📜

নমো তস্স ভগৰতো অরহতো সম্মাসম্বুদ্ধস্স

অভিধম্মাৰতারো

গন্থারম্ভকথা

১.

অনন্তকরুণাপঞ্ঞং ¶ ¶ ¶ , তথাগতমনুত্তরং;

ৰন্দিত্ৰা সিরসা বুদ্ধং, ধম্মং সাধুগণম্পি চ.

২.

পণ্ডুকম্বলনামায, সিলাযাতুলৰিক্কমো;

নিসিন্নো দেৰরাজস্স, ৰিমলে সীতলে তলে.

৩.

যং দেৰদেৰো দেৰানং, দেৰদেৰেহি পূজিতো;

দেসেসি দেৰলোকস্মিং, ধম্মং দেৰপুরক্খতো.

৪.

তত্থাহং ¶ পাটৰত্থায, ভিক্খূনং পিটকুত্তমে;

অভিধম্মাৰতারন্তু, মধুরং মতিৰড্ঢনং.

৫.

তাল়ং মোহকৰাটস্স, ৰিঘাটনমনুত্তরং;

ভিক্খূনং পৰিসন্তানং, অভিধম্মমহাপুরং.

৬.

সুদুত্তরং তরন্তানং, অভিধম্মমহোদধিং;

সুদুত্তরং তরন্তানং, তরংৰ মকরাকরং.

৭.

আভিধম্মিকভিক্খূনং, হত্থসারমনুত্তরং;

পৰক্খামি সমাসেন, তং সুণাথ সমাহিতা.

১. পঠমো পরিচ্ছেদো

চিত্তনিদ্দেসো

৮.

চিত্তং ¶ চেতসিকং রূপং, নিব্বানন্তি নিরুত্তরো;

চতুধা দেসযী ধম্মে, চতুসচ্চপ্পকাসনো.

তত্থ চিত্তন্তি ৰিসযৰিজাননং চিত্তং, তস্স পন কো ৰচনত্থো? ৰুচ্চতে – সব্বসঙ্গাহকৰসেন পন চিন্তেতীতি চিত্তং, অত্তসন্তানং ৰা চিনোতীতিপি চিত্তং.

৯.

ৰিচিত্তকরণা ¶ চিত্তং, অত্তনো চিত্ততায ৰা;

পঞ্ঞত্তিযম্পি ৰিঞ্ঞাণে, ৰিচিত্তে চিত্তকম্মকে;

চিত্তসম্মুতি দট্ঠব্বা, ৰিঞ্ঞাণে ইধ ৰিঞ্ঞুনা.

তং পন সারম্মণতো একৰিধং, সৰিপাকাৰিপাকতো দুৰিধং. তত্থ সৰিপাকং নাম কুসলাকুসলং, অৰিপাকং অব্যাকতং. কুসলাকুসলাব্যাকতজাতিভেদতো তিৰিধং.

তত্থ ¶ কুসলন্তি পনেতস্স কো ৰচনত্থো?

১০.

কুচ্ছিতানং সলনতো, কুসানং লৰনেন ৰা;

কুসেন লাতব্বত্তা ৰা, কুসলন্তি পৰুচ্চতি.

১১.

ছেকে কুসলসদ্দোযং, আরোগ্যে অনৰজ্জকে;

দিট্ঠো ইট্ঠৰিপাকেপি, অনৰজ্জাদিকে ইধ.

তস্মা অনৰজ্জইট্ঠৰিপাকলক্খণং কুসলং, অকুসলৰিদ্ধংসনরসং, ৰোদানপচ্চুপট্ঠানং. ৰজ্জপটিপক্খত্তা অনৰজ্জলক্খণং ৰা কুসলং, ৰোদানভাৰরসং, ইট্ঠৰিপাকপচ্চুপট্ঠানং, যোনিসোমনসিকারপদট্ঠানং. সাৰজ্জানিট্ঠৰিপাকলক্খণমকুসলং. তদুভযৰিপরীতলক্খণমব্যাকতং, অৰিপাকারহং ৰা.

তত্থ ¶ কুসলচিত্তং একৰীসতিৰিধং হোতি, তদিদং ভূমিতো চতুব্বিধং হোতি – কামাৰচরং, রূপাৰচরং, অরূপাৰচরং, লোকুত্তরঞ্চেতি.

তত্থ কামাৰচরকুসলচিত্তং ভূমিতো একৰিধং, সৰত্থুকাৰত্থুকভেদতো দুৰিধং, হীনমজ্ঝিমপণীতভেদতো তিৰিধং, সোমনস্সুপেক্খাঞাণপ্পযোগভেদতো অট্ঠৰিধং হোতি. সেয্যথিদং – সোমনস্সসহগতং ঞাণসম্পযুত্তং অসঙ্খারিকমেকং, সসঙ্খারিকমেকং, সোমনস্সসহগতং ঞাণৰিপ্পযুত্তং অসঙ্খারিকমেকং, সসঙ্খারিকমেকং, উপেক্খাসহগতং ঞাণসম্পযুত্তং অসঙ্খারিকমেকং, সসঙ্খারিকমেকং, উপেক্খাসহগতং ঞাণৰিপ্পযুত্তং অসঙ্খারিকমেকং, সসঙ্খারিকমেকন্তি ইদং অট্ঠৰিধম্পি কামাৰচরকুসলচিত্তং নাম.

১২.

উদ্দানতো দুৰে কামা, ক্লেসৰত্থুৰসা পন;

কিলেসো ছন্দরাগোৰ, ৰত্থু তেভূমৰট্টকং.

১৩.

কিলেসকামো ¶ কামেতি, ৰত্থু কামীযতীতি চ;

সিজ্ঝতি দুৰিধোপেস, কামো ৰো কারকদ্ৰযে.

১৪.

যস্মিং ¶ পন পদেসে সো, কামোযং দুৰিধোপি চ;

সম্পত্তীনং ৰসেনাৰ-চরতীতি চ সো পন.

১৫.

পদেসো চতুপাযানং, ছন্নং দেৰানমেৰ চ;

মনুস্সানং ৰসেনেৰ, একাদসৰিধো পন.

১৬.

কামোৰচরতীতেত্থ, কামাৰচরসঞ্ঞিতো;

অস্সাভিলক্খিতত্তা হি, সসত্থাৰচরো ৰিয.

১৭.

স্ৰাযং রূপভৰো রূপং, এৰং কামোতি সঞ্ঞিতো;

উত্তরস্স পদস্সেৰ, লোপং কত্ৰা উদীরিতো.

১৮.

তস্মিং ¶ কামে ইদং চিত্তং, সদাৰচরতীতি চ;

কামাৰচরমিচ্চেৰং, কথিতং কামঘাতিনা.

১৯.

পটিসন্ধিং ভৰে কামে, অৰচারযতীতি ৰা;

কামাৰচরমিচ্চেৰং, পরিযাপন্নন্তি তত্র ৰা.

২০.

ইদং অট্ঠৰিধং চিত্তং, কামাৰচরসঞ্ঞিতং;

দসপুঞ্ঞক্রিযৰত্থু-ৰসেনেৰ পৰত্ততি.

২১.

দানং সীলং ভাৰনা পত্তিদানং,

ৰেয্যাৰচ্চং দেসনা চানুমোদো;

দিট্ঠিজ্জুত্তং সংসুতিচ্চাপচাযো,

ঞেয্যো এৰং পুঞ্ঞৰত্থুপ্পভেদো.

২২.

গচ্ছন্তি সঙ্গহং দানে, পত্তিদানানুমোদনা;

তথা সীলমযে পুঞ্ঞে, ৰেয্যাৰচ্চাপচাযনা.

২৩.

দেসনা সৰনং দিট্ঠি-উজুকা ভাৰনামযে;

পুন তীণেৰ সম্ভোন্তি, দস পুঞ্ঞক্রিযাপি চ.

২৪.

সব্বানুস্সতিপুঞ্ঞঞ্চ, পসংসা সরণত্তযং;

যন্তি দিট্ঠিজুকম্মস্মিং, সঙ্গহং নত্থি সংসযো.

২৫.

পুরিমা ¶ মুঞ্চনা চেৰ, পরা তিস্সোপি চেতনা;

হোতি দানমযং পুঞ্ঞং, এৰং সেসেসু দীপযে.

ইদানি অস্স পনট্ঠৰিধস্সাপি কামাৰচরকুসলচিত্তস্স অযমুপ্পত্তিক্কমো ৰেদিতব্বো. যদা হি যো দেয্যধম্মপ্পটিগ্গাহকাদিসম্পত্তিং, অঞ্ঞং ৰা সোমনস্সহেতুং আগম্ম হট্ঠপহট্ঠো ‘‘অত্থি দিন্ন’’ন্তি আদিনযপ্পৰত্তং সম্মাদিট্ঠিং পুরক্খত্ৰা পরেহি অনুস্সাহিতো দানাদীনি পুঞ্ঞানি করোতি, তদাস্স সোমনস্সসহগতং ঞাণসম্পযুত্তং ¶ অসঙ্খারিকং ¶ পঠমং মহাকুসলচিত্তং উপ্পজ্জতি. যদা পন ৰুত্তনযেনেৰ হট্ঠপহট্ঠো সম্মাদিট্ঠিং পুরক্খত্ৰা পরেহি উস্সাহিতো করোতি, তদাস্স তমেৰ চিত্তং সসঙ্খারিকং হোতি. ইমস্মিং পনত্থে সঙ্খারোতি অত্তনো ৰা পরস্স ৰা পৰত্তস্স পুব্বপ্পযোগস্সাধিৰচনং. যদা পন ঞাতিজনস্স পটিপত্তিদস্সনেন জাতপরিচযা বালকা ভিক্খূ দিস্ৰা সোমনস্সজাতা সহসা যং কিঞ্চি হত্থগতং দদন্তি ৰা ৰন্দন্তি ৰা, তদা তেসং ততিযচিত্তমুপ্পজ্জতি. যদা পন তে ‘‘দেথ ৰন্দথ, অয্যে’’তি ৰদন্তি, এৰং ঞাতিজনেন উস্সাহিতা হুত্ৰা হত্থগতং দদন্তি ৰা ৰন্দন্তি ৰা, তদা তেসং চতুত্থচিত্তমুপ্পজ্জতি. যদা পন দেয্যধম্মপ্পটিগ্গাহকাদীনং অসম্পত্তিং ৰা অঞ্ঞেসং ৰা সোমনস্সহেতূনং অভাৰং আগম্ম চতূসুপি ৰিকপ্পেসু সোমনস্সরহিতা হোন্তি, তদা সেসানি চত্তারি উপেক্খাসহগতানি উপ্পজ্জন্তি. এৰং সোমনস্সুপেক্খাঞাণপ্পযোগভেদতো অট্ঠৰিধং কামাৰচরকুসলচিত্তং ৰেদিতব্বং.

২৬.

দসপুঞ্ঞক্রিযাদীনং, ৰসেন চ বহূনিপি;

এতানি পন চিত্তানি, ভৰন্তীতি পকাসযে.

২৭.

সত্তরস সহস্সানি, দ্ৰে সতানি অসীতি চ;

কামাৰচরপুঞ্ঞানি, ভৰন্তীতি ৰিনিদ্দিসে.

তং পন যথানুরূপং কামাৰচরসুগতিযং ভৰভোগসম্পত্তিং অভিনিপ্ফাদেতি.

ইতরেসু পন রূপাৰচরকুসলচিত্তং সৰত্থুকতো একৰিধং, দ্ৰীসু ভৰেসু উপ্পজ্জনতো দুৰিধং, হীনমজ্ঝিমপণীতভেদতো তিৰিধং, পটিপদাদিভেদতো চতুব্বিধং, ঝানঙ্গযোগভেদতো পঞ্চৰিধং. সেয্যথিদং – কামচ্ছন্দব্যাপাদথিনমিদ্ধউদ্ধচ্চকুক্কুচ্চৰিচিকিচ্ছাৰিপ্পহীনং ৰিতক্কৰিচারপীতিসুখচিত্তেকগ্গতাসম্পযুত্তং ¶ পঠমং, ৰিতক্কৰিপ্পহীনং ৰিচারপীতিসুখচিত্তেকগ্গতাসম্পযুত্তং ¶ দুতিযং, ৰিতক্কৰিচারৰিপ্পহীনং পীতিসুখচিত্তেকগ্গতাসম্পযুত্তং ততিযং, ৰিতক্কৰিচারপীতিৰিপ্পহীনং সুখচিত্তেকগ্গতাসম্পযুত্তং চতুত্থং, ৰিতক্কৰিচারপীতিসুখৰিপ্পহীনং উপেক্খাচিত্তেকগ্গতাসম্পযুত্তং পঞ্চমন্তি ইদং পঞ্চৰিধং ¶ রূপাৰচরকুসলচিত্তং নাম.

তং পন যথাসম্ভৰং পথৰীকসিণাদীসু আরম্মণেসু পৰত্তিৰসেন অনেকৰিধং হোতি. সব্বং পনেতং রূপাৰচরভাৰনাপুঞ্ঞৰসপ্পৰত্তং যথানুরূপং রূপাৰচরূপপত্তিনিপ্ফাদকং হোতি. এৰং তাৰ রূপাৰচরকুসলং ৰেদিতব্বং.

সেসেসু পন দ্ৰীসু অরূপাৰচরকুসলচিত্তং তাৰ উপেক্খাৰেদনাযোগভেদতো একৰিধং, সৰত্থুকাৰত্থুকভেদতো দুৰিধং, হীনমজ্ঝিমপণীতভেদতো তিৰিধং, আরম্মণভেদতো চতুব্বিধং. কসিণুগ্ঘাটিমাকাসং, তত্থ পৰত্তৰিঞ্ঞাণং, তস্স অপগমো, আকিঞ্চঞ্ঞাযতনন্তি ইদমস্স চতুব্বিধমারম্মণং. যথাপটিপাটিযা এতস্সারম্মণস্স ভেদতো চতুব্বিধং হোতি. সেয্যথিদং – সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা আকাসানঞ্চাযতনসঞ্ঞাসহগতং, ৰিঞ্ঞাণঞ্চাযতনসঞ্ঞাসহগতং, আকিঞ্চঞ্ঞাযতনসঞ্ঞাসহগতং, নেৰসঞ্ঞানাসঞ্ঞাযতনসঞ্ঞাসহগতন্তি ইদং চতুব্বিধং অরূপাৰচরকুসলচিত্তং নাম. সব্বং পনেতং অরূপাৰচরভাৰনাপুঞ্ঞৰসপ্পৰত্তং যথানুরূপং অরূপূপপত্তিনিপ্ফাদকং হোতি. এৰং অরূপাৰচরকুসলচিত্তং ৰেদিতব্বং.

ইতরং পন লোকুত্তরকুসলচিত্তং নিব্বানারম্মণতো একৰিধং, নিযতানিযতৰত্থুকভেদতো দুৰিধং, তীহি ৰিমোক্খমুখেহি পত্তব্বতো তিৰিধং, চতুমগ্গযোগভেদতো চতুব্বিধং ¶ . সেয্যথিদং – সক্কাযদিট্ঠিৰিচিকিচ্ছাসীলব্বতপরামাসসঞ্ঞোজনপ্পহানকরং সোতাপত্তিমগ্গচিত্তং, রাগদোসমোহানং তনুত্তকরং সকদাগামিমগ্গচিত্তং, কামরাগব্যাপাদানং নিরৰসেসপ্পহানকরং অনাগামিমগ্গচিত্তং, রূপরাগঅরূপরাগমানউদ্ধচ্চঅৰিজ্জাপহানকরং অরহত্তমগ্গচিত্তন্তি ইদং চতুব্বিধং লোকুত্তরকুসলচিত্তং নাম. একেকং পনেত্থ ঝানঙ্গযোগভেদতো পঞ্চৰিধং হোতি, তস্মা ৰীসতিৰিধং হোতি. সব্বং পনেতং লোকুত্তরভাৰনাপুঞ্ঞৰসপ্পৰত্তং মগ্গানুরূপফলপ্পৰত্তিযা চত্তারো অরিযপুগ্গলে অভিনিপ্ফাদেতি. এৰং লোকুত্তরকুসলং ৰেদিতব্বং.

২৮.

কামে ¶ ¶ অট্ঠেৰ রূপে চ, পঞ্চ চত্তারিরূপিসু;

চত্তারানুত্তরানেৰং, কুসলানেকৰীসতি.

২৯.

কুসলাকুসলাপগতেন সতা,

কুসলে কুসলেন চ যং কুসলং;

চতুভূমিগতং মুনিনা ৰসিনা,

লপিতং লপিতং সকলম্পি মযা.

অকুসলং পন ভূমিতো একৰিধং কামাৰচরমেৰ, নিযতানিযতৰত্থুৰসেন চ একহেতুকদুহেতুকৰসেন চ পটিসন্ধিজনকাজনকৰসেন চ দুৰিধং, তীহি ৰেদনাহি যোগতো চ লোভমূলং দোসমূলং মোহমূলন্তি মূলতো চ তিৰিধং হোতি. তত্থ লোভমূলং পন সোমনস্সুপেক্খাদিট্ঠিপ্পযোগভেদতো অট্ঠৰিধং হোতি. সেয্যথিদং – সোমনস্সসহগতং দিট্ঠিগতসম্পযুত্তং অসঙ্খারিকমেকং, সসঙ্খারিকমেকং, সোমনস্সসহগতং দিট্ঠিগতৰিপ্পযুত্তং অসঙ্খারিকমেকং, সসঙ্খারিকমেকং, উপেক্খাসহগতং দিট্ঠিগতসম্পযুত্তং অসঙ্খারিকমেকং, সসঙ্খারিকমেকং, উপেক্খাসহগতং দিট্ঠিগতৰিপ্পযুত্তং অসঙ্খারিকমেকং, সসঙ্খারিকমেকন্তি.

যদা ¶ হি ‘‘নত্থি কামেসু আদীনৰো’’তিআদিনা নযেন মিচ্ছাদিট্ঠিং পুরক্খত্ৰা কেৰলং হট্ঠতুট্ঠো কামে ৰা পরিভুঞ্জতি, দিট্ঠমঙ্গলাদীনি ৰা সারতো পচ্চেতি সভাৰতিক্খেনেৰ অনুস্সাহিতেন চিত্তেন, তদাস্স পঠমং অকুসলচিত্তং উপ্পজ্জতি. যদা পন মন্দেন সমুস্সাহিতেন, তদা দুতিযং. যদা মিচ্ছাদিট্ঠিং অপুরক্খত্ৰা কেৰলং হট্ঠতুট্ঠো মেথুনং ধম্মং ৰা পরিভুঞ্জতি, পরসম্পত্তিং ৰা অভিজ্ঝাযতি, পরস্স ভণ্ডং ৰা হরতি সভাৰতিক্খেনেৰ অনুস্সাহিতেন চিত্তেন, তদা ততিযং. যদা মন্দেন সমুস্সাহিতেন, তদা চতুত্থং উপ্পজ্জতি. যদা পন কামানং ৰা অসম্পত্তিং আগম্ম অঞ্ঞেসং ৰা সোমনস্সহেতূনং অভাৰেন চতূসুপি ৰিকপ্পেসু সোমনস্সরহিতা হোন্তি, তদা সেসানি চত্তারি উপেক্খাসহগতানি উপ্পজ্জন্তীতি. এৰং সোমনস্সুপেক্খাদিট্ঠিপ্পযোগভেদতো অট্ঠৰিধং লোভমূলং ৰেদিতব্বং.

দোসমূলং পন একন্তসৰত্থুকতো একৰিধং, অসঙ্খারসসঙ্খারভেদতো দুৰিধং দোমনস্সসহগতং পটিঘসম্পযুত্তং অসঙ্খারং, সসঙ্খারন্তি. অস্স পন পাণাতিপাতাদীসু তিক্খমন্দপ্পৰত্তিকালে উপ্পত্তি ৰেদিতব্বা.

মোহমূলম্পি ¶ ¶ ৰিচিকিচ্ছুদ্ধচ্চযোগতো দুৰিধং হোতি উপেক্খাসহগতং ৰিচিকিচ্ছাসম্পযুত্তং, উপেক্খাসহগতং উদ্ধচ্চসম্পযুত্তন্তি. তস্স অসন্নিট্ঠানৰিক্খেপকালেসু পৰত্তি ৰেদিতব্বাতি.

এৰং তাৰ দ্ৰাদসৰিধং অকুসলচিত্তং ৰেদিতব্বং, সব্বং পনেতং যথানুরূপং অপাযেসু উপপত্তিযা, সুগতিযম্পি দুক্খৰিসেসস্স অভিনিপ্ফাদকং হোতি.

৩০.

লোভমূলৰসেনট্ঠ, দোসমূলৰসা দুৰে;

মোহমূলৰসেন দ্ৰে, এৰং দ্ৰাদসধা সিযুং.

৩১.

পাপাপাপেস্ৰপাপেন ¶ , যং ৰুত্তং পাপমানসং;

পাপাপাপপ্পহীনেন, তং মযা সমুদাহটং.

ইতরং পন অব্যাকতমৰিপাকারহতো একৰিধং হোতি, জাতিভেদতো দুৰিধং ৰিপাকচিত্তং কিরিযচিত্তন্তি. তত্থ ৰিপাকচিত্তং ভূমিভেদতো চতুব্বিধং কামাৰচরং রূপাৰচরং অরূপাৰচরং লোকুত্তরন্তি. তত্থ কামাৰচরং দুৰিধং কুসলৰিপাকং অকুসলৰিপাকন্তি. কুসলৰিপাকং দুৰিধং সহেতুকমহেতুকঞ্চেতি.

তত্থ সহেতুকৰিপাকচিত্তং সককুসলং ৰিয সোমনস্সুপেক্খাঞাণপ্পযোগভেদতো অট্ঠৰিধং. সেয্যথিদং – সোমনস্সসহগতং ঞাণসম্পযুত্তং অসঙ্খারং, সসঙ্খারং, সোমনস্সসহগতং ঞাণৰিপ্পযুত্তং অসঙ্খারং, সসঙ্খারং, উপেক্খাসহগতং ঞাণসম্পযুত্তং অসঙ্খারং, সসঙ্খারং, উপেক্খাসহগতং ঞাণৰিপ্পযুত্তং অসঙ্খারং, সসঙ্খারন্তি ইদং অট্ঠৰিধং সহেতুকৰিপাকং নাম.

যথা পনস্স কুসলং দানাদিৰসেন ছসু আরম্মণেসু পৰত্ততি, ন ইদং তথা. ইদং হি পটিসন্ধিভৰঙ্গচুতিতদারম্মণৰসেন পরিত্তধম্মপরিযাপন্নেসুযেৰ ছসু আরম্মণেসু পৰত্ততি. সম্পযুত্তধম্মানঞ্চ ৰিসেসে অসতিপি আদাসতলাদীসু মুখনিমিত্তং ৰিয নিরুস্সাহং ৰিপাকং, মুখং ৰিয সউস্সাহং কুসলন্তি ৰেদিতব্বং. ইমেসং পন ৰিপচ্চনট্ঠানং ৰেদিতব্বং. ইমানি হি পটিসন্ধিভৰঙ্গচুতিতদারম্মণানি হুত্ৰা ৰিপচ্চন্তি.

৩২.

কামাৰচরদেৰানং ¶ , মনুস্সানং ইমে পন;

দুহেতুকতিহেতূনং, ভৰন্তি পটিসন্ধিযো.

৩৩.

ততো পৰত্তিযং হুত্ৰা, ভৰঙ্গং যাৰতাযুকং;

বলৰারম্মণে হুত্ৰা, তদারম্মণমেৰ চ.

৩৪.

ততো ¶ ¶ মরণকালস্মিং, চুতি হুত্ৰা পৰত্তরে;

এৰং চতূসু ঠানেসু, ৰিপচ্চন্তীতি নিদ্দিসে.

৩৫.

সভূমিকুসলেহেৰ, মহাপাকা সমা ৰিনা;

কম্মদ্ৰারঞ্চ কম্মঞ্চ, পুঞ্ঞানং ক্রিযৰত্থুকং.

৩৬.

অৰিঞ্ঞত্তিজনত্তা হি, অৰিপাকসভাৰতো;

অপ্পৰত্তনতো চেৰ, পাকা পুঞ্ঞেহি নো সমা.

৩৭.

পরিত্তারম্মণত্তা হি, তেসমেকন্ততো পন;

করুণামুদিতা তেসু, ন জাযন্তি কদাচিপি.

৩৮.

তথা ৰিরতিযো তিস্সো, ন পনেতেসু জাযরে;

পঞ্চ সিক্খাপদা ৰুত্তা, কুসলাতি হি সত্থুনা.

৩৯.

তথাধিপতিনোপেত্থ, ন সন্তীতি ৰিনিদ্দিসে;

ছন্দাদীনি ধুরং কত্ৰা, অনুপ্পজ্জনতো পন.

৪০.

অসঙ্খারসসঙ্খার-ৰিধানং পন পুঞ্ঞতো;

ঞেয্যং পচ্চযতো চেৰ, ৰিপাকেসু চ ৰিঞ্ঞুনা.

৪১.

হীনাদীনং ৰিপাকত্তা, পুঞ্ঞানং পুঞ্ঞৰাদিনা;

হীনাদযো ভৰন্তীতি, ৰিপাকা পরিদীপিতা.

৪২.

ইদং অট্ঠৰিধং চিত্তং, একন্তেন সৰত্থুকং;

জাযতে কামলোকস্মিং, ন পনঞ্ঞত্থ জাযতে.

এৰং তাৰ সহেতুকৰিপাকচিত্তং ৰেদিতব্বং.

অহেতুকৰিপাকচিত্তং ¶ পন অলোভাদিহেতুৰিরহিতং উপেক্খাসহগতং চক্খুৰিঞ্ঞাণং, উপেক্খাসহগতং সোতৰিঞ্ঞাণং, উপেক্খাসহগতং ঘানৰিঞ্ঞাণং, উপেক্খাসহগতং জিৰ্হাৰিঞ্ঞাণং, সুখসহগতং কাযৰিঞ্ঞাণং, উপেক্খাসহগতং অহেতুকমনোধাতুসম্পটিচ্ছনং, সোমনস্সসহগতং অহেতুকমনোৰিঞ্ঞাণধাতুসন্তীরণং ¶ , উপেক্খাসহগতং অহেতুকমনোৰিঞ্ঞাণধাতুসন্তীরণন্তি ইদং পন অট্ঠৰিধং অহেতুকৰিপাকচিত্তং নাম.

ইদং পন অট্ঠৰিধং নিযতৰত্থুকতো একৰিধং, নিযতানিযতারম্মণতো দুৰিধং. তত্থ ৰিঞ্ঞাণপঞ্চকং নিযতারম্মণং, সেসত্তযং অনিযতারম্মণং. সুখসোমনস্সুপেক্খাৰেদনাযোগতো তিৰিধং. তত্থ সুখসহগতং কাযৰিঞ্ঞাণং, দ্ৰিট্ঠানিকং সন্তীরণং সোমনস্সুপেক্খাযুত্তং, সেসমুপেক্খাযুত্তন্তি.

দিট্ঠারম্মণসুতারম্মণমুতারম্মণদিট্ঠসুতমুতারম্মণদিট্ঠ-সুতমুতৰিঞ্ঞাতারম্মণৰসেন পঞ্চৰিধং. তত্থ দিট্ঠারম্মণং চক্খুৰিঞ্ঞাণং, সুতারম্মণং ¶ সোতৰিঞ্ঞাণং, মুতারম্মণং ঘানজিৰ্হাকাযৰিঞ্ঞাণত্তযং, দিট্ঠসুতমুতারম্মণং মনোধাতুসম্পটিচ্ছনং, দিট্ঠসুতমুতৰিঞ্ঞাতারম্মণং সেসমনোৰিঞ্ঞাণধাতুদ্ৰযন্তি.

ৰত্থুতো ছব্বিধং. কথং? চক্খুৰিঞ্ঞাণস্স চক্খুমেৰ ৰত্থু, তথা সোতঘানজিৰ্হাকাযৰিঞ্ঞাণানং সোতঘানজিৰ্হাকাযৰত্থু, অৰসেসত্তযস্স হদযৰত্থুমেৰাতি.

আরম্মণতো সত্তৰিধং হোতি. কথং? রূপারম্মণমেৰ চক্খুৰিঞ্ঞাণং, তথা সদ্দগন্ধরসফোট্ঠব্বারম্মণানি পটিপাটিযা সোতঘানজিৰ্হাকাযৰিঞ্ঞাণানি, রূপাদিপঞ্চারম্মণা মনোধাতু, সেসমনোৰিঞ্ঞাণধাতুদ্ৰযং ছল়ারম্মণন্তি.

তং সব্বং পন অহেতুকৰিপাকচিত্তং কিচ্চতো অট্ঠৰিধং হোতি. কথং? দস্সনকিচ্চং চক্খুৰিঞ্ঞাণং, সৰনঘাযনসাযনফুসনসম্পটিচ্ছনসন্তীরণতদারম্মণকিচ্চানি অৰসেসানি.

তত্থ ¶ চক্খুতো পৰত্তং ৰিঞ্ঞাণং, চক্খুম্হি সন্নিস্সিতং ৰিঞ্ঞাণন্তি ৰা চক্খুৰিঞ্ঞাণং, তথা সোতৰিঞ্ঞাণাদীনি. তত্থ চক্খুসন্নিস্সিতরূপৰিজাননলক্খণং চক্খুৰিঞ্ঞাণং ¶ , রূপমত্তারম্মণরসং, রূপাভিমুখভাৰপচ্চুপট্ঠানং, রূপারম্মণায কিরিযামনোধাতুযা অপগমপদট্ঠানং. তথা সোতঘানজিৰ্হাকাযৰিঞ্ঞাণানি সোতাদিসন্নিস্সিতসদ্দাদিৰিজাননলক্খণানি, সদ্দাদিমত্তারম্মণরসানি, সদ্দাদীসু অভিমুখভাৰপচ্চুপট্ঠানানি, সদ্দাদিআরম্মণানং কিরিযামনোধাতূনং অপগমপদট্ঠানানি. মনোধাতুসম্পটিচ্ছনং পন চক্খুৰিঞ্ঞাণাদীনং অনন্তরা রূপাদিৰিজাননলক্খণং, রূপাদিসম্পটিচ্ছনরসং, তথাভাৰপচ্চুপট্ঠানং, চক্খুৰিঞ্ঞাণাদীনং অপগমপদট্ঠানং.

সেসা পন দ্ৰে অহেতুকমনোৰিঞ্ঞাণধাতুযো ছল়ারম্মণৰিজাননলক্খণা, সন্তীরণাদিরসা, তথাভাৰপচ্চুপট্ঠানা, হদযৰত্থুপদট্ঠানাতি ৰেদিতব্বা. তত্থ পঠমা একন্তমিট্ঠারম্মণে পৰত্তিসব্ভাৰতো সোমনস্সযুত্তাৰ হুত্ৰা পঞ্চদ্ৰারে সন্তীরণকিচ্চং সাধযমানা পঞ্চসু দ্ৰারেসু ঠত্ৰা ৰিপচ্চতি, ছসু পন দ্ৰারেসু বলৰারম্মণে তদারম্মণং হুত্ৰা ৰিপচ্চতি. দুতিযা ¶ পন ইট্ঠমজ্ঝত্তারম্মণে পৰত্তিসব্ভাৰতো উপেক্খাসহগতা হুত্ৰা সন্তীরণতদারম্মণপটিসন্ধিভৰঙ্গচুতিৰসেন পৰত্তনতো পঞ্চসু ঠানেসু ৰিপচ্চতি. কথং? মনুস্সলোকে তাৰ জচ্চন্ধজচ্চবধিরজচ্চজল়জচ্চুম্মত্তকপণ্ডকউভতোব্যঞ্জননপুংসকাদীনং পটিসন্ধিগ্গহণকালে পটিসন্ধি হুত্ৰা ৰিপচ্চতি. পটিসন্ধিযা ৰীতিৰত্তায পৰত্তিযং যাৰতাযুকং ভৰঙ্গং হুত্ৰা ৰিপচ্চতি. ইট্ঠমজ্ঝত্তে পঞ্চারম্মণৰীথিযা সন্তীরণং হুত্ৰা, বলৰারম্মণে ছদ্ৰারে তদারম্মণং হুত্ৰা, মরণকালে চুতি হুত্ৰাতি ইমেসু পন পঞ্চসু ঠানেসু ৰিপচ্চতীতি. এৰং তাৰ অহেতুকৰিপাকচিত্তানি ৰেদিতব্বানি.

৪৩.

কামাৰচরপুঞ্ঞস্স ¶ , ৰিপাকা হোন্তি সোল়স;

তং তিহেতুকপুঞ্ঞস্স, ৰসেন পরিদীপযে.

ইদানি রূপাৰচরৰিপাকচিত্তানি ৰুচ্চন্তি. তানি নিযতৰত্থুকতো একৰিধানি, ঝানঙ্গযোগভেদতো পঞ্চৰিধানি. কথং? ৰিতক্কৰিচারপীতিসুখচিত্তেকগ্গতাসম্পযুত্তং পঠমং, ৰিচারপীতিসুখচিত্তেকগ্গতাসম্পযুত্তং দুতিযং, পীতিসুখচিত্তেকগ্গতাসম্পযুত্তং ততিযং, সুখচিত্তেকগ্গতাসম্পযুত্তং চতুত্থং, উপেক্খাচিত্তেকগ্গতাসম্পযুত্তং পঞ্চমন্তি ইমানি পঞ্চপি রূপাৰচরৰিপাকচিত্তানি উপপত্তিযং পটিসন্ধিভৰঙ্গচুতিৰসেন পৰত্তন্তি.

ইদানি ¶ অরূপাৰচরৰিপাকচিত্তানি ৰুচ্চন্তি. তানি সককুসলানি ৰিয আরম্মণভেদতো চতুব্বিধানি হোন্তি. কথং? আকাসানঞ্চাযতনসঞ্ঞাসহগতং, ৰিঞ্ঞাণঞ্চাযতনসঞ্ঞাসহগতং, আকিঞ্চঞ্ঞাযতনসঞ্ঞাসহগতং, নেৰসঞ্ঞানাসঞ্ঞাযতনসঞ্ঞাসহগতন্তি ইমানি চত্তারি অরূপাৰচরৰিপাকচিত্তানি.

৪৪.

কুসলানুগতং কত্ৰা, ভাজিতং কিং মহগ্গতং;

কামাৰচরপুঞ্ঞংৰ, নাসমানফলং যতো.

৪৫.

অত্তনো কুসলেহেৰ, সমানং সব্বথা ইদং;

গজাদীনং যথা ছাযা, গজাদিসদিসা তথা.

৪৬.

কামাৰচরপুঞ্ঞংৰ, নাপরাপরিযৰেদনং;

ঝানা অপরিহীনস্স, সত্তস্স ভৰগামিনো.

৪৭.

কুসলানন্তরংযেৰ ¶ , ফলং উপ্পজ্জতীতি চ;

ঞাপনত্থং পনেতস্স, কুসলানুগতং কতং.

৪৮.

পটিপ্পদাক্কমো চেৰ, হীনাদীনঞ্চ ভেদতো;

ঝানাগমনতো চেত্থ, ৰেদিতব্বো ৰিভাৰিনা.

৪৯.

অভাৰোধিপতীনঞ্চ ¶ , অযমেৰ ৰিসেসকো;

সেসং সব্বং চ সেসেন, কুসলেন সমং মতং. –

এৰং রূপাৰচরারূপাৰচরৰিপাকা ৰেদিতব্বা.

ইদানি লোকুত্তরৰিপাকচিত্তানি হোন্তি. তানি চতুমগ্গযুত্তচিত্তফলত্তা চতুব্বিধানি হোন্তি. কথং? সোতাপত্তিমগ্গফলচিত্তং, সকদাগামিমগ্গফলচিত্তং, অনাগামিমগ্গফলচিত্তং, অরহত্তমগ্গফলচিত্তন্তি. এৰং পনেত্থ একেকং ঝানঙ্গযোগভেদতো পঞ্চৰিধং, পুন মগ্গৰীথিফলসমাপত্তিৰসেন পৰত্তিতো দুৰিধং. এৰং লোকুত্তরকুসলৰিপাকচিত্তানি ৰেদিতব্বানি.

৫০.

সুঞ্ঞতং ¶ অনিমিত্তন্তি, তথাপণিহিতন্তিপি;

এতানি তীণি নামানি, মগ্গস্সানন্তরে ফলে.

৫১.

লব্ভন্তি পরভাগস্মিং, ৰল়ঞ্জনফলেসু ন;

ৰিপস্সনাৰসেনেৰ, তানি নামানি লব্ভরে.

৫২.

হোন্তি সাধিপতীনেৰ, লোকুত্তরফলানি তু;

ৰিপাকেধিপতী নত্থি, ঠপেত্ৰা তু অনাসৰে.

৫৩.

অত্তনো মগ্গভাৰেন, মগ্গো ‘‘মগ্গো’’তি ৰুচ্চতি;

ফলং মগ্গমুপাদায, মগ্গো নামাতি ৰুচ্চতি. –

এৰং লোকুত্তরৰিপাকা ৰেদিতব্বা.

ইদানি সত্তাকুসলৰিপাকানি ৰুচ্চন্তি. অকুসলৰিপাকং উপেক্খাসহগতং চক্খুৰিঞ্ঞাণং, উপেক্খাসহগতং সোতৰিঞ্ঞাণং, উপেক্খাসহগতং ঘানৰিঞ্ঞাণং, উপেক্খাসহগতং জিৰ্হাৰিঞ্ঞাণং, দুক্খসহগতং কাযৰিঞ্ঞাণং, উপেক্খাসহগতং অহেতুকমনোধাতুসম্পটিচ্ছনং, উপেক্খাসহগতং অহেতুকমনোৰিঞ্ঞাণধাতুসন্তীরণন্তি ইমানি সত্ত অকুসলৰিপাকচিত্তানি.

এত্থ ¶ পন উপেক্খাসহগতাহেতুকমনোৰিঞ্ঞাণধাতু একাদসৰিধেনাপি অকুসলচিত্তেন কম্মে আযূহিতে কম্মকম্মনিমিত্তগতিনিমিত্তেসু অঞ্ঞতরং আরম্মণং কত্ৰা চতূসু অপাযেসু পটিসন্ধি হুত্ৰা ৰিপচ্চতি, পটিসন্ধিযা ৰীতিৰত্তায ¶ দুতিযচিত্তৰারং ততো পট্ঠায যাৰতাযুকং ভৰঙ্গং হুত্ৰা, অনিট্ঠমজ্ঝত্তারম্মণায পঞ্চৰিঞ্ঞাণৰীথিযা সন্তীরণং হুত্ৰা, বলৰারম্মণে ছসু দ্ৰারেসু তদারম্মণং হুত্ৰা, মরণকালে চুতি হুত্ৰা ৰিপচ্চতি. এৰং পঞ্চসু ঠানেসু ৰিপচ্চতি. কেৰলং হি তানি কুসলৰিপাকাহেতুকচিত্তানি কুসলকম্মপচ্চযানি, ইমানি অকুসলকম্মপচ্চযানি. অযমিমেসং, তেসঞ্চ ৰিসেসো.

৫৪.

অনিট্ঠানিট্ঠমজ্ঝত্তগোচরে ৰত্তরে ইমে;

সুখাদিত্তযযুত্তা তে, দুক্খুপেক্খাযুতা ইমে.

এৰং ¶ কামাৰচরকুসলৰিপাকসহেতুকমট্ঠৰিধং, অহেতুকমট্ঠৰিধং, ঝানঙ্গযোগভেদতো রূপাৰচরৰিপাকং পঞ্চৰিধং, আরম্মণভেদতো অরূপাৰচরৰিপাকং চতুব্বিধং, মগ্গসম্পযুত্তচিত্তফলভেদতো লোকুত্তরৰিপাকং চতুব্বিধং, চক্খুৰিঞ্ঞাণাদিভেদতো অকুসলৰিপাকং সত্তৰিধন্তি ছত্তিংসৰিধং ৰিপাকচিত্তং ৰেদিতব্বং.

৫৫.

এৰং ছত্তিংসধা পাকং, পাকসাসনপূজিতো;

সৰিপাকাৰিপাকেসু, কুসলো সুগতোব্রৰি.

কিরিযাব্যাকতচিত্তং পন অৰিপাকতো একৰিধং, পরিত্তমহগ্গততো দুৰিধং, কামাৰচররূপাৰচরঅরূপাৰচরভূমিভেদতো তিৰিধং. তত্থ কামাৰচরং দুৰিধং সহেতুকমহেতুকন্তি. তত্থ সহেতুকং একৰিধং অরহতো এৰ উপ্পজ্জনতো. সোমনস্সুপেক্খাঞাণপ্পযোগভেদতো কামাৰচরকুসলং ৰিয অট্ঠৰিধং হোতি. সেয্যথিদং – সোমনস্সসহগতং ঞাণসম্পযুত্তং অসঙ্খারিকং, সসঙ্খারিকং, সোমনস্সসহগতং ¶ ঞাণৰিপ্পযুত্তং অসঙ্খারিকং, সসঙ্খারিকং, উপেক্খাসহগতং ঞাণসম্পযুত্তং অসঙ্খারিকং, সসঙ্খারিকং, উপেক্খাসহগতং ঞাণৰিপ্পযুত্তং অসঙ্খারিকং, সসঙ্খারিকন্তি ইমানি অট্ঠ সহেতুককিরিযচিত্তানি. এতানি পন যথানুরূপং দানাদিৰসেন খীণাসৰানংযেৰ পৰত্তন্তি. এৰং সহেতুককিরিযচিত্তানি ৰেদিতব্বানি.

অহেতুককিরিযচিত্তং পন তিৰিধং কিরিযাহেতুকমনোধাতুউপেক্খাসহগতাৰজ্জনচিত্তং, কিরিযাহেতুকমনোৰিঞ্ঞাণধাতুসোমনস্সসহগতং হসিতুপ্পাদচিত্তং, কিরিযাহেতুকমনোৰিঞ্ঞাণধাতুউপেক্খাসহগতং ৰোট্ঠব্বনচিত্তন্তি ¶ .

তত্থ কিরিযাহেতুকমনোধাতু উপেক্খাসহগতা হদযৰত্থুং নিস্সায চক্খুদ্ৰারে ইট্ঠইট্ঠমজ্ঝত্তঅনিট্ঠঅনিট্ঠমজ্ঝত্তেসু রূপারম্মণেসু যেন কেনচি পসাদে ঘট্টিতে তং তং আরম্মণং গহেত্ৰা আৰজ্জনৰসেন চক্খুৰিঞ্ঞাণস্স পুরেচারী হুত্ৰা ভৰঙ্গং আৰট্টযমানা উপ্পজ্জতি. সোতদ্ৰারাদীসুপি এসেৰ নযো. ইতরা পন দ্ৰে অহেতুকমনোৰিঞ্ঞাণধাতুযো সাধারণাসাধারণাতি দুৰিধা হোন্তি. তত্থ অসাধারণা পন কিরিযাহেতুকমনোৰিঞ্ঞাণধাতু সোমনস্সসহগতা খীণাসৰস্সেৰ ছসু দ্ৰারেসু ছসু অনুল়ারেসু আরম্মণেসু হসিতুপ্পাদকিচ্চা নিযতৰত্থুকা উপ্পজ্জতি. সাধারণা পন অহেতুকমনোৰিঞ্ঞাণধাতু উপেক্খাসহগতা ছল়ারম্মণৰিজাননলক্খণা ¶ , তথাভাৰপচ্চুপট্ঠানা, সা তীসু ভৰেসু সব্বেসং সচিত্তকসত্তানং সাধারণা, ন কস্সচি পন সচিত্তকস্স ন উপ্পজ্জতি নাম. উপ্পজ্জমানা পনাযং পঞ্চদ্ৰারমনোদ্ৰারেসু ৰোট্ঠব্বনাৰজ্জনকিচ্চা উপ্পজ্জতি. ছ অসাধারণঞাণানিপি এতায গহিতারম্মণমেৰ গণ্হন্তি. সব্বারম্মণগহণসমত্থতায ¶ সব্বঞ্ঞুতঞ্ঞাণগতিকাতি ৰেদিতব্বা. ইমানি তীণি অহেতুককিরিযচিত্তানি.

ইধ ঠত্ৰা হসনচিত্তানি পরিগ্গণ্হিতব্বানি. তেরস হসনচিত্তানি. কুসলতো চতূহি সোমনস্সসহগতেহি, অকুসলতো চতূহীতি ইমেহি অট্ঠহি চিত্তেহি পুথুজ্জনা হসন্তি, সেখা পন কুসলতো চতূহি, অকুসলতো দ্ৰীহি দিট্ঠিগতৰিপ্পযুত্তসোমনস্সসহগতেহীতি ছহি হসন্তি, খীণাসৰা কিরিযতো পঞ্চহি সোমনস্সসহগতেহি হসন্তীতি.

৫৬.

সোমনস্সযুতানট্ঠ, কুসলাকুসলানি চ;

ক্রিযতো পন পঞ্চেৰং, হাসচিত্তানি তেরস.

৫৭.

পুথুজ্জনা হসন্তেত্থ, চিত্তেহি পন অট্ঠহি;

ছহি সেখা অসেখা চ, হসন্তি পন পঞ্চহি.

ইদানি রূপাৰচরকিরিযচিত্তানি হোন্তি. ৰিতক্কৰিচারপীতিসুখচিত্তেকগ্গতাসম্পযুত্তং পঠমং, ৰিচারপীতিসুখচিত্তেকগ্গতাসম্পযুত্তং দুতিযং, পীতিসুখচিত্তেকগ্গতাসম্পযুত্তং ততিযং, সুখচিত্তেকগ্গতাসম্পযুত্তং চতুত্থং, উপেক্খাচিত্তেকগ্গতাসম্পযুত্তং পঞ্চমন্তি ইমানি পঞ্চ রূপাৰচরকিরিযচিত্তানি.

ইদানি ¶ অরূপাৰচরকিরিযচিত্তানি ৰুচ্চন্তি. আকাসানঞ্চাযতনসঞ্ঞাসহগতং, ৰিঞ্ঞাণঞ্চাযতনসঞ্ঞাসহগতং, আকিঞ্চঞ্ঞাযতনসঞ্ঞাসহগতং, নেৰসঞ্ঞানাসঞ্ঞাযতনসঞ্ঞাসহগতন্তি ইমানি চত্তারি অরূপাৰচরকিরিযচিত্তানি. ইমানি পন রূপারূপকিরিযচিত্তানি সকসকভূমিকুসলসদিসানি. কেৰলং পনেতানি কিরিযচিত্তানি খীণাসৰানংযেৰ উপ্পজ্জন্তি, কুসলানি পন সেখপুথুজ্জনানং. ইমানি চ খীণাসৰানং ভাৰনাকারৰসপ্পৰত্তানি, তানি পন সেখপুথুজ্জনানং ভাৰনাপুঞ্ঞৰসপ্পৰত্তানীতি অযমেৰ ইমেসং, তেসঞ্চ ৰিসেসো.

৫৮.

যা ¶ ¶ পুথুজ্জনকালস্মিং, অভিনিব্বত্তিতা পন;

রূপারূপসমাপত্তি, সা খীণাসৰভিক্খুনো.

৫৯.

যাৰ খীণাসৰো ভিক্খু, ন সমাপজ্জতেৰ নং;

তাৰ তা কুসলা এৰ, সমাপন্না সচে ক্রিযা.

এৰং সোমনস্সাদিভেদতো কামাৰচরসহেতুককিরিযচিত্তমট্ঠৰিধং, মনোধাতুমনোৰিঞ্ঞাণধাতুদ্ৰযভেদতো অহেতুকং তিৰিধং, ঝানঙ্গযোগভেদতো রূপাৰচরং পঞ্চৰিধং, আরম্মণভেদতো অরূপাৰচরং চতুব্বিধং, এৰং ভূমিৰসেন ৰীসতিৰিধং কিরিযচিত্তং ৰেদিতব্বন্তি.

৬০.

একাদসৰিধং কামে, রূপে পঞ্চ অরূপিসু;

চত্তারীতি চ সব্বানি, ক্রিযাচিত্তানি ৰীসতি.

৬১.

লোকুত্তরক্রিযচিত্তং, পন কস্মা ন ৰিজ্জতি;

একচিত্তক্খণত্তা হি, মগ্গস্সাতি ন ৰিজ্জতি.

৬২.

ক্রিযাক্রিযাপত্তিৰিভাগদেসকো,

ক্রিযাক্রিযং চিত্তমৰোচ যং জিনো;

হিতাহিতানং সক্রিযাক্রিযারতো,

ক্রিযাক্রিযং তন্তু মযা সমীরিতং.

এত্তাৰতা একৰীসতিৰিধং কুসলং, দ্ৰাদসৰিধং অকুসলং ছত্তিংসৰিধং ৰিপাকং, ৰীসতিৰিধং কিরিযচিত্তন্তি আদিম্হি নিক্খিত্তং চিত্তং একূননৰুতিপ্পভেদেন ৰিধিনা পকাসিতং হোতীতি.

৬৩.

একৰীসতি ¶ পুঞ্ঞানি, দ্ৰাদসাকুসলানি চ;

ছত্তিংসেৰ ৰিপাকানি, ক্রিযচিত্তানি ৰীসতি.

৬৪.

একূননৰুতি সব্বে, চিত্তুপ্পাদা মহেসিনা;

অট্ঠ লোকুত্তরে কত্ৰা, নিদ্দিট্ঠা হি সমাসতো.

৬৫.

পিটকে ¶ ¶ অভিধম্মস্মিং, যে ভিক্খূ পাটৰত্থিনো;

তেহাযং উগ্গহেতব্বো, চিন্তেতব্বো পুনপ্পুনং.

৬৬.

অভিধম্মাৰতারেন, অভিধম্মমহোদধিং;

যে তরন্তি ইমং লোকং, পরঞ্চেৰ তরন্তি তেতি.

ইতি অভিধম্মাৰতারে চিত্তনিদ্দেসো নাম

পঠমো পরিচ্ছেদো.

২. দুতিযো পরিচ্ছেদো

চেতসিকনিদ্দেসো

৬৭.

চিত্তানন্তরমুদ্দিট্ঠা ¶ , যে চ চেতসিকা মযা;

তেসং দানি করিস্সামি, ৰিভাজনমিতো পরং.

তত্থ চিত্তসম্পযুত্তা, চিত্তে ভৰা ৰা চেতসিকা. তেপি চিত্তং ৰিয সারম্মণতো একৰিধা, সৰিপাকাৰিপাকতো দুৰিধা, কুসলাকুসলাব্যাকতভেদতো তিৰিধা, কামাৰচরাদিভেদতো চতুব্বিধা.

তত্থ কামাৰচরচিত্তসম্পযুত্তা কামাৰচরা. তেসু কামাৰচরপঠমমহাকুসলচিত্তসম্পযুত্তা তাৰ নিযতা সরূপেন আগতা একূনতিংস ধম্মা হোন্তি. সেয্যথিদং – ফস্সো ৰেদনা সঞ্ঞা চেতনা ৰিতক্কো ৰিচারো পীতি চিত্তেকগ্গতা সদ্ধা সতি ৰীরিযং পঞ্ঞা জীৰিতিন্দ্রিযং অলোভো অদোসো হিরী ওত্তপ্পং কাযপ্পস্সদ্ধি চিত্তপ্পস্সদ্ধি কাযলহুতা চিত্তলহুতা কাযমুদুতা চিত্তমুদুতা কাযকম্মঞ্ঞতা চিত্তকম্মঞ্ঞতা কাযপাগুঞ্ঞতা চিত্তপাগুঞ্ঞতা কাযুজুকতা চিত্তুজুকতাতি. পুন ছন্দো, অধিমোক্খো, তত্রমজ্ঝত্ততা, মনসিকারো চাতি চত্তারো নিযতযেৰাপনকা হোন্তি. ইমেহি চতূহি তেত্তিংস হোন্তি ¶ . পুন করুণা মুদিতা কাযদুচ্চরিতৰিরতি ¶ ৰচীদুচ্চরিতৰিরতি মিচ্ছাজীৰৰিরতি চেতি ইমে পঞ্চ অনিযতা. ইমে পন কদাচি উপ্পজ্জন্তি.

ইমেসু পন করুণামুদিতাৰসেন ভাৰনাকালে করুণাপুব্বভাগো ৰা মুদিতাপুব্বভাগো ৰা এতা উপ্পজ্জন্তি, ন পনেকতো উপ্পজ্জন্তি. যদা পন ইমিনা চিত্তেন মিচ্ছাকম্মন্তাদীহি ৰিরমতি, তদা সম্মাকম্মন্তাদীনি পরিপূরেন্তি, একা ৰিরতি উপ্পজ্জতি, করুণামুদিতাহি সহ, অঞ্ঞমঞ্ঞেন চ ন উপ্পজ্জন্তি. তস্মা এতেসু একেন সহ চতুত্তিংসেৰ ধম্মা হোন্তি.

৬৮.

আদিনা ¶ পুঞ্ঞচিত্তেন, তেত্তিংস নিযতা মতা;

করুণামুদিতেকেন, চতুত্তিংস ভৰন্তি তে.

৬৯.

কস্মা পনেত্থ মেত্তা চ, উপেক্খা চ ন উদ্ধটা;

যেৰাপনকধম্মেসু, ধম্মরাজেন সত্থুনা.

৭০.

অব্যাপাদেন মেত্তাপি, তত্রমজ্ঝত্ততায চ;

উপেক্খা গহিতা যস্মা, তস্মা ন গহিতা উভো.

৭১.

কস্মা যেৰাপনা ধম্মা, বুদ্ধেনাদিচ্চবন্ধুনা;

সরূপেনেৰ সব্বেতে, পাল়িযং ন চ উদ্ধটা.

৭২.

যস্মা অনিযতা কেচি, যস্মা রাসিং ভজন্তি ন;

যস্মা চ দুব্বলা কেচি, তস্মা ৰুত্তা ন পাল়িযং.

৭৩.

ছন্দাধিমোক্খমুদিতা মনসি চ কারো,

মজ্ঝত্ততা চ করুণা ৰিরতিত্তযং চ;

পুঞ্ঞেসু তেন নিযতানিযতা চ সব্বে,

যেৰাপনা মুনিৰরেন ন চেৰ ৰুত্তা.

৭৪.

কস্মা পনেত্থ ফস্সোৰ, পঠমং সমুদীরিতো;

পঠমাভিনিপাতত্তা, চিত্তস্সারম্মণে কির.

৭৫.

ফুসিত্ৰা ¶ ¶ পন ফস্সেন, ৰেদনায চ ৰেদযে;

সঞ্জানাতি চ সঞ্ঞায, চেতনায চ চেতযে.

৭৬.

বলৰপচ্চযত্তা চ, সহজাতানমেৰ হি;

ফস্সোৰ পঠমং ৰুত্তো, তস্মা ইধ মহেসিনা.

৭৭.

অকারণমিদং সব্বং, চিত্তানং তু সহেৰ চ;

একুপ্পাদাদিভাৰেন, চিত্তজানং পৰত্তিতো.

৭৮.

অযং তু পঠমুপ্পন্নো, অযং পচ্ছাতি নত্থিদং;

বলৰপচ্চযত্তেপি, কারণঞ্চ ন দিস্সতি.

৭৯.

দেসনাক্কমতো চেৰ, পঠমং সমুদীরিতো;

ইচ্চেৰং পন ৰিঞ্ঞেয্যং, ৰিঞ্ঞুনা ন ৰিসেসতো.

৮০.

ন চ পরিযেসিতব্বোযং, তস্মা পুব্বাপরক্কমো;

ৰচনত্থলক্খণাদীহি, ধম্মা এৰ ৰিজানতা.

যস্মা পন ইমে ধম্মা ৰচনত্থলক্খণাদীহি ৰুচ্চমানা পাকটা হোন্তি সুৰিঞ্ঞেয্যাৰ, তস্মা তেসং ৰচনত্থলক্খণাদীনি পৰক্খামি. সেয্যথিদং – ফুসতীতি ফস্সো. স্ৰাযং ফুসনলক্খণো, সঙ্ঘট্টনরসো, সন্নিপাতপচ্চুপট্ঠানো, ফলট্ঠেন ৰেদনাপচ্চুপট্ঠানো ৰা, আপাথগতৰিসযপদট্ঠানো. অযং হি অরূপধম্মোপি সমানো আরম্মণেসু ফুসনাকারেনেৰ ¶ পৰত্ততি, সো দ্ৰিন্নং মেণ্ডানং সন্নিপাতো ৰিয দট্ঠব্বো.

সুন্দরং মনোতি সুমনো, সুমনস্স ভাৰো সোমনস্সং, সোমনস্সমেৰ ৰেদনা সোমনস্সৰেদনা. সা ৰেদযিতলক্খণা, ইট্ঠাকারানুভৰনরসা রাজা ৰিয সুভোজনরসং, চেতসিকঅস্সাদপচ্চুপট্ঠানা, পস্সদ্ধিপদট্ঠানা.

নীলাদিভেদং ¶ আরম্মণং সঞ্জানাতীতি সঞ্ঞা. সা সঞ্জাননলক্খণা, পচ্চাভিঞ্ঞাণকরণরসা ৰড্ঢকিস্স অভিঞ্ঞাণকরণমিৰ, যথাগহিতনিমিত্তৰসেন অভিনিৰেসকরণপচ্চুপট্ঠানা, যথোপট্ঠিতৰিসযপদট্ঠানা.

চেতযতীতি ¶ চেতনা. সদ্ধিং অত্তনা সম্পযুত্তধম্মে আরম্মণে অভিসন্দহতীতি অত্থো. সা চেতযিতলক্খণা, আযূহনরসা, সংৰিদহনপচ্চুপট্ঠানা সককিচ্চপরকিচ্চসাধকা জেট্ঠসিস্সমহাৰড্ঢকিআদযো ৰিয.

ৰিতক্কেতীতি ৰিতক্কো. ৰিতক্কনং ৰা ৰিতক্কো. স্ৰাযং আরম্মণে চিত্তস্স অভিনিরোপনলক্খণো, আহননপরিযাহননরসো, আরম্মণে চিত্তস্স আনযনপচ্চুপট্ঠানো.

আরম্মণে তেন চিত্তং ৰিচরতীতি ৰিচারো. ৰিচরণং ৰা ৰিচারো. অনুসঞ্চরণন্তি ৰুত্তং হোতি. স্ৰাযং আরম্মণানুমজ্জনলক্খণো, তত্থ সহজাতানুযোজনরসো, চিত্তস্স অনুপবন্ধপচ্চুপট্ঠানো.

পিনযতীতি পীতি. সা সম্পিযাযনলক্খণা, কাযচিত্তপীণনরসা, ফরণরসা ৰা, ওদগ্যপচ্চুপট্ঠানা.

চিত্তস্স একগ্গভাৰো চিত্তেকগ্গতা. সমাধিস্সেতং নামং. সো অৰিসারলক্খণো, অৰিক্খেপলক্খণো ৰা, সহজাতানং সম্পিণ্ডনরসো ন্হানিযচুণ্ণানং উদকং ৰিয, উপসমপচ্চুপট্ঠানো, ৰিসেসতো সুখপদট্ঠানো.

সদ্দহন্তি এতায, সযং ৰা সদ্দহতি, সদ্দহনমত্তমেৰ ৰা এসাতি সদ্ধা. সা পনেসা সদ্দহনলক্খণা, পসাদনরসা উদকপ্পসাদকমণি ৰিয, অকালুসিযপচ্চুপট্ঠানা, সদ্ধেয্যৰত্থুপদট্ঠানা.

সরন্তি ¶ এতায, সযং ৰা সরতি, সরণমত্তমেৰ ৰা এসাতি সতি. সা অপিলাপনলক্খণা, অসম্মোসরসা, আরক্খপচ্চুপট্ঠানা, থিরসঞ্ঞাপদট্ঠানা.

ৰীরভাৰো ¶ ৰীরিযং. ৰীরানং ৰা কম্মং ৰীরিযং. তং পনেতং উস্সাহনলক্খণং, সহজাতানং উপত্থম্ভনরসং, অসংসীদনভাৰপচ্চুপট্ঠানং, সংৰেগপদট্ঠানং.

পজানাতীতি ¶ পঞ্ঞা. সা পনেসা ৰিজাননলক্খণা, ৰিসযোভাসনরসা পদীপো ৰিয, অসম্মোহপচ্চুপট্ঠানা অরঞ্ঞগতসুদেসকো ৰিয.

জীৰন্তি তেন তংসম্পযুত্তধম্মাতি জীৰিতং. তং পন অত্তনা অৰিনিব্ভুত্তানং ধম্মানং অনুপালনলক্খণং, তেসং পৰত্তনরসং, তেসংযেৰ ঠপনপচ্চুপট্ঠানং, যাপযিতব্বধম্মপদট্ঠানং. সন্তেপি চ তেসং অনুপালনলক্খণাদিম্হি ৰিধানে অত্থিক্খণেযেৰ তং তে ধম্মে অনুপালেতি উদকং ৰিয উপ্পলাদীনি, যথাসকং পচ্চযুপ্পন্নেপি চ ধম্মে অনুপালেতি ধাতি ৰিয কুমারং, সযংপৰত্তিতধম্মসম্বন্ধেনেৰ পৰত্ততি নিযামকো ৰিয, ন ভঙ্গতো উদ্ধং পৰত্তযতি অত্তনো চ পৰত্তযিতব্বানঞ্চ অভাৰা, ন ভঙ্গক্খণে ঠপেতি সযং ভিজ্জমানত্তা খীযমানো ৰিয ৰত্তিস্নেহোৰ পদীপসিখন্তি.

ন লুব্ভন্তি তেন, সযং ৰা ন লুব্ভতি, অলুব্ভনমত্তমেৰ ৰা তন্তি অলোভো. সো আরম্মণে চিত্তস্স অলগ্গভাৰলক্খণো কমলদলে জলবিন্দু ৰিয, অপরিগ্গহরসো মুত্তভিক্খু ৰিয, অনল্লীনভাৰপচ্চুপট্ঠানো অসুচিম্হি পতিতপুরিসো ৰিয.

ন দুস্সন্তি তেন, সযং ৰা ন দুস্সতি, অদুস্সনমত্তমেৰ ৰা তন্তি অদোসো. সো অচণ্ডিক্কলক্খণো, অৰিরোধলক্খণো ৰা অনুকূলমিত্তো ৰিয, আঘাতৰিনযনরসো, পরিল়াহৰিনযনরসো ¶ ৰা চন্দনং ৰিয, সোম্মভাৰপচ্চুপট্ঠানো পুণ্ণচন্দো ৰিয.

কাযদুচ্চরিতাদীহি হিরীযতীতি হিরী. লজ্জাযেতং অধিৰচনং. তেহিযেৰ ওত্তপ্পতীতি ওত্তপ্পং. পাপতো উব্বেগস্সেতং অধিৰচনং. তত্থ পাপতো জিগুচ্ছনলক্খণা হিরী, ওত্তাসলক্খণং ওত্তপ্পং. উভোপি পাপানং অকরণরসা, পাপতো সঙ্কোচনপচ্চুপট্ঠানা, অত্তগারৰপরগারৰপদট্ঠানা. ইমে ধম্মা লোকপালাতি দট্ঠব্বা.

কাযপস্সম্ভনং কাযপস্সদ্ধি. চিত্তপস্সম্ভনং চিত্তপস্সদ্ধি. কাযোতি চেত্থ ৰেদনাদযো তযো খন্ধা. উভোপি পনেতা একতো হুত্ৰা কাযচিত্তদরথৰূপসমলক্খণা ¶ , কাযচিত্তদরথনিম্মদনরসা, কাযচিত্তানং অপরিপ্ফন্দনসীতিভাৰপচ্চুপট্ঠানা, কাযচিত্তপদট্ঠানা, কাযচিত্তানং অৰূপসমতাউদ্ধচ্চাদিকিলেসপ্পটিপক্খভূতাতি ৰেদিতব্বা.

কাযলহুভাৰো ¶ কাযলহুতা. চিত্তলহুভাৰো চিত্তলহুতা. কাযচিত্তানং গরুভাৰৰূপসমলক্খণা, কাযচিত্তগরুভাৰনিম্মদনরসা, কাযচিত্তানং অদন্ধতাপচ্চুপট্ঠানা, কাযচিত্তপদট্ঠানা, কাযচিত্তানং গরুভাৰকরথিনমিদ্ধাদিকিলেসপ্পটিপক্খভূতাতি ৰেদিতব্বা.

কাযমুদুভাৰো কাযমুদুতা. চিত্তমুদুভাৰো চিত্তমুদুতা. কাযচিত্তানং থদ্ধভাৰৰূপসমলক্খণা, কাযচিত্তানং থদ্ধভাৰনিম্মদনরসা, অপ্পটিঘাতপচ্চুপট্ঠানা, কাযচিত্তপদট্ঠানা, কাযচিত্তানং থদ্ধভাৰকরদিট্ঠিমানাদিকিলেসপ্পটিপক্খভূতাতি ৰেদিতব্বা.

কাযকম্মঞ্ঞভাৰো কাযকম্মঞ্ঞতা. চিত্তকম্মঞ্ঞভাৰো চিত্তকম্মঞ্ঞতা. কাযচিত্তানং অকম্মঞ্ঞভাৰৰূপসমলক্খণা, কাযচিত্তানং অকম্মঞ্ঞভাৰনিম্মদনরসা, কাযচিত্তানং আরম্মণকরণসম্পত্তিপচ্চুপট্ঠানা, কাযচিত্তপদট্ঠানং, কাযচিত্তানং ¶ অকম্মঞ্ঞভাৰকরঅৰসেসনীৰরণাদিকিলেসপ্পটিপক্খভূতাতি ৰেদিতব্বা.

কাযপাগুঞ্ঞভাৰো কাযপাগুঞ্ঞতা. চিত্তপাগুঞ্ঞভাৰো চিত্তপাগুঞ্ঞতা. কাযচিত্তানং অগেলঞ্ঞভাৰলক্খণা, কাযচিত্তানং গেলঞ্ঞনিম্মদনরসা, নিরাদীনৰপচ্চুপট্ঠানা, কাযচিত্তপদট্ঠানা, কাযচিত্তানং গেলঞ্ঞভাৰকরঅস্সদ্ধাদিকিলেসপ্পটিপক্খভূতাতি দট্ঠব্বা.

কাযস্স উজুকভাৰো কাযুজুকতা. চিত্তস্স উজুকভাৰো চিত্তুজুকতা. কাযচিত্তানং অকুটিলভাৰলক্খণা, কাযচিত্তানং অজ্জৰলক্খণা ৰা, কাযচিত্তানং কুটিলভাৰনিম্মদনরসা, অজিম্হতাপচ্চুপট্ঠানা, কাযচিত্তপদট্ঠানা, কাযচিত্তানং কুটিলভাৰকরমাযাসাঠেয্যাদিকিলেসপ্পটিপক্খভূতাতি দট্ঠব্বা.

ছন্দোতি কত্তুকম্যতাযেতং অধিৰচনং. তস্মা সো কত্তুকম্যতালক্খণো ছন্দো, আরম্মণপরিযেসনরসো, আরম্মণেন অত্থিকতাপচ্চুপট্ঠানো, তদেৰস্স পদট্ঠানো.

অধিমুচ্চনং ¶ অধিমোক্খো. সো সন্নিট্ঠানলক্খণো, অসংসপ্পনরসো, নিচ্ছযপচ্চুপট্ঠানো, সন্নিট্ঠেয্যধম্মপদট্ঠানো, আরম্মণে নিচ্চলভাৰেন ইন্দখীলো ৰিয দট্ঠব্বো.

তেসু ¶ তেসু ধম্মেসু মজ্ঝত্তভাৰো তত্রমজ্ঝত্ততা. সা চিত্তচেতসিকানং সমৰাহিতলক্খণা, ঊনাধিকতানিৰারণরসা, পক্খপাতুপচ্ছেদনরসা ৰা, মজ্ঝত্তভাৰপচ্চুপট্ঠানা.

কিরিযা কারো, মনস্মিং কারো মনসিকারো. পুরিমমনতো ৰিসদিসং মনং করোতীতি চ মনসিকারো.

স্ৰাযং ¶ আরম্মণপটিপাদকো, ৰীথিপটিপাদকো, জৰনপটিপাদকোতি তিপ্পকারো. তত্থ আরম্মণপটিপাদকো মনস্মিং কারো মনসিকারো. সো সারণলক্খণো, সম্পযুত্তানং আরম্মণে সংযোজনরসো, আরম্মণাভিমুখভাৰপচ্চুপট্ঠানো, আরম্মণপদট্ঠানো, সঙ্খারক্খন্ধপরিযাপন্নো আরম্মণপটিপাদকত্তেন সম্পযুত্তানং সারথী ৰিয দট্ঠব্বো. ৰীথিপটিপাদকোতি পঞ্চদ্ৰারাৰজ্জনস্সেতং অধিৰচনং, জৰনপটিপাদকোতি মনোদ্ৰারাৰজ্জনস্সেতং অধিৰচনং, ন তে ইধ অধিপ্পেতা.

করুণাতি পরদুক্খে সতি সাধূনং হদযকম্পনং করোতীতি করুণা, কিনাতি ৰিনাসেতি ৰা পরদুক্খন্তি করুণা. সা পরদুক্খাপনযনাকারপ্পৰত্তিলক্খণা, পরদুক্খাসহনরসা, অৰিহিংসাপচ্চুপট্ঠানা, দুক্খাভিভূতানং অনাথভাৰদস্সনপদট্ঠানা.

মোদন্তি তায, সযং ৰা মোদতীতি মুদিতা. সা পমোদনলক্খণা, অনিস্সাযনরসা, অরতিৰিঘাতপচ্চুপট্ঠানা, সত্তানং সম্পত্তিদস্সনপদট্ঠানা. কেচি পন মেত্তুপেক্খাযোপি অনিযতে ইচ্ছন্তি, তং ন গহেতব্বং. অত্থতো হি অদোসো এৰ মেত্তা, তত্রমজ্ঝত্তুপেক্খাযেৰ উপেক্খাতি.

কাযদুচ্চরিততো ৰিরতি কাযদুচ্চরিতৰিরতি. এসেৰ নযো সেসেসুপি দ্ৰীসু. লক্খণাদিতো পন এতা তিস্সোপি ৰিরতিযো কাযদুচ্চরিতাদিৰত্থূনং অৰীতিক্কমলক্খণা, কাযদুচ্চরিতাদিৰত্থুতো সঙ্কোচনরসা, অকিরিযপচ্চুপট্ঠানা, সদ্ধাহিরিওত্তপ্পঅপ্পিচ্ছতাদিগুণপদট্ঠানা. কেচি পন ইমাসু একেকং নিযতং ৰিরতিং ইচ্ছন্তি. এৰং কামাৰচরপঠমমহাকুসলচিত্তেন ইমে তেত্তিংস ৰা চতুত্তিংস ৰা ধম্মা সম্পযোগং গচ্ছন্তীতি ৰেদিতব্বা.

যথা ¶ ¶ ¶ চ পঠমেন, এৰং দুতিযচিত্তেনাপি. সসঙ্খারভাৰমত্তমেৰ হি এত্থ ৰিসেসো. পুন ততিযেন ঞাণৰিপ্পযোগতো ঠপেত্ৰা অমোহং অৰসেসা দ্ৰত্তিংস ৰা তেত্তিংস ৰা ৰেদিতব্বা. তথা চতুত্থেনাপি সসঙ্খারভাৰমত্তমেৰ ৰিসেসো, পঠমে ৰুত্তেসু পন ঠপেত্ৰা পীতিং অৰসেসা পঞ্চমেন সম্পযোগং গচ্ছন্তি. সোমনস্সট্ঠানে চেত্থ উপেক্খাৰেদনা পৰিট্ঠা. সা পন ইট্ঠানিট্ঠৰিপরীতানুভৰনলক্খণা, পক্খপাতুপচ্ছেদনরসা. যথা চ পঞ্চমেন, এৰং ছট্ঠেনাপি. সসঙ্খারমত্তমেৰ হোতি ৰিসেসো. সত্তমেন পন ঠপেত্ৰা পঞ্ঞং অৰসেসা একতিংস ৰা দ্ৰত্তিংস ৰা ধম্মা হোন্তি, তথা অট্ঠমেনাপি. সসঙ্খারমত্তমেৰ ৰিসেসো. এৰং তাৰ কামাৰচরকুসলচেতসিকা ৰেদিতব্বা.

৮১.

উপেক্খাযুত্তচিত্তেসু, ন দুক্খসুখপীতিযো;

জাযন্তেৰ ৰিসুং পঞ্চ, করুণামুদিতাদযো.

অৰসেসেসু পন রূপাৰচরচিত্তসম্পযুত্তা রূপাৰচরা, তত্থ পঠমচিত্তসম্পযুত্তা তাৰ কামাৰচরপঠমচিত্তে ৰুত্তেসু ঠপেত্ৰা ৰিরতিত্তযং অৰসেসা ৰেদিতব্বা. ৰিরতিযো পন কামাৰচরকুসললোকুত্তরেস্ৰেৰ উপ্পজ্জন্তি, ন অঞ্ঞেসু. দুতিযেন ৰিতক্কৰজ্জা দ্ৰত্তিংস ৰা তেত্তিংস ৰা. ততিযেন ৰিচারৰজ্জা একতিংস ৰা দ্ৰত্তিংস ৰা. চতুত্থেন ততো পীতিৰজ্জা তিংস ৰা একতিংস ৰা. পঞ্চমেন ততো করুণামুদিতাৰজ্জা তিংস হোন্তি, সোমনস্সট্ঠানে উপেক্খা পৰিট্ঠা. এৰং রূপাৰচরকুসলচেতসিকা ৰেদিতব্বা.

অরূপাৰচরচিত্তসম্পযুত্তা অরূপাৰচরা, তে পন রূপাৰচরপঞ্চমে ৰুত্তনযেন ৰেদিতব্বা. অরূপাৰচরভাৰোৰেত্থ ৰিসেসো.

লোকুত্তরচিত্তসম্পযুত্তা ¶ লোকুত্তরা, তে পন পঠমজ্ঝানিকে মগ্গচিত্তে পঠমরূপাৰচরচিত্তে ৰুত্তনযেন দুতিযজ্ঝানিকাদিভেদেপি মগ্গচিত্তে দুতিযরূপাৰচরচিত্তাদীসু ৰুত্তনযেনেৰ ৰেদিতব্বা. করুণামুদিতানমভাৰো চ নিযতৰিরতিভাৰো চ লোকুত্তরভাৰো চেত্থ ৰিসেসো. এৰং তাৰ কুসলচিত্তসম্পযুত্তচেতসিকা ৰেদিতব্বা.

অকুসলা পন চেতসিকা ভূমিতো একৰিধা কামাৰচরাযেৰ, তেসু লোভমূলপঠমাকুসলচিত্তসম্পযুত্তা ¶ তাৰ নিযতা সরূপেনাগতা পন্নরস, যেৰাপনকা নিযতা চত্তারোতি ¶ একূনৰীসতি হোন্তি. অনিযতা ছ যেৰাপনকাতি সব্বে পঞ্চৰীসতি হোন্তি. সেয্যথিদং – ফস্সো সোমনস্সৰেদনা সঞ্ঞা চেতনা ৰিতক্কো ৰিচারো পীতি চিত্তস্সেকগ্গতা ৰীরিযং জীৰিতং অহিরিকং অনোত্তপ্পং লোভো মোহো মিচ্ছাদিট্ঠীতি ইমে সরূপেনাগতা পন্নরস, ছন্দো অধিমোক্খো উদ্ধচ্চং মনসিকারোতি ইমে চত্তারো নিযতযেৰাপনকা, ইমে পন পটিপাটিযা দসসু চিত্তেসু নিযতা হোন্তি, মানো ইস্সা মচ্ছরিযং কুক্কুচ্চং থিনমিদ্ধন্তি ইমে ছযেৰ অনিযতযেৰাপনকা.

৮২.

এৰং যেৰাপনা সব্বে, নিযতানিযতা দস;

নিদ্দিট্ঠা পাপচিত্তেসু, হতপাপেন তাদিনা.

তত্থ ফস্সোতি অকুসলচিত্তসহজাতো ফস্সো. এস নযো সেসেসুপি. ন হিরীযতীতি অহিরিকো, অহিরিকস্স ভাৰো অহিরিকং. কাযদুচ্চরিতাদীহি ওত্তপ্পতীতি ওত্তপ্পং, ন ওত্তপ্পং অনোত্তপ্পং. তত্থ কাযদুচ্চরিতাদীহি অজিগুচ্ছনলক্খণং, অলজ্জালক্খণং ৰা অহিরিকং, অনোত্তপ্পং তেহেৰ অসারজ্জনলক্খণং, অনুত্তাসলক্খণং ৰা.

লুব্ভন্তি ¶ তেন, সযং ৰা লুব্ভতি, লুব্ভনমত্তমেৰ ৰা তন্তি লোভো. সো আরম্মণগহণলক্খণো মক্কটালেপো ৰিয, অভিসঙ্গরসো তত্তকপালে পক্খিত্তমংসপেসি ৰিয, অপরিচ্চাগপচ্চুপট্ঠানো তেলঞ্জনরাগো ৰিয, সংযোজনিযেসু ধম্মেসু অস্সাদদস্সনপদট্ঠানো.

মুয্হন্তি তেন, সযং ৰা মুয্হতি, মুয্হনমত্তমেৰ ৰা তন্তি মোহো. সো চিত্তস্স অন্ধভাৰলক্খণো, অঞ্ঞাণলক্খণো ৰা, অসম্পটিৰেধরসো, আরম্মণসভাৰচ্ছাদনরসো ৰা, অন্ধকারপচ্চুপট্ঠানো, অযোনিসোমনসিকারপদট্ঠানো.

মিচ্ছা পস্সন্তি তায, সযং ৰা মিচ্ছা পস্সতি, মিচ্ছাদস্সনমত্তমেৰ ৰা এসাতি মিচ্ছাদিট্ঠি. সা অযোনিসোঅভিনিৰেসলক্খণা, পরামাসরসা, মিচ্ছাভিনিৰেসপচ্চুপট্ঠানা, অরিযানং অদস্সনকামতাদিপদট্ঠানা.

উদ্ধতভাৰো ¶ উদ্ধচ্চং. তং অৰূপসমলক্খণং ৰাতাভিঘাতচলজলং ৰিয, অনৰট্ঠানরসং ৰাতাভিঘাতচলধজপটাকা ৰিয, ভন্তত্তপচ্চুপট্ঠানং পাসাণাভিঘাতসমুদ্ধতভস্মং ৰিয, অযোনিসোমনসিকারপদট্ঠানং.

মঞ্ঞতীতি ¶ মানো. সো উণ্ণতিলক্খণো, সম্পগ্গহণরসো, কেতুকম্যতাপচ্চুপট্ঠানো, দিট্ঠিৰিপ্পযুত্তলোভপদট্ঠানো.

ইস্সতীতি ইস্সা. সা পরসম্পত্তীনং উসূযনলক্খণা, তত্থেৰ অনভিরতিরসা, ততো ৰিমুখভাৰপচ্চুপট্ঠানা, পরসম্পত্তিপদট্ঠানা.

মচ্ছরভাৰো মচ্ছরিযং. তং অত্তনো সম্পত্তীনং নিগুহণলক্খণং, তাসংযেৰ পরেহি সাধারণভাৰঅক্খমনরসং, সঙ্কোচনপচ্চুপট্ঠানং, অত্তসম্পত্তিপদট্ঠানং.

কুচ্ছিতং ¶ কতং কুকতং, তস্স ভাৰো কুক্কুচ্চং. তং পচ্ছানুতাপলক্খণং, কতাকতানুসোচনরসং, ৰিপ্পটিসারপচ্চুপট্ঠানং, কতাকতপদট্ঠানং.

থিনতা থিনং. মিদ্ধতা মিদ্ধং. অনুস্সাহনসংসীদনতা, অসত্তিৰিঘাতো চাতি অত্থো. থিনঞ্চ মিদ্ধঞ্চ থিনমিদ্ধং. তত্থ থিনং অনুস্সাহনলক্খণং, ৰীরিযৰিনোদনরসং, সংসীদনভাৰপচ্চুপট্ঠানং. মিদ্ধং অকম্মঞ্ঞতালক্খণং, ওনহনরসং, লীনতাপচ্চুপট্ঠানং, উভযম্পি অযোনিসোমনসিকারপদট্ঠানং. সেসা কুসলে ৰুত্তনযেন ৰেদিতব্বা.

এত্থ পন ৰিতক্কৰীরিযসমাধীনং মিচ্ছাসঙ্কপ্পমিচ্ছাৰাযামমিচ্ছাসমাধযো ৰিসেসকা. ইতি ইমে একূনৰীসতি চেতসিকা পঠমাকুসলচিত্তেন সম্পযোগং গচ্ছন্তীতি ৰেদিতব্বা. যথা চ পঠমেন, এৰং দুতিযেনাপি. সসঙ্খারভাৰো চেত্থ থিনমিদ্ধস্স নিযতভাৰো চ ৰিসেসো. ততিযেন পঠমে ৰুত্তেসু ঠপেত্ৰা দিট্ঠিং সেসা অট্ঠারস ৰেদিতব্বা. মানো পনেত্থ অনিযতো হোতি, দিট্ঠিযা সহ ন উপ্পজ্জতীতি. চতুত্থেন দুতিযে ৰুত্তেসু ঠপেত্ৰা দিট্ঠিং অৰসেসা ৰেদিতব্বা. এত্থাপি চ মানো অনিযতো হোতি. পঞ্চমেন পঠমে ৰুত্তেসু ঠপেত্ৰা পীতিং অৰসেসা সম্পযোগং গচ্ছন্তীতি. সোমনস্সট্ঠানে পনেত্থ উপেক্খা পৰিট্ঠা. ছট্ঠেনাপি পঞ্চমে ৰুত্তসদিসা এৰ. সসঙ্খারতা ¶ , থিনমিদ্ধস্স নিযতভাৰো চ ৰিসেসো. সত্তমেন পঞ্চমে ৰুত্তেসু ঠপেত্ৰা দিট্ঠিং অৰসেসা ৰেদিতব্বা. মানো পনেত্থ অনিযতো. অট্ঠমেন ছট্ঠে ৰুত্তেসু ঠপেত্ৰা দিট্ঠিং অৰসেসা ৰেদিতব্বা. এত্থাপি মানো ¶ অনিযতো হোতি. এৰং লোভমূলচেতসিকা ৰেদিতব্বা.

দোমনস্সসহগতেসু পটিঘসম্পযুত্তেসু দোসমূলেসু দ্ৰীসু পঠমেন অসঙ্খারিকেন সম্পযুত্তা নিযতা সরূপেনাগতা ¶ তেরস. সেয্যথিদং – ফস্সো দোমনস্সৰেদনা সঞ্ঞা চেতনা চিত্তেকগ্গতা ৰিতক্কো ৰিচারো ৰীরিযং জীৰিতং অহিরিকং অনোত্তপ্পং দোসো মোহো চেতি ইমে তেরস ধম্মা ছন্দাদীহি চতূহি নিযতযেৰাপনকেহি সত্তরস হোন্তি ইস্সামচ্ছরিযকুক্কুচ্চেসু অনিযতেসু তীসু একেন সহ অট্ঠারস হোন্তি, এতেপি তযো ন একতো উপ্পজ্জন্তি.

তত্থ দুট্ঠু মনোতি দুমনো, দুমনস্স ভাৰো দোমনস্সং, দোমনস্সৰেদনাযেতং অধিৰচনং. তেন সহগতং দোমনস্সসহগতং. তং অনিট্ঠারম্মণানুভৰনলক্খণং, অনিট্ঠাকারসম্ভোগরসং, চেতসিকাবাধপচ্চুপট্ঠানং, একন্তেনেৰ হদযৰত্থুপদট্ঠানং.

দুস্সন্তি তেন, সযং ৰা দুস্সতি, দুস্সনমত্তমেৰ ৰা তন্তি দোসো. সো চণ্ডিক্কলক্খণো পহতাসীৰিসো ৰিয, ৰিসপ্পনরসো ৰিসনিপাতো ৰিয, অত্তনো নিস্সযদহনরসো ৰা দাৰগ্গি ৰিয, দুস্সনপচ্চুপট্ঠানো লদ্ধোকাসো ৰিয সপত্তো, আঘাতৰত্থুপদট্ঠানো. অৰসেসা হেট্ঠা ৰুত্তপ্পকারাৰ. ইতি ইমে সত্তরস ৰা অট্ঠারস ৰা নৰমেন সম্পযোগং গচ্ছন্তীতি ৰেদিতব্বা. যথা চ নৰমেন, এৰং দসমেনাপি. সসঙ্খারতা, পনেত্থ থিনমিদ্ধসম্ভৰো চ ৰিসেসো.

দ্ৰীসু পন মোহমূলেসু ৰিচিকিচ্ছাসম্পযুত্তেন একাদসমেন সম্পযুত্তা তাৰ ফস্সো উপেক্খাৰেদনা সঞ্ঞা চেতনা ৰিতক্কো ৰিচারো ৰীরিযং জীৰিতং চিত্তট্ঠিতি অহিরিকং অনোত্তপ্পং মোহো ৰিচিকিচ্ছাতি সরূপেনাগতা তেরস, উদ্ধচ্চং মনসিকারোতি দ্ৰে যেৰাপনকা নিযতা. তেহি সদ্ধিং পন্নরস হোন্তি.

তত্থ ¶ পৰত্তট্ঠিতিমত্তা একগ্গতা. ৰিগতা চিকিচ্ছাতি ৰিচিকিচ্ছা. সভাৰং ৰিচিনন্তো ¶ এতায কিচ্ছতি কিলমতীতি ৰিচিকিচ্ছা. সা সংসযলক্খণা, কম্পনরসা, অনিচ্ছযপচ্চুপট্ঠানা, অযোনিসোমনসিকারপদট্ঠানা. সেসা ৰুত্তনযা এৰ.

দ্ৰাদসমেন উদ্ধচ্চসম্পযুত্তেন সম্পযুত্তা সরূপেনাগতা ¶ ৰিচিকিচ্ছাসহগতে ৰুত্তেসু ৰিচিকিচ্ছাহীনা উদ্ধচ্চং সরূপেন আগতং, তস্মা তেরসেৰ হোন্তি. ৰিচিকিচ্ছায অভাৰেন পনেত্থ অধিমোক্খো উপ্পজ্জতি, তেন সদ্ধিং চুদ্দস হোন্তি. অধিমোক্খসম্ভৰতো সমাধি বলৰা হোতি, অধিমোক্খমনসিকারা দ্ৰে যেৰাপনকা, তেহি সহ পন্নরসেৰ হোন্তি. এৰং তাৰ অকুসলচেতসিকা ৰেদিতব্বা.

ইদানি অব্যাকতা ৰুচ্চন্তি, অব্যাকতা পন দুৰিধা ৰিপাককিরিযভেদতো. তত্থ ৰিপাকা কুসলা ৰিয ভূমিৰসেন চতুব্বিধা কামাৰচরং রূপাৰচরং অরূপাৰচরং লোকুত্তরঞ্চেতি. তত্থ কামাৰচরৰিপাকা সহেতুকাহেতুকৰসেন দুৰিধা. তত্থ সহেতুকৰিপাকসম্পযুত্তা সহেতুকা. তে সহেতুককামাৰচরকুসলসম্পযুত্তসদিসা. যা পন করুণামুদিতা অনিযতা, তা সত্তারম্মণত্তা ৰিপাকেসু নুপ্পজ্জন্তি. কামাৰচরৰিপাকানং একন্তপরিত্তারম্মণত্তা ৰিরতিযো পনেত্থ একন্তকুসলত্তা ন লব্ভন্তি. ৰিভঙ্গে ‘‘পঞ্চ সিক্খাপদা কুসলাযেৰা’’তি হি ৰুত্তং. এৰং কামাৰচরসহেতুকৰিপাকচেতসিকা ৰেদিতব্বা.

৮৩.

তেত্তিংসাদিদ্ৰযে ধম্মা, দ্ৰত্তিংসেৰ ততো পরে;

বাত্তিংস পঞ্চমে ছট্ঠে, একতিংস ততো পরে.

অহেতুকচিত্তসম্পযুত্তা ¶ পন অহেতুকা. তেসু চক্খুৰিঞ্ঞাণসম্পযুত্তা তাৰ ফস্সো উপেক্খাৰেদনা সঞ্ঞা চেতনা জীৰিতং চিত্তট্ঠিতীতি সরূপেনাগতা ছ, মনসিকারেন চ সত্ত হোন্তি. সোতঘানজিৰ্হাকাযৰিঞ্ঞাণসম্পযুত্তাপি সত্ত সত্তেৰ চেতসিকা. তত্থ কাযৰিঞ্ঞাণসম্পযুত্তেসু পন উপেক্খাঠানে সুখৰেদনা পৰিট্ঠা. সা কাযিকসাতলক্খণা, পীণনরসা, সেসা ৰুত্তনযা এৰ.

৮৪.

ইট্ঠারম্মণযোগস্মিং, চক্খুৰিঞ্ঞাণকাদিসু;

সতি কস্মা উপেক্খাৰ, ৰুত্তা চতূসু সত্থুনা.

৮৫.

উপাদায ¶ চ রূপেন, উপাদারূপকে পন;

সঙ্ঘট্টনানিঘংসস্স, দুব্বলত্তাতি দীপযে.

৮৬.

পসাদং পনতিক্কম্ম, কূটংৰ পিচুপিণ্ডকং;

ভূতরূপেন ভূতানং, ঘট্টনায সুখাদিকং.

তস্মা ¶ কাযৰিঞ্ঞাণং সুখাদিসম্পযুত্তন্তি ৰেদিতব্বং. মনোধাতুনা সম্পযুত্তা সরূপেনাগতা চক্খুৰিঞ্ঞাণেন সদ্ধিং ৰুত্তা ছ, ৰিতক্কৰিচারেহি সহ অট্ঠ, অধিমোক্খমনসিকারেহি দ্ৰীহি যেৰাপনকেহি দস ধম্মা হোন্তি. তথা মনোৰিঞ্ঞাণধাতুউপেক্খাসহগতেন. সোমনস্সসহগতেন পীতিঅধিকা ৰেদনাপরিৰত্তনঞ্চ নানত্তং. তস্মাৰেত্থ একাদস ধম্মা হোন্তি. এৰং অহেতুকাপি কামাৰচরৰিপাকচেতসিকা ৰেদিতব্বা.

রূপাৰচরৰিপাকচিত্তসম্পযুত্তা পন রূপাৰচরা. অরূপাৰচরৰিপাকচিত্তসম্পযুত্তা অরূপাৰচরা. তে সব্বেপি অত্তনো অত্তনো কুসলচিত্তসম্পযুত্তচেতসিকেহি সদিসাযেৰাতি.

লোকুত্তরৰিপাকচিত্তসম্পযুত্তা ¶ লোকুত্তরা. তে সব্বে তেসংযেৰ লোকুত্তরৰিপাকচিত্তানং সদিসা কুসলচিত্তসম্পযুত্তেহি চেতসিকেহি সদিসা. এৰং রূপাৰচরারূপাৰচরলোকুত্তরৰিপাকচেতসিকা ৰেদিতব্বা.

অকুসলৰিপাকচিত্তসম্পযুত্তা পন অকুসলৰিপাকচেতসিকা নাম. তে পন কুসলৰিপাকাহেতুকচিত্তেসু চক্খুৰিঞ্ঞাণাদীসু ৰুত্তচেতসিকসদিসা. এত্থ পন কাযৰিঞ্ঞাণে দুক্খৰেদনা পৰিট্ঠা. সা কাযিকাবাধলক্খণা. সেসা ৰুত্তনযাযেৰাতি. এৰং ছত্তিংস ৰিপাকচিত্তসম্পযুত্তচেতসিকা ৰেদিতব্বা.

কিরিযাব্যাকতা চ চেতসিকা ভূমিতো তিৰিধা হোন্তি কামাৰচরা রূপাৰচরা অরূপাৰচরাতি. তত্থ কামাৰচরা সহেতুকাহেতুকতো দুৰিধা হোন্তি. তেসু সহেতুককিরিযচিত্তসম্পযুত্তা সহেতুকা, তে পন অট্ঠহি কামাৰচরকুসলচিত্তসম্পযুত্তেহি সমানা ঠপেত্ৰা ৰিরতিত্তযং অনিযতযেৰাপনকেসু করুণামুদিতাযেৰ উপ্পজ্জন্তি. অহেতুককিরিযচিত্তসম্পযুত্তা অহেতুকা, তে কুসলৰিপাকাহেতুকমনোধাতুমনোৰিঞ্ঞাণধাতুচিত্তসম্পযুত্তেহি সমানা. মনোৰিঞ্ঞাণধাতুদ্ৰযে ¶ পন ৰীরিযিন্দ্রিযং অধিকং. ৰীরিযিন্দ্রিযসম্ভৰতো পনেত্থ বলপ্পত্তো সমাধি হোতি. হসিতুপ্পাদচিত্তেন সম্পযুত্তা দ্ৰাদস ধম্মা হোন্তি পীতিযা সহ. অযমেত্থ ৰিসেসো.

রূপাৰচরকিরিযচিত্তসম্পযুত্তা পন রূপাৰচরা. অরূপাৰচরকিরিযচিত্তসম্পযুত্তা অরূপাৰচরা. তে সব্বেপি সকসকভূমিকুসলচিত্তসম্পযুত্তেহি সমানাতি. এৰং ৰীসতি কিরিযচিত্তসম্পযুত্তা চ চেতসিকা ৰেদিতব্বা.

এত্তাৰতা ¶ ¶ কুসলাকুসলৰিপাককিরিযভেদভিন্নেন একূননৰুতিযা চিত্তেন সম্পযুত্তা চেতসিকা নিদ্দিট্ঠা হোন্তি.

৮৭.

কুসলাকুসলেহি ৰিপাকক্রিযা-

হদযেহি যুতা পন চেতসিকা;

সকলাপি চ সাধু মযা কথিতা,

সুগতেন মহামুনিনা কথিতা.

৮৮.

অৰগচ্ছতি যো ইমং অনুনং,

পরমং তস্স সমন্ততো মতি;

অভিধম্মনযে দূরাসদে,

অতিগম্ভীরঠানে ৰিজম্ভতে.

ইতি অভিধম্মাৰতারে চেতসিকনিদ্দেসো নাম

দুতিযো পরিচ্ছেদো.

৩. ততিযো পরিচ্ছেদো

চেতসিকৰিভাগনিদ্দেসো

৮৯.

সব্বে ¶ ¶ চেতসিকা ৰুত্তা, বুদ্ধেনাদিচ্চবন্ধুনা;

নামসামঞ্ঞতোযেৰ, দ্ৰেপঞ্ঞাস ভৰন্তি তে.

সেয্যথিদং – ফস্সো ৰেদনা সঞ্ঞা চেতনা ৰিতক্কো ৰিচারো পীতি চিত্তেকগ্গতা ৰীরিযং জীৰিতং ছন্দো অধিমোক্খো মনসিকারো তত্রমজ্ঝত্ততা সদ্ধা সতি হিরী ওত্তপ্পং অলোভো অদোসো অমোহো কাযপ্পস্সদ্ধিআদীনি ছ যুগানি, তিস্সো ৰিরতিযো, করুণা মুদিতা লোভো দোসো মোহো উদ্ধচ্চং মানো দিট্ঠি ইস্সা মচ্ছরিযং কুক্কুচ্চং থিনং মিদ্ধং ৰিচিকিচ্ছা অহিরিকং অনোত্তপ্পঞ্চাতি.

৯০.

চতুপঞ্ঞাসধা ¶ কামে, রূপে পঞ্চদসেরিতা;

তে হোন্তি দ্ৰাদসারূপে, চত্তালীসমনাসৰা.

৯১.

একৰীসসতং সব্বে, চিত্তুপ্পাদা সমাসতো;

এতেসু তেসমুপ্পত্তিং, উদ্ধরিত্ৰা পনেককং.

৯২.

ফস্সাদীনং তু ধম্মানং, পৰক্খামি ইতো পরং;

পাটৰত্থায ভিক্খূনং, চিত্তচেতসিকেস্ৰহং.

৯৩.

একগ্গতা মনক্কারো, জীৰিতং ফস্সপঞ্চকং;

অট্ঠেতে অৰিনিব্ভোগা, একুপ্পাদা সহক্খযা.

৯৪.

ফস্সো চ ৰেদনা সঞ্ঞা, চেতনা জীৰিতিন্দ্রিযং;

একগ্গতা মনক্কারো, সব্বসাধারণা ইমে.

৯৫.

ৰিতক্কো পঞ্চপঞ্ঞাস-চিত্তেসু সমুদীরিতো;

চারো ছসট্ঠিচিত্তেসু, জাযতে নত্থি সংসযো.

৯৬.

একপঞ্ঞাসচিত্তেসু ¶ , পীতি তেসট্ঠিযা সুখং;

উপেক্খা পঞ্চপঞ্ঞাস-চিত্তে দুক্খং তু তীসু হি.

৯৭.

হোতি দ্ৰাসট্ঠিচিত্তেসু, সোমনস্সিন্দ্রিযং পন;

দুক্খিন্দ্রিযং পনেকস্মিং, তথেকম্হি সুখিন্দ্রিযং.

৯৮.

পঞ্চুত্তরসতে ¶ চিত্তে, ৰীরিযং আহ নাযকো;

চতুত্তরসতে চিত্তে, সমাধিন্দ্রিযমব্রৰি.

৯৯.

সব্বাহেতুকচিত্তানি, ঠপেত্ৰা চেকহেতুকে;

একুত্তরসতে চিত্তে, ছন্দস্সুপ্পত্তিমুদ্দিসে.

১০০.

ঠপেত্ৰা দস ৰিঞ্ঞাণে, ৰিচিকিচ্ছাযুতম্পি চ;

দসুত্তরসতে চিত্তে, অধিমোক্খো উদীরিতো.

১০১.

সদ্ধা ¶ সতি হিরোত্তপ্পং, অলোভাদোসমজ্ঝতা;

ছল়েৰ যুগল়া চাতি, ধম্মা একূনৰীসতি.

১০২.

একনৰুতিযা চিত্তে, জাযন্তি নিযতা ইমে;

অহেতুকেসু চিত্তেসু, অপুঞ্ঞেসু ন জাযরে.

১০৩.

একূনাসীতিযা চিত্তে, পঞ্ঞা জাযতি সব্বদা;

অট্ঠৰীসতিযা চিত্তে, করুণামুদিতা সিযুং.

১০৪.

কামাৰচরপুঞ্ঞেসু, সব্বলোকুত্তরেসু চ;

চত্তালীসৰিধে চিত্তে, সাট্ঠকে ৰিরতিত্তযং.

১০৫.

সদ্ধা সতি হিরোত্তপ্পং, অলোভাদিত্তযম্পি চ;

যুগল়ানি ছ মজ্ঝত্তং, করুণামুদিতাপি চ.

১০৬.

তথা ৰিরতিযো তিস্সো, সব্বে তে পঞ্চৰীসতি;

কুসলাব্যাকতা চাপি, কুসলেন পকাসিতা.

১০৭.

অহিরীকমনোত্তপ্পং, মোহো উদ্ধচ্চমেৰ চ;

দ্ৰাদসাপুঞ্ঞচিত্তেসু, নিযতাযেৰ জাযরে.

১০৮.

লোভো ¶ দোসো চ মোহো চ, মানো দিট্ঠি চ সংসযো;

মিদ্ধমুদ্ধচ্চকুক্কুচ্চং, থিনং মচ্ছরিযম্পি চ.

১০৯.

অহিরীকমনোত্তপ্পং, ইস্সা চ দোমনস্সকং;

এতে অকুসলা ৰুত্তা, একন্তেন মহেসিনা.

১১০.

লোভো অট্ঠসু নিদ্দিট্ঠো, ৰুত্তা চতূসু দিট্ঠিতু;

মানো দিট্ঠিৰিযুত্তেসু, দোসোদ্ৰীস্ৰেৰ জাযতে.

১১১.

ইস্সামচ্ছেরকুক্কুচ্চা, দ্ৰীসু জাযন্তি নো সহ;

ৰিচিকিচ্ছা পনেকস্মিং, থিনমিদ্ধং তু পঞ্চসু.

১১২.

ফস্সো ¶ চ ৰেদনা সঞ্ঞা, চেতনা জীৰিতং মনো;

ৰিতক্কো চ ৰিচারো চ, পীতি ৰীরিযসমাধি চ.

১১৩.

ছন্দো চেৰাধিমোক্খো চ, মনসিকারো চ চুদ্দস;

কুসলাকুসলা চেৰ, হোন্তি অব্যাকতাপি চ.

১১৪.

একূনতিংসচিত্তেসু, ঝানং পঞ্চঙ্গিকং মতং;

চতুঝানঙ্গযুত্তানি, সত্ততিংসাতি নিদ্দিসে.

১১৫.

একাদসৰিধং চিত্তং, তিৰঙ্গিকমুদীরিতং;

চতুতিংসৰিধং চিত্তং, দুৰঙ্গিকমুদীরিতং.

১১৬.

সভাৰেনাৰিতক্কেসু ¶ , ঝানঙ্গানি ন উদ্ধরে;

সব্বাহেতুকচিত্তেসু, মগ্গঙ্গানি ন উদ্ধরে.

১১৭.

তীণি সোল়সচিত্তেসু, ইন্দ্রিযানি ৰদে বুধো;

একস্মিং পন চত্তারি, পঞ্চ তেরসসুদ্ধরে.

১১৮.

সত্ত দ্ৰাদসচিত্তেসু, ইন্দ্রিযানি জিনোব্রৰি;

একেনূনেসু অট্ঠেৰ, চত্তালীসমনেসু চ.

১১৯.

চত্তালীসায ¶ চিত্তেসু, নৰকং নাযকোব্রৰি;

এৰং ইন্দ্রিযযোগোপি, ৰেদিতব্বো ৰিভাৰিনা.

১২০.

অমগ্গঙ্গানি নামেত্থ, অট্ঠারস অহেতুকা;

ঝানঙ্গানি ন ৰিজ্জন্তি, ৰিঞ্ঞাণেসু দ্ৰিপঞ্চসু.

১২১.

একং চিত্তং দুমগ্গঙ্গং, তিমগ্গঙ্গানি সত্তসু;

চত্তালীসায চিত্তেসু, মগ্গো সো চতুরঙ্গিকো.

১২২.

পঞ্চদ্দসসু চিত্তেসু, মগ্গো পঞ্চঙ্গিকো মতো;

ৰুত্তো দ্ৰত্তিংসচিত্তেসু, মগ্গো সত্তঙ্গিকোপি চ.

১২৩.

মগ্গো ¶ অট্ঠসু চিত্তেসু, মতো অট্ঠঙ্গিকোতি হি;

এৰং তু সব্বচিত্তেসু, মগ্গঙ্গানি সমুদ্ধরে.

১২৪.

বলানি দ্ৰে দ্ৰিচিত্তেসু, একস্মিং তীণি দীপযে;

একাদসসু চত্তারি, ছ দ্ৰাদসসু নিদ্দিসে.

১২৫.

একূনাসীতিযা সত্ত, সোল়সেৰাবলানি তু;

চিত্তমেৰং তু ৰিঞ্ঞেয্যং, সবলং অবলম্পি চ.

১২৬.

ঝানঙ্গমগ্গঙ্গবলিন্দ্রিযানি,

চিত্তেসু জাযন্তি হি যেসু যানি;

মযা সমাসেন সমুদ্ধরিত্ৰা,

ৰুত্তানি সব্বানিপি তানি তেসু.

ইতি অভিধম্মাৰতারে চেতসিকৰিভাগনিদ্দেসো নাম

ততিযো পরিচ্ছেদো.

৪. চতুত্থো পরিচ্ছেদো

একৰিধাদিনিদ্দেসো

১২৭.

ইতো ¶ ¶ পরং পৰক্খামি, নযমেকৰিধাদিকং;

আভিধম্মিকভিক্খূনং, বুদ্ধিযা পন ৰুদ্ধিযা.

১২৮.

সব্বমেকৰিধং চিত্তং, ৰিজাননসভাৰতো;

দুৰিধঞ্চ ভৰে চিত্তং, অহেতুকসহেতুতো.

১২৯.

পুঞ্ঞাপুঞ্ঞৰিপাকা হি, কামে দস চ পঞ্চ চ;

ক্রিযা তিস্সোতি সব্বেপি, অট্ঠারস অহেতুকা.

১৩০.

একসত্ততি সেসানি, চিত্তুপ্পাদা মহেসিনা;

সহেতুকাতি নিদ্দিট্ঠা, তাদিনা হেতুৰাদিনা.

১৩১.

সৰত্থুকাৰত্থুকতো ¶ , তথোভযৰসেন চ;

সব্বং ৰুত্তপকারং তু, তিৰিধং হোতি মানসং.

১৩২.

সব্বো কামৰিপাকো চ, রূপে পঞ্চদসাপি চ;

আদিমগ্গো সিতুপ্পাদো, মনোধাতু ক্রিযাপি চ.

১৩৩.

দোমনস্সদ্ৰযঞ্চাপি, তেচত্তালীস মানসা;

নুপ্পজ্জন্তি ৰিনা ৰত্থুং, একন্তেন সৰত্থুকা.

১৩৪.

অরূপাৰচরপাকা চ, একন্তেন অৰত্থুকা;

দ্ৰাচত্তালীস সেসানি, চিত্তানুভযথা সিযুং.

১৩৫.

একেকারম্মণং চিত্তং, পঞ্চারম্মণমেৰ চ;

ছল়ারম্মণকঞ্চেতি, এৰম্পি তিৰিধং সিযা.

১৩৬.

ৰিঞ্ঞাণানি চ দ্ৰেপঞ্চ, অট্ঠ লোকুত্তরানি চ;

সব্বং মহগ্গতঞ্চেৰ, ঠপেত্ৰাভিঞ্ঞমানসং.

১৩৭.

তেচত্তালীস ¶ ৰিঞ্ঞেয্যা, একেকারম্মণা পন;

মনোধাতুত্তযং তত্থ, পঞ্চারম্মণমীরিতং.

১৩৮.

তেচত্তালীস সেসানি, ছল়ারম্মণিকা মতা;

তথা চ তিৰিধং চিত্তং, কুসলাকুসলাদিতো.

১৩৯.

অহেতুং একহেতুঞ্চ, দ্ৰিহেতুঞ্চ তিহেতুকং;

এৰং চতুব্বিধং চিত্তং, ৰিঞ্ঞাতব্বং ৰিভাৰিনা.

১৪০.

হেট্ঠা মযাপি নিদ্দিট্ঠা, অট্ঠারস অহেতুকা;

ৰিচিকিচ্ছুদ্ধচ্চসংযুত্তং, একহেতুমুদীরিতং.

১৪১.

কামে ¶ দ্ৰাদসধা পুঞ্ঞ-ৰিপাকক্রিযতো পন;

দসধাকুসলা চাতি, বাৰীসতি দুহেতুকা.

১৪২.

কামে ¶ দ্ৰাদসধা পুঞ্ঞ-ৰিপাকক্রিযতো পন;

সব্বং মহগ্গতঞ্চেৰ, অপ্পমাণং তিহেতুকং.

১৪৩.

রূপীরিযাপথৰিঞ্ঞত্তি-জনকাজনকাদিতো;

এৰঞ্চাপি হি তং চিত্তং, হোতি সব্বং চতুব্বিধং.

১৪৪.

দ্ৰাদসাকুসলা তত্থ, কুসলা কামধাতুযা;

তথা দস ক্রিযা কামে, অভিঞ্ঞামানসং দ্ৰযং.

১৪৫.

সমুট্ঠাপেন্তি রূপানি, কপ্পেন্তি ইরিযাপথং;

জনযন্তি চ ৰিঞ্ঞত্তিং, ইমে দ্ৰত্তিংস মানসা.

১৪৬.

কুসলা চ ক্রিযা চেৰ, তে মহগ্গতমানসা;

অট্ঠানাসৰচিত্তানি, ছব্বীসতি চ মানসা.

১৪৭.

সমুট্ঠাপেন্তি রূপানি, কপ্পেন্তি ইরিযাপথং;

চোপনং ন চ পাপেন্তি, দ্ৰিকিচ্চা নিযতা ইমে.

১৪৮.

ঠপেত্ৰা দস ৰিঞ্ঞাণে, ৰিপাকা দ্ৰীসু ভূমিসু;

ক্রিযা চেৰ মনোধাতু, ইমানেকূনৰীসতি.

১৪৯.

সমুট্ঠাপেন্তি ¶ রূপানি, ন করোন্তিতরদ্ৰযং;

পুন দ্ৰেপঞ্চৰিঞ্ঞাণা, ৰিপাকা চ অরূপিসু.

১৫০.

সব্বেসং সন্ধিচিত্তঞ্চ, চুতিচিত্তঞ্চারহতো;

ন করোন্তি তিকিচ্চানি, ইমে সোল়স মানসা.

১৫১.

একদ্ৰিতিচতুট্ঠান-পঞ্চট্ঠানপভেদতো;

পঞ্চধা চিত্তমক্খাসি, পঞ্চনিম্মললোচনো.

১৫২.

কুসলাকুসলা সব্বে, চিত্তুপ্পাদা মহাক্রিযা;

মহগ্গতা ক্রিযা চেৰ, চত্তারো ফলমানসা.

১৫৩.

সব্বেৰ ¶ পঞ্চপঞ্ঞাস, নিপ্পপঞ্চেন সত্থুনা;

জৰনট্ঠানতোযেৰ, একট্ঠানে নিযামিতা.

১৫৪.

পুন দ্ৰেপঞ্চৰিঞ্ঞাণা, দস্সনে সৰনে তথা;

ঘাযনে সাযনে ঠানে, ফুসনে পটিপাটিযা.

১৫৫.

মনোধাতুত্তিকং ঠানে, আৰজ্জনে পটিচ্ছনে;

অট্ঠসট্ঠি ভৰন্তেতে, একট্ঠানিকতং গতা.

১৫৬.

পুন দ্ৰিট্ঠানিকং নাম, চিত্তদ্ৰযমুদীরিতং;

সোমনস্সযুতং পঞ্চ-দ্ৰারে সন্তীরণং সিযা.

১৫৭.

তদারম্মণং ছদ্ৰারে, বলৰারম্মণে সতি;

তথা ৰোট্ঠব্বনং হোতি, পঞ্চদ্ৰারেসু ৰোট্ঠবো.

১৫৮.

মনোদ্ৰারেসু সব্বেসং, হোতি আৰজ্জনং পন;

ইদং দ্ৰিট্ঠানিকং নাম, হোতি চিত্তদ্ৰযং পন.

১৫৯.

পটিসন্ধিভৰঙ্গস্স, চুতিযা ঠানতো পন;

মহগ্গতৰিপাকা তে, নৰ তিট্ঠানিকা মতা.

১৬০.

অট্ঠ ¶ কামা মহাপাকা, পটিসন্ধিভৰঙ্গতো;

তদারম্মণতো চেৰ, চুতিট্ঠানৰসেন চ.

১৬১.

চতুট্ঠানিকচিত্তানি ¶ , অট্ঠ হোন্তীতি নিদ্দিসে;

কুসলাকুসলপাকং তু-পেক্খাসহগতদ্ৰযং.

১৬২.

সন্তীরণং ভৰে পঞ্চ-দ্ৰারে ছদ্ৰারিকেসু চ;

তদারম্মণতং যাতি, বলৰারম্মণে সতি.

১৬৩.

পটিসন্ধিভৰঙ্গানং, চুতিট্ঠানৰসেন চ;

পঞ্চট্ঠানিকচিত্তন্তি, ইদং দ্ৰযমুদীরিতং.

১৬৪.

পঞ্চকিচ্চং ¶ দ্ৰযং চিত্তং, চতুকিচ্চং পনট্ঠকং;

তিকিচ্চং নৰকং দ্ৰে তু, দ্ৰিকিচ্চা সেসমেককং.

১৬৫.

ভৰঙ্গাৰজ্জনঞ্চেৰ, দস্সনং সম্পটিচ্ছনং;

সন্তীরণং ৰোট্ঠব্বনং, জৰনং ভৰতি সত্তমং.

১৬৬.

ছব্বিধং হোতি তং ছন্নং, ৰিঞ্ঞাণানং পভেদতো;

সত্তধা সত্তৰিঞ্ঞাণ-ধাতূনং তু পভেদতো.

১৬৭.

একেকারম্মণং ছক্কং, পঞ্চারম্মণভেদতো;

ছল়ারম্মণতো চেৰ, হোতি অট্ঠৰিধং মনো.

১৬৮.

তত্থ দ্ৰেপঞ্চৰিঞ্ঞাণা, হোন্তি একেকগোচরা;

রূপারম্মণিকা দ্ৰে তু, দ্ৰে দ্ৰে সদ্দাদিগোচরা.

১৬৯.

সব্বং মহগ্গতং চিত্তং, পঞ্চাভিঞ্ঞাৰিৰজ্জিতং;

সব্বং লোকুত্তরঞ্চেতি, একেকারম্মণং ভৰে.

১৭০.

একেকারম্মণং ছক্ক-মিদং ঞেয্যং ৰিভাৰিনা;

পঞ্চারম্মণিকং নাম, মনোধাতুত্তযং ভৰে.

১৭১.

কামাৰচরচিত্তানি, চত্তালীসং তথেককং;

অভিঞ্ঞানি চ সব্বানি, ছল়ারম্মণিকানিতি.

১৭২.

চিত্তং নৰৰিধং হোতি, সত্তৰিঞ্ঞাণধাতুসু;

পচ্ছিমঞ্চ তিধা কত্ৰা, কুসলাকুসলাদিতো.

১৭৩.

পুঞ্ঞাপুঞ্ঞৰসেনেৰ ¶ , ৰিপাকক্রিযভেদতো;

ছসত্ততিৰিধো ভেদো, মনোৰিঞ্ঞাণধাতুযা.

১৭৪.

মনোধাতুং দ্ৰিধা কত্ৰা, ৰিপাকক্রিযভেদতো;

নৰধা পুব্বৰুত্তেহি, দসধা হোতি মানসং.

১৭৫.

ধাতুদ্ৰযং ¶ তিধা কত্ৰা, পচ্ছিমং পুন পণ্ডিতো;

একাদসৰিধং চিত্তং, হোতীতি পরিদীপযে.

১৭৬.

মনোৰিঞ্ঞাণধাতুম্পি, কুসলাকুসলাদিতো;

চতুধা ৰিভজিত্ৰান, ৰদে দ্ৰাদসধা ঠিতং.

১৭৭.

ভৰে ¶ চুদ্দসধা চিত্তং, চুদ্দসট্ঠানভেদতো;

পটিসন্ধিভৰঙ্গস্স, চুতিযাৰজ্জনস্স চ.

১৭৮.

পঞ্চন্নং দস্সনাদীনং, সম্পটিচ্ছনচেতসো;

সন্তীরণস্স ৰোট্ঠব্ব-জৰনানং ৰসেন চ.

১৭৯.

তদারম্মণচিত্তস্স, তথেৰ ঠানভেদতো;

এৰং চুদ্দসধা চিত্তং, হোতীতি পরিদীপযে.

১৮০.

ভূমিপুগ্গলনানাত্ত-ৰসেন চ পৰত্তিতো;

বহুধা পনিদং চিত্তং, হোতীতি চ ৰিভাৰযে.

১৮১.

একৰিধাদিনযে পনিমস্মিং,

যো কুসলো মতিমা ইধ ভিক্খু;

তস্সভিধম্মগতা পন অত্থা,

হত্থগতামলকা ৰিয হোন্তি.

ইতি অভিধম্মাৰতারে একৰিধাদিনিদ্দেসো নাম

চতুত্থো পরিচ্ছেদো.

৫. পঞ্চমো পরিচ্ছেদো

ভূমিপুগ্গলচিত্তুপ্পত্তিনিদ্দেসো

১৮২.

ইতো ¶ ¶ পরং পৰক্খামি, বুদ্ধিৰুদ্ধিকরং নযং;

চিত্তানং ভূমীসুপ্পত্তিং, পুগ্গলানং ৰসেন চ.

১৮৩.

দেৰাচেৰ ¶ মনুস্সা চ, তিস্সো ৰাপাযভূমিযো;

গতিযো পঞ্চ নিদ্দিট্ঠা, সত্থুনা তু তযো ভৰা.

১৮৪.

ভূমিযো তত্থ তিংসেৰ, তাসু তিংসেৰ পুগ্গলা;

ভূমীস্ৰেতাসু উপ্পন্না, সব্বে চ পন পুগ্গলা.

১৮৫.

পটিসন্ধিকচিত্তানং, ৰসেনেকূনৰীসতি;

পটিসন্ধি চ নামেসা, দুৰিধা সমুদীরিতা.

১৮৬.

অচিত্তকা সচিত্তা চ, অসঞ্ঞীনমচিত্তকা;

সেসা সচিত্তকা ঞেয্যা, সা পনেকূনৰীসতি.

১৮৭.

পটিসন্ধিৰসেনেৰ, হোন্তি ৰীসতি পুগ্গলা;

ইধ চিত্তাধিকারত্তা, অচিত্তা ন চ উদ্ধটা.

১৮৮.

অহেতুদ্ৰিতিহেতূতি, পুগ্গলা তিৰিধা সিযুং;

অরিযা পন অট্ঠাতি, সব্বে একাদসেরিতা.

১৮৯.

এতেসং পন সব্বেসং, পুগ্গলানং পভেদতো;

চিত্তানং ভূমীসুপ্পত্তিং, ভণতো মে নিবোধথ.

১৯০.

তিংসভূমীসু চিত্তানি, কতি জাযন্তি মে ৰদ;

চুদ্দসেৰ তু চিত্তানি, হোন্তি সব্বাসু ভূমিসু.

১৯১.

সদা ৰীসতি চিত্তানি, কামেযেৰ ভৰে সিযুং;

পঞ্চ রূপভৰেযেৰ, চত্তারেৰ অরূপিসু.

১৯২.

কামরূপভৰেস্ৰেৰ ¶ , অট্ঠারস ভৰন্তি হি;

দ্ৰেচত্তালীস চিত্তানি, হোন্তি তীসু ভৰেসুপি.

১৯৩.

ঠপেত্ৰা পন সব্বাসং, চতস্সোপাযভূমিযো;

তেরসেৰ চ চিত্তানি, হোন্তি ছব্বীসভূমিসু.

১৯৪.

অপরানি ¶ চতস্সোপি, ঠপেত্ৰারুপ্পভূমিযো;

চিত্তানি পন জাযন্তি, ছ চ ছব্বীসভূমিসু.

১৯৫.

সুদ্ধাৰাসিকদেৰানং ¶ , ঠপেত্ৰা পঞ্চ ভূমিযো;

পঞ্চ চিত্তানি জাযন্তে, পঞ্চৰীসতিভূমিসু.

১৯৬.

অপরানি দুৰে হোন্তি, পঞ্চৰীসতিভূমিসু;

ঠপেত্ৰা নেৰসঞ্ঞঞ্চ, চতস্সোপাযভূমিযো.

১৯৭.

দ্ৰেপি চিত্তানি জাযন্তি, চতুৰীসতিভূমিসু;

আকিঞ্চঞ্ঞং নেৰসঞ্ঞঞ্চ, ঠপেত্ৰাপাযভূমিযো.

১৯৮.

অপাযভূমিযো হিত্ৰা, তিস্সো আরুপ্পভূমিযো;

দ্ৰেযেৰ পন চিত্তানি, হোন্তি তেৰীসভূমিসু.

১৯৯.

অরূপে চ অপাযে চ, ঠপেত্ৰা অট্ঠ ভূমিযো;

একাদসৰিধং চিত্তং, হোন্তি দ্ৰাৰীসভূমিসু.

২০০.

সুদ্ধাৰাসে অপাযে চ, ঠপেত্ৰা নৰ ভূমিযো;

একৰীসাসু নিচ্চম্পি, চত্তারোৰ ভৰন্তি হি.

২০১.

একং সত্তরসস্ৰেৰ, চিত্তং জাযতি ভূমিসু;

সুদ্ধাৰাসে ঠপেত্ৰা তু, অপাযারুপ্পভূমিযো.

২০২.

দ্ৰাদসেৰ তু জাযন্তে, একাদসসু ভূমিসু;

ঠপেত্ৰা পন সব্বাপি, ভূমিযো হি মহগ্গতা.

২০৩.

কামাৰচরদেৰানং, মনুস্সানং ৰসেন তু;

অট্ঠ চিত্তানি জাযন্তে, সদা সত্তসু ভূমিসু.

২০৪.

পঞ্চমজ্ঝানপাকেকো ¶ , জাযতে ছসু ভূমিসু;

চত্তারি পন চিত্তানি, তীসু তীস্ৰেৰ ভূমিসু.

২০৫.

চত্তারি ¶ পন চিত্তানি, হোন্তি একেকভূমিসু;

অরূপাৰচরপাকানং, ৰসেন পরিদীপযে.

২০৬.

কুসলাকুসলা কামে,

তেসং পাকা অহেতুকা;

আৰজ্জনদ্ৰযঞ্চাতি,

সত্ততিংসেৰ মানসা.

২০৭.

নরকাদীস্ৰপাযেসু, চতূসুপি চ জাযরে;

দ্ৰেপঞ্ঞাসাৰসেসানি, নুপ্পজ্জন্তি কদাচিপি.

২০৮.

কামে দেৰমনুস্সানং, নৰ পাকা মহগ্গতা;

নেৰ জাযন্তি জাযন্তি, অসীতি হদযা সদা.

২০৯.

কামে অট্ঠ মহাপাকা, দোমনস্সদ্ৰযম্পি চ;

তথা ঘানাদিৰিঞ্ঞাণ-ত্তযং পাকা অপুঞ্ঞজা.

২১০.

নত্থি আরুপ্পপাকা চ, রূপাৰচরভূমিযং;

ইমেহি সহ চিত্তেহি, তযো মগ্গা ফলদ্ৰযং.

২১১.

চত্তারো দিট্ঠিসংযুত্তা, ৰিচিকিচ্ছাযুতম্পি চ;

চত্তারো হেট্ঠিমা পাকা, সুদ্ধাৰাসে ন লব্ভরে.

২১২.

সেসানি একপঞ্ঞাস, চিত্তানি পন লব্ভরে;

রূপাৰচরিকা সব্বে, ৰিপাকা কামধাতুযা.

২১৩.

দোমনস্সাদিমগ্গো চ, ক্রিযা চ দ্ৰে অহেতুকা;

তেচত্তালীস চিত্তানি, নত্থি আরুপ্পভূমিযং.

২১৪.

এৰং ¶ ভূমিৰসেনেৰ, চিত্তুপ্পত্তিং ৰিভাৰযে;

তথা একাদসন্নম্পি, পুগ্গলানং ৰসেন চ.

২১৫.

কুসলাকুসলা ¶ ¶ কামে,

তেসং পাকা অহেতুকা;

আৰজ্জনদ্ৰযঞ্চাতি,

সত্ততিংসেৰ মানসা.

২১৬.

অহেতুকস্স সত্তস্স, জাযন্তে পঞ্চভূমিসু;

দ্ৰেপঞ্ঞাসাৰসেসানি, ন জাযন্তি কদাচিপি.

২১৭.

অহেতুকস্স ৰুত্তেহি, কামপাকা দুহেতুকা;

দুহেতুকস্স জাযন্তে, চত্তালীসং তথেককং.

২১৮.

সব্বে মহগ্গতা চেৰ, সব্বেপি চ অনাসৰা;

তিহেতুকা ৰিপাকা চ, কামে নৰ ক্রিযাপি চ.

২১৯.

দুহেতুনো ন জাযন্তি, চত্তালীসং তথাট্ঠ চ;

কামাৰচরসত্তস্স, তিহেতুপটিসন্ধিনো.

২২০.

পুথুজ্জনস্স জাযন্তে, চতুপঞ্ঞাস মানসা;

দ্ৰিহেতুকস্স ৰুত্তানি, চত্তালীসং তথেককং.

২২১.

চত্তারো ঞাণসংযুত্তা, ৰিপাকা কামধাতুযা;

রূপারূপেসু পুঞ্ঞানি, চতুপঞ্ঞাস মানসা.

২২২.

পুথুজ্জনস্স জাযন্তে, পঞ্চতিংস ন জাযরে;

ছদেৰেসু মনুস্সেসু, সোতাপন্নস্স দেহিনো.

২২৩.

পঞ্ঞাসেৰস্স চিত্তানি, জাযন্তীতি ৰিনিদ্দিসে;

নৰতিংসেৰ চিত্তানি, নুপ্পজ্জন্তীতি দীপযে.

২২৪.

সোতাপন্নস্স ৰুত্তানি, ঠপেত্ৰা পঠমং ফলং;

অত্তনোৰ ফলেনস্স, সকদাগামিনো সিযুং.

২২৫.

সোতাপন্নস্স ¶ ¶ ৰুত্তানি, ঠপেত্ৰা পটিঘদ্ৰযং;

দুতিযং চ ফলং হিত্ৰা, যানি চিত্তানি তানিতি;

অনাগামিস্স সত্তস্স, জাযন্তীতি ৰিনিদ্দিসে.

২২৬.

কতি চিত্তানি জাযন্তে, কামে অরহতো পন;

চত্তারীসঞ্চ চত্তারি, কামে অরহতো সিযুং.

২২৭.

মগ্গট্ঠানং চতুন্নম্পি, পুগ্গলানং সকং সকং;

মগ্গচিত্তং সিযা তেসং, একচিত্তক্খণা হি তে.

২২৮.

পুথুজ্জনস্স তীস্ৰেৰ, পঠমজ্ঝানভূমিসু;

পঞ্চতিংসেৰ চিত্তানি, জাযন্তেতি ৰিনিদ্দিসে.

২২৯.

ঘানাদীসু চ ৰিঞ্ঞাণ-ত্তযং সত্ত অপুঞ্ঞজা;

মহাপাকা তথা পাকা, উপরিজ্ঝানভূমিকা.

২৩০.

ৰিপাকাপি চ আরুপ্পা, দোমনস্সদ্ৰযম্পি চ;

অট্ঠারস ক্রিযা চেৰ, অট্ঠ লোকুত্তরানি চ.

২৩১.

পঠমজ্ঝাননিব্বত্ত-পুথুজ্জনসরীরিনো;

এতানি চতুপঞ্ঞাস, চিত্তানি ন চ লব্ভরে.

২৩২.

সোতাপন্নস্স ¶ চিত্তানি, তত্থেকতিংস জাযরে;

পুথুজ্জনস্স ৰুত্তেসু, হিত্ৰা চাপুঞ্ঞপঞ্চকং.

২৩৩.

সকদাগামিনো তত্থ, ঠপেত্ৰা পঠমং ফলং;

একতিংসেৰ জাযন্তে, পক্খিপিত্ৰা সকং ফলং.

২৩৪.

অনাগামিস্স তত্থেৰ, ঠপেত্ৰা দুতিযং ফলং;

একতিংসেৰ জাযন্তে, ফলচিত্তেন অত্তনো.

২৩৫.

ৰিঞ্ঞাণং চক্খুসোতানং, পুঞ্ঞজং সম্পটিচ্ছনং;

সন্তীরণদ্ৰযঞ্চেৰ, ক্রিযচিত্তানি ৰীসতি.

২৩৬.

অরহত্তফলং ¶ ¶ পাকো, পঠমজ্ঝানসম্ভৰো;

সত্তৰীসতি চিত্তানি, অরহন্তস্স জাযরে.

২৩৭.

পুথুজ্জনস্স তীস্ৰেৰ, দুতিযজ্ঝানভূমিসু;

ছত্তিংস দুতিযজ্ঝান-ততিযজ্ঝানপাকতো.

২৩৮.

পুথুজ্জনস্স ৰুত্তেসু, হিত্ৰা ৰাপুঞ্ঞপঞ্চকং;

সোতাপন্নস্স বাত্তিংস, ফলেন সহ অত্তনো.

২৩৯.

সোতাপন্নস্স ৰুত্তেসু, ঠপেত্ৰা পঠমং ফলং;

বাত্তিংস ফলচিত্তেন, সকদাগামিস্স অত্তনো.

২৪০.

সকদাগামীসু ৰুত্তেসু, ঠপেত্ৰা দুতিযং ফলং;

অনাগামিফলেনস্স, বাত্তিংসেৰ ভৰন্তি হি.

২৪১.

অরহন্তস্স তীস্ৰেৰ, অট্ঠৰীসতি অত্তনো;

ফলেন দুতিযজ্ঝান-ততিযজ্ঝানপাকতো.

২৪২.

পরিত্তকসুভাদীনং, দেৰানং তীসু ভূমিসু;

পঞ্চতিংসেৰ জাযন্তে, চতুত্থজ্ঝানপাকতো.

২৪৩.

সোতাপন্নস্স তত্থেক-তিংস চিত্তানি জাযরে;

সকদাগামিনো এৰং, তথানাগামিনোপি চ.

২৪৪.

খীণাসৰস্স তত্থেৰ, সত্তৰীসতি মানসা;

তথা ৰেহপ্ফলে চাপি, সব্বেসং হোন্তি মানসা.

২৪৫.

একতিংসেৰ চিত্তানি, সুদ্ধাৰাসিকভূমিসু;

অনাগামিকসত্তস্স, হোন্তীতি পরিদীপযে.

২৪৬.

অরহতো পন তত্থেৰ, মানসা সত্তৰীসতি;

এৰং রূপীসু চিত্তানি, ৰিঞ্ঞেয্যানি ৰিভাৰিনা.

২৪৭.

চতুৰীসতি ¶ চিত্তানি, পঠমারুপ্পভূমিযং;

পুথুজ্জনস্স সত্তস্স, জাযন্তীতি ৰিনিদ্দিসে.

২৪৮.

সোতাপন্নস্স ¶ তত্থেৰ, ঠপেত্ৰাপুঞ্ঞপঞ্চকং;

সমৰীসতি চিত্তানি, ফলেন সহ অত্তনো.

২৪৯.

সকদাগামিনো তত্থ, তথানাগামিনোপি চ;

জাযন্তি ৰীস চিত্তানি, পুব্বপুব্বফলং ৰিনা.

২৫০.

খীণাসৰস্স তত্থেৰ, দসপঞ্চ চ মানসা;

পুথুজ্জনস্স সত্তস্স, দুতিযারুপ্পভূমিযং.

২৫১.

হোন্তি ¶ তেৰীস চিত্তানি, ইতি ৰত্ৰা ৰিভাৰযে;

তিণ্ণন্নম্পেত্থ সেখানং, চিত্তানেকূনৰীসতি.

২৫২.

চুদ্দসেৰ তু চিত্তানি, দুতিযারুপ্পভূমিযং;

ক্রিযাদ্ৰাদস পাকেকো, ফলং খীণাসৰস্স তু.

২৫৩.

পুথুজ্জনস্স সত্তস্স, ততিযারুপ্পভূমিযং;

বাৰীসতি চ চিত্তানি, ভৰন্তীতি পকাসযে.

২৫৪.

অট্ঠারসেৰ চিত্তানি, সোতাপন্নস্স জাযরে;

সকদাগামিনো তানি, ঠপেত্ৰা পঠমং ফলং.

২৫৫.

সকদাগামিৰুত্তেসু, ঠপেত্ৰা দুতিযং ফলং;

অট্ঠারসেৰ চিত্তানি, অনাগামিস্স জাযরে.

২৫৬.

তেরসেৰ চ চিত্তানি, ততিযারুপ্পভূমিযং;

খীণাসৰস্স সত্তস্স, ভৰন্তীতি ৰিনিদ্দিসে.

২৫৭.

একৰীসতি চিত্তানি, চতুত্থারুপ্পভূমিযং;

পুথুজ্জনস্স সত্তস্স, জাযন্তীতি ৰিনিদ্দিসে.

২৫৮.

সোতাপন্নস্স ¶ সত্তস্স, সত্তরস পকাসযে;

সকদাগামিনো তানি, ঠপেত্ৰা পঠমং ফলং.

২৫৯.

সকদাগামিৰুত্তেসু, ঠপেত্ৰা দুতিযং ফলং;

হোন্তি সত্তরসেৰস্স, অনাগামিস্স মানসা.

২৬০.

দ্ৰাদসেৰ ¶ তু চিত্তানি, চতুত্থারুপ্পভূমিযং;

জাযন্তি অরহন্তস্স, ইতি ৰত্ৰা ৰিভাৰযে.

২৬১.

হেট্ঠিমানং অরূপীনং, ব্রহ্মানং উপরূপরি;

অরূপকুসলা চেৰ, উপ্পজ্জন্তি ক্রিযাপি চ.

২৬২.

উদ্ধমুদ্ধমরূপীনং, হেট্ঠিমা হেট্ঠিমা পন;

আরুপ্পানেৰ জাযন্তে, দিট্ঠাদীনৰতো কির.

২৬৩.

ঠপেত্ৰা পঠমং মগ্গং, কুসলানুত্তরা তযো;

কামাৰচরপুঞ্ঞানি, অপুঞ্ঞানি তথা দস.

২৬৪.

চত্তারারুপ্পপুঞ্ঞানি, সব্বে পাকা অনুত্তরা;

পঠমারুপ্পপাকো চ, নৰ কামক্রিযাপি চ.

২৬৫.

আরুপ্পাপি ক্রিযা সব্বা, তেচত্তালীস মানসা;

উপ্পজ্জন্তি পনেতানি, পঠমারুপ্পভূমিযং.

২৬৬.

সব্বো কামৰিপাকো চ, সব্বো রূপোমহগ্গতো;

চিত্তুপ্পাদো মনোধাতু, দোমনস্সদ্ৰযম্পি চ.

২৬৭.

আদিমগ্গো তযো পাকা, আরুপ্পা চ তথূপরি;

ছচত্তালীস নত্থেত্থ, পঠমারুপ্পভূমিযং.

২৬৮.

ৰুত্তেসু পন চিত্তেসু, পঠমারুপ্পভূমিযং;

ঠপেত্ৰা পঠমারুপ্প-ত্তযং পাকো চ অত্তনো.

২৬৯.

তালীসেতানি ¶ জাযন্তে, দুতিযারুপ্পভূমিযং;

এৰং সেসদ্ৰযে ঞেয্যা, হিত্ৰা হেট্ঠিমহেট্ঠিমং.

২৭০.

অত্তনো ¶ অত্তনো পাকা, চত্তারো চ অনাসৰা;

ৰিপাকা হোন্তি সব্বেৰ, চতূস্ৰারুপ্পভূমিসু.

২৭১.

ৰোট্ঠব্বনেন চিত্তেন, কামে অট্ঠ মহাক্রিযা;

চতস্সোপি চ আরুপ্পা, তেরসেৰ ক্রিযা সিযুং.

২৭২.

খীণাসৰস্স ¶ জাযন্তে, পঠমারুপ্পভূমিযং;

দ্ৰাদসেৰ ক্রিযা হোন্তি, দুতিযারুপ্পভূমিযং.

২৭৩.

একাদস ক্রিযা হোন্তি, ততিযারুপ্পভূমিযং;

দসেৰ চ ক্রিযা ঞেয্যা, চতুত্থারুপ্পভূমিযং.

২৭৪.

অরহতো পন চিত্তানি, হোন্তি একূনৰীসতি;

অরহত্তং ক্রিযা সব্বা, ঠপেত্ৰাৰজ্জনদ্ৰযং.

২৭৫.

চতুন্নঞ্চ ফলট্ঠানং, তিহেতুকপুথুজ্জনে;

তেরসেৰ চ চিত্তানি, ভৰন্তীতি পকাসযে.

২৭৬.

চত্তারো ঞাণসংযুত্তা, মহাপাকা তথা নৰ;

রূপারূপৰিপাকা চ, তেরসেৰ ভৰন্তিমে.

২৭৭.

চতুন্নঞ্চ ফলট্ঠানং, দুহেতুকপুথুজ্জনে;

ঞাণহীনানি চত্তারি, ৰিপাকা এৰ জাযরে.

২৭৮.

পুথুজ্জনানং তিণ্ণম্পি, চতুন্নং অরিযদেহিনং;

সত্তরসেৰ চিত্তানি, সত্তন্নম্পি ভৰন্তি হি.

২৭৯.

ৰিঞ্ঞাণানি দুৰে পঞ্চ, মনোধাতুত্তযম্পি চ;

সন্তীরণানি ৰোট্ঠব্বং, হোন্তি সত্তরসেৰিমে.

২৮০.

হেট্ঠা তিণ্ণং ফলট্ঠানং, তিহেতুকপুথুজ্জনে;

নৰেৰ কুসলা হোন্তি, চতুন্নম্পি মহগ্গতা.

২৮১.

তিণ্ণং ¶ পুথুজ্জনানঞ্চ, তিণ্ণমরিযানমাদিতো;

তেরসেৰ তু চিত্তানি, উপ্পজ্জন্তীতি নিদ্দিসে.

২৮২.

অট্ঠেৰ কামপুঞ্ঞানি, দিট্ঠিহীনা অপুঞ্ঞতো;

চত্তারোপি চ উদ্ধচ্চ-সংযুত্তঞ্চাতি তেরস.

২৮৩.

হেট্ঠা দ্ৰিন্নং ফলট্ঠানং, তথা সব্বপুথুজ্জনে;

দোমনস্সযুত্তং চিত্তং, দ্ৰযমেৰ তু জাযতে.

২৮৪.

তিণ্ণং ¶ পুথুজ্জনানং তু, পঞ্চেৰ পন জাযরে;

চত্তারি দিট্ঠিযুত্তানি, ৰিচিকিচ্ছাযুতম্পি চ.

২৮৫.

মগ্গট্ঠানং চতুন্নম্পি, মগ্গচিত্তং সকং সকং;

একমেৰ ভৰে তেসং, ইতি ৰত্ৰা ৰিভাৰযে.

২৮৬.

মযা ভৰেসু চিত্তানং, পুগ্গলানং ৰসেন চ;

ভিক্খূনং পাটৰত্থায, চিত্তুপ্পত্তি পকাসিতা.

২৮৭.

এৰং সব্বমিদং চিত্তং, ভূমিপুগ্গলভেদতো;

বহুধাপি চ হোতীতি, ৰিঞ্ঞাতব্বং ৰিভাৰিনা.

২৮৮.

সক্কা ¶ ৰুত্তানুসারেন, ভেদো ঞাতুং ৰিভাৰিনা;

গন্থৰিত্থারভীতেন, সংখিত্তং পনিদং মযা.

২৮৯.

পুব্বাপরং ৰিলোকেত্ৰা, চিন্তেত্ৰা চ পুনপ্পুনং;

অত্থং উপপরিক্খিত্ৰা, গহেতব্বং ৰিভাৰিনা.

২৯০.

ইমঞ্চাভিধম্মাৰতারং সুসারং,

ৰরং সত্তমোহন্ধকারপ্পদীপং;

সদা সাধু চিন্তেতি ৰাচেতি যো তং,

নরং রাগদোসা চিরং নোপযন্তি.

ইতি অভিধম্মাৰতারে ভূমিপুগ্গলৰসেন চিত্তুপ্পত্তিনিদ্দেসো নাম

পঞ্চমো পরিচ্ছেদো.

৬. ছট্ঠো পরিচ্ছেদো

আরম্মণৰিভাগনিদ্দেসো

২৯১.

এতেসং ¶ ¶ ¶ পন চিত্তানং, আরম্মণমিতো পরং;

দস্সযিস্সামহং তেন, ৰিনা নত্থি হি সম্ভৰো.

২৯২.

রূপং সদ্দং গন্ধং রসং, ফোট্ঠব্বং ধম্মমেৰ চ;

ছধা আরম্মণং আহু, ছল়ারম্মণকোৰিদা.

২৯৩.

তত্থ ভূতে উপাদায, ৰণ্ণো চতুসমুট্ঠিতো;

সনিদস্সনপটিঘো, রূপারম্মণসঞ্ঞিতো.

২৯৪.

দুৰিধো হি সমুদ্দিট্ঠো, সদ্দো চিত্তোতুসম্ভৰো;

সৰিঞ্ঞাণকসদ্দোৰ, হোতি চিত্তসমুট্ঠিতো.

২৯৫.

অৰিঞ্ঞাণকসদ্দো যো,

সো হোতূতুসমুট্ঠিতো;

দুৰিধোপি অযং সদ্দো,

সদ্দারম্মণতং গতো.

২৯৬.

ধরীযতীতি গচ্ছন্তো, গন্ধো সূচনতোপি ৰা;

অযং চতুসমুট্ঠানো, গন্ধারম্মণসম্মতো.

২৯৭.

রসমানা রসন্তীতি, রসোতি পরিকিত্তিতো;

সোৰ চতুসমুট্ঠানো, রসারম্মণনামকো.

২৯৮.

ফুসীযতীতি ফোট্ঠব্বং, পথৰীতেজৰাযৰো;

ফোট্ঠব্বং চতুসম্ভূতং, ফোট্ঠব্বারম্মণং মতং.

২৯৯.

সব্বং নামঞ্চ রূপঞ্চ, হিত্ৰা রূপাদিপঞ্চকং;

লক্খণানি চ পঞ্ঞত্তি-ধম্মারম্মণসঞ্ঞিতং.

৩০০.

ছারম্মণানি ¶ লব্ভন্তি, কামাৰচরভূমিযং;

তীণি রূপে পনারূপে, ধম্মারম্মণমেককং.

৩০১.

খণৰত্থুপরিত্তত্তা ¶ , আপাথং ন ৰজন্তি যে;

তে ধম্মারম্মণা হোন্তি, যেসং রূপাদযো কির.

৩০২.

তে পটিক্খিপিতব্বাৰ, অঞ্ঞমঞ্ঞস্স গোচরং;

নেৰ পচ্চনুভোন্তানং, মনো তেসং তু গোচরং.

৩০৩.

তঞ্চ ¶ ‘‘পচ্চনুভোতী’’তি, ৰুত্তত্তা পন সত্থুনা;

রূপাদারম্মণানেৰ, হোন্তি রূপাদযো পন.

৩০৪.

দিব্বচক্খাদিঞাণানং, রূপাদীনেৰ গোচরা;

অনাপাথগতানেৰ, তানীতিপি ন যুজ্জতি.

৩০৫.

যং রূপারম্মণং হোন্তং, তং ধম্মারম্মণং কথং;

এৰং সতি পনেতেসং, নিযমোতি কথং ভৰে.

৩০৬.

সব্বং আরম্মণং এতং, ছব্বিধং সমুদীরিতং;

তং পরিত্তত্তিকাদীনং, ৰসেন বহুধা মতং.

৩০৭.

সব্বো কামৰিপাকো চ, ক্রিযাহেতুদ্ৰযম্পি চ;

পঞ্চৰীসতি একন্তং, পরিত্তারম্মণা সিযুং.

৩০৮.

ইট্ঠাদিভেদা পঞ্চেৰ, রূপসদ্দাদযো পন;

ৰিঞ্ঞাণানং দ্ৰিপঞ্চন্নং, গোচরা পটিপাটিযা.

৩০৯.

রূপাদিপঞ্চকং সব্বং, মনোধাতুত্তযস্স তু;

তেরসন্নং পনেতেসং, রূপক্খন্ধোৰ গোচরো.

৩১০.

নারূপং ন চ পঞ্ঞত্তিং, নাতীতং ন চনাগতং;

আরম্মণং করোন্তে চ, ৰত্তমানো হি গোচরো.

৩১১.

তেরসেতানি চিত্তানি, জাযন্তে কামধাতুযং;

চত্তারি রূপাৰচরে, নেৰ কিঞ্চি অরূপিসু.

৩১২.

মহাপাকানমট্ঠন্নং ¶ ¶ , সন্তীরণত্তযস্সপি;

ছসু দ্ৰারেসু রূপাদিছপরিত্তানি গোচরা.

৩১৩.

রূপাদযো পরিত্তা ছ, হসিতুপ্পাদগোচরা;

পঞ্চদ্ৰারে পটুপ্পন্না, মনোদ্ৰারে তিকালিকা.

৩১৪.

দুতিযারুপ্পচিত্তঞ্চ, চতুত্থারুপ্পমানসং;

ছব্বিধং নিযতং হোতি, তং মহগ্গতগোচরং.

৩১৫.

নিব্বানারম্মণত্তা হি, একন্তেন অনঞ্ঞতো;

অট্ঠানাসৰচিত্তানং, অপ্পমাণোৰ গোচরো.

৩১৬.

চত্তারো ঞাণহীনা চ, কামাৰচরপুঞ্ঞতো;

ক্রিযতোপি চ চত্তারো, দ্ৰাদসাকুসলানি চ.

৩১৭.

পরিত্তারম্মণা চেৰ, তে মহগ্গতগোচরা;

পঞ্ঞত্তারম্মণত্তা হি, নৰত্তব্বাৰ হোন্তি তে.

৩১৮.

চত্তারো ঞাণসংযুত্তা, পুঞ্ঞতো ক্রিযতোপি চ;

তথাভিঞ্ঞাদ্ৰযঞ্চেৰ, ক্রিযাৰোট্ঠব্বনম্পি চ.

৩১৯.

একাদসন্নমেতেসং, তিৰিধো হোতি গোচরো;

পঞ্ঞত্তারম্মণত্তা হি, নৰত্তব্বাপি হোন্তিমে.

৩২০.

যানি ৰুত্তাৰসেসানি, চিত্তানি পন তানি হি;

নৰত্তব্বারম্মণানীতি, ৰিঞ্ঞেয্যানি ৰিভাৰিনা.

পরিত্তারম্মণত্তিকং সমত্তং.

৩২১.

দুতিযারুপ্পচিত্তঞ্চ ¶ , চতুত্থারুপ্পমানসং;

ছব্বিধং পন একন্ত-অতীতারম্মণং সিযা.

৩২২.

ৰিঞ্ঞাণানং দ্ৰিপঞ্চন্নং, মনোধাতুত্তযস্স চ;

পঞ্চ রূপাদযো ধম্মা, পচ্চুপ্পন্নাৰ গোচরা.

৩২৩.

অট্ঠ ¶ ¶ কামমহাপাকা, সন্তীরণত্তযম্পি চ;

হসিতুপ্পাদচিত্তন্তি, দ্ৰাদসেতে তু মানসা.

৩২৪.

সিযাতীতারম্মণা পচ্চু-প্পন্নানাগতগোচরা;

কুসলাকুসলা কামে, ক্রিযতো নৰ মানসা.

৩২৫.

অভিঞ্ঞামানসা দ্ৰেপি, সিযাতীতাদিগোচরা;

সন্তপঞ্ঞত্তিকালেপি, নৰত্তব্বা ভৰন্তিমে.

৩২৬.

সেসানি পন সব্বানি, রূপারূপভৰেসুপি;

নৰত্তব্বানি হোন্তেৰ, অতীতারম্মণাদিনা.

৩২৭.

কামতো চ ক্রিযা পঞ্চ, রূপতো পঞ্চমী ক্রিযা;

চিত্তানং ছন্নমেতেসং, নত্থি কিঞ্চি অগোচরং.

৩২৮.

নিব্বানঞ্চ ফলং মগ্গং, রূপঞ্চারূপমেৰ চ;

সক্কোন্তি গোচরং কাতুং, কতি চিত্তানি মে ৰদ.

৩২৯.

চত্তারো ঞাণসংযুত্তা,

পুঞ্ঞতো ক্রিযতো তথা;

অভিঞ্ঞাহদযা দ্ৰেপি,

ক্রিযা ৰোট্ঠব্বনম্পি চ.

৩৩০.

সক্কোন্তি গোচরং কাতুং, চিত্তানেকাদসাপি চ;

নিব্বানঞ্চ ফলং মগ্গং, রূপঞ্চারূপমেৰ চ.

৩৩১.

চিত্তেসু পন সব্বেসু, কতি চিত্তানি মে ৰদ;

অরহত্তফলং মগ্গং, কাতুং সক্কোন্তি গোচরং.

৩৩২.

সব্বেসু পন চিত্তেসু, ছ চ চিত্তানি মে সুণ;

অরহত্তফলং মগ্গং, কাতুং সক্কোন্তি গোচরং.

৩৩৩.

চত্তারো ঞাণসংযুত্তা, ক্রিযা ৰোট্ঠব্বনম্পি চ;

ক্রিযাভিঞ্ঞা মনোধাতু, ছ চ সক্কোন্তি গোচরং.

৩৩৪.

চত্তারো ¶ ¶ ঞাণসংযুত্তা-ভিঞ্ঞাচিত্তঞ্চ পুঞ্ঞতো;

নারহত্তং ফলং মগ্গং, কাতুং সক্কোন্তি গোচরং.

৩৩৫.

কস্মা অরহতো মগ্গ-চিত্তং ৰা ফলমানসং;

পুথুজ্জনা ৰা সেক্খা ৰা, ন সক্কোন্তি হি জানিতুং.

৩৩৬.

পুথুজ্জনো ন জানাতি,

সোতাপন্নস্স মানসং;

সোতাপন্নো ন জানাতি,

সকদাগামিস্স মানসং.

৩৩৭.

সকদাগামী ন জানাতি, অনাগামিস্স মানসং;

অনাগামী ন জানাতি, অরহন্তস্স মানসং.

৩৩৮.

হেট্ঠিমো ¶ হেট্ঠিমো নেৰ, জানাতি উপরূপরি;

উপরূপরি জানাতি, হেট্ঠিমস্স চ মানসং.

৩৩৯.

যো ধম্মো যস্স ধম্মস্স,

হোতি আরম্মণং পন;

তমুদ্ধরিত্ৰা একেকং,

পৰক্খামি ইতো পরং.

৩৪০.

কুসলারম্মণং কামে, কুসলাকুসলস্স চ;

অভিঞ্ঞামানসস্সাপি, কুসলস্স ক্রিযস্স চ.

৩৪১.

কামাৰচরপাকস্স, তথা কামক্রিযস্স চ;

এতেসং পন রাসীনং, ছন্নং আরম্মণং সিযা.

৩৪২.

রূপাৰচরপুঞ্ঞানি, কামপাকং ততো ৰিনা;

পঞ্চন্নং পন রাসীনং, হোন্তি আরম্মণানি হি.

৩৪৩.

আরুপ্পকুসলঞ্চাপি, তেভূমকুসলস্স চ;

তেভূমকক্রিযস্সাপি, তথেৰাকুসলস্সপি.

৩৪৪.

অরূপাৰচরপাকানং ¶ ¶ , দ্ৰিন্নং পন চতুত্থদু;

ইমেসং অট্ঠরাসীনং, হোতারম্মণপচ্চযো.

৩৪৫.

অপরিযাপন্নপুঞ্ঞম্পি, কামাৰচরতোপি চ;

রূপতো পঞ্চমস্সাপি, কুসলস্স ক্রিযস্স চ.

৩৪৬.

চতুন্নং পন রাসীনং, হোতি আরম্মণং সদা;

তথেৰাকুসলং কাম-রূপাৰচরতো পন.

৩৪৭.

কুসলস্স ক্রিযস্সাপি, তথেৰাকুসলস্স চ;

কামাৰচরপাকানং, ছন্নং রাসীনমীরিতং.

৩৪৮.

ৰিপাকারম্মণং কামে, কামাৰচরতোপি চ;

রূপাৰচরতো চেৰ, কুসলস্স ক্রিযস্স চ.

৩৪৯.

কামাৰচরপাকানং, তথেৰাকুসলস্স চ;

ছন্নঞ্চ পন রাসীনং, হোতারম্মণপচ্চযো.

৩৫০.

ৰিপাকারম্মণং রূপে, কামাৰচরতোপি চ;

রূপাৰচরতো চেৰ, কুসলস্স ক্রিযস্স চ.

৩৫১.

অপুঞ্ঞস্সাতি পঞ্চন্নং, রাসীনং হোতি গোচরো;

অরূপাৰচরপাকেসু, অযমেৰ নযো মতো.

৩৫২.

অপরিযাপন্নপাকম্পি, কামতো রূপতোপি চ;

কুসলস্স ক্রিযস্সাপি, হোতি আরম্মণং পন.

৩৫৩.

ক্রিযচিত্তমিদং কামে, কামাৰচরতোপি চ;

রূপাৰচরতো চেৰ, কুসলস্স ক্রিযস্স চ.

৩৫৪.

কামাৰচরপাকস্স, তথেৰাকুসলস্স চ;

ছন্নং রাসীনমেতেসং, হোতারম্মণপচ্চযো.

৩৫৫.

যং ¶ ক্রিযামানসং রূপে, কামপাকং ততো ৰিনা;

পঞ্চন্নং পন রাসীনং, হোতি আরম্মণং পন.

৩৫৬.

ক্রিযাচিত্তং ¶ ¶ পনারুপ্পে, তেসং পঞ্চন্নমেৰ চ;

আরুপ্পস্স ক্রিযস্সাপি, ছন্নং হোতেৰ গোচরো.

৩৫৭.

রূপং চতুসমুট্ঠানং, রূপারম্মণসঞ্ঞিতং;

কামাৰচরপুঞ্ঞস্স, তথেৰ কুসলস্স চ.

৩৫৮.

অভিঞ্ঞাদ্ৰযচিত্তস্স, কামপাকক্রিযস্স চ;

ছন্নং রাসীনমেতেসং, হোতারম্মণপচ্চযো.

৩৫৯.

নিব্বানারম্মণং কাম-রূপাৰচরতো পন;

কুসলস্সুভযস্সাপি, কামরূপক্রিযস্স চ.

৩৬০.

অপরিযাপন্নতো চেৰ, ফলস্স কুসলস্স চ;

ছন্নং রাসীনমেতেসং, হোতারম্মণপচ্চযো.

৩৬১.

নানপ্পকারকং সব্বং, পঞ্ঞত্তারম্মণং পন;

তেভূমকস্স পুঞ্ঞস্স, তথেৰাকুসলস্স চ.

৩৬২.

রূপারূপৰিপাকস্স, তেভূমকক্রিযস্স চ;

নৰন্নং পন রাসীনং, হোতারম্মণপচ্চযো.

৩৬৩.

রূপারম্মণিকা দ্ৰে তু, দ্ৰে দ্ৰে সদ্ধাদিগোচরা;

পঞ্চারম্মণিকা নাম, চিত্তুপ্পাদা তযো মতা.

৩৬৪.

ইধেকচত্তালীসেৰ, ছল়ারম্মণিকা মতা;

কামাৰচরচিত্তান-মযমারম্মণক্কমো.

৩৬৫.

পঞ্চাভিঞ্ঞা ৰিৰজ্জেত্ৰা, রূপারূপা অনাসৰা;

চিত্তুপ্পাদা ইমে সব্বে, ধম্মারম্মণগোচরা.

৩৬৬.

পঠমারুপ্পকুসলং, দুতিযারুপ্পচেতসো;

কুসলস্স ৰিপাকস্স, ক্রিযস্সারম্মণং ভৰে.

৩৬৭.

পঠমারুপ্পপাকোযং ¶ , দুতিযারুপ্পচেতসো;

কুসলস্স ৰিপাকস্স, ক্রিযস্সারম্মণং ন হি.

৩৬৮.

পঠমং ¶ তু ক্রিযাচিত্তং, দুতিযারুপ্পচেতসো;

ন পুঞ্ঞস্স ন পাকস্স, হোতি আরম্মণং পন.

৩৬৯.

পঠমং তু ক্রিযাচিত্তং, দুতিযারুপ্পচেতসো;

ক্রিযস্সারম্মণং হোতি, ইতি ঞেয্যং ৰিভাৰিনা.

৩৭০.

পুথুজ্জনস্স সেক্খস্স, অরূপারম্মণং দ্ৰিধা;

কুসলং কুসলস্সাপি, ৰিপাকস্স চ তং সিযা.

৩৭১.

খীণাসৰস্স ভিক্খুস্স, পঠমারুপ্পমানসং;

আরম্মণং তিধা হোতি, ইতি ৰুত্তং মহেসিনা.

৩৭২.

ক্রিযস্সাপি ক্রিযা হোতি, কুসলম্পি ক্রিযস্স চ;

কুসলং তু ৰিপাকস্স, এৰং হোতি তিধা পন.

৩৭৩.

ততিযারুপ্পচিত্তম্পি, চতুত্থারুপ্পচেতসো;

এৰমেৰ দ্ৰিধা চেৰ, তিধা চারম্মণং সিযা.

৩৭৪.

যং যং পন ইধারব্ভ,

যে যে জাযন্তি গোচরং;

সো সো তেসঞ্চ তেসঞ্চ,

হোতারম্মণপচ্চযো.

৩৭৫.

যো ¶ পনিমস্স নরো কির পারং,

দুত্তরমুত্তরমুত্তরতীধ;

সো অভিধম্মমহণ্ণৰপারং,

দুত্তরমুত্তরমুত্তরতেৰ.

ইতি অভিধম্মাৰতারে আরম্মণৰিভাগো নাম

ছট্ঠো পরিচ্ছেদো.

৭. সত্তমো পরিচ্ছেদো

ৰিপাকচিত্তপ্পৰত্তিনিদ্দেসো

৩৭৬.

অনন্তঞাণেন ¶ ¶ ¶ নিরঙ্গণেন,

গুণেসিনা কারুণিকেন তেন;

ৰুত্তে ৰিপাকে মতিপাটৰত্থং,

ৰিপাকচিত্তপ্পভৰং সুণাথ.

৩৭৭.

একূনতিংস কম্মানি, পাকা দ্ৰত্তিংস দস্সিতা;

তীসু দ্ৰারেসু কম্মানি, ৰিপাকা ছসু দিস্সরে.

৩৭৮.

কুসলং কামলোকস্মিং, পৰত্তে পটিসন্ধিযং;

তং তং পচ্চযমাগম্ম, দদাতি ৰিৰিধং ফলং.

৩৭৯.

একায চেতনাযেকা, পটিসন্ধি পকাসিতা;

নানাকম্মেহি নানা চ, ভৰন্তি পটিসন্ধিযো.

৩৮০.

তিহেতুকং তু যং কম্মং, কামাৰচরসঞ্ঞিতং;

তিহেতুকং দুহেতুঞ্চ, ৰিপাকং দেত্যহেতুকং.

৩৮১.

দুহেতুকং তু যং কম্মং, তং ন দেতি তিহেতুকং;

দুহেতুকমহেতুঞ্চ, ৰিপাকং দেতি অত্তনো.

৩৮২.

তিহেতুকেন কম্মেন,

পটিসন্ধি তিহেতুকা;

দুহেতুকাপি হোতেৰ,

ন চ হোতি অহেতুকা.

৩৮৩.

দুহেতুকেন কম্মেন,

পটিসন্ধি দুহেতুকা;

অহেতুকাপি ¶ হোতেৰ,

ন চ হোতি তিহেতুকা.

৩৮৪.

অসঙ্খারমসঙ্খারং ¶ , সসঙ্খারম্পি দেতি হি;

সসঙ্খারমসঙ্খারং, সসঙ্খারং ফলং তথা.

৩৮৫.

একায চেতনাযেত্থ, কুসলস্স চ সোল়স;

ৰিধা ৰিপাকচিত্তানি, ভৰন্তীতি পকাসযে.

৩৮৬.

আরম্মণেন হোতেৰ, ৰেদনাপরিৰত্তনং;

তদারম্মণচিত্তম্পি, জৰনেন নিযামিতং.

৩৮৭.

কামাৰচরচিত্তেন, কুসলেনাদিনা পন;

তুল্যেন পাকচিত্তেন, গহিতা পটিসন্ধি চে.

৩৮৮.

বলৰারম্মণে ¶ ইট্ঠে, চক্খুস্সাপাথমাগতে;

মনোধাতু ভৰঙ্গস্মিং, তায আৰট্টিতে পন.

৩৮৯.

ৰীথিচিত্তেসু জাতেসু, চক্খুৰিঞ্ঞাণকাদিসু;

জাযতে জৰনং হুত্ৰা, পঠমং কামমানসং.

৩৯০.

সত্তক্খত্তুং জৰিত্ৰান, পঠমে কুসলে গতে;

তদেৰারম্মণং কত্ৰা, তেনেৰ সদিসং পুন.

৩৯১.

ৰিপাকং জাযতে চিত্তং, তদারম্মণসঞ্ঞিতং;

সন্ধিযা তুল্যতো মূল-ভৰঙ্গন্তি পৰুচ্চতে.

৩৯২.

তঞ্চ সন্তীরণং এত্থ, দস্সনং সম্পটিচ্ছনং;

গণনূপগচিত্তানি, চত্তারেৰ ভৰন্তি হি.

৩৯৩.

যদা হি দুতিযং চিত্তং, কুসলং জৰনং তদা;

তেন তুল্যৰিপাকম্পি, তদারম্মণকং সিযা.

৩৯৪.

সন্ধিযা অসমানত্তা, দ্ৰে নামানিস্স লব্ভরে;

‘‘আগন্তুকভৰঙ্গ’’ন্তি, ‘‘তদারম্মণক’’ন্তি চ.

৩৯৫.

যদা ¶ ¶ হি ততিযং পুঞ্ঞং, জৰনং হোতি তেন চ;

সদিসং ততিযং পাকং, তদারম্মণকং সিযা.

৩৯৬.

‘‘আগন্তুকভৰঙ্গ’’ন্তি, ইদম্পি চ পৰুচ্চতি;

ইমিনা পন সদ্ধিং ছ, পুরিমানি চ পঞ্চপি.

৩৯৭.

যদা চতুত্থং কুসলং, জৰনং হোতি তেন চ;

তুল্যং চতুত্থং পাকং তু, তদারম্মণতং ৰজে.

৩৯৮.

আগন্তুকভৰঙ্গং তু, তদারম্মণনামকং;

পুরিমানি ছ পাকানি, ইমিনা হোন্তি সত্ত তু.

৩৯৯.

তস্মিং দ্ৰারে যদা ইট্ঠ-মজ্ঝত্তারম্মণং পন;

আগচ্ছতি তদাপাথং, তদা ৰুত্তনযেনিধ.

৪০০.

আরম্মণৰসেনেৰ, ৰেদনা পরিৰত্ততি;

উপেক্খাসহিতং তস্মা, হোতি সন্তীরণং মনো.

৪০১.

উপেক্খাসহিতেস্ৰেৰ, জৰনেসু চতূসুপি;

তেহি তুল্যানি চত্তারি, পাকচিত্তানি জাযরে.

৪০২.

ৰেদনাযাসমানত্তা, অচ্চন্তং পুরিমেহি তু;

হোন্তি পিট্ঠিভৰঙ্গানি, চত্তারীতি চ নামতো.

৪০৩.

পঞ্চিমানি ৰিপাকানি, পুরিমেহি চ সত্তহি;

সদ্ধিং দ্ৰাদস পাকানি, ভৰন্তীতি ৰিনিদ্দিসে.

৪০৪.

চক্খুদ্ৰারে তথা এৰং, সোতাদীস্ৰপি নিদ্দিসে;

দ্ৰাদস দ্ৰাদস পাকা, সমসট্ঠি ভৰন্তিমে.

৪০৫.

একায চেতনাযেৰ, কম্মে আযূহিতে পন;

সমসট্ঠি ৰিপাকানি, উপ্পজ্জন্তি ন সংসযো.

৪০৬.

গহিতাগহণেনেত্থ ¶ ¶ , চক্খুদ্ৰারেসু দ্ৰাদস;

সোতৰিঞ্ঞাণকাদীনি, চত্তারীতি চ সোল়স.

৪০৭.

এৰমেৰ ¶ সসঙ্খার-তিহেতুকুসলেনপি;

অসঙ্খারসসঙ্খারু-পেক্খাসহগতেহিপি.

৪০৮.

কম্মে আযূহিতে তেসং, ৰিপাকেহি চ তীহিপি;

এসেৰ চ নযো তেহি, দিন্নায পটিসন্ধিযা.

৪০৯.

পঠমং ইট্ঠমজ্ঝত্ত-গোচরস্স ৰসেনিধ;

পৰত্তিং পন দস্সেত্ৰা, উপেক্খাসহিতদ্ৰযে.

৪১০.

দস্সেতব্বা তপ্পচ্ছা তু, ইট্ঠস্মিং গোচরে ইধ;

একেকস্মিং পন দ্ৰারে, দ্ৰাদস দ্ৰাদসেৰ তু.

৪১১.

গহিতাগহণেনেত্থ, পাকচিত্তানি সোল়স;

পুব্বে ৰুত্তনযেনেৰ, ঞেয্যং সব্বমসেসতো.

৪১২.

তিহেতুকেন কম্মেন, পটিসন্ধি তিহেতুকা;

ভৰতীতি অযং ৰারো, ৰুত্তো এত্তাৰতা মযা.

৪১৩.

সন্ধিমেকং তু কম্মেকং, জনেতি ন ততো পরং;

অনেকানি ৰিপাকানি, সঞ্জনেতি পৰত্তিযং.

৪১৪.

একস্মা হি যথা বীজা, জাযতে একমঙ্কুরং;

সুবহূনি ফলানিস্স, হোন্তি হেতুপৰত্তিতো.

৪১৫.

দুহেতুকেন কম্মেন, পটিসন্ধি দুহেতুকা;

হোতীতি হি অযং ৰারো, অনুপুব্বেন আগতো.

৪১৬.

দুহেতুকেন কম্মেন, সোমনস্সযুতেনিধ;

অসঙ্খারিকচিত্তেন, কম্মে আযূহিতে পন.

৪১৭.

তেন ¶ তুল্যেন পাকেন, গহিতা পটিসন্ধি চে;

ইট্ঠে আরম্মণে চক্খু-দ্ৰারে আপাথমাগতে.

৪১৮.

সোমনস্সযুতে ঞাণ-হীনে কুসলমানসে;

সত্তক্খত্তুং জৰিত্ৰান, গতে তস্মিং দুহেতুকে.

৪১৯.

তদেৰারম্মণং ¶ কত্ৰা, জাযতে তদনন্তরং;

তংসরিক্খকমেকং তু, অসঙ্খারিকমানসং.

৪২০.

তং হি মূলভৰঙ্গন্তি, তদারম্মণমিচ্চপি;

উভযম্পি চ তস্সেৰ, নামন্তি পরিদীপিতং.

৪২১.

দুহেতুকসসঙ্খারে, জৰিতেপি চ তংসমং;

হোতাগন্তুকসঙ্খাতং, তদারম্মণমানসং.

৪২২.

তথেৰ চ দুহেতূনং, ইট্ঠমজ্ঝত্তগোচরে;

দ্ৰিন্নং উপেক্খাযুত্তানং, জৰনানমনন্তরং.

৪২৩.

দ্ৰে তাদিসানি জাযন্তে, তদারম্মণমানসা;

তেসং ‘‘পিট্ঠিভৰঙ্গ’’ন্তি, নামং ‘‘আগন্তুক’’ন্তি চ.

৪২৪.

সন্তীরণদ্ৰযঞ্চেৰ, দস্সনং সম্পটিচ্ছনং;

ইমানি চ ভৰঙ্গানি, চক্খুদ্ৰারে পনট্ঠ হি.

৪২৫.

এৰমট্ঠট্ঠ ¶ কত্ৰান, দ্ৰারেসুপি চ পঞ্চসু;

চত্তালীস ৰিপাকানি, ভৰন্তীতি পৰত্তিযং.

৪২৬.

গহিতাগহণেনেত্থ, চক্খুদ্ৰারে পনট্ঠ চ;

সোতঘানাদিনা সদ্ধিং, দ্ৰাদসেৰ ভৰন্তি হি.

৪২৭.

একায চেতনাযেৰং, কম্মে আযূহিতে পন;

দ্ৰাদসেৰ ৰিপাকানি, ভৰন্তীতি পকাসিতং.

৪২৮.

দুহেতুকত্তযেনাপি ¶ , সেসেন সদিসেন তু;

পাকেনাদিন্নসন্ধিযা, অযমেৰ নযো মতো.

৪২৯.

দুহেতুকেন কম্মেন, পটিসন্ধি দুহেতুকা;

হোতীতিপি অযং ৰারো, ৰুত্তো এত্তাৰতা মযা.

৪৩০.

দুহেতুকেন কম্মেন, পটিসন্ধি অহেতুকা;

হোতীতি চ অযং ৰারো, অনুপুব্বেন আগতো.

৪৩১.

দুহেতুকেসু ¶ চিত্তেসু, কুসলেসু চতূসুপি;

তেসু অঞ্ঞতরেনেৰ, কম্মে আযূহিতে পন.

৪৩২.

তস্সেৰ পাকভূতায, আদিন্নপটিসন্ধিনো;

উপেক্খাসহিতাহেতু, মনোৰিঞ্ঞাণধাতুযা.

৪৩৩.

পটিসন্ধি ন ৰত্তব্বা, সা কম্মসদিসাতি হি;

কম্মং দুহেতুকং হোতি, পটিসন্ধি অহেতুকা.

৪৩৪.

তস্স বুদ্ধিমুপেতস্স, ইট্ঠমজ্ঝত্তগোচরে;

আপাথমাগতে চক্খু-দ্ৰারে পুন চ দেহিনো.

৪৩৫.

দুহেতূনং চতুন্নম্পি, পুঞ্ঞানং যস্স কস্সচি;

জৰনস্সাৰসানস্মিং, অহেতুকমিদং মনো.

৪৩৬.

তদারম্মণভাৰেন, জাযতে নত্থি সংসযো;

তং তু মূলভৰঙ্গঞ্চ, তদারম্মণমেৰ চ.

৪৩৭.

ৰীথিচিত্তেসু জাতেসু, চক্খুৰিঞ্ঞাণকাদিসু;

উপেক্খাসহিতংযেৰ, হোতি সন্তীরণম্পি চ.

৪৩৮.

তেসু একং ঠপেত্ৰান, গহিতাগহণেনিধ;

গণনূপগচিত্তানি, তীণিযেৰ ভৰন্তি হি.

৪৩৯.

ইট্ঠে ¶ আরম্মণে চক্খু-দ্ৰারে আপাথমাগতে;

তদা সন্তীরণঞ্চেৰ, তদারম্মণমানসং.

৪৪০.

সোমনস্সযুতংযেৰ, গহেত্ৰা তেসু এককং;

পুরিমানি চ তীণীতি, চত্তারোৰ ভৰন্তি হি.

৪৪১.

এৰং চত্তারি চিত্তানি, দ্ৰারেসুপি চ পঞ্চসু;

হোন্তি ৰীসতি চিত্তানি, ৰিপাকানি পৰত্তিযং.

৪৪২.

চক্খুদ্ৰারে তু চত্তারি, গহিতাগহণেনিধ;

সোতঘানাদিনা সদ্ধিং, হোতেৰাহেতুকট্ঠকং.

৪৪৩.

অহেতুপটিসন্ধিস্স ¶ , ন তদারম্মণং ভৰে;

দুহেতুকং তিহেতুং ৰা, দুহেতুপটিসন্ধিনো.

৪৪৪.

জাতা ¶ সুগতিযং যেন, পাকেন পটিসন্ধি তু;

তেন তুল্যম্পি হীনং ৰা, তদারম্মণকং ভৰে.

৪৪৫.

মনুস্সলোকং সন্ধায, ৰুত্তঞ্চাহেতুকট্ঠকং;

চতূসুপি অপাযেসু, পৰত্তে পন লব্ভতি.

৪৪৬.

থেরো নেরযিকানং তু, ধম্মং দেসেতি ৰস্সতি;

গন্ধং ৰাযুঞ্চ মাপেতি, যদা তেসং তদা পন.

৪৪৭.

থেরং দিস্ৰা চ সুত্ৰা চ, ধম্মং গন্ধঞ্চ ঘাযতং;

পিৰতঞ্চ জলং ৰাযুং, ফুসতং মুদুমেৰ চ.

৪৪৮.

চক্খুৰিঞ্ঞাণকাদীনি, পুঞ্ঞজানেৰ পঞ্চপি;

সন্তীরণদ্ৰযং একা, মনোধাতূতি অট্ঠকং.

৪৪৯.

অযং তাৰ কথা ইট্ঠ-ইট্ঠমজ্ঝত্তগোচরে;

কামাৰচরপুঞ্ঞানং, জৰনানং ৰসেনিধ.

৪৫০.

নিযমত্থং ¶ তু যং ৰুত্তং, তদারম্মণচেতসো;

কুসলং পন সন্ধায, তং ৰুত্তন্তি হি দীপিতং.

৪৫১.

ইধাকুসলচিত্তেসু, সোমনস্সযুতেসুপি;

ইট্ঠে আরম্মণে তেসু, জৰিতেসু চতূসুপি.

৪৫২.

সোমনস্সযুতাহেতু-মনোৰিঞ্ঞাণধাতু হি;

তদারম্মণভাৰেন, জাযতে তদনন্তরং.

৪৫৩.

ছস্ৰাকুসলচিত্তেসু, উপেক্খায যুতেসু হি;

গোচরে ইট্ঠমজ্ঝত্তে, জৰিতেসু অনন্তরং.

৪৫৪.

উপেক্খাসহিতাহেতু-মনোৰিঞ্ঞাণধাতু হি;

তদারম্মণভাৰেন, জাযতে পন পুঞ্ঞজা.

৪৫৫.

ইট্ঠারম্মণযোগস্মিং ¶ , কঙ্খতো উদ্ধতস্স ৰা;

সোমনস্সযুতং হোতি, তদারম্মণমানসং.

৪৫৬.

সোমনস্সযুতে চিত্তে, জৰনে জৰিতে পন;

গৰেসিতব্বা পঞ্চেৰ, তদারম্মণমানসা.

৪৫৭.

উপেক্খাসহিতে চিত্তে, জৰনে জৰিতে পন;

ছল়েৰ গৰেসিতব্বা, তদারম্মণমানসা.

৪৫৮.

তিহেতুসোমনস্সেন, আদিন্নপটিসন্ধিনো;

ঝানতো পরিহীনস্স, তং ঝানং পচ্চৰেক্খতো.

৪৫৯.

দোমনস্সযুতং চিত্তং, হোতি ৰিপ্পটিসারিনো;

তস্স কিং জাযতে ব্রূহি, তদারম্মণমানসং.

৪৬০.

পট্ঠানে পটিসিদ্ধা হি, দোমনস্সঅনন্তরং;

সোমনস্সস্স উপ্পত্তি, দোমনস্সস্স চস্স ৰা.

৪৬১.

মহগ্গতং ¶ পনারব্ভ, জৰনে জৰিতেপি চ;

তত্থেৰ পটিসিদ্ধং তু, তদারম্মণমানসং.

৪৬২.

তস্মা ¶ ভৰঙ্গপাতোৰ, তদারম্মণমেৰ ৰা;

ন হোতি কিং নু কাতব্বং, ৰদ ত্ৰং আভিধম্মিক.

৪৬৩.

উপেক্খাসহিতাহেতু-মনোৰিঞ্ঞাণধাতু তু;

পুঞ্ঞাপুঞ্ঞৰিপাকা হি, তদারম্মণিকা সিযা.

৪৬৪.

আৰজ্জনং কিমস্সাতি, নত্থি তং জাযতে কথং;

ভৰঙ্গাৰজ্জনানং কিং, মগ্গস্সানন্তরস্স চ.

৪৬৫.

ফলস্সপি নিরোধা চ, ৰুট্ঠহন্তস্স ভিক্খুনো;

ফলচিত্তস্স ৰা এৰং, নত্থি আৰজ্জনং কির.

৪৬৬.

ৰিনা আৰজ্জনেনাপি, হোতি জাযতু মানসং;

কিমস্সারম্মণং ব্রূহি, যদি জানাসি পণ্ডিত.

৪৬৭.

ৰিনা ¶ আরম্মণেনেৰ, ন হি জাযতি মানসং;

রূপাদীসু পরিত্তেসু, যং কিঞ্চারব্ভ জাযতে.

৪৬৮.

উতুবীজনিযামো চ, কম্মধম্মনিযামতা;

চিত্তস্স চ নিযামোতি, ঞেয্যা পঞ্চ নিযামতা.

৪৬৯.

তত্থ একপ্পহারেন, ফলপুপ্ফাদিধারণং;

রুক্খানং পন সব্বেসং, অযং উতুনিযামতা.

৪৭০.

তেসং তেসং তু বীজানং, তংতংতুল্যফলুব্ভৰো;

মত্থকে নাল়িকেরস্স, ছিদ্দত্তং বীজজো অযং.

৪৭১.

তিহেতুকং তিহেতুঞ্চ, দুহেতুঞ্চ অহেতুকং;

ৰিপাকং তু যতো দেতি, অযং কম্মনিযামতা.

৪৭২.

জাতিযং ¶ বোধিসত্তস্স, মেদনীকম্পনাদিকং;

ৰিসেসত্তমনেকম্পি, অযং ধম্মনিযামতা.

৪৭৩.

গোচরেন পসাদস্মিং, ঘট্টিতে পন তেনিধ;

উপ্পত্তাৰজ্জনাদীনং, অযং চিত্তনিযামতা.

৪৭৪.

অন্ধজ্জনানং হদযন্ধকারং,

ৰিদ্ধংসনং দীপমিমং জলন্তং;

সিক্খেথ ধীরো সততং পযুত্তো,

মোহন্ধকারাপগমং যদিচ্ছেতি.

ইতি অভিধম্মাৰতারে ৰিপাকচিত্তপ্পৰত্তিনিদ্দেসো নাম

সত্তমো পরিচ্ছেদো.

৮. অট্ঠমো পরিচ্ছেদো

পকিণ্ণকনিদ্দেসো

৪৭৫.

ইদানি ¶ ¶ পন সব্বেসং, এতেসং মানসং মযা;

পাটৰত্থায ভিক্খূনং, কথীযতি পকিণ্ণকং.

৪৭৬.

পন্থমক্কটকো নাম, দিসাসু পন পঞ্চসু;

তত্থ সুত্তং পসারেত্ৰা, জালমজ্ঝে নিপজ্জতি.

৪৭৭.

পঠমায দিসাযেত্থ, সুত্তে পন পসারিতে;

পাণকেন পটঙ্গেন, ঘট্টিতে মক্খিকায ৰা.

৪৭৮.

নিপন্নট্ঠানতো কিঞ্চি, চলিত্ৰা উণ্ণনাভি তু;

গন্ত্ৰা সুত্তানুসারেন, যূসং পিৰতি তস্স সা.

৪৭৯.

পুনাগন্ত্ৰান তত্থেৰ, নিপজ্জতি যথাসুখং;

এৰমেৰ করোতেৰ, দিসাসু দুতিযাদিসু.

৪৮০.

পসাদা ¶ পঞ্চ দট্ঠব্বা, সুত্তং পঞ্চদিসাস্ৰিৰ;

চিত্তং পন চ দট্ঠব্বং, মজ্ঝে মক্কটকো ৰিয.

৪৮১.

পাণকাদীহি সুত্তস্স, তস্স সঙ্ঘট্টনা ৰিয;

পসাদানং তু দট্ঠব্বা, ঘট্টনারম্মণেন হি.

৪৮২.

চলনং ৰিয তংমজ্ঝে, নিপন্নাযুণ্ণনাভিযা;

পসাদঘট্টনং তত্থ, গহেত্ৰারম্মণং পন.

৪৮৩.

মনোধাতুক্রিযাচিত্তং, ভৰঙ্গাৰট্টনং মতং;

তস্সা সুত্তানুসারংৰ, ৰীথিচিত্তপৰত্তনং.

৪৮৪.

সীসে পনস্স ৰিজ্ঝিত্ৰা, যূসপানংৰ চেতসো;

আরম্মণেসু দট্ঠব্বং, জৰনস্স পৰত্তনং.

৪৮৫.

পুনাগন্ত্ৰা ¶ যথা সুত্ত-জালমজ্ঝে নিপজ্জনং;

ৰত্থুংযেৰ চ নিস্সায, চিত্তস্স পরিৰত্তনং.

৪৮৬.

ইদং তু পন ওপম্মং, অত্থং দীপেতি কিং তু হি;

আরম্মণেন পঠমং, পসাদে ঘট্টিতে পন.

৪৮৭.

পসাদৰত্থুতো চিত্তা, ৰত্থুসন্নিস্সিতং মনো;

ততো হি পঠমংযেৰ, জাযতীতি হি দীপিতং.

৪৮৮.

একেকারম্মণং ¶ দ্ৰীসু, দ্ৰীসু দ্ৰারেসু সব্বসো;

আগচ্ছতি তেনাপাথং, অযমত্থোপি দীপিতো.

৪৮৯.

রূপং চক্খুপসাদম্হি, ঘট্টিত্ৰা তঙ্খণে পন;

মনোদ্ৰারে তথাপাথ-মাগচ্ছতি নিসংসযো.

৪৯০.

খগো যথা হি রুক্খগ্গে, নিলীযন্তোৰ সাখিনো;

সাখং ঘট্টেতি তস্সীধ, ছাযা ফরতি ভূমিযং.

৪৯১.

সাখায ¶ ঘট্টনচ্ছাযা, ফরণানি চ সব্বসো;

অপুব্বাচরিমং এক-ক্খণস্মিংযেৰ জাযরে.

৪৯২.

এৰমেৰ চ রূপস্স, পসাদস্স চ ঘট্টনং;

ভৰঙ্গচলনস্সাপি, পচ্চযত্তেন অত্থতো.

৪৯৩.

তথেৰ চ মনোদ্ৰারে, আপাথগমনম্পি চ;

অপুব্বাচরিমং এক-ক্খণস্মিংযেৰ হোতিতি.

৪৯৪.

ততো ভৰঙ্গং ছিন্দিত্ৰা, চক্খুদ্ৰারে যথাক্কমং;

আৰজ্জনে সমুপ্পন্নে, দস্সনে সম্পটিচ্ছনে.

৪৯৫.

সন্তীরণে সমুপ্পন্নে, ততো ৰোট্ঠব্বনেপি চ;

কুসলং জৰনং চিত্তং, তথাকুসলমেৰ ৰা.

৪৯৬.

এসো এৰ নযো সোত-দ্ৰারাদীসুপি ৰিঞ্ঞুনা;

অৰিসেসেন ৰিঞ্ঞেয্যো, সদ্দাদীনং তু ঘট্টনে.

৪৯৭.

দোৰারিকোপমাদীনি ¶ , এতস্সত্থস্স দীপনে;

উদ্ধরিত্ৰান তানেত্থ, দস্সেতব্বানি ৰিঞ্ঞুনা.

৪৯৮.

অসম্ভেদেন চক্খুস্স, রূপাপাথগমেন চ;

আলোকনিস্সযেনাপি, সমনক্কারহেতুনা.

৪৯৯.

পচ্চযেহি পনেতেহি, সমেতেহি চতূহিপি;

জাযতে চক্খুৰিঞ্ঞাণং, সম্পযুত্তেহি তং সহ.

৫০০.

অসম্ভেদেন সোতস্স, সদ্দাপাথগমেন চ;

আকাসনিস্সযেনাপি, সমনক্কারহেতুনা.

৫০১.

পচ্চযেহি পনেতেহি, সমেতেহি চতূহিপি;

জাযতে সোতৰিঞ্ঞাণং, সম্পযুত্তেহি তং সহ.

৫০২.

অসম্ভেদেন ¶ ঘানস্স, গন্ধাপাথগমেন চ;

ৰাযোসন্নিস্সযেনাপি, সমনক্কারহেতুনা.

৫০৩.

পচ্চযেহি পনেতেহি, সমেতেহি চতূহিপি;

জাযতে ঘানৰিঞ্ঞাণং, সম্পযুত্তেহি তং সহ.

৫০৪.

অসম্ভেদেন জিৰ্হায, রসাপাথগমেন চ;

আপোসন্নিস্সযেনাপি, সমনক্কারহেতুনা.

৫০৫.

পচ্চযেহি পনেতেহি, সমেতেহি চতূহিপি;

জাযতে জিৰ্হাৰিঞ্ঞাণং, সম্পযুত্তেহি তং সহ.

৫০৬.

অসম্ভেদেন ¶ কাযস্স, ফোট্ঠব্বাপাথসঙ্গমা;

পথৰীনিস্সযেনাপি, সমনক্কারহেতুনা.

৫০৭.

পচ্চযেহি পনেতেহি, সমেতেহি চতূহিপি;

জাযতে কাযৰিঞ্ঞাণং, সম্পযুত্তেহি তং সহ.

৫০৮.

অসম্ভেদা মনস্সাপি, ধম্মাপাথগমেন চ;

ৰত্থুসন্নিস্সযেনাপি, সমনক্কারহেতুনা.

৫০৯.

পচ্চযেহি ¶ পনেতেহি, সমেতেহি চতূহিপি;

মনোৰিঞ্ঞাণমেৰং তু, সম্পযুত্তেহি জাযতে.

৫১০.

মনো ভৰঙ্গচিত্তন্তি, ৰেদিতব্বং ৰিভাৰিনা;

আৰজ্জনক্রিযাচিত্তং, সমনক্কারোতি সঞ্ঞিতং.

৫১১.

ৰত্থুসন্নিস্সযেনাতি, নাযং সব্বত্থ গচ্ছতি;

ভৰং তু পঞ্চৰোকারং, সন্ধায কথিতো পন.

৫১২.

পটিসন্ধাদিচিত্তানি, সব্বানেকূনৰীসতি;

কামে দস চ রূপেসু, পঞ্চ চত্তারিরূপিসু.

৫১৩.

কম্মং ¶ কম্মনিমিত্তঞ্চ, তথা গতিনিমিত্তকং;

ইদং হি তিৰিধং তেসং, আরম্মণমুদীরিতং.

৫১৪.

কামাৰচরসন্ধীনং, পরিত্তারম্মণং মতং;

পচ্চুপ্পন্নমতীতং ৰা, হোতি নত্থি অনাগতং.

৫১৫.

অট্ঠেৰ চ মহাপাকা, তীণি সন্তীরণানি চ;

একাদসৰিধং চিত্তং, তদারম্মণসঞ্ঞিতং.

৫১৬.

একাদসৰিধে চিত্তে, তদারম্মণসঞ্ঞিতে;

দস পুঞ্ঞৰিপাকানি, একং হোতি অপুঞ্ঞজং.

৫১৭.

মহাপাকা ন জাযন্তে, রূপারূপভৰদ্ৰযে;

কামে রূপে ভৰে চেৰ, হোতি সন্তীরণত্তযং.

৫১৮.

তদারম্মণচিত্তানি, যানি ৰুত্তানি সত্থুনা;

তেসু চিত্তং পনেকম্পি, রূপারূপভৰদ্ৰযে.

৫১৯.

ন তদারম্মণং হুত্ৰা, পৰত্ততি কদাচিপি;

কস্মা ন হোতি চে তত্থ, বীজস্সাভাৰতো পন.

৫২০.

পটিসন্ধিবীজং নত্থেত্থ, কামাৰচরসঞ্ঞিতং;

রূপাদিগোচরে তস্স, ভৰেয্য জনকং তু যং.

৫২১.

চক্খুৰিঞ্ঞাণকাদীনং ¶ , নত্থিতাপজ্জতীতি চে;

নিন্দ্রিযানং পৰত্তানু-ভাৰতো চিত্তসম্ভৰো.

৫২২.

একন্তেন যথা চেতং, তদারম্মণমানসং;

নপ্পৰত্ততি সব্বম্পি, রূপারূপভৰদ্ৰযে.

৫২৩.

অকামাৰচরধম্মেপি, তদেতং নানুবন্ধতি;

কস্মা অজনকত্তা হি, জনকস্সাসমানতো.

৫২৪.

জনকং ¶ তেন তুল্যং ৰা, কামাৰচরসঞ্ঞিতং;

কুসলাকুসলাদিং তু, জৰনং অনুবন্ধতি.

৫২৫.

কামাৰচরধম্মাপি ¶ , যে মহগ্গতগোচরা;

হুত্ৰা ৰত্তন্তি তে চাপি, ইদং নেৰানুবন্ধতি.

৫২৬.

পরিত্তারম্মণত্তা চ, একন্তেন পনস্স হি;

তথাপরিচিতত্তা চ, নানুবন্ধতি সব্বদা.

৫২৭.

কিং তেন যুত্তিৰাদেন, ৰুত্তং অট্ঠকথাসু হি;

তদারম্মণচিত্তানি, একাদসপি সব্বসো.

৫২৮.

নামগোত্তং পনারব্ভ, জৰনে জৰিতেপি চ;

তদারম্মণং ন গণ্হন্তি, রূপারূপভৰেসু ৰা.

৫২৯.

যদা পঞ্ঞত্তিমারব্ভ, জৰনে জৰিতেপি ৰা;

তথা ৰিপস্সনাযাপি, লক্খণারম্মণায চ.

৫৩০.

তদারম্মণা ন লব্ভন্তি, মিচ্ছত্তনিযতেসুপি;

ন লোকুত্তরধম্মেপি, আরব্ভ জৰনে গতে.

৫৩১.

তথা মহগ্গতে ধম্মে, আরব্ভ জৰনে পন;

পটিসম্ভিদাঞাণানি, আরব্ভ জৰিতেপি চ.

৫৩২.

মনোদ্ৰারেপি সব্বেসং, জৰনানমনন্তরং;

তদারম্মণচিত্তানি, ভৰন্তি অনুপুব্বতো.

৫৩৩.

ন ¶ ৰিজ্জতি মনোদ্ৰারে, ঘট্টনারম্মণস্স হি;

কথং ভৰঙ্গতো হোতি, ৰুট্ঠানং পন চেতসো.

৫৩৪.

মনোদ্ৰারেপি আপাথ-মাগচ্ছন্তেৰ গোচরা;

ঘট্টনায ৰিনা তস্মা, চিত্তানং হোতি সম্ভৰো.

৫৩৫.

দ্ৰাদসাপুঞ্ঞচিত্তানং ¶ , ৰিপাকা সত্তসত্ততি;

ভৰন্তি চতুরাসীতি, পাপপাকা পৰত্তিযং.

৫৩৬.

একাদসৰিধানং তু, হিত্ৰা উদ্ধচ্চমানসং;

একাদসৰিধা চেৰ, ভৰন্তি পটিসন্ধিযো.

৫৩৭.

ক্রিযচিত্তেসু সব্বেসু, জৰনং ন চ হোতি যং;

তং ৰে করণমত্তত্তা, ৰাতপুপ্ফসমং মতং.

৫৩৮.

জৰনত্তং তু সম্পত্তং, কিচ্চসাধনতো পন;

ছিন্নমূলস্স রুক্খস্স, পুপ্ফংৰ অফলং সিযা.

৫৩৯.

পটিচ্চ পন এতস্মা, ফলমেতীতি পচ্চযো;

যো ধম্মো যস্স ধম্মস্স, ঠিতিযুপ্পত্তিযাপি ৰা.

৫৪০.

উপকারো হি সো তস্স, পচ্চযোতি পৰুচ্চতি;

সম্ভৰোপভৰো হেতু, কারণং পচ্চযো মতো.

৫৪১.

লোভাদি পন যো ধম্মো, মূলট্ঠেনুপকারকো;

হেতূতি পন সো ধম্মো, ৰিঞ্ঞাতব্বো ৰিভাৰিনা.

৫৪২.

লোভো দোসো চ মোহো চ,

তথালোভাদযো তযো;

ছল়েৰ হেতুযো হোন্তি,

জাতিতো নৰধা সিযুং.

৫৪৩.

ধম্মানং কুসলাদীনং, কুসলাদিত্তসাধকো;

মূলট্ঠোতি ৰদন্তেৰং, একে আচরিযা পন.

৫৪৪.

এৰং ¶ ¶ সন্তে তু হেতূনং, তংসমুট্ঠানরূপিসু;

হেতুপচ্চযতা নেৰ, সম্পজ্জতি কদাচিপি.

৫৪৫.

ন হি তে পন রূপানং, সাধেন্তি কুসলাদিকং;

ন তেসং পন রূপানং, পচ্চযা ন চ হোন্তি তে.

৫৪৬.

তস্মা ¶ হি কুসলাদীনং, কুসলাদিত্তসাধকো;

মূলট্ঠোতি ন গন্তব্বো, ৰিঞ্ঞুনা সমযঞ্ঞুনা.

৫৪৭.

সুপ্পতিট্ঠিতভাৰস্স, সাধনেনুপকারকো;

মূলট্ঠোতি চ হেতূনং, ৰিঞ্ঞাতব্বো ৰিভাৰিনা.

৫৪৮.

কুসলাকুসলা হেতূ, ক্রিযাহেতূ চ সব্বসো;

ধম্মানং সম্পযুত্তানং, তংসমুট্ঠানরূপিনং.

৫৪৯.

হেতুপচ্চযতং যাতা, পঞ্চৰোকারভূমিযং;

সম্পযুত্তানমেৰেতে, চতুৰোকারভূমিযং.

৫৫০.

কামে ৰিপাকহেতূপি, কামাৰচরভূমিযং;

অত্তনা সম্পযুত্তানং, পটিসন্ধিক্খণে পন.

৫৫১.

কটত্তারূপজাতানং, তথেৰ চ পৰত্তিযং;

চিত্তজানঞ্চ রূপানং, হেতুপচ্চযতং গতা.

৫৫২.

রূপে ৰিপাকহেতু চ, রূপাৰচরভূমিযং;

তথা ৰুত্তপ্পকারানং, হোন্তি তে হেতুপচ্চযা.

৫৫৩.

হেতুযো পঞ্চৰোকারে, লোকুত্তরৰিপাকজা;

চিত্তজানঞ্চ রূপানং, সম্পযুত্তানমেৰ চ.

৫৫৪.

তে হেতুপচ্চযা হোন্তি, চতুৰোকারভূমিযং;

ভৰন্তি সম্পযুত্তানং, ইতরে চ সভূমিযং.

৫৫৫.

হেতুত্থো হেতুযো চেৰ, হেতুপচ্চযসম্ভৰো;

এৰমেৰ চ ৰিঞ্ঞেয্যো, সঞ্জাতসুখহেতুনা.

৫৫৬.

ছন্দো ¶ চিত্তঞ্চ ৰীরিযং, ৰীমংসা চাতি সত্থুনা;

লোকাধিপতিনা ৰুত্তা, চতুধাধিপতী সিযুং.

৫৫৭.

ছন্দং ¶ তু জেট্ঠকং কত্ৰা, ছন্দং কত্ৰা ধুরং পন;

চিত্তস্সুপ্পত্তিকালস্মিং, ছন্দাধিপতি নামসো.

৫৫৮.

এসেৰ চ নযো ঞেয্যো, সেসেসুপি চ তীসুপি;

অধিপ্পতীতি নিদ্দিট্ঠো, জেট্ঠট্ঠেনুপকারকো.

৫৫৯.

সুমতিমতিৰিবোধনং ৰিচিত্তং,

কুমতিমতিন্ধনপাৰকং পধানং;

ইমমতিমধুরং অৰেদি যো যো,

জিনৰচনং সকলং অৰেদি সো সো.

ইতি অভিধম্মাৰতারে পকিণ্ণকনিদ্দেসো নাম

অট্ঠমো পরিচ্ছেদো.

৯. নৰমো পরিচ্ছেদো

পুঞ্ঞৰিপাকপচ্চযনিদ্দেসো

৫৬০.

বাত্তিংস ¶ পাকচিত্তানি, লোকিকানেৰ যানি হি;

এতেসং পাকচিত্তানং, পটিসন্ধিপৰত্তিসু.

৫৬১.

পুঞ্ঞাপুঞ্ঞাদিসঙ্খারা, যথা যেসঞ্চ পচ্চযা;

ভৰাদীসু তথা তেপি, ৰিঞ্ঞাতব্বা ৰিভাৰিনা.

৫৬২.

তযো ভৰা চতস্সো চ, যোনিযো গতিপঞ্চকং;

ৰিঞ্ঞাণট্ঠিতিযো সত্ত, সত্তাৰাসা নৰেরিতা.

৫৬৩.

কামে ¶ পুঞ্ঞাভিসঙ্খার-সঞ্ঞিতা অট্ঠ চেতনা;

নৰন্নং পাকচিত্তানং, কামে সুগতিযং পন.

৫৬৪.

নানাক্খণিককম্মূপ-নিস্সযপচ্চযেহি চ;

দ্ৰেধা হি পচ্চযা তেসং, ভৰন্তি পটিসন্ধিযং.

৫৬৫.

উপেক্খাসহিতাহেতু-মনোৰিঞ্ঞাণধাতুযা ¶ ;

ৰিনা পরিত্তপাকানং, হোন্তি দ্ৰেধা পৰত্তিযং.

৫৬৬.

তাযেৰ চেতনা রূপ-ভৰে দ্ৰেধাৰ পচ্চযা;

পঞ্চন্নং পাকচিত্তানং, ভৰন্তি হি পৰত্তিযং.

৫৬৭.

অট্ঠন্নং তু পরিত্তানং, কামে দুগ্গতিযং তথা;

পৰত্তে পচ্চযা হোন্তি, ন হোন্তি পটিসন্ধিযং.

৫৬৮.

হোন্তি ৰুত্তপ্পকারাৰ, কামে সুগতিযং তথা;

সোল়সন্নং ৰিপাকানং, পৰত্তে পটিসন্ধিযং.

৫৬৯.

রূপে পুঞ্ঞাভিসঙ্খারা, রূপাৰচরভূমিযং;

পঞ্চন্নং পাকচিত্তানং, পচ্চযা পটিসন্ধিযং.

৫৭০.

হোন্তিমাপুঞ্ঞসঙ্খারা, কামে দুগ্গতিযং দ্ৰিধা;

ৰিঞ্ঞাণস্স পনেকস্স, পচ্চযা পটিসন্ধিযং.

৫৭১.

ছন্নং পন পৰত্তেৰ, হোন্তি নো পটিসন্ধিযং;

সত্তন্নম্পি ভৰন্তেৰ, পৰত্তে পটিসন্ধিযং.

৫৭২.

কামে সুগতিযং তেসং, সত্তন্নম্পি তথেৰ চ;

পৰত্তে পচ্চযা হোন্তি, ন হোন্তি পটিসন্ধিযং.

৫৭৩.

ৰিঞ্ঞাণানং চতুন্নম্পি, তেসং রূপভৰে তথা;

পৰত্তে পচ্চযা হোন্তি, ন হোন্তি পটিসন্ধিযং.

৫৭৪.

সো ¶ চ কামভৰেনিট্ঠ-রূপাদিউপলদ্ধিযং;

অনিট্ঠরূপাদযো পন, ব্রহ্মলোকে ন ৰিজ্জরে.

৫৭৫.

তথেৰানেঞ্জসঙ্খারো ¶ , অরূপাৰচরভূমিযং;

চতুন্নং পাকচিত্তানং, পৰত্তে পটিসন্ধিযং.

৫৭৬.

এৰং ¶ তাৰ ভৰেস্ৰেতে, পটিসন্ধিপৰত্তিসু;

যথা চ পচ্চযা হোন্তি, তথা ঞেয্যা ৰিভাৰিনা.

৫৭৭.

এসেৰ চ নযো ঞেয্যো, যোনিআদীসু তত্রিদং;

আদিতো পন পট্ঠায, মুখমত্তনিদস্সনং.

৫৭৮.

অৰিসেসেন পুঞ্ঞাভি-সঙ্খারো দ্ৰিভৰেসুপি;

দত্ৰান পটিসন্ধিং তু, সব্বপাকং জনেতি সো.

৫৭৯.

তথা চতূসু ৰিঞ্ঞেয্যো, অণ্ডজাদীসু যোনিসু;

বহুদেৰমনুস্সানং, গতীসু দ্ৰীসু এৰ চ.

৫৮০.

তথা নানত্তকাযাদি-ৰিঞ্ঞাণানং ঠিতীসুপি;

তথা ৰুত্তপ্পকারস্মিং, সত্তাৰাসে চতুব্বিধে.

৫৮১.

এৰং পুঞ্ঞাভিসঙ্খারো, ভৰাদীসু যথারহং;

একৰীসতিপাকানং, পচ্চযো হোতি চ দ্ৰিধা.

৫৮২.

কামে অপুঞ্ঞসঙ্খারো, ভৰে চতূসু যোনিসু;

তীসু গতীসু একিস্সা, ৰিঞ্ঞাণট্ঠিতিযাপি চ.

৫৮৩.

সত্তাৰাসে পনেকস্মিং,

উহোতি সো পচ্চযো দ্ৰিধা;

সত্তন্নং পাকচিত্তানং,

পৰত্তে পটিসন্ধিযং.

৫৮৪.

তথেৰানেঞ্জসঙ্খারো, একারূপভৰে পুন;

একিস্সা যোনিযা চেৰ, একিস্সা গতিযাপি চ.

৫৮৫.

তীসু চিত্তট্ঠিতীস্ৰেৰ, সত্তাৰাসে চতুব্বিধে;

চতুন্নং পাকচিত্তানং, দ্ৰেধা সো হোতি পচ্চযো.

৫৮৬.

পটিসন্ধিপৰত্তীনং ¶ , ৰসেনেৰ ভৰাদিসু;

ৰিজানিতব্বা সঙ্খারা, যথা যেসঞ্চ পচ্চযা.

৫৮৭.

ন ¶ রূপারূপধম্মানং, সঙ্কন্তি পন ৰিজ্জতি;

সঙ্কন্তিভাৰে অসতি, পটিসন্ধি কথং সিযা.

৫৮৮.

নত্থি চিত্তস্স সঙ্কন্তি, অতীতভৰতো ইধ;

ততো হেতুং ৰিনা তস্স, পাতুভাৰো ন ৰিজ্জতি.

৫৮৯.

সুলদ্ধপচ্চযং রূপা-রূপমত্তং তু জাযতি;

উপ্পজ্জমানমেৰং তু, লভিত্ৰা পচ্চযং পন.

৫৯০.

ভৰন্তরমুপেতীতি, সমঞ্ঞায পৰুচ্চতি;

ন চ সত্তো ন চ জীৰো, ন অত্তা ৰাপি ৰিজ্জতি.

৫৯১.

তযিদং পাকটং কত্ৰা, পটিসন্ধিক্কমং পন;

দস্সযিস্সামহং সাধু, নিবোধথ সুদুব্বুধং.

৫৯২.

অতীতস্মিং ¶ ভৰে তস্স, আসন্নমরণস্স হি;

হরিতং তালপণ্ণংৰ, পক্খিত্তং আতপে পন.

৫৯৩.

সুস্সমানে সরীরস্মিং, নট্ঠে চক্খুন্দ্রিযাদিকে;

হদযৰত্থুমত্তস্মিং, ঠিতে কাযপ্পসাদিকে.

৫৯৪.

ৰত্থুসন্নিস্সিতং চিত্তং, হোতি তস্মিং খণেপি চ;

পুব্বানুসেৰিতং কম্মং, পুঞ্ঞং ৰাপুঞ্ঞমেৰ ৰা.

৫৯৫.

কম্মং কম্মনিমিত্তং ৰা, আলম্বিত্ৰা পৰত্ততি;

এৰং পৰত্তমানং তং, ৰিঞ্ঞাণং লদ্ধপচ্চযং.

৫৯৬.

অৰিজ্জায পটিচ্ছন্না-দীনৰে ৰিসযে পন;

তণ্হা নমেতি সঙ্খারা, খিপন্তি সহজা পন.

৫৯৭.

ন মীযমানং তণ্হায, তং সন্ততিৰসা পন;

ওরিমা পন তীরম্হা, আলম্বিত্ৰান রজ্জুকং.

৫৯৮.

মাতিকাতিক্কমোৰেতং ¶ ¶ , পুরিমং জহতি নিস্সযং;

অপরং কম্মসম্ভূতং, লম্বিত্ৰা ৰাপি নিস্সযং.

৫৯৯.

তং পনারম্মণাদীহি, পচ্চযেহি পৰত্ততি;

পুরিমং চৰনং এত্থ, পচ্ছিমং পটিসন্ধি তু.

৬০০.

তদেতং নাপি পুরিমা, ভৰতোপি ইধাগতং;

কম্মাদিঞ্চ ৰিনা হেতুং, পাতুভূতং ন চেৰ তং.

৬০১.

এত্থ চেতস্স চিত্তস্স, পুরিমা ভৰতো পন;

ইধানাগমনেতীত-ভৰহেতূহি সম্ভৰে.

৬০২.

পটিঘোসদীপমুদ্দাদী, ভৰন্তেত্থ নিদস্সনা;

যথা আগন্ত্ৰা অঞ্ঞত্র, হোন্তি সদ্দাদিহেতুকা.

৬০৩.

এৰমেৰ চ ৰিঞ্ঞাণং, ৰেদিতব্বং ৰিভাৰিনা;

সন্তানবন্ধতো নত্থি, একতা ৰাপি নানতা.

৬০৪.

সতি সন্তানবন্ধে তু, একন্তেনেকতা সিযা;

খীরতো দধিসম্ভূতং, ন ভৰেয্য কদাচিপি.

৬০৫.

অথাপি পন একন্ত-নানতা সা ভৰেয্য চে;

খীরসামী নরো নেৰ, দধিসামী ভৰেয্য সো.

৬০৬.

তস্মা এত্থ পনেকন্ত-একতানানতাপি ৰা;

ন চেৰ উপগন্তব্বা, ৰিঞ্ঞুনা সমযঞ্ঞুনা.

৬০৭.

ননু এৰমসঙ্কন্তি-পাতুভাৰে তস্স সতি;

যে ইমস্মিং মনুস্সত্ত-ভাৰে খন্ধাভিসম্ভৰা.

৬০৮.

তেসং ইধ নিরুদ্ধত্তা, কম্মস্স ফলহেতুনো;

পরত্থাগমতো চেৰ, ইধ তস্স কতস্স হি.

৬০৯.

অঞ্ঞস্স ¶ অঞ্ঞতো চেৰ, কম্মতো তং ফলং সিযা;

তস্মা ন সুন্দরং এতং, ৰিধানং সব্বমেৰ চ.

এত্থাহ ¶ –

৬১০.

সন্তানে ¶ যং ফলং এতং, নাঞ্ঞস্স ন চ অঞ্ঞতো;

বীজানং অভিসঙ্খারো, এতস্সত্থস্স সাধকো.

৬১১.

একস্মিং পন সন্তানে, ৰত্তমানং ফলং পন;

অঞ্ঞস্সাতিপি ৰা নেৰ, অঞ্ঞতো ৰা ন হোতি তং.

৬১২.

বীজানং অভিসঙ্খারা, এতস্সত্থস্স সাধকো;

বীজানং অভিসঙ্খারে, কতে তু মধুআদিনা.

৬১৩.

তস্স বীজস্স সন্তানে, পঠমং লদ্ধপচ্চযো;

মধুরো ফলসো তস্স, হোতি কালন্তরে পন.

৬১৪.

ন হি তানি হি বীজানি, অভিসঙ্খরণম্পি ৰা;

পাপুণন্তি ফলট্ঠানং, এৰং ঞেয্যমিদম্পি চ.

৬১৫.

বালকালে পযুত্তেন, ৰিজ্জাসিপ্পোসধাদিনা;

দীপেতব্বো অযং ৰুদ্ধ-কালস্মিং ফলদাযিনা.

৬১৬.

এৰং সন্তেপি তং কম্মং, ৰিজ্জমানম্পি ৰা পন;

ফলস্স পচ্চযো হোতি, অথ ৰাৰিজ্জমানকং.

৬১৭.

ৰিজ্জমানং সচে হোতি, তপ্পৰত্তিক্খণে পন;

ভৰিতব্বং ৰিপাকেন, সদ্ধিমেৰ চ হেতুনা.

৬১৮.

অথ ৰাৰিজ্জমানং তং, নিরুদ্ধং পচ্চযো ভৰে;

পৰত্তিক্খণতো পুব্বে, পচ্ছা নিচ্চফলং সিযা.

ৰুচ্চতে ¶ –

৬১৯.

কটত্তা পচ্চযো কম্মং, তস্মা নিচ্চফলং ন চ;

পাটিভোগাদিকং কম্মং, ৰেদিতব্বং নিদস্সনং.

৬২০.

কটত্তাযেৰ ¶ তং কম্মং, ফলস্স পন পচ্চযো;

ন চস্স ৰিজ্জমানত্তং, তস্স ৰাৰিজ্জমানতা.

৬২১.

অভিধম্মাৰতারোযং, পরমত্থপকাসনো;

সোতব্বো পন সোতূনং, পীতিবুদ্ধিৰিৰড্ঢনো.

ইতি অভিধম্মাৰতারে পুঞ্ঞৰিপাকপচ্চযনিদ্দেসো নাম

নৰমো পরিচ্ছেদো.

১০. দসমো পরিচ্ছেদো

রূপৰিভাগনিদ্দেসো

৬২২.

ৰুত্তমাদিম্হি ¶ যং রূপং, চিত্তজানমনন্তরং;

তস্স দানি করিস্সামি, সমাসেন ৰিভাৰনং.

৬২৩.

যং রুপ্পতীতি রূপন্তি, তথা রূপযতীতি ৰা;

রূপারূপভৰাতীতো, সুরূপো রূপমব্রৰি.

৬২৪.

তং রূপং দুৰিধং হোতি, ভূতোপাদাযভেদতো;

চতুব্বিধা মহাভূতা, উপাদা চতুৰীসতি.

৬২৫.

পথৰীধাতু আপো চ,

তেজো ৰাযো তথেৰ চ;

চত্তারোমে মহাভূতা,

মহাভূতেন দেসিতা.

৬২৬.

মহন্তা পাতুভূতাতি, মহাভূতসমাতি ৰা;

ৰঞ্চকত্তা অভূতেন, মহাভূতাতি সঞ্ঞিতা.

৬২৭.

চক্খু ¶ ¶ সোতঞ্চ ঘানঞ্চ, জিৰ্হা কাযো চ রূপতা;

সদ্দো গন্ধো রসো ইত্থি-পুরিসিন্দ্রিযজীৰিতং.

৬২৮.

ৰত্থুমাহারতা কায-ৰচীৰিঞ্ঞত্তিযো দুৰে;

আকাসো চেৰ রূপস্স, লহুতাদিত্তযম্পি চ.

৬২৯.

উপচযো সন্ততিরূপং, জরতানিচ্চতাপি চ;

উপাদাতি পৰুচ্চন্তি, ইমানি চতুৰীসতি.

৬৩০.

মহাভূতানি নিস্সায, অমুঞ্চিত্ৰা পৰত্তিতো;

উপাদারূপমিচ্চাহ, নিরুপাদানমানসো.

৬৩১.

পথৰী পত্থটত্তা চ, ৰাযো ৰাযনতো ভৰে;

তেজো তেজেতি রূপানি, আপো আপেতি পালনা.

৬৩২.

তেসং দানি পৰক্খামি, রূপানং লক্খণাদিকং;

লক্খণাদীসু ঞাতেসু, ধম্মা আৰি ভৰন্তি হি.

৬৩৩.

সামঞ্ঞং ৰা সভাৰো ৰা, ধম্মানং লক্খণং মতং;

কিচ্চং ৰা তস্স সম্পত্তি, রসোতি পরিদীপিতো.

৬৩৪.

ফলং ৰা পচ্চুপট্ঠানং, উপট্ঠাননযোপি ৰা;

আসন্নকারণং যং তু, তং পদট্ঠানসঞ্ঞিতং.

তত্থ ¶ কক্খল়ত্তলক্খণা পথৰীধাতু, পতিট্ঠানরসা, সম্পটিচ্ছনপচ্চুপট্ঠানা. পগ্ঘরণলক্খণা আপোধাতু, উপব্রূহনরসা, সঙ্গহপচ্চুপট্ঠানা. উণ্হত্তলক্খণা তেজোধাতু, পরিপাচনরসা, মদ্দৰানুপ্পদানপচ্চুপট্ঠানা. ৰিত্থম্ভনলক্খণা ৰাযোধাতু, সমুদীরণরসা, অভিনীহারপচ্চুপট্ঠানা. একেকায চেত্থ সেসভূতত্তযপদট্ঠানাতি ৰেদিতব্বা.

চক্খতীতি চক্খু, রূপং ৰিভাৰেতীতি অত্থো.

৬৩৫.

তত্থ ¶ ¶ চক্খু দ্ৰিধা ৰুত্তং, পঞ্ঞামংসপ্পভেদতো;

তত্থ পঞ্ঞামযং চক্খু, হোতি পঞ্চৰিধং পন.

৬৩৬.

বুদ্ধধম্মসমন্তেহি, ঞাণদিব্বেহি নামতো;

যথানুক্কমতো তেসং, নানত্তং মে নিবোধথ.

৬৩৭.

আসযানুসযে ঞাণং, ইন্দ্রিযানং পরোপরে;

বুদ্ধচক্খুন্তি নিদ্দিট্ঠং, মুনিনা লোকচক্খুনা.

৬৩৮.

হেট্ঠামগ্গত্তযে ঞাণং, ধম্মচক্খুন্তি সঞ্ঞিতং;

ঞেয্যং সমন্তচক্খুন্তি, ঞাণং সব্বঞ্ঞুতা পন.

৬৩৯.

যং ‘‘চক্খুং উদপাদী’’তি, আগতং ঞাণচক্খু তং;

অভিঞ্ঞাচিত্তজা পঞ্ঞা, দিব্বচক্খুন্তি ৰুচ্চতি.

৬৪০.

মংসচক্খুপি দুৰিধং, সসম্ভারপসাদতো;

সসম্ভারঞ্চ নামেত্থ, অক্খিকূপে পতিট্ঠিতং.

৬৪১.

অক্খিকূপট্ঠিনা হেট্ঠা, উদ্ধঞ্চ ভমুকট্ঠিনা;

উভতো অক্খিকূটেহি, মত্থলুঙ্গেন অন্ততো.

৬৪২.

বহিদ্ধা অক্খিলোমেহি, পরিচ্ছিন্নো চ যো পন;

ন্হারুসুত্তেন আবন্ধো, মংসপিণ্ডো পৰুচ্চতি.

৬৪৩.

সকলোপি চ লোকোযং, কমলস্স দলং ৰিয;

পুথুলং ৰিপুলং নীলং, ইতি জানাতি লোচনং.

৬৪৪.

চক্খু নাম ন তং হোতি, ৰত্থু তস্সাতি ৰুচ্চতি;

ইদং পন সসম্ভার-চক্খুন্তি পরিদীপিতং.

৬৪৫.

ৰণ্ণো গন্ধো রসো ওজা,

চতস্সো চাপি ধাতুযো;

ভাৰসম্ভৰসণ্ঠানং,

জীৰিতানি তথেৰ চ.

৬৪৬.

কাযচক্খুপসাদাতি ¶ ¶ ,

সম্ভারা হোন্তি চুদ্দস;

তথা ৰিত্থারতো চেতং,

চতস্সো চাপি ধাতুযো.

৬৪৭.

ৰণ্ণো গন্ধো রসো ওজা,

সণ্ঠানসম্ভৰো তথা;

দসেতে চতুসমুট্ঠানা,

চত্তালীস ভৰন্তি তে.

৬৪৮.

চক্খু ¶ কাযপ্পসাদো চ, ভাৰো জীৰিতমেৰ চ;

চত্তালীসঞ্চ রূপানি, চত্তারি তু ভৰন্তি হি.

৬৪৯.

ইমেসং পন রূপানং, ৰসেন পরিপিণ্ডিতং;

ইদং সম্ভারচক্খুন্তি, পণ্ডিতেহি পকাসিতং.

৬৫০.

যো পনেত্থ সিতো অত্থি, পরিবন্ধো পরিত্তকো;

চতুন্নং পন ভূতানং, পসাদো কম্মসম্ভৰো.

৬৫১.

ইদং পসাদচক্খুন্তি, অক্খাতং পঞ্চচক্খুনা;

তদেতং তস্স মজ্ঝে তু, সসম্ভারস্স চক্খুনো.

৬৫২.

সেতেন মণ্ডলেনস্স, পরিক্খিত্তস্স সব্বসো;

কণ্হমণ্ডলমজ্ঝে ৰা, নিৰিট্ঠে দিট্ঠমণ্ডলে.

৬৫৩.

সন্ধারণাদিকিচ্চাহি, ধাতূহি চ চতূহিপি;

কতূপকারং হুত্ৰান, উতুচিত্তাদিনা পন.

৬৫৪.

উপত্থম্ভিযমানং তং, আযুনা কতপালনং;

ৰণ্ণগন্ধরসাদীহি, রূপেহি পরিৰারিতং.

৬৫৫.

চক্খুৰিঞ্ঞাণকাদীনং, ৰত্থুদ্ৰারঞ্চ সাধযং;

ঊকাসিরসমানেন, পমাণেনেৰ তিট্ঠতি.

ৰুত্তং ¶ ¶ হেতং –

৬৫৬.

‘‘যেন চক্খুপসাদেন, রূপানিমনুপস্সতি;

পরিত্তং সুখুমং এতং, ঊকাসিরসমূপম’’ন্তি.

৬৫৭.

সোতাদীসু চ এসেৰ, নযো ঞেয্যো ৰিভাৰিনা;

ৰিসেসমত্তমেৰেত্থ, পৰক্খামি ইতো পরং.

সুণাতীতি সোতং, তং তনুতম্বলোমাচিতে অঙ্গুলিৰেধকসণ্ঠানে পদেসে ৰুত্তপ্পকারাহি ধাতূহি কতূপকারং উতুচিত্তাহারেহি উপত্থম্ভিযমানং আযুনা পরিপালিযমানং সোতৰিঞ্ঞাণাদীনং ৰত্থুদ্ৰারভাৰং সাধযমানং তিট্ঠতি.

ঘাযতীতি ঘানং, তং সসম্ভারঘানবিলস্স অন্তো অজপদসণ্ঠানে পদেসে যথাৰুত্তপ্পকারা হুত্ৰা তিট্ঠতি.

সাযতীতি জিৰ্হা, জীৰিতমৰ্হাযতীতি ৰা জিৰ্হা, সা সসম্ভারজিৰ্হামজ্ঝস্স উপরি উপ্পলদলগ্গসণ্ঠানে পদেসে যথাৰুত্তপ্পকারা হুত্ৰা তিট্ঠতি.

কুচ্ছিতানং মলানং আযোতি কাযো. যাৰতা পন ইমস্মিং কাযে উপাদিন্নকং রূপং অত্থি, সব্বত্থ কাযপসাদো কপ্পাসপটলে স্নেহো ৰিয যথাৰুত্তপ্পকারো হুত্ৰা তিট্ঠতি.

এত্থ পনেতেসং লক্খণাদীনি পৰক্খামি – দট্ঠুকামতানিদানকম্মসমুট্ঠানভূতপসাদলক্খণং ¶ চক্খু, রূপেসু আৰিঞ্ছনরসং, চক্খুৰিঞ্ঞাণস্স আধারভাৰপচ্চুপট্ঠানং, দট্ঠুকামতানিদানকম্মজভূতপদট্ঠানং.

সোতুকামতানিদানকম্মসমুট্ঠানভূতপসাদলক্খণং ¶ সোতং, সদ্দেসু আৰিঞ্ছনরসং, সোতৰিঞ্ঞাণস্স আধারভাৰপচ্চুপট্ঠানং, সোতুকামতানিদানকম্মজভূতপদট্ঠানং.

ঘাযিতুকামতানিদানকম্মসমুট্ঠানভূতপসাদলক্খণং ঘানং, গন্ধেসু আৰিঞ্ছনরসং, ঘানৰিঞ্ঞাণস্স আধারভাৰপচ্চুপট্ঠানং, ঘাযিতুকামতানিদানকম্মজভূতপদট্ঠানং.

সাযিতুকামতানিদানকম্মসমুট্ঠানভূতপসাদলক্খণাজিৰ্হা ¶ , রসেসু আৰিঞ্ছনরসা, জিৰ্হাৰিঞ্ঞাণস্স আধারভাৰপচ্চুপট্ঠানা, সাযিতুকামতানিদানকম্মজভূতপদট্ঠানা.

ফুসিতুকামতানিদানকম্মসমুট্ঠানভূতপসাদলক্খণো কাযো, ফোট্ঠব্বেসু আৰিঞ্ছনরসো, কাযৰিঞ্ঞাণস্স আধারভাৰপচ্চুপট্ঠানো, ফুসিতুকামতানিদানকম্মজভূতপদট্ঠানো.

কেচি পনাহু –

৬৫৮.

তেজাধিকানং ভূতানং, পসাদো পন চক্খুতি;

আকাসানিলতোযুব্বিঅধিকানং তু সেসকা.

৬৫৯.

তে পনেৰং তু ৰত্তব্বা, ‘‘সুত্তং আহরথা’’তি হি;

সুত্তমেৰ চ তে অদ্ধা, ন দক্খিস্সন্তি কিঞ্চিপি.

৬৬০.

ৰিসেসে সতি ভূতানং, পসাদো হি কথং ভৰে;

সমানানং হি ভূতানং, পসাদো পরিদীপিতো.

৬৬১.

তস্মা নিস্সযভূতানং, চতুন্নং সব্বসো পন;

পহাযেৰ পনেতেসং, ৰিসেসপরিকপ্পনং.

৬৬২.

ঞেয্যা কম্মৰিসেসেন, পসাদানং ৰিসেসতা;

ন হি ভূতৰিসেসেন, হোতি তেসং ৰিসেসতা.

৬৬৩.

এৰমেতেসু ¶ চক্খুঞ্চ, সোতং অপত্তগাহকং;

সেসং তু পন ঘানাদিত্তযং সম্পত্তগাহকং.

রূপন্তি রূপযতীতি রূপং, ৰণ্ণৰিকারমাপজ্জমানং হদযঙ্গতভাৰং পকাসেতীতি অত্থো. তং পন চক্খুপটিহননলক্খণং, চক্খুৰিঞ্ঞাণস্স ৰিসযভাৰরসং, তস্সেৰ গোচরভাৰপচ্চুপট্ঠানং, চতুমহাভূতপদট্ঠানং. যথা চেতং, তথা সব্বানিপি উপাদারূপানীতি ¶ .

সদ্দোতি ¶ সদ্দযতীতি সদ্দো, সো পন সোতপটিহননলক্খণো, সোতৰিঞ্ঞাণস্স ৰিসযভাৰরসো, তস্সেৰ গোচরভাৰপচ্চুপট্ঠানো.

রসোতি রসন্তি তেনাতি রসো, সো জিৰ্হাপটিহননলক্খণো, জিৰ্হাৰিঞ্ঞাণস্স ৰিসযভাৰরসো, তস্সেৰ গোচরভাৰপচ্চুপট্ঠানো.

গন্ধোতি অত্তানং গন্ধযতি সূচযতীতি গন্ধো, সো ঘানপটিহননলক্খণো, ঘানৰিঞ্ঞাণস্স ৰিসযভাৰরসো, তস্সেৰ গোচরভাৰপচ্চুপট্ঠানো.

ইত্থিন্দ্রিযন্তি –

৬৬৪.

কম্মজো ইত্থিভাৰোযং, পটিসন্ধিসমুট্ঠিতো;

যঞ্চেতং ইত্থিলিঙ্গাদি, ন তু তং ইন্দ্রিযং সিযা.

৬৬৫.

ইত্থিন্দ্রিযং পটিচ্চেৰ, ইত্থিলিঙ্গাদযো পন;

পৰত্তেযেৰ জাযন্তে, ন তানি পটিসন্ধিযং.

৬৬৬.

ন চ তং চক্খুৰিঞ্ঞেয্যং, মনোৰিঞ্ঞেয্যমেৰ তং;

ইত্থিলিঙ্গাদযো চক্খুৰিঞ্ঞেয্যা হোন্তি ৰা ন ৰা.

৬৬৭.

এসেৰ চ নযো ঞেয্যো, সেসেপি পুরিসিন্দ্রিযে;

ইদং পঠমকপ্পানং, উভযং তু পৰত্তিযং.

৬৬৮.

সমুট্ঠাতীতি ¶ ৰিঞ্ঞেয্যং, পরতো পটিসন্ধিযং;

পৰত্তেপি সমুট্ঠায, পৰত্তে পরিৰত্ততি.

৬৬৯.

মহতা পাপকম্মেন, পুরিসত্তং ৰিনস্সতি;

মহতা কুসলেনেৰ, জাযতে পুরিসিন্দ্রিযং.

৬৭০.

দুব্বলাকুসলেনেৰ, ইত্থিলিঙ্গং ৰিনস্সতি;

দুব্বলেনেৰ পুঞ্ঞেন, ইত্থিভাৰো হি জাযতে.

৬৭১.

উভতোব্যঞ্জনস্সাপি ¶ , একমেৰিন্দ্রিযং সিযা;

এৰং সন্তে অভাৰো চ, দুতিযব্যঞ্জনস্স তু.

৬৭২.

ন চাভাৰো সিযা কস্মা, ন তং ব্যঞ্জনকারণং;

তস্স কম্মসহাযং হি, রাগচিত্তং তু কারণং.

উভযস্স পনেতস্স লক্খণাদীনি ৰুচ্চতি. তত্থ ইত্থিভাৰলক্খণং ইত্থিন্দ্রিযং, ‘‘ইত্থী’’তি পকাসনরসং, ইত্থিলিঙ্গনিমিত্তকুত্তাকপ্পানং কারণভাৰপচ্চুপট্ঠানং.

পুরিসভাৰলক্খণং পুরিসিন্দ্রিযং, ‘‘পুরিসো’’তি পকাসনরসং, পুরিসলিঙ্গনিমিত্তকুত্তাকপ্পানং কারণভাৰপচ্চুপট্ঠানং.

জীৰিতন্তি –

৬৭৩.

জীৰিতিন্দ্রিযনিদ্দেসে, ৰত্তব্বং যং সিযা ইধ;

অরূপজীৰিতে ৰুত্ত-নযেনেৰ চ তং ৰদে.

লক্খণাদীনি ¶ পনস্স এৰং ৰেদিতব্বানি. সহজরূপপরিপালনলক্খণং জীৰিতিন্দ্রিযং, তেসং পৰত্তনরসং, তেসমেৰ ঠপনপচ্চুপট্ঠানং, যাপযিতব্বভূতপদট্ঠানন্তি.

ৰত্থূতি হদযৰত্থু.

৬৭৪.

যং নিস্সায মনোধাতু-মনোৰিঞ্ঞাণধাতুযো;

ৰত্তন্তি পঞ্চৰোকারে, তং ‘‘ৰত্থূ’’তি পৰুচ্চতি.

মনোধাতুমনোৰিঞ্ঞাণধাতূনং ¶ নিস্সযলক্খণং হদযৰত্থু, তাসঞ্চেৰ ধাতূনং আধারণরসং, উব্বাহনপচ্চুপট্ঠানং.

আহারতাতি কবল়ীকারো আহারো. ওজট্ঠমকং রূপং আহরতীতি আহারো.

৬৭৫.

যায ¶ ওজায যাপেন্তি, যত্থ যত্থ চ পাণিনো;

অযং তু ‘‘কবল়ীকারো, আহারো’’তি পৰুচ্চতি.

৬৭৬.

অন্নপানাদিকং ৰত্থু, অগ্গিং হরতি কম্মজং;

কেৰলং ন চ সক্কোতি, পালেতুং জীৰিতং পন.

৬৭৭.

ওজা সক্কোতি পালেতুং, হরিতুং ন চ পাচকং;

হরিতুম্পি চ পালেতুং, উভো সক্কোন্তি একতো.

লক্খণাদিতো পনস্স ওজালক্খণো কবল়ীকারো আহারো, রূপাহরণরসো, উপত্থম্ভনপচ্চুপট্ঠানো, কবল়ং কত্ৰা অজ্ঝোহরিতব্বৰত্থুপদট্ঠানোতি ৰেদিতব্বো.

কাযৰিঞ্ঞত্তিনিদ্দেসে কাযেন অত্তনো ভাৰং ৰিঞ্ঞাপেন্তানং কাযগ্গহণানুসারেন গহিতায এতায ভাৰো ৰিঞ্ঞাযতীতি ৰিঞ্ঞত্তি. সযং ৰা কাযগ্গহণানুসারেন ৰিঞ্ঞাযতীতিপি ৰিঞ্ঞত্তি. ‘‘কাযেন সংৰরো সাধু, সাধু ৰাচায সংৰরো’’তি আগতো চোপনসঙ্খাতো কাযোৰ ৰিঞ্ঞত্তি কাযৰিঞ্ঞত্তি. কাযৰিপ্ফন্দনেন অধিপ্পাযৰিঞ্ঞাপনহেতুত্তা সযঞ্চ তথা ৰিঞ্ঞেয্যত্তা কাযেন ৰিঞ্ঞত্তীতিপি কাযৰিঞ্ঞত্তি.

৬৭৮.

তত্থ যা সহজাতস্স, চিত্তজানিলধাতুযা;

রূপস্স চলনে হেতু, একাকারৰিকারতা.

৬৭৯.

কাযৰিঞ্ঞত্তি নামাযং, কাযদ্ৰারন্তি সা মতা;

তত্থ যা চেতনাসিদ্ধা, পুঞ্ঞাপুঞ্ঞৰসা পন.

৬৮০.

কাযকম্মন্তি ¶ নিদ্দিট্ঠা, সত্থুনা সা হিতেসিনা;

সম্পৰত্তি পনেতিস্সা, ৰচীদ্ৰারেপি জাযতে.

৬৮১.

লভিত্ৰা ¶ পনুপত্থম্ভং, একাৰজ্জনৰীথিযং;

হেট্ঠাহি ছহি চিত্তেহি, ৰাযোধাতুসমুট্ঠিতং.

৬৮২.

সত্তমেন তু চিত্তেন, ৰাযোধাতুসমুট্ঠিতা;

চালেতি সহজং রূপং, ৰিঞ্ঞত্তিসহিতাত্তনা.

ৰচীৰিঞ্ঞত্তিনিদ্দেসে ¶ পন –

৬৮৩.

পচ্চযো চিত্তজাতায, উপাদিন্নকঘট্টনে;

যো আকারৰিকারেকো, অযং পথৰিধাতুযা.

৬৮৪.

ৰচীৰিঞ্ঞত্তি ৰিঞ্ঞেয্যা, সহ সদ্দৰসা পন;

ৰচীদ্ৰারন্তি নিদ্দিট্ঠা, সাৰ সক্যকুলিন্দুনা.

৬৮৫.

সদ্দো ন চিত্তজো অত্থি, ৰিনা ৰিঞ্ঞত্তিঘট্টনং;

ধাতুসঙ্ঘট্টনেনেৰ, সহ সদ্দো হি জাযতি.

৬৮৬.

সা ৰিঞ্ঞাপনতো চেৰ, অযং ৰিঞ্ঞেয্যতোপি চ;

ৰিঞ্ঞত্তীতি সিযা তস্সা, সম্ভৰো কারকদ্ৰযে.

৬৮৭.

ন ৰিঞ্ঞত্তিদ্ৰযং অট্ঠ, রূপানি ৰিয চিত্তজং;

চিত্তজানং ৰিকারত্তা, চিত্তজন্তি পৰুচ্চতি.

তত্থ কাযৰিঞ্ঞত্তি অধিপ্পাযপকাসনরসা, কাযৰিপ্ফন্দনহেতুভাৰপচ্চুপট্ঠানা, চিত্তসমুট্ঠানৰাযোধাতুপদট্ঠানা. তথা ৰচীৰিঞ্ঞত্তি অধিপ্পাযপকাসনরসা, ৰচীঘোসস্স হেতুভাৰপচ্চুপট্ঠানা, চিত্তসমুট্ঠানপথৰীধাতুপদট্ঠানা.

৬৮৮.

ন কস্সতীতি আকাসো, রূপানং ৰিৰরো পন;

যো রূপানং পরিচ্ছেদো, স্ৰাকাসোতি পৰুচ্চতি.

সো ¶ রূপপরিচ্ছেদলক্খণো, রূপপরিযন্তপকাসনরসো, রূপমরিযাদপচ্চুপট্ঠানো, অসম্ফুট্ঠভাৰছিদ্দৰিৰরভাৰপচ্চুপট্ঠানো ৰা, পরিচ্ছিন্নরূপপদট্ঠানো.

রূপস্স লহুতাদিত্তযনিদ্দেসে –

৬৮৯.

হেট্ঠা ৰুত্তনযেনেৰ, রূপস্স লহুতাদিসু;

তিস্সো রূপৰিকারাতি, ৰিঞ্ঞাতব্বা ৰিভাৰিনা.

৬৯০.

এতাসং ¶ পন তিস্সন্নং, কমতো চ পৰত্তিযং;

অরোগী মদ্দিতং চম্মং, ধন্তহেমং নিদস্সনং.

৬৯১.

কম্মং কাতুং ন সক্কোতি, লহুতাদিত্তযং পন;

আহারাদিত্তযংযেৰ, তং করোতি ততো তিজং.

তত্থ ¶ অদন্ধতালক্খণা রূপস্স লহুতা, রূপানং গরুভাৰৰিনোদনরসা, লহুপরিৰত্তিতাপচ্চুপট্ঠানা, লহুরূপপদট্ঠানা.

অথদ্ধতালক্খণা রূপস্স মুদুতা, রূপানং থদ্ধভাৰৰিনোদনরসা, সব্বকিরিযাসু অৰিরোধিতাপচ্চুপট্ঠানা, মুদুরূপপদট্ঠানা.

সরীরকিরিযানুকূলকম্মঞ্ঞতালক্খণা রূপস্স কম্মঞ্ঞতা, অকম্মঞ্ঞতাৰিনোদনরসা, অদুব্বলভাৰপচ্চুপট্ঠানা, কম্মঞ্ঞতারূপপদট্ঠানা. এতা পন তিস্সোপি ন অঞ্ঞমঞ্ঞং ৰিজহন্তি.

উপচযসন্ততিনিদ্দেসে –

৬৯২.

রূপানমাচযো যো হি, ৰুত্তো উপচযোতি সো;

অনুপ্পবন্ধতা তেসং, সন্ততীতি পৰুচ্চতি.

৬৯৩.

অত্থতো ¶ উভযম্পেতং, জাতিরূপন্তি দীপিতং;

ৰুত্তমাকারনানত্তা, ৰেনেয্যানং ৰসেন ৰা.

লক্খণাদিতো পন আচযলক্খণো রূপস্স উপচযো, পুব্বন্ততো রূপানং উম্মুজ্জাপনরসো, নিয্যাতনপচ্চুপট্ঠানো, পরিপুণ্ণভাৰপচ্চুপট্ঠানো ৰা, উপচিতরূপপদট্ঠানো.

পৰত্তিলক্খণা রূপস্স সন্ততি, অনুপ্পবন্ধনরসা, অনুপচ্ছেদপচ্চুপট্ঠানা, অনুপ্পবন্ধরূপপদট্ঠানা.

জরানিদ্দেসে ¶ জীরণং জরা.

৬৯৪.

দুৰিধাযং জরা নাম, পাকটাপাকটাতি চ;

পাকটা রূপধম্মেসু, অরূপেসু অপাকটা.

রূপস্স পরিপাকতালক্খণা রূপস্স জরতা, উপনযনরসা, সভাৰানং অপগমেপি নসভাৰাপগমপচ্চুপট্ঠানা ৰীহিপুরাণভাৰো ৰিয, পরিপচ্চমানরূপপদট্ঠানা.

পরিভেদলক্খণা রূপস্স অনিচ্চতা, সংসীদনরসা, খযৰযপচ্চুপট্ঠানা, পরিভিজ্জমানরূপপদট্ঠানাতি ৰেদিতব্বাতি.

এৰং চতুৰীসতি উপাদারূপানি ৰেদিতব্বানি.

৬৯৫.

ভূতরূপানি চত্তারি, উপাদা চতুৰীসতি;

অট্ঠৰীসতি রূপানি, সব্বানেৰ ভৰন্তি হি.

৬৯৬.

ইমেসু পন রূপেসু, অসম্মোহত্থমেৰ তং;

সমোধানং সমুট্ঠানং, নিপ্ফন্নং সঙ্খতম্পি চ.

৬৯৭.

চোদনং ¶ পরিহারঞ্চ, নযমেকৰিধাদিকং;

সঙ্খেপেন পৰক্খামি, পকিণ্ণকমিদং সুণ.

তত্থ ¶ সমোধানন্তি সব্বমেৰ ইদং রূপং সব্বসমোধানতো পথৰীধাতু আপোধাতু তেজোধাতু ৰাযোধাতু চক্খাযতনং…পে… জরতা অনিচ্চতাতি অট্ঠৰীসতিৰিধং চ হোতি, ইতো অঞ্ঞং রূপং নাম নত্থি. কেচি পন মিদ্ধৰাদিনো ‘‘মিদ্ধরূপং নাম অত্থী’’তি ৰদন্তি, তে ‘‘অদ্ধা মুনীসি সম্বুদ্ধো, নত্থি নীৰরণা তৰা’’তি চ ‘‘থিনমিদ্ধনীৰরণং অৰিজ্জানীৰরণঞ্চ নীৰরণসম্পযুত্ত’’ন্তি সম্পযুত্তৰচনতো চ মহাপকরণপট্ঠানে ‘‘নীৰরণং ধম্মং পটিচ্চ নীৰরণো ধম্মো উপ্পজ্জতি নপুরেজাতপচ্চযা’’তি অরূপেপি ‘‘কামচ্ছন্দনীৰরণং পটিচ্চ থিনমিদ্ধউদ্ধচ্চকুক্কুচ্চাৰিজ্জানীৰরণ’’ন্তি এৰমাদীহি পাল়ীহি ৰিরুজ্ঝনতো চ অরূপমেৰ মিদ্ধন্তি পটিক্খিপিতব্বা.

৬৯৮.

অরূপেপি ¶ পনেতস্স, মিদ্ধস্সুপ্পত্তি পাঠতো;

নিট্ঠমেত্থাৰগন্তব্বা, অরূপন্তি চ ৰিঞ্ঞুনা.

অপরে ‘‘বলরূপেন সদ্ধিং একূনতিংস, সম্ভৰরূপেন সদ্ধিং তিংস, জাতিরূপেন সদ্ধিং একতিংস, রোগরূপেন সদ্ধিং দ্ৰত্তিংস রূপানী’’তি ৰদন্তি. তেপি তেসং ৰিসুং ৰিসুং অভাৰং দস্সেত্ৰা পটিক্খিপিতব্বা. ৰাযোধাতুযা গহিতায বলরূপং গহিতমেৰ, অঞ্ঞং বলরূপং নাম নত্থি. আপোধাতুযা সম্ভৰরূপং, উপচযসন্ততীতি জাতিরূপং, জরতাঅনিচ্চতাদীহি রোগরূপং গহিতং, অঞ্ঞং রোগরূপং নাম নত্থীতি, তস্মা অট্ঠৰীসতিৰিধানেৰ রূপানীতি.

এৰং সমোধানতো ৰেদিতব্বানীতি.

সমুট্ঠানন্তি চত্তারি রূপসমুট্ঠানানি উতুচিত্তাহারকম্মানীতি.

৬৯৯.

কম্মং ¶ উতু চ চিত্তঞ্চ, আহারো রূপহেতুযো;

এতেহেৰ চ রূপানি, জাযন্তি ন পনঞ্ঞতো.

৭০০.

তস্মা একসমুট্ঠানা, একাদস ভৰন্তি হি;

অট্ঠিন্দ্রিযানি ৰত্থুঞ্চ, ৰিঞ্ঞত্তিদ্ৰযমেৰ চ.

৭০১.

অট্ঠিন্দ্রিযানি ৰত্থুঞ্চ, একন্তেনেৰ কম্মজা;

চিত্তজংযেৰ ৰিঞ্ঞত্তি-দ্ৰযং ৰুত্তং মহেসিনা.

৭০২.

চিত্তেন উতুনা চেৰ, সদ্দো দ্ৰীহি সমুট্ঠিতো;

উতুআহারচিত্তেহি, লহুতাদিত্তযং কতং.

৭০৩.

ৰণ্ণো ¶ গন্ধো রসো ওজা,

চতস্সো চাপি ধাতুযো;

সন্তত্যুপচযাকাসা,

একাদস চতুব্ভৰা.

৭০৪.

একাদসেকতো ¶ জাতা,

দ্ৰিজেকোৰ তিজা তযো;

চতুজেকাদসক্খাতা,

দ্ৰে ন কেনচি জাযরে.

৭০৫.

কম্মেন ৰীসতি রূপা, সত্তরস তু চেতসা;

উতুনা দসপঞ্চেৰ, চুদ্দসাহারতো পন.

৭০৬.

ছসট্ঠি সব্বানেতানি, সমুট্ঠানৰিভাগতো;

অট্ঠসট্ঠি চ হোন্তেৰ, জরতানিচ্চতাহি তে.

৭০৭.

জরতানিচ্চতা চেৰ, ন কেনচি সমুট্ঠিতা;

জাতস্স পাকভেদত্তা, জাযেয্যুং যদি তানিপি.

৭০৮.

এৰং সন্তে তু তেসম্পি, পাকভেদা সিযুং ন হি;

পাকো পচ্চতি ভেদো ৰা, ন চ ভিজ্জতি নত্থি তং.

৭০৯.

জাতস্স ¶ পাকভেদত্তা, দ্ৰযমেতং ন জাযতি;

সিযা কত্থচি বুদ্ধেত্থ, ‘‘রূপস্সুপচযো’’তি হি.

৭১০.

ৰচনেন যথা ‘‘জাতি, জাযতী’’তি চ দীপিতং;

পাকোপি পচ্চতেৰং তু, ভেদোপি পরিভিজ্জতু.

৭১১.

ন চেৰ জাযতে জাতি, ইতি ঞেয্যা ৰিভাৰিনা;

জাযমানস্স ধম্মস্স, নিব্বত্তীতি পকাসিতা.

৭১২.

তত্থ যথা সিযা জাতি, যেসং ধম্মানমেৰ সা;

তপ্পচ্চযত্তৰোহারং, অভিনিব্বত্তিসম্মুতিং.

৭১৩.

লভতেৰ তথা তেসং, পাকভেদা লব্ভন্তি তে;

তপ্পচ্চযত্তৰোহারং, অভিনিব্বত্তিসম্মুতিং.

৭১৪.

এৰং ইদং দ্ৰযঞ্চাপি, হোতি কম্মাদিসম্ভৰং;

ন পাকভেদা ৰোহারং, তং লভন্তি কদাচিপি.

৭১৫.

কস্মা ¶ হি জনকানং তু, পচ্চযানমভাৰতো;

আনুভাৰখণুপ্পাদে, জাতিযা পন লব্ভতি.

৭১৬.

তপ্পচ্চযত্তৰোহারং, অভিনিব্বত্তিসম্মুতিং;

তস্মা লভতি জাতি চ, লভতী নেতরদ্ৰযং.

৭১৭.

জিয্যতীতি ন ৰত্তব্বং, তং দ্ৰযং ভিজ্জতীতি ৰা;

আনুভাৰখণে তস্স, পচ্চযানমভাৰতো.

৭১৮.

‘‘অনিচ্চং সঙ্খতঞ্চেতং, জরামরণ’’মিচ্চপি;

ৰুত্তত্তা জাযতিচ্চেতং, অথ মঞ্ঞসি চে তুৰং.

৭১৯.

এৰম্পি চ ন ৰত্তব্বং, সা হি পরিযাযদেসনা;

অনিচ্চানং তু ধম্মানং, জরামরণতো তথা.

৭২০.

অনিচ্চং ¶ সঙ্খতঞ্চাতি, ৰুত্তং ৰিঞ্ঞত্তিযো ৰিয;

যদি এৰং তযমেতং, অজাতত্তা চ সব্বথা.

৭২১.

নত্থীতি ¶ চে খংপুপ্ফংৰ, নিচ্চং ৰাসঙ্খতং ৰিয;

নোভযং পনিদং কস্মা, নিস্সযাযত্তৰুত্তিতো.

৭২২.

ভাৰে পথৰিযাদীনং, নিস্সযানং তু ভাৰতো;

তস্মা হি চ খংপুপ্ফংৰ, ন নত্থি পন তং তযং.

৭২৩.

যস্মা পথৰিযাদীনং, অভাৰেন চ লব্ভতি;

তস্মা ন পন নিচ্চং ৰা, নিব্বানং ৰিয তং তযং.

নিপ্ফন্নন্তি এত্থ চত্তারো মহাভূতা চক্খুসোতঘানজিৰ্হাকাযরূপসদ্দগন্ধরসইত্থিপুরিসজীৰিতিন্দ্রিযকবল়ীকারাহারহদযৰত্থূতি অট্ঠারস রূপানি নিপ্ফন্নানি নাম. সেসানি দস অনিপ্ফন্নানি নাম.

৭২৪.

অট্ঠারস নিপ্ফন্নানি, অনিপ্ফন্নাৰসেসকা;

যদি হোন্তি অনিপ্ফন্না, ভৰেয্যুং তে অসঙ্খতা.

৭২৫.

তেসমেৰ ¶ চ রূপানং, ৰিকারত্তা অসঙ্খতা;

কথং নাম ভৰেয্যুং তে, নিপ্ফন্না চেৰ সঙ্খতা.

এৰং নিপ্ফন্নসঙ্খতো ৰেদিতব্বো.

চোদনাপরিহারন্তি এত্থ –

৭২৬.

ইত্থিভাৰো পুমত্তঞ্চ, জীৰিতং সম্ভৰোপি চ;

তথা কাযপ্পসাদোতি, সব্বট্ঠানাতি ৰণ্ণিতা.

৭২৭.

এৰং সন্তে তু ধম্মানং, হোতি সঙ্করদোসতা;

চক্খুকাযপসাদানং, একত্তং উপপজ্জতি.

৭২৮.

অঞ্ঞং পন চ অঞ্ঞস্মিং, ন চত্থি পরমত্থতো;

তস্মা কাযিন্দ্রিযং চক্খু-পসাদেন ন সঙ্করং.

৭২৯.

অঞ্ঞমঞ্ঞাৰিনিব্ভোগৰসেন ¶ তু পৰত্তিতো;

তেসং ঠানন্তরং ৰত্তুং, ন সক্কা সমযঞ্ঞুনা.

৭৩০.

যাৰতা অনুপাদিন্নসন্তানং অত্থি তত্থ সো;

অত্থি কাযপসাদোতি, তস্মা এৰমুদীরিতং.

৭৩১.

লক্খণাদিৰসেনাপি, নানত্তং সমুপাগতং;

ধজানং পঞ্চৰণ্ণানং, ছাযা উপমতং গতা.

৭৩২.

তস্মা ¶ হি পন ধম্মানং, অঞ্ঞমঞ্ঞং ৰিমিস্সতা;

ন হোতেৰাতি ৰিঞ্ঞেয্যা, ৰিঞ্ঞুনা সমযঞ্ঞুনা.

এৰং নিপ্ফন্নানিপ্ফন্নভাৰো, চোদনাপরিহারো চ ৰেদিতব্বো.

নযমেকৰিধাদিকন্তি –

৭৩৩.

লোকিকত্তা ¶ নহেতুত্তা, সঙ্খতত্তা চ সাসৰা;

সব্বমেকৰিধং রূপং, পচ্চযাযত্তৰুত্তিতো.

৭৩৪.

অজ্ঝত্তিকবহিদ্ধা চ, ইন্দ্রিযানিন্দ্রিযাপি চ;

সুখুমোল়ারিকা চেৰ, উপাদিন্নাদিতো দ্ৰিধা.

৭৩৫.

চক্খুআযতনাদীনি, পঞ্চ অজ্ঝত্তিকানি তু;

তেৰীসতিৰিধং সেসং, বাহিরন্তি পৰুচ্চতি.

৭৩৬.

চক্খুসোতিন্দ্রিযাদীনি, ইন্দ্রিযানি পনট্ঠ তু;

সেসঞ্চ তু ৰীসং রূপং, অনিন্দ্রিযমুদীরিতং.

৭৩৭.

চক্খুআযতনাদীনি, নৰ ফোট্ঠব্বমেৰ চ;

তং বারসৰিধং রূপং, ওল়ারিকমুদীরিতং.

৭৩৮.

সেসানি পন রূপানি, সুখুমানি তু সোল়স;

কম্মজং তু উপাদিন্নং, অনুপাদিন্নমঞ্ঞথা.

এৰঞ্চ দুৰিধং হোতি.

পুন ¶ সনিদস্সনসপ্পটিঘঅনিদস্সনসপ্পটিঘ- অনিদস্সনঅপ্পটিঘভেদতো চ, কম্মজাকম্মজনেৰকম্মজানাকম্মজভেদতো চ তিৰিধং. তত্থ রূপাযতনং সনিদস্সনসপ্পটিঘং, একাদসৰিধং সেসোল়ারিকরূপং অনিদস্সনসপ্পটিঘং, সেসং সোল়সৰিধং সুখুমরূপং অনিদস্সনঅপ্পটিঘং. কম্মতো জাতং কম্মজং, অট্ঠিন্দ্রিযানি, ৰত্থু চ কম্মজং, তদঞ্ঞপ্পচ্চযা জাতং অকম্মজং, নকুতোচি জাতং নেৰকম্মজানাকম্মজং জরতা অনিচ্চতা চ. এৰং তিৰিধং হোতি.

পুন দিট্ঠসুতমুতৰিঞ্ঞাতৰসেন চ, দ্ৰারঞ্চেৰ ৰত্থু চ, দ্ৰারমেৰ হুত্ৰা ন ৰত্থু চ, ৰত্থুমেৰ হুত্ৰা ন দ্ৰারঞ্চ, নেৰ দ্ৰারঞ্চ ন ৰত্থু চাতি এৰং ভেদতো চ, দ্ৰারঞ্চেৰিন্দ্রিযঞ্চ, দ্ৰারংযেৰ হুত্ৰা নেৰিন্দ্রিযঞ্চ, ইন্দ্রিযমেৰ হুত্ৰা ন দ্ৰারঞ্চ, নেৰ দ্ৰারঞ্চ নেৰিন্দ্রিযঞ্চাতি এৰং ¶ ভেদতো চ, ৰত্থু চেৰ ইন্দ্রিযঞ্চ, ইন্দ্রিযমেৰ হুত্ৰা ন ৰত্থু চ, ৰত্থুমেৰ হুত্ৰা নেৰিন্দ্রিযঞ্চ, নেৰিন্দ্রিযং ন ৰত্থু চেতি এৰং ভেদতো চ চতুব্বিধং.

তত্থ ¶ দিট্ঠং নাম রূপাযতনং, সুতং নাম সদ্দাযতনং, মুতং নাম গন্ধরসফোট্ঠব্বাযতনত্তযং, ৰিঞ্ঞাতং নাম অৰসেসচক্খাযতনাদিপঞ্চকং, সোল়সৰিধং সুখুমরূপঞ্চ. চক্খাযতনাদিপঞ্চকং দ্ৰারঞ্চেৰ ৰত্থু চ, ৰিঞ্ঞত্তিদ্ৰযং দ্ৰারমেৰ হোতি, ন ৰত্থু, হদযৰত্থু ৰত্থুমেৰ হোতি, ন দ্ৰারং, সেসং সব্বং রূপং নেৰ দ্ৰারং ন ৰত্থু চ. ততিযচতুক্কে ইন্দ্রিযমেৰ হুত্ৰা ন দ্ৰারন্তি ইত্থিন্দ্রিযপুরিসিন্দ্রিযজীৰিতিন্দ্রিযানি. ইমানি হি ইন্দ্রিযানেৰ হোন্তি, ন দ্ৰারানি, সেসমনন্তরচতুক্কে ৰুত্তনযেনেৰ ৰেদিতব্বং. চতুত্থচতুক্কে ততিযপদং হদযৰত্থুং সন্ধায ৰুত্তং, সেসং ৰুত্তনযমেৰ. এৰং চতুব্বিধং হোতীতি ৰেদিতব্বং.

পুন একজদ্ৰিজতিজচতুজনকুতোচিজাতভেদতো, দ্ৰারিন্দ্রিযং ৰত্থু চ, দ্ৰারমেৰ হুত্ৰা নেৰিন্দ্রিযং ন ৰত্থু চ, ৰত্থুমেৰ হুত্ৰা নেৰিন্দ্রিযং ন দ্ৰারঞ্চ, ইন্দ্রিযমেৰ হুত্ৰা ন ৰত্থু ন দ্ৰারঞ্চ, নেৰিন্দ্রিযং ¶ ন ৰত্থু ন দ্ৰারঞ্চাতি এৰং পভেদতো পঞ্চৰিধং.

তত্থ –

৭৩৯.

অট্ঠিন্দ্রিযানি ৰত্থুঞ্চ, ৰিঞ্ঞত্তিদ্ৰযমেৰ চ;

একাদসৰিধং রূপং, একজন্তি পৰুচ্চতি.

৭৪০.

সদ্দো একো দ্ৰিজো নাম, লহুতাদিত্তযং তিজং;

একাদসৰিধং সেসং, চতুজন্তি পকাসিতং.

৭৪১.

জরতানিচ্চতা চেৰ, নকুতোচি ভৰে পন;

চক্খাদিপঞ্চকং দ্ৰারং, ইন্দ্রিযং ৰত্থুমেৰ চ.

৭৪২.

ৰিঞ্ঞত্তীনং দ্ৰযং দ্ৰারং, নেৰিন্দ্রিযং ন ৰত্থু চ;

হদযৰত্থু ৰত্থূৰ, ন দ্ৰারং নেৰিন্দ্রিযং পন.

ইত্থিপুরিসজীৰিতিন্দ্রিযানি ¶ ইন্দ্রিযমেৰ ন ৰত্থু ন দ্ৰারঞ্চ, সেসং পন রূপং নেৰিন্দ্রিযং ন ৰত্থু ন দ্ৰারন্তি. এৰং পঞ্চৰিধন্তি ৰেদিতব্বং.

পুন কম্মজচিত্তজউতুচিত্তজউতুচিত্তাহারজচতুজনকুতোচিজাতভেদতো, চক্খুৰিঞ্ঞেয্যসোতঘানজিৰ্হাকাযমনোৰিঞ্ঞেয্যৰসেন ছব্বিধং.

তত্থ অট্ঠিন্দ্রিযানি ৰত্থু চ কম্মজমেৰ, ৰিঞ্ঞত্তিদ্ৰযং চিত্তজমেৰ, সদ্দো উতুচিত্তজো, লহুতাদিত্তযং উতুচিত্তাহারজমেৰ, সেসং একাদসৰিধং চতুজং নাম, জরতা অনিচ্চতা নকুতোচিজাতং নাম. দুতিযছক্কে চক্খুৰিঞ্ঞেয্যং ¶ নাম চক্খুৰিঞ্ঞাণেন ৰিঞ্ঞেয্যং রূপাযতনং…পে… কাযৰিঞ্ঞেয্যং নাম ফোট্ঠব্বাযতনং, মনোৰিঞ্ঞেয্যং নাম সেসা পঞ্চ ওল়ারিকা চ সোল়স সুখুমরূপানি চাতি একৰীসতিৰিধং হোতি. এৰং ছব্বিধং হোতি.

পুন ছৰত্থুঅৰত্থুভেদতো চ, চক্খুৰিঞ্ঞেয্যং সোতঘানজিৰ্হাকাযৰিঞ্ঞেয্যং মনোধাতুৰিঞ্ঞেয্যং মনোৰিঞ্ঞাণধাতুৰিঞ্ঞেয্যন্তি সত্তৰিধং হোতি.

তত্থ ¶ চক্খাদিপঞ্চৰত্থূনি হদযৰত্থুনা সদ্ধিং ছ ৰত্থূনি, সেসং বাৰীসতিৰিধং রূপং অৰত্থু নাম, দুতিযসত্তকমুত্তানমেৰ. এৰং সত্তৰিধং হোতি.

পুন সত্তদ্ৰারাদ্ৰারভেদতো অট্ঠৰিধং. তত্থ চক্খুদ্ৰারাদীনি পঞ্চ কাযৰিঞ্ঞত্তিৰচীৰিঞ্ঞত্তিদ্ৰারেহি সদ্ধিং সত্ত দ্ৰারানি, সেসমদ্ৰারন্তি এৰং অট্ঠৰিধং হোতি.

পুন অট্ঠিন্দ্রিযানিন্দ্রিযভেদতো পন নৰৰিধং.

পুন নৰকম্মজাকম্মজভেদতো দসৰিধং.

পুন আযতনভেদতো একাদসৰিধং.

ভৰেসু রূপকলাপপৰত্তিভেদতো বহুৰিধন্তি ৰেদিতব্বং.

৭৪৩.

ইতো পরং পৰক্খামি, কামরূপভৰদ্ৰযে;

উপ্পত্তিং পন রূপানং, পটিসন্ধিপৰত্তিসু.

৭৪৪.

ভুম্মৰজ্জেসু ¶ দেৰেসু, নিরযে নিজ্ঝামতণ্হিকে;

যোনিযো পুরিমা তিস্সো, ন সন্তীতি ৰিনিদ্দিসে.

৭৪৫.

সেসে গতিত্তযে ভুম্ম-দেৰেসুপি চ যোনিযো;

চতস্সো চ ভৰন্তীতি, ৰেদিতব্বা ৰিভাৰিনা.

৭৪৬.

গব্ভসেয্যকসত্তস্স, পটিসন্ধিক্খণে পন;

তিংস রূপানি জাযন্তে, সভাৰস্সেৰ দেহিনো.

৭৪৭.

অভাৰগব্ভসেয্যানং, অণ্ডজানঞ্চ ৰীসতি;

ভৰন্তি পন রূপানি, কাযৰত্থুৰসেন তু.

৭৪৮.

গহিতাগহণেনেত্থ, একাদস ভৰন্তি তে;

এসেৰ চ নযো ঞেয্যো, সব্বেসু দসকেসুপি.

৭৪৯.

জীৰিতেন যদা সদ্ধিং, জাতে সুদ্ধকমট্ঠকং;

জীৰিতনৰকং নাম, হোতীতি সমুদীরিতং.

৭৫০.

জীৰিতনৰকং ¶ কাযপসাদেনেকতো সিযা;

তং কাযদসকং নাম, হোতীতি পরিযাপুটং.

৭৫১.

এসেৰ চ নযো ঞেয্যো, সদ্ধিং ভাৰেন ৰত্থুনা;

চক্খাদীহি চ যোজেত্ৰা, দসকা সত্ত ৰিঞ্ঞুনা.

৭৫২.

ওপপাতিকসত্তানং, মনুস্সেসূপপত্তিযং;

কামাৰচরদেৰানং, নিচ্চং রূপানি সত্ততি.

৭৫৩.

চক্খু ¶ সোতঞ্চ ঘানঞ্চ, জিৰ্হা কাযো চ ৰত্থু চ;

ভাৰো চাতি হি সত্তন্নং, দসকানং ৰসা পন.

৭৫৪.

ব্রহ্মানং রূপিনং চক্খু-সোতৰত্থুৰসা পন;

দসকানি চ তীণেৰ, নৰকং জীৰিতস্স চ.

৭৫৫.

চতুন্নং তু কলাপানং, ৰসেন পন রূপিনং;

চত্তালীসেৰ রূপানি, একূনানি ভৰন্তি হি.

৭৫৬.

জীৰিতনৰকেনেৰ ¶ , অসঞ্ঞুপ্পত্তি দীপিতা;

জচ্চন্ধবধিরাঘান-রহিতে তু নপুংসকে.

৭৫৭.

ৰত্থুনো কাযজিৰ্হানং, ৰসা তিংসাৰকংসতো;

উক্কংসস্সাৰকংসস্স, অন্তরে অনুরূপতো.

৭৫৮.

পরিপুণ্ণানং রূপানং, ৰসেন পন পাণিনং;

রূপানং তু সমুপ্পত্তি, ৰেদিতব্বা ৰিভাৰিনা.

৭৫৯.

সত্তৰীসতি রূপানি, কামাৰচরদেহিনো;

অপ্পৰত্তনতো হোন্তি, দ্ৰিন্নং ভাৰানমেকতো.

৭৬০.

ঘানং জিৰ্হা চ কাযো চ, তথা ভাৰদ্ৰযম্পি চ;

ব্রহ্মানং পন রূপীনং, পঞ্চ রূপা ন ৰিজ্জরে.

৭৬১.

চতুসন্ততি কামস্মিং, রূপে হোন্তি তিসন্ততি;

দ্ৰিসন্ততি অসঞ্ঞেসু, বহিদ্ধা একসন্ততি.

৭৬২.

রূপং ¶ নিব্বত্তমানং তু, সব্বেসং পন পাণিনং;

পঠমং কম্মতোযেৰ, নিব্বত্ততি ন সংসযো.

৭৬৩.

গব্ভসেয্যকসত্তানং, পটিসন্ধিক্খণে পন;

তঞ্চ খো সন্ধিচিত্তস্স, উপ্পাদেযেৰ জাযরে.

৭৬৪.

যথেৰ তস্স উপ্পাদে, তিংস রূপানি জাযরে;

তথেৰ ঠিতিভঙ্গেসু, তিংস তিংসেৰ জাযরে.

৭৬৫.

সব্বানেতানি রূপানি, রূপক্খন্ধোতি সঞ্ঞিতো;

অনিচ্চো অদ্ধুৰোনত্তা, দুক্খক্খন্ধোৰ কেৰলো.

৭৬৬.

রোগতো গণ্ডতো রূপং, পরতো চ পলোকতো;

দিস্ৰান দুক্খতো রূপং, রূপে ছন্দং ৰিরাজযে.

৭৬৭.

গন্তুং পনিচ্ছে পিটকেভিধম্মে,

যো ধম্মসেনাপতিনা সমত্তং;

হিতত্থিনা ¶ তেন চ ভিক্খুনাযং,

সক্কচ্চ সম্মা পন সিক্খিতব্বো.

ইতি অভিধম্মাৰতারে রূপৰিভাগো নাম

দসমো পরিচ্ছেদো.

১১. একাদসমো পরিচ্ছেদো

নিব্বাননিদ্দেসো

৭৬৮.

রূপানন্তরমুদ্দিট্ঠং ¶ , নিব্বানং যং পনাদিতো;

তস্সিদানি অনুপ্পত্তো, ৰিভাৰননযক্কমো.

৭৬৯.

তস্মাহং তস্স দস্সেতুং, দুক্করস্স যথাবলং;

দুব্বোধস্স পৰক্খামি, ৰিভাৰনমিতো পরং.

তত্থ ¶ নিব্বানন্তি ভৰাভৰং ৰিননতো ৰানং ৰুচ্চতি তণ্হা, ৰানতো নিক্খন্তত্তা নিব্বানন্তি চ পৰুচ্চতি অমতং অসঙ্খতং পরমং সুখং. ৰুত্তং হেতং ‘‘যো সো সব্বসঙ্খারসমথো সব্বূপধিপটিনিস্সগ্গো তণ্হাক্খযো ৰিরাগো নিরোধো নিব্বান’’ন্তি.

৭৭০.

যস্স চাধিগমা সব্ব-কিলেসানং খযো ভৰে;

নিব্বানমিতি নিদ্দিট্ঠং, নিব্বানকুসলেন তং.

এতং চ নিব্বানং নাম তযিদং সন্তিলক্খণং, অচ্চুতিরসং, অস্সাসকরণরসং ৰা, অনিমিত্তপচ্চুপট্ঠানং, নিস্সরণপচ্চুপট্ঠানং ৰাতি ৰেদিতব্বং.

এত্থাহ – ন পরমত্থতো নিব্বানং নাম একো সভাৰো অত্থি, তিত্থিযানং অত্তা ৰিয, সসৰিসাণং ¶ ৰিয চ অনুপলব্ভনীযতোতি? ন, পঞ্ঞাচক্খুনা উপপরিক্খিযমানানং হিতগৰেসীনং যথানুরূপায পটিপত্তিযা উপলব্ভনীযতো. যং হি পুথুজ্জনা নোপলব্ভন্তি, তং ‘‘নত্থী’’তি ন ৰত্তব্বং. অথাযস্মতা সারিপুত্তত্থেরেন ধম্মসেনাপতিনা ‘‘কতমং নু খো, আৰুসো, নিব্বান’’ন্তি নিব্বানং পুট্ঠেন ‘‘যো খো, আৰুসো, রাগক্খযো দোসক্খযো মোহক্খযো’’তি রাগাদীনং খযোৰ দস্সিতো, তস্মা রাগাদীনং ¶ খযমত্তমেৰ নিব্বানন্তি চে? তং ন. কস্মা? অরহত্তস্সাপি রাগাদীনং খযমত্তপসঙ্গদোসাপত্তিতো. কথং? নিব্বানং পুচ্ছানন্তরমেৰ ‘‘কতমং নু খো, আৰুসো, অরহত্ত’’ন্তি পুট্ঠেন ‘‘যো খো, আৰুসো, রাগক্খযো দোসক্খযো মোহক্খযো’’তি রাগাদীনং খযোৰ ৰুত্তো, তস্মা তৰ মতেন অরহত্তফলস্সাপি রাগাদীনং খযমত্ততা ভৰেয্য, ন চেতং যুত্তং অনুত্তরস্স লোকুত্তরফলচিত্তস্স রাগানং খযমত্ততাপজ্জনং, তস্মা মা ¶ এৰং ব্যঞ্জনচ্ছাযায ৰদেসি, উভিন্নং পন সুত্তানং অত্থো উপপরিক্খিতব্বো.

যস্স পন ধম্মস্সাধিগমেন রাগাদীনং খযো হোতি, সো ধম্মো রাগাদীনং খযস্স উপনিস্সযত্তা অক্খযোপি সমানো ‘‘রাগাদীনং খযো নিব্বান’’ন্তি খযোপচারেন ৰুত্তো, ‘‘তিপুসং জরো গুল়ো সেম্হো’’তিআদীসু ৰিয ফলূপচারেন ৰুত্তন্তি ৰেদিতব্বং. অরহত্তং পন খযন্তে উপ্পন্নত্তা ‘‘খযো’’তি ৰুত্তং. যদি রাগাদীনং খযমত্তং নিব্বানং ভৰেয্য, সব্বে বালপুথুজ্জনাপি সমধিগতনিব্বানা সচ্ছিকতনিরোধা ভৰেয্যুং. কিঞ্চ ভিয্যো – নিব্বানস্স বহুত্তাদিদোসাপত্তিতো চ. এৰঞ্হি সতি রাগাদিক্খযানং বহুভাৰতো নিব্বানস্সাপি বহুভাৰো ভৰেয্য, সঙ্খতলক্খণঞ্চ নিব্বানং ভৰেয্য, সঙ্খতলক্খণত্তা সঙ্খতপরিযাপন্নঞ্চ, সঙ্খতপরিযাপন্নত্তা অনিচ্চং দুক্খং নিব্বানং ভৰেয্যাতি.

কিঞ্চ ভিয্যো – যদি খযো নিব্বানং ভৰেয্য, গোত্রভুৰোদানমগ্গফলচিত্তানং কিং নু আরম্মণং ৰদেসি, ৰদ ভদ্রমুখাতি? রাগাদীনং খযমেৰ ৰদামীতি. কিং পন রাগাদযো গোত্রভুআদীনং খণে খীযন্তি, উদাহু খীযিস্সন্তি, অথ খীণাতি? কিং পনেত্থ ‘‘খীণেস্ৰেৰ খযং ৰদামী’’তি. সুট্ঠু উপধারেত্ৰা ৰদ ভদ্রমুখাতি, যদি খীণেস্ৰেৰ খযং ৰদেসি, ন গোত্রভুচিত্তাদীনং নিব্বানারম্মণতা সিজ্ঝতীতি. কিং কারণং? গোত্রভুক্খণে রাগাদযো খীযিস্সন্তি, তথা ৰোদানক্খণে, মগ্গক্খণে পন খীযন্তি, ন খীণা, ফলক্খণে খীণা. এৰং সন্তে ভৰতো মতেন ফলমেৰ খযারম্মণং, ন ইতরে, ইতরেসং পন কিমারম্মণং ৰদেসীতি ¶ ? অদ্ধা সো আরম্মণং অপস্সন্তো নিরুত্তরো ¶ ভৰিস্সতি. অপিচ কিলেসক্খযো নাম সপ্পুরিসেহি করীযতি, যথানুরূপায পটিপত্তিযা উপ্পাদীযতীতি অত্থো. নিব্বানং পন ন কেনচি করীযতি ন উপ্পাদীযতি, তস্মা নিব্বানমমতমসঙ্খতং. তমকতং ¶ জানাতীতি অরিযসাৰকো ‘‘অকতঞ্ঞূ’’তি পৰুচ্চতি. ৰুত্তঞ্চেতং –

৭৭১.

‘‘অসদ্ধো অকতঞ্ঞূ চ,

সন্ধিচ্ছেদো চ যো নরো;

হতাৰকাসো ৰন্তাসো,

স ৰে উত্তমপোরিসো’’তি.

অপিচ ‘‘নিস্সরণ’’ন্তি ভগৰতা ৰুত্তত্তা চ. ‘‘নিস্সরণ’’ন্তি হি নিব্বানস্সেতং নামং. যথাহ ‘‘তযো খোমে, ভিক্খৰে, ধম্মা দুপ্পটিৰিজ্ঝা. কতমে তযো ধম্মা দুপ্পটিৰিজ্ঝা? তিস্সো নিস্সরণধাতুযো. কামানমেতং নিস্সরণং, যদিদং নেক্খম্মং. রূপানমেতং নিস্সরণং, যদিদং অরূপং. যং খো পন কিঞ্চি ভূতং সঙ্খতং পটিচ্চসমুপ্পন্নং, নিরোধো তস্স নিস্সরণ’’ন্তি হি ৰুত্তং. এৰং ৰুত্তস্স তস্স নিব্বানস্স অভাৰপত্তিদোসতো পঠমজ্ঝানাকাসানঞ্চাযতনানম্পি অভাৰো ভৰেয্য, তস্মা অযুত্তং অক্খযস্স নিব্বানস্স খযদোসাপজ্জনন্তি, ন তু খযো নিব্বানং.

‘‘অত্থি নিস্সরণং লোকে, পঞ্ঞায মে সুফুসিত’’ন্তি চ ‘‘অত্থি, ভিক্খৰে, অজাতং অভূতং অকতং অসঙ্খত’’ন্তি চ ধম্মসামিনা তথাগতেন সম্মাসম্বুদ্ধেন অনেকেসু সুত্তন্তেসু পরমত্থৰসেন ৰুত্তত্তা ‘‘অত্থি নিব্বানং নাম একো ধম্মো’’তি নিট্ঠমেত্থ গন্তব্বং. অপিচ পরিত্তত্তিকে ‘‘কতমে ধম্মা অপ্পমাণা’’তি পদমুদ্ধরিত্ৰা – ‘‘চত্তারো মগ্গা অপরিযাপন্না চত্তারি চ সামঞ্ঞফলানি নিব্বানঞ্চ, ইমে ধম্মা অপ্পমাণা’’তি ৰুত্তত্তা রাগাদীনং খযস্স অপ্পমাণত্তং কথং যুজ্জতি, তস্মা পরমত্থতো অত্থিযেৰ নিব্বানং নাম একো সভাৰোতি. তং ¶ পন পকতিৰাদীনং পকতি ৰিয, তিত্থিযানং অত্তা ৰিয চ সসৰিসাণং ৰিয চ নাৰিজ্জমানং.

অথ পঞ্ঞত্তিমত্তং নিব্বানন্তি চে, তম্পি অযুত্তং. কস্মা? নিব্বানারম্মণানং চিত্তচেতসিকানং নৰত্তব্বারম্মণত্তা. কথং? পরিত্তারম্মণত্তিকে চ পন ‘‘কতমে ধম্মা অপ্পমাণারম্মণা’’তি ¶ পদমুদ্ধরিত্ৰা ‘‘চত্তারো মগ্গা অপরিযাপন্না চত্তারি চ সামঞ্ঞফলানি ¶ , ইমে ধম্মা অপ্পমাণারম্মণা’’তি হি ৰুত্তং. যদি পনেতেসং পঞ্ঞত্তিআরম্মণং সিযা, অপ্পমাণারম্মণতা ন যুজ্জেয্য, নৰত্তব্বারম্মণপক্খং ভজেয্যুং. ‘‘নৰত্তব্বারম্মণা পন রূপাৰচরত্তিকচতুক্কজ্ঝানা কুসলতো চ ৰিপাকতো চ কিরিযতো চ, চতুত্থস্স ঝানস্স ৰিপাকো, আকাসানঞ্চাযতনং আকিঞ্চঞ্ঞাযতনং কুসলতো চ ৰিপাকতো চ কিরিযতো চ, ইমে ধম্মা নৰত্তব্বারম্মণা’’তি হি ৰুত্তং, তস্মা ন পঞ্ঞত্তিমত্তং নিব্বানং. যস্মা চ পণ্ণত্তিভাৰো নিব্বানস্স ন যুজ্জতি, তস্মা মগ্গফলানং আরম্মণপচ্চযভূতং উপ্পাদাদীনমভাৰতো নিচ্চং, রূপসভাৰাভাৰতো অরূপং, পপঞ্চাভাৰতো নিপ্পপঞ্চং নিব্বানং নাম অত্থীতি উপগন্তব্বন্তি.

৭৭২.

অচ্চন্তমনন্তং সন্তং, অমতং অপলোকিতং;

পণীতং সরণং খেমং, তাণং লেণং পরাযণং.

৭৭৩.

সিৰঞ্চ নিপুণং সচ্চং, দুক্খক্খযমনাসৰং;

সুদুদ্দসং পরং পারং, নিব্বানমনিদস্সনং.

৭৭৪.

তণ্হাক্খযং ধুৰং দীপং, অব্যাপজ্ঝমনীতিকং;

অনালযমরূপঞ্চ, পদমচ্চুতমক্খরং.

৭৭৫.

ৰিরাগঞ্চ নিরোধঞ্চ, ৰিমুত্তি মোক্খমেৰ চ;

ইমেহি পন নামেহি, নিব্বানং তু কথীযতি.

৭৭৬.

এৰঞ্চ ¶ পন ৰিঞ্ঞায, নিব্বানম্পি চ অচ্চুতং;

তস্স চাধিগমূপাযো, কত্তব্বো ৰিঞ্ঞুনা সদা.

৭৭৭.

সদ্ধাবুদ্ধিকরং তথাগতমতে সম্মোহৰিদ্ধংসনং,

পঞ্ঞাসম্ভৰসম্পসাদনকরং জানাতি যো চে ইমং;

অত্থব্যঞ্জনসালিনং সুমধুরং সারঞ্ঞুৰিম্হাপনং,

গম্ভীরে নিপুণাভিধম্মপিটকে সো যাভিনিট্ঠং পদং.

ইতি অভিধম্মাৰতারে নিব্বাননিদ্দেসো নাম

একাদসমো পরিচ্ছেদো.

১২. দ্ৰাদসমো পরিচ্ছেদো

পঞ্ঞত্তিনিদ্দেসো

এত্থাহ ¶ ¶ – ‘‘কিং এত্তকমেৰ ঞেয্যং, উদাহু অঞ্ঞম্পি অত্থী’’তি? অত্থি পঞ্ঞত্তি নামাতি. সা পনেসা পঞ্ঞপেতব্বতো, পঞ্ঞাপনতো চ ‘‘পঞ্ঞত্তী’’তি ৰুচ্চতি. তেনেৰাহ – ‘‘যা তেসং তেসং ধম্মানং সঙ্খা সমঞ্ঞা পঞ্ঞত্তি ৰোহারো নামং নামকম্মং নামধেয্যং নিরুত্তি ব্যঞ্জনং অভিলাপো’’তি. তত্থ সঙ্খাযতীতি সঙ্খা, কথীযতীতি অত্থো. কিন্তি কথীযতি? ‘‘অহ’’ন্তি ‘‘মম’’ন্তি ‘‘পরো’’তি ‘‘পরস্সা’’তি ‘‘মঞ্চো’’তি ‘‘পীঠ’’ন্তি অনেকেহি আকারেহি কথীযতীতি সঙ্খা. সমঞ্ঞাযতীতি সমঞ্ঞা. পঞ্ঞাপীযতীতি পঞ্ঞত্তি. ৰোহরীযতীতি ৰোহারো. কিন্তি ৰোহরীযতি? ‘‘অহ’’ন্তি ‘‘মম’’ন্তি ‘‘পরো’’তি ‘‘পরস্সা’’তি ‘‘মঞ্চো’’তি ‘‘পীঠ’’ন্তি. এৰং তাৰ পঞ্ঞপেতব্বতো পঞ্ঞত্তীতি ৰুত্তা. ‘‘অহ’’ন্তি হি রূপাদযো ধম্মে উপাদায পটিচ্চ কারণং কত্ৰা যথা তে রূপাদযো ধম্মা উপ্পাদৰযৰন্তো, ন এৰংৰিধা, কেৰলং লোকসঙ্কেতেন ¶ সিদ্ধা যা অযং ‘‘অহ’’ন্তি কথীযতি চেৰ পঞ্ঞাপীযতি চ, এসা পঞ্ঞত্তীতি অত্থো.

ইদানি পঞ্ঞাপনতো পঞ্ঞত্তিং পকাসেতুং ‘‘নামং নামকম্ম’’ন্তিআদিমাহ. তত্থ নামন্তি তং তং ধম্মং ‘‘এস ইত্থন্নামো নামা’’তি পঞ্ঞপেতি, তস্মা তং পঞ্ঞত্তীতি পৰুচ্চতি. নামকম্মন্তিআদীনি তস্সা এৰ ৰেৰচনানি. অযং পঞ্ঞাপনতো পঞ্ঞত্তি নাম.

সা পনেসা তজ্জাপঞ্ঞত্তি উপাদাপঞ্ঞত্তি উপনিধাপঞ্ঞত্তীতি তিৰিধা হোতি. তত্থ তজ্জাপঞ্ঞত্তি নাম চক্খুসোতরূপসদ্দপথৰীতেজোৰাযোতিআদিনযপ্পৰত্তা. উপাদাপঞ্ঞত্তি পন সমূহাসমূহৰসেন দুৰিধা হোতি. তত্থ সমূহপঞ্ঞত্তি নাম রূপারূপধম্মেসু একস্স ৰা বহূনং ৰা নামং গহেত্ৰা সমূহমেৰোপাদায ৰুচ্চতি. কথং? অচ্ছতরচ্ছঘটপটাদিপ্পভেদা. অযং সমূহপঞ্ঞত্তি ¶ নাম. অসমূহপঞ্ঞত্তি পন দিসাকাসকালনিমিত্তাভাৰনিরোধাদিভেদা.

যদা পন সা ৰিজ্জমানং পরমত্থং জোতযতি, তদা ‘‘ৰিজ্জমানপঞ্ঞত্তী’’তি পৰুচ্চতি. যদা অৰিজ্জমানং সমূহাসমূহভেদং নামমত্তং জোতযতি, তদা ‘‘অৰিজ্জমানপঞ্ঞত্তী’’তি পৰুচ্চতি ¶ . দুৰিধাপি পনেসা সোতদ্ৰারজৰনানন্তরং গহিতপুব্বসঙ্কেতমনোদ্ৰারজৰনৰিঞ্ঞাণেন ৰিঞ্ঞাযতি. যায গহিতপুব্বসঙ্কেতেন মনোদ্ৰারজৰনৰিঞ্ঞাণেন পঞ্ঞাপীযতি. যং সন্ধায ‘‘ৰিজ্জমানপঞ্ঞত্তি, অৰিজ্জমানপঞ্ঞত্তি, ৰিজ্জমানেন অৰিজ্জমানপঞ্ঞত্তি, অৰিজ্জমানেন ৰিজ্জমানপঞ্ঞত্তি, ৰিজ্জমানেন ৰিজ্জমানপঞ্ঞত্তি, অৰিজ্জমানেন অৰিজ্জমানপঞ্ঞত্তী’’তি ছক্কনযো ৰুত্তো. তত্থ পরমত্থতো ৰিজ্জমানানং রূপাদীনং পঞ্ঞাপনা ৰিজ্জমানপঞ্ঞত্তি. তথা অৰিজ্জমানানমিত্থিপুরিসাদীনং পঞ্ঞাপনা অৰিজ্জমানপঞ্ঞত্তি. ঠপেত্ৰা পন ৰচনত্থং কেনচি আকারেন অনুপলব্ভমানানং পঞ্চমসচ্চাদীনং, তিত্থিযপরিকপ্পিতানং ৰা পকতিপুরিসাদীনং পঞ্ঞাপনাপি অৰিজ্জমানপঞ্ঞত্তিযেৰ ¶ . ‘‘তেৰিজ্জো, ছল়ভিঞ্ঞো’’তি এৰমাদিনযপ্পৰত্তা ৰিজ্জমানেন অৰিজ্জমানপঞ্ঞত্তি. ‘‘ইত্থিসদ্দো, পুরিসসদ্দো’’তি এৰমাদিকা অৰিজ্জমানেন ৰিজ্জমানপঞ্ঞত্তি. ‘‘চক্খুৰিঞ্ঞাণং, সোতৰিঞ্ঞাণ’’ন্তি এৰমাদিকা ৰিজ্জমানেন ৰিজ্জমানপঞ্ঞত্তি. ‘‘খত্তিযকুমারো, ব্রাহ্মণকুমারো, ভিক্খুকুমারো’’তি এৰমাদিকা অৰিজ্জমানেন অৰিজ্জমানপঞ্ঞত্তীতি এৰং ৰুত্তা ছ পঞ্ঞত্তিযোপি এত্থেৰ সঙ্গহং গচ্ছন্তি. অযং উপাদাপঞ্ঞত্তি নাম.

উপনিধাপঞ্ঞত্তিপি এতিস্সা এৰ পভেদা, সা পন ‘‘দীঘং উপনিধায রস্সো, রস্সং উপনিধায দীঘো’’তিআদিনযপ্পৰত্তা ‘‘কপণং মানুসকং রজ্জং দিব্বসুখং উপনিধাযা’’তি এৰমাদিকা চ, তস্মা পঞ্ঞপেতব্বতো চ পঞ্ঞাপনতো চ পঞ্ঞত্তীতি ৰেদিতব্বা. সমঞ্ঞা সমত্তা.

৭৭৮.

পরমত্থতো চ পঞ্ঞত্তি, ততিযা কোটি ন ৰিজ্জতি;

দ্ৰীসু ঠানেসু কুসলো, পরৰাদেসু ন কম্পতি.

ইতি অভিধম্মাৰতারে পঞ্ঞত্তিনিদ্দেসো নাম

দ্ৰাদসমো পরিচ্ছেদো.

১৩. তেরসমো পরিচ্ছেদো

কারকপটিৰেধনিদ্দেসো

এত্থাহ ¶ ¶ – নিদ্দিট্ঠা কুসলাদযো নাম ধম্মা, ন পনেতেসং কারকো অত্তা নিদ্দিট্ঠো. তস্স হি কারকস্স ৰেদকস্স অত্তনো অভাৰে কুসলাকুসলানং ধম্মানং অভাৰো সিযা, তেসমভাৰে তদাযত্তৰুত্তীনং তেসং ৰিপাকানমভাৰো হোতি, তস্মা কুসলাদীনং ধম্মানং দেসনা নিরত্থিকাতি? অত্র ৰুচ্চতে – নাযং ¶ নিরত্থিকা, সাত্থিকাৰাযং দেসনা. যদি কারকস্সাভাৰা কুসলাদীনমভাৰো সিযা, তস্স পরিকপ্পিতস্স অত্তনোপি অভাৰো সিযা. কিং কারণন্তি চে? তস্স অত্তনো অঞ্ঞস্স কারকস্সাভাৰতো. কারকাভাৰেপি কত্তা অত্তা অত্থীতি চে? তথা কুসলাদীনম্পি অসতিপি কত্তরি অত্থিতা উপগন্তব্বা, কুতোযং তৰ তত্থানুরোধো, ইধ ৰিরোধোতি. অথাপি যথা পন লোকে কারকাভাৰেপি পথৰীআপতেজউতুআদযো পটিচ্চ অঙ্কুরাদীনং অভিনিব্বত্তি দিস্সতি, তথা এতেসম্পি কুসলাদীনং ধম্মানং হেতুপচ্চযসামগ্গিযা অভিনিব্বত্তি হোতীতি ৰেদিতব্বা.

অথাপি চেত্থ তস্সা পঞ্ঞায পরিকপ্পিতো নিচ্চো ধুৰো কুসলাদীনং কত্তা অত্তা পরমত্থতো অত্থীতি চে? তমুপপরিক্খিস্সাম তাৰ, সো পন তাৰ অত্তা কারকো ৰেদকো কিং সচেতনো ৰা, উদাহু অচেতনো ৰাতি? কিঞ্চেত্থ – যদি অচেতনো সিযা, পাকারতরুপাসাণসদিসো সিযা. তস্স কারকৰেদকত্তাভাৰো সিযা. যদি সচেতনো, সো চেতনায অঞ্ঞো ৰা সিযা, অনঞ্ঞো ৰা. অথানঞ্ঞো, চেতনায নাসে অত্তনোপি নাসো সিযা. কিং কারণন্তি চে? চেতনায অনঞ্ঞত্তা.

অথাপি ভৰতো অধিপ্পাযো এৰং সিযা, অত্তনো পন নাসো ¶ ন ভৰতি নিচ্চত্তা, চেতনাযযেৰ নাসো ভৰতীতি? ৰুচ্চতে – অত্তনো অনাসে সতি চেতনাযপি নাসো ন ভৰতি. কিং কারণন্তি চে? চেতনায অনঞ্ঞত্তা. চেতনত্তানং অনঞ্ঞত্তে সতি চেতনাযযেৰ নাসো ভৰতি, ন অত্তনোতি অযুত্তমেতং. অথ চেতনাযযেৰ ৰিনাসে ৰিসেসকারণং নত্থি, অত্তাৰ নস্সতু, তিট্ঠতু চেতনা. অথ চেতনায নাসে অত্তনো নাসো ¶ ন ভৰতীতি চে? চেতনায অত্তা অঞ্ঞো সিযা. অথ অঞ্ঞস্স অত্তস্স নাসে সতি সযং নাসো ন ভৰতি, এৰঞ্চ সতি ‘‘চেতনায ¶ অনঞ্ঞো অত্তা’’তি তৰ পটিঞ্ঞা হীনা. অথাপি চেতনত্তানং অনঞ্ঞত্তে সতি অত্তনো অনাসো চেতনাযপি অনাসো ভৰতু. অথ ন ভৰতি, পটিঞ্ঞা হীনা. অথ ৰুত্তপ্পকারতো ৰিপরীতং ৰা সিযা, অত্তা নস্সতু, চেতনা তিট্ঠতু. অথ পন এৰং ন ভৰতীতি চে? অনঞ্ঞত্তপক্খং পরিচ্চজ. অথ পন ন পরিচ্চজসি, পটিঞ্ঞাহীনো ভৰসি.

অথাযং ভৰতো অধিপ্পাযো সিযা ‘‘নাযং মম অত্তা চেতনায অনঞ্ঞো, অঞ্ঞোযেৰা’’তি? তত্র ৰুচ্চতে – ইধ পন অঞ্ঞত্তং দুৰিধং হোতি লক্খণকতমঞ্ঞত্তঞ্চ দেসন্তরকতমঞ্ঞত্তঞ্চাতি. তত্থ কিং ত্ৰং চেতনত্তানং লক্খণকতমঞ্ঞত্তং ৰদেসি, উদাহু দেসন্তরকতমঞ্ঞত্তন্তি? অহং লক্খণকতমঞ্ঞত্তং ৰদামীতি. যথা হি রূপরসগন্ধাদীনমেকদেসে ৰত্তমানানম্পি লক্খণতো অঞ্ঞত্তং হোতি, এৰং চেতনত্তানমেকদেসে ৰত্তমানানম্পি লক্খণতো অঞ্ঞত্তং হোতি, তস্মা লক্খণকতমঞ্ঞত্তং ৰদামীতি. তত্র ৰুচ্চতে – যথা হি জাতৰেদস্স ডয্হমানে আমকসঙ্ঘটে আমকৰণ্ণৰিনাসে রসাদীনং ৰিনাসো ভৰতি, তথেৰ চেতনায ৰিনাসে অত্তনোপি ৰিনাসো সিযা. কিং কারণন্তি চে? রূপরসাদীনং ৰিয একদেসত্তাতি.

অথেৰং ভৰতো মতি সিযা ‘‘একদেসত্তে সতিপি অত্তনো পন নাসো ন ভৰতি, চেতনাযযেৰ ৰিনাসো ভৰতী’’তি? অত্র ৰুচ্চতে – অত্তনো অনাসে চেতনাযপি অনাসোৰ হোতি. কিং কারণন্তি চে? রূপরসাদীনং ৰিয অৰিনিব্ভোগতো. অথ সমানে একদেসত্তে অৰিনিব্ভোগভাৰেপি ¶ কেন হেতুনা চেতনায এৰ নাসো ভৰতি, ন পন অত্তনো. অথ ৰিসেসকারণং নত্থি, তৰ লদ্ধিযা অত্তাৰ নস্সতু, তিট্ঠতু চেতনা. অথ চেতনায নাসে অত্তনো নাসো ¶ ন ভৰতি, উভিন্নং একদেসতা নত্থি. এৰঞ্চ সতি কো দোসোতি চে? যং পন তযা ৰুত্তং, যথা রূপরসগন্ধাদীনং একদেসে ৰত্তমানানম্পি লক্খণতো অঞ্ঞত্তং, তথা চেতনত্তানমেকদেসে ৰত্তমানানম্পি লক্খণতো অঞ্ঞত্তন্তি? তমযুত্তন্তি তৰ পটিঞ্ঞা হীনা. অথ রূপরসাদীনং ৰিয সমানেপি একদেসত্তে যদি অত্তনো অনাসে চেতনাযপি অনাসো ন ভৰতি, পটিঞ্ঞাহীনো অসি. অথ ৰুত্তপ্পকারতো ৰিপরীতং ৰা সিযা, তৰ অত্তা নস্সতু, চেতনা তিট্ঠতু. অথেৰং ন ভৰতীতি চে? একদেসতাৰ নত্থীতি.

অথ দেসন্তরকতমঞ্ঞত্তং ৰদেসি, চেতনত্তানং অঞ্ঞত্তে সতি ঘটপটসকটগেহাদীনং ৰিয অঞ্ঞত্তং সিযা. চেতনায ৰিনা অনঞ্ঞতা তে অত্তা ন ঘটেন ৰিনা পটো ৰিয অঞ্ঞো সিযা ¶ . অঞ্ঞো চ হি ঘটো অঞ্ঞো চ পটোতি? ন, এৰঞ্চ সতি কো দোসোতি চে? ‘‘অচেতনো অত্তা’’তি পুব্বে ৰুত্তদোসতো ন পরিমুচ্চতীতি. তস্মা পরমত্থতো ন কোচি কত্তা ৰা ৰেদকো ৰা অত্তা অত্থীতি দট্ঠব্বন্তি.

যদি এৰং অথ কস্মা ভগৰতা –

৭৭৯.

‘‘অস্মা লোকা পরং লোকং,

সো চ সন্ধাৰতী নরো;

সো চ করোতি ৰেদেতি,

সুখদুক্খং সযংকত’’ন্তি চ.

৭৮০.

‘‘সত্তো ¶ সংসারমাপন্নো,

দুক্খমস্স মহব্ভযং;

অত্থি মাতা অত্থি পিতা,

অত্থি সত্তোপপাতিকো’’তি চ.

৭৮১.

‘‘ভারা হৰে পঞ্চক্খন্ধা,

ভারহারো চ পুগ্গলো;

ভারাদানং দুক্খং লোকে,

ভারনিক্খেপনং সুখ’’ন্তি চ.

৭৮২.

‘‘যঞ্হি করোতি পুরিসো,

কাযেন ৰাচা উদ চেতসা;

তঞ্হি তস্স সকং হোতি,

তঞ্চ আদায গচ্ছতী’’তি চ.

৭৮৩.

‘‘একস্সেকেন কপ্পেন,

পুগ্গলস্সট্ঠিসঞ্চযো;

সিযা পব্বতসমো রাসি,

ইতি ৰুত্তং মহেসিনা’’তি চ.

৭৮৪.

‘‘অসদ্ধো ¶ অকতঞ্ঞূ চ,

সন্ধিচ্ছেদো চ যো নরো;

হতাৰকাসো ৰন্তাসো,

স ৰে উত্তমপোরিসো’’তি চ. –

ৰুত্তন্তি. সচ্চং এৰং ৰুত্তং ভগৰতা, তঞ্চ খো সম্মুতিৰসেন, ন পরমত্থতো. ননু ভগৰতা ইদম্পি ৰুত্তং –

৭৮৫.

‘‘কিং ¶ নু সত্তোতি পচ্চেসি, মার দিট্ঠিগতং নু তে;

সুদ্ধসঙ্খারপুঞ্জোযং, নযিধ সত্তুপলব্ভতী’’তি চ.

৭৮৬.

‘‘যথাপি ¶ অঙ্গসম্ভারা,

হোতি সদ্দো রথো ইতি;

এৰং খন্ধেসু সন্তেসু,

হোতি সত্তোতি সম্মুতী’’তি চ.

তস্মা ন ৰচনমত্তমেৰাৰলম্বিতব্বং, ন চ দল়্হমূল়্হগাহিনা চ ভৰিতব্বং, গরুকুলমুপসেৰিত্ৰা সুত্তপদানং অধিপ্পাযো জানিতব্বো, সুত্তপদেসু অভিযোগো কাতব্বো. দ্ৰে সচ্চানি ভগৰতা ৰুত্তানি – ‘‘সম্মুতিসচ্চং, পরমত্থসচ্চঞ্চা’’তি. তস্মা দ্ৰেপি সম্মুতিপরমত্থসচ্চানি অসঙ্করতো ঞাতব্বানি. এৰং অসঙ্করতো ঞত্ৰা কোচি কারকো ৰা ৰেদকো ৰা নিচ্চো ধুৰো অত্তা পরমত্থতো নত্থীতি উপপরিক্খিত্ৰা পচ্চযসামগ্গিযা ধম্মানং পৰত্তিং সল্লক্খেত্ৰা পণ্ডিতেন কুলপুত্তেন অত্থকামেন দুক্খস্সন্তকিরিযায পটিপজ্জিতব্বন্তি.

৭৮৭.

যো ইমং গন্থং অচ্চন্তং, চিন্তেতি সততম্পি সো;

কমেন পরমা পঞ্ঞা, তস্স গচ্ছতি ৰেপুলং.

৭৮৮.

অতিমতিকরমাধিনীহরং,

ৰিমতিৰিনাসকরং পিযক্করং;

পঠতি ¶ সুণতি যো সদা ইমং,

ৰিকসতি তস্স মতীধ ভিক্খুনো.

ইতি অভিধম্মাৰতারে কারকপটিৰেধনিদ্দেসো নাম

তেরসমো পরিচ্ছেদো.

১৪. চুদ্দসমো পরিচ্ছেদো

রূপাৰচরসমাধিভাৰনানিদ্দেসো

৭৮৯.

ভাৰনানযমহং ¶ ¶ হিতানযং,

মানযঞ্চ সুগতং সুখানযং;

ব্যাকরোমি পরমং ইতো পরং,

তং সুণাথ মধুরত্থৰণ্ণনং.

৭৯০.

উত্তরং তু মনুস্সানং, ধম্মতো ঞাণদস্সনং;

পত্তুকামেন কাতব্বং, আদিতো সীলসোধনং.

৭৯১.

সঙ্কস্সরসমাচারে, দুস্সীলে সীলৰজ্জিতে;

নত্থি ঝানং কুতো মগ্গো, তস্মা সীলং ৰিসোধযে.

৭৯২.

সীলং চারিত্তৰারিত্তৰসেন দুৰিধং মতং;

তং পনাচ্ছিদ্দমক্খণ্ডমকম্মাসমনিন্দিতং.

৭৯৩.

কত্তব্বং অত্থকামেন, ৰিৰেকসুখমিচ্ছতা;

সীলঞ্চ নাম ভিক্খূনং, অলঙ্কারো অনুত্তরো.

৭৯৪.

রতনং সরণং খেমং, তাণং লেণং পরাযণং;

চিন্তামণি পণীতো চ, সীলং যানমনুত্তরং.

৭৯৫.

সীতলং ¶ সলিলং সীলং, কিলেসমলধোৰনং;

গুণানং মূলভূতঞ্চ, দোসানং বলঘাতি চ.

৭৯৬.

তিদিৰারোহণঞ্চেতং, সোপানং পরমুত্তমং;

মগ্গো খেমো চ নিব্বাননগরস্স পৰেসনে.

৭৯৭.

তস্মা সুপরিসুদ্ধং তং, সীলং দুৰিধলক্খণং;

কত্তব্বং অত্থকামেন, পিযসীলেন ভিক্খুনা.

৭৯৮.

কাতব্বো পন সীলস্মিং, পরিসুদ্ধে ঠিতেনিধ;

পলিবোধস্সুপচ্ছেদো, পলিবোধা দসাহু চ.

৭৯৯.

‘‘আৰাসো ¶ চ কুলং লাভো,

গণো কম্মঞ্চ পঞ্চমং;

অদ্ধানং ঞাতি আবাধো,

গন্থো ইদ্ধীতি তে দসা’’তি.

৮০০.

পলিবোধস্সুপচ্ছেদং, কত্ৰা দসৰিধস্সপি;

উপসঙ্কমিতব্বো সো, কম্মট্ঠানস্স দাযকো.

৮০১.

পিযো ¶ গরু ভাৰনীযো, ৰত্তা চ ৰচনক্খমো;

গম্ভীরঞ্চ কথং কত্তা, নো চট্ঠানে নিযোজকো.

৮০২.

এৰমাদিগুণোপেতমুপগন্ত্ৰা হিতেসিনং;

কল্যাণমিত্তং কালেন, কম্মট্ঠানস্স দাযকং.

৮০৩.

কম্মট্ঠানং গহেতব্বং, ৰত্তং কত্ৰা পনস্স তু;

তেনাপি চরিতং ঞত্ৰা, দাতব্বং তস্স ভিক্খুনো.

৮০৪.

চরিতং পনিদং রাগদোসমোহৰসেন চ;

সদ্ধাবুদ্ধিৰিতক্কানং, ৰসেন ছব্বিধং মতং.

৮০৫.

ৰোমিস্সকনযা তেসং, চতুসট্ঠি ভৰন্তি তে;

তেহি অত্থো ন চত্থীতি, ন মযা ইধ দস্সিতা.

৮০৬.

অসুভা ¶ চ দসেৰেত্থ, তথা কাযগতাসতি;

একাদস ইমে রাগ-চরিতস্সানুকূলতা.

৮০৭.

চতস্সো অপ্পমঞ্ঞাযো, সৰণ্ণকসিণা ইমে;

অট্ঠেৰ চ সদা দোস-চরিতস্সানুকূলতা.

৮০৮.

তং মোহচরিতস্সেত্থ, ৰিতক্কচরিতস্স চ;

অনুকূলন্তি নিদ্দিট্ঠং, আনাপানং পনেককং.

৮০৯.

পুরিমানুস্সতিছক্কং, সদ্ধাচরিতদেহিনো;

মরণূপসমাযুত্তা, সতিমাহারনিস্সিতা.

৮১০.

সঞ্ঞা ¶ ধাতুৰৰত্থানং, বুদ্ধিপ্পকতিজন্তুনো;

ইমে পন চ চত্তারো, অনুকূলাতি দীপিতা.

৮১১.

চত্তারোপি চ আরুপ্পা, সেসানি কসিণানি চ;

অনুকূলা ইমে সব্ব-চরিতানন্তি ৰণ্ণিতা.

৮১২.

ইদং সব্বং পনেকন্ত-ৰিপচ্চনীকভাৰতো;

অতিসপ্পাযতো ৰুত্ত-মিতি ঞেয্যং ৰিভাৰিনা.

৮১৩.

কম্মট্ঠানানি সব্বানি, চত্তালীসাতি নিদ্দিসে;

কসিণানি দস চেৰ, অসুভানুস্সতী দস.

৮১৪.

চতস্সো অপ্পমঞ্ঞাযো, চত্তারো চ অরূপিনো;

চতুধাতুৰৰত্থানং, সঞ্ঞা চাহারতা ইতি.

৮১৫.

কম্মট্ঠানেসু এতেসু, উপচারৰহা কতি;

আনাপানসতিং কায-গতং হিত্ৰা পনট্ঠপি.

৮১৬.

সেসানুস্সতিযো সঞ্ঞা, ৰৰত্থানন্তি তেরস;

উপচারৰহা ৰুত্তা, সেসা তে অপ্পনাৰহা.

৮১৭.

অপ্পনাযাৰহেস্ৰেত্থ, কসিণানি দসাপি চ;

আনাপানসতী চেৰ, চতুক্কজ্ঝানিকা ইমে.

৮১৮.

অসুভানি ¶ দস চেত্থ, তথা কাযগতাসতি;

একাদস ইমে ধম্মা, পঠমজ্ঝানিকা সিযুং.

৮১৯.

আদিব্রহ্মৰিহারাতি ¶ , তিকজ্ঝানৰহা তযো;

চতুত্থাপি চ আরুপ্পা, চতুত্থজ্ঝানিকা মতা.

৮২০.

ৰসেনারম্মণঙ্গানং, দুৰিধো সমতিক্কমো;

গোচরাতিক্কমারূপে, রূপে ঝানঙ্গতিক্কমো.

৮২১.

দসেৰ কসিণানেত্থ, ৰড্ঢেতব্বানি হোন্তি হি;

ন চ ৰড্ঢনিযা সেসা, ভৰন্তি অসুভাদযো.

৮২২.

দসেৰ কসিণানেত্থ, অসুভানি দসাপি চ;

আনাপানসতী চেৰ, তথা কাযগতাসতি.

৮২৩.

পটিভাগনিমিত্তানি ¶ , হোন্তি আরম্মণানি হি;

সেসানেৰ পটিভাগ-নিমিত্তারম্মণা সিযুং.

৮২৪.

অসুভানি দসাহার-সঞ্ঞা কাযগতাসতি;

দেৰেসু নপ্পৰত্তন্তি, দ্ৰাদসেতানি সব্বদা.

৮২৫.

তানি দ্ৰাদস চেতানি, আনাপানসতীপি চ;

তেরসেৰ পনেতানি, ব্রহ্মলোকে ন ৰিজ্জরে.

৮২৬.

ঠপেত্ৰা চতুরারূপে, নত্থি কিঞ্চি অরূপিসু;

মনুস্সলোকে সব্বানি, পৰত্তন্তি ন সংসযো.

৮২৭.

চতুত্থং কসিণং হিত্ৰা, কসিণা অসুভানি চ;

দিট্ঠেনেৰ গহেতব্বা, ইমে একূনৰীসতি.

৮২৮.

সতিযম্পি চ কাযম্হি, দিট্ঠেন তচপঞ্চকং;

সেসমেত্থ সুতেনেৰ, গহেতব্বন্তি দীপিতং.

৮২৯.

আনাপানসতী এত্থ, ফুট্ঠেন পরিদীপিতা;

ৰাযোকসিণমেৰেত্থ, দিট্ঠফুট্ঠেন গয্হতি.

৮৩০.

সুতেনেৰ ¶ গহেতব্বা, সেসা অট্ঠারসাপি চ;

উপেক্খা অপ্পমঞ্ঞা চ, অরূপা চেৰ পঞ্চিমে.

৮৩১.

আদিতোৰ গহেতব্বা, ন হোন্তীতি পকাসিতা;

পঞ্চতিংসাৰসেসানি, গহেতব্বানি আদিতো.

৮৩২.

কম্মট্ঠানেসু হেতেসু, আকাসকসিণং ৰিনা;

কসিণা নৰ হোন্তে চ, অরূপানং তু পচ্চযা.

৮৩৩.

দসাপি কসিণা হোন্তি, অভিঞ্ঞানং তু পচ্চযা;

তযো ব্রহ্মৰিহারাপি, চতুক্কস্স ভৰন্তি তু.

৮৩৪.

হেট্ঠিমং হেট্ঠিমারুপ্পং, উপরূপরিমস্স হি;

তথা চতুত্থমারুপ্পং, নিরোধস্সাতি দীপিতং.

৮৩৫.

সব্বানি চ পনেতানি, চত্তালীসৰিধানি তু;

ৰিপস্সনাভৰসম্পত্তি-সুখানং পচ্চযা সিযুং.

৮৩৬.

কম্মট্ঠানং ¶ গহেত্ৰান, আচরিযস্স সন্তিকে;

ৰসন্তস্স কথেতব্বং, আগতস্সাগতক্খণে.

৮৩৭.

উগ্গহেত্ৰা ¶ পনঞ্ঞত্র, গন্তুকামস্স ভিক্খুনো;

নাতিসঙ্খেপৰিত্থারং, কথেতব্বং তু তেনপি.

৮৩৮.

কম্মট্ঠানং গহেত্ৰান, সম্মট্ঠানং মনোভুনো;

অট্ঠারসহি দোসেহি, নিচ্চং পন ৰিৰজ্জিতে.

৮৩৯.

অনুরূপে ৰিহারস্মিং, ৰিহাতব্বং তু গামতো;

নাতিদূরে নচ্চাসন্নে, সিৰে পঞ্চঙ্গসংযুতে.

৮৪০.

খুদ্দকো পলিবোধোপি, ছিন্দিতব্বো পনত্থি চে;

দীঘা কেসা নখা লোমা, ছিন্দিতব্বা ৰিভাৰিনা.

৮৪১.

চীৰরং রজিতব্বং তং, কিলিট্ঠং তু সচে সিযা;

সচে পত্তে মলং হোতি, পচিতব্বোৰ সুট্ঠু সো.

৮৪২.

অচ্ছিন্নপলিবোধেন ¶ , পচ্ছা তেন চ ভিক্খুনা;

পৰিৰিত্তে পনোকাসে, ৰসন্তেন যথাসুখং.

৮৪৩.

ৰজ্জেত্ৰা মত্তিকং নীলং, পীতং সেতঞ্চ লোহিতং;

সণ্হাযারুণৰণ্ণায, মত্তিকায মনোরমং.

৮৪৪.

কত্তব্বং কসিণজ্ঝানং, পত্তুকামেন ধীমতা;

সেনাসনে ৰিৰিত্তস্মিং, বহিদ্ধা ৰাপি তাদিসে.

৮৪৫.

পটিচ্ছন্নে পনট্ঠানে, পব্ভারে ৰা গুহন্তরে;

সংহারিমং ৰা কাতব্বং, তং তত্রট্ঠকমেৰ ৰা.

৮৪৬.

সংহারিমং করোন্তেন, দণ্ডকেসু চতূস্ৰপি;

চম্মং ৰা কটসারং ৰা, দুস্সপত্তম্পি ৰা তথা.

৮৪৭.

বন্ধিত্ৰা তথা কাতব্বং, মত্তিকায পমাণতো;

ভূমিযং পত্থরিত্ৰা চ, ওলোকেতব্বমেৰ তং.

৮৪৮.

তত্রট্ঠং ভূমিযং ৰট্টং, আকোটিত্ৰান খাণুকে;

ৰল্লীহি তং ৰিনন্ধিত্ৰা, কাতব্বং কণ্ণিকং সমং.

৮৪৯.

ৰিত্থারতো ¶ পমাণেন, ৰিদত্থিচতুরঙ্গুলং;

ৰট্টং ৰত্ততি তং কাতুং, ৰিৰট্টং পন মিচ্ছতা.

৮৫০.

ভেরীতলসমং সাধু, কত্ৰা কসিণমণ্ডলং;

সম্মজ্জিত্ৰান তং ঠানং, ন্হত্ৰা আগম্ম পণ্ডিতো.

৮৫১.

হত্থপাসপমাণস্মিং, তম্হা কসিণমণ্ডলা;

পদেসে তু সুপঞ্ঞত্তে, আসনস্মিং সুঅত্থতে.

৮৫২.

উচ্চে তত্থ নিসীদিত্ৰা, ৰিদত্থিচতুরঙ্গুলে;

উজুকাযং পণিধায, কত্ৰা পরিমুখং সতিং.

৮৫৩.

কামেস্ৰাদীনৰং দিস্ৰা, নেক্খম্মং দট্ঠু খেমতো;

পরমং পীতিপামোজ্জং, জনেত্ৰা রতনত্তযে.

৮৫৪.

‘‘ভাগী ¶ অস্সমহং অদ্ধা, ইমায পটিপত্তিযা;

পৰিৰেকসুখস্সা’’তি, কত্ৰা উস্সাহমুত্তমং.

৮৫৫.

আকারেন ¶ সমেনেৰ, উম্মীলিত্ৰান লোচনং;

নিমিত্তং গণ্হতা সাধু, ভাৰেতব্বং পুনপ্পুনং.

৮৫৬.

ন ৰণ্ণো পেক্খিতব্বো সো, দট্ঠব্বং ন চ লক্খণং;

ৰণ্ণং পন অমুঞ্চিত্ৰা, উস্সদস্স ৰসেন হি.

৮৫৭.

চিত্তং পণ্ণত্তিধম্মস্মিং, ঠপেত্ৰেকগ্গমানসো;

‘‘পথৰী পথৰি’’চ্চেৰং, ৰত্ৰা ভাৰেয্য পণ্ডিতো.

৮৫৮.

পথৰী মেদনী ভূমি, ৰসুধা চ ৰসুন্ধরা;

এৰং পথৰিনামেসু, একং ৰত্তুম্পি ৰট্টতি.

৮৫৯.

উম্মীলিত্ৰা নিমীলিত্ৰা, আৰজ্জেয্য পুনপ্পুনং;

যাৰুগ্গহনিমিত্তং তু, নুপ্পজ্জতি চ তাৰ সো.

৮৬০.

এৰং ভাৰযতো তস্স, পুন একগ্গচেতসো;

যদা পন নিমীলেত্ৰা, আৰজ্জন্তস্স যোগিনো.

৮৬১.

যথা উম্মীলিতেকালে, তথাপাথং তু যাতি চে;

তদুগ্গহনিমিত্তং ত-মুপ্পন্নন্তি পৰুচ্চতি.

৮৬২.

নিমিত্তে ¶ পন সঞ্জাতে, ততো পভুতি যোগিনা;

নিসীদিতব্বং নো চেৰং, তস্মিং ঠানে ৰিজানতা.

৮৬৩.

অত্তনো ৰসনট্ঠানং, পৰিসিত্ৰান ধীমতা;

তেন তত্থ নিসিন্নেন, ভাৰেতব্বং যথাসুখং.

৮৬৪.

পপঞ্চপরিহারত্থং, পাদানং পন ধোৰনে;

তস্সেকতলিকা দ্ৰে চ, ইচ্ছিতব্বা উপাহনা.

৮৬৫.

সমাধিতরুণো তস্স, অসপ্পাযেন কেনচি;

সচে নস্সতি তং ঠানং, গন্ত্ৰাৰাদায তং পন.

৮৬৬.

পীঠে ¶ সুখনিসিন্নেন, ভাৰেতব্বং পুনপ্পুনং;

সমন্নাহরিতব্বঞ্চ, করে তক্কাহতম্পি চ.

৮৬৭.

নিমিত্তং পন তং হিত্ৰা, চিত্তং ধাৰতি চে বহি;

নিৰারেত্ৰা নিমিত্তস্মিং, ঠপেতব্বং তু মানসং.

৮৬৮.

যত্থ যত্থ নিসীদিত্ৰা, তমিচ্ছতি তপোধনো;

তত্থ তত্থ দিৰারত্তিং, তস্সুপট্ঠাতি চেতসো.

৮৬৯.

এৰং তস্স করোন্তস্স, অনুপুব্বেন যোগিনো;

ৰিক্খম্ভন্তি চ সব্বানি, পঞ্চ নীৰরণানিপি.

৮৭০.

সমাধিযতি চিত্তম্পি, উপচারসমাধিনা;

পটিভাগনিমিত্তম্পি, উপ্পজ্জতি চ যোগিনো.

৮৭১.

কো পনাযং ৰিসেসো হি, ইমস্স পুরিমস্স ৰা;

থৰিকা নীহতাদাস-মণ্ডলং ৰিয মজ্জিতং.

৮৭২.

মেঘতো ৰিয নিক্খন্তং, সম্পুণ্ণচন্দমণ্ডলং;

পটিভাগনিমিত্তং তং, বলাকা ৰিয তোযদে.

৮৭৩.

তদুগ্গহনিমিত্তং ¶ তং, পদালেত্ৰাৰ নিগ্গতং;

ততোধিকতরং সুদ্ধং, হুত্ৰাপট্ঠাতি তস্স তং.

৮৭৪.

তনুসণ্ঠানৰন্তঞ্চ, ৰণ্ণৰন্তং ন চেৰ তং;

উপট্ঠাকারমত্তং তং, পঞ্ঞজং ভাৰনামযং.

৮৭৫.

পটিভাগে ¶ সমুপ্পন্নে, নিমিত্তে ভাৰনামযে;

হোন্তি ৰিক্খম্ভিতানেৰ, পঞ্চ নীৰরণানিপি.

৮৭৬.

কিলেসা সন্নিসিন্নাৰ, যুত্তযোগস্স ভিক্খুনো;

চিত্তং সমাহিতংযেৰ, উপচারসমাধিনা.

৮৭৭.

আকারেহি পন দ্ৰীহি, সমাধিযতি মানসং;

উপচারক্খণে তস্স, পটিলাভে সমাধিনো.

৮৭৮.

নীৰারণপ্পহানেন ¶ , উপচারক্খণে তথা;

অঙ্গানং পাতুভাৰেন, পটিলাভক্খণে পন.

৮৭৯.

দ্ৰিন্নং পন সমাধীনং, কিং নানাকরণং পন;

অঙ্গানি থামজাতানি, উপচারক্খণেন চ.

৮৮০.

অপ্পনায পনঙ্গানি, থামজাতানি জাযরে;

তস্মা তং অপ্পনাচিত্তং, দিৰসম্পি পৰত্ততি.

৮৮১.

পল্লঙ্কেন চ তেনেৰ, ৰড্ঢেত্ৰা তং নিমিত্তকং;

অপ্পনং অধিগন্তুং সো, সক্কোতি যদি সুন্দরং.

৮৮২.

নো চে সক্কোতি সো তেন,

তং নিমিত্তং তু যোগিনা;

চক্কৰত্তিয গব্ভোৰ,

রতনং ৰিয দুল্লভং.

৮৮৩.

সততং অপ্পমত্তেন, রক্খিতব্বং সতীমতা;

নিমিত্তং রক্খতো লদ্ধং, পরিহানি ন ৰিজ্জতি.

৮৮৪.

আরক্খণে অসন্তম্হি, লদ্ধং লদ্ধং ৰিনস্সতি;

রক্খিতব্বং হি তস্মা তং, তত্রাযং রক্খণাৰিধি.

৮৮৫.

আৰাসো গোচরো ভস্সং, পুগ্গলো ভোজনং উতু;

ইরিযাপথোতি সত্তেতে, অসপ্পাযে ৰিৰজ্জযে.

৮৮৬.

সপ্পাযে ¶ সত্ত সেৰেয্য, এৰঞ্হি পটিপজ্জতো;

ন চিরেনেৰ কালেন, হোতি ভিক্খুস্স অপ্পনা.

৮৮৭.

যস্সপ্পনা ন হোতেৰ, এৰম্পি পটিপজ্জতো;

অপ্পনায চ কোসল্লং, সম্মা সম্পাদযে বুধো.

৮৮৮.

অপ্পনায হি কোসল্ল-মিদং দসৰিধং ইধ;

গন্থৰিত্থারভীতেন, মযা ৰিস্সজ্জিতন্তি চ.

৮৮৯.

এৰঞ্হি ¶ সম্পাদযতো, অপ্পনাকোসল্লং পন;

পটিলদ্ধে নিমিত্তস্মিং, অপ্পনা সম্পৰত্ততি.

৮৯০.

এৰম্পি পটিপন্নস্স, সচে সা নপ্পৰত্ততি;

তথাপি ন জহে যোগং, ৰাযমেথেৰ পণ্ডিতো.

৮৯১.

চিত্তপ্পৰত্তিআকারং ¶ , তস্মা সল্লক্খযং বুধো;

সমতং ৰীরিযস্সেৰ, যোজযেথ পুনপ্পুনং.

৮৯২.

ঈসকম্পি লযং যন্তং, পগ্গণ্হেথেৰ মানসং;

অচ্চারদ্ধং নিসেধেত্ৰা, সমমেৰ পৰত্তযে.

৮৯৩.

লীনতুদ্ধতভাৰেহি, মোচযিত্ৰান মানসং;

পটিভাগনিমিত্তাভি-মুখং তং পটিপাদযে.

৮৯৪.

এৰং নিমিত্তাভিমুখং, পটিপাদযতো পন;

ইদানেৰপ্পনা তস্স, সা সমিজ্ঝিস্সতীতি চ.

৮৯৫.

ভৰঙ্গং পন পচ্ছিজ্জ, পথৰীকসিণং তথা;

তদেৰারম্মণং কত্ৰা, মনোদ্ৰারম্হি যোগিনো.

৮৯৬.

জাযতেৰজ্জনং চিত্তং, তত্রেৰারম্মণে ততো;

জৰনানি চ জাযন্তে, তস্স চত্তারি পঞ্চ ৰা.

৮৯৭.

অৰসানে পনেকং তু, রূপাৰচরিকং ভৰে;

তক্কাদযো পনঞ্ঞেহি, ভৰন্তি বলৰত্তরা.

৮৯৮.

অপ্পনাচেতসো তানি, পরিকম্মোপচারতো;

ৰুচ্চন্তি পরিকম্মানি, উপচারানি চাতিপি.

৮৯৯.

অপ্পনাযানুলোমত্তা ¶ , অনুলোমানি এৰ চ;

যং তং সব্বন্তিমং এত্থ, গোত্রভূতি পৰুচ্চতি.

৯০০.

গহিতাগহণেনেত্থ, পরিকম্মপ্পনাদিকং;

দুতিযং উপচারং তং, ততিযং অনুলোমকং.

৯০১.

চতুত্থং ¶ গোত্রভু দিট্ঠং, পঞ্চমং অপ্পনামনো;

পঠমং উপচারং ৰা, দুতিযং অনুলোমকং.

৯০২.

ততিযং গোত্রভু দিট্ঠং, চতুত্থং অপ্পনামনো;

চতুত্থং পঞ্চমং ৰাতি, অপ্পেতি ন ততো পরং.

৯০৩.

ছট্ঠে ৰা সত্তমে ৰাপি, অপ্পনা নেৰ জাযতি;

আসন্নত্তা ভৰঙ্গস্স, জৰনং পতি তাৰদে.

৯০৪.

পুরিমেহাসেৰনং লদ্ধা, ছট্ঠং ৰা সত্তমম্পি ৰা;

অপ্পেতীতি পনেত্থাহ, গোদত্তো আভিধম্মিকো.

৯০৫.

ধাৰন্তো হি যথা কোচি,

নরো ছিন্নতটামুখো;

ঠাতুকামো পরিযন্তে,

ঠাতুং সক্কোতি নেৰ সো.

৯০৬.

এৰমেৰ পনচ্ছট্ঠে, সত্তমে ৰাপি মানসো;

ন সক্কোতীতি অপ্পেতুং, ৰেদিতব্বং ৰিভাৰিনা.

৯০৭.

একচিত্তক্খণাযেৰ, হোতাযং অপ্পনা পন;

ততো ভৰঙ্গপাতোৰ, হোতীতি পরিদীপিতং.

৯০৮.

ততো ভৰঙ্গং ছিন্দিত্ৰা, পচ্চৰেক্খণহেতুকং;

আৰজ্জনং ততো ঝান-পচ্চৰেক্খণমানসং.

৯০৯.

কামচ্ছন্দো ¶ চ ব্যাপাদো, থিনমিদ্ধঞ্চ উদ্ধতো;

কুক্কুচ্চং ৰিচিকিচ্ছা চ, পহীনা পঞ্চিমে পন.

৯১০.

ৰিতক্কেন ৰিচারেন, পীতিযা চ সুখেন চ;

একগ্গতায সংযুত্তং, ঝানং পঞ্চঙ্গিকং ইদং.

৯১১.

নানাৰিসযলুদ্ধস্স ¶ , কামচ্ছন্দৰসা পন;

ইতো চিতো ভমন্তস্স, ৰনে মক্কটকো ৰিয.

৯১২.

একস্মিং ¶ ৰিসযেযেৰ, সমাধানেৰ চেতসো;

‘‘সমাধি কামচ্ছন্দস্স, পটিপক্খো’’তি ৰুচ্চতি.

৯১৩.

পামোজ্জভাৰতো চেৰ, সীতলত্তা সভাৰতো;

‘‘ব্যাপাদস্স ততো পীতি, পটিপক্খা’’তি ভাসিতা.

৯১৪.

সৰিপ্ফারিকভাৰেন, নেক্খম্মাদিপৰত্তিতো;

‘‘ৰিতক্কো থিনমিদ্ধস্স, পটিপক্খো’’তি ৰণ্ণিতো.

৯১৫.

অৰূপসন্তভাৰস্স, সযঞ্চেৰাতিসন্ততো;

‘‘সুখং উদ্ধচ্চকুক্কুচ্চ-দ্ৰযস্স পটিপক্খকং’’.

৯১৬.

মতিযা অনুরূপত্তা, ‘‘অনুমজ্জনলক্খণো;

ৰিচারো ৰিচিকিচ্ছায, পটিপক্খো’’তি দীপিতো.

৯১৭.

পঞ্চঙ্গৰিপ্পযুত্তং তং, ঝানং পঞ্চঙ্গসংযুতং;

সিৰং তিৰিধকল্যাণং, দসলক্খণসংযুতং.

৯১৮.

এৰঞ্চাধিগতং হোতি, পঠমং তেন যোগিনা;

সুচিরট্ঠিতিকামেন, তস্স ঝানস্স সব্বসো.

৯১৯.

তং সমাপজ্জিতব্বং তু, ৰিসোধেত্ৰান পাপকে;

তং সমাপজ্জতো তস্স, সুচিরট্ঠিতিকং ভৰে.

৯২০.

চিত্তভাৰনৰেপুল্লং, পত্থযন্তেন ভিক্খুনা;

পটিভাগনিমিত্তং তং, ৰড্ঢেতব্বং যথাক্কমং.

৯২১.

ৰড্ঢনাভূমিযো দ্ৰে চ, উপচারঞ্চ অপ্পনা;

উপচারম্পি ৰা পত্ৰা, ৰড্ঢেতুং তঞ্চ ৰত্ততি.

৯২২.

অপ্পনং পন পত্ৰা ৰা, তত্রাযং ৰড্ঢনক্কমো;

কসিতব্বং যথাঠানং, পরিচ্ছিন্দতি কস্সকো.

৯২৩.

যোগিনা এৰমেৰম্পি, অঙ্গুলদ্ৰঙ্গুলাদিনা;

পরিচ্ছিজ্জ পরিচ্ছিজ্জ, ৰড্ঢেতব্বং যথিচ্ছকং.

৯২৪.

পত্তেপি ¶ ¶ পঠমে ঝানে, আকারেহিপি পঞ্চহি;

সুচিণ্ণৰসিনা তেন, ভৰিতব্বং তপস্সিনা.

৯২৫.

আৰজ্জনং সমাপত্তি, অধিট্ঠানেসু তীসু চ;

ৰুট্ঠানপচ্চৰেক্খাসু, ৰসিতা পঞ্চ ভাসিতা.

৯২৬.

আৰজ্জিত্ৰা অধিট্ঠিত্ৰা, সমাপজ্জ পুনপ্পুনং;

ৰুট্ঠিত্ৰা পচ্চৰেক্খিত্ৰা, ৰসিতা পঞ্চ সাধযে.

৯২৭.

পঠমে ¶ অৰসিপত্তে, দুতিযং যো পনিচ্ছতি;

উভতো ভট্ঠোভৰে যোগী, পঠমা দুতিযাপি চ.

৯২৮.

কামস্সহগতা সঞ্ঞা, মনক্কারা চরন্তি চে;

পমাদযোগিনো ঝানং, হোতি তং হানভাগিযং.

৯২৯.

সতি সন্তিট্ঠতে তস্মিং, সন্তা তদনুধম্মতা;

মন্দস্স যোগিনো ঝানং, হোতি তং ঠিতিভাগিযং.

৯৩০.

অতক্কসহিতা সঞ্ঞা, মনক্কারা চরন্তি চে;

অপ্পমত্তস্স তং ঝানং, ৰিসেসভাগিযং সিযা.

৯৩১.

নিব্বিদাসংযুতা সঞ্ঞা, মনক্কারা চরন্তি চে;

নিব্বেধভাগিযং ঝানং, হোতীতি পরিদীপিতং.

৯৩২.

তস্মা পঞ্চসু এতেসু, সুচিণ্ণৰসিনা পন;

পঠমা পগুণতো ঝানা, ৰুট্ঠায ৰিধিনা ততো.

৯৩৩.

যস্মা অযং সমাপত্তি, আসন্নাকুসলারিকা;

থূলত্তা তক্কচারানং, ততোযং অঙ্গদুব্বলা.

৯৩৪.

ইতি আদীনৰং দিস্ৰা, পঠমে পন যোগিনা;

দুতিযং সন্ততো ঝানং, চিন্তযিত্ৰান ধীমতা.

৯৩৫.

নিকন্তিং পরিযাদায, ঝানস্মিং পঠমে পুন;

দুতিযাধিগমত্থায, কাতব্বো ভাৰনক্কমো.

৯৩৬.

অথস্স ¶ পঠমজ্ঝানা, ৰুট্ঠায ৰিধিনা যদা;

সতস্স সম্পজানস্স, ঝানঙ্গং পচ্চৰেক্খতো.

৯৩৭.

থূলতো ¶ তক্কচারা হি, উপতিট্ঠন্তি যোগিনো;

সেসমঙ্গত্তযং তস্স, সন্তমেৰোপতিট্ঠতি.

৯৩৮.

থূলঙ্গানং পহানায, তদা তস্স চ যোগিনো;

সন্তঙ্গপটিলাভায, নিমিত্তং তু তদেৰ চ.

৯৩৯.

‘‘পথৰী পথৰি’’চ্চেৰং, করোতো মনসা পুন;

ইদানি দুতিযজ্ঝান-মুপ্পজ্জিস্সতি তং ইতি.

৯৪০.

ভৰঙ্গং পন পচ্ছিজ্জ, পথৰীকসিণং পন;

তদেৰারম্মণং কত্ৰা, মনোদ্ৰারম্হি যোগিনো.

৯৪১.

জাযতাৰজ্জনং চিত্তং, তস্মিং আরম্মণে ততো;

জৰনানি হি জাযন্তে, তস্স চত্তারি পঞ্চ ৰা.

৯৪২.

অৰসানে পনেকম্পি, তেসং জৰনচেতসং;

রূপাৰচরিকং হোতি, দুতিযজ্ঝানমানসং.

৯৪৩.

সম্পসাদনমজ্ঝত্তং, পীতিযা চ সুখেন চ;

একগ্গতায সংযুত্তং, ঝানং হোতি তিৰঙ্গিকং.

৯৪৪.

হেট্ঠা ৰুত্তনযেনেৰ, সেসং সমুপলক্খযে;

এৰং দুৰঙ্গহীনং তু, তীহি অঙ্গেহি সংযুতং.

৯৪৫.

ঝানং ¶ তিৰিধকল্যাণং, দসলক্খণসংযুতং;

দুতিযাধিগতং হোতি, ভিক্খুনা ভাৰনামযং.

৯৪৬.

দুতিযাধিগতে ঝানে, আকারেহি চ পঞ্চহি;

সুচিণ্ণৰসিনা হুত্ৰা, দুতিযেপি সতীমতা.

৯৪৭.

তস্মা পগুণতো ঝানা, ৰুট্ঠায দুতিযা পুন;

আসন্নতক্কচারারি, সমাপত্তি অযং ইতি.

৯৪৮.

পীতিযা ¶ পিযতো তস্স, চেতসো উপ্পিলাপনং;

পীতিযা পন থূলত্তা, ততোযং অঙ্গদুব্বলা.

৯৪৯.

তত্থ ¶ আদীনৰং দিস্ৰা, ততিযে সন্ততো পন;

নিকন্তিং পরিযাদায, ঝানস্মিং দুতিযে পুন.

৯৫০.

ততিযাধিগমত্থায, কাতব্বো ভাৰনক্কমো;

অথস্স দুতিযজ্ঝানা, ৰুট্ঠায চ যদা পন.

৯৫১.

সতস্স সম্পজানস্স, ঝানঙ্গং পচ্চৰেক্খতো;

থূলতো পীতুপট্ঠাতি, সুখাদি সন্ততো পন.

৯৫২.

থূলঙ্গানং পহানায, তদা তস্স চ যোগিনো;

সন্তঙ্গপটিলাভায, নিমিত্তং তু তদেৰ চ.

৯৫৩.

‘‘পথৰী পথৰি’’চ্চেৰং, করোতো মনসা পুন;

ইদানি ততিযং ঝান-মুপ্পজ্জিস্সতি তং ইতি.

৯৫৪.

ভৰঙ্গং মনুপচ্ছিজ্জ, পথৰীকসিণং পন;

তদেৰারম্মণং কত্ৰা, মনোদ্ৰারম্হি যোগিনো.

৯৫৫.

জাযতাৰজ্জনং চিত্তং, তস্মিং আরম্মণে ততো;

জৰনানি চ জাযন্তে, তস্স চত্তারি পঞ্চ ৰা.

৯৫৬.

অৰসানে পনেকং তু, তেসং জৰনচেতসং;

রূপাৰচরিকং হোতি, ততিযজ্ঝানমানসং.

৯৫৭.

সতিযা সম্পজঞ্ঞেন, সম্পন্নং তু সুখেন চ;

একগ্গতায সংযুত্তং, দুৰঙ্গং ততিযং মতং.

৯৫৮.

হেট্ঠা ৰুত্তনযেনেৰ, সেসং সমুপলক্খযে;

এৰমেকঙ্গহীনং তু, দ্ৰীহি অঙ্গেহি সংযুতং.

৯৫৯.

ঝানং তিৰিধকল্যাণং, দসলক্খণসংযুতং;

ততিযাধিগতং হোতি, ভিক্খুনা ভাৰনামযং.

৯৬০.

ততিযাধিগতে ¶ ঝানে, আকারেহি চ পঞ্চহি;

সুচিণ্ণৰসিনা হুত্ৰা, তস্মিং পন সতীমতা.

৯৬১.

তস্মা পগুণতো ঝানা, ৰুট্ঠায ততিযা পুন;

আসন্নপীতিদোসা হি, সমাপত্তি অযন্তি চ.

৯৬২.

যদেৰচেত্থ ¶ আভোগো, সুখমিচ্চেৰ চেতসো;

এৰং সুখস্স থূলত্তা, হোতাযং অঙ্গদুব্বলা.

৯৬৩.

ইতি ¶ আদীনৰং দিস্ৰা, ঝানস্মিং ততিযে পুন;

চতুত্থং সন্ততো দিস্ৰা, চেতসা পন যোগিনা.

৯৬৪.

নিকন্তিং পরিযাদায, ঝানস্মিং ততিযে পুন;

চতুত্থাধিগমত্থায, কাতব্বো ভাৰনক্কমো.

৯৬৫.

অথস্স ততিযজ্ঝানা, ৰুট্ঠায হি যদা পন;

সতস্স সম্পজানস্স, ঝানঙ্গং পচ্চৰেক্খতো.

৯৬৬.

থূলতো তস্সুপট্ঠাতি, সুখং তং মানসং ততো;

উপেক্খা সন্ততো তস্স, চিত্তস্সেকগ্গতাপি চ.

৯৬৭.

থূলঙ্গস্স পহানায, সন্তঙ্গস্সূপলদ্ধিযা;

তদেৰ চ নিমিত্তঞ্হি, ‘‘পথৰী পথৰী’’তি চ.

৯৬৮.

করোতো মনসা এৰ, পুনপ্পুনঞ্চ যোগিনো;

চতুত্থং পনিদং ঝানং, উপ্পজ্জিস্সতি তং ইতি.

৯৬৯.

ভৰঙ্গং পনুপচ্ছিজ্জ, পথৰীকসিণং তথা;

তদেৰারম্মণং কত্ৰা, মনোদ্ৰারম্হি যোগিনো.

৯৭০.

জাযতাৰজ্জনং চিত্তং, তস্মিং আরম্মণে ততো;

জৰনানি চ জাযন্তে, তস্স চত্তারি পঞ্চ ৰা.

৯৭১.

অৰসানে পনেকং তু, তেসং জৰনচেতসং;

রূপাৰচরিকং হোতি, চতুত্থজ্ঝানমানসং.

৯৭২.

একঙ্গৰিপ্পহীনং ¶ তু, দ্ৰীহি অঙ্গেহি যোগতো;

চতুত্থং পনিদং ঝানং, দুৰঙ্গন্তি পৰুচ্চতি.

৯৭৩.

এৰং তিৰিধকল্যাণং, দসলক্খণসংযুতং;

চতুত্থাধিগতং হোতি, ভিক্খুনা ভাৰনামযং.

৯৭৪.

যস্মা সুখমুপেক্খায, ন হোতাসেৰনং পন;

উপেক্খাসহগতানেৰ, জৰনানি জৰন্তি চ.

৯৭৫.

উপেক্খাসহগতং ¶ তস্মা, চতুত্থং সমুদীরিতং;

অযমেত্থ ৰিসেসো হি, সেসং ৰুত্তনযং পন.

৯৭৬.

যং চতুক্কনযে ঝানং, দুতিযং তং দ্ৰিধা পন;

কত্ৰান পঞ্চকনযে, দুতিযং ততিযং কতং.

৯৭৭.

ততিযং তং চতুত্থঞ্চ, চতুত্থং পঞ্চমং ইধ;

পঠমং পঠমংযেৰ, অযমেত্থ ৰিসেসতা.

৯৭৮.

এৰমেত্তাৰতা ৰুত্তা, নাতিসঙ্খেপতো মযা;

নাতিৰিত্থারতো চাযং, রূপাৰচরভাৰনা.

৯৭৯.

সুমধুরৰরতরৰচনো, কং নু জনং নেৰ রঞ্জযতি;

অতিনিসিতৰিসদবুদ্ধি-পসাদজন ৰেদনীযোযং.

ইতি অভিধম্মাৰতারে রূপাৰচরসমাধিভাৰনানিদ্দেসো

নাম চুদ্দসমো পরিচ্ছেদো.

১৫. পন্নরসমো পরিচ্ছেদো

অরূপাৰচরসমাধিভাৰনানিদ্দেসো

৯৮০.

রূপারূপমতীতেন ¶ ¶ , রূপারূপাদিৰেদিনা;

যানি চারূপপুঞ্ঞানি, সরূপেনীরিতানি তু.

৯৮১.

তেসং দানি পৰক্খামি, ভাৰনানযমুত্তমং;

যোগাৰচরভিক্খূনং, হিতত্থায সমাসতো.

৯৮২.

‘‘রূপে খো ৰিজ্জমানস্মিং, দণ্ডাদানাদযো সিযুং;

অনেকাপি পনাবাধা, চক্খুরোগাদযো’’ইতি.

৯৮৩.

রূপে আদীনৰং দিস্ৰা, রূপে নিব্বিন্দমানসো;

তস্সাতিক্কমনত্থায, অরূপং পটিপজ্জতি.

৯৮৪.

তম্হা ¶ কসিণরূপাপি, সো নিব্বিজ্জ ৰিসারদো;

অপক্কমিতুকামো চ, সূকরাভিহতোৰ সা.

৯৮৫.

চতুত্থে পন ঝানস্মিং, হুত্ৰা চিণ্ণৰসী ৰসী;

চতুত্থজ্ঝানতো ধীমা, ৰুট্ঠায ৰিধিনা পুন.

৯৮৬.

করোতি পনিদং চিত্তং, রূপমারম্মণং যতো;

আসন্নসোমনস্সঞ্চ, থূলসন্তৰিমোক্খতো.

৯৮৭.

ইতি আদীনৰং দিস্ৰা, চতুত্থে তত্থ সব্বসো;

নিকন্তিং পরিযাদায, পঠমারুপ্পঞ্চ সন্ততো.

৯৮৮.

চক্কৰাল়পরিযন্তং, যত্তকং ৰা পনিচ্ছতি;

তত্তকং পত্থরিত্ৰান, ফুট্ঠোকাসঞ্চ তেন তং.

৯৮৯.

আকাসো ¶ ইতি ৰানন্তো,

আকাসো ইতি ৰা পুন;

মনসা হি করোন্তোৰ,

উগ্ঘাটেতি পৰুচ্চতি.

৯৯০.

উগ্ঘাটেন্তো হি কসিণং, ন সংৰেল্লেতি তং পন;

ন চুদ্ধরতি সো যোগী, পূৰং ৰিয কপালতো.

৯৯১.

কেৰলং পন তং নেৰ, আৰজ্জতি ন পেক্খতি;

নাৰজ্জন্তো নপেক্খন্তো, উগ্ঘাটেতি হি নামসো.

৯৯২.

কসিণুগ্ঘাটিমাকাসং ¶ , নিমিত্তং পন তংৰ সো;

আকাসো ইতি চিত্তেন, আৰজ্জতি পুনপ্পুনং.

৯৯৩.

আৰজ্জতো হি তস্সেৰং,

করোতো তক্কাহতম্পি চ;

পঞ্চ নীৰরণা তস্স,

ৰিক্খম্ভন্তি হি সব্বসো.

৯৯৪.

আসেৰতি ¶ চ ভাৰেতি, তং নিমিত্তং পুনপ্পুনং;

করোতো পন তস্সেৰ, সন্তচিত্তস্স যোগিনো.

৯৯৫.

তত্রাকাসে পনাপ্পেতি, পঠমারুপ্পমানসং;

ইধাপি পুরিমে ভাগে, তীণি চত্তারি ৰা পন.

৯৯৬.

জৰনানি উপেক্খায, সম্পযুত্তানি হোন্তি হি;

চতুত্থং পঞ্চমং ৰাপি, হোতি আরুপ্পমানসং.

৯৯৭.

পুন ভাৰেতুকামেন, দুতিযারুপ্পমানসং;

সুচিণ্ণৰসিনা হুত্ৰা, পঠমারুপ্পমানসে.

৯৯৮.

আসন্নরূপাৰচর-জ্ঝানপচ্চত্থিকন্তি চ;

দুতিযারুপ্পচিত্তংৰ, ন চ সন্তমিদন্তি চ.

৯৯৯.

এৰমাদীনৰং ¶ দিস্ৰা, পঠমারুপ্পমানসে;

নিকন্তিং পরিযাদায, দুতিযং সন্ততো পন.

১০০০.

তমাকাসং ফরিত্ৰান, পৰত্তমানসং পন;

তঞ্চ ৰিঞ্ঞাণমিচ্চেৰং, কত্তব্বং মনসা বহুং.

১০০১.

আৰজ্জনঞ্চ কত্তব্বং, তথা তক্কাহতম্পি চ;

‘‘অনন্ত’’ন্তি ‘‘অনন্ত’’ন্তি, কাতব্বং মনসা নিধ.

১০০২.

তস্মিং পন নিমিত্তস্মিং, ৰিচারেন্তস্স মানসং;

উপচারেন তং চিত্তং, সমাধিযতি যোগিনো.

১০০৩.

আসেৰতি চ ভাৰেতি, তং নিমিত্তং পুনপ্পুনং;

তস্স চেৰং করোন্তস্স, সতিসম্পন্নচেতসো.

১০০৪.

আকাসং ফুসৰিঞ্ঞাণে, দুতিযারুপ্পমানসং;

অপ্পেতি অপ্পনা যস্মিং, নযো ৰুত্তনযোৰ সো.

১০০৫.

আকাসোযমনন্তোতি, এৰমাকাসমেৰ তং;

ফরিত্ৰা পৰত্তৰিঞ্ঞাণং, ‘‘ৰিঞ্ঞাণঞ্চ’’ন্তি ৰুচ্চতি.

১০০৬.

মনক্কারৰসেনাপি, অনন্তং পরিদীপিতং;

‘‘ৰিঞ্ঞাণানন্ত’’মিচ্চেৰ, ৰত্তব্বং পনিদং সিযা.

১০০৭.

অথ ¶ ভাৰেতুকামেন, ততিযারুপ্পমানসং;

সুচিণ্ণৰসিনা হুত্ৰা, দুতিযারুপ্পমানসে.

১০০৮.

আসন্নপঠমারুপ্প-চিত্তপচ্চত্থিকন্তি চ;

ততিযারুপ্পচিত্তংৰ, ন চ সন্তমিদন্তি চ.

১০০৯.

এৰমাদীনৰং দিস্ৰা, দুতিযারুপ্পমানসে;

নিকন্তিং পরিযাদায, ততিযং সন্ততো পন.

১০১০.

এৰং মনসি কত্ৰান, কাতব্বো মনসা পুন;

পঠমারুপ্পৰিঞ্ঞাণা-ভাৰো তস্সেৰ সুঞ্ঞতো.

১০১১.

তং ¶ ¶ পনাকাসৰিঞ্ঞাণং, অকত্ৰা মনসা পুন;

‘‘নত্থি নত্থী’’তি ৰাতেন, ‘‘সুঞ্ঞং সুঞ্ঞ’’ন্তি ৰা ততো.

১০১২.

আৰজ্জিতব্বমেৰঞ্হি, কত্তব্বং মনসাপি চ;

তক্কাহতঞ্চ কাতব্বং, পুনপ্পুনংৰ ধীমতা.

১০১৩.

তস্মিং নিমিত্তে তস্সেৰং, ৰিচারেন্তস্স মানসং;

সতি তিট্ঠতি ভিয্যোপি, সমাধিযতি মানসং.

১০১৪.

আসেৰতি চ ভাৰেতি, তং নিমিত্তং পুনপ্পুনং;

তস্স চেৰং করোন্তস্স, সতিসম্পন্নচেতসো.

১০১৫.

কসিণুগ্ঘাটিমাকাসং, ফরিত্ৰান সমন্ততো;

ৰিঞ্ঞাণস্স পৰত্তস্স, নত্থিভাৰে অভাৰকে.

১০১৬.

ততিযারুপ্পৰিঞ্ঞাণং,

তং পনাপ্পেতি যোগিনো;

অপ্পনায নযোপেত্থ,

হোতি ৰুত্তনযোৰ সো.

১০১৭.

আকাসগতৰিঞ্ঞাণং, দুতিযারুপ্পচক্খুনা;

পস্সন্তো ৰিহরিত্ৰান, ‘‘নত্থি নত্থী’’তিআদিনা.

১০১৮.

পরিকম্মমনক্কারে ¶ , তস্মিং অন্তরহিতে পন;

তস্সাপগমমত্তংৰ, পস্সন্তো ৰসতী চ সো.

১০১৯.

সন্নিপাতং যথা কোচি, দিস্ৰা সঙ্ঘস্স কত্থচি;

গতে সঙ্ঘে তু তং ঠানং, সুঞ্ঞমেৰানুপস্সতি.

১০২০.

পুন ভাৰেতুকামেন, চতুত্থারুপ্পমানসং;

সুচিণ্ণৰসিনা হুত্ৰা, ততিযারুপ্পমানসে.

১০২১.

আসন্নদুতিযারুপ্প-চিত্তপচ্চত্থিকন্তি চ;

চতুত্থারুপ্পচিত্তংৰ, ন চ সন্তমিদন্তি চ.

১০২২.

এৰমাদীনৰং ¶ দিস্ৰা, ততিযারুপ্পমানসে;

নিকন্তিং পরিযাদায, চতুত্থং সন্ততো পন.

১০২৩.

এৰং মনসি কত্ৰান, পুন তত্থেৰ ধীমতা;

অভাৰারম্মণং কত্ৰা, সম্পৰত্তমিদং মনো.

১০২৪.

‘‘সন্তং সন্তমিদং চিত্ত’’-মিচ্চেৰং তং পুনপ্পুনং;

হোতি আৰজ্জিতব্বঞ্চ, কাতব্বং মনসাপি চ.

১০২৫.

তস্মিং নিমিত্তে তস্সেৰং, ৰিচারেন্তস্স মানসং;

সতি তিট্ঠতি ভিয্যোপি, সমাধিযতি মানসং.

১০২৬.

আসেৰতি চ ভাৰেতি, তং নিমিত্তং পুনপ্পুনং;

তস্স চেৰং করোন্তস্স, সতিসম্পন্নচেতসো.

১০২৭.

ততিযারুপ্পসঙ্খাত-খন্ধেসু চ চতূসুপি;

চতুত্থারুপ্পৰিঞ্ঞাণং, তং পনাপ্পেতি যোগিনো.

১০২৮.

অপ্পনায ¶ নযোপেত্থ, হেট্ঠা ৰুত্তনযূপমো;

অপিচেত্থ ৰিসেসোযং, ৰেদিতব্বো ৰিভাৰিনা.

১০২৯.

‘‘অহো সন্তা ৰতায’’ন্তি, সমাপত্তি পদিস্সতি;

যা পনাভাৰমত্তম্পি, কত্ৰা ঠস্সতি গোচরং.

১০৩০.

সন্তারম্মণতাযেৰ, ‘‘সন্তায’’ন্তি ৰিপস্সতি;

সন্ততো চে মনক্কারো, কথঞ্চ সমতিক্কমো.

১০৩১.

অনাপজ্জিতুকামত্তা ¶ , হোতেৰ সমতিক্কমো;

‘‘সমাপজ্জামহমেত’’-মিচ্চাভোগো ন ৰিজ্জতি.

১০৩২.

সন্ততো তং করোন্তো হি, মনসা সুখুমং পরং;

অসঞ্ঞং পন দুব্বল্যং, পাপুণাতি মহগ্গতং.

১০৩৩.

নেৰসঞ্ঞী চ নাসঞ্ঞী,

যায সঞ্ঞায হোতি সো;

ন ¶ কেৰলং তু সঞ্ঞাৰ,

এদিসী অথ খো পন.

১০৩৪.

এৰমেৰ ভৰন্তেত্থ, সুখুমা ৰেদনাদযো;

পত্তমক্খনতেলেন, মগ্গস্মিং উদকেন চ.

১০৩৫.

সাৰেতব্বো অযং অত্থো, চতুত্থারুপ্পবোধনে;

পটুসঞ্ঞায কিচ্চস্স, নেৰক্করণতো অযং.

১০৩৬.

‘‘নেৰসঞ্ঞা’’তি নিদ্দিট্ঠা, চতুত্থারুপ্পসম্ভৰা;

পটুসঞ্ঞায কিচ্চং সা, কাতুং সক্কোতি নেৰ চ.

১০৩৭.

যথা দহনকিচ্চং তু, তেজোধাতু সুখোদকে;

সা সঙ্খারাৰসেসত্তা, সুখুমত্তেন ৰিজ্জতি;

তস্মা পন চ সা সঞ্ঞা, ‘‘নাসঞ্ঞা’’তি পৰুচ্চতি.

১০৩৮.

এতা হি রূপমাকাসং,

ৰিঞ্ঞাণং তদভাৰকং;

অতিক্কমিত্ৰা কমতো,

চতস্সো হোন্তি আহ চ.

১০৩৯.

‘‘আরম্মণাতিক্কমতো, চতস্সোপি ভৰন্তিমা;

অঙ্গাতিক্কমমেতাসং, ন ইচ্ছন্তি ৰিভাৰিনো.

১০৪০.

সুপণীততরা ¶ হোন্তি,

পচ্ছিমা পচ্ছিমা ইধ;

উপমা তত্থ ৰিঞ্ঞেয্যা,

পাসাদতলসাটিকা’’তি.

১০৪১.

সঙ্খেপেন মযারুপ্প-সমাপত্তিনযো অযং;

দস্সিতো দস্সিতো সুদ্ধ-দস্সিনা পিযদস্সিনা.

১০৪২.

রূপারূপজ্ঝানসমাপত্তিৰিধানং ¶ ,

জানাতিমং সারতরং যো পন ভিক্খু;

রূপারূপজ্ঝানসমাপত্তীসু দক্খো,

রূপারূপং যাতি ভৰং সো অভিভুয্য.

ইতি অভিধম্মাৰতারে অরূপাৰচরসমাধিভাৰনানিদ্দেসো নাম

পন্নরসমো পরিচ্ছেদো.

১৬. সোল়সমো পরিচ্ছেদো

অভিঞ্ঞানিদ্দেসো

১০৪৩.

ইতো ¶ পরং করিস্সামি, পঞ্ঞাসুদ্ধিকরং পরং;

পঞ্চন্নম্পি অভিঞ্ঞানং, মুখমত্তনিদস্সনং.

১০৪৪.

রূপারূপসমাপত্তী,

নিব্বত্তেত্ৰা পনট্ঠপি;

লোকিকাপি অভিঞ্ঞাযো,

ভাৰেতব্বা ৰিভাৰিনা.

১০৪৫.

চতুত্থজ্ঝানমত্তেপি, সুচিণ্ণৰসিনা সতা;

অনুযোগমভিঞ্ঞাসু, কাতুং ৰত্ততি যোগিনো.

১০৪৬.

অভিঞ্ঞা ¶ নাম ভিক্খূনং, সাভিঞ্ঞানং অনুত্তরো;

অলঙ্কারো হি তাণন্তি, সত্থন্তি চ পৰুচ্চতি.

১০৪৭.

নিব্বত্তিতাস্ৰভিঞ্ঞাসু, যোগাৰচরভিক্খুনা;

সমাধিভাৰনা হিস্স, তদা নিট্ঠঙ্গতা সিযা.

১০৪৮.

দিব্বানি ¶ চক্খুসোতানি, ইদ্ধিচিত্তৰিজাননং;

পুব্বেনিৰাসঞাণন্তি, পঞ্চাভিঞ্ঞা ইমা সিযুং.

১০৪৯.

কসিণানুলোমতাদীহি, চতুদ্দসনযেহি চ;

দমেতব্বমভিঞ্ঞাযো, পত্তুকামেন মানসং.

১০৫০.

দন্তে সমাহিতে সুদ্ধে, পরিযোদাতে অনঙ্গণে;

নুপক্লেসে মুদুভূতে, কম্মনীযে ঠিতাচলে.

১০৫১.

ইতি অট্ঠঙ্গসম্পন্নে, চিত্তে ইদ্ধিৰিধায চ;

অভিনীহরতি চে চিত্তং, সিজ্ঝতিদ্ধিৰিকুব্বনং.

১০৫২.

অভিঞ্ঞাপাদকজ্ঝানং, সমাপজ্জ ততো পন;

ৰুট্ঠায হি সতং ৰাপি, সহস্সং ৰা যদিচ্ছতি.

১০৫৩.

‘‘সতং হোমি সতং হোমী’’-চ্চেৰং কত্ৰান মানসং;

অভিঞ্ঞাপাদকজ্ঝানং, সমাপজ্জ ততো পন.

১০৫৪.

ৰুট্ঠায পুনধিট্ঠাতি,

সহাধিট্ঠানচেতসা;

সতং হোতি হি সো যোগী,

সহস্সাদীস্ৰযং নযো.

১০৫৫.

পাদকজ্ঝানচিত্তং তু, নিমিত্তারম্মণং সিযা;

পরিকম্মমনানেত্থ, সতারম্মণিকানি তু.

১০৫৬.

তদাধিট্ঠানচিত্তম্পি ¶ , সতারম্মণমেৰ তং;

পুব্বে ৰুত্তপ্পনাচিত্তং, ৰিয গোত্রভুনন্তরং.

১০৫৭.

তমেকং ¶ জাযতে তত্থ, চতুত্থজ্ঝানিকং মনো;

পরিকম্মৰিসেসোৰ, সেসং পুব্বসমং ইধ.

ইদ্ধিৰিধঞাণং.

১০৫৮.

দিব্বসোতমিদং ¶ তত্থ, ভাৰেতব্বং কথং সিযা;

অভিঞ্ঞাপাদকজ্ঝানং, সমাপজ্জ ততো পুন.

১০৫৯.

ৰুট্ঠায পরিকম্মেন, কামাৰচরচেতসা;

সদ্দো আৰজ্জিতব্বোৰ, মহন্তো সুখুমোপি চ.

১০৬০.

তস্সেৰং পন সদ্দস্স, নিমিত্তং মনসি কুব্বতো;

দিব্বসোতমিদানিস্স, উপ্পজ্জিস্সতি তং ইতি.

১০৬১.

সদ্দেস্ৰঞ্ঞতরং সদ্দং, কত্ৰা আরম্মণং ততো;

উপ্পজ্জিত্ৰা নিরুদ্ধে তু, মনোদ্ৰারাৰজ্জনে পুন.

১০৬২.

জৰনানি হি জাযন্তে, তস্স চত্তারি পঞ্চ ৰা;

পুরিমানেত্থ চিত্তেসু, তীণি চত্তারি ৰা পন.

১০৬৩.

পরিকম্মোপচারানু-লোমগোত্রভুনামকা;

চতুত্থং পঞ্চমং ৰাপি, অপ্পনাচিত্তমীরিতং.

১০৬৪.

সহজাতং তু যং ঞাণং, অপ্পনামানসেন হি;

তং ঞাণং দিব্বসোতন্তি, ৰদন্তি সুতকোৰিদা.

১০৬৫.

থামজাতং করোন্তেন, তং ঞাণং তেন যোগিনা;

‘‘এত্থন্তরগতং সদ্দং, সুণামী’’তি চ চেতসা.

১০৬৬.

অঙ্গুলং দ্ৰঙ্গুলং ভিয্যো,

ৰিদত্থি রতনং তথা;

গামো দেসো ততো যাৰ,

চক্কৰাল়া ততো পরং.

১০৬৭.

ইচ্চেৰং তু পরিচ্ছিজ্জ, ৰড্ঢেতব্বং যথাক্কমং;

এসো অধিগতাভিঞ্ঞো, পাদকারম্মণেন তু.

১০৬৮.

ফুট্ঠোকাসগতে ¶ সদ্দে, সব্বে পন সুণাতি সো;

সুণন্তো পাটিযেক্কম্পি, সল্লক্খেতুং পহোতি সো.

দিব্বসোতঞাণং.

১০৬৯.

কথং ¶ পনুপ্পাদেতব্বং, চেতোপরিযমানসং;

দিব্বচক্খুৰসেনেৰ, ইদং ঞাণং পনিজ্ঝতি.

১০৭০.

আলোকং পন ৰড্ঢেত্ৰা, তস্মা দিব্বেন চক্খুনা;

হদযং পন নিস্সায, ৰত্তমানং তু লোহিতং.

১০৭১.

দিস্ৰা পরস্স ৰিঞ্ঞেয্যং,

হোতি চিত্তং তু ভিক্খুনা;

সোমনস্সযুতে চিত্তে,

লোহিতং লোহিতং সিযা.

১০৭২.

দোমনস্সযুতে চিত্তে, ৰত্তমানে তু কাল়কং;

উপেক্খাসহিতে চিত্তে, তিলতেলূপমং সিযা.

১০৭৩.

তস্মা ¶ পরস্স সত্তস্স, দিস্ৰা হদযলোহিতং;

চেতোপরিযঞাণং তং, কাতব্বং থামতং গতং.

১০৭৪.

এৰং থামগতে তস্মিং, যথানুক্কমতো পন;

চিত্তমেৰ ৰিজানাতি, ৰিনা লোহিতদস্সনং.

১০৭৫.

কামাৰচরচিত্তঞ্চ, রূপারূপেসু মানসং;

সব্বমেৰ ৰিজানাতি, সরাগাদিপ্পভেদকং.

চেতোপরিযঞাণং.

১০৭৬.

পুব্বেনিৰাসঞাণেন, কত্তব্বা তদনুস্সতি;

তং সম্পাদেতুকামেন, আদিকম্মিকভিক্খুনা;

ঝানানি পন চত্তারি, সমাপজ্জানুপুব্বতো.

১০৭৭.

অভিঞ্ঞাপাদকজ্ঝানা, ৰুট্ঠায হি ততো পুন;

ভিক্খুনা ৰজ্জিতব্বাৰ, নিসজ্জা সব্বপচ্ছিমা.

১০৭৮.

ততো ¶ ¶ পভুতি সব্বম্পি, পটিলোমক্কমা পন;

সব্বমাৰজ্জিতব্বং তং, দিৰসে রত্তিযং কতং.

১০৭৯.

পটিলোমক্কমেনেৰ, দুতিযে ততিযেপি চ;

দিৰসে পক্খমাসেসু, তথা সংৰচ্ছরেসুপি.

১০৮০.

যাৰ অস্মিং ভৰে সন্ধি, তাৰ তেন চ ভিক্খুনা;

কতমাৰজ্জিতব্বং তং, পুরিমস্মিং ভৰেপি চ.

১০৮১.

চুতিক্খণেপি নিব্বত্তং, নামরূপঞ্চ সাধুকং;

এৰমাৰজ্জিতে তস্মিং, নামরূপে যদা পন.

১০৮২.

তদেৰারম্মণং কত্ৰা, নামরূপং চুতিক্খণে;

মনোদ্ৰারে মনক্কারো, উপ্পজ্জতি তদা পন.

১০৮৩.

আৰজ্জনে নিরুদ্ধস্মিং, তদেৰারম্মণং পন;

কত্ৰা জৰনচিত্তানি, হোন্তি চত্তারি পঞ্চ ৰা;

পুব্বে ৰুত্তনযেনেৰ, সেসং ঞেয্যং ৰিভাৰিনা.

১০৮৪.

পরিকম্মাদিনামানি, পুরিমানি ভৰন্তি তু;

পচ্ছিমং অপ্পনাচিত্তং, রূপাৰচরিকং ভৰে.

১০৮৫.

তেন চিত্তেন যং ঞাণং, সংযুত্তং তেন যা পন;

সংযুত্তা সতি সা পুব্বে-নিৰাসানুস্সতীরিতা.

পুব্বেনিৰাসানুস্সতিঞাণং.

১০৮৬.

রূপং পস্সিতুকামেন, ভিক্খুনা দিব্বচক্খুনা;

কসিণারম্মণং ঝানং, অভিঞ্ঞাপাদকং পন.

১০৮৭.

অভিনীহারক্খমং কত্ৰা, তেজোকসিণমেৰ ৰা;

ওদাতকসিণং ৰাপি, আলোককসিণম্পি ৰা.

১০৮৮.

ইমেসু ¶ কতপুঞ্ঞেহি, কসিণেসু চ তীসুপি;

আলোককসিণং এত্থ, সেট্ঠন্তি পরিদীপিতং.

১০৮৯.

তস্মা ¶ ¶ তমিতরং ৰাপি, উপ্পাদেত্ৰা যথাক্কমং;

উপচারভূমিযংযেৰ, ঠত্ৰা তং পন পণ্ডিতো.

১০৯০.

ৰড্ঢেত্ৰান ঠপেতব্বং, ন উপ্পাদেয্য অপ্পনং;

উপ্পাদেতি সচে হোতি, পাদকজ্ঝাননিস্সিতং.

১০৯১.

ঝানস্স ৰড্ঢিতস্সন্তো-গতং রূপং তু যোগিনা;

পস্সিতব্বং ভৰে রূপং, পস্সতো পন তস্স তং.

১০৯২.

পরিকম্মস্স ৰারো হি, অতিক্কমতি তাৰদে;

আলোকোপি ততো তস্স, খিপ্পমন্তরধাযতি.

১০৯৩.

তস্মিং অন্তরহিতে রূপ-গতম্পি চ ন দিস্সতি;

তেনাথ পাদকজ্ঝানং, পৰিসিত্ৰা ততো পুন.

১০৯৪.

ৰুট্ঠায পন আলোকো, ফরিতব্বোৰ ভিক্খুনা;

এৰং অনুক্কমেনেৰ, আলোকো থামৰা সিযা.

১০৯৫.

‘‘আলোকো এত্থ হোতূ’’তি,

যত্তকং ঠানমেৰ সো;

পরিচ্ছিন্দতি তত্থেৰ,

আলোকো পন তিট্ঠতি.

১০৯৬.

দিৰসম্পি নিসীদিত্ৰা, পস্সতো হোতি দস্সনং;

তিণুক্কায গতো মগ্গং, পুরিসেত্থ নিদস্সনং.

১০৯৭.

উপ্পাদনক্কমোপিস্স, তত্রাযং দিব্বচক্খুনো;

ৰুত্তপ্পকাররূপং তং, কত্ৰা আরম্মণং পন.

১০৯৮.

মনোদ্ৰারে মনক্কারে, জাতে যানি তদেৰ চ;

রূপং আরম্মণং কত্ৰা, জাযন্তি জৰনানি হি.

১০৯৯.

কামাৰচরচিত্তানি ¶ , তানি চত্তারি পঞ্চ ৰা;

হেট্ঠা ৰুত্তনযেনেৰ, সেসং ঞেয্যং ৰিভাৰিনা.

১১০০.

অত্থসাধকচিত্তং তং, চতুত্থজ্ঝানিকং মতং;

তংচিত্তসংযুতং ঞাণং, দিব্বচক্খুন্তি ৰুচ্চতি.

১১০১.

অনাগতংসঞাণস্স ¶ , যথাকম্মুপগস্স চ;

পরিকম্মং ৰিসুং নত্থি, ইজ্ঝন্তি দিব্বচক্খুনা.

১১০২.

চুতূপপাতঞাণম্পি, দিব্বচক্খুন্তি ৰা পন;

অত্থতো একমেৰেদং, ব্যঞ্জনে পন নানতা.

দিব্বচক্খুঞাণং.

১১০৩.

যোধ সুণাতি করোতি চ চিত্তে,

গন্থমিমং পরমং পন ভিক্খু;

সো অভিধম্মমহণ্ণৰপারং,

যাতি অনেন তরেন তরিত্ৰা.

ইতি অভিধম্মাৰতারে অভিঞ্ঞানিদ্দেসো নাম

সোল়সমো পরিচ্ছেদো.

১৭. সত্তরসমো পরিচ্ছেদো

অভিঞ্ঞারম্মণনিদ্দেসো

১১০৪.

অনাগতংসঞাণঞ্চ ¶ , যথাকম্মুপগম্পি চ;

পঞ্চ ইদ্ধিৰিধাদীনি, সত্তাভিঞ্ঞা ইমা পন.

১১০৫.

এতাসং ¶ পন সত্তন্নং, অভিঞ্ঞানমিতো পরং;

পৰক্খামি সমাসেন, আরম্মণৰিনিচ্ছযং.

১১০৬.

আরম্মণত্তিকা ৰুত্তা, যে চত্তারো মহেসিনা;

সত্তন্নমেত্থ ঞাণানং, সম্পৰত্তিং সুণাথ মে.

১১০৭.

তত্থ ইদ্ধিৰিধঞাণং, পরিত্তাদীসু সত্তসু;

আরম্মণৰিভাগেসু, পৰত্ততি কথং পন.

১১০৮.

কাযেনাদিস্সমানেন, গন্তুকামো যদাভৰে;

চিত্তসন্নিস্সিতং কত্ৰা, কাযং চিত্তৰসেন তং.

১১০৯.

মহগ্গতে ¶ চ চিত্তস্মিং, সমারোপেতি সো তদা;

কাযারম্মণতো ঞাণং, পরিত্তারম্মণং সিযা.

১১১০.

দিস্সমানেন কাযেন, গন্তুকামো যদা ভৰে;

কাযসন্নিস্সিতং কত্ৰা, চিত্তং কাযৰসেন তং.

১১১১.

পাদকজ্ঝানচিত্তং তং, কাযে রোপেতি সো তদা;

ঝানারম্মণতো ঞাণং, তং মহগ্গতগোচরং.

১১১২.

অনাগতমতীতঞ্চ, করোতি ৰিসযং যদা;

অতীতারম্মণং হোতি, তদানাগতগোচরং.

১১১৩.

কাযেন দিস্সমানেন, গমনে পন ভিক্খুনো;

পচ্চুপ্পন্নো ভৰে তস্স, গোচরোতি ৰিনিদ্দিসে.

১১১৪.

কাযং চিত্তৰসেনাপি, চিত্তং কাযৰসেন ৰা;

পরিণামনকালস্মিং, অজ্ঝত্তারম্মণং সিযা.

১১১৫.

বহিদ্ধারম্মণং হোতি, বহিদ্ধারূপদস্সনে;

এৰমিদ্ধিৰিধং ঞাণং, সম্পৰত্ততি সত্তসু.

১১১৬.

পচ্চুপ্পন্নে পরিত্তে চ, বহিদ্ধজ্ঝত্তিকেসুপি;

চতূস্ৰেতেসু ধম্মেসু, দিব্বসোতং পৰত্ততি.

১১১৭.

পচ্চুপ্পন্নো ¶ ¶ পরিত্তো চ, সদ্দো আরম্মণং যতো;

পরিত্তারম্মণং পচ্চু-প্পন্নারম্মণতং গতং.

১১১৮.

অত্তনো কুচ্ছিসদ্দস্স, সৰনেপি পরস্স চ;

অজ্ঝত্তারম্মণঞ্চেৰ, বহিদ্ধারম্মণম্পি চ.

১১১৯.

চেতোপরিযঞাণম্পি, পরিত্তাদীসু অট্ঠসু;

আরম্মণৰিভাগেসু, পৰত্ততি কথং পন.

১১২০.

পরিত্তারম্মণং হোতি, পরিত্তানং পজাননে;

জাননে মজ্ঝিমানং তু, তং মহগ্গতগোচরং.

১১২১.

জাননে পন মগ্গস্স, ফলস্সাপি পজাননে;

তদা পনস্স ঞাণস্স, অপ্পমাণোৰ গোচরো.

১১২২.

তং ¶ মগ্গারম্মণং হোতি, মগ্গচিত্তস্স জাননে;

পরিযাযেনেৰেতস্স, মগ্গারম্মণতা মতা.

১১২৩.

অতীতে সত্তদিৰস-ব্ভন্তরে চ যদা পন;

অনাগতে তথা সত্ত-দিৰসব্ভন্তরেপি চ.

১১২৪.

পরেসং পন চিত্তস্স, জাননে সমুদীরিতং;

অতীতারম্মণঞ্চেৰ, তদানাগতগোচরং.

১১২৫.

কথঞ্চ পন তং পচ্চুপ্পন্নগোচরতং গতং;

পচ্চুপ্পন্নং তিধা ৰুত্তং, খণসন্ততিঅদ্ধতো.

১১২৬.

তত্থ তিক্খণসম্পত্তং, পচ্চুপ্পন্নখণাদিকং;

একদ্ৰেসন্ততিৰারপরিযাপন্নমিদং পন.

১১২৭.

সন্ততিপচ্চুপ্পন্নন্তি, আহু সন্ততিকোৰিদা;

একব্ভৰপরিচ্ছিন্নং, পচ্চুপ্পন্নন্তি পচ্ছিমং.

১১২৮.

খণাদিকত্তযং পচ্চু-প্পন্নং তমাহু কেচিধ;

চেতোপরিযঞাণস্স, হোতি আরম্মণং ইতি.

১১২৯.

যথা ¶ চ পুপ্ফমুট্ঠিম্হি, উক্খিত্তে গগনে পন;

অৰস্সং একমেকস্স, ৰণ্টং ৰণ্টেন ৰিজ্ঝতি.

১১৩০.

এৰং মহাজনস্সাপি, চিত্তে আৰজ্জিতে পন;

একস্স চিত্তমেকেন, অৰস্সং পন ৰিজ্ঝতি.

১১৩১.

যেনাৰজ্জতি চিত্তেন, যেন জানাতি চেতসা;

তেসং দ্ৰিন্নং সহট্ঠানা-ভাৰতো তং ন যুজ্জতি.

১১৩২.

জৰনাৰজ্জনানং তু, নানারম্মণপত্তিতো;

অনিট্ঠে পন হি ঠানে, অযুত্তন্তি পকাসিতং.

১১৩৩.

তস্মা সন্ততিঅদ্ধান-পচ্চুপ্পন্নানমেৰ তু;

ৰসেন পচ্চুপ্পন্নং তং, হোতি আরম্মণং ইদং.

১১৩৪.

পচ্চুপ্পন্নম্পি অদ্ধাখ্যং, ইদং জৰনৰারতো;

দীপেতব্বন্তি নিদ্দিট্ঠং, তত্রাযং দীপনানযো.

১১৩৫.

যদা ¶ ¶ পরস্স চিত্তঞ্হি, ঞাতুমাৰজ্জতিদ্ধিমা;

আৰজ্জনমনো তস্স, পচ্চুপ্পন্নখণৰ্হযং.

১১৩৬.

আরম্মণং তদা কত্ৰা, তেন সদ্ধিং নিরুজ্ঝতি;

জৰনানি হি জাযন্তে, তস্স চত্তারি পঞ্চ ৰা.

১১৩৭.

এতেসং পচ্ছিমং চিত্তং, ইদ্ধিচিত্তমুদীরিতং;

কামাৰচরচিত্তানি, সেসানীতি ৰিনিদ্দিসে.

১১৩৮.

এতেসং পন সব্বেসং, নিরুদ্ধং তু তদেৰ চ;

চিত্তং আরম্মণং হোতি, তস্মা সব্বানি তানিপি.

১১৩৯.

একারম্মণতং যন্তি, ন নানারম্মণানি হি;

অদ্ধাৰসা ভৰে পচ্চু-প্পন্নারম্মণতো পন.

১১৪০.

একারম্মণভাৰেপি, ইদ্ধিমানসমেৰ চ;

পরস্স চিত্তং জানাতি, নেতরানি যথা পন.

১১৪১.

চক্খুদ্ৰারে ¶ তু ৰিঞ্ঞাণং, রূপং পস্সতি নেতরং;

এৰমেৰ চ তং ইদ্ধি-চিত্তমেৰ চ জানাতি.

১১৪২.

পরচিত্তারম্মণত্তা, বহিদ্ধারম্মণং সিযা;

চেতোপরিযঞাণম্পি, অট্ঠস্ৰেৰ পৰত্ততি.

১১৪৩.

পুব্বেনিৰাসঞাণম্পি, পরিত্তাদীসু অট্ঠসু;

আরম্মণৰিভাগেসু, পৰত্ততি কথং পন.

১১৪৪.

কামাৰচরখন্ধানং, সমনুস্সরণে পন;

পরিত্তারম্মণংযেৰ, হোতীতি পরিদীপযে.

১১৪৫.

রূপাৰচরিকারুপ্পখন্ধানুস্সরণে পন;

ভৰতীতি হি ঞাতব্বং, তং মহগ্গতগোচরং.

১১৪৬.

অতীতে অত্তনা মগ্গং, ভাৰিতং তু ফলম্পি ৰা;

সমনুস্সরতো এৰ-প্পমাণারম্মণং সিযা.

১১৪৭.

সমনুস্সরতো মগ্গং, মগ্গারম্মণমেৰ তং;

অতীতারম্মণংযেৰ, হোতি একন্ততো ইদং.

১১৪৮.

চেতোপরিযঞাণম্পি ¶ , যথাকম্মুপগম্পি চ;

অতীতারম্মণা হোন্তি, কিঞ্চাপি অথ খো পন.

১১৪৯.

চেতোপরিযঞাণস্স, সত্তদ্দিৰসব্ভন্তরং;

অতীতং চিত্তমেৰস্স, আরম্মণমুদীরিতং.

১১৫০.

অতীতে চেতনামত্তং, যথাকম্মুপগস্সপি;

পুব্বেনিৰাসঞাণস্স, নত্থি কিঞ্চি অগোচরং.

১১৫১.

অজ্ঝত্তারম্মণং অত্ত-খন্ধানুস্সরণে সিযা;

বহিদ্ধারম্মণং অঞ্ঞ-খন্ধানুস্সরণে ভৰে.

১১৫২.

সরণে নামগোত্তস্স, তং নৰত্তব্বগোচরং;

পুব্বেনিৰাসঞাণম্পি, অট্ঠস্ৰেৰ পৰত্ততি.

১১৫৩.

পচ্চুপ্পন্নে ¶ পরিত্তে চ, বহিদ্ধজ্ঝত্তিকেসুপি;

চতূস্ৰেতেসু ধম্মেসু, দিব্বচক্খু পৰত্ততি.

১১৫৪.

দিব্বসোতসমং ¶ দিব্ব-চক্খুআরম্মণক্কমে;

রূপং সদ্দোতি দ্ৰিন্নং তু, অযমেৰ ৰিসেসতা.

১১৫৫.

অনাগতংসঞাণম্পি, পরিত্তাদীসু অট্ঠসু;

আরম্মণৰিভাগেসু, পৰত্ততি কথং পন.

১১৫৬.

নিব্বত্তিস্সতি যং কামা-ৰচরেতি পজানতো;

পরিত্তারম্মণং হোতি, রূপারূপেস্ৰনাগতে.

১১৫৭.

নিব্বত্তিস্সতি যঞ্চাপি, সিযা মহগ্গতগোচরং;

ভাৰেস্সতি অযং মগ্গং, ফলং সচ্ছিকরিস্সতি.

১১৫৮.

এৰং পজাননে অপ্প-মাণারম্মণতং ভৰে;

মগ্গং ভাৰেস্সতিচ্চেৰ, জাননে মগ্গগোচরং.

১১৫৯.

একন্তেন ইদং ঞাণং, হোতানাগতগোচরং;

চেতোপরিযং তু কিঞ্চাপি, হোতানাগতগোচরং.

১১৬০.

অথ খো পন তং সত্ত-দিৰসব্ভন্তরং পন;

চিত্তমেৰ চ জানাতি, ন হি তং অঞ্ঞগোচরং.

১১৬১.

অনাগতংসঞাণস্স ¶ , অনাগতংসগোচরং;

‘‘অহং দেৰো ভৰিস্সামি’’-চ্চেৰমজ্ঝত্তগোচরং.

১১৬২.

‘‘তিস্সো ফুস্সো অমুত্রাযং,

নিব্বত্তিস্সতিনাগতে’’;

ইচ্চেৰং জাননে তস্স,

বহিদ্ধারম্মণং সিযা.

১১৬৩.

জাননে নামগোত্তস্স, যস্স কস্সচিনাগতে;

পুব্বেনিৰাসঞাণংৰ, তং নৰত্তব্বগোচরং.

১১৬৪.

যথাকম্মুপগঞাণং ¶ , পরিত্তাদীসু পঞ্চসু;

আরম্মণৰিভাগেসু, পৰত্ততি কথং পন.

১১৬৫.

জাননে কামকম্মস্স, পরিত্তারম্মণং সিযা;

তথা মহগ্গতকম্মস্স, তং মহগ্গতগোচরং.

১১৬৬.

অতীতমেৰ জানাতি, তস্মা চাতীতগোচরং;

অজ্ঝত্তারম্মণং হোতি, অত্তনো কম্মজাননে.

১১৬৭.

বহিদ্ধারম্মণং হোতি, পরকম্মপজাননে;

এৰং পৰত্তি ঞাতব্বা, যথাকম্মুপগস্সপি.

১১৬৮.

সত্তন্নম্পি অভিঞ্ঞানং, ৰুত্তো আরম্মণক্কমো;

এত্থ ৰুত্তনযেনেৰ, ৰেদিতব্বো ৰিভাৰিনা.

১১৬৯.

ৰিৰিধত্থৰণ্ণপদেহি সম্পন্নং,

মধুরত্থমতিনীহরং গন্থং;

সোতুজনস্স হদযপীতিকরং,

সুণেয্য কোচি মনুজো সচেতনো.

ইতি অভিধম্মাৰতারে অভিঞ্ঞারম্মণনিদ্দেসো নাম

সত্তরসমো পরিচ্ছেদো.

১৮. অট্ঠারসমো পরিচ্ছেদো

দিট্ঠিৰিসুদ্ধিনিদ্দেসো

১১৭০.

সমাধিং ¶ ¶ পন সাভিঞ্ঞং, ভাৰেত্ৰা তদনন্তরং;

ভাৰেতব্বা যতো পঞ্ঞা, ভিক্খুনা তেন ধীমতা.

১১৭১.

ততোহং ¶ দানি ৰক্খামি, পঞ্ঞাভাৰনমুত্তমং;

সমাসেনেৰ ভিক্খূনং, পরং পীতিসুখাৰহং.

১১৭২.

কা পঞ্ঞা পন কো চত্থো,

কিমস্সা লক্খণাদিকং;

কতিধা সা কথং তেন,

ভাৰেতব্বাতি ৰুচ্চতে. –

১১৭৩.

পঞ্ঞা ৰিপস্সনাপঞ্ঞা, পুঞ্ঞচিত্তসমাযুতা;

পজানাতীতি পঞ্ঞা সা, জাননা ৰা পকারতো.

১১৭৪.

সঞ্ঞাৰিঞ্ঞাণপঞ্ঞানং, কো ৰিসেসো কিমন্তরং;

সঞ্ঞাৰিঞ্ঞাণপঞ্ঞানং, জাননত্তে সমেপি চ.

১১৭৫.

যা সঞ্জাননমত্তংৰ, সঞ্ঞা নীলাদিতো পন;

লক্খণপ্পটিৰেধং তু, কাতুং সক্কোতি নেৰ সা.

১১৭৬.

ৰিঞ্ঞাণং পন জানাতি, নীলপীতাদিগোচরং;

সক্কোতিপি অনিচ্চাদিলক্খণং পটিৰিজ্ঝিতুং.

১১৭৭.

উস্সক্কিত্ৰা ন সক্কোতি, মগ্গং পাপেতুমেৰ তং;

পঞ্ঞা ৰুত্তনযং কাতুং, সক্কোতি তিৰিধম্পি তং.

১১৭৮.

ইমেসং পন তিণ্ণম্পি, ৰিসেসো সমুদীরিতো;

সব্বেসং পন ধম্মানং, সভাৰপটিৰেধনং.

১১৭৯.

লক্খণং পন পঞ্ঞায, লক্খণঞ্ঞূহি দীপিতং;

সম্মোহনন্ধকারস্স, ৰিদ্ধংসনরসা মতা.

১১৮০.

অসম্মোহপচ্চুপট্ঠানা ¶ , সমাধাসন্নকারণা;

এৰমেত্থ চ ৰিঞ্ঞেয্যা, পঞ্ঞায লক্খণাদিকা.

কতিধাতি ¶ এত্থ –

১১৮১.

লক্খণেনেকধা ৰুত্তা,

লোকিকালোকিকা দ্ৰিধা;

লোকিযেনেত্থ মগ্গেন,

যুত্তা সা লোকিকা সিযা.

১১৮২.

লোকুত্তরেন ¶ মগ্গেন, যুত্তা লোকুত্তরা মতা;

তিৰিধাপি সিযা পঞ্ঞা, চিন্তাসুতমযাদিতো.

১১৮৩.

তত্থত্তনোৰ চিন্তায, নিপ্ফন্নত্তাতি তস্স সা;

হোতি চিন্তামযা পঞ্ঞা, ভূরিপঞ্ঞেন দেসিতা.

১১৮৪.

পরতো পন সুত্ৰান, লদ্ধা পঞ্ঞা অযং ইধ;

সুতেনেৰ চ নিপ্ফন্না, পঞ্ঞা সুতমযা মতা.

১১৮৫.

যথা ৰাপি তথা চেত্থ, ভাৰনায ৰসেন তু;

নিপ্ফন্না অপ্পনাপত্তা, পঞ্ঞা সা ভাৰনামযা.

১১৮৬.

পটিসম্ভিদাচতুক্কস্স, ৰসেন চতুধা সিযা;

অত্থধম্মনিরুত্তীসু, ঞাণং ঞাণেসু তীসুপি.

১১৮৭.

যং কিঞ্চি পচ্চযুপ্পন্নং, ৰিপাকা চ ক্রিযা তথা;

নিব্বানং ভাসিতত্থো চ, পঞ্চেতে অত্থসঞ্ঞিতা.

১১৮৮.

ফলনিব্বত্তকো হেতু, অরিযমগ্গো চ ভাসিতং;

কুসলাকুসলঞ্চেতি, পঞ্চেতে ধম্মসঞ্ঞিতা.

১১৮৯.

তস্মিং অত্থে চ ধম্মে চ, যা সভাৰনিরুত্তি তু;

নিরুত্তীতি চ নিদ্দিট্ঠা, নিরুত্তিকুসলেন সা.

১১৯০.

ঞাণং আরম্মণং কত্ৰা, তিৰিধং পচ্চৰেক্খতো;

তেসু ঞাণেসু যং ঞাণং, পটিভানন্তি তং মতং.

১১৯১.

পরিযত্তিপরিপুচ্ছাহি ¶ ¶ , সৰনাধিগমেহি চ;

পুব্বযোগেন গচ্ছন্তি, পভেদং পটিসম্ভিদা.

কথং ভাৰেতব্বাতি এত্থ –

১১৯২.

খন্ধাদীসু হি ধম্মেসু, ভূমিভূতেসু যোগিনা;

উগ্গহাদিৰসেনেত্থ, কত্ৰা পরিচযং পন.

১১৯৩.

সীলং চিত্তৰিসুদ্ধিঞ্চ, সম্পাদেত্ৰা ততো পরং;

দিট্ঠিসুদ্ধাদযো পঞ্চ, সম্পাদেন্তেন সুদ্ধিযা.

১১৯৪.

তায পঞ্ঞায যুত্তেন, ভীতেন জননাদিতো;

ভাৰেতব্বা ভৰাভাৰং, পত্থযন্তেন ভিক্খুনা.

১১৯৫.

রূপঞ্চ ৰেদনা সঞ্ঞা, সঙ্খারা চেৰ সব্বসো;

ৰিঞ্ঞাণঞ্চেতি পঞ্চেতে, খন্ধা সম্বুদ্ধদেসিতা.

১১৯৬.

তত্থ যং কিঞ্চি রূপং তং, অতীতানাগতাদিকং;

অজ্ঝত্তং ৰা বহিদ্ধা ৰা, সুখুমোল়ারিকম্পি ৰা.

১১৯৭.

হীনং ৰাপি পণীতং ৰা, যং দূরে যঞ্চ সন্তিকে;

সব্বং তমেকতো কত্ৰা, রূপক্খন্ধোতি ৰুচ্চতি.

১১৯৮.

ইতরেসুপি যং কিঞ্চি, তং ৰেদযিতলক্খণং;

সব্বং তমেকতো কত্ৰা, ৰেদনাক্খন্ধতা কতা.

১১৯৯.

চিত্তজং ¶ পন যং কিঞ্চি, তং সঞ্জাননলক্খণং;

সব্বং তমেকতো কত্ৰা, সঞ্ঞাক্খন্ধোতি ৰুচ্চতি.

১২০০.

যং কিঞ্চি চিত্তসম্ভূতং, অভিসঙ্খারলক্খণং;

সব্বং তমেকতো কত্ৰা, সঙ্খারক্খন্ধতা কতা.

১২০১.

তত্থ চিত্তং তু যং কিঞ্চি, তং ৰিজাননলক্খণং;

সব্বং তমেকতো কত্ৰা, ৰিঞ্ঞাণক্খন্ধতা কতা.

১২০২.

চত্তারো ¶ চ মহাভূতা, উপাদা চতুৰীসতি;

অট্ঠৰীসতিধা চেতং, রূপং রূপন্তি গণ্হতি.

১২০৩.

একাসীতিযা ¶ চিত্তেন, সংযুত্তা ৰেদনাদযো;

ৰেদনাসঞ্ঞাসঙ্খার-ৰিঞ্ঞাণক্খন্ধসঞ্ঞিতা.

১২০৪.

চত্তারোরূপিনো খন্ধে, নামন্তি পরিগণ্হতি;

রূপক্খন্ধো ভৰে রূপং, নামক্খন্ধা অরূপিনো.

১২০৫.

রুপ্পনলক্খণং রূপং, নামং নমনলক্খণং;

ইতি সঙ্খেপতো নাম-রূপং সো পরিগণ্হতি.

১২০৬.

ফালেন্তো ৰিয তালস্স, কন্দং তু যমকং দ্ৰিধা;

ৰৰত্থপেতি নামঞ্চ, রূপঞ্চাতি দ্ৰিধা পন.

১২০৭.

নামতো রূপতো অঞ্ঞো,

সত্তো ৰা পুগ্গলোপি ৰা;

অত্তা ৰা কোচি নত্থীতি,

নিট্ঠং গচ্ছতি সব্বদা.

১২০৮.

এৰং ৰৰত্থপেত্ৰা সো, নামরূপং সভাৰতো;

সত্তসম্মোহঘাতত্থং, বহুসুত্তৰসেনিধ.

১২০৯.

নামরূপমত্তঞ্ঞেৰ, নত্থি কোচিধ পুগ্গলো;

এৰমেত্থ পণ্ডিতো পোসো, ৰৰত্থপেতি তং পন.

ৰুত্তং হেতং –

১২১০.

‘‘যথাপি অঙ্গসম্ভারা,

হোতি সদ্দো রথো ইতি;

এৰং খন্ধেসু সন্তেসু,

হোতি সত্তোতি সম্মুতী’’তি.

১২১১.

যথাপি ¶ দারুযন্তম্পি, নিজ্জীৰঞ্চ নিরীহকং;

দারুরজ্জুসমাযোগে, তং গচ্ছতিপি তিট্ঠতি.

১২১২.

তথেদং নামরূপম্পি, নিজ্জীৰঞ্চ নিরীহকং;

অঞ্ঞমঞ্ঞসমাযোগে, তং গচ্ছতিপি তিট্ঠতি.

তেনাহু পোরাণা –

১২১৩.

‘‘নামঞ্চ ¶ রূপঞ্চ ইধত্থি সচ্চতো,

ন হেত্থ সত্তো মনুজো চ ৰিজ্জতি;

সুঞ্ঞং ইদং যন্তমিৰাভিসঙ্খতং,

দুক্খস্স পুঞ্জো তিণকট্ঠসাদিসো’’তি.

১২১৪.

অঞ্ঞমঞ্ঞূপনিস্সায ¶ , দণ্ডকেসু ঠিতেসু হি;

একস্মিং পতমানে তু, তথেৰ পততীতরো.

তেনাহু পোরাণা –

১২১৫.

‘‘যমকং নামরূপঞ্চ, উভো অঞ্ঞোঞ্ঞনিস্সিতা;

একস্মিং ভিজ্জমানস্মিং, উভো ভিজ্জন্তি পচ্চযা’’তি.

১২১৬.

উতিন্নং নামরূপানং, নামং নিত্তেজমেত্থ তং;

সকেনেৰ হি তেজেন, ন সক্কোতি পৰত্তিতুং.

১২১৭.

ন ব্যাহরতি নো সেতি, ন তিট্ঠতি ন গচ্ছতি;

ন ভেদেতি ন চোরেতি, ন ভুঞ্জতি ন খাদতি.

১২১৮.

তথা রূপম্পি নিত্তেজং, ৰিনা নামঞ্চ সব্বথা;

সকেনেৰ হি তেজেন, ন সক্কোতি পৰত্তিতুং.

১২১৯.

ভুঞ্জামীতি পিৰামীতি, খাদামীতি তথেৰ চ;

রোদামীতি হসামীতি, রূপস্সেতং ন ৰিজ্জতি.

১২২০.

নামং ¶ নিস্সায রূপং তু, রূপং নিস্সায নামকং;

পৰত্ততি সদা সব্বং, পঞ্চৰোকারভূমিযং.

১২২১.

ইমস্স পন অত্থস্স, আৰিভাৰত্থমেৰ চ;

জচ্চন্ধপীঠসপ্পীনং, ৰত্তব্বা উপমা ইধ.

১২২২.

যথা হি নাৰং নিস্সায, মনুস্সা যন্তি অণ্ণৰে;

এৰং রূপম্পি নিস্সায, নামকাযো পৰত্ততি.

১২২৩.

যথা ¶ মনুস্সে নিস্সায, নাৰা গচ্ছতি অণ্ণৰে;

এৰং নামম্পি নিস্সায, রূপকাযো পৰত্ততি.

১২২৪.

সত্তসঞ্ঞং ৰিনোদেত্ৰা, নামরূপস্স সব্বথা;

যাথাৰদস্সনং এতং, ‘‘দিট্ঠিসুদ্ধী’’তি ৰুচ্চতি.

১২২৫.

পরিমুচ্চিতুকামো চ, দুক্খতো জাতিআদিতো;

অন্তদ্ৰযং ৰিৰজ্জেত্ৰা, ভাৰযে পন পণ্ডিতো.

১২২৬.

দিট্ঠিৰিসুদ্ধিমিমং পরিসুদ্ধং,

সুট্ঠুতরং তু করোতি নরো যো;

দিট্ঠিগতানি মলানি অসেসং,

নাসমুপেন্তি হি তস্স নরস্স.

ইতি অভিধম্মাৰতারে দিট্ঠিৰিসুদ্ধিনিদ্দেসো নাম

অট্ঠারসমো পরিচ্ছেদো.

১৯. একূনৰীসতিমো পরিচ্ছেদো

কঙ্খাৰিতরণৰিসুদ্ধিনিদ্দেসো

১২২৭.

এতস্স ¶ ¶ নামরূপস্স, জানিত্ৰা হেতুপচ্চযে;

কঙ্খা তীসু পনদ্ধাসু, ৰিতরিত্ৰা ঠিতং পন.

১২২৮.

কঙ্খাৰিতরণং নাম, ঞাণং তং সমুদীরিতং;

তং সম্পাদেতুকামেন, অত্থকামেন ভিক্খুনা.

১২২৯.

নামরূপস্স কো হেতু, কোনু ৰা পচ্চযো ভৰে;

আৰজ্জিত্ৰা তমিচ্চেৰং, রূপকাযস্স তাৰদে.

১২৩০.

কেসা লোমা নখা দন্তা, তচো মংসং নহারু চ;

অট্ঠিমিঞ্জঞ্চ ৰক্কঞ্চ, হদযং যকনম্পি চ.

১২৩১.

ইচ্চেৰমাদিবাত্তিংস-কোট্ঠাসপচ্চযস্স হি;

পরিগ্গণ্হতি কাযস্স, মনসা হেতুপচ্চযে.

১২৩২.

অৰিজ্জা ¶ তণ্হুপাদানং, কম্মং হেতু চতুব্বিধো;

এতস্স রূপকাযস্স, আহারো পচ্চযো মতো.

১২৩৩.

জনকো হেতু অক্খাতো,

পচ্চযো অনুপালকো;

হেত্ৰঙ্কুরস্স বীজং তু,

পচ্চযা পথৰাদযো.

১২৩৪.

ইতিমে পঞ্চ ধম্মা হি, হেতুপচ্চযতং গতা;

অৰিজ্জাদযো তযো তত্থ, মাতাৰ উপনিস্সযা.

১২৩৫.

জনকং পন কম্মং তু, পুত্তস্স হি পিতা ৰিয;

ধাতী ৰিয কুমারস্স, আহারো ধারকো ভৰে.

১২৩৬.

ইচ্চেৰং ¶ রূপকাযস্স, সো পচ্চযপরিগ্গহং;

কত্ৰা পুনপি ‘‘চক্খুঞ্চ, রূপমালোকমেৰ চ.

১২৩৭.

পটিচ্চ চক্খুৰিঞ্ঞাণং, হোতি’’ইচ্চেৰমাদিনা;

নযেন নামকাযস্স, পচ্চযং পরিগণ্হতি.

১২৩৮.

সো এৰং নামরূপস্স, ৰুত্তিং দিস্ৰান পচ্চযা;

যথা এতরহিদং তু, অতীতেপি তথেৰিদং.

১২৩৯.

পচ্চযা চ পৰত্তিত্থ, তথেৰানাগতেপি চ;

পৰত্তিস্সতি অদ্ধাসু, তীস্ৰেৰং অনুপস্সতি.

১২৪০.

তস্সেৰং ¶ পস্সতো যা সা, পুব্বন্তে পঞ্চধা তথা;

অপরন্তে সিযা কঙ্খা, পঞ্চধা সমুদীরিতা.

১২৪১.

পচ্চুপ্পন্নেপি অদ্ধানে, ছব্বিধা পরিকিত্তিতা;

সব্বা চানৰসেসাৰ, যোগিনো সা পহিয্যতি.

১২৪২.

একো কম্মৰিপাকানং, ৰসেনাপি চ পণ্ডিতো;

এতস্স নামরূপস্স, পচ্চযং পরিগণ্হতি.

১২৪৩.

কম্মং চতুব্বিধং দিট্ঠ-ধম্মৰেদনিযং তথা;

উপপজ্জাপরাপরিযা-হোসিকম্মৰসা পন.

তত্থ ¶ একজৰনৰীথিযং সত্তসু চিত্তেসু কুসলা ৰা অকুসলা ৰা পঠমজৰনচেতনা দিট্ঠধম্মৰেদনীযকম্মং নাম. তং ইমস্মিংযেৰ অত্তভাৰে ৰিপাকং দেতি, তথা অসক্কোন্তং পন ‘‘অহোসিকম্মং নাহোসি কম্মৰিপাকো, ন ভৰিস্সতি কম্মৰিপাকো, নত্থি কম্মৰিপাকো’’তি ইমস্স তিকস্স ৰসেন অহোসিকম্মং নাম হোতি. অত্থসাধিকা পন সত্তমজৰনচেতনা উপপজ্জৰেদনীযকম্মং নাম. তমনন্তরে অত্তভাৰে ৰিপাকং দেতি, তথা অসক্কোন্তং ৰুত্তনযেন অহোসিকম্মং নাম হোতি. উভিন্নমন্তরে পঞ্চজৰনচেতনা অপরাপরিযৰেদনীযকম্মং নাম. তমনাগতে যদা ওকাসং লভতি, তদা ৰিপাকং দেতি, সতি সংসারপ্পৰত্তিযা অহোসিকম্মং নাম ন হোতি.

১২৪৪.

অপরং ¶ চতুব্বিধং কম্মং, গরুকং বহুলম্পি চ;

আসন্নঞ্চ কটত্তা চ, কম্মন্তি সমুদীরিতং.

১২৪৫.

অঞ্ঞং চতুব্বিধং কম্মং, জনকং উপথম্ভকং;

তথূপপীল়কং কম্ম-মুপঘাতকমেৰ চ.

তত্থ জনকং নাম কুসলং ৰা অকুসলং ৰা কম্মং পটিসন্ধিযম্পি পৰত্তেপি রূপারূপৰিপাকক্খন্ধে জনেতি. উপত্থম্ভকং পন ৰিপাকং জনেতুং ন সক্কোতি, অঞ্ঞেন কম্মেন দিন্নায পটিসন্ধিযা জনিতে ৰিপাকে উপ্পজ্জনকসুখদুক্খং উপত্থম্ভেতি, অদ্ধানং পৰত্তেতি. উপপীল়কং পন অঞ্ঞেন কম্মেন দিন্নায পটিসন্ধিযা জনিতে ৰিপাকে উপ্পজ্জনকসুখদুক্খং পীল়েতি বাধতি, অদ্ধানং পৰত্তিতুং ন দেতি. উপঘাতকং পন সযং কুসলম্পি অকুসলম্পি সমানং ¶ অঞ্ঞং দুব্বলকম্মং ঘাতেত্ৰা তস্স ৰিপাকং পটিবাহিত্ৰা অত্তনো ৰিপাকস্স ওকাসং করোতি. এৰং পন কম্মেন ওকাসে কতে তংৰিপাকমুপ্পন্নং নাম হোতি. ইতি ইমং দ্ৰাদসৰিধং কম্মং কম্মৰট্টে পক্খিপিত্ৰা ¶ এৰমেকো কম্মৰিপাকৰসেন নামরূপস্স পচ্চযপরিগ্গহং করোতি.

ইতি এৰং কম্মৰিপাকৰট্টৰসেন নামরূপস্স পৰত্তিং দিস্ৰা ‘‘যথা ইদং এতরহি, এৰমতীতেপি অদ্ধানে কম্মৰিপাকৰসেন পচ্চযতো পৰত্তিত্থ, অনাগতেপি পৰত্তিস্সতী’’তি ইতি কম্মঞ্চেৰ ৰিপাকো চাতি কম্মৰিপাকৰসেন লোকো পৰত্ততীতি তং সমনুপস্সতি. তস্সেৰং সমনুপস্সতো সব্বা সোল়সৰিধা কঙ্খা পহিয্যতি.

১২৪৬.

হেতুফলস্স সম্বন্ধৰসেনেৰ পৰত্ততি;

কেৰলং নামরূপন্তি, সম্মা সমনুপস্সতি.

১২৪৭.

এৰং কারণতো উদ্ধং, কারণং ন চ পস্সতি;

পাকপৰত্তিতো উদ্ধং, ন পাকপটিৰেদকং.

তেনাহু পোরাণা –

১২৪৮.

‘‘কম্মস্স কারকো নত্থি, ৰিপাকস্স চ ৰেদকো;

সুদ্ধধম্মা পৰত্তন্তি, এৰেতং সম্মদস্সনং.

১২৪৯.

এৰং ¶ কম্মে ৰিপাকে চ, ৰত্তমানে সহেতুকে;

বীজরুক্খাদিকানংৰ, পুব্বা কোটি ন নাযতি.

১২৫০.

অনাগতেপি সংসারে, অপ্পৰত্তি ন দিস্সতি;

এতমত্থমনঞ্ঞায, তিত্থিযা অসযংৰসী.

১২৫১.

সত্তসঞ্ঞং গহেত্ৰান, সস্সতুচ্ছেদদস্সিনো;

দ্ৰাসট্ঠিদিট্ঠিং গণ্হন্তি, অঞ্ঞমঞ্ঞৰিরোধিনো.

১২৫২.

দিট্ঠিবন্ধনবদ্ধা তে, তণ্হাসোতেন ৰুয্হরে;

তণ্হাসোতেন ৰুয্হন্তা, ন তে দুক্খা পমুচ্চরে.

১২৫৩.

এৰমেতং অভিঞ্ঞায, ভিক্খু বুদ্ধস্স সাৰকো;

গম্ভীরং নিপুণং সুঞ্ঞং, পচ্চযং পটিৰিজ্ঝতি.

১২৫৪.

কম্মং ¶ নত্থি ৰিপাকম্হি, পাকো কম্মে ন ৰিজ্জতি;

অঞ্ঞমঞ্ঞং উভো সুঞ্ঞা, ন চ কম্মং ৰিনা ফলং.

১২৫৫.

যথা ন সূরিযে অগ্গি, ন মণিম্হি ন গোমযে;

ন তেসং বহি সো অত্থি, সম্ভারেহি চ জাযতি.

১২৫৬.

তথা ন অন্তো কম্মস্স, ৰিপাকো উপলব্ভতি;

বহিদ্ধাপি ন কম্মস্স, ন কম্মং তত্থ ৰিজ্জতি.

১২৫৭.

ফলেন ¶ সুঞ্ঞং তং কম্মং, ফলং কম্মে ন ৰিজ্জতি;

কম্মঞ্চ খো উপাদায, ততো নিব্বত্ততে ফলং.

১২৫৮.

ন হেত্থ দেৰো ব্রহ্মা ৰা,

সংসারস্সত্থি কারকো;

সুদ্ধধম্মা পৰত্তন্তি,

হেতুসম্ভারপচ্চযা’’তি.

১২৫৯.

এৰং নানপ্পকারেহি, নামরূপস্স পচ্চযং;

পরিগ্গহেত্ৰা অদ্ধাসু, তরিত্ৰা কঙ্খমুট্ঠিতং.

১২৬০.

কঙ্খাৰিতরণং ¶ নাম, ঞাণং তং সমুদীরিতং;

ধম্মট্ঠিতি যথাভূতং, তং সম্মাদস্সনন্তিপি.

১২৬১.

ইমিনা পন ঞাণেন,

সংযুত্তো বুদ্ধসাসনে;

হোতি লদ্ধপতিট্ঠোৰ,

সোতাপন্নো হি চূল়কো.

১২৬২.

তস্মা সপঞ্ঞো পন অত্থকামো,

যো নামরূপস্স হেতুপচ্চযানি;

পরিগ্গহং সাধু করোতি ধীরো,

খিপ্পং স নিব্বানপুরং উপেতি.

ইতি অভিধম্মাৰতারে কঙ্খাৰিতরণৰিসুদ্ধিনিদ্দেসো নাম

একূনৰীসতিমো পরিচ্ছেদো.

২০. ৰীসতিমো পরিচ্ছেদো

মগ্গামগ্গঞাণদস্সনৰিসুদ্ধিনিদ্দেসো

১২৬৩.

কলাপসম্মসনেনেৰ ¶ ¶ ,

যোগো করণিযো সিযা;

মগ্গামগ্গে তু ঞাণং ত-

মধিগন্তুং পনিচ্ছতা.

১২৬৪.

পচ্চুপ্পন্নস্স ধম্মস্স, নিব্বত্তি উদযো মতো;

ৰযো ৰিপরিণামোতি, তস্সেৰ সমুদীরিতা.

১২৬৫.

অনুপস্সনাপি ¶ ঞাণন্তি, ৰরঞাণেন দেসিতং;

সো পনেৰং পজানাতি, যোগাৰচরমাণৰো.

১২৬৬.

ইমস্স নামরূপস্স, পুব্বে উপ্পত্তিতো পন;

নিচযো রাসি ৰা নত্থি, তথা উপ্পজ্জতোপি চ.

১২৬৭.

রাসিতো নিচযা ৰাপি, নত্থি আগমনন্তি চ;

তথা নিরুজ্ঝমানস্স, ন দিসাগমনন্তি চ.

১২৬৮.

নিরুদ্ধস্সাপি একস্মিং, ঠানে নত্থি চযোতি চ;

এত্থ ৰীণূপমা ৰুত্তা, এতস্সত্থস্স দীপনে.

১২৬৯.

উদব্বযমনক্কারমেৰং সঙ্খেপতো পন;

কত্ৰা তস্সেৰ ঞাণস্স, ৰিভঙ্গস্স ৰসেন তু.

১২৭০.

‘‘অৰিজ্জাসমুদযা রূপসমুদযো’’তি হি আদিনা;

নযেনেকেকখন্ধস্স, উদযব্বযদস্সনে.

১২৭১.

দস দসাতি কত্ৰান, ৰুত্তা পঞ্ঞাসলক্খণা;

তেসং পন ৰসেনাপি, ধম্মে সমনুপস্সতি.

১২৭২.

এৰং রূপুদযো হোতি, এৰমস্স ৰযো ইতি;

উদেতি এৰং রূপম্পি, এৰং রূপং তু ৰেতি চ.

১২৭৩.

এৰং ¶ পচ্চযতোপেত্থ, খণতো উদযব্বযং;

পস্সতো সব্বধম্মা চ, পাকটা হোন্তি তস্স তে.

১২৭৪.

উদকে দণ্ডরাজীৰ, আরগ্গেরিৰ সাসপো;

ৰিজ্জুপ্পাদাৰ ধম্মা তে, পরিত্তট্ঠাযিনো সিযুং.

১২৭৫.

কদলীসুপিনালাতচক্কমাযুপমা ইমে;

অসারা পন নিস্সারা, হুত্ৰা খাযন্তি যোগিনো.

১২৭৬.

এৰমেত্তাৰতা ¶ তেন, উদযব্বযদস্সনং;

লক্খণানি চ পঞ্ঞাস, পটিৰিজ্ঝ ঠিতং পন.

১২৭৭.

ঞাণং ¶ অধিগতং হোতি, তরুণং পঠমং পন;

যস্স চাধিগমা যোগী, হোতারদ্ধৰিপস্সকো.

১২৭৮.

ৰিপস্সনায হেতায,

করুণাযাথ যোগিনো;

ৰিপস্সকস্স জাযন্তে,

উপক্লেসা দসেৰিমে.

১২৭৯.

ওভাসো পীতি পস্সদ্ধি, ঞাণং সদ্ধা সতী সুখং;

উপেক্খা ৰীরিযং নিকন্তীতি, উপক্লেসা দসেৰিমে.

১২৮০.

সম্পত্তপটিৰেধস্স, সোতাপন্নাদিনোপি চ;

তথা ৰিপ্পটিপন্নস্স, উপক্লেসা ন জাযরে.

১২৮১.

সম্মাৰ পটিপন্নস্স, যুত্তযোগস্স ভিক্খুনো;

সদা ৰিপস্সকস্সেৰ, উপ্পজ্জন্তি কিরস্সু তে.

১২৮২.

ৰিপস্সনায ওভাসো, ওভাসোতি পৰুচ্চতি;

তস্মিং পন সমুপ্পন্নে, যোগাৰচরভিক্খু সো.

১২৮৩.

মগ্গপ্পত্তো ফলপ্পত্তো, অহমস্মীতি গণ্হতি;

অমগ্গংযেৰ মগ্গোতি, তস্সেৰং পন গণ্হতো.

১২৮৪.

এৰং ¶ ৰিপস্সনাৰীথি,

ওক্কন্তা নাম হোতি সা;

ওভাসমেৰ সো ভিক্খু,

অস্সাদেন্তো নিসীদতি.