📜

নমো তস্স ভগৰতো অরহতো সম্মাসম্বুদ্ধস্স

অভিধম্মপিটকে

পঞ্চপকরণ-অনুটীকা

ধাতুকথাপকরণ-অনুটীকা

গন্থারম্ভৰণ্ণনা

ধাতুকথাপকরণদেসনায ¶ ¶ দেসদেসকপরিসাপদেসা ৰুত্তপ্পকারা এৰাতি কালাপদেসং দস্সেন্তো ‘‘ধাতুকথাপকরণং দেসেন্তো’’তিআদিমাহ. ‘‘তস্সেৰ অনন্তরং অদেসযী’’তি হি ইমিনা ৰিভঙ্গানন্তরং ধাতুকথা দেসিতাতি তস্সা দেসনাকালো অপদিট্ঠো হোতি. যে পন ‘‘ৰিভঙ্গানন্তরং ¶ কথাৰত্থুপকরণং দেসিত’’ন্তি ৰদন্তি, তেসং ৰাদং পটিক্খিপন্তো ‘‘ৰিভঙ্গানন্তরং…পে… দস্সেতু’’ন্তি আহ.

‘‘কামা তে পঠমা সেনা’’তিআদিৰচনতো (সু. নি. ৪৩৮; মহানি. ২৮; চূল়নি. নন্দমাণৰপুচ্ছানিদ্দেস ৪৭) কিলেসৰিদ্ধংসনম্পি দেৰপুত্তমারস্স বলৰিধমনন্তি সক্কা ৰত্তুং, ‘‘অপ্পৰত্তিকরণৰসেন কিলেসাভিসঙ্খারমারান’’ন্তি পন ৰুচ্চমানত্তা খন্তিবলসদ্ধাবলাদিআনুভাৰেন উস্সাহপরিসাবলভঞ্জনমেৰ দেৰপুত্তমারস্স বলৰিদ্ধংসনং দট্ঠব্বং. ৰিসযাতিক্কমনং কামধাতুসমতিক্কমো. সমুদযপ্পহানপরিঞ্ঞাৰসেনাতি পহানাভিসমযপরিঞ্ঞাভিসমযানং ৰসেন. ননু চেতং পঞ্চন্নং মারানং ভঞ্জনং সাৰকেসুপি লব্ভতেৰাতি চোদনং মনসি কত্ৰা আহ ‘‘পরূপনিস্সযরহিত’’ন্তিআদি. ৰীরস্স ভাৰো ৰীরিযন্তি কত্ৰা ৰুত্তং ‘‘মহাৰীরিযোতি মহাৰীরো’’তি. মহাৰীরিযতা চ পরিপুণ্ণৰীরিযপারমিতায চতুরঙ্গসমন্নাগতৰীরিযাধিট্ঠানেন ¶ অনঞ্ঞসাধারণচতুব্বিধসম্মপ্পধানসম্পত্তিযা চ ৰেদিতব্বা. ততো এৰ হিস্স ৰীরিযাহানিসিদ্ধিপীতি.

খন্ধাদিকে ধম্মে অধিট্ঠায নিস্সায ৰিসযং কত্ৰা অভিধম্মকথা পৰত্তাতি আহ ‘‘অভিধম্মকথাধিট্ঠানট্ঠেন ৰা’’তি. তেসং কথনতোতি তেসং খন্ধাদীনং কথাভাৰতো. এতেন অত্থৰিসেসসন্নিস্সযো ব্যঞ্জনসমুদাযো পকরণন্তি ৰুত্তং হোতি. অথ ৰা ধাতুযো কথীযন্তি এত্থ, এতেন ৰাতি ধাতুকথা, তথাপৰত্তো ব্যঞ্জনত্থসমুদাযো. যদি এৰং সত্তন্নম্পি পকরণানং ধাতুকথাভাৰো আপজ্জতীতি চোদনং সন্ধাযাহ ‘‘যদিপী’’তিআদি. তত্থ সাতিসযন্তি সৰিসেসং ৰিচিত্তাতিরেকৰসেন অনৰসেসতো চ দেসনায পৰত্তত্তা. তথা হি ৰুত্তং ‘‘সব্বাপি ধম্মসঙ্গণী ধাতুকথায মাতিকা’’তি (ধাতু. ৫). তেনেৰাহ ‘‘একদেসকথনমেৰ হি অঞ্ঞত্থ কত’’ন্তি.

ইদানি সাসনে যেসু ধাতু-সদ্দো নিরুল়্হো, তেসং ৰসেন অঞ্ঞেহিপি অসাধারণং ইমস্স পকরণস্স ধাতুকথাভাৰং দস্সেন্তো ‘‘খন্ধাযতনধাতূহি ৰা’’তিআদিমাহ. তত্থ তত্থাতি খন্ধাযতনধাতূসু. মহন্তো পভেদানুগতো ৰিসযো এতাসন্তি মহাৰিসযা, ধাতুযো, ন খন্ধাযতনানি অপ্পতরপদত্তা. যেন ৰা সভাৰেন ধম্মা সঙ্গহাসঙ্গহসম্পযোগৰিপ্পযোগেহি উদ্দেসনিদ্দেসে লভন্তি, সো সভাৰো ধাতু. সা ধাতু ইধ সাতিসযং দেসিতাতি সৰিসেসং ধাতুযা কথনতো ইদং পকরণং ‘‘ধাতুকথা’’তি ৰুত্তং. সভাৰত্থো হি অযং ধাতু-সদ্দো ‘‘ধাতুসো, ভিক্খৰে ¶ , সত্তা সংসন্দন্তী’’তিআদীসু (সং. নি. ২.৯৮) ৰিয. ধাতুভেদন্তি ধাতুৰিভাগং. পকরণন্তি ৰচনসেসো. কুতো পকরণ-সদ্দো লব্ভতীতি আহ ‘‘সত্তন্নং পকরণানং কমেন ৰণ্ণনায পৰত্তত্তা’’তি. তেন যোজনং কত্ৰাতি তেন পকরণ-সদ্দেন ‘‘ধাতুকথাৰ পকরণং ধাতুকথাপকরণ’’ন্তি যোজনং কত্ৰা. তং দীপনন্তি তং ধাতুকথাপকরণস্স অত্থদীপনং, অত্থদীপনাকারেন পৰত্তং ৰণ্ণনং. ‘‘অত্থং দীপযিস্সামী’’তি ৰত্ৰা ‘‘তং সুণাথা’’তি ৰদন্তো সোতদ্ৰারানুসারেন তত্থ উপধারণে নিযোজেতীতি আহ ‘‘তংদীপনৰচনসৰনেন উপধারেথাতি অত্থো’’তি.

গন্থারম্ভৰণ্ণনা নিট্ঠিতা.

১. মাতিকাৰণ্ণনা

১. নযমাতিকাৰণ্ণনা

১. চুদ্দসৰিধেনাতি ¶ ¶ চুদ্দসপ্পকারেন, চুদ্দসহি পদেহীতি অত্থো. তত্থ ‘‘সঙ্গহো অসঙ্গহো’’তি ইদমেকং পদং, তথা ‘‘সম্পযোগো ৰিপ্পযোগো’’তি. ‘‘সঙ্গহিতেন সম্পযুত্তং ৰিপ্পযুত্ত’’ন্তিআদীনি পন তীণি তীণি পদানি একেকং পদং. ইতরেসু পদৰিভাগো সুৰিঞ্ঞেয্যোৰ. এতেহীতি সঙ্গহাদিপ্পকারেহি. নযনং পাপনং, তং পন পৰত্তনং ঞাপনঞ্চ হোতীতি ‘‘পৰত্তীযতি ঞাযন্তী’’তি চ দ্ৰিধাপি অত্থো ৰুত্তো. নযা এৰ উদ্দিসিযমানা মাতিকা. অত্থদ্ৰযেপি পৰত্তনঞাণকিরিযানং করণভাৰেন সঙ্গহাদিপ্পকারা নযাতি ৰুত্তা. তেনাহ অট্ঠকথাযং ‘‘ইমিনা সঙ্গহাদিকেন নযেনা’’তি (ধাতু. অট্ঠ. ১). পদানন্তি অত্থদীপকানং ৰচনানং. পজ্জতি এতেন অত্থোতি হি পদং. পদানন্তি চ সংসামিসম্বন্ধে সামিৰচনং, পকরণস্সাতি পন অৰযৰাৰযৰীসম্বন্ধে.

২. অব্ভন্তরমাতিকাৰণ্ণনা

২. তদত্থানীতি পটিচ্চসমুপ্পাদত্থানি. পটিচ্চ সমুপ্পজ্জতি সঙ্খারাদিকং এতস্মাতি হি পটিচ্চসমুপ্পাদো, পচ্চেকং অৰিজ্জাদিকো পচ্চযধম্মো. তথা হি ৰুত্তং সঙ্খারপিটকে ‘‘দ্ৰাদস পচ্চযা, দ্ৰাদস পটিচ্চসমুপ্পাদা’’তি. তেসন্তি খন্ধাদীনং. তথাদস্সিতানন্তি গণনুদ্দেসৰিভাগমত্তেন দস্সিতানং. কস্মা পনেত্থ পটিচ্চসমুপ্পাদো দ্ৰাদসভাৰেনেৰ গহিতো, ননু তত্থ ভৰো কম্মভৰাদিভেদেন, সোকাদযো চ সরূপতোযেৰ ইধ পাল়িযং গহিতাতি চোদনং সন্ধাযাহ ‘‘তত্থা’’তিআদি. তত্থ তত্থাতি তস্মিং ‘‘পঞ্চৰীসাধিকেন পদসতেনা’’তি এৰং ৰুত্তে অট্ঠকথাৰচনে. কম্মভৰস্স ভাৰনভাৰেন, উপপত্তিভৰস্স ভৰনভাৰেন. পদত্থতো পন কম্মভৰো ¶ ভৰতি এতস্মাতি ভৰো, ইতরো ভৰতি, ভৰনং ৰাতি. তন্নিদানদুক্খভাৰেনাতি জরামরণনিদানদুক্খভাৰেন.

‘‘সব্বাপি ধম্মসঙ্গণী ধাতুকথায মাতিকা’’তি ইদম্পি ধাতুকথায মাতিকাকিত্তনমেৰাতি ‘‘সব্বাপি…পে… মাতিকাতি অযং ধাতুকথামাতিকাতো বহিদ্ধা ৰুত্তা’’তি ৰচনং অসম্ভাৰেন্তো ‘‘অথ ৰা’’তিআদিমাহ ¶ . পকরণন্তরগতা ৰুত্তা ধাতুকথায মাতিকাভাৰেনাতি অত্থো. কামঞ্চেত্থ মাতিকাভাৰেন ৰুত্তা, পকরণন্তরগতত্তা পন অঞ্ঞতো গহেতব্বরূপা ইতো বহিভূতা নাম হোন্তি, সরূপতো গহিতাৰ পঞ্চক্খন্ধাতিআদিকা অব্ভন্তরা. তেনাহ ‘‘সরূপতো দস্সেত্ৰা ঠপিতত্তা’’তি. মাতিকায অসঙ্গহিতত্তাতি মাতিকায সরূপেন অসঙ্গহিতত্তা, ন অঞ্ঞথা. ন হি মাতিকায অসঙ্গহিতো কোচি পদত্থো অত্থি. ৰিকিণ্ণভাৰেনাতি খন্ধৰিভঙ্গাদীসু ৰিসুং ৰিসুং কিণ্ণভাৰেন ৰিসটভাৰেন.

৩. নযমুখমাতিকাৰণ্ণনা

৩. নযানং সঙ্গহাদিপ্পকারৰিসেসানং পৰত্তি দেসনা, তস্সা ৰিনিগ্গমট্ঠানতায দ্ৰারং. যথাৰুত্তধম্মা যথারহং খন্ধাযতনধাতুযো অরূপিনো চ খন্ধাতি তেসং উদ্দেসো নযমুখমাতিকা. তেনাহ ‘‘নযান’’ন্তিআদি. ৰিযুজ্জনসীলা, ৰিযোগো ৰা এতেসং অত্থীতি ৰিযোগিনো, তথা সহযোগিনো, সঙ্গহাসঙ্গহধম্মা চ ৰিযোগীসহযোগীধম্মা চ সঙ্গহা…পে… ধম্মা, সঙ্গণ্হনাসঙ্গণ্হনৰসেন ৰিযুজ্জনসংযুজ্জনৰসেন চ পৰত্তনকসভাৰাতি অত্থো. চুদ্দসপীতিআদিনা তমেৰত্থং পাকটতরং করোতি. যেহীতি যেহি খন্ধাদীহি অরূপক্খন্ধেহি চ. তে চত্তারোতি তে সঙ্গহাদযো চত্তারো. সচ্চাদীহিপীতি সচ্চইন্দ্রিযপটিচ্চসমুপ্পাদাদীহিপি সহ. যথাসম্ভৰন্তি সম্ভৰানুরূপং, যং যং পদং সঙ্গহিতো অসঙ্গহিতোতি চ ৰত্তুং যুত্তং, তং তন্তি অত্থো.

সো পনাতি সঙ্গহাসঙ্গহো. সঙ্গাহকভূতেহীতি সঙ্গহণকিরিযায কত্তুভূতেহি. তেহীতি সচ্চাদীহি. ন সঙ্গহভূতেহীতি সঙ্গহণকিরিযায করণভূতেহি সচ্চাদীহি সঙ্গহাসঙ্গহো ন ৰুত্তো. তত্থাপি হি খন্ধাযতনধাতুযো এৰ করণভূতাতি দস্সেতি. খন্ধাদীহেৰ সঙ্গহেহীতি খন্ধাদীহিযেৰ সঙ্গণ্হনকিরিযায করণভূতেহি, ‘‘খন্ধসঙ্গহেন সঙ্গহিতা, আযতনসঙ্গহেন অসঙ্গহিতা ¶ , ধাতুসঙ্গহেন অসঙ্গহিতা, তে ধম্মা চতূহি খন্ধেহি, দ্ৰীহাযতনেহি, অট্ঠহি ধাতূহি অসঙ্গহিতা’’তি সঙ্গহাসঙ্গহো নিযমেত্ৰা ৰুত্তো. তস্মাতি যস্মা সচ্চাদীনি সঙ্গাহকভাৰেন ৰুত্তানি, ন সঙ্গহভাৰেন, খন্ধাদীনিযেৰ চ সঙ্গহভাৰেন ৰুত্তানি, তস্মা.

কস্মা ¶ পনেত্থ সচ্চাদযো সঙ্গহৰসেন ন ৰুত্তাতি? তথাদেসনায অসম্ভৰতো. ন হি সক্কা রূপক্খন্ধাদীনং সমুদযসচ্চাদীহি, সঞ্ঞাদীনং ৰা ইন্দ্রিযাদীহি সঙ্গহনযেন পুচ্ছিতুং ৰিস্সজ্জিতুং ৰাতি. তথা অরিযফলাদীসু উপ্পন্নৰেদনাদীনং সচ্চৰিনিমুত্ততায ‘‘ৰেদনাক্খন্ধো কতিহি সচ্চেহি সঙ্গহিতো’’তি পুচ্ছিত্ৰাপি ‘‘একেন সচ্চেন সঙ্গহিতো’’তিআদিনা নিযমেত্ৰা সঙ্গহং দস্সেতুং ন সক্কাতি. যথাসম্ভৰন্তি যেহি সম্পযোগো, যেহি চ ৰিপ্পযোগো, তদনুরূপং.

রূপং রূপেন নিব্বানেন ৰা ৰিপ্পযুত্তং ন হোতি, নিব্বানং ৰা রূপেন. কস্মা? সম্পযুত্তন্তি অনাসঙ্কনীযসভাৰত্তা. চতুন্নঞ্হি খন্ধানং অঞ্ঞমঞ্ঞং সম্পযোগীভাৰতো ‘‘রূপনিব্বানেহিপি সো অত্থি নত্থী’’তি সিযা আসঙ্কা, তস্মা তেসং ইতরেহি, ইতরেসঞ্চ তেহি ৰিপ্পযোগো ৰুচ্চতি, ন পন রূপস্স রূপেন, নিব্বানেন ৰা, নিব্বানস্স ৰা রূপেন কত্থচি সম্পযোগো অত্থীতি তদাসঙ্কাভাৰতো ৰিপ্পযোগোপি রূপস্স রূপনিব্বানেহি, নিব্বানস্স ৰা তেন ন ৰুচ্চতি, অরূপক্খন্ধেহিযেৰ পন ৰুচ্চতীতি আহ ‘‘চতূহেৰা’’তিআদি. অনারম্মণস্স চক্খাযতনাদিকস্স. অনারম্মণঅনারম্মণমিস্সকেহীতি অনারম্মণেন সোতাযতনাদিনা অনারম্মণমিস্সকেন চ ধম্মাযতনাদিনা. মিস্সকস্স ধম্মাযতনাদিকস্স. অনারম্মণঅনারম্মণমিস্সকেহি ন হোতীতি যোজেতব্বং. যেসং পন যেহি হোতি, তং দস্সেতুং ‘‘অনারম্মণস্স পনা’’তিআদি ৰুত্তং. যথা হি সারম্মণস্স অনারম্মণেন অনারম্মণমিস্সকেন চ ৰিপ্পযোগো হোতি, এৰং সারম্মণেনপি সো হোতিযেৰ. তেন ৰিয অনারম্মণস্স অনারম্মণমিস্সকস্স চাতি দট্ঠব্বং.

৪. লক্খণমাতিকাৰণ্ণনা

৪. ৰিসুং যোজনা কাতব্বাতি যো তীহি সঙ্গহো চতূহি চ সম্পযোগো ৰুত্তো, তং সভাগো ভাৰো পযোজেতি, যো চ তীহি অসঙ্গহো চতূহি চ ৰিপ্পযোগো ৰুত্তো, তং ৰিসভাগো ভাৰোতি ইমমত্থং দস্সেন্তো ‘‘সঙ্গহো…পে… ৰিঞ্ঞাযতী’’তি আহ. যস্স সঙ্গহো, সো ধম্মো খন্ধাদিকো ¶ সভাগো. যস্স অসঙ্গহো, সো ৰিসভাগো. তথা সম্পযোগেসুপি ৰেদিতব্বং. ইদানি যথাৰুত্তং সভাগতং সরূপতো নিদ্ধারেত্ৰা দস্সেতুং ‘‘তত্থা’’তিআদি ৰুত্তং. তত্থ ¶ সমানভাৰো সঙ্গহে সভাগতা, একুপ্পাদাদিকো সম্পযোগেতি ইমিনা রুপ্পনাদিৰিধুরো অসমানসভাৰো অসঙ্গহে ৰিসভাগতা, নানুপ্পাদাদিকো ৰিপ্পযোগেতি অযমত্থো অত্থসিদ্ধোতি ন ৰুত্তোতি.

৫. বাহিরমাতিকাৰণ্ণনা

৫. এতেন ঠপনাকারেনাতি সরূপেন অগ্গহেত্ৰা যথাৰুত্তেন পকরণন্তরমাতিকায ইধ মাতিকাভাৰকিত্তনসঙ্খাতেন ঠপনাকারেন. পকরণন্তরঠপিতায মাতিকায অৰিভাগেন পচ্ছতো গহণং বহি ঠপনন্তি আহ ‘‘বহি পিট্ঠিতো ঠপিতত্তা’’তি. ইধ অট্ঠপেত্ৰাতি ইমিস্সা ধাতুকথায সরূপেন অৰত্ৰা. তথা পকাসিতত্তাতি মাতিকাভাৰেন জোতিতত্তা. ধম্মসঙ্গণীসীসেন হি ধম্মসঙ্গণিযং আগতমাতিকাৰ গহিতাতি. যেহি নযেহি ধাতুকথায নিদ্দেসো, তেসু নযেসু, তেহি ৰিভজিতব্বেসু খন্ধাদীসু, তেসং নযানং পৰত্তিদ্ৰারলক্খণেসু চ উদ্দিট্ঠেসু ধাতুকথায উদ্দেসৰসেন ৰত্তব্বং ৰুত্তমেৰ হোতীতি যং উদ্দেসৰসেন ৰত্তব্বং, তং ৰত্ৰা পুন যথাৰুত্তানং খন্ধাদীনং কুসলাদিৰিভাগদস্সনত্থং ‘‘সব্বাপি ধম্মসঙ্গণী ধাতুকথায মাতিকা’’তি ৰুত্তন্তি এৰমেত্থ মাতিকায নিক্খেপৰিধি ৰেদিতব্বো.

‘‘গাৰীতি অযমাহা’’তি এত্থ গাৰী-সদ্দো ৰিয ‘‘সঙ্গহো অসঙ্গহো’’তি এত্থ পদত্থৰিপল্লাসকারিনা ইতি-সদ্দেন অত্থপদত্থকো সঙ্গহাসঙ্গহ-সদ্দো সদ্দপদত্থকো জাযতীতি অধিপ্পাযেনাহ ‘‘অনিদ্ধারিতত্থস্স সদ্দস্সেৰ ৰুত্তত্তা’’তি. তেন অত্থুদ্ধারতো সঙ্গহসদ্দং সংৰণ্ণেতীতি দস্সেতি. অনিদ্ধারিতৰিসেসোতি অসঙ্গহিতজাতিসঞ্জাতিআদিৰিসেসো. সামঞ্ঞেন গহেতব্বতন্তি সঙ্গহসদ্দাভিধেয্যতাসামঞ্ঞেন ৰিঞ্ঞাযমানো ৰুচ্চমানো ৰা. ন চেত্থ সামঞ্ঞঞ্চ একরূপমেৰাতি চোদনা কাতব্বা ভেদাপেক্খত্তা তস্স. যত্তকা হি তস্স ৰিসেসা, তদপেক্খমেৰ তন্তি. ‘‘অত্তনো জাতিযা’’তি ৰিঞ্ঞাযতি যথা ‘‘মত্তেয্যা’’তি ৰুত্তে অত্তনো মাতু হিতাতি.

ধম্মৰিসেসং অনিদ্ধারেত্ৰাতি সঙ্গহিততাদিনা পুচ্ছিতব্বৰিস্সজ্জেতব্বধম্মানং ৰিসেসনং অকত্ৰা. সামঞ্ঞেনাতি অৰিসেসেন. ধম্মানন্তি খন্ধাদিধম্মানং. অৰসেসা নিদ্ধারেত্ৰাতি ‘‘সঙ্গহিতেন ¶ অসঙ্গহিত’’ন্তিআদিকা অৰসেসা ¶ দ্ৰাদসপি পুচ্ছিতব্বৰিস্সজ্জেতব্বধম্মৰিসেসং নিদ্ধারেত্ৰা ধম্মানং পুচ্ছনৰিস্সজ্জননযউদ্দেসাতি যোজনা. ননু চ ‘‘সঙ্গহিতেন অসঙ্গহিত’’ন্তিআদযোপি যথাৰুত্তৰিসেসং অনিদ্ধারেত্ৰা সামঞ্ঞেন ধম্মানং পুচ্ছনৰিস্সজ্জননযুদ্দেসাতি চোদনং সন্ধাযাহ ‘‘সঙ্গহিতেন অসঙ্গহিত’’ন্তিআদি. যস্স অত্থো ঞাযতি, সদ্দো চ ন পযুজ্জতি, সো লোপোতি ৰেদিতব্বো, আৰুত্তিআদিৰসেন ৰা অযমত্থো দীপেতব্বো. তেনাতি লুত্তনিদ্দিট্ঠেন অসঙ্গহিত-সদ্দেন. সঙ্গহিতৰিসেসৰিসিট্ঠোতি চক্খাযতনেন খন্ধসঙ্গহেন সঙ্গহিততাৰিসেসৰিসিট্ঠো, তেন সোতাযতনাদিভাৰেন অসঙ্গহিতো সোতপসাদাদিকো যো রুপ্পনসভাৰো ধম্মৰিসেসো. তন্নিস্সিতো তং ধম্মৰিসেসং নিস্সায লব্ভমানো. ‘‘তে ধম্মা কতিহি খন্ধেহি…পে… চতূহি খন্ধেহি অসঙ্গহিতা’’তিআদিনা অসঙ্গহিততাসঙ্খাতো পুচ্ছাৰিস্সজ্জননযো পরতো পুচ্ছিত্ৰা ৰিস্সজ্জিযমানো ইধ উদ্দিট্ঠো হোতি. ৰিসেসনে করণৰচনন্তি ইমিনা তস্স ধম্মস্স যথাৰুত্তসঙ্গহিততাৰিসেসৰিসিট্ঠতংযেৰ ৰিভাৰেতি. এৰমেতে পুচ্ছিতব্বৰিস্সজ্জেতব্বধম্মৰিসেসং নিদ্ধারেত্ৰা পুচ্ছনৰিস্সজ্জননযুদ্দেসা পৰত্তাতি ৰেদিতব্বা.

ননু চ ‘‘সঙ্গহিতেন অসঙ্গহিত’’ন্তি এত্তাৰতাপি অযমত্থো লব্ভতীতি? ন লব্ভতি তস্স ধম্মমত্তদীপনতো. নযুদ্দেসো হেসো, ন ধম্মুদ্দেসো. তথা হি পাল়িযং সঙ্গহিতেনঅসঙ্গহিতপদনিদ্দেসে ‘‘চক্খাযতনেন যে ধম্মা খন্ধসঙ্গহেন সঙ্গহিতা, আযতন…পে… ধাতুসঙ্গহেন অসঙ্গহিতা’’তি ৰত্ৰা ‘‘তে ধম্মা কতিহি খন্ধেহি…পে… অসঙ্গহিতা’’তি (ধাতু. ১৭১) পুচ্ছিত্ৰা ‘‘তে ধম্মা চতূহি খন্ধেহি দ্ৰীহাযতনেহি অট্ঠহি ধাতূহি অসঙ্গহিতা’’তি দুতিযং অসঙ্গহিতপদং গহিতং. অঞ্ঞথা ‘‘চক্খাযতনেন যে ধম্মা খন্ধসঙ্গহেন সঙ্গহিতা, তে ধম্মা আযতনসঙ্গহেন অসঙ্গহিতা, ধাতুসঙ্গহেন অসঙ্গহিতা. তে কতমে’’ইচ্চেৰ নিদ্দিসিতব্বং সিযা.

এস নযোতি অতিদেসেন দস্সিতমত্থং পাকটতরং কাতুং ‘‘তেসুপী’’তিআদি ৰুত্তং. ততিযপদেনাতি লুত্তনিদ্দেসেন গহেতব্বন্তি ৰুত্তপদং সন্ধাযাহ. কত্তুঅত্থে করণনিদ্দেসো সঙ্গহিতাসঙ্গহিতেহি তেহি ধম্মেহি ধম্মানং সঙ্গহিততাসঙ্গহিততায ৰুত্তত্তা. তথা ¶ হি তত্থ পাল়িযং ‘‘তেহি ধম্মেহি যে ধম্মা’’তি ধম্মমুখেনেৰ সঙ্গহিততাসঙ্গহিততা ৰুত্তা. দুতিযততিযেসু পন সঙ্গহিততাসঙ্গহিততাসঙ্খাতৰিসেসনদ্ৰারেন ধম্মানং অসঙ্গহিততাসঙ্গহিততা ৰুত্তাতি তত্থ ‘‘ৰিসেসনে করণৰচন’’ন্তি ৰুত্তং. তেনাহ ‘‘তত্থ হি…পে… ধম্মন্তরস্সা’’তি. তত্থ সভাৰন্তরেনাতি সঙ্গহিততাসঙ্গহিততাসঙ্খাতেন ¶ সভাৰন্তরেন পকারন্তরেন. সভাৰন্তরস্সাতি অসঙ্গহিততাসঙ্গহিততাসঙ্খাতস্স সভাৰন্তরস্স. এতেসূতি চতুত্থপঞ্চমেসু. ধম্মন্তরেনাতি অঞ্ঞধম্মেন. ধম্মন্তরস্সাতি ততো অঞ্ঞস্স ধম্মস্স ৰিসেসনং কতং. তত্থ হি অন্তরেন পকারৰিসেসামসনং ধম্মেনেৰ ধম্মো ৰিসেসিতোতি. আদিপদেনেৰাতি ‘‘সঙ্গহিতেনা’’তিআদিনা ৰুত্তেন পঠমপদেনেৰ. ইতরেহীতি ‘‘সম্পযুত্তং ৰিপ্পযুত্ত’’ন্তিআদিনা ৰুত্তেহি দুতিযততিযপদেহি. এত্থাতি একাদসমাদীসু চতূসু. দুতিযততিযেসু ৰিয ৰিসেসনে এৰ করণৰচনং দট্ঠব্বং, ন চতুত্থপঞ্চমেসু ৰিয কত্তুঅত্থেতি অধিপ্পাযো. পুচ্ছাৰিস্সজ্জনানন্তিআদিনা তমেৰত্থং ৰিভাৰেতি.

ৰিৰিধকপ্পনতোতি ৰিৰিধং বহুধা কপ্পনতো, সঙ্গহাসঙ্গহানং ৰিসুং সহ চ ৰিসেসনৰিসেসিতব্বভাৰকপ্পনতোতি অত্থো. তং পন ৰিকপ্পনং ৰুত্তাকারেন ৰিভজনং হোতীতি আহ ‘‘ৰিভাগতোতি অত্থো’’তি. সন্নিট্ঠানলক্খণেন অধিমোক্খেন সম্পযুত্তধম্মা আরম্মণে নিচ্ছযনাকারেন পৰত্তিযা সন্নিট্ঠানৰসেন ৰুত্তধম্মা. তে চ তেহি সদ্ধিং তদৰসিট্ঠে দ্ৰিপঞ্চৰিঞ্ঞাণৰিচিকিচ্ছাসহগতধম্মে চ সঙ্গহেত্ৰা আহ ‘‘সন্নিট্ঠানৰসেন ৰুত্তা চ সব্বে চ চিত্তুপ্পাদা সন্নিট্ঠানৰসেন ৰুত্তসব্বচিত্তুপ্পাদা’’তি. ইতরেতি ফস্সাদযো. সব্বেসন্তি একূননৰুতিযা চিত্তুপ্পাদানং. পরিগ্গহেতব্বাতি সঙ্গহাদিৰসেন পরিগ্গণ্হিতব্বা. মহাৰিসযেন অধিমোক্খেন. অঞ্ঞেসন্তি ৰিতক্কাদীনং. ৰচনং সন্ধাযাতি ‘‘অধিমুচ্চনং অধিমোক্খো, সো সন্নিট্ঠানলক্খণো’’তি ধম্মসঙ্গহৰণ্ণনাযং (ধ. স. অট্ঠ. যেৰাপনকৰণ্ণনা) ‘‘তণ্হাপচ্চযা অধিমোক্খো, অধিমোক্খপচ্চযা ভৰো’’তি পটিচ্চসমুপ্পাদৰিভঙ্গে চ আগতং ৰচনং সন্ধায. অত্থে সতীতি ‘‘সন্নিট্ঠান…পে… সাধারণতো’’তি এৰমত্থে ৰুচ্চমানে. ৰত্তব্বেসূতি সঙ্গহাদিপরিগ্গহত্থং ৰত্তব্বেসু. ৰুত্তা ফস্সাদযো মনসিকারপরিযোসানা. তাদিসস্সাতি ¶ ফস্সাদিসদিসস্স সাধারণস্স অধিমোক্খসদিসস্স অসাধারণস্স অঞ্ঞস্স ধম্মস্স অভাৰা.

ননু জীৰিতিন্দ্রিযচিত্তট্ঠিতিযোপি সাধারণাতি? সচ্চং সাধারণা, অত্থি পন ৰিসেসোতি দস্সেন্তো আহ ‘‘জীৰিতিন্দ্রিযং পনা’’তিআদি. অসমাধিসভাৰা বলভাৰং অপ্পত্তা সামঞ্ঞসদ্দেনেৰ ৰত্তব্বাতি যোজনা. সামঞ্ঞৰিসেসসদ্দেহি চাতি সামঞ্ঞৰিসেসসদ্দেহি ৰত্তব্বা চ সমাধিসভাৰা চিত্তেকগ্গতা. ৰিসেসসদ্দৰচনীযং অঞ্ঞন্তি বলপ্পত্তসমাধিতো অঞ্ঞং সামঞ্ঞসদ্দেন ব্যাপেতব্বং, ৰিসেসসদ্দেন চ নিৰত্তেতব্বং নত্থি সমাধিসভাৰায এৰ চিত্তেকগ্গতায গহিতত্তা. ন অঞ্ঞব্যাপকনিৰত্তকো সামঞ্ঞৰিসেসো অনঞ্ঞ…পে… ৰিসেসো ¶ , তস্স দীপনতো. তস্সেৰ ধম্মস্সাতি তস্সেৰ বলপ্পত্তসমাধিধম্মস্স. ভেদদীপকেহীতি ৰিসেসদীপকেহি সমাধিবলাদিৰচনেহি ৰত্তব্বা. ৰুত্তলক্খণা অনঞ্ঞব্যাপকনিৰত্তকসামঞ্ঞৰিসেসদীপনা সদ্দা. ততো ৰিপরীতেহি অঞ্ঞং ব্যাপেতব্বং নিৰত্তেতব্বঞ্চ গহেত্ৰা পৰত্তেহি সামঞ্ঞৰিসেসসদ্দেহেৰ ন সুখাদিসভাৰা ৰেদনা ৰিয ৰত্তব্বা. তস্মাতি যস্মা অসমাধিসভাৰা সমাধিসভাৰাতি দ্ৰেধা ভিন্দিত্ৰা গহিতা চিত্তেকগ্গতা, তস্মা. অসমাধিসভাৰমেৰ পকাসেয্য ৰিসেসসদ্দনিরপেক্খং পৰত্তমানত্তা. ইতরোতি সমাধিবলাদিকো ৰিসেসসদ্দো. ইধাতি ইমস্মিং অব্ভন্তরমাতিকুদ্দেসে, সাধারণে ফস্সাদিকে, মহাৰিসযে ৰা অধিমোক্খে উদ্দিসিযমানে. ননু চ অভিন্দিত্ৰা গয্হমানা চিত্তেকগ্গতা ৰেদনা ৰিয সাধারণা হোতীতি চোদনং সন্ধাযাহ ‘‘অভিন্নাপি ৰা’’তিআদি. ‘‘চিত্তস্স ঠিতি চিত্তেকগ্গতা অৰিসাহটমানসতা (ধ. স. ১১, ১৫). অরূপীনং ধম্মানং আযু ঠিতী’’তি (ধ. স. ১৯) ৰচনতো সমাধিজীৰিতিন্দ্রিযানং অঞ্ঞধম্মনিস্সযেন ৰত্তব্বতা ৰেদিতব্বা. ন অরহতীতি ইধ উদ্দেসং ন অরহতি সমুখেনেৰ ৰত্তব্বেসু ফস্সাদীসু উদ্দিসিযমানেসূতি অত্থো.

মাতিকাৰণ্ণনা নিট্ঠিতা.

২. নিদ্দেসৰণ্ণনা

১. পঠমনযো সঙ্গহাসঙ্গহপদৰণ্ণনা

১. খন্ধপদৰণ্ণনা

৬. ‘‘অভিঞ্ঞেয্যধম্মভাৰেন ¶ ¶ ৰুত্তা চত্তারো খন্ধা হোন্তী’’তিআদিনা, ‘‘রূপক্খন্ধো অভিঞ্ঞেয্যো’’তিআদিনা চ অভিঞ্ঞাতলক্খণৰিসযাতি আহ ‘‘সভাৰতো অভিঞ্ঞাতান’’ন্তি. পরিঞ্ঞেয্যতাদীতি আদি-সদ্দেন পহাতব্বসচ্ছিকাতব্বভাৰেতব্বতা সঙ্গয্হতি. অধিপতিযাদীতি অধিপতিপচ্চযভাৰউপট্ঠানপদহনাদীনি. সচ্চাদিৰিসেসো ৰিযাতি দুক্খসচ্চাদিপরিযাযো অভিঞ্ঞেয্যপীল়নট্ঠাদিৰিসেসো ৰিয. এৰঞ্চ কত্ৰাতি নযমুখমাতিকায অভিঞ্ঞেয্যনিস্সযেন ৰুচ্চমানত্তা এৰ. তেসং রূপধম্মানং পঞ্চন্নং খন্ধানং খন্ধভাৰেন ৰিয রূপক্খন্ধভাৰেন সভাগতা হোতি, ন ৰেদনাক্খন্ধাদিভাৰেনাতি সঙ্গহলক্খণমাহ. ইতীতি তস্মা, যস্মা রূপধম্মা অঞ্ঞমঞ্ঞং রূপক্খন্ধভাৰেন সভাগা, তস্মাতি অত্থো. রূপক্খন্ধভাৰসঙ্খাতেন রূপক্খন্ধভাৰেন অত্থমুখেনেৰ গহণে. সদ্দদ্ৰারেন পন গহণে রূপক্খন্ধৰচনসঙ্খাতেন ৰা রূপক্খন্ধৰচনৰচনীযতাসঙ্খাতেন. ইদানি তমেৰত্থং পাকটতরং কাতুং ‘‘রূপক্খন্ধোতি হী’’তিআদি ৰুত্তং.

পুরিমেনাতি রূপক্খন্ধেন. সঞ্ঞাক্খন্ধমূলকাতিআদীসু ‘‘পুরিমেন যোজিযমানে’’তিআদিং আনেত্ৰা যথারহং যোজেতব্বং. অভেদতো পঞ্চকপুচ্ছাৰিস্সজ্জনং খন্ধপদনিদ্দেসে সব্বপচ্ছিমমেৰাতি আহ ‘‘ভেদতো পঞ্চকপুচ্ছাৰিস্সজ্জনানন্তর’’ন্তি.

আযতনপদাদিৰণ্ণনা

৪০. যদিপি ¶ এককেপি সদিসং ৰিস্সজ্জনং ৰিস্সজ্জনং সমুদযমগ্গসচ্চানং ‘‘সমুদযসচ্চং একেন খন্ধেন…পে… মগ্গসচ্চং একেন খন্ধেন একেনাযতনেন একায ধাতুযা সঙ্গহিতং, চতূহি খন্ধেহি একাদসহি আযতনেহি সত্তরসহি ধাতূহি অসঙ্গহিত’’ন্তি (ধাতু. ৪১) নিদ্দিট্ঠত্তা. এত্থাতি এতস্মিং ইন্দ্রিযপদনিদ্দেসে ¶ . চক্খুসোতচক্খুসুখিন্দ্রিযদুকানন্তি চক্খুসোতদুকং চক্খুসুখিন্দ্রিযদুকন্তি এতেসং দুকানং. চক্খুসোতসুখিন্দ্রিযানঞ্হি ‘‘একেন খন্ধেন একেনাযতনেন একায ধাতুযা সঙ্গহিতং, চতূহি খন্ধেহি একাদসহি আযতনেহি সত্তরসহি ধাতূহি অসঙ্গহিত’’ন্তি এককে সদিসং ৰিস্সজ্জনং. চক্খুসোতিন্দ্রিযদুকস্স পন ‘‘চক্খুন্দ্রিযঞ্চ সোতিন্দ্রিযঞ্চ একেন খন্ধেন দ্ৰীহাযতনেহি দ্ৰীহি ধাতূহি সঙ্গহিতা, চতূহি খন্ধেহি দসহাযতনেহি সোল়সহি ধাতূহি অসঙ্গহিতা’’তি, ‘‘চক্খুন্দ্রিযঞ্চ সুখিন্দ্রিযঞ্চ দ্ৰীহি খন্ধেহি দ্ৰীহাযতনেহি দ্ৰীহি ধাতূহি সঙ্গহিতা, তীহি খন্ধেহি দসহাযতনেহি সোল়সহি ধাতূহি অসঙ্গহিতা’’তি চক্খুসুখিন্দ্রিযদুকস্স চ অসদিসং ৰিস্সজ্জনং. নাপি দুকেহি তিকস্সাতি চক্খুসোতচক্খুসুখিন্দ্রিযাদিদুকেহি চক্খুসোতসুখিন্দ্রিযাদিতিকস্স নাপি সদিসং ৰিস্সজ্জনং. ইধাতি সচ্চপদনিদ্দেসে. তিকেন চাতি দুক্খসমুদযমগ্গাদিতিকেন চ. ‘‘পঞ্চহি খন্ধেহি দ্ৰাদসহাযতনেহি অট্ঠারসহি ধাতূহি সঙ্গহিতা, ন কেহিচি খন্ধেহি ন কেহিচি আযতনেহি ন কাহিচি ধাতূহি অসঙ্গহিতা’’তি সদিসং ৰিস্সজ্জনং.

৬. পটিচ্চসমুপ্পাদৰণ্ণনা

৬১. অৰিজ্জাৰচনেনাতি ‘‘অৰিজ্জাপচ্চযা সঙ্খারা’’তি এত্থ অৰিজ্জাগ্গহণেন. ৰিসেসনং ন কত্তব্বং, ‘‘সব্বম্পি ৰিঞ্ঞাণ’’ন্তি ৰত্তব্বন্তি অধিপ্পাযো. তত্থ কারণমাহ ‘‘কুসলাদীনম্পী’’তিআদিনা. ৰিস্সজ্জনাসদিসেন সব্বৰিঞ্ঞাণাদিসঙ্গহণতো. তেসন্তি ৰিঞ্ঞাণাদিপদানং. ইধাতি ইমস্মিং পঠমনযে. অকম্মজানম্পি সঙ্গহিততা ৰিঞ্ঞাযতি সদ্দাযতনস্সপি গহিতত্তা.

৭১. জাযমান…পে… মানানন্তি জাযমানাদিঅৰত্থানং ধম্মানং. জাযমানাদিভাৰমত্তত্তাতি নিব্বত্তনাদিঅৰত্থামত্তভাৰতো. ৰিনিব্ভুজ্জিত্ৰাতি অৰত্থাভাৰতো ৰিনিব্ভোগং কত্ৰা. পরমত্থতো অৰিজ্জমানানি, সভাৰমত্তভূতানীতি পরমত্থধম্মানং অৰত্থাভাৰমত্তভূতানি ¶ . অপরমত্থসভাৰানিপি রূপধম্মস্স নিব্বত্তিআদিভাৰতো রুপ্পনভাৰেন গয্হন্তি. ততো ‘‘রূপক্খন্ধস্স সভাগানি, অরূপানং পন জাতিজরামরণানী’’তি আনেত্ৰা যোজনা. একেকভূতানীতি যথা একস্মিং রূপকলাপে জাতিআদীনি একেকানিযেৰ হোন্তি, এৰং একস্মিং অরূপকলাপেপীতি ৰুত্তং. তেনাহ ¶ ‘‘রূপকলাপজাতিআদীনি ৰিযা’’তিআদি. অনুভৰনসঞ্জাননৰিজাননকিচ্চানং ৰেদনাদীনং নিব্বত্তিআদিভূতানিপি জাতিআদীনি তথা ন গয্হন্তীতি আহ ‘‘ৰেদিযন…পে… অগয্হমানানী’’তি. তেন ৰেদনাক্খন্ধাদীহি জাতিআদীনং সঙ্গহাভাৰমাহ. ‘‘জাতি, ভিক্খৰে, অনিচ্চা সঙ্খতা’’তিআদিৰচনতো জাতিআদীনম্পি সঙ্খতপরিযাযো অত্থীতি সঙ্খতাভিসঙ্খরণকিচ্চেন সঙ্খারক্খন্ধেন তেসং সঙ্গহোতি ৰুত্তং ‘‘সঙ্খতা…পে… সভাগানী’’তি. তেনেৰ চ সঙ্খারক্খন্ধস্স অনেকন্তপরমত্থকিচ্চতা ৰেদিতব্বা. তথা দুৰিধানীতি ৰুত্তপ্পকারেন রূপারূপধম্মানং নিব্বত্তিআদিভাৰেন দ্ৰিপ্পকারানি. তেনাতি যথাৰুত্তসভাগত্থেন. তেহি খন্ধাদীহীতি রূপক্খন্ধসঙ্খারক্খন্ধধম্মাযতনধম্মধাতূহি.

পঠমনযসঙ্গহাসঙ্গহপদৰণ্ণনা নিট্ঠিতা.

২. দুতিযনযো সঙ্গহিতেনঅসঙ্গহিতপদৰণ্ণনা

১৭১. ‘‘সঙ্গহিতেন অসঙ্গহিত’’ন্তি এত্থ সঙ্গহিতাসঙ্গহিতসদ্দা ভিন্নাধিকরণা ন গহেতব্বা ৰিসেসনৰিসেসিতব্বতায ইচ্ছিতত্তা. যো হি ধম্মো সঙ্গহিততাৰিসেসৰিসিট্ঠো অসঙ্গহিতো হেট্ঠা উদ্দিট্ঠো, স্ৰেৰ ইধ অসঙ্গহিতভাৰেন পুচ্ছিত্ৰা ৰিস্সজ্জীযতীতি দস্সেন্তো ‘‘যং তং…পে… তদেৰ দস্সেন্তো’’তি আহ. যে হি ধম্মা চক্খাযতনেন খন্ধসঙ্গহেন সঙ্গহিতা, আযতনধাতুসঙ্গহেন চ অসঙ্গহিতা, তেসংযেৰ পুন খন্ধাদীহি অসঙ্গহো পুচ্ছিত্ৰা ৰিস্সজ্জিতো. তেন ৰুত্তং ‘‘চক্খাযতনেন…পে… আহা’’তি. সব্বত্থাতি সব্বেসু নযেসু ৰারেসু চ. খন্ধাদিসঙ্গহসামঞ্ঞানন্তি ‘‘খন্ধসঙ্গহেনা’’তিআদিনা অৰিসেসেন ৰুত্তানং খন্ধাদিসঙ্গহানং. ‘‘সামঞ্ঞজোতনা ৰিসেসে অৰতিট্ঠতী’’তি আহ ‘‘নিচ্চং ৰিসেসাপেক্খত্তা’’তি. ৰিসেসাৰবোধনত্থানি পঞ্হব্যাকরণানীতি ৰুত্তং ‘‘ভেদনিস্সিতত্তা চ পুচ্ছাৰিস্সজ্জনান’’ন্তি. সৰিসেসাৰ খন্ধাদিগণনাতি ‘‘খন্ধসঙ্গহেনা’’তিআদিনা অৰিসেসেন ৰুত্তাপি ¶ রূপক্খন্ধাদিনা সৰিসেসাৰ খন্ধাদিগণনা, খন্ধাদিনা সঙ্গহোতি অত্থো. সুদ্ধাতি কেৰলা অনৰসেসা, সামঞ্ঞভূতাতি ৰুত্তং হোতি.

তত্থাতি যথাধিকতে দুতিযনযে. সামঞ্ঞজোতনায ৰিসেসনিদ্দিট্ঠত্তা আহ ‘‘সঙ্গহি…পে… নিদ্ধারিতত্তা’’তি. তীসু সঙ্গহেসূতি খন্ধাদিসঙ্গহেসু ¶ তীসু. অঞ্ঞেহীতি ৰুত্তাৰসেসেহি দ্ৰীহি একেন ৰা. এত্তকেনেৰ দস্সেতব্বা সিযুং তাৰতাপি সঙ্গহিতেন অসঙ্গহিতভাৰস্স পকাসিতত্তা. তেসন্তি সঙ্গহিতেনঅসঙ্গহিতভাৰেন ৰুত্তধম্মানং. এৰংৰিধানন্তি ‘‘চক্খাযতনং সোতাযতন’’ন্তিআদিনা অনিদ্ধারিতৰিসেসানং. অসম্ভৰাতি ৰুত্তপ্পকারেন নিদ্দিসিতুং অসম্ভৰা. সঙ্গহাদিনযদস্সনমত্তং নযমাতিকায ব্যাপারো, যত্থ পন সঙ্গহাদযো, তে খন্ধাদযো কুসলাদযো চ তেসং ৰিসযভূতাতি তেহি ৰিনা সঙ্গহাদীনং পৰত্তি নত্থি. তেনাহ ‘‘নযমাতিকায অব্ভন্তরবাহিরমাতিকাপেক্খত্তা’’তি. সঙ্গাহকং অসঙ্গাহকঞ্চাতি ৰত্তব্বং. যো হি ইধ সঙ্গাহকভাৰেন ৰুত্তো ধম্মো অসঙ্গাহকভাৰেনপি ৰুত্তোযেৰাতি.

‘‘যে ধম্মা খন্ধসঙ্গহেন সঙ্গহিতা, আযতনধাতুসঙ্গহেন অসঙ্গহিতা’’তি, ‘‘যে ধম্মা খন্ধসঙ্গহেন অসঙ্গহিতা, আযতনধাতুসঙ্গহেন সঙ্গহিতা’’তি চ যত্থ পুচ্ছিতব্বৰিস্সজ্জিতব্বধম্মৰিসেসনিদ্ধারণং নত্থি, তত্থ পঠমনযে ছট্ঠনযে চ ‘‘রূপক্খন্ধো কতিহি খন্ধেহি সঙ্গহিতো? একেন খন্ধেনা’’তি (ধাতু. ৬), ‘‘রূপক্খন্ধো কতিহি খন্ধেহি সম্পযুত্তোতি? নত্থি. চতূহি খন্ধেহি ৰিপ্পযুত্তো’’তি (ধাতু. ২২৮) চ এৰং পুচ্ছিতব্বৰিস্সজ্জিতব্বভাৰেন. ইতরেসূতি দুতিযাদিনযেসু. তস্স তস্সাতি যং পুচ্ছিতব্বং ৰিস্সজ্জিতব্বঞ্চ ‘‘যে ধম্মা’’তি অনিযমিতরূপেন নিদ্ধারিতং, তস্স তস্স ‘‘তে ধম্মা’’তি নিযামকভাৰেন.

এত্থাতি এতস্মিং পকরণে. যেন যেন চক্খাযতনাদিনা সঙ্গাহকেন. খন্ধাদিসঙ্গহেসূতি খন্ধাযতনধাতুসঙ্গহেসু. তেন তেনাতি খন্ধাদিসঙ্গহেন. অঞ্ঞন্তি ততো ততো সঙ্গাহকতো অঞ্ঞং. তব্বিনিমুত্তং সঙ্গহেতব্বাসঙ্গহেতব্বং যং ধম্মজাতং অত্থি, তং তদেৰ ‘‘চক্খাযতনেন যে ধম্মা খন্ধসঙ্গহেন সঙ্গহিতা, আযতনধাতুসঙ্গহেন অসঙ্গহিতা’’তি সঙ্গাহকাসঙ্গাহকভাৰেন উদ্ধটং. অঞ্ঞো ধম্মো নত্থি তস্স সভাগভাৰেন সঙ্গাহকস্সেৰ অভাৰতো. সিযা পনেতং সভাগেন একদেসেন সঙ্গহোতি, তং পটিক্খিপন্তো আহ ‘‘ন চ সো…পে… হোতী’’তি. যঞ্চাতিআদিনা ৰচনন্তরং পরিহরতি.

যদি ¶ ¶ চাতিআদিনাপি তস্সেৰ তেন সঙ্গহাভাৰং পাঠাভাৰদস্সনেন ৰিভাৰেতি. তত্থ সো এৰাতি যো রূপাদিক্খন্ধো সঙ্গাহকভাৰেন ৰুত্তো, সো এৰ তেন রূপাদিক্খন্ধেন সঙ্গয্হেয্য সঙ্গহেতব্বো ভৰেয্য, তেনেৰ তস্স সঙ্গহাভাৰে লক্খণং দস্সেন্তো আহ ‘‘ন হি সো এৰ তস্স সভাগো ৰিসভাগো চা’’তি. একদেসা ৰিয চক্খাযতনাদযো সমুদাযস্স রূপক্খন্ধাদিকস্স. রূপক্খন্ধো চক্খাযতনাদীনং ন সঙ্গাহকো অসঙ্গাহকো চ সভাগৰিসভাগভাৰাভাৰতো. এস নযো সেসেসুপি. সমুদাযন্তোগধানন্তিআদিনা ৰুত্তমেৰত্থং পাকটতরং করোতি. তত্থ যেনাতি ৰিভাগেন. তেতি একদেসা. তেসন্তি একদেসানং. এত্থ তদন্তোগধতায ৰিভাগাভাৰো, ৰিভাগাভাৰেন সভাগৰিসভাগতাভাৰো, তেন সঙ্গাহকাসঙ্গাহকতাভাৰো দস্সিতোতি ৰেদিতব্বো.

যথা সব্বেন সব্বং সভাগৰিসভাগাভাৰেন একদেসানং সমুদাযো সঙ্গাহকো অসঙ্গাহকো চ ন হোতি, এৰং একদেসসভাগৰিসভাগানন্তি দস্সেন্তো ‘‘তথা’’তিআদিমাহ. তত্থ যথাতিআদি উদাহরণদস্সনেন যথাৰুত্তস্স অত্থস্স পাকটকরণং. খন্ধসঙ্গহেন সঙ্গাহকং অসঙ্গাহকঞ্চাতি যোজনা. তথা সেসেসুপি. ন হি একদেস…পে… ৰিসভাগং যেন সমুদাযো সঙ্গাহকো অসঙ্গাহকো চ সিযাতি অধিপ্পাযো. এত্থ চ সঙ্গাহকত্তং তাৰ মা হোতু, অসঙ্গাহকত্তং পন কস্মা পটিক্খিপীযতীতি চোদনং মনসি কত্ৰা আহ ‘‘তস্মা’’তিআদি. তত্থ তস্মাতি ৰুত্তমেৰত্থং হেতুভাৰেন পরামসতি. অত্ততো অঞ্ঞস্স, অত্তনি অন্তোগধতো অঞ্ঞস্স, অত্তেকদেসসভাগতো অঞ্ঞস্স সতিপি অসঙ্গাহকত্তেতি যোজনা. তং পনেতং ‘‘রূপক্খন্ধো রূপক্খন্ধেন সঙ্গহিতো অসঙ্গহিতো চ ন হোতী’’তিআদিনা ৰুত্তে তযো পকারে সন্ধায ৰুত্তং. সঙ্গাহকত্তমেৰ এতেসং নত্থীতি এতেসং অত্তা, অত্তনি অন্তোগধো, অত্তেকদেসসভাগো চাতি ৰুত্তানং সঙ্গাহকভাৰো এৰ নত্থি সভাগাভাৰতো. তেন ৰুত্তং ‘‘ন হি সো এৰ তস্স সভাগো’’তিআদি. যেনাতি সঙ্গাহকত্তেন. এৰরূপানন্তি যথাৰুত্তানং তিপ্পকারানং অগ্গহণং ৰেদিতব্বং সতিপি ৰিসভাগভাৰেতি অধিপ্পাযো.

তেনাতি ¶ ‘‘ধম্মাযতন’’ন্তিআদিনা ৰচনেন. একদেসস্স ৰেদনাক্খন্ধাদিকস্স সমুদাযস্স ধম্মাযতনস্স সঙ্গাহকত্তং একদেসেন সমুদাযস্স সঙ্গহিতভাৰন্তি অত্থো, সমুদাযস্স রূপক্খন্ধস্স একদেসস্স চক্খাযতনস্স সোতাযতনস্স চ সঙ্গাহকত্তং সমুদাযেন একদেসস্স সঙ্গহিতভাৰন্তি ৰুত্তং হোতি. যদি এৰং ন দস্সেতি, অথ কিং দস্সেতীতি আহ ‘‘চতুক্খন্ধগণনভেদেহী’’তিআদি. তত্থ চতুক্খন্ধগণনভেদেহীতি রূপাদিচতুক্খন্ধগণনৰিভাগেহি ¶ . পঞ্চধাতি রূপাদিচতুক্খন্ধসঙ্গহো ৰিঞ্ঞাণক্খন্ধসঙ্গহোতি এৰং পঞ্চপ্পকারেন ভিন্নতং. তেনাহ ‘‘গণেতব্বাগণেতব্বভাৰেনা’’তি. ‘‘একেন খন্ধেনা’’তিআদীসু করণত্থে করণৰচনং, ন কত্তুঅত্থেতি কত্ৰা আহ ‘‘সঙ্গাহকাসঙ্গাহকনিরপেক্খান’’ন্তি. তেনেৰাহ ‘‘কম্মকরণমত্তসব্ভাৰা’’তি. দুতিযাদযো পন নযা. অগণনাদিদস্সনানীতি অগণনগণনদস্সনানি. ননু চ দুতিযাদীসু গণনাদীনিপি ৰিজ্জন্তীতি? সচ্চং ৰিজ্জন্তি, তানি পন ৰিসেসনভূতানি অপ্পধানানীতি ৰিসেসিতব্বভূতানং পধানানং ৰসেনেৰং ৰুত্তং. ‘‘চক্খাযতনেন যে ধম্মা খন্ধসঙ্গহেন সঙ্গহিতা’’তিআদিনা কত্তুআদযো নিদ্দিট্ঠাতি আহ ‘‘কত্তুকরণকম্মত্তযসব্ভাৰা’’তি.

তথা তথাতি তেন তেন রূপক্খন্ধাদিপ্পকারেন. তংতংখন্ধাদিভাৰাভাৰো সভাগৰিসভাগতাতি রূপধম্মাদীনং রূপক্খন্ধাদিভাৰো সভাগতা, ৰেদনাক্খন্ধাদিঅভাৰো ৰিসভাগতাতি অত্থো. যথানিদ্ধারিতধম্মদস্সনেতি ‘‘যে ধম্মা, তে ধম্মা’’তি নিদ্ধারিতপ্পকারধম্মনিরূপনে. সঙ্গাহকসঙ্গহেতব্বানন্তি চক্খাযতনাদিকস্স সঙ্গাহকস্স সোতাযতনাদিকস্স চ সঙ্গহেতব্বস্স. সমানক্খন্ধাদিভাৰোতি একক্খন্ধাদিভাৰো, রূপক্খন্ধাদিভাৰোতি অত্থো. তদভাৰোতি তস্স সমানক্খন্ধাদিভাৰস্স অভাৰো অঞ্ঞক্খন্ধাদিভাৰো. অযন্তি য্ৰাযং পঠমনযে তথা তথা গণেতব্বাগণেতব্বতাসঙ্খাতো দুতিযাদিনযেসু যথাৰুত্তানং সমানক্খন্ধাদিভাৰাভাৰসঙ্খাতো তংতংখন্ধাদিভাৰাভাৰো ৰুত্তো, অযমেতেসং দ্ৰিপ্পকারানং নযানং সভাগৰিসভাগতাসু ৰিসেসো.

সমুদযসচ্চসুখিন্দ্রিযাদীতি আদি-সদ্দেন মগ্গসচ্চদুক্খিন্দ্রিযাদি সঙ্গয্হতি. অসঙ্গাহকত্তাভাৰতোতি সঙ্গহিততাৰিসিট্ঠস্স অসঙ্গাহকত্তস্স অভাৰতো ¶ . ন হি সক্কা ‘‘সমুদযসচ্চেন যে ধম্মা খন্ধসঙ্গহেন সঙ্গহিতা, আযতনধাতুসঙ্গহেন অসঙ্গহিতা’’তিআদি ৰত্তুং. দুক্খসচ্চসদিসানি অব্যাকতপদাদীনি. ইতরেহীতি আযতনধাতুসঙ্গহেহি সঙ্গাহকত্তাসঙ্গাহকত্তাভাৰতো ন উদ্ধটানীতি যোজনা. এৰন্তিআদি যথাৰুত্তস্স অত্থস্স নিগমনৰসেন ৰুত্তং. ন রূপক্খন্ধোতি ন সব্বো রূপক্খন্ধধম্মোতি অত্থো.

‘‘খন্ধপদেনা’’তি ইদং করণত্থে করণৰচনং, ন কত্তুঅত্থেতি আহ ‘‘খন্ধপদসঙ্গহেনাতি অত্থো’’তি. তেনেৰস্স কত্তুঅত্থতং পটিসেধেতুং ‘‘ন সঙ্গাহকেনা’’তি ৰুত্তং. করণং পন কত্তুরহিতং ¶ নত্থীতি আহ ‘‘কেনচি সঙ্গাহকেনাতি ইদং পন আনেত্ৰা ৰত্তব্ব’’ন্তি. সঙ্গাহকেসু ন যুজ্জতি ন সঙ্গহেতব্বেসূতি অধিপ্পাযো. রূপক্খন্ধধম্মা হি ‘‘যে ধম্মা খন্ধসঙ্গহেন সঙ্গহিতা’’তি ৰুত্তাতি. সমুদাযে ৰুত্তৰিধি তদৰযৰেপি সম্ভৰতীতি চোদনং সমুট্ঠাপেন্তো ‘‘এতেন নযেনা’’তিআদিমাহ. পটিযোগীনিৰত্তনং এৰ-সদ্দেন করীযতীতি আহ ‘‘ন হি অঞ্ঞমত্তনিৰারণং এৰ-সদ্দস্স অত্থো’’তি. তেনাহ ‘‘সঙ্গাহকতো অঞ্ঞনিৰারণং এৰ-সদ্দস্স অত্থো’’তি. সো চ…পে… পেক্খন্তি ইমিনা তমেৰত্থং পাকটতরং করোতি. সঙ্গাহকাপেক্খত্তে হি ‘‘সো চা’’তিআদিৰচনস্স ‘‘চক্খাযতনেন রূপক্খন্ধোৰ সঙ্গহিতো’’তি এত্থ চক্খাযতনং সঙ্গাহকন্তি যথাধিপ্পেতস্স অত্থস্স অসম্ভৰো এৰাতি ইদানি তং অসম্ভৰং ৰিভাৰেন্তো ‘‘কথ’’ন্তিআদিমাহ, তং সুৰিঞ্ঞেয্যমেৰ.

এত্থাতি ‘‘অড্ঢেকাদসহি আযতনধাতূহী’’তি এত্থ. ‘‘রূপক্খন্ধেনা’’তি আনেত্ৰা ৰত্তব্বং আযতনধাতুৰিসেসনত্থং. ন সো এৰ তস্স, সমুদাযো ৰা তদেকদেসানং সঙ্গাহকো অসঙ্গাহকো চ হোতীতি ৰুত্তোৰাযমত্থোতি আহ ‘‘রূপক্খন্ধো…পে… ন হোতী’’তি. ইমিনা পরিযাযেনাতি যস্মা ৰুত্তপ্পকারং সঙ্গাহকত্তং নত্থি ‘‘যেন সঙ্গহিতস্স অসঙ্গাহকং সিযা’’তি ইমিনা পরিযাযেন. অসঙ্গহিততায অভাৰো ৰুত্তো অট্ঠকথাযং (ধাতু. অট্ঠ. ১৭১) ‘‘সো চ…পে… নত্থী’’তি. সঙ্গহিততাযাতি নিপ্পরিযাযেন সঙ্গহিতভাৰেন অসঙ্গহিততায অভাৰো ৰুত্তোতি ন যুজ্জতীতি যোজনা. সা সঙ্গহিততাতি অত্তনা অত্তনো, অত্তেকদেসানং ¶ ৰা সঙ্গহিততা. তেনাতি রূপক্খন্ধেন. তেসন্তি রূপক্খন্ধতদেকদেসানং. অত্থি চ ৰিপ্পযুত্ততা ৰেদনাক্খন্ধাদীহি. চক্খাযতনাদীহি ৰিযাতি ৰিসদিসুদাহরণং. এতেহি রূপৰেদনাক্খন্ধাদীহি অঞ্ঞেহি চ এৰরূপেহি. এতানি অঞ্ঞানি চাতি এত্থাপি এসেৰ নযো.

তেনেৰ তস্স সঙ্গহিতত্তাভাৰদস্সনেন হেট্ঠা দস্সিতেন. এত্থাতি এতস্মিং ৰারে. অগ্গহণেতি অকথনে, অদেসনাযন্তি অত্থো. সমুদযসচ্চাদীসূতি সমুদযসচ্চসুখিন্দ্রিযাদীসু যুজ্জেয্য তং কারণং. কস্মা? তেহি সমুদযসচ্চাদীহি খন্ধাদিসঙ্গহেন সঙ্গহিতে ধম্মজাতে সতি তস্স আযতনসঙ্গহাদীহি অসঙ্গহিতত্তস্স অভাৰতো. রূপক্খন্ধাদীহীতি রূপক্খন্ধৰেদনাক্খন্ধাদীহি. সঙ্গহিতমেৰ নত্থি, কস্মা? ‘‘সো এৰ তস্স সঙ্গাহকো ন হোতী’’তি ৰুত্তোৰাযমত্থো. যদিপি রূপক্খন্ধাদিনা রূপক্খন্ধাদিকস্স অত্তনো…পে… নত্থীতি সম্বন্ধো. অঞ্ঞস্স পন ৰেদনাক্খন্ধাদিকস্স রূপক্খন্ধাদিনা সঙ্গহিতত্তাভাৰেন অসঙ্গহিতত্তং অত্থীতি যোজনা. উভযাভাৰোতি ¶ সঙ্গহিতত্তাসঙ্গহিতত্তাভাৰো. এত্থ এতস্মিং ৰারে. ধম্মাযতনজীৰিতিন্দ্রিযাদীনন্তি ধম্মাযতনাদীনং খন্ধচতুক্কসঙ্গাহকত্তে, জীৰিতিন্দ্রিযাদীনং খন্ধদুকসঙ্গাহকত্তেতি যোজনা. পাল়িযং অনাগতত্তা ‘‘সতী’’তি সাসঙ্কং ৰদতি. আদি-সদ্দেন পঠমেন ধম্মধাতুসল়াযতনাদীনং সুখিন্দ্রিযাদীনঞ্চ, দুতিযেন একক্খন্ধস্স সঙ্গহো দট্ঠব্বো. সুখিন্দ্রিযঞ্হি ৰেদনাক্খন্ধস্সেৰ সঙ্গাহকং. তেসন্তি খন্ধচতুক্কখন্ধদুকাদীনং অসঙ্গহিততা ন নত্থি অত্থেৰাতি তস্সা অভাৰো অনেকন্তিকো. পুব্বে ৰুত্তনযেনাতি ‘‘রূপক্খন্ধাদীহি পনা’’তিআদিনা ৰুত্তনযেন.

তত্থেৰাতি তস্মিংযেৰ পুব্বে ৰুত্তে সনিদস্সনসপ্পটিঘপদে. নিৰত্তেত্ৰা গণ্হন্তোতি পুব্বে ৰুত্তং পটিনিৰত্তেত্ৰা গণ্হন্তো পচ্চামসন্তো. তদৰত্তব্বতাতি তেসং সঙ্গাহকাসঙ্গাহকসঙ্গহিতত্তাসঙ্গহিতত্তানং অৰত্তব্বতা. অসঙ্গাহকত্তাভাৰতো এৰ…পে… ন সঙ্গাহকত্তাভাৰতোতি যস্মা নেসং অসঙ্গাহকত্তং ৰিয সঙ্গাহকত্তম্পি নত্থি, ততো এৰ সঙ্গহিতত্তাসঙ্গহিতত্তম্পীতি দস্সেতি.

দুতিযনযসঙ্গহিতেনঅসঙ্গহিতপদৰণ্ণনা নিট্ঠিতা.

৩. ততিযনযো অসঙ্গহিতেনসঙ্গহিতপদৰণ্ণনা

১৭৯. রূপক্খন্ধেন ¶ খন্ধসঙ্গহেন অসঙ্গহিতেসূতি নিদ্ধারণে ভুম্মং. তস্মাতি যস্মা একদেসসভাগতা সমুদাযসভাগতা ন হোতি, তস্মা. তেনাতি রূপক্খন্ধেন. তানীতি ৰেদনাদিক্খন্ধত্তযনিব্বানানি. যথা চ একদেসৰিসভাগতায ন সঙ্গহিততা, এৰং একদেসসভাগতায অসঙ্গহিততাপি নত্থীতি দস্সেন্তো ‘‘ন কেৰল’’ন্তিআদিমাহ. সঙ্গহিতানেৰ ন ন হোন্তীতি যোজনা. তেতি ৰেদনাদিক্খন্ধত্তযনিব্বানসুখুমরূপধম্মা. তেহীতি ৰিঞ্ঞাণক্খন্ধচক্খাযতনাদীহি. ন কথঞ্চি সম্মিস্সাতি কেনচিপি পকারেন ন সম্মিস্সাতি অসম্মিস্সতায সঙ্গহিতত্তাভাৰং সাধেতি. রূপক্খন্ধেন ৰিয…পে… ন হোতীতি যথা রূপক্খন্ধেন সভাগতাভাৰতো নিব্বানং ন কেনচিপি সঙ্গহণেন সঙ্গহিতং, এৰং ৰিঞ্ঞাণক্খন্ধচক্খাযতনাদীহি তং আযতনধাতুসঙ্গহেহি সঙ্গহিতং ন হোতীতি খন্ধসঙ্গহাভাৰো পাকটো ৰুত্তোৰাতি এৰং ৰুত্তং.

এৰরূপানন্তি ¶ রূপক্খন্ধৰিঞ্ঞাণক্খন্ধচক্খাযতনাদীনং. ন হি নিব্বানং সন্ধায ‘‘রূপক্খন্ধেন ৰিঞ্ঞাণক্খন্ধেন চক্খাযতনেন যে ধম্মা খন্ধসঙ্গহেন অসঙ্গহিতা, আযতনধাতুসঙ্গহেন সঙ্গহিতা’’তি সক্কা ৰত্তুং. তেন ৰুত্তং ‘‘সঙ্গাহকত্তাভাৰতো এৰা’’তি. তথা ‘‘অব্যাকতেহি ধম্মেহি যে ধম্মা খন্ধসঙ্গহেন অসঙ্গহিতা, আযতনধাতুসঙ্গহেন সঙ্গহিতা’’তিআদি ন সক্কা ৰত্তুং তাদিসস্স ধম্মস্স অভাৰতোতি আহ ‘‘সনিব্বান…পে… ভাৰতোৰা’’তি. অগ্গহণং ৰেদিতব্বন্তি যোজনা. তেনাহ ‘‘ন হী’’তিআদি. কঞ্চীতি কঞ্চি ধম্মজাতং. তেতি অব্যাকতধম্মাদযো. অত্তনোতি অব্যাকতধম্মাদিং সন্ধাযাহ. একদেসোতি রূপক্খন্ধাদি. অত্তেকদেসসভাগোতি নিব্বানং. তঞ্হি ধম্মাযতনধম্মধাতুপরিযাপন্নতায তদেকদেসসভাগো. অসঙ্গহিতসঙ্গাহকত্তাতি খন্ধসঙ্গহেন অসঙ্গহিতানং সঞ্ঞাক্খন্ধাদীনং আযতনধাতুসঙ্গহেন সঙ্গাহকত্তাতি অত্থো.

ৰিসভাগক্খন্ধনিব্বানসমুদাযত্তা খন্ধসঙ্গহেন ধম্মাযতনেন ন কোচি ধম্মো সঙ্গহিতো অত্থীতি যোজনা. এতস্সাতি ‘‘ধম্মাযতনেন সঙ্গহিতা’’তি এতস্স পদস্স ধম্মাযতনগণনেন সঙ্গহিতাতি অত্থো. ওল়ারিকরূপসম্মিস্সং ধম্মাযতনেকদেসং.

ততিযনযঅসঙ্গহিতেনসঙ্গহিতপদৰণ্ণনা নিট্ঠিতা.

৪. চতুত্থনযো সঙ্গহিতেনসঙ্গহিতপদৰণ্ণনা

১৯১. তিণ্ণং ¶ সঙ্গহানন্তি খন্ধাযতনধাতুসঙ্গহানং. সঙ্গহণপুব্বং অসঙ্গহণং, অসঙ্গহণপুব্বং সঙ্গহণঞ্চ ৰুচ্চমানং সঙ্গহণাসঙ্গহণানং পৰত্তিৰিসেসেন ৰুত্তং হোতীতি আহ ‘‘সঙ্গহণা…পে… উদ্দিট্ঠা’’তি. সঙ্গহাভাৰকতো অসঙ্গহো সঙ্গহহেতুকো সঙ্গহস্স পৰত্তিৰিসেসোযেৰ নাম হোতীতি আহ ‘‘সঙ্গহণপ্পৰত্তিৰিসেসৰিরহে’’তি. কেনচি সমুদযসচ্চাদিনা তীহিপি সঙ্গহেহি সঙ্গহিতেন সঙ্খারক্খন্ধপরিযাপন্নেন ধম্মৰিসেসেন পুন তথেৰ সঙ্গহিতো সো এৰ সমুদযসচ্চাদিকো ধম্মৰিসেসো সঙ্গহিতেন সঙ্গহিতো. সঙ্গাহকত্তাভাৰসব্ভাৰা সঙ্গাহকভাৰেন ন উদ্ধটা, ন অসঙ্গাহকত্তা এৰ. যথা হি তীহি সঙ্গহেহি ন সঙ্গাহকা, এৰং ¶ দ্ৰীহি, একেনপি সঙ্গহেন ন সঙ্গাহকা ইধ ন উদ্ধটা. তেহি সঙ্গহিতাতি তেহি তীহি সঙ্গহেহি সঙ্গহিতা ধম্মা. যস্সাতি যস্স অত্তনো সঙ্গাহকস্স.

সকলৰাচকেনাতি অনৰসেসং খন্ধাদিঅত্থং ৰদন্তেন. তেন খন্ধাদিপদেনাতি ‘‘তেনেৰ সঙ্গহং গচ্ছেয্যা’’তি এত্থ তেন খন্ধাদিপদেনাতি এৰং যোজেতব্বং. এৰং পন অযোজেত্ৰা ‘‘যং অত্তনো সঙ্গাহকং সঙ্গণ্হিত্ৰা পুন তেনেৰ সঙ্গহং গচ্ছেয্য, তং অঞ্ঞং সঙ্গহিতং নাম নত্থী’’তি এৰং ন সক্কা ৰত্তুং. কস্মাতি চে? ন হি যেন সমুদযসচ্চাদিনা যং সঙ্খারক্খন্ধপরিযাপন্নং ধম্মজাতং খন্ধাদিসঙ্গহেহি সঙ্গহিতং, তেনেৰ সমুদযসচ্চাদিনা তস্স তদৰসিট্ঠস্স সঙ্খারক্খন্ধধম্মস্স, ন চ তস্সেৰ কেৰলস্স সমুদযসচ্চাদিকস্স সঙ্গহো পুচ্ছিতো ৰিস্সজ্জিতোতি যোজনা, অথ খো তেন সঙ্খারক্খন্ধধম্মেন ফস্সাদিনা. সঙ্গহিতস্সাতি সঙ্গহিততাৰিসিট্ঠস্সাতি অত্থো. তস্মা অত্তনো সঙ্গাহকং সকলক্খণাদিং সঙ্গণ্হিত্ৰা পুন তেন খন্ধাদিপদেন যং সঙ্গহং গচ্ছেয্য, তং তাদিসং নত্থীতি অত্থো ৰেদিতব্বো. ৰেদনা সদ্দো চ খন্ধো আযতনঞ্চাতি ৰেদনা ৰিসুং খন্ধো, সদ্দো চ ৰিসুং আযতনন্তি অত্থো. অঞ্ঞেন খন্ধন্তরাদিনা. অসম্মিস্সন্তি অব্যাকতদুক্খসচ্চাদি ৰিয অমিস্সিতং. ন হি…পে… এত্থাতি সঙ্গহিততাৰিসিট্ঠেন ধম্মেন যো ধম্মো সঙ্গহিতো, তস্স সঙ্গহিততাৰিসিট্ঠোযেৰ যো সঙ্গহো, সো ন এত্থ ৰারে পুচ্ছিতো ৰিস্সজ্জিতো চ. সঙ্গহোৰাতি কেৰলো সঙ্গহো ¶ , ন কত্তাপেক্খোতি অত্থো. ন সঙ্গাহকেনাতি ইদং যথাৰুত্তেন অত্থেন নিৰত্তিতস্স দস্সনং. ন হীতিআদি তংসমত্থনং.

চতুত্থনযসঙ্গহিতেনসঙ্গহিতপদৰণ্ণনা নিট্ঠিতা.

৫. পঞ্চমনযো অসঙ্গহিতেনঅসঙ্গহিতপদৰণ্ণনা

১৯৩. ৰুত্তনযেনাতি যস্মা সঙ্গহপ্পৰত্তিৰিসেসৰিরহিতো অসঙ্গহিতধম্মৰিসেসনিস্সিতো পঞ্চমনযো, তস্মা যো এত্থ কেনচি অসঙ্গহিতেন ধম্মৰিসেসেন পুন অসঙ্গহিতো ধম্মৰিসেসো অসঙ্গহিতেন অসঙ্গহিতো অসঙ্গহিততায পুচ্ছিতব্বো ৰিস্সজ্জিতব্বো চ. তমেৰ তাৰ যথানিদ্ধারিতং ¶ দস্সেন্তো ‘‘রূপক্খন্ধেন যে ধম্মা খন্ধ…পে… অসঙ্গহিতা, তেহি ধম্মেহি যে ধম্মা খন্ধ…পে… অসঙ্গহিতাতি আহা’’তি চতুত্থনযে ৰুত্তনযানুসারেন. যথানিদ্ধারিতধম্মদস্সনন্তি পাল়িযং নিদ্ধারিতপ্পকারধম্মদস্সনং. সহ সুখুমরূপেনাতি সসুখুমরূপং, তেন সুখুমরূপেন সদ্ধিং গহিতং ৰিঞ্ঞাণং, তেন সহিতধম্মসমুদাযা সসুখুম…পে… দাযা. কে পন তেতি আহ ‘‘দুক্খসচ্চা’’তিআদি. কেসঞ্চীতি নিব্বানচক্খাযতনাদীনং. তীহিপি সঙ্গহেহি. পরিপুণ্ণসঙ্গহেহি তীহিপি সঙ্গহেহি অসঙ্গাহকা পরিপুণ্ণসঙ্গহাসঙ্গাহকা. অব্যাকতধম্মসদিসা নেৰদস্সনেননভাৰনাযপহাতব্বনেৰসেক্খানাসেক্খাদযো. ইতরেতি রূপক্খন্ধাদযো. তব্বিপরিযাযেনাতি ৰুত্তৰিপরিযাযেন, তীহিপি সঙ্গহেহি অসঙ্গহেতব্বস্স অত্থিতায পরিপুণ্ণসঙ্গহাসঙ্গাহকত্তাতি অত্থো.

অসঙ্গাহকেসু নিব্বানং অন্তোগধং, তস্মা তং অনিদস্সনঅপ্পটিঘেহি অসঙ্গহেতব্বং ন হোতীতি অত্থো. তেনাহ ‘‘ন চ তদেৰ তস্স অসঙ্গাহক’’ন্তি. ‘‘ৰেদনাক্খন্ধেন যে ধম্মা’’তিআদযো নৰ পঞ্হা দুতিযপঞ্হাদযো, তে পঠমপঞ্হেন সদ্ধিং দস, নামরূপপঞ্হাদযো পন চতুৰীসতীতি আহ ‘‘সব্বেপি চতুত্তিংস হোন্তী’’তি. রূপক্খন্ধাদিৰিসেসকপদন্তি ‘‘রূপক্খন্ধেনা’’তিআদিনা অসঙ্গাহকত্তেন ৰিসেসকং রূপক্খন্ধাদিপদং. পুচ্ছাযাতি চ পুচ্ছনত্থন্তি অত্থো. ‘‘রূপক্খন্ধেনা’’তিআদি সব্বম্পি ৰা ৰিঞ্ঞাপেতুং ইচ্ছিতভাৰেন ৰচনং পঞ্হভাৰতো পুচ্ছা. তেনাহ অট্ঠকথাযং ¶ ‘‘পঞ্হা পনেত্থ…পে… চতুত্তিংস হোন্তী’’তি. তে হি লক্খণতো দস্সিতাতি তে নিদ্ধারিতধম্মা তেনেৰ অসঙ্গহিতাসঙ্গহিততায নিদ্ধারণসঙ্খাতেন লক্খণেন দস্সিতা.

তদেৰাতি এৰ-সদ্দেনাতি ‘‘তদেৰা’’তি এত্থ এৰ-সদ্দেন. ‘‘যং পুচ্ছায উদ্ধটং পদং, তং খন্ধাদীহি অসঙ্গহিত’’ন্তি এত্থ ‘‘খন্ধাদীহেৰা’’তি অৰধারণং নিপ্পযোজনং পকারন্তরস্স অভাৰতো. ‘‘তীহি অসঙ্গহো’’তি হি ৰুত্তং. তথা ‘‘অসঙ্গহিতমেৰা’’তি সঙ্গহিততানিৰত্তনস্স অনধিপ্পেতত্তা. তদেৰাতি পন ইচ্ছিতং উদ্ধটস্সেৰ অসঙ্গহিতেনঅসঙ্গহিতভাৰস্স অৰধারেতব্বত্তাতি দস্সেন্তো ‘‘ন কদাচী’’তিআদিমাহ. তত্থ অঞ্ঞস্সাতি অনুদ্ধটস্স. অনিযততং দস্সেতীতি ইদং অৰধারণফলদস্সনং. নিযমতোতি সক্কা ৰচনসেসো যোজেতুন্তি ইদম্পি এৰ-কারেন সিদ্ধমেৰত্থং পাকটতরং কাতুং ৰুত্তং. যতো হি এৰ-কারো, ততো অঞ্ঞত্থ নিযমোতি. এৰংপকারমেৰাতি পুচ্ছায উদ্ধটপ্পকারমেৰ, যং পকারং পুচ্ছায উদ্ধটং, তংপকারমেৰাতি অত্থো. তস্সাতি ¶ অসঙ্গহিতস্স. অঞ্ঞস্সাতি পুচ্ছায অনুদ্ধটপ্পকারস্স. এতেন যো পুচ্ছায উদ্ধটো তীহিপি সঙ্গহেহি অসঙ্গহিতো, তস্সেৰ ইধ পুচ্ছিতব্বৰিস্সজ্জিতব্বভাৰো, ন অঞ্ঞস্সাতি দস্সেতি. তেনাহ ‘‘পুচ্ছায উদ্ধটঞ্হী’’তিআদি. আযতনধাতুসঙ্গহৰসেন চেত্থ রূপক্খন্ধাদীনং অঞ্ঞসহিততা, ৰিঞ্ঞাণক্খন্ধাদীনং অসহিততা চ ৰেদিতব্বা.

অৰসেসা ৰেদনাদযো তযো খন্ধা নিব্বানঞ্চ সকলেন রূপক্খন্ধেন তেসং সঙ্গহো নত্থীতি ‘‘সঙ্গহিতা’’তি ন সক্কা ৰত্তুং, একদেসেন পন সঙ্গহো অত্থীতি ‘‘অসঙ্গহিতা ন হোন্তীতি এৰং দট্ঠব্ব’’ন্তি আহ. ‘‘রূপধম্মাৰা’’তি নিযমনং পুচ্ছায উদ্ধটভাৰাপেক্খন্তি দস্সেন্তো ‘‘পুচ্ছায…পে… অধিপ্পাযো’’তি আহ. তেন ৰুত্তং ‘‘অনুদ্ধটা ৰেদনাদযোপি হি অসঙ্গহিতা এৰা’’তি. এত্থাতি এতস্মিং পঞ্চমনযনিদ্দেসে. পঠমে নযেতি পঠমে অত্থৰিকপ্পে. তথা দুতিযেতি এত্থাপি. রূপৰিঞ্ঞাণেহীতি অসুখুমরূপধম্মেহি ৰিঞ্ঞাণেন চাতি অযমেত্থ অধিপ্পাযোতি দস্সেন্তো ‘‘ওল়ারিক…পে… অত্থো’’তি আহ. কথং পন রূপধম্মাতি ৰুত্তে ওল়ারিকরূপস্সেৰ গহণন্তি আহ ‘‘রূপেকদেসো হি এত্থ রূপগ্গহণেন গহিতো’’তি.

১৯৬. অসঙ্গাহকন্তি ¶ ‘‘চক্খাযতনেন…পে… অসঙ্গহিতা’’তি এৰং অসঙ্গাহকভাৰেন ৰুত্তং পুচ্ছিতব্বৰিস্সজ্জেতব্বভাৰেন ৰুত্তম্পি কামং ৰেদনাদীহেৰ চতূহি অসঙ্গহিতং, তং পন ন চক্খাযতনমেৰাতি দস্সেতুং ‘‘চক্খাযতনেন পনা’’তিআদি ৰুত্তং. যেহি ধম্মেহীতি খন্ধাদীসু যেহি. সব্বং ধম্মজাতং তেৰ রূপাদিকে ধম্মে উদানেতি পাল়িযং. কস্মা পনেতং উদানেতীতি আহ ‘‘সদিসৰিস্সজ্জনা’’তিআদি. পঠমেন উদানেন. দ্ৰেতি ‘‘বাহিরা উপাদা দ্ৰে’’তি এত্থ ৰুত্তং দ্ৰে-সদ্দং সন্ধাযাহ. তস্স অসঙ্গহিতস্স. যথাদস্সিতস্সাতি ‘‘রূপ’’ন্তিআদিনা দস্সিতপ্পকারস্স. ধম্মন্ৰযঞাণুপ্পাদনং নযদানং. ‘‘রূপং ধম্মাযতন’’ন্তিআদীনং পদানং ৰসেন দ্ৰেৰীসপদিকো এস নযো.

পঞ্চমনযঅসঙ্গহিতেনঅসঙ্গহিতপদৰণ্ণনা নিট্ঠিতা.

৬. ছট্ঠনযো সম্পযোগৰিপ্পযোগপদৰণ্ণনা

২২৮. ‘‘তত্থা’’তি ¶ ইমিনা ‘‘সম্পযোগৰিপ্পযোগপদং ভাজেত্ৰা’’তি এত্থ সম্পযোগৰিপ্পযোগপদং ভাজিতং, সংৰণ্ণেতব্বতায চ পধানভূতং পচ্চামট্ঠং, ন রূপক্খন্ধাদিপদন্তি দস্সেন্তো ‘‘যং লব্ভতি…পে… ৰেদিতব্ব’’ন্তি ৰত্ৰা পুন ‘‘রূপক্খন্ধাদীসু হী’’তিআদিনা তমত্থং ৰিৰরতি. তত্থ ন লব্ভতীতি ‘‘সম্পযুত্তং ৰিপ্পযুত্ত’’ন্তি ৰা গহেতুং ন লব্ভতি, অলব্ভমানম্পি পুচ্ছায গহিতং পটিক্খেপেন ৰিস্সজ্জেতুং. পটিক্খেপোপি হি পুচ্ছায ৰিস্সজ্জনমেৰ. তথা হি যমকে (যম. ১.খন্ধযমক.৫৯-৬১) ‘‘যস্স রূপক্খন্ধো নুপ্পজ্জিত্থ, তস্স ৰেদনাক্খন্ধো নুপ্পজ্জিত্থা’’তি পুচ্ছায ‘‘নত্থী’’তি ৰিস্সজ্জিতং. তেন পনেত্থ রূপধম্মেসু সম্পযোগট্ঠো ন লব্ভতীতি অযমত্থো দস্সিতো হোতি. অলব্ভমানম্পি সম্পযোগপদং গহিতন্তি সম্বন্ধো. সব্বত্থাতি রূপক্খন্ধৰেদনাক্খন্ধাদীসু. এতেসন্তি রূপনিব্বানানং. ৰিসভাগতাতি অতংসভাগতা. একুপ্পাদাদিভাৰো হি সম্পযোগে সভাগতা, ন সঙ্গহে ৰিয সমানসভাগতা, তস্মা একুপ্পাদাদিভাৰরহিতানং রূপনিব্বানানং সা একুপ্পাদাদিতা ৰিসভাগতা ৰুত্তা. তদভাৰতোতি তস্সা ৰিসভাগতায একুপ্পাদাদিতায অভাৰতো. ৰিপ্পযোগোপি নিৰারিতো এৰ হোতি, ৰিসভাগো ভাৰো ৰিপ্পযোগোতি ৰুত্তোৰাযমত্থোতি. ‘‘চতূসু ¶ হী’’তিআদিনা ৰুত্তমেৰত্থং পাকটতরং করোতি. তত্থ তেসং তেহীতি চ অরূপক্খন্ধে এৰ পরামসতি. ৰিসভাগতা চ হোতি রূপনিব্বানেসু অৰিজ্জমানত্তাতি অত্থো. তেনাহ ‘‘ন চ রূপেকদেসস্সা’’তিআদি. তেনেৰাতি চতুক্খন্ধসভাগত্তা এৰ.

তীহি ৰিঞ্ঞাণধাতূহীতি ঘানজিৰ্হাকাযৰিঞ্ঞাণধাতূহি ৰিপ্পযুত্তে অনারম্মণমিস্সকে রূপধম্মমিস্সকে ধম্মে দীপেতি রূপভৰোতি যোজনা. পঞ্চহীতি চক্খুৰিঞ্ঞাণাদীহি পঞ্চহি ৰিঞ্ঞাণধাতূহি. একায মনোধাতুযা. ন সম্পযুত্তেতি ন সম্পযুত্তে এৰ. তথা হি ‘‘ৰিপ্পযুত্তে অহোন্তে সত্তহিপি সম্পযুত্তে সত্তপি ৰা তা’’তি ৰুত্তং. তেনাতি ৰিপ্পযুত্ততাপটিক্খেপেন. তাহীতি সত্তৰিঞ্ঞাণধাতূহি. সম্পযুত্তে দীপেন্তীতি সম্পযুত্তে দীপেন্তিযেৰ, ন সম্পযুত্তে এৰাতি এৰমৰধারণং গহেতব্বং. এস নযো সেসেসুপি. সম্পযুত্তে ৰেদনাদিকে. সম্পযুত্তৰিপ্পযুত্তভাৰেহি নৰত্তব্বং, তংযেৰ ৰিঞ্ঞাণধাতুসত্তকং. সম্পযুত্তভাৰেন নৰত্তব্বানি সম্পযুত্তনৰত্তব্বানি, ভিন্নসন্তানিকানি, নানাক্খণিকানি চ অরূপানিপি ধম্মজাতানি. অনারম্মণমিস্সকসব্বৰিঞ্ঞাণধাতুতংসম্পযুত্তা ধম্মাযতনাদিপদেহি দীপেতব্বা, অনারম্মণমিস্সকসব্বৰিঞ্ঞাণধাতুযো ¶ অচেতসিকাদিপদেহি দীপেতব্বা, তদুভযসমুদাযা দুক্খসচ্চাদিপদেহি দীপেতব্বাতি ৰেদিতব্বা.

যদি এৰন্তি যদি অনারম্মণমিস্সানং ধম্মানং ৰিপ্পযোগো নত্থি. অনারম্মণমিস্সোভযধম্মাতি রূপনিব্বানসহিতসব্বৰিঞ্ঞাণধাতুতংসম্পযুত্তধম্মা. খন্ধাদীহেৰাতি খন্ধাযতনধাতূহি এৰ, ন অরূপক্খন্ধমত্তেন. অরূপক্খন্ধেযেৰ পন সন্ধায ‘‘তেহি ধম্মেহি যে ধম্মা ৰিপ্পযুত্তা’’তি ৰুত্তন্তি নাযং দোসোতি দস্সেতি. তদেকদেসাতি ‘‘অনারম্মণমিস্সা’’তিআদিনা ৰুত্তধম্মসমুদাযস্স একদেসা. তদেকদেসঞ্ঞসমুদাযাতি তস্সেৰ যথাৰুত্তস্স সমুদাযস্স একদেসা হুত্ৰা অঞ্ঞেসং অৰযৰানং রূপক্খন্ধাদীনং সমুদাযভূতা. ৰিভাগাভাৰতোতি ভেদাভাৰতো. ভেদোতি চেত্থ অচ্চন্তভেদো অধিপ্পেতো. ন হি সমুদাযাৰযৰানং সামঞ্ঞৰিসেসানং ৰিয অচ্চন্তভেদো অত্থি ভেদাভেদযুত্তত্তা. তেসং অচ্চন্তভেদমেৰ হি সন্ধায ‘‘সমুদাযন্তোগধানং একদেসানং ন ৰিভাগো অত্থী’’তি সঙ্গহেপি ৰুত্তং. তেনাতি অৰিভাগসব্ভাৰতো সভাগৰিসভাগত্তাভাৰেন. তেসন্তি অনারম্মণমিস্সকসব্বৰিঞ্ঞাণধাতুআদীনং ¶ . তে চ অকুসলাব্যাকতা. তেসন্তি কুসলাকুসলাব্যাকতধম্মানং. তস্মাতি যস্মা ৰিভত্তসভাৰানং ন তেসং সমুদাযেকদেসাদিভাৰো, তস্মা. যস্মা পন কুসলাদযো এৰ খন্ধাদযোতি খন্ধাদিআমসনেন সমুদাযেকদেসাদিভাৰো আপন্নো এৰাতি ৰুত্তনযেন ৰিপ্পযোগাভাৰো হোতি, তস্মা তং পরিহরন্তো ‘‘খন্ধাদীনি অনামসিত্ৰা’’তিআদিমাহ. তেসন্তি কুসলাদীনং. অঞ্ঞমঞ্ঞৰিপ্পযুত্ততা ৰুত্তা ‘‘কুসলেহি ধম্মেহি যে ধম্মা ৰিপ্পযুত্তা’’তিআদিনা. সব্বেসূতি দুতিযাদিসব্বপঞ্হেসু.

ছত্তিংসায পিট্ঠিদুকপদেসু ৰীসতি দুকপদানি ইমস্মিং নযে লব্ভন্তি, অৰসিট্ঠানি সোল়সেৰাতি আহ ‘‘সোল়সাতি ৰত্তব্ব’’ন্তি. ততো এৰ ‘‘তেৰীসপদসত’’ন্তি এত্থ ‘‘তেৰীস’’ন্তি ইদঞ্চ ‘‘একৰীস’’ন্তি ৰত্তব্বন্তি যোজনা. সব্বত্থাতি সব্বপঞ্হেসু. এককালেকসন্তানানং ভিন্নকালভিন্নসন্তানানঞ্চ অনেকেসং ধম্মানং সমুদাযভূতা সঙ্খারক্খন্ধধম্মাযতনধম্মধাতুযোতি আহ ‘‘কালসন্তান…পে… ধাতূন’’ন্তি. একদেসসম্মিস্সাতি চিত্তিদ্ধিপাদাদিনা অত্তনো একদেসেনেৰ খন্ধন্তরাদীহি সম্মিস্সা ইদ্ধিপাদাদযো, অনারম্মণেহি রূপনিব্বানেহি চ অসম্মিস্সা. সমানকালসন্তানেহীতি এককালসন্তানেহি কালসন্তানভেদরহিতেহি একদেসন্তরেহি, সঙ্খারক্খন্ধাদীনং একদেসন্তরেহি, সঙ্খারক্খন্ধাদীনং একদেসৰিসেসভূতেহি ¶ সতিপট্ঠানসম্মপ্পধানসঞ্ঞাক্খন্ধাদীহি ৰিভত্তা এৰ সমুদযসচ্চাদযো সম্পযোগীৰিপ্পযোগীভাৰেন, রূপক্খন্ধাদযো ৰিপ্পযোগীভাৰেন গহিতাতি যোজনা. তেহি সমুদযসচ্চাদীহি. তে সঞ্ঞাক্খন্ধাদযো. কেহিচি সহুপ্পজ্জনারহেহি একদেসন্তরেহি ৰিভত্তেহি. ন হি সঙ্খারক্খন্ধাদিপরিযাপন্নত্তেপি সমুদযসচ্চাদযো মগ্গসচ্চাদীহি সম্পযোগং লভন্তি. তেসন্তি ৰেদনাক্খন্ধসঞ্ঞাক্খন্ধাদীনং. একুপ্পাদা…পে… ৰিসভাগতা চাতি একুপ্পাদাদিতাসঙ্খাতা যথারহং সভাগতা ৰিসভাগতা চ. তেন যথাৰুত্তকারণেন সম্পযোগস্স ৰিপ্পযোগস্স চ লভনতো.

ভিন্নকালানং সমুদাযীনং সমুদাযা ভিন্নকালসমুদাযা. ৰত্তমানা চ একস্মিং সন্তানে একেকধম্মা ৰত্তন্তি. তস্মাতি যস্মা এতদেৰ, তস্মা. তেসং ৰেদনাক্খন্ধাদীনং ৰিভজিতব্বস্স একদেসভূতস্স অভাৰতো. সুখিন্দ্রিযাদীনি ৰেদনাক্খন্ধেকদেসভূতানিপি. তেন ৰিভাগাকরণেন ¶ . যদি সমানকালস্স ৰিভজিতব্বস্স অভাৰতো চক্খুৰিঞ্ঞাণধাতাদযো ৰিঞ্ঞাণক্খন্ধস্স ৰিভাগং ন করোন্তি, অথ কস্মা ‘‘চক্খুৰিঞ্ঞাণধাতু…পে… মনোৰিঞ্ঞাণধাতু সোল়সহি ধাতূহি ৰিপ্পযুত্তা’’তি ৰুত্তন্তি চোদনং মনসি কত্ৰা আহ ‘‘খন্ধাযতন…পে… ৰিপ্পযুত্তাতি ৰুত্ত’’ন্তি. এৰমেৰন্তি যথা ধাতুৰিভাগেন ৰিভত্তস্স ৰিঞ্ঞাণস্স, এৰমেৰং.

২৩৫. তংসম্পযোগীভাৰন্তি তেহি খন্ধেহি সম্পযোগীভাৰং. যথা হি সমানকালসন্তানেহি একচিত্তুপ্পাদগতেহি ৰেদনাসঞ্ঞাৰিঞ্ঞাণক্খন্ধেহি সমুদযসচ্চস্স সম্পযুত্ততা, এৰং ভিন্নসন্তানেহি ভিন্নকালেহি চ তেহি তস্স ৰিপ্পযুত্ততাতি আহ ‘‘এৰং তংৰিপ্পযোগীভাৰং…পে… ন ৰুত্ত’’ন্তি. ৰিসভাগতানিবন্ধস্স ৰিভাগস্স অভাৰেন অৰিভাগেহি তেহি তীহি খন্ধেহি. ৰিভাগে হীতিআদিনা তমেৰত্থং পাকটতরং করোতি. ৰিভাগরহিতেহীতি সমানকালসন্তানেহি একচিত্তুপ্পাদগতত্তা অৰিভত্তেহি ৰেদনাক্খন্ধাদীহি ন যুত্তং ৰিপ্পযুত্তন্তি ৰত্তুং. তেনাহ ‘‘ৰিজ্জমানেহি…পে… ভাৰতো’’তি. তত্থ ৰিজ্জমানস্স সমানস্স সমানজাতিকস্সাতি অধিপ্পাযো. ন হি ৰিজ্জমানং রূপারূপং অঞ্ঞমঞ্ঞস্স ৰিসভাগং ন হোতি. অনুপ্পন্না ধম্মা ৰিযাতি ইদং ৰিসদিসুদাহরণদস্সনং. যথা ‘‘অনুপ্পন্না ধম্মা’’তি অনাগতকালং ৰুচ্চতীতি আমট্ঠকালভেদং, এৰং যং আমট্ঠকালভেদং ন হোতীতি অত্থো. উদ্ধরিতব্বং দেসনায দেসেতব্বন্তি ৰুত্তং হোতি. ৰিজ্জমানস্সেৰ ৰিজ্জমানেন সম্পযোগো, সম্পযোগারহস্সেৰ ¶ চ ৰিপ্পযোগোতি অত্থিভাৰসন্নিস্সযা সম্পযুত্তৰিপ্পযুত্ততাতি আহ ‘‘পচ্চুপ্পন্নভাৰং নিস্সাযা’’তি. তেনেৰাহ ‘‘অৰিজ্জমানস্সা’’তিআদি. তঞ্চাতি উদ্ধরণং.

ৰিভাগরহিতেহীতি ৰিসভাগতাভাৰতো অৰিভাগেহি. অনামট্ঠকালভেদেতি অনামট্ঠকালৰিসেসে. অৰিজ্জমানস্স…পে… সম্পযোগো নত্থীতি এতেন পারিসেসতো ৰিজ্জমানস্স চ ৰিজ্জমানেন সম্পযোগো দস্সিতো. অৰিজ্জমানতাদীপকে ভেদে গহিতেতি যথাগহিতেসু ধম্মেসু তেহি ৰিপ্পযোগীনং অৰিজ্জমানভাৰদীপকে তেসংযেৰ ৰিসেসে ‘‘অরূপভৰো একেন খন্ধেন দসহাযতনেহি সোল়সহি ধাতূহি ৰিপ্পযুত্তো’’তিআদিনা (ধাতু. ২৪৬) গহিতে তেনেৰ রুপ্পনাদিনা ভেদেন তেসং ¶ অঞ্ঞমঞ্ঞং ৰিসভাগতাপি গহিতা এৰাতি ৰিপ্পযোগো হোতীতি যোজনা. ভেদে পন অগ্গহিতে তেন তেন গহণেনাতি যথাৰুত্তে অৰিজ্জমানতাদীপকে ৰিসেসে, ৰিসভাগে ৰা অগ্গহিতে ‘‘ৰেদনা, সঞ্ঞা, সঙ্খারক্খন্ধো তীহি খন্ধেহি একেনাযতনেন সত্তহি ধাতূহি সম্পযুত্তো’’তিআদিনা তেন তেন গহণেন সভাগতাদীপনেন ৰিসভাগতায অগ্গহিতত্তা সভাগতাৰ হোতি. তথা চ সতি সভাগত্তে কা পনেত্থ সভাগতাতি আহ ‘‘ৰিজ্জমানতায…পে… হোতী’’তি. তস্সাতি সভাগতায. তস্মাতি ৰিসভাগতায অলব্ভমানত্তা, সভাগতায চ লব্ভমানত্তা.

২৬২. ৰিতক্কো ৰিযাতি সৰিতক্কসৰিচারেসু চিত্তুপ্পাদেসু ৰিতক্কো ৰিয. সো হি ৰিতক্করহিতত্তা অৰিতক্কো ৰিচারমত্তো চ. তেনাহ ‘‘কোট্ঠাসন্তরচিত্তুপ্পাদেসু অলীনা’’তি. ততো এৰ সো অপ্পধানো, দুতিযঝানধম্মা এৰেত্থ পধানাতি আহ ‘‘যে পধানা’’তি. তেনেৰাতি সৰিতক্কসৰিচারেসু চিত্তুপ্পাদেসু ৰিতক্কস্স অৰিতক্কৰিচারমত্তগ্গহণেন ইধ অগ্গহিতত্তা, ৰিতক্কত্তিকে দুতিযরাসিযেৰ চ অধিপ্পেতত্তা. অনন্তরনযেতি সম্পযুত্তেনৰিপ্পযুত্তপদনিদ্দেসে. সমুদযসচ্চেন সমানগতিকা সদিসপ্পৰত্তিকা. ইতীতি ইমিনা কারণেন. তে অৰিতক্কৰিচারমত্তা ধম্মা ন গহিতা, সমুদযসচ্চং ৰিয ন দেসনারুল়্হা. ন সৰিতক্কসৰিচারেহি সমানগতিকাতি যোজনা. যদি হি তে সৰিতক্কসৰিচারেহি সমানগতিকা সিযুং, ‘‘অৰিতক্কৰিচারমত্তেহি ধম্মেহি যে ধম্মা সম্পযুত্তা, তেহি ধম্মেহি যে ধম্মা ৰিপ্পযুত্তা, তে ধম্মা ন কেহিচি খন্ধেহি, ন কেহিচি আযতনেহি, একায ধাতুযা ৰিপ্পযুত্তা’’তি ৰত্তব্বা সিযুং. যস্মা পন তে সমুদযসচ্চেন সমানগতিকা. যথা হি যে সমুদযসচ্চেন সম্পযুত্তেহি ৰিপ্পযুত্তা, তেসং কেহিচি ৰিপ্পযোগং ৰত্তুং ন সক্কা, এৰং তেহিপি ¶ . তথা হি ৰক্খতি ‘‘সমুদযসচ্চাদীনী’’তিআদি. দসমো…পে… ৰুত্তোতি এত্থ দসমনযে তেহি অৰিতক্কৰিচারমত্তেহি ৰিপ্পযুত্তেহি ৰিপ্পযুত্তানং সোল়সহি ধাতূহি ৰিপ্পযোগো ৰুত্তো, ওসাননযে তেহি ৰিপ্পযুত্তানং অট্ঠারসহি ধাতূহি সঙ্গহো চ ৰুত্তোতি তস্মা ন তে সৰিতক্কসৰিচারেহি সমানগতিকাতি দস্সেতি.

ৰিতক্কসহিতেসূতি ¶ সহৰিতক্কেসু. তেসূতি অৰিতক্কৰিচারমত্তেসু সহ ৰিতক্কেন দুতিযজ্ঝানধম্মেসু, ‘‘অৰিতক্কৰিচারমত্তা’’তি গহিতেসু ৰুত্তেসূতি অত্থো. সব্বেপি তেতি দুতিযজ্ঝানধম্মা ৰিতক্কো চাতি সব্বেপি তে ধম্মা সক্কা ৰত্তুং. তথা হি সম্পযোগৰিপ্পযোগপদনিদ্দেসে ‘‘অৰিতক্কৰিচারমত্তা ধম্মা একেন খন্ধেন একেনাযতনেন একায ধাতুযা কেহিচি সম্পযুত্তা’’তি ৰুত্তং. তত্থ একেন খন্ধেনাতি সঙ্খারক্খন্ধেন. সো হি সমুদাযোতি ‘‘অৰিতক্কৰিচারমত্তা ধম্মা’’তি ৰুত্তধম্মসমুদাযো. ননু ৰিতক্কোপেত্থ ধম্মসঙ্গহং গতো, সো চ ৰিচারতো অঞ্ঞেনপি সম্পযুত্তোতি চোদনং সন্ধাযাহ ‘‘ন হি তদেকদেসস্স…পে… হোতী’’তি. যথাতিআদিনা তমেৰত্থং ইদ্ধিপাদনিদস্সনেন ৰিভাৰেতি. তস্সত্থো – যথা ইদ্ধিপাদসমুদাযস্স একদেসভূতানং ছন্দিদ্ধিপাদাদীনং তীহি খন্ধেহি সম্পযোগো ৰুত্তো, তংসমুদাযস্স ন হোতি, এৰং ইধাপি ৰিতক্কস্স অঞ্ঞেহি সম্পযোগো অৰিতক্কৰিচারমত্তস্স সমুদাযস্স ন হোতীতি.

যদি এৰং ‘‘ইদ্ধিপাদো দ্ৰীহি খন্ধেহি সম্পযুত্তো’’তিআদি ন ৰত্তব্বন্তি চে? নো ন ৰত্তব্বন্তি দস্সেন্তো ‘‘যথা পনা’’তিআদিমাহ. তত্থ তেসূতি ইদ্ধিপাদেসু. সমুদাযস্সাতি ইদ্ধিপাদসমুদাযস্স. তেহি ৰেদনাক্খন্ধাদীহি সম্পযুত্ততা ৰুত্তা ‘‘ইদ্ধিপাদো দ্ৰীহি খন্ধেহি সম্পযুত্তো’’তিআদিনা. তেনাতি ৰিচারেন. ন হীতিআদিনা যথাধিগতধম্মানং সম্পযুত্ততায নৰত্তব্বাভাৰং উদাহরণদস্সনৰসেন ৰিভাৰেতি. কেচি ৰিচিকিচ্ছা তংসহগতা চ মোহৰজ্জা মোহেন সম্পযুত্তা, কেচি অসম্পযুত্তা. মোহেনাতি ৰিচিকিচ্ছাসহগতমোহমেৰ সন্ধায ৰদতি. ইতি ইমিনা কারণেন ন সমুদাযো তেন মোহেন সম্পযুত্তো. অঞ্ঞো কোচি ধম্মো হেতুভাৰো নাপি অত্থি, যেন হেতুনা সো দস্সনেনপহাতব্বহেতুকোতি ৰুত্তো সমুদাযো. এৰন্তি ইমিনা নযেন ‘‘ভাৰনা…পে… যোপি সম্পযুত্তা’’তি নৰত্তব্বতায নিদস্সেতব্বাতি অত্থো. এৰন্তি যথা দস্সনেনপহাতব্বহেতুকসমুদাযস্স সম্পযুত্ততা ন ৰত্তব্বা, এৰং যেন ধম্মেন অৰিতক্ক…পে… সিযা, তং ন নত্থি. তস্মাতি যস্মা অৰিতক্কৰিচারমত্তেসু কোচিপি ৰিচারেন ¶ অসম্পযুত্তো নত্থি, তস্মা. তেতি অৰিতক্কৰিচারমত্তা ¶ ধম্মা. একধম্মেপি…পে… কতো যথা ‘‘অপ্পচ্চযা ধম্মা অসঙ্খতা ধম্মা’’তি.

ছট্ঠনযসম্পযোগৰিপ্পযোগপদৰণ্ণনা নিট্ঠিতা.

৭. সত্তমনযো সম্পযুত্তেনৰিপ্পযুত্তপদৰণ্ণনা

৩০৬. তেহি সমুদযসচ্চাদীহি খন্ধত্তযখন্ধেকদেসাদিকে সম্পযুত্তে সতিপি, সম্পযুত্তেহি চ ৰিপ্পযুত্তে রূপনিব্বানাদিকে তদঞ্ঞধম্মে সতিপি ৰিপ্পযোগাভাৰতো. সঙ্খেপেন ৰুত্তমত্থং ৰিত্থারেন দস্সেতুং ‘‘ন হী’’তিআদি ৰুত্তং. ততো লোভসহগতচিত্তুপ্পাদতো অঞ্ঞধম্মানং অৰসিট্ঠানং কুসলাকুসলাব্যাকতধম্মানং খন্ধাদীসু কেনচি ৰিপ্পযোগো ন হি অত্থি খন্ধপঞ্চকাদীনং সঙ্গণ্হনতো তেসং. তে এৰ চিত্তুপ্পাদাতি তে লোভসহগতচিত্তুপ্পাদা এৰ. তদঞ্ঞধম্মানন্তি তদঞ্ঞধম্মানম্পীতি পি-সদ্দলোপো দট্ঠব্বো. তথাতি ইমিনা ন চ তে এৰ ধম্মা অড্ঢদুতিযাযতনধাতুযো, অথ খো তে চ ততো অঞ্ঞে চাতি ইমমত্থং উপসংহরতি.

ননু তদঞ্ঞভাৰতো এৰ তেহি ইতরেসং ৰিপ্পযোগো সিদ্ধোতি আহ ‘‘ন চা’’তিআদি. তদঞ্ঞসমুদাযেহীতি ততো লোভসহগতচিত্তুপ্পাদতো অঞ্ঞসমুদাযেহি অঞ্ঞে লোভসহগতা ধম্মা ৰিপ্পযুত্তা ন হোন্তি. কস্মা? সমুদাযে…পে… ৰিপ্পযোগাভাৰতো. তস্সত্থো – সমুদাযেন লোভসহগততদঞ্ঞধম্মরাসিনা একদেসানং লোভসহগতধম্মানং ৰিপ্পযোগাভাৰতো, তথা যে একদেসা হুত্ৰা অঞ্ঞেসং অৰযৰানং সমুদাযভূতা, তেসঞ্চ সমুদাযেন ৰিপ্পযোগাভাৰতোতি. অনেন সমুদাযেন অৰযৰস্স সমুদাযস্স অৰযৰেন চ তস্স ন ৰিপ্পযোগো, অৰযৰস্সেৰ পন অৰযৰেনাতি দস্সেতি. এস নযোতি য্ৰাযং সমুদযসচ্চে ৰুত্তো ৰিধি, এসেৰ মগ্গসচ্চসুখিন্দ্রিযাদীসু অরূপক্খন্ধেকদেসত্তা তেসন্তি দস্সেতি. নিরৰসেসেসূতি অবহিকতৰিতক্কেসু. ৰিতক্কো হি সমুদাযতো অবহিকতো. ‘‘সো হি সমুদাযো’’তিআদিকো ৰুত্তনযো লব্ভতীতি আহ ‘‘অগ্গহণে কারণং ন দিস্সতী’’তি.

অঞ্ঞেসুপি ¶ ¶ সমুদযসচ্চাদীসু ৰিস্সজ্জনস্স…পে… দট্ঠব্বং, যতো সমুদযসচ্চাদি ইধ ন গহিতন্তি অধিপ্পাযো. সম্পযুত্তাধিকারতো ‘‘অঞ্ঞেনা’’তি পদং সম্পযুত্ততো অঞ্ঞং ৰদতীতি আহ ‘‘অসম্পযুত্তেন অসম্মিস্সন্তি অত্থো’’তি. ইদানি ব্যতিরেকেনপি তমত্থং পতিট্ঠাপেতুং ‘‘অদুক্খমসুখা…পে… গহিতানী’’তি ৰুত্তং. এতেন লক্খণেনাতি ‘‘অসম্পযুত্তেন অসম্মিস্স’’ন্তি ৰুত্তলক্খণেন. চিত্তন্তি ‘‘চিত্তেহি ধম্মেহি যে ধম্মা’’তি পঞ্হং উপলক্খেতি. সহযুত্তপদেহি সত্তাতি ‘‘চেতসিকেহি ধম্মেহি যে ধম্মা’’তিআদিনা চিত্তেন সহযুত্তে ধম্মে দীপেন্তেহি পদেহি আগতা সত্ত পঞ্হা. তিণ্ণং তিকপদানমগ্গহণেন ঊনোতি কত্ৰা. যে সন্ধায ‘‘তিকে তযো’’তি ৰুত্তং. তং পন ৰেদনাপীতিত্তিকেসু পচ্ছিমং, ৰিতক্কত্তিকে পঠমন্তি পদত্তযং ৰেদিতব্বং.

৩০৯. উদ্ধটপদেন পকাসিযমানা অত্থা অভেদোপচারেন ‘‘উদ্ধটপদ’’ন্তি ৰুত্তাতি আহ ‘‘উদ্ধটপদেন সম্পযুত্তেহী’’তি. তেন চ যথাৰুত্তেন উদ্ধটপদেন. মনেন যুত্তাতি এত্থ মননমত্তত্তা মনোধাতু ‘‘মনো’’তি ৰুত্তাতি আহ ‘‘মনোধাতুযা একন্তসম্পযুত্তা’’তি.

সত্তমনযসম্পযুত্তেনৰিপ্পযুত্তপদৰণ্ণনা নিট্ঠিতা.

৮. অট্ঠমনযো ৰিপ্পযুত্তেনসম্পযুত্তপদৰণ্ণনা

৩১৭. রূপক্খন্ধেন ৰিপ্পযুত্তা নাম চত্তারো অরূপিনো খন্ধা, তেসং অঞ্ঞেহি সম্পযোগো নাম নত্থি তাদিসস্স অঞ্ঞস্স সম্পযোগিনো অভাৰতো. সমুদাযস্স চ একদেসেন সম্পযোগো নত্থীতি ৰুত্তোৰাযমত্থো. ৰেদনাক্খন্ধাদীহি ৰিপ্পযুত্তং রূপং নিব্বানঞ্চ, তস্স কেনচি সম্পযোগো নত্থেৰাতি আহ ‘‘রূপক্খন্ধাদীহি…পে… নত্থী’’তি. তেনাতি ‘‘রূপক্খন্ধেন যে ধম্মা ৰিপ্পযুত্তা’’তিআদিৰচনেন.

অট্ঠমনযৰিপ্পযুত্তেনসম্পযুত্তপদৰণ্ণনা নিট্ঠিতা.

৯. নৰমনযো সম্পযুত্তেনসম্পযুত্তপদৰণ্ণনা

৩১৯. ‘‘সমাসপদং ¶ ¶ ইদ’’ন্তি ৰত্ৰা অযং নাম সমাসোতি দস্সেন্তো ‘‘যস্স খন্ধাদিনো’’তিআদিমাহ, যস্স ৰেদনাক্খন্ধাদিনোতি অত্থো. যং ইধ সম্পযুত্তং ৰুত্তন্তি ইমস্মিং নৰমনযে যং ধম্মজাতং সম্পযুত্তন্তি ৰুত্তং. রূপক্খন্ধাদীসু অরণন্তেসু অব্ভন্তরবাহিরমাতিকাধম্মেসূতি নিদ্ধারণে ভুম্মং. তঞ্হি ধম্মজাতং অত্তনা সম্পযুত্তেন ৰেদনাক্খন্ধাদিনা সযং সম্পযুত্তন্তি নিদ্ধারিতং. অযোগোতি অসম্পযোগো. ৰক্খতি দসমনযে. তত্থ হি ‘‘রূপক্খন্ধেন ৰেদনাদযো ৰিপ্পযুত্তা, তেহি রূপক্খন্ধো ৰিপ্পযুত্তো’’তি ৰত্ৰা নিব্বানং কথন্তি চোদনং সন্ধাযাহ ‘‘নিব্বানং পন সুখুমরূপগতিকমেৰা’’তি ৰুত্তং. ‘‘মনাযতনং একেনাযতনেন একায ধাতুযা কেহিচি ৰিপ্পযুত্ত’’ন্তি এত্থ হি যথা সুখুমরূপং ৰিয সরূপতো অনুদ্ধটম্পি নিব্বানং কেহিচীতিপদেন গহিতমেৰ হোতীতি এদিসেসু ঠানেসু নিব্বানং সুখুমরূপগতিকন্তি ৰিঞ্ঞাযতি, এৰমিধাপি ‘‘রূপমিস্সকেহি ৰা’’তি এতেন অনুপাদিন্নঅনুপাদানিযাদীহি নিব্বানমিস্সকেহিপি অসম্পযোগো ৰুত্তো হোতীতি দট্ঠব্বো. অৰিকলচতুক্খন্ধসঙ্গাহকেহি পদেহি সহৰত্তিনো অঞ্ঞস্স সম্পযোগিনো অভাৰতো অতীতানাগতেহি চ সম্পযোগো নত্থেৰাতি তস্স অযুজ্জমানতং দস্সেন্তো ‘‘ৰত্তমানানমেৰ…পে… অরূপভৰাদীহীতি অত্থো’’তি আহ. ইতরেতি যে সম্পযোগং লভন্তি, কে পন তে রূপেন অসম্মিস্সা অরূপেকদেসভূতা. তেনাহ ‘‘ৰেদনাক্খন্ধাদযো’’তি.

নৰমনযসম্পযুত্তেনসম্পযুত্তপদৰণ্ণনা নিট্ঠিতা.

১০. দসমনযো ৰিপ্পযুত্তেনৰিপ্পযুত্তপদৰণ্ণনা

৩৫৩. যে ৰিপ্পযুত্তেন ৰিপ্পযুত্তভাৰেন পাল়িযং অগ্গহিতা, তেসু কেচি ৰিপ্পযুত্তস্স ধম্মন্তরস্স অভাৰতো কেচি খন্ধাদীহি ৰিপ্পযোগস্সেৰ অসম্ভৰতোতি ইমমত্থং দস্সেন্তো ‘‘ধম্মাযতনাদিধম্মা’’তিআদিমাহ. তত্থ সব্বচিত্তুপ্পাদগতধম্মভাৰতোতি ইমিনা ভিন্নকালতাদিৰিসেসৰতো অরূপক্খন্ধস্স ৰিপ্পযুত্তস্স ধম্মন্তরস্স অভাৰমাহ, অনারম্মণমিস্সকভাৰতোতি ইমিনা পন সব্বস্সপি. কামভৰো ¶ উপপত্তিভৰো সঞ্ঞীভৰো পঞ্চৰোকারভৰোতি ¶ ইমে চত্তারো মহাভৰা. ৰিপ্পযোগাভাৰতোতি ৰিপ্পযোগাসম্ভৰতো. ন হি যে দুক্খসচ্চাদীহি ৰিপ্পযুত্তা, তেহি ৰিপ্পযুত্তানং তেসংযেৰ দুক্খসচ্চাদীনং খন্ধাদীসু কেনচি ৰিপ্পযোগো সম্ভৰতি.

দসমনযৰিপ্পযুত্তেনৰিপ্পযুত্তপদৰণ্ণনা নিট্ঠিতা.

১১. একাদসমনযো সঙ্গহিতেনসম্পযুত্তৰিপ্পযুত্তপদৰণ্ণনা

৪০৯. তেতি সঙ্খারক্খন্ধধম্মা. সেসেহীতি অৰসিট্ঠেহি ৰেদনাসঞ্ঞাৰিঞ্ঞাণক্খন্ধেহি. ‘‘এতেন সহ সম্বন্ধো’’তি ইমিনা পদানং সম্বন্ধদস্সনমুখেন ‘‘সমুদযসচ্চেন যে ধম্মা সম্পযুত্তা’’তি পাল়িযা অত্থৰিৰরণং পাকটতরং কত্ৰা কেহিচীতিপদস্সত্থং কাতুং ‘‘কেহিচীতি এতস্স পনা’’তিআদিমাহ. অত্থং দস্সেতুং আহাতি সম্বন্ধো. ৰিসেসেত্ৰাতি এত্থ তেসং ধম্মানং তণ্হাৰজ্জানং সঙ্খারক্খন্ধধম্মাযতনধম্মধাতুপরিযাপন্নতাকিত্তনং ৰিসেসনং দট্ঠব্বং, যতো তে সমুদযসচ্চেন খন্ধাদিসঙ্গহেন সঙ্গহিতাতি ৰুত্তা. সযং অত্তনা সম্পযুত্তো ন হোতীতি ৰুত্তং ‘‘অত্তৰজ্জেহী’’তি. তেন ৰুত্তং ‘‘চিত্তং ন ৰত্তব্বং চিত্তেন সম্পযুত্তন্তিপি, চিত্তেন ৰিপ্পযুত্তন্তিপী’’তি. সম্পযোগারহেহীতি ৰিসেসনং সুখুমরূপং নিব্বানন্তি দ্ৰে সন্ধায কতং, ন তণ্হাদিকে.

একাদসমনযসঙ্গহিতেনসম্পযুত্তৰিপ্পযুত্তপদৰণ্ণনা নিট্ঠিতা.

১২. দ্ৰাদসমনযো সম্পযুত্তেনসঙ্গহিতাসঙ্গহিতপদৰণ্ণনা

৪১৭. নৰমনযে সম্পযোগৰিসিট্ঠা সম্পযুত্তা উদ্ধটা, দ্ৰাদসমনযে চ সম্পযোগৰিসিট্ঠা সঙ্গহিতাসঙ্গহিতাতি উভযত্থাপি সম্পযোগৰিসিট্ঠাৰ গহিতাতি আহ ‘‘দ্ৰাদসম…পে… লব্ভন্তী’’তি.

দ্ৰাদসমনযসম্পযুত্তেনসঙ্গহিতাসঙ্গহিতপদৰণ্ণনা নিট্ঠিতা.

১৩. তেরসমনযো অসঙ্গহিতেনসম্পযুত্তৰিপ্পযুত্তপদৰণ্ণনা

৪৪৮. যেহীতি ¶ ¶ রূপক্খন্ধধম্মাযতনাদীহি. তীহিপি খন্ধাযতনাদিসঙ্গহেহি. পুন যেহীতি অরূপভৰাদীহি. ওল়ারিকাযতনানেৰ হোন্তি আযতনধাতুসঙ্গহেহিপি অসঙ্গহিতত্তা. তেতি চতুৰোকারভৰাদযো. ৰুত্তাৰসেসাতি রূপক্খন্ধধম্মাযতনাদীহি অৰসিট্ঠা. সতিপি অসঙ্গাহকত্তে তেহি অসঙ্গহিতানং সম্পযোগো ন সম্ভৰতীতি ৰেদনাক্খন্ধাদযো ইধ তেরসমনযে ৰিস্সজ্জনং ন রুহন্তি নারোহন্তি. তেনাহ অট্ঠকথাযং ‘‘ৰেদনাক্খন্ধেন হি খন্ধাদিৰসেন রূপারূপধম্মা অসঙ্গহিতা হোন্তি, তেসঞ্চ সম্পযোগো নাম নত্থী’’তি (ধাতু. ৪৪৮) অসঙ্গাহকা এৰ ন হোন্তি অৰিকলপঞ্চক্খন্ধাদিসমুদাযভাৰতো.

তেতি ‘‘দুক্খসচ্চাদী’’তি আদি-সদ্দেন ৰুত্তধম্মা. অসব্ব…পে… সিযুং অৰিতক্কাৰিচারাদিধম্মা ৰিয. ন তেসং ৰিপ্পযোগো নত্থি তব্বিনিমুত্তস্স চিত্তুপ্পাদস্স সম্ভৰতো. ৰেদনাক্খন্ধেন অসঙ্গহিতানং অনারম্মণমিস্সকত্তা ন ‘‘ৰিপ্পযোগস্স অত্থিতাযা’’তি ৰুত্তং. তথা চাহ ‘‘রূপারূপধম্মা অসঙ্গহিতা’’তি. উভযাভাৰতোতি সম্পযোগৰিপ্পযোগাভাৰতো. অনারম্মণসহিতসব্বৰিঞ্ঞাণতংধাতুসম্পযুত্ততদুভযধম্মা অচেতসিকচেতসিকলোকিযপদাদীনং ৰসেন ৰেদিতব্বা.

তেরসমনযঅসঙ্গহিতেনসম্পযুত্তৰিপ্পযুত্তপদৰণ্ণনা নিট্ঠিতা.

১৪. চুদ্দসমনযো ৰিপ্পযুত্তেনসঙ্গহিতাসঙ্গহিতপদৰণ্ণনা

৪৫৬. ধম্মসভাৰমত্তত্তাতি সভাৰধম্মানং ধম্মমত্তত্তা অৰত্থাৰিসেসমত্তত্তা.

সমুচ্ছিজ্জতি এতেনাতি সমুচ্ছেদো. সঙ্গহাদিৰিচারপরিনিট্ঠানভূতো চুদ্দসমনযো. তেনাহ ‘‘পরিযোসানে নযে’’তি. ৰিস্সজ্জেতব্বধম্মৰিৰিত্তা পুচ্ছা মোঘপুচ্ছা, সা তথাভূতাপি ৰিস্সজ্জেতব্বধম্মাভাৰস্স ঞাপিকা হোতীতি আহ ‘‘তেসং পুচ্ছায মোঘত্তা তে ন লব্ভন্তী’’তি. মোঘা পুচ্ছা এতস্সাতি মোঘপুচ্ছকো. অট্ঠমো নযো ¶ তত্থ সব্বপুচ্ছানং মোঘত্তা ¶ . তেন চ সহাতি তেন অট্ঠমনযেন সদ্ধিং ইমস্মিং ওসাননযে অট্ঠমনযে চ ওসাননযে চ এতে ধম্মাযতনাদযো সব্বপ্পকারেন ন লব্ভন্তি. ৰিপ্পযোগস্সপি অভাৰাতি তত্থ কারণমাহ.

চুদ্দসমনযৰিপ্পযুত্তেনসঙ্গহিতাসঙ্গহিতপদৰণ্ণনা নিট্ঠিতা.

ধাতুকথাপকরণ-অনুটীকা সমত্তা.

পুগ্গলপঞ্ঞত্তিপকরণ-অনুটীকা

১. মাতিকাৰণ্ণনা

১. ‘‘ধাতুকথং ¶ ¶ দেসযিত্ৰা অনন্তরং তস্স আহ পুগ্গলপঞ্ঞত্তি’’ন্তি ৰুত্তে তত্থ কারণং সমুদাগমতো পট্ঠায ৰিভাৰেন্তো ‘‘ধম্মসঙ্গহে’’তিআদিমাহ. তত্থ যদিপি ধম্মসঙ্গহে ফস্সাদীনং পথৰীআদীনঞ্চ ধম্মানং নানানযৰিচিত্তো অনুপদৰিভাগোপি কতো, ন সঙ্গহো এৰ, সো পন তেসং কুসলত্তিকাদিহেতুদুকাদিতিকদুকেহি সঙ্গহসন্দস্সনত্থোতি ৰুত্তং ‘‘ধম্মসঙ্গহে তিকদুকাদিৰসেন সঙ্গহিতানং ধম্মান’’ন্তি. তেনেৰ হি তং পকরণং ‘‘ধম্মসঙ্গহো’’তি সমঞ্ঞং লভি. কামঞ্চ ধম্মসঙ্গহেপি ‘‘তস্মিং খো পন সমযে চত্তারো খন্ধা হোন্তী’’তিআদিনা (ধ. স. ৫৮) খন্ধাদিৰিভাগো দস্সিতো, সো পন ন তথা সাতিসযো, যথা ৰিভঙ্গপকরণেতি সাতিসযং তং গহেত্ৰা আহ ‘‘ৰিভঙ্গে খন্ধাদিৰিভাগং দস্সেত্ৰা’’তি, যতো তং ‘‘ৰিভঙ্গো’’ত্ৰেৰ পঞ্ঞাযিত্থ. ধাতুকথাযাতি আধারে ভুম্মং, তথা ‘‘ধম্মসঙ্গহে ৰিভঙ্গে’’তি এত্থাপি. আধারো হি সঙ্গহণৰিভজনপ্পভেদৰচনসঙ্খাতানং ¶ অৰযৰকিরিযানং তংসমুদাযভূতানি পকরণানি যথা ‘‘রুক্খে সাখা’’তি. করণৰচনং ৰা এতং, ধাতুকথায করণভূতাযাতি অত্থো.

এত্থ চ অভিঞ্ঞেয্যধম্মে দেসেন্তো দেসনাকুসলো ভগৰা তিকদুকৰসেন তাৰ নেসং সঙ্গহং দস্সেন্তো ধম্মসঙ্গণিং দেসেত্ৰা সঙ্গহপুব্বকত্তা ৰিভাগস্স তদনন্তরং খন্ধাদিৰসেন ৰিভাগং দস্সেন্তো ৰিভঙ্গং দেসেসি. পুন যথাৰুত্তৰিভাগসঙ্গহযুত্তে ধম্মে সঙ্গহাসঙ্গহাদিনযপ্পভেদতো দস্সেন্তো ধাতুকথং দেসেসি তস্সা অব্ভন্তরবাহিরমাতিকাসরীরকত্তা. ন হি সক্কা খন্ধাদিকে কুসলাদিকে চ ৰিনা সঙ্গহাসঙ্গহাদিনযং নেতুন্তি. তেনাহ ‘‘তথাসঙ্গহিতৰিভত্তান’’ন্তি. এৰং সঙ্গহতো ৰিভাগতো পভেদতো চ ধম্মানং দেসনা যস্সা ¶ পঞ্ঞত্তিযা ৰসেন হোতি, যো চাযং যথাৰুত্তধম্মুপাদানো পুগ্গলৰোহারো, তস্স চ সমযৰিমুত্তাদিৰসেন ৰিভাগো, তং সব্বং ৰিভাৰেতুং পুগ্গলপঞ্ঞত্তি দেসিতাতি ইদমেতেসং চতুন্নং পকরণানং দেসনানুক্কমকারণং দট্ঠব্বং.

তেসন্তি ধম্মানং. সভাৰতোতি ‘‘ফস্সো ৰেদনা’’তিআদিসভাৰতো. উপাদাযাতি ‘‘পুগ্গলো সত্তো পোসো’’তিআদিনা খন্ধে উপাদায. পঞ্ঞাপনং যায তজ্জাউপাদাদিভেদায পঞ্ঞত্তিযা হোতি, তং পঞ্ঞত্তিং. পভেদতোতি খন্ধাদিসমযৰিমুত্তাদিৰিভাগতো. যায পঞ্ঞত্তিযা সভাৰতো উপাদায চ পঞ্ঞাপনন্তি সঙ্খেপতো ৰুত্তমত্থং ৰিৰরন্তো ‘‘তত্থ যে ধম্মে’’তিআদিমাহ. তত্থ অসভাৰপঞ্ঞত্তিযাপি মূলভূতং উপাদানং সভাৰধম্মো এৰ, কেৰলং পন তেসং পৰত্তিআকারভেদসন্নিস্সযতো ৰিসেসোতি দস্সেন্তো ‘‘যে ধম্মে…পে… হোতী’’তি আহ. তত্থ পুব্বাপরিযভাৰেন পৰত্তমানেতি ইমিনা পবন্ধসন্নিস্সযতং দস্সেন্তো সন্তানপঞ্ঞত্তিং ৰদতি, অসভাৰসমূহৰসেনাতি ইমিনা সেসপঞ্ঞত্তিং. তিস্সো হি পঞ্ঞত্তিযো সন্তানপঞ্ঞত্তি সমূহপঞ্ঞত্তি অৰত্থাৰিসেসপঞ্ঞত্তীতি. তত্থ পবন্ধো সন্তানো. সমুদাযো সমূহো. উপ্পাদাদিকো দহরভাৰাদিকো চ অৰত্থাৰিসেসো. তেসু অসভাৰগ্গহণেন ৰিনা পবন্ধসমূহানং অসভাৰত্তে সিদ্ধে অসভাৰসমূহৰসেনাতি অসভাৰগ্গহণং পবন্ধসমূহৰিনিমুত্তপঞ্ঞত্তিসন্দস্সনত্থন্তি তেন অৰত্থাৰিসেসপঞ্ঞত্তিযা পরিগ্গহো ৰুত্তোতি ৰেদিতব্বো.

তেসন্তি পুব্বে যং-সদ্দেন পরামট্ঠানং ইন্দ্রিযবদ্ধধম্মানং. তেনেৰাহ ‘‘অঞ্ঞেসঞ্চ বাহিররূপনিব্বানান’’ন্তি. সসভাৰসমূহসসভাৰপ্পভেদৰসেনাতি রূপক্খন্ধাদিসসভাৰসমূহৰসেন চক্খাযতনাদিসসভাৰৰিসেসৰসেন চ. ‘‘সসভাৰসমূহসভাৰভেদৰসেনা’’তি চ পাঠো. তত্থ সমূহসভাৰোতি ¶ সভাৰসন্তানং অৰত্থাৰিসেসৰিধুরং সমূহৰসেন লক্খণমেৰাহ. তথা হি খন্ধপঞ্ঞত্তিযাপি সভাৰপঞ্ঞত্তিতা ৰুত্তা. তাযাতি আযতনপঞ্ঞত্তিআদিপ্পভেদায সভাৰপঞ্ঞত্তিযা. ৰিভত্তা সভাৰপঞ্ঞত্তীতি ‘‘ফস্সো ফুসনা’’তিআদিনা (ধ. স. ২) ৰিভত্তা ফস্সাদিসভাৰপঞ্ঞত্তি. সব্বাপীতি পি-সদ্দেন সভাৰধম্মেসু সামঞ্ঞৰসেন পৰত্তং কুসলাদিপঞ্ঞত্তিং সঙ্গণ্হাতি. রূপাদিধম্মানং সমূহো সন্তানেন ¶ পৰত্তমানো অৰত্থাৰিসেসসহিতো একত্তগ্গহণনিবন্ধনো সত্তোতি ৰোহরীযতীতি সো সভাৰধম্মো নাম পন ন হোতীতি আহ ‘‘পুগ্গলপঞ্ঞত্তি পন অসভাৰপঞ্ঞত্তী’’তি. তাযাতি পুগ্গলপঞ্ঞত্তিযা. যস্মা পন ধম্মানং পবন্ধো সমূহো চ ধম্মসন্নিস্সিতোতি ৰত্তব্বতং অরহতি, তস্মা ‘‘পরিঞ্ঞেয্যাদিসভাৰধম্মে উপাদায পৰত্তিতো’’তি ৰুত্তং.

ৰিজ্জমানপঞ্ঞত্তি পন ‘‘সভাৰপঞ্ঞত্তী’’তি ৰুত্তা, অৰিজ্জমানপঞ্ঞত্তি ‘‘অসভাৰপঞ্ঞত্তী’’তি ৰুত্তা. সব্বা পঞ্ঞত্তিযোতি উপাদাযপঞ্ঞত্তিকিচ্চপঞ্ঞত্তিআদযো সব্বা পঞ্ঞত্তিযো. যদি সব্বা পঞ্ঞত্তিযো ইধ দস্সিতা হোন্তি, কথং ‘‘পুগ্গলপঞ্ঞত্তী’’তি নামং জাতন্তি আহ ‘‘খন্ধাদিপঞ্ঞত্তীসূ’’তিআদি. অঞ্ঞত্থাতি ধম্মসঙ্গহাদীসু. যে ধম্মেতি যে খন্ধাদিধম্মে. পঞ্ঞত্তিযা ৰত্থুভাৰেনাতি পঞ্ঞাপনস্স অধিট্ঠানভাৰেন. অধিট্ঠানঞ্হি পঞ্ঞাপেতব্বধম্মা পঞ্ঞাপনস্স. এৰঞ্চ কত্ৰা খন্ধাদীহি সদ্ধিং পুগ্গলো গহিতো. যে ধম্মেতি ৰা যে পঞ্ঞত্তিধম্মে. পঞ্ঞাপেতুকামোতি নিক্খিপিতুকামো ৰত্থুভেদতো অসঙ্করতো ঠপেতুকামো. পঞ্ঞত্তিপরিচ্ছেদন্তি চ ৰত্থুভেদভিন্নং পঞ্ঞত্তিভূতং পরিচ্ছেদং. এৰমেত্থ অত্থো দট্ঠব্বো.

সামঞ্ঞপ্পভেদপঞ্ঞাপনাতি সামঞ্ঞভূতানং ৰিসেসভূতানঞ্চ অত্থানং পঞ্ঞাপনা. তেসন্তি অত্থ-সদ্দাপেক্খায পুল্লিঙ্গনিদ্দেসো. তত্থাতি পঞ্ঞাপনায অত্থদস্সনভূতেসু দস্সনাদীসু. ইদমেৰংনামকন্তি ইদং রুপ্পনাদিঅত্থজাতং ইত্থন্নামকং রূপক্খন্ধৰেদনাক্খন্ধাদিসমঞ্ঞং. তংতংকোট্ঠাসিককরণন্তি রূপৰেদনাদিতংতংঅত্থৰিভাগপরিযাপন্নতাপাদনং. তথা সঞ্ঞুপ্পাদানমেৰাতি আহ ‘‘বোধনমেৰ নিক্খিপনা’’তি. বোধনঞ্হি বোধনেয্যসন্তানে বোধেতব্বস্স অত্থস্স ঠপনন্তি কত্ৰা ‘‘নিক্খিপনা’’তি ৰুত্তং. ‘‘পঞ্ঞাপনা’’তিআদিনা ভাৰসাধনেন ৰত্ৰা সাধনন্তরামসনেন অত্থন্তরপরিকপ্পাসঙ্কা সিযাতি তং নিৰারেতুং ‘‘যো পনাযং…পে… ৰেদিতব্বো’’তি আহ. তেসং তেসং ধম্মানন্তি তংতংপঞ্ঞাপেতব্বধম্মানং. দস্সনভূতায নামপঞ্ঞত্তিযা দিট্ঠতায, ঠপনভূতায ঠপিততায. তংনিমিত্ততন্তি তস্স দস্সনস্স ঠপনস্স চ নিমিত্তকারণতং. নিমিত্তঞ্হি কত্তুভাৰেন ¶ ৰোহরীযতি যথা ‘‘ভিক্খা ৰাসেতী’’তি, ‘‘অরিযভাৰকরানি সচ্চানি অরিযসচ্চানী’’তি চ.

পাল়িযং ¶ অনাগততন্তি ৰিজ্জমানতাদিৰিসেসৰচনেন সহ পাঠানারুল়্হতং. ৰিজ্জমানস্স সতোতি ৰিজ্জমানস্স সমানস্সাতি ইমমত্থং দস্সেন্তো ‘‘ৰিজ্জমানভূতস্সাতি অত্থো’’তি আহ. তথাতি সচ্চিকট্ঠপরমত্থৰসেন অৰিজ্জমানস্স অনুপলব্ভমানস্স. তং পন অনুপলব্ভমানতং তথা-সদ্দেন ব্যতিরেকৰসেন দীপিতং পাকটতরং কাতুং ‘‘যথা কুসলাদীনী’’তিআদিমাহ. তত্থ ৰিনিৰত্তসভাৰানীতি ৰিভত্তসভাৰানি. উপলদ্ধীতি গহণং. তেনাকারেনাতি তেন রূপৰেদনাদিআকারেন অৰিজ্জমানস্স. অঞ্ঞেনাকারেনাতি ততো রূপৰেদনাদিতো অঞ্ঞেন তব্বিনিমুত্তেন পঞ্ঞাপেতব্বপঞ্ঞাপনাকারেন ৰিজ্জমানস্স. পঞ্ঞত্তিদুকে ৰুত্তমেৰ ‘‘অযঞ্চ ৰাদো সেৰত্থিকথায পটিসিদ্ধো’’তিআদিনা. লোকনিরুত্তিমত্তসিদ্ধস্সাতি এত্থ মত্তগ্গহণং তস্স পঞ্ঞত্তিৰত্থুস্স ন কেৰলং ৰিজ্জমানসভাৰতানিৰত্তনত্থমেৰ, অথ খো ৰিপরীতগ্গাহনিৰত্তনত্থম্পীতি দস্সেন্তো ‘‘অনভিনিৰেসেন চিত্তেনা’’তি আহ. চতুসচ্চপঞ্চক্খন্ধাদিৰিনিমুত্তং সচ্চন্তরখন্ধন্তরাদিকং পঞ্চমসচ্চাদিকং. সচে তং কোচি অত্থীতি পটিজানেয্য, অযাথাৰগহিতস্স তং ৰাচাৰত্থুমত্তমেৰস্সাতি দস্সেন্তো আহ ‘‘সাভিনিৰেসেন…পে… ৰুত্ত’’ন্তি. উদ্দেসে নিদ্দেসে চ সত্তৰন্তং পধানভাৰেন আগমনং সন্ধাযাহ ‘‘সরূপতো তিস্সন্নং আগতত’’ন্তি. গুণভাৰেন পন উদ্ধংসোতপঞ্ঞাৰিমুত্তপাসাণলেখাদিগ্গহণেসু ইতরাপি তিস্সো পঞ্ঞত্তিযো ইমস্মিং পকরণে আগতা এৰ.

যথাৰুত্তস্স…পে… অৰিরোধেনাতি ‘‘ৰিজ্জমানপঞ্ঞত্তি অৰিজ্জমানপঞ্ঞত্তী’’তি এৰং ৰুত্তপ্পকারস্স অৰিলোমনেন. আচরিযৰাদাতি চেত্থ অত্তনোমতিযো ৰেদিতব্বা, অঞ্ঞত্থ পন অট্ঠকথা চ. যথা চ অৰিরোধো হোতি, তং দস্সেন্তো ‘‘তস্মা’’তিআদিমাহ. তত্থ অৰিজ্জমানত্তা পঞ্ঞাপেতব্বমত্তত্থেন পঞ্ঞত্তীতি এতেন ‘‘অৰিজ্জমানা পঞ্ঞত্তি অৰিজ্জমানপঞ্ঞত্তী’’তি ইমং সমাসৰিকপ্পমাহ. অৰিজ্জমানপঞ্ঞত্তীতি এত্থ হি দ্ৰে সমাসা অৰিজ্জমানস্স, অৰিজ্জমানা ৰা পঞ্ঞত্তীতি অৰিজ্জমানপঞ্ঞত্তি. তেসু পুরিমেন নামপঞ্ঞত্তি ৰুত্তা, দুতিযেন উপাদাপঞ্ঞত্তিআদিভেদা ইতরাপি. সসভাৰং ৰেদনাদিকং. তজ্জপরমত্থনামলাভতোতি তজ্জস্স তদনুরূপস্স পরমত্থস্স অন্ৰত্থস্স নামস্স লভনতো, অনুভৰনাদিসভাৰানং ধম্মানং পরমত্থিকস্স ৰেদনাদিনামস্স লভনত্তাতি অত্থো ¶ . এতেন ৰিসেসনিৰত্তিঅত্থো ¶ মত্ত-সদ্দো, তেন চাযং ৰিসেসো নিৰত্তিতোতি দস্সেতি. পরতো লভিতব্বন্তি পরং উপাদায লদ্ধব্বং যথা রূপাদিকে উপাদায সত্তোতি নিস্সভাৰসমূহসন্তানাদি পঞ্ঞত্তিৰত্থু. একত্তেনাতি অনঞ্ঞত্তেন. অনুপলব্ভসভাৰতা ঞাণেন অগ্গহেতব্বসভাৰতা, যতো তে নৰত্তব্বাতি ৰুচ্চন্তি.

সসূকসালিরাসিআদিআকারেন সংকুচিতগ্গো ৰাসৰৰাসুদেৰাদীনং ৰিয মোলিৰিসেসো কিরীটং, সো পন মকুটৰিসেসোপি হোতিযেৰাতি আহ ‘‘কিরীটং মকুট’’ন্তি. সব্বসমোরোধোতি সব্বাসং ৰিজ্জমানপঞ্ঞত্তিআদীনং ছন্নং পঞ্ঞত্তীনং অন্তোকরণং. সঙ্খাতব্বপ্পধানত্তাতি ইদং লক্খণৰচনং. ন হি সব্বাপি উপনিধাপঞ্ঞত্তিসঙ্খাৰসেন পৰত্তা, নাপি সব্বা সঙ্খাতব্বপ্পধানা. দুতিযং ততিযন্তিআদিকং পন উপনিধাপঞ্ঞত্তিযা, দ্ৰে তীণীতিআদিকং উপনিক্খিত্তপঞ্ঞত্তিযা একদেসং উপলক্খণৰসেন দস্সেন্তো তস্স চ সঙ্খ্যেয্যপ্পধানতাযাহ ‘‘সঙ্খাতব্বপ্পধানত্তা’’তি. পূরণত্থো হি সদ্দো তদত্থদীপনমুখেন পূরেতব্বমত্থং দীপেতি. সো চ সঙ্খাৰিসযো পধানোৰাতি দুতিযাদীনং পঞ্ঞত্তীনং সঙ্খাতব্বপ্পধানতা ৰুত্তা. যাৰ হি দসসঙ্খা সঙ্খ্যেয্যপ্পধানাতি. তথা দ্ৰে তীণীতিআদীনম্পি পঞ্ঞত্তীনং. সঙ্খাতব্বো পন অত্থো কোচি ৰিজ্জমানো, কোচি অৰিজ্জমানো, কোচি সহ ৰিসুঞ্চ তদুভযং মিস্সোতি ছপি পঞ্ঞত্তিযো ভজতীতি.

ইতরাতি উপাদাসমোধানতজ্জাসন্ততিপঞ্ঞত্তিযো ৰুত্তাৰসেসা উপনিধাপঞ্ঞত্তিউপনিক্খিত্তপঞ্ঞত্তিযো চ. সত্তরথাদিভেদা উপাদাপঞ্ঞত্তি, দীঘরস্সাদিভেদা উপনিধাপঞ্ঞত্তি চ অৰিজ্জমানপঞ্ঞত্তি. হত্থগতাদিৰিসিট্ঠা উপনিধাপঞ্ঞত্তি, সমোধানপঞ্ঞত্তি চ অৰিজ্জমানেনঅৰিজ্জমানপঞ্ঞত্তি. তথেৰ ‘‘সুৰণ্ণৰণ্ণো ব্রহ্মস্সরো’’তিআদিকা ৰিজ্জমানগব্ভা ৰিজ্জমানেনঅৰিজ্জমানপঞ্ঞত্তিং ভজন্তীতি আহ ‘‘যথাযোগং তং তং পঞ্ঞত্তি’’ন্তি. তেন ৰুত্তং ‘‘দুতিযং ততিযং…পে… ভজন্তী’’তি. যঞ্হীতিআদি যথাৰুত্তউপনিধাউপনিক্খিত্তপঞ্ঞত্তীনং অৰিজ্জমানেনঅৰিজ্জমানপঞ্ঞত্তিভাৰসমত্থনং. তত্থ তঞ্চ সঙ্খানন্তি যং ‘‘পঠমং এক’’ন্তিআদিকং সঙ্খানং, তঞ্চ সঙ্খামুখেন গহেতব্বরূপং. চ-সদ্দেন সঙ্খ্যেয্যং সঙ্গণ্হাতি. তম্পি হি পঞ্ঞাপেতব্বং পঞ্ঞত্তীতি. তস্সা পন পরমত্থতো অভাৰো ৰুত্তোযেৰ. কিঞ্চি ¶ নত্থীতি পরমত্থতো কিঞ্চি নত্থি. তথাতি ইমিনা অৰিজ্জমানেনঅৰিজ্জমানভাৰন্তি এতং আকড্ঢতি. তেনাহ ‘‘ন হি…পে… ৰিজ্জমানো’’তি.

ওকাসেতি ¶ অৰীচিপরনিম্মিতৰসৰত্তীপরিচ্ছিন্নে পদেসে. সো হি কামাধিট্ঠানতো ‘‘কামো’’তি ৰুচ্চতি. কম্মনিব্বত্তক্খন্ধেসূতি ইমিনা উত্তরপদলোপেন কামভৰং ‘‘কামো’’তি ৰদতি. ভণনং সদ্দো চেতনা ৰা, তংসমঙ্গিতায তব্বিসিট্ঠে পুগ্গলে ভাণকোতি পঞ্ঞত্তীতি আহ ‘‘ৰিজ্জমানেনঅৰিজ্জমানপঞ্ঞত্তিপক্খং ভজতী’’তি. যেভুয্যেন রূপাযতনগ্গহণমুখেন রূপসঙ্খাতেন সণ্ঠানং গয্হতীতি তস্স তেন অভেদোপচারং কত্ৰা ৰুত্তং ‘‘রূপাযতনসঙ্খাতেন সণ্ঠানেনা’’তি. যং অভেদোপচারং ভিন্দিতুং অজানন্তা নিকাযন্তরিযা রূপাযতনং সণ্ঠানসভাৰং পটিজানন্তি. ‘‘কিসো পুগ্গলো, থূলো পুগ্গলো, কিসো দণ্ডো, থূলো দণ্ডো’’তিআদিনা পুগ্গলাদীনং পঞ্ঞাপনা তথাতথাসন্নিৰিট্ঠে রূপসঙ্খাতে কিসাদিসণ্ঠানপঞ্ঞত্তি, ন রূপাযতনমত্তেতি আহ ‘‘সণ্ঠানন্তি ৰা রূপাযতনে অগ্গহিতে’’তি. পচ্চত্তধম্মনামৰসেনাতি ‘‘পথৰী ফস্সো’’তিআদিনা ধম্মানং তংতংনামৰসেন. কিচ্চপঞ্ঞত্তিআদিৰিভাগেন পৰত্তো অযম্পি আচরিযৰাদো ‘‘কিচ্চপঞ্ঞত্তি একচ্চা ভূমিপঞ্ঞত্তি পচ্চত্তপঞ্ঞত্তি অসঙ্খতপঞ্ঞত্তি চ ৰিজ্জমানপঞ্ঞত্তি, লিঙ্গপঞ্ঞত্তি একচ্চা পচ্চত্তপঞ্ঞত্তি চ অৰিজ্জমানপঞ্ঞত্তি, একচ্চা কিচ্চপঞ্ঞত্তি ৰিজ্জমানেনঅৰিজ্জমানপঞ্ঞত্তি, একচ্চা ভূমিসণ্ঠানপঞ্ঞত্তি ৰিজ্জমানেন ৰা অৰিজ্জমানেন ৰা অৰিজ্জমানপঞ্ঞত্তী’’তি দস্সিতত্তা ‘‘ধম্মকথা ইত্থিলিঙ্গ’’ন্তিআদীনং ৰিজ্জমানেনৰিজ্জমানপঞ্ঞত্তিভাৰো, অৰিজ্জমানেনঅৰিজ্জমানপঞ্ঞত্তিভাৰো চ দস্সিতনযোতি আহ ‘‘সব্বসঙ্গাহকোতি দট্ঠব্বো’’তি. উপাদাপঞ্ঞত্তিআদিভাৰো চেত্থ কিচ্চপঞ্ঞত্তিআদীনং কিচ্চপঞ্ঞত্তিআদিভাৰো চ তাসং যথারহং ৰিভাৰেতব্বো.

২. সঙ্খেপপ্পভেদৰসেনাতি ‘‘যাৰতা পঞ্চক্খন্ধা’’তি সব্বেপি খন্ধে খন্ধভাৰসামঞ্ঞেন সংখিপনৰসেন, ‘‘যাৰতা রূপক্খন্ধো’’তিআদিনা খন্ধানং ততো সামঞ্ঞতো পকারেহি ভিন্দনৰসেন চ. অযং অত্থোতি অযং পঞ্ঞত্তিসঙ্খাতো অত্থো. সামঞ্ঞতো ৰা হি ধম্মানং পঞ্ঞাপনং হোতি ৰিসেসতো ৰা. ৰিসেসো চেত্থ অত্তনো সামঞ্ঞাপেক্খায ৰেদিতব্বো, ৰিসেসাপেক্খায পন সোপি সামঞ্ঞং সম্পজ্জতীতি ‘‘কিত্তাৰতা খন্ধানং খন্ধপঞ্ঞত্তী’’তি পুচ্ছায সঙ্খেপতো ৰিস্সজ্জনৰসেন ¶ ‘‘যাৰতা পঞ্চক্খন্ধা’’তি ৰুত্তন্তি তত্থাপি ‘‘খন্ধানং খন্ধপঞ্ঞত্তী’’তি আনেত্ৰা যোজেতব্বন্তি আহ ‘‘যাৰতা…পে… পঞ্ঞত্তী’’তি. ‘‘যাৰতা পঞ্চক্খন্ধা, এত্তাৰতা খন্ধানং খন্ধপঞ্ঞত্তি. যাৰতা রূপক্খন্ধো…পে… ৰিঞ্ঞাণক্খন্ধো, এত্তাৰতা খন্ধানং খন্ধপঞ্ঞত্তী’’তি এৰমেত্থ পাল়িযোজনা কাতব্বা. এৰঞ্হি সঙ্খেপতো পভেদতো চ খন্ধপঞ্ঞত্তি ৰিস্সজ্জিতা হোতি. তথা হি ইমস্সেৰ অত্থস্স অট্ঠকথাযং ৰুত্তভাৰং ¶ দস্সেন্তো ‘‘যত্তকেন…পে… আদিকেনা’’তি আহ. তত্থাতি তস্মিং ৰিস্সজ্জনস্স অত্থৰচনে, তস্মিং ৰা ৰিস্সজ্জনপাঠে তদত্থৰচনে চ. পভেদনিদস্সনমত্তন্তি পভেদস্স উদাহরণমত্তং. অৰুত্তোপি সব্বো ভূতুপাদিকো, সুখাদিকো চ পভেদো. তং পন ভূমিমুখেন দস্সেতুং ‘‘রূপক্খন্ধো কামাৰচরো’’তিআদি ৰুত্তন্তি দট্ঠব্বং.

এৰং অট্ঠকথাযং আগতনযেন পাল়িযা অত্থযোজনং দস্সেত্ৰা ইদানি তং পকারন্তরেন দস্সেতুং ‘‘অযং ৰা’’তিআদি ৰুত্তং. তত্থ অযং ৰাতি ৰুচ্চমানং সন্ধাযাহ. এত্থাতি এতস্মিং খন্ধপঞ্ঞত্তিৰিস্সজ্জনে. ইদন্তি ইদং পদং. যত্তকো…পে… খন্ধপঞ্ঞত্তিযা পভেদোতি ইমিনা সঙ্খেপতো ৰিত্থারতো চ খন্ধানং পভেদং পতি পঞ্ঞত্তিৰিভাগোতি দস্সিতং হোতি. তেনাহ ‘‘ৰত্থুভেদেন…পে… দস্সেতী’’তি. পকরণন্তরেতি ৰিভঙ্গপকরণে. তত্থ হি সাতিসযং খন্ধানং ৰিভাগপঞ্ঞত্তি ৰুত্তা. তেনাহ অট্ঠকথাযং ‘‘সম্মাসম্বুদ্ধেন হি…পে… কথিতা’’তি. এত্থ চ পঠমনযে সমুখেন, দুতিযে ৰত্থুমুখেন পঞ্ঞত্তিযা ৰিভাগা দস্সিতাতি অযমেতেসং ৰিসেসো.

এস নযোতি ইমিনা খন্ধপঞ্ঞত্তিযা ৰুত্তমত্থং আযতনপঞ্ঞত্তিযাদীসু অতিদিসতি. তত্থ ‘‘যাৰতা পঞ্চক্খন্ধা’’তি, ‘‘খন্ধানং খন্ধপঞ্ঞত্তী’’তি ইদং পঞ্ঞত্তিনিদ্দেসপাল়িযা আদিপরিযোসানগ্গহণমুখেন দস্সনং. ‘‘যাৰতা দ্ৰাদসাযতনানী’’তি, ‘‘আযতনানং আযতনপঞ্ঞত্তী’’তি ইমস্স অত্থো ‘‘যত্তকেন পঞ্ঞাপনেন সঙ্খেপতো দ্ৰাদসাযতনানী’’তি এতেন দস্সিতো, ‘‘যাৰতা চক্খাযতন’’ন্তিআদিকস্স পন ‘‘পভেদতো চক্খাযতন’’ন্তিআদিকেনাতি. তত্থ ‘‘চক্খাযতনং…পে… ধম্মাযতন’’ন্তি পভেদনিদস্সনমত্তমেতং. এতেন অৰুত্তোপি সব্বো সঙ্গহিতো হোতীতি ‘‘তত্রাপি দসাযতনা কামাৰচরা’’তিআদি ৰুত্তং. অযং ৰা এত্থ পাল়িযা অত্থযোজনা – ‘‘যাৰতা’’তি ইদং সব্বেহি পদেহি ¶ যোজেত্ৰা ‘‘যত্তকানি দ্ৰাদসাযতনানি…পে… যত্তকো দ্ৰাদসন্নং আযতনানং, তপ্পভেদানঞ্চ চক্খাযতনাদীনং পভেদো, তত্তকো আযতনানং আযতনপঞ্ঞত্তিযা পভেদো’’তি পকরণন্তরে ৰুত্তেন ৰত্থুপভেদেন আযতনপঞ্ঞত্তিযা পভেদং দস্সেতীতিআদিনা ইতরপঞ্ঞত্তীসুপি নযো যোজেতব্বো.

৭. ‘‘ছ পঞ্ঞত্তিযো…পে… পুগ্গলপঞ্ঞত্তী’’তি ইমং অপেক্খিত্ৰা ‘‘কিত্তাৰতা…পে… এত্তাৰতা ইন্দ্রিযানং ইন্দ্রিযপঞ্ঞত্তী’’তি অযং পাল়িপদেসো নিদ্দেসোপি সমানো ¶ পকরণন্তরে ৰত্থুভেদেন ৰুত্তং খন্ধাদিপঞ্ঞত্তিপ্পভেদং উপাদায উদ্দেসোযেৰ হোতীতি আহ ‘‘উদ্দেসমত্তেনেৰাতি অত্থো’’তি.

মাতিকাৰণ্ণনা নিট্ঠিতা.

২. নিদ্দেসৰণ্ণনা

১. এককনিদ্দেসৰণ্ণনা

১. পচ্চনীকধম্মানং ¶ ¶ ঝাপনট্ঠেন ঝানং, ততো সুট্ঠু ৰিমুচ্চনট্ঠেন ৰিমোক্খোতি নিপ্পরিযাযেন ঝানঙ্গানেৰ ৰিমোক্খোতি অট্ঠকথাঅধিপ্পাযো. টীকাকারেন পন ‘‘অভিভাযতনং ৰিয সসম্পযুত্তং ঝানং ৰিমোক্খো’’তি মঞ্ঞমানেন ‘‘অধিপ্পাযেনাহা’’তি ৰুত্তং. ঝানধম্মা হি সম্পযুত্তধম্মেহি সদ্ধিংযেৰ পটিপক্খতো ৰিমুচ্চন্তি, ন ৰিনা, তথা অভিরতিৰসেন আরম্মণে নিরাসঙ্কপ্পৰত্তিপীতি অধিপ্পাযো. যথা ৰা ঝানঙ্গানং ঝানপচ্চযেন পচ্চযভাৰতো সৰিসেসো ঝানপরিযাযো, এৰং ৰিমোক্খকিচ্চযোগতো তেসং সৰিসেসো ৰিমোক্খপরিযাযো, তদুপচারেন সম্পযুত্তানং ৰেদিতব্বো. পঠমং সমঙ্গিভাৰত্থন্তি পটিলাভং সন্ধাযাহ. ‘‘ফুসিত্ৰা ৰিহরতীতি পটিলভিত্ৰা ইরিযতী’’তি হি ৰুত্তং. অট্ঠকথাযং ‘‘যেন হি সদ্ধিং…পে… পটিলদ্ধা নাম হোন্তী’’তি তেহি সাধেতব্বসহজাতাদিপচ্চযলাভোযেৰেত্থ পটিলাভো দট্ঠব্বো. যথা ফস্সো যত্থ উপ্পন্নো, তং আরম্মণং ফুসতীতি ৰুচ্চতি, এৰং সম্পযুত্তধম্মেপি তংসভাৰত্তাতি আহ ‘‘সম্ফস্সেন ফুসনত্থ’’ন্তি. তস্স ‘‘ৰিৰরতী’’তি ইমিনা সম্বন্ধো. ইতরেহীতি উপচারম্পীতিআদিনা উপচারপুরিমপ্পনাপরপ্পনানং পটিলাভকারণন্তি ৰচনেহি. ইতরে কারণত্থেতি ‘‘উপচারেন…পে… ফুসতিযেৰা’’তি ৰুত্তে কারণত্থদীপকে অত্থে. ফুসতি ফলং অধিগচ্ছতি এতাযাতি কারণভাৰস্স ফুসনাপরিযাযো ৰেদিতব্বো.

পঠমত্থমেৰাতি সমঙ্গিভাৰত্থমেৰ. তানি অঙ্গানীতি ইমিনা ঝানকোট্ঠাসভাৰেন ৰুত্তধম্মাযেৰ গহিতা, ন ফস্সপঞ্চমকইন্দ্রিযট্ঠকাদিভাৰেনাতি ৰুত্তং ‘‘সেসা…পে… সঙ্গহিতানী’’তি. এৰং সতীতি সুখসঙ্খাতঝানঙ্গতো ৰেদনাসোমনস্সিন্দ্রিযানং সেসিতব্বভাৰে ¶ সতি. এৰঞ্হি নেসং ফস্সকতা ইতরস্স ফস্সিতব্বতাৰ সিযা. তেনাহ ‘‘সুখস্স ফুসিতব্বত্তা’’তি. ৰেদযিতাধিপতেয্যট্ঠেহীতি আরম্মণানুভৰনসঙ্খাতেন ৰেদযিতসভাৰেন, তস্সেৰ সাতৰিসেসসঙ্খাতেন সম্পযুত্তেহি অনুৰত্তনীযভাৰেন চ. উপনিজ্ঝাযনভাৰোপি যথাৰুত্তৰেদযিতাধিপতেয্যট্ঠৰিসিট্ঠো ওল়ারিকস্স আরম্মণস্স নিজ্ঝাযনভাৰো. অভিন্নসভাৰোপি হি ধম্মো পুরিমৰিসিট্ঠপচ্চযৰিসেসসম্ভৰেন ৰিসেসেন ¶ ভিন্নাকারো হুত্ৰা ৰিসিট্ঠফলভাৰং আপজ্জতি. যথেকংযেৰ কম্মং চক্খাদিনিব্বত্তিহেতুভূতং কম্মং. তেন ৰুত্তং ‘‘ৰেদযিতা…পে… ৰুত্তত্তা’’তি. অঙ্গানীতি নাযং তপ্পরভাৰেন বহুৰচননিদ্দেসো অনন্তভাৰতো, কেৰলঞ্চ অঙ্গানং বহুত্তা বহুৰচনং, তেন কিং সিদ্ধং? পচ্চেকম্পি যোজনা সিদ্ধা হোতি. তেন ৰুত্তং ‘‘পচ্চেকম্পি যোজনা কাতব্বা’’তি. যদি ‘‘সুখং ঠপেত্ৰা’’তি যোজনাযং সেসা তযো খন্ধা হোন্তি, সেসা তযো, চত্তারো চ খন্ধা হোন্তীতি ৰত্তব্বং সিযাতি? ন, চতূসু তিণ্ণং অন্তোগধত্তা. তেনাহ ‘‘সব্বযোজনা…পে… ৰুত্ত’’ন্তি.

২. অসমযৰিমোক্খেনাতি হেট্ঠামগ্গৰিমোক্খেন. সো হি লোকিযৰিমোক্খো ৰিয অধিগমৰল়ঞ্জনত্থং পকপ্পেতব্বসমযৰিসেসাভাৰতো এৰং ৰুত্তো. অগ্গমগ্গৰিমোক্খো পন একচ্চাসৰৰিমুত্তিৰচনতো ইধ নাধিপ্পেতো. তেনাহ ‘‘একচ্চে আসৰা পরিক্খীণা হোন্তী’’তি. একচ্চেহি আসৰেহি ৰিমুত্তোতি দিট্ঠাসৰাদীহি সমুচ্ছেদৰিমুত্তিযা ৰিমুত্তো. অসময…পে… লাভেনাতি যথাৰুত্তঅসমযৰিমোক্খস্স উপনিস্সযভূতস্স অধিগমেন. ততো এৰ সাতিসযেন, একচ্চেহি কামাসৰেহি ৰিমুত্তো ৰিক্খম্ভনৰসেনাতি অত্থো. সো এৰ একচ্চসমযৰিমোক্খলাভী যথাৰুত্তো সমযৰিমুত্তো অসমযৰিমোক্খৰিসেসস্স ৰসেন সমযৰিমোক্খপঞ্ঞত্তিযা অধিপ্পেতত্তা. সোতি অসমযৰিমোক্খূপনিস্সযসমযৰিমোক্খলাভী. তেন সাতিসযেন সমযৰিমোক্খেন. তথাৰিমুত্তোৰ হোতীতি এত্থ ইতি-সদ্দো হেতুঅত্থো. যস্মা তথাৰিমুত্তো হোতি, তস্মা সমযৰিমুত্তপঞ্ঞত্তিং লদ্ধুং অরহতীতি পরিঞ্ঞাতত্থং হেতুনা পতিট্ঠাপেতি. ব্যতিরেকমুখেনপি তমত্থং পাকটতরং কাতুং ‘‘পুথুজ্জনো পনা’’তিআদি ৰুত্তং. তত্থ সমুদাচারভাৰতোতি সমুদাচারস্স সম্ভৰতো. সোতি ঝানলাভী পুথুজ্জনো.

যদি পুনরাৰত্তকধম্মতায পুথুজ্জনো সমযৰিমুত্তোতি ন ৰুত্তো, তদভাৰতো কস্মা অরহা তথা ন ৰুত্তোতি আহ ‘‘অরহতো পনা’’তিআদি. তদকারণভাৰন্তি তেসং ৰিমোক্খানং, তস্স ৰা সমযৰিমুত্তিভাৰস্স অকারণভাৰং. সব্বোতি সুক্খৰিপস্সকোপি সমথযানিকোপি অট্ঠৰিমোক্খলাভীপি ¶ . বহিঅব্ভন্তরভাৰা অপেক্খাসিদ্ধা, ৰত্তু অধিপ্পাযৰসেন গহেতব্বরূপা চাতি আহ ‘‘বাহিরানন্তি লোকুত্তরতো বহিভূতান’’ন্তি.

৩. রূপতো ¶ অঞ্ঞং ন রূপন্তি তত্থ রূপপটিভাগং কসিণরূপাদি রূপ-সদ্দেন গহিতন্তি তদঞ্ঞং পঠমততিযারুপ্পৰিসযমত্তং অরূপক্খন্ধনিব্বানৰিনিমুত্তং অরূপ-সদ্দেন গহিতং দট্ঠব্বং. পটিপক্খভূতেহি কিলেসচোরেহি অমূসিতব্বং ঝানমেৰ চিত্তমঞ্জূসং. সমাধিন্তি ৰা সমাধিসীসেন ঝানমেৰ ৰুত্তন্তি ৰেদিতব্বং.

৪. অত্তনো অনুরূপেন পমাদেনাতি এত্থ অনাগামিনো অধিকুসলেসু ধম্মেসু অসক্কচ্চঅসাতচ্চকিরিযাদিনা. খীণাসৰস্স পন তাদিসেন পমাদপতিরূপকেন, তাদিসায ৰা অসক্কচ্চকিরিযায. সা চস্স উস্সুক্কাভাৰতো ৰেদিতব্বা. পটিপ্পস্সদ্ধসব্বুস্সুক্কা হি তে উত্তমপুরিসা. সমযেন সমযন্তি সমযে সমযে. ভুম্মত্থে হি এতং করণৰচনং উপযোগৰচনঞ্চ. অনিপ্ফত্তিতোতি সমাপজ্জিতুং অসক্কুণেয্যতো. অস্সাতি ‘‘তেসঞ্হী’’তিআদিনা ৰুত্তস্স ইমস্স অট্ঠকথাৰচনস্স. তেনাতি যথাভতেন সুত্তেন.

৫. যেনাধিপ্পাযেন ‘‘ধম্মেহী’’তি ৰত্তব্বন্তি ৰুত্তং, তং ৰিৰরন্তো ‘‘ইধা’’তিআদিমাহ. তত্থ ইধাতি ‘‘পরিহানধম্মো অপরিহানধম্মো’’তি এতস্মিং পদদ্ৰযে. তত্থাতি ‘‘কুপ্পধম্মো অকুপ্পধম্মো’’তি পদদ্ৰযে. সতি ৰচননানত্তে অত্থেৰ ৰচনত্থনানত্তন্তি আহ ‘‘ৰচনত্থনানত্তমত্তেন ৰা’’তি. ৰচনত্থগ্গহণমুখেন গহেতব্বস্স পন ৰিভাৰনত্থস্স নত্থেত্থ নানত্তং, যতো তেসং পরিযাযন্তরতাসিদ্ধি.

৭-৮. সমাপত্তিচেতনাতি যায চেতনায সমাপত্তিং নিব্বত্তেতি সমাপজ্জতি চ. তেনাহ ‘‘তদাযূহনা’’তি. আরক্খপচ্চুপট্ঠানা সতীতি কত্ৰা আহ ‘‘অনুরক্খণা…পে… সতী’’তি. তেনাহ ‘‘একারক্খো সতারক্খেন চেতসা ৰিহরতী’’তি. তথা হি সা ‘‘কুসলাকুসলানং ধম্মানং গতিযো সমন্নেসতী’’তি ৰুত্তা.

১১. অগ্গমগ্গট্ঠোপি ইতরমগ্গট্ঠা ৰিয অনুপচ্ছিন্নভযত্তা ভযূপরতৰোহারং লভতীতি আহ ‘‘অরহত্তমগ্গট্ঠো চ…পে… ভযূপরতো’’তি.

১২. কেচীতি ¶ তিহেতুকপটিসন্ধিকে মন্দবুদ্ধিকে সন্ধাযাহ. তেন ৰুত্তং ‘‘দুপ্পঞ্ঞাতি ইমিনা গয্হন্তী’’তি. দুব্বলা পঞ্ঞা যেসং তে দুপ্পঞ্ঞাতি.

১৪. অনিযতধম্মসমন্নাগতস্সেৰ ¶ পচ্চযৰিসেসেন নিযতধম্মপটিলাভোতি আহ ‘‘যত্থ…পে… হোন্তী’’তি. তদভাৰাতি নিযতানিযতৰোমিস্সায পৰত্তিযা অভাৰা.

১৬. পরিযাদিযিতব্বানীতি পরিযাদকেন মগ্গেন খেপেতব্বানি. তণ্হাদীনং পলিবুধনাদিকিরিযায মত্থকপ্পত্তিযা সীসভাৰো ৰেদিতব্বো, নিব্বানস্স পন ৰিসঙ্খারভাৰতো সঙ্খারসীসতা. তেনাহ ‘‘সঙ্খারৰিৰেকভূতো নিরোধো’’তি. কেচি পন ‘‘সঙ্খারসীসং নিরোধসমাপত্তী’’তি ৰদন্তি, তং তেসং মতিমত্তং পঞ্ঞত্তিমত্তস্স সীসভাৰানুপপত্তিতো তদুদ্ধঞ্চ সঙ্খারপ্পৰত্তিসব্ভাৰতো. সহ ৰিযাতি একজ্ঝং ৰিয. এতেন সম-সদ্দস্স অত্থমাহ. সহত্থো হেস সম-সদ্দো. সংসিদ্ধিদস্সনেনাতি সংসিদ্ধিযা নিট্ঠানস্স উপরমস্স দস্সনেন.

ইধাতি ইমিস্সা পুগ্গলপঞ্ঞত্তিপাল়িযা, ইমিস্সা ৰা তদট্ঠকথায. কিলেসপৰত্তসীসানন্তি কিলেসসীসপৰত্তসীসানং. তেসু হি গহিতেসু ইতরম্পি পরিযাদিযিতব্বং কিলেসভাৰেন পরিযাদিযিতব্বতাসামঞ্ঞেন চ গহিতমেৰ হোতীতি কিলেসৰট্টপরিযাদানেন মগ্গস্স ইতরৰট্টানম্পি পরিযাদিযনং. ৰট্টুপচ্ছেদকেন মগ্গেনেৰ হি জীৰিতিন্দ্রিযম্পি অনৰসেসতো নিরুজ্ঝতীতি. কস্মা পনেত্থ পৰত্তসীসং ৰিসুং গহিতন্তি চোদনং সন্ধাযাহ ‘‘পৰত্তসীসম্পী’’তিআদি. ওধিসো চ অনোধিসো চ কিলেসপরিযাদানে সতি সিজ্ঝমানা পচ্চৰেক্খণৰারা তেন নিপ্ফাদেতব্বাতি ৰুত্তা. তেনেৰাহ ‘‘কিলেসপরিযাদানস্সেৰ ৰারা’’তি. ইদানি তমত্থং আগমেন সাধেন্তো ‘‘ৰিমুত্তস্মি’’ন্তিআদিমাহ. চুতিচিত্তেন হোতীতি ইদং যথাৰুত্তস্স কিলেসপরিযাদানসমাপনভূতস্স পচ্চৰেক্খণৰারস্স চুতিচিত্তেন পরিচ্ছিন্নত্তা ৰুত্তং, তস্মা চুতিচিত্তেন পরিচ্ছেদকেন পরিচ্ছিন্নং হোতীতি অত্থো.

১৭. তিট্ঠেয্যাতি ন উপগচ্ছেয্য. ঠানঞ্হি গতিনিৰত্তি. তেন ৰুত্তং ‘‘নপ্পৰত্তেয্যা’’তি.

১৮. পযিরুপাসনায বহূপকারত্তা পযিরুপাসিতব্বত্তা.

২০. অগ্গৰিজ্জা ¶ যস্স অনধিগতৰিজ্জাদ্ৰযস্স হোতি, সো চে পচ্ছা ৰিজ্জাদ্ৰযং অধিগচ্ছতি, তস্স পঠমং অধিগতৰিজ্জাদ্ৰযস্স ৰিয অতেৰিজ্জতাভাৰা ¶ যদিপি নিপ্পরিযাযতা তেৰিজ্জতা, পঠমং অধিগতৰিজ্জাদ্ৰযস্স পন সা সৰিসেসাতি দস্সেন্তো ‘‘যায কতকিচ্চতা’’তিআদিমাহ. তত্থ অগ্গৰিজ্জাতি আসৰক্খযঞাণং, অগ্গমগ্গঞাণমেৰ ৰা ৰেদিতব্বং. সা চ তেৰিজ্জতাতি যোজনা.

২২. তত্থেৰাতি সচ্চাভিসম্বোধে এৰ.

২৪. তন্তি নিরোধসমাপত্তিলাভিনো উভতোভাগৰিমুত্ততাৰচনং. ৰুত্তলক্খণূপপত্তিকোতি দ্ৰীহি ভাগেহি দ্ৰে ৰারে ৰিমুত্তোতি এৰং ৰুত্তলক্খণেন উপপত্তিতো যুত্তিতো সমন্নাগতো. এসেৰ নযোতি যথা চতুন্নং অরূপসমাপত্তীনং একেকতো নিরোধতো চ ৰুট্ঠায অরহত্তং পত্তানং ৰসেন পঞ্চ উভতোভাগৰিমুত্তা ৰুত্তা, তথা সেক্খভাৰং পত্তানং ৰসেন পঞ্চ কাযসক্খিনো হোন্তীতি কত্ৰা ৰুত্তং.

দস্সনকারণাতি ইমিনা ‘‘দিস্ৰা’’তি এত্থ ত্ৰা-সদ্দো হেতুঅত্থোতি দস্সেতি যথা ‘‘সীহং দিস্ৰা ভযং হোতী’’তিআদীসু. দস্সনে সতি পরিক্খযো, নাসতীতি আহ ‘‘দস্সনাযত্তপরিক্খযত্তা’’তি. পুরিমকিরিযাতি আসৰানং খযকিরিযায পুরিমকিরিযা. সমানকালত্তেপি হি কারণকিরিযা ফলকিরিযায পুরিমসিদ্ধা ৰিয ৰোহরীযতি. ততো নামকাযতো মুচ্চনতো. যতো হি যেন মুচ্চিতব্বং, তং নিস্সিতো হোতীতি ৰুত্তং ‘‘নামনিস্সিতকো’’তি. তস্সাতি কাযদ্ৰযৰিমুত্তিযা উভতোভাগৰিমুত্তভাৰস্স. অরূপলোকে হি ঠিতারহন্তৰসেনাযমত্থো ৰুত্তো. তেনাহ ‘‘সুত্তে হী’’তিআদি.

দ্ৰীহি ভাগেহীতি ৰিক্খম্ভনসমুচ্ছেদভাগেহি. দ্ৰে ৰারেতি কিলেসানং ৰিক্খম্ভনসমুচ্ছিন্দনৰসেন দ্ৰিক্খত্তুং. কিলেসেহি ৰিমুত্তোতি ইদং পঠমততিযৰাদানং ৰসেন ৰুত্তং, ইতরং দুতিযৰাদস্স. অরূপজ্ঝানং যদিপি রূপসঞ্ঞাদীহি ৰিমুত্তং তংসমতিক্কমাদিনা পত্তব্বত্তা, পৰত্তিনিৰারকেহি পন কামচ্ছন্দাদীহিযেৰস্স ৰিমুত্তি সাতিসযাতি দস্সেন্তো ‘‘নীৰরণসঙ্খাতনামকাযতো ৰিমুত্ত’’ন্তি আহ. যঞ্চাপি অরূপজ্ঝানং রূপলোকে ৰিৰেকট্ঠতাৰসেনপি রূপকাযতো ৰিমুত্তং, তং পন রূপপটিবন্ধছন্দরাগৰিক্খম্ভনেনেৰ হোতীতি ৰিক্খম্ভনমেৰ ¶ পধানন্তি ৰুত্তং ‘‘রূপতণ্হাৰিক্খম্ভনেন ¶ রূপকাযতো চ ৰিমুত্তত্তা’’তি. একদেসেন উভতোভাগৰিমুত্তং নাম হোতি সমুচ্ছেদৰিমুত্তিযা অভাৰা.

২৫. ‘‘সত্তিসযো’’তি ৰিয সমুদাযে পৰত্তো ৰোহারো অৰযৰেপি দিস্সতীতি দস্সেন্তো আহ ‘‘অট্ঠৰিমোক্খেকদেসেন…পে… ৰুচ্চতী’’তি.

২৬. ফুট্ঠানন্তি ফস্সিতানং, অধিগতানন্তি অত্থো. অন্তোতি অন্তসদিসো ফস্সনায পরকালো. তদনন্তরো হি তপ্পরিযোসানো ৰিয হোতীতি. কালৰিসযো চাযং অন্ত-সদ্দো, ন পন কালত্থো. তেনাহ ‘‘অধিপ্পাযো’’তি. নামকাযেকদেসতোতি নীৰরণসঙ্খাতনামকাযেকদেসতো. আলোচিতো পকাসিতো ৰিয হোতি ৰিবন্ধৰিক্খম্ভনেন আলোচনে পকাসনে সমত্থস্স ঞাণচক্খুনো অধিট্ঠানসমুপ্পাদনতো. ন তু ৰিমুত্তোতি ৰিমুত্তোতি ন ৰুচ্চতেৰ.

২৮. ইমং পন নযন্তি ‘‘অপিচ তেস’’ন্তিআদিনা আগতৰিধিং. যেন ৰিসেসেনাতি যেন কারণৰিসেসেন. সোতি দিট্ঠিপ্পত্তসদ্ধাৰিমুত্তানং যথাৰুত্তো পঞ্ঞায ৰিসেসো. পটিক্খেপো কতো কারণস্স অৰিভাৰিতত্তা. উভতোভাগৰিমুত্তো ৰিয, পঞ্ঞাৰিমুত্তো ৰিয ৰা সব্বথা অৰিমুত্তস্স সাৰসেসৰিমুত্তিযম্পি দিট্ঠিপ্পত্তস্স ৰিয পঞ্ঞায সাতিসযায অভাৰতো সদ্ধামত্তেন ৰিমুত্তভাৰো দট্ঠব্বো. সদ্ধায অধিমুত্তোতি ইদং আগমনৰসেন সদ্ধায অধিকভাৰং সন্ধায ৰুত্তং, মগ্গাধিগমতো পনস্স পচ্চক্খমেৰ ঞাণদস্সনং.

৩১. ‘‘সোতোতি অরিযমগ্গস্স নাম’’ন্তি নিপ্পরিযাযেন তংসমঙ্গী সোতাপন্নোতি অধিপ্পাযেন চোদকো ‘‘অপি-সদ্দো কস্মা ৰুত্তো’’তি চোদনং উট্ঠাপেত্ৰা ‘‘ননূ’’তিআদিনা অত্তনো অধিপ্পাযং ৰিৰরতি. ইতরো ‘‘নাপন্ন’’ন্তিআদিনা পরিহরতি. সমন্নাগতো এৰ নাম লোকুত্তরধম্মানং অকুপ্পসভাৰত্তা. ইতরেহীতি দুতিযমগ্গট্ঠাদীহি. সো এৰাতি পঠমফলট্ঠো এৰ. ইধাতি ইমস্মিং সত্তক্খত্তুপরমনিদ্দেসে. সোতং ৰা অরিযমগ্গং আদিতো পন্নো অধিগতোতি সোতাপন্নোতি ৰুচ্চমানে দুতিযমগ্গট্ঠাদীনং ¶ নত্থেৰ সোতাপন্নভাৰাপত্তি. সুত্তে পন সোতং অরিযমগ্গং আদিতো মরিযাদং অমুঞ্চিত্ৰাৰ পন্নো পটিপজ্জতীতি কত্ৰা মগ্গসমঙ্গী ‘‘সোতাপন্নো’’তি ৰুত্তো. পরিযাযেন ইতরোপি তস্স অপরিহানধম্মত্তা সোতাপন্নোতি ৰেদিতব্বং. পহীনাৰসিট্ঠকিলেসপচ্চৰেক্খণায সমুদযসচ্চং ৰিয দুক্খসচ্চম্পি পচ্চৰেক্খিতং হোতি সচ্চদ্ৰযপরিযাপন্নত্তা ¶ কিলেসানন্তি আহ ‘‘চতুসচ্চপচ্চৰেক্খণাদীন’’ন্তি. আদি-সদ্দেন ফলপচ্চৰেক্খণউপরিমগ্গফলধম্মে চ সঙ্গণ্হাতি.

৩২. মহাকুলমেৰাতি উল়ারকুলমেৰ ৰুচ্চতি ‘‘কুলীনো কুলপুত্তো’’তিআদীসু ৰিয.

৩৩. সজ্ঝানকো অপরিহীনজ্ঝানো কালকতো ব্রহ্মলোকূপগো হুত্ৰা ৰট্টজ্ঝাসযো চে, উপরূপরি নিব্বত্তিত্ৰা নিব্বাযতীতি আহ ‘‘অনাগামিসভাগো’’তি. যতো সো ঝানানাগামীতি ৰুচ্চতি. তেনাহ ‘‘অনাৰত্তিধম্মো’’তি.

৩৬. পরযোগে ত্ৰা-সদ্দো তদন্তো হুত্ৰা ‘‘পরসদ্দযোগে’’তি ৰুত্তো, অপ্পত্ৰাতি ৰুত্তং হোতীতি ‘‘অপ্পত্তং হুত্ৰা’’তি ইমিনা ৰুচ্চতি.

৩৭. তেনাতি ‘‘উপহচ্চা’’তি পদেন. ননু চ ৰেমজ্ঝাতিক্কমো ‘‘অতিক্কমিত্ৰা ৰেমজ্ঝ’’ন্তি ইমিনা পকাসিতো হোতীতি অধিপ্পাযো.

৪০. তণ্হাৰট্টসোতা তণ্হাৰট্টবন্ধা. তস্সাতি সোতস্স. সম্বন্ধে চেতং সামিৰচনং. উদ্ধংসোতস্স উপরিভৰূপগতা একংসিকাতি আহ ‘‘যত্থ ৰা তত্থ ৰা গন্ত্ৰা’’তি. তস্সাতি উদ্ধংসোতস্স. তত্থাতি অৰিহেসু. লহুসালহুসগতিকাতি লহুকালহুকাযুগতিকা, লহুকালহুকঞাণগতিকা ৰা. উপ্পজ্জিত্ৰাৰ নিব্বাযনকাদীহীতি আদি-সদ্দেন ‘‘আকাসং লঙ্ঘিত্ৰা নিব্বাযতী’’তিআদিনা ৰুত্তা তিস্সো উপমা সঙ্গণ্হাতি. অন্তরাউপহচ্চপরিনিব্বাযীহি অধিমত্ততা, উদ্ধংসোততো অনধিমত্ততা চ অসঙ্খারসসঙ্খারপরিনিব্বাযীনং ন ৰেদিতব্বাতি যোজনা. তে এৰাতি অন্তরাউপহচ্চপরিনিব্বাযিউদ্ধংসোতা এৰ. যদি এৰং অসঙ্খারসসঙ্খারপরিনিব্বাযীনং উপমাৰচনেন ততো মহন্ততরেহি কস্মা ৰুত্তন্তি চোদনং সন্ধাযাহ ‘‘ততো মহন্ত…পে… দস্সনত্থ’’ন্তি.

তেনাতি ¶ ‘‘নো চস্স, নো চ মে সিযা’’তি ৰচনেন. তেনাতি ৰা যথাৰুত্তেন তস্স অত্থৰচনেন. ইমস্স দুক্খস্সাতি ইমস্স সম্পতি ৰত্তমানস্স ৰিঞ্ঞাণাদিদুক্খস্স. উদযদস্সনং ঞাণং. চতূহিপীতি ‘‘নো চস্সা’’তি চতূহি পদেহি. যং অত্থীতি যং পরমত্থতো ৰিজ্জতি ¶ . তেনাহ ‘‘ভূতন্তি সসভাৰ’’ন্তি, ভূতন্তি খন্ধপঞ্চকন্তি অত্থো. যথাহ ‘‘ভূতমিদন্তি, ভিক্খৰে, সমনুপস্সথা’’তি. ৰিৰট্টমানসো ৰিৰিচ্চমানহদযো তণ্হাদিসোততো নিৰত্তজ্ঝাসযো. উপেক্খকো হোতীতি চত্তভরিযো ৰিয পুরিসো ভযং নন্দিঞ্চ পহায উদাসিনো হোতি.

অৰিসিট্ঠেতি হীনে. ৰিসিট্ঠেতি উত্তমে. ‘‘ভৰে’’তি ৰত্ৰা ‘‘সম্ভৰে’’তি ৰুচ্চমানং অৰুত্তৰাচকং হোতীতি দস্সেন্তো ‘‘পচ্চুপ্পন্নো’’তিআদিমাহ. ভূতমেৰ ৰুচ্চতীতি যং ভূতন্তি ৰুচ্চতি, তদেৰ ভৰোতি চ ৰুচ্চতি, ভৰতি অহোসীতি ৰা. সম্ভৰতি এতস্মাতি সম্ভৰো. তদাহারো তস্স ভৰস্স পচ্চযো. অনুক্কমেন মগ্গপঞ্ঞাযাতি ৰিপস্সনানুক্কমেন লদ্ধায অরিযমগ্গপঞ্ঞায. তেনাতি সেক্খেন.

এককনিদ্দেসৰণ্ণনা নিট্ঠিতা.

২. দুকনিদ্দেসৰণ্ণনা

৬৩. কস্সচীতি কস্সচিপি. কথঞ্চীতি কেনচি পকারেন, ৰিক্খম্ভনমত্তেনাপীতি ৰুত্তং হোতি. অজ্ঝত্তগ্গহণস্সাতি অত্তানং অধিকিচ্চ উদ্দিস্স পৰত্তগ্গাহস্স.

৮৩. পুরিমগ্গহিতন্তি ‘‘করিস্সতি মে’’তিআদিনা চিত্তেন পঠমং গহিতং. তং কতন্তি তং তাদিসং উপকারং. পুঞ্ঞফলং উপজীৰন্তো কতঞ্ঞুপক্খে তিট্ঠতীতি ৰুত্তং ‘‘পুঞ্ঞফলং অনুপজীৰন্তো’’তি.

৯০. গুণপারিপূরিযা পরিপুণ্ণো যাৰদত্থো ইধ তিত্তোতি আহ ‘‘নিট্ঠিতকিচ্চতায নিরুস্সুক্কো’’তি.

দুকনিদ্দেসৰণ্ণনা নিট্ঠিতা.

৩. তিকনিদ্দেসৰণ্ণনা

৯১. সেসসংৰরভেদেনাতি ¶ ¶ কাযিকৰাচসিকৰীতিক্কমতো সেসেন সংৰরৰিনাসেন. সো পন দ্ৰারৰসেন ৰুচ্চমানো মনোদ্ৰারিকো হোতীতি আহ ‘‘মনোসংৰরভেদেনা’’তি. ইদানি তং পকারভেদেন দস্সেন্তো ‘‘সতিসংৰরাদিভেদেন ৰা’’তি আহ, মুট্ঠসচ্চাদিপ্পৰত্তিযাতি অত্থো. যং কিঞ্চি সভাৰভূতং চরিতম্পি ‘‘সীল’’ন্তি ৰুচ্চতীতি অকুসলস্সপি সীলপরিযাযো ৰুত্তো.

৯৪. সমানৰিসযানন্তি পঠমফলাদিকো সমানো এৰরূপো ৰিসযো এতেসন্তি সমানৰিসযা, তেসং.

১০৭. তদত্থো তপ্পযোজনো লোকুত্তরসাধকোতি অত্থো. তস্স পরমত্থসাসনস্স. মূলেকদেসত্তাতি মূলভাৰেন একদেসত্তা.

১১৮. উন্নল়ো উগ্গততুচ্ছমানো.

১২৩. সীলস্স অনুগ্গণ্হনং অপরিসুদ্ধিযং সোধনং অপারিপূরিযং পূরণঞ্চাতি আহ ‘‘সোধেতব্বে চ ৰড্ঢেতব্বে চা’’তি. অধিসীলং নিস্সাযাতি অধিসীলং নিস্সযং কত্ৰা উপ্পন্নপঞ্ঞায.

১২৪. গূথসদিসত্তমেৰ দস্সেতি, ন গূথকূপসদিসত্তন্তি অধিপ্পাযো. গূথৰসেনেৰ হি কূপস্সপি জিগুচ্ছনীযতাতি. অযঞ্চ অত্থো গূথরাসিযেৰ গূথকূপোতি ইমস্মিং পক্খে নৰত্তব্বো সিযা.

১৩০. সরভঙ্গসত্থারাদযো রূপভৰাদিকামাদিপরিঞ্ঞং কত্ৰা পঞ্ঞপেন্তো লোকিযং পরিঞ্ঞং সম্মদেৰ পঞ্ঞপেন্তীতি আহ ‘‘যেভুয্যেন ন সক্কোন্তী’’তি. অসমত্থভাৰং ৰা সন্ধায নো চ পঞ্ঞাপেতুং সক্কোন্তীতি ৰুত্তন্তি যোজনা.

তিকনিদ্দেসৰণ্ণনা নিট্ঠিতা.

৪. চতুক্কনিদ্দেসৰণ্ণনা

১৩৩. পরেনাতি ¶ ¶ অঞ্ঞেন, আণত্তেনাতি অত্থো. আণত্তিযা অত্তনা চাতি আণাপকস্স আণত্তিযা, অত্তনা চ আণত্তেন কতং তঞ্চ তস্স আণাপকস্স যং ৰচীপযোগেন কতন্তি যোজনা. আণত্তিযা পাপস্সাতি আণাপনৰসেন পসুতপাপস্স.

১৪৮. দেসনায করণভূতায. ধম্মানন্তি দেসনায যথাবোধেতব্বানং সীলাদিধম্মানং.

১৫২. অনন্তরন্তি ঞাণস্স উপট্ঠিতন্তি অনন্তরং ৰুত্তং. কিং পন তন্তি আহ ‘‘ৰচন’’ন্তি. লুজ্জতীতি ইদং যেন কারণেন লোক-সদ্দো তদত্থে পৰত্তো, তং দস্সেতীতি আহ ‘‘কারণযুত্ত’’ন্তি.

১৫৬. সহিতাসহিতস্সাতি কুসলসদ্দযোগেন সামিৰচনং ভুম্মত্থেতি দস্সেন্তো আহ ‘‘সহিতাসহিতেতি অত্থো’’তি. সহিতভাসনেন দেসকসম্পত্তি, সহিতাসহিতকোসল্লেন সাৰকসম্পত্তি ৰেদিতব্বা. পরিসসম্পত্তিপি ঞাণসম্পন্নস্স ধম্মকথিকস্স পটিভানসম্পদায কারণং হোতীতি আহ ‘‘সাৰকসম্পত্তিযা বোধেতুং সমত্থতাযা’’তি.

১৫৭. কুসলধম্মেহীতি সমথৰিপস্সনাধম্মেহি. চতুত্থো ৰুত্তো, যো নেৰ সঙ্ঘং নিমন্তেতি, ন দানং দেতি.

১৬৬. যমিদং ‘‘কালেনা’’তি ৰুত্তন্তি ‘‘যো তত্থ অৰণ্ণো, তম্পি ভণতি কালেন. যোপি তত্থ ৰণ্ণো, তম্পি ভণতি কালেনা’’তি যং ইদং পাল়িযং ৰুত্তং, তত্র তস্মিং ৰচনে ৰাক্যে যো পুগ্গলো ‘‘কালেন ভণতী’’তি ৰুত্তো, সো কীদিসোতি ৰিচারণায তস্স দস্সনত্থং ‘‘কালঞ্ঞূ হোতী’’তিআদি পাল়িযং ৰুত্তন্তি দস্সেন্তো সঙ্গহে আহাতি যোজনা.

১৬৮. পুব্বুপ্পন্নপচ্চযৰিপত্তীতি তস্মিং অত্তভাৰে পঠমুপ্পন্নপচ্চযৰিপত্তি. তেসং ৰিপত্তি পৰত্তপ্পচ্চযৰিপত্তীতি যোজনা.

১৭৩. তেসন্তি ¶ ¶ পহীনাৰসিট্ঠকিলেসানং. ৰিমুত্তিদস্সনমেৰ হোতি ৰিমুত্তিঅত্থত্তা তংদস্সনস্স.

১৭৪. তন্তাৰুতানং ৰত্থানন্তি নিদ্ধারণে সামিৰচনং.

১৭৮. নামকাযোতি নামসমূহো. ইদমেৰ চ দ্ৰযন্তি সীলসংৰরপূরণং, সাজীৰাৰীতিক্কমনঞ্চাতি ইদমেৰ দ্ৰযং. ততোতি সাজীৰাৰীতিক্কমনতো. কথায হলিদ্দরাগাদিসদিসতাতি যোজনা. তেনাহ ‘‘ন পুগ্গলস্সা’’তি.

১৭৯. ইতি-সদ্দেনাতি ‘‘দারুমাসকো’’তি এত্থ ৰুত্তইতি-সদ্দেন. এৰংপকারেতি ইমিনাপি সলাকাদিকে সঙ্গণ্হাতি.

১৮১. অৰিসটসুখন্তি অৰিক্খেপসুখং.

১৮৭. খন্ধধম্মেসূতি সঙ্খতধম্মেসু. তদলাভেনাতি মগ্গফলালাভেন. অত্থেনাতি সীলাদিঅত্থেন.

চতুক্কনিদ্দেসৰণ্ণনা নিট্ঠিতা.

৫. পঞ্চকনিদ্দেসৰণ্ণনা

১৯১. যথা তেসু পটিপজ্জিতব্বন্তি তেসু পঞ্চসু পুগ্গলেসু যথারহং উপমেয্যোপমাদস্সনমুখেন হিতূপদেসপটিপত্তিযা যথা অঞ্ঞেহি পটিপজ্জিতব্বন্তি অত্থো. কিরিযাৰাচী আরম্ভ-সদ্দো অধিপ্পেতো, ন ‘‘আরম্ভকত্তুস্স কসাৰপুচ্ছা’’তিআদীসু ৰিয ধম্মৰাচীতি আহ ‘‘আরম্ভকিরিযাৰাচকো সদ্দো’’তি. ‘‘নিরুজ্ঝন্তী’’তি ৰুত্তত্তা ‘‘মগ্গকিচ্চৰসেনা’’তি ৰুত্তং.

১৯২. গহণং ¶ ‘‘এৰমেত’’ন্তি সম্পটিচ্ছনং.

১৯৯. ন এৰং সম্বন্ধো অসমানজাতিকত্তা.

পঞ্চকনিদ্দেসৰণ্ণনা নিট্ঠিতা.

৬. ছক্কনিদ্দেসৰণ্ণনা

২০২. ইদং ¶ সচ্চাভিসম্বোধাদিকং সঙ্গহিতং হোতি ফলস্স হেতুনা অৰিনাভাৰতো. তেনাহ ‘‘সাম’’ন্তিআদি. অনাচরিযকেন অত্তনা উপ্পাদিতেনাতি ইদং সব্বঞ্ঞুতঞ্ঞাণে ৰিজ্জমানগুণকথনং, ন তব্বিধুরধম্মন্তরনিৰত্তনং তথারূপস্স অঞ্ঞস্স অভাৰতো. তেনস্স সাচরিযকতা, পরতো চ উপ্পত্তি পটিক্খিত্তাতি ইমমত্থমাহ ‘‘তত্থা’’তিআদিনা. তত্থ সাচরিযকত্তং পরূপদেসহেতুকতা, পরতো উপ্পত্তি উপদেসেন ৰিনাপি সন্নিস্সায নিব্বত্তীতি অযমেতেসং ৰিসেসো.

ছক্কনিদ্দেসৰণ্ণনা নিট্ঠিতা.

৭. সত্তকনিদ্দেসৰণ্ণনা

২০৩. কুসলেসু ধম্মেসূতি আধারে ভুম্মং, ন ৰিসযেতি দস্সেন্তো ‘‘কুসলেসু ধম্মেসু অন্তোগধা’’তি আহ. ইদানি ৰিসযলক্খণং এতং ভুম্মন্তি দস্সেন্তো ‘‘বোধিপক্খিযধম্মেসু ৰা’’তিআদিমাহ. ‘‘তদুপকারতাযা’’তি ইদং কুসলেসু ধম্মেসু সাধেতব্বেসূতি ইমমত্থং সন্ধায ৰুত্তং. উম্মুজ্জনপঞ্ঞাযাতি উম্মুজ্জাপনপঞ্ঞায, উম্মুজ্জনাকারেন ৰা পৰত্তপঞ্ঞায. তেনেৰাতি উম্মুজ্জনমত্তত্তা এৰ. যথা হি ঞাণুপ্পাদো সংকিলেসপক্খতো উম্মুজ্জনং, এৰং সদ্ধুপ্পাদোপীতি আহ ‘‘সদ্ধাসঙ্খাতমেৰ উম্মুজ্জন’’ন্তি. চিত্তৰারোতি চিত্তপ্পবন্ধৰারো. পচ্চেকং ঠানৰিপস্সনাপতরণপতিগাধপ্পত্তিনিট্ঠত্তা ¶ তেসং পুগ্গলানং ‘‘অনেকে পুগ্গলা’’তি ৰুত্তং. কস্মা? তেনত্তভাৰেন অরহত্তস্স অগ্গহণতো. ততিযপুগ্গলাদিভাৰন্তি উম্মুজ্জিত্ৰা ঠিতপুগ্গলাদিভাৰং.

সত্তকনিদ্দেসৰণ্ণনা নিট্ঠিতা.

১০. দসকনিদ্দেসৰণ্ণনা

২০৯. সোতাপন্নাদযোতি ¶ ৰুত্তৰিসেসযুত্তা সোতাপন্নসকদাগামিঝানানাগামিনো. অসা…পে… পনাতি এত্থ পন-সদ্দো ৰিসেসত্থদীপনো. তেন ‘‘অজ্ঝত্তসংযোজনানং সমুচ্ছিন্নত্তা’’তি ইদং ৰিসেসং দীপেতীতি ৰেদিতব্বং.

দসকনিদ্দেসৰণ্ণনা নিট্ঠিতা.

পুগ্গলপঞ্ঞত্তিপকরণ-অনুটীকা সমত্তা.

কথাৰত্থুপকরণ-অনুটীকা

গন্থারম্ভৰণ্ণনা

সমুদাযে ¶ ¶ একদেসা অন্তোগধাতি সমুদাযো তেসং অধিট্ঠানভাৰেন ৰুত্তো যথা ‘‘রুক্খে সাখা’’তি দস্সেতি ‘‘কথাসমুদাযস্সা’’তিআদিনা. তত্থ কথানন্তি তিস্সো কথা ৰাদো জপ্পো ৰিতণ্ডাতি. তেসু যেন পমাণতক্কেহি পক্খপটিপক্খানং পতিট্ঠাপনপটিক্খেপা হোন্তি, সো ৰাদো. একাধিকরণা হি অঞ্ঞমঞ্ঞৰিরুদ্ধা ধম্মা পক্খপটিপক্খা যথা ‘‘হোতি তথাগতো পরং মরণা, ন হোতি তথাগতো পরং মরণা’’তি (দী. নি. ১.৬৫). নানাধিকরণা পন অঞ্ঞমঞ্ঞৰিরুদ্ধাপি পক্খপটিপক্খা নাম ন হোন্তি যথা ‘‘অনিচ্চং রূপং, নিচ্চং নিব্বান’’ন্তি. যেন ছলজাতিনিগ্গহট্ঠানেহি পক্খপটিপক্খানং পতিট্ঠাপনং পটিক্খেপারম্ভো, সো জপ্পো. আরম্ভমত্তমেৰেত্থ, ন অত্থসিদ্ধীতি দস্সনত্থং আরম্ভগ্গহণং. যায পন ছলজাতিনিগ্গহট্ঠানেহি পটিপক্খপটিক্খেপায ৰাযমন্তি, সা ৰিতণ্ডা. তত্থ অত্থৰিকপ্পুপপত্তিযা ৰচনৰিঘাতো ছলং যথা ‘‘নৰকম্বলোযং পুরিসো, রাজা নো সক্খী’’তি এৰমাদি ¶ . দূসনভাসা জাতযো, উত্তরপতিরূপকাতি অত্থো. নিগ্গহট্ঠানানি পরতো আৰি ভৰিস্সন্তি. এৰং ৰাদজপ্পৰিতণ্ডপ্পভেদাসু তীসু কথাসু ইধ ৰাদকথা ‘‘কথা’’তি অধিপ্পেতা. সা চ খো অৰিপরীতধম্মতায পতিট্ঠাপনৰসেন, ন ৰিগ্গাহিককথাভাৰেনাতি ৰেদিতব্বং. মাতিকাঠপনেনেৰাতি উদ্দেসদেসনায এৰ. ঠপিতস্সাতি দেসিতস্স. দেসনা হি দেসেতব্বমত্থং ৰিনেয্যসন্তানেসু ঠপনতো নিক্খিপনতো ঠপনং, নিক্খেপোতি চ ৰুচ্চতি.

গন্থারম্ভৰণ্ণনা নিট্ঠিতা.

নিদানকথাৰণ্ণনা

পরিনিব্বানমেৰ ¶ …পে… ৰুত্তং. অভিন্নসভাৰম্পি হি অত্থং তদঞ্ঞধম্মতো ৰিসেসাৰবোধনত্থং অঞ্ঞং ৰিয কত্ৰা ৰোহরন্তি যথা ‘‘অত্তনো সভাৰং ধারেন্তীতি ধম্মা’’তি (ধ. স. অট্ঠ. ১). সাতি অসঙ্খতা ধাতু. করণভাৰেন ৰুত্তা যথাৰুত্তস্স উপসমস্স সাধকতমভাৰং সন্ধায. ধম্মৰাদী…পে… দুব্বলতা ৰুত্তা তথারূপায পঞ্ঞায ভাৰে তাদিসানং পক্খভাৰাভাৰতো. লদ্ধিযাতি ‘‘অত্থি পুগ্গলো সচ্চিকট্ঠপরমত্থেন, পরিহাযতি অরহা অরহত্তা’’তিআদিলদ্ধিযা. সুত্তন্তেহীতি দেৰতাসংযুত্তাদীহি. লিঙ্গাকপ্পভেদং পরতো সযমেৰ ৰক্খতি.

ভিন্দিত্ৰা মূলসঙ্গহন্তি মূলসঙ্গীতিং ৰিনাসেত্ৰা, ভেদং ৰা কত্ৰা যথা সা ঠিতা, ততো অঞ্ঞথা কত্ৰা. সঙ্গহিততো ৰা অঞ্ঞত্রাতি মূলসঙ্গীতিযা সঙ্গহিততো অঞ্ঞত্র. তেনাহ ‘‘অসঙ্গহিতং সুত্ত’’ন্তি. নীতত্থং যথারুতৰসেন ৰিঞ্ঞেয্যত্থত্তা. নেয্যত্থং ৰিপরিণামদুক্খতাদিৰসেন নিদ্ধারেতব্বত্থত্তা. তীহি ঠানেহীতি ‘‘সূরা সতিমন্তো ইধ ব্রহ্মচরিযৰাসো’’তি (অ. নি. ৯.২১) এৰং ৰুত্তেহি তীহি কারণেহি. অঞ্ঞং সন্ধায ভণিতন্তি একং পব্বজ্জাসঙ্খাতং ব্রহ্মচরিযৰাসং সন্ধায ভণিতং. অঞ্ঞং অত্থং ঠপযিংসূতি সব্বস্সপি ব্রহ্মচরিযৰাসস্স ৰসেন ‘‘নত্থি দেৰেসু ব্রহ্মচরিযৰাসো’’তিআদিকং (কথা. ২৬৯) অঞ্ঞং অত্থং ঠপযিংসু. সুত্তঞ্চ অঞ্ঞং সন্ধায ভণিতং ততো অঞ্ঞং সন্ধায ভণিতং কত্ৰা ¶ ঠপযিংসু, তস্স অত্থঞ্চ অঞ্ঞং ঠপযিংসূতি এৰমেত্থ যোজনা ৰেদিতব্বা. সুঞ্ঞতাদীতি আদি-সদ্দেন অনিচ্চতাদিং সঙ্গণ্হাতি.

গম্ভীরং একদেসং মহাপদেসপরিৰারাদিং. একচ্চে সকলং অভিধম্মং ৰিস্সজ্জিংসু ছড্ডযিংসু সেয্যথাপি সুত্তন্তিকা. তে হি তং ন জিনৰচনন্তি ৰদন্তি. কথাৰত্থুস্স সৰিৰাদত্তেতিআদি হেট্ঠা নিদানট্ঠকথায আগতনযং সন্ধায ৰুত্তং. কেচি পন পুগ্গলপঞ্ঞত্তিযাপি সৰিৰাদত্তং মঞ্ঞন্তি. ‘‘ততিযসঙ্গীতিতো পুব্বে পৰত্তমানানং ৰসেনা’’তি ইদং কস্মা ৰুত্তং, ননু ততিযসঙ্গীতিতো পুব্বেপি তং মাতিকারূপেন পৰত্ততেৰ? নিদ্দেসং ৰা সন্ধায তথা ৰুত্তন্তি ৰেদিতব্বং. অঞ্ঞানীতি অঞ্ঞাকারানি অভিধম্মপকরণাদীনি অকরিংসু, পৰত্তন্তানিপি তানি অঞ্ঞথা কত্ৰা পঠিংসূতি অত্থো ¶ . মঞ্জুসিরীতি ইদং কস্মা ৰুত্তং. ন হি তং নামং পিটকত্তযং অনুৰত্তন্তেহি ভিক্খূহি গয্হতি? ইতরেহি গয্হমানম্পি ৰা সাসনিকপরিঞ্ঞেহি ন সাসনাৰচরং গয্হতীতি কত্ৰা ৰুত্তং. নিকাযনামন্তি মহাসঙ্ঘিকাদিনিকাযনামং, দুত্তগুত্তাদিৰগ্গনামঞ্চ.

সঙ্কন্তিকানং ভেদো সুত্তৰাদীতি সঙ্কন্তিকানং অনন্তরে একো নিকাযভেদো সুত্তৰাদী নাম ভিজ্জিত্থ. সহাতি একজ্ঝং কত্ৰা, গণিযমানাতি অত্থো.

উপ্পন্নে ৰাদে সন্ধাযাতি ততিযসঙ্গীতিকালে উপ্পন্নে ৰাদে সন্ধায. উপ্পজ্জনকেতি ততো পট্ঠায যাৰ সদ্ধম্মন্তরধানা এত্থন্তরে উপ্পজ্জনকে. সুত্তসহস্সাহরণঞ্চেত্থ পরৰাদভঞ্জনত্থঞ্চ সকৰাদপতিট্ঠাপনত্থঞ্চ. সুত্তেকদেসোপি হি ‘‘সুত্ত’’ন্তি ৰুচ্চতি সমুদাযৰোহারস্স অৰযৰেসুপি দিস্সনতো যথা ‘‘পটো দড্ঢো, সমুদ্দো দিট্ঠো’’তি চ. তে পনেত্থ সুত্তপদেসা ‘‘অত্থি পুগ্গলো অত্তহিতায পটিপন্নো’’তিআদিনা আগতা ৰেদিতব্বা.

নিদানকথাৰণ্ণনা নিট্ঠিতা.

মহাৰগ্গো

১. পুগ্গলকথা

১. সুদ্ধসচ্চিকট্ঠো

১. অনুলোমপচ্চনীকৰণ্ণনা

১. সম্বরাদীহি ¶ ¶ পকপ্পিতৰিজ্জা, তথাভিসঙ্খতানি ওসধানি চ ‘‘মাযা’’তি ৰুচ্চন্তি, ইধ পন মাযায আহিতৰিসেসা অভূতঞ্ঞেয্যাকারা অধিপ্পেতাতি দস্সেন্তো ‘‘মাযায অমণিআদযো মণিআদিআকারেন দিস্সমানা মাযাতি ৰুত্তা’’তি আহ. সচ্চঞ্ঞেৰ সচ্চিকং, সো এৰ অত্থো অৰিপরীতস্স ঞাণস্স ৰিসযভাৰট্ঠেনাতি সচ্চিকট্ঠো. তেনাহ ‘‘ভূতট্ঠো’’তি. অৰিপরীতভাৰতো এৰ পরমো পধানো অত্থোতি পরমত্থো, ঞাণস্স পচ্চক্খভূতো ধম্মানং অনিদ্দিসিতব্বসভাৰো. তেন ৰুত্তং ‘‘উত্তমত্থো’’তি.

অত্থীতি ৰচনসামঞ্ঞেনাতি ‘‘অত্থি পুগ্গলো অত্তহিতায পটিপন্নো’’তিআদীসু (অ. নি. ৪.৯৬; কথা. ২২) ‘‘অত্থী’’তি পৰত্তৰচনসামঞ্ঞেন. অত্থৰিকপ্পুপপত্তিযা ৰচনৰিঘাতো ছলন্তি ৰদন্তি. পতিট্ঠং পচ্ছিন্দন্তোতি হেতুং দূসেন্তো, অহেতুং করোন্তোতি অত্থো. হেতু হি পটিঞ্ঞায পতিট্ঠাপনতো পতিট্ঠা, তং পন হেতুং অত্থমত্ততো দস্সেন্তো ‘‘যদি সচ্চিকট্ঠেনা’’তিআদিমাহ. পযোগতো পন দূসনেন সদ্ধিং পরতো আৰি ভৰিস্সতি. ওকাসং অদদমানোতি যথানুরূপং যুত্তিং ৰত্তুং অৰসরং অদেন্তো. অথ ৰা পতিট্ঠং পচ্ছিন্দন্তো, পটিঞ্ঞং এৰ পরিৰত্তেন্তোতি অত্থো. উপলব্ভতি পুগ্গলোতি হি সকৰাদিং উদ্দিস্স পরৰাদিনো পটিঞ্ঞাৰ ¶ ন যুত্তা অপ্পসিদ্ধত্তা ৰিসেসিতব্বস্স. তেনেৰাহ ‘‘অনুপলব্ভনেয্যতো ন তৰ ৰাদো তিট্ঠতীতি নিৰত্তেন্তো’’তি. রূপঞ্চ উপলব্ভতি…পে… দস্সেতীতি এতেন পরৰাদিনা অধিপ্পেতহেতুনো ৰিপরীতত্থসাধকত্তং দস্সেতি.

উপলব্ভমানং নাম হোতীতি আকারতো তংআকারৰন্তানং অনঞ্ঞত্তাতি অধিপ্পাযো. অঞ্ঞথাতি আকার, আকারৰন্তানং ভেদে. এতিস্সাতি ‘‘ততো সো পুগ্গলো উপলব্ভতি সচ্চিকট্ঠপরমট্ঠেনা’’তি এৰং ¶ ৰুত্তায দুতিযপুচ্ছায. এস ৰিসেসোতি যো যথাৰুত্তো দ্ৰিন্নং পুচ্ছানং ৰিসযস্স সভাৰাকারভেদো, এস দ্ৰিন্নং পুচ্ছানং ৰিসেসো. সভাৰধম্মানং সামঞ্ঞলক্খণেন অভিন্নানম্পি সলক্খণতো ভেদোযেৰাতি অঞ্ঞধম্মস্স অঞ্ঞেনাকারেন ন কদাচিপি উপলব্ভো ভৰেয্য. যদি সিযা, অঞ্ঞত্তমেৰ ন সিযাতি রুপ্পনাদিসপচ্চযাদিআকারেন অনুপলব্ভমানোপি পুগ্গলো অত্তনো ভূতসভাৰট্ঠেন উপলব্ভতেৰাতি ৰদন্তং পরৰাদিনং পতি ‘‘যো সচ্চিকট্ঠো’’তিআদি চোদনা অনোকাসাতি দস্সেন্তো আহ ‘‘যথা পন…পে… নিগ্গহো চ ন কাতব্বো’’তি. তত্থ নিগ্গহোতি ‘‘আজানাহি নিগ্গহ’’ন্তি এৰং ৰুত্তনিগ্গহো, পরাজযারোপনেন পরৰাদিনো নিগ্গণ্হনন্তি অত্থো.

স্ৰাযং পন যস্মা তস্স ৰাদাপরাধহেতুকো, তস্মা তং দস্সেতুং অট্ঠকথাযং দোসাপরাধপরিযাযেহি ৰিভাৰিতো. অৰজাননঞ্হেত্থ নিগ্গহট্ঠানং. তথা হি পটিঞ্ঞাহানি, পটিঞ্ঞান্তরং, পটিঞ্ঞাৰিরোধো, পটিঞ্ঞাসঞ্ঞাসো, হেত্ৰন্তরং, অত্থন্তরং, নিরত্থকং, অৰিঞ্ঞাতত্থং, অসম্বন্ধত্থং, অপ্পত্তকালং, ঊনং, অধিকং, পুনরুত্তং, অননুভাসনং, অৰিঞ্ঞাতং, অপ্পটিভা, ৰিক্খেপো, মতানুঞ্ঞা, অনুযুঞ্জিতব্বস্স উপেক্খনং, অননুযুঞ্জিতব্বস্স অনুযোগো, অপসিদ্ধন্তরং, হেত্ৰাভাসা চাতি দ্ৰাৰীসতি নিগ্গহট্ঠানানি ঞাযৰাদিনো ৰদন্তি.

তত্থ ৰিসদিসূদাহরণধম্মানুজাননং পঠমুদাহরণে পটিঞ্ঞাহানি. পটিঞ্ঞাতত্থপটিসেধে তদঞ্ঞত্থনিদ্দেসো পটিঞ্ঞান্তরং. পটিঞ্ঞাৰিরুদ্ধহেতুকিত্তনং পটিঞ্ঞাৰিরোধো. পটিঞ্ঞাতত্থাপনযনং পটিঞ্ঞাসঞ্ঞাসো. অৰিসেসৰুত্তে হেতুম্হি পটিসিদ্ধে ৰিসেসহেতুকথনং হেত্ৰন্তরং. অধিকতত্থানুপযোগিঅত্থকথনং অত্থন্তরং. মাতিকাপাঠো ৰিয অত্থহীনং নিরত্থকং. তিক্খত্তুং ৰুত্তম্পি সক্খিপটিৰাদীহি অৰিদিতং অৰিঞ্ঞাতত্থং. পুব্বাপরৰসেন সম্বন্ধরহিতং অসম্বন্ধত্থং. অৰযৰৰিপল্লাসৰচনং অপ্পত্তকালং. অৰযৰৰিকলং ঊনং. অধিকহেতূদাহরণং অধিকং. ঠপেত্ৰা ¶ অনুৰাদং সদ্দত্থানং পুনপ্পুনং ৰচনং অত্থাপন্নৰচনঞ্চ পুনরুত্তং. পরিসায ৰিদিতস্স তীহি ৰুত্তস্স অপচ্চুদাহারো অননুভাসনং. যং ৰাদিনা ¶ ৰুত্তং পরিসায ৰিঞ্ঞাতং পটিৰাদিনা দুৰিঞ্ঞাতং, তং অৰিঞ্ঞাতং. তংৰাদিনা ৰত্তব্বে ৰুত্তে পরৰাদিনো পটিৰচনস্স অনুপট্ঠানং অপ্পটিভা. কিচ্চন্তরপ্পসঙ্গেন কথাৰিচ্ছিন্দনং ৰিক্খেপো. অত্তনো দোসানুজাননেন পরপক্খস্স দোসপ্পসঞ্জনং পরমতানুজাননং মতানুঞ্ঞা. নিগ্গহপ্পত্তস্স নিগ্গণ্হনং অনুযুঞ্জিতব্বস্স উপেক্খনং. সম্পত্তনিগ্গহস্স অনিগ্গহট্ঠানে চ নিগ্গণ্হনং অনুযুঞ্জিতব্বস্স অনুযোগো. একং সিদ্ধন্তমনুজানিত্ৰা অনিযমতো তদঞ্ঞসিদ্ধন্তকথাপ্পসঞ্জনং অপসিদ্ধন্তরং. অসিদ্ধা অনেকন্তিকা ৰিরুদ্ধা চ হেত্ৰাভাসা, হেতুপতিরূপকাতি অত্থো. তেসঞ্চ কথনং নিগ্গহট্ঠানন্তি.

ইমেসু দ্ৰাৰীসতিযা নিগ্গহট্ঠানেসু ইদং পটিঞ্ঞায অপনযনতো সযমেৰ পচ্চক্খানতো পটিঞ্ঞাসঞ্ঞাসো নাম নিগ্গহট্ঠানং. তেনেৰাহ ‘‘অৰজাননেনেৰ নিগ্গহং দস্সেতী’’তি. অসিদ্ধত্তাতি এতেন পচ্চক্খতো অনুমানতো চ পুগ্গলস্স অনুপলব্ভমাহ. ন হি সো পচ্চক্খতো উপলব্ভতি. যদি উপলব্ভেয্য, ৰিৰাদো এৰ ন সিযা, অনুমানম্পি তাদিসং নত্থি, যেন পুগ্গলং অনুমিনেয্যুং. তথা হি তং সাসনিকো পুগ্গলৰাদী ৰদেয্য ‘‘পুগ্গলো উপলব্ভতি, অত্থি পুগ্গলো’’তি ভগৰতা ৰুত্তত্তা রূপৰেদনাদি ৰিয. যঞ্হি ভগৰতা ‘‘অত্থী’’তি যদি ৰুত্তং, তং পরমত্থতো অত্থি যথা তং রূপং ৰেদনা সঞ্ঞা সঙ্খারা ৰিঞ্ঞাণং. যং পন পরমত্থতো নত্থি, ন তং ভগৰতা ‘‘অত্থী’’তি ৰুত্তং যথা তং পকতিৰাদিআদীনং পকতিআদীতি, তং মিচ্ছা. এত্থ হি যদি ৰোহারতো পুগ্গলস্স অত্থিভাৰো অধিপ্পেতো, সিদ্ধং সাধনং, অথ পরমত্থতো, অসিদ্ধো হেতু তথা অৰুত্তত্তা. ৰিরুদ্ধো চ তস্স অনিচ্চসঙ্খতপটিচ্চসমুপ্পন্নাদিভাৰাসাধনতো রূপৰেদনাদীসু তথা দিট্ঠত্তাতিআদিনা তস্স অহেতুকভাৰস্সেৰ পাকটভাৰতো.

যং পন বাহিরকা পুথু অঞ্ঞতিত্থিযা ৰদন্তি. অত্থেৰ চ পরমত্থতো অত্তা ঞাণাভিধানস্স পৰত্তিযা নিমিত্তভাৰতো রূপাদি ৰিয. অথ ৰা অত্তাতিরিত্তপদত্থন্তরো রূপক্খন্ধো খন্ধসভাৰত্তা যথা তং ইতরক্খন্ধা. যঞ্হেত্থ পদত্থন্তরং, সো পুগ্গলোতি অধিপ্পাযো.

এত্থ ¶ চ পুরিমস্স হেতুনো পঞ্ঞত্তিযা অনেকন্তিকতা অসিদ্ধতা চ. ন হি অসতো সকৰাদিনং ¶ পতি পরমত্থতো ঞাণাভিধানপ্পৰত্তিযা নিমিত্তভাৰো সিজ্ঝতি. ৰোহারতো চে, তদসিদ্ধসাধনতা রূপাদিসভাৰৰিনিমুত্তরূপোপি পুগ্গলো ন হোতীতি এৰমাদিৰিরুদ্ধত্থতা. পচ্ছিমস্স পন হেতুনো সাধেতব্বত্থসামঞ্ঞপরিগ্গহে সিদ্ধসাধনতা, রূপক্খন্ধতো পদত্থন্তরতো পরমত্থন্তরভূতৰেদনাদিসম্ভৰস্স ইচ্ছিতত্তা চ. তব্বিসেসপরিগ্গহে চ সকৰাদিনং পতি উদাহরণাভাৰো পরপরিকপ্পিতজীৰপদত্থৰিরহতো. ইতরক্খন্ধানং ৰেদনাদিৰিনিমুত্তউভযসিদ্ধজীৰপদত্থসহিতোপি রূপক্খন্ধো ন হোতি ইতরক্খন্ধা ৰিযাতি ৰিরুদ্ধত্থতা চ.

যং পন কাণাদা ‘‘সুখাদীনং নিস্সযভাৰতো’’তি অনুমানং ৰদন্তি, তে ইদং ৰত্তব্বা – কিং সুখাদীনং অত্তনি পটিবদ্ধং যতো সুখাদিনিস্সযতায অত্তা অনুমীযতি. যদি উপ্পাদো, এৰং সন্তে সব্বেপি সুখাদযো একতো এৰ ভৰেয্যুং কারণস্স সন্নিহিতভাৰতো অঞ্ঞনিরপেক্খতো চ. অথ অঞ্ঞম্পি কিঞ্চি ইন্দ্রিযাদিকারণন্তরমপেক্খিতব্বং, তদেৰ হোতু কারণং, কিমঞ্ঞেন অদিট্ঠসামত্থিযেন পরিকপ্পিতেন পযোজনং. অথ পন তেসং অত্তাধীনা ৰুত্তীতি ৰদেয্যুং, এৰম্পি ন সিজ্ঝতি উদাহরণাভাৰতো. ন হি রূপাদিৰিনিমুত্তো তাদিসো কোচি সভাৰধম্মো সুখাদিসন্নিস্সযভূতো অত্থি, যতো অত্তনো অত্তত্থসিদ্ধিযা উদাহরণং অপদিসেয্যুং. ইমিনা নযেন অসমাসপদাভিধেয্যত্তাতিআদীনম্পি অযুত্তত্তা নিৰারেতব্বা. তথা ‘‘অঞ্ঞস্স সচ্চিকট্ঠস্স অসিদ্ধত্তা’’তি ইমিনা চ পকতিঅণুআদীনম্পি বাহিরপরিকপ্পিতানং অসিদ্ধতা ৰুত্তাৰাতি ৰেদিতব্বা. কথং পন তেসং অসিদ্ধীতি? পমাণেন অনুপলব্ভনতো. ন হি পচ্চক্খতো পকতি সিদ্ধা কপিলস্সপি ইসিনো তস্স অপচ্চক্খভাৰস্স কাপিলেহি অনুঞ্ঞাযমানত্তা.

যং পন ‘‘অত্থি পধানং ভেদানং অন্ৰযদস্সনতো সকলকলাপমত্তং ৰিযা’’তি তে অনুমানং ৰদন্তি. ইমিনা হি ভেদানং সত্ৰাদীনং ৰিজ্জমানপধানতা পটিঞ্ঞাতা. এত্থ চ ৰুচ্চতে – সকলাদীনং পধানং তব্বিভাগেহি কিং অঞ্ঞত্তং, উদাহু অনঞ্ঞন্তি, কিঞ্চেত্থ যদি অঞ্ঞত্তং, সব্বো লোকো পধানমযোতি সমযৰিরোধো সিযা, সণ্ঠানভেদেন অঞ্ঞত্থ পটিজাননতো ¶ ন দোসোতি চে? তং ন, ৰলযকটকাদিসণ্ঠানভেদেপি কনকাভেদদস্সনতো. ন হি সণ্ঠানং ৰত্থুভেদনিমিত্তং তস্স অনুপাদানত্তা. যং যস্স ভেদনিমিত্তং, ন তং তস্স অনুপাদানং যথা সুৰণ্ণমত্তিকাদিঘটাদীনং সুৰণ্ণঘটো মত্তিকাঘটো কোসেয্যপটো কপ্পাসপটোতি চ সাধেতব্বধম্মরহিতঞ্চ উদাহরণং. ন হি পধানেককারণপুব্বকত্তং সকলাদীনং পকতিৰাদিনো ¶ সিদ্ধং, নাপি কাপিলানং কথঞ্চি অঞ্ঞত্তানুজাননতো. অনঞ্ঞত্তে পন উদাহরণাভাৰো. ন হি তদেৰ সাধেতব্বং তদেৰ চ উদাহরণং যুত্তং, অন্ৰযদস্সনম্পি অসিদ্ধং. ন হি তদেৰ তেন অন্ৰিতং যুজ্জতি. পধানেন অন্ৰযদস্সনম্পি অসিদ্ধং পরৰাদিনোতি গুণস্স পধানস্স অননুজাননতো. অথ যং কিঞ্চি কারণং পধানং ‘‘পধীযতি এত্থ ফল’’ন্তি, এৰম্পি অসিদ্ধমেৰ কারণে ফলস্স অত্থিভাৰাননুজাননতো, হেতুনো চ অসিদ্ধনিস্সযতাপরাভিমতভেদাননুজাননতো. অথ ৰিসেসেন কারণাযত্তৰুত্তিতা ফলস্স সাধীযতি, ন কিঞ্চি ৰিরুদ্ধং ধম্মানং যথাসকং পচ্চযেন পটিচ্চসমুপ্পত্তিযা ইচ্ছিতত্তাতি.

অপিচ পকতিৰাদিনো ‘‘সত্ৰরজতমসঙ্খাতানং তিণ্ণং গুণানং সমভাৰো পকতি, সা চ নিচ্চা সত্ৰাদিৰিসমসভাৰতো অনিচ্চতো মহতাদিৰিকারতো অনঞ্ঞা’’তি পটিজানন্তি. সা তেসং ৰুত্তপ্পকারা পকতি ন সিজ্ঝতি ততো ৰিরুদ্ধসভাৰতো ৰিকারতো অনঞ্ঞত্তা. ন হি অস্সস্স ৰিসাণং দীঘং, তঞ্চ রস্সতো গোৰিসাণতো অনঞ্ঞন্তি ৰুচ্চমানং সিজ্ঝতি. কিঞ্চ ভিয্যো? তিণ্ণং একভাৰাভাৰতো. সত্ৰাদিগুণত্তযতো হি পকতিযা অনঞ্ঞত্তং ইচ্ছন্তানং তেসং সত্ৰাদীনম্পি পকতিযা অনঞ্ঞত্তং আপজ্জতি, ন চ যুত্তং তিণ্ণং একভাৰোতি. এৰম্পি পকতি ন সিজ্ঝতি. কথং? অনেকদোসাপত্তিতো. যদি হি ব্যত্তসভাৰতো ৰিকারতো অব্যত্তসভাৰা পকতি অনঞ্ঞা, এৰং সন্তে হেতুমন্ততা অনিচ্চতা অব্যাপিতা সকিরিযতা অনেকতা নিস্সিততা লিঙ্গতা সাৰযৰতা পরতন্ত্রতাতি এৰমাদযো অনেকে দোসা পকতিযা আপজ্জন্তি, ন জাতিৰিকারতো অনঞ্ঞা পটিজানিতব্বা. তথা চ সতি সমযৰিরোধোতি কপ্পনামত্তং পকতীতি অসিদ্ধা সাতি নিট্ঠমেত্থ গন্তব্বং.

পকতিযা ¶ চ অসিদ্ধায তংনিমিত্তকভাৰেন ৰুচ্চমানা মহতাদযোপি অসিদ্ধা এৰ. যথা চ পকতি মহতাদযো চ, এৰং ইস্সরপজাপতিপুরিসকালসভাৰনিযতিযদিচ্ছাদযোপি. এতেসু হি ইস্সরো তাৰ ন সিজ্ঝতি উপকারস্স অদস্সনতো. সত্তানঞ্হি জাতিযং মাতাপিতূনং বীজখেত্তভাৰেন কম্মস্স হীনতাদিৰিভাগকরণেন, ততো পরঞ্চ উতুআহারানং ব্রূহনুপত্থম্ভনেন, ইন্দ্রিযানং দস্সনাদিকিচ্চসাধনেন উপকারো দিস্সতি, ন, এৰমিস্সরস্স. হীনতাদিৰিভাগকরণমিস্সরস্সাতি চে? তং ন, অসিদ্ধত্তা. যথাৰুত্তো উপকারৰিসেসো ইস্সরনিম্মিতো, ন কম্মুনাতি সাধনীযমেতং. ইতরত্রাপি সমানমেতন্তি চে? ন, কম্মতো ফলনিযমসিদ্ধত্তা ¶ . সতি হি কতূপচিতে কম্মস্মিং তত্থ যং অকুসলং, ততো হীনতা, যং কুসলং, ততো পণীততাতি সিদ্ধমেতং. ইস্সরৰাদিনাপি হি ন সক্কা কম্মং পটিক্খিপিতুং.

অপিচেতস্স লোকৰিচিত্তস্স ইস্সরনিম্মানভাৰে বহূ দোসা সম্ভৰন্তি. কথং? যদি সব্বমিদং লোকৰিচিত্তং ইস্সরনিম্মিতং, সহেৰ ৰচনেন পৰত্তিতব্বং, ন কমেন. ন হি সন্নিহিতকারণানং ফলানং কমেন উপ্পত্তি যুত্তা, কারণন্তরাপেক্খায ইস্সরস্স সামত্থিযহানি. চক্খাদীনং চক্খুৰিঞ্ঞাণাদীসু কারণভাৰো ন যুত্তো. করোতীতি হি কারণন্তি. ইস্সরো এৰ চ কারকোতি সব্বকারণানং কারণভাৰহানি. যেহি পুথুৰিসেসেহি ইস্সরো পসীদেয্য, তেসঞ্চ সযংকারতা আপজ্জতি, তথা সব্বেসং হেতুকানং কারণভাৰো. যঞ্জেতং নিম্মানং, তঞ্চস্স অত্তদত্থং ৰা সিযা, পরত্থং ৰা সিযা. অত্তদত্থতাযং অত্তনো ইস্সরভাৰহানি অকতকিচ্চতায ইসিতাৰসিতাভাৰতো. তেন ৰা নিম্মিতেন যং অত্তনো কাতব্বং, তং কস্মা সযমেৰ ন করোতি. পরত্থতাযং পন পরো নামেত্থ লোকো এৰাতি কিমত্থিযং তস্স নিরযাদিরোগাদিৰিসাদিনিম্মানং. যা চস্স ইস্সরতা, সা সযংকতা ৰা সিযা পরংকতা ৰা অহেতুকা ৰা. তত্থ সযংকতা চে, ততো পুব্বে অনিস্সরভাৰাপত্তি. পরংকতা চে, পচ্ছাপি অনিস্সরভাৰাপত্তি সউত্তরতা চ সিযা. অহেতুকা চে, ন কস্সচি অনিস্সরতাতি এৰমিস্সরস্সপি অসিদ্ধি ৰেদিতব্বা.

যথা চ ইস্সরো, এৰং পজাপতি পুরিসো চ. নামমত্তমেৰ হেত্থ ৰিসেসো. তেহি ৰাদীহি পকপ্পিতং যদিদং ‘‘পজাপতি পুরিসো’’তি. তংনিমিত্তকং ¶ পন লোকপ্পৰত্তিং ইচ্ছন্তানং পজাপতিৰাদে পুরিসৰাদে চ ইস্সরৰাদে ৰিয দোসা অসিদ্ধি চ ৰিধাতব্বা. যথা চেতে ইস্সরাদযো, এৰং কালোপি অসিদ্ধো লক্খণাভাৰতো. পরমত্থতো হি ৰিজ্জমানানং ধম্মানং সভাৰসঙ্খাতং লক্খণং উপলব্ভতি. যথা পথৰিযা কথিনতা, ন এৰং কালস্স, তস্মা নত্থি পরমত্থতো কালোতি. কালৰাদী পনাহ ‘‘ৰত্তনালক্খণো কালো’’তি. সো ৰত্তব্বো ‘‘কা পনাযং ৰত্তনা’’তি. সো আহ ‘‘সমযমুহুত্তাদীনং পৰত্তী’’তি. তম্পি ন, রূপাদীহি অত্থন্তরভাৰেন অনিদ্ধারিতত্তা. পরমত্থতো হি অনিদ্ধারিতসভাৰস্স ৰত্তনালক্খণতাযং সসৰিসাণাদীনম্পি তংলক্খণতা আপজ্জেয্য.

যং পন ৰদন্তি কাণাদা ‘‘অপরস্মিং অপরং যুগপদি চিরং খিপ্পমিতি কাললিঙ্গানীতি লিঙ্গসব্ভাৰতো ¶ অত্থি কালো’’তি, তং অযুত্তং লিঙ্গিনো অনুপলব্ভমানত্তা. সিদ্ধসম্বন্ধেসু হি লিঙ্গেসু লিঙ্গমত্তগ্গহণেন লিঙ্গিনি অৰবোধো ভৰেয্য. ন চ কেনচি অৰিপরীতচেতসা তেন লিঙ্গেন সহ কদাচি কালসঙ্খাতো লিঙ্গী গহিতপুব্বোতি. অতো ন যুত্তং ‘‘লিঙ্গসব্ভাৰতো অত্থি কালো’’তি. ‘‘অপরস্মিং অপর’’ন্তিআদিকস্স ৰিসেসস্স নিমিত্তভাৰতো যুত্তন্তি চে? ন, পঠমজাততাদিনিমিত্তকত্তা তস্স. ন চ পঠমজাততাদি নাম কোচি ধম্মো অত্থি অঞ্ঞত্র সমঞ্ঞামত্ততোতি নত্থেৰ পরমত্থতো কালো. কিঞ্চ ভিয্যো, বহূনং একভাৰাপত্তিতো. অতীতাদিৰিভাগেন হি লোকসমঞ্ঞাৰসেন বহূ কালভেদা. ত্ৰঞ্চেতং একং ৰদসীতি বহূনং একভাৰাভাৰতো নত্থেৰ পরমত্থতো কালো. তথা একস্স অনেকভাৰাপত্তিতো. যো হি অযং অজ্জ ৰত্তমানকালো, সো হিয্যো অনাগতো অহোসি, স্ৰে অতীতো ভৰিস্সতি. হিয্যো চ ৰত্তমানো অজ্জ অতীতো অহোসি, তথা স্ৰে ৰত্তমানোপি অপরজ্জ. ন চেকসভাৰস্স অনেকসভাৰতা যুত্তাতি অসিদ্ধো পরমত্থতো কালো. ধম্মপ্পৰত্তিং পন উপাদায কপ্পনামত্তসিদ্ধায লোকসমঞ্ঞায অতীতাদিৰিভাগতো ৰোহরীযতীতি ৰোহারমত্তকোতি দট্ঠব্বো.

সভাৰনিযতিযদিচ্ছাদযোপি অসিদ্ধা. কিং কারণা? লক্খণাভাৰা. ন হি সভাৰতো নিযতিযদিচ্ছা সম্ভৰতি. অঞ্ঞথা এৰংৰিধো কোচি ¶ ভাৰো অত্থি চে, তেসং সভাৰসঙ্খাতেন লক্খণেন ভৰিতব্বং, পতিট্ঠাপকহেতুনা চ ন চত্থি. কেৰলং পনেতে ৰাদা ৰিমদ্দিযমানা অহেতুৰাদে এৰ তিট্ঠন্তি, ন চাহেতুকং লোকৰিচিত্তং ৰিসেসাভাৰপ্পসঙ্গতো. অহেতুকভাৰে হি পৰত্তিযা য্ৰাযং নরসুরনিরযতিরচ্ছানাদীসু ইন্দ্রিযাদীনং ৰিসেসো, তস্স অভাৰো আপজ্জতি, ন চাযং পণ্ডিতেহি ইচ্ছিতো. কিঞ্চ? দিট্ঠভাৰতো. দিট্ঠা হি চক্খাদিতো চক্খুৰিঞ্ঞাণাদীনং বীজাদিতো অঙ্কুরাদীনং পৰত্তি, তস্মাপি হেতুতোৰাযং পৰত্তি. তথা পুরে পচ্ছা চ অভাৰতো. যতো যতো হি পচ্চযসামগ্গিতো যং যং ফলং নিব্বত্ততি, ততো পুব্বে পচ্ছা চ ন তস্স নিব্বত্তি সম্ভৰতি, কিঞ্চ বহুনা. যদি অহেতুতো পৰত্তি সিযা, অহেতুকা পৰত্তীতি ইমাপি ৰাচা যথাসকপচ্চযসমৰাযতো পুরে পচ্ছা চ ভৰেয্যুং, ন চ ভৰন্তি অলদ্ধপ্পচ্চযত্তা, মজ্ঝে এৰ চ ভৰন্তি লদ্ধপ্পচ্চযত্তা. এৰং সব্বেপি সঙ্খতা ধম্মাতি ন সিজ্ঝতি অহেতুৰাদো. তস্মিঞ্চ অসিদ্ধে পৰত্তিযা অহেতুভাৰো ৰিয অহেতুপরিযাযৰিসেসভূতা সভাৰনিযতিযদিচ্ছাদযোপি অসিদ্ধা এৰ হোন্তীতি ৰেদিতব্বা.

যং পন কাণাদা ‘‘পরমাণৰো নিচ্চা, তেহি দ্ৰিঅণুকাদিফলং নিব্বত্ততি, তঞ্চ অনিচ্চং ¶ , তস্স ৰসেনেতং লোকৰিচিত্ত’’ন্তি ৰদন্তি, তম্পি মিচ্ছাপরিকপ্পমত্তং. ন হি পরমাণৰো নাম সন্তি অঞ্ঞত্র ভূতসঙ্ঘাতা. সো পন অনিচ্চোৰ, ন চ নিচ্চতো অনিচ্চস্স নিব্বত্তি যুত্তা তস্স কারণভাৰানুপপত্তিতো তথা অদস্সনতো চ. যদি চ সো কস্সচি কারণভাৰং গচ্ছেয্য, অনিচ্চো এৰ সিযা ৰিকারাপত্তিতো. ন চাযং সম্ভৰো অত্থি, যং ৰিকারং অনাপজ্জন্তমেৰ কারণং ফলং নিব্বত্তেয্যাতি. ৰিকারঞ্চে আপজ্জতি, কুতস্স নিচ্চতাৰকাসো, তস্মা ৰুত্তপ্পকারা পরমাণৰো সত্তা অনিচ্চা, অঞ্ঞেপি নিচ্চাদিভাৰেন বাহিরকেহি পরিকপ্পিতা অসিদ্ধা এৰাতি ৰেদিতব্বং. তেন ৰুত্তং ‘‘ধম্মপ্পভেদতো পন অঞ্ঞস্স সচ্চিকট্ঠস্স অসিদ্ধত্তা’’তি.

এত্থাহ ‘‘যদি পরমত্থতো পুগ্গলো ন উপলব্ভতি, এৰং পন পুগ্গলে অনুপলব্ভমানে অথ কস্মা ভগৰা ‘অত্থি পুগ্গলো অত্তহিতায পটিপন্নো’তি (অ. নি. ৪.৯৫; কথা. ২২), ‘চত্তারোমে, ভিক্খৰে, পুগ্গলা সন্তো সংৰিজ্জমানা লোকস্মি’ন্তি ¶ (অ. নি. ৪.৯৫; কথা. ২২) চ তত্থ তত্থ পুগ্গলস্স অত্থিভাৰং পৰেদেসী’’তি. ৰিনেয্যজ্ঝাসযৰসেন. তথা তথা ৰিনেতব্বানঞ্হি পুগ্গলানং অজ্ঝাসযৰসেন ৰিনেয্যদমনকুসলো সত্থা ধম্মং দেসেন্তো লোকসমঞ্ঞানুরূপং তত্থ তত্থ পুগ্গলগ্গহণং করোতি, ন পরমত্থতো পুগ্গলস্স অত্থিভাৰতো.

অপিচ অট্ঠহি কারণেহি ভগৰা পুগ্গলকথং কথেতি হিরোত্তপ্পদীপনত্থং, কম্মস্সকতাদীপনত্থং, পচ্চত্তপুরিসকারদীপনত্থং, আনন্তরিযদীপনত্থং, ব্রহ্মৰিহারদীপনত্থং, পুব্বেনিৰাসদীপনত্থং, দক্খিণাৰিসুদ্ধিদীপনত্থং, লোকসম্মুতিযা অপ্পহানত্থঞ্চাতি. ‘‘খন্ধা ধাতূ আযতনানি হিরীযন্তি ওত্তপ্পন্তী’’তি হি ৰুত্তে মহাজনো ন জানাতি, সম্মোহং আপজ্জতি, পটিসত্তু ৰা হোতি ‘‘কিমিদং খন্ধা ধাতূ আযতনানি হিরীযন্তি ওত্তপ্পন্তি নামা’’তি. ‘‘ইত্থী হিরীযতি ওত্তপ্পতি, পুরিসো, খত্তিযো, ব্রাহ্মণো’’তি পন ৰুত্তে জানাতি, ন সম্মোহং আপজ্জতি, ন পটিসত্তু হোতি, তস্মা ভগৰা হিরোত্তপ্পদীপনত্থং পুগ্গলকথং কথেতি. ‘‘খন্ধা কম্মস্সকা, ধাতুযো আযতনানী’’তি ৰুত্তেপি এসেৰ নযো. তস্মা কম্মস্সকতাদীপনত্থম্পি পুগ্গলকথং কথেতি. ‘‘ৰেল়ুৰনাদযো মহাৰিহারা খন্ধেহি কারাপিতা, ধাতূহি, আযতনেহী’’তি ৰুত্তেপি এসেৰ নযো. তথা ‘‘খন্ধা মাতরং জীৰিতা ৰোরোপেন্তি, পিতরং, অরহন্তং, রুহিরুপ্পাদকম্মং, সঙ্ঘভেদকম্মং করোন্তি, ধাতুযো, আযতনানী’’তি ৰুত্তেপি, ‘‘খন্ধা মেত্তাযন্তি ¶ , ধাতুযো, আযতনানী’’তি ৰুত্তেপি, ‘‘খন্ধা পুব্বেনিৰাসং অনুস্সরন্তি, ধাতুযো, আযতনানী’’তি ৰুত্তেপি এসেৰ নযো. তস্মা ভগৰা পচ্চত্তপুরিসকারদীপনত্থং আনন্তরিযদীপনত্থং ব্রহ্মৰিহারদীপনত্থং পুব্বেনিৰাসদীপনত্থঞ্চ পুগ্গলকথং কথেতি. ‘‘খন্ধা দানং পটিগ্গণ্হন্তি, ধাতুযো, আযতনানী’’তি ৰুত্তেপি মহাজনো ন জানাতি, সম্মোহং আপজ্জতি, পটিসত্তু ৰা হোতি ‘‘কিমিদং খন্ধা ধাতূ আযতনানি পটিগ্গণ্হন্তি নামা’’তি. ‘‘পুগ্গলো পটিগ্গণ্হাতী’’তি পন ৰুত্তে জানাতি, ন সম্মোহং আপজ্জতি, ন পটিসত্তু হোতি, তস্মা ভগৰা দক্খিণাৰিসুদ্ধিদীপনত্থং পুগ্গলকথং কথেতি. লোকসম্মুতিঞ্চ বুদ্ধা ভগৰন্তো নপ্পজহন্তি লোকসমঞ্ঞায লোকাভিলাপে ঠিতাযেৰ ধম্মং দেসেন্তি, তস্মা ভগৰা লোকসম্মুতিযা অপ্পহানত্থম্পি পুগ্গলকথং কথেতীতি ইমেহি অট্ঠহি ¶ কারণেহি ভগৰা পুগ্গলকথং কথেতি, ন পরমত্থতো পুগ্গলস্স অত্থিভাৰতোতি ৰেদিতব্বং.

ধম্মপ্পভেদাকারেনেৰাতি যথাৰুত্তরূপাদিধম্মপ্পভেদতো অঞ্ঞস্স সচ্চিকট্ঠস্স অসিদ্ধত্তা রূপাদিধম্মপ্পভেদাকারেনেৰ পুগ্গলস্স উপলদ্ধিযা ভৰিতব্বন্তি অত্থো. তেন ‘‘কিং তৰ পুগ্গলো উপলব্ভমানো রুপ্পনাকারেন উপলব্ভতি, উদাহু অনুভৰনসঞ্জাননাভিসঙ্খরণৰিজাননেসু অঞ্ঞতরাকারেনা’’তি দস্সেতি তব্বিনিমুত্তস্স সভাৰধম্মস্স লোকে অভাৰতো. অৰিসেসৰিসেসেহি পুগ্গলূপলব্ভস্স পটিঞ্ঞাপটিক্খেপপক্খা অনুজাননাৰজাননপক্খা. যদিপিমে দ্ৰেপি পক্খা অনুলোমপটিলোমনযেসু লব্ভন্তি, আদিতো পন পঠমং ঠপেত্ৰা পৰত্তো পঠমনযো, ইতরো দুতিযন্তি ইমং নেসং ৰিসেসং দস্সেন্তো ‘‘অনুজাননা…পে… ৰেদিতব্বো’’তি আহ. যথাধিকতায লদ্ধিযা অনুলোমনতো চেত্থ পঠমো নযো অনুলোমপক্খো, তব্বিলোমনতো ইতরো পটিলোমপক্খোতি ৰুত্তোতি ৰেদিতব্বন্তি.

তেন ৰত রেতি এত্থ তেনাতি কারণৰচনং. যেন পুগ্গলূপলব্ভো পতিট্ঠপীযতি, তেন হেতুনা. স্ৰাযং হেতু সাসনিকস্স বাহিরকস্স চ ৰসেন হেট্ঠা দস্সিতো এৰ. হেতুপতিরূপকে চাযং হেতুসমঞ্ঞা পরমত্থস্স অধিপ্পেতত্তা. হেট্ঠা ‘‘আজানাহি নিগ্গহ’’ন্তি নিগ্গহস্স সঞ্ঞাপনমত্তং কতং, তং ইদানি ‘‘যং তত্থ ৰদেসী’’তিআদিনা নিগমনরূপেন মিচ্ছাভাৰদস্সনেন চ ৰিভাৰিযমানং পাকটভাৰকরণতো আরোপিতং পতিট্ঠাপিতং হোতীতি অট্ঠকথাযং ‘‘আরোপিতত্তা’’তি ৰুত্তং.

এত্থ ¶ চ ‘‘পুগ্গলো উপলব্ভতী’’তি পটিঞ্ঞাৰযৰো সরূপেনেৰ দস্সিতো. ‘‘তেনা’’তি ইমিনা সামঞ্ঞতো হেতাৰযৰো দস্সিতো. য্ৰাযং যস্মা পটিঞ্ঞাধম্মো হুত্ৰা সদিসপক্খে ৰিজ্জমানো, ৰিসদিসপক্খে অৰিজ্জমানোযেৰ হেতু লক্খণূপপন্নো নাম হোতি, ন ইতরো, তস্মা যত্থ সো ৰিজ্জতি ন ৰিজ্জতি চ, সো সদিসাসদিসভাৰভিন্নো দুৰিধো দিট্ঠন্তাৰযৰো. যথা রূপাদি উপলব্ভতি, তথা পুগ্গলো. যথা চ সসৰিসাণং ন উপলব্ভতি, ন তথা পুগ্গলোতি উপনযো. স্ৰাযং ‘‘ৰত্তব্বে খো পুগ্গলো উপলব্ভতি সচ্চিকট্ঠপরমত্থেনা’’তি ইমায পাল়িযা দীপিতো, যো অট্ঠকথাযং সদ্ধিং হেতুদাহরণেহি ‘‘পাপনা’’তি ৰুত্তো. নিগমনং পাল়িযং সরূপেনেৰ আগতং, যা অট্ঠকথাযং ‘‘রোপনা’’তি ¶ ৰুত্তাতি. এৰং পোরাণেন ঞাযক্কমেন সাধনাৰযৰা নিদ্ধারেত্ৰা যোজেতব্বা.

ইদানি ৰত্তনেন পরপক্খুপলক্খিতে হেতুদাহরণে অন্ৰযব্যতিরেকদস্সনৰসেন নিদ্ধারেত্ৰা সাধনপযোগো যোজেতব্বো. কারণং ৰত্তব্বন্তি কিমেত্থ ৰত্তব্বং. হেতুদাহরণেহিযেৰ হি সপরপক্খানং সাধনং দূসনং ৰা, ন পটিঞ্ঞায, তস্সা সাধেতব্বাদিভাৰতো. তং পন দ্ৰযং ‘‘তেন ৰত রে’’তিআদিপাল়িযা ৰিভাৰিতং. অট্ঠকথাযং পাপনারোপনাসীসেন দস্সিতং. পটিঞ্ঞাঠপনা পন তেসং ৰিসযদস্সনং কথাযং তংমূলতাযাতি ৰেদিতব্বং. তেনাহ ‘‘যং পন ৰক্খতী’’তিআদি. তেনেৰ চ অট্ঠকথাযং ‘‘ইদং অনুলোম…পে… একং চতুক্কং ৰেদিতব্ব’’ন্তি ৰক্খতি. তথা চাহ ‘‘যথা পন তত্থা’’তিআদি. নিগ্গহোৰ ৰিসুং ৰুত্তো, ন পটিকম্মন্তি অধিপ্পাযো. ৰিসুং ৰুত্তোতি চ পাপনারোপনাহি অসম্মিস্সং কত্ৰা ৰিসুং অঙ্গভাৰেন ৰুত্তো, ন তদঞ্ঞতরো ৰিয তদন্তোগধভাৰেন ৰুত্তো, নাপি ঠপনা ৰিয অগণনুপগভাৰেনাতি অত্থো. যে পনাতি পদকারে সন্ধাযাহ. দুতিযে…পে… আপজ্জতি তত্থ নিগ্গহস্স অযথাভূতত্তা পটিকম্মস্স চ যথাভূতভাৰতোতি অধিপ্পাযো.

২. পরমত্থতো পুগ্গলং নানুজানাতি, ৰোহারতো পন অনুজানাতীতি সকৰাদিমতং জানন্তেনপি পরৰাদিনা ছলৰসেন ৰিভাগং অকত্ৰা ‘‘পুগ্গলো নুপলব্ভতি সচ্চিকট্ঠপরমত্থেনা’’তি পুচ্ছায কতায সকৰাদী তত্থ অযং পুগ্গলৰাদী, ইমস্স লদ্ধি পটিক্খিপিতব্বাতি পরমত্থসচ্চং সন্ধাযাহ ‘‘আমন্তা’’তি. ‘‘ন উপলব্ভতী’’তি হি ৰুত্তং হোতি. পুন ইতরো সম্মুতিসচ্চং সন্ধায ‘‘যো সচ্চিকট্ঠো’’তিআদিমাহ. তস্সত্থো – যো লোকৰোহারসিদ্ধো সচ্চিকট্ঠো, ততো এৰ কেনচি অপটিক্খিপিতব্বতো পরমত্থতো ততো সো পুগ্গলো ¶ নুপলব্ভতীতি. পুন সকৰাদী পুব্বে পরমত্থসচ্চৰসেন পুগ্গলে পটিক্খিত্তে ইদানি সম্মুতিসচ্চৰসেনাযং পুচ্ছাতি মন্ত্ৰা তং অপ্পটিক্খিপন্তো ‘‘ন হেৰং ৰত্তব্বে’’তি আহ. তেনাহ ‘‘অত্তনা অধিপ্পেতং সচ্চিকট্ঠমেৰাতি সম্মুতিসচ্চং সন্ধাযাতি অধিপ্পাযো’’তি ¶ . এৰমৰট্ঠিতে ‘‘যদি পরৰাদিনা…পে… নারভিতব্বা’’তি ইদং ন ৰত্তব্বং পঠমপুচ্ছায পরমত্থসচ্চস্স সচ্চিকট্ঠোতি অধিপ্পেতত্তা. ‘‘অথ সকৰাদিনা…পে… আপজ্জতী’’তি ইদম্পি ন ৰত্তব্বং দুতিযপুচ্ছায সম্মুতিসচ্চস্স সচ্চিকট্ঠোতি অধিপ্পেতত্তা.

যদি উভযং অধিপ্পেতন্তি ইদং যদি পঠমপুচ্ছং সন্ধায, তদযুত্তং তস্সা পরমত্থসচ্চস্সেৰ ৰসেন পৰত্তত্তা. অথ দুতিযপুচ্ছং সন্ধায, তস্সা সম্মুতিসচ্চৰসেন পঠমত্থং ৰত্ৰা পুন মিস্সকৰসেন ৰত্তুং ‘‘সম্মুতিসচ্চপরমত্থসচ্চানি ৰা একতো কত্ৰাপি এৰমাহা’’তি ৰুত্তত্তা তম্পি ন ৰত্তব্বমেৰ. দ্ৰেপি সচ্চানীতি সম্মুতিপরমত্থসচ্চানি. তেসু পরমত্থসচ্চস্সেৰ নিপ্পরিযাযেন সচ্চিকট্ঠপরমত্থভাৰো, ইতরস্স উপচারেন. তথা চ ৰুত্তং ‘‘মাযা মরীচি…পে… উত্তমট্ঠো’’তি. তস্মা সম্মুতিসচ্চৰসেন উপলদ্ধিং ইচ্ছন্তেনপি পরমত্থসচ্চৰসেন অনিচ্ছনতো ‘‘পুগ্গলো উপলব্ভতি সচ্চিকট্ঠপরমত্থেনা’’তিআদিনা অনুযোগো যুত্তো. ‘‘পধানপ্পধানেসু পধানে কিচ্চসিদ্ধী’’তি এতেনেৰ ‘‘ন চ সচ্চিকট্ঠেকদেসেন অনুযোগো’’তিআদি নিৰত্তিতঞ্চ হোতি সচ্চিকট্ঠেকদেসভাৰস্সেৰ অসিদ্ধত্তা. নাস্স পরমত্থসচ্চতা অনুযুঞ্জিতব্বাতি অস্স সচ্চিকট্ঠস্স পরমত্থসচ্চতা পরৰাদিনা ন অনুযুঞ্জিতব্বা ‘‘পুগ্গলো নুপলব্ভতি সচ্চিকট্ঠপরমত্থেনা’’তি সকৰাদিনোপি সচ্চিকট্ঠপরমত্থতো তস্স ইচ্ছিতব্বত্তাতি অধিপ্পাযো. ৰোহরিতসচ্চিকট্ঠস্স অত্তনা অধিপ্পেতসচ্চিকট্ঠতাপি যুত্তা তস্স তেন অধিপ্পেতত্তা. স্ৰাযমত্থো হেট্ঠা দস্সিতোযেৰ. ৰুত্তনযোৰ দোসোতি ‘‘দ্ৰেপি সচ্চানী’’তিআদিনা অনন্তরমেৰ ৰুত্তং সন্ধাযাহ. তস্স পন অদোসভাৰো দস্সিতোযেৰ. অথ ন ইতি অথ ন ভূতসভাৰত্থেন উপলব্ভেয্যাতি যোজনা. ৰত্তব্বোতি যদেত্থ ৰত্তব্বং, তং ‘‘যো লোকৰোহারসিদ্ধো’’তিআদিনা ৰুত্তমেৰ, তস্মা এত্থ ‘‘পরমত্থতো পুগ্গলং নানুজানাতী’’তিআদিনা অধিপ্পাযমগ্গনং দট্ঠব্বং.

অনুঞ্ঞেয্যমেতং সিযাতি এতং অনুপলব্ভনং পঠমপুচ্ছাযং ৰিয দুতিযপুচ্ছাযম্পি অনুজানিতব্বং সিযা. ন ৰা কিঞ্চি ৰত্তব্বন্তি অথ ৰা কিঞ্চি ন ৰত্তব্বং ঠপনীযত্তা পঞ্হস্স. তথা হিস্স ঠপনীযাকারং দস্সেন্তো ‘‘যথা হী’’তিআদিমাহ. এত্থ চ কামং সচ্চদ্ৰযাকারেন ¶ পুগ্গলো নুপলব্ভতি, সম্মুতিযাকারেন পন নুপলব্ভতীতি উপলব্ভনভাৰস্স ৰসেন পটিক্খেপো কতোতি অযমেত্থ অধিপ্পাযো দট্ঠব্বো. অনুঞ্ঞাতং পটিক্খিত্তঞ্চাতি ¶ পঠমপুচ্ছাযং অনুঞ্ঞাতং, দুতিযপুচ্ছাযং পটিক্খিত্তং. এতং ছলৰাদং নিস্সাযাতি এতং একংযেৰ ৰত্থুং উদ্দিস্স অনুজাননপটিক্খিপনাকারং ছলৰচনং নিস্সায. ত্ৰং নিগ্গহেতব্বোতি যোজনা. সম্ভৰন্তস্স সামঞ্ঞেনাতি নিগ্গহট্ঠানভাৰেন সম্ভৰন্তস্স অনুলোমনযেন অনুজাননপটিক্খেপস্স সমানভাৰেন. অসম্ভৰন্তস্স কপ্পনন্তি পচ্চনীকনযেন তস্স নিগ্গহট্ঠানভাৰেন অসম্ভৰন্তস্স তথা কপ্পনং সংৰিধানং ছলৰাদো ভৰিতুং অরহতি. ‘‘অত্থৰিকপ্পুপপত্তিযা ৰচনৰিঘাতো ছল’’ন্তি ৰুত্তোৰাযমত্থো. তেনাতি যথাৰুত্তকপ্পনং ছলৰাদোতি ৰুত্তত্তা. ৰচনসামঞ্ঞমত্তং কপ্পিতং ছলং ৰদতি এতেনাতি ছলৰাদো. তেন ৰুত্তং ‘‘ছলৰাদস্স কারণত্তা ছলৰাদো’’তি. ৰচনসামঞ্ঞমত্তং অত্থভূতং তদত্থং ছলৰাদং নিস্সায. ‘‘ৰিচারেতব্ব’’ন্তি ৰুত্তং, কিমেত্থ ৰিচারেতব্বং. যদিপি পক্খস্স ঠপনামূলকং অনুজাননাৰজাননানং মিচ্ছাভাৰদস্সনং তব্বিসযত্তা, পাপনারোপনাহি এৰ পন সো ৰিভাৰীযতি, ন ঠপনাযাতি পাকটোযমত্থো.

৪-৫. তেনাতি সকৰাদিনা. তেন নিযামেনাতি যেন নিযামেন সকৰাদিনা চতূহি পাপনারোপনাহিস্স নিগ্গহো কতো, তেন নিযামেন নযেন. সো নিগ্গহো দুক্কটো অনিগ্গহোযেৰাতি দস্সেন্তো আহ ‘‘অনিগ্গহভাৰস্স ৰা উপগমিতত্তা’’তি, পাপিতত্তাতি অত্থো. এৰমেৰাতি যথা ‘‘তযা মম কতো নিগ্গহো’’তিআদিনা অনিগ্গহভাৰূপনযো ৰুত্তো, এৰমেৰ. এতস্সাতি ‘‘তেন হী’’তিআদিনা ইমায পাল়িযা ৰুত্তস্স.

অনুলোমপচ্চনীকৰণ্ণনা নিট্ঠিতা.

২. পচ্চনীকানুলোমৰণ্ণনা

৭-১০. অঞ্ঞেনাতি সম্মুতিসচ্চভূতেন. পরস্সাতি সকৰাদিনো. সো হি পরৰাদিনা পরো নাম হোতি. পটিঞ্ঞাপটিক্খেপানং ভিন্নৰিসযত্তা ‘‘অৰিরোধিতত্তা’’তি ৰুত্তং. অভিন্নাধিকরণং ¶ ৰিয হি অভিন্নৰিসযমেৰ ৰিরুদ্ধং নাম সিযা, ন ইতরন্তি অধিপ্পাযো. তমেৰত্থং ৰিভাৰেতুং ‘‘ন হি…পে… আপজ্জতী’’তি আহ. যদি এৰং কথমিদং নিগ্গহট্ঠানং জাতন্তি আহ ‘‘অত্তনো ¶ পনা’’তিআদি. তেন পটিঞ্ঞান্তরং নাম অঞ্ঞমেৰেতং নিগ্গহট্ঠানন্তি দস্সেতি.

পচ্চনীকানুলোমৰণ্ণনা নিট্ঠিতা.

সুদ্ধসচ্চিকট্ঠৰণ্ণনা নিট্ঠিতা.

২. ওকাসসচ্চিকট্ঠো

১. অনুলোমপচ্চনীকৰণ্ণনা

১১. সামঞ্ঞেন ৰুত্তং ৰিসেসনিৰিট্ঠং হোতীতি আহ ‘‘সব্বত্থাতি সব্বস্মিং সরীরেতি অযমত্থো’’তি. সামঞ্ঞজোতনা হি ৰিসেসে অৰতিট্ঠতীতি ৰিসেসত্থিনা ৰিসেসো অনুপযুজ্জিতব্বোতি. এতেনাতি দেসৰসেন সব্বত্থ পটিক্খেপৰচনেন.

৩. কালসচ্চিকট্ঠো

১. অনুলোমপচ্চনীকৰণ্ণনা

১২. মজ্ঝিমজাতিকালেতি পচ্চুপ্পন্নত্তভাৰকালে. অত্তভাৰো হি ইধ ‘‘জাতী’’তি অধিপ্পেতো. ততো অতীতো পুরিমজাতিকালো, অনাগতো পচ্ছিমজাতিকালো. ইমেসু তীসূতি সব্বত্থ, সব্বদা, সব্বেসূতি ইমেসু তীসু নযেসু. পাঠস্স সংখিত্ততা সুৰিঞ্ঞেয্যাতি তং ঠপেত্ৰা অত্থস্স সদিসতং ৰিভাৰেন্তো ‘‘ইধাপি হি…পে… যোজেতব্ব’’ন্তি আহ. এত্থাপি ‘‘ন কেনচি সভাৰেন পুগ্গলো উপলব্ভতী’’তি অযমত্থো ৰুত্তো হোতি. ন হি কেনচি সভাৰেন উপলব্ভমানস্স সকলেকদেসৰিনিমুত্তো পৰত্তিকালো নাম অত্থীতি.

৪. অৰযৰসচ্চিকট্ঠো

১. অনুলোমপচ্চনীকৰণ্ণনা

১৩. ততিযনযে ¶ ন সব্বেকধম্মৰিনিমুত্তং পৰত্তিট্ঠানং নাম অত্থীতি যোজেতব্বং.

ওকাসাদিসচ্চিকট্ঠো

২. পচ্চনীকানুলোমৰণ্ণনা

১৪. অনুলোমপঞ্চকস্সাতিআদিম্হি ¶ অট্ঠকথাৰচনে. পুন তত্থাতি যথাৰুত্তে অট্ঠকথাৰচনে, তেসু ৰা অনুলোমপঞ্চকপচ্চনীকেসু. সব্বত্থ পুগ্গলো নুপলব্ভতীতিআদিকস্স পাঠপ্পদেসস্স অত্থো ‘‘সরীরং সন্ধাযা’’তিআদিনা অট্ঠকথাযং ৰুত্তনযেন ৰেদিতব্বো অত্থো. পটিকম্মাদিপাল়িন্তি পটিকম্মনিগ্গহউপনযননিগমনপাল়িং. তীসু মুখেসূতি ‘‘সব্বত্থা’’তিআদিনা ৰুত্তেসু তীসু ৰাদমুখেসু. পচ্চনীকস্স পাল়ি ৰুত্তাতি সম্বন্ধো. তন্তি পাল়িং. সঙ্খিপিত্ৰা আগতত্তা সরূপেন অৰুত্তে. সুদ্ধিক…পে… ৰুত্তং হোতি তত্থ ‘‘সব্বত্থা’’তিআদিনা সরীরাদিনো পরামসনং নত্থি, ইধ অত্থীতি অযমেৰ ৰিসেসো, অঞ্ঞং সমানন্তি.

সচ্চিকট্ঠৰণ্ণনা নিট্ঠিতা.

৫. সুদ্ধিকসংসন্দনৰণ্ণনা

১৭-২৭. সচ্চিকট্ঠস্স, সচ্চিকট্ঠে ৰা সংসন্দনং সচ্চিকট্ঠসংসন্দনন্তি সমাসদ্ৰযং ভৰতীতি দস্সেন্তো ‘‘সচ্চিকট্ঠস্সা’’তিআদিমাহ. তত্থ সচ্চিকট্ঠস্স পুগ্গলস্সাতি সচ্চিকট্ঠসভাৰস্স পরমত্থতো ৰিজ্জমানসভাৰস্স পুগ্গলস্স. রূপাদীহি সদ্ধিং সংসন্দনন্তি সচ্চিকট্ঠতাসামঞ্ঞেন রূপাদীহি সমীকরণং. সচ্চিকট্ঠেতি সচ্চিকট্ঠহেতু, তত্থ ৰা তং অধিট্ঠানং কত্ৰা. ‘‘তুল্যযোগে সমুচ্চযো’’তি সমুচ্চযত্থত্তা এৰ চ-কারস্স সচ্চিকট্ঠেন উপলদ্ধিসামঞ্ঞেন ¶ ইধ রূপমাহটন্তি তস্স উদাহটভাৰো যুত্তোতি ‘‘যথারূপ’’ন্তি নিদস্সনৰসেন অত্থো ৰুত্তো, অঞ্ঞথা ইধ রূপস্স আহরণমেৰ কিমত্থিযং. এৰং সেসধম্মেসুপি. যা পনেত্থ অঞ্ঞত্তপুচ্ছা, সাপি নিদস্সনত্থং উপব্রূহেতি অঞ্ঞত্তনিবন্ধনত্তা তস্স. ওপম্মসংসন্দনে পন নিদস্সনত্থো গাহীযতীতি ইমস্মিং সুদ্ধিকসংসন্দনে কেৰলং সমুচ্চযৰসেনেৰ অত্থদস্সনং যুত্তন্তি অধিপ্পাযো. রূপাদীনি উপাদাপঞ্ঞত্তিমত্তত্তা পুগ্গলস্স সো তেহি অঞ্ঞো, অনঞ্ঞো চাতি ন ৰত্তব্বোতি অযং সাসনক্কমোতি আহ ‘‘রূপাদীহি…পে… সমযো’’তি. অনুঞ্ঞাযমানেতি তস্মিং সমযে সুত্তে চ অপ্পটিক্খিপিযমানে. অযঞ্চ অত্থো সাসনিকস্স পরৰাদিনো ৰসেন ৰুত্তোতি ৰেদিতব্বং.

‘‘আজানাহি ¶ নিগ্গহ’’ন্তি পাঠো দিট্ঠো ভৰিস্সতি, অঞ্ঞথা ‘‘পটিলোমপঞ্চকানি দস্সিতানি, পটিকম্মচতুক্কাদীনি সংখিত্তানী’’তি ন সক্কা ৰত্তুন্তি অধিপ্পাযো. চোদনায ৰিনা পরৰাদিনো পটিজানাপনং নত্থীতি ৰুত্তং ‘‘পটিজানাপনত্থন্তি…পে… চোদনত্থ’’ন্তি. চোদনাপুব্বকঞ্হি তস্স পটিজানাপনং. তেন ফলৰোহারেন কারণং ৰুত্তন্তি দস্সেতি. অব্যাকতত্তাতি অব্যাকরণীযত্তা, ভগৰতা ৰা ন ব্যাকতত্তা. যদি ঠপনীযত্তা পটিক্খিপিতব্বন্তি ইমস্মিং পচ্চনীকনযে ঠপনীযত্তা পঞ্হস্স সকৰাদিনা পটিক্খিপিতব্বং. পরেনপীতি পরৰাদিনাপি ঠপনীযত্তা লদ্ধিমেৰ নিস্সায অনুলোমনযে পটিক্খেপো কতোতি অযমেত্থ সুদ্ধিকসংসন্দনায অধিপ্পাযো যুত্তো অনুলোমেপি রূপাদীহি অঞ্ঞত্তচোদনাযমেৰ পরৰাদিনা পটিক্খেপস্স কতত্তাতি অধিপ্পাযো.

সুদ্ধিকসংসন্দনৰণ্ণনা নিট্ঠিতা.

৬. ওপম্মসংসন্দনৰণ্ণনা

২৮-৩৬. উপলদ্ধিসামঞ্ঞেন অঞ্ঞত্তপুচ্ছা চাতি ইমিনা দ্ৰযম্পি উদ্ধরতি উপলদ্ধিসামঞ্ঞেন অঞ্ঞত্তপুচ্ছা, উপলদ্ধিসামঞ্ঞেন পুচ্ছা চাতি. তত্থ পচ্ছিমং সন্ধাযাহ ‘‘দ্ৰিন্নং সমানতা’’তিআদি. তস্সত্থো – দ্ৰিন্নং রূপৰেদনানং ৰিয রূপপুগ্গলানং সচ্চিকট্ঠেন সমানতা ¶ তেসং অঞ্ঞত্তস্স কারণং যুত্তং ন হোতি. অথ খো…পে… উপলব্ভনীযতাতি ইদঞ্চ সংসন্দনং ৰিচারেতব্বং. অযং হেত্থ অধিপ্পাযো – যদি সচ্চিকট্ঠসামঞ্ঞেন রূপপুগ্গলানং উপলদ্ধিসামঞ্ঞং ইচ্ছিতং, তেনেৰ নেসং অঞ্ঞত্তম্পি ইচ্ছিতব্বং. অথ পরমত্থৰোহারভেদতো তেসং অঞ্ঞত্তং ন ইচ্ছিতং, ততো এৰ উপলদ্ধিসামঞ্ঞম্পি ন ইচ্ছিতব্বন্তি.

৩৭-৪৫. উপলদ্ধীতি পুগ্গলস্স উপলদ্ধি ৰিজ্জমানতা. ‘‘পটিকম্মপঞ্চক’’ন্তি ৰিঞ্ঞাযতীতি যোজনা.

ওপম্মসংসন্দনৰণ্ণনা নিট্ঠিতা.

৭. চতুক্কনযসংসন্দনৰণ্ণনা

৪৬-৫২. একধম্মতোপীতি ¶ সত্তপঞ্ঞাসায সচ্চিকট্ঠেসু একধম্মতোপি. এতেন ততো সব্বতোপি পুগ্গলস্স অঞ্ঞত্তাননুজাননং দস্সেতি. তেনাহ অট্ঠকথাযং ‘‘সকলং পরমত্থসচ্চং সন্ধাযা’’তি. রূপাদিএকেকধম্মৰসেন নানুযুঞ্জিতব্বো অৰযৰব্যতিরেকেন সমুদাযস্স অভাৰতো. যস্মা পন সমুদাযাৰযৰা ভিন্নসভাৰা, তস্মা ‘‘সমুদাযতো…পে… নিগ্গহারহো সিযা’’তি পরৰাদিনো আসঙ্কমাহ. এতং ৰচনোকাসন্তি যদিপি সত্তপঞ্ঞাসধম্মসমুদাযতো পুগ্গলস্স অঞ্ঞত্তং ন ইচ্ছতি তব্বিনিমুত্তস্স সচ্চিকট্ঠস্স অভাৰতো, তদেকদেসতো পনস্স অনঞ্ঞত্তম্পি ন ইচ্ছতেৰ. ন হি সমুদাযো অৰযৰো হোতীতি. তস্মা ‘‘তং পটিক্খিপতো কিং নিগ্গহট্ঠানন্তি ৰত্তুং মা লব্ভেথা’’তি দস্সেতুং ‘‘অযঞ্চা’’তিআদি ৰুত্তং. রূপাদিধম্মপ্পভেদৰিভাগমুখেনেৰ অনৰসেসতো পুগ্গলোতি গহণাকারদস্সনৰসেন পৰত্তো পঠমৰিকপ্পো, দুতিযো পন অৰিভাগতো পরমত্থসচ্চভাৰসামঞ্ঞেনাতি অযং ইমেসং দ্ৰিন্নং ৰিকপ্পানং ৰিসেসো. ইতীতি ৰুত্তপ্পকারপরামসনন্তি আহ ‘‘এৰ’’ন্তি.

সভাৰৰিনিব্ভোগতোতি সভাৰেন ৰিনিব্ভুজ্জিতব্বতো. সভাৰভিন্নো হি ধম্মো তদঞ্ঞধম্মতো ৰিনিব্ভোগং লভতি. তেনাহ ‘‘রূপতো অঞ্ঞসভাগত্তা’’তি. রূপৰজ্জেতি রূপধম্মৰজ্জে ¶ . তীসুপীতি ‘‘রূপস্মিং পুগ্গলো, অঞ্ঞত্র রূপা, পুগ্গলস্মিং রূপ’’ন্তি ইমেসু এৰং পৰত্তেসু তীসুপি অনুযোগেসু. সাসনিকো এৰাযং পুগ্গলৰাদীতি কত্ৰা আহ ‘‘ন হি সো সক্কাযদিট্ঠিং ইচ্ছতী’’তি. ‘‘রূপৰা’’তি ইমিনা রূপেন সকিঞ্চনতাৰ ঞাপীযতি, ন রূপাযত্তৰুত্তিতাতি আহ ‘‘অঞ্ঞত্র রূপাতি এত্থ চ রূপৰা পুগ্গলোতি অযমত্থো সঙ্গহিতো’’তি.

চতুক্কনযসংসন্দনৰণ্ণনা নিট্ঠিতা.

নিট্ঠিতা চ সংসন্দনকথাৰণ্ণনা.

৮. লক্খণযুত্তিৰণ্ণনা

৫৪. লক্খণযুত্তিকথাযং ¶ ‘‘ছলৰসেন পন ৰত্তব্বং আজানাহি নিগ্গহ’’ন্তি পাঠো গহেতব্বো.

লক্খণযুত্তিৰণ্ণনা নিট্ঠিতা.

৯. ৰচনসোধনৰণ্ণনা

৫৫-৫৯. পদদ্ৰযস্স অত্থতো একত্তেতি পদদ্ৰযস্স একত্তত্থে সতীতি অত্থো. পরিকপ্পৰচনঞ্হেতং দোসদস্সনত্থং ‘‘এৰং সন্তে অযং দোসো’’তি. তযিদং একত্তং উপলব্ভতি এৰাতি পচ্ছিমপদাৰধারণং ৰেদিতব্বং. ‘‘কেহিচি পুগ্গলো কেহিচি ন পুগ্গলো’’তি ব্যভিচারদস্সনতো পরেন ন সম্পটিচ্ছিতন্তি কত্ৰা তমেৰ অসম্পটিচ্ছিতত্তং ৰিভাৰেন্তো ‘‘পুগ্গলস্স হী’’তিআদিমাহ. তত্থ অৰিভজিতব্বতন্তি ‘‘উপলব্ভতি চা’’তি এৰং অৰিভজিতব্বতং. ৰিভজিতব্বতন্তি ‘‘পুগ্গলো চ তদঞ্ঞঞ্চ উপলব্ভতী’’তি এৰং ৰিভজিতব্বতং. এতেন ‘‘পুগ্গলো উপলব্ভতি এৰা’’তি পচ্ছিমপদাৰধারণং ৰেদিতব্বং, ন ‘‘পুগ্গলো এৰ উপলব্ভতী’’তি ইমমত্থং দস্সেতি. তং ৰিভাগন্তি যথাৰুত্তং ৰিভজিতব্বাৰিভজিতব্বং ৰিভাগং ৰদতো সকৰাদিনো, অঞ্ঞস্স ৰা কস্সচি. এতস্সাতি পরৰাদিনো ¶ . যথাৰুত্তৰিভাগন্তি ‘‘পুগ্গলো উপলব্ভতি…পে… কেহিচি ন পুগ্গলো’’তি এৰং পাল়িযং ৰুত্তপ্পকারং ৰিভাগং. যথাআপাদিতেনাতি ‘‘পুগ্গলো উপলব্ভতীতি পদদ্ৰযস্স অত্থতো একত্তে’’তিআদিনা আপাদিতপ্পকারেন. ন ভৰিতব্বন্তি যদিপি তেন পুগ্গলো উপলব্ভতি এৰ ৰুচ্চতি, উপলব্ভতীতি পন পুগ্গলো এৰ ন ৰুচ্চতি, অথ খো অঞ্ঞোপি, তস্মা যথাৰুত্তেন পসঙ্গেন ন ভৰিতব্বং. তেনাহ ‘‘মগ্গিতব্বো এত্থ অধিপ্পাযো’’তি.

৬০. অত্থতো পুগ্গলো নত্থীতি ৰুত্তং হোতি অত্তসুঞ্ঞতাদস্সনেন অনত্তলক্খণস্স ৰিহিতত্তা.

ৰচনসোধনৰণ্ণনা নিট্ঠিতা.

১০. পঞ্ঞত্তানুযোগৰণ্ণনা

৬১-৬৬. রূপকাযাৰিরহং ¶ সন্ধায আহ, ন রূপতণ্হাসব্ভাৰং. তথা সতি অনেকন্তিকত্তা পটিক্খিপিতব্বমেৰ সিযা, ন অনুজানিতব্বন্তি. ‘‘অত্থিতাযা’’তি আহাতি সম্বন্ধো. কামীভাৰস্স অনেকন্তিকত্তা কস্সচি কামধাতূপপন্নস্স কামধাতুযা আযত্তত্তাভাৰতো চ কদাচি ভাৰস্সেৰাতি যোজনা.

৬৭. কাযানুপস্সনাযাতি কাযানুপস্সনাদেসনায. সা হি কাযকাযানুপস্সীনং ৰিভাগগ্গহণস্স কারণভূতা, কাযানুপস্সনা এৰ ৰা. এৰংলদ্ধিকত্তাতি অঞ্ঞো কাযো অঞ্ঞো পুগ্গলোতি এৰংলদ্ধিকত্তা. আহচ্চ ভাসিতন্তি ঠানকরণানি আহন্ত্ৰা কথিতং, ভগৰতা সামং দেসিতন্তি অত্থো.

পঞ্ঞত্তানুযোগৰণ্ণনা নিট্ঠিতা.

১১. গতিঅনুযোগৰণ্ণনা

৬৯-৭২. যানিস্স ¶ সুত্তানি নিস্সায লদ্ধি উপ্পন্না, তেসং দস্সনতো পরতো ‘‘তেন হি পুগ্গলো সন্ধাৰতী’’তিআদিনা পাল়ি আগতা, পুরতো পন ‘‘ন ৰত্তব্বং পুগ্গলো সন্ধাৰতী’’তিআদিনা, তস্মা ৰুত্তং ‘‘দস্সেন্তো…পে… ভৰিতব্ব’’ন্তি. দস্সেত্ৰাতি ৰা ৰত্তব্বন্তি ‘‘যানিস্স…পে… তানি দস্সেত্ৰা ‘তেন হি পুগ্গলো সন্ধাৰতী’তিআদিমাহা’’তি ৰত্তব্বন্তি অত্থো. দস্সেন্তোতি ৰা ইদং দস্সনকিরিযায ন ৰত্তমানতামত্তৰচনং, অথ খো তস্সা লক্খণত্থৰচনং, হেতুভাৰৰচনং ৰাতি ন কোচি দোসো.

৯১. সো ৰত্তব্বোতি সো জীৰসরীরানং অনঞ্ঞতাপজ্জনাকারো ৰত্তব্বো, নত্থীতি অধিপ্পাযো. ‘‘রূপী অত্তা’’তি ইমিস্সা লদ্ধিযা ৰসেন ‘‘যেন রূপসঙ্খাতেন অত্তনো সভাৰভূতেন সরীরেন সদ্ধিং গচ্ছতী’’তি এৰং পন অত্থে সতি সো আকারো ৰুত্তো এৰ হোতি, তথা চ সতি ‘‘রূপং পুগ্গলোতি অননুঞ্ঞাতত্তা’’তি এৰম্পি ৰত্তুং ন সক্কা. যস্মা পন ‘‘ইধ সরীরনিক্খেপা’’তি অনন্তরং ৰক্খতি, তস্মা ¶ ‘‘সো ৰত্তব্বো’’তি ৰুত্তং. নিরযূপগস্স পুগ্গলস্স অন্তরাভৰং ন ইচ্ছতীতি ইদং পুরাতনানং অন্তরাভৰৰাদীনং ৰসেন ৰুত্তং. অধুনাতনা পন ‘‘উদ্ধংপাদো তু নারকো’’তি ৰদন্তা তস্সপি অন্তরাভৰং ইচ্ছন্তেৰ, কেচি পন অসঞ্ঞূপগানং. অরূপূপগানং পন সব্বেপি ন ইচ্ছন্তি. তত্থ যে ‘‘সঞ্ঞুপ্পাদা চ পন তে দেৰা তম্হা কাযা চৰন্তী’’তি সুত্তস্স অত্থং মিচ্ছা গহেত্ৰা চুতূপপাতকালেসু অসঞ্ঞীনং সঞ্ঞা অত্থীতি অন্তরাভৰতোৰ অসঞ্ঞূপপত্তিং ইচ্ছন্তি, তদঞ্ঞেসং ৰসেন ‘‘সৰেদনো…পে… পটিক্খিপতী’’তি দস্সেন্তো ‘‘যে পনা’’তিআদিমাহ. কে পনেৰং ইচ্ছন্তি? সব্বত্থিৰাদীসু একচ্চে.

৯২. নেৰসঞ্ঞানাসঞ্ঞাযতনেতি নেৰসঞ্ঞানাসঞ্ঞাযতনে ভৰে, অচিত্তুপ্পাদে ৰা সঞ্ঞা অত্থীতি ইচ্ছন্তীতি ন ৰত্তব্বন্তি সম্বন্ধো. যতো সো সঞ্ঞাভৰেন অসঙ্গহিতো, ভৰন্তরভাৰেন চ সঙ্গহিতো.

৯৩. ইন্ধনুপাদানো অগ্গি ৰিয ইন্ধনেন রূপাদিউপাদানো পুগ্গলো রূপাদিনা ৰিনা নত্থীতি এত্থ অযমধিপ্পাযৰিভাৰনা – যথা ন ৰিনা ইন্ধনেন অগ্গি পঞ্ঞাপীযতি, ন চ তং অঞ্ঞং ইন্ধনতো সক্কা পটিজানিতুং, নাপি অনঞ্ঞং. যদি হি অঞ্ঞং সিযা, ন উণ্হং ইন্ধনং ¶ সিযা, অথ অনঞ্ঞং, নিদহিতব্বংযেৰ দাহকং সিযা, এৰং ন ৰিনা রূপাদীহি পুগ্গলো পঞ্ঞাপীযতি, ন চ তেহি অঞ্ঞো, নাপি অনঞ্ঞো সস্সতুচ্ছেদভাৰপ্পসঙ্গতোতি পরৰাদিনো অধিপ্পাযো. তত্থ যদি অগ্গিন্ধনোপমা লোকৰোহারেন ৰুত্তা, অপল়িত্তং কট্ঠাদিইন্ধনং নিদহিতব্বঞ্চ, পল়িত্তং ভাসুরুণ্হং অগ্গিদাহকঞ্চ, তঞ্চ ওজট্ঠমকরূপং পবন্ধৰসেন পৰত্তং অনিচ্চং সঙ্খতং পটিচ্চসমুপ্পন্নং. যদি এৰং পুগ্গলো রূপাদীহি অঞ্ঞো অনিচ্চো চ আপন্নো, অথ পরমত্থতো চ, তস্মিংযেৰ কট্ঠাদিসঞ্ঞিতে রূপসঙ্খাতপল়িত্তে যং উসুমং সো অগ্গি তংসহজাতানি তীণিভূতানি ইন্ধনং. এৰম্পি সিদ্ধং লক্খণভেদতো অগ্গিন্ধনানং অঞ্ঞত্তন্তি অগ্গি ৰিয ইন্ধনতো রূপাদীহি অঞ্ঞো পুগ্গলো অনিচ্চো চ আপজ্জতীতি.

গতিঅনুযোগৰণ্ণনা নিট্ঠিতা.

১২. উপাদাপঞ্ঞত্তানুযোগৰণ্ণনা

৯৭. নীলগুণযোগতো ¶ নীলো, নীলো এৰ নীলকো, তস্স, অযং পনস্স নীলপঞ্ঞত্তি নীলরূপুপাদানাতি আহ ‘‘নীলং…পে… পঞ্ঞত্তী’’তি. এৰং পন পাঠে ঠিতে নীলং উপাদায নীলোতি কথমযং পদুদ্ধারোতি আহ ‘‘নীলং রূপং…পে… এত্থ যো পুট্ঠো নীলং উপাদায নীলো’’তি. এত্থাতি এতস্মিং ৰচনে. তদাদীসূতি ‘‘পীতং রূপং উপাদাযা’’তিআদিকং অট্ঠকথাযং আদি-সদ্দেন গহিতমেৰ তদত্থদস্সনৰসেন গণ্হাতি.

৯৮. ৰুত্তন্তি ‘‘মগ্গকুসলো’’তিআদীসু ছেকট্ঠং সন্ধায ৰুত্তং. কুসলপঞ্ঞত্তিং কুসলৰোহারং.

১১২. পুব্বপক্খং দস্সেত্ৰা উত্তরমাহাতি পরৰাদী পুব্বপক্খং দস্সেত্ৰা সকৰাদিস্স উত্তরমাহ.

১১৫. ‘‘রূপং রূপৰা’’তিআদিনযপ্পৰত্তং পরৰাদিৰাদং ভিন্দিতুং ‘‘যথা ন নিগল়ো নেগল়িকো’’তিআদিনা ¶ সকৰাদিৰাদো আরদ্ধোতি আহ ‘‘যস্স রূপং সো রূপৰাতি উত্তরপক্খে ৰুত্তং ৰচনং উদ্ধরিত্ৰা’’তি.

১১৮. ৰিঞ্ঞাণনিস্সযভাৰূপগমনন্তি চক্খুৰিঞ্ঞাণস্স নিস্সযভাৰূপগমনং. তযিদং ৰিসেসনং চক্খুস্সাতি ইমিনাৰ সিদ্ধন্তি ন কতং দট্ঠব্বং.

উপাদাপঞ্ঞত্তানুযোগৰণ্ণনা নিট্ঠিতা.

১৩. পুরিসকারানুযোগৰণ্ণনা

১২৩. কম্মানন্তি কুসলাকুসলকম্মানং. তগ্গহণেনেৰ হি তংতংকিচ্চকরণীযে কিরিযানম্পি সঙ্গহো দট্ঠব্বো. নিপ্ফাদকপ্পযোজকভাৰেনাতি কারককারাপকভাৰেন.

১২৫. কম্মকারকস্স পুগ্গলস্স যো অঞ্ঞো পুগ্গলো কারকো. তেনপীতি কারককারকেনপি. তস্সাতি কারককারকস্স. অঞ্ঞন্তি অঞ্ঞং কম্মং. এৰন্তি ইমিনা ৰুত্তপ্পকারেন. তেহি তেহি কারকেহি পুগ্গলা ৰিয অঞ্ঞানি কম্মানি করীযন্তীতি দস্সেতি. তেনাহ ¶ ‘‘কম্মৰট্টস্স অনুপচ্ছেদং ৰদন্তী’’তি. এৰং সন্তে পুগ্গলস্স কারকো, কম্মস্স কারকোতি অযং ৰিভাগো ইধ অনামট্ঠো হোতি, তথা চ সতি কারকপরম্পরায ৰচনং ৰিরুজ্ঝেয্যাতি আহ ‘‘পুগ্গলস্স…পে… ৰিচারেতব্বমেত’’ন্তি. তস্স কারকন্তি পুগ্গলস্স কারকং. ইদঞ্চাতি ন কেৰলং পুগ্গলকারকস্স কম্মকারকতাপত্তিযেৰ দোসো, অথ খো ইদং কম্মকারকতায কারকপরম্পরাপজ্জনম্পি ৰিচারেতব্বং, ন যুজ্জতীতি অত্থো. পুগ্গলানঞ্হি পটিপাটিযা কারকভাৰো কারকপরম্পরা.

১৭০. একো অন্তোতি ‘‘গাহো’’তি সস্সতগাহসঙ্খাতো অন্তোতি অত্থো.

১৭৬. সিযা অঞ্ঞো, সিযা অনঞ্ঞো, সিযা ন ৰত্তব্বো ‘‘অঞ্ঞোতি ৰা অনঞ্ঞোতি ৰা’’তি ¶ , এৰং পৰত্তনিগণ্ঠৰাদসদিসত্তা সো এৰ একো নেৰ সো হোতি, ন অঞ্ঞোতি লদ্ধিমত্তং. তেনাহ ‘‘ইদং পন নত্থেৰা’’তি. পরস্স ইচ্ছাৰসেনেৰাতি পরৰাদিনো লদ্ধিৰসেনেৰ. একং অনিচ্ছন্তস্সাতি একং ‘‘সো করোতি, সো পটিসংৰেদেতী’’তি গহণং সস্সতদিট্ঠিভযেন পটিক্খিপন্তস্স ইতরং উচ্ছেদগ্গহণং আপন্নং. তঞ্চ পটিক্খিপন্তস্স অঞ্ঞং মিস্সকং নিচ্চানিচ্চগ্গহণং, ৰিক্খেপগ্গহণঞ্চ আপন্নং. কারকৰেদকিচ্ছায ঠত্ৰাতি স্ৰেৰ কারকো ৰেদকো চাতি ইমস্মিং আদাযে ঠত্ৰা. তংতংঅনিচ্ছাযাতি তস্স তস্স ৰাদস্স অসম্পটিচ্ছনেন. আপন্নৰসেনপীতি আপন্নগাহৰসেনপি অযং অনুযোগো ৰুত্তোতি যোজনা. সব্বেসং আপন্নত্তাতি হেট্ঠা ৰুত্তনযেন সব্বেসং ৰিকপ্পানং অনুক্কমেন আপন্নত্তা নাযমনুযোগো কতোতি যোজনা. একেকস্সেৰাতি তেসু ৰিসুং ৰিসুং একেকস্সেৰ আপন্নত্তা. তন্তিৰসেন পন তে ৰিকপ্পা একজ্ঝং দস্সেত্ৰাতি অধিপ্পাযো. একতো যোজেতব্বং চতুন্নম্পি পঞ্হানং একতো পুট্ঠত্তা.

পুরিসকারানুযোগৰণ্ণনা নিট্ঠিতা.

কল্যাণৰগ্গো নিট্ঠিতো.

১৪. অভিঞ্ঞানুযোগৰণ্ণনা

১৯৩. ৰিকুব্বতীতি ¶ এত্থ ইতি-সদ্দো আদিঅত্থো, পকারত্থো ৰা. তেন ‘‘দিব্বায সোতধাতুযা সদ্দং সুণাতী’’তিআদিকং সঙ্গণ্হাতি. অভিঞ্ঞানুযোগো দট্ঠব্বোতি যোজনা. তদভিঞ্ঞাৰতোতি আসৰক্খযাভিঞ্ঞাৰতো. অরহতো সাধনন্তি অরহতো সচ্চিকট্ঠপরমত্থেন পুগ্গলত্তাভাৰসাধনং. তব্ভাৰস্সাতি অরহত্তস্স. অরহত্তধারানঞ্হি খন্ধা নাম পুগ্গলত্তং তস্সপি হোতীতি.

অভিঞ্ঞানুযোগৰণ্ণনা নিট্ঠিতা.

১৫-১৮. ঞাতকানুযোগাদিৰণ্ণনা

২০৯. ততিযকোটিভূতস্সাতি ¶ ততিযকোটিসভাৰস্স সঙ্খতাসঙ্খতৰিনিমুত্তসভাৰস্স. সভাৰস্সাতি চ সভাৰধম্মস্স. লদ্ধিং নিগূহিত্ৰাতি পুগ্গলো নেৰ সঙ্খতো, নাসঙ্খতোতি লদ্ধিং অৰিভাৰেত্ৰা.

ঞাতকানুযোগাদিৰণ্ণনা নিট্ঠিতা.

১৯. পটিৰেধানুযোগাদিৰণ্ণনা

২১৮. পজাননং নাম ন হোতি নিব্বিদাদীনং অপ্পচ্চযত্তা. পরিচ্ছেদনসমত্থতঞ্চ দস্সেতীতি সম্বন্ধো.

২২৮. সহরূপভাৰো রূপেন সমঙ্গিতা, ৰিনারূপভাৰো ততো ৰিনিস্সটতাতি তদুভযং রূপস্স অব্ভন্তরগমনং বহিনিক্খমনঞ্চ হোতি. তস্মা তং দ্ৰযং সহরূপভাৰৰিনারূপভাৰানং লক্খণৰচনন্তি ৰুত্তং.

২৩৭. ওল়ারিকোতি থূলো. আহিতো অহং মানো এত্থাতি অত্তা, অত্তভাৰো. সো এৰ যথাসকং কম্মুনা পটিলভিতব্বতো পটিলাভো. পদদ্ৰযেনপি কামাৰচরত্তভাৰো কথিতো. মনোমযো অত্তপটিলাভো রূপাৰচরত্তভাৰো. সো হি ঝানমনেন নিব্বত্তত্তা ¶ মনোমযো. অরূপো অত্তপটিলাভোতি অরূপাৰচরত্তভাৰো. সো হি রূপেন অমিস্সিতত্তা অরূপোতি এৰমেত্থ অত্থো ৰেদিতব্বো. ‘‘অত্তা’’তি পন জীৰে লোকৰোহারো নিরুল়্হো, অসতিপি জীৰে তথানিরুল়্হং লোকৰোহারং গহেত্ৰা সম্মাসম্বুদ্ধাপি ৰোহরন্তীতি দস্সেন্তো ‘‘ইতি ইমা লোকস্স সমঞ্ঞা, যাহি তথাগতো ৰোহরতী’’তি ৰত্ৰা ইদানি যথা ৰোহরন্তি, তং পকারং ৰিভাৰেন্তো ‘‘অপরামস’’ন্তিআদিমাহ.

পচ্চত্তসামঞ্ঞলক্খণৰসেনাতি কক্খল়ফুসনাদিসলক্খণৰসেন অনিচ্চতাদিসামঞ্ঞলক্খণৰসেন চ. ইমিনাতি ‘‘পচ্চত্তসামঞ্ঞলক্খণৰসেনা’’তিআদিনা ৰুত্তেন পরমত্থতো পুগ্গলাভাৰৰচনেন ¶ . ইতো পুরিমাতি তত্থ তত্থ সকৰাদিপটিক্খেপাদিৰিভাৰনৰসেন পৰত্তা ইতো অত্থসংৰণ্ণনতো পুরিমা. ইমিনাতি ৰা ‘‘যথা রূপাদযো ধম্মা’’তিআদিনা অট্ঠকথাযং ৰুত্তৰচনেন. যথা চাতি এত্থ চ-সদ্দো সমুচ্চযত্থো. তেন সমঞ্ঞানতিধাৰনং সম্পিণ্ডেতি. ইদং ৰুত্তং হোতি – যথা পরামাসো চ ন হোতি জনপদনিরুত্তিযা অভিনিৰিসিতব্বতো, যথা চ সমঞ্ঞাতিধাৰনং ন হোতি, এৰং ইতো পুরিমা চ অত্থৰণ্ণনা যোজেতব্বা. সমঞ্ঞাতিধাৰনে হি সতি সব্বলোকৰোহারূপচ্ছেদো সিযাতি.

তস্মা সচ্চন্তি যস্মা তত্থ পরমত্থাকারং অনারোপেত্ৰা সমঞ্ঞং নাতিধাৰন্তো কেৰলং লোকসম্মুতিযাৰ ৰোহরতি, তস্মা সচ্চং পরেসং অৰিসংৰাদনতো. তথকারণন্তি তথো অৰিতথো ধম্মসভাৰো কারণং পৰত্তিহেতু এতস্সাতি তথকারণং, পরমত্থৰচনং, অৰিপরীতধম্মসভাৰৰিসযন্তি অত্থো. তেনাহ ‘‘ধম্মানং তথতায পৰত্ত’’ন্তি.

পটিৰেধানুযোগাদিৰণ্ণনা নিট্ঠিতা.

পুগ্গলকথাৰণ্ণনা নিট্ঠিতা.

২. পরিহানিকথা

১. ৰাদযুত্তিপরিহানিকথাৰণ্ণনা

২৩৯. ইদং ¶ ¶ সুত্তন্তি ইদং লক্খণমত্তং দট্ঠব্বং. ‘‘পঞ্চিমে, ভিক্খৰে, ধম্মা সমযৰিমুত্তস্স ভিক্খুনো পরিহানায সংৰত্তন্তী’’তি (অ. নি. ৫.১৪৯-১৫০) ইদম্পি হি সুত্তং অনাগামিআদীনংযেৰ পরিহানিনিস্সযো, ন অরহতো. সমযৰিমুত্তোতি অট্ঠসমাপত্তিলাভিনো সেক্খস্সেতং নামং. যথাহ –

‘‘কতমো চ পুগ্গলো সমযৰিমুত্তো? ইধেকচ্চো পুগ্গলো কালেন কালং সমযেন সমযং অট্ঠ ৰিমোক্খে কাযেন ফুসিত্ৰা ৰিহরতি, পঞ্ঞায চস্স দিস্ৰা একচ্চে আসৰা পরিক্খীণা হোন্তি. অযং ৰুচ্চতি পুগ্গলো সমযৰিমুত্তো’’তি (পু. প. ১).

‘‘পরিহানিধম্মো’’তি চ পুথুজ্জনো চ একচ্চো চ সেক্খো অধিপ্পেতো, ন অরহাতি. তস্মাতি যস্মা যথাদস্সিতানি সুত্তানি অনাগামিআদীনং পরিহানিলদ্ধিযা নিস্সযো, ন অরহতো, তস্মা. তং নিস্সায তং অপেক্খিত্ৰা যস্মা ‘‘অরহতোপী’’তি এত্থ অরহতোপি পরিহানি, কো পন ৰাদো অনাগামিআদীনন্তি অযমত্থো লব্ভতি, তস্মা পি-সদ্দসম্পিণ্ডিতমত্থং দস্সেন্তো ‘‘অরহতোপি…পে… যোজেতব্ব’’ন্তি আহ. যস্মা ৰা কামঞ্চেত্থ দুতিযসুত্তং সেক্খৰসেন আগতং, পঠমততিযসুত্তানি পন অসেক্খৰসেনপি আগতানীতি তেসং লদ্ধি, তস্মা ‘‘অরহতোপী’’তি অট্ঠকথাযং ৰুত্তং. তেনাহ ‘‘ইদং সুত্তং অরহতো’’তিআদি.

ততিযস্মিন্তি ‘‘সব্বেসঞ্ঞেৰ অরহন্তানং পরিহানী’’তি এতস্মিং পঞ্হে. সো হি ‘‘সব্বেৰ অরহন্তো’’তিআদিনা ¶ আগতেসু ততিযো পঞ্হো. তেসন্তি মুদিন্দ্রিযানং. ততিযস্মিম্পীতি পি-সদ্দো ৰুত্তত্থসমুচ্চযো. তেন পঠমপঞ্হং সমুচ্চিনোতি ‘‘তত্থপি তিক্খিন্দ্রিযা অধিপ্পেতা’’তি.

সোযেৰ ন পরিহাযতীতি সোতাপন্নোযেৰ সোতাপন্নভাৰতো ন পরিহাযতীতি অত্থো. ন চেত্থ সকদাগামিভাৰাপত্তিযা সোতাপন্নভাৰাপগমো পরিহানি হোতি ৰিসেসাধিগমভাৰতো. পত্তৰিসেসতো ¶ হি পরিহানীতি. ইতরেতি সকদাগামিআদিকা. উপরিমগ্গত্থাযাতি উপরিমগ্গত্তযপটিলাভত্থায ‘‘নিযতো’’তি ৰুত্তমত্থং অগ্গহেত্ৰা.

ৰাদযুত্তিপরিহানিকথাৰণ্ণনা নিট্ঠিতা.

২. অরিযপুগ্গলসংসন্দনপরিহানিকথাৰণ্ণনা

২৪১. ততোতি অরহত্ততো. তত্থাতি দস্সনমগ্গফলে. ৰাযামেনাতি ৰিপস্সনুস্সাহনেন. তদনন্তরন্তি সোতাপত্তিফলানন্তরং. পঠমং দস্সনমগ্গফলানন্তরং অরহত্তং পাপুণাতি, ততো পরিহীনো পুন ৰাযমন্তো তদনন্তরং ন অরহত্তং পাপুণাতীতি কা এত্থ যুত্তীতি অধিপ্পাযো. পরৰাদী নাম যুত্তম্পি ৰদতি অযুত্তম্পীতি কিং তস্স ৰাদে যুত্তিগৰেসনাযাতি পন দট্ঠব্বং. অপরিহানসভাৰো ভাৰনামগ্গো অরিযমগ্গত্তা দস্সনাদস্সনমগ্গো ৰিয. ন চেত্থ অসিদ্ধতাসঙ্কা লোকুত্তরমগ্গস্স পরস্সপি অরিযমগ্গভাৰস্স সিদ্ধত্তা, নাপি লোকিযমগ্গেন অনেকন্তিকতা অরিযসদ্দেন ৰিসেসিতত্তা. তথা ন ৰিরুদ্ধতা দুতিযমগ্গাদীনং ভাৰনামগ্গভাৰস্স ওল়ারিককিলেসপ্পহানাদীনঞ্চ পরস্সপি আগমতো সিদ্ধত্তা.

অরিযপুগ্গলসংসন্দনপরিহানিকথাৰণ্ণনা নিট্ঠিতা.

৩. সুত্তসাধনপরিহানিকথাৰণ্ণনা

২৬৫. পুগ্গলপঞ্ঞত্তিঅট্ঠকথাযং ¶ ‘‘পত্তি, ফুসনা’’তি চ পচ্চক্খতো অধিগমো অধিপ্পেতোতি ৰুত্তং ‘‘পত্তব্বং ৰদতীতি আহ ফুসনারহ’’ন্তি.

২৬৭. কতসন্নিট্ঠানস্সাতি ইমস্মিং সত্তাহে মাসে উতুম্হি অন্তোৰস্সে ৰা অঞ্ঞং আরাধেস্সামীতি কতনিচ্ছযস্স.

সুত্তসাধনপরিহানিকথাৰণ্ণনা নিট্ঠিতা.

পরিহানিকথাৰণ্ণনা নিট্ঠিতা.

৩. ব্রহ্মচরিযকথা

১. সুদ্ধব্রহ্মচরিযকথাৰণ্ণনা

২৬৯. হেট্ঠাপীতি ¶ ¶ পরনিম্মিতৰসৰত্তিদেৰেহি হেট্ঠাপি. মগ্গভাৰনম্পি ন ইচ্ছন্তীতি ৰিঞ্ঞাযতি ‘‘ইধ ব্রহ্মচরিযৰাসো’’তি ইমিনা ‘‘দ্ৰেপি ব্রহ্মচরিযৰাসা নত্থি দেৰেসূতি উপলদ্ধিৰসেনা’’তি ৰুত্তত্তা.

২৭০. তস্সেৰাতি পরৰাদিনো এৰ. পুগ্গলৰসেনাতি ‘‘গিহীনঞ্চেৰ একচ্চানঞ্চ দেৰান’’ন্তি এৰং পুগ্গলৰসেন. তস্সাতি পরৰাদিনো. পটিক্খেপো ন যুত্তোতি এৰং পুগ্গলৰসেন অত্থযোজনা ন যুত্তাতি অধিপ্পাযো. পুগ্গলাধিট্ঠানেন পন কতাপি অত্থৰণ্ণনা ওকাসৰসেন পরিচ্ছিজ্জতীতি নাযং দোসো. তস্সাযং অধিপ্পাযোতি অযং ‘‘গিহীনঞ্চেৰা’’তিআদিনা ৰুত্তো তস্স পরৰাদিনো যদি অধিপ্পাযো, এৰং সঞ্ঞায পরৰাদিনো সকৰাদিনা সমানাদাযোতি ন নিগ্গহারহো সিযা. তেনাহ ‘‘সক…পে… তব্বো’’তি. পঠমং পন অনুজানিত্ৰা পচ্ছা পটিক্খেপেনেৰ নিগ্গহেতব্বতা ৰেদিতব্বা. কেচি ‘‘যত্থ নত্থি পব্বজ্জা, নত্থি তত্থ ব্রহ্মচরিযৰাসোতি পুচ্ছায একচ্চানং মনুস্সানং মগ্গপ্পটিৰেধং সন্ধায পরৰাদিনো পটিক্খেপো. যদিপি সো দেৰানং মগ্গপ্পটিলাভং ন ইচ্ছতি, সম্ভৰন্তং পন সব্বং দস্সেতুং অট্ঠকথাযং ‘গিহীন’মিচ্চেৰ অৰত্ৰা ‘একচ্চানঞ্চ দেৰান’ন্তি ৰুত্ত’’ন্তি ৰদন্তি, তং ন সুন্দরং ‘‘সন্ধাযা’’তি ৰুত্তত্তা, পুরিমোযেৰত্থো যুত্তো.

সুদ্ধব্রহ্মচরিযকথাৰণ্ণনা নিট্ঠিতা.

২. সংসন্দনব্রহ্মচরিযকথাৰণ্ণনা

২৭৩. রূপাৰচরমগ্গেনাতি ¶ রূপাৰচরজ্ঝানেন. তঞ্হি রূপভৰূপপত্তিযা উপাযভাৰতো মগ্গোতি ৰুত্তো. যথাহ ‘‘রূপুপপত্তিযা মগ্গং ভাৰেতী’’তি (ধ. স. ১৬০). ইদন্তি ইদং রূপাৰচরজ্ঝানং. ‘‘ইধৰিহাযনিট্ঠহেতুভূতো রূপাৰচরমগ্গো’’তিআদিকং দীপেন্তং ৰচনং অনাগামিমগ্গস্স তব্ভাৰদীপকেন ‘‘ইধ ভাৰিতমগ্গো’’তিআদিকেন কথং সমেতীতি চোদেত্ৰা যথা সমেতি ¶ , তং দস্সেতুং ‘‘পুব্বে পনা’’তিআদি ৰুত্তং. তত্থ ‘‘পুব্বে’’তি ইমিনা ‘‘ইধ ভাৰিতমগ্গো’’তিআদিকং ৰদন্তি, ইধাপি পন ‘‘রূপাৰচরমগ্গেনা’’তিআদিকং. তত্থ অনাগামী এৰাতি অনাগামিফলট্ঠো এৰ. ঝানানাগামীতি অসমুচ্ছিন্নজ্ঝত্তসংযোজনোপি রূপভৰে উপ্পজ্জিত্ৰা অনাৰত্তিধম্মমগ্গং ভাৰেত্ৰা তত্থেৰ পরিনিব্বাযনতো. অধিপ্পাযোতি যথাৰুত্তো দ্ৰিন্নং অট্ঠকথাৰচনানং অৰিরোধদীপকো অধিপ্পাযো.

ইধাতি কামলোকে. তত্থাতি ব্রহ্মলোকে. এত্থ চ পরৰাদী এৰং পুচ্ছিতব্বো ‘‘তীহি, ভিক্খৰে, ঠানেহী’’তি সুত্তং কিং যথারুতৰসেন গহেতব্বত্থং, উদাহু সন্ধাযভাসিতন্তি? তত্থ জানমানো সন্ধাযভাসিতন্তি ৰদেয্য. অঞ্ঞথা ‘‘পরনিম্মিতৰসৰত্তিদেৰে উপাদাযা’’তিআদি ৰত্তুং ন সক্কা ‘‘দেৰে চ তাৰতিংসে’’তি ৰুত্তত্তা. যথা হি তস্স ‘‘সেয্যথাপি দেৰেহি তাৰতিংসেহি সদ্ধিং মন্তেত্ৰা’’তিআদীসু ৰিয সক্কং দেৰরাজানং উপাদায কামাৰচরদেৰেসু তাৰতিংসদেৰা পাকটা পঞ্ঞাতাতি তেসং গহণং, ন তেযেৰ অধিপ্পেতাতি সুত্তপদস্স সন্ধাযভাসিতত্থং সম্পটিচ্ছিতব্বং, এৰং ‘‘ইধ ব্রহ্মচরিযৰাসো’’তি এত্থাপি অনৰজ্জসুখঅব্যাসেকসুখনেক্খম্মসুখাদিসন্নিস্সযভাৰেন মহানিসংসতায সাসনে পব্বজ্জা ‘‘ইধ ব্রহ্মচরিযৰাসো’’তি ইমস্মিং সুত্তে অধিপ্পেতা. সা হি উত্তরকুরুকানং দেৰানঞ্চ অনোকাসভাৰতো দুক্করা দুল্লভা চ. তত্থ সূরিযপরিৰত্তাদীহিপি দেৰেসু মগ্গপটিলাভায অত্থিতা ৰিভাৰেতব্বা, উত্তরকুরুকানং পন ৰিসেসানধিগমভাৰো উভিন্নম্পি ইচ্ছিতো এৰাতি.

সংসন্দনব্রহ্মচরিযকথাৰণ্ণনা নিট্ঠিতা.

ব্রহ্মচরিযকথাৰণ্ণনা নিট্ঠিতা.

৩. ওধিসোকথাৰণ্ণনা

২৭৪. ওধিসোতি ¶ ভাগসো, ভাগেনাতি অত্থো. ভাগো নাম যস্মা একদেসো হোতি, তস্মা ‘‘একদেসেন একদেসেনা’’তি ৰুত্তং. তত্থ যদি চতুন্নং মগ্গানং ৰসেন সমুদযপক্খিকস্স কিলেসগণস্স চতুভাগেহি পহানং ‘‘ওধিসো পহান’’ন্তি অধিপ্পেতং, ইচ্ছিতমেৰেতং সকৰাদিস্স ‘‘তিণ্ণং সংযোজনানং পরিক্খযা দিট্ঠিগতানং পহানাযা’’তি ¶ চ আদিৰচনতো. যস্মা পন মগ্গো চতূসু সচ্চেসু নানাভিসমযৰসেন কিচ্চকরো, ন একাভিসমযৰসেনাতি পরৰাদিনো লদ্ধি, তস্মা যথা ‘‘মগ্গো কালেন দুক্খং পরিজানাতি, কালেন সমুদযং পজহতী’’তিআদিনা নানক্খণৰসেন সচ্চেসু পৰত্ততীতি ইচ্ছিতো, এৰং পচ্চেকম্পি নানক্খণৰসেন পৰত্তেয্য. তথা সতি দুক্খাদীনং একদেসএকদেসমেৰ পরিজানাতি পজহতীতি দস্সেতুং পাল়িযং ‘‘সোতাপত্তি…পে… একদেসে পজহতী’’তিআদি ৰুত্তং. সতি হি নানাভিসমযে পঠমমগ্গাদীহি পহাতব্বানং সংযোজনত্তযাদীনং দুক্খদস্সনাদীহি একদেসএকদেসপ্পহানং সিযাতি একদেসসোতাপত্তিমগ্গট্ঠাদিতা, ততো এৰ একদেসসোতাপন্নাদিতা চ আপজ্জতি অনন্তরফলত্তা লোকুত্তরকুসলানং, ন চ তং যুত্তং. ন হি কালভেদেন ৰিনা সো এৰ সোতাপন্নো, অসোতাপন্নো চাতি সক্কা ৰিঞ্ঞাতুং. তেনাহ ‘‘একদেসং সোতাপন্নো, একদেসং ন সোতাপন্নো’’তিআদি.

অপিচাযং নানাভিসমযৰাদী এৰং পুচ্ছিতব্বো ‘‘মগ্গঞাণং সচ্চানি পটিৰিজ্ঝন্তং কিং আরম্মণতো পটিৰিজ্ঝতি, উদাহু কিচ্চতো’’তি. যদি আরম্মণতোতি ৰদেয্য, তস্স ৰিপস্সনাঞাণস্স ৰিয দুক্খসমুদযানং অচ্চন্তপরিচ্ছেদসমুচ্ছেদা ন যুত্তা ততো অনিস্সটত্তা, তথা মগ্গদস্সনং. ন হি সযমেৰ অত্তানং আরব্ভ পৰত্ততীতি যুত্তং, মগ্গন্তরপরিকপ্পনাযং অনৰট্ঠানং আপজ্জতীতি, তস্মা তীণি সচ্চানি কিচ্চতো, নিরোধং কিচ্চতো আরম্মণতো চ পটিৰিজ্ঝতীতি এৰমসম্মোহতো পটিৰিজ্ঝন্তস্স মগ্গঞাণস্স নত্থেৰ নানাভিসমযো. ৰুত্তঞ্হেতং ‘‘যো, ভিক্খৰে, দুক্খং পস্সতি, দুক্খসমুদযম্পি সো পস্সতী’’তিআদি. ন চেতং কালন্তরদস্সনং সন্ধায ৰুত্তং. ‘‘যো নু খো, আৰুসো, দুক্খং পস্সতি, দুক্খসমুদযম্পি সো পস্সতি, দুক্খনিরোধম্পি…পে… দুক্খনিরোধগামিনিপটিপদম্পি সো পস্সতী’’তি (সং. নি. ৫.১১০০) একসচ্চদস্সনসমঙ্গিনো অঞ্ঞসচ্চদস্সনসমঙ্গিভাৰৰিচারণাযং তদত্থসাধনত্থং আযস্মতা গৰংপতিত্থেরেন আভতত্তা পচ্চেকঞ্চ সচ্চত্তযদস্সনস্স যোজিতত্তা. অঞ্ঞথা পুরিমদিট্ঠস্স পুন অদস্সনতো সমুদযাদিদস্সনে দুক্খাদিদস্সনমযোজনীযং ¶ সিযা. ন হি লোকুত্তরমগ্গো লোকিযমগ্গো ৰিয কতকারিভাৰেন পৰত্ততি সমুচ্ছেদকত্তা. তথা যোজনে চ সব্বং দস্সনং ¶ দস্সনন্তরপরন্তি দস্সনানুপরমো সিযা. এৰং আগমতো যুত্তিতো চ নানাভিসমযস্স অসম্ভৰতো পচ্চেকং মগ্গানং ওধিসো পহানং নত্থীতি নিট্ঠমেত্থ গন্তব্বং.

ওধিসোকথাৰণ্ণনা নিট্ঠিতা.

৪. জহতিকথাৰণ্ণনা

১. নসুত্তাহরণকথাৰণ্ণনা

২৮০. যদিপি পাল়িযং ‘‘তযো মগ্গে ভাৰেতী’’তি ৰুত্তং, মগ্গভাৰনা পন যাৰদেৰ কিলেসসমুচ্ছিন্দনত্থাতি ঞত্ৰা ‘‘কিচ্চসব্ভাৰন্তি তীহি পহাতব্বস্স পহীনত’’ন্তি আহ. তত্থ তীহীতি হেট্ঠিমেহি তীহি অরিযমগ্গেহি পহাতব্বস্স অজ্ঝত্তসংযোজনস্স পহীনতং সমুচ্ছিন্দনন্তি অত্থো. তং পন কিচ্চন্তি অধোভাগিযসংযোজনেসু মগ্গস্স পহানাভিসমযকিচ্চং. তেনেৰ মগ্গেনাতি অনাগামিমগ্গেনেৰ. এতং ন সমেতীতি এৰং মগ্গুপ্পাদতো পগেৰ কামরাগব্যাপাদা পহীযন্তীতি লদ্ধিকিত্তনং ইমিনা মগ্গস্স কিচ্চসব্ভাৰকথনেন ন সমেতি ন যুজ্জতি. তস্মাতি ইমিনা যথাৰুত্তমেৰ ৰিরোধং পচ্চামসতি. পহীনানন্তি ৰিক্খম্ভিতানং. যো হি ঝানলাভী ঝানেন যথাৰিক্খম্ভিতে কিলেসে মগ্গেন সমুচ্ছিন্দতি, সো ইধাধিপ্পেতো. তেনাহ ‘‘দস্সনমগ্গে…পে… অধিপ্পাযো’’তি.

জহতিকথাৰণ্ণনা নিট্ঠিতা.

৫. সব্বমত্থীতিকথাৰণ্ণনা

১. ৰাদযুত্তিৰণ্ণনা

২৮২. সব্বং ¶ অত্থীতি এত্থ যস্মা পচ্চুপ্পন্নং ৰিয অতীতানাগতম্পি ধরমানসভাৰন্তি পরৰাদিনো লদ্ধি, তস্মা সব্বন্তি কালৰিভাগতো অতীতাদিভেদং সব্বং. সো পন ‘‘যম্পি নত্থি, তম্পি অত্থী’’তি কালৰিমুত্তস্স ৰসেন অনুযোগো, তং অতিপ্পসঙ্গদস্সনৰসেন পরৰাদিপটিঞ্ঞায দোসারোপনং. নযদস্সনং ৰা অতীতানাগতানং নত্থিভাৰস্স. অত্থীতি ¶ পন অযং অত্থিভাৰো যস্মা দেসকালাকারধম্মেহি ৰিনা ন হোতি, তস্মা তং তাৰ তেহি সদ্ধিং যোজেত্ৰা অনুযোগং দস্সেতুং ‘‘সব্বত্থ সব্বমত্থী’’তিআদিনা পাল়ি পৰত্তা. তত্থ যদিপি সব্বত্থাতি ইদং সামঞ্ঞৰচনং, তং পন যস্মা ৰিসেসনিৰিট্ঠং হোতি, পরতো চ সব্বেসূতি ধম্মা ৰিভাগতো ৰুচ্চন্তি, তস্মা ওল়ারিকস্স পাকটস্স রূপধম্মসমুদাযস্স ৰসেন অত্থং দস্সেতুং অট্ঠকথাযং ‘‘সব্বত্থাতি সব্বস্মিং সরীরে’’তি ৰুত্তং, নিদস্সনমত্তং ৰা এতং দট্ঠব্বং. তথা চ কাণাদকাপিলেহি পটিঞ্ঞাযমানা আকাসকালাদিসত্তপকতিপুরিসা ৰিয পরৰাদিনা পটিঞ্ঞাযমানং সব্বং সব্বব্যাপীতি আপন্নমেৰ হোতীতি. ‘‘সব্বত্থ সরীরে’’তি চ ‘‘তিলে তেল’’ন্তি ৰিয ব্যাপনে ভুম্মন্তি সরীরপরিযাপন্নেন সব্বেন ভৰিতব্বন্তি ৰুত্তং ‘‘সিরসি পাদা…পে… অত্থো’’তি.

সব্বস্মিং কালে সব্বমত্থীতি যোজনা. এতস্মিং পক্খেযেৰস্স অঞ্ঞৰাদো পরিদীপিতো সিযা ‘‘যং অত্থি, অত্থেৰ তং, যং নত্থি, নত্থেৰ তং, অসতো নত্থি সম্ভৰো, সতো নত্থি ৰিনাসো’’তি. এৰং সব্বেনাকারেন সব্বং সব্বেসু ধম্মেসু সব্বং অত্থীতি অত্থোতি সম্বন্ধো. ইমেহি পন পক্খেহি ‘‘সব্বং সব্বসভাৰং, অনেকসত্তিনিচিতাভাৰা অসতো নত্থি সম্ভৰো’’তি ৰাদো পরিদীপিতো সিযা. যোগরহিতন্তি কেনচি যুত্তাযুত্তলক্খণসংযোগরহিতং. তং পন একসভাৰন্তি সংযোগরহিতং নাম অত্থতো একসভাৰং, একধম্মোতি অত্থো. এতেন দেৰৰাদীনং ব্রহ্মদস্সনং অত্থেৰাতিৰাদো পরিদীপিতো সিযা. অত্থীতি পুচ্ছতীতি যদি সব্বমত্থীতি তৰ ৰাদো, যথাৰুত্তায মম দিট্ঠিযা সম্মাদিট্ঠিভাৰো অত্থীতি একন্তেন তযা সম্পটিচ্ছিতব্বো, তস্মা ‘‘কিং সো অত্থী’’তি পুচ্ছতীতি অত্থো.

ৰাদযুত্তিৰণ্ণনা নিট্ঠিতা.

২. কালসংসন্দনকথাৰণ্ণনা

২৮৫. অতীতা ¶ …পে… করিত্ৰাতি এত্থাযং সঙ্খেপত্থো – অতীতং অনাগতন্তি রূপস্স ইমং ৰিসেসং, এৰং ৰিসেসং ৰা রূপং অগ্গহেত্ৰা পচ্চুপ্পন্নতাৰিসেসৰিসিট্ঠরূপমেৰ অপ্পিযং পচ্চুপ্পন্নরূপভাৰানং সমানাধিকরণত্তা এতস্মিংযেৰ ¶ ৰিসযে অপ্পেতব্বং, ৰচীগোচরং পাপেতব্বং সতিপি নেসং ৰিসেসনৰিসেসিতব্বতাসঙ্খাতে ৰিভাগে তথাপি অৰিভজিতব্বং কত্ৰাতি. যস্মা পন পাল়িযং ‘‘পচ্চুপ্পন্নন্তি ৰা রূপন্তি ৰা’’তি পচ্চুপ্পন্নরূপসদ্দেহি তদত্থস্স ৰত্তব্বাকারো ইতিসদ্দেহি দস্সিতো, তস্মা ‘‘পচ্চুপ্পন্নসদ্দেন…পে… ৰুত্তং হোতী’’তি আহ. রূপপঞ্ঞত্তীতি রূপাযতনপঞ্ঞত্তি. সা হি সভাৰধম্মুপাদানা তজ্জাপঞ্ঞত্তি. তেনেৰাহ ‘‘সভাৰপরিচ্ছিন্নে পৰত্তা ৰিজ্জমানপঞ্ঞত্তী’’তি. রূপসমূহং উপাদাযাতি তংতংঅত্তপঞ্ঞত্তিযা উপাদানভূতানং অভাৰৰিভাৰনাকারেন পৰত্তমানানং রূপধম্মানং সমূহং উপাদায. উপাদানুপাদানম্পি হি উপাদানমেৰাতি. তস্মাতি সমূহুপাদাযাধীনতায অৰিজ্জমানপঞ্ঞত্তিভাৰতো. ৰিগমাৰত্তব্বতাতি ৰিগমস্স ৰত্থভাৰাপগমস্স অৰত্তব্বতা. ন হি ওদাততাৰিগমেন অৰত্থং হোতি. ন পন যুত্তা রূপভাৰস্স ৰিগমাৰত্তব্বতাতি যোজনা. রূপভাৰোতি চ রূপাযতনসভাৰো চক্খুৰিঞ্ঞাণস্স গোচরভাৰো. ন হি তস্স পচ্চুপ্পন্নভাৰৰিগমে ৰিগমাৰত্তব্বতা যুত্তা.

কালসংসন্দনকথাৰণ্ণনা নিট্ঠিতা.

ৰচনসোধনৰণ্ণনা

২৮৮. অনাগতং ৰা পচ্চুপ্পন্নং ৰাতি এত্থ ৰা-সদ্দো অনিযমত্থো যথা ‘‘খদিরে ৰা বন্ধিতব্বং পলাসে ৰা’’তি. তস্মা ‘‘হুত্ৰা হোতী’’তি এত্থ হোতি-সদ্দো অনাগতপচ্চুপ্পন্নেসু যং কিঞ্চি পধানং কত্ৰা সম্বন্ধং লভতীতি দস্সেন্তো ‘‘অনাগতং…পে… দট্ঠব্ব’’ন্তি আহ. তত্থ পচ্চুপ্পন্নং হোন্তন্তি পচ্চুপ্পন্নং জাযমানং পচ্চুপ্পন্নভাৰং লভন্তং. তেনাহ ‘‘তঞ্ঞেৰ অনাগতং তং পচ্চুপ্পন্নন্তি লদ্ধিৰসেনা’’তি. তম্পি হুত্ৰা হোতীতি যং অনাগতং হুত্ৰা পচ্চুপ্পন্নভাৰপ্পত্তিযা ‘‘হুত্ৰা হোতী’’তি ৰুত্তং, কিং তদপি পুন হুত্ৰা হোতীতি পুচ্ছতি. তব্ভাৰাৰিগমতোতি পচ্চুপ্পন্নভাৰতো হুত্ৰাহোতিভাৰানুপগমতো. পচ্চুপ্পন্নাভাৰতোতি পচ্চুপ্পন্নতায অভাৰতো.

ৰচনং ¶ ¶ অরহতীতি ইমিনা ৰচনমত্তে ন কোচি দোসোতি দস্সেতি. ইদং ৰুত্তং হোতি – যদিপি তস্স পুন হুত্ৰা ভূতস্স পুন হুত্ৰাহোতিভাৰো নত্থি, পুনপ্পুনং ঞাপেতব্বতায পন দুতিযং ততো পরম্পি তথা ৰত্তব্বতং অরহতীতি ‘‘আমন্তা’’তি পটিজানাতীতি. ধম্মেতি সভাৰধম্মে. তপ্পটিক্খেপতো অধম্মে অভাৰধম্মে. তেনাহ ‘‘সসৰিসাণে’’তি.

পটিক্খিত্তনযেনাতি ‘‘হুত্ৰা হোতি, হুত্ৰা হোতী’’তি এত্থ পুব্বে যদেতং তযা ‘‘অনাগতং হুত্ৰা পচ্চুপ্পন্নং হোতী’’তি ৰদতা ‘‘তংযেৰ অনাগতং তং পচ্চুপ্পন্ন’’ন্তি লদ্ধিৰসেন ‘‘অনাগতং ৰা পচ্চুপ্পন্নং ৰা হুত্ৰা হোতী’’তি ৰুত্তং, ‘‘কিং তে তম্পি হুত্ৰা হোতী’’তি পুচ্ছিতে যো পরৰাদিনা হুত্ৰা ভূতস্স পুন হুত্ৰাঅভাৰতো ‘‘ন হেৰা’’তি পটিক্খেপো কতো, তেন পটিক্খিত্তনযেন. স্ৰাযং যদেৰ রূপাদি অনাগতং, তদেৰ পচ্চুপ্পন্নন্তি সতিপি অত্থাভেদে অনাগতপচ্চুপ্পন্নন্তি পন অত্থেৰ কালভেদোতি তংকালভেদৰিরোধায পটিক্খেপো পৰত্তোতি আহ ‘‘পটিক্খিত্তনযেনাতি কালনানত্তেনা’’তি. তেন হি সো অযঞ্চ পটিক্খেপো নীতো পৰত্তিতোতি. পটিঞ্ঞাতনযেনাতি ইদম্পি যথাৰুত্তপটিক্খেপানন্তরং যং পটিঞ্ঞাতং, তং সন্ধাযাহ. যথা হি সা পটিঞ্ঞা অত্থাভেদেন নীতা পৰত্তিতা, তথাযম্পি. তেনেৰাহ ‘‘অত্থানানত্তেনা’’তি, অনাগতাদিপ্পভেদায কালপঞ্ঞত্তিযা উপাদানভূতস্স অত্থস্স অভেদেনাতি অত্থো. যথা উপাদানভূতরূপাদিঅত্থাভেদেপি তেসং খণত্তযানাৰত্তি তংসমঙ্গিতা অনাগতপচ্চুপ্পন্নভাৰাৰত্তিতা, তথা তত্থ ৰুচ্চমানা হুত্ৰাহোতিভাৰা যথাক্কমং পুরিমপচ্ছিমেসু পৰত্তিতা পুরিমপচ্ছিমকিরিযাতি কত্ৰাতি ইমমত্থং দস্সেন্তো ‘‘অত্থানানত্তং…পে… পটিজানাতী’’তি ৰত্ৰা পুন ‘‘অত্থানানত্তমেৰ হী’’তিআদিনা তমেৰ অত্থং সমত্থেতি. যথা পন ‘‘তং জীৰং তং সরীর’’ন্তি পটিজানন্তস্স জীৰোৰ সরীরং, সরীরমেৰ জীৰোতি জীৰসরীরানং অনঞ্ঞত্তং আপজ্জতি, এৰং ‘‘তঞ্ঞেৰ অনাগতং তং পচ্চুপ্পন্ন’’ন্তি চ পটিজানন্তস্স অনাগতপচ্চুপ্পন্নানং অনঞ্ঞত্তং আপন্নন্তি পচ্চুপ্পন্নানাগতেসু ৰুত্তা হোতিভাৰহুত্ৰাভাৰা অনাগতপচ্চুপ্পন্নেসুপি আপজ্জেয্যুন্তি ৰুত্তং অট্ঠকথাযং ‘‘এৰং সন্তে অনাগতম্পি হুত্ৰাহোতি নাম, পচ্চুপ্পন্নম্পি হুত্ৰাহোতিযেৰ নামা’’তি.

অনুঞ্ঞাতপঞ্হস্সাতি ¶ ‘‘তঞ্ঞেৰ অনাগতং তং পচ্চুপ্পন্নন্তি? আমন্তা’’তি এৰং অত্থানানত্তং সন্ধায অনুঞ্ঞাতস্স অত্থস্স. ঞাতুং ইচ্ছিতো হি অত্থো পঞ্হো. দোসো ৰুত্তোতি অনাগতং হুত্ৰা পচ্চুপ্পন্নভূতস্স পুন অনাগতং হুত্ৰা পচ্চুপ্পন্নভাৰাপত্তিসঙ্খাতো দোসো ৰুত্তো পুরিমনযে ¶ . পচ্ছিমনযে পন অনাগতপচ্চুপ্পন্নেসু একেকস্স হুত্ৰাহোতিভাৰাপত্তিসঙ্খাতো দোসো ৰুত্তোতি অত্থো. পটিক্খিত্তপঞ্হন্তি ‘‘তংযেৰ অনাগতং তং পচ্চুপ্পন্নন্তি? ন হেৰং ৰত্তব্বে’’তি এৰং কালনানত্তং সন্ধায পটিক্খিত্তপঞ্হং. তেনাতি অনাগতপচ্চুপ্পন্নানং হোতিহুত্ৰাভাৰপটিক্খেপেন. চোদেতীতি অনাগতং তেন হোতি নাম, পচ্চুপ্পন্নং তেন হুত্ৰা নাম, উভযম্পি অনঞ্ঞত্তা উভযসভাৰন্তি চোদেতি. এত্থাতি ‘‘হুত্ৰা হোতী’’তি এতস্মিং পঞ্হে কথং হোতি দোসোতি চোদেতীতি. ‘‘তস্সেৰা’’তি পরিহরতি. কথং কত্ৰা চোদনা, কথঞ্চ কত্ৰা পরিহারো? অনুজাননপটিক্খেপানং ভিন্নৰিসযতায চোদনা, অত্থাভেদকালভেদৰিসযত্তা অভিন্নাধারতায তেসং পরিহারো. তস্সেৰাতি হি পরৰাদিনো এৰাতি অত্থো.

তদুভযং গহেত্ৰাতি ‘‘তং অনাগতং তং পচ্চুপ্পন্ন’’ন্তি উভযং একজ্ঝং গহেত্ৰা. একেকন্তি তেসু একেকং. একেকমেৰাতি উভযং একজ্ঝং অগ্গহেত্ৰা একেকমেৰ ৰিসুং ৰিসুং ইমস্মিং পক্খে তথা ন যুত্তন্তি অত্থো. এস নযোতি অতিদেসং কত্ৰা সংখিত্তত্তা তং দুব্বিঞ্ঞেয্যন্তি ‘‘অনাগতস্স হী’’তিআদিনা ৰিৰরতি. পটিজানিতব্বং সিযা অনাগতপচ্চুপ্পন্নানং যথাক্কমং হোতিহুত্ৰাভাৰতোতি অধিপ্পাযো. ‘‘যদেতং তযা’’তিআদিনা পৰত্তো সংৰণ্ণনানযো পুরিমনযো, তত্থ হি ‘‘যদি তে অনাগতং হুত্ৰা’’তিআদিনা হুত্ৰাহোতিভাৰো চোদিতো. ‘‘অপরো নযো’’তিআদিকো দুতিযনযো. তত্থ হি ‘‘অনাগতস্স…পে… হুত্ৰাহোতিযেৰ নামা’’তি অনাগতাদীসু একেকস্স হুত্ৰাহোতিনামতা চোদিতা.

ৰচনসোধনৰণ্ণনা নিট্ঠিতা.

অতীতঞাণাদিকথাৰণ্ণনা

২৯০. কথং ¶ ৰুচ্চতীতি কস্মা ৰুত্তং. তেনাতি হি ইমিনা দুতিযপুচ্ছায ‘‘অতীতং ঞাণ’’ন্তি ইদং পচ্চামট্ঠং, তঞ্চ পচ্চুপ্পন্নং ঞাণং, অতীতধম্মারম্মণতায অতীতন্তি ৰুত্তং. তেনাহ অট্ঠকথাযং ‘‘পুন পুট্ঠো অতীতারম্মণং পচ্চুপ্পন্নং ঞাণ’’ন্তিআদি.

অতীতঞাণাদিকথাৰণ্ণনা নিট্ঠিতা.

অরহন্তাদিকথাৰণ্ণনা

২৯১. ‘‘অরহং ¶ খীণাসৰো’’তিআদিনা সুত্তৰিরোধো পাকটোতি ইদমেৰ দস্সেন্তো ‘‘যুত্তিৰিরোধো…পে… দট্ঠব্বো’’তি আহ. তত্থ অনানত্তন্তি অৰিসেসো. এৰমাদিকোতি আদি-সদ্দেন কতকিচ্চতাভাৰো অনোহিতভারতাতি এৰমাদীনং সঙ্গহো দট্ঠব্বো.

অরহন্তাদিকথাৰণ্ণনা নিট্ঠিতা.

পদসোধনকথাৰণ্ণনা

২৯৫. যো অতীতসদ্দাভিধেয্যো অত্থো, সো অত্থিসদ্দাভিধেয্যোতি দ্ৰেপি সমানাধিকরণত্থাতি কত্ৰা ৰুত্তং ‘‘অতীতঅত্থিসদ্দানং একত্থত্তা’’তি, ন, অতীতসদ্দাভিধেয্যস্সেৰ অত্থিসদ্দাভিধেয্যত্তা. তেনাহ ‘‘অত্থিসদ্দত্থস্স চ ন্ৰাতীতভাৰতো’’তি. তেন কিং সিদ্ধন্তি আহ ‘‘অতীতং ন্ৰাতীতং, ন্ৰাতীতঞ্চ অতীতং হোতী’’তি. ইদং ৰুত্তং হোতি – যদি তৰ মতেন অতীতং অত্থি, অত্থি চ ন্ৰাতীতন্তি অতীতঞ্চ নো অতীতং সিযা, তথা অত্থি নো অতীতং অতীতঞ্চ নো অতীতং অতীতং সিযাতি, যথা ‘‘অতীতং অত্থী’’তি এত্থ অতীতমেৰ অত্থীতি নাযং নিযমো গহেতব্বো অনতীতস্সপি অত্থিভাৰস্স ইচ্ছিতত্তা. তেনেৰাহ ‘‘অত্থি সিযা অতীতং, সিযা ন্ৰাতীত’’ন্তি. যেন হি আকারেন অতীতস্স অত্থিভাৰো পরৰাদিনা ইচ্ছিতো, তেনাকারেন অনতীতস্স অনাগতস্স পচ্চুপ্পন্নস্স চ সো ইচ্ছিতো. কেন পন আকারেন ইচ্ছিতোতি ¶ ? সঙ্খতাকারেন. তেন ৰুত্তং ‘‘তেনাতীতং ন্ৰাতীতং, ন্ৰাতীতং অতীত’’ন্তি. তস্মা অতীতং অত্থিযেৰাতি এৰমেত্থ নিযমো গহেতব্বো. অত্থিভাৰে হি অতীতং নিযমিতং, ন অতীতে অত্থিভাৰো নিযমিতো, ‘‘ন পন নিব্বানং অত্থী’’তি এত্থ পন নিব্বানমেৰ অত্থীতি অযম্পি নিযমো সম্ভৰতীতি সো এৰ গহেতব্বো. যদিপি হি নিব্বানং পরমত্থতো অত্থিভাৰং উপাদায উত্তরপদাৰধারণং লব্ভতি তদঞ্ঞস্সপি অভাৰতো, তথাপি অসঙ্খতাকারেন অঞ্ঞস্স অনুপলব্ভনতো তথা নিব্বানমেৰ অত্থীতি পুরিমপদাৰধারণে অত্থে গয্হমানে ‘‘অত্থি সিযা নিব্বানং, সিযা নো নিব্বান’’ন্তি চোদনা অনোকাসা. অতীতাদীসু পন পুরিমপদাৰধারণং পরৰাদিনা ন গহিতন্তি নত্থেত্থ অতিপ্পসঙ্গো. অগ্গহণঞ্চস্স পাল়িতো এৰ ৰিঞ্ঞাযতি. এৰমেত্থ ¶ অতীতাদীনং অত্থিতং ৰদন্তস্স পরৰাদিস্সেৰাযং ইট্ঠৰিঘাতদোসাপত্তি, ন পন নিব্বানস্স অত্থিতং ৰদন্তস্স সকৰাদিস্সাতি. পটিপাদনা পতিট্ঠাপনা ৰেদিতব্বা.

এত্থাহ ‘‘অতীতং অত্থী’’তিআদিনা কিং পনাযং অতীতানাগতানং পরমত্থতো অত্থিভাৰো অধিপ্পেতো, উদাহু ন পরমত্থতো. কিঞ্চেত্থ – যদি তাৰ পরমত্থতো, সব্বকালং অত্থিভাৰতো সঙ্খারানং সস্সতভাৰো আপজ্জতি, ন চ তং যুত্তং আগমৰিরোধতো যুত্তিৰিরোধতো চ. অথ ন পরমত্থতো, ‘‘সব্বমত্থী’’তিআদিকা চোদনা নিরত্থিকা সিযা, ন নিরত্থিকা. সো হি পরৰাদী ‘‘যং কিঞ্চি রূপং অতীতানাগত’’ন্তিআদিনা অতীতানাগতানম্পি খন্ধভাৰস্স ৰুত্তত্তা অসতি চ অতীতে কুসলাকুসলস্স কম্মস্স আযতিং ফলং কথং ভৰেয্য, তত্থ চ পুব্বেনিৰাসঞাণাদি অনাগতে চ অনাগতংসঞাণাদি কথং পৰত্তেয্য, তস্মা অত্থেৰ পরমত্থতো অতীতানাগতন্তি যং পটিজানাতি, তং সন্ধায অযং কতাতি. একন্তেন চেতং সম্পটিচ্ছিতব্বং. যেপি ‘‘সব্বং অত্থী’’তি ৰদন্তি অতীতং অনাগতং পচ্চুপ্পন্নঞ্চ, তে সব্বত্থিৰাদাতি.

চতুব্বিধা চেতে তে সব্বত্থিৰাদা. তত্থ কেচি ভাৰঞ্ঞত্তিকা. তে হি ‘‘যথা সুৰণ্ণভাজনস্স ভিন্দিত্ৰা অঞ্ঞথা করিযমানস্স সণ্ঠানস্সেৰ অঞ্ঞথত্তং, ন ৰণ্ণাদীনং, যথা চ খীরং দধিভাৰেন পরিণমন্তং রসৰীরিযৰিপাকে পরিচ্চজতি, ন ৰণ্ণং, এৰং ধম্মাপি অনাগতদ্ধুনো পচ্চুপ্পন্নদ্ধং সঙ্কমন্তা অনাগতভাৰমেৰ জহন্তি, ন অত্তনো সভাৰং. তথা ¶ পচ্চুপ্পন্নদ্ধুনো অতীতদ্ধং সঙ্কমে’’তি ৰদন্তি. কেচি লক্খণঞ্ঞত্তিকা, তে পন ‘‘তীসু অদ্ধাসু পৰত্তমানো ধম্মো অতীতো অতীতলক্খণযুত্তো, ইতরলক্খণেহি অযুত্তো. তথা অনাগতো পচ্চুপ্পন্নো চ. যথা পুরিসো একিস্সা ইত্থিযা রত্তো অঞ্ঞাসু অরত্তো’’তি ৰদন্তি. অঞ্ঞে অৰত্থঞ্ঞত্তিকা, তে ‘‘তীসু অদ্ধাসু পৰত্তমানো ধম্মো তং তং অৰত্থং পত্ৰা অঞ্ঞো অঞ্ঞং নিদ্দিসীযতি অৰত্থন্তরতো, ন সভাৰতো. যথা একং অক্খং একঙ্গে নিক্খিত্তং একন্তি ৰুচ্চতি, সতঙ্গে সতন্তি, সহস্সঙ্গে সহস্সন্তি, এৰংসম্পদমিদ’’ন্তি. অপরে অঞ্ঞথঞ্ঞত্তিকা, তে পন ‘‘তীসু অদ্ধাসু পৰত্তমানো ধম্মো তং তং অপেক্খিত্ৰা তদঞ্ঞসভাৰেন ৰুচ্চতি. যথা তং একা ইত্থী মাতাতি চ ৰুচ্চতি ধীতা’’তি চ. এৰমেতে চত্তারো সব্বত্থিৰাদা.

তেসু পঠমো পরিণামৰাদিতায কাপিলপক্খিকেসু পক্খিপিতব্বোতি. দুতিযস্সপি কালসঙ্করো আপজ্জতি সব্বস্স সব্বলক্খণযোগতো. চতুত্থস্সপি সঙ্করোৰ. একস্সেৰ ধম্মস্স ¶ পৰত্তিক্খণে তযোপি কালা সমোধানং গচ্ছন্তি. পুরিমপচ্ছিমক্খণা হি অতীতানাগতা, মজ্ঝিমো পচ্চুপ্পন্নোতি. ততিযস্স পন অৰত্থঞ্ঞত্তিকস্স নত্থি সঙ্করো ধম্মকিচ্চেন কালৰৰত্থানতো. ধম্মো হি সকিচ্চক্খণে পচ্চুপ্পন্নো, ততো পুব্বে অনাগতো, পচ্ছা অতীতোতি.

তত্থ যদি অতীতম্পি ধরমানসভাৰতায অত্থি অনাগতম্পি, কস্মা তং অতীতন্তি ৰুচ্চতি অনাগতন্তি ৰা, ননু ৰুত্তং ‘‘ধম্মকিচ্চেন কালৰৰত্থানতো’’তি. যদি এৰং পচ্চুপ্পন্নস্স চক্খুস্স কিং কিচ্চং, অনৰসেসপচ্চযসমৰাযে ফলুপ্পাদনং. এৰং সতি অনাগতস্সপি চস্স তেন ভৰিতব্বং অত্থিভাৰতোতি লক্খণসঙ্করো সিযা. ইদঞ্চেত্থ ৰত্তব্বং, তেনেৰ সভাৰেন সতো ধম্মস্স কিচ্চং, কিচ্চকরণে কো ৰিবন্ধো, যেন কদাচি করোতি কদাচি ন করোতি পচ্চযসমৰাযভাৰতো, কিচ্চস্স সমৰাযাভাৰতোতি চে? তং ন, নিচ্চং অত্থিভাৰস্স ইচ্ছিতত্তা. ততো এৰ চ অদ্ধুনং অৰৰত্থানং. ধম্মো হি তেনেৰ সভাৰেন ৰিজ্জমানো কস্মা কদাচি অতীতোতি ৰুচ্চতি কদাচি অনাগতোতি কালস্স ৰৰত্থানং ন সিযা. যো হি ধম্মো অজাতো, সো অনাগতো. যো জাতো ন চ নিরুদ্ধো, সো পচ্চুপ্পন্নো. যো নিরুদ্ধো, সো অতীতো. ইদমেৰেত্থ ৰত্তব্বং. যদি যথা ৰত্তমানং অত্থি ¶ , তথা অতীতং অনাগতঞ্চ অত্থি, তস্স তথা সতো অজাততা নিরুদ্ধতা চ কেন হোতীতি. তেনেৰ হি সভাৰেন সতো ধম্মস্স কথমিদং সিজ্ঝতি অজাতোতি ৰা নিরুদ্ধোতি ৰা. কিং তস্স পুব্বে নাহোসি, যস্স অভাৰতো অজাতোতি ৰুচ্চতি, কিঞ্চ পচ্ছা নত্থি, যস্স অভাৰতো নিরুদ্ধোতি ৰুচ্চতি. তস্মা সব্বথাপি অদ্ধত্তযং ন সিজ্ঝতি, যদি অহুত্ৰা সঙ্গতি হুত্ৰা চ ৰিনস্সতীতি ন সম্পটিচ্ছন্তি. যং পন ৰুত্তং ‘‘সঙ্খতলক্খণযোগতো ন সস্সতভাৰপ্পসঙ্গো’’তি, তযিদং কেৰলং ৰাচাৰত্থুমত্তং উদযৰযাসম্ভৰতো, অত্থি চ নাম সব্বদা সো ধম্মো, ন চ নিচ্চোতি কুতোযং ৰাচাযুত্তি.

সভাৰো সব্বদা অত্থি, নিচ্চো ধম্মো ন ৰুচ্চতি;

ধম্মো সভাৰতো নাঞ্ঞো, অহো ধম্মেসু কোসলং.

যঞ্চ ¶ ৰুত্তং ‘‘যং কিঞ্চি রূপং অতীতানাগত’’ন্তিআদিনা অতীতানাগতানং খন্ধভাৰস্স ৰুত্তত্তা অত্থেৰাতি, ৰদাম. অতীতং ভূতপুব্বং, অনাগতং যং সতি পচ্চযে ভৰিস্সতি, তদুভযস্সপি রুপ্পনাদিসভাৰানাতিৰত্তনতো রূপক্খন্ধাদিভাৰো ৰুত্তো. যথাধম্মসভাৰানাতিৰত্তনতো অতীতা ধম্মা অনাগতা ধম্মাতি, ন ধরমানসভাৰতায. কো চ এৰমাহ ‘‘পচ্চুপ্পন্নং ৰিয তং অত্থী’’তি. কথং পনেতং অত্থীতি? অতীতানাগতসভাৰেন. ইদং পন তৰেৰ উপট্ঠিতং, কথং তং অতীতং অনাগতঞ্চ ৰুচ্চতি, যদি নিচ্চকালং অত্থীতি.

যং পন ‘‘ন তাৰ কালং করোতি, যাৰ ন তং পাপং ব্যন্তী হোতী’’তি (ম. নি. ৩.২৫০) সুত্তে ৰুত্তং, তং যস্মিঞ্চ সন্তানে কম্মং কতূপচিতং, তত্থ তেনাহিতং তংফলুপ্পাদনসমত্থতং সন্ধায ৰুত্তং, ন অতীতস্স কম্মস্স ধরমানসভাৰত্তা. তথা সতি সকেন ভাৰেন ৰিজ্জমানং কথং তং অতীতং নাম সিযা. ইত্থঞ্চেতং এৰং সম্পটিচ্ছিতব্বং, যং সঙ্খারা অহুত্ৰা সম্ভৰন্তি, হুত্ৰা পতিৰেন্তি তেসং উদযতো পুব্বে ৰযতো চ পচ্ছা ন কাচি ঠিতি নাম অত্থি, যতো অতীতানাগতং অত্থীতি ৰুচ্চেয্য. তেন ৰুত্তং –

‘‘অনিধানগতা ভগ্গা, পুঞ্জো নত্থি অনাগতে;

উপ্পন্না যেপি তিট্ঠন্তি, আরগ্গে সাসপূপমা’’তি. (মহানি. ১০, ৩৯);

যদি ¶ চানাগতং পরমত্থতো সিযা, অহুত্ৰা সম্ভৰন্তীতি ৰত্তুং ন সক্কা. পচ্চুপ্পন্নকালে অহুত্ৰা সম্ভৰন্তীতি চে? ন, ধম্মপ্পৰত্তিমত্তত্তা কালস্স. অথ অত্তনো সভাৰেন অহুত্ৰা সম্ভৰন্তীতি, সিদ্ধমেতং অনাগতং পরমত্থতো নত্থীতি. যঞ্চ ৰুত্তং ‘‘অসতি অতীতে কুসলাকুসলস্স কম্মস্স আযতিং ফলং কথং ভৰেয্যা’’তি, ন খো পনেত্থ অতীতকম্মতো ফলুপ্পত্তি ইচ্ছিতা, অথ খো তস্স কতত্তা তদাহিতৰিসেসতো সন্তানতো. ৰুত্তঞ্হেতং ভগৰতা ‘‘কামাৰচরস্স কুসলস্স কম্মস্স কতত্তা উপচিতত্তা ৰিপাকং চক্খুৰিঞ্ঞাণং উপ্পন্নং হোতী’’তি (ধ. স. ৪৩১). যস্স পন অতীতানাগতং পরমত্থতো অত্থি, তস্স ফলং নিচ্চমেৰ অত্থীতি কিং তত্থ কম্মস্স সামত্থিযং. উপ্পাদনে চে, সিদ্ধমিদং অহুত্ৰা ভৰতীতি. যং পন ৰুত্তং ‘‘অসতি অতীতানাগতে কথং তত্থ ঞাণং পৰত্তেয্যা’’তি, যথা তং আলম্বণং, তং তথা অত্থি, কথঞ্চ তং আলম্বণং, অহোসি ভৰিস্সতি চাতি. ন হি কোচি অতীতং অনুস্সরন্তো অত্থীতি অনুস্সরতি, অথ খো অহোসীতি. যথা পন ৰত্তমানং আরম্মণং অনুভূতং, তথা তং অতীতং ¶ অনুস্সরতি. যথা চ ৰত্তমানং ভৰিস্সতি, তথা বুদ্ধাদীহি গয্হতি. যদি চ তং তথেৰ অত্থি, ৰত্তমানমেৰ তং সিযা. অথ নত্থি, সিদ্ধং ‘‘অসন্তং ঞাণস্স আরম্মণং হোতী’’তি. ৰিজ্জমানং ৰা হি চিত্তসঞ্ঞাতং অৰিজ্জমানং ৰা আরম্মণং এতেসং অত্থীতি আরম্মণা, চিত্তচেতসিকা, ন ৰিজ্জমানংযেৰ আরব্ভ পৰত্তনতো, তস্মা পচ্চুপ্পন্নমেৰ ধরমানসভাৰং ন অতীতানাগতন্তি ন তিট্ঠতি সব্বত্থিৰাদো. কেচি পন ‘‘ন অতীতাদীনং অত্থিতাপটিঞ্ঞায সব্বত্থিৰাদা, অথ খো আযতনসব্বস্স অত্থিতাপটিঞ্ঞাযা’’তি ৰদন্তি, তেসং মতেন সব্বেৰ সাসনিকা সব্বত্থিৰাদা সিযুন্তি.

পদসোধনকথাৰণ্ণনা নিট্ঠিতা.

সব্বমত্থীতিকথাৰণ্ণনা নিট্ঠিতা.

৬. অতীতক্খন্ধাদিকথা

১. নসুত্তসাধনকথাৰণ্ণনা

২৯৭. ‘‘অতীতং ¶ অনাগতং পচ্চুপ্পন্ন’’ন্তি অযং কালৰিভাগপরিচ্ছিন্নো ৰোহারো ধম্মানং তং তং অৰত্থাৰিসেসং উপাদায পঞ্ঞত্তো. ধম্মো হি সকিচ্চক্খণে পচ্চুপ্পন্নো, ততো পুব্বে অনাগতো, পচ্ছা অতীতোতি ৰুত্তোৰাযমত্থো. তত্থ যদিপি ধম্মা অনিচ্চতায অনৰট্ঠিতা, অৰত্থা পন তেসং যথাৰুত্তা ৰৰত্থিতাতি তদুপাদানা কালপঞ্ঞত্তিপি ৰৰত্থিতা এৰ. ন হি অতীতাদি অনাগতাদিভাৰেন ৰোহরীযতি, খন্ধাদিপঞ্ঞত্তি পন অনপেক্খিতকালৰিসেসা. তীসুপি হি কালেসু রূপক্খন্ধো রূপক্খন্ধোৰ, তথা সেসা খন্ধা আযতনধাতুযো চ. এৰমৰট্ঠিতে যস্মা পরৰাদী ‘‘অত্থী’’তি ইমং পচ্চুপ্পন্ননিযতং ৰোহারং অতীতানাগতেসুপি আরোপেতি, তস্মা সো অদ্ধসঙ্করং করোতি. পরমত্থতো অৰিজ্জমানে ৰিজ্জমানে কত্ৰা ৰোহরতীতি ততো ৰিৰেচেতুং ‘‘অতীতং খন্ধা’’তিআদিকা অযং কথা আরদ্ধা.

যস্মা পন রুপ্পনাদিসভাৰে অতীতাদিভেদভিন্নে ধম্মে একজ্ঝং গহেত্ৰা তত্থ রাসট্ঠং উপাদায খন্ধপঞ্ঞত্তি, চক্খুরূপাদীসু কারণাদিঅত্থং সুঞ্ঞতট্ঠঞ্চ উপাদায আযতনপঞ্ঞত্তি ধাতুপঞ্ঞত্তি ¶ চ, তস্মা সা অদ্ধত্তযসাধারণা, ন অতীতাদিপঞ্ঞত্তি ৰিয অদ্ধৰিসেসাধিট্ঠানাতি আহ ‘‘খন্ধাদিভাৰাৰিজহনতো অতীতানাগতান’’ন্তি. তে পনেতে অতীতাদিকে খন্ধাদিকে ৰিয সভাৰধম্মতো সঞ্জানন্তো পরৰাদী ‘‘অত্থী’’তি পটিজানাতীতি আহ ‘‘অতীতানাগতানং অত্থিতং ইচ্ছন্তস্সা’’তি. সেসমেত্থ যং ৰত্তব্বং, তং হেট্ঠা ৰুত্তনযমেৰ.

‘‘তযোমে, ভিক্খৰে, নিরুত্তিপথা’’তি সুত্তং নিরুত্তিপথসুত্তং. তত্থ হি পচ্চুপ্পন্নস্সেৰ অত্থিভাৰো ৰুত্তো, ন অতীতানাগতানং. তেন ৰুত্তং ‘‘অত্থিতায ৰারিতত্তা’’তি. যদি এৰং ‘‘অত্থি, ভিক্খৰে, নিব্বান’’ন্তি ইদং কথন্তি? তং সব্বদা উপলদ্ধিতো ৰুত্তং নিচ্চসভাৰঞাপনত্থং অসঙ্খতধম্মস্স, ইধ পন সঙ্খতধম্মানং খণত্তযসমঙ্গিতায অত্থিভাৰো ন ততো পুব্বে পচ্ছা চাতি পঞ্ঞাপনত্থং ‘‘যং, ভিক্খৰে, রূপং…পে… ন তস্স সঙ্খা ভৰিস্সতী’’তি ৰুত্তং. এতেন ‘‘অত্থী’’তি সমঞ্ঞায অনুপাদানতো অতীতং অনাগতং পরমত্থতো ¶ নত্থীতি দস্সিতং হোতি. ইমিনাৰূপাযেনাতি ‘‘খন্ধাদিভাৰাৰিজহনতো’’তি এৰং ৰুত্তেন হেতুনা. উপপত্তিসাধনযুত্তি হি ইধ ‘‘উপাযো’’তি ৰুত্তা.

নসুত্তসাধনকথাৰণ্ণনা নিট্ঠিতা.

২. সুত্তসাধনকথাৰণ্ণনা

২৯৮. এতে ধম্মাতি এতে খন্ধআযতনধাতুধম্মা. সুত্তাহরণন্তি নিরুত্তিপথসুত্তাহরণং. নেসন্তি অতীতানাগতানং.

সুত্তসাধনকথাৰণ্ণনা নিট্ঠিতা.

অতীতক্খন্ধাদিকথাৰণ্ণনা নিট্ঠিতা.

৭. একচ্চংঅত্থীতিকথা

১. অতীতাদিএকচ্চকথাৰণ্ণনা

২৯৯. যে ¶ কতূপচিতা কুসলাকুসলা ধম্মা ৰিপাকদানায অকতোকাসা, কতোকাসা চ যে ‘‘ওকাসকতুপ্পন্না’’তি ৰুচ্চন্তি. যে চ ৰিপ্পকতৰিপাকা, তে সব্বেপি ‘‘অৰিপক্কৰিপাকা’’তি ৰেদিতব্বা. তেসং ৰিপাকদানসামত্থিযং অনপগতন্তি অধিপ্পাযেন পরৰাদী অত্থিতং ইচ্ছতি. যে পন পরৰাদী সব্বেন সব্বং ৰিপক্কৰিপাকা কুসলাকুসলা ধম্মা, তেসং অপগতন্তি নত্থিতং ইচ্ছতি. তেনাহ ‘‘অত্থীতি একচ্চং অত্থি একচ্চং নত্থী’’তিআদি. এৰং ইচ্ছন্তস্স পন পরৰাদিনো যথা অৰিপাকেসুপি একচ্চং নত্থীতি আপজ্জতি, এৰং ৰিপক্কৰিপাকেসু অৰিপক্কৰিপাকেসু চ আপজ্জতেৰাতি দস্সেতুং ‘‘অৰিপক্কৰিপাকা ধম্মা একচ্চে’’তিআদিনা পাল়ি পৰত্তা. তেন ৰুত্তং ‘‘তিণ্ণং রাসীনং ৰসেনা’’তিআদি. ৰোহারৰসেনাতি ফলস্স অনুপরমৰোহারৰসেন, হেতুকিচ্চং পন অনুপরতং অনুপচ্ছিন্নং অত্থীতি লদ্ধিযং ঠিতত্তা চোদেতব্বোৰ. অৰিচ্ছেদৰসেন পৰত্তমানঞ্হি ফলস্স পবন্ধৰোহারং পরৰাদী ৰোহারতো অত্থীতি ইচ্ছতি, হেতু পনস্স কম্মং পরমত্থতো চ কম্মূপচযৰাদিভাৰতো পত্তিঅপ্পত্তিসভাৰতাদযো ¶ ৰিয চিত্তৰিপ্পযুত্তো কম্মূপচযো নাম একো সঙ্খারধম্মো অৰিপন্নো, সোপি তস্সেৰ ৰেৰচনন্তি পরৰাদী. যং সন্ধাযাহ –

‘‘নপ্পচযন্তি কম্মানি, অপি কপ্পসহস্সতো;

পত্ৰা পচ্চযসামগ্গিং, কালে পচ্চন্তি পাণিন’’ন্তি.

যঞ্চ সন্ধায পরতো পরিভোগমযপুঞ্ঞকথায ‘‘পরিভোগমযং পন চিত্তৰিপ্পযুত্তং উপ্পজ্জতীতি লদ্ধিযা পটিজানাতী’’তি ৰক্খতি.

একচ্চংঅত্থীতিকথাৰণ্ণনা নিট্ঠিতা.

৮. সতিপট্ঠানকথাৰণ্ণনা

৩০১. পরমত্থসতিপট্ঠানত্তাতি এতেন লোকুত্তরায এৰ সম্মাসতিযা তত্থাপি মগ্গভূতায নিপ্পরিযাযেন ¶ সতিপট্ঠানভাৰো নিয্যানিকত্তা ইতরায পরিযাযেনাতি দস্সেতি. মগ্গফলসম্মাসতিযা ধম্মানুস্সতিভাৰপরিযাযো অত্থীতি ‘‘লোকিযলোকুত্তরসতিপট্ঠানসমুদাযভূতস্সা’’তি ৰুত্তং. সতিসমুদাযভূতস্স ন সতিগোচরভূতস্সাতি অধিপ্পাযো. সতিগোচরস্স হি সতিপট্ঠানতং চোদেতুং পাল়িযং ‘‘চক্খাযতনং সতিপট্ঠান’’ন্তি আরদ্ধং. তেন ৰুত্তং ‘‘সব্বধম্মানং পভেদপুচ্ছাৰসেন ৰুত্ত’’ন্তি. সুত্তসাধনাযং পন পঠমং লোকিযসতিপট্ঠানৰসেন, দুতিযং মিস্সকৰসেন, ততিযং লোকুত্তরৰসেন দস্সিতন্তি ৰেদিতব্বং.

সতিপট্ঠানকথাৰণ্ণনা নিট্ঠিতা.

৯. হেৰত্থিকথাৰণ্ণনা

৩০৪. হেৰত্থিকথাযং ‘‘সব্বো ধম্মো সকভাৰেন অত্থি পরভাৰেন নত্থী’’তি পৰত্তো পরৰাদীৰাদো যথা ৰিভজ্জ পটিপুচ্ছা ৰা ন ব্যাকাতব্বো, এৰং একংসতো ন ব্যাকাতব্বো ৰিসেসাভাৰতো, কেৰলং ঠপনীযপক্খে তিট্ঠতীতি অধিপ্পাযেনাহ ‘‘অৰত্তব্বুত্তরেনা’’তি. যথা হি সব্বে ¶ ৰাদা সপ্পটিৰাদাৰাতি পটিঞ্ঞা ভূতকথনত্তা অৰত্তব্বুত্তরা উপেক্খিতব্বা, এৰমযম্পীতি ৰেদিতব্বং. তেনাহ ‘‘উপেক্খিতব্বেনা’’তি. অথ ৰা অৰত্তব্বং উত্তরং অৰত্তব্বুত্তরং. যথা অনিচ্চৰাদিনং পতি অনিচ্চো সদ্দো পচ্চযাধীনৰুত্তিতোতি, উত্তরং ন ৰত্তব্বং সিদ্ধসাধনভাৰতো, এৰং ইধাপি দট্ঠব্বং. সিদ্ধসাধনঞ্হি দড্ঢস্স ডহনসদিসত্তা নিরত্থকমেৰ সিযা, অট্ঠকথাযং পন যস্মা পরৰাদিনা যেন সভাৰেন যো ধম্মো অত্থি, তেনেৰ সভাৰেন সো ৰিনা কালভেদাদিপরামসনেন নত্থীতি পতিট্ঠাপীযতি, তস্মা ‘‘অযোনিসো পতিট্ঠাপিতত্তা’’তি ৰুত্তং.

এত্থ চ ‘‘হেৰত্থি, হেৰং নত্থী’’তি পটিজানন্তেন পরৰাদিনা যথা সপরভাৰেহি রূপাদীনং অত্থিতা পটিঞ্ঞাতা, এৰং কালদেসাদিভেদেহিপি সা পটিঞ্ঞাতা এৰ. তেনেৰাহ ‘‘অতীতং অনাগতপচ্চুপ্পন্নৰসেন, অনাগতপচ্চুপ্পন্নানি ৰা অতীতাদিৰসেন নত্থী’’তি. এৰং সতি নিগণ্ঠাচেলকৰাদো পরিদীপিতো সিযা. তে হি ‘‘সিযা অত্থি, সিযা নত্থি, সিযা অত্থি চ ¶ নত্থি চা’’তিআদিনা সব্বপদত্থেসু পত্তভাগে পটিজানন্তি. তত্থ যদি ৰত্থুনো সভাৰেনেৰ, দেসকালসন্তানৰসেন ৰা নত্থিতা অধিপ্পেতা, তং সিদ্ধসাধনং সকৰাদিনোপি ইচ্ছিতত্তা. যস্স হি ধম্মস্স যো সভাৰো, ন সো ততো অঞ্ঞথা উপলব্ভতি. যদি উপলব্ভেয্য, অঞ্ঞো এৰ সো সিযা. ন চেত্থ সামঞ্ঞলক্খণং নিদস্সেতব্বং সলক্খণস্স অধিপ্পেতত্তা তস্স নত্থিভাৰস্স অভাৰতো. যথা চ পরভাৰেন নত্থিতায ন ৰিৰাদো, এৰং দেসকালন্তরেসুপি ইত্তরকালত্তা সঙ্খারানং. ন হি সঙ্খারা দেসন্তরং, কালন্তরং ৰা সঙ্কমন্তি খণিকভাৰতো. এতেনেৰ পরিযাযন্তরেন নত্থিতাপি পটিক্খিত্তা ৰেদিতব্বা. যথা চ অত্থিতা, নত্থিতা ৰিনা কালভেদেন একস্মিং ধম্মে পতিট্ঠং ন লভন্তি অঞ্ঞমঞ্ঞৰিরুদ্ধত্তা, এৰং সব্বদাপি নিচ্চত্তা.

যং পন তে ৰদন্তি ‘‘যথা সুৰণ্ণং কটকাদিরূপেন ঠিতং রুচকাদিভাৰং আপজ্জতীতি নিচ্চানিচ্চং. তঞ্হি সুৰণ্ণভাৰাৰিজহনতো নিচ্চং কটকাদিভাৰহানিতো অনিচ্চং, এৰং সব্বধম্মা’’তি. তে ইদং ৰত্তব্বা ‘‘কিং কটকভাৰো কটকস্স, উদাহু সুৰণ্ণস্সা’’তি. যদি কটকস্স, সুৰণ্ণনিরপেক্খো সিযা তদঞ্ঞভাৰো ৰিয. অথ সুৰণ্ণস্স, নিচ্চকালং তত্থ উপলব্ভেয্য সুৰণ্ণভাৰো ৰিয. ন চ সক্কা উভিন্নং একভাৰোতি ৰত্তুং কটকৰিনাসেপি সুৰণ্ণাৰিনাসতো. অথ মতং, সুৰণ্ণকটকাদীনং পরিযাযীপরিযাযভাৰতো ¶ নাযং দোসোতি. যথা হি কটকপরিযাযনিরোধেন রুচকপরিযাযুপ্পাদেপি পরিযাযী তথেৰ তিট্ঠতি, এৰং মনুস্সপরিযাযনিরোধে দেৰপরিযাযুপ্পাদেপি পরিযাযী জীৰদ্রব্যং তিট্ঠতীতি নিচ্চানিচ্চং, তথা সব্বদ্রব্যানীতি. তযিদং অম্বং পুট্ঠস্স লবুজব্যাকরণং. যং স্ৰেৰ নিচ্চো অনিচ্চোতি ৰা ৰদন্তো অঞ্ঞত্থ নিচ্চতং অঞ্ঞত্থ অনিচ্চতং পটিজানাতি, অথ পরিযাযপরিযাযীনং অনঞ্ঞতা ইচ্ছিতা, এৰং সতি পরিযাযোপি নিচ্চো সিযা পরিযাযিনো অনঞ্ঞত্তা পরিযাযসরূপং ৰিয, পরিযাযী ৰা অনিচ্চো পরিযাযতো অনঞ্ঞত্তা পরিযাযসরূপং ৰিযাতি. অথ নেসং অঞ্ঞা অনঞ্ঞতা, এৰঞ্চ সতি ৰুত্তদোসদ্ৰযানতিৰত্তি. অপিচ কোযং পরিযাযো নাম, যদি সণ্ঠানং, সুৰণ্ণো তাৰ হোতু, কথং জীৰদ্রব্যে অরূপিভাৰতো. যদি তস্সপি সণ্ঠানৰন্তং ইচ্ছিতং, তথা সতিস্স একস্মিম্পি সত্তসন্তানে বহুতা আপজ্জতি সরূপতা চ সণ্ঠানৰন্তেসুপি পীল়কাদীসু তথাদস্সনতো. অথ পৰত্তিৰিসেসো, এৰম্পি বহুতা খণিকতা চ আপজ্জতি, তস্মা পরিযাযসরূপমেৰ তাৰ পতিট্ঠপেতব্বং.

যং পন ৰুত্তং ‘‘সুৰণ্ণং কটকাদিরূপেন ঠিত’’ন্তি, তত্থ সম্পত্তিযোগতো ৰিঞ্ঞাযমানেসু ৰিসিট্ঠেসু ¶ রূপগন্ধরসফোট্ঠব্বেসু কিং একং, উদাহু তেসং সমুদাযো, তব্বিনিমুত্তং ৰা ধম্মন্তরং সুৰণ্ণন্তি? তত্থ ন তাৰ রূপাদীসু একেকং সুৰণ্ণং তেন সুৰণ্ণকিচ্চাসিদ্ধিতো, নাপি তব্বিনিমুত্তং ধম্মন্তরং তাদিসস্স অভাৰতো. অথ সমুদাযো, তং পন পঞ্ঞত্তিমত্তন্তি ন তস্স নিচ্চতা, নাপি অনিচ্চতা সম্ভৰতি. যথা চ সুৰণ্ণস্স, এৰং কটকস্সপি পঞ্ঞত্তিমত্তত্তাতি. তযিদং নিদস্সনং পরৰাদিনো জীৰদ্রব্যস্সপি পঞ্ঞত্তিমত্তং তস্সেৰ সাধেতীতি কুতো তস্স নিচ্চানিচ্চতাতি অলমতিপ্পপঞ্চেন.

হেৰত্থিকথাৰণ্ণনা নিট্ঠিতা.

মহাৰগ্গৰণ্ণনা নিট্ঠিতা.

২. দুতিযৰগ্গো

১. পরূপহারৰণ্ণনা

৩০৭. ৰিক্খম্ভিতরাগাৰ অৰিক্খম্ভিতরাগানং অধিমানিকতায অসম্ভৰতোতি যাৰ অধিমানিকং, তাৰ সম্পজানা নিদ্দং ওক্কমন্তীতি অধিপ্পাযো. ‘‘অধিমানিকান’’ন্তি ¶ ইদং ভূতপুব্বগতিযা ৰুত্তন্তি আহ ‘‘অধিমানিকপুব্বা অধিপ্পেতা সিযু’’ন্তি.

৩০৮. যং ৰিমতিগাহকারণং ৰুচ্চমানং, তং ‘‘হন্দ হী’’তি পরং জোতেতীতি অধিপ্পাযেনাহ ‘‘কারণত্থেতি যুত্ত’’ন্তি. ৰিমতিগাহস্স পন নিচ্ছিততং ‘‘হন্দ হী’’তি পরং জোতেতীতি ৰুত্তং ‘‘ৰচসাযত্থে’’তি.

পরূপহারৰণ্ণনা নিট্ঠিতা.

৫. ৰচীভেদকথাৰণ্ণনা

৩২৬. সোতি ¶ পঠমমগ্গট্ঠো. তস্মাতি যস্মা ‘‘ৰিরজং ৰীতমলং ধম্মচক্খুং উদপাদি ‘যং কিঞ্চি সমুদযধম্মং, সব্বং তং নিরোধধম্ম’’’ন্তি সুত্তস্স অত্থং অঞ্ঞথা গহেত্ৰা উদযব্বযানুপস্সনানিস্সন্দেন মগ্গক্খণেপি দুক্খন্তি ৰিপস্সনা উপট্ঠাতি, তস্মা ‘‘সো দুক্খমিচ্চেৰ ৰাচং ভাসতী’’তি ৰদন্তি.

৩২৮. ইচ্ছিতেতি পরৰাদিনা সম্পটিচ্ছিতে. আরোপিতেতি যুত্তিনিদ্ধারণেন তস্মিং অত্থে পতিট্ঠাপিতে যুজ্জতি, ৰচীসমুট্ঠাপনক্খণতো পন পচ্ছা তং সদ্দং সুণাতীতি ইচ্ছিতে ন যুজ্জতি সোতৰিঞ্ঞাণস্স পচ্চুপ্পন্নারম্মণত্তাতি অধিপ্পাযো. যস্মা পন অত্তনা নিচ্ছারিতং সদ্দং অত্তনাপি সুণাতি, তস্মা সোতৰিঞ্ঞাণং ‘‘যেন তং সদ্দং সুণাতী’’তি অট্ঠকথাযং ৰুত্তন্তি দট্ঠব্বং.

৩৩২. লোকুত্তরমগ্গক্খণেতি পঠমজ্ঝানিকস্স পঠমমগ্গস্স খণে. অভিভূসুত্তাহরণে অধিপ্পাযো ৰত্তব্বোতি এতেন তদাহরণস্স অসম্বন্ধতং দস্সেতি. তেনাহ ‘‘তস্মা অসাধক’’ন্তি.

ৰচীভেদকথাৰণ্ণনা নিট্ঠিতা.

৭. চিত্তট্ঠিতিকথাৰণ্ণনা

৩৩৫. এৰন্তি ‘‘একচিত্তং যাৰতাযুকং তিট্ঠতী’’তি ৰুত্তাকারেন. অঞ্ঞত্থাতি অরূপভৰতো অঞ্ঞস্মিং. এতেনাতি ‘‘একমেৰ চিত্তং আরুপ্পে তিট্ঠতি ¶ , যাৰতাযুকং তিট্ঠতী’’তি এৰংৰাদিনা দুতিযাপি অড্ঢকথা পস্সিতব্বা পঠমকথায চিরকালাৰট্ঠানৰচনস্স অঞ্ঞদত্থু ভাৰৰিভাৰনতোতি অধিপ্পাযো. পুরিমাযাতি ‘‘যাৰতাযুকং তিট্ঠতী’’তি পঞ্হতো পুরিমায. তত্থ হি ‘‘ৰস্সসতং তিট্ঠতী’’তি পুচ্ছায ‘‘আমন্তা’’তি অনুঞ্ঞা কতা, পচ্ছিমাযং পন ‘‘মনুস্সানং একং চিত্তং যাৰতাযুকং তিট্ঠতী’’তি ‘‘ন হেৰং ৰত্তব্বে’’তি পটিক্খেপো কতো. অৰিরোধো ৰিভাৰেতব্বো, যতো তত্থেৰ অনুঞ্ঞা কতা, ন পচ্ছাতি অধিপ্পাযো ¶ . ৰস্সসতাদীতি চ আদি-সদ্দেন ন কেৰলং ‘‘দ্ৰে ৰস্সসতানী’’তি এৰমাদিযেৰ সঙ্গহিতং, অথ খো ‘‘একং চিত্তং দিৰসং তিট্ঠতী’’তি এৰমাদিপীতি দট্ঠব্বং. ‘‘মুহুত্তং মুহুত্তং উপ্পজ্জতীতি পঞ্হো সকৰাদিনা পুচ্ছিতো ৰিয ৰুত্তো’’তি ইদং ৰিচারেতব্বং. ‘‘মুহুত্তং মুহুত্তং উপ্পজ্জতী’’তি পঞ্হো পরৰাদিস্স. ‘‘উপ্পাদৰযধম্মিনো’’তিআদিসুত্তত্থৰসেন পটিঞ্ঞা সকৰাদিস্সাতি হি ৰুত্তং.

চিত্তট্ঠিতিকথাৰণ্ণনা নিট্ঠিতা.

৯. অনুপুব্বাভিসমযকথাৰণ্ণনা

৩৩৯. ‘‘তানি ৰা চত্তারিপি ঞাণানি একো সোতাপত্তিমগ্গোযেৰাতি পটিজানাতী’’তি ইমং সন্ধাযাহ ‘‘অথ ৰা’’তিআদি. চতুন্নং ঞাণানন্তি দুক্খেঞাণাদীনং চতুন্নং ঞাণানং. একমগ্গভাৰতোতি সোতাপত্তিআদিএকমগ্গভাৰতো. কমেন পৰত্তমানানিপি হি তানি ঞাণানি তংতংমগ্গকিচ্চস্স সাধনতো একোযেৰ মগ্গো হোতীতি অধিপ্পাযো. তেনাহ ‘‘একমগ্গস্স…পে… পটিজানাতী’’তি.

৩৪৪. দস্সনেতি মগ্গদস্সনে.

৩৪৫. ধম্মত্থানং হেতুফলভাৰতো ধম্মত্থপটিসম্ভিদানং সিযা সোতাপত্তিফলহেতুতা, তদভাৰতো ন ইতরপটিসম্ভিদানন্তি আহ ‘‘নিরুত্তি…পে… ৰিচারেতব্ব’’ন্তি. সব্বাসম্পি পন পটিসম্ভিদানং পঠমফলসচ্ছিকিরিযাহেতুতা ৰিচারেতব্বা মগ্গাধিগমেনেৰ লদ্ধব্বত্তা ফলানং ৰিয, তস্মা ‘‘অট্ঠহি ঞাণেহী’’তি এত্থ নিক্খেপকণ্ডে আগতনযেন দুক্খাদিঞাণানং পুব্বন্তাদিঞাণানঞ্চ ৰসেন ‘‘অট্ঠহি ঞাণেহী’’তি যুত্তং ৰিয দিস্সতি.

অনুপুব্বাভিসমযকথাৰণ্ণনা নিট্ঠিতা.

১০. ৰোহারকথাৰণ্ণনা

৩৪৭. ৰিসযৰিসযীসূতি ¶ ¶ রূপচক্খাদিকে সন্ধাযাহ. তে হি রূপক্খন্ধপরিযাপন্নত্তা একন্তেন লোকিযা. ৰিসযস্সেৰাতি সদ্দস্সেৰ. সো হি ৰোহরিতব্বতো ৰোহারকরণতায চ ‘‘ৰোহারো’’তি পাল়িযং ৰুত্তো. নত্থেত্থ কারণং ৰিসযীনং ৰিসযস্সপি আসৰাদিঅনারম্মণতাভাৰতো. অসিদ্ধলোকুত্তরভাৰস্স একন্তসাসৰত্তা তস্স সদ্দাযতনস্স যথা লোকুত্তরতা তৰ মতেনাতি অধিপ্পাযো.

পটিহঞ্ঞেয্যাতি ইদং পরিকপ্পৰচনং. পরিকপ্পৰচনঞ্চ অযাথাৰন্তি আহ ‘‘ন হি…পে… অত্থী’’তি. ন হি জলং অনলন্তি পরিকপ্পিতং দহতি পচতি ৰা. কিং লোকিযেন ঞাণেন জানিতব্বতো লোকিযো রূপাযতনাদি ৰিয, উদাহু লোকুত্তরো পচ্চৰেক্খিযমানমগ্গাদি ৰিযাতি এৰমেত্থ হেতুস্স অনেকন্তভাৰো ৰেদিতব্বো. তেনাহ ‘‘লোকিযে লোকুত্তরে চ সম্ভৰতো’’তি.

ৰোহারকথাৰণ্ণনা নিট্ঠিতা.

১১. নিরোধকথাৰণ্ণনা

৩৫৩. যেসং দ্ৰিন্নন্তি যেসং দ্ৰিন্নং দুক্খসচ্চানং. দ্ৰীহি নিরোধেহীতি অপ্পটিসঙ্খাপটিসঙ্খাসঙ্খাতেহি দ্ৰীহি নিরোধেহি. তত্থ দুক্খাদীনং পটিসঙ্খাতি পটিসঙ্খা, পঞ্ঞাৰিসেসো. তেন ৰত্তব্বো নিরোধো পটিসঙ্খানিরোধো. যো সাসৰেহি ধম্মেহি ৰিসংযোগোতি ৰুচ্চতি, যো পচ্চযৰেকল্লেন ধম্মানং উপ্পাদস্স অচ্চন্তৰিবন্ধভূতো নিরোধো, সো পটিসঙ্খায নৰত্তব্বতো অপ্পটিসঙ্খানিরোধো নামাতি পরৰাদিনো লদ্ধি. পটিসঙ্খায ৰিনা নিরুদ্ধাতি পচ্চযৰেকল্লেন অনুপ্পত্তিং সন্ধায ৰুত্তং. তেনাহ ‘‘ন উপ্পজ্জিত্ৰা ভঙ্গা’’তি. অনুপ্পাদোপি হি নিরোধোতি ৰুচ্চতি যতো ‘‘ইমস্সুপ্পাদা ইদং উপ্পজ্জতী’’তি লক্খণুদ্দেসস্স পটিলোমে ‘‘ইমস্স ¶ নিরোধা ইদং নিরুজ্ঝতী’’তি দস্সিতো. তেনাতি পটিসঙ্খায নিরোধস্স খণিকনিরোধস্স চ ইধ নাধিপ্পেতত্তা.

নিরোধকথাৰণ্ণনা নিট্ঠিতা.

দুতিযৰগ্গৰণ্ণনা নিট্ঠিতা.

৩. ততিযৰগ্গো

১. বলকথাৰণ্ণনা

৩৫৪. নিদ্দেসতোতি ¶ ‘‘অট্ঠানমেতং অনৰকাসো’’তিআদিনা নিদ্দিট্ঠপ্পকারতো. সো পন যস্মা ৰিত্থারো হোতি, তস্মা ৰুত্তং ‘‘ৰিত্থারতো’’তি. সব্বং কিলেসাৰরণাদিং, তমেৰ পচ্চেকং পৰত্তিআকারভেদতো সব্বাকারং. ‘‘সব্ব’’ন্তি হি ইদং সরূপতো গহণং, ‘‘সব্বাকারতো’’তি পৰত্তিআকারভেদতো. ভগৰা হি ধম্মে জানন্তো তেসং আকারভেদে অনৰসেসেত্ৰাৰ জানাতি. যথাহ ‘‘সব্বে ধম্মা সব্বাকারতো বুদ্ধস্স ভগৰতো ঞাণমুখে আপাথং আগচ্ছন্তী’’তি (মহানি. ১৫৬; চূল়নি. মোঘরাজমাণৰপুচ্ছানিদ্দেস ৮৫; পটি. ম. ৩.৫). উদ্দেসতোতি একদেসতো. একদেসো চ ৰিত্থারো ন হোতীতি আহ ‘‘সঙ্খেপতো’’তি. যথা জানন্তীতি সম্বন্ধো. উদ্দেসমত্তেনপীতি দিট্ঠিগতযথাভূতঞাণাদিপ্পভেদানং আসযাদীনং উদ্দেসমত্তেনপি. তেনাহ ‘‘ইন্দ্রিযানং তিক্খমুদুভাৰজাননমত্তং সন্ধাযা’’তি. থেরেনাতি অনুরুদ্ধত্থেরেন. এৰমেৰাতি উদ্দেসতো ঠানাদিমত্তজাননাকারেনেৰ. স্ৰাযমত্থো সকৰাদিনাপি ইচ্ছিতোযেৰাতি আহ ‘‘কথমযং চোদেতব্বো সিযা’’তি.

৩৫৬. সেসেসূতি ইন্দ্রিযপরোপরিযত্তঞাণতো সেসেসু. পটিক্খেপোতি অসাধারণতাপটিক্খেপো. ননু চ সেসানং অসাধারণতাপি অত্থীতি চোদনং সন্ধাযাহ ‘‘ঠানা…পে… অধিপ্পাযো’’তি.

বলকথাৰণ্ণনা নিট্ঠিতা.

২. অরিযন্তিকথাৰণ্ণনা

৩৫৭. সঙ্খারে ¶ সন্ধায পটিজানন্তস্সাতি দিট্ঠিযা পরিকপ্পিতেন সত্তেন সুঞ্ঞে সঙ্খারে সন্ধায ‘‘সুঞ্ঞতঞ্চ মনসি করোতী’’তি পুচ্ছায ‘‘আমন্তা’’তি পটিজানন্তস্স. দ্ৰিন্নং ফস্সানং সমোধানং কথং আপজ্জতি ঠানাঠানভূতে সঙ্খারে ৰুত্তনযেন সুঞ্ঞতং মনসি করোন্তস্সাতি অধিপ্পাযো. যথাৰুত্তনযেনাতি ‘‘দিট্ঠিযা পরিকপ্পিতেন সত্তেন সুঞ্ঞা ¶ পঞ্চক্খন্ধা’’তি পকারেন নযেন. অথ ৰা যথাৰুত্তনযেনাতি ‘‘ঠানাঠানমনসিকারো সঙ্খারারম্মণো, সুঞ্ঞতামনসিকারো নিব্বানারম্মণো’’তি এৰং ৰুত্তনযেন. ‘‘সঙ্খারে সন্ধায পটিজানন্তস্সা’’তি ৰুত্তত্তা ‘‘দ্ৰিন্নং ফস্সানং সমোধানং কথং আপজ্জতী’’তি আহ. সত্তসুঞ্ঞতায সুঞ্ঞত্তেপি সঙ্খারানং অঞ্ঞোৰ ঠানাঠানমনসিকারো, অঞ্ঞো সুঞ্ঞতামনসিকারোতি যুজ্জতেৰ দ্ৰিন্নং ফস্সানং সমোধানাপত্তিচোদনা, সঙ্খারে সন্ধায পটিজানন্তস্স পন কথং অরিযভাৰসিদ্ধি ঠানাঠানঞাণাদীনন্তি ৰিচারেতব্বং. কিং ৰা এতায যুত্তিচিন্তায. উম্মত্তকপচ্ছিসদিসো হি পরৰাদিৰাদো. অঞ্ঞেসুপি ঠানেসু ঈদিসেসু এসেৰ নযো. আরোপেত্ৰাতি ইত্থিপুরিসাদিআকারং, সত্তাকারমেৰ ৰা অসন্তং রূপাদিউপাদানে আরোপেত্ৰা. অভূতারোপনঞ্হেত্থ পণিদহনন্তি অধিপ্পেতং. তেনাহ ‘‘পরিকপ্পনৰসেনা’’তি. সোতি যথাৰুত্তো পণিধি. একস্মিম্পি খন্ধে.

অরিযন্তিকথাৰণ্ণনা নিট্ঠিতা.

৪. ৰিমুচ্চমানকথাৰণ্ণনা

৩৬৬. মগ্গক্খণে চিত্তং একদেসেন ৰিমুত্তং একদেসেন অৰিমুত্তন্তি অযং ‘‘ৰিমুত্তং ৰিমুচ্চমান’’ন্তি লদ্ধিযা দোসো. তথা হি ৰুত্তং ‘‘একদেসং ৰিমুত্তং, একদেসং অৰিমুত্ত’’ন্তি. অট্ঠকথাযঞ্চ ‘‘তঞ্হি তদা সমুচ্ছেদৰিমুত্তিযা ৰিমুত্তেকদেসেন ৰিমুচ্চমানন্তিস্স লদ্ধী’’তি দস্সিতোৰাযমত্থো. ৰিপ্পকতনিদ্দেসেতি ৰিমুচ্চনকিরিযায অপরিযোসিততানিদ্দেসে. যং সন্ধাযাহ ‘‘ৰিমুত্তং ৰিমুচ্চমানন্তি ৰিপ্পকতভাৰেন ৰুত্তত্তা’’তি. তেনাতি পরৰাদিনা. ৰিমুচ্চ…পে… ৰুত্তং ৰিমুচ্চমানস্স ৰিমুত্তভাৰাভাৰতো, ৰিমুত্তভেদেন পন তথা ৰুত্তন্তি অধিপ্পাযো. সতি চ ¶ দোসে ৰিপ্পকতনিদ্দেসেতি আনেত্ৰা যোজেতব্বং. একদেসো ৰিসেসনং হোতি নিপ্পদেসৰিমুত্তিযা অৰিচ্ছিন্নতো. ফলচিত্তেনাতি পঠমফলচিত্তেন উপ্পন্নেন.

ৰিমুচ্চমানকথাৰণ্ণনা নিট্ঠিতা.

৫. অট্ঠমককথাৰণ্ণনা

৩৬৮. পহীনা ¶ নাম ভৰেয্যুং, ন পহিয্যমানাতি অধিপ্পাযো.

অট্ঠমককথাৰণ্ণনা নিট্ঠিতা.

৬. অট্ঠমকস্স ইন্দ্রিযকথাৰণ্ণনা

৩৭১. লোকুত্তরানংযেৰ সদ্ধাদীনং ইন্দ্রিযভাৰো, ন লোকিযানন্তি পরৰাদিনো অধিপ্পাযৰসেনাহ ‘‘অপ্পটিলদ্ধিন্দ্রিযত্তা’’তিআদি. তত্থ নিয্যানিকানি ভাৰেন্তোতি যথা নিয্যানিকা হোন্তি, এৰং উপ্পাদেন্তো ব্রূহেন্তো ৰা. ইন্দ্রিযভাৰং পন পত্তেসু তেসু পুন ভাৰনাকিচ্চং নত্থীতি তস্স অধিপ্পাযোতি দস্সেন্তো আহ ‘‘ন পন ইন্দ্রিযানি ভাৰেন্তো’’তি.

অট্ঠমকস্স ইন্দ্রিযকথাৰণ্ণনা নিট্ঠিতা.

৭. দিব্বচক্খুকথাৰণ্ণনা

৩৭৩. ৰিসিনোতি ৰিসেসেন বন্ধতি ৰিসযীনং অত্তপটিবন্ধং করোতীতি ৰিসযো, আরম্মণং ¶ , অনুভৰতি এতেনাতি আনুভাৰো, সামত্থিযং, বলন্তি অত্থো, গোচরকরণং গোচরো, ৰিসযে আনুভাৰগোচরা ৰিসয…পে… চরাতি. তেহি যথা ৰিসিট্ঠং ৰিসেসং হোতি, তথা পচ্চযভূতেন ঝানধম্মেন আহিতবলং কতবলাধানং. ৰিসযগ্গহণঞ্চেত্থ আনুভাৰগোচরকরণানং পৰত্তিট্ঠানদস্সনং যত্থস্স তেহি উপত্থদ্ধত্তা বলাধানং পাকটং হোতি. তেনাহ ‘‘যাদিসে ৰিসযে’’তিআদি. বলাধানঞ্চ উত্তরিমনুস্সধম্মতো মহগ্গতধম্মৰিসেসতো উপ্পন্নেহি পণীতেহি চিত্তজরূপেহি ৰিসেসাপত্তি. যং নিস্সায পরাৰুত্তীতি একে ৰদন্তি. পুরিমং মংসচক্খুমত্তমেৰাতি যথাৰুত্তবলাধানতো পুরিমং মংসচক্খুমত্তমেৰ. ৰদন্তো সঙ্গহকারো. ৰিসযগ্গহণং পাল়িযং কতং. ন ৰিসযৰিসেসদস্সনত্থন্তি ন ৰিসযস্স ৰিসেসদস্সনত্থং. যতো উভিন্নম্পি রূপাযতনমেৰ ৰিসযোতি ৰিসযস্স সদিসতং অৰিসেসং আহ, সদিসস্স ৰা ৰিসেসং দীপেতীতি যোজনা.

ধম্মুপত্থদ্ধ ¶ …পে… অধিপ্পাযো, অঞ্ঞথা লদ্ধিযেৰ ন সিযাতি ভাৰো. মগ্গোতি উপাযো, কারণন্তি অত্থো. পকতিচক্খুমতো এৰ হি দিব্বচক্খু উপ্পজ্জতি. কস্মা? কসিণালোকং ৰড্ঢেত্ৰা দিব্বচক্খুঞাণস্স উপ্পাদনং, সো চ কসিণমণ্ডলে উগ্গহনিমিত্তেন ৰিনা নত্থি, তস্মা ৰুত্তং ‘‘মংসচক্খুপচ্চযতাদস্সনত্থমেৰ ৰুত্ত’’ন্তি. তেনাতি ‘‘মগ্গো’’তি ৰচনেন. রূপাৰচরজ্ঝানপচ্চযেনাতি রূপাৰচরজ্ঝানেন পচ্চযভূতেন উপ্পন্নানি রূপাৰচরজ্ঝানচিত্তসমুট্ঠিতানি. ঝানকম্মসমুট্ঠিতেসু ৰত্তব্বমেৰ নত্থি. তস্স হেসা লদ্ধি.

৩৭৪. যেন দিব্বচক্খুনো পঞ্ঞাচক্খুভাৰস্স ইচ্ছনেন পটিজাননেন. তীণি চক্খূনি মংসদিব্বপঞ্ঞাচক্খূনি চক্খুন্তরভাৰং ৰদতো ভৰেয্যুং, তস্মা তং ন ইচ্ছতীতি অত্থো.

দিব্বচক্খুকথাৰণ্ণনা নিট্ঠিতা.

৯. যথাকম্মূপগতঞাণকথাৰণ্ণনা

৩৭৭. দিব্বচক্খুপাদকত্তা ‘‘যথাকম্মূপগতঞাণস্স উপনিস্সযে দিব্বচক্খুম্হী’’তি ৰুত্তং, ন যথাকম্মূপগতজাননকিচ্চকে দিব্বচক্খুম্হি তস্স তংকিচ্চকতাভাৰতো. যতো যং অনঞ্ঞং, তম্পি ¶ ততো অনঞ্ঞমেৰাতি আহ ‘‘ইমিনা…পে… ভৰিতব্ব’’ন্তি. তত্থ অত্থন্তরভাৰং নিৰারেতীতি দিব্বচক্খুঞাণস্স পক্খিকত্তা যথাকম্মূপগতঞাণস্স ততো অত্থন্তরভাৰং নিৰারেতি. তস্স হি তং পরিভণ্ডঞাণং. দিব্বচক্খুস্স যথাকম্মূপগতঞাণতো অত্থন্তরভাৰং ন নিৰারেতি অতপ্পক্খিকত্তাতি অধিপ্পাযো. দিব্বচক্খুস্স যথাকম্মূপগতঞাণকিচ্চতা পরৰাদিনা ইচ্ছিতা, ন যথাকম্মূপগতঞাণস্স দিব্বচক্খুকিচ্চতাতি তমত্থং ‘‘যথাকম্মূপগতঞাণমেৰ দিব্বচক্খু’’ন্তি এত্থ যোজেত্ৰা দস্সেন্তো ‘‘এৰ-সদ্দো চা’’তিআদিমাহ.

যথাকম্মূপগতঞাণকথাৰণ্ণনা নিট্ঠিতা.

১০. সংৰরকথাৰণ্ণনা

৩৭৯. আটানাটিযসুত্তে ¶ ‘‘সন্তি, ভিক্খৰে, যক্খা যেভুয্যেন পাণাতিপাতা অপ্পটিৰিরতা’’তি (দী. নি. ৩.২৭৬, ২৮৬) আগতত্তা চাতুমহারাজিকানং সংৰরাসংৰরসব্ভাৰো অৰিৰাদসিদ্ধো. যত্থ পন ৰিৰাদো, তমেৰ দস্সেন্তেন তাৰতিংসাদযো গহিতাতি ইমমত্থং দস্সেতুং ‘‘চাতুমহারাজিকান’’ন্তি ৰুত্তং. এৰং সতীতি যদি তাৰতিংসেসু সংৰরাসংৰরো নত্থি, এৰং সন্তে. সুরাপানন্তি এত্থাপি ‘‘সুয্যতী’’তি পদং আনেত্ৰা সম্বন্ধিতব্বং. কথং সুয্যতীতি? ৰুত্তঞ্হেতং কুম্ভজাতকে –

‘‘যং ৰে পিৰিত্ৰা পুব্বদেৰা পমত্তা,

তিদিৰা চুতা সস্সতিযা সমাযা;

তং তাদিসং মজ্জমিমং নিরত্থং,

জানং মহারাজ কথং পিৰেয্যা’’তি. (জা. ১.১৬.৫৮);

তত্থ পুব্বদেৰা নাম অসুরা. তে হি তাৰতিংসানং উপ্পত্তিতো পুব্বদেৰাতি পঞ্ঞাযিংসু. পমত্তাতি সুরাপানেন পমাদং আপন্না. তিদিৰাতি মনুস্সচাতুমহারাজিকলোকে উপাদায ততিযলোকভূতা দেৰট্ঠানা, নামমেৰ ৰা এতং তস্স দেৰট্ঠানস্স. সস্সতিযাতি কেৰলং দীঘাযুকতং ¶ সন্ধায ৰদতি. সমাযা সহ অত্তনো অসুরমাযায, অসুরমন্তেহি সদ্ধিং চুতাতি অত্থো. অট্ঠকথাযঞ্চ ৰুত্তং ‘‘আগন্তুকদেৰপুত্তা আগতাতি নেৰাসিকা গন্ধপানং সজ্জযিংসু. সক্কো সকপরিসায সঞ্ঞমদাসী’’তি. তেনাহ ‘‘তেসং সুরাপানং অসংৰরো ন হোতীতি ৰত্তব্বং হোতী’’তি. এত্থ চ তাৰতিংসানং পাতুভাৰতো পট্ঠায সুরাপানম্পি তত্থ নাহোসি, পগেৰ পাণাতিপাতাদযোতি ৰিরমিতব্বাভাৰতো এৰ তাৰতিংসতো পট্ঠায উপরি দেৰলোকেসু সমাদানসম্পত্তৰিরতিৰসেন পুরেতব্বা সংৰরা ন সন্তি, লোকুত্তরা পন সন্তিযেৰ. তথা তেহি পহাতব্বা অসংৰরা. ন হি অপ্পহীনানুসযানং মগ্গৰজ্ঝা কিলেসা ন সন্তীতি.

সংৰরকথাৰণ্ণনা নিট্ঠিতা.

ততিযৰগ্গৰণ্ণনা নিট্ঠিতা.

৪. চতুত্থৰগ্গো

১. গিহিস্স অরহাতিকথাৰণ্ণনা

৩৮৭. গিহিছন্দরাগসম্পযুত্ততাযাতি ¶ গিহিভাৰে কামভোগিভাৰে ছন্দরাগসহিততায.

গিহিস্স অরহাতিকথাৰণ্ণনা নিট্ঠিতা.

৪. সমন্নাগতকথাৰণ্ণনা

৩৯৩. পত্তিন্তি অধিগমো. অধিগমো নাম সমন্নাগমো হোতীতি পাল়িযং চতূহি ফস্সাদীহি সমন্নাগমো চোদিতোতি দট্ঠব্বং.

সমন্নাগতকথাৰণ্ণনা নিট্ঠিতা.

৫. উপেক্খাসমন্নাগতকথাৰণ্ণনা

৩৯৭. সব্বং ¶ যোজেতব্বন্তি এত্থ যদি তে অরহা চতূহি খন্ধেহি ৰিয ছহি উপেক্খাহি সমন্নাগতো, এৰং সন্তে ছ উপেক্খা পচ্চেকং ফস্সাদিসহিতাতি ‘‘ছহি ফস্সাদীহি সমন্নাগতো’’তিআদিনা যোজেতব্বং.

উপেক্খাসমন্নাগতকথাৰণ্ণনা নিট্ঠিতা.

৬. বোধিযাবুদ্ধোতিকথাৰণ্ণনা

৩৯৮. পত্তিধম্মৰসেনাতি ‘‘পত্তিধম্মো নামা’’তিআদিনা ৰুত্তস্স চিত্তৰিপ্পযুত্তস্স সঙ্খারস্স ৰসেন. ‘‘বোধিযা বুদ্ধো’’তি পুচ্ছা. ‘‘বোধিযা নিরুদ্ধায ৰিগতায পটিপ্পস্সদ্ধায অবুদ্ধো হোতী’’তি অনুযোগো. এৰমঞ্ঞত্থাপি পুচ্ছানুযোগা ৰেদিতব্বা.

বোধিযাবুদ্ধোতিকথাৰণ্ণনা নিট্ঠিতা.

৭. লক্খণকথাৰণ্ণনা

৪০২. তস্মাতি ¶ যস্মা অবোধিসত্তস্সপি চক্কৰত্তিনো লক্খণেহি সমন্নাগমো বোধিসত্তস্সপি চরিমভৰতো অঞ্ঞত্থ অসমন্নাগমো হোতি, তস্মা লক্খণসমন্নাগতো বোধিসত্তোৰাতি ইমস্সত্থস্স অসাধকং. তেনাহ ‘‘আভতম্পি অনাভতসদিসমেৰা’’তি.

লক্খণকথাৰণ্ণনা নিট্ঠিতা.

৮. নিযামোক্কন্তিকথাৰণ্ণনা

৪০৩. পারমীপূরণন্তি ¶ ইদং বোধিচরিযায উপলক্খণং, ন পারমীনং পুণ্ণভাৰদস্সনং. তেন তেসং আরম্ভসমাদানাদীনম্পি সঙ্গহো কতোতি দট্ঠব্বং. মহাভিনীহারতো পট্ঠায হি মহাসত্তা নিযতাতি ৰুচ্চন্তি. যথাহ – ‘‘এৰং সব্বঙ্গসম্পন্না, বোধিযা নিযতা নরা’’তি, ‘‘ধুৰং বুদ্ধো ভৰিস্সতী’’তি চ, ন নিযামস্স নাম কস্সচি ধম্মস্স উপ্পন্নত্তা ব্যাকরোন্তি, অথ খো একংসেনাযং পারমিযো পূরেত্ৰা বুদ্ধো ভৰিস্সতীতি কত্ৰা ব্যাকরোন্তীতি পরৰাদীপরিকপ্পিতং ধম্মন্তরং পটিসেধেতি, ন বোধিযা নিযতত্তং. তেনাহ ‘‘কেৰলঞ্হি ন’’ন্তিআদি.

নিযামোক্কন্তিকথাৰণ্ণনা নিট্ঠিতা.

১০. সব্বসংযোজনপ্পহানকথাৰণ্ণনা

৪১৩. সতিপি কেসঞ্চি সংযোজনানং হেট্ঠিমমগ্গেহি পহীনত্তে ‘‘পঞ্চন্নং ওরম্ভাগিযানং সংযোজনানং পরিক্খযা’’তিআদীসু ৰিয ৰণ্ণভণনমুখেন অনৰসেসতঞ্চ সন্ধায সব্বসংযোজনপ্পহানকিত্তনং পরিযাযৰচনন্তি আহ ‘‘ইমং পরিযাযং অগ্গহেত্ৰা’’তি. অরহত্তমগ্গেন পজহনতো এৰাতি গণ্হাতীতি অগ্গমগ্গো এৰ সব্বসংযোজনানি পজহতীতি লদ্ধিং গণ্হাতীতি ৰদন্তি পদকারা. এৰং সতীতি যদি অনৰসেসতামত্তেন তথা পটিজানাতি.

সব্বসংযোজনপ্পহানকথাৰণ্ণনা নিট্ঠিতা.

চতুত্থৰগ্গৰণ্ণনা নিট্ঠিতা.

৫. পঞ্চমৰগ্গো

১. ৰিমুত্তিকথাৰণ্ণনা

৪১৮. ফলঞাণং ¶ ¶ ন হোতি, সেসানি ৰিপস্সনামগ্গপচ্চৰেক্খণঞাণানি ৰিমুত্তানীতি ন ৰত্তব্বানীতি সম্বন্ধো. এত্থাতি এতেসু চতূসু ঞাণেসু. ৰিপস্সনাগ্গহণেন গহিতং মগ্গাদিকিচ্চৰিদূরকিচ্চত্তা ৰিপস্সনাপরিযোসানত্তা চ.

ৰিমুত্তিকথাৰণ্ণনা নিট্ঠিতা.

২. অসেখঞাণকথাৰণ্ণনা

৪২১. অসেখে আরব্ভ পৰত্তত্তা অসেখঞাণন্তি পরস্স লদ্ধি, ন অসেখে অসেখধম্মে পরিযাপন্নন্তি ইমমত্থমাহ ‘‘এতেন…পে… দস্সেতী’’তি.

অসেখঞাণকথাৰণ্ণনা নিট্ঠিতা.

৩. ৰিপরীতকথাৰণ্ণনা

৪২৪. অসিৰে সিৰাতি ৰোহারং ৰিয অঞ্ঞাণে…পে… ৰদতি.

ৰিপরীতকথাৰণ্ণনা নিট্ঠিতা.

৪. নিযামকথাৰণ্ণনা

৪২৮-৪৩১. যন্তি ¶ যং ঞাণং. সচ্চানুলোমন্তি সচ্চপ্পটিৰেধানুকূলং. ৰিপরীতানুযোগতো পভুতি গণেত্ৰা ‘‘চতুত্থ’’ন্তি আহ ন অনিযতস্স নিযামগমনাযাতি অৰিপরীতানুযোগতো পভুতি গণেত্ৰা, তথা সতি পঞ্চমভাৰতো ৰিসেসভাৰতো চ.

নিযামকথাৰণ্ণনা নিট্ঠিতা.

৫. পটিসম্ভিদাকথাৰণ্ণনা

৪৩২-৪৩৩. সব্বং ¶ ঞাণন্তি ইদং ‘‘অরিযান’’ন্তি ইমিনা ন ৰিসেসিতন্তি অধিপ্পাযেনাহ ‘‘অনরিযানম্পি হি ঞাণং ঞাণমেৰা’’তি. অথ ৰা পাল়িযং অৰিসেসেন সব্বং ঞাণন্তি ৰুত্তং গহেত্ৰা এৰমাহ. অরিযস্স চে ঞাণন্তি, সো পন পটিক্খেপেয্যাতি আহ ‘‘অনরিযস্স এতং ঞাণং সন্ধাযা’’তি.

পটিসম্ভিদাকথাৰণ্ণনা নিট্ঠিতা.

৭. চিত্তারম্মণকথাৰণ্ণনা

৪৩৬-৪৩৮. ৰত্তব্বপটিঞ্ঞাতি ফস্সারম্মণে ঞাণং ৰত্তব্বং চেতোপরিযঞাণন্তি এৰং পৰত্তা পটিঞ্ঞা.

চিত্তারম্মণকথাৰণ্ণনা নিট্ঠিতা.

৮. অনাগতঞাণকথাৰণ্ণনা

৪৩৯-৪৪০. অনন্তরানাগতেপি ¶ চিত্তে ঞাণং ইচ্ছন্তি, তত্থ পন খণপচ্চুপ্পন্নে ৰিয তাদিসেন পরিকম্মেন কদাচি ঞাণং উপ্পজ্জেয্য. তেনাহ ‘‘অনন্তরে একন্তেনেৰ ঞাণং নত্থী’’তি.

অনাগতঞাণকথাৰণ্ণনা নিট্ঠিতা.

৯. পটুপ্পন্নঞাণকথাৰণ্ণনা

৪৪১-৪৪২. ‘‘সব্বসঙ্খারেসু অনিচ্চতো দিট্ঠেসূ’’তি ৰুত্তে যং দস্সনভূতং ঞাণং, তম্পি সঙ্খারসভাৰত্তা তথাদিট্ঠং সিযাতি অত্থতো আপজ্জতি, এৰংভূতং ৰচনং সন্ধাযাহ ‘‘অত্থতো আপন্নং ৰচন’’ন্তি. তং পন যস্মা ‘‘তম্পি ঞাণং অনিচ্চতো দিট্ঠং হোতী’’তি পটিজাননৰসেন পৰত্তং, তস্মা ‘‘অনুজাননৰচন’’ন্তি ৰুত্তং. ভঙ্গানুপস্সনানং পবন্ধৰসেন পৰত্তমানানং.

পটুপ্পন্নঞাণকথাৰণ্ণনা নিট্ঠিতা.

১০. ফলঞাণকথাৰণ্ণনা

৪৪৩-৪৪৪. ফলপরোপরিযত্তং ¶ ফলস্স উচ্চাৰচতা. বলেনাতি ঞাণবলেন.

ফলঞাণকথাৰণ্ণনা নিট্ঠিতা.

পঞ্চমৰগ্গৰণ্ণনা নিট্ঠিতা.

মহাপণ্ণাসকো সমত্তো.

৬. ছট্ঠৰগ্গো

১. নিযামকথাৰণ্ণনা

৪৪৫-৪৪৭. এতস্স ¶ অরিযস্স পুগ্গলস্স.

নিযামকথাৰণ্ণনা নিট্ঠিতা.

২. পটিচ্চসমুপ্পাদকথাৰণ্ণনা

৪৫১. কারণট্ঠেন ঠিততাতি কারণভাৰেন ব্যভিচরণাভাৰমাহ. যো হি ধম্মো যস্স ধম্মস্স যদা কারণং হোতি, ন তস্স তদা অঞ্ঞথাভাৰো অত্থি, সা চ অত্থতো কারণভাৰোযেৰাতি ‘‘কারণভাৰোযেৰা’’তি আহ.

পটিচ্চসমুপ্পাদকথাৰণ্ণনা নিট্ঠিতা.

৫. নিরোধসমাপত্তিকথাৰণ্ণনা

৪৫৭-৪৫৯. সভাৰধম্মতং পটিসেধেতি তদুভযলক্খণরহিতস্স সভাৰধম্মস্স অভাৰা. ‘‘ৰোদানম্পি ৰুট্ঠান’’ন্তি ৰচনতো ‘‘ৰোদানঞ্চ ৰুট্ঠানপরিযাযোৰা’’তি আহ. সভাৰধম্মত্তে সিদ্ধে সঙ্খতৰিদূরতায অসঙ্খতং সিযাতি আহ ‘‘সভাৰধম্মত্তাসাধকত্তা’’তি.

নিরোধসমাপত্তিকথাৰণ্ণনা নিট্ঠিতা.

ছট্ঠৰগ্গৰণ্ণনা নিট্ঠিতা.

৭. সত্তমৰগ্গো

১. সঙ্গহিতকথাৰণ্ণনা

৪৭১-৪৭২. সঙ্গহিতাতি ¶ ¶ সঙ্গহণাদিৰসেন সদ্ধিং গহিতা. তে পন যস্মা একৰিধতাদিসামঞ্ঞেন বন্ধা ৰিয হোন্তি, তস্মা আহ ‘‘সম্বন্ধা’’তি.

সঙ্গহিতকথাৰণ্ণনা নিট্ঠিতা.

২. সম্পযুত্তকথাৰণ্ণনা

৪৭৩-৪৭৪. অনুপ্পৰিসিতব্বানুপ্পৰিসনভাৰো তেসং ভেদে সতি যুজ্জেয্য, নাঞ্ঞথাতি উপমাভিন্দনেন উপমেয্যস্স ভিন্নতং দস্সেন্তো ‘‘নানত্তৰৰত্থা…পে… দস্সেতী’’তি আহ.

সম্পযুত্তকথাৰণ্ণনা নিট্ঠিতা.

৩. চেতসিককথাৰণ্ণনা

৪৭৫-৪৭৭. ফস্সিকাদযোতি এত্থ আদি-সদ্দো ৰৰত্থাৰাচী. তেন চিত্তুপ্পাদদেসনাযং দস্সিতপ্পভেদা ৰেদনাদযো গয্হন্তি, ন তংসমুট্ঠানা রূপধম্মাতি আহ ‘‘একুপ্পাদতাদিৰিরহিতা সহজাততা নত্থী’’তি.

চেতসিককথাৰণ্ণনা নিট্ঠিতা.

৪. দানকথাৰণ্ণনা

৪৭৯. ফলদানভাৰদীপনত্থন্তি ¶ ফলদানসব্ভাৰদীপনত্থং. ফলদানং ৰুত্তং ৰিয হোতীতি চিত্তেন ফলদানং পধানভাৰে ৰুত্তং ৰিয হোতীতি অত্থো. অঞ্ঞথা দানভাৰোতি ন সক্কা ৰত্তুং. দানভাৰোপি হি ‘‘দানং অনিট্ঠফল’’ন্তিআদিনা ৰুত্তোযেৰাতি. তন্নিৰারণত্থন্তি ফলদাননিৰারণত্থং. এতন্তি ‘‘দানং অনিট্ঠফল’’ন্তিআদিৰচনং. ভেসজ্জাদিৰসেন আবাধানিট্ঠতা দেয্যধম্মস্স অনিট্ঠফলতাপরিযাযো দট্ঠব্বো.

কথং ¶ তথেৰ সুত্তং সকৰাদিপরৰাদিৰাদেসু যুজ্জতীতি চোদনায ‘‘ন পন একেনত্থেনা’’তি ৰুত্তং ৰিভাৰেতুং ‘‘দেয্যধম্মোৰ দান’’ন্তিআদি ৰুত্তং. তত্থ নিৰত্তনপক্খেযেৰ এৰ-কারো যুত্তো, ন সাধনপক্খে দ্ৰিন্নম্পি দানভাৰস্স ইচ্ছিতত্তা. তেনাহ ‘‘চেতসিকোৰাতি অত্থো দট্ঠব্বো, দেয্যধম্মোৰা’’তি চ. তেনেৰাহ ‘‘দ্ৰিন্নঞ্হি দানানন্তিআদি. সঙ্করভাৰমোচনত্থন্তি সতিপি দানভাৰে সভাৰসঙ্করমোচনত্থং. তেনাহ ‘‘চেতসিকস্সা’’তিআদি.

দানকথাৰণ্ণনা নিট্ঠিতা.

৫. পরিভোগমযপুঞ্ঞকথাৰণ্ণনা

৪৮৫. তস্সা লদ্ধিযাতি পঞ্চন্নং ৰিঞ্ঞাণানং সমোধানং হোতীতি লদ্ধিযা. এতেসন্তি ৰত্তমানচিত্তপরিভোগমযপুঞ্ঞানং.

৪৮৬. অযং ৰাদো হীযতি পরিভোগস্সেৰ অভাৰতো. চাগচেতনায এৰ পুঞ্ঞভাৰো, ন চিত্তৰিপ্পযুত্তস্স. এৰন্তি ইমিনা পকারেন, অপরিভুত্তে দেয্যধম্মে পুঞ্ঞভাৰেনাতি অত্থো. অপরিভুত্তে দেয্যধম্মে পুঞ্ঞভাৰতো এৰ হি পুথুজ্জনকালে দিন্নং অরহা হুত্ৰা পরিভুঞ্জন্তে তম্পি পুথুজ্জনে দানমেৰাতি নিচ্ছিতং. পরৰাদীপটিক্খেপমুখেন সকৰাদং পতিট্ঠাপেতি পঠমো অত্থৰিকপ্পো, দুতিযো পন উজুকমেৰ সকৰাদং পতিট্ঠাপেতীতি অযমেতেসং ৰিসেসো.

পরিভোগমযপুঞ্ঞকথাৰণ্ণনা নিট্ঠিতা.

৬. ইতোদিন্নকথাৰণ্ণনা

৪৮৮-৪৯১. তেনেৰ ¶ চীৰরাদিদানেনাতি অনুমোদনং ৰিনা দাযকেন পৰত্তিতচীৰরাদিদানেন. তেনাহ ‘‘সযংকতেন কম্মুনা ৰিনাপী’’তি. ইমিনা কারণেনাতি অনুমোদিতত্তাৰ তেসং তত্থ ভোগা উপ্পজ্জন্তীতি এতেন কারণেন. যদি যন্তিআদি পরৰাদিনো লদ্ধিপতিট্ঠাপনাকারদস্সনং. তত্থ যদি ন যাপেয্যুং, কথং অনুমোদেয্যুং, চিত্তং পসাদেয্যুং ¶ , পীতিং উপ্পাদেয্যুং, সোমনস্সং পটিলভেয্যুন্তি একচ্চে অঞ্ঞে পেতে অনুমোদনাদীনি কত্ৰা যাপেন্তে দিস্ৰা অনুমোদনাদীনি করোন্তি, তস্মা তে ইতো দিন্নেন যাপেন্তীতি অধিপ্পাযো.

ইতোদিন্নকথাৰণ্ণনা নিট্ঠিতা.

৭. পথৰীকম্মৰিপাকোতিকথাৰণ্ণনা

৪৯২. অত্তৰজ্জেহীতি ফস্সৰজ্জেহি. ন হি সো এৰ তেন সম্পযুত্তো হোতি. সোতি ফস্সমেৰ পচ্চামসতি. সাৰজ্জনেতি আৰজ্জনসহিতে, আৰজ্জনং পুরেচারিকং কত্ৰা এৰ পৰত্তনকেতি অত্থো. কম্মূপনিস্সযভূতমেৰাতি যেন কম্মুনা যথাৰুত্তা ফস্সাদযো নিব্বত্তিতা, তস্স কম্মস্স উপনিস্সযভূতমেৰ. দুক্খস্সাতি আযতিং উপ্পজ্জনকদুক্খস্স. ‘‘মূলতণ্হা’’তি দস্সেতীতি যোজনা, তথা ‘‘উপনিস্সযভূত’’ন্তি এত্থাপি. কম্মাযূহনস্স কারণভূতা পুরিমসিদ্ধা তণ্হা কম্মস্স উপনিস্সযো, কতূপচিতে কম্মে ভৰাদীসু নমনৰসেন পৰত্তা হি ৰিপাকস্স উপনিস্সযো.

৪৯৩. ওকাসকতুপ্পন্নং অখেপেত্ৰা পরিনিব্বানভাৰো সকসমযৰসেন চোদনায যুজ্জমানতা.

৪৯৪. কম্মে সতীতি ইমিনা কম্মস্স পথৰীআদীনং পচ্চযতামত্তমাহ, ন জনকত্তং. তেনাহ ‘‘তংসংৰত্তনিকং নাম হোতী’’তি.

পথৰীকম্মৰিপাকোতিকথাৰণ্ণনা নিট্ঠিতা.

৮. জরামরণংৰিপাকোতিকথাৰণ্ণনা

৪৯৫. একারম্মণাতি ¶ ইদং অনারম্মণতাসাধনৰসেন সম্পযোগলক্খণাভাৰস্স উদ্ধটত্তা ৰুত্তং, ন তস্সেৰ সম্পযোগলক্খণত্তা.

৪৯৬. অব্যাকতানন্তি ৰিপাকাব্যাকতানং. ইতরত্থ ৰত্তব্বমেৰ নত্থি.

৪৯৭. তন্তি ‘‘অপরিসুদ্ধৰণ্ণতা জরাযেৰা’’তি ৰচনং.

জরামরণংৰিপাকোতিকথাৰণ্ণনা নিট্ঠিতা.

১০. ৰিপাকোৰিপাকধম্মধম্মোতিকথাৰণ্ণনা

৫০১. ৰিপাকো ¶ ৰিপাকস্স পচ্চযো হোন্তো অঞ্ঞমঞ্ঞপচ্চযো হোতীতি অধিপ্পাযেনাহ ‘‘যস্স ৰিপাকস্স ৰিপাকো অঞ্ঞমঞ্ঞপচ্চযো হোতী’’তি. ‘‘তপ্পচ্চযাপি অঞ্ঞস্স ৰিপাকস্স উপ্পত্তিং সন্ধাযা’’তিআদিৰচনতো পন জাতিজরামরণাদীনং উপনিস্সযপচ্চযোতি সক্কা ৰিঞ্ঞাতুং. পুরিমপটিঞ্ঞাযাতি ‘‘ৰিপাকো ৰিপাকধম্মধম্মো’’তি পটিঞ্ঞায. ইমস্স চোদনস্সাতি ‘‘ৰিপাকো চ ৰিপাকধম্মধম্মো চা’’তিআদিনা পৰত্তস্স চোদনস্স.

ৰিপাকোৰিপাকধম্মধম্মোতিকথাৰণ্ণনা নিট্ঠিতা.

সত্তমৰগ্গৰণ্ণনা নিট্ঠিতা.

৮. অট্ঠমৰগ্গো

১. ছগতিকথাৰণ্ণনা

৫০৩-৫০৪. ৰণ্ণা ¶ এৰ নীলাদিৰসেন নিভাতীতি ৰণ্ণনিভা, ৰণ্ণাযতনন্তি অত্থো. সণ্ঠানং দীঘাদি.

ছগতিকথাৰণ্ণনা নিট্ঠিতা.

২. অন্তরাভৰকথাৰণ্ণনা

৫০৫. অন্তরট্ঠানানীতি অন্তরিকট্ঠানানি. নিৰারকট্ঠানানি ভিন্দিত্ৰা চ আকাসেন চ গমনতো. যদি সো ভৰানং অন্তরা ন সিযাতি সো অন্তরাভৰো কামভৰাদীনং ভৰানং অন্তরে যদি ন ভৰেয্য. ন নাম অন্তরাভৰোতি ‘‘সব্বেন সব্বং নত্থি নাম অন্তরাভৰো’’তি এৰং পৰত্তস্স সকৰাদিৰচনস্স পটিক্খেপে কারণং নত্থি, তস্স পটিক্খেপে কারণং হদযে ঠপেত্ৰা ন পটিক্খিপতি, অথ খো তথা অনিচ্ছন্তো কেৰলং লদ্ধিযা পটিক্খিপতীতি অত্থো.

৫০৬. জাতীতি ন ইচ্ছতীতি সম্বন্ধো.

৫০৭. এৰং ¶ তং তত্থ ন ইচ্ছতীতি কামভৰাদীসু ৰিয তং চুতিপটিসন্ধিপরম্পরং তত্থ অন্তরাভৰাৰত্থায ন ইচ্ছতি. সো হি তস্স ভাৰিভৰনিব্বত্তককম্মতো এৰ পৰত্তিং ইচ্ছতি, তস্মা জাতিজরামরণানি অনিচ্চতো কুতো চুতিপটিসন্ধিপরম্পরা. অযঞ্চ ৰাদো অন্তরাভৰৰাদীনং একচ্চানং ৰুত্তো. যে ‘‘অপ্পকেন কালেন সত্তাহেনেৰ ৰা পটিসন্ধিং পাপুণাতী’’তি ৰদন্তি, যে পন ‘‘তত্থেৰ চৰিত্ৰা আযাতীতি সত্তসত্তাহানী’’তি ৰদন্তি, তেহি অনুঞ্ঞাতাৰ চুতিপটিসন্ধিপরম্পরাতি তে অধুনাতনা দট্ঠব্বা পাল়িযং ‘‘অন্তরাভৰে সত্তা জাযন্তি জীযন্তি মীযন্তি চৰন্তি উপপজ্জন্তীতি? ন হেৰং ৰত্তব্বে’’তি আগতত্তা. যথা চেতং, এৰং নিরযূপগাদিভাৰম্পিস্স অধুনাতনা পটিজানন্তি. তথা হি তে ৰদন্তি ‘‘উদ্ধংপাদো তু ¶ নারকো’’তিআদি. তত্থ যং নিস্সায পরৰাদী অন্তরাভৰং নাম পরিকপ্পেতি, তং দস্সেতুং অট্ঠকথাযং ‘‘অন্তরাপরিনিব্বাযীতি সুত্তপদং অযোনিসো গহেত্ৰা’’তি ৰুত্তং. ইমস্স হি ‘‘অৰিহাদীসু তত্থ তত্থ আযুৰেমজ্ঝং অনতিক্কমিত্ৰা অন্তরা অগ্গমগ্গাধিগমেন অনৰসেসকিলেসপরিনিব্বানেন পরিনিব্বাযতি, অন্তরাপরিনিব্বাযী’’তি সুত্তপদস্স অযমত্থো, ন অন্তরাভৰভূতোতি. তস্মা ৰুত্তং ‘‘অন্তরাপরিনিব্বাযীতি সুত্তপদং অযোনিসো গহেত্ৰা’’তি.

যে পন ‘‘সম্ভৰেসীতি ৰচনতো অত্থেৰ অন্তরাভৰো. সো হি সম্ভৰং উপপত্তিং এসতীতি সম্ভৰেসী’’তি ৰদন্তি, তেপি যে ভূতাৰ ন পুন ভৰিস্সন্তি, তে খীণাসৰা ‘‘ভূতানং ৰা সত্তানং ঠিতিযা’’তি এত্থ ‘‘ভূতা’’তি ৰুত্তা. তব্বিধুরতায সম্ভৰমেসন্তীতি সম্ভৰেসিনো, অপ্পহীনভৰসংযোজনত্তা সেক্খা পুথুজ্জনা. চতূসু ৰা যোনীসু অণ্ডজজলাবুজা সত্তা যাৰ অণ্ডকোসং ৰত্থিকোসঞ্চ ন ভিন্দন্তি, তাৰ সম্ভৰেসী নাম, অণ্ডকোসতো ৰত্থিকোসতো চ নিক্খন্তা ভূতা নাম. সংসেদজওপপাতিকা চ পঠমচিত্তক্খণে সম্ভৰেসী নাম, দুতিযচিত্তক্খণতো পট্ঠায ভূতা নাম. যেন ৰা ইরিযাপথেন জাযন্তি, যাৰ ততো অঞ্ঞং ন পাপুণন্তি, তাৰ সম্ভৰেসী নাম, ততো পরং ভূতা নামাতি এৰং উজুকে পাল়িঅনুগতে অত্থে সতি কিং অনিদ্ধারিতস্স পত্থিযেন অন্তরাভৰেন অত্তভাৰেন পরিকপ্পিতেন পযোজনন্তি পটিক্খিপিতব্বা.

যং ¶ পনেকে ‘‘সন্তানৰসেন পৰত্তমানানং ধম্মানং অৰিচ্ছেদেন দেসন্তরেসু পাতুভাৰো দিট্ঠো. যথা তং ৰীহিআদিঅৰিঞ্ঞাণকসন্তানে, এৰং সৰিঞ্ঞাণকসন্তানেপি অৰিচ্ছেদেন দেসন্তরে পাতুভাৰেন ভৰিতব্বং. অযঞ্চ নযো সতি অন্তরাভৰে যুজ্জতি, নাঞ্ঞথা’’তি যুত্তিং ৰদন্তি, তেহি ইদ্ধিমতো চেতোৰসিপ্পত্তস্স চিত্তানুগতিকং কাযং অধিট্ঠহন্তস্স খণেন ব্রহ্মলোকতো ইধূপসঙ্কমনে ইতো ৰা ব্রহ্মলোকূপগমনে যুত্তি ৰত্তব্বা. যদি সব্বত্থেৰ ৰিচ্ছিন্নদেসে ধম্মানং পৰত্তি ন ইচ্ছিতা, যদিপি সিযা ‘‘ইদ্ধিমন্তানং ইদ্ধিৰিসযো অচিন্তেয্যো’’তি, তং ইধাপি সমানং ‘‘কম্মৰিপাকো অচিন্তেয্যো’’তি ৰচনতো, তস্মা তং তেসং মতিমত্তমেৰ. অচিন্তেয্যসভাৰা হি সভাৰধম্মা, তে কত্থচি পচ্চযৰসেন ৰিচ্ছিন্নদেসে পাতুভৰন্তি, কত্থচি অৰিচ্ছিন্নদেসে চ. তথা হি মুখঘোসাদীহি পচ্চযেহি অঞ্ঞস্মিং দেসে আদাসপব্বতপদেসাদিকে পটিবিম্বপটিঘোসাদিকং নিব্বত্তমানং দিট্ঠন্তি.

এত্থাহ ¶ – পটিবিম্বং তাৰ অসিদ্ধত্তা অসদিসত্তা চ ন নিদস্সনং. পটিবিম্বঞ্হি নাম অঞ্ঞদেৰ রূপন্তরং উপ্পজ্জতীতি অসিদ্ধমেতং. সিদ্ধিযম্পি অসদিসত্তা ন নিদস্সনং সিযা একস্মিং ঠানে দ্ৰিন্নং সহঠানাভাৰতো. যত্থেৰ হি আদাসরূপং পটিবিম্বরূপঞ্চ দিস্সতি, ন চ একস্মিং দেসে রূপদ্ৰযস্স সহভাৰো যুত্তো নিস্সযভূতদেসতো, অসদিসঞ্চেতং সন্ধানতো. ন হি মুখস্স পটিবিম্বসন্ধানভূতং আদাসসন্ধানসম্বন্ধত্তা সন্ধানং উদ্দিস্স অৰিচ্ছেদেন দেসন্তরে পাতুভাৰো ৰুচ্চতি, ন অসন্তানন্তি অসমানমেৰ তন্তি.

তত্থ যং ৰুত্তং ‘‘পটিবিম্বং নাম অঞ্ঞদেৰ রূপন্তরং উপ্পজ্জতীতি অসিদ্ধং একস্মিং ঠানে দ্ৰিন্নং সহঠানভাৰতো’’তি, তযিদং অসন্তানমেৰ সহঠানং চোদিতং ভিন্ননিস্সযত্তা. ন হি ভিন্ননিস্সযানং সহঠানং অত্থি. যথা অনেকেসং মণিদীপাদীনং পভারূপং একস্মিং পদেসে পৰত্তমানং অচ্ছিতমানতায নিরন্তরতায চ অভিন্নট্ঠানং ৰিয পঞ্ঞাযতি, ভিন্ননিস্সযত্তা পন ভিন্নট্ঠানমেৰ তং, গহণৰিসেসেন তথাঅভিন্নট্ঠানমত্তং, এৰং আদাসরূপপটিবিম্বরূপেসুপি দট্ঠব্বং. তাদিসপচ্চযসমৰাযেন হি তত্থ তং উপ্পজ্জতি চেৰ ৰিগচ্ছতি চ, এৰঞ্চেতং সম্পটিচ্ছিতব্বং চক্খুৰিঞ্ঞাণস্স গোচরভাৰূপগমনতো. অঞ্ঞথা আলোকেন ৰিনাপি পঞ্ঞাযেয্য, চক্খুৰিঞ্ঞাণস্স ৰা ন গোচরো ৰিয সিযা. তস্স পন সামগ্গিযা ¶ সো আনুভাৰো, যং তথা দস্সনং হোতীতি. অচিন্তেয্যো হি ধম্মানং সামত্থিযভেদোতি ৰদন্তেনপি অযমেৰত্থো সাধিতো ভিন্ননিস্সযস্সপি অভিন্নট্ঠানস্স ৰিয উপট্ঠানতো. এতেনেৰ উদকাদীসু পটিবিম্বরূপাভাৰচোদনা পটিক্খিত্তা ৰেদিতব্বা.

সিদ্ধে চ পটিবিম্বরূপে তস্স নিদস্সনভাৰো সিদ্ধোযেৰ হোতি হেতুফলানং ৰিচ্ছিন্নদেসতাৰিভাৰনতো. যং পন ৰুত্তং ‘‘অসদিসত্তা ন নিদস্সন’’ন্তি, তদযুত্তং. কস্মা? ন হি নিদস্সনং নাম নিদস্সিতব্বেন সব্বদা সদিসমেৰ হোতি. চুতিক্খন্ধাধানতো ৰিচ্ছিন্নদেসে উপপত্তিক্খন্ধা পাতুভৰন্তীতি এতস্স অত্থস্স সাধনত্থং মুখরূপতো ৰিচ্ছিন্নে ঠানে তস্স ফলভূতং পটিবিম্বরূপং নিব্বত্ততীতি এত্থ তস্স নিদস্সনত্থস্স অধিপ্পেতত্তা. এতেন অসন্তানচোদনা পটিক্খিত্তা ৰেদিতব্বা.

যস্মা ৰা মুখপটিবিম্বরূপানং হেতুফলভাৰো সিদ্ধো, তস্মাপি সা পটিক্খিত্তাৰ হোতি. হেতুফলভাৰসম্বন্ধেসু হি সন্তানৰোহারো. যথাৰুত্তদ্ৰীহিকারণেহি পটিবিম্বং উপ্পজ্জতি বিম্বতো ¶ আদাসতো চ, ন চেৰং উপপত্তিক্খন্ধানং ৰিচ্ছিন্নদেসুপ্পত্তি. যথা চেত্থ পটিবিম্বরূপং নিদস্সিতং, এৰং পটিঘোসদীপমুদ্দাদযোপি নিদস্সিতব্বা. যথা হি পটিঘোসদীপমুদ্দাদযো সদ্দাদিহেতুকা হোন্তি, অঞ্ঞত্র অগন্ত্ৰা হোন্তি, এৰমেৰ ইদং চিত্তন্তি.

অপিচাযং অন্তরাভৰৰাদী এৰং পুচ্ছিতব্বো – যদি ‘‘ধম্মানং ৰিচ্ছিন্নদেসুপ্পত্তি ন যুত্তা’’তি অন্তরাভৰো পরিকপ্পিতো, রাহুআদীনং সরীরে কথমনেকযোজনসহস্সন্তরিকেসু পাদট্ঠানহদযট্ঠানেসু কাযৰিঞ্ঞাণমনোৰিঞ্ঞাণুপ্পত্তি ৰিচ্ছিন্নদেসে যুত্তা. যদি একসন্তানভাৰতো, ইধাপি তংসমানং. ন চেত্থ অরূপধম্মভাৰতো অলং পরিহারায পঞ্চৰোকারে রূপারূপধম্মানং অঞ্ঞমঞ্ঞং সম্বন্ধত্তা. ৰত্তমানেহি তাৰ পচ্চযেহি ৰিচ্ছিন্নদেসে ফলস্স উপ্পত্তি সিদ্ধা, কিমঙ্গং পন অতীতেহি পঞ্চৰোকারভৰেহি. যত্থ ৰিপাকৰিঞ্ঞাণস্স পচ্চযো, তত্থস্স নিস্সযভূতস্স ৰত্থুস্স সহভাৰীনঞ্চ খন্ধানং সম্ভৰোতি লদ্ধোকাসেন কম্মুনা নিব্বত্তিযমানস্স অৰসেসপচ্চযন্তরসহিতস্স ৰিপাকৰিঞ্ঞাণস্স উপ্পত্তিযং নালং ৰিচ্ছিন্নদেসতা ৰিবন্ধায. যথা চ অনেককপ্পসহস্সন্তরিকাপি চুতিক্খন্ধা উপপত্তিক্খন্ধানং অনন্তরপচ্চযোতি ন কালদূরতা, এৰং অনেকযোজনসহস্সন্তরিকাপি তে তেসং অনন্তরপচ্চযো হোন্তীতি ন দেসদূরতা. এৰং ¶ চুতিক্খন্ধনিরোধানন্তরং উপপত্তিট্ঠানে পচ্চযন্তরসমৰাযেন পটিসন্ধিক্খন্ধা পাতুভৰন্তীতি নত্থেৰ অন্তরাভৰো. অসতি চ তস্মিং যং তস্স কেচি ‘‘ভাৰিভৰনিব্বত্তককম্মুনো ততো এৰ ভাৰিপুরিমকালভৰাকারো সজাতিসুদ্ধদিব্বচক্খুগোচরো অহীনিন্দ্রিযো কেনচি অপ্পটিহতগমনো গন্ধাহারো’’তি এৰমাদিকারণাকারাদিং ৰণ্ণেন্তি, তং ৰঞ্ঝাতনযস্স রস্সদীঘসামতাদিৰিৰাদসদিসন্তি ৰেদিতব্বং.

অন্তরাভৰকথাৰণ্ণনা নিট্ঠিতা.

৩. কামগুণকথাৰণ্ণনা

৫১০. সব্বেপীতি কুসলাকুসলক্খন্ধাদযোপি. তেসম্পি হি আলম্বনত্থিকতালক্খণস্স কত্তুকম্যতাছন্দস্স ৰসেন সিযা কমনট্ঠতাতি অধিপ্পাযো. ধাতুকথাযং ‘‘কামভৰো পঞ্চহি খন্ধেহি একাদসহি আযতনেহি সত্তরসহি ধাতূহি সঙ্গহিতো. কতিহি অসঙ্গহিতো? ন কেহিচি ¶ খন্ধেহি একেনাযতনেন একায ধাতুযা অসঙ্গহিতো’’তি আগতত্তা আহ ‘‘উপাদিন্নক্খন্ধানমেৰ কামভৰভাৰো ধাতুকথাযং দস্সিতো’’তি. পঞ্চাতি গণনপরিচ্ছেদো, তদঞ্ঞগণননিৰত্তনত্থোতি ‘‘পঞ্চ কামগুণা’’তি ৰচনং ততো অঞ্ঞেসং তব্ভাৰং নিৰত্তেতীতি আহ ‘‘পঞ্চেৰ কামকোট্ঠাসা কামোতি ৰুত্তা’’তি. ততো এৰ কামধাতূতি ৰচনং ন অঞ্ঞস্স নামং, তেসংযেৰ নামন্তি অত্থো. তযিদং পরৰাদিনো মতিমত্তন্তি ৰুত্তং ‘‘ইমিনা অধিপ্পাযেনা’’তি. এৰং ৰচনমত্তন্তি এৰং ‘‘পঞ্চিমে কামগুণা’’তি ৰচনমত্তং নিস্সায, ন পনত্থস্স অৰিপরীতং অত্থন্তি অত্থো.

কামগুণকথাৰণ্ণনা নিট্ঠিতা.

৫. রূপধাতুকথাৰণ্ণনা

৫১৫-৫১৬. রূপধাতূতি ৰচনতোতি ‘‘কামধাতুরূপধাতুঅরূপধাতূ’’তি এত্থ রূপধাতূতি ৰুত্তত্তা. রূপীধম্মেহেৰাতি রুপ্পনসভাৰেহিযেৰ ধম্মেহি. ‘‘তযোমে ভৰা’’তিআদিনা পরিচ্ছিন্নাতি তযোমে ভৰা ¶ , তিস্সো ধাতুযোতি চ এৰং পরিচ্ছিন্না. ‘‘ধাতুযা আগতট্ঠানে ভৰেন পরিচ্ছিন্দিতব্বং, ভৰস্স আগতট্ঠানে ধাতুযা পরিচ্ছিন্দিতব্ব’’ন্তি হি ৰুত্তং, তস্মা কামরূপারূপাৰচরধম্মাৰ তংতংভুম্মভাৰেন পরিচ্ছিন্না এৰং ৰুত্তা.

রূপধাতুকথাৰণ্ণনা নিট্ঠিতা.

৬. অরূপধাতুকথাৰণ্ণনা

৫১৭-৫১৮. পুরিমকথাযন্তি রূপধাতুকথাযং. অৰিসেসেনাতি পৰত্তিট্ঠানৰসেন ৰিসেসং অকত্ৰা.

অরূপধাতুকথাৰণ্ণনা নিট্ঠিতা.

৭. রূপধাতুযাআযতনকথাৰণ্ণনা

৫১৯. ওকাসভাৰেনাতি ¶ ৰত্থুভাৰেন. তথাৰিধন্তি ঘানাদিআকারং.

রূপধাতুযাআযতনকথাৰণ্ণনা নিট্ঠিতা.

৮. অরূপেরূপকথাৰণ্ণনা

৫২৪-৫২৬. নিস্সরণং নাম নিস্সরিতব্বে সতি হোতি, ন অসতি, তস্মা ‘‘অরূপভৰে সুখুমরূপং অত্থি, যতো নিস্সরণং তং আরুপ্প’’ন্তি আহ.

অরূপেরূপকথাৰণ্ণনা নিট্ঠিতা.

৯. রূপংকম্মন্তিকথাৰণ্ণনা

৫২৭-৫৩৭. পকপ্পযমানাতি পকারেহি কপ্পযমানা অত্তনো সম্পযুত্তানঞ্চ কিচ্চং সমত্থযমানা. তেনাহ ‘‘সম্পযুত্তেসু অধিকং ব্যাপারং কুরুমানা’’তি.

রূপংকম্মন্তিকথাৰণ্ণনা নিট্ঠিতা.

১০. জীৰিতিন্দ্রিযকথাৰণ্ণনা

৫৪০. অন্তং ¶ গহেত্ৰা ৰদতীতি ‘‘অত্থি অরূপধম্মানং আযু ঠিতি যপনা যাপনা ইরিযনা ¶ ৰত্তনা পালনা, অত্থি অরূপজীৰিতিন্দ্রিয’’ন্তি তস্মিং পঞ্হে ‘‘অত্থি অরূপজীৰিতিন্দ্রিয’’ন্তি ইমং অন্তং পরিযোসানং গহেত্ৰা ৰদতি. ৰত্তুং যুত্তো সমুদাযস্স ইচ্ছন্তো তদৰযৰস্স ইচ্ছতীতি. ন হি অৰযৰেহি ৰিনা সমুদাযো নাম অত্থি.

৫৪১. তমেৰাতি অরূপং চিত্তৰিপ্পযুত্তমেৰ.

৫৪২. তদাপীতি সমাপজ্জনৰুট্ঠানকালেপি.

৫৪৪-৫৪৫. সো যুত্তো দ্ৰিন্নং রূপারূপজীৰিতিন্দ্রিযানং সকসমযে ইচ্ছিতত্তা.

জীৰিতিন্দ্রিযকথাৰণ্ণনা নিট্ঠিতা.

১১. কম্মহেতুকথাৰণ্ণনা

৫৪৬. ‘‘পাণাতিপাতকম্মস্স হেতূ’’তিআদিকস্স পরিহানিকথাযং অনাগতত্তা যো তত্থ আগতনযো, তমেৰ দস্সেন্তো ‘‘সেসন্তি…পে… ৰদতী’’তি আহ. সম্পটিচ্ছনৰচনন্তি সম্পটিচ্ছাপনৰচনং. তং পরৰাদিং. তংতংলদ্ধিসম্পটিচ্ছাপনং ৰা গাহাপনন্তি দস্সেন্তো ‘‘পক্খ’’ন্তিআদিমাহ.

কম্মহেতুকথাৰণ্ণনা নিট্ঠিতা.

অট্ঠমৰগ্গৰণ্ণনা নিট্ঠিতা.

৯. নৰমৰগ্গো

১. আনিসংসদস্সাৰীকথাৰণ্ণনা

৫৪৭. দট্ঠব্বস্স আদীনৰতো আনিসংসতো চ যদিপি পরৰাদিনা পচ্ছা নানাচিত্তৰসেন ¶ পটিঞ্ঞাতং, পুব্বে পন একতো কত্ৰা পটিজানি, ন চ ¶ তং লদ্ধিং পরিচ্চজি. তেনস্স অধিপ্পাযমদ্দনং যুত্তন্তি দট্ঠব্বং. তেনেৰাহ ‘‘অনিচ্চ…পে… পটিঞ্ঞাতত্তা’’তি. আরম্মণৰসেনাতি আরম্মণকরণৰসেন, ন কিচ্চনিপ্ফত্তিৰসেনাতি অধিপ্পাযো. ইদং আনিসংসকথানুযুঞ্জনং আনিসংসদস্সনঞ্চ. ঞাণং ৰিপস্সনা পটিৰেধঞাণস্স ৰিয অনুবোধঞাণস্সপি যথারহং পৰত্তিনিৰত্তীসু কিচ্চকরণং যুত্তন্তি অধিপ্পাযো.

আনিসংসদস্সাৰীকথাৰণ্ণনা নিট্ঠিতা.

২. অমতারম্মণকথাৰণ্ণনা

৫৪৯. এৰমাদিনা সুত্তভযেনাতি এত্থ আদি-সদ্দেন ‘‘অনাসৰঞ্চ ৰো, ভিক্খৰে, ধম্মং দেসেস্সামি অনাসৰগামিনিঞ্চ পটিপদ’’ন্তিআদীনি সুত্তপদানি সঙ্গণ্হাতি.

অমতারম্মণকথাৰণ্ণনা নিট্ঠিতা.

৩. রূপংসারম্মণন্তিকথাৰণ্ণনা

৫৫২-৫৫৩. ‘‘তদপ্পতিট্ঠং অনারম্মণ’’ন্তিআদীসু পচ্চযত্থো আরম্মণ-সদ্দো. ‘‘রূপাযতনং চক্খুৰিঞ্ঞাণধাতুযা তংসম্পযুত্তকানঞ্চ ধম্মানং আরম্মণপচ্চযেন পচ্চযো’’তিআদীসু ওলুব্ভট্ঠোতি আহ ‘‘পচ্চযট্ঠো ওলুব্ভট্ঠো’’তি. এৰং ৰিভাগে ৰিজ্জমানেতি তত্থ পচ্চযাযত্তৰুত্তিতা পচ্চযট্ঠো, দণ্ডরজ্জুআদি ৰিয দুব্বলস্স চিত্তচেতসিকানং আলম্বিতব্বতায উপত্থম্ভনট্ঠো ওলুব্ভট্ঠো. ৰিসেসাভাৰং পচ্চযভাৰসামঞ্ঞেন কপ্পেত্ৰা ৰা.

রূপংসারম্মণন্তিকথাৰণ্ণনা নিট্ঠিতা.

৪. অনুসযাঅনারম্মণাতিকথাৰণ্ণনা

৫৫৪-৫৫৬. ‘‘ইমস্মিং ¶ সতী’’তি ইমিনা মগ্গেন অনিরুদ্ধতাপি সঙ্গহিতাতি আহ ‘‘অপ্পহীনত্তাৰ অত্থীতি ৰুচ্চতী’’তি. ন পন ৰিজ্জমানত্তাতি অৰধারণেন ¶ নিৰত্তিতং দস্সেতি, ৰিজ্জমানত্তা ধরমানত্তা খণত্তযসমঙ্গিভাৰতোতি অত্থো.

অনুসযাঅনারম্মণাতিকথাৰণ্ণনা নিট্ঠিতা.

৫. ঞাণংঅনারম্মণন্তিকথাৰণ্ণনা

৫৫৭-৫৫৮. যস্স অধিগতত্তা অরহতো পরিঞ্ঞেয্যাদীসু অনৰসেসতো সম্মোহো ৰিগতো, তং অগ্গমগ্গঞাণং সন্ধায ‘‘মগ্গঞাণস্সা’’তি ৰদন্তি. যস্মা তস্স সব্বস্স সতোকারিতা ৰিয সম্পজানকারিতা, তস্মা তেন ঞাণেন সো ঞাণী. সতিপঞ্ঞাৰেপুল্লপ্পত্তো হি সো উত্তমপুরিসো.

ঞাণংঅনারম্মণন্তিকথাৰণ্ণনা নিট্ঠিতা.

৭. ৰিতক্কানুপতিতকথাৰণ্ণনা

৫৬২. দ্ৰীহিপীতি দ্ৰীহি ৰিসেসেহি, ৰিসেসেন ৰিসেসং অকত্ৰাতি অত্থো.

ৰিতক্কানুপতিতকথাৰণ্ণনা নিট্ঠিতা.

৮. ৰিতক্কৰিপ্ফারসদ্দকথাৰণ্ণনা

৫৬৩. সব্বসোতি ¶ সব্বপ্পকারতো, সো পন পকারো পৰত্তিট্ঠানকালৰসেন গহেতব্বোতি আহ ‘‘সব্বত্থ সব্বদা ৰা’’তি. তে চ ঠানকালা ‘‘ৰিতক্কযতো’’তিআদিৰচনতো চিত্তৰিসেসৰসেন গহেতব্বাতি ৰুত্তং ‘‘সৰিতক্কচিত্তেসূ’’তি. ‘‘ৰিতক্কেত্ৰা ৰাচং ভিন্দতী’’তি সুত্তপদং অযোনিসো গহেত্ৰা ‘‘ৰিতক্কৰিপ্ফারমত্তং সদ্দো’’তি আহ.

ৰিতক্কৰিপ্ফারসদ্দকথাৰণ্ণনা নিট্ঠিতা.

৯. নযথাচিত্তস্সৰাচাতিকথাৰণ্ণনা

৫৬৫. মুসাৰাদো ¶ ন হোতীতি ৰুত্তং অনাপত্তীতি সম্বন্ধো.

নযথাচিত্তস্সৰাচাতিকথাৰণ্ণনা নিট্ঠিতা.

১১. অতীতানাগতসমন্নাগতকথাৰণ্ণনা

৫৬৮-৫৭০. সমন্নাগতপঞ্ঞত্তিযাতি সমঙ্গিভাৰপঞ্ঞত্তিযা. তেনেৰাহ ‘‘পচ্চুপ্পন্নধম্মসমঙ্গী সমন্নাগতোতি ৰুচ্চতী’’তি. পটিলাভপঞ্ঞত্তিযাতি অধিগমনপঞ্ঞত্তিযা. অযন্তি ‘‘সমন্নাগতো’’তি ৰুচ্চমানপুগ্গলস্স যো তথা ৰত্তব্বাকারো, অযং সমন্নাগতপঞ্ঞত্তি নাম. এস নযো সেসেসুপি.

অতীতানাগতসমন্নাগতকথাৰণ্ণনা নিট্ঠিতা.

নৰমৰগ্গৰণ্ণনা নিট্ঠিতা.

১০. দসমৰগ্গো

১. নিরোধকথাৰণ্ণনা

৫৭১-৫৭২. সকসমযে ¶ ‘‘পুরিমচিত্তস্স নিরোধানন্তরং পচ্ছিমচিত্তং উপ্পজ্জতী’’তি ইচ্ছিতং, পরৰাদী পন ‘‘যস্মিং খণে ভৰঙ্গচিত্তং, তস্মিংযেৰ খণে কিরিযমযচিত্তং উপ্পজ্জতী’’তি ৰদতি. এৰং সতি পুরিমপচ্ছিমচিত্তানং সহভাৰোপি অনুঞ্ঞাতো হোতি. তেনাহ ‘‘ভঙ্গক্খণেন সহেৰা’’তি. তথা চ সতি ৰিপাককিরিযক্খন্ধানং ৰিয কিরিযৰিপাকক্খন্ধানং ৰিপাকৰিপাকক্খন্ধানং কিরিযকিরিযক্খন্ধানঞ্চ ৰুত্তনযেন সহভাৰো ৰত্তব্বোতি ইমমত্থং দস্সেন্তো ‘‘ভৰঙ্গচিত্তস্সা’’তিআদিমাহ. তত্থ উপপত্তিভৰভাৰেন এসিযা ইচ্ছিতব্বাতি উপপত্তেসিযা ৰিপাকক্খন্ধা, তে চ যেভুয্যেন ভৰঙ্গপরিযাযকাতি অট্ঠকথাযং ৰুত্তং ‘‘উপপত্তেসিযন্তি সঙ্খং গতস্স ভৰঙ্গচিত্তস্সা’’তি. আদিপরিযোসানমত্তঞ্হি তস্স পটিসন্ধিচুতিচিত্তং, তদারম্মণং ভৰঙ্গন্ত্ৰেৰ ৰুচ্চতীতি. চক্খুৰিঞ্ঞাণাদীনং কিরিযাৰেমজ্ঝে ¶ পতিতত্তা কিরিযাচতুক্খন্ধগ্গহণেন গহণং যুত্তন্তি ৰুত্তং. চক্খুৰিঞ্ঞাণাদীনন্তি হি আদি-সদ্দেন ন সোতৰিঞ্ঞাণাদীনংযেৰ গহণং, অথ খো সম্পটিচ্ছনসন্তীরণানম্পীতি দট্ঠব্বং.

নিরোধকথাৰণ্ণনা নিট্ঠিতা.

৩. পঞ্চৰিঞ্ঞাণসমঙ্গিস্সমগ্গকথাৰণ্ণনা

৫৭৬. লক্খণন্তি পঞ্চৰিঞ্ঞাণানং উপ্পন্নারম্মণতাদিঅৰিতথেকপ্পকারতালক্খণং. কামং মনোৰিঞ্ঞাণং অৰত্থুকম্পি হোতি, সৰত্থুকত্তে পন তম্পি উপ্পন্নৰত্থুকমেৰ. তথা হি পাল়িযং ঠপনাযং ‘‘হঞ্চি পঞ্চৰিঞ্ঞাণা উপ্পন্নারম্মণা’’ত্ৰেৰ ৰুত্তং. মনোৰিঞ্ঞাণস্সপি উপ্পন্নৰত্থুকতাপরিযাযো অত্থীতি ‘‘পঞ্চ ৰিঞ্ঞাণা’’তি অৰত্ৰা ‘‘ছ ৰিঞ্ঞাণা উপ্পন্নৰত্থুকা’’তি ৰুত্তে ‘‘নো চ ৰত রে ৰত্তব্বে পঞ্চৰিঞ্ঞাণসমঙ্গিস্স অত্থি মগ্গভাৰনা’’তি ৰত্তুং ন সক্কাতি দস্সেন্তো আহ ‘‘ছ ৰিঞ্ঞাণা…পে… অধিপ্পেত’’ন্তি.

৫৭৭. ‘‘অনিমিত্তং ¶ সুঞ্ঞতং অপ্পণিহিত’’ন্তি নিব্বানস্স তে পরিযাযা. চক্খুৰিঞ্ঞাণস্স অনিমিত্তগাহিভাৰে সুঞ্ঞতারম্মণতাপি সিযাতি ৰুত্তং ‘‘তদেৰ সুঞ্ঞতন্তি অধিপ্পাযো’’তি.

পঞ্চৰিঞ্ঞাণসমঙ্গিস্সমগ্গকথাৰণ্ণনা নিট্ঠিতা.

৫. পঞ্চৰিঞ্ঞাণাসাভোগাতিকথাৰণ্ণনা

৫৮৪-৫৮৬. সা পন নমিত্ৰা পৰত্তি. আরম্মণপ্পকারগ্গহণন্তি আরম্মণস্স ইট্ঠানিট্ঠপ্পকারস্স গহণং. যেন আরম্মণপ্পকারগ্গহণেন কুসলচিত্তস্স অলোভাদীহি সম্পযোগো অকুসলচিত্তস্স লোভাদীহি সম্পযোগো হোতি, সো আভোগোতি দস্সেতি.

পঞ্চৰিঞ্ঞাণাসাভোগাতিকথাৰণ্ণনা নিট্ঠিতা.

৬. দ্ৰীহিসীলেহীতিকথাৰণ্ণনা

৫৮৭-৫৮৯. অপ্পৰত্তিনিরোধন্তি ¶ অনুপ্পাদনিরোধং. সীলস্স ৰীতিক্কমোযেৰ নিরোধো সীলৰীতিক্কমনিরোধো. নিন্নানং খণিকনিরোধং সল্লক্খেন্তো.

দ্ৰীহিসীলেহীতিকথাৰণ্ণনা নিট্ঠিতা.

৭. সীলংঅচেতসিকন্তিকথাৰণ্ণনা

৫৯০-৫৯৪. ঠিতেন অৰিনট্ঠেন. উপচযেনাতি সীলভূতেন কম্মূপচযেন. ‘‘দানং অচেতসিক’’ন্তি ¶ কথাযং ৰুত্তনযেনাতি যথা ‘‘ন ৰত্তব্বং চেতসিকো ধম্মো দানন্তি? আমন্তা. দানং অনিট্ঠফলন্তি…পে… তেন হি চেতসিকো ধম্মো দান’’ন্তি পাল়ি পৰত্তা, এৰং তদনুসারেন ‘‘ন ৰত্তব্বং চেতসিকং সীলন্তি? আমন্তা. সীলং অনিট্ঠফল’’ন্তিআদিনা সীলস্স চেতসিকভাৰসাধকানি সুত্তপদানি চ আনেত্ৰা তদত্থদস্সনৰসেন অচেতসিকো রূপাদিধম্মো আযতিং ৰিপাকং দেতি. যদি সো সীলং ভৰেয্য, ৰিনা সংৰরসমাদানেন ৰিনা ৰিরতিযা সীলৰা নাম সিযা. যস্মা পন সমাদানচেতনা ৰিরতি সংৰরো সীলং, তস্মা ‘‘সীলং ইট্ঠফলং কন্তফল’’ন্তিআদিনা যোজনা কাতব্বাতি ইমমত্থং সন্ধায ৰুত্তং ‘‘ৰুত্তনযেনা’’তি, ৰুত্তনযানুসারেনাতি অত্থো. যস্মা পন পাল়িযং যথা ‘‘সীলং অচেতসিক’’ন্তি কথা আগতা, তথা ‘‘দানং অচেতসিক’’ন্তি ৰিসুং আগতা কথা নত্থি, তস্মা ‘‘সা পন কথা মগ্গিতব্বা’’তি ৰুত্তং.

সীলংঅচেতসিকন্তিকথাৰণ্ণনা নিট্ঠিতা.

৯. সমাদানহেতুকথাৰণ্ণনা

৫৯৮-৬০০. সমাদানহেতুকথাযং ‘‘ফস্সো দেতী’’তি আরভিত্ৰা যাৰ কণ্হসুক্কসপ্পটিভাগা ধম্মা সম্মুখীভাৰং আগচ্ছন্তীতি আরামরোপাদিসুত্তাহরণঞ্চাতি এত্তকমেৰ পরিভোগকথায সদিসন্তি আহ ‘‘সমাদান…পে… দট্ঠব্বা’’তি.

সমাদানহেতুকথাৰণ্ণনা নিট্ঠিতা.

১১. অৰিঞ্ঞত্তিদুস্সীল্যন্তিকথাৰণ্ণনা

৬০৩-৬০৪. মহাভূতানি ¶ উপাদায পৰত্তো অঞ্ঞচিত্তক্খণেপি লব্ভমানো কুসলাকুসলানুবন্ধো অৰিঞ্ঞত্তীতি অযং ৰাদো ‘‘চিত্তৰিপ্পযুত্তো অপুঞ্ঞূপচযো’’তি ইমিনা সঙ্গহিতোতি ¶ ততো অঞ্ঞানুবন্ধাযং ‘‘আণত্তিযা’’তিআদি ৰুত্তন্তি তং দস্সেতুং ‘‘আণত্তিযা…পে… অধিপ্পাযো’’তি ৰুত্তং. তত্থ আণত্তো যদা আণত্তভাৰেন ৰিহিংসাদিকিরিযং সাধেতি, তদা আণত্তিযা পাণাতিপাতাদীসু অঙ্গভাৰো ৰেদিতব্বো. সা পনাণত্তি পারিৰাসিকভাৰেন ৰিঞ্ঞত্তিরহিতা নাম হোতীতি পরৰাদিনো অধিপ্পাযো, তং দস্সেতুং ‘‘একস্মিং দিৰসে’’তিআদি ৰুত্তং.

অৰিঞ্ঞত্তিদুস্সীল্যন্তিকথাৰণ্ণনা নিট্ঠিতা.

দসমৰগ্গৰণ্ণনা নিট্ঠিতা.

দুতিযো পণ্ণাসকো সমত্তো.

১১. একাদসমৰগ্গো

৪. ঞাণকথাৰণ্ণনা

৬১৪-৬১৫. ‘‘অন্ধকা’’তি ৰুত্তা পুব্বসেলিযঅপরসেলিযরাজগিরিকসিদ্ধত্থিকাপি যেভুয্যেন মহাসঙ্ঘিকা এৰাতি ৰুত্তং ‘‘পুব্বে…পে… ভৰেয্যু’’ন্তি. তত্থ অঞ্ঞেতি ৰচনং দ্ৰিন্নং কথানং উজুৰিপচ্চনীকভাৰতো. পুরিমকানঞ্হি চক্খুৰিঞ্ঞাণাদিসমঙ্গী ‘‘ঞাণী’’তি ৰুচ্চতি, ইমেসং সো এৰ ‘‘ঞাণী’’তি ন ৰত্তব্বোতি ৰুত্তো. রাগৰিগমো রাগস্স সমুচ্ছিন্দনং, তথা অঞ্ঞাণৰিগমো. যথা সমুচ্ছিন্নাৰিজ্জো ‘‘ঞাণী’’তি, পটিপক্খতো ‘‘অঞ্ঞাণী’’তি, এৰং অসমুচ্ছিন্নাৰিজ্জো ‘‘অঞ্ঞাণী’’তি, পটিপক্খতো ‘‘ঞাণী’’তি ৰুত্তো. অঞ্ঞাণস্স ৰিগতত্তা সো ‘‘ঞাণী’’তি ৰত্তব্বতং আপজ্জতি, ন পন সততং সমিতং ঞাণস্স পৰত্তনতোতি অধিপ্পাযো.

ঞাণকথাৰণ্ণনা নিট্ঠিতা.

৭. ইদ্ধিবলকথাৰণ্ণনা

৬২১-৬২৪. যস্মিং ¶ ¶ আযুকপ্পে কম্মক্খযেন মরণং হোতি, তং সন্ধায ৰুত্তং ‘‘কম্মস্স ৰিপাকৰসেনা’’তি, যস্মিং পন আযুক্খযেন মরণং হোতি, তং সন্ধায ‘‘ৰস্সগণনাযা’’তি. তত্থ ‘‘ন চ তাৰ কালং করোতি, যাৰ ন তং পাপকম্মং ব্যন্তী হোতী’’তি (ম. নি. ৩.২৫০; অ. নি. ৩.৩৬) ৰচনতো যেভুয্যেন নিরযে কম্মক্খযেন মরণং হোতীতি আহ ‘‘কম্মস্স ৰিপাকৰসেন ৰাতি নিরযংৰ সন্ধায ৰুত্ত’’ন্তি. ‘‘ৰস্সসতং ৰস্সসহস্সং ৰস্সসতসহস্সানী’’তিআদিনা মনুস্সানং দেৰানঞ্চ আযুপরিচ্ছেদৰচনতো যেভুয্যেন তেসং আযুক্খযেন মরণং হোতীতি ৰুত্তং ‘‘ৰস্সগণনায ৰাতি মনুস্সে চাতুমহারাজিকাদিদেৰে চ সন্ধাযা’’তি. ‘‘ৰুত্ত’’ন্তি আনেত্ৰা যোজেতব্বং.

ইদ্ধিবলকথাৰণ্ণনা নিট্ঠিতা.

৮. সমাধিকথাৰণ্ণনা

৬২৫-৬২৬. সমং ঠপনট্ঠেনাতি সমং ৰিসমং লীনুদ্ধচ্চাদিং পটিবাহিত্ৰা, ৰিক্খেপমেৰ ৰা ৰিদ্ধংসেত্ৰা ঠপনট্ঠেন. ‘‘চিত্তসন্ততি সমাধী’’তি ৰদন্তেন তস্স চেতসিকভাৰো পটিক্খিত্তো হোতীতি আহ ‘‘চেতসিকন্তরং অত্থীতি অগ্গহেত্ৰা’’তি. ভাৰনায আহিতৰিসেসায একগ্গতায ৰিজ্জমানৰিসেসপটিক্খেপো ছলং, সো পনস্স অনাহিতৰিসেসায একগ্গতায সামঞ্ঞেনাতি আহ ‘‘সামঞ্ঞমত্তেনা’’তি.

সমাধিকথাৰণ্ণনা নিট্ঠিতা.

৯. ধম্মট্ঠিততাকথাৰণ্ণনা

৬২৭. অৰিজ্জায ¶ যা ঠিততাতি অৰিজ্জায সঙ্খারানং অনন্তরপচ্চযভাৰে যা নিযততা ধম্মনিযামতাসঙ্খাতা, যা ঠিতসভাৰতা নিপ্ফন্না ¶ , ন ধম্মমত্ততাট্ঠিততায নিপ্ফন্নায ৰসেন, অনন্তরপচ্চযভাৰসঙ্খাতা ঠিততা পচ্চযতা হোতীতি অত্থো. অঞ্ঞমঞ্ঞপচ্চযভাৰরহিতস্সাতি ইদং সহজাতনিস্সযাদিপচ্চযানং পটিক্খেপপদং দট্ঠব্বং, ন অঞ্ঞমঞ্ঞপচ্চযতামত্তস্স. সব্বো তাদিসোতি ইমিনা সমনন্তরঅনন্তরূপনিস্সযনত্থিৰিগতাসেৰনাদিকং সঙ্গণ্হাতি. অঞ্ঞমঞ্ঞপচ্চযতঞ্চাতি এত্থাপি ৰুত্তনযেন অত্থো ৰেদিতব্বো. এত্থ পন পচ্চযুপ্পন্নস্সপি পচ্চযভাৰতো সঙ্খারানম্পি ৰসেন যোজেতব্বং. তেনাহ ‘‘তস্সা চ ইতরা’’তি.

ধম্মট্ঠিততাকথাৰণ্ণনা নিট্ঠিতা.

১০. অনিচ্চতাকথাৰণ্ণনা

৬২৮. রূপাদীনং অনিচ্চতা রূপাদিকে সতি হোতি, অসতি ন হোতীতি ইমিনা পরিযাযেন তস্সা তেহি সহ উপ্পাদনিরোধো ৰুত্তো, উপ্পাদাদীসু তীসু লক্খণেসু অনিচ্চতাৰোহারো হোতীতি যথা তযো দণ্ডে উপাদায পৰত্তো তিদণ্ডৰোহারো তেসু সব্বেসু হোতি, এৰং জাতিজরামরণধম্মো ন নিচ্চো অনিচ্চো, তস্স জাতিআদিপকতিতা অনিচ্চতাসদ্দেন ৰুচ্চতীতি উপ্পাদাদীসু লক্খণেসু অনিচ্চতাৰোহারো সম্ভৰতীতি ৰুত্তং ‘‘তীসু…পে… হোতী’’তি. ৰিভাগানুযুঞ্জনৰসেনাতি পভেদানুযুঞ্জনৰসেন. তত্থ যথা জরাভঙ্গৰসেন অনিচ্চতা পাকটা হোতি, ন তথা জাতিৰসেনাতি পাল়িযং জরামরণৰসেনেৰ অনিচ্চতাৰিভাগো দস্সিতোতি দট্ঠব্বং.

অনিচ্চতাকথাৰণ্ণনা নিট্ঠিতা.

একাদসমৰগ্গৰণ্ণনা নিট্ঠিতা.

১২. দ্ৰাদসমৰগ্গো

১. সংৰরোকম্মন্তিকথাৰণ্ণনা

৬৩০-৬৩২. সব্বস্সপি ¶ মনসো মনোদ্ৰারভাৰতো ‘‘ৰিপাকদ্ৰারন্তি ভৰঙ্গমনং ৰদতী’’তি আহ.

সংৰরোকম্মন্তিকথাৰণ্ণনা নিট্ঠিতা.

২. কম্মকথাৰণ্ণনা

৬৩৩-৬৩৫. সৰিপাকাপি ¶ দস্সিতাযেৰ নাম হোতি ৰুত্তাৰসিট্ঠা সৰিপাকাতি অত্থসিদ্ধত্তা.

কম্মকথাৰণ্ণনা নিট্ঠিতা.

৪. সল়াযতনকথাৰণ্ণনা

৬৩৮-৬৪০. মনাযতনেকদেসস্স ৰিপাকস্স অত্থিতায ‘‘অৰিসেসেনা’’তি ৰুত্তং.

সল়াযতনকথাৰণ্ণনা নিট্ঠিতা.

৫. সত্তক্খত্তুপরমকথাৰণ্ণনা

৬৪১-৬৪৫. অস্সাতি ইমস্স সত্তক্খত্তুপরমস্স. তেনাহ ‘‘সত্তক্খত্তুপরমভাৰে চ নিযামং ¶ ইচ্ছসী’’তি. যেন আনন্তরিযকম্মেন. অন্তরাতি সত্ত ভৰে অনিব্বত্তেত্ৰা তেসং অন্তরেযেৰ. কেচীতি অভযগিরিৰাসিনো. অপরেতি পদকারা. তস্সাতি যো সত্তক্খত্তুপরমোতি ৰা, কোলংকোলোতি ৰা, একবীজীতি ৰা ভগৰতা ঞাণেন পরিচ্ছিন্দিত্ৰা ব্যাকতো, তস্স যথাৰুত্তপরিচ্ছেদা অন্তরা উপরিমগ্গাধিগমো নত্থি অৰিতথদেসনত্তা. যথাপরিচ্ছেদমেৰ তস্স অভিসমযো, স্ৰাযং ৰিভাগো তেসংযেৰ পুগ্গলানং ইন্দ্রিযপরোপরিযত্তেন ৰেদিতব্বো ভৰনিযামেন তাদিসস্স কস্সচি অভাৰতো. যস্মা কস্সচি মুদুকানিপি ইন্দ্রিযানি পচ্চযৰিসেসেন তিক্খভাৰং আপজ্জেয্যুং, তস্মা তাদিসং সন্ধায ‘‘ভব্বোতি ৰুচ্চতি, ন সো অভব্বো নামা’’তি চ ৰুত্তং. যস্মা পন ভগৰা ন তাদিসং ‘‘সত্তক্খত্তুপরমো’’তিআদিনা নিযমেত্ৰা ব্যাকরোতি, তস্মা আহ ‘‘ন পন অন্তরা অভিসমেতুং ভব্বতা ৰুত্তা’’তি. অযঞ্চ নযো একন্তেন ইচ্ছিতব্বো. অঞ্ঞথা পুগ্গলস্স সঙ্করো সিযাতি দস্সেন্তো ‘‘যদি চা’’তিআদিমাহ.

সত্তক্খত্তুপরমকথাৰণ্ণনা নিট্ঠিতা.

দ্ৰাদসমৰগ্গৰণ্ণনা নিট্ঠিতা.

১৩. তেরসমৰগ্গো

১. কপ্পট্ঠকথাৰণ্ণনা

৬৫৪-৬৫৭. ‘‘হেট্ঠা ¶ ৰুত্তাধিপ্পাযমেৰা’’তি ইদং ইদ্ধিবলকথাযং যং ৰুত্তং ‘‘অতীতং অনাগতন্তি ইদং অৰিসেসেন কপ্পং তিট্ঠেয্যাতি পটিঞ্ঞাতত্তা চোদেতী’’তিআদি, তং সন্ধায ৰুত্তন্তি আহ ‘‘হেট্ঠাতি ইদ্ধিবলকথায’’ন্তি. তত্থ ‘‘দ্ৰে কপ্পে’’তিআদিআযুপরিচ্ছেদাতিক্কমসমত্থতাচোদনাৰসেন আগতা, ইধ পন সঙ্ঘভেদকো আযুকপ্পমেৰ অট্ঠত্ৰা যদি একং মহাকপ্পং তিট্ঠেয্য, যথা একং, এৰং অনেকেপি কপ্পে তিট্ঠেয্যাতি চোদনা কাতব্বা.

কপ্পট্ঠকথাৰণ্ণনা নিট্ঠিতা.

৪. নিযতস্সনিযামকথাৰণ্ণনা

৬৬৩-৬৬৪. অপ্পত্তনিযামানন্তি ¶ যে অনুপ্পন্নমিচ্ছত্তসম্মত্তনিযতধম্মা পুগ্গলা, তেসং ধম্মে. কে পন তে? যথাৰুত্তপুগ্গলসন্তানপরিযাপন্না ধম্মা. তে হি ভূমিত্তযপরিযাপন্নতায ‘‘তেভূমকা’’তি ৰুত্তা. যে পন পত্তনিযামানং সন্তানে পৰত্তা অনিযতধম্মা, ন তেসমেত্থ সঙ্গহো কতো. ন হি তেহি সমন্নাগমেন অনিযততা অত্থি. তেনেৰাহ ‘‘তেহি সমন্নাগতোপি অনিযতোযেৰা’’তি. ইমং ৰোহারমত্তন্তি ইমিনা নিযামো নাম কোচি ধম্মো নত্থি, উপচিতসম্ভারতায অভিসম্বুজ্ঝিতুং ভব্বতাৰ তথা ৰুচ্চতীতি দস্সেতি. নিযতোতি ৰচনস্স কারণভাৰেন ৰুত্তোতি যোজনা. উভযস্সপীতি নিযতো নিযামং ওক্কমতীতি ৰচনদ্ৰযস্স.

নিযতস্সনিযামকথাৰণ্ণনা নিট্ঠিতা.

৮. অসাতরাগকথাৰণ্ণনা

৬৭৪. এৰং পৰত্তমানোতি ‘‘অহো ৰত মে ভৰেয্যা’’তি এৰং পত্থনাকারেন পৰত্তমানো. অঞ্ঞথাতি নন্দনাদিআকারেন.

অসাতরাগকথাৰণ্ণনা নিট্ঠিতা.

৯. ধম্মতণ্হাঅব্যাকতাতিকথাৰণ্ণনা

৬৭৬-৬৮০. গহেত্ৰাতি ¶ এতেন গহণমত্তমেৰ তং, ন পন সা তাদিসী অত্থীতি দস্সেতি. ন হি লোকুত্তরারম্মণা অব্যাকতা ৰা তণ্হা অত্থীতি. তীহি কোট্ঠাসেহীতি কামভৰৰিভৰতণ্হাকোট্ঠাসেহি. রূপতণ্হাদিভেদা ছপি তণ্হা.

ধম্মতণ্হাঅব্যাকতাতিকথাৰণ্ণনা নিট্ঠিতা.

তেরসমৰগ্গৰণ্ণনা নিট্ঠিতা.

১৪. চুদ্দসমৰগ্গো

১. কুসলাকুসলপটিসন্দহনকথাৰণ্ণনা

৬৮৬-৬৯০. অনন্তরপচ্চযভাৰোযেৰেত্থ ¶ পটিসন্ধানং ঘটনঞ্চাতি আহ ‘‘অনন্তরং উপ্পাদেতী’’তি.

কুসলাকুসলপটিসন্দহনকথাৰণ্ণনা নিট্ঠিতা.

২. সল়াযতনুপ্পত্তিকথাৰণ্ণনা

৬৯১-৬৯২. কেচি ৰাদিনোতি কাপিলে সন্ধাযাহ. তে হি অভিব্যত্তৰাদিনো ৰিজ্জমানমেৰ কারণে ফলং অনভিব্যত্তং হুত্ৰা ঠিতং পচ্ছা অভিব্যত্তিং গচ্ছতীতি ৰদন্তা বীজাৰত্থায ৰিজ্জমানাপি রুক্খাদীনং ন অঙ্কুরাদযো আৰিভৰন্তি, বীজমত্তং আৰিভাৰং গচ্ছতীতি কথেন্তি.

সল়াযতনুপ্পত্তিকথাৰণ্ণনা নিট্ঠিতা.

৩. অনন্তরপচ্চযকথাৰণ্ণনা

৬৯৩-৬৯৭. অনন্তরুপ্পত্তিং সল্লক্খেন্তোতি চক্খুৰিঞ্ঞাণানন্তরং সোতৰিঞ্ঞাণুপ্পত্তিং মঞ্ঞমানো. সোতৰিঞ্ঞাণন্তি ৰচনেনেৰ তস্স চক্খুসন্নিস্সযতা ¶ রূপারম্মণতা চ পটিক্খিত্তা, পটিঞ্ঞাতা চ সোতসন্নিস্সযতা সদ্দারম্মণতা চাতি আহ ‘‘ন সো চক্খুম্হি সদ্দারম্মণ’’ন্তি. তত্থ সদ্দারম্মণন্তি ‘‘সোতৰিঞ্ঞাণং ইচ্ছতী’’তি আনেত্ৰা সম্বন্ধিতব্বং. তযিদং চক্খুৰিঞ্ঞাণস্স অনন্তরং সোতৰিঞ্ঞাণং উপ্পজ্জতীতি লদ্ধিযা এৰং ঞাযতীতি আহ ‘‘অনন্তরূপলদ্ধিৰসেন আপন্নত্তা’’তি.

অনন্তরপচ্চযকথাৰণ্ণনা নিট্ঠিতা.

৪. অরিযরূপকথাৰণ্ণনা

৬৯৮-৬৯৯. সম্মাৰাচাদীতি ¶ সম্মাৰাচাকম্মন্তা. তত্থ সম্মাৰাচা সদ্দসভাৰা, ইতরো চ কাযৰিঞ্ঞত্তিসভাৰো, উভযম্পি ৰা ৰিঞ্ঞত্তীতি অধিপ্পাযেন রূপন্তিস্স লদ্ধি.

অরিযরূপকথাৰণ্ণনা নিট্ঠিতা.

৫. অঞ্ঞোঅনুসযোতিকথাৰণ্ণনা

৭০০-৭০১. তস্মিং সমযেতি কুসলাব্যাকতচিত্তক্খণে. সো হীতি পচ্ছিমপাঠো.

অঞ্ঞোঅনুসযোতিকথাৰণ্ণনা নিট্ঠিতা.

৬. পরিযুট্ঠানংচিত্তৰিপ্পযুত্তন্তিকথাৰণ্ণনা

৭০২. তেতি রাগাদযো. তস্মাতি যস্মা ৰিপস্সন্তস্সপি রাগাদযো উপ্পজ্জন্তি, তস্মা.

পরিযুট্ঠানংচিত্তৰিপ্পযুত্তন্তিকথাৰণ্ণনা নিট্ঠিতা.

৭. পরিযাপন্নকথাৰণ্ণনা

৭০৩-৭০৫. কিলেসৰত্থুওকাসৰসেনাতি ¶ কিলেসকামৰত্থুকামভূমিৰসেন. রূপধাতুসহগতৰসেন অনুসেতীতি কামরাগো যথা কামৰিতক্কসঙ্খাতায কামধাতুযা সহ পচ্চযসমৰাযে ¶ উপ্পজ্জনারহো, তমেৰ রূপধাতুযাপীতি অত্থো. রাগাদিকারণলাভে উপ্পত্তিঅরহতা হি অনুসযনং.

পরিযাপন্নকথাৰণ্ণনা নিট্ঠিতা.

৮. অব্যাকতকথাৰণ্ণনা

৭০৬-৬০৮. সব্বথাপীতি অৰিপাকভাৰেনপি সস্সতাদিভাৰেনপি.

অব্যাকতকথাৰণ্ণনা নিট্ঠিতা.

৯. অপরিযাপন্নকথাৰণ্ণনা

৭০৯-৭১০. তস্মা দিট্ঠি লোকিযপরিযাপন্না ন হোতীতি অত্থং ৰদন্তি, এৰং সতি অতিপ্পসঙ্গো হোতি ৰীতদোসাদিৰোহারভাৰতোতি. ততো অঞ্ঞথা অত্থং ৰদন্তো ‘‘রূপদিট্ঠিযা’’তিআদিমাহ. তত্থ আদি-সদ্দেন অরূপদিট্ঠিআদিং সঙ্গণ্হাতি. পরৰাদিঅধিপ্পাযৰসেন অযমত্থৰিভাৰনাতি আহ ‘‘যদি চ পরিযাপন্না সিযা’’তি. তথা চ সতীতি দিট্ঠিযা কামধাতুপরিযাপন্নত্তে সতীতি অত্থো. তস্মাতি ‘‘ৰীতদিট্ঠিকো’’তি এৰং ৰোহারাভাৰতো. ন হি সা তস্স অৰিগতা দিট্ঠি, যতো সো ৰীতদিট্ঠিকোতি ন ৰুচ্চতি. যেনাতি কামদিট্ঠিভাৰেন.

অপরিযাপন্নকথাৰণ্ণনা নিট্ঠিতা.

চুদ্দসমৰগ্গৰণ্ণনা নিট্ঠিতা.

১৫. পন্নরসমৰগ্গো

১. পচ্চযতাকথাৰণ্ণনা

৭১১-৭১৭. ৰৰত্থিতোতি ¶ ¶ অসংকিণ্ণো. যো হি ধম্মো যেন পচ্চযভাৰেন পচ্চযো হোতি, তস্স ততো অঞ্ঞেনপি পচ্চযভাৰে সতি পচ্চযতা সংকিণ্ণা নাম ভৰেয্য. ৰিরুদ্ধাসম্ভৰীনং ৰিয তব্বিধুরানং পচ্চযভাৰানং সহভাৰং পটিক্খিপতি.

পচ্চযতাকথাৰণ্ণনা নিট্ঠিতা.

২. অঞ্ঞমঞ্ঞপচ্চযকথাৰণ্ণনা

৭১৮-৭১৯. সহজাতাতি ৰুত্তত্তা ন সঙ্খারপচ্চযা চ অৰিজ্জাতি ৰুত্তত্তাতি অধিপ্পাযো. অনন্তরাদিনাপি হি সঙ্খারা অৰিজ্জায পচ্চযা হোন্তিযেৰ. অঞ্ঞমঞ্ঞানন্তরং অৰত্ৰা অৰিগতানন্তরং সম্পযুত্তস্স ৰচনং কমভেদো, অত্থিগ্গহণেনেৰ গহিতো অত্থিপচ্চযভূতোযেৰ ধম্মো নিস্সযপচ্চযো হোতীতি. অসাধারণতাযাতি পদন্তরাসাধারণতায. তেনাহ ‘‘ৰক্খতি হী’’তিআদি.

অঞ্ঞমঞ্ঞপচ্চযকথাৰণ্ণনা নিট্ঠিতা.

৯. ততিযসঞ্ঞাৰেদযিতকথাৰণ্ণনা

৭৩২. যদিপি সেসং নাম গহিততো অঞ্ঞং, তথাপি পকরণপরিচ্ছিন্নমেৰেত্থ তং গয্হতীতি দস্সেন্তো ‘‘যেসং…পে… অধিপ্পাযো’’তি ৰত্ৰা পুন অনৰসেসমেৰ সঙ্গণ্হন্তো ‘‘অসঞ্ঞসত্তানম্পি ¶ চা’’তিআদিমাহ. তত্থ সব্বসত্তে সন্ধাযাতি অধিপ্পাযোতি যোজনা. পাণিসম্ফস্সাপি কমন্তীতিআদিকং সরীরপকতীতি সম্বন্ধো.

৭৩৩-৭৩৪. পঞ্চহি ৰিঞ্ঞাণেহি ন চৰতি, ন উপপজ্জতীতি ৰাদং পরৰাদী নানুজানাতীতি আহ ‘‘সুত্ত…পে… ৰত্তব্ব’’ন্তি.

ততিযসঞ্ঞাৰেদযিতকথাৰণ্ণনা নিট্ঠিতা.

১০. অসঞ্ঞসত্তুপিকাকথাৰণ্ণনা

৭৩৫. যথা ¶ ৰিতক্কৰিচারপীতিসুখৰিরাগৰসেন পৰত্তা সমাপত্তি ৰিতক্কাদিরহিতা হোতি, এৰং সঞ্ঞাৰিরাগৰসেন পৰত্তাপি সঞ্ঞারহিতাৰ সিযাতি তস্স লদ্ধীতি দস্সেন্তো আহ ‘‘সাপি অসঞ্ঞিতা…পে… দস্সেতী’’তি.

৭৩৬. যদি চতুত্থজ্ঝানসমাপত্তি কথং অসঞ্ঞসমাপত্তীতি চোদনং সন্ধাযাহ ‘‘সঞ্ঞাৰিরাগৰসেন সমাপন্নত্তা অসঞ্ঞিতা, ন সঞ্ঞায অভাৰতো’’তি.

অসঞ্ঞসত্তুপিকাকথাৰণ্ণনা নিট্ঠিতা.

১১. কম্মূপচযকথাৰণ্ণনা

৭৩৮-৭৩৯. ‘‘কম্মূপচযো কম্মেন সহজাতো’’তি পুট্ঠো সম্পযুত্তসহজাততং সন্ধায পটিক্খিপতি, ৰিপ্পযুত্তসহজাততং সন্ধায পটিজানাতীতি. ৰিপ্পযুত্তস্সপি হি অত্থি সহজাততা চিত্তসমুট্ঠানরূপস্স ৰিযাতি অধিপ্পাযো.

৭৪১. তিণ্ণন্তি ¶ কম্মকম্মূপচযকম্মৰিপাকানং.

কম্মূপচযকথাৰণ্ণনা নিট্ঠিতা.

পন্নরসমৰগ্গৰণ্ণনা নিট্ঠিতা.

ততিযো পণ্ণাসকো সমত্তো.

১৬. সোল়সমৰগ্গো

৩. সুখানুপ্পদানকথাৰণ্ণনা

৭৪৭-৭৪৮. ন তস্সাতি যস্স তং অনুপ্পদিস্সতি, ন তস্স. যো হি অনুপ্পদেতি, যস্স চ অনুপ্পদেতি, তদুভযৰিনিমুত্তা ইধ পরেতি অধিপ্পেতা.

সুখানুপ্পদানকথাৰণ্ণনা নিট্ঠিতা.

৪. অধিগয্হমনসিকারকথাৰণ্ণনা

৭৪৯-৭৫৩. তংচিত্ততাযাতি ¶ এত্থ মনসিকরোন্তো যদি সব্বসঙ্খারে একতো মনসি করোতি, যেন চিত্তেন মনসি করোতি, সব্বসঙ্খারন্তোগধত্তা তস্মিংযেৰ খণে তং চিত্তং মনসি কাতব্বং এতস্সাতি তংচিত্ততা নাম দোসো আপজ্জতীতি দস্সেন্তো আহ ‘‘তদেৰ আরম্মণভূত’’ন্তিআদি. এতেন তস্সেৰ তেন মনসিকরণাসম্ভৰমাহ, তং ৰাতিআদিনা পন সসংৰেদনাৰাদাপত্তিন্তি অযমেতেসং ৰিসেসো.

অধিগয্হমনসিকারকথাৰণ্ণনা নিট্ঠিতা.

সোল়সমৰগ্গৰণ্ণনা নিট্ঠিতা.

১৭. সত্তরসমৰগ্গো

১. অত্থিঅরহতোপুঞ্ঞূপচযকথাৰণ্ণনা

৭৭৬-৭৭৯. কিরিযচিত্তং ¶ অব্যাকতং অনাদিযিত্ৰাতি ‘‘কিরিযচিত্তং অব্যাকত’’ন্তি অগ্গহেত্ৰা, দানাদিপৰত্তনেন দানমযাদিপুঞ্ঞত্তেন চ গহেত্ৰাতি অত্থো.

অত্থিঅরহতোপুঞ্ঞূপচযকথাৰণ্ণনা নিট্ঠিতা.

২. নত্থিঅরহতোঅকালমচ্চূতিকথাৰণ্ণনা

৭৮০. অলদ্ধৰিপাকৰারানন্তি ৰিপাকদানং পতি অলদ্ধোকাসানং. ব্যন্তীভাৰন্তি ৰিগতন্ততং, ৰিগমং অৰিপাকন্তি অত্থো.

৭৮১. ততো পরন্তি ব্যতিরেকেন অত্থসিদ্ধি, ন কেৰলেন অন্ৰযেনাতি আহ ‘‘তাৰ ন কমতি, ততো পরং কমতীতি লদ্ধিযা পটিক্খিপতী’’তি. তত্থ ততো পরন্তি পুব্বে কতস্স কম্মস্স পরিক্খযগমনতো পরং. নত্থি পাণাতিপাতো পাণাতিপাতলক্খণাভাৰতোতি অধিপ্পাযো. তমেৰ লক্খণাভাৰং দস্সেতুং ‘‘পাণোপাণসঞ্ঞিতা’’তিআদি ৰুত্তং. তত্থ ন তেনাতি যো পরেন উপক্কমো কতো ¶ , তেন উপক্কমেন ন মতো, ধম্মতামরণেনেৰ মতোতি দুব্বিঞ্ঞেয্যং অৰিসেসৰিদূহি, দুব্বিঞ্ঞেয্যং ৰা হোতু সুৰিঞ্ঞেয্যং ৰা, অঙ্গপারিপূরিযাৰ পাণাতিপাতো.

নত্থিঅরহতোঅকালমচ্চূতিকথাৰণ্ণনা নিট্ঠিতা.

৩. সব্বমিদংকম্মতোতিকথাৰণ্ণনা

৭৮৪. অবীজতোতি ¶ সব্বেন সব্বং অবীজতো অঞ্ঞবীজতো চ. তন্তি দেয্যধম্মং, গিলানপচ্চযন্তি অত্থো.

সব্বমিদংকম্মতোতিকথাৰণ্ণনা নিট্ঠিতা.

৪. ইন্দ্রিযবদ্ধকথাৰণ্ণনা

৭৮৮. ৰিনাপি অনিচ্চট্ঠেনাতি অনিচ্চট্ঠং ঠপেত্ৰাপি অট্ঠপেত্ৰাপীতি অত্থো, ন অনিচ্চট্ঠৰিরহেনাতি. ন হি অনিচ্চট্ঠৰিরহিতং অনিন্দ্রিযবদ্ধং অত্থি.

ইন্দ্রিযবদ্ধকথাৰণ্ণনা নিট্ঠিতা.

৭. নৰত্তব্বংসঙ্ঘোদক্খিণংৰিসোধেতীতিকথাৰণ্ণনা

৭৯৩-৭৯৪. অপ্পটিগ্গহণতোতি পটিগ্গাহকত্তাভাৰতো.

নৰত্তব্বংসঙ্ঘোদক্খিণংৰিসোধেতীতিকথাৰণ্ণনা নিট্ঠিতা.

১১. দক্খিণাৰিসুদ্ধিকথাৰণ্ণনা

৮০০-৮০১. পটিগ্গাহকনিরপেক্খাতি পটিগ্গাহকস্স গুণৰিসেসনিরপেক্খা, তস্স দক্খিণেয্যভাৰেন ৰিনাতি অত্থো. তেনাহ ‘‘পটিগ্গাহকেন ¶ পচ্চযভূতেন ৰিনা’’তি. সচ্চমেতন্তি ¶ লদ্ধিকিত্তনেন ৰুত্তভাৰমেৰ পটিজানাতি. পটিগ্গাহকস্স ৰিপাকনিব্বত্তনং দানচেতনায মহাফলতা. পচ্চযভাৰোযেৰ হি তস্স, ন তস্সা কারণত্তং. তেনাহ ‘‘দানচেতনানিব্বত্তনেন যদি ভৰেয্যা’’তিআদি.

দক্খিণাৰিসুদ্ধিকথাৰণ্ণনা নিট্ঠিতা.

সত্তরসমৰগ্গৰণ্ণনা নিট্ঠিতা.

১৮. অট্ঠারসমৰগ্গো

১. মনুস্সলোককথাৰণ্ণনা

৮০২-৮০৩. গহণন্তি মিচ্ছাগহণং.

মনুস্সলোককথাৰণ্ণনা নিট্ঠিতা.

২. ধম্মদেসনাকথাৰণ্ণনা

৮০৪-৮০৬. তস্স চ নিম্মিতবুদ্ধস্স দেসনং সম্পটিচ্ছিত্ৰা আযস্মতা আনন্দেন সযমেৰ চ দেসিতো.

ধম্মদেসনাকথাৰণ্ণনা নিট্ঠিতা.

৬. ঝানসঙ্কন্তিকথাৰণ্ণনা

৮১৩-৮১৬. ৰিতক্কৰিচারেসু ৰিরত্তচিত্ততা তত্থ আদীনৰমনসিকারো, তদাকারো চ দুতিযজ্ঝানূপচারোতি আহ ‘‘ৰিতক্কৰিচারা আদীনৰতো মনসি কাতব্বা, ততো দুতিযজ্ঝানেন ভৰিতব্ব’’ন্তি.

ঝানসঙ্কন্তিকথাৰণ্ণনা নিট্ঠিতা.

৭. ঝানন্তরিককথাৰণ্ণনা

৮১৭-৮১৯. ন ¶ ¶ পঠমজ্ঝানং ৰিতক্কাভাৰতো, নাপি দুতিযজ্ঝানং ৰিচারসব্ভাৰতোতি ঝানমেতং ন হোতীতি দস্সেন্তো আহ ‘‘পঠমজ্ঝানাদীসু অঞ্ঞতরভাৰাভাৰতো ন ঝান’’ন্তি.

ঝানন্তরিককথাৰণ্ণনা নিট্ঠিতা.

৯. চক্খুনারূপংপস্সতীতিকথাৰণ্ণনা

৮২৬-৮২৭. ‘‘চক্খুনা রূপং দিস্ৰা’’তি ইমিনা চক্খুৰিঞ্ঞাণেন পটিজাননস্স অগ্গহণে অরুচিং সূচেন্তো আহ ‘‘মনোৰিঞ্ঞাণপটিজাননং কির সন্ধাযা’’তি. তেনেৰাহ ‘‘মনোৰিঞ্ঞাণপটিজাননং পনা’’তিআদি. তস্মাতি মনোৰিঞ্ঞাণপটিজাননস্সেৰ অধিপ্পেতত্তাতি অত্থো. এৰং সন্তেতি যদি রূপেন রূপং পটিৰিজানাতি, রূপং পটিৰিজানন্তম্পি মনোৰিঞ্ঞাণং রূপৰিজাননং হোতি, ন রূপদস্সনন্তি আহ ‘‘মনোৰিঞ্ঞাণপটিজাননং পন রূপদস্সনং কথং হোতী’’তি.

চক্খুনারূপংপস্সতীতিকথাৰণ্ণনা নিট্ঠিতা.

অট্ঠারসমৰগ্গৰণ্ণনা নিট্ঠিতা.

১৯. একূনৰীসতিমৰগ্গো

১. কিলেসপজহনকথাৰণ্ণনা

৮২৮-৮৩১. তে পনাতি যে অরিযমগ্গেন পহীনা কিলেসা, তে পন. কামঞ্চেত্থ মগ্গেন পহাতব্বকিলেসা মগ্গভাৰনায অসতি উপ্পজ্জনারহা খণত্তযং ন আগতাতি চ অনাগতা নাম ¶ সিযুং, যস্মা পন তে ন উপ্পজ্জিস্সন্তি, তস্মা তথা ন ৰুচ্চন্তীতি দট্ঠব্বং. তেনেৰাহ ‘‘নাপি ভৰিস্সন্তী’’তি.

কিলেসপজহনকথাৰণ্ণনা নিট্ঠিতা.

২. সুঞ্ঞতকথাৰণ্ণনা

৮৩২. যেন ¶ অৰসৰত্তনট্ঠেন পরপরিকপ্পিতো নত্থি এতেসং অত্তনো ৰিসযন্তি অনত্তাতি ৰুচ্চন্তি সভাৰধম্মা, স্ৰাযং অনত্ততাতি আহ ‘‘অৰসৰত্তনাকারো অনত্ততা’’তি. সা পনাযং যস্মা অত্থতো অসারকতাৰ হোতি, তস্মা তদেকদেসেন তং দস্সেতুং ‘‘অত্থতো জরামরণমেৰা’’তি আহ. এৰং সতি লক্খণসঙ্করো সিযা, তেসং পনিদং অধিপ্পাযকিত্তনন্তি দট্ঠব্বং. অরূপধম্মানং অৰসৰত্তনাকারতায এৰ হি অনত্তলক্খণস্স সঙ্খারক্খন্ধপরিযাপন্নতা.

সুঞ্ঞতকথাৰণ্ণনা নিট্ঠিতা.

৩. সামঞ্ঞফলকথাৰণ্ণনা

৮৩৫-৮৩৬. পত্তিধম্মন্তি হেট্ঠা ৰুত্তং সমন্নাগমমাহ.

সামঞ্ঞফলকথাৰণ্ণনা নিট্ঠিতা.

৫. তথতাকথাৰণ্ণনা

৮৪১-৮৪৩. রূপাদীনং সভাৰতাতি এতেন রূপাদযো এৰ সভাৰতাতি ইমমত্থং পটিক্খিপতি ¶ . যতো তং পরৰাদী রূপাদীসু অপরিযাপন্নং ইচ্ছতি. তেনাহ ‘‘ভাৰং হেস তথতাতি ৰদতি, ন ভাৰযোগ’’ন্তি. তত্থ ভাৰন্তি ধম্মমত্তং, পকতীতি অত্থো ‘‘জাতিধম্ম’’ন্তিআদীসু ৰিয. রূপাদীনঞ্হি রুপ্পনাদিপকতি তথা অসঙ্খতাতি চ পরৰাদিনো লদ্ধি. তেন ৰুত্তং ‘‘ন ভাৰযোগ’’ন্তি. যেন হি ভাৰো সভাৰধম্মো যুজ্জতি, একীভাৰমেৰ গচ্ছতি, তং রুপ্পনাদিলক্খণং ভাৰযোগো. তং পন রূপাদিতো অনঞ্ঞং, ততো এৰ সঙ্খতং, অৰিপরীতট্ঠেন পন ‘‘তথ’’ন্তি ৰুচ্চতি.

তথতাকথাৰণ্ণনা নিট্ঠিতা.

৬. কুসলকথাৰণ্ণনা

৮৪৪-৮৪৬. অনৰজ্জভাৰমত্তেনেৰ ¶ কুসলন্তি যোজনা. তস্মাতি যস্মা অৰজ্জরহিতং অনৰজ্জং, অনৰজ্জভাৰমত্তেনেৰ চ কুসলং, তস্মা নিব্বানং কুসলন্তি.

কুসলকথাৰণ্ণনা নিট্ঠিতা.

৭. অচ্চন্তনিযামকথাৰণ্ণনা

৮৪৭. যং ‘‘একৰারং নিমুগ্গো তথা নিমুগ্গোৰ হোতি, এতস্স পুন ভৰতো ৰুট্ঠানং নাম নত্থী’’তি অট্ঠকথাযং আগতং, সো পন আচরিযৰাদো, ন অট্ঠকথানযোতি দস্সেন্তো ‘‘তায জাতিযা…পে… মঞ্ঞমানো’’তি আহ. তত্থ তায জাতিযাতি যস্সং জাতিযং পুগ্গলো কম্মাৰরণাদিআৰরণেহি সমন্নাগতো হোতি, তায জাতিযা. সংসারখাণুকভাৰো ৰস্সভঞ্ঞাদীনং ৰিয মক্খলিআদীনং ৰিয চ দট্ঠব্বো. সো চ অহেতুকাদিমিচ্ছাদস্সনস্স ফলভাৰেনেৰ ৰেদিতব্বো, ন অচ্চন্তনিযামস্স নাম কস্সচি অত্থিভাৰতো. যথা হি ৰিমুচ্চন্তস্স কোচি নিযামো নাম নত্থি ঠপেত্ৰা মগ্গেন ভৰপরিচ্ছেদং, এৰং অৰিমুচ্চন্তস্সপি কোচি সংসারনিযামো নাম ¶ নত্থি. তাদিসস্স পন মিচ্ছাদস্সনস্স বলৰভাৰে অপরিমিতকপ্পপরিচ্ছেদে চিরতরং সংসারপ্পবন্ধো হোতি, অপাযূপপত্তি চ যত্থ সংসারখাণুসমঞ্ঞা.

যং পনেকে ৰদন্তি ‘‘অত্থেৰ অচ্চন্তং সংসরিতা অনন্তত্তা সত্তনিকাযস্সা’’তি, তম্পি অপুঞ্ঞবহুলং সত্তসন্তানং সন্ধায ৰুত্তং সিযা. ন হি মাতুঘাতকাদীনং তেনত্তভাৰেন সম্মত্তনিযামোক্কমনন্তরাযভূতো মিচ্ছত্তনিযামো ৰিয সত্তানং ৰিমুত্তন্তরাযকরো সংসারনিযামো নাম নত্থি. যাৰ পন ন মগ্গফলস্স উপনিস্সযো উপলব্ভতি, তাৰ সংসারো অপরিচ্ছিন্নো. যদা চ সো উপলদ্ধো, তদা সো পরিচ্ছিন্নো এৰাতি দট্ঠব্বং.

যথা নিযতসম্মাদস্সনং, এৰং নিযতমিচ্ছাদস্সনেনপি সৰিসযে একংসগাহৰসেন উক্কংসগতেন ভৰিতব্বন্তি তেন সমন্নাগতস্স পুগ্গলস্স সতি অচ্চন্তনিযামে কথং তস্মিং অভিনিৰেসৰিসযে অনেকংসগাহো উপ্পজ্জেয্য, অভিনিৰেসন্তরং ৰা ৰিরুদ্ধং যদি উপ্পজ্জেয্য, অচ্চন্তনিযামো এৰ ন ¶ সিযাতি পাল়িযং ৰিচিকিচ্ছুপ্পত্তিনিযামন্তরুপ্পত্তিচোদনা কতা. ন হি ৰিচিকিচ্ছা ৰিয সম্মত্তনিযতপুগ্গলানং যথাক্কমং মিচ্ছত্তসম্মত্তনিযতপুগ্গলানং সম্মত্তমিচ্ছত্তনিযতা ধম্মা কদাচিপি উপ্পজ্জন্তি, অৰিরুদ্ধং পন নিযামন্তরমেৰ হোতীতি আনন্তরিকন্তরং ৰিয মিচ্ছাদস্সনন্তরং সমানজাতিকং ন নিৰত্তেতীতি ৰিরুদ্ধংযেৰ দস্সেতুং পাল়িযং ৰিচিকিচ্ছা ৰিয সস্সতুচ্ছেদদিট্ঠিযো এৰ উদ্ধটা. এৰমেত্থ ৰিচিকিচ্ছুপ্পত্তিনিযামন্তরুপ্পত্তীনং নিযামন্তরুপ্পত্তিনিৰত্তকভাৰো ৰেদিতব্বো, অচ্চন্তনিযামো চ নিৰত্তিস্সতীতি চ ৰিরুদ্ধমেতন্তি পন ‘‘ৰিচারেত্ৰাৰ গহেতব্বা’’তি ৰুত্তং সিযা.

অচ্চন্তনিযামকথাৰণ্ণনা নিট্ঠিতা.

৮. ইন্দ্রিযকথাৰণ্ণনা

৮৫৩-৮৫৬. যথা লোকুত্তরা সদ্ধাদযো এৰ সদ্ধিন্দ্রিযাদীনি, এৰং লোকিযাপি. কস্মা ¶ ? তত্থাপি অধিমোক্খলক্খণাদিনা ইন্দট্ঠসব্ভাৰতো. সদ্ধেয্যাদিৰত্থূসু সদ্দহনাদিমত্তমেৰ হি তন্তি ইমমত্থং দস্সেন্তো আহ ‘‘লোকুত্তরানং…পে… দট্ঠব্বো’’তি.

ইন্দ্রিযকথাৰণ্ণনা নিট্ঠিতা.

একূনৰীসতিমৰগ্গৰণ্ণনা নিট্ঠিতা.

২০. ৰীসতিমৰগ্গো

২. ঞাণকথাৰণ্ণনা

৮৬৩-৮৬৫. কামং পুব্বভাগেপি অত্থেৰ দুক্খপরিঞ্ঞা, অত্থসাধিকা পন সা মগ্গক্খণিকা এৰাতি উক্কংসগতং দুক্খপরিঞ্ঞং সন্ধায অৰধারেন্তো আহ ‘‘দুক্খং…পে… মগ্গঞাণমেৰ দীপেতী’’তি. তং পন অৰধারণং ন ঞাণন্তরনিৰত্তনং, অথ খো ঞাণন্তরস্স যথাধিগতকিচ্চনিৰত্তনং দট্ঠব্বং. তেনাহ ‘‘ন তস্সেৰ ঞাণভাৰ’’ন্তিআদি.

ঞাণকথাৰণ্ণনা নিট্ঠিতা.

৩. নিরযপালকথাৰণ্ণনা

৮৬৬-৮৬৮. নেরযিকে ¶ নিরযে পালেন্তি, ততো নিগ্গন্তুং অপ্পদানৰসেন রক্খন্তীতি নিরযপালা. নিরযপালতায ৰা নেরযিকানং নরকদুক্খেন পরিযোনদ্ধায অলং সমত্থাতি নিরযপালা. কিং পনেতে নিরযপালা নেরযিকা, উদাহু অনেরযিকাতি. কিঞ্চেত্থ – যদি তাৰ নেরযিকা, নিরযসংৰত্তনিযেন কম্মেন নিব্বত্তাতি সযম্পি নিরযদুক্খং পচ্চনুভৰেয্যুং, তথা সতি অঞ্ঞেসং নেরযিকানং যাতনায অসমত্থা সিযুং, ‘‘ইমে নেরযিকা, ইমে নিরযপালা’’তি ৰৰত্থানঞ্চ ন সিযা. যে চ যে যাতেন্তি, তেহি সমানরূপবলপ্পমাণেহি ইতরেসং ভযসন্তাসা ন ¶ সিযুং. অথ অনেরযিকা, তেসং তত্থ কথং সম্ভৰোতি? ৰুচ্চতে – অনেরযিকা নিরযপালা অনিরযগতিসংৰত্তনিযকম্মনিব্বত্তা. নিরযূপপত্তিসংৰত্তনিযকম্মতো হি অঞ্ঞেনেৰ কম্মুনা তে নিব্বত্তন্তি রক্খসজাতিকত্তা. তথা হি ৰদন্তি –

‘‘কোধনা কুরূরকম্মন্তা, পাপাভিরুচিনো তথা;

দুক্খিতেসু চ নন্দন্তি, জাযন্তি যমরক্খসা’’তি.

তত্থ যদেকে ৰদন্তি ‘‘যাতনাদুক্খস্স অপ্পটিসংৰেদনতো, অঞ্ঞথা পুন অঞ্ঞমঞ্ঞং যাতেয্যু’’ন্তি চ এৰমাদি, তযিদং আকাসরোমট্ঠনং নিরযপালানং নেরযিকভাৰস্সেৰ অভাৰতো. যে পন ৰদেয্যুং – যদিপি অনেরযিকা নিরযপালা, অযোমযায পন আদিত্তায সম্পজ্জলিতায সজোতিভূতায নিরযভূমিযা পরিৰত্তমানা কথং নাম দুক্খং নানুভৰন্তীতি? কম্মানুভাৰতো. যথা হি ইদ্ধিমন্তো চেতোৰসিপ্পত্তা মহামোগ্গল্লানাদযো নেরযিকে অনুকম্পন্তা ইদ্ধিবলেন নিরযভূমিং উপগতা তত্থ দাহদুক্খেন ন বাধীযন্তি, এৰং সম্পদমিদং দট্ঠব্বং.

তং ইদ্ধিৰিসযস্স অচিন্তেয্যভাৰতোতি চে? ইদম্পি তংসমানং কম্মৰিপাকস্স অচিন্তেয্যভাৰতো. তথারূপেন হি কম্মুনা তে নিব্বত্তা যথা নিরযদুক্খেন অবাধিতা এৰ হুত্ৰা নেরযিকে যাতেন্তি, ন চেত্তকেন বাহিরৰিসযাভাৰো ৰিজ্জতি ইট্ঠানিট্ঠতায পচ্চেকং দ্ৰারপুরিসেসু ৰিভত্তসভাৰত্তা. তথা হি একচ্চস্স দ্ৰারস্স পুরিসস্স ইট্ঠং ¶ একচ্চস্স অনিট্ঠং, একচ্চস্স চ অনিট্ঠং একচ্চস্স ইট্ঠং হোতি. এৰঞ্চ কত্ৰা যদেকে ৰদন্তি ‘‘নত্থি কম্মৰসেন তেজসা পরূপতাপন’’ন্তিআদি, তদপাহতং হোতি. যং পন ৰদন্তি ‘‘অনেরযিকানং তেসং কথং তত্থ সম্ভৰো’’তি নেরযিকানং যাতকভাৰতো. নেরযিকসত্তযাতনাযোগ্গঞ্হি অত্তভাৰং নিব্বত্তেন্তং কম্মং তাদিসনিকন্তিৰিনামিতং নিরযট্ঠানেযেৰ নিব্বত্তেতি. তে চ নেরযিকেহি অধিকতরবলারোহপরিণাহা অতিৰিয ভযানকসন্তাসকুরূরতরপযোগা চ হোন্তি. এতেনেৰ তত্থ কাকসুনখাদীনম্পি নিব্বত্তি সংৰণ্ণিতাতি দট্ঠব্বং.

কথমঞ্ঞগতিকেহি অঞ্ঞগতিকবাধনন্তি চ ন ৰত্তব্বং অঞ্ঞত্থাপি তথা দস্সনতো. যং পনেকে ৰদন্তি ‘‘অসত্তসভাৰা নিরযপালা নিরযসুনখাদযো চা’’তি, তং তেসং মতিমত্তং অঞ্ঞত্থ ¶ তথা অদস্সনতো. ন হি কাচি অত্থি তাদিসী ধম্মপ্পৰত্তি, যা অসত্তসভাৰা, সম্পতিসত্তেহি অপ্পযোজিতা চ অত্থকিচ্চং সাধেন্তী দিট্ঠপুব্বা. পেতানং পানীযনিৰারকানং দণ্ডাদিহত্থপুরিসানম্পি অসত্তভাৰে ৰিসেসকারণং নত্থি. সুপিনূপঘাতোপি অত্থকিচ্চসমত্থতায অপ্পমাণং দস্সনাদিমত্তেনপি তদত্থসিদ্ধিতো. তথা হি সুপিনে আহারূপভোগাদিনা ন অত্থসিদ্ধি অত্থি, নিম্মানরূপং পনেত্থ লদ্ধপরিহারং ইদ্ধিৰিসযস্স অচিন্তেয্যভাৰতো. ইধাপি কম্মৰিপাকস্স অচিন্তেয্যভাৰতোতি চে? তং ন, অসিদ্ধত্তা. নেরযিকানং কম্মৰিপাকো নিরযপালাতি অসিদ্ধমেতং, ৰুত্তনযেন পন নেসং সত্তভাৰো এৰ সিদ্ধো. সক্কা হি ৰত্তুং সত্তসঙ্খাতা নিরযপালসঞ্ঞিতা ধম্মপ্পৰত্তি সাভিসন্ধিকা পরূপঘাতি অত্থকিচ্চসব্ভাৰতো ওজাহারাদিরক্খসসন্ততি ৰিযাতি. অভিসন্ধিপুব্বকতা চেত্থ ন সক্কা পটিক্খিপিতুং তথা তথা অভিসন্ধিযা যাতনতো, ততো এৰ ন সঙ্ঘাটপব্বতাদীহি অনেকন্তিকতা. যে পন ৰদন্তি ‘‘ভূতৰিসেসা এৰ তে ৰণ্ণসণ্ঠানাদিৰিসেসৰন্তো ভেরৰাকারা নরকপালাতি সমঞ্ঞং লভন্তী’’তি, তদসিদ্ধং. উজুকমেৰ পাল়িযং ‘‘অত্থি নিরযে নিরযপালা’’তি ৰাদস্স পতিট্ঠাপিতত্তা.

অপিচ যথা অরিযৰিনযে নরকপালানং ভূতমত্ততা অসিদ্ধা, তথা পঞ্ঞত্তিমত্তৰাদিনোপি তেসং ভূতমত্ততা অসিদ্ধাৰ. ন হি তস্স ভূতানি নাম সন্তি. যদি পরমত্থং গহেত্ৰা ৰোহরতি, অথ কস্মা ৰেদনাদিকে ¶ এৰ পটিক্খিপতীতি? তিট্ঠতেসা অনৰট্ঠিততক্কানং অপ্পহীনসম্মোহৰিপল্লাসানং ৰাদৰীমংসা, এৰং অত্থেৰ নিরযপালাতি নিট্ঠমেত্থ গন্তব্বং. সতি চ নেসং সব্ভাৰে, অসতিপি বাহিরে ৰিসযে নরকে ৰিয দেসাদিনিযমো হোতীতি ৰাদো ন সিজ্ঝতি এৰাতি দট্ঠব্বং.

নিরযপালকথাৰণ্ণনা নিট্ঠিতা.

৪. তিরচ্ছানকথাৰণ্ণনা

৮৬৯-৮৭১. তস্সাতি এরাৰণনামকস্স দেৰপুত্তস্স. তহিং কীল়নকালে হত্থিৰণ্ণেন ৰিকুব্বনং ¶ সন্ধায ‘‘হত্থিনাগস্সা’’তি ৰুত্তং. দিব্বযানস্সাতি এত্থাপি এসেৰ নযো. ন হি একন্তসুখপ্পচ্চযট্ঠানে সগ্গে দুক্খাধিট্ঠানস্স অকুসলকম্মসমুট্ঠানস্স অত্তভাৰস্স সম্ভৰো যুত্তো. তেনাহ ‘‘ন তিরচ্ছানগতস্সা’’তি.

তিরচ্ছানকথাৰণ্ণনা নিট্ঠিতা.

৬. ঞাণকথাৰণ্ণনা

৮৭৬-৮৭৭. ‘‘দ্ৰাদসৰত্থুকং ঞাণং লোকুত্তর’’ন্তি এত্থ দ্ৰাদসৰত্থুকস্স ঞাণস্স লোকুত্তরতা পতিট্ঠাপীযতীতি দস্সেন্তো পঠমৰিকপ্পং ৰত্ৰা পুন লোকুত্তরঞাণস্স দ্ৰাদসৰত্থুকতা পতিট্ঠাপীযতীতি দস্সেতুং ‘‘তং ৰা…পে… অত্থো’’তি আহ. পরিঞ্ঞেয্যন্তি এত্থ ইতি-সদ্দো আদিঅত্থো, পকারত্থো ৰা. তেন ‘‘পহাতব্ব’’ন্তি এৰমাদিং সঙ্গণ্হাতি. পরিঞ্ঞাতন্তি এত্থাপি এসেৰ নযো. ‘‘পরিঞ্ঞেয্যং পরিঞ্ঞাত’’ন্তিআদিনা পরিজাননাদিকিরিযায নিব্বত্তেতব্বতা নিব্বত্তিততা চ দস্সিতা, ন নিব্বত্তিযমানতাতি. যেন পন সা হোতি, তং দস্সেতুং ‘‘সচ্চঞাণং পনা’’তিআদি ৰুত্তং. তত্থ সচ্চঞাণন্তি দুক্খাদিসচ্চসভাৰাৰবোধকং ঞাণং, যং সন্ধায ‘‘ইদং দুক্খ’’ন্তিআদি ৰুত্তং. মগ্গক্খণেপীতি অপি-সদ্দেন ততো ¶ পুব্বাপরভাগেপীতি দট্ঠব্বং. পরিজাননাদিকিচ্চসাধনৰসেন হোতি অসম্মোহতো ৰিসযতো চাতি অধিপ্পাযো.

ঞাণকথাৰণ্ণনা নিট্ঠিতা.

ৰীসতিমৰগ্গৰণ্ণনা নিট্ঠিতা.

চতুত্থো পণ্ণাসকো সমত্তো.

২১. একৰীসতিমৰগ্গো

১. সাসনকথাৰণ্ণনা

৮৭৮. সমুদাযাতি ¶ ‘‘সাসনং নৰং কত’’ন্তিআদিনা পুচ্ছাৰসেন পৰত্তা ৰচনসমুদাযা. একদেসানন্তি তদৰযৰানং. ‘‘তীসুপি পুচ্ছাসূ’’তি এৰং অধিকরণভাৰেন ৰুত্তা.

সাসনকথাৰণ্ণনা নিট্ঠিতা.

৪. ইদ্ধিকথাৰণ্ণনা

৮৮৩-৮৮৪. অধিপ্পাযৰসেনাতি তথা তথা অধিমুচ্চনাধিপ্পাযৰসেন.

ইদ্ধিকথাৰণ্ণনা নিট্ঠিতা.

৭. ধম্মকথাৰণ্ণনা

৮৮৭-৮৮৮. রূপসভাৰো রূপট্ঠোতি আহ ‘‘রূপট্ঠো নাম কোচি রূপতো অঞ্ঞো নত্থী’’তি. যং পন যতো অঞ্ঞং, ন তং তংসভাৰন্তি আহ ‘‘রূপট্ঠতো অঞ্ঞং রূপঞ্চ ন হোতী’’তি, রূপমেৰ ন হোতীতি অত্থো. এতেন ব্যতিরেকতো তমত্থং সাধেতি. তস্মাতি যস্মা রূপতো অঞ্ঞো রূপট্ঠো নত্থি, রূপট্ঠতো চ অঞ্ঞং রূপং, তস্মা রূপং রূপমেৰ রূপসভাৰমেৰাতি ¶ এৰ-কারেন নিৰত্তিতং দস্সেতি ‘‘ন ৰেদনাদিসভাৰ’’ন্তি. অধিপ্পাযেনাতি রূপরূপট্ঠানং অনঞ্ঞত্তাধিপ্পাযেন. অঞ্ঞথাতি তেসং অঞ্ঞত্তে রূপট্ঠেন নিযমেন রূপং নিযতন্তি ৰত্তব্বন্তি যোজনা. দস্সিতোযেৰ হোতি অত্থতো আপন্নত্তা. ন হি অভিন্নে ৰত্থুস্মিং পরিযাযন্তরভেদং করোতি. অঞ্ঞত্তন্তি রূপসভাৰানং রূপরূপট্ঠানঞ্চ. সসামিনিদ্দেসসিদ্ধাভেদা ‘‘সিলাপুত্তকস্স সরীর’’ন্তি ¶ ৰিয, কপ্পনামত্ততো চাযং ভেদো, ন পরমত্থতোতি আহ ‘‘গহেত্ৰা ৰিয পৰত্তো’’তি. ৰেদনাদীহি নানত্তমেৰাতি ৰেদনাদীহি অঞ্ঞত্তমেৰ. সো সভাৰোতি সো রূপসভাৰো. নানত্তসঞ্ঞাপনত্থন্তি রূপস্স সভাৰো, ন ৰেদনাদীনন্তি এৰং ভেদস্স ঞাপনত্থং. তঞ্চ ৰচনন্তি ‘‘রূপং রূপট্ঠেন ন নিযত’’ন্তি ৰচনং. ৰুত্তপ্পকারেনাতি ‘‘রূপট্ঠতো অঞ্ঞস্স রূপস্স অভাৰা’’তিআদিনা ৰুত্তাকারেন. যদি সদোসং, অথ কস্মা পটিজানাতীতি যোজনা.

ৰুত্তমেৰ কারণন্তি ‘‘রূপং রূপমেৰ, ন ৰেদনাদিসভাৰ’’ন্তি এৰং ৰুত্তমেৰ যুত্তিং. পরেন চোদিতন্তি ‘‘ন ৰত্তব্বং রূপং রূপট্ঠেন নিযত’’ন্তিআদিনা পরৰাদিনো চোদনং সন্ধাযাহ. তমেৰ কারণং দস্সেত্ৰাতি তমেৰ যথাৰুত্তং যুত্তিং ‘‘এত্থ হী’’তিআদিনা দস্সেত্ৰা. চোদনং নিৰত্তেতীতি ‘‘অথ কস্মা পটিজানাতী’’তি ৰুত্তং চোদনং নিৰত্তেতি. যমত্থং সন্ধায ‘‘ইতো অঞ্ঞথা’’তি ৰুত্তং, তং দস্সেতুং ‘‘রূপাদী’’তিআদি ৰুত্তং.

ধম্মকথাৰণ্ণনা নিট্ঠিতা.

একৰীসতিমৰগ্গৰণ্ণনা নিট্ঠিতা.

২২. বাৰীসতিমৰগ্গো

২. কুসলচিত্তকথাৰণ্ণনা

৮৯৪-৮৯৫. পুরিমজৰনক্খণেতি পরিনিব্বানচিত্ততো অনন্তরাতীতপুরিমজৰনৰারক্খণে.

কুসলচিত্তকথাৰণ্ণনা নিট্ঠিতা.

৩. আনেঞ্জকথাৰণ্ণনা

৮৯৬. হেতুসরূপারম্মণসম্পযুত্তধম্মারম্মণাদিতো ¶ ¶ ভৰঙ্গসদিসত্তা চুতিচিত্তং ‘‘ভৰঙ্গচিত্ত’’ন্তি আহ.

আনেঞ্জকথাৰণ্ণনা নিট্ঠিতা.

৫-৭. তিস্সোপিকথাৰণ্ণনা

৮৯৮-৯০০. অরহত্তপ্পত্তিপি গব্ভেযেৰ অত্থীতি মঞ্ঞতি. সত্তৰস্সিকা হি সোপাকসামণেরাদযো অরহত্তং পত্তা. সত্তৰস্সিকোপি গব্ভো অত্থীতি পরৰাদিনো অধিপ্পাযো. আকাসেন গচ্ছন্তো ৰিয সুপিনং আকাসসুপিনং. তং অভিঞ্ঞানিব্বত্তং মঞ্ঞতীতি নিদস্সনং কত্ৰা দস্সেন্তো আহ ‘‘আকাসগমনাদিঅভিঞ্ঞা ৰিযা’’তি. হেট্ঠিমানং চতুন্নং ৰা মগ্গানং অধিগমেন ধম্মাভিসমযো অগ্গফলাধিগমেন অরহত্তপ্পত্তি চ সুপিনে অত্থীতি মঞ্ঞতীতি যোজনা.

তিস্সোপিকথাৰণ্ণনা নিট্ঠিতা.

৯. আসেৰনপচ্চযকথাৰণ্ণনা

৯০৩-৯০৫. বীজং চতুমধুরভাৰং ন গণ্হাতীতি ইদং সকসমযৰসেন ৰুত্তং, পরসমযে পন রূপধম্মাপি অরূপধম্মেহি সমানক্খণা এৰ ইচ্ছিতা. তেনেৰাহ ‘‘সব্বে ধম্মা খণিকা’’তি. খণিকত্তেপি ৰা অচেতনেসুপি অনিন্দ্রিযবদ্ধরূপেসু ভাৰনাৰিসেসো লব্ভতি, কিমঙ্গং পন সচেতনেসূতি দস্সেতুং ‘‘যথা বীজং চতুমধুরভাৰং ন গণ্হাতী’’তি নিদস্সনন্তি দট্ঠব্বং. আসেৰেন্তো নাম কোচি ধম্মো নত্থি ইত্তরতায অনৰট্ঠানতোতি অধিপ্পাযো. ইত্তরখণতায এৰ পন আসেৰনং লব্ভতি. কুসলাদিভাৰেন হি অত্তসদিসস্স পযোগেন করণীযস্স ¶ পুনপ্পুনং করণপ্পৰত্তনং অত্তসদিসতাপাদনং ৰাসনং ৰা আসেৰনং পুরে পরিচিতগন্থো ৰিয পচ্ছিমস্সাতি.

আসেৰনপচ্চযকথাৰণ্ণনা নিট্ঠিতা.

১০. খণিককথাৰণ্ণনা

৯০৬-৯০৭. পথৰিযাদিরূপেসূতি ¶ অনেককলাপসমুদাযভূতেসু সসম্ভারপথৰীআদিরূপেসু. তত্থ হি কেসুচি পুরিমুপ্পন্নেসু ঠিতেসু কেসঞ্চি তদঞ্ঞেসং উপ্পাদো, ততো পুরিমন্তরুপ্পন্নানং কেসঞ্চি নিরোধো হোতি একেককলাপরূপেসু সমানুপ্পাদনিরোধত্তা তেসং. এৰং পতিট্ঠানন্তি এৰং ৰুত্তপ্পকারেন অসমানুপ্পাদনিরোধেন পবন্ধেন পতিট্ঠানপৰত্তীতি অত্থো. সা পনাযং যথাৰুত্তা পৰত্তি কস্মা রূপসন্ততিযা এৰাতি আহ ‘‘ন হি রূপান’’ন্তিআদি. তস্সত্থো – যদি সব্বে সঙ্খতধম্মা সমানক্খণা, তথা সতি অরূপসন্ততিযা ৰিয রূপসন্ততিযাপি অনন্তরাদিপচ্চযেন ৰিধিনা পৰত্তি সিযা, ন চেতং অত্থি. যদি সিযা, চিত্তক্খণে চিত্তক্খণে পথৰীআদীনং উপ্পাদনিরোধেহি ভৰিতব্বন্তি.

খণিককথাৰণ্ণনা নিট্ঠিতা.

বাৰীসতিমৰগ্গৰণ্ণনা নিট্ঠিতা.

২৩. তেৰীসতিমৰগ্গো

১. একাধিপ্পাযকথাৰণ্ণনা

৯০৮. এক-সদ্দো অঞ্ঞত্থোপি হোতি ‘‘ইত্থেকে অভিৰদন্তী’’তিআদীসু ৰিয, অঞ্ঞত্তঞ্চেত্থ ¶ রাগাধিপ্পাযতো ৰেদিতব্বং, পুথুজ্জনস্স পন সছন্দরাগপরিভোগভাৰতো আহ ‘‘রাগাধিপ্পাযতো অঞ্ঞাধিপ্পাযোৰাতি ৰুত্তং হোতী’’তি. কো পন সো অঞ্ঞাধিপ্পাযোতি? করুণাধিপ্পাযো. তেন ৰুত্তং ‘‘করুণাধিপ্পাযেন একাধিপ্পাযো’’তি. অযঞ্চ নযো ইত্থিযা জীৰিতরক্খণত্থং কারুঞ্ঞেন মনোরথং পূরেন্তস্স বোধিসত্তস্স সংৰরৰিনাসো ন হোতীতি এৰংৰাদিনং পরৰাদিং সন্ধায ৰুত্তো, পণিধানাধিপ্পাযৰাদিনং পন সন্ধায ‘‘একো অধিপ্পাযোতি এত্থা’’তিআদি ৰুত্তং. পুত্তমুখদস্সনাধিপ্পাযোপি এত্থেৰ সঙ্গহং গতোতি দট্ঠব্বং. একতোভাৰেতি সহভাৰে.

একাধিপ্পাযকথাৰণ্ণনা নিট্ঠিতা.

৩-৭. ইস্সরিযকামকারিকাকথাৰণ্ণনা

৯১০-৯১৪. ইস্সরিযেনাতি ¶ চিত্তিস্সরিযেন, ন চেতোৰসিভাৰেনাতি অত্থো. কামকারিকং যথিচ্ছিতনিপ্ফাদনং. ইস্সরিযকামকারিকাহেতূতি ইস্সরিযকামকারিভাৰনিমিত্তং, তস্স নিব্বত্তনত্থন্তি অত্থো. মিচ্ছাদিট্ঠিযা করীযতীতি মিচ্ছাভিনিৰেসেনেৰ যা কাচি দুক্করকারিকা করীযতীতি অত্থো.

ইস্সরিযকামকারিকাকথাৰণ্ণনা নিট্ঠিতা.

৮. পতিরূপকথাৰণ্ণনা

৯১৫-৯১৬. মেত্তাদযো ৰিযাতি যথা মেত্তা করুণা মুদিতা চ সিনেহসভাৰাপি অরঞ্জনসভাৰত্তা অসংকিলিট্ঠত্তা চ ন রাগো, এৰং রাগপতিরূপকো কোচি ধম্মো নত্থি ঠপেত্ৰা মেত্তাদযো, অঞ্ঞচিত্তস্স সিনিয্হনাকারো রাগস্সেৰ পৰত্তিআকারোতি অত্থো. তেনেৰাহ ‘‘রাগমেৰ গণ্হাতী’’তি. এৰং দোসেপীতি এত্থ ইস্সাদযো ৰিয ন দোসো দোসপতিরূপকো কোচি অত্থীতি দোসমেৰ গণ্হাতীতি যোজেতব্বং. ঠপেত্ৰা হি ইস্সাদযো অঞ্ঞচিত্তস্স দুস্সনাকারো দোসস্সেৰ পৰত্তিআকারোতি.

পতিরূপকথাৰণ্ণনা নিট্ঠিতা.

৯. অপরিনিপ্ফন্নকথাৰণ্ণনা

৯১৭-৯১৮. অনিচ্চাদিকো ¶ ভাৰোতি অনিচ্চসঙ্খারপটিচ্চসমুপ্পন্নতাদিকো ভাৰো ধম্মো পকতি এতস্সাতি অত্থো. দুক্খঞ্ঞেৰ পরিনিপ্ফন্নন্তি ‘‘দুক্খসচ্চং সন্ধায পুচ্ছা কতা, ন দুক্খতামত্ত’’ন্তি অযমত্থো ৰিঞ্ঞাযতি ‘‘ন কেৰলঞ্হি পঠমসচ্চমেৰ দুক্খ’’ন্তি ৰচনেন. তথা সতি পরৰাদিনা চক্খাযতনাদীনং অঞ্ঞেসঞ্চ তংসরিক্খকানং ধম্মানং পরিনিপ্ফন্নতা নানুজানিতব্বা সিযা. কস্মা? তেসম্পি হি দুক্খসচ্চেন সঙ্গহো, ন ইতরসচ্চেহি. যঞ্হি সমুদযসচ্চতো নিব্বত্তং, তং নিপ্পরিযাযতো দুক্খসচ্চং ¶ , ইতরং সঙ্খারদুক্খতায দুক্খন্তি ইমমত্থং দস্সেন্তো ‘‘ন কেৰলঞ্হী’’তিআদিমাহ. তত্থ ন হি অনুপাদিন্নানীতি ইমিনা চক্খাযতনাদীনং সমুদযসচ্চেন সঙ্গহাভাৰমাহ. লোকুত্তরানীতি ইমিনা নিরোধমগ্গসচ্চেহি. যদি এৰমেত্থ যুত্তি ৰত্তব্বা, কিমেত্থ ৰত্তব্বং? সভাৰো হেস পরৰাদিৰাদস্স, যদিদং পুব্বেনাপরমসংসন্দনং. তথা হি সো ৰিঞ্ঞূহি পটিক্খিত্তো. তথা চেৰ তং অম্হেহি তত্থ তত্থ ৰিভাৰিতং. এতন্তি ‘‘রূপং অপরিনিপ্ফন্নং, দুক্খঞ্ঞেৰ পরিনিপ্ফন্ন’’ন্তি যদেতং তযা ৰুত্তং, এতং নো ৰত রে ৰত্তব্বে. কস্মা? রূপস্স চ দুক্খত্তা. রূপঞ্হি অনিচ্চং দুক্খাধিট্ঠানঞ্চ. তেন ৰুত্তং ‘‘যদনিচ্চং তং দুক্খং. সংখিত্তেন পঞ্চুপাদানক্খন্ধা দুক্খা’’তি চ.

অপরিনিপ্ফন্নকথাৰণ্ণনা নিট্ঠিতা.

তেৰীসতিমৰগ্গৰণ্ণনা নিট্ঠিতা.

কথাৰত্থুপকরণ-অনুটীকা সমত্তা.

নমো তস্স ভগৰতো অরহতো সম্মাসম্বুদ্ধস্স

যমকপকরণ-অনুটীকা

গন্থারম্ভৰণ্ণনা

সঙ্খেপেনেৰাতি ¶ ¶ উদ্দেসেনেৰ. যং ‘‘মাতিকাঠপন’’ন্তি ৰুত্তং. ধম্মেসূতি খন্ধাদিধম্মেসু কুসলাদিধম্মেসু চ. অৰিপরীততো গহিতেসু ধম্মেসু মূলযমকাদিৰসেন পৰত্তিযমানা দেসনা ৰেনেয্যানং নানপ্পকারকোসল্লাৰহা পরিঞ্ঞাকিচ্চসাধনী চ হোতি, ন ৰিপরীততোতি আহ ‘‘ৰিপরীতগ্গহণং…পে… আরদ্ধ’’ন্তি. এতেন কথাৰত্থুপকরণদেসনানন্তরং যমকপকরণদেসনায কারণমাহ. তত্থ ৰিপরীতগ্গহণন্তি পুগ্গলপরিগ্গহণাদিমিচ্ছাগাহং. ধম্মপুগ্গলোকাসাদিনিস্সযানন্তি ‘‘যে কেচি কুসলা ধম্মা, সব্বে তে কুসলমূলা’’তিআদিনা (যম. ১.মূলযমক.১) ধম্মে, ‘‘যস্স রূপক্খন্ধো উপ্পজ্জতি, তস্স ৰেদনাক্খন্ধো উপ্পজ্জতী’’তিআদিনা (যম. ১.খন্ধযমক.৫০) পুগ্গলং ‘‘যত্থ রূপক্খন্ধো উপ্পজ্জতি, তত্থ ৰেদনাক্খন্ধো উপ্পজ্জতী’’তিআদিনা (যম. ১.খন্ধযমক.৫১) ওকাসং নিস্সায আরব্ভ পৰত্তানং. আদি-সদ্দেন পুগ্গলোকাসউপ্পাদনিরোধতদুভযপরিঞ্ঞাদীনং সঙ্গহো দট্ঠব্বো. সন্নিট্ঠানসংসযানন্তি ¶ পাল়িগতিপটিৰচনসরূপদস্সনপটিক্খিপনপটিসেধননযেহি যথাপুচ্ছিতস্স অত্থস্স নিচ্ছযকরণং সন্নিট্ঠানং, তদভাৰতো সংসযনং সংসযো. তেসং সন্নিট্ঠানসংসযানং.

কামঞ্চেত্থ ধম্মপটিগ্গাহকানং সংসযপুব্বকং সন্নিট্ঠানন্তি পঠমং সংসযো ৰত্তব্বো, দেসেন্তস্স পন ভগৰতো সন্নিট্ঠানপুব্বকো সংসযোতি দস্সনত্থং অযং পদানুক্কমো কতো. সব্বঞ্হি পরিঞ্ঞেয্যং হত্থামলকং ৰিয পচ্চক্খং কত্ৰা ঠিতস্স ধম্মসামিনো ন কত্থচি সংসযো, ৰিস্সজ্জেতুকামতায পন ৰিনেয্যজ্ঝাসযগতং সংসযং দস্সেন্তো সংসযিতৰসেন পুচ্ছং করোতীতি এৰং ৰিস্সজ্জনপুচ্ছনৰসেন ন সন্নিট্ঠানসংসযা লব্ভন্তীতি অযমত্থো দস্সিতো, নিচ্ছিতসংসযধম্মৰসেনেৰ পনেত্থ সন্নিট্ঠানসংসযা ¶ ৰেদিতব্বা. তেনাহ অট্ঠকথাযং ‘‘কুসলেসু কুসলা নু খো, ন নু খো কুসলাতি সন্দেহাভাৰতো’’তিআদি. তেনেৰ চ ‘‘সন্নিট্ঠানসংসযান’’ন্তি, ‘‘সন্নিট্ঠানসংসযৰসেনা’’তি চ পঠমং সন্নিট্ঠানগ্গহণং কতং.

তন্তি যমকপকরণং. তস্স যে সমযাদযো ৰত্তব্বা, তে কথাৰত্থুপকরণদেসনানন্তরো দেসনাসমযো, তাৰতিংসভৰনমেৰ দেসনাদেসো, কুসলাকুসলমূলাদিযমকাকারেন দেসনাতি ৰিভাগতো ‘‘সঙ্খেপেনেৰা’’তিআদিগাথাহি ৰিভাৰিতা নিমিত্তেন সদ্ধিং সংৰণ্ণনপটিঞ্ঞা চাতি ইমমত্থং দস্সেন্তো ‘‘সমযদেসদেসনাৰসেনা’’তিআদিমাহ. নিমিত্তঞ্হেতং ইধ সংৰণ্ণনায, যদিদং কমানুপ্পত্তি আগতভারৰাহিতা চ পণ্ডিতানং পণ্ডিতকিচ্চভাৰতো. তত্থ অনুপ্পত্তং দস্সেত্ৰাতি সম্বন্ধো.

তত্থাতি তস্মিং সমযাদিদস্সনে. যমনং উপরমনন্তি যমো মরণন্তি আহ ‘‘জাতিযা সতি মরণং হোতীতি…পে… ৰিসযো’’তি. তত্থ যথা ‘‘জাতিযা সতি মরণং হোতী’’তি জাতি যমস্স ৰিসযো, এৰং ‘‘উপাদানক্খন্ধেসু সন্তেসু মরণং হোতী’’তি উপাদানক্খন্ধা যমস্স ৰিসযোতি যোজেতব্বং. তে হি মরণধম্মিনোতি. অনুপ্পত্তমরণংযেৰ কিব্বিসকারিনং পুগ্গলং যমপুরিসা ৰিৰিধা কম্মকারণা করোন্তি, ন অপ্পত্তমরণন্তি মরণং যমস্স ৰিসযো ৰুত্তো. আণাপৰত্তিট্ঠানন্তি ইদং ৰিসয-সদ্দস্স অত্থৰচনং. দেসং ৰাতি কামাদিধাতুত্তযদেসং সন্ধাযাহ. ধাতুত্তযিস্সরো হি মচ্চুরাজা. পঞ্চানন্তরিযানি অঞ্ঞসত্থারুদ্দেসো চ, তেন ৰা সদ্ধিং পঞ্চ ৰেরানি ছ অভব্বট্ঠানানি. আৰত্তাতি পদক্খিণাৰত্তা. তনুরুহাতি লোমা.

গন্থারম্ভৰণ্ণনা নিট্ঠিতা.

১. মূলযমকং

উদ্দেসৰারৰণ্ণনা

১. যমকসমূহস্সাতি ¶ ¶ মূলযমকাদিকস্স যমকসমূহস্স. মূলযমকাদযো হি পকরণাপেক্খায অৰযৰভূতাপি নিচ্চাৰযৰাপেক্খায যমকসমূহোতি ৰুত্তো. তেনাহ ‘‘তংসমূহস্স চ সকলস্স পকরণস্সা’’তি.

কুসলাকুসলমূলৰিসেসানন্তি দুতিযপুচ্ছায ৰুত্তানং সংসযপদসঙ্গহিতানং কুসলসঙ্খাতানং, তথা পঠমপুচ্ছায ৰুত্তানং কুসলমূলসঙ্খাতানং ৰিসেসানং অত্থযমকভাৰস্স ৰুত্তত্তাতি যোজনা. যথা হি পঠমপুচ্ছায ৰিসেসৰন্তভাৰেন ৰুত্তাযেৰ কুসলধম্মা দুতিযপুচ্ছাযং ৰিসেসভাৰেন ৰুত্তা, এৰং পঠমপুচ্ছাযং ৰিসেসভাৰেন ৰুত্তাযেৰ কুসলমূলধম্মা দুতিযপুচ্ছাযং ৰিসেসৰন্তভাৰেন ৰুত্তা. ৰত্তুৰচনিচ্ছাৰসেন হি ধম্মানং ৰিসেসৰিসেসৰন্ততাৰিভাগা হোন্তীতি. কুসলমূলকুসলৰিসেসেহি সংসযিতপদসঙ্গহিতেহি কুসলকুসলমূলানং ৰিসেসৰন্তানন্তি অধিপ্পাযো. এত্থ চ ৰিসেসৰন্তাপেক্খৰিসেসৰসেন পঠমো অত্থৰিকপ্পো ৰুত্তো, দুতিযো পন ৰিসেসাপেক্খৰিসেসৰন্তৰসেনাতি অযমেতেসং ৰিসেসো. তেনাহ ‘‘ঞাতুং ইচ্ছিতানং হী’’তিআদি.

তত্থ ঞাতুং ইচ্ছিতানন্তি পুচ্ছায ৰিসযভূতানন্তি অত্থো. ৰিসেসানন্তি কুসলকুসলমূলৰিসেসানং. ৰিসেসৰন্তাপেক্খানন্তি কুসলমূলকুসলসঙ্খাতেহি ৰিসেসৰন্তেহি সাপেক্খানং. ৰিসেসৰতন্তি কুসলমূলকুসলানং. ৰিসেসাপেক্খানন্তি কুসলকুসলমূলৰিসেসেহি সাপেক্খানং. এত্থাতি এতস্মিং মূলযমকে. পধানভাৰোতি পঠমৰিকপ্পে তাৰ সংসযিতপ্পধানত্তা পুচ্ছায ৰিসেসানং পধানভাৰো ৰেদিতব্বো. তে হি সংসযিতানং ৰিসেসৰন্তোতি. দুতিযৰিকপ্পে পন ৰিসেসা নাম ৰিসেসৰন্তাধীনাতি ৰিসেসৰন্তানং তত্থ পধানভাৰো দট্ঠব্বো. দ্ৰিন্নং পন একজ্ঝং পধানভাৰো ন যুজ্জতি. সতি হি অপ্পধানে পধানং নাম সিযা. তেনাহ ‘‘একেকায পুচ্ছায একেকো এৰ অত্থো সঙ্গহিতো হোতী’’তি. এৰঞ্চেতং সম্পটিচ্ছিতব্বং, অঞ্ঞথা ৰিনিচ্ছিতৰিসেসিতব্বভাৰেহি ইধ পধানভাৰো ন যুজ্জতেৰাতি. ন ধম্মৰাচকোতি ন সভাৰধম্মৰাচকো. সভাৰধম্মোপি ¶ হি অত্থোতি ৰুচ্চতি ‘‘গম্ভীরপঞ্ঞং নিপুণত্থদস্সি’’ন্তিআদীসু ¶ (সু. নি. ১৭৮). ‘‘হেতুফলে ঞাণং অত্থপটিসম্ভিদা’’তিআদীসু (ৰিভ. ৭২০) অত্থ-সদ্দস্স হেতুফলৰাচকতা দট্ঠব্বা. আদি-সদ্দেনস্স ‘‘অত্থাভিসমযা’’তিআদীসু (সং. নি. ১.১২৯) আগতা হিতাদিৰাচকতা সঙ্গয্হতি. তেনেৰাতি পাল়িঅত্থৰাচকত্তা এৰ.

তীণিপি পদানীতি এত্থ পি-সদ্দো সমুচ্চযত্থো, সমুচ্চযো চ তুল্যযোগে সিযা. কিং নাম-পদেন অনৰসেসতো কুসলাদীনং সঙ্গহোতি আসঙ্কায তদাসঙ্কানিৰত্তনত্থমাহ ‘‘তীণিপি…পে… সঙ্গাহকত্ত’’ন্তি. তত্থ সঙ্গাহকত্তমত্তন্তি মত্ত-সদ্দো ৰিসেসনিৰত্তিঅত্থোতি. তেন নিৰত্তিতং ৰিসেসং দস্সেতুং ‘‘ন নিরৰসেসসঙ্গাহকত্ত’’ন্তি ৰুত্তং. ন হি রূপং নাম-পদেন সঙ্গয্হতি. কুসলাদিযেৰ নামন্তি নিযমো দট্ঠব্বো, ন নামংযেৰ কুসলাদীতি ইমমেৰ চ নিযমং সন্ধাযাহ ‘‘কুসলাদীনং সঙ্গাহকত্তমত্তমেৰ সন্ধায ৰুত্ত’’ন্তি. যদিপি নাম-পদং ন নিরৰসেসকুসলাদিসঙ্গাহকং, কুসলাদিসঙ্গাহকং পন হোতি, তদত্থমেৰ চ তং গহিতন্তি নামস্স কুসলত্তিকপরিযাপন্নতা ৰুত্তাতি দস্সেন্তো আহ ‘‘কুসলাদি…পে… ৰুত্ত’’ন্তি.

উদ্দেসৰারৰণ্ণনা নিট্ঠিতা.

নিদ্দেসৰারৰণ্ণনা

৫২. দুতিযযমকেতি একমূলযমকে. এৰমিধাপীতি যথা একমূলযমকে ‘‘যে কেচি কুসলা’’ইচ্চেৰ পুচ্ছা আরদ্ধা, এৰং ইধাপি অঞ্ঞমঞ্ঞমূলযমকেপি ‘‘যে কেচি কুসলা’’ইচ্চেৰ পুচ্ছা আরভিতব্বা সিযা. কস্মা? পুরিমযমক…পে… অপ্পৰত্তত্তাতি. ইদঞ্চ দুতিযযমকস্স তথা অপ্পৰত্তত্তা ৰুত্তং, ততিযযমকং পন তথেৰ পৰত্তং. কেচীতি পদকারা. তে হি যথা পঠমদুতিযযমকেসু পুরিমপুচ্ছা এৰ পরিৰত্তনৰসেন পচ্ছিমপুচ্ছা কতাতি পচ্ছিমপুচ্ছায পুরিমপুচ্ছা সমানা ঠপেত্ৰা পটিলোমভাৰং, ন তথা অঞ্ঞমঞ্ঞযমকে. তত্থ হি দ্ৰেপি পুচ্ছা অঞ্ঞমঞ্ঞৰিসদিসা. যদি তত্থাপি দ্ৰীহিপি পুচ্ছাহি সদিসাহি ভৰিতব্বং ¶ , ‘‘যে কেচি কুসলা’’তি পঠমপুচ্ছা আরভিতব্বা, পচ্ছিমপুচ্ছা ৰা ‘‘সব্বে তে ধম্মা কুসলমূলেন একমূলা’’তি ¶ ৰত্তব্বা সিযা. এৰং পন অৰত্ৰা পঠমদুতিযযমকেসু ৰিয পুরিমপচ্ছিমপুচ্ছা সদিসা অকত্ৰা ততিযযমকে তাসং ৰিসদিসতা ‘‘যে কেচি কুসলা’’তি অনারদ্ধত্তা, তস্মা পটিলোমপুচ্ছানুরূপায অনুলোমপুচ্ছায ভৰিতব্বন্তি ইমমত্থং সন্ধায ‘‘যে কেচি কুসলাতি অপুচ্ছিত্ৰা’’তি ৰুত্তন্তি ৰদন্তি.

অত্থৰসেনাতি সম্ভৰন্তানং নিচ্ছিতসংসযিতানং অত্থানং ৰসেন. তদনুরূপাযাতি তস্সা পুরিমপুচ্ছায অত্থতো ব্যঞ্জনতো চ অনুচ্ছৰিকায. পুরিমঞ্হি অপেক্খিত্ৰা পচ্ছিমায ভৰিতব্বং. তেনাতি তস্মা. যস্মা অনুলোমে সংসযচ্ছেদে জাতেপি পটিলোমে সংসযো উপ্পজ্জতি, যদি ন উপ্পজ্জেয্য, পটিলোমপুচ্ছায পযোজনমেৰ ন সিযা, তস্মা ন পচ্ছিমপুচ্ছানুরূপা পুরিমপুচ্ছা, অথ খো ৰুত্তনযেন পুরিমপুচ্ছানুরূপা পচ্ছিমপুচ্ছা, তায চ অনুরূপতায অত্থাদিৰসেন দ্ৰিন্নং পদানং সম্বন্ধত্তা অত্থাদিযমকতা ৰুত্তা. দেসনাক্কমতো চেত্থ অনুলোমপটিলোমতা ৰেদিতব্বা ‘‘কুসলা কুসলমূলা’’তি ৰত্ৰা ‘‘কুসলমূলা কুসলা’’তি চ ৰুত্তত্তা. সেসযমকেসুপি এসেৰ নযো. ৰিসেসৰন্তৰিসেস, ৰিসেসৰিসেসৰন্তগ্গহণতো ৰা ইধ অনুলোমপটিলোমতা ৰেদিতব্বা. পঠমপুচ্ছাযঞ্হি যে ধম্মা ৰিসেসৰন্তো, তে নিচ্ছযাধিট্ঠানে কত্ৰা দস্সেন্তো ‘‘যে কেচি কুসলা ধম্মা’’তি ৰত্ৰা তেসু যস্মিং ৰিসেসো সংসযাধিট্ঠানো, তংদস্সনত্থং ‘‘সব্বে তে কুসলমূলা’’তি পুচ্ছা কতা. দুতিযপুচ্ছাযং পন তপ্পটিলোমতো যেন ৰিসেসেন তে ৰিসেসৰন্তো, তং ৰিসেসং সন্নিট্ঠানং কত্ৰা দস্সেন্তো ‘‘যে ৰা পন কুসলমূলা’’তি ৰত্ৰা তে ৰিসেসৰন্তে সংসযাধিট্ঠানভূতে দস্সেতুং ‘‘সব্বে তে ধম্মা কুসলা’’তি পুচ্ছা কতা. অনিযতৰত্থুকা হি সন্নিট্ঠানসংসযা অনেকজ্ঝাসযত্তা সত্তানং.

ইমিনাপি ব্যঞ্জনেনাতি ‘‘যে কেচি কুসলমূলেন একমূলা’’তি ইমিনাপি ৰাক্যেন. এৰং ন সক্কা ৰত্তুন্তি যেনাধিপ্পাযেন ৰুত্তং, তমেৰাধিপ্পাযং ৰিৰরতি ‘‘ন হী’’তিআদিনা. তত্থ তেনেৰাতি কুসলব্যঞ্জনত্থস্স কুসলমূলেন একমূলব্যঞ্জনত্থস্স ভিন্নত্তা এৰ. ৰিস্সজ্জনন্তি ৰিভজনং ¶ . ইতরথাতি কুসলমূলেন একমূলব্যঞ্জনেন পুচ্ছায কতায. তানি ৰচনানীতি কুসলৰচনং কুসলমূলেন একমূলৰচনঞ্চ. কুসলচিত্তসমুট্ঠানরূপৰসেন চস্স অব্যাকতদীপনতা দট্ঠব্বা. এত্থাতি ‘‘ইমিনাপি ব্যঞ্জনেন তস্সেৰত্থস্স সম্ভৰতো’’তি এতস্মিং ৰচনে. যে কেচি কুসলা…পে… সম্ভৰতোতি এতেন কুসলানং কুসলমূলেন একমূলতায ব্যভিচারাভাৰং দস্সেতি. তেনেৰাহ ‘‘ন হি…পে… সন্তী’’তি. ৰুত্তব্যঞ্জনত্থস্সেৰ ¶ সম্ভৰতোতি হি ইমিনা অৰুত্তব্যঞ্জনত্থস্স সম্ভৰাভাৰৰচনেন স্ৰাযমধিপ্পাযমত্থো ৰিভাৰিতো. যথা হি কুসলমূলেন একমূলব্যঞ্জনত্থো কুসলব্যঞ্জনত্থং ব্যভিচরতি, ন এৰং তং কুসলব্যঞ্জনত্থো. কথং কত্ৰা চোদনা, কথঞ্চ কত্ৰা পরিহারো? কুসলমূলেন একমূলা কুসলা এৰাতি চোদনা কতা, কুসলমূলেন একমূলা এৰ কুসলাতি পন পরিহারো পৰত্তোতি ৰেদিতব্বং. দুতিযযমকে ৰিয অপুচ্ছিত্ৰাতি ‘‘যে কেচি কুসলা’’তি অপুচ্ছিত্ৰা. কুসলমূলেহীতি কুসলেহি মূলেহি. তেতি কুসলমূলেন একমূলা.

একতো উপ্পজ্জন্তীতি এত্থ ইতি-সদ্দো আদিঅত্থো পকারত্থো ৰা. তেন ‘‘কুসলমূলানি একমূলানি চেৰ অঞ্ঞমঞ্ঞমূলানি চা’’তিআদিপাল়িসেসং দস্সেতি. যং সন্ধায ‘‘হেট্ঠা ৰুত্তনযেনেৰ ৰিস্সজ্জনং কাতব্বং ভৰেয্যা’’তি ৰুত্তং. তত্থ হেট্ঠাতি অনুলোমপুচ্ছাৰিস্সজ্জনে. ৰুত্তনযেনাতি ‘‘মূলানি যানি একতো উপ্পজ্জন্তী’’তিআদিনা ৰুত্তনযেন. তম্পীতি ‘‘কুসলমূলেনা’’তিআদি অট্ঠকথাৰচনম্পি. তথাতি তেন পকারেন, অনুলোমপুচ্ছাযং ৰিয ৰিস্সজ্জনং কাতব্বং ভৰেয্যাতি ইমিনা পকারেনাতি অত্থো. যেন কারণেন ‘‘ন সক্কা ৰত্তু’’ন্তি ৰুত্তং, তং কারণং দস্সেতুং ‘‘যে ৰা পনা’’তিআদিমাহ. তত্থ ‘‘আমন্তা’’ইচ্চেৰ ৰিস্সজ্জনেন ভৰিতব্বন্তি ‘‘সব্বে তে ধম্মা কুসলা’’তি পুচ্ছাযং ৰিয ‘‘সব্বে তে ধম্মা কুসলমূলেন একমূলা’’তি পুচ্ছিতেপি পটিৰচনৰিস্সজ্জনমেৰ লব্ভতি, ন অনুলোমপুচ্ছাযং ৰিয সরূপদস্সনৰিস্সজ্জনং ৰিভজিত্ৰা দস্সেতব্বস্স অভাৰতো. যে হি ধম্মা কুসলমূলেন একমূলা, ন তে ধম্মা কুসলমূলেন অঞ্ঞমঞ্ঞমূলাৰ. যে পন কুসলমূলেন অঞ্ঞমঞ্ঞমূলা, তে কুসলমূলেন একমূলাৰ. তেনাহ ‘‘ন হি…পে… ৰিভাগো কাতব্বো ভৰেয্যা’’তি.

তত্থ ¶ যেনাতি যেন অঞ্ঞমঞ্ঞমূলেসু একমূলস্স অভাৰেন. যত্থাতি যস্মিং ঞাণসম্পযুত্তচিত্তুপ্পাদে. অঞ্ঞমঞ্ঞমূলকত্তা একমূলকত্তা চাতি অধিপ্পাযো. দ্ৰিন্নং দ্ৰিন্নঞ্হি একেকেন অঞ্ঞমঞ্ঞমূলকত্তে ৰুত্তে তেসং একেকেন একমূলকত্তম্পি ৰুত্তমেৰ হোতি সমানত্থো একসদ্দোতি কত্ৰা. তেনেৰাহ ‘‘যত্থ পন…পে… ন একমূলানী’’তি. তযিদং মিচ্ছা, দ্ৰীসুপি একেকেন ইতরস্স একমূলকত্তং সম্ভৰতি এৰাতি. তেনাহ ‘‘এতস্স গহণস্স নিৰারণত্থ’’ন্তিআদি. ‘‘যে ধম্মা কুসলমূলেন অঞ্ঞমঞ্ঞমূলা, তে কুসলমূলেন একমূলা’’তি ইমমত্থং ৰিভাৰেন্তেন ইধ ‘‘আমন্তা’’তি পদেন যত্থ দ্ৰে মূলানি উপ্পজ্জন্তি, তত্থ একেকেন ইতরস্স একমূলকত্তং পকাসিতমেৰাতি আহ ‘‘আমন্তাতি ইমিনাৰ ৰিস্সজ্জনেন তংগহণনিৰারণতো’’তি ¶ . নিচ্ছিতত্তাতি এত্থ একতো উপ্পজ্জমানানং তিণ্ণন্নং তাৰ মূলানং নিচ্ছিতং হোতু অঞ্ঞমঞ্ঞেকমূলকত্তং, দ্ৰিন্নং পন কথন্তি আহ ‘‘অঞ্ঞমঞ্ঞমূলানং হী’’তিআদি. সমানমূলতা এৰাতি অৰধারণেন নিৰত্তিতত্থং দস্সেতুং ‘‘ন অঞ্ঞমঞ্ঞসমানমূলতা’’তি ৰুত্তং. তেন অঞ্ঞমঞ্ঞমূলানং সমানমূলতামত্তৰচনিচ্ছায একমূলগ্গহণং, ন তেসং অঞ্ঞমঞ্ঞপচ্চযতাৰিসিট্ঠসমানমূলতাদস্সনত্থন্তি ইমমত্থং দস্সেতি. দ্ৰিন্নং মূলানন্তি দ্ৰিন্নং একমূলানং একতো উপ্পজ্জমানানং. যথা তেসং সমানমূলতা, তং দস্সেতুং ‘‘তেসু হী’’তিআদি ৰুত্তং. তংমূলেহি অঞ্ঞেহীতি ইতরমূলেহি মূলদ্ৰযতো অঞ্ঞেহি সহজাতধম্মেহি.

ইদানি যেন অধিপ্পাযেন পটিলোমে ‘‘কুসলা’’ইচ্চেৰ পুচ্ছা কতা, ন ‘‘কুসলমূলেন একমূলা’’তি, তং দস্সেতুং ‘‘অঞ্ঞমঞ্ঞমূলত্তে পন…পে… কতাতি দট্ঠব্ব’’ন্তি আহ. ন হি কুসলমূলেন অঞ্ঞমঞ্ঞমূলেসু কিঞ্চি একমূলং ন হোতীতি ৰুত্তোৰাযমত্থো. মূলযুত্ততমেৰ ৰদতি, ন মূলেহি অযুত্তন্তি অধিপ্পাযো. অঞ্ঞথা পুব্বেনাপরং ৰিরুজ্ঝেয্য. তেনেৰাতি মূলযুত্ততায এৰ ৰুচ্চমানত্তা. উভযত্থাপীতি অঞ্ঞমঞ্ঞমূলা একমূলাতি দ্ৰীসুপি পদেসু. ‘‘কুসলমূলেনা’’তি ৰুত্তং, কুসলমূলেন সম্পযুত্তেনাতি হি অত্থো. যদি উভযম্পি ৰচনং মূলযুত্ততমেৰ ৰদতি, অথ কস্মা অনুলোমপুচ্ছাযমেৰ একমূলগ্গহণং কতং, ন পটিলোমপুচ্ছাযন্তি উভযত্থাপি তং গহেতব্বং ন ৰা গহেতব্বং. এৰঞ্হি মূলেকমূলযমকদেসনাহি অযং অঞ্ঞমঞ্ঞযমকদেসনা সমানরসা সিযাতি চোদনং মনসি কত্ৰা আহ ‘‘তত্থা’’তিআদি.

তত্থ ¶ তত্থাতি তস্মিং অঞ্ঞমঞ্ঞযমকে. যদিপি একমূলা অঞ্ঞমঞ্ঞমূলাতি ইদং পদদ্ৰযং ৰুত্তনযেন মূলযুত্ততমেৰ ৰদতি, তথাপি সামঞ্ঞৰিসেসলক্খণে অত্থেৰ ভেদোতি দস্সেতুং ‘‘মূলযোগসামঞ্ঞে’’তিআদি ৰুত্তং. সমূলকানং সমানমূলতা একমূলত্তন্তি একমূলৰচনং তেসু অৰিসেসতো মূলসব্ভাৰমত্তং ৰদতি, ন অঞ্ঞমঞ্ঞমূলসদ্দো ৰিয মূলেসু লব্ভমানং ৰিসেসং, ন চ সামঞ্ঞে নিচ্ছযো ৰিসেসে সংসযং ৰিধমতীতি ইমমত্থমাহ ‘‘মূলযোগসামঞ্ঞে…পে… পৰত্তা’’তি ইমিনা. ৰিসেসে পন নিচ্ছযো সামঞ্ঞে সংসযং ৰিধমন্তো এৰ পৰত্ততীতি আহ ‘‘মূলযোগৰিসেসে পন…পে… নিচ্ছিতমেৰ হোতী’’তি. তস্মাতি ৰুত্তস্সেৰ তস্স হেতুভাৰেন পরামসনং, ৰিসেসনিচ্ছযেনেৰ অৰিনাভাৰতো, সামঞ্ঞস্স নিচ্ছিতত্তা তত্থ ৰা সংসযাভাৰতোতি অত্থো. তেনাহ ‘‘একমূলাতি পুচ্ছং অকত্ৰা’’তি. কুসলভাৰদীপকং ন হোতীতি কুসলভাৰস্সেৰ ¶ দীপকং ন হোতি তদঞ্ঞজাতিকস্সপি দীপনতো. তেনাহ ‘‘কুসলভাৰে সংসযসব্ভাৰা’’তি. অঞ্ঞমঞ্ঞমূলৰচনন্তি কেৰলং অঞ্ঞমঞ্ঞমূলৰচনন্তি অধিপ্পাযো. কুসলাধিকারস্স অনুৰত্তমানত্তাতি ইমিনা ‘‘সব্বে তে ধম্মা কুসলা’’তি কুসলগ্গহণে কারণমাহ. একমূলগ্গহণে হি পযোজনাভাৰো দস্সিতো, কুসলস্স ৰসেন চাযং দেসনাতি.

৫৩-৬১. মূলনযে ৰুত্তে এৰ অত্থেতি মূলনযে ৰুত্তে এৰ কুসলাদিধম্মে. কুসলাদযো হি সভাৰধম্মা ইধ পাল়িঅত্থতায অত্থোতি ৰুত্তো. কুসলমূলভাৰেন, মূলস্স ৰিসেসনেন, মূলযোগদীপনেন চ পকাসেতুং. কুসলমূলভূতা মূলা কুসলমূলমূলাতি সমাসযোজনা. মূলৰচনঞ্হি নিৰত্তেতব্বগহেতব্বসাধারণং. অকুসলাব্যাকতাপি মূলধম্মা অত্থীতি কুসলমূলভাৰেন মূলধম্মা ৰিসেসিতা. মূলগ্গহণেন চ মূলৰন্তানং মূলযোগো দীপিতো হোতি. সমানেন মূলেন, মূলস্স ৰিসেসনেন, মূলযোগদীপনেন চ পকাসেতুং ‘‘একমূলমূলা’’তি, অঞ্ঞমঞ্ঞস্স মূলেন মূলভাৰেন, মূলস্স ৰিসেসনেন, মূলযোগদীপনেন চ পকাসেতুং ‘‘অঞ্ঞমঞ্ঞমূলমূলা’’তি মূলমূলনযো ৰুত্তোতি যোজনা. তীসুপি যমকেসু যথাৰুত্তৰিসেসনমেৰেত্থ পরিযাযন্তরং দট্ঠব্বং.

মূলযোগং ¶ দীপেতুন্তি মূলযোগমেৰ পধানং সাতিসযঞ্চ কত্ৰা দীপেতুন্তি অধিপ্পাযো. যথা হি কুসলানি মূলানি এতেসন্তি কুসলমূলকানীতি বাহিরত্থসমাসে মূলযোগো পধানভাৰেন ৰুত্তো হোতি, ন এৰং ‘‘কুসলসঙ্খাতা মূলা কুসলমূলা’’তি কেৰলং, ‘‘কুসলমূলমূলা’’তি সৰিসেসনং ৰা ৰুত্তে উত্তরপদত্থপ্পধানসমাসে. তেনাহ ‘‘অঞ্ঞপদত্থ…পে… দীপেতু’’ন্তি. ৰুত্তপ্পকারোৰাতি ‘‘কুসলমূলভাৰেন মূলস্স ৰিসেসনেনা’’তিআদিনা মূলমূলনযে চ, ‘‘অঞ্ঞপদত্থসমাসন্তেন ক-কারেনা’’তিআদিনা মূলকনযে চ ৰুত্তপ্পকারো এৰ. ৰচনপরিযাযো মূলমূলকনযে একজ্ঝং কত্ৰা যোজেতব্বো.

৭৪-৮৫. ন একমূলভাৰং লভমানেহীতি অব্যাকতমূলেন ন একমূলকং তথাৰত্তব্বতং লভমানেহি অট্ঠারসঅহেতুকচিত্তুপ্পাদাহেতুকসমুট্ঠানরূপনিব্বানেহি একতো অলব্ভমানত্তা. যথা হি যথাৰুত্তচিত্তুপ্পাদাদযো হেতুপচ্চযৰিরহিতা অহেতুকৰোহারং লভন্তি, ন এৰং সহেতুকসমুট্ঠানং রূপং. তেনাহ ‘‘অহেতুকৰোহাররহিতং কত্ৰা’’তি. এত্থ চ ‘‘সব্বং রূপং ন হেতুকমেৰ, অহেতুকমেৰা’’তি ৰুত্তত্তা কিঞ্চাপি সহেতুকসমুট্ঠানম্পি রূপং অহেতুকং, ‘‘অব্যাকতো ¶ ধম্মো অব্যাকতস্স ধম্মস্স হেতুপচ্চযেন পচ্চযো, ৰিপাকাব্যাকতা কিরিযাব্যাকতা হেতূ সম্পযুত্তকানং খন্ধানং চিত্তসমুট্ঠানানঞ্চ রূপানং হেতুপচ্চযেন পচ্চযো’’তি (পট্ঠা. ১.১.৪০৩) পন ৰচনতো হেতুপচ্চযযোগেন সহেতুকসমুট্ঠানস্স রূপস্স অহেতুকৰোহারাভাৰো ৰুত্তো. কেচি পন ‘‘অব্বোহারিকং কত্ৰাতি সহেতুকৰোহারেন অব্বোহারিকং কত্ৰাতি অত্থং ৰত্ৰা অঞ্ঞথা ‘অহেতুকং অব্যাকতং অব্যাকতমূলেন একমূল’ন্তি ন সক্কা ৰত্তু’’ন্তি ৰদন্তি. তত্থ যং ৰত্তব্বং, তং ৰুত্তমেৰ অহেতুকৰোহারাভাৰেন সহেতুকতাপরিযাযস্স অত্থসিদ্ধত্তা. অপিচ হেতুপচ্চযসব্ভাৰতো তস্স সহেতুকতাপরিযাযো লব্ভতেৰ. তেনাহ ‘‘ন ৰা সহেতুকদুকে ৰিয…পে… অব্বোহারিকং কত’’ন্তি. এত্থ এত্থাতি এতস্মিং একমূলকদুকে. হেতুপচ্চযযোগাযোগৰসেনাতি হেতুপচ্চযেন যোগাযোগৰসেন, হেতুপচ্চযস্স সব্ভাৰাসব্ভাৰৰসেনাতি অত্থো. সহেতুকৰোহারমেৰ লভতি পচ্চযভূতহেতুসব্ভাৰতো.

অপরে ¶ পন ভণন্তি ‘‘সহেতুকচিত্তসমুট্ঠানং রূপং অহেতুকং অব্যাকতন্তি ইমিনা ৰচনেন সঙ্গহং গচ্ছন্তম্পি সমূলকত্তা ‘অব্যাকতমূলেন ন একমূল’ন্তি ন সক্কা ৰত্তুং, সতিপি সমূলকত্তে নিপ্পরিযাযেন সহেতুকং ন হোতীতি ‘অব্যাকতমূলেন একমূল’ন্তি চ ন সক্কা ৰত্তুং, তস্মা ‘অহেতুকং অব্যাকতং অব্যাকতমূলেন ন একমূলং, সহেতুকং অব্যাকতং অব্যাকতমূলেন একমূল’ন্তি দ্ৰীসুপি পদেসু অনৰরোধতো অব্বোহারিকং কত্ৰাতি ৰুত্ত’’ন্তি, তং তেসং মতিমত্তং ‘‘সহেতুকঅব্যাকতসমুট্ঠানং রূপং অব্যাকতমূলেন একমূলং হোতী’’তি অট্ঠকথাযং তস্স একমূলভাৰস্স নিচ্ছিতত্তা, তস্মা ৰুত্তনযেনেৰ চেত্থ অত্থো ৰেদিতব্বো.

৮৬-৯৭. কুসলাকুসলাব্যাকতরাসিতো নমননামনসঙ্খাতেন ৰিসেসেন অরূপধম্মানং গহণং নিদ্ধারণং নাম হোতীতি আহ ‘‘নামানং নিদ্ধারিতত্তা’’তি. তেন তেসং অধিকভাৰমাহ ৰিঞ্ঞাযমানমেৰ পকরণেন অপরিচ্ছিন্নত্তা. যদি এৰং ‘‘অহেতুকং নামং সহেতুকং নাম’’ন্তি পাঠন্তরে কস্মা নামগ্গহণং কতন্তি আহ ‘‘সুপাকটভাৰত্থ’’ন্তি, পরিব্যত্তং কত্ৰা ৰুত্তে কিং ৰত্তব্বন্তি অধিপ্পাযো.

নিদ্দেসৰারৰণ্ণনা নিট্ঠিতা.

মূলযমকৰণ্ণনা নিট্ঠিতা.

২. খন্ধযমকং

১. পণ্ণত্তিৰারো

উদ্দেসৰারৰণ্ণনা

২-৩. খন্ধযমকে ¶ …পে… পরিঞ্ঞা চ ৰত্তব্বাতি ইদং পধানভাৰেন ৰত্তব্বদস্সনং. অভিঞ্ঞেয্যকথা হি অভিধম্মো, সা চ যাৰদেৰ পরিঞ্ঞত্তাতি পরিঞ্ঞাসু চ ন ৰিনা তীরণপরিঞ্ঞায পহানপরিঞ্ঞা, তীরণঞ্চ সম্পুণ্ণপরানুগ্গহস্স অধিপ্পেতত্তা কালপুগ্গলোকাসৰিভাগমুখেন খন্ধানং ৰিসুং সহ চ উপ্পাদনিরোধলক্খণপরিগ্গহৰসেন সাতিসযং সম্ভৰতি, নাঞ্ঞথাতি ইমমত্থং দস্সেন্তো ‘‘ছসু কালভেদেসু…পে… পরিঞ্ঞা চ ৰত্তব্বা’’তি পধানং ৰত্তব্বং উদ্ধরতি. তত্থ পন যথা ন তীরণপরিঞ্ঞায ৰিনা পহানপরিঞ্ঞা, এৰং তীরণপরিঞ্ঞা ৰিনা ঞাতপরিঞ্ঞায. সা ¶ চ সুতমযঞাণমূলিকাতি দেসনাকুসলো সত্থা অন্ৰযতো ব্যতিরেকতো চ সমুদাযাৰযৰপদত্থাদিৰিভাগদস্সনমুখেন খন্ধেসু পরিঞ্ঞাপ্পভেদং পকাসেতুকামো ‘‘পঞ্চক্খন্ধা’’তিআদিনা দেসনং আরভীতি দস্সেন্তো ‘‘তে পন খন্ধা’’তিআদিমাহ. পঞ্চহি পদেহীতি পঞ্চহি সমুদাযপদেহি.

তত্থাতি তেসু সমুদাযাৰযৰপদেসু. ধম্মোতি রুপ্পনাদিকো ঞেয্যধম্মো. সমুদাযপদস্সাতি রূপক্খন্ধাদিসমুদাযপদস্স. যদিপি অৰযৰৰিনিমুত্তো পরমত্থতো সমুদাযো নাম নত্থি, যথা পন অৰযৰো সমুদাযো ন হোতি, এৰং ন সমুদাযোপি অৰযৰোতি সতিপি সমুদাযাৰযৰানং ভেদে দ্ৰিন্নং পদানং সমানাধিকরণভাৰতো অত্থেৰাভেদোতি পদদ্ৰযস্স সমানত্থতায সিযা আসঙ্কাতি আহ ‘‘এতস্মিং সংসযট্ঠানে’’তি. ‘‘চক্খাযতনং রূপক্খন্ধগণনং গচ্ছতি, ৰিঞ্ঞাণক্খন্ধো তজ্জা মনোৰিঞ্ঞাণধাতূ’’তিআদীসু একদেসো সমুদাযপদত্থো ৰুত্তো, ‘‘যং কিঞ্চি রূপং…পে… অযং ৰুচ্চতি রূপক্খন্ধো’’তিআদীসু (ৰিভ. ২) পন সকলোতি আহ ‘‘রূপাদি…পে… অত্থো’’তি. অৰযৰপদানঞ্চেত্থ ৰিসেসনৰিসেসিতব্বৰিসযানং সমানাধিকরণতায সমুদাযপদত্থতা ৰুত্তা, ততো এৰ সমুদাযপদানম্পি অৰযৰপদত্থতা. ন হি ৰিসেসনৰিসেসিতব্বানং অত্থানং অচ্চন্তং ভেদো অভেদো ৰা ইচ্ছিতো, অথ খো ভেদাভেদো, তস্মা ¶ অভেদদস্সনৰসেন পঠমনযো ৰুত্তো, ভেদদস্সনৰসেন দুতিযনযো. যো হি রুপ্পনাদিসঙ্খাতো রাসট্ঠো অৰযৰপদেহি রূপাদিসদ্দেহি চ খন্ধসদ্দেন চ ৰিসেসনৰিসেসিতব্বভাৰেন ভিন্দিত্ৰা ৰুত্তো, স্ৰাযং অত্থতো রাসিভাৰেন অপেক্খিতো রুপ্পনাদিঅত্থো এৰাতি.

যথা অৰযৰপদেহি ৰুচ্চমানোপি সমুদাযপদস্স অত্থো হোতি, এৰং সমুদাযপদেহি ৰুচ্চমানোপি অৰযৰপদস্স অত্থোতি ‘‘রূপক্খন্ধো রূপঞ্চেৰ রূপক্খন্ধো চ, রূপক্খন্ধো রূপন্তি? আমন্তা’’তিআদিনা পদসোধনা কতাতি দস্সেন্তো আহ ‘‘রূপাদিঅৰযৰপদেহি…পে… পদসোধনৰারো ৰুত্তো’’তি. তত্থ একচ্চস্স অৰযৰপদস্স অঞ্ঞত্থ ৰুত্তিযা অৰযৰপদত্থস্স সমুদাযপদত্থতায সিযা অনেকন্তিকতা, সমুদাযপদস্স পন তং নত্থীতি সমুদাযপদত্থস্স অৰযৰপদত্থতায ব্যভিচারাভাৰো ¶ ‘‘রূপক্খন্ধো রূপন্তি? আমন্তা’’তি পাল়িযা পকাসিতোতি ৰুত্তং ‘‘রূপাদি…পে… দস্সেতু’’ন্তি.

‘‘রূপক্খন্ধো’’তিআদীসু খন্ধত্থস্স ৰিসেসিতব্বত্তা ৰুত্তং ‘‘পধানভূতস্স খন্ধপদস্সা’’তি. ৰেদনাদিউপপদত্থস্স চ সম্ভৰতো ‘‘ৰেদনাক্খন্ধো’’তিআদীসু. রূপাৰযৰপদেন ৰুত্তস্সাতি রূপসঙ্খাতেন অৰযৰপদেন ৰিসেসনভাৰেন ৰুত্তস্স খন্ধত্থস্স রূপক্খন্ধভাৰো হোতি. তেন ৰুত্তং ‘‘রূপক্খন্ধো রূপন্তি? আমন্তা’’তি. তত্থাতি তস্মিং রূপক্খন্ধপদে. পধানভূতেন ৰিসেসিতব্বত্তা খন্ধাৰযৰপদেন ৰুত্তস্স রুপ্পনট্ঠস্স কিং ৰেদনাক্খন্ধাদিভাৰো হোতীতি যোজনা. সমানে অৰযৰপদাভিধেয্যভাৰে অপ্পধানেন পদেন যো অত্থো ৰিঞ্ঞাযতি, সো কস্মা পধানেন ন ৰিঞ্ঞাযতীতি অধিপ্পাযো. খন্ধাৰযৰপদেন ৰুত্তো ধম্মোতি রাসট্ঠমাহ. তত্থ কোচীতি রুপ্পনট্ঠো. কেনচি সমুদাযপদেনাতি রূপক্খন্ধপদেন, ন ৰেদনাক্খন্ধাদিপদেন. তেনাহ ‘‘ন সব্বো সব্বেনা’’তি. এস নযো ৰেদনাক্খন্ধাদীসু. রূপরূপক্খন্ধাদিঅৰযৰসমুদাযপদসোধনমুখেন তত্থ চ চতুক্খন্ধৰসেন পৰত্তা পাল়িগতি পদসোধনমূলচক্কৰারো. এৰঞ্চ দস্সেন্তেনাতি ইমিনা য্ৰাযং রূপাদিঅৰযৰপদেহি রূপক্খন্ধাদিসমুদাযপদেহি চ দস্সিতাকারো অত্থৰিসেসো, তং পচ্চামসতি. ৰিসেসনভাৰো ভেদকতায সামঞ্ঞতো অৰচ্ছেদকত্তা, ৰিসেসিতব্বভাৰো অভেদযোগেন ভেদন্তরতো অৰিচ্ছিন্দিতব্বত্তা, সমানাধিকরণভাৰো তেসং ভেদাভেদানং একৰত্থুসন্নিস্সযত্তা.

তেনাতি ¶ যথাৰুত্তেন ৰিসেসনৰিসেসিতব্বভাৰেন. এত্থাতি এতস্মিং সমানাধিকরণে. তেনাতি ৰা সমানাধিকরণভাৰেন. এত্থাতি রূপক্খন্ধপদে. যথা নীলুপ্পলপদে উপ্পলৰিসেসনভূতং নীলং ৰিসিট্ঠমেৰ হোতি, ন যং কিঞ্চি, এৰমিধাপি খন্ধৰিসেসনভূতং রূপম্পি ৰিসিট্ঠমেৰ সিযাতি দস্সেন্তো ‘‘কিং খন্ধতো…পে… হোতী’’তি আহ. তথা ‘‘রূপঞ্চ তং খন্ধো চা’’তি সমানাধিকরণভাৰেনেৰ যং রূপং, সো খন্ধো. যো খন্ধো, তং রূপন্তি অযম্পি আপন্নো এৰাতি আহ ‘‘সব্বেৰ…পে… ৰিসেসিতব্বা’’তি. ৰিসেসনেন চ নাম নিদ্ধারিতরূপেন ভৰিতব্বং অৰচ্ছেদকত্তা, ন অনিদ্ধারিতরূপেনাতি আহ ‘‘কিং পন ত’’ন্তিআদি, তস্সেৰ গহিতত্তা ন পিযরূপসাতরূপস্সাতি অধিপ্পাযো. ন ¶ হি তং খন্ধৰিসেসনভাৰেন গহিতং, ৰিস্সজ্জনং কতং তস্সেৰাতি যোজনা. ন খন্ধতো অঞ্ঞং রূপং অত্থীতি ইদং রুপ্পনট্ঠো রূপন্তি কত্ৰা ৰুত্তং, ন হি সো খন্ধৰিনিমুত্তো অত্থি. তেনেৰাতি যথাৰুত্তরূপস্স খন্ধৰিনিমুত্তস্স অভাৰেনেৰ. ‘‘পিযরূপং সাতরূপং, দস্সেন্তেনপ্পক’’ন্তি চ আদীসু অতদত্থস্স রূপসদ্দস্স লব্ভমানত্তা ‘‘তেন রূপসদ্দেনা’’তি ৰিসেসেত্ৰা ৰুত্তং. ৰুচ্চমানং ভূতুপাদাযম্পি ভেদং ধম্মজাতং. সুদ্ধেনাতি কেৰলেন, রূপসদ্দেন ৰিনাপীতি অত্থো. তযিদং পকরণাদিঅৰচ্ছিন্নতং সন্ধায ৰুত্তং, সমানাধিকরণতং ৰা. যো হি রূপসদ্দেন সমানাধিকরণো খন্ধসদ্দো, তেন যথাৰুত্তরূপসদ্দেন ৰিয তদত্থো ৰুচ্চতেৰ. তেনাহ ‘‘খন্ধা রূপক্খন্ধো’’তি. যদিপি যথাৰুত্তং রূপং খন্ধো এৰ চ, খন্ধো পন ন রূপমেৰাতি আহ ‘‘ন চ সব্বে…পে… ৰিসেসিতব্বা’’তি. তেনেৰাতি অরূপসভাৰস্স খন্ধস্স অত্থিভাৰেনেৰ. তেতি খন্ধা. ৰিভজিতব্বাতি ‘‘খন্ধা রূপক্খন্ধো’’তি পদং উদ্ধরিত্ৰা ‘‘রূপক্খন্ধো খন্ধো চেৰ রূপক্খন্ধো চ, অৰসেসা খন্ধা ন রূপক্খন্ধো’’তিআদিনা ৰিভাগেন দস্সেতব্বা.

খন্ধানং রূপৰিসেসন…পে… সংসযো হোতীতি এত্থ কিং খন্ধতো অঞ্ঞাপি ৰেদনা অত্থি, যতো ৰিনিৰত্তা ৰেদনা খন্ধৰিসেসনং হোতি, সব্বে চ খন্ধা কিং খন্ধৰিসেসনভূতায ৰেদনায ৰিসেসিতব্বাতি এৰং যোজনা ৰেদিতব্বা. কেচীতি অনুভৰনাদিপ্পকারা. কেনচি ৰিসেসনেনাতি ৰেদনাদিনা ৰিসেসনেন.

এত্থ চ রূপাদিপণ্ণত্তি খন্ধপণ্ণত্তি চ ‘‘রূপং খন্ধো, খন্ধা রূপক্খন্ধো’’তিআদিনা ৰিসুং সহ চ রুপ্পনাদিকে অত্থে পৰত্তমানা কদাচি অৰযৰভূতে পৰত্ততি, কদাচি সমুদাযভূতে, তস্সা পন তথা পৰত্তনাকারে নিদ্ধারিতে যস্মা রূপাদিক্খন্ধা পদতো অত্থতো চ ¶ ৰিসোধিতা নাম হোন্তি তব্বিসযকঙ্খাপনোদনতো, তস্মা ‘‘রূপক্খন্ধো রূপঞ্চেৰ রূপক্খন্ধো চ, রূপক্খন্ধো রূপন্তি? আমন্তা’’তিআদিনযপ্পৰত্তেন পঠমৰারেন রূপাদিঅৰযৰপদেহি অৰযৰত্থো ৰিয সমুদাযত্থোপি ৰুচ্চতি, তথা সমুদাযপদেহিপীতি অযমত্থো দস্সিতো. ‘‘রূপং রূপক্খন্ধো, খন্ধা ৰেদনাক্খন্ধো’’তিআদিনযপ্পৰত্তেন পন দুতিযৰারেন ৰিসেসৰাচী ৰিয রূপাদিঅৰযৰপদেহি সামঞ্ঞভূতেনপি তংতংৰিসিট্ঠেন খন্ধাৰযৰপদেন সো ¶ সো এৰ সমুদাযত্থো ৰুচ্চতি, ন সব্বোতি অযমত্থো দস্সিতো. খন্ধৰিনিমুত্তস্স যথাধিপ্পেতস্স অভাৰা যদিপি খন্ধোযেৰ রূপং, সো পন ন সব্বো রূপং, অথ খো তদেকদেসো, তথা ৰেদনাদযোপীতি অযমত্থো ‘‘রূপং খন্ধো, খন্ধা রূপ’’ন্তিআদিনযপ্পৰত্তেন ততিযৰারেন দস্সিতো. ‘‘রূপং খন্ধো, খন্ধা ৰেদনাক্খন্ধো’’তিআদিনযপ্পৰত্তেন পন চতুত্থৰারেন ‘‘রূপং খন্ধো’’তি রূপস্স খন্ধভাৰে নিচ্ছিতে খন্ধো নামাযং ন কেৰলং রূপমেৰ, অথ খো ৰেদনাদি চাতি ৰেদনাদীনম্পি খন্ধভাৰপ্পকাসনে ন সব্বে খন্ধা ৰেদনাদিৰিসেসৰন্তো, কেচিদেৰ পন তেন তেন ৰিসেসেন তথা ৰুচ্চন্তীতি অযমত্থো দস্সিতো. এৰং দস্সেন্তী চেসা পাল়ি খন্ধানং যথাৰুত্তপণ্ণত্তিসোধনমুখেন সরূপাৰধারণায সংৰত্ততি, তঞ্চ তেসং যাৰদেৰ উপ্পাদাদিনিচ্ছযত্থন্তি দস্সেন্তো ‘‘এৰং যেসং…পে… ৰেদিতব্বো’’তি আহ.

একদেসেপি সমুদাযৰোহারো দিস্সতি যথা পটো দড্ঢো, সমুদ্দো দিট্ঠোতি আহ ‘‘চক্কাৰযৰভাৰতো চক্কানীতি যমকানি ৰুত্তানী’’তি. বন্ধিত্ৰাতি যমকভাৰেন বন্ধিত্ৰা, যমকমূলভাৰেনেৰ ৰা. মূলভাৰেন গহণং সম্বন্ধভাৰো, তংসম্বন্ধতা চ মূলপদাদীনং নাভিআদিসদিসতা দট্ঠব্বা. অপুব্বস্স ৰত্তব্বস্স অভাৰতো নযিধ দেসনা মণ্ডলভাৰেনেৰ সম্বজ্ঝতীতি আহ ‘‘ন মণ্ডলভাৰেন সম্বজ্ঝনতো’’তি. যদিপি রূপক্খন্ধমূলকে অপুব্বং নত্থি, ৰেদনাক্খন্ধাদিমূলকেসু পন সঞ্ঞাদিমুখেন দেসনপ্পৰত্তিযং অপুব্বৰসেনেৰ গতো সিযা মণ্ডলভাৰেন সম্বন্ধো, ন তথা পাঠো পৰত্তোতি আহ ‘‘ৰেদনাক্খন্ধ…পে… সম্বন্ধেনা’’তি. পচ্ছিমস্স পুরিমেন অসম্বজ্ঝনমেৰ হি হেট্ঠিমসোধনং. সুদ্ধক্খন্ধলাভমত্তমেৰ গহেত্ৰাতি ‘‘খন্ধা রূপ’’ন্তি এত্থ খন্ধাতি খন্ধসদ্দেন লব্ভমানং রূপাদীহি অসম্মিস্সং খন্ধট্ঠমত্তমেৰ উদ্দেসৰসেন গহেত্ৰা. যদিপি উদ্দেসে খন্ধৰিসেসনং রূপাদি ‘‘খন্ধা রূপ’’ন্তি সুদ্ধরূপাদিমত্তমেৰ গহিতং, তথাপি ৰিসেসরহিতস্স সামঞ্ঞস্স অভাৰতো তত্থ সুদ্ধরূপাদিমত্ততায অট্ঠত্ৰা. খন্ধৰিসেসনভাৰসঙ্খাতন্তি যথাধিগতং খন্ধানং ৰিসেসনভাৰেন কথিতং রুপ্পনাদিকং ¶ ৰিসেসনত্থং দস্সেতুং. কেৰলমেৰ তং অগ্গণ্হন্তো খন্ধসদ্দেন সহ যোজেত্ৰা…পে… ৰিভত্তত্তা সুদ্ধক্খন্ধৰারোতি ৰুত্তোতি যোজনা.

উদ্দেসৰারৰণ্ণনা নিট্ঠিতা.

১. পণ্ণত্তিৰারো

নিদ্দেসৰারৰণ্ণনা

২৬. এৰং ¶ ৰুত্তন্তি এৰং দ্ৰারালম্বনেহি সদ্ধিং দ্ৰারপ্পৰত্তধম্মৰিভাগৰসেন ৰুত্তং. পিযসভাৰং পিযজাতিকং ‘‘কথং রূপেন খো, আৰুসো’’তিআদীসু ৰিয পিযসভাৰট্ঠেন রূপং, ন রুপ্পনট্ঠেনাতি ৰুত্তং ‘‘পিযরূপং…পে… রূপং ন রূপক্খন্ধো’’তি. রুপ্পনট্ঠেন রূপক্খন্ধপরিযাপন্নম্পি চক্খাদি পিযসভাৰমত্তৰচনিচ্ছাৰসেন পিযরূপমেৰ অনুপ্পৰিসতি, ন রূপক্খন্ধন্তি আহ ‘‘পিযসভাৰ…পে… ন রূপক্খন্ধোতি ৰুত্ত’’ন্তি. ‘‘যো পন যত্থ ৰিসেসো’’তি ৰুত্তো ৰিসেসসদ্দো নানুৰত্ততীতি অধিপ্পাযেনাহ ‘‘ৰচনসেসো’’তি. ন হি অধিকারতো লব্ভমানস্স অজ্ঝাহরণকিচ্চং অত্থি. দিট্ঠিসঞ্ঞাতি ৰা পদুদ্ধারোযং ৰেদিতব্বো. ৰিসেসতা পনস্সা ‘‘ৰিসেসং ৰণ্ণযিস্সামা’’তি পটিঞ্ঞায এৰ পাকটা. ‘‘অৰসেসা সঙ্খারা’’তি এত্থাপি এসেৰ নযো. সংযোজনৰসেন জানাতি অভিনিৰিসতীতি সঞ্ঞা দিট্ঠীতি আহ ‘‘দিট্ঠি এৰ সঞ্ঞা’’তি. দিট্ঠি চাতি চ-সদ্দেন অৰসিট্ঠং পপঞ্চং সঙ্গণ্হাতি. তথা হি ‘‘পপঞ্চসঞ্ঞাসঙ্খা’’তি এত্থ পপঞ্চসূদনিযং (ম. নি. অট্ঠ. ১.২০১) ৰুত্তং ‘‘সঞ্ঞানামেন ৰা পপঞ্চা এৰ ৰুত্তা’’তি.

২৮. ‘‘খন্ধা ৰেদনাক্খন্ধো’’তি এতস্মিং অনুলোমে যথা সরূপদস্সনেন ৰিস্সজ্জনং লব্ভতি, ন এৰং ‘‘ন খন্ধা ন ৰেদনাক্খন্ধো’’তি পটিলোমে, ইধ পন পটিৰচনেন ৰিস্সজ্জনন্তি তদত্থং ৰিৰরন্তো ‘‘খন্ধসদ্দপ্পৰত্তিযা চ অভাৰে ৰেদনাক্খন্ধসদ্দপ্পৰত্তিযা চ অভাৰো’’তি আহ. তেন সত্তাপটিসেধে অযং ন-কারোতি দস্সেতি. সদ্দগ্গহণঞ্চেত্থ সদ্দনিবন্ধনত্তা ¶ পঞ্ঞত্তিযা সদ্দসভাগতং ৰা সন্ধায কতং. পণ্ণত্তিসোধনঞ্হেতং. তেনাহ ‘‘পণ্ণত্তিসোধনমত্তমেৰ করোতী’’তি. তেন নিদ্ধারেতব্বস্স ধম্মন্তরস্স অভাৰং দস্সেতি. যতো ৰুত্তং ‘‘ন অঞ্ঞধম্মসব্ভাৰো এৰেত্থ পমাণ’’ন্তি. এৰঞ্চ কত্ৰাতিআদিনা যথাৰুত্তমত্থং পাঠন্তরেন সমত্থেতি. কামং কত্থচি সতিপি খন্ধে নত্থি ৰেদনাক্খন্ধো, অখন্ধত্তসভাৰা পন নত্থি ৰেদনাতি ‘‘ন খন্ধা ন ৰেদনাক্খন্ধোতি? আমন্তা’’তি ৰুত্তন্তি এৰং ৰা এতং দট্ঠব্বং. তেনাহ অট্ঠকথাযং ‘‘পঞ্ঞত্তিনিব্বানসঙ্খাতা’’তিআদি.

৩৯. ‘‘রূপতো অঞ্ঞে’’তি এত্থ ভূতুপাদায ধম্মো ৰিয পিযসভাৰোপি রূপসদ্দাভিধেয্যতাসামঞ্ঞেন গহিতোতি আহ ‘‘লোকুত্তরা ৰেদনাদযো ¶ দট্ঠব্বা’’তি. অপ্পৰত্তিমত্তমেৰাতি খন্ধসদ্দপ্পৰত্তিযা অভাৰে রূপসদ্দপ্পৰত্তিযা চ অভাৰোতি পণ্ণত্তিসোধনমত্ততংযেৰ সন্ধায ৰদতি, তথা চাহ ‘‘এৰঞ্চ কত্ৰা’’তিআদি. তেনেতং দস্সেতি – যথা চক্খুতো অঞ্ঞস্স সব্বস্সপি সভাৰধম্মস্স আযতনগ্গহণেন গহিতত্তা তদুভযৰিনিমুত্তং কিঞ্চি নত্থীতি কেৰলং পঞ্ঞত্তিসোধনত্থং তমেৰ অভাৰং দস্সেতুং ‘‘চক্খুঞ্চ আযতনে চ ঠপেত্ৰা অৰসেসা ন চেৰ চক্খু ন চ আযতন’’ন্তি ৰুত্তং, এৰমিধাপি তদত্থমেৰ উভযৰিনিমুত্তস্স অভাৰং দস্সেতুং ‘‘রূপঞ্চ খন্ধে চ ঠপেত্ৰা অৰসেসা ন চেৰ রূপং ন চ খন্ধা’’তি ৰুত্তন্তি. ৰিসমোপঞ্ঞাসো. ‘‘চক্খুঞ্চ আযতনে চ ঠপেত্ৰা’’তি এত্থ হি অৰসেসগ্গহণেন গয্হমানং কিঞ্চি নত্থীতি সক্কা ৰত্তুং আযতনৰিনিমুত্তস্স সভাৰধম্মস্স অভাৰা. তেনাহ ‘‘যদি সিযা’’তি. ‘‘রূপঞ্চ খন্ধে চ ঠপেত্ৰা’’তি এত্থ পন ন তথা সক্কা ৰত্তুং খন্ধৰিনিমুত্তস্স সভাৰধম্মস্স অত্থিভাৰতো. যদি পন তাদিসং খন্ধগতং ধম্মজাতং নত্থীতি এৰমিদং ৰুত্তং সিযা, এৰং সতি যুত্তমেতং সিযা. তথা হি ‘‘অট্ঠকথাযং পনা’’তিআদিনা পঞ্ঞত্তিগ্গহণমেৰ উদ্ধরীযতি. তণ্হাৰত্থু চ ন সিযা অৰসেসগ্গহণেন গয্হমানন্তি আনেত্ৰা সম্বন্ধো. খন্ধো চ সিযাতি যোজনা.

নিদ্দেসৰারৰণ্ণনা নিট্ঠিতা.

২. পৰত্তিৰারৰণ্ণনা

৫০-২০৫. মিস্সককালভেদেসু ¶ যমকেসু পদানং ভিন্নকালত্তা সিযা অত্থৰিসেসোতি আহ ‘‘অমিস্সককালভেদেসু ৰারেসু অত্থৰিসেসাভাৰতো’’তি. ইদানি তমেৰত্থং ‘‘পুরিমস্স হী’’তিআদিনা ৰিৰরতি. তেনাতি অত্থৰিসেসাভাৰেন. এত্থাতি এতস্মিং পৰত্তিৰারপাঠে, এতিস্সং ৰা পৰত্তিৰারৰণ্ণনাযং. ছ এৰ ৰুত্তা, ন নৰাতি অধিপ্পাযো. তেনাহ ‘‘অতীতেনা’’তিআদি. এতে পন তযোতি অত্তনা ৰিসুং অনন্তরং দস্সিতে সন্ধাযাহ. যথাদস্সিতাতি অট্ঠকথাযং নিদ্ধারেত্ৰা দস্সিতব্বাকারা পচ্চুপ্পন্নেনাতীতাদযো যে পাল়িযং উজুকমেৰ আগতা. ‘‘ন ৰিসুং ৰিজ্জন্তী’’তি ৰুত্তমেৰত্থং ‘‘তত্থ তত্থ হী’’তিআদিনা পাকটতরং করোতি. তত্থ পটিলোমপুচ্ছাহীতি ‘‘যস্স ৰা পন ৰেদনাক্খন্ধো ¶ উপ্পজ্জিত্থ, তস্স রূপক্খন্ধো উপ্পজ্জতী’’তি এৰমাদিকাহি পঠমপদে ৰুত্তস্স পটিলোমৰসেন পৰত্তাহি. তেনেৰাতি নযতো যোজেতুং সক্কুণেয্যত্তা এৰ. মিস্সককালভেদেসু চাতি ন কেৰলং অমিস্সককালভেদেসুযেৰ, অথ খো মিস্সককালভেদেসু চাতি অত্থো. ন যোজনাসুকরতায এৰ পুরিমে অযোজনা, অথ খো সুখগ্গহণত্থম্পীতি দস্সেন্তো আহ ‘‘অমিস্সক…পে… ৰুত্তানী’’তি.

যেন কারণেনাতি যেন একপদদ্ৰযসঙ্গহিতানং খন্ধানং উপ্পাদস্স নিরোধস্স লাভসঙ্খাতেন কারণেন. যথাক্কমং পুরেপঞ্হো পচ্ছাপঞ্হোতি চ নামং ৰুত্তং. চ-সদ্দেন পুরেপচ্ছাপঞ্হোতি চ নামং ৰুত্তন্তি নিদ্ধারেত্ৰা যোজেতব্বং. তত্থ পন ‘‘একপদদ্ৰযসঙ্গহিতান’’ন্তি ইদং একজ্ঝং কত্ৰা গহেতব্বং. তমেৰত্থম্পি ৰিৰরতি ‘‘যস্স হী’’তিআদিনা. তত্থ যস্সাতি যস্স পঞ্হস্স. ‘‘পঞ্হো’’তি চেত্থ পুচ্ছনৰসেন পৰত্তং ৰচনং ৰেদিতব্বং. তেনেৰাহ ‘‘পরিপূরেত্ৰা ৰিস্সজ্জেতব্বত্থসঙ্গণ্হনতো’’তি. তং সরূপদস্সনেন ৰিস্সজ্জনং তংৰিস্সজ্জনং, তং ৰা যথাৰুত্তং ৰিস্সজ্জনং এতস্সাতি তংৰিস্সজ্জনো, তস্স তংৰিস্সজ্জনস্স. পুরিমকোট্ঠাসেনাতি পুরিমেন উদ্দেসপদেন. তেন হি ৰিস্সজ্জনপদস্স সমানত্থতা ইধ সদিসত্থতা. একেন পদেনাতি একেন পধানাপ্পধানেন যমকপদেন, ন পঠমপদেনেৰাতি অত্থো. উপ্পাদনিরোধলাভসামঞ্ঞমত্তেনাতি উপ্পাদস্স ৰা নিরোধস্স ৰা লব্ভমানতায সমানতামত্তেন. সন্নিট্ঠানপদ…পে… যুত্তন্তি ইদং অট্ঠকথাযং ‘‘যত্থ রূপক্খন্ধো নুপ্পজ্জতী’’তিআদিনা পুরেপঞ্হস্স দস্সিতত্তা ৰুত্তং. যদিপি তত্থ ‘‘উপ্পজ্জতী’’তি ৰিস্সজ্জিতত্তা ৰেদনাক্খন্ধস্স উপ্পাদো লব্ভতীতি ৰুত্তং, যো পন সন্নিট্ঠানপদসঙ্গহিতো ¶ রূপক্খন্ধস্স অনুপ্পাদো পাল়িযং অনুঞ্ঞাতরূপেন ঠিতো, তস্স ৰসেন পুরেপঞ্হো যুত্তোতি অধিপ্পাযো. এৰঞ্হি পুরিমকোট্ঠাসেন সদিসত্থতা হোতি.

‘‘যস্স রূপক্খন্ধো নুপ্পজ্জিত্থ, তস্স ৰেদনাক্খন্ধো নুপ্পজ্জিত্থা’’তি এত্থ রূপক্খন্ধস্স অনুপ্পন্নপুব্বতাপটিক্খেপমুখেন ইতরস্স পটিক্খিপীযতীতি রূপক্খন্ধস্সেৰ যথাৰুত্তপটিক্খেপো পধানভাৰেন ৰুত্তো. এসেৰ নযো অঞ্ঞেসুপি এদিসেসু ঠানেসূতি আহ ‘‘সন্নিট্ঠানত্থস্সেৰ পটিক্খিপনং পটিক্খেপো’’তি ¶ . ‘‘যস্স রূপক্খন্ধো উপ্পজ্জতি, তস্স ৰেদনাক্খন্ধো নিরুজ্ঝতী’’তি এত্থ পন রূপক্খন্ধস্স উপ্পাদলক্খণং কত্ৰা ৰেদনাক্খন্ধস্স নিরোধো পুচ্ছীযতীতি সো এৰ ‘‘নো’’তি পটিসেধীযতি. এস নযো অঞ্ঞেসুপি এদিসেসু ঠানেসূতি ৰুত্তং ‘‘সংসযত্থনিৰারণং পটিসেধো’’তি. ‘‘ন-কারৰিরহিত’’ন্তি এতেন পটিসেধস্স পটিসেধিতমাহ. যদি এৰং পাল়িগতিপটিসেধৰিস্সজ্জনানং কো ৰিসেসোতি আহ ‘‘তত্থ উপ্পত্তী’’তিআদি.

তদেকদেসপক্খেপৰসেনাতি তেসং চতুন্নং পঞ্হানং পঞ্চন্নঞ্চ ৰিস্সজ্জনানং একদেসস্স পক্খিপনৰসেন. তেনাহ অট্ঠকথাযং ‘‘পঠমে ঠানে পরিপুণ্ণপঞ্হস্স পুরিমকোট্ঠাসে সরূপদস্সনেনা’’তিআদি. যো পনেত্থ পঞ্হেসু ৰিস্সজ্জনেসু চ সত্তৰীসতিযা ঠানেসু পক্খেপং লভতি, তং দস্সেতুং ‘‘পরিপুণ্ণপঞ্হো এৰা’’তিআদি ৰুত্তং. পাল়িৰৰত্থানদস্সনাদিতোতি এত্থ আদি-সদ্দেন পুচ্ছাৰিভঙ্গো ৰিস্সজ্জনাঠানানি একস্মিং পঞ্হে যোজনানযোতি ইমেসং সঙ্গহো দট্ঠব্বো.

সুদ্ধাৰাসানন্তিআদি পাল়িযা পদং উদ্ধরিত্ৰা অত্থদস্সনত্থং আরদ্ধং. ‘‘যস্স যত্থ রূপক্খন্ধো নুপ্পজ্জিত্থ, তস্স তত্থ ৰেদনাক্খন্ধো নুপ্পজ্জিত্থা’’তি ইমস্স ৰিস্সজ্জনং হোতি ‘‘সুদ্ধাৰাসানং তেসং তত্থা’’তি. তত্থ একভূমিযং দুতিযা উপপত্তি নত্থীতি একিস্সা ভূমিযা একস্স অরিযপুগ্গলস্স দুতিযৰারং পটিসন্ধিগ্গহণং নত্থীতি অত্থো. ততিযৰারাদীসু ৰত্তব্বমেৰ নত্থি. স্ৰাযমত্থো যথা ঞাপিতো হোতি, তং দস্সেতুং ‘‘পটিসন্ধিতো পভুতি হি…পে… পৰত্তা’’তি ৰুত্তং. তেন অদ্ধাপচ্চুপ্পন্নৰসেনাযং দেসনা পৰত্তাতি দস্সেতি. আদাননিক্খেপপরিচ্ছিন্নং কম্মজসন্তানং একত্তেন গহেত্ৰা তস্স ৰসেন উপ্পাদনিরোধেসু ৰুচ্চমানেসু অকম্মজেসু কুসলাদীসু কথন্তি চোদনাযং তেপি ইধ তংনিস্সিতা এৰ কতাতি দস্সেন্তো ¶ আহ ‘‘তস্মিঞ্হি…পে… দস্সিতা’’তি. তেনেৰাতি কম্মজসন্তানেনেৰ. তস্মাতি এককম্মনিব্বত্তস্স ৰিপাকসন্তানস্স একত্তেন গহিতত্তা. তস্সাতি কম্মজসন্তানস্স. পঞ্চসু সুদ্ধাৰাসেসু যথা পচ্চেকং ‘‘একিস্সা ভূমিযা দুতিযা উপপত্তি নত্থী’’তি যথাৰুত্তপাল়িযা ৰিঞ্ঞাযতি, এৰং ‘‘সুদ্ধাৰাসান’’ন্তি অৰিসেসৰচনতো সকলেপি সুদ্ধাৰাসে সা নত্থীতি তায কস্মা ন ৰিঞ্ঞাযতীতি চোদনং সমুট্ঠাপেত্ৰা সযমেৰ পরিহরিতুং ‘‘কস্মা পনা’’তিআদিমাহ. তত্থ সুদ্ধাৰাসেসু হেট্ঠাভূমিকস্স অসতি ইন্দ্রিযপরিপাকে উপরিভূমিসমুপ্পত্তি ন সক্কা ¶ পটিসেধেতুং উদ্ধংসোতৰচনতো. উদ্ধমস্স তণ্হাসোতং ৰট্টসোতঞ্চাতি হি উদ্ধংসোতো. তেনাহ ‘‘উদ্ধংসোতপাল়িসব্ভাৰা’’তি. সংসন্দেতব্বাতি যথা ন ৰিরুজ্ঝন্তি, এৰং নেতব্বা. তথা চেৰ সংৰণ্ণিতং.

এতেন সন্নিট্ঠানেনাতি অঙ্কিতোকাসভাৰিরূপুপ্পাদসন্নিস্সযেন নিচ্ছযেন. ৰিসেসিতা তথাভাৰিরূপভাৰিনো. অসঞ্ঞসত্তাপীতি ন কেৰলং পঞ্চৰোকারা এৰ, অথ খো অসঞ্ঞসত্তাপি. তে এৰ অসঞ্ঞসত্তে এৰ গহেত্ৰা পুরিমকোট্ঠাসেতি অধিপ্পাযো. তেন যে সন্নিট্ঠানেন ৰজ্জিতাতি তেন যথাৰুত্তসন্নিট্ঠানেন যে ৰিরহিতা, তে তথা ন ৰত্তব্বাতি অত্থো. ইদানি ‘‘তে ততো’’তিআদিনা দস্সেতি. ততোতি অসঞ্ঞাভৰতো. পচ্ছিমভৰিকানন্তি এত্থ পচ্ছিমভৰং সরূপতো দস্সেতুং ‘‘কিং পঞ্চৰোকারাদী’’তিআদি ৰুত্তং. অপচ্ছিমভৰিকানম্পি অরূপানং অরূপভৰে যথা রূপক্খন্ধো নুপ্পাদি, এৰং তত্থ পচ্ছিমভৰিকানং ৰেদনাক্খন্ধোপীতি আহ ‘‘এতেন সন্নিট্ঠানেন সঙ্গহিতত্তা’’তি. তেনাহ ‘‘তেসং…পে… আহা’’তি. তত্থ তেসন্তি পচ্ছিমভৰিকানং. তত্থাতি অরূপভৰে. ইতরানুপ্পত্তিভাৰঞ্চাতি ইতরস্স ৰেদনাক্খন্ধস্স অনুপ্পজ্জনসব্ভাৰম্পি. সপ্পটিসন্ধিকানম্পি সুদ্ধাৰাসানং খন্ধভেদস্স পরিনিব্বানপরিযাযো ওল়ারিকদোসপ্পহানতো কিলেসূপসমসামঞ্ঞেন ৰুত্তোতি ৰেদিতব্বং.

সব্বেসঞ্হি তেসন্তি তংতংভূমিযং ঠিতানং সব্বেসং সুদ্ধাৰাসানং. যথা পনাতিআদিনা ৰুত্তমেৰত্থং পাকটতরং করোতি. অনন্তা লোকধাতুযোতি ইদং ওকাসস্স পরিচ্ছেদাভাৰংযেৰ দস্সেতুং ৰুত্তং. পুগ্গলৰসেন সমানাধারতায সমানকালত্তেন অসম্ভৰন্তো ওকাসৰসেন পন সম্ভৰন্তো সংকিণ্ণা ৰিয হোন্তীতি আহ ‘‘সংকিণ্ণতা হোতী’’তি.

পৰত্তিৰারৰণ্ণনা নিট্ঠিতা.

৩. পরিঞ্ঞাৰারৰণ্ণনা

২০৬-২০৮. তস্সাপীতি ¶ পুগ্গলোকাসৰারস্সপি. ওকাসে পুগ্গলস্সেৰাতি যথাগহিতে ওকাসে যো পুগ্গলো, তস্সেৰ ওকাসৰিসিট্ঠপুগ্গলস্সেৰাতি ¶ অত্থো. যথা পন পুগ্গলৰারে লব্ভমানে পুগ্গলোকাসৰারোপি লব্ভতি, এৰং ওকাসৰারোপি লব্ভেয্যাতি চোদনং সন্ধাযাহ ‘‘ওকাসৰারোপি চা’’তি. তস্মাতি যস্মা ৰুচ্চমানোপি ওকাসো পুগ্গলস্স ৰিসেসভাৰেনেৰ ৰুচ্চেয্য, ন ৰিসুং, তস্মা.

অঞ্ঞথাতি পৰত্তিৰারে ৰিয আদাননিক্খেপপরিচ্ছিন্নং কম্মজসন্তানং একত্তেন গহেত্ৰা তস্স উপ্পাদনিরোধৰসেন পরিঞ্ঞাৰচনে. ‘‘যো রূপক্খন্ধং পরিজানাতী’’তি সন্নিট্ঠানপদসঙ্গহিতত্থাভাৰদস্সনমুখেন ইতরস্সপি অভাৰং দস্সেতুং ‘‘রুপক্খন্ধপরিজাননস্স অভাৰা’’তি ৰুত্তং. ‘‘আমন্তা’’তি চ কতং, তস্মা পৰত্তে চিত্তক্খণৰসেনেৰেত্থ তযো অদ্ধো লব্ভন্তীতি অত্থো. ‘‘অগ্গমগ্গসমঙ্গিঞ্চ অরহন্তঞ্চা’’তি দ্ৰিন্নং পদানং ‘‘রূপক্খন্ধঞ্চ ন পরিজানন্তি ৰেদনাক্খন্ধঞ্চ ন পরিজানিত্থা’’তি দ্ৰীহি পদেহি যথাক্কমং সম্বন্ধো. ‘‘ঠপেত্ৰা অৰসেসা পুগ্গলা’’তি পন পচ্চেকং যোজেতব্বং. অগ্গমগ্গ…পে… নত্থীতি ইমিনা অরহত্তমগ্গঞাণস্সেৰ পরিঞ্ঞামত্থকপ্পত্তিযা পরিঞ্ঞাকিচ্চং সাতিসযং, তদভাৰা ন ইতরেসন্তি দস্সেতি. যতো তস্সেৰ ৰজিরূপমতা ৰুত্তা, সেসানঞ্চ ৰিজ্জূপমতা. তেনাতি তেন যথাৰুত্তেন ৰচনেন. তদৰসেসসব্বপুগ্গলেতি ততো অগ্গমগ্গসমঙ্গিতো অৰসেসসব্বপুগ্গলে. ইমং পন যথাৰুত্তদোসং পরিহরন্তা ‘‘পুথুজ্জনাদযো সন্ধাযা’’তি ৰদন্তি.

পরিঞ্ঞাৰারৰণ্ণনা নিট্ঠিতা.

খন্ধযমকৰণ্ণনা নিট্ঠিতা.

৩. আযতনযমকং

১. পণ্ণত্তিৰারো

উদ্দেসৰারৰণ্ণনা

১-৯. ৰুত্তনযেনাতি ¶ ‘‘অৰযৰপদেহি ৰুত্তো একদেসো সকলো ৰা সমুদাযপদানং অত্থো, সমুদাযপদেহি পন ৰুত্তো একন্তেন অৰযৰপদানং অত্থো’’তিআদিনা ৰুত্তেন নযেন. এতেন যথাৰুত্তঅত্থৰণ্ণনানযদস্সনতায সব্বপণ্ণত্তিৰারাদীসু যথারহং অত্থো নেতব্বোতি দস্সেতি.

উদ্দেসৰারৰণ্ণনা নিট্ঠিতা.

নিদ্দেসৰারৰণ্ণনা

১০-১৭. ৰাযনং ¶ সৰিসযং ব্যাপেত্ৰা পৰত্তনং, তযিদং যথা গন্ধাযতনে লব্ভতি, এৰং সীলাদীসুপীতি পাল়িযং ‘‘সীলগন্ধো’’তিআদি ৰুত্তং ‘‘সীলাদিযেৰ গন্ধো’’তি কত্ৰা. তেনাহ অট্ঠকথাযং ‘‘সীলগন্ধো…পে… নামানী’’তি. যস্মা পন সৰিসযব্যাপনং তত্থ পসটভাৰো পাকটভাৰো ৰা হোতি, তস্মা ‘‘পসারণট্ঠেন পাকটভাৰট্ঠেন ৰা’’তি ৰুত্তং. অত্তনো ৰত্থুস্স সূচনং ৰা ৰাযনং. ‘‘দেৰকাযা সমাগতা (দী. নি. ২.৩৩২; সং. নি. ১.৩৭), পণ্ণত্তিধম্মা’’তিআদীসু (ধ. স. দুকমাতিকা ১০৮) সমূহপঞ্ঞত্তীসুপি কাযধম্মসদ্দা আগতাতি ‘‘সসভাৰ’’ন্তি ৰিসেসেতি. কাযৰচনেন…পে… নত্থীতি ইদং ‘‘ন ধম্মো নাযতন’’ন্তি এত্থ ধম্মসদ্দস্স ৰিনিৰত্তৰিসেসসব্বসভাৰধম্মৰাচকতং সন্ধায ৰুত্তং, ন ধম্মাযতনসঙ্খাতধম্মৰিসেসৰাচকতন্তি দট্ঠব্বং.

নিদ্দেসৰারৰণ্ণনা নিট্ঠিতা.

২. পৰত্তিৰারৰণ্ণনা

১৮-২১. এতস্মিন্তি ¶ পৰত্তিৰারে. পুচ্ছামত্তলাভেনাতি মোঘপুচ্ছাভাৰমাহ. একেকন্তি ‘‘যস্স চক্খাযতনং উপ্পজ্জতি, তস্স সদ্দাযতনং উপ্পজ্জতী’’তিআদিকং একেকং. পঞ্চাতি ‘‘যস্স সদ্দাযতনং উপ্পজ্জতি, তস্স গন্ধাযতনং উপ্পজ্জতী’’তিআদীনি পঞ্চ. পুচ্ছামত্তলাভেন সঙ্গহং অনুজানন্তো ‘‘ৰিস্সজ্জনৰসেন হাপেতব্বানী’’তি আহ. ‘‘ৰক্খতি হী’’তিআদিনা যথাৰুত্তমত্থং অট্ঠকথায সমত্থেতি.

সদিসৰিস্সজ্জনন্তি সামঞ্ঞৰচনং ৰিসেসনিৰিট্ঠমেৰ হোতীতি তং ৰিসেসং দস্সেন্তো ‘‘পুগ্গলৰারমেৰ সন্ধায ৰুত্ত’’ন্তি ৰত্ৰা তস্সা পন সদিসৰিস্সজ্জনতায অব্যাপিতত্তা যত্থ সদিসং, তত্থাপি ৰিস্সজ্জিতন্তি দস্সেন্তো ‘‘ওকাসৰারে পন…পে… ৰিস্সজ্জিত’’ন্তি আহ. তত্থ তন্তি দুতিযং. পুগ্গলৰারেপীতি যত্থ সদিসং ৰিস্সজ্জনং, তত্থ পুগ্গলৰারেপি ৰিস্সজ্জিতং, পগেৰ ওকাসৰারেতি অধিপ্পাযো. ৰিরত্তকামকম্মনিব্বত্তস্সাতি ভাৰনাবলেন ৰিরত্তো কামো এতেনাতি ৰিরত্তকামং, রূপাৰচরকম্মং, ততো নিব্বত্তস্স. পটিসন্ধি এৰ বীজং ¶ পটিসন্ধিবীজং, তস্স. ‘‘এৰংসভাৰত্তা’’তি এতেন একন্ততো কামতণ্হানিদানকম্মহেতুকানি ঘানাদীনীতি দস্সেতি. গন্ধাদযো চ ন সন্তীতি সব্বেন সব্বং তেসম্পি অভাৰং সন্ধায ৰদতি. তত্থ যং ৰত্তব্বং, তং হেট্ঠা ৰুত্তমেৰ.

‘‘সচ্চ’’ন্তি যথাৰুত্তৰসেন গহেতব্বং চোদকেন ৰুত্তমত্থং সম্পটিচ্ছিত্ৰা পুন যেনাধিপ্পাযেন তানি যমকানি সদিসৰিস্সজ্জনানি, তং দস্সেতুং ‘‘যথা পনা’’তিআদি ৰুত্তং. তত্রাযং সঙ্খেপত্থো – তত্থ চক্খাযতনমূলকেসু ঘানাযতনযমকেন ‘‘সচক্খুকানং অঘানকানং উপপজ্জন্তান’’ন্তিআদিনা নযেন জিৰ্হাকাযাযতনযমকানি যথা সদিসৰিস্সজ্জনানি, তথা ইধ ঘানাযতনমূলকেসু ঘানাযতনযমকেন তানি জিৰ্হাকাযাযতনযমকানি ‘‘যস্স ঘানাযতনং উপ্পজ্জতি, তস্স জিৰ্হাযতনং উপ্পজ্জতীতি? আমন্তা’’তিআদিনা নযেন সদিসৰিস্সজ্জনানীতি. এৰমেত্থ উভযেসং ৰিসুং অঞ্ঞমঞ্ঞং সদিসৰিস্সজ্জনতায ইদং ৰুত্তং, ন একজ্ঝং অঞ্ঞমঞ্ঞং সদিসৰিস্সজ্জনতায. তেনাহ ‘‘তস্মা তত্থ তত্থেৰ সদিসৰিস্সজ্জনতা পাল়িঅনারুল়্হতায কারণ’’ন্তি. এৰঞ্চ সতি চক্খাযতনমূলগ্গহণং কিমত্থিযন্তি আহ ‘‘নিদস্সনভাৰেনা’’তিআদি. তত্থ নিদস্সনভাৰেনাতি নিদস্সনভূতানং অঞ্ঞমঞ্ঞসদিসৰিস্সজ্জনতাসঙ্খাতেন ¶ নিদস্সনভাৰেনেৰ, ন পন তেসং নিদস্সিতব্বেহি সব্বথা সদিসৰিস্সজ্জনতাযাতি অধিপ্পাযো. ‘‘যেভুয্যতাযা’’তি ৰুত্তং যেভুয্যতং দস্সেতুং ‘‘তেসু হী’’তিআদি ৰুত্তং.

এৰন্তি ইমিনা ‘‘আমন্তা’’তি পটিৰচনৰিস্সজ্জনেন যথাৰুত্তৰচনস্সেৰ ৰিস্সজ্জনভাৰানুজাননং কত্তব্বন্তি ইমমত্থং আকড্ঢতি. সাতি দুতিযপুচ্ছা. ঘানাযতনযমকেনাতি চক্খাযতনমূলকেসু ঘানাযতনযমকেনেৰ. তংসেসানীতি তেন ঘানাযতনমূলককাযাযতনযমকেন সদ্ধিং সেসানি. সদিসৰিস্সজ্জনত্তা অনারুল়্হানীতি এত্থ ‘‘অনারুল়্হানী’’তি এত্তকমেৰ তথা-সদ্দেন অনুকড্ঢীযতি, ন ‘‘সদিসৰিস্সজ্জনত্তা’’তি দস্সেন্তো ‘‘তথাতি…পে… সমঞ্ঞেনা’’তি ৰত্ৰা ইদানি ‘‘কারণসামঞ্ঞেনা’’তি ৰুত্তস্স সদিসৰিস্সজ্জনত্তস্স তত্থ অভাৰং দস্সেতুং ‘‘ঘানজিৰ্হাকাযাযতনানং পনা’’তিআদি ৰুত্তং. তত্থ ¶ অগব্ভসেয্যকেসু পৰত্তমানানন্তি এত্থাপি ‘‘সহচারিতাযা’’তি পদং আনেত্ৰা সম্বন্ধিতব্বং, তথা ‘‘গব্ভসেয্যকেসু চ পৰত্তমানান’’ন্তি. ইতরানি ঘানাযতনমূলকানি জিৰ্হাকাযাযতনযমকানি দ্ৰে ন ৰিস্সজ্জীযন্তি, ঘানাযতনমূলকেসু চ যমকেসু ৰিস্সজ্জিতেসু ইতরদ্ৰযমূলকানি জিৰ্হাকাযাযতনমূলকানি ন ৰিস্সজ্জীযন্তি অৰিসেসত্তা অপ্পৰিসেসত্তা চাতি যোজেতব্বং. তত্থ কাযাযতনযমকে দুতিযপুচ্ছাৰসেন অপ্পৰিসেসো, ইতরৰসেন অৰিসেসো ৰেদিতব্বো. রূপাযতনমনাযতনেহি সদ্ধিন্তি ইদং রূপাযতনমূলকমনাযতনৰসেন ৰুত্তন্তি আহ ‘‘রূপাযতন…পে… অধিপ্পাযো’’তি. তেনেৰাহ ‘‘রূপাযতনমূলকেসু হী’’তিআদি. যমকানন্তি রূপাযতনমূলকগন্ধরসফোট্ঠব্বাযতনযমকানং. দুতিযপুচ্ছানন্তি যথাৰুত্তযমকানংযেৰ দুতিযপুচ্ছানং. ৰুত্তনযেনাতি ‘‘সরূপকানং অচিত্তকান’’ন্তিআদিনা ৰুত্তেন নযেন. আদিপুচ্ছানন্তি তেসংযেৰ যমকানং পঠমপুচ্ছানং.

হেট্ঠিমেহীতি ইদং অৰিসেসৰচনম্পি যেসু সদিসৰিস্সজ্জনতা সম্ভৰতি, তদপেক্খন্তি আহ ‘‘গন্ধরস…পে… অত্থো’’তি. উদ্দিট্ঠধম্মেসু উদ্দেসানুরূপং লব্ভমানৰিসেসকথনং ৰিস্সজ্জনং, যো তত্থ ন সব্বেন সব্বং উদ্দেসানুরূপগুণেন উপলব্ভতি, তস্স অকথনম্পি অত্থতো ৰিস্সজ্জনমেৰ নাম হোতীতি আহ ‘‘অৰিস্সজ্জনেনেৰ অলব্ভমানতাদস্সনেন ৰিস্সজ্জিতানি নাম হোন্তী’’তি.

চক্খুৰিকলসোতৰিকলা ¶ ৰিয চক্খুসোতৰিকলোপি লব্ভতীতি সো পন অট্ঠকথাযং পি-সদ্দেন সঙ্গহিতোতি দস্সেন্তো ‘‘জচ্চন্ধম্পি…পে… ৰেদিতব্বো’’তি আহ. পরিপুণ্ণাযতনমেৰ ওপপাতিকং সন্ধায ৰুত্তন্তি এত্থ অট্ঠানপ্পযুত্তো এৰ-সদ্দোতি তস্স ঠানং দস্সেন্তো ‘‘ৰুত্তমেৰাতি অত্থো’’তি ৰত্ৰা তেন পরিপুণ্ণাযতনস্স তত্থ অনিযতত্তা অপরিপুণ্ণাযতনস্সপি সঙ্গহো সিদ্ধোতি দস্সেন্তো ‘‘তেন জচ্চন্ধবধিরম্পি সন্ধায ৰুত্ততা ন নিৰারিতা হোতী’’তি আহ.

২২-২৫৪. তস্মিং পুগ্গলস্স অনামট্ঠত্তাতি কস্মা ৰুত্তং, যাৰতা ‘‘রূপীব্রহ্মলোকং পুচ্ছতী’’তি ইমিনাপি ওকাসোযেৰ আমট্ঠোতি. ‘‘আমন্তা’’তি পটিঞ্ঞায কারণৰিভাৰনাধিপ্পাযেনেৰ ‘‘কস্মা পটিঞ্ঞাত’’ন্তি চোদনং সমুট্ঠাপেত্ৰা তং কারণং দস্সেতুকামো ‘‘ননূ’’তিআদিমাহ ¶ . গব্ভসেয্যকভাৰং গন্ত্ৰা পরিনিব্বাযিস্সতীতি পচ্ছিমভৰিকং সন্ধাযাহ. তদৰত্থস্সাতি পচ্ছিমভৰাৰত্থস্স. ভৰিস্সন্তস্সাতি ভাৰিনো. পটিঞ্ঞাতব্বত্তাতি ‘‘উপ্পজ্জিস্সতী’’তি পটিঞ্ঞাতব্বত্তা.

অথ কস্মাতি এত্থাযং সঙ্খেপত্থো – যদি ‘‘যস্স রূপাযতনং উপ্পজ্জিস্সতি, তস্স চক্খাযতনং উপ্পজ্জিস্সতী’’তি পুচ্ছাযং ৰুত্তেন ৰিধিনা পটিঞ্ঞাতব্বং, অথ কস্মা অথ কেন কারণেন পটিলোমে ‘‘যস্স ৰা পন রূপাযতনং নুপ্পজ্জিস্সতি, তস্স চক্খাযতনং নুপ্পজ্জিস্সতী’’তি পুচ্ছায ‘‘আমন্তা’’তি পটিঞ্ঞাতং, ননু ইদং অঞ্ঞমঞ্ঞং ৰিরুদ্ধন্তি? ননূতিআদিনাপি চোদকো তমেৰ ৰিরোধং ৰিভাৰেতি. নো চ নুপ্পজ্জিস্সতি উপ্পজ্জিস্সতি এৰাতি অত্থো. ‘‘তস্মিং ভৰে’’তিআদি তস্স পরিহারো. তত্থ তস্মিং ভৰেতি যস্মিং ভৰে ‘‘রূপাযতনং নুপ্পজ্জিস্সতী’’তি ৰুত্তং পৰত্তমানত্তা, তস্মিং ভৰে. অনাগতভাৰেন অৰচনতোতি ভাৰীভাৰেন অৰত্তব্বতো আরদ্ধুপ্পাদভাৰেন পৰত্তমানত্তাতি অধিপ্পাযো. তেনেৰাহ ‘‘ভৰন্তরে হী’’তিআদি. ন পন ৰুচ্চতীতি সম্বন্ধো. এৰঞ্চ কত্ৰাতিআদিনা পাঠন্তরেন যথাৰুত্তমত্থং সমত্থেতি.

যস্মিং অত্তভাৰে যেহি আযতনেহি ভৰিতব্বং, তংতংআযতননিব্বত্তককম্মেন অৰস্সংভাৰীআযতনস্স সত্তস্স, সন্তানস্স ৰা, ‘‘যস্স ৰা পন রূপাযতনং উপ্পজ্জিস্সতি, তস্স চক্খাযতনং উপ্পজ্জিস্সতীতি? আমন্তা, যস্স ৰা পন রূপাযতনং নুপ্পজ্জিস্সতি, তস্স চক্খাযতনং নুপ্পজ্জিস্সতীতি? আমন্তা’’তি চ এৰং পৰত্তং পুচ্ছাদ্ৰযৰিস্সজ্জনং আযতনপটিলাভস্স ¶ জাতিভাৰতো সুট্ঠু উপপন্নং ভৰতি. পচ্ছিমভৰিকাদযোতি এত্থ আদি-সদ্দেন অরূপে উপ্পজ্জিত্ৰা পরিনিব্বাযনকা সঙ্গয্হন্তি. ইদম্পি ৰিস্সজ্জনং. অভিনন্দিতব্বত্তাতি ‘‘আমন্তা’’তি সম্পটিচ্ছিতব্বত্তা.

যং পন অঘানকানং কামাৰচরং উপপজ্জন্তানন্তি ৰুত্তন্তি সম্বন্ধো. যস্স ৰিপাকো ঘানাযতনুপ্পত্তিতো পুরেতরমেৰ উপচ্ছিজ্জিস্সতি, তং ঘানাযতনানিব্বত্তককম্মন্তি ৰুত্তং. কথং পনীদিসং কম্মং অত্থীতি ৰিঞ্ঞাযতীতি আহ ‘‘যস্স যত্থা’’তিআদি. এৰম্পি গব্ভসেয্যকো এৰ ইধ অঘানকোতি অধিপ্পেতোতি কথমিদং ৰিঞ্ঞাযতীতি চোদনায ‘‘ন হী’’তিআদিং ৰত্ৰা তমত্থং সাধেতুং ‘‘ধম্মহদযৰিভঙ্গে’’তিআদি ৰুত্তং. অৰচনত্তম্পি হি যথাধম্মসাসনে অভিধম্মে পটিক্খেপোযেৰাতি ¶ . ইধাতি ইমস্মিং আযতনযমকে. যথাদস্সিতাসূতি ‘‘যস্স ৰা পন সোতাযতনং নুপ্পজ্জিস্সতি, তস্স চক্খাযতনং নুপ্পজ্জতি, যস্স যত্থ ঘানাযতনং ন নিরুজ্ঝতি, তস্স তত্থ রূপাযতনং ন নিরুজ্ঝিস্সতী’’তি চ দস্সিতপ্পকারাসু পুচ্ছাসু. আমন্তাতি ৰুত্তন্তি অথ কস্মা ন ৰিঞ্ঞাযতীতি যোজনা. এতাসু পুচ্ছাসু কস্মা পটিৰচনেন ৰিস্সজ্জনং ন কতন্তি অধিপ্পাযো. সন্নিট্ঠানেন গহিতত্থস্সাতি ‘‘যস্স ৰা পন সোতাযতনং নুপ্পজ্জিস্সতি, যস্স যত্থ ঘানাযতনং ন নিরুজ্ঝিস্সতী’’তি চ এৰমাদিকেন সন্নিট্ঠানপদেন গহিতস্স অত্থস্স. একদেসে সংসযত্থস্স সম্ভৰেনাতি একদেসে সংসযিতব্বস্স অত্থস্স সম্ভৰেন সন্নিট্ঠানত্থপটিযোগভূতসংসযত্থস্স পটিৰচনস্স অকরণতো ‘‘আমন্তা’’তি পটিৰচনৰিস্সজ্জনস্স অকত্তব্বতো অত্থস্স অভিন্দিত্ৰা একজ্ঝং কত্ৰা অৰত্তব্বতো. তেনাহ ‘‘ভিন্দিতব্বেহি ন পটিৰচনৰিস্সজ্জনং হোতী’’তি.

যদি সিযাতি ভিন্দিত্ৰা ৰত্তব্বেপি অত্থে যদি পটিৰচনৰিস্সজ্জনং সিযা, পরিপুণ্ণৰিস্সজ্জনমেৰ ন সিযা অনোকাসভাৰতো ভিন্দিতব্বতো চাতি অত্থো. তথা হি ‘‘পঞ্চৰোকারে পরিনিব্বন্তানং, অরূপে পচ্ছিমভৰিকানং, যে চ অরূপং উপপজ্জিত্ৰা পরিনিব্বাযিস্সন্তি, তেসং চৰন্তানং তেসং সোতাযতনঞ্চ নুপ্পজ্জিস্সতি, চক্খাযতনঞ্চ নুপ্পজ্জতী’’তি চ, তথা ‘‘রূপাৰচরে পরিনিব্বন্তানং, অরূপানং তেসং তত্থ ঘানাযতনঞ্চ ন নিরুজ্ঝতি, রূপাযতনঞ্চ ন নিরুজ্ঝিস্সতী’’তি চ তত্থ ৰিভাগৰসেন পৰত্তো পাঠসেসো. অথ কস্মাতি যদি অভিন্দিতব্বে পটিৰচনৰিস্সজ্জনং, ন ভিন্দিতব্বে, এৰং সন্তে ‘‘যস্স ৰা পন সোমনস্সিন্দ্রিযং উপ্পজ্জতি, তস্স চক্খুন্দ্রিযং উপ্পজ্জতীতি? আমন্তা’’তি ইমিনা পটিৰচনৰিস্সজ্জনেন ¶ গব্ভসেয্যকানং সোমনস্সপটিসন্ধি নত্থীতি কস্মা ন ৰিঞ্ঞাযতি, ভিন্দিতব্বে ন পটিৰচনৰিস্সজ্জনং হোতীতি সম্পটিচ্ছিতব্বন্তি? তং ন, অঞ্ঞায পাল়িযা তদত্থস্স ৰিঞ্ঞাযমানত্তাতি দস্সেন্তো ‘‘কামধাতুযা’’তিআদিমাহ.

‘‘যং চিত্তং উপ্পজ্জতি, ন নিরুজ্ঝতি, তং চিত্তং নিরুজ্ঝিস্সতি, নুপ্পজ্জিস্সতীতি? আমন্তা’’তি তস্সেৰ চিত্তস্স নিরোধো অনাগতভাৰেন তস্স উপ্পাদক্খণে যথা ৰুত্তো, এৰং তস্সেৰ কম্মজসন্তানস্স নিরোধো তস্স উপ্পাদে অনাগতভাৰেন ৰত্তব্বো. তেনেতং দস্সেতি ‘‘একচিত্তস্স নাম উপ্পাদক্খণে নিরোধো অনাগতভাৰেন ৰুচ্চতি, কিমঙ্গং পন একসন্তানস্সা’’তি ¶ . সব্বত্থ সব্বস্মিং অনাগতৰারে. উপপজ্জন্তানং এৰ ৰসেন সো নিরোধো তথা অনাগতভাৰেন ৰুত্তো, কস্মা পনেত্থ নিরোধো উপপন্নানং ৰসেন ন ৰুত্তোতি আহ ‘‘উপ্পন্নানং পনা’’তিআদি. তস্সেৰ যথাপৰত্তস্স কম্মজসন্তানস্স এৰ. তস্মাতি যস্মা উপ্পাদক্খণতো উদ্ধং নিরোধো আরদ্ধো নাম হোতি, তস্মা. ভেদে সতিপি কালভেদামসনস্স কারণে সতিপি. অনাগতকালামসনৰসেনেৰ নিরোধস্সেৰ ৰসেন ৰিস্সজ্জনদ্ৰযং উপপন্নমেৰ যুত্তমেৰ হোতীতি. অঞ্ঞেসং ৰসেন নিরোধস্সেৰ ৰত্তুং অসক্কুণেয্যত্তা ‘‘অরহত’’ন্তি ৰুত্তং.

যদি উপপত্তিঅনন্তরং নিরোধো আরদ্ধো নাম হোতি, অথ কস্মা চুতিযা নিরোধৰচনন্তি চোদনং সন্ধাযাহ ‘‘তন্নিট্ঠানভাৰতো পন চুতিযা নিরোধৰচন’’ন্তি. তন্নিট্ঠানভাৰতোতি তস্স সন্তানস্স নিট্ঠানভাৰতো. পৰত্তেতিআদি ৰুত্তস্সেৰত্থস্স পাকটকরণং. তত্থ তস্সাতি সন্তানস্স. ৰক্খতীতিআদিপি পৰত্তে নিরোধং অনাদিযিত্ৰা চুতিনিরোধস্সেৰ গহিততায কারণৰচনং. তেনাতি তেন যথাৰুত্তেন পাঠন্তরৰচনেন. এত্থাতি এতস্মিং ‘‘যস্স চক্খাযতনং নিরুজ্ঝিস্সতী’’তিআদিকে আযতনযমকে. যদি পৰত্তে নিরুদ্ধস্সপি চুতিযা এৰ নিরোধো ইচ্ছিতো, ‘‘সচক্খুকান’’ন্তিআদি কথন্তি আহ ‘‘সচক্খুকানন্তিআদীসু চ পটিলদ্ধচক্খুকানন্তিআদিনা অত্থো ৰিঞ্ঞাযতী’’তি. তেতি অরূপে পচ্ছিমভৰিকা. অচক্খুকৰচনঞ্চ সাৰসেসন্তি যোজনা.

পৰত্তিৰারৰণ্ণনা নিট্ঠিতা.

আযতনযমকৰণ্ণনা নিট্ঠিতা.

৪. ধাতুযমকং

১-১৯. সদ্দধাতুসম্বন্ধানন্তি ¶ ইদং যানি চক্খুধাতাদিমূলকেসু সদ্দযমকানি, সব্বানি চ সদ্দধাতুমূলকানি, তানি সন্ধায ৰুত্তং. ন হি তানি চক্খুৰিঞ্ঞাণধাতাদিসম্বন্ধানি ৰিয চুতিপটিসন্ধিৰসেন লব্ভন্তি, এতেনেৰ আযতনযমকেপি পৰত্তিৰারে সদ্দধাতুসম্বন্ধানং যমকানং অলব্ভমানতা চ ৰেদিতব্বা.

ধাতুযমকৰণ্ণনা নিট্ঠিতা.

৫. সচ্চযমকং

১. পণ্ণত্তিৰারৰণ্ণনা

১০-২৬. সোতি ¶ দুক্খসদ্দো. অঞ্ঞত্থাতি সঙ্খারদুক্খৰিপরিণামদুক্খদুক্খাধিট্ঠানেসু. অঞ্ঞনিরপেক্খোতি সঙ্খারাদিপদন্তরানপেক্খো. তেনাতি অঞ্ঞনিরপেক্খদুক্খপদগ্গহণতো. তস্মিং দুক্খদুক্খে ৰিসযভূতে. এস দুক্খসদ্দো ‘‘দুক্খং দুক্খসচ্চ’’ন্তি এত্থ পঠমো দুক্খসদ্দো. তঞ্চ দুক্খদুক্খং. ‘‘দুক্খং দুক্খসচ্চ’’ন্তি এত্থ দুক্খমেৰ দুক্খসচ্চন্তি নযিদং অৰধারণং ইচ্ছিতব্বং, দুক্খং দুক্খসচ্চমেৰাতি পন ইচ্ছিতব্বন্তি আহ ‘‘একন্তেন দুক্খসচ্চমেৰা’’তি. সচ্চৰিভঙ্গে ৰুত্তেসু সমুদযেসু কোচি ফলধম্মেসু নত্থীতি সচ্চৰিভঙ্গে পঞ্চধা ৰুত্তেসু সমুদযেসু একোপি ফলসভাৰেসু নত্থি, ফলসভাৰো নত্থীতি অত্থো. ‘‘ফলধম্মো নত্থী’’তি চ পাঠো. মগ্গসদ্দো চ ফলঙ্গেসূতি সামঞ্ঞফলঙ্গেসু সম্মাদিট্ঠিআদীসু ‘‘মগ্গঙ্গং মগ্গপরিযাপন্ন’’ন্তিআদিনা (ৰিভ. ৪৯২, ৪৯৫) আগতো মগ্গসদ্দো মগ্গফলত্তা পৰত্ততি কারণূপচারেনাতি অধিপ্পাযো. তেনাহ ‘‘ন মগ্গকিচ্চসব্ভাৰা’’তিআদি. তস্মাতি যস্মা সচ্চদেসনায পভৰাদিসভাৰা এৰ ধম্মা সমুদযাদিপরিযাযেন ৰুত্তা, ন অপ্পভৰাদিসভাৰা, তস্মা ¶ . এত্থ চ তেভূমকধম্মানং যথারহং দুক্খসমুদযসচ্চন্তোগধত্তা অসচ্চসভাৰে সভাৰধম্মে চ উদ্ধরন্তো ফলধম্মে এৰ উদ্ধরি. ননু চ মগ্গসম্পযুত্তাপি ধম্মা অসচ্চসভাৰাতি তেপি উদ্ধরিতব্বাতি? ন, তেসং মগ্গগতিকত্তা. ‘‘ফলধম্মেসূ’’তি এত্থ ধম্মগ্গহণেন ৰা ফলসম্পযুত্তধম্মানং ৰিয তেসম্পি গহণং দট্ঠব্বং.

পদসোধনেন…পে… ইধ গহিতাতি এতেন অসচ্চসভাৰানং ধম্মানং পকরণেন নিৰত্তিততং আহ. তেসন্তি দুক্খাদীনং. তব্বিসেসনযোগৰিসেসন্তি তেন দুক্খাদিৰিসেসনযোগেন ৰিসিট্ঠতং. সচ্চৰিসেসনভাৰেনেৰ দুক্খাদীনং পরিঞ্ঞেয্যতাদিভাৰো সিদ্ধোতি আহ ‘‘একন্তসচ্চত্তা’’তি. যথা চেত্থাতি যথা এতস্মিং সচ্চযমকে সুদ্ধসচ্চৰারে সচ্চৰিসেসনভূতা এৰ দুক্খাদযো গহিতা. এৰং খন্ধযমকাদীসুপীতি ন সুদ্ধসচ্চৰারে এৰ অযং নযো দস্সিতোতি অত্থো. পদসোধনৰারে তংমূলচক্কৰারে চ ‘‘রূপং রূপক্খন্ধো’’তিআদিনা সমুদাযপদানংযেৰ ৰুত্তত্তা ৰত্তব্বমেৰ নত্থীতি ‘‘সুদ্ধক্খন্ধাদিৰারেসূ’’তি ৰুত্তং. তথা চেত্থাপি ¶ সুদ্ধৰারে এৰ অযং নযো দস্সিতো. যদি সুদ্ধক্খন্ধাদিৰারেসু খন্ধাদিৰিসেসনভূতানমেৰ রূপাদীনং গহণেন ভৰিতব্বং, অথ কস্মা খন্ধাদিৰিসেসনতো অঞ্ঞেসম্পি রূপাদীনং ৰসেন অত্থো দস্সিতোতি চোদনং সন্ধাযাহ ‘‘অট্ঠকথাযং পনা’’তিআদি. পুরিমো এৰ অত্থো যুত্তো, যুত্তিতো পাঠোৰ বলৰাতি.

পণ্ণত্তিৰারৰণ্ণনা নিট্ঠিতা.

২. পৰত্তিৰারৰণ্ণনা

২৭-১৬৪. দুক্খপরিঞ্ঞা যাৰ দুক্খসমতিক্কমনত্থাতি সপ্পদেসং পৰত্তাপি সা তদত্থাৰহা ভৰেয্যাতি কস্সচি আসঙ্কা সিযাতি দস্সেন্তো আহ ‘‘অরিযত্তা…পে… কত্ৰা ৰুত্ত’’ন্তি. কেচি পনেত্থ ‘‘অন্তিমভৰে ঠিতত্তা’’তি কারণং ৰদন্তি, তং ন যুজ্জতি উপপত্তিযা দুক্খৰিচারত্তা, ন চ সব্বে সুদ্ধাৰাসা অন্তিমভৰিকা উদ্ধংসোতৰচনতো. ‘‘যস্স দুক্খসচ্চং উপ্পজ্জতী’’তি উপ্পাদাৰত্থা. অৰিসেসেন দুক্খসচ্চপরিযাপন্না ধম্মা সম্বন্ধীভাৰেনেৰ ¶ তংসমঙ্গী চ পুগ্গলো ৰুত্তোতি দস্সেন্তো ‘‘সব্বে উপপজ্জন্তা’’তিআদিং ৰত্ৰা স্ৰাযমত্থো যস্মা নিচ্ছযরূপেন গহিতো, নিচ্ছিতস্সেৰ চ অত্থস্স ৰিভাগদস্সনেন ভৰিতব্বং, তস্মা ‘‘তেস্ৰেৰ…পে… উপপন্নমেৰা’’তি আহ. তত্থ তেস্ৰেৰ কেচি দস্সীযন্তীতি সম্বন্ধো. এককোট্ঠাসুপ্পত্তিসমঙ্গিনোতি দুক্খকোট্ঠাসুপ্পত্তিসমঙ্গিনো. তেসূতি সন্নিট্ঠানেন গহিতেসু. মগ্গফলুপ্পাদসমঙ্গীসূতি মগ্গফলুপ্পাদসমঙ্গীনং, অযমেৰ ৰা পাঠো.

এত্থ চাতিআদিনা ‘‘সব্বেস’’ন্তিআদিপাল়িযা পিণ্ডত্থং দস্সেতি. তত্থ সমুদযসচ্চুপ্পাদৰোমিস্সস্স দুক্খসচ্চুপ্পাদস্সাতি ইদং অনাদরে সামিৰচনং. কত্থচি সমুদযসচ্চুপ্পাদৰোমিস্সেপি দুক্খসচ্চে তংরহিতস্স সমুদযসচ্চুপ্পাদরহিতস্স দুক্খসচ্চুপ্পাদস্স দস্সনৰসেন ৰুত্তন্তি যোজনা. কেচি পন ‘‘সমুদযসচ্চাৰোমিস্সস্সা’’তি পঠন্তি, তেসং ‘‘তংরহিতস্সা’’তি ইদং পুরিমপদস্স অত্থৰিৰরণং ৰেদিতব্বং. তংসহিতস্সাতি সমুদযসচ্চুপ্পাদসহিতস্স দুক্খসচ্চুপ্পাদস্স দস্সনৰসেন ৰুত্তন্তি যোজনা. তেসন্তি অসঞ্ঞসত্তানং, পৰত্তিযং দুক্খসচ্চস্স উপ্পাদো ‘‘পৰত্তে’’তিআদিনা ৰুত্তেসু দ্ৰীসুপি কোট্ঠাসেসু ন গহিতোতি অত্থো. পটিসন্ধিযং পন ¶ তেসং উপ্পাদস্স পঠমকোট্ঠাসেন গহিততা দস্সিতা এৰ. তথা নিরোধো চাতি যথা অসঞ্ঞসত্তানং পটিসন্ধিযং দুক্খসচ্চস্স উপ্পাদো পঠমকোট্ঠাসেন গহিতো, পৰত্তিযং পন সো দ্ৰীহি কোট্ঠাসেহি ন গহিতো, তথা তেসং দুক্খসচ্চস্স নিরোধোপীতি অত্থো. তথা হি ‘‘সব্বেসং চৰন্তানং পৰত্তে তণ্হাৰিপ্পযুত্তচিত্তস্স ভঙ্গক্খণে’’তিআদিনা (যম. ১.সচ্চযমক.৮৮) নিরোধৰারে পাল়ি পৰত্তা. এসেৰ নযোতি য্ৰাযং ‘‘এত্থ চা’’তিআদিনা সমুদযসচ্চযমকে পাল়িযা অত্থনযো ৰুত্তো, মগ্গসচ্চযমকেপি এসেৰ নযো, এৰমেৰ তত্থাপি অত্থো নেতব্বোতি অত্থো. তথা হি ‘‘সব্বেসং উপপজ্জন্তান’’ন্তিআদিনা তত্থ পাল়ি পৰত্তা.

এৰঞ্চ সতীতি এৰং খণৰসেন ওকাসগ্গহণে সতীতি যথাৰুত্তমত্থং অননুজাননৰসেন পচ্চামসতি. এতস্স ৰিস্সজ্জনেতি এতস্স যমকপদস্স ৰিস্সজ্জনে. ‘‘অগ্গমগ্গস্স উপ্পাদক্খণে, অরহন্তানং চিত্তস্স উপ্পাদক্খণে, যস্স চিত্তস্স অনন্তরা অগ্গমগ্গং পটিলভিস্সন্তি, তস্স চিত্তস্স উপ্পাদক্খণে, অসঞ্ঞসত্তং উপপজ্জন্তানং তেসং তত্থ দুক্খসচ্চং উপ্পজ্জতি, নো চ তেসং তত্থ সমুদযসচ্চং উপ্পজ্জিস্সতী’’তি (যম. ১.সচ্চযমক.৭১) পুরিমকোট্ঠাসস্স আগতত্তা ৰিরোধো নত্থীতি ‘‘পচ্ছিমকোট্ঠাসে’’তিআদি ৰুত্তং ¶ . তত্থ তস্মাতি যস্মা ন উপপত্তিচিত্তুপ্পাদক্খণো ভাৰিনো সমুদযপচ্চুপ্পাদস্স আধারো, অথ খো কামাৰচরাদিওকাসো, তস্মা. পুগ্গলোকাসৰারো হেসাতি যস্মা পুগ্গলোকাসৰারো এস, তস্মা ‘‘তেসং তত্থা’’তি এত্থ ওকাসৰসেন তত্থ-সদ্দস্স অত্থো ৰেদিতব্বো. যদি পুগ্গলোকাসৰারে কামাৰচরাদিওকাসৰসেনেৰ অত্থো গহেতব্বো, ন খণৰসেন, অথ কস্মা ‘‘সব্বেসং উপপজ্জন্তান’’ন্তিআদিনা ওকাসং অনামসিত্ৰা তত্থ ৰিস্সজ্জনং পৰত্তন্তি চোদনং সন্ধাযাহ ‘‘তত্থ…পে… সো এৰা’’তি. তত্থ তত্থাতি ওকাসৰারে. পুগ্গলৰিসেসদস্সনত্থন্তি পুগ্গলসঙ্খাতৰিসেসদস্সনত্থং. যত্থ তেতি যস্মিং কামাৰচরাদিওকাসে তে পুগ্গলা.

কেচীতি ধম্মসিরিত্থেরং সন্ধাযাহ. সো হি ‘‘পৰত্তে চিত্তস্স ভঙ্গক্খণে দুক্খসচ্চং নুপ্পজ্জতী’’তি এত্থ চিত্তজরূপমেৰ অধিপ্পেতং চিত্তপটিবদ্ধৰুত্তিত্তাতি কারণং ৰদতি. অপরে ‘‘অরূপেতি ইমং পুরিমাপেক্খম্পি হোতীতি তেন পৰত্তং ৰিসেসেত্ৰা অরূপভৰৰসেন অযমত্থো ৰুত্তো ¶ , তস্মা ‘যস্স ৰা পন সমুদযসচ্চং নিরুজ্ঝতি, তস্স দুক্খসচ্চং উপ্পজ্জতীতি? নো’তিআদীসুপি এৰমত্থো ৰেদিতব্বো’’তি ৰদন্তি. পুগ্গলো ন চিত্তং অপেক্খিত্ৰাৰ গহিতোতি ইদং চিত্তস্স অনধিকতত্তা ৰুত্তং. যত্থ পন সমুদযসচ্চস্স উপ্পাদনিচ্ছযো, তত্থেৰ তস্স অনুপ্পাদনিচ্ছযেনপি ভৰিতব্বং চিত্তেন চ ৰিনা পুগ্গলস্সেৰ অনুপলব্ভনতোতি ‘‘যস্স সমুদযসচ্চং নুপ্পজ্জতী’’তি এত্থ সমুদযসচ্চাধারং চিত্তং অত্থতো গহিতমেৰাতি সক্কা ৰিঞ্ঞাতুং. অপিচ ইন্দ্রিযবদ্ধেপি ন সব্বো রূপুপ্পাদো একন্তেন চিত্তুপ্পাদাধীনোতি সক্কা ৰত্তুং চিত্তুপ্পত্তিযা ৰিনাপি তত্থ রূপুপ্পত্তিদস্সনতো, তস্মা চিত্তজরূপমেৰ চিত্তস্স উপ্পাদক্খণে উপ্পজ্জতি, ন ইতরং, ইতরং পন তস্স তীসুপি খণেসু উপ্পজ্জতীতি নিট্ঠমেত্থ গন্তব্বং. ৰিভজিতব্বা অৰিভত্তা নাম নত্থীতি সিযাযং পসঙ্গো পঠমৰারে, দুতিযৰারে পন ৰিভজনা এৰ সাতি নাযং পসঙ্গো লব্ভতি, পঠমৰারেপি ৰা নাযং পসঙ্গো. কস্মা? এসা হি যমকস্স পকতি, যদিদং যথালাভৰসেন যোজনা.

দুতিযে চিত্তে ৰত্তমানেতি এত্থ ‘‘পঠমং ভৰঙ্গং, দুতিযং চিত্ত’’ন্তি ৰদন্তি. ভৰনিকন্তিযা আৰজ্জনম্পি ৰিপাকপ্পৰত্তিতো ৰিসদিসত্তা ‘‘দুতিয’’ন্তি ৰত্তুং সক্কা, ততো পট্ঠায পুব্বে তস্স তত্থ সমুদযসচ্চং নুপ্পজ্জিত্থাতি ৰত্তব্বাতি অপরে. ভৰনিকন্তিযা পন সহজাতং পঠমং চিত্তং ইধ দুতিযং চিত্তন্তি অধিপ্পেতং. ততো পুব্বে পৰত্তং সব্বং অব্যাকতভাৰেন সমানজাতিকত্তা একন্তি কত্ৰা ততো পট্ঠায হেট্ঠা তস্স তত্থ সমুদযসচ্চং নুপ্পজ্জিত্থেৰাতি ¶ . তেনাহ ‘‘সব্বন্তিমেন পরিচ্ছেদেনা’’তিআদি. তস্মিন্তি দুতিযে চিত্তে. তেন সমানগতিকত্তাতি তেন যথাৰুত্তদুতিযচিত্তেন চ তংসমঙ্গিনো ৰা দুক্খসচ্চং উপ্পজ্জিত্থ, নো চ সমুদযসচ্চন্তি ৰত্তব্বভাৰেন সমানগতিকত্তা. এৰঞ্চ কত্ৰাতি তেন সমানগতিকতায দস্সিতত্তা এৰ. যথাৰুত্তাতি দুতিযাকুসলচিত্ততো পুরিমসব্বচিত্তসমঙ্গিনো অগ্গহিতা হোন্তি ইতরভাৰাভাৰতো. ৰুত্তমেৰত্থং পাঠন্তরেন সমত্থেতুং ‘‘যথা’’তিআদি ৰুত্তং. তেতি চতুৰোকারা. ৰজ্জেতব্বাতি ‘‘ইতরেস’’ন্তি ৰিসেসনেন নিৰত্তেতব্বা. পঞ্চৰোকারা ৰিয যথাৰুত্তা সুদ্ধাৰাসাতি দুতিযচিত্তক্খণসমঙ্গিভাৰেন ৰুত্তপ্পকারা যথা সুদ্ধাৰাসসঙ্খাতা পঞ্চৰোকারা পুব্বে ৰুত্তা সন্তি, এৰং চতুৰোকারা পুব্বে ৰুত্তা ন হি সন্তীতি যোজনা.

‘‘যস্স ¶ যত্থা’’তি পুগ্গলোকাসা আধেয্যাধারভাৰেন অপেক্খিতাতি আহ ‘‘পুগ্গলোকাসা অঞ্ঞমঞ্ঞপরিচ্ছিন্না গহিতা’’তি. কামাৰচরে…পে… উপপন্নাতি এত্থ কামাৰচরে অভিসমেতাৰিনো রূপাৰচরং উপপন্না, রূপাৰচরে অভিসমেতাৰিনো অরূপাৰচরং উপপন্না, ৰা-সদ্দেন কামাৰচরে অভিসমেতাৰিনো অরূপাৰচরং উপপন্নাতি চ যোজেতব্বং. তত্থাতি উপপন্নোকাসে. অভিসমযোতি উপরিমগ্গাভিসমযো যাৰ উপপন্নো ন ভৰিস্সতি, তাৰ তে তত্থ উপপন্নপুগ্গলা এত্থ এতস্মিং ‘‘অভিসমেতাৰীন’’ন্তিআদিনা ৰুত্তে দুতিযকোট্ঠাসে ন গয্হন্তি পুগ্গলোকাসানং অঞ্ঞমঞ্ঞং পরিচ্ছিন্নত্তা. যদি এৰং কিং তে ইমস্মিং যমকে অসঙ্গহিতাতি আহ ‘‘তে পনা’’তিআদি. তত্থ যং ৰুত্তং ‘‘সমানগতিকাতি ৰিসুং ন দস্সিতা’’তি, তং পাকটতরং কাতুং ‘‘অনভিসমেতাৰীন’’ন্তিআদি ৰুত্তং. তস্সত্থো – ‘‘অনভিসমেতাৰীন’’ন্তি ইমিনা পঠমপদেন গহিতা সব্বত্থ মগ্গুপ্পত্তিরহে সম্পত্তিভৰে তত্থ সুদ্ধাৰাসে যে অনভিসমেতাৰিনো, তেসু দ্ৰিপ্পকারেসু সুদ্ধাৰাসা যস্মিং কালে তত্থ অনভিসমেতাৰিনোতি গহেতব্বা, তত্থ নেসং তথা গহেতব্বকালস্স ৰিসেসনত্থং ‘‘সুদ্ধাৰাসানং দুতিযে চিত্তে ৰত্তমানে’’তি ৰুত্তন্তি.

এতেনাতি এতেন ৰচনেন. ৰোদানচিত্তং নাম মগ্গচিত্তানং অনন্তরপচ্চযভূতং চিত্তং, ইধ পন অগ্গমগ্গচিত্তস্স. ততোতি যথাৰুত্তৰোদানচিত্ততো পুরিমতরচিত্তসমঙ্গিনো, অনুলোমঞাণসম্পযুত্তচিত্তসমঙ্গিনো, অৰসিট্ঠৰুট্ঠানগামিনিৰিপস্সনাচিত্তাদিসমঙ্গিনোপি. তেনাহ ‘‘যাৰ সব্বন্তিমতণ্হাসম্পযুত্তচিত্তসমঙ্গী, তাৰ দস্সিতা’’তি.

পটিসন্ধিচুতিচিত্তানং ¶ ভঙ্গুপ্পাদক্খণা পৰত্তে চিত্তস্স ভঙ্গুপ্পাদক্খণেহি দুক্খসচ্চাদীনং নুপ্পাদাদীসু সমানগতিকাতি কত্ৰা ৰুত্তং ‘‘পৰত্তে চিত্তস্সা’’তিআদি. তত্থ চুতিচিত্তস্সপি উপ্পাদক্খণস্স গহণং দট্ঠব্বন্তি যোজনা. দ্ৰীসুপি কোট্ঠাসেসূতি সমুদযসচ্চস্স ভাৰিনো নিরোধস্স অপ্পটিক্খেপপটিক্খেপৰসেন পৰত্তেসু পুরিমপচ্ছিমকোট্ঠাসেসু. ন ৰিসেসিতন্তি যথাৰুত্তে অপ্পটিক্খেপে চ সতিপি ৰিসেসেত্ৰা ন ৰুত্তন্তি অত্থো. একস্সপি পুগ্গলস্স তাদিসস্স মগ্গস্স চ ফলস্স চ ভঙ্গক্খণসমঙ্গিনো পুরিমকোট্ঠাসস্সেৰ অভজনতো কোট্ঠাসদ্ৰযসম্ভৰাভাৰতোতি অত্থো. ইদানি তমেৰত্থং ৰিৰরিতুং ‘‘যস্স দুক্খসচ্চ’’ন্তিআদি ৰুত্তং. কেসঞ্চি পুগ্গলানং. নিদ্ধারণে চেতং সামিৰচনং. ‘‘মগ্গস্স চ ফলস্স ¶ চা’’তি ৰুত্তমগ্গফলানি দস্সেন্তো ‘‘তিণ্ণং ফলানং দ্ৰিন্নঞ্চ মগ্গান’’ন্তি আহ. তানি পন হেট্ঠিমানি তীণি ফলানি মজ্ঝে চ দ্ৰে মগ্গা ৰেদিতব্বা. নিরন্তরং অনুপ্পাদেত্ৰাতি পটিপক্খধম্মেহি অৰোকিণ্ণং কত্ৰা সহ ৰিপস্সনায মগ্গং উপ্পাদেন্তেন যা সাতচ্চকিরিযা কাতব্বা, তং অকত্ৰাতি অত্থো. তেনাহ ‘‘অন্তরন্তরা…পে… উপ্পাদেত্ৰা’’তি. ‘‘অরূপে মগ্গস্স চ ফলস্স চ ভঙ্গক্খণে’’তি অৰিসেসতো ৰুত্তে কথমযং ৰিসেসো লব্ভতীতি আহ ‘‘সামঞ্ঞৰচনেনপী’’তিআদি. তেন অপৰাদৰিসযপরিযাযেন উপসগ্গা অভিনিৰিসন্তীতি লোকসিদ্ধোযং ঞাযোতি দস্সেতি.

পৰত্তিৰারৰণ্ণনা নিট্ঠিতা.

৩. পরিঞ্ঞাৰারৰণ্ণনা

১৬৫-১৭০. এত্থেৰাতি ইমস্মিং সচ্চযমকে এৰ. অপরিঞ্ঞেয্যতাদস্সনত্থন্তি এত্থ অ-কারো ন পরিঞ্ঞেয্যাভাৰৰচনো, নাপি পরিঞ্ঞেয্যপটিপক্খৰচনো, অথ খো তদঞ্ঞৰচনোতি যথারহং সচ্চেসু লব্ভমানানং পহাতব্বতাদীনম্পি দস্সনে আপন্নেযেৰ সমযৰারো দস্সনপরো, যেসঞ্চ ন দস্সনপরো, তেসু কেসুচি সচ্চেসু লব্ভমানানম্পি কেসঞ্চি ৰিসেসানং অযং ৰারো ন দস্সনপরোতি দস্সেন্তো ‘‘সচ্ছিকরণ…পে… দস্সনত্থঞ্চা’’তি আহ. সমুদযে পহানপরিঞ্ঞাৰ ৰুত্তা, ন তীরণপরিঞ্ঞাতি যুত্তং তাৰেতং সমুদযস্সপি তীরেতব্বসভাৰত্তা, ‘‘দুক্খে তীরণপরিঞ্ঞাৰ ¶ ৰুত্তা, ন পহানপরিঞ্ঞা’’তি ইদং পন কস্মা ৰুত্তং, ননু দুক্খং অপ্পহাতব্বমেৰাতি? সমুদযসচ্চৰিভঙ্গে ৰুত্তানং কেসঞ্চি সমুদযকোট্ঠাসানং দুক্খসচ্চে সঙ্গহণতো দুক্খসমুদযে ৰা অসঙ্করতোৰ গহেত্ৰা ভূতকথনমেতং দট্ঠব্বং. উভযত্থাতি দুক্খে সমুদযে চ ৰুত্তা. কস্মা? তেসং সাধারণাতি. এৰং সাধারণাসাধারণভেদভিন্নং যথাৰুত্তং পরিঞ্ঞাকিচ্চং পুব্বভাগে নানক্খণে লব্ভমানম্পি মগ্গকালে একক্খণে এৰ লব্ভতি একঞাণকিচ্চত্তাতি দস্সেতুং ‘‘মগ্গঞাণঞ্হী’’তিআদি ৰুত্তং.

পরিঞ্ঞাৰারৰণ্ণনা নিট্ঠিতা.

সচ্চযমকৰণ্ণনা নিট্ঠিতা.

৬. সঙ্খারযমকং

১. পণ্ণত্তিৰারৰণ্ণনা

১. সতিপি ¶ কুসলমূলাদীনম্পি ৰিভত্তভাৰে খন্ধাদিৰিভাগো ততো সাতিসযোতি দস্সেন্তো ‘‘খন্ধাদযো ৰিয পুব্বে অৰিভত্তা’’তি আহ. পকারত্থো ৰা এত্থ আদি-সদ্দো ‘‘ভূৰাদযো’’তিআদীসু ৰিযাতি কুসলমূলাদীনম্পি সঙ্গহো দট্ঠব্বো. অৰিঞ্ঞাতত্তা নিসামেন্তেহি. হেতুঅত্থো ৰা এত্থ লুত্তনিদ্দিট্ঠো অৰিঞ্ঞাপিতত্তাতি অত্থো. যদিপি কাযসঙ্খারানং ৰিকপ্পদ্ৰযেপি হেতুফলভাৰোযেৰ ইচ্ছিতো, সামিৰচনরূপাৰিভূতো পন অত্থেৰ অত্থভেদোতি দস্সেন্তো ‘‘কাযস্স…পে… কত্তুঅত্থে’’তি আহ. সো পনাতি কত্তুঅত্থো.

২-৭. সুদ্ধিকএকেকপদৰসেনাতি ‘‘কাযো সঙ্খারো’’তিআদীসু দ্ৰীসু দ্ৰীসু পদেসু অঞ্ঞমঞ্ঞং অসম্মিস্সএকেকপদৰসেন. অত্থাভাৰতোতি যথাধিপ্পেতত্থাভাৰতো. অঞ্ঞথা করজকাযাদিকো অত্থো অত্থেৰ. তেনেৰাহ ‘‘পদসোধন…পে… অৰচনীযত্তা’’তি. ইদানি তমেৰ অত্থাভাৰং ব্যতিরেকৰসেন দস্সেন্তো ‘‘যথা’’তিআদিমাহ. কস্মা পন উভযত্থ সমানে সমাসপদভাৰে তত্থ অত্থো লব্ভতি, ইধ ন লব্ভতীতি? ভিন্নলক্খণত্তা. তত্থ হি রূপক্খন্ধাদিপদানি ¶ সমানাধিকরণানীতি পদদ্ৰযাধিট্ঠানো একো অত্থো লব্ভতি, ইধ পন কাযসঙ্খারাদিপদানি ভিন্নাধিকরণানীতি তথারূপো অত্থো ন লব্ভতীতি. তেনাহ ‘‘যথাধিপ্পেতত্থাভাৰতো’’তি.

ৰিসুং অদীপেত্ৰাতি ‘‘কাযসঙ্খারো’’তিআদিনা সহ ৰুচ্চমানোপি কাযসঙ্খারসদ্দো ৰিসুং ৰিসুং অত্তনো অত্থং অজোতেত্ৰা একং অত্থং যদি দীপেতীতি পরিকপ্পৰসেন ৰদতি. তেন কাযসঙ্খারসদ্দানং সমানাধিকরণতং উল্লিঙ্গেতি. ‘‘কাযসঙ্খারসদ্দো কাযসঙ্খারত্থে ৰত্তমানো’’তি কস্মা ৰুত্তং, ‘‘সঙ্খারসদ্দো সঙ্খারত্থেৰ ৰত্তমানো’’তি পন ৰত্তব্বং সিযা. এৰঞ্হি সতি খন্ধত্থে ৰত্তমানো খন্ধসদ্দো ৰিয রূপসদ্দেন কাযসদ্দেন ৰিসেসিতব্বোতি ইদং ৰচনং যুজ্জেয্য, কাযসঙ্খারসদ্দানং পন সমানাধিকরণত্তে ন কেৰলং সঙ্খারসদ্দোযেৰ সঙ্খারত্থে ¶ ৰত্ততি, অথ খো কাযসদ্দোপীতি ইমমত্থং দস্সেতুং ‘‘কাযসঙ্খারসদ্দো কাযসঙ্খারত্থে ৰত্তমানো’’তি ৰুত্তং সিযা, কাযসদ্দেন সমানাধিকরণেনাতি অধিপ্পাযো. ব্যধিকরণেন পন সঙ্খারস্স ৰিসেসিতব্বতা অত্থেৰাতি.

ইমস্স ৰারস্সাতি সুদ্ধসঙ্খারৰারস্স. পদসোধনেন দস্সিতানন্তি এত্তকেৰ ৰুচ্চমানে তত্থ দস্সিতভাৰসামঞ্ঞেন সুদ্ধকাযাদীনম্পি গহণং আপজ্জেয্যাতি তংনিৰারণত্থং ‘‘যথাধিপ্পেতানমেৰা’’তি আহ. কাযাদিপদেহি অগ্গহিতত্তাতি সুদ্ধকাযাদিপদেহি অগ্গহিতত্তা. ইধ পনাতি অট্ঠকথাযং. সুদ্ধসঙ্খারৰারং সন্ধায ৰুত্তম্পি সুদ্ধসঙ্খারৰারমেৰেত্থ অননুজানন্তো সকলসঙ্খারযমকৰিসযন্তি আহ ‘‘ইধ পন সঙ্খারযমকে’’তি. অধিপ্পেতত্থপরিচ্চাগোতি অস্সাসপস্সাসাদিকস্স অধিপ্পেতত্থস্স অগ্গহণং চেতনাকাযঅভিসঙ্খরণসঙ্খারাদি অনধিপ্পেতত্থপরিগ্গহো. যদি ‘‘কাযো সঙ্খারো’’তিআদিনা সুদ্ধসঙ্খারতংমূলচক্কৰারা অত্থাভাৰতো ইধ ন গহেতব্বা, অথ কস্মা পৰত্তিৰারমেৰ অনারভিত্ৰা অঞ্ঞথা দেসনা আরদ্ধাতি আহ ‘‘পদসোধনৰারতংমূলচক্কৰারেহী’’তিআদি. সংসযো হোতি সঙ্খারসদ্দৰচনীযতাসামঞ্ঞতো কাযসঙ্খারাদিপদানং ব্যধিকরণভাৰতো চ. তেনেৰাহ ‘‘অসমানাধিকরণেহি…পে… দস্সিতাযা’’তি.

পণ্ণত্তিৰারৰণ্ণনা নিট্ঠিতা.

২. পৰত্তিৰারৰণ্ণনা

১৯. সঙ্খারানং ¶ পুগ্গলানঞ্চ ওকাসত্তাতি সম্পযুত্তানং নিস্সযপচ্চযতায, সঙ্খারানং সমাপজ্জিতব্বতায পুগ্গলানং ঝানস্স ওকাসতা ৰেদিতব্বা, ভূমি পন যদগ্গেন পুগ্গলানং ওকাসো, তদগ্গেন সঙ্খারানম্পি ওকাসো. ‘‘দুতিযে ঝানে ততিযে ঝানে’’তিআদিনা ঝানং, ‘‘কামাৰচরে রূপাৰচরে’’তিআদিনা ভূমি চ ৰিসুং ওকাসভাৰেন গহিতা. ইতীতি হেতুঅত্থো, যস্মা ঝানম্পি ওকাসভাৰেন গহিতং, তস্মাতি অত্থো. পুগ্গলৰারে চ ওকাসৰসেন পুগ্গলগ্গহণেতি পুগ্গলৰারে চ যদা পুগ্গলোকাসসঙ্খারাদীনং ওকাসভাৰেন গয্হতি, তদা ¶ তেসং দ্ৰিন্নং ওকাসানং ৰসেন গয্হনং হোতীতি যত্থ সো পুগ্গলো, যঞ্চ তস্মিং পুগ্গলে ঝানং উপলব্ভতি, তেসং দ্ৰিন্নং ভূমিঝানসঙ্খাতানং ওকাসানং ৰসেন যথারহং কাযসঙ্খারাদীনং গহণং কথনং হোতীতি. তস্মাতি যস্মা এতদেৰ, তস্মা. দুতিযততিযজ্ঝানোকাসৰসেনাতি দুতিযততিযজ্ঝানসঙ্খাতওকাসৰসেন গহিতা. কথং? ‘‘ৰিনা ৰিতক্কৰিচারেহি অস্সাসপস্সাসানং উপ্পাদক্খণে’’তি এৰং গহিতা পুগ্গলা ৰিসেসেত্ৰা দস্সিতা. কেন? তেনেৰ ৰিতক্কৰিচাররহিতঅস্সাসপস্সাসুপ্পাদক্খণেনাতি যোজেতব্বং.

পঠমকোট্ঠাসে ঝানোকাসৰসেন পুগ্গলদস্সনং কতন্তি ৰুত্তং ‘‘পুন…পে… দস্সেতী’’তি. ভূমিওকাসৰসেন পুগ্গলং দস্সেতীতি সম্বন্ধো. দ্ৰিপ্পকারানন্তি ঝানভূমিওকাসভেদেন দুৰিধানং. তেসন্তি পুগ্গলানং. ‘‘পঠমং ঝানং সমাপন্নানং কামাৰচরান’’ন্তি চ ইদং নিৰত্তেতব্বগহেতব্বসাধারণৰচনং, তস্স চ অৰচ্ছেদকং ‘‘অস্সাসপস্সাসানং উপ্পাদক্খণে’’তি ইদন্তি ৰুত্তং ‘‘ৰিসেস…পে… খণে’’তি. তেন ৰিসেসনেন. কামাৰচরানম্পীতি পি-সদ্দো সম্পিণ্ডনত্থো. তেন ন কেৰলং রূপারূপাৰচরেসু পঠমজ্ঝানং সমাপন্নানং, অথ খো কামাৰচরানম্পীতি ৰুত্তমেৰত্থং সম্পিণ্ডেতি. কীদিসানং কামাৰচরানন্তি আহ ‘‘গব্ভগতাদীন’’ন্তি. আদি-সদ্দেন উদকনিমুগ্গৰিসঞ্ঞিভূতা সঙ্গহিতা, ন মতচতুত্থজ্ঝানসমাপন্ননিরোধসমাপন্না. তে হি অকামাৰচরতায ৰিয রূপারূপভৰসমঙ্গিনো ৰিতক্কৰিচারুপ্পত্তিযাৰ নিৰত্তিতা. একন্তিকত্তাতি অস্সাসপস্সাসাভাৰস্স একন্তিকত্তা. নিদস্সিতাতি রূপারূপাৰচরা নিদস্সনভাৰেন ৰুত্তা, ন তব্বিরহিতানং অঞ্ঞেসং অভাৰতোতি অধিপ্পাযো. পঠমজ্ঝানোকাসা অস্সাসপস্সাসৰিরহৰিসিট্ঠাতি যোজনা. পঠমঞ্চেত্থ পঠমজ্ঝানসমঙ্গীনং রূপারূপাৰচরানং গহণং, দুতিযং যথাৰুত্তগব্ভগতাদীনং. ইমিনা নযেনাতি য্ৰাযং ¶ ‘‘সঙ্খারানং পুগ্গলানঞ্চা’’তিআদিনা ঝানোকাসভূমিওকাসৰসেন পুগ্গলৰিভাগনযো ৰুত্তো, ইমিনা নযেন উপাযেন. সব্বত্থ সব্বপুচ্ছাসু.

২১. এতস্মিং পন অত্থে সতীতি য্ৰাযং উপ্পত্তিভূমিযা ঝানং ৰিসেসেত্ৰা অত্থো ৰুত্তো, এতস্মিং অত্থে গয্হমানে অঞ্ঞত্থপি উপ্পত্তিভূমিযা ঝানং ৰিসেসিতব্বং ভৰেয্য, তথা চ অনিট্ঠং আপজ্জতীতি দস্সেন্তো ‘‘চতুত্থজ্ঝানে’’তিআদিমাহ. কিং পন তং অনিট্ঠন্তি আহ ‘‘ভূমীনং ¶ ওকাসভাৰস্সেৰ অগ্গহিততাপত্তিতো’’তি. যত্থ যত্থ হি ঝানং গয্হতি, তত্থ তত্থ তং উপ্পত্তিভূমিযা ৰিসেসিতব্বং হোতি. তথা সতি ঝানোকাসোৰ গহিতো সিযা, ন ভূমিওকাসো গুণভূতত্তা. কিঞ্চ ‘‘চতুত্থজ্ঝানে রূপাৰচরে অরূপাৰচরে’’তি এত্থ রূপারূপভূমিযা চতুত্থজ্ঝানে ৰিসেসিযমানে তদেকদেসোৰ ওকাসৰসেন গহিতো সিযা, ন সব্বং চতুত্থজ্ঝানং. তেনাহ ‘‘সব্বচতুত্থজ্ঝানস্স ওকাসৰসেন অগ্গহিততাপত্তিতো চা’’তি. ঝানভূমোকাসানন্তি ঝানোকাসভূমিওকাসানং.

ননু চ ঝানভূমিওকাসে অসঙ্করতো যোজিযমানে ন সব্বস্মিং পঠমজ্ঝানোকাসে কাযসঙ্খারো ৰচীসঙ্খারো চ অত্থি, তথা সব্বস্মিং কামাৰচরোকাসেতি চোদনুপ্পত্তিং সন্ধায তস্স পরিহারং ৰত্তুং ‘‘যদিপী’’তিআদিমাহ. তত্থাতি পঠমজ্ঝানোকাসে কামাৰচরোকাসে চ. তংদ্ৰযুপ্পত্তীতি তস্স কাযৰচীসঙ্খারদ্ৰযস্স উপ্পত্তি. ওকাসদ্ৰযস্স অসঙ্করতো গহণে অযঞ্চ গুণো লদ্ধো হোতীতি আহ ‘‘ৰিসুং…পে… ন ৰত্তব্বং হোতী’’তি. তত্থ অঙ্গমত্তৰসেনাতি ৰিতক্কাদিঝানঙ্গমত্তৰসেন. তত্থ ৰত্তব্বং অট্ঠকথাযং ৰুত্তমেৰ. ৰিতক্করহিতোপি ৰিচারো ৰচীসঙ্খারোযেৰাতি আহ ‘‘অৰিতক্ক…পে… গচ্ছতী’’তি. মুদ্ধভূতং দুতিযজ্ঝানন্তি চতুক্কনযে দুতিযজ্ঝানমাহ. তঞ্হি সকলক্খোভকরধম্মৰিগমেন ৰিতক্কেকঙ্গপ্পহাযিকতো সাতিসযত্তা ‘‘মুদ্ধভূত’’ন্তি ৰত্তব্বতং লভতি. অসঞ্ঞসত্তা ৰিযাতি ইদং ৰিসদিসুদাহরণং দট্ঠব্বং.

৩৭. আৰজ্জনতো পুব্বে পৰত্তং সব্বং চিত্তং পটিসন্ধিচিত্তেন সমানগতিকত্তা একং কত্ৰা ৰুত্তং ‘‘পঠমতো’’তি. তেনাহ ‘‘অৰিতক্কঅৰিচারতো’’তিআদি. চিত্তসঙ্খারস্স আদিদস্সনত্থন্তি সুদ্ধাৰাসে চিত্তসঙ্খারস্স আদিদস্সনত্থং. তথা ‘‘ৰচীসঙ্খারস্স আদিদস্সনত্থ’’ন্তি এত্থাপি.

পৰত্তিৰারৰণ্ণনা নিট্ঠিতা.

সঙ্খারযমকৰণ্ণনা নিট্ঠিতা.

৭. অনুসযযমকং

পরিচ্ছেদপরিচ্ছিন্নুদ্দেসৰারৰণ্ণনা

১. ‘‘অৰিজ্জাসমুদযা ¶ ¶ রূপসমুদযো, তণ্হাসমুদযা রূপসমুদযো, কম্মসমুদযা রূপসমুদযো. লোভো নিদানং কম্মানং সমুদযাযা’’তি চ এৰমাদিনা কুসলমূলকুসলাদীনং পচ্চযভাৰো ৰুত্তোতি আহ ‘‘পচ্চযদীপকেন মূলযমকেনা’’তি. ‘‘সো ‘অনিচ্চং রূপং, অনিচ্চং রূপ’ন্তি যথাভূতং পজানাতি. চক্খু অনিচ্চং, রূপা অনিচ্চা’’তি চ আদিনা বহুলখন্ধাদিমুখেন অনিচ্চানুপস্সনাদযো ৰিহিতাতি ৰুত্তং ‘‘খন্ধাদীসু তীরণবাহুল্লতো’’তি. কিলেসানং সমুচ্ছিন্দনতো পরং পহানকিচ্চং নত্থীতি আহ ‘‘অনুসযপহানন্তা পহানপরিঞ্ঞা’’তি. যদিপি অনুসযেহি সম্পযোগতো আরম্মণতো ৰা পহানপরিঞ্ঞা নপ্পৰত্ততি, অনুসযাভাৰে পন তদারম্ভো এৰ নত্থীতি কত্ৰা ৰুত্তং ‘‘অনুসযেহি পহানপরিঞ্ঞং ৰিভাৰেতু’’ন্তি. অনুসযভাৰেন লব্ভমানানন্তি অনুসযভাৰেন ৰিজ্জমানানং, অনুসযসভাৰানন্তি অত্থো. তীহাকারেহীতি পরিচ্ছেদাদীহি তীহি পকারেহি. অনুসযেসু গণনসরূপপ্পৰত্তিট্ঠানতো অবোধিতেসু পুগ্গলোকাসাদিৰসেন পৰত্তিযমানা তব্বিসযা দেসনা ন সুৰিঞ্ঞেয্যা হোতীতি দস্সেন্তো আহ ‘‘তেসু তথা…পে… দুরৰবোধত্তা’’তি.

এত্থ পুরিমেসূতি পদুদ্ধারো অনন্তরস্স ৰিধি পটিসেধো ৰাতি কত্ৰা সানুসযৰারাদিঅপেক্খো, ন অনুসযৰারাদিঅপেক্খো অনুসযৰারে পাল়িৰৰত্থানস্স পগেৰ কতত্তাতি দস্সেন্তো ‘‘এতেসু সানুসযৰারাদীসু পুরিমেসূতি অত্থো’’তি আহ. সানুসযৰারাদীসু হি তীসু পুরিমেসু ওকাসৰারে যতো ততোতি দেসনা পৰত্তা, ন অনুসযৰারাদীসু. অত্থৰিসেসাভাৰতোতি ‘‘কামধাতুযা চুতস্সা’’তিআদিনা (যম. ২.অনুসযযমক.৩০২) পাল়িআগতপদস্স, ‘‘কামধাতুং ৰা পন উপপজ্জন্তস্সা’’তিআদিনা যমকভাৰেন অট্ঠকথাআদিগতপদস্স চ অত্থৰিসেসাভাৰতো. কথমযং যমকদেসনা সিযা দুতিযস্স পদস্স অভাৰতোতি অত্থো. যদি নাযং যমকদেসনা, অথ কস্মা ইধাগতাতি আহ ‘‘পুরিমৰারে হী’’তিআদি. তত্থ অনুসযট্ঠানপরিচ্ছেদদস্সনন্তি অনুসযট্ঠানতায ¶ পরিচ্ছেদদস্সনং. এৰম্পি কথমিদং অনুসযযমকং যমকদেসনাসব্ভাৰতোতি আহ ‘‘যমকদেসনা…পে… নামং দট্ঠব্ব’’ন্তি ¶ . অত্থৰসেনাতি পটিলোমত্থৰসেন. পঠমপদেন হি ৰুত্তস্স ৰিপরিৰত্তনৰসেনপি যমকদেসনা হোতি ‘‘রূপং রূপক্খন্ধো, রূপক্খন্ধো রূপ’’ন্তিআদীসু (যম. ১.খন্ধযমক.২), তত্থ পন অত্থৰিসেসো অত্থি, ইধ নত্থি, তস্মা ন তথা দেসনা কতাতি দস্সেন্তো আহ ‘‘অত্থৰিসেসাভাৰতো পন ন ৰুত্তা’’তি. লব্ভমানতাৰসেনাতি পুচ্ছায লব্ভমানতাৰসেন.

উপ্পত্তিঅরহতং দস্সেতীতি ইমিনা নিপ্পরিযাযেন অনুসযা অনাগতাতি দস্সিতং হোতি যতো তে মগ্গৰজ্ঝা, ন চ অতীতপচ্চুপ্পন্না উপ্পত্তিরহাতি ৰুচ্চন্তি উপ্পন্নত্তা. যংসভাৰা পন ধম্মা অনাগতা অনুসযাতি ৰুচ্চন্তি, তংসভাৰা এৰ তে অতীতপচ্চুপ্পন্না ৰুত্তা. ন হি ধম্মানং অদ্ধাভেদেন সভাৰভেদো অত্থি, তস্মা অনুসযানং অতীতপচ্চুপ্পন্নভাৰা পরিযাযতো লব্ভন্তীতি অট্ঠকথাযং (যম. অট্ঠ. অনুসযযমক ১) ‘‘অতীতোপি হোতী’’তিআদি ৰুত্তং. এৰংপকারাতি অনুসযপ্পকারা, কারণলাভে সতি উপ্পজ্জনারহাইচ্চেৰ অত্থো. সো এৰংপকারো উপ্পজ্জনৰারে উপ্পজ্জতি-সদ্দেন গহিতো উপ্পজ্জনারহতায অৰিচ্ছিন্নভাৰদীপনত্থন্তি অধিপ্পাযো. তেনাহ ‘‘ন খন্ধযমকাদীসু ৰিয উপ্পজ্জমানতা’’তি, পচ্চুপ্পন্নতাতি অত্থো. তেনেৰাতিআদিনা যথাৰুত্তমত্থং পাকটতরং করোতি. তত্থ নিন্নানাকরণোতি নিব্বিসেসো. উপ্পজ্জনানুসযানং নিন্নানাকরণত্তা এৰ হি ‘‘এত্থেসা তণ্হা উপ্পজ্জমানা উপ্পজ্জতি, এত্থ নিৰিসমানা নিৰিসতী’’তি ৰিভঙ্গে (ৰিভ. ২০৩) আগতং. অনুসযনঞ্হি এত্থ নিৰিসনন্তি অধিপ্পেতং.

ইদানি যেন পরিযাযেন অতীতপচ্চুপ্পন্নেসু অনুসযৰোহারো, তং দস্সেতুকামো অনাগতম্পি তেহি সদ্ধিং একজ্ঝং কত্ৰা দস্সেন্তো ‘‘অনুরূপং কারণং পন…পে… ৰুচ্চন্তী’’তি আহ. এতেন ভূতপুব্বগতিযা অতীতপচ্চুপ্পন্নেসু উপ্পত্তিরহতা ৰেদিতব্বাতি দস্সেতি. উপ্পত্তিঅরহতা নাম কিলেসানং মগ্গেন অসমুচ্ছিন্নতায ৰেদিতব্বা. সা চ অতীতপচ্চুপ্পন্নেসুপি অত্থেৰাতি পকারন্তরেনপি তেসং পরিযাযতোৰ অনুসযভাৰং পকাসেতি. তেনেৰাহ ‘‘মগ্গস্স পনা’’তিআদি. তাদিসানন্তি যে মগ্গভাৰনায অসতি উপ্পত্তিরহা, তাদিসানং. ধম্মো এৰ চ উপ্পজ্জতি, ন ধম্মাকারোতি অধিপ্পাযো. ন হি ধম্মাকারা অনিচ্চতাদযো ¶ উপ্পজ্জন্তীতি ৰুচ্চন্তি. যদি পন তে উপ্পাদাদিসমঙ্গিনো সিযুং, ধম্মা এৰ সিযুং. তেন ৰুত্তং ‘‘অপ্পহীনাকারো চ উপ্পজ্জতীতি ৰত্তুং ন যুজ্জতী’’তি.

ৰুত্তম্পি থামগমনং অগ্গহেত্ৰা অপ্পহীনট্ঠমত্তমেৰ গহেত্ৰা চোদকো চোদেতীতি দস্সেন্তো আহ ¶ ‘‘সত্তানুসয…পে… আপজ্জতীতি চে’’তি. ন হি থামগমনে গহিতে চোদনায ওকাসো অত্থি. তেনাহ ‘‘নাপজ্জতী’’তিআদি. ৰুত্তং অট্ঠকথাযং, ন কেৰলমট্ঠকথাযমেৰ পাঠগতোৰাযমত্থো, তস্মা এৰমেৰ গহেতব্বোতি দস্সেন্তো ‘‘থামগতো…পে… যুত্ত’’ন্তি ৰত্ৰা কিং পন তং থামগমনন্তি পরাসঙ্কং নিৰত্তেন্তো ‘‘থামগতন্তি চ…পে… ৰুত্তা’’তি আহ. তত্থ অঞ্ঞেহি অসাধারণোতি কিলেসৰত্থুআদীনং কিলেসতাদিসভাৰো ৰিয কামরাগাদিতো অঞ্ঞত্থ অলব্ভমানো তেসংযেৰ আৰেণিকো সভাৰো, যতো তে ভৰবীজং ভৰমূলন্তি চ ৰুচ্চন্তি. যস্মা চ থামগমনং তেসং অনঞ্ঞসাধারণো সভাৰো, তস্মা অনুসযনন্তি ৰুত্তং হোতীতি দস্সেন্তো ‘‘থামগতোতি অনুসযসমঙ্গীতি অত্থো’’তি আহ.

‘‘যস্স কামরাগানুসযো অনুসেতি, তস্স পটিঘানুসযো অনুসেতীতি? আমন্তা’’তিআদিনা (যম. ২.অনুসযযমক.৩) অনুসযৰারে ৰুত্তো এৰ অত্থো ‘‘যস্স কামরাগানুসযো উপ্পজ্জতি, তস্স পটিঘানুসযো উপ্পজ্জতীতি? আমন্তা’’তিআদিনা (যম. ২.অনুসযযমক.৩০০) ৰুত্তোতি অনুসযনাকারো এৰ উপ্পজ্জনৰারে উপ্পজ্জতি-সদ্দেন গহিতোতি ‘‘উপ্পজ্জনৰারো অনুসযৰারেন নিন্নানাকরণো ৰিভত্তো’’তি যং ৰুত্তং, তত্থ ৰিচারং আরভতি ‘‘অনুসযউপ্পজ্জনৰারানং সমানগতিকত্তা’’তিআদিনা. ‘‘উপ্পজ্জতী’’তি ৰচনং সিযাতি উপ্পজ্জনৰারে ‘‘উপ্পজ্জতী’’তি ৰচনং অপ্পহীনাকারদীপকং সিযা. তথা চ সতি যথা ‘‘ইমস্স উপ্পাদা’’তি এত্থ ইমস্স অনিরোধাতি অযমত্থোপি ঞাযতি, এৰং ‘‘উপ্পজ্জতী’’তি ৰুত্তে অত্থতো ‘‘ন উপ্পজ্জতী’’তি অযমত্থো ৰুত্তো হোতি অপ্পহীনাকারস্স উপ্পত্তিরহভাৰস্স অনুপ্পজ্জমানসভাৰত্তাতি চোদনং দস্সেন্তো ‘‘উপ্পজ্জতীতি ৰচনস্স অৰুত্ততা ন সক্কা ৰত্তুন্তি চে’’তি আহ. ৰচনত্থৰিসেসেন তংদ্ৰযস্স ৰুত্তত্তাতি এতেন ধম্মনানত্তাভাৰেপি পদত্থনানত্থেন ৰারন্তরদেসনা হোতি যথা ¶ সহজাতসংসট্ঠৰারেসূতি দস্সেতি. অনুরূপং কারণং লভিত্ৰাতিআদি তমেৰ ৰচনত্থৰিসেসং ৰিভাৰেতুং আরদ্ধং. উপ্পত্তিযোগ্গন্তি উপ্পত্তিযা যোগ্গং, উপ্পজ্জনসভাগতন্তি অত্থো. যতো অনুসযা উপ্পত্তিরহাতি ৰুচ্চন্তি, একন্তেন চেতদেৰ সম্পটিচ্ছিতব্বং ‘‘যস্স কামরাগানুসযো উপ্পজ্জতি, তস্স পটিঘানুসযো উপ্পজ্জতীতি? আমন্তা’’তিআদিৰচনতো (যম. ২.অনুসযযমক.৩০০). ‘‘অনুসেন্তীতি অনুসযা’’তি এত্তকে ৰুত্তে সদা ৰিজ্জমানা নু খো তে অপরিনিপ্ফন্নানুসযনট্ঠেন ‘‘অনুসযা’’তি ৰুচ্চন্তীতি অযমত্থো আপজ্জতীতি তংনিসেধনত্থং ‘‘অনুরূপং কারণং লভিত্ৰা উপ্পজ্জন্তী’’তি ৰুত্তং. উপ্পত্তিঅরহভাৰেন থামগততা অনুসযট্ঠোতি যং তেসং উপ্পত্তিযোগৰচনং ৰুত্তং, তং সম্মদেৰ ¶ ৰুত্তন্তি ইমমত্থমাহ ‘‘অনুসযসদ্দস্সা’’তিআদিনা. তেন ৰারদ্ৰযদেসনুপ্পাদিকা অনুসযসদ্দত্থনিদ্ধারণাতি দস্সেতি. তম্পি সুৰুত্তমেৰ ইমিনা তন্তিপ্পমাণেনাতি ইদম্পি ‘‘অভিধম্মে তাৰা’’তিআদিনা আগতং তিৰিধমেৰ তন্তিং সন্ধাযাহাতি দস্সেন্তো আহ ‘‘তন্তিত্তযেনপি হি চিত্তসম্পযুত্ততা দীপিতা হোতী’’তি.

পরিচ্ছেদপরিচ্ছিন্নুদ্দেসৰারৰণ্ণনা নিট্ঠিতা.

উপ্পত্তিট্ঠানৰারৰণ্ণনা

২. এৰং সতীতি ৰেদনানং ৰিসেসিতব্বভাৰে কামধাতুযা চ ৰিসেসনভাৰে সতি. কামাধাতুযা অনুসযনট্ঠানতা ন ৰুত্তা হোতি অপ্পধানভাৰতো, পধানাপ্পধানেসু পধানে কিচ্চদস্সনতো, ৰিসেসনভাৰেন চরিতব্বতায চাতি অধিপ্পাযো. হোতু কো দোসোতি কদাচি ৰদেয্যাতি আসঙ্কমানো আহ ‘‘দ্ৰীসু পনা’’তিআদি. দ্ৰীসূতি নিদ্ধারণে ভুম্মং, তথা ‘‘তীসু ধাতূসূ’’তি এত্থাপি. তস্মাতি যস্মা ধাতুআদিভেদেন তিৰিধং অনুসযট্ঠানং, তত্থ চ রূপারূপধাতূনং ভৰরাগস্স অনুসযট্ঠানতা ৰুত্তাতি কামধাতুযা কামরাগস্স অনুসযট্ঠানতা একন্তেন ৰত্তব্বা, তস্মা. তীসু ধাতূসু তীসু ৰেদনাসূতি চ নিদ্ধারণে ভুম্মং, কামধাতুযা দ্ৰীসু ৰেদনাসূতি চ আধারে.

দ্ৰীস্ৰেৰাতি ¶ দ্ৰীসু সুখোপেক্খাসু এৰ. সব্বাসু দ্ৰীসূতি যাসু কাসুচি দ্ৰীসু. তেনাতি ‘‘কামরাগো দ্ৰীসু ৰেদনাসু অনুসেতী’’তি ৰচনসামত্থিযলদ্ধেন ৰিসেসনিচ্ছযেনেৰ. ভৰরাগানুসযট্ঠানং রূপারূপধাতুযো তদনুরূপা চ ৰেদনা. ন হি দ্ৰীসু ৰেদনাসু কামরাগানুসযোৰ অনুসেতীতি অৰধারণং ইচ্ছিতং, দ্ৰীসু এৰ পন ৰেদনাসূতি ইচ্ছিতং. তেনেৰাহ ‘‘দ্ৰীস্ৰেৰ অনুসেতি, ন তীসূ’’তি. অট্ঠানঞ্চ অনুসযানং, কিং তং অপরিযাপন্নং সক্কাযে? সব্বো লোকুত্তরো ধম্মো. চ-সদ্দেন পটিঘানুসযট্ঠানং সঙ্গণ্হাতি. তেন ৰুত্তং ‘‘যথা চা’’তিআদি. অঞ্ঞাতি কামরাগানুসযট্ঠানভূতা দ্ৰে ৰেদনা.

অঞ্ঞেসু ¶ দ্ৰীহি ৰেদনাহি ৰিপ্পযুত্তেসু. পিযরূপসাতরূপেসূতি পিযাযিতব্বমধুরসভাৰেসু. ৰিসেসনঞ্চেতং রূপাদীনং সব্বদ্ৰারসব্বপুরিসেসু ইট্ঠভাৰস্স অনিযততায কতং. সাতসন্তসুখগিদ্ধিযাতি সাতসুখে সন্তসুখে চ গিজ্ঝনাকারেন অভিকঙ্খনাকারেন. তত্থ সাতসুখং কাযিকং, সন্তসুখং চেতসিকং. সাতসুখং ৰা কাযিকসুখং, সন্তসুখং উপেক্খাসুখং. তথা চাহু ‘‘উপেক্খা পন সন্তত্তা, সুখমিচ্চেৰ ভাসিতা’’তি (ৰিসুদ্ধি. ২.৬৪৪; মহানি. অট্ঠ. ২৭). পরিত্তং ৰা ওল়ারিকং সুখং সাতসুখং, অনোল়ারিকং সন্তসুখং. পরিত্তগ্গহণঞ্চেত্থ কামরাগানুসযস্স অধিপ্পেতত্তা. অঞ্ঞত্থাতি ৰেদনাহি অঞ্ঞত্থ. সোতি কামরাগানুসযো. ৰেদনাসু অনুগতো হুত্ৰা সেতীতি ৰেদনাপেক্খো এৰ হুত্ৰা পৰত্ততি যথা পুত্তাপেক্খায ধাতিযা অনুগ্গণ্হনপ্পৰত্তি, সযনসঙ্খাতা পৰত্তি চ কামরাগস্স নিকামনমেৰ. তেনাহ ‘‘সুখমিচ্চেৰ অভিলপতী’’তি. যথা তস্স, এৰং পটিঘানুসযাদীনম্পি ৰুত্তনিযামেন যথাসকং কিচ্চকরণমেৰ দুক্খৰেদনাদীসু অনুসযনং দট্ঠব্বং. তেন ৰুত্তং ‘‘এৰং পটিঘানুসযো চা’’তিআদি. তীসু ৰেদনাসু অনুসযনৰচনেনাতি তীসু ৰেদনাসু যথারহং অনুসযনৰচনেন. ইট্ঠাদিভাৰেন গহিতেসূতি ইট্ঠাদীসু আরম্মণপকতিযা ৰসেন ইট্ঠাদিভাৰেন গহিতেসু ৰিপরীতসঞ্ঞায ৰসেন অনিট্ঠাদীসু ইট্ঠাদিভাৰেন গহিতেসূতি যোজনা. ন হি ইট্ঠাদিভাৰেন গহণং ৰিপরীতসঞ্ঞা.

তত্থাতি ইট্ঠারম্মণাদীসু. এত্থাতি অনুসযনে. কামস্সাদাদিৰত্থুভূতানং কামভৰাদীনন্তি কামস্সাদভৰস্সাদৰত্থুভূতানং ¶ কামরূপারূপভৰানং গহণং ৰেদিতব্বন্তি যোজনা. তত্থাতি ৰেদনাত্তযধাতুত্তযেসু. নিদ্ধারণে চেতং ভুম্মং. দুক্খপটিঘাতো দুক্খে অনভিরতি. যত্থ তত্থাতি দুক্খৰেদনায তংসম্পযুত্তেসু অনিট্ঠরূপাদীসু ৰাতি যত্থ তত্থ. মহগ্গতা উপাদিন্নক্খন্ধা রূপারূপভৰা, অনুপাদিন্নক্খন্ধা রূপারূপাৰচরধম্মা. তত্থাতি যথাৰুত্তেসু মহগ্গতধম্মেসু ভৰরাগোইচ্চেৰ ৰেদিতব্বো. তেন ৰুত্তং ‘‘রূপধাতুযা অরূপধাতুযা এত্থ কামরাগানুসযো নানুসেতী’’তি. দিট্ঠানুসযাদীনন্তি আদি-সদ্দেন ৰিচিকিচ্ছানুসযঅৰিজ্জানুসযাদীনং সঙ্গহো দট্ঠব্বো.

ধাতুত্তযৰেদনাত্তযৰিনিমুত্তং দিট্ঠানুসযাদীনং অনুসযনট্ঠানং ন ৰুত্তন্তি সুৰুত্তমেতং দিট্ঠানুসযাদীনং উপ্পত্তিট্ঠানপুচ্ছাযং ‘‘সব্বসক্কাযপরিযাপন্নেসু ধম্মেসু’’ইচ্চেৰ ৰিস্সজ্জিতত্তা. কামরাগো পন যত্থ নানুসেতি, তং দুক্খৰেদনারূপারূপধাতুৰিনিমুত্তং দিট্ঠানুসযাদীনং অনুসযনট্ঠানং ¶ অত্থীতি দস্সেতুং ‘‘ননু চা’’তিআদি আরদ্ধং. তত্থ তদনুসযনট্ঠানতোতি তস্স কামরাগানুসযস্স অনুসযনট্ঠানতো. অঞ্ঞা নেক্খম্মস্সিতসোমনস্সুপেক্খাসঙ্খাতা. অযমেত্থ সঙ্খেপত্থো – নেক্খম্মস্সিতদোমনস্সে ৰিয পটিঘানুসযো নেক্খম্মস্সিতসোমনস্সুপেক্খাসু কামরাগানুসযো নানুসেতীতি ‘‘যত্থ কামরাগানুসযো নানুসেতি, তত্থ দিট্ঠানুসযো নানুসেতী’’তি সক্কা ৰত্তুন্তি তস্মা তং উদ্ধরিত্ৰা ন ৰুত্তন্তি. হোন্তূতি তাসং ৰেদনানং অত্থিতং পটিজানিত্ৰা উদ্ধরিত্ৰা অৰচনস্স কারণং দস্সেন্তো আহ ‘‘ন পন…পে… তং ন ৰুত্ত’’ন্তি. তদনুসযনট্ঠানন্তি তেসং দিট্ঠানুসযাদীনং অনুসযনট্ঠানং. তস্মাতি যস্মা সতিপি কামরাগানুসযনট্ঠানতো অঞ্ঞস্মিং দিট্ঠানুসযাদীনং অনুসযনট্ঠানে তং পন ধাতুত্তযৰেদনাত্তযৰিনিমুত্তং নত্থি ৰেদনাদ্ৰযভাৰতো, তস্মা. তং ৰেদনাদ্ৰযং ন ৰুত্তং ৰিসুং ন উদ্ধটন্তি অত্থো. তস্মাতি যস্মা ‘‘যত্থ কামরাগাদযো নানুসেন্তি, তত্থ দিট্ঠিৰিচিকিচ্ছা নানুসেন্তী’’তি অযমত্থো ‘‘আমন্তা’’তি ইমিনা পটিৰচনৰিস্সজ্জনেন অৰিভাগতো ৰুত্তোতি ‘‘যত্থ কামরাগাদযো অনুসেন্তি, তত্থ দিট্ঠিৰিচিকিচ্ছা অনুসেন্তী’’তি অযম্পি অত্থো অৰিভাগতোৰ লব্ভতি, তস্মা. অৰিভাগতো চ দুক্খং পটিঘস্স অনুসযনট্ঠানন্তি দীপিতং হোতি. তেনাহ ‘‘অৰিসেসেন…পে… ৰেদিতব্ব’’ন্তি. তত্থ অৰিসেসেনাতি গেহস্সিতং নেক্খম্মস্সিতন্তি ৰিসেসং অকত্ৰা. সমুদাযৰসেন ¶ গহেত্ৰাতি যথাৰুত্তঅৰযৰানং সমূহৰসেন দুক্খন্ত্ৰেৰ গহেত্ৰা. ‘‘অৰিসেসেন সমুদাযৰসেন গহেত্ৰা’’তি ইমমত্থং তথা-সদ্দেন অনুকড্ঢতি ‘‘দ্ৰীসু ৰেদনাসূ’’তি এত্থাপি গেহস্সিতাদিৰিভাগস্স অনিচ্ছিতত্তা.

যদি এৰং ‘‘পটিঘং তেন পজহতি, ন তত্থ পটিঘানুসযো অনুসেতী’’তি ইদং সুত্তপদং কথন্তি চোদনং সন্ধায ‘‘অপিচা’’তিআদি ৰুত্তং. তত্থাতি তস্মিং দোমনস্সে, তংসম্পযুত্তে ৰা পটিঘে. নেক্খম্মস্সিতং দোমনস্সন্তিআদিনা নেয্যত্থমিদং সুত্তং, ন নীতত্থন্তি দস্সেতি. যথা পন সুত্তং উদাহটং, তথা ইধ কস্মা ন ৰুত্তন্তি আহ ‘‘পটিঘুপ্পত্তিরহট্ঠানতাযা’’তিআদি. এৰম্পি সুত্তাভিধম্মপাঠানং কথমৰিরোধোতি আহ নিপ্পরিযাযদেসনা হেসা, সা পন পরিযাযদেসনাতি. এৰঞ্চ কত্ৰাতি পরিযাযদেসনত্তা এৰ. রাগানুসযোতি কামরাগানুসযো অধিপ্পেতো. যতো ‘‘অনাগামিমগ্গেন সমুগ্ঘাতনং সন্ধাযা’’তি ৰুত্তং, তস্মা তস্স ন মহগ্গতধম্মা অনুসযনট্ঠানন্তি তং পঠমজ্ঝানঞ্চ অনামসিত্ৰা ‘‘ন হি লোকিযা…পে… নানুসেতীতি সক্কা ৰত্তু’’ন্তি ৰুত্তং. অৰত্থুভাৰতোতি সভাৰেনেৰ অনুপ্পত্তিট্ঠানত্তা. ইধাতি ইমস্মিং অনুসযযমকে. ৰুত্তনযেনাতি ‘‘নেক্খম্মস্সিতং দোমনস্সং উপ্পাদেত্ৰা’’তিআদিনা ৰুত্তেন নযেন ¶ . তংপটিপক্খভাৰতোতি তেসং পটিঘাদীনং পটিপক্খস্স মগ্গস্স সব্ভাৰতো. ন কেৰলং মগ্গসব্ভাৰতো, অথ খো বলৰৰিপস্সনাসব্ভাৰতোপীতি দস্সেন্তো আহ ‘‘তংসমুগ্ঘা…পে… ভাৰতো চা’’তি.

ইদানি যদেতং তত্থ তত্থ ‘‘অনুসযনট্ঠান’’ন্তি ৰুত্তং, তং গহেতব্বধম্মৰসেন ৰা সিযা গহণৰিসেসেন ৰাতি দ্ৰে ৰিকপ্পা, তেসু পঠমং সন্ধাযাহ ‘‘আরম্মণে অনুসযনট্ঠানে সতী’’তি. রূপাদিআরম্মণে অনুসযানং অনুসযনট্ঠানন্তি গয্হমানে যমত্থং সন্ধায ‘‘ন সক্কা ৰত্তু’’ন্তি ৰুত্তং, তং দস্সেতুং ‘‘দুক্খায হী’’তিআদিমাহ. যদি সিযাতি যদি কামরাগানুসযো সিযা. এতস্সপীতি দিট্ঠানুসযসম্পযুত্তলোভস্সপি ‘‘সব্বসক্কাযপরিযাপন্নেসু ধম্মেসূ’’তি কামরাগস্স ঠানং ৰত্তব্বং সিযা, ন চ ৰুত্তং. অথ পনাতিআদি দুতিযৰিকপ্পং সন্ধায ৰুত্তং. অজ্ঝাসযৰসেন তংনিন্নতাযাতি অসতিপি আরম্মণকরণে যত্থ কামরাগাদযো অজ্ঝাসযতো নিন্না, তং তেসং অনুসযনট্ঠানং. তেন ¶ ৰুত্তং ‘‘অনুগতো হুত্ৰা সেতী’’তি. অথ পন ৰুত্তন্তি সম্বন্ধো. যথাতিআদি যথাৰুত্তস্স অত্থস্স উদাহরণৰসেন নিরূপনং. দুক্খে পটিহঞ্ঞনৰসেনেৰ পৰত্ততি, নারম্মণকরণৰসেনাতি অধিপ্পাযো. দুক্খমেৰ তস্স অনুসযনট্ঠানং ৰুত্তন্তি অজ্ঝাসযস্স তত্থ নিন্নত্তা দুক্খমেৰ তস্স পটিঘস্স অনুসযনট্ঠানং ৰুত্তং, নালম্বিতং রূপাদি সুখৰেদনা চাতি অধিপ্পাযো. এৰন্তি যথা অঞ্ঞারম্মণস্সপি পটিঘস্স অজ্ঝাসযতো দুক্খনিন্নতায দুক্খমেৰ অনুসযনট্ঠানং ৰুত্তং, এৰং. দুক্খাদীসু…পে… ৰুত্তন্তি ‘‘দুক্খেন সুখং অধিগন্তব্বং. নত্থি দিন্ন’’ন্তি চ আদিনা কাযকিলমনদুক্খে দানানুভাৰাদিকে চ মিচ্ছাভিনিৰেসনৰসেন উপ্পজ্জমানেন দিট্ঠানুসযেন সম্পযুত্তো অঞ্ঞারম্মণোপি লোভো ‘‘এৰং সুখং ভৰিস্সতী’’তি অজ্ঝাসযতো সুখাভিসঙ্গৰসেনেৰ পৰত্ততীতি সুখুপেক্খাভেদং সাতসন্তসুখদ্ৰযমেৰ অস্স লোভস্স অনুসযনট্ঠানং ৰুত্তং পাল়িযং, ন যথাৰুত্তং দুক্খাদি, তস্মা ভৰরাগ…পে… ন ৰিরুজ্ঝতি. একস্মিংযেৰ চাতিআদি দুতিযৰিকপ্পংযেৰ উপব্রূহনত্থং ৰুত্তং. তত্থ রাগস্স সুখজ্ঝাসযতা তংসমঙ্গিনো পুগ্গলস্স ৰসেন ৰেদিতব্বা, তন্নিন্নভাৰেন ৰা চক্খুস্স ৰিসমজ্ঝাসযতা ৰিয. এস নযো সেসেসুপি. তেসং রাগপটিঘানং নানানুসযট্ঠানতা হোতি একস্মিম্পি আরম্মণেতি অত্থো.

এৰঞ্চ কত্ৰাতি অসতিপি গহেতব্বভেদে গহণৰিসেসেন অনুসযনট্ঠানস্স ভিন্নত্তা এৰ. ‘‘যত্থ…পে… নো’’তি ৰুত্তং, অঞ্ঞথা ৰিরুজ্ঝেয্য. গহেতব্বভেদেন হি রাগপটিঘানং অনুসযনট্ঠানভেদে ¶ গয্হমানে ৰিপাকমত্তে ঠাতব্বং সিযা, ন চ তং যুত্তং, নপি সব্বেসং পুরিসদ্ৰারানং ইট্ঠানিট্ঠং নিযতন্তি. যদিপি যথাৰুত্তলোভস্স ৰুত্তনযেন কামরাগানুসযতা সম্ভৰতি, যথা পন সুখুপেক্খাসু ইট্ঠারম্মণে চ উপ্পজ্জন্তেন দোমনস্সেন সহ পৰত্তো দোসো দুব্বলভাৰেন পটিঘানুসযো ন হোতি, এৰং যথাৰুত্তলোভোপি কামরাগানুসযো ন হোতীতি ইমমত্থং দস্সেতুং ‘‘অট্ঠকথাযং পনা’’তিআদি ৰুত্তং. ন পটিঘানুসযোতি এত্থ ন-কারো পটিসেধনত্থো, ন অঞ্ঞত্থো, ইতরত্থ পন সম্ভৰো এৰ নত্থীতি দস্সেন্তো ‘‘যং পনেত’’ন্তিআদিমাহ. তত্থ ‘‘ন হি দোমনস্সস্স পটিঘানুসযভাৰাসঙ্কা অত্থী’’তি ইমিনা ন-কারস্স অঞ্ঞত্থতাভাৰদস্সনমুখেন অভাৰত্থতং সমত্থেতি.

দেসনা ¶ সংকিণ্ণা ৰিয ভৰেয্যাতি এত্থ দেসনাসঙ্করং দস্সেতুং ‘‘ভৰরাগস্সপি…পে… ভৰেয্যা’’তি ৰুত্তং. তস্সত্থো – যথা কামরাগস্স কামধাতুযা দ্ৰীসু ৰেদনাসু আরম্মণকরণৰসেন উপ্পত্তি ৰুত্তা ‘‘কামরাগো কামধাতুযা দ্ৰীসু ৰেদনাসু অনুসেতী’’তি, এৰং যদি ‘‘ভৰরাগো কামধাতুযা দ্ৰীসু ৰেদনাসু অনুসেতী’’তি ৰুচ্চেয্য, ভৰরাগস্সপি…পে… ভৰেয্য. ততো চ কামরাগেন সদ্ধিং ভৰরাগস্স দেসনা সংকিণ্ণা ভৰেয্য, কামরাগতো চ ভৰরাগস্স ৰিসেসো দস্সেতব্বো. সো চ সহজাতানুসযৰসেন ন সক্কা দস্সেতুন্তি আরম্মণকরণৰসেন দস্সেতব্বো. তেন ৰুত্তং ‘‘তস্মা আরম্মণ…পে… অধিপ্পাযো’’তি. তত্থ আরম্মণৰিসেসেনাতি রূপারূপধাতুসঙ্খাতআরম্মণৰিসেসেন. ৰিসেসদস্সনত্থন্তি কামরাগতো ভৰরাগস্স ৰিসেসদস্সনত্থং. এৰং দেসনা কতাতি ‘‘রূপধাতুযা অরূপধাতুযা এত্থ ভৰরাগানুসযো অনুসেতী’’তি এৰং ৰিসযে ভুম্মং কত্ৰা দেসনা কতা. তেনাহ ‘‘সহজাতৰেদনাৰিসেসাভাৰতো’’তি.

উপ্পত্তিট্ঠানৰারৰণ্ণনা নিট্ঠিতা.

মহাৰারো

১. অনুসযৰারৰণ্ণনা

৩. পৰত্তাৰিরামৰসেনাতি ¶ অনুসযপ্পৰত্তিযা অৰিরামৰসেন, অৰিচ্ছেদৰসেনাতি অত্থো. কথং পন কুসলাব্যাকতচিত্তক্খণে অনুসযানং পৰত্তীতি আহ ‘‘মগ্গেনেৰ…পে… পুব্বে’’তি.

২০. চিত্তচেতসিকানঞ্চ ঠানং নাম চিত্তুপ্পাদোতি আহ ‘‘একস্মিং চিত্তুপ্পাদে’’তি. তেসং তেসং পুগ্গলানন্তি পুথুজ্জনাদীনং পুগ্গলানং. পকতিযা সভাৰেন. সভাৰসিদ্ধা হি দুক্খায ৰেদনায কামরাগস্স অননুসযনট্ঠানতা. এৰং সেসেসুপি যথারহং ৰত্তব্বং. ৰক্খতি হি ‘‘পকতিযা দুক্খাদীনং কামরাগাদীনং অননুসযনট্ঠানতং সন্ধায ৰুত্ত’’ন্তি. পহানেনাতি তস্স তস্স অনুসযস্স সমুচ্ছিন্দনেন. তিণ্ণং পুগ্গলানন্তি পুথুজ্জনসোতাপন্নসকদাগামীনং. দ্ৰিন্নং পুগ্গলানন্তি অনাগামিঅরহন্তানং. এত্থাতি এতস্মিং পুগ্গলোকাসৰারে. পুরিমনযেতি ‘‘তিণ্ণং পুগ্গলান’’ন্তিআদিকে পুরিমস্মিং ৰিস্সজ্জননযে. ওকাসন্তি উপ্পত্তিট্ঠানং, ইধ পন দুক্খৰেদনা ¶ ৰেদিতব্বা. পচ্ছিমনযেতি ‘‘দ্ৰিন্নং পুগ্গলান’’ন্তিআদিকে ৰিস্সজ্জননযে. অনোকাসতা অননুসযনট্ঠানতা.

অনুসযৰারৰণ্ণনা নিট্ঠিতা.

২. সানুসযৰারৰণ্ণনা

৬৬-১৩১. ‘‘সানুসযো, পজহতি, পরিজানাতী’’তি পুগ্গলো ৰুত্তোতি ‘‘কামরাগেন সানুসযো, কামরাগং পজহতি, কামরাগং পরিজানাতী’’তিআদীসু অনুসযসমঙ্গিভাৰেন পহানপরিঞ্ঞাকিরিযায কত্তুভাৰেন চ পুগ্গলো ৰুত্তো, ন ধম্মো. ভৰৰিসেসেন ৰাতি কেৰলেন ভৰৰিসেসেন ৰা. ইতরেসূতি পটিঘানুসযাদীসু. ভৰানুসযৰিসেসেন ৰাতি কামভৰাদিভৰৰিসিট্ঠানুসযৰিসেসেন ৰা. সানুসযতানিরনুসযতাদিকাতি এত্থ আদি-সদ্দেন পহানাপহানপরিঞ্ঞাপরিঞ্ঞা ¶ সঙ্গয্হন্তি. ননু চ ভৰৰিসেসে কেসঞ্চি অনুসযানং অপ্পহানন্তি? ন তং অনুসযকতং, অথ খো পচ্চযৰেকল্লতো অনোকাসতায চাতি নাযং ৰিরোধো. দ্ৰীসু ৰেদনাসূতি সুখউপেক্খাসু ৰেদনাসু দুক্খায ৰেদনায কামরাগানুসযেন নিরনুসযোতি যোজেতব্বং. ইদম্পি নত্থি পুগ্গলৰসেন ৰুচ্চমানত্তা. তেনাহ ‘‘ন হি পুগ্গলস্স…পে… অনুসযান’’ন্তি. যদিপি পুগ্গলস্স অনুসযনোকাসো অনোকাসো, তস্স পন সানুসযতাদিহেতু হোতীতি দস্সেন্তো ‘‘অনুসযস্স পনা’’তিআদিমাহ. নিরনুসযতাদীনন্তি আদি-সদ্দেন অপ্পহানাপরিঞ্ঞা সঙ্গণ্হাতি. পরিজাননং সমতিক্কমনন্তি পরিঞ্ঞাৰারেপি ‘‘অপাদানে নিস্সক্কৰচন’’ন্তি ৰুত্তং.

অনুসযনট্ঠানতোতি অনুসযনট্ঠানহেতু. ‘‘অননুসযনট্ঠানতো’’তি এত্থাপি এসেৰ নযো. নিমিত্তাপাদানভাৰদস্সনত্থন্তি সানুসযৰারে নিমিত্তভাৰদস্সনত্থং, পজহনপরিঞ্ঞাৰারেসু অপাদানভাৰদস্সনত্থঞ্চাতি যোজেতব্বং. পজহতীতি এত্থ ‘‘রূপধাতুযা অরূপধাতুযা ততো মানানুসযং পজহতী’’তি পাল়িপদং আহরিত্ৰা যোজেতব্বং, ন পজহতীতি এত্থ পন ‘‘দুক্খায ৰেদনায ততো কামরাগানুসযং নপ্পজহতী’’তি. এৰমাদীসূতি আদি-সদ্দেন পরিঞ্ঞাৰারম্পি সঙ্গণ্হাতি. ভুম্মনিদ্দেসেনেৰ হেতুঅত্থেনেৰ নিদ্দিট্ঠাতি অত্থো.

চতুত্থপঞ্হৰিস্সজ্জনেনাতি ¶ ‘‘যতো ৰা পন মানানুসযেন সানুসযো, ততো কামরাগানুসযেন সানুসযো’’তি এতস্স পঞ্হস্স ৰিস্সজ্জনেন. তত্থ হি ‘‘রূপধাতুযা অরূপধাতুযা’’তিআদিনা সরূপতো অনুসযনট্ঠানানি দস্সিতানি. তদত্থেতি তং অনুসযনট্ঠানদস্সনং অত্থো এতস্সাতি তদত্থো, তস্মিং তদত্থে. ‘‘অনুসযস্স উপ্পত্তিট্ঠানদস্সনত্থং অযং ৰারো আরদ্ধো’’তিআদিনা ‘‘যতো’’তি এতেন অনুসযনট্ঠানং ৰুত্তন্তি ইমমত্থং ৰিভাৰেত্ৰা. পমাদলিখিতং ৰিয দিস্সতি উপ্পন্ন-সদ্দেন ৰত্তমানুপ্পন্নে ৰুচ্চমানে. যথা পন উপ্পজ্জনৰারে উপ্পজ্জতি-সদ্দেন উপ্পত্তিযোগদীপকত্তা উপ্পত্তিরহা ৰুচ্চন্তি, এৰমিধাপি উপ্পত্তিঅরহে ৰুচ্চমানে ন কোচি ৰিরোধো. যং পন ৰক্খতি ‘‘ন হি অপরিযাপন্নানং অনুসযুপ্পত্তিরহট্ঠানতা’’তি, সোপি ন দোসো. যত্থ যত্থ হি অনুসযা উপ্পত্তিরহা, তদেৰ একজ্ঝং গহেত্ৰা ‘‘সব্বত্থা’’তি ৰুত্তন্তি. তথেৰ দিস্সতীতি তং পমাদলিখিতং ৰিয দিস্সতীতি অত্থো.

যতো উপ্পন্নেন ভৰিতব্বন্তি যতো অনুসযনট্ঠানতো কামগারানুসযেন উপ্পন্নেন ভৰিতব্বং, তেন ¶ কামরাগানুসযেন উপ্পত্তিরহট্ঠানে নিস্সক্কৰচনং কতং ‘‘যতো’’তি. তথাতি এত্থ তথা-সদ্দো যথা ‘‘যতো উপ্পন্নেনা’’তি এত্থ উপ্পত্তিরহট্ঠানতো অনুসযস্স উপ্পত্তিরহতা ৰুত্তা, তথা ‘‘উপ্পজ্জনকেনা’’তি এত্থাপি সা এৰ ৰুচ্চতীতি দীপেতীতি আহ ‘‘সব্বধম্মেসু…পে… আপন্নেনা’’তি. তত্থ ‘‘উপ্পজ্জনকো’’তি ৰুত্তে অনুপ্পজ্জনকো ন হোতীতি অযমত্থো ৰিঞ্ঞাযতি, তথা চ সতি তেন অনুপ্পত্তি নিচ্ছিতাতি উপ্পন্নসভাৰতা চ পকাসিতা হোতীতি. তেনাহ ‘‘সব্বধম্মেসু…পে… অপনেতী’’তি. ‘‘যো যতো কামরাগানুসযেন নিরনুসযো, সো ততো মানানুসযেন নিরনুসযো’’তি পুচ্ছায ‘‘যতো ততো’’তি আগতত্তা ৰিস্সজ্জনে ‘‘সব্বত্থা’’তি পদস্স নিস্সক্কৰসেনেৰ সক্কা যোজেতুন্তি দস্সেন্তো ‘‘সব্বত্থাতি…পে… ন ন সম্ভৰতী’’তি আহ. ভুম্মতো অঞ্ঞত্থাপি সদ্দৰিদূ ইচ্ছন্তি, যতো সব্বেসং পাদকং ‘‘সব্বত্থপাদক’’ন্তি ৰুচ্চতি, ইধ পন নিস্সক্কৰসেন ৰেদিতব্বং.

সানুসযৰারৰণ্ণনা নিট্ঠিতা.

৩. পজহনৰারৰণ্ণনা

১৩২-১৯৭. অপ্পজহনসব্ভাৰাতি ¶ অপ্পহানস্স, অপ্পহীযমানস্স ৰা সব্ভাৰা. তস্মাতি যস্মা যো কামরাগানুসযং পজহতি, ন সো মানানুসযং নিরৰসেসতো পজহতি, যো চ মানানুসযং নিরৰসেসতো পজহতি, ন সো কামরাগানুসযং পজহতি পগেৰ পহীনত্তা, তস্মা ‘‘যো ৰা পন মানানুসযং পজহতি, সো কামরাগানুসযং পজহতীতি? নো’’তি ৰুত্তন্তি ৰেদিতব্বং. যদি এৰং পঠমপুচ্ছাযং কথন্তি আহ ‘‘যস্মা পন…পে… ৰুত্ত’’ন্তি. তত্থ পহানকরণমত্তমেৰাতি পহানকিরিযাসম্ভৰমত্তমেৰ, ন নিরৰসেসপ্পহানন্তি অধিপ্পাযো. তে ঠপেত্ৰাতি দিট্ঠিৰিচিকিচ্ছানুসযাদীনং নিরৰসেসপজহনকে অট্ঠমকাদিকে ঠপেত্ৰা. অৰসেসাতি তস্স তস্স অনুসযস্স নিরৰসেসপ্পজহনকেহি অৰসিট্ঠা. তেসু যেসং একচ্চে অনুসযা পহীনা, তেপি অপ্পজহনসব্ভাৰেনেৰ নপ্পজহন্তীতি ৰুত্তা. ন চ যথাৰিজ্জমানেনাতি মগ্গকিচ্চভাৰেন ৰিজ্জমানপ্পকারেন পহানেন ৰজ্জিতা রহিতা এৰ ৰুত্তাতি যোজনা.

কেসঞ্চীতি ¶ সোতাপন্নসকদাগামিমগ্গসমঙ্গিসকদাগামীনং. পুন কেসঞ্চীতি অনাগামিঅগ্গমগ্গসমঙ্গিঅরহন্তানং. উভযন্তি কামরাগৰিচিকিচ্ছানুসযদ্ৰযং. সেসানন্তি ‘‘সেসা’’তি ৰুত্তানং যথাৰুত্তপুগ্গলানং. তেসন্তি ৰুত্তপ্পকারানং দ্ৰিন্নং অনুসযানং. উভযাপ্পজহনস্সাতি কামরাগৰিচিকিচ্ছানুসযাপ্পজহনস্স. কারণং ন হোতীতি যেসং ৰিচিকিচ্ছানুসযো পহীনো, তেসং তস্স পহীনতা, যেসং যথাৰুত্তং উভযপ্পহীনং, তেসং তদপ্পজহনস্স কারণং ন হোতীতি অত্থো. তেনাহ ‘‘তেসং পহীনত্তা ‘নপ্পজহন্তী’তি ন সক্কা ৰত্তু’’ন্তি. অথ পন ন তত্থ কারণং ৰুত্তং, যেন কারণৰচনেন যথাৰুত্তদোসাপত্তি সিযা, কেৰলং পন সন্নিট্ঠানেন তেসং পুগ্গলানং গহিততাদস্সনত্থং ৰুত্তং ‘‘কামরাগানুসযঞ্চ নপ্পজহন্তী’’তি, এৰম্পি পুচ্ছিতস্স সংসযত্থস্স কারণং ৰত্তব্বং. তথা চ সতি ‘‘সেসপুগ্গলা তস্স অনুসযস্স পহীনত্তা নপ্পজহন্তী’’তি কারণং ৰত্তব্বমেৰাতি চোদনং সন্ধাযাহ ‘‘ন ৰত্তব্ব’’ন্তিআদি. তত্থ ন ৰত্তব্বন্তি ৰুত্তনযেন কারণং ন ৰত্তব্বং কারণভাৰস্সেৰ অভাৰতো. ‘‘উভযাপ্পজহনস্স কারণং ন হোতী’’তি ৰুত্তং, যথা পন ৰত্তব্বং, তং দস্সেতুং ‘‘যো কামরাগানুসযং…পে… ৰত্তব্বত্তা’’তি আহ. তেন পহীনাপ্পহীনৰসেন ¶ কারণং ন ৰত্তব্বং, পহীনানংযেৰ পন ৰসেন ৰত্তব্বন্তি দস্সেতি. সংসযত্থসঙ্গহিতেতি সংসযত্থেন পদেন সঙ্গহিতে. সন্নিট্ঠানপদসঙ্গহিতং পন পহীযমানত্তা ‘‘নপ্পজহতী’’তি ন সক্কা ৰত্তুন্তি.

পজহনৰারৰণ্ণনা নিট্ঠিতা.

৫. পহীনৰারৰণ্ণনা

২৬৪-২৭৪. ফলট্ঠৰসেনেৰ দেসনা আরদ্ধা, ন মগ্গট্ঠৰসেন, কুতো পুথুজ্জনৰসেন. কস্মা? ফলক্খণে হি অনুসযা পহীনাতি ৰুচ্চন্তি, মগ্গক্খণে পন পহীযন্তীতি. তেনেৰাহ ‘‘মগ্গসমঙ্গীনং অগ্গহিততং দীপেতী’’তি. পটিলোমে হি পুথুজ্জনৰসেনপি দেসনা গহিতা ‘‘যস্স দিট্ঠানুসযো অপ্পহীনো, তস্স ৰিচিকিচ্ছানুসযো অপ্পহীনোতি? আমন্তা’’তিআদিনা. অনুসযচ্চন্তপটিপক্খেকচিত্তক্খণিকানন্তি অনুসযানং অচ্চন্তং পটিপক্খভূতএকচিত্তক্খণিকানং. মগ্গসমঙ্গীনন্তি মগ্গট্ঠানং. এত্থ চ অনুসযানং অচ্চন্তপটিপক্খতাগ্গহণেন ¶ উপ্পত্তিরহতং পটিক্খিপতি. ন হি তে অচ্চন্তপটিপক্খসমুপ্পত্তিতো পরতো উপ্পত্তিরহা হোন্তি. মগ্গসমঙ্গিতাগ্গহণেন অনুপ্পত্তিরহতাপাদিততং পটিক্খিপতি. ন হি মগ্গক্খণে তে অনুপ্পত্তিরহতং আপাদিতা নাম হোন্তি, অথ খো আপাদীযন্তীতি. একচিত্তক্খণিকতাগ্গহণেন সন্তানব্যাপারং. তেনাহ ‘‘ন কোচী’’তিআদি. তত্থ তেতি মগ্গসমঙ্গিনো. ন কেৰলং পহীনৰারেযেৰ, অথ খো অঞ্ঞেসুপীতি দস্সেন্তো ‘‘অনুসয…পে… গহিতা’’তি আহ.

২৭৫-২৯৬. যত্থ অনুসযো উপ্পত্তিরহো, তত্থেৰস্স অনুপ্পত্তিরহতাপাদনন্তি ‘‘অত্তনো অত্তনো ওকাসে এৰ অনুপ্পত্তিধম্মতং আপাদিতো’’তি আহ. তথা হি ৰুত্তং ‘‘চক্খুং লোকে পিযরূপং সাতরূপং, এত্থেসা তণ্হা উপ্পজ্জমানা উপ্পজ্জতি, এত্থ নিৰিসমানা নিৰিসতী’’তি (ৰিভ. ২০৩) ৰত্ৰা পুন ৰুত্তং ‘‘চক্খুং লোকে পিযরূপং সাতরূপং, এত্থেসা তণ্হা পহীযমানা পহীযতি, এত্থ নিরুজ্ঝমানা নিরুজ্ঝতী’’তি (ৰিভ. ২০৪). তস্মাতি যস্মা তদোকাসত্তমেৰ কামধাতুআদিওকাসত্তমেৰ অনুসযানং দীপেন্তি পহীনাপ্পহীনৰচনানি, তস্মা. অনোকাসে তদুভযাৰত্তব্বতা ৰুত্তাতি যস্মা কামরাগপটিঘানুসযানং দ্ৰিন্নং উপ্পত্তিট্ঠানং, সো এৰ পহানোকাসোতি ¶ স্ৰাযং তেসং অঞ্ঞমঞ্ঞং অনোকাসো, তস্মিং অনোকাসে তদুভযস্স পহানাপ্পহানস্স নৰত্তব্বতা ৰুত্তা. কামরাগানুসযোকাসে হি পটিঘানুসযস্স অপ্পহীনত্তা সো ‘‘তত্থ পহীনো’’তি ন ৰত্তব্বো, অট্ঠিতত্তা পন ‘‘তত্থ অপ্পহীনো’’তি চ, তস্মা অনোকাসে তদুভযাৰত্তব্বতা ৰুত্তাতি. তেন সদ্ধিং সমানোকাসেতি তেন কামরাগেন সদ্ধিং সমানোকাসে. ‘‘সাধারণট্ঠানে’’তি ৰুত্তে কামধাতুযং সুখুপেক্খাসু পহীনো নাম হোতি, ন সমানকালে পহীনো ততিযচতুত্থমগ্গৰজ্ঝত্তা কামরাগমানানুসযানং.

পহীনৰারৰণ্ণনা নিট্ঠিতা.

৭. ধাতুৰারৰণ্ণনা

৩৩২-৩৪০. অপ্পহীনুপ্পত্তিরহভাৰা ইধ অনুগমনসযনানীতি দস্সেন্তো ‘‘যস্মিং ¶ …পে… অত্থো’’তি আহ. ইধাপি যুত্তাতি পুব্বে ৰুত্তমেৰত্থং পরামসতি. তথা হি ৰুত্তং ‘‘কারণলাভে উপ্পত্তিঅরহতং দস্সেতী’’তি (যম. মূলটী. অনুসযযমক ১). ছ পটিসেধৰচনানীতি তিস্সন্নং ধাতূনং চুতূপপাতৰিসিট্ঠানং পটিসেধনৰসেন ৰুত্তৰচনানি, ততো এৰ ধাতুৰিসেসনিদ্ধারণানি ন হোন্তি. পটিসেধোতি হি ইধ সত্তাপটিসেধো ৰুত্তোতি অধিপ্পাযেন ৰদতি. অঞ্ঞত্থে পন ন-কারে নাযং দোসো. ইমং নাম ধাতুং. তংমূলিকাসূতি পটিসেধমূলিকাসু. এৰঞ্হীতি ‘‘ন কামধাতুযা চুতস্স কামধাতুং উপপজ্জন্তস্সা’’তিআদিনা পঠমযোজনায সতি. নকামধাতুআদীসু উপপত্তিকিত্তনেনেৰ নকামধাতুআদিগ্গহণেনপি ধাতুৰিসেসস্সেৰ গহিততায অত্থতো ৰিঞ্ঞাযমানত্তা. তেনাহ ‘‘ন কামধাতু…পে… ৰিঞ্ঞাযতী’’তি. ভঞ্জিতব্বাতি ৰিভজিতব্বা. ৰিভাগো পনেত্থ দুৰিধো ইচ্ছিতোতি আহ ‘‘দ্ৰিধা কাতব্বাতি অত্থো’’তি. পুচ্ছা চ ৰিস্সজ্জনানি চ পুচ্ছাৰিস্সজ্জনানি. যথা অৰুত্তে ভঙ্গাভাৰস্স অৰিঞ্ঞাতত্তা ‘‘অনুসযা ভঙ্গা নত্থী’’তি ৰত্তব্বং, তথা তযিদং ‘‘কতি অনুসযা ভঙ্গা’’তি এতদপেক্খন্তি তদপি ৰত্তব্বং. পুচ্ছাপেক্খঞ্হি ৰিস্সজ্জনন্তি.

ধাতুৰারৰণ্ণনা নিট্ঠিতা.

অনুসযযমকৰণ্ণনা নিট্ঠিতা.

৮. চিত্তযমকং

উদ্দেসৰারৰণ্ণনা

১-৬২. সরাগাদীতি ¶ এত্থ আদি-সদ্দেন ‘‘যস্স সরাগং চিত্তং উপ্পজ্জতি, ন নিরুজ্ঝতী’’তি আরভিত্ৰা যাৰ ‘‘যস্স অৰিমুত্তং চিত্ত’’ন্তি ৰারো, তাৰ সঙ্গণ্হাতি. কুসলাদীতি পন আদি-সদ্দেন ‘‘যস্স কুসলং চিত্তং উপ্পজ্জতি, ন নিরুজ্ঝতী’’তি আরভিত্ৰা যাৰ ‘‘যস্স সরণং চিত্তং উপ্পজ্জতি, ন নিরুজ্ঝতী’’তি ৰারো, তাৰ সঙ্গণ্হাতি, তস্মা সরাগাদিকুসলাদীহীতি সরাগাদীহি অৰিমুত্তন্তেহি, কুসলাদীহি অরণন্তেহি পদেহি মিস্সকা ৰারা. সুদ্ধিকাতি কেৰলা যথাৰুত্তসরাগাদীহি কুসলাদীহি চ অমিস্সকা. তযো তযোতি পুগ্গলধম্মৰসেন ¶ তযো তযো মহাৰারা. যদি এৰং কথং সোল়স পুগ্গলৰারাতি আহ ‘‘তত্থ তত্থ পন ৰুত্তে সম্পিণ্ডেত্ৰা’’তি. তত্থ তত্থ সোল়সৰিধে সরাগাদিমিস্সকচিত্তে ৰুত্তে পুগ্গলে এৰ একজ্ঝং সম্পিণ্ডেত্ৰা সঙ্গহেত্ৰা ‘‘সোল়স পুগ্গলৰারা’’তি ৰুত্তং. ‘‘ধম্মপুগ্গলধম্মৰারা’’তি এত্থাপি এসেৰ নযো. ন নিরন্তরং ৰুত্তেতি ধম্মে পুগ্গলধম্মে চ অনামসিত্ৰা সোল়সসুপি ঠানেসু নিরন্তরং পুগ্গলে এৰ ৰুত্তে সম্পিণ্ডেত্ৰা সোল়স পুগ্গলৰারা ন ৰুত্তাতি অত্থো.

সংসগ্গৰসেনাতি সংসজ্জনৰসেন দেসনায ৰিমিস্সনৰসেন. অঞ্ঞথা হি উপ্পাদনিরোধা পচ্চুপ্পন্নানাগতকালা চ কথং সংসজ্জীযন্তি. সেসানম্পি ৰারানন্তি উপ্পাদুপ্পন্নৰারাদীনং. তংতংনামতাতি যথা ‘‘যস্স চিত্তং উপ্পজ্জতি, তস্স চিত্তং উপ্পন্ন’’ন্তিআদিনা উপ্পাদউপ্পন্নভাৰামসনতো উপ্পাদউপ্পন্নৰারোতি নামং পাল়িতো এৰ ৰিঞ্ঞাযতি, এৰং সেসৰারানম্পীতি আহ ‘‘তংতংনামতা পাল়িঅনুসারেন ৰেদিতব্বা’’তি.

উদ্দেসৰারৰণ্ণনা নিট্ঠিতা.

নিদ্দেসৰারৰণ্ণনা

৬৩. তথারূপস্সেৰাতি পচ্ছিমচিত্তসমঙ্গিনো এৰ. তঞ্চ চিত্তন্তি তঞ্চ যথাৰুত্তক্খণং পচ্ছিমচিত্তং. ‘‘এৰংপকার’’ন্তি ইমস্স অত্থং দস্সেতুং ‘‘ভঙ্গক্খণসমঙ্গিমেৰা’’তি ৰুত্তং নিরুজ্ঝমানাকারস্স ‘‘এৰংপকার’’ন্তি ৰুত্তত্তা.

৬৫-৮২. দ্ৰযমেতন্তি ¶ যং ‘‘খণপচ্চুপ্পন্নমেৰ চিত্তং উপ্পাদক্খণাপগমেন উপ্পজ্জিত্থ নাম, তদেৰ উপ্পাদক্খণে উপ্পাদং পত্তত্তা উপ্পজ্জিত্থ, অনতীতত্তা উপ্পজ্জতি নামা’’তি ৰুত্তং, এতং উভযম্পি. এৰং ন সক্কা ৰত্তুন্তি ইমিনা ৰুত্তপ্পকারেন ন সক্কা ৰত্তুং, পকারন্তরেন পন সক্কা ৰত্তুন্তি অধিপ্পাযো. তত্থ ‘‘ন হী’’তিআদিনা পঠমপক্খং ৰিভাৰেতি. ৰিভজিতব্বং সিযাতি ‘‘ভঙ্গক্খণে তং চিত্তং উপ্পজ্জিত্থ, নো চ উপ্পজ্জতি, উপ্পাদক্খণে তং চিত্তং উপ্পজ্জিত্থ চেৰ উপ্পজ্জতি চা’’তি ৰিভজিতব্বং সিযা, ন চ ৰিভত্তং ¶ . ‘‘আমন্তা’’তি ৰত্তব্বং সিযা খণপচ্চুপ্পন্নে চিত্তে ৰুত্তনযেন উভযস্সপি লব্ভমানত্তা, ন চ ৰুত্তং. ইদানি যেন পকারেন সক্কা ৰত্তুং, তং দস্সেতুং ‘‘চিত্তস্স ভঙ্গক্খণে’’তিআদিমাহ. পুগ্গলো ৰুত্তো, পুগ্গলৰারো হেসোতি অধিপ্পাযো. তস্সাতি পুগ্গলস্স. ন চ কিঞ্চি চিত্তং উপ্পজ্জতি চিত্তস্স ভঙ্গক্খণসমঙ্গিভাৰতো. তং পন চিত্তং উপ্পজ্জতি, যং চিত্তসমঙ্গী সো পুগ্গলোতি এৰমেত্থ অত্থো দট্ঠব্বো. যদি অনেকচিত্তৰসেনাযং যমকদেসনা পৰত্তাতি চোদনং সন্ধাযাহ ‘‘চিত্তন্তি হি…পে… তিট্ঠতী’’তি. সন্নিট্ঠানৰসেন নিযমো ৰেদিতব্বো, অঞ্ঞথা ‘‘নো চ তেসং চিত্তং উপ্পজ্জতী’’তিআদিনা পটিসেধো ন যুজ্জেয্যাতি অধিপ্পাযো. তাদিসন্তি তথারূপং, যদৰত্থো উপ্পন্নউপ্পজ্জমানতাদিপরিযাযেহি ৰত্তব্বো হোতি, তদৰত্থন্তি অত্থো.

৮৩-১১৩. ইমস্স পুগ্গলৰারত্তাতি ‘‘যস্স চিত্তং উপ্পজ্জমান’’ন্তিআদিনযপ্পৰত্তস্স ইমস্স অতিক্কন্তকালৰারস্স পুগ্গলৰারত্তা. পুগ্গলো পুচ্ছিতোতি ‘‘যস্স চিত্তং উপ্পজ্জমানং…পে… তস্স চিত্ত’’ন্তি চিত্তসমঙ্গিপুগ্গলো পুচ্ছিতোতি পুগ্গলস্সেৰ ৰিস্সজ্জনেন ভৰিতব্বং, ইতরথা অঞ্ঞং পুচ্ছিতং অঞ্ঞং ৰিস্সজ্জিতং সিযা. ন কোচি পুগ্গলো ন গহিতো সব্বসত্তানং অনিব্বত্তচিত্ততাভাৰতো. তে চ পন সব্বে পুগ্গলা. নিরুজ্ঝমানক্খণাতীতচিত্তাতি নিরুজ্ঝমানক্খণা হুত্ৰা অতীতচিত্তা. তথা দুতিযততিযাতি যথা পঠমপঞ্হো অনৰসেসপুগ্গলৰিসযত্তা পটিৰচনেন ৰিস্সজ্জেতব্বো সিযা, তথা ততো এৰ দুতিযততিযপঞ্হা ‘‘আমন্তা’’ইচ্চেৰ ৰিস্সজ্জেতব্বা সিযুন্তি অত্থো. চতুত্থো পন পঞ্হো এৰং ৰিভজিত্ৰা পুগ্গলৰসেনেৰ ৰিস্সজ্জেতব্বোতি দস্সেন্তো ‘‘পচ্ছিমচিত্তস্সা’’তিআদিং ৰত্ৰা তথা অৰচনে কারণং দস্সেন্তো ‘‘চিত্তৰসেন পুগ্গলৰৰত্থানতো’’তিআদিমাহ. ‘‘ভঙ্গক্খণে চিত্তং উপ্পাদক্খণং ¶ ৰীতিক্কন্ত’’ন্তি ইমিনা ৰত্তমানস্স চিত্তস্স ৰসেন পুগ্গলো উপ্পাদক্খণাতীতচিত্তো, ‘‘অতীতং চিত্তং উপ্পাদক্খণঞ্চ ৰীতিক্কন্তন্তি ভঙ্গক্খণঞ্চ ৰীতিক্কন্ত’’ন্তি ইমিনা পন অতীতস্স চিত্তস্স ৰসেন পুগ্গলো উপ্পাদক্খণাতীতচিত্তো ৰুত্তো.

তত্থাতি তেসু দ্ৰীসু পুগ্গলেসু. পুরিমস্সাতি পঠমং ৰুত্তস্স সন্নিট্ঠানপদসঙ্গহিতস্স চিত্তং ন ভঙ্গক্খণং ৰীতিক্কন্তং. ‘‘নো চ ভঙ্গক্খণং ৰীতিক্কন্ত’’ন্তি হি ৰুত্তং. পচ্ছিমস্স ৰীতিক্কন্তং চিত্তং ভঙ্গক্খণন্তি সম্বন্ধো. ‘‘ভঙ্গক্খণঞ্চ ৰীতিক্কন্ত’’ন্তি হি ৰুত্তং. এৰমাদিকো পুগ্গলৰিভাগোতি দুতিযপঞ্হাদীসু ৰুত্তং সন্ধাযাহ. তস্স চিত্তস্স তংতংখণৰীতিক্কমাৰীতিক্কমদস্সনৰসেনাতি ¶ তস্স তস্স উপ্পাদক্খণস্স ভঙ্গক্খণস্স চ যথারহং ৰীতিক্কমস্স অৰীতিক্কমস্স চ দস্সনৰসেন দস্সিতো হোতি পুগ্গলৰিভাগোতি যোজনা. ইধাতি ইমস্মিং অতিক্কন্তকালৰারে. পুগ্গলৰিসিট্ঠং চিত্তং পুচ্ছিতং ‘‘যস্স চিত্তং তস্স চিত্ত’’ন্তি ৰুত্তত্তা. যদিপি পুগ্গলপ্পধানা পুচ্ছা পুগ্গলৰারত্তা. অথাপি চিত্তপ্পধানা পুগ্গলং ৰিসেসনভাৰেন গহেত্ৰা চিত্তস্স ৰিসেসিতত্তা. উভযথাপি দুতিযপুচ্ছায ‘‘আমন্তা’’তি ৰত্তব্বং সিযা অনৰসেসপুগ্গলৰিসযত্তা. তথা পন অৰত্ৰা ‘‘অতীতং চিত্ত’’ন্তি ৰুত্তং, কস্মা নিরোধক্খণ…পে… দস্সনত্থন্তি দট্ঠব্বন্তি যোজনা. এস নযো ‘‘ন নিরুজ্ঝমান’’ন্তি এত্থাপীতি নিরুজ্ঝমানং খণং নিরোধক্খণং খণং ৰীতিক্কন্তকালং কিং তস্স চিত্তং ন হোতীতি অত্থো.

১১৪-১১৬. সরাগপচ্ছিমচিত্তস্সাতি সরাগচিত্তেসু পচ্ছিমস্স চিত্তস্স, একস্স পুগ্গলস্স রাগসম্পযুত্তচিত্তেসু যং সব্বপচ্ছিমং চিত্তং, তস্স. সো পন পুগ্গলো অনাগামী ৰেদিতব্বো. ন নিরুজ্ঝতি নিরোধাসমঙ্গিতায. নিরুজ্ঝিস্সতি ইদানি নিরোধং পাপুণিস্সতি. অপ্পটিসন্ধিকত্তা পন ততো অঞ্ঞং নুপ্পজ্জিস্সতি. ইতরেসন্তি যথাৰুত্তসরাগপচ্ছিমচিত্তসমঙ্গিং ৰীতরাগচিত্তসমঙ্গিঞ্চ ঠপেত্ৰা অৰসেসানং ইতরসেক্খানঞ্চেৰ পুথুজ্জনানঞ্চ.

নিদ্দেসৰারৰণ্ণনা নিট্ঠিতা.

চিত্তযমকৰণ্ণনা নিট্ঠিতা.

৯. ধম্মযমকং

১. পণ্ণত্তিৰারো

উদ্দেসৰারৰণ্ণনা

১-১৬. যথা ¶ মূলযমকে কুসলাদিধম্মা দেসিতাতি কুসলাকুসলাব্যাকতা ধম্মা কুসলকুসলমূলাদিৰিভাগতো ¶ মূলযমকে যমকৰসেন যথা দেসিতা. অঞ্ঞথাতি কুসলকুসলমূলাদিৰিভাগতো অঞ্ঞথা, খন্ধাদিৰসেনাতি অত্থো.

উদ্দেসৰারৰণ্ণনা নিট্ঠিতা.

২. পৰত্তিৰারৰণ্ণনা

৩৩-৩৪. তং পন কম্মসমুট্ঠানাদিরূপং অগ্গহেত্ৰা. কেচীতি ধম্মসিরিত্থেরং সন্ধাযাহ. সো হি ‘‘চিত্তসমুট্ঠানরূপৰসেন ৰুত্ত’’ন্তি অট্ঠকথং আহরিত্ৰা ‘‘ইমস্মিং পঞ্হে কম্মসমুট্ঠানাদিরূপঞ্চ লব্ভতী’’তি অৰোচ. তথা চ ৰত্ৰা পটিলোমপাল়িং দস্সেত্ৰা ‘‘চিত্তসমুট্ঠানরূপমেৰ ইধাধিপ্পেতং. কম্মসমুট্ঠানাদিরূপে ন ৰিধানং, নাপি পটিসেধো’’তি আহ. তথাতি যথা ৰুত্তপ্পকারে পাঠে চিত্তসমুট্ঠানরূপমেৰ অধিপ্পেতং, তথা এত্থাপীতি অত্থো. নোতি ৰুত্তন্তি ৰদন্তীতি সম্বন্ধো. তং পনেতন্তি যথা উদ্ধটস্স পাঠস্স অত্থৰচনং, এৰং ন সক্কা ৰত্তুং. কস্মাতি আহ ‘‘চিত্তস্স ভঙ্গক্খণে…পে… পটিসেধসিদ্ধিতো’’তি. স্ৰাযং পটিসেধো হেট্ঠা দস্সিতোযেৰাতি অধিপ্পাযো.

যে চ ৰদন্তীতি এত্থ যে চাতি ৰজিরবুদ্ধিত্থেরং সন্ধাযাহ. সো হি ‘‘সোতাপত্তিমগ্গক্খণে’’তিআদিনা পটিসম্ভিদামগ্গপাল়িং আহরিত্ৰা ‘‘যথা তত্থ সতিপি কম্মজাদিরূপে ঠপেত্ৰা চিত্তসমুট্ঠানরূপন্তি চিত্তপটিবদ্ধত্তা চিত্তজরূপমেৰ ঠপেতব্বভাৰেন উদ্ধটং, এৰমিধাপি চিত্তজরূপমেৰ কথিত’’ন্তি ৰদতি. তঞ্চ নেসং ৰচনং তথা ন হোতি, যথা তেহি উদাহটং, ৰিসমোযং উপঞ্ঞাসোতি অত্থো. যথা চ তং তথা ন হোতি, তং দস্সেতুং ‘‘যেসঞ্হী’’তিআদি ৰুত্তং. তেসন্তি কম্মজাদীনং. তস্সাতি মগ্গস্স. তেতি অব্যাকতা, যে উপ্পাদনিরোধৰন্তো. অৰিজ্জমানেসু চ উপ্পাদনিরোধেসু নিব্বানস্স ৰিয.

সন্নিট্ঠানেন ¶ গহিতেসু পুগ্গলেসু. তেসু হি কেচি অকুসলাব্যাকতচিত্তানং উপ্পাদক্খণসমঙ্গিনো, কেচি অব্যাকতচিত্তস্স, কেচি কুসলাব্যাকতচিত্তস্স, তেসু পুরিমা দ্ৰে ¶ পঠমকোট্ঠাসেন সঙ্গহিতা তস্স কুসলুপ্পত্তিপটিসেধপরত্তা, তে পন ভৰৰসেন ৰিভজিত্ৰা ৰত্তব্বাতি দস্সেন্তো ‘‘পঞ্চৰোকারে’’তিআদিমাহ. এৰন্তি যথাৰুত্তনযেন. সব্বত্থাতি সব্বপঞ্হেসু.

৭৯. ততোতি একাৰজ্জনৰীথিতো. পুরিমতরজৰনৰীথি যায ৰুট্ঠানগামিনী সঙ্গহিতা, তত্থ উপ্পন্নস্সপি চিত্তস্স. কুসলানাগতভাৰপরিযোসানেনাতি কুসলধম্মানং অনাগতভাৰস্স পরিযোসানভূতেন অগ্গমগ্গানন্তরপচ্চযত্তেন দীপিতং হোতি সমানলক্খণং সব্বং. কেন? তায এৰ সমানলক্খণতায. এস নযোতি যথা কুসলানুপ্পাদো কুসলানাগতভাৰস্স পরিযোসানভূততো ৰুত্তপরিচ্ছেদতো ওরম্পি লব্ভতীতি সো যথাৰুত্তপরিচ্ছেদো লক্খণমত্তন্তি স্ৰাযং নযো দস্সিতো. এস নযো অকুসলাতীতভাৰস্স আদিম্হি ‘‘দুতিযে অকুসলে’’তি ৰুত্তট্ঠানে, অব্যাকতাতীতভাৰস্স আদিম্হি ‘‘দুতিযে চিত্তে’’তি ৰুত্তট্ঠানেপীতি যোজনা. ইদানি ‘‘এস নযো’’তি যথাৰুত্তমতিদেসং ‘‘যথা হী’’তিআদিনা পাকটতরং করোতি. ভাৰনাপহানানি দস্সিতানি হোন্তি ‘‘অগ্গমগ্গসমঙ্গী কুসলঞ্চ ধম্মং ভাৰেতি, অকুসলঞ্চ পজহতী’’তি. ইধাতি ইমস্মিং পৰত্তিৰারে. তং তন্তি অকুসলাতীততাদি কুসলানাগততাদি চ. তেন তেনাতি ‘‘দুতিযে অকুসলে অগ্গমগ্গসমঙ্গী’’তি এৰমাদিনা অন্তেন চ.

১০০. পটিসন্ধিচিত্ততোতি ইদং মরিযাদগ্গহণং, ন অভিৰিধিগ্গহণং, যতো ‘‘সোল়সম’’ন্তি আহ. অভিৰিধিগ্গহণমেৰ ৰা সোল়সচিত্তক্খণাযুকমেৰ রূপন্তি ইমস্মিং পক্খে অধিপ্পেতে পটিক্খিত্তোৰাযং ৰাদোতি দস্সেন্তো ‘‘ততো পরম্পি ৰা’’তি আহ. অযঞ্চ ৰিচারো হেট্ঠা দস্সিতো এৰ. ন ততো ওরন্তি ৰিঞ্ঞাযতি ততো ওরং অকুসলনিরোধসমকালং অব্যাকতনিরোধস্স অসম্ভৰতো.

পৰত্তিৰারৰণ্ণনা নিট্ঠিতা.

ধম্মযমকৰণ্ণনা নিট্ঠিতা.

১০. ইন্দ্রিযযমকং

১. পণ্ণত্তিৰারো

উদ্দেসৰারৰণ্ণনা

১. ইন্দ্রিযযমকে ¶ ¶ ৰিভঙ্গে ৰিযাতি যথা ইন্দ্রিযৰিভঙ্গে পুরিসিন্দ্রিযানন্তরং জীৰিতিন্দ্রিযং উদ্দিট্ঠং, ন মনিন্দ্রিযানন্তরং, এৰং ইমস্মিং ইন্দ্রিযযমকে. তঞ্চ সুত্তদেসনানুরোধেনাতি দস্সেন্তো ‘‘তীণিমানি…পে… সুত্তে দেসিতক্কমেনা’’তি আহ. সোযং যদত্থং তস্স সুত্তে দেসিতক্কমেন উদ্দেসো, তং দস্সেতুং ‘‘পৰত্তিৰারেহী’’তিআদি ৰুত্তং. তত্থ যথা ‘‘জীৰিতিন্দ্রিয’’ন্তি ইদং রূপজীৰিতিন্দ্রিযস্স অরূপজীৰিতিন্দ্রিযস্স চ সামঞ্ঞতো গহণং, এৰং উপাদিন্নস্স অনুপাদিন্নস্স চাতি আহ ‘‘কম্মজানং অকম্মজানঞ্চ অনুপালক’’ন্তি. অথ ৰা সহজধম্মানুপালকম্পি জীৰিতিন্দ্রিযং ন কেৰলং খণট্ঠিতিযা এৰ কারণং, অথ খো পবন্ধানুপচ্ছেদস্সপি কারণমেৰ. অঞ্ঞথা আযুক্খযমরণং ন সম্ভৰেয্য, তস্মা ‘‘কম্মজানঞ্চ অনুপালক’’ন্তি অৰিসেসতো ৰুত্তং, চুতিপটিসন্ধীসু চ পৰত্তমানানং কম্মজানং অনুপালকং. ইতীতি তস্মা. তংমূলকানীতি জীৰিতিন্দ্রিযমূলকানি. চুতিপটিসন্ধিপৰত্তিৰসেনাতি চুতিপটিসন্ধিৰসেন পৰত্তিৰসেন চ. তত্থ যং উপাদিন্নং, তং চুতিপটিসন্ধিৰসেনেৰ, ইতরং ইতরৰসেনপি ৰত্তব্বং. যস্মা চক্খুন্দ্রিযাদীসু পুরিসিন্দ্রিযাৰসানেসু একন্তউপাদিন্নেসু অতংসভাৰত্তা যং মনিন্দ্রিযং মূলমেৰ ন হোতি, তস্মা তং ঠপেত্ৰা অৰসেসমূলকানি চক্খুন্দ্রিযাদিমূলকানি. আযতনযমকে ৰিযাতি যথা আযতনযমকে পটিসন্ধিৰসেনাযতনানং উপ্পাদো, মরণৰসেন চ নিরোধো ৰুত্তো, এৰমিধাপি চুতিউপপত্তিৰসেনেৰ ৰত্তব্বানি, তস্মা অতংসভাৰত্তা জীৰিতিন্দ্রিযং তেসং চক্খুন্দ্রিযাদীনং মজ্ঝে অনুদ্দিসিত্ৰা অন্তে পুরিসিন্দ্রিযানন্তরং উদ্দিট্ঠং. যং পন চক্খুন্দ্রিযাদিমূলকেসু মনিন্দ্রিযং সব্বপচ্ছা এৰ গহিতং, তত্থ কারণং অট্ঠকথাযং ৰুত্তমেৰ.

উদ্দেসৰারৰণ্ণনা নিট্ঠিতা.

নিদ্দেসৰারৰণ্ণনা

৯৪. কোচি ¶ সভাৰো নত্থীতি কোচি সভাৰধম্মো নত্থি. যদি এৰং ‘‘নত্থী’’তি পটিক্খেপো এৰ যুত্তোতি আহ ‘‘ন চ রূপাদী’’তিআদি. ‘‘সুখা দুক্খা ¶ অদুক্খমসুখা’’তিআদীসু সুখদুক্খসদ্দানং সামঞ্ঞৰচনভাৰেপি ইন্দ্রিযদেসনাযং তে ৰিসিট্ঠৰিসযা এৰাতি দস্সেন্তো ‘‘সুখস্স…পে… গহিতোযেৰা’’তি আহ. দুক্খস্স চ ভেদং কত্ৰা.

১৪০. পঞ্ঞিন্দ্রিযানি হোন্তীতি আমন্তাতি ৰুত্তন্তি পজাননট্ঠেন অধিপতেয্যট্ঠেন চ পঞ্ঞিন্দ্রিযানি হোন্তি, দস্সনট্ঠেন পন চক্খূনি চাতি চক্খু, ইন্দ্রিযন্তি পুচ্ছায ‘‘আমন্তা’’তি ৰুত্তন্তি অধিপ্পাযো. ‘‘তণ্হাসোতমেৰাহা’’তি ৰুত্তং, ‘‘যস্স ছত্তিংসতি সোতা’’তিআদীসু (ধ. প. ৩৩৯) পন দিট্ঠিআদীনম্পি সোতভাৰো আগতো.

পণ্ণত্তিনিদ্দেসৰারৰণ্ণনা নিট্ঠিতা.

২. পৰত্তিৰারৰণ্ণনা

১৮৬. অঞ্ঞধম্মনিস্সযেনাতি ‘‘যো তেসং রূপীনং ধম্মানং আযু ঠিতী’’তিআদিনা (ধ. স. ৬৩৪) অঞ্ঞধম্মনিস্সযেন গহেতব্বং. পৰত্তিঞ্চ গহেত্ৰা গতেসু ৰিস্সজ্জনেসু, চুতিপটিসন্ধিযো গহেত্ৰা গতেসু যোজনা ন লব্ভতীতি অধিপ্পাযো. অলব্ভমানা চ সুখদুক্খদোমনস্সিন্দ্রিযেহেৰ ন লব্ভতি. তংমূলকা চ নযাতি সুখিন্দ্রিযাদিমূলকা চ নযা. তেহীতি সুখিন্দ্রিযাদীহি. যোজনাতি ‘‘পৰত্তে সুখিন্দ্রিযৰিপ্পযুত্তচিত্তস্স উপ্পাদক্খণে’’তিআদিনা উপ্পজ্জমানেহি যোজনা. তংমূলকা চ তথাযোজনামূলভূতা চ নযা জীৰিতিন্দ্রিযাদিমূলকা চ নযা. পাকটাযেৰাতি পাল়িগতিযা এৰ ৰিঞ্ঞাযমানযোজনত্তা সুৰিঞ্ঞেয্যা এৰ.

তং ৰচনং. সোমনস্সৰিরহিতসচক্খুকপটিসন্ধিনিদস্সনৰসেনাতি সোমনস্সৰিরহিতসচক্খুকপটিসন্ধিযেৰ নিদস্সনন্তি যোজেতব্বং. কথং পনেতং জানিতব্বং ‘‘নিদস্সনমত্তমেতং, ন পন গণনপরিচ্ছিন্দন’’ন্তি আহ ‘‘ন হি চতুন্নংযেৰাতি নিযমো কতো’’তি. তংসমানলক্খণাতি তায ¶ সচক্খুকপটিসন্ধিতায সমানলক্খণাতি পরিত্তৰিপাকগ্গহণং. তত্থ সসোমনস্সপটিসন্ধিযো সন্ধায উপেক্খাপটিসন্ধিযো নিদস্সনভাৰেন ৰুত্তাতি কেচি. পরিত্তৰিপাকপটিসন্ধি চ কুসলৰিপাকাহেতুকপটিসন্ধি ৰেদিতব্বা. সাপি হি সচক্খুকা সিযা. তংসমানলক্খণাতি ৰা তায ¶ উপেক্খাসহগতায সমানলক্খণা যথাৰুত্তঅহেতুকপটিসন্ধি চ পঞ্চমজ্ঝানপটিসন্ধি চ. যদি এৰং ‘‘চতুন্ন’’ন্তি কস্মা গণনপরিচ্ছেদোতি আহ ‘‘কামাৰচরে…পে… নিদস্সনং কত’’ন্তি. তেনাতি উপেক্খাসহগতমহাৰিপাকনিদস্সনেন, যেহি সমানতায ইমে নিদস্সনভাৰেন ৰুত্তা, তে একংসেন তংসভাৰা এৰাতি অযমেত্থ অধিপ্পাযো. তেনাহ ‘‘যথা সসোমনস্স…পে… তো হোতী’’তি.

ননু চ গব্ভসেয্যকেসু অযমত্থো একংসতো ন লব্ভতীতি আসঙ্কং সন্ধাযাহ ‘‘গব্ভসেয্যকানঞ্চ…পে… দস্সিতা হোতী’’তি. তেনাহ ‘‘সচক্খুকান’’ন্তিআদি. তত্থ যদি সহেতুকপটিসন্ধিকানং কামাৰচরানং নিযমতো সচক্খুকাদিভাৰদস্সনং গব্ভসেয্যকৰসেন লব্ভেয্য, যুত্তমেতং সিযাতি চোদনং সন্ধাযাহ ‘‘গব্ভসেয্যকেপি হী’’তিআদি. তথা আযতনযমকে দস্সিতন্তি ইদং আযতনযমকৰণ্ণনাযং অত্তনা ৰুত্তং ‘‘এৰঞ্চ কত্ৰা ইন্দ্রিযযমকে’’তিআদিৰচনং সন্ধায ৰুত্তং. তত্থ হি সোমনস্সিন্দ্রিযুপ্পাদককম্মস্স একন্তেন চক্খুন্দ্রিযুপ্পাদনতো গব্ভেপি যাৰ চক্খুন্দ্রিযুপ্পত্তি, তাৰ উপ্পজ্জমানতায ‘‘অভিনন্দিতব্বত্তা’’তি ৰুত্তং. সন্নিট্ঠানেন সঙ্গহিতানন্তি ‘‘যস্স ৰা পন সোমনস্সিন্দ্রিযং উপ্পজ্জতী’’তি এতেন সন্নিট্ঠানেন সঙ্গহিতানং. ইত্থীনং অঘানকানং উপপজ্জন্তীনন্তি আদীসূতি আদি-সদ্দেন ‘‘ইত্থীনং অচক্খুকানং উপপজ্জন্তীন’’ন্তিআদিং সঙ্গণ্হাতি. তে এৰাতি গব্ভসেয্যকা এৰ.

তংসমানলক্খণন্তি সোপেক্খঅচক্খুকপটিসন্ধিভাৰেন সমানলক্খণং. তত্থাতি অহেতুকপটিসন্ধিচিত্তে. সমাধিলেসো দুব্বলসমাধি যো চিত্তট্ঠিতিমত্তো. তস্মাতি যস্মা চিত্তট্ঠিতি ৰিয দুব্বলং ৰীরিযং নত্থি, যো ‘‘ৰীরিযলেসো’’তি ৰত্তব্বো, তস্মা, লেসমত্তস্সপি ৰীরিযস্স অভাৰাতি অত্থো. অঞ্ঞেসূতি অহেতুকপটিসন্ধিচিত্ততো অঞ্ঞেসু. কেসুচীতি একচ্চেসু. উভযেনপি মনোদ্ৰারাৰজ্জনহসিতুপ্পাদচিত্তং ৰদতি. ইধাতি অহেতুকপটিসন্ধিচিত্তে. সমাধিৰীরিযানি ইন্দ্রিযপ্পত্তানি চ ন হোন্তীতি সমাধিকিচ্চং পটিক্খিপতি, ন সমাধিমত্তং, ন ¶ ৰীরিযলেসস্স সব্ভাৰতোতি যোজেতব্বং. তেনেৰাহ ‘‘ৰিসেসনঞ্হি ৰিসেসিতব্বে পৰত্ততী’’তি. যস্মিং ৰীরিযে সতি ইন্দ্রিযুপ্পত্তি সিযা, তদেৰ তত্থ নত্থীতি অত্থো.

অপাযে ¶ ওপপাতিকৰসেনাতি ইদং সুগতিযং ওপপাতিকো ৰিকলিন্দ্রিযো ন হোতীতি কত্ৰা ৰুত্তং, ‘‘লব্ভন্তেৰ ঞাণৰিপ্পযুত্তান’’ন্তি পন ৰুত্তত্তা ‘‘দুহেতুকপটিসন্ধিকানং ৰসেনা’’তি অট্ঠকথাযং ৰুত্তং. তেসন্তি ইত্থিপুরিসিন্দ্রিযসন্তানানং. ইত্থিপুরিসিন্দ্রিযানং পন উপ্পাদনিরোধা অভিণ্হসোৰ হোন্তীতি. পঠমকপ্পিকাদীনন্তি এত্থ আদি-সদ্দেন গহিতানং পরিৰত্তমানলিঙ্গানং ৰসেন উপ্পাদনিরোধগ্গহণং ৰেদিতব্বং. পঠমকপ্পিকানং পন ৰসেন উপ্পাদো এৰ লব্ভতি. ‘‘চুতিউপপত্তিৰসেনেৰ দুতিযপুচ্ছাসুপি সন্নিট্ঠানেহি গহণং ৰেদিতব্ব’’ন্তি ইদং উপাদিন্নইন্দ্রিযেহি নিযমিতত্তা ৰুত্তং.

১৯০. সন্তানুপ্পত্তিনিরোধদস্সনতোতি সন্তানৰসেন উপ্পাদনিরোধানং দিস্সমানত্তা. এতেন রূপজীৰিতিন্দ্রিযস্স চক্খুন্দ্রিযাদিসমানগতিকতং যুত্তিতো সাধেতি. আগমতো পন ‘‘ৰিনা সোমনস্সেনা’’তিআদিনা পরতো সাধেস্সতি. ছেদোতি নামং দট্ঠব্বং সরূপদস্সনেনেৰ সংসযছেদনতো.

তস্সাতি রূপজীৰিতিন্দ্রিযস্স. তে চ অসঞ্ঞসত্তা. ননু চ উপ্পাদোৰ জীৰিতিন্দ্রিযস্স চুতিউপপত্তিৰসেন ৰত্তব্বো, ন অনুপ্পাদোতি আহ ‘‘অনুপ্পাদো…পে… ন পৰত্তে’’তি. অযঞ্চ নযো ন কেৰলং পুরিমকোট্ঠাসে এৰ, অথ খো ইতরকোট্ঠাসেপি গহিতো এৰাতি দস্সেন্তো ‘‘পচ্ছিমকোট্ঠাসেপী’’তিআদিমাহ.

‘‘উপপত্তিচিত্তস্স উপ্পাদক্খণে’’তি কস্মা ৰুত্তন্তি যেনাধিপ্পাযেন চোদনা কতা, তমধিপ্পাযং ৰিৰরিতুং ‘‘ননু সুদ্ধাৰাস’’ন্তিআদি ৰুত্তং. ন ৰত্তব্বন্তি ‘‘উপপজ্জন্তান’’ন্তি ন ৰত্তব্বং, ‘‘উপপত্তিচিত্তস্স উপ্পাদক্খণে’’ইচ্চেৰ ৰত্তব্বন্তি অত্থো. ইদানি যথা ‘‘উপপজ্জন্তান’’ন্তি ন ৰত্তব্বং, তং দস্সেতুং ‘‘যথা হী’’তিআদি ৰুত্তং. সোমনস্সমনিন্দ্রিযানন্তি সোমনস্সিন্দ্রিযমনিন্দ্রিযানং, অযমেৰ ৰা পাঠো. তদাতি পঠমস্স রূপজীৰিতিন্দ্রিযস্স ধরমানকালে. তস্মাতি যস্মা রূপারূপজীৰিতিন্দ্রিযানং অত্থেৰ কালভেদো, উভযঞ্চেত্থ জীৰিতিন্দ্রিযভাৰসামঞ্ঞেন একজ্ঝং কত্ৰা গয্হতি, তস্মা. উভযন্তি সোমনস্সিন্দ্রিযজীৰিতিন্দ্রিযন্তি ¶ ইদং উভযং. উপ্পাদক্খণেন নিদস্সিতন্তি এতেন ‘‘উপপত্তিচিত্তস্স উপ্পাদক্খণে’’তি ইদং নিদস্সনমত্তন্তি দস্সেতি. ইদানি তমেৰত্থং উদাহরণেন পাকটতরং কাতুং ‘‘যথা হী’’তিআদি ৰুত্তং. তত্থ ¶ যথা তাদিসানং অনেকেসং চিত্তানং ভঙ্গক্খণে লব্ভমানং তদেকদেসেন সব্বপঠমস্স উপপত্তিচিত্তস্স ভঙ্গক্খণেন নিদস্সিতং, এৰমিধাপি খণদ্ৰযে লব্ভমানং তদেকদেসেন উপ্পাদক্খণেন নিদস্সিতন্তি এৰং নিদস্সনত্থো ৰেদিতব্বো.

তেসন্তি জীৰিতিন্দ্রিযাদীনং. অঞ্ঞত্থাতি পৰত্তে. ইধাতি অনাগতকালভেদে. ন ন সম্ভৰতি উপপত্তিক্খণস্স ৰিয ততো পরং পৰত্তিক্খণস্সপি অনাগতকালভাৰতো. তস্মাতি উপপত্তিতো অঞ্ঞত্থাপি যথাধিপ্পেতউপ্পাদসম্ভৰতো. অযঞ্চ অত্থো ৰারন্তরেপি দিস্সতীতি দস্সেন্তো আহ ‘‘এৰঞ্চ কত্ৰা’’তিআদি. ন হীতিআদিনা তমেৰত্থং সমত্থেতি. তত্থ অপি পচ্ছিম…পে… সন্ধিকস্সাতি অপি-সদ্দেন ‘‘কো পন ৰাদো অপচ্ছিমভৰিকস্স সোমনস্সসহগতপটিসন্ধিকস্সা’’তি দস্সেতি. অপচ্ছিমভৰিকস্স চুতিতো পচ্ছা ‘‘সোমনস্সিন্দ্রিযং নিরুজ্ঝিস্সতী’’তি ৰত্তব্বমেৰ নত্থীতি আহ ‘‘চুতিতো পুব্বেৰা’’তি. এত্থ হি পঠমপুচ্ছাসু সন্নিট্ঠানত্থোতিআদীসু অযং সঙ্খেপত্থো – এত্থ ‘‘যস্স চক্খুন্দ্রিযং উপ্পজ্জিস্সতী’’তি এৰমাদীসু যমকেসু যা পঠমপুচ্ছা, তাসু সন্নিট্ঠানপদসঙ্গহিতো অত্থো. পুচ্ছিতব্বত্থনিস্সযোতি ‘‘তস্স সোমনস্সিন্দ্রিযং উপ্পজ্জিস্সতী’’তিআদিকস্স পুচ্ছিতব্বস্স অত্থস্স নিস্সযভূতো মাদিসোৰ মযা সদিসো এৰ অত্থো উপপত্তিউপ্পাদিন্দ্রিযৰা উপপত্তিক্খণে উপ্পাদাৰত্থইন্দ্রিযসহিতো, উভযুপ্পাদিন্দ্রিযৰা পটিসন্ধিপৰত্তীসু উপ্পাদাৰত্থইন্দ্রিযসহিতো ৰা. পটিনিৰত্তিত্ৰাপি পুচ্ছিতব্বত্থস্স নিস্সযোতি ‘‘যস্স ৰা পনা’’তিআদিনা পটিনিৰত্তিত্ৰা পুচ্ছিতব্বস্সপি সংসযত্থস্স নিস্সযোতি এৰং ইমিনা ৰিয অজ্ঝাসযেন ‘‘যস্স ৰা পন সোমনস্সিন্দ্রিযং উপ্পজ্জিস্সতী’’তিআদীসু দুতিযপুচ্ছাসু সন্নিট্ঠানত্থমেৰ সন্নিট্ঠানপদসঙ্গহিতমেৰ অত্থং নিযমেতি. তত্থেৰ তাসু এৰ পুব্বে ৰুত্তপঠমপুচ্ছাসু এৰ. পুচ্ছিতব্বং ‘‘তস্স সোমনস্সিন্দ্রিযং উপ্পজ্জিস্সতী’’তিআদীসু অনাগতভাৰমত্তেন সরূপতো গহিতং উপ্পাদং উপ্পাদসঙ্খাতং, ‘‘তস্স সোমনস্সিন্দ্রিযং নিরুজ্ঝিস্সতী’’তিআদীসু অনাগতভাৰমত্তেন সরূপতো গহিতং নিরোধং ৰা নিরোধসঙ্খাতং ৰা সংসযত্থং ন নিযমেতীতি. এৰন্তি ৰুত্তপ্পকারেন সন্নিট্ঠানত্থস্স নিযমো হোতি, ন সংসযত্থস্স, তস্মা ‘‘যস্স ৰা পন…পে… আমন্তা’’তি ৰুত্তং. এস নযোতি য্ৰাযং উপ্পাদৰারে ৰিচারো ৰুত্তো, নিরোধৰারেপি এসেৰ নযো. তথা হি ‘‘যস্স ¶ ¶ ৰা পন সোমনস্সিন্দ্রিযং নিরুজ্ঝিস্সতি, তস্স চক্খুন্দ্রিযং নিরুজ্ঝিস্সতীতি? আমন্তা’’তি ৰুত্তং.

এৰং অৰুত্তত্তাতি উপ্পাদনিরোধানং অনাগতানং সরূপেন অৰুত্তত্তা. ন হি তত্থ তে সরূপেন ৰুত্তা, অথ খো ‘‘নুপ্পজ্জিস্সতী’’তি পটিক্খেপমুখেন ৰুত্তা. তত্থাতি অনুলোমে. ন এৰং যোজেতব্বা পটিলোমে. তমেৰ অযোজেতব্বতং ‘‘যথা হী’’তিআদিনা ৰিৰরতি. উপ্পাদনিরোধে অতিক্কমিত্ৰা উপ্পাদনিরোধা সম্ভৰন্তি যোজেতুং, তথা উপ্পাদনিরোধে অপ্পত্ৰা উপ্পাদনিরোধা সম্ভৰন্তি যোজেতুন্তি যোজনা. ইদঞ্চ দ্ৰযং যথানুলোমে সম্ভৰতি, ন এৰং পটিলোমে. তেনাহ ‘‘ন এৰং…পে… সম্ভৰন্তী’’তি. তত্থ কারণমাহ ‘‘অভূতাভাৰস্স…পে… সম্ভৰানুপপত্তিতো’’তি. অভূতাভাৰস্সাতি অভূতস্স অভাৰস্স, অভূতস্স উপ্পাদস্স নিরোধস্স চ অভাৰস্সাতি অধিপ্পাযো. তেনাহ ‘‘অভূতুপ্পাদনিরোধাভাৰো চ পটিলোমে পুচ্ছিতো’’তি, তস্মা ‘‘আমন্তা’’তি চ ৰুত্তং, ন ৰুত্তং ৰিস্সজ্জনন্তি সম্বন্ধো. অস্স ৰিসেসরহিতস্স অভূতাভাৰস্সাতি ইমস্স যথাৰুত্তস্স যথা রূপাভাৰো ৰেদনাভাৰোতি কোচি অভাৰোপি ৰিসেসসহিতো, ন এৰমযন্তি ৰিসেসরহিতস্স অভূতাভাৰস্স.

কালন্তরযোগাভাৰতোতি কালৰিসেসযোগাভাৰতো. যাদিসানন্তি যানি ভূতানি ন ৰত্তমানানি সতি পচ্চযে উপ্পজ্জনারহানি, তেসং অনাগতানন্তি অত্থো. উপ্পাদনিরোধাভাৰেন পুচ্ছিতব্বস্সাতি ‘‘নুপ্পজ্জিস্সতি ন নিরুজ্ঝিস্সতী’’তি এৰং উপ্পাদস্স নিরোধস্স চ অভাৰেন পুচ্ছিতব্বস্স অত্থস্স. সন্নিস্সযো নিস্সযভূতো সন্নিট্ঠানেন সন্নিচ্ছিতো সন্নিট্ঠানপদসঙ্গহিতো. সো যথাৰুত্তো অত্থো নিস্সযো এতেসন্তি তন্নিস্সযা. তাদিসানংযেৰ অনাগতানংযেৰ উপপত্তিচুতিউপ্পাদনিরোধানং উপপত্তিচুতিসঙ্খাতউপ্পাদনিরোধানং অনুপ্পাদানিরোধানং পটিক্খেপৰসেন. জীৰিতাদীনম্পি জীৰিতমনিন্দ্রিযাদীনম্পি. অনুপ্পাদানিরোধা সংসযপদেন পুচ্ছিতা হোন্তি ‘‘যস্স সোমনস্সিন্দ্রিযং নুপ্পজ্জিস্সতি, তস্স সোমনস্সিন্দ্রিযং ন নিরুজ্ঝিস্সতী’’তি. ‘‘আমন্তা’’তি ৰুত্তং ৰিভজিত্ৰা ৰত্তব্বস্স অভাৰতো. তেনাহ ‘‘ন ৰুত্তং…পে… ৰিস্সজ্জন’’ন্তি.

যে ¶ সোপেক্খপটিসন্ধিকা ভৰিস্সন্তি রূপলোকে, তে সঙ্গহিতাতি যোজনা. তংসমানলক্খণতাযাতি তেন সোপেক্খপটিসন্ধিকভাৰেন সমানলক্খণতায. তং পমাদলিখিতং ধম্মযমকে ¶ তাদিসস্সেৰ ৰচনস্স অভাৰতো. তত্থপি যং ৰত্তব্বং, তং চিত্তযমকে ৰুত্তং ‘‘ন হি খণপচ্চুপ্পন্নে উপ্পজ্জিত্থাতি অতীতৰোহারো অত্থী’’তিআদিনা.

পৰত্তিৰারৰণ্ণনা নিট্ঠিতা.

৩. পরিঞ্ঞাৰারৰণ্ণনা

৪৩৫-৪৮২. লোকিযঅব্যাকতেহীতি ফলধম্মনিব্বানৰিনিমুত্তেহি অব্যাকতেহি. তানি উপাদাযাতি তানি লোকিযঅব্যাকতানি উপাদায. তংসমানগতিকানং মনিন্দ্রিযাদীনং ‘‘সো ৰেদনাক্খন্ধং পরিজানাতীতি? আমন্তা’’তিআদিনা (যম. ১.খন্ধযমক.২০৬) ৰেদনাক্খন্ধাদীনং ৰিয পরিঞ্ঞেয্যতা ৰুত্তা. যঞ্হি পরিজানিতব্বং, তদেৰ পরিজানাতীতিআদিনা ৰুত্তং. এৰমৰিপরীতে অত্থে সিদ্ধেপি চোদকো ‘‘মিস্সকত্তা’’তি এত্থ লব্ভমানং লেসং গহেত্ৰা চোদেতি ‘‘যদি পরিঞ্ঞেয্যমিস্সকত্তা’’তিআদিনা. তস্সত্থো – যথা ইধ পরিঞ্ঞেয্যমিস্সকানং পরিঞ্ঞেয্যতা ৰুত্তা, এৰমঞ্ঞত্থাপি সা তেসং ৰত্তব্বা, তথা ভাৰেতব্বমিস্সকানং ভাৰেতব্বতাতি. তেনাহ ‘‘কস্মা ধম্মযমকে’’তিআদি. কুসলাকুসলেসু ভাৰনাপহানাভিনিৰেসো হোতি, যেন ৰুত্তং ‘‘সো তং অকুসলং পজহতি, কুসলং ভাৰেতী’’তিআদি. ন অব্যাকতভাৰন্তি একেন যথা ফস্সদ্ৰারতো ৰিয ৰিঞ্ঞাণদ্ৰারতো কুসলাদীনং উপ্পত্তিপরিযাযো, এৰং ৰেদনাক্খন্ধাদীনং ৰিয ন অব্যাকতাদীনং পরিঞ্ঞেয্যতাপরিযাযোতি দস্সেতি.

কুসলাকুসলভাৰেন অগ্গহিতাতি সমুদযসভাৰেন অগ্গহিতাতি অত্থো. কুসলাকুসলাপীতি কুসলাকুসলভাৰাপি সমানা. ভাৰেতব্বপহাতব্বভাৰেহি ¶ ৰিনাপি হোতি, যো ন মগ্গসমুদযসচ্চপক্খিযো. যথা ‘‘অনিচ্চং রূপ’’ন্তি এত্থ ‘‘অনিচ্চমেৰ রূপং, ন নিচ্চ’’ন্তি পটিযোগিৰিনিৰত্তনমেৰ এৰ-কারেন করীযতি, ন তস্স দুক্খানত্ততাদযো নিৰারিতা হোন্তি, এৰং ‘‘পহাতব্বমেৰা’’তি এত্থ এৰ-সদ্দেন পটিযোগিভূতং অপ্পহাতব্বমেৰ নিৰত্তীযতি, ন ততো অঞ্ঞৰিসেসাতি দস্সেন্তো আহ ‘‘এতেন পহাতব্বমেৰা’’তিআদি. ভাৰেতব্বভাৰো ¶ এৰ তস্স অঞ্ঞিন্দ্রিযস্স গহিতো উক্কংসগতিৰিজাননতো. ‘‘পরতো লিখিতব্বং উপ্পটিপাটিযা লিখিত’’ন্তি কস্মা ৰুত্তং. দ্ৰে পুগ্গলাতি হি আদি অনুলোমে আগতং উদ্ধটং, চক্খুন্দ্রিযং ন পরিজানাতীতিআদি পন পটিলোমে. দোমনস্সিন্দ্রিযং ন পজহন্তি নামাতি ইদং ‘‘নো চ দোমনস্সিন্দ্রিযং পজহন্তী’’তি পাল়িপদস্স অত্থৰচনং. যং পন ‘‘চক্খুন্দ্রিযমূলকং অতিক্কমিত্ৰা দোমনস্সিন্দ্রিযমূলকে ইদং ৰুত্ত’’ন্তি ৰুত্তং, পটিলোমে আগতং সন্ধায ৰুত্তত্তা তং ন যুত্তং, ন তং অট্ঠকথাচরিযা পঠমং আগতং পদং লঙ্ঘিত্ৰা তাদিসস্সেৰ পচ্ছা আগতপদস্স অত্থৰণ্ণনং করোন্তি. পদানুক্কমতো এৰ হি অট্ঠকথাযং অত্থৰণ্ণনা আরদ্ধা, পরিযোসাপিতা চ, তস্মা অনুপটিপাটিযাৰ লিখিতং, ন উপ্পটিপাটিযাতি দট্ঠব্বং ‘‘দ্ৰে পুগ্গলা’’তিআদিকস্স অনুলোমে আগতস্স উদ্ধটত্তা.

এত্থাতি এতস্মিং পরিঞ্ঞাৰারে. ছ পুগ্গলাতি পুথুজ্জনেন সদ্ধিং যাৰ অনাগামিমগ্গট্ঠা ছ পুগ্গলা. অভিন্দিত্ৰা গহিতো তত্থ ভব্বাভব্বানং কিচ্চৰিসেসস্স অগ্গহিতত্তা. যত্থ পন সতি পুথুজ্জনগ্গহণসামঞ্ঞে ভব্বানং কিচ্চং গহিতং, যত্থ চ অভব্বানং, তত্থ তে এৰ ভিন্দিত্ৰা ৰুত্তা হোন্তীতি দস্সেন্তো ‘‘যে চ পুথুজ্জনা মগ্গং পটিলভিস্সন্তি, যে চ পুথুজ্জনা মগ্গং ন পটিলভিস্সন্তী’’তি চ আদিমাহ. অরহাতি অরিযো, অযমেৰ ৰা পাঠো. পঠমমগ্গফলসমঙ্গীতি পুরিমমগ্গফলসমঙ্গী. ইতরোতি অরহা. এৰং পুগ্গলভেদং ঞত্ৰাতি ইধ পুথুজ্জনো সো চ অভব্বোতি গহিতো, ইধ ভব্বো ইধ অরিযা, যে চ পঠমমগ্গফলসমঙ্গিনো যাৰ অগ্গমগ্গফলসমঙ্গিনোতি এৰং যথাৰুত্তং পুগ্গলৰিভাগং ঞত্ৰা. তত্থ তত্থাতি তেসং দ্ৰে পুথুজ্জনা অট্ঠ অরিযাতি ইমেসং যথাৰুত্তপুগ্গলানং ভেদতো অভেদতো চ গহণৰসেন আগতে তস্মিং তস্মিং পাঠপদেসে. সন্নিট্ঠানেনাতি সন্নিট্ঠানপদৰসেন, নিচ্ছযৰসেনেৰ ৰা. নিদ্ধারেত্ৰাতি ¶ নীহরিত্ৰা. ৰিস্সজ্জনং যোজেতব্বন্তি ৰিস্সজ্জনৰসেন পৰত্তপাল়িযা যথাৰুত্তঅত্থদস্সনেন সম্বন্ধতো ৰিভাৰেতব্বোতি.

পরিঞ্ঞাৰারৰণ্ণনা নিট্ঠিতা.

ইন্দ্রিযযমকৰণ্ণনা নিট্ঠিতা.

যমকপকরণ-অনুটীকা সমত্তা.

নমো তস্স ভগৰতো অরহতো সম্মাসম্বুদ্ধস্স

পট্ঠানপকরণ-অনুটীকা

গন্থারম্ভৰণ্ণনা

কামগুণাদীহীতি ¶ ¶ কামগুণঝানাভিঞ্ঞাচিত্তিস্সরিযাদীহি. লল়ন্তীতি লল়িতানুভৰনৰসেন রমন্তি. তেসূতি কামগুণাদীসু. ৰিহরন্তীতি ইরিযাপথপরিৰত্তনাদিনা ৰত্তন্তি. পচ্চত্থিকেতি বাহিরব্ভন্তরভেদে অমিত্তে. ইস্সরিযং তত্থ তত্থ আধিপতেয্যং. ঠানং সেট্ঠিসেনাপতিযুৰরাজাদিট্ঠানন্তরং. আদি-সদ্দেন পরিৰারপরিচ্ছেদাদি সঙ্গয্হতি. পুঞ্ঞযোগানুভাৰপ্পত্তাযাতি দানমযাদিপুঞ্ঞানুভাৰাধিগতায সমথৰিপস্সনাভাৰনাসঙ্খাতযোগানুভাৰাধিগতায চ. জুতিযাতি সরীরপ্পভায চেৰ ঞাণপ্পভায চ. এত্থ চ দেৰ-সদ্দো যথা কীল়াৰিজিগিসাৰোহারজুতিগতিঅত্থো, এৰং সত্তিঅভিত্থৰকমনত্থোপি হোতি ধাতুসদ্দানং অনেকত্থভাৰতোতি ‘‘যদিচ্ছিতনিপ্ফাদনে সক্কোন্তীতি ৰা’’তিআদি ৰুত্তং.

ইদ্ধিৰিধাদিতামত্তেন ভগৰতো অভিঞ্ঞাদীনং সাৰকেহি সাধারণতাৰচনং, সভাৰতো পন সব্বেপি ¶ বুদ্ধগুণা অনঞ্ঞসাধারণাযেৰাতি দস্সেন্তো ‘‘নিরতিসযায অভিঞ্ঞাকীল়ায, উত্তমেহি দিব্বব্রহ্মঅরিযৰিহারেহী’’তি আহ. চিত্তিস্সরিযসত্তধনাদীনং দানসঙ্খাতেন সম্মাপটিপত্তিঅৰেচ্চপ্পসাদসক্কারানং গহণসঙ্খাতেনাতি যোজনা. গহণঞ্চেত্থ তেসু উপলব্ভমানসম্মাপটিপত্তিঅৰেচ্চপ্পসাদানং তেহি উপনীযমানসক্কারস্স চ অভিনন্দনং অনুমোদনং সম্পটিচ্ছনঞ্চ ৰেদিতব্বং. ধম্মসভাৰানুরূপানুসাসনীৰচনেনেৰ চ পন সিক্খাপদপঞ্ঞত্তিপি সঙ্গহিতাতি দট্ঠব্বা ৰীতিক্কমধম্মানুরূপা অনুসাসনীতি কত্ৰা. ঞাণগতি ঞাণেন গন্তব্বস্স ঞেয্যস্স অৰবোধো. সমন্নাগতত্তাতি ইদং ‘‘অভিঞ্ঞাকীল়াযা’’তিআদীসু পচ্চেকং যোজেতব্বং, তথা সদেৰকেন লোকেনাতি ইদং ‘‘গমনীযতো’’তিআদীসু. তে দেৰেতি সম্মুতিদেৰাদিকে দেৰে. তেহি গুণেহীতি অভিঞ্ঞাদিগুণেহি. পূজনীযতরো দেৰোতি ¶ ইদং পূজনীযপরিযাযো অযং অতি-সদ্দোতি কত্ৰা ৰুত্তং. অতিরেকতরোতি অধিকতরো. উপপত্তিদেৰানন্তি ইদং তব্বহুলতায ৰুত্তং. ৰিসুদ্ধিদেৰাপি হি তত্থ ৰিজ্জন্তেৰ, তেসুপি ৰা লব্ভমানং উপপত্তিদেৰভাৰমত্তমেৰ গহেত্ৰা তথা ৰুত্তং. পটিপক্খানং দুস্সীল্যমুট্ঠস্সচ্চৰিক্খেপানং, সীলৰিপত্তিঅভিজ্ঝাদোমনস্সঅৰসিট্ঠনীৰরণানং ৰা.

ইসীনং সত্তমো, ইসীসু সত্তমোতি দুৰিধম্পি অত্থং যোজেত্ৰা দস্সেন্তো ‘‘চতুসচ্চাৰবোধগতিযা…পে… ৰুত্তো’’তি আহ. সপরসন্তানেসু সীলাদিগুণানং এসনট্ঠেন ৰা ইসযো, বুদ্ধাদযো অরিযা. ইসি চ সো সত্তমো চাতি ইসিসত্তমোতি এৰমেত্থ অত্থো দট্ঠব্বো. ‘‘নামরূপনিরোধ’’ন্তি এত্থ যং নামরূপং নিরোধেতব্বং, তং দস্সেন্তো ‘‘যতো ৰিঞ্ঞাণং পচ্চুদাৰত্ততী’’তি আহ. ৰট্টপরিযাপন্নঞ্হি নামরূপং নিরোধেতব্বং. তস্মিঞ্হি নিরোধিতে সব্বসো নামরূপং নিরোধিতমেৰ হোতি. যথাহ ‘‘সোতাপত্তিমগ্গঞাণেন অভিসঙ্খারৰিঞ্ঞাণস্স নিরোধেন সত্ত ভৰে ঠপেত্ৰা অনমতগ্গে সংসারে যে উপ্পজ্জেয্যুং নামঞ্চ রূপঞ্চ, এত্থেতে নিরুজ্ঝন্তি…পে… অরহতো অনুপাদিসেসায নিব্বানধাতুযা পরিনিব্বাযন্তস্স চরিমৰিঞ্ঞাণস্স নিরোধেন পঞ্ঞা চ সতি চ নামঞ্চ রূপঞ্চ, এত্থেতে নিরুজ্ঝন্তি ৰূপসমন্তি অত্থং গচ্ছন্তি পটিপ্পস্সম্ভন্তী’’তি (চূল়নি. অজিতমাণৰপুচ্ছানিদ্দেস ৬). অতিগম্ভীরনযমণ্ডিতদেসনং সাতিসযং পচ্চযাকারস্স ৰিভাৰনতো. সভাৰতো চ পচ্চযাকারো গম্ভীরো. যথাহ ‘‘অধিগতো খো ম্যাযং ধম্মো গম্ভীরো’’তিআদি (দী. নি. ২.৬৭; ম. নি. ১.২৮১; ২.৩৩৭; সং. নি. ১.১৭২; মহাৰ. ৭, ৮), ‘‘গম্ভীরো চাযং, আনন্দ ¶ , পটিচ্চসমুপ্পাদো গম্ভীরাৰভাসো’’তি (দী. নি. ২.৯৫; সং. নি. ২.৬০) চ আদি. তস্স চাযং অনন্তনযপট্ঠানদেসনা অতিগম্ভীরাৰ.

গন্থারম্ভৰণ্ণনা নিট্ঠিতা.

পচ্চযুদ্দেসৰণ্ণনা

সমাননেতি সমাননযনে, সমাহরণে, সমানকরণে ৰা অট্ঠকথাধিপ্পাযং. তত্থ ‘‘দ্ৰে অনুলোমানি ধম্মানুলোমঞ্চ পচ্চযানুলোমঞ্চা’’তিআদিনা পরতো ৰণ্ণযিস্সন্তি.

পট্ঠাননামত্থোতি ¶ ‘‘পট্ঠান’’ন্তি ইমস্স নামস্স অত্থো, তং পন যস্মা অৰযৰদ্ৰারেন সমুদাযে নিরুল়্হং, তস্মা যথা অৰযৰেসু পতিট্ঠিতং, তমেৰ তাৰ দস্সেতুং ‘‘তিকপট্ঠানাদীনং তিকপট্ঠানাদিনামত্থো’’তি ৰুত্তং. অথ ৰা অৰযৰানমেৰ পট্ঠাননামত্থো নিদ্ধারেতব্বো তংসমুদাযমত্তত্তা পকরণস্স. ন হি সমুদাযো নাম কোচি অত্থো অত্থীতি দস্সেতুং ‘‘পট্ঠানং…পে… নামত্থো’’তি ৰুত্তং. তেনেৰাহ ‘‘ইমস্স পকরণস্স…পে… সমোধানতা চেত্থ ৰত্তব্বা’’তি. ৰচনসমুদাযত্থৰিজাননেন ৰিদিতপট্ঠানসামঞ্ঞত্থস্স ৰিত্থারতো পট্ঠানকথা ৰুচ্চমানা সুখগ্গহণা হোতীতি দস্সেন্তো আহ ‘‘এৰঞ্হি…পে… হোতী’’তি. তত্থাতি তাসু নামত্থযথাৰুত্তসমোধানতাসু. সব্বসাধারণস্সাতি সব্বেসং অৰযৰভূতানং তিকপট্ঠানাদীনং সমুদাযস্স চ সাধারণস্স. অত্থতো আপন্নং নানাৰিধভাৰন্তি পকারগ্গহণেনেৰ পকারানং অনেকৰিধতা চ গহিতাৰ হোন্তীতি ৰুত্তং. পকারেহি ঠানন্তি হি পট্ঠানং, নানাৰিধো পচ্চযো, তং এত্থ ৰিভজনৰসেন অত্থীতি পট্ঠানং, পকরণং, তদৰযৰো চ. এতস্মিঞ্চ অত্থনযে সদ্দতোপি নানাৰিধভাৰসিদ্ধি দস্সিতাতি ৰেদিতব্বা. তত্থ নানপ্পকারা পচ্চযতা, নানপ্পকারানং পচ্চযতা চ নানপ্পকারপচ্চযতাতি উভযম্পি সামঞ্ঞনিদ্দেসেন একসেসনযেন ৰা একজ্ঝং গহিতন্তি দস্সেন্তো ‘‘একস্সপি…পে… ৰেদিতব্বা’’তি আহ. অনেকধম্মভাৰতোতি অনেকে ধম্মা এতস্সাতি অনেকধম্মো, তব্ভাৰতোতি যোজেতব্বং. নানপ্পকারপচ্চযতাতি ¶ নানপ্পকারপচ্চযভাৰো, যো অট্ঠকথাযং ‘‘নানপ্পকারপচ্চযট্ঠো’’তি ৰুত্তো.

কামং ধম্মসঙ্গহাদীসুপি অত্থেৰ পচ্চযধম্মৰিভাগো, সো পন তত্থ পচ্চযভাৰো ন তথা তপ্পরভাৰেন ৰিভত্তো যথা পট্ঠানেতি দস্সেন্তো ‘‘এতেন…পে… দস্সেতী’’তি আহ. সাতিসযৰিভাগতং ইমস্স পকরণস্স তথা তদৰযৰানং.

সব্বঞ্ঞুতঞ্ঞাণস্স যথাৰুত্তগমনং যদধিকরণং, তং দস্সেতুং ‘‘এত্থাতি ৰচনসেসো’’তি. গমনদেসভাৰতোতি পৰত্তিট্ঠানভাৰতো. অঞ্ঞেহি গতিমন্তেহীতি তীসু কালেসু অপ্পটিহতঞাণাদীহি. তস্স সব্বঞ্ঞুতঞ্ঞাণস্স.

তিৰিধেন ¶ পরিচ্ছেদেন দেসিতেসু ধম্মেসু তিকৰোহারোতি আহ ‘‘তিকানন্তি তিকৰসেন ৰুত্তধম্মান’’ন্তি. তীণি পরিমাণানি এতেসন্তি হি তিকা. সমন্তাতি সমন্ততো সব্বভাগতোতি ৰুত্তং হোতীতি আহ ‘‘অনুলোমাদীহি সব্বপ্পকারেহিপী’’তি. গতানীতি পৰত্তানি. সমন্তচতুৰীসতিপট্ঠানানীতি সমন্ততো অনুলোমাদিসব্বভাগতো সমোধানৰসেন চতুৰীসতি পট্ঠানানি. অনুলোমাদিসব্বকোট্ঠাসতোতি অনুলোমাদিচতুকোট্ঠাসতো. তিকাদিছছভাৰন্তি তিকাদিদুকদুকপরিযোসানেহি ছছভাৰং. তেনাতি যথাৰুত্তদস্সনেন. ধম্মানুলোমাদিসব্বকোট্ঠাসতোতি পচ্চনীকাদিদুকাদিসহজাতৰারাদিপচ্চযপচ্চনীযাদিআরম্মণমূলাদীনং গহণং দট্ঠব্বং. যথাৰুত্ততো অঞ্ঞস্স পকারস্স অসম্ভৰতো ‘‘অনূনেহি নযেহি পৰত্তানীতি ৰুত্তং হোতী’’তি আহ. তানি পন যথাৰুত্তানি সমন্তপট্ঠানানি. অযঞ্চ অত্থৰণ্ণনা অট্ঠকথাৰচনেন অঞ্ঞদত্থু সংসন্দতীতি দস্সেন্তো আহ ‘‘তেনেৰাহ…পে… ৰসেনা’’তি.

হেতুনোতি হেতুসভাৰস্স ধম্মস্স. সতিপি হেতুসভাৰস্স আরম্মণপচ্চযাদিভাৰে সৰিসেসে তাৰ পচ্চযে দস্সেন্তেন ‘‘অধিপতিপচ্চযাদিভূতস্স চা’’তি ৰুত্তং. ‘‘হেতু হুত্ৰা পচ্চযো’’তি ৰুত্তে ধম্মস্স হেতুসভাৰতা নিদ্ধারিতা, ন পচ্চযৰিসেসোতি তস্স অধিপতিপচ্চযাদিভাৰো ন নিৰারিতোতি আহ ‘‘এতেনপি সো এৰ দোসো আপজ্জতী’’তি. তেনাতি হেতুভাৰগ্গহণেন. ইধাতি ‘‘হেতুপচ্চযো’’তি এত্থ. ধম্মগ্গহণন্তি অলোভাদিধম্মগ্গহণং. সত্তিৰিসেসো অত্তনো বলং সত্তিকারণভাৰো, যো রসোতিপি ৰুচ্চতি, স্ৰাযং অনঞ্ঞসাধারণতায ধম্মতো অনঞ্ঞোপি পচ্চযন্তরসমৰাযেযেৰ ¶ লব্ভমানত্তা অঞ্ঞো ৰিয কত্ৰা ৰুত্তো. তস্সাতি হেতুভাৰসঙ্খাতস্স সামত্থিযস্স. হেতু হুত্ৰাতি এত্থাপি হেতুভাৰৰাচকো হেতুসদ্দো, ন হেতুসভাৰধম্মৰাচকোতি আহ ‘‘হেতু হুত্ৰা পচ্চযোতি চ ৰুত্ত’’ন্তি.

এৰঞ্চ কত্ৰাতিআদিনা যথাৰুত্তমত্থং পাল়িযা সমত্থেতি. যদি এৰং অট্ঠকথাযং ধম্মস্সেৰ পচ্চযতাৰচনং কথন্তি আহ ‘‘অট্ঠকথাযং পনা’’তিআদি ¶ . তেনেৰ চেত্থ অম্হেহিপি ‘‘ধম্মতো অনঞ্ঞোপি অঞ্ঞো ৰিয কত্ৰা’’তি চ ৰুত্তং. যদি অট্ঠকথাযং ‘‘যো হি ধম্মো, মূলট্ঠেন উপকারকো ধম্মো’’তি চ আদীসু ধম্মেন ধম্মসত্তিৰিভাৰনং কতং, অথ কস্মা ইধ হেতুভাৰেন পচ্চযোতি ধম্মসত্তিযেৰ ৰিভাৰিতাতি চোদনং মনসি কত্ৰা ৰুত্তং ‘‘ইধাপি ৰা…পে… দস্সেতী’’তি. ধম্মসত্তিৰিভাৰনং পনেত্থ ন সক্কা পটিক্খিপিতুন্তি দস্সেন্তো ‘‘ন হী’’তিআদিমাহ. অত্থো এতস্স অত্থীতি অত্থো, অত্থাভিধাযিৰচনন্তি ৰুত্তং ‘‘এতীতি এতস্স অত্থো ৰত্ততী’’তি, তস্মা অত্থোতি অত্থৰচনন্তি ৰুত্তং হোতি. তেনাহ ‘‘তঞ্চ উপ্পত্তিট্ঠিতীনং সাধারণৰচন’’ন্তি. তঞ্চাতি হি ‘‘ৰত্ততী’’তি ৰচনং পচ্চামট্ঠং. অথ ৰা এতীতি এতস্স অত্থোতি ‘‘এতী’’তি এতস্স পদস্স অত্থো ‘‘ৰত্ততী’’তি এত্থ ৰত্তনকিরিযা. তঞ্চাতি তঞ্চ ৰত্তনং. এতস্মিং পনত্থে সাধারণৰচনন্তি এত্থ ৰচন-সদ্দো অত্থপরিযাযো ৰেদিতব্বো ‘‘ৰুচ্চতী’’তি কত্ৰা. যদগ্গেন উপ্পত্তিযা পচ্চযো, তদগ্গেন ঠিতিযাপি পচ্চযোতি কোচি আসঙ্কেয্যাতি তদাসঙ্কানিৰত্তনত্থং ৰুত্তং ‘‘কোচি হি…পে… হেতুআদযো’’তি. এত্থ চ যথা উপ্পজ্জনারহানং উপ্পত্তিযা পচ্চযে সতিযেৰ উপ্পাদো, নাসতি, এৰং তিট্ঠন্তানম্পি ঠিতিপচ্চযৰসেনেৰ ঠানং যথা জীৰিতিন্দ্রিযৰসেন সহজাতধম্মানন্তি দট্ঠব্বং. যে পন অরূপধম্মানং ঠিতিং পটিক্খিপন্তি, যং ৰত্তব্বং, তং হেট্ঠা ৰুত্তমেৰ.

যথা অধিকরণসাধনো পতিট্ঠত্থো হেতু-সদ্দো, এৰং করণসাধনো পৰত্তিঅত্থোপি যুজ্জতীতি দস্সেন্তো ‘‘হিনোতী’’তিআদিমাহ. ‘‘লোভো নিদানং কম্মানং সমুদযাযা’’তিআদিৰচনতো হেতূনং কম্মনিদানভাৰো ৰেদিতব্বো.

এতেনাতি হেতুপচ্চযতো অঞ্ঞেনেৰ কুসলভাৰসিদ্ধিৰচনেন. একে আচরিযা. সভাৰতোৰাতি এতেন যথা অঞ্ঞেসং রূপগতং ওভাসেন্তস্স পদীপস্স রূপগতোভাসকেন অঞ্ঞেন পযোজনং নত্থি সযং ওভাসনসভাৰত্তা, এৰং অঞ্ঞেসং কুসলাদিভাৰসাধকানং হেতূনং অঞ্ঞেন কুসলাদিভাৰসাধকেন ¶ পযোজনং নত্থি সযমেৰ কুসলাদিসভাৰত্তাতি দস্সেতি. ন সভাৰসিদ্ধো অলোভাদীনং কুসলাদিভাৰো উভযসভাৰত্তা তংসম্পযুত্তফস্সাদীনং ৰিযাতি ¶ ইমমত্থং দস্সেতি ‘‘যস্মা পনা’’তিআদিনা. সা পন অঞ্ঞপটিবদ্ধা কুসলাদিতা.

ন কোচি ধম্মো ন হোতীতি রূপাদিভেদেন ছব্বিধেসু সঙ্খতাসঙ্খতপঞ্ঞত্তিধম্মেসু কোচিপি ধম্মো আরম্মণপচ্চযো ন ন হোতি, স্ৰাযং আরম্মণপচ্চযভাৰো হেট্ঠা ধাতুৰিভঙ্গৰণ্ণনাযং ৰুত্তোযেৰ.

পুরিমাভিসঙ্খারূপনিস্সযন্তি ‘‘ছন্দৰতো’’তিআদিনা ৰুত্তাকারেন পুরিমসিদ্ধং চিত্তাভিসঙ্খারকসঙ্খাতং উপনিস্সযং. চিত্তেতি চিত্তসীসেনাযং নিদ্দেসো দট্ঠব্বো. ন হি চিত্তমেৰ তথাভিসঙ্খরীযতি, অথ খো তংসম্পযুত্তধম্মাপি. সাধযমানাতি ৰসে ৰত্তযমানা. ৰসৰত্তনঞ্চেত্থ তদাকারানুৰিধানং. ছন্দাদীসু হি হীনেসু মজ্ঝিমেসু পণীতেসু তংতংসম্পযুত্তাপি তথা তথা পৰত্তন্তি. তেনাহ ‘‘হীনাদিভাৰেন তদনুৰত্তনতো’’তি. তেনাতি অত্তনো ৰসে ৰত্তাপনেন, তেসং ৰা ৰসে ৰত্তনেন. তেহি ছন্দাদযো. অধিপতিপচ্চযা হোন্তি অত্তাধীনানং পতিভাৰেন পৰত্তনতো. গরুকাতব্বং আরম্মণং মহগ্গতধম্মলোভনীযধম্মাদি.

তদনন্তরুপ্পাদনিযমোতি তস্স তস্সেৰ চিত্তস্স অনন্তরং উপ্পজ্জমানতং. তংতংসহকারীপচ্চযৰিসিট্ঠস্সাতি তেন তেন আরম্মণাদিনা সহকারীকারণেন তদুপ্পাদনসমত্থতাসঙ্খাতং ৰিসেসং পত্তস্স. তাযযেৰাতি যা ৰেখাদানে পুপ্ফনসমত্থতা ৰেখাপগমে লদ্ধোকাসা, তাযমেৰ.

উপসগ্গৰসেনপি অত্থৰিসেসো হোতীতি ৰুত্তং ‘‘সদ্দত্থমত্ততো নানাকরণ’’ন্তি. ৰচনীযত্থতোতি ভাৰত্থতো. ভাৰত্থোপি হি ৰচনগ্গহণানুসারেন ৰিঞ্ঞেয্যত্তা ‘‘ৰচনীযো’’তি ৰুচ্চতি. নিরোধুপ্পাদন্তরাভাৰতোতি পুরিমনিরোধস্স পচ্ছিমুপ্পাদস্স চ ব্যৰধাযকাভাৰতো. নিরন্তরুপ্পাদনসমত্থতাতি এতেন নিরোধানং নিরোধসমকালুপ্পাদৰাদং নিৰারেতি. সতি হি সমকালত্তে ব্যৰধানাসঙ্কা এৰ ন সিযা সণ্ঠানাভাৰতো. ইদমিতো হেট্ঠা উদ্ধং তিরিযন্তি ৰিভাগাভাৰা অত্তনা একত্তমিৰ উপনেত্ৰাতি যোজনা. সণ্ঠানাভাৰেন হি অপ্পটিঘভাৰূপলক্খণেন ¶ ৰিভাগাভাৰং, তেন একত্তমিৰূপনযনং সুট্ঠু অনন্তরভাৰং সাধেতি, সহাৰট্ঠানাভাৰেন পন অনন্তরমেৰ উপ্পাদনং.

ৰিভাগতো ¶ ঞাণেন আকরীযতীতি আকারো, ধম্মানং পৰত্তিভেদো. নেৰসঞ্ঞানাসঞ্ঞাযতনফলসমাপত্তীনং নিরোধুপ্পাদানন্তরতাযাতি যোজনা. পুরিমচুতীতি অসঞ্ঞসত্তুপ্পত্তিতো পুরিমচুতি. যদি কালন্তরতা নত্থি, কথমিদং ‘‘সত্তাহং নিরোধং সমাপজ্জিত্ৰা পঞ্চ কপ্পসতানি অতিক্কমিত্ৰা’’তি ৰচনন্তি আহ ‘‘ন হি তেসং…পে… ৰুচ্চেয্যা’’তি. ননু তেসং অন্তরা রূপসন্তানো পৰত্ততেৰাতি অনুযোগং সন্ধাযাহ ‘‘ন চ…পে… অঞ্ঞসন্তানত্তা’’তি. যদি এৰং তেসং অঞ্ঞভিন্নসন্তানং ৰিয অঞ্ঞমঞ্ঞূপকারেনপি ভৰিতব্বন্তি চোদনায ৰুত্তং ‘‘রূপারূপ…পে… হোন্তী’’তি. তেনেতং দস্সেতি – যদিপি রূপারূপধম্মা একস্মিং পুগ্গলে ৰত্তমানা ৰিসেসতো অঞ্ঞমঞ্ঞূপকারকভাৰেন ৰত্তন্তি, অঞ্ঞমঞ্ঞং পন ৰিসদিসসভাৰতায ৰিসুংযেৰ সন্তানভাৰেন পৰত্তনতো ব্যৰধাযকা ন হোন্তি সন্ততিৰসেন মিথু অপরিযাপন্নত্তা, যতো ‘‘অঞ্ঞমঞ্ঞং ৰিপ্পযুত্তা, ৰিসংসট্ঠা’’তি চ ৰুত্তন্তি. উপকারকো চ নাম অচ্চন্তং ভিন্নসন্তানানম্পি হোতিযেৰাতি ন তাৰতা সন্তানাভেদোতি ভিয্যোপি নেসং ব্যৰধাযকতাভাৰো ৰেদিতব্বো. যথা সমানজাতিকানং চিত্তুপ্পাদানং নিরন্তরতা সুট্ঠু অনন্তরভাৰেন পাকটা, ন তথা অসমানজাতিকানন্তি অধিপ্পাযেন ‘‘জৰনানন্তরস্স জৰনস্স ৰিয ভৰঙ্গানন্তরস্স ভৰঙ্গস্স ৰিযা’’তি ৰুত্তং.

পচ্চযভাৰো চেত্থাতি এত্থ চ-সদ্দো ব্যতিরেকো. সো যেন ৰিসেসেনেত্থ উপ্পাদক্খণং, তং ৰিসেসং জোতেতি. অনন্তরপচ্চযাদীনন্তি আদি-সদ্দেন সমনন্তরপচ্চযং সঙ্গণ্হাতি. পুরেপচ্ছাভাৰা, তদুপাদিকা ৰা উপ্পাদনিরোধা পুব্বন্তাপরন্তপরিচ্ছেদো, তেন গহিতানং খণত্তযপরিযাপন্নানন্তি অত্থো. তেনাহ ‘‘উপ্পজ্জতীতি ৰচনং অলভন্তান’’ন্তি. উপ্পাদক্খণসমঙ্গী হি ‘‘উপ্পজ্জতী’’তি ৰুচ্চতি. তথা হি ৰুত্তং ‘‘উপ্পাদক্খণে উপ্পজ্জমানং, নো চ উপ্পন্নং, ভঙ্গক্খণে উপ্পন্নং নো চ উপ্পজ্জমান’’ন্তি (যম. ২.চিত্তযমক.৮১). সোতি অনন্তরাদিপচ্চযভাৰো. অপরিচ্ছেদন্তি কালৰসেন পরিচ্ছেদরহিতং. যতোতি পুব্বন্তাপরন্তৰসেন পরিচ্ছেদাভাৰতো. তেনেৰাতি কালৰসেন পরিচ্ছিজ্জ এৰ ধম্মানং গহণতো.

উপ্পত্তিযা ¶ পচ্চযভাৰেন পাকটেনাতি ইদং তস্স নিদস্সনভাৰনিদস্সনং. সিদ্ধঞ্হি নিদস্সনং. পচ্চযুপ্পন্নানন্তি পচ্চযনিব্বত্তানং, অত্তনো ফলভূতানন্তি ¶ অধিপ্পাযো. সহজাতভাৰেনাতি সহ উপ্পন্নভাৰেন. অত্তনা সহুপ্পন্নধম্মানঞ্হি সহুপ্পন্নভাৰেন উপকারকতা সহজাতপচ্চযতা. তেন ঠিতিক্খণেপি নেসং উপকারকতা ৰেদিতব্বা. এৰঞ্হি ‘‘পকাসস্স পদীপো ৰিযা’’তি নিদস্সনম্পি সুট্ঠু যুজ্জতি. পদীপো হি পকাসস্স ঠিতিযাপি পচ্চযোতি.

অঞ্ঞমঞ্ঞতাৰসেনেৰাতি ইমিনা সহজাতাদিভাৰেন অত্তনো উপকারকস্স উপকারকতামত্তং ন অঞ্ঞমঞ্ঞপচ্চযতা, অথ খো অঞ্ঞমঞ্ঞপচ্চযভাৰৰসেনাতি লক্খণসঙ্করাভাৰং দস্সেতি, ন সহজাতাদিপচ্চযেহি ৰিনা অঞ্ঞমঞ্ঞপচ্চযস্স পৰত্তি. তেনেৰাহ ‘‘ন সহজাততাদিৰসেনা’’তি. যদিপি অঞ্ঞমঞ্ঞপচ্চযো সহজাতাদিপচ্চযেহি ৰিনা ন হোতি, সহজাতাদিপচ্চযা পন তেন ৰিনাপি হোন্তীতি সহজাততাদিৰিধুরেনেৰ পকারেন অঞ্ঞমঞ্ঞপচ্চযস্স পৰত্তীতি দস্সেন্তো ‘‘সহজাতাদি…পে… ন হোতী’’তি ৰত্ৰা তমেৰত্থং পাকটতরং কাতুং ‘‘ন চ পুরেজাত…পে… হোন্তী’’তি আহ. সহজাততাদীতি চ আদি-সদ্দেন নিস্সযঅত্থিঅৰিগতাদীনং গহণং ৰেদিতব্বং.

পথৰীধাতুযং পতিট্ঠায এৰ সেসধাতুযো উপাদারূপানি ৰিয যথাসককিচ্চং করোন্তীতি ৰুত্তং ‘‘অধিট্ঠানাকারেন পথৰীধাতু সেসধাতূন’’ন্তি. এত্থ অধিট্ঠানাকারেনাতি আধারাকারেন. আধারাকারো চেত্থ নেসং সাতিসযং তদধীনৰুত্তিতায ৰেদিতব্বো, যতো ভূতানি অনিদ্দিসিতব্বট্ঠানানি ৰুচ্চন্তি. এৰঞ্চ কত্ৰা চক্খাদীনম্পি অধিট্ঠানাকারেন উপকারকতা সুট্ঠু যুজ্জতি. ন হি যথাৰুত্তং তদধীনৰুত্তিযা ৰিসেসং মুঞ্চিত্ৰা অঞ্ঞো চক্খাদীসু অদেসকানং অরূপধম্মানং অধিট্ঠানাকারো সম্ভৰতি. যদিপি যং যং ধম্মং পটিচ্চ যে যে ধম্মা পৰত্তন্তি, তেসং সব্বেসং তদধীনৰুত্তিভাৰো, যেন পন পচ্চযভাৰৰিসেসেন চক্খাদীনং পটুমন্দভাৰেসু চক্খুৰিঞ্ঞাণাদযো তদনুৰিধানাকারেনেৰ পৰত্তন্তি, স্ৰাযমিদং তেসং তদধীনৰুত্তিযা সিদ্ধো ৰিসেসোতি ৰুত্তো. এৰঞ্হি পচ্চযভাৰসামঞ্ঞে সতিপি আরম্মণপচ্চযতো নিস্সযপচ্চযস্স ৰিসেসো সিদ্ধোতি ৰেদিতব্বো. স্ৰাযং ধাতুৰিভঙ্গে ৰিভাৰিতোযেৰ. খন্ধাদযো তংতংনিস্সযানং খন্ধাদীনন্তি ‘‘উপকারকা’’তি আনেত্ৰা সম্বন্ধিতব্বং.

যং ¶ ¶ কিঞ্চি কারণং নিস্সযোতি ৰদতি, ন ৰুত্তলক্খণূপপন্নমেৰ. এতেন পচ্চযট্ঠো ইধ নিস্সযট্ঠোতি দস্সেতি. তত্থাতি নিদ্ধারণে ভুম্মং. তেন ৰুত্তং ‘‘নিদ্ধারেতী’’তি.

সুট্ঠুকততং দীপেতি, কস্স? ‘‘অত্তনো’’তি ৰুত্তস্স পকতসদ্দেন ৰিসেসিযমানস্স পচ্চযস্স. কেন কতন্তি? অত্তনো কারণেহীতি সিদ্ধোৰাযমত্থো. তথাতি ফলস্স উপ্পাদনসমত্থভাৰেন. অথ ৰা তথাতি নিপ্ফাদনৰসেন উপসেৰনৰসেন চ. তত্থ নিপ্ফাদনং হেতুপচ্চযসমোধানেন ফলস্স নিব্বত্তনং, তং সুৰিঞ্ঞেয্যন্তি অনামসিত্ৰা উপসেৰনমেৰ ৰিভাৰেন্তো ‘‘উপসেৰিতো ৰা’’তি আহ. তত্থ অল্লীযাপনং পরিভোগৰসেন ৰেদিতব্বং. তেনাহ ‘‘উপভোগূপসেৰন’’ন্তি. ৰিজাননাদিৰসেনাতি ৰিজাননসঞ্জাননানুভৰনাদিৰসেন. তেনাতি যথাৰুত্তউপসেৰিতস্স পকতভাৰেন. অনাগতানম্পি…পে… ৰুত্তা হোতি, পগেৰ অতীতানং পচ্চুপ্পন্নানঞ্চাতি অধিপ্পাযো. পচ্চুপ্পন্নস্সপি হি ‘‘পচ্চুপ্পন্নং উতু ভোজনং সেনাসনং উপনিস্সায ঝানং উপ্পাদেন্তী’’তিআদিৰচনতো (পট্ঠা. ২.১৮.৮) পকতূপনিস্সযভাৰে লব্ভতীতি.

যথা যে ধম্মা যেসং ধম্মানং পচ্ছাজাতপচ্চযা হোন্তি, তে তেসং একংসেন ৰিপ্পযুত্তঅত্থিঅৰিগতপচ্চযাপি হোন্তি, তথা যে ধম্মা যেসং ধম্মানং পুরেজাতপচ্চযা হোন্তি, তে তেসং নিস্সযারম্মণপচ্চযাপি হোন্তীতি উভযেসু উভযেসং পচ্চযাকারানং লক্খণতো সঙ্করাভাৰং দস্সেতুং ‘‘ৰিপ্পযুত্তাকারাদীহি ৰিসিট্ঠা, নিস্সযারম্মণাকারাদীহি ৰিসিট্ঠা’’তি চ ৰুত্তং. যথা হি পচ্ছাজাতপুরেজাতাকারা অঞ্ঞমঞ্ঞৰিসিট্ঠা, এৰং পচ্ছাজাতৰিপ্পযুত্তাকারাদযো পুরেজাতনিস্সযাকারাদযো চ অঞ্ঞমঞ্ঞৰিভত্তসভাৰা এৰাতি.

মনোসঞ্চেতনাহারৰসেন পৰত্তমানেহীতি ইমিনা চেতনায সম্পযুত্তধম্মানম্পি তদনুগুণং অত্তনো পচ্চযুপ্পন্নেসু পৰত্তিমাহ. তেনেৰাতি চেতনাহারৰসেন উপকারকত্তা এৰ.

পযোগেন করণীযস্সাতি এতেন ভিন্নজাতি যং তাদিসং পযোগেন কাতুং ন সক্কা, তং নিৰত্তেতি. অনেকৰারং পৰত্তিযা আসেৰনট্ঠস্স পাকটভাৰোতি কত্ৰা ৰুত্তং ‘‘পুনপ্পুনং করণ’’ন্তি. একস্স পন ¶ পচ্চযধম্মস্স একৰারমেৰ পৰত্তি. অত্তসদিসস্সাতি অরূপধম্মসারম্মণতাসুক্ককণ্হাদিভাৰেহি অত্তনা সদিসস্স. ইদং পচ্চযুপ্পন্নৰিসেসনং, ‘‘অত্তসদিসসভাৰতাপাদন’’ন্তি ¶ ইদং পন পচ্চযভাৰৰিসেসনং, তঞ্চ ভিন্নজাতিযতাদিমেৰ ৰিসদিসসভাৰতং নিৰত্তেতি, ন ভূমন্তরতাদি. ন হি পরিত্তা ধম্মা মহগ্গতঅপ্পমাণানং ধম্মানং আসেৰনপচ্চযা ন হোন্তীতি. ৰাসনং ৰাসং গাহাপনং, ইধ পন ৰাসনং ৰিয ৰাসনং, ভাৰনন্তি অত্থো. গন্থাদীসূতি গন্থসিপ্পাদীসু. ৰিসযে চেতং ভুম্মং, ন নিদ্ধারণে. তেন গন্থসিপ্পাদিৰিসযা পুরিমসিদ্ধা অজ্ঝযনাদিকিরিযা ‘‘গন্থাদীসু পুরিমা পুরিমা’’তি ৰুত্তা, সা পন আসেৰনাকারা ইধ উদাহরণভাৰেন অধিপ্পেতাতি আহ ‘‘পুরিমা পুরিমা আসেৰনা ৰিযাতি অধিপ্পাযো’’তি. নিদ্ধারণে এৰ ৰা এতং ভুম্মং. গন্থাদিৰিসযা হি আসেৰনা গন্থাদীতি ৰুত্তা যথা রূপৰিসযজ্ঝানং রূপন্তি ৰুত্তং ‘‘রূপী রূপানি পস্সতী’’তিআদীসু (ম. নি. ২.২৪৮; ৩.৩১২; পটি. ম. ১.২০৯; ধ. স. ২৪৮).

অত্তনো ৰিয সম্পযুত্তধম্মানম্পি কিচ্চসাধিকা চেতনা চিত্তস্স ব্যাপারভাৰেন লক্খীযতীতি আহ ‘‘চিত্তপযোগো চেতনা’’তি. তাযাতি তায চেতনায. উপ্পন্নকিরিযতাৰিসিট্ঠেতি চিত্তপযোগসঙ্খাতায চেতনাকিরিযায উপ্পত্তিযা ৰিসিট্ঠে ৰিসেসং আপন্নে. যস্মিঞ্হি সন্তানে কুসলাকুসলচেতনা উপ্পজ্জতি, তত্থ যথাবলং তাদিসং ৰিসেসাধানং কত্ৰা নিরুজ্ঝতি, যতো তত্থেৰ অৰসেসপচ্চযসমৰাযে তস্সা ফলভূতানি ৰিপাককটত্তারূপানি নিব্বত্তিস্সন্তি. তেনাহ ‘‘সেসপচ্চয…পে… ন অঞ্ঞথা’’তি. তেসন্তি ৰিপাককটত্তারূপানং. তেনাতি চিত্তকিরিযভাৰেন. কিং ৰত্তব্বন্তি অসহজাতানম্পি ভাৰীনং উপকারিকা চেতনা সহজাতানং উপকারিকাতি ৰত্তব্বমেৰ নত্থীতি অত্থো.

নিরুস্সাহসন্তভাৰেনাতি উস্সাহনং উস্সাহো, নত্থি এতস্স উস্সাহোতি নিরুস্সাহো, সো এৰ সন্তভাৰোতি নিরুস্সাহসন্তভাৰো, তেন. উস্সাহোতি চ কিরিযমযচিত্তুপ্পাদস্স পৰত্তিআকারো ৰেদিতব্বো, যো ব্যাপারোতি চ ৰুচ্চতি, ন ৰীরিযুস্সাহো. স্ৰাযং যথা অসমুগ্ঘাতিতানুসযানং কিরিযমযচিত্তুপ্পাদেসু সাতিসযো ¶ লব্ভতি, ন তথা নিরনুসযানং. ততো এৰ তে সন্তসভাৰা ৰিপাকুপ্পাদনব্যাপাররহিতাৰ হোন্তি, কিরিযমযচিত্তুপ্পাদতায পন সউস্সাহা এৰাতি ততোপি ৰিসেসনত্থং ‘‘নিরুস্সাহসন্তভাৰেনা’’তি ৰুত্তং. এতেনাতি নিরুস্সাহসন্তভাৰগ্গহণেন. সারম্মণাদিভাৰেনাতি সারম্মণঅরূপধম্মচিত্তচেতসিকফস্সাদিভাৰেন. ৰিসদিসৰিপাকভাৰং দস্সেতি যথাৰুত্তউস্সাহমত্তরহিতসন্তভাৰস্স ৰিপক্কভাৰমাপন্নেসু অরূপধম্মেসু এৰ লব্ভনতো. সোতি ৰিপাকভাৰো. ৰিপাকানং পযোগেন অসাধেতব্বতাযাতি ¶ ‘‘ছন্দৰতো কিং নামন সিজ্ঝতী’’তিআদিনা চিত্তাভিসঙ্খারপযোগেন যথা কুসলাকুসলা নিপ্ফাদীযন্তি, এৰং ৰিপাকানং পযোগেন অনিপ্ফাদেতব্বত্তা. পযোগেনাতি কম্মফলুপ্পত্তিমূলহেতুভূতেন পুরিমপযোগেন. যং সন্ধায ৰুত্তং ‘‘পযোগসম্পত্তিং আগম্ম ৰিপচ্চন্তী’’তিআদি. অঞ্ঞথাতি পযোগেন ৰিনা. সেসপচ্চযেসূতি কম্মস্স ৰিপাকুপ্পাদনে সহকারীকারণেসু. কম্মস্স কটত্তাযেৰ পযোগে সতি অসতিপীতি ৰুত্তমেৰত্থং অৰধারণেন দস্সেন্তো ৰিপাকানং নিরুস্সাহতং পাকটং করোতি. ন কিলেসৰূপসমসন্তভাৰো যথা তং সন্তানেসু ঝানসমাপত্তীসূতি অধিপ্পাযো. অযঞ্চ ৰিপাকানং সন্তভাৰো নানুমানিকো, অথ খো পচ্চক্খসিদ্ধোতি দস্সেন্তো ‘‘সন্তভাৰতোযেৰা’’তিআদিমাহ. তত্থ অভিনিপাতগ্গহণেন কিচ্চতো পঞ্চৰিঞ্ঞাণানি দস্সেতি. তেনেৰাহ ‘‘পঞ্চহি ৰিঞ্ঞাণেহি ন কিঞ্চি ধম্মং পটিজানাতি অঞ্ঞত্র অভিনিপাতমত্তা’’তি. তপ্পচ্চযৰতন্তি ৰিপাকপচ্চযৰন্তানং, ৰিপাকপচ্চযেন উপকত্তব্বানন্তি অত্থো. অৰিপাকানং রূপধম্মানং. ৰিপাকানুকুলং পৰত্তিন্তি সন্তসভাৰং পচ্চযভাৰমাহ.

যথাসকং পচ্চযেহি নিব্বত্তানং পচ্চযুপ্পন্নানং অনুবলপ্পদানং উপত্থম্ভকত্তং, তযিদং আহারেসু ন নিযতং ততো অঞ্ঞথাপি পৰত্তনতো. তথা সতি তদেৰ তত্থ কস্মা গহিতন্তি চোদনং মনসি কত্ৰা আহ ‘‘সতিপি…পে… উপত্থম্ভকত্তেনা’’তি. তেন পধানাপ্পধানেসু পধানেন নিদ্দেসো ঞাযগতোতি দস্সেতি. কামঞ্চেত্থ ‘‘রূপারূপানং উপত্থম্ভকত্তেনা’’তি অৰিসেসতো ৰুত্তং, সামঞ্ঞজোতনা পন ৰিসেসে অৰতিট্ঠতীতি যথারহং পচ্চযভাৰো নিদ্ধারেতব্বো. স্ৰাযং তেসং উপত্থম্ভকত্তস্স পধানভাৰৰিভাৰনেনেৰ আৰি ভৰতীতি তমেৰ দস্সেন্তো ¶ ‘‘উপত্থম্ভকত্তঞ্হী’’তিআদিমাহ. ফস্সমনোসঞ্চেতনাৰিঞ্ঞাণানি অত্তনা সহজাতধম্মানং সহুপ্পাদনভাৰেন পচ্চযা হোন্তীতি আহ ‘‘সতিপি জনকত্তে অরূপীনং আহারান’’ন্তি. উপত্থম্ভকত্তং হোতি উপ্পাদতো পরম্পি নেসং পচ্চযভাৰতো. অসতিপি জনকত্তে উপত্থম্ভিযমানস্স রূপস্স অঞ্ঞেহি যথাসকং পচ্চযেহি জনিতত্তা. তেনাহ ‘‘চতুসমুট্ঠানিকরূপূপত্থম্ভকরূপাহারস্সা’’তি. যদগ্গেন রূপারূপাহারা অত্তনো ফলস্স উপ্পত্তিযা পচ্চযা হোন্তি, তদগ্গেন ঠিতিযাপি পচ্চযা হোন্তিযেৰাতি উপত্থম্ভকত্তং জনকত্তং ন ব্যভিচরতি, তস্মা অনুপত্থম্ভকস্স আহারস্স কুতো জনকতা. তেনাহ ‘‘অসতি পন…পে… নত্থীতি উপত্থম্ভকত্তং পধান’’ন্তি. যস্মা জনকো অজনকোপি হুত্ৰা আহারো উপত্থম্ভকো হোতি, অনুপত্থম্ভকো পন হুত্ৰা জনকো ন হোতিযেৰ, তস্মাস্স উপত্থম্ভকত্তং পধানন্তি ¶ অত্থো. ইদানি জনকত্তম্পি আহারানং উপত্থম্ভনৰসেনেৰ হোতীতি দস্সেন্তো ‘‘জনযমানোপি হী’’তিআদিমাহ. অৰিচ্ছেদৰসেনাতি সন্ততিযা ঘট্টনৰসেন.

যদি অধিপতিযট্ঠো ইন্দ্রিযপচ্চযতা, এৰং সন্তে অধিপতিপচ্চযতো ইন্দ্রিযপচ্চযস্স কিং নানাকরণন্তি চোদনং মনসি কত্ৰা তং তেসং নানাকরণং দস্সেন্তো ‘‘ন অধিপতিপচ্চযধম্মানং ৰিযা’’তিআদিমাহ. তত্থ পৰত্তিনিৰারকেতি অত্তনো অধিপতিপচ্চযপৰত্তিযা নিৰারকে অঞ্ঞে অধিপতিপচ্চযধম্মে. অভিভৰিত্ৰা পৰত্তনেনাতি পুরিমাভিসঙ্খারসিদ্ধেন ধোরেয্যভাৰেন অভিভুয্য পৰত্তিযা. গরুভাৰোতি জেট্ঠকভাৰো. অযঞ্হেত্থ সঙ্খেপত্থো – যেন জেট্ঠকভাৰেন ছন্দাদযো অত্তনো পৰত্তিৰিবন্ধকে তুল্যযোগীধম্মে তদঞ্ঞধম্মে ৰিয অভিভুয্য পৰত্তন্তি, ন সো ইন্দ্রিযপচ্চযতায অধিপতিযট্ঠোতি অধিপ্পেতোতি. অথ কো চরহীতি আহ ‘‘অথ খো’’তিআদি. দস্সনাদিকিচ্চেসু নিমিত্তভূতেসু চক্খুৰিঞ্ঞাণাদীহি চক্খাদীহি পচ্চযেহি চক্খাদীনং অনুৰত্তনীযতাতি সম্বন্ধো. জীৰনে অনুপালনে জীৰন্তেহি সহজাতধম্মেহি জীৰিতস্স, সুখিতাদীহি সুখিতদুক্খিতসোমনস্সিতদোমনস্সিতুপেক্খিতেহি সহজাতধম্মেহি সুখাদীনং অনুৰত্তনীযতাতি যোজনা. তংতংকিচ্চেসূতি ৰুত্তমেৰ দস্সনাদিকিচ্চং পচ্চামসতি. চক্খাদযো ¶ পচ্চযা এতেসন্তি চক্খাদিপচ্চযা, চক্খুৰিঞ্ঞাণাদযো. তেহি চক্খাদিপচ্চযেহি. চক্খাদীনন্তি চক্খাদিজীৰিতসুখাদিসদ্ধাদীনং.

তেসু কিচ্চেসূতি দস্সনাদিকিচ্চেসু. চক্খাদীনং ইস্সরিযং অধিপতিযট্ঠো, সা ইন্দ্রিযপচ্চযতাতি অত্থো. তপ্পচ্চযানং চক্খুৰিঞ্ঞাণাদীনং তদনুৰত্তনেন তেসং চক্খাদীনং অনুৰত্তনেন. তত্থ দস্সনাদিকিচ্চে. পৰত্তীতি চ ইদং তস্স অধিপতিযট্ঠস্স পাকটকরণং. অনুৰত্তকেন হি অনুৰত্তনীযো অধিপতিযট্ঠো পাকটো হোতি. যথা চক্খাদীনং কিচ্চৰসেন অধিপতিযট্ঠো, ন এৰং ভাৰদ্ৰযস্স. তস্স পন তাদিসেন কারণতামত্তেনাতি দস্সেন্তো ‘‘ইত্থিপুরিসিন্দ্রিযানং পনা’’তিআদিমাহ. পচ্চযেহীতি কম্মাদিপচ্চযেহি. ততোতি ইত্থাদিগ্গহণপচ্চযভাৰতো. তংসহিতসন্তানেতি ইত্থিন্দ্রিযাদিসহিতসন্তানে. ‘‘সুখিন্দ্রিযদুক্খিন্দ্রিযানিপি চক্খাদিগ্গহণেন গহিতানী’’তি ইদং ইন্দ্রিযপচ্চযমেৰ সন্ধায ৰুত্তং, পচ্ছাজাতাদীহি পন তানি রূপধম্মানম্পি পচ্চযা হোন্তিযেৰ.

লক্খণারম্মণূপনিজ্ঝানভূতানন্তি অনিচ্চতাদিলক্খণস্স পথৰীকসিণাদিআরম্মণস্স চ উপনিজ্ঝানৰসেন ¶ পৰত্তানং. ৰিতক্কাদীনন্তি ৰিতক্কৰিচারপীতিৰেদনাচিত্তেকগ্গতানং. উপগন্ত্ৰা নিজ্ঝানন্তি উপনিকচ্চ নিজ্ঝানজ্ঝানারম্মণস্স ঝানচক্খুনা ব্যত্ততরং ওলোকনং অত্থতো চিন্তনমেৰ হোতীতি ৰুত্তং ‘‘পেক্খনং চিন্তনঞ্চা’’তি. তেনেৰাহ ‘‘ৰিতক্কনাদিৰসেনা’’তি. ৰিতক্কাদীনংযেৰ সাধারণো, যেন তেযেৰ ‘‘ঝানঙ্গানী’’তি ৰুচ্চন্তি. সুখদুক্খৰেদনাদ্ৰযন্তি সামঞ্ঞৰচনম্পি উপনিজ্ঝাযনট্ঠস্স অধিকতত্তা অনুপনিজ্ঝানসভাৰমেৰ তং বোধেতীতি আহ ‘‘সুখিন্দ্রিযদুক্খিন্দ্রিযদ্ৰয’’ন্তি. তঞ্হি ইধাধিপ্পেতব্বং, ন সোমনস্সদোমনস্সিন্দ্রিযং. তেন ৰুত্তং ‘‘অধিপ্পাযো’’তি. অঝানঙ্গা উপেক্খাচিত্তেকগ্গতা পঞ্চৰিঞ্ঞাণসহগতা দট্ঠব্বা ৰিতক্কপচ্ছিমকত্তা ঝানঙ্গানং. যদি এৰন্তি ঝানঙ্গৰচনেনেৰ অঝানঙ্গানং নিৰত্তনং কতং, এৰং সন্তে. একন্তেন ন উপেক্খায ৰিয অনেকন্তেন. অনেকন্তিকঞ্হি উপেক্খায অঝানঙ্গত্তং. যদি একন্তেন অঝানঙ্গং সুখদুক্খিন্দ্রিযং, অথ কথং পসঙ্গোতি আহ ‘‘ঝানঙ্গট্ঠানে নিদ্দিট্ঠত্তা’’তি. অথ ৰা যদি একন্তেন অঝানঙ্গতং ৰেদনাদ্ৰযং, কথং ঝানঙ্গৰোহারোতি আহ ‘‘ঝানঙ্গট্ঠানে নিদ্দিট্ঠত্তা’’তি. সতিপি…পে… দস্সনত্থং ‘‘ঠপেত্ৰা সুখদুক্খিন্দ্রিযদ্ৰয’’ন্তি ৰুত্তন্তি যোজনা ¶ . যদি এৰং যথাৰুত্তৰেদনাদ্ৰযেন সদ্ধিং তাদিসা উপেক্খাচিত্তেকগ্গতা কস্মা ন ঠপিতাতি আহ ‘‘উপেক্খা…পে… অত্থী’’তি, পঞ্চৰিঞ্ঞাণসহগতানং ঝানপচ্চযভাৰো পন নত্থি, ন ইতরেসন্তি অধিপ্পাযো. গহণং কতং উপেক্খাচিত্তেকগ্গতানন্তি আনেত্ৰা যোজনা.

যতো ততো ৰাতি দুগ্গতিতো ৰা সুগতিতো ৰা সংকিলেসতো ৰা ৰোদানতো ৰা নিয্যানট্ঠো, স্ৰাযং যথাক্কমং সম্মা মিচ্ছা ৰা হোতীতি আহ ‘‘সম্মা ৰা মিচ্ছা ৰাতি অত্থো’’তি. অহেতুকচিত্তেসু ন লব্ভন্তীতি এত্থ অহেতুকচিত্তেসু এৰ ন লব্ভন্তীতি এৰমৰধারণং গহেতব্বং, ন অহেতুকচিত্তেসু ন লব্ভন্তি এৰাতি. তস্মা পুরিমস্মিঞ্হি অৰধারণে অহেতুকচিত্তেসু অলাভো নিযতোতি সো পতিযোগীসু নিৰত্তিতো হোতি. তেনাহ ‘‘সহেতুকচিত্তেসু অলাভাভাৰদস্সনত্থং ৰুত্ত’’ন্তি. দুতিযে পন অহেতুকচিত্তানি অলাভে নিযতানীতি তেসু অনৰসেসতো অলাভেন ভৰিতব্বং. তথা সতি যো কেসুচি অহেতুকচিত্তেসু ঝানপচ্চযো লব্ভতি, সোপি নিৰারিতো সিযা. তেন ৰুত্তং ‘‘ন অহেতুকচিত্তেসূ’’তিআদি. তত্থ লাভাভাৰদস্সনত্থন্তি লাভাভাৰস্সেৰ দস্সনত্থং ন ৰুত্তন্তি অত্থো. তেন একচ্চালাভো অপটিক্খিত্তো হোতি. তেনেৰাহ ‘‘কত্থচি কস্সচি লাভো ন নিৰারিতো’’তি. এৰং অত্থে গয্হমানেতি এৰং ৰুত্তনযেন পঠমপদাৰধারণৰসেন অত্থে ৰিঞ্ঞাযমানে. এত্তকমেৰ ৰিঞ্ঞাযেয্যাতি অহেতুকচিত্তেসু কেসুচি চিত্তেসু ঝানমগ্গপচ্চযেসু কস্সচি ¶ পচ্চযস্স লাভো ন নিৰারিতোতি এত্তকমেৰ ৰিঞ্ঞাযেয্য অৰিসেসেন ৰুত্তত্তা. কিং পনেত্থ উপরি কাতব্বন্তি আহ ‘‘ন সৰিতক্ক…পে… কত’’ন্তি. যদিপি ন কতং, অত্থতো পন তং কতমেৰাতি ৰেদিতব্বং.

অহেতুকচিত্তেসু ৰা লাভাভাৰদস্সনত্থেতিআদি পচ্ছিমপদাৰধারণৰসেন অত্থদস্সনং. তস্মাতি যস্মা অহেতুকচিত্তেসু ন লব্ভন্তি এৰাতি এৰং নিযমে করিযমানে যথাৰুত্তো অত্থো সম্ভৰতি, তস্মা. অযঞ্চ অত্থো পাঠন্তরেনপি সংসন্দতীতি দস্সেতুং ‘‘যেন অলাভেনা’’তিআদি ৰুত্তং. তং অলাভন্তি তং ধম্মসঙ্গণিযং পকাসিতং অলাভং. এসাতি এস ইধ পট্ঠানৰণ্ণনাযং ‘‘অহেতুকচিত্তেসু ন লব্ভন্তী’’তি ¶ অলাভো ৰুত্তো. কীদিসো পন অলাভোতি তং দস্সেন্তো ‘‘যথা হী’’তিআদিমাহ. তত্থ সহেতুকেসূতি সহেতুকচিত্তেসু. সঙ্কড্ঢিত্ৰাতি অৰিসটে কত্ৰা. একত্তগতভাৰকরণন্তি একভাৰাপাদনং. ইমস্মিং পন পকরণে ঝানপচ্চযো ৰুত্তোৰ যথালাভপচ্চযাকারৰিভাৰনে দেসনায তপ্পরভাৰতো.

সমন্তি অৰিসমং, সম্মা, সহ ৰা. পকারেহীতি একৰত্থুকতাদিপ্পকারেহি. যুত্ততাযাতি সংসট্ঠতায. সা পন সংসট্ঠতা যস্মা সভাৰতো অনেকেসম্পি সতং একত্তগমনং ৰিয হোতি, তস্মা ৰুত্তং ‘‘একীভাৰোপগমনেন ৰিয উপকারকতা’’তি. এৰং উপকারকতা চ তেসং বহূনং সহচ্চ একত্তকারিতায নিদস্সেতব্বা.

যুত্তানম্পি সতন্তি ৰুত্তপ্পকারেন সংসট্ঠতায অঞ্ঞমঞ্ঞসম্বন্ধতায যুত্তানম্পি সমানানং. অযঞ্চ যুত্ততা ন সম্পযুত্তপচ্চযতায ৰিয পচ্চযধম্মেসু পচ্চযুপ্পন্নধম্মেসু চ ৰেদিতব্বা, কেৰলং তত্থ অরূপসভাৰত্তা উভযং সমধুরং, ইধ রূপারূপসভাৰত্তা ৰিধুরন্তি অযং ৰিসেসো. ৰিপ্পযুত্তভাৰেনাতি ৰিসংসট্ঠভাৰেন. তেন ৰুত্তং ‘‘নানত্তূপগমেনা’’তি. ইদঞ্হেত্থ ৰিপ্পযুত্ততায ৰিসেসনং যা নানত্তূপগমনসঙ্খাতা ৰিপ্পযুত্ততা, ন সা ‘‘ঞাণৰিপ্পযুত্ত’’ন্তিআদীসু ৰিয অভাৰমত্তন্তি, অযঞ্চ উপকারকতা ৰিনা সংসগ্গেন সহাৰট্ঠাযিতায কিচ্চকারিতাদীহি নিদস্সেতব্বা. ন হীতিআদি ‘‘যুত্তান’’ন্তি ৰুত্তস্স অত্থস্স সমত্থনং ‘‘তাদিসে যোগে সতিযেৰ ৰিপ্পযুত্তপচ্চযতা’’তি. তেনাহ ‘‘ন হী’’তিআদি. তস্সত্থো – যথা ‘‘ৰত্থু খন্ধানং, সহজাতা কুসলা খন্ধা চিত্তসমুট্ঠানানং রূপানং, পচ্ছাজাতা কুসলা খন্ধা পুরেজাতস্স ইমস্স কাযস্স ৰিপ্পযুত্তপচ্চযেন পচ্চযো’’তিআদিৰচনতো (পট্ঠা. ১.১.৪৩৪) ৰত্থুসহজাতপচ্ছাজাতৰসেন যুত্তানং ¶ অত্থি ৰিপ্পযুত্তপচ্চযতা, ন এৰং অযুত্তানং ৰত্থুসহজাত…পে… অত্থীতি. যদি এৰং রূপানং রূপেহি কস্মা ৰিপ্পযুত্তপচ্চযো ন ৰুত্তোতি আহ ‘‘রূপানং পনা’’তিআদি. ৰিপ্পযোগোযেৰ নত্থি সম্পযোগাসঙ্কায অভাৰতো. সম্পযুজ্জমানানঞ্হি অরূপানং রূপেহি, রূপানঞ্চ তেহি সিযা সম্পযোগাসঙ্কা, সম্পযোগলক্খণং পন নত্থীতি তেসং ৰিপ্পযোগো ৰুত্তো. তেনাহ ‘‘চতূহি সম্পযোগো চতূহি ৰিপ্পযোগো’’তি.

অত্থি ¶ মে পাপকম্মং কতন্তি কতভাৰৰিসিট্ঠা অত্থিতা ৰুচ্চমানা কিরিযায সিদ্ধভাৰমেৰ দীপেতি, ন সিজ্ঝমানতন্তি আহ ‘‘নিব্বত্ততালক্খণং অত্থিভাৰ’’ন্তি. অত্থতো পন কম্মস্স অনিব্বত্তফলতায এৰমেত্থ অত্থিতা ৰেদিতব্বা. অত্থি পুগ্গলোতি পনেত্থ তস্সা পঞ্ঞত্তিযা গহেতব্বতা, তদুপাদানস্স ৰা পবন্ধাৰিচ্ছেদো লব্ভতেৰাতি ৰুত্তং ‘‘উপলব্ভমানতালক্খণং অত্থিভাৰ’’ন্তি. পচ্চযধম্মস্স যদিপি উপ্পাদতো পট্ঠায যাৰ ভঙ্গা লব্ভমানতা অত্থিভাৰো, তথাপি তস্স যথা উপ্পাদক্খণতো ঠিতিক্খণে সাতিসযো ব্যাপারো, এৰং পচ্চযুপ্পন্নেপীতি ৰুত্তং ‘‘সতিপি জনকত্তে উপত্থম্ভকপ্পট্ঠানা অত্থিভাৰেন উপকারকতা’’তি. ৰত্থারম্মণসহজাতাদীনন্তি আদি-সদ্দেন পুরেজাতপচ্ছাজাতাদীনি সঙ্গণ্হাতি. অত্থিভাৰেনেৰ ন নিস্সযাদিভাৰেনাতি ‘‘সাধারণ’’ন্তি ৰুত্তং উপকারকত্তং ৰিভাৰেতি.

ফস্সাদীনং অনেকেসং সহভাৰো নত্থীতি ইদং ন একচিত্তুপ্পাদপরিযাপন্নে সন্ধায, অথ খো নানাচিত্তুপ্পাদপরিযাপন্নেতি দস্সেন্তো ‘‘একস্মিং ফস্সাদিসমুদাযে সতি দুতিযো ন হোতী’’তি আহ. স্ৰাযমত্থো ‘‘সহভাৰো নত্থী’’তি সহভাৰপটিক্খেপেনেৰ ৰিঞ্ঞাযতি. এত্তাৰতা পন অনৰবুজ্ঝন্তানং ৰসেন ৰিৰরিত্ৰা ৰুত্তো. তেনাতি অনেকেসং ফস্সাদীনং সহভাৰাভাৰেন. যদি নত্থিতামত্তেন উপকারকতা নত্থিপচ্চযতা, অনানন্তরাতীতৰসেনপি সিযাতি চোদনং সন্ধাযাহ ‘‘সতিপী’’তিআদি. তানীতি পুরিমতরচিত্তানি. দদমানং ৰিযাতি কস্মা ৰুত্তং, ননু ওকাসং দেতিযেৰ. তথা হি ৰুত্তং ‘‘পৰত্তিওকাসদানেন উপকারকতা’’তি? সচ্চমেতং, এৰমজ্ঝাসযা ৰিয পচ্চযধম্মা অভাৰং গচ্ছন্তীতি দস্সনত্থং ৰিয-সদ্দগ্গহণং.

নত্থিতাৰিগমানং সতিপি পচ্চযস্স ধম্মস্স অনুপলদ্ধিতাসামঞ্ঞে নত্থিৰিগতপচ্চযেসু লব্ভমানং ৰিসেসমত্থং ৰিভাৰেতুং ‘‘এত্থ চা’’তিআদি ৰুত্তং. অভাৰমত্তেনাতি হুত্ৰা অভাৰমত্তেন. তেনেত্থ নিরোধানন্তরং পচ্চযধম্মস্স উপকারকত্তং আহ, যথা তং ‘‘ওকাসদান’’ন্তি ¶ ৰুত্তং. সভাৰৰিগমেনাতি এতেন নিরোধতো পরম্পি যতো ‘‘ৰিগততা নিরোধপ্পত্ততা’’তি ৰুত্তং. পচ্চযধম্মে যাসং নত্থিতাৰিগততানং ৰসেন নত্থিৰিগতপচ্চযা ৰুত্তা, তাসং ৰিসেসে দস্সিতে নত্থিৰিগতপচ্চযানং ৰিসেসো ¶ দস্সিতো হোতীতি ‘‘নত্থিতা চ নিরোধানন্তরসুঞ্ঞতা ৰিগততা নিরোধপ্পত্ততা’’তি ৰুত্তং, তত্থ নিরোধানন্তরা ন নিরোধসমকালাতি অধিপ্পাযো. তথাতি ইমিনা যথা পচ্চযধম্মাৰিসেসেপি নত্থিৰিগতপচ্চযভাৰৰিসেসো নিদ্ধারিতো, তথা অত্থিঅৰিগতপচ্চযভাৰৰিসেসোতি ইমমত্থং উপসংহরতি. যথা হি নিরোধানন্তরনিরোধপ্পত্তীহি নত্থিৰিগততানং ভেদো লক্খিতো, এৰং পচ্চযধম্মস্স ধরমানতানিরোধানুপগমেহি অত্থিঅৰিগততানন্তি. কথং পনাযং ধম্মাৰিসেসে পচ্চযভাৰৰিসেসো দুৰিঞ্ঞেয্যরূপেন ঠিতো সম্মা ৰিভাৰিস্সতীতি আহ ‘‘ধম্মানঞ্হী’’তিআদি. তদভিসমযায তেসং পচ্চযৰিসেসানং অধিগমত্থং.

চতূসু খন্ধেসু একস্সপি অসঙ্গহিতত্তাভাৰতো অনন্তরাদীহীতি ৰিভত্তিং পরিণামেত্ৰা যোজনা. অঞ্ঞন্তি সুখুমরূপং. ন হি তং পুরেজাতপচ্চযো হোতি. ননু চ রূপরূপম্পি পুরেজাতপচ্চযভাৰেন কুসলত্তিকে নাগতন্তি আহ ‘‘রূপরূপং পনা’’তিআদি. অঞ্ঞত্থ আগতমেৰাতি যদিপি কুসলত্তিকে নাগতং, সনিদস্সনত্তিকাদীসু পন আগতত্তা ন সক্কা রূপরূপস্স পুরেজাতপচ্চযতং পটিক্খিপিতুন্তি অত্থো.

পচ্চযুদ্দেসৰণ্ণনা নিট্ঠিতা.

পচ্চযনিদ্দেসো

১. হেতুপচ্চযনিদ্দেসৰণ্ণনা

১. হেতুপচ্চযেন পচ্চযভাৰো হেতুপচ্চযোতি উদ্দিট্ঠো, ন হেতুপচ্চযধম্মোতি অত্থো. সোতি হেতুভাৰেন পচ্চযো. এত্থ চ পঠমৰিকপ্পে যো হেতুপচ্চযেন পচ্চযভাৰো ৰুত্তো, যো চ দুতিযৰিকপ্পে হেতুভাৰেন পচ্চযো ৰুত্তো, সো যস্মা অত্থতো যথাৰুত্তস্স পচ্চযধম্মস্স যথাৰুত্তানং ¶ পচ্চযুপ্পন্নানং হেতুপচ্চযভাৰোযেৰ, তস্মা ৰুত্তং ‘‘উভযথাপি হেতুভাৰেন উপকারকতা হেতুপচ্চযোতি উদ্দিট্ঠোতি দস্সিতং হোতী’’তি. যথা চেত্থ, এৰং ‘‘আরম্মণপচ্চযেন পচ্চযভাৰো, আরম্মণভাৰেন ৰা পচ্চযো আরম্মণপচ্চযো’’তিআদিনা আরম্মণপচ্চযাদীসু অত্থো নেতব্বোতি দস্সেন্তো ¶ ‘‘এস নযো সেসপচ্চযেসুপী’’তি আহ. ধম্মসভাৰো এৰ, ন ধম্মতো অঞ্ঞা ধম্মসত্তি নাম অত্থীতি. উপকারকং ধম্মন্তি পচ্চযধম্মং আহ. উপকারকতন্তি পচ্চযতং.

পচ্চত্তনিদ্দিট্ঠোতি পচ্চত্তৰসেন নিদ্দিট্ঠো, পঠমায ৰিভত্তিযা নিদ্দিট্ঠোতি অত্থো. তেনাতি পচ্চযধম্মনিদ্দেসভূতেন পচ্চত্তনিদ্দিট্ঠেন পঠমেন হেতুসদ্দেন. এতস্সাতি হেতুসদ্দাভিধেয্যমত্থমাহ. সো হি ছব্বিধো নৰৰিধো দ্ৰাদসৰিধোতি অনেকভেদেন ভিন্নোপি হেতুভাৰসামঞ্ঞেন একজ্ঝং কত্ৰা একৰচনেন ৰুত্তো. দুতিযো হেতুসদ্দোতি আনেত্ৰা যোজনা. হেতুনা সম্পযুত্তানন্তি অধিকতত্তা ৰুত্তং ‘‘হেতু সম্পযুত্তানং পচ্চযো হোন্তো হেতুনা সম্পযুত্তানমেৰ পচ্চযো হোতি, ন ৰিপ্পযুত্তান’’ন্তি এৰং পদমেতং. ন হি সব্বেন সব্বং হেতুৰিপ্পযুত্তধম্মানং হেতুপচ্চযো ন হোতীতি. সম্পযুত্তসদ্দস্স সম্বন্ধীসদ্দত্তা ‘‘সম্পযুত্তসদ্দস্স সাপেক্খত্তা’’তি ৰুত্তং. সম্পযুত্তোতি হি ৰুত্তে কেন সম্পযুত্তোতি একন্ততো সম্বন্ধিঅন্তরং অপেক্খিতব্বং. তেনাহ ‘‘অঞ্ঞস্স…পে… ৰিঞ্ঞাযতী’’তি. নাযং একন্তোতি য্ৰাযং ‘‘দুতিযে হেতুসদ্দে অৰিজ্জমানে’’তিআদিনা ৰুত্তো অত্থো, অযমেকন্তো ন হোতি, অঞ্ঞাপেক্খোপি সদ্দো অঞ্ঞস্স ৰিসেসনং হোতীতি ইদং ন সব্বত্থেৰ সম্ভৰতীতি অত্থো. ‘‘পচ্চত্তনিদ্দিট্ঠো’’তি ইমিনা পঠমস্স হেতুসদ্দস্স সম্পযুত্তসদ্দানপেক্খতং আহ. তেন ৰুত্তং ‘‘হেহুপচ্চযেন পচ্চযোতি এত্থেৰ ব্যাৰটো’’তি. অৰিসিট্ঠাতি ন ৰিসেসিতা. এৰন্তি যথা হেতুসদ্দেন অঞ্ঞত্থ ব্যাৰটেন সম্পযুত্তা ন ৰিসেসিযন্তি কিচ্চন্তরপসুতত্তা, এৰং সম্পযুত্তসদ্দেন হেতুসদ্দৰিসেসনরহিতেন তদত্থমত্তব্যাৰটত্তা অৰিসেসতো সম্পযুত্তানং গহণং সিযা. তেন ৰুত্তং ‘‘সম্পযুত্তসদ্দেনা’’তিআদি. আহারিন্দ্রিযাসম্পযুত্তস্স অভাৰতোতি আহারেহি ইন্দ্রিযেহি চ নসম্পযুত্তস্স ধম্মস্স অভাৰতো. ন হি ফস্সচেতনাৰিঞ্ঞাণৰেদনাজীৰিতৰিরহিতো চিত্তুপ্পাদো অত্থি. তেনাহ ‘‘ৰজ্জেতব্বা…পে… তং ন কত’’ন্তি. ৰজ্জেতব্বং হেতুৰিপ্পযুত্তং.

এৰম্পীতি দুতিযেন হেতুসদ্দেন গয্হমানেপি নাপজ্জতি. যদিপি হেতৰো বহৰো, সামঞ্ঞনিদ্দেসো চাযং, তথাপি সামঞ্ঞজোতনায ৰিসেসনিদ্দিট্ঠত্তাতি ¶ অধিপ্পাযো. তেন ৰুত্তং ‘‘পচ্চত্ত…পে… ৰুত্তত্তা’’তি. ৰিনাপি দুতিযেন হেতুসদ্দেন হেতুসম্পযুত্তভাৰে সিদ্ধেপীতি ইমিনা যং ¶ ৰুত্তং ‘‘নাযমেকন্তো’’তি, তমেৰ উল্লিঙ্গেতি. ন পন হেতূনন্তি ইদং হেতুস্স পচ্চযভাৰেন গহিতত্তা পচ্চযুপ্পন্নভাৰেন গহণং ন যুজ্জেয্যাতি আসঙ্কমানং সন্ধায ৰুত্তং. তেনেৰাহ ‘‘এৰম্পি গহণং সিযা’’তি. সোতি দুতিযো হেতুসদ্দো. অপরে পন ‘‘হেতুসম্পযুত্তকান’’ন্তি এত্থ হেতূনঞ্চ সম্পযুত্তকানঞ্চাতি সমাসং ৰিকপ্পেন্তি. পতিট্ঠামত্তাদিভাৰেন নিরপেক্খাতি হেতুঝানমগ্গধম্মা পতিট্ঠানউপনিজ্ঝাননিয্যানমত্তেন অঞ্ঞধম্মনিরপেক্খা হেতুঝানমগ্গপচ্চযকিচ্চং করোন্তি. সাপেক্খা এৰাতি অঞ্ঞসাপেক্খা এৰ. আহরিতব্বইসিতব্বা আহারিন্দ্রিযপচ্চযেহি উপকত্তব্বধম্মা. তস্মাতি যস্মা যেহি সাপেক্খা, তে অত্তনো পচ্চযুপ্পন্নধম্মে পচ্চযভাৰেনেৰ পরিচ্ছিন্দিত্ৰা তিট্ঠন্তি, তস্মা. তেনাহ ‘‘তে ৰিনাপি…পে… ন কত’’ন্তি. পরিচ্ছিন্দন্তি ৰিসেসেন্তি. তন্তি দুতিযং আহারিন্দ্রিযগ্গহণং. তত্থাতি আহারিন্দ্রিযপচ্চযনিদ্দেসে. ন কেৰলঞ্চ তত্থেৰ, ইধ চ হেতুপচ্চযনিদ্দেসে দুতিযেন হেতুগ্গহণেন পচ্চযুপ্পন্নানং পুন ৰিসেসনকিচ্চং নত্থি, কস্মা? পচ্চযভূতেনেৰ হেতুনা সম্পযুত্তানং অঞ্ঞেসঞ্চ হেতূনং অৰিচ্ছিন্নত্তা.

পুরিমৰচনাপেক্খো ৰুত্তস্সেৰ নিদ্দেসোতি তং-সদ্দস্স পটিনিদ্দেসভাৰমাহ. পাকটীভূতে এৰ অত্থে পৰত্ততি, পাকটীভাৰো চ অঞ্ঞানপেক্খেন সদ্দেন পকাসিতত্তা ৰেদিতব্বো. অনপেক্খনীযো অত্থন্তরব্যাৰটত্তা. অঞ্ঞোতি হেতুসদ্দতো অঞ্ঞো. নিদ্দিসিতব্বপকাসকো ৰুত্তো নত্থি, যো তং-সদ্দেন পটিনিদ্দেসং লভেয্য.

যদি এৰং ‘‘তংসমুট্ঠানান’’ন্তি এত্থ কথন্তি আহ ‘‘হেতুসম্পযুত্তকানন্তি ইমিনা পনা’’তিআদি. তত্থ পন-সদ্দো সতিপি হেতূ হেতুসম্পযুত্তকানং নিদ্দেসভাৰে হেতুসম্পযুত্তকসদ্দে লব্ভমানানং নিদ্দিসিতব্বানং পাকটীকরণসঙ্খাতং হেতুসদ্দতো ৰিসেসং জোতেতি. ‘‘হেতুসম্পযুত্তকান’’ন্তি ইমস্স সমাসপদস্স উত্তরপদত্থপ্পধানত্তমাহ ‘‘পচ্চযুপ্পন্নৰচনেনা’’তি. তেন চ যথাধিপ্পেতস্স অত্থস্স একদেসোৰ ৰুচ্চতি ধম্মানং ৰিসেসনভাৰতোতি আহ ‘‘অসমত্তেনা’’তি. ৰিসেসনং নাম ৰিসেসিতব্বাপেক্খন্তি আহ ‘‘পচ্চযুপ্পন্নৰচনন্তরাপেক্খেনা’’তি. ৰুত্ততায ৰিনা পটিনিদ্দেসতা নত্থীতি ‘‘পুব্বে ৰুত্তেনা’’তি ৰুত্তং.

তং-সদ্দেন ¶ নিদ্দিসিতব্বন্তি ‘‘তংসমুট্ঠানান’’ন্তি এত্থ তং-সদ্দেন নিদ্দিসিতব্বং হেতুসম্পযুত্তকসদ্দে পাকটীভূতং কিং পনাতি পুচ্ছতি. তে হেতূ চেৰ…পে… হেতুসম্পযুত্তকা চ ¶ তং-সদ্দেন নিদ্দিসিতব্বা হেতুসম্পযুত্তকসদ্দে পাকটীভূতাতি সম্বন্ধো. অঞ্ঞথাতি ‘‘যেহি হেতূহী’’তিআদিনা ৰুত্তপ্পকারতো অঞ্ঞথা অঞ্ঞেন পকারেন. তং অঞ্ঞং পকারং দস্সেন্তো ‘‘তে হেতূ…পে… সম্বন্ধে সতী’’তি আহ. ইধাতি অনন্তরং ৰুত্তসম্বন্ধনং ভুম্মনিদ্দেসেন পরামসতি. তেনেৰাতি পঠমেনেৰ হেতুসদ্দেন. তং-সদ্দেন নিদ্দিসিতব্বাতি ‘‘তংসমুট্ঠানান’’ন্তি এত্থ তং-সদ্দেন নিদ্দিসিতব্বা যথা পাকটা, এৰং পুব্বে ‘‘তংসম্পযুত্তকান’’ন্তি ৰুত্তচোদনাযম্পি এৰমেৰ তেনেৰ তং-সদ্দেন নিদ্দিসিতব্বা পাকটা ভৰিতুং অরহন্তি. তথা চ সতি নিদ্দিসিতব্বস্স…পে… ন যুজ্জেয্য. দুৰিধম্পি ৰা হেতুগ্গহণং অপনেত্ৰাতি ‘‘হেতূ হেতুসম্পযুত্তকান’’ন্তি এত্থ কতং দ্ৰিপ্পকারহেতুগ্গহণং অৰিচারেত্ৰা ‘‘তংসম্পযুত্তকানন্তি অৰত্ৰা’’তিআদিনা তং-সদ্দৰচনীযতং চোদেতি, ‘‘নিদ্দিসিতব্বস্স অপাকটত্তা’’তিআদিনা পরিহরতি চ. হেতূ হি পচ্চযাতি ইদং অযং হেতুপচ্চযকথাতি কত্ৰা ৰুত্তং.

তং ন ৰুত্তন্তি চিত্তসমুট্ঠানৰচনং ন ৰুত্তং. তস্সাতি সহজাতপচ্চযস্স. কটত্তারূপস্স পচ্চযভাৰো ন ৰুত্তো ভৰেয্য, ৰুত্তোৰ সো ‘‘ৰিপাকাব্যাকতো একো খন্ধো তিণ্ণন্নং খন্ধানং কটত্তা চ রূপানং সহজাতপচ্চযেন পচ্চযো, তযো খন্ধা একস্স খন্ধস্স কটত্তা চ রূপান’’ন্তিআদিনা, তস্মা চিত্তচেতসিকানং কটত্তারূপপচ্চযভাৰো ন সক্কা নিৰারেতুং. তত্থাতি সহজাতপচ্চযনিদ্দেসে. তত্থ হি ‘‘চিত্তচেতসিকা ধম্মা চিত্তসমুট্ঠানানং রূপানং সহজাতপচ্চযেন পচ্চযো’’তি চিত্তসমুট্ঠানরূপানি এৰ নিদ্দিট্ঠানি. ইধাপীতি ইমস্মিং হেতুপচ্চযনিদ্দেসেপি. এৰং ভৰিতব্বন্তি ‘‘চিত্তসমুট্ঠানান’’ন্তি নিদ্দেসেন ভৰিতব্বং. যদি এৰং কস্মা তথা ন ৰুত্তন্তি আহ ‘‘চিত্তসমুট্ঠানানন্তি পনা’’তিআদি. ৰিসেসিতং হোতি সব্বচিত্তচেতসিকাসমুট্ঠানভাৰেন. ৰচনেনাতি যথাদস্সিতেন সহজাতপচ্চযনিদ্দেসৰচনেন. চিত্তচেতসিকানং পচ্চযভাৰো এৰ হি তত্থ পচ্চযনিদ্দেসে ৰুত্তো, ন চিত্তচেতসিকানং সমুট্ঠানভাৰোতি অধিপ্পাযো.

হেতুআদিপটিবদ্ধতঞ্চ দস্সেতি যদগ্গেন তানি চিত্তপটিবদ্ধৰুত্তীনি, তদগ্গেন তংসম্পযুত্তধম্মপটিবদ্ধৰুত্তীনিপি হোন্তীতি. আরম্মণমেতং হোতীতি ¶ যদেতং কুসলাকুসলচেতনাৰসেন মনোদ্ৰারে চেতনং সেসদ্ৰারেসু কাযৰচীপযোগৰসেন সঙ্কপ্পনং, যঞ্চ কামরাগাদীনং সন্তানে অনুসযনং, এতং আরম্মণং এসো পচ্চযো কম্মৰিঞ্ঞাণস্স ঠিতিযা পতিট্ঠানায. পতিট্ঠিতেতি কম্মং জৰাপেত্ৰা পটিসন্ধিআকড্ঢনসমত্থতাপতিট্ঠাপত্তে কম্মৰিঞ্ঞাণে ৰিরুল়্হেতি ¶ ততো এৰ কম্মৰিঞ্ঞাণতো পটিসন্ধিৰিঞ্ঞাণবীজে ৰিরুল়্হে ৰিরুহন্তেতি অত্থো. অথ ৰা পতিট্ঠা ৰিঞ্ঞাণস্স হোতীতি কিলেসাভিসঙ্খারসঙ্খাতে কম্মৰিঞ্ঞাণস্স ঠিতিযা পৰত্তিযা আরম্মণে পচ্চযে পটিসিদ্ধে আযতিপটিসন্ধিৰিঞ্ঞাণস্স পতিট্ঠা হোতি, তস্মিং পটিসন্ধিৰিঞ্ঞাণে পুনব্ভৰাভিনিব্বত্তিৰসেন পতিট্ঠিতে পতিট্ঠহন্তে ৰিরুল়্হে বীজভাৰেন ৰিরুহন্তে নামরূপস্স অৰক্কন্তি হোতীতি এৰমেত্থ অত্থো ৰেদিতব্বো. তেনাহ ‘‘পটিসন্ধিনামরূপস্স ৰিঞ্ঞাণপচ্চযতা ৰুত্তা’’তি.

পুরিমতরসিদ্ধাযাতি খেত্তভাৰনিব্বত্তিযা পুরেতরমেৰ সিদ্ধায পথৰিযা. অত্তলাভোযেৰ চেত্থ পতিট্ঠানং, ন পটিলদ্ধত্তভাৰানং অৰট্ঠানন্তি দস্সেন্তো ‘‘পতিট্ঠানং কম্মস্স কটত্তা উপ্পত্তীতি ৰুত্তং হোতী’’তি আহ.

সেসরূপানন্তি পটিসন্ধিক্খণে পথৰীধাতুআদীনং সেসরূপানং, পৰত্তে পন তিসন্ততিরূপানম্পি. সহভৰনমত্তং ৰা দস্সেতি. সহভাৰেনপি হি অত্থি কাচি ৰিসেসমত্তা. কত্থচি কত্থচীতি পকতিকালভৰৰিসেসাদিকে. ততিযপকতিযঞ্হি পঠমকপ্পিককালে চ ভাৰকলাপো নত্থি, রূপভৰে কাযকলাপোপি. আদি-সদ্দেন তত্থেৰ ঘানজিৰ্হাকলাপা, কামভৰে চ অন্ধাদীনং চক্খাদিকলাপা সঙ্গয্হন্তি. কত্থচি অভাৰাভাৰতোতি নামরূপোকাসে কত্থচিপি অভাৰাভাৰতো.

তেসন্তি পৰত্তিযং কটত্তারূপাদীনং. ন হি হেতু পৰত্তিযং কটত্তারূপস্স পচ্চযো হোতি, উতুআহারজানং পন সম্ভৰোযেৰ নত্থি. তেন ৰুত্তং ‘‘পচ্চযভাৰপ্পসঙ্গোযেৰ নত্থী’’তি. ন পন লব্ভতি পচ্চযপচ্চনীযে তাদিসস্স ৰারস্স অনুদ্ধটত্তা. ইদন্তি ‘‘পৰত্তিযং কটত্তারূপাদীনং পচ্চযভাৰপটিবাহনতো’’তি ইদং ‘‘হেতূ সহজাতান’’ন্তি অদেসনায পরিহারৰচনং, ঈদিসী পন চোদনা অনোকাসা এৰাতি দস্সেতুং ‘‘ভগৰা পনা’’তিআদি ¶ ৰুত্তং. যো হি ধম্মো যথা ভগৰতা দেসিতো, সো তথেৰ গহেতব্বোতি.

হেতুপচ্চযনিদ্দেসৰণ্ণনা নিট্ঠিতা.

২. আরম্মণপচ্চযনিদ্দেসৰণ্ণনা

২. উপ্পজ্জনক্খণেযেৰাতি ¶ এত্থ উপ্পাদতো পট্ঠায যাৰ ভঙ্গা উদ্ধং পজ্জনং গমনং পৰত্তনং উপ্পজ্জনং, তস্স খণো, তস্মিং উপ্পজ্জনক্খণেতি এৰং ৰা অত্থো দট্ঠব্বো. এৰঞ্হি সতি উপ্পজ্জনসদ্দেন উপ্পন্নসদ্দেন ৰিয সব্বে পৰত্তমানভাৰা সঙ্গহিতা হোন্তি, ন উপ্পাদমত্তং. তেনাতি চক্খুৰিঞ্ঞাণাদীনং ৰত্তমানক্খণেযেৰ রূপাদীনং আরম্মণপচ্চযত্তেন. অনালম্বিযমানানন্তি সব্বেন সব্বং নালম্বিযমানানন্তি অত্থো. অঞ্ঞথা হি যথাৰুত্তানং রূপাদীনং যদা আরম্মণপচ্চযত্তাভাৰো, তদা অনালম্বিযমানতাৰাতি. সব্বরূপানীতি সব্বানি রূপাযতনানি, যত্তকানি তানি আপাথগতানি যোগ্যদেসে ঠিতানি, তানি সব্বানীতি অত্থো. সহ ন হোন্তীতি একজ্ঝং আরম্মণং ন হোন্তি. সতিপি হি অনেকেসং একজ্ঝং আপাথগমনে যত্থ যত্থ পুব্বাভোগো, তং তংযেৰ আরম্মণং হোতি, ন সব্বং. নীলাদিসঙ্ঘাতৰসেন চেতং ৰুত্তং, ন পচ্চেকং নীলাদিরূপাযতনমত্তৰসেন. সমুদিতানিযেৰ হি রূপাযতনানি চক্খুৰিঞ্ঞাণস্স আরম্মণং, ন ৰিসুং ৰিসুন্তি ধাতুৰিভঙ্গৰণ্ণনাযং দস্সিতোযং নযো. যং পন অট্ঠকথাযং ‘‘তে তে ৰিসুং ৰিসুং আরম্মণপচ্চযো হোন্তী’’তিপি ৰুত্তং, তম্পি যথাৰুত্তমেৰত্থং সন্ধায ৰুত্তং. অঞ্ঞথা রূপাযতনং মনিন্দ্রিযগোচরং নাম ন সিযা. সদ্দাদীসুপি এসেৰ নযো. তেনেৰাহ ‘‘তথা সদ্দাদযোপী’’তি. ‘‘সহ ন হোন্তী’’তি ৰুত্তমত্থং পাল়িযা ৰিভাৰেতুং ‘‘যং যন্তি হি ৰচনং রূপাদীনি ভিন্দতী’’তি আহ.

‘‘যে এতে’’তিআদিকো পুরিমো অত্থো, ‘‘ন একতো হোন্তী’’তিআদিকো পন পচ্ছিমো, ‘‘সব্বারম্মণতাদিৰসেন ৰা ইধাপি অত্থো গহেতব্বো’’তি কস্মা ৰুত্তং. ন হি ‘‘যং যং ৰা পনারব্ভা’’তি ইমিস্সা পাল়িযা ৰিয ‘‘যং যং ধম্মং আরব্ভা’’তি ইমস্স পাঠস্স পুরতো মনোৰিঞ্ঞাণস্স সব্বারম্মণতা নাগতা. ৰুত্তঞ্হি ‘‘সব্বে ধম্মা মনোৰিঞ্ঞাণধাতুযা তংসম্পযুত্তকানঞ্চ ধম্মানং আরম্মণপচ্চযেন পচ্চযো’’তি. ন ¶ হি অনন্তরমেৰ পাল়িযং সরূপতো আগতমত্থং গহেত্ৰা পদন্তরং সংৰণ্ণেতব্বং. তত্থ হি ‘‘রূপারম্মণং ৰা’’তিআদিনা নিযমৰসেন ছ আরম্মণানি ৰত্ৰা ‘‘যং যং ৰা পনারব্ভা’’তি ৰচনং সব্বারম্মণতাদিদস্সনন্তি যুত্তমেৰেতন্তি, ইধ পন সব্বারম্মণতং ৰত্ৰা পুন ‘‘যং যং ধম্মং আরব্ভা’’তি ৰুচ্চমানং সব্বারম্মণতাদস্সনন্তি কথমিদং যুজ্জেয্য? কমাভাৰোপি ‘‘সব্বে ধম্মা’’তি অৰিসেসৰচনেনেৰ সিদ্ধো আরম্মণানুপুব্বিযাৰ অগ্গহিতত্তা. ন হি মনোধাতুযা ৰিয ¶ মনোৰিঞ্ঞাণধাতুযা ইধ আরম্মণানি অনুপুব্বতো গহিতানি, তত্থ ৰিয ৰা এতেনেৰ নিযমাভাৰোপি সংৰণ্ণিতোতি ৰেদিতব্বো. তস্মা অট্ঠকথাযং ৰুত্তনযেনেৰেত্থ অত্থো গহেতব্বো.

পৰত্তন্তি পৰত্তনং. নদিযা সন্দনং পব্বতস্স ঠানন্তি হি ৰুত্তা অৰিরতমৰিচ্ছেদনাযং তথাপৰত্তিকিরিযাৰ. তেনাহ ‘‘অৰিরতং অৰিচ্ছিন্নং সন্দন্তী’’তি. এৰন্তি যথা ‘‘সন্দন্তী’’তি ৰত্তমানৰচনং ৰুত্তং, এৰং ‘‘যে যে ধম্মা উপ্পজ্জন্তী’’তি সব্বসঙ্গহৰসেন উপ্পজ্জনস্স গহিতত্তা আরম্মণপৰগ্গতো ‘‘উপ্পজ্জন্তী’’তি ৰত্তমানৰচনং ৰুত্তন্তি অত্থো. তেনাহ অট্ঠকথাযং ‘‘সব্বকালসঙ্গহৰসেনা’’তিআদি. তথা চ ৰুত্তং ‘‘অতীতানাগত…পে… অধিপ্পাযো’’তি, অতীতানাগতপচ্চুপ্পন্নানং চিত্তচেতসিকানন্তি অত্থো. সমুদাযৰসেনাতি চিত্তেন রাসীকরণৰসেন. অধিপ্পাযোতি ইমিনা ৰত্তমানুপচারেন ৰিনাৰ ‘‘যে যে ধম্মা উপ্পজ্জন্তী’’তি এত্থ ৰত্তমানত্থং সক্কা যোজেতুন্তি ইমমত্থং উল্লিঙ্গেতি. তেনাহ ‘‘ইমে পনা’’তিআদি. যদিপি পচ্চযধম্মা কেচি অতীতা অনাগতাপি হোন্তি, পচ্চযুপ্পন্নধম্মো পন পচ্চুপ্পন্নো এৰাতি আহ ‘‘অতীতানাগতানং ন হোন্তী’’তি. উপ্পাদে ৰা হি পচ্চযুপ্পন্নস্স পচ্চযেন ভৰিতব্বং ঠিতিযং ৰাতি. তস্মাতি যস্মা অতীতানাগতা পরমত্থতো নত্থি, তস্মা. তেসূতি পচ্চযুপ্পন্নেসু. তংতংপচ্চযাতি তং তং রূপাদিআরম্মণং পচ্চযো এতেসন্তি তংতংপচ্চযা. অযমত্থো দস্সিতো হোতি সমানসভাৰত্তা. ন হি অত্থাভেদেন সভাৰভেদো অত্থি. ন পন তংতংপচ্চযৰন্ততা দস্সিতা হোতি অতীতানাগতেসু নিপ্পরিযাযেন তদভাৰতো. যস্মা পচ্চযৰন্তো পচ্চযুপ্পন্নাযেৰ, তে চ পচ্চুপ্পন্নাযেৰাতি.

যং ¶ যং ধম্মং তে তে ধম্মাতি যংনিমিত্তাযংৰচনভেদো, তং দস্সেতুং ‘‘এত্থ চা’’তিআদি আরদ্ধং. রূপারূপধম্মা হি কলাপতো পৰত্তমানাপি চিত্তচেতসিকানং কদাচি ৰিসুং ৰিসুং আরম্মণং হোন্তি, কদাচি একজ্ঝং, ন এত্থ নিযমো অত্থি, পুরিমাভোগোযেৰ পন তথাগহণে কারণং. তযিমং দীপেতুং ভগৰতা যংৰচনভেদো কতোতি চ সক্কা ৰত্তুং, যস্মা পন এককলাপপরিযাপন্নানম্পি ধম্মানং একজ্ঝং গহণে ন সমুদাযো গয্হতি তদাভোগাভাৰতো, অথ খো সমুদিতা ধম্মা এৰাতি সহগ্গহণম্পি ৰিসুংগহণগতিকং, তস্মা ৰিসুংগহণসব্ভাৰদীপনত্থং ‘‘যং য’’ন্তি ৰত্ৰা সতিপি ৰিসুংগহণে তে সব্বে একজ্ঝং আরম্মণপচ্চযো হোন্তীতি দস্সনত্থং ‘‘তে তে’’তি ৰুত্তন্তি ইমমত্থং দস্সেন্তো ‘‘চত্তারো হি খন্ধা’’তিআদিমাহ. তত্থ ৰেদনাদীসূতি ৰেদনাদীসু চতূসু খন্ধেসু অভিন্দিত্ৰা গহণৰসেন, ভিন্দিত্ৰা পন গহণৰসেন ফস্সাদীসু. যো ¶ চ রূপাদিকোতি ইদং ৰিঞ্ঞাণন্তরস্স সাধারণারম্মণৰসেন ৰুত্তং, যে চ অনেকে ফস্সাদযোতি ইদং অসাধারণারম্মণৰসেন. তে সব্বেতি তে সাধারণাসাধারণপ্পভেদে সব্বেপি আরম্মণধম্মে. একেকমেৰ আরব্ভ উপ্পজ্জন্তীতি এত্থ যং ৰত্তব্বং, তং হেট্ঠা ৰুত্তমেৰ. রূপারম্মণধম্মা চ অনেকে নীলাদিভেদতো. তথাতি অনেকে. তেন ভেরিসদ্দাদিকে, মূলগন্ধাদিকে, মূলরসাদিকে, কথিনসম্ফস্সাদিকে, ৰেদনাদিকে চ সঙ্গণ্হাতি. অনেকেতি হি ইমিনা অনেককলাপগতানংযেৰ ৰণ্ণাদীনং ইন্দ্রিযৰিঞ্ঞাণারম্মণভাৰমাহ. সামঞ্ঞতো হি ৰুত্তং যথারহং ভিন্দিত্ৰা নিদস্সিতব্বং হোতীতি.

কুসলৰিপাকস্সাতি কুসলস্স ৰিপাকস্স চ. ন হি নিব্বানং পুব্বে নিৰুত্থন্তি ইদং ‘‘দিট্ঠনিব্বানোযেৰা’’তিআদিনা ৰক্খমানমেৰ অত্থং হদযে ঠপেত্ৰা ৰুত্তং. পুব্বেনিৰাসানুস্সতিঞাণেন হি নিব্বানৰিভাৰনং অদিট্ঠসচ্চস্স ৰা সিযা দিট্ঠসচ্চস্সপি ৰা. তত্থ অদিট্ঠসচ্চেন তাৰ তং ৰিভাৰেতুমেৰ ন সক্কা অপ্পটিৰিদ্ধত্তা, ইতরস্স পন পগেৰ ৰিভূতমেৰাতি তং তেন ৰিভাৰিতং নাম হোতীতি অধিপ্পাযো. এত্থ চ ‘‘ন চ তং ৰুত্ত’’ন্তি ইমিনা পুব্বেনিৰাসানুস্সতিঞাণস্স নিব্বানারম্মণকরণাভাৰং আগমতো দস্সেত্ৰা ‘‘ন হি নিব্বান’’ন্তিআদিনা যুত্তিতো দস্সেতি. তত্থ ‘‘ন পুব্বে নিৰুত্থং অসঙ্খতত্তা’’তি কস্মা ৰুত্তং? গোচরাসেৰনায আসেৰিতস্সপি নিৰুত্থন্তি ইচ্ছিতত্তা. দিট্ঠসচ্চোযেৰ হি পুব্বেনিৰাসানুস্সতিঞাণেন ¶ নিব্বানং ৰিভাৰেতি, ন অদিট্ঠসচ্চো. তং পন ঞাণং খন্ধে ৰিয খন্ধপটিবদ্ধেপি ৰিভাৰেতীতি নিব্বানারম্মণখন্ধৰিভাৰনে নিব্বানম্পি ৰিভাৰেতীতি সক্কা ৰিঞ্ঞাতুং. এতেন পযোজনাভাৰচোদনা পটিক্খিত্তাতি দট্ঠব্বা. এৰং অনাগতংসঞাণেপি যোজেতব্বন্তি যথা পুব্বেনিৰাসানুস্সতিঞাণস্স নিব্বানারম্মণতা দস্সিতা, এৰং অনাগতংসঞাণেপি যথারহং যোজেতব্বং. তত্থ পন ‘‘খন্ধপটিবদ্ধৰিভাৰনকালে’’তিআদিনা যোজনা ৰেদিতব্বা. তেন ৰুত্তং ‘‘যথারহ’’ন্তি. কস্সচি অভিঞ্ঞাপ্পত্তস্সপি রূপাৰচরস্স, পগেৰ ইতরস্স.

আরম্মণপচ্চযনিদ্দেসৰণ্ণনা নিট্ঠিতা.

৩. অধিপতিপচ্চযনিদ্দেসৰণ্ণনা

৩. ধুরসহচরিযতো ¶ ধোরেয্যো ‘‘ধুর’’ন্তি ৰুত্তোতি আহ ‘‘ধুরন্তি ধুরগ্গাহ’’ন্তি. ছন্দস্স পুব্বঙ্গমতাসিদ্ধং পাসংসভাৰং উপাদায অট্ঠকথাযং ‘‘জেট্ঠক’’ন্তি ৰুত্তন্তি তমেৰত্থং দীপেন্তো ‘‘সেট্ঠ’’ন্তি আহ. তথা হি ৰুত্তং অট্ঠসালিনিযং ‘‘ছন্দং পুব্বঙ্গমং কত্ৰা আযূহিত’’ন্তি. পুরিমছন্দস্সাতি ‘‘ছন্দাধিপতী’’তি পুরিমস্মিং পদে নিদ্দেসৰসেন ৰুত্তস্স ছন্দসদ্দস্স সমানরূপেন সদিসাকারেন. তদনন্তরং নিদ্দিট্ঠেনাতি তস্স পুরিমস্স ছন্দসদ্দস্স অনন্তরং নিদ্দেসৰসেন ৰুত্তেন. ততো এৰ চ তংসমানত্থতায চ তংসম্বন্ধেন ‘‘ছন্দসম্পযুত্তকান’’ন্তি এত্থ ছন্দসদ্দেনেৰ অধিপতিসদ্দরহিতেনাতি অত্থো. পচ্চযভূতস্সাতি অধিপতিপচ্চযভূতস্স. সম্পযুত্তকৰিসেসনভাৰোতি অত্তনা সম্পযুত্তধম্মানং সো এৰ অধিপতিপচ্চযতাসঙ্খাতো ৰিসেসনভাৰো. এস নযোতি ইমিনা ‘‘ৰীরিযাধিপতি ৰীরিযসম্পযুত্তকানন্তিআদীসু পুরিমৰীরিযস্স সমানরূপেনা’’তিআদিনা ৰত্তব্বং অত্থৰচনং অতিদিসতি.

কুসলাব্যাকতানং পৰত্তিন্তি কুসলাব্যাকতানং অধিপতীনং পৰত্তনাকারং. অলদ্ধং আরম্মণং লদ্ধব্বং লব্ভনীযং, লদ্ধুং ৰা সক্কুণেয্যং, দুতিযে পন অত্থে লাভমরহতীতি লদ্ধব্বং. অৰঞ্ঞাতন্তি পগেৰ অনৰঞ্ঞাতন্তি অত্থো.

অপ্পনাপ্পত্তা কুসলকিরিযধম্মা মহাবলা সাধিপতিকা এৰ হোন্তি, তথা মিচ্ছত্তনিযতাপীতি আহ ‘‘অপ্পনাসদিসা…পে… নুপ্পজ্জন্তী’’তি. অপ্পনাসদিসাতি ¶ অপ্পনাপ্পত্তসদিসা. কম্মকিলেসাৰরণভূতা চ তেতি তে মিচ্ছত্তনিযতধম্মা কম্মাৰরণভূতা, যে আনন্তরিযপ্পকারা কিলেসাৰরণভূতা, যে নিযতমিচ্ছাদিট্ঠিধম্মা, সম্পযুত্তচেতনায পনেত্থ কিলেসাৰরণপক্খিকতা দট্ঠব্বা আনন্তরিযচেতনাসম্পযুত্তস্স পটিঘস্স কম্মাৰরণপক্খিকতা ৰিয. পচ্চক্খগতি অনন্তরতায ৰিনা ভাৰিনীতি ৰুত্তং ‘‘পচ্চক্খসগ্গানং কামাৰচরদেৰানম্পী’’তি. তেন তেসু আনন্তরিযা ৰিয অসম্ভাৰিনো অহেতুকাভিনিৰেসাদযোপীতি দস্সেতি.

তিৰিধোপি কিরিযারম্মণাধিপতীতি এত্থ অযং কিরিযারম্মণাধিপতীতি অজ্ঝত্তারম্মণো অধিপ্পেতো, উদাহু বহিদ্ধারম্মণোতি উভযথাপি ন সম্ভৰো এৰাতি দস্সেন্তো ‘‘কামাৰচরাদিভেদতো পনা’’তিআদিমাহ. তত্থ পরসন্তানগতানং সারম্মণধম্মানং অধিপতিপচ্চযতা ¶ নত্থীতি সম্বন্ধো. অভাৰতোতি অৰচনতো. অৰচনঞ্হি নাম যথাধম্মসাসনে অভিধম্মে অভাৰো এৰাতি এতেনেৰ অনুদ্ধটতাপি অৰুত্ততো ৰেদিতব্বা. অজ্ঝত্তারম্মণবহিদ্ধারম্মণদ্ৰযৰিনিমুত্তস্স সারম্মণধম্মস্স অভাৰতো নত্থীতি ৰিঞ্ঞাযতীতি ৰত্তব্বে তমেৰ ৰিঞ্ঞাযমানতং সম্ভাৰেন্তো ‘‘নত্থীতি ৰিঞ্ঞাযমানেপী’’তি আহ. তেন ৰুত্তং ‘‘বহিদ্ধা খন্ধে’’তিআদি. রূপে এৰ ভৰিতুং অরহতি এদিসেসু ঠানেসু অরূপে অসম্ভৰতোতি অধিপ্পাযো. অসম্ভৰতো চ যথাৰুত্তপাল়িঅনুসারতোতি ৰেদিতব্বন্তি. ‘‘ৰিচারিত’’ন্তি কস্মা ৰুত্তং, ননু ‘‘অতীতারম্মণে অনাগতে খন্ধে গরুং কত্ৰা অস্সাদেতী’’তিআদিৰচনতো অরূপেপি এদিসেসু ঠানেসু খন্ধসদ্দো পৰত্ততেৰ. আৰজ্জনকিরিযসব্ভাৰতো পনাতি ইদং যথাদস্সিতপাল়িযা ৰিরোধপরিহরণাধিপ্পাযেন ৰুত্তং, অৰচনং পন কত্থচি ৰিনেয্যজ্ঝাসযেন, কত্থচি নযদস্সনেন হোতীতি কুতো ৰিরোধাৰসরো.

অধিপতিপচ্চযনিদ্দেসৰণ্ণনা নিট্ঠিতা.

৪. অনন্তরপচ্চযনিদ্দেসৰণ্ণনা

৪. যথাৰুত্তা নিরোধানন্তরসুঞ্ঞতা নিরোধপ্পত্ততা ওকাসদানৰিসেসো, অত্তনো অনুরূপচিত্তুপ্পাদনসমত্থতা চিত্তনিযমহেতুতা, তত্থ ¶ অনন্তরুপ্পাদনসমত্থতা চ সণ্ঠানাভাৰতো সুট্ঠুতরং নিরন্তরুপ্পাদনসমত্থতা চ চিত্তনিযমহেতুৰিসেসো দট্ঠব্বো. ধাতুৰসেনাতি ৰিঞ্ঞাণধাতুমনোধাতুমনোৰিঞ্ঞাণধাতুৰসেন. এত্তকা এৰ হি ধাতুযো ভিন্নসভাৰা অনন্তরপচ্চযতায নিযমেত্ৰা ৰত্তব্বা, অভিন্নসভাৰা পন ৰিসেসাভাৰতো পুরিমতামত্তংযেৰ ৰিসেসং পুরক্খত্ৰা ৰত্তব্বাতি তা কুসলাদিভেদেন তথা ৰুত্তা. তেনাহ ‘‘কুসলাদিৰসেন চা’’তি. যা পন মনোধাতুমনোৰিঞ্ঞাণধাতুৰসেন অনন্তরপচ্চযতা ৰত্তব্বা, তত্থ মনোৰিঞ্ঞাণধাতু মনোধাতুযা অনন্তরপচ্চযেন পচ্চযোতি ৰুচ্চমানো সম্মোহো সিযা, পুরে মনোধাতুযা অনন্তরপচ্চযভাৰেন ৰুত্তা, ইদানি মনোৰিঞ্ঞাণধাতু মনোধাতুযাতি পচ্চযপচ্চযুপ্পন্নৰিসেসা ন ৰিঞ্ঞাযেয্য, মনোধাতুযা পন চক্খুৰিঞ্ঞাণাদিধাতূনং অনন্তরপচ্চযভাৰে ৰুচ্চমানে নিযমো নত্থি. তেনাহ ‘‘মনোধাতু চক্খুৰিঞ্ঞাণধাতুযাতি চা’’তি ¶ . তথেৰাতি নিযমাভাৰতো এৰাতি অত্থো. তস্মাতি যস্মা ইতো অঞ্ঞথা দেসনায পচ্চযপচ্চযুপ্পন্নানং ৰিসেসাভাৰো চিত্তৰিসেসদস্সনৰিচ্ছেদো নিযমাভাৰো চাতি ইমে দোসা আপজ্জন্তি, তস্মা. নিদস্সনেনাতি ধাতুৰসেন নিদস্সনেন. নযং দস্সেত্ৰাতি ‘‘মনোৰিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং অনন্তরপচ্চযেন পচ্চযো’’তি এৰমাদিকস্স অনন্তরপচ্চযতাগ্গহণস্স নযং দস্সেত্ৰা. নিরৰসেসদস্সনত্থন্তি নিরৰসেসস্স অনন্তরপচ্চযভাৰিনো চিত্তুপ্পাদস্স দস্সনত্থং.

সদিসকুসলানন্তি সমানকুসলানং, সমানতা চেত্থ একৰীথিপরিযাপন্নতায ৰেদিতব্বা. তেনেৰাহ ‘‘ভূমিভিন্নানম্পি পচ্চযভাৰো ৰুত্তো হোতী’’তি. সমানৰীথিতা চ যস্মা সমানৰেদনা সমানহেতুকা চ হোন্তি, তস্মা ‘‘ৰেদনায ৰা হেতূহি ৰা সদিসকুসলান’’ন্তি আহ. ৰা-সদ্দো চেত্থ অনিযমত্থো. তেন ঞাণসঙ্খারাদিভেদস্সপি ৰিকপ্পনৰসেন সঙ্গহো দট্ঠব্বো. চুতিপি গহিতা তংসভাৰত্তা. ভৰঙ্গচিত্তমেৰ হি পরিযোসানে ‘‘চুতী’’তি ৰুচ্চতি. কুসলাকুসলানন্তরঞ্চ কদাচি সা উপ্পজ্জতীতি তদারম্মণম্পি গহিতন্তি দট্ঠব্বং, কিরিযজৰনানন্তরং তদারম্মণুপ্পত্তিযন্তি অধিপ্পাযো.

কামাৰচরকিরিযায ¶ আৰজ্জনস্সাতি অযমেত্থ অত্থো অধিপ্পেতোতি দস্সেন্তো ‘‘আৰজ্জনগ্গহণেন কামাৰচরকিরিযং ৰিসেসেতী’’তি আহ. তমেৰ হি অত্থং পাকটতরং কাতুং ‘‘কামাৰচরৰিপাকো’’তিআদি ৰুত্তং. ৰোট্ঠব্বনম্পি গহিতং সন্তীরণানন্তরত্তাতি অধিপ্পাযো.

অনন্তরপচ্চযনিদ্দেসৰণ্ণনা নিট্ঠিতা.

৬. সহজাতপচ্চযনিদ্দেসৰণ্ণনা

৬. পোরাণপাঠোতি পুরাতনো অট্ঠকথাপাঠো. ইমস্সাতি ইমস্স পদস্স. অৰুত্তস্সাতি পাল়িযং অৰুত্তস্স. যদিপি সহগতসদ্দস্স অত্থসংৰণ্ণনাযং সংসট্ঠসদ্দস্স ৰিয সমানত্থস্সপি কত্থচি সদ্দন্তরস্স অত্থো ৰুচ্চতি পরিযাযৰিসেসবোধনত্থং, তথাপি ন মূলসদ্দস্স অত্থো ৰিভাৰিতো ¶ হোতীতি দস্সেন্তো আহ ‘‘ন চ…পে… হোতী’’তি. ‘‘অঞ্ঞমঞ্ঞ’’ন্তি চ ‘‘অঞ্ঞঅঞ্ঞ’’ন্তি ৰত্তব্বে ম-কারাগমং কত্ৰা নিদ্দেসো, কম্মব্যতিহারে চেতং পদং, তস্মা ইতরেতরন্তি ৰুত্তং হোতি. পচ্চযপচ্চযুপ্পন্নানং একস্মিংযেৰ খণে পচ্চযুপ্পন্নপচ্চযভাৰস্স ইচ্ছিতত্তা যো হি যস্স পচ্চযো যস্মিং খণে, তস্মিংযেৰ খণে সোপি তস্স পচ্চযোতি অযমেত্থ অঞ্ঞমঞ্ঞপচ্চযতা. তথা হি অট্ঠকথাযং ‘‘অঞ্ঞো অঞ্ঞস্সা’’তি ৰত্ৰা ‘‘ইমিনা…পে… দীপেতী’’তি ৰুত্তং. ওক্কমনং পৰিসনন্তি অত্থো. আসনক্খণে হি ধম্মা পুরিমভৰতো ইমং ভৰং পৰিসন্তা ৰিয হোন্তি. তেন ৰুত্তং ‘‘পরলোকতো ইমং লোকং আগন্ত্ৰা পৰিসন্তং ৰিয উপ্পজ্জতী’’তি. তস্মা অৰিসেসেন পটিসন্ধি ওক্কন্তিসদ্দাভিধেয্যাতি অধিপ্পাযেন ৰুত্তং ‘‘ওক্কন্তি…পে… অধিপ্পাযেনাহা’’তি. তংনিৰারণত্থন্তি তস্স খণন্তরে রূপীনং সহজাতপচ্চযভাৰস্স ‘‘কঞ্চি কালে ন সহজাতপচ্চযেন পচ্চযো’’তি নিৰারণত্থং. তেন পদদ্ৰযেন সমানেসু পচ্চযপচ্চযুপ্পন্নধম্মেসু পুরিমতো পচ্ছিমস্স ৰিসেসমত্থং দস্সেতি.