📜

নমো তস্স ভগৰতো অরহতো সম্মাসম্বুদ্ধস্স

অভিধম্মত্থসঙ্গহো

গন্থারম্ভকথা

১. সম্মাসম্বুদ্ধমতুলং ¶ ¶ , সসদ্ধম্মগণুত্তমং.

অভিৰাদিয ভাসিস্সং, অভিধম্মত্থসঙ্গহং.

চতুপরমত্থধম্মো

২. তত্থ ৰুত্তাভিধম্মত্থা, চতুধা পরমত্থতো.

চিত্তং চেতসিকং রূপং, নিব্বানমিতি সব্বথা.

১. চিত্তপরিচ্ছেদো

ভূমিভেদচিত্তং

৩. তত্থ ¶ চিত্তং তাৰ চতুব্বিধং হোতি কামাৰচরং রূপাৰচরং অরূপাৰচরং লোকুত্তরঞ্চেতি.

অকুসলচিত্তং

৪. তত্থ কতমং কামাৰচরং? সোমনস্সসহগতং দিট্ঠিগতসম্পযুত্তং অসঙ্খারিকমেকং, সসঙ্খারিকমেকং, সোমনস্সসহগতং দিট্ঠিগতৰিপ্পযুত্তং অসঙ্খারিকমেকং, সসঙ্খারিকমেকং ¶ , উপেক্খাসহগতং দিট্ঠিগতসম্পযুত্তং অসঙ্খারিকমেকং, সসঙ্খারিকমেকং, উপেক্খাসহগতং দিট্ঠিগতৰিপ্পযুত্তং অসঙ্খারিকমেকং, সসঙ্খারিকমেকন্তি ইমানি অট্ঠপি লোভসহগতচিত্তানি নাম.

৫. দোমনস্সসহগতং পটিঘসম্পযুত্তং অসঙ্খারিকমেকং, সসঙ্খারিকমেকন্তি ইমানি দ্ৰেপি পটিঘসম্পযুত্তচিত্তানি নাম.

৬. উপেক্খাসহগতং ৰিচিকিচ্ছাসম্পযুত্তমেকং, উপেক্খাসহগতং উদ্ধচ্চসম্পযুত্তমেকন্তি ইমানি দ্ৰেপি মোমূহচিত্তানি নাম.

৭. ইচ্চেৰং সব্বথাপি দ্ৰাদসাকুসলচিত্তানি সমত্তানি.

৮. অট্ঠধা লোভমূলানি, দোসমূলানি চ দ্ৰিধা.

মোহমূলানি চ দ্ৰেতি, দ্ৰাদসাকুসলা সিযুং.

অহেতুকচিত্তং

৯. উপেক্খাসহগতং চক্খুৰিঞ্ঞাণং, তথা সোতৰিঞ্ঞাণং, ঘানৰিঞ্ঞাণং, জিৰ্হাৰিঞ্ঞাণং ¶ , দুক্খসহগতং কাযৰিঞ্ঞাণং, উপেক্খাসহগতং সম্পটিচ্ছনচিত্তং, উপেক্খাসহগতং সন্তীরণচিত্তঞ্চেতি ইমানি সত্তপি অকুসলৰিপাকচিত্তানি নাম.

১০. উপেক্খাসহগতং কুসলৰিপাকং চক্খুৰিঞ্ঞাণং, তথা সোতৰিঞ্ঞাণং, ঘানৰিঞ্ঞাণং, জিৰ্হাৰিঞ্ঞাণং, সুখসহগতং কাযৰিঞ্ঞাণং, উপেক্খাসহগতং সম্পটিচ্ছনচিত্তং, সোমনস্সসহগতং সন্তীরণচিত্তং, উপেক্খাসহগতং সন্তীরণচিত্তঞ্চেতি ইমানি অট্ঠপি কুসলৰিপাকাহেতুকচিত্তানি নাম.

১১. উপেক্খাসহগতং ¶ পঞ্চদ্ৰারাৰজ্জনচিত্তং, তথা মনোদ্ৰারাৰজ্জনচিত্তং, সোমনস্সসহগতং হসিতুপ্পাদচিত্তঞ্চেতি ইমানি তীণিপি অহেতুককিরিযচিত্তানি নাম.

১২. ইচ্চেৰ সব্বথাপি অট্ঠারসাহেতুকচিত্তানি সমত্তানি.

১৩. সত্তাকুসলপাকানি, পুঞ্ঞপাকানি অট্ঠধা.

ক্রিযচিত্তানি তীণীতি, অট্ঠারস অহেতুকা.

সোভনচিত্তং

১৪. পাপাহেতুকমুত্তানি, সোভনানীতি ৰুচ্চরে.

একূনসট্ঠি চিত্তানি, অথেকনৰুতীপি ৰা.

কামাৰচরসোভনচিত্তং

১৫. সোমনস্সসহগতং ঞাণসম্পযুত্তং অসঙ্খারিকমেকং, সসঙ্খারিকমেকং, সোমনস্সসহগতং ঞাণৰিপ্পযুত্তং অসঙ্খারিকমেকং, সসঙ্খারিকমেকং, উপেক্খাসহগতং ঞাণসম্পযুত্তং অসঙ্খারিকমেকং, সসঙ্খারিকমেকং. উপেক্খাসহগতং ঞাণৰিপ্পযুত্তং অসঙ্খারিকমেকং, সসঙ্খারিকমেকন্তি ইমানি অট্ঠপি কামাৰচরকুসলচিত্তানি নাম.

১৬. সোমনস্সসহগতং ঞাণসম্পযুত্তং অসঙ্খারিকমেকং, সসঙ্খারিকমেকং, সোমনস্সসহগতং ¶ ঞাণৰিপ্পযুত্তং অসঙ্খারিকমেকং, সসঙ্খারিকমেকং, উপেক্খাসহগতং ঞাণসম্পযুত্তং অসঙ্খারিকমেকং, সসঙ্খারিকমেকং, উপেক্খাসহগতং ঞাণৰিপ্পযুত্তং অসঙ্খারিকমেকং, সসঙ্খারিকমেকন্তি ইমানি অট্ঠপি সহেতুককামাৰচরৰিপাকচিত্তানি নাম.

১৭. সোমস্সসহগতং ঞাণসম্পযুত্তং অসঙ্খারিকমেকং, সসঙ্খারিকমেকং, সোমনস্সসহগতং ঞাণৰিপ্পযুত্তং অসঙ্খারিকমেকং ¶ , সসঙ্খারিকমেকং, উপেক্খাসহগতং ঞাণসম্পযুত্তং অসঙ্খারিকমেকং, সসঙ্খারিকমেকং, উপেক্খাসহগতং ঞাণৰিপ্পযুত্তং অসঙ্খারিকমেকং, সসঙ্খারিকমেকন্তি ইমানি অট্ঠপি সহেতুককামাৰচরকিরিযচিত্তানি নাম.

১৮. ইচ্চেৰং সব্বথাপি চতুৰীসতি সহেতুককামাৰচরকুসলৰিপাককিরিযচিত্তানি সমত্তানি.

১৯. ৰেদনাঞাণসঙ্খারভেদেন চতুৰীসতি.

সহেতুকামাৰচরপুঞ্ঞপাকক্রিযা মতা.

২০. কামে তেৰীস পাকানি, পুঞ্ঞাপুঞ্ঞানি ৰীসতি.

একাদস ক্রিযা চেতি, চতুপঞ্ঞাস সব্বথা.

রূপাৰচরচিত্তং

২১. ৰিতক্কৰিচারপীতিসুখেকগ্গতাসহিতং পঠমজ্ঝানকুসলচিত্তং, ৰিচারপীতিসুখেকগ্গতাসহিতং দুতিযজ্ঝানকুসলচিত্তং, পীতিসুখেকগ্গতাসহিতং ততিযজ্ঝানকুসলচিত্তং, সুখেকগ্গতাসহিতং চতুত্থজ্ঝানকুসলচিত্তং, উপেক্খেকগ্গতাসহিতং পঞ্চমজ্ঝানকুসলচিত্তঞ্চেতি ইমানি পঞ্চপি রূপাৰচরকুসলচিত্তানি নাম.

২২. ৰিতক্কৰিচারপীতিসুখেকগ্গতাসহিতং পঠমজ্ঝানৰিপাকচিত্তং, ৰিচারপীতিসুখেকগ্গতাসহিতং দুতিযজ্ঝানৰিপাকচিত্তং, পীতিসুখেকগ্গতাসহিতং ততিযজ্ঝানৰিপাকচিত্তং, সুখেকগ্গতাসহিতং ¶ চতুত্থজ্ঝানৰিপাকচিত্তং, উপেক্খেকগ্গতাসহিতং পঞ্চমজ্ঝানৰিপাকচিত্তঞ্চেতি ইমানি পঞ্চপি রূপাৰচরৰিপাকচিত্তানি নাম.

২৩. ৰিতক্কৰিচারপীতিসুখেকগ্গতাসহিতং পঠমজ্ঝানকিরিযচিত্তং, ৰিচারপীতিসুখেকগ্গতাসহিতং দুতিযজ্ঝানকিরিযচিত্তং, পীতিসুখেকগ্গতাসহিতং ততিযজ্ঝানকিরিযচিত্তং ¶ , সুখেকগ্গতাসহিতং চতুত্থজ্ঝানকিরিযচিত্তং, উপেক্খেকগ্গতাসহিতং পঞ্চমজ্ঝানকিরিযচিত্তঞ্চেতি ইমানি পঞ্চপি রূপাৰচরকিরিযচিত্তানি নাম.

২৪. ইচ্চেৰং সব্বথাপি পন্নরস রূপাৰচরকুসলৰিপাককিরিযচিত্তানি সমত্তানি.

২৫. পঞ্চধা ঝানভেদেন, রূপাৰচরমানসং.

পুঞ্ঞপাকক্রিযাভেদা, তং পঞ্চদসধা ভৰে.

অরূপাৰচরচিত্তং

২৬. আকাসানঞ্চাযতনকুসলচিত্তং, ৰিঞ্ঞাণঞ্চাযতনকুসলচিত্তং, আকিঞ্চঞ্ঞাযতনকুসলচিত্তং, নেৰসঞ্ঞানাসঞ্ঞাযতনকুসলচিত্তঞ্চেতি ইমানি চত্তারিপি অরূপাৰচরকুসলচিত্তানি নাম.

২৭. আকাসানঞ্চাযতনৰিপাকচিত্তং, ৰিঞ্ঞাণঞ্চাযতনৰিপাকচিত্তং, আকিঞ্চঞ্ঞাযতনৰিপাকচিত্তং, নেৰসঞ্ঞানাসঞ্ঞাযতনৰিপাকচিত্তঞ্চেতি ইমানি চত্তারিপি অরূপাৰচরৰিপাকচিত্তানি নাম.

২৮. আকাসানঞ্চাযতনকিরিযচিত্তং, ৰিঞ্ঞাণঞ্চাযতনকিরিযচিত্তং, আকিঞ্চঞ্ঞাযতনকিরিযচিত্তং, নেৰসঞ্ঞানাসঞ্ঞাযতনকিরিযচিত্তঞ্চেতি ইমানি চত্তারিপি অরূপাৰচরকিরিযচিত্তানি নাম.

২৯. ইচ্চেৰং সব্বথাপি দ্ৰাদস অরূপাৰচরকুসলৰিপাককিরিযচিত্তানি সমত্তানি.

৩০. আলম্বণপ্পভেদেন ¶ , চতুধারুপ্পমানসং.

পুঞ্ঞপাকক্রিযাভেদা, পুন দ্ৰাদসধা ঠিতং.

লোকুত্তরচিত্তং

৩১. সোতাপত্তিমগ্গচিত্তং ¶ , সকদাগামিমগ্গচিত্তং, অনাগামিমগ্গচিত্তং, অরহত্তমগ্গচিত্তঞ্চেতি ইমানি চত্তারিপি লোকুত্তরকুসলচিত্তানি নাম.

৩২. সোতাপত্তিফলচিত্তং, সকদাগামিফলচিত্তং, অনাগামিফলচিত্তং, অরহত্তফলচিত্তঞ্চেতি ইমানি চত্তারিপি লোকুত্তরৰিপাকচিত্তানি নাম.

৩৩. ইচ্চেৰং সব্বথাপি অট্ঠ লোকুত্তরকুসলৰিপাকচিত্তানি সমত্তানি.

৩৪. চতুমগ্গপ্পভেদেন, চতুধা কুসলং তথা.

পাকং তস্স ফলত্তাতি, অট্ঠধানুত্তরং মতং.

চিত্তগণনসঙ্গহো

৩৫. দ্ৰাদসাকুসলানেৰং, কুসলানেকৰীসতি.

ছত্তিংসেৰ ৰিপাকানি, ক্রিযচিত্তানি ৰীসতি.

৩৬. চতুপঞ্ঞাসধা কামে, রূপে পন্নরসীরযে.

চিত্তানি দ্ৰাদসারুপ্পে, অট্ঠধানুত্তরে তথা.

৩৭. ইত্থমেকূননৰুতিপভেদং পন মানসং.

একৰীসসতং ৰাথ, ৰিভজন্তি ৰিচক্খণা.

ৰিত্থারগণনা

৩৮. কথমেকূননৰুতিৰিধং ¶ চিত্তং একৰীসসতং হোতি? ৰিতক্কৰিচারপীতিসুখেকগ্গতাসহিতং পঠমজ্ঝানসোতাপত্তিমগ্গচিত্তং, ৰিচারপীতিসুখেকগ্গতাসহিতং দুতিযজ্ঝানসোতাপত্তিমগ্গচিত্তং, পীতিসুখেকগ্গতাসহিতং ততিযজ্ঝানসোতাপত্তিমগ্গচিত্তং, সুখেকগ্গতাসহিতং চতুত্থজ্ঝানসোতাপত্তিমগ্গচিত্তং, উপেক্খেকগ্গতাসহিতং পঞ্চমজ্ঝানসোতাপত্তিমগ্গচিত্তঞ্চেতি ইমানি পঞ্চপি সোতাপত্তিমগ্গচিত্তানি নাম.

৩৯. তথা ¶ সকদাগামিমগ্গঅনাগামিমগ্গঅরহত্তমগ্গচিত্তঞ্চেতি সমৰীসতি মগ্গচিত্তানি.

৪০. তথা ফলচিত্তানি চেতি সমচত্তালীস লোকুত্তরচিত্তানি ভৰন্তীতি.

৪১. ঝানঙ্গযোগভেদেন, কত্ৰেকেকন্তু পঞ্চধা.

ৰুচ্চতানুত্তরং চিত্তং, চত্তালীসৰিধন্তি চ.

৪২. যথা চ রূপাৰচরং, গয্হতানুত্তরং তথা.

পঠমাদিঝানভেদে, আরুপ্পঞ্চাপি পঞ্চমে.

একাদসৰিধং তস্মা, পঠমাদিকমীরিতং;

ঝানমেকেকমন্তে তু, তেৰীসতিৰিধং ভৰে.

৪৩. সত্ততিংসৰিধং পুঞ্ঞং, দ্ৰিপঞ্ঞাসৰিধং তথা.

পাকমিচ্চাহু চিত্তানি, একৰীসসতং বুধা.

ইতি অভিধম্মত্থসঙ্গহে চিত্তসঙ্গহৰিভাগো নাম

পঠমো পরিচ্ছেদো.

২. চেতসিকপরিচ্ছেদো

সম্পযোগলক্খণং

১. একুপ্পাদনিরোধা ¶ চ, একালম্বণৰত্থুকা.

চেতোযুত্তা দ্ৰিপঞ্ঞাস, ধম্মা চেতসিকা মতা.

অঞ্ঞসমানচেতসিকং

২. কথং? ফস্সো ৰেদনা সঞ্ঞা চেতনা একগ্গতা জীৰিতিন্দ্রিযং মনসিকারো চেতি সত্তিমে চেতসিকা সব্বচিত্তসাধারণা নাম.

৩. ৰিতক্কো ¶ ৰিচারো অধিমোক্খো ৰীরিযং পীতি ছন্দো চাতি ছ ইমে চেতসিকা পকিণ্ণকা নাম.

৪. এৰমেতে তেরস চেতসিকা অঞ্ঞসমানাতি ৰেদিতব্বা.

অকুসলচেতসিকং

৫. মোহো অহিরিকং অনোত্তপ্পং উদ্ধচ্চং লোভো দিট্ঠি মানো দোসো ইস্সা মচ্ছরিযং কুক্কুচ্চং থিনং মিদ্ধং ৰিচিকিচ্ছা চেতি চুদ্দসিমে চেতসিকা অকুসলা নাম.

সোভনচেতসিকং

৬. সদ্ধা সতি হিরী ওত্তপ্পং অলোভো অদোসো তত্রমজ্ঝত্ততা কাযপস্সদ্ধি চিত্তপস্সদ্ধি কাযলহুতা চিত্তলহুতা কাযমুদুতা চিত্তমুদুতা কাযকম্মঞ্ঞতা চিত্তকম্মঞ্ঞতা কাযপাগুঞ্ঞতা ¶ চিত্তপাগুঞ্ঞতা কাযুজুকতা চিত্তুজুকতা চেতি একূনৰীসতিমে চেতসিকা সোভনসাধারণা নাম.

৭. সম্মাৰাচা সম্মাকম্মন্তো সম্মাআজীৰো চেতি তিস্সো ৰিরতিযো নাম.

৮. করুণা মুদিতা অপ্পমঞ্ঞাযো নামাতি সব্বথাপি পঞ্ঞিন্দ্রিযেন সদ্ধিং পঞ্চৰীসতিমে চেতসিকা সোভনাতি ৰেদিতব্বা.

৯. এত্তাৰতা চ –

তেরসঞ্ঞসমানা চ, চুদ্দসাকুসলা তথা;

সোভনা পঞ্চৰীসাতি, দ্ৰিপঞ্ঞাস পৰুচ্চরে.

সম্পযোগনযো

১০. তেসং ¶ চিত্তাৰিযুত্তানং, যথাযোগমিতো পরং.

চিত্তুপ্পাদেসু পচ্চেকং, সম্পযোগো পৰুচ্চতি.

১১. সত্ত সব্বত্থ যুজ্জন্তি, যথাযোগং পকিণ্ণকা.

চুদ্দসাকুসলেস্ৰেৰ, সোভনেস্ৰেৰ সোভনা.

অঞ্ঞসমানচেতসিকসম্পযোগনযো

১২. কথং? সব্বচিত্তসাধারণা তাৰ সত্তিমে চেতসিকা সব্বেসুপি একূননৰুতিচিত্তুপ্পাদেসু লব্ভন্তি.

১৩. পকিণ্ণকেসু পন ৰিতক্কো তাৰ দ্ৰিপঞ্চৰিঞ্ঞাণৰজ্জিতকামাৰচরচিত্তেসু চেৰ একাদসসু পঠমজ্ঝানচিত্তেসু চেতি পঞ্চপঞ্ঞাসচিত্তেসু উপ্পজ্জতি.

১৪. ৰিচারো ¶ পন তেসু চেৰ একাদসসু দুতিযজ্ঝানচিত্তেসু চাতি ছসট্ঠিচিত্তেসু.

১৫. অধিমোক্খো দ্ৰিপঞ্চৰিঞ্ঞাণৰিচিকিচ্ছাসহগতৰজ্জিতচিত্তেসু.

১৬. ৰীরিযং পঞ্চদ্ৰারাৰজ্জনদ্ৰিপঞ্চৰিঞ্ঞাণসম্পটিচ্ছনসন্তীরণৰজ্জিতচিত্তেসু.

১৭. পীতি দোমনস্সুপেক্খাসহগতকাযৰিঞ্ঞাণচতুত্থজ্ঝানৰজ্জিতচিত্তেসু.

১৮. ছন্দো অহেতুকমোমূহৰজ্জিতচিত্তেসূতি.

১৯. তে পন চিত্তুপ্পাদা যথাক্কমং –

ছসট্ঠি পঞ্চপঞ্ঞাস, একাদস চ সোল়স;

সত্ততি ৰীসতি চেৰ, পকিণ্ণকৰিৰজ্জিতা.

পঞ্চপঞ্ঞাস ¶ ছসট্ঠিট্ঠসত্ততি তিসত্ততি;

একপঞ্ঞাস চেকূনসত্ততি সপকিণ্ণকা.

অকুসলচেতসিকসম্পযোগনযো

২০. অকুসলেসু পন মোহো অহিরিকং অনোত্তপ্পং উদ্ধচ্চঞ্চাতি চত্তারোমে চেতসিকা সব্বাকুসলসাধারণা নাম, সব্বেসুপি দ্ৰাদসা কুসলেসু লব্ভন্তি.

২১. লোভো অট্ঠসু লোভসহগতচিত্তেস্ৰেৰ লব্ভতি.

২২. দিট্ঠি চতূসু দিট্ঠিগতসম্পযুত্তেসু.

২৩. মানো চতূসু দিট্ঠিগতৰিপ্পযুত্তেসু.

২৪. দোসো ¶ ইস্সা মচ্ছরিযং কুক্কুচ্চঞ্চাতি দ্ৰীসু পটিঘসম্পযুত্তচিত্তেসু.

২৫. থিনমিদ্ধং পঞ্চসু সসঙ্খারিকচিত্তেসু.

২৬. ৰিচিকিচ্ছা ৰিচিকিচ্ছাসহগতচিত্তেযেৰাতি.

২৭. সব্বাপুঞ্ঞেসু চত্তারো,

লোভমূলে তযো গতা;

দোসমূলেসু চত্তারো,

সসঙ্খারে দ্ৰযং তথা.

ৰিচিকিচ্ছা ৰিচিকিচ্ছা-চিত্তে চাতি চতুদ্দস;

দ্ৰাদসাকুলেস্ৰেৰ, সম্পযুজ্জন্তি পঞ্চধা.

সোভনচেতসিকসম্পযোগনযো

২৮. সোভনেসু পন সোভনসাধারণা তাৰ একূনৰীসতিমে চেতসিকা সব্বেসুপি একূনসট্ঠিসোভনচিত্তেসু সংৰিজ্জন্তি.

২৯. ৰিরতিযো ¶ পন তিস্সোপি লোকুত্তরচিত্তেসু সব্বথাপি নিযতা একতোৰ লব্ভন্তি, লোকিযেসু পন কামাৰচরকুসলেস্ৰেৰ কদাচি সন্দিস্সন্তি ৰিসুং ৰিসুং.

৩০. অপ্পমঞ্ঞাযো পন দ্ৰাদসসু পঞ্চমজ্ঝানৰজ্জিতমহগ্গতচিত্তেসু চেৰ কামাৰচরকুসলেসু চ সহেতুককামাৰচরকিরিযচিত্তেসু চাতি অট্ঠৰীসতিচিত্তেস্ৰেৰ কদাচি নানা হুত্ৰা জাযন্তি, উপেক্খাসহগতেসু পনেত্থ করুণামুদিতা ন সন্তীতি কেচি ৰদন্তি.

৩১. পঞ্ঞা পন দ্ৰাদসসু ঞাণসম্পযুত্তকামাৰচরচিত্তেসু চেৰ সব্বেসুপি পঞ্চতিংসমহগ্গতলোকুত্তরচিত্তেসু চাতি সত্তচত্তালীসচিত্তেসু সম্পযোগং গচ্ছতীতি.

৩২. একূনৰীসতি ¶ ধম্মা, জাযন্তেকূনসট্ঠিসু.

তযো সোল়সচিত্তেসু, অট্ঠৰীসতিযং দ্ৰযং.

পঞ্ঞা পকাসিতা, সত্তচত্তালীসৰিধেসুপি;

সম্পযুত্তা চতুধেৰং, সোভনেস্ৰেৰ সোভনা.

৩৩. ইস্সামচ্ছেরকুক্কুচ্চ-ৰিরতিকরুণাদযো.

নানা কদাচি মানো চ, থিন মিদ্ধং তথা সহ.

৩৪. যথাৰুত্তানুসারেন, সেসা নিযতযোগিনো.

সঙ্গহঞ্চ পৰক্খামি, তেসং দানি যথারহং.

সঙ্গহনযো

৩৫. ছত্তিংসানুত্তরে ধম্মা, পঞ্চতিংস মহগ্গতে.

অট্ঠতিংসাপি লব্ভন্তি, কামাৰচরসোভনে.

সত্তৰীসতিপুঞ্ঞম্হি, দ্ৰাদসাহেতুকেতি চ;

যথাসম্ভৰযোগেন, পঞ্চধা তত্থ সঙ্গহো.

লোকুত্তরচিত্তসঙ্গহনযো

৩৬. কথং ¶ ? লোকুত্তরেসু তাৰ অট্ঠসু পঠমজ্ঝানিকচিত্তেসু অঞ্ঞসমানা তেরস চেতসিকা, অপ্পমঞ্ঞাৰজ্জিতা তেৰীসতি সোভনচেতসিকা চেতি ছত্তিংস ধম্মা সঙ্গহং গচ্ছন্তি, তথা দুতিযজ্ঝানিকচিত্তেসু ৰিতক্কৰজ্জা, ততিযজ্ঝানিকচিত্তেসু ৰিতক্কৰিচারৰজ্জা, চতুত্থজ্ঝানিকচিত্তেসু ৰিতক্কৰিচারপীতিৰজ্জা, পঞ্চমজ্ঝানিকচিত্তেসুপি উপেক্খাসহগতা তে এৰ সঙ্গয্হন্তীতি সব্বথাপি অট্ঠসু লোকুত্তরচিত্তেসু পঞ্চকজ্ঝানৰসেন পঞ্চধাৰ সঙ্গহো হোতীতি.

৩৭. ছত্তিংস ¶ পঞ্চতিংস চ, চতুত্তিংস যথাক্কমং.

তেত্তিংসদ্ৰযমিচ্চেৰং, পঞ্চধানুত্তরে ঠিতা.

মহগ্গতচিত্তসঙ্গহনযো

৩৮. মহগ্গতেসু পন তীসু পঠমজ্ঝানিকচিত্তেসু তাৰ অঞ্ঞসমানা তেরস চেতসিকা, ৰিরতিত্তযৰজ্জিতা দ্ৰাৰীসতি সোভনচেতসিকা চেতি পঞ্চতিংস ধম্মা সঙ্গহং গচ্ছন্তি, করুণামুদিতা পনেত্থ পচ্চেকমেৰ যোজেতব্বা, তথা দুতিযজ্ঝানিকচিত্তেসু ৰিতক্কৰজ্জা, ততিযজ্ঝানিকচিত্তেসু ৰিতক্কৰিচারৰজ্জা, চতুত্থজ্ঝানিকচিত্তেসু ৰিতক্কৰিচারপীতিৰজ্জা, পঞ্চমজ্ঝানিকচিত্তেসু পন পন্নরসসু অপ্পমঞ্ঞাযো ন লব্ভন্তীতি সব্বথাপি সত্তৰীসতিমহগ্গতচিত্তেসু পঞ্চকজ্ঝানৰসেন পঞ্চধাৰ সঙ্গহো হোতীতি.

৩৯. পঞ্চতিংস চতুত্তিংস, তেত্তিংস চ যথাক্কমং.

বাত্তিংস চেৰ তিংসেতি, পঞ্চধাৰ মহগ্গতে.

কামাৰচরসোভনচিত্তসঙ্গহনযো

৪০. কামাৰচরসোভনেসু পন কুসলেসু তাৰ পঠমদ্ৰযে অঞ্ঞসমানা তেরস চেতসিকা, পঞ্চৰীসতি সোভনচেতসিকা ¶ চেতি অট্ঠতিংস ধম্মা সঙ্গহং গচ্ছন্তি, অপ্পমঞ্ঞাৰিরতিযো পনেত্থ পঞ্চপি পচ্চেকমেৰ যোজেতব্বা, তথা দুতিযদ্ৰযে ঞাণৰজ্জিতা, ততিযদ্ৰযে ঞাণসম্পযুত্তা পীতিৰজ্জিতা, চতুত্থদ্ৰযে ঞাণপীতিৰজ্জিতা তে এৰ সঙ্গয্হন্তি. কিরিযচিত্তেসুপি ৰিরতিৰজ্জিতা তথেৰ চতূসুপি দুকেসু চতুধাৰ সঙ্গয্হন্তি. তথা ৰিপাকেসু চ অপ্পমঞ্ঞাৰিরতিৰজ্জিতা তে এৰ সঙ্গয্হন্তীতি সব্বথাপি চতুৰীসতিকামাৰচরসোভনচিত্তেসু দুকৰসেন দ্ৰাদসধাৰ সঙ্গহো হোতীতি.

৪১. অট্ঠতিংস সত্ততিংস, দ্ৰযং ছত্তিংসকং সুভে.

পঞ্চতিংস চতুত্তিংস, দ্ৰযং তেত্তিংসকং ক্রিযে;

তেত্তিংস পাকে বাত্তিংস, দ্ৰযেকতিংসকং ভৰে;

সহেতুকামাৰচরপুঞ্ঞ-পাকক্রিযামনে.

৪২. নৰিজ্জন্তেত্থ ¶ ৰিরতী, ক্রিযেসু চ মহগ্গতে.

অনুত্তরে অপ্পমঞ্ঞা, কামপাকে দ্ৰযং তথা;

অনুত্তরে ঝানধম্মা, অপ্পমঞ্ঞা চ মজ্ঝিমে;

ৰিরতী ঞাণপীতী চ, পরিত্তেসু ৰিসেসকা.

অকুসলচিত্তসঙ্গহনযো

৪৩. অকুসলেসু পন লোভমূলেসু তাৰ পঠমে অসঙ্খারিকে অঞ্ঞসমানা তেরস চেতসিকা, অকুসলসাধারণা চত্তারো চাতি সত্তরস লোভদিট্ঠীহি সদ্ধিং একূনৰীসতি ধম্মা সঙ্গহং গচ্ছন্তি.

৪৪. তথেৰ দুতিযে অসঙ্খারিকে লোভমানেন.

৪৫. ততিযে তথেৰ পীতিৰজ্জিতা লোভদিট্ঠীহি সহ অট্ঠারস.

৪৬. চতুত্থে ¶ তথেৰ লোভমানেন.

৪৭. পঞ্চমে পন পটিঘসম্পযুত্তে অসঙ্খারিকে দোসো ইস্সা মচ্ছরিযং কুক্কুচ্চঞ্চাতি চতূহি সদ্ধিং পীতিৰজ্জিতা তে এৰ ৰীসতি ধম্মা সঙ্গয্হন্তি, ইস্সামচ্ছরিযকুক্কুচ্চানি পনেত্থ পচ্চেকমেৰ যোজেতব্বানি.

৪৮. সসঙ্খারিকপঞ্চকেপি তথেৰ থিনমিদ্ধেন ৰিসেসেত্ৰা যোজেতব্বা.

৪৯. ছন্দপীতিৰজ্জিতা পন অঞ্ঞসমানা একাদস, অকুসলসাধারণা চত্তারো চাতি পন্নরস ধম্মা উদ্ধচ্চসহগতে সম্পযুজ্জন্তি.

৫০. ৰিচিকিচ্ছাসহগতচিত্তে চ অধিমোক্খৰিরহিতা ৰিচিকিচ্ছাসহগতা তথেৰ পন্নরস ¶ ধম্মা সমুপলব্ভন্তীতি সব্বথাপি দ্ৰাদসাকুসলচিত্তুপ্পাদেসু পচ্চেকং যোজিযমানাপি গণনৰসেন সত্তধাৰ সঙ্গহিতা ভৰন্তীতি.

৫১. একূনৰীসাট্ঠারস, ৰীসেকৰীস ৰীসতি.

দ্ৰাৰীস পন্নরসেতি, সত্তধা কুসলেঠিতা.

৫২. সাধারণা চ চত্তারো, সমানা চ দসাপরে.

চুদ্দসেতে পৰুচ্চন্তি, সব্বাকুসলযোগিনো.

অহেতুকচিত্তসঙ্গহনযো

৫৩. অহেতুকেসু পন হসনচিত্তে তাৰ ছন্দৰজ্জিতা অঞ্ঞসমানা দ্ৰাদস ধম্মা সঙ্গহং গচ্ছন্তি.

৫৪. তথা ৰোট্ঠব্বনে ছন্দপীতিৰজ্জিতা.

৫৫. সুখসন্তীরণে ছন্দৰীরিযৰজ্জিতা.

৫৬. মনোধাতুত্তিকাহেতুকপটিসন্ধিযুগল়ে ছন্দপীতিৰীরিযৰজ্জিতা.

৫৭. দ্ৰিপঞ্চৰিঞ্ঞাণে ¶ পকিণ্ণকৰজ্জিতা তেযেৰ সঙ্গয্হন্তীতি সব্বথাপি অট্ঠারসসু অহেতুকেসু গণনৰসেন চতুধাৰ সঙ্গহো হোতীতি.

৫৮. দ্ৰাদসেকাদস দস, সত্ত চাতি চতুব্বিধো.

অট্ঠারসাহেতুকেসু, চিত্তুপ্পাদেসু সঙ্গহো.

৫৯. অহেতুকেসু সব্বত্থ, সত্ত সেসা যথারহং.

ইতি ৰিত্থারতো ৰুত্তো, তেত্তিংসৰিধসঙ্গহো.

৬০. ইত্থং ¶ চিত্তাৰিযুত্তানং, সম্পযোগঞ্চ সঙ্গহং.

ঞত্ৰা ভেদং যথাযোগং, চিত্তেন সমমুদ্দিসে.

ইতি অভিধম্মত্থসঙ্গহে চেতসিকসঙ্গহৰিভাগো নাম

দুতিযো পরিচ্ছেদো.

৩. পকিণ্ণকপরিচ্ছেদো

১. সম্পযুত্তা যথাযোগং, তেপঞ্ঞাস সভাৰতো.

চিত্তচেতসিকা ধম্মা, তেসং দানি যথারহং.

২. ৰেদনাহেতুতো কিচ্চদ্ৰারালম্বণৰত্থুতো.

চিত্তুপ্পাদৰসেনেৰ, সঙ্গহো নাম নীযতে.

ৰেদনাসঙ্গহো

৩. তত্থ ৰেদনাসঙ্গহে তাৰ তিৰিধা ৰেদনা সুখং দুক্খং অদুক্খমসুখা চেতি, সুখং দুক্খং সোমনস্সং দোমনস্সং উপেক্খাতি চ ভেদেন পন পঞ্চধা হোতি.

৪. তত্থ সুখসহগতং কুসলৰিপাকং কাযৰিঞ্ঞাণমেকমেৰ, তথা দুক্খসহগতং অকুসলৰিপাকং.

৫. সোমনস্সসহগতচিত্তানি ¶ পন লোভমূলানি চত্তারি, দ্ৰাদস কামাৰচরসোভনানি, সুখসন্তীরণহসনানি চ দ্ৰেতি অট্ঠারস কামাৰচরসোমনস্সসহগতচিত্তানি চেৰ পঠমদুতিযততিযচতুত্থজ্ঝানসঙ্খাতানি ¶ চতুচত্তালীস মহগ্গতলোকুত্তরচিত্তানি চেতি দ্ৰাসট্ঠিৰিধানি ভৰন্তি.

৬. দোমনস্সসহগতচিত্তানি পন দ্ৰে পটিঘসম্পযুত্তচিত্তানেৰ.

৭. সেসানি সব্বানিপি পঞ্চপঞ্ঞাস উপেক্খাসহগতচিত্তানেৰাতি.

৮. সুখং দুক্খমুপেক্খাতি, তিৰিধা তত্থ ৰেদনা.

সোমনস্সং দোমনস্সমিতিভেদেন পঞ্চধা.

৯. সুখমেকত্থ দুক্খঞ্চ, দোমনস্সং দ্ৰযে ঠিতং.

দ্ৰাসট্ঠীসু সোমনস্সং, পঞ্চপঞ্ঞাসকেতরা.

হেতুসঙ্গহো

১০. হেতুসঙ্গহে হেতূ নাম লোভো দোসো মোহো অলোভো অদোসো অমোহো চাতি ছব্বিধা ভৰন্তি.

১১. তত্থ পঞ্চদ্ৰারাৰজ্জনদ্ৰিপঞ্চৰিঞ্ঞাণসম্পটিচ্ছনসন্তীরণৰোট্ঠব্বনহসনৰসেন অহেতুকচিত্তানি নাম.

১২. সেসানি সব্বানিপি একসত্ততি চিত্তানি সহেতুকানেৰ.

১৩. তত্থাপি দ্ৰে মোমূহচিত্তানি একহেতুকানি.

১৪. সেসানি দস অকুসলচিত্তানি চেৰ ঞাণৰিপ্পযুত্তানি দ্ৰাদস কামাৰচরসোভনানি চেতি দ্ৰাৰীসতি দ্ৰিহেতুকচিত্তানি.

১৫. দ্ৰাদস ¶ ¶ ঞাণসম্পযুত্তকামাৰচরসোভনানি চেৰ পঞ্চতিংস মহগ্গতলোকুত্তরচিত্তানি চেতি সত্তচত্তালীস তিহেতুকচিত্তানীতি.

১৬. লোভো দোসো চ মোহো চ,

হেতূ অকুসলা তযো;

অলোভাদোসামোহো চ,

কুসলাব্যাকতা তথা.

১৭. অহেতুকাট্ঠারসেকহেতুকা দ্ৰে দ্ৰাৰীসতি.

দ্ৰিহেতুকা মতা সত্তচত্তালীসতিহেতুকা.

কিচ্চসঙ্গহো

১৮. কিচ্চসঙ্গহে কিচ্চানি নাম পটিসন্ধিভৰঙ্গাৰজ্জনদস্সনসৰনঘাযনসাযনফুসনসম্পটিচ্ছনসন্তীরণৰোট্ঠব্বনজৰনতদারম্মণচুতিৰসেন চুদ্দসৰিধানি ভৰন্তি.

১৯. পটিসন্ধিভৰঙ্গাৰজ্জনপঞ্চৰিঞ্ঞাণঠানাদিৰসেন পন তেসং দসধা ঠানভেদো ৰেদিতব্বো.

২০. তত্থ দ্ৰে উপেক্খাসহগতসন্তীরণানি চেৰ অট্ঠ মহাৰিপাকানি চ নৰ রূপারূপৰিপাকানি চেতি একূনৰীসতি চিত্তানি পটিসন্ধিভৰঙ্গচুতিকিচ্চানি নাম.

২১. আৰজ্জনকিচ্চানি পন দ্ৰে.

২২. তথা দস্সনসৰনঘাযনসাযনফুসনসম্পটিচ্ছনকিচ্চানি চ.

২৩. তীণি সন্তীরণকিচ্চানি.

২৪. মনোদ্ৰারাৰজ্জনমেৰ ¶ পঞ্চদ্ৰারে ৰোট্ঠব্বনকিচ্চং সাধেতি.

২৫. আৰজ্জনদ্ৰযৰজ্জিতানি কুসলাকুসলফলকিরিযচিত্তানি পঞ্চপঞ্ঞাস জৰনকিচ্চানি.

২৬. অট্ঠ ¶ মহাৰিপাকানি চেৰ সন্তীরণত্তযঞ্চেতি একাদস তদারম্মণকিচ্চানি.

২৭. তেসু পন দ্ৰে উপেক্খাসহগতসন্তীরণচিত্তানি পটিসন্ধিভৰঙ্গচুতিতদারম্মণসন্তীরণৰসেন পঞ্চকিচ্চানি নাম.

২৮. মহাৰিপাকানি অট্ঠ পটিসন্ধিভৰঙ্গচুতিতদারম্মণৰসেন চতুকিচ্চানি নাম.

২৯. মহগ্গতৰিপাকানি নৰ পটিসন্ধিভৰঙ্গচুতিৰসেন তিকিচ্চানি নাম.

৩০. সোমনস্সসন্তীরণং সন্তীরণতদারম্মণৰসেন দুকিচ্চং.

৩১. তথা ৰোট্ঠব্বনং ৰোট্ঠব্বনাৰজ্জনৰসেন.

৩২. সেসানি পন সব্বানিপি জৰনমনোধাতুত্তিকদ্ৰিপঞ্চৰিঞ্ঞাণানি যথাসম্ভৰমেককিচ্চানীতি.

৩৩. পটিসন্ধাদযো নাম, কিচ্চভেদেন চুদ্দস.

দসধা ঠানভেদেন, চিত্তুপ্পাদা পকাসিতা.

৩৪. অট্ঠসট্ঠি তথা দ্ৰে চ, নৰাট্ঠ দ্ৰে যথাক্কমং.

একদ্ৰিতিচতুপঞ্চকিচ্চঠানানি নিদ্দিসে.

দ্ৰারসঙ্গহো

৩৫. দ্ৰারসঙ্গহে ¶ দ্ৰারানি নাম চক্খুদ্ৰারং সোতদ্ৰারং ঘানদ্ৰারং জিৰ্হাদ্ৰারং কাযদ্ৰারং মনোদ্ৰারঞ্চেতি ছব্বিধানি ভৰন্তি.

৩৬. তত্থ চক্খুমেৰ চক্খুদ্ৰারং.

৩৭. তথা সোতাদযো সোতদ্ৰারাদীনি.

৩৮. মনোদ্ৰারং ¶ পন ভৰঙ্গন্তি পৰুচ্চতি.

৩৯. তত্থ পঞ্চদ্ৰারাৰজ্জনচক্খুৰিঞ্ঞাণসম্পটিচ্ছনসন্তীরণৰোট্ঠব্বনকামাৰচরজৰনতদারম্মণৰসেন ছচত্তালীস চিত্তানি চক্খুদ্ৰারে যথারহং উপ্পজ্জন্তি, তথা পঞ্চদ্ৰারাৰজ্জনসোতৰিঞ্ঞাণাদিৰসেন সোতদ্ৰারাদীসুপি ছচত্তালীসেৰ ভৰন্তীতি সব্বথাপি পঞ্চদ্ৰারে চতুপঞ্ঞাস চিত্তানি কামাৰচরানেৰ.

৪০. মনোদ্ৰারে পন মনোদ্ৰারাৰজ্জনপঞ্চপঞ্ঞাসজৰনতদারম্মণৰসেন সত্তসট্ঠি চিত্তানি ভৰন্তি.

৪১. একূনৰীসতি পটিসন্ধিভৰঙ্গচুতিৰসেন দ্ৰারৰিমুত্তানি.

৪২. তেসু পন পঞ্চৰিঞ্ঞাণানি চেৰ মহগ্গতলোকুত্তরজৰনানি চেতি ছত্তিংস যথারহমেকদ্ৰারিকচিত্তানি নাম.

৪৩. মনোধাতুত্তিকং পন পঞ্চদ্ৰারিকং.

৪৪. সুখসন্তীরণৰোট্ঠব্বনকামাৰচরজৰনানি ছদ্ৰারিকচিত্তানি.

৪৫. উপেক্খাসহগতসন্তীরণমহাৰিপাকানি ¶ ছদ্ৰারিকানি চেৰ দ্ৰারৰিমুত্তানি চ.

৪৬. মহগ্গতৰিপাকানি দ্ৰারৰিমুত্তানেৰাতি.

৪৭. একদ্ৰারিকচিত্তানি, পঞ্চছদ্ৰারিকানি চ.

ছদ্ৰারিকৰিমুত্তানি, ৰিমুত্তানি চ সব্বথা.

ছত্তিংসতি তথা তীণি, একতিংস যথাক্কমং;

দসধা নৰধা চেতি, পঞ্চধা পরিদীপযে.

আলম্বণসঙ্গহো

৪৮. আলম্বণসঙ্গহে ¶ আরম্মণানি নাম রূপারম্মণং সদ্দারম্মণং গন্ধারম্মণং রসারম্মণং ফোট্ঠব্বারম্মণং ধম্মারম্মণঞ্চেতি ছব্বিধানি ভৰন্তি.

৪৯. তত্থ রূপমেৰ রূপারম্মণং, তথা সদ্দাদযো সদ্দারম্মণাদীনি.

৫০. ধম্মারম্মণং পন পসাদসুখুমরূপচিত্তচেতসিকনিব্বানপঞ্ঞত্তিৰসেন ছধা সঙ্গয্হতি.

৫১. তত্থ চক্খুদ্ৰারিকচিত্তানং সব্বেসম্পি রূপমেৰ আরম্মণং, তঞ্চ পচ্চুপ্পন্নং. তথা সোতদ্ৰারিকচিত্তাদীনম্পি সদ্দাদীনি, তানি চ পচ্চুপ্পন্নানিযেৰ.

৫২. মনোদ্ৰারিকচিত্তানং পন ছব্বিধম্পি পচ্চুপ্পন্নমতীতং অনাগতং কালৰিমুত্তঞ্চ যথারহমারম্মণং হোতি.

৫৩. দ্ৰারৰিমুত্তানঞ্চ পটিসন্ধিভৰঙ্গচুতিসঙ্খাতানং ছব্বিধম্পি যথাসম্ভৰং যেভুয্যেন ভৰন্তরে ¶ ছদ্ৰারগ্গহিতং পচ্চুপ্পন্নমতীতং পঞ্ঞত্তিভূতং ৰা কম্মকম্মনিমিত্তগতিনিমিত্তসম্মতং আরম্মণং হোতি.

৫৪. তেসু চক্খুৰিঞ্ঞাণাদীনি যথাক্কমং রূপাদিএকেকারম্মণানেৰ.

৫৫. মনোধাতুত্তিকং পন রূপাদিপঞ্চারম্মণং.

৫৬. সেসানি কামাৰচরৰিপাকানি হসনচিত্তঞ্চেতি সব্বথাপি কামাৰচরারম্মণানেৰ.

৫৭. অকুসলানি চেৰ ঞাণৰিপ্পযুত্তকামাৰচরজৰনানি চেতি লোকুত্তরৰজ্জিতসব্বারম্মণানি.

৫৮. ঞাণসম্পযুত্তকামাৰচরকুসলানি ¶ চেৰ পঞ্চমজ্ঝানসঙ্খাতং অভিঞ্ঞাকুসলঞ্চেতি অরহত্তমগ্গফলৰজ্জিতসব্বারম্মণানি.

৫৯. ঞাণসম্পযুত্তকামাৰচরকিরিযানি চেৰ কিরিযাভিঞ্ঞাৰোট্ঠব্বনঞ্চেতি সব্বথাপি সব্বারম্মণানি.

৬০. আরুপ্পেসু দুতিযচতুত্থানি মহগ্গতারম্মণানি.

৬১. সেসানি মহগ্গতচিত্তানি সব্বানিপি পঞ্ঞত্তারম্মণানি.

৬২. লোকুত্তরচিত্তানি নিব্বানারম্মণানীতি.

৬৩. পঞ্চৰীস পরিত্তম্হি, ছ চিত্তানি মহগ্গতে.

একৰীসতি ৰোহারে, অট্ঠ নিব্বানগোচরে.

ৰীসানুত্তরমুত্তম্হি ¶ , অগ্গমগ্গফলুজ্ঝিতে;

পঞ্চ সব্বত্থ ছচ্চেতি, সত্তধা তত্থ সঙ্গহো.

ৰত্থুসঙ্গহো

৬৪. ৰত্থুসঙ্গহে ৰত্থূনি নাম চক্খুসোতঘানজিৰ্হাকাযহদযৰত্থু চেতি ছব্বিধানি ভৰন্তি.

৬৫. তানি কামলোকে সব্বানিপি লব্ভন্তি.

৬৬. রূপলোকে পন ঘানাদিত্তযং নত্থি.

৬৭. অরূপলোকে পন সব্বানিপি ন সংৰিজ্জন্তি.

৬৮. তত্থ পঞ্চৰিঞ্ঞাণধাতুযো যথাক্কমং একন্তেন পঞ্চ পসাদৰত্থূনি নিস্সাযেৰ পৰত্তন্তি.

৬৯. পঞ্চদ্ৰারাৰজ্জনসম্পটিচ্ছনসঙ্খাতা পন মনোধাতু চ হদযং নিস্সিতাযেৰ পৰত্তন্তি.

৭০. অৰসেসা ¶ পন মনোৰিঞ্ঞাণধাতুসঙ্খাতা চ সন্তীরণমহাৰিপাকপটিঘদ্ৰযপঠমমগ্গহসনরূপাৰচরৰসেন হদযং নিস্সাযেৰ পৰত্তন্তি.

৭১. অৰসেসা কুসলাকুসলকিরিযানুত্তরৰসেন পন নিস্সায ৰা অনিস্সায ৰা.

৭২. আরুপ্পৰিপাকৰসেন হদযং অনিস্সাযেৰাতি.

৭৩. ছৰত্থুং ¶ নিস্সিতা কামে, সত্ত রূপে চতুব্বিধা.

তিৰত্থুং নিস্সিতারুপ্পে, ধাত্ৰেকা নিস্সিতা মতা.

৭৪. তেচত্তালীস নিস্সায, দ্ৰেচত্তালীস জাযরে.

নিস্সায চ অনিস্সায, পাকারুপ্পা অনিস্সিতা.

ইতি অভিধম্মত্থসঙ্গহে পকিণ্ণকসঙ্গহৰিভাগো নাম

ততিযো পরিচ্ছেদো.

৪. ৰীথিপরিচ্ছেদো

১. চিত্তুপ্পাদানমিচ্চেৰং, কত্ৰাসঙ্গহমুত্তরং.

ভূমিপুগ্গলভেদেন, পুব্বাপরনিযামিতং.

পৰত্তিসঙ্গহং নাম, পটিসন্ধিপৰত্তিযং;

পৰক্খামি সমাসেন, যথাসম্ভৰতো কথং.

২.. ৰীথিমুত্তানং পন কম্মকম্মনিমিত্তগতিনিমিত্তৰসেন তিৰিধা হোতি ৰিসযপ্পৰত্তি.

৪. তত্থ ৰত্থুদ্ৰারারম্মণানি পুব্বে ৰুত্তনযানেৰ.

ৰিঞ্ঞাণছক্কং

৫. চক্খুৰিঞ্ঞাণং ¶ ¶ সোতৰিঞ্ঞাণং ঘানৰিঞ্ঞাণং জিৰ্হাৰিঞ্ঞাণং কাযৰিঞ্ঞাণং মনোৰিঞ্ঞাণঞ্চেতি ছ ৰিঞ্ঞাণানি.

ৰীথিছক্কং

৬. ছ ৰীথিযো পন চক্খুদ্ৰারৰীথি সোতদ্ৰারৰীথি ঘানদ্ৰারৰীথি জিৰ্হাদ্ৰারৰীথি কাযদ্ৰারৰীথি মনোদ্ৰারৰীথি চেতি দ্ৰারৰসেন ৰা, চক্খুৰিঞ্ঞাণৰীথি সোতৰিঞ্ঞাণৰীথি ঘানৰিঞ্ঞাণৰীথি জিৰ্হাৰিঞ্ঞাণৰীথি কাযৰিঞ্ঞাণৰীথি মনোৰিঞ্ঞাণৰীথি চেতি ৰিঞ্ঞাণৰসেন ৰা দ্ৰারপ্পৰত্তা চিত্তপ্পৰত্তিযো যোজেতব্বা.

ৰীথিভেদো

৭. অতিমহন্তং মহন্তং পরিত্তং অতিপরিত্তঞ্চেতি পঞ্চদ্ৰারে মনোদ্ৰারে পন ৰিভূতমৰিভূতঞ্চেতি ছধা ৰিসযপ্পৰত্তি ৰেদিতব্বা.

পঞ্চদ্ৰারৰীথি

৮. কথং? উপ্পাদঠিতিভঙ্গৰসেন খণত্তযং একচিত্তক্খণং নাম.

৯. তানি পন সত্তরস চিত্তক্খণানি রূপধম্মানমাযূ.

১০. একচিত্তক্খণাতীতানি ৰা বহুচিত্তক্খণাতীতানি ৰা ঠিতিপ্পত্তানেৰ পঞ্চারম্মণানি পঞ্চদ্ৰারে আপাথমাগচ্ছন্তি. তস্মা যদি একচিত্তক্খণাতীতকং রূপারম্মণং চক্খুস্স আপাথমাগচ্ছতি, ততো দ্ৰিক্খত্তুং ভৰঙ্গে চলিতে ভৰঙ্গসোতং ৰোচ্ছিন্দিত্ৰা তমেৰ রূপারম্মণং আৰজ্জন্তং পঞ্চদ্ৰারাৰজ্জনচিত্তং উপ্পজ্জিত্ৰা নিরুজ্ঝতি, ততো তস্সানন্তরং তমেৰ ¶ রূপং পস্সন্তং চক্খুৰিঞ্ঞাণং, সম্পটিচ্ছন্তং সম্পটিচ্ছনচিত্তং, সন্তীরযমানং সন্তীরণচিত্তং, ৰৰত্থপেন্তং ৰোট্ঠব্বনচিত্তঞ্চেতি যথাক্কমং উপ্পজ্জিত্ৰা নিরুজ্ঝন্তি, ততো পরং একূনতিংস ¶ কামাৰচরজৰনেসু যংকিঞ্চি লদ্ধপচ্চযং যেভুয্যেন সত্তক্খত্তুং জৰতি, জৰনানুবন্ধানি চ দ্ৰে তদারম্মণপাকানি যথারহং পৰত্তন্তি, ততো পরং ভৰঙ্গপাতো.

১১. এত্তাৰতা চুদ্দস ৰীথিচিত্তুপ্পাদা, দ্ৰে ভৰঙ্গচলনানি, পুব্বেৰাতীতকমেকচিত্তক্খণন্তি কত্ৰা সত্তরস চিত্তক্খণানি পরিপূরেন্তি, ততো পরং নিরুজ্ঝতি, আরম্মণমেতং অতিমহন্তং নাম গোচরং.

১২. যাৰ তদারম্মণুপ্পাদা পন অপ্পহোন্তাতীতকমাপাথমাগতং আরম্মণং মহন্তং নাম, তত্থ জৰনাৰসানে ভৰঙ্গপাতোৰ হোতি, নত্থি তদারম্মণুপ্পাদো.

১৩. যাৰ জৰনুপ্পাদাপি অপ্পহোন্তাতীতকমাপাথমাগতং আরম্মণং পরিত্তং নাম, তত্থ জৰনম্পি অনুপ্পজ্জিত্ৰা দ্ৰত্তিক্খত্তুং ৰোট্ঠব্বনমেৰ পৰত্ততি, ততো পরং ভৰঙ্গপাতোৰ হোতি.

১৪. যাৰ ৰোট্ঠব্বনুপ্পাদা চ পন অপ্পহোন্তাতীতকমাপাথমাগতং নিরোধাসন্নমারম্মণং অতিপরিত্তং নাম, তত্থ ভৰঙ্গচলনমেৰ হোতি, নত্থি ৰীথিচিত্তুপ্পাদো.

১৫. ইচ্চেৰং চক্খুদ্ৰারে, তথা সোতদ্ৰারাদীসু চেতি সব্বথাপি পঞ্চদ্ৰারে তদারম্মণজৰনৰোট্ঠব্বনমোঘৰারসঙ্খাতানং চতুন্নং ৰারানং যথাক্কমং আরম্মণভূতা ৰিসযপ্পৰত্তি চতুধা ৰেদিতব্বা.

১৬. ৰীথিচিত্তানি সত্তেৰ, চিত্তুপ্পাদা চতুদ্দস.

চতুপঞ্ঞাস ৰিত্থারা, পঞ্চদ্ৰারে যথারহং.

অযমেত্থ পঞ্চদ্ৰারে ৰীথিচিত্তপ্পৰত্তিনযো.

মনোদ্ৰারৰীথি পরিত্তজৰনৰারো

১৭. মনোদ্ৰারে ¶ ¶ পন যদি ৰিভূতমারম্মণং আপাথমাগচ্ছতি, ততো পরং ভৰঙ্গচলনমনোদ্ৰারাৰজ্জনজৰনাৰসানে তদারম্মণপাকানি পৰত্তন্তি, ততো পরং ভৰঙ্গপাতো.

১৮. অৰিভূতে পনারম্মণে জৰনাৰসানে ভৰঙ্গপাতোৰ হোতি, নত্থি তদারম্মণুপ্পাদোতি.

১৯. ৰীথিচিত্তানি তীণেৰ, চিত্তুপ্পাদা দসেরিতা.

ৰিত্থারেন পনেত্থেক-চত্তালীস ৰিভাৰযে;

অযমেত্থ পরিত্তজৰনৰারো.

অপ্পনাজৰনৰারো

২০. অপ্পনাজৰনৰারে পন ৰিভূতাৰিভূতভেদো নত্থি, তথা তদারম্মণুপ্পাদো চ.

২১. তত্থ হি ঞাণসম্পযুত্তকামাৰচরজৰনানমট্ঠন্নং অঞ্ঞতরস্মিং পরিকম্মোপচারানুলোমগোত্রভুনামেন চতুক্খত্তুং তিক্খত্তুমেৰ ৰা যথাক্কমং উপ্পজ্জিত্ৰা নিরুদ্ধানন্তরমেৰ যথারহং চতুত্থং, পঞ্চমং ৰা ছব্বীসতিমহগ্গতলোকুত্তরজৰনেসু যথাভিনীহারৰসেন যং কিঞ্চি জৰনং অপ্পনাৰীথিমোতরতি, ততো পরং অপ্পনাৰসানে ভৰঙ্গপাতোৰ হোতি.

২২. তত্থ সোমনস্সসহগতজৰনানন্তরং অপ্পনাপি সোমনস্সসহগতাৰ পাটিকঙ্খিতব্বা, উপেক্খাসহগতজৰনানন্তরং উপেক্খাসহগতাৰ, তত্থাপি কুসলজৰনানন্তরং কুসলজৰনঞ্চেৰ হেট্ঠিমঞ্চ ফলত্তযমপ্পেতি, কিরিযজৰনানন্তরং কিরিযজৰনং অরহত্তফলঞ্চাতি.

২৩. দ্ৰত্তিংস ¶ সুখপুঞ্ঞম্হা, দ্ৰাদসোপেক্খকা পরং,

সুখিতক্রিযতো অট্ঠ, ছ সম্ভোন্তি উপেক্খকা.

২৪. পুথুজ্জনান ¶ সেক্খানং, কামপুঞ্ঞতিহেতুতো.

তিহেতুকামক্রিযতো, ৰীতরাগানমপ্পনা.

অযমেত্থ মনোদ্ৰারে ৰীথিচিত্তপ্পৰত্তিনযো.

তদারম্মণনিযমো

২৫. সব্বত্থাপি পনেত্থ অনিট্ঠে আরম্মণে অকুসলৰিপাকানেৰ পঞ্চৰিঞ্ঞাণসম্পটিচ্ছনসন্তীরণতদারম্মণানি.

২৬. ইট্ঠে কুসলৰিপাকানি.

২৭. অতিইট্ঠে পন সোমনস্সসহগতানেৰ সন্তীরণতদারম্মণানি, তত্থাপি সোমনস্সসহগতকিরিযজৰনাৰসানে সোমনস্সসহগতানেৰ তদারম্মণানি ভৰন্তি, উপেক্খাসহগতকিরিযজৰনাৰসানে চ উপেক্খাসহগতানেৰ হোন্তি.

২৮. দোমনস্সসহগতজৰনাৰসানে চ পন তদারম্মণানিচেৰ ভৰঙ্গানি চ উপেক্খাসহগতানেৰ ভৰন্তি, তস্মা যদি সোমনস্সপটিসন্ধিকস্স দোমনস্সসহগতজৰনাৰসানে তদারম্মণসম্ভৰো নত্থি, তদা যং কিঞ্চি পরিচিতপুব্বং পরিত্তারম্মণমারব্ভ উপেক্খাসহগতসন্তীরণং উপ্পজ্জতি, তমনন্তরিত্ৰা ভৰঙ্গপাতোৰ হোতীতি ৰদন্তি আচরিযা.

২৯. তথা কামাৰচরজৰনাৰসানে কামাৰচরসত্তানং কামাৰচরধম্মেস্ৰেৰ আরম্মণভূতেসু তদারম্মণং ইচ্ছন্তীতি.

৩০. কামে জৰনসত্তালম্বণানং নিযমে সতি.

ৰিভূতেতিমহন্তে চ, তদারম্মণমীরিতং.

অযমেত্থ তদারম্মণনিযমো.

জৰননিযমো

৩১. জৰনেসু ¶ ¶ চ পরিত্তজৰনৰীথিযং কামাৰচরজৰনানি সত্তক্খত্তুং ছক্খত্তুমেৰ ৰা জৰন্তি.

৩২. মন্দপ্পৰত্তিযং পন মরণকালাদীসু পঞ্চৰারমেৰ.

৩৩. ভগৰতো পন যমকপাটিহারিযকালাদীসু লহুকপ্পৰত্তিযং চত্তারিপঞ্চ ৰা পচ্চৰেক্খণচিত্তানি ভৰন্তীতিপি ৰদন্তি.

৩৪. আদিকম্মিকস্স পন পঠমকপ্পনাযং মহগ্গতজৰনানিঅভিঞ্ঞাজৰনানি চ সব্বদাপি একৰারমেৰ জৰন্তি, ততো পরং ভৰঙ্গপাতো.

৩৫. চত্তারো পন মগ্গুপ্পাদা একচিত্তক্খণিকা, ততো পরং দ্ৰে তীণি ফলচিত্তানি যথারহং উপ্পজ্জন্তি, ততো পরং ভৰঙ্গপাতো.

৩৬. নিরোধসমাপত্তিকালে দ্ৰিক্খত্তুং চতুত্থারুপ্পজৰনং জৰতি, ততো পরং নিরোধং ফুসতি.

৩৭. ৰুট্ঠানকালে চ অনাগামিফলং ৰা অরহত্তফলং ৰা যথারহমেকৰারং উপ্পজ্জিত্ৰা নিরুদ্ধে ভৰঙ্গপাতোৰ হোতি.

৩৮. সব্বত্থাপি সমাপত্তিৰীথিযং ভৰঙ্গসোতো ৰিয ৰীথিনিযমো নত্থীতি কত্ৰা বহূনিপি লব্ভন্তীতি.

৩৯. সত্তক্খত্তুং পরিত্তানি, মগ্গাভিঞ্ঞা সকিং মতা.

অৰসেসানি লব্ভন্তি, জৰনানি বহূনিপি.

অযমেত্থ জৰননিযমো.

পুগ্গলভেদো

৪০. দুহেতুকানমহেতুকানঞ্চ ¶ ¶ পনেত্থ কিরিযজৰনানি চেৰ অপ্পনাজৰনানি চ লব্ভন্তি.

৪১. তথা ঞাণসম্পযুত্তৰিপাকানি চ সুগতিযং.

৪২. দুগ্গতিযং পন ঞাণৰিপ্পযুত্তানি চ মহাৰিপাকানি ন লব্ভন্তি.

৪৩. তিহেতুকেসু চ খীণাসৰানং কুসলাকুসলজৰনানি ন লব্ভন্তি.

৪৪. তথা সেক্খপুথুজ্জনানং কিরিযজৰনানি.

৪৫. দিট্ঠিগতসম্পযুত্তৰিচিকিচ্ছাজৰনানি চ সেক্খানং.

৪৬. অনাগামিপুগ্গলানং পন পটিঘজৰনানি চ ন লব্ভন্তি.

৪৭. লোকুত্তরজৰনানি চ যথারহং অরিযানমেৰ সমুপ্পজ্জন্তীতি.

৪৮. অসেক্খানং চতুচত্তালীস সেক্খানমুদ্দিসে.

ছপ্পঞ্ঞাসাৰসেসানং, চতুপঞ্ঞাস সম্ভৰা.

অযমেত্থ পুগ্গলভেদো.

ভূমিৰিভাগো

৪৯. কামাৰচরভূমিযং পনেতানি সব্বানিপি ৰীথিচিত্তানি যথারহমুপলব্ভন্তি.

৫০. রূপাৰচরভূমিযং ¶ পটিঘজৰনতদারম্মণৰজ্জিতানি.

৫১. অরূপাৰচরভূমিযং পঠমমগ্গরূপাৰচরহসনহেট্ঠিমারুপ্পৰজ্জিতানি চ লব্ভন্তি.

৫২. সব্বত্থাপি ¶ চ তংতংপসাদরহিতানং তংতংদ্ৰারিকৰীথিচিত্তানি ন লব্ভন্তেৰ.

৫৩. অসঞ্ঞসত্তানং পন সব্বথাপি চিত্তপ্পৰত্তি নত্থেৰাতি.

৫৪. অসীতি ৰীথিচিত্তানি, কামে রূপে যথারহং.

চতুসট্ঠি তথারূপে, দ্ৰেচত্তালীস লব্ভরে.

অযমেত্থ ভূমিৰিভাগো.

৫৫. ইচ্চেৰং ছদ্ৰারিকচিত্তপ্পৰত্তি যথাসম্ভৰং ভৰঙ্গন্তরিতা যাৰতাযুকমব্বোচ্ছিন্না পৰত্ততি.

ইতি অভিধম্মত্থসঙ্গহে ৰীথিসঙ্গহৰিভাগো নাম

চতুত্থো পরিচ্ছেদো.

৫. ৰীথিমুত্তপরিচ্ছেদো

১. ৰীথিচিত্তৰসেনেৰং, পৰত্তিযমুদীরিতো.

পৰত্তিসঙ্গহো নাম, সন্ধিযং দানি ৰুচ্চতি.

২. চতস্সো ভূমিযো, চতুব্বিধা পটিসন্ধি, চত্তারি কম্মানি, চতুধা মরণুপ্পত্তি চেতি ৰীথিমুত্তসঙ্গহে চত্তারি চতুক্কানি ৰেদিতব্বানি.

ভূমিচতুক্কং

৩. তত্থ ¶ অপাযভূমি কামসুগতিভূমি রূপাৰচরভূমি অরূপাৰচরভূমি চেতি চতস্সো ভূমিযো নাম.

৪. তাসু নিরযো তিরচ্ছানযোনি পেত্তিৰিসযো অসুরকাযো চেতি অপাযভূমি চতুব্বিধা হোতি.

৫. মনুস্সা ¶ চাতুমহারাজিকা তাৰতিংসা যামা তুসিতা নিম্মানরতি পরনিম্মিতৰসৰত্তী চেতি কামসুগতিভূমি সত্তৰিধা হোতি.

৬. সা পনাযমেকাদসৰিধাপি কামাৰচরভূমিচ্চেৰ সঙ্খং গচ্ছতি.

৭. ব্রহ্মপারিসজ্জা ব্রহ্মপুরোহিতা মহাব্রহ্মা চেতি পঠমজ্ঝানভূমি.

৮. পরিত্তাভা অপ্পমাণাভা আভস্সরা চেতি দুতিযজ্ঝানভূমি.

৯. পরিত্তসুভা অপ্পমাণসুভা সুভকিণ্হা চেতি ততিযজ্ঝানভূমি.

১০. ৰেহপ্ফলা অসঞ্ঞসত্তা সুদ্ধাৰাসা চেতি চতুত্থজ্ঝানভূমীতি রূপাৰচরভূমি সোল়সৰিধা হোতি.

১১. অৰিহা অতপ্পা সুদস্সা সুদস্সী অকনিট্ঠা চেতি সুদ্ধাৰাসভূমি পঞ্চৰিধা হোতি.

১২. আকাসানঞ্চাযতনভূমি ৰিঞ্ঞাণঞ্চাযতনভূমি আকিঞ্চঞ্ঞাযতনভূমি নেৰসঞ্ঞানাসঞ্ঞাযতনভূমি চেতি অরূপভূমি চতুব্বিধা হোতি.

১৩. পুথুজ্জনা ¶ ন লব্ভন্তি, সুদ্ধাৰাসেসু সব্বথা.

সোতাপন্না চ সকদাগামিনো চাপি পুগ্গলা.

১৪. অরিযা নোপলব্ভন্তি, অসঞ্ঞাপাযভূমিসু.

সেসট্ঠানেসু লব্ভন্তি, অরিযানরিযাপি চ.

ইদমেত্থ ভূমিচতুক্কং.

পটিসন্ধিচতুক্কং

১৫. অপাযপটিসন্ধি ¶ কামসুগতিপটিসন্ধি রূপাৰচরপটিসন্ধি অরূপাৰচরপটিসন্ধি চেতি চতুব্বিধা পটিসন্ধি নাম.

১৬. তত্থ অকুসলৰিপাকোপেক্খাসহগতসন্তীরণং অপাযভূমিযং ওক্কন্তিক্খণে পটিসন্ধি হুত্ৰা ততো পরং ভৰঙ্গং পরিযোসানে চৰনং হুত্ৰা ৰোচ্ছিজ্জতি, অযমেকাপাযপটিসন্ধি নাম.

১৭. কুসলৰিপাকোপেক্খাসহগতসন্তীরণং পন কামসুগতিযং মনুস্সানঞ্চেৰ জচ্চন্ধাদীনং ভুম্মস্সিতানঞ্চ ৰিনিপাতিকাসুরানং পটিসন্ধিভৰঙ্গচুতিৰসেন পৰত্ততি.

১৮. মহাৰিপাকানি পন অট্ঠ সব্বত্থাপি কামসুগতিযং পটিসন্ধিভৰঙ্গচুতিৰসেন পৰত্তন্তি.

১৯. ইমা নৰ কামসুগতিপটিসন্ধিযো নাম.

২০. সা পনাযং দসৰিধাপি কামাৰচরপটিসন্ধিচ্চেৰ সঙ্খং গচ্ছতি.

২১. তেসু ¶ চতুন্নং অপাযানং মনুস্সানং ৰিনিপাতিকাসুরানঞ্চ আযুপ্পমাণগণনায নিযমো নত্থি.

২২. চাতুমহারাজিকানং পন দেৰানং দিব্বানি পঞ্চৰস্সসতানি আযুপ্পমাণং, মনুস্সগণনায নৰুতিৰস্সসতসহস্সপ্পমাণং হোতি, ততো চতুগ্গুণং তাৰতিংসানং, ততো চতুগ্গুণং যামানং, ততো চতুগ্গুণং তুসিতানং, ততো চতুগ্গুণং নিম্মানরতীনং, ততো চতুগ্গুণং পরনিম্মিতৰসৰত্তীনং.

২৩. নৰসতঞ্চেকৰীস-ৰস্সানং কোটিযো তথা.

ৰস্সসতসহস্সানি, সট্ঠি চ ৰসৰত্তিসু.

২৪. পঠমজ্ঝানৰিপাকং ¶ পঠমজ্ঝানভূমিযং পটিসন্ধিভৰঙ্গচুতিৰসেন পৰত্ততি.

২৫. তথা দুতিযজ্ঝানৰিপাকং ততিযজ্ঝানৰিপাকঞ্চ দুতিযজ্ঝানভূমিযং.

২৬. চতুত্থজ্ঝানৰিপাকং ততিযজ্ঝানভূমিযং.

২৭. পঞ্চমজ্ঝানৰিপাকং চতুত্থজ্ঝানভূমিযং.

২৮. অসঞ্ঞসত্তানং পন রূপমেৰ পটিসন্ধি হোতি. তথা ততো পরং পৰত্তিযং চৰনকালে চ রূপমেৰ পৰত্তিত্ৰা নিরুজ্ঝতি, ইমা ছ রূপাৰচরপটিসন্ধিযো নাম.

২৯. তেসু ব্রহ্মপারিসজ্জানং দেৰানং কপ্পস্স ততিযো ভাগো আযুপ্পমাণং.

৩০. ব্রহ্মপুরোহিতানং উপড্ঢকপ্পো.

৩১. মহাব্রহ্মানং একো কপ্পো.

৩২. পরিত্তাভানং দ্ৰে কপ্পানি.

৩৩. অপ্পমাণাভানং চত্তারিকপ্পানি.

৩৪. আভস্সরানং ¶ অট্ঠ কপ্পানি.

৩৫. পরিত্তসুভানং সোল়স কপ্পানি.

৩৬. অপ্পমাণসুভানং দ্ৰত্তিংস কপ্পানি.

৩৭. সুভকিণ্হানং চতুসট্ঠি কপ্পানি.

৩৮. ৰেহপ্ফলানং অসঞ্ঞসত্তানঞ্চ পঞ্চকপ্পসতানি.

৩৯. অৰিহানং কপ্পসহস্সানি.

৪০. অতপ্পানং দ্ৰে কপ্পসহস্সানি.

৪১. সুদস্সানং চত্তারি কপ্পসহস্সানি.

৪২. সুদস্সীনং অট্ঠ কপ্পসহস্সানি.

৪৩. অকনিট্ঠানং ¶ সোল়স কপ্পসহস্সানি.

৪৪. পঠমারুপ্পাদিৰিপাকানি পঠমারুপ্পাদিভূমীসু যথাক্কমং পটিসন্ধিভৰঙ্গচুতিৰসেন পৰত্তন্তি. ইমা চতস্সো অরূপপটিসন্ধিযো নাম.

৪৫. তেসু পন আকাসানঞ্চাযতনূপগানং দেৰানং ৰীসতিকপ্পসহস্সানি আযুপ্পমাণং.

৪৬. ৰিঞ্ঞাণঞ্চাযতনূপগানং দেৰানং চত্তালীসকপ্পসহস্সানি.

৪৭. আকিঞ্চঞ্ঞাযতনূপগানং দেৰানং সট্ঠিকপ্পসহস্সানি.

৪৮. নেৰসঞ্ঞানাসঞ্ঞাযতনূপগানং দেৰানং চতুরাসীতিকপ্পসহস্সানি.

৪৯. পটিসন্ধি ভৰঙ্গঞ্চ, তথা চৰনমানসং.

একমেৰ তথেৰেকৰিসযঞ্চেকজাতিযং.

ইদমেত্থ পটিসন্ধিচতুক্কং.

কম্মচতুক্কং

৫০. জনকং ¶ উপত্থম্ভকং উপপীল়কং উপঘাতকঞ্চেতি কিচ্চৰসেন.

৫১. গরুকং আসন্নং আচিণ্ণং কটত্তাকম্মঞ্চেতি পাকদানপরিযাযেন.

৫২. দিট্ঠধম্মৰেদনীযং উপপজ্জৰেদনীযং অপরাপরিযৰেদনীযং অহোসিকম্মঞ্চেতি পাককালৰসেন চত্তারি কম্মানি নাম.

৫৩. তথা অকুসলং কামাৰচরকুসলং রূপাৰচরকুসলং অরূপাৰচরকুসলঞ্চেতি পাকঠানৰসেন.

৫৪. তত্থ ¶ অকুসলং কাযকম্মং ৰচীকম্মং মনোকম্মঞ্চেতি কম্মদ্ৰারৰসেন তিৰিধং হোতি.

৫৫. কথং? পাণাতিপাতো অদিন্নাদানং কামেসুমিচ্ছাচারো চেতি কাযৰিঞ্ঞত্তিসঙ্খাতে কাযদ্ৰারে বাহুল্লৰুত্তিতো কাযকম্মং নাম.

৫৬. মুসাৰাদো পিসুণৰাচা ফরুসৰাচা সম্ফপ্পলাপো চেতি ৰচীৰিঞ্ঞত্তিসঙ্খাতে ৰচীদ্ৰারে বাহুল্লৰুত্তিতো ৰচীকম্মং নাম.

৫৭. অভিজ্ঝা ব্যাপাদো মিচ্ছাদিট্ঠি চেতি অঞ্ঞত্রাপি ৰিঞ্ঞত্তিযা মনস্মিংযেৰ বাহুল্লৰুত্তিতো মনোকম্মং নাম.

৫৮. তেসু পাণাতিপাতো ফরুসৰাচা ব্যাপাদো চ দোসমূলেন জাযন্তি.

৫৯. কামেসুমিচ্ছাচারো অভিজ্ঝা মিচ্ছাদিট্ঠি চ লোভমূলেন.

৬০. সেসানি ¶ চত্তারিপি দ্ৰীহি মূলেহি সম্ভৰন্তি.

৬১. চিত্তুপ্পাদৰসেন পনেতং অকুসলং সব্বথাপি দ্ৰাদসৰিধং হোতি.

৬২. কামাৰচরকুসলম্পি কাযদ্ৰারে পৰত্তং কাযকম্মং, ৰচীদ্ৰারে পৰত্তং ৰচীকম্মং, মনোদ্ৰারে পৰত্তং মনোকম্মঞ্চেতি কম্মদ্ৰারৰসেন তিৰিধং হোতি.

৬৩. তথা দানসীলভাৰনাৰসেন.

৬৪. চিত্তুপ্পাদৰসেন পনেতং অট্ঠৰিধং হোতি.

৬৫. দানসীলভাৰনাপচাযনৰেয্যাৰচ্চপত্তিদানপত্তানুমোদনধম্মস্সৰনধম্মদেসনা দিট্ঠিজুকম্মৰসেন দসৰিধং হোতি.

৬৬. তং ¶ পনেতং ৰীসতিৰিধম্পি কামাৰচরকম্মমিচ্চেৰ সঙ্খং গচ্ছতি.

৬৭. রূপাৰচরকুসলং পন মনোকম্মমেৰ, তঞ্চ ভাৰনামযং অপ্পনাপ্পত্তং, ঝানঙ্গভেদেন পঞ্চৰিধং হোতি.

৬৮. তথা অরূপাৰচরকুসলঞ্চ মনোকম্মং, তম্পি ভাৰনামযং অপ্পনাপ্পত্তং. আরম্মণভেদেন চতুব্বিধং হোতি.

৬৯. এত্থাকুসলকম্মমুদ্ধচ্চরহিতং অপাযভূমিযং পটিসন্ধিং জনেতি, পৰত্তিযং পন সব্বম্পি দ্ৰাদসৰিধং সত্তাকুসলপাকানি সব্বত্থাপি কামলোকে রূপলোকে চ যথারহং ৰিপচ্চতি.

৭০. কামাৰচরকুসলম্পি কামসুগতিযমেৰ পটিসন্ধিং জনেতি, তথা পৰত্তিযঞ্চ মহাৰিপাকানি ¶ , অহেতুকৰিপাকানি পন অট্ঠপি সব্বত্থাপি কামলোকে রূপলোকে চ যথারহং ৰিপচ্চতি.

৭১. তত্থাপি তিহেতুকমুক্কট্ঠং কুসলং তিহেতুকং পটিসন্ধিং দত্ৰা পৰত্তে সোল়স ৰিপাকানি ৰিপচ্চতি.

৭২. তিহেতুকমোমকং দ্ৰিহেতুকমুক্কট্ঠঞ্চ কুসলং দ্ৰিহেতুকং পটিসন্ধিং দত্ৰা পৰত্তে তিহেতুকরহিতানি দ্ৰাদস ৰিপাকানি ৰিপচ্চতি.

৭৩. দ্ৰিহেতুকমোমকং পন কুসলং অহেতুকমেৰ পটিসন্ধিং দেতি, পৰত্তে চ অহেতুকৰিপাকানেৰ ৰিপচ্চতি.

৭৪. অসঙ্খারং সসঙ্খার-ৰিপাকানি ন পচ্চতি.

সসঙ্খারমসঙ্খার-ৰিপাকানীতি কেচন.

তেসং দ্ৰাদস পাকানি, দসাট্ঠ চ যথাক্কমং;

যথাৰুত্তানুসারেন যথাসম্ভৰমুদ্দিসে.

৭৫. রূপাৰচরকুসলং ¶ পন পঠমজ্ঝানং পরিত্তং ভাৰেত্ৰা ব্রহ্মপারিসজ্জেসু উপ্পজ্জতি.

৭৬. তদেৰ মজ্ঝিমং ভাৰেত্ৰা ব্রহ্মপুরোহিতেসু.

৭৭. পণীতং ভাৰেত্ৰা মহাব্রহ্মেসু.

৭৮. তথা দুতিযজ্ঝানং ততিযজ্ঝানঞ্চ পরিত্তং ভাৰেত্ৰা পরিত্তাভেসু.

৭৯. মজ্ঝিমং ভাৰেত্ৰা অপ্পমাণাভেসু.

৮০. পণীতং ভাৰেত্ৰা আভস্সরেসু.

৮১. চতুত্থজ্ঝানং পরিত্তং ভাৰেত্ৰা পরিত্তসুভেসু.

৮২. মজ্ঝিমং ¶ ভাৰেত্ৰা অপ্পমাণসুভেসু.

৮৩. পণীতং ভাৰেত্ৰা সুভকিণ্হেসু.

৮৪. পঞ্চমজ্ঝানং ভাৰেত্ৰা ৰেহপ্ফলেসু.

৮৫. তদেৰ সঞ্ঞাৰিরাগং ভাৰেত্ৰা অসঞ্ঞসত্তেসু.

৮৬. অনাগামিনো পন সুদ্ধাৰাসেসু উপ্পজ্জন্তি.

৮৭. অরূপাৰচরকুসলঞ্চ যথাক্কমং ভাৰেত্ৰা আরুপ্পেসু উপ্পজ্জন্তীতি.

৮৮. ইত্থং মহগ্গতং পুঞ্ঞং, যথাভূমিৰৰত্থিতং.

জনেতি সদিসং পাকং, পটিসন্ধিপৰত্তিযং.

ইদমেত্থ কম্মচতুক্কং.

চুতিপটিসন্ধিক্কমো

৮৯. আযুক্খযেন কম্মক্খযেন উভযক্খযেন উপচ্ছেদককম্মুনা চেতি চতুধা মরণুপ্পত্তি নাম.

৯০. তথা ¶ চ মরন্তানং পন মরণকালে যথারহং অভিমুখীভূতং ভৰন্তরে পটিসন্ধিজনকং কম্মং ৰা, তংকম্মকরণকালে রূপাদিকমুপলদ্ধপুব্বমুপকরণভূতঞ্চ কম্মনিমিত্তং ৰা, অনন্তরমুপ্পজ্জমানভৰে উপলভিতব্বমুপভোগভূতঞ্চ গতিনিমিত্তং ৰা কম্মবলেন ছন্নং দ্ৰারানং অঞ্ঞতরস্মিং পচ্চুপট্ঠাতি, ততো পরং তমেৰ তথোপট্ঠিতং আরম্মণং আরব্ভ ৰিপচ্চমানককম্মানুরূপং পরিসুদ্ধং উপক্কিলিট্ঠং ৰা উপলভিতব্বভৰানুরূপং তত্থোণতংৰ চিত্তসন্তানং অভিণ্হং পৰত্ততি বাহুল্লেন, তমেৰ ৰা পন জনকভূতং কম্মং অভিনৰকরণৰসেন দ্ৰারপ্পত্তং হোতি.

৯১. পচ্চাসন্নমরণস্স ¶ তস্স ৰীথিচিত্তাৰসানে ভৰঙ্গক্খযে ৰা চৰনৰসেন পচ্চুপ্পন্নভৰপরিযোসানভূতং চুতিচিত্তং উপ্পজ্জিত্ৰা নিরুজ্ঝতি, তস্মিং নিরুদ্ধাৰসানে তস্সানন্তরমেৰ তথাগহিতং আরম্মণং আরব্ভ সৰত্থুকং অৰত্থুকমেৰ ৰা যথারহং অৰিজ্জানুসযপরিক্খিত্তেন তণ্হানুসযমূলকেন সঙ্খারেন জনিযমানং সম্পযুত্তেহি পরিগ্গয্হমানং সহজাতানমধিট্ঠানভাৰেন পুব্বঙ্গমভূতং ভৰন্তরপটিসন্ধানৰসেন পটিসন্ধিসঙ্খাতং মানসং উপ্পজ্জমানমেৰ পতিট্ঠাতি ভৰন্তরে.

৯২. মরণাসন্নৰীথিযং পনেত্থ মন্দপ্পৰত্তানি পঞ্চেৰ জৰনানি পাটিকঙ্খিতব্বানি, তস্মা যদি পচ্চুপ্পন্নারম্মণেসু আপাথগতেসু ধরন্তেস্ৰেৰ মরণং হোতি, তদা পটিসন্ধিভৰঙ্গানম্পি পচ্চুপ্পন্নারম্মণতা লব্ভতীতি কত্ৰা কামাৰচরপটিসন্ধিযা ছদ্ৰারগ্গহিতং কম্মনিমিত্তং গতিনিমিত্তঞ্চ পচ্চুপ্পন্নমতীতারম্মণং উপলব্ভতি, কম্মং পন অতীতমেৰ, তঞ্চ মনোদ্ৰারগ্গহিতং, তানি পন সব্বানিপি পরিত্তধম্মভূতানেৰারম্মণানি.

৯৩. রূপাৰচরপটিসন্ধিযা পন পঞ্ঞত্তিভূতং কম্মনিমিত্তমেৰারম্মণং হোতি.

৯৪. তথা ¶ অরূপপটিসন্ধিযা চ মহগ্গতভূতং পঞ্ঞত্তিভূতঞ্চ কম্মনিমিত্তমেৰ যথারহমারম্মণং হোতি.

৯৫. অসঞ্ঞসত্তানং পন জীৰিতনৰকমেৰ পটিসন্ধিভাৰেন পতিট্ঠাতি, তস্মা তে রূপপটিসন্ধিকা নাম.

৯৬. অরূপা অরূপপটিসন্ধিকা.

৯৭. সেসা রূপারূপপটিসন্ধিকা.

৯৮. আরুপ্পচুতিযা হোন্তি, হেট্ঠিমারুপ্পৰজ্জিতা.

পরমারুপ্পসন্ধী চ, তথা কামতিহেতুকা.

রূপাৰচরচুতিযা ¶ , অহেতুরহিতা সিযুং;

সব্বা কামতিহেতুম্হা, কামেস্ৰেৰ পনেতরা.

অযমেত্থ চুতিপটিসন্ধিক্কমো.

৯৯. ইচ্চেৰং গহিতপটিসন্ধিকানং পন পটিসন্ধিনিরোধানন্তরতো পভুতি তমেৰারম্মণমারব্ভ তদেৰ চিত্তং যাৰ চুতিচিত্তুপ্পাদা অসতি ৰীথিচিত্তুপ্পাদে ভৰস্স অঙ্গভাৰেন ভৰঙ্গসন্ততিসঙ্খাতং মানসং অব্বোচ্ছিন্নং নদীসোতো ৰিয পৰত্ততি.

১০০. পরিযোসানে চ চৰনৰসেন চুতিচিত্তং হুত্ৰা নিরুজ্ঝতি.

১০১. ততো পরঞ্চ পটিসন্ধাদযো রথচক্কমিৰ যথাক্কমং এৰ পরিৰত্তন্তা পৰত্তন্তি.

১০২. পটিসন্ধিভৰঙ্গৰীথিযো, চুতিচেহ তথা ভৰন্তরে.

পুন সন্ধি ভৰঙ্গমিচ্চযং, পরিৰত্ততি চিত্তসন্ততি.

পটিসঙ্খাযপনেতমদ্ধুৰং ¶ , অধিগন্ত্ৰা পদমচ্চুতং বুধা;

সুসমুচ্ছিন্নসিনেহবন্ধনা, সমমেস্সন্তি চিরায সুব্বতা.

ইতি অভিধম্মত্থসঙ্গহে ৰীথিমুত্তসঙ্গহৰিভাগো নাম

পঞ্চমো পরিচ্ছেদো.

৬. রূপপরিচ্ছেদো

১. এত্তাৰতা ৰিভত্তা হি, সপ্পভেদপ্পৰত্তিকা.

চিত্তচেতসিকা ধম্মা, রূপং দানি পৰুচ্চতি.

২. সমুদ্দেসা ¶ ৰিভাগা চ, সমুট্ঠানা কলাপতো.

পৰত্তিক্কমতো চেতি, পঞ্চধা তত্থ সঙ্গহো.

রূপসমুদ্দেসো

৩. চত্তারি মহাভূতানি, চতুন্নঞ্চ মহাভূতানং উপাদাযরূপন্তি দুৰিধম্পেতং রূপং একাদসৰিধেন সঙ্গহং গচ্ছতি.

৪. কথং? পথৰীধাতু আপোধাতু তেজোধাতু ৰাযোধাতু ভূতরূপং নাম.

৫. চক্খু সোতং ঘানং জিৰ্হা কাযো পসাদরূপং নাম.

৬. রূপং সদ্দো গন্ধো রসো আপোধাতুৰিৰজ্জিতং ভূতত্তযসঙ্খাতং ফোট্ঠব্বং গোচররূপং নাম.

৭. ইত্থত্তং পুরিসত্তং ভাৰরূপং নাম.

৮. হদযৰত্থু হদযরূপং নাম.

৯. জীৰিতিন্দ্রিযং জীৰিতরূপং নাম.

১০. কবল়ীকারো আহারো আহাররূপং নাম.

১১. ইতি ¶ চ অট্ঠারসৰিধম্পেতং রূপং সভাৰরূপং সলক্খণরূপং নিপ্ফন্নরূপং রূপরূপং সম্মসনরূপন্তি চ সঙ্গহং গচ্ছতি.

১২. আকাসধাতু পরিচ্ছেদরূপং নাম.

১৩. কাযৰিঞ্ঞত্তি ৰচীৰিঞ্ঞত্তি ৰিঞ্ঞত্তিরূপং নাম.

১৪. রূপস্স লহুতা মুদুতা কম্মঞ্ঞতা ৰিঞ্ঞত্তিদ্ৰযং ৰিকাররূপং নাম.

১৫. রূপস্স উপচযো সন্ততি জরতা অনিচ্চতা লক্খণরূপং নাম.

১৬. জাতিরূপমেৰ ¶ পনেত্থ উপচযসন্ততিনামেন পৰুচ্চতীতি একাদসৰিধম্পেতং রূপং অট্ঠৰীসতিৰিধং হোতি সরূপৰসেন.

১৭. কথং –

ভূতপ্পসাদৰিসযা, ভাৰো হদযমিচ্চপি;

জীৰিতাহাররূপেহি, অট্ঠারসৰিধং তথা.

পরিচ্ছেদো চ ৰিঞ্ঞত্তি, ৰিকারো লক্খণন্তি চ;

অনিপ্ফন্না দস চেতি, অট্ঠৰীসৰিধং ভৰে.

অযমেত্থ রূপসমুদ্দেসো.

রূপৰিভাগো

১৮. সব্বঞ্চ পনেতং রূপং অহেতুকং সপ্পচ্চযং সাসৰং সঙ্খতং লোকিযং কামাৰচরং অনারম্মণং অপ্পহাতব্বমেৰাতি একৰিধম্পি অজ্ঝত্তিকবাহিরাদিৰসেন বহুধা ভেদং গচ্ছতি.

১৯. কথং? পসাদসঙ্খাতং পঞ্চৰিধম্পি অজ্ঝত্তিকরূপং নাম, ইতরং বাহিররূপং.

২০. পসাদহদযসঙ্খাতং ¶ ছব্বিধম্পি ৰত্থুরূপং নাম, ইতরং অৰত্থুরূপং.

২১. পসাদৰিঞ্ঞত্তিসঙ্খাতং সত্তৰিধম্পি দ্ৰাররূপং নাম, ইতরং অদ্ৰাররূপং.

২২. পসাদভাৰজীৰিতসঙ্খাতং অট্ঠৰিধম্পি ইন্দ্রিযরূপং নাম, ইতরং অনিন্দ্রিযরূপং.

২৩. পসাদৰিসযসঙ্খাতং দ্ৰাদসৰিধম্পি ওল়ারিকরূপং সন্তিকেরূপং, সপ্পটিঘরূপঞ্চ, ইতরং সুখুমরূপং দূরেরূপং অপ্পটিঘরূপঞ্চ.

২৪. কম্মজং ¶ উপাদিন্নরূপং, ইতরং অনুপাদিন্নরূপং.

২৫. রূপাযতনং সনিদস্সনরূপং, ইতরং অনিদস্সনরূপং.

২৬. চক্খাদিদ্ৰযং অসম্পত্তৰসেন, ঘানাদিত্তযং সম্পত্তৰসেনাতি পঞ্চৰিধম্পি গোচরগ্গাহিকরূপং, ইতরং অগোচরগ্গাহিকরূপং.

২৭. ৰণ্ণো গন্ধো রসো ওজা ভূতচতুক্কঞ্চেতি অট্ঠৰিধম্পি অৰিনিব্ভোগরূপং, ইতরং ৰিনিব্ভোগরূপং.

২৮. ইচ্চেৰমট্ঠৰীসতি-ৰিধম্পি চ ৰিচক্খণা.

অজ্ঝত্তিকাদিভেদেন, ৰিভজন্তি যথারহং.

অযমেত্থ রূপৰিভাগো.

রূপসমুট্ঠাননযো

২৯. কম্মং চিত্তং উতু আহারো চেতি চত্তারি রূপসমুট্ঠানানি নাম.

৩০. তত্থ কামাৰচরং রূপাৰচরঞ্চেতি পঞ্চৰীসতিৰিধম্পি কুসলাকুসলকম্মমভিসঙ্খতং অজ্ঝত্তিকসন্তানে কম্মসমুট্ঠানরূপং পটিসন্ধিমুপাদায খণে খণে সমুট্ঠাপেতি.

৩১. অরূপৰিপাকদ্ৰিপঞ্চৰিঞ্ঞাণৰজ্জিতং ¶ পঞ্চসত্ততিৰিধম্পি চিত্তং চিত্তসমুট্ঠানরূপং পঠমভৰঙ্গমুপাদায জাযন্তমেৰ সমুট্ঠাপেতি.

৩২. তত্থ অপ্পনাজৰনং ইরিযাপথম্পি সন্নামেতি.

৩৩. ৰোট্ঠব্বনকামাৰচরজৰনাভিঞ্ঞা পন ৰিঞ্ঞত্তিম্পি সমুট্ঠাপেন্তি.

৩৪. সোমনস্সজৰনানি পনেত্থ তেরস হসনম্পি জনেন্তি.

৩৫. সীতুণ্হোতুসমঞ্ঞাতা ¶ তেজোধাতু ঠিতিপ্পত্তাৰ উতুসমুট্ঠানরূপং অজ্ঝত্তঞ্চ বহিদ্ধা চ যথারহং সমুট্ঠাপেতি.

৩৬. ওজাসঙ্খাতো আহারো আহারসমুট্ঠানরূপং অজ্ঝোহরণকালে ঠানপ্পত্তোৰ সমুট্ঠাপেতি.

৩৭. তত্থ হদযইন্দ্রিযরূপানি কম্মজানেৰ.

৩৮. ৰিঞ্ঞত্তিদ্ৰযং চিত্তজমেৰ.

৩৯. সদ্দো চিত্তোতুজো.

৪০. লহুতাদিত্তযং উতুচিত্তাহারেহি সম্ভোতি.

৪১. অৰিনিব্ভোগরূপানি চেৰ আকাসধাতু চ. চতূহি সম্ভূতানি.

৪২. লক্খণরূপানি ন কুতোচি জাযন্তি.

৪৩. অট্ঠারস পন্নরস, তেরস দ্ৰাদসাতি চ.

কম্মচিত্তোতুকাহার-জানি হোন্তি যথাক্কমং.

৪৪. জাযমানাদিরূপানং, সভাৰত্তা হি কেৰলং.

লক্খণানি ন জাযন্তি, কেহিচীতি পকাসিতং.

অযমেত্থ রূপসমুট্ঠাননযো.

কলাপযোজনা

৪৫. একুপ্পাদা ¶ একনিরোধা একনিস্সযা সহৰুত্তিনো একৰীসতি রূপকলাপা নাম.

৪৬. তত্থ জীৰিতং অৰিনিব্ভোগরূপঞ্চ চক্খুনা সহ চক্খুদসকন্তি পৰুচ্চতি. তথা ¶ সোতাদীহি সদ্ধিং সোতদসকং ঘানদসকং জিৰ্হাদসকং কাযদসকং ইত্থিভাৰদসকং পুম্ভাৰদসকং ৰত্থুদসকঞ্চেতি যথাক্কমং যোজেতব্বং. অৰিনিব্ভোগরূপমেৰ জীৰিতেন সহ জীৰিতনৰকন্তি পৰুচ্চতি. ইমে নৰ কম্মসমুট্ঠানকলাপা.

৪৭. অৰিনিব্ভোগরূপং পন সুদ্ধট্ঠকং, তদেৰ কাযৰিঞ্ঞত্তিযা সহ কাযৰিঞ্ঞত্তিনৰকং, ৰচীৰিঞ্ঞত্তিসদ্দেহি সহ ৰচীৰিঞ্ঞত্তিদসকং, লহুতাদীহি সদ্ধিং লহুতাদেকাদসকং, কাযৰিঞ্ঞত্তিলহুতাদিদ্ৰাদসকং, ৰচীৰিঞ্ঞত্তিসদ্দলহুতাদিতেরসকঞ্চেতি ছ চিত্তসমুট্ঠানকলাপা.

৪৮. সুদ্ধট্ঠকং সদ্দনৰকং লহুতাদেকাদসকং সদ্দলহুতাদিদ্ৰাদসকঞ্চেতি চত্তারো উতুসমুট্ঠানকলাপা.

৪৯. সুদ্ধট্ঠকং লহুতাদেকাদসকঞ্চেতি দ্ৰেআহারসমুট্ঠানকলাপা.

৫০. তত্থ সুদ্ধট্ঠকং সদ্দনৰকঞ্চেতি দ্ৰে উতুসমুট্ঠানকলাপা বহিদ্ধাপি লব্ভন্তি, অৰসেসা পন সব্বেপি অজ্ঝত্তিকমেৰাতি.

৫১. কম্মচিত্তোতুকাহার-সমুট্ঠানা যথাক্কমং.

নৰ ছ চতুরো দ্ৰেতি, কলাপা একৰীসতি.

কলাপানং পরিচ্ছেদ-লক্খণত্তা ৰিচক্খণা;

ন কলাপঙ্গমিচ্চাহু, আকাসং লক্খণানি চ.

অযমেত্থ কলাপযোজনা.

রূপপৰত্তিক্কমো

৫২. সব্বানিপি ¶ পনেতানি রূপানি কামলোকে যথারহং অনূনানি পৰত্তিযং উপলব্ভন্তি.

৫৩. পটিসন্ধিযং ¶ পন সংসেদজানঞ্চেৰ ওপপাতিকানঞ্চ চক্খুসোতঘানজিৰ্হাকাযভাৰৰত্থুদসকসঙ্খাতানি সত্ত দসকানি পাতুভৰন্তি উক্কট্ঠৰসেন, ওমকৰসেন পন চক্খুসোতঘানভাৰদসকানি কদাচিপি ন লব্ভন্তি, তস্মা তেসং ৰসেন কলাপহানি ৰেদিতব্বা.

৫৪. গব্ভসেয্যকসত্তানং পন কাযভাৰৰত্থুদসকসঙ্খাতানি তীণি দসকানি পাতুভৰন্তি, তত্থাপি ভাৰদসকং কদাচি ন লব্ভতি, ততো পরং পৰত্তিকালে কমেন চক্খুদসকাদীনি চ পাতুভৰন্তি.

৫৫. ইচ্চেৰং পটিসন্ধিমুপাদায কম্মসমুট্ঠানা, দুতিযচিত্তমুপাদায চিত্তসমুট্ঠানা, ঠিতিকালমুপাদায উতুসমুট্ঠানা, ওজাফরণমুপাদায আহারসমুট্ঠানা চেতি চতুসমুট্ঠানরূপকলাপসন্ততি কামলোকে দীপজালা ৰিয, নদীসোতো ৰিয চ যাৰতাযুকমব্বোচ্ছিন্না পৰত্ততি.

৫৬. মরণকালে পন চুতিচিত্তোপরিসত্তরসমচিত্তস্স ঠিতিকালমুপাদায কম্মজরূপানি ন উপ্পজ্জন্তি, পুরেতরমুপ্পন্নানি চ কম্মজরূপানি চুতিচিত্তসমকালমেৰ পৰত্তিত্ৰা নিরুজ্ঝন্তি, ততো পরং চিত্তজাহারজরূপঞ্চ ৰোচ্ছিজ্জতি, ততো পরং উতুসমুট্ঠানরূপপরম্পরা যাৰ মতকল়েৰরসঙ্খাতা পৰত্তন্তি.

৫৭. ইচ্চেৰং মতসত্তানং, পুনদেৰ ভৰন্তরে.

পটিসন্ধিমুপাদায, তথা রূপং পৰত্ততি.

৫৮. রূপলোকে ¶ পন ঘানজিৰ্হাকাযভাৰদসকানি চ আহারজকলাপানি চ ন লব্ভন্তি, তস্মা তেসং পটিসন্ধিকালে চক্খুসোতৰত্থুৰসেন তীণি দসকানি জীৰিতনৰকঞ্চেতি চত্তারো কম্মসমুট্ঠানকলাপা, পৰত্তিযং চিত্তোতুসমুট্ঠানা চ লব্ভন্তি.

৫৯. অসঞ্ঞসত্তানং পন চক্খুসোতৰত্থুসদ্দাপি ন লব্ভন্তি, তথা সব্বানিপি চিত্তজরূপানি, তস্মা তেসং পটিসন্ধিকালে জীৰিতনৰকমেৰ, পৰত্তিযঞ্চ সদ্দৰজ্জিতং উতুসমুট্ঠানরূপং অতিরিচ্ছতি.

৬০. ইচ্চেৰং ¶ কামরূপাসঞ্ঞীসঙ্খাতেসু তীসু ঠানেসু পটিসন্ধিপৰত্তিৰসেন দুৰিধা রূপপ্পৰত্তি ৰেদিতব্বা.

৬১. অট্ঠৰীসতি কামেসু, হোন্তি তেৰীস রূপিসু.

সত্তরসেৰ সঞ্ঞীনং, অরূপে নত্থি কিঞ্চিপি.

সদ্দো ৰিকারো জরতা, মরণঞ্চোপপত্তিযং;

ন লব্ভন্তি পৰত্তে তু, ন কিঞ্চিপি ন লব্ভতি.

অযমেত্থ রূপপৰত্তিক্কমো.

নিব্বানভেদো

৬২. নিব্বানং পন লোকুত্তরসঙ্খাতং চতুমগ্গঞাণেন সচ্ছিকাতব্বং মগ্গফলানমারম্মণভূতং ৰানসঙ্খাতায তণ্হায নিক্খন্তত্তা নিব্বানন্তি পৰুচ্চতি.

৬৩. তদেতং সভাৰতো একৰিধম্পি সউপাদিসেসনিব্বানধাতু অনুপাদিসেসনিব্বানধাতু চেতি দুৰিধং হোতি কারণপরিযাযেন.

৬৪. তথা ¶ সুঞ্ঞতং অনিমিত্তং অপ্পণিহিতঞ্চেতি তিৰিধং হোতি আকারভেদেন.

৬৫. পদমচ্চুতমচ্চন্তং, অসঙ্খতমনুত্তরং.

নিব্বানমিতি ভাসন্তি, ৰানমুত্তা মহেসযো.

ইতি চিত্তং চেতসিকং, রূপং নিব্বানমিচ্চপি;

পরমত্থং পকাসেন্তি, চতুধাৰ তথাগতা.

ইতি অভিধম্মত্থসঙ্গহে রূপসঙ্গহৰিভাগো নাম

ছট্ঠো পরিচ্ছেদো.

৭. সমুচ্চযপরিচ্ছেদো

১. দ্ৰাসত্ততিৰিধা ¶ ৰুত্তা, ৰত্থুধম্মা সলক্খণা.

তেসং দানি যথাযোগং, পৰক্খামি সমুচ্চযং.

২. অকুসলসঙ্গহো মিস্সকসঙ্গহো বোধিপক্খিযসঙ্গহো সব্বসঙ্গহো চেতি সমুচ্চযসঙ্গহো চতুব্বিধো ৰেদিতব্বো.

অকুসলসঙ্গহো

৩. কথং? অকুসলসঙ্গহে তাৰ চত্তারো আসৰা – কামাসৰো ভৰাসৰো দিট্ঠাসৰো অৰিজ্জাসৰো.

৪. চত্তারো ওঘা – কামোঘো ভৰোঘো দিট্ঠোঘো অৰিজ্জোঘো.

৫. চত্তারো যোগা – কামযোগো ভৰযোগো দিট্ঠিযোগো অৰিজ্জাযোগো.

৬. চত্তারো গন্থা – অভিজ্ঝাকাযগন্থো, ব্যাপাদো কাযগন্থো, সীলব্বতপরামাসো কাযগন্থো, ইদংসচ্চাভিনিৰেসো কাযগন্থো.

৭. চত্তারো ¶ উপাদানা – কামুপাদানং দিট্ঠুপাদানং সীলব্বতুপাদানং অত্তৰাদুপাদানং.

৮. ছ নীৰরণানি – কামচ্ছন্দনীৰরণং ব্যাপাদনীৰরণং থিনমিদ্ধনীৰরণং উদ্ধচ্চকুক্কুচ্চনীৰরণং ৰিচিকিচ্ছানীৰরণং অৰিজ্জানীৰরণং.

৯. সত্ত ¶ অনুসযা – কামরাগানুসযো ভৰরাগানুসযো পটিঘানুসযো মানানুসযো দিট্ঠানুসযো ৰিচিকিচ্ছানুসযো অৰিজ্জানুসযো.

১০. দস সংযোজনানি – কামরাগসংযোজনং রূপরাগসংযোজনং অরূপরাগসংযোজনং পটিঘসংযোজনং মানসংযোজনং দিট্ঠিসংযোজনং সীলব্বতপরামাসসংযোজনং ৰিচিকিচ্ছাসংযোজনং উদ্ধচ্চসংযোজনং অৰিজ্জাসংযোজনং সুত্তন্তে.

১১. অপরানিপি দস সংযোজনানি – কামরাগসংযোজনং ভৰরাগসংযোজনং পটিঘসংযোজনং মানসংযোজনং দিট্ঠিসংযোজনং সীলব্বতপরামাসসংযোজনং ৰিচিকিচ্ছাসংযোজনং ইস্সাসংযোজনং মচ্ছরিযসংযোজনং অৰিজ্জাসংযোজনং অভিধম্মে (ৰিভ. ৯৬৯).

১২. দস কিলেসা – লোভো দোসো মোহো মানো দিট্ঠি ৰিচিকিচ্ছা থিনং উদ্ধচ্চং অহিরিকং অনোত্তপ্পং.

১৩. আসৰাদীসু পনেত্থ কামভৰনামেন তব্বত্থুকা তণ্হা অধিপ্পেতা, সীলব্বতপরামাসো ইদংসচ্চাভিনিৰেসো অত্তৰাদুপাদো চ তথাপৰত্তং দিট্ঠিগতমেৰ পৰুচ্চতি.

১৪. আসৰোঘা চ যোগা চ,

তযো গন্থা চ ৰত্থুতো;

উপাদানা দুৰে ৰুত্তা,

অট্ঠ নীৰরণা সিযুং.

ছল়েৰানুসযা ¶ হোন্তি, নৰ সংযোজনা মতা;

কিলেসা দস ৰুত্তোযং, নৰধা পাপসঙ্গহো.

মিস্সকসঙ্গহো

১৫. মিস্সকসঙ্গহে ছ হেতূ – লোভো দোসো মোহো অলোভো অদোসো অমোহো.

১৬. সত্ত ¶ ঝানঙ্গানি – ৰিতক্কো ৰিচারো পীতি একগ্গতা সোমনস্সং দোমনস্সং উপেক্খা.

১৭. দ্ৰাদস মগ্গঙ্গানি – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি মিচ্ছাদিট্ঠি মিচ্ছাসঙ্কপ্পো মিচ্ছাৰাযামো মিচ্ছাসমাধি.

১৮. বাৰীসতিন্দ্রিযানি – চক্খুন্দ্রিযং সোতিন্দ্রিযং ঘানিন্দ্রিযং জিৰ্হিন্দ্রিযং কাযিন্দ্রিযং ইত্থিন্দ্রিযং পুরিসিন্দ্রিযং জীৰিতিন্দ্রিযং মনিন্দ্রিযং সুখিন্দ্রিযং দুক্খিন্দ্রিযং সোমনস্সিন্দ্রিযং দোমনস্সিন্দ্রিযং উপেক্খিন্দ্রিযং সদ্ধিন্দ্রিযং ৰীরিযিন্দ্রিযং সতিন্দ্রিযং সমাধিন্দ্রিযং পঞ্ঞিন্দ্রিযং অনঞ্ঞাতঞ্ঞস্সামীতিন্দ্রিযং অঞ্ঞিন্দ্রিযং অঞ্ঞাতাৰিন্দ্রিযং.

১৯. নৰ বলানি – সদ্ধাবলং ৰীরিযবলং সতিবলং সমাধিবলং পঞ্ঞাবলং হিরিবলং ওত্তপ্পবলং অহিরিকবলং অনোত্তপ্পবলং.

২০. চত্তারো অধিপতী – ছন্দাধিপতি ৰীরিযাধিপতি চিত্তাধিপতি ৰীমংসাধিপতি.

২১. চত্তারো আহারা – কবল়ীকারো আহারো, ফস্সো দুতিযো, মনোসঞ্চেতনা ততিযা, ৰিঞ্ঞাণং চতুত্থং.

২২. ইন্দ্রিযেসু ¶ পনেত্থ সোতাপত্তিমগ্গঞাণং অনঞ্ঞাতঞ্ঞস্সামীতিন্দ্রিযং.

২৩. অরহত্তফলঞাণং অঞ্ঞাতাৰিন্দ্রিযং.

২৪. মজ্ঝে ছ ঞাণানি অঞ্ঞিন্দ্রিযানীতি পৰুচ্চন্তি.

২৫. জীৰিতিন্দ্রিযঞ্চ রূপারূপৰসেন দুৰিধং হোতি.

২৬. পঞ্চৰিঞ্ঞাণেসু ঝানঙ্গানি, অৰীরিযেসু বলানি, অহেতুকেসু মগ্গঙ্গানি ন লব্ভন্তি.

২৭. তথা ¶ ৰিচিকিচ্ছাচিত্তে একগ্গতা মগ্গিন্দ্রিযবলভাৰং ন গচ্ছতি.

২৮. দ্ৰিহেতুকতিহেতুকজৰনেস্ৰেৰ যথাসম্ভৰং অধিপতি একোৰ লব্ভতীতি.

২৯. ছ হেতূ পঞ্চ ঝানঙ্গা, মগ্গঙ্গা নৰ ৰত্থুতো.

সোল়সিন্দ্রিযধম্মা চ, বলধম্মা নৰেরিতা.

চত্তারোধিপতি ৰুত্তা, তথাহারাতি সত্তধা;

কুসলাদিসমাকিণ্ণো, ৰুত্তোমিস্সকসঙ্গহো.

বোধিপক্খিযসঙ্গহো

৩০. বোধিপক্খিযসঙ্গহে চত্তারো সতিপট্ঠানা কাযানুপস্সনাসতিপট্ঠানং ৰেদনানুপস্সনাসতিপট্ঠানং চিত্তানুপস্সনাসতিপট্ঠানং ধম্মানুপস্সনাসতিপট্ঠানং.

৩১. চত্তারো সম্মপ্পধানা উপ্পন্নানং পাপকানং পহানায ৰাযামো, অনুপ্পন্নানং পাপকানং অনুপ্পাদায ৰাযামো, অনুপ্পন্নানং কুসলানং উপ্পাদায ৰাযামো, উপ্পন্নানং কুসলানং ভিয্যোভাৰায ৰাযামো.

৩২. চত্তারো ¶ ইদ্ধিপাদা – ছন্দিদ্ধিপাদো ৰীরিযিদ্ধিপাদো চিত্তিদ্ধিপাদো ৰীমংসিদ্ধিপাদো.

৩৩. পঞ্চিন্দ্রিযানি – সদ্ধিন্দ্রিযং ৰীরিযিন্দ্রিযং সতিন্দ্রিযং সমাধিন্দ্রিযং পঞ্ঞিন্দ্রিযং.

৩৪. পঞ্চ বলানি – সদ্ধাবলং ৰীরিযবলং সতিবলং সমাধিবলং পঞ্ঞাবলং.

৩৫. সত্ত বোজ্ঝঙ্গা – সতিসম্বোজ্ঝঙ্গো ধম্মৰিচযসম্বোজ্ঝঙ্গো ৰীরিযসম্বোজ্ঝঙ্গো পীতিসম্বোজ্ঝঙ্গো পস্সদ্ধিসম্বোজ্ঝঙ্গো সমাধিসম্বোজ্ঝঙ্গো উপেক্খাসম্বোজ্ঝঙ্গো.

৩৬. অট্ঠ ¶ মগ্গঙ্গানি – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি.

৩৭. এত্থ পন চত্তারো সতিপট্ঠানাতি সম্মাসতি একাৰ পৰুচ্চতি.

৩৮. তথা চত্তারো সম্মপ্পধানাতি চ সম্মাৰাযামো.

৩৯. ছন্দো চিত্তমুপেক্খা চ, সদ্ধাপস্সদ্ধিপীতিযো.

সম্মাদিট্ঠি চ সঙ্কপ্পো, ৰাযামো ৰিরতিত্তযং.

সম্মাসতি সমাধীতি, চুদ্দসেতে সভাৰতো;

সত্ততিংসপ্পভেদেন, সত্তধা তত্থ সঙ্গহো.

৪০. সঙ্কপ্পপস্সদ্ধি চ পীতুপেক্খা,

ছন্দো চ চিত্তং ৰিরতিত্তযঞ্চ;

নৰেকঠানা ৰিরিযং নৰট্ঠ,

সতী সমাধী চতু পঞ্চ পঞ্ঞা;

সদ্ধা দুঠানুত্তমসত্ততিংস-

ধম্মানমেসো পৰরো ৰিভাগো.

৪১. সব্বে ¶ লোকুত্তরে হোন্তি, ন ৰা সঙ্কপ্পপীতিযো.

লোকিযেপি যথাযোগং, ছব্বিসুদ্ধিপৰত্তিযং.

সব্বসঙ্গহো

৪২. সব্বসঙ্গহে পঞ্চক্খন্ধা – রূপক্খন্ধো ৰেদনাক্খন্ধো সঞ্ঞাক্খন্ধো সঙ্খারক্খন্ধো ৰিঞ্ঞাণক্খন্ধো.

৪৩. পঞ্চুপাদানক্খন্ধা ¶ – রূপুপাদানক্খন্ধো ৰেদনুপাদানক্খন্ধো সঞ্ঞুপাদানক্খন্ধো সঙ্খারুপাদানক্খন্ধো ৰিঞ্ঞাণুপাদানক্খন্ধো.

৪৪. দ্ৰাদসাযতনানি – চক্খাযতনং সোতাযতনং ঘানাযতনং জিৰ্হাযতনং কাযাযতনং মনাযতনং রূপাযতনং সদ্দাযতনং গন্ধাযতনং রসাযতনং ফোট্ঠব্বাযতনং ধম্মাযতনং.

৪৫. অট্ঠারস ধাতুযো – চক্খুধাতু সোতধাতু ঘানধাতু জিৰ্হাধাতু কাযধাতু রূপধাতু সদ্দধাতু গন্ধধাতু রসধাতু ফোট্ঠব্বধাতু চক্খুৰিঞ্ঞাণধাতু সোতৰিঞ্ঞাণধাতু ঘানৰিঞ্ঞাণধাতু জিৰ্হাৰিঞ্ঞাণধাতু কাযৰিঞ্ঞাণধাতু মনোধাতু ধম্মধাতু মনোৰিঞ্ঞাণধাতু.

৪৬. চত্তারি অরিযসচ্চানি – দুক্খং অরিযসচ্চং, দুক্খসমুদযো অরিযসচ্চং, দুক্খনিরোধো অরিযসচ্চং, দুক্খনিরোধগামিনী পটিপদা অরিযসচ্চং.

৪৭. এত্থ পন চেতসিকসুখুমরূপনিব্বানৰসেন একূনসত্ততি ধম্মা ধম্মাযতনধম্মধাতূতি সঙ্খং গচ্ছন্তি.

৪৮. মনাযতনমেৰ সত্তৰিঞ্ঞাণধাতুৰসেন ভিজ্জতি.

৪৯. রূপঞ্চ ৰেদনা সঞ্ঞা, সেসচেতসিকা তথা.

ৰিঞ্ঞাণমিতি পঞ্চেতে, পঞ্চক্খন্ধাতি ভাসিতা.

৫০. পঞ্চুপাদানক্খন্ধাতি ¶ , তথা তেভূমকা মতা.

ভেদাভাৰেন নিব্বানং, খন্ধসঙ্গহনিস্সটং.

৫১. দ্ৰারারম্মণভেদেন, ভৰন্তাযতনানি চ.

দ্ৰারালম্বতদুপ্পন্ন-পরিযাযেন ধাতুযো.

৫২. দুক্খং ¶ তেভূমকং ৰট্টং, তণ্হা সমুদযো ভৰে.

নিরোধো নাম নিব্বানং, মগ্গো লোকুত্তরো মতো.

৫৩. মগ্গযুত্তা ফলা চেৰ, চতুসচ্চৰিনিস্সটা.

ইতি পঞ্চপ্পভেদেন, পৰুত্তো সব্বসঙ্গহো.

ইতি অভিধম্মত্থসঙ্গহে সমুচ্চযসঙ্গহৰিভাগো নাম

সত্তমো পরিচ্ছেদো.

৮. পচ্চযপরিচ্ছেদো

১. যেসং সঙ্খতধম্মানং, যে ধম্মা পচ্চযা যথা.

তং ৰিভাগমিহেদানি, পৰক্খামি যথারহং.

২. পটিচ্চসমুপ্পাদনযো পট্ঠাননযো চেতি পচ্চযসঙ্গহো দুৰিধো ৰেদিতব্বো.

৩. তত্থ তব্ভাৰভাৰীভাৰাকারমত্তোপলক্খিতো পটিচ্চসমুপ্পাদনযো, পট্ঠাননযো পন আহচ্চপচ্চযট্ঠিতিমারব্ভ পৰুচ্চতি, উভযং পন ৰোমিস্সেত্ৰা পপঞ্চেন্তি আচরিযা.

পটিচ্চসমুপ্পাদনযো

৪. তত্থ অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপং, নামরূপপচ্চযা সল়াযতনং, সল়াযতনপচ্চযা ফস্সো, ফস্সপচ্চযা ৰেদনা, ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৰো ¶ , ভৰপচ্চযা জাতি, জাতিপচ্চযা ¶ জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতীতি অযমেত্থ পটিচ্চসমুপ্পাদনযো.

৫. তত্থ তযো অদ্ধা দ্ৰাদসঙ্গানি ৰীসতাকারা তিসন্ধি চতুসঙ্খেপা তীণি ৰট্টানি দ্ৰে মূলানি চ ৰেদিতব্বানি.

৬. কথং? অৰিজ্জাসঙ্খারা অতীতো অদ্ধা, জাতিজরামরণং অনাগতো অদ্ধা, মজ্ঝে অট্ঠ পচ্চুপ্পন্নো অদ্ধাতি তযো অদ্ধা.

৭. অৰিজ্জা সঙ্খারা ৰিঞ্ঞাণং নামরূপং সল়াযতনং ফস্সো ৰেদনা তণ্হা উপাদানং ভৰো জাতি জরামরণন্তি দ্ৰাদসঙ্গানি.

৮. সোকাদিৰচনং পনেত্থ নিস্সন্দফলনিদস্সনং.

৯. অৰিজ্জাসঙ্খারগ্গহণেন পনেত্থ তণ্হুপাদানভৰাপি গহিতা ভৰন্তি, তথা তণ্হুপাদানভৰগ্গহণেন চ অৰিজ্জাসঙ্খারা, জাতিজরামরণগ্গহণেন চ ৰিঞ্ঞাণাদিফলপঞ্চকমেৰ গহিতন্তি কত্ৰা –

১০. অতীতে হেতৰো পঞ্চ, ইদানি ফলপঞ্চকং.

ইদানি হেতৰো পঞ্চ, আযতিং ফলপঞ্চকন্তি;

ৰীসতাকারা তিসন্ধি, চতুসঙ্খেপা চ ভৰন্তি.

১১. অৰিজ্জাতণ্হুপাদানা চ কিলেসৰট্টং, কম্মভৰসঙ্খাতো ভৰেকদেসো সঙ্খারা চ কম্মৰট্টং, উপপত্তিভৰসঙ্খাতো ভৰেকদেসো অৰসেসা চ ৰিপাকৰট্টন্তি তীণি ৰট্টানি.

১২. অৰিজ্জাতণ্হাৰসেন দ্ৰে মূলানি চ ৰেদিতব্বানি.

১৩. তেসমেৰ ¶ ¶ চ মূলানং, নিরোধেন নিরুজ্ঝতি.

জরামরণমুচ্ছায, পীল়িতানমভিণ্হসো;

আসৰানং সমুপ্পাদা, অৰিজ্জা চ পৰত্ততি.

ৰট্টমাবন্ধমিচ্চেৰং, তেভূমকমনাদিকং;

পটিচ্চসমুপ্পাদোতি, পট্ঠপেসি মহামুনি.

পট্ঠাননযো

১৪. হেতুপচ্চযো আরম্মণপচ্চযো অধিপতিপচ্চযো অনন্তরপচ্চযো সমনন্তরপচ্চযো সহজাতপচ্চযো অঞ্ঞমঞ্ঞপচ্চযো নিস্সযপচ্চযো উপনিস্সযপচ্চযো পুরেজাতপচ্চযো পচ্ছাজাতপচ্চযো আসেৰনপচ্চযো কম্মপচ্চযো ৰিপাকপচ্চযো আহারপচ্চযো ইন্দ্রিযপচ্চযো ঝানপচ্চযো মগ্গপচ্চযো সম্পযুত্তপচ্চযো ৰিপ্পযুত্তপচ্চযো অত্থিপচ্চযো নত্থিপচ্চযো ৰিগতপচ্চযো অৰিগতপচ্চযোতি অযমেত্থ পট্ঠাননযো.

১৫. ছধা নামং তু নামস্স, পঞ্চধা নামরূপিনং.

একধা পুন রূপস্স, রূপং নামস্স চেকধা.

পঞ্ঞত্তিনামরূপানি, নামস্স দুৰিধা দ্ৰযং;

দ্ৰযস্স নৰধা চেতি, ছব্বিধা পচ্চযা কথং.

১৬. অনন্তরনিরুদ্ধা চিত্তচেতসিকা ধম্মা পটুপ্পন্নানং চিত্তচেতসিকানং ধম্মানং অনন্তরসমনন্তরনত্থিৰিগতৰসেন, পুরিমানি জৰনানি পচ্ছিমানং জৰনানং আসেৰনৰসেন, সহজাতা চিত্তচেতসিকা ধম্মা অঞ্ঞমঞ্ঞং সম্পযুত্তৰসেনেতি চ ছধা নামং নামস্স পচ্চযো হোতি.

১৭. হেতুঝানঙ্গমগ্গঙ্গানি সহজাতানং নামরূপানং হেতাদিৰসেন, সহজাতা চেতনা সহজাতানং নামরূপানং, নানাক্খণিকা চেতনা কম্মাভিনিব্বত্তানং নামরূপানং কম্মৰসেন, ৰিপাকক্খন্ধা ¶ অঞ্ঞমঞ্ঞং সহজাতানং রূপানং ৰিপাকৰসেনেতি ¶ চ পঞ্চধা নামং নামরূপানং পচ্চযো হোতি.

১৮. পচ্ছাজাতা চিত্তচেতসিকা ধম্মা পুরেজাতস্স ইমস্স কাযস্স পচ্ছাজাতৰসেনেতি একধাৰ নামং রূপস্স পচ্চযো হোতি.

১৯. ছ ৰত্থূনি পৰত্তিযং সত্তন্নং ৰিঞ্ঞাণধাতূনং পঞ্চারম্মণানি চ পঞ্চৰিঞ্ঞাণৰীথিযা পুরেজাতৰসেনেতি একধাৰ রূপং নামস্স পচ্চযো হোতি.

২০. আরম্মণৰসেন উপনিস্সযৰসেনেতি চ দুৰিধা পঞ্ঞত্তিনামরূপানি নামস্সেৰ পচ্চযা হোন্তি.

২১. তত্থ রূপাদিৰসেন ছব্বিধং হোতি আরম্মণং.

২২. উপনিস্সযো পন তিৰিধো হোতি – আরম্মণূপনিস্সযো অনন্তরূপনিস্সযো পকতূপনিস্সযো চেতি.

২৩. তত্থ আরম্মণমেৰ গরুকতং আরম্মণূপনিস্সযো.

২৪. অনন্তরনিরুদ্ধা চিত্তচেতসিকা ধম্মা অনন্তরূপনিস্সযো.

২৫. রাগাদযো পন ধম্মা সদ্ধাদযো চ সুখং দুক্খং পুগ্গলো ভোজনং উতুসেনাসনঞ্চ যথারহং অজ্ঝত্তঞ্চ বহিদ্ধা চ কুসলাদিধম্মানং, কম্মং ৰিপাকানন্তি চ বহুধা হোতি পকতূপনিস্সযো.

২৬. অধিপতিসহজাতঅঞ্ঞমঞ্ঞনিস্সযআহারইন্দ্রিযৰিপ্পযুত্তঅত্থিঅৰিগতৰসেনেতি যথারহং নৰধা নামরূপানি নামরূপানং পচ্চযা ভৰন্তি.

২৭. তত্থ ¶ গরুকতমারম্মণং আরম্মণাধিপতিৰসেন নামানং, সহজাতাধিপতি চতুব্বিধোপি সহজাতৰসেন সহজাতানং নামরূপানন্তি চ দুৰিধো হোতি অধিপতিপচ্চযো.

২৮. চিত্তচেতসিকা ধম্মা ¶ অঞ্ঞমঞ্ঞং সহজাতরূপানঞ্চ, মহাভূতা অঞ্ঞমঞ্ঞং উপাদারূপানঞ্চ, পটিসন্ধিক্খণে ৰত্থুৰিপাকা অঞ্ঞমঞ্ঞন্তি চ তিৰিধো হোতি সহজাতপচ্চযো.

২৯. চিত্তচেতসিকা ধম্মা অঞ্ঞমঞ্ঞং, মহাভূতা অঞ্ঞমঞ্ঞং, পটিসন্ধিক্খণে ৰত্থুৰিপাকা অঞ্ঞমঞ্ঞন্তি চ তিৰিধো হোতি অঞ্ঞমঞ্ঞপচ্চযো.

৩০. চিত্তচেতসিকা ধম্মা অঞ্ঞমঞ্ঞং সহজাতরূপানঞ্চ, মহাভূতা অঞ্ঞমঞ্ঞং উপাদারূপানঞ্চ, ছ ৰত্থূনি সত্তন্নং ৰিঞ্ঞাণধাতূনন্তি চ তিৰিধো হোতি নিস্সযপচ্চযো.

৩১. কবল়ীকারো আহারো ইমস্স কাযস্স, অরূপিনো আহারা সহজাতানং নামরূপানন্তি চ দুৰিধো হোতি আহারপচ্চযো.

৩২. পঞ্চ পসাদা পঞ্চন্নং ৰিঞ্ঞাণানং, রূপজীৰিতিন্দ্রিযং উপাদিন্নরূপানং, অরূপিনো ইন্দ্রিযা সহজাতানং নামরূপানন্তি চ তিৰিধো হোতি ইন্দ্রিযপচ্চযো.

৩৩. ওক্কন্তিক্খণে ৰত্থু ৰিপাকানং, চিত্তচেতসিকা ধম্মা সহজাতরূপানং সহজাতৰসেন, পচ্ছাজাতা চিত্তচেতসিকা ধম্মা পুরেজাতস্স ইমস্স কাযস্স পচ্ছাজাতৰসেন ছ ৰত্থূনি পৰত্তিযং সত্তন্নং ৰিঞ্ঞাণধাতূনং পুরেজাতৰসেনেতি চ তিৰিধো হোতি ৰিপ্পযুত্তপচ্চযো.

৩৪. সহজাতং পুরেজাতং, পচ্ছাজাতঞ্চ সব্বথা.

কবল়ীকারো আহারো, রূপজীৰিতমিচ্চযন্তি. –

পঞ্চৰিধো হোতি অত্থিপচ্চযো অৰিগতপচ্চযো চ.

৩৫. আরম্মণূপনিস্সযকম্মত্থিপচ্চযেসু ¶ চ সব্বেপি পচ্চযা সমোধানং গচ্ছন্তি.

৩৬. সহজাতরূপন্তি ¶ পনেত্থ সব্বত্থাপি পৰত্তে চিত্তসমুট্ঠানানং, পটিসন্ধিযং কটত্তারূপানঞ্চ ৰসেন দুৰিধং হোতীতি ৰেদিতব্বং.

৩৭. ইতি তেকালিকা ধম্মা, কালমুত্তা চ সম্ভৰা.

অজ্ঝত্তঞ্চ বহিদ্ধা চ, সঙ্খতাসঙ্খতা তথা;

পঞ্ঞত্তিনামরূপানং, ৰসেন তিৰিধা ঠিতা;

পচ্চযা নাম পট্ঠানে, চতুৰীসতি সব্বথা.

৩৮. তত্থ রূপধম্মা রূপক্খন্ধোৰ, চিত্তচেতসিকসঙ্খাতা চত্তারো অরূপিনো খন্ধা, নিব্বানঞ্চেতি পঞ্চৰিধম্পি অরূপন্তি চ নামন্তি চ পৰুচ্চতি.

পঞ্ঞত্তিভেদো

৩৯. ততো অৰসেসা পঞ্ঞত্তি পন পঞ্ঞাপিযত্তা পঞ্ঞত্তি, পঞ্ঞাপনতো পঞ্ঞত্তীতি চ দুৰিধা হোতি.

৪০. কথং? তংতংভূতৰিপরিণামাকারমুপাদায তথা তথা পঞ্ঞত্তা ভূমিপব্বতাদিকা, সম্ভারসন্নিৰেসাকারমুপাদায গেহরথসকটাদিকা, খন্ধপঞ্চকমুপাদায পুরিসপুগ্গলাদিকা, চন্দাৰট্টনাদিকমুপাদায দিসাকালাদিকা, অসম্ফুট্ঠাকারমুপাদায কূপগুহাদিকা, তংতংভূতনিমিত্তং ভাৰনাৰিসেসঞ্চ উপাদায কসিণনিমিত্তাদিকা চেতি এৰমাদিপ্পভেদা পন পরমত্থতো অৰিজ্জমানাপি অত্থচ্ছাযাকারেন চিত্তুপ্পাদানমারম্মণভূতা তং তং উপাদায উপনিধায কারণং কত্ৰা তথা তথা পরিকপ্পিযমানা সঙ্খাযতি সমঞ্ঞাযতি ৰোহরীযতি পঞ্ঞাপীযতীতি পঞ্ঞত্তীতি পৰুচ্চতি. অযং পঞ্ঞত্তি পঞ্ঞাপিযত্তা পঞ্ঞত্তি নাম.

৪১. পঞ্ঞাপনতো পঞ্ঞত্তি পন নামনামকম্মাদিনামেন পরিদীপিতা, সা ৰিজ্জমানপঞ্ঞত্তি অৰিজ্জমানপঞ্ঞত্তি, ৰিজ্জমানেন ¶ অৰিজ্জমানপঞ্ঞত্তি, অৰিজ্জমানেন ৰিজ্জমানপঞ্ঞত্তি ¶ , ৰিজ্জমানেন ৰিজ্জমানপঞ্ঞত্তি, অৰিজ্জমানেন অৰিজ্জমানপঞ্ঞত্তি চেতি ছব্বিধা হোতি.

৪২. তত্থ যদা পন পরমত্থতো ৰিজ্জমানং রূপৰেদনাদিং এতায পঞ্ঞাপেন্তি, তদাযং ৰিজ্জমানপঞ্ঞত্তি. যদা পন পরমত্থতো অৰিজ্জমানং ভূমিপব্বতাদিং এতায পঞ্ঞাপেন্তি, তদাযং অৰিজ্জমানপঞ্ঞত্তীতি পৰুচ্চতি. উভিন্নং পন ৰোমিস্সকৰসেন সেসা যথাক্কমং ছল়ভিঞ্ঞো, ইত্থিসদ্দো, চক্খুৰিঞ্ঞাণং, রাজপুত্তোতি চ ৰেদিতব্বা.

৪৩. ৰচীঘোসানুসারেন, সোতৰিঞ্ঞাণৰীথিযা.

পৰত্থানন্তরুপ্পন্ন-মনোদ্ৰারস্স গোচরা.

অত্থা যস্সানুসারেন, ৰিঞ্ঞাযন্তি ততো পরং;

সাযং পঞ্ঞত্তি ৰিঞ্ঞেয্যা, লোকসঙ্কেতনিম্মিতা.

ইতি অভিধম্মত্থসঙ্গহে পচ্চযসঙ্গহৰিভাগো নাম

অট্ঠমো পরিচ্ছেদো.

৯. কম্মট্ঠানপরিচ্ছেদো

১. সমথৰিপস্সনানং, ভাৰনানমিতো পরং.

কম্মট্ঠানং পৰক্খামি, দুৰিধম্পি যথাক্কমং.

সমথকম্মট্ঠানং

২. তত্থ সমথসঙ্গহে তাৰ দস কসিণানি, দস অসুভা, দস অনুস্সতিযো, চতস্সো অপ্পমঞ্ঞাযো, একা সঞ্ঞা, একং ৰৰত্থানং, চত্তারো আরুপ্পা চেতি সত্তৰিধেন সমথকম্মট্ঠানসঙ্গহো.

চরিতভেদো

৩. রাগচরিতা ¶ ¶ দোসচরিতা মোহচরিতা সদ্ধাচরিতা বুদ্ধিচরিতা ৰিতক্কচরিতা চেতি ছব্বিধেন চরিতসঙ্গহো.

ভাৰনাভেদো

৪. পরিকম্মভাৰনা উপচারভাৰনা অপ্পনাভাৰনা চেতি তিস্সো ভাৰনা.

নিমিত্তভেদো

৫. পরিকম্মনিমিত্তং উগ্গহনিমিত্তং পটিভাগনিমিত্তঞ্চেতি তীণি নিমিত্তানি চ ৰেদিতব্বানি.

৬. কথং? পথৰীকসিণং আপোকসিণং তেজোকসিণং ৰাযোকসিণং নীলকসিণং পীতকসিণং লোহিতকসিণং ওদাতকসিণং আকাসকসিণং আলোককসিণঞ্চেতি ইমানি দস কসিণানি নাম.

৭. উদ্ধুমাতকং ৰিনীলকং ৰিপুব্বকং ৰিচ্ছিদ্দকং ৰিক্খাযিতকং ৰিক্খিত্তকং হতৰিক্খিত্তকং লোহিতকং পুল়ৰকং অট্ঠিকঞ্চেতি ইমে দস অসুভা নাম.

৮. বুদ্ধানুস্সতি ধম্মানুস্সতি সংঘানুস্সতি সীলানুস্সতি চাগানুস্সতি দেৰতানুস্সতি উপসমানুস্সতি মরণানুস্সতি কাযগতাসতি আনাপানস্সতি চেতি ইমা দস অনুস্সতিযো নাম.

৯. মেত্তা করুণা মুদিতা উপেক্খা চেতি ইমা চতস্সো অপ্পমঞ্ঞাযো নাম, ব্রহ্মৰিহারোতি চ পৰুচ্চতি.

১০. আহারেপটিকূলসঞ্ঞা একা সঞ্ঞা নাম.

১১. চতুধাতুৰৰত্থানং ¶ একং ৰৰত্থানং নাম.

১২. আকাসানঞ্চাযতনাদযো ¶ চত্তারো আরুপ্পা নামাতি সব্বথাপি সমথনিদ্দেসে চত্তালীস কম্মট্ঠানানি ভৰন্তি.

সপ্পাযভেদো

১৩. চরিতাসু পন দস অসুভা কাযগতাসতিসঙ্খাতা কোট্ঠাসভাৰনা চ রাগচরিতস্স সপ্পাযা.

১৪. চতস্সো অপ্পমঞ্ঞাযো নীলাদীনি চ চত্তারি কসিণানি দোসচরিতস্স.

১৫. আনাপানং মোহচরিতস্স ৰিতক্কচরিতস্স চ,

১৬. বুদ্ধানুস্সতিআদযো ছ সদ্ধাচরিতস্স.

১৭. মরণউপসমসঞ্ঞাৰৰত্থানানি বুদ্ধিচরিতস্স.

১৮. সেসানি পন সব্বানিপি কম্মট্ঠানানি সব্বেসম্পি সপ্পাযানি, তত্থাপি কসিণেসু পুথুলং মোহচরিতস্স, খুদ্দকং ৰিতক্কচরিতস্সেৰাতি.

অযমেত্থ সপ্পাযভেদো.

ভাৰনাভেদো

১৯. ভাৰনাসু সব্বত্থাপি পরিকম্মভাৰনা লব্ভতেৰ, বুদ্ধানুস্সতিআদীসু অট্ঠসু সঞ্ঞাৰৰত্থানেসু চাতি দসসুকম্মট্ঠানেসু উপচারভাৰনাৰ সম্পজ্জতি, নত্থি অপ্পনা.

২০. সেসেসু পন সমতিংসকম্মট্ঠানেসু অপ্পনাভাৰনাপি সম্পজ্জতি.

২১. তত্থাপি ¶ দস কসিণানি আনাপানঞ্চ পঞ্চকজ্ঝানিকানি.

২২. দস ¶ অসুভা কাযগতাসতি চ পঠমজ্ঝানিকা.

২৩. মেত্তাদযো তযো চতুক্কজ্ঝানিকা.

২৪. উপেক্খা পঞ্চমজ্ঝানিকাতি ছব্বীসতি রূপাৰচরজ্ঝানিকানি কম্মট্ঠানানি.

২৫. চত্তারো পন আরুপ্পা আরুপ্পজ্ঝানিকাতি.

অযমেত্থ ভাৰনাভেদো.

গোচরভেদো

২৬. নিমিত্তেসু পন পরিকম্মনিমিত্তং উগ্গহনিমিত্তঞ্চ সব্বত্থাপি যথারহং পরিযাযেন লব্ভন্তেৰ.

২৭. পটিভাগনিমিত্তং পন কসিণাসুভকোট্ঠাসআনাপানেস্ৰেৰ লব্ভতি, তত্থ হি পটিভাগনিমিত্তমারব্ভ উপচারসমাধি অপ্পনাসমাধি চ পৰত্তন্তি.

২৮. কথং? আদিকম্মিকস্স হি পথৰীমণ্ডলাদীসু নিমিত্তং উগ্গণ্হন্তস্স তমারম্মণং পরিকম্মনিমিত্তন্তি পৰুচ্চতি, সা চ ভাৰনা পরিকম্মভাৰনা নাম.

২৯. যদা পন তং নিমিত্তং চিত্তেন সমুগ্গহিতং হোতি, চক্খুনা পস্সন্তস্সেৰ মনোদ্ৰারস্স আপাথমাগতং, তদা তমেৰারম্মণং উগ্গহনিমিত্তং নাম, সা চ ভাৰনা সমাধিযতি.

৩০. তথা সমাহিতস্স পনেতস্স ততো পরং তস্মিং উগ্গহনিমিত্তে পরিকম্মসমাধিনা ভাৰনমনুযুঞ্জন্তস্স যদা তপ্পটিভাগং ৰত্থুধম্মৰিমুচ্চিতং পঞ্ঞত্তিসঙ্খাতং ভাৰনামযমারম্মণং চিত্তে সন্নিসন্নং সমপ্পিতং হোতি, তদা তং পটিভাগনিমিত্তং সমুপ্পন্নন্তি পৰুচ্চতি.

৩১. ততো ¶ পট্ঠায পরিপন্থৰিপ্পহীনা কামাৰচরসমাধিসঙ্খাতা উপচারভাৰনা নিপ্ফন্না নাম হোতি.

৩২. ততো ¶ পরং তমেৰ পরিভাগনিমিত্তং উপচারসমাধিনা সমাসেৰন্তস্স রূপাৰচরপঠমজ্ঝানমপ্পেতি.

৩৩. ততো পরং তমেৰ পঠমজ্ঝানং আৰজ্জনং সমাপজ্জনং অধিট্ঠানং ৰুট্ঠানং পচ্চৰেক্খণা চেতি ইমাহি পঞ্চহি ৰসিতাহি ৰসীভূতং কত্ৰা ৰিতক্কাদিকমোল়ারিকঙ্গং পহানায ৰিচারাদিসুখুমঙ্গুপত্তিযা পদহতো যথাক্কমং দুতিযজ্ঝানাদযো যথারহমপ্পেন্তি.

৩৪. ইচ্চেৰং পথৰীকসিণাদীসু দ্ৰাৰীসতিকম্মট্ঠানেসু পটিভাগনিমিত্তমুপলব্ভতি.

৩৫. অৰসেসেসু পন অপ্পমঞ্ঞা সত্তপঞ্ঞত্তিযং পৰত্তন্তি.

৩৬. আকাসৰজ্জিতকসিণেসু পন যং কিঞ্চি কসিণং উগ্ঘাটেত্ৰা লদ্ধমাকাসং অনন্তৰসেন পরিকম্মং করোন্তস্স পঠমারুপ্পমপ্পেতি.

৩৭. তমেৰ পঠমারুপ্পৰিঞ্ঞাণং অনন্তৰসেন পরিকম্মং করোন্তস্স দুতিযারুপ্পমপ্পেতি.

৩৮. তমেৰ পঠমারুপ্পৰিঞ্ঞাণাভাৰং পন ‘‘নত্থি কিঞ্চী’’তি পরিকম্মং করোন্তস্স ততিযারুপ্পমপ্পেতি.

৩৯. ততিযারুপ্পং ‘‘সন্তমেতং, পণীতমেত’’ন্তি পরিকম্মং করোন্তস্স চতুত্থারুপ্পমপ্পেতি.

৪০. অৰসেসেসু চ দসসু কম্মট্ঠানেসু বুদ্ধগুণাদিকমারম্মণমারব্ভ পরিকম্মং কত্ৰা তস্মিং নিমিত্তে সাধুকমুগ্গহিতে তত্থেৰ পরিকম্মঞ্চ সমাধিযতি, উপচারো চ সম্পজ্জতি.

৪১. অভিঞ্ঞাৰসেন ¶ পৰত্তমানং পন রূপাৰচরপঞ্চমজ্ঝানং অভিঞ্ঞাপাদকপঞ্চমজ্ঝানা ৰুট্ঠহিত্ৰা অধিট্ঠেয্যাদিকমাৰজ্জেত্ৰা পরিকম্মং করোন্তস্স রূপাদীসু আরম্মণেসু যথারহমপ্পেতি.

৪২. অভিঞ্ঞা ¶ চ নাম –

ইদ্ধিৰিধং দিব্বসোতং, পরচিত্তৰিজাননা;

পুব্বেনিৰাসানুস্সতি, দিব্বচক্খূতি পঞ্চধা.

অযমেত্থ গোচরভেদো.

নিট্ঠিতো চ সমথকম্মট্ঠাননযো.

ৰিপস্সনাকম্মট্ঠানং

ৰিসুদ্ধিভেদো

৪৩. ৰিপস্সনাকম্মট্ঠানে পন সীলৰিসুদ্ধি চিত্তৰিসুদ্ধি দিট্ঠিৰিসুদ্ধি কঙ্খাৰিতরণৰিসুদ্ধি মগ্গামগ্গঞাণদস্সনৰিসুদ্ধি পটিপদাঞাণদস্সনৰিসুদ্ধি ঞাণদস্সনৰিসুদ্ধি চেতি সত্তৰিধেন ৰিসুদ্ধিসঙ্গহো.

৪৪. অনিচ্চলক্খণং দুক্খলক্খণং অনত্তলক্খণঞ্চেতি তীণি লক্খণানি.

৪৫. অনিচ্চানুপস্সনা দুক্খানুপস্সনা অনত্তানুপস্সনা চেতি তিস্সো অনুপস্সনা.

৪৬. সম্মসনঞাণং উদযব্বযঞাণং ভঙ্গঞাণং ভযঞাণং আদীনৰঞাণং নিব্বিদাঞাণং মুচ্চিতুকম্যতাঞাণং পটিসঙ্খাঞাণং সঙ্খারুপেক্খাঞাণং অনুলোমঞাণঞ্চেতি দস ৰিপস্সনাঞাণানি.

৪৭. সুঞ্ঞতো ৰিমোক্খো, অনিমিত্তো ৰিমোক্খো, অপ্পণিহিতো ৰিমোক্খো চেতি তযো ৰিমোক্খা.

৪৮. সুঞ্ঞতানুপস্সনা ¶ অনিমিত্তানুপস্সনা অপ্পণিহিতানুপস্সানা চেতি তীণি ৰিমোক্খমুখানি চ ৰেদিতব্বানি.

৪৯. কথং ¶ ? পাতিমোক্খসংৰরসীলং ইন্দ্রিযসংৰরসীলং আজীৰপারিসুদ্ধিসীলং পচ্চযসন্নিস্সিতসীলঞ্চেতি চতুপারিসুদ্ধিসীলং সীলৰিসুদ্ধি নাম.

৫০. উপচারসমাধি অপ্পনাসমাধি চেতি দুৰিধোপি সমাধি চিত্তৰিসুদ্ধি নাম.

৫১. লক্খণরসপচ্চুপট্ঠানপদট্ঠানৰসেন নামরূপ পরিগ্গহো দিট্ঠিৰিসুদ্ধি নাম.

৫২. তেসমেৰ চ নামরূপানং পচ্চযপরিগ্গহো কঙ্খাৰিতরণৰিসুদ্ধি নাম.

৫৩. ততো পরং পন তথাপরিগ্গহিতেসু সপ্পচ্চযেসু তেভূমকসঙ্খারেসু অতীতাদিভেদভিন্নেসু খন্ধাদিনযমারব্ভ কলাপৰসেন সঙ্খিপিত্ৰা ‘‘অনিচ্চং খযট্ঠেন, দুক্খং ভযট্ঠেন, অনত্তা অসারকট্ঠেনা’’তি অদ্ধানৰসেন সন্ততিৰসেন খণৰসেন ৰা সম্মসনঞাণেন লক্খণত্তযং সম্মসন্তস্স তেস্ৰেৰ পচ্চযৰসেন খণৰসেন চ উদযব্বযঞাণেন উদযব্বযং সমনুপস্সন্তস্স চ –

‘‘ওভাসো পীতি পস্সদ্ধি, অধিমোক্খো চ পগ্গহো;

সুখং ঞাণমুপট্ঠানমুপেক্খা চ নিকন্তি চে’’তি. –

ওভাসাদিৰিপস্সনুপক্কিলেসপরিপন্থপরিগ্গহৰসেন মগ্গামগ্গলক্খণৰৰত্থানং মগ্গামগ্গঞাণদস্সনৰিসুদ্ধি নাম.

৫৪. তথা পরিপন্থৰিমুত্তস্স পন তস্স উদযব্বযঞাণতো পট্ঠায যা ৰানুলোমা তিলক্খণং ৰিপস্সনাপরম্পরায পটিপজ্জন্তস্স নৰ ৰিপস্সনাঞাণানি পটিপদাঞাণদস্সনৰিসুদ্ধি নাম.

৫৫. তস্সেৰং পটিপজ্জন্তস্স ¶ পন ৰিপস্সনাপরিপাকমাগম্ম ‘‘ইদানি অপ্পনা উপ্পজ্জিস্সতী’’তি ভৰঙ্গং ৰোচ্ছিজ্জিত্ৰা উপ্পন্নমনোদ্ৰারাৰজ্জনানন্তরং দ্ৰে তীণি ৰিপস্সনাচিত্তানি যং কিঞ্চি অনিচ্চাদিলক্খণমারব্ভ পরিকম্মোপচারানুলোমনামেন পৰত্তন্তি.

৫৬. যা ¶ সিখাপ্পত্তা, সা সানুলোমা সঙ্খারুপেক্খা ৰুট্ঠানগামিনিৰিপস্সনাতি চ পৰুচ্চতি.

৫৭. ততো পরং গোত্রভুচিত্তং নিব্বানমালম্বিত্ৰা পুথুজ্জনগোত্তমভিভৰন্তং, অরিযগোত্তমভিসম্ভোন্তঞ্চ পৰত্ততি.

৫৮. তস্সানন্তরমেৰ মগ্গো দুক্খসচ্চং পরিজানন্তো সমুদযসচ্চং পজহন্তো, নিরোধসচ্চং সচ্ছিকরোন্তো, মগ্গসচ্চং ভাৰনাৰসেন অপ্পনাৰীথিমোতরতি.

৫৯. ততো পরং দ্ৰে তীণি ফলচিত্তানি পৰত্তিত্ৰা ভৰঙ্গপাতোৰ হোতি, পুন ভৰঙ্গং ৰোচ্ছিন্দিত্ৰা পচ্চৰেক্খণঞাণানি পৰত্তন্তি.

৬০. মগ্গং ফলঞ্চ নিব্বানং, পচ্চৰেক্খতি পণ্ডিতো.

হীনে কিলেসে সেসে চ, পচ্চৰেক্খতি ৰান ৰা.

ছব্বিসুদ্ধিকমেনেৰং, ভাৰেতব্বো চতুব্বিধো;

ঞাণদস্সনৰিসুদ্ধি, নাম মগ্গো পৰুচ্চতি.

অযমেত্থ ৰিসুদ্ধিভেদো.

ৰিমোক্খভেদো

৬১. তত্থ অনত্তানুপস্সনা অত্তাভিনিৰেসং মুঞ্চন্তী সুঞ্ঞতানুপস্সনা নাম ৰিমোক্খমুখং হোতি.

৬২. অনিচ্চানুপস্সনা ¶ ৰিপল্লাসনিমিত্তং মুঞ্চন্তী অনিমিত্তানুপস্সনা নাম.

৬৩. দুক্খানুপস্সনা ¶ তণ্হাপণিধিং মুঞ্চন্তী অপ্পণিহিতানুপস্সনা নাম.

৬৪. তস্মা যদি ৰুট্ঠানগামিনিৰিপস্সনা অনত্ততো ৰিপস্সতি, সুঞ্ঞতো ৰিমোক্খো নাম হোতি মগ্গো.

৬৫. যদি অনিচ্চতো ৰিপস্সতি, অনিমিত্তো ৰিমোক্খো নাম.

৬৬. যদি দুক্খতো ৰিপস্সতি, অপ্পণিহিতো ৰিমোক্খো নামাতি চ মগ্গো ৰিপস্সনাগমনৰসেন তীণি নামানি লভতি, তথা ফলঞ্চ মগ্গাগমনৰসেন মগ্গৰীথিযং.

৬৭. ফলসমাপত্তিৰীথিযং পন যথাৰুত্তনযেন ৰিপস্সন্তানং যথাসকফলমুপ্পজ্জমানম্পি ৰিপস্সনাগমনৰসেনেৰ সুঞ্ঞতাদিৰিমোক্খোতি চ পৰুচ্চতি, আরম্মণৰসেন পন সরসৰসেন চ নামত্তযং সব্বত্থ সব্বেসম্পি সমমেৰ চ.

অযমেত্থ ৰিমোক্খভেদো.

পুগ্গলভেদো

৬৮. এত্থ পন সোতাপত্তিমগ্গং ভাৰেত্ৰা দিট্ঠিৰিচিকিচ্ছাপহানেন পহীনাপাযগমনো সত্তক্খত্তুপরমো সোতাপন্নো নাম হোতি.

৬৯. সকদাগামিমগ্গং ভাৰেত্ৰা রাগদোসমোহানং তনুকরত্তা সকদাগামী নাম হোতি সকিদেৰ ইমং লোকং আগন্ত্ৰা.

৭০. অনাগামিমগ্গং ¶ ভাৰেত্ৰা কামরাগব্যাপাদানমনৰসেসপ্পহানেন অনাগামী নাম হোতি অনাগন্ত্ৰা ইত্থত্তং.

৭১. অরহত্তমগ্গং ভাৰেত্ৰা অনৰসেসকিলেসপ্পহানেন অরহা নাম হোতি খীণাসৰো লোকে অগ্গদক্খিণেয্যোতি.

অযমেত্থ পুগ্গলভেদো.

সমাপত্তিভেদো

৭২. ফলসমাপত্তিৰীথিযং ¶ পনেত্থ সব্বেসম্পি যথাসকফলৰসেন সাধারণাৰ.

৭৩. নিরোধসমাপত্তিসমাপজ্জনং পন অনাগামীনঞ্চেৰ অরহন্তানঞ্চ লব্ভতি, তত্থ যথাক্কমং পঠমজ্ঝানাদিমহগ্গতসমাপত্তিং সমাপজ্জিত্ৰা ৰুট্ঠায তত্থ গতে সঙ্খারধম্মে তত্থ তত্থেৰ ৰিপস্সন্তো যাৰ আকিঞ্চঞ্ঞাযতনং গন্ত্ৰা ততো পরং অধিট্ঠেয্যাদিকং পুব্বকিচ্চং কত্ৰা নেৰসঞ্ঞানাসঞ্ঞাযতনং সমাপজ্জতি, তস্স দ্ৰিন্নং অপ্পনাজৰনানং পরতো ৰোচ্ছিজ্জতি চিত্তসন্ততি, ততো নিরোধসমাপন্নো নাম হোতি.

৭৪. ৰুট্ঠানকালে পন অনাগামিনো অনাগামিফলচিত্তং, অরহতো অরহত্তফলচিত্তং একৰারমেৰ পৰত্তিত্ৰা ভৰঙ্গপাতো হোতি, ততো পরং পচ্চৰেক্খণঞাণং পৰত্ততি.

অযমেত্থ সমাপত্তিভেদো.

নিট্ঠিতো চ ৰিপস্সনাকম্মট্ঠাননযো.

উয্যোজনং

৭৫. ভাৰেতব্বং ¶ পনিচ্চেৰং, ভাৰনাদ্ৰযমুত্তমং.

পটিপত্তিরসস্সাদং, পত্থযন্তেন সাসনেতি.

ইতি অভিধম্মত্থসঙ্গহে কম্মট্ঠানসঙ্গহৰিভাগো নাম

নৰমো পরিচ্ছেদো.

নিগমনং

(ক) চারিত্তসোভিতৰিসালকুলোদযেন ¶ ,

সদ্ধাভিৰুড্ঢপরিসুদ্ধগুণোদযেন;

নম্পৰ্হযেন পণিধায পরানুকম্পং,

যং পত্থিতং পকরণং পরিনিট্ঠিতং তং.

(খ) পুঞ্ঞেন তেন ৰিপুলেন তু মূলসোমং;

ধঞ্ঞাধিৰাসমুদিতোদিতমাযুকন্তং;

পঞ্ঞাৰদাতগুণসোভিতলজ্জিভিক্খূ,

মঞ্ঞন্তু পুঞ্ঞৰিভৰোদযমঙ্গলায.

ইতি অনুরুদ্ধাচরিযেন রচিতং

অভিধম্মত্থসঙ্গহং নাম পকরণং.

নমো তস্স ভগৰতো অরহতো সম্মাসম্বুদ্ধস্স.

অভিধম্মত্থৰিভাৰিনীটীকা

গন্থারম্ভকথা

(ক) ৰিসুদ্ধকরুণাঞাণং ¶ ¶ , বুদ্ধং সম্বুদ্ধপূজিতং;

ধম্মং সদ্ধম্মসম্ভূতং, নত্ৰা সংঘং নিরঙ্গণং.

(খ) সারিপুত্তং মহাথেরং, পরিযত্তিৰিসারদং;

ৰন্দিত্ৰা সিরসা ধীরং, গরুং গারৰভাজনং.

(গ) ৰণ্ণযিস্সং সমাসেন, অভিধম্মত্থসঙ্গহং;

আভিধম্মিকভিক্খূনং, পরং পীতিৰিৰড্ঢনং.

(ঘ) পোরাণেহি ¶ অনেকাপি, কতা যা পন ৰণ্ণনা;

ন তাহি সক্কা সব্বত্থ, অত্থো ৰিঞ্ঞাতৰে ইধ.

(ঙ) তস্মা লীনপদানেত্থ, সাধিপ্পাযমহাপযং;

ৰিভাৰেন্তো সমাসেন, রচযিস্সামি ৰণ্ণনন্তি.

গন্থারম্ভকথাৰণ্ণনা

১. পরমৰিচিত্তনযসমন্নাগতং সকসমযসমযন্তরগহনৰিগ্গাহণসমত্থং সুৰিমলৰিপুলপঞ্ঞাৰেয্যত্তিযজননং পকরণমিদমারভন্তোযমাচরিযো পঠমং তাৰ রতনত্তযপণামাভিধেয্য করণপ্পকারপকরণাভিধানপযোজনানি দস্সেতুং ‘‘সম্মাসম্বুদ্ধ’’ন্ত্যাদিমাহ.

এত্থ ¶ হি ‘‘সম্মাসম্বুদ্ধ…পে… অভিৰাদিযা’’তি ইমিনা রতনত্তযপণামো ৰুত্তো, অভিধম্মত্থসঙ্গহ’’ন্তি এতেন অভিধেয্যকরণপ্পকারপকরণাভিধানানি অভিধম্মত্থানং ইধ সঙ্গহেতব্বভাৰদস্সনেন তেসং ইমিনা সমুদিতেন পটিপাদেতব্বভাৰদীপনতো, একত্থ সঙ্গয্হ কথনাকারদীপনতো, অত্থানুগতসমঞ্ঞাপরিদীপনতো চ. পযোজনং পন সঙ্গহপদেন সামত্থিযতো দস্সিতমেৰ অভিধম্মত্থানং একত্থ সঙ্গহে সতি তদুগ্গহপরিপুচ্ছাদিৰসেন তেসং সরূপাৰবোধস্স, তম্মূলিকায চ দিট্ঠধম্মিকসম্পরাযিকত্থসিদ্ধিযা অনাযাসেন সংসিজ্ঝনতো.

তত্থ রতনত্তযপণামপ্পযোজনং তাৰ বহুধা পপঞ্চেন্তি আচরিযা, ৰিসেসতো পন অন্তরাযনিৰারণং পচ্চাসীসন্তি. তথা হি ৰুত্তং সঙ্গহকারেহি ‘‘তস্সানুভাৰেন হতন্তরাযো’’তি (পারা. অট্ঠ. ১.গন্থারম্ভকথা). রতনত্তযপণামো হি অত্থতো পণামকিরিযাভিনিপ্ফাদিকা কুসলচেতনা, সা চ ৰন্দনেয্যৰন্দকানং খেত্তজ্ঝাসযসম্পদাহি দিট্ঠধম্মৰেদনীযভূতা যথালদ্ধসম্পত্তিনিমিত্তকস্স কম্মস্স অনুবলপ্পদানৰসেন তন্নিব্বত্তিতৰিপাকসন্ততিযা অন্তরাযকরানি উপপীল়কউপচ্ছেদককম্মানি পটিবাহিত্ৰা তন্নিদানানং যথাধিপ্পেতসিদ্ধিৰিবন্ধকানং রোগাদিঅন্তরাযানমপ্পৰত্তিং সাধেতি. তস্মা পকরণারম্ভে রতনত্তযপণামকরণং যথারদ্ধপকরণস্স অনন্তরাযেন পরিসমাপনত্থঞ্চেৰ সোতূনঞ্চ ৰন্দনাপুব্বঙ্গমায পটিপত্তিযা অনন্তরাযেন উগ্গহণধারণাদিসংসিজ্ঝনত্থঞ্চ. অভিধেয্যকথনং পন ৰিদিতাভিধেয্যস্সেৰ গন্থস্স ৰিঞ্ঞূহি উগ্গহণাদিৰসেন ¶ পটিপজ্জিতব্বভাৰতো. করণপ্পকারপ্পযোজনসন্দস্সনানি চ সোতুজনসমুস্সাহজননত্থং. অভিধানকথনং পন ৰোহারসুখত্থন্তি অযমেত্থ সমুদাযত্থো. অযং পন অৰযৰত্থো ¶ – সসদ্ধম্মগণুত্তমং অতুলং সম্মাসম্বুদ্ধং অভিৰাদিয অভিধম্মত্থসঙ্গহং ভাসিস্সন্তি সম্বন্ধো.

তত্থ সম্মা সামঞ্চ সব্বধম্মে অভিসম্বুদ্ধোতি সম্মা সম্বুদ্ধো, ভগৰা. সো হি সঙ্খতাসঙ্খতভেদং সকলম্পি ধম্মজাতং যাথাৰসরসলক্খণপটিৰেধৰসেন সম্মা সযং ৰিচিতোপচিতপারমিতাসম্ভূতেন সযম্ভূঞাণেন সামং বুজ্ঝি অঞ্ঞাসি. যথাহ ‘‘সযং অভিঞ্ঞায কমুদ্দিসেয্য’’ন্তি (মহাৰ. ১১; ম. নি. ১.২৮৫; ২.৩৪১; ধ. প. ৩৫৩), অথ ৰা বুধধাতুস্স জাগরণৰিকসনত্থেসুপি পৰত্তনতো সম্মা সামঞ্চ পটিবুদ্ধো অনঞ্ঞপটিবোধিতো হুত্ৰা সযমেৰ সৰাসনসম্মোহনিদ্দায অচ্চন্তং ৰিগতো, দিনকরকিরণসমাগমেন পরমরুচিরসিরিসোভগ্গপ্পত্তিযা ৰিকসিতমিৰ পদুমং অগ্গমগ্গঞাণসমাগমেন অপরিমিতগুণগণালঙ্কতসব্বঞ্ঞুতঞ্ঞাণপ্পত্তিযা সম্মা সযমেৰ ৰিকসিতো ৰিকাসমনুপ্পত্তোত্যত্থো. যথাৰুত্তৰচনত্থযোগেপি সম্মাসম্বুদ্ধসদ্দস্স ভগৰতি সমঞ্ঞাৰসেন পৰত্তত্তা ‘‘অতুল’’ন্তি ইমিনা ৰিসেসেতি. তুলায সম্মিতো তুল্যো, সোযেৰ তুলো যকারলোপৰসেন. অথ ৰা সম্মিতত্থে অকারপচ্চযৰসেন তুলায সম্মিতো তুলো, ন তুলো অতুলো, সীলাদীহি গুণেহি কেনচি অসদিসো, নত্থি এতস্স ৰা তুলো সদিসোতি অতুলো সদেৰকে লোকে অগ্গপুগ্গলভাৰতো. যথাহ ‘‘যাৰতা, ভিক্খৰে, সত্তা অপদা ৰা দ্ৰিপদা ৰা চতুপ্পদা ৰা…পে… তথাগতো তেসং অগ্গমক্খাযতী’’তিআদি (অ. নি. ৪.৩৪; ৫.৩২; ইতিৰু. ৯০).

এত্তাৰতা চ হেতুফলসত্তূপকারসম্পদাৰসেন তীহাকারেহি ভগৰতো থোমনা কতা হোতি. তত্থ হেতুসম্পদা নাম মহাকরুণাসমাযোগো বোধিসম্ভারসম্ভরণঞ্চ ¶ . ফলসম্পদা পন ঞাণপহানআনুভাৰরূপকাযসম্পদাৰসেন চতুব্বিধা. তত্থ সব্বঞ্ঞুতঞ্ঞাণপদট্ঠানং মগ্গঞাণং, তম্মূলকানি চ দসবলাদিঞাণানি ঞাণসম্পদা. সৰাসনসকলসংকিলেসানমচ্চন্তমনুপ্পাদধম্মতাপাদনং পহানসম্পদা. যথিচ্ছিতনিপ্ফাদনে আধিপচ্চং আনুভাৰসম্পদা. সকললোকনযনাভিসেকভূতা পন লক্খণানুব্যঞ্জনপ্পটিমণ্ডিতা অত্তভাৰসম্পত্তি রূপকাযসম্পদা নাম. সত্তূপকারো পন আসযপযোগৰসেন দুৰিধো. তত্থ দেৰদত্তাদীসু ৰিরোধিসত্তেসুপি ¶ নিচ্চং হিতজ্ঝাসযতা, অপরিপাকগতিন্দ্রিযানং ইন্দ্রিযপরিপাককালাগমনঞ্চ আসযো নাম. তদঞ্ঞসত্তানং পন লাভসক্কারাদিনিরপেক্খচিত্তস্স যানত্তযমুখেন সব্বদুক্খনিয্যানিকধম্মদেসনা পযোগো নাম.

তত্থ পুরিমা দ্ৰে ফলসম্পদা ‘‘সম্মাসম্বুদ্ধ’’ন্তি ইমিনা দস্সিতা, ইতরা পন দ্ৰে, তথা সত্তূপকারসম্পদা চ ‘‘অতুল’’ন্তি এতেন, তদুপাযভূতা পন হেতুসম্পদা দ্ৰীহিপি সামত্থিযতো দস্সিতা তথাৰিধহেতুব্যতিরেকেন তদুভযসম্পত্তীনমসম্ভৰতো, অহেতুকত্তে চ সব্বত্থ তাসং সম্ভৰপ্পসঙ্গতো.

তদেৰং তিৰিধাৰত্থাসঙ্গহিতথোমনাপুব্বঙ্গমং বুদ্ধরতনং ৰন্দিত্ৰা ইদানি সেসরতনানম্পি পণামমারভন্তো আহ ‘‘সসদ্ধম্মগণুত্তম’’ন্তি. গুণীভূতানম্পি হি ধম্মসংঘানং অভিৰাদেতব্বভাৰো সহযোগেন ৰিঞ্ঞাযতি যথা ‘‘সপুত্তদারো আগতোতি পুত্তদারস্সাপি আগমন’’ন্তি.

তত্থ অত্তানং ধারেন্তে চতূসু অপাযেসু, ৰট্টদুক্খেসু চ অপতমানে কত্ৰা ধারেতীতি ধম্মো, চতুমগ্গফলনিব্বানৰসেন নৰৰিধো, পরিযত্তিযা সহ দসৰিধো ৰা ধম্মো. ধারণঞ্চ পনেতস্স অপাযাদিনিব্বত্তককিলেসৰিদ্ধংসনং, তং অরিযমগ্গস্স কিলেসসমুচ্ছেদকভাৰতো, নিব্বানস্স চ ¶ আরম্মণভাৰেন তস্স তদত্থসিদ্ধিহেতুতায নিপ্পরিযাযতো লব্ভতি, ফলস্স পন কিলেসানং পটিপ্পস্সম্ভনৰসেন মগ্গানুকূলপ্পৰত্তিতো, পরিযত্তিযা চ তদধিগমহেতুতাযাতি উভিন্নম্পি পরিযাযতোতি দট্ঠব্বং. সতং সপ্পুরিসানং অরিযপুগ্গলানং, সন্তো ৰা সংৰিজ্জমানো ন তিত্থিযপরিকপ্পিতো অত্তা ৰিয পরমত্থতো অৰিজ্জমানো সন্তো ৰা পসত্থো স্ৰাক্খাততাদিগুণযোগতো ন বাহিরকধম্মো ৰিয একন্তনিন্দিতো ধম্মোতি সদ্ধম্মো, গণো চ সো অট্ঠন্নং অরিযপুগ্গলানং সমূহভাৰতো উত্তমো চ সুপ্পটিপন্নতাদিগুণৰিসেসযোগতো, গণানং, গণেসু ৰা দেৰমনুস্সাদি সমূহেসু উত্তমো যথাৰুত্তগুণৰসেনাতি গণুত্তমো, সহ সদ্ধম্মেন, গণুত্তমেন চাতি সসদ্ধম্মগণুত্তমো, তং সসদ্ধম্মগণুত্তমং.

অভিৰাদিযাতি ৰিসেসতো ৰন্দিত্ৰা, ভযলাভকুলাচারাদিৰিরহেন সক্কচ্চং আদরেন কাযৰচীমনোদ্ৰারেহি ৰন্দিত্ৰাত্যত্থো. ভাসিস্সন্তি কথেস্সামি. নিব্বত্তিতপরমত্থভাৰেন অভি ৰিসিট্ঠা ¶ ধম্মা এত্থাতিআদিনা অভিধম্মো, ধম্মসঙ্গণীআদিসত্তপকরণং অভিধম্মপিটকং, তত্থ ৰুত্তা অত্থা অভিধম্মত্থা, তে সঙ্গয্হন্তি এত্থ, এতেনাতি ৰা অভিধম্মত্থসঙ্গহং.

পরমত্থধম্মৰণ্ণনা

২. এৰং তাৰ যথাধিপ্পেতপ্পযোজননিমিত্তং রতনত্তযপণামাদিকং ৰিধায ইদানি যেসং অভিধম্মত্থানং সঙ্গহণৰসেন ইদং পকরণং পট্ঠপীযতি, তে তাৰ সঙ্খেপতো উদ্দিসন্তো আহ ‘‘তত্থ ৰুত্তা’’ত্যাদি. তত্থ তস্মিং অভিধম্মে সব্বথা কুসলাদিৰসেন, খন্ধাদিৰসেন চ ৰুত্তা অভিধম্মত্থা পরমত্থতো সম্মুতিং ঠপেত্ৰা নিব্বত্তিতপরমত্থৰসেন চিত্তং ৰিঞ্ঞাণক্খন্ধো, চেতসিকং ৰেদনাদিক্খন্ধত্তযং, রূপং ¶ ভূতুপাদাযভেদভিন্নো রূপক্খন্ধো, নিব্বানং মগ্গফলানমারম্মণভূতো অসঙ্খতধম্মোতি এৰং চতুধা চতূহাকারেহি ঠিতাতি যোজনা. তত্থ পরমো উত্তমো অৰিপরীতো অত্থো, পরমস্স ৰা উত্তমস্স ঞাণস্স অত্থো গোচরোতি পরমত্থো.

চিন্তেতীতি চিত্তং, আরম্মণং ৰিজানাতীতি অত্থো. যথাহ ‘‘ৰিসযৰিজাননলক্খণং চিত্ত’’ন্তি (ধ. স. অট্ঠ. ১ ধম্মুদেসৰারফস্সপঞ্চমকরাসিৰণ্ণনা). সতিপি হি নিস্সযসমনন্তরাদিপচ্চযেন ৰিনা আরম্মণেন চিত্তমুপ্পজ্জতীতি তস্স তংলক্খণতা ৰুত্তা, এতেন নিরারম্মণৰাদিমতং পটিক্খিত্তং হোতি. চিন্তেন্তি ৰা এতেন করণভূতেন সম্পযুত্তধম্মাতি চিত্তং. অথ ৰা চিন্তনমত্তং চিত্তং. যথাপচ্চযং হি পৰত্তিমত্তমেৰ যদিদং সভাৰধম্মো নাম. এৰঞ্চ কত্ৰা সব্বেসম্পি পরমত্থধম্মানং ভাৰসাধনমেৰ নিপ্পরিযাযতো লব্ভতি, কত্তুকরণৰসেন পন নিব্বচনং পরিযাযকথাতি দট্ঠব্বং. সকসককিচ্চেসু হি ধম্মানং অত্তপ্পধানতাসমারোপনেন কত্তুভাৰো চ, তদনুকূলভাৰেন সহজাতধম্মসমূহে কত্তুভাৰসমারোপনেন পটিপাদেতব্বধম্মস্স করণত্তঞ্চ পরিযাযতোৰ লব্ভতি, তথানিদস্সনং পন ধম্মসভাৰৰিনিমুত্তস্স কত্তাদিনো অভাৰপরিদীপনত্থন্তি ৰেদিতব্বং. ৰিচিত্তকরণাদিতোপি চিত্তসদ্দত্থং পপঞ্চেন্তি. অযং পনেত্থ সঙ্গহো –

‘‘ৰিচিত্তকরণা চিত্তং, অত্তনো চিত্ততায ৰা;

চিতং কম্মকিলেসেহি, চিতং তাযতি ৰা তথা;

চিনোতি অত্তসন্তানং, ৰিচিত্তারম্মণন্তি চা’’তি.

চেতসি ¶ ভৰং তদাযত্তৰুত্তিতাযাতি চেতসিকং. ন হি তং চিত্তেন ৰিনা আরম্মণগ্গহণসমত্থং অসতি চিত্তে সব্বেন সব্বং অনুপ্পজ্জনতো, চিত্তং পন কেনচি চেতসিকেন ৰিনাপি ¶ আরম্মণে পৰত্ততীতি তং চেতসিকমেৰ চিত্তাযত্তৰুত্তিকং নাম. তেনাহ ভগৰা ‘‘মনোপুব্বঙ্গমা ধম্মা’’তি (ধ. প. ১-২), এতেন সুখাদীনং অচেতনত্তনিচ্চত্তাদযো ৰিপ্পটিপত্তিযোপি পটিক্খিত্তা হোন্তি. চেতসি নিযুত্তং ৰা চেতসিকং.

রুপ্পতীতি রূপং, সীতুণ্হাদিৰিরোধিপচ্চযেহি ৰিকারমাপজ্জতি, আপাদীযতীতি ৰা অত্থো. তেনাহ ভগৰা ‘‘সীতেনপি রুপ্পতি, উণ্হেনপি রুপ্পতী’’ত্যাদি (সং. নি. ৩.৭৯), রুপ্পনঞ্চেত্থ সীতাদিৰিরোধিপচ্চযসমৰাযে ৰিসদিসুপ্পত্তিযেৰ. যদি এৰং অরূপধম্মানম্পি রূপৰোহারো আপজ্জতীতি? নাপজ্জতি সীতাদিগ্গহণসামত্থিযতো ৰিভূততরস্সেৰ রুপ্পনস্সাধিপ্পেতত্তা. ইতরথা হি ‘‘রুপ্পতী’’তি অৰিসেসৰচনেনেৰ পরিযত্তন্তি কিং সীতাদিগ্গহণেন, তং পন সীতাদিনা ফুট্ঠস্স রুপ্পনং ৰিভূততরং, তস্মা তদেৰেত্থাধিপ্পেতন্তি ঞাপনত্থং সীতাদিগ্গহণং কতং. যদি এৰং কথং ব্রহ্মলোকে রূপৰোহারো, ন হি তত্থ উপঘাতকা সীতাদযো অত্থীতি? কিঞ্চাপি উপঘাতকা নত্থি, অনুগ্গাহকা পন অত্থি, তস্মা তংৰসেনেত্থ রুপ্পনং সম্ভৰতীতি, অথ ৰা তংসভাৰানতিৰত্তনতো তত্থ রূপৰোহারোতি অলমতিপ্পপঞ্চেন.

ভৰাভৰং ৰিননতো সংসিব্বনতো ৰানসঙ্খাতায তণ্হায নিক্খন্তং, নিব্বাতি ৰা এতেন রাগগ্গিআদিকোতি নিব্বানং.

১. চিত্তপরিচ্ছেদৰণ্ণনা

ভূমিভেদচিত্তৰণ্ণনা

৩. ইদানি যস্মা ৰিভাগৰন্তানং ধম্মানং সভাৰৰিভাৰনং ৰিভাগেন ৰিনা ন হোতি, তস্মা যথাউদ্দিট্ঠানং অভিধম্মত্থানং উদ্দেসক্কমেন ৰিভাগং দস্সেতুং চিত্তং তাৰ ভূমিজাতিসম্পযোগাদিৰসেন ¶ ৰিভজিত্ৰা নিদ্দিসিতুমারভন্তো আহ ‘‘তত্থ চিত্তং তাৰা’’ত্যাদি. তাৰ-সদ্দো পঠমন্তি এতস্সত্থে. যথাউদ্দিট্ঠেসু চতূসু অভিধম্মত্থেসু পঠমং চিত্তং নিদ্দিসীযতীতি ¶ অযঞ্হেত্থত্থো. চত্তারো ৰিধা পকারা অস্সাতি চতুব্বিধং. যস্মা পনেতে চতুভুম্মকা ধম্মা অনুপুব্বপণীতা, তস্মা হীনুক্কট্ঠুক্কট্ঠতরতমানুক্কমেন তেসং নিদ্দেসো কতো. তত্থ কামেতীতি কামো, কামতণ্হা, সা এত্থ অৰচরতি আরম্মণকরণৰসেনাতি কামাৰচরং. কামীযতীতি ৰা কামো, একাদসৰিধো কামভৰো, তস্মিং যেভুয্যেন অৰচরতীতি কামাৰচরং. যেভুয্যেন চরণস্স হি অধিপ্পেতত্তা রূপারূপভৰেসু পৰত্তস্সাপি ইমস্স কামাৰচরভাৰো উপপন্নো হোতি. কামভৰোযেৰ ৰা কামো এত্থ অৰচরতীতি কামাৰচরো, তত্থ পৰত্তম্পি চিত্তং নিস্সিতে নিস্সযৰোহারেন কামাৰচরং ‘‘মঞ্চা উক্কুট্ঠিং করোন্তী’’ত্যাদীসু ৰিযাতি অলমতিৰিসারণিযা কথায. হোতি চেত্থ –

‘‘কামোৰচরতীত্যেত্থ, কামেৰচরতীতি ৰা;

ঠানূপচারতো ৰাপি, তং কামাৰচরং ভৰে’’তি.

রূপারূপাৰচরেসুপি এসেৰ নযো যথারহং দট্ঠব্বো. উপাদানক্খন্ধসঙ্খাতলোকতো উত্তরতি অনাসৰভাৰেনাতি লোকুত্তরং, মগ্গচিত্তং. ফলচিত্তং পন ততো উত্তিণ্ণন্তি লোকুত্তরং. উভযম্পি ৰা সহ নিব্বানেন লোকতো উত্তরং অধিকং যথাৰুত্তগুণৰসেনেৰাতি লোকুত্তরং.

ভূমিভেদচিত্তৰণ্ণনা নিট্ঠিতা.

অকুসলচিত্তৰণ্ণনা

৪. ইমেসু পন চতূসু চিত্তেসু কামাৰচরচিত্তস্স কুসলাকুসলৰিপাককিরিযভেদেন চতুব্বিধভাৰেপি পাপাহেতুকৰজ্জানং একূনসট্ঠিযা, একনৰুতিযা ৰা চিত্তানং সোভননামেন ৰোহারকরণত্থং ‘‘পাপাহেতুকমুত্তানি ¶ ‘সোভনানী’তি ৰুচ্চরে’’তি এৰং ৰক্খমাননযস্স অনুরূপতো পাপাহেতুকেযেৰ পঠমং দস্সেন্তো, তেসু চ ভৰেসু গহিতপটিসন্ধিকস্স সত্তস্স আদিতো ৰীথিচিত্তৰসেন লোভসহগতচিত্তুপ্পাদানমেৰ সম্ভৰতো তেযেৰ পঠমং দস্সেত্ৰা তদনন্তরং দ্ৰিহেতুকভাৰসামঞ্ঞেন দোমনস্সসহগতে, তদনন্তরং একহেতুকে চ দস্সেতুং ‘‘সোমনস্সসহগত’’ন্ত্যাদিনা ¶ লোভমূলং তাৰ ৰেদনাদিট্ঠিসঙ্খারভেদেন অট্ঠধা ৰিভজিত্ৰা দস্সেতি.

তত্থ সুন্দরং মনো, তং ৰা এতস্স অত্থীতি সুমনো, চিত্তং, তংসমঙ্গিপুগ্গলো ৰা, তস্স ভাৰো তস্মিং অভিধানবুদ্ধীনং পৰত্তিহেতুতাযাতি সোমনস্সং, মানসিকসুখৰেদনাযেতং অধিৰচনং, তেন সহগতং একুপ্পাদাদিৰসেন সংসট্ঠং, তেন সহ একুপ্পাদাদিভাৰং গতন্তি ৰা সোমনস্সসহগতং. মিচ্ছা পস্সতীতি দিট্ঠি. সামঞ্ঞৰচনস্সপি হি অত্থপ্পকরণাদিনা ৰিসেসৰিসযতা হোতীতি ইধ মিচ্ছাদস্সনমেৰ ‘‘দিট্ঠী’’তি ৰুচ্চতি. দিট্ঠিযেৰ দিট্ঠিগতং ‘‘সঙ্খারগতং থামগত’’ন্ত্যাদীসু ৰিয গত-সদ্দস্স তব্ভাৰৰুত্তিত্তা. দ্ৰাসট্ঠিযা ৰা দিট্ঠীসু গতং অন্তোগতং, দিট্ঠিযা ৰা গমনমত্তং ন এত্থ গন্তব্বো অত্তাদিকো কোচি অত্থীতি দিট্ঠিগতং, ‘‘ইদমেৰ সচ্চং মোঘমঞ্ঞ’’ন্তি পৰত্তো অত্তত্তনিযাদিঅভিনিৰেসো, তেন সমং একুপ্পাদাদীহি পকারেহি যুত্তন্তি দিট্ঠিগতসম্পযুত্তং. সঙ্খরোতি চিত্তং তিক্খভাৰসঙ্খাতমণ্ডনৰিসেসেন সজ্জেতি, সঙ্খরীযতি ৰা তং এতেন যথাৰুত্তনযেন সজ্জীযতীতি সঙ্খারো, তত্থ তত্থ কিচ্চে সংসীদমানস্স চিত্তস্স অনুবলপ্পদানৰসেন অত্তনো ৰা পরেসং ৰা পৰত্তপুব্বপ্পযোগো, সো পন অত্তনো পুব্বভাগপ্পৰত্তে চিত্তসন্তানে চেৰ পরসন্তানে চ পৰত্ততীতি তন্নিব্বত্তিতো চিত্তস্স তিক্খভাৰসঙ্খাতো ৰিসেসোৰিধ সঙ্খারো, সো যস্স নত্থি তং অসঙ্খারং ¶ , তদেৰ অসঙ্খারিকং. সঙ্খারেন সহিতং সসঙ্খারিকং. তথা চ ৰদন্তি –

‘‘পুব্বপ্পযোগসম্ভূতো, ৰিসেসো চিত্তসম্ভৰী;

সঙ্খারো তংৰসেনেত্থ, হোত্যাসঙ্খারিকাদিতা’’তি.

অথ ৰা ‘‘সসঙ্খারিকং অসঙ্খারিক’’ন্তি চেতং কেৰলং সঙ্খারস্স ভাৰাভাৰং সন্ধায ৰুত্তং, ন তস্স সহপ্পৰত্তিসব্ভাৰাভাৰতোতি ভিন্নসন্তানপ্পৰত্তিনোপি সঙ্খারস্স ইদমত্থিতায তংৰসেন নিব্বত্তং চিত্তং সঙ্খারো অস্স অত্থীতি সসঙ্খারিকং ‘‘সলোমকো সপক্খকো’’ত্যাদীসু ৰিয সহ-সদ্দস্স ৰিজ্জমানত্থপরিদীপনতো. তব্বিপরীতং পন তদভাৰতো ৰুত্তনযেন অসঙ্খারিকং. দিট্ঠিগতেন ৰিপ্পযুত্তং ৰিসংসট্ঠন্তি দিট্ঠিগতৰিপ্পযুত্তং. উপপত্তিতো যুত্তিতো ইক্খতি অনুভৰতি ৰেদযমানাপি মজ্ঝত্তাকারসণ্ঠিতিযাতি উপেক্খা. সুখদুক্খানং ৰা উপেতা যুত্তা অৰিরুদ্ধা ইক্খা ¶ অনুভৰনন্তি উপেক্খা. সুখদুক্খাৰিরোধিতায হেসা তেসং অনন্তরম্পি পৰত্ততি. উপেক্খাসহগতন্তি ইদং ৰুত্তনযমেৰ.

কস্মা পনেত্থ অঞ্ঞেসুপি ফস্সাদীসু সম্পযুত্তধম্মেসু ৰিজ্জমানেসু সোমনস্সসহগতাদিভাৰোৰ ৰুত্তোতি? সোমনস্সাদীনমেৰ অসাধারণভাৰতো. ফস্সাদযো হি কেচি সব্বচিত্তসাধারণা, কেচি কুসলাদিসাধারণা, মোহাদযো চ সব্বাকুসলসাধারণাতি ন তেহি সক্কা চিত্তং ৰিসেসেতুং, সোমনস্সাদযো পন কত্থচি চিত্তে হোন্তি, কত্থচি ন হোন্তীতি পাকটোৰ তংৰসেন চিত্তস্স ৰিসেসো. কস্মা পনেতে কত্থচি হোন্তি, কত্থচি ন হোন্তীতি? কারণস্স সন্নিহিতাসন্নিহিতভাৰতো. কিং পন নেসং কারণন্তি? ৰুচ্চতেসভাৰতো, পরিকপ্পতো ৰা হি ইট্ঠারম্মণং, সোমনস্সপটিসন্ধিকতা, অগম্ভীরসভাৰতা চ ইধ সোমনস্সস্স ¶ কারণং, ইট্ঠমজ্ঝত্তারম্মণং, উপেক্খাপটিসন্ধিকতা, গম্ভীরসভাৰতা চ উপেক্খায, দিট্ঠিৰিপন্নপুগ্গলসেৰনা, সস্সতুচ্ছেদাসযতা চ দিট্ঠিযা, বলৰউতুভোজনাদযো পন পচ্চযা অসঙ্খারিকভাৰস্সাতি. তস্মা অত্তনো অনুরূপকারণৰসেন নেসং উপ্পজ্জনতো কত্থচি চিত্তেযেৰ সম্ভৰোতি সক্কা এতেহি চিত্তস্স ৰিসেসো পঞ্ঞাপেতুন্তি. এৰঞ্চ কত্ৰা নেসং সতিপি মোহহেতুকভাৰে লোভসহগতভাৰোৰ নিগমনে ৰুত্তো.

ইমেসং পন অট্ঠন্নম্পি অযমুপ্পত্তিক্কমো ৰেদিতব্বো. যদা হি ‘‘নত্থি কামেসু আদীনৰো’’ত্যাদিনা নযেন মিচ্ছাদিট্ঠিং পুরক্খত্ৰা হট্ঠতুট্ঠো কামে ৰা পরিভুঞ্জতি, দিট্ঠমঙ্গলাদীনি ৰা সারতো পচ্চেতি সভাৰতিক্খেনেৰ অনুস্সাহিতেন চিত্তেন, তদা পঠমং অকুসলচিত্তমুপ্পজ্জতি. যদা পন মন্দেন সমুস্সাহিতেন চিত্তেন, তদা দুতিযং. যদা পন মিচ্ছাদিট্ঠিং অপুরক্খত্ৰা কেৰলং হট্ঠতুট্ঠো মেথুনং ৰা সেৰতি, পরসম্পত্তিং ৰা অভিজ্ঝাযতি, পরভণ্ডং ৰা হরতি সভাৰতিক্খেনেৰ অনুস্সাহিতেন চিত্তেন, তদা ততিযং. যদা পন মন্দেন সমুস্সাহিতেন চিত্তেন, তদা চতুত্থং. যদা পন কামানং ৰা অসম্পত্তিং আগম্ম, অঞ্ঞেসং ৰা সোমনস্সহেতূনং অভাৰেন চতূসুপি ৰিকপ্পেসু সোমনস্সরহিতা হোন্তি, তদা সেসানি চত্তারি উপেক্খাসহগতানি উপ্পজ্জন্তীতি. অট্ঠপীতি পি-সদ্দো সম্পিণ্ডনত্থো, তেন ৰক্খমাননযেন অকুসলকম্মপথেসু নেসং লব্ভমানকম্মপথানুরূপতো পৰত্তিভেদং কালদেসসন্তানারম্মণাদিভেদেন অনেকৰিধতম্পি সঙ্গণ্হাতি.

৫. দুট্ঠু ¶ মনো, তং ৰা এতস্সাতি দুম্মনো, তস্স ভাৰো দোমনস্সং, মানসিকদুক্খৰেদনাযেতং অধিৰচনং, তেন ¶ সহগতন্তি দোমনস্সসহগতং. আরম্মণে পটিহঞ্ঞতীতি পটিঘো, দোসো. চণ্ডিক্কসভাৰতায হেস আরম্মণং পটিহনন্তো ৰিয পৰত্ততি. দোমনস্সসহগতস্স ৰেদনাৰসেন অভেদেপি অসাধারণধম্মৰসেন চিত্তস্স উপলক্খণত্থং দোমনস্সগ্গহণং, পটিঘসম্পযুত্তভাৰো পন উভিন্নং একন্তসহচারিতা দস্সনত্থং ৰুত্তোতি দট্ঠব্বং. দোমনস্সঞ্চেত্থ অনিট্ঠারম্মণানুভৰনলক্খণো ৰেদনাক্খন্ধপরিযাপন্নো একো ধম্মো, পটিঘো চণ্ডিক্কসভাৰো সঙ্খারক্খন্ধপরিযাপন্নো একো ধম্মোতি অযমেতেসং ৰিসেসো. এত্থ চ যং কিঞ্চি অনিট্ঠারম্মণং, নৰৰিধআঘাতৰত্থূনি চ দোমনস্সস্স কারণং, পটিঘস্স কারণঞ্চাতি দট্ঠব্বং. দ্ৰিন্নং পন নেসং চিত্তানং পাণাতিপাতাদীসু তিক্খমন্দপ্পৰত্তিকালে উপ্পত্তি ৰেদিতব্বা. এত্থাপি নিগমনে পি-সদ্দস্স অত্থো ৰুত্তনযানুসারেন দট্ঠব্বো.

৬. সভাৰং ৰিচিনন্তো তায কিচ্ছতি কিলমতীতি ৰিচিকিচ্ছা. অথ ৰা চিকিচ্ছিতুং দুক্করতায ৰিগতা চিকিচ্ছা ঞাণপ্পটিকারো ইমিস্সাতি ৰিচিকিচ্ছা, তায সম্পযুত্তং ৰিচিকিচ্ছাসম্পযুত্তং. উদ্ধতস্স ভাৰো উদ্ধচ্চং. উদ্ধচ্চস্স সব্বাকুসলসাধারণভাৰেপি ইধ সম্পযুত্তধম্মেসু পধানং হুত্ৰা পৰত্ততীতি ইদমেৰ তেন ৰিসেসেত্ৰা ৰুত্তং. এৰঞ্চ কত্ৰা ধম্মুদ্দেসপাল়িযং সেসাকুসলেসু উদ্ধচ্চং যেৰাপনকৰসেন ৰুত্তং, ইধ পন ‘‘উদ্ধচ্চং উপ্পজ্জতী’’তি সরূপেনেৰ দেসিতং. হোন্তি চেত্থ –

‘‘সব্বাকুসলযুত্তম্পি, উদ্ধচ্চং অন্তমানসে;

বলৰং ইতি তংযেৰ, ৰুত্তমুদ্ধচ্চযোগতো.

‘‘তেনেৰ হি মুনিন্দেন, যেৰাপনকনামতো;

ৰত্ৰা সেসেসু এত্থেৰ, তং সরূপেন দেসিত’’ন্তি.

ইমানি ¶ পন দ্ৰে চিত্তানি মূলন্তরৰিরহতো অতিসম্মূল়্হতায, সংসপ্পনৰিক্খিপনৰসেন পৰত্তৰিচিকিচ্ছুদ্ধচ্চসমাযোগেন চঞ্চলতায চ সব্বত্থাপি রজ্জনদুস্সনরহিতানি উপেক্খাসহগতানেৰ পৰত্তন্তি, ততোযেৰ চ সভাৰতিক্খতায উস্সাহেতব্বতায অভাৰতো সঙ্খারভেদোপি নেসং নত্থি. হোন্তি চেত্থ –

‘‘মূল়্হত্তা ¶ চেৰ সংসপ্প-ৰিক্খেপা চেকহেতুকং;

সোপেক্খং সব্বদা নো চ, ভিন্নং সঙ্খারভেদতো.

‘‘ন হি তস্স সভাৰেন, তিক্খতুস্সাহনীযতা;

অত্থি সংসপ্পমানস্স, ৰিক্খিপন্তস্স সব্বদা’’তি.

মোহেন মুয্হন্তি অতিসযেন মুয্হন্তি মূলন্তরৰিরহতোতি মোমূহানি.

৭. ইচ্চেৰন্ত্যাদি যথাৰুত্তানং দ্ৰাদসাকুসলচিত্তানং নিগমনং. তত্থ ইতি-সদ্দো ৰচনৰচনীযসমুদাযনিদস্সনত্থো. এৰং-সদ্দো ৰচনৰচনীযপটিপাটিসন্দস্সনত্থো. নিপাতসমুদাযো ৰা এস ৰচনৰচনীযনিগমনারম্ভে. ইচ্চেৰং যথাৰুত্তনযেন সব্বথাপি সোমনস্সুপেক্খাদিট্ঠিসম্পযোগাদিনা পটিঘসম্পযোগাদিনা ৰিচিকিচ্ছুদ্ধচ্চযোগেনাতি সব্বেনাপি সম্পযোগাদিআকারেন দ্ৰাদস অকুসলচিত্তানি সমত্তানি পরিনিট্ঠিতানি, সঙ্গহেত্ৰা ৰা অত্তানি গহিতানি, ৰুত্তানীত্যত্থো. তত্থ কুসলপটিপক্খানি অকুসলানি মিত্তপ্পটিপক্খো অমিত্তো ৰিয, পটিপক্খভাৰো চ কুসলাকুসলানং যথাক্কমং পহাযকপহাতব্বভাৰেন ৰেদিতব্বো.

৮. অট্ঠধাত্যাদি সঙ্গহগাথা. লোভো চ সো সুপ্পতিট্ঠিতভাৰসাধনেন মূলসদিসত্তা মূলঞ্চ, কং এতেসন্তি লোভমূলানি চিত্তানি ৰেদনাদিভেদতো অট্ঠধা সিযুং ¶ . তথা দোসমূলানি সঙ্খারভেদতো দ্ৰিধা. মোহমূলানি সুদ্ধো মোহোযেৰ মূলমেতেসন্তি মোহমূলসঙ্খাতানি সম্পযোগভেদতো দ্ৰে চাতি অকুসলা দ্ৰাদস সিযুন্ত্যত্থো.

অকুসলচিত্তৰণ্ণনা নিট্ঠিতা.

অহেতুকচিত্তৰণ্ণনা

৯. এৰং মূলভেদতো তিৰিধম্পি অকুসলং সম্পযোগাদিভেদতো দ্ৰাদসধা ৰিভজিত্ৰা ইদানি ¶ অহেতুকচিত্তানি নিদ্দিসন্তো তেসং অকুসলৰিপাকাদিৰসেন তিৰিধভাৰেপি অকুসলানন্তরং অকুসলৰিপাকেযেৰ চক্খাদিনিস্সযসম্পটিচ্ছনাদিকিচ্চভেদেন সত্তধা ৰিভজিতুং ‘‘উপেক্খাসহগতং চক্খুৰিঞ্ঞাণ’’ন্ত্যাদিমাহ. তত্থ চক্খতি ৰিঞ্ঞাণাধিট্ঠিতং হুত্ৰা সমৰিসমং আচিক্খন্তং ৰিয হোতীতি চক্খু. অথ ৰা চক্খতি রূপং অস্সাদেন্তং ৰিয হোতীতি চক্খু. চক্খতীতি হি অযং সদ্দো ‘‘মধুং চক্খতি, ব্যঞ্জনং চক্খতী’’ত্যাদীসু ৰিয অস্সাদনত্থো হোতি. তেনাহ ভগৰা – ‘‘চক্খুং খো পন, মাগণ্ডিয, রূপারামং রূপরতং রূপসম্মুদিত’’ন্ত্যাদি. যদি এৰং ‘‘সোতং খো, মাগণ্ডিয, সদ্দারামং সদ্দরতং সদ্দসম্মুদিত’’ন্ত্যাদিৰচনতো (ম. নি. ২.২০৯) সোতাদীনম্পি সদ্দাদিঅস্সাদনং অত্থীতি তেসম্পি চক্খুসদ্দাভিধেয্যতা আপজ্জেয্যাতি? নাপজ্জতি নিরুল়্হত্তা, নিরুল়্হো হেস চক্খু-সদ্দো দট্ঠুকামতানিদানকম্মজভূতপ্পসাদলক্খণে চক্খুপ্পসাদেযেৰ মযূরাদিসদ্দা ৰিয সকুণৰিসেসাদীসু, চক্খুনা সহৰুত্তিযা পন ভমুকট্ঠিপরিচ্ছিন্নো মংসপিণ্ডোপি ‘‘চক্খূ’’তি ৰুচ্চতি. অট্ঠকথাযং পন অনেকত্থত্তা ধাতূনং চক্খতি-সদ্দস্স ৰিভাৰনত্থতাপি সম্ভৰতীতি ‘‘চক্খতি রূপং ৰিভাৰেতীতি চক্খূ’’তি (ৰিসুদ্ধি. ২.৫১০) ৰুত্তং. চক্খুস্মিং ¶ ৰিঞ্ঞাণং তন্নিস্সিতত্থাতি চক্খুৰিঞ্ঞাণং. তথা হেতং ‘‘চক্খুসন্নিস্সিতরূপৰিজাননলক্খণ’’ন্তি (ধ. স. অট্ঠ. ৪৩১; ৰিসুদ্ধি. ২.৪৫৪) ৰুত্তং.

এৰং সোতৰিঞ্ঞাণাদীসুপি যথারহং দট্ঠব্বং. ‘‘তথা’’তি ইমিনা উপেক্খাসহগতভাৰং অতিদিসতি. ৰিঞ্ঞাণাধিট্ঠিতং হুত্ৰা সুণাতীতি সোতং. ঘাযতি গন্ধোপাদানং করোতীতি ঘানং. জীৰিতনিমিত্তং রসো জীৰিতং, তং অৰ্হাযতি তস্মিং নিন্নতাযাতি জিৰ্হা নিরুত্তিনযেন. কুচ্ছিতানং পাপধম্মানং আযো পৰত্তিট্ঠানন্তি কাযো. কাযিন্দ্রিযঞ্হি ফোট্ঠব্বগ্গহণসভাৰত্তা তদস্সাদৰসপ্পৰত্তানং, তম্মূলকানঞ্চ পাপধম্মানং ৰিসেসকারণন্তি তেসং পৰত্তিট্ঠানং ৰিয গয্হতি. সসম্ভারকাযো ৰা কুচ্ছিতানং কেসাদীনং আযোতি কাযো. তংসহচরিতত্তা পন পসাদকাযোপি তথা ৰুচ্চতি. দু কুচ্ছিতং হুত্ৰা খনতি কাযিকসুখং, দুক্খমন্তি ৰা দুক্খং. দুক্করমোকাসদানং এতস্সাতি দুক্খ’’ন্তিপি অপরে. পঞ্চৰিঞ্ঞাণগ্গহিতং রূপাদিআরম্মণং সম্পটিচ্ছতি তদাকারপ্পৰত্তিযাতি সম্পটিচ্ছনং. সম্মা তীরেতি যথাসম্পটিচ্ছিতং রূপাদিআরম্মণং ৰীমংসতীতি সন্তীরণং. অঞ্ঞমঞ্ঞৰিরুদ্ধানং কুসলাকুসলানং পাকাতি ৰিপাকা, ৰিপক্কভাৰমাপন্নানং অরূপধম্মানমেতং অধিৰচনং. এৰঞ্চ কত্ৰা কুসলাকুসলকম্মসমুট্ঠানানম্পি ¶ কটত্তারূপানং নত্থি ৰিপাকৰোহারো. অকুসলস্স ৰিপাকচিত্তানি অকুসলৰিপাকচিত্তানি.

১০. সুখযতি কাযচিত্তং, সুট্ঠু ৰা খনতি কাযচিত্তাবাধং, সুখেন খমিতব্বন্তি ৰা সুখং. ‘‘সুকরমোকাসদানং এতস্সাতি সুখ’’ন্তি অপরে. কস্মা পন যথা অকুসলৰিপাকসন্তীরণং একমেৰ ৰুত্তং, এৰমৰত্ৰা কুসলৰিপাকসন্তীরণং দ্ৰিধা ৰুত্তন্তি? ইট্ঠইট্ঠমজ্ঝত্তারম্মণৰসেন ৰেদনাভেদসম্ভৰতো. যদি এৰং তত্থাপি অনিট্ঠঅনিট্ঠমজ্ঝত্তারম্মণৰসেন ৰেদনাভেদেন ভৰিতব্বন্তি? নযিদমেৰং অনিট্ঠারম্মণে ¶ উপ্পজ্জিতব্বস্সপি দোমনস্সস্স পটিঘেন ৰিনা অনুপ্পজ্জনতো, পটিঘস্স চ একন্তাকুসলসভাৰস্স অব্যাকতেসু অসম্ভৰতো. ন হি ভিন্নজাতিকো ধম্মো ভিন্নজাতিকেসু উপলব্ভতি, তস্মা অত্তনা সমানযোগক্খমস্স অসম্ভৰতো অকুসলৰিপাকেসু দোমনস্সং ন সম্ভৰতীতি তস্স তংসহগততা ন ৰুত্তা. অথ ৰা যথা কোচি বলৰতা পোথিযমানো দুব্বলপুরিসো তস্স পটিপ্পহরিতুং অসক্কোন্তো তস্মিং উপেক্খকোৰ হোতি, এৰমেৰ অকুসলৰিপাকানং পরিদুব্বলভাৰতো অনিট্ঠারম্মণেপি দোমনস্সুপ্পাদো নত্থীতি সন্তীরণং উপেক্খাসহগতমেৰ.

চক্খুৰিঞ্ঞাণাদীনি পন চত্তারি উভযৰিপাকানিপি ৰত্থারম্মণঘট্টনায দুব্বলভাৰতো অনিট্ঠে ইট্ঠেপি চ আরম্মণে উপেক্খাসহগতানেৰ. তেসঞ্হি চতুন্নম্পি ৰত্থুভূতানি চক্খাদীনি উপাদারূপানেৰ, তথা আরম্মণভূতানিপি রূপাদীনি, উপাদারূপকেন চ উপাদারূপকস্স সঙ্ঘট্টনং অতিদুব্বলং পিচুপিণ্ডকেন পিচুপিণ্ডকস্স ফুসনং ৰিয, তস্মা তানি সব্বথাপি উপেক্খাসহগতানেৰ. কাযৰিঞ্ঞাণস্স পন ফোট্ঠব্বসঙ্খাতভূতত্তযমেৰ আরম্মণন্তি তং কাযপ্পসাদে সঙ্ঘট্টিতম্পি তং অতিক্কমিত্ৰা তন্নিস্সযেসু মহাভূতেসু পটিহঞ্ঞতি. ভূতরূপেহি চ ভূতরূপানং সঙ্ঘট্টনং বলৰতরং অধিকরণিমত্থকে পিচুপিণ্ডকং ঠপেত্ৰা কূটেন পহটকালে কূটস্স পিচুপিণ্ডকং অতিক্কমিত্ৰা অধিকরণিগ্গহণং ৰিয, তস্মা ৰত্থারম্মণঘট্টনায বলৰভাৰতো কাযৰিঞ্ঞাণং অনিট্ঠে দুক্খসহগতং, ইট্ঠে সুখসহগতন্তি. সম্পটিচ্ছনযুগল়্হং পন অত্তনা অসমাননিস্সযানং চক্খুৰিঞ্ঞাণাদীনমনন্তরং উপ্পজ্জতীতি সমাননিস্সযতো অলদ্ধানন্তরপচ্চযতায সভাগূপত্থম্ভরহিতো ৰিয পুরিসো নাতিবলৰং সব্বথাপি ৰিসযরসমনুভৰিতুং ন সক্কোতীতি সব্বথাপি উপেক্খাসহগতমেৰ. ৰুত্তৰিপরিযাযতো কুসলৰিপাকসন্তীরণং ইট্ঠইট্ঠমজ্ঝত্তারম্মণেসু ¶ সুখোপেক্খাসহগতন্তি. যদি এৰং আৰজ্জনদ্ৰযস্স ¶ উপেক্খাসম্পযোগং কস্মা ৰক্খতি, ননু তম্পি সমাননিস্সযানন্তরং পৰত্ততীতি? সচ্চং, তত্থ পন পুরিমং পুব্বে কেনচি অগ্গহিতেযেৰ আরম্মণে একৰারমেৰ পৰত্ততি, পচ্ছিমম্পি ৰিসদিসচিত্তসন্তানপরাৰত্তনৰসেন ব্যাপারন্তরসাপেক্খন্তি ন সব্বথাপি ৰিসযরসমনুভৰিতুং সক্কোতি, তস্মা মজ্ঝত্তৰেদনাসম্পযুত্তমেৰাতি. হোন্তি চেত্থ –

‘‘ৰত্থালম্বসভাৰানং, ভূতিকানঞ্হি ঘট্টনং;

দুব্বলং ইতি চক্খাদি-চতুচিত্তমুপেক্খকং.

‘‘কাযনিস্সযফোট্ঠব্ব-ভূতানং ঘট্টনায তু;

বলৰত্তা ন ৰিঞ্ঞাণং, কাযিক মজ্ঝৰেদনং.

‘‘সমাননিস্সযো যস্মা, নত্থানন্তরপচ্চযো;

তস্মা দুব্বলমালম্বে, সোপেক্খং সম্পটিচ্ছন’’ন্তি.

কুসলস্স ৰিপাকানি, সম্পযুত্তহেতুৰিরহতো অহেতুকচিত্তানি চাতি কুসলৰিপাকাহেতুকচিত্তানি. নিব্বত্তকহেতুৰসেন নিপ্ফন্নানিপি হেতানি সম্পযুত্তহেতুৰসেনেৰ অহেতুকৰোহারং লভন্তি, ইতরথা মহাৰিপাকেহি ইমেসং নানত্তাসম্ভৰতো. কিং পনেত্থ কারণং যথা ইধেৰং অকুসলৰিপাকনিগমনে অহেতুকগ্গহণং ন কতন্তি? ব্যভিচারাভাৰতো. সতি হি সম্ভৰে, ব্যভিচারে চ ৰিসেসনং সাত্থকং সিযা. অকুসলৰিপাকানং পন লোভাদিসাৰজ্জধম্মৰিপাকভাৰেন তব্বিধুরেহি, অলোভাদীহি সম্পযোগাযোগতো, সযং অব্যাকতনিরৰজ্জসভাৰানং লোভাদিঅকুসলধম্মসম্পযোগৰিরোধতো চ নত্থি কদাচিপি সহেতুকতায সম্ভৰোতি অহেতুকভাৰাব্যভিচারতো ¶ ন তানি অহেতুকসদ্দেন ৰিসেসিতব্বানি.

১১. ইদানি অহেতুকাধিকারে অহেতুককিরিযচিত্তানিপি কিচ্চভেদেন তিধা দস্সেতুং ‘‘উপেক্খাসহগত’’ন্ত্যাদি ৰুত্তং. চক্খাদিপঞ্চদ্ৰারে ঘট্টিতমারম্মণং আৰজ্জেতি তত্থ আভোগং করোতি, চিত্তসন্তানং ৰা ভৰঙ্গৰসেন পৰত্তিতুং অদত্ৰা ৰীথিচিত্তভাৰায পরিণামেতীতি পঞ্চদ্ৰারাৰজ্জনং, কিরিযাহেতুকমনোধাতুচিত্তং. আৰজ্জনস্স অনন্তরপচ্চযভূতং ভৰঙ্গচিত্তং মনোদ্ৰারং ৰীথিচিত্তানং পৰত্তিমুখভাৰতো. তস্মিং দিট্ঠসুতমুতাদিৰসেন আপাথমাগতমারম্মণং আৰজ্জেতি ¶ , ৰুত্তনযেন ৰা চিত্তসন্তানং পরিণামেতীতি মনোদ্ৰারাৰজ্জনং, কিরিযাহেতুকমনোৰিঞ্ঞাণধাতুউপেক্খাসহগতচিত্তং. ইদমেৰ চ পঞ্চদ্ৰারে যথাসন্তীরিতং আরম্মণং ৰৰত্থপেতীতি ৰোট্ঠব্বনন্তি চ ৰুচ্চতি. হসিতং উপ্পাদেতীতি হসিতুপ্পাদং, খীণাসৰানং অনোল়ারিকারম্মণেসু পহট্ঠাকারমত্তহেতুকং কিরিযাহেতুকমনোৰিঞ্ঞাণধাতুসোমনস্সসহগতচিত্তং.

১২. সব্বথাপীতি অকুসলৰিপাককুসলৰিপাককিরিযভেদেন. অট্ঠারসাতি গণনপরিচ্ছেদো. অহেতুকচিত্তানীতি পরিচ্ছিন্নধম্মনিদস্সনং.

অহেতুকচিত্তৰণ্ণনা নিট্ঠিতা.

সোভনচিত্তৰণ্ণনা

১৪. এৰং দ্ৰাদসাকুসলঅহেতুকাট্ঠারসৰসেন সমতিংস চিত্তানি দস্সেত্ৰা ইদানি তব্বিনিমুত্তানং সোভনৰোহারং ঠপেতুং ‘‘পাপাহেতুকমুত্তানী’’ত্যাদি ৰুত্তং. অত্তনা অধিসযিতস্স অপাযাদিদুক্খস্স পাপনতো পাপেহি ¶ , হেতুসম্পযোগাভাৰতো অহেতুকেহি চ মুত্তানি চতুৰীসতিকামাৰচরপঞ্চতিংসমহগ্গতলোকুত্তরৰসেন একূনসট্ঠিপরিমাণানি, অথ ৰা অট্ঠ লোকুত্তরানি ঝানঙ্গযোগভেদেন পচ্চেকং পঞ্চধা কত্ৰা একনৰুতিপি চিত্তানি সোভনগুণাৰহনতো, অলোভাদিঅনৰজ্জহেতুসম্পযোগতো চ সোভনানীতি ৰুচ্চরে কথীযন্তি.

কামাৰচরসোভনচিত্তৰণ্ণনা

১৫. ইদানি সোভনেসু কামাৰচরানমেৰ পঠমং উদ্দিট্ঠত্তা তেসুপি অব্যাকতানং কুসলপুব্বকত্তা পঠমং কামাৰচরকুসলং, ততো তব্বিপাকং, তদনন্তরং তদেকভূমিপরিযাপন্নং কিরিযচিত্তঞ্চ পচ্চেকং ৰেদনাঞাণসঙ্খারভেদেন অট্ঠধা দস্সেতুং ‘‘সোমনস্সসহগত’’ন্ত্যাদি ৰুত্তং. তত্থ জানাতি যথাসভাৰং পটিৰিজ্ঝতীতি ঞাণং. সেসং ৰুত্তনযমেৰ. এত্থ চ বলৰসদ্ধায দস্সনসম্পত্তিযা পচ্চযপটিগ্গাহকাদিসম্পত্তিযাতি এৰমাদীহি কারণেহি সোমনস্সসহগততা, পঞ্ঞাসংৰত্তনিককম্মতো, অব্যাপজ্জলোকূপপত্তিতো, ইন্দ্রিযপরিপাকতো, কিলেসদূরীভাৰতো ¶ চ ঞাণসম্পযুত্ততা, তব্বিপরিযাযেন উপেক্খাসহগততা চেৰ ঞাণৰিপ্পযুত্ততা চ, আৰাসসপ্পাযাদিৰসেন কাযচিত্তানং কল্লভাৰতো, পুব্বে দানাদীসু কতপরিচযতাদীহি চ অসঙ্খারিকতা, তব্বিপরিযাযেন সসঙ্খারিকতা চ ৰেদিতব্বা.

তত্থ যদা পন যো দেয্যধম্মপটিগ্গাহকাদিসম্পত্তিং, অঞ্ঞং ৰা সোমনস্সহেতুং আগম্ম হট্ঠপহট্ঠো ‘‘অত্থি দিন্ন’’ন্ত্যাদিনযপ্পৰত্তং সম্মাদিট্ঠিং পুরক্খত্ৰা মুত্তচাগতাদিৰসেন অসংসীদন্তো অনুস্সাহিতো পরেহি দানাদীনি পুঞ্ঞানি করোতি, তদাস্স চিত্তং সোমনস্সসহগতং ঞাণসম্পযুত্তং অসঙ্খারিকং হোতি. যদা পন ৰুত্তনযেনেৰ হট্ঠতুট্ঠো সম্মাদিট্ঠিং ¶ পুরক্খত্ৰাপি অমুত্তচাগতাদিৰসেন সংসীদমানো পরেহি ৰা উস্সাহিতো করোতি, তদাস্স তদেৰ চিত্তং সসঙ্খারিকং হোতি. যদা পন ঞাতিজনস্স পটিপত্তিদস্সনেন জাতপরিচযা বালদারকা ভিক্খূ দিস্ৰা সোমনস্সজাতা সহসা কিঞ্চিদেৰ হত্থগতং দদন্তি ৰা ৰন্দন্তি ৰা, তদা তেসং ততিযং চিত্তং উপ্পজ্জতি. যদা পন ‘‘দেথ, ৰন্দথা’’তি ঞাতীহি উস্সাহিতা এৰং পটিপজ্জন্তি, তদা চতুত্থং চিত্তং উপ্পজ্জতি. যদা পন দেয্যধম্মপটিগ্গাহকাদীনং অসম্পত্তিং, অঞ্ঞেসং ৰা সোমনস্সহেতূনং অভাৰং আগম্ম চতূসুপি ৰিকপ্পেসু সোমনস্সরহিতা হোন্তি, তদা সেসানি চত্তারি উপেক্খাসহগতানি উপ্পজ্জন্তীতি. অট্ঠপীতি পি-সদ্দেন দসপুঞ্ঞকিরিযাদিৰসেন অনেকৰিধতং সম্পিণ্ডেতি. তথা হি ৰদন্তি –

‘‘কমেন পুঞ্ঞৰত্থূহি, গোচরাধিপতীহি চ;

কম্মহীনাদিতো চেৰ, গণেয্য নযকোৰিদো’’তি.

ইমানি হি অট্ঠ চিত্তানি দসপুঞ্ঞকিরিযৰত্থুৰসেন পৰত্তনতো পচ্চেকং দস দসাতি কত্ৰা অসীতি চিত্তানি হোন্তি, তানি চ ছসু আরম্মণেসু পৰত্তনতো পচ্চেকং ছগ্গুণিতানি সাসীতিকানি চত্তারি সতানি হোন্তি, অধিপতিভেদেন পন ঞাণৰিপ্পযুত্তানং চত্তালীসাধিকদ্ৰিসতপরিমাণানং ৰীমংসাধিপতিসম্পযোগাভাৰতো তানি তিণ্ণং অধিপতীনং ৰসেন তিগুণিতানি ৰীসাধিকানি সত্তসতানি, তথা ঞাণসম্পযুত্তানি চ চতুন্নং অধিপতীনং ৰসেন চতুগ্গুণিতানি সসট্ঠিকানি নৰ সতানীতি এৰং অধিপতিৰসেন সহস্সং সাসীতিকানি চ ছ সতানি হোন্তি, তানি কাযৰচীমনোকম্মসঙ্খাতকম্মত্তিকৰসেন তিগুণিতানি চত্তালীসাধিকানি পঞ্চ ¶ সহস্সানি হোন্তি, তানি চ হীনমজ্ঝিমপণীতভেদতো তিগুণিতানি ৰীসসতাধিকপন্নরসসহস্সানি হোন্তি. যং পন ৰুত্তং আচরিযবুদ্ধদত্তত্থেরেন –

‘‘সত্তরস ¶ সহস্সানি, দ্ৰে সতানি অসীতি চ;

কামাৰচরপুঞ্ঞানি, ভৰন্তীতি ৰিনিদ্দিসে’’তি.

তং অধিপতিৰসেন গণনপরিহানিং অনাদিযিত্ৰা সোতপতিতৰসেন ৰুত্তন্তি দট্ঠব্বং, কালদেসাদিভেদেন পন নেসং ভেদো অপ্পমেয্যোৰ.

কুচ্ছিতে (ধ. স. অট্ঠ. ১) পাপধম্মে সলযন্তি কম্পেন্তি ৰিদ্ধংসেন্তি অপগমেন্তীতি ৰা কুসলানি. অথ ৰা কুচ্ছিতাকারেন সন্তানে সযনতো পৰত্তনতো কুসসঙ্খাতে পাপধম্মে লুনন্তি ছিন্দন্তীতি কুসলানি. অথ ৰা কুচ্ছিতে পাপধম্মে সানতো তনুকরণতো ওসানকরণতো ৰা কুসসঙ্খাতেন ঞাণেন, সদ্ধাদিধম্মজাতেন ৰা লাতব্বানি সহজাতউপনিস্সযভাৰেন যথারহং পৰত্তেতব্বানীতি কুসলানি, তানেৰ যথাৰুত্তত্থেন কামাৰচরানি কুসলচিত্তানি চাতি কামাৰচরকুসলচিত্তানি.

১৬. যথা পনেতানি পুঞ্ঞকিরিযৰসেন, কম্মদ্ৰারৰসেন, কম্মৰসেন, অধিপতিৰসেন চ পৰত্তন্তি, নেৰং ৰিপাকানি দানাদিৰসেন অপ্পৰত্তনতো, ৰিঞ্ঞত্তিসমুট্ঠাপনাভাৰতো, অৰিপাকসভাৰতো, ছন্দাদীনি পুরক্খত্ৰা অপ্পৰত্তিতো চ, তস্মা তংৰসেন পরিহাপেত্ৰা যথারহং গণনভেদো যোজেতব্বো. ইমানিপি ইট্ঠইট্ঠমজ্ঝত্তারম্মণৰসেন যথাক্কমং সোমনস্সুপেক্খাসহিতানি. পটিসন্ধাদিৰসপ্পৰত্তিযং কম্মস্স বলৰাবলৰভাৰতো, তদারম্মণপ্পৰত্তিযং যেভুয্যেন জৰনানুরূপতো, কদাচি তত্থাপি কম্মানুরূপতো চ ঞাণসম্পযুত্তানি, ঞাণৰিপ্পযুত্তানি চ হোন্তি. যথাপযোগং ৰিনা সপ্পযোগঞ্চ যথাউপট্ঠিতেহি কম্মাদিপচ্চযেহি উতুভোজনাদিসপ্পাযাসপ্পাযৰসেন অসঙ্খারিকসসঙ্খারিকানি.

১৭. কিরিযচিত্তানম্পি ¶ কুসলে ৰুত্তনযেন যথারহং সোমনস্সসহগতাদিতা ৰেদিতব্বা.

১৮. সহেতুককামাৰচরকুসলৰিপাককিরিযচিত্তানীতি এত্থ সহেতুকগ্গহণং ৰিপাককিরিযাপেক্খং ¶ ৰিসেসনং কুসলস্স একন্তসহেতুকত্তা. হোতি হি যথালাভযোজনা, ‘‘সক্খরকথলম্পি মচ্ছগুম্বম্পি চরন্তম্পি তিট্ঠন্তম্পী’’ত্যাদীসু (দী. নি. ১.২৪৯) ৰিয সক্খরকথলস্স চরণাযোগতো মচ্ছগুম্বাপেক্খায চরণকিরিযা যোজীযতীতি.

১৯. সহেতুকামাৰচরপুঞ্ঞপাককিরিযা ৰেদনাঞাণসঙ্খারভেদেন পচ্চেকং ৰেদনাভেদতো দুৰিধত্তা, ঞাণভেদতো চতুব্বিধত্তা, সঙ্খারভেদতো অট্ঠৰিধত্তা চ সম্পিণ্ডেত্ৰা চতুৰীসতি মতাতি যোজনা. ননু চ ৰেদনাভেদো তাৰ যুত্তো তাসং ভিন্নসভাৰত্তা. ঞাণসঙ্খারভেদো পন কথন্তি? ঞাণসঙ্খারানং ভাৰাভাৰকতোপি ভেদো ঞাণসঙ্খারকতোৰ যথা ৰস্সকতো সুভিক্খো দুব্ভিক্খোতি, তস্মা ঞাণসঙ্খারকতো ভেদো ঞাণসঙ্খারভেদোতি ন এত্থ কোচি ৰিরোধোতি.

২০. ইদানি সব্বানিপি কামাৰচরচিত্তানি সম্পিণ্ডেত্ৰা দস্সেতুং ‘‘কামে তেৰীসা’’ত্যাদি ৰুত্তং. কামে ভৰে সত্ত অকুসলৰিপাকানি, সহেতুকাহেতুকানি সোল়স কুসলৰিপাকানীতি এৰং তেৰীসতি ৰিপাকানি দ্ৰাদস অকুসলানি, অট্ঠ কুসলানীতি পুঞ্ঞাপুঞ্ঞানি ৰীসতি অহেতুকা তিস্সো সহেতুকা অট্ঠাতি একাদস কিরিযা চাতি সব্বথাপি কুসলাকুসলৰিপাককিরিযানং অন্তোগধভেদেন চতুপঞ্ঞাসেৰ কালদেসসন্তানাদিভেদেন অনেকৰিধভাৰেপীত্যত্থো.

কামাৰচরসোভনচিত্তৰণ্ণনা নিট্ঠিতা.

রূপাৰচরচিত্তৰণ্ণনা

২১. ইদানি ¶ তদনন্তরুদ্দিট্ঠস্স রূপাৰচরস্স নিদ্দেসক্কমো অনুপ্পত্তোতি তস্স ঝানঙ্গযোগভেদেন পঞ্চধা ৰিভাগং দস্সেতুং ‘‘ৰিতক্ক…পে… সহিত’’ন্ত্যাদিমাহ. ৰিতক্কো চ ৰিচারো চ পীতি চ সুখঞ্চ একগ্গতা চাতি ইমেহি সহিতং ৰিতক্কৰিচারপীতিসুখেকগ্গতাসহিতং. তত্থ আরম্মণং ৰিতক্কেতি সম্পযুত্তধম্মে অভিনিরোপেতীতি ৰিতক্কো, সো সহজাতানং আরম্মণাভিনিরোপনলক্খণো, যথা হি কোচি গামৰাসী পুরিসো রাজৰল্লভং সম্বন্ধিনং মিত্তং ৰা নিস্সায রাজগেহং অনুপৰিসতি, এৰং ৰিতক্কং নিস্সায চিত্তং আরম্মণং আরোহতি. যদি এৰং কথং অৰিতক্কং চিত্তং আরম্মণং আরোহতীতি? তম্পি ৰিতক্কবলেনেৰ ¶ অভিনিরোহতি. যথা হি সো পুরিসো পরিচযেন তেন ৰিনাপি নিরাসঙ্কো রাজগেহং পৰিসতি, এৰং পরিচযেন ৰিতক্কেন ৰিনাপি অৰিতক্কং চিত্তং আরম্মণং অভিনিরোহতি. পরিচযোতি চেত্থ সৰিতক্কচিত্তস্স সন্তানে অভিণ্হপ্পৰত্তিৰসেন নিব্বত্তা চিত্তভাৰনা. অপি চেত্থ পঞ্চৰিঞ্ঞাণং অৰিতক্কম্পি ৰত্থারম্মণসঙ্ঘট্টনবলেন, দুতিযজ্ঝানাদীনি চ হেট্ঠিমভাৰনাবলেন অভিরোহন্তি.

আরম্মণে তেন চিত্তং ৰিচরতীতি ৰিচারো. সো আরণনুমজ্জনলক্খণো. তথা হেস ‘‘অনুসন্ধানতা’’তি (ধ. স. ৮) নিদ্দিট্ঠো. এত্থ চ ৰিচারতো ওল়ারিকট্ঠেন, তস্সেৰ পুব্বঙ্গমট্ঠেন চ পঠমঘণ্টাভিঘাতো ৰিয চেতসো পঠমাভিনিপাতো ৰিতক্কো, অনুরৰো ৰিয অনুসঞ্চরণং ৰিচারো. ৰিপ্ফারৰাচেত্থ ৰিতক্কো চিত্তস্স পরিপ্ফন্দনভূতো, আকাসে উপ্পতিতুকামস্স সকুণস্স পক্খৰিক্খেপো ৰিয, পদুমাভিমুখপাতো ৰিয চ গন্ধানুবন্ধচেতসা ভমরস্স, সন্তৰুত্তি ৰিচারো চিত্তস্স নাতিপরিপ্ফন্দনভূতো, আকাসে উপ্পতিতস্স ¶ সকুণস্স পক্খপ্পসারণং ৰিয, পদুমস্স উপরিভাগে পরিব্ভমনং ৰিয চ পদুমাভিমুখপতিতস্স ভমরস্স.

পিনযতি কাযচিত্তং তপ্পেতি, ৰড্ঢেতীতি ৰা পীতি, সা সম্পিযাযনলক্খণা, আরম্মণং কল্লতো গহণলক্খণাতি ৰুত্তং হোতি, সম্পযুত্তধম্মে সুখযতীতি সুখং, তং ইট্ঠানুভৰনলক্খণং সুভোজনরসস্সাদকো রাজা ৰিয. তত্থ আরম্মণপ্পটিলাভে পীতিযা ৰিসেসো পাকটো কন্তারখিন্নস্স ৰনন্তোদকদস্সনে ৰিয, যথালদ্ধস্স অনুভৰনে সুখস্স ৰিসেসো পাকটো যথাদিট্ঠউদকস্স পানাদীসু ৰিযাতি. নানারম্মণৰিক্খেপাভাৰেন একং আরম্মণং অগ্গং ইমস্সাতি একগ্গং, চিত্তং, তস্স ভাৰো একগ্গতা, সমাধি. সো অৰিক্খেপলক্খণো. তস্স হি ৰসেন সসম্পযুত্তং চিত্তং অৰিক্খিত্তং হোতি.

পঠমঞ্চ দেসনাক্কমতো চেৰ উপ্পত্তিক্কমতো চ আদিভূতত্তা তং ঝানঞ্চ আরম্মণূপনিজ্ঝানতো, পচ্চনীকঝাপনতো চাতি পঠমজ্ঝানং, ৰিতক্কাদিপঞ্চকং. ঝানঙ্গসমুদাযে যেৰ হি ঝানৰোহারো নেমিআদিঅঙ্গসমুদাযে রথৰোহারো ৰিয, তথা হি ৰুত্তং ৰিভঙ্গে ‘‘ঝানন্তি ৰিতক্কো ৰিচারো পীতি সুখং চিত্তস্সেকগ্গতা’’তি (ৰিভ. ৫৬৯). পঠমজ্ঝানেন সম্পযুত্তং কুসলচিত্তং পঠমজ্ঝানকুসলচিত্তং.

কস্মা ¶ পন অঞ্ঞেসু ফস্সাদীসু সম্পযুত্তধম্মেসু ৰিজ্জমানেসু ইমেযেৰ পঞ্চ ঝানঙ্গৰসেন ৰুত্তাতি? ৰুচ্চতে – উপনিজ্ঝানকিচ্চৰন্ততায, কামচ্ছন্দাদীনং উজুপটিপক্খভাৰতো চ. ৰিতক্কো হি আরম্মণে চিত্তং অভিনিরোপেতি. ৰিচারো অনুপ্পবন্ধেতি, পীতি চস্স পীননং, সুখঞ্চ উপব্রূহনং করোতি, অথ নং সসম্পযুত্তধম্মং এতেহি অভিনিরোপনানুপ্পবন্ধনপীননউপব্রূহনেহি অনুগ্গহিতা একগ্গতা সমাধানকিচ্চেন ¶ অত্তানং অনুৰত্তাপেন্তী একত্তারম্মণে সমং, সম্মা চ আধিযতি. ইন্দ্রিযসমতাৰসেন সমং পটিপক্খধম্মানং দূরীভাৰেন লীনুদ্ধচ্চাভাৰেন সম্মা চ ঠপেতীতি এৰমেতে সমেৰ উপনিজ্ঝানকিচ্চং আৰেণিকং. কামচ্ছন্দাদিপটিপক্খভাৰে পন সমাধি কামচ্ছন্দস্স পটিপক্খো রাগপ্পণিধিযা উজুপচ্চনীকভাৰতো. কামচ্ছন্দৰসেন হি নানারম্মণেহি পলোভিতস্স পরিব্ভমন্তস্স চিত্তস্স সমাধানং একগ্গতায হোতি. পীতি ব্যাপাদস্স পামোজ্জসভাৰত্তা. ৰিতক্কো থিনমিদ্ধস্স যোনিসো সঙ্কপ্পনৰসেন সৰিপ্ফারপ্পৰত্তিতো সুখং অৰূপসমানুতাপসভাৰস্স উদ্ধচ্চকুক্কুচ্চস্স ৰূপসন্তসীতলসভাৰত্তা. ৰিচারো ৰিচিকিচ্ছায আরম্মণে অনুমজ্জনৰসেন পঞ্ঞাপতিরূপসভাৰত্তা. এৰং উপনিজ্ঝানকিচ্চৰন্ততায, কামচ্ছন্দাদীনং উজুপটিপক্খভাৰতো চ ইমেযেৰ পঞ্চ ঝানঙ্গভাৰেন ৰৰত্থিতাতি. যথাহু –

‘‘উপনিজ্ঝানকিচ্চত্তা, কামাদিপটিপক্খতো;

সন্তেসুপি চ অঞ্ঞেসু, পঞ্চেৰ ঝানসঞ্ঞিতা’’তি.

উপেক্খা পনেত্ত সন্তৰুত্তিসভাৰত্তা সুখেৰ অন্তোগধাতি দট্ঠব্বং. তেনাহু –

‘‘উপেক্খা সন্তৰুত্তিত্তা, সুখমিচ্চেৰ ভাসিতা’’তি. (ৰিভ. অট্ঠ. ২৩২; ৰিসুদ্ধি. ২.৬৪৪);

পহানঙ্গাদিৰসেন পনস্স ৰিসেসো উপরি আৰি ভৰিস্সতি, তথা অরূপাৰচরলোকুত্তরেসুপি লব্ভমানকৰিসেসো. অথেত্থ কামাৰচরকুসলেসু ৰিয সঙ্খারভেদো কস্মা ন গহিতো. ইদম্পি হি কেৰলং সমথানুযোগৰসেন পটিলদ্ধং সসঙ্খারিকং, মগ্গাধিগমৰসেন পটিলদ্ধং অসঙ্খারিকন্তি সক্কা ৰত্তুন্তি? নযিদমেৰং মগ্গাধিগমৰসেনসত্তিতো ¶ পটিলদ্ধস্সাপি অপরভাগে পরিকম্মৰসেনেৰ উপ্পজ্জনতো, তস্মা সব্বস্সপি ঝানস্স পরিকম্মসঙ্খাতপুব্বাভিসঙ্খারেন ¶ ৰিনা কেৰলং অধিকারৰসেন অনুপ্পজ্জনতো ‘‘অসঙ্খারিক’’ন্তিপি, অধিকারেন চ ৰিনা কেৰলং পরিকম্মাভিসঙ্খারেনেৰ অনুপ্পজ্জনতো ‘‘সসঙ্খারিক’’ন্তিপি ন সক্কা ৰত্তুন্তি. অথ ৰা পুব্বাভিসঙ্খারৰসেনেৰ উপ্পজ্জমানস্স ন কদাচি অসঙ্খারিকভাৰো সম্ভৰতীতি ‘‘অসঙ্খারিক’’ন্তি চ ব্যভিচারাভাৰতো ‘‘সসঙ্খারিক’’ন্তি চ ন ৰুত্তন্তি.

পি-সদ্দেন চেত্থ চতুক্কপঞ্চকনযৰসেন সুদ্ধিকনৰকো, তঞ্চ দুক্খপ্পটিপদাদন্ধাভিঞ্ঞাদুক্খপ্পটিপদাখিপ্পাভিঞ্ঞাসুখপ্পটিপদাদন্ধাভিঞ্ঞাসুখপ্পটিপদাখিপ্পাভিঞ্ঞাৰসেন পটিপদাচতুক্কেন যোজেত্ৰা দেসিতত্তা চত্তারো নৰকা, পরিত্তং পরিত্তারম্মণং, পরিত্তং অপ্পমাণারম্মণং, অপ্পমাণং পরিত্তারম্মণং, অপ্পমাণং অপ্পমাণারম্মণন্তি আরম্মণচতুক্কেন যোজিতত্তা চত্তারো নৰকা, ‘‘দুক্খপ্পটিপদং দন্ধাভিঞ্ঞং পরিত্তং পরিত্তারম্মণং, দুক্খপ্পটিপদং দন্ধাভিঞ্ঞং পরিত্তং অপ্পমাণারম্মণ’’ন্ত্যাদিনা আরম্মণপ্পটিপদামিস্সকনযৰসেন সোল়স নৰকাতি পঞ্চৰীসতি নৰকাতি এৰমাদিভেদং সঙ্গণ্হাতি.

২২. ঝানৰিসেসেন নিব্বত্তিতৰিপাকো একন্ততো তংতংঝানসদিসোৰাতি ৰিপাকং ঝানসদিসমেৰ ৰিভত্তং. ইমমেৰ হি অত্থং দীপেতুং ভগৰতা ৰিপাকনিদ্দেসেপি কুসলং উদ্দিসিত্ৰাৰ তদনন্তরং মহগ্গতলোকুত্তরৰিপাকা ৰিভত্তা.

২৫. রূপাৰচরমানসং ঝানভেদেন পঞ্চহি চতূহি তীহি দ্ৰীহি পুন দ্ৰীহি ঝানঙ্গেহি সম্পযোগভেদেন পঞ্চধা পঞ্চঙ্গিকং চতুরঙ্গিকং তিৰঙ্গিকং দুৰঙ্গিকং পুন দুৰঙ্গিকন্তি পঞ্চৰিধং হোতি অৰিসেসেন, পুন তং পুঞ্ঞপাককিরিযানং পচ্চেকং পঞ্চন্নং পঞ্চন্নং ভেদা পঞ্চদসধা ভৰেত্যত্থো.

রূপাৰচরচিত্তৰণ্ণনা নিট্ঠিতা.

অরূপাৰচরচিত্তৰণ্ণনা

২৬. ইদানি ¶ ¶ অরূপাৰচরং আরম্মণভেদেন চতুধা ৰিভজিত্ৰা দস্সেন্তো আহ ‘‘আকাসানঞ্চাযতনা’’তিআদি. তত্থ উপ্পাদাদিঅন্তরহিততায নাস্স অন্তোতি অনন্তং, আকাসঞ্চ তং অনন্তঞ্চাতি আকাসানন্তং, কসিণুগ্ঘাটিমাকাসো. ‘‘অনন্তাকাস’’ন্তি চ ৰত্তব্বে ‘‘অগ্যাহিতো’’ত্যাদীসু ৰিয ৰিসেসনস্স পরনিপাতৰসেন ‘‘আকাসানন্ত’’ন্তি ৰুত্তং. আকাসানন্তমেৰ আকাসানঞ্চং সকত্থে ভাৰপচ্চযৰসেন. আকাসানঞ্চমেৰ আযতনং সসম্পযুত্তধম্মস্স ঝানস্স অধিট্ঠানট্ঠেন দেৰানং দেৰাযতনং ৰিযাতি আকাসানঞ্চাযতনং. তস্মিং অপ্পনাপ্পত্তং পঠমারুপ্পজ্ঝানম্পি ইধ ‘‘আকাসানঞ্চাযতন’’ন্তি ৰুত্তং যথা পথৰীকসিণারম্মণং ঝানং ‘‘পথৰীকসিণ’’ন্তি. অথ ৰা আকাসানঞ্চং আযতনং অস্সাতি আকাসানঞ্চাযতনং, ঝানং, তেন সম্পযুত্তং কুসলচিত্তং আকাসানঞ্চাযতনকুসলচিত্তং.

ৰিঞ্ঞাণমেৰ অনন্তং ৰিঞ্ঞাণানন্তং, পঠমারুপ্পৰিঞ্ঞাণং. তঞ্হি উপ্পাদাদিঅন্তৰন্তম্পি অনন্তাকাসে পৰত্তনতো অত্তানং আরব্ভ পৰত্তায ভাৰনায উপ্পাদাদিঅন্তং অগ্গহেত্ৰা অনন্ততো ফরণৰসেন পৰত্তনতো চ ‘‘অনন্ত’’ন্তি ৰুচ্চতি. ৰিঞ্ঞাণানন্তমেৰ ৰিঞ্ঞাণঞ্চং আকারস্স রস্সত্তং, ন-কারস্স লোপঞ্চ কত্ৰা. দুতিযারুপ্পৰিঞ্ঞাণেন ৰা অঞ্চিতব্বং পাপুণিতব্বন্তি ৰিঞ্ঞাণঞ্চং, তদেৰ আযতনং দুতিযারুপ্পস্স অধিট্ঠানত্তাতি ৰিঞ্ঞাণঞ্চাযতনং. সেসং পুরিমসমং.

নাস্স ¶ পঠমারুপ্পস্স কিঞ্চনং অপ্পমত্তকং অন্তমসো ভঙ্গমত্তম্পি অৰসিট্ঠং অত্থীতি অকিঞ্চনং, তস্স ভাৰো আকিঞ্চঞ্ঞং, পঠমারুপ্পৰিঞ্ঞাণাভাৰো. তদেৰ আযতনন্ত্যাদি পুরিমসদিসং.

ওল়ারিকায সঞ্ঞায অভাৰতো, সুখুমায চ সঞ্ঞায অত্থিতায নেৰস্স সসম্পযুত্তধম্মস্স সঞ্ঞা অত্থি, নাপি অসঞ্ঞং অৰিজ্জমানসঞ্ঞন্তি নেৰসঞ্ঞানাসঞ্ঞং, চতুত্থারুপ্পজ্ঝানং. দীঘং কত্ৰা পন ‘‘নেৰসঞ্ঞানাসঞ্ঞ’’ন্তি ৰুত্তং. নেৰসঞ্ঞানাসঞ্ঞমেৰ আযতনং মনাযতনধম্মাযতনপরিযাপন্নত্তাতি নেৰসঞ্ঞানাসঞ্ঞাযতনং. অথ ৰা সঞ্ঞাৰ ৰিপস্সনায গোচরভাৰং গন্ত্ৰা নিব্বেদজননসঙ্খাতস্স পটুসঞ্ঞাকিচ্চস্স অভাৰতো নেৰসঞ্ঞা চ ¶ উণ্হোদকে তেজোধাতু ৰিয সঙ্খারাৰসেসসুখুমভাৰেন ৰিজ্জমানত্তা ন অসঞ্ঞাতি নেৰসঞ্ঞানাসঞ্ঞা, সা এৰ আযতনং ইমস্স সসম্পযুত্তধম্মস্স ঝানস্স নিস্সযাদিভাৰতোতি নেৰসঞ্ঞানাসঞ্ঞাযতনং. সঞ্ঞাৰসেন চেত্থ ঝানূপলক্খণং নিদস্সনমত্তং. ৰেদনাদযোপি হি তস্মিং ঝানে নেৰৰেদনানাৰেদনাদিকাযেৰাতি. নেৰসঞ্ঞানাসঞ্ঞাযতনেন সম্পযুত্তং কুসলচিত্তং নেৰসঞ্ঞানাসঞ্ঞাযতনকুসলচিত্তং. পি-সদ্দেন চেত্থ আরম্মণপ্পটিপদামিস্সকনযৰসেন সোল়সক্খত্তুকদেসনং (ধ. স. ২৬৫-২৬৮), অঞ্ঞম্পি চ পাল়িযং আগতনযভেদং সঙ্গণ্হাতি.

৩০. আরম্মণানং অতিক্কমিতব্বানং, কসিণাকাসৰিঞ্ঞাণতদভাৰসঙ্খাতানং আলম্বিতব্বানঞ্চ আকাসাদিচতুন্নং গোচরানং পভেদেন আরুপ্পমানসং চতুব্বিধং হোতি. তঞ্হি যথাক্কমং পঞ্চমজ্ঝানারম্মণং কসিণনিমিত্তং অতিক্কম্ম তদুগ্ঘাটেন লদ্ধং আকাসমালম্বিত্ৰা তম্পি অতিক্কম্ম তত্থ পৰত্তং ৰিঞ্ঞাণমালম্বিত্ৰা তম্পি অতিক্কম্ম তদভাৰভূতং অকিঞ্চনভাৰমালম্বিত্ৰা তম্পি অতিক্কম্ম তত্থ পৰত্তং ততিযারুপ্পৰিঞ্ঞাণমালম্বিত্ৰা ¶ পৰত্ততি, ন পন রূপাৰচরকুসলং ৰিয পুরিমপুরিমঅঙ্গাতিক্কমৰসেন পুরিমপুরিমস্সাপি আরম্মণং গহেত্ৰা. তেনাহু আচরিযা –

‘‘আরম্মণাতিক্কমতো, চতস্সোপি ভৰন্তিমা;

অঙ্গাতিক্কমমেতাসং, ন ইচ্ছন্তি ৰিভাৰিনো’’তি; (ধ. স. অট্ঠ. ২৬৮);

অরূপাৰচরচিত্তৰণ্ণনা নিট্ঠিতা.

সোভনচিত্তৰণ্ণনা নিট্ঠিতা.

লোকুত্তরচিত্তৰণ্ণনা

৩১. ইদানি লোকুত্তরকুসলং চতুমগ্গযোগতো, ফলঞ্চ তদনুরূপপ্পৰত্তিযা চতুধা ৰিভজিত্ৰা দস্সেতুং ‘‘সোতাপত্তিমগ্গচিত্ত’’ন্ত্যাদি ৰুত্তং. নিব্বানং পতিসৰনতো উপগমনতো, নিব্বানমহাসমুদ্দনিন্নতায ¶ সোতসদিসত্তা ৰা ‘‘সোতো’’তি ৰুচ্চতি অরিযো অট্ঠঙ্গিকো মগ্গো, তস্স আপত্তি আদিতো পজ্জনং পাপুণনং পঠমসমন্নাগমো সোতাপত্তি আ-উপসগ্গস্স আদিকম্মনি পৰত্তনতো. নিব্বানং মগ্গেতি, নিব্বানত্থিকেহি ৰা মগ্গীযতি, কিলেসে মারেন্তো গচ্ছতীতি ৰা মগ্গো, তেন সম্পযুত্তং চিত্তং মগ্গচিত্তং, সোতাপত্তিযা লদ্ধং মগ্গচিত্তং সোতাপত্তিমগ্গচিত্তং. অথ ৰা অরিযমগ্গসোতস্স আদিতো পজ্জনং এতস্সাতি সোতাপত্তি, পুগ্গলো, তস্স মগ্গো সোতাপত্তিমগ্গো, তেন সম্পযুত্তং চিত্তং সোতাপত্তিমগ্গচিত্তং.

সকিং একৰারং পটিসন্ধিৰসেন ইমং মনুস্সলোকং আগচ্ছতীতি সকদাগামী, ইধ পত্ৰা ইধ পরিনিব্বাযী, তত্থ পত্ৰা তত্থ পরিনিব্বাযী, ইধ পত্ৰা তত্থ পরিনিব্বাযী, তত্থ পত্ৰা ইধ পরিনিব্বাযী, ইধ পত্ৰা তত্থ নিব্বত্তিত্ৰা ইধ পরিনিব্বাযীতি পঞ্চসু সকদাগামীসু পঞ্চমকো ইধাধিপ্পেতো. সো হি ইতো ¶ গন্ত্ৰা পুন সকিং ইধ আগচ্ছতীতি. তস্স মগ্গো সকদাগামিমগ্গো. কিঞ্চাপি মগ্গসমঙ্গিনো তথাগমনাসম্ভৰতো ফলট্ঠোযেৰ সকদাগামী নাম, তস্স পন কারণভূতো পুরিমুপ্পন্নো মগ্গো মগ্গন্তরাৰচ্ছেদনত্থং ফলট্ঠেন ৰিসেসেত্ৰা ৰুচ্চতি ‘‘সকদাগামিমগ্গো’’তি. এৰং অনাগামিমগ্গোতি. সকদাগামিমগ্গেন সম্পযুত্তং চিত্তং সকদাগামিমগ্গচিত্তং.

পটিসন্ধিৰসেন ইমং কামধাতুং ন আগচ্ছতীতি অনাগামী, তস্স মগ্গো অনাগামিমগ্গো, তেন সম্পযুত্তং চিত্তং অনাগামিমগ্গচিত্তং. অগ্গদক্খিণেয্যভাৰেন পূজাৰিসেসং অরহতীতি অরহা, অথ ৰা কিলেসসঙ্খাতা অরযো, সংসারচক্কস্স ৰা অরা কিলেসা হতা অনেনাতি অরহা, পাপকরণে রহাভাৰতো ৰা অরহা, অট্ঠমকো অরিযপুগ্গলো, তস্স ভাৰো অরহত্তং, চতুত্থফলস্সেতং অধিৰচনং, তস্স আগমনভূতো মগ্গো অরহত্তমগ্গো, তেন সম্পযুত্তং চিত্তং অরহত্তমগ্গচিত্তং.

পি-সদ্দেন একেকস্স মগ্গস্স নযসহস্সৰসেন চতুন্নং চতুসহস্সভেদং সচ্চৰিভঙ্গে (ৰিভ. ২০৬; ৰিভ. অট্ঠ. ২০৬-২১৪) আগতং সট্ঠিসহস্সভেদং নযং হেট্ঠা ৰুত্তনযেন অনেকৰিধত্তম্পি সঙ্গণ্হাতি. তত্থাযং নযসহস্সমত্তপরিদীপনা, কথং? সোতাপত্তিমগ্গো তাৰ ঝাননামেন পটিপদাভেদং অনামসিত্ৰা কেৰলং সুঞ্ঞতো অপ্পণিহিতোতি দ্ৰিধা ৰিভত্তো, পুন পটিপদাচতুক্কেন যোজেত্ৰা পচ্চেকং চতুধা ৰিভত্তোতি এৰং ঝাননামেন দসধা ৰিভত্তো. তথা মগ্গসতিপট্ঠানসম্মপ্পধানইদ্ধিপাদইন্দ্রিযবলবোজ্ঝঙ্গসচ্চসমথধম্মখন্ধআযতনধাতুআহারফস্সৰেদনাসঞ্ঞাচেতনাচিত্তনামেহিপি ¶ পচ্চেকং দসদসাকারেহি ৰিভত্তো তথা তথা বুজ্ঝনকানং পুগ্গলানং ৰসেন. তস্মা ¶ ঝানৰসেন দসমগ্গাদীনং একূনৰীসতিযা ৰসেন দস দসাতি ৰীসতিযা ঠানেসু দ্ৰে নযসতানি হোন্তি. পুন তানি চতূহি অধিপতীহি যোজেত্ৰা পচ্চেকং চতুধা ৰিভত্তানীতি এৰং অধিপতীহি অমিস্সেত্ৰা দ্ৰে সতানি, মিস্সেত্ৰা অট্ঠ সতানীতি সোতাপত্তিমগ্গে নযসহস্সং হোতি, তথা সকদাগামিমগ্গাদীসুপি.

৩২. সোতাপত্তিযা লদ্ধং, সোতাপত্তিস্স ৰা ফলচিত্তং ৰিপাকভূতং চিত্তং সোতাপত্তিফলচিত্তং. অরহত্তঞ্চ তং ফলচিত্তঞ্চাতি অরহত্তফলচিত্তং.

৩৪. চতুমগ্গপ্পভেদেনাতি ইন্দ্রিযানং অপাটৰপাটৰতরতমভেদেন ভিন্নসামত্থিযতায সক্কাযদিট্ঠিৰিচিকিচ্ছাসীলব্বতপরামাসানং নিরৰসেসপ্পহানং কামরাগব্যাপাদানং তনুভাৰাপাদনং তেসমেৰ নিরৰসেসপ্পহানং রূপারূপরাগমানুদ্ধচ্চাৰিজ্জানং অনৰসেসপ্পহানন্তি এৰং সংযোজনপ্পহানৰসেন চতুব্বিধানং সোতাপত্তিমগ্গাদীনং অট্ঠঙ্গিকমগ্গানং সম্পযোগভেদেন চতুমগ্গসঙ্খাতং লোকুত্তরকুসলং চতুধা হোতি, ৰিপাকং পন তস্সেৰ কুসলস্স ফলত্তা তদনুরূপতো তথা চতুধাতি এৰং অনুত্তরং অত্তনো উত্তরিতরাভাৰেন অনুত্তরসঙ্খাতং লোকুত্তরং চিত্তং অট্ঠধা মতন্তি যোজনা.

কিরিযানুত্তরস্স পন অসম্ভৰতো দ্ৰাদসৰিধতা ন ৰুত্তা. কস্মা পন তস্স অসম্ভৰোতি? মগ্গস্স একচিত্তক্খণিকত্তা. যদি হি মগ্গচিত্তং পুনপ্পুনং উপ্পজ্জেয্য, তদুপ্পত্তিযা কিরিযভাৰো সক্কা ৰত্তুং. তং পন কিলেসসমুচ্ছেদকৰসেনেৰ উপলভিতব্বতো একৰারপ্পৰত্তেনেৰ চ তেন অসনিসম্পাতেন ৰিয তরুআদীনং সমূলৰিদ্ধংসনস্স তংতংকিলেসানং অচ্চন্তং অপ্পৰত্তিযা সাধিতত্তা পুন উপ্পজ্জমানেপি কাতব্বাভাৰতো দিট্ঠধম্মসুখৰিহারত্থঞ্চ ফলসমাপত্তিযা এৰ ¶ নিব্বানারম্মণৰসেন পৰত্তনতো ন কদাচি সেক্খানং অসেক্খানং ৰা উপ্পজ্জতি. তস্মা নত্থি সব্বথাপি লোকুত্তরকিরিযচিত্তন্তি.

লোকুত্তরচিত্তৰণ্ণনা নিট্ঠিতা.

চিত্তগণনসঙ্গহৰণ্ণনা

৩৫. ‘‘দ্ৰাদসাকুসলানেৰ’’ন্ত্যাদি ¶ যথাৰুত্তানং চতুভূমিকচিত্তানং গণনসঙ্গহো.

৩৬. এৰং জাতিৰসেন সঙ্গহং দস্সেত্ৰা পুন ভূমিৰসেন দস্সেতুং ‘‘চতুপঞ্ঞাসধা কামে’’ত্যাদি ৰুত্তং. কামে ভৰে চিত্তানি চতুপঞ্ঞাসধা ঈরযে, রূপে ভৰে পন্নরস ঈরযে, আরুপ্পে ভৰে দ্ৰাদস ঈরযে, অনুত্তরে পন নৰৰিধে ধম্মসমুদাযে চিত্তানি অট্ঠধা ঈরযে, কথেয্যাত্যত্থো. এত্থ চ কামতণ্হাদিৰিসযভাৰেন কামভৰাদিপরিযাপন্নানি চিত্তানি সকসকভূমিতো অঞ্ঞত্থ পৰত্তমানানিপি কামভৰাদীসু চিত্তানীতি ৰুত্তানি, যথা মনুস্সিত্থিযা কুচ্ছিস্মিং নিব্বত্তোপি তিরচ্ছানগতো তিরচ্ছানযোনিপরিযাপন্নত্তা তিরচ্ছানেস্ৰেৰ সঙ্গয্হতি. কত্থচি অপরিযাপন্নানি নৰৰিধলোকুত্তরধম্মসমূহেকদেসভূতানি ‘‘রুক্খে সাখা’’ত্যাদীসু ৰিয অনুত্তরে চিত্তানীতি ৰুত্তানি. অথ ৰা ‘‘কামে, রূপে’’তি চ উত্তরপদলোপনিদ্দেসো. অরূপে ভৰানি আরুপ্পানি. নত্থি এতেসং উত্তরং চিত্তন্তি অনুত্তরানীতি উপযোগবহুৰচনৰসেন কামে কামাৰচরানি চিত্তানি চতুপঞ্ঞাসধা ঈরযে, রূপে রূপাৰচরানি চিত্তানি পন্নরস ঈরযে, আরুপ্পে আরুপ্পানি চিত্তানি দ্ৰাদস ঈরযে. অনুত্তরে লোকুত্তরানি চিত্তানি অট্ঠধা ঈরযেতি এৰমেত্থ সম্বন্ধো দট্ঠব্বো.

৩৭. ইত্থং ¶ যথাৰুত্তেন জাতিভেদভিন্নচতুভূমিকচিত্তভেদৰসেন একূননৰুতিপ্পভেদং কত্ৰা মানসং চিত্তং ৰিচক্খণা ৰিসেসেন অত্থচক্খণসভাৰা পণ্ডিতা ৰিভজন্তি. অথ ৰা একৰীসসতং একুত্তরৰীসাধিকং সতং ৰিভজন্তি.

চিত্তগণনসঙ্গহৰণ্ণনা নিট্ঠিতা.

ৰিত্থারগণনৰণ্ণনা

৩৮. ঝানঙ্গৰসেন পঠমজ্ঝানসদিসত্তা পঠমজ্ঝানঞ্চ তং সোতাপত্তিমগ্গচিত্তঞ্চেতি পঠমজ্ঝানসোতাপত্তিমগ্গচিত্তং. পাদকজ্ঝানসম্মসিতজ্ঝানপুগ্গলজ্ঝাসযেসুপি, হি অঞ্ঞতরৰসেন তংতংঝানসদিসত্তা ¶ ৰিতক্কাদিঅঙ্গপাতুভাৰেন চত্তারোপি মগ্গা পঠমজ্ঝানাদিৰোহারং লভন্তা পচ্চেকং পঞ্চধা ৰিভজন্তি. তেনাহ ‘‘ঝানঙ্গযোগভেদেনা’’ত্যাদি, তত্থ পঠমজ্ঝানাদীসু যং যং ঝানং সমাপজ্জিত্ৰা ততো ততো ৰুট্ঠায সঙ্খারে সম্মসন্তস্স ৰুট্ঠানগামিনিৰিপস্সনা পৰত্তা, তং পাদকজ্ঝানং ৰুট্ঠানগামিনিৰিপস্সনায পদট্ঠানভাৰতো. যং যং ঝানং সম্মসন্তস্স সা পৰত্তা, তং সম্মসিতজ্ঝানং. ‘‘অহো ৰত মে পঠমজ্ঝানসদিসো মগ্গো পঞ্চঙ্গিকো, দুতিযজ্ঝানাদীসু ৰা অঞ্ঞতরসদিসো চতুরঙ্গাদিভেদো মগ্গো ভৰেয্যা’’তি এৰং যোগাৰচরস্স উপ্পন্নজ্ঝাসযো পুগ্গলজ্ঝাসযো নাম.

তত্থ যেন পঠমজ্ঝানাদীসু অঞ্ঞতরং ঝানং সমাপজ্জিত্ৰা ততো ৰুট্ঠায পকিণ্ণকসঙ্খারে সম্মসিত্ৰা মগ্গো উপ্পাদিতো হোতি, তস্স সো মগ্গো পঠমজ্ঝানাদীসু তংতংপাদকজ্ঝানসদিসো হোতি. সচে পন ৰিপস্সনাপাদকং কিঞ্চি ঝানং নত্থি, কেৰলং পঠমজ্ঝানাদীসু অঞ্ঞতরং ঝানং সম্মসিত্ৰা ¶ মগ্গো উপ্পাদিতো হোতি, তস্স সো সম্মসিতজ্ঝানসদিসো হোতি. যদা পন যং কিঞ্চি ঝানং সমাপজ্জিত্ৰা ততো ৰুট্ঠায অঞ্ঞতরং সম্মসিত্ৰা মগ্গো উপ্পাদিতো হোতি, তদা পুগ্গলজ্ঝাসযৰসেন দ্ৰীসু অঞ্ঞতরসদিসো হোতি. সচে পন পুগ্গলস্স তথাৰিধো অজ্ঝাসযো নত্থি, হেট্ঠিমহেট্ঠিমজ্ঝানতো ৰুট্ঠায উপরূপরিঝানধম্মে সম্মসিত্ৰা উপ্পাদিতমগ্গো পাদকজ্ঝানং অনপেক্খিত্ৰা সম্মসিতজ্ঝানসদিসো হোতি. উপরূপরিঝানতো পন ৰুট্ঠায হেট্ঠিমহেট্ঠিমজ্ঝানধম্মে সম্মসিত্ৰা উপ্পাদিতমগ্গো সম্মসিতজ্ঝানং অনপেক্খিত্ৰা পাদকজ্ঝানসদিসো হোতি. হেট্ঠিমহেট্ঠিমজ্ঝানতো হি উপরূপরিঝানং বলৰতরন্তি. ৰেদনানিযমো পন সব্বত্থাপি ৰুট্ঠানগামিনিৰিপস্সনানিযমেন হোতি. তথা সুক্খৰিপস্সকস্স সকলজ্ঝানঙ্গনিযমো. তস্স হি পাদকজ্ঝানাদীনং অভাৰেন তেসং ৰসেন নিযমাভাৰতো ৰিপস্সনানিযমেন পঞ্চঙ্গিকোৰ মগ্গো হোতীতি. অপিচ সমাপত্তিলাভিনোপি ঝানং পাদকং অকত্ৰা পকিণ্ণকসঙ্খারে সম্মসিত্ৰা উপ্পাদিতমগ্গোপি ৰিপস্সনানিযমেনেৰ পঞ্চঙ্গিকোৰ হোতীতি অযমেত্থ অট্ঠকথাদিতো উদ্ধটো ৰিনিচ্ছযসারো. থেরৰাদদস্সনাদিৰসপ্পৰত্তো পন পপঞ্চো অট্ঠকথাদীসু ৰুত্তনযেন ৰেদিতব্বো. যথা চেত্থ, এৰং সব্বত্থাপি ৰিত্থারনযো তত্থ তত্থ ৰুত্তনযেন গহেতব্বো. গন্থভীরুকজনানুগ্গহত্থং পনেত্থ সঙ্খেপকথা অধিপ্পেতা.

৪২. যথা রূপাৰচরং চিত্তং পঠমাদিপঞ্চৰিধঝানভেদেন গয্হতি ‘‘পঠমজ্ঝান’’ন্ত্যাদিনা ৰুচ্চতি ¶ , তথা অনুত্তরম্পি চিত্তং ‘‘পঠমজ্ঝানসোতাপত্তিমগ্গচিত্ত’’ন্ত্যাদিনা গয্হতি. আরুপ্পঞ্চাপি উপেক্খেকগ্গতাযোগেন অঙ্গসমতায পঞ্চমজ্ঝানে গয্হতি, পঞ্চমজ্ঝানৰোহারং লভতীত্যত্থো. অথ ৰা ¶ রূপাৰচরং চিত্তং অনুত্তরঞ্চ পঠমাদিঝানভেদে ‘‘পঠমজ্ঝানকুসলচিত্তং, পঠমজ্ঝানসোতাপত্তিমগ্গচিত্তন্ত্যাদিনা যথা গয্হতি, তথা আরুপ্পঞ্চাপি পঞ্চমে ঝানে গয্হতীতি যোজনা. আচরিযস্সাপি হি অযমেৰ যোজনা অধিপ্পেতাতি দিস্সতি নামরূপপরিচ্ছেদে উজুকমেৰ তথা ৰুত্তত্তা. ৰুত্তঞ্হি তত্থ –

‘‘রূপাৰচরচিত্তানি, গয্হন্তানুত্তরানি চ;

পঠমাদিঝানভেদে, আরুপ্পঞ্চাপি পঞ্চমে’’তি. (নাম. পরি. ২৪);

তস্মাতি যস্মা রূপাৰচরং ৰিয অনুত্তরম্পি পঠমাদিঝানভেদে গয্হতি, আরুপ্পঞ্চাপি পঞ্চমে গয্হতি, যস্মা ৰা ঝানঙ্গযোগভেদেন একেকং পঞ্চধা কত্ৰা অনুত্তরং চিত্তং চত্তালীসৰিধন্তি ৰুচ্চতি, রূপাৰচরলোকুত্তরানি ৰিয চ পঠমাদিঝানভেদে, তথা আরুপ্পঞ্চাপি পঞ্চমে গয্হতি, তস্মা পঠমাদিকমেকেকং ঝানং লোকিযং তিৰিধং, লোকুত্তরং অট্ঠৰিধন্তি একাদসৰিধং. অন্তে তু ঝানং তেৰীসতিৰিধং তিৰিধরূপাৰচরদ্ৰাদসৰিধঅরূপাৰচরঅট্ঠলোকুত্তরৰসেনাত্যত্থো.

৪৩. পাদকজ্ঝানাদিৰসেন গণনৰুড্ঢি কুসলৰিপাকেস্ৰেৰ সম্ভৰতীতি তেসমেৰ গণনং একৰীসসতগণনায অঙ্গভাৰেন দস্সেন্তো আহ ‘‘সত্ততিংসা’’ত্যাদি.

ইতি অভিধম্মত্থৰিভাৰিনিযা নাম অভিধম্মত্থসঙ্গহৰণ্ণনায

চিত্তপরিচ্ছেদৰণ্ণনা নিট্ঠিতা.

২. চেতসিকপরিচ্ছেদৰণ্ণনা

সম্পযোগলক্খণৰণ্ণনা

১. এৰং ¶ ¶ তাৰ চিত্তং ভূমিজাতিসম্পযোগসঙ্খারঝানারম্মণমগ্গভেদেন যথারহং ৰিভজিত্ৰা ইদানি চেতসিকৰিভাগস্স অনুপ্পত্তত্তা পঠমং তাৰ চতুব্বিধসম্পযোগলক্খণসন্দস্সনৰসেন চেতসিকলক্খণং ঠপেত্ৰা, তদনন্তরং অঞ্ঞসমানঅকুসলসোভনৰসেন তীহি রাসীহি চেতসিকধম্মে উদ্দিসিত্ৰা, তেসং সোল়সহাকারেহি সম্পযোগং, তেত্তিংসৰিধেন সঙ্গহঞ্চ দস্সেতুং ‘‘একুপ্পাদনিরোধা চা’’ত্যাদি আরদ্ধং. চিত্তেন সহ একতো উপ্পাদো চ নিরোধো চ যেসং তে একুপ্পাদনিরোধা. একং আলম্বণঞ্চ ৰত্থু চ যেসং তে একালম্বণৰত্থুকা. এৰং চতূহি লক্খণেহি চেতোযুত্তা চিত্তেন সম্পযুত্তা দ্ৰিপঞ্ঞাস লক্খণা ধারণতো ধম্মা নিযতযোগিনো, অনিযতযোগিনো চ চেতসিকা মতা.

তত্থ যদি একুপ্পাদমত্তেনেৰ চেতোযুত্তাতি অধিপ্পেতা, তদা চিত্তেন সহ উপ্পজ্জমানানং রূপধম্মানম্পি চেতোযুত্ততা আপজ্জেয্যাতি একনিরোধগ্গহণং. এৰম্পি চিত্তানুপরিৰত্তিনো ৰিঞ্ঞত্তিদ্ৰযস্স পসঙ্গো নসক্কা নিৰারেতুং, তথা ‘‘একতো উপ্পাদো ৰা নিরোধো ৰা এতেসন্তি একুপ্পাদনিরোধা’’তি পরিকপ্পেন্তস্স পুরেতরমুপ্পজ্জিত্ৰা চিত্তস্স ভঙ্গক্খণে নিরুজ্ঝমানানম্পি রূপধম্মানন্তি একালম্বণগ্গহণং. যে এৰং তিৰিধলক্খণা, তে নিযমতো একৰত্থুযেৰাতিদস্সনত্থং একৰত্থুকগ্গহণন্তি অলমতিপ্পপঞ্চেন.

সম্পযোগলক্খণৰণ্ণনা নিট্ঠিতা.

অঞ্ঞসমানচেতসিকৰণ্ণনা

২. কথন্তি ¶ সরূপসম্পযোগাকারানং কথেতুকম্যতাপুচ্ছা. ফুসতীতি ফস্সো (ধ. স. অট্ঠ. ১ ধম্মুদেসৰারফস্সপঞ্চমকরাসিৰণ্ণনা), স্ৰাযং ¶ ফুসনলক্খণো. অযঞ্হি অরূপধম্মোপি সমানো আরম্মণে ফুসনাকারেনেৰ পৰত্ততি, সা চস্স ফুসনাকারপ্পৰত্তি অম্বিলখাদকাদীনং পস্সন্তস্স পরস্স খেল়ুপ্পাদাদি ৰিয দট্ঠব্বা. ৰেদযতি আরম্মণরসং অনুভৰতীতি ৰেদনা, সা ৰেদযিতলক্খণা. আরম্মণরসানুভৰনঞ্হি পত্ৰা সেসসম্পযুত্তধম্মা একদেসমত্তেনেৰ রসং অনুভৰন্তি, একংসতো পন ইস্সরৰতায ৰেদনাৰ অনুভৰতি. তথা হেসা ‘‘সুভোজনরসানুভৰনকরাজা ৰিযা’’তি ৰুত্তা. সুখাদিৰসেন পনস্সা ভেদং সযমেৰ ৰক্খতি. নীলাদিভেদং আরম্মণং সঞ্জানাতি সঞ্ঞং কত্ৰা জানাতীতি সঞ্ঞা, সা সঞ্জাননলক্খণা. সা হি উপ্পজ্জমানা দারুআদীসু ৰড্ঢকিআদীনং সঞ্ঞাণকরণং ৰিয পচ্ছা সঞ্জাননস্স কারণভূতং আকারং গহেত্ৰা উপ্পজ্জতি. নিমিত্তকারিকায তাৰেতং যুজ্জতি, নিমিত্তেন সঞ্জানন্তিযা পন কথন্তি? সাপি পুন অপরায সঞ্ঞায সঞ্জাননস্স নিমিত্তং আকারং গহেত্ৰা উপ্পজ্জতীতি ন এত্থ কোচি অসম্ভৰো.

চেতেতি অত্তনা সম্পযুত্তধম্মে আরম্মণে অভিসন্দহতি, সঙ্খতাভিসঙ্খরণে ৰা ব্যাপারমাপজ্জতীতি চেতনা. তথা হি অযমেৰ অভিসঙ্খরণে পধানত্তা ৰিভঙ্গে সুত্তন্তভাজনিযে সঙ্খারক্খন্ধং ৰিভজন্তেন ‘‘সঙ্খতমভিসঙ্খরোন্তীতি সঙ্খারা’’তি (সং. নি. ৩.৭৯) ৰত্ৰা ‘‘চক্খুসম্ফস্সজা চেতনা’’ত্যাদিনা (ৰিভ. ২১) নিদ্দিট্ঠা. সা চেতযিতলক্খণা, জেট্ঠসিস্সমহাৰড্ঢকিআদযো ৰিয সকিচ্চপরকিচ্চসাধিকাতি দট্ঠব্বং. একগ্গতাৰিতক্কৰিচারপীতীনং সরূপৰিভাৰনং হেট্ঠা আগতমেৰ.

জীৰন্তি ¶ তেন সম্পযুত্তধম্মাতি জীৰিতং, তদেৰ সহজাতানুপালনে আধিপচ্চযোগেন ইন্দ্রিযন্তি জীৰিতিন্দ্রিযং, তং অনুপালনলক্খণং উপ্পলাদিঅনুপালকং উদকং ৰিয. করণং কারো, মনস্মিং কারো মনসিকারো, সো চেতসো আরম্মণে সমন্নাহারলক্খণো. ৰিতক্কো হি সহজাতধম্মানং আরম্মণে অভিনিরোপনসভাৰত্তা তে তত্থ পক্খিপন্তো ৰিয হোতি, চেতনা অত্তনা আরম্মণগ্গহণেন যথারুল়্হে ধম্মেপি তত্থ তত্থ নিযোজেন্তী বলনাযকো ৰিয হোতি, মনসিকারো তে আরম্মণাভিমুখং পযোজনতো আজানীযানং পযোজনকসারথি ৰিযাতি অযমেতেসং ৰিসেসো. ধম্মানঞ্হি তং তং যাথাৰসরসলক্খণং সভাৰতো পটিৰিজ্ঝিত্ৰা ভগৰতা তে তে ধম্মা ৰিভত্তাতি ভগৰতি সদ্ধায ‘‘এৰং ৰিসেসা ইমে ধম্মা’’তি ওকপ্পেত্ৰা উগ্গহণপরিপুচ্ছাদিৰসেন তেসং সভাৰসমধিগমায যোগো করণীযো, ন পন তত্থ তত্থ ৰিপ্পটিপজ্জন্তেহি ¶ সম্মোহো আপজ্জিতব্বোতি অযমেত্থ আচরিযানং অনুসাসনী. সব্বেসম্পি একূননৰুতিচিত্তানং সাধারণা নিযমতো তেসু উপ্পজ্জনতোতি সব্বচিত্তসাধারণা নাম.

৩. অধিমুচ্চনং অধিমোক্খো, সো সন্নিট্ঠানলক্খণো, আরম্মণে নিচ্চলভাৰেন ইন্দখীলো ৰিয দট্ঠব্বো. ৰীরানং ভাৰো, কম্মং, ৰিধিনা ঈরযিতব্বং পৰত্তেতব্বন্তি ৰা ৰীরিযং, উস্সাহো, সো সহজাতানং উপত্থম্ভনলক্খণো. ৰীরিযৰসেন হি তেসং ওলীনৰুত্তিতা ন হোতি. এৰঞ্চ কত্ৰা ইমস্স ৰিতক্কাদীহি ৰিসেসো সুপাকটো হোতি. ছন্দনং ছন্দো, আরম্মণেন অত্থিকতা, সো কত্তুকামতালক্খণো. তথা হেস ‘‘আরম্মণগ্গহণে চেতসো হত্থপ্পসারণং ৰিযা’’তি (ধ. স. অট্ঠ. ১ যেৰাপনকৰণ্ণনা) ৰুচ্চতি. দানৰত্থুৰিস্সজ্জনৰসেন ¶ পৰত্তকালেপি চেস ৰিস্সজ্জিতব্বেন তেন অত্থিকোৰ খিপিতব্বউসূনং গহণে অত্থিকো ইস্সাসো ৰিয. সোভনেসু তদিতরেসু চ পকারেন কিণ্ণা ৰিপ্পকিণ্ণাতি পকিণ্ণকা.

৪. সোভনাপেক্খায ইতরে, ইতরাপেক্খায সোভনা চ অঞ্ঞে নাম, তেসং সমানা ন উদ্ধচ্চসদ্ধাদযো ৰিয অকুসলাদিসভাৰাযেৰাতি অঞ্ঞসমানা.

অঞ্ঞসমানচেতসিকৰণ্ণনা নিট্ঠিতা.

অকুসলচেতসিকৰণ্ণনা

৫. এৰং তাৰ সব্বচিত্তসাধারণৰসেন, পকিণ্ণকৰসেন চ সোভনেতরসভাৰে তেরস ধম্মে উদ্দিসিত্ৰা ইদানি হেট্ঠা চিত্তৰিভাগে নিদ্দিট্ঠানুক্কমেন অকুসলধম্মপরিযাপন্নে পঠমং, ততো সোভনধম্মপরিযাপন্নে চ দস্সেতুং ‘‘মোহো’’ত্যাদি ৰুত্তং. অহেতুকা পন আৰেণিকধম্মা নত্থীতি ন তে ৰিসুং ৰুত্তা. আরম্মণে মুয্হতীতি মোহো, অঞ্ঞাণং, সো আরম্মণসভাৰচ্ছাদনলক্খণো. আরম্মণগ্গহণৰসপ্পৰত্তোপি হেস তস্স যথাসভাৰপ্পটিচ্ছাদনাকআরেনেৰ পৰত্ততি. ন হিরীযতি ন লজ্জতীতি অহিরিকো, পুগ্গলো, ধম্মসমূহো ৰা. অহিরিকস্স ভাৰো অহিরিক্কং, তদেৰ অহিরিকং. ন ওত্তপ্পতীতি অনোত্তপ্পং. তত্থ গূথতো গামসূকরো ¶ ৰিয কাযদুচ্চরিতাদিতো অজিগুচ্ছনলক্খণং অহিরিকং, অগ্গিতো সলভো ৰিয ততো অনুত্তাসলক্খণং অনোত্তপ্পং. তেনাহু পোরাণা –

‘‘জিগুচ্ছতি নাহিরিকো, পাপা গূথাৰ সূকরো;

ন ভাযতি অনোত্তপ্পী, সলভো ৰিয পাৰকা’’তি.

উদ্ধতস্স ¶ ভাৰো উদ্ধচ্চং, তং চিত্তস্স অৰূপসমলক্খণং পাসাণাভিঘাতসমুদ্ধতভস্মং ৰিয. লুব্ভতীতি লোভো, সো আরম্মণে অভিসঙ্গলক্খণো মক্কটালেপো ৰিয. চিত্তস্স আলম্বিতুকামতামত্তং ছন্দো, লোভো তত্থ অভিগিজ্ঝনন্তি অযমেতেসং ৰিসেসো. ‘‘ইদমেৰ সচ্চং, মোঘমঞ্ঞ’’ন্তি মিচ্ছাভিনিৰেসলক্খণা দিট্ঠি. ঞাণঞ্হি আরম্মণং যথাসভাৰতো জানাতি, দিট্ঠি যথাসভাৰং ৰিজহিত্ৰা অযাথাৰতো গণ্হাতীতি অযমেতেসং ৰিসেসো. ‘‘সেয্যোহমস্মী’’ত্যাদিনা মঞ্ঞতীতি মানো, সো উণ্ণতিলক্খণো. তথা হেস ‘‘কেতুকম্যতাপচ্চুপট্ঠানো’’তি (ধ. স. অট্ঠ. ৪০০) ৰুত্তো. দুস্সতীতি দোসো, সো চণ্ডিক্কলক্খণো পহটাসীৰিসো ৰিয, ইস্সতীতি ইস্সা, সা পরসম্পত্তিউসূযনলক্খণা. মচ্ছরস্স ভাৰো মচ্ছরিযং, ‘‘মা ইদং অচ্ছরিযং অঞ্ঞেসং হোতু, ময্হমেৰ হোতূ’’তি পৰত্তং ৰা মচ্ছরিযং, তং অত্তসম্পত্তিনিগূহনলক্খণং. কুচ্ছিতং কতন্তি কুকতং. কতাকতদুচ্চরিতসুচরিতং. অকতম্পি হি কুকত’’ন্তি ৰোহরন্তি ‘‘যং মযা অকতং. তং কুকত’’ন্তি. ইধ পন কতাকতং আরব্ভ উপ্পন্নো ৰিপ্পটিসারচিত্তুপ্পাদো কুকতং, তস্স ভাৰো কুক্কুচ্চং, তং কতাকতদুচ্চরিতসুচরিতানুসোচনলক্খণং. থিননং থিনং, অনুস্সাহনাৰসংসীদনৰসেন সংহতভাৰো. মিদ্ধনং মিদ্ধং, ৰিগতসামত্থিযতা, অসত্তিৰিঘাতো ৰা, তত্থ থিনং চিত্তস্স অকম্মঞ্ঞতালক্খণং, মিদ্ধং ৰেদনাদিক্খন্ধত্তযস্সাতি অযমেতেসং ৰিসেসো. তথা হি পাল়িযং (ধ. স. ১১৬২-১১৬৩) ‘‘তত্থ কতমং থিনং? যা চিত্তস্স অকল্লতা অকম্মঞ্ঞতা. তত্থ কতমং মিদ্ধং? যা কাযস্স অকল্লতা অকম্মঞ্ঞতা’’ত্যাদিনা ইমেসং নিদ্দেসো পৰত্তো. ননু চ ‘‘কাযস্সা’’তি ৰচনতো রূপকাযস্সপি অকম্মঞ্ঞতা মিদ্ধন্তি তস্স রূপভাৰোপি আপজ্জতীতি? নাপজ্জতি, তত্থ তত্থ আচরিযেহি আনীতকারণৰসেনেৰস্স ¶ পটিক্খিত্তত্তা. তথা হি মিদ্ধৰাদিমতপ্পটিক্খেপনত্থং তেসং ৰাদনিক্খেপপুব্বকং অট্ঠকথাদীসু বহুধা ৰিত্থারেন্তি আচরিযা. অযং পনেত্থ সঙ্গহো –

‘‘কেচি ¶ মিদ্ধম্পি রূপন্তি, ৰদন্তেতং ন যুজ্জতি;

পহাতব্বেসু ৰুত্তত্তা, কামচ্ছন্দাদযো ৰিয.

‘‘পহাতব্বেসু অক্খাত-মেতং নীৰরণেসু হি;

রূপন্তু ন পহাতব্ব-মক্খাতং দস্সনাদিনা.

‘‘‘ন তুম্হং ভিক্খৰে রূপং, পজহেথা’তি পাঠতো;

পহেয্যভাৰলেসোপি, যত্থ রূপস্স দিস্সতি.

‘‘তত্থ তব্বিসযচ্ছন্দ-রাগহানি পকাসিতা;

ৰুত্তঞ্হি তত্থ যো ছন্দ-রাগক্খেপোতিআদিকং.

‘‘রূপারূপেসু মিদ্ধেসু, অরূপং তত্থ দেসিতং;

ইতি চে নত্থি তং তত্থ, অৰিসেসেন পাঠতো.

‘‘সক্কা হি অনুমাতুং যং, মিদ্ধং রূপন্তি চিন্তিতং;

তম্পি নীৰরণং মিদ্ধ-ভাৰতো ইতরং ৰিয.

‘‘সম্পযোগাভিধানা চ, ন তং রূপন্তি নিচ্ছযো;

অরূপীনঞ্হি খন্ধানং, সম্পযোগো পৰুচ্চতি.

‘‘তথারুপ্পে সমুপ্পত্তি, পাঠতো নত্থি রূপতা;

নিদ্দা খীণাসৰানন্তু, কাযগেলঞ্ঞতো সিযা’’তি.

অকুসলচেতসিকৰণ্ণনা নিট্ঠিতা.

সোভনচেতসিকৰণ্ণনা

৬. সদ্দহতীতি ¶ সদ্ধা, বুদ্ধাদীসু পসাদো, সা সম্পযুত্তধম্মানং পসাদনলক্খণা উদকপ্পসাদকমণি ৰিয. সরণং ¶ সতি, অসম্মোসো, সা সম্পযুত্তধম্মানং সারণলক্খণা. হিরীযতি কাযদুচ্চরিতাদীহি জিগুচ্ছতীতি হিরী, সা পাপতো জিগুচ্ছনলক্খণা. ওত্তপ্পতীতি ওত্তপ্পং, তং পাপতো উত্তাসলক্খণং. অত্তগারৰৰসেন পাপতো জিগুচ্ছনতো কুলৰধূ ৰিয হিরী, পরগারৰৰসেন পাপতো উত্তাসনতো ৰেসিযা ৰিয ওত্তপ্পং. লোভপ্পটিপক্খো অলোভো, সো আরম্মণে চিত্তস্স অলগ্গতালক্খণো মুত্তভিক্খু ৰিয. দোসপ্পটিপক্খো অদোসো, সো অচণ্ডিক্কলক্খণো অনুকূলমিত্তো ৰিয. তেসু ধম্মেসু মজ্ঝত্ততা তত্রমজ্ঝত্ততা, সা চিত্তচেতসিকানং অজ্ঝুপেক্খনলক্খণা সমপ্পৰত্তানং অস্সানং অজ্ঝুপেক্খকো সারথি ৰিয.

কাযস্স পস্সম্ভনং কাযপ্পস্সদ্ধি. চিত্তস্স পস্সম্ভনং চিত্তপ্পস্সদ্ধি. উভোপি চেতা কাযচিত্তদরথৰূপসমলক্খণা. কাযস্স লহুভাৰো কাযলহুতা. তথা চিত্তলহুতা. তা কাযচিত্তগরুভাৰৰূপসমলক্খণা. কাযস্স মুদুভাৰো কাযমুদুতা. তথা চিত্তমুদুতা. তা কাযচিত্তথদ্ধভাৰৰূপসমলক্খণা. কম্মনি সাধু কম্মঞ্ঞং, তস্স ভাৰো কম্মঞ্ঞতা, কাযস্স কম্মঞ্ঞতা কাযকম্মঞ্ঞতা. তথা চিত্তকম্মঞ্ঞতা. তা কাযচিত্তঅকম্মঞ্ঞভাৰৰূপসমলক্খণা. পগুণস্স ভাৰো পাগুঞ্ঞং, তদেৰ পাগুঞ্ঞতা, কাযস্স পাগুঞ্ঞতা কাযপাগুঞ্ঞতা. তথা চিত্তপাগুঞ্ঞতা. তা কাযচিত্তানং গেলঞ্ঞৰূপসমলক্খণা. কাযস্স উজুকভাৰো কাযুজুকতা. তথা চিত্তুজুকতা. তা কাযচিত্তানং অজ্জৰলক্খণা. যথাক্কমং পনেতা কাযচিত্তানং সারম্ভাদিকরধাতুক্খোভপটিপক্খপচ্চযসমুট্ঠানা, কাযোতি চেত্থ ৰেদনাদিক্খন্ধত্তযস্স গহণং. যস্মা চেতে দ্ৰে দ্ৰে ধম্মাৰ একতো হুত্ৰা যথাসকং পটিপক্খধম্মে হনন্তি, তস্মা ইধেৰ ¶ দুৰিধতা ৰুত্তা, ন সমাধিআদীসু. অপিচ চিত্তপ্পস্সদ্ধিআদীহি চিত্তস্সেৰ পস্সদ্ধাদিভাৰো হোতি, কাযপ্পস্সদ্ধিআদীহি পন রূপকাযস্সপি তংসমুট্ঠানপণীতরূপফরণৰসেনাতি তদত্থসন্দস্সনত্থঞ্চেত্থ দুৰিধতা ৰুত্তা. সোভনানং সব্বেসম্পি সাধারণা নিযমেন তেসু উপ্পজ্জনতোতি সোভনসাধারণা.

৭. সম্মা ৰদন্তি এতাযাতি সম্মাৰাচা, ৰচীদুচ্চরিতৰিরতি. সা চতুব্বিধা মুসাৰাদা ¶ ৰেরমণি, পিসুণৰাচা ৰেরমণি, ফরুসৰাচা ৰেরমণি, সম্ফপ্পলাপা ৰেরমণীতি. কম্মমেৰ কম্মন্তো সুত্তন্তৰনন্তাদযো ৰিয. সম্মা পৰত্তো কম্মন্তো সম্মাকম্মন্তো, কাযদুচ্চরিতৰিরতি. সা তিৰিধা পাণাতিপাতা ৰেরমণি, অদিন্নাদানা ৰেরমণি, কামেসুমিচ্ছাচারা ৰেরমণীতি. সম্মা আজীৰন্তি এতেনাতি সম্মাআজীৰো, মিচ্ছাজীৰৰিরতি. সো পন আজীৰহেতুককাযৰচীদুচ্চরিততো ৰিরমণৰসেন সত্তৰিধো, কুহনলপনাদিমিচ্ছাজীৰৰিরমণৰসেন বহুৰিধো ৰা. তিৰিধাপি পনেতা পচ্চেকং সম্পত্তসমাদানসমুচ্ছেদৰিরতিৰসেন তিৰিধা ৰিরতিযো নাম যথাৰুত্তদুচ্চরিতেহি ৰিরমণতো.

৮. করোতি পরদুক্খে সতি সাধূনং হদযখেদং জনেতি, কিরতি ৰা ৰিক্খিপতি পরদুক্খং, কিণাতি ৰা তং হিংসতি, কিরিযতি ৰা দুক্খিতেসু পসারিযতীতি করুণা, সা পরদুক্খাপনযনকামতালক্খণা. তায হি পরদুক্খং অপনীযতু ৰা, মা ৰা, তদাকারেনেৰ সা পৰত্ততি. মোদন্তি এতাযাতি মুদিতা, সা পরসম্পত্তিঅনুমোদনলক্খণা, অপ্পমাণসত্তারম্মণত্তা অপ্পমাণা, তা এৰ অপ্পমঞ্ঞা. ননু চ ‘‘চতস্সো অপ্পমঞ্ঞা’’তি ৰক্খতি, কস্মা পনেত্থ দ্ৰেযেৰ ৰুত্তাতি? অদোসতত্রমজ্ঝত্ততাহি মেত্তুপেক্খানং গহিতত্তা. অদোসোযেৰ হি সত্তেসু হিতজ্ঝাসযৰসপ্পৰত্তো ¶ মেত্তা নাম. তত্রমজ্ঝত্ততাযেৰ তেসু পটিঘানুনযৰূপসমপ্পৰত্তা উপেক্খা নাম. তেনাহু পোরাণা –

‘‘অব্যাপাদেন মেত্তা হি, তত্রমজ্ঝত্ততায চ;

উপেক্খা গহিতা যস্মা, তস্মা ন গহিতা উভো’’তি. (অভিধ. ৭০);

পকারেন জানাতি অনিচ্চাদিৰসেন অৰবুজ্ঝতীতি পঞ্ঞা, সা এৰ যথাসভাৰাৰবোধনে আধিপচ্চযোগতো ইন্দ্রিযন্তি পঞ্ঞিন্দ্রিযং. অথ সঞ্ঞাৰিঞ্ঞাণপঞ্ঞানং কিং নানাকরণন্তি? সঞ্ঞা তাৰ নীলাদিৰসেন সঞ্জাননমত্তং করোতি, লক্খণপ্পটিৰেধং কাতুং ন সক্কোতি. ৰিঞ্ঞাণং লক্খণপ্পটিৰেধম্পি সাধেতি, উস্সক্কিত্ৰা পন মগ্গং পাপেতুং ন সক্কোতি. পঞ্ঞা পন তিৰিধম্পি করোতি, বালগামিকহেরঞ্ঞিকানং কহাপণাৰবোধনমেত্থ নিদস্সনন্তি. ঞাণৰিপ্পযুত্তসঞ্ঞায চেত্থ আকারগ্গহণৰসেন উপ্পজ্জনকালে ৰিঞ্ঞাণং অব্বোহারিকং, সেসকালে বলৰং. ঞাণসম্পযুত্তা পন উভোপি তদনুগতিকা হোন্তি. সব্বথাপি পঞ্চৰীসতীতি সম্বন্ধো.

৯. ‘‘তেরসঞ্ঞসমানা’’ত্যাদি ¶ তীহি রাসীহি ৰুত্তানং সঙ্গহো.

সোভনচেতসিকৰণ্ণনা নিট্ঠিতা.

সম্পযোগনযৰণ্ণনা

১০. চিত্তেন সহ অৰিযুত্তা চিত্তাৰিযুত্তা, চেতসিকাতি ৰুত্তং হোতি. উপ্পজ্জতীতি উপ্পাদো, চিত্তমেৰ উপ্পাদো চিত্তুপ্পাদো ¶ . অঞ্ঞত্থ পন সসম্পযুত্তং চিত্তং চিত্তুপ্পাদোতি ৰুচ্চতি ‘‘উপ্পজ্জতি চিত্তং এতেনাতি উপ্পাদো, ধম্মসমূহো, চিত্তঞ্চ তং উপ্পাদো চাতি চিত্তুপ্পাদো’’তি কত্ৰা. সমাহারদ্ৰন্দেপি হি পুল্লিঙ্গং কত্থচি সদ্দৰিদূ ইচ্ছন্তি. তেসং চিত্তাৰিযুত্তানং চিত্তুপ্পাদেসু পচ্চেকং সম্পযোগো ইতো পরং যথাযোগং পৰুচ্চতীতি সম্বন্ধো.

অঞ্ঞসমানচেতসিকসম্পযোগনযৰণ্ণনা

১৩. সভাৰেন অৰিতক্কত্তা দ্ৰিপঞ্চৰিঞ্ঞাণানি ৰজ্জিতানি এতেহি, তেহি ৰা এতানি ৰজ্জিতানীতি দ্ৰিপঞ্চৰিঞ্ঞাণৰজ্জিতানি, চতুচত্তালীস কামাৰচরচিত্তানি. তেসু চেৰ একাদসসু পঠমজ্ঝানচিত্তেসু চ ৰিতক্কো জাযতি সেসানং ভাৰনাবলেন অৰিতক্কত্তাতি অধিপ্পাযো.

১৪. তেসু চেৰ পঞ্চপঞ্ঞাসসৰিতক্কচিত্তেসু, একাদসসু দুতিযজ্ঝানচিত্তেসু চাতি ছসট্ঠিচিত্তেসু ৰিচারো জাযতি.

১৫. দ্ৰিপঞ্চৰিঞ্ঞাণেহি, ৰিচিকিচ্ছাসহগতেন চাতি একাদসহি ৰজ্জিতেসু অট্ঠসত্ততিচিত্তেসু অধিমোক্খো জাযতি.

১৬. পঞ্চদ্ৰারাৰজ্জনেন, দ্ৰিপঞ্চৰিঞ্ঞাণেহি, সম্পটিচ্ছনদ্ৰযেন, সন্তীরণত্তযেন চাতি সোল়সহি ৰজ্জিতেসু তেসত্ততিযা চিত্তেসু ৰীরিযং জাযতি.

১৭. দোমনস্সসহগতেহিদ্ৰীহি ¶ , উপেক্খাসহগতেহি পঞ্চপঞ্ঞাসচিত্তেহি, কাযৰিঞ্ঞাণদ্ৰযেন, একাদসহি চতুত্থজ্ঝানেহি চাতি সত্ততিচিত্তেহি ৰজ্জিতেসু একপঞ্ঞাসচিত্তেসু পীতি জাযতি.

১৮. অহেতুকেহি ¶ অট্ঠারসহি, মোমূহেহি দ্ৰীহি চাতি ৰীসতিযা চিত্তেহি ৰজ্জিতেসু একূনসত্ততিচিত্তেসু ছন্দো জাযতি.

১৯. তে পনাতি পকিণ্ণকৰিৰজ্জিতা তংসহগতা চ. যথাক্কমন্তি ৰিতক্কাদিছপকিণ্ণকৰজ্জিততংসহিতকমানুরূপতো. ‘‘ছসট্ঠি পঞ্চপঞ্ঞাসা’’ত্যাদি একৰীসসতগণনৰসেন, একূননৰুতিগণনৰসেন চ যথারহং যোজেতব্বং.

অঞ্ঞসমানচেতসিকসম্পযোগনযৰণ্ণনা নিট্ঠিতা.

অকুসলচেতসিকসম্পযোগনযৰণ্ণনা

২০. ‘‘সব্বাকুসলসাধারণা’’তি ৰত্ৰা তদেৰ সমত্থেতুং ‘‘সব্বেসুপী’’ত্যাদি ৰুত্তং. যো হি কোচি পাণাতিপাতাদীসু পটিপজ্জতি, সো সব্বোপি মোহেন তত্থ অনাদীনৰদস্সাৰী অহিরিকেন ততো অজিগুচ্ছন্তো, অনোত্তপ্পেন অনোত্তপ্পন্তো, উদ্ধচ্চেন অৰূপসন্তো চ হোতি, তস্মা তে সব্বাকুসলেসু উপলব্ভন্তি.

২১. লোভসহগতচিত্তেস্ৰেৰাতি এৰ-কারো অধিকারত্থাযপি হোতীতি ‘‘দিট্ঠিসহগতচিত্তেসূ’’তিআদীসুপি অৰধারণং দট্ঠব্বং. সক্কাযাদীসু হি অভিনিৰিসন্তস্স তত্থ মমাযনসম্ভৰতো দিট্ঠি লোভসহগতচিত্তেস্ৰেৰ লব্ভতি. মানোপি অহংমানৰসেন পৰত্তনতো দিট্ঠিসদিসোৰ পৰত্ততীতি দিট্ঠিযা সহ একচিত্তুপ্পাদেন পৰত্ততি কেসরসীহো ৰিয অপরেন তথাৰিধেন সহ একগুহাযং, ন চাপি দোসমূলাদীসু উপ্পজ্জতি অত্তসিনেহসন্নিস্সযভাৰেন একন্তলোভপদট্ঠানত্তাতি সো দিট্ঠিৰিপ্পযুত্তেস্ৰেৰ লব্ভতি.

২৪. তথা ¶ ¶ পরসম্পত্তিং উসূযন্তস্স, অত্তসম্পত্তিযা চ পরেহি সাধারণভাৰং অনিচ্ছন্তস্স, কতাকতদুচ্চরিতসুচরিতে অনুসোচন্তস্স চ তত্থ তত্থ পটিহননৰসেনেৰ পৰত্তনতো ইস্সামচ্ছরিযকুক্কুচ্চানি পটিঘচিত্তেস্ৰেৰ.

২৫. অকম্মঞ্ঞতাপকতিকস্স তথা সভাৰতিক্খেসু অসঙ্খারিকেসু পৰত্তনাযোগতো থিনমিদ্ধং সসঙ্খারিকেস্ৰেৰ লব্ভতি.

২৭. সব্বাপুঞ্ঞেস্ৰেৰ চত্তারো চেতসিকা গতা, লোভমূলেযেৰ যথাসম্ভৰং তযো গতা, দোসমূলেস্ৰেৰ দ্ৰীসু চত্তারো গতা, তথা সসঙ্খারেযেৰ দ্ৰযন্তি যোজনা. ৰিচিকিচ্ছা ৰিচিকিচ্ছাচিত্তে চাতি চ-সদ্দো অৰধারণে. ৰিচিকিচ্ছা ৰিচিকিচ্ছাচিত্তেযেৰাতি সম্বন্ধো.

অকুসলচেতসিকসম্পযোগনযৰণ্ণনা নিট্ঠিতা.

সোভনচেতসিকসম্পযোগনযৰণ্ণনা

২৯. লোকুত্তরচিত্তেসু পাদকজ্ঝানাদিৰসেন কদাচি সম্মাসঙ্কপ্পৰিরহো সিযা, ন পন ৰিরতীনং অভাৰো মগ্গস্স কাযদুচ্চরিতাদীনং সমুচ্ছেদৰসেন, ফলস্স চ তদনুকূলৰসেন পৰত্তনতোতি ৰুত্তং ‘‘ৰিরতিযো পনা’’ত্যাদি. সব্বথাপীতি সব্বেহিপি তংতংদুচ্চরিতদুরাজীৰানং ৰিধমনৰসপ্পৰত্তেহি আকারেহি. ন হি এতাসং লোকিযেসু ৰিয লোকুত্তরেসুপি মুসাৰাদাদীনং ৰিসুং ৰিসুং পহানৰসেন পৰত্তি হোতি সব্বেসমেৰ দুচ্চরিতদুরাজীৰানং তেন তেন মগ্গেন কেসঞ্চি সব্বসো, কেসঞ্চি অপাযগমনীযাদিঅৰত্থায পহানৰসেন একক্খণে সমুচ্ছিন্দনতো. ননু চাযমত্থো ‘‘একতোৰা’’তি ইমিনাৰ সিদ্ধোতি? তং ন, তিস্সন্নং একতোৰুত্তিপরিদীপনমত্তেন চতুব্বিধৰচীদুচ্চরিতাদীনং পটিপক্খাকারপ্পৰত্তিযা অদীপিতত্তা. কেচি পন ইমমত্থং অসল্লক্খেত্ৰাৰ ¶ ‘‘‘সব্বথাপী’তি ইদং অতিরিত্ত’’ন্তি ৰদন্তি, তত্থ তেসং অঞ্ঞাণমেৰ কারণং. ‘‘নিযতা’’তি ইমিনাপি লোকিযেসু ৰিয কদাচি সম্ভৰং নিৰারেতি. তথা হেতা লোকিযেসু যেৰাপনকৰসেন দেসিতা, ইধ পন সরূপেনেৰ. কামাৰচরকুসলেস্ৰেৰাতি অৰধারণেন ¶ কামাৰচরৰিপাককিরিযেসু মহগ্গতেসু চ সম্ভৰং নিৰারেতি. তথা চেৰ উপরি ৰক্খতি. কদাচীতি মুসাৰাদাদিএকেকদুচ্চরিতেহি পটিৰিরমণকালে. কদাচি উপ্পজ্জন্তাপি ন একতো উপ্পজ্জন্তি ৰীতিক্কমিতব্বৰত্থুসঙ্খাতানং অত্তনো আরম্মণানং সম্ভৰাপেক্খত্তাতি ৰুত্তং ‘‘ৰিসুং ৰিসু’’ন্তি.

৩০. অপ্পনাপ্পত্তানং অপ্পমঞ্ঞানং ন কদাচি সোমনস্সরহিতা পৰত্তি অত্থীতি ‘‘পঞ্চম…পে… চিত্তেসু চা’’তি ৰুত্তং. ৰিনীৰরণাদিতায মহত্তং গতানি, মহন্তেহি ৰা ঝাযীহি গতানি পত্তানীতি মহগ্গতানি. নানা হুত্ৰাতি ভিন্নারম্মণত্তা অত্তনো আরম্মণভূতানং দুক্খিতসুখিতসত্তানং আপাথগমনাপেক্খতায ৰিসুং ৰিসুং হুত্ৰা. এত্থাতি ইমেসু কামাৰচরকুসলচিত্তেসু, করুণামুদিতাভাৰনাকালে অপ্পনাৰীথিতো পুব্বে পরিচযৰসেন উপেক্খাসহগতচিত্তেহিপি পরিকম্মং হোতি, যথা তং পগুণগন্থং সজ্ঝাযন্তস্স কদাচি অঞ্ঞৰিহিতস্সপি সজ্ঝাযনং, যথা চ পগুণৰিপস্সনায সঙ্খারে সম্মসন্তস্স কদাচি পরিচযবলেন ঞাণৰিপ্পযুত্তচিত্তেহিপি সম্মসনন্তি উপেক্খাসহগতকামাৰচরেসু করুণামুদিতানং অসম্ভৰৰাদো কেচিৰাদো কতো. অপ্পনাৰীথিযং পন তাসং একন্ততো সোমনস্সসহগতেস্ৰেৰ সম্ভৰো দট্ঠব্বো ভিন্নজাতিকস্স ৰিয ভিন্নৰেদনস্সপি আসেৰনপচ্চযাভাৰতো.

৩২. তযো সোল়সচিত্তেসূতি সম্মাৰাচাদযো তযো ধম্মা অট্ঠলোকুত্তরকামাৰচরকুসলৰসেন সোল়সচিত্তেসু জাযন্তি.

৩৩. এৰং ¶ নিযতানিযতসম্পযোগৰসেন ৰুত্তেসু অনিযতধম্মে একতো দস্সেত্ৰা সেসানং নিযতভাৰং দীপেতুং ‘‘ইস্সামচ্ছেরা’’ত্যাদি ৰুত্তং. ইস্সামচ্ছেরকুক্কুচ্চৰিরতিকরুণাদযো নানা কদাচি জাযন্তি, মানো চ কদাচি ‘‘সেয্যোহমস্মী’’ত্যাদিৰসপ্পৰত্তিযং জাযতি. থিনমিদ্ধং তথা কদাচি অকম্মঞ্ঞতাৰসপ্পৰত্তিযং সহ অঞ্ঞমঞ্ঞং অৰিপ্পযোগিৰসেন জাযতীতি যোজনা. অথ ৰা মানো চাতি এত্থ চ-সদ্দং ‘‘সহা’’তি এত্থাপি যোজেত্ৰা থিনমিদ্ধং তথা কদাচি সহ চ সসঙ্খারিকপটিঘে, দিট্ঠিগতৰিপ্পযুত্তসসঙ্খারিকেসু চ ইস্সামচ্ছরিযকুক্কুচ্চেহি, মানেন চ সদ্ধিং, কদাচি তদিতরসসঙ্খারিকচিত্তসম্পযোগকালে, তংসম্পযোগকালেপি ৰা নানা চ জাযতীতি যোজনা দট্ঠব্বা. অপরে পন আচরিযা ‘‘মানো চ থিনমিদ্ধঞ্চ তথা কদাচি নানা কদাচি সহ চ জাযতী’’তি এত্তকমেৰ যোজেসুং.

৩৪. সেসাতি ¶ যথাৰুত্তেহি একাদসহি অনিযতেহি ইতরে একচত্তালীস. কেচি পন ‘‘যথাৰুত্তেহি অনিযতযেৰাপনকেহি সেসা নিযতযেৰাপনকা’’তি ৰণ্ণেন্তি, তং তেসং মতিমত্তং, ইধ যেৰাপনকনামেন কেসঞ্চি অনুদ্ধটত্তা. কেৰলঞ্হেত্থ নিযতানিযতৰসেন চিত্তুপ্পাদেসু যথারহং লব্ভমানচেতসিকমত্তসন্দস্সনং আচরিযেন কতং, ন যেৰাপনকনামেন কেচি উদ্ধটাতি.

এৰং তাৰ ‘‘ফস্সাদীসু অযং ধম্মো এত্তকেসু চিত্তেসু উপলব্ভতী’’তি চিত্তপরিচ্ছেদৰসেন সম্পযোগং দস্সেত্ৰা ইদানি ‘‘ইমস্মিং চিত্তুপ্পাদে এত্তকা চেতসিকা’’তি চেতসিকরাসিপরিচ্ছেদৰসেন সঙ্গহং দস্সেতুং ‘‘সঙ্গহঞ্চা’’ত্যাদি ৰুত্তং.

সোভনচেতসিকসম্পযোগনযৰণ্ণনা নিট্ঠিতা.

সম্পযোগনযৰণ্ণনা নিট্ঠিতা.

সঙ্গহনযৰণ্ণনা

৩৫. ‘‘ছত্তিংসা’’ত্যাদি ¶ তত্থ তত্থ যথারহং লব্ভমানকধম্মৰসেন গণনসঙ্গহো.

৩৬. পঠমজ্ঝানে নিযুত্তানি চিত্তানি, তং ৰা এতেসং অত্থীতি পঠমজ্ঝানিকচিত্তানি. অপ্পমঞ্ঞানং সত্তারম্মণত্তা, লোকুত্তরানঞ্চ নিব্বানারম্মণত্তা ৰুত্তং ‘‘অপ্পমঞ্ঞাৰজ্জিতা’’তি. ‘‘তথা’’তি ইমিনা অঞ্ঞসমানা, অপ্পমঞ্ঞাৰজ্জিতা সোভনচেতসিকা চ সঙ্গহং গচ্ছন্তীতি আকড্ঢতি. উপেক্খাসহগতাতি ৰিতক্কৰিচারপীতিসুখৰজ্জা সুখট্ঠানং পৰিট্ঠউপেক্খায সহগতা. পঞ্চকজ্ঝানৰসেনাতি ৰিতক্কৰিচারে ৰিসুং ৰিসুং অতিক্কমিত্ৰা ভাৰেন্তস্স নাতিতিক্খঞাণস্স ৰসেন দেসিতস্স ঝানপঞ্চকস্স ৰসেন. তে পন একতো অতিক্কমিত্ৰা ভাৰেন্তস্স তিক্খঞাণস্স ৰসেন দেসিতচতুক্কজ্ঝানৰসেন দুতিযজ্ঝানিকেসু ৰিতক্কৰিচারৰজ্জিতানং সম্ভৰতো চতুধা এৰ সঙ্গহো হোতীতি অধিপ্পাযো.

৩৭. তেত্তিংসদ্ৰযং চতুত্থপঞ্চমজ্ঝানচিত্তেসু.

মহগ্গতচিত্তসঙ্গহনযৰণ্ণনা

৩৮. তীসূতি ¶ কুসলৰিপাককিরিযৰসেন তিৰিধেসু সীলৰিসুদ্ধিৰসেন সুৰিসোধিতকাযৰচীপযোগস্স কেৰলং চিত্তসমাধানমত্তেন মহগ্গতজ্ঝানানি পৰত্তন্তি, ন পন কাযৰচীকম্মানং ৰিসোধনৰসেন, নাপি দুচ্চরিতদুরাজীৰানং সমুচ্ছিন্দনপটিপ্পস্সম্ভনৰসেনাতি ৰুত্তং ‘‘ৰিরতিৰজ্জিতা’’তি. পচ্চেকমেৰাতি ৰিসুং ৰিসুংযেৰ. পন্নরসসূতি রূপাৰচরৰসেন তীসু, আরুপ্পৰসেন দ্ৰাদসসূতি পন্নরসসু. অপ্পমঞ্ঞাযো ন লব্ভন্তীতি এত্থ কারণং ৰুত্তমেৰ.

মহগ্গতচিত্তসঙ্গহনযৰণ্ণনা নিট্ঠিতা.

কামাৰচরসোভনচিত্তসঙ্গহনযৰণ্ণনা

৪০. পচ্চেকমেৰাতি ¶ একেকাযেৰ. অপ্পমঞ্ঞানং হি সত্তারম্মণত্তা, ৰিরতীনঞ্চ ৰীতক্কমিতব্বৰত্থুৰিসযত্তা নত্থি তাসং একচিত্তুপ্পাদে সম্ভৰোতি লোকিযৰিরতীনং একন্তকুসলসভাৰত্তা নত্থি অব্যাকতেসু সম্ভৰোতি ৰুত্তং ‘‘ৰিরতিৰজ্জিতা’’তি. তেনাহ ‘‘পঞ্চ সিক্খাপদা কুসলাযেৰা’’তি (ৰিভ. ৭১৫). ইতরথা সদ্ধাসতিআদযো ৰিয ‘‘সিযা কুসলা, সিযা অব্যাকতা’’তি ৰদেয্য. ফলস্স পন মগ্গপটিবিম্বভূতত্তা, দুচ্চরিতদুরাজীৰানং পটিপ্পস্সম্ভনতো চ ন লোকুত্তরৰিরতীনং একন্তকুসলতা যুত্তাতি তাসং তত্থ অগ্গহণং. কামাৰচরৰিপাকানম্পি একন্তপরিত্তারম্মণত্তা, অপ্পমঞ্ঞানঞ্চ সত্তারম্মণত্তা, ৰিরতীনম্পি একন্তকুসলত্তা ৰুত্তং ‘‘অপ্পমঞ্ঞাৰিরতিৰজ্জিতা’’তি.

ননু চ পঞ্ঞত্তাদিআরম্মণম্পি কামাৰচরকুসলং হোতীতি তস্স ৰিপাকেনপি কুসলসদিসারম্মণেন ভৰিতব্বং যথা তং মহগ্গতলোকুত্তরৰিপাকেহীতি? নযিদমেৰং, কামতণ্হাধীনস্স ফলভূতত্তা. যথা হি দাসিযা পুত্তো মাতরা ইচ্ছিতং কাতুং অসক্কোন্তো সামিকেনেৰ ইচ্ছিতিচ্ছিতং করোতি, এৰং কামতণ্হাযত্ততায দাসিসদিসস্স কামাৰচরকম্মস্স ৰিপাকভূতং চিত্তং তেন গহিতারম্মণং অগ্গহেত্ৰা কামতণ্হারম্মণমেৰ গণ্হাতীতি. দ্ৰাদসধাতি কুসলৰিপাককিরিযভেদেসু পচ্চেকং চত্তারো চত্তারো দুকাতি কত্ৰা তীসু দ্ৰাদসধা.

৪২. ইদানি ¶ ইমেসু পঠমজ্ঝানিকাদীহি দুতিযজ্ঝানিকাদীনং ভেদকরধম্মে দস্সেতুং ‘‘অনুত্তরে ঝানধম্মা’’ত্যাদি ৰুত্তং. অনুত্তরে চিত্তে ৰিতক্কৰিচারপীতিসুখৰসেন ঝানধম্মা ৰিসেসকা ভেদকা. মজ্ঝিমে মহগ্গতে অপ্পমঞ্ঞা, ঝানধম্মা ¶ চ. পরিত্তেসু কামাৰচরেসু ৰিরতী, ঞাণপীতী চ অপ্পমঞ্ঞা চ ৰিসেসকা, তত্থ ৰিরতী কুসলেহি ৰিপাককিরিযানং ৰিসেসকা, অপ্পমঞ্ঞা কুসলকিরিযেহি ৰিপাকানং, ঞাণপীতী পন তীসু পঠমযুগল়াদীহি দুতিযযুগল়াদীনন্তি দট্ঠব্বং.

কামাৰচরসোভনচিত্তসঙ্গহনযৰণ্ণনা নিট্ঠিতা.

অকুসলচিত্তসঙ্গহনযৰণ্ণনা

৪৪. দুতিযে অসঙ্খারিকেতি দিট্ঠিৰিপ্পযুত্তে অসঙ্খারিকে লোভমানেন তথেৰ অঞ্ঞসমানা, অকুসলসাধারণা চ একূনৰীসতি ধম্মাতি সম্বন্ধো.

৪৫. ততিযেতি উপেক্খাসহগতদিট্ঠিসম্পযুত্তে অসঙ্খারিকে.

৪৬. চতুত্থেতি দিট্ঠিৰিপ্পযুত্তে অসঙ্খারিকে.

৪৭. ইস্সামচ্ছরিযকুক্কুচ্চানি পনেত্থ পচ্চেকমেৰ যোজেতব্বানি ভিন্নারম্মণত্তাযেৰাতি অধিপ্পাযো.

৫০. অধিমোক্খস্স নিচ্ছযাকারপ্পৰত্তিতো দ্ৰেল়্হকসভাৰে ৰিচিকিচ্ছাচিত্তে সম্ভৰো নত্থীতি ‘‘অধিমোক্খৰিরহিতা’’তি ৰুত্তং.

৫১. একূনৰীসতি পঠমদুতিযঅসঙ্খারিকেসু, অট্ঠারস ততিযচতুত্থঅসঙ্খারিকেসু, ৰীস পঞ্চমে ¶ অসঙ্খারিকে, একৰীস পঠমদুতিযসসঙ্খারিকেসু, ৰীসতি ততিযচতুত্থসসঙ্খারিকেসু, দ্ৰাৰীস পঞ্চমে সসঙ্খারিকে, পন্নরস মোমূহদ্ৰযেতি এৰং অকুসলে সত্তধা ঠিতাতি যোজনা.

৫২. সাধারণাতি ¶ অকুসলানং সব্বেসমেৰ সাধারণভূতা চত্তারো সমানা চ ছন্দপীতিঅধিমোক্খৰজ্জিতা অঞ্ঞসমানা অপরে দসাতি এতে চুদ্দস ধম্মা সব্বাকুসলযোগিনোতি পৰুচ্চন্তীতি যোজনা.

অকুসলচিত্তসঙ্গহনযৰণ্ণনা নিট্ঠিতা.

অহেতুকচিত্তসঙ্গহনযৰণ্ণনা

৫৪. ‘‘তথা’’তি ইমিনা অঞ্ঞসমানে পচ্চামসতি.

৫৬. মনোৰিঞ্ঞাণধাতুযা ৰিয ৰিসিট্ঠমননকিচ্চাযোগতো মননমত্তা ধাতূতি মনোধাতু. অহেতুকপটিসন্ধিযুগল়েতি উপেক্খাসন্তীরণদ্ৰযে.

৫৮. দ্ৰাদস হসনচিত্তে, একাদস ৰোট্ঠব্বনসুখসন্তীরণেসু, দস মনোধাতুত্তিকাহেতুকপটিসন্ধিযুগল়ৰসেন পঞ্চসু, সত্ত দ্ৰিপঞ্চৰিঞ্ঞাণেসূতি অট্ঠারসাহেতুকেসু চিত্তুপ্পাদেসু সঙ্গহো চতুব্বিধো হোতীতি যোজনা.

৫৯. তেত্তিংসৰিধসঙ্গহোতি অনুত্তরে পঞ্চ, তথা মহগ্গতে, কামাৰচরসোভনে দ্ৰাদস, অকুসলে সত্ত, অহেতুকে চত্তারোতি তেত্তিংসৰিধসঙ্গহো.

৬০. ইত্থং যথাৰুত্তনযেন চিত্তাৰিযুত্তানং চেতসিকানং চিত্তপরিচ্ছেদৰসেন ৰুত্তং সম্পযোগঞ্চ চেতসিকরাসিপরিচ্ছেদৰসেন ৰুত্তং সঙ্গহঞ্চ ঞত্ৰা যথাযোগং চিত্তেন সমং ভেদং উদ্দিসে ‘‘সব্বচিত্তসাধারণা তাৰ সত্ত একূননৰুতিচিত্তেসু উপ্পজ্জনতো পচ্চেকং একূননৰুতিৰিধা ¶ , পকিণ্ণকেসু ¶ ৰিতক্কো পঞ্চপঞ্ঞাসচিত্তেসু উপ্পজ্জনতো পঞ্চপঞ্ঞাসৰিধো’’ত্যাদিনা কথেয্যাতি অত্থো.

অহেতুকচিত্তসঙ্গহনযৰণ্ণনা নিট্ঠিতা.

ইতি অভিধম্মত্থৰিভাৰিনিযা নাম অভিধম্মত্থসঙ্গহৰণ্ণনায

চেতসিকপরিচ্ছেদৰণ্ণনা নিট্ঠিতা.

৩. পকিণ্ণকপরিচ্ছেদৰণ্ণনা

১. ইদানি যথাৰুত্তানং চিত্তচেতসিকানং ৰেদনাদিৰিভাগতো, তংতংৰেদনাদিভেদভিন্নচিত্তুপ্পাদৰিভাগতো চ পকিণ্ণকসঙ্গহং দস্সেতুং ‘‘সম্পযুত্তা যথাযোগ’’ন্ত্যাদি আরদ্ধং. যথাযোগং সম্পযুত্তা চিত্তচেতসিকা ধম্মা সভাৰতো অত্তনো অত্তনো সভাৰৰসেন একূননৰুতিৰিধম্পি চিত্তং আরম্মণৰিজাননসভাৰসামঞ্ঞেন একৰিধং, সব্বচিত্তসাধারণো ফস্সো ফুসনসভাৰেন একৰিধোত্যাদিনা তেপঞ্ঞাস হোন্তি.

২. ইদানি তেসং ধম্মানং যথারহং ৰেদনা…পে… ৰত্থুতো সঙ্গহো নাম ৰেদনাসঙ্গহাদিনামকো পকিণ্ণকসঙ্গহো চিত্তুপ্পাদৰসেনেৰ তংতংৰেদনাদিভেদভিন্নচিত্তুপ্পাদানং ৰসেনেৰ ন কত্থচি তংৰিরহেন নীযতে উপনীযতে, আহরীযতীত্যত্থো.

ৰেদনাসঙ্গহৰণ্ণনা

৩. তত্থাতি তেসু ছসু সঙ্গহেসু. সুখাদিৰেদনানং, তংসহগতচিত্তুপ্পাদানঞ্চ ৰিভাগৰসেন সঙ্গহো ৰেদনাসঙ্গহো. দুক্খতো, সুখতো চ অঞ্ঞা অদুক্খমসুখা ম-কারাগমৰসেন. ননু চ ‘‘দ্ৰেমা, ভিক্খৰে, ৰেদনা সুখা দুক্খা’’তি (সং. নি. ৪.২৬৭) ৰচনতো দ্ৰে এৰ ৰেদনাতি? সচ্চং, তং পন অনৰজ্জপক্খিকং ¶ অদুক্খমসুখং সুখৰেদনাযং ¶ , সাৰজ্জপক্খিকঞ্চ দুক্খৰেদনাযং সঙ্গহেত্ৰা ৰুত্তং. যম্পি কত্থচি সুত্তে ‘‘যং কিঞ্চি ৰেদযিতমিদমেত্থ দুক্খস্সা’’তি (সং. নি. ৪.২৫৯) ৰচনং, তং সঙ্খারদুক্খতায সব্বৰেদনানং দুক্খসভাৰত্তা ৰুত্তং. যথাহ – ‘‘সঙ্খারানিচ্চতং, আনন্দ, মযা সন্ধায ভাসিতং সঙ্খারৰিপরিণামতঞ্চ যং কিঞ্চিৰেদযিতমিদমেত্থ দুক্খস্সা’’তি (সং. নি. ৪.২৫৯; ইতিৰু. অট্ঠ. ৫২). তস্মা তিস্সোযেৰ ৰেদনাতি দট্ঠব্বা. তেনাহ ভগৰা – ‘‘তিস্সো ইমা, ভিক্খৰে, ৰেদনা সুখা দুক্খা অদুক্খমসুখা চা’’তি (ইতিৰু. ৫২-৫৩; সং. নি. ৪.২৪৯-২৫১). এৰং তিৰিধাপি পনেতা ইন্দ্রিযদেসনাযং ‘‘সুখিন্দ্রিযং দুক্খিন্দ্রিযং সোমনস্সিন্দ্রিযং দোমনস্সিন্দ্রিযং উপেক্খিন্দ্রিয’’ন্তি (ৰিভ. ২১৯) পঞ্চধা দেসিতাতি তংৰসেনপেত্থ ৰিভাগং দস্সেতুং ‘‘সুখং দুক্খ’’ন্ত্যাদি ৰুত্তং. কাযিকমানসিকসাতাসাতভেদতো হি সুখং দুক্খঞ্চ পচ্চেকং দ্ৰিধা ৰিভজিত্ৰা ‘‘সুখিন্দ্রিযং সোমনস্সিন্দ্রিযং দুক্খিন্দ্রিযং দোমনস্সিন্দ্রিয’’ন্তি (ৰিভ. ২১৯) দেসিতা, উপেক্খা পন ভেদাভাৰতো উপেক্খিন্দ্রিযন্তি একধাৰ. যথা হি সুখদুক্খানি অঞ্ঞথা কাযস্স অনুগ্গহমুপঘাতঞ্চ করোন্তি, অঞ্ঞথা মনসো, নেৰং উপেক্খা, তস্মা সা একধাৰ দেসিতা, তেনাহু পোরাণা –

‘‘কাযিকং মানসং দুক্খং, সুখঞ্চোপেক্খৰেদনা;

একং মানসমেৰেতি, পঞ্চধিন্দ্রিযভেদতো’’তি. (স. স. ৭৪);

তত্থ ইট্ঠফোট্ঠব্বানুভৰনলক্খণং সুখং. অনিট্ঠফোট্ঠব্বানুভৰনলক্খণং দুক্খং. সভাৰতো, পরিকপ্পতো ৰা ইট্ঠানুভৰনলক্খণং সোমনস্সং. তথা অনিট্ঠানুভৰনলক্খণং দোমনস্সং. মজ্ঝত্তানুভৰনলক্খণা উপেক্খা.

৫. চতুচত্তালীস পচ্চেকং লোকিযলোকুত্তরভেদেন একাদসৰিধত্তা.

৭. সেসানীতি ¶ সুখদুক্খসোমনস্সদোমনস্সসহগতেহি অৰসেসানি অকুসলতো ছ, অহেতুকতো চুদ্দস, কামাৰচরসোভনতো দ্ৰাদস, পঞ্চমজ্ঝানিকানি তেৰীসাতি সব্বানিপি পঞ্চপঞ্ঞাস.

ৰেদনাসঙ্গহৰণ্ণনা নিট্ঠিতা.

হেতুসঙ্গহৰণ্ণনা

১০. লোভাদিহেতূনং ¶ ৰিভাগৰসেন, তংসম্পযুত্তৰসেন চ সঙ্গহো হেতুসঙ্গহো. হেতৰো নাম ছব্বিধা ভৰন্তীতি সম্বন্ধো. হেতুভাৰো পন নেসং সম্পযুত্তানং সুপ্পতিট্ঠিতভাৰসাধনসঙ্খাতো মূলভাৰো. লদ্ধহেতুপচ্চযা হি ধম্মা ৰিরুল়্হমূলা ৰিয পাদপা থিরা হোন্তি, ন অহেতুকা ৰিয জলতলে সেৰালসদিসা. এৰঞ্চ কত্ৰা এতে মূলসদিসতায ‘‘মূলানী’’তি চ ৰুচ্চন্তি. অপরে পন ‘‘কুসলাদীনং কুসলাদিভাৰসাধনং হেতুভাৰো’’তি ৰদন্তি, এৰং সতি হেতূনং অত্তনো কুসলাদিভাৰসাধনো অঞ্ঞো হেতু মগ্গিতব্বো সিযা. অথ সেসসম্পযুত্তহেতুপটিবদ্ধো তেসং কুসলাদিভাৰো, এৰম্পি মোমূহচিত্তসম্পযুত্তস্স হেতুনো অকুসলভাৰো অপ্পটিবদ্ধো সিযা. অথ তস্স সভাৰতো অকুসলভাৰোপি সিযা, এৰং সতি সেসহেতূনম্পি সভাৰতোৰ কুসলাদিভাৰোতি তেসং ৰিয সম্পযুত্তধম্মানম্পি সো হেতুপটিবদ্ধো ন সিযা. যদি চ হেতুপটিবদ্ধো কুসলাদিভাৰো, তদা অহেতুকানং অব্যাকতভাৰো ন সিযাতি অলমতিনিপ্পীল়নেন. কুসলাদিভাৰো পন কুসলাকুসলানং যোনিসোঅযোনিসোমনসিকারপ্পটিবদ্ধো. যথাহ – ‘‘যোনিসো, ভিক্খৰে, মনসিকরোতো অনুপ্পন্না ¶ চেৰ কুসলা ধম্মা উপ্পজ্জন্তি, উপ্পন্না চ কুসলা ধম্মা অভিৰড্ঢন্তী’’ত্যাদি (অ. নি. ১.৬৭), অব্যাকতানং পন অব্যাকতভাৰো নিরনুসযসন্তানপ্পটিবদ্ধো কম্মপ্পটিবদ্ধো অৰিপাকভাৰপ্পটিবদ্ধো চাতি দট্ঠব্বং.

১৬. ইদানি হেতূনং জাতিভেদং দস্সেতুং ‘‘লোভো দোসো চা’’ত্যাদি ৰুত্তং.

হেতুসঙ্গহৰণ্ণনা নিট্ঠিতা.

কিচ্চসঙ্গহৰণ্ণনা

১৮. পটিসন্ধাদীনং কিচ্চানং ৰিভাগৰসেন, তংকিচ্চৰন্তানঞ্চ পরিচ্ছেদৰসেন সঙ্গহো কিচ্চসঙ্গহো. ভৰতো ভৰস্স পটিসন্ধানং পটিসন্ধিকিচ্চং. অৰিচ্ছেদপ্পৰত্তিহেতুভাৰেন ভৰস্স অঙ্গভাৰো ভৰঙ্গকিচ্চং. আৰজ্জনকিচ্চাদীনি হেট্ঠা ৰুত্তৰচনত্থানুসারেন যথারহং যোজেতব্বানি. আরম্মণে ¶ তংতংকিচ্চসাধনৰসেন অনেকক্খত্তুং, একক্খত্তুং ৰা জৰমানস্স ৰিয পৰত্তি জৰনকিচ্চং. তংতংজৰনগ্গহিতারম্মণস্স আরম্মণকরণং তদারম্মণকিচ্চং. নিব্বত্তভৰতো পরিগল়্হনং চুতিকিচ্চং.

১৯. ইমানি পন কিচ্চানি ঠানৰসেন পাকটানি হোন্তীতি তং দানি পভেদতো দস্সেতুং ‘‘পটিসন্ধী’’ত্যাদি ৰুত্তং, তত্থ পটিসন্ধিযা ঠানং পটিসন্ধিঠানং. কামং পটিসন্ধিৰিনিমুত্তং ঠানং নাম নত্থি, সুখগ্গহণত্থং পন ‘‘সিলাপুত্তকস্স সরীর’’ন্ত্যাদীসু ৰিয অভেদেপি ভেদপরিকপ্পনাতি দট্ঠব্বং. এৰং সেসেসুপি. দস্সনাদীনং পঞ্চন্নং ৰিঞ্ঞাণানং ঠানং পঞ্চৰিঞ্ঞাণঠানং. আদি-সদ্দেন সম্পটিচ্ছনঠানাদীনং সঙ্গহো.

তত্থ ¶ চুতিভৰঙ্গানং অন্তরা পটিসন্ধিঠানং. পটিসন্ধিআৰজ্জনানং, জৰনাৰজ্জনানং, তদারম্মণাৰজ্জনানং, ৰোট্ঠব্বনাৰজ্জনানং, কদাচি জৰনচুতীনং, তদারম্মণচুতীনঞ্চ অন্তরা ভৰঙ্গঠানং. ভৰঙ্গপঞ্চৰিঞ্ঞাণানং, ভৰঙ্গজৰনানঞ্চ অন্তরা আৰজ্জনঠানং. পঞ্চদ্ৰারাৰজ্জনসম্পটিচ্ছনানমন্তরা পঞ্চৰিঞ্ঞাণঠানং. পঞ্চৰিঞ্ঞাণসন্তীরণানমন্তরা সম্পটিচ্ছনঠানং. সম্পটিচ্ছনৰোট্ঠব্বনানমন্তরা সন্তীরণঠানং. সন্তীরণজৰনানং, সন্তীরণভৰঙ্গানঞ্চ অন্তরা ৰোট্ঠব্বনঠানং. ৰোট্ঠব্বনতদারম্মণানং, ৰোট্ঠব্বনভৰঙ্গানং, ৰোট্ঠব্বনচুতীনং, মনোদ্ৰারাৰজ্জনতদারম্মণানং, মনোদ্ৰারাৰজ্জনভৰঙ্গানং, মনোদ্ৰারাৰজ্জনচুতীনঞ্চ অন্তরা জৰনঠানং. জৰনভৰঙ্গানং, জৰনচুতীনঞ্চ অন্তরা তদারম্মণঠানং. জৰনপটিসন্ধীনং, তদারম্মণপটিসন্ধীনং, ভৰঙ্গপটিসন্ধীনং ৰা অন্তরা চুতিঠানং নাম.

২০. দ্ৰে উপেক্খাসহগতসন্তীরণানি সুখসন্তীরণস্স পটিসন্ধিৰসপ্পৰত্তিভাৰাভাৰতোতিঅধিপ্পাযো. এৰঞ্চ কত্ৰা পট্ঠানে ‘‘উপেক্খাসহগতং ধম্মং পটিচ্চ উপেক্খাসহগতো ধম্মো উপ্পজ্জতি ন হেতুপচ্চযা’’তি (পট্ঠা. ৪.১৩.১৭৯) এৰমাগতস্স উপেক্খাসহগতপদস্স ৰিভঙ্গে ‘‘অহেতুকং উপেক্খাসহগতং একং খন্ধং পটিচ্চ দ্ৰে খন্ধা, দ্ৰে খন্ধে পটিচ্চ একো খন্ধো, অহেতুকপটিসন্ধিক্খণে উপেক্খাসহগতং একং খন্ধং পটিচ্চ দ্ৰে খন্ধা, দ্ৰে খন্ধে পটিচ্চ একো খন্ধো’’তি (পট্ঠা. ৪.১৩.১৭৯) এৰং পৰত্তিপটিসন্ধিৰসেন পটিচ্চনযো উদ্ধটো, পীতিসহগতসুখসহগতপদৰিভঙ্গে পন ‘‘অহেতুকং পীতিসহগতং একং খন্ধং পটিচ্চতযো খন্ধা…পে… দ্ৰে খন্ধা. অহেতুকং সুখসহগতং একং খন্ধং পটিচ্চ দ্ৰে খন্ধা ¶ …পে… একো খন্ধো’’তি (পট্ঠা. ৪.১৩.১৪৪, ১৬৭) পৰত্তিৰসেনেৰ উদ্ধটো, ন পন ‘‘অহেতুকপটিসন্ধিক্খণে’’ত্যাদিনা পটিসন্ধিৰসেন, তস্মা যথাধম্মসাসনে অৰচনম্পি অভাৰমেৰ দীপেতীতি ন তস্স পটিসন্ধিৰসেন পৰত্তি ¶ অত্থি. যত্থ পন লব্ভমানস্সপি কস্সচি অৰচনং, তত্থ কারণং উপরি আৰি ভৰিস্সতি.

২৫. মনোদ্ৰারাৰজ্জনস্স পরিত্তারম্মণে দ্ৰত্তিক্খত্তুং পৰত্তমানস্সপি নত্থি জৰনকিচ্চং তস্স আরম্মণরসানুভৰনাভাৰতোতি ৰুত্তং ‘‘আৰজ্জনদ্ৰযৰজ্জিতানী’’তি. এৰঞ্চ কত্ৰা ৰুত্তং অট্ঠকথাযং ‘‘জৰনট্ঠানে ঠত্ৰা’’তি (ধ. স. অট্ঠ. ৪৯৮ ৰিপাকুদ্ধারকথা). ইতরথা ‘‘জৰনং হুত্ৰা’’তি ৰত্তব্বং সিযাতি. কুসলাকুসলফলকিরিযচিত্তানীতি একৰীসতি লোকিযলোকুত্তরকুসলানি, দ্ৰাদস অকুসলানি, চত্তারি লোকুত্তরফলচিত্তানি, অট্ঠারস তেভূমককিরিযচিত্তানি. একচিত্তক্খণিকম্পি হি লোকুত্তরমগ্গাদিকং তংসভাৰৰন্ততায জৰনকিচ্চং নাম, যথা একেকগোচরৰিসযম্পি সব্বঞ্ঞুতঞ্ঞাণং সকলৰিসযাৰবোধনসামত্থিযযোগতো ন কদাচি তংনামং ৰিজহতীতি.

২৭. এৰং কিচ্চভেদেন ৰুত্তানেৰ যথাসকং লব্ভমানকিচ্চগণনৰসেন সম্পিণ্ডেত্ৰা দস্সেতুং ‘‘তেসু পনা’’ত্যাদি ৰুত্তং.

৩৩. পটিসন্ধাদযো চিত্তুপ্পাদা নামকিচ্চভেদেন পটিসন্ধাদীনং নামানং, কিচ্চানঞ্চ ভেদেন, অথ ৰা পটিসন্ধাদযো নাম তন্নামকা চিত্তুপ্পাদা পটিসন্ধাদীনং কিচ্চানং ভেদেন চুদ্দস, ঠানভেদেন পটিসন্ধাদীনংযেৰ ঠানানং ভেদেন দসধা পকাসিতাতি যোজনা. এককিচ্চঠানদ্ৰিকিচ্চঠানতিকিচ্চঠানচতুকিচ্চঠানপঞ্চকিচ্চঠানানি চিত্তানি যথাক্কমং অট্ঠসট্ঠি, তথা দ্ৰে চ নৰ চ অট্ঠ চ দ্ৰে চাতি নিদ্দিসেতি সম্বন্ধো.

কিচ্চসঙ্গহৰণ্ণনা নিট্ঠিতা.

দ্ৰারসঙ্গহৰণ্ণনা

৩৫. দ্ৰারানং ¶ ¶ , দ্ৰারপ্পৰত্তচিত্তানঞ্চ পরিচ্ছেদৰসেন সঙ্গহো দ্ৰারসঙ্গহো. আৰজ্জনাদীনং অরূপধম্মানং পৰত্তিমুখভাৰতো দ্ৰারানি ৰিযাতি দ্ৰারানি.

৩৬. চক্খুমেৰাতি পসাদচক্খুমেৰ.

৩৭. আৰজ্জনাদীনং মনানং, মনোযেৰ ৰা দ্ৰারন্তি মনোদ্ৰারং. ভৰঙ্গন্তি আৰজ্জনানন্তরং ভৰঙ্গং. তেনাহু পোরাণা –

‘‘সাৰজ্জনং ভৰঙ্গন্তু, মনোদ্ৰারন্তি ৰুচ্চতী’’তি;

৩৯. তত্থাতি তেসু চক্খাদিদ্ৰারেসু চক্খুদ্ৰারে ছচত্তালীস চিত্তানি যথারহমুপ্পজ্জন্তীতি সম্বন্ধো. পঞ্চদ্ৰারাৰজ্জনমেকং, চক্খুৰিঞ্ঞাণাদীনি উভযৰিপাকৰসেন সত্ত, ৰোট্ঠব্বনমেকং, কামাৰচরজৰনানি চ কুসলাকুসলনিরাৰজ্জনকিরিযৰসেন একূনতিংস, তদারম্মণানি চ অগ্গহিতগ্গহণেন অট্ঠেৰাতি ছচত্তালীস. যথারহন্তি ইট্ঠাদিআরম্মণে যোনিসোঅযোনিসোমনসিকারনিরনুসযসন্তানাদীনং অনুরূপৰসেন. সব্বথাপীতি আৰজ্জনাদিতদারম্মণপরিযোসানেন সব্বেনপি পকারেন কামাৰচরানেৰাতি যোজনা. সব্বথাপি চতুপঞ্ঞাস চিত্তানীতি ৰা সম্বন্ধো. সব্বথাপি তংতংদ্ৰারিকৰসেন ঠিতানি অগ্গহিতগ্গহণেন চক্খুদ্ৰারিকেসু ছচত্তালীসচিত্তেসু সোতৰিঞ্ঞাণাদীনং চতুন্নং যুগল়ানং পক্খেপেন চতুপঞ্ঞাসপীত্যত্থো.

৪১. চক্খাদিদ্ৰারেসু অপ্পৰত্তনতো, মনোদ্ৰারসঙ্খাতভৰঙ্গতো আরম্মণন্তরগ্গহণৰসেন অপ্পৰত্তিতো চ পটিসন্ধাদিৰসেন পৰত্তানি একূনৰীসতি দ্ৰারৰিমুত্তানি.

৪২. দ্ৰিপঞ্চৰিঞ্ঞাণানি ¶ সকসকদ্ৰারে, ছব্বীসতি মহগ্গতলোকুত্তরজৰনানি মনোদ্ৰারেযেৰ উপ্পজ্জনতো ছত্তিংস চিত্তানি যথারহং সকসকদ্ৰারানুরূপং একদ্ৰারিকচিত্তানি.

৪৫. পঞ্চদ্ৰারেসু ¶ সন্তীরণতদারম্মণৰসেন, মনোদ্ৰারে চ তদারম্মণৰসেন পৰত্তনতো ছদ্ৰারিকানি চেৰ পটিসন্ধাদিৰসপ্পৰত্তিযা দ্ৰারৰিমুত্তানি চ.

৪৭. পঞ্চদ্ৰারিকানি চ ছদ্ৰারিকানি চ পঞ্চছদ্ৰারিকানি. ছদ্ৰারিকানি চ তানি কদাচি দ্ৰারৰিমুত্তানি চাতি ছদ্ৰারিকৰিমুত্তানি. অথ ৰা ছদ্ৰারিকানি চ ছদ্ৰারিকৰিমুত্তানি চাতি ছদ্ৰারিকৰিমুত্তানীতি একদেসসরূপেকসেসো দট্ঠব্বো.

দ্ৰারসঙ্গহৰণ্ণনা নিট্ঠিতা.

আলম্বণসঙ্গহৰণ্ণনা

৪৮. আরম্মণানং সরূপতো, ৰিভাগতো, তংৰিসযচিত্ততো চ সঙ্গহো আলম্বণসঙ্গহো. ৰণ্ণৰিকারং আপজ্জমানং রূপযতি হদযঙ্গতভাৰং পকাসেতীতি রূপং, তদেৰ দুব্বলপুরিসেন দণ্ডাদি ৰিয চিত্তচেতসিকেহি আলম্বীযতি, তানি ৰা আগন্ত্ৰা এত্থ রমন্তীতি আরম্মণন্তি রূপারম্মণং. সদ্দীযতীতি সদ্দো, সোযেৰ আরম্মণন্তি সদ্দারম্মণং. গন্ধযতি অত্তনো ৰত্থুং সূচেতি ‘‘ইদমেত্থ অত্থী’’তি পেসুঞ্ঞং করোন্তং ৰিয হোতীতি গন্ধো, সোযেৰ আরম্মণং গন্ধারম্মণং. রসন্তি তং সত্তা অস্সাদেন্তীতি রসো, সোযেৰ আরম্মণং রসারম্মণং. ফুসীযতীতি ফোট্ঠব্বং, তদেৰ আরম্মণং ফোট্ঠব্বারম্মণং. ধম্মোযেৰ আরম্মণং ধম্মারম্মণং.

৪৯. তত্থাতি ¶ তেসু রূপাদিআরম্মণেসু, রূপমেৰাতি ৰণ্ণাযতনসঙ্খাতং রূপমেৰ. সদ্দাদযোতি সদ্দাযতনাদিসঙ্খাতা সদ্দাদযো, আপোধাতুৰজ্জিতভূতত্তযসঙ্খাতং ফোট্ঠব্বাযতনঞ্চ.

৫০. পঞ্চারম্মণপসাদানি ঠপেত্ৰা সেসানি সোল়স সুখুমরূপানি.

৫১. পচ্চুপ্পন্নন্তি ৰত্তমানং.

৫২. ছব্বিধম্পীতি ¶ রূপাদিৰসেন ছব্বিধম্পি. ৰিনাসাভাৰতো অতীতাদিকালৰসেন নৰত্তব্বত্তা নিব্বানং, পঞ্ঞত্তি চ কালৰিমুত্তং নাম. যথারহন্তি কামাৰচরজৰনঅভিঞ্ঞাসেসমহগ্গতাদিজৰনানং অনুরূপতো. কামাৰচরজৰনানঞ্হি হসিতুপ্পাদৰজ্জানং ছব্বিধম্পি তিকালিকং, কালৰিমুত্তঞ্চ আরম্মণং হোতি. হসিতুপ্পাদস্স তিকালিকমেৰ. তথা হিস্স একন্তপরিত্তারম্মণতং ৰক্খতি. দিব্বচক্খাদিৰসপ্পৰত্তস্স পন অভিঞ্ঞাজৰনস্স যথারহং ছব্বিধম্পি তিকালিকং, কালৰিমুত্তঞ্চ আরম্মণং হোতি. ৰিভাগো পনেত্থ নৰমপরিচ্ছেদে আৰি ভৰিস্সতি. সেসানং পন কালৰিমুত্তং, অতীতঞ্চ যথারহমারম্মণং হোতি.

৫৩. দ্ৰার…পে… সঙ্খাতানং ছব্বিধম্পি আরম্মণং হোতীতি সম্বন্ধো, তং পন নেসং আরম্মণং ন আৰজ্জনস্স ৰিয কেনচি অগ্গহিতমেৰ গোচরভাৰং গচ্ছতি, ন চ পঞ্চদ্ৰারিকজৰনানং ৰিয একন্তপচ্চুপ্পন্নং, নাপি মনোদ্ৰারিকজৰনানং ৰিয তিকালিকমেৰ, অৰিসেসেন কালৰিমুত্তং ৰা, নাপি মরণাসন্নতো পুরিমভাগজৰনানং ৰিয কম্মকম্মনিমিত্তাদিৰসেন আগমসিদ্ধিৰোহারৰিনিমুত্তন্তি আহ ‘‘যথাসম্ভৰং…পে… সম্মত’’ন্তি. তত্থ যথাসম্ভৰন্তি তংতংভূমিকপটিসন্ধিভৰঙ্গচুতীনং তংতংদ্ৰারগ্গহিতাদিৰসেন সম্ভৰানুরূপতো. কামাৰচরানঞ্হি ¶ পটিসন্ধিভৰঙ্গানং তাৰ রূপাদিপঞ্চারম্মণং ছদ্ৰারগ্গহিতং যথারহং পচ্চুপ্পন্নমতীতঞ্চ কম্মনিমিত্তসম্মতমারম্মণং হোতি, তথা চুতিচিত্তস্স অতীতমেৰ. ধম্মারম্মণং পন তেসং তিণ্ণন্নম্পি মনোদ্ৰারগ্গহিতমেৰ অতীতং কম্মকম্মনিমিত্তসম্মতং, তথা রূপারম্মণং একমেৰ মনোদ্ৰারগ্গহিতং একন্তপচ্চুপ্পন্নং গতিনিমিত্তসম্মতন্তি এৰং কামাৰচরপটিসন্ধাদীনং যথাসম্ভৰং ছদ্ৰারগ্গহিতং পচ্চুপ্পন্নমতীতঞ্চ কম্মকম্মনিমিত্তগতিনিমিত্তসম্মতমারম্মণং হোতি.

মহগ্গতপটিসন্ধাদীসু পন রূপাৰচরানং, পঠমততিযারুপ্পানঞ্চ ধম্মারম্মণমেৰ মনোদ্ৰারগ্গহিতং পঞ্ঞত্তিভূতং কম্মনিমিত্তসম্মতং, তথা দুতিযচতুত্থারুপ্পানং অতীতমেৰাতি এৰং মহগ্গতপটিসন্ধিভৰঙ্গচুতীনং মনোদ্ৰারগ্গহিতং পঞ্ঞত্তিভূতং, অতীতং ৰা কম্মনিমিত্তসম্মতমেৰ আরম্মণং হোতি.

যেভুয্যেন ভৰন্তরে ছদ্ৰারগ্গহিতন্তি বাহুল্লেন অতীতানন্তরভৰে মরণাসন্নপ্পৰত্তছদ্ৰারিকজৰনেহি গহিতং. অসঞ্ঞীভৰতো চুতানঞ্হি পটিসন্ধিৰিসযস্স অনন্তরাতীতভৰে ¶ ন কেনচি দ্ৰারেন গহণং অত্থীতি তদেৰেত্থ যেভুয্যগ্গহণেন ব্যভিচারিতং. কেৰলঞ্হি কম্মবলেনেৰ তেসং পটিসন্ধিযা কম্মনিমিত্তাদিকমারম্মণং উপট্ঠাতি. তথা হি সচ্চসঙ্খেপে অসঞ্ঞীভৰতো চুতস্স পটিসন্ধিনিমিত্তং পুচ্ছিত্ৰা –

‘‘ভৰন্তরকতং কম্মং, যমোকাসং লভে ততো;

হোতি সা সন্ধি তেনেৰ, উপট্ঠাপিতগোচরে’’তি. (স. স. ১৭১) –

কেৰলং কম্মবলেনেৰ পটিসন্ধিগোচরস্স উপট্ঠানং ৰুত্তং. ইতরথা হি জৰনগ্গহিতস্সপি আরম্মণস্স কম্মবলেনেৰ উপট্ঠাপিযমানত্তা ‘‘তেনেৰা’’তি সাৰধারণৰচনস্স অধিপ্পাযসুঞ্ঞতা ¶ আপজ্জেয্যাতি. ননু চ তেসম্পি পটিসন্ধিগোচরো কম্মভৰে কেনচি দ্ৰারেন জৰনগ্গহিতো সম্ভৰতীতি? সচ্চং সম্ভৰতি কম্মকম্মনিমিত্তসম্মতো, গতিনিমিত্তসম্মতো পন সব্বেসম্পি মরণকালেযেৰ উপট্ঠাতীতি কুতো তস্স কম্মভৰে গহণসম্ভৰো. অপিচেত্থ মরণাসন্নপৰত্তজৰনেহি গহিতমেৰ সন্ধায ‘‘ছদ্ৰারগ্গহিত’’ন্তি ৰুত্তং, এৰঞ্চ কত্ৰা আচরিযেন ইমস্মিংযেৰ অধিকারে পরমত্থৰিনিচ্ছযে ৰুত্তং –

‘‘মরণাসন্নসত্তস্স, যথোপট্ঠিতগোচরং;

ছদ্ৰারেসু তমারব্ভ, পটিসন্ধি ভৰন্তরে’’তি. (পরম. ৰি. ৮৯);

‘‘পচ্চুপ্পন্ন’’ন্ত্যাদিনা অনাগতস্স পটিসন্ধিগোচরভাৰং নিৰারেতি. ন হি তং অতীতকম্মকম্মনিমিত্তানি ৰিয অনুভূতং, নাপি পচ্চুপ্পন্নকম্মনিমিত্তগতিনিমিত্তানি ৰিয আপাথগতঞ্চ হোতীতি, কম্মকম্মনিমিত্তাদীনঞ্চ সরূপং সযমেৰ ৰক্খতি.

৫৪. তেসূতি রূপাদিপচ্চুপ্পন্নাদিকম্মাদিআরম্মণেসু ৰিঞ্ঞাণেসু. রূপাদীসু একেকং আরম্মণং এতেসন্তি রূপাদিএকেকারম্মণানি.

৫৫. রূপাদিকং পঞ্চৰিধম্পি আরম্মণমেতস্সাতি রূপাদিপঞ্চারম্মণং.

৫৬. সেসানীতি দ্ৰিপঞ্চৰিঞ্ঞাণসম্পটিচ্ছনেহি অৰসেসানি একাদস কামাৰচরৰিপাকানি ¶ . সব্বথাপি কামাৰচরারম্মণানীতি সব্বেনপি ছদ্ৰারিকদ্ৰারৰিমুত্তছল়ারম্মণৰসপ্পৰত্তাকারেন নিব্বত্তানিপি একন্তকামাৰচরসভাৰছল়ারম্মণগোচরানি. এত্থ হি ৰিপাকানি তাৰ সন্তীরণাদিৰসেন রূপাদিপঞ্চারম্মণে, পটিসন্ধাদিৰসেন ছল়ারম্মণসঙ্খাতে কামাৰচরারম্মণেযেৰ পৰত্তন্তি.

হসনচিত্তম্পি ¶ পধানসারুপ্পট্ঠানং দিস্ৰা তুস্সন্তস্স রূপারম্মণে, ভণ্ডভাজনট্ঠানে মহাসদ্দং সুত্ৰা ‘‘এৰরূপা লোলুপ্পতণ্হা মে পহীনা’’তি তুস্সন্তস্স সদ্দারম্মণে, গন্ধাদীহি চেতিযপূজনকালে তুস্সন্তস্স গন্ধারম্মণে, রসসম্পন্নং পিণ্ডপাতং সব্রহ্মচারীহি ভাজেত্ৰা পরিভুঞ্জনকালে তুস্সন্তস্স রসারম্মণে, আভিসমাচারিকৰত্তপরিপূরণকালে তুস্সন্তস্স ফোট্ঠব্বারম্মণে, পুব্বেনিৰাসঞাণাদীহি গহিতকামাৰচরধম্মং আরব্ভ তুস্সন্তস্স ধম্মারম্মণেতি এৰং পরিত্তধম্মপরিযাপন্নেস্ৰেৰ ছসু আরম্মণেসু পৰত্ততি.

৫৭. দ্ৰাদসাকুসলঅট্ঠঞাণৰিপ্পযুত্তজৰনৰসেন ৰীসতি চিত্তানি অত্তনো জল়ভাৰতো লোকুত্তরধম্মে আরব্ভ পৰত্তিতুং ন সক্কোন্তীতি নৰৰিধলোকুত্তরধম্মে ৰজ্জেত্ৰা তেভূমকানি, পঞ্ঞত্তিঞ্চ আরব্ভ পৰত্তন্তীতি আহ ‘‘অকুসলানি চেৰা’’ত্যাদি. ইমেসু হি অকুসলতো চত্তারো দিট্ঠিগতসম্পযুত্তচিত্তুপ্পাদা পরিত্তধম্মে আরব্ভ পরামসনঅস্সাদনাভিনন্দনকালে কামাৰচরারম্মণা, তেনেৰাকারেন সত্তৰীসতি মহগ্গতধম্মে আরব্ভ পৰত্তিযং মহগ্গতারম্মণা, সম্মুতিধম্মে আরব্ভ পৰত্তিযং পঞ্ঞত্তারম্মণা. দিট্ঠিৰিপ্পযুত্তচিত্তুপ্পাদাপি তেযেৰ ধম্মে আরব্ভ কেৰলং অস্সাদনাভিনন্দনৰসেন পৰত্তিযং, পটিঘসম্পযুত্তা চ দুস্সনৰিপ্পটিসারৰসেন, ৰিচিকিচ্ছাসহগতো অনিট্ঠঙ্গমনৰসেন, উদ্ধচ্চসহগতো ৰিক্খিপনৰসেন, অৰূপসমৰসেন চ পৰত্তিযং পরিত্তমহগ্গতপঞ্ঞত্তারম্মণো, কুসলতো চত্তারো, কিরিযতো চত্তারোতি অট্ঠ ঞাণৰিপ্পযুত্তচিত্তুপ্পাদা সেক্খপুথুজ্জনখীণাসৰানং অসক্কচ্চদানপচ্চৰেক্খণধম্মস্সৰনাদীসু পরিত্তধম্মে আরব্ভ পৰত্তিকালে কামাৰচরারম্মণা, অতিপগুণজ্ঝানপচ্চৰেক্খণকালে ¶ মহগ্গতারম্মণা, কসিণনিমিত্তাদীসু পরিকম্মাদিকালে পঞ্ঞত্তারম্মণাতি দট্ঠব্বং.

৫৮. অরহত্তমগ্গফলৰজ্জিতসব্বারম্মণানি সেক্খপুথুজ্জনসন্তানেস্ৰেৰ পৰত্তনতো. সেক্খাপি হি ঠপেত্ৰা লোকিযচিত্তং অরহতো মগ্গফলসঙ্খাতং পাটিপুগ্গলিকচিত্তং জানিতুং ন সক্কোন্তি অনধিগতত্তা, তথা পুথুজ্জনাদযোপি সোতাপন্নাদীনং, সেক্খানং পন অত্তনো অত্তনো মগ্গফলপচ্চৰেক্খণেসু ¶ পরসন্তানগতমগ্গফলারম্মণায অভিঞ্ঞায পরিকম্মকালে, অভিঞ্ঞাচিত্তেনেৰ মগ্গফলানং পরিচ্ছিন্দনকালে চ অত্তনো অত্তনো সমানানং, হেট্ঠিমানঞ্চ মগ্গফলধম্মে আরব্ভ কুসলজৰনানং পৰত্তি অত্থীতি অরহত্তমগ্গফলস্সেৰ পটিক্খেপো কতো. কামাৰচরমহগ্গতপঞ্ঞত্তিনিব্বানানি পন সেক্খপুথুজ্জনানং সক্কচ্চদানপচ্চৰেক্খণধম্মস্সৰনসঙ্খারসম্মসনকসিণপরিকম্মাদীসু তংতদারম্মণিকাভিঞ্ঞানং পরিকম্মকালে, গোত্রভুৰোদানকালে, দিব্বচক্খাদীহি রূপৰিজাননাদিকালে চ কুসলজৰনানং গোচরভাৰং গচ্ছন্তি.

৫৯. সব্বথাপি সব্বারম্মণানীতি কামাৰচরমহগ্গতসব্বলোকুত্তরপঞ্ঞত্তিৰসেন সব্বথাপি সব্বারম্মণানি, ন পন অকুসলাদযো ৰিয সপ্পদেসসব্বারম্মণানীত্যত্থো. কিরিযজৰনানঞ্হি সব্বঞ্ঞুতঞ্ঞাণাদিৰসপ্পৰত্তিযং, ৰোট্ঠব্বনস্স চ তংতংপুরেচারিকৰসপ্পৰত্তিযং ন চ কিঞ্চি অগোচরং নাম অত্থি.

৬০. পঠমততিযারুপ্পারম্মণত্তা আরুপ্পেসু দুতিযচতুত্থানি মহগ্গতারম্মণানি.

৬১. সেসানি…পে… পঞ্ঞত্তারম্মণানীতি পন্নরস রূপাৰচরানি, পঠমততিযারুপ্পানি চাতি একৰীসতি কসিণাদিপঞ্ঞত্তীসু পৰত্তনতো পঞ্ঞত্তারম্মণানি.

৬৩. তেৰীসতিকামাৰচরৰিপাকপঞ্চদ্ৰারাৰজ্জনহসনৰসেন ¶ পঞ্চৰীসতি চিত্তানি পরিত্থম্হি কামাৰচরারম্মণে যেৰ ভৰন্তি. কামাৰচরঞ্হি মহগ্গতাদযো উপাদায মন্দানুভাৰতায পরিসমন্ততো অত্তং খণ্ডিতং ৰিযাতি পরিত্তং. ‘‘ছ চিত্তানি মহগ্গতেযেৰা’’ত্যাদিনা সব্বত্থ সাৰধারণযোজনা দট্ঠব্বা.

আলম্বণসঙ্গহৰণ্ণনা নিট্ঠিতা.

ৰত্থুসঙ্গহৰণ্ণনা

৬৪. ৰত্থুৰিভাগতো ¶ , তব্বত্থুকচিত্তপরিচ্ছেদৰসেন চ সঙ্গহো ৰত্থুসঙ্গহো. ৰসন্তি এতেসু চিত্তচেতসিকা তন্নিস্সযত্তাতি ৰত্থূনি.

৬৫. তানি কামলোকে সব্বানিপি লব্ভন্তি পরিপুণ্ণিন্দ্রিযস্স তত্থেৰ উপলব্ভনতো. পি-সদ্দেন পন অন্ধবধিরাদিৰসেন কেসঞ্চি অসম্ভৰং দীপেতি.

৬৬. ঘানাদিত্তযং নত্থি ব্রহ্মানং কামৰিরাগভাৰনাৰসেন গন্ধরসফোট্ঠব্বেসু ৰিরত্ততায তব্বিসযপ্পসাদেসুপি ৰিরাগসভাৰতো. বুদ্ধদস্সনধম্মস্সৰনাদিঅত্থং পন চক্খুসোতেসু অৰিরত্তভাৰতো চক্খাদিদ্ৰযং তত্থ উপলব্ভতি.

৬৭. অরূপলোকে সব্বানিপি ছ ৰত্থূনি ন সংৰিজ্জন্তি অরূপীনং রূপৰিরাগভাৰনাবলেন তত্থ সব্বেন সব্বং রূপপ্পৰত্তিযা অভাৰতো.

৬৮. পঞ্চৰিঞ্ঞাণানেৰ নিস্সত্তনিজ্জীৰট্ঠেন ধাতুযোতি পঞ্চৰিঞ্ঞাণধাতুযো.

৬৯. মননমত্তা ধাতু মনোধাতু.

৭০. মনোযেৰ ¶ ৰিসিট্ঠৰিজাননকিচ্চযোগতো ৰিঞ্ঞাণং নিস্সত্তনিজ্জীৰট্ঠেন ধাতু চাতি মনোৰিঞ্ঞাণধাতু. মনসো ৰিঞ্ঞাণধাতূতি ৰা মনোৰিঞ্ঞাণধাতু. সা হি মনতোযেৰ অনন্তরপচ্চযতো সম্ভূযমনসোযেৰ অনন্তরপচ্চযভূতাতি মনসো সম্বন্ধিনী হোতি. সন্তীরণত্তযস্স, অট্ঠমহাৰিপাকানং, পটিঘদ্ৰযস্স, পঠমমগ্গস্স, হসিতুপ্পাদস্স, পন্নরসরূপাৰচরানঞ্চ ৰসেন পৰত্তা যথাৰুত্তমনোধাতুপঞ্চৰিঞ্ঞাণধাতূহি অৰসেসা মনোৰিঞ্ঞাণধাতু সঙ্খাতা চ তিংস ধম্মা ন কেৰলং মনোধাতুযেৰ, তথা হদযং নিস্সাযেৰ পৰত্তন্তীতি সম্বন্ধো.

সন্তীরণমহাৰিপাকানি হি একাদস দ্ৰারাভাৰতো, কিচ্চাভাৰতো চ আরুপ্পে ন উপ্পজ্জন্তি ¶ . পটিঘস্স অনীৰরণাৰত্থস্স অভাৰতো তংসহগতং চিত্তদ্ৰযং রূপলোকেপি নত্থি, পগেৰ আরুপ্পে. পঠমমগ্গোপি পরতোঘোসপচ্চযাভাৰে সাৰকানং অনুপ্পজ্জনতো, বুদ্ধপচ্চেকবুদ্ধানঞ্চ মনুস্সলোকতো অঞ্ঞত্থ অনিব্বত্তনতো, হসনচিত্তঞ্চ কাযাভাৰতো, রূপাৰচরানি অরূপীনং রূপৰিরাগভাৰনাৰসেন তদারম্মণেসু ঝানেসুপি ৰিরত্তভাৰতো অরূপভৰে ন উপ্পজ্জন্তীতি সব্বানিপি এতানি তেত্তিংস চিত্তানি হদযং নিস্সাযেৰ পৰত্তন্তি.

৭১. পঞ্চরূপাৰচরকুসলতো অৰসেসানি দ্ৰাদস লোকিযকুসলানি, পটিঘদ্ৰযতো অৰসেসানি দস অকুসলানি, পঞ্চদ্ৰারাৰজ্জনহসনরূপাৰচরকিরিযেহি অৰসেসানি তেরস কিরিযচিত্তানি, পঠমমগ্গতো অৰসেসানি সত্ত অনুত্তরানি চাতি ইমেসং ৰসেন দ্ৰেচত্তালীসৰিধা মনোৰিঞ্ঞাণধাতুসঙ্খাতা ধম্মা পঞ্চৰোকারভৰৰসেন হদযং নিস্সায ৰা, চতুৰোকারভৰৰসেন অনিস্সাযৰা পৰত্তন্তি.

৭৩. কামে ¶ ভৰে ছৰত্থুং নিস্সিতা সত্ত ৰিঞ্ঞাণধাতুযো, রূপে ভৰে তিৰত্থুং নিস্সিতা ঘানৰিঞ্ঞাণাদিত্তযৰজ্জিতা চতুব্বিধা ৰিঞ্ঞাণধাতুযো, আরুপ্পে ভৰে অনিস্সিতা একা মনোৰিঞ্ঞাণধাতু মতাতি যোজনা.

৭৪. কামাৰচরৰিপাকপঞ্চদ্ৰারাৰজ্জনপটিঘদ্ৰযহসনৰসেন সত্তৰীসতি কামাৰচরানি, পন্নরস রূপাৰচরানি, পঠমমগ্গোতি তেচত্তালীস নিস্সাযেৰ জাযরে, ততোযেৰ অৰসেসা আরুপ্পৰিপাকৰজ্জিতা দ্ৰেচত্তালীস নিস্সায চ অনিস্সায চ জাযরে, পাকারুপ্পা চত্তারো অনিস্সিতাযেৰাতি সম্বন্ধো.

ৰত্থুসঙ্গহৰণ্ণনা নিট্ঠিতা.

ইতি অভিধম্মত্থৰিভাৰিনিযা নাম অভিধম্মত্থসঙ্গহৰণ্ণনায

পকিণ্ণকপরিচ্ছেদৰণ্ণনা নিট্ঠিতা.

৪. ৰীথিপরিচ্ছেদৰণ্ণনা

১. ইচ্চেৰং ¶ যথাৰুত্তনযেন চিত্তুপ্পাদানং চতুন্নং খন্ধানং উত্তরং ৰেদনাসঙ্গহাদিৰিভাগতো উত্তমং পভেদসঙ্গহং কত্ৰা পুন কামাৰচরাদীনং তিণ্ণং ভূমীনং, দ্ৰিহেতুকাদিপুগ্গলানঞ্চ ভেদেন লক্খিতং ‘‘ইদং এত্তকেহি পরং, ইমস্স অনন্তরং এত্তকানি চিত্তানী’’তি এৰং পুব্বাপরচিত্তেহি নিযামিতং পটিসন্ধিপৰত্তীসু চিত্তুপ্পাদানং পৰত্তিসঙ্গহং নাম তন্নামকং সঙ্গহং যথাসম্ভৰতো সমাসেন পৰক্খামীতি যোজনা.

২. ৰত্থুদ্ৰারারম্মণসঙ্গহা হেট্ঠা কথিতাপি পরিপুণ্ণং কত্ৰা পৰত্তিসঙ্গহং দস্সেতুং পুন নিক্খিত্তা.

৩. ৰিসযানং দ্ৰারেসু, ৰিসযেসু চ চিত্তানং পৰত্তি ৰিসযপ্পৰত্তি.

৪. তত্থাতি তেসু ছসু ছক্কেসু.

ৰীথিছক্কৰণ্ণনা

৬. ‘‘চক্খুদ্ৰারে ¶ পৰত্তা ৰীথি চিত্তপরম্পরা চক্খুদ্ৰারৰীথী’’ত্যাদিনা দ্ৰারৰসেন, ‘‘চক্খুৰিঞ্ঞাণসম্বন্ধিনী ৰীথি তেন সহ একারম্মণএকদ্ৰারিকতায সহচরণভাৰতো চক্খুৰিঞ্ঞাণৰীথী’’ত্যাদিনা ৰিঞ্ঞাণৰসেন ৰা ৰীথীনং নাম যোজনা কাতব্বাতি দস্সেতুং ‘‘চক্খুদ্ৰারৰীথী’’ত্যাদি ৰুত্তং.

ৰীথিছক্কৰণ্ণনা নিট্ঠিতা.

ৰীথিভেদৰণ্ণনা

৭. ‘‘অতিমহন্ত’’ন্ত্যাদীসু ¶ একচিত্তক্খণাতীতং হুত্ৰা আপাথাগতং সোল়সচিত্তক্খণাযুকং অতিমহন্তং নাম. দ্ৰিতিচিত্তক্খণাতীতং হুত্ৰা পন্নরসচুদ্দসচিত্তক্খণাযুকং মহন্তং নাম. চতুচিত্তক্খণতো পট্ঠায যাৰ নৰচিত্তক্খণাতীতং হুত্ৰা তেরসচিত্তক্খণতো পট্ঠায যাৰ অট্ঠচিত্তক্খণাযুতং পরিত্তং নাম. দসচিত্তক্খণতো পট্ঠায যাৰ পন্নরসচিত্তক্খণাতীতং হুত্ৰা সত্তচিত্তক্খণতো পট্ঠায যাৰ দ্ৰিচিত্তক্খণাযুকং অতিপরিত্তং নাম. এৰঞ্চ কত্ৰা ৰক্খতি ‘‘একচিত্তক্খণাতীতানী’’ত্যাদি. ৰিভূতং পাকটং. অৰিভূতং অপাকটং.

ৰীথিভেদৰণ্ণনা নিট্ঠিতা.

পঞ্চদ্ৰারৰীথিৰণ্ণনা

৮. কথন্তি কেন পকারেন অতিমহন্তাদিৰসেন ৰিসযৰৰত্থানন্তি পুচ্ছিত্ৰা চিত্তক্খণৰসেন তং পকাসেতুং ‘‘উপ্পাদঠিতী’’ত্যাদি আরদ্ধং. উপ্পজ্জনং উপ্পাদো, অত্তপটিলাভো. ভঞ্জনং ভঙ্গো, সরূপৰিনাসো. উভিন্নং ৰেমজ্ঝে ভঙ্গাভিমুখপ্পৰত্তি ঠিতি নাম. কেচি পন চিত্তস্স ঠিতিক্খণং পটিসেধেন্তি. অযঞ্হি নেসং অধিপ্পাযো – চিত্তযমকে (ৰিভ. মূলটী. ২০ পকিণ্ণককথাৰণ্ণনা; যম. ২.চিত্তযমক.৮১, ১০২) ‘‘উপ্পন্নং উপ্পজ্জমান’’ন্তি এৰমাদিপদানং ৰিভঙ্গে ‘‘ভঙ্গক্খণে উপ্পন্নং ¶ , নো চ উপ্পজ্জমানং, উপ্পাদক্খণে উপ্পন্নঞ্চেৰ উপ্পজ্জমানঞ্চা’’ত্যাদিনা (যম. ২.চিত্তযমক.৮১, ১০২) ভঙ্গুপ্পাদাৰ কথিতা, ন ঠিতিক্খণো. যদি চ চিত্তস্স ঠিতিক্খণোপি অত্থি, ‘‘ঠিতিক্খণে ভঙ্গক্খণে চা’’তি ৰত্তব্বং সিযা. অথ মতং ‘‘উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতীতি (অ. নি. ৩.৪৭) সুত্তন্তপাঠতো ঠিতিক্খণো অত্থী’’তি, তত্থপি একস্মিং ধম্মে অঞ্ঞথত্তস্স অনুপ্পজ্জনতো, পঞ্ঞাণৰচনতো চ পবন্ধঠিতিযেৰ অধিপ্পেতা, ন চ খণঠিতি, ন চ অভিধম্মে লব্ভমানস্স অৰচনে কারণং অত্থি, তস্মা যথাধম্মসাসনে অৰচনম্পি অভাৰমেৰ দীপেতীতি. তত্থ ৰুচ্চতে যথেৰ হি একধম্মাধারভাৰেপি উপ্পাদভঙ্গানং অঞ্ঞো উপ্পাদক্খণো, অঞ্ঞো ভঙ্গক্খণোতি উপ্পাদাৰত্থায ভিন্না ভঙ্গাৰত্থা ইচ্ছিতা. ইতরথা হি ‘‘অঞ্ঞোযেৰ ধম্মো উপ্পজ্জতি, অঞ্ঞো নিরুজ্ঝতী’’তি আপজ্জেয্য, এৰমেৰ উপ্পাদভঙ্গাৰত্থাহি ভিন্না ¶ ভঙ্গাভিমুখাৰত্থাপি ইচ্ছিতব্বা, সা ঠিতি নাম. পাল়িযং পন ৰেনেয্যজ্ঝাসযানুরোধতো নযদস্সনৰসেন সা ন ৰুত্তা. অভিধম্মদেসনাপি হি কদাচি ৰেনেয্যজ্ঝাসযানুরোধেন পৰত্ততি, যথা রূপস্স উপ্পাদো উপচযো সন্ততীতি দ্ৰিধা ভিন্দিত্ৰা দেসিতো, সুত্তে চ ‘‘তীণিমানি, ভিক্খৰে, সঙ্খতস্স সঙ্খতলক্খণানি. কতমানি তীণি? উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতী’’তি এৰং সঙ্খতধম্মস্সেৰ লক্খণদস্সনত্থং উপ্পাদাদীনং ৰুত্তত্তা ন সক্কা পবন্ধস্স পঞ্ঞত্তিসভাৰস্স অসঙ্খতস্স ঠিতি তত্থ ৰুত্তাতি ৰিঞ্ঞাতুং. উপসগ্গস্স চ ধাত্ৰত্থেযেৰ পৰত্তনতো ‘‘পঞ্ঞাযতী’’তি এতস্স ৰিঞ্ঞাযতীতি অত্থো. তস্মা ন এত্তাৰতা চিত্তস্স ঠিতিক্খণো পটিবাহিতুং যুত্তোতি সুৰুত্তমেতং ‘‘উপ্পাদঠিতিভঙ্গৰসেনা’’তি. এৰঞ্চ কত্ৰা ৰুত্তং অট্ঠকথাযম্পি ‘‘একেকস্স ¶ উপ্পাদঠিতিভঙ্গৰসেন তযো তযো খণা’’তি (ৰিভ. অট্ঠ. ২৬ পকিণ্ণককথা).

৯. অরূপং লহুপরিণামং, রূপং গরুপরিণামং গাহকগাহেতব্বভাৰস্স তংতংখণৰসেন উপ্পজ্জনতোতি আহ ‘‘তানী’’ত্যাদি. তানীতি তাদিসানি. সত্তরসন্নং চিত্তানং খণানি ৰিয খণানি সত্তরসচিত্তক্খণানি, তানি চিত্তক্খণানি সত্তরসাতি ৰা সম্বন্ধো. ৰিসুং ৰিসুং পন একপঞ্ঞাস চিত্তক্খণানি হোন্তি. রূপধম্মানন্তি ৰিঞ্ঞত্তিলক্খণরূপৰজ্জানং রূপধম্মানং. ৰিঞ্ঞত্তিদ্ৰযঞ্হি একচিত্তক্খণাযুকং. তথা হি তং চিত্তানুপরিৰত্তিধম্মেসু ৰুত্তং. লক্খণরূপেসু চ জাতি চেৰ অনিচ্চতা চ চিত্তস্স উপ্পাদভঙ্গক্খণেহি সমানাযুকা, জরতা পন একূনপঞ্ঞাসচিত্তক্খণাযুকা. এৰঞ্চ কত্ৰা ৰদন্তি –

‘‘তং সত্তরসচিত্তাযু, ৰিনা ৰিঞ্ঞত্তিলক্খণ’’ন্তি (স. স. ৬০);

কেচি (ৰিভ. মূলটী. ২০) পন ‘‘পটিচ্চসমুপ্পাদট্ঠকথাযং ‘এত্তাৰতা একাদস চিত্তক্খণা অতীতা হোন্তি, অথাৰসেসপঞ্চচিত্তক্খণাযুকে’তি (ৰিসুদ্ধি. ২.৬২৩; ৰিভ. অট্ঠ. ২২৭) ৰচনতো সোল়সচিত্তক্খণানি রূপধম্মানমাযূ. উপ্পজ্জমানমেৰ হি রূপং ভৰঙ্গচলনস্স পচ্চযো হোতী’’তি ৰদন্তি, তযিদমসারং ‘‘পটিসন্ধিচিত্তেন সহুপ্পন্নং কম্মজরূপং ততো পট্ঠায সত্তরসমেন সদ্ধিং নিরুজ্ঝতি, পটিসন্ধিচিত্তস্স ঠিতিক্খণে উপ্পন্নং অট্ঠারসমস্স উপ্পাদক্খণে নিরুজ্ঝতী’’ত্যাদিনা (ৰিভ. অট্ঠ. ২৬ পকিণ্ণককথা) অট্ঠকথাযমেৰ সত্তরসচিত্তক্খণস্স আগতত্তা. যত্থ পন সোল়সচিত্তক্খণানেৰ পঞ্ঞাযন্তি, তত্থ চিত্তপ্পৰত্তিযা ¶ পচ্চযভাৰযোগ্যক্খণৰসেন নযো নীতো. হেট্ঠিমকোটিযা হি একচিত্তক্খণম্পি ¶ অতিক্কন্তস্সেৰ রূপস্স আপাথাগমনসামত্থিযন্তি অলমতিৰিত্থারেন.

১০. একচিত্তস্স খণং ৰিয খণং একচিত্তক্খণং, তং অতীতং এতেসং, এতানি ৰা তং অতীতানীতি একচিত্তক্খণাতীতানি. আপাথমাগচ্ছন্তীতি রূপসদ্দারম্মণানি সকসকট্ঠানে ঠত্ৰাৰ গোচরভাৰং গচ্ছন্তীতি আভোগানুরূপং অনেককলাপগতানি আপাথং আগচ্ছন্তি, সেসানি পন ঘানাদিনিস্সযেসু অল্লীনানেৰ ৰিঞ্ঞাণুপ্পত্তিকারণানীতি একেককলাপগতানিপি. একেককলাপগতাপি হি পসাদা ৰিঞ্ঞাণস্স আধারভাৰং গচ্ছন্তি, তে পন ভৰঙ্গচলনস্স অনন্তরপচ্চযভূতেন ভৰঙ্গেন সদ্ধিং উপ্পন্না. ‘‘আৰজ্জনেন সদ্ধিং উপ্পন্না’’তি অপরে.

দ্ৰিক্খত্তুং ভৰঙ্গে চলিতেতি ৰিসদিসৰিঞ্ঞাণুপ্পত্তিহেতুভাৰসঙ্খাতভৰঙ্গচলনৰসেন পুরিমগ্গহিতারম্মণস্মিংযেৰ দ্ৰিক্খত্তুং ভৰঙ্গে পৰত্তে. পঞ্চসু হি পসাদেসু যোগ্যদেসাৰত্থানৰসেন আরম্মণে ঘট্টিতে পসাদঘট্টনানুভাৰেন ভৰঙ্গসন্ততি ৰোচ্ছিজ্জমানা সহসা অনোচ্ছিজ্জিত্ৰা যথা ৰেগেন ধাৰন্তো ঠাতুকামোপি পুরিসো একদ্ৰিপদৰারে অতিক্কমিত্ৰাৰ তিট্ঠতি, এৰং দ্ৰিক্খত্তুং উপ্পজ্জিত্ৰাৰ ওচ্ছিজ্জতি. তত্থ পঠমচিত্তং ভৰঙ্গসন্ততিং চালেন্তং ৰিয উপ্পজ্জতীতি ভৰঙ্গচলনং, দুতিযং তস্স ওচ্ছিজ্জনাকারেন উপ্পজ্জনতো ভৰঙ্গুপচ্ছেদোতি ৰোহরন্তি. ইধ পন অৰিসেসেন ৰুত্তং ‘‘দ্ৰিক্খত্তুং ভৰঙ্গে চলিতে’’তি.

ননু চ রূপাদিনা পসাদে ঘট্টিতে তন্নিস্সিতস্সেৰ চলনং যুত্তং, কথং পন হদযৰত্থুনিস্সিতস্স ভৰঙ্গস্সাতি? সন্ততিৰসেন একাবদ্ধত্তা. যথা হি ভেরিযা একস্মিং তলে ঠিতসক্খরায মক্খিকায নিসিন্নায অপরস্মিং তলে দণ্ডাদিনা পহটে অনুক্কমেন ভেরিচম্মৰরত্তাদীনং চলনেন সক্খরায ¶ চলিতায মক্খিকায উপ্পতিত্ৰা গমনং হোতি, এৰমেৰ রূপাদিনা পসাদে ঘট্টিতে তন্নিস্সযেসু মহাভূতেসু চলিতেসু অনুক্কমেন তংসম্বন্ধানং সেসরূপানম্পি চলনেন হদযৰত্থুম্হি চলিতে তন্নিস্সিতস্স ভৰঙ্গস্স চলনাকারেন পৰত্তি হোতি. ৰুত্তঞ্চ –

‘‘ঘট্টিতে ¶ অঞ্ঞৰত্থুম্হি, অঞ্ঞনিস্সিতকম্পনং;

একাবদ্ধেন হোতীতি, সক্খরোপমযা ৰদে’’তি. (স. স. ১৭৬);

ভৰঙ্গসোতন্তি ভৰঙ্গপ্পৰাহং. আৰজ্জন্তন্তি ‘‘কিং নামেত’’ন্তি ৰদন্তং ৰিয আভোগং কুরুমানং. পস্সন্তন্তি পচ্চক্খতো পেক্খন্তং. ননু চ ‘‘চক্খুনা রূপং দিস্ৰা’’তি (দী. নি. ১.২১৩; অ. নি. ৩.৬২; ৰিভ. ৫১৭) ৰচনতো চক্খুন্দ্রিযমেৰ দস্সনকিচ্চং সাদেতি, ন ৰিঞ্ঞাণন্তি? নযিদমেৰং, রূপস্স অন্ধভাৰেন রূপদস্সনে অসমত্থভাৰতো. যদি চ তং রূপং পস্সতি, তথা সতি অঞ্ঞৰিঞ্ঞাণসমঙ্গিনোপি রূপদস্সনপ্পসঙ্গো সিযা. যদি এৰং ৰিঞ্ঞাণস্স তং কিচ্চং সাধেতি, ৰিঞ্ঞাণস্স অপ্পটিবন্ধত্তা অন্তরিতরূপস্সপি দস্সনং সিযা. হোতু অন্তরিতস্সপি দস্সনং, যস্স ফলিকাদিতিরোহিতস্স আলোকপটিবন্ধো নত্থি, যস্স পন কুট্টাদিঅন্তরিতস্স অলোকপটিবন্ধো অত্থি. তত্থ পচ্চযাভাৰতো ৰিঞ্ঞাণং নুপ্পজ্জতীতি ন তস্স চক্খুৰিঞ্ঞাণেন গহণং হোতি. ‘‘চক্খুনা’’তি পনেত্থ তেন দ্ৰারেন করণভূতেনাতি অধিপ্পাযো. অথ ৰা নিস্সিতকিরিযা নিস্সযপ্পটিবদ্ধা ৰুত্তা যথা ‘‘মঞ্চা উক্কুট্ঠিং করোন্তী’’তি.

সম্পটিচ্ছন্তন্তি তমেৰ রূপং পটিগ্গণ্হন্তং ৰিয. সন্তীরযমানন্তি তমেৰ রূপং ৰীমংসন্তং ৰিয. ৰৰত্থপেন্তন্তি তমেৰ রূপং সুট্ঠু সল্লক্খেন্তং ৰিয. যোনিসোমনসিকারাদিৰসেন লদ্ধো পচ্চযো এতেনাতি লদ্ধপচ্চযং. যং কিঞ্চি জৰনন্তি সম্বন্ধো. মুচ্ছামরণাসন্নকালেসু চ ছপ্পঞ্চপি জৰনানি পৰত্তন্তীতি আহ ¶ ‘‘যেভুয্যেনা’’তি. জৰনানুবন্ধানীতি পটিসোতগামিনাৰং নদীসোতো ৰিয কিঞ্চি কালং জৰনং অনুগতানি. তস্স জৰনস্স আরম্মণং আরম্মণমেতেসন্তি তদারম্মণানি ‘‘ব্রহ্মস্সরো’’ত্যাদীসু ৰিয মজ্ঝেপদলোপৰসেন, তদারম্মণানি চ তানি পাকানি চাতি তদারম্মণপাকানি. যথারহন্তি আরম্মণজৰনসত্তানুরূপং. তথা পৰত্তিং পন সযমেৰ পকাসযিস্সতি, ভৰঙ্গপাতোতি ৰীথিচিত্তৰসেন অপ্পৰত্তিত্ৰা চিত্তস্স ভৰঙ্গপাতো ৰিয, ভৰঙ্গৰসেন উপ্পত্তীতি ৰুত্তং হোতি. এত্থ চ ৰীথিচিত্তপ্পৰত্তিযা সুখগ্গহণত্থং অম্বোপমাদিকং আহরন্তি, তত্রিদং অম্বোপমামত্তং (ধ. স. অট্ঠ. ৪৯৮ ৰিপাকুদ্ধারকথা) – একো কির পুরিসো ফলিতম্বরুক্খমূলে সসীসং পারুপিত্ৰা নিদ্দাযন্তো আসন্নে পতিতস্স একস্স অম্বফলস্স সদ্দেন পবুজ্ঝিত্ৰা সীসতো ৰত্থং অপনেত্ৰা চক্খুং উম্মীলেত্ৰা দিস্ৰা চ তং গহেত্ৰা মদ্দিত্ৰা উপসিঙ্ঘিত্ৰা পক্কভাৰং ঞত্ৰা ¶ পরিভুঞ্জিত্ৰা মুখগতং সহ সেম্হেন অজ্ঝোহরিত্ৰা পুন তত্থেৰ নিদ্দাযতি. তত্থ পুরিসস্স নিদ্দাযনকালো ৰিয ভৰঙ্গকালো, ফলস্স পতিতকালো ৰিয আরম্মণস্স পসাদঘট্টনকালো, তস্স সদ্দেন পবুদ্ধকালো ৰিয আৰজ্জনকালো, উম্মীলেত্ৰা ওলোকিতকালো ৰিয চক্খুৰিঞ্ঞাণপ্পৰত্তিকালো, গহিতকালো ৰিয সম্পটিচ্ছনকালো, মদ্দনকালো ৰিয সন্তীরণকালো, উপসিঙ্ঘনকালো ৰিয ৰোট্ঠব্বনকালো, পরিভোগকালো ৰিয জৰনকালো, মুখগতং সহ সেম্হেন অজ্ঝোহরণকালো ৰিয তদারম্মণকালো, পুন নিদ্দাযনকালো ৰিয পুন ভৰঙ্গকালো.

ইমায চ উপমায কিং দীপিতং হোতি? আরম্মণস্স পসাদঘট্টনমেৰ কিচ্চং, আৰজ্জনস্স ৰিসযাভুজনমেৰ, চক্খুৰিঞ্ঞাণস্স দস্সনমত্তমেৰ, সম্পটিচ্ছনাদীনঞ্চ পটিগ্গণ্হনাদিমত্তমেৰ ¶ , জৰনস্সেৰ পন আরম্মণরসানুভৰনং, তদারম্মণস্স চ তেন অনুভূতস্সেৰ অনুভৰনন্তি এৰং কিচ্চৰসেন ধম্মানং অঞ্ঞমঞ্ঞং অসংকিণ্ণতা দীপিতা হোতি. এৰং পৰত্তমানং পন চিত্তং ‘‘আৰজ্জনং নাম হুত্ৰা ভৰঙ্গানন্তরং হোতি, ত্ৰং দস্সনাদীসু অঞ্ঞতরং হুত্ৰা আৰজ্জনানন্তর’’ন্ত্যাদিনা নিযুঞ্জকে কারকে অসতিপি উতুবীজনিযামাদি (ধ. স. অট্ঠ. ৪৯৮ ৰিপাকুদ্ধারকথা) ৰিয চিত্তনিযামৰসেনেৰ পৰত্ততীতি ৰেদিতব্বং.

১১. এত্তাৰতা সত্তরস চিত্তক্খণানি পরিপূরেন্তীতি সম্বন্ধো.

১২. অপ্পহোন্তাতীতকন্তি অপ্পহোন্তং হুত্ৰা অতীতং. নত্থি তদারম্মণুপ্পাদোতি চুদ্দসচিত্তক্খণাযুকে তাৰ আরম্মণস্স নিরুদ্ধত্তাৰ তদারম্মণং নুপ্পজ্জতি. ন হি একৰীথিযং কেসুচি পচ্চুপ্পন্নারম্মণেসু কানিচি অতীতারম্মণানি হোন্তি. পন্নরসচিত্তক্খণাযুকেসুপি জৰনুপ্পত্তিতো পরং একমেৰ চিত্তক্খণং অৰসিট্ঠন্তি দ্ৰিক্খত্তুং তদারম্মণুপ্পত্তিযা অপ্পহোনকভাৰতো নত্থি দুতিযতদারম্মণস্স উপ্পত্তীতি পঠমম্পি নুপ্পজ্জতি. দ্ৰিক্খত্তুমেৰ হি তদারম্মণুপ্পত্তি পাল়িযং নিযমিতা চিত্তপ্পৰত্তিগণনাযং সব্বৰারেসু ‘‘তদারম্মণানি দ্ৰে’’তি (ৰিভ. অট্ঠ. ২২৭) দ্ৰিন্নমেৰ চিত্তৰারানং আগতত্তা. যং পন পরমত্থৰিনিচ্ছযে ৰুত্তং –

‘‘সকিং ¶ দ্ৰে ৰা তদালম্বং, সকিমাৰজ্জনাদযো’’তি (পরম. ৰি. ১১৬), তং মজ্ঝিমভাণকমতানুসারেন ৰুত্তন্তি দট্ঠব্বং. যস্মা পন মজ্ঝিমভাণকানং ৰাদো হেট্ঠা ৰুত্তপাল়িযা অসংসন্দনতো সম্মোহৰিনোদনীযং (ৰিভ. অট্ঠ. ২২৭) পটিক্খিত্তোৰ, তস্মা আচরিযেনপি অত্তনা অনধিপ্পেতত্তাযেৰ ইধ চেৰ নামরূপপরিচ্ছেদে চ সকিং তদারম্মণুপ্পত্তি ন ৰুত্তা.

১৩. ৰোট্ঠব্বনুপ্পাদতো ¶ পরং ছচিত্তক্খণাৰসিট্ঠাযুকম্পি আরম্মণং অপ্পাযুকভাৰেন পরিদুব্বলত্তা জৰনুপ্পত্তিযা পচ্চযো ন হোতি. জৰনঞ্হি উপ্পজ্জমানং নিযমেন সত্তচিত্তক্খণাযুকেযেৰ উপ্পজ্জতীতি অধিপ্পাযেনাহ ‘‘জৰনম্পি অনুপ্পজ্জিত্ৰা’’তি. হেতুম্হি চাযং ত্ৰাপচ্চযো, জৰনস্সপি অনুপ্পত্তিযাতি অত্থো. ইতরথা হি অপরকালকিরিযায সমানকত্তুকতা ন লব্ভতীতি. দ্ৰত্তিক্খত্তুন্তি দ্ৰিক্খত্তুং ৰা তিক্খত্তুং ৰা. কেচি পন ‘‘তিক্খত্তু’ন্তি ইদং ৰচনসিলিট্ঠতামত্তপ্পযোজন’’ন্তি ৰদন্তি, তং পন তেসং অভিনিৰেসমত্তং. ন হি ‘‘দ্ৰিক্খত্তুং ৰোট্ঠব্বনমেৰ পরিৰত্ততী’’তি ৰুত্তেপি ৰচনস্স অসিলিট্ঠভাৰো অত্থি, ন চ তিক্খত্তুং পৰত্তিযা বাধকং কিঞ্চি ৰচনং অট্ঠকথাদীসু অত্থি. এৰঞ্চ কত্ৰা তত্থ তত্থ সীহল়সংৰণ্ণনাকারাপি ‘‘দ্ৰিক্খত্তুং ৰা তিক্খত্তুং ৰা’’ইচ্চেৰ ৰণ্ণেন্তি. ৰোট্ঠব্বনমেৰ পরিৰত্ততীতি ৰোট্ঠব্বনমেৰ পুনপ্পুনং উপ্পজ্জতি. তং পন অপ্পত্ৰা অন্তরা চক্খুৰিঞ্ঞাণাদীসু ঠত্ৰা চিত্তপ্পৰত্তিযা নিৰত্তনং নত্থি.

আনন্দাচরিযো পনেত্থ (ধ. স. মূলটী. ৪৯৮ ৰিপাকুদ্ধারকথাৰণ্ণনা) ‘‘আৰজ্জনা কুসলাকুসলানং খন্ধানং অনন্তরপচ্চযেন পচ্চযো’’তি (পট্ঠা. ১.১.৪১৭) আৰজ্জনায কুসলাকুসলানং অনন্তরপচ্চযভাৰস্স ৰুত্তত্তা ৰোট্ঠব্বনাৰজ্জনানঞ্চ অত্থন্তরাভাৰতো সতি উপ্পত্তিযং ৰোট্ঠব্বনং কামাৰচরকুসলাকুসলকিরিযজৰনানং একন্ততো অনন্তরপচ্চযভাৰেনেৰ পৰত্তেয্য, নো অঞ্ঞথাতি মুচ্ছাকালাদীসু মন্দীভূতৰেগতায জৰনপারিপূরিযা পরিত্তারম্মণং নিযমিতব্বং, ন ৰোট্ঠব্বনস্স দ্ৰত্তিক্খত্তুং পৰত্তিযাতি দীপেতি. কিঞ্চাপি এৰং দীপেতি, তিহেতুকৰিপাকানি পন অনন্তরপচ্চযভাৰেন ৰুত্তানেৰ. খীণাসৰানং চুতিৰসেন পৰত্তানি ন কস্সচি অনন্তরপচ্চযভাৰং গচ্ছন্তীতি তানি ৰিয ৰোট্ঠব্বনম্পি পচ্চযৰেকল্লতো কুসলাকুসলাদীনং অনন্তরপচ্চযো ¶ ন হোতীতি ন ন সক্কা ৰত্তুং, তস্মা অট্ঠকথাসু আগতনযেনেৰেত্থ পরিত্তারম্মণং নিযমিতন্তি.

১৪. নত্থি ¶ ৰীথিচিত্তুপ্পাদো উপরিমকোটিযা সত্তচিত্তক্খণাযুকস্সপি দ্ৰত্তিক্খত্তুং ৰোট্ঠব্বনুপ্পত্তিযা অপ্পহোনকভাৰতো ৰীথিচিত্তানং উপ্পাদো নত্থি, ভৰঙ্গপাতোৰ হোতীতি অধিপ্পাযো. ভৰঙ্গচলনমেৰাতি অৰধারণফলং দস্সেতুং ‘‘নত্থি ৰীথিচিত্তুপ্পাদো’’তি ৰুত্তং. অপরে পন ‘‘নত্থি ভৰঙ্গুপচ্ছেদো’’তি অৰধারণফলং দস্সেন্তি, তং পন ৰীথিচিত্তুপ্পাদাভাৰৰচনেনেৰ সিদ্ধং. সতি হি ৰীথিচিত্তুপ্পাদে ভৰঙ্গং উপচ্ছিজ্জতি. ভৰঙ্গুপচ্ছেদনামেন পন হেট্ঠাপি ৰিসুং অৰুত্তত্তা ইধ অৰিসেসেন ৰুত্তং.

১৫. সব্বসো ৰীথিচিত্তুপ্পত্তিযা অভাৰতো পচ্ছিমৰারোৰিধমোঘৰারৰসেন ৰুত্তো, অঞ্ঞত্থ (ধ. স. অট্ঠ. ৪৯৮ ৰিপাকুদ্ধারকথা) পন দুতিযততিযৰারাপি তদারম্মণজৰনেহি সুঞ্ঞত্তা ‘‘মোঘৰারা’’তি ৰুত্তা. আরম্মণভূতাতি ৰিসযভূতা, পচ্চযভূতা চ. পচ্চযোপি হি ‘‘আরম্মণ’’ন্তি ৰুচ্চতি ‘‘ন লচ্ছতি মারো ওতারং, ন লচ্ছতি মারো আরম্মণ’’ন্ত্যাদীসু (দী. নি. ৩.৮০) ৰিয. তেনেৰেত্থ মোঘৰারস্সপি আরম্মণভূতা ৰিসযপ্পৰত্তীতি সিদ্ধং. অতিপরিত্তারম্মণঞ্হি মোঘৰারপঞ্ঞাপনস্স পচ্চযো হোতি. ইতরথা হি ভৰঙ্গচলনস্স সকসকগোচরেযেৰ পৰত্তনতো পচ্ছিমৰারস্স অতিপরিত্তারম্মণে পৰত্তি নত্থীতি ‘‘চতুন্নং ৰারানং আরম্মণভূতা’’তি ৰচনং দুরুপপাদনং সিযাতি.

১৬. পঞ্চদ্ৰারে যথারহং তংতংদ্ৰারানুরূপং, তংতংপচ্চযানুরূপং, তংতংআরম্মণাদিঅনুরূপঞ্চ উপ্পজ্জমানানি ৰীথিচিত্তানি আৰজ্জনদস্সনাদিসম্পটিচ্ছনসন্তীরণৰোট্ঠব্বনজৰনতদারম্মণৰসেন অৰিসেসতো সত্তেৰ হোন্তি. চিত্তুপ্পাদা চিত্তানং ¶ ৰিসুং ৰিসুং উপ্পত্তিৰসেন উপ্পজ্জমানচিত্তানিযেৰ ৰা চতুদ্দস আৰজ্জনাদিপঞ্চকসত্তজৰনতদারম্মণদ্ৰযৰসেন. ৰিত্থারা পন চতুপঞ্ঞাস সব্বেসমেৰ কামাৰচরানং যথাসম্ভৰং তত্থ উপ্পজ্জনতো,

এত্থাতি ৰিসযপ্পৰত্তিসঙ্গহে.

পঞ্চদ্ৰারৰীথিৰণ্ণনা নিট্ঠিতা.

মনোদ্ৰারৰীথি

পরিত্তজৰনৰারৰণ্ণনা

১৭. মনোদ্ৰারিকচিত্তানং ¶ অতীতানাগতম্পি আরম্মণং হোতীতি তেসং অতিমহন্তাদিৰসেন ৰিসযৰৰত্থানং কাতুং ন সক্কাতি ৰিভূতাৰিভূতৰসেনেৰেতং নিযমেতুং ‘‘যদি ৰিভূতমারম্মণ’’ন্ত্যাদি ৰুত্তং.

১৯. এত্থাতি মনোদ্ৰারে. একচত্তালীস পঞ্চদ্ৰারাৰেণিকানং দ্ৰিপঞ্চৰিঞ্ঞাণমনোধাতুত্তযৰসেন তেরসচিত্তানং তত্থ অপ্পৰত্তনতো.

পরিত্তজৰনৰারৰণ্ণনা নিট্ঠিতা.

অপ্পনাজৰনৰারৰণ্ণনা

২০. ৰিভূতাৰিভূতভেদো নত্থি আরম্মণস্স ৰিভূতকালেযেৰ অপ্পনাসম্ভৰতো.

২১. তত্থ হি ছব্বীসতিমহগ্গতলোকুত্তরজৰনেসু যং কিঞ্চি জৰনং অপ্পনাৰীথিমোতরতীতি সম্বন্ধো. পরিকম্মোপচারানুলোমগোত্রভুনামেন যথাক্কমং উপ্পজ্জিত্ৰা নিরুদ্দেতি ¶ যোজনা. পঠমচিত্তঞ্হি অপ্পনায পরিকম্মত্তা পটিসঙ্খারকভূতত্তা পরিকম্মং. দুতিযং সমীপচারিত্তা উপচারং. নাচ্চাসন্নোপি হি নাতিদূরপ্পৰত্তি সমীপচারী নাম হোতি, অপ্পনং উপেচ্চ চরতীতি ৰা উপচারং. ততিযং পুব্বভাগে পরিকম্মানং, উপরিঅপ্পনায চ অনুকূলত্তা অনুলোমং. চতুত্থং পরিত্তগোত্তস্স, পুথুজ্জনগোত্তস্স চ অভিভৰনতো, মহগ্গতগোত্তস্স, লোকুত্তরগোত্তস্স চ ভাৰনতো ৰড্ঢনতো গোত্রভু, ইমানি চত্তারি নামানি চতুক্খত্তুং পৰত্তিযং অনৰসেসতো লব্ভন্তি, তিক্খত্তুং পৰত্তিযং পন উপচারানুলোমগোত্রভুনামেনেৰ লব্ভন্তি. অট্ঠকথাযং (ৰিসুদ্ধি. ২.৮০৪) পন পুরিমানং তিণ্ণং ¶ , দ্ৰিন্নং ৰা অৰিসেসেনপি পরিকম্মাদিনামং ৰুত্তং, চতুক্খত্তুং, তিক্খত্তুমেৰ ৰা পঞ্চমং, চতুত্থং ৰা উপ্পজ্জিতব্বঅপ্পনানুরূপতোতি অধিপ্পাযো. পরিকম্মাদিনামানং অনৰসেসতো লব্ভমানৰারদস্সনত্থং ‘‘চতুক্খত্তু’’ন্তি আদিতো ৰুত্তং, গণনপটিপাটিৰসেন পন ‘‘পঞ্চমং ৰা’’তি ওসানে ৰুত্তং.

যথারহন্তি খিপ্পাভিঞ্ঞদন্ধাভিঞ্ঞানুরূপং. খিপ্পাভিঞ্ঞস্স হি তিক্খত্তুং পৰত্তকামাৰচরজৰনানন্তরং চতুত্থং অপ্পনাচিত্তমুপ্পজ্জতি. দন্ধাভিঞ্ঞস্স চতুক্খত্তুং পৰত্তজৰনানন্তরং পঞ্চমং অপ্পনা উপ্পজ্জতি, যস্মা পন অলদ্ধাসেৰনং অনুলোমং গোত্রভুং উপ্পাদেতুং ন সক্কোতি, লদ্ধাসেৰনম্পি চ ছট্ঠং সত্তমং ভৰঙ্গস্স আসন্নভাৰেন পপাতাসন্নপুরিসো ৰিয অপ্পনাৰসেন পতিট্ঠাতুং ন সক্কোতি, তস্মা চতুত্থতো ওরং, পঞ্চমতো পরং ৰা অপ্পনা ন হোতীতি দট্ঠব্বং. যথাভিনীহারৰসেনাতি রূপারূপলোকুত্তরমগ্গফলানুরূপসমথৰিপস্সনাভাৰনাচিত্তাভিনীহরণানুরূপতো, অপ্পনায ৰীথি অপ্পনাৰীথি. ‘‘ততো পরং ভৰঙ্গপাতোৰ হোতী’’তি এত্তকেযেৰ ৰুত্তে চতুত্থং, পঞ্চমং ৰা ওতিণ্ণঅপ্পনাতো ¶ পরং ভৰঙ্গপাতোৰ হোতি, ন মগ্গানন্তরং ফলচিত্তং, সমাপত্তিৰীথিযঞ্চ ঝানফলচিত্তানি পুনপ্পুনন্তি গণ্হেয্যুন্তি পুন ‘‘অপ্পনাৰসানে’’তি ৰুত্তং. নিকাযন্তরিযা কির লোকিযপ্পনাসু পঠমকপ্পনাতো পরং সত্তমজৰনপূরণত্থং দ্ৰত্তিক্খত্তুং কামাৰচরজৰনানম্পি পৰত্তিং ৰণ্ণেন্তীতি তেসং মতিনিসেধনত্থং ‘‘ভৰঙ্গপাতোৰা’’তি সাৰধারণং ৰুত্তং.

২২. তত্থাতি তেসু অট্ঠঞাণসম্পযুত্তকামাৰচরজৰনেসু, তেসু চ ছব্বীসতিমহগ্গতলোকুত্তরজৰনেসু. তত্থাতি ৰা তস্মিং অপ্পনাৰারে. সোমনস্সসহগতজৰনানন্তরন্তি সোমনস্সসহগতানং চতুন্নং কুসলকিরিযজৰনানং অনন্তরং. সোমনস্সসহগতাৰাতি চতুক্কজ্ঝানস্স, সুক্খৰিপস্সকাদীনং মগ্গফলস্স চ ৰসেন সোমনস্সসহগতাৰ, ন পন উপেক্খাসহগতা ভিন্নৰেদনানং অঞ্ঞমঞ্ঞং আসেৰনপচ্চযভাৰস্স অনুদ্ধটত্তা. পাটিকঙ্খিতব্বাতি পসংসিতব্বা, ইচ্ছিতব্বাতি ৰুত্তং হোতি. তত্থাপীতি তস্মিং একৰেদনজৰনৰারেপি. কুসলজৰনানন্তরন্তি চতুব্বিধঞাণসম্পযুত্তকুসলজৰনানন্তরং কুসলজৰনমপ্পেতি, ন কিরিযজৰনং ভিন্নসন্তানে নিব্বত্তনতো. হেট্ঠিমঞ্চ ফলত্তযমপ্পেতি সমাপত্তিৰীথিযন্ত্যধিপ্পাযো.

২৩. সুখপুঞ্ঞম্হা ¶ সোমনস্সসহগততিহেতুককুসলদ্ৰযতো পরং অগ্গফলৰিপাককিরিযৰজ্জিতলোকিযলোকুত্তরচতুক্কজ্ঝানজৰনৰসেন দ্ৰত্তিংস, উপেক্খকা তিহেতুককুসলদ্ৰযতো পরং তথেৰ পঞ্চমজ্ঝানানি দ্ৰাদস, সুখিতক্রিযতো তিহেতুকদ্ৰযতো পরং কিরিযজ্ঝানচতুক্কস্স, অগ্গফলচতুক্কস্স চ ৰসেন অট্ঠ, উপেক্খকা তিহেতুকদ্ৰযতো পরং উপেক্খাসহগতরূপারূপকিরিযপঞ্চকস্স, অগ্গফলস্স চ ৰসেন ছ অপ্পনা সম্ভোন্তি.

২৪. এত্থাতি ৰীথিসঙ্গহাধিকারে.

অপ্পনাজৰনৰারৰণ্ণনা নিট্ঠিতা.

মনোদ্ৰারৰীথিৰণ্ণনা নিট্ঠিতা.

অপ্পনাজৰনৰারৰণ্ণনা নিট্ঠিতা.

তদারম্মণনিযমৰণ্ণনা

২৫. সব্বত্থাপীতি ¶ পঞ্চদ্ৰারমনোদ্ৰারেপি.

২৬. ইট্ঠেতি ইট্ঠমজ্ঝত্তে. অতিইট্ঠারম্মণঞ্হি ৰিসুং ৰক্খতি. কুসলৰিপাকানি পঞ্চৰিঞ্ঞাণসম্পটিচ্ছনসন্তীরণতদারম্মণানীতি সম্বন্ধো. ইট্ঠমজ্ঝত্তে সন্তীরণতদারম্মণানি উপেক্খাসহগতানেৰাতি আহ ‘‘অতিইট্ঠে পন সোমনস্সসহগতানেৰা’’তি. ৰিপাকস্স হি কম্মানুভাৰতো পৰত্তমানস্স আদাসে মুখনিমিত্তং ৰিয নিব্বিকপ্পতায পকপ্পেত্ৰা গহণাভাৰতো যথারম্মণমেৰ ৰেদনাযোগো হোতি, কুসলাকুসলানং পন অপ্পহীনৰিপল্লাসেসু সন্তানেসু পৰত্তিযা অতিইট্ঠেপি ইট্ঠমজ্ঝত্তঅনিট্ঠাকারতো, অনিট্ঠেপি ইট্ঠইট্ঠমজ্ঝত্তাকারতো গহণং হোতি. তথা হি অস্সদ্ধাদীনং বুদ্ধাদীসু অতিইট্ঠারম্মণেসুপি উপেক্খাজৰনং হোতি, তিত্থিযাদীনঞ্চ দোমনস্সজৰনং, গম্ভীরপকতিকাদীনঞ্চ পটিক্কূলারম্মণে উপেক্খাজৰনং, সুনখাদীনঞ্চ তত্থ সোমনস্সজৰনং, পুরিমপচ্ছাভাগপ্পৰত্তানি পন ৰিপাকানি যথাৰত্থুকানেৰ ¶ . অপিচ অসুচিদস্সনে সুমনাযমানানং সুনখাদীনন্তি. চক্খুৰিঞ্ঞাণাদীনং পন অতিইট্ঠানিট্ঠেসু পৰত্তমানানম্পি উপেক্খাসহগতভাৰে কারণং হেট্ঠা কথিতমেৰ.

২৭. তত্থাপীতি তদারম্মণেসুপি. সোমনস্সসহগতকিরিযজৰনাৰসানেতি সহেতুকাহেতুকসুখসহগতকিরিযপঞ্চকাৰসানে. খীণাসৰানং চিত্তৰিপল্লাসাভাৰেন কিরিযজৰনানিপি যথারম্মণমেৰ পৰত্তন্তীতি ৰুত্তং ‘‘সোমনস্সসহগতকিরিযজৰনাৰসানে’’ত্যাদি. কেচি পন আচরিযা ‘‘পট্ঠানে (ধ. স. মূলটী. ৪৯৮ ৰিপাকুদ্ধারকথাৰণ্ণনা) ‘কুসলাকুসলে নিরুদ্ধে ৰিপাকো ¶ তদারম্মণতা উপ্পজ্জতী’তি (পট্ঠা. ৩.১.৯৮) কুসলাকুসলানমেৰানন্তরং তদারম্মণং ৰুত্তন্তি নত্থি কিরিযজৰনানন্তরং তদারম্মণুপ্পাদো’’তি ৰদন্তি. তত্থ ৰুচ্চতে – যদি অব্যাকতানন্তরম্পি তদারম্মণং ৰুচ্চেয্য. পরিত্তারম্মণে ৰোট্ঠব্বনানন্তরম্পি তস্স পৰত্তিং মঞ্ঞেয্যুন্তি কিরিযজৰনানন্তরং তদারম্মণং ন ৰুত্তং, ন পন অলব্ভনতো. লব্ভমানস্সপি হি কেনচি অধিপ্পাযেন কত্থচি অৰচনং দিস্সতি, যথা তং ধম্মসঙ্গহে লব্ভমানম্পি হদযৰত্থু দেসনাভেদপরিহারত্থং ন ৰুত্তন্তি.

২৮. দোমনস্স…পে… উপেক্খাসহগতানেৰ ভৰন্তি, ন সোমনস্সসহগতানি অঞ্ঞমঞ্ঞং ৰিরুদ্ধসভাৰত্তা. তেনেৰ হি পট্ঠানে দোমনস্সানন্তরং সোমনস্সং, তদনন্তরঞ্চ দোমনস্সং অনুদ্ধটং. তথা হি ‘‘সুখায ৰেদনায সম্পযুত্তো ধম্মো সুখায ৰেদনায সম্পযুত্তস্স ধম্মস্স অনন্তরপচ্চযেন পচ্চযো’’ত্যাদিনা (পট্ঠা. ১.২.৪৫) সুখদুক্খৰেদনায সম্পযুত্তা ধম্মা অত্তনো অত্তনো সমানৰেদনাসম্পযুত্তানং অদুক্খমসুখৰেদনায সম্পযুত্তকানঞ্চ অনন্তরপচ্চযভাৰেন দ্ৰীসু দ্ৰীসু ৰারেসু ৰুত্তা, অদুক্খমসুখৰেদনায সম্পযুত্তকা পন সমানৰেদনাসম্পযুত্তানং, ইতরৰেদনাদ্ৰযসম্পযুত্তানঞ্চ ধম্মানং অনন্তরপচ্চযভাৰেন তীসু ৰারেসূতি এৰং ৰেদনাত্তিকে সত্তেৰ অনন্তরপচ্চযৰারা ৰুত্তা. যদি চ দোমনস্সানন্তরং সোমনস্সং, সোমনস্সানন্তরং ৰা দোমনস্সং উপ্পজ্জেয্য, সুখদুক্খৰেদনাসম্পযুত্তানম্পি অঞ্ঞমঞ্ঞং অনন্তরপচ্চযৰসেন দ্ৰে ৰারে ৰড্ঢেত্ৰা নৰ ৰারা ৰত্তব্বা সিযুং, ন পনেৰং ৰুত্তা. তস্মা ন তেসং তদনন্তরং উপ্পত্তি অত্থি. এত্থ চ ‘‘সোমনস্সসহগতকিরিযজৰনাৰসানে’’ত্যাদিনা অযম্পি নিযমো অনুঞ্ঞাতো –

‘‘পরিত্তকুসলাদোস-পাপসাতক্রিযাজৰা ¶ ;

পঞ্চস্ৰেকং তদালম্বং, সুখিতেসু যথারহং.

‘‘পাপাকামসুভা ¶ চেৰ, সোপেক্খা চ ক্রিযাজৰা;

সোপেক্খেসু তদালম্বং, ছস্ৰেকমনুরূপতো’’তি.

অযঞ্হি জৰনেন তদারম্মণনিযমো অব্যভিচারী. ‘‘ঞাণসম্পযুত্তজৰনতো ঞাণসম্পযুত্ততদারম্মণ’’ন্ত্যাদিনযপ্পৰত্তো পন অনেকন্তিকো. যেভুয্যেন হি অকুসলজৰনেসু পরিচিতস্স কদাচি কুসলজৰনেসু জৰিতেসু, কুসলজৰনেসু ৰা পরিচিতস্স কদাচি অকুসলজৰনেসু জৰিতেসু অকুসলানন্তরং পৰত্তপরিচযেন তিহেতুকজৰনতোপি পরং অহেতুকতদারম্মণং হোতি, তথা কুসলানন্তরং পৰত্তপরিচযেন অকুসলজৰনতো পরং তিহেতুকতদারম্মণম্পি, পটিসন্ধিনিব্বত্তককম্মতো পন অঞ্ঞকম্মেন তদারম্মণপ্পৰত্তিযং ৰত্তব্বমেৰ নত্থি. তথা চ ৰুত্তং পট্ঠানে ‘‘অহেতুকে খন্ধে অনিচ্চতো দুক্খতো অনত্ততো ৰিপস্সন্তি, কুসলাকুসলে নিরুদ্ধে অহেতুকো ৰিপাকো তদারম্মণতা উপ্পজ্জতি, কুসলাকুসলে নিরুদ্ধে সহেতুকো ৰিপাকো তদারম্মণতা উপ্পজ্জতী’’তি (পট্ঠা. ৩.১.৯৮).

তস্মাতি যস্মা দোমনস্সজৰনাৰসানে উপেক্খাসহগতানেৰ হোন্তি. তস্মা দোমনস্সসহগতজৰনাৰসানে উপেক্খাসহগতসন্তীরণং উপ্পজ্জতীতি সম্বন্ধো. ‘সোমনস্সপটিসন্ধিকস্সা’তি ইমিনাৰ ভৰঙ্গপাতাভাৰো দীপিতোৰ হোতি দোমনস্সানন্তরং সোমনস্সাভাৰতোতি তং অৰত্ৰা তদারম্মণাভাৰমেৰ পরিকপ্পেন্তো আহ ‘‘যদি তদারম্মণসম্ভৰো নত্থী’’তি. সোমনস্সপটিসন্ধিকস্স তিত্থিযাদিনো বুদ্ধাদিঅতিইট্ঠারম্মণে পি পটিহতচিত্তস্স দোমনস্সজৰনে জৰিতে ৰুত্তনযেন সোমনস্সতদারম্মণস্স অতিইট্ঠারম্মণে চ উপেক্খাসহগততদারম্মণস্স অনুপ্পজ্জনতো, কেনচি ৰা অসপ্পাযেন পরিহীনলোকিযজ্ঝানং আরব্ভ ‘‘পণীতধম্মো মে নট্ঠো’’তি ৰিপ্পটিসারং ¶ জনেন্তস্স দোমনস্সজৰনে সতি অকামাৰচরারম্মণে তদারম্মণাভাৰতো যদি তদারম্মণস্স উপ্পত্তিসম্ভৰো নত্থীতি অধিপ্পাযো.

পরিচিতপুব্বন্তি পুব্বে পরিচিতং, তস্মিং ভৰে যেভুয্যেন গহিতপুব্বং. উপেক্খাসহগতসন্তীরণং ¶ উপ্পজ্জতি নিরাৰজ্জনম্পি. যথা তং নিরোধা ৰুট্ঠহন্তস্স ফলচিত্তন্ত্যধিপ্পাযো. যথাহু –

‘‘নিরাৰজ্জং কথং চিত্তং, হোতি নেতঞ্হি সম্মতং;

নিযমো ন ৰিনাৰজ্জং, নিরোধা ফলদস্সনা’’তি.

কেন পন কিচ্চেন ইদং চিত্তং পৰত্ততীতি? তদারম্মণকিচ্চেন তাৰ ন পৰত্ততি জৰনারম্মণস্স অগ্গহণতো, নাপি সন্তীরণকিচ্চেন যথাসম্পটিচ্ছিতস্স সন্তীরণৰসেন অপ্পৰত্তনতো, পটিসন্ধিচুতীসু ৰত্তব্বমেৰ নত্থি, পারিসেসতো পন ভৰস্স অঙ্গভাৰতো ভৰঙ্গকিচ্চেনাতি যুত্তং সিযা. আচরিযধম্মপালত্থেরেনপি (ধ. স. অনুটী. ৪৯৮ ৰিপাকুদ্ধারকথাৰণ্ণনা) হি অযমত্থো দস্সিতোৰ. যং পন পটিসন্ধিভৰঙ্গানং ধম্মতো, আরম্মণতো চ সমানতং ৰক্খতি, তং যেভুয্যতোতি দট্ঠব্বং. ন হি ইদমেকং ঠানং ৰজ্জেত্ৰা পটিসন্ধিভৰঙ্গানং ৰিসদিসতা অত্থি. তমনন্তরিত্ৰাতি তং অত্তনো অনন্তরং অব্যৰহিতং কত্ৰা, তদনন্তরন্ত্যত্থো.

২৯. কামাৰচর…পে… ইচ্ছন্তীতি এত্থ কামাৰচরজৰনাৰসানেযেৰ তদারম্মণং ইচ্ছন্তি কামতণ্হানিদানকম্মনিব্বত্তত্তা. ন হি তং কামতণ্হাহেতুকেন কম্মুনা জনিতং অতংসভাৰস্স রূপারূপাৰচরলোকুত্তরজৰনস্স অনন্তরং উপ্পজ্জতি. কিংকারণা? অজনকত্তা, জনকসমানত্তাভাৰতো চ. যথা হি গেহতো বহি নিক্খমিতুকামো বালকো জনকং, তংসদিসং ৰা অঙ্গুলিযং গহেত্ৰা নিক্খমতি, নাঞ্ঞং রাজপুরিসাদিং, এৰং ভৰঙ্গৰিসযতো ¶ অঞ্ঞত্থ পৰত্তমানং তদারম্মণং জনকং কামাৰচরকুসলাকুসলং, তংসদিসং ৰা কামাৰচরকিরিযজৰনং অনুবন্ধতি, ন পন তস্স ৰিসদিসানি মহগ্গতলোকুত্তরজৰনানি. তথা কামাৰচরসত্তানমেৰ তদারম্মণং ইচ্ছন্তি, ন ব্রহ্মানং তদারম্মণূপনিস্সযস্স কামাৰচরপটিসন্ধিবীজস্সাভাৰতো. তথা কামাৰচরধম্মেস্ৰেৰ আরম্মণভূতেসু ইচ্ছন্তি. ন ইতরেসু অপরিচিতত্তা. যথা হি সো বালকো জনকং, তংসদিসং ৰা অনুগচ্ছন্তোপি অরঞ্ঞাদিঅপরিচিতট্ঠানং গচ্ছন্তং অননুবন্ধিত্ৰা পমুখঙ্গণাদিম্হি পরিচিতট্ঠানেযেৰ অনুবন্ধতি, এৰমিদম্পি রূপাৰচরাদিঅপরিচিতারম্মণং আরব্ভ পৰত্তন্তং নানুবন্ধতি. অপিচ কামতণ্হাযত্তকম্মজনিতত্তাপি এতং কামতণ্হারম্মণেসু পরিত্তধম্মেস্ৰেৰ পৰত্ততীতি ৰুত্তোৰাযমত্থো. হোন্তি চেত্থ –

‘‘জনকং ¶ তংসমানং ৰা, জৰনং অনুবন্ধতি;

ন তু অঞ্ঞং তদালম্বং, বালদারকলীলযা.

‘‘বীজস্সাভাৰতো নত্থি, ব্রহ্মানম্পি ইমস্স হি;

পটিসন্ধিমনো বীজং, কামাৰচরসঞ্ঞিতং.

‘‘ঠানে পরিচিতেযেৰ, তং ইদং বালকো ৰিয;

অনুযাতীতি নাঞ্ঞত্থ, হোতি তণ্হাৰসেন ৰা’’তি.

ননু চ ‘‘কামাৰচরপটিসন্ধিবীজাভাৰতো’’তি ৰুত্তং, তথা চ চক্খুৰিঞ্ঞাণাদীনম্পি অভাৰো আপজ্জতীতি? নাপজ্জতি ইন্দ্রিযপ্পৰত্তিআনুভাৰতো, দ্ৰারৰীথিভেদে চিত্তনিযমতো চ.

তদারম্মণনিযমৰণ্ণনা নিট্ঠিতা.

জৰননিযমৰণ্ণনা

৩২. মন্দপ্পৰত্তিযন্তি ¶ মরণাসন্নকালে ৰত্থুদুব্বলতায মন্দীভূতৰেগত্তা মন্দং হুত্ৰা পৰত্তিযং. মরণকালাদীসূতি আদি-সদ্দেন মুচ্ছাকালং সঙ্গণ্হাতি.

৩৩. ভগৰতো…পে… ৰদন্তীতি ভগৰতো যমকপাটিহারিযকালাদীসু উদকক্খন্ধঅগ্গিক্খন্ধপ্পৰত্তনাদিঅত্থং ৰিসুং ৰিসুং পাদকজ্ঝানং সমাপজ্জিত্ৰা ততো ৰুট্ঠায ঝানধম্মে ৰিসুং ৰিসুং আৰজ্জেন্তস্স আৰজ্জনৰসিতায মত্থকপ্পত্তিযা আৰজ্জনতপ্পরোৰ চিত্তাভিনীহারো হোতীতি যথাৰজ্জিতঝানঙ্গারম্মণানি চত্তারি, পঞ্চৰা পচ্চৰেক্খণজৰনচিত্তানি পৰত্তন্তীতি ৰদন্তি (ৰিসুদ্ধি. ১.৭৮) অট্ঠকথাচরিযা. ‘‘ভগৰতো’’তি চ ইদং নিদস্সনমত্তং অঞ্ঞেসম্পি ধম্মসেনাপতিআদীনং এৰরূপে অচ্চাযিককালে অপরিপুণ্ণজৰনানং পৰত্তনতো. তথা চ ৰুত্তং অট্ঠকথাযং ‘‘অযঞ্চ মত্থকপ্পত্তা ৰসিতা ভগৰতো যমকপাটিহারিযকালে ¶ অঞ্ঞেসং ৰা এৰরূপে কালে’’তি (ৰিসুদ্ধি. ১.৭৮). ‘‘চত্তারি পঞ্চ ৰা’’তি চ পনেতং তিক্খিন্দ্রিযমুদিন্দ্রিযৰসেন গহেতব্বন্তি আচরিযধম্মপালত্থেরেন (ৰিসুদ্ধি. মহা. ১.৭৮) ৰুত্তং, তস্মা ভগৰতো চত্তারি, অঞ্ঞেসং পঞ্চপীতি যুত্তং ৰিয দিস্সতি.

৩৪. আদিকম্মিকস্সাতি আদিতো কতযোগকম্মস্স. পঠমং নিব্বত্তা অপ্পনা পঠমকপ্পনা. অভিঞ্ঞাজৰনানম্পি ‘‘পঠমকপ্পনাযা’’তি অধিকারো সিযাতি আহ ‘‘সব্বদাপী’’তি, পঠমুপ্পত্তিকালে, চিণ্ণৰসীকালে চ পঞ্চাভিঞ্ঞাজৰনানি একৰারমেৰ জৰন্তীত্যত্থো.

৩৫. মগ্গাযেৰ উপ্পজ্জনতো মগ্গুপ্পাদা. যথারহন্তি পঞ্চমং ৰা চতুত্থং ৰা উপ্পন্নমগ্গানুরূপং. সত্তজৰনপরমত্তা হি একাৰজ্জনৰীথিযা ¶ চতুত্থং উপ্পন্নমগ্গতো পরং তীতি ফলচিত্তানি, পঞ্চমং উপ্পন্নমগ্গতো পরং দ্ৰে ৰা হোন্তি.

৩৬. নিরোধসমাপত্তিকালেতি নিরোধস্স পুব্বভাগে. চতুত্থারুপ্পজৰনন্তি কুসলকিরিযানং অঞ্ঞতরং নেৰসঞ্ঞানাসঞ্ঞাযতনজৰনং. অনাগামিখীণাসৰাযেৰ নিরোধসমাপত্তিং সমাপজ্জন্তি, ন সোতাপন্নসকদামিনোতি ৰুত্তং ‘‘অনাগামিফলং ৰা অরহত্তফলং ৰা’’তি. ৰিভত্তিৰিপল্লাসো চেত্থ দট্ঠব্বো ‘‘অনাগামিফলে ৰা অরহত্তফলে ৰা’’তি. তেনাহ ‘‘নিরুদ্ধে’’তি. যথারহন্তি তংতংপুগ্গলানুরূপং.

৩৮. সব্বত্থাপি সমাপত্তিৰীথিযন্তি সকলাযপি ঝানসমাপত্তিৰীথিযং, ফলসমাপত্তিৰীথিযঞ্চ.

৩৯. পরিত্তানি জৰনানি সত্তক্খত্তুং মতানি উক্কংসকোটিযা. মগ্গাভিঞ্ঞা পন সকিং একৰারমেৰ মতা. অৰসেসানি অভিঞ্ঞামগ্গৰজ্জিতানি মহগ্গতলোকুত্তরজৰনানি বহূনিপি লব্ভন্তি সমাপত্তিৰীথিযং অহোরত্তম্পি পৰত্তনতো. অপি-সদ্দেন লোকিযজ্ঝানানি পঠমকপ্পনাযং, অন্তিমফলদ্ৰযঞ্চ নিরোধানন্তরং একৰারং, ফলচিত্তানি মগ্গানন্তরং দ্ৰত্তিক্খত্তুম্পীতি সম্পিণ্ডেতি.

জৰননিযমৰণ্ণনা নিট্ঠিতা.

পুগ্গলভেদৰণ্ণনা

৪০. ইদানি ¶ দুহেতুকাহেতুকাপাযিকাহেতুকতিহেতুকৰসেন চতুব্বিধানং পুথুজ্জনানং, মগ্গট্ঠফলট্ঠৰসেন অট্ঠৰিধানং অরিযানন্তি দ্ৰাদসন্নং পুগ্গলানং উপ্পজ্জনকৰীথিচিত্তপরিচ্ছেদদস্সনত্থং পঠমং তাৰ তেসং ৰজ্জিতব্বচিত্তানি দস্সেতুমাহ ‘‘দুহেতুকানমহেতুকানঞ্চা’’ত্যাদি. পটিসন্ধিৰিঞ্ঞাণসহগতালোভাদোসৰসেন দ্ৰে হেতূ ¶ ইমেসন্তি দ্ৰিহেতুকা. তাদিসানং হেতূনং অভাৰতো অহেতুকা. ম-কারো পদসন্ধিকরো. অপ্পনাজৰনানি ন লব্ভন্তি ৰিপাকাৰরণসব্ভাৰতো. দ্ৰিহেতুকাহেতুকপটিসন্ধি হি ‘‘ৰিপাকাৰরণ’’ন্তি ৰুচ্চতি. অপ্পনাজৰনাভাৰতোযেৰ অরহত্তং নত্থীতি কিরিযজৰনানি ন লব্ভন্তি.

৪১. ‘‘সহেতুকং (পট্ঠা. ৩.১.১০২) ভৰঙ্গং অহেতুকস্স ভৰঙ্গস্স অনন্তরপচ্চযেন পচ্চযো’’তি পাঠতো অহেতুকানম্পি নানাকম্মেন দ্ৰিহেতুকতদারম্মণং সম্ভৰতি, দ্ৰিহেতুকানং ৰত্তব্বমেৰ নত্থি. মূলসন্ধিযা পন জল়ভাৰতো উভিন্নম্পি নত্থি তিহেতুকতদারম্মণন্তি আহ ‘‘তথা ঞাণসম্পযুত্তৰিপাকানি চা’’তি. আচরিযজোতিপালত্থেরেন পন ‘‘সহেতুকং ভৰঙ্গ’’ন্তি অৰিসেসেন ৰুত্তত্তা অহেতুকানম্পি তিহেতুকতদারম্মণং ৰত্ৰা ইধ ঞাণসম্পযুত্তৰিপাকাভাৰৰচনস্স পরিহাসৰসেন ‘‘সো এৰ পুচ্ছিতব্বো, যো তস্স কত্তা’’তি ৰুত্তং, তং পন পরিহাসৰসেন ৰুত্তম্পি আচরিযং পুচ্ছিত্ৰাৰ ৰিজাননত্থং ৰুত্তৰচনং ৰিয ঠিতং. তথা হি আচরিযেনেৰেত্থ কারণং পরমত্থৰিনিচ্ছযে ৰুত্তং –

‘‘ঞাণপাকা ন ৰত্তন্তি, জল়ত্তা মূলসন্ধিযা’’তি; (পরম. ৰি. ২৭১);

অপরে পন ‘‘যথা অহেতুকানং সহেতুকতদারম্মণং হোতি, এৰং দ্ৰিহেতুকানং তিহেতুকতদারম্মণম্পী’’তি ৰণ্ণেন্তি, তেসং মতানুরোধেন চ ইধাপি ঞাণসম্পযুত্তৰিপাকপটিক্খেপো অহেতুকেযেৰ সন্ধাযাতি ৰদন্তি. তত্থ পন পমাণপাঠাভাৰতো আচরিযেন উভিন্নম্পি সাধারণৰসেন ঞাণসম্পযুত্তৰিপাকাভাৰে কারণং ৰত্ৰা সমকমেৰ চিত্তপরিচ্ছেদস্স দস্সিতত্তা তেসং ৰচনং ৰীমংসিত্ৰা সম্পটিচ্ছিতব্বং. অহেতুকাপেক্খায চেত্থ ¶ ‘‘সুগতিয’’ন্তি ৰচনং, তং পন অত্থতো অনুঞ্ঞাতদ্ৰিহেতুকৰিপাকানং তত্থেৰ সম্ভৰদস্সনপরং. তেনাহ ‘‘দুগ্গতিযং পনা’’ত্যাদি.

৪৩. তিহেতুকেসূতি ¶ পটিসন্ধিৰিঞ্ঞাণসহগতালোভাদোসামোহৰসেন তিহেতুকেসু পুথুজ্জাদীসূ নৰৰিধপুগ্গলেসু.

৪৫. দিট্ঠী…পে… সেক্খানন্তি সিক্খায অপরিপূরকারিতায সিক্খনসীলতায ‘‘সেক্খা’’তি লদ্ধনামানং সোতাপন্নসকদাগামীনং পুগ্গলানং পঠমমগ্গেনেৰ সক্কাযদিট্ঠিৰিচিকিচ্ছানং পহীনত্তা তংসহগতজৰনানি চেৰ চ-সদ্দেন আকড্ঢিতানি খীণাসৰাৰেণিকানি কিরিযজৰনানি চ ন লব্ভন্তি.

৪৬. পটিঘজৰনানি চাতি দোমনস্সজৰনানি চেৰ দিট্ঠিসম্পযুত্তৰিচিকিচ্ছাসহগতকিরিযজৰনানি চ.

৪৭. লোকুত্তর…পে… সমুপ্পজ্জন্তীতি চতুন্নং মগ্গানং একচিত্তক্খণিকভাৰেন পুগ্গলন্তরেসু অসম্ভৰতো, হেট্ঠিমহেট্ঠিমানঞ্চ উপরূপরিসমাপত্তিযা অনধিগতত্তা, উপরূপরিপুগ্গলানঞ্চ অসমুগ্ঘাটিতকম্মকিলেসনিরোধেন পুথুজ্জনেহি ৰিয সোতাপন্নানং সোতাপন্নাদীহি পুগ্গলন্তরভাৰূপগমনেন পটিপ্পস্সদ্ধত্তা চ অট্ঠপি লোকুত্তরজৰনানি যথাসকং মগ্গফলট্ঠানং অরিযানমেৰ সমুপ্পজ্জন্তি.

৪৮. ইদানি তেসং তেসং পুগ্গলানং যথাপটিক্খিত্তজৰনানি ৰজ্জেত্ৰা পারিসেসতো লব্ভমানজৰনানি সম্পিণ্ডেত্ৰা দস্সেতুং ‘‘অসেক্খান’’ন্ত্যাদি ৰুত্তং. তিৰিধসিক্খায পরিপূরকারিভাৰতো অসেক্খানং খীণাসৰানং তেত্তিংসৰিধকুসলাকুসলস্স, হেট্ঠিমফলত্তযস্স, ৰীথিমুত্তানঞ্চ নৰমহগ্গতৰিপাকানং ৰসেন পঞ্চচত্তালীসৰজ্জিতানি সেসানি ¶ তেৰীসতিকআমাৰচরৰিপাকৰীসতিকিরিযঅরহত্তফলৰসেন চতুচত্তালীস ৰীথিচিত্তানি সম্ভৰা যথালাভং কামভৰে ঠিতানং ৰসেন উদ্দিসে.

সেক্খানং অট্ঠারসকিরিযজৰনদিট্ঠিৰিচিকিচ্ছাসহগতপঞ্চকঅগ্গফলমহগ্গতৰিপাকৰসেন তেত্তিংস ৰজ্জেত্ৰা তেৰীসতিকামাৰচরৰিপাকআৰজ্জনদ্ৰযএকৰীসতিকুসলসত্তাকুসলহেট্ঠিমফলত্তযৰসেন ছপ্পঞ্ঞাস ৰীথিচিত্তানি যথাসম্ভৰং উদ্দিসে অৰিসেসতো. ৰিসেসতো পন সোতাপন্নসকদাগামীনং একপঞ্ঞাস, অনাগামীনং একূনপঞ্ঞাস, অৰসেসানং চতুন্নং পুথুজ্জনানং ¶ অট্ঠারসকিরিযজৰনসব্বলোকুত্তরমহগ্গতৰিপাকৰসেন পঞ্চতিংস ৰজ্জেত্ৰা অৰসেসানি কামাৰচরৰিপাকআৰজ্জনদ্ৰযলোকিযকুসলাকুসলৰসেন চতুপঞ্ঞাস ৰীথিচিত্তানি যথাসম্ভৰতো উদ্দিসে অৰিসেসতো. ৰিসেসতো পন তিহেতুকানং চতুপঞ্ঞাসেৰ লব্ভন্তি, দ্ৰিহেতুকাহেতুকানং ঞাণসম্পযুত্তৰিপাকঅপ্পনাজৰনৰজ্জিতানি একচত্তালীস, আপাযিকানং তানেৰ দ্ৰিহেতুকৰিপাকৰজ্জিতানি সত্ততিংস ৰীথিচিত্তানীতি দট্ঠব্বং.

পুগ্গলানং ৰসেন চিত্তপ্পৰত্তিভেদো পুগ্গলভেদো.

পুগ্গলভেদৰণ্ণনা নিট্ঠিতা.

ভূমিৰিভাগৰণ্ণনা

৪৯. সব্বানিপি ৰীথিচিত্তানি উপলব্ভন্তি ছন্নং দ্ৰারানং, সব্বেসঞ্চ পুগ্গলানং তত্থ সম্ভৰতো. যথারহন্তি তংতংভৰানুরূপং, তংতংপুগ্গলানুরূপঞ্চ.

৫২. ত্যাদিনা ¶ ঘানৰিঞ্ঞাণাদীনম্পি পটিক্খেপো হেস্সতীতি রূপাৰচরভূমিযং পটিঘজৰনতদারম্মণানেৰ পটিক্খিত্তানি. সব্বত্থাপীতি কামভৰে, রূপভৰে, অরূপভৰে চ.

৫৪. কামভৰে যথারহং ৰীথিমুত্তৰজ্জানি অসীতি ৰীথিচিত্তানি, রূপভৰে পটিঘদ্ৰযঅট্ঠতদারম্মণঘানাদিৰিঞ্ঞাণছক্কৰীথিমুত্তকৰসেন পঞ্চৰীসতি ৰজ্জেত্ৰা সেসানি আৰজ্জনদ্ৰযনৰঅহেতুকৰিপাকতেপঞ্ঞাসজৰনৰসেন চতুসট্ঠি, অরূপে ভৰে তেৰীসতিকামাৰচরৰিপাকপঠমমগ্গপঞ্চদসরূপাৰচরপটিঘদ্ৰযআরুপ্পৰিপাককিরিযমনোধাতুহসনৰসেন সত্তচত্তালীস ৰজ্জেত্ৰা সেসানি ছব্বীসতি পরিত্তজৰনঅট্ঠআরুপ্পজৰনসত্তলোকুত্তরজৰনমনোদ্ৰারাৰজ্জনৰসেন দ্ৰেচত্তালীস চিত্তানি লব্ভরে উপলব্ভন্তি.

কেচি ¶ পন ‘‘রূপভৰে অনিট্ঠারম্মণাভাৰতো ইধাগতানংযেৰ ব্রহ্মানং অকুসলৰিপাকসম্ভৰোতি তানি পরিহাপেত্ৰা পঞ্চপরিত্তৰিপাকেহি সদ্ধিং রূপভৰে সট্ঠিযেৰ ৰীথিচিত্তানী’’তি ৰদন্তি. ইধ পন তত্থ ঠত্ৰাপি ইমং লোকং পস্সন্তানং অনিট্ঠারম্মণস্স অসম্ভৰো ন সক্কা ৰত্তুন্তি তেহি সদ্ধিংযেৰ তত্থ চতুসট্ঠি ৰুত্তানি. এৰঞ্চ কত্ৰা ৰুত্তং ধম্মানুসারণিযং ‘‘যদা ব্রহ্মানো কামাৰচরং অনিট্ঠারম্মণং আলম্বন্তি, তদা তং সুগতিযম্পি অকুসলৰিপাকচক্খুসোতৰিঞ্ঞাণমনোধাতুসন্তীরণানং উপ্পত্তি সম্ভৰতী’’তি.

ভূমিৰসেন ৰিভাগো ভূমিৰিভাগো.

ভূমিৰিভাগৰণ্ণনা নিট্ঠিতা.

৫৫. যথাসম্ভৰন্তি তংতংদ্ৰারেসু, তংতংভৰেসু ৰা সম্ভৰানুরূপতো. যাৰতাযুকন্তি পটিসন্ধিতো পরং ভৰনিকন্তিৰসেন পৰত্তমনোদ্ৰারিকচিত্তৰীথিতো পট্ঠায চুতিচিত্তাৰসানং ¶ , ততো পুব্বে পৰত্তভৰঙ্গাৰসানং ৰা অব্বোচ্ছিন্না অসতি নিরোধসমাপত্তিযন্তি অধিপ্পাযো.

ইতি অভিধম্মত্থৰিভাৰিনিযা নাম অভিধম্মত্থসঙ্গহৰণ্ণনায

ৰীথিপরিচ্ছেদৰণ্ণনা নিট্ঠিতা.

৫. ৰীথিমুত্তপরিচ্ছেদৰণ্ণনা

১. এত্তাৰতা ৰীথিসঙ্গহং দস্সেত্ৰা ইদানি ৰীথিমুত্তসঙ্গহং দস্সেতুমারভন্তো আহ ‘‘ৰীথিচিত্তৰসেনেৰ’’ন্ত্যাদি. এৰং যথাৰুত্তনযেন ৰীথিচিত্তৰসেন পৰত্তিযং পটিসন্ধিতো অপরভাগে চুতিপরিযোসানং পৰত্তিসঙ্গহো নাম সঙ্গহো উদীরিতো, ইদানি তদনন্তরং সন্ধিযং পটিসন্ধিকালে, তদাসন্নতায তংগহণেনেৰ গহিতচুতিকালে চ পৰত্তিসঙ্গহো ৰুচ্চতীতি যোজনা.

ভূমিচতুক্কৰণ্ণনা

৩. পুঞ্ঞসম্মতা ¶ অযা যেভুয্যেন অপগতোতি অপাযো, সোযেৰ ভূমি ভৰন্তি এত্থ সত্তাতি অপাযভূমি. অনেকৰিধসম্পত্তিঅধিট্ঠানতায সোভনা গন্তব্বতো উপপজ্জিতব্বতো গতীতি সুগতি, কামতণ্হাসহচরিতা সুগতি কামসুগতি, সাযেৰ ভূমীতি কামসুগতিভূমি. এৰং সেসেসুপি.

৪. অযতো সুখতো নিগ্গতোতি নিরযো. তিরো অঞ্চিতাতি তিরচ্ছানা, তেসং যোনি তিরচ্ছানযোনি. যৰন্তি তায সত্তা অমিস্সিতাপি সমানজাতিতায মিস্সিতা ৰিয হোন্তীতি যোনি. সা পন অত্থতো খন্ধানং পৰত্তিৰিসেসো. পকট্ঠেন সুখতো ইতা গতাতি পেতা, নিজ্ঝামতণ্হিকাদিভেদানং পেতানং ৰিসযো পেত্তিৰিসযো ¶ . এত্থ পন তিরচ্ছানযোনিপেত্তিৰিসযগ্গহণেন খন্ধানংযেৰ গহণং তেসং তাদিসস্স পরিচ্ছিন্নোকাসস্স অভাৰতো. যত্থ ৰা তে অরঞ্ঞপব্বতপাদাদিকে নিবদ্ধৰাসং ৰসন্তি, তাদিসস্স ঠানস্স ৰসেন ওকাসোপি গহেতব্বো. ন সুরন্তি ইস্সরিযকীল়াদীহি ন দিব্বন্তীতি অসুরা, পেতাসুরা. ইতরে পন ন সুরা সুরপ্পটিপক্খাতি অসুরা, ইধ চ পেতাসুরানমেৰ গহণং ইতরেসং তাৰতিংসেসু গহণস্স ইচ্ছিতত্তা. তথা হি ৰুত্তং আচরিযেন –

‘‘তাৰতিংসেসু দেৰেসু, ৰেপচিত্তাসুরা গতা’’তি; (নাম. পরি. ৪৩৮);

৫. সতিসূরভাৰব্রহ্মচরিযযোগ্যতাদিগুণেহি উক্কট্ঠমনতায মনো উস্সন্নং এতেসন্তি মনুস্সা. তথা হি পরমসতিনেপক্কাদিপ্পত্তা বুদ্ধাদযোপি মনুস্সভূতাযেৰ. জম্বুদীপৰাসিনো চেত্থ নিপ্পরিযাযতো মনুস্সা. তেহি পন সমানরূপাদিতায সদ্ধিং পরিত্তদীপৰাসীহি ইতরমহাদীপৰাসিনোপি ‘‘মনুস্সা’’তি ৰুচ্চন্তি. লোকিযা পন ‘‘মনুনো আদিখত্তিযস্স অপচ্চং পুত্তাতি মনুস্সা’’তি ৰদন্তি. মনুস্সানং নিৰাসভূতা ভূমি ইধ মনুস্সা. এৰং সেসেসুপি.

চতূসু মহারাজেসু ভত্তি এতেসং, চতুন্নং ৰা মহারাজানং নিৰাসট্ঠানভূতে চাতুমহারাজে ভৰাতি চাতুমহারাজিকা. মাঘেন মাণৰেন সদ্ধিং তেত্তিংস সহপুঞ্ঞকারিনো এত্থ নিব্বত্তাতি তংসহচরিতট্ঠানং তেত্তিংসং, তদেৰ তাৰতিংসং, তংনিৰাসো এতেসন্তি তাৰতিংসাতি ৰদন্তি. যস্মা পন ¶ ‘‘সহস্সং চাতুমহারাজিকানং সহস্সং তাৰতিংসান’’ন্তি (অ. নি. ৩.৮১) ৰচনতো সেসচক্কৰাল়েসুপি ছকামাৰচরদেৰলোকা অত্থি, তস্মা নামমত্তমেৰ এতং তস্স দেৰলোকস্সাতি গহেতব্বং. দুক্খতো যাতা অপযাতাতি ¶ যামা. অত্তনো সিরিসম্পত্তিযা তুসং পীতিং ইতা গতাতি তুসিতা. নিম্মানে রতি এতেসন্তি নিম্মানরতিনো. পরনিম্মিতেসু ভোগেসু অত্তনো ৰসং ৰত্তেন্তীতি পরনিম্মিতৰসৰত্তিনো.

৭. মহাব্রহ্মানং পরিচারিকত্তা তেসং পরিসতি ভৰাতি ব্রহ্মপারিসজ্জা. তেসং পুরোহিতট্ঠানে ঠিতত্তা ব্রহ্মপুরোহিতা. তেহি তেহি ঝানাদীহি গুণৰিসেসেহি ব্রূহিতা পরিৰুদ্ধাতি ব্রহ্মানো, ৰণ্ণৰন্ততায চেৰ দীঘাযুকতাদীহি চ ব্রহ্মপারিসজ্জাদীহি মহন্তা ব্রহ্মানোতি মহাব্রহ্মানো. তযোপেতে পণীতরতনপভাৰভাসিতসমানতলৰাসিনো.

৮. উপরিমেহি পরিত্তা আভা এতেসন্তি পরিত্তাভা. অপ্পমাণা আভা এতেসন্তি অপ্পমাণাভা. ৰলাহকতো ৰিজ্জু ৰিয ইতো চিতো চ আভা সরতি নিস্সরতি এতেসং সপ্পীতিকজ্ঝাননিব্বত্তক্খন্ধসন্তানত্তাতি আভস্সরা. দণ্ডদীপিকায ৰা অচ্চি ৰিয এতেসং সরীরতো আভা ছিজ্জিত্ৰা ছিজ্জিত্ৰা পতন্তী ৰিয সরতি নিস্সরতীতি আভস্সরা. যথাৰুত্তায ৰা পভায আভাসনসীলাতি আভস্সরা. এতেপি তযো পণীতরতনপভাৰভাসিতেকতলৰাসিনো.

৯. সুভাতি একগ্ঘনা অচলা সরীরাভা ৰুচ্চতি, সা উপরিব্রহ্মেহি পরিত্তা এতেসন্তি পরিত্তসুভা. অপ্পমাণা সুভা এতেসন্তি অপ্পমাণসুভা. পভাসমুদযসঙ্খাতেহি সুভেহি কিণ্ণা আকিণ্ণাতি সুভকিণ্হা. ‘‘সুভাকিণ্ণা’’তি চ ৰত্তব্বে আ-সদ্দস্স রস্সত্তং, অন্তিমণ-কারস্স চ হ-কারং কত্ৰা ‘‘সুভকিণ্হা’’তি ৰুত্তং. এতেপি পণীতরতনপভাৰভাসিতেকতলৰাসিনো.

১০. ঝানপ্পভাৰনিব্বত্তং ¶ ৰিপুলং ফলমেতেসন্তি ৰেহপ্ফলা. সঞ্ঞাৰিরাগভাৰনানিব্বত্তরূপসন্ততিমত্তত্তা নত্থি সঞ্ঞা, তংমুখেন ৰুত্তাৰসেসা অরূপক্খন্ধা চ এতেসন্তি অসঞ্ঞা. তেযেৰ সত্তাতি অসঞ্ঞসত্তা. এতেপি পণীতরতনপভাৰভাসিতেকতলৰাসিনো. সুদ্ধানং ¶ অনাগামিঅরহন্তানমেৰ আৰাসাতি সুদ্ধাৰাসা. অনুনযপটিঘাভাৰতো ৰা সুদ্ধো আৰাসো এতেসন্তি সুদ্ধাৰাসা, তেসং নিৰাসভূমিপি সুদ্ধাৰাসা.

১১. ইমেসু পন পঠমতলৰাসিনো অপ্পকেন কালেন অত্তনো ঠানং ন ৰিজহন্তীতি অৰিহা. দুতিযতলৰাসিনো ন কেনচি তপ্পন্তীতি অতপ্পা. ততিযতলৰাসিনো পরমসুন্দররূপত্তা সুখেন দিস্সন্তীতি সুদস্সা. চতুত্থতলৰাসিনো সুপরিসুদ্ধদস্সনত্তা সুখেন পস্সন্তীতি সুদস্সিনো. পঞ্চমতলৰাসিনো পন উক্কট্ঠসম্পত্তিকত্তা নত্থি এতেসং কনিট্ঠভাৰোতি অকনিট্ঠা.

১২. আকাসানঞ্চাযতনে পৰত্তা পঠমারুপ্পৰিপাকভূতচতুক্খন্ধা এৰ, তেহি পরিচ্ছিন্নওকাসো ৰা আকাসানঞ্চাযতনভূমি. এৰং সেসেসুপি.

১৩. পুথুজ্জনা, সোতাপন্না চ সকদাগামিনো চাপি পুগ্গলা সুদ্ধাৰাসেসু সব্বথা ন লব্ভন্তীতি সম্বন্ধো. পুথুজ্জনাদীনঞ্চ পটিক্খেপেন অনাগামিঅরহন্তানমেৰ তত্থ লাভো ৰুত্তো হোতি.

১৪. সেসট্ঠানেসূতি সুদ্ধাৰাসঅপাযঅসঞ্ঞিৰজ্জিতেসু সেসট্ঠানেসু অরিযা, অনরিযাপি চ লব্ভন্তি.

ভূমিচতুক্কৰণ্ণনা নিট্ঠিতা.

পটিসন্ধিচতুক্কৰণ্ণনা

১৬. ওক্কন্তিক্খণেতি ¶ পটিসন্ধিক্খণে.

১৭. জাতিযা অন্ধো জচ্চন্ধো. কিঞ্চাপি জাতিক্খণে অণ্ডজজলাবুজা সব্বেপি অচক্খুকাৰ ¶ . তথাপি চক্খাদিউপ্পজ্জনারহকালেপি চক্খুপ্পত্তিৰিবন্ধককম্মপ্পটিবাহিতসামত্থিযেন দিন্নপটিসন্ধিনা, ইতরেনপি ৰা কম্মেন অনুপ্পাদেতব্বচক্খুকো সত্তো জচ্চন্ধো নাম. অপরে পন ‘‘জচ্চন্ধোতি পসূতিযংযেৰ অন্ধো, মাতুকুচ্ছিযং অন্ধো হুত্ৰা নিক্খন্তোতি অত্থো, তেন দুহেতুকতিহেতুকানং মাতুকুচ্ছিযং চক্খুস্স অৰিপজ্জনং সিদ্ধ’’ন্তি ৰদন্তি. জচ্চন্ধাদীনন্তি এত্থ আদিগ্গহণেন জচ্চবধিরজচ্চমূগজচ্চজল়জচ্চুম্মত্তকপণ্ডকউভতোব্যঞ্জনকনপুংসকমম্মাদীনং সঙ্গহো. অপরে পন ‘‘একচ্চে অহেতুকপটিসন্ধিকা অৰিকলিন্দ্রিযা হুত্ৰা থোকং ৰিচারণপকতিকা হোন্তি, তাদিসানম্পি আদিসদ্দেন সঙ্গহো’’তি ৰদন্তি. ভুম্মদেৰে সিতা নিস্সিতা তগ্গতিকত্তাতি ভুম্মস্সিতা. সুখসমুস্সযতো ৰিনিপাতাতি ৰিনিপাতিকা.

১৮. সব্বত্থাপি কামসুগতিযন্তি দেৰমনুস্সৰসেন সত্তৰিধাযপি কামসুগতিযং.

২১. তেসূতি যথাৰুত্তপটিসন্ধিযুত্তেসু পুগ্গলেসু, অপাযাদীসু ৰা. আযুপ্পমাণগণনায নিযমো নত্থি কেসঞ্চি চিরাযুকত্তা, কেসঞ্চি চিরতরাযুকত্তা চ. তথাচাহু –

‘‘আপাযিকমনুস্সাযু-

পরিচ্ছেদো ন ৰিজ্জতি;

তথা হি কালো মন্ধাতা,

যক্খা কেচি চিরাযুনো’’তি. –

অপাযেসু ¶ হি কম্মমেৰ পমাণং, তত্থ নিব্বত্তানং যাৰ কম্মং নখীযতি. তাৰ চৰনাভাৰতো, তথা ভুম্মদেৰানং. তেসুপি হি নিব্বত্তা কেচি সত্তাহাদিকালং তিট্ঠন্তি, কেচি কপ্পমত্তম্পি, তথা মনুস্সানম্পি কদাচি তেসম্পি অসঙ্খ্যেয্যাযুকত্তা কদাচি দসৰস্সাযুকত্তা. ‘‘যো চিরং জীৰতি, সো ৰস্সসতং জীৰতি, অপ্পং ৰা ভিয্যো (দী. নি. ২.৭; সং. নি. ১.১৪৫; অ. নি. ৭.৭৪), দুতিযং ৰস্সসতং ন পাপুণাতী’’তি ইদং পন অজ্জতনকালিকে সন্ধায ৰুত্তং.

২২. দিব্বানি পঞ্চৰস্সসতানীতি মনুস্সানং পঞ্ঞাস ৰস্সানি একদিনং, তদনুরূপতো মাসসংৰচ্ছরে ¶ পরিচ্ছিন্দিত্ৰা দিব্বপ্পমাণানি পঞ্চৰস্সসতানি আযুপ্পমাণং হোতি. ৰুত্তম্পি চেতং –

‘‘যানি পঞ্ঞাস ৰস্সানি, মনুস্সানং দিনো তহিং;

তিংসরত্তিদিৰো মাসো, মাসা দ্ৰাদস সংৰচ্ছরং;

তেন সংৰচ্ছরেনাযু, দিব্বং পঞ্চসতং মত’’ন্তি.

মনুস্সগণনাযাতি মনুস্সানং সংৰচ্ছরগণনায. ততো চতুগ্গুণন্তি চাতুমহারাজিকানং পঞ্ঞাসমানুস্সকৰস্সপরিমিতং দিৰসং, দিব্বানি চ পঞ্চৰস্সসতানি দিগুণং কত্ৰা দিব্বৰস্সসহস্সানি তাৰতিংসানং সম্ভৰতীতি এৰং দিৰসসংৰচ্ছরদিগুণৰসেন চতুগ্গুণং, তং পন দিব্বগণনায ৰস্সসহস্সং, মনুস্সগণনায সট্ঠিৰস্সসতসহস্সাধিকতিকোটিপ্পমাণং হোতি. ততো চতুগ্গুণং যামানন্তি তাৰতিংসানমাযুপ্পমাণতো ৰুত্তনযেন চতুগ্গুণং, দিব্বগণনায দ্ৰিসহস্সং, মনুস্সগণনায চত্তালীসৰস্সসতসহস্সাধিকা চুদ্দস ৰস্সকোটিযো হোন্তি. ততো চতুগ্গুণং তুসিতানন্তি দিব্বানি চত্তারি ৰস্সসহস্সানি, মনুস্সগণনায সট্ঠিৰস্সসতসহস্সাধিকা সত্তপঞ্ঞাস ¶ ৰস্সকোটিযো. ততো চতুগ্গুণং নিম্মানরতীনন্তি দিব্বানি অট্ঠৰস্সসহস্সানি, মনুস্সগণনায দ্ৰে ৰস্সকোটিসতানি চত্তালীসৰস্সসতসহস্সাধিকা তিংস ৰস্সকোটিযো চ. ততো চতুগ্গুণং পরনিম্মিতৰসৰত্তীনন্তি দিব্বানি সোল়স ৰস্সসহস্সানি.

২৩. মনুস্সগণনং পন সযমেৰ দস্সেন্তো আহ ‘‘নৰসতঞ্চা’’ত্যাদি. ৰস্সানং সম্বন্ধি নৰসতং একৰীস কোটিযো, তথা সট্ঠি চ ৰস্সসতসহস্সানি ৰসৰত্তীসু আযুপ্পমাণন্তি সম্বন্ধো.

২৫. দুতিযজ্ঝানভূমিযন্তি চতুক্কনযৰসেন ৰুত্তং. ততো পরং পৰত্তিযং, চৰনকালে চ তথারূপমেৰ ভৰঙ্গচুতিৰসেন পৰত্তিত্ৰা নিরুজ্ঝতীতি যোজনা.

২৯. তেসূতি তাহি গহিতপটিসন্ধিকেসু ব্রহ্মেসু. কপ্পস্সাতি অসঙ্খ্যেয্যকপ্পস্স. ন হি ব্রহ্মপারিসজ্জাদীনং তিণ্ণং মহাকপ্পৰসেন আযুপরিচ্ছেদো সম্ভৰতি এককপ্পেপি তেসং অৰিনাসাভাৰেন ¶ পরিপুণ্ণকপ্পে অসম্ভৰতো. তথা হেস (ৰিসুদ্ধি. ২.৪০৯) লোকো সত্তৰারেসু অগ্গিনা ৰিনস্সতি, অট্ঠমে ৰারে উদকেন, পুন সত্তৰারেসু অগ্গিনা, অট্ঠমে ৰারে উদকেনাতি এৰং অট্ঠসু অট্ঠকেসু পরিপুণ্ণেসু পচ্ছিমে ৰারে ৰাতেন ৰিনস্সতি. তত্থ পঠমজ্ঝানতলং উপাদায অগ্গিনা, দুতিযততিযজ্ঝানতলং উপাদায উদকেন, চতুত্থজ্ঝানতলং উপাদায ৰাতেন ৰিনস্সতি. ৰুত্তম্পি চেতং –

‘‘সত্ত সত্তগ্গিনা ৰারা, অট্ঠমে অট্ঠমে দকা;

চতুসট্ঠি যদা পুণ্ণা, একো ৰাযুৰরো সিযা.

‘‘অগ্গিনাভস্সরা ¶ হেট্ঠা, আপেন সুভকিণ্হতো;

ৰেহপ্ফলতো ৰাতেন, এৰং লোকো ৰিনস্সতী’’তি. –

তস্মা তিণ্ণম্পি পঠমজ্ঝানতলানং এককপ্পেপি অৰিনাসাভাৰতো সকলকপ্পে তেসং সম্ভৰো নত্থীতি অসঙ্খ্যেয্যকপ্পৰসেন তেসং আযুপরিচ্ছেদো দট্ঠব্বো. দুতিযজ্ঝানাদিতলতো পট্ঠায পন পরিপুণ্ণস্স মহাকপ্পস্স ৰসেন, ন অসঙ্খ্যেয্যকপ্পৰসেন. অসঙ্খ্যেয্যকপ্পোতি চ যোজনাযামৰিত্থারতো সেতসাসপরাসিতো ৰস্সসতৰস্সসতচ্চযেন একেকবীজস্স হরণেন সাসপরাসিনো পরিক্খযেপি অক্খযসভাৰস্স মহাকপ্পস্স চতুত্থভাগো. সো পন সত্থরোগদুব্ভিক্খানং অঞ্ঞতরসংৰট্টেন বহূসু ৰিনাসমুপগতেসু অৰসিট্ঠসত্তসন্তানপ্পৰত্তকুসলকম্মানুভাৰেন দসৰস্সতো পট্ঠায অনুক্কমেন অসঙ্খ্যেয্যাযুকপ্পমাণেসু সত্তেসু পুন অসদ্ধম্মসমাদানৰসেন কমেন পরিহাযিত্ৰা দসৰস্সাযুকেসু জাতেসু রোগাদীনং অঞ্ঞতরসংৰট্টেন সত্তানং ৰিনাসপ্পত্তিযাৰ ‘‘অযমেকো অন্তরকপ্পো’’তি এৰং পরিচ্ছিন্নস্স অন্তরকপ্পস্স ৰসেন চতুসট্ঠিঅন্তরকপ্পপ্পমাণো হোতি, ‘‘ৰীসতিঅন্তরকপ্পপ্পমাণো’’তি চ ৰদন্তি.

৪৫. আকাসানঞ্চাযতনং উপগচ্ছন্তীতি আকাসানঞ্চাযতনূপগা.

৪৯. একমেৰাতি ভূমিতো, জাতিতো, সম্পযুত্তধম্মতো, সঙ্খারতো চ সমানমেৰ. একজাতিযন্তি একস্মিং ভৰে.

পটিসন্ধিচতুক্কৰণ্ণনা নিট্ঠিতা.

কম্মচতুক্কৰণ্ণনা

৫০. ইদানি ¶ ¶ কম্মচতুক্কং চতূহাকারেহি দস্সেতুং ‘‘জনক’’ন্ত্যাদি আরদ্ধং, জনযতীতি জনকং. উপত্থম্ভেতীতি উপত্থম্ভকং. উপগন্ত্ৰা পীল়েতীতি উপপীল়কং. উপগন্ত্ৰা ঘাতেতীতি উপঘাতকং.

তত্থ পটিসন্ধিপৰত্তীসু ৰিপাককটত্তারূপানং নিব্বত্তকা কুসলাকুসলচেতনা জনকং নাম. সযং ৰিপাকং নিব্বত্তেতুং অসক্কোন্তম্পি কম্মন্তরস্স চিরতরৰিপাকনিব্বত্তনে পচ্চযভূতং, ৰিপাকস্সেৰ ৰা সুখদুক্খভূতস্স ৰিচ্ছেদপচ্চযানুপ্পত্তিযা, উপব্রূহনপচ্চযুপ্পত্তিযা চ জনকসামত্থিযানুরূপং চিরতরপ্পৰত্তিপচ্চযভূতং কুসলাকুসলকম্মং উপত্থম্ভকং নাম. কম্মন্তরজনিতৰিপাকস্স ব্যাধিধাতুসমতাদিনিমিত্তৰিবাধনেন চিরতরপ্পৰত্তিৰিনিবন্ধকং যং কিঞ্চি কম্মং উপপীল়কং নাম. দুব্বলস্স পন কম্মস্স জনকসামত্থিযং উপহচ্চ ৰিচ্ছেদকপচ্চযুপ্পাদনেন তস্স ৰিপাকং পটিবাহিত্ৰা সযং ৰিপাকনিব্বত্তককম্মং উপঘাতকং নাম.

জনকোপঘাতকানঞ্হি অযং ৰিসেসো – জনকং কম্মন্তরস্স ৰিপাকং অনুপচ্ছিন্দিত্ৰাৰ ৰিপাকং জনেতি, উপঘাতকং উপচ্ছেদনপুব্বকন্তি ইদং তাৰ অট্ঠকথাসু (ৰিসুদ্ধি. ২.৬৮৭; অ. নি. অট্ঠ. ২.৩.৩৪) সন্নিট্ঠানং. অপরে পন আচরিযা ‘‘উপপীল়ককম্মং বহ্ৰাবাধতাদিপচ্চযোপসংহারেন কম্মন্তরস্স ৰিপাকং অন্তরন্তরা ৰিবাধতি. উপঘাতকং পন তং সব্বসো উপচ্ছিন্দিত্ৰা অঞ্ঞস্স ওকাসং দেতি, ন পন সযং ৰিপাকনিব্বত্তকং. এৰঞ্হি জনকতো ইমস্স ৰিসেসো সুপাকটো’’তি ৰদন্তি. কিচ্চৰসেনাতি জননউপত্থম্ভনউপপীল়নউপচ্ছেদনকিচ্চৰসেন.

৫১. গরুকন্তি মহাসাৰজ্জং, মহানুভাৰঞ্চ অঞ্ঞেন কম্মেন পটিবাহিতুং অসক্কুণেয্যকম্মং. আসন্নন্তি মরণকালে অনুস্সরিতং, তদা কতঞ্চ. আচিণ্ণন্তি অভিণ্হসো কতং ¶ , একৰারং কত্ৰাপি ৰা অভিণ্হসো সমাসেৰিতং. কটত্তাকম্মন্তি গরুকাদিভাৰং অসম্পত্তং কতমত্ততোযেৰ কম্মন্তি ৰত্তব্বকম্মং.

তত্থ কুসলং ৰা হোতু অকুসলং ৰা, গরুকাগরুকেসু যং গরুকং অকুসলপক্খে মাতুঘাতকাদিকম্মং ¶ , কুসলপক্খে মহগ্গতকম্মং ৰা, তদেৰ পঠমং ৰিপচ্চতি সতিপি আসন্নাদিকম্মে পরিত্তং উদকং ওত্থরিত্ৰা গচ্ছন্তো মহোঘো ৰিয. তথা হি তং ‘‘গরুক’’ন্তি ৰুচ্চতি. তস্মিং অসতি দূরাসন্নেসু যং আসন্নং মরণকালে অনুস্সরিতং, তদেৰ পঠমং ৰিপচ্চতি, আসন্নকালে কতে ৰত্তব্বমেৰ নত্থি. তস্মিম্পি অসতি আচিণ্ণানাচিণ্ণেসু চ যং আচিণ্ণং সুসীল্যং ৰা, দুস্সীল্যং ৰা, তদেৰ পঠমং ৰিপচ্চতি. কটত্তাকম্মং পন লদ্ধাসেৰনং পুরিমানং অভাৰেন পটিসন্ধিং আকড্ঢতীতি গরুকং সব্বপঠমং ৰিপচ্চতি. গরুকে অসতি আসন্নং, তস্মিম্পি অসতি আচিণ্ণং, তস্মিম্পি অসতি কটত্তাকম্মং. তেনাহ ‘‘পাকদানপরিযাযেনা’’তি, ৰিপাকদানানুক্কমেনাত্যত্থো. অভিধম্মাৰতারাদীসু পন আসন্নতো আচিণ্ণং পঠমং ৰিপচ্চন্তং কত্ৰা ৰুত্তং. যথা পন গোগণপরিপুণ্ণস্স ৰজস্স দ্ৰারে ৰিৰটে অপরভাগে দম্মগৰবলৰগৰেসু সন্তেসুপি যো ৰজদ্ৰারস্স আসন্নো হোতি, অন্তমসো দুব্বলজরগ্গৰোপি, সোযেৰ পঠমতরং নিক্খমতি, এৰং গরুকতো অঞ্ঞেসু কুসলাকুসলেসু সন্তেসুপি মরণকালস্স আসন্নত্তা আসন্নমেৰ পঠমং ৰিপাকং দেতীতি ইধ তং পঠমং ৰুত্তং.

৫২. দিট্ঠধম্মো পচ্চক্খভূতো পচ্চুপ্পন্নো অত্তভাৰো, তত্থ ৰেদিতব্বং ৰিপাকানুভৰনৰসেনাতি দিট্ঠধম্মৰেদনীযং. দিট্ঠধম্মতো অনন্তরং উপপজ্জিত্ৰা ৰেদিতব্বং উপপজ্জৰেদনীযং. অপরে অপরে দিট্ঠধম্মতো অঞ্ঞস্মিং যত্থ কত্থচি অত্তভাৰে ৰেদিতব্বং কম্মং অপরাপরিযৰেদনীযং. অহোসি এৰ কম্মং ¶ , ন তস্স ৰিপাকো অহোসি, অত্থি, ভৰিস্সতি চাতি এৰং ৰত্তব্বকম্মং অহোসিকম্মং.

তত্থ পটিপক্খেহি অনভিভূততায, পচ্চযৰিসেসেন পটিলদ্ধৰিসেসতায চ বলৰভাৰপ্পত্তা তাদিসস্স পুব্বাভিসঙ্খারস্স ৰসেন সাতিসযা হুত্ৰা তস্মিংযেৰ অত্তভাৰে ফলদাযিনী পঠমজৰনচেতনা দিট্ঠধম্মৰেদনীযং নাম. সা হি ৰুত্তপ্পকারেন বলৰজনসন্তানে গুণৰিসেসযুত্তেসু উপকারানুপকারৰসপ্পৰত্তিযা, আসেৰনালাভেন অপ্পৰিপাকতায চ ইতরদ্ৰযং ৰিয পৰত্তসন্তানুপরমাপেক্খং, ওকাসলাভাপেক্খঞ্চ কম্মং ন হোতীতি ইধেৰ পুপ্ফমত্তং ৰিয পৰত্তিৰিপাকমত্তং অহেতুকফলং দেতি. অত্থসাধিকা পন সত্তমজৰনচেতনা সন্নিট্ঠাপকচেতনাভূতা ৰুত্তনযেন পটিলদ্ধৰিসেসা অনন্তরত্তভাৰে ৰিপাকদাযিনী উপপজ্জৰেদনীযং নাম. সা চ পটিসন্ধিং দত্ৰাৰ পৰত্তিৰিপাকং দেতি. পটিসন্ধিযা ¶ পন অদিন্নায পৰত্তিৰিপাকং দেতীতি নত্থি. চুতি অনন্তরঞ্হি উপপজ্জৰেদনীযস্স ওকাসো. পটিসন্ধিযা পন দিন্নায জাতিসতেপি পৰত্তিৰিপাকং দেতীতি আচরিযা. যথাৰুত্তকআরণৰিরহতো দিট্ঠধম্মৰেদনীযাদিভাৰং অসম্পত্তা আদিপরিযোসানচেতনানং মজ্ঝে পৰত্তা পঞ্চ চেতনা ৰিপাকদানসভাৰস্স অনুপচ্ছিন্নত্তা যদা কদাচি ওকাসলাভে সতি পটিসন্ধিপৰত্তীসু ৰিপাকং অভিনিপ্ফাদেন্তী অপরাপরিযৰেদনিযং নাম. সকসককালাতীতং পন পুরিমকম্মদ্ৰযং, ততিযম্পি চ সংসারপ্পৰত্তিযা ৰোচ্ছিন্নায অহোসিকম্মং নাম.

পাককালৰসেনাতি পচ্চুপ্পন্নে, তদনন্তরে, যদা কদাচীতি এৰং পুরিমানং তিণ্ণং যথাপরিচ্ছিন্নকালৰসেন, ইতরস্স তংকালাভাৰৰসেন চ. অহোসিকম্মস্স হি কালাতিক্কমতোৰ তং ৰোহারো.

৫৩. পাকঠানৰসেনাতি ¶ পটিসন্ধিযা ৰিপচ্চনভূমিৰসেন.

৫৪. ইদানি অকুসলাদিকম্মানং কাযকম্মদ্ৰারাদিৰসেন পৰত্তিং, তংনিদ্দেসমুখেন চ তেসং পাণাতিপাতাদিৰসেন দসৰিধাদিভেদঞ্চ দস্সেতুং ‘‘তত্থ অকুসল’’ন্ত্যাদি আরদ্ধং. কাযদ্ৰারে পৰত্তং কম্মং কাযকম্মং. এৰং ৰচীকম্মাদীনি.

৫৫. পাণস্স সণিকং পতিতুং অদত্ৰা অতীৰ পাতনং পাণাতিপাতো. কাযৰাচাহি অদিন্নস্স আদানং অদিন্নাদানং. মেথুনৰীতিক্কমসঙ্খাতেসু কামেসু মিচ্ছা চরণং কামেসু মিচ্ছাচারো.

তত্থ পাণোতি ৰোহারতো সত্তো, পরমত্থতো জীৰিতিন্দ্রিযং. তস্মিং পাণে পাণসঞ্ঞিনো জীৰিতিন্দ্রিযুপচ্ছেদকপ্পযোগসমুট্ঠাপিকা ৰধকচেতনা পাণাতিপাতো. পরভণ্ডে তথাসঞ্ঞিনো তদাদাযকপ্পযোগসমুট্ঠাপিকা থেয্যচেতনা অদিন্নাদানং. অসদ্ধম্মসেৰনৰসেন কাযদ্ৰারপ্পৰত্তা অগন্তব্বট্ঠানৰীতিক্কমচেতনা কামেসুমিচ্ছাচারো নাম. সুরাপানম্পি এত্থেৰ সঙ্গয্হতীতি ৰদন্তি রসসঙ্খাতেসু কামেসু মিচ্ছাচারভাৰতো. কাযৰিঞ্ঞত্তিসঙ্খাতে কাযদ্ৰারেতি কাযেন অধিপ্পাযৰিঞ্ঞাপনতো, সযঞ্চ কাযেন ৰিঞ্ঞেয্যত্তা কাযৰিঞ্ঞত্তিসঙ্খাতে অভিক্কমাদিজনকচিত্তজৰাযোধাত্ৰাধিককলাপস্স ৰিকারভূতে সন্থম্ভনাদীনং সহকারীকারণভূতে চোপনকাযভাৰতো, কম্মানং পৰত্তিমুখভাৰতো চ কাযদ্ৰারসঙ্খাতে কম্মদ্ৰারে.

কিঞ্চাপি ¶ হি তংতংকম্মসহগতচিত্তুপ্পাদেনেৰ সা ৰিঞ্ঞত্তি জনীযতি. তথাপি তস্সা তথা পৰত্তমানায তংসমুট্ঠাপককম্মস্স কাযকম্মাদিৰোহারো হোতীতি সা তস্সেৰ পৰত্তিমুখভাৰেন ৰত্তুং লব্ভতি. ‘‘কাযদ্ৰারে ৰুত্তিতো’’তি ¶ এত্তকেযেৰ ৰুত্তে ‘‘যদি এৰং কম্মদ্ৰারৰৰত্থানং ন সিযা. কাযদ্ৰারে হি পৰত্তং ‘কাযকম্ম’ন্তি ৰুচ্চতি, কাযকম্মস্স চ পৰত্তিমুখভূতং ‘কাযদ্ৰার’ন্তি. পাণাতিপাতাদিকং পন ৰাচায আণাপেন্তস্স কাযকম্মং ৰচীদ্ৰারেপি পৰত্ততীতি দ্ৰারেন কম্মৰৰত্থানং ন সিযা, তথা মুসাৰাদাদিং কাযৰিকারেন করোন্তস্স ৰচীকম্মং কাযদ্ৰারেপি পৰত্ততীতি কম্মেন দ্ৰারৰৰত্থানম্পি ন সিযা’’তি অযং চোদনা পচ্চুপট্ঠেয্যাতি বাহুল্লৰুত্তিযা ৰৰত্থানং দস্সেতুং ‘‘বাহুল্লৰুত্তিতো’’তি ৰুত্তং. কাযকম্মঞ্হি কাযদ্ৰারেযেৰ বহুলং পৰত্ততি, অপ্পং ৰচীদ্ৰারে, তস্মা কাযদ্ৰারেযেৰ বহুলং পৰত্তনতো কাযকম্মভাৰো সিদ্ধো ৰনচরকাদীনং ৰনচরকাদিভাৰো ৰিয. তথা কাযকম্মমেৰ যেভুয্যেন কাযদ্ৰারে পৰত্ততি, ন ইতরানি, তস্মা কাযকম্মস্স যেভুয্যেন এত্থেৰ পৰত্তনতো কাযকম্মদ্ৰারভাৰো সিদ্ধো ব্রাহ্মণগামাদীনং ব্রাহ্মণগামাদিভাৰো ৰিযাতি নত্থি কম্মদ্ৰারৰৰত্থানে কোচি ৰিবন্ধোতি অযমেত্থাধিপ্পাযো.

৫৬. মুসাতি অভূতং ৰত্থু, তং তচ্ছতো ৰদন্তি এতেনাতি মুসাৰাদো. পিসতি সামগ্গিং সঞ্চুণ্ণেতি ৰিক্খিপতি, পিযভাৰং সুঞ্ঞং করোতীতি ৰা পিসুণা. অত্তানম্পি পরম্পি ফরুসং করোতি, ককচো ৰিয খরসম্ফস্সাতি ৰা ফরুসা. সং সুখং, হিতঞ্চ ফলতি ৰিসরতি ৰিনাসেতীতি সম্ফং, অত্তনো, পরেসঞ্চ অনুপকারং যং কিঞ্চি, তং পলপতি এতেনাতি সম্ফপ্পলাপো.

তত্থ অভূতং ৰত্থুং ভূততো পরং ৰিঞ্ঞাপেতুকামস্স তথা ৰিঞ্ঞাপনপ্পযোগসমুট্ঠাপিকা চেতনা মুসাৰাদো. সো পরস্স অত্থভেদকরোৰ কম্মপথো হোতি, ইতরো ¶ কম্মমেৰ. পরেসং ভেদকামতায, অত্তপ্পিযকামতায ৰা পরভেদকরৰচীপযোগসমুট্ঠাপিকা সংকিলিট্ঠচেতনা পিসুণৰাচা, সাপি দ্ৰীসু ভিন্নেসুযেৰ কম্মপথো. পরস্স মম্মচ্ছেদকরৰচীপযোগসমুট্ঠাপিকা একন্তফরুসচেতনা ফরুসৰাচা. ন হি চিত্তসণ্হতায সতি ফরুসৰাচা নাম হোতি. সীতাহরণাদিঅনত্থৰিঞ্ঞাপনপ্পযোগসমুট্ঠাপিকা সংকিলিট্ঠচেতনা সম্ফপ্পলাপো, সো পন পরেহি তস্মিং অনত্থে গহিতেযেৰ কম্মপথো. ৰচীৰিঞ্ঞত্তিসঙ্খাতে ৰচীদ্ৰারেতি ৰাচায অধিপ্পাযং ৰিঞ্ঞাপেতি, সযঞ্চ ৰাচায ৰিঞ্ঞাযতীতি ৰচীৰিঞ্ঞত্তিসঙ্খাতে ৰচীভেদকরপ্পযোগসমুট্ঠাপকচিত্তসমুট্ঠানপথৰীধাত্ৰাধিককলাপস্স ¶ ৰিকারভূতে চোপনৰাচাভাৰতো, কম্মানং পৰত্তিমুখভাৰতো চ ৰচীদ্ৰারসঙ্খাতে কম্মদ্ৰারে. বাহুল্লৰুত্তিতোতি ইদং ৰুত্তনযমেৰ.

৫৭. পরসম্পত্তিং অভিমুখং ঝাযতি লোভৰসেন চিন্তেতীতি অভিজ্ঝা. ব্যাপজ্জতি হিতসুখং এতেনাতি ব্যাপাদো. মিচ্ছা ৰিপরীততো পস্সতীতি মিচ্ছাদিট্ঠি.

তত্থ ‘‘অহো ৰত ইদং মম সিযা’’তি এৰং পরভণ্ডাভিজ্ঝাযনং অভিজ্ঝা, সা পরভণ্ডস্স অত্তনো নামনেনেৰ কম্মপথো হোতি. ‘‘অহো ৰতাযং সত্তো ৰিনস্সেয্যা’’তি এৰং মনোপদোসো ব্যাপাদো. ‘‘নত্থি দিন্ন’’ন্ত্যাদিনা নযেন ৰিপরীতদস্সনং মিচ্ছাদিট্ঠি. এত্থ পন নত্থিকঅহেতুকঅকিরিযদিট্ঠীহিযেৰ কম্মপথভেদো. ইমেসং পন অঙ্গাদিৰৰত্থানৰসেন পপঞ্চো তত্থ তত্থ (দী. নি. অট্ঠ. ১.৮; ধ. স. অট্ঠ. ১ অকুসলকম্মপথকথা; পারা. অট্ঠ. ২.১৭২) আগতনযেন দট্ঠব্বো. অঞ্ঞত্রাপি ৰিঞ্ঞত্তিযাতি কাযৰচীৰিঞ্ঞত্তিং ৰিনাপি, তং অসমুট্ঠাপেত্ৰাপীত্যত্থো. ৰিঞ্ঞত্তিসমুট্ঠাপকচিত্তসম্পযুত্তা চেত্থ অভিজ্ঝাদযো চেতনাপক্খিকাৰ হোন্তি.

৫৮. দোসমূলেন ¶ জাযন্তীতি সহজাতাদিপচ্চযেন দোসসঙ্খাতমূলেন, দোসমূলকচিত্তেন ৰা জাযন্তি, ন লোভমূলাদীহি. হসমানাপি হি রাজানো দোসচিত্তেনেৰ পাণৰধং আণাপেন্তি, তথা ফরুসৰাচাব্যাপাদেসুপি যথারহং দট্ঠব্বং. মিচ্ছাদস্সনস্স অভিনিৰিসিতব্বৰত্থূসু লোভপুব্বঙ্গমমেৰ অভিনিৰিসনতো আহ ‘‘মিচ্ছাদিট্ঠি চ লোভমূলেনা’’তি. সেসানি চত্তারিপি দ্ৰীহি মূলেহি সম্ভৰন্তীতি যো তাৰ অভিমতং ৰত্থুং, অনভিমতং ৰা অত্তবন্ধুপরিত্তাণাদিপ্পযোজনং সন্ধায হরতি, তস্স অদিন্নাদানং লোভমূলেন হোতি. ৰেরনিয্যাতনত্থং হরন্তস্স দোসমূলেন. নীতিপাঠকপ্পমাণতো দুট্ঠনিগ্গহণত্থং পরসন্তকং হরন্তানং রাজূনং, ব্রাহ্মণানঞ্চ ‘‘সব্বমিদং ব্রাহ্মণানং রাজূহি দিন্নং, তেসং পন সব্বদুব্বলভাৰেন অঞ্ঞে পরিভুঞ্জন্তি, অত্তসন্তকমেৰ ব্রাহ্মণা পরিভুঞ্জন্তী’’ত্যাদীনি ৰত্ৰা সকসঞ্ঞায এৰং যং কিঞ্চি হরন্তানং, কম্মফলসম্বন্ধাপৰাদীনঞ্চ মোহমূলেন. এৰং মুসাৰাদাদীসুপি যথারহং যোজেতব্বং.

৬৩. ছসু আরম্মণেসু তিৰিধকম্মৰসেন উপ্পজ্জমানম্পেতং তিৰিধনিযমেন উপ্পজ্জতীতি আহ ‘‘তথা দানসীলভাৰনাৰসেনা’’তি. দসধা নিদ্দিসিযমানানং হি দ্ৰিন্নং, পুন দ্ৰিন্নং, তিণ্ণঞ্চ ¶ যথাক্কমং দানাদীসু তীস্ৰেৰ সঙ্গহো. কারণং পনেত্থ পরতো ৰক্খাম. ছল়ারম্মণেসু পন তিৰিধকম্মদ্ৰারেসু চ নেসং পৰত্তিযোজনা অট্ঠকথাদীসু (ধ. স. অট্ঠ. ১৫৬-১৫৯) আগতনযেন গহেতব্বা.

৬৫. দীযতি এতেনাতি দানং, পরিচ্চাগচেতনা. এৰং সেসেসুপি. সীলতীতি সীলং, কাযৰচীকম্মানি সমাদহতি, সম্মা ঠপেতীত্যত্থো, সীলযতি ৰা উপধারেতীতি সীলং ¶ , উপধারণং পনেত্থ কুসলানং অধিট্ঠানভাৰো. তথা হি ৰুত্তং ‘‘সীলে পতিট্ঠাযা’’ত্যাদি (সং. নি. ১.২৩, ১৯২). ভাৰেতি কুসলে ধম্মে আসেৰতি ৰড্ঢেতি এতাযাতি ভাৰনা. অপচাযতি পূজাৰসেন সামীচিং করোতি এতেনাতি অপচাযনং. তংতংকিচ্চকরণে ব্যাৰটস্স ভাৰো ৰেয্যাৰচ্চং. অত্তনো সন্তানে নিব্বত্তা পত্তি দীযতি এতেনাতি পত্তিদানং. পত্তিং অনুমোদতি এতাযাতি পত্তানুমোদনা. ধম্মং সুণন্তি এতেনাতি ধম্মস্সৰনং. ধম্মং দেসেন্তি এতাযাতি ধম্মদেসনা. দিট্ঠিযা উজুকরণং দিট্ঠিজুকম্মং.

তত্থ সানুসযসন্তানৰতো পরেসং পূজানুগ্গহকামতায অত্তনো ৰিজ্জমানৰত্থুপরিচ্চজনৰসপ্পৰত্তচেতনা দানং নাম, দানৰত্থুপরিযেসনৰসেন, দিন্নস্স সোমনস্সচিত্তেন অনুস্সরণৰসেন চ পৰত্তা পুব্বপচ্ছাভাগচেতনা এত্থেৰ সমোধানং গচ্ছন্তি. এৰং সেসেসুপি যথারহং দট্ঠব্বং. নিচ্চসীলাদিৰসেন পঞ্চ, অট্ঠ, দস ৰা সীলানি সমাদিযন্তস্স, পরিপূরেন্তস্স, অসমাদিযিত্ৰাপি সম্পত্তকাযৰচীদুচ্চরিততো ৰিরমন্তস্স, পব্বজন্তস্স, উপসম্পদমাল়কে সংৰরং সমাদিযন্তস্স, চতুপারিসুদ্ধিসীলং পরিপূরেন্তস্স চ পৰত্তচেতনা সীলং নাম. চত্তালীসায কম্মট্ঠানেসু, খন্ধাদীসু চ ভূমীসু পরিকম্মসম্মসনৰসপ্পৰত্তা অপ্পনং অপ্পত্তা গোত্রভুপরিযোসানচেতনা ভাৰনা নাম, নিরৰজ্জৰিজ্জাদিপরিযাপুণনচেতনাপি এত্থেৰ সমোধানং গচ্ছতি.

ৰযসা, গুণেহি চ জেট্ঠানং চীৰরাদীসু পচ্চাসারহিতেন অসংকিলিট্ঠজ্ঝাসযেন পচ্চুট্ঠানআসনাভিনীহারাদিৰিধিনা বহুমানকরণচেতনা অপচাযনং নাম. তেসমেৰ, গিলানানঞ্চ যথাৰুত্তজ্ঝাসযেন তংতংকিচ্চকরণচেতনা ৰেয্যাৰচ্চং নাম. অত্তনো সন্তানে নিব্বত্তস্স পুঞ্ঞস্স পরেহি ¶ সাধারণভাৰং পচ্চাসীসনচেতনা পত্তিদানং নাম. পরেহি দিন্নস্স, অদিন্নস্সপি ৰা পুঞ্ঞস্স মচ্ছেরমলৰিনিস্সটেন চিত্তেন অব্ভানুমোদনচেতনা পত্তানুমোদনা নাম ¶ . এৰমিমং ধম্মং সুত্ৰা তত্থ ৰুত্তনযেন পটিপজ্জন্তো ‘‘লোকিযলোকুত্তরগুণৰিসেসস্স ভাগী ভৰিস্সামি, বহুস্সুতো ৰা হুত্ৰা পরেসং ধম্মদেসনাদীহি অনুগ্গণ্হিস্সামী’’তি এৰং অত্তনো, পরেসং ৰা হিতফরণৰসপ্পৰত্তেন অসংকিলিট্ঠজ্ঝাসযেন হিতূপদেসসৰনচেতনা ধম্মস্সৰনং নাম, নিরৰজ্জৰিজ্জাদিসৰনচেতনাপি এত্থেৰ সঙ্গয্হতি. লাভসক্কারাদিনিরপেক্খতায যোনিসো মনসি করোতো হিতূপদেসচেতনা ধম্মদেসনা নাম, নিরৰজ্জৰিজ্জাদিউপদিসনচেতনাপি এত্থেৰ সঙ্গহং গচ্ছতি. ‘‘অত্থি দিন্ন’’ন্ত্যাদিনযপ্পৰত্তসম্মাদস্সনৰসেন দিট্ঠিযা উজুকরণং দিট্ঠিজুকম্মং নাম.

যদি এৰং ঞাণৰিপ্পযুত্তচিত্তুপ্পাদস্স দিট্ঠিজুকম্মপুঞ্ঞকিরিযভাৰো ন লব্ভতীতি? নো ন লব্ভতি পুরিমপচ্ছিমচেতনানম্পি তংতংপুঞ্ঞকিরিযাস্ৰেৰ সঙ্গণ্হনতো. কিঞ্চাপি হি উজুকরণৰেলাযং ঞাণসম্পযুত্তমেৰ চিত্তং হোতি, পুরিমপচ্ছাভাগে পন ঞাণৰিপ্পযুত্তম্পি সম্ভৰতীতি তস্সপি দিট্ঠিজুকম্মভাৰো উপপজ্জতীতি অলমতিপ্পপঞ্চেন.

ইমেসু পন দসসু পত্তিদানানুমোদনা দানে সঙ্গহং গচ্ছন্তি তংসভাৰত্তা. দানম্পি হি ইস্সামচ্ছেরানং পটিপক্খং, এতেপি. তস্মা সমানপ্পটিপক্খতায একলক্খণত্তা তে দানমযপুঞ্ঞকিরিযৰত্থুম্হি সঙ্গয্হন্তি. অপচাযনৰেয্যাৰচ্চাসীলমযপুঞ্ঞেৰ সঙ্গয্হন্তি চারিত্তসীলভাৰতো. দেসনাসৰনদিট্ঠিজুকা পন কুসলধম্মাসেৰনভাৰতো ভাৰনামযে সঙ্গহং গচ্ছন্তীতি (দী. নি. টী. ৩.৩০৫) আচরিযধম্মপালত্থেরেন ৰুত্তং. অপরে পন ‘‘দেসেন্তো, সুণন্তো চ দেসনানুসারেন ঞাণং ¶ পেসেত্ৰা লক্খণানি পটিৰিজ্ঝ পটিৰিজ্ঝ দেসেতি, সুণাতি চ, তানি চ দেসনাসৰনানি পটিৰেধমেৰাহরন্তীতি দেসনাসৰনাভাৰনামযে সঙ্গহং গচ্ছন্তী’’তি ৰদন্তি. ধম্মদানসভাৰতো দেসনা দানমযে সঙ্গহং গচ্ছতীতিপি সক্কা ৰত্তুং. তথা হি ৰুত্তং ‘‘সব্বদানং ধম্মদানং জিনাতী’’তি (ধ. প. ৩৫৪). তথা দিট্ঠিজুকম্মং সব্বত্থাপি সব্বেসং নিযমনলক্খণত্তা. দানাদীসু হি যং কিঞ্চি ‘‘অত্থি দিন্ন’’ন্ত্যাদিনযপ্পৰত্তায সম্মাদিট্ঠিযা ৰিসোধিতং মহপ্ফলং হোতি মহানিসংসং, এৰঞ্চ কত্ৰা দীঘনিকাযট্ঠকথাযং (দী. নি. অট্ঠ. ৩.৩০৫; ধ. স. অট্ঠ. ১৫৬-১৫৯ পুঞ্ঞাকিরিযৰত্থাদিকথা) ‘‘দিট্ঠিজুকম্মং সব্বেসং নিযমলক্খণ’’ন্তি ৰুত্তং. এৰং দানসীলভাৰনাৰসেন তীসু ইতরেসং সঙ্গণ্হনতো সঙ্খেপতো তিৰিধমেৰ পুঞ্ঞকিরিযৰত্থু হোতীতি দট্ঠব্বং, তথা চেৰ আচরিযেন হেট্ঠা দস্সিতং.

৬৭. মনোকম্মমেৰ ¶ ৰিঞ্ঞত্তিসমুট্ঠাপকত্তাভাৰেন কাযদ্ৰারাদীসু অপ্পৰত্তনতো. তঞ্চ রূপাৰচরকুসলং ভাৰনামযং দানাদিৰসেন অপ্পৰত্তনতো. অপ্পনাপ্পত্তং পুব্বভাগপ্পৰত্তানং কামাৰচরভাৰতো. ঝানঙ্গভেদেনাতি পটিপদাদিভেদতো অনেকৰিধত্তেপি অঙ্গাতিক্কমৰসেন নিব্বত্তজ্ঝানঙ্গভেদতো পঞ্চৰিধং হোতি.

৬৮. আরম্মণভেদেনাতি কসিণুগ্ঘাটিমাকাসং, আকাসৰিসযং মনো, তদভাৰো, তদালম্বং ৰিঞ্ঞাণন্তি চতুব্বিধন্তি ইমেসং চতুন্নং আরম্মণানং ভেদেন.

৬৯. এত্থাতি ইমেসু পাকট্ঠানৰসেন চতুব্বিধেসু কম্মেসু. উদ্ধচ্চরহিতন্তি উদ্ধচ্চসহগতচেতনারহিতং একাদসৰিধং অকুসলকম্মং. কিং পনেত্থ কারণং অধিমোক্খৰিরহেন সব্বদুব্বলম্পি ৰিচিকিচ্ছাসহগতং পটিসন্ধিং আকড্ঢতি, অধিমোক্খসম্পযোগেন ততো বলৰন্তম্পি উদ্ধচ্চসহগতং নাকড্ঢতীতি ¶ ? পটিসন্ধিদানসভাৰাভাৰতো. বলৰং আকড্ঢতি, দুব্বলং নাকড্ঢতীতি হি অযং ৰিচারণা পটিসন্ধিদানসভাৰেসুযেৰ. যস্স পন পটিসন্ধিদানসভাৰোযেৰ নত্থি, ন তস্স বলৰভাৰো পটিসন্ধিআকড্ঢনে কারণং.

কথং পনেতং ৰিঞ্ঞাতব্বং উদ্ধচ্চসহগতস্স পটিসন্ধিদানসভাৰো নত্থীতি? দস্সনেনপহাতব্বেসু অনাগতত্তা. তিৰিধা হি অকুসলা দস্সনেন পহাতব্বা, ভাৰনায পহাতব্বা, সিযা দস্সনেন পহাতব্বা, সিযা ভাৰনায পহাতব্বাতি. তত্থ দিট্ঠিসহগতৰিচিকিচ্ছাসহগতচিত্তুপ্পাদা দস্সনেন পহাতব্বা নাম পঠমং নিব্বানদস্সনৰসেন ‘‘দস্সন’’ন্তি লদ্ধনামেন সোতাপত্তিমগ্গেন পহাতব্বত্তা. উদ্ধচ্চসহগতচিত্তুপ্পাদো ভাৰনায পহাতব্বো নাম অগ্গমগ্গেন পহাতব্বত্তা. উপরিমগ্গত্তযঞ্হি পঠমমগ্গেন দিট্ঠনিব্বানে ভাৰনাৰসেন পৰত্তনতো ‘‘ভাৰনা’’তি ৰুচ্চতি. দিট্ঠিৰিপ্পযুত্তদোমনস্সসহগতচিত্তুপ্পাদা পন সিযা দস্সনেন পহাতব্বা, সিযা ভাৰনায পহাতব্বা তেসং অপাযনিব্বত্তকাৰত্থায পঠমমগ্গেন, সেসবহলাবহলাৰত্থায উপরিমগ্গেহি পহীযমানত্তা. তত্থ সিযা দস্সনেন পহাতব্বম্পি দস্সনেন পহাতব্বসামঞ্ঞেন ইধ ‘‘দস্সনেন পহাতব্ব’’ন্তি ৰোহরন্তি.

যদি চ উদ্ধচ্চসহগতং পটিসন্ধিং দদেয্য, তদা অকুসলপটিসন্ধিযা সুগতিযং অসম্ভৰতো অপাযেস্ৰেৰ দদেয্য. অপাযগমনীযঞ্চ অৰস্সং দস্সনেন পহাতব্বং সিযা. ইতরথা ¶ অপাযগমনীযস্স অপ্পহীনত্তা সেক্খানং অপাযুপ্পত্তি আপজ্জতি, ন চ পনেতং যুত্তং ‘‘চতূহপাযেহি চ ৰিপ্পমুত্তো (খু. পা. ৬.১১; সু. নি. ২৩৪), অৰিনিপাতধম্মো’’তি (পারা. ২১; সং. নি. ৫.৯৯৮) আদিৰচনেহি সহ ৰিরুজ্ঝনতো. সতি চ পনেতস্স দস্সনেন পহাতব্বভাৰে ‘‘সিযা দস্সনেন পহাতব্বা’’তি ইমস্স ৰিভঙ্গে ৰত্তব্বং সিযা, ন চ পনেতং ৰুত্তন্তি ¶ . অথ সিযা ‘‘অপাযগামিনিযো রাগো দোসো মোহো তদেকট্ঠা চ কিলেসা’’তি এৰং দস্সনেন পহাতব্বেসু ৰুত্তত্তা উদ্ধচ্চসহগতচেতনায তত্থ সঙ্গহো সক্কা ৰত্তুন্তি. তং ন, তস্স একন্ততো ভাৰনায পহাতব্বভাৰেন ৰুত্তত্তা. ৰুত্তঞ্হেতং – ‘‘কতমে ধম্মা ভাৰনায পহাতব্বা? উদ্ধচ্চসহগতো চিত্তুপ্পাদো’’তি (ধ. স. ১৪০৬), তস্মা দস্সনেন পহাতব্বেসু অৰচনং ইমস্স পটিসন্ধিদানাভাৰং সাধেতি. ননু চ পটিসম্ভিদাৰিভঙ্গে –

‘‘যস্মিং সমযে অকুসলং চিত্তং উপ্পন্নং হোতি উপেক্খাসহগতং উদ্ধচ্চসম্পযুত্তং রূপারম্মণং ৰা…পে… ধম্মারম্মণং ৰা, যং যং ৰা পনারব্ভ তস্মিং সমযে ফস্সো হোতি…পে… অৰিক্খেপো হোতি, ইমে ধম্মা অকুসলা. ইমেসু ধম্মেসু ঞাণং ধম্মপটিসম্ভিদা, তেসং ৰিপাকে ঞাণং অত্থপটিসম্ভিদা’’তি (ৰিভ. ৭৩০-৭৩১) –

এৰং উদ্ধচ্চসহগতচিত্তুপ্পাদং উদ্ধরিত্ৰা তস্স ৰিপাকোপি উদ্ধটোতি কথমস্স পটিসন্ধিদানাভাৰো সম্পটিচ্ছিতব্বোতি? নাযং পটিসন্ধিদানং সন্ধায উদ্ধটো. অথ খো পৰত্তিৰিপাকং সন্ধায. পট্ঠানে পন –

‘‘সহজাতা দস্সনেন পহাতব্বা চেতনা চিত্তসমুট্ঠানানং রূপানং কম্মপচ্চযেন পচ্চযো, নানাক্খণিকা দস্সনেন পহাতব্বা চেতনা ৰিপাকানং খন্ধানং, কটত্তা চ রূপানং কম্মপচ্চযেন পচ্চযো’’তি (পট্ঠা. ২.৮.৮৯) –

দস্সনেন পহাতব্বচেতনায এৰ সহজাতনানাক্খণিককম্মপচ্চযভাৰং উদ্ধরিত্ৰা ‘‘সহজাতা ভাৰনায পহাতব্বা চেতনা চিত্তসমুট্ঠানানং রূপানং কম্মপচ্চযেন পচ্চযো’’তি ¶ (পট্ঠা. ২.৮.৮৯) ভাৰনায পহাতব্বচেতনায সহজাতকম্মপচ্চযভাৰোৰ উদ্ধটো, ন পন নানাক্খণিককম্মপচ্চযভাৰো, ন চ নানাক্খণিককম্মপচ্চযং ৰিনা পটিসন্ধিআকড্ঢনং অত্থি ¶ , তস্মা নত্থি তস্স সব্বথাপি পটিসন্ধিদানন্তি. যং পনেকে ৰদন্তি ‘‘উদ্ধচ্চচেতনা উভযৰিপাকম্পি ন দেতি পট্ঠানে নানাক্খণিককম্মপচ্চযভাৰস্স অনুদ্ধটত্তা’’তি, তং তেসং মতিমত্তং পটিসম্ভিদাৰিভঙ্গে উদ্ধচ্চসহগতানম্পি পৰত্তিৰিপাকস্স উদ্ধটত্তা, পট্ঠানে চ পটিসন্ধিৰিপাকভাৰমেৰ সন্ধায নানাক্খণিককম্মপচ্চযভাৰস্স অনুদ্ধটত্তা. যদি হি পৰত্তিৰিপাকং সন্ধায নানাক্খণিককম্মপচ্চযভাৰো ৰুচ্চেয্য, তদা পটিসন্ধিৰিপাকম্পিস্স মঞ্ঞেয্যুন্তি লব্ভমানস্সপি পৰত্তিৰিপাকস্স ৰসেন নানাক্খণিককম্মপচ্চযভাৰো ন ৰুত্তো, তস্মা ন সক্কা তস্স পৰত্তিৰিপাকং নিৰারেতুং. তেনাহ ‘‘পৰত্তিযং পনা’’ত্যাদি. আচরিযবুদ্ধমিত্তাদযো পন অত্থি উদ্ধচ্চসহগতং ভাৰনায পহাতব্বম্পি. অত্থি ন ভাৰনায পহাতব্বম্পি, তেসু ভাৰনায পহাতব্বং সেক্খসন্তানপ্পৰত্তং, ইতরং পুথুজ্জনসন্তানপ্পৰত্তং, ফলদানঞ্চ পুথুজ্জনসন্তানপ্পৰত্তস্সেৰ ন ইতরস্সাতি এৰং উদ্ধচ্চসহগতং দ্ৰিধা ৰিভজিত্ৰা একস্স উভযৰিপাকদানং, একস্স সব্বথাপি ৰিপাকাভাৰং ৰণ্ণেন্তি. যো পনেত্থ তেসং ৰিনিচ্ছযো, যঞ্চ তস্স নিরাকরণং, যঞ্চ সব্বথাপি ৰিপাকাভাৰৰাদীনং মতপটিক্খেপনং ইধ অৰুত্তং, তং সব্বং পরমত্থমঞ্জূসাদীসু, ৰিসেসতো চ অভিধম্মত্থৰিকাসিনিযা নাম অভিধম্মাৰতারসংৰণ্ণনাযং ৰুত্তনযেন ৰেদিতব্বং.

সব্বত্থাপি কামলোকেতি সুগতিদুগ্গতিৰসেন সব্বস্মিম্পি কামলোকে. যথারহন্তি দ্ৰারারম্মণানুরূপং. অপাযেসুপি যং নাগসুপণ্ণাদীনং মহাসম্পত্তিৰিসযং ৰিপাকৰিঞ্ঞাণং, যঞ্চ নিরযৰাসীনং মহামোগ্গল্লানত্থেরদস্সনাদীসু উপ্পজ্জতি ৰিপাকৰিঞ্ঞাণং ¶ , তং কুসলকম্মস্সেৰ ফলং. ন হি অকুসলস্স ইট্ঠৰিপাকো সম্ভৰতি. ৰুত্তঞ্হেতং ‘‘অট্ঠানমেতং, ভিক্খৰে, অনৰকাসো, যং অকুসলস্স কম্মস্স ইট্ঠো কন্তো ৰিপাকো সংৰিজ্জতী’’তি (ম. নি. ৩.১৩১; অ. নি. ১.২৮৪-২৮৬; ৰিভ. ৮০৯), তস্মা কুসলকম্মং অপাযেসুপি অহেতুকৰিপাকানি জনেতি. অঞ্ঞভূমিকস্স চ কম্মস্স অঞ্ঞভূমিকৰিপাকাভাৰতো কামৰিরাগভাৰনায কামতণ্হাৰিসযৰিঞ্ঞাণুপ্পাদনাযোগতো একন্তসদিসৰিপাকত্তা চ মহগ্গতানুত্তরকুসলানং রূপাৰচরকম্মেন অহেতুকৰিপাকুপ্পত্তিযা অভাৰতো রূপলোকেপি যথারহং রূপাদিৰিসযানি তানি অভিনিপ্ফাদেতীতি ৰুত্তং ‘‘সব্বত্থাপি কামলোকে’’ত্যাদি.

৭১. এৰং পন ৰিপচ্চন্তং কম্মং সোল়সকদ্ৰাদসকঅট্ঠকৰসেন তিধা ৰিপচ্চতীতি দস্সেতুং ‘‘তত্থাপি’’ত্যাদি ৰুত্তং. তত্থাপীতি এৰং ৰিপচ্চমানেপি কুসলকম্মে. উক্কট্ঠন্তি কুসলপরিৰারলাভতো ¶ , পচ্ছা আসেৰনপ্পৰত্তিযা ৰা ৰিসিট্ঠং. যঞ্হি কম্মং অত্তনো পৰত্তিকালে পুরিমপচ্ছাভাগপ্পৰত্তেহি কুসলকম্মেহি পরিৰারিতং, পচ্ছা ৰা আসেৰনলাভেন সমুদাচিণ্ণং. তং উক্কট্ঠং. যং পন করণকালে অকুসলকম্মেহি পরিৰারিতং, পচ্ছা ৰা ‘‘দুক্কটমেতং মযা’’তি ৰিপ্পটিসারুপ্পাদনেন পরিভাৰিতং, তং ওমকন্তি দট্ঠব্বং.

পটিসন্ধিন্তি একমেৰ পটিসন্ধিং. ন হি একেন কম্মেন অনেকাসু জাতীসু পটিসন্ধি হোতি, পৰত্তিৰিপাকো পন জাতিসতেপি জাতিসহস্সেপি হোতি. যথাহ ‘‘তিরচ্ছানগতে দানং দত্ৰা সতগুণা দক্খিণা পাটিকঙ্খিতব্বা’’তি (ম. নি. ৩.৩৭৯). যস্মা পনেত্থ ঞাণং জচ্চন্ধাদিৰিপত্তিনিমিত্তস্স মোহস্স, সব্বাকুসলস্সেৰ ৰা পটিপক্খং, তস্মা তংসম্পযুত্তং কম্মং জচ্চন্ধাদিৰিপত্তিপচ্চযং ন হোতীতি তিহেতুকং অতিদুব্বলম্পি সমানং ¶ দুহেতুকপটিসন্ধিমেৰ আকড্ঢতি, নাহেতুকং. দুহেতুকঞ্চ কম্মং ঞাণসম্পযোগাভাৰতো ঞাণফলুপ্পাদনে অসমত্থং, যথা তং অলোভসম্পযোগাভাৰতো অলোভফলুপ্পাদনে অসমত্থং অকুসলকম্মন্তি তং অতিউক্কট্ঠম্পি সমানং দুহেতুকমেৰ পটিসন্ধিং আকড্ঢতি, ন তিহেতুকন্তি ৰুত্তং ‘‘তিহেতুকমোমকং দুহেতুকমুক্কট্ঠঞ্চা’’ত্যাদি.

এত্থ সিযা – যথা পটিসম্ভিদামগ্গে ‘‘গতিসম্পত্তিযা ঞাণসম্পযুত্তে অট্ঠন্নং হেতূনং পচ্চযা উপপত্তি হোতী’’তি (পটি. ম. ১.২৩১) কুসলস্স কম্মস্স জৰনক্খণে তিণ্ণং, নিকন্তিক্খণে দ্ৰিন্নং, পটিসন্ধিক্খণে তিণ্ণঞ্চ হেতূনং ৰসেন অট্ঠন্নং হেতূনং পচ্চযা ঞাণসম্পযুত্তূপপত্তি, তথা ‘‘গতিসম্পত্তিযা ঞাণৰিপ্পযুত্তে ছন্নং হেতূনং পচ্চযা উপপত্তি হোতী’’তি (পটি. ম. ১.২৩৩) জৰনক্খণে দ্ৰিন্নং, নিকন্তিক্খণে দ্ৰিন্নং, পটিসন্ধিক্খণে দ্ৰিন্নঞ্চ হেতূনং ৰসেন ছন্নং হেতূনং পচ্চযা ঞাণৰিপ্পযুত্তূপপত্তি ৰুত্তা, এৰং ‘‘গতিসম্পত্তিযা ঞাণৰিপ্পযুত্তে সত্তন্নং হেতূনং পচ্চযা উপপত্তি হোতী’’তি তিহেতুককম্মেন দুহেতুকপটিসন্ধিযা অৰুত্তত্তা নত্থি তিহেতুকস্স দুহেতুকপটিসন্ধিআকড্ঢনন্তি? নযিদমেৰং দুহেতুকোমককম্মেন অহেতুকপটিসন্ধিযা ৰিয তিহেতুকোমককম্মেন সামত্থিযানুরূপতো দুহেতুকপটিসন্ধিযাৰ দাতব্বত্তা, কম্মসরিক্খকৰিপাকদস্সত্থং পন মহাথেরেন সাৰসেসো পাঠো কতো. ইতরথা ‘‘চতুন্নং হেতূনং পচ্চযা’’তি ৰচনাভাৰতো দুহেতুককম্মেন অহেতুকূপপত্তিযাপিঅভাৰো আপজ্জতি, তস্মা যথা সুগতিযং জচ্চন্ধবধিরাদিৰিপত্তিযা অহেতুকূপপত্তিং ৰজ্জেত্ৰা গতিসম্পত্তিযা সহেতুকূপপত্তিদস্সনত্থং দুহেতুকূপপত্তি এৰ উদ্ধটা, ন অহেতুকূপপত্তি, এৰং কম্মসরিক্খকৰিপাকদস্সনত্থং ¶ তিহেতুককম্মেন ¶ তিহেতুকূপপত্তি এৰ উদ্ধটা, ন দুহেতুকূপপত্তি, ন পন অলব্ভনতোতি দট্ঠব্বং.

৭৪. এৰং একায চেতনায সোল়স ৰিপাকানি এত্থেৰ দ্ৰাদসকমগ্গো অহেতুকট্ঠকম্পীতি পৰত্তস্স তিপিটকচূল়নাগত্থেরৰাদস্স ৰসেন ৰিপাকপ্পৰত্তিং দস্সেত্ৰা ইদানি একায চেতনায দ্ৰাদস ৰিপাকানি এত্থেৰ দসকমগ্গো অহেতুকট্ঠকম্পীতি আগতস্স মোরৰাপীৰাসীমহাধম্মরক্খিতত্থেরৰাদস্সপি ৰসেন দস্সেতুং অসঙ্খারং সসঙ্খারৰিপাকানী’’ত্যাদি ৰুত্তং. যথা মুখে চলিতে আদাসতলে মুখনিমিত্তং চলতি, এৰং অসঙ্খারকুসলস্স অসঙ্খারৰিপাকোৰ হোতি, ন সসঙ্খারোতি এৰং আগমনতোৰ সঙ্খারভেদোতি অযমেত্থাধিপ্পাযো. যস্মা পন ৰিপাকস্স সঙ্খারভেদো পচ্চযৰসেন ইচ্ছিতো, ন কম্মৰসেন, তস্মা এস কেচিৰাদো কতো.

তেসন্তি তেসং এৰংৰাদীনং. যথাক্কমন্তি তিহেতুকুক্কট্ঠাদীনং অনুক্কমেন. দ্ৰাদস ৰিপাকানীতি তিহেতুকুক্কট্ঠঅসঙ্খারিকসসঙ্খারিককম্মস্স ৰসেন যথাক্কমং সসঙ্খারিকচতুক্কৰজ্জিতানি, অসঙ্খারিকচতুক্কৰজ্জিতানি চ দ্ৰাদস ৰিপাকানি, তথা তিহেতুকোমকস্স, দুহেতুকুক্কট্ঠস্স চ কম্মস্স ৰসেন দুহেতুকসসঙ্খারদ্ৰযৰজ্জিতানি, দুহেতুকাসঙ্খারদ্ৰযৰজ্জিতানি চ দস ৰিপাকানি, দুহেতুকোমকস্স ৰসেন দুহেতুকদ্ৰযৰজ্জিতানি চ অট্ঠ ৰিপাকানি যথাৰুত্তস্স ‘‘তিহেতুকমুক্কট্ঠ’’ন্ত্যাদিনা ৰুত্তনযস্স অনুসারেন অনুস্সরণেন যথাসম্ভৰং তস্স তস্স সম্ভৰানুরূপতো উদ্দিসে.

৭৫. পরিতো অত্তং খণ্ডিতং ৰিয অপ্পানুভাৰন্তি পরিত্তং. পকট্ঠভাৰং নীতন্তি পণীতং, উভিন্নং মজ্ঝে ভৰং মজ্ঝিমং. তত্থ ‘‘পটিলদ্ধমত্তং ¶ অনাসেৰিতং পরিত্ত’’ন্তি অৰিসেসতোৰ অট্ঠকথাযং ৰুত্তং, তথা ‘‘নাতিসুভাৰিতং অপরিপুণ্ণৰসীভাৰং মজ্ঝিমং. অতিৰিয সুভাৰিতং পন সব্বসো পরিপুণ্ণৰসীভাৰং পণীত’’ন্তি. আচরিযেন পনেত্থ পরিত্তম্পি ঈসকং লদ্ধাসেৰনমেৰাধিপ্পেতন্তি দিস্সতি. তথা হানেন নামরূপপরিচ্ছেদে –

‘‘সমানাসেৰনে ¶ লদ্ধে, ৰিজ্জমানে মহব্বলে;

অলদ্ধা তাদিসং হেতুং, অভিঞ্ঞা ন ৰিপচ্চতী’’তি. (নাম. পরি. ৪৭৪);

সমানভূমিকতোৰ আসেৰনলাভেন বলৰভাৰতো মহগ্গতধম্মানং ৰিপাকদানং ৰত্ৰা তদভাৰতো অভিঞ্ঞায অৰিপচ্চনং ৰুত্তং. হীনেহি ছন্দচিত্তৰীরিযৰীমংসাহি নিব্বত্তিতং ৰা পরিত্তং. মজ্ঝিমেহি ছন্দাদীহি মজ্ঝিমং. পণীতেহি পণীতন্তি অলমতিপ্পপঞ্চেন.

৮৪. পঞ্চমজ্ঝানং ভাৰেত্ৰাতি অভিঞ্ঞাভাৰং অসম্পত্তং পঞ্চমজ্ঝানং তিৰিধম্পি ভাৰেত্ৰা. অভিঞ্ঞাভাৰপ্পত্তস্স পন অৰিপাকভাৰো ‘‘অলদ্ধা তাদিস’’ন্ত্যাদিনা (নাম. পরি. ৪৭৪) আচরিযেন সাধিতো. মূলটীকাকারাদযো পন অঞ্ঞথাপি তং সাধেন্তি. তং পন সঙ্খেপতো, তত্থ তত্থ ৰিত্থারতো চ অভিধম্মত্থৰিকাসিনিযং ৰুত্তনযেন দট্ঠব্বং. সঞ্ঞাৰিরাগং ভাৰেত্ৰাতি ‘‘সঞ্ঞা রোগো, সঞ্ঞা গণ্ডো’’ত্যাদিনা, ‘‘ধী চিত্তং ধিব্বতং চিত্ত’’ন্ত্যাদিনা ৰা নযেন অরূপপ্পৰত্তিযা আদীনৰদস্সনেন তদভাৰে চ পণীতভাৰসন্নিট্ঠানেন ৰাযোকসিণে কেসঞ্চি মতেন পরিচ্ছিন্নাকাসকসিণে ৰা ভাৰনাবলেন তেন পটিলভিতব্বভাৰে অরূপস্স অনিব্বত্তিসভাৰাপাদনৰসেন অরূপৰিরাগভাৰনং ভাৰেত্ৰা অঞ্ঞসত্তেসু উপ্পজ্জন্তি কম্মকিরিযৰাদিনো তিত্থিযা এৰাত্যধিপ্পাযো ¶ . তে পন যেন ইরিযাপথেন ইধ মরন্তি. তেনেৰ তত্থ নিব্বত্তন্তীতি দট্ঠব্বং.

৮৬. অনাগামিনো পন সুদ্ধাৰাসেসু উপ্পজ্জন্তীতি অনাগামিনোযেৰ অরিযা পুথুজ্জনাদিকালে, পচ্ছাপি ৰা পঞ্চমজ্ঝানং তিৰিধম্পি ভাৰেত্ৰা সদ্ধাদিইন্দ্রিযৰেমত্ততানুক্কমেন পঞ্চসু সুদ্ধাৰাসেসু উপ্পজ্জন্তি.

৮৭. যথাক্কমং ভাৰেত্ৰা যথাক্কমং আরুপ্পেসু উপ্পজ্জন্তীতি যোজনা যথাক্কমন্তি চ পঠমারুপ্পাদিঅনুক্কমেন. সব্বম্পি চেতং তস্স তস্সেৰ ঝানস্স আৰেণিকভূমিৰসেন ৰুত্তং. নিকন্তিযা পন সতি পুথুজ্জনাদযো যথালদ্ধজ্ঝানস্স ভূমিভূতেসু সুদ্ধাৰাসৰজ্জিতেসু যত্থ কত্থচি নিব্বত্তন্তি, তথা কামভৰেপি কামাৰচরকম্মবলেন. ‘ইজ্ঝতি, ভিক্খৰে, সীলৰতো চেতোপণিধি ৰিসুদ্ধত্তা’তি (অ. নি. ৮.৩৫) হি ৰুত্তং. অনাগামিনো পন কামরাগস্স সব্বসো ¶ পহীনত্তা কামভৰেসু নিকন্তিং ন উপ্পাদেন্তীতি কামলোকৰজ্জিতে যথালদ্ধজ্ঝানভূমিভূতে যত্থ কত্থচি নিব্বত্তন্তি. সুদ্ধাৰাসেসু হি অনাগামিনোযেৰ নিব্বত্তন্তীতি নিযমো অত্থি. তে পন অঞ্ঞত্থ ন নিব্বত্তন্তীতি নিযমো নত্থি. এৰঞ্চ কত্ৰা ৰুত্তং আচরিযেন –

‘‘সুদ্ধাৰাসেস্ৰনাগামি-পুগ্গলাৰোপপজ্জরে;

কামধাতুম্হি জাযন্তি, অনাগামিৰিৰজ্জিতা’’তি. (পরম. ৰি. ২০৫);

সুক্খৰিপস্সকাপি পনেতে মরণকালে একন্তেনেৰ সমাপত্তিং নিব্বত্তেন্তি সমাধিম্হি পরিপূরকারীভাৰতোতি দট্ঠব্বং. ‘‘ইত্থিযোপি পন অরিযা ৰা অনরিযা ৰা অট্ঠসমাপত্তিলাভিনিযো ব্রহ্মপারিসজ্জেসুযেৰ নিব্বত্তন্তী’’তি অট্ঠকথাযং (ৰিভ. অট্ঠ. ৮০৯; অ. নি. অট্ঠ. ১.১.২৭৯ আদযো; ম. নি. অট্ঠ. ৩.১৩০) ৰুত্তং. অপিচেত্থ ৰেহপ্ফলঅকনিট্ঠচতুত্থারুপ্পভৰানং সেট্ঠভৰভাৰতো ¶ তত্থ নিব্বত্তা অরিযা অঞ্ঞত্থ নুপ্পজ্জন্তি, তথা অৰসেসেসু উপরূপরি ব্রহ্মলোকেসু নিব্বত্তা হেট্ঠিমহেট্ঠিমেসু. ৰুত্তঞ্হেতং আচরিযেন –

‘‘ৰেহপ্ফলে অকনিট্ঠে, ভৰগ্গে চ পতিট্ঠিতা;

ন পুনাঞ্ঞত্থ জাযন্তি, সব্বে অরিযপুগ্গলা;

ব্রহ্মলোকগতা হেট্ঠা, অরিযা নোপপজ্জরে’’তি. (নাম. পরি. ৪৫২-৪৫৩);

কম্মচতুক্কৰণ্ণনা নিট্ঠিতা.

চুতিপটিসন্ধিক্কমৰণ্ণনা

৮৯. ‘‘আযুক্খযেনা’’ত্যাদীসু সতিপি কম্মানুভাৰে তংতংগতীসু যথাপরিচ্ছিন্নস্স আযুনো পরিক্খযেন মরণং আযুক্খযমরণং. সতিপি তত্থ তত্থ পরিচ্ছিন্নাযুসেসে গতিকালাদিপচ্চযসামগ্গিযঞ্চ ¶ তংতংভৰসাধকস্স কম্মুনো পরিনিট্ঠিতৰিপাকত্তা মরণং কম্মক্খযমরণং. আযুকম্মানং সমকমেৰ পরিক্খীণত্তা মরণং উভযক্খযমরণং. সতিপি তস্মিং দুৰিমে পুরিমভৰসিদ্ধস্স কস্সচি উপচ্ছেদককম্মুনো বলেন সত্থহরণাদীহি উপক্কমেহি উপচ্ছিজ্জমানসন্তানানং, গুণমহন্তেসু ৰা কতেন কেনচি উপক্কমেন আযূহিতউপচ্ছেদককম্মুনা পটিবাহিতসামত্থিযস্স কম্মস্স তংতংঅত্তভাৰপ্পৰত্তনে অসমত্থভাৰতো দুসিমারকলাবুরাজাদীনং ৰিয তঙ্খণেযেৰ ঠানাচাৰনৰসেন পৰত্তমরণং উপচ্ছেদকমরণং নাম. ইদং পন নেরযিকানং উত্তরকুরুৰাসীনং কেসঞ্চি দেৰানঞ্চ ন হোতি. তেনাহু –

‘‘উপক্কমেন ৰা কেসঞ্চুপচ্ছেদককম্মুনা’’তি. (স. স. ৬২);

মরণস্স উপ্পত্তি পৰত্তি মরণুপ্পত্তি.

৯০. মরণকালেতি ¶ মরণাসন্নকালে. যথারহন্তি তংতংগতীসু উপ্পজ্জনকসত্তানুরূপং, কত্থচি পন অনুপ্পজ্জমানস্স খীণাসৰস্স যথোপট্ঠিতং নামরূপধম্মাদিকমেৰ চুতিপরিযোসানানং গোচরভাৰং গচ্ছতি, ন কম্মকম্মনিমিত্তাদযো. উপলদ্ধপুব্বন্তি চেতিযদস্সনাদিৰসেন পুব্বে উপলদ্ধং. উপকরণভূতন্তি পুপ্ফাদিৰসেন উপকরণভূতং. উপলভিতব্বন্তি অনুভৰিতব্বং. উপভোগভূতন্তি অচ্ছরাৰিমানকপ্পরুক্খনিরযগ্গিআদিকং উপভুঞ্জিতব্বং. অচ্ছরাৰিমানকপ্পরুক্খমাতুকুচ্ছিআদিগতং হি রূপাযতনং সুগতিনিমিত্তং. নিরযগ্গিনিরযপালাদিগতং দুগ্গতিনিমিত্তং. গতিযা নিমিত্তং গতিনিমিত্তং.

কম্মবলেনাতি পটিসন্ধিনিব্বত্তকস্স কুসলাকুসলকম্মস্স আনুভাৰেন. ছন্নং দ্ৰারানন্তি ৰক্খমাননযেন যথাসম্ভৰং ছন্নং উপপত্তিদ্ৰারানং, যদি কুসলকম্মং ৰিপচ্চতি, তদা পরিসুদ্ধং কুসলচিত্তং পৰত্ততি, অথ অকুসলকম্মং, তদা উপক্কিলিট্ঠং অকুসলচিত্তন্তি আহ ‘‘ৰিপচ্চমানক…পে… কিলিট্ঠং ৰা’’তি. তেনাহ ভগৰা ‘‘নিমিত্তস্সাদগধিতং ৰা, ভিক্খৰে, ৰিঞ্ঞাণং তিট্ঠমানং তিট্ঠতি, অনুব্যঞ্জনস্সাদগধিতং ৰা, তস্মিং চে সমযে কালং করোতি, ঠানমেতং ৰিজ্জতি, যং দ্ৰিন্নং গতীনং অঞ্ঞতরং গতিং উপপজ্জেয্য নিরযং ৰা তিরচ্ছানযোনিং ৰা’’তি (সং. নি. ৪.২৩৫). তত্থোণতং ৰাতি তস্মিং উপপজ্জিতব্বভৰে ওণতং ৰিয, তত্থোণতং এৰাতি ৰা পদচ্ছেদো. ‘‘বাহুল্লেনা’’তি এত্থ অধিপ্পাযো ‘‘যেভুয্যেন ভৰন্তরে’’তি এত্থ ¶ ৰুত্তনযেন দট্ঠব্বো. অথ ৰা ‘‘যথারহ’’ন্তি ইমিনাৰ সো সক্কা সঙ্গহেতুন্তি ‘‘বাহুল্লেনা’’তি ইমিনা সহসা ওচ্ছিজ্জমানজীৰিতানং সণিকং মরন্তানং ৰিয ন অভিক্খণমেৰাতি দীপিতন্তি ৰিঞ্ঞাযতি. অভিনৰকরণৰসেনাতি তঙ্খণে করিযমানং ৰিয অত্তানং অভিনৰকরণৰসেন.

৯১. পচ্চাসন্নমরণস্সাতি ¶ একৰীথিপ্পমাণাযুকৰসেন, ততো ৰা কিঞ্চি অধিকাযুকৰসেন সমাসন্নমরণস্স. ৰীথিচিত্তাৰসানেতি তদারম্মণপরিযোসানানং, জৰনপরিযোসানানং ৰা ৰীথিচিত্তানং অৰসানে. তত্থ ‘‘কামভৰতো চৰিত্ৰা তত্থেৰ উপ্পজ্জমানানং তদারম্মণপরিযোসানানি, সেসানং জৰনপরিযোসানানী’’তি ধম্মানুসারণিযং ৰুত্তং. ভৰঙ্গক্খযেৰাতি যদি একজৰনৰীথিতো অধিকতরাযুসেসো সিযা, তদা ভৰঙ্গাৰসানে ৰা উপ্পজ্জিত্ৰা নিরুজ্ঝতি. অথ একচিত্তক্খণাযুসেসো সিযা, তদা ৰীথিচিত্তাৰসানে, তঞ্চ অতীতকম্মাদিৰিসযমেৰ. ‘‘তস্সানন্তরমেৰা’’তি ইমিনা অন্তরাভৰৰাদিমতং পটিক্খিপতি.

যথারহন্তি কম্মকরণকালস্স, ৰিপাকদানকালস্স চ অনুরূপৰসেন. অথ ৰা ৰিপচ্চমানককম্মানুরূপং অনুসযৰসেন, জৰনসহজাতৰসেন ৰা পৰত্তিঅনুরূপতোত্যত্থো. ননু চ ‘‘অৰিজ্জানুসযপরিক্খিত্তেনা’’ত্যাদি ৰুত্তং. জৰনসহজাতানঞ্চ কথং অনুসযভাৰোতি? নাযং দোসো অনুসযসদিসতায তাসম্পি অনুসযৰোহারভাৰতো. ইতরথা অকুসলকম্মসহজাতানং ভৰতণ্হাসহজাতানং ৰা চুতিআসন্নজৰনসহজাতানঞ্চ সঙ্গহো ন সিযা. অৰিজ্জাৰ অপ্পহীনট্ঠেন অনুসযনতো পৰত্তনতো অনুসযো, তেন পরিক্খিত্তেন পরিৰারিতেন. তণ্হানুসযোৰ মূলং পধানং সহকারীকারণভূতং ইমস্সাতি তণ্হানুসযমূলকো. সঙ্খারেনাতি কুসলাকুসলকম্মেন কম্মসহজাতফস্সাদিধম্মসমুদাযেন চুতিআসন্নজৰনসহজাতেন ৰা, তেন জনিযমানং. অৰিজ্জায হি পটিচ্ছন্নাদীনৰৰিসযে তণ্হা নামেতি, খিপনকসঙ্খারসম্মতা যথাৰুত্তসঙ্খারা খিপন্তি, যথাহু –

‘‘অৰিজ্জাতণ্হাসঙ্খার-সহজেহি অপাযিনং;

ৰিসযাদীনৰচ্ছাদিনমনক্খিপকেহি তু.

‘‘অপ্পহীনেহি ¶ ¶ সেসানং, ছাদনং নমনম্পি চ;

খিপকা পন সঙ্খারা, কুসলাৰ ভৰন্তিহা’’তি. (স. স. ১৬৪-১৬৫);

সম্পযুত্তেহি পরিগ্গয্হমানন্তি অত্তনা সম্পযুত্তেহি ফস্সাদীহি ধম্মেহি সম্পযুত্তপচ্চযাদিনা পরিৰারেত্ৰা গয্হমানং, সহজাতানমধিট্ঠানভাৰেন পুব্বঙ্গমভূতন্তি অত্তনা সহজাতানং পতিট্ঠানভাৰেন পধানভূতং. ‘‘মনোপুব্বঙ্গমা ধম্মা’’তি (ধ. প. ১-২) হি ৰুত্তং. ভৰন্তরপটিসন্ধানৰসেনাতি পুরিমভৰন্তরস্স, পচ্ছিমভৰন্তরস্স চ অঞ্ঞমঞ্ঞং একাবদ্ধং ৰিয পটিসন্দহনৰসেন উপ্পজ্জমানমেৰ পতিট্ঠাতি, ন ইতো গন্ত্ৰাত্যধিপ্পাযো. ন হি পুরিমভৰপরিযাপন্নো কোচি ধম্মো ভৰন্তরং সঙ্কমতি, নাপি পুরিমভৰপরিযাপন্নহেতূহি ৰিনা উপ্পজ্জতি পটিঘোসপদীপমুদ্দা ৰিযাতি অলমতিপ্পপঞ্চেন.

৯২. মন্দং হুত্ৰা পৰত্তানি মন্দপ্পৰত্তানি. পচ্চুপ্পন্নারম্মণেসু আপাথগতেসু মনোদ্ৰারে গতিনিমিত্তৰসেন, পঞ্চদ্ৰারে কম্মনিমিত্তৰসেনাত্যধিপ্পাযো. পটিসন্ধিভৰঙ্গানম্পি পচ্চুপ্পন্নারম্মণতা লব্ভতীতি মনোদ্ৰারে তাৰ পটিসন্ধিযা চতুন্নং ভৰঙ্গানঞ্চ, পঞ্চদ্ৰারে পন পটিসন্ধিযাৰ পচ্চুপ্পন্নারম্মণভাৰো লব্ভতি. তথা হি কস্সচি মনোদ্ৰারে আপাথমাগতং পচ্চুপ্পন্নং গতিনিমিত্তং আরব্ভ উপ্পন্নায তদারম্মণপরিযোসানায চিত্তৰীথিযা অনন্তরং চুতিচিত্তে উপ্পন্নে তদনন্তরং পঞ্চচিত্তক্খণাযুকে আরম্মণে পৰত্তায পটিসন্ধিযা চতুন্নং ভৰঙ্গানং, পঞ্চদ্ৰারে চ ঞাতকাদীহি উপট্ঠাপিতেসু দেয্যধম্মেসু ৰণ্ণাদিকে আরব্ভ যথারহং পৰত্তায চিত্তৰীথিযা চুতিচিত্তস্স চ অনন্তরং একচিত্তক্খণাযুকে আরম্মণে পৰত্তায পটিসন্ধিযা পচ্চুপ্পন্নারম্মণে পৰত্তি উপলব্ভতীতি অযমেত্থ সঙ্খেপো, ৰিত্থারো ¶ পন ৰিসুদ্ধিমগ্গে(ৰিসুদ্ধি. ২.৬২০ আদযো) ৰিভঙ্গট্ঠকথাযং (ৰিভ. অট্ঠ. ২২৭) ৰা সঙ্খারপচ্চযাৰিঞ্ঞাণপদৰণ্ণনাযং ৰুত্তনযেন দট্ঠব্বো. ছদ্ৰারগ্গহিতন্তি কম্মনিমিত্তং ছদ্ৰারগ্গহিতং, গতিনিমিত্তং ছট্ঠদ্ৰারগ্গহিতন্তি যথাসম্ভৰং যোজেতব্বং. অপরে পন অৰিসেসতো ৰণ্ণেন্তি. সচ্চসঙ্খেপেপি তেনেৰাধিপ্পাযেন ইদং ৰুত্তং –

‘‘পঞ্চদ্ৰারে সিযা সন্ধি, ৰিনা কম্মং দ্ৰিগোচরে’’তি; (স. স. ১৭৩);

অট্ঠকথাযং (ৰিসুদ্ধি. ২.৬২৪-৬২৫; ৰিভ. অট্ঠ. ২২৭) ¶ পন ‘‘গতিনিমিত্তং মনোদ্ৰারে আপাথমাগচ্ছতী’’তি ৰুত্তত্তা, তদারম্মণায চ পঞ্চদ্ৰারিকপটিসন্ধিযা অদস্সিতত্তা, মূলটীকাদীসু চ ‘‘কম্মবলেন উপট্ঠাপিতং ৰণ্ণাযতনং সুপিনং পস্সন্তস্স ৰিয দিব্বচক্খুস্স ৰিয চ মনোদ্ৰারেযেৰ গোচরভাৰং গচ্ছতী’’তি (ৰিসুদ্ধি. মহা. ২.৬২৩) নিযমেত্ৰা ৰুত্তত্তা তেসং ৰচনং ন সম্পটিচ্ছন্তি আচরিযা. ‘‘পচ্চুপ্পন্নঞ্চা’’তি এত্থ গতিনিমিত্তং তাৰ পচ্চুপ্পন্নারম্মণং যুজ্জতি, কম্মনিমিত্তং পন পটিসন্ধিজনককম্মস্সেৰ নিমিত্তভূতং অধিপ্পেতন্তি কথং তস্স চুতিআসন্নজৰনেহি গহিতস্স পচ্চুপ্পন্নভাৰো সম্ভৰতি. ন হি তদেৰ আরম্মণুপট্ঠাপকং, তদেৰ পটিসন্ধিজনকং ভৰেয্য উপচিতভাৰাভাৰতো অনস্সাদিতত্তা চ. ‘‘কতত্তা উপচিতত্তা’’তি (ধ. স. ৪৩১) হি ৰচনতো পুনপ্পুনং লদ্ধাসেৰনমেৰ কম্মং পটিসন্ধিং আকড্ঢতি. পটিসম্ভিদামগ্গে (পটি. ম. ১.২৩২) চ নিকন্তিক্খণে দ্ৰিন্নং হেতূনং পচ্চযাপি সহেতুকপটিসন্ধিযা ৰুত্তত্তাকতূপচিতম্পি কম্মং তণ্হায অস্সাদিতমেৰ ৰিপাকং অভিনিপ্ফাদেতি, তদা চ পটিসন্ধিযা সমানৰীথিযং ৰিয পৰত্তমানানি চুতিআসন্নজৰনানি কথং পুনপ্পুনং লদ্ধাসেৰনানি সিযুং, কথঞ্চ তানি তদা কণ্হায পরামট্ঠানি. অপিচ পচ্চুপ্পন্নং কম্মনিমিত্তং চুতিআসন্নপ্পৰত্তানং পঞ্চদ্ৰারিকজৰনানং আরম্মণং হোতি. ‘‘পঞ্চদ্ৰারিককম্মঞ্চ পটিসন্ধিনিমিত্তকং ন ¶ হোতি পরিদুব্বলভাৰতো’’তি অট্ঠকথাযং (ৰিসুদ্ধি. ২.৬২০; ৰিভ. অট্ঠ. ২২৭) ৰুত্তন্তি সচ্চমেতং. ঞাতকাদীহি উপট্ঠাপিতেসু পন পুপ্ফাদীসু সন্নিহিতেস্ৰেৰ মরণসম্ভৰতো তত্থ ৰণ্ণাদিকং আরব্ভ চুতিআসন্নৰীথিতো পুরিমভাগপ্পৰত্তানং পটিসন্ধিজননসমত্থানং মনোদ্ৰারিকজৰনানং আরম্মণভূতেন সহ সমানত্তা তদেকসন্ততিপতিতং চুতিআসন্নজৰনগ্গহিতম্পি পচ্চুপ্পন্নং ৰণ্ণাদিকং কম্মনিমিত্তভাৰেন ৰুত্তং. এৰঞ্চ কত্ৰা ৰুত্তং আনন্দাচরিযেন ‘‘পঞ্চদ্ৰারে চ আপাথমাগচ্ছন্তং পচ্চুপ্পন্নং কম্মনিমিত্তং আসন্নকতকম্মারম্মণসন্ততিযং উপ্পন্নং, তংসদিসঞ্চ দট্ঠব্ব’’ন্তি (ৰিভ. মূলটী. ২২৭; ৰিসুদ্ধি. মহা. ২.৬২৩).

৯৪. যথারহন্তি দুতিযচতুত্থপঠমততিযানং পটিসন্ধীনং অনুরূপতো.

৯৮. আরুপ্পচুতিযা পরং হেট্ঠিমারুপ্পৰজ্জিতা আরুপ্পপটিসন্ধিযো হোন্তি উপরূপরিঅরূপীনং হেট্ঠিমহেট্ঠিমকম্মস্স অনাযূহনতো, উপচারজ্ঝানস্স পন বলৰভাৰতো তস্স ৰিপাকভূতা কামতিহেতুকা পটিসন্ধিযো হোন্তি. রূপাৰচরচুতিযা পরং অহেতুকরহিতা উপচারজ্ঝানানুভাৰেনেৰ ¶ দুহেতুকতিহেতুকপটিসন্ধিযো সিযুং, কামতিহেতুম্হা চুতিতো পরং সব্বা এৰ কামরূপারূপভৰপরিযাপন্না যথারহং অহেতুকাদিপটিসন্ধিযো সিযুং. ইতরো দুহেতুকাহেতুকচুতিতো পরং কামেস্ৰেৰ ভৰেসু তিহেতুকাদিপটিসন্ধিযো সিযুং.

চুতিপটিসন্ধিক্কমৰণ্ণনা নিট্ঠিতা.

৯৯. পটিসন্ধিযা ¶ নিরোধস্স অনন্তরতো পটিসন্ধিনিরোধানন্তরতো. তদেৰ চিত্তন্তি তংসদিসতায তব্বোহারপ্পৰত্তত্তা তদেৰ চিত্তং যথা ‘‘তানিযেৰ ওসধানী’’তি. অসতি ৰীথিচিত্তুপ্পাদেতি অন্তরন্তরা ৰীথিচিত্তানং উপ্পাদে অসতি, চুতিচিত্তং হুত্ৰা নিরুজ্ঝতি তদেৰ চিত্তন্তি সম্বন্ধো.

১০১. পরিৰত্তন্তা পৰত্তন্তি যাৰ ৰট্টমূলসমুচ্ছেদাত্যধিপ্পাযো.

১০২. যথা ইহ ভৰেপটিসন্ধি চেৰ ভৰঙ্গঞ্চ ৰীথিযো চ চুতি চ, তথা পুন ভৰন্তরে পটিসন্ধিভৰঙ্গন্তি এৰমাদিকা অযং চিত্তসন্ততি পরিৰত্ততীতি যোজনা. কেচি পন ইমস্মিং পরিচ্ছেদে ৰীথিমুত্তসঙ্গহস্সেৰ দস্সিতত্তা পটিসন্ধিভৰঙ্গচুতীনমেৰ ইধ গহণং যুত্তন্ত্যাধিপ্পাযেন ‘‘পটিসন্ধিভৰঙ্গৰীথিযো’’তি ইমস্স পটিসন্ধিভৰঙ্গপ্পৰাহাতি অত্থং ৰদন্তি, তং তেসং মতিমত্তং পৰত্তিসঙ্গহদস্সনাৰসানে তত্থ সঙ্গহিতানং সব্বেসমেৰ নিগমনস্স অধিপ্পেতত্তা. এৰঞ্হি সতি ‘‘পটিসঙ্খায পনেতমদ্ধুৰ’’ন্তি এত্থ সব্বেসমেৰ এত-সদ্দেন পরামসনং সুট্ঠু উপপন্নং হোতি. এতং যথাৰুত্তং ৰট্টপৰত্তং অদ্ধুৰং অনিচ্চং পলোকধম্মং পটিসঙ্খায পচ্চৰেক্খিত্ৰা বুধা পণ্ডিতা চিরায চিরকালং সুব্বতা হুত্ৰা অচ্চুতং ধুৰং অচৰনধম্মং পদং নিব্বানং অধিগন্ত্ৰা মগ্গফলঞাণেন সচ্ছিকত্ৰা ততোযেৰ সুট্ঠু সমুচ্ছিন্নসিনেহবন্ধনা সমং নিরুপধিসেসনিব্বানধাতুং এস্সন্তি পাপুণিস্সন্তি.

ইতি অভিধম্মত্থৰিভাৰিনিযা নাম অভিধম্মত্থসঙ্গহৰণ্ণনায

ৰীথিমুত্তপরিচ্ছেদৰণ্ণনা নিট্ঠিতা.

৬. রূপপরিচ্ছেদৰণ্ণনা

১. এৰং ¶ ¶ তাৰ চিত্তচেতসিকৰসেন দুৰিধং অভিধম্মত্থং দস্সেত্ৰা ইদানি রূপং, তদনন্তরঞ্চ নিব্বানং দস্সেতুমারভন্তো আহ ‘‘এত্তাৰতা’’ত্যাদি. সপ্পভেদপ্পৰত্তিকা উদ্দেসনিদ্দেসপটিনিদ্দেসৰসেন তীহি পরিচ্ছেদেহি ৰুত্তপ্পভেদৰন্তো, পৰত্তিপটিসন্ধিৰসেন দ্ৰীহি পরিচ্ছেদেহি ৰুত্তপ্পৰত্তিৰন্তো চ চিত্তচেতসিকা ধম্মা এত্তাৰতা পঞ্চহি পরিচ্ছেদেহি ৰিভত্তা হি যস্মা, ইদানি যথানুপ্পত্তং রূপং পৰুচ্চতীতি যোজনা.

২. ইদানি যথাপটিঞ্ঞাতরূপৰিভাগত্থং মাতিকং ঠপেতুং ‘‘সমুদ্দেসা’’ত্যাদি ৰুত্তং. সঙ্খেপতো উদ্দিসনং সমুদ্দেসো. একৰিধাদিৰসেন ৰিভজনং ৰিভাগো, সমুট্ঠাতি এতস্মা ফলন্তি সমুট্ঠানং, কম্মাদযো রূপজনকপচ্চযা. চক্খুদসকাদযো কলাপা. পৰত্তিক্কমতো চেতি ভৰকালসত্তভেদেন রূপানং উপ্পত্তিক্কমতো.

রূপসমুদ্দেসৰণ্ণনা

৩. উপাদিন্নানুপাদিন্নসন্তানেসু সসম্ভারধাতুৰসেন মহন্তা হুত্ৰা ভূতা পাতুভূতাতি মহাভূতা (ধ. স. অট্ঠ. ৫৮৪). অথৰা অনেকৰিধঅব্ভুতৰিসেসদস্সনেন, অনেকাভূতদস্সনেন ৰা মহন্তানি অব্ভুতানি, অভূতানি ৰা এতেসূতি মহাভূতা, মাযাকারাদযো. তেহি সমানা সযং অনীলাদিসভাৰানেৰ নীলাদিউপাদাযরূপদস্সনাদিতোতি মহাভূতা. মনাপৰণ্ণসণ্ঠানাদীহি ৰা সত্তানং ৰঞ্চিকা যক্খিনিআদযো ৰিয মনাপইত্থিপুরিসরূপদস্সনাদিনা সত্তানং ৰঞ্চকত্তা মহন্তানি অভূতানি এতেসূতি মহাভূতা. ৰুত্তম্পি হেতং –

‘‘মহন্তা ¶ পাতুভূতাতি, মহাভূতসমাতি ৰা;

ৰঞ্চকত্তা অভূতেন, ‘মহাভূতা’তি সম্মতা’’তি. (অভিধ. ৬২৬);

অথ ৰা মহন্তপাতুভাৰতো মহন্তানি ভৰন্তি এতেসু উপাদারূপানি, ভূতানি চাতি মহাভূতানি. মহাভূতে উপাদায পৰত্তং রূপং উপাদাযরূপং. যদি এৰং ‘‘একং মহাভূতং পটিচ্চ ততো ¶ মহাভূতা’’ত্যাদিৰচনতো (পট্ঠা. ১.১.৫৩) একেকমহাভূতা সেসমহাভূতানং নিস্সযা হোন্তীতি তেসম্পি উপাদাযরূপতাপসঙ্গোতি? নযিদমেৰং উপাদাযেৰ পৰত্তরূপানং তংসমঞ্ঞাসিদ্ধিতো. যঞ্হি মহাভূতে উপাদিযতি, সযঞ্চ অঞ্ঞেহি উপাদীযতি. ন তং উপাদাযরূপং. যং পন উপাদীযতেৰ, ন কেনচি উপাদীযতি, তদেৰ উপাদাযরূপন্তি নত্থি ভূতানং তব্বোহারপ্পসঙ্গো. অপিচ চতুন্নং মহাভূতানং উপাদাযরূপন্তি উপাদাযরূপলক্খণন্তি নত্থি তযো উপাদায পৰত্তানং উপাদাযরূপতাতি.

৪. পথনট্ঠেন পথৰী, তরুপব্বতাদীনং পকতিপথৰী ৰিয সহজাতরূপানং পতিট্ঠানভাৰেন পক্খাযতি, উপট্ঠাতীতি ৰুত্তং হোতি, পথৰী এৰ ধাতু সলক্খণধারণাদিতো নিস্সত্তনিজ্জীৰট্ঠেন সরীরসেলাৰযৰধাতুসদিসত্তা চাতি পথৰীধাতু. আপেতি সহজাতরূপানি পত্থরতি, আপাযতি ৰা ব্রূহেতি ৰড্ঢেতীতি আপো. তেজেতি পরিপাচেতি, নিসেতি ৰা তিক্খভাৰেন সেসভূতত্তযং উস্মাপেতীতি তেজো. ৰাযতি দেসন্তরুপ্পত্তিহেতুভাৰেন ভূতসঙ্ঘাতং পাপেতীতি ৰাযো. চতস্সোপি পনেতা যথাক্কমং কথিনত্তদৰত্তউণ্হত্তৰিত্থম্ভনত্তলক্খণাতি দট্ঠব্বং.

৫. চক্খাদীনং ৰচনত্থো হেট্ঠা কথিতোৰ. পসাদরূপং নাম চতুন্নং মহাভূতানং পসন্নভাৰহেতুকত্তা. তং ¶ পন যথাক্কমং দট্ঠুকামতাসোতুকামতাঘাযিতুকামতাসাযিতুকামতাফুসিতুকামতানিদানকম্মসমুট্ঠানভূতপ্পসাদলক্খণং. তত্থ চক্খু তাৰ মজ্ঝে কণ্হমণ্ডলস্স ঊকাসিরপ্পমাণে অভিমুখে ঠিতানং সরীরসণ্ঠানুপ্পত্তিপদেসে তেলমিৰ পিচুপটলানি সত্তক্খিপটলানি ব্যাপেত্ৰা ধারণনহাপনমণ্ডনবীজনকিচ্চাহি চতূহি ধাতীহি ৰিয খত্তিযকুমারো সন্ধারণবন্ধনপরিপাচনসমুদীরণকিচ্চাহি চতূহি ধাতূহি কতূপকারং উতুচিত্তাহারেহি উপত্থম্ভিযমানং আযুনা পরিপালিযমানং ৰণ্ণাদীহি পরিৰারিতং যথাযোগং চক্খুৰিঞ্ঞাণাদীনং ৰত্থুদ্ৰারভাৰং সধেন্তং পৰত্ততি, ইতরং ‘‘সসম্ভারচক্খূ’’তি ৰুচ্চতি. এৰং সোতাদযোপি যথাক্কমং সোতবিলব্ভন্তরে অঙ্গুলিৰেধনাকারং উপচিততনুতম্বলোমং, নাসিকব্ভন্তরে অজপদসণ্ঠানং, জিৰ্হামজ্ঝে উপ্পলদলগ্গসণ্ঠানং পদেসং অভিব্যাপেত্ৰা পৰত্তন্তি, ইতরং পন ঠপেত্ৰা কম্মজতেজস্স পতিট্ঠানট্ঠানং কেসগ্গলোমগ্গনখগ্গসুক্খচম্মানি চ অৰসেসং সকলসরীরং ফরিত্ৰা পৰত্ততি. এৰং সন্তেপি ইতরেহি তস্স সঙ্করো ন হোতি ভিন্ননিস্সযলক্খণত্তা. একনিস্সযানিপি হি রূপরসাদীনি লক্খণভেদতো অসংকিণ্ণাতি কিং পন ভিন্ননিস্সযা পসাদা.

৬. আপোধাতুযা ¶ সুখুমভাৰেন ফুসিতুং অসক্কুণেয্যত্তা ৰুত্তং ‘‘আপোধাতু ৰিৰজ্জিতং ভূতত্তযসঙ্খাত’’ন্তি. কিঞ্চাপি হি সীততা ফুসিত্ৰা গয্হতি, সা পন তেজোযেৰ. মন্দে হি উণ্হত্তে সীতবুদ্ধি সীততাসঙ্খাতস্স কস্সচি গুণস্স অভাৰতো. তযিদং সীতবুদ্ধিযা অনৰট্ঠিতভাৰতো ৰিঞ্ঞাযতি পারাপারে ৰিয. তথা হি ঘম্মকালে আতপে ঠত্ৰা ছাযং পৰিট্ঠানং সীতবুদ্ধি হোতি, তত্থেৰ চিরকালং ঠিতানং উণ্হবুদ্ধি. যদি চ আপোধাতু সীততা সিযা, উণ্হভাৰেন সহ একস্মিং কলাপে ¶ উপলব্ভেয্য, ন চেৰং উপলব্ভতি, তস্মা ৰিঞ্ঞাযতি ‘‘ন আপোধাতু সীততা’’তি. যে পন ‘‘দৰতা আপোধাতু, সা চ ফুসিত্ৰা গয্হতী’’তি ৰদন্তি, তে ৰত্তব্বা ‘‘দৰতা নাম ফুসিত্ৰা গয্হতীতি ইদং আযস্মন্তানং অভিমানমত্তং সণ্ঠানে ৰিযা’’তি. ৰুত্তঞ্হেতং পোরাণেহি –

‘‘দৰতাসহৰুত্তীনি, তীণি ভূতানি সম্ফুসং;

দৰতং সম্ফুসামীতি, লোকোযমভিমঞ্ঞতি.

‘‘ভূতে ফুসিত্ৰা সণ্ঠানং, মনসা গণ্হতো যথা;

পচ্চক্খতো ফুসামীতি, ৰিঞ্ঞেয্যা দৰতা তথা’’তি.

গোচররূপং নাম পঞ্চৰিঞ্ঞাণৰিসযভাৰতো. গাৰো ইন্দ্রিযানি চরন্তি এত্থাতি গোচরন্তি হি আরম্মণস্সেতং নামং. তং পনেতং পঞ্চৰিধম্পি যথাক্কমং চক্খুৰিঞ্ঞাণাদীনং গোচরভাৰলক্খণং, চক্খাদিপটিহননলক্খণং ৰা.

৭. ইত্থিযা ভাৰো ইত্থত্তং (ধ. স. অট্ঠ. ৬৩২). পুরিসস্স ভাৰো পুরিসত্তং. তত্থ ইত্থিলিঙ্গনিমিত্তকুত্তাকপ্পহেতুভাৰলক্খণং ইত্থত্তং, পুরিসলিঙ্গাদিহেতুভাৰলক্খণং পুরিসত্তং. তত্থ ইত্থীনং অঙ্গজাতং ইত্থিলিঙ্গং. সরাধিপ্পাযা ইত্থিনিমিত্তং ‘‘ইত্থী’’তি সঞ্জাননস্স পচ্চযভাৰতো. অৰিসদঠানগমননিসজ্জাদি ইত্থিকুত্তং. ইত্থিসণ্ঠানং ইত্থাকপ্পো. পুরিসলিঙ্গাদীনিপি ৰুত্তনযেন দট্ঠব্বানি. অট্ঠকথাযং পন অঞ্ঞথা ইত্থিলিঙ্গাদীনি ৰণ্ণিতানি. তং পন এৰং সঙ্গহেত্ৰা ৰদন্তি –

‘‘লিঙ্গং ¶ হত্থাদিসণ্ঠানং, নিমিত্তং মিহিতাদিকং;

কুত্তং সুপ্পাদিনা কীল়া, আকপ্পো গমনাদিক’’ন্তি.

ভাৰরূপং নাম ভৰতি এতেন ইত্থাদিঅভিধানং, বুদ্ধি চাতি কত্ৰা. তং পনেতং কাযিন্দ্রিযং ৰিয সকলসরীরং ফরিত্ৰা তিট্ঠতি.

৮. হদযমেৰ ¶ মনোধাতুমনোৰিঞ্ঞাণধাতূনং নিস্সযত্তা ৰত্থু চাতি হদযৰত্থু. তথা হি তং ধাতুদ্ৰযনিস্সযভাৰলক্খণং, তঞ্চ হদযকোসব্ভন্তরে অড্ঢপসতমত্তং লোহিতং নিস্সায পৰত্ততি. রূপকণ্ডে অৰুত্তস্সপি পনেতস্স আগমতো, যুত্তিতো চ অত্থিভাৰো দট্ঠব্বো. তত্থ, তং রূপং নিস্সায মনোধাতু চ মনোৰিঞ্ঞাণধাতু চ ৰত্তন্তি ‘‘যং রূপং মনোধাতুযা চ মনোৰিঞ্ঞাণধাতুযা চ তংসম্পযুত্তকানঞ্চ ধম্মানং নিস্সযপচ্চযেন পচ্চযো’’তি (পট্ঠা. ১.১.৮) এৰমাগতং পট্ঠানৰচনং আগমো. যুত্তি পনেৰং দট্ঠব্বা –

‘‘নিপ্ফন্নভূতিকাধারা, দ্ৰে ধাতূ কামরূপিনং;

রূপানুবন্ধৰুত্তিত্তা, চক্খুৰিঞ্ঞাণাদযো ৰিয.

‘‘চক্খাদিনিস্সিতানেতা, তস্সঞ্ঞাধারভাৰতো;

নাপি রূপাদিকে তেসং, বহিদ্ধাপি পৰত্তিতো.

‘‘ন চাপি জীৰিতং তস্স, কিচ্চন্তরনিযুত্তিতো;

ন চ ভাৰদ্ৰযং তস্মিং, অসন্তেপি পৰত্তিতো.

‘‘তস্মা তদঞ্ঞং ৰত্থু তং, ভূতিকন্তি ৰিজানিযং;

ৰত্থালম্বদুকানন্তু, দেসনাভেদতো ইদং;

ধম্মসঙ্গণিপাঠস্মিং, ন অক্খাতং মহেসিনা’’তি.

৯. জীৰন্তি তেনাতি জীৰিতং, তদেৰ কম্মজরূপপরিপালনে আধিপচ্চযোগতো ইন্দ্রিযন্তি জীৰিতিন্দ্রিযং. তথা হেতং কম্মজরূপপরিপালনলক্খণং. যথাসকং খণমত্তট্ঠাযীনম্পি হি সহজাতানং ¶ পৰত্তিহেতুভাৰেনেৰ অনুপালকং. ন হি তেসং কম্মংযেৰ ঠিতিকারণং হোতি আহারজাদীনং আহারাদি ৰিয কম্মস্স তঙ্খণাভাৰতো. ইদং পন সহ পাচনগ্গিনা অনৰসেসউপাদিন্নকাযং ব্যাপেত্ৰা পৰত্ততি.

১০. কবল়ং ¶ কত্ৰা অজ্ঝোহরীযতীতি কবল়ীকারো আহারো, ইদঞ্চ সৰত্থুকং কত্ৰা আহারং দস্সেতুং ৰুত্তং. সেন্দ্রিযকাযোপত্থম্ভনহেতুভূতা পন অঙ্গমঙ্গানুসারী রসহরসঙ্খাতা অজ্ঝোহরিতব্বাহারসিনেহভূতা ওজা ইধ আহাররূপং নাম. তথা হেতং সেন্দ্রিযকাযোপত্থম্ভনহেতুভাৰলক্খণং, ওজট্ঠমকরূপাহরণলক্খণং ৰা.

১১. কক্খল়ত্তাদিনা অত্তনো অত্তনো সভাৰেন উপলব্ভনতো সভাৰরূপং নাম. উপ্পাদাদীহি, অনিচ্চতাদীহি ৰা লক্খণেহি সহিতন্তি সলক্খণং. পরিচ্ছেদাদিভাৰং ৰিনা অত্তনো সভাৰেনেৰ কম্মাদীহি পচ্চযেহি নিপ্ফন্নত্তা নিপ্ফরূপং নাম. রুপ্পনসভাৰো রূপং, তেন যুত্তম্পি রূপং, যথা ‘‘অরিসসো, নীলুপ্পল’’ন্তি, স্ৰাযং রূপ-সদ্দো রুল়্হিযা অতংসভাৰেপি পৰত্ততীতি অপরেন রূপ-সদ্দেন ৰিসেসেত্ৰা ‘‘রূপরূপ’’ন্তি ৰুত্তং যথা ‘‘দুক্খদুক্খ’’ন্তি. পরিচ্ছেদাদিভাৰং অতিক্কমিত্ৰা সভাৰেনেৰ উপলব্ভনতো লক্খণত্তযারোপনেন সম্মসিতুং অরহত্তা সম্মসনরূপং.

১২. ন কস্সতীতি অকাসো. অকাসোযেৰ আকাসো, নিজ্জীৰট্ঠেন ধাতু চাতি আকাসধাতু. চক্খুদসকাদিএকেককলাপগতরূপানং কলাপন্তরেহি অসংকিণ্ণভাৰাপাদনৰসেন পরিচ্ছেদকং, তেহি ৰা পরিচ্ছিজ্জমানং, তেসং পরিচ্ছেদমত্তং ৰা রূপং পরিচ্ছেদরূপং. তঞ্হি তং তং রূপকলাপং পরিচ্ছিন্দন্তং ৰিয হোতি. ৰিজ্জমানেপি চ কলাপন্তরভূতেহি কলাপন্তরভূতানং সম্ফুট্ঠভাৰে তংতংরূপৰিৰিত্ততা রূপপরিযন্তো আকাসো. যেসঞ্চ সো পরিচ্ছেদো, তেহি সযং অসম্ফুট্ঠোযেৰ. অঞ্ঞথা পরিচ্ছিন্নতা ন সিযা তেসং রূপানং ব্যাপীভাৰাপত্তিতো. অব্যাপিতা ¶ হি অসম্ফুট্ঠতা. তেনাহ ভগৰা ‘‘অসম্ফুট্ঠং চতূহি মহাভূতেহী’’তি (ধ. স. ৬৩৭).

১৩. চলমানকাযেন অধিপ্পাযং ৰিঞ্ঞাপেতি, সযঞ্চ তেন ৰিঞ্ঞাযতীতি কাযৰিঞ্ঞত্তি. সৰিঞ্ঞাণকসদ্দসঙ্খাতৰাচায অধিপ্পাযং ৰিঞ্ঞাপেতি, সযঞ্চ তায ৰিঞ্ঞাযতীতি ৰচীৰিঞ্ঞত্তি. তত্থ অভিক্কমাদিজনকচিত্তসমুট্ঠানৰাযোধাতুযা সহজাতরূপসন্থম্ভনসন্ধারণচলিতেসু ¶ সহকারীকারণভূতো ফন্দমানকাযফন্দনতংহেতুকৰাযোধাতুৰিনিমুত্তো মহন্তং পাসাণং উক্খিপন্তস্স সব্বথামেন গহণকালে উস্সাহনৰিকারো ৰিয রূপকাযস্স পরিফন্দনপচ্চযভাৰেন উপলব্ভমানো ৰিকারো কাযৰিঞ্ঞত্তি. সা হি ফন্দমানকাযেন অধিপ্পাযং ৰিঞ্ঞাপেতি. ন হি ৰিঞ্ঞত্তিৰিকাররহিতেসু রুক্খচলনাদীসু ‘‘ইদমেস কারেতী’’তি অধিপ্পাযগ্গহণং দিট্ঠন্তি. হত্থচলনাদীসু চ ফন্দমানকাযগ্গহণানন্তরং অৰিঞ্ঞাযমানন্তরেহি মনোদ্ৰারজৰনেহি গয্হমানত্তা সযঞ্চ কাযেন ৰিঞ্ঞাযতি.

কথং পন ৰিঞ্ঞত্তিৰসেন হত্থচলনাদযো হোন্তীতি? ৰুচ্চতে – একাৰজ্জনৰীথিযং সত্তসু জৰনেসু সত্তমজৰনসমুট্ঠানৰাযোধাতু ৰিঞ্ঞত্তিৰিকারসহিতাৰ পঠমজৰনাদিসমুট্ঠানাহি ৰাযোধাতূহি লদ্ধোপত্থম্ভা দেসন্তরুপ্পত্তিহেতুভাৰেন চলযতি চিত্তজং, পুরিমজৰনাদিসম্ভূতা পন সন্থম্ভনসন্ধারণমত্তকরা তস্স উপকারায হোন্তীতি. যথা হি সত্তহি যুগেহি আকড্ঢিতব্বসকটে সত্তমযুগযুত্তাযেৰ গোণা হেট্ঠা ছসু যুগেসু যুত্তগোণেহি লদ্ধূপত্থম্ভা সকটং চালেন্তি, পঠমযুগাদিযুত্তা পন উপত্থম্ভনসন্ধারণমত্তমেৰ সাধেন্তা তেসং উপকারায হোন্তি, এৰংসম্পদমিদং দট্ঠব্বং.

দেসন্তরুপ্পত্তিযেৰ ¶ চেত্থ চলনং উপ্পন্নদেসতো কেসগ্গমত্তম্পি ধম্মানং সঙ্কমনাভাৰতো. ইতরথা নেসং অব্যাপারকতা, খণিকতা চ ন সিযা. দেসন্তরুপ্পত্তিহেতুভাৰোতি চ যথা অত্তনা সহজরূপানি হেট্ঠিমজৰনসমুট্ঠিতরূপেহি পতিট্ঠিতট্ঠানতো অঞ্ঞত্থ উপ্পজ্জন্তি, এৰং তেহি সহ তত্থ উপ্পত্তিযেৰাতি দট্ঠব্বং, এত্থ পন চিত্তজে চলিতে তংসম্বন্ধেন ইতরম্পি চলতি নদীসোতে পক্খিত্তসুক্খগোমযপিণ্ডং ৰিয. তথা চলযিতুং অসক্কোন্তি যোপি পঠমজৰনাদিসমুট্ঠানৰাযোধাতুযো ৰিঞ্ঞত্তিৰিকারসহিতাযেৰ যেন দিসাভাগেন অযং অভিক্কমাদীনি পৰত্তেতুকামো, তদভিমুখভাৰৰিকারসম্ভৰতো. এৰঞ্চ কত্ৰা মনোদ্ৰারাৰজ্জনস্সপি ৰিঞ্ঞত্তিসমুট্ঠাপকত্তং ৰক্খতি. ৰচীভেদকরচিত্তসমুট্ঠানপথৰীধাতুযা অক্খরুপ্পত্তিট্ঠানগতউপাদিন্নরূপেহি সহ ঘট্টনপচ্চযভূতো একো ৰিকারো ৰচীৰিঞ্ঞত্তি. যং পনেত্থ ৰত্তব্বং, তং কাযৰিঞ্ঞত্তিযং ৰুত্তনযেন দট্ঠব্বং.

অযং পন ৰিসেসো – যথা তত্থ ‘‘ফন্দমানকাযগ্গহণানন্তর’’ন্তি ৰুত্তং, এৰমিধ ‘‘সুয্যমানসদ্দসৰনানন্তর’’ন্তি যোজেতব্বং. ইধ চ সন্থম্ভনাদীনং অভাৰতো সত্তমজৰনসমুট্ঠিতাত্যাদিনযো ¶ ন লব্ভতি. ঘট্টনেন হি সদ্ধিংযেৰ সদ্দো উপ্পজ্জতি. ঘট্টনঞ্চ পঠমজৰনাদীসুপি লব্ভতেৰ. এত্থ চ যথা উস্সাপেত্ৰা বদ্ধগোসীসতালপণ্ণাদিরূপানি দিস্ৰা তদনন্তরপ্পৰত্তায অৰিঞ্ঞাযমানন্তরায মনোদ্ৰারৰীথিযা গোসীসাদীনং উদকসহচারিতপ্পকারং সঞ্ঞাণং গহেত্ৰা উদকগ্গহণং হোতি, এৰং ৰিপ্ফন্দমানসমুচ্চারিযমানকাযসদ্দে গহেত্ৰা তদনন্তরপ্পৰত্তায অৰিঞ্ঞাযমানন্তরায মনোদ্ৰারৰীথিযা পুরিমসিদ্ধসম্বন্ধূপনিস্সযায সাধিপ্পাযৰিকারগ্গহণং হোতীতি অযং দ্ৰিন্নং সাধারণা উপমা.

১৪. লহুভাৰো ¶ লহুতা. মুদুভাৰো মুদুতা. কম্মঞ্ঞভাৰো কম্মঞ্ঞতা. যথাক্কমঞ্চেতা অরোগিনো ৰিয রূপানং অগরুতা সুপরিমদ্দিতচম্মস্স ৰিয অকথিনতা সুধন্তসুৰণ্ণস্স ৰিয সরীরকিরিযানং অনুকূলভাৰোতি দট্ঠব্বং. অঞ্ঞমঞ্ঞং অৰিজহন্তস্সপি হি লহুতাদিত্তযস্স তংতংৰিকারাধিকরূপেহি নানত্তং ৰুচ্চতি, দন্ধত্তকরধাতুক্খোভপ্পটিপক্খপচ্চযসমুট্ঠানো হি রূপৰিকারো লহুতা. থদ্ধত্তকরধাতুক্খোভপ্পটিপক্খপচ্চযসমুট্ঠানো মুদুতা. সরীরকিরিযানং অননুকূলভাৰকরধাতুক্খোভপ্পটিপক্খপচ্চযসমুট্ঠানো কম্মঞ্ঞতাতি.

১৫. উপচযনং উপচযো, পঠমচযোত্যত্থো ‘‘উপঞ্ঞত্ত’’ন্ত্যাদীসু ৰিয উপ-সদ্দস্স পঠমত্থজোতনতো. সন্তানো সন্ততি, পবন্ধোত্যত্থো. তত্থ পটিসন্ধিতো পট্ঠায যাৰ চক্খাদিদসকানং উপ্পত্তি, এত্থন্তরে রূপুপ্পাদো উপচযো নাম. ততো পরং সন্ততি নাম. যথাসকং খণমত্তট্ঠাযীনং রূপানং নিরোধাভিমুখভাৰৰসেন জীরণং জরা, সাযেৰ জরতা, নিচ্চধুৰভাৰেন ন ইচ্চং অনুপগন্তব্বন্তি অনিচ্চং, তস্স ভাৰো অনিচ্চতা, রূপপরিভেদো. লক্খণরূপং নাম ধম্মানং তংতংঅৰত্থাৰসেন লক্খণহেতুত্তা.

১৬. জাতিরূপমেৰাতি পটিসন্ধিতো পট্ঠায রূপানং খণে খণে উপ্পত্তিভাৰতো জাতিসঙ্খাতং রূপুপ্পত্তিভাৰেন চতুসন্ততিরূপপ্পটিবদ্ধৰুত্তিত্তা রূপসম্মতঞ্চ জাতিরূপমেৰ উপচযসন্ততিভাৰেন পৰুচ্চতি পঠমুপরিনিচ্চত্তসঙ্খাতপ্পৰত্তিআকারভেদতো ৰেনেয্যৰসেন ‘‘উপচযো সন্ততী’’তি (ধ. স. ৬৪২) ৰিভজিত্ৰা ৰুত্তত্তা. এৰঞ্চ কত্ৰা তাসং নিদ্দেসে অত্থতো অভেদং দস্সেতুং ‘‘যো আযতনানং আচযো, সো রূপস্স উপচযো. যো রূপস্স উপচযো, সা ¶ রূপস্স সন্ততী’’তি (ধ. স. ৬৪১-৬৪২) ৰুত্তং. একাদসৰিধম্পীতি সভাগসঙ্গহৰসেন একাদসপ্পকারম্পি.

১৭. চত্তারো ¶ ভূতা, পঞ্চ পসাদা, চত্তারো ৰিসযা, দুৰিধো ভাৰো, হদযরূপমিচ্চপি ইদং জীৰিতাহাররূপেহি দ্ৰীহি সহ অট্ঠারসৰিধং, তথা পরিচ্ছেদো চ দুৰিধা ৰিঞ্ঞত্তি, তিৰিধো ৰিকারো, চতুব্বিধং লক্খণন্তি রূপানং পরিচ্ছেদৰিকারাদিভাৰং ৰিনা ৰিসুং পচ্চযেহি অনিব্বত্তত্তা ইমে অনিপ্ফন্না দস চেতি অট্ঠৰীসতিৰিধং ভৰে.

রূপসমুদ্দেসৰণ্ণনা নিট্ঠিতা.

রূপৰিভাগৰণ্ণনা

১৮. ইদানি যথাউদ্দিট্ঠরূপানং একৰিধাদিনযদস্সনত্থং ‘‘সব্বঞ্চ পনেত’’ন্ত্যাদি ৰুত্তং. সম্পযুত্তস্স অলোভাদিহেতুনো অভাৰা অহেতুকং. যথাসকং পচ্চযৰন্ততায সপ্পচ্চযং. অত্তানং আরব্ভ পৰত্তেহি কামাসৰাদীহি সহিতত্তা সাসৰং. পচ্চযেহি অভিসঙ্খতত্তা সঙ্খতং. উপাদানক্খন্ধসঙ্খাতে লোকে নিযুত্ততায লোকিযং. কামতণ্হায অৰচরিতত্তা কামাৰচরং. অরূপধম্মানং ৰিয কস্সচি আরম্মণস্স অগ্গহণতো নাস্স আরম্মণন্তি অনারম্মণং. তদঙ্গাদিৰসেন পহাতব্বতাভাৰতো অপ্পহাতব্বং. ইতি-সদ্দো পকারত্থো, তেন ‘‘অব্যাকত’’ন্ত্যাদিকং সব্বং একৰিধনযং সঙ্গণ্হাতি.

১৯. অজ্ঝত্তিকরূপং অত্তভাৰসঙ্খাতং অত্তানং অধিকিচ্চ উদ্দিস্স পৰত্তত্তা. কামং অঞ্ঞেপি হি অজ্ঝত্তসম্ভূতা অত্থি, রুল়্হীৰসেন পন চক্খাদিকংযেৰ অজ্ঝত্তিকং. অথ ৰা ‘‘যদি মযং ন হোম, ত্ৰং কট্ঠকলিঙ্গরূপমো ভৰিস্সসী’’তি ৰদন্তা ৰিয অত্তভাৰস্স ¶ সাতিসযং উপকারত্তা চক্খাদীনেৰ ৰিসেসতো অজ্ঝত্তিকানি নাম. অত্তসঙ্খাতং ৰা চিত্তং অধিকিচ্চ তস্স দ্ৰারভাৰেন পৰত্ততীতি অজ্ঝত্তং, তদেৰ অজ্ঝত্তিকং. ততো বহিভূতত্তা ইতরং তেৰীসতিৰিধং বাহিররূপং.

২০. ইতরং বাৰীসতিৰিধং অৰত্থুরূপং.

২২. অট্ঠৰিধম্পি ¶ ইন্দ্রিযরূপং পঞ্চৰিঞ্ঞাণেসু লিঙ্গাদীসু সহজরূপপরিপালনে চ আধিপচ্চযোগতো. পসাদরূপস্স হি পঞ্চৰিধস্স চক্খুৰিঞ্ঞাণাদীসু আধিপচ্চং অত্তনো পটুমন্দাদিভাৰেন তেসম্পি পটুমন্দাদিভাৰাপাদনতো. ভাৰদ্ৰযস্সাপি ইত্থিলিঙ্গাদীসু আধিপচ্চং যথাসকং পচ্চযেহি উপ্পজ্জমানানম্পি তেসং যেভুয্যেন সভাৰকসন্তানেযেৰ তংতদাকারেন উপ্পজ্জনতো, ন পন ইন্দ্রিযপচ্চযভাৰতো. জীৰিতস্স চ কম্মজপরিপালনে আধিপচ্চং তেসং যথাসকং খণট্ঠানস্স জীৰিতিন্দ্রিযপ্পটিবদ্ধত্তা. সযঞ্চ অত্তনা ঠপিতধম্মসম্বন্ধেনেৰ পৰত্ততি নাৰিকো ৰিয.

২৩. ৰিসযৰিসযিভাৰপ্পত্তিৰসেন থূলত্তা ওল়ারিকরূপং. ততোযেৰ গহণস্স সুকরত্তা সন্তিকেরূপং আসন্নরূপং নাম. যো সযং, নিস্সযৰসেন চ সম্পত্তানং, অসম্পত্তানঞ্চ পটিমুখভাৰো অঞ্ঞমঞ্ঞপতনং, সো পটিঘো ৰিযাতি পটিঘো. যথা হি পটিঘাতে সতি দুব্বলস্স চলনং হোতি, এৰং অঞ্ঞমঞ্ঞং পটিমুখভাৰে সতি অরূপসভাৰত্তা দুব্বলস্স ভৰঙ্গস্স চলনং হোতি. পটিঘো যস্স অত্থি তং সপ্পটিঘং. তত্থ সযং সম্পত্তি ফোট্ঠব্বস্স, নিস্সযৰসেন সম্পত্তি ঘানজিৰ্হাকাযগন্ধরসানং, উভযথাপি অসম্পত্তি চক্খুসোতরূপসদ্দানন্তি দট্ঠব্বং. ইতরং সোল়সৰিধং ওল়ারিকতাদিসভাৰাভাৰতো সুখুমরূপাদিকং.

২৪. কম্মতো ¶ জাতং অট্ঠারসৰিধং উপাদিন্নরূপং তণ্হাদিট্ঠীহি উপেতেন কম্মুনা অত্তনো ফলভাৰেন আদিন্নত্তা গহিতত্তা. ইতরং অগ্গহিতগ্গহণেনদসৰিধং অনুপাদিন্নরূপং.

২৫. দট্ঠব্বভাৰসঙ্খাতেন নিদস্সনেন সহ ৰত্ততীতি সনিদস্সনং. চক্খুৰিঞ্ঞাণগোচরভাৰো হি নিদস্সনন্তি ৰুচ্চতি তস্স চ রূপাযতনতো অনঞ্ঞত্তেপি অঞ্ঞেহি ধম্মেহি তং ৰিসেসেতুং অঞ্ঞং ৰিয কত্ৰা ৰত্তুং ৰট্টতীতি সহ নিদস্সনেন সনিদস্সনন্তি. ধম্মভাৰসামঞ্ঞেন হি একীভূতেসু ধম্মেসু যো নানত্তকরো ৰিসেসো, সো অঞ্ঞো ৰিয কত্ৰা উপচরিতুং যুত্তো. এৰঞ্হি অত্থৰিসেসাৰবোধো হোতি.

২৬. অসম্পত্তৰসেনাতি অত্তানং অসম্পত্তস্স গোচরস্স ৰসেন, অত্তনা ৰিসযপ্পদেসং ৰা অসম্পত্তৰসেন. চক্খুসোতানি হি রূপসদ্দেহি অসম্পত্তানি, সযং ৰা তানি অসম্পত্তানেৰ আরম্মণং গণ্হন্তি. তেনেতং ৰুচ্চতি –

‘‘চক্খুসোতং ¶ পনেতেসু, হোতাসম্পত্তগাহকং;

ৰিঞ্ঞাণুপ্পত্তিহেতুত্তা, সন্তরাধিকগোচরে.

‘‘তথা হি দূরদেসট্ঠং, ফলিকাদিতিরোহিতং;

মহন্তঞ্চ নগাদীনং, ৰণ্ণং চক্খু উদিক্খতি.

‘‘আকাসাদিগতো কুচ্ছি-চম্মানন্তরিকোপি চ;

মহন্তো চ ঘণ্টাদীনং, সদ্দো সোতস্স গোচরো.

‘‘গন্ত্ৰা ৰিসযদেসং তং, ফরিত্ৰা গণ্হতীতি চে;

অধিট্ঠানৰিধানেপি, তস্স সো গোচরো সিযা.

‘‘ভূতপ্পবন্ধতো সো চে, যাতি ইন্দ্রিযসন্নিধিং;

কম্মচিত্তোজসম্ভূতো, ৰণ্ণো সদ্দো চ চিত্তজো.

‘‘ন তেসং গোচরা হোন্তি, ন হি সম্ভোন্তি তে বহি;

ৰুত্তা চ অৰিসেসেন, পাঠে তংৰিসযাৰ তে.

‘‘যদি ¶ চেতং দ্ৰযং অত্তসমীপংযেৰ গণ্হতি;

অক্খিৰণ্ণং তথা মূলং, পস্সেয্য ভমুকস্স চ.

‘‘দিসাদেসৰৰত্থানং, সদ্দস্স ন ভৰেয্য চ;

সিযা চ সরৰেধিস্স, সকণ্ণে সরপাতন’’ন্তি.

গোচরগ্গাহিকরূপং ৰিঞ্ঞাণাধিট্ঠিতং হুত্ৰা তংতংগোচরগ্গহণসভাৰত্তা. ইতরং তেৰীসতিৰিধং অগোচরগ্গাহিকরূপং গোচরগ্গহণাভাৰতো.

২৭. ৰণ্ণিতব্বো দট্ঠব্বোতি ৰণ্ণো. অত্তনো উদযানন্তরং রূপং জনেতীতি ওজা. অৰিনিব্ভোগরূপং ¶ কত্থচিপি অঞ্ঞমঞ্ঞং ৰিনিভুঞ্জনস্স ৰিসুং ৰিসুং পৰত্তিযা অভাৰতো. রূপলোকে গন্ধাদীনং অভাৰৰাদিমতম্পি হি তত্থ তত্থ (ৰিভ. মূলটী. ২২৭; ৰিভ. অনুটী. ২২৭) আচরিযেহি পটিক্খিত্তমেৰ.

২৮. ইচ্চেৰন্তি এত্থপি ইতি-সদ্দো পকারত্থো, তেন ইধ অনাগতম্পি সব্বং দুকতিকাদিভেদং সঙ্গণ্হাতি.

রূপৰিভাগৰণ্ণনা নিট্ঠিতা.

রূপসমুট্ঠাননযৰণ্ণনা

২৯. কানি পন তানি কম্মাদীনি, কথং, কত্থ, কদা চ রূপসমুট্ঠানানীতি আহ ‘‘তত্থা’’ত্যাদি. পটিসন্ধিমুপাদাযাতি পটিসন্ধিচিত্তস্স উপ্পাদক্খণং উপাদায. খণে খণেতি একেকস্স চিত্তস্স তীসু তীসু খণেসু, নিরন্তরমেৰাতি ৰুত্তং হোতি. অপরে পন চিত্তস্স ঠিতিক্খণং (ৰিভ. মূলটী. ২০ পকিণ্ণককথাৰণ্ণনা), ভঙ্গক্খণে চ রূপুপ্পাদং (ৰিভ. মূলটী. ২০ পকিণ্ণককথাৰণ্ণনা) পটিসেধেন্তি. তত্থ কিঞ্চাপি ঠিতিক্খণাভাৰে তেসং উপপত্তি চেৰ তত্থ ৰত্তব্বঞ্চ হেট্ঠা কথিতমেৰ, ইধাপি ¶ পন ভঙ্গক্খণে রূপুপ্পাদাভাৰে উপপত্তিযা তত্থ ৰত্তব্বেন চ সহ সুখগ্গহণত্থং সঙ্গহেত্ৰা ৰুচ্চতি –

‘‘উপ্পন্নুপ্পজ্জমানন্তি, ৰিভঙ্গে এৰমাদিনং;

ভঙ্গক্খণস্মিং উপ্পন্নং, নো চ উপ্পজ্জমানকং.

‘‘উপ্পজ্জমানমুপ্পাদে, উপ্পন্নঞ্চাতিআদিনা;

ভঙ্গুপ্পাদাৰ অক্খাতা, ন চিত্তস্স ঠিতিক্খণো.

‘‘‘উপ্পাদো ¶ চ ৰযো চেৰ, অঞ্ঞথত্তং ঠিতস্স চ;

পঞ্ঞাযতী’তি (অ. নি. ৩.৪৭) ৰুত্তত্তা, ঠিতি অত্থীতি চে মতং.

‘‘অঞ্ঞথত্তস্স একস্মিং, ধম্মে অনুপলদ্ধিতো;

পঞ্ঞাণৰচনা চেৰ, পবন্ধট্ঠিতি তত্থপি.

‘‘ৰুত্তা তস্মা ন চিত্তস্স, ঠিতি দিস্সতি পাল়িযং;

অভিধম্মে অভাৰোপি, নিসেধোযেৰ সব্বথা.

‘‘যদা সমুদযো যস্স, নিরুজ্ঝতি তদাস্স কিং;

দুক্খমুপ্পজ্জতীত্যেত্থ, পঞ্হে নোতি নিসেধতো.

‘‘রূপুপ্পাদো ন ভঙ্গস্মিং, তস্মা সব্বেপি পচ্চযা;

উপ্পাদেযেৰ চিত্তস্স, রূপহেতূতি কেচন.

‘‘ৰুচ্চতে তত্থ একস্মিং, ধম্মেযেৰ যথা মতা;

উপ্পাদাৰত্থতো ভিন্না, ভঙ্গাৰত্থা তথেৰ তু.

‘‘ভঙ্গস্সাভিমুখাৰত্থা, ইচ্ছিতব্বা অযং ঠিতি;

নযদস্সনতো এসা, ৰিভঙ্গে ন তু দেসিতা.

‘‘লক্খণং সঙ্খতস্সেৰ, ৰত্তুমুপ্পাদআদিনং;

দেসিতত্তা ন তত্থাপি, পবন্ধস্স ঠিতীরিতা.

‘‘উপসগ্গস্স ধাতূনমত্থেযেৰ পৰত্তিতো;

পঞ্ঞাযতীতি চেতস্স, অত্থো ৰিঞ্ঞাযতে ইতি.

‘‘ভঙ্গে ¶ ¶ রূপস্স নুপ্পাদো, চিত্তজানং ৰসেন ৰা;

আরুপ্পংৰাভিসন্ধায, ভাসিতো যমকস্স হি.

‘‘সভাৰোযং যথালাভ-যোজনাতি ততো নহি;

ন চিত্তট্ঠিতি ভঙ্গে চ, ন রূপস্স অসম্ভৰো’’তি.

৩১. রূপৰিরাগভাৰনানিব্বত্তত্তা হেতুনো তব্বিধুরতায, অনোকাসতায চ অরূপৰিপাকা, রূপজননে ৰিসেসপচ্চযেহি ঝানঙ্গেহি সম্পযোগাভাৰতো দ্ৰিপঞ্চৰিঞ্ঞাণানি চাতি চুদ্দস চিত্তানি রূপং ন সমুট্ঠাপেন্তীতি ৰুত্তং ‘‘আরুপ্পৰিপাকদ্ৰিপঞ্চৰিঞ্ঞাণৰজ্জিত’’ন্তি. পটিসন্ধিচিত্তং, পন চুতিচিত্তঞ্চ একূনৰীসতি ভৰঙ্গস্সেৰ অন্তোগধত্তা চিত্তন্তরং ন হোতীতি ন তস্স ৰজ্জনং কতং. কিঞ্চাপি ন কতং, পচ্ছাজাতপচ্চযরহিতং, পন আহারাদীহি চ অনুপত্থদ্ধং দুব্বলৰত্থুং নিস্সায পৰত্তত্তা, অত্তনো চ আগন্তুকতায কম্মজরূপেহি চিত্তসমুট্ঠানরূপানং ঠানং গহেত্ৰা ঠিতত্তা চ পটিসন্ধিচিত্তং রূপসমুট্ঠাপকং ন হোতি. চুতিচিত্তে পন অট্ঠকথাযং (ধ. স. অট্ঠ. ৬৩৬; ৰিভ. অট্ঠ. ২৬ পকিণ্ণককথা) তাৰ ‘‘ৰূপসন্তৰট্টমূলস্মিং সন্তানে সাতিসযং সন্তৰুত্তিতায খীণাসৰস্সেৰ চুতিচিত্তং রূপং ন সমুট্ঠাপেতী’’তি (ধ. স. মূলটী. ৬৩৬) ৰুত্তং. আনন্দাচরিযাদযো পন ‘‘সব্বেসম্পি চুতিচিত্তং রূপং ন সমুট্ঠাপেতী’’তি ৰদন্তি. ৰিনিচ্ছযো পন নেসং সঙ্খেপতো মূলটীকাদীসু, ৰিত্থারতো চ অভিধম্মত্থৰিকাসিনিযং ৰুত্তনযেন দট্ঠব্বো. পঠমভৰঙ্গমুপাদাযাতি পটিসন্ধিযা অনন্তরনিব্বত্তপঠমভৰঙ্গতো পট্ঠায. জাযন্তমেৰ সমুট্ঠাপেতি, ন পন ঠিতং, ভিজ্জমানং ৰা অনন্তরাদিপচ্চযলাভেন উপ্পাদক্খণেযেৰ জনকসামত্থিযযোগতো.

৩২. ইরিযায কাযিককিরিযায পৰত্তিপথভাৰতো ইরিযাপথো, গমনাদি, অত্থতো তদৰত্থা রূপপ্পৰত্তি. তম্পি ¶ সন্ধারেতি যথাপৰত্তং উপত্থম্ভেতি. যথা হি ৰীথিচিত্তেহি অব্বোকিণ্ণে ভৰঙ্গে পৰত্তমানে অঙ্গানি ওসীদন্তি, ন এৰমেতেসু দ্ৰত্তিংসৰিধেসু, ৰক্খমানেসু চ ছব্বীসতিযা জাগরণচিত্তেসু পৰত্তমানেসু. তদা পন অঙ্গানি উপত্থদ্ধানি যথাপৰত্তইরিযাপথভাৰেনেৰ পৰত্তন্তি.

৩৩. ৰিঞ্ঞত্তিম্পি সমুট্ঠাপেন্তি, ন কেৰলং রূপিরিযাপথানেৰ. অৰিসেসৰচনেপি পনেত্থ মনোদ্ৰারপ্পৰত্তানেৰ ¶ ৰোট্ঠব্বনজৰনানি ৰিঞ্ঞত্তিসমুট্ঠাপকানি, তথা হাসজনকানি চ পঞ্চদ্ৰারপ্পৰত্তানং পরিদুব্বলভাৰতোতি দট্ঠব্বং. কামঞ্চেত্থ রূপৰিনিমুত্তো ইরিযাপথো, ৰিঞ্ঞত্তি ৰা নত্থি, তথাপি ন সব্বং রূপসমুট্ঠাপকং চিত্তং ইরিযাপথূপত্থম্ভকং, ৰিঞ্ঞত্তিৰিকারজনকঞ্চ হোতি. যং পন চিত্তং ৰিঞ্ঞত্তিজনকং, তং একংসতো ইরিযাপথূপত্থম্ভকং ইরিযাপথস্স ৰিঞ্ঞত্তিযা সহ অৰিনাভাৰতো. ইরিযাপথূপত্থম্ভকঞ্চ রূপজনকন্তি ইমস্স ৰিসেসদস্সনত্থং রূপতো ইরিযাপথৰিঞ্ঞত্তীনং ৰিসুং গহণং.

৩৪. তেরসাতি কুসলতো চত্তারি, অকুসলতো চত্তারি, কিরিযতো পঞ্চাতি তেরস. তেসু হি পুথুজ্জনা অট্ঠহি কুসলাকুসলেহি হসন্তি, সেক্খা দিট্ঠিসহগতৰজ্জিতেহি, অসেক্খা পন পঞ্চহি কিরিযচিত্তেহি, তত্থাপি বুদ্ধা চতূহি সহেতুককিরিযচিত্তেহেৰ হসন্তি, ন অহেতুকেন ‘‘অতীতংসাদীসু অপ্পটিহতঞাণং পত্ৰা ইমেহি তীহি ধম্মেহি সমন্নাগতস্স বুদ্ধস্স ভগৰতো সব্বং কাযকম্মং ঞাণপুব্বঙ্গমং ঞাণানুপরিৰত্তী’’তি ৰচনতো (মহানি. ৬৯; চূল়নি. মোঘরাজমাণৰপুচ্ছানিদ্দেস ৮৫; পটি. ম. ৩.৫). ন হি ৰিচারণপঞ্ঞারহিতস্স হসিতুপ্পাদস্স বুদ্ধানং পৰত্তি যুত্তাতি ৰদন্তি. হসিতুপ্পাদচিত্তেন পন পৰত্তিযমানম্পি তেসং সিতকরণং পুব্বেনিৰাসঅনাগতংসসব্বঞ্ঞুতঞ্ঞাণানং অনুৰত্তকত্তা ঞাণানুপরিৰত্তিযেৰাতি. এৰঞ্চ কত্ৰা অট্ঠকথাযং ¶ (ধ. স. অট্ঠ. ৫৬৮) ‘‘তেসং ঞাণানং চিণ্ণপরিযন্তে ইদং চিত্তং হাসযমানং উপ্পজ্জতী’’তি ৰুত্তং, তস্মা ন তস্স বুদ্ধানং পৰত্তি সক্কা নিৰারেতুং.

৩৫. পচ্ছাজাতাদিপচ্চযূপত্থম্ভলাভেন ঠিতিক্খণেযেৰ উতুওজানং বলৰভাৰোতি ৰুত্তং ‘‘তেজোধাতু ঠিতিপ্পত্তা’’ত্যাদি.

৩৭. তত্থ হদযইন্দ্রিযরূপানি নৰ কম্মতোযেৰ জাতত্তা কম্মজানেৰ. যঞ্হি জাতং, জাযতি, জাযিস্সতি চ, তং ‘‘কম্মজ’’ন্তি ৰুচ্চতি যথা দুদ্ধন্তি.

৪০. পচ্চুপ্পন্নপচ্চযাপেক্খত্তা লহুতাদিত্তযং কম্মজং ন হোতি, ইতরথা সব্বদাভাৰীহি ভৰিতব্বন্তি ৰুত্তং ‘‘লহুতাদিত্তযং উতুচিত্তাহারেহি সম্ভোতী’’তি.

৪৩. একন্তকম্মজানি ¶ নৰ, চতুজেসু কম্মজানি নৰাতি অট্ঠারস কম্মজানি, পঞ্চৰিকাররূপসদ্দঅৰিনিব্ভোগরূপআকাসৰসেন পন্নরস চিত্তজানি, সদ্দো, লহুতাদিত্তযং, অৰিনিব্ভোগাকাসরূপানি নৰাতি তেরস উতুজানি, লহুতাদিত্তযঅৰিনিব্ভোগাকাসৰসেন দ্ৰাদস আহারজানি.

৪৪. কেৰলং জাযমানাদিরূপানং জাযমানপরিপচ্চমানভিজ্জমানরূপানং সভাৰত্তা সভাৰমত্তং ৰিনা অত্তনো জাতিআদিলক্খণাভাৰতো লক্খণানি কেহিচি পচ্চযেহি ন জাযন্তীতি পকাসিতং. উপ্পাদাদিযুত্তানঞ্হি চক্খাদীনং জাতিআদীনি লক্খণানি ৰিজ্জন্তি, ন এৰং জাতিআদীনং. যদি তেসম্পি জাতিআদীনি সিযুং, এৰং অনৰত্থানমেৰ আপজ্জেয্য. যং পন ‘‘রূপাযতনং…পে… কবল়ীকারো আহারো. ইমে ধম্মা চিত্তসমুট্ঠানা’’ত্যাদীসু (ধ. স. ১২০১) জাতিযা কুতোচিজাতত্তং অনুঞ্ঞাতং ¶ , তম্পি রূপজনকপচ্চযানং রূপুপ্পাদনং পতি অনুপরতব্যাপারানং পচ্চযভাৰূপগমনক্খণে জাযমানধম্মৰিকারভাৰেন উপলব্ভমানতং সন্ধাযাতি দট্ঠব্বং. যম্পি ‘‘জাতি, ভিক্খৰে, অনিচ্চা সঙ্খতা পটিচ্চসমুপ্পন্না. জরামরণং, ভিক্খৰে, অনিচ্চং সঙ্খতং পটিচ্চসমুপ্পন্ন’’ন্তি ৰচনং (সং. নি. ২.২০), তত্থাপি পটিচ্চসমুপ্পন্নানং লক্খণভাৰতোতি অযমেত্থাভিসন্ধি. তেনাহু পোরাণা –

‘‘পাঠে কুতোচি জাতত্তং, জাতিযা পরিযাযতো;

সঙ্খতানং সভাৰত্তা, তীসু সঙ্খততোদিতা’’তি.

রূপসমুট্ঠাননযৰণ্ণনা নিট্ঠিতা.

কলাপযোজনাৰণ্ণনা

৪৫. যস্মা পনেতানি রূপানি কম্মাদিতো উপ্পজ্জমানানিপি ন একেকং সমুট্ঠহন্তি, অথ খো পিণ্ডতোৰ. তস্মা পিণ্ডানং গণনপরিচ্ছেদং, সরূপঞ্চ দস্সেতুং ‘‘একুপ্পাদা’’ত্যাদি ৰুত্তং ¶ . সহৰুত্তিনোতি ৰিসুং ৰিসুং কলাপগতরূপৰসেন সহৰুত্তিনো, ন সব্বকলাপানং অঞ্ঞমঞ্ঞং সহুপ্পত্তিৰসেন.

৪৬. দস পরিমাণা অস্সাতি দসকং, সমুদাযস্সেতং নামং, চক্খুনা উপলক্খিতং, তপ্পধানং ৰা দসকং চক্খুদসকং. এৰং সেসেসুপি.

৪৭. ৰচীৰিঞ্ঞত্তিগ্গহণেন সদ্দোপি সঙ্গহিতো হোতি তস্সা তদৰিনাভাৰতোতি ৰুত্তং ‘‘ৰচীৰিঞ্ঞত্তিদসক’’ন্তি.

৫০. কিং ¶ পনেতে একৰীসতি কলাপা সব্বেপি সব্বত্থ হোন্তি, উদাহু কেচি কত্থচীতি আহ ‘‘তত্থা’’ত্যাদি.

কলাপযোজনাৰণ্ণনা নিট্ঠিতা.

রূপপৰত্তিক্কমৰণ্ণনা

৫২. ইদানি নেসং সম্ভৰৰসেন, পৰত্তিপটিসন্ধিৰসেন, যোনিৰসেন চ পৰত্তিং দস্সেতুং ‘‘সব্বানিপি পনেতানী’’ত্যাদি ৰুত্তং. যথারহন্তি সভাৰকপরিপুণ্ণাযতনানং অনুরূপতো.

৫৩. কমলকুহরগব্ভমলাদিসংসেদট্ঠানেসু জাতা সংসেদজা. উপপাতো নেসং অত্থীতি ওপপাতিকা, উক্কংসগতিপরিচ্ছেদৰসেন চেত্থ ৰিসিট্ঠউপপাতো গহিতো যথা ‘‘অভিরূপস্স কঞ্ঞা দাতব্বা’’তি. সত্ত দসকানি পাতুভৰন্তি পরিপুণ্ণাযতনভাৰেন উপলব্ভনতো. কদাচি ন লব্ভন্তি জচ্চন্ধজচ্চবধিরজচ্চাঘাননপুংসকআদিকপ্পিকানং ৰসেন. তত্থ সুগতিযং মহানুভাৰেন কম্মুনা নিব্বত্তমানানং ওপপাতিকানং ইন্দ্রিযৰেকল্লাযোগতো চক্খুসোতঘানালাভো সংসেদজানং, ভাৰালাভো পঠমকপ্পিকওপপাতিকানং ৰসেনপি. দুগ্গতিযং পন চক্খুসোতভাৰালাভো দ্ৰিন্নম্পি ৰসেন, ঘানালাভো সংসেদজানমেৰ ৰসেন, ন ওপপাতিকানং ¶ ৰসেনাতি দট্ঠব্বং. তথা হি ধম্মহদযৰিভঙ্গে ‘‘কামধাতুযা উপপত্তিক্খণে কস্সচি একাদসাযতনানি পাতুভৰন্তি, কস্সচি দস, কস্সচি অপরানিপি দস, কস্সচি নৰ, কস্সচি সত্তা’’তি (ৰিভ. ১০০৭) ৰচনতো পরিপুণ্ণিন্দ্রিযস্স ওপপাতিকস্স সদ্দাযতনৰজ্জিতানি একাদসাযতনানি ৰুত্তানি. অন্ধস্স চক্খাযতনৰজ্জিতানি ¶ দস, তথা বধিরস্স সোতাযতনৰজ্জিতানি, অন্ধবধিরস্স তদুভযৰজ্জিতানি নৰ, গব্ভসেয্যকস্স চক্খুসোতঘানজিৰ্হাসদ্দাযতনৰজ্জিতানিসত্তাযতনানি ৰুত্তানি. যদি পন অঘানকোপি ওপপাতিকো সিযা, অন্ধবধিরাঘানকানং ৰসেন তিক্খত্তুং দস, অন্ধবধিরঅন্ধাঘানকবধিরাঘানকানং ৰসেন তিক্খত্তুং নৰ, অন্ধবধিরাঘানকস্স ৰসেন চ অট্ঠ আযতনানি ৰত্তব্বানি সিযুং, ন পনেৰং ৰুত্তানি. তস্মা নত্থি ওপপাতিকস্স ঘানৰেকল্লন্তি. তথা চ ৰুত্তং যমকট্ঠকথাযং ‘‘অঘানকো ওপপাতিকো নত্থি. যদি ভৰেয্য, কস্সচি অট্ঠাযতনানীতি ৰদেয্যা’’তি (যম. অট্ঠ. আযতনযমক. ১৮-২১).

সংসেদজানং পন ঘানাভাৰো ন সক্কা নিৰারেতুং ‘‘কামধাতুযা উপপত্তিক্খণে’’ত্যাদিপাল়িযা (ৰিভ. ১০০৭) ওপপাতিকযোনিমেৰ সন্ধায, সত্তাযতনগ্গহণস্স চ অঞ্ঞেসং অসম্ভৰতো গব্ভসেয্যকমেৰ সন্ধায ৰুত্তত্তা. যং পন ‘‘সংসেদজযোনিকা পরিপুণ্ণাযতনভাৰেন ওপপাতিকসঙ্গহং কত্ৰা ৰুত্তা’’তি অট্ঠকথাৰচনং, তম্পি পরিপুণ্ণাযতনংযেৰ সংসেদজানং ওপপাতিকেসু সঙ্গহৰসেন ৰুত্তং. অপরে পন যমকে ঘানজিৰ্হানং সহচারিতা ৰুত্তাতি অজিৰ্হস্স অসম্ভৰতো অঘানকস্সপি অভাৰমেৰ ৰণ্ণেন্তি, তত্থাপি যথা চক্খুসোতানি রূপভৰে ঘানজিৰ্হাহি ৰিনা পৰত্তন্তি, ন এৰং ঘানজিৰ্হা অঞ্ঞমঞ্ঞং ৰিনা পৰত্তন্তি দ্ৰিন্নম্পি রূপভৰে অনুপ্পজ্জনতোতি এৰং ৰিসুং ৰিসুং কামভৰে অপ্পৰত্তিৰসেন তেসং সহচারিতা ৰুত্তাতি ন ন সক্কা ৰত্তুন্তি.

৫৪. গব্ভে মাতুকুচ্ছিযং সেন্তীতি গব্ভসেয্যকা, তেযেৰ রূপাদীসু সত্ততায সত্তাতি গব্ভসেয্যকসত্তা. এতে ¶ অণ্ডজজলাবুজা. তীণি দসকানি পাতুভৰন্তি, যানি ‘‘কললরূপ’’ন্তি ৰুচ্চন্তি, পরিপিণ্ডিতানি চ তানি জাতিউণ্ণায একস্স অংসুনো পসন্নতিলতেলে পক্খিপিত্ৰা উদ্ধটস্স পগ্ঘরিত্ৰা অগ্গে ঠিতবিন্দুমত্তানি অচ্ছানি ৰিপ্পসন্নানি. কদাচি ন লব্ভতি অভাৰকসত্তানং ৰসেন. ততো পরন্তি পটিসন্ধিতো পরং. পৰত্তিকালেতি সত্তমে সত্তাহে, টীকাকারমতেন একাদসমে সত্তাহে ৰা. কমেনাতি চক্খুদসকপাতুভাৰতো সত্তাহাতিক্কমেন সোতদসকং ¶ , ততো সত্তাহাতিক্কমেন ঘানদসকং, ততো সত্তাহাতিক্কমেন জিৰ্হাদসকন্তি এৰং অনুক্কমেন. অট্ঠকথাযম্পি হি অযমত্থো দস্সিতোৰ.

৫৫. ঠিতিকালন্তি পটিসন্ধিচিত্তস্স ঠিতিকালং. পটিসন্ধিচিত্তসহজাতা হি উতু ঠানপ্পত্তা তস্স ঠিতিক্খণে সুদ্ধট্ঠকং সমুট্ঠাপেতি, তদা উপ্পন্না ভঙ্গক্খণেত্যাদিনা অনুক্কমেন উতু রূপং জনেতি. ওজাফরণমুপাদাযাতি গব্ভসেয্যকস্স মাতু অজ্ঝোহটাহারতো সংসেদজোপপাতিকানঞ্চ মুখগতসেম্হাদিতো ওজায রসহরণীঅনুসারেন সরীরে ফরণকালতো পট্ঠায.

৫৬. চুতিচিত্তং উপরিমং এতস্সাতি চুতিচিত্তোপরি. কম্মজরূপানি ন উপ্পজ্জন্তি তদুপ্পত্তিযং মরণাভাৰতো. কম্মজরূপৰিচ্ছেদে হি ‘‘মতো’’তি ৰুচ্চতি. যথাহ –

‘‘আযু উস্মা চ ৰিঞ্ঞাণং, যদা কাযং জহন্তিমং;

অপৰিদ্ধো তদা সেতি, নিরত্থংৰ কলিঙ্গর’’ন্তি. (সং. নি. ৩.৯৫ থোকং ৰিসদিসং);

পুরেতরন্তি সত্তরসমস্স উপ্পাদক্খণে. ততোপরং চিত্তজাহারজরূপঞ্চ ৰোচ্ছিজ্জতীতি অজীৰকসন্তানে তেসং উপ্পত্তিযা ¶ অভাৰতো যথানিব্বত্তং চিত্তজং, আহারজঞ্চ ততো পরং কিঞ্চি কালং পৰত্তিত্ৰা নিরুজ্ঝতি. অপরে পন আচরিযা ‘‘চিত্তজরূপং চুতিচিত্ততো পুরেতরমেৰ ৰোচ্ছিজ্জতী’’তি ৰণ্ণেন্তি.

৫৮. রূপলোকে ঘানজিৰ্হাকাযানং অভাৰে কারণং ৰুত্তমেৰ. ভাৰদ্ৰযং পন বহলকামরাগূপনিস্সযত্তা ব্রহ্মানঞ্চ তদভাৰতো তত্থ ন পৰত্ততি. আহারজকলাপানি চ ন লব্ভন্তি অজ্ঝোহটাহারাভাৰেন সরীরগতস্সপি আহারস্স রূপসমুট্ঠাপনাভাৰতো. বাহিরঞ্হি উতুং, আহারঞ্চ উপনিস্সযং লভিত্ৰা উতুআহারা রূপং সমুট্ঠাপেন্তি. জীৰিতনৰকন্তি কাযাভাৰতো কাযদসকট্ঠানিযং জীৰিতনৰকং.

৫৯. অতিরিচ্ছতি সেসব্রহ্মানং পটিসন্ধিযং, পৰত্তে চ উপলভিতব্বরূপতো অৰসিট্ঠং হোতি ¶ , মরণকালে পন ব্রহ্মানং সরীরনিক্খেপাভাৰতো সব্বেসম্পি তিসমুট্ঠানানি, দ্ৰিসমুট্ঠানানি চ সহেৰ নিরুজ্ঝন্তি.

৬১. রূপেসু তেৰীসতি ঘানজিৰ্হাকাযভাৰদ্ৰযৰসেন পঞ্চন্নং অভাৰতো. কেচি পন ‘‘লহুতাদিত্তযম্পি তেসু নত্থি দন্ধত্তকরাদিধাতুক্খোভাভাৰতো’’তি ৰদন্তি, তং অকারণং. ন হি ৰূপসমেতব্বাপেক্খা তব্বিরোধিধম্মপ্পৰত্তি তথা সতি সহেতুককিরিযচিত্তেসু লহুতাদীনং অভাৰপ্পসঙ্গতো. ‘‘সদ্দো ৰিকারো’’ত্যাদি সব্বেসম্পি সাধারণৰসেন ৰুত্তং.

রূপপৰত্তিক্কমৰণ্ণনা নিট্ঠিতা.

নিব্বানভেদৰণ্ণনা

৬২. এত্তাৰতা ¶ চিত্তচেতসিকরূপানি ৰিভাগতো নিদ্দিসিত্ৰা ইদানি নিব্বানং নিদ্দিসন্তো আহ ‘‘নিব্বানং পনা’’ত্যাদি. ‘‘চতুমগ্গঞাণেন সচ্ছিকাতব্ব’’ন্তি ইমিনা নিব্বানস্স তংতংঅরিযপুগ্গলানং পচ্চক্খসিদ্ধতং দস্সেতি. ‘‘মগ্গফলানমারম্মণভূত’’ন্তি ইমিনা কল্যাণপুথুজ্জনানং অনুমানসিদ্ধতং. সঙ্খতধম্মারম্মণঞ্হি, পঞ্ঞত্তারম্মণং ৰা ঞাণং কিলেসানং সমুচ্ছেদপটিপ্পস্সম্ভনে অসমত্থং, অত্থি চ লোকে কিলেসসমুচ্ছেদাদি. তস্মা অত্থি সঙ্খতসম্মুতিধম্মৰিপরীতো কিলেসানং সমুচ্ছেদপটিপ্পস্সদ্ধিকরানং মগ্গফলানং আরম্মণভূতো নিব্বানং নাম একো ধম্মোতি সিদ্ধং. পচ্চক্খানুমানসিদ্ধতাসন্দস্সনেন চ অভাৰমত্তং নিব্বানন্তি ৰিপ্পটিপন্নানং ৰাদং নিসেধেতীতি অলমতিপ্পপঞ্চেন. খন্ধাদিভেদে তেভূমকধম্মে হেট্ঠুপরিযৰসেন ৰিননতো সংসিব্বনতো ৰানসঙ্খাতায তণ্হায নিক্খন্তত্তা ৰিসযাতিক্কমৰসেন অতীতত্তা.

৬৩. সভাৰতোতি অত্তনো সন্তিলক্খণেন. উপাদীযতি কামুপাদাদীহীতি উপাদি, পঞ্চক্খন্ধস্সেতং অধিৰচনং, উপাদিযেৰ সেসো কিলেসেহীতি উপাদিসেসো, তেন সহ ৰত্ততীতি সউপাদিসেসা ¶ , সা এৰ নিব্বানধাতূতি সউপাদিসেসনিব্বানধাতু. কারণপরিযাযেনাতি সউপাদিসেসাদিৰসেন পঞ্ঞাপনে কারণভূতস্স উপাদিসেস ভাৰাভাৰস্স লেসেন.

৬৪. আরম্মণতো, সম্পযোগতো চ রাগদোসমোহেহি সুঞ্ঞত্তা সুঞ্ঞং, সুঞ্ঞমেৰ সুঞ্ঞতং, তথা রাগাদিনিমিত্তরহিতত্তা অনিমিত্তং. রাগাদিপণিধিরহিতত্তা অপ্পণিহিতং. সব্বসঙ্খারেহি ৰা সুঞ্ঞত্তা সুঞ্ঞতং. সব্বসঙ্খারনিমিত্তাভাৰতো ¶ অনিমিত্তং. তণ্হাপণিধিযা অভাৰতো অপ্পণিহিতং.

৬৫. চৰনাভাৰতো অচ্চুতং. অন্তস্স পরিযোসানস্স অতিক্কন্তত্তা অচ্চন্তং. পচ্চযেহি অসঙ্খতত্তা অসঙ্খতং. অত্তনো উত্তরিতরস্স অভাৰতো, সহধম্মেন ৰত্তব্বস্স উত্তরস্স ৰা অভাৰতো অনুত্তরং. ৰানতো তণ্হাতো মুত্তত্তা সব্বসো অপগতত্তা ৰানমুত্তা. মহন্তে সীলক্খন্ধাদিকে এসন্তি গৰেসন্তীতি মহেসযো. ‘‘ইতি চিত্ত’’ন্ত্যাদি ছহি পরিচ্ছেদেহি ৰিভত্তানং চিত্তাদীনং নিগমনং.

নিব্বানভেদৰণ্ণনা নিট্ঠিতা.

ইতি অভিধম্মত্থৰিভাৰিনিযা নাম অভিধম্মত্থসঙ্গহৰণ্ণনায

রূপপরিচ্ছেদৰণ্ণনা নিট্ঠিতা.

৭. সমুচ্চযপরিচ্ছেদৰণ্ণনা

১. সলক্খণা চিন্তনাদিসলক্খণা চিত্তচেতসিকনিপ্ফন্নরূপনিব্বানৰসেন দ্ৰাসত্ততিপভেদা ৰত্থুধম্মা সভাৰধম্মা ৰুত্তা, ইদানি তেসং যথাযোগং সভাৰধম্মানং একেকসমুচ্চযৰসেন যোগানুরূপতো অকুসলসঙ্গহাদিভেদং সমুচ্চযং রাসিং পৰক্খামীতি যোজনা.

২. অকুসলানমেৰ ¶ সভাগধম্মৰসেন সঙ্গহো অকুসলসঙ্গহো. কুসলাদিৰসেন মিস্সকানং সঙ্গহো মিস্সকসঙ্গহো, সচ্চাভিসম্বোধিসঙ্খাতস্স অরিযমগ্গস্স পক্খে ভৰানং বোধিপক্খিযানং ধম্মানং সতিপট্ঠানাদিভেদানং সভাগৰত্থুৰসেন সঙ্গহো বোধিপক্খিযসঙ্গহো. খন্ধাদিৰসেন সব্বেসং সঙ্গহো সব্বসঙ্গহো.

অকুসলসঙ্গহৰণ্ণনা

৩. পুব্বকোটিযা ¶ অপঞ্ঞাযনতো চিরপারিৰাসিযট্ঠেন, ৰণতো ৰা ৰিস্সন্দমানযূসা ৰিয চক্খাদিতো ৰিসযেসু ৰিস্সন্দনতো আসৰা. অথ ৰা ভৰতো আভৰগ্গং ধম্মতো আগোত্রভুং সৰন্তি পৰত্তন্তীতি আসৰা. অৰধিঅত্থো চেত্থ আ-কারো, অৰধি চ মরিযাদাভিৰিধিৰসেন দুৰিধো. তত্থ ‘‘আপাটলিপুত্তং ৰুট্ঠো দেৰো’’ত্যাদীসু ৰিয কিরিযং বহি কত্ৰা পৰত্তো মরিযাদো. ‘‘আভৰগ্গং সদ্দো অব্ভুগ্গতো’’ত্যাদীসু ৰিয কিরিযং ব্যাপেত্ৰা পৰত্তো অভিৰিধি. ইধ পন অভিৰিধিম্হি দট্ঠব্বো. তথা হেতে নিব্বত্তিট্ঠানভূতে চ ভৰগ্গে, গোত্রভুম্হি চ আরম্মণভূতে পৰত্তন্তি. ৰিজ্জমানেসু চ অঞ্ঞেসু আভৰগ্গং, আগোত্রভুঞ্চ সৰন্তেসু মানাদীসু অত্তত্তনিযগ্গহণৰসেন অভিব্যাপনতো মদকরণট্ঠেন আসৰসদিসতায চ এতেযেৰ আসৰভাৰেন নিরুল়্হাতি দট্ঠব্বং. কামোযেৰ আসৰো কামাসৰো, কামরাগো. রূপারূপভৰেসু ছন্দরাগো ভৰাসৰো. ঝাননিকন্তিসস্সতদিট্ঠিসহগতো চ রাগো এত্থেৰ সঙ্গয্হতি. তত্থ পঠমো উপপত্তিভৰেসু রাগো, দুতিযো কম্মভৰে, ততিযো ভৰদিট্ঠিসহগতো. দ্ৰাসট্ঠিৰিধা দিট্ঠি দিট্ঠাসৰো. দুক্খাদীসু চতূসু সচ্চেসু, পুব্বন্তে, অপরন্তে, পুব্বাপরন্তে, পটিচ্চসমুপ্পাদেসু চাতি অট্ঠসু ঠানেসু অঞ্ঞাণং অৰিজ্জাসৰো.

৪. ওত্থরিত্ৰা হরণতো, ওহননতো ৰা হেট্ঠা কত্ৰা হননতো ওসীদাপনতো ‘‘ওঘো’’তি ৰুচ্চতি জলপ্পৰাহো, এতে চ সত্তে ওত্থরিত্ৰা হনন্তা ৰট্টস্মিং সত্তে ওসীদাপেন্তা ৰিয হোন্তীতি ওঘসদিসতায ওঘা ¶ , আসৰাযেৰ পনেত্থ যথাৰুত্তট্ঠেন ‘‘ওঘা’’তি চ ৰুচ্চন্তি.

৫. ৰট্টস্মিং, ভৰযন্তকে ৰা সত্তে কম্মৰিপাকেন ভৰন্তরাদীহি, দুক্খেন ৰা সত্তে যোজেন্তীতি যোগা, হেট্ঠা ৰুত্তধম্মাৰ.

৬. নামকাযেন ¶ রূপকাযং, পচ্চুপ্পন্নকাযেন ৰা অনাগতকাযং গন্থেন্তি দুপ্পমুঞ্চং ৰেঠেন্তীতি কাযগন্থা. গোসীলাদিনা সীলেন, ৰতেন, তদুভযেন চ সুদ্ধীতি এৰং পরতো অসভাৰতো আমসনং পরামাসো. ‘‘ইদমেৰ সচ্চং, মোঘমঞ্ঞ’’ন্তি অভিনিৰিসনং দল়্হগ্গাহো ইদং সচ্চাভিনিৰেসো.

৭. মণ্ডূকং পন্নগো ৰিয ভুসং দল়্হং আরম্মণং আদিযন্তীতি উপাদানানি. কামোযেৰ উপাদানং, কামে উপাদিযতীতি ৰা কামুপাদানং. ‘‘ইমিনা মে সীলৰতাদিনা সংসারসুদ্ধী’’তি এৰং সীলৰতাদীনং গহণং সীলব্বতুপাদানং. ৰদন্তি এতেনাতি ৰাদো, খন্ধেহি ব্যতিরিত্তাব্যতিরিত্তৰসেন ৰীসতি পরিকপ্পিতস্স অত্তনো ৰাদো অত্তৰাদো. সোযেৰ উপাদানন্তি অত্তৰাদুপাদানং.

৮. ঝানাদিৰসেন উপ্পজ্জনককুসলচিত্তং নিসেধেন্তি তথা তস্স উপ্পজ্জিতুং ন দেন্তীতি নীৰরণানি, পঞ্ঞাচক্খুনো ৰা আৰরণট্ঠেন নীৰরণা. পঞ্চসু কামগুণেসু অধিমত্তরাগসঙ্খাতো কামোযেৰ ছন্দনট্ঠেন ছন্দো চাতি কামচ্ছন্দো. সোযেৰ নীৰরণন্তি কামচ্ছন্দনীৰরণং. ব্যাপজ্জতি ৰিনস্সতি এতেন চিত্তন্তি ব্যাপাদো, ‘‘অনত্থং মে অচরী’’ত্যাদিনযপ্পৰত্তনৰৰিধআঘাতৰত্থুপদট্ঠানতায নৰৰিধো, অট্ঠানকোপেন সহ দসৰিধো ৰা দোসো, সোযেৰ ¶ নীৰরণন্তি ব্যাপাদনীৰরণং. থিনমিদ্ধমেৰ নীৰরণং থিনমিদ্ধনীৰরণং. তথা উদ্ধচ্চকুক্কুচ্চনীৰরণং. কস্মা পনেতে ভিন্নধম্মা দ্ৰে দ্ৰে একনীৰরণভাৰেন ৰুত্তাতি? কিচ্চাহারপটিপক্খানং সমানভাৰতো. থিনমিদ্ধানঞ্হি চিত্তুপ্পাদস্স লযাপাদনকিচ্চং সমানং, উদ্ধচ্চকুক্কুচ্চানং অৰূপসন্তভাৰকারণং. তথা পুরিমানং দ্ৰিন্নং তন্দীৰিজম্ভিতা আহারো, হেতূত্যত্থো, পচ্ছিমানং ঞাতিব্যসনাদিৰিতক্কনং. পুরিমানঞ্চ দ্ৰিন্নং ৰীরিযং পটিপক্খভূতং, পচ্ছিমানং সমথোতি, তেনাহু পোরাণা –

‘‘কিচ্চাহারৰিপক্খানং, একত্তা একমেত্থ হি;

কতমুদ্ধচ্চকুক্কুচ্চং, থিনমিদ্ধঞ্চ তাদিনা.

‘‘লীনতাসন্ততা কিচ্চং, তন্দী ঞাতিৰিতক্কনং;

হেতু ৰীরিযসমথা, ইমে তেসং ৰিরোধিনো’’তি.

৯. অপ্পহীনট্ঠেন ¶ অনু অনু সন্তানে সেন্তীতি অনুসযা, অনুরূপং কারণং লভিত্ৰা উপ্পজ্জন্তীত্যত্থো. অপ্পহীনা হি কিলেসা কারণলাভে সতি উপজ্জনারহা সন্তানে অনু অনু সযিতা ৰিয হোন্তীতি তদৰত্থা ‘‘অনুসযা’’তি ৰুচ্চন্তি. তে পন নিপ্পরিযাযতো অনাগতা কিলেসা, অতীতপচ্চুপ্পন্নাপি তংসভাৰত্তা তথা ৰুচ্চন্তি. ন হি কালভেদেন ধম্মানং সভাৰভেদো অত্থি, যদি অপ্পহীনট্ঠেন অনুসযা, ননু সব্বেপি কিলেসা অপ্পহীনা অনুসযা ভৰেয্যুন্তি? ন মযং অপ্পহীনতামত্তেন ‘‘অনুসযা’’তি ৰদাম, অথ খো অপ্পহীনট্ঠেন থামগতা কিলেসা অনুসযাতি. থামগমনঞ্চ অনঞ্ঞসাধারণো কামরাগাদীনমেৰ আৰেণিকো সভাৰোতি অলং ৰিৰাদেন. কামরাগোযেৰ অনুসযো কামরাগানুসযো.

১০. সংযোজেন্তি বন্ধন্তীতি সংযোজনানি.

১২. চিত্তং ¶ কিলিস্সতি উপতপ্পতি, বাধীযতি ৰা এতেহীতি কিলেসা.

১৩. কামভৰনামেনাতি কামভৰসঙ্খাতানং আরম্মণানং নামেন. তথাপৰত্তন্তি সীলব্বতাদীনং পরতো আমসনাদিৰসেন পৰত্তং.

১৪. আসৰা চ ওঘা চ যোগা চ গন্থা চ ৰত্থুতো ধম্মতো ৰুত্তনযেন তযো. তথা উপাদানা দুৰে ৰুত্তা তণ্হাদিট্ঠিৰসেন. নীৰরণা অট্ঠ সিযুং থিনমিদ্ধউদ্ধচ্চকুক্কুচ্চানং ৰিসুং গহণতো. অনুসযা ছল়েৰ হোন্তি কামরাগভৰরাগানুসযানং তণ্হাসভাৰেন একতো গহিতত্তা. নৰ সংযোজনা মতা উভযত্থ ৰুত্তানং তণ্হাসভাৰানং, দিট্ঠিসভাৰানঞ্চ একেকং সঙ্গহিতত্তা. কিলেসা পন সুত্তন্তৰসেন, অভিধম্মৰসেনপি দস. ইতি এৰং পাপানং অকুসলানং সঙ্গহো নৰধা ৰুত্তো. এত্থ চ –

নৰাট্ঠসঙ্গহা লোভ-দিট্ঠিযো সত্তসঙ্গহা;

অৰিজ্জা পটিঘো পঞ্চ-সঙ্গহো চতুসঙ্গহা;

কঙ্খা তিসঙ্গহা মানুদ্ধচ্চা থিনং দ্ৰিসঙ্গহং.

কুক্কুচ্চমিদ্ধাহিরিকা-নোত্তপ্পিস্সা ¶ নিগূহনা;

একসঙ্গহিতা পাপা, ইচ্চেৰং নৰসঙ্গহা.

অকুসলসঙ্গহৰণ্ণনা নিট্ঠিতা.

মিস্সকসঙ্গহৰণ্ণনা

১৫. হেতূসু ৰত্তব্বং হেট্ঠা ৰুত্তমেৰ.

১৬. আরম্মণং উপগন্ত্ৰা চিন্তনসঙ্খাতেন উপনিজ্ঝাযনট্ঠেন যথারহং পচ্চনীকধম্মঝাপনট্ঠেন চ ঝানানি চ তানি অঙ্গানি চ সমুদিতানং ¶ অৰযৰভাৰেন অঙ্গীযন্তি ঞাযন্তীতি ঝানঙ্গানি. অৰযৰৰিনিমুত্তস্স চ সমুদাযস্স অভাৰেপি সেনঙ্গরথঙ্গাদযো ৰিয ৰিসুং ৰিসুং অঙ্গভাৰেন ৰুচ্চন্তি একতো হুত্ৰা ঝানভাৰেন. দোমনস্সঞ্চেত্থ অকুসলঝানঙ্গং, সেসানি কুসলাকুসলাব্যাকতঝানঙ্গানি.

১৭. সুগতিদুগ্গতীনং, নিব্বানস্স চ অভিমুখং পাপনতো মগ্গা, তেসং পথভূতানি অঙ্গানি, মগ্গস্স ৰা অট্ঠঙ্গিকস্স অঙ্গানি মগ্গঙ্গানি. সম্মা অৰিপরীততো পস্সতীতি সম্মাদিট্ঠি. সা পন ‘‘অত্থি দিন্ন’’ন্ত্যাদিৰসেন দসৰিধা, পরিঞ্ঞাদিকিচ্চৰসেন চতুব্বিধা ৰা. সম্মা সঙ্কপ্পেন্তি এতেনাতি সম্মাসঙ্কপ্পো. সো নেক্খম্মসঙ্কপ্পঅব্যাপাদসঙ্কপ্পঅৰিহিংসাসঙ্কপ্পৰসেন তিৰিধো. সম্মাৰাচাদযো হেট্ঠা ৰিভাৰিতাৰ. সম্মা ৰাযমন্তি এতেনাতি সম্মাৰাযামো. সম্মা সরন্তি এতাযাতি সম্মাসতি. ইমেসং পন ভেদং উপরি ৰক্খতি. সম্মা সামঞ্চ আধীযতি এতেন চিত্তন্তি সম্মাসমাধি, পঠমজ্ঝানাদিৰসেন পঞ্চৰিধা একগ্গতা. মিচ্ছাদিট্ঠিআদযো দুগ্গতিমগ্গত্তা মগ্গঙ্গানি.

১৮. দস্সনাদীসু চক্খুৰিঞ্ঞাণাদীহি, যেভুয্যেন তংসহিতসন্তানপ্পৰত্তিযং লিঙ্গাদীহি, জীৰনে জীৰন্তেহি কম্মজরূপসম্পযুত্তধম্মেহি, মননে জাননে সম্পযুত্তধম্মেহি, সুখিতাদিভাৰে সুখিতাদীহি ¶ সহজাতেহি, সদ্দহনাদীসু সদ্দহনাদিৰসপ্পৰত্তেহি তেহেৰ, ‘‘অনঞ্ঞাতং ঞস্সামী’’তি পৰত্তিযং তথাপৰত্তেহি সহজাতেহি, আজাননে অঞ্ঞভাৰিভাৰে চ আজাননাদিৰসপ্পৰত্তেহি সহজাতেহি অত্তানং অনুৰত্তাপেন্তা ধম্মা ইস্সরট্ঠেন ইন্দ্রিযানি নামাতি আহ ‘‘চক্খুন্দ্রিয’’ন্ত্যাদি. অট্ঠকথাযং (ৰিভ. অট্ঠ. ২১৯; ৰিসুদ্ধি. ২.৫২৫) পন অপরেপি ইন্দলিঙ্গট্ঠাদযো ইন্দ্রিযট্ঠা ৰুত্তা. জীৰিতিন্দ্রিযন্তি রূপারূপৰসেন দুৰিধং জীৰিতিন্দ্রিযং. ‘‘অনমতগ্গে সংসারে অনঞ্ঞাতং ¶ অমতং পদং, চতুসচ্চধম্মমেৰ ৰা ঞস্সামী’’তি এৰমজ্ঝাসযেন পটিপন্নস্স ইন্দ্রিযং অনঞ্ঞাতঞ্ঞস্সামীতিন্দ্রিযং. আজানাতি পঠমমগ্গেন দিট্ঠমরিযাদং অনতিক্কমিত্ৰা জানাতি ইন্দ্রিযঞ্চাতি অঞ্ঞিন্দ্রিযং. অঞ্ঞাতাৰিনো চত্তারি সচ্চানি পটিৰিজ্ঝিত্ৰা ঠিতস্স অরহতো ইন্দ্রিযং অঞ্ঞাতাৰিন্দ্রিযং. ধম্মসরূপৰিভাৰনত্থঞ্চেত্থ পঞ্ঞিন্দ্রিযগ্গহণং, পুগ্গলজ্ঝাসযকিচ্চৰিসেসৰিভাৰনত্থং অনঞ্ঞাতঞ্ঞস্সামীতিন্দ্রিযাদীনং গহণং.

এত্থ চ সত্তপঞ্ঞত্তিযা ৰিসেসনিস্সযত্তা অজ্ঝত্তিকাযতনানি আদিতো ৰুত্তানি, মনিন্দ্রিযং পন অজ্ঝত্তিকাযতনভাৰসামঞ্ঞেন এত্থেৰ ৰত্তব্বম্পি অরূপিন্দ্রিযেহি সহ একতো দস্সনত্থং জীৰিতিন্দ্রিযানন্তরং ৰুত্তং, সাযং পঞ্ঞত্তি ইমেসং ৰসেন ‘‘ইত্থী পুরিসো’’তি ৰিভাগং গচ্ছতীতি দস্সনত্থং তদনন্তরং ভাৰদ্ৰযং, তযিমে উপাদিন্নধম্মা ইমস্স ৰসেন তিট্ঠন্তীতি দস্সনত্থং ততো পরং জীৰিতিন্দ্রিযং, সত্তসঞ্ঞিতো ধম্মপুঞ্জো পবন্ধৰসেন পৰত্তমানো ইমাহি ৰেদনাহি সংকিলিস্সতীতি দস্সনত্থং ততো ৰেদনাপঞ্চকং, তাহি পন ৰিসুদ্ধিকামানং ৰোদানসম্ভারদস্সনত্থং ততো সদ্ধাদিপঞ্চকং, সম্ভূতৰোদানসম্ভারা চ ইমেহি ৰিসুজ্ঝন্তীতি ৰিসুদ্ধিপ্পত্তা, নিট্ঠিতকিচ্চা চ হোন্তীতি দস্সনত্থং অন্তে তীণি ৰুত্তানি. এত্তাৰতা অধিপ্পেতত্থসিদ্ধীতি অঞ্ঞেসং অগ্গহণন্তি ইদমেতেসং অনুক্কমেন দেসনায কারণন্তি অলমতিপ্পপঞ্চেন.

১৯. অসদ্ধিযকোসজ্জপমাদউদ্ধচ্চঅৰিজ্জাঅহিরিকঅনোত্তপ্পসঙ্খাতেহি পটিপক্খধম্মেহি অকম্পিযট্ঠেন, সম্পযুত্তধম্মেসু থিরভাৰেন চ সদ্ধাদীনি সত্ত বলানি, অহিরিকানোত্তপ্পদ্ৰযং পন সম্পযুত্তধম্মেসু থিরভাৰেনেৰ.

২০. অত্তাধীনপ্পৰত্তীনং পতিভূতা ধম্মা অধিপতী. ‘‘ছন্দৰতো কিংনাম ন সিজ্ঝতী’’ত্যাদিকং হি পুব্বাভিসঙ্খারূপনিস্সযং লভিত্ৰা ¶ উপ্পজ্জমানে চিত্তে ছন্দাদযো ধুরভূতা ¶ সযং সম্পযুত্তধম্মে সাধযমানা হুত্ৰা পৰত্তন্তি, তে চ তেসং ৰসেন পৰত্তন্তি, তেন তে অত্তাধীনানং পতিভাৰেন পৰত্তন্তি. অঞ্ঞেসং অধিপতিধম্মানং অধিপতিভাৰনিৰারণৰসেন ইস্সরিযং অধিপতিতা. সন্তেসুপি ইন্দ্রিযন্তরেসু কেৰলং দস্সনাদীসু চক্খুৰিঞ্ঞাণাদীহি অনুৰত্তাপনমত্তং ইন্দ্রিযতাতি অযং অধিপতিইন্দ্রিযানং ৰিসেসো.

২১. ওজট্ঠমকরূপাদযো আহরন্তীতি আহারা. কবল়ীকারাহারো হি ওজট্ঠমকরূপং আহরতি, ফস্সাহারো তিস্সো ৰেদনা, মনোসঞ্চেতনাহারসঙ্খাতং কুসলাকুসলকম্মং তীসু ভৰেসু পটিসন্ধিং. ৰিঞ্ঞাণাহারসঙ্খাতং পটিসন্ধিৰিঞ্ঞাণং সহজাতনামরূপেআহরতি, কিঞ্চাপি সকসকপচ্চযুপ্পন্নে আহরন্তা অঞ্ঞেপি অত্থি. অজ্ঝত্তিকসন্ততিযা পন ৰিসেসপচ্চযত্তা ইমেযেৰ চত্তারো ‘‘আহারা’’তি ৰুত্তা.

কবল়ীকারাহারভক্খানঞ্হি সত্তানং রূপকাযস্স কবল়ীকারাহারো ৰিসেসপচ্চযো কম্মাদিজনিতস্সপি তস্স কবল়ীকারাহারূপত্থম্ভবলেনেৰ দসৰস্সাদিপ্পৰত্তিসম্ভৰতো. তথা হেস ‘‘ধাতি ৰিয কুমারস্স, উপত্থম্ভনকযন্তং ৰিয গেহস্সা’’তি ৰুত্তো. ফস্সোপি সুখাদিৰত্থুভূতং আরম্মণং ফুসন্তোযেৰ সুখাদিৰেদনাপৰত্তনেন সত্তানং ঠিতিযা পচ্চযো হোতি. মনোসঞ্চেতনা কুসলাকুসলকম্মৰসেন আযূহমানাযেৰ ভৰমূলনিপ্ফাদনতো সত্তানং ঠিতিযা পচ্চযো হোতি. ৰিঞ্ঞাণং ৰিজানন্তমেৰ নামরূপপ্পৰত্তনেন সত্তানং ঠিতিযা পচ্চযো হোতীতি এৰমেতেযেৰ অজ্ঝত্তসন্তানস্স ৰিসেসপচ্চযত্তা ‘‘আহারা’’তি ৰুত্তা, ফস্সাদীনং দুতিযাদিভাৰো দেসনাক্কমতো, ন উপ্পত্তিক্কমতো.

২৬. পঞ্চৰিঞ্ঞাণানং ¶ ৰিতক্কৰিরহেন আরম্মণেসু অভিনিপাতমত্তত্তা তেসু ৰিজ্জমানানিপি উপেক্খাসুখদুক্খানি উপনিজ্ঝানাকারস্স অভাৰতো ঝানঙ্গভাৰেন ন উদ্ধটানি. ‘‘ৰিতক্কপচ্ছিমকং হি ঝানঙ্গ’’ন্তি ৰুত্তং. দ্ৰিপঞ্চৰিঞ্ঞাণমনোধাতুত্তিকসন্তীরণত্তিকৰসেন সোল়সচিত্তেসু ৰীরিযাভাৰতো তত্থ ৰিজ্জমানোপি সমাধি বলভাৰং ন গচ্ছতি. ‘‘ৰীরিযপচ্ছিমকং বল’’ন্তি হি ৰুত্তং. তথা অট্ঠারসাহেতুকেসু হেতুৰিরহতো মগ্গঙ্গানি ন লব্ভন্তি. ‘‘হেতুপচ্ছিমকং মগ্গঙ্গ’’ন্তি (ধ. স. অট্ঠ. ৪৩৮) হি ৰুত্তন্তি ইমমত্থং মনসি নিধাযাহ ‘‘দ্ৰিপঞ্চৰিঞ্ঞাণেসূ’’ত্যাদি. ঝানঙ্গানি ন লব্ভন্তীতি সম্বন্ধো.

২৭. অধিমোক্খৰিরহতো ¶ ৰিচিকিচ্ছাচিত্তে একগ্গতা চিত্তট্ঠিতিমত্তং, ন পন মিচ্ছাসমাধিসমাধিন্দ্রিযসমাধিবলৰোহারং গচ্ছতীতি আহ ‘‘তথা ৰিচিকিচ্ছাচিত্তে’’ত্যাদি.

২৮. দ্ৰিহেতুকতিহেতুকগ্গহণেন একহেতুকেসু অধিপতীনং অভাৰং দস্সেতি. জৰনেস্ৰেৰাতি অৰধারণং লোকিযৰিপাকেসু অধিপতীনং অসম্ভৰদস্সনত্থং. ন হি তে ছন্দাদীনি পুরক্খত্ৰা পৰত্তন্তি. ৰীমংসাধিপতিনো দ্ৰিহেতুকজৰনেসু অসম্ভৰতো চিত্তাভিসঙ্খারূপনিস্সযস্স চ সম্ভৰানুরূপতো লব্ভমানতং সন্ধাযাহ ‘‘যথাসম্ভৰ’’ন্তি. একোৰ লব্ভতি, ইতরথা অধিপতিভাৰাযোগতো, তেনেৰ হি ভগৰতা ‘‘হেতূ হেতুসম্পযুত্তকানং ধম্মানং হেতুপচ্চযেন পচ্চযো’’ত্যাদিনা (পট্ঠা. ১.১.১) হেতুপচ্চযনিদ্দেসে ৰিয ‘‘অধিপতী অধিপতিসম্পযুত্তকান’’ন্ত্যাদিনা অৰত্ৰা ‘‘ছন্দাধিপতি ছন্দসম্পযুত্তকান’’ন্ত্যাদিনা (পট্ঠা. ১.১.৩) একেকাধিপতিৰসেনেৰ অধিপতিপচ্চযো উদ্ধটো.

২৯. ৰত্থুতো ¶ ধম্মৰসেন হেতুধম্মা ছ, ঝানঙ্গানি পঞ্চ সোমনস্সদোমনস্সুপেক্খানং ৰেদনাৰসেন একতো গহিতত্তা, মগ্গঙ্গা নৰ মিচ্ছাসঙ্কপ্পৰাযামসমাধীনং ৰিতক্কৰীরিযচিত্তেকগ্গতাসভাৰেন সম্মাসঙ্কপ্পাদীহি একতো গহিতত্তা. ইন্দ্রিযধম্মা সোল়স পঞ্চন্নং ৰেদনিন্দ্রিযানং ৰেদনাসামঞ্ঞেন, তিণ্ণং লোকুত্তরিন্দ্রিযানং পঞ্ঞিন্দ্রিযস্স চ ঞাণসামঞ্ঞেন একতো গহিতত্তা, রূপারূপজীৰিতিন্দ্রিযানঞ্চ ৰিসুং গহিতত্তা, বলধম্মা পন যথাৰুত্তনযেনেৰ নৰ ঈরিতা, অধিপতিধম্মা চত্তারো ৰুত্তা, আহারা তথা চত্তারো ৰুত্তাতি কুসলাদীহি তীহি সমাকিণ্ণো ততোযেৰ মিস্সকসঙ্গহো এৰংনামকো সঙ্গহো সত্তধা ৰুত্তো. এত্থ চ –

পঞ্চসঙ্গহিতা পঞ্ঞা, ৰাযামেকগ্গতা পন;

চতুসঙ্গহিতা চিত্তং, সতি চেৰ তিসঙ্গহা.

সঙ্কপ্পো ৰেদনা সদ্ধা, দুকসঙ্গহিতা মতা;

একেকসঙ্গহা সেসা, অট্ঠৰীসতি ভাসিতা.

মিস্সকসঙ্গহৰণ্ণনা নিট্ঠিতা.

বোধিপক্খিযসঙ্গহৰণ্ণনা

৩০. পট্ঠাতীতি ¶ পট্ঠানং, অসুভগ্গহণাদিৰসেন অনুপৰিসিত্ৰা কাযাদিআরম্মণে পৰত্ততীত্যত্থো, সতিযেৰ পট্ঠানং সতিপট্ঠানং. তং পন কাযৰেদনাচিত্তধম্মেসু অসুভদুক্খানিচ্চানত্তাকারগ্গহণৰসেন, সুভসুখনিচ্চঅত্তসঞ্ঞাৰিপল্লাসপ্পহানৰসেন চ চতুব্বিধন্তি ৰুত্তং ‘‘চত্তারো সতিপট্ঠানা’’তি. কুচ্ছিতানং কেসাদীনং আযোতি কাযো, সরীরং, অস্সাসপস্সাসানং ৰা সমূহো কাযো ¶ , তস্স অনুপস্সনা পরিকম্মৰসেন, ৰিপস্সনাৰসেন চ সরণং কাযানুপস্সনা. দুক্খদুক্খৰিপরিণামদুক্খসঙ্খারদুক্খভূতানং ৰেদনানং ৰসেন অনুপস্সনা ৰেদনানুপস্সনা. তথা সরাগমহগ্গতাদিৰসেন সম্পযোগভূমিভেদেন ভিন্নস্সেৰ চিত্তস্স অনুপস্সনা চিত্তানুপস্সনা. সঞ্ঞাসঙ্খারানং ধম্মানং ভিন্নলক্খণানমেৰ অনুপস্সনা ধম্মানুপস্সনা.

৩১. সম্মা পদহন্তি এতেনাতি সম্মপ্পধানং, ৰাযামো. সো চ কিচ্চভেদেন চতুব্বিধোতি আহ ‘‘চত্তারো সম্মপ্পধানা’’ত্যাদি. অসুভমনসিকারকম্মট্ঠানানুযুঞ্জনাদিৰসেন ৰাযমনং ৰাযামো. ভিয্যোভাৰাযাতি অভিৰুদ্ধিযা.

৩২. ইজ্ঝতি অধিট্ঠানাদিকং এতাযাহি ইদ্ধি, ইদ্ধিৰিধঞাণং ইদ্ধিযা পাদো ইদ্ধিপাদো, ছন্দোযেৰ ইদ্ধিপাদো ছন্দিদ্ধিপাদো.

৩৫. বুজ্ঝতীতি বোধি, আরদ্ধৰিপস্সকতো পট্ঠায যোগাৰচরো. যায ৰা সো সতিআদিকায ধম্মসামগ্গিযা বুজ্ঝতি সচ্চানি পটিৰিজ্ঝতি, কিলেসনিদ্দাতো ৰা ৰুট্ঠাতি, কিলেসসঙ্কোচাভাৰতো ৰা মগ্গফলপ্পত্তিযা ৰিকসতি, সা ধম্মসামগ্গী বোধি, তস্স বোধিস্স, তস্সা ৰা বোধিযা অঙ্গভূতা কারণভূতাতি বোজ্ঝঙ্গা, তে পন ধম্মৰসেন সত্তৰিধাতি আহ ‘‘সতিসম্বোজ্ঝঙ্গো’’ত্যাদি. সতিযেৰ সুন্দরো বোজ্ঝঙ্গো, সুন্দরস্স ৰা বোধিস্স, সুন্দরায ৰা বোধিযা অঙ্গোতি সতিসম্বোজ্ঝঙ্গো. ধম্মে ৰিচিনাতি উপপরিক্খতীতি ধম্মৰিচযো, ৰিপস্সনাপঞ্ঞা. উপেক্খাতি ইধ তত্রমজ্ঝত্তুপেক্খা.

৪০. ‘‘সত্তধা ¶ তত্থ সঙ্গহো’’তি ৰত্ৰান পুন তং দস্সেতুং ‘‘সঙ্কপ্পপস্সদ্ধি চা’’ত্যাদি ৰুত্তং ¶ . তত্থ ৰীরিযং নৰট্ঠানং সম্মপ্পধানচতুক্কৰীরিযিদ্ধিপাদৰীরিযিন্দ্রিযৰীরিযবলসম্বোজ্ঝঙ্গসম্মাৰাযামৰসেন নৰকিচ্চত্তা, সতি অট্ঠট্ঠানা সতিপট্ঠানচতুক্কসতিন্দ্রিযসতিবলসতিসম্বোজ্ঝঙ্গসম্মাসতিৰসেন অট্ঠকিচ্চত্তা. সমাধি চতুট্ঠানো সমাধিন্দ্রিযসমাধিবলসমাধিসম্বোজ্ঝঙ্গসম্মাসমাধিৰসেন চতুকিচ্চত্তা, পঞ্ঞা পঞ্চট্ঠানা ৰীমংসিদ্ধিপাদপঞ্ঞিন্দ্রিযপঞ্ঞাবলধম্মৰিচযসম্বোজ্ঝঙ্গসম্মাদিট্ঠিৰসেন পঞ্চকিচ্চত্তা, সদ্ধা দ্ৰিট্ঠানা সদ্ধিন্দ্রিযসদ্ধাবলৰসেন দ্ৰিকিচ্চত্তা. এসো উত্তমানং বোধিপক্খিযভাৰেন ৰিসিট্ঠানং সত্ততিংস ধম্মানং পৰরো উত্তমো ৰিভাগো.

৪১. লোকুত্তরে অট্ঠৰিধেপি সব্বে সত্ততিংস ধম্মা হোন্তি, সঙ্কপ্পপীতিযো ন ৰা হোন্তি, দুতিযজ্ঝানিকে সঙ্কপ্পস্স, চতুত্থপঞ্চমজ্ঝানিকে পীতিযা চ অসম্ভৰতো ন হোন্তি ৰা, লোকিযেপি চিত্তে সীলৰিসুদ্ধাদি ছব্বিসুদ্ধিপৰত্তিযং যথাযোগং তংতংকিচ্চস্স অনুরূপৰসেন কেচি কত্থচি ৰিসুং ৰিসুং হোন্তি, কত্থচি ন ৰা হোন্তি.

বোধিপক্খিযসঙ্গহৰণ্ণনা নিট্ঠিতা.

সব্বসঙ্গহৰণ্ণনা

৪২. অতীতানাগতপচ্চুপ্পন্নাদিভেদভিন্না তে তে সভাগধম্মা একজ্ঝং রাসট্ঠেন খন্ধা. তেনাহ ভগৰা – ‘‘তদেকজ্ঝং অভিসংযূহিত্ৰা অভিসঙ্খিপিত্ৰা অযং ৰুচ্চতি রূপক্খন্ধো’’ত্যাদি (ৰিভ. ২), তে পনেতে খন্ধা ভাজনভোজনব্যঞ্জনভত্তকারকভুঞ্জকৰিকপ্পৰসেন পঞ্চেৰ ৰুত্তাতি আহ ‘‘রূপক্খন্ধো’’ত্যাদি ¶ . রূপঞ্হি ৰেদনানিস্সযত্তা ভাজনট্ঠানিযং, ৰেদনা ভুঞ্জিতব্বত্তা ভোজনট্ঠানিযা, সঞ্ঞা ৰেদনাস্সাদলাভহেতুত্তা ব্যঞ্জনট্ঠানিযা, সঙ্খারা অভিসঙ্খরণতো ভত্তকারকট্ঠানিযা, ৰিঞ্ঞাণং উপভুঞ্জকত্তা ভুঞ্জকট্ঠানিযং. এত্তাৰতা চ অধিপ্পেতত্থসিদ্ধীতি পঞ্চেৰ ৰুত্তা. দেসনাক্কমেপি ইদমেৰ কারণং যত্থ ভুঞ্জতি, যঞ্চ ভুঞ্জতি, যেন চ ভুঞ্জতি, যো চ ভোজকো, যো চ ভুঞ্জিতা, তেসং অনুক্কমেন দস্সেতুকামত্তা.

৪৩. উপাদানানং ¶ গোচরা খন্ধা উপাদানক্খন্ধা, তে পন উপাদানৰিসযভাৰেন গহিতা রূপাদযো পঞ্চেৰাতি ৰুত্তং ‘‘রূপুপাদানক্খন্ধো’’ত্যাদি. সব্বসভাগধম্মসঙ্গহত্থং হি সাসৰা, অনাসৰাপি ধম্মা অৰিসেসতো ‘‘পঞ্চক্খন্ধা’’তি দেসিতা. ৰিপস্সনাভূমিসন্দস্সনত্থং পন সাসৰাৰ ‘‘উপাদানক্খন্ধা’’তি. যথা পনেত্থ ৰেদনাদযো সাসৰা, অনাসৰা চ, ন এৰং রূপং, একন্তকামাৰচরত্তা. সভাগরাসিৰসেন পন তং খন্ধেসু দেসিতং, উপাদানিযভাৰেন, পন রাসিৰসেন চ উপাদানক্খন্ধেসূতি দট্ঠব্বং.

৪৪. আযতন্তি এত্থ তংতংদ্ৰারারম্মণা চিত্তচেতসিকা তেন তেন কিচ্চেন ঘট্টেন্তি ৰাযমন্তি, আযভূতে ৰা তে ধম্মে এতানি তনোন্তি ৰিত্থারেন্তি, আযতং ৰা সংসারদুক্খং নযন্তি পৰত্তেন্তি, চক্খুৰিঞ্ঞাণাদীনং কারণভূতানীতি ৰা আযতনানি. অপিচ লোকে নিৰাসআকরসমোসরণসঞ্জাতিট্ঠানং ‘‘আযতন’’ন্তি ৰুচ্চতি, তস্মা এতেপি তংতংদ্ৰারিকানং, তংতদারম্মণানঞ্চ চক্খুৰিঞ্ঞাণাদীনং নিৰাসট্ঠানতায, তেসমেৰ আকিণ্ণভাৰেন পৰত্তানং আকরট্ঠানতায, দ্ৰারারম্মণতো সমোসরন্তানং সমোসরণট্ঠানতায, তত্থেৰ উপ্পজ্জন্তানং সঞ্জাতিট্ঠানতায চ আযতনানি. তানি পন দ্ৰারভূতানি অজ্ঝত্তিকাযতনানি ¶ ছ, আরম্মণভূতানি চ বাহিরাযতনানি ছাতি দ্ৰাদসৰিধানীতি আহ ‘‘চক্খাযতন’’ন্ত্যাদি. চক্খু চ তং আযতনঞ্চাতি চক্খাযতনং. এৰং সেসেসুপি.

এত্থ অজ্ঝত্তিকাযতনেসু সনিদস্সনসপ্পটিঘারম্মণত্তা চক্খাযতনং ৰিভূতন্তি তং পঠমং ৰুত্তং, তদনন্তরং অনিদস্সনসপ্পটিঘারম্মণানি ইতরানি, তত্থাপি অসম্পত্তগ্গাহকসামঞ্ঞেন চক্খাযতনানন্তরং সোতাযতনং ৰুত্তং, ইতরেসু সীঘতরং আরম্মণগ্গহণসমত্থত্তা ঘানাযতনং পঠমং ৰুত্তং. পুরতো ঠপিতমত্তস্স হি ভোজনাদিকস্স গন্ধো ৰাতানুসারেন ঘানে পটিহঞ্ঞতি, তদনন্তরং পন পদেসৰুত্তিসামঞ্ঞেন জিৰ্হাযতনং ৰুত্তং, ততো সব্বট্ঠানিকং কাযাযতনং, ততো পঞ্চন্নম্পি গোচরগ্গহণসমত্থং মনাযতনং, যথাৰুত্তানং পন অনুক্কমেন তেসং তেসং আরম্মণানি রূপাযতনাদীনি ৰুত্তানি.

৪৫. অত্তনো সভাৰং ধারেন্তীতি ধাতুযো. অথ ৰা যথাসম্ভৰং অনেকপ্পকারং সংসারদুক্খং ৰিদহন্তি, ভারহারেহি ৰিয চ ভারো সত্তেহি ধীযন্তি ধারিযন্তি, অৰসৰত্তনতো দুক্খৰিধানমত্তমেৰ চেতা, সত্তেহি চ সংসারদুক্খং অনুৰিধীযতি এতাহি, তথাৰিহিতঞ্চ এতাস্ৰেৰ ¶ মীযতি ঠপিযতি, রসসোণিতাদিসরীরাৰযৰধাতুযো ৰিয, হরিতালমনোসিলাদিসেলাৰযৰধাতুযো ৰিয চ ঞেয্যাৰযৰভূতা চাতি ধাতুযো. যথাহু –

‘‘ৰিদহতি ৰিধানঞ্চ, ধীযতে চ ৰিধীযতে;

এতায ধীযতে এত্থ, ইতি ৰা ধাতুসম্মতা;

সরীরসেলাৰযৰ-ধাতুযো ৰিয ধাতুযো’’তি.

তা পন মনাযতনং সত্তৰিঞ্ঞাণধাতুৰসেন সত্তধা ভিন্দিত্ৰা অৰসেসেহি একাদসাযতনেহি সহ অট্ঠারসধাতূ ¶ ৰুত্তাতি আহ ‘‘চক্খুধাতূ’’ত্যাদি. কমকারণং ৰুত্তনযেন দট্ঠব্বং.

৪৬. অরিযকরত্তা অরিযানি, তচ্ছভাৰতো সচ্চানীতি অরিযসচ্চানি. ইমানি হি চত্তারো পটিপন্নকে, চত্তারো ফলট্ঠেতি অট্ঠঅরিযপুগ্গলে সাধেন্তি অসতি সচ্চপ্পটিৰেধে তেসং অরিযভাৰানুপগমনতো, সতি চ তস্মিং একন্তেন তব্ভাৰূপগমনতো চ. দুক্খসমুদযনিরোধমগ্গানমেৰ পন যথাক্কমং বাধকত্তং পভৰত্তং নিস্সরণত্তং নিয্যানিকত্তং, নাঞ্ঞেসং, বাধকাদিভাৰোযেৰ চ দুক্খাদীনং, ন অবাধকাদিভাৰো, তস্মা অঞ্ঞত্থাভাৰতত্থব্যাপিতাসঙ্খাতেন লক্খণেন এতানি তচ্ছানি. তেনাহু পোরাণা –

‘‘বোধানুরূপং চত্তারো, ছিন্দন্তে চতুরো মলে;

খীণদোসে চ চত্তারো, সাধেন্তারিযপুগ্গলে.

‘‘অঞ্ঞত্থ বাধকত্তাদি, ন হি এতেহি লব্ভতি;

নাবাধকত্তমেতেসং, তচ্ছানেতানিৰেততো’’তি.

অরিযানং ৰা সচ্চানি তেহি পটিৰিজ্ঝিতব্বত্তা, অরিযস্স ৰা সম্মাসম্বুদ্ধস্স সচ্চানি তেন দেসিতত্তাতি অরিযসচ্চানি. তানি পন সংকিলিট্ঠাসংকিলিট্ঠফলহেতুৰসেন চতুব্বিধানীতি আহ ‘‘চত্তারি অরিযসচ্চানী’’ত্যাদি. তত্থ কুচ্ছিতত্তা, তুচ্ছত্তা চ দুক্খং. কম্মাদিপচ্চযসন্নিট্ঠানে দুক্খুপ্পত্তিনিমিত্ততায সমুদযো সমুদেতি এতস্মা দুক্খন্তি কত্ৰা, দুক্খস্স ¶ সমুদযো দুক্খসমুদযো. দুক্খস্স অনুপ্পাদনিরোধো এত্থ, এতেনাতি ৰা দুক্খনিরোধো. দুক্খনিরোধং গচ্ছতি, পটিপজ্জন্তি চ তং এতাযাতি দুক্খনিরোধগামিনিপটিপদা.

৪৭. চেতসিকানং, সোল়সসুখুমরূপানং, নিব্বানস্স চ ৰসেন একূনসত্ততি ধম্মা আযতনেসু ধম্মাযতনং, ধাতূসু ধম্মধাতূতি চ সঙ্খং গচ্ছন্তি.

৪৯. সেসা ¶ চেতসিকাতি ৰেদনাসঞ্ঞাহি সেসা পঞ্ঞাস চেতসিকা. কস্মা পন ৰেদনাসঞ্ঞা ৰিসুং কতাতি? ৰট্টধম্মেসু অস্সাদতদুপকরণভাৰতো. তেভূমকধম্মেসু হি অস্সাদৰসপ্পৰত্তা ৰেদনা, অসুভে সুভাদিসঞ্ঞাৰিপল্লাসৰসেন চ তস্সা তদাকারপ্পৰত্তীতি তদুপকরণভূতা সঞ্ঞা, তস্মা সংসারস্স পধানহেতুতায এতা ৰিনিভুজ্জিত্ৰা দেসিতাতি. ৰুত্তঞ্হেতং আচরিযেন –

‘‘ৰট্টধম্মেসু অস্সাদং, তদস্সাদুপসেৰনং;

ৰিনিভুজ্জ নিদস্সেতুং, খন্ধদ্ৰযমুদাহট’’ন্তি. (নাম. পরি. ৬৪৯);

৫০. ননু চ আযতনধাতূসু নিব্বানং সঙ্গহিতং, খন্ধেসু কস্মা ন সঙ্গহিতন্তি আহ ‘‘ভেদাভাৰেনা’’ত্যাদি. অতীতাদিভেদভিন্নানঞ্হি রাসট্ঠেন খন্ধৰোহারোতি নিব্বানং ভেদাভাৰতো খন্ধসঙ্গহতো নিস্সটং, ৰিনিমুত্তন্ত্যত্থো.

৫১. ছন্নং দ্ৰারানং, ছন্নং আরম্মণানঞ্চ ভেদেন আযতনানি দ্ৰাদস ভৰন্তি, ছন্নং দ্ৰারানং ছন্নং আরম্মণানং তদুভযং নিস্সায উপ্পন্নানং তত্তকানমেৰ ৰিঞ্ঞাণানং পরিযাযেন কমেন ধাতুযো অট্ঠারস ভৰন্তি.

৫২. তিস্সো ভূমিযো ইমস্সাতি তিভূমং, তিভূমংযেৰ তেভূমকং. ৰত্ততি এত্থ কম্মং, তব্বিপাকো চাতি ৰট্টং. তণ্হাতি কামতণ্হাদিৰসেন তিৰিধা, পুন ছল়ারম্মণৰসেন অট্ঠারসৰিধা, অতীতানাগতপচ্চুপ্পন্নৰসেন চতুপঞ্ঞাসৰিধা, অজ্ঝত্তিকবাহিরৰসেন অট্ঠসতপ্পভেদা তণ্হা. কস্মা পন অঞ্ঞেসুপি দুক্খহেতূসু সন্তেসু তণ্হাযেৰ সমুদযোতি ৰুত্তাতি? পধানকারণত্তা. কম্মৰিচিত্ততাহেতুভাৰেন, হি কম্মসহাযভাৰূপগমনেন চ দুক্খৰিচিত্ততাকারণত্তা ¶ তণ্হা দুক্খস্স ৰিসেসকারণন্তি ¶ . মগ্গো দুক্খনিরোধগামিনিপটিপদানামেন ৰুত্তো মগ্গো লোকুত্তরো মতোতি মগ্গোতি পুন মগ্গগ্গহণং যোজেতব্বং.

৫৩. মগ্গযুত্তা অট্ঠঙ্গিকৰিনিমুত্তা সেসা মগ্গসম্পযুত্তা ফস্সাদযো ফলঞ্চেৰ সসম্পযুত্তন্তি এতে চতূহি সচ্চেহি ৰিনিস্সটা ৰিনিগ্গতা নিপ্পরিযাযতো, পরিযাযতো পন অঞ্ঞাতাৰিন্দ্রিযনিদ্দেসেপি ‘‘মগ্গঙ্গং মগ্গপরিযাপন্ন’’ন্তি (ধ. স. ৫৫৫) ৰুত্তত্তা ফলধম্মেসু সম্মাদিট্ঠাদীনং মগ্গসচ্চে, ইতরেসঞ্চ মগ্গফলসম্পযুত্তানং সঙ্খারদুক্খসামঞ্ঞেন দুক্খসচ্চে সঙ্গহো সক্কা কাতুং. এৰঞ্হি সতি সচ্চদেসনাযপি সব্বসঙ্গাহিকতা উপপন্না হোতি. কস্মা পনেতে খন্ধাদযো বহূ ধম্মা ৰুত্তাতি? ভগৰতাপি তথেৰ দেসিতত্তা. ভগৰতাপি কস্মা তথা দেসিতাতি? তিৰিধসত্তানুগ্গহস্স অধিপ্পেতত্তা. নামরূপতদুভযসম্মুল়্হৰসেন হি তিক্খনাভিতিক্খমুদিন্দ্রিযৰসেন, সঙ্খিত্তমজ্ঝিমৰিত্থাররুচিৰসেন চ তিৰিধা সত্তা. তেসু নামসম্মুল়্হানং খন্ধগ্গহণং নামস্স তত্থ চতুধা ৰিভত্তত্তা, রূপসম্মুল়্হানং আযতনগ্গহণং রূপস্স তত্থ অড্ঢেকাদসধা ৰিভত্তত্তা, উভযমুল়্হানং ধাতুগ্গহণং উভযেসম্পি তত্থ ৰিত্থারতো ৰিভত্তত্তা, তথা তিক্খিন্দ্রিযানং, সঙ্খিত্তরুচিকানঞ্চ খন্ধাগ্গহণন্ত্যাদি যোজেতব্বং. তং পনেতং তিৰিধম্পি পৰত্তিনিৰত্তিতদুভযহেতুৰসেন দিট্ঠমেৰ উপকারাৰহং. নো অঞ্ঞথাতি সচ্চগ্গহণন্তি দট্ঠব্বং.

সব্বসঙ্গহৰণ্ণনা নিট্ঠিতা.

ইতি অভিধম্মত্থৰিভাৰিনিযা নাম অভিধম্মত্থসঙ্গহৰণ্ণনায

সমুচ্চযপরিচ্ছেদৰণ্ণনা নিট্ঠিতা.

৮. পচ্চযপরিচ্ছেদৰণ্ণনা

১. ইদানি ¶ যথাৰুত্তনামরূপধম্মানং পটিচ্চসমুপ্পাদপট্ঠাননযৰসেন পচ্চযে দস্সেতুং ‘‘যেস’’ন্ত্যাদি আরদ্ধং. যেসং পচ্চযেহি সঙ্খতত্তা সঙ্খতানং পচ্চযুপ্পন্নধম্মানং যে পচ্চযধম্মা যথা যেনাকারেন পচ্চযা ঠিতিযা, উপ্পত্তিযা চ উপকারকা, তং ৰিভাগং তেসং পচ্চযুপ্পন্নানং, তেসং ¶ পচ্চযানং, তস্স চ পচ্চযাকারস্স পভেদং ইহ ইমস্মিং সমুচ্চযসঙ্গহানন্তরে ঠানে যথারহং তংতংপচ্চযুপ্পন্নধম্মে সতি তংতংপচ্চযানং তংতংপচ্চযভাৰাকারানুরূপং ইদানি পৰক্খামীতি যোজনা.

২. তত্থ পচ্চযসামগ্গিং পটিচ্চ সমং গন্ত্ৰা ফলানং উপ্পাদো এতস্মাতি পটিচ্চসমুপ্পাদো, পচ্চযাকারো. নানপ্পকারানি ঠানানি পচ্চযা এত্থাত্যাদিনা পট্ঠানং, অনন্তনযসমন্তপট্ঠানমহাপকরণং, তত্থ দেসিতনযো পট্ঠাননযো.

৩. তত্থাতি তেসু দ্ৰীসু নযেসু. তস্স পচ্চযধম্মস্স ভাৰেন ভৰনসীলস্স ভাৰো তব্ভাৰভাৰীভাৰো, সোযেৰ আকারমত্তং, তেন উপলক্খিতো তব্ভাৰভাৰীভাৰাকারমত্তোপলক্খিতো. এতেনেৰ তদভাৰাভাৰাকারমত্তোপলক্খিততাপি অত্থতো দস্সিতা হোতি. অন্ৰযব্যতিরেকৰসেন হি পচ্চযলক্খণং দস্সেতব্বং. তেনাহ ভগৰা – ‘‘ইমস্মিং সতি ইদং হোতি, ইমস্সুপ্পাদা ইদমুপ্পজ্জতি. ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতী’’তি (ম. নি. ১.৪০৪, ৪০৬; সং. নি. ২.২১; উদা. ১, ২). পটিচ্চ ফলং এতি এতস্মাতি পচ্চযো. তিট্ঠতি ফলং এত্থ তদাযত্তৰুত্তিতাযাতি ঠিতি, আহচ্চ ৰিসেসেত্ৰা পৰত্তা পচ্চযসঙ্খাতা ঠিতি আহচ্চপচ্চযট্ঠিতি. পটিচ্চসমুপ্পাদনযো হি তব্ভাৰভাৰীভাৰাকারমত্তং উপাদায পৰত্তত্তা হেতাদিপচ্চযনিযমৰিসেসং অনপেক্খিত্ৰা ¶ অৰিসেসতোৰ পৰত্ততি, অযং পন হেতাদিতংতংপচ্চযানং তস্স তস্স ধম্মন্তরস্স তংতংপচ্চযভাৰসামত্থিযাকারৰিসেসং উপাদায ৰিসেসেত্ৰা পৰত্তোতি আহচ্চপচ্চযট্ঠিতিমারব্ভ পৰুচ্চতীতি. কেচি পন ‘‘আহচ্চ কণ্ঠতালুআদীসু পহরিত্ৰা ৰুত্তা ঠিতি আহচ্চপচ্চযট্ঠিতী’’তি ৰণ্ণেন্তি. তং পন সৰনমত্তেনেৰ তেসং অৰহসিতব্বৰচনতং পকাসেতি. ন হি পটিচ্চসমুপ্পাদনযো, অঞ্ঞো ৰা কোচি নযো কণ্ঠতালুআদীসু অনাহচ্চ দেসেতুং সক্কাতি. ৰোমিস্সেত্ৰাতি পট্ঠাননযম্পি পটিচ্চসমুপ্পাদেযেৰ পক্খিপিত্ৰা তব্ভাৰভাৰীভাৰেন হেতাদিপচ্চযৰসেন চ মিস্সেত্ৰা আচরিযা সঙ্গহকারাদযো পপঞ্চেন্তি ৰিত্থারেন্তি, মযং পন ৰিসুং ৰিসুংযেৰ দস্সযিস্সামাত্যধিপ্পাযো.

পটিচ্চসমুপ্পাদনযৰণ্ণনা

৪. ন ¶ ৰিজানাতীতি অৰিজ্জা, অৰিন্দিযং ৰা কাযদুচ্চরিতাদিং ৰিন্দতি পটিলভতি, ৰিন্দিযং ৰা কাযসুচরিতাদিং ন ৰিন্দতি, ৰেদিতব্বং ৰা চতুসচ্চাদিকং ন ৰিদিতং করোতি, অৰিজ্জমানে ৰা জৰাপেতি, ৰিজ্জমানে ৰা ন জৰাপেতীতি অৰিজ্জা, চতূসু অরিযসচ্চেসু পুব্বন্তাদীসু চতূসু অঞ্ঞাণস্সেতং নামং. অৰিজ্জা এৰ পচ্চযো অৰিজ্জাপচ্চযো. ততো অৰিজ্জাপচ্চযা সঙ্খতমভিসঙ্খরোন্তীতি সঙ্খারা, কুসলাকুসলকম্মানি. তে তিৰিধা পুঞ্ঞাভিসঙ্খারো অপুঞ্ঞাভিসঙ্খারো আনেঞ্জাভিসঙ্খারোতি. তত্থকামরূপাৰচরা তেরস কুসলচেতনা পুঞ্ঞাভিসঙ্খারো, দ্ৰাদস অকুসলচেতনা অপুঞ্ঞাভিসঙ্খারো, চতস্সো আরুপ্পচেতনা আনেঞ্জাভিসঙ্খারোতি এৰমেতা একূনতিংস চেতনা সঙ্খারা নাম. পটিসন্ধিৰসেন একূনৰীসতিৰিধং, পৰত্তিৰসেন দ্ৰত্তিংসৰিধং ৰিপাকচিত্তং ৰিঞ্ঞাণং নাম. নামঞ্চ রূপঞ্চ নামরূপং. তত্থ নামং ইধ ৰেদনাদিক্খন্ধত্তযং, রূপং পন ভূতুপাদাযভেদতো দুৰিধং ¶ কম্মসমুট্ঠানরূপং, তদুভযম্পি ইধ পটিসন্ধিৰিঞ্ঞাণসহগতন্তি দট্ঠব্বং. নামরূপপচ্চযাতি এত্থ নামঞ্চ রূপঞ্চ নামরূপঞ্চ নামরূপন্তি সরূপেকসেসো ৰেদিতব্বো. চক্খাদীনি ছ অজ্ঝত্তিকাযতনানি, কেসঞ্চি মতেন রূপাদীনি ছ বাহিরাযতনানিপি ৰা আযতনং নাম. ছ আযতনানি চ ছট্ঠাযতনঞ্চ সল়াযতনং. চক্খুসম্ফস্সাদিৰসেন ছদ্ৰারিকো ফস্সো ফস্সো নাম. সুখদুক্খুপেক্খাৰসেন তিৰিধা ৰেদনা.

কামতণ্হা ভৰতণ্হা ৰিভৰতণ্হাতি তিৰিধা তণ্হা. ছল়ারম্মণাদিৰসেন পন অট্ঠসতপ্পভেদা হোন্তি কামুপাদানাদিৰসেন চত্তারি উপাদানানি. এত্থ চ দুব্বলা তণ্হা তণ্হা নাম, বলৰতী উপাদানং. অসম্পত্তৰিসযপত্থনা ৰা তণ্হা তমসি চোরানং হত্থপ্পসারণং ৰিয, সম্পত্তৰিসযগ্গহণং উপাদানং চোরানং হত্থপ্পত্তস্স গহণং ৰিয. অপ্পিচ্ছতাপটিপক্খা তণ্হা, সন্তোসপ্পটিপক্খং উপাদানং. পরিযেসনদুক্খমূলং তণ্হা, আরক্খদুক্খমূলং উপাদানন্তি অযমেতেসং ৰিসেসো. কম্মভৰো উপপত্তিভৰোতি দুৰিধো ভৰো. তত্থ পঠমো ভৰতি এতস্মা ফলন্তি ভৰো, সো কামাৰচরকুসলাকুসলাদিৰসেন একূনতিংসৰিধো. দুতিযো পন ভৰতীতি ভৰো, সো কামভৰাদিৰসেন নৰৰিধো. উপাদানপচ্চযা ভৰোতি চেত্থ উপপত্তিভৰোপি অধিপ্পেতো. ভৰপচ্চযা জাতীতি কম্মভৰোৰ. সো হি জাতিযা পচ্চযো হোতি, ন ইতরো. সো হি পঠমাভিনিব্বত্তক্খন্ধসভাৰো জাতিযেৰ, ন চ ¶ তদেৰ তস্স কারণং যুত্তং. তেসং তেসং সত্তানং তংতংগতিআদীসু অত্তভাৰপটিলাভো জাতি. তথানিব্বত্তস্স চ অত্তভাৰস্স পুরাণভাৰো জরা. এতস্সেৰ একভৰপরিচ্ছিন্নস্স পরিযোসানং মরণং. ঞাতিব্যসনাদীহি ফুট্ঠস্স চিত্তসন্তাপো সোকো. তস্সেৰ ৰচীপলাপো পরিদেৰো. কাযিকদুক্খৰেদনা ¶ দুক্খং. মানসিকদুক্খৰেদনা দোমনস্সং. ঞাতিব্যসনাদীহি ফুট্ঠস্স অধিমত্তচেতোদুক্খপ্পভাৰিতো ভুসো আযাসো উপাযাসো.

এত্থ চ সতিপি ৰত্থারম্মণাদিকে পচ্চযন্তরে অৰিজ্জাদিএকেকপচ্চযগ্গহণং পধানভাৰতো, পাকটভাৰতো চাতি দট্ঠব্বং. এত্থ চ অৰিজ্জানুসযিতেযেৰ সন্তানে সঙ্খারানং ৰিপাকধম্মভাৰেন পৰত্তনতো অৰিজ্জাপচ্চযাসঙ্খারাসম্ভৰন্তি, ৰিঞ্ঞাণঞ্চ সঙ্খারজনিতং হুত্ৰা ভৰন্তরে পতিট্ঠাতি. ন হি জনকাভাৰে তস্সুপ্পত্তি সিযা, তস্মা সঙ্খারপচ্চযা ৰিঞ্ঞাণং. নামরূপঞ্চ পুব্বঙ্গমাধিট্ঠানভূতৰিঞ্ঞাণুপত্থদ্ধং পটিসন্ধিপৰত্তীসু পতিট্ঠহতীতি ৰিঞ্ঞাণপচ্চযানামরূপং, সল়াযতনঞ্চ নামরূপনিস্সযমেৰ ছব্বিধফস্সস্স দ্ৰারভাৰেন যথারহং পৰত্ততি, নো অঞ্ঞথাতি নামরূপপচ্চযা সল়াযতনং. ফস্সো চ সল়াযতনসম্ভৰেযেৰ আরম্মণং ফুসতি. ন হি দ্ৰারাভাৰে তস্সুপ্পত্তি সিযাতি সল়াযতনপচ্চযা ফস্সো. ইট্ঠানিট্ঠমজ্ঝত্তঞ্চ আরম্মণং ফুসন্তোযেৰ ৰেদনং ৰেদযতি, নো অঞ্ঞথাতি ফস্সপচ্চযা ৰেদনা. ৰেদনীযেসু চ ধম্মেসু অস্সাদানুপস্সিনো ৰেদনাহেতুকা তণ্হা সমুট্ঠাতীতি ৰেদনাপচ্চযা তণ্হা. তণ্হাসিনেহপিপাসিতাযেৰ চ উপাদানিযেসু ধম্মেসু উপাদায দল়্হভাৰায সংৰত্তন্তি. তণ্হায হি রূপাদীনি অস্সাদেত্ৰা অস্সাদেত্ৰা কামেসু পাতব্যতং আপজ্জন্তীতি তণ্হা কামুপাদানস্স পচ্চযো. তথা রূপাদিভেদেগধিতো ‘‘নত্থি দিন্ন’’ন্ত্যাদিনা মিচ্ছাদস্সনং সংসারতো মুচ্চিতুকামো অসুদ্ধিমগ্গে সুদ্ধিমগ্গপরামাসং খন্ধেসু অত্তত্তনিযগাহভূতং অত্তৰাদদস্সনদ্ৰযঞ্চ গণ্হাতি, তস্মা দিট্ঠুপাদাদীনম্পি পচ্চযোতি তণ্হাপচ্চযা উপাদানং. যথারহং সম্পযোগানুসযৰসেন উপাদানপতিট্ঠিতাযেৰ সত্তা কম্মাযূহনায সংৰত্তন্তীতি উপাদানং ভৰস্স পচ্চযো. উপপত্তিভৰসঙ্খাতা চ জাতি কম্মভৰহেতুকাযেৰ ¶ . বীজতো অঙ্কুরো ৰিয তত্থ তত্থ সমুপলব্ভতীতি ভৰো জাতিযা পচ্চযো নাম. সতি চ জাতিযা এৰ জরামরণসম্ভৰো. ন হি অজাতানং জরামরণসম্ভৰো হোতীতি জাতি জরামরণানং পচ্চযোতি এৰমেতেসং তব্ভাৰভাৰীভাৰো দট্ঠব্বো.

এৰমেতস্স কেৰলস্স দুক্খক্খন্ধস্স সমুদযো হোতীতি যথাৰুত্তেন পচ্চযপরম্পরৰিধিনা, ন ¶ পন ইস্সরনিম্মানাদীহি এতস্স ৰট্টসঙ্খাতস্স কেৰলস্স সুখাদীহি অসম্মিস্সস্স, সকলস্স ৰা দুক্খক্খন্ধস্স দুক্খরাসিস্স ন সুখসুভাদীনং সমুদযো নিব্বত্তি হোতি. এত্থ ইমস্মিং পচ্চযসঙ্গহাধিকারে.

৫. অততি সততং গচ্ছতি পৰত্ততীতি অদ্ধা, কালো.

৬. অৰিজ্জাসঙ্খারা অতীতো অদ্ধা অতীতভৰপরিযাপন্নহেতূনমেৰেত্থ অধিপ্পেতত্তা, অদ্ধাগ্গহণেন চ অৰিজ্জাদীনং ধম্মানমেৰ গহণং তব্বিনিমুত্তস্স কস্সচি কালস্স অনুপলব্ভনতো. নিরুদ্ধানুপ্পাদা এৰ হি ধম্মা অতীতানাগতকালৰসেন উপ্পাদাদিক্খণত্তযপরিযাপন্না চ পচ্চুপ্পন্নকালৰসেন ৰোহরীযন্তি. জাতিজরামরণং অনাগতো অদ্ধা পচ্চুপ্পন্নহেতুতো অনাগতে নিব্বত্তনতো. মজ্ঝে পচ্চুপ্পন্নো অদ্ধা অতীতহেতুতো ইধ নিব্বত্তনকফলসভাৰত্তা, অনাগতফলস্স ইধ হেতুসভাৰত্তা চ মজ্ঝে ৰিঞ্ঞাণাদীনি অট্ঠঙ্গানি পচ্চুপ্পন্নো অদ্ধা.

৮. ননু সোকপরিদেৰাদযোপি অঙ্গভাৰেন ৰত্তব্বাতি আহ ‘‘সোকাদিৰচন’’ন্ত্যাদি. সোকাদিৰচনং জাতিযা নিস্সন্দস্স অমুখ্যফলমত্তস্স নিদস্সনং, ন পন ৰিসুং অঙ্গদস্সনন্ত্যত্থো.

৯. তণ্হুপাদানভৰাপি ¶ গহিতা হোন্তীতি কিলেসভাৰসামঞ্ঞতো অৰিজ্জাগ্গহণেন তণ্হুপাদানানি, কম্মভৰসামঞ্ঞতো সঙ্খারগ্গহণেন কম্মভৰো গহিতো. তথা তণ্হুপাদানভৰগ্গহণেন চ অৰিজ্জাসঙ্খারা গহিতাতি সম্বন্ধো. এত্থাপি ৰুত্তনযেন তেসং গহণেন তেসং সঙ্গহো দট্ঠব্বো, ৰিঞ্ঞাণনামরূপসল়াযতনফস্সৰেদনানং জাতিজরাভঙ্গাৰ জাতিজরামরণন্তি চ ৰুত্তাতি আহ ‘‘জাতিজরামরণগ্গহণেনা’’ত্যাদি.

১০. অতীতে হেতৰো পঞ্চাতি সরূপতো ৰুত্তানং দ্ৰিন্নং অৰিজ্জাসঙ্খারানং, সঙ্গহৰসেন গহিতানং তিণ্ণং তণ্হুপাদানভৰানঞ্চ ৰসেন পচ্চুপ্পন্নফলস্স পচ্চযা অতীতভৰে নিব্বত্তা হেতৰো পঞ্চ, ইদানি ফলপঞ্চকন্তি অতীতহেতুপচ্চযা ইধ পচ্চুপ্পন্নে নিব্বত্তং ৰিঞ্ঞাণাদিফলপঞ্চকং. ইদানি হেতৰো পঞ্চাতি সরূপতো ৰুত্তানং তণ্হাদীনং তিণ্ণং, সঙ্গহতো লদ্ধানং ¶ অৰিজ্জাসঙ্খারানং দ্ৰিন্নঞ্চ ৰসেন আযতিং ফলস্স পচ্চযা ইদানি হেতৰো পঞ্চ. আযতিং ফলপঞ্চকন্তি জাতিজরামরণগ্গহণেন ৰুত্তং পচ্চুপ্পন্নহেতুপচ্চযা অনাগতে নিব্বত্তনকৰিঞ্ঞাণাদিফলপঞ্চকন্তি এৰং ৰীসতি অতীতাদীসু তত্থ তত্থ আকিরিযন্তীতি আকারা.

অতীতহেতূনং, ইদানি ফলপঞ্চকস্স চ অন্তরা একো সন্ধি, ইদানি ফলপঞ্চকস্স, ইদানি হেতূনঞ্চ অন্তরা একো, ইদানি হেতূনং, আযতিং ফলস্স চ অন্তরা একোতি এৰং তিসন্ধি. ৰুত্তঞ্হেতং – ‘‘সঙ্খারৰিঞ্ঞাণানমন্তরা একো, ৰেদনাতণ্হানমন্তরা একো, ভৰজাতীনমন্তরা একো সন্ধী’’তি. এত্থ হি হেতুতোফলস্স অৰিচ্ছেদপ্পৰত্তিভাৰতো হেতুফলসম্বন্ধভূতো পঠমো সন্ধি, তথা ততিযো, দুতিযো পন ফলতো হেতুনো অৰিচ্ছেদপ্পৰত্তিভাৰতো ফলহেতুসম্বন্ধভূতো. ফলভূতোপি হি ¶ ধম্মো অঞ্ঞস্স হেতুসভাৰস্স ধম্মস্স পচ্চযোতি. সঙ্খিপীযন্তি এত্থ অৰিজ্জাদযো, ৰিঞ্ঞাণাদযো চাতি সঙ্খেপো, অতীতহেতু, এতরহি ৰিপাকো, এতরহি হেতু আযতিং ৰিপাকোতি চত্তারো সঙ্খেপাতি চতুসঙ্খেপা.

১১. কম্মভৰসঙ্খাতো ভৰেকদেসোতি এত্থ আযতিং পটিসন্ধিযা পচ্চযচেতনা ভৰো নাম, পুরিমকম্মভৰস্মিং ইধ পটিসন্ধিযা পচ্চযচেতনা সঙ্খারাতি ৰেদিতব্বা. অৰসেসা চাতি ৰিঞ্ঞাণাদিপঞ্চকজাতিজরামরণৰসেন সত্তৰিধা পচ্চুপ্পন্নফলৰসেন ৰুত্তধম্মা. উপপত্তিভৰসঙ্খাতো ভৰেকদেসোতি পন অনাগতপরিযাপন্না ৰেদিতব্বা. ভৰ-সদ্দেন কম্মভৰস্সপি ৰুচ্চমানত্তা ভৰেকদেস-সদ্দো ৰুত্তো.

১২. পুব্বন্তস্স অৰিজ্জা মূলং. অপরন্তস্স তণ্হা মূলন্তি আহ অৰিজ্জাতণ্হাৰসেন দ্ৰে মূলানী’’তি.

১৩. তেসমেৰ অৰিজ্জাতণ্হাসঙ্খাতানং ৰট্টমূলানং নিরোধেন অনুপ্পাদধম্মতাপত্তিযা সচ্চপ্পটিৰেধতো সিদ্ধায অপ্পৰত্তিযা ৰট্টং নিরুজ্ঝতি. অভিণ্হসো অভিক্খণং জরামরণসঙ্খাতায মুচ্ছায পীল়িতানং সত্তানং সোকাদিসমপ্পিতানং কামাসৰাদিআসৰানং সমুপ্পাদতো পুন অৰিজ্জা চ পৰত্ততি. ‘‘আসৰসমুদযা অৰিজ্জাসমুদযো’’তি (ম. নি. ১.১০৩) হি ৰুত্তং. এতেন অৰিজ্জাযপি পচ্চযো দস্সিতো হোতি, ইতরথা পটিচ্চসমুপ্পাদচক্কং ¶ অবদ্ধং সিযাতি. ইচ্চেৰং ৰুত্তনযেন আবদ্ধং অৰিচ্ছিন্নং অনাদিকং আদিরহিতং তিভূমকপরিযাপন্নত্তা তেভূমকং কিলেসকম্মৰিপাকৰসেন তিৰট্টভূতং পটিচ্চসমুপ্পাদোতি পট্ঠপেসি পঞ্ঞপেসি মহামুনি সম্মাসম্বুদ্ধো.

পটিচ্চসমুপ্পাদনযৰণ্ণনা নিট্ঠিতা.

পট্ঠাননযৰণ্ণনা

১৪. এৰং ¶ পটিচ্চসমুপ্পাদনযং ৰিভাগতো দস্সেত্ৰা ইদানি পট্ঠাননযং দস্সেতুং ‘‘হেতুপচ্চযো’’ত্যাদি ৰুত্তং. তত্থ হিনোতি পতিট্ঠাতি এতেনাতি হেতু. অনেকত্থত্তা ধাতুসদ্দানং হি-সদ্দো ইধ পতিট্ঠত্থোতি দট্ঠব্বো. হিনোতি ৰা এতেন কম্মনিদানভূতেন উদ্ধং ওজং অভিহরন্তেন মূলেন ৰিয পাদপো তপ্পচ্চযং ফলং গচ্ছতি পৰত্ততি ৰুদ্ধিং ৰিরূল়্হিং আপজ্জতীতি হেতু. হেতু চ সো পচ্চযো চাতি হেতুপচ্চযো. হেতু হুত্ৰা পচ্চযো, হেতুভাৰেন পচ্চযোতি ৰুত্তং হোতি. মূলট্ঠেন হেতু, উপকারট্ঠেন পচ্চযোতি সঙ্খেপতো মূলট্ঠেন উপকারকো ধম্মো হেতুপচ্চযো. সো পন পৰত্তে চিত্তসমুট্ঠানানং, পটিসন্ধিযং কম্মসমুট্ঠানানঞ্চ রূপানং উভযত্থ সম্পযুত্তানং নামধম্মানঞ্চ রুক্খস্স মূলানি ৰিয সুপ্পতিট্ঠিতভাৰসাধনসঙ্খাতমূলট্ঠেন উপকারকা ছ ধম্মাতি দট্ঠব্বং.

আলম্বীযতি দুব্বলেন ৰিয দণ্ডাদিকং চিত্তচেতসিকেহি গয্হতীতি আরম্মণং. চিত্তচেতসিকা হি যং যং ধম্মং আরব্ভ পৰত্তন্তি, তে তে ধম্মা তেসং তেসং ধম্মানং আরম্মণপচ্চযো নাম. ন হি সো ধম্মো অত্থি, যো চিত্তচেতসিকানং আরম্মণপচ্চযভাৰং ন গচ্ছেয্য. অত্তাধীনপ্পৰত্তীনং পতিভূতো পচ্চযো অধিপতিপচ্চযো.

ন ৰিজ্জতি পচ্চযুপ্পন্নেন সহ অন্তরং এতস্স পচ্চযস্সাতি অনন্তরপচ্চযো. সণ্ঠানাভাৰেন সুট্ঠু অনন্তরপচ্চযো সমনন্তরপচ্চযো. অত্তনো অত্তনো অনন্তরং অনুরূপচিত্তুপ্পাদজননসমত্থো পুরিমপুরিমনিরুদ্ধো ধম্মো ‘‘অনন্তরপচ্চযো’’, ‘‘সমনন্তরপচ্চযো’’তি চ ¶ ৰুচ্চতি. ব্যঞ্জনমত্তেনেৰ হি নেসং ৰিসেসো. অত্থতো পন উভযম্পি সমনন্তরনিরুদ্ধস্সেৰাধিৰচনং. ন হি তেসং অত্থতো ভেদো উপলব্ভতি ¶ . যং পন কেচি ৰদন্তি ‘‘অত্থানন্তরতায অনন্তরপচ্চযো, কালানন্তরতায সমনন্তরপচ্চযো’’তি, তং ‘‘নিরোধা ৰুট্ঠহন্তস্স নেৰসঞ্ঞানাসঞ্ঞাযতনং ফলসমাপত্তিযা সমনন্তরপচ্চযেন পচ্চযো’’ত্যাদীহি (পট্ঠা. ১.১.৪১৭) ৰিরুজ্ঝতি. নেৰসঞ্ঞানাসঞ্ঞাযতনং হি সত্তাহাদিকালং নিরুদ্ধং ফলসমাপত্তিযা সমনন্তরপচ্চযো, তস্মা অভিনিৰেসং অকত্ৰা ব্যঞ্জনমত্ততোৰেত্থ নানাকরণং পচ্চেতব্বং, ন অত্থতো. পুব্বধম্মনিরোধস্স হি পচ্ছাজাতধম্মুপ্পাদনস্স চ অন্তরাভাৰেন উপ্পাদনসমত্থতায নিরোধো অনন্তরপচ্চযতা, ‘‘ইদমিতো উদ্ধং, ইদং হেট্ঠা, ইদং সমন্ততো’’তি অত্তনা একত্তং উপনেত্ৰা ৰিয সুট্ঠু অনন্তরভাৰেন উপ্পাদেতুং সমত্থং হুত্ৰা নিরোধো সমনন্তরপচ্চযতাতি এৰং ব্যঞ্জনমত্ততোৰ ভেদো. নিরোধপচ্চযস্সপি হি নেৰসঞ্ঞানাসঞ্ঞাযতনস্স অসঞ্ঞুপ্পত্তিযা পুরিমস্স চ চুতিচিত্তস্স কালন্তরেপি উপ্পজ্জন্তানং ফলপটিসন্ধীনং অন্তরা সমানজাতিযেন অরূপধম্মেন ব্যৰধানাভাৰতো ভিন্নজাতিকানঞ্চ রূপধম্মানং ব্যৰধানকরণে অসমত্থতায নিরন্তরুপ্পাদনে একত্তং উপনেত্ৰা ৰিয উপ্পাদনে চ সমত্থতা অত্থীতি তেসম্পি অনন্তরসমনন্তরপচ্চযতা লব্ভতি, তস্মা ধম্মতো অৰিসেসেপি তথা তথা বুজ্ঝনকানং ৰেনেয্যানং ৰসেন উপসগ্গত্থৰিসেসমত্ততোৰ ভেদো পচ্চেতব্বোতি.

অত্তনো অনুপ্পত্তিযা সহুপ্পন্নানম্পি অনুপ্পত্তিতো পকাসস্স পদীপো ৰিয সহুপ্পন্নানং সহুপ্পাদভাৰেন পচ্চযো সহজাতপচ্চযো, অরূপিনো চতুক্খন্ধা, চত্তারো মহাভূতা, পটিসন্ধিক্খণে ৰত্থুৰিপাকা চ ধম্মা.

অঞ্ঞমঞ্ঞং উপত্থম্ভযমানং তিদণ্ডং ৰিয অত্তনো উপকারকধম্মানং উপত্থম্ভকভাৰেন পচ্চযো অঞ্ঞমঞ্ঞপচ্চযো. অঞ্ঞমঞ্ঞতাৰসেনেৰ ¶ চ উপকারকতা অঞ্ঞমঞ্ঞপচ্চযতা, ন সহজাতমত্তেনাতি অযমেতেসং দ্ৰিন্নং ৰিসেসো. তথা হি সহজাতপচ্চযভাৰীযেৰ কোচি অঞ্ঞমঞ্ঞপচ্চযো ন হোতি চিত্তজরূপানং সহজাতপচ্চযভাৰিনো নামস্স উপাদারূপানং সহজাতপচ্চযভাৰীনং মহাভূতানঞ্চ অঞ্ঞমঞ্ঞপচ্চযভাৰস্স অনুদ্ধটত্তা. যদি হি সহজাতভাৰেনেৰ অত্তনো উপকারকানং উপকারকতা অঞ্ঞমঞ্ঞপচ্চযতা সিযা, তদা সহজাতঅঞ্ঞমঞ্ঞপচ্চযেহি সমানেহি ভৰিতব্বন্তি.

চিত্তকম্মস্স ¶ পটো ৰিয সহজাতনামরূপানং নিস্সযভূতা চতুক্খন্ধা, তরুপব্বতাদীনং পথৰী ৰিয আধারণতোযেৰ সহজাতরূপসত্তৰিঞ্ঞাণধাতূনং যথাক্কমং নিস্সযা ভূতরূপং, ৰত্থু চাতি ইমে নিস্সযপচ্চযো নাম নিস্সীযতি নিস্সিতকেহীতি কত্ৰা, বলৰভাৰেন নিস্সযো পচ্চযো উপনিস্সযপচ্চযো উপ-সদ্দস্স অতিসযজোতকত্তা, তস্স পন ভেদং ৰক্খতি.

ছ ৰত্থূনি, ছ আরম্মণানি চাতি ইমে পচ্চযুপ্পন্নতো পঠমং উপ্পজ্জিত্ৰা পৰত্তমানভাৰেন উপকারকো পুরেজাতপচ্চযো. পচ্ছাজাতপচ্চযে অসতি সন্তানট্ঠিতিহেতুভাৰং আগচ্ছন্তস্স কাযস্স উপত্থম্ভনভাৰেন উপকারকা পচ্ছাজাতা চিত্তচেতসিকা ধম্মা পচ্ছাজাতপচ্চযো. সো গিজ্ঝপোতকসরীরানং আহারাসা চেতনা ৰিয দট্ঠব্বো.

পুরিমপুরিমপরিচিতগন্থো ৰিয উত্তরউত্তরগন্থস্স কুসলাদিভাৰেন অত্তসদিসস্স পগুণবলৰভাৰৰিসিট্ঠঅত্তসমানজাতিযতাগাহণং আসেৰনং, তেন পচ্চযা সজাতিযধম্মানং সজাতিযধম্মাৰ আসেৰনপচ্চযো. ভিন্নজাতিকা হি ভিন্নজাতিকেহি আসেৰনপগুণেন পগুণবলৰভাৰৰিসিট্ঠং কুসলাদিভাৰসঙ্খাতং অত্তনো গতিং ¶ গাহাপেতুং ন সক্কোন্তি, ন চ সযং ততো গণ্হন্তি, তে পন অনন্তরাতীতানি লোকিযকুসলাকুসলানি চেৰ অনাৰজ্জনকিরিযজৰনানি চাতি দট্ঠব্বং. চিত্তপ্পযোগসঙ্খাতকিরিযাভাৰেন সহজাতানং নানাক্খণিকানং ৰিপাকানং, কটত্তারূপানঞ্চ উপকারিকা চেতনা কম্মপচ্চযো.

অত্তনো নিরুস্সাহসন্তভাৰেন সহজাতনামরূপানং নিরুস্সাহসন্তভাৰায উপকারকা ৰিপাকচিত্তচেতসিকা ৰিপাকপচ্চযো. তে হি পযোগেন অসাধেতব্বতায কম্মস্স কটত্তা নিপ্ফজ্জমানমত্ততো নিরুস্সাহসন্তভাৰা হোন্তি, ন কিলেসৰূপসমসন্তভাৰা. তথা সন্তভাৰতোযেৰ হি ভৰঙ্গাদযো দুব্বিঞ্ঞেয্যা. অভিনিপাতসম্পটিচ্ছনসন্তীরণমত্তা পন ৰিপাকা দুব্বিঞ্ঞেয্যাৰ. জৰনপ্পৰত্তিযাৰ নেসং রূপাদিগ্গহিততা ৰিঞ্ঞাযতি.

রূপারূপানং উপত্থম্ভকত্তেন উপকারকা চত্তারো আহারা আহারপচ্চযো. সতিপি হি জনকভাৰে উপত্থম্ভকত্তমেৰ আহারস্স পধানকিচ্চং. জনযন্তোপি আহারো অৰিচ্ছেদৰসেন উপত্থম্ভেন্তো ৰ জনেতীতি উপত্থম্ভকভাৰো ৰ আহারভাৰো. তেসু তেসু কিচ্চেসু পচ্চযুপ্পন্নধম্মেহি অত্তানং অনুৰত্তাপনসঙ্খাতাধিপতিযট্ঠেন পচ্চযো ইন্দ্রিযপচ্চযো.

আরম্মণূপনিজ্ঝানলক্খণূপনিজ্ঝানৰসেন ¶ উপগন্ত্ৰা আরম্মণনিজ্ঝানকা ৰিতক্কাদযো ঝানপচ্চযো. সুগতিতো পুঞ্ঞতো, দুগ্গহিতো পাপতো ৰা নিয্যানট্ঠেন উপকারকা সম্মাদিট্ঠাদযো মগ্গপচ্চযো.

পরমত্থতো ভিন্নাপি একীভাৰগতা ৰিয একুপ্পাদাদিভাৰসঙ্খাতসম্পযোগলক্খণেন উপকারকা নামধম্মা ৰ সম্পযুত্তপচ্চযো. অঞ্ঞমঞ্ঞসম্বন্ধতায যুত্তাপি সমানা ৰিপ্পযুত্তভাৰেন ¶ ৰিসংসট্ঠতায নানত্তুপগমনেন উপকারকা ৰত্থুচিত্তচেতসিকা ৰিপ্পযুত্তপচ্চযো.

পচ্চুপ্পন্নসভাৰসঙ্খাতেন অত্থিভাৰেন তাদিসস্সেৰ ধম্মস্স উপত্থম্ভকত্তেন উপকারকা ‘‘সহজাতং পুরেজাত’’ন্ত্যাদিনা ৰক্খমানধম্মা অত্থিপচ্চযো. সতিপি হি জনকত্তে ঠিতিযংযেৰ সাতিসযো অত্থিপচ্চযানং ব্যাপারোতি উপত্থম্ভকতাৰ তেসং গহিতা. একস্মিং ফস্সাদিসমুদাযে পৰত্তমানে দুতিযস্স অভাৰতো অত্তনো ঠিতিযা ওকাসং অলভন্তানং অনন্তরমুপ্পজ্জমানকচিত্তচেতসিকানং ওকাসদানৰসেন উপকারকা অনন্তরনিরুদ্ধা চিত্তচেতসিকা নত্থিপচ্চযো.

অত্তনো সভাৰাৰিগমনেন অপ্পৰত্তমানানং ৰিগতভাৰেন উপকারকাযেৰ ধম্মা ৰিগতপচ্চযো. নিরোধানুপগমনৰসেন উপকারকা অত্থিপচ্চযা ৰ অৰিগতপচ্চযো. সসভাৰতামত্তেন উপকারকতা অত্থিপচ্চযতা, নিরোধানুপগমনৰসেন উপকারকতা অৰিগতপচ্চযতাতি পচ্চযতাৰিসেসো নেসং ধম্মাৰিসেসেপি দট্ঠব্বো. ধম্মানঞ্হি সমত্থতাৰিসেসং সব্বাকারেন ঞত্ৰা ভগৰতা চতুৰীসতিপচ্চযা দেসিতাতি ভগৰতি সদ্ধায ‘‘এৰং ৰিসেসা এতে ধম্মা’’তি সুতমযঞাণং উপ্পাদেত্ৰা চিন্তাভাৰনামযঞাণেহি তদভিসমযায যোগো করণীযো. অৰিসেসেপি হি ধম্মসামগ্গিযস্স তথা তথা ৰিনেতব্বপুগ্গলানং ৰসেন হেট্ঠা ৰুত্তোপি পচ্চযো পুন পকারন্তেন ৰুচ্চতি অহেতুকদুকং ৰত্ৰাপি হেতুৰিপ্পযুত্তদুকং ৰিযাতি দট্ঠব্বং.

১৫. নামং চতুক্খন্ধসঙ্খাতং নামং তাদিসস্সেৰ নামস্স ছধা ছহাকারেহি পচ্চযো হোতি, তদেৰ নামরূপীনং সমুদিতানং ¶ পঞ্চধা পচ্চযো হোতি, রূপস্স পুন ভূতুপাদাযভেদস্স একধা পচ্চযো হোতি, রূপঞ্চ নামস্স একধা পচ্চযো, পঞ্ঞত্তিনামরূপানি নামস্স দ্ৰিধা দ্ৰিপ্পকারা ¶ পচ্চযা হোন্তি, দ্ৰযং পন নামরূপদ্ৰযং সমুদিতং দ্ৰযস্স তাদিসস্সেৰ নামরূপদ্ৰযস্স নৰধা পচ্চযো চেতি এৰং পচ্চযা ছব্বিধা ঠিতা.

১৬. ৰিপাকব্যাকতং কম্মৰসেন ৰিপাকভাৰপ্পত্তং কম্মৰেগক্খিত্তপতিতং ৰিয হুত্ৰা পৰত্তমানং অত্তনো সভাৰং গাহেত্ৰা পরিভাৰেত্ৰা নেৰ অঞ্ঞং পৰত্তেতি, ন চ পুরিমৰিপাকানুভাৰং গহেত্ৰা উপ্পজ্জতি. ‘‘ন মগ্গপচ্চযা আসেৰনে এক’’ন্তি (পট্ঠা. ১.১.২২১) ৰচনতো চ অহেতুককিরিযেসু হসিতুপ্পাদস্সেৰ আসেৰনতাউদ্ধরণেন আৰজ্জনদ্ৰযং আসেৰনপচ্চযো ন হোতি, তস্মা জৰনানেৰ আসেৰনপচ্চযভাৰং গচ্ছন্তীতি আহ ‘‘পুরিমানি জৰনানী’’ত্যাদি. অৰিসেসৰচনেপেত্থ লোকিযকুসলাকুসলাব্যাকতজৰনানেৰ দট্ঠব্বানি লোকুত্তরজৰনানং আসেৰনভাৰস্স অনুদ্ধটত্তা.

এৰঞ্চ কত্ৰা ৰুত্তং পট্ঠানট্ঠকথাযং (পট্ঠা. অট্ঠ. ১.১২) ‘‘লোকুত্তরো পন আসেৰনপচ্চযো নাম নত্থী’’তি. তত্থ হি কুসলং ভিন্নজাতিকস্স পুরেচরত্তা ন তেন আসেৰনগুণং গণ্হাপেতি, ফলচিত্তানি চ জৰনৰসেন উপ্পজ্জমানানিপি ৰিপাকাব্যাকতে ৰুত্তনযেন আসেৰনং ন গণ্হন্তি, ন চ অঞ্ঞং গাহাপেন্তি. যম্পি ‘‘আসেৰনৰিনিমুত্তং জৰনং নত্থী’’তি আচরিযধম্মপালত্থেরেন ৰুত্তং, তম্পি যেভুয্যৰসেন ৰুত্তন্তি ৰিঞ্ঞাযতি. ইতরথা আচরিযস্স অসমপেক্খিতাভিধাযকত্তপ্পসঙ্গো সিযা. মগ্গো পন গোত্রভুতো আসেৰনং ন গণ্হাতীতি নত্থি ভূমিআদিৰসেন নানাজাতিতায অনধিপ্পেতত্তা. তথা হি ৰুত্তং পট্ঠানে ‘‘গোত্রভু ¶ মগ্গস্স আসেৰনপচ্চযেন পচ্চযো, ৰোদানং মগ্গস্স আসেৰনপচ্চযেন পচ্চযো’’তি (পট্ঠা. ১.১.৪২৬). একুপ্পাদাদিচতুব্বিধসম্পযোগলক্খণাভাৰতো সহুপ্পন্নানম্পি রূপধম্মানং সম্পযুত্তপচ্চযতা নত্থীতি ৰুত্তং ‘‘চিত্তচেতসিকা ধম্মা অঞ্ঞমঞ্ঞ’’ন্তি.

১৭. হেতুঝানঙ্গমগ্গঙ্গানি সহজাতানং নাম রূপানন্তি তযোপেতে পটিসন্ধিযং কম্মসমুট্ঠানানং, পৰত্তিযং চিত্তসমুট্ঠানানঞ্চ রূপানং, উভযত্থ সহজাতানং নামানঞ্চ হেতাদিপচ্চযেন পচ্চযা হোন্তি. ‘‘সহজাতরূপন্তি হি সব্বত্থ পটিসন্ধিযং কম্মসমুট্ঠানানং, পৰত্তিযং চিত্তসমুট্ঠানান’’ন্তি ৰক্খতি. সহজাতা চেতনাতি অন্তমসো চক্খুৰিঞ্ঞাণাদীহিপি সহজাতচেতনা. সহজাতানং নাম রূপানন্তি সব্বাপি চেতনা নামানং, পটিসন্ধিসহগতা চেতনা কম্মসমুট্ঠানরূপানং, পৰত্তিযং রূপসমুট্ঠাপকচিত্তসহগতা চেতনা চিত্তসমুট্ঠানরূপানঞ্চ. নানাক্খণিকা ¶ চেতনাতি ৰিপাকক্খণতো নানাক্খণে অতীতভৰাদীসু নিব্বত্তা কুসলাকুসলচেতনা. নামরূপানন্তি উভযত্থাপি নামরূপানং. ৰিপাকক্খন্ধাতি পটিসন্ধিৰিঞ্ঞাণাদিকা ৰিপাকা অরূপক্খন্ধা. কম্মসমুট্ঠানম্পি হি রূপং ৰিপাকৰোহারং ন লভতি অরূপধম্মভাৰেন, সারম্মণভাৰেন চ কম্মসদিসেসু অরূপধম্মেস্ৰেৰ ৰিপাক-সদ্দস্স নিরুল়্হত্তা.

১৮. পুরেজাতস্স ইমস্স কাযস্সাতি পচ্চযধম্মতো পুরে উপ্পন্নস্স ইমস্স রূপকাযস্স. কথং পন পচ্চযুপ্পন্নস্স পুরে নিব্বত্তিযং পচ্ছাজাতস্স পচ্চযতাতি? ননু ৰুত্তং ‘‘পচ্ছাজাতপচ্চযে অসতি সন্তানট্ঠিতিহেতুকভাৰং আগচ্ছন্তস্সা’’তি, তস্মা সন্তানপ্পৰত্তস্স হেতুভাৰুপত্থম্ভনে ইমস্স ব্যাপারোতি ন কোচি ৰিরোধো.

১৯. পটিসন্ধিযং ¶ চক্খাদিৰত্থূনং অসম্ভৰতো, সতি চ সম্ভৰে তংতংৰিঞ্ঞাণানং পচ্চযভাৰানুপগমনতো, হদযৰত্থুনো চ পটিসন্ধিৰিঞ্ঞাণেন সহুপ্পন্নস্স পুরেজাতকতাভাৰতো ৰুত্তং ‘‘ছৰত্থূনি পৰত্তিয’’ন্তি. ‘‘পঞ্চারম্মণানি পঞ্চৰিঞ্ঞাণৰীথিযা’’তি চ ইদং আরম্মণপুরেজাতনিদ্দেসে আগতং সন্ধায ৰুত্তং. পঞ্হাৰারে পন ‘‘সেক্খা ৰা পুথুজ্জনা ৰা চক্খুং অনিচ্চতো দুক্খতো অনত্ততো ৰিপস্সন্তী’’ত্যাদিনা (পট্ঠা. ১.১.৪২৪) অৰিসেসেন পচ্চুপ্পন্নচক্খাদীনম্পি গহিতত্তা ধম্মারম্মণম্পি আরম্মণপুরেজাতং মনোৰিঞ্ঞাণৰীথিযা লব্ভতি. অত্থতো হেতং সিদ্ধং, যং পচ্চুপ্পন্নধম্মারম্মণং গহেত্ৰা মনোদ্ৰারিকৰীথি পৰত্ততি, তং তস্স আরম্মণপুরেজাতং হোতীতি.

২২. পকতিযা এৰ পচ্চযন্তররহিতেন অত্তনো সভাৰেনেৰ উপনিস্সযো পকতূপনিস্সযো. আরম্মণানন্তরেহি অসংমিস্সো পুথগেৰ কোচি উপনিস্সযোতি ৰুত্তং হোতি. অথ ৰা পকতো উপনিস্সযো পকতূপনিস্সযো. পকতোতি চেত্থ প-কারো উপসগ্গো, সো অত্তনো ফলস্স উপ্পাদনসমত্থভাৰেন সন্তানে নিপ্ফাদিতভাৰং, আসেৰিতভাৰঞ্চ দীপেতি, তস্মা অত্তনো সন্তানে নিপ্ফন্নো রাগাদি, সদ্ধাদি, উপসেৰিতো ৰা উতুভোজনাদি পকতূপনিস্সযো. তথা চেৰ নিদ্দিসতি.

২৩. গরুকতন্তি গরুং কত্ৰা পচ্চৰেক্খিতং. তথা হি ‘‘দানং দত্ৰা সীলং সমাদিযিত্ৰা ¶ উপোসথকম্মং কত্ৰা তং গরুং কত্ৰা পচ্চৰেক্খতী’’ত্যাদিনা (পট্ঠা. ১.১.৪১৩) দানসীলউপোসথকম্মপুব্বেকতসুচিণ্ণঝানগোত্রভুৰোদানমগ্গাদীনি গরুং কত্ৰা পচ্চৰেক্খণৰসেন অস্স নিদ্দেসো পৰত্তো.

২৪. ‘‘পুরিমা ¶ পুরিমা কুসলা খন্ধা পচ্ছিমানং পচ্ছিমানং কুসলানং খন্ধানং উপনিস্সযপচ্চযেন পচ্চযো’’ত্যাদিনা (পট্ঠা. ১.১.৪২৩) নযেন অনন্তরপচ্চযেন সদ্ধিং নানত্তং অকত্ৰা অনন্তরূপনিস্সযস্স আগতত্তা ৰুত্তং ‘‘অনন্তরনিরুদ্ধা’’ত্যাদি. এৰং সন্তেপি অত্তনো অনন্তরং অনুরূপচিত্তুপ্পাদৰসেন অনন্তরপচ্চযো, বলৰকারণৰসেন অনন্তরূপনিস্সযপচ্চযোতি অযমেতেসং ৰিসেসো.

২৫. যথারহং অজ্ঝত্তঞ্চ বহিদ্ধা চ রাগাদযো…পে… সেনাসনঞ্চাতি যোজনা. রাগাদযো হি অজ্ঝত্তং নিপ্ফাদিতা, পুগ্গলাদযো বহিদ্ধা সেৰিতা. তথা হি ৰুত্তং আচরিযেন –

‘‘রাগসদ্ধাদযো ধম্মা, অজ্ঝত্তমনুৰাসিতা;

সত্তসঙ্খারধম্মা চ, বহিদ্ধোপনিসেৰিতা’’তি. (নাম. পরি. ৮২৭);

অথ ৰা অজ্ঝত্তঞ্চ বহিদ্ধা চ কুসলাদিধম্মানন্তি যথাঠিতৰসেনেৰ যোজনা অত্তনো হি রাগাদযো চ অত্তনো কুসলাদিধম্মানং কল্যাণমিত্তস্স সদ্ধাদিকে নিস্সায কুসলং করোন্তানং পরেসঞ্চ নিস্সযা হোন্তি.

তত্থ কামরাগাদযো নিস্সায কামভৰাদীসু নিব্বত্তনত্থং, রাগাদিৰূপসমত্থঞ্চ দানসীলউপোসথজ্ঝানাভিঞ্ঞাৰিপস্সনামগ্গভাৰনা, রাগাদিহেতুকা চ উপরূপরিরাগাদযো হোন্তীতি যথারহং দট্ঠব্বং. যং যঞ্হি নিস্সায যস্স যস্স সম্ভৰো, তং তং তস্স তস্স পকতূপনিস্সযো হোতি. পচ্চযমহাপদেসো হেস, যদিদং ‘‘উপনিস্সযপচ্চযো’’তি ৰুত্তং. তথা চাহ ‘‘বহুধা হোতি পকতূপনিস্সযো’’তি. সদ্ধাদযোতি সীলসুতচাগপঞ্ঞা. অত্তনো সদ্ধাদিকঞ্হি উপনিস্সায অত্তনো দানসীলাদযো, তথা কল্যাণমিত্তানং সদ্ধাদযো উপনিস্সায ¶ পরেসঞ্চ দানসীলাদযো ¶ হোন্তীতি পাকটমেতং. সুখং দুক্খন্তি কাযিকং সুখং দুক্খং. পুগ্গলোতি কল্যাণমিত্তাদিপুগ্গলো. ভোজনন্তি সপ্পাযাদিভোজনং, উতুপি তাদিসোৰ.

২৭. ‘‘অধিপতি…পে… পচ্চযা হোন্তী’’তি সঙ্খেপেন ৰুত্তমত্থং ৰিত্থারেতুং ‘‘তত্থ গরুকতমারম্মণ’’ন্ত্যাদি ৰুত্তং. গরুকতমারম্মণন্তি পচ্চৰেক্খণঅস্সাদাদিনা গরুকতং আরম্মণং. তঞ্হি ঝানমগ্গফলৰিপস্সনানিব্বানাদিভেদং পচ্চৰেক্খণঅস্সাদাদিমগ্গফলাদিধম্মে অত্তাধীনে করোতীতি আরম্মণাধিপতি নাম. গরুকাতব্বতামত্তেন আরম্মণাধিপতি. গরুকতোপি বলৰকারণট্ঠেন আরম্মণূপনিস্সযোতি অযমেতেসং ৰিসেসো. সহজাতা…পে… নামরূপানন্তি ছন্দচিত্তৰীরিযৰীমংসানং, ৰসেন চতুব্বিধোপি সহজাতাধিপতি যথারহং সহজাতনামরূপানং পৰত্তিযংযেৰ সহজাতাধিপতিৰসেন পচ্চযো.

২৮. রূপধম্মস্স অরূপধম্মং পতি সহজাতপচ্চযতা পটিসন্ধিযং ৰত্থুৰসেন ৰুত্তাতি আহ ‘‘ৰত্থুৰিপাকা অঞ্ঞমঞ্ঞ’’ন্তি –

৩০. যস্মা পন অঞ্ঞমঞ্ঞুপত্থম্ভনৰসেনেৰ অঞ্ঞমঞ্ঞপচ্চযতা, ন সহজাতমত্ততোতি পৰত্তিযং রূপং নামানং অঞ্ঞমঞ্ঞপচ্চযো ন হোতি, তস্মা ৰুত্তং ‘‘চিত্তচেতসিকা ধম্মা অঞ্ঞমঞ্ঞ’’ন্তি. তথা উপাদারূপানি চ ভূতরূপানং অঞ্ঞমঞ্ঞপচ্চযা ন হোন্তীতি ৰুত্তং ‘‘মহাভূতা অঞ্ঞমঞ্ঞ’’ন্তি.

৩১. ননু চ ‘‘অরূপিনো আহারা সহজাতানং নামরূপান’’ন্তি ৰুত্তং, এৰঞ্চ সতি অসঞ্ঞীনং সহজাতাহারস্স অসম্ভৰতো ‘‘সব্বে সত্তা আহারট্ঠিতিকা’’তি কথমিদং নীযতীতি? ৰুচ্চতে – মনোসঞ্চেতনাহারৰসপ্পৰত্তস্স কম্মস্স ¶ , তংসহগতানম্পি ৰা সেসাহারানং কম্মূপনিস্সযপচ্চযেহি পচ্চযত্তপরিযাযং গহেত্ৰা সব্বসত্তানং আহারট্ঠিতিকতা ৰুত্তা, ন আহারপচ্চযভাৰতোতি.

৩২. ‘‘পঞ্চ পসাদা’’ত্যাদীসু ননু ইত্থিন্দ্রিযপুরিসিন্দ্রিযা ন গহিতাতি? সচ্চং ন গহিতা. যদিপি তেসং লিঙ্গাদীহি অনুৰত্তনীযতা অত্থি, সা পন ন পচ্চযভাৰতো. যথা হি জীৰিতাহারা যেসং পচ্চযা হোন্তি, তেসং অনুপালকা উপত্থম্ভকা অত্থি, অৰিগতপচ্চযভূতা চ ¶ হোন্তি, ন এৰং ইত্থিপুরিসভাৰা লিঙ্গাদীনং কেনচি উপকারেন উপকারা হোন্তি. কেৰলং পন যথাসকেহেৰ কম্মাদিপচ্চযেহি পৰত্তমানং লিঙ্গাদীনং যথা ইত্থাদিগ্গহণস্স পচ্চযভাৰো হোতি, ততো অঞ্ঞেনাকারেন তং-সহিতসন্তানে অপ্পৰত্তিতো লিঙ্গাদীহি অনুৰত্তনীযতা, ইন্দ্রিযতা চ নেসং ৰুচ্চতি, তস্মা ন তেসং ইন্দ্রিযপচ্চযভাৰো ৰুত্তো.

৩৩. যেসং নামানং চক্খাদীনং অব্ভন্তরতো নিক্খমন্তানং ৰিয পৰত্তানং, যেসঞ্চ রূপানং নামসন্নিস্সযেনেৰ উপ্পজ্জমানানং সম্পযোগাসঙ্কা হোতি, তেসমেৰ ৰিপ্পযুত্তপচ্চযতা. রূপানং পন রূপেহি সাসঙ্কা নত্থি. ৰত্থুসন্নিস্সযেনেৰ জাযন্তানং ৰিসযভাৰমত্তং আরম্মণন্তি তেনাপি তেসং সম্পযোগাসঙ্কা নত্থীতি যেসং সম্পযোগাসঙ্কা অত্থি, তেসমেৰ ৰিপ্পযুত্তপচ্চযতাপি ৰুত্তাতি আহ ‘‘ওক্কন্তিক্খণে ৰত্থূ’’ত্যাদি.

৩৪. সব্বথা সব্বাকারেন যথারহং নামৰসেন ৰুত্তং তিৰিধং সহজাতং, দুৰিধং পুরেজাতং, একৰিধং পচ্ছাজাতঞ্চ পচ্চযজাতং, আহারেসু কবল়ীকারো আহারো, রূপজীৰিতিন্দ্রিযন্তি অযং পঞ্চৰিধোপি অত্থিপচ্চযো, অৰিগতপচ্চযো চ হোতি. পচ্চুপ্পন্নসভাৰেন অত্থিভাৰেন তাদিসস্সেৰ ধম্মস্স ¶ উপত্থম্ভকত্তা অত্থিভাৰাভাৰেন অনুপকারকানমেৰ অত্থিভাৰেন উপকারকতা অত্থিপচ্চযভাৰোতি নত্থি নিব্বানস্স সব্বদা ভাৰিনো অত্থিপচ্চযতা, অৰিগতপচ্চযতা চ. উপ্পাদাদিযুত্তানং ৰা নত্থিভাৰোপকারকতাৰিরুদ্ধো, ৰিগতভাৰোপকারকতাৰিরুদ্ধো চ উপকারকভাৰো অত্থিপচ্চযতাদিকাতি ন তস্স তপ্পচ্চযত্তপ্পসঙ্গো. রূপজীৰিতিন্দ্রিযঞ্চেত্থ ওজা ৰিয ঠিতিক্খণেৰ উপকারকত্তা সহজাতপচ্চযেসু ন গয্হতীতি ৰিসুং ৰুত্তং.

৩৫. ইদানি সব্বেপি পচ্চযা সঙ্খেপতোপি চতুধাযেৰাতি দস্সেতুং ‘‘আরম্মণূ…পে… গচ্ছন্তী’’তি ৰুত্তং. ন হি সো কোচি পচ্চযো অত্থি, যো চিত্তচেতসিকানং আরম্মণভাৰং ন গচ্ছেয্য, সকসকপচ্চযুপ্পন্নস্স চ উপনিস্সযভাৰং ন গচ্ছতি, কম্মহেতুকত্তা চ লোকপ্পৰত্তিযা ফলহেতূপচারৰসেন সব্বেপি কম্মসভাৰং নাতিৰত্তন্তি, তে চ পরমত্থতো লোকসম্মুতিৰসেন চ ৰিজ্জমানাযেৰাতি সব্বেপি চতূসু সমোধানং গচ্ছন্তি.

৩৬. ইদানি যং ৰুত্তং তত্থ তত্থ ‘‘সহজাতরূপ’’ন্তি, তং সব্বং ন অৰিসেসতো দট্ঠব্বন্তি ¶ দস্সেতুং ‘‘সহজাতরূপ’’ন্ত্যাদি ৰুত্তং. পটিসন্ধিযঞ্হি চিত্তসমুট্ঠানরূপাভাৰতো পৰত্তিযং কম্মসমুট্ঠানানঞ্চ চিত্তচেতসিকেহি সহুপ্পত্তিনিযমাভাৰতো সহজাতরূপন্তি সব্বত্থাপি পৰত্তে চিত্তসমুট্ঠানানং রূপানং, পটিসন্ধিযং কটত্তারূপসঙ্খাতকম্মজরূপানঞ্চ ৰসেন দুৰিধং হোতি. কম্মস্স কতত্তা নিব্বত্তমানানি রূপানি কটত্তারূপানি.

৩৭. ইতি এৰং ৰুত্তনযেন সম্ভৰা যথাসম্ভৰং তেকালিকা অনন্তরসমনন্তরআসেৰননত্থিৰিগতৰসেন পঞ্চন্নং অতীতকালিকানং, কম্মপচ্চযস্স অতীতৰত্তমানৰসেন দ্ৰিকালিকস্স, আরম্মণঅধিপতিউপনিস্সযপচ্চযানং তিকালিকানং ¶ , ইতরেসং পন্নরসন্নং পচ্চুপ্পন্নকালিকানঞ্চ ৰসেন কালত্তযৰন্তো, নিব্বানপঞ্ঞত্তিৰসেন কালৰিমুত্তা চ, চক্খাদিরাগাদিসদ্ধাদিৰসেন অজ্ঝত্তিকা চ, পুগ্গলউতুভোজনাদিৰসেন ততো বহিদ্ধা চ, পচ্চযুপ্পন্নভাৰেন সঙ্খতা চ, কথা তপ্পটিপক্খভাৰেন অসঙ্খতা চ ধম্মা পঞ্ঞত্তিনামরূপানং ৰসেন সঙ্খেপতো তিৰিধা ঠিতা সব্বথা পট্ঠানে অনন্তনযসমন্তপট্ঠানে পকরণে চতুৰীসতিসঙ্খাতা পচ্চযা নামাতি যোজনা.

৩৮. তত্থাতি তেসু পঞ্ঞত্তিনামরূপেসু.

পট্ঠাননযৰণ্ণনা নিট্ঠিতা.

পঞ্ঞত্তিভেদৰণ্ণনা

৩৯. ৰচনীযৰাচকভেদা দুৰিধা পঞ্ঞত্তীতি ৰুত্তং ‘‘পঞ্ঞাপিযত্তা’’ত্যাদি. পঞ্ঞাপিযত্তাতি তেন তেন পকারেন ঞাপেতব্বত্তা, ইমিনা রূপাদিধম্মানং সমূহসন্তানাদিঅৰত্থাৰিসেসাদিভেদা সম্মুতিসচ্চভূতা উপাদাপঞ্ঞত্তিসঙ্খাতা অত্থপঞ্ঞত্তি ৰুত্তা. সা হি নামপঞ্ঞত্তিযা পঞ্ঞাপীযতি. পঞ্ঞাপনতোতি পকারেহি অত্থপঞ্ঞত্তিযা ঞাপনতো. ইমিনা হি পঞ্ঞাপেতীতি ‘‘পঞ্ঞত্তী’’তি লদ্ধনামানং অত্থানং অভিধানসঙ্খাতা নামপঞ্ঞত্তি ৰুত্তা.

৪০. ভূতপরিণামাকারমুপাদাযাতি ¶ পথৰাদিকানং মহাভূতানং পবন্ধৰসেন পৰত্তমানানং পত্থটসঙ্গহতাদিআকারেন পরিণামাকারং পরিণতভাৰসঙ্খাতং আকারং উপাদায নিস্সযং কত্ৰা. তথা তথাতি ভূমাদিৰসেন. ভূমিপব্বতাদিকাতি ভূমিপব্বতরুক্খাদিকা সন্তানপঞ্ঞত্তি. সম্ভারসন্নিৰেসাকারন্তি দারুমত্তিকাতন্তাদীনং সম্ভারানং উপকরণানং ¶ সন্নিৰেসাকারং রচনাদিৰিসিট্ঠতংতংসণ্ঠানাদিআকারং. রথসকটাদিকাতি রথসকটগামঘটপটাদিকা সমূহপঞ্ঞত্তি. চন্দাৰট্টনাদিকন্তি চন্দিমসূরিযনক্খত্তানং সিনেরুং পদক্খিণৰসেন উদযাদিআৰট্টনাকারং. দিসাকালাদিকাতি পুরত্থিমদিসাদিকা দিসাপঞ্ঞত্তি, পুব্বণ্হাদিকা কালপঞ্ঞত্তি, মাসোতুৰেসাখমাসাদিকা তংতংনামৰিসিট্ঠা মাসাদিপঞ্ঞত্তি চ. অসম্ফুট্ঠাকারন্তি তংতংরূপকলাপেহি অসম্ফুট্ঠং সুসিরাদিআকারং. কূপগুহাদিকা তি কূপগুহছিদ্দাদিকা আকাসপঞ্ঞত্তি. তংতংভূতনিমিত্তন্তি পথৰীকসিণাদিতংতংভূতনিমিত্তং. ভাৰনাৰিসেসন্তি পরিকম্মাদিভেদং ভাৰনায পবন্ধৰিসেসং. কসিণনিমিত্তাদিকাতি কসিণাসুভনিমিত্তাদিভেদা যোগীনং উপট্ঠিতা উগ্গহপটিভাগাদিভেদা নিমিত্তপঞ্ঞত্তি. এৰমাদিপ্পভেদাতি কসিণুগ্ঘাটিমাকাসনিরোধকসিণাদিভেদা চ. অত্থচ্ছাযাকারেনাতি পরমত্থধম্মস্স ছাযাকারেন পটিভাগাকারেন.

৪১. নামনামকম্মাদিনামেনাতি নামং নামকম্মং নামধেয্যং নিরুত্তি ব্যঞ্জনং অভিলাপোতি ইমেহি ছহি নামেহি. তত্থ অত্থেসু নমতীতি নামং. তং অন্ৰত্থরুল়্হীৰসেন দুৰিধং, সামঞ্ঞগুণকিরিযাযদিচ্ছাৰসেন চতুব্বিধং. নামমেৰ নামকম্মং. তথা নামধেয্যং. অক্খরদ্ৰারেন অত্থং নীহরিত্ৰা উত্তি কথনং নিরুত্তি, অত্থং ব্যঞ্জযতীতি ব্যঞ্জনং. অভিলপতীতি অভিলাপো, সদ্দগতঅক্খরসন্নিৰেসক্কমো. সা পনাযং নামপঞ্ঞত্তি ৰিজ্জমানঅৰিজ্জমানতদুভযসংযোগৰসেন ছব্বিধা হোতীতি দস্সেতুং ‘‘ৰিজ্জমানপঞ্ঞত্তী’’ত্যাদি ৰুত্তং, এতায পঞ্ঞাপেন্তীতি ‘‘রূপৰেদনা’’ত্যাদিনা পকাসেন্তি.

৪২. উভিন্নন্তি ৰিজ্জমানাৰিজ্জমানানং দ্ৰিন্নং. পঞ্চাভিঞ্ঞা, আসৰক্খযঞাণন্তি ছ অভিঞ্ঞা অস্সাতি ছল়ভিঞ্ঞো. এত্থ ¶ চ অভিঞ্ঞানং ৰিজ্জমানত্তা, তপ্পটিলাভিনো পুগ্গলস্স অৰিজ্জমানত্তা চ অযং ৰিজ্জমানেন অৰিজ্জমানপঞ্ঞত্তি নাম. তথা ইত্থিযা অৰিজ্জমানত্তা, সদ্দস্স চ ৰিজ্জমানত্তা ইত্থিসদ্দোতি অৰিজ্জমানেন ৰিজ্জমানপঞ্ঞত্তি. পসাদচক্খুনো, তন্নিস্সিতৰিঞ্ঞাণস্স চ ৰিজ্জমানত্তা চক্খুৰিঞ্ঞাণন্তি ৰিজ্জমানেন ৰিজ্জমানপঞ্ঞত্তি ¶ . রঞ্ঞো চ পুত্তস্স চ সম্মুতিসচ্চভূতত্তা রাজপুত্তোতি অৰিজ্জমানেন অৰিজ্জমানপঞ্ঞত্তি.

৪৩. ৰচীঘোসানুসারেনাতি ভূমিপব্বতরূপৰেদনাদিৰচীমযসদ্দস্স অনুসারেন অনুগমনেন অনুস্সরণেন আরম্মণকরণেন পৰত্তায সোতৰিঞ্ঞাণৰীথিযা পৰত্তিতো অনন্তরং উপ্পন্নস্স মনোদ্ৰারস্স নামচিন্তনাকারপ্পৰত্তস্স মনোদ্ৰারিকৰিঞ্ঞাণসন্তানস্স ‘‘ইদমীদিসস্স অত্থস্স নাম’’ন্তি পুব্বেযেৰ গহিতসঙ্কেতোপনিস্সযস্স গোচরা আরম্মণভূতা ততো নামগ্গহণতো পরং যস্সা সম্মুতিপরমত্থৰিসযায নামপঞ্ঞত্তিযা অনুসারেন অনুগমনেন অত্থা সম্মুতিপরমত্থভেদা ৰিঞ্ঞাযন্তি, সাযং ভূমিপব্বতরূপৰেদনাদিকা পঞ্ঞাপেতব্বত্থপঞ্ঞাপিকা লোকসঙ্কেতেন নিম্মিতা লোকৰোহারেন সিদ্ধা, মনোদ্ৰারগ্গহিতা অক্খরাৰলিভূতা পঞ্ঞত্তি ৰিঞ্ঞেয্যা পঞ্ঞাপনতো পঞ্ঞত্তিসঙ্খাতা নামপঞ্ঞত্তীতি ৰিঞ্ঞেয্যা.

এত্থ চ সোতৰিঞ্ঞাণৰীথিযা অনন্তরভাৰিনিং মনোদ্ৰারিকৰীথিম্পি সোতৰিঞ্ঞাণৰীথিগ্গহণেনেৰ সঙ্গহেত্ৰা ‘‘সোতৰিঞ্ঞাণৰীথিযা’’তি ৰুত্তং. ঘটাদিসদ্দঞ্হি সুণন্তস্স একমেকং সদ্দং আরব্ভ পচ্চুপ্পন্নাতীতারম্মণৰসেন দ্ৰে দ্ৰে জৰনৰারা, বুদ্ধিযা গহিতনামপণ্ণত্তিভূতং অক্খরাৰলিমারব্ভ একোতি এৰং সোতৰিঞ্ঞাণৰীথিযা অনন্তরায অতীতসদ্দারম্মণায ¶ জৰনৰীথিযা অনন্তরং নামপঞ্ঞত্তিযা গহণং, ততো পরং অত্থাৰবোধোতি আচরিযা.

পঞ্ঞত্তিভেদৰণ্ণনা নিট্ঠিতা.

ইতি অভিধম্মত্থৰিভাৰিনিযা নাম অভিধম্মত্থসঙ্গহৰণ্ণনায

পচ্চযপরিচ্ছেদৰণ্ণনা নিট্ঠিতা.

৯. কম্মট্ঠানপরিচ্ছেদৰণ্ণনা

১. ইতো ¶ পচ্চযনিদ্দেসতো পরং নীৰরণানং সমনট্ঠেন সমথসঙ্খাতানং, অনিচ্চাদিৰিৰিধাকারতো দস্সনট্ঠেন ৰিপস্সনাসঙ্খাতানঞ্চ দ্ৰিন্নং ভাৰনানং দুৰিধম্পি কম্মট্ঠানং দুৰিধভাৰনাকম্মস্স পৰত্তিট্ঠানতায কম্মট্ঠানভূতমারম্মণং উত্তরুত্তরযোগকম্মস্স পদট্ঠানতায কম্মট্ঠানভূতং ভাৰনাৰীথিঞ্চ যথাক্কমং সমথৰিপস্সনানুক্কমেন পৰক্খামীতি যোজনা.

সমথকম্মট্ঠানং

চরিতভেদৰণ্ণনা

৩. রাগো ৰ চরিতা পকতীতি রাগচরিতা. এৰং দোসচরিতাদযোপি. চরিতসঙ্গহোতি মূলচরিতৰসেন পুগ্গলসঙ্গহো, সংসগ্গৰসেন পন তেসট্ঠি চরিতা হোন্তি. ৰুত্তঞ্হি –

‘‘রাগাদিকে তিকে সত্ত, সত্ত সদ্ধাদিকে তিকে;

একদ্ৰিতিকমূলম্হি, মিস্সতো সত্তসত্তক’’ন্তি.

এত্থ হি রাগচরিতা দোসচরিতা মোহচরিতা রাগদোসচরিতা রাগমোহচরিতা দোসমোহচরিতা রাগদোসমোহচরিতাতি ¶ এৰং রাগাদিকে তিকে সত্তকমেকং. তথা সদ্ধাচরিতা বুদ্ধিচরিতা ৰিতক্কচরিতা সদ্ধাবুদ্ধিচরিতা সদ্ধাবুদ্ধিৰিতক্কচরিতা বুদ্ধিৰিতক্কচরিতা সদ্ধাবুদ্ধিৰিতক্কচরিতাতি সদ্ধাদিকেপি তিকে একন্তি এৰং দ্ৰে তিকে অমিস্সেত্ৰা চুদ্দস চরিতা হোন্তি. রাগাদিতিকে পন একদ্ৰিতিকমূলৰসেন সদ্ধাদিতিকেন সহ যোজিতে রাগসদ্ধাচরিতা রাগবুদ্ধিচরিতা রাগৰিতক্কচরিতা রাগসদ্ধাবুদ্ধিচরিতা রাগসদ্ধাৰিতক্কচরিতা রাগবুদ্ধিৰিতক্কচরিতা রাগসদ্ধাবুদ্ধিৰিতক্কচরিতাতি রাগমূলনযে একং সত্তকং, তথা ‘‘দোসসদ্ধাচরিতা দোসবুদ্ধিচরিতা দোসৰিতক্কচরিতা’’ত্যাদিনা দোসমূলনযেপি একং, ‘‘মোহসদ্ধাচরিতা’’ত্যাদিনা মোহমূলনযেপি একন্তি এৰং একমূলনযে সত্তকত্তযং হোতি. যথা ¶ চেত্থ, এৰং দ্ৰিমূলকনযেপি ‘‘রাগদোসসদ্ধাচরিতা রাগদোসবুদ্ধিচরিতা রাগদোসৰিতক্কচরিতা’’ত্যাদিনা সত্তকত্তযং. তিমূলকনযে পন ‘‘রাগদোসমোহসদ্ধাচরিতা’’ত্যাদিনা একং সত্তকন্তি এৰং মিস্সতো সত্তসত্তকৰসেন একূনপঞ্ঞাস চরিতা হোন্তি. ইতি ইমা একূনপঞ্ঞাস, পুরিমা চ চুদ্দসাতি তেসট্ঠি চরিতা দট্ঠব্বা. কেচি পন দিট্ঠিযা সদ্ধিং ‘‘চতুসট্ঠী’’তি ৰণ্ণেন্তি.

চরিতভেদৰণ্ণনা নিট্ঠিতা.

ভাৰনাভেদৰণ্ণনা

৪. ভাৰনায পটিসঙ্খারকম্মভূতা, আদিকম্মভূতা ৰা পুব্বভাগভাৰনা পরিকম্মভাৰনা নাম. নীৰরণৰিক্খম্ভনতো পট্ঠায গোত্রভূপরিযোসানা কামাৰচরভাৰনা উপচারভাৰনা নাম. অপ্পনায সমীপচারিত্তা গামূপচারাদযো ৰিয. মহগ্গতভাৰপ্পত্তা অপ্পনাভাৰনা নাম অপ্পনাসঙ্খাতৰিতক্কপমুখত্তা ¶ . সম্পযুত্তধম্মেহি আরম্মণে অপ্পেন্তো ৰিয পৰত্ততীতি ৰিতক্কো অপ্পনা. তথা হি সো ‘‘অপ্পনা ব্যপ্পনা’’তি (ধ. স. ৭) নিদ্দিট্ঠো. তপ্পমুখতাৰসেন পন সব্বেপি মহগ্গতানুত্তরঝানধম্মা ‘‘অপ্পনা’’তি ৰুচ্চন্তি.

ভাৰনাভেদৰণ্ণনা নিট্ঠিতা.

নিমিত্তভেদৰণ্ণনা

৫. পরিকম্মস্স নিমিত্তং আরম্মণত্তাতি পরিকম্মনিমিত্তং, কসিণমণ্ডলাদি. তদেৰ চক্খুনা দিট্ঠং ৰিয মনসা উগ্গহেতব্বং নিমিত্তং, উগ্গণ্হন্তস্স ৰা নিমিত্তন্তি উগ্গহনিমিত্তং. তপ্পটিভাগং ৰণ্ণাদিকসিণদোসরহিতং নিমিত্তং উপচারপ্পনানং আরম্মণত্তাতি পটিভাগনিমিত্তং.

৬. পথৰীযেৰ ¶ কসিণং একদেসে অট্ঠত্ৰা অনন্তস্স ফরিতব্বতায সকলট্ঠেনাতি পথৰীকসিণং, কসিণমণ্ডলং. পটিভাগনিমিত্তং, তদারম্মণঞ্চ ঝানং ‘পথৰীকসিণ’ন্তি ৰুচ্চতি. তথা আপোকসিণাদীসুপি. তত্থ পথৰাদীনি চত্তারি ভূতকসিণানি. নীলাদীনি চত্তারি ৰণ্ণকসিণানি, পরিচ্ছিন্নাকাসো আকাসকসিণং, চন্দাদিআলোকো আলোককসিণন্তি দট্ঠব্বং.

৭. উদ্ধং ধুমাতং সূনং ছৰসরীরং উদ্ধুমাতং, তদেৰ কুচ্ছিতট্ঠেনউদ্ধুমাতকং. এৰং সেসেসুপি. সেতরত্তাদিনা ৰিমিস্সিতং যেভুয্যেন নীলৰণ্ণং ছৰসরীরং ৰিনীলকং ৰিসেসতো নীলকন্তি কত্ৰা. ৰিস্সৰন্তপুব্বকং ৰিপুব্বকং. মজ্ঝে দ্ৰিধা ছিন্নং ৰিচ্ছিদ্দকং. সোণসিঙ্গালাদীহি ৰিৰিধাকারেন খাযিতং ¶ ৰিক্খাযিতকং. সোণসিঙ্গালাদীহি ৰিৰিধেনাকারেন খণ্ডিত্ৰা তত্থ তত্থ খিত্তং ৰিক্খিত্তকং. কাকপদাদিআকারেন সত্থেন হনিত্ৰা ৰিৰিধং খিত্তং হতৰিক্খিত্তকং. লোহিতপগ্ঘরণকং লোহিতকং. কিমিকুলপগ্ঘরণকং পুল়ৰকং. অন্তমসো একম্পি অট্ঠি অট্ঠিকং.

৮. অনু অনু সরণং অনুস্সতি, অরহতাদিবুদ্ধগুণারম্মণা অনুস্সতি বুদ্ধানুস্সতি. স্ৰাক্খাততাদিধম্মগুণারম্মণা অনুস্সতি ধম্মানুস্সতি. সুপ্পটিপন্নতাদিসংঘগুণারম্মণা অনুস্সতি সংঘানুস্সতি. অখণ্ডতাদিনা সুপরিসুদ্ধস্স অত্তনো সীলগুণস্স অনুস্সরণং সীলানুস্সতি. ৰিগতমলমচ্ছেরতাদিৰসেন অত্তনো চাগানুস্সরণং চাগানুস্সতি. ‘‘যেহি সদ্ধাদীহি সমন্নাগতা দেৰা দেৰত্তং গতা, তাদিসা গুণা মযি সন্তী’’তি এৰং দেৰতা সক্খিট্ঠানে ঠপেত্ৰা অত্তনো সদ্ধাদিগুণানুস্সরণং দেৰতানুস্সতি. সব্বদুক্খূপসমভূতস্স নিব্বানস্স গুণানুস্সরণং উপসমানুস্সতি. জীৰিতিন্দ্রিযুপচ্ছেদভূতস্স মরণস্স অনুস্সরণং মরণানুস্সতি. কেসাদিকাযকোট্ঠাসে গতা পৰত্তা সতি কাযগতাসতি. আনঞ্চ অপানঞ্চ আনাপানং, অস্সাসপস্সাসা, তদারম্মণা সতি আনাপানস্সতি.

৯. মিজ্জতি সিনিয্হতীতি মেত্তা, মিত্তেসু ভৰাতি ৰা মেত্তা, সা সত্তানং হিতসুখূপসংহরণলক্খণা. পরদুক্খাপনযনকামতালক্খণা করুণা. পরসম্পত্তিপমোদলক্খণা মুদিতা. ইট্ঠানিট্ঠেসু মজ্ঝত্তাকারপ্পৰত্তিলক্খণা উপেক্খা. অপ্পমাণসত্তারম্মণত্তা অপ্পমঞ্ঞা. উত্তমৰিহারভাৰতো, উত্তমানং ৰা ৰিহারভাৰতো ব্রহ্মৰিহারো.

১০. গমনপরিযেসনপরিভোগাদিপচ্চৰেক্খণৰসেন ¶ ¶ কবল়ীকারাহারে পটিকূলন্তি পৰত্তা সঞ্ঞা আহারে পটিকূলসঞ্ঞা.

১১. পথৰীধাতুআদীনং চতুন্নং ধাতূনং সলক্খণতো কেসাদিসসম্ভারাদিতো চ ৰৰত্থানং চতুধাতুৰৰত্থানং.

১২. অরূপে আরম্মণে পৰত্তা আরুপ্পা.

নিমিত্তভেদৰণ্ণনা নিট্ঠিতা.

সপ্পাযভেদৰণ্ণনা

১৩. ইদানি তস্স তস্স পুগ্গলস্স চরিতানুকূলকম্মট্ঠানং দস্সেতুং ‘‘চরিতাসু পনা’’ত্যাদিমাহ. রাগো ৰ চরিতং পকতি এতস্সাতি রাগচরিতো, রাগবহুলো পুগ্গলো, রাগস্স উজুৰিপচ্চনীকভাৰতো অসুভকম্মট্ঠানং তস্স সপ্পাযং. আনাপানং মোহচরিতস্স, ৰিতক্কচরিতস্স চ সপ্পাযং বুদ্ধিৰিসযভাৰেন মোহপ্পটিপক্খত্তা, ৰিতক্কসন্ধাৰনস্স নিৰারকত্তা চ. ছ বুদ্ধানুস্সতিআদযো সদ্ধাচরিতস্স সপ্পাযা সদ্ধাৰুদ্ধিহেতুভাৰতো.

১৭. মরণউপসমসঞ্ঞাৰৰত্থানানি বুদ্ধিচরিতস্স সপ্পাযানি গম্ভীরভাৰতো বুদ্ধিযা এৰ ৰিসযত্তা.

১৮. সেসানীতি চতুব্বিধভূতকসিণআকাসআলোককসিণআরুপ্পচতুক্কৰসেন দসৰিধানি. তত্থাপীতি তেসু দসসু কম্মট্ঠানেসু. পুথুলং মোহচরিতস্স সপ্পাযং সম্বাধে ওকাসে চিত্তস্স ভিয্যোসোমত্তায সম্মুয্হনতো. খুদ্দকং ৰিতক্কচরিতস্স সপ্পাযং মহন্তারম্মণস্স ৰিতক্কসন্ধাৰনপচ্চযত্তা. উজুৰিপচ্চনীকতো চেৰ অতিসপ্পাযতায ¶ চেতং ৰুত্তং. রাগাদীনং পন অৰিক্খম্ভিকা, সদ্ধাদীনং ৰা অনুপকারিকা কসিণাদিভাৰনা নাম নত্থি.

সপ্পাযভেদৰণ্ণনা নিট্ঠিতা.

ভাৰনাভেদৰণ্ণনা

১৯. সব্বত্থাপীতি ¶ চত্তালীসকম্মট্ঠানেসুপি নত্থি অপ্পনা, বুদ্ধগুণাদীনং পরমত্থভাৰতো, অনেকৰিধত্তা, একস্সপি গম্ভীরভাৰতো চ. বুদ্ধানুস্সতিআদীসু দসসু কম্মট্ঠানেসু অপ্পনাৰসেন সমাধিস্স পতিট্ঠাতুং অসক্কুণেয্যত্তা অপ্পনাভাৰং অপ্পত্ৰা সমাধি উপচারভাৰেন পতিট্ঠাতি. লোকুত্তরসমাধি, পন দুতিযচতুত্থারুপ্পসমাধি চ সভাৰধম্মেপি ভাৰনাৰিসেসৰসেন অপ্পনং পাপুণাতি. ৰিসুদ্ধিভাৰনানুক্কমৰসেন হি লোকুত্তরো অপ্পনং পাপুণাতি. আরম্মণসমতিক্কমভাৰনাৰসেন আরুপ্পসমাধি. অপ্পনাপ্পত্তস্সেৰ হি চতুত্থজ্ঝানসমাধিনো আরম্মণসমতিক্কমনমত্তং হোতি.

২১. পঞ্চপি ঝানানি এতেসমত্থি, তত্থ নিযুত্তানীতি ৰা পঞ্চকজ্ঝানিকানি.

২২. অসুভভাৰনায পটিকূলারম্মণত্তা চণ্ডসোতায নদিযা অরিত্তবলেন নাৰা ৰিয ৰিতক্কবলেনেৰ তত্থ চিত্তং পৰত্ততীতি অসুভকম্মট্ঠানে অৰিতক্কজ্ঝানাসম্ভৰতো ‘‘পঠমজ্ঝানিকা’’তি ৰুত্তং.

২৩. মেত্তাকরুণামুদিতানং দোমনস্সসহগতব্যাপাদৰিহিংসানভিরতীনং পহাযকত্তা দোমনস্সপ্পটিপক্খেন সোমনস্সেনেৰ সহগততা যুত্তাতি ‘‘মেত্তাদযো তযো চতুক্কজ্ঝানিকা’’তি ৰুত্তা.

২৪. ‘‘সব্বে ¶ সত্তা সুখিতা হোন্তু, দুক্খা মুচ্চন্তু, লদ্ধসুখসম্পত্তিতো মা ৰিগচ্ছন্তূ’’তি মেত্তাদিৰসপ্পৰত্তব্যাপারত্তযং পহায কম্মস্সকতাদস্সনেন সত্তেসু মজ্ঝত্তাকারপ্পৰত্তভাৰনানিব্বত্তায তত্রমজ্ঝত্তুপেক্খায বলৰতরত্তা উপেক্খাব্রহ্মৰিহারস্স সুখসহগতাসম্ভৰতো ‘‘উপেক্খা পঞ্চমজ্ঝানিকা’’তি ৰুত্তা.

ভাৰনাভেদৰণ্ণনা নিট্ঠিতা.

গোচরভেদৰণ্ণনা

২৬. যথারহন্তি ¶ তংতংআরম্মণানুরূপতো. কস্সচি আরম্মণস্স অপরিব্যত্ততায ‘‘পরিযাযেনা’’তি ৰুত্তং.

২৭. কসিণাসুভকোট্ঠাসানাপানস্সতীস্ৰেৰ হি পরিব্যত্তনিমিত্তসম্ভৰোতি.

২৮. পথৰীমণ্ডলাদীসু নিমিত্তং উগ্গণ্হন্তস্সাতি আদিম্হি তাৰ চতুপারিসুদ্ধিসীলং ৰিসোধেত্ৰা দসৰিধং পলিবোধং উপচ্ছিন্দিত্ৰা পিযগরুভাৰনীযাদিগুণসমন্নাগতং কল্যাণমিত্তং উপসঙ্কমিত্ৰা অত্তনো চরিযানুকূলং কম্মট্ঠানং গহেত্ৰা অট্ঠারসৰিধং অননুরূপৰিহারং পহায পঞ্চঙ্গসমন্নাগতে অনুরূপৰিহারে ৰিহরন্তস্স কেসনখহরণাদিখুদ্দকপলিবোধুপচ্ছেদং কত্ৰা কসিণমণ্ডলাদীনি পুরতো কত্ৰা আনাপানকোট্ঠাসাদীসু চিত্তং ঠপেত্ৰা নিসীদিত্ৰা ‘‘পথৰী পথৰী’’ত্যাদিনা তংতংভাৰনানুক্কমেন পথৰীকসিণাদীসু তংতদারম্মণেসু নিমিত্তং উগ্গণ্হন্তস্স. অযমেত্থ সঙ্খেপো. ৰিত্থারতো পন ভাৰনা ৰিসুদ্ধিমগ্গতো (ৰিসুদ্ধি. ১.৫৪ আদযো) গহেতব্বা. দুৰিধম্পি হি ভাৰনাৰিধানং ইধ আচরিযেন ¶ অতিসঙ্খেপতো ৰুত্তং, তদত্থদস্সনত্থঞ্চ ৰিত্থারনযে আহরিযমানে অতিপ্পপঞ্চো সিযাতি মযম্পি তং ন ৰিত্থারেস্সাম. যদা পন তং নিমিত্তং চিত্তেন সমুগ্গহিতন্তি এৰং পৰত্তানুপুব্বভাৰনাৰসেন যদা তং পরিকম্মনিমিত্তং চিত্তেন সম্মা উগ্গহিতং হোতি. মনোদ্ৰারস্স আপাথমাগতন্তি চক্খুং নিম্মীলেত্ৰা, অঞ্ঞত্থ গন্ত্ৰা ৰা মনসি করোন্তস্স কসিণমণ্ডলসদিসমেৰ হুত্ৰা মনোদ্ৰারিকজৰনানং আপাথং আগতং হোতি.

২৯. সমাধিযতীতি ৰিসেসতো চিত্তেকগ্গতাপত্তিযা সমাহিতা হোতি.

৩০. চিত্তসমাধানৰসেন পুগ্গলোপি সমাহিতোযেৰাতি ৰুত্তং ‘‘তথা সমাহিতস্সা’’তি. তপ্পটিভাগন্তি উগ্গহনিমিত্তসদিসং, ততোযেৰ হি তং ‘‘পটিভাগনিমিত্ত’’ন্তি ৰুচ্চতি. তং পন উগ্গহনিমিত্ততো অতিপরিসুদ্ধং হোতি. ৰত্থুধম্মৰিমুচ্চিতন্তি পরমত্থধম্মতো ৰিমুত্তং, ৰত্থুধম্মতো ৰা কসিণমণ্ডলগতকসিণদোসতো ৰিনিমুত্তং. ভাৰনায নিব্বত্তত্তা ভাৰনামযং. সমপ্পিতন্তি সুট্ঠু অপ্পিতং.

৩১. ততো পট্ঠাযাতি পটিভাগনিমিত্তুপ্পত্তিতো পট্ঠায.

৩৩. পঞ্চসু ঝানঙ্গেসু একেকারম্মণে উপ্পন্নাৰজ্জনানন্তরং চতুপঞ্চজৰনকতিপযভৰঙ্গতো ¶ পরং অগন্ত্ৰা অপরাপরং ঝানঙ্গাৰজ্জনসমত্থতা আৰজ্জনৰসিতা নাম. সমাপজ্জিতুকামতানন্তরং কতিপযভৰঙ্গতো পরং অগন্ত্ৰা উপ্পন্নাৰজ্জনানন্তরং সমাপজ্জিতুং সমত্থতা সমাপজ্জনৰসিতা নাম. সেতু ৰিয সীঘসোতায নদিযা ওঘং ভৰঙ্গৰেগং উপচ্ছিন্দিত্ৰা যথাপরিচ্ছিন্নকালং ঝানং ঠপেতুং সমত্থতা ভৰঙ্গপাততো রক্খণযোগ্যতা অধিট্ঠানৰসিতা নাম. যথা পরিচ্ছিন্নকালং অনতিক্কমিত্ৰা ঝানতো ৰুট্ঠানসমত্থতা ৰুট্ঠানৰসিতা নাম. অথ ৰা যথাপরিচ্ছিন্নকালতো উদ্ধং গন্তুং অদত্ৰা ঠপনসমত্থতা অধিট্ঠানৰসিতা ¶ নাম. যথাপরিচ্ছিন্নকালতো অন্তো অৰুট্ঠহিত্ৰা যথাকালৰসেনেৰ ৰুট্ঠানসমত্থতা ৰুট্ঠানৰসিতা নামাতি অলমতিপ্পপঞ্চেন. পচ্চৰেক্খণৰসিতা পন আৰজ্জনৰসিতায এৰ সিদ্ধা. আৰজ্জনানন্তরজৰনানেৰ হি পচ্চৰেক্খণজৰনানি নাম. ৰিতক্কাদিওল়ারিকঙ্গং পহানাযাতি দুতিযজ্ঝানাদীহি ৰিতক্কাদিওল়ারিকঙ্গানং ঝানক্খণে অনুপ্পাদায. পদহতোতি পরিকম্মং করোন্তস্স. তস্স পন উপচারভাৰনা নিপ্ফন্না নাম হোতি ৰিতক্কাদীসু নিকন্তিৰিক্খম্ভনতো পট্ঠাযাতি দট্ঠব্বং. যথারহন্তি তংতংঝানিককসিণাদিআরম্মণানুরূপং.

৩৬. আকাসকসিণস্স উগ্ঘাটেতুং অসক্কুণেয্যত্তা ৰুত্তং ‘‘আকাসৰজ্জিতেসূ’’তি. কসিণন্তি কসিণপটিভাগনিমিত্তং. উগ্ঘাটেত্ৰাতি অমনসিকারৰসেন উদ্ধরিত্ৰা. অনন্তৰসেন পরিকম্মং করোন্তস্সাতি ‘‘অনন্তং আকাসং, অনন্তং আকাস’’ন্তি আকাসং আরব্ভ পরিকম্মং করোন্তস্স, ন পন কেৰলং ‘‘অনন্তং অনন্ত’’ন্তি. এৰং ৰিঞ্ঞাণঞ্চাযতনেপি. ‘‘অনন্ত’’ন্তি অৰত্ৰাপি ‘‘আকাসো আকাসো (ৰিসুদ্ধি. ১.২৭৬), ৰিঞ্ঞাণং ৰিঞ্ঞাণ’’ন্তি (ৰিসুদ্ধি. ১.২৮১) মনসি কাতুং ৰট্টতীতি আচরিযা.

৩৯. ‘‘সন্তমেতং, পণীতমেত’’ন্তি পরিকম্মং করোন্তস্সাতি অভাৰমত্তারম্মণতায ‘‘এতং সন্তং, এতং পণীত’’ন্তি ভাৰেন্তস্স.

৪০. অৰসেসেসু চাতি কসিণাদীহি সহ অপ্পনাৰহকম্মট্ঠানতো অৰসেসেসু বুদ্ধানুস্সতিআদীসু অট্ঠসু ¶ , সঞ্ঞাৰৰত্থানেসু চাতি দসসু কম্মট্ঠানেসু. পরিকম্মং কত্ৰাতি ‘‘সো ভগৰা ইতিপি অরহং, ইতিপি সম্মাসম্বুদ্ধো’’ত্যাদিনা (ৰিসুদ্ধি. ১.১২৪) ৰুত্তৰিধানেন পরিকম্মং কত্ৰা. সাধুকমুগ্গহিতেতি বুদ্ধাদিগুণনিন্নপোণপব্ভারচিত্ততাৰসেন সুট্ঠু উগ্গহিতে. পরিকম্মঞ্চ সমাধিযতীতি পরিকম্মভাৰনা সমাহিতা নিপ্ফজ্জতি. উপচারো চ সম্পজ্জতীতি নীৰরণানি ৰিক্খম্ভেন্তো উপচারসমাধি চ উপ্পজ্জতি.

৪১. অভিঞ্ঞাৰসেন ¶ পৰত্তমানন্তি অভিৰিসেসতো জাননট্ঠেন অভিঞ্ঞাসঙ্খাতং ইদ্ধিৰিধাদিপঞ্চলোকিযাভিঞ্ঞাৰসেন পৰত্তমানং, অভিঞ্ঞাপাদকপঞ্চমজ্ঝানা ৰুট্ঠহিত্ৰাতি কসিণানুলোমাদীহি চুদ্দসহাকারেহি (ৰিসুদ্ধি. ২.৩৬৫) চিত্তং পরিদমেত্ৰা অভিনীহারক্খমং কত্ৰা উপেক্খেকগ্গতাযোগতো অনুরূপত্তা চ রূপাৰচরপঞ্চমজ্ঝানমেৰ অভিঞ্ঞানং পাদকং পতিট্ঠাভূতং পথৰাদিকসিণারম্মণং পঞ্চমজ্ঝানং, তং সমাপজ্জিত্ৰা ততো ৰুট্ঠায. অধিট্ঠেয্যাদিকমাৰজ্জেত্ৰাতি ইদ্ধিৰিধঞাণস্স পরিকম্মকালে অধিট্ঠাতব্বং ৰিকুব্বনীযং সতাদিকং কোমাররূপাদিকং, দিব্বসোতস্স পরিকম্মকালে থূলসুখুমভেদং সদ্দং, চেতোপরিযঞাণস্স পরিকম্মকালে পরস্স হদযঙ্গতৰণ্ণদস্সনেন সরাগাদিভেদং চিত্তং, পুব্বেনিৰাসানুস্সতিঞাণস্স পরিকম্মসমযে পুরিমভৰেসু চুতিচিত্তাদিভেদং পুব্বে নিৰুত্থক্খন্ধং, দিব্বচক্খুস্স পরিকম্মসমযে ওভাসফরিতট্ঠানগতং রূপং ৰা আৰজ্জেত্ৰা.

পরিকম্মং করোন্তস্সাতি ‘‘সতং হোমি, সহস্সং হোমী’’ত্যাদিনা পরিকম্মং করোন্তস্স. রূপাদীসূতি পরিকম্মৰিসযভূতেসু রূপপাদকজ্ঝানসদ্দপরচিত্তপুব্বেনিৰুত্থক্খন্ধাদিভেদেসু আরম্মণেসু. এত্থ হি ইদ্ধিৰিধঞাণস্স তাৰ পাদকজ্ঝানং, কাযো, রূপাদিঅধিট্ঠানে রূপাদীনি চাতি ছ আরম্মণানি ¶ . তত্থ পাদকজ্ঝানং অতীতমেৰ, কাযো পচ্চুপ্পন্নো, ইতরং পচ্চুপ্পন্নমনাগতং ৰা. দিব্বসোতস্স পন সদ্দোযেৰ, সো চ খো পচ্চুপ্পন্নো. পরচিত্তৰিজাননায পন অতীতে সত্তদিৰসেসু, অনাগতে সত্তদিৰসেসু চ পৰত্তং পরিত্তাদীসু যং কিঞ্চি তিকালিকং চিত্তমেৰ আরম্মণং হোতীতি মহাঅট্ঠকথাচরিযা (ৰিসুদ্ধি. ২.৪১৬; ধ. স. অট্ঠ. ১৪৩৪).

সঙ্গহকারা পন ‘‘চত্তারোপি খন্ধা’’তি (ধ. স. অট্ঠ. ১৪৩৪) ৰদন্তি, কথং পনস্সা পচ্চুপ্পন্নচিত্তারম্মণতা, ননু চ আৰজ্জনায গহিতমেৰ ইদ্ধিচিত্তস্স আরম্মণং হোতি, আৰজ্জনায চ পচ্চুপ্পন্নচিত্তমারম্মণং কত্ৰা নিরুজ্ঝমানায তংসমকালমেৰ পরস্স চিত্তম্পি নিরুজ্ঝতীতি আৰজ্জনজৰনানং কালৰসেন একারম্মণতা ন সিযা, মগ্গফলৰীথিতো অঞ্ঞত্থ আৰজ্জনজৰনানং কথঞ্চ নানারম্মণতা ন অধিপ্পেতাতি? অট্ঠকথাযং (ৰিসুদ্ধি. ২.৪১৬; ধ. স. অট্ঠ. ১৪৩৪) তাৰ সন্ততিঅদ্ধাপচ্চুপ্পন্নারম্মণতা যোজিতা. আনন্দাচরিযো (ধ. স. মূলটী. ১৪৩৪ থোক ৰিসদিসং) পন ভণতি ‘‘পাদকজ্ঝানতো ৰুট্ঠায পচ্চুপ্পন্নাদিৰিভাগং অকত্ৰা কেৰলং ‘ইমস্স চিত্তং ¶ জানামি’চ্চেৰ পরিকম্মং কত্ৰা পুনপি পাদকজ্ঝানং সমাপজ্জিত্ৰা ৰুট্ঠায অৰিসেসেনেৰ চিত্তং আৰজ্জেত্ৰা তিণ্ণং, চতুন্নং ৰা পরিকম্মানং অনন্তরং চেতোপরিযঞাণেন পরস্স চিত্তং পটিৰিজ্ঝতি রূপং ৰিয দিব্বচক্খুনা. পচ্ছা কামাৰচরচিত্তেন সরাগাদিৰৰত্থানম্পি করোতি নীলাদিৰৰত্থানং ৰিয. তানি চ সব্বানি অভিমুখীভূতচিত্তারম্মণানেৰ, অনিট্ঠে চ ঠানে নানারম্মণতাদোসো নত্থি অভিন্নাকারপ্পৰত্তিতো’’তি. পুব্বেনিৰাসানুস্সতিঞাণস্স পুব্বে নিৰুত্থক্খন্ধা, খন্ধপ্পটিবদ্ধানি চ নামগোত্তানি, নিব্বানঞ্চ আরম্মণং হোতি, দিব্বচক্খুস্স পন রূপমেৰ ¶ পচ্চুপ্পন্নন্তি অযমেতেসং আরম্মণৰিভাগো. যথারহমপ্পেতীতি তংতংপরিকম্মানুরূপতো অপ্পেতি.

৪২. ইদানি আরম্মণানং ভেদেন অভিঞ্ঞাভেদং দস্সেতুং ‘‘ইদ্ধিৰিধা’’ত্যাদিমাহ. অধিট্ঠানাদি ইদ্ধিপ্পভেদো এতিস্সাতি ইদ্ধিৰিধা. দিব্বানং সোতসদিসতায, দিব্বৰিহারসন্নিস্সিততায চ দিব্বঞ্চ তং সোতঞ্চাতি দিব্বসোতং. পরেসং চিত্তং ৰিঞ্ঞাযতি এতাযাতি পরচিত্তৰিজাননা. অত্তনো সন্তানে নিৰুত্থৰসেন চেৰ গোচরনিৰাসৰসেন চ পুব্বে অতীতভৰেসু খন্ধাদীনং অনুস্সরণং পুব্বেনিৰাসানুস্সতি. ৰুত্তনযেন দিব্বঞ্চ তং চক্খু চাতি দিব্বচক্খু. ‘চুতূপপাতঞাণ’ন্তি পন দিব্বচক্খুমেৰ ৰুচ্চতি. যথাকম্মূপগঞাণঅনাগতংসঞাণানিপি দিব্বচক্খুৰসেনেৰ ইজ্ঝন্তি. ন হি তেসং ৰিসুং পরিকম্মং অত্থি. তত্থ অনাগতংসঞাণস্স তাৰ অনাগতে সত্তদিৰসতো পরং পৰত্তনকং চিত্তচেতসিকং দুতিযদিৰসতো পট্ঠায পৰত্তনকঞ্চ যং কিঞ্চি আরম্মণং হোতি. তঞ্হি সৰিসযে সব্বঞ্ঞুতঞ্ঞাণগতিকন্তি. যথা কম্মূপগঞাণস্স পন কুসলাকুসলসঙ্খাতা চেতনা, চত্তারোপি ৰা খন্ধা আরম্মণন্তি দট্ঠব্বং.

গোচরৰসেন ভেদো গোচরভেদো.

গোচরভেদৰণ্ণনা নিট্ঠিতা.

সমথকম্মট্ঠানৰণ্ণনা নিট্ঠিতা.

ৰিপস্সনাকম্মট্ঠানং

ৰিসুদ্ধিভেদৰণ্ণনা

৪৩. অনিচ্চাদিৰসেন ¶ ৰিৰিধাকারেন পস্সতীতি ৰিপস্সনা, অনিচ্চানুপস্সনাদিকা ভাৰনাপঞ্ঞা. তস্সা কম্মট্ঠানং, সাযেৰ ৰা কম্মট্ঠানন্তি ৰিপস্সনাকম্মট্ঠানং. তস্মিং ৰিপস্সনাকম্মট্ঠানে সত্তৰিধেন ৰিসুদ্ধিসঙ্গহোতি সম্বন্ধো.

৪৪. অনিচ্চতাযেৰ ¶ লক্খণং লক্খিতব্বং, লক্খীযতি অনেনাতি ৰা অনিচ্চলক্খণং. উদযৰযপটিপীল়নসঙ্খাতদুক্খভাৰো ৰ লক্খণন্তি দুক্খলক্খণং. পরপরিকপ্পিতস্স অত্তনো অভাৰো অনত্ততা, তদেৰ লক্খণন্তি অনত্তলক্খণং.

৪৫. তিণ্ণং লক্খণানং অনু অনু পস্সনা অনিচ্চানুপস্সনাদিকা.

৪৬. খন্ধাদীনং কলাপতো সম্মসনৰসপ্পৰত্তং ঞাণং সম্মসনঞাণং. উপ্পাদভঙ্গানুপস্সনাৰসপ্পৰত্তঞাণং উদযব্বযঞাণং. উদযং মুচ্চিত্ৰা ৰযে পৰত্তং ঞাণং ভঙ্গঞাণং. সঙ্খারানং ভযতো অনুপস্সনাৰসেন পৰত্তং ঞাণং ভযঞাণং, দিট্ঠভযানং আদীনৰতো পেক্খণৰসেন পৰত্তং ঞাণং আদীনৰঞাণং, দিট্ঠাদীনৰেসু নিব্বিন্দনৰসপ্পৰত্তং ঞাণং নিব্বিদাঞাণং. নিব্বিন্দিত্ৰা সঙ্খারেহি মুচ্চিতুকম্যতাৰসেন পৰত্তং ঞাণং মুচ্চিতুকম্যতাঞাণং. মুচ্চনস্স উপাযসম্পটিপাদনত্থং পুন সঙ্খারানং পরিগ্গহৰসপ্পৰত্তং ঞাণং পটিসঙ্খাঞাণং. পটিসঙ্খাতধম্মেসু ভযনন্দীৰিৰজ্জনৰসেন অজ্ঝুপেক্খিত্ৰা পৰত্তং ঞাণং সঙ্খারুপেক্খাঞাণং. পুরিমানং নৰন্নং কিচ্চনিপ্ফত্তিযা, উপরি চ সত্ততিংসায বোধিপক্খিযধম্মানং অনুকূলং ঞাণং অনুলোমঞাণং.

৪৭. অত্তসুঞ্ঞতায সুঞ্ঞতো. সংযোজনাদীহি ৰিমুচ্চনট্ঠেন ৰিমোক্খো. নিচ্চনিমিত্তাদিনো অভাৰতো অনিমিত্তো. পণিহিতস্স তণ্হাপণিধিস্স অভাৰতো অপ্পণিহিতো.

৪৯. যো ¶ নং পাতি, তং মোক্খেতি অপাযাদীহি দুক্খেহীতি পাতিমোক্খং, তদেৰ কাযদুচ্চরিতাদীহি সংৰরণতো সংৰরো, সমাধানোপধারণট্ঠেন সীলঞ্চাতি পাতিমোক্খসংৰরসীলং. মনচ্ছট্ঠানং ইন্দ্রিযানং রূপাদীসু সংৰরণৰসেন ¶ পৰত্তং সীলং ইন্দ্রিযসংৰরসীলং. মিচ্ছাজীৰ ৰিৰজ্জনেন আজীৰস্স পরিসুদ্ধিৰসপ্পৰত্তং আজীৰপারিসুদ্ধিসীলং. পচ্চযে সন্নিস্সিতং তেসং ইদমত্থিকতায পচ্চৰেক্খণসীলং পচ্চযসন্নিস্সিতসীলং. চতুব্বিধত্তা দেসনাসংৰরপরিযেট্ঠিপচ্চৰেক্খণৰসেন, পরিসুদ্ধত্তা চ চতুপারিসুদ্ধিসীলং নাম.

৫০. চিত্তৰিসুদ্ধি নাম চিত্তস্স ৰিনীৰরণভাৰাপাদনৰসেন ৰিসোধনতো, চিত্তসীসেন নিদ্দিট্ঠত্তা, ৰিসুদ্ধত্তা চাতি ৰা কত্ৰা.

৫১. ‘‘ধম্মানং সামঞ্ঞসভাৰো লক্খণং, কিচ্চসম্পত্তিযো রসো, উপট্ঠানাকারো, ফলঞ্চ পচ্চুপট্ঠান’’ন্তি এৰং ৰুত্তানং লক্খণাদীনং ‘‘ফুসনলক্খণো ফস্সো, কক্খল়লক্খণা পথৰী’’ত্যাদিনা ৰিত্থারতো, ‘‘নমনলক্খণং নামং, রুপ্পনলক্খণং রূপ’’ন্ত্যাদিনা সঙ্খেপতো চ পরিগ্গহো পচ্চত্তলক্খণাদিৰসেন পরিচ্ছিজ্জ গহণং দুক্খসচ্চৰৰত্থানং দিট্ঠিৰিসুদ্ধি নাম ‘‘নামরূপতো অত্তা নত্থী’’তি দস্সনতো দিট্ঠি চ অত্তদিট্ঠিমলৰিসোধনতো ৰিসুদ্ধি চাতি কত্ৰা.

৫২. পচ্চযপরিগ্গহোতি নামঞ্চ রূপঞ্চ পটিসন্ধিযং তাৰ অৰিজ্জাতণ্হাউপাদানকম্মহেতুৰসেন নিব্বত্ততি. পৰত্তিযঞ্চ রূপং কম্মচিত্তউতুআহারপচ্চযৰসেন, নামঞ্চ চক্খুরূপাদিনিস্সযারম্মণাদিপচ্চযৰসেন, ৰিসেসতো চ যোনিসোমনসিকারাদিচতুচক্কসম্পত্তিযা কুসলং, তব্বিপরিযাযেন অকুসলং, কুসলাকুসলৰসেন ৰিপাকো ভৰঙ্গাদিৰসেন আৰজ্জনং, খীণাসৰসন্তানৰসেন কিরিযজৰনং, আৰজ্জনঞ্চ উপ্পজ্জতীতি এৰং সাধারণাসাধারণৰসেন তীসু অদ্ধাসু নামরূপপ্পৰত্তিযা পচ্চক্খাদিসিদ্ধস্স কম্মাদিপচ্চযস্স পরিগ্গণ্হনং সমুদযসচ্চস্স ৰৰত্থানং কঙ্খাৰিতরণৰিসুদ্ধি নাম ‘‘অহোসিং নু খো অহমতীতমদ্ধান’’ন্ত্যাদিকায ¶ (ম. নি. ১.১৮; সং. নি. ২.২০) সোল়সৰিধায, ‘‘সত্থরিকঙ্খতী’’ত্যাদিকায (ধ. স. ১১২৩; ৰিভ. ৯১৫) অট্ঠৰিধায চ কঙ্খায ৰিতরণতো অতিক্কমনতো কঙ্খাৰিতরণা, অহেতুকৰিসমহেতুদিট্ঠিমলৰিসোধনতো ৰিসুদ্ধি চাতি কত্ৰা.

৫৩. ততো ¶ পচ্চযপরিগ্গহতো পরং তথাপরিগ্গহিতেসু পচ্চত্তলক্খণাদিৰৰত্থানৰসেন, পচ্চযৰৰত্থানৰসেন চ পরিগ্গহিতেসু লোকুত্তরৰজ্জেসু তিভূমিপরিযাপন্নেসু নামরূপেসু অতীতাদিভেদভিন্নেসু খন্ধাদিনযমারব্ভ পঞ্চক্খন্ধছদ্ৰারছল়ারম্মণছদ্ৰারপ্পৰত্তধম্মাদিৰসেন আগতং খন্ধাদিনযং আরব্ভ কলাপৰসেন পিণ্ডৰসেন সঙ্খিপিত্ৰা যং অতীতে জাতং রূপং, তং অতীতেৰ নিরুদ্ধং. যং অনাগতে ভাৰি রূপং, তম্পি তত্থেৰ নিরুজ্ঝিস্সতি. যং পচ্চুপ্পন্নং, তং অনাগতং অপ্পত্ৰা এত্থেৰ নিরুজ্ঝতি, তথা অজ্ঝত্তবহিদ্ধসুখুমওল়ারিকহীনপণীতরূপাদযো. তস্মা ‘‘অনিচ্চং অত্তাদিৰসেন ন ইচ্চং অনুপগন্তব্বং খযট্ঠেন খযগমনতো, দুক্খং ভযট্ঠেন ভযকরত্তা, অনত্তা অসারকট্ঠেন অত্তসারাদিঅভাৰেনা’’তি চ ‘‘চক্খুং অনিচ্চং…পে… মনো. রূপং…পে… ধম্মা. চক্খুৰিঞ্ঞাণং…পে… মনোৰিঞ্ঞাণং অনিচ্চং দুক্খং অনত্তা’’ত্যাদিনা (পটি. ম. ১.৪৮) অতীতাদিঅদ্ধাৰসেন, অতীতাদিসন্তানৰসেন, অতীতাদিখণৰসেন চ সম্মসনঞাণেন হুত্ৰাঅভাৰউদযব্বযপটিপীল়নঅৰসৰত্তনাকারসঙ্খাতলক্খণত্তযসম্মসনৰসপ্পৰত্তেন কলাপসম্মসনঞাণেন লক্খণত্তযং সম্মসন্তস্স পরিমজ্জন্তস্স.

সম্মসনঞাণে পন উপ্পন্নে পুন তেস্ৰেৰ সঙ্খারেসু ‘‘অৰিজ্জাসমুদযা রূপসমুদযো, তণ্হাকম্মআহারসমুদযা রূপসমুদযো, তথা অৰিজ্জানিরোধা রূপনিরোধো, তণ্হাকম্মআহারনিরোধা রূপনিরোধো’’তি ¶ (পটি. ম. ১.৫০) এৰং রূপক্খন্ধে ৰেদনাসঞ্ঞাসঙ্খারক্খন্ধেসুপি আহারং অপনেত্ৰা ‘‘ফস্সসমুদযা ফস্সনিরোধা’’তি চ এৰং ফস্সং পক্খিপিত্ৰা, ৰিঞ্ঞাণক্খন্ধে ‘‘নামরূপসমুদযা নামরূপনিরোধা’’তি নামরূপং পক্খিপিত্ৰা পচ্চযসমুদযৰসেন, পচ্চযনিরোধৰসেন চ, পচ্চযে অনামসিত্ৰা পচ্চুপ্পন্নক্খন্ধেসু নিব্বত্তিলক্খণমত্তস্স, ৰিপরিণামলক্খণমত্তস্স চ দস্সনেন খণৰসেন চাতি একেকস্মিং খন্ধে পচ্চযৰসেন চতুধা, খণৰসেন একধা চাতি পঞ্চধা উদযং, পঞ্চধা ৰযন্তি দসদসউদযব্বযদস্সনৰসেন সমপঞ্ঞাসাকারেহি উদযব্বযঞাণেন উদযব্বযং সমনুপস্সন্তস্স আরদ্ধৰিপস্সকস্স যোগিনো ৰিপস্সনাচিত্তসমুট্ঠানো সরীরতো নিচ্ছরণকআলোকসঙ্খাতো ওভাসো, ৰিপস্সনাচিত্তসহজাতা খুদ্দিকাদিপঞ্চৰিধা (ধ. স. অট্ঠ. ১ ধম্মুদ্দেসৰার ঝানঙ্গরাসিৰণ্ণনা) পীতি, তথা কাযচিত্তদরথৰূপসমলক্খণা কাযচিত্তৰসেন দুৰিধা পস্সদ্ধি, বলৰসদ্ধিন্দ্রিযসঙ্খাতো অধিমোক্খো, সম্মপ্পধানকিচ্চসাধকো ৰীরিযসম্বোজ্ঝঙ্গসঙ্খাতো পগ্গহো, অতিপণীতং সুখং, ইন্দৰিস্সট্ঠৰজিরসদিসং তিলক্খণৰিপস্সনাভূতং ¶ ঞাণং, সতিপট্ঠানভূতা চিরকতাদিঅনুস্সরণসমত্থা উপট্ঠানসঙ্খাতা সতি, সমপ্পৰত্তৰিপস্সনাসহজাতা উপেক্খাসম্বোজ্ঝঙ্গভূতা তত্রমজ্ঝত্তুপেক্খা, মনোদ্ৰারে আৰজ্ঝনুপেক্খা চাতি দুৰিধাপি উপেক্খা, ওভাসাদীসু উপ্পন্নেসু ‘‘ন ৰত মে ইতো পুব্বে এৰরূপো ওভাসো উপ্পন্নপুব্বো’’ত্যাদিনা (ৰিসুদ্ধি. ২.৭৩৩) নযেন তত্থ আলযং কুরুমানা সুখুমতণ্হা রূপনিকন্তিচাতি ওভাসাদীসু দসসু ৰিপস্সনুপক্কিলেসেসু উপ্পন্নেসু ‘‘ন ৰত মে ইতো পুব্বে এৰরূপা ওভাসাদযো উপ্পন্নপুব্বা অদ্ধা মগ্গপ্পত্তোস্মি, ফলপ্পত্তোস্মী’’তি (ৰিসুদ্ধি. ২.৭৩৩) অগ্গহেত্ৰা ‘‘ইমে ওভাসাদযো ¶ তণ্হাদিট্ঠিমানৰত্থুতায ন মগ্গো, অথ খো ৰিপস্সনুপক্কিলেসা এৰ, তব্বিনিমুত্তং পন ৰীথিপটিপন্নং ৰিপস্সনাঞাণং মগ্গো’’তি এৰং মগ্গামগ্গলক্খণস্স ৰৰত্থানং নিচ্ছযনং মগ্গামগ্গস্স জাননতো, দস্সনতো, অমগ্গে মগ্গসঞ্ঞায ৰিসোধনতো চ মগ্গামগ্গঞাণদস্সনৰিসুদ্ধি নাম.

৫৪. যাৰানুলোমাতি যাৰ সচ্চানুলোমঞাণা. নৰ ৰিপস্সনাঞাণানীতি (ৰিসুদ্ধি. ২.৭৩৭ আদযো) খন্ধানং উদযঞ্চ ৰযঞ্চ জাননকং উদযব্বযঞাণং, উদযং মুঞ্চিত্ৰা ভঙ্গমত্তানুপেক্খকং ভঙ্গঞাণং, ভঙ্গৰসেন উপট্ঠিতানং সীহাদীনং ৰিয ভাযিতব্বাকারানুপেক্খকং ভযঞাণং, তথানুপেক্খিতানং আদিত্তঘরস্স ৰিয আদীনৰাকারানুপেক্খকং আদীনৰঞাণং, দিট্ঠাদীনৰেসু নিব্বিন্দনৰসেন পৰত্তং নিব্বিদাঞাণং, জালাদিতো মচ্ছাদিকা ৰিয তেহি তেভূমকধম্মেহি মুচ্চিতুকামতাৰসেন পৰত্তং মুচ্চিতুকম্যতাঞাণং, মুচ্চনুপাযসম্পাদনত্থং দিট্ঠাদীনৰেসুপি সমুদ্দসকুণী ৰিয পুনপ্পুনং সম্মসনৰসপ্পত্তং পটিসঙ্খানুপস্সনাঞাণং, চত্তভরিযো পুরিসো ৰিয দিট্ঠাদীনৰেসু তেসু সঙ্খারেসু উপেক্খনাকারপ্পৰত্তং সঙ্খারুপেক্খাঞাণং, অনিচ্চাদিলক্খণৰিপস্সনতায হেট্ঠা পৰত্তানং অট্ঠন্নং ৰিপস্সনাঞাণানং, উদ্ধং মগ্গক্খণে অধিগন্তব্বানং সত্ততিংসবোধিপক্খিযধম্মানঞ্চ অনুলোমতো মগ্গৰীথিযং গোত্রভুতো পুব্বে পৰত্তং সচ্চানুলোমিকঞাণসঙ্খাতং নৰমং অনুলোমঞাণন্তি ইমানি নৰ ঞাণানি ঞাণদস্সনৰিসুদ্ধিযা পটিপদাভাৰতো তিলক্খণজাননট্ঠেন, পচ্চক্খতো দস্সনট্ঠেন, পটিপক্খতো ৰিসুদ্ধত্তা চ পটিপদাঞাণদস্সনৰিসুদ্ধি নাম.

৫৫. ৰিপস্সনায পরিপাকো ৰিপস্সনাপরিপাকো, সঙ্খারুপেক্খাঞাণং. তং আগম্ম পটিচ্চ. ইদানি অপ্পনা উপ্পজ্জিস্সতীতি ¶ ‘‘ইদানি অপ্পনাসঙ্খাতো লোকুত্তরমগ্গো উপ্পজ্জিস্সতী’’তি ৰত্তব্বক্খণে. যং কিঞ্চীতি সঙ্খারুপেক্খায গহিতেসু তীসু একং যং কিঞ্চি.

৫৬. ৰিপস্সনায ¶ মত্থকপ্পত্তিযা সিখাপ্পত্তা. অনুলোমঞাণসহিততায সানুলোমা. সা এৰ সঙ্খারেসু উদাসীনত্তা সঙ্খারুপেক্খা. যথানুরূপং অপাযাদিতো, সঙ্খারনিমিত্ততো চ ৰুট্ঠহনতো ৰুট্ঠানসঙ্খাতং মগ্গং গচ্ছতীতি ৰুট্ঠানগামিনী.

৫৭. অভিসম্ভোন্তন্তি পাপুণন্তং.

৫৮. পরিজানন্তোতি ‘‘এত্তকং দুক্খং, ন ইতো ঊনাধিক’’ন্তি পরিচ্ছিজ্জ জানন্তো. সচ্ছিকরোন্তোতি আরম্মণকরণৰসেন পচ্চক্খং করোন্তো. মগ্গসচ্চং ভাৰনাৰসেনাতি মগ্গসচ্চসঙ্খাতস্স সম্পযুত্তমগ্গসঙ্খাতস্স চতুত্থসচ্চস্স সহজাতাদিপচ্চযো হুত্ৰা ৰড্ঢনৰসেন. একস্সেৰ ঞাণস্স চতুকিচ্চসাধনং পদীপাদীনং ৰট্টিদাহাদিচতুকিচ্চদস্সনতো, ‘‘যো, ভিক্খৰে, দুক্খং পস্সতী’’ত্যাদি (সং. নি. ৫.১১০০; ৰিসুদ্ধি. ২.৮৩৯) আগমতো চ সম্পটিচ্ছিতব্বং.

৫৯. দ্ৰে তীণি ফলচিত্তানি পৰত্তিত্ৰাতি মগ্গুপ্পত্তিযা অনুরূপতো দ্ৰে ৰা তীণি ৰা ফলচিত্তানি অপনীতগ্গিম্হি ঠানে উণ্হত্তনিব্বাপনত্থায ঘটেহি অভিসিঞ্চমানমুদকং ৰিয সমুচ্ছিন্নকিলেসেপি সন্তানে দরথপটিপ্পস্সম্ভকানি হুত্ৰা পৰত্তিত্ৰা, তেসং পৰত্তিযাতি ৰুত্তং হোতি. পচ্চৰেক্খণঞাণানীতি মগ্গফলাদিৰিসযানি কামাৰচরঞাণানি, যানি সন্ধায ‘‘ৰিমুত্তস্মিং ৰিমুত্তমিতি ঞাণং হোতী’’তি (মহাৰ. ২৩) ৰুত্তং.

৬০. ইদানি পচ্চৰেক্খণায ভূমিং দস্সেতুং ‘‘মগ্গং ফলঞ্চা’’ত্যাদি ৰুত্তং. তত্থ ‘‘ইমিনাৰ ৰতাহং মগ্গেন আগতো’’তি ¶ মগ্গং পচ্চৰেক্খতি. ততো ‘‘অযং নাম মে আনিসংসো লদ্ধো’’তি তস্স ফলং, ততো ‘‘অযং নাম মে ধম্মো আরম্মণতো সচ্ছিকতো’’তি নিব্বানঞ্চ পণ্ডিতো পচ্চৰেক্খতি. ততো ‘‘ইমে নাম মে কিলেসা পহীনা’’তি পহীনে কিলেসে, ‘‘ইমে নাম অৰসিট্ঠা’’তি অৰসিট্ঠকিলেসে পচ্চৰেক্খতি ৰা, ন ৰা. কোচি সেক্খো পচ্চৰেক্খতি, কোচি ন পচ্চৰেক্খতি. তত্থ কামচারোত্যধিপ্পাযো. তথা হি মহানামো সক্কো ‘‘কো সু নাম মে ধম্মো অজ্ঝত্তং অপ্পহীনো’’তি (ম. নি. ১.১৭৫; ৰিসুদ্ধি. ২.৮১২) অপ্পহীনে কিলেসে পুচ্ছি. অরহতো পন অৰসিট্ঠকিলেসপচ্চৰেক্খণং নত্থি সব্বকিলেসানং ¶ পহীনত্তা, তস্মা তিণ্ণং সেক্খানং পন্নরস অরহতো চত্তারীতি একূনৰীসতি পচ্চৰেক্খণঞাণানীতি দট্ঠব্বং.

ছব্বিসুদ্ধিকমেনাতি (ৰিসুদ্ধি. ২.৬৬২ আদযো) সীলচিত্তৰিসুদ্ধীনং ৰসেন মূলভূতানং দ্ৰিন্নং, দিট্ঠিৰিসুদ্ধিআদীনং ৰসেন সরীরভূতানং চতুন্নন্তি এতাসং ছন্নং ৰিসুদ্ধীনং কমেন. চতুন্নং সচ্চানং জাননতা, পচ্চক্খকরণতো, কিলেসমলেহি ৰিসুদ্ধত্তা চ ঞাণদস্সনৰিসুদ্ধি নাম.

এত্থাতি ৰিপস্সনাকম্মট্ঠানে.

ৰিসুদ্ধিভেদৰণ্ণনা নিট্ঠিতা.

ৰিমোক্খভেদৰণ্ণনা

৬১. তত্থ তস্মিং উদ্দেসে. সঙ্খারেসু ‘‘যো অত্তাভিনিৰেসো কম্মস্স কারকো ফলস্স চ ৰেদকো এসো মে অত্তা’’তি এৰং অভিনিৰেসো দল়্হগ্গাহো, তং মুঞ্চন্তী ¶ ‘‘অনত্তা’’তি পৰত্তা অনুপস্সনাৰ অত্তসুঞ্ঞতাকারানুপস্সনতো সুঞ্ঞতানুপস্সনা নাম ৰিমোক্খমুখং পটিপক্খতো ৰিমুত্তিৰসেন ৰিমোক্খসঙ্খাতস্স লোকুত্তরং মগ্গফলস্স দ্ৰারং হোতি.

৬২. সঙ্খারেসু ‘‘অনিচ্চ’’ন্তি পৰত্তা অনুপস্সনা অনিচ্চে ‘‘নিচ্চ’’ন্তি (অ. নি. ৪.৪৯; পটি. ম. ১.২৩৬; ৰিভ. ৯৩৯) পৰত্তং সঞ্ঞাচিত্তদিট্ঠিৰিপল্লাসসঙ্খাতং ৰিপল্লাসনিমিত্তং মুঞ্চন্তী পজহন্তী ৰিপল্লাসনিমিত্তরহিতাকারানুপস্সনতো অনিমিত্তানুপস্সনা নাম ৰিমোক্খমুখং হোতীতি সম্বন্ধো.

৬৩. ‘‘দুক্খ’’ন্তি পৰত্তানুপস্সনা সঙ্খারেসু ‘‘এতং মম, এতং সুখ’’ন্ত্যাদিনা নযেন পৰত্তং ¶ কামভৰতণ্হাসঙ্খাতং তণ্হাপণিধিং তণ্হাপত্থনং মুঞ্চন্তী দুক্খাকারদস্সনেন পরিচ্চজন্তী পণিধিরহিতাকারানুপস্সনতো অপ্পণিহিতানুপস্সনা নাম.

৬৪. তস্মাতি যস্মা এতাসং তিস্সন্নং এতানি তীণি নামানি, তস্মা যদি ৰুট্ঠানগামিনিৰিপস্সনা অনত্ততো ৰিপস্সতি. মগ্গো সুঞ্ঞতো নাম ৰিমোক্খো হোতি আগমনৰসেন লদ্ধনামত্তা.

৬৬. ৰিপস্সনাগমনৰসেনাতি ৰিপস্সনাসঙ্খাতাগমনৰসেন. আগচ্ছতি এতেন মগ্গো, ফলঞ্চাতি ৰিপস্সনামগ্গো ইধ আগমনং নাম.

৬৭. যথাৰুত্তনযেনাতি পুব্বে ৰুত্তঅনত্তানুপস্সনাদিৰসেন. যথাসকং ফলমুপ্পজ্জমানম্পীতি যথালদ্ধমগ্গস্স ফলভূতং অত্তনো অত্তনো ফলং উপ্পজ্জমানম্পি মগ্গাগমনৰসেন অলভিত্ৰা ৰিপস্সনাগমনৰসেনেৰ তীণি নামানি লভতি ¶ ফলসমাপত্তিকালে তদা মগ্গপ্পৰত্তাভাৰেন তস্স দ্ৰারভাৰাযোগতো. আরম্মণৰসেনাতি সব্বসঙ্খারসুঞ্ঞতত্তা, সঙ্খারনিমিত্তরহিতত্তা, তণ্হাপণিধিরহিতত্তা চ সুঞ্ঞতঅনিমিত্তঅপ্পণিহিতনামৰন্তং নিব্বানং আরব্ভ পৰত্তত্তা তস্স ৰসেন. সরসৰসেনাতি রাগাদিসুঞ্ঞতত্তা, রূপনিমিত্তাদিআরম্মণরহিতত্তা, কিলেসপণিধিরহিতত্তা অত্তনো গুণৰসেন. সব্বত্থাতি মগ্গৰীথিযং, ফলসমাপত্তিৰীথিযঞ্চ. সব্বেসম্পীতি মগ্গস্স, ফলস্সপি.

ৰিমোক্খভেদৰণ্ণনা নিট্ঠিতা.

পুগ্গলভেদৰণ্ণনা

৬৮. সত্তক্খত্তুং সত্তসু ৰারেসু কামসুগতিযং পটিসন্ধিগ্গহণং পরমং এতস্সাতি সত্তক্খত্তুপরমো ন পন অট্ঠমাদিকামভৰগামীত্যধিপ্পাযো. যং সন্ধায ৰুত্তং ‘‘ন তে ভৰং অট্ঠমমাদিযন্তী’’তি ¶ (খু. পা. ৬.৯; সু. নি. ২৩২; নেত্তি. ১১৫). রূপারূপসুগতিভৰং পন সত্তৰারতো পরম্পি গচ্ছতীতি আচরিযা.

৬৯. রাগদোসমোহানন্তি মোহগ্গহণং রাগদোসেকট্ঠমোহং সন্ধাযাতি দট্ঠব্বং.

৭০. খীণা চত্তারো আসৰা এতস্সাতি খীণাসৰো. দক্খিণারহেসু অগ্গত্তা অগ্গদক্খিণেয্যো.

পুগ্গলভেদৰণ্ণনা নিট্ঠিতা.

সমাপত্তিভেদৰণ্ণনা

৭২. সব্বেসম্পীতি চতুন্নম্পি অরিযপুগ্গলানং.

৭৩. চিত্তচেতসিকানং ¶ অপ্পৰত্তিসঙ্খাতস্স নিরোধস্স সমাপত্তি নিরোধসমাপত্তি, দিট্ঠেৰ ধম্মে চিত্তনিরোধং পত্ৰা ৰিহরণং. অনাগামীনঞ্চাতি কামরূপভৰট্ঠানং অট্ঠসমাপত্তিলাভীনমেৰ অনাগামীনং, তথা খীণাসৰানঞ্চ. তত্থাতি নিরোধসমাপত্তিযং. যাৰ আকিঞ্চঞ্ঞাযতনং গন্ত্ৰাতি এৰং সমথৰিপস্সনানং যুগনদ্ধভাৰাপাদনৰসেন যাৰ আকিঞ্চঞ্ঞাযতনং, তাৰ গন্ত্ৰা. অধিট্ঠেয্যাদিকন্তি কাযপটিবদ্ধং ঠপেত্ৰা ৰিসুং ৰিসুং ঠপিতচীৰরাদিপরিক্খারগেহাদীনং অগ্গিআদিনা অৰিনাসনাধিট্ঠানং, সংঘপটিমাননসত্থুপক্কোসনানং পুরেতরং ৰুট্ঠানং, সত্তাহব্ভন্তরে আযুসঙ্খারপ্পৰত্তিওলোকনন্তি চতুব্বিধং অধিট্ঠানাদিকং পুব্বকিচ্চং কত্ৰা.

সমাপত্তিভেদৰণ্ণনা নিট্ঠিতা.

ৰিপস্সনাকম্মট্ঠানৰণ্ণনা নিট্ঠিতা.

উয্যোজনৰণ্ণনা

৭৫. পটিপত্তিরসস্সাদন্তি ¶ ঝানসুখফলসুখাদিভেদং সমথৰিপস্সনাপটিপত্তিরসস্সাদং.

ইতি অভিধম্মত্থৰিভাৰিনিযা নাম অভিধম্মত্থসঙ্গহৰণ্ণনায

কম্মট্ঠানপরিচ্ছেদৰণ্ণনা নিট্ঠিতা.

নিগমনৰণ্ণনা

(ক) চারিত্তেন কুলাচারেন সোভিতে ৰিসালকুলে উদযো নিব্বত্তি যস্স, তেন, কম্মাদিৰিসযায সদ্ধায অভিৰুদ্ধো পরিসুদ্ধো চ দানসীলাদিগুণানং উদযো যস্স, তেন, নম্পৰ্হযেন নম্পনামকেন, পরানুকম্পং সাসনে সুখোতরণপরিপাচনলক্খণং পরানুগ্গহং, পণিধায পত্থেত্ৰা যং পকরণং পত্থিতং অভিযাচিতং, তং এত্তাৰতা পরিনিট্ঠিতন্তি যোজনা.

(খ) তেন ¶ পকরণপ্পসুতেন ৰিপুলেন পুঞ্ঞেন পঞ্ঞাৰদাতেন অরিযমগ্গপঞ্ঞাপরিসুদ্ধেন সীলাদিগুণেন সোভিতা. ততোযেৰ লজ্জিনো ভিক্খূ, ধঞ্ঞানং অধিৰাসভূতং, উদিতোদিতং অচ্চন্তপ্পসিদ্ধং, মূলসোমং নাম ৰিহারং, পুঞ্ঞৰিভৰস্স উদযসঙ্খাতায মঙ্গলত্থায আযুকন্তং মঞ্ঞন্তু, তত্থ নিৰাসিনো ভিক্খূ ঈদিসা হোন্তূত্যধিপ্পাযো.

নিগমনৰণ্ণনা নিট্ঠিতা.

নিট্ঠিতা চাযং অভিধম্মত্থৰিভাৰিনী নাম.

অভিধম্মত্থসঙ্গহটীকা.

নিগমনকথা

১. রম্মে পুলত্থিনগরে নগরাধিরাজে,

রঞ্ঞা পরক্কমভুজেন মহাভুজেন;

কারাপিতে ¶ ৰসতি জেতৰনে ৰিহারে;

যো রম্মহম্মিযৰরূপৰনাভিরামে.

২. সম্পন্নসীলদমসংযমতোসিতেহি,

সম্মানিতো ৰসিগণেহি গুণাকরেহি;

পত্তো মুনিন্দৰচনাদিসু নেকগন্থ-

জাতেসু চাচরিযতং মহিতং ৰিদূহি.

৩. ঞাণানুভাৰমিহ যস্স চ সূচযন্তী,

সংৰণ্ণনা চ ৰিনযট্ঠকথাদিকানং;

সারত্থদীপনিমুখা মধুরত্থসার-

সন্দীপনেন সুজনং পরিতোসযন্তী.

৪. তস্সানুকম্পমৰলম্বিয ¶ সারিপুত্ত-

ত্থেরস্স থামগতসারগুণাকরস্স;

যো নেকগন্থৰিসযং পটুতং অলত্থং,

তস্সেস ঞাণৰিভৰো ৰিভৰেকহেতু.

৫. সোহমেতস্স সংসুদ্ধ-ৰাযামস্সানুভাৰতো.

অদ্ধাসাসনদাযাদো, হেস্সং মেত্তেয্যসত্থুনো.

৬. জোতযন্তং তদা তস্স, সাসনং সুদ্ধমানসং.

পস্সেয্যং সক্করেয্যঞ্চ, গরুং মে সারিসম্ভৰং.

৭. দিনেহি চতুৰীসেহি, টীকাযং নিট্ঠিতা যথা.

তথা কল্যাণসঙ্কপ্পা, সীঘং সিজ্ঝন্তু পাণিনন্তি.

ইতি ভদন্তসারিপুত্তমহাথেরস্স সিস্সেন রচিতা

অভিধম্মত্থৰিভাৰিনী নাম

অভিধম্মত্থসঙ্গহটীকা নিট্ঠিতা.