📜

নমো তস্স ভগৰতো অরহতো সম্মাসম্বুদ্ধস্স

অভিধম্মাৰতার-পুরাণটীকা

১. পঠমো পরিচ্ছেদো

চিত্তনিদ্দেসৰণ্ণনা

৮. তত্থ ¶ ¶ তেসু চতুব্বিধেসু পরমত্থেসু, জাতিনিদ্ধারণং. চিত্তন্তি চিত্তং নাম. ৰিজানাতীতি ৰিজাননং, ৰিসযানং ৰিজাননং ৰিসযৰিজাননং. চিত্তসরূপপরিদীপনমিদং ৰচনং. তস্স পন চিত্তস্স কো ৰচনত্থো কো সদ্দত্থো. ৰুচ্চতে আচরিযেন. সব্বসঙ্গাহকৰসেন সব্বেসং চিত্তানং সঙ্গাহকনযৰসেন. আরম্মণং চিন্তেতি জানাতীতি চিত্তং, তদা সব্বং চিত্তং অধিপ্পেতং. জৰনৰীথিৰসেন অত্তসন্তানং চিনোতীতি চিত্তং, তদা কুসলাকুসলমহাকিরিযাচিত্তং অধিপ্পেতং. অঞ্ঞেসং জৰনানং অগ্গহণং কামাৰচরজৰনানি এৰ যেভুয্যৰসেন সত্তক্খত্তুং জৰন্তীতি ঞাপনত্থং.

৯. ৰিচিত্তং ¶ করণং যস্স তং ৰিচিত্তকরণং, তস্স ভাৰো ৰিচিত্তকরণা. ‘‘ইমস্স রূপস্স উদ্ধং ইদং হোতু, হেট্ঠা ইদং হোতু, উভযপস্সে ইদ’’ন্তি চিন্তেত্ৰা যথাচিন্তিতেন কমেন সেসচিত্তরূপনিপ্ফাদনং হোতি, এৰং যং কিঞ্চি লোকে ৰিচিত্তং সিপ্পজাতং, সব্বং তং চিত্তেনেৰ করীযতি. এৰং ৰিচিত্তকরণতায চিত্তং. তদা করণতায চিত্তং করোতীতি চিত্তং. ইদং তদ্ধিতপদং. ৰা অযং অঞ্ঞো নযো ¶ . তং অত্তনো চিত্ততায অঞ্ঞদেৰ সরাগং চিত্তং, অঞ্ঞং সদোসং, অঞ্ঞং সমোহং. অঞ্ঞং কামাৰচরং, অঞ্ঞং রূপাৰচরাদিভেদং. অঞ্ঞং রূপারম্মণং, অঞ্ঞং সদ্দাদিআরম্মণং. রূপারম্মণেসুপি অঞ্ঞং নীলারম্মণং, অঞ্ঞং পীতাদিআরম্মণং. সদ্দাদিআরম্মণেসুপি এসেৰ নযো. সব্বেসুপি তেসু অঞ্ঞং হীনং, অঞ্ঞং মজ্ঝিমং, অঞ্ঞং পণীতং. হীনাদীসুপি অঞ্ঞং ছন্দাধিপতেয্যং, অঞ্ঞং চিত্তাধিপতেয্যং, অঞ্ঞং ৰীরিযাধিপতেয্যং, অঞ্ঞং ৰীমংসাধিপতেয্যং, তস্মা যস্স ইমেসং সম্পযুত্তভূমিআরম্মণহীনমজ্ঝিমপণীতাধিপতীনং ৰসেন অত্তনো চিত্ততায চিত্তং. চিত্তো এতস্মিং অত্থীতি চিত্তং. তদা সব্বং চিত্তং. পঞ্ঞত্তিযম্পি ৰিঞ্ঞাণে ৰিচিত্তে চিত্তস্স কম্মং চিত্তকম্মং, চিত্তকম্মমেৰ চিত্তকম্মকং, চিত্তকম্মকে ৰিচিত্তে ইধ ইমস্মিং অধিকারে চিত্তসম্মুতি চিত্তসদ্দো ৰিঞ্ঞাণে চিত্তে ৰিঞ্ঞুনা দট্ঠব্বো.

তং পন সব্বসঙ্গাহকৰসেন চিন্তেতীতিআদিনা ৰুত্তপ্পকারং চিত্তং. সারম্মণতো সারম্মণভাৰেন একৰিধং. সৰিপাকাৰিপাকতো সৰিপাকাৰিপাকৰসেন দুৰিধং. তত্থ তস্মিং দুৰিধে চিত্তে সৰিপাকং নাম চিত্তং কুসলাকুসলং, অৰিপাকং অব্যাকতং, কুসলাকুসলভাৰেন অকথিতন্তি অত্থো. কুসলজাতি অকুসলজাতি অব্যাকতজাতীতি জাতিভেদতো তিৰিধং.

তত্থ তস্মিং ৰচনে ‘‘কুসল’’ন্তি এতস্স সদ্দস্স পন কো ৰচনত্থো.

১০. কুচ্ছিতানং সলনতো পাপকানং ধম্মানং কম্পনতো ৰিদ্ধংসনতো. কুচ্ছিতেনাকারেন সযন্তীতি কুসা, কুসানং অকুসলসঙ্খাতানং লৰনেন ছিন্দনতো. কুচ্ছিতে সাতি তনুং করোতীতি কুসং, কুসেন ঞাণেন লাতব্বত্তা গহেতব্বত্তা. ৰা অযং অঞ্ঞো নযো.

১১. কুসলসদ্দোযং ¶ অযং কুসলসদ্দো ছেকে অত্থে আরোগ্যত্থে অনৰজ্জত্থে ইট্ঠৰিপাকে অত্থেপি দিট্ঠো অম্হেহি. ইধ ইমস্মিং অধিকারে অনৰজ্জাদিকে অত্থে দিট্ঠো. আদি-সদ্দেন আরোগ্যত্থইট্ঠৰিপাকত্থা ¶ গহেতব্বা. দিট্ঠো যস্মা, তস্মা অনৰজ্জইট্ঠৰিপাকলক্খণং কুসলং. নত্থি অৰজ্জং কিলেসাৰজ্জং কিলেসদোসো কিলেসদরথো এতস্সাতি অনৰজ্জং, কম্মেন ৰিপচ্চীযতেতি ৰিপাকো, ইট্ঠানিট্ঠাদিআরম্মণানুভৰনৰসেন, অত্তনো সভাৰেন চ ইট্ঠো ৰিপাকো এতস্সাতি ইট্ঠৰিপাকং, অনৰজ্জমেৰ ইট্ঠৰিপাকং, তং লক্খীযতি অনেন অৰিঞ্ঞাতং লক্খিতব্বং কুসলন্তি লক্খণং, অনৰজ্জইট্ঠৰিপাকং লক্খণং এতস্সাতি অনৰজ্জইট্ঠৰিপাকলক্খণং. অনৰজ্জইট্ঠৰিপাকমেৰ কুসলং. ননু কথং সযমেৰ অত্তনো লক্খণং ভৰেয্যাতি চোদনা ভৰেয্য ৰিঞ্ঞাতাৰিঞ্ঞাতসদ্দত্থভাৰেন লক্খণলক্খিতব্বভাৰযুত্তিতো. কুসলসদ্দত্থৰসেন হি অৰিঞ্ঞাতং অপাকটং কুসলং লক্খিতব্বং হোতি. অনৰজ্জইট্ঠৰিপাকসদ্দত্থৰসেন ৰিঞ্ঞাতং পাকটং কুসলং লক্খণং হোতি. অকুসলৰিদ্ধংসনরসং অকুসলানং ৰিদ্ধংসনং অকুসলৰিদ্ধংসনং, তং রসো কিচ্চমেতস্সাতি অকুসলৰিদ্ধংসনরসং, অকুসলৰিদ্ধংসনকিচ্চং. ৰোদানভাৰেন পচ্চুপট্ঠাতীতি ৰোদানপচ্চুপট্ঠানং, ৰোদানউপট্ঠানাকারং ৰোদানগয্হাকারং. ৰা অযং অঞ্ঞো নযো. ৰজ্জপটিপক্খত্তা অনৰজ্জলক্খণমেৰ কুসলং, ৰজ্জপটিপক্খলক্খণং কুসলন্তি অত্থো. ৰোদানভাৰরসং ৰোদানভাৰসম্পত্তিকং. ইট্ঠৰিপাকপচ্চুপট্ঠানং ইট্ঠৰিপাকফলং. যোনিসোমনসিকারপদট্ঠানং পদঞ্চ তং ঠানঞ্চাতি পদট্ঠানং, উভো কারণত্থাধিৰচনং, তস্মা আসন্নকারণন্তি অত্থো, ইতরথা পুনরুত্তিদোসো সিযা, যোনিসোমনসিকারো পদট্ঠানং আসন্নকারণং এতস্সাতি যোনিসোমনসিকারপদট্ঠানং.

সাৰজ্জানিট্ঠৰিপাকলক্খণং ¶ অকুসলং. তদুভযৰিপরীতং তেহি উভযেহি কুসলাকুসলেহি ৰিপরীতং অৰিপাকলক্খণং এতস্সাতি তদুভযৰিপরীতলক্খণং অব্যাকতং. ৰা অযং অঞ্ঞো নযো. অৰিপাকারহং ৰিপাকস্স অননুচ্ছৰিকং.

সৰত্থুকাৰত্থুকভেদতোতি সৰত্থুকং হদযৰত্থুকং, অৰত্থুকং হদযৰত্থুৰিরহিতং.

১২. উদ্দানতো সঙ্খেপৰসেন কিলেসৰত্থুৰসেন দুৰে কামা হোন্তি. ছন্দরাগোৰ কিলেসো, তেভূমকে পৰত্তং ৰট্টসহিতং ৰত্থু, ৰসতি কিলেসো এত্থাতি ৰত্থু.

১৩. কিলেসকামো ৰত্থুং কামেতি ইচ্ছতি, ৰত্থু কিলেসকামেন কামীযতি ইচ্ছীযতীতি কত্তুকারককম্মকারকদ্ৰযে সাধনদ্ৰযে এস এসো দুৰিধোপি কামো সিজ্ঝতি.

১৪-৫. সো ¶ অযং দুৰিধোপি কামো যস্মিং পদেসে সম্পত্তীনং ৰসেন অৰচরতি, ইতি তস্মা কারণা সো পন পদেসো চতুপাযানং ছন্নং দেৰানং মনুস্সানং ৰসেন এৰ একাদসৰিধো হোতি.

১৬. কামোৰচরতীতি এত্থ এতস্মিং একাদসৰিধে পদেসে কামো অৰচরতি, ইতি তস্মা কারণা সো পদেসো অস্স কামস্স অনেন কামেন অভিলক্খিতত্তা কামাৰচরসঞ্ঞিতো. অভিলক্খিতসদ্দপ্পযোগে ততিযত্থে ‘‘অস্সা’’তি ছট্ঠী হোতীতি সদ্দসত্থৰিদূ পঠন্তি. সসত্থাৰচরো পদেসো ৰিয সত্তে সসন্তি হিংসন্তি তেহীতি সত্থা, সহ সত্থেহীতি সসত্থা, সসত্থা পুরিসা অৰচরন্তি এত্থাতি সসত্থাৰচরো. যথা হি যস্মিং পদেসে সসত্থা পুরিসা অৰচরন্তি, সো পদেসো ৰিজ্জমানেসুপি ¶ অঞ্ঞেসু দ্ৰিপদচতুপ্পদেসু অৰচরন্তেসু তেসং উপলক্খিতত্তা ‘‘সসত্থাৰচরো’’ত্ৰেৰ ৰুচ্চতি, এৰং ৰিজ্জমানেসুপি অঞ্ঞেসু রূপাৰচরাদীসু তত্থ অৰচরন্তেসু তেসং অভিলক্খিতত্তা অযং পদেসো ‘‘কামাৰচরো’’ত্ৰেৰ ৰুচ্চতি.

১৭. যথা রূপভৰো উত্তরপদস্স লোপং কত্ৰা রূপন্তি ৰুত্তো, এৰং তথা স্ৰাযং সো অযং এসো কামাৰচরো উত্তরপদস্স লোপং কত্ৰা কামো ইতি সঞ্ঞিতো কামো নাম উদীরিতো পণ্ডিতেন কথিতো.

১৮. তস্মিং কামে ইদং চিত্তং তস্মিং কামাৰচরে সদা অৰচরতি, ইতি তস্মা কারণা কামাৰচরং ইতি এৰং কামঘাতিনা কামানং ৰিনাসকেন বুদ্ধেন কথিতং. কিঞ্চাপি এতং রূপারূপভৰেসুপি অৰচরতি, যথা পন সঙ্গামে যেভুয্যেন অৰচরণতো ‘‘সঙ্গামাৰচরো’’তি লদ্ধনামো নাগো নগরে চরন্তোপি ‘‘সঙ্গামাৰচরো’’ত্ৰেৰ ৰুচ্চতি, থলচরজলচরা পাণিনো অথলে অজলে ঠিতাপি ‘‘থলচরজলচরা’’ত্ৰেৰ ৰুচ্চন্তি, এৰং ইদং অঞ্ঞত্থ অৰচরন্তম্পি কামাৰচরমেৰাতি দট্ঠব্বং. আরম্মণকরণৰসেন ৰা এত্থ কামো অৰচরতীতিপি কামাৰচরং. কামঞ্চেস রূপারূপাৰচরেসুপি অৰচরতি, যথা পন ৰদতীতি ৰচ্ছো, মহিযং সেতীতি মহিংসোতি ৰুত্তে ন যত্তকা ৰদন্তি, মহিযং ৰা সেন্তি, সব্বেসং তং নামং হোতি, এৰংসম্পদমিদং দট্ঠব্বং.

১৯. পটিসন্ধিং ভৰে কামে কামভৰসঙ্খাতে কামে পটিসন্ধিং অৰচারযতি, ইতি তস্মা কামাৰচরং ¶ . ইতি এৰং ৰা অযং অঞ্ঞো নযো. তত্র তস্মিং কামাৰচরে পরিযাপন্নং অন্তোগধং, ইতি তস্মা কামাৰচরং.

২০. অট্ঠৰিধং চিত্তং কামাৰচরসঞ্ঞিতং ইদং অট্ঠৰিধং চিত্তং. দসপুঞ্ঞকিরিযৰত্থুৰসেনেৰ পুঞ্ঞকিরিযা এৰ তেসং তেসং ফলানিসংসানং ¶ ৰত্থূনি কারণানীতি পুঞ্ঞকিরিযৰত্থূনি, তেসং ৰসো, তেন পৰত্ততি.

২১. দানং সীলং ভাৰনা পত্তিদানং ৰেয্যাৰচ্চং ধম্মদেসনা অনুমোদনা দিট্ঠিজুভাৰো সংসুতি ধম্মস্সৰনঞ্চ অপচাযো অপচাযনং, এৰং ইমিনা মযা ৰুত্তপ্পকারেন পুঞ্ঞানি এৰ ৰত্থূনি পুঞ্ঞৰত্থূনি, তেসং পভেদো পুঞ্ঞৰত্থুপ্পভেদো ঞেয্যো পণ্ডিতেন জানিতব্বো.

২২-৩. গচ্ছন্তি সঙ্গহং দানে পত্তিদানানুমোদনা দানে সঙ্গহং গচ্ছন্তি, ৰেয্যাৰচ্চাপচাযনা সীলমযে পুঞ্ঞে সঙ্গহং গচ্ছন্তি, ধম্মদেসনা ধম্মস্সৰনং দিট্ঠিউজুকা ভাৰনামযে পুঞ্ঞে সঙ্গহং গচ্ছন্তি, দস পুঞ্ঞকিরিযাপি চ তীণি এৰ সম্ভোন্তি.

২৪. সব্বানুস্সতিপুঞ্ঞঞ্চ পসংসা সরণত্তযং রতনত্তযগুণপসংসা চ এতে দিট্ঠিজুকম্মম্হি সঙ্গয্হন্তি, তস্মিং সঙ্গহপাপুণে সংসযো সন্দেহো নত্থি.

২৫. পুরিমা চেতনা ততো পুব্বভাগে পৰত্তা চেতনা, মুঞ্চচেতনা পচ্চুপ্পন্না চেতনা, পরচেতনা পচ্ছাকালে পৰত্তা চেতনা, তিস্সোপি চেতনা দানমযে পুঞ্ঞে হোন্তি. এৰন্তি যথা তিস্সোপি চেতনা দানমযে পুঞ্ঞে হোন্তি, এৰং তথা দানমযপুঞ্ঞতো সেসেসুপি সীলমযভাৰনামযেসু তিস্সো চেতনা পণ্ডিতো দীপযে কথেয্য.

হি সচ্চং যদা পন যো পুগ্গলো দেয্যধম্মপটিগ্গাহকাদিসম্পত্তিং আগম্ম পটিচ্চ. পটিগ্গাহকাদিসম্পত্তিন্তি এত্থ আদি-সদ্দেন দেসকালকল্যাণমিত্তাদযো গহিতা. অঞ্ঞং ৰা সোমনস্সহেতুন্তি অঞ্ঞ-গ্গহণেন সদ্ধাবহুলতাৰিসুদ্ধিদিট্ঠিতাকুসলকিরিযানিসংসদস্সিতাসোমনস্সপটিসন্ধিকতাদীনং সঙ্গহো. অত্থি দিন্নং দানস্স ফলং অত্থি. আদি-সদ্দেন ¶ অত্থিহুতাদযো গহিতা. পুরক্খত্ৰাতি পুরতো কত্ৰা. পরেহি অনুস্সাহিতো অচোদিতো দানাদীনি পুঞ্ঞানি ¶ করোতি. দানাদীনীতি ৰচনেন দেয্যধম্মং নিস্সায পৰত্তদানচেতনা গহেতব্বা. তদা অস্স পুগ্গলস্স. সঙ্খরণং সঙ্খারো, নত্থি সঙ্খারো এতস্সাতি অসঙ্খারো, তং এৰ অসঙ্খারিকং, অপ্পযোগন্তি অত্থো. ৰুত্তনযেনাতি ৰুত্তনযো নাম ‘‘দেয্যধম্মপটিগ্গাহকাদিসম্পত্তি’’ন্তি ৰচনং. ইমস্মিং পনত্থে সঙ্খরোতীতি সঙ্খারো নাম অত্তনো ৰা পৰত্তস্স পুব্বপ্পযোগস্স অধিৰচনং, পরস্স ৰা পৰত্তপুব্বপ্পযোগস্স অধিৰচনং. অযমস্স অধিপ্পাযো – যদা যো ‘‘দানাদীনি করিস্সামী’’তি চিত্তং সমুপ্পাদেত্ৰা নাকাসি, পচ্ছা অত্তনো পুব্বচেতনায উস্সাহিতো করোতি, তদা সসঙ্খারিকং হোতি, অত্তনো পুব্বপ্পযোগেন সহ পৰত্ততীতি অত্থো. পটিপত্তিদস্সনেন পটিপজ্জিতব্বা সীলাদীহি পটিপজ্জন্তি জানন্তি গচ্ছন্তি ৰা নিব্বানং এতাযাতি পটিপত্তি, তায দস্সনং পটিপত্তিদস্সনং, তেন. জাতো পরিচযো এতেসন্তি জাতপরিচযা. সহসাতি ৰেগেন. চতূসুপি ৰিকপ্পেসু দস্সেয্য.

২৬. দসপুঞ্ঞক্রিযাদীনং ৰসেন চ বহূনিপি ভৰন্তি এতানি পন চিত্তানি দসপুঞ্ঞকিরিযাদীনং ৰসেনপি বহূনিপি ভৰন্তি ইতি এৰং পকাসযে ভগৰা পকাসেয্য.

২৭.

সত্তরস সহস্সানি, দ্ৰে সতানি অসীতি চ;

কামাৰচরপুঞ্ঞানি, ভৰন্তীতি ৰিনিদ্দিসেতি. –

কামাৰচরপুঞ্ঞানি সত্তরস সহস্সানি চ দ্ৰে সতানি চ অসীতি চ ভৰন্তি, ইতি ৰচনং ৰিনিদ্দিসে আচরিযো কথেয্য.

দসপুঞ্ঞক্রিযাৰত্থু, ছদ্ৰারাধিপতীহি চ;

কাযাদীহি চ তীহেৰ, হীনাদীহি চ তীহি তু.

দ্ৰীসু ¶ ভৰেসু কামভৰরূপভৰেসু. পটিপদাদিভেদতো দুক্খাপটিপদং দন্ধাভিঞ্ঞং, দুক্খাপটিপদং খিপ্পাভিঞ্ঞং, সুখাপটিপদং দন্ধাভিঞ্ঞং, সুখাপটিপদং খিপ্পাভিঞ্ঞং. রূপাৰচরভাৰনাপুঞ্ঞৰসপ্পৰত্তং রূপাৰচরে পৰত্তস্স ভাৰনাপুঞ্ঞস্স ৰসেন পৰত্তং রূপাৰচরূপপত্তিনিপ্ফাদকং রূপাৰচরে উপপত্তিযা পটিসন্ধিযা নিপ্ফাদকং হোতি.

সৰত্থুকাৰত্থুকভেদতোতি ¶ অরূপাৰচরং যদা কামরূপে জাযতি, তদা হদযৰত্থুং নিস্সায জাযতি, ইতি তস্মা সৰত্থুকং নাম জাতং. যদা অরূপে জাযতি, তদা হদযৰত্থুং অনিস্সায জাযতি, ইতি তস্মা অৰত্থুকং নাম জাতং.

আকাসানঞ্চাযতনস্স কসিণুগ্ঘাটিমাকাসং আরম্মণং. ৰিঞ্ঞাণঞ্চাযতনস্স তত্থ পৰত্তৰিঞ্ঞাণং, তস্মিং কসিণুগ্ঘাটিমাকাসে পৰত্তং ৰিঞ্ঞাণং চিত্তং আরম্মণং হোতি. আকিঞ্চঞ্ঞাযতনস্স তস্স অপগমো তস্স আকাসানঞ্চাযতনস্স অপগমো অভাৰো ৰোহারো আরম্মণং হোতি. নেৰসঞ্ঞানাসঞ্ঞাযতনস্স আকিঞ্চঞ্ঞাযতনং আরম্মণং হোতি.

রূপে সঞ্ঞা রূপসঞ্ঞা. সঞ্ঞাসীসেন চিত্তম্পি গহিতং. সমতিক্কমা কসিণুগ্ঘাটিমাকাসসমতিক্কমনেন. পটিঘে দ্ৰারারম্মণানং সঙ্ঘট্টনে পৰত্তা সঞ্ঞা পটিঘসঞ্ঞা. দ্ৰিপঞ্চৰিঞ্ঞাণানং অধিৰচনং. তাসং পটিঘসঞ্ঞানং দ্ৰিপঞ্চৰিঞ্ঞাণানং অত্থঙ্গমা অত্থঙ্গমেন. নানা অত্তা সভাৰো এতস্সাতি নানত্তং, আরম্মণং, নানত্তে নানাসভাৰে পৰত্তা সঞ্ঞা নানত্তসঞ্ঞা, নানা অত্তা সভাৰো এতিস্সাতি ৰা নানত্তা, সাযেৰ সঞ্ঞা নানত্তসঞ্ঞা, কামাৰচরসঞ্ঞাতি অত্থো. তাসং নানত্তসঞ্ঞানং অমনসিকারা অমনসিকারেন.

নিযতানিযতৰত্থুকভেদতোতি ¶ সোতাপত্তিমগ্গো নিযতৰত্থুকো. কস্মা? কামরূপেসুযেৰ হদযৰত্থুং নিস্সায উপ্পজ্জনতো. ইতরে পন তযো মগ্গা অনিযতৰত্থুকা. কস্মা? কামরূপেসু হদযৰত্থুং নিস্সায জাযন্তি, অরূপে হদযৰত্থুং অনিস্সায জাযন্তি, তস্মা অনিযতৰত্থুকা. তীহি ৰিমোক্খমুখেহীতি সুঞ্ঞতঅনিমিত্তঅপ্পণিহিতসঙ্খাতেহি তীহি ৰিমোক্খমুখেহি.

যস্স সংৰিজ্জন্তি, তং পুগ্গলং ৰট্টস্মিং সংযোজেন্তি বন্ধন্তীতি সংযোজনা. সক্কাযদিট্ঠিৰিচিকিচ্ছাসীলব্বতপরামাসাযেৰ সংযোজনা সক্কাযদিট্ঠিৰিচিকিচ্ছাসীলব্বতপরামাসসংযোজনা, তেসং পহানং সক্কাযদিট্ঠিৰিচিকিচ্ছাসীলব্বতপরামাসসংযোজনপ্পহানং, তং করোতীতি সক্কাযদিট্ঠিৰিচিকিচ্ছাসীলব্বতপরামাসসংযোজনপ্পহানকরং, সোতাপত্তিমগ্গচিত্তং. মানোপি একদেসতো অপাযগামিকোযেৰ পহিয্যতে. সোতাপত্তিমগ্গেন নিস্সেসতো ন পহিয্যতে. সেসকিলেসেসুপি ¶ এসেৰ নযো. উদ্ধচ্চং পন একদেসতোপি অপাযগামিকম্পি ন পহিয্যতি. সকদাগামিমগ্গচিত্তং রাগদোসমোহানং তনুত্তকরং. সোতাপত্তিমগ্গেন নাসিতসংযোজনানং পহানং কস্মা ন ৰুত্তন্তি চে? পঠমমগ্গতো দুতিযমগ্গস্স মহন্তত্তা পঠমমগ্গেন নাসিতা সংযোজনা দুতিযমগ্গেন নাসিতাতি পঞ্ঞাযতি, ইতি যস্মা, তস্মা ন ৰুত্তং. ততিযচতুত্থমগ্গেসুপি এসেৰ নযো. এত্থ এতস্মিং লোকুত্তরচিত্তে. একেকন্তি ৰিচ্ছাৰসেন ৰুত্তং. মগ্গানুরূপন্তি ৰচনং পঠমমগ্গস্স পঠমফলঞ্চ অনুরূপন্তি ৰিঞ্ঞাপনত্থং.

২৮. কামে অট্ঠেৰ কামাৰচরে অট্ঠ এৰ চিত্তানি, রূপে রূপভৰে পঞ্চ চিত্তানি, অরূপিসু চত্তারি চিত্তানি, অনুত্তরানি লোকুত্তরচিত্তানি চত্তারি, এৰং ইমিনা মযা ৰুত্তপ্পকারেন কুসলানি চিত্তানি একৰীসতি হোন্তি.

২৯. কুসলাকুসলাপগতেন ¶ সতা মুনিনা কুসলতো, অকুসলতো চ অপগতেন সতা সতিসম্পন্নেন কুসলে কুসলেন ছেকেন ৰসিনা পঞ্চৰসীহি সমন্নাগতেন যং কুসলচিত্তং চতুভূমিগতং চতূসু ভূমীসু পৰত্তং সকলং সব্বং লপিতং কথিতং, তং কুসলচিত্তং মযাপি বুদ্ধদত্তাচরিযেন লপিতং কথিতং.

নিযতানিযতৰত্থুৰসেনাতি পটিঘসম্পযুত্তদ্ৰযং কামেযেৰ হদযৰত্থুং নিস্সায জাযতি, অঞ্ঞভূমীসু ন জাযতি, তস্মা নিযতৰত্থুকং হোতি. ইতরানি পন অকুসলানি কামরূপেসু উপ্পজ্জনকালে হদযৰত্থুং নিস্সায জাযন্তি, অরূপে হদযৰত্থুং অনিস্সায জাযন্তি, তস্মা অনিযতৰত্থুকানি, তেন. পটিসন্ধিজনকাজনকৰসেন চাতি উদ্ধচ্চসহগতং পটিসন্ধিং ন জনেতি. যদি পটিসন্ধিং জনেয্য, অপাযেসুযেৰ জনেয্য. কস্মা? সোতাপত্তিমগ্গেন একদেসতো অপাযগামিকম্পি ন জহিতং, সব্বং ন জহিতন্তি অত্থো. সোপি মগ্গো অপাযগামী ন হোতি. অঞ্ঞে পন কিলেসা একদেসৰসেন অপাযগামিকা জহিতা, তেন পঠমমগ্গেনাতি তস্মা ন জনেতি. একাদসৰিধং পন পটিসন্ধিং জনেতি, তেন.

দিট্ঠমঙ্গলাদীনীতি আদি-সদ্দেন সুতমঙ্গলাদীনি গহিতানি. সারতো উত্তমতো পচ্চেতি সদ্দহতি. সভাৰতিক্খেন সভাৰো তিক্খো এতস্সাতি সভাৰতিক্খং, তেন সভাৰতিক্খেন.

অস্স ¶ পন পটিঘসম্পযুত্তস্স পাণাতিপাতাদীসু অকুসলকম্মেসু তিক্খপ্পৰত্তিকালে অসঙ্খারিকস্স উপ্পত্তি, মন্দপ্পৰত্তিকালে সসঙ্খারিকস্স উপ্পত্তি ৰেদিতব্বা.

তস্স মোমূহস্স.

দুক্খৰিসেসস্স দুক্খনানত্তস্স.

৩০. লোভমূলৰসেন ¶ অট্ঠ চিত্তানি, দোসমূলৰসা দুৰে চিত্তানি, মোহমূলৰসেন দ্ৰে চিত্তানি. এৰং ইমিনা মযা ৰুত্তপ্পকারেন অকুসলানি দ্ৰাদসপ্পকারানি সিযুং ভৰেয্যুং.

৩১. যং পাপমানসং যং অকুসলচিত্তং পাপাপাপেসু পাপঅপাপেসু কুসলাকুসলেসু অপাপেন অপ্পৰত্তেন পাপাপাপপ্পহীনেন ৰুত্তং ঈরিতং কথিতং, তং পাপমানসং তং অকুসলচিত্তং মযা সমুদাহটং কথিতং.

যথা পনস্স যথা পন অস্স ৰিপাকস্স কুসলং দানাদিৰসেন দানাদীনং দসপুঞ্ঞকিরিযৰত্থূনং ৰসেন ছসু আরম্মণেসু পৰত্ততি, ইদং ৰিপাকচিত্তং তথা ন পৰত্ততি. হি সচ্চং ইদং ৰিপাকং পটিসন্ধিভৰঙ্গচুতিতদারম্মণৰসেন পরিত্তধম্মপরিযাপন্নেসু কামাৰচরধম্মন্তোগধেসু ছসু আরম্মণেসু পৰত্ততি. সম্পযুত্তধম্মানঞ্চ ৰিসেসে অসতিপি কুসলসম্পযুত্তধম্মতো অস্স ৰিপাকস্স, সম্পযুত্তধম্মানঞ্চ নানত্তে অসতিপি ইদং ৰিপাকং আদাসতলাদীসু ধম্মজাতেসু মুখনিমিত্তং ৰিয নিরুস্সাহং. অযমস্সাধিপ্পাযো – যথা আদাসতলে মুখনিমিত্তং মুখে চলিতে চলতি, অচলিতে ন চলতি, মুখস্স কারণং ৰিনা মুখনিমিত্তস্স ৰিয কারণং নত্থি, এৰং কুসলকারণা ৰিপাকস্স অঞ্ঞং কারণং নত্থি, নিরুস্সাহং ৰিপাকং.

৩২. কামাৰচরদেৰানং মনুস্সানং ইমে অট্ঠ মহাৰিপাকা দুহেতুকতিহেতুকানং কামাৰচরদেৰানং, মনুস্সানঞ্চ পটিসন্ধিযো ভৰন্তি.

৩৩-৪. ততো পরং পৰত্তিযং যাৰতাযুকং ভৰঙ্গং হুত্ৰা বলৰারম্মণে অতিমহন্তৰিভূতারম্মণে ¶ তদারম্মণঞ্চ হুত্ৰা ততো পরং মরণকালস্মিং চুতি হুত্ৰা পৰত্তন্তি ¶ , এৰং ইমিনা মযা ৰুত্তপ্পকারেন চতূসু ঠানেসু ৰিপচ্চন্তি ৰিপাকভাৰেন জাযন্তি.

৩৫. সভূমিকুসলেহেৰ মহাপাকা সমা ৰিনা মহাপাকা কম্মদ্ৰারং কম্মকারণং ৰিনা, কম্মঞ্চ মহাপুঞ্ঞানং কিরিযৰত্থুকং ৰিনা ৰজ্জেত্ৰা সভূমিকুসলেহেৰ অত্তনো ভূমিযং পৰত্তেহি কুসলেহি এৰ সমা সদিসা. কম্মদ্ৰারং নাম কাযৰিঞ্ঞত্তিকম্মদ্ৰারং, ৰচীৰিঞ্ঞত্তিকম্মদ্ৰারং, ভৰঙ্গসঙ্খাতং মনোদ্ৰারং, ইতি তিৰিধং কম্মদ্ৰারং কম্মকারণং. কম্মং নাম অট্ঠকামাৰচরকুসলচেতনা ইধ অধিপ্পেতা.

৩৬. পাকা কুসলৰিপাকা অৰিঞ্ঞত্তিজনত্তা চ ৰিঞ্ঞত্তি চ ৰিঞ্ঞত্তি চ ৰিঞ্ঞত্তিৰিঞ্ঞত্তিযোতি ৰত্তব্বে সরূপেকসেসং কত্ৰা ‘‘ৰিঞ্ঞত্তী’’তি ৰুত্তং, তা জনেন্তীতি ৰিঞ্ঞত্তিজনা, ন ৰিঞ্ঞত্তিজনা অৰিঞ্ঞত্তিজনা, তেসং ভাৰো অৰিঞ্ঞত্তিজনত্তং. তস্মা অৰিঞ্ঞত্তিজনত্তা কাযৰিঞ্ঞত্তিৰচীৰিঞ্ঞত্তিসঙ্খাতানং কম্মদ্ৰারানং অজনকত্তা মনোদ্ৰারসঙ্খাতস্স কম্মদ্ৰারস্স ৰসেন চ অপ্পৰত্তনতো অৰিপাকসভাৰতো চ অকম্মভাৰতো চ অপ্পৰত্তনতো চেৰ পুঞ্ঞকিরিযৰত্থুৰসেন অপ্পৰত্তনতো চেৰ পুঞ্ঞেহি নো সমা অসদিসা.

৩৭-৯. পরিত্তারম্মণত্তা হি তেসমেকন্ততো তেসং ৰিপাকানং একন্ততো পরিত্তারম্মণত্তা কামাৰচরারম্মণত্তা তেসু ৰিপাকেসু সত্তপঞ্ঞত্তিকারম্মণা করুণামুদিতা কদাচি কিস্মিঞ্চি কালে ন জাযন্তি, তথা এৰং তিস্সো পন ৰিরতিযো এতেসু ৰিপাকেসু ন জাযন্তি, হি কস্মা কারণা ন জাযন্তি, পঞ্চ সিক্খাপদা কুসলাতি কুসলা নামাতি সত্থুনা ৰুত্তা যস্মা কারণা, তস্মা ন জাযন্তি. তথাধিপতিনোপেত্থ তথা এৰমেৰ চত্তারো অধিপতিনোপি এতেসু ৰিপাকেসু ন সন্তি. কস্মা ¶ ? ছন্দাদীনি ধম্মজাতানি পুরেতরং কত্ৰা অনুপ্পজ্জনতো ন সন্তি, ইতি ৰচনং ৰিনিদ্দিসে আচরিযো কথেয্য.

৪০. অসঙ্খারসসঙ্খারৰিধানং পন পুঞ্ঞতো ৰিপাকেসু অসঙ্খারসসঙ্খারৰিধানং পুঞ্ঞতো কুসলতো আগমনৰসেন ঞেয্যং. তত্থ একচ্চানং আচরিযানং মতেন মুখে চলিতে আদাসতলে মুখনিমিত্তচলনং ৰিয অসঙ্খারস্স কুসলস্স ৰিপাকো অসঙ্খারো হোতি, সসঙ্খারস্স কুসলস্স ৰিপাকো সসঙ্খারো হোতি, এৰং আগমনৰসেন ঞেয্যং. পচ্চযতো চেৰ ঞেয্যং তত্থ একচ্চানং ¶ আচরিযানং মতেন বলৰন্তেহি ৰিভূতেহি পচ্চযেহি কম্মাদীহি উপ্পন্নো অসঙ্খারো দুব্বলেহি সসঙ্খারোতি এৰং পচ্চযৰসেন ৰিঞ্ঞেয্যং জানিতব্বং.

৪১-২. হীনাদীনং পুঞ্ঞানং ৰিপাকত্তা হীনাদযো ৰিপাকা পুঞ্ঞৰাদিনা জিনেন পরিদীপিতা ভৰন্তি, ইতি এৰং ইমিনা ৰুত্তপ্পকারেন পৰত্তং ইদং অট্ঠৰিধং চিত্তং একন্তেন সৰত্থুকং কামলোকস্মিং জাযতে, অঞ্ঞত্থ পন অঞ্ঞাসু ভূমীসু ন জাযতে.

ৰিঞ্ঞাণপঞ্চকং নিযতারম্মণন্তি চক্খুৰিঞ্ঞাণস্স রূপমেৰ আরম্মণং, ন সদ্দাদযো. সেসত্তযং যদা চক্খুৰিঞ্ঞাণেন গহিতং আরম্মণং করোতি, তদাস্স রূপং আরম্মণং হোতি. যদা সোতৰিঞ্ঞাণেন গহিতং, তদাস্স সদ্দো আরম্মণো হোতি. যদা ঘানজিৰ্হাকাযৰিঞ্ঞাণেহি গহিতানি আরম্মণানি করোন্তি, তদাস্স গন্ধরসফোট্ঠব্বারম্মণানি হোন্তি. মনোৰিঞ্ঞাণধাতুদ্ৰযং যদা তদারম্মণং হোতি, তদা ছআরম্মণং হোতি, এৰং অনিযতারম্মণং হোতি.

রূপারম্মণায কিরিযামনোধাতুযা অপগমো পদট্ঠানং আসন্নকারণং এতস্সাতি অপগমপদট্ঠানং, তায আৰজ্জনং ¶ কত্ৰা ঠিতায চক্খুৰিঞ্ঞাণেন দস্সনকিচ্চং করীযতীতি অত্থো. তথাভাৰপচ্চুপট্ঠানং সম্পটিচ্ছনভাৰেন গয্হাকারং. সন্তীরণাদিরসা সোমনস্সযুত্তা মনোৰিঞ্ঞাণধাতুসন্তীরণতদারম্মণরসা, উপেক্খাযুত্তা পন সন্তীরণতদারম্মণপটিসন্ধিভৰঙ্গচুতিরসা, তথাভাৰপচ্চুপট্ঠানা সন্তীরণাদিভাৰেন গয্হাকারং.

৪৩. কামাৰচরপুঞ্ঞস্স কামাৰচরকুসলস্স সোল়স ৰিপাকা হোন্তি. ইতি যং ৰচনং ৰুত্তং, তং ৰচনং তিহেতুকপুঞ্ঞস্স উক্কট্ঠস্স ৰসেন আচরিযো পরিদীপযে. অযমেত্থ অত্থো – ছন্দাধিপতেয্যাদীনং ৰসেন উক্কট্ঠতিহেতুককুসলং কামসুগতিযং তিহেতুকপটিসন্ধিং দত্ৰা পৰত্তে অট্ঠ অহেতুককুসলৰিপাকানি, অট্ঠ মহাকুসলৰিপাকানীতি সোল়স পাকানি নিপ্ফাদেতি.

৪৪. কুসলানুগতং কত্ৰা ভাজিতং কিং মহগ্গতং ৰিপাকচিত্তং কুসলানুগতং কুসলং অনুগতং কত্ৰা মহগ্গতকুসলচিত্তেন সমানং কত্ৰা ভগৰতা ভাজিতং দেসিতং. কিং কেন কারণেন? কামাৰচরপুঞ্ঞংৰ কামাৰচরকুসলং ইৰ অসমানফলং নত্থি যতো যস্মা কারণা, তস্মা ¶ ৰিপাকং কুসলানুগতং কত্ৰা ভগৰতা ভাজিতং দেসিতং. কামাৰচরপুঞ্ঞংৰাতি যথা অট্ঠৰিধেসু কামাৰচরকুসলেসু উক্কট্ঠতিহেতুককুসলং কামসুগতিযং তিহেতুকপটিসন্ধিং দত্ৰা পৰত্তে সোল়স কুসলৰিপাকানি নিপ্ফাদেতি, তিহেতুকওমকঞ্চ দুহেতুকউক্কট্ঠঞ্চ কামসুগতিযং দুহেতুকপটিসন্ধিং দত্ৰা পৰত্তে তিহেতুকৰিরহিতানি অহেতুকদুহেতুকসঙ্খাতানি ৰিপাকানি নিপ্ফাদেতি, দুহেতুকওমকং পন কামসুগতিযং অহেতুকপটিসন্ধিং দত্ৰা পৰত্তে অট্ঠ অহেতুকৰিপাকানি নিপ্ফাদেতি, এৰং কামাৰচরপুঞ্ঞং অসমানফলংৰ হোতি.

৪৫. গজাদীনং ¶ ছাযা গজাদিসদিসা হোতি যথা, এৰং মহগ্গতৰিপাকং সব্বথা সব্বপকারেন অত্তনো কুসলেহেৰ সমানং হোতি.

৪৬-৭. কামাৰচরপুঞ্ঞংৰ নাপরাপরিযৰেদনং ইদং মহগ্গতকুসলং কামাৰচরপুঞ্ঞংৰ অপরাপরিযৰেদনং অপরস্মিং ভৰে ফলদাযকং ন হোতি, ঝানা অপরিহীনস্স ভৰগামিনো পটিসন্ধিগামিনো সত্তস্স কুসলানন্তরংযেৰ ফলং উপ্পজ্জতি, ইতি চ ঞাপনত্থং এতস্স মহগ্গতৰিপাকস্স কুসলানুগতং কুসলানুগমনং ভগৰতা কতং.

৪৮. এত্থ এতস্মিং মহগ্গতৰিপাকে পটিপদাক্কমো তেসঞ্চ হীনাদীনং ভেদতো ঝানাগমনতো মহগ্গতকুসলঝানস্স আগমনৰসেন ৰিভাৰিনা পণ্ডিতেন ৰেদিতব্বো.

৪৯. এত্থ ৰিপাকে ছন্দাদিঅধিপতীনং অভাৰো, অযমেৰ ৰিসেসতো কুসলতো অযং এৰ ৰিসেসো, সেসং সব্বপকারং অৰিসেসেন কুসলেন সমং মতং কথিতং ভগৰতা.

৫০. সুঞ্ঞতং অনিমিত্তন্তি, তথাপণিহিতন্তিপি সুঞ্ঞতং অনত্তা, অনিমিত্তং অনিচ্চং, অপ্পণিহিতং দুক্খং ইতি এতানি তীণি নামানি মগ্গস্স অনন্তরে চতুব্বিধস্স মগ্গস্স অনন্তরে চতুব্বিধে ফলে হোন্তি.

৫১. লব্ভন্তি পরভাগস্মিং মগ্গানন্তরে পৰত্তফলতো অঞ্ঞস্মিং কালে ৰল়ঞ্জনফলেসু ফলসমাপত্তিসমাপজ্জনকালেসু এতানি তীণি নামানি ন লব্ভন্তে, ফলেহি ৰিপস্সনাৰসেনেৰ অনত্তঅনিচ্চদুক্খসঙ্খাতানং ¶ তিণ্ণং ৰিপস্সনানং ৰসেন এৰ তানি তীণি নামানি লব্ভরে ফলেহি লব্ভন্তে.

৫২. হোন্তি ¶ সাধিপতীনেৰ লোকুত্তরফলানি তু একন্ততো সাধিপতীনি এৰ হোন্তি, লোকুত্তরফলানি ঠপেত্ৰা অঞ্ঞস্মিং ৰিপাকে অধিপতী নত্থি.

৫৩. মগ্গো অত্তনো মগ্গভাৰেন মগ্গো নাম ৰুচ্চতে ভগৰতা. ফলং মগ্গং উপাদায অট্ঠঙ্গিকমগ্গং নিস্সযং কত্ৰা মগ্গো নাম ইতি ৰচনং ৰুচ্চতে ভগৰতা.

৫৪. ইমে সত্ত অকুসলৰিপাকা. গাৰো চরন্তি এত্থাতি গোচরো, তস্সদিসত্তা গোচরো আরম্মণন্তি অত্থো, অনিট্ঠো চ অনিট্ঠমজ্ঝত্তো চ অনিট্ঠানিট্ঠমজ্ঝত্তা, তেযেৰ গোচরো অনিট্ঠানিট্ঠমজ্ঝত্তগোচরো, তস্মিং অনিট্ঠানিট্ঠমজ্ঝত্তগোচরে ৰত্তরে ৰত্তন্তি. সুখাদিত্তযযুত্তা তে তে অট্ঠ অহেতুককুসলৰিপাকা সুখাদিত্তযযুত্তা সুখসোমনস্সউপেক্খাৰেদনাহি সহগতা. দুক্খুপেক্খাযুতা ইমে ইমে সত্ত অহেতুকঅকুসলৰিপাকা দুক্খুপেক্খাৰেদনাহি সহগতা.

৫৫. এৰং ছত্তিংসধা পাকং পাকসাসনপূজিতো সুগতো. কিং ৰিসিট্ঠো? পাকং নাম অসুরং, তং সাসতি, পাকেন অত্তনো পুঞ্ঞফলেন দেৰে অনুসাসতীতি ৰা পাকসাসনো, কো সো? সক্কো. তেন পাকসাসনেন পূজিতো সৰিপাকাৰিপাকেসু কুসলৰিপাককিরিযেসু কুসলো ছেকো এৰং ইমিনা মযা ৰুত্তপ্পকারেন পাকং চিত্তং ছত্তিংসপ্পকারং অব্র্ৰি অৰোচ.

অনুল়ারেসূতি খুদ্দকেসু. তথাভাৰপচ্চুপট্ঠানা ছল়ারম্মণৰিজাননগয্হাকারা. সব্বঞ্ঞুতঞ্ঞাণস্স গতি ৰিয গতি এতিস্সাতি সব্বঞ্ঞুতঞ্ঞাণগতিকা.

৫৬. সোমনস্সযুত্তানট্ঠ ¶ , কুসলাকুসলানি চ সোমনস্সযুত্তানি অট্ঠ কুসলাকুসলানি চ, ক্রিযতো পন পঞ্চ এৰং ইমিনা মযা ৰুত্তপ্পকারেন হাসচিত্তানি তেরস.

৫৭. পুথুজ্জনা হসন্তেত্থ এত্থ এতেসু তেরসচিত্তেসু পুথুজ্জনা পন অট্ঠহি চিত্তেহি হসন্তি ¶ . সেখা সত্ত অরিযা ছহি চিত্তেহি হসন্তি. অসেখা খীণাসৰা পঞ্চহি চিত্তেহি হসন্তি.

কুসলানি পন রূপারূপকুসলানি সেখপুথুজ্জনানং উপ্পজ্জন্তি. ইমানি রূপারূপকিরিযানি খীণাসৰানং ভাৰনাযেৰ কারো ভাৰনাকারো, তস্স ৰসো ভাৰনাকারৰসো, তেন পৰত্তানি. তানি রূপারূপকুসলানি ভাৰনাপুঞ্ঞৰসপ্পৰত্তানি ভাৰনাকুসলৰসেন পৰত্তানি. ইমেসং রূপারূপকিরিযানং তেসঞ্চ রূপারূপকুসলানং অযমেৰ ৰিসেসো.

৫৮-৯. যা পুথুজ্জনকালস্মিং, অভিনিব্বত্তিতা পন পুথুজ্জনকালস্মিং পুথুজ্জনভাৰট্ঠিতেন যোগিনা অভিনিব্বত্তিতা যা রূপারূপসমাপত্তি, সা রূপারূপসমাপত্তি সো যোগী খীণাসৰো ভিক্খু হুত্ৰা নং রূপারূপসমাপত্তিং যাৰ যত্তকং কালং ন সমাপজ্জতে, তাৰ তত্তকেন কালেন তস্স খীণাসৰভিক্খুনো কুসলা এৰ রূপারূপকুসলা এৰ হোতি. খীণাসৰেন সা রূপারূপসমাপত্তি সচে যদি সমাপন্না সমাপজ্জিতা, ক্রিযা রূপারূপকিরিযা হোতি.

৬০. একাদসৰিধং কামে কামাৰচরে কিরিযচিত্তং একাদসৰিধং, রূপে রূপাৰচরে পঞ্চ, অরূপিসু চত্তারি ইতি সব্বানি ক্রিযচিত্তানি ৰীসতি.

৬১. লোকুত্তরক্রিযচিত্তং, পন কস্মা ন ৰিজ্জতি? মগ্গস্স একচিত্তক্খণিকত্তা ন ৰিজ্জতি. অযমেত্থ অধিপ্পাযো – চতুমগ্গট্ঠো ¶ খীণাসৰো নাম ন হোতি, মগ্গানন্তরমেৰ ফলং উপ্পজ্জতি, মগ্গোপি একচিত্তক্খণিকো যদি চিত্তং বহুচিত্তক্খণিকং, ফলসমঙ্গিনো খীণাসৰস্সপি মগ্গচিত্তং ভৰেয্য, এৰং সতি লোকুত্তরকিরিযচিত্তং ভৰেয্যাতি অধিপ্পাযো.

৬২. ক্রিযাক্রিযাপত্তিৰিভাগদেসকো করণং ক্রিযং, ক্রিযং নাম ৰিনযপরিযাযেন অকত্তব্বস্স করণং, ন করণং অক্রিযং, অক্রিযং নাম ৰিনযপরিযাযেন কত্তব্বস্স অকরণং, আপজ্জনং আপত্তি, ক্রিযায করণেন আপত্তি ক্রিযাপত্তি, অক্রিযায অকরণেন আপত্তি অক্রিযাপত্তি, ক্রিযাপত্তি চ অক্রিযাপত্তি চ ক্রিযাপত্যাক্রিযাপত্তিযো, একস্স আপত্তি-সদ্দস্স লোপং কত্ৰা ‘‘ক্রিযাক্রিযাপত্তিযো’’তি ৰুত্তং, তাসং ৰিভাগো ক্রিযাক্রিযাপত্তিৰিভাগো, দেসেতীতি দেসকো, তস্স দেসকো ক্রিযাক্রিযাপত্তিৰিভাগদেসকো. ণ্ৰু-তু-পচ্চযেসু পরেসু কম্মত্থে ছট্ঠী হোতীতি ¶ ৰদন্তি. জিনো কিং ৰিসিট্ঠো? ক্রিযাক্রিযাপত্তিৰিভাগদেসকো হিতাহিতানং সক্রিযাক্রিযারতো হিতস্স সক্রিযায রতো, অহিতস্স অক্রিযায রতো, যং ক্রিযাক্রিযং, ক্রিযং নাম ক্রিযচিত্তং, অক্রিযং নাম কুসলাকুসলৰিপাকচিত্তং ইচ্ছন্তি একে. তং ন. কস্মা? কুসলাধিকারে ‘‘কুসলং মুনিনা লপিতং’’ অকুসলাধিকারে ‘‘পাপমানসং পাপাপাপেস্ৰপাপেন ৰুত্তং’’ ৰিপাকাধিকারে ‘‘পাকং সুগতো অব্রৰী’’তি ৰত্ৰা পুন ক্রিযাধিকারে ‘‘কুসলাকুসলৰিপাকানি অৰোচা’’তি ৰচনস্স ৰত্তব্বাভাৰতো. তেন ৰাস্স ক্রিযাক্রিযং এতস্সাতি ক্রিযাক্রিযং, ক্রিযাক্রিযসভাৰন্তি অত্থো. অযমেৰ সারতো পচ্চেতব্বো. যং ক্রিযাক্রিযং চিত্তং ক্রিযাক্রিযাসভাৰং অৰোচ দেসেসি, তং ক্রিযাক্রিযং ক্রিযাক্রিযসভাৰং মযা সমীরিতং, সম্মা পকারেন ঈরিতং কথিতং.

৬৪. একূননৰুতি ¶ সব্বে, চিত্তুপ্পাদা মহেসিনা লোকুত্তরে অট্ঠ কত্ৰা একূননৰুতি সব্বে চিত্তুপ্পাদা মহেসিনা তথাগতেন সমাসতো সঙ্খেপতো নিদ্দিট্ঠা.

৬৫. পিটকে অভিধম্মস্মিং, যে ভিক্খূ পাটৰত্থিনো অভিধম্মপিটকে পটুনো ভাৰো পাটৰং, তেন অত্থো পাটৰত্থো, সো এতেসং অত্থীতি পাটৰত্থিনো, ছেকভাৰত্থিকা যে ভিক্খূ, তেহি ভিক্খূহি অযং অভিধম্মাৰতারো উগ্গহেতব্বো সিক্খিতব্বো পুনপ্পুনং চিন্তিতব্বো.

৬৬. যে জনা তস্সঙ্কাসেন তংসন্নিভেন অভিধম্মাৰতারেন অভিধম্মমহোদধিং মহাসাগরসন্নিভং অভিধম্মং তরন্তি, তে ইমং লোকং পরলোকঞ্চ তরন্তি. ইতীতি পরিসমাপনে.

ইতি অভিধম্মাৰতারটীকায

চিত্তনিদ্দেসৰণ্ণনা নিট্ঠিতা.

পঠমো পরিচ্ছেদো.

২. দুতিযো পরিচ্ছেদো

চেতসিকনিদ্দেসৰণ্ণনা

৬৭. চিত্তানন্তরমুদ্দিট্ঠা ¶ , যে চ চেতসিকা মযা যে চ চেতসিকা চিত্তানন্তরং মযা উদ্দিট্ঠা, ইতো পরং ইদানি তেসং চেতসিকানং ৰিভাজনং করিস্সামি অহং.

ইমেসু পন করুণামুদিতাৰসেন ভাৰনাকালে করুণাপুব্বভাগো ৰা, অপ্পনাপত্তায করুণায পুব্বভাগো, তস্মিং পুব্বভাগে, করুণাতো পুব্বভাগে কামাৰচরচিত্তেতি অত্থো. একা করুণা উপ্পজ্জতি. মুদিতাপুব্বভাগে ৰা অপ্পনাপত্তায মুদিতায পুব্বভাগে একা মুদিতা ¶ উপ্পজ্জতি. ইমিনা কামাৰচরচিত্তেন যোগী মিচ্ছাকম্মন্তাদীহি ধম্মেহি ৰিরমতি. রমু-ধাতু কীল়াযং, ৰি-সদ্দো ৰিরমণত্থো.

৬৮. আদিনা পুঞ্ঞচিত্তেন, তেত্তিংস নিযতা মতা আদিনা পুঞ্ঞচিত্তেন পঠমমহাকুসলচিত্তেন সহ নিযতা তেত্তিংস চেতসিকা ভগৰতা মতাতি, অথ ৰা করুণামুদিতা অনিযতা একেন ধম্মেন সহ চতুত্তিংস ধম্মা ভৰন্তি.

৬৯. কস্মা পনেত্থ মেত্তা চ, উপেক্খা চ ন উদ্ধটা এত্থ এতেসু যেৰাপনকধম্মেসু, নিদ্ধারণং, মেত্তা চ উপেক্খা চ ধম্মরাজেন সত্থুনা ন উদ্ধটা ন ৰুত্তা কস্মা কারণা.

৭০. অব্যাপাদেন মেত্তাপি অব্যাপাদেন মেত্তা গহিতা, উপেক্খাতি তত্রমজ্ঝত্ততায চ গহিতা যস্মা কারণা, তস্মা উভোপেতা ভগৰতা ন গহিতা.

৭১. কস্মা যেৰাপনা ধম্মা, বুদ্ধেনাদিচ্চবন্ধুনা সব্বে তে যেৰাপনা ধম্মা যেৰাপননামকা পাল়িযং সরূপেন এৰ. বন্ধতি স্নেহেন এতস্মিন্তি বন্ধু, আদিচ্চস্স বন্ধু আদিচ্চবন্ধু, তেন আদিচ্চবন্ধুনা বুদ্ধেন ন চ উদ্ধটা ন দেসিতা.

৭২. কস্মা ¶ কারণা? যস্মা অনিযতা কেচি যেৰাপনকা অনিযতা, যস্মা কারণা রাসিং দুকৰগ্গাদিরাসিং ন ভজন্তি ন সেৰন্তি, যস্মা কারণা কেচি যেৰাপনকা দুব্বলা, তস্মা পাল়িযং ভগৰতা ন ৰুত্তা.

৭৩. ছন্দাধিমোক্খমুদিতা মনসি চ কারো,

মজ্ঝত্ততা চ করুণা ৰিরতিত্তযঞ্চ;

পুঞ্ঞেসু তেন নিযতানিযতা চ সব্বে,

যেৰাপনা মুনিৰরেন ন চেৰ ৰুত্তা.

ছন্দাধিমোক্খো ¶ মুদিতা মনসিকারো মজ্ঝত্ততা করুণা ৰিরতিত্তযঞ্চ পুঞ্ঞেসুকুসলেসু নিযতা চত্তারো অনিযতা পঞ্চ সব্বে যেৰাপনা ন চ এৰ তেন মুনিৰরেন ৰুত্তা.

৭৪-৮০. কস্মা পনেত্থ ফস্সোৰ, পঠমং সমুদীরিতো এত্থ এতেসু চেতসিকেসু, জাতিনিদ্ধারণং, ফস্সোৰ পঠমং সমুদীরিতো কথিতো. কস্মা কারণা? কির মযা সুতং, আরম্মণে চিত্তস্স পঠমং অভিনিপাতত্তা ফস্সো পঠমং সমুদীরিতো, ফুসিত্ৰা পন ফস্সেন ফস্সেন আরম্মণং ফুসিত্ৰা যোগিনো ৰেদনায আরম্মণং ৰেদযে, সঞ্ঞায সঞ্জানাতি, চেতনায আরম্মণং চেতযে. সহজাতানং চেতসিকানং ফস্সোৰ ইধ ইমস্মিং চিত্তে মহেসিনা পঠমং ৰুত্তো. হি কস্মা কারণা? যস্মা বলৰপচ্চযত্তা, তস্মা ৰুত্তো. অকারণমিদং সব্বং, চিত্তানং তু সহেৰ চ ‘‘পঠমাভিনিপাতত্তা’’তি চ ‘‘বলৰপচ্চযত্তা’’তি চ ইদং সব্বং ৰচনং অকারণং অহেতুকং অযুত্তং, কস্মা কারণা? চিত্তজানং চিত্তেহি সহপ্পৰত্তানং চেতসিকানং একুপ্পাদাদিভাৰেন সমানুপ্পাদসমাননিরোধসমানালম্বণসমানৰত্থুকভাৰেন পৰত্তিতো অকারণং অযুত্তং. অযং তু পঠমুপ্পন্নো, অযং পচ্ছাতি নত্থিদং অযং ধম্মো পঠমুপ্পন্নো, অযং ধম্মো পচ্ছাকালে উপ্পন্নো ইতি ইদং ৰচনং নত্থি. বলৰপচ্চযত্তেপি কারণং ন চ দিস্সতি. দেসনাক্কমতো চেৰ পঠমং সমুদীরিতো ইচ্চেৰং ইতি এৰং ইতি ইমিনা মযা ৰুত্তপ্পকারেন ফস্সস্স পঠমং সমুদীরিততং ৰিঞ্ঞুনা ৰিভাৰিনা ৰিঞ্ঞেয্যং, ৰিসেসতো ৰিসেসেন অঞ্ঞথা ন ৰিঞ্ঞেয্যং. ন চ পরিযেসিতব্বোযং, তস্মা পুব্বাপরক্কমো যস্মা কারণা অযং পুব্বাপরক্কমো ৰিঞ্ঞুনা ন চ পরিযেসিতব্বো ন গৰেসিতব্বো, ধম্মা এৰ ৰচনত্থলক্খণাদীহি ৰিজানতা পণ্ডিতেন পরিযেসিতব্বা.

ইট্ঠাকারানুভৰনরসা ¶ ¶ ইট্ঠারম্মণানুভৰনকিচ্চা সুভোজনরসং অনুভৰন্তো রাজা ৰিয. চেতসিকঅস্সাদপচ্চুপট্ঠানা চেতসিকপস্সদ্ধিপদট্ঠানা.

পচ্চাভিঞ্ঞাণকরণরসা পটিজাননকিচ্চা ৰড্ঢকিস্স অভিঞ্ঞাণকরণমিৰ ৰড্ঢকিনো সকিং সঞ্জানিত্ৰাপি দারুহরেসু সুত্তস্স পটিপসারণং ৰিযাতি অধিপ্পাযো. যথাগহিতনিমিত্তৰসেনাতি যথাপৰত্তিতনিমিত্তস্স ৰসেন. মনসি অভিনিৰেসকরণং গয্হাকারা.

আযূহনরসা পৰত্তনকিচ্চসাধকা. মহাৰড্ঢকিআদযো ৰিয যথা মহাৰড্ঢকী সযম্পি দারুং তচ্ছতি, পরেপি দারুং তচ্ছাপেতি, এৰং সযম্পি আরম্মণে সন্দহতি, সম্পযুত্তধম্মেপি অভিসন্দহাপেতি.

আহননং ভুসো হননং, পরিযাহননং সমন্তা হননং, তং রসো এতস্সাতি আহননপরিযাহননরসো.

আরম্মণানুমজ্জনলক্খণো আরম্মণপরিমদ্দনলক্খণো.

পিনযতীতি পীতি, সহজাতধম্মে আরম্মণে পিনযতীতি অত্থো. কাযচিত্তফরণরসা. উদগ্গস্স চিত্তস্স ভাৰো ওদগ্যং, তং পচ্চুপট্ঠানং এতস্সাতি ওদগ্যপচ্চুপট্ঠানা.

সদ্দহন্তি ৰত্থুত্তযং সদ্দহন্তি. অকালুসিযপচ্চুপট্ঠানা অনাৰিলভাৰপচ্চুপট্ঠানা. সদ্ধেয্যৰত্থুপদট্ঠানা সদ্দহিতব্বৰত্থুত্তযাসন্নকারণা.

অরঞ্ঞগতসুদেসকো ৰিয অরঞ্ঞে গতো মগ্গসুদেসকো ৰিয.

অত্তনা অৰিনিব্ভুত্তানং ধম্মানন্তি অৰিগতানং চেতসিকানং. তেসন্তি তেসং চেতসিকানং ধম্মানং. সন্তেপি চ তেসং ¶ চেতসিকানং অনুপালনলক্খণাদিম্হি ¶ ৰিধানে অত্থিক্খণেযেৰ তং তেসং পালেতব্বানং চেতসিকানং পৰত্তক্খণেযেৰ তং জীৰিতং তে ধম্মে পালেতব্বে চেতসিকে অনুপালেতি. উদকং ৰিযাতি যথা উদকং অত্তনি উপ্পলাদীনি অনুপালেতি, তথা অনুপালনলক্খণাদিম্হি ৰিধানে সন্তেপি তেসং অত্থিক্খণেযেৰ অনুপালেতি, ৰিজ্জমানক্খণেৰ অনুপালেতীতি অধিপ্পাযো. পচ্চযুপ্পন্নেপি চ ধম্মে অনুপালেতি, ধাতি ৰিয কুমারং অঞ্ঞায জনিতং কুমারং রক্খন্তী ধাতি ৰিয, পরস্স পুত্তং অঙ্কাদিনা ধারেতীতি ধাতি. সযংপৰত্তিতধম্মসম্বন্ধেনেৰ পৰত্ততি অত্তনা পৰত্তিতেহি ধম্মেহি সম্পৰত্ততি. নিযামকো ৰিয যথা নিযামকো একনাৰায ৰুত্থেহি জনেহি সহ পৰত্ততি, ভঙ্গতো উদ্ধং তং জীৰিতং ন পৰত্তযতি, অত্তনো চ অভাৰা ঠপযিতব্বানং চেতসিকানঞ্চ অভাৰা, ভঙ্গক্খণে চেতসিকে ন ঠপেতি সযং ভিজ্জমানত্তা, ৰট্টিস্নেহো খীযমানো পদীপসিখং ন করোতি যথা.

সোম্মভাৰপচ্চুপট্ঠানোতি মুদুভাৰপচ্চুপট্ঠানো, সীতলভাৰপচ্চুপট্ঠানো ৰা.

কাযোতি চেত্থ ৰেদনাদযো তযো খন্ধা ৰেদনাক্খন্ধো সঞ্ঞাক্খন্ধো সঙ্খারক্খন্ধো ইমে খন্ধা গহিতা.

নিম্মদ্দনরসাতি নিম্মদ্দনকিচ্চা. কাযচিত্তানং অৰূপসমতাউদ্ধচ্চাদিকিলেসপটিপক্খভূতাতি আদিগ্গহণেন কুক্কুচ্চং গহেতব্বং.

ইতি অভিধম্মাৰতারটীকায

চেতসিকনিদ্দেসৰণ্ণনা নিট্ঠিতা.

দুতিযো পরিচ্ছেদো.

৩. ততিযো পরিচ্ছেদো

চেতসিকৰিভাগনিদ্দেসৰণ্ণনা

৮৯. সব্বে ¶ চেতসিকা ৰুত্তা, বুদ্ধেনাদিচ্চবন্ধুনা যে সব্বে চেতসিকা আদিচ্চবন্ধুনা বুদ্ধেন ¶ ৰুত্তা, তে সব্বে চেতসিকা নামসামঞ্ঞতো নামসমানভাৰেন দ্ৰেপঞ্ঞাসভৰন্তি তে, অনোত্তপ্পপরিযোসানা দ্ৰিপঞ্ঞাস ভৰন্তি.

৯০-৯২. চতুপঞ্ঞাসধা কামে, রূপে পঞ্চদসেরিতা কামে কামাৰচরে চতুপঞ্ঞাস চিত্তানি ঈরিতা. রূপে রূপাৰচরে পঞ্চদস চিত্তানি ঈরিতা ভৰন্তি. দ্ৰাদসারূপে অরূপাৰচরে দ্ৰাদস চিত্তানি ভৰন্তি. চত্তালীস মনাসৰা লোকুত্তরচিত্তানি চত্তালীস ভৰন্তি, একৰীসসতং সব্বে চিত্তুপ্পাদা সমাসতো সঙ্খেপতো একৰীসসতং হোতি. এতেসু তেসমুপ্পত্তিং ইতো পরং এতেসু মযা ৰুত্তেসু চিত্তেসু তেসং ফস্সাদীনং ধম্মানং উপ্পত্তিং একং একং উদ্ধরিত্ৰা চিত্তচেতসিকেসু ভিক্খূনং পাটৰত্থায অহং পৰক্খামি দেসিস্সামি.

৯৩. একগ্গতা চিত্তেকগ্গতা মনক্কারো মনসিকারো জীৰিতং ফস্সপঞ্চকং এতে অট্ঠ চেতসিকা অৰিনিব্ভোগা অঞ্ঞমঞ্ঞতো অৰিগতা একুপ্পাদা সমানুপ্পাদা সহক্খযা সহৰযা.

৯৪. ফস্সো চ ৰেদনা সঞ্ঞা, চেতনা জীৰিতিন্দ্রিযং একগ্গতা মনক্কারো ইমে চেতসিকা সব্বসাধারণা সব্বচিত্তেহি সাধারণা, সব্বচিত্তানং সাধারণা ৰা.

৯৫. ৰিতক্কো পঞ্চপঞ্ঞাস-চিত্তেসু সমুদীরিতো. চারো ছসট্ঠিচিত্তেসু ৰিতক্কো তাৰ দ্ৰিপঞ্চৰিঞ্ঞাণৰজ্জিতকামাৰচরেসু চেৰ একাদসসু পঠমজ্ঝানচিত্তেসু চাতি পঞ্চপঞ্ঞাসচিত্তেসু ¶ ভগৰতা সমুদীরিতো. ৰিচারো দ্ৰিপঞ্চৰিঞ্ঞাণৰজ্জিতকামাৰচরচিত্তেসু একাদসসু পঠমজ্ঝানচিত্তেসু চ একাদসসু দুতিযজ্ঝানচিত্তেসু চাতি ছসট্ঠিচিত্তেসু জাযতি. এত্থ এতস্মিং ৰচনে সংসযো নত্থি.

৯৬. একপঞ্ঞাসচিত্তেসু, পীতি তেসট্ঠিযা সুখং পীতিদোমনস্সুপেক্খাসহগতকাযৰিঞ্ঞাণচতুত্থজ্ঝানৰজ্জিতেসু একপঞ্ঞাসচিত্তেসু জাযতি. সুখং দোমনস্সদুক্খুপেক্খাসহগতৰজ্জিতেসু তেসট্ঠিচিত্তেসু জাযতি. উপেক্খা সোমনস্সসুখদুক্খসহগতৰজ্জিতেসু পঞ্চপঞ্ঞাসচিত্তেসু জাযতি. দুক্খং অকুসলৰিপাককাযৰিঞ্ঞাণপটিঘসহগতেসু তীসু চিত্তেসু জাযতি.

৯৭. হোতি দ্ৰাসট্ঠিচিত্তেসু, সোমনস্সিন্দ্রিযং পন দোমনস্সদুক্খসুখুপেক্খাসহগতৰজ্জিতেসু ¶ দ্ৰাসট্ঠিচিত্তেসু জাযতি. দুক্খিন্দ্রিযং পনেকস্মিং অকুসলৰিপাকে কাযৰিঞ্ঞাণে জাযতি. তথেকম্হি সুখিন্দ্রিযং তথা একস্মিং পুঞ্ঞপাকে কাযৰিঞ্ঞাণে হোতি.

৯৮. পঞ্চুত্তরসতে চিত্তে, ৰীরিযং আহ নাযকো জিনো পঞ্চদ্ৰারাৰজ্জনদ্ৰিপঞ্চৰিঞ্ঞাণসম্পটিচ্ছনসন্তীরণৰজ্জিতে পঞ্চুত্তরসতে চিত্তে ৰীরিযং আহ কথেসি. চতুত্তরসতে চিত্তে, সমাধিন্দ্রিযমব্র্ৰি ৰিচিকিচ্ছাসহগতদ্ৰিপঞ্চৰিঞ্ঞাণসম্পটিচ্ছনসন্তীরণপঞ্চদ্ৰারাৰজ্জনৰজ্জিতে চতুত্তরসতে চিত্তে সমাধিন্দ্রিযং অৰোচ.

৯৯. সব্বাহেতুকচিত্তানি, ঠপেত্ৰা চেকহেতুকে সব্বানি অট্ঠারস অহেতুকচিত্তানি একহেতুকচিত্তদ্ৰযঞ্চ ঠপেত্ৰা সেসস্মিং একুত্তরসতে চিত্তে ছন্দস্স উপ্পত্তিং উদ্দিসে পণ্ডিতো কথেয্য.

১০০. ঠপেত্ৰা ¶ দস ৰিঞ্ঞাণে চক্খুৰিঞ্ঞাণাদিকে দস ৰিঞ্ঞাণে চ ৰিচিকিচ্ছাযুতম্পি চিত্তং ঠপেত্ৰা সেসস্মিং দসুত্তরসতে চিত্তে অধিমোক্খো ভগৰতা উদীরিতো.

১০১-২. সদ্ধা সতি হিরী ওত্তপ্পং অলোভো অদোসো তত্রমজ্ঝত্তং ছ যুগল়া চ ইতি ইমে একূনৰীসতি ধম্মা নিযতা হুত্ৰা একনৰুতিযা চিত্তে জাযন্তি. একূনৰীসতি ধম্মা অহেতুকেসু অট্ঠারসসু অপুঞ্ঞেসু দ্ৰাদসসু অকুসলেসু ন জাযরে ন জাযন্তি.

১০৩. একূনাসীতিযা চিত্তে, পঞ্ঞা জাযতি সব্বদা পঞ্ঞা দ্ৰাদসঅকুসলঅট্ঠারসঅহেতুকমহাকুসলঞাণৰিপ্পযুত্তমহাৰিপাকঞাণৰিপ্পযুত্তমহাকিরিযাঞাণৰিপ্পযুত্তৰজ্জিতে একূনাসীতিযা চিত্তে জাযতি. অট্ঠৰীসতিযা চিত্তে, করুণামুদিতা সিযুং করুণামুদিতা অট্ঠসু মহাকুসলেসু, অট্ঠসু মহাকিরিযাসু, রূপাৰচরপঞ্চমজ্ঝানৰজ্জিতেসু দ্ৰাদসরূপাৰচরেসু চাতি অট্ঠৰীসতিযা চিত্তেসু সিযুং ভৰেয্যুং.

১০৪. কামাৰচরপুঞ্ঞেসু, সব্বলোকুত্তরেসু চ কামাৰচরমহাকুসলেসু চিত্তেসু সব্বেসু লোকুত্তরেসু চাতি সহ অট্ঠকে চত্তালীসৰিধে চিত্তে ৰিরতিত্তযং হোতি.

১০৫. সদ্ধা ¶ সতি হিরোত্তপ্পং অলোভাদিত্তযম্পি চ যুগল়ানি ছ চ মজ্ঝত্তং করুণামুদিতাপি চ.

১০৬. তথা তিস্সো ৰিরতিযো সব্বে তে পঞ্চৰীসতি ধম্মা মহাকুসলচিত্তসম্পযুত্তঅব্যাকতচিত্তসম্পযুত্তাতি কুসলেন সব্বেসুযেৰ ধম্মেসু ছেকেন ৰিজিতঙ্গণেন পকাসিতা.

১০৭. অহিরীকং ¶ অনোত্তপ্পং, মোহো উদ্ধচ্চমেৰ চাতি ইমে চত্তারো ধম্মা নিযতা হুত্ৰা দ্ৰাদসাপুঞ্ঞচিত্তেসুযেৰ দ্ৰাদসঅকুসলচিত্তেসুযেৰ জাযরে জাযন্তি.

১০৮-৯. লোভো দোসো চ মোহো চ, মানো দিট্ঠি চ সংসযো ৰিচিকিচ্ছা মিদ্ধং উদ্ধচ্চং কুক্কুচ্চং থিনং মচ্ছরিযম্পি চ অহিরিকং অনোত্তপ্পং ইস্সা চ দোমনস্সকং এতে ধম্মা অকুসলা অকুসলচিত্তসম্পযুত্তা একন্তেন মহেসিনা ৰিজিতঙ্গণৰিগতমলেন ৰুত্তা.

১১০. লোভো অট্ঠসু লোভমূলেসু চিত্তেসু ভগৰতা নিদ্দিট্ঠো দস্সিতো. দিট্ঠি চতূসু দিট্ঠিসম্পযুত্তেসু চিত্তেসু ৰুত্তা. মানো দিট্ঠিৰিপ্পযুত্তেসু চতূসু গাহূপৰাদপ্পভিন্দনেন ৰুত্তো. দোসো দ্ৰীসু এৰ পটিঘসম্পযুত্তেসু চিত্তেসু মুনিন্দেন ৰুত্তো.

১১১. ইস্সামচ্ছেরকুক্কুচ্চা দ্ৰীসু দোসমূলেসু চিত্তেসু জাযন্তি, নো সহ সহ নো জাযন্তি, একেকোৰ জাযন্তীতি অত্থো. ৰিচিকিচ্ছা পনেকস্মিং ৰিচিকিচ্ছা পন একস্মিং ৰিচিকিচ্ছাসহগতচিত্তে জাযতি. থিনমিদ্ধং পঞ্চসু সসঙ্খারিকঅকুসলচিত্তেসু জাযতি.

১১২-৩. ফস্সো চ ৰেদনা সঞ্ঞা, চেতনা জীৰিতং মনো ৰিতক্কো চ ৰিচারো চ পীতি ৰীরিযং সমাধি চ ছন্দো চেৰাধিমোক্খো চ মনসিকারো চ চুদ্দস ধম্মা কুসলা চ কুসলচেতসিকা চ হোন্তি. অকুসলা চেৰ অকুসলচেতসিকা চেৰ অব্যাকতাপি চ অব্যাকতচেতসিকা চ হোন্তি.

১১৪. একূনতিংসচিত্তেসু, ঝানং পঞ্চঙ্গিকং মতং চতূসু সোমনস্সসহগতাকুসলেসু, দ্ৰাদসসু সোমনস্সসহগতমহাকুসলমহাৰিপাকমহাকিরিযচিত্তেসু, সুখসন্তীরণহসিতুপ্পাদচিত্তেসু ¶ ¶ , তীসু রূপপঠমজ্ঝানচিত্তেসু, অট্ঠসু লোকুত্তরপঠমজ্ঝানচিত্তেসু চাতি একূনতিংসচিত্তেসু পঞ্চঙ্গিকং পঞ্চাৰযৰঝানযুত্তং ঝানং সুগতেন মতং. উপেক্খাসহগতানি চত্তারি লোভমূলানি চ দ্ৰে দোসমূলানি চ দ্ৰে মোহমূলানি চ মনোধাতুত্তিকঞ্চ উপেক্খাসহগতা তিস্সো অহেতুকমনোৰিঞ্ঞাণধাতুযো চ দ্ৰাদসুপেক্খাসহগতানি মহাকুসলমহাৰিপাককিরিযচিত্তানি তীণি রূপদুতিযজ্ঝানচিত্তানি অট্ঠ লোকুত্তরদুতিযজ্ঝানচিত্তানি চাতি সত্ততিংস চিত্তানি চতুঝানঙ্গযুত্তানি চতুঝানাৰযৰযুত্তানি ইতি এৰং নিদ্দিসে কথেয্য.

১১৫. একাদসৰিধং চিত্তং, তিৰঙ্গিকমুদীরিতং তীণি রূপাৰচরততিযজ্ঝানচিত্তানি, অট্ঠলোকুত্তরততিযজ্ঝানচিত্তানি চাতি একাদসৰিধং চিত্তং তিৰঙ্গিকং তিঅৰযৰঝানযুত্তং, ছ রূপাৰচরচতুত্থজ্ঝানপঞ্চমজ্ঝানচিত্তানি, দ্ৰাদসারূপাৰচরচিত্তানি, সোল়স লোকুত্তরচতুত্থজ্ঝানপঞ্চমজ্ঝানচিত্তানি চাতি চতুতিংসৰিধং চিত্তং দুৰঙ্গিকং দ্ৰিঅৰযৰঝানযুত্তং উদীরিতং জিনেন ঈরিতং.

১১৬. সভাৰেনাৰিতক্কেসু, ঝানঙ্গানি ন উদ্ধরে সভাৰেন পকতিযা অৰিতক্কেসু ৰিতক্কৰিরহিতেসু দ্ৰিপঞ্চৰিঞ্ঞাণেসু ঝানঙ্গানি ঝানাৰযৰানি জিনো ন উদ্ধরে. অযমেত্থাধিপ্পাযো – অঞ্ঞত্থ ৰিতক্কো ঝানচিত্তেন ৰিপ্পহীনো ভাসিতো, ইমেসু পন নেৰ ঝানচিত্তেন পহীনা, পকতিযা ৰিতক্কৰিরহিতানি দ্ৰিপঞ্চৰিঞ্ঞাণানি সব্বাহেতুকচিত্তেসু মগ্গঙ্গানি মগ্গাৰযৰানি জিনো ন উদ্ধরে ন দেসেয্য.

১১৭. বুধো জিনো দ্ৰিপঞ্চৰিঞ্ঞাণেসু মনোধাতুত্তিকে চ তীসু সন্তীরণেসু চাতি সোল়সচিত্তেসু তীণিন্দ্রিযানি ¶ ৰদে কথেয্য. একস্মিং পন চত্তারি একস্মিং ৰিচিকিচ্ছাসহগতচিত্তে চত্তারি ইন্দ্রিযানি হোন্তি, একাদসসু অকুসলচিত্তেসু ৰিচিকিচ্ছাযুত্তচিত্তৰজ্জিতেসু হসিতুপ্পাদে চেৰ ৰোট্ঠব্বনচিত্তে চাতি তেরসসু চিত্তেসু পঞ্চ ইন্দ্রিযানি বুধো ভগৰা উদ্ধরে উদ্ধরেয্য.

১১৮. সত্ত দ্ৰাদসচিত্তেসু, ইন্দ্রিযানি জিনোব্র্ৰি জিনো বুদ্ধো ঞাণৰিপ্পযুত্তমহাকুসলমহাৰিপাকমহাকিরিযাসঙ্খাতেসু দ্ৰাদসচিত্তেসু সত্ত ইন্দ্রিযানি অব্র্ৰি কথেসি, একেনূনেসু অট্ঠেৰ, চত্তালীসমনেসু চ জিনো ঞাণসম্পযুত্তমহাকুসলমহাৰিপাকমহাকিরিযাসঙ্খাতেসু ¶ দ্ৰাদসসু চিত্তেসু, পঞ্চদসসু রূপেসু, দ্ৰাদসসু অরূপেসু চাতি একেনূনেসু চত্তালীসমনেসু অট্ঠেৰ ইন্দ্রিযানি অব্র্ৰি.

১১৯. চত্তালীসায লোকুত্তরচিত্তেসু নৰকং ইন্দ্রিযনৰকং নাযকো অব্র্ৰি কথেসি. এৰং ইন্দ্রিযযোগোপি, ৰেদিতব্বো ৰিভাৰিনা এৰং ইমিনা মযা ৰুত্তপ্পকারেন চিত্তেসু ইন্দ্রিযযোগো ৰিভাৰিনা ৰিসেসেন পঞ্ঞং ভাৰেতুং পকাসেতুং সীলমেতস্সাতি ৰিভাৰী, তেন ৰেদিতব্বো.

১২০. অমগ্গঙ্গানি নামেত্থ, অট্ঠারস অহেতুকা এত্থ এতেসু চিত্তেসু অট্ঠারস অহেতুকা নত্থি মগ্গো এতেসূতি অমগ্গঙ্গানি নাম, ঝানঙ্গানি ন ৰিজ্জন্তি, ৰিঞ্ঞাণেসু দ্ৰিপঞ্চসু দ্ৰিপঞ্চৰিঞ্ঞাণেসু ঝানঙ্গানিপি ন সংৰিজ্জন্তি.

১২১. একং চিত্তং দুমগ্গঙ্গং একং ৰিচিকিচ্ছাসহগতচিত্তং দুমগ্গঙ্গং দুমগ্গাৰযৰং, চতূসু দিট্ঠিৰিপ্পযুত্তাকুসলচিত্তেসু চ দ্ৰীসু পটিঘযুত্তেসু চ উদ্ধচ্চযুত্তেসু চাতি সত্তসু চিত্তেসু চ তিমগ্গঙ্গানি তিমগ্গাৰযৰানি হোন্তি. চত্তালীসায চিত্তেসু ¶ , মগ্গো সো চতুরঙ্গিকো চতূসু দিট্ঠিসম্পযুত্তাকুসলেসু ঞাণৰিপ্পযুত্তমহাকুসলমহাৰিপাকমহাকিরিযাসঙ্খাতেসু দ্ৰাদসসু চিত্তেসু চ রূপাৰচরদুতিযততিযচতুত্থপঞ্চমজ্ঝানসঙ্খাতেসু দ্ৰাদসসু রূপাৰচরেসু, দ্ৰাদসসু অরূপাৰচরেসু চাতি চত্তালীসায চিত্তেসু চতুরঙ্গিকো মগ্গো চতুরাৰযৰো মগ্গো হোতি.

১২২. পঞ্চদ্দসসু চিত্তেসু, মগ্গো পঞ্চঙ্গিকো মতো ঞাণসম্পযুত্তমহাকুসলমহাৰিপাকমহাকিরিযাসঙ্খাতেসু দ্ৰাদসসু, তীসু রূপপঠমজ্ঝানচিত্তেসু চাতি পঞ্চদ্দসসু চিত্তেসু পঞ্চঙ্গিকো পঞ্চাৰযৰো মগ্গো ভগৰতা মতো. দ্ৰত্তিংসচিত্তেসু মগ্গো সত্তঙ্গিকোপি চ লোকুত্তরদুতিযততিযচতুত্থপঞ্চমজ্ঝানসঙ্খাতেসু দ্ৰত্তিংসচিত্তেসু মগ্গো সত্তঙ্গিকো সত্তাৰযৰো হোতি.

১২৩. মগ্গো অট্ঠসু চিত্তেসু মগ্গফলৰসেন অট্ঠসু লোকুত্তরচিত্তেসু মগ্গো অট্ঠঙ্গিকো অট্ঠাৰযৰো হোতি. ইতি পরিসমাপনে. তু পদপূরণে. এৰং ইমিনা মযা ৰুত্তপ্পকারেন সব্বচিত্তেসু মগ্গঙ্গানি মগ্গাৰযৰানি ধীরো উদ্ধরেয্য, দেসেয্যাতি অত্থো.

১২৪. বলানি দ্ৰে দ্ৰিচিত্তেসু হসিতুপ্পাদৰোট্ঠব্বনসঙ্খাতেসু দ্ৰীসু চিত্তেসু দ্ৰে বলানি হোন্তি ¶ . একস্মিং তীণি দীপযে একস্মিং ৰিচিকিচ্ছাযুত্তে তীণি বলানি ধীরো দীপযে পকাসেয্য. ৰিচিকিচ্ছাযুত্ততো সেসেসু একাদসসু অকুসলেসু চত্তারি বলানি হোন্তি. ছ দ্ৰাদসসু ঞাণৰিপ্পযুত্তমহাকুসলমহাৰিপাকমহাকিরিযাসঙ্খাতেসু দ্ৰাদসসু চিত্তেসু ছ বলানি হোন্তীতি ধীরো নিদ্দিসে কথেয্য.

১২৫. একূনাসীতিযা ¶ সত্ত ঞাণসম্পযুত্তমহাকুসলমহাৰিপাকমহাকিরিযাসঙ্খাতেসু দ্ৰাদসসু কামাৰচরচিত্তেসু, সত্তৰীসতিযা মহগ্গতচিত্তেসু, চত্তালীসলোকুত্তরচিত্তেসু চাতি একূনাসীতিযা চিত্তেসু সত্ত বলানি হোন্তি. সোল়সেৰাবলানি তু দ্ৰিপঞ্চৰিঞ্ঞাণানি চ তিস্সো মনোধাতুযো চ তীণি সন্তীরণানি চাতি সোল়স এৰ চিত্তানি অবলানি বলৰিরহিতানি হোন্তি, এৰং ইমিনা মযা ৰুত্তপ্পকারেন চিত্তং সবলং বলেন সহগতং অবলম্পি চ বলৰিরহিতঞ্চাপি চিত্তং ৰিঞ্ঞেয্যং ধীরেন ৰিজানিতব্বং.

১২৬. ঝানঙ্গমগ্গঙ্গবলিন্দ্রিযানি, চিত্তেসু জাযন্তি হি যেসু যানি যেসু চিত্তেসু যানি ঝানঙ্গমগ্গঙ্গবলইন্দ্রিযানি জাযন্তি, মযা সমাসেন সমুদ্ধরিত্ৰা অসংসট্ঠং উদ্ধরিত্ৰা তেসু চিত্তেসু সব্বানিপি তানি ঝানঙ্গমগ্গঙ্গবলইন্দ্রিযানি সমাসেন সঙ্খেপেন মযা বুদ্ধদত্তাচরিযেন ৰুত্তানি কথিতানি.

ইতি অভিধম্মাৰতারটীকায

চেতসিকৰিভাগনিদ্দেসৰণ্ণনা নিট্ঠিতা.

ততিযো পরিচ্ছেদো.

৪. চতুত্থো পরিচ্ছেদো

একৰিধাদিনিদ্দেসৰণ্ণনা

১২৭.

ইতো ¶ পরং পৰক্খামি, নযমেকৰিধাদিকং;

আভিধম্মিকভিক্খূনং, বুদ্ধিযা পন ৰুদ্ধিযা.

অহং ইতো পরং ইতো পরিচ্ছেদতো পরং একৰিধাদিকং নযং আভিধম্মিকভিক্খূনং বুদ্ধিযা ৰুদ্ধিত্থায পৰক্খামি দেসেস্সামি.

১২৮. সব্বমেকৰিধং ¶ চিত্তং, ৰিজাননসভাৰতো সব্বং চিত্তং ৰিজাননসভাৰতো একৰিধং, দুৰিধঞ্চ ভৰে চিত্তং অহেতুকসহেতুকতো ইদং চিত্তং দুৰিধং ভৰেয্য.

১২৯. পুঞ্ঞাপুঞ্ঞৰিপাকা হি, কামে দস চ পঞ্চ চ হি সচ্চং কামে কামাৰচরে কুসলাকুসলৰিপাকা দস পঞ্চ চ কিরিযা তিস্সো ইতি সব্বে অট্ঠারস চিত্তুপ্পাদা অহেতুকা.

১৩০. অহেতুকতো চিত্তুপ্পাদতো সেসা একসত্ততি চিত্তুপ্পাদা সহেতুকাতি সহেতুকা নামাতি মহেসিনা তাদিনা অৰিপরীতসভাৰেন হেতুৰাদিনা পচ্চযৰাদিনা নিদ্দিট্ঠা.

১৩১. সৰত্থুকাৰত্থুকতো সৰত্থুকঅৰত্থুকৰসেন তথা উভযৰসেন সৰত্থুকৰসেন, অৰত্থুকৰসেন চ সব্বং ৰুত্তপ্পকারেন চ মানসং তিৰিধং হোতি.

১৩২-৪. সব্বো কামৰিপাকো চ, রূপে পঞ্চদসাপি চ চিত্তুপ্পাদা আদিমগ্গো পঠমমগ্গো হসিতুপ্পাদো মনোধাতুকিরিযাপি চ দোমনস্সদ্ৰযঞ্চাপি তেচত্তালীস মানসা ৰিনা ৰত্থুং ৰত্থুং ৰজ্জেত্ৰা ন উপ্পজ্জন্তি, একন্তেন সৰত্থুকা নাম. অরূপাৰচরৰিপাকা চ একন্তেন ¶ অৰত্থুকা, মযা ৰুত্ততো চিত্তুপ্পাদতো সেসানি দ্ৰেচত্তালীস চিত্তানি উভযথা সৰত্থুকাৰত্থুকৰসেন সিযুং.

১৩৫. একেকারম্মণং চিত্তং, পঞ্চারম্মণমেৰ চ চিত্তং ছল়ারম্মণকঞ্চেতি এৰং ইমিনা মযা ৰুত্তপ্পকারেনাপি তিৰিধং চিত্তং সিযা.

১৩৬-৮. ৰিঞ্ঞাণানি চ দ্ৰে পঞ্চ, অট্ঠ লোকুত্তরানি চ অভিঞ্ঞামানসং ঠপেত্ৰা সব্বং মহগ্গতঞ্চেৰাতি তেচত্তালীস চিত্তুপ্পাদা পন একেকারম্মণা ৰিঞ্ঞেয্যা ধীরেন. তত্থ ¶ চিত্তে মনোধাতুত্তযং পঞ্চারম্মণং ঈরিতং ভগৰতা. মযা ৰুত্তচিত্ততো সেসানি তেচত্তালীস চিত্তানি ছল়ারম্মণিকানি মতানি সত্থুনা, তথা এৰং চিত্তং কুসলাকুসলাদিতো তিৰিধং. আদি-সদ্দেন অব্যাকতং গহেতব্বং.

১৩৯. অহেতুকং চিত্তং একহেতুকঞ্চ চিত্তং দ্ৰিহেতুকঞ্চ চিত্তং তিহেতুকঞ্চ চিত্তন্তি এৰং ইমিনা পকারেন চিত্তং চতুব্বিধং ৰিভাৰিনা ৰিঞ্ঞাতব্বং.

১৪০-২. হেট্ঠা মযাপি নিদ্দিট্ঠা অট্ঠারস চিত্তুপ্পাদা অহেতুকা, ৰিচিকিচ্ছুদ্ধচ্চসংযুত্তং চিত্তং একহেতুকং এৰং উদীরিতং ভগৰতা. কামে কামাৰচরে পুঞ্ঞৰিপাকক্রিযতো কুসলৰসেন চ ৰিপাকৰসেন চ কিরিযাৰসেন চ দ্ৰাদসধা চিত্তুপ্পাদা অকুসলা চ দসধা চাতি বাৰীসতি চিত্তুপ্পাদা দুহেতুকা. কামে কামাৰচরে পুঞ্ঞৰিপাকক্রিযতো পুঞ্ঞৰসেন চ ৰিপাকৰসেন চ কিরিযাৰসেন চ দ্ৰাদসধা চিত্তুপ্পাদা. সব্বং মহগ্গতঞ্চেৰ অপ্পমাণং লোকুত্তরচিত্তঞ্চ তিহেতুকং.

১৪৩-৫০. রূপীরিযাপথৰিঞ্ঞত্তি-জনকাজনকাদিতোতি রূপইরিযাপথৰিঞ্ঞত্তিজনকৰসেন রূপইরিযাপথজনকৰসেন চ রূপজনকৰসেন চ তিকিচ্চাজনকৰসেন চাতিআদীহি পকারেহি সব্বং চিত্তং চতুব্বিধং হোতি. তত্থ তস্মিং চিত্তে দ্ৰাদসাকুসলা, কামধাতুযা কুসলা, তথা কামে দস কিরিযা, অভিঞ্ঞামানসং দ্ৰযং, ইমে বাত্তিংস মানসা রূপানি সমুট্ঠাপেন্তি, ইরিযাপথং কপ্পেন্তি, ৰিঞ্ঞত্তিং জনযন্তি. কুসলা মহগ্গতমানসা কিরিযা চ মহগ্গতমানসা, অট্ঠ অনাসৰচিত্তানি, ছব্বীসতি চ মানসা রূপানি সমুট্ঠাপেন্তি, ইরিযাপথং ¶ কপ্পেন্তি. চোপনং ন পাপেন্তি ৰিঞ্ঞত্তিং ন জনযন্তীতি অত্থো. ইমে চিত্তুপ্পাদা দুকিচ্চনিযতা ¶ , দস ৰিঞ্ঞাণে ঠপেত্ৰা দ্ৰীসু ভূমীসু ৰিপাকা মনোধাতুদ্ৰযসন্তীরণত্তযমহাৰিপাকরূপৰিপাকানং ৰসেন অট্ঠারস পাকা মনোধাতু কিরিযা চেৰাতি ইমানি একূনৰীসতি চিত্তানি রূপানি সমুট্ঠাপেন্তি, ইতরদ্ৰযং ন করোন্তি, পুন দ্ৰেপঞ্চৰিঞ্ঞাণা পঠমং ‘‘দস ৰিঞ্ঞাণে’’তি ৰুত্তত্তা ‘‘পুনা’’তি ৰুত্তা. অরূপীসু ৰিপাকা চ সব্বেসং সত্তানং পটিসন্ধিচিত্তঞ্চ অরহতো চুতিচিত্তঞ্চ ইমে সোল়স মানসা তিকিচ্চানি ন করোন্তি.

১৫১. একদ্ৰিতিচতুট্ঠান-পঞ্চট্ঠানপ্পভেদতো এককিচ্চদ্ৰিকিচ্চতিকিচ্চচতুকিচ্চপঞ্চকিচ্চভেদেন পঞ্চধা চিত্তং পঞ্চপকারং চিত্তং পঞ্চনিম্মললোচনো বুদ্ধো অক্খাসি কথেসি.

১৫২.

কুসলাকুসলা সব্বে, চিত্তুপ্পাদা মহাক্রিযা;

মহগ্গতা ক্রিযা চেৰ, চত্তারো ফলমানসা.

১৫৩. সব্বেৰ পঞ্চপঞ্ঞাস চিত্তুপ্পাদা জৰনট্ঠানতোযেৰ জৰনকিচ্চৰসেনেৰ একট্ঠানে এককিচ্চে নিপ্পপঞ্চেন সত্থুনা তণ্হামানদিট্ঠিৰিরহিতেন সত্থুনা নিযামিতা কথিতা.

১৫৪. পুন দ্ৰেপঞ্চৰিঞ্ঞাণা চিত্তুপ্পাদা দস্সনে সৰনে তথা ঘাযনে সাযনট্ঠানে ফুসনে পটিপাটিযা সত্থুনা নিযামিতা.

১৫৫. মনোধাতুত্তিকং আৰজ্জনে পটিচ্ছনে, এতে অট্ঠসট্ঠি চিত্তুপ্পাদা একট্ঠানিকতং এককিচ্চভাৰং গতা পত্তা ভৰন্তি.

১৫৬-৮. চিত্তদ্ৰযং দ্ৰিট্ঠানিকং নাম উদীরিতং ভগৰতা, সোমনস্সযুতং চিত্তং পঞ্চদ্ৰারে সন্তীরণং সিযা. ছদ্ৰারে তদালম্বণঞ্চ বলৰারম্মণে অতিমহন্তারম্মণে সতি সিযা ¶ , তথা ৰোট্ঠব্বনং পঞ্চদ্ৰারেসু ৰোট্ঠব্বনং হোতি. মনোদ্ৰারেসু পন সব্বেসং আরম্মণানং আৰজ্জনং হোতি, ইদং চিত্তদ্ৰযং দ্ৰিট্ঠানিকং নাম হোতি.

১৫৯. পটিসন্ধিযা ঠানতো পটিসন্ধিযা কিচ্চৰসেন ভৰঙ্গস্স ঠানতো ভৰঙ্গস্স কিচ্চৰসেন চুতিযা ঠানতো ¶ চুতিযা কিচ্চৰসেন তে মহগ্গতৰিপাকা নৰ তিট্ঠানিকা তিকিচ্চাতি মুনিনা মতা.

১৬০-৩. অট্ঠ কামা মহাপাকা, পটিসন্ধিভৰঙ্গতো পটিসন্ধিভৰঙ্গৰসেন তদারম্মণতো চেৰ তদারম্মণৰসেন চ এৰ চুতিট্ঠানৰসেন চ অট্ঠ চিত্তানি চতুট্ঠানিকচিত্তানি হোন্তি, ইতি ৰচনং ধীরো নিদ্দিসে, কুসলাকুসলপাকোপেক্খাসহগতদ্ৰযং পঞ্চদ্ৰারে সন্তীরণং ভৰে, ছদ্ৰারিকেসুপি বলৰারম্মণে সতি তদারম্মণতা সিযা. পটিসন্ধিভৰঙ্গানং ঠানৰসেন চ চুতিট্ঠানৰসেন চ ইদং চিত্তদ্ৰযং পঞ্চট্ঠানিকচিত্তং নামাতি উদীরিতং মুনিনা.

১৬৪. পঞ্চকিচ্চং দ্ৰযং চিত্তং, অট্ঠকং পন চতুকিচ্চং, নৰকং তিকিচ্চং, দ্ৰে চিত্তুপ্পাদা দ্ৰিকিচ্চা, ইমেসং ইমেহি চিত্তুপ্পাদেহি সেসং এককং কিচ্চং.

১৬৫.

ভৰঙ্গাৰজ্জনঞ্চেৰ, দস্সনং সম্পটিচ্ছনং;

সন্তীরণং ৰোট্ঠব্বনং, জৰনং ভৰতি সত্তমং.

১৬৬. ছব্বিধং হোতি তং ছন্নং তং চিত্তং ছন্নং চক্খুসোতঘানজিৰ্হাকাযমনোৰিঞ্ঞাণানং পভেদতো ছব্বিধং হোতি, চক্খুসোতঘানজিৰ্হাকাযমনোধাতুমনোৰিঞ্ঞাণধাতূনং সত্তন্নং ৰসেন চিত্তং সত্তধা হোতি.

১৬৭. একেকারম্মণং ছক্কং, পঞ্চারম্মণভেদতো ছল়ারম্মণতো চেৰ ছল়ারম্মণচিত্তৰসেন মনো চিত্তং অট্ঠৰিধং হোতি.

১৬৮. তত্থ ¶ তস্মিং চিত্তে দ্ৰেপঞ্চৰিঞ্ঞাণা একেকগোচরা হোন্তি, দ্ৰে চিত্তুপ্পাদা রূপারম্মণিকা, দ্ৰে দ্ৰে চিত্তুপ্পাদা সদ্দাদিগোচরা.

১৬৯. পঞ্চাভিঞ্ঞাৰিৰজ্জিতং সব্বং মহগ্গতং, সব্বং লোকুত্তরঞ্চ ইতি ইদং চিত্তং একেকারম্মণং ভৰে.

১৭০. ইদং ¶ ছক্কং একেকারম্মণং ৰিভাৰিনা ঞেয্যং, মনোধাতুত্তযং পঞ্চারম্মণিকং নাম ভৰে.

১৭১. কামাৰচরচিত্তানি চত্তালীসং তথা একেকং সব্বানি অভিঞ্ঞানি চ ছল়ারম্মণিকানীতি ছল়ারম্মণিকানি নাম পণ্ডিতেন ৰিঞ্ঞেয্যানি.

১৭২. সত্তৰিঞ্ঞাণধাতূসু পচ্ছিমং মনোৰিঞ্ঞাণধাতুঞ্চ কুসলাকুসলাব্যাকতৰসেন তিধা কত্ৰা নৰৰিধং চিত্তং হোতি.

১৭৩. মনোৰিঞ্ঞাণধাতুযা ভেদো পুঞ্ঞাপুঞ্ঞৰসেনেৰ ৰিপাককিরিযভেদতো ছসত্ততিৰিধো হোতি.

১৭৪. মনোধাতুং ৰিপাককিরিযভেদতো দ্ৰিধা কত্ৰা পুব্বে ৰুত্তেহি নৰধা চিত্তেহি মানসং দসধা হোতি.

১৭৫. পচ্ছিমং ধাতুদ্ৰযং মনোধাতুমনোৰিঞ্ঞাণধাতুদ্ৰযং, মনোধাতুং কুসলৰিপাকঅকুসলৰিপাককিরিযাৰসেন তিধা কত্ৰা, মনোৰিঞ্ঞাণধাতুঞ্চ কুসলাকুসলাব্যাকতৰসেন তিৰিধা কত্ৰা চক্খুসোতঘানজিৰ্হাকাযৰিঞ্ঞাণেহি সহ চিত্তং একাদসৰিধং হোতি, ইতি ইদং ৰচনং পণ্ডিতো পরিদীপযে.

১৭৬. মনোৰিঞ্ঞাণধাতুম্পি কুসলাকুসলাদিতো কুসলাকুসলৰিপাককিরিযাৰসেন চতুধা ৰিভজিত্ৰান তং ¶ চিত্তং চক্খুসোতঘানজিৰ্হাকাযৰিঞ্ঞাণেহি সহ তিপ্পকারায মনোধাতুযা চ সহ দ্ৰাদসধাপি ধীরো ৰদে.

১৭৭-৯. চিত্তং চুদ্দসট্ঠানভেদেন চুদ্দসধা ভৰে, পটিসন্ধিযা ৰসেন চ ভৰঙ্গৰসেন চ চুতিযা ৰসেন চ আৰজ্জনস্স ৰসেন চ পঞ্চন্নং দস্সনাদীনং কিচ্চানং ৰসেন চ সম্পটিচ্ছনচেতসো ৰসেন চ সন্তীরণস্স ৰসেন চ ৰোট্ঠব্বনজৰনানং ৰসেন চ, যথা এৰং তদারম্মণচিত্তস্স ৰসেন ¶ চাতি এৰং ইমিনা পকারেন ঠানভেদতো কিচ্চভেদেন চুদ্দসধা চিত্তং হোতি, ইতি ইদং ৰচনং ধীরো পরিদীপযে পরিদীপেয্য.

১৮০. ভূমিপুগ্গলনানত্তৰসেন ভূমিনানত্তৰসেন, পুগ্গলনানত্তৰসেন চ চিত্তানং পৰত্তিতো ইদং চিত্তং বহুধা হোতি, ইতি ৰচনঞ্চ ধীরো ৰিভাৰযে পকাসেয্য.

১৮১. ইধ ইমস্মিং সাসনে যো ভিক্খু মতিমা ইমস্মিং একৰিধাদিনযে কুসলো ছেকো হোতি, অভিধম্মে পৰত্তা অত্থা তস্স ভিক্খুনো হত্থগতা হত্থপৰিট্ঠা আমলকা ৰিয সুদ্ধমণিকা ৰিয হোন্তি.

ইতি অভিধম্মাৰতারটীকায

একৰিধাদিনিদ্দেসৰণ্ণনা নিট্ঠিতা.

চতুত্থো পরিচ্ছেদো.

৫. পঞ্চমো পরিচ্ছেদো

ভূমিপুগ্গলচিত্তুপ্পত্তিনিদ্দেসৰণ্ণনা

১৮২.

ইতো পরং পৰক্খামি, বুদ্ধিৰুদ্ধিকরং নযং;

চিত্তানং ভূমিসুপ্পত্তিং, পুগ্গলানং ৰসেন চ.

অহং ¶ ইতো পরং বুদ্ধিৰুদ্ধিকরং নযং মতিৰদ্ধিকরং নযং পৰক্খামি দেসেস্সামি. চিত্তানং ভূমিসুপ্পত্তিং পুগ্গলানং ৰসেন চ ভূমীসু চিত্তানং উপ্পত্তিং, পুগ্গলানং ৰসেন ভূমীসু চিত্তানং উপ্পত্তিঞ্চ পৰক্খামি.

১৮৩. দেৰা ¶ চেৰ মনুস্সা চ, তিস্সো চ অপাযভূমিযো হোন্তি, গতিযো পঞ্চ তেসং দেৰমনুস্সতিরচ্ছানপেতনিরযগতীনং ৰসেন পঞ্চ গতিযো নিদ্দিট্ঠা সত্থুনা দস্সিতা ভগৰতা. তযো ভৰা পন কামরূপারূপভৰৰসেন তযো সত্থুনা নিদ্দিট্ঠা দস্সিতা.

১৮৪-৫. ভূমিযো তত্থ তিংসেৰ, তাসু তিংসেৰ পুগ্গলা তত্থ তেসু তীসু ভৰেসু তিংস এৰ ভূমিযো হোন্তি, তাসু ভূমীসু উপ্পন্না পুগ্গলা তিংস এৰ হোন্তি, এতাসু ভূমীসু উপ্পন্না সব্বে চ পন পুগ্গলা পটিসন্ধিকচিত্তানং ৰসেন একূনৰীসতি হোন্তি. পটিসন্ধি চ নামেসা এসা পটিসন্ধি চ নাম দুৰিধা দ্ৰিপ্পকারা সমুদীরিতা সত্থুনা কথিতা.

১৮৬. অচিত্তকা পটিসন্ধি, সচিত্তকা পটিসন্ধি চ ইতি দুৰিধা পটিসন্ধি হোতি, অসঞ্ঞিব্রহ্মানং পটিসন্ধি অচিত্তকা রূপপটিসন্ধি হোতি. সেসা রূপপটিসন্ধিতো সেসা সচিত্তকা সচিত্তকপটিসন্ধি ঞেয্যা পণ্ডিতেন জানিতব্বা. সা পন সচিত্তকা পটিসন্ধি একূনৰীসতি হোতি.

১৮৭. পটিসন্ধিৰসেনেৰ সচিত্তকপটিসন্ধিৰসেন এৰ ৰীসতি পুগ্গলা হোন্তি. ইধ ইমস্মিং চিত্তাধিকারে চিত্তাধিকারত্তা অচিত্তকপটিসন্ধি রূপপটিসন্ধি ন চ উদ্ধটা ন চ কথিতা মযা.

১৮৮. অহেতুদ্ৰিতিহেতূতি, পুগ্গলা তিৰিধা সিযুং অহেতুকদ্ৰিহেতুকতিহেতুকা ইতি তিৰিধা তিপ্পকারা পুগ্গলা ¶ সিযুং ভৰেয্যুং. অরিযা পন পুগ্গলা অট্ঠ ইতি এৰং ইমিনা মযা ৰুত্তপ্পকারেন সব্বে পুগ্গলা একাদস ঈরিতা কথিতা ভগৰতা.

১৮৯. ভূমীসু তিংসভূমীসু চিত্তানং উপ্পত্তিং এতেসং পন সব্বেসং পুগ্গলানং পভেদতো ভূমীসু চিত্তানং উপ্পত্তিঞ্চ গণ্হতো গণ্হন্তস্স মম ৰচনং নিবোধথ, তুম্হে জানাথ সুণাথ.

১৯০. তীসু ভূমীসু কতি চিত্তানি জাযন্তি? মে ময্হং ৰদ তানি চিত্তানি ত্ৰং কথেহি, সব্বাসু ভূমীসু চুদ্দস এৰ চিত্তানি. তং যথা –

ৰোট্ঠব্বং ¶ কামপুঞ্ঞঞ্চ, ৰিযুত্তানি চ দিট্ঠিযা;

উদ্ধচ্চসহিতঞ্চেৰ, হোন্তি সব্বত্থ চুদ্দস.

১৯১. সদা ৰীসতি চিত্তানি, কামেযেৰ ভৰে সিযুং ৰীসতি চিত্তানি কামেযেৰ ভৰে সদা সব্বস্মিং কালে সিযুং ভৰেয্যুন্তি. তং যথা –

কামে অট্ঠ মহাপাকা, দোমনস্সদ্ৰযম্পি চ;

তথা ঘানাদিৰিঞ্ঞাণত্তযং পাকা অপুঞ্ঞজা.

ঘানাদিৰিঞ্ঞাণত্তযন্তি কুসলৰিপাকঘানাদিত্তযং. পাকা অপুঞ্ঞজা অকুসলতো জাতা অহেতুকা সত্ত ৰিপাকা. পঞ্চ রূপভৰেযেৰ পঞ্চ চিত্তানি রূপভৰেযেৰ ভৰন্তি. চত্তারেৰ অরূপিসু চত্তারি চিত্তানি অরূপীসুযেৰ হোন্তি. তং যথা –

রূপেৰ রূপপাকা ৰারুপ্পপাকা অরূপিসু;

নৰ মহগ্গতা পাকা, রূপারূপেৰ জাযরে.

১৯২. কামরূপভৰেস্ৰেৰ অট্ঠারস চিত্তানি ভৰন্তি.

তং ¶ যথা –

পুঞ্ঞরূপানি পঞ্চেৰ, পুঞ্ঞজং সম্পটিচ্ছনং;

চক্খুসোতদ্ৰযং পুঞ্ঞপাকং সন্তীরণদ্ৰযং.

পুঞ্ঞপাকং হসিতুপ্পাদমনোধাতুক্রিযাপি চ;

অট্ঠারসাদিমগ্গেন, পঞ্চ রূপক্রিযাপি চ;

কামরূপভৰেস্ৰেৰ, এতানেৰ সদা সিযুং.

দ্ৰেচত্তালীস চিত্তানি, হোন্তি তীসু ভৰেসুপি দ্ৰেচত্তালীস চিত্তানি হোন্তি. তং যথা –

পটিঘদ্ৰযৰজ্জিতানি ¶ , অপুঞ্ঞানি দসেৰ চ;

মহাপুঞ্ঞানি অট্ঠেৰ, ৰোট্ঠব্বনক্রিযানি চ.

পুঞ্ঞারুপ্পানি চত্তারি, আরুপ্পকিরিযানি চ;

কনিট্ঠমগ্গৰজ্জানি, সত্ত লোকুত্তরানি চ;

দ্ৰেচত্তালীস চিত্তানি, হোন্তি তীসু ভৰেসুপি.

১৯৩. ঠপেত্ৰা পন সব্বেসং, চতস্সোপাযভূমিযো চতস্সো অপাযভূমিযো ঠপেত্ৰা ৰজ্জেত্ৰা অপাযতো সেসানং সব্বেসং পুগ্গলানং ছব্বীসভূমীসু তেরস এৰ চিত্তানি হোন্তি. তং যথা –

চতুত্থারূপাৰচরং, অনাগামিফলাদযো;

মহাক্রিযা চ জাযন্তি, তেরসাপাযৰজ্জিতা.

অনাগামিফলাদযোতি আদি-সদ্দেন হি অরহত্তফলানি গহিতানি.

১৯৪. অপরানি চতস্সোপি, ঠপেত্ৰারুপ্পভূমিযো চতস্সো অরূপভূমিযো ঠপেত্ৰা সেসাসু ছব্বীসভূমীসু অপরানি ছ চিত্তানি জাযন্তি. তং যথা –

মনোধাতুক্রিযঞ্চেৰ ¶ , পুঞ্ঞজং সম্পটিচ্ছনং;

চক্খুসোতদ্ৰযং পুঞ্ঞপাকং সন্তীরণদ্ৰযং;

ছেৰ চিত্তানি জাযন্তি, তথা উপরিৰজ্জিতে.

১৯৫. সুদ্ধাৰাসিকদেৰানং, ঠপেত্ৰা পঞ্চ ভূমিযো পঞ্চ ভূমিযো ঠপেত্ৰা পঞ্চৰীসতিভূমীসু পঞ্চ চিত্তানি জাযন্তি. তং যথা –

দিট্ঠিযা সম্পযুত্তানং, ৰিচিকিচ্ছাযুতং তথা;

পঞ্চ সব্বত্থ জাযন্তি, সুদ্ধাৰাসৰিৰজ্জিতে.

১৯৬.

অপরানি ¶ দুৰে হোন্তি, পঞ্চৰীসতিভূমিসু;

ঠপেত্ৰা নেৰসঞ্ঞঞ্চ, চতস্সোপাযভূমিযো.

চতস্সোপাযভূমিযো নেৰসঞ্ঞানাসঞ্ঞঞ্চ ঠপেত্ৰাযেৰ পঞ্চৰীসতিভূমীসু অপরানি দুৰে চিত্তানি হোন্তি. তং যথা –

ঠপেত্ৰা নেৰসঞ্ঞঞ্চ, চতস্সোপাযভূমিযো;

সেসাসু ততিযারুপ্পজৰনং জাযতি দ্ৰযং.

১৯৭. দ্ৰেপি চিত্তানি জাযন্তি, চতুৰীসতিভূমিসু চতস্সোপাযভূমিযো আকিঞ্চঞ্ঞঞ্চ নেৰসঞ্ঞঞ্চ ঠপেত্ৰা সেসাসু চতুৰীসতিভূমীসু দ্ৰেপি চিত্তানি জাযন্তি. তং যথা –

চতুত্থততিযারুপ্পং, ঠপেত্ৰাপাযভূমিযো;

সেসাসু দুতিযারুপ্প-জৰনং জাযতি দ্ৰযং.

১৯৮. অপাযভূমিযো হিত্ৰা চতস্সো অপাযভূমিযো তিস্সো উপরি অরূপভূমিযো হিত্ৰা ছড্ডেত্ৰা সেসাসু তেৰীসতিভূমীসু দ্ৰেযেৰ পন চিত্তানি হোন্তি. তং যথা –

অপাযভূমিযো ¶ হিত্ৰা, তিস্সোচারুপ্পভূমিযো;

সেসাসু পঠমারুপ্পং, জৰনদ্ৰযং জাযতি.

১৯৯. অরূপে চ অপাযে চ অট্ঠ ভূমিযো ঠপেত্ৰা সেসাসু বাৰীসতিভূমীসু একাদসৰিধং চিত্তং হোতি. তং যথা –

সব্বং রূপঞ্চ ৰিপাকং, ঠপেত্ৰা সিতমানসং;

একাদসেৰ জাযতি, অপাযারূপৰজ্জিতে.

২০০. সুদ্ধাৰাসে ¶ অপাযে চ নৰ ভূমিযো ঠপেত্ৰা সেসাসু একৰীসাসু ভূমীসু নিচ্চম্পি চত্তারো এৰ মানসা হোন্তি. তং যথা –

সোতাপত্তিফলঞ্চেৰ, সকদাগামিফলম্পি চ;

সকদাগামিমগ্গো চ, ঠপেত্ৰাপাযসুদ্ধকে;

অনাগামিমগ্গো চেৰ, একৰীসাসু হোন্তি হি.

২০১. একং সত্তরসস্ৰেৰ, চিত্তং জাযতি ভূমিসু সুদ্ধাৰাসঅপাযারুপ্পভূমিযো ঠপেত্ৰা অৰসেসাসু সত্তরসসু ভূমীসু একং চিত্তং জাযতি. তং যথা –

সুদ্ধাৰাসে অপাযে চ, ঠপেত্ৰারুপ্পভূমিযো;

আদিমগ্গো একো হোতি, সত্তরসসু ভূমিসু.

২০২.

দ্ৰাদসেৰ তু জাযন্তে, একাদসসু ভূমিসু;

ঠপেত্ৰা পন সব্বাপি, ভূমিযো হি মহগ্গতা. –

একূনৰীসতিভূমিযো ঠপেত্ৰা সেসাসু একাদসসু ভূমীসু দ্ৰাদস চিত্তানি জাযন্তি. তং যথা –

দোমনস্সদ্ৰযাপুঞ্ঞপাকা সত্ত চ পুঞ্ঞজং;

ঘানাদিত্তযং সেসাসু, হিত্ৰা সব্বা মহগ্গতা.

২০৩. কামাৰচরদেৰানং ¶ ৰসেন চ মনুস্সানং ৰসেন চ সত্তসু কামাৰচরভূমীসু অট্ঠ চিত্তানি সব্বদা জাযন্তি. তং যথা –

কামে দেৰমনুস্সানং, মহাপাকানি জাযরে;

সদা সত্তসু এতানি, হিত্ৰা তেৰীস ভূমিযো.

২০৪. পঞ্চমজ্ঝানপাকেকো ¶ , জাযতে ছসু ভূমিসু একো পঞ্চমজ্ঝানৰিপাকো ৰেহপ্ফলাদীসু ছসু ভূমীসু জাযতি. চত্তারি পন রূপৰিপাকচিত্তানি তীসু তীসু ভূমীসু জাযন্তি. অযমেত্থাধিপ্পাযো – একো পঠমরূপৰিপাকো ব্রহ্মপারিসজ্জব্রহ্মপুরোহিতমহাব্রহ্মানং তীসু ভূমীসু জাযতি, একো দুতিযরূপৰিপাকো, একো ততিযরূপৰিপাকো চ পরিত্তাভাঅপ্পমাণাভাআভস্সরানং তীসু ভূমীসু জাযতি, একো চতুত্থরূপৰিপাকো পরিত্তসুভঅপ্পমাণসুভসুভকিণ্হানং তীসু ভূমীসু জাযতি.

২০৫. চত্তারি পন চিত্তানি, হোন্তি একেকভূমিসু অরূপাৰচরৰিপাকানং ৰসেন চত্তারি পন চিত্তানি একেকভূমীসু একেকাসু ভূমীসু হোন্তি, ইতি এৰং ইমিনা মযা ৰুত্তপ্পকারেন সব্বাসু ভূমীসু চিত্তুপ্পাদং পরিদীপযে পণ্ডিতো কথেয্য.

২০৬-৭. কুসলাকুসলা কামে কামে ৰীসতি কুসলাকুসলা, তেসং পাকা অহেতুকা তেসং কুসলাকুসলানং অহেতুকা পঞ্চদস ৰিপাকা আৰজ্জনদ্ৰযঞ্চ ইতি এৰং ইমিনা মযা ৰুত্তপ্পকারেন সত্ততিংস মানসা নরকাদীসু চতূসু অপাযেসুপি জাযরে. অৰসেসানি দ্ৰিপঞ্ঞাস চিত্তানি কদাচিপি কিস্মিঞ্চি কালেপি নুপ্পজ্জন্তি. তং যথা –

পঞ্চদসানি ¶ রূপে তু, অরূপে দ্ৰাদসীরিতা;

অট্ঠ লোকুত্তরানেৰ, কামপাকা সহেতুকা.

অট্ঠ মহাক্রিযা চেৰ, হসিতুপ্পাদমানসং;

দ্ৰিপঞ্ঞাসানি চিত্তানি, অপাযেসু ন জাযরে.

২০৮. কামে দেৰমনুস্সানং কামাৰচরে দেৰমনুস্সানং মহগ্গতা নৰ পাকা নেৰ জাযন্তি, অসীতি হদযা মানসা সদা জাযন্তি. তং যথা –

দ্ৰাদসাকুসলানেৰ, কুসলানেকৰীসতি;

সত্তৰীসতি পাকা চ, মহগ্গতৰিৰজ্জিতা.

কামে ¶ দেৰমনুস্সানং, ক্রিযচিত্তানি ৰীসতি;

হোন্তি অসীতি চিত্তানি, ৰিঞ্ঞেয্যানি ৰিভাৰিনা.

২০৯-১২. কামে কামাৰচরে অট্ঠ মহাৰিপাকা দোমনস্সদ্ৰযম্পি চ তথা ঘানাদিৰিঞ্ঞাণত্তযং কুসলৰিপাকং অপুঞ্ঞজা সত্ত পাকা. নত্থি আরুপ্পপাকা চ, রূপাৰচরভূমিযং অরূপপাকা চ চত্তারো রূপাৰচরভূমিযং নত্থি. অযমেত্থাধিপ্পাযো – রূপাৰচরভূমিযং অট্ঠ মহাৰিপাকা কামসুগতিসত্তানং দ্ৰিন্নং ৰিপাকচিত্তত্তা ন হোন্তি, ঝানেন ৰিক্খম্ভিতত্তা দোমনস্সদ্ৰযম্পি নত্থি, ঘানজিৰ্হাকাযপসাদৰিরহিতত্তা কুসলৰিপাকং ঘানাদিত্তযং নত্থি, অনিট্ঠারম্মণানং অভাৰতো সত্ত অকুসলৰিপাকা চ নত্থি, অরূপপাকা চ নত্থি. কস্মা? অরূপানং ৰিপাকচিত্তত্তা. ইমেহি সহ চিত্তেহি ইমেহি চতুৰীসতিচিত্তেহি সহ তযো মগ্গা ফলদ্ৰযং সোতাপত্তিমগ্গো সকদাগামিমগ্গো অনাগামিমগ্গো চ সোতাপত্তিফলসকদাগামিফলানি চ চত্তারো দিট্ঠিসংযুত্তা ৰিচিকিচ্ছাসংযুত্তম্পি চ চত্তারো হেট্ঠিমা পাকা চ সুদ্ধাৰাসে ন লব্ভরে ন লব্ভন্তি. অযমেত্থাধিপ্পাযো – পুথুজ্জনসোতাপন্নসকদাগামিপুগ্গলানং অসাধারণত্তা সুদ্ধো চ আৰাসো, অথ ৰা ¶ ঘোরাতিক্কমট্ঠিতত্তা অনাগামিপুগ্গলা সুদ্ধা নাম, চতুরোঘতিণ্ণত্তা খীণাসৰা সুদ্ধা নাম, তেসং সুদ্ধানং দ্ৰিন্নং উত্তমসত্তানং আৰাসোতিপি সুদ্ধাৰাসো, তস্মিং.

অযমেত্থাধিপ্পাযো – সুদ্ধাৰাসে পন সোতাপত্তিমগ্গসোতাপত্তিফলসকদাগামিমগ্গসকদাগামিফলঅনাগামিমগ্গা ন ৰিজ্জন্তি. কস্মাতি চে? অনাগামিফলট্ঠানংযেৰ তস্মিং উপ্পজ্জনতো চত্তারো দিট্ঠিসংযুত্তা চ ৰিচিকিচ্ছাযুত্তঞ্চ পঞ্চ অকুসলচিত্তানং সোতাপন্নেন ৰিনাসিতত্তা, ইতি তস্মা কারণা ন জাযন্তি. চত্তারো হেট্ঠিমৰিপাকা হেট্ঠিমানং রূপব্রহ্মানং ৰিপাকচিত্তত্তা নত্থি. সেসানি একপঞ্ঞাস চিত্তানি সুদ্ধাৰাসে পন লব্ভন্তি. তং যথা –

দিট্ঠিযা ৰিপ্পযুত্তানি, উদ্ধচ্চসহগতং তথা;

কামপুঞ্ঞানি অট্ঠ চ, রূপপুঞ্ঞানি পঞ্চ ৰা.

অরূপকুসলানেৰ, মগ্গো খীণাসৰস্স চ;

চক্খুসোতমনোধাতু, পুঞ্ঞজা তীরণা দুৰে.

পঞ্চমজ্ঝানপাকো ¶ চ, অনাগামিফলাদযো;

সুদ্ধাৰাসেসু লব্ভন্তি, ক্রিযচিত্তানি ৰীসতি.

রূপাৰচরিকা সব্বে সব্বানি রূপাৰচরানি পঞ্চদস চিত্তানি, কামধাতুযা সব্বে তেৰীসতি ৰিপাকা.

২১৩. দোমনস্সাদিমগ্গো চ দোমনস্সদ্ৰযঞ্চ আদিমগ্গো চ সোতাপত্তিমগ্গো চ, ক্রিযা চ দ্ৰে অহেতুকা পঞ্চদ্ৰারাৰজ্জনহসিতুপ্পাদানি কিরিযানি চাতি তেচত্তালীস চিত্তানি অরূপভূমিযং নত্থি. পঞ্চ রূপাৰচরৰিপাকা রূপীনং ৰিপাকচিত্তত্তা নত্থি. রূপজৰনানি হেট্ঠিমঝানানং ৰিরত্তত্তা নত্থি. চক্খুসোতৰিঞ্ঞাণানি পুঞ্ঞজানি পসাদরহিতত্তা নত্থি. ঘানাদিৰিঞ্ঞাণানি পকতিযাযেৰ নত্থি. কুসলৰিপাকা মনোধাতু চক্খাদিগ্গহিতপঞ্চারম্মণত্তা অরূপানং ধম্মারম্মণত্তা নত্থি, অসতি চক্খাদিৰিঞ্ঞাণে সা চ পুঞ্ঞজা মনোধাতু ¶ তায চ অসতিযা চক্খাদিৰিঞ্ঞাণম্পি নত্থিযেৰ. কিরিযামনোধাতুপি পঞ্চারম্মণত্তাযেৰ নত্থি, হসিতুপ্পাদোপি রূপকাযাভাৰা সিতস্সাভাৰা নত্থি, পুব্বেৰ দিট্ঠসচ্চা অরিযা রূপভূমিকা, তস্মা আদিমগ্গোপি নত্থি.

২১৪. এৰং ভূমিৰসেনেৰ, চিত্তুপ্পত্তিং ৰিভাৰযে এৰং ইমিনা মযা ৰুত্তপ্পকারেন ভূমিৰসেন চিত্তুপ্পত্তিং ৰিভাৰযে ধীরো কথেয্য. তথা এৰং একাদসন্নং পুগ্গলানং ৰসেন চিত্তুপ্পত্তিং ধীরো ৰিভাৰযে কথেয্য.

২১৫.

কুসলাকুসলা কামে,

তেসং পাকা অহেতুকা;

আৰজ্জনদ্ৰযঞ্চাতি,

সত্ততিংসেৰ মানসাতি. –

অযং ৰুত্তত্থা.

২১৬. এৰং চতূস্ৰপাযভূমীসু মনুস্সভূমিযঞ্চাতি পঞ্চভূমীসু অহেতুকস্স সত্তস্স জাযন্তে ¶ উপ্পজ্জন্তি. দ্ৰেপঞ্ঞাসাৰসেসানি, ন জাযন্তি কদাচিপি অৰসেসানি দ্ৰেপঞ্ঞাস চিত্তানি কদাচিপি ন জাযন্তি ন উপ্পজ্জন্তি, তানি সরূপতো ৰুত্তানেৰ.

২১৭. অহেতুকস্স সত্তস্স উপ্পজ্জন্তেহি সত্ততিংসচিত্তেহি সহ দুহেতুকা, চতুমহাৰিপাকা চাতি চত্তালীস চিত্তানি তথা এককং দুহেতুকস্স সত্তস্স জাযন্তি.

২১৮-২৩. সব্বে মহগ্গতা চেৰ সব্বে সত্তৰীসতিৰিধা মহগ্গতা চেৰ সব্বেপি চ অনাসৰা সব্বে অট্ঠ লোকুত্তরা চেৰ চত্তারো তিহেতুকৰিপাকা চ কামে হসিতুপ্পাদো সহেতুকমহাকিরিযা চাতি নৰ ক্রিযাপি চেতি চত্তালীসং তথা অট্ঠ চ দুহেতুনো সত্তস্স ন জাযন্তি.

অযমেত্থাধিপ্পাযো ¶ – দুহেতুনো রূপারূপসমাপত্তিযা অসমত্থতায সত্তৰীস মহগ্গতা ন জাযন্তি, মগ্গফলং অধিগন্তুং অসমত্থতায অট্ঠ লোকুত্তরা ন জাযন্তি, তিহেতুকৰিপাকা তিহেতুকানং সত্তানং ৰিপাকচিত্তত্তা ন জাযন্তি, নৰ কিরিযানি খীণাসৰানংযেৰ উপ্পজ্জমানত্তা ন জাযন্তীতি. কামাৰচরসত্তস্স, তিহেতুপটিসন্ধিনো পুথুজ্জনস্স চতুপঞ্ঞাস মানসা জাযন্তি. কতমানি তানি? দুহেতুকস্স ৰুত্তানি চত্তালীস চিত্তানি তথা একঞ্চ কামধাতুযং চত্তারো ঞাণসম্পযুত্তৰিপাকা রূপারূপেসু নৰ পুঞ্ঞানি চাতি চতুপঞ্ঞাস মানসা জাযন্তি. পুথুজ্জনস্স তিহেতুনো কামসত্তস্স পঞ্চতিংস চিত্তানি ন জাযরে ন জাযন্তি. তং যথা –

আৰজ্জনদ্ৰযং হিত্ৰা, অট্ঠারস ক্রিযাপি চ;

নৰ মহগ্গতা পাকা, অট্ঠ লোকুত্তরানি চ.

কামপুথুজ্জনস্সেৰ, তিহেতুপটিসন্ধিনো;

পঞ্চতিংসেৰ চিত্তানি, ন জাযন্তি কদাচিপি.

ছদেৰেসু মনুস্সেসু চাতি সত্তসু ভূমীসু জাতস্স সোতাপন্নস্স দেহিনো সত্তস্স পঞ্ঞাস চিত্তানি জাযন্তি. ইতি ৰচনং ধীরো নিদ্দিসে কথেয্য. তং যথা –

দিট্ঠিযা ¶ ৰিপ্পযুত্তানি, দোমনস্সদ্ৰযম্পি চ;

উদ্ধচ্চসহিতঞ্চেৰ, কামপুঞ্ঞানি অট্ঠ চ.

নৰ মহগ্গতপুঞ্ঞানি, আৰজ্জনদ্ৰযম্পি চ;

সব্বে কামৰিপাকা চ, সোতাপত্তিফলম্পি চ.

অস্স সোতাপন্নস্স নৰতিংসেৰ চিত্তানি ন উপ্পজ্জন্তি. ইতি ৰচনং ধীরো দীপযে দেসেয্য. তং যথা –

আৰজ্জনদ্ৰযং হিত্ৰা, অট্ঠারস ক্রিযাপি চ;

নৰ মহগ্গতা পাকা, সত্ত লোকুত্তরানি চ.

দিট্ঠিযা ¶ সম্পযুত্তানি, ৰিচিকিচ্ছাযুতং তথা;

নৰতিংস ন জাযন্তি, সোতাপন্নস্স দেহিনো.

২২৪. পঠমং ফলং ঠপেত্ৰা সোতাপন্নস্স পুগ্গলস্স ৰুত্তানি চিত্তানি অত্তনো সকদাগামিনো ফলেন সকদাগামিফলেন সহ সকদাগামিপুগ্গলস্স সিযুং.

২২৫. সোতাপন্নস্স ৰুত্তানি, ঠপেত্ৰা পটিঘদ্ৰযং দুতিযঞ্চ ফলং সকদাগামিফলঞ্চ হিত্ৰা অত্তনো অনাগামিফলেন সহ সোতাপন্নস্স সত্তস্স ৰুত্তানি যানি অট্ঠচত্তালীস চিত্তানি অত্থি, তানি অনাগামিস্স সত্তস্স জাযন্তি. ইতি ৰচনং ধীরো ৰিনিদ্দিসে.

২২৬. কতি চিত্তানি জাযন্তি, কামে অরহতো পন কামে সত্তসু কামভূমীসু জাতস্স অরহতো খীণাসৰস্স কতি চিত্তানি জাযন্তি? চত্তারি চ চত্তারীসঞ্চ চিত্তানি কামে সত্তসু কামভূমীসু জাতস্স অরহতো সিযুং ভৰেয্যুং. তং যথা –

তেৰীস কামপাকানি, ক্রিযচিত্তানি ৰীসতি;

অরহত্তফলেনেৰ, কামে অরহতো সিযুং.

২২৭. মগ্গট্ঠানং ¶ চতুন্নম্পি তেসং পুগ্গলানং সকং সকং মগ্গচিত্তং সিযা ভৰেয্য. একচিত্তক্খণা হি তে হি সচ্চং তং মযা ৰুত্তং ৰচনং. তে মগ্গা একচিত্তক্খণা.

২২৮. পুথুজ্জনস্স তীস্ৰেৰ, পঠমজ্ঝানভূমিসু তীসু এৰ পঠমজ্ঝানভূমীসু জাতস্স পুথুজ্জনস্স ব্রহ্মুনো পঞ্চতিংস এৰ চিত্তানি জাযন্তি. ইতি ৰচনং ধীরো ৰিনিদ্দিসে উচ্চারেয্য. তং যথা –

দোমনস্সদ্ৰযং হিত্ৰা, অপুঞ্ঞানি দসেৰ চ;

কামপুঞ্ঞানি অট্ঠেৰ, নৰ পুঞ্ঞা মহগ্গতা.

চক্খুসোতদ্ৰযং ¶ পুঞ্ঞপাকং সন্তীরণদ্ৰযং;

আৰজ্জনদ্ৰযঞ্চেৰ, পুঞ্ঞজং সম্পটিচ্ছনং;

পঠমজ্ঝানপাকো চ, পঞ্চতিংসেৰ জাযরে.

২২৯-২৩৪. ঘানাদীসু পসাদেসু পৰত্তং কুসলৰিপাকং ৰিঞ্ঞাণত্তযং সত্ত অপুঞ্ঞজা পাকা অট্ঠ মহাপাকা তথা উপরিঝানভূমীসু জাতা পাকা আরুপ্পা চত্তারো ৰিপাকাপি চ দোমনস্সদ্ৰযম্পি চ আৰজ্জনদ্ৰযৰজ্জা অট্ঠারস ক্রিযা চেৰ অট্ঠ লোকুত্তরানি চ এতানি চতুপঞ্ঞাস চিত্তানি পঠমজ্ঝানভূমীসু তীসু নিব্বত্তস্স পুথুজ্জনস্স দেহিনো সত্তস্স ন চ লব্ভরে ন লব্ভন্তি. তাসু তীসু ভূমীসু নিব্বত্তস্স পুথুজ্জনস্স ব্রহ্মুনো ৰুত্তেসু চিত্তেসু অপুঞ্ঞপঞ্চকং হিত্ৰা তত্থ তীসু পঠমজ্ঝানভূমীসু নিব্বত্তস্স সোতাপন্নস্স ব্রহ্মুনো পঠমফলেন সহ একতিংস চিত্তানি জাযরে জাযন্তি. সকদাগামিনো তত্থ তীসু পঠমজ্ঝানভূমীসু জাতস্স সকদাগামিনো ব্রহ্মুনো তেসু চিত্তেসু পঠমং ফলং ঠপেত্ৰা সকদাগামিফলং পক্খিপিত্ৰা একতিংসেৰ চিত্তানি জাযরে. অনাগামিস্স তত্থেৰ তীসু পঠমজ্ঝানভূমীসু এৰ জাতস্স অনাগামিস্স দুতিযং ফলং ঠপেত্ৰা অত্তনো ফলচিত্তেন সহ একতিংসেৰ চিত্তানি জাযন্তি.

২৩৫.

ৰিঞ্ঞাণং চক্খুসোতানং, পুঞ্ঞজং সম্পটিচ্ছনং;

সন্তীরণদ্ৰযঞ্চেৰ, ক্রিযচিত্তানি ৰীসতি.

২৩৬-৭. অরহত্তফলং ¶ পঠমজ্ঝানতো সম্ভৰো পাকো সত্তৰীসতি চিত্তানি অরহন্তস্স খীণাসৰস্স জাযরে. পুথুজ্জনস্স তীস্ৰেৰ তীসু এৰ দুতিযজ্ঝানভূমীসু জাতস্স পুথুজ্জনস্স ব্রহ্মুনো দুতিযজ্ঝানততিযজ্ঝানপাকেন সহ ছত্তিংস চিত্তানি জাযন্তি. তং যথা –

দোমনস্সদ্ৰযং ¶ হিত্ৰা, অপুঞ্ঞানি দসেৰ চ;

কামপুঞ্ঞানি অট্ঠেৰ, নৰ পুঞ্ঞমহগ্গতা.

চক্খুসোতদ্ৰযং পুঞ্ঞপাকং সন্তীরণদ্ৰযং;

আৰজ্জনদ্ৰযঞ্চেৰ, পুঞ্ঞজং সম্পটিচ্ছনং.

দুতিযজ্ঝানপাকেন, ততিযজ্ঝানপাকতো;

ছত্তিংসেৰ চ চিত্তানি, দুতিযজ্ঝানদেহিনো.

২৩৮-২৪১. পুথুজ্জনস্স ৰুত্তেসু, হিত্ৰা ৰাপুঞ্ঞপঞ্চকং অত্তনো ফলেন সহ বাত্তিংস চিত্তানি সোতাপন্নস্স জাযন্তি. সোতাপন্নস্স ৰুত্তেসু, ঠপেত্ৰা পঠমং ফলং সোতাপন্নস্স ৰুত্তেসু পঠমং ফলং ঠপেত্ৰা অত্তনো ফলচিত্তেন সহ বাত্তিংস চিত্তানি, সকদাগামিস্স ৰুত্তেসু দুতিযং ফলং ঠপেত্ৰা অনাগামিফলেন সহ বাত্তিংসেৰ চিত্তানি অস্স অনাগামিনো ভৰন্তি. অরহন্তস্স তীস্ৰেৰ, অট্ঠৰীসতি অত্তনো তীসু এৰ দুতিযজ্ঝানভূমীসু জাতস্স অরহতো অত্তনো ফলেন দুতিযজ্ঝানততিযজ্ঝানপাকতো পাকেহি সহ অট্ঠৰীসতি চিত্তানি হোন্তি. তং যথা –

ৰিঞ্ঞাণং চক্খুসোতানং, পুঞ্ঞজং সম্পটিচ্ছনং;

সন্তীরণদ্ৰযঞ্চেৰ, ক্রিযচিত্তানি ৰীসতি.

অরহত্তফলং পাকো, দুতিযজ্ঝানসম্ভৰো;

ততিযজ্ঝানপাকো চ, অট্ঠৰীসতি মানসা.

২৪২-৬. পরিত্তকসুভাদীনং, দেৰানং তীসু ভূমীসু চতুত্থজ্ঝানৰিপাকেন সহ পঞ্চতিংসেৰ চিত্তানি ¶ জাযন্তি. সোতাপন্নস্স তত্থেক-তিংস চিত্তানি জাযরেতত্থ তাসু তীসু পরিত্তকসুভাদীনং ভূমীসু সোতাপন্নস্স চ একতিংস চিত্তানি জাযরে. যথা এৰং সকদাগামিনো একতিংস চিত্তানি জাযরে. তথা অনাগামিনো একতিংস জাযরে. তত্থেৰ ¶ তাসু তীসু ভূমীসু এৰ জাতস্স খীণাসৰস্স সত্তৰীসতি মানসা হোন্তি, তথা এৰং ৰেহপ্ফলে ৰেহপ্ফলভূমিযং জাতানং পুথুজ্জনসেক্খানং পঞ্চন্নং সব্বেসং পুগ্গলানং মানসা হোন্তি. পঞ্চসু সুদ্ধাৰাসিকভূমীসু জাতস্স অনাগামিনো সত্তস্স একতিংসেৰ চিত্তানি হোন্তি. ইতি ৰচনং ধীরো পরিদীপযে দেসেয্য. তত্থেৰ তাসু সুদ্ধাৰাসভূমীসু এৰ জাতস্স অরহতো সত্তৰীসতি মানসা হোন্তি. এৰং ইমিনা মযা ৰুত্তপ্পকারেন রূপীসু পঞ্চদসসু রূপিভূমীসু জাতানং সব্বেসং পুগ্গলানং চিত্তানি ৰিভাৰিনা ধীরেন ৰিঞ্ঞেয্যানি জানিতব্বানি.

২৪৭. চতুৰীসতি চিত্তানি, পঠমারুপ্পভূমিযং পঠমআরুপ্পভূমিযং জাতস্স পুথুজ্জনস্স চতুৰীসতি চিত্তানি জাযন্তি. ইতি ৰচনং ধীরো ৰিনিদ্দিসে. তং যথা –

দোমনস্সদ্ৰযং হিত্ৰা, অপুঞ্ঞানি দসেৰ চ;

কামপুঞ্ঞানি অট্ঠেৰ, আরুপ্পকুসলানি চ;

পঠমারুপ্পপাকো চ, ক্রিযাৰোট্ঠব্বনম্পি চ.

২৪৮-২৫১. সোতাপন্নস্স তত্থেৰ, ঠপেত্ৰাপুঞ্ঞপঞ্চকংতত্থ তিস্সং পঠমারুপ্পভূমিযং এৰ সোতাপন্নস্স পুগ্গলস্স অপুঞ্ঞপঞ্চকং হিত্ৰা অত্তনো ফলেন সহ ৰীসতি চিত্তানি হোন্তি. তথা তত্থ তিস্সং পঠমারুপ্পভূমিযং সকদাগামিনো, অনাগামিনোপি চ পুগ্গলস্স পুব্বং পুব্বং ফলং ৰিনা ৰজ্জেত্ৰা অত্তনো ফলেন সহ ৰীসতি চিত্তানি জাযন্তি. খীণাসৰস্স তত্থেৰ তত্থ তিস্সং পঠমারুপ্পভূমিযং এৰ জাতস্স খীণাসৰস্স দস পঞ্চ মানসা চ জাযন্তি. তং যথা –

মহাক্রিযানি অট্ঠেৰ, চত্ৰারুপ্পক্রিযানি চ;

অরহত্তফলং পাকো, ৰোট্ঠব্বঞ্চাপি মানসং.

দুতিযারুপ্পভূমিযং ¶ জাতস্স পুথুজ্জনস্স সত্তস্স তেৰীসতি চিত্তানি হোন্তি. তং যথা –

দোমনস্সদ্ৰযং ¶ হিত্ৰা, অপুঞ্ঞানি দসেৰ চ;

কামপুঞ্ঞানি অট্ঠেৰ, পুঞ্ঞারূপূপরী তযো;

দুতিযারুপ্পপাকো চ, ৰোট্ঠব্বঞ্চাপি মানসং.

ইতি এৰং ইমিনা পকারেন ৰত্ৰা কথেত্ৰা ধীরো পণ্ডিতো ৰিভাৰযে দেসেয্য. এত্থ এতিস্সং দুতিযারুপ্পভূমিযং জাতানং তিণ্ণন্নং সেক্খানম্পি একূনৰীসতি চিত্তানি হোন্তি. তং যথা –

দিট্ঠিযা ৰিপ্পযুত্তানি, উদ্ধচ্চসহিতং তথা;

কামপুঞ্ঞানি অট্ঠেৰ, পুঞ্ঞারূপূপরী তযো.

দুতিযারুপ্পপাকো চ, ৰোট্ঠব্বঞ্চাপি মানসং;

সকসকফলেনেৰ, চিত্তানেকূনৰীসতি.

২৫২. চুদ্দসেৰ তু চিত্তানি দুতিযারুপ্পভূমিযং জাতস্স খীণাসৰস্স কিরিযচিত্তানি দ্ৰাদস একো পাকো অরহত্তফলঞ্চাতি চুদ্দসেৰ চিত্তানি হোন্তি. তং যথা –

মহাক্রিযানি অট্ঠেৰ, ক্রিযারূপূপরী তযো;

ৰোট্ঠব্বঞ্চ সকো পাকো, অরহত্তফলম্পি চ.

২৫৩. পুথুজ্জনস্স সত্তস্স, ততিযারুপ্পভূমিযং ততিযঅরূপভূমিযং জাতস্স পুথুজ্জনস্স সত্তস্স বাৰীসতি চিত্তানি ভৰন্তি. ইতি ৰচনং ধীরো পকাসযে. তং যথা –

দোমনস্সদ্ৰযং হিত্ৰা, অপুঞ্ঞানি দসেৰ চ;

কামপুঞ্ঞানি অট্ঠেৰ, পুঞ্ঞারূপূপরী দুৰে;

ততিযারুপ্পপাকো চ, ৰোট্ঠব্বঞ্চাপি মানসং.

২৫৪-৫. অট্ঠারসেৰ চিত্তানি, সোতাপন্নস্স পুগ্গলস্স অট্ঠারস এৰ চিত্তানি জাযরে. তং যথা –

দিট্ঠিযা ¶ ¶ ৰিপ্পযুত্তানি, উদ্ধচ্চসহিতং তথা;

মহাপুঞ্ঞানি অট্ঠেৰ, পুঞ্ঞারূপূপরী দুৰে.

অট্ঠারসেৰ পাকেন, সোতাপত্তিফলেন চ;

ৰোট্ঠব্বঞ্চাপি মানসং, সোতাপন্নস্স জাযরে.

সকদাগামিনো পঠমং ফলং ঠপেত্ৰা অত্তনো ফলেন তানি অট্ঠারস চিত্তানি হোন্তি. সকদাগামিনো ৰুত্তেসু চিত্তেসু দুতিযং ফলং ঠপেত্ৰা অত্তনো ফলেন সহ অট্ঠারস চিত্তানি এৰ অনাগামিস্স জাযরে.

২৫৬. তেরসেৰ চ চিত্তানি, ততিযারুপ্পভূমিযং ততিযঅরূপভূমিযং জাতস্স খীণাসৰস্স তেরসেৰ চিত্তানি জাযন্তি. ইতি ৰচনং ধীরো ৰিনিদ্দিসে. তং যথা –

মহাক্রিযানি অট্ঠেৰ, ক্রিযারূপূপরী দুৰে;

অরহত্তফলং পাকো, ৰোট্ঠব্বঞ্চাপি মানসং.

২৫৭. একৰীসতি চিত্তানি, চতুত্থারুপ্পভূমিযং চতুত্থঅরূপভূমিযং জাতস্স পুথুজ্জনস্স সত্তস্স একৰীসতি চিত্তানি জাযন্তি. ইতি ইদং ৰচনং ধীরো ৰিনিদ্দিসে. তং যথা –

দোমনস্সদ্ৰযং হিত্ৰা, অপুঞ্ঞানি দসেৰ চ;

কামপুঞ্ঞানি অট্ঠেৰ, ৰোট্ঠব্বঞ্চাপি মানসং;

চতুত্থারুপ্পপুঞ্ঞঞ্চ, সপাকেনেকৰীসতি.

২৫৮-২৬০. সোতাপন্নস্স সত্তস্স, সত্তরস চিত্তানি ধীরো পকাসযে. তং যথা –

দিট্ঠিযা ৰিপ্পযুত্তানি, উদ্ধচ্চসহিতং তথা;

কামপুঞ্ঞানি অট্ঠেৰ, সোতাপত্তিফলম্পি চ;

চতুত্থারুপ্পপুঞ্ঞঞ্চ, সপাকো ৰোট্ঠব্বম্পি চ.

সকদাগামিনো ¶ পঠমং ফলং ঠপেত্ৰা তানি এৰ চিত্তানি সফলেন হোন্তি. সকদাগামিনো ৰুত্তেসু চিত্তেসু দুতিযং ¶ ফলং ঠপেত্ৰা অত্তনো ফলেন সত্তরস মানসা অনাগামিস্স হোন্তি. দ্ৰাদসেৰ তু চিত্তানি, চতুত্থারুপ্পভূমিযং জাতস্স অরহন্তস্স দ্ৰাদস এৰ চিত্তানি জাযন্তি. তং যথা –

মহাক্রিযানি অট্ঠেৰ, ৰোট্ঠব্বঞ্চাপি মানসং;

চতুত্থঞ্চ ক্রিযারূপং, পাকো অরহতো ফলং.

ইতি এৰং ইমিনা মযা ৰুত্তপ্পকারেন পুগ্গলানং ৰসেন ভূমীসু চিত্তপ্পৰত্তিং ৰিদূ ধীরো ৰিভাৰযে.

২৬১-২. হেট্ঠিমানং অরূপীনং, ব্রহ্মানং উপরূপরি জাতা অরূপকুসলা চেৰ কিরিযাপি চ উপ্পজ্জন্তি. উদ্ধং উদ্ধং ভাগে জাতানং অরূপীনং ব্রহ্মানং হেট্ঠিমা হেট্ঠিমা আরুপ্পা হেট্ঠাভাগে জাতা অরূপাৰচরা পন নেৰ জাযন্তি. কস্মা কারণাতি? কির মযা সুতং, হেট্ঠিমঝানেসু দিট্ঠাদীনৰতো দিট্ঠদোসভাৰতো নেৰ জাযন্তি.

২৬৩-৫. ঠপেত্ৰা পঠমং মগ্গং সোতাপত্তিমগ্গং ঠপেত্ৰা কুসলানুত্তরা তযো তযো অনুত্তরা কুসলা তযো মগ্গা, কামাৰচরপুঞ্ঞানি অট্ঠ, তথা দস অপুঞ্ঞানি চিত্তানি, অরূপপুঞ্ঞানি চত্তারি. সব্বে পাকা অনুত্তরা সব্বানি লোকুত্তরফলানি, পঠমারুপ্পপাকো চ নৰ কামকিরিযাপি চ, অরূপাপি সব্বা কিরিযা, এতানি পন তেচত্তালীস মানসা পঠমারুপ্পভূমিযং উপ্পজ্জন্তি.

২৬৬-৭. সব্বো তেৰীসতিকামৰিপাকো, সব্বো পন্নরসৰিধো মহগ্গতো রূপো চিত্তুপ্পাদো, মনোধাতু কিরিযামনোধাতু, দোমনস্সদ্ৰযম্পি চ আদিমগ্গো চ তথা উপরি জাতা তযো অরূপপাকা চাতি ছচত্তালীস চিত্তানি এত্থ এতিস্সং পঠমারুপ্পভূমিযং নত্থি.

২৬৮-৯. ৰুত্তেসু ¶ পন চিত্তেসু, পঠমারুপ্পভূমিযং ৰুত্তেসু চিত্তেসু কুসলপাককিরিযাৰসেন পঠমারুপ্পত্তযং ঠপেত্ৰা অত্তনো পাকো চাতি চত্তালীস চিত্তানি দুতিযারুপ্পভূমিযং ¶ জাযন্তি. এৰং ইমিনা মযা ৰুত্তপ্পকারেন সেসদ্ৰযে পঠমদুতিযারুপ্পতো সেসআকিঞ্চঞ্ঞাযতননেৰসঞ্ঞানাসঞ্ঞাযতনভূমিদ্ৰযে হেট্ঠিমহেট্ঠিমং কুসলৰিপাককিরিযাৰসেন হেট্ঠাভাগে জাতং অরূপত্তযং হিত্ৰা অত্তনো অত্তনো পাকা এৰং ইমিনা মযা ৰুত্তপ্পকারেন পণ্ডিতেন ঞেয্যা জানিতব্বা.

২৭০-৩. চত্তারো চ অনাসৰা, ৰিপাকা চত্তারি লোকুত্তরফলচিত্তানি, সব্বে সব্বানি চ চতূসু আরুপ্পভূমীসু হোন্তি. ৰোট্ঠব্বনেন চিত্তেন সহ কামে অট্ঠ মহাকিরিযা, চতস্সো অরূপকিরিযাপি চাতি তেরস এৰ কিরিযা পঠমারুপ্পভূমিযং জাতস্স খীণাসৰস্স জাযন্তি. দুতিযারুপ্পভূমিযং জাতস্স খীণাসৰস্স পঠমারুপ্পকিরিযং হিত্ৰা দ্ৰাদস এৰ কিরিযা হোন্তি. ততিযারুপ্পভূমিযং জাতস্স খীণাসৰস্স পঠমদুতিযারুপ্পকিরিযানি হিত্ৰা একাদস কিরিযা হোন্তি. চতুত্থারুপ্পভূমিযং জাতস্স খীণাসৰস্স পঠমদুতিযততিযারুপ্পকিরিযানি হিত্ৰা দসেৰ কিরিযা ঞেয্যা জানিতব্বা.

২৭৪.

অরহতো পন চিত্তানি, হোন্তি একূনৰীসতি;

অরহত্তং ক্রিযা সব্বা, ঠপেত্ৰাৰজ্জনদ্ৰযং.

আৰজ্জনদ্ৰযং ঠপেত্ৰা সব্বা কিরিযা, অরহত্তফলঞ্চাতি একূনৰীসতি চিত্তানি অরহতো পন হোন্তি. আৰজ্জনদ্ৰযং কিঞ্চাপি খীণাসৰস্স হোন্তি, এৰম্পি অঞ্ঞেসং পুথুজ্জনসেক্খানম্পি হোন্তিযেৰ. একূনৰীসতি চিত্তানি খীণাসৰস্স এৰ হোন্তি, ন অঞ্ঞেসন্তি ঞাপনত্থং ‘‘আৰজ্জনদ্ৰযং ঠপেত্ৰা’’তি ৰুত্তং.

২৭৫-৬. চতুন্নং ¶ ফলট্ঠানং পুগ্গলানঞ্চ তিহেতুকপুথুজ্জনে চ তেরসেৰ চিত্তানি ভৰন্তি. ইতি ৰচনং ধীরো পকাসযে. তং যথা – চত্তারো ঞাণসম্পযুত্তা মহাৰিপাকানি, নৰ রূপারূপপাকা চ ইমে তেরসেৰ চিত্তানি ভৰন্তি.

২৭৭-৯. চতুন্নং ফলট্ঠানং পুগ্গলানঞ্চ দুহেতুকপুথুজ্জনে চ ঞাণপরিহীনানি চত্তারি ৰিপাকানি এৰ জাযরে. পুথুজ্জনানং তিণ্ণম্পি, চতুন্নং অরিযদেহিনং অরিযগতানং সত্তন্নং পুগ্গলানং ¶ সত্তরসেৰ চিত্তানি ভৰন্তি. তং যথা – দুৰে পঞ্চৰিঞ্ঞাণানি, মনোধাতুত্তযসন্তীরণানি, ৰোট্ঠব্বনঞ্চ ইমে সত্তরস এৰ হোন্তি.

২৮০-৫. হেট্ঠা তিণ্ণং ফলট্ঠানং, তিহেতুকপুথুজ্জনে চতুন্নং পুগ্গলানং মহগ্গতানি এৰ কুসলানি হোন্তি. তিণ্ণং পুথুজ্জনানঞ্চ, আদিতো তিণ্ণং অরিযানং হেট্ঠা অরিযানং তেরসেৰ চিত্তানি উপ্পজ্জন্তি. ইতি ৰচনং ধীরো নিদ্দিসে. অট্ঠেৰ কামপুঞ্ঞানি, অপুঞ্ঞতো অকুসলৰসেন দিট্ঠিহীনা চত্তারো চিত্তুপ্পাদাপি, উদ্ধচ্চসম্পযুত্তঞ্চাতি তেরস চিত্তানি হোন্তি. হেট্ঠা দ্ৰিন্নং ফলট্ঠানং সোতাপন্নসকদাগামিপুগ্গলানং সব্বপুথুজ্জনে অহেতুকদুহেতুকতিহেতুকপুথুজ্জনে দোমনস্সযুত্তং দ্ৰযমেৰ চিত্তং জাযতে. তিণ্ণং পুথুজ্জনানঞ্চ পঞ্চ এৰ জাযরে. তং যথা –

চত্তারি দিট্ঠিযুত্তানি, ৰিচিকিচ্ছাযুতম্পি চ;

মগ্গট্ঠানং চতুন্নম্পি, মগ্গচিত্তং সকং সকং.

তেসং চতুন্নং মগ্গট্ঠানং পুগ্গলানং সকং সকং একমেৰ মগ্গচিত্তং ভৰে ভৰেয্য. ইতি এৰং ইমিনা মযা ৰুত্তপ্পকারেন ধীরো পণ্ডিতো ৰিভাৰযে চিত্তপ্পৰত্তিং পকাসযে.

২৮৬-৯. মযা ভৰেসু চিত্তানং, পুগ্গলানং ৰসেন চ. ভৰেসু সব্বভৰেসু চিত্তানং, পুগ্গলানং ৰসেন চ চিত্তপ্পৰত্তি ভিক্খূনং ¶ আভিধম্মিকভিক্খূনং পাটৰত্থায ছেকভাৰায মযা পকাসিতা. এৰং সব্বমিদং চিত্তং, ভূমিপুগ্গলভেদতো এৰং ইমিনা মযা ৰুত্তপ্পকারেন ভূমিপুগ্গলভেদতো ইদং সব্বং চিত্তং বহুধাপি চ বহুপ্পকারম্পি চ হোতি. ইতি গহণং ৰিভাৰিনা ৰিঞ্ঞাতব্বং. সক্কা ৰুত্তানুসারেন মযা ৰুত্তস্স অনুসারেন ভেদো চিত্তভেদো ৰিভাৰিনা ঞাতুং ৰিজানিতুং সক্কা. গন্থৰিত্থারভীতেন মযা ইদং চিত্তপ্পৰত্তিদীপকৰচনং সংখিত্তং, পুব্বাপরং ৰিলোকেত্ৰা, চিন্তেত্ৰা চ পুনপ্পুনং অত্থং উপপরিক্খিত্ৰা ৰিভাৰিনা গহেতব্বং.

২৯০. ইমঞ্চাভিধম্মাৰতারং সুসারং, ৰরং সত্তমোহন্ধকারপ্পদীপং ইমঞ্চ অভিধম্মাৰতারপ্পকরণং সুসারং সুন্দরসারভূতং ৰরং সত্তঅন্ধকারসদিসে মোহে পদীপং পজ্জোতপ্পদীপং ¶ যো নরো সাধুকং চিন্তেতি ৰাচেতিপি, তং নরং রাগদোসা চিরং চিরকালং নোপযন্তি ন উপগচ্ছন্তি.

ইতি অভিধম্মাৰতারটীকায

ভূমিপুগ্গলচিত্তুপ্পত্তিনিদ্দেসৰণ্ণনা নিট্ঠিতা.

পঞ্চমো পরিচ্ছেদো.

৬. ছট্ঠো পরিচ্ছেদো

আরম্মণৰিভাগৰণ্ণনা

২৯১.

এতেসং পন চিত্তানং, আরম্মণমিতো পরং;

দস্সযিস্সামহং তেন, ৰিনা নত্থি হি সম্ভৰো.

ইতো পরং ইতো পরিচ্ছেদতো পরং অহং এতেসং পন চিত্তানং আরম্মণং দস্সযিস্সামি. হি কস্মা? তেন ৰিনা তং আরম্মণং ৰজ্জেত্ৰা চিত্তানং সম্ভৰো নত্থি যস্মা কারণা, তস্মা কারণা দস্সযিস্সামি.

২৯২.

রূপং ¶ সদ্দং গন্ধং রসং, ফোট্ঠব্বং ধম্মমেৰ চ;

ছধা আরম্মণং আহু, ছল়ারম্মণকোৰিদা.

ছল়ারম্মণেসু ছেকা পণ্ডিতা আরম্মণং ছধা ছপ্পকারং আহু কথেসুং.

২৯৩. তত্থ ভূতে উপাদায. তত্থ তেসু আরম্মণেসু ভূতে উপাদায ভূতে পটিচ্চ ৰণ্ণো চতুসমুট্ঠিতো ¶ কম্মচিত্তউতুআহারসঙ্খাতেহি চতূহি পচ্চযেহি সমুট্ঠিতো নিব্বত্তো নিদস্সনেন সহ পৰত্তো পটিঘেন সহ পৰত্তো রূপারম্মণসঞ্ঞিতো.

২৯৪. দুৰিধোপি সমুদ্দিট্ঠো, সদ্দো চিত্তোতুসম্ভৰো সদ্দো দুৰিধোপি মুনিনা সমুদ্দিট্ঠো চিত্তোতুসম্ভৰো, সৰিঞ্ঞাণকসদ্দোৰ চিত্তসমুট্ঠিতো হোতি. কথং? ৰচীভেদকচিত্তেন ভূতায জাতায ভূমিযা পথৰীধাতুযা ৰিকারতা পথৰীলক্খণভাৰতো অতিথদ্ধলক্খণতা ৰিকারতা নাম. সা ৰচীৰিঞ্ঞত্তি ৰিঞ্ঞাযতীতি ৰিঞ্ঞত্তিযা উপাদিণ্ণঘট্টনস্স কম্মজপথৰীধাতুযা ঘট্টনস্স কারণং চিত্তজপথৰীধাতুযা কম্মজপথৰীধাতুযা ঘট্টনঞ্চ সদ্দো চ অপুব্বং অচরিমং হোতি.

২৯৫. অৰিঞ্ঞাণকসদ্দো যো সো অৰিঞ্ঞাণকসদ্দো উতুসমুট্ঠিতো হোতি. অযং দুৰিধোপি সদ্দো সদ্দারম্মণতং গতো সদ্দারম্মণভাৰং পত্তো.

২৯৬. ধরীযতীতি গচ্ছন্তো গচ্ছন্তো জনেহি ধরীযতেতি গন্ধো. গমু সপ্প গতিম্হি, ধর ধারণে. সূচনতো অত্তনো সাধারণস্স পুপ্ফাদিনো ৰত্থুস্স পকাসনতোপি ৰা গন্ধো নাম. গন্ধ সূচনে. অযং গন্ধো চতূহি সমুট্ঠানং এতস্সাতি চতুসমুট্ঠানো. গন্ধারম্মণসম্মতো.

২৯৭. রসমানা ¶ রসন্তীতি, রসোতি পরিকিত্তিতো জনা রসমানা যং ধম্মজাতং রসন্তি অনুভৰন্তি, ইতি যস্মা কারণা, তস্মা কারণা রসো ইতি রসো নাম পণ্ডিতেহি পরিকিত্তিতো, সো রসো চতুসম্ভূতো রসারম্মণনামকো.

২৯৮. ফুসীযতীতি ফোট্ঠব্বং যং ধম্মজাতং জনেহি ফুসীযতীতি তস্মা ফোট্ঠব্বং, পথৰীতেজৰাযৰো. তং ফোট্ঠব্বং চতুসম্ভূতং ফোট্ঠব্বারম্মণং মতং.

২৯৯. সব্বং নামঞ্চ রূপঞ্চ, হিত্ৰা রূপাদিপঞ্চকং রূপাদিপঞ্চকং হিত্ৰা সব্বং নামঞ্চ চিত্তচেতসিকনিব্বাননামঞ্চ রূপঞ্চ পঞ্চপসাদসুখুমরূপঞ্চ লক্খণানি চ অনিচ্চদুক্খঅনত্তলক্খণানি চ পঞ্ঞত্তি চ ধম্মারম্মণসঞ্ঞিতং.

৩০০. ছারম্মণানি ¶ লব্ভন্তি, কামাৰচরভূমিযং কামাৰচরভূমিযং ছারম্মণানি লব্ভন্তি. তীণি রূপাৰচরে রূপসদ্দধম্মারম্মণৰসেন লব্ভন্তি. অরূপে পন একেকং ধম্মারম্মণং লব্ভতি.

৩০১-৩. খণৰত্থুপরিত্তত্তা, আপাথং ন ৰজন্তি যে যে রূপাদযো পঞ্চ ৰিসযা খণৰত্থুপরিত্তত্তা পঞ্চারম্মণানং খণস্স পরিত্তত্তা মন্দত্তা তেসং অপ্পাযুকত্তা ৰত্থুপরিত্তত্তা পঞ্চারম্মণানং অতিখুদ্দকৰত্থুকত্তা আপাথং পঞ্চদ্ৰারেসু পাকটভাৰং ন ৰজন্তি, পঞ্চপসাদেসু ঘট্টনকিচ্চং ন সাধেন্তি, তে রূপাদযো পঞ্চ ৰিসযা ধম্মারম্মণং হোন্তি. ইতি যেসং একচ্চানং আচরিযানং মতং হোতি. কিরাতি অনুস্সৰনত্থে নিপাতো. তে পটিক্খিপিতব্বাৰ তে এৰং ৰাদিনো একচ্চে আচরিযা পটিক্খিপিতব্বা, মযা পটিসেধিতব্বা. কস্মা? চক্খুৰিঞ্ঞাণং সোতৰিঞ্ঞাণস্স গোচরভূতং সদ্দং ন পটিঅনুভোতি, সোতৰিঞ্ঞাণং চক্খুৰিঞ্ঞাণস্স গোচরভূতং ¶ রূপং ন পটিঅনুভোতি. ইতি অঞ্ঞমঞ্ঞস্স গোচরং নেৰ পচ্চনুভোন্তানং তেসং পঞ্চন্নং চক্খুৰিঞ্ঞাণাদীনং ৰিঞ্ঞাণানং তঞ্চ গোচরং মনোধাতুমনোৰিঞ্ঞাণধাতুসঙ্খাতং জৰনং পন পচ্চনুভোতি. ইতি ৰচনস্স ভগৰতা ৰুত্তত্তা পটিক্খিপিতব্বা. রূপাদযো পন ৰিসযা রূপাদিপঞ্চারম্মণানি এৰ হোন্তি.

৩০৪-৬. দিব্বচক্খাদিঞাণানং, রূপাদীনেৰ গোচরা তানি রূপাদীনি এৰ গোচরা দিব্বচক্খাদিঞাণানং অনাপাথগতানং এৰ পাকটভাৰং অপ্পত্তানেৰ. ইতিপি ৰচনং ৰুত্তং ন যুজ্জতি. যং ধম্মজাতং রূপারম্মণং ভৰন্তং, তং ধম্মজাতং কথং কেন পকারেন ধম্মারম্মণং ভৰেয্য? এৰং সতি রূপারম্মণস্স ধম্মারম্মণত্তে সতি এতেসং রূপারম্মণধম্মারম্মণানং নিযমোপি কথং ভৰে কেন পকারেন ভৰেয্য? সব্বং আরম্মণং এতং এতং সব্বং আরম্মণং ছব্বিধং ছপ্পকারং ভগৰতা সমুদীরিতং. তং পরিত্তত্তিকাদীনং ৰসেন বহুপ্পকারেহি মতং.

৩০৭. সব্বো কামৰিপাকো চ সব্বো তেৰীসতিকামৰিপাকো চ ক্রিযাহেতুদ্ৰযম্পি চ মনোধাতুহসিতুপ্পাদৰসেন কিরিযাহেতুদ্ৰযম্পি চাতি পঞ্চৰীসতি চিত্তুপ্পাদা একন্তপরিত্তারম্মণা একন্তকামাৰচরারম্মণা সিযুং ভৰেয্যুং.

৩০৮-১০. ইট্ঠাদিভেদা পঞ্চেৰ, রূপসদ্দাদযো পন দ্ৰিপঞ্চন্নং ৰিঞ্ঞাণানং পটিপাটিযা অনুক্কমেন গোচরা হোন্তি. রূপাদিপঞ্চকং সব্বং, মনোধাতুত্তযস্স তু মনোধাতুত্তযস্স পন সব্বং ¶ রূপাদিপঞ্চকং আরম্মণং হোতি, এতেসং তেরসন্নং পন চিত্তানং রূপক্খন্ধোৰ গোচরো আরম্মণং হোতি. নারূপং নামং আরম্মণং ন করোন্তি. ন চ পঞ্ঞত্তিং পঞ্ঞত্তিং আরম্মণং ন করোন্তি. নাতীতং অতীতং আরম্মণং ন করোন্তি ¶ . ন চনাগতং অনাগতং আরম্মণং ন করোন্তি এৰ. হি সচ্চং ৰত্তমানো গোচরো এতেসং দ্ৰিপঞ্চৰিঞ্ঞাণানং, মনোধাতুত্তযস্স চাতি তেরসন্নং চিত্তানং তং আরম্মণং ৰত্তমানং এৰ পচ্চুপ্পন্নং এৰ.

৩১১. তেরসেতানি চিত্তানি, জাযন্তে কামধাতুযং এতানি তেরস চিত্তানি কামধাতুযং জাযন্তি, রূপাৰচরে পুঞ্ঞজানি চক্খুসোতৰিঞ্ঞাণসম্পটিচ্ছনানি, কিরিযামনোধাতু চাতি চত্তারি চিত্তানি জাযন্তি. অরূপিসু অরূপভূমীসু নেৰ কিঞ্চিপি একম্পি চিত্তং নেৰ জাযতি.

৩১২-৩. মহাপাকানমট্ঠন্নং অট্ঠন্নং মহাৰিপাকানং পৰত্তিযং ছসু দ্ৰারেসু তদারম্মণকিচ্চানং রূপাদিছপরিত্তানি গোচরা. সন্তীরণত্তযস্সপি পৰত্তিযং পঞ্চদ্ৰারে সন্তীরণত্তযকিচ্চস্স, ছদ্ৰারেসু তদালম্বণকিচ্চস্স চ রূপাদিছপরিত্তানি গোচরা. রূপাদযো পরিত্তা ছ, হসিতুপ্পাদগোচরা হসিতুপ্পাদস্স রূপাদযো ছ পরিত্তা গোচরা হোন্তি. পঞ্চদ্ৰারে পটুপ্পন্না পঞ্চসু দ্ৰারেসু যে গোচরা পচ্চুপ্পন্না, মনোদ্ৰারে তিকালিকা যে গোচরা তিকালিকা তীসু কালেসু নিযুত্তা.

৩১৪-৫. দুতিযারুপ্পচিত্তঞ্চ, চতুত্থারুপ্পমানসং কুসলৰিপাককিরিযাৰসেন ছব্বিধং চিত্তং মহগ্গতগোচরং নিযতং নিযতারম্মণং হোতি, তং ছব্বিধং চিত্তং মহগ্গতগোচরং পুব্বে অত্তনা অধিগতআকাসানঞ্চাযতনআকিঞ্চঞ্ঞাযতনকুসলারম্মণং, তেসু দ্ৰে দুতিযচতুত্থারুপ্পপাকা ‘‘যস্স যস্স কুসলঝানস্স যং যং আরম্মণং গহেত্ৰা ব্রহ্মলোকে পটিসন্ধি হোতী’’তি ৰচনতো সকসককুসলস্স আরম্মণং এৰ তেসং ৰিপাকানং আরম্মণং হোতি. নিব্বানারম্মণত্তা হি, একন্তেন অনঞ্ঞতো অট্ঠানাসৰচিত্তানং অপ্পমাণোৰ নিব্বানং এৰ গোচরং আরম্মণং হোতি ¶ . হি কস্মা কারণা? নিব্বানারম্মণত্তা, ন অঞ্ঞতো আরম্মণতো.

৩১৬-৩২০. চত্তারো ঞাণহীনা চ, কামাৰচরপুঞ্ঞতো কামাৰচরকুসলৰসেন চত্তারো ঞাণহীনা চ ক্রিযতো কিরিযৰসেন চত্তারো ঞাণহীনা চ দ্ৰাদসাকুসলানি চ তে পরিত্তারম্মণা চেৰ মহগ্গতগোচরা চ, তে ন ৰত্তব্বা চ হোন্তি. কস্মা? পঞ্ঞত্তারম্মণত্তা ¶ . চত্তারো ঞাণসংযুত্তা, পুঞ্ঞতো কুসলৰসেন চত্তারো ঞাণসম্পযুত্তা, ক্রিযতো কিরিযৰসেন চত্তারো ঞাণসম্পযুত্তা চ তথা অভিঞ্ঞাদ্ৰযঞ্চ কিরিযাৰোট্ঠব্বনম্পি চ একাদসন্নং এতেসং চিত্তানং গোচরো পরিত্তমহগ্গতঅপ্পমাণৰসেন তিৰিধো হোতি. ইমে একাদস ন ৰত্তব্বাপি হোন্তি. কস্মা? পঞ্ঞত্তারম্মণত্তা. যানি ৰুত্তাৰসেসানি ৰুত্ততো চিত্ততো সেসানি যানি চিত্তানি, তানি ন ৰত্তব্বারম্মণানীতি ৰিভাৰিনা ৰিঞ্ঞেয্যানি.

পরিত্তারম্মণত্তিকং সমত্তং.

৩২১.

দুতিযারুপ্পচিত্তঞ্চ, চতুত্থারুপ্পমানসং;

ছব্বিধং পন একন্তঅতীতারম্মণং সিযা.

৩২২-৬. ৰিঞ্ঞাণানং দ্ৰিপঞ্চন্নং দ্ৰিন্নং পঞ্চৰিঞ্ঞাণানং, মনোধাতুত্তযস্স চ তেরসন্নং চিত্তানং গোচরা রূপাদযো পঞ্চ ধম্মা পচ্চুপ্পন্নাৰ, অট্ঠ কামমহাৰিপাকা তদারম্মণকিচ্চৰসেন অতীতানাগতপচ্চুপ্পন্নগোচরা, চুতিকিচ্চৰসেন অতীতারম্মণা, পটিসন্ধিভৰঙ্গকিচ্চৰসেন পচ্চুপ্পন্নাতীতারম্মণা. সোমনস্সসন্তীরণং সন্তীরণকিচ্চৰসেন পচ্চুপ্পন্নারম্মণং. তদারম্মণকিচ্চৰসেন পচ্চুপ্পন্নানাগতাতীতারম্মণং. সেসসন্তীরণদ্ৰযং সন্তীরণকিচ্চৰসেন পচ্চুপ্পন্নারম্মণং ¶ , তদারম্মণকিচ্চৰসেন পচ্চুপ্পন্নানাগতাতীতারম্মণং, চুতিকিচ্চৰসেন অতীতারম্মণং, পটিসন্ধিভৰঙ্গকিচ্চৰসেন পচ্চুপ্পন্নাতীতারম্মণং. হসিতুপ্পাদচিত্তং জৰনকিচ্চৰসেন পচ্চুপ্পন্নাতীতানাগতগোচরং. ইতি এতে দ্ৰাদস মানসা পন সিযাতীতারম্মণা অতীতারম্মণা সিযুং. পচ্চুপ্পন্নানাগতগোচরা পচ্চুপ্পন্নারম্মণা অনাগতারম্মণা সিযুং. কামে ৰীসতি কুসলাকুসলা ক্রিযতো কিরিযৰসেন কামে নৰ মানসা, ৰোট্ঠব্বং ৰোট্ঠব্বনকিচ্চৰসেন পচ্চুপ্পন্নারম্মণং, আৰজ্জনকিচ্চৰসেন তিকালারম্মণং. মহাকিরিযমানসা জৰনকিচ্চৰসেন তিকালারম্মণা, সন্তে পঞ্ঞত্তিকালে নৰত্তব্বারম্মণা. দ্ৰে অভিঞ্ঞামানসাপি অভিঞ্ঞাকিচ্চৰসেন অতীতাদিগোচরা সিযুং. ইমে মানসা পঞ্ঞত্তিকালেপি সন্তে নৰত্তব্বা ভৰন্তি. রূপারূপভৰেসু মযা ৰুত্ততো সেসানি সব্বানি চিত্তানি অতীতারম্মণাদিনা অতীতারম্মণাদিৰসেন পণ্ডিতেন ন ৰত্তব্বানি ন কথিতব্বানি হোন্তি এৰ, পঞ্ঞত্তারম্মণানি এৰ হোন্তীতি অত্থো.

৩২৭. কামতো ¶ চ ক্রিযা পঞ্চ কামাৰচরৰসেন পঞ্চ কিরিযা, রূপতো রূপাৰচরৰসেন পঞ্চমী ক্রিযা অভিঞ্ঞাচিত্তং, এতেসং ছন্নং চিত্তানং নত্থি কিঞ্চি একম্পি অগোচরং অনারম্মণং, সব্বারম্মণন্তি অত্থো. ‘‘পঞ্চমী ক্রিযা’’তি ৰচনং অভিঞ্ঞাচিত্তৰসেন ৰুত্তং. সুদ্ধঝানস্স পঞ্চমরূপকিরিযস্স পঞ্ঞত্তারম্মণং এৰাতি ৰেদিতব্বং.

৩২৮. নিব্বানঞ্চ চতুব্বিধং ফলং, মগ্গং রূপঞ্চ অরূপং চিত্তচেতসিকসঙ্খাতং নামঞ্চ গোচরং কাতুং যানি চিত্তানি সক্কোন্তি, তানি চিত্তানি মে ৰদ, আচরিয, তানি ময্হং কথেহি.

৩২৯-৩০. চত্তারো ঞাণসংযুত্তা, পুঞ্ঞতো পুঞ্ঞৰসেন চত্তারো ঞাণসম্পযুত্তা, ক্রিযতো তথা কিরিযৰসেন ¶ চত্তারো ঞাণসম্পযুত্তা, দ্ৰে অভিঞ্ঞামানসা, কিরিযাৰোট্ঠব্বনম্পি চাতি একাদস চিত্তানি নিব্বানঞ্চ ফলঞ্চ মগ্গঞ্চ রূপঞ্চ অরূপং নামঞ্চ গোচরং কাতুং সক্কোন্তি.

৩৩১-৪. চিত্তেসু পন সব্বেসু যানি চিত্তানি অরহত্তফলং অরহত্তমগ্গং গোচরং কাতুং সক্কোন্তি, তানি কতি চিত্তানি মে ৰদ তানি ময্হং ত্ৰং কথেহি. সব্বেসু পন চিত্তেসু, ছ চ চিত্তানি মে সুণ, ভো ভদ্দমুখ, ত্ৰং ময্হং ৰচনং সুণোহি, সব্বেসু পন চিত্তেসু ছ চিত্তানি অরহত্তফলং অরহত্তমগ্গং গোচরং কাতুং সক্কোন্তি. চত্তারো ঞাণসংযুত্তা, কিরিযা চ ৰোট্ঠব্বনম্পি চ কিরিযাভিঞ্ঞামনো চাতি ছ চ চিত্তানি গোচরং কাতুং সক্কোন্তি. পুঞ্ঞতো পুঞ্ঞৰসেন চত্তারো ঞাণসম্পযুত্তা, পুঞ্ঞতো পুঞ্ঞৰসেন অভিঞ্ঞাচিত্তঞ্চ অরহত্তফলং মগ্গং গোচরং কাতুং ন সক্কোন্তি.

৩৩৫-৮. অরহতো খীণাসৰস্স মগ্গচিত্তং ফলমানসং ৰা পুথুজ্জনা ৰা সেক্খা ৰা ৰিজানিতুং ন সক্কোন্তি. কস্মা কারণা? পুথুজ্জনো সোতাপন্নস্স মানসং ন জানাতি, সোতাপন্নো সকদাগামিস্স মানসং ন জানাতি, সকদাগামী অনাগামিস্স মানসং ন জানাতি, অনাগামী অরহন্তস্স মানসং ন জানাতি. হেট্ঠিমো হেট্ঠিমো পুগ্গলো উপরূপরি ঠিতস্স পুগ্গলস্স মানসং নেৰ জানাতি, উপরূপরি ঠিতো পুগ্গলোপি হেট্ঠিমস্স হেট্ঠিমস্স পুগ্গলস্স মানসং জানাতি.

৩৩৯-৩৪২. যো ¶ ধম্মো যস্স ধম্মস্স আরম্মণং হোতি, তং আরম্মণং একং একং উদ্ধরিত্ৰা ইতো পরং পৰক্খামি. কুসলারম্মণং কামে কামে অট্ঠৰিধং কুসলং অট্ঠৰিধস্স কামাৰচরকুসলস্স আরম্মণং হোতি. কথং ¶ ? পুব্বেৰ কতং অট্ঠৰিধং মহাকুসলং পচ্ছা সোমনস্সসহগতঞাণসম্পযুত্তচিত্তদ্ৰযেন ৰা সোমনস্সসহগতঞাণৰিপ্পযুত্তচিত্তদ্ৰযেন ৰা উপেক্খাসহগতঞাণসম্পযুত্তদ্ৰযেন ৰা উপেক্খাসহগতঞাণৰিপ্পযুত্তদ্ৰযেন ৰা অনুস্সরণকআলাদীসু তস্স অট্ঠৰিধস্স কুসলস্স জৰনকিচ্চৰসেন আরম্মণং হোতি, ৰিপ্পটিসারকালাদীসু দ্ৰাদসৰিধস্স অকুসলস্স আরম্মণং হোতি, কুসলস্স অভিঞ্ঞামানসস্স চ কিরিযস্স অভিঞ্ঞামানসস্স চ আরম্মণং হোতি, একাদসৰিধস্স কামাৰচরৰিপাকস্স তদারম্মণৰসেন আরম্মণং হোতি. তথা কামক্রিযস্সাতি জৰনকিচ্চৰসেন হসনস্স আৰজ্জনকিচ্চৰসেন ৰোট্ঠব্বনস্স জৰনকিচ্চৰসেন মহাকিরিযস্স আরম্মণং হোতি, এতেসং ছন্নং রাসীনং আরম্মণং সিযা ভৰেয্য. রূপাৰচরপুঞ্ঞানি পঞ্চ ততো ছরাসিতো কামৰিপাকং ৰজ্জেত্ৰা পঞ্চন্নং রাসীনং আরম্মণানি হোন্তি. তদা লোভমূলমোহমূলৰসেন অত্তনা পটিলদ্ধঝানানং অনুস্সরণকালে তস্স দসৰিধস্স অকুসলস্স আরম্মণং হোতি, তিহেতুকপটিসন্ধিনো সত্তস্স ঝানতো পরিহীনস্স ঝানং পচ্চৰেক্খতো ঝানারম্মণং দোমনস্সযুত্তং হোতি, তদা তস্স পটিঘদ্ৰযস্স আরম্মণং হোতি. কামক্রিযস্সাতি একন্তপরিত্তারম্মণানি কিরিযামনোধাতুহসনানি ৰজ্জেত্ৰা আৰজ্জনকিচ্চৰসেন ৰোট্ঠব্বনস্স, জৰনকিচ্চৰসেন মহাকিরিযস্স চ আরম্মণং হোতি.

৩৪৩. আরুপ্পকুসলঞ্চাপি, তেভূমকুসলস্স চ মহাকুসলস্স চ অভিঞ্ঞাকিচ্চৰসেন পঞ্চমরূপকুসলস্স চ দুতিযচতুত্থঅরূপকুসলস্স চ তেভূমকক্রিযস্সাপি ৰোট্ঠব্বনস্স মহাকিরিযস্স চ অভিঞ্ঞাকিচ্চৰসেন পঞ্চমরূপকিরিযস্স চ দুতিযচতুত্থারুপ্পকিরিযস্স চ আরম্মণং হোতি, দুতিযারুপ্পকিরিযস্স চ পঠমারুপ্পকিরিযায আরম্মণেন ¶ ভৰিতব্বং, চতুত্থারুপ্পকিরিযস্স চ ততিযারুপ্পকিরিযায আরম্মণেন ভৰিতব্বং, এৰঞ্চ সতি কথং পঠমারুপ্পকুসলং দুতিযারুপ্পকিরিযস্স আরম্মণং হোতি, ততিযারুপ্পকুসলঞ্চ চতুত্থারুপ্পকিরিযস্স আরম্মণং হোতীতি চে ৰত্তব্বং, যদা পুথুজ্জনযোগী ৰা সেক্খো ৰা যোগী রূপসমাপত্তিং সমাপজ্জিত্ৰা ততো ৰুট্ঠহিত্ৰা আকাসানঞ্চাযতনসঙ্খাতং পঠমারুপ্পসমাপত্তিং সমাপজ্জিত্ৰা ৰীতরাগো হুত্ৰা অত্তনা অধিগতা সমাপত্তিযো গহেত্ৰা পুথুজ্জনসেক্খকালে অত্তনা অনধিগতং দুতিযং অরূপসমাপত্তিং সমাপজ্জি, তদা খীণাসৰকালে ¶ সমাপজ্জিতং দুতিযং অরূপকিরিযং পঠমারুপ্পকুসলং আরম্মণং করোতি, এৰং পঠমারুপ্পকুসলং দুতিযারুপ্পকিরিযস্স আরম্মণং হোতি.

যদা যোগী রূপসমাপত্তিযো সমাপজ্জিত্ৰা ততো ৰুট্ঠহিত্ৰা পঠমারুপ্পকুসলং দুতিযারুপ্পকুসলং ততিযারুপ্পকুসলঞ্চ সমাপজ্জিত্ৰা খীণাসৰো হুত্ৰা অত্তনা অধিগতা সমাপত্তিযো গহেত্ৰা অত্তনা অনধিগতং চতুত্থং অরূপসমাপত্তিং সমাপজ্জি, তদা চতুত্থারুপ্পকিরিযা ততিযারুপ্পকুসলং আরম্মণং করোতি, এৰং চতুত্থারুপ্পকিরিযস্স ততিযারুপ্পকুসলং আরম্মণং হোতি, পচ্ছা খীণাসৰকালে সমাপজ্জিতা রূপারূপসমাপত্তিযো হোন্তি. যথা হোতি, তথা এৰ অকুসলস্সপি আরম্মণং হোতি.

৩৪৪-৭. অরূপাৰচরপাকানন্তি জাতিনিদ্ধারণং, চতুত্থদুতিযানং অরূপপাকানম্পি আরম্মণং হোতি, ‘‘চতুত্থদুতিযান’’ন্তি ৰত্তব্বে তিযানং-সদ্দস্স লোপং কত্ৰা ‘‘চতুত্থদূ’’তি ৰুত্তং, তদা দ্ৰিন্নং অরূপপাকানং পঠমারুপ্পততিযারুপ্পজৰনানি আরম্মণানি হোন্তি, ‘‘যস্স কুসলস্স ঝানস্স যং আরম্মণং গহেত্ৰা ব্রহ্মলোকে পটিসন্ধি হোতী’’তি ৰচনতো সকসককুসলানং আরম্মণভূতানি ¶ আকাসানঞ্চাযতনআকিঞ্চঞ্ঞাযতনানি তেসং দুতিযচতুত্থারুপ্পপাকানং আরম্মণানি হোন্তি, এৰং অরূপকুসলং ইমেসং অট্ঠরাসীনং আরম্মণপচ্চযো হোতি. অপরিযাপন্নপুঞ্ঞম্পি চতুব্বিধলোকুত্তরকুসলম্পি কামাৰচরতো কামাৰচরৰসেন কুসলস্স ঞাণসম্পযুত্তমহাকুসলস্স চ ক্রিযস্স ৰোট্ঠব্বনস্স, ঞাণসম্পযুত্ততো কিরিযস্স চ রূপতো রূপাৰচরৰসেন পঞ্চমস্স রূপকুসলস্স চ পঞ্চমস্স রূপকিরিযস্স চাতি চতুন্নং রাসীনং আরম্মণং সদা হোতি, অযমেত্থ অধিপ্পাযো – সেক্খানং ঞাণসম্পযুত্তমহাকুসলস্স, ৰোট্ঠব্বনস্স, পঞ্চমস্স রূপকুসলস্স চ তিৰিধং লোকুত্তরপুঞ্ঞং আরম্মণং হোতি. খীণাসৰস্স ৰোট্ঠব্বনস্স, ঞাণসম্পযুত্তমহাকিরিযস্স, পঞ্চমস্স রূপকিরিযস্স চ অরহত্তপুঞ্ঞং আরম্মণং হোতি. যথা তথা এৰ সব্বং অকুসলং কামাৰচরতো কামাৰচরৰসেন কুসলস্স মহাকুসলস্স, ক্রিযস্স হসনৰোট্ঠব্বনমহাকিরিযস্স চ রূপাৰচরতো পন রূপাৰচরৰসেন পঞ্চমস্স রূপকুসলস্স, পঞ্চমস্স রূপকিরিযস্স চ আরম্মণং হোতি, যথা তথা এৰ সব্বস্স অকুসলস্স চ কামাৰচরৰিপাকানং তদারম্মণকিচ্চৰসেন একাদসন্নঞ্চাতি ছন্নং রাসীনং আরম্মণং ভগৰতা ঈরিতং.

৩৪৮-৩৫২. ৰিপাকারম্মণং ¶ কামে সব্বং ৰিপাকারম্মণং কামাৰচরতোপি কামাৰচরৰসেনপি কুসলস্স মহাকুসলস্স, ক্রিযস্স হসনৰোট্ঠব্বনমহাকিরিযস্স চ রূপাৰচরতো চেৰ রূপাৰচরৰসেন চ এৰ পঞ্চমস্স রূপকুসলস্স, পঞ্চমস্স রূপকিরিযস্স চ কামাৰচরপাকানং কামাৰচরৰিপাকানং একাদসন্নঞ্চ তথেৰ অকুসলস্স চ ছন্নং রাসীনং আরম্মণং হোতি. রূপে ৰিপাকারম্মণং কামাৰচরতোপি চ কামাৰচরৰসেনপি চ কুসলস্স মহাকুসলস্স ¶ , ক্রিযস্স চ ৰোট্ঠব্বনমহাকিরিযস্স চ রূপাৰচরতো চেৰ রূপাৰচরৰসেন চ এৰ কুসলস্স চ অপুঞ্ঞস্স চাতি পঞ্চন্নং রাসীনং গোচরো হোতি, অরূপাৰচরপাকেসু অযং নযো ভগৰতা মতো. ৰট্টে ন পরিযাপন্না নপ্পৰিট্ঠাতি অপরিযাপন্না, তেসং পুগ্গলানং পাকাপি কামতো কামাৰচরৰসেন কুসলস্স ঞাণসম্পযুত্তমহাকুসলস্স, ক্রিযস্স চ ৰোট্ঠব্বনঞাণসম্পযুত্তমহাকিরিযস্স চ রূপতোপি রূপাৰচরৰসেনপি কুসলস্স পঞ্চমস্স রূপকুসলস্স, ক্রিযস্স চ পঞ্চমস্স রূপকিরিযস্স চ এৰং আরম্মণং হোতীতি. এত্থাযমধিপ্পাযো অপরিযাপন্নপুঞ্ঞে ৰুত্তনযেনেৰ ৰেদিতব্বো.

৩৫৩-৬. কামে ইদং সব্বকিরিযচিত্তং কামাৰচরতোপি চ কামাৰচরৰসেনপি চ কুসলস্স মহাকুসলস্স, ক্রিযস্স চ হসনৰোট্ঠব্বনমহাকিরিযস্স চ রূপাৰচরতো চেৰ রূপাৰচরৰসেন চ এৰ কুসলস্স পঞ্চমস্স রূপকুসলস্স, ক্রিযস্স চ পঞ্চমস্স রূপকিরিযস্স চ একাদসকামাৰচরপাকস্স চ তথেৰ অকুসলস্স চ এতেসং ছন্নং রাসীনং আরম্মণং হোতি. যং ক্রিযামানসং রূপে রূপাৰচরে যং কিরিযামানসং, কামপাকং ততো ৰিনা ততো রাসিতো কামপাকং ৰিনা ৰজ্জেত্ৰা পঞ্চন্নং পন রাসীনং আরম্মণং হোতি. কামাৰচরতো কামাৰচরৰসেন কিরিযস্স ৰোট্ঠব্বনমহাকিরিযস্স আরম্মণং হোতি, হসনং একন্তপরিত্তারম্মণত্তা রূপকিরিযং আরম্মণং ন করোতি. ক্রিযাচিত্তং পনারুপ্পে অরূপকিরিযাচিত্তং পন তেসং পঞ্চন্নং এৰ চ রাসীনং আরুপ্পক্রিযস্সাপি পঠমারুপ্পকিরিযং দুতিযারুপ্পকিরিযস্স আরম্মণং হোতি, ততিযারুপ্পকিরিযং চতুত্থারুপ্পকিরিযস্স আরম্মণং হোতি. ইতি ছন্নং রাসীনং গোচরো হোতিযেৰ.

৩৫৭-৮.

রূপং ¶ চতুসমুট্ঠানং, রূপারম্মণসঞ্ঞিতং;

কামাৰচরপুঞ্ঞস্স, তথেৰ কুসলস্স চ;

অভিঞ্ঞাদ্ৰযচিত্তস্স, কামপাকক্রিযস্স চ.

দ্ৰিচক্খুৰিঞ্ঞাণমনোধাতুদ্ৰযসন্তীরণত্তযমহাপাকস্স ¶ চ কামকিরিযস্স চাতি একাদসৰিধস্স কামকিরিযস্স চ ছন্নং এতেসং রাসীনং আরম্মণপচ্চযো হোতি.

৩৫৯-৩৬০. নিব্বানারম্মণং কামরূপাৰচরতো কামরূপাৰচরৰসেন সেক্খানং ঞাণসম্পযুত্তমহাকুসলস্স, রূপাৰচরৰসেন পঞ্চমস্স রূপকুসলস্স চ কামরূপকিরিযস্স চ খীণাসৰানং ৰোট্ঠব্বনঞাণসম্পযুত্তমহাকিরিযস্স চ পঞ্চমরূপকিরিযস্স চ উভযস্সাপি চিত্তস্স আরম্মণং হোতি. অপরিযাপন্নতো চেৰ লোকুত্তরৰসেন চ এৰ ফলস্স, কুসলস্স চ এতেসং ছন্নং রাসীনং আরম্মণপচ্চযো হোতি.

৩৬১-২. নানপ্পকারকং সব্বং, পঞ্ঞত্তারম্মণং পন তেভূমকস্স পুঞ্ঞস্স মহাকুসলস্স, সুদ্ধঝানস্স পঞ্চৰিধস্স রূপকুসলস্স, পঠমারুপ্পততিযারুপ্পকুসলস্স চ তথেৰ অকুসলস্স চ রূপারূপৰিপাকস্স সব্বস্স রূপৰিপাকস্স, পঠমারুপ্পততিযারুপ্পৰিপাকস্স চ তেভূমকক্রিযস্স চ হসনৰোট্ঠব্বনমহাকিরিযস্স সব্বস্স রূপকিরিযস্স, পঠমারুপ্পততিযারুপ্পকিরিযস্স চাতি নৰন্নং পন রাসীনং আরম্মণপচ্চযো হোতি.

৩৬৩-৪. রূপারম্মণিকা দ্ৰে তু দ্ৰে চিত্তুপ্পাদা রূপারম্মণিকা, দ্ৰে দ্ৰে সদ্দাদিগোচরা দ্ৰে দ্ৰে চিত্তুপ্পাদা সদ্দারম্মণাদিগোচরা, তযো মনোধাতুসঙ্খাতা চিত্তুপ্পাদা পঞ্চারম্মণিকা নাম মতা ভগৰতা. ইধ ইমস্মিং কামাৰচরাধিকারে ¶ একচত্তালীসেৰ চিত্তুপ্পাদা ছল়ারম্মণিকা মতা. অযং কামাৰচরচিত্তানং আরম্মণক্কমো.

৩৬৫-৯. পঞ্চাভিঞ্ঞা ৰিৰজ্জেত্ৰা, রূপারূপা অনাসৰা ইমে সব্বে চিত্তুপ্পাদা ধম্মারম্মণগোচরা হোন্তি. পঠমারুপ্পকুসলং দুতিযারুপ্পচেতসো কুসলস্স আরম্মণং হোতি, দুতিযারুপ্পচেতসো ৰিপাকস্স চ আরম্মণং হোতি, দুতিযারুপ্পচেতসো কিরিযস্স চ আরম্মণং হোতি. দুতিযারুপ্পচেতসো কিরিযস্স পঠমারুপ্পকুসলারম্মণভাৰে কারণং হেট্ঠা ৰুত্তমেৰ. পঠমারুপ্পপাকোযং, দুতিযারুপ্পচেতসো কুসলস্স চ দুতিযারুপ্পচেতসো ৰিপাকস্স চ দুতিযারুপ্পচেতসো কিরিযস্স চ আরম্মণং ন হোতি. হি কস্মা? তেসং দুতিযারুপ্পকুসলৰিপাককিরিযানং পঠমারুপ্পকুসলারম্মণত্তা. পঠমং তু ক্রিযাচিত্তং পঠমং কিরিযাচিত্তং পন দুতিযারুপ্পচেতসো পুঞ্ঞস্স আরম্মণং ন হোতি. দুতিযারুপ্পচেতসো ৰিপাকস্স আরম্মণং ন ¶ হোতি. রূপারূপভৰেসু হি খীণাসৰা ৰিপাকচিত্তানি চুতিৰসেন সকসককুসলানং আরম্মণং করোন্তি. পঠমং তু ক্রিযাচিত্তং পন দুতিযারুপ্পচেতসো কিরিযস্স আরম্মণং হোতি. ইতি এৰং ইমিনা মযা ৰুত্তপ্পকারেন চিত্তানং আরম্মণুপ্পত্তি ৰিভাৰিনা ধীরেন ঞেয্যা.

৩৭০-৩. পুথুজ্জনস্স সেক্খস্স, অরূপারম্মণং দ্ৰিধা দ্ৰিপ্পকারং কুসলং কুসলস্স দুতিযারুপ্পকুসলস্স আরম্মণং হোতি, তং পঠমারুপ্পকুসলং দুতিযারুপ্পৰিপাকস্স আরম্মণং সিযা ভৰেয্য. খীণাসৰস্স ভিক্খুস্স, পঠমারুপ্পমানসং আরম্মণং তিধা তিপ্পকারং হোতি. ইতি ৰচনং মহেসিনা ৰুত্তং. ক্রিযস্সাপি দুতিযারুপ্পকিরিযস্সাপি পঠমারুপ্পকিরিযা আরম্মণং হোতি. কুসলম্পি পঠমারুপ্পকুসলম্পি দুতিযারুপ্পকিরিযস্স চ আরম্মণং হোতি. কুসলং ¶ পঠমারুপ্পকুসলং দুতিযারুপ্পৰিপাকস্স আরম্মণং হোতি. এৰং ইমিনা মযা ৰুত্তপ্পকারেন পঠমারুপ্পমানসং আরম্মণং তিধা হোতি. ততিযারুপ্পচিত্তম্পি চতুত্থারুপ্পচেতসো কুসলস্স আরম্মণং হোতি, চতুত্থারুপ্পচেতসো ৰিপাকস্স চ তং আরম্মণং হোতি. এৰমেৰ যথা পঠমারুপ্পমানসং আরম্মণং দ্ৰিধা হোতি, এৰমেৰ তথা ততিযারুপ্পচিত্তং আরম্মণং দ্ৰিধা হোতি. যথা পঠমারুপ্পমানসং আরম্মণং তিধা হোতি, এৰমেৰ তথা ততিযারুপ্পচিত্তং আরম্মণং তিধা সিযা.

৩৭৪. যং যং পন ইধারব্ভ ইধ ইমস্মিং অধিকারে যং যং গোচরং আরব্ভ পটিচ্চ যে যে চিত্তুপ্পাদা জাযন্তি, সো সো গোচরো তেসঞ্চ তেসঞ্চ চিত্তুপ্পাদানং আরম্মণপচ্চযো হোতি.

৩৭৫. যো পন নরো ইমস্স অভিধম্মাৰতারস্স কির পারং দুত্তরং ইধ ইমস্মিং লোকে উত্তরতি, সো নরো অভিধম্মমহণ্ণৰে পারং দুত্তরং উত্তরং উত্তরতি এৰ.

ইতি অভিধম্মাৰতারটীকায

আরম্মণৰিভাগৰণ্ণনা নিট্ঠিতা.

ছট্ঠো পরিচ্ছেদো.

৭. সত্তমো পরিচ্ছেদো

ৰিপাকচিত্তপ্পৰত্তিনিদ্দেসৰণ্ণনা

৩৭৬.

অনন্তঞাণেন ¶ নিরঙ্গণেন,

গুণেসিনা কারুণিকেন তেন;

ৰুত্তে ৰিপাকে মতিপাটৰত্থং,

ৰিপাকচিত্তপ্পভৰং সুণাথ.

যেন ¶ জিনেন অনন্তঞাণেন নিক্কিলেসেন গুণেসিনা কারুণিকেন তেন জিনেন ৰুত্তে ৰিপাকস্মিং মতিপাটৰত্থং মতিছেকভাৰত্থায ৰিপাকচিত্তপ্পভৰং মযা ভণমানং ৰিপাকচিত্তপ্পৰত্তিং তুম্হে সুণাথ.

৩৭৭. একূনতিংস কম্মানি, পাকা দ্ৰত্তিংস ভগৰতা দস্সিতা, কম্মানি তীসু দ্ৰারেসু দিস্সরে, ৰিপাকা ছসু দ্ৰারেসু দিস্সন্তি.

৩৭৮-৯. কুসলং কামলোকস্মিং কামলোকম্হি কুসলং পৰত্তে, পটিসন্ধিযঞ্চ তংতংপচ্চযমাগম্ম তংতংপচ্চযং পটিচ্চ. সো সো পচ্চযো তংতংপচ্চযো, ‘‘ততপচ্চযো’’তি ৰত্তব্বে নিগ্গহীতাগমৰসেন ‘‘তংতংপচ্চযো’’তি ৰুত্তং. ৰিচ্ছাকম্মধারযসমাসোযং. ৰিৰিধং ফলং দদাতি. একায চেতনায একা পটিসন্ধি ভগৰতা পকাসিতা. নানাকম্মেহি নানা পটিসন্ধিযো চ ভৰন্তি.

৩৮০-১. তিহেতুকং তু যং কম্মং তিহেতুকং যং কম্মং পন কামাৰচরসঞ্ঞিতং তিহেতুকং ৰিপাকং দুহেতুঞ্চ ৰিপাকং অহেতুঞ্চ ৰিপাকং দেতি. দুহেতুকং তু যং কম্মং দুহেতুকং যং কম্মং পন, তং কম্মং তিহেতুকং ৰিপাকং ন দেতি, অত্তনো ৰিপাকং দুহেতুঞ্চ অহেতুঞ্চ দেতি.

৩৮২-৩. তিহেতুকেন ¶ কম্মেন, পটিসন্ধি তিহেতুকা হোতি, দুহেতুকাপি পটিসন্ধি হোতেৰ, অহেতুকা পটিসন্ধি নেৰ হোতি, উক্কট্ঠতিহেতুককম্মেন তিহেতুকা পটিসন্ধি, ওমকতিহেতুককম্মেন দুহেতুকা পটিসন্ধি হোতীতি অধিপ্পাযো. দুহেতুকেন কম্মেন দুহেতুকা পটিসন্ধি, অহেতুকাপি পটিসন্ধি হোতেৰ, তিহেতুকা পটিসন্ধি নেৰ হোতি. উক্কট্ঠদুহেতুককম্মেন দুহেতুকা পটিসন্ধি, ওমকদুহেতুককম্মেন অহেতুকা পটিসন্ধি হোতীতি অধিপ্পাযো.

৩৮৪. অসঙ্খারকম্মং ¶ অসঙ্খারৰিপাকং দেতি, সসঙ্খারৰিপাকম্পি দেতি, সসঙ্খারকম্মং সসঙ্খারফলং, তথা অসঙ্খারফলং দেতি.

৩৮৫. একায চেতনাযেত্থ এত্থ এতাসু চেতনাসু একায কুসলায চেতনায সোল়সৰিধা ৰিপাকচিত্তানি ভৰন্তি. ইতি ৰচনং জিনো পকাসযে.

৩৮৬-৯২. ৰেদনাপরিৰত্তনং আরম্মণেন হোতেৰ, তদারম্মণচিত্তম্পি জৰনেন নিযামিতং, সোমনস্সযুত্তে কুসলে জৰনে জৰিতে তদারম্মণম্পি সোমনস্সযুত্তমেৰ হোতীতি অত্থো. উপেক্খাযুত্তকুসলেপি এসেৰ নযো. কামাৰচরচিত্তেন কুসলেনাদিনা পঠমেন কুসলেন তুল্যেন ৰিপাকচিত্তেন. ততিযাৰিসেসনং. যেন সত্তেন গহিতা পটিসন্ধি চে যদি, ইট্ঠে বলৰারম্মণে মনাপে অতিমহন্তারম্মণে তস্স সত্তস্স চক্খুস্স চক্খুপসাদস্স আপাথং পাকটভাৰং আগতে সতি মনোধাতুযা তায ভৰঙ্গস্মিং আৰট্টিতে ভৰঙ্গসোতে ছিন্দিতে সতি চক্খুৰিঞ্ঞাণকাদীসু ৰীথিচিত্তেসু জাতেসু পঠমং কুসলং কামমানসং জৰনং হুত্ৰা জাযতে. সত্তক্খত্তুৰারানি জৰিত্ৰান পঠমে মহাকুসলে গতে তদেৰ তং এৰ ইট্ঠং আরম্মণং কত্ৰা তেনেৰ পঠমমহাকুসলেন সদিসং তদারম্মণৰিপাকচিত্তং. সন্ধিযা তুল্যতো পটিসন্ধিযা তুল্যভাৰেন মূলভৰঙ্গন্তি মূলভৰঙ্গং নাম ভগৰতা পৰুচ্চতে. তঞ্চ তদারম্মণচিত্তং সন্তীরণং সোমনস্সযুত্তং সন্তীরণং দস্সনং সম্পটিচ্ছনং এত্থ এতস্মিং ৰীথিচিত্তে গণনূপগচিত্তানি গণনং উপগতানি চিত্তানি চত্তারি এৰ ভৰন্তি.

৩৯৩-৪. যদা হি দুতিযং চিত্তং, কুসলং জৰনং যদা যস্মিং কালে তস্সেৰ সোমনস্সতিহেতুনো পুগ্গলস্স দুতিযং ¶ কুসলং চিত্তং জৰনং হোতি, তদা তস্মিং কালে তেন জৰনেন তুল্যৰিপাকং তদারম্মণং. তস্স সন্ধিযা অসমানত্তা তস্স তদারম্মণচিত্তস্স সন্ধিযা অসমানত্তা ¶ দ্ৰে নামানি অস্স ৰিপাকচিত্তস্স অনেন ৰিপাকচিত্তেন লব্ভরে লব্ভন্তি, ‘‘আগন্তুকভৰঙ্গ’’ন্তি নামং ‘‘তদারম্মণক’’ন্তি চ নামং ইতি দ্ৰে নামানি লব্ভন্তি.

৩৯৫-৬. যদা তস্সেৰ পুগ্গলস্স ততিযং পুঞ্ঞং জৰনং হোতি, তদা তেন জৰনেন সদিসং ততিযং পাকং তদারম্মণিকং সিযা. ইদং ৰিপাকচিত্তং আগন্তুকভৰঙ্গন্তি আগন্তুভৰঙ্গং নাম ভগৰতা ৰুচ্চতে, পুরিমানি চ পঞ্চ ৰিপাকচিত্তানি ইমিনা পন ততিযৰিপাকেন পন সদ্ধিং ছ চিত্তানি হোন্তি.

৩৯৭-৮. যদা চতুত্থং কুসলং জৰনং হোতি, তদা তেন জৰনেন তুল্যং চতুত্থৰিপাকং তদারম্মণভাৰং ৰজে গচ্ছেয্য. চতুত্থৰিপাকং আগন্তুকভৰঙ্গং তদারম্মণনামকং হোতি, পুরিমানি ছ পাকানি ইমিনা সহ চতুত্থপাকেন সত্ত চিত্তানি হোন্তি.

৩৯৯-৪০৩. যদা যস্মিং কালে তস্মিং চক্খুদ্ৰারে ইট্ঠমজ্ঝত্তারম্মণং পন তথা আপাথং আগচ্ছতি চ, তদা ৰুত্তনযেন আৰজ্জনদস্সনসম্পটিচ্ছনচিত্তেসু জাতেসু ইধ ইমস্মিং মজ্ঝত্তারম্মণে আরম্মণৰসেন ৰেদনা পরিৰত্ততি, তস্মা উপেক্খাসহগতং সন্তীরণং মনো হোতি. উপেক্খাসহগতেসু এৰ চতূসুপি জৰনেসু জৰিতেসু তেহি জৰনেহি তুল্যানি চত্তারি ৰিপাকচিত্তানি জাযরে. অচ্চন্তং একন্তেন ৰেদনায উপেক্খাৰেদনায পুরিমেহি সোমনস্সসহগতেহি চিত্তেহি অসমানত্তা চত্তারি চিত্তানি নামতো পিট্ঠিভৰঙ্গানি নাম হোন্তি, পিট্ঠিভৰঙ্গানি সোমনস্সৰিপাকানং পচ্ছাভাগে ভৰঙ্গানীতি অত্থো. ইমানি ¶ উপেক্খাসহগতানি পঞ্চ ৰিপাকানি পুরিমেহি সত্তহি ৰিপাকেহি সদ্ধিং দ্ৰাদস ৰিপাকানি ভৰন্তি. ইতি ৰচনং ধীরো ৰিনিদ্দিসে.

৪০৪-৬. যথা চক্খুদ্ৰারে দ্ৰাদস ৰিপাকানি হোন্তি, তথা এৰং সোতাদীসু দ্ৰারেসুপি দ্ৰাদস পাকানি হোন্তি. ইতি ৰচনং ধীরো নিদ্দিসে, ইমে মযা ৰুত্তা ৰিপাকা সমসট্ঠি ভৰন্তি. এৰং ইমিনা মযা ৰুত্তপ্পকারেন একায চেতনায কম্মে আযূহিতে পৰত্তিতে সমসট্ঠি ৰিপাকানি উপ্পজ্জন্তি, ইমস্মিং ৰচনে সংসযো নত্থি. গহিতাগ্গহণেনেত্থ এত্থ এতেসু ৰিপাকেসু গহিতানং ৰিপাকানং অগ্গহণেন চক্খুদ্ৰারে দ্ৰাদস পাকা, সোতৰিঞ্ঞাণকাদীনি চত্তারি চাতি সোল়স পাকানি হোন্তি.

৪০৭-১১. একেন ¶ তিহেতুককুসলেন অসঙ্খারিকেন কম্মেন আযূহিতে যথা, এৰমেৰ সসঙ্খারতিহেতুককুসলেনাপি অসঙ্খারসসঙ্খারউপেক্খাসহগতেহিপি কুসলেহি কম্মে আযূহিতে পৰত্তিতে তেসং তিণ্ণং কুসলানং ৰিপাকেহি তীহিপি দিন্নায পটিসন্ধিযা এসেৰ নযো পণ্ডিতেন জানিতব্বো. ইধ ইমস্মিং উপেক্খাসহগতদ্ৰযে ইট্ঠমজ্ঝত্তগোচরস্স ৰসেন ৰিপাকচিত্তপ্পৰত্তিং পঠমং দস্সেত্ৰা দস্সেতব্বাথ পচ্ছা তু, ইট্ঠস্মিং গোচরে ইধ অথ পচ্ছা মযা ৰুত্তচিত্তপ্পৰত্তিতো পচ্ছাকালে পন ইধ ইমস্মিং ইট্ঠগোচরে একেকস্মিং পন দ্ৰাদস দ্ৰাদস পাকা পণ্ডিতেন দস্সেতব্বা. গহিতাগ্গহণেনেত্থ এত্থ এতেসু ৰিপাকেসু গহিতানং ৰিপাকানং অগ্গহণেন সোল়স পাকচিত্তানি হোন্তি. পুব্বে কালে মযা ৰুত্তনযেনেৰ সব্বং ৰচনং অসেসতো অসেসভাৰেন পণ্ডিতেন ঞেয্যং.

৪১২-৪. তিহেতুকেন কম্মেন, পটিসন্ধি তিহেতুকা ভৰতি, ইতি অযং ৰারো এত্তাৰতা এত্তকেন ৰচনেন মযা ¶ ৰুত্তো. একং কম্মং একস্মিং ভৰে একং পটিসন্ধিং জনেতি, ততো পটিসন্ধিতো অপরং অঞ্ঞং দুতিযং পটিসন্ধিং ন জনেতি, পৰত্তিযং অনেকানি ৰিপাকানি সঞ্জনেতি. হি সচ্চং ‘‘একং কম্ম’’ন্তিআদিকং ৰচনং. একস্মা বীজা একতো বীজতো একং অঙ্কুরং জাযতি, অস্স বীজস্স বহূনি ফলানি হেতুপ্পৰত্তিতো সলিলাদিহেতুপ্পত্তিযা হোন্তি.

৪১৫-২১. দুহেতুকেন কম্মেন, পটিসন্ধি দুহেতুকা হোতি, ইতি ৰচনং অযং ৰারো অনুপুব্বেন অনুপটিপাটিযা আগতো. ইধ ইমস্মিং অধিকারে দুহেতুকেন পুঞ্ঞেন সোমনস্সযুত্তেন অসঙ্খারিকেন চিত্তেন কম্মে আযূহিতে পন দুহেতুকেন সোমনস্সযুত্তকুসলেন তুল্যেন পাকেন যেন সত্তেন গহিতা পটিসন্ধি চে, ইট্ঠে আরম্মণে তস্স সত্তস্স চক্খুদ্ৰারে আপাথং আগতে সোমনস্সযুত্তে ঞাণহীনে কুসলমানসে তস্মিং দুহেতুকে সত্তক্খত্তুং জৰিত্ৰান গতে তং এৰ আরম্মণং কত্ৰা তদনন্তরং তস্স জৰনস্স অনন্তরং তংসরিক্খকং তেন জৰনেন সদিসং একন্তং অসঙ্খারিকমানসং জাযতি. তন্তি তং চিত্তং মূলভৰঙ্গন্তি মূলভৰঙ্গং নাম তদারম্মণমিচ্চপি তদারম্মণং নাম উভযম্পি নামং তস্সেৰ নামং তস্স চিত্তস্স এৰ নামং. ইতি এৰং ইমিনা পকারেন ভগৰতা পরিদীপিতং. দুহেতুকে সসঙ্খারে কুসলে জৰনে জৰিতেপি চ তংসমং তেন চিত্তেন সদিসং আগন্তুকসঙ্খাতং তদারম্মণমানসং হোতি.

৪২২-৯. তথেৰ চ তথা এৰ চ ইট্ঠমজ্ঝত্তগোচরে দুহেতূনং দ্ৰিন্নং উপেক্খাযুত্তানং জৰনানং ¶ অনন্তরং তাদিসানি তেহি জৰনেহি সদিসানি দ্ৰে তদারম্মণমানসানি জাযন্তে, তেসং তদারম্মণমানসানং ‘‘পিট্ঠিভৰঙ্গ’’ন্তি নামং, ‘‘আগন্তুকভৰঙ্গ’’ন্তি চ নামং হোতি. সন্তীরণদ্ৰযঞ্চেৰ দস্সনং ¶ সম্পটিচ্ছনং ইমানি দ্ৰে ভৰঙ্গানি চাতি অট্ঠ ৰিপাকা চক্খুদ্ৰারে হোন্তি. এৰং ইমিনা মযা ৰুত্তপ্পকারেন পঞ্চসু দ্ৰারেসুপি চ অট্ঠ অট্ঠ ৰিপাকে কত্ৰা পৰত্তিযং চত্তালীস ৰিপাকানি ভৰন্তি. গহিতাগ্গহণেনেত্থ, চক্খুদ্ৰারে পনট্ঠ চ এত্থ এতেসু ৰিপাকেসু গহিতানং ৰিপাকানং অগ্গহণেন চক্খুদ্ৰারে অট্ঠ চ ৰিপাকা সোতঘানাদিনা ৰিপাকেন সদ্ধিং দ্ৰাদস এৰ ৰিপাকানি ভৰন্তি. একায চেতনাযেৰং এৰং ইমিনা মযা ৰুত্তপ্পকারেন একায চেতনায কম্মে আযূহিতে পৰত্তিতে পন সতি দ্ৰাদসেৰ ৰিপাকানি ভৰন্তি. ইতি ৰচনং ৰিজিতকুসলযুদ্ধসঙ্গামেন পকাসিতং দেসিতং. দুহেতুকত্তযেনাপি, সেসেন সদিসেন তু মযা ৰুত্ততো দুহেতুতো সেসেন দুহেতুকত্তযেনাপি সদিসেন পাকেন আদিন্নসন্ধিনো গহিতপটিসন্ধিকস্স সত্তস্স এৰং নযো মতো কথিতো নিরঙ্গণেন. দুহেতুকেন কম্মেন দুহেতুকা পটিসন্ধি হোতি. ইতি অযং ৰারো চ এত্তাৰতা এত্তকেন ৰচনেন মযা ৰুত্তো.

৪৩০-৮. দুহেতুকেন কম্মেন অহেতুকা পটিসন্ধি হোতি, ইতি অযং ৰারো অনুপুব্বেন পটিপাটিযা আগতো. তেসু চতূসুপি দুহেতুকেসু কুসলেসু চিত্তেসু অঞ্ঞতরেনেৰ হেতুকেন কম্মে আযূহিতে পৰত্তিতে সতি তস্সেৰ দুহেতুকস্স কুসলজৰনস্স পাকভূতায উপেক্খাসহগতাহেতুকায মনোৰিঞ্ঞাণধাতুযা আদিন্নপটিসন্ধিনো সত্তস্স সা পটিসন্ধি কম্মসদিসা নাম ন ৰত্তব্বা পণ্ডিতেহি. হি সচ্চং ‘‘পটিসন্ধি ন ৰত্তব্বা’’তিআদিকং ৰচনং. কম্মং দুহেতুকং হোতি, পটিসন্ধি অহেতুকা হোতি. তস্স দেহিনো সত্তস্স ৰুড্ঢিমুপেতস্স ৰুড্ঢিং উপগতস্স চক্খুদ্ৰারে পন ইট্ঠমজ্ঝত্তগোচরে আপাথমাগতে সতি দুহেতুকানং চতুন্নং পুঞ্ঞানং যস্স কস্সচি ¶ জৰনস্স অৰসানম্হি ইদং অহেতুকং মনো তদারম্মণভাৰেন জাযতি. এত্থ এতস্মিং ৰচনে সংসযো সন্দেহো নত্থি, তং অহেতুকচিত্তং মূলভৰঙ্গঞ্চ তদারম্মণমেৰ চ হোতি. চক্খুৰিঞ্ঞাণকাদীসুপি ৰীথিচিত্তেসু জাতেসু উপেক্খাসহগতংযেৰ সন্তীরণম্পি চ হোতি. তেসু একং ঠপেত্ৰান, গহিতাগ্গহণেনিধ তেসু দ্ৰীসু সন্তীরণতদারম্মণকিচ্চেসু ৰিপাকেসু একং সন্তীরণকিচ্চং তদারম্মণকিচ্চং তং চিত্তং ঠপেত্ৰা গহিতানং ৰিপাকানং অগ্গহণেন ইধ ইট্ঠমজ্ঝত্তারম্মণে গণনূপগচিত্তানি তীণিযেৰ ভৰন্তি.

৪৩৯-৪১. ইট্ঠে আরম্মণে চক্খু-দ্ৰারে আপাথমাগতে তদা সন্তীরণঞ্চেৰ সোমনস্সযুত্তংযেৰ ¶ হোতি, তদারম্মণমানসঞ্চ সোমনস্সযুত্তংযেৰ হোতি, তেসু সন্তীরণতদারম্মণকিচ্চেসু ৰিপাকেসু একেকং সন্তীরণকিচ্চং, তদারম্মণকিচ্চং ৰা চিত্তং গহেত্ৰা পুরিমানি চ তীণি চত্তারি এৰ ৰিপাকানি ভৰন্তি. এৰং ইমিনা মযা ৰুত্তপ্পকারেন পঞ্চসু দ্ৰারেসুপি চত্তারি চত্তারি ৰিপাকচিত্তানীতি পৰত্তিযং ৰিপাকানি ৰীসতি চিত্তানি হোন্তি.

৪৪২-৮. চক্খুদ্ৰারে তু চত্তারি, গহিতাগ্গহণেনিধ গহিতানং ৰিপাকানং অগ্গহণেন চক্খুদ্ৰারে পন চত্তারি ৰিপাকানি ইধ ইমস্মিং ইট্ঠারম্মণে সোতঘানাদিনা ৰিপাকেন সদ্ধিং অহেতুকং অট্ঠকং হোতি এৰ. অহেতুকপটিসন্ধিস্স সত্তস্স দুহেতুকং, তিহেতুকং ৰা তদারম্মণং ন ভৰে ন ভৰেয্য, দুহেতুপটিসন্ধিনো সত্তস্স তিহেতুকং তদারম্মণং ন ভৰে. জাতা সুগতিযং যেন, পাকেন পটিসন্ধি তু সুগতিযং যেন পাকেন পটিসন্ধি জাতা, তেন ৰিপাকেন তুল্যম্পি, হীনং ৰা তেসং তদারম্মণং ভৰেয্য. মনুস্সলোকং সন্ধায, ৰুত্তঞ্চাহেতুকট্ঠকং সুগতিযং অহেতুকট্ঠকঞ্চ মনুস্সলোকঞ্চ সন্ধায পটিচ্চ কারণং ¶ কত্ৰা মযা ৰুত্তং. চতূসুপি অপাযেসু পন অপেতো অযো পতিট্ঠা এতেহীতি অপাযো, তেসু. পৰত্তে অহেতুকং অট্ঠকং আপাযিকেহি লব্ভতি. থেরো নেরযিকানং তু, ধম্মং দেসেতি ৰস্সতি থিরো থিরকারধম্মো যস্মিং অত্থীতি থেরো, দুতিযঅগ্গসাৰকভূতো ইদ্ধিমা মোগ্গল্লানত্থেরো নেরযিকানং নিরযে জাতানং সত্তানং ধম্মং দেসেতি ৰস্সতি, ‘‘উচ্ছঙ্গে মং নিসীদিত্ৰা’’তিআদীসু ৰিয দেৰং ৰস্সাপেতীতি অত্থো. গন্ধং ৰাযুঞ্চ মাপেতি যদা, তদা পন তেসং নেরযিকানং সত্তানং তেহি নেরযিকসত্তেহি থেরং দিস্ৰা, ধম্মঞ্চ সুত্ৰা, গন্ধঞ্চ ঘাযিত্ৰা জলং উদকঞ্চ পিৰতং পিৰন্তানং মুদুং ৰাযুঞ্চ তেহি ফুসতং ফুসন্তানং তেসং নেরযিকসত্তানং চক্খুৰিঞ্ঞাণকাদীনি পঞ্চপি পুঞ্ঞজানি এৰ কুসলৰিপাকানি এৰ সন্তীরণদ্ৰযং পুঞ্ঞজং এৰ কুসলৰিপাকং এৰ পুঞ্ঞজা এৰ একা মনোধাতু ইতি অট্ঠকং হোতি.

৪৪৯-৫০. অযং তাৰ কথা ‘‘চক্খুৰিঞ্ঞাণকাদীনি পুঞ্ঞজানেৰা’’তিআদিকা অযং কথা ইট্ঠইট্ঠমজ্ঝত্তগোচরে কামাৰচরে পুঞ্ঞানং জৰনানং ৰসেন মযা ৰুত্তা. তদারম্মণচেতসো তদারম্মণচিত্তস্স যং নিযমত্তং ‘‘তদারম্মণমানসং জৰনেন নিযামিত’’ন্তিআদিৰচনেন মযা ৰুত্তং, তং নিযমত্তং কুসলং সন্ধায ৰুত্তং. সোমনস্সযুত্তে কামাৰচরকুসলে জৰিতে তদারম্মণম্পি সোমনস্সযুত্তমেৰ হোতি, উপেক্খাযুত্তে কামাৰচরকুসলে জৰিতে তদারম্মণম্পি উপেক্খাযুত্তমেৰ ¶ হোতি, নেতং অকুসলে উপেক্খাযুত্তে ৰিচিকিচ্ছাদিকে অকুসলে জৰনে পন জৰিতে সোমনস্সযুত্তম্পি তদারম্মণং হোতীতি অধিপ্পাযো. ইতিপি ৰচনং আচরিযেন দীপিতং.

৪৫১-৭. ইধ ইমস্মিং অধিপ্পাযে অকুসলচিত্তেসু সোমনস্সযুত্তেসু চতূসুপি ইট্ঠে আরম্মণে তেসু চিত্তেসু ¶ জৰিতেসু সোমনস্সযুত্তা অহেতুমনোৰিঞ্ঞাণধাতু তদনন্তরং তেসং অকুসলজৰনানং অনন্তরং তদারম্মণভাৰেন জাযতি. উপেক্খাযুত্তেসু ছসু অকুসলচিত্তেসু ইট্ঠমজ্ঝত্তে গোচরে জৰিতেসু পুঞ্ঞজা উপেক্খাসহগতা অহেতুমনোৰিঞ্ঞাণধাতু এৰ তদনন্তরং ৰা তেসং উপেক্খাসহগতানং ছন্নং অকুসলজৰনানং অনন্তরং তদারম্মণভাৰেন জাযতি. ইট্ঠারম্মণযোগস্মিং বুদ্ধরূপাদিইট্ঠারম্মণযোগস্মিং কঙ্খতো ‘‘বুদ্ধো নু খো, নো বুদ্ধো’’তি কঙ্খন্তস্স সত্তস্স উদ্ধতস্স ৰা সত্তস্স তদারম্মণমানসং সোমনস্সযুত্তং অহেতুকং ৰিপাকং হোতি পিট্ঠিভৰঙ্গং. সোমনস্সযুতে চিত্তে, জৰনে জৰিতে পন সোমনস্সযুত্তা এৰ পঞ্চ তদারম্মণমানসা পণ্ডিতেন গৰেসিতব্বা. উপেক্খাসহগতে চিত্তে জৰনে পন জৰিতে সতি উপেক্খাসহগতা ছ চ তদারম্মণমানসা পণ্ডিতেন গৰেসিতব্বা.

৪৫৮-৬৩. তিহেতুসোমনস্সেন, আদিন্নপটিসন্ধিনো সত্তস্স ঝানতো পরিহীনস্স ৰিপ্পটিসারিনো তং ঝানং পচ্চৰেক্খতো পচ্চৰেক্খন্তস্স দোমনস্সযুত্তং চিত্তং হোতি. তস্স দোমনস্সস্স অনন্তরং কিং মানসং জাযতে, ত্ৰং দোমনস্সযুত্তজৰনস্স অনন্তরমানসং ব্রূহি কথেহি. পট্ঠানে পটিসিদ্ধা হি দোমনস্সস্সানন্তরং সোমনস্সস্স উপ্পত্তি পট্ঠানে পটিসিদ্ধা পট্ঠানপ্পকরণে ভগৰতা নিৰারিতা, অস্স সোমনস্সস্স ৰা অনন্তরং দোমনস্সস্স উপ্পত্তি পট্ঠানে পট্ঠানপ্পকরণে পটিসিদ্ধা ভগৰতা নিৰারিতা. মহগ্গতং পনারব্ভ মহগ্গতং পটিচ্চ জৰনে জৰিতেপি চ তদারম্মণমানসং তত্থেৰ তস্মিং পট্ঠানে এৰ পটিসিদ্ধং ভগৰতা নিৰারিতং. তস্মা কারণা ভৰঙ্গপাতো ৰা তদারম্মণমেৰ ৰা ন হোতি. কিং নু কাতব্বং তেসং ভৰঙ্গতদারম্মণানং অভাৰে কারণং যং কাতব্বং, অম্হেহি তং ¶ কারণং কিং নু পুচ্ছাম, তং তদত্থং আভিধম্মিকভাৰেন আভিধম্মিক তং কারণং ৰদ ৰদাহি. উপেক্খাসহগতাহেতুমনোৰিঞ্ঞাণধাতু পুঞ্ঞাপুঞ্ঞৰিপাকা তদারম্মণিকা সিযা ভৰেয্য.

৪৬৪-৭. ইমস্স তদারম্মণস্স আৰজ্জনং কিং নত্থি? তং তদারম্মণমানসং কথং কেন পকারেন জাযতে? ভৰঙ্গআৰজ্জনানং চিত্তানং কিং আৰজ্জনমত্তং? মগ্গস্স অনন্তরস্স চ ফলস্সাপি কিং আৰজ্জনং নত্থি? নিরোধা চ নিরোধতো ৰুট্ঠহন্তস্স ভিক্খুনো ফলচিত্তস্স ৰাতি ¶ মযা সুতং, এৰং ইমিনা মযা ৰুত্তপ্পকারেন আৰজ্জনং নত্থি. ৰিনা আৰজ্জনেনাপি, হোতু জাযতু মানসং চিত্তং আৰজ্জনেন ৰিনা আৰজ্জনং ৰজ্জেত্ৰা হোতু জাযতু, কিমস্সারম্মণং অস্স তদারম্মণমানসস্স কিং আরম্মণং, পণ্ডিত, ত্ৰং আরম্মণং যদি জানাসি, তং আরম্মণং ব্রূহি ময্হং কথেহি. ৰিনা আরম্মণেনেতং এতং মানসং আরম্মণেন ৰিনা আরম্মণং ৰজ্জেত্ৰা ন জাযতি. হি সচ্চং ‘‘ৰিনা আরম্মণেনেত’’ন্তিআদিকং ৰচনং, তদারম্মণমানসং যদা দোমনস্সযুত্তং জৰনং মহগ্গতারম্মণং জৰতি, তদা তস্মিংযেৰ জৰনচিত্তক্খণে পরিত্তেসু কামাৰচরারম্মণেসু যং কিঞ্চি পরিত্তারম্মণং আরব্ভ পটিচ্চ জাযতি.

৪৬৮-৭৩. উতুবীজনিযামো চ উতুনিযামো বীজনিযামো চ কম্মধম্মনিযামতা চ কম্মনিযামতা চ সীলাদিপারমীধম্মনিযামতা চ চিত্তস্স নিযামো চাতি পঞ্চ নিযামতা পণ্ডিতেন ঞেয্যা. তত্থ তেসু পঞ্চসু নিযামেসু সব্বেসং পন রুক্খানং একপ্পহারেন ফলপুপ্ফাদিধারণং উতু, অযং উতুনিযামতা. তেসং তেসং তু বীজানং, তংতংতুল্যফলুব্ভৰো তেসং তেসং বীজানং পন তেহি তেহি বীজেহি তুল্যানম্পি সস্সানং ফলানং উপ্পত্তি, অযং বীজনিযামতা ¶ . মত্থকে নাল়িকেরস্স নাল়িকেরফলস্স মত্থকে ছিদ্দত্তং ছিদ্দভাৰো, অযং বীজজো বীজতো জাতো নিযামো. তিহেতুককম্মং তিহেতুকঞ্চ ৰিপাকং দুহেতুকঞ্চ ৰিপাকং অহেতুকঞ্চ ৰিপাকং যতো যং কম্মং দেতি, অযং কম্মনিযামতা. বোধিসত্তস্স জাতিযং জিনঙ্কুরস্স জাতিক্খণে মেদনীকম্পনাদিকং অনেকৰিসেসত্তং, অযং সীলাদিপারমীধম্মনিযামতা. তেন গোচরেন পসাদস্মিং ঘট্টিতে সতি ইধ ইমস্মিং চিত্তৰীথিযং আৰজ্জনাদীনং চিত্তানং উপ্পত্তি, অযং চিত্তনিযামতা.

৪৭৪. যো পুগ্গলো ধীরো ধীরসম্পন্নো গুণসম্পন্নো ৰিক্খিত্তপাপো মোহন্ধকারাপগমং অন্ধকারমনিস্সায অৰিজ্জানিস্সরণং যদিচ্ছে সচে ইচ্ছেয্য, সো ধীরো ইমং অভিধম্মাৰতারপ্পকরণং অন্ধজ্জনানং অন্ধসদিসবালজনানং হদযন্ধকারং ৰিদ্ধংসনং অন্ধকারসন্নিস্সিতস্স যস্স হদযস্স ৰিদ্ধংসনকরং জলন্তং দীপং জলমানং দীপং. পযত্তোতি পকারেন যততি ৰীরিযং করোতীতি পযত্তো, সততং সব্বদা সিক্খেথ সজ্ঝাযনধারণচিন্তনৰসেন সিক্খেয্য.

ইতি অভিধম্মাৰতারটীকায

ৰিপাকচিত্তপ্পৰত্তিনিদ্দেসৰণ্ণনা নিট্ঠিতা.

সত্তমো পরিচ্ছেদো.

৮. অট্ঠমো পরিচ্ছেদো

পকিণ্ণকনিদ্দেসৰণ্ণনা

৪৭৫.

ইদানি ¶ পন সব্বেসং, এতেসং মানসং মযা;

পাটৰত্থায ভিক্খূনং, কথীযতি পকিণ্ণকং.

ইদানি পন কালে এতেসং তিহেতুকদ্ৰিহেতুকঅহেতুকানং সব্বেসং পুগ্গলানং পকিণ্ণকং মানসং ভিক্খূনং পাটৰত্থায ¶ ভিক্খূনং ছেকভাৰত্থায মযা কথীযতে উচ্চতে.

৪৭৬-৮৫. পন্থমক্কটকো উণ্ণনাভি পন্থমক্কটকো নাম পঞ্চসু দিসাসু তস্স সুত্তং পসারেত্ৰা জালমজ্ঝে নিপজ্জতি. পঠমায দিসাযেত্থ এত্থ এতাসু দিসাসু পঠমায দিসায পসারিতে সুত্তে পাণকেন পটঙ্গেন ৰা মক্খিকায ৰা ঘট্টিতে সতি সা উণ্ণনাভি কিঞ্চি চলিত্ৰা ফন্দনং কত্ৰা নিপন্নট্ঠানতো সুত্তানুসারেন সুত্তং অনুসারেত্ৰা তস্স পাণকস্স যূসং যূসসঙ্খাতং সোণিতং পিৰতি. পুনাগন্ত্ৰা তত্থেৰ তস্মিং জালমজ্ঝেযেৰ যথাসুখং নিপজ্জতি, যথা পঠমায দিসায চলনাদিকং কিরিযং করোতি, এৰমেৰ দুতিযাদীসু চতূসু দিসাসু চলনাদিকং কিরিযং করোতি, এৰং পঞ্চসু দিসাসু সুত্তং ৰিয পঞ্চ পসাদা পণ্ডিতেন দট্ঠব্বা, মজ্ঝে মক্কটকো ৰিয চ চিত্তং পন পণ্ডিতেন দট্ঠব্বং. পাণকাদীহি খুদ্দকতিরচ্ছানেহি তস্স সঙ্ঘট্টনা ৰিয আরম্মণে পন পসাদানং সঙ্ঘট্টনা পণ্ডিতেন দট্ঠব্বা. জালমজ্ঝে নিপন্নায উণ্ণনাভিযা তং চলনং ৰিয পসাদে ঘট্টেতীতি পসাদঘট্টনং, কিং তং? আরম্মণং. তত্থ তিস্সং ৰীথিযং পসাদঘট্টনং আরম্মণং গহেত্ৰা মনোধাতুকিরিযাচিত্তং ভৰঙ্গং আৰট্টেতীতি ভৰঙ্গাৰট্টনং মতং ভগৰতা. তস্স পন্থমক্কটকস্স সুত্তানুসারংৰ সুত্তং অনুগমনং ৰিয ৰীথিচিত্তপ্পৰত্তনং পণ্ডিতেন দট্ঠব্বং. সীসে পন ৰিজ্ঝিত্ৰা অস্স মক্কটস্স যূসপানং ৰিয জৰনস্স চিত্তস্স আরম্মণেসু পৰত্তনং পণ্ডিতেন দট্ঠব্বং. পুন আগন্ত্ৰা সুত্তজালমজ্ঝে নিপজ্জনং যথা ৰত্থুংযেৰ হদযৰত্থুং এৰ নিস্সায চিত্তস্স পরিৰত্তনং পণ্ডিতেন দট্ঠব্বং.

৪৮৬-৯৩. ইদং ¶ তু পন ওপম্মং, অত্থং দীপেতি কিং তু হি ইদং ওপম্মং কং অত্থং দীপেতি পকাসেতি? পঠমং পসাদে আরম্মণেন ¶ ঘট্টিতে সতি পসাদৰত্থুতো পসাদো ৰত্থু নিস্সযো এতস্সাতি পসাদৰত্থু, চিত্তং, ততো পসাদৰত্থুতো, পঠমং এৰ ৰত্থুসন্নিস্সিতং ভৰঙ্গসঙ্খাতং মনো জাযতি, ইতিপি অত্থো তেন ওপম্মেন দীপিতো. একেকারম্মণং দ্ৰীসু দ্ৰীসু দ্ৰারেসু সব্বসো সব্বপ্পকারেন পন আপাথং আগচ্ছতি, অযমত্থোপি তেন ওপম্মেন দীপিতো ‘‘দ্ৰীসু দ্ৰীসু দ্ৰারেসূ’’তি, একং রূপারম্মণং একস্মিংযেৰ খণে চক্খুদ্ৰারে, মনোদ্ৰারে চাতি দ্ৰীসু দ্ৰারেসু আপাথং আগচ্ছতীতি অত্থো. সোতদ্ৰারাদীসুপি এসেৰ নযো ঞেয্যো. রূপং চক্খুপসাদম্হি ঘট্টেত্ৰা তঙ্খণে পন তস্স খণে পন তথা মনোদ্ৰারে পন আপাথং আগচ্ছতি, ভৰঙ্গচলনস্স পচ্চযো হোতীতি অত্থো. ন সংসযো এতস্মিং ৰচনে সংসযো নত্থি. যথা খগো যথা সকুণো. হি সচ্চং মযা ৰুত্তং ৰচনং. রুক্খগ্গে রুক্খকোটিযং নিলীযন্তোৰ সাখিনো সাখং ঘট্টেতি, তস্স ছাযা ভূমিযং পথৰিযং ফরতি পটিহঞ্ঞতি. ইধাতি নিপাতো. সাখায সকুণেন ঘট্টনং ভূমিযং ছাযাফরণাপি চ অপুব্বং অচরিমং একক্খণস্মিংযেৰ জাযরে জাযন্তি. এৰমেৰ পন রূপস্স, পসাদস্স চ ঘট্টনং, তথেৰ অত্থতো অত্থৰসেন ভৰঙ্গচলনস্সাপি পচ্চযত্তেন পচ্চযভাৰেন মনোদ্ৰারে আপাথং আগমনং অপুব্বং অচরিমং একক্খণেযেৰ হোতি.

৪৯৪-৭. ততো পরং ভৰঙ্গসোতং ছিন্দিত্ৰা চক্খুদ্ৰারে চক্খুপসাদে যথাক্কমং আৰজ্জনে সমুপ্পন্নে, দস্সনে সমুপ্পন্নে, সম্পটিচ্ছনে সমুপ্পন্নে, সন্তীরণে সমুপ্পন্নে, তথা ৰোট্ঠব্বনে চ সমুপ্পন্নে কুসলং জৰনচিত্তং জৰতি, তথা অকুসলমেৰ চিত্তং জৰতি. সোতদ্ৰারাদীসুপি সদ্দাদীনং আরম্মণানং ঘট্টনে এসেৰ নযো অৰিসেসেন ৰিঞ্ঞুনা ৰিঞ্ঞেয্যো. এতস্স অত্থস্স দীপনে দোৰারিকোপমাদীনি ৰচনানি ¶ উদ্ধরিত্ৰা ততো পকরণতো নীহরিত্ৰা এত্থ এতস্মিং ৰীথিযাধিকারে ৰিঞ্ঞুনা দস্সেতব্বানি.

৪৯৮-৯. অসম্ভেদেন চক্খুস্সাতি তস্সাপি চক্খু অসম্ভিন্নং হোতি. জীৰিতা নিরুদ্ধম্পি পিত্তেন ৰা সেম্হেন ৰা রুহিরেন ৰা পলিবুদ্ধং চক্খুৰিঞ্ঞাণস্স পচ্চযো ভৰিতুং অসক্কোন্তং সম্ভিন্নং নাম, সক্কোন্তং অসম্ভিন্নং নাম হোতি. তেন চক্খুপসাদস্স অসম্ভিন্নেন রূপাপাথগমনেন আলোকসন্নিস্সযেনাপি. তেন তিৰিধেন পচ্চযেন সমনক্কারহেতুনা পঞ্চদ্ৰারাৰজ্জনপচ্চযেন সহ পৰত্তনেন. এতেহি পন চতূহি পচ্চযেহি সং একতো ইন্তি পৰত্তন্তীতি ¶ সমেতা, সমেতেহি সহগতেহি সমাগমং একীভাৰং আগতেহি, তং চক্খুৰিঞ্ঞাণং চক্খুপসাদনিস্সিতং ৰিঞ্ঞাণং সম্পযুত্তেহি চেতসিকেহি সহ জাযতে.

৫০০-১. অসম্ভেদেন সোতস্স সোতপসাদস্স অসম্ভিন্নেন সদ্দাপাথগমেন চ সদ্দস্স আপাথগমনেন চ. আকাসনিস্সযেনাপি পিহিতকণ্ণচ্ছিদ্দস্স সোতৰিঞ্ঞাণং নুপ্পজ্জতি. তেন তিৰিধেন পচ্চযেন. সমনক্কারহেতুনা পঞ্চদ্ৰারাৰজ্জনপচ্চযেন সহ পৰত্তেন. এতেহি পন চতূহি পচ্চযেহি সমেতেহি সহগতেহি সমাগমং একীভাৰং আগতেহি তং সোতৰিঞ্ঞাণং সম্পযুত্তেহি সহ জাযতি.

৫০২-৩. অসম্ভেদেন ঘানস্স ঘানপসাদস্স অসম্ভিন্নেন গন্ধাপাথগমেন চ গন্ধস্স আপাথগমনেন চ. ৰাযোসন্নিস্সযেনাপীতি ঘানবিলম্হি পৰিসন্তেন ৰাযুনাতি অত্থো. তেন তিৰিধেন পচ্চযেন. সমনক্কারহেতুনা পঞ্চদ্ৰারাৰজ্জনপচ্চযেন সহ পৰত্তেন. এতেহি পন চতূহি পচ্চযেহি সমেতেহি সহগতেহি সমাগমং একীভাৰং ¶ আগতেহি তং ঘানৰিঞ্ঞাণং সম্পযুত্তেহি সহ জাযতি.

৫০৪-৫. অসম্ভেদেন জিৰ্হায জিৰ্হায অসম্ভিন্নেন রসাপাথগমেন চ রসস্স আপাথগমনেন চ. আপোসন্নিস্সযেনাপীতি জিৰ্হাতেমনং আপং লদ্ধা চ উপ্পজ্জতি, তেন ৰিনা সুক্খখাদনীযে জিৰ্হায সাযিতেপি জিৰ্হাৰিঞ্ঞাণং নুপ্পজ্জতীতি অত্থো. তেন তিৰিধেন পচ্চযেন. সমনক্কারহেতুনা পঞ্চদ্ৰারাৰজ্জনপচ্চযেন সহ পৰত্তেন. এতেহি পন চতূহি পচ্চযেহি সমেতেহি সহগতেহি সমাগমং একীভাৰং আগতেহি তং জিৰ্হাৰিঞ্ঞাণং সম্পযুত্তেহি সহ জাযতি.

৫০৬-৭. কাযপসাদস্স অসম্ভেদেন ফোট্ঠব্বস্স আপাথগমনেন চ. পথৰীনিস্সযেনাপীতি তেন ৰিনা কাযদ্ৰারম্পীতি বহিদ্ধা মহাভূতারম্মণং অজ্ঝত্তিকং কাযপসাদং ঘট্টেত্ৰা পসাদপচ্চযেসু মহাভূতেসু পটিহঞ্ঞতি. তেন তিৰিধেন পচ্চযেন. সমনক্কারহেতুনা পঞ্চদ্ৰারাৰজ্জনপচ্চযেন সহ পৰত্তেন. এতেহি পন চতূহি পচ্চযেহি সমেতেহি সহগতেহি সমাগমং একীভাৰং আগতেহি তং কাযৰিঞ্ঞাণং সম্পযুত্তেহি সহ জাযতি.

৫০৮-৯. অসম্ভেদা ¶ মনস্সাপীতি মনন্তি ভৰঙ্গচিত্তং. তং নিরুদ্ধম্পি আৰজ্জনচিত্তস্স পচ্চযো ভৰিতুং অসমত্থং মন্দতমগতমেৰ ৰত্তমানম্পি সম্ভিন্নং নাম হোতি. আৰজ্জনস্স পচ্চযো ভৰিতুং সমত্থং অসম্ভিন্নং নাম. মনস্স অসম্ভেদেন ধম্মস্স আপাথগমনেন চ ৰত্থুসন্নিস্সযেন হদযৰত্থুসন্নিস্সযেন. তেন তিৰিধেন পচ্চযেন. সমনক্কারহেতুনা মনোদ্ৰারাৰজ্জনেন সহ পৰত্তেন. এতেহি পন চতূহি পচ্চযেহি সমেতেহি সহগতেহি সমাগমং ¶ একীভাৰং আগতেহি তং মনোৰিঞ্ঞাণং তং মনোৰিঞ্ঞাণসঙ্খাতং জৰনচিত্তং সম্পযুত্তেহি সহ জাযতে.

৫১০-১১. মনো ভৰঙ্গচিত্তং নাম ৰিভাৰিনা ৰেদিতব্বং. আৰজ্জনক্রিযাচিত্তং আৰজ্জনকিরিযাচিত্তদ্ৰযং সমনক্কারো নাম ৰিভাৰিনা সঞ্ঞিতং. ৰত্থুসন্নিস্সযেন ইতি অযং পাঠো সব্বত্থ সব্বেসু ভৰেসু ন গচ্ছতি. পঞ্চহি খন্ধেহি ৰোকারো ৰোকিণ্ণোতি পঞ্চৰোকারো, পঞ্চৰোকারভৰং সন্ধায কারণং কত্ৰা ‘‘ৰত্থুসন্নিস্সযেনা’’তি অযং পাঠো পন কথিতো মযা, পঞ্চৰোকারভৰো নাম কামরূপভৰো, অরূপভৰো চতুৰোকারভৰো নাম, অসঞ্ঞীভৰো একৰোকারভৰো নাম. অযং পাঠো চতুৰোকারঅরূপভৰং সন্ধায ন কথিতোতি অত্থো. ৰত্থুস্স রূপত্তা অরূপভৰে কথং ৰত্থুসন্নিস্সযো ভৰেয্যাতি অত্থো.

৫১২-৪. পটিসন্ধাদিচিত্তানি, সব্বানেকূনৰীসতি হোন্তি, কামাৰচরেসু দস, রূপেসু পঞ্চ, অরূপীসু চত্তারি, সব্বানি পটিসন্ধিচিত্তানি একূনৰীসতি হোন্তি. কম্মং নাম কুসলাকুসলচেতনা. কম্মনিমিত্তং নাম রূপানি পঞ্চারম্মণানি পঞ্ঞত্তি চ মহগ্গতচিত্তঞ্চ. তথা গতিনিমিত্তকং নাম কপ্পরুক্খাদযো, অকুসলপক্খে রূপাদিআরম্মণভূতা লোহকুম্ভাদযো চ. ইতি এৰং ইমিনা মযা ৰুত্তপ্পকারেন তেসং পটিসন্ধাদিচিত্তানং আরম্মণং তিৰিধং ভগৰতা উদীরিতং. কামাৰচরসন্ধীনং পরিত্তারম্মণং কামাৰচরারম্মণং ভগৰতা মতং. পচ্চুপ্পন্নং রূপাদিপঞ্চারম্মণং, গতিনিমিত্তং পঞ্চারম্মণঞ্চ পচ্চুপ্পন্নঞ্চ হোতি. অতীতং ৰা কম্মং কুসলাকুসলচেতনা অতীতাযেৰ, ন পচ্চুপ্পন্না. অনাগতং আরম্মণং নত্থি.

৫১৫-২৬. অট্ঠেৰ চ মহাৰিপাকা, তীণি সন্তীরণানি চাতি একাদসৰিধং চিত্তং তদারম্মণসঞ্ঞিতং. একাদসৰিধে চিত্তে ¶ তদারম্মণসঞ্ঞিতে পুঞ্ঞৰিপাকানি কুসলৰিপাকা দস ¶ হোন্তি, অপুঞ্ঞজং অকুসলৰিপাকং পন একং হোতি. মহাৰিপাকা রূপারূপভৰদ্ৰযে ন জাযন্তি, কামরূপভৰে সন্তীরণত্তযং হোতি. যানি তদারম্মণচিত্তানি সত্থুনা জিনেন ৰুত্তানি, তেসু তদারম্মণচিত্তেসু একম্পি তদারম্মণচিত্তং রূপারূপভৰদ্ৰযে তদারম্মণং হুত্ৰা কদাচিপি নপ্পৰত্ততি. কস্মা কারণা? তত্থ তস্মিং রূপারূপভৰদ্ৰযে ‘‘তদারম্মণং ন হোতী’’তি ৰচনং চোদকো ভৰেয্য, বীজস্সাভাৰতো পন ন হোতীতি পরিহারো. অকামাৰচরারম্মণে অকামাৰচরধম্মে ইদং তদারম্মণমানসং নেৰ অনুবন্ধতি. হি কস্মা কারণা? পরিত্তারম্মণত্তা চ একন্তেন অৰস্সং তদারম্মণমানসস্স কামাৰচরারম্মণত্তা চ তথা অপরিচিতত্তা চ সব্বদা নানুবন্ধতি. তঞ্হি যথা পিতরং ৰা পিতুসদিসং ৰা ঞাতিং অনুবন্ধন্তোপি তরুণদারকো ঘরদ্ৰারন্তরৰীথিচতুক্কাদিম্হি পরিচিতেযেৰ দেসে অনুবন্ধতি, ন অরঞ্ঞং ৰা যুদ্ধভূমিং ৰা গচ্ছতি, এৰং কামাৰচরে ধম্মে অনুবন্ধন্তম্পি মহগ্গতলোকুত্তরধম্মমারব্ভ পৰত্তমানে ধম্মে নানুবন্ধতি. যস্মা চস্স সব্বো কামাৰচরপাকো চ কিরিযামনোধাতু কিরিযাঅহেতুকমনোৰিঞ্ঞাণধাতু সোমনস্সসহগতা ইমে ধম্মা পরিত্তারম্মণাতি এৰং অচ্চন্তং পরিত্তমেৰ আরম্মণং ৰুত্তং, তস্মা চেতং মহগ্গতলোকুত্তরারম্মণে কামাৰচরধম্মেপি নানুবন্ধতীতি ৰেদিতব্বং.

৫২৭-৩২. কিং তেন যুত্তিৰাদেন, ৰুত্তং অট্ঠকথাসু হি ‘‘জনকং তেন তুল্য’’ন্তিআদিকেন তেন, যুত্তিযা ৰাদো যুত্তিৰাদো, ‘‘জনকং তেন তুল্য’’ন্তিআদিকায যুত্তিকথায কিং পযোজনং ৰুত্তং? অট্ঠকথাসু হি সচ্চং ‘‘কিং তেন যুত্তিৰাদেনা’’তি ৰচনং, ‘‘অত্থকথাসূ’’তি ৰত্তব্বে সমাসে হি ত্থ-স্স ট্ঠ-কারং কত্ৰা ‘‘অট্ঠকথাসূ’’তি ৰুত্তং ¶ . কামাৰচরে ধম্মে পটিচ্চ তদারম্মণভাৰদীপকং ৰচনং আচরিযেন ৰুত্তং. তদারম্মণচিত্তানি, একাদসপি সব্বসো সব্বপ্পকারেনপি তদারম্মণচিত্তানি নামগোত্তং পনারব্ভ তিস্সাদিকং নামপঞ্ঞত্তিং পটিচ্চ কচ্চাযনগোত্তকস্সপগোত্তাদিকং গোত্তপঞ্ঞত্তিং পটিচ্চ জৰনে জৰিতেপি চ তদারম্মণং ন গণ্হন্তি, রূপারূপভৰেসু ৰা তদারম্মণং ন গণ্হন্তি. যদা পঞ্ঞত্তিমারব্ভ, জৰনে জৰিতেপি ৰা যদা মযা ৰুত্তায পঞ্ঞত্তিযা সেসপঞ্ঞত্তিং পটিচ্চ জৰনে জৰিতেপি ৰা তদারম্মণং ন লব্ভতে আচরিযেন, তথা দুক্খঅনিচ্চঅনত্তলক্খণারম্মণিকায ৰিপস্সনায তদারম্মণং ন লব্ভতে আচরিযেন. তদারম্মণা ন লব্ভন্তি, মিচ্ছত্তনিযতেসুপি মিচ্ছত্তে মিচ্ছাসভাৰে ‘‘নত্থি দিন্ন’’ন্ত্যাদিৰসেন নিযতানি চত্তারি দিট্ঠিযুত্তজৰনানি মিচ্ছত্তনিযতানি, মিচ্ছত্তনিযতেসুপি তদারম্মণং ন লব্ভতে আচরিযেন, লোকুত্তরধম্মে আরব্ভ ¶ জৰনে গতেপি তদারম্মণং ন লব্ভতে আচরিযেন. তথা মহগ্গতে ধম্মে আরব্ভ জৰনে জৰিতেপি তদারম্মণং ন লব্ভতে আচরিযেন, পটিসম্ভিদাঞাণং আরব্ভ জৰনে জৰিতেপি তদারম্মণং ন লব্ভতে আচরিযেন. মনোদ্ৰারেপি সব্বেসং জৰনানং অনন্তরং অনুপুব্বতো তদারম্মণচিত্তানি ভৰন্তি.

৫৩৩-৪. মনোদ্ৰারে আরম্মণঘট্টনা ন ৰিজ্জতি. ভৰঙ্গতো চেতসো ৰীথিচিত্তস্স ৰুট্ঠানং কথং কেন পকারেন হোতি? মনোদ্ৰারেপি ঘট্টনায ৰিনা ঘট্টনং ৰজ্জেত্ৰা আপাথং আগচ্ছন্তেৰ যস্মা কারণা, তস্মা ৰীথিচিত্তানং সম্ভৰো হোতি.

৫৩৫-৬. দ্ৰাদসাপুঞ্ঞচিত্তানং দ্ৰাদসঅকুসলচিত্তানং ৰিপাকা সত্তসত্ততি পাপপাকা দ্ৰাদসপাপচিত্তানং ৰিপাকা ¶ চতুরাসীতি পৰত্তিযং হোন্তি. একস্স সোমনস্সযুত্তদিট্ঠিসম্পযুত্তাকুসলস্স চক্খুসোতঘানজিৰ্হাকাযৰিঞ্ঞাণানি, সম্পটিচ্ছনং, উপেক্খাযুত্তসন্তীরণানি চাতি সত্ত অকুসলপাকা হোন্তি. তথা সেসানং একাদসন্নং অকুসলানম্পি সত্ত ৰিপাকা হোন্তি. একাদসৰিধানং তু, হিত্ৰা উদ্ধচ্চমানসং উদ্ধচ্চমানসং হিত্ৰা একাদসৰিধানং পটিসন্ধিযো একাদসৰিধা চেৰ ভৰন্তি.

৫৩৭-৮. ক্রিযচিত্তেসু সব্বেসু যং আৰজ্জনদ্ৰযং জৰনং ন চ হোতি, তং আৰজ্জনদ্ৰযং করণমত্তত্তা কিরিযামত্তত্তা ৰাতপুপ্ফসমং ৰাতপুপ্ফেন সদিসং মতং ভগৰতা. অযমেত্থাধিপ্পাযো – খীণাসৰে উপ্পন্নকালে ৰা তং আৰজ্জনদ্ৰযং কিরিযচিত্তং ভৰিতুং যুত্তং. সব্বেসু পুথুজ্জনেসু উপ্পন্নকালে কথং কিরিযা হোতীতি চে? করণমত্তত্তা অফলদাযকং ৰাতপুপ্ফং ৰিয অফলদাযকং কিরিযচিত্তং ভৰিতুং যুত্তিহারো কিরিযা পন হোতি. যং সব্বং কিরিযচিত্তং কিচ্চসাধনতো জৰনকিচ্চসাধনৰসেন জৰনত্তং জৰনভাৰং পত্তং ছিন্নমূলস্স রুক্খস্স পুপ্ফং অফলং হোতি যথা, এৰং ছিন্নাৰিজ্জাতণ্হামূলস্স ৰীতরাগস্স তং সব্বং কিরিযচিত্তং অফলং ৰিপাকৰিরহিতং সিযা ভৰেয্য.

৫৩৯-৪০. পটিচ্চ পন এতস্মা, ফলমেতীতি পচ্চযো একং ধম্মং পটিচ্চ এতস্মা ধম্মতো ফলং এতি পৰত্ততি তস্মা পচ্চযো, যো ধম্মো যস্স ধম্মস্স ঠিতিযা উপ্পত্তিযাপি উপকারো ¶ নাম হোতি, সো ধম্মো তস্স ধম্মস্স পচ্চযোতি পচ্চযো নাম পণ্ডিতেন পৰুচ্চতে. সম্ভৰো পভৰো হেতু কারণং পচ্চযো মতো ভগৰতা. ইদং ৰচনং অঞ্ঞত্থ দীপনৰচনং.

৫৪১. লোভাদি পন যো ধম্মো, মূলট্ঠেনুপকারকো যো লোভাদি পন ধম্মো মূলভাৰেন ফলধম্মস্স ¶ উপকারকো, সো লোভাদিধম্মো ফলধম্মস্স হেতূতি হেতু নাম ৰিভাৰিনা ৰিঞ্ঞাতব্বো.

৫৪২. লোভো দোসো চ মোহো চ তথা অলোভাদযো তযো হেতূ, তে ছ এৰ হেতুযো হোন্তি, জাতিতো জাতিৰসেন কুসলজাতিঅকুসলজাতিঅব্যাকতজাতিৰসেন নৰধা নৰহি কোট্ঠাসেহি সিযুং.

৫৪৩-৪. ধম্মানং কুসলাদীনং, কুসলাদিত্তসাধকো যো ধম্মো কুসলাদীনং ধম্মানং কুসলাদিত্তসাধকো কুসলাদিভাৰসাধকো, সো ধম্মো মূলট্ঠো নাম. এৰং ৰচনং একে একচ্চে আচরিযা ৰদন্তি. এৰং সন্তে কুসলাকুসলাদীনং ধম্মানং কুসলাদিত্তসাধকৰসেন মূলট্ঠে সন্তে তংসমুট্ঠানরূপীসু তেহি চিত্তেহি সমুট্ঠানরূপেসু তেহি চিত্তেহি সমুট্ঠিতেসু চিত্তজরূপেসু হেতূনং লোভাদিহেতূনং হেতুপচ্চযতা কদাচিপি নেৰ সম্পজ্জতি. অযমেত্থাধিপ্পাযো – যদি চিত্তেসু রূপানি সমুট্ঠাপেন্তেসু তে লোভাদযোপি চিত্তানং সম্পযুত্তচিত্তানং একুপ্পাদত্তা চ রূপানি সমুট্ঠাপেন্তিযেৰ. তদা তেসং মতে তেসং চিত্তজরূপানং কুসলাদিত্তং সিযা. ন চ কদাচি রূপানি কুসলাদিনামকানি দিস্সন্তি যস্মা, তস্মা চিত্তজরূপানং কুসলাদিভাৰঞাপনত্থং তেসং চিত্তজরূপানং তে লোভাদযো হেতুপচ্চযা ন হোন্তি, ইতি ৰচনং ৰত্তব্বং সিযা. এৰঞ্চ সতি চিত্তজরূপানি নাম কদাচিপি ৰিযুত্তানি চরন্তি, তস্মা কুসলাদিত্তসাধকো মূলট্ঠো ন হোতি.

৫৪৫-৬. হি সচ্চং ‘‘এৰং সন্তে তু হেতূন’’ন্তিআদিকং ৰচনং. তে লোভাদযো হেতূ তেসং রূপানং কুসলাদিতং কুসলাদিভাৰং ন সাধেন্তি ন নিপ্ফাদেন্তি. তে হেতূ তেসং ¶ পন রূপানং পচ্চযা ন চ ন হোন্তিযেৰ, তস্মা কারণা কুসলাদীনং ধম্মানং কুসলাদিত্তসাধকো যো ধম্মো, সো ধম্মো মূলট্ঠোতি মূলসভাৰো নাম সমযঞ্ঞুনা সমযৰিজাননসীলেন ৰিঞ্ঞুনা গন্তব্বো জানিতব্বো.

৫৪৭. সুপ্পতিট্ঠিতভাৰস্স ¶ , সাধনেনুপকারকো সুপ্পতিট্ঠিতভাৰং সাধনেন উপকারকো যো অত্থো, সো অত্থো হেতূনং লোভাদীনং মূলট্ঠো মূলসভাৰো ইতি চ গহণং ৰিভাৰিনা ৰিঞ্ঞাতব্বং.

৫৪৮-৯. কুসলাকুসলা হেতূ কুসলা হেতূ, অকুসলা হেতূ, ক্রিযাহেতূ সব্বসো সব্বপ্পকারেন সব্বে কিরিযাহেতুযো চ সম্পযুত্তানং পঞ্চৰোকারভূমিযং সম্পযুত্তানং ধম্মানং অঞ্ঞমঞ্ঞপচ্চযভাৰেন হেতুপচ্চযতং যাতা গতা. তংসমুট্ঠানানং চিত্তজরূপানঞ্চ হেতুপচ্চযতং যাতা গতা, এতে হেতূ চতুৰোকারভূমিযং সম্পযুত্তানং এৰ ধম্মানং হেতুপচ্চযতং যাতা গতা.

৫৫০-১. কামে ৰিপাকহেতূপি অত্তনা সম্পযুত্তানং হেতুপচ্চযতং যাতা, পটিসন্ধিক্খণেপি কটত্তারূপজাতানং কম্মজরূপানং হেতুপচ্চযতং যাতা, তস্মা পটিসন্ধিচিত্তুপ্পাদক্খণেযেৰ কম্মজরূপানং উপ্পাদো হোতি, যস্মা কারণা পৰত্তিযং চিত্তজানঞ্চ রূপানং হেতুপচ্চযতং গতা.

৫৫২-৫. রূপে ৰিপাকহেতূ কামাৰচরভূমিযং হেতুযো ৰিয হেতুপচ্চযা হোন্তি, পঞ্চৰোকারে লোকুত্তরৰিপাকহেতৰো চিত্তজানং রূপানঞ্চ সম্পযুত্তানঞ্চ পঞ্চৰোকারভূমিযং হেতুপচ্চযা হোন্তি. চতুৰোকারে লোকুত্তরৰিপাকজা হেতৰো সম্পযুত্তানং এৰ চতুৰোকারভূমিযং হেতুপচ্চযা ভৰন্তি. ইতরে চতুৰোকারে অরূপভৰে ৰিপাকজা হেতৰো সম্পযুত্তানং এৰ সভূমিযং অত্তনো ¶ ভূমিযং অরূপভূমিযং হেতুপচ্চযা হোন্তি. হেতুত্থো হেতূনং অত্থো হেতুযো চেৰ হেতুপচ্চযো চেৰ হেতুপচ্চযসম্ভৰো হেতুপচ্চযুপ্পত্তি, এৰমেৰ এৰং ইমিনা পকারেন. সঞ্জাতো সুখহেতু যস্সাতি সঞ্জাতসুখহেতু, তেন ৰিঞ্ঞেয্যো.

৫৫৬-৮. ছন্দো চিত্তঞ্চ ৰীরিযং ৰীমংসা চাতি চতুধাধিপতী লোকাধিপতিনা সত্থুনা ৰুত্তা. ছন্দং জেট্ঠকং কত্ৰা চিত্তস্স উপ্পত্তিকালস্মিং যো ছন্দো, সো ছন্দাধিপতি নাম, ছন্দং ধুরং কত্ৰা সমাধিকরণচিত্তস্স এসেৰ নযো সেসেসুপি চ তীসু মযা ৰুত্ততো ছন্দাধিপতিতো সেসেসুপি চ অধিপতীসু. যো ধম্মো জেট্ঠট্ঠেন উপকারকো, সো ধম্মো অধিপতীতি অধিপতি নাম ভগৰতা নিদ্দিট্ঠো.

৫৫৯.

সুমতিমতিৰিবোধনং ¶ ৰিচিত্তং,

কুমতিমতিন্ধনপাৰকং পধানং;

ইমমতিমধুরং অৰেদি যো যো,

জিনৰচনং সকলং অৰেদি সো সো.

যো যো জনো ইমং অভিধম্মাৰতারং সুমতিমতিৰিবোধনং সুমতীনং সুন্দরমতীনং পণ্ডিতানং মতিযা ৰিবোধনকরং ৰিচিত্তং কুমতীনং কুচ্ছিতমতীনং বালানং মতিইন্ধনে পধানং পাৰকং অতিমধুরকরং অৰেদি জানি, সো সো জনো সকলং জিনৰচনং অৰেদি জানি.

ইতি অভিধম্মাৰতারটীকায

পকিণ্ণকনিদ্দেসৰণ্ণনা নিট্ঠিতা.

অট্ঠমো পরিচ্ছেদো.

৯. নৰমো পরিচ্ছেদো

পুঞ্ঞৰিপাকপচ্চযনিদ্দেসৰণ্ণনা

৫৬০-২.

বাত্তিংসপাকচিত্তানি ¶ , লোকিকানেৰ যানি হি;

এতেসং পাকচিত্তানং, পটিসন্ধিপৰত্তিসু.

যানি লোকিকানি এৰ বাত্তিংস পাকচিত্তানি হোন্তি, এতেসং পাকচিত্তানং পুঞ্ঞাপুঞ্ঞাদিসঙ্খারা ভৰাদীসু যোনিগতিৰিঞ্ঞাণট্ঠিতিসত্তাৰাসেসু পটিসন্ধিপৰত্তীসু যথা যেন পকারেন পচ্চযা হোন্তি এৰ, ইমেসং ৰিপাকচিত্তানং তেপি সঙ্খারা ভৰাদীসু যোনিগতিৰিঞ্ঞাণট্ঠিতিসত্তাৰাসেসু পটিসন্ধিপৰত্তীসু তথা তেন পকারেন ৰিভাৰিনা পণ্ডিতেন ৰিঞ্ঞাতব্বা. তযো ভৰা চতস্সো চ যোনিযো কামভৰরূপভৰঅরূপভৰৰসেন তযো ভৰা, অণ্ডজজলাবুজসংসেদজওপপাতিকযোনিৰসেন চতস্সো চ যোনিযো, নিরযগতিতিরচ্ছানগতিপেতগতিমনুস্সগতিদেৰগতিৰসেন ¶ গতিপঞ্চকং, সন্ধিসঞ্ঞায পটিসন্ধিসঞ্ঞায নানত্তা নানাভাৰতো, কাযস্সাপি চ রূপকাযস্সাপি চ নানত্তা নানাভাৰতো কামসুগতিযো, নানা অত্তা সভাৰো এতস্সাতি নানত্তা, নানত্তো রূপকাযো এতেসন্তি নানত্তকাযা, নানা সভাৰো এতস্সাতি নানত্তা, নানত্তাযেৰ সঞ্ঞা নানত্তসঞ্ঞা, সা এতেসং অত্থীতি নানত্তসঞ্ঞী নাম, পঠমজ্ঝানভূমি চ চতুরাপাযভূমিযো চ নানত্তকাযএকত্তসঞ্ঞী নাম, দুতিযজ্ঝানভূমি একত্তকাযনানত্তসঞ্ঞী নাম, ততিযজ্ঝানভূমিৰেহপ্ফলভূমিসুদ্ধাৰাসভূমিযো একত্তকাযএকত্তসঞ্ঞী নাম, হেট্ঠা ঠিতা রূপেহি সদ্ধিং সত্তৰিঞ্ঞাণট্ঠিতিযো, তিট্ঠন্তি ৰিঞ্ঞাণানি এত্থাতি ঠিতিযো, ৰিঞ্ঞাণানং ঠিতিযো ৰিঞ্ঞাণট্ঠিতিযো, ৰিঞ্ঞাণস্স অভাৰতো অসঞ্ঞীভূমি ন গয্হতে, চতুত্থারুপ্পভূমি চ ¶ পটুৰিঞ্ঞাণাভাৰতো ন গয্হতে. সত্তাৰাসৰসেন অসঞ্ঞীভূমিং, চতুত্থারুপ্পভূমিঞ্চ পন গহেত্ৰা তে সত্তাৰাসা নৰ এৰ হোন্তি.

৫৬৩-৮. কামে পুঞ্ঞাভিসঙ্খারসঞ্ঞিতা অট্ঠ চেতনা পূরেন্তি অত্তনো কারকং পূরেন্তি চ, অজ্ঝাসযং পুজ্জঞ্চ ভৰং নিব্বত্তেন্তীতি পুঞ্ঞানি, অভিসঙ্খরোন্তি ৰিপাকং, কম্মজরূপঞ্চাতি অভিসঙ্খারা, পুঞ্ঞানি এৰ অভিসঙ্খারা পুঞ্ঞাভিসঙ্খারা, তেযেৰ সঞ্ঞিতা পুঞ্ঞাভিসঙ্খারসঞ্ঞিতা, কামে পুঞ্ঞাভিসঙ্খারসঞ্ঞিতা অট্ঠ চেতনা. নৰন্নং পাকচিত্তানং উপেক্খাযুত্তাহেতুকমহাৰিপাকৰসেন নৰন্নং পাকচিত্তানং কামসুগতিযং পন নানা ৰত্তমানচেতনাখণতো পরং খণং এতস্সাতি নানাখণং, তং এৰ নানক্খণিকং, তমেৰ কম্মং নানক্খণিককম্মং, ৰত্তমানচেতনাতো পরা অতীতচেতনাতি অত্থো. বলৰা নিস্সযপচ্চযো উপনিস্সযপচ্চযো, বলৰত্থো চেত্থ উপ-সদ্দো, বলৰপচ্চযোতি অত্থো, নানক্খণিককম্মপচ্চযৰসেন বলৰপচ্চযৰসেন চাতি অত্থো. দ্ৰেধা দ্ৰীহি পকারেহি তেসং পটিসন্ধিযং পচ্চযা ভৰন্তি, তা অট্ঠ কামাৰচরমহাকুসলচেতনা উপেক্খাসহিতাহেতুমনোৰিঞ্ঞাণধাতুযা ৰিনা উপেক্খাসহগতাহেতুমনোৰিঞ্ঞাণধাতুং ৰজ্জেত্ৰা পরিত্তপাকানং চক্খুসোতঘানজিৰ্হাকাযসম্পটিচ্ছনসোমনস্সযুত্তাহেতুককুসলৰিপাকানং দ্ৰেধা নানক্খণিককম্মূপনিস্সযপচ্চযেহি পৰত্তিযং পচ্চযা হোন্তি. তাযেৰ চেতনা তা এৰ অট্ঠ কামাৰচরমহাকুসলচেতনা রূপভৰে পঞ্চন্নং পাকচিত্তানং কুসলৰিপাকচিত্তানং চক্খুসোতসম্পটিচ্ছনসোমনস্সযুত্তউপেক্খাযুত্তসন্তীরণানং দ্ৰেধা নানক্খণিককম্মূপনিস্সযপচ্চযেহি পৰত্তিযং পচ্চযা হোন্তি. অট্ঠন্নং তু পরিত্তানং, কামে দুগ্গতিযং তথা অট্ঠন্নং পরিত্তানং কুসলৰিপাকানং চক্খুসোতঘানজিৰ্হাকাযসম্পটিচ্ছনানং, দ্ৰিন্নং ¶ সন্তীরণানঞ্চ পৰত্তে পৰত্তিক্খণে ¶ পচ্চযা হোন্তি, পটিসন্ধিযং পটিসন্ধিক্খণে পন পচ্চযা ন হোন্তি. ৰুত্তপ্পকারাৰ কামে সুগতিযং যথাৰুত্তপ্পকারাৰ অট্ঠ কামাৰচরমহাকুসলচেতনা কামসুগতিযং তথা সোল়সন্নং কুসলৰিপাকানং পৰত্তে পৰত্তিক্খণে দ্ৰেধা নানক্খণিককম্মূপনিস্সযপচ্চযেহি পচ্চযা হোন্তি, পৰত্তে পৰত্তিক্খণে সত্তন্নং কুসলৰিপাকানং পচ্চযা হোন্তি. পটিসন্ধিযং পটিসন্ধিক্খণে নৰন্নং কুসলৰিপাকচিত্তানং পচ্চযা হোন্তি.

৫৬৯-৭৪. রূপে পুঞ্ঞাভিসঙ্খারা, রূপাৰচরভূমিযং পঞ্চন্নং পাকচিত্তানং পটিসন্ধিযং পটিসন্ধিক্খণে পচ্চযা হোন্তিমাপুঞ্ঞসঙ্খারা, কামে দুগ্গতিযং দ্ৰিধা ইমে অপুঞ্ঞাভিসঙ্খারা, ইমা কুসলপটিপক্খা উদ্ধচ্চৰজ্জা একাদস চেতনা কামদুগ্গতিযং একস্স পটিসন্ধিৰিঞ্ঞাণস্স পটিসন্ধিযং পটিসন্ধিক্খণে দ্ৰিধা নানক্খণিককম্মূপনিস্সযপচ্চযেহি পচ্চযা হোন্তি. দ্ৰাদস অকুসলচেতনা পৰত্তে পৰত্তিক্খণে এৰ ছন্নং চক্খুসোতঘানজিৰ্হাকাযসম্পটিচ্ছনানং অকুসলৰিপাকানং পচ্চযা হোন্তি, পটিসন্ধিযং পটিসন্ধিক্খণে পচ্চযা নো হোন্তি. সত্তন্নম্পি ভৰন্তেৰ পৰত্তে পৰত্তিক্খণে পটিসন্ধিযং পটিসন্ধিক্খণে অকুসলৰিপাকানি সত্তন্নং চক্খুসোতঘানজিৰ্হাকাযসম্পটিচ্ছনসন্তীরণানং পচ্চযা ভৰন্তি. কামে সুগতিযং তেসং, সত্তন্নম্পি তথেৰ চ দ্ৰাদসাকুসলচেতনা কামে সুগতিযং তথেৰ চ তেসং সত্তন্নং অকুসলৰিপাকানং পৰত্তে পৰত্তিক্খণে পচ্চযা হোন্তি, পটিসন্ধিযং পটিসন্ধিক্খণে পচ্চযা ন হোন্তি. ৰিঞ্ঞাণানং চতুন্নম্পি, তেসং রূপভৰে তথা তাযেৰ দ্ৰাদসাকুসলচেতনা রূপভৰে তেসং চতুন্নং অকুসলৰিপাকানং চক্খুসোতসম্পটিচ্ছনসন্তীরণসঙ্খাতানং ৰিঞ্ঞাণানং তথা পৰত্তে পৰত্তিক্খণে পচ্চযা হোন্তি, পটিসন্ধিযং পটিসন্ধিক্খণে ¶ পচ্চযা ন হোন্তি. সো চ কামভৰেনিট্ঠরূপাদিউপলদ্ধিযং সো চ অপুঞ্ঞাভিসঙ্খারো কামভৰে অনিট্ঠরূপাদিউপলদ্ধিযং অমনাপরূপাদীনি আরম্মণানি উপলদ্ধিযং তেসং চতুন্নং অপুঞ্ঞজানং ৰিঞ্ঞাণানং পচ্চযো হোতি. হি সচ্চং ‘‘সো চ কামভৰেনিট্ঠ-রূপাদিউপলদ্ধিয’’ন্তিআদিকং ৰচনং. অনিট্ঠরূপাদযো নাম ৰিসযা ব্রহ্মলোকে ন ৰিজ্জরে ন ৰিজ্জন্তি.

৫৭৫-৬. তথেৰানেঞ্জসঙ্খারো ন ইঞ্জতি ন ফন্দতি ন চলতীতি আনেঞ্জং, আনেঞ্জঞ্চ তং সঙ্খারো চাতি আনেঞ্জসঙ্খারো, তথা এৰ আনেঞ্জসঙ্খারো অরূপাৰচরভূমিযং চতুন্নং পাকচিত্তানং পৰত্তে পৰত্তিক্খণে পটিসন্ধিযং পটিসন্ধিক্খণে পচ্চযো হোতি. ভৰেস্ৰেতে ভৰেসু এতে ৰুত্তপ্পকারা পচ্চযা ৰুত্তপ্পকারেন পটিসন্ধিপৰত্তীসু যথা চ যেন যেন চ পকারেন ¶ নানক্খণিককম্মূপনিস্সযপচ্চযেহি পচ্চযা হোন্তি, তেন পচ্চযা তথা তেন তেন পকারেন ৰিভাৰিনা ৰিজানন্তেন পণ্ডিতেন ঞেয্যা.

৫৭৭. এসেৰ চ নযো ঞেয্যো, যোনিআদীসু যোনিগতিৰিঞ্ঞাণট্ঠিতিসত্তাৰাসেসু এসেৰ চ নযো ভৰেসু মযা ৰুত্তো এৰ নযো পণ্ডিতেন ঞেয্যো. তত্রিদং তত্র ভৰেসু আদিতো পট্ঠায ৰুত্তং ইদং ৰচনং মুখমত্তনিদস্সনং উপাযমত্তদীপনং হোতি.

৫৭৮-৮১. অৰিসেসেন পুঞ্ঞাভি-সঙ্খারো দ্ৰিভৰেসুপি কামপুঞ্ঞাভিসঙ্খারৰসেন, রূপপুঞ্ঞাভিসঙ্খারৰসেন চ পুঞ্ঞাভিসঙ্খারো অৰিসেসেন সমানভাৰেন দ্ৰীসু ভৰেসু কামরূপভৰেসু পটিসন্ধিং দত্ৰা সো সঙ্খারো সব্বপাকং জনেতি নিব্বত্তেতি. তথা চতূসু ৰিঞ্ঞেয্যো, অণ্ডজাদীসু যোনিসু দ্ৰিভৰেসু পুঞ্ঞাভিসঙ্খারো ৰিয তথা চতূসু অণ্ডজাদীসু সো পুঞ্ঞাভিসঙ্খারো পণ্ডিতেন ঞেয্যো. ‘‘অণ্ডজাদীসূ’’তি ¶ ৰচনং পদুমপচ্চেকবুদ্ধানং মনুস্সত্তং সন্ধায ৰুত্তং. বহুদেৰমনুস্সানং ৰসেন দ্ৰীসু গতীসু এৰ চ তথা সো পুঞ্ঞাভিসঙ্খারো পণ্ডিতেন ঞেয্যো. তথা নানত্তকাযাদি-ৰিঞ্ঞাণানং ঠিতীসুপি নানত্তকাযনানত্তসঞ্ঞীনানত্তকআযএকত্তসঞ্ঞী একত্তকাযনানত্তসঞ্ঞী একত্তকাযএকত্তসঞ্ঞীনং ৰসেন চতূসু ৰিঞ্ঞাণট্ঠিতীসু সো পুঞ্ঞাভিসঙ্খারো পণ্ডিতেন ঞেয্যো. নানত্তকাযনানত্তসঞ্ঞীনানত্তকাযএকত্তসঞ্ঞীএকত্তকাযনানত্তসঞ্ঞীএকত্তকাযএকত্তসঞ্ঞীনং ৰসেন ৰুত্তপ্পকারস্মিং চতুব্বিধে সত্তাৰাসে তথা সো পুঞ্ঞাভিসঙ্খারো পণ্ডিতেন ঞেয্যো. এৰং ইমিনা মযা ৰুত্তপ্পকারেন পুঞ্ঞাভিসঙ্খারো ভৰাদীসু ভৰযোনিগতিৰিঞ্ঞাণট্ঠিতিসত্তাৰাসেসু যথারহং সোল়সন্নং কামকুসলপাকানং, পঞ্চন্নং রূপপাকানঞ্চাতি একৰীসতিপাকানং দ্ৰিধা নানক্খণিককম্মূপনিস্সযপচ্চযেন পচ্চযো হোতি.

৫৮২-৩. কামে অপুঞ্ঞসঙ্খারো কামভৰে অণ্ডজজলাবুজসংসেদজওপপাতিকযোনিৰসেন অণ্ডজাদীসু যোনীসু নিরযগতিপেতগতিতিরচ্ছানগতিৰসেন তীসু গতীসু নানত্তকাযএকত্তসঞ্ঞীৰসেন একিস্সা ৰিঞ্ঞাণট্ঠিতিযা নানত্তকাযএকত্তসঞ্ঞীৰসেন চ একস্মিং পন সত্তাৰাসে দ্ৰিধা নানক্খণিককম্মূপনিস্সযপচ্চযেহি পৰত্তে পৰত্তিক্খণে পটিসন্ধিযং পটিসন্ধিক্খণে সো অপুঞ্ঞাভিসঙ্খারো পচ্চযো হোতি.

৫৮৪-৬. তথেৰানেঞ্জসঙ্খারো ¶ তথা এৰ আনেঞ্জসঙ্খারো, একারূপভৰে একস্মিং অরূপভৰে একিস্সা ওপপাতিকযোনিযা চেৰ একিস্সা দেৰগতিযাপি চ আকাসানঞ্চাযতনভূমি ৰিঞ্ঞাণঞ্চাযতনভূমি আকিঞ্চঞ্ঞাযতনভূমিৰসেন তীসু এৰ চিত্তট্ঠিতীসু চতুন্নং অরূপভূমীনং ৰসেন চতুব্বিধে সত্তাৰাসে চতুন্নং অরূপপাকচিত্তানং দ্ৰেধা ¶ নানক্খণিককম্মোপনিস্সযপচ্চযেহি সো আনেঞ্জাভিসঙ্খারো পচ্চযো হোতি. পটিসন্ধিপৰত্তীনং, ৰসেনেৰং ভৰাদীসু এৰং ইমিনা মযা ৰুত্তপ্পকারেন পটিসন্ধিপৰত্তীনং ৰসেন ভৰাদীসু যথা যে সঙ্খারা এসং পাকচিত্তানং পচ্চযা হোন্তি, তথা তে সঙ্খারা এৰং ইমিনা মযা ৰুত্তপ্পকারেন পণ্ডিতেন ৰিজানিতব্বা.

৫৮৭-৯০. ন রূপারূপধম্মানং, সঙ্কন্তি পন ৰিজ্জতি রূপধম্মানং, চিত্তচেতসিকসঙ্খাতানং নামধম্মানঞ্চ সঙ্কন্তি পন সঙ্কমনং পন ন ৰিজ্জতি. সঙ্কন্তিভাৰে অসতি অতীতভৰতো ইধ ইমস্মিং ভৰে রূপধম্মানং সঙ্কমনভাৰে অসতি পটিসন্ধিচিত্তং কথং কেন পকারেন সিযা ভৰেয্য? নত্থি চিত্তস্স সঙ্কন্তি, অতীতভৰতো ইধ ইমস্মিং ভৰে চিত্তস্স সঙ্কন্তি সঙ্কমনং নত্থি, ততো অতীতভৰতো অতীতং হেতুং ৰিনা ৰজ্জেত্ৰা ইধ ইমস্মিং ভৰে চিত্তস্স পাতুভাৰো ন ৰিজ্জতি. সুলদ্ধপচ্চযং রূপারূপমত্তং সুট্ঠু লদ্ধপচ্চযং রূপনামমত্তং জাযতি. এৰং ইমিনা মযা ৰুত্তপ্পকারেন পচ্চযং লভিত্ৰা উপ্পজ্জমানং রূপারূপমত্তং রূপনামমত্তং জাযতি. এৰং ইমিনা মযা ৰুত্তপ্পকারেন পচ্চযং লভিত্ৰা উপ্পজ্জমানং রূপারূপমত্তং ভৰন্তরং অঞ্ঞভৰং পটিসন্ধিং উপেতি উপগচ্ছতি. ইতি ৰচনং সমঞ্ঞায লোকিযৰোহারেন পৰুচ্চতে, সত্তো ৰা নত্থি, সত্তো জীৰোতি ৰেৰচনং, অত্তা ৰাপি ন ৰিজ্জতি.

৫৯১-৯. তস্সিদং পাকটং কত্ৰা, পটিসন্ধিক্কমং পন তস্স সত্তস্স ইদং পটিসন্ধিক্কমং সুদুব্বুধং অতিদুব্বিজানং পাকটং কত্ৰা অহং দস্সযিস্সামি, তমেতং পটিসন্ধিক্কমং সাধু সাধুকং নিবোধথ, সাধু সাধুকং মনসি করোথ, ৰিৰিধেসু আরম্মণেসু লোভৰসেন চিত্তং অনামেত্ৰা ৰজিরমঞ্জূসায অনগ্ঘমণিরতনং পক্খিপন্তো ৰিয চিত্তে ঠপেত্ৰাতি অত্থো. অতীতস্মিং ভৰে তস্স, আসন্নমরণস্স হিইতো ¶ ভৰতো অতীতস্মিং ভৰে আসন্নমরণস্স তস্স সরীরস্মিং আতপে পক্খিত্তং হরিতং তালপণ্ণং ৰিয সুস্সমানে সতি চক্খুন্দ্রিযাদিকে ইন্দ্রিযে নট্ঠে হদযৰত্থুমত্তস্মিং ঠিতে কাযপ্পসাদিকে ৰিঞ্ঞাণে তস্মিং খণে ৰত্থুসন্নিস্সিতং হদযৰত্থুনিস্সিতং. ‘‘চিত্ত’’ন্তি ৰচনং ভৰঙ্গমনোদ্ৰারাৰজ্জনজৰনং সন্ধায ৰুত্তন্তি ৰেদিতব্বং. পুব্বানুসেৰিতন্তি ¶ ইতো কালা পুব্বকালে তেন পন অনুসেৰিতং অনুচিণ্ণং পুঞ্ঞং কম্মং ৰা অপুঞ্ঞং এৰ ৰা কম্মং কম্মনিমিত্তং গতিনিমিত্তং ৰা কম্মফলেন দ্ৰারেসু পচ্চুপট্ঠিতং আলম্বিত্ৰা মনোদ্ৰারাৰজ্জনজৰনৰসেন সেৰিতচিত্তং পৰত্ততি. এৰং ইমিনা মযা ৰুত্তপ্পকারেন পৰত্তমানং তং ৰিঞ্ঞাণং তং জৰনচিত্তং লদ্ধপচ্চযং লদ্ধারম্মণপচ্চযং. অৰিজ্জায পটিচ্ছন্নাদীনৰে ৰিসযেতি অকুসলজৰনে জৰিতে তস্স জৰনস্স অৰিজ্জায অপ্পটিচ্ছন্নদোসে তস্মিং কম্মাদিকে আরম্মণে কুসলজৰনে জৰিতে ততো চিত্তৰীথিতো পুব্বভাগে পৰত্তায অৰিজ্জায পটিচ্ছন্নদোসে তস্মিং কম্মাদিকে আরম্মণে. তণ্হাতি অকুসলজৰনেন সহজো লোভো, অকুসলজৰনে ৰা জৰিতে ততো ৰীথিচিত্ততো পুব্বভাগে পৰত্তো লোভো তণ্হা. নমেতীতি অঞ্ঞং আরম্মণং অগ্গাহাপেত্ৰা দল়্হগ্গাহৰসেন তং এৰ কম্মনিমিত্তগতিনিমিত্তসঙ্খাতং আরম্মণং গণ্হাপেতীতি অত্থো. সহজা সঙ্খারা পন তস্স চিত্তস্স সহজা একতো জাতা চেতনা পন তস্মিং যেৰারম্মণে খিপন্তি পৰত্তন্তি. ইমস্মিং পচ্চুপ্পন্নভৰে একসন্ততিৰসা পৰত্তায তণ্হায নমীযমানং তং ৰিঞ্ঞাণং ওরিমা তীরম্হা রজ্জুকং আলম্বিত্ৰা মাতিকাতিক্কমো পুরিসো ৰিয এতং পুরিমং নিস্সযভূতং হদযৰত্থুং জহতি ছড্ডেতি, চুতিচিত্তং উপ্পজ্জিত্ৰা নিরুজ্ঝতীতি অত্থো. অপরং কম্মসম্ভূতং নিস্সযং অপরং অঞ্ঞকম্মতো সম্ভূতং নিস্সযভূতং হদযৰত্থুং লভিত্ৰা ৰা অলভিত্ৰাপি ৰা আরম্মণাদীহি ¶ পচ্চযেহি তং পটিসন্ধিসঙ্খাতং মানসং পৰত্ততি. ‘‘লভিত্ৰা’’তি ৰচনং কামরূপভৰং সন্ধায ৰুত্তং. ‘‘অলভিত্ৰা’’তি ৰচনং অরূপভৰং সন্ধায ৰুত্তং. এত্থ এতেসু চিত্তেসু পুরিমং ‘‘জহতী’’তি ৰচনেন ৰুত্তঞ্চেৰ চিত্তং, চুতিচিত্তং পচ্ছিমং ‘‘আরম্মণাদীহি পচ্চযেহি পৰত্ততী’’তি ৰচনেন ৰুত্তঞ্চেৰ চিত্তং পটিসন্ধিচিত্তং পণ্ডিতেন ৰেদিতব্বং.

৬০০-৬. তদেতং তং এতং পটিসন্ধিচিত্তং পুরিমা ভৰতো ইধ ইমস্মিং পচ্ছিমভৰে নাপি আগতং, কম্মাদিঞ্চ হেতুং ৰিনা ৰজ্জেত্ৰা পটিসন্ধিচিত্তং পাতুভূতং ন চেৰ তং এত্থ এতস্মিং ৰচনে এতস্স পটিসন্ধিচিত্তস্স পুরিমা ভৰতো ইধ ইমস্মিং পচ্চুপ্পন্নভৰে অনাগমনে অতীতভৰহেতূহি অতীতভৰে কম্মাদিপচ্চযেহি এতস্স পটিসন্ধিচিত্তস্স সম্ভৰে. পটিঘোসদীপমুদ্দাদী, ভৰন্তেত্থ নিদস্সনা এত্থ এতস্মিং তস্স পটিসন্ধিচিত্তস্স অতীতভৰতো অনাগমনে অতীতভৰে হেতূহি সম্ভৰে পটিঘোসদীপমুদ্দাদিঅত্থনিদস্সনা উপমা ভৰন্তি. অঞ্ঞত্র অঞ্ঞস্মিং পটিঘোসাদীনং অত্থানং পৰত্তিট্ঠানে আগন্ত্ৰা সদ্দাদিহেতুকা সদ্দাদযো পচ্চযা হোন্তি যথা. ইদং ৰুত্তং হোতি – ইমস্মিং ঠানে জনেহি পৰত্তাপিতা সদ্দদীপমুদ্দাদযো অত্থা ¶ পব্বতন্তরাদীসু অঞ্ঞেসু ঠানেসু পৰত্তানং পটিঘোসদীপমুদ্দাদীনং অত্থানং হেতুকা হোন্তি. তেসু সদ্দাদীসু পচ্চযেসু সন্তেসু যে তে পটিঘোসাদযো হোন্তি, অসন্তেসু ন হোন্তি যথা, এৰমেৰ চ ৰিঞ্ঞাণং অতীতভৰতো পচ্চুপ্পন্নভৰৰিঞ্ঞাণৰসেন পৰত্তং ৰিঞ্ঞাণং ৰিভাৰিনা ৰেদিতব্বং. সন্তানবন্ধতো সন্তানবন্ধৰসেন একতা অতীতভৰপচ্চুপ্পন্নভৰৰিঞ্ঞাণৰসেন পৰত্তস্স ৰিঞ্ঞাণস্স একীভাৰো নত্থি, নানতাপি তস্স ৰিঞ্ঞাণস্স নানাভাৰোপি পচ্চেকভাৰো অপি. সতি সন্তানবন্ধে তু, একন্তেনেকতা সিযা সন্তানবন্ধে সতি একন্তেন তস্স ¶ ৰিঞ্ঞাণস্স একতা একীভাৰো সিযা ভৰেয্য, খীরসভাৰতো পগ্ঘরণসভাৰতো খীরতো সম্ভূতং ঘনসভাৰং কদাচিপি কিস্মিঞ্চিপি কালে ন ভৰেয্য, সব্বদা পগ্ঘরণসভাৰখীরমেৰ ভৰেয্যাতি অত্থো. অথাপি অপরো নযোপি সা একন্তনানতা তস্স ৰিঞ্ঞাণস্স সো একন্তনানাভাৰো যদি ভৰেয্য, খীরসামিকো সো পুগ্গলো দধিসামি ন ভৰেয্য. খীরকালে খীরস্স ইস্সরভূতো সামিকো পগ্ঘরণসভাৰং জহিত্ৰা দধিস্স উপ্পজ্জমানকালে তস্স দধিস্স ইস্সরো ন ভৰেয্য, ততো খীরসামিকো অঞ্ঞো পুগ্গলো তস্স দধিস্স অনিস্সরো অসামিকো ভৰেয্যাতি অত্থো. যস্মা কারণা এত্থ এতস্মিং পটিসন্ধিক্কমৰিনিচ্ছযে একন্তএকতাপি ৰা একন্তনানতাপি ৰা সমযঞ্ঞুনা ৰিঞ্ঞুনা ন চেৰ উপগন্তব্বা.

৬০৭-১০. এৰং ইমিনা মযা ৰুত্তপ্পকারেন অসঙ্কন্তিপাতুভাৰে সঙ্কন্তিপাতুভাৰরহিতে ভৰে সতি ইমস্মিং মনুস্সত্তভাৰে খন্ধাদিসমতা অভিসম্ভূতা যে খন্ধা হোন্তি, এতেসং ইধ ইমস্মিং মনুস্সত্তভাৰে নিরুদ্ধত্তা ইধ ইমস্মিং মনুস্সত্তভাৰে জনেহি কতস্স তস্স কম্মস্স ফলহেতুনো ফলস্স পচ্চযভূতস্স পরত্থ পরস্মিং লোকে আগমতো চেৰ এৰং অঞ্ঞস্স সত্তস্স অঞ্ঞতো কম্মতো হি ততো সত্ততো অঞ্ঞেন সত্তেন কততো অঞ্ঞতো চেৰ কম্মতো তং ফলং সিযা ভৰেয্য, ‘‘অঞ্ঞস্স সত্তস্সা’’তি ৰচনেন তিত্থিযসত্তস্সপি কম্মং অঞ্ঞস্স চ ফলং দদেয্যাতি অত্থো, তস্মা কারণা এতং সব্বং এৰ চ তুম্হেহি ৰুত্তৰিধানং ন সুন্দরং. এত্থাহাতি এতস্মিং ঠানে ঠত্ৰা চোদকো আহ – ননু এৰং ‘‘অসঙ্কন্তিপাতুভাৰে ভৰে সতী’’তিআদিকং ৰচনং নিযতীতি? ৰুচ্চতে – সন্তানে যং ফলং এতং একস্মিং ¶ সন্তানে পৰত্তমানং যং এতং ফলং অঞ্ঞস্স সত্তস্স ন হোতি, অঞ্ঞতো কম্মতো ন চ হোতি, বীজানং অভিসঙ্খারো এতস্সত্থস্স ‘‘একস্মিং সন্তানে’’তিআদিকস্স এতস্স অত্থস্স সাধকো নিপ্ফাদকো হোতি.

৬১১-৫. একস্মিং ¶ পন সন্তানে, ৰত্তমানং ফলং পন অঞ্ঞস্স সত্তস্সাপি ৰা ন হোতি, তং ফলং অঞ্ঞতো কম্মতো ন হোতি. বীজানং অভিসঙ্খারো এতস্সত্থস্স ‘‘একস্মিং পন সন্তানে’’তিআদিকস্স এতস্স অত্থস্স সাধকো নিপ্ফাদকো হোতি, বীজানং অভিসঙ্খারে মধুআদিনা ৰত্থুনা জনেহি কতে তস্স বীজস্স সন্তানে পঠমং লদ্ধপচ্চযো পঠমং লদ্ধমধুআদিপচ্চযো তস্স বীজস্স ফলং কালন্তরে মধুআদিনা বীজাভিসঙ্খরণতো অঞ্ঞস্মিং কালে মধুরো হোতি. হি সচ্চং ‘‘বীজানং অভিসঙ্খারে’’তিআদিকং ৰচনং. তানি হি তানি এৰ পঠমং মধুআদিনা জনেহি রোপিতানি বীজানি অভিসঙ্খরণতো কালন্তরে মধুরভাৰং ফলম্পি ৰা ফলট্ঠং ৰা ন পাপুণন্তি. এৰং ইমিনা পকারেন ইদং মযা ৰুত্তং ‘‘একস্মিং পন সন্তানে’’তিআদিকং ৰচনং পণ্ডিতেন ঞেয্যং. অপি চ অপরো নযো. বালকালে তরুণকালে তেন তরুণেন পযুত্তেন ৰিজ্জাসিপ্পোসধাদিনা কম্মেনাপি তস্স ৰুদ্ধকালস্মিং ফলদানসীলেন অযং ‘‘একস্মিং পন সন্তানে’’তিআদিকো অত্থো পণ্ডিতেন দীপেতব্বো.

৬১৬-২০. চোদকো পুনাহ – এৰং সন্তেপি তং কম্মং এৰং ইমিনা মযা ৰুত্তপ্পকারেন কম্মে সন্তেপি সংৰিজ্জমানেপি তং কম্মং এতস্মিংযেৰ খণে ৰিজ্জমানম্পি ৰা ফলস্স পচ্চযো হোতি. অথ ৰাৰিজ্জমানকং পচ্চযো ন ভৰেয্য. এতস্মিংযেৰ খণে অৰিজ্জমানকং কম্মং ৰা ফলস্স পচ্চযো হোতি. সচে যদি ৰিজ্জমানং ফলস্স পচ্চযো হোতি, তপ্পৰত্তিক্খণে পন ¶ তস্স কম্মস্স পৰত্তিক্খণে তস্স কম্মস্স ৰিজ্জমানকালে পন হেতুনা কম্মেনেৰ সদ্ধিং পাকেন ভৰিতব্বং. অথ ৰা অপরো নযো. ৰিজ্জমানং নিরুদ্ধং কম্মং ৰিপাকস্স পচ্চযো যদি ভৰেয্য, পৰত্তিক্খণতো তস্স কম্মস্স পৰত্তিক্খণতো পুব্বে ৰা কালে, তস্স কম্মস্স পৰত্তিক্খণতো পচ্ছা ৰা অৰিজ্জমানকালেতি অত্থো. নিচ্চফলং সিযাতি সব্বদা কম্মপচ্চযৰিরহিতং ফলং সিযাতি অত্থো. আচরিযেন ৰুচ্চতে – ‘‘লোভং, ভিক্খৰে, পজহথ, সোতাপত্তিপটিলাভায অহমেৰ পাটিভোগো’’তিআদীসু পাঠেসু পাটিভোগো ৰিয কম্মং দট্ঠব্বং. সোতাপত্তিফলং ৰিয কম্মতো সম্ভূতং ফলং দট্ঠব্বং. কটত্তাযেৰ জনেহি কটত্তাযেৰ তং কম্মং ফলস্স পচ্চযো হোতি, অস্স ৰিজ্জমানত্তং ন চ হোতি, তস্স অৰিজ্জমানস্স কম্মস্স ৰিজ্জমানতা ৰা ন চ নেৰ হোতি.

৬২১. অভিধম্মাৰতারোযং অভিধম্মাৰতারো অযং পরমত্থপ্পকাসনো ভূতত্থদীপনো সোতূনং পুগ্গলানং ¶ পীতিবুদ্ধিৰিৰড্ঢনো পণ্ডিতেহি ৰিৰিধেসু আরম্মণেসু চিত্তং অনামেত্ৰা সক্কচ্চেন মনসিকারেন সোতব্বো.

ইতি অভিধম্মাৰতারটীকায

পুঞ্ঞৰিপাকপচ্চযনিদ্দেসৰণ্ণনা নিট্ঠিতা.

নৰমো পরিচ্ছেদো.

১০. দসমো পরিচ্ছেদো

রূপৰিভাগৰণ্ণনা

৬২২. ৰুত্তমাদিম্হি যং রূপং, চিত্তজানমনন্তরং যং রূপং চিত্তচেতসিকানং অনন্তরং আদিম্হি পকরণাদিম্হি ‘‘চিত্তং চেতসিকং ¶ রূপ’’ন্তিআদিনা ৰচনেন আচরিযেন ৰুত্তং, ইতো পরং ইদানি তস্স রূপস্স ৰিভাৰনং সমাসেন সঙ্খেপেন করিস্সং.

৬২৩. যং রুপ্পতীতি রূপন্তি যং ধম্মজাতং রুপ্পতি সীতাদিনা ৰিরুদ্ধপচ্চযেন ৰিকারমাপজ্জতি. তথা রূপযতীতি রূপং যং ধম্মজাতং ৰণ্ণৰিকারমাপজ্জমানং হদযঙ্গতভাৰং অজ্ঝাসযং পকাসেতি, ইতি তস্মা রূপং, কিং তং? ৰণ্ণাযতনং. রূপারূপভৰাতীতো, সুরূপো রূপমব্র্ৰি ভগৰা রূপারূপভৰঅতীতো সুরূপো রূপং অব্র্ৰি কথেসি.

৬২৫-৬. মহাভূতেনাতি মহন্তো ভূতো উপ্পত্তি এতস্সাতি মহাভূতো, তেন. ৰঞ্চকত্তা মহাভূতসমাতি ৰা.

৬৩০. নিরুপাদানমানসোতি উপাদানৰিরহিতচিত্তো.

৬৩৩. তস্স ¶ সম্পত্তীতি তস্স কিচ্চস্স সম্পত্তি.

৬৩৪. উপব্রূহনরসাতি ৰড্ঢনকিচ্চা.

৬৩৭. আসযানুসযে ঞাণন্তি এত্থ আসযো নাম

সস্সতুচ্ছেদদিট্ঠী চ, খন্তী সচ্চানুলোমিকং;

যথাভূতঞ্চ যং ঞাণং, এতং আসযসদ্দিতং.

অত্থীতি খো, কচ্চান, অযমেকো অন্তো, অন্তো খো, কচ্চান, অত্থি ইতি অযং একো অন্তো কোট্ঠাসো, অযং সস্সতদিট্ঠি. নত্থীতি খো, কচ্চান, অযং দুতিযো অন্তো, অযং উচ্ছেদদিট্ঠি. খন্তী সচ্চানুলোমিকন্তি চতুন্নং সচ্চানং অনুলোমিকঞাণং, সঙ্খারুপেক্খাঞাণন্তি অত্থো. যথাভূতঞ্চ যং ঞাণন্তি সপ্পচ্চযনামরূপদস্সনং ঞাণং. এতং আসযসদ্দিতন্তি ¶ এতং আসযং ইতি কথিতং. এৰং ৰুত্তপ্পকারেন আসযে ঞাণং নাম. অনুসযো নাম দিট্ঠানুসযাদযো অনুসযা সত্ত. ইন্দ্রিযানং পরোপরেতি পরে অধিকভাৰেন ওপরে চ তিক্খানুভাৰেন অযং সত্তো তিক্খসদ্ধিন্দ্রিযো মুদুসদ্ধিন্দ্রিযো হীনসদ্ধিন্দ্রিযোতি অত্থো. সমাধিন্দ্রিযাদীসুপি এসেৰ নযো. ইতি সত্তানং ইন্দ্রিযানং পরওপরে ঞাণং.

৬৩৮. সব্বঞ্ঞুতা ঞাণন্তি তিহেতুককামাৰচরক্রিযাচতুক্কং গহেতব্বং.

৬৪১. অক্খিকূটেহি মত্থলুঙ্গেন পরিচ্ছিন্নো অন্ততো.

৬৪৫. ভাৰসম্ভৰসণ্ঠানাতি ইত্থিপুমসম্ভৰভূতৰণ্ণাযতনং.

৬৪৭. এতে দস চতুসমুট্ঠানা সম্ভারা চতূহি পচ্চযেহি চত্তালীস ভৰন্তি.

৬৫২. নিৰিট্ঠেতি পতিট্ঠিতে.

৬৫৮. উব্বিঅধিকানং ¶ পথৰীঅধিকানং.

৬৬০-২. ৰিসেসে সতীতি নিস্সযভূতানং চতুন্নং ৰিসেসে সতি, সব্বসো সব্বেসং ৰিসেসপরিকপ্পনং পহায এৰ কম্মৰিসেসেন পসাদানং ৰিসেসতা ঞেয্যা.

৬৬৩. সদ্দীযতীতি উচ্চারীযতে. রসন্তীতি অস্সাদেন্তি.

৬৬৮. পরতোতি পঠমকপ্পতো অপরভাগে পটিসন্ধিযং ভাৰদ্ৰযং সমুট্ঠাতীতি ৰিঞ্ঞেয্যং. ‘‘পৰত্তেপি সমুট্ঠাযা’’তিআদিকং সোণকুমারাদযো সন্ধায ৰুত্তং.

৬৭২. ন তং ব্যঞ্জনকারণন্তি তং ইন্দ্রিযদ্ৰযং ব্যঞ্জনস্স কারণং ন সিযা. তস্সাতি ব্যঞ্জনস্স.

৬৭৪. উব্বাহনন্তি ¶ নীহরণং.

৬৭৬-৭. অন্নপানাদিকং ৰত্থু যং কম্মজং অগ্গিং হরতি, কেৰলং একং হুত্ৰা তং অন্নপানাদিকং ৰত্থু জীৰিতং পন পালেতুং ন চ সক্কোতি. একতো জীৰিতং পালেতুঞ্চ সক্কোন্তি.

কাযেন রূপকাযেন অত্তনো ভাৰং ৰিঞ্ঞাপেন্তানং ভাৰো কাযগ্গহণানুসারেন কাযগ্গহণস্স অনুচিন্তনেন গহিতায ৰাযোধাতুৰিকারসঙ্খাতায এতায ধম্মজাতিযা পণ্ডিতেহি ৰিঞ্ঞাযতে. ইতিপি তস্মা কাযৰিঞ্ঞত্তি.

৬৮১. একাৰজ্জনৰীথিযং হেট্ঠা ছহি চিত্তেহি ৰাযোধাতুসমুট্ঠিতং উপত্থম্ভং লভিত্ৰা.

৬৮৪. সহ সদ্দেন ৰাতি সদ্দেন সহেৰ.

৬৯০-১. এতাসং পন লহুতাদীনং তিস্সন্নং পৰত্তিযং নিদস্সনং কমতো আরোগ্যং লহুতা ¶ , মদ্দিতং ধম্মং মুদুতা, ধন্তহেমং কম্মঞ্ঞতা হোতি. লহুতাদিত্তযং পন কম্মং কাতুং ন সক্কোতি, আহারাদিত্তযংযেৰ লহুতাদিত্তযং করোতি যস্মা, ততো তং তিজং নাম.

৬৯৩. ৰুত্তমাকারনানত্তাতি এত্থ আকারনানত্তা নাম আচযাকারঅনুবন্ধতাকারৰসেন ৰুত্তং. ৰেনেয্যানং ৰসেন ৰাতি একে ৰেনেয্যা আচযৰসেন জাতিরূপং জানন্তি, একে অনুবন্ধতাৰসেন জানন্তি. ইতি ৰেনেয্যানং জাননৰসেন জাতিরূপং দ্ৰিধা ৰুত্তং.

৬৯৪. সভাৰানপগমে অত্তনো সভাৰস্স অনপগমে সতি.

তে ¶ মিদ্ধরূপৰাদাচরিযা পটিক্খিপিতব্বা. কথং? অদ্ধা মুনিসি সম্বুদ্ধো, নত্থি নীৰরণা তৰাতি যো ত্ৰং অদ্ধা একন্তেন মুনি অসি সম্বুদ্ধো অসি নীৰরণা ধম্মা তৰ তুয্হং নত্থি, ইতি ৰচনে সচে মিদ্ধং নীৰরণং রূপে পৰিট্ঠং সিযা. ভগৰতা রূপকাযস্স ৰিজ্জমানত্তা ‘‘নত্থি নীৰরণা তৰা’’তি ৰচনং ৰত্তব্বং সিযা. থিনমিদ্ধনীৰরণং অৰিজ্জানীৰরণেন সহ নীৰরণঞ্চেৰ হোতি, নীৰরণসম্পযুত্তঞ্চ হোতি. ইতি সম্পযুত্তৰচনতো সম্পযুত্তস্স রূপস্স অভাৰতো তম্পি ন ৰত্তব্বং সিযা. ন পুরেজাতপচ্চযাতি অঞ্ঞমঞ্ঞপচ্চযাতি অত্থো. সচে থিনমিদ্ধং রূপং সিযা, কথং অরূপেপি অঞ্ঞমঞ্ঞং সিযা, ন সিযাতি অত্থো. অরূপেপি কামচ্ছন্দনীৰরণং পটিচ্চ থিনমিদ্ধনীৰরণং উপ্পজ্জতি. ইতি ৰচনেন চ ন মিদ্ধরূপং সিযা, অরূপে কথং সিযাতি অত্থো. অরূপমেৰ মিদ্ধং ইতি পটিক্খিপিতব্বা. অরূপেপি এতস্স মিদ্ধস্স উপ্পত্তিযা সাধকৰচনতো নিট্ঠং এত্থ চ অৰগন্তব্বং ‘‘অরূপ’’ন্তি ৰিঞ্ঞুনা.

৭০৫-৬. কম্মেন ৰীসতি রূপাতি অট্ঠিন্দ্রিযৰত্থুঅট্ঠাৰিনিব্ভোগসন্ততূপচযাকাসা কম্মজা. চেতসা ৰিঞ্ঞত্তিদ্ৰযসদ্দলহুতাদিত্তযঅৰিনিব্ভোগসন্ততূপচযাকাসা চিত্তজা. উতুনা সদ্দলহুতাদিত্তযঅৰিনিব্ভোগসন্ততূপচযাকাসা উতুজা. আহারতো লহুতাদিত্তযঅৰিনিব্ভোগসন্ততূপচযাকাসা আহারজা.

৭০৭-১৭. জাযেয্যুং যদি তানিপীতি তানি জরতাঅনিচ্চতারূপা যদি জাযেয্যুং, এৰং সন্তে তু তেসং জরতাঅনিচ্চতা ভেদা সিযুং. হি সচ্চং ৰচনং পাকো ন পচ্চতি, ভেদো ৰা ন ¶ চ ভিজ্জতি যস্মা, তস্মা তেসং পাকভেদা সিযুন্তি, তং ৰচনং নত্থি. এতং জরতাঅনিচ্চতাদ্ৰযং জাতস্স নিপ্ফন্নরূপস্স পাকভেদত্তা ন জাযতি. সিযা কস্সচি বুদ্ধেত্থাতি এত্থ জরতাঅনিচ্চতাৰিনিচ্ছযাধিকারে কস্সচি জনস্স বুদ্ধি ঞাণং যদি সিযা, ‘‘রূপস্সূপচযো’’তি ৰচনেন ‘‘জাতি ¶ জাযতী’’তি ৰচনং দীপিতং যথা, এৰং তথা পাকোপি পচ্চতু, ভেদোপি পরিভিজ্জতু, এৰং বুদ্ধি সিযা. জাতি ন চেৰ জাযতে. ইতি ইমিনা পকারেন ৰিভাৰিনা ঞেয্যা. জাতি জাযমানস্স নিপ্ফন্নরূপস্স নিব্বত্তি নাম পকাসিতা. তত্থ যস্স সিযা তত্থ ৰচনে যস্স জনস্স বুদ্ধি সিযা. যেসং নিপ্ফন্নরূপধম্মানং জাতি অত্থি, সা জাতি অভিনিব্বত্তিসম্মুতিং তপ্পচ্চযত্তৰোহারং তেসং নিপ্ফন্নরূপধম্মানং পচ্চযট্ঠেন লদ্ধৰোহারং কম্মজাদিকং ৰোহারং লভতেৰ যথা, তথা তেসং নিপ্ফন্নরূপধম্মানং তে পাকভেদা অভিনিব্বত্তিসম্মুতিং নাম তপ্পচ্চযত্তৰোহারং লভন্তি, ইতি বুদ্ধি সিযা. তস্স জনস্স এৰং ৰত্তব্বং – ইদং সন্ততূপচযদ্ৰযং কম্মাদিসম্ভৰং হোতি যথা, এৰং পাকভেদা তং কম্মাদিসম্ভৰৰোহারং কদাচিপি ন লভন্তি. হি সচ্চং ৰচনং কস্মা কারণা জনকানং কম্মাদিপচ্চযানং আনুভাৰসঙ্খাতে খণুপ্পাদে তেসং পাকভেদানং অভাৰতো ন লভন্তি. ৰুত্তপ্পকারেন খণুপ্পাদে জাতিপরম্পরাভাৰতো সা জাতি লব্ভতে, তস্মা কারণা জাতি এৰ অভিনিব্বত্তিসম্মুতিং পচ্চযত্তৰোহারং লভতি, ইতরং জরতাঅনিচ্চতাদ্ৰযং পন ন লভতি. তং জরতাঅনিচ্চতাদ্ৰযং জিয্যতি ইতি ভিজ্জতি ইতি ৰা ন ৰত্তব্বং হোতি. কস্মা? কম্মাদিপচ্চযানং আনুভাৰক্খণে তস্স জরতাঅনিচ্চতাদ্ৰযস্স পচ্চযানং অভাৰতো.

৭১৮-২৩. অনিচ্চং সঙ্খতঞ্চেতং জরামরণং অনিচ্চসঙ্খাতং ইতিপি ৰচনস্স ভগৰতা ৰুত্তত্তা জরতাঅনিচ্চতাদ্ৰযং জাযতি, এৰং ইতি ত্ৰং চে মঞ্ঞসি, এৰং ‘‘জাযতি এৰা’’তি ৰচনং ভগৰতা ন ৰত্তব্বং. হি কস্মা কারণা? ‘‘অনিচ্চং সঙ্খতঞ্চেতং, জরামরণমিচ্চপী’’তিৰুত্তভাৰাদিনা আকারদেসনাপরিযাযেন লেসেন ভগৰতা অনিচ্চানং নিপ্ফন্নরূপধম্মানং জরামরণসঙ্খাতং সভাৰতো জরামরণং অনিচ্চং সঙ্খতঞ্চাপি ¶ চিত্তজানং ৰিকারত্তা ৰিঞ্ঞত্তিযো ‘‘চিত্তজা’’তি ৰুত্তা ৰিয, তথা এৰং ভগৰতা ৰুত্তং. যদি এৰং অত্থে সতি এতং রুপ্পনলক্খণত্তযং অজাতত্তা চ সব্বথা সব্বাকারেন খংপুপ্ফংৰ নত্থি, অসঙ্খতং নিব্বানং ৰিয নিচ্চংৰাতি চ চোদকো ৰদেয্য, নত্থি নিচ্চন্তি ইদং উভযৰচনং নো ভগৰতা ৰত্তব্বং. কস্মা? নিস্সযধম্মানং আযত্তভাৰেন পৰত্তিতো পথৰিযাদীনং নিস্সযানং ভাৰে সতি তস্স লক্খণত্তযস্স ভাৰতো, তস্মা খংপুপ্ফংৰ তং লক্খণত্তযং ন নত্থি, অত্থীতি অত্থো. পথৰীআদীনং ¶ অভাৰে তং লক্খণত্তযং ন চ লব্ভতি যস্মা, তস্মা নিব্বানং ৰিয, তথা নিচ্চং ন.

৭২৪-৫. পরিচ্ছেদাদযো অনিপ্ফন্না. তেসমেৰ চ রূপানং তেসমেৰ নিপ্ফন্নরূপধম্মানং ৰিকারত্তা নিপ্ফন্না চেৰ সঙ্খতা সেসৰসেন ৰুত্তানং পভেদকতোতি দস্সনতো. সেসং উত্তানত্থমেৰ.

৭৬৭.

গন্তুং পনিচ্ছে পিটকেভিধম্মে,

যো ধম্মসেনাপতিনা সমত্তং;

হিতত্থিনা তেন চ ভিক্খুনাযং,

সক্কচ্চ সম্মা পন সিক্খিতব্বো.

যো ভিক্খু অভিধম্মে পিটকে ধম্মসেনাপতিনা সমত্তং সভাৰং গন্তুং পাপুণিতুং ইচ্ছেয্য, তেন চ ভিক্খুনা হিতত্থিনা সক্কচ্চং আদরেন সম্মা তীরণচিন্তনসজ্ঝাযনেহি অযং অভিধম্মাৰতারো সিক্খিতব্বো.

ইতি অভিধম্মাৰতারটীকায

রূপৰিভাগৰণ্ণনা নিট্ঠিতা.

দসমো পরিচ্ছেদো.

১১. একাদসমো পরিচ্ছেদো

নিব্বাননিদ্দেসৰণ্ণনা

৭৬৯. ভৰাভৰং ¶ ৰিননতোতি খুদ্দকং, মহন্তং ভৰং সিব্বনতো. সব্বূপধিপটিনিস্সগ্গোতি সব্বেহি সঙ্খারূপধিকিলেসূপধিখন্ধূপধীহি পটিনিস্সজ্জনং. অচ্চুতিরসং অচুতিসম্পত্তিকং. নিব্বানং পুট্ঠেনাতি সুগতেন নিব্বানং পুট্ঠেন সারিপুত্তত্থেরেন. উভিন্নং সুত্তানন্তি ধম্মসেনাপতিৰুত্তানং ¶ দ্ৰিন্নং সুত্তানন্তি অত্থো. খযস্স উপনিস্সযত্তাতি খযস্স বলৰকারণত্তা. পুথূনং ধম্মানং অপ্পমত্তক্খণে রাগাদিক্খযমত্তং নিব্বানং ভৰেয্য. সব্বে বালপুথুজ্জনা সমধিগতনিব্বানা সচ্ছিকতনিরোধা ভৰেয্যুং. কিঞ্চ ভিয্যো কিং উত্তরি কারণঞ্চ অত্থীতি অত্থো. রাগাদীনং সঙ্খতত্তা তেসং সঙ্খতানং নিব্বানং সঙ্খতলক্খণং ভৰেয্য. কিং পনেত্থাতি এতেসু খণেসু কিং পন খণে ত্ৰং ৰদেসি. খীণেস্ৰেৰাতি ভৰাদীসু খীণেসু এৰ. নিরুত্তরোতি নিপ্ফন্নহারো.

৭৭১. অস্সদ্ধোতি বাহিরসদ্ধায ৰিরহিতো. ৰন্তাসোতি ৰন্তা ৰমিতা আসা তণ্হা যেনাতি ৰন্তাসো.

নিস্সরণিযাতি নিস্সরণে নিযুত্তা. যদিদং নেক্খম্মং যং ইদং কামানং এতং নিস্সরণং নিরোধো, তস্স কিঞ্চিভূতস্স সঙ্খতস্স পটিচ্চসমুপ্পন্নধম্মজাতস্স নিরোধো নিস্সরণন্তি, এৰং ইমিনা পকারেন ৰুত্তস্স তস্স নিস্সরণনামকস্স অভাৰপ্পত্তিদোসতো নিস্সরণনামকানং পঠমজ্ঝানআকাসানঞ্চাযতনানম্পি অভাৰো ভৰেয্য. অত্থি নিস্সরণন্তি অত্থি নিব্বানং. উপ্পাদাদীনন্তি উপ্পাদট্ঠিতিভঙ্গানং. পপঞ্চাভাৰতোতি তণ্হামানদিট্ঠীনং অভাৰতো.

৭৭২. অপলোকিতন্তি অদস্সনধম্মং.

৭৭৪. অব্যাপজ্ঝন্তি নিদুক্খং. অক্খরন্তি অখরং.

৭৭৭. সদ্ধাবুদ্ধিকরং ¶ তথাগতমতে জিনৰচনে সম্মোহৰিদ্ধংসনং পঞ্ঞাসম্ভৰং পঞ্ঞাকারণং সম্পসাদনকরং. অত্থব্যঞ্জনসালিনন্তি অত্থব্যঞ্জনসারৰন্তং সুমধুরং সারঞ্ঞু জিনসাসনসারঞ্ঞূ ৰিম্হাপনং অচ্ছেরকরং ইমং এৰং ৰুত্তপ্পকারং অভিধম্মাৰতারং যো জানাতি, সো জনো গম্ভীরে নিপুণে নিপুণঞাণগোচরে অভিধম্মপিটকে পদং নিট্ঠং উত্তমসন্নিট্ঠানং যাতি পাপুণাতি.

ইতি অভিধম্মাৰতারটীকায

নিব্বাননিদ্দেসৰণ্ণনা নিট্ঠিতা.

একাদসমো পরিচ্ছেদো.

১২. দ্ৰাদসমো পরিচ্ছেদো

পঞ্ঞত্তিনিদ্দেসৰণ্ণনা

সঙ্খাযতীতি ¶ সঙ্খা, কথীযতীতি অত্থো. কিন্তি কিং ইতি কথীযতি. ‘‘অহ’’ন্তি ‘‘মম’’ন্তি কথীযতি.

তজ্জাপঞ্ঞত্তীতি তস্স চক্খুসোতাদিকস্স অনুরূপৰসেন জাতা পঞ্ঞত্তীতি অত্থো.

একস্সৰাতি একস্স নামধম্মস্স ‘‘অচ্ছো’’তি নামং গহেত্ৰা বহূনং নামধম্মানং ‘‘অচ্ছো’’তি নামং গহেত্ৰা. সমূহমেৰাতি নামধম্মানং সমূহং এৰ.

গহিতো পুব্বে সঙ্কেতো এতেনাতি গহিতপুব্বসঙ্কেতং. কিং তং? মনোদ্ৰারাৰজ্জনজৰনৰিঞ্ঞাণং. তেন গহিতায পঞ্ঞত্তিযা ৰিঞ্ঞাযতি ‘‘সত্তা’’তি ‘‘কম্মজা’’তি কথীযতি.

ইত্থী ¶ চ পুরিসো চ ইত্থিপুরিসা, তে আদযো যেসং তে ইত্থিপুরিসাদযো, তেসং.

৭৭৮. ততিযা কোটীতি ততিযো কোট্ঠাসো.

ইতি অভিধম্মাৰতারটীকায

পঞ্ঞত্তিনিদ্দেসৰণ্ণনা নিট্ঠিতা.

দ্ৰাদসমো পরিচ্ছেদো.

১৩. তেরসমো পরিচ্ছেদো

কারকপটিৰেধৰণ্ণনা

ৰেদকস্সাতি ¶ সুখদুক্খৰেদকস্স. তদাযত্তৰুত্তীনন্তি তেসং আযত্তা পটিবদ্ধা যেসং ৰিপাকানং তে তদাযত্তৰুত্তিনো, তেসং. অত্র ইমস্মিং ঠানে আচরিযেন পরিহারো ৰুচ্চতে. কুতোযং তৰ তত্থানুরোধোতি তত্থ তস্মিং অঞ্ঞস্স অত্তকারকস্স অভাৰেপি সত্তুসঙ্খাতস্স অত্তনো ভাৰেপি অযং তৰ অনুরোধো অনুনযো কুতো কেন কারণেন ইধ ইমস্মিং অসতি কত্তরি কুসলাদীনং অত্থিভাৰে কম্মৰিরোধো কুতো কেন কারণেন. অথাপীতি অপরো নযোপি. কিঞ্চেত্থাতি এত্থ এতিস্সং চোদনাযং কিঞ্চি ৰত্তব্বং অত্থি, অৰসিট্ঠং তাৰ ব্রূহি, অপরিসমত্তা তে চোদনা. তস্সাতি অত্তনো. কারকৰেদকত্তাভাৰোতি কারকৰেদকত্তস্স অভাৰো সিযা.

অথ ন ভৰতীতি অত্তনো অনাসে চেতনাপি অনাসো যদি ন ভৰতি. পটিঞ্ঞা হীনাতি ‘‘চেতনায অনঞ্ঞো অত্তা’’তি পটিঞ্ঞা হীনা. ৰুত্তপ্পকারতোতি ‘‘অত্তনো অনাসে চেতনায নাসো ন ভৰতি’’ইতি ৰুত্তপ্পকারতো ¶ . ৰিপরীতন্তি ‘‘অত্তনো অনাসে চেতনায অনাসো’’ইতি ৰিপরীতগ্গহণং সিযা. অত্তা নস্সতু, চেতনা তিট্ঠতু, অথ পন এৰং ন ভৰতীতি অত্তা নস্সতু, চেতনা তিট্ঠতু, এৰং গহণং পন ন ভৰতি. অনঞ্ঞত্তপক্খং পরিচ্চজ পরিচ্চজাহি ‘‘চেতনায অনঞ্ঞো অত্তা’’তি. পটিঞ্ঞা হীনা যস্স সো পটিঞ্ঞাহীনো.

উভিন্নং চেতনত্তানং একদেসতা একদেসভাৰো নত্থি. এৰঞ্চ সতীতি এৰং উভিন্নং একদেসস্স অভাৰে সতি কো দোসো ইতি ত্ৰং চে ৰদেয্যাসি. যং পন তযা ৰুত্তং যথা রূপরসগন্ধাদীনং একদেসে ৰত্তমানানম্পি লক্খণতো অঞ্ঞত্তন্তি যং ৰচনং পন তযা ৰুত্তং, তং ৰচনং অযুত্তং, নানুরূপন্তি অত্থো. তৰ পটিঞ্ঞা হীনাতি ‘‘একদেসে ৰত্তমানানং চেতনত্তানং লক্খণতো অঞ্ঞত্ত’’ন্তি পটিঞ্ঞা হীনা.

এৰঞ্চ সতীতি এতং চেতনায অঞ্ঞভাৰে সতি কো দোসো ইতি চে ভৰং ৰদেয্য. ‘‘অচেতনো ¶ অত্তা’’তি ৰচনং, পুব্বে ৰুত্তদোসতোতি ‘‘পাকারতরুপাসাণতিণসদিসো সিযা’’তি পুব্বে ৰুত্তদোসতো.

৭৮০. অত্থি সত্তোপপাতিকোতি ওপপাতিকা সত্তা অত্থি.

৭৮১. ভারাদানন্তি ভারগ্গহণং. ভারনিক্খেপনন্তি ভারোরোপনং.

৭৮৩. একস্স পুগ্গলস্স অট্ঠিসঞ্চযো অট্ঠিসমূহো একেন কপ্পেন পব্বতসমো রাসি সিযা.

৭৮৫. ভো মার, ত্ৰং সত্তো ইতি পচ্চেসি, কং সদ্দহসি, ‘‘সত্তো’’তি গহণং তে তৰ দিট্ঠিগতং, সুদ্ধসঙ্খারপুঞ্জো অযং, ইধ লোকে সত্তো ন উপলব্ভতি.

৭৮৭. যো ¶ ভিক্খু ইমং গন্থং অচ্চন্তং সততম্পি চিন্তেতি, তস্স ভিক্খুনো পরমা পঞ্ঞা ৰেপুলং ৰিপুলভাৰং গচ্ছতি.

৭৮৮. যো ভিক্খু ইমং অভিধম্মাৰতারং অতিমতিকরং উত্তমং অভিঞ্ঞাণকরং ৰিমতিৰিনাসকরং কঙ্খচ্ছেদকরং পিযক্করং পেমকরং সদা পঠতি, সুণাতি, তস্স ভিক্খুনো মতি ইধ সাসনে ঠিতে ৰিকসতি পটিফুল্লতি.

ইতি অভিধম্মাৰতারটীকায

কারকপটিৰেধৰণ্ণনা নিট্ঠিতা.

তেরসমো পরিচ্ছেদো.

১৪. চুদ্দসমো পরিচ্ছেদো

রূপাৰচরসমাধিভাৰনানিদ্দেসৰণ্ণনা

৭৮৯-৯৩. হিতানযন্তি ¶ হিতাৰহং. মানসঞ্চ সুগতন্তি সুট্ঠু পৰত্তমানসঞ্চ. মধুরা অত্থৰণ্ণনা এতস্সাতি মধুরত্থৰণ্ণনং. উত্তরং তু মনুস্সানং, ধম্মতো ঞাণদস্সনন্তি মনুস্সানং লোকিযধম্মতো উত্তরিভূতঞাণদস্সনলোকুত্তরং. সঙ্কস্সরসমাচারেতি সঙ্কায কঙ্খায সরিতব্বসমাচারে. অচ্ছিদ্দং অক্খণ্ডং অকম্মাসং. অত্থকামেনাতি অত্তনো হিতকামেন.

৭৯৭. দুৰিধলক্খণং চারিত্তৰারিত্তলক্খণং.

৮০৫. তেসং চরিতানং ৰোমিস্সকনযা.

৮০৭. সৰণ্ণকসিণাতি নীলপীতওদাতলোহিতৰণ্ণকসিণা.

৮০৮. তং ¶ এককং আনাপানং অস্সাসপস্সাসো.

৮০৯-১০. মরণূপসমাযুত্তা সতীতি মরণানুস্সতি উপসমানুস্সতি. আহারনিস্সিতসঞ্ঞাতি আহারে পটিকূলসঞ্ঞা. ধাতুৰৰত্থানন্তি চতুধাতুৰৰত্থানং.

৮১১-২. অনুকূলা ইমে সব্ব-চরিতানন্তি ৰণ্ণিতাতি যং কম্মট্ঠানং সদ্ধাচরিতস্স অনুকূলং, তমেৰ পঞ্ঞাচরিতস্স অনুকূলন্তি অধিপ্পাযো. ইদং সব্বং পন ৰচনং একন্তৰিপচ্চনীকভাৰতো একন্তপটিপক্খভাৰতো অতিসপ্পাযতো ৰুত্তং, ইতি ৰিভাৰিনা ঞেয্যং.

৮৩৫. ৰিপস্সনাভৰসম্পত্তি-সুখানং পচ্চযা সিযুং ৰিপস্সনাসম্পত্তিসুখানং ভৰসম্পত্তিসুখানং পচ্চযা সিযুং.

৮৩৮. সম্মট্ঠানং ¶ মনোভুনোতি মনোভুহদযো তস্স হদযস্স সম্মট্ঠানং.

৮৪৪. পত্তুকামেন ধীমতা কসিণং কত্তব্বং.

৮৪৫. সংহারিমন্তি ইতো চিতো চ হরিতব্বকসিণং. তত্রট্ঠকন্তি তস্মিং ঠানে ঠিতং ইতো চিতো চ অনাহরিতব্বং কসিণং.

৮৪৯. ৰিৰট্টং পন মিচ্ছতাতি নিব্বানং ইচ্ছন্তেন ৰিদত্থিচতুরঙ্গুলং ৰট্টং কাতুং তং কসিণং ৰট্টতি.

৮৫১-২. হত্থপাসপ্পমাণস্মিং, তম্হা কসিণমণ্ডলাতি ততো কসিণমণ্ডলতো হত্থপাসপ্পমাণস্মিং পদেসে ৰিদত্থিচতুরঙ্গুলে উচ্চে. পরিমুখং সতিন্তি কম্মট্ঠানাভিমুখং সতিং.

৮৫৩-৪. নেক্খম্মন্তি ঝানং. খেমতো দট্ঠুং দিস্ৰা অহং ইমায পটিপত্তিযা অদ্ধা একন্তেন পৰিৰেকসুখস্স নিব্বানসুখস্স ভাগী অস্সং ভৰেয্যং.

৮৫৬. সো ¶ কসিণস্স ৰণ্ণো তেন যোগিনা ন পেক্খিতব্বো, কসিণস্স লক্খণং ন পেক্খিতব্বং উস্সদস্স ৰসেন ৰণ্ণং অমুঞ্চিত্ৰা.

৮৬০. এৰং ইমিনা ৰুত্তপ্পকারেন একগ্গচেতসো একগ্গচিত্তস্স যোগিনো নিমীলেত্ৰা আৰজ্জন্তস্স যথা যেন পকারেন কম্মট্ঠানং হোতি উম্মীলিতে কালেপি, তথা তেন পকারেন তং কম্মট্ঠানং আপাথং যাতি চে যদি আগচ্ছতি, উগ্গহমেৰ উগ্গহনিমিত্তং.

৮৬৪. পাদানং ধোৰনে পপঞ্চপরিহারত্থং. একতলিকাতি একতলমত্তা.

৮৬৫. তং সংহারিমং কসিণমাদায.

৮৬৬. সমন্নাহরিতব্বন্তি ¶ কম্মট্ঠানং সুমনেন আহরিতব্বং, মনসিকাতব্বন্তি অত্থো. তক্কাহটন্তি ৰিতক্কেন আহটং ফুসিতং করে করেয্য.

৮৬৮. তন্তি তং নিমিত্তং.

৮৭১-৪. ইমস্সাতি পটিভাগনিমিত্তস্স. পুরিমস্সাতি উগ্গহনিমিত্তস্স. কো পন অযং ৰিসেসো? থৰিকা নীহরিতং আদাসমণ্ডলং মজ্জিতং ৰিয. তোযদে কাল়মেঘে সেতবলাকা ৰিয. তদা তং উগ্গহনিমিত্তং পদালেত্ৰাৰ নিগ্গতং পটিভাগনিমিত্তং. ততো উগ্গহনিমিত্ততো. তন্তি তং পটিভাগনিমিত্তং. সণ্ঠানৰন্তঞ্চ ৰণ্ণৰন্তঞ্চ ন চ উপট্ঠাকারমত্তং. পঞ্ঞজন্তি পঞ্ঞায জাতং.

৮৭৭-৮. উপচারক্খণে তস্সাতি তস্স সমাধিনো উপচারক্খণে. নীৰরণপ্পহানেন সমাধিনো পটিলাভক্খণে পন অঙ্গানং ৰিতক্কাদীনং পাতুভাৰেন ইতি দ্ৰীহি আকারেহি.

৮৭৯. দ্ৰিন্নং ¶ সমাধীনন্তি উপচারপ্পনাসমাধীনং.

৮৮২. চক্কৰত্তিযগব্ভোৰ রতনং ৰিয অস্স অনেন সুদুল্লভং.

৮৮৪. অযন্তি পটিসন্ধিসন্থারো.

৮৯১-২. সমতং ৰীরিযস্সেৰাতি ৰীরিযসমভাৰং. লযং লীনভাৰং ঈসকম্পি যন্তং গচ্ছন্তং মানসং আৰজ্জনচিত্তং.

৮৯৫-৯. ভৰঙ্গং পন পচ্ছিজ্জ উচ্ছিন্দিত্ৰা তদেৰ পথৰীকসিণং আরম্মণং কত্ৰা যোগিনো মনোদ্ৰারম্হি জাযতি. ততোতি আৰজ্জনতো তত্রেৰারম্মণে তস্মিং পথৰীকসিণসঙ্খাতে আরম্মণে তস্স যোগিনো জৰনানি চত্তারি ৰা পঞ্চ ৰা জাযন্তে. অৰসানে একং জৰনমানসং রূপাৰচরিকং হোতি, তস্মিং রূপাৰচরিকে ৰিতক্কাদযো অঙ্গা. অঞ্ঞেহি অঞ্ঞেসং চিত্তানং অঞ্ঞেহি ৰিতক্কাদীহি বলৰতরা হোন্তি. তানি অপ্পনাভাৰং অপ্পত্তানি অপ্পনাচেতসো ¶ পরিকম্মোপচারতো পরিকম্মভাৰতো পরিকম্মানীতি ৰুচ্চন্তে, উপচারভাৰতো উপচারানীতি চ ৰুচ্চন্তে. তানি জৰনানি অপ্পনাযানুলোমত্তা অনুলোমানি এৰ চ ৰুচ্চন্তি. এত্থ অনুলোমকেসু যং সব্বন্তিমং জৰনং, তং গোত্রভূতি পৰুচ্চতি.

৯০১. গোত্রভু দিট্ঠন্তি গোত্রভু নাম উদ্দিট্ঠং.

৯০৪-৫. পুরিমেহি জৰনেহি যং আসেৰনং, তং বলৰপচ্চযং লদ্ধা লভিত্ৰা ছট্ঠং জৰনং, সত্তমং ৰা জৰনং অপ্পেতি. ইতি ৰচনং পৰুচ্চতি, এত্থ ৰাদে গোদত্তো নাম আভিধম্মিকো আচরিযো আহ. ছিন্নতটে মুখং যস্স ছিন্নতটমুখো.

৯০৮. পচ্চৰেক্খণা ¶ হেতু যস্স আৰজ্জনস্সাতি পচ্চৰেক্খণহেতুকং.

৯১১-২. কামচ্ছন্দস্স নানাৰিসযে পলুদ্ধস্স. চেতসো একস্মিং ৰিসযে সমাধানেন সমাধি.

৯১৫. সযঞ্চ অতিসন্ততো সুখং অৰূপসন্তসভাৰস্স উদ্ধচ্চকুক্কুচ্চদ্ৰযস্স পটিপক্খতো ৰুত্তং.

৯১৭. পঞ্চঙ্গৰিপ্পযুত্তন্তি পঞ্চনীৰরণৰিপ্পযুত্তং. পঞ্চঙ্গসংযুতন্তি ৰিতক্কাদীহি যুত্তং.

৯২০-১. ৰেপুল্লন্তি কম্মট্ঠানস্স ৰিপুলভাৰং. তঞ্চ পটিভাগনিমিত্তং উপচারং ৰিচারেত্ৰা ৰড্ঢেতুং ৰট্টতি.

৯২৮-৩১. পমাদযোগিনোতি পমাদৰসেন যোগিসম্পন্নস্স কামসহগতা সঞ্ঞামনক্কারা মনসিকারা চে চরন্তি, তস্স যোগিনো তং ঝানং হানভাগিযং হোতি. সতি সন্তিট্ঠতে তস্মিং, সন্তা তদনুধম্মতা তস্মিং পঠমজ্ঝানে তদনুধম্মতা তস্স পঠমজ্ঝানস্স অনুরূপা সতি নিকন্তি সন্তা সংৰিজ্জমানা সন্তিট্ঠতে সন্তিট্ঠতি, তং ঝানং মন্দস্স যোগিনো ঠিতিভাগিযং হোতি, ঠিতিং ভজতি. ৰিসেসভাগিযং হোতি, ৰিসেসং দুতিযাদিভাৰনং পাপুণাতীতি অত্থো. নিব্বিদাসংযুতা ¶ সঞ্ঞা, মনক্কারাতি নিব্বিদাৰিপস্সনাসংযুত্তা সঞ্ঞামনক্কারা. নিব্বেধভাগিযন্তি লোকুত্তরভাগিযং, লোকুত্তরমগ্গভাগিযন্তি অত্থো.

৯৩৩. অযং সমাপত্তি আসন্নাকুসলারযো আসন্নাকুসলারিকা যস্মা তক্কচারানং থূলত্তা চ, তস্মা কারণা অযং সমাপত্তি অঙ্গদুব্বলা.

৯৩৫. নিকন্তিন্তি তণ্হং. পরিযাদাযাতি সোসাপেত্ৰা.

৯৩৬. ৰিধিনাতি ¶ পুব্বে ৰুত্তৰিধিনা. সতস্সাতি সতিসম্পন্নস্স.

৯৩৮. নিমিত্তং তু তদেৰ চাতি তমেৰ পঠমনিমিত্তং ‘‘পথৰী পথৰী’’ইতি এৰং মনসা করোন্তস্স.

৯৪৩. সম্পসাদনন্তি সদ্ধা. মজ্ঝত্তন্তি তত্রমজ্ঝত্ততা.

৯৪৪. দুৰঙ্গহীনন্তি ৰিতক্কৰিচারহীনং.

৯৪৮. পীতি নাম চেতসো চিত্তস্স উপ্পিলাপনং উপ্পিলাপিতত্তং যতো যস্মা কারণা.

৯৬১-২. আসন্নপীতিদোসাতি পীতিযেৰ দোসা. এত্থ এতস্মিং ততিযজ্ঝানে যদেৰ যং এৰ সুখং ইতি এৰং সুখং চেতসো আভোগো মনসিকারো. এৰং ইমিনা পকারেন সুখস্স থূলত্তা অযং সমাপত্তি অঙ্গদুব্বলা হোতি.

৯৭৪-৫. সুখং উপেক্খায আসেৰনং পন ন হোতি যস্মা উপেক্খায আসেৰনং পন ন হোতি, যস্মা উপেক্খাসহগতানি জৰনানি জৰন্তি, তস্মা চতুত্থজ্ঝানং উপেক্খাসহগতং সমুদীরিতং.

৯৭৬. দুতিযজ্ঝানং দ্ৰিধা দ্ৰীহি কোট্ঠাসেহি ঠিতং.

৯৭৯. অযং ¶ অভিধম্মাৰতারো সুমধুরৰরতরৰচনো কং নু জনং নেৰ রঞ্জযতি, অতিনিসিতৰিসদো বুদ্ধিপ্পচারো যস্স সো অতিনিসিতৰিসদবুদ্ধিপ্পচারো, সো তেন জনেন ৰেদনীযো জানিতব্বো.

ইতি অভিধম্মাৰতারটীকায

রূপাৰচরসমাধিভাৰনানিদ্দেসৰণ্ণনা নিট্ঠিতা.

চুদ্দসমো পরিচ্ছেদো.

১৫. পন্নরসমো পরিচ্ছেদো

অরূপাৰচরসমাধিভাৰনানিদ্দেসৰণ্ণনা

৯৮২-৩. রূপে ¶ খো ৰিজ্জমানস্মিন্তি রূপকাযে ৰিজ্জমানে দণ্ডাদানাদযো দণ্ডগ্গহণাদযো. ইতি রূপে রূপকাযে আদীনৰং দিস্ৰা.

৯৮৪. সূকরাভিহতোৰ সাতি সূকরং অনুবন্ধিতো সা সুনখো ৰিয.

৯৮৫. ৰসীতি যোগী.

৯৮৮-৯৯০. ফুট্ঠোকাসঞ্চ তেন তন্তি তেন চিত্তেন ফুট্ঠং তমোকাসং ‘‘অনন্তো আকাসো’’ইতি চ মনসা করোন্তো এৰ উগ্ঘাটেতি. ইতি ৰচনং ৰুচ্চতে, অযমঞ্ঞো নযো, ‘‘আকাসো’’ ইতি মনসা করোন্তো তং কসিণং ন সংৰেল্লেতি.

৯৯৮. রূপাৰচরজ্ঝানমেৰ পচ্চত্থিকং রূপাৰচরজ্ঝানপচ্চত্থিকং.

১০০৪. আকাসফুটৰিঞ্ঞাণেতি ¶ ফুটমেৰ ৰিঞ্ঞাণং ফুটৰিঞ্ঞাণং, তস্মিং আকাসারম্মণে ফুটৰিঞ্ঞাণে.

১০০৫-৬. অযং আকাসো অনন্তো ইতি এৰং তং আকাসমেৰ ফরিত্ৰা পৰত্তং ৰিঞ্ঞাণং ৰিঞ্ঞাণঞ্চ ইতি ৰচনং ৰুচ্চতে. ৰিঞ্ঞাণং অনন্তং নাম ন হোতি, অনন্তারম্মণত্তা ‘‘ৰিঞ্ঞাণং অনন্ত’’ন্তি ৰুচ্চতে, তং ৰিঞ্ঞাণং মনক্কারৰসেন অপি অনন্তং পরিদীপিতং.

১০১০. পঠমারুপ্পৰিঞ্ঞাণস্স অভাৰো তস্স এৰ পঠমারুপ্পস্স সুঞ্ঞতো সুঞ্ঞভাৰতো.

১০১৩. সতি ¶ তিট্ঠতি ভিয্যো বলৰা সতি তিট্ঠতি.

১০১৫. অভাৰকে নত্থিভাৰে.

১০১৭-৮. দুতিযারুপ্পচক্খুনাতি চক্খুনা দুতিযারুপ্পং ‘‘নত্থি নত্থী’’তিআদিনা আকারেন পরিকম্মৰসেন মনক্কারে. তস্সাপগমমত্তঞ্চ তস্স পঠমারুপ্পস্স অপগমমত্তঞ্চ.

১০২৯. যা নাম অযং সমাপত্তি অভাৰমত্তম্পি গোচরং কত্ৰা ঠস্সতি, অযং সমাপত্তি ৰত একন্তেন অহো সন্তাতি পদিস্সতি.

১০৩৩. যায সঞ্ঞায নেৰসঞ্ঞী, নাসঞ্ঞী চ হোতি, কেৰলং একন্তেন অথ খো সা সঞ্ঞা এদিসী ন হোতি.

১০৩৫-৭. পটুসঞ্ঞায কিচ্চস্স নেৰ করণতো অযং সমাপত্তি ‘‘নেৰসঞ্ঞা’’তি নিদ্দিট্ঠাতি চতুত্থআরুপ্পতো সম্ভৰা পৰত্তা তেজোধাতু সুখোদকে দহনকিচ্চং কাতুং ন সক্কোতি যথা, সা সঙ্খারধম্মানং অৰসেসত্তা.

১০৪০. পাসাদতলঞ্চ ¶ সাটিকা চ.

১০৪১. যো পন ভিক্খু ইমং রূপারূপজ্ঝানসমাপত্তিৰিধানং সারতরং জানাতি, সো রূপারূপজ্ঝানসমাপত্তিপুরেক্খো সেক্খো ভৰং কামভৰং অভিভুয্য অভিভৰিত্ৰা রূপারূপং যাতি পাপুণাতি.

ইতি অভিধম্মাৰতারটীকায

অরূপাৰচরসমাধিভাৰনানিদ্দেসৰণ্ণনা নিট্ঠিতা.

পন্নরসমো পরিচ্ছেদো.

১৬. সোল়সমো পরিচ্ছেদো

অভিঞ্ঞানিদ্দেসৰণ্ণনা

১০৪৫. সতাতি ¶ সতিসম্পন্নেন. অনুযোগন্তি ৰীরিযং.

১০৪৭. যোগাৰচরভিক্খুনা নিব্বত্তিতাসু অভিঞ্ঞাসু অস্স যোগাৰচরস্স ভিক্খুনো সমাধিভাৰনা নিট্ঠং পরিযোসানং গতা সিযা.

১০৫০. দন্তেতি দন্তে ঠিতে. অচলেতি অচলে ঠিতে.

১০৫২-৪. অভিঞ্ঞায পাদকং কারণং অভিঞ্ঞাপাদকং যোগী সতং ৰাপি সহস্সং ৰাপি যদি সচে ইচ্ছতি, অভিঞ্ঞাপাদকং ঝানং সমাপজ্জিত্ৰা ততো অভিঞ্ঞাপাদকঝানতো ৰুট্ঠায ৰুট্ঠহিত্ৰা ‘‘সতং হোমি, সতং হোমি’’ ইতি এৰং কামাৰচরপরিকম্মমানসং কত্ৰা অভিঞ্ঞায পাদকং কারণভূতং ঝানং পুনাধিট্ঠাতি পুন আপজ্জিত্ৰা ততো ঝানতো ৰুট্ঠায পুন অধিট্ঠাতি ¶ , সহাধিট্ঠানেন চেতসা অধিট্ঠানসঙ্খাতেন চতুত্থজ্ঝানচিত্তেন সহ সো যোগী সতং হোতি. ইদ্ধিৰিধঞাণং.

১০৬৭-৮. এসো অধিগতাভিঞ্ঞো যোগী পাদকারম্মণেন চতুত্থজ্ঝানস্স পটিভাগনিমিত্তসঙ্খাতেন আরম্মণেন ফুট্ঠে ওকাসে গতে পৰত্তে পন সদ্দে সুণাতি. দিব্বসোতঞাণং.

১০৬৯. পরস্স চিত্তং পরিযতি পরিচ্ছিজ্জতীতি চেতোপরিযং, তমেৰ মানসং চেতোপরিযমানসং.

১০৭০. হদযং পন নিস্সাযাতি হদযৰত্থুং নিস্সায পৰত্তমানলোহিতং, হদযকোসে পৰত্তং রুহিরন্তি অত্থো.

১০৭৫. কামাৰচরচিত্তঞ্চাতি ¶ কামাৰচরসত্তানং কামাৰচরচিত্তঞ্চ. রূপারূপেসু রূপভৰারূপভৰেসু সত্তানং মানসঞ্চ. কিং ভূতং? সরাগাদিপ্পভেদকং মানসং সব্বং চেতোপরিযঞাণং জানাতি. চেতোপরিযঞাণং.

১০৭৭-৮২. নিসজ্জা সব্বপচ্ছিমাতি সব্বেসং ইরিযাপথানং পচ্ছা জাতা নিসজ্জা ভিক্খুনা আৰজ্জিতব্বা. ততো পভুতি ততো সব্বপচ্ছিমতো নিসজ্জাতো পভুতি তং সব্বং পচ্ছিমনিসজ্জং আদিং কত্ৰা পটিলোমক্কমা পটিলোমক্কমেন সব্বং অত্তনা কতং আৰজ্জিতব্বং. অস্মিং ভৰে যাৰ যত্তকং কালং সন্ধি পটিসন্ধি হোতি, তাৰ তত্তকং কালং কতং কিরিযং তেন ভিক্খুনা আৰজ্জিতব্বং. পুরিমস্মিং ভৰেপি চুতিক্খণেপি নিব্বত্তং নামরূপঞ্চ সাধুকং আৰজ্জিতব্বং. চুতিক্খণে নিব্বত্তে তস্মিং নামরূপে এৰং ভিক্খুনা আৰজ্জিতব্বে যদা তদেৰ তমেৰ নামরূপং আরম্মণং কত্ৰা চুতিক্খণে মনোদ্ৰারে মনক্কারো মনোদ্ৰারাৰজ্জনচিত্তং উপ্পজ্জতি. পুব্বেনিৰাসানুস্সতিঞাণং.

১০৮৬-৯৬. অভিঞ্ঞাপাদকং কসিণারম্মণং ঝানং অভিনীহারক্খমং কত্ৰা ইমেসু তীসু কসিণেসু কতপুঞ্ঞেহি. তস্মা তমিতরং ৰাপীতি আলোককসিণং ৰা ইতরং ৰাপি কসিণদ্ৰযং যথাক্কমং ¶ উপ্পাদেত্ৰা উপচারভূমিযংযেৰ ঠত্ৰা তং আলোককসিণং ঠপেতব্বং. অপ্পনং পণ্ডিতো ন উপ্পাদেয্য, সচে উপ্পাদেতি, তং আলোককসিণং পাদকজ্ঝাননিস্সিতং পাদকজ্ঝানস্স আরম্মণং হোতি. ৰড্ঢিতস্স ঝানস্স অন্তোগধং রূপং তেন যোগিনা পস্সিতব্বং ভৰে ভৰেয্য. তং রূপং পস্সতো পস্সন্তস্স তস্স যোগিনো পরিকম্মস্স ৰারো অতিক্কমতি, তাৰদে তস্মিংযেৰ খণে আলোকোপি তস্স যোগিনো আলোকোপি খিপ্পং অন্তরধাযতি. তস্মিং আলোকে অন্তরহিতে ¶ রূপগতং রূপং ন দিস্সতি. দিৰসম্পি নিসীদিত্ৰা পস্সতো রূপদস্সনং হোতি.

১১০০-১. তংচিত্তসংযুতন্তি তেন চতুত্থজ্ঝানেন যুত্তং চিত্তং. অনাগতংসঞাণস্স পরিকম্মং, যথাকম্মূপগস্স ঞাণস্স চ পরিকম্মং. দিব্বচক্খুঞাণং.

১১০৩. যো ভিক্খু ইধ ইমস্মিং সাসনে ইমং পন গন্থং সুণাতি, চিত্তে করোতি চ, সো ভিক্খু অনেন তরেন ইমিনা গন্থেন তরিত্ৰা অভিধম্মমহণ্ণৰপারং যাতি পাপুণাতি, জানাতীতি অত্থো.

ইতি অভিধম্মাৰতারটীকায

অভিঞ্ঞানিদ্দেসৰণ্ণনা নিট্ঠিতা.

সোল়সমো পরিচ্ছেদো.

১৭. সত্তরসমো পরিচ্ছেদো

অভিঞ্ঞারম্মণনিদ্দেসৰণ্ণনা

১১০৪. অনাগতংসঞাণঞ্চাতি ন আগতো অনাগতো, ন তাৰ সম্পত্তোতি অত্থো, অনাগতে অংসা কোট্ঠাসা তেসং ঞাণং অনাগতংসঞাণং. যং যং কম্মং যথাকম্মং, তং উপগচ্ছতি জানাতীতি যথাকম্মুপগং, ৰিপাকচেতনাজাননকঞাণং.

১১০৭-৯. তত্থ ¶ তেসু আরম্মণত্তিকেসু. চিত্তসন্নিস্সিতং কত্ৰাতি তং কাযং চিত্তং সন্নিস্সিতং করিত্ৰা তমেৰ কাযচিত্তচেতসিকৰসেন মহগ্গতে চিত্তস্মিং সমারোপেতি ঞাণং ইদ্ধিৰিধঞাণং, ততো কাযারম্মণতো কাযস্স পরিত্তত্তা কামাৰচরত্তা পরিত্তারম্মণং ঞাণং সিযা.

১১১০-৩. দিস্সমানেন ¶ কাযেন, গন্তুকামো যদা ভৰে যো যোগী দিস্সমানেন কাযেন গন্তুকামো যদা ভৰেয্য, সো যোগী তদা চিত্তং কাযসন্নিস্সিতং কত্ৰা রূপকাযে সন্নিস্সিতং কত্ৰা তং পাদকজ্ঝানচিত্তং কাযৰসেন কাযে আরোপেতি, তদা ঝানারম্মণতো তং ঞাণং মহগ্গতগোচরং হোতি, যং ঞাণং যদা অনাগতঞ্চ ধম্মজাতং, অতীতঞ্চ ধম্মজাতং ৰিসযং আরম্মণং করোতি, তদা তং ঞাণং অতীতারম্মণং হোতি, তদা অনাগতারম্মণং আরম্মণকরণকালে অনাগতগোচরং হোতি. দিস্সমানেন কাযেন তস্স ভিক্খুনো গমনে পন সতি তস্স যোগিনো ঞাণস্স গোচরো পচ্চুপ্পন্নো নাম হোতি, ইতি ৰিনিদ্দিসে.

১১১৪. কাযং চিত্তস্স ৰসেন চিত্তে আরোপেতি, চিত্তং কাযস্স ৰসেন কাযে আরোপেতি, ইতি পরিণামনকালস্মিং তস্স যোগিনো ঞাণং অজ্ঝত্তারম্মণং সিযা. সম্পৰত্ততি সত্তসূতি পরিত্তমহগ্গতঅতীতঅনাগতপচ্চুপ্পন্নঅজ্ঝত্তবহিদ্ধারম্মণসঙ্খাতেসু সত্তসু আরম্মণেসু সম্পৰত্ততি.

১১২০. জাননে মজ্ঝিমানন্তি মহগ্গতানং জাননে.

১১২২. এতস্স চেতোপরিযঞাণস্স মগ্গারম্মণতা পরিযাযেন এৰ মতা ঞাতা.

১১২৬-৭. তত্থ তিক্খণসম্পত্তং, পচ্চুপ্পন্নং খণাদিকং.

তত্থ তেসু পচ্চুপ্পন্নেসু যং পচ্চুপ্পন্নং খণাদিকং তিক্খণসম্পত্তং উপ্পাদট্ঠিতিভঙ্গক্খণসম্পত্তং খণাদিকং খণাযেৰ তং খণাৰযৰং পচ্চুপ্পন্নং নাম. একদ্ৰেসন্ততিৰারপরিযাপন্নন্তি একচিত্তদ্ৰিচিত্তৰীথিৰারপরিযাপন্নং সন্ততিপচ্চুপ্পন্নং নাম. পচ্চুপ্পন্নন্তি পচ্ছিমন্তি অদ্ধাপচ্চুপ্পন্নন্তি অত্থো.

১১৩১-২. যেন ¶ ¶ আৰজ্জনচিত্তেন ধম্মে আৰজ্জতি, যেন চেতসা জানাতি, তেসং দ্ৰিন্নং আৰজ্জনজৰনচিত্তানং সহট্ঠানস্স অভাৰা তং ‘‘খণাদিকত্তযং পচ্চুপ্পন্ন’’ন্তিআদিকং ‘‘একস্স চিত্তমেকেন, অৰস্সং পন ৰিজ্ঝতি’’ইতি পরিযোসানং ৰচনং ন যুজ্জতি. আৰজ্জনজৰনানং নানারম্মণভাৰং পত্তিতো আপজ্জনতো চ ন যুজ্জতি. অনিট্ঠে পন ঠানে তেসং আৰজ্জনজৰনানং একারম্মণভাৰে অনিচ্ছিতে তস্মিং ঠানে ন যুজ্জতি, অঞ্ঞস্মিং পন ঠানে মগ্গৰীথিযং আৰজ্জনপরিকম্মজৰনানং কসিণাদিকং আরম্মণং হোতি, গোত্রভুলোকুত্তরচিত্তানঞ্চ নিব্বানং আরম্মণং হোতি, এত্থ আরম্মণজৰনানং একারম্মণতা অনিচ্ছতা.

১১৩৪-৪১. ‘‘একব্ভৰপরিচ্ছিন্নং, পচ্চুপ্পন্নন্তি পচ্ছিম’’ন্তি ৰত্ৰা পুন অঞ্ঞেন পরিযাযেন তং পচ্চুপ্পন্নং দস্সেতুং ইদং অদ্ধাখ্যং অদ্ধানাম পচ্চুপ্পন্নং জৰনৰারতো দীপেতব্বং. ইতি ৰচনং নিদ্দিট্ঠং. যদা ইদ্ধিমা যোগী পরস্স চিত্তং ঞাতুং আৰজ্জতি, তস্স আৰজ্জনমনো পচ্চুপ্পন্নখণৰ্হযং পচ্চুপ্পন্নং মনোদ্ৰারাৰজ্জনচিত্তং আরম্মণং কত্ৰা তেন চিত্তেন সদ্ধিং নিরুজ্ঝতি, তেসু নিরুদ্ধেসু তস্স যোগিনো চত্তারি, পঞ্চ ৰা জৰনানি জাযন্তি. এতেসং চতুন্নং, পঞ্চন্নং জৰনানং যং পচ্ছিমং চিত্তং ইদ্ধিচিত্তমুদীরিতং. ইদ্ধিচিত্ততো সেসানি কামাৰচরচিত্তানি. এতেসং কামাৰচরে ইদ্ধিজৰনানং তদেৰ চ পরচিত্তং আরম্মণং হোতি যস্মা, তস্মা সব্বানি তানি জৰনানি একারম্মণতং যন্তি, তেসং জৰনানং নানারম্মণতা অদ্ধাৰসা ন ভৰেয্য, পচ্চুপ্পন্নারম্মণতো তেসং জৰনানং একারম্মণভাৰেপি ইদ্ধিমানসমেৰ চ পরস্স চিত্তং জানাতি. ইতরানি কামাৰচরানি পন চিত্তানি পরস্স চিত্তং ন জানন্তি. যথা চক্খুদ্ৰারে তু ৰিঞ্ঞাণন্তি চক্খুৰিঞ্ঞাণং রূপং পস্সতি, তথা ইতরং চিত্তং ন পস্সতি.

১১৬১. অনাগতংসঞাণস্সাতি ¶ অনাগতংসঞাণস্স অনাগতং ধম্মং অগোচরং, গোচরং ন হোতিযেৰাতি অত্থো.

১১৬৯. ৰিৰিধত্থানি ৰণ্ণপদানি যস্মিং সো ৰিৰিধত্থৰণ্ণপদো, তং মধুরত্থমতিনীহরং উত্তমং সোতুজনস্স হদযং পীতিকরং সচেতনো কো নাম মনুজো ন সুণেয্য.

ইতি অভিধম্মাৰতারটীকায

অভিঞ্ঞারম্মণনিদ্দেসৰণ্ণনা নিট্ঠিতা.

সত্তরসমো পরিচ্ছেদো.

১৮. অট্ঠারসমো পরিচ্ছেদো

দিট্ঠিৰিসুদ্ধিনিদ্দেসৰণ্ণনা

১১৭৫. যা ¶ সঞ্জাননমত্তংৰ, সঞ্ঞা নীলাদিতো পনাতি সা সঞ্ঞা নীলাদিৰসেন সঞ্জাননমত্তংৰ করোতি. লক্খণপ্পটিৰেধন্তি অনিচ্চাদিলক্খণপটিবুজ্ঝনং.

১১৭৭. তং ৰিঞ্ঞাণং উস্সক্কিত্ৰা উদ্ধং সক্কং কত্ৰা সত্তে মগ্গং পাপেতুং ন সক্কোতি.

১১৭৮-৯. সব্বেসং পন ধম্মানং সভাৰপটিৰেধনং অৰিপরীতৰসেন পটিবুজ্ঝনং পঞ্ঞায লক্খণং.

১১৮০. সমাধি আসন্নকারণং এতাযাতি সমাধাসন্নকারণা.

১১৮১. লক্খণেনেকধাতি সব্বধম্মং পটিবুজ্ঝনলক্খণেন পঞ্ঞাৰ একধা ৰুত্তা.

১১৮৩. ভূরিপঞ্ঞেনাতি ¶ ভূতে অত্থে অৰিপরীতে অত্থে রমতীতি ভূরি, ভূরি পঞ্ঞা এতস্সাতি ভূরিপঞ্ঞো, তেন.

১১৮৬-৯১. তীসু অত্থধম্মনিরুত্তীসু চ ঞাণেসু অত্থধম্মনিরুত্তীসু জাতেসু ঞাণেসু চ ঞাণং. যং কিঞ্চি পচ্চযুপ্পন্নং ফলং ধম্মজাতং. ভাসিতত্থোতি পাল়িযা অত্থো. এতে পঞ্চ ধম্মা অত্থসঞ্ঞিতা অত্থনামকা. ফলনিব্বত্তকো হেতূতি জননকো পচ্চযো. ভাসিতন্তি পাল়ি. ধম্মসঞ্ঞিতাতি ধম্মনামকা. সভাৰনিরুত্তীতি অৰিপরীতৰোহারো. পরিযত্তীতি সিক্খনং. সৰনাধিগমেহি পুব্বযোগেন পুব্বে পৰত্তনায.

১১৯২. ভূমিভূতেসূতি ৰিপস্সনায ভূমিভূতেসু.

১১৯৪. জননাদিতোতি ¶ জাতিআদিতো ভীতেন পঞ্ঞা ভাৰেতব্বা.

১২০৩. একাসীতিযা চিত্তেনাতি লোকুত্তরচিত্তৰজ্জিতেন ৰিপস্সনাভূমিভূতেন একাসীতিযা চিত্তেন.

১২০৮. সত্তসম্মোহঘাতত্থন্তি সত্তোতি সম্মোহস্স ৰিনাসিতত্থং.

১২১১. নিরীহকন্তি ঈহৰিরহিতং ব্যাপারৰিরহিতং, দারুরজ্জুসমাযোগে.

১২১৫. উভো ভিজ্জন্তি পচ্চযাতি অঞ্ঞমঞ্ঞপচ্চযকারণা.

১২২৫. অন্তদ্ৰযন্তি কামসুখল্লিকানুযোগঅত্তকিলমথানুযোগদ্ৰযং. ভাৰযেতি দিট্ঠিৰিসুদ্ধিং ৰড্ঢেয্য.

ইতি অভিধম্মাৰতারটীকায

দিট্ঠিৰিসুদ্ধিনিদ্দেসৰণ্ণনা নিট্ঠিতা.

অট্ঠারসমো পরিচ্ছেদো.

১৯. একূনৰীসতিমো পরিচ্ছেদো

কঙ্খাৰিতরণৰিসুদ্ধিনিদ্দেসৰণ্ণনা

১২৩১. ইচ্চেৰমাদিবাত্তিংসকোট্ঠাসানং ¶ পচ্চযস্স হেতুপচ্চযে তাৰ যোগী মনসা পরিগ্গণ্হাতি.

১২৩৩. হেত্ৰঙ্কুরস্স বীজং তু বীজং অঙ্কুরস্স হেতুজনকং, পথৰাদযো অঙ্কুরস্স পচ্চযা.

১২৩৪. পঞ্চ ¶ ধম্মাতি অৰিজ্জাতণ্হুপাদানকম্মাহারা হেতুপচ্চযা ধম্মা.

১২৩৫. কম্মং পুত্তস্স জনকো পিতা ৰিয নামরূপস্স জনকং.

১২৩৮. পচ্চযাতি পচ্চযেন.

১২৪০. যা সাতি যা সা কঙ্খা. পুব্বন্তে পুব্বকোট্ঠাসে.

১২৪১. সব্বথা সব্বকোট্ঠাসতো অনৰসেসাৰ তস্স যোগিনো সা কঙ্খা পহিয্যতি নাসীযতে.

১২৪৩. অত্থসাধিকাতি কুসলপক্খে দানাদিঅত্থসাধিকা, অকুসলপক্খে পাণাতিপাতাদিঅত্থসাধিকা.

তং ৰিপাকন্তি উপঘাতককম্মস্স তং ৰিপাকং উপ্পন্নং নাম হোতি. এৰং একো যোগী কম্মৰিপাকৰসেন নামরূপস্স পচ্চযপরিগ্গহং করোতি.

১২৪৬. হেতুফলস্স সম্বন্ধৰসেনাতি হেতুফলসম্বন্ধৰসেন ইদং নামরূপং কেৰলং একন্তেন পৰত্ততি, ইতি সম্মা অৰিপরীতাকারেন সং অনুপস্সতি.

১২৪৭. পাকপ্পৰত্তিতো ¶ উদ্ধং পাকপটিৰেদকং ন পস্সতি ন জানিযতে.

১২৫০-১. অপ্পৰত্তি নাম ন দিস্সতি, উপপন্নং দিস্সতি. তিত্থিযা এতমত্থং অনঞ্ঞায অজানিত্ৰা অসযংৰসী সত্তসঞ্ঞন্তি ‘‘সত্তো’’তি সঞ্ঞং গহেত্ৰান সস্সতউচ্ছেদদস্সিনো অঞ্ঞমঞ্ঞং ৰিরোধিনো হুত্ৰা দ্ৰাসট্ঠিদিট্ঠিং গণ্হন্তি.

১২৫৪. উভোতি উভো কম্মৰিপাকা অঞ্ঞমঞ্ঞতো সুঞ্ঞা. ন চ কম্মং ৰিনা ফলন্তি কম্মং ৰিনা ফলং ন চ হোতি.

১২৫৫. সম্ভারেহীতি ¶ সূরিযাদিসম্ভারেহি.

১২৫৭. সুঞ্ঞং তং নামরূপধম্মং.

১২৫৮. হেতুসম্ভারপচ্চযাতি হেতুনা চ সম্ভারপচ্চযেহি চ.

ইতি অভিধম্মাৰতারটীকায

কঙ্খাৰিতরণৰিসুদ্ধিনিদ্দেসৰণ্ণনা নিট্ঠিতা.

একূনৰীসতিমো পরিচ্ছেদো.

২০. ৰীসতিমো পরিচ্ছেদো

মগ্গামগ্গঞাণদস্সনৰিসুদ্ধিনিদ্দেসৰণ্ণনা

১২৬৪. পচ্চুপ্পন্নস্স ধম্মস্সাতি পচ্চুপ্পন্নস্স নামরূপধম্মস্স.

১২৬৬-৮. উপ্পজ্জতো উপ্পজ্জন্তস্স নামরূপধম্মস্স রাসিতো নিচযতো আগমনঞ্চ নত্থি. দিসাগমনন্তি দিসায গমনং ¶ . নিরুদ্ধস্সাপি নামরূপধম্মস্স একস্মিং ঠানে নিচযোতি চ নত্থি.

১২৭০-১. অৰিজ্জাসমুদযা রূপসমুদযো, অৰিজ্জানিরোধা রূপনিরোধো. তণ্হাসমুদযা রূপসমুদযো, তণ্হানিরোধা রূপনিরোধো. কম্মসমুদযা রূপসমুদযো, কম্মনিরোধা রূপনিরোধো. আহারনিরোধা রূপনিরোধো. ধম্মেতি সঙ্খারধম্মে.

১২৮০. সম্পত্তপটিৰেধস্সাতি সম্পত্তলোকুত্তরসঙ্খাতমগ্গফলস্স সোতাপন্নাদিপুগ্গলস্স. ৰিপ্পটিপন্নস্সাতি পটিপত্তিযং অপ্পটিপন্নস্স, ৰিরুদ্ধৰসেন পটিপন্নস্স ৰা.

১২৮৬. কাযচিত্তানীতি ¶ কাযাতি ৰেদনাসঞ্ঞাসঙ্খারা. চিত্তন্তি ৰিঞ্ঞাণং.

১২৯০. যতো যতো পচ্চযাদিতো. যং অমতং নিব্বানং ৰিজানতং ৰিজানন্তানং পীতিপামোজ্জং, তেহি লভিতব্বং অমতং, অমতং ৰিয পীতিপামোজ্জং ৰা.

১২৯৩. অপ্পত্তেতি অত্তনি মগ্গফলস্মিং অপ্পত্তে. পত্তসঞ্ঞীতি মগ্গফলে অহং পত্তো অস্মি ইতি সঞ্ঞিতো হোতি.

১২৯৭. সারৰেদিনোতি সারজাননসীলা. তন্তি তং মগ্গামগ্গঞাণদস্সনং. ইদং ঞাণং মগ্গামগ্গঞাণদস্সনন্তি মগ্গামগ্গঞাণদস্সনং নাম.

ইতি অভিধম্মাৰতারটীকায

মগ্গামগ্গঞাণদস্সনৰিসুদ্ধিনিদ্দেসৰণ্ণনা নিট্ঠিতা.

ৰীসতিমো পরিচ্ছেদো.

২১. একৰীসতিমো পরিচ্ছেদো

পটিপদাঞাণদস্সনৰিসুদ্ধিনিদ্দেসৰণ্ণনা

১২৯৯. উপল্লেসৰিমুত্তং ¶ সুৰিসদং ঞাণন্তি অট্ঠৰিধঞাণং সন্ধাযাহ.

১৩০২. সচ্চানুলোমঞাণন্তি অযমেৰ পৰুচ্চতি.

১৩০৬. অযং সিখাপত্তা ৰিপস্সনা এৰ সচ্চানুলোমঞাণং নাম পৰুচ্চতি.

১৩০৯. ভৰঙ্গানন্তরং সঙ্খারু-পেক্খাগতনযেনাতি ভৰঙ্গানন্তরং সঙ্খারুপেক্খাসঙ্খাতেন ঞাণেন কতনযেন.

১৩১৪-৬. বোধিপক্খিযধম্মানং ¶ , উদ্ধঞ্চ অনুলোমতোতি উদ্ধং ৰত্তমানানং বোধিপক্খিযধম্মানং অনুলোমতো, ইদং অনুলোমঞাণং ৰুট্ঠানগামিনিযা পরিযোসানং নাম ভাসিতং মহেসিনা কথিতং. সচ্চানুলোমঞাণং আহচ্চ উপ্পন্না, সব্বপ্পকারেন গোত্রভুপরিযোসানং.

১৩১৮. তত্থাতি ৰিপস্সনায.

ইতি অভিধম্মাৰতারটীকায

পটিপদাঞাণদস্সনৰিসুদ্ধিনিদ্দেসৰণ্ণনা নিট্ঠিতা.

একৰীসতিমো পরিচ্ছেদো.

২২. দ্ৰাৰীসতিমো পরিচ্ছেদো

ঞাণদস্সনৰিসুদ্ধিনিদ্দেসৰণ্ণনা

১৩১৯-২২. আৰজ্জনস্স হিতং আৰজ্জনিযং, তং ঠানং এতস্সাতি আৰজ্জনিযঠানং, গোত্রভূতি অত্থো. তং গোত্রভুচিত্তং ¶ মগ্গচিত্তস্স আৰজ্জনিযঠানত্তা. পটিপদাঞাণদস্সনং কুদাচনং ন চ ভজতি, তথেৰ ঞাণদস্সনৰিসুদ্ধিং কুদাচনং ন ভজতেৰ. উভিন্নং ঞাণানং অন্তরা একং অব্বোহারিকং ৰোহারে নিযুত্তন্তি ৰোহারিকং, ন ৰোহারিকং অব্বোহারিকং. ৰিপস্সনায সোতস্মিং ৰিপস্সনায সোতে পতিতত্তা ৰিপস্সনা নাম ৰোহরিতব্বা. ততো নিব্বানতো.

১৩২৫. সূরং তিক্খং ৰিপস্সনন্তি গোত্রভুচিত্তং সন্ধাযাহ.

১৩২৬-৯. ৰিসঙ্খারন্তি সঙ্খারেহি ৰিগতং. পঠমাৰজ্জনঞ্চেৰাতি পঠমাৰজ্জনং ৰিয. পঠমাভোগতাপি চাতি পঠমমনসিকারা ৰিয. মগ্গস্স অনন্তরাদীহি পচ্চযেহি. তস্সাতি মগ্গস্স. সিখাপত্তায তায ৰিপস্সনায মুদ্ধম্হি মত্থকে. অনাৰত্তন্তি অনিৰত্তং.

১৩৩০-৩. একেন ¶ আৰজ্জনেন একিস্সাযেৰ ৰীথিযা. অনুলোমগোত্রভুচেতসন্তি অনুলোমগোত্রভুচিত্তানং নানারম্মণতা ৰুত্তা. তং গোত্রভুচিত্তং অনাৰজ্জনম্পি মগ্গস্স আৰজ্জনট্ঠানে ঠত্ৰা. সঞ্ঞং দত্ৰা ৰিযাতি ‘‘অহং নিব্বানং আরম্মণং করোমি, ত্ৰম্পি তমেৰারম্মণং করোহি’’ ইতি সঞ্ঞং দত্ৰা ৰিযাতি অধিপ্পাযো. সঞ্ঞিতন্তি সঞ্ঞং. কদাচিপি অনিব্বিদ্ধপুব্বং মগ্গো এস এসো মগ্গো পুব্বে অনিব্বিদ্ধপুব্বো.

১৩৩৬. উজ্ঝতীতি ছিন্দতি.

১৩৩৮. অনেকেসং আনিসংসানং দাযকেন আদিমগ্গেন সংযুত্তং. পঠমমগ্গঞাণং.

১৩৪১. একস্সাসেৰনং ¶ নত্থি একস্স চিত্তুপ্পাদস্স আসেৰনপচ্চযো নত্থি, তস্মা কারণা দ্ৰে চিত্তুপ্পাদা অনুলোমকা. তেহীতি চিত্তুপ্পাদেহি আসেৰনপচ্চযং লদ্ধা লভিত্ৰা ততিযং চিত্তং গোত্রভু হোতি.

১৩৪৫-৭. মগ্গপেক্খনহেতু যস্স আৰজ্জনমনসো, তং মগ্গপেক্খনহেতুকং. তস্মিং নিরুদ্ধেতি তস্মিং আৰজ্জনচিত্তে নিরুদ্ধে মগ্গস্স পচ্চৰেক্খণসঞ্ঞিতানি সত্ত জৰনানি পটিপাটিযা জাযন্তে. পচ্চৰেক্খণঞাণানি একূনৰীসতি হোন্তি.

১৩৫১. ততো তদা ৰিপস্সনাৰীথিং ওতরতি. দুতিযমগ্গঞাণং.

১৩৬১. মূলঘাতন্তি মূলঘাতনং. ততিযমগ্গঞাণং.

১৩৬৩. অনাৰত্তিসভাৰতোতি অনিৰত্ততো. চতুত্থমগ্গঞাণং.

ইতি অভিধম্মাৰতারটীকায

ঞাণদস্সনৰিসুদ্ধিনিদ্দেসৰণ্ণনা নিট্ঠিতা.

দ্ৰাৰীসতিমো পরিচ্ছেদো.

২৩. তেৰীসতিমো পরিচ্ছেদো

কিলেসপহাননিদ্দেসৰণ্ণনা

১৩৭৫. ইধ ¶ পন ইমস্মিং পনাধিকারে কারণূপচারেন লাভাদিকারণস্স ৰোহারেন, লাভো আদি ৰত্থু যস্স অনুনযস্সাতি লাভাদিৰত্থুকো, তস্স.

সুখুমাতি কামরাগপটিঘা সুখুমা.

১৩৭৬. যেন ¶ যেন পঠমমগ্গাদিঞাণেন যো যো সংযোজনাদিকো পহাতব্বো ধম্মো ঘাতং ৰিনাসং যাতি, সো সো ধম্মো তেন তেন অসেসেন ঞাণেন এৰং সাধু মযা সন্দস্সিতো.

১৩৮৩. পরিঞ্ঞাভিসমযেনাতি পরিচ্ছিন্দিত্ৰা জাননেন. দুক্খং অভিসমেতীতি দুক্খং পটিৰিজ্ঝতি.

১৩৯৪. যো যোগী ইমং ৰিদিত্ৰা হিতভাৰনং ৰনং ৰনেতব্বং ৰিদিত্ৰা জানিত্ৰা ৰে একন্তেন সুখসংহিতং হিতং উপেতি, চিত্তস্স তমং অনুত্তমং হীনং ৰিধূয ৰিনাসেত্ৰা অৰিগ্গহকম্পদং পদং অৰিগ্গহকং সরীররহিতং পদং পটিপজ্জিতব্বং ঞাতব্বং পদং নিব্বানং উপেতি পাপুণাতি চ.

ইতি অভিধম্মাৰতারটীকায

কিলেসপহাননিদ্দেসৰণ্ণনা নিট্ঠিতা.

তেৰীসতিমো পরিচ্ছেদো.

২৪. চতুৰীসতিমো পরিচ্ছেদো

পচ্চযনিদ্দেসৰণ্ণনা

১৩৯৫. রূপং ¶ রূপস্সাতি রূপং রূপস্স. অরূপস্স নামস্স.

১৩৯৬. মিস্সকস্সাতি নামরূপমিস্সকস্সাতি অত্থো.

১৩৯৭. তিপঞ্চ চাতি পন্নরস চ.

১৩৯৯. একোতি ¶ কম্মপচ্চযো. দ্ৰেকালিকোতি অতীতপচ্চুপ্পন্নকালৰসেন দ্ৰীসু কালেসু নিযুত্তো. দস্সিতোতি ভগৰতা দেসিতো.

ইতি অভিধম্মাৰতারটীকায

পচ্চযনিদ্দেসৰণ্ণনা নিট্ঠিতা.

চতুৰীসতিমো পরিচ্ছেদো.

নিগমনকথাৰণ্ণনা

১৪০১. সুমতিমতিৰিচারবোধনোতি সুমতীনং সুন্দরপঞ্ঞানং কৰীনং মতিযা ৰিচারস্স বোধনো. ৰিমতিৰিমোহৰিনাসনোতি ৰিমতীনং বালানং ৰিমোহস্স ৰিনাসনো. কুমতিমতিমহাতমোনাসোতি কুমতীনং বালানং মহাতমসন্নিভায মতিযা নাসকো. পটুমতিভাসকরোতি পটূনং পণ্ডিতানং তিক্খপঞ্ঞায ওভাসকরো.

১৪০২. সুমতিনামকো ভিক্খু অসমানতো অসদিসায পূজায মম আযাচিতো যতো যস্মা ¶ কারণা, ততো তস্মা কারণা অযং অভিধম্মাৰতারো. পদাতো পদাতি কোট্ঠাসতো কোট্ঠাসতো. হিতৰিভাৰনা ভাৰনাতি হিতপ্পকাসনায ভাৰনায মযা রচিতো. অথ ৰা অহং সুমতিনা ভিক্খুনা অসমানতো মানতো আযাচিতো যতো যস্মা, ততো তস্মা.

১৪০৫. তিৰিধা ব্যপ্পথানঞ্হি গতিযোতি ব্যপ্পথানং ৰচনানং অত্থগন্থযুত্তিৰসেন তিৰিধা গতিযো.

১৪০৬. নিকাযন্তরলদ্ধীহীতি অঞ্ঞস্মিং নিকাযে লদ্ধীহি. ৰাচনামগ্গনিস্সিতোতি ৰচনপ্পবন্ধনিস্সিতো.

১৪১০. অসংকিণ্ণকুলাকুলেতি ¶ অসম্মিস্সকুলেহি আকিণ্ণে. সুপসন্নসিতোদকেতি মধুরসীতোদকে.

১৪১১. সঙ্কটেতি সম্বাধে.

১৪১২. কেলাসসিখরাকারপাসাদপটিমণ্ডিতেতি রজতপব্বতমত্থকনিভেহি পাসাদেহি অলঙ্কতে.

১৪১৩. ৰিৰিধাকারচারুপাকারগোপুরেতি ৰিৰিধসণ্ঠানমনুঞ্ঞপাকারদ্ৰারকোট্ঠকে.

১৪১৪. সল্লেখাতি সল্লেখৰুত্তি. সাখল্যেতি সখিলভাৰে. সতাতি সতিসম্পন্নেন.

১৪১৫. ৰস্সৰলাহকা দেৰাতি ৰস্সৰলাহকভূতা দেৰা অমরা.

নিগমনকথাৰণ্ণনা নিট্ঠিতা.

অভিধম্মাৰতারপুরাণটীকা নিট্ঠিতা.

নমো তস্স ভগৰতো অরহতো সম্মাসম্বুদ্ধস্স

অভিধম্মাৰতার-অভিনৰটীকা

(পঠমো ভাগো)

গন্থারম্ভকথা

(ক) ৰিসুদ্ধকরুণাঞাণং ¶ ¶ , বুদ্ধং সম্বুদ্ধপূজিতং;

ধম্মং সদ্ধম্মসম্ভূতং, ৰন্দে সংঘং নিরঙ্গণং.

(খ) সারিপুত্তং মহাথেরং, পরিযত্তিৰিসারদং;

নমামি সন্তৰুত্তিং মে, গুরুং গারৰভাজনং.

(গ) ৰন্দন্তেন মযা এৰং,

যা লদ্ধা পুঞ্ঞসম্পদা;

হিত্ৰা তস্সানুভাৰেন,

অন্তরাযে অসেসতো.

(ঘ) মহাৰিহারৰাসীনং ¶ , থেরানং থিরসীলিনং;

ৰংসালঙ্কারভূতেন, ভূতানুগ্গহকারিনা.

(ঙ) থেরেন বুদ্ধদত্তেন, রচিতং যং মনোরমং;

পিটকে অভিধম্মস্মিং, ওতারুপাযভাৰতো.

(চ) অভিধম্মাৰতারোতি, লদ্ধনামেন ৰিস্সুতং;

নানানিপুণগম্ভীরনযং পকরণুত্তমং.

(ছ) অত্থসংৰণ্ণনং তস্স, আরভিস্সং যথাবলং;

পামোজ্জজননত্থায, আভিধম্মিকভিক্খুনন্তি.

গন্থারম্ভকথাৰণ্ণনা

১. পরমনিপুণৰিচিত্তনযসমন্নাগতং ¶ সকসমযসমযন্তরগহনৰিগ্গাহণসমত্থং সুৰিমলৰিপুলপঞ্ঞাৰেয্যত্তিযজননং পকরণমিদমারভন্তোযমাচরিযো পঠমং তাৰ রতনত্তযপ্পণামকরণেন অন্তরাযনিৰারণঞ্চেৰ পঞ্ঞাপাটৰঞ্চ পত্থেতি. রতনত্তযপ্পণামো হি অত্থতো পণামকিরিযাভিনিপ্ফাদিকা কুসলচেতনা. সা চ ৰন্দনেয্যৰন্দকানং খেত্তজ্ঝাসযসম্পদাহি দিট্ঠধম্মৰেদনীযভূতা যথালদ্ধসম্পত্তিনিমিত্তকস্স কম্মস্স অনুবলপ্পদানৰসেন তন্নিব্বত্তিতৰিপাকসন্ততিযা অন্তরাযকরানি উপপীল়কউপচ্ছেদককম্মানি পটিবাহিত্ৰা তন্নিদানানং যথাধিপ্পেতসিদ্ধিৰিবন্ধকানং রোগাদিঅন্তরাযানমপ্পৰত্তিং সাধেতি, রাগাদিমলৰিক্খালনেন চ চিত্তসন্তানং পরিসোধেত্ৰা তন্নিস্সিতায পঞ্ঞায যথাধিপ্পেতসিদ্ধিসম্পাদকং তিক্খৰিসদভাৰমাৰহতি. কিঞ্চি আচিণ্ণমেতং পণ্ডিতানং, যদিদং গন্থসমারম্ভে রতনত্তযপ্পণামকরণং, তস্মা সপ্পুরিসাচারানুরক্খণত্থঞ্চ আদিম্হি রতনত্তযৰন্দনা আরদ্ধাতি এৰমাদিনা অঞ্ঞানিপি বহূনি পযোজনানি নিদ্ধারেতব্বানি. তানি পন তত্থ তত্থ বহুধা ৰিত্থারিতানীতি তং পপঞ্চপরিস্সমং ঠপেত্ৰা যথানুপ্পত্তমেৰ তাৰ ৰণ্ণযিস্সাম.

এত্থ চ রতনত্তযপ্পণামং কত্তুকামো তথাগতমূলকত্তা সেসরতনানং পঠমং তাৰ তথাগতস্স ¶ থোমনাপুব্বঙ্গমং পণামমারভন্তো আহ ‘‘অনন্তকরুণাপঞ্ঞ’’ন্তিআদি. থোমনাপুব্বঙ্গমেন হি পণামেন সত্থু গুণাতিসযযোগো, ততো চস্স অনুত্তরৰন্দনীযভাৰো, তেন চ অত্তনো ৰন্দনায খেত্তঙ্গতভাৰো, খেত্তঙ্গতায চ ৰন্দনায যথাধিপ্পেতনিপ্ফত্তিযা হেতুভাৰো চ দস্সিতো হোতি.

তত্থ ¶ ৰন্দিত্ৰাতি পুব্বকালকিরিযানিদ্দেসো. তস্স পন ওসানগাথাযং ‘‘পৰক্খামী’’তি ইমিনা অপরকালকিরিযাৰচনেন সহ সম্বন্ধো. বুদ্ধন্তি ৰন্দনকিরিযায কম্মনিদ্দেসো. ‘‘অনন্তকরুণাপঞ্ঞ’’ন্তিআদিকং পন তব্বিসেসনং. তত্থ কিরতীতি করুণা, পরদুক্খং ৰিক্খিপতি অপনেতীতি অত্থো. কিরীযতি দুক্খিতেসু পসারীযতীতি ৰা করুণা. অথ ৰা করোতীতি করুণা, পরদুক্খে সতি সাধূনং কম্পনং হদযখেদং জনযতীতি অত্থো. কিণাতীতি ৰা করুণা, পরস্স দুক্খং পচ্চযৰেকল্লকরণতো হিংসতীতি অত্থো. পজানাতীতি পঞ্ঞা, যথাসভাৰং পকারেহি পটিৰিজ্ঝতীতি অত্থো. করুণা চ পঞ্ঞা চ করুণাপঞ্ঞা, নত্থি এতাসং অন্তোতি অনন্তা, অনন্তা করুণাপঞ্ঞা এতস্সাতি অনন্তকরুণাপঞ্ঞো, তং অনন্তকরুণাপঞ্ঞং.

এত্থ চ উপ্পাদৰযন্ততাৰসেন চেৰ সন্ততিপরিযোসানৰসেন চ সতিপি ভগৰতো করুণাপঞ্ঞানং সপরিযন্তভাৰে অনন্তারম্মণেসু পৰত্তনতো অনন্ততা ৰেদিতব্বা. সম্মাসম্বুদ্ধস্স হি সব্বসত্তানং দুক্খাপনযনাকারপ্পৰত্তা অনঞ্ঞসাধারণা মহাকরুণা কঞ্চি সত্তং অৰজ্জেত্ৰা সব্বেসু সত্তেসু নিরৰসেসেন পৰত্ততি, তথা সব্বধম্মসভাৰবোধনসমত্থা সব্বঞ্ঞুতঞ্ঞাণসঙ্খাতা পঞ্ঞাপি সকলঞেয্যধম্মেসু অনৰসেসতো পৰত্ততি, তস্মা অনন্তারম্মণপ্পৰত্তকরুণাঞাণৰন্ততায অনন্তকরুণাপঞ্ঞো ভগৰা. করুণাপঞ্ঞাগ্গহণেন চেত্থ ভগৰতো সব্বলোকিযলোকুত্তরগুণসম্পত্তি দস্সিতা হোতি. তথা হি করুণাগ্গহণেন লোকিযেসু মহগ্গতভাৰপ্পত্তাসাধারণগুণদীপনতো সকললোকিযগুণসম্পত্তি দস্সিতা, পঞ্ঞাগ্গহণেন সব্বঞ্ঞুতঞ্ঞাণপদট্ঠানমগ্গঞাণদীপনতো সব্বলোকুত্তরগুণসম্পত্তি দস্সিতাতি.

অপিচ ¶ সব্ববুদ্ধগুণানং করুণা আদি, পঞ্ঞা পরিযোসানং. মহাকরুণাসঞ্চোদিতমানসো হি ভগৰা সংসারপঙ্কতো সত্তানং সমুদ্ধরণত্থায কতাভিনীহারো অনুপুব্বেন পারমিযো পূরেত্ৰা অনুত্তরসম্মাসম্বোধিযা অধিগমেন সকলবুদ্ধগুণে পটিলভি. ইতি ¶ সকলবুদ্ধগুণানং তন্নিদানভাৰতো করুণা সব্ববুদ্ধগুণানমাদি, সব্বঞ্ঞুতঞ্ঞাণপদট্ঠানস্স পন মগ্গঞাণস্স পটিলভনতো উত্তরিকরণীযাভাৰতো পঞ্ঞা পরিযোসানং. আদিপরিযোসানদস্সনেন চ সকলবুদ্ধগুণা নযতো দস্সিতা হোন্তি. নযগ্গাহো এৰ হি সব্ববুদ্ধগুণানং দস্সনুপাযো, ইতরথা তাদিসস্স সব্বঞ্ঞুবুদ্ধস্সপি ৰচনপথাতীতং তথাগতগুণং অনুপদং ৰণ্ণেন্তো কো নাম পরিযোসানমাহরিতুং সক্কুণেয্যাতি.

এৰং করুণাপঞ্ঞামুখেন সঙ্খেপতো সকলবুদ্ধগুণেহি ভগৰন্তং থোমেত্ৰাপি পুন অত্তনো বুদ্ধগুণসংকিত্তনে অতিত্তাভাৰেন চেৰ পরেসঞ্চ পসাদবাহুল্লজননত্থং তদন্তোগধেপি ৰিসিট্ঠগুণে পধানভাৰেন নীহরিত্ৰা দস্সেন্তো আহ ‘‘তথাগত’’ন্তিআদি. তত্থ ‘‘তথাগত’’ন্তি তথা আগততাদীহি অট্ঠহি কারণেহি তথাগতং. ৰুত্তঞ্হেতং (দী. নি. অট্ঠ. ১.৭; ম. নি. অট্ঠ. ১.১২; বু. ৰং. অট্ঠ. ১.২ নিদানকথা; অ. নি. অট্ঠ. ১.১.১৭০) –

‘‘অট্ঠহি কারণেহি ভগৰা তথাগতো, তথা আগতোতি তথাগতো, তথা গতোতি তথাগতো, তথলক্খণং আগতোতি তথাগতো, তথধম্মে যাথাৰতো অভিসম্বুদ্ধোতি তথাগতো, তথদস্সিতায তথাগতো, তথৰাদিতায তথাগতো, তথাকারিতায তথাগতো, অভিভৰনট্ঠেন তথাগতো’’তি.

‘‘কথং ¶ ভগৰা তথা আগতোতি তথাগতো? যথা সব্বলোকহিতায উস্সুক্কমাপন্না পুরিমকা সম্মাসম্বুদ্ধা আগতা, কিং ৰুত্তং হোতি? মনুস্সত্তাদিঅট্ঠঙ্গসমন্নাগতেন যেন অভিনীহারেন তে ভগৰন্তো আগতা, তেনেৰ চ অভিনীহারেন অযম্পি ভগৰা আগতো, যথা চ তে ভগৰন্তো সমতিংস পারমিযো পূরেত্ৰা পঞ্চমহাপরিচ্চাগাদীনি সম্পাদেত্ৰা আগতা, যথা চ তে সত্ততিংস বোধিপক্খিযধম্মে ভাৰেত্ৰা ব্রূহেত্ৰা আগতা, তথা অযম্পি ভগৰা আগতোতি এৰং তাৰ তথা আগতো’’তি তথাগতো. (১)

‘‘কথং তথা গতোতি তথাগতো? যথা সম্পতিজাতা তে ভগৰন্তো সত্তপদৰীতিহারেন গতা, যথা ৰা তে সমথৰিপস্সনামগ্গেহি তং তং অকুসলপক্খং ৰিধমিত্ৰা গতা, তথা অযম্পি ভগৰা গতো, এৰং তথা গতোতি তথাগতো. (২)

‘‘কথং ¶ তথলক্খণং আগতোতি তথাগতো? যস্মা তেসং তেসং ধম্মানং যং সভাৰসরসলক্খণং তথং অৰিতথং, তঞ্চেস তথলক্খণং আগতো যাথাৰতো অধিগতো, তস্মা তথলক্খণং আগতোতি তথাগতো গমনত্থানং বুজ্ঝনত্থসম্ভৰতো. তথা হি ৰদন্তি ‘যে গতিঅত্থা, তে বুজ্ঝনত্থা. যে বুজ্ঝনত্থা, তে গতিঅত্থা’তি. (৩)

‘‘কথং তথধম্মে যাথাৰতো অভিসম্বুদ্ধোতি তথাগতো? যস্মা ‘ইদং দুক্খন্তি, ভিক্খৰে, তথমেতং অৰিতথমেত’ন্তিআদিৰচনতো (সং. নি. ৫.১০৯০) ‘অৰিজ্জায সঙ্খারানং ¶ পচ্চযট্ঠো সঙ্খারানং অৰিজ্জাপচ্চযসম্ভূতসমুদাগতট্ঠো তথো অৰিতথো অনঞ্ঞথো’তিআদিৰচনতো চ তথধম্মসঙ্খাতে সচ্চপটিচ্চসমুপ্পাদে যাথাৰতো আগতো অভিসম্বুদ্ধো, তস্মা তথধম্মে যাথাৰতো অভিসম্বুদ্ধোতি তথাগতো. (৪)

‘‘কথং তথদস্সিতায তথাগতো? যস্মা অপরিমাণাসু লোকধাতূসু অপরিমাণানং সত্তানং ছদ্ৰারগ্গহিতে আরম্মণে অৰিপরীতমেৰ পস্সতি জানাতি, ঞত্ৰা চ পনেৰং ‘কতমং তং রূপাযতনং, যং চতুন্নং মহাভূতানং উপাদাযা’তিআদিনা (ধ. স. ৬১৬ আদযো) তথমেস অৰিপরীতং ৰিভজতি দস্সেতি, তস্মা তথং আগচ্ছতি পস্সতি জানাতি, তং ৰা আগমযতি দস্সেতীতি তথাগতোতি এৰং তথদস্সিতায তথাগতো. (৫)

‘‘কথং তথৰাদিতায তথাগতো? যস্মা এস অভিসম্বোধিতো যাৰ পরিনিব্বানা রাগমদাদিনিম্মথনৰসেন একসদিসমেৰ ধম্মং তথং অৰিতথং ভাসতি, তস্মা তথং গদতি, তথো অৰিপরীতো আগদোৰচনমেতস্সাতি ৰা দ-কারস্স ত-কারং কত্ৰা তথাগতোতি ৰুত্তোতি এৰং তথৰাদিতায তথাগতো. (৬)

‘‘কথং তথাকারিতায তথাগতো? ভগৰা হি ‘যথা ৰাদী তথা কারী’তি (অ. নি. ৪.২৩; চূল়নি. পোসালমাণৰপুচ্ছানিদ্দেস ৮৩) ৰচনতো অত্তনো ৰাচায অনুরূপমেৰ করোতি, তস্মা যথা ৰাচা, তথা কাযোপি গতো পৰত্তো ইমস্সাতি তথাগতোতি এৰং তথাকারিতায তথাগতো. (৭)

‘‘কথং ¶ অভিভৰনট্ঠেন তথাগতো? যস্মা পনেস অনুপমায সকললোকিযলোকুত্তরগুণসম্পদায ¶ সমন্নাগতত্তা সদেৰকং লোকং অভিভুয্য পৰত্ততি, তস্মা অভিভৰনট্ঠেন তথাগতোতি ৰুচ্চতী’’তি.

তত্রেৰং পদসিদ্ধি ৰেদিতব্বা – অগদো ৰিযাতি অগদো, দেসনাৰিলাসো চেৰ পুঞ্ঞুস্সযো চ. তেন হেস মহানুভাৰো ভিসক্কো ৰিয দিব্বাগদেন সপ্পে সব্বপরপ্পৰাদিনো, সদেৰকঞ্চ লোকং অভিভৰতি. ইতি সব্বলোকাভিভৰনে তথো অৰিপরীতো যথাৰুত্তো অগদো এতস্সাতি দ-কারস্স ত-কারং কত্ৰা তথাগতোতি ৰুচ্চতীতি অযমেত্থ সঙ্খেপো. ৰিত্থারো পন দীঘাগমসংৰণ্ণনাদীসু গহেতব্বো. আহ চেত্থ –

‘‘যথেৰ লোকম্হি ৰিপস্সিআদযো,

সব্বঞ্ঞুভাৰং মুনযো ইধাগতা;

তথা অযং সক্যমুনীপি আগতো,

তথাগতো ৰুচ্চতি তেন চক্খুমা. (দী. নি. অট্ঠ. ১.৭; ম. নি. অট্ঠ. ১.১২; অ. নি. অট্ঠ. ১.১.১৭০; বু. ৰং. অট্ঠ. ১.২ নিদানকথা);

‘‘পহায কামাদিমলে যথা গতা,

সমাধিঞাণেহি ৰিপস্সিআদযো;

মহেসিনো সক্যমুনী জুতিন্ধরো,

তথা গতো তেন তথাগতো মতো.

‘‘তথঞ্চ ধাত্ৰাযতনাদিলক্খণং,

সভাৰসামঞ্ঞৰিভাগভেদতো;

সযম্ভুঞাণেন জিনোযমাগতো,

তথাগতো ৰুচ্চতি সক্যপুঙ্গৰো.

‘‘তথানি ¶ সচ্চানি সমন্তচক্খুনা,

তথা ইদপ্পচ্চযতা চ সব্বসো;

অনঞ্ঞঞেয্যেন ¶ যতো ৰিভাৰিতা,

যাথাৰতো তেন জিনো তথাগতো.

‘‘অনন্তভেদাসুপি লোকধাতুসু,

জিনস্স রূপাযতনাদিগোচরে;

ৰিচিত্তভেদে তথমেৰ দস্সনং,

তথাগতো তেন সমন্তলোচনো.

‘‘যতো চ ধম্মং তথমেৰ ভাসতি,

করোতি ৰাচাযনুলোমমত্তনো;

গুণেহি লোকং অভিভুয্যিরীযতি,

তথাগতো তেনপি লোকনাযকো’’তি. (ইতিৰু. অট্ঠ. ৩৮; দী. নি. টী. ১.৭);

কেনচি গুণেন অত্তনো ৰিসিট্ঠস্স কস্সচি অভাৰতো নত্থি এতস্স উত্তরোতি অনুত্তরো. ভগৰতো হি অৰীচিতো পট্ঠায যাৰ ভৰগ্গং তিরিযং অপরিমাণাসু লোকধাতূসু ন কোচি কেনচি গুণেন সমসমোপি অত্থি, কুতো পন উত্তরিতরো. যথাহ –

‘‘রূপে সীলে সমাধিম্হি, পঞ্ঞায চ অসাদিসো;

ৰিমুত্তিযা সমসমো, ধম্মচক্কপ্পৰত্তনে’’তি.

ৰিন্দিত্ৰাতি তীহি ৰন্দনাহি তন্নিন্নতাদিৰসেন নমস্সিত্ৰা. কাযৰচীমনোদ্ৰারৰসেন হি তিস্সো ৰন্দনা. যথাহ ‘‘তিস্সো ইমা, ভিক্খৰে, ৰন্দনা কাযেন ৰন্দতি, ৰচসা ৰন্দতি, মনসা ৰন্দতী’’তি. তত্থ বুদ্ধাদিগুণারম্মণা কামাৰচরকুসলকিরিযানমঞ্ঞতরা চেতনা কাযৰিঞ্ঞত্তিং সমুট্ঠাপেত্ৰা কাযদ্ৰারপ্পৰত্তিৰসেন উপ্পন্না কাযৰন্দনাতি ৰুচ্চতি, সাযেৰ ৰচীৰিঞ্ঞত্তিং সমুট্ঠাপেত্ৰা ৰচীদ্ৰারপ্পৰত্তিৰসেন উপ্পন্না ৰচীৰন্দনাতি, উভযৰিঞ্ঞত্তিযো পন অসমুট্ঠাপেত্ৰা কেৰলং ¶ মনোদ্ৰারপ্পৰত্তিৰসেন উপ্পন্না মনোৰন্দনাতি. সিরসাতি উত্তমঙ্গেন করণভূতেন. অবুজ্ঝি, বোধেতীতি ৰা বুদ্ধো. অযঞ্হি চতুসচ্চধম্মে সযম্পি অবুজ্ঝি, পরেপি বোধেতি ¶ , তস্মা বুজ্ঝনবোধনট্ঠেন ‘‘বুদ্ধো’’তি ৰুচ্চতি. যথাহ ‘‘বুজ্ঝিতা সচ্চানীতি বুদ্ধো, বোধেতা পজাযাতি বুদ্ধো’’তি (মহানি. ১৯২; চূল়নি. পারাযনত্থুতিগাথানিদ্দেস ৯৭; পটি. ম. ১.১৬২). অথ ৰা বুধ-সদ্দস্স জাগরণৰিকসনত্থেসুপি পৰত্তনতো অবুজ্ঝি সৰাসনসম্মোহনিদ্দায অচ্চন্তং ৰিগতো, বুদ্ধিযা ৰিকসিতৰাতি ৰা বুদ্ধো. ভগৰা হি ৰত্থুসভাৰদস্সনৰিবন্ধিকায অৰিজ্জাসঙ্খাতায নিদ্দায অরিযমগ্গঞাণেন সহ ৰাসনায সমুচ্ছিন্নত্তা ততো অচ্চন্তং ৰিগতো. পরমরুচিরসিরিসোভগ্গসমাগমেন ৰিকসিতমিৰ পদুমং অপরিমিতগুণগণালঙ্কতসব্বঞ্ঞুতঞ্ঞাণসমাগমেন ৰিকসিতো ৰিকাসমনুপ্পত্তো, তস্মা জাগরণৰিকসনত্থৰসেনপি ‘‘বুদ্ধো’’তি ৰুচ্চতি.

এত্তাৰতা চ দ্ৰীহি আকারেহি ভগৰতো থোমনা কতা হোতি অত্তহিতসম্পত্তিতো, পরহিতপটিপত্তিতো চ. তাসু অত্তহিতসম্পত্তি অনাৰরণঞাণাধিগমো সৰাসনসকলসংকিলেসানমচ্চন্তপ্পহানং অনুপাদিসেসনিব্বানাধিগমো চ, পরহিতপটিপত্তি পন আসযপ্পযোগৰসেন দুৰিধং পরহিতসমীহনং. তত্থ ধম্মদেসনায অভাজনেসু দেৰদত্তাদীসু ৰিরোধিসত্তেসুপি নিচ্চং হিতজ্ঝাসযতা অপরিপাকগতিন্দ্রিযানং ইন্দ্রিযপরিপাককালাগমনঞ্চ আসযো নাম. তদঞ্ঞসত্তানং পন লাভসক্কারাদিনিরপেক্খচিত্তস্স যানত্তযমুখেন সব্বদুক্খনিয্যানিকধম্মদেসনা পযোগো নাম. দুৰিধাসু পনেতাসু পরহিতপটিপত্তীসু, তিৰিধাসু চ অত্তহিতসম্পত্তীসু অনন্তকরুণা-ৰচনেন, তথা আগতট্ঠেন চ তথাগত-সদ্দেন আসযৰসেন পরহিতপটিপত্তি দস্সিতা, বোধনট্ঠেন বুদ্ধ-সদ্দেন, তথদস্সনট্ঠেন ¶ চ তথাগতট্ঠেন চ তথাগতসদ্দেন পযোগৰসেন, অনন্তপঞ্ঞা-ৰচনেন, ঞাণগতিদীপকেন তথাগত-সদ্দেন, বুজ্ঝনজাগরণৰিকসনট্ঠেন চ বুদ্ধ-সদ্দেন তিৰিধাপি অত্তহিতসম্পত্তি, অনুত্তরৰচনেন চ অত্তহিতপরহিতসম্পত্তি পকাসিতাতি ৰেদিতব্বা.

অপিচ হেতুফলসত্তূপকারসম্পদাৰসেন তীহাকারেহিপি ভগৰতো থোমনা পৰত্ততীতি তংৰসেনপেত্থ থোমনা দট্ঠব্বা. তত্থ হেতুসম্পদা নাম মহাকরুণাসমাযোগো, বোধিসম্ভারসম্ভরণঞ্চ তম্মূলকত্তা সকলবুদ্ধগুণানং. ফলসম্পদা পন চতুব্বিধা ঞাণসম্পদা, পহানসম্পদা, আনুভাৰসম্পদা, রূপকাযসম্পদা চাতি. তাসু সব্বঞ্ঞুতঞ্ঞাণপদট্ঠানং মগ্গঞাণং, মগ্গঞাণপদট্ঠানং সব্বঞ্ঞুতঞ্ঞাণং, তম্মূলকানি চ দসবলাদিঞাণানি ঞাণসম্পদা নাম. অগ্গমগ্গভাৰনায সব্বকিলেসানং সহ ৰাসনাহি অনুপ্পত্তিধম্মতাপাদনং ¶ পহানসম্পদা. অচিন্তেয্যাপরিমিতানং সব্বলোকহিতানং নিপ্ফাদনে, সদেৰকলোকাভিভৰনে চ আধিপচ্চং আনুভাৰসম্পদা. সকললোকনযনাভিসেকভূতা পন লক্খণানুব্যঞ্জনপটিমণ্ডিতা অত্তভাৰসম্পত্তি রূপকাযসম্পদা নাম. সত্তূপকারো হেট্ঠা ৰুত্তপরহিতপটিপত্তিৰসেনেৰ ৰেদিতব্বো. ইমাসু পন অনন্তকরুণা-ৰচনেন, তথা আগতট্ঠেন চ তথাগত-সদ্দেন হেতুসম্পদা দস্সিতা. ফলসম্পদাসু ঞাণসম্পদা চেৰ পহানসম্পদা চ অনন্তপঞ্ঞা-ৰচনেন, অভিসমযপরিদীপকেন তথাগতসদ্দেন, বুজ্ঝনজাগরণৰিকসনট্ঠেন, চ বুদ্ধ-সদ্দেন দস্সিতা, আনুভাৰসম্পদাপি অভিভৰনট্ঠেন তথাগত-সদ্দেন, অনুত্তর-ৰচনেন চ ৰিভাৰিতা, রূপকাযসম্পদা পন রূপগ্গপ্পত্তিদীপকেন অনুত্তর-সদ্দেন দস্সিতাতি দট্ঠব্বং.

এৰং ¶ বুদ্ধরতনস্স থোমনাপুব্বঙ্গমং পণামং কত্ৰা ইদানি সেসরতনানম্পি পণামমারভন্তো আহ ‘‘ধম্মং সাধুগণম্পি চা’’তি. ভগৰতো থোমনেন চ স্ৰাক্খাততাদযো ধম্মগুণা, সুপ্পটিপন্নতাদযো সঙ্ঘগুণা চ দস্সিতা হোন্তি তপ্পভৰস্স অনঞ্ঞথাভাৰতোতি ন তেসং ৰিসুং থোমনা কতা. অধিগতমগ্গে সচ্ছিকতনিরোধে পুগ্গলে যথানুসিট্ঠং পটিপজ্জমানে চ অপাযদুক্খেসু চেৰ ৰট্টদুক্খেসু চ অপতমানে কত্ৰা ধারেতীতি ধম্মো, সো চতুন্নং অরিযমগ্গানং, চতুন্নঞ্চ সামঞ্ঞফলানং, নিব্বানস্স, পরিযত্তিধম্মস্স চ ৰসেন দসৰিধো. ৰুত্তঞ্হেতং ছত্তৰিমানে –

‘‘রাগৰিরাগমনেজমসোকং,

ধম্মমসঙ্খতমপ্পটিকূলং;

মধুরমিমং পগুণং সুৰিভত্তং,

ধম্মমিমং সরণত্থমুপেহী’’তি. (ৰি. ৰ. ৮৮৭);

এত্থ হি কামরাগাদিভেদো সব্বোপি রাগো ৰিরজ্জতি এতেনাতি ‘‘রাগৰিরাগো’’তি মগ্গো কথিতো. এজাসঙ্খাতায তণ্হায, অন্তোনিজ্ঝানলক্খণস্স চ সোকস্স তদুপ্পত্তিযং সব্বসো পরিক্খীণত্তা ‘‘অনেজমসোক’’ন্তি ফলং কথিতং. কেনচি পচ্চযেন অসঙ্খতত্তা ‘‘ধম্মমসঙ্খত’’ন্তি নিব্বানং ৰুত্তং. অৰিরোধদীপনতো পন অত্থব্যঞ্জনস্স সম্পন্নতায, পকট্ঠগুণৰিভাৰনতো সুট্ঠু ৰিভজিতত্তা চ ‘‘অপ্পটিকূল’’ন্তিআদিনা সব্বোপি পরিযত্তিধম্মো কথিতো. তত্থ অরিযমগ্গনিব্বানানি নিপ্পরিযাযেনেৰ অপাযাদিতো ধারণতো ধম্মো, ফলপরিযত্তিযো ¶ পন পরিযাযেন. তথা হেত্থ ধারণং নাম অপাযাদিনিব্বত্তককিলেসৰিদ্ধংসনং. ইতি অরিযমগ্গস্স কিলেসসমুচ্ছেদকতায, নিব্বানস্স চ আলম্বণভাৰেন তস্স তদত্থসিদ্ধিহেতুতাযপি উভিন্নম্পি ¶ নিপ্পরিযাযতো লব্ভতি. ইতরেসু পন অরিযফলস্স মগ্গেন সমুচ্ছিন্নকিলেসানং পটিপস্সদ্ধকিচ্চতায, মগ্গানুকূলপ্পৰত্তিতো পরিযত্তিধম্মস্স চ তদধিগমহেতুতাযাতি উভিন্নম্পি পরিযাযতোৰ লব্ভতীতি.

অত্তহিতপরহিতং সাধেন্তীতি সাধূ, তেসং গণো সমুদাযোতি সাধুগণো, সাধু চাযং গণো চাতি ৰা সাধুগণো, সাধুনো ৰা সম্মাসম্বুদ্ধস্স আযত্তো গণো তস্স ওরসপুত্তভাৰতোতি সাধুগণো. সো পন চতুন্নং অরিযমগ্গসমঙ্গীনং, চতুন্নঞ্চ ফলসমঙ্গীনং ৰসেন অট্ঠৰিধো অরিযসঙ্ঘো, তং সাধুগণং. পিচাতি নিপাতসমুদাযো, একো ৰা নিপাতো, তিণ্ণং রতনানং ৰন্দনকিরিযায সম্পিণ্ডনত্থো. কেচি ‘‘গণো’’তি ইধ পকরণতোৰ অরিযগণপুগ্গলোৰ লব্ভতীতি সাধূতি ভাৰনপুংসকৰসেন ‘‘ৰন্দিত্ৰা’’তি ইমিনা সহ যোজেন্তি, তদা পন সাধূতি ভযলাভাদিৰিরহেন সক্কচ্চং আদরন্তি অত্থো.

২. এৰং পকরণারম্ভে যথাধিপ্পেতং রতনত্তযপ্পণামং কত্ৰা ইদানি যত্থ পাটৰত্থায ইদং পকরণং পট্ঠপীযতি, তং সদ্ধিং দেসকদেসপটিগ্গাহকসম্পত্তীহি ৰিভাৰেত্ৰা দস্সেন্তো আহ ‘‘পণ্ডুকম্বলনামাযা’’তিআদি. তত্থ দেৰরাজস্স পণ্ডুকম্বলনামায সিলায ৰিমলে সীতলে তলে নিসিন্নো অতুলৰিক্কমো দেৰদেৰেহি পূজিতো দেৰদেৰো দেৰপুরক্খতো দেৰানং দেৰলোকস্মিং যং ধম্মং দেসেসীতি সম্বন্ধো.

অযং পনেত্থ অত্থো – পণ্ডুকম্বলসরিক্খৰণ্ণতায ‘‘পণ্ডুকম্বল’’ন্তি নামং সমঞ্ঞা এতিস্সাতি পণ্ডুকম্বলনামা. সা হি সক্কস্স তাদিসপুঞ্ঞানুভাৰেন নিব্বত্তা পণ্ডুকম্বলজযসুমনপুপ্ফসমানেন ৰণ্ণেন সব্বকালং ৰিরোচতি ¶ , পমাণতো পন সট্ঠিযোজনাযামা, পঞ্ঞাসযোজনৰিত্থারা, পন্নরসযোজনুব্বেধা চ হোতি. সিলাযাতি অৰযৰসম্বন্ধে সামিৰচনং. তুলায সম্মিতো তুল্যো, ন তুল্যো অতুল্যো, অতুল্যো ৰিক্কমো বলং এতস্সাতি অতুল্যৰিক্কমো. সম্মাসম্বুদ্ধস্স হি পরমপারমিতানুভাৰসংসিদ্ধেন হত্থিগণনায কোটিসহস্সহত্থীনং, পুরিসগণনায দসকোটিসহস্সপুরিসানং বলেহি সমপ্পমাণেন কাযবলেন, অপ্পমাণেন চ ঞাণবলেন ন কস্সচি দেৰব্রহ্মাদীসু অঞ্ঞতরস্স বলতুলনায উপনেতব্বং অত্থি ¶ . অথ ৰা অনঞ্ঞসাধারণত্তা অতুল্যো পরক্কমসঙ্খাতো অপরিমাণগুণৰিসেসাৰহেন অনঞ্ঞসাধারণেন সম্মপ্পধানেন সমন্নাগতত্তা ৰা অতুল্যো সম্মপ্পধানসঙ্খাতো ৰিক্কমো ইমস্সাতি অতুল্যৰিক্কমো. ‘‘অতুল্যৰিক্কমো’’তি চ ৰত্তব্বে গাথাবন্ধৰসেন য-কারলোপং কত্ৰা ‘‘অতুলৰিক্কমো’’তি ৰুত্তং. অথ ৰা সম্মিতত্থে অ-কারপচ্চযস্সাপি সম্ভৰতো অতুলো ৰিক্কমো অস্সাতি ‘‘অতুলৰিক্কমো’’তি ৰুত্তং.

দিব্বন্তীতি দেৰা, পঞ্চকামগুণাদীহি কীল়ন্তি, তেসু ৰা ৰিহরন্তি, ৰিজযসমত্থতাযোগেন বাহিরব্ভন্তরিকে পচ্চত্থিকে ৰিজেতুং ইচ্ছন্তি, ইস্সরিযধনাদিসক্কারদানগ্গহণং, তংতংঅত্থানুসাসনঞ্চ করোন্তা ৰোহরন্তি, পুঞ্ঞঞাণানুভাৰপ্পত্তায জুতিযা জোতেন্তি, যথাধিপ্পেতঞ্চ ৰিসযং অপ্পটিঘাতেন গচ্ছন্তি, যথিচ্ছিতনিপ্ফাদনে চ সক্কোন্তীতি অত্থো. অথ ৰা দেৰনীযা তংতংব্যসননিত্থরণত্থিকেহি ‘‘সরণং পরাযণ’’ন্তি গমনীযা, অভিত্থৰনীযা সোভাৰিসেসযোগেন কমনীযাতি ৰা দেৰা, তে তিৰিধা – সম্মুতিদেৰা উপপত্তিদেৰা ৰিসুদ্ধিদেৰাতি. তত্থ সম্মুতিদেৰা নাম মহাসম্মতাদযো খত্তিযা. উপপত্তিদেৰা নাম ¶ চাতুমহারাজিকে উপাদায তদুত্তরিদেৰা. ৰিসুদ্ধিদেৰা নাম খীণাসৰা. ইধ পন উপপত্তিদেৰা দট্ঠব্বা. নো চ খো তেপি অৰিসেসেন, ঠপেত্ৰা পন যামাদিকে চাতুমহারাজিকতাৰতিংসৰাসিনোৰ অধিপ্পেতা. তেসং চতূহি সঙ্গহৰত্থূহি রঞ্জনতো রাজা, দেৰানং রাজা ইস্সরো দেৰরাজা, তস্স দেৰরাজস্স, ‘‘সক্কস্স দেৰরঞ্ঞো’’তি অধিপ্পাযো. ন হি অঞ্ঞেসং দেৰলোকেসু নিসিন্নো ভগৰা অভিধম্মপিটকং দেসেসীতি.

৩. যন্তি অনিযমনিদ্দেসো, তস্স পন ‘‘তত্থা’’তি ইমিনা নিযমনং ৰেদিতব্বং. যথাৰুত্তানং তিণ্ণম্পি দেৰানং উত্তমো দেৰো তেহি সব্বেহি অধিকতরং কীল়নাদিযোগতোতি দেৰদেৰো, ভগৰা. সো হি নিরতিসযায অভিঞ্ঞাকীল়ায উত্তমেহি দিব্বব্রহ্মঅরিযৰিহারেহি সপরসন্তানসিদ্ধায পঞ্চৰিধমারৰিজযিচ্ছানিব্বত্তিযা চিত্তিস্সরিযসত্তধনাদিসম্মাপটিপত্তিঅৰেচ্চপ্পসাদসক্কারদানগ্গহণসঙ্খাতেন, যথাপরাধযথানুলোমযথাধম্মানুসাসনসঙ্খাতেন চ ৰোহারাতিসযেন পরমায পঞ্ঞায চ সরীরপ্পভাসঙ্খাতায জুতিযা অনুপমায ঞাণসরীরগতিযা মারৰিজযসব্বঞ্ঞুতঞ্ঞাণপরহিতনিপ্ফাদনেসু অপ্পটিহতায সত্তিযা চ সমন্নাগতত্তা সদেৰকেন ৰা লোকেন ‘‘সরণ’’ন্তি গমনীযতো, অভিত্থৰনীযতো, ভত্তিৰসেন কমনীযতো চ সব্বে তে দেৰে তেহি তেহি গুণেহি অভিভুয্য ঠিতোতি সব্বদেৰেহি পূজনীযতরো দেৰো ¶ , ৰিসুদ্ধিদেৰভাৰসঙ্খাতস্স ৰা সব্বঞ্ঞুগুণালঙ্কারস্স অধিগতত্তা অঞ্ঞেসঞ্চ দেৰানং অতিসযেন দেৰোতি দেৰদেৰো. দেৰানন্তি তদা ধম্মপটিগ্গাহকানং দসসহস্সচক্কৰাল়াধিৰাসীনং মাতুদেৰপুত্তপ্পমুখানং উপপত্তিদেৰানং. ৰিসুদ্ধিদেৰানম্পেত্থ গহণন্তি ৰদন্তি. তে পন উপপত্তিদেৰেস্ৰেৰ সঙ্গহিতা মনুস্সঅরহন্তানং তত্থ অভাৰতো ¶ . দেৰদেৰেহীতি ৰিসুদ্ধিদেৰেহি. ৰিসুদ্ধিদেৰা হি ৰুত্তনযেন ইতরদেৰেহি সাতিসযং কীল়নাদিযোগতো ইধ ‘‘দেৰদেৰা’’তি অধিপ্পেতা, তেহি. পূজিতোতি পূজিতব্বো, পূজিতুং অরহোতি অত্থো. এতেন ৰিসুদ্ধিদেৰেসুপি ভগৰতো অগ্গপুগ্গলতং দীপেতি. দেসেসীতি মধুরকরৰীকসদ্দসদিসং ব্রহ্মস্সরং নিচ্ছারেন্তো পকাসেসি. দেৰলোকস্মিন্তি তাৰতিংসদেৰলোকে. সভাৰসামঞ্ঞলক্খণং ধারেতীতি ধম্মো, কুসলাদিভেদো অভিধম্মো, ইধ পন তপ্পকাসকং অভিধম্মপিটকং ‘‘ধম্ম’’ন্তি ৰুত্তং. তথা হি ৰক্খতি ‘‘পিটকুত্তমে’’তি. দেৰপুরক্খতোতি দসসহস্সচক্কৰাল়ৰাসিদিব্বব্রহ্মেহি পুরক্খতো, পরিৰারিতোতি অত্থো.

ননু চ ‘‘দেৰান’’ন্তি ৰচনেনেৰ দেৰপুরক্খতভাৰো সিদ্ধোতি কিং ‘‘দেৰপুরক্খতো’’তি ৰচনেন? নাযং দোসো. ভগৰা হি কদাচি চূল়পন্থকত্থেরাদীনং ৰিয পরম্মুখেপি নিসীদিত্ৰা ওভাসং ৰিস্সজ্জেত্ৰা সত্তানং সম্মুখে নিসিন্নং ৰিয দস্সেন্তো ধম্মং দেসেতি, কদাচিপি পারাযনিকব্রাহ্মণাদীনং ৰিয সম্মুখেপি নিসীদিত্ৰা অঞ্ঞেহি চ পরিৰুতো অঞ্ঞেসম্পি ধম্মং দেসেতি, ইধ পন ন তথা, দেৰেহিযেৰ পরিৰুতো দেৰানং দেসেতীতি দস্সনত্থং ‘‘দেৰপুরক্খতো’’তিপি ৰত্তব্বমেৰাতি.

৪. এৰমেতস্মিং পকরণে গারৰজননত্থং তেন সম্পাদেতব্বপাটৰৰিসযং অভিধম্মপিটকং দেসকাদিসম্পত্তীহি সহ ৰিভাৰেত্ৰা ইদানি যথাধিপ্পেতপকরণারম্ভপযোজনাভিধানাভিধেয্যসোতুজনসমুস্সাহনকরণপ্পকারানি চ ৰিভাৰেতুং ‘‘তত্থাহ’’ন্তিআদি ৰুত্তং. তত্থ ‘‘পাটৰত্থাযা’’তি ইমিনা পকরণারম্ভপযোজনং ৰুত্তং. ‘‘অভিধম্মাৰতার’’ন্তি ইমিনা অভিধানাভিধেয্যানি. ‘‘মধুর’’ন্তিআদীহি পকরণং ৰিসেসেতি. ‘‘সমাসেনা’’তি চ ইমিনা সোতুজনসমুস্সাহনকরণপ্পকারানীতি ¶ দট্ঠব্বং. ‘‘অহ’’ন্তি কত্তুভূতং অত্তানং নিদ্দিসতি. তথা হি যো পরো ন হোতি, সো নিযকজ্ঝত্তসঙ্খাতো অত্তা ‘‘অহ’’ন্তি ৰুচ্চতি.

পটুনো ভাৰো পাটৰং, তংযেৰ অত্থো পযোজনট্ঠেনাতি পাটৰত্থো, তদত্থায. তং সন্ধায ৰিৰিধনযগ্গহণসমত্থস্স ¶ সুতমযঞাণস্স উপ্পাদনত্থন্তি ৰুত্তং হোতি. সংসারে ভযং ইক্খন্তি, ভিন্দন্তি ৰা পাপকে অকুসলে ধম্মেতি ভিক্খূ, তেসং. পিটকঞ্চ তং উত্তমঞ্চাতি পিটকুত্তমং, তস্মিং পিটকুত্তমে, অভিধম্মপিটকেতি অধিপ্পাযো. তঞ্হি পরিযত্তিভাজনত্থতো পিটকং, তীসু পিটকেসু ৰিসিট্ঠভাৰতো উত্তমঞ্চাতি পিটকুত্তমং. তত্থ পরিযত্তিভাজনত্থতোতি পরিযত্তিঅত্থেন চেৰ ভাজনত্থেন চ. তথা হি ‘‘মা পিটকসম্পদানেনা’’তিআদীসু (অ. নি. ৩.৬৬) পরিযত্তি পিটকন্তি ৰুচ্চতি. ‘‘অথ পুরিসো আগচ্ছেয্য কুদালপিটক’’ন্তিআদীসু (ম. নি. ১.২২৮; অ. নি. ৩.৭০) যং কিঞ্চি ভাজনম্পি. তস্মা ইদম্পি পরিযাপুণিতব্বট্ঠেন পরিযত্তি, অভিধম্মত্থানমাধারণত্থেন ভাজনঞ্চাতি পরিযত্তিভাজনত্থতো পিটকন্তি ৰুচ্চতি. তেনেৰাহু –

‘‘পিটকং পিটকত্থৰিদূ,

পরিযত্তিব্ভাজনত্থতো আহু;

তেন সমোধানেত্ৰা,

তযোপি ৰিনযাদযো ঞেয্যা’’তি. (দী. নি. অট্ঠ. ১.পঠমমহাসঙ্গীতিকথা; পারা. অট্ঠ. ১.পঠমমহাসঙ্গীতিকথা; ধ. স. অট্ঠ. নিদানকথা);

ৰিসিট্ঠভাৰো পনস্স লোকৰোহারমতিক্কম্ম যথাসভাৰৰসেন দেসনতো, ৰিসিট্ঠধম্মক্খন্ধৰিভাৰনতো চ ৰেদিতব্বো. এত্থ হি ‘‘সত্তো পুগ্গলো ভিক্খূ’’তিআদিকং লোকৰোহারমতিক্কম্ম ‘‘খন্ধধাতুআযতন’’ন্তিআদিনা যথাধম্মৰসেনেৰ বাহুল্লদেসনা পৰত্তা, ন ইতরেসু ৰিয ¶ যথাৰুত্তৰোহারৰসেন, যতো ইদং যথাধম্মসাসনন্তি ৰুচ্চতি. সব্বসঙ্খতধম্মৰিসিট্ঠো চেত্থ পঞ্ঞাক্খন্ধো ৰিসেসতো ৰিভাৰিতো, তস্মা তিণ্ণম্পি পিটকানং বুদ্ধৰচনভাৰেপি যথাসভাৰানতিক্কমদেসনাদিতো ইদমেৰ তীসু পিটকেসু ৰিসিট্ঠন্তি যুত্তং. অপিচ ধম্মাতিরেকধম্মৰিসেসভাৰতো চস্স ৰিসিট্ঠভাৰো ৰেদিতব্বো. অভিধম্মে হি নিপ্পদেসতো খন্ধাযতনাদিধম্মানং ৰিভত্তত্তা ইতরদ্ৰযতো অতিরেকতরা, ৰিসিট্ঠা চ পাল়ি হোতি, তস্মা অতিরেকস্স, ৰিসিট্ঠস্স চ পাল়িধম্মস্স ৰসেন ইদমেৰ তীসু পিটকেসু উত্তমন্তি ৰত্তুং ৰট্টতি. যথাৰুত্তৰিসিট্ঠভাৰযোগতোযেৰ চেতং ‘‘অভিধম্মপিটক’’ন্তি ৰুচ্চতি অভি-সদ্দস্স ৰিসিট্ঠভাৰজোতনতো ¶ . অপিচ ৰুড্ঢিমন্তাদিধম্মানং এত্থ ৰুত্তত্তা চেতং অভিধম্মপিটকং. যথাহু পোরাণা –

‘‘যং এত্থ ৰুড্ঢিমন্তো, সলক্খণা পূজিতা পরিচ্ছিন্না;

ৰুত্তাধিকা চ ধম্মা, অভিধম্মো তেন অক্খাতো’’তি. (দী. নি. অট্ঠ. ১.পঠমমহাসঙ্গীতিকথা; পারা. অট্ঠ. ১.পঠমমহাসঙ্গীতিকথা; ধ. স. অট্ঠ. নিদানকথা);

তথা হেত্থ ‘‘রূপূপপত্তিযা মগ্গং ভাৰেতি, মেত্তাসহগতেন চেতসা একং দিসং ফরিত্ৰা ৰিহরতী’’তিআদিনা (ধ. স. ১৬০ আদযো) ৰুড্ঢিমন্তোপি ধম্মা ৰুত্তা, ‘‘রূপারম্মণং ৰা সদ্দারম্মণং ৰা’’তিআদিনা (ধ. স. ১) নযেন আরম্মণাদীহি লক্খিতব্বত্তা সলক্খণাপি ‘‘সেক্খা ধম্মা অসেক্খা ধম্মা, লোকুত্তরা ধম্মা’’তিআদিনা নযেন পূজিতা পূজারহাপি ‘‘ফস্সো হোতি, ৰেদনা হোতী’’তিআদিনা (ধ. স. ১) নযেন সভাৰপরিচ্ছিন্নত্তা পরিচ্ছিন্নাপি ‘‘মহগ্গতা ধম্মা অপ্পমাণা ধম্মা (ধ. স. তিকমাতিকা ১২, দুকমাতিকা ৯৯), অনুত্তরা ধম্মা’’তিআদিনা নযেন অধিকা ৰিসিট্ঠাপি ধম্মা ৰুত্তা, তস্মা অভি-সদ্দস্স ৰুড্ঢিআদিঅত্থেসুপি পৰত্তনতো ‘‘ৰুড্ঢিমন্তো ধম্মা এত্থা’’তিআদিনা নিব্বচনেন ইদং পিটকং ¶ ‘‘অভিধম্ম’’ন্তি ৰুচ্চতি. অভিধম্মং ওতরন্তি অনেনাতি অভিধম্মাৰতারং নাম পকরণং. ইমিনা পনস্স অত্থানুগতমভিধানং দস্সেতি. তু-সদ্দো পদপূরণে. আচরিযেন হি গাথাপদপূরণত্থং যেভুয্যেন তত্থ তত্থ নিপাতা ৰুচ্চন্তি. যত্থ পন নেসং পযোজনৰিসেসো দিস্সতি, তত্থেৰ তমত্থং ৰক্খাম. মধুরন্তি নিপ্পরিযাযতো মধুর-সদ্দোযং জিৰ্হাৰিঞ্ঞেয্যে রসৰিসেসে ৰত্ততি, ইধ পন ইট্ঠভাৰসামঞ্ঞেন অত্থব্যঞ্জনসম্পত্তি মধুরসদ্দেন ৰুত্তা. ভৰতি হি তংসদিসস্স তং-সদ্দেনাভিধানং যথা ‘‘অগ্গিমাণৰো’’তি. তেন পন মধুরেন যোগতো ইদম্পি মধুরং যথা নীলগুণযোগতো নীলুপ্পলন্তি. নিপুণগম্ভীরায ব্যঞ্জনসম্পত্তিযা চেৰ অত্থসম্পত্তিযা চ অভিধম্মৰিসযং মতিং ৰড্ঢেতীতি মতিৰড্ঢনং. অথ ৰা ব্যঞ্জনসম্পত্তিযা ‘‘মধুর’’ন্তি ৰুত্তং, অত্থসম্পত্তিযা ‘‘মতিৰড্ঢন’’ন্তি.

৫. তাল়ন্তি কুঞ্চিকং, কুঞ্চিকাসদিসন্তি অত্থো. মুয্হন্তি তেনাতি মোহো, অৰিজ্জাযেতং অধিৰচনং, মোহোযেৰ অভিধম্মমহাপুরং পৰিসন্তানং পৰেসননিৰারণত্তা কৰাটভূতোতি ¶ মোহকৰাটং, তস্স. ৰিঘাটেতি, ৰিঘাটীযতি অনেনাতি ৰা ৰিঘাটনং. ননু চ অৰিজ্জাকৰাটং পঞ্ঞায উগ্ঘাটীযতি. সা হি তস্সা উজুৰিপচ্চনীকভূতাতি? সচ্চং, ইদম্পি তস্সা কারণভাৰেন ‘‘মোহকৰাটৰিঘাটনকর’’ন্তি ৰুত্তং. কারণকারণম্পি হি কারণৰসেন ৰুচ্চতি যথা ‘‘চোরেহি গামো দড্ঢো, তিণেহি ভত্তং সিদ্ধ’’ন্তি.

৬. সুদুত্তরন্তি ধম্মত্থদেসনাপটিৰেধসঙ্খাতচতুগম্ভীরভাৰপটিসংযুত্ততায মন্দবুদ্ধীহি তরিতুং অসক্কুণেয্যত্তা অতিদুত্তরং, তেনেৰ চেদং মহোদধিসমানত্তা ‘‘মহোদধী’’তি ৰুত্তং. মহণ্ণৰোপি হি চতুরাসীতিযোজনসহস্সগম্ভীরো ন সক্কা অঞ্ঞত্র সিনেরুপব্বতরাজতো কেনচি পতিট্ঠং লদ্ধুং, এৰমিদম্পি চতুগম্ভীরতাপটিসংযুত্তং অঞ্ঞত্র তথাগতা ¶ ন কেনচি পতিট্ঠং লদ্ধুং সক্কাতি. তরন্তানন্তি অত্থগ্গহণৰসেন উত্তরিতুকামানং. এত্থ চ ‘‘তরংৰা’’তি অধিকারৰসেন ৰত্তব্বং, ৰক্খমানং ৰা আনেত্ৰা সম্বন্ধিতব্বং. তরন্তানন্তি পরতীরসম্পাপুণনত্থং উত্তরন্তানং. তরংৰাতি উল়ুম্পং ৰিয, তংসমানন্তি অত্থো. মকরা নাম মচ্ছজাতিকা, তেসং আকরো নিৰাসভূমীতি মকরাকরো, তং.

৭. অভিধম্মে নিযুত্তা আভিধম্মিকা, তেসং. হত্থসারং ৰিযাতি হত্থসারং. যথা হি মনুস্সানং বহূসু রতনাদীসু ৰিজ্জমানেসুপি আপদাসু চ সুখপরিভোগত্থং হত্থে কযিরমানং সাররতনাদিকং ‘‘হত্থসার’’ন্তি ৰুচ্চতি, এৰমিদম্পি সতিপি মহন্তে অভিধম্মপিটকে তস্স সব্বসো ৰিত্তিণ্ণতায পরিহরিতুং অসক্কুণেয্যত্তা তদত্থসারসম্পিণ্ডনৰসেন কযিরমানং আভিধম্মিকভিক্খূনং সুখপরিহরণত্থায সম্পজ্জতীতি হত্থসারসদিসত্তা ‘‘হত্থসার’’ন্তি ৰুত্তং. পৰক্খামীতি পকারেন কথেস্সামি, অনাগতৰচনঞ্চেতং, ৰত্তমানসমীপত্তা ৰা অনাগতে ৰত্তমানূপচারতো ৰত্তমানৰচনং, পটিঞ্ঞানন্তরমেৰ ৰক্খতীতি. অত্থৰসেন পকারেন কথেন্তোপি সদ্দৰসেন সঙ্খিপিত্ৰা কথেস্সামীতি দস্সেন্তো আহ ‘‘সমাসেনা’’তি. সমসনং সংখিপনং সমাসো, তেন সমাসেন, ন ব্যাসৰসেনাতি ৰুত্তং হোতি. এত্তাৰতা চ পযোজনাভিধানাভিধেয্যসোতুজনসমুস্সাহনকরণপ্পকারানি দস্সেত্ৰা ইদানি যস্মা সোতুজনসমুস্সাহনং নাম তেসং সক্কচ্চসৰনে নিযুঞ্জনং, তস্মা তে তত্থ নিযোজেন্তো আহ ‘‘তং সুণাথ সমাহিতা’’তি. সক্কচ্চসৰনপটিবদ্ধা হি সম্মাপটিপত্তীতি. তত্থ তন্তি তং মযা ৰক্খমানং অভিধম্মাৰতারং সুণাথ নিসামযথ. সমাহিতা সম্মা আহিতা, অৰিক্খিত্তচিত্তাতি অত্থো.

গন্থারম্ভকথাৰণ্ণনা নিট্ঠিতা.

১. পঠমো পরিচ্ছেদো

চিত্তনিদ্দেসো

কামাৰচরকুসলৰণ্ণনা

৮. এৰং ¶ ¶ তাৰ রতনত্তযপ্পণামাদিকং দস্সেত্ৰা ইদানি যথারদ্ধপ্পকরণস্স অত্থসরীরভূতমভিধম্মং সঙ্খেপতো উদ্দিসন্তো আহ ‘‘চিত্তং চেতসিক’’ন্তিআদি. তত্থ চিত্তসদ্দস্স তাৰ ৰচনত্থং সযমেৰ অনন্তরং ৰিপঞ্চেতি. ‘‘চেতসিক’’ন্তিআদীসু পন অৰিপ্পযোগীভাৰেন চেতসি চিত্তে নিযুত্তং, তত্থ ৰা ভৰং তদাযত্তৰুত্তিতাযাতি চেতসিকং, ৰেদনাদিক্খন্ধত্তযস্সেতং অধিৰচনং. রুপ্পতি, রূপীযতীতি ৰা রূপং, সীতুণ্হাদীহি ৰিকারমাপজ্জতি, আপাদীযতীতি অত্থো, চতুন্নং মহাভূতানং, চতুৰীসতিউপাদারূপানঞ্চ ৰসেন অট্ঠৰীসতিৰিধস্স রূপক্খন্ধস্সেতং অধিৰচনং. ভৰাভৰং ৰিননতো সংসিব্বনতো ৰানং ৰুচ্চতি তণ্হা, ন ৰিজ্জতি সা এত্থ, ততো ৰা নিক্খন্তং এতন্তি নিব্বানং, অমতং অসঙ্খতং ৰত্থু. ইতি-সদ্দো নিদস্সনে. নত্থি এতস্স উত্তরিতরোতি নিরুত্তরো. অথ ৰা চতুৰেসারজ্জৰিহারত্তা নত্থি এতস্স উত্তরং পচ্চনীকৰচনন্তি নিরুত্তরো. ঞাণপ্পহানঅন্তরাযনিয্যানিকেসু হি সদেৰকে লোকে ন কোচি সত্থু সহধম্মিকং উত্তরং ৰচনং কথেতুং সমত্থো অত্থীতি. তত্র ভগৰা উত্রাসাভাৰতো ৰিসারদোৰ হোতি. ৰুত্তঞ্হেতং ভগৰতা –

‘‘‘সম্মাসম্বুদ্ধস্স তে পটিজানতো ইমে ধম্মা অনভিসম্বুদ্ধাতি তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহধম্মেন পটিচোদেস্সতীতি নিমিত্তমেতং, সারিপুত্ত, ন সমনুপস্সামি, এতমহং, সারিপুত্ত, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি.

‘‘খীণাসৰস্স ¶ তে পটিজানতো ইমে আসৰা অপরিক্খীণাতি তত্র ৰত মং…পে… ৰিহরামি.

‘‘যে ¶ চ খো পন তে অন্তরাযিকা ধম্মা ৰুত্তা, তে পটিসেৰতো নালং অন্তরাযাযাতি তত্র ৰত মং…পে… ৰিহরামি.

‘‘যস্স খো পন তে অত্থায ধম্মো দেসিতো, সো ন নিয্যাতি তক্করস্স সম্মা দুক্খক্খযাযাতি তত্র ৰত মং…পে… ৰিহরামী’’তি (ম. নি. ১.১৫০).

চত্তারি অরিযসচ্চানি পকাসেতীতি চতুসচ্চপ্পকাসনো. দুক্খসমুদযনিরোধমগ্গৰসেন হি চত্তারি অরিযসচ্চানি. যথাহ, ‘‘চত্তারিমানি, ভিক্খৰে, অরিযসচ্চানি. কতমানি চত্তারি? দুক্খং অরিযসচ্চং, দুক্খসমুদযং অরিযসচ্চং, দুক্খনিরোধং অরিযসচ্চং, দুক্খনিরোধগামিনী পটিপদা অরিযসচ্চ’’ন্তি (সং. নি. ৫.১০৮৩). তত্থ তেভূমকা ধম্মা অনেকুপদ্দৰাধিট্ঠানতায ধুৰসুভাদিৰিরহেন, কুচ্ছিততুচ্ছট্ঠেন চ দুক্খং নাম. কম্মাদিৰিসেসপচ্চযসমৰাযে দুক্খুপ্পত্তিকারণভাৰেন তণ্হা সমুদযো নাম ‘‘সমেচ্চ উদেতি দুক্খং ইমস্মা’’তি কত্ৰা. দুক্খস্স অনুপ্পাদনিরোধপচ্চযত্তা দুক্খনিরোধো নিব্বানং. তং পন দুক্খনিরোধং আলম্বণকরণৰসেন গমনতো পাপুণনতো, তদধিগমায পটিপদাভাৰতো চাতি ‘‘দুক্খনিরোধগামিনী পটিপদা’’তি লোকুত্তরমগ্গো ৰুচ্চতি. সচ্চট্ঠো পন তেসং তচ্ছাৰিপরীতভূতভাৰতো ৰেদিতব্বো. ৰুত্তঞ্হি ‘‘‘ইদং দুক্খন্তি, ভিক্খৰে, তথমেতং অৰিতথমেতং অনঞ্ঞথমেত’’ন্তি (সং. নি. ৫.১০৯০) ৰিত্থারো. এত্থ পন চতুন্নং অরিযফলানং, অরিযমগ্গসম্পযুত্তানঞ্চ সচ্চৰিনিস্সটভাৰেপি ইধ মগ্গনিব্বানপ্পকাসনতাৰচনেনেৰ তপ্পকাসনত্থম্পি ৰুত্তং হোতি, অনাসৰভাৰেন ¶ একলক্খণত্তা তংতংহেতুকৰিসযভাৰতো চাতি দট্ঠব্বং.

এত্থ চ ‘‘নিরুত্তরো চতুসচ্চপ্পকাসনো’’তি ইমেহি ভগৰতো চিত্তাদিচতুব্বিধধম্মদেসনানুকূলগুণৰিসেসং দস্সেতি অতথাৰিধস্স তংদেসনাসামত্থিযাযোগতো. অথ ৰা ‘‘নিরুত্তরো’’তি ৰচনেন চতুব্বিধধম্মস্স অনঞ্ঞথত্তং দীপেতি. ‘‘চতুসচ্চপ্পকাসনো’’তি পন ইমিনা যে তে ধম্মা ভগৰতা ৰিনেয্যপরিপাচনত্থং দেসিতা, ন তে ইধ অধিপ্পেতা. যে পন পরিপাচিতেহি তেহি অভিসমেতব্বৰসেন দুক্খাদযো চতুব্বিধা ৰুত্তা, তেযেৰ উদ্দিসিতব্বত্থেন অধিপ্পেতাতি দস্সেতি.

এৰং ¶ সঙ্খেপতো চত্তারো ধম্মে উদ্দিসিত্ৰা ইদানি উদ্দেসো নাম নিদ্দেসত্থায হোতীতি যথাউদ্দিট্ঠধম্মে নিদ্দিসিতুং ‘‘তত্থ চিত্ত’’ন্তিআদি আরদ্ধং. তত্থ তত্থাতি তেসু চিত্তাদীসু ধম্মেসু. ৰিসযৰিজাননং চিত্তন্তি যং ৰিসযসঙ্খাতস্স আরম্মণস্স ৰিজাননং উপলদ্ধি, তং চিত্তন্তি অত্থো. ইমিনা পন চিত্তস্স আরম্মণপটিবদ্ধৰুত্তিতং, অনিচ্চতং, অকারকতঞ্চ দীপেতি. ‘‘ৰিসযৰিজানন’’ন্তি হি আরম্মণেন চিত্তং উপলক্খেন্তো তস্স তদাযত্তৰুত্তিতং, তংদীপনেন চ তদভিমুখকালেযেৰ উপ্পত্তিদীপনতো অনিচ্চভাৰঞ্চ দীপেতি. ভাৰনিদ্দেসেন পন ৰিজাননমত্তদীপনতো অকারকভাৰং. যথাপচ্চযঞ্হি পৰত্তিমত্তমেৰেতং, যদিদং সভাৰধম্মো নামাতি. এৰঞ্চ কত্ৰা সব্বেসম্পি চিত্তচেতসিকধম্মানং ভাৰসাধনমেৰ নিপ্পরিযাযতো লব্ভতি. যং পন ‘‘চিন্তেতীতি চিত্তং, তেন চিত্তং ৰিচরতীতি ৰিচারো’’তিআদিনা কত্তুকরণৰসেন নিব্বচনং ৰুচ্চতি, তং পরিযাযকথনন্তি ৰেদিতব্বং. সকসককিচ্চেসু হি ধম্মানং অত্তপ্পধানতাসমারোপনেন কত্তুভাৰো, তদনুকূলভাৰেন তংসম্পযুত্তধম্মসমূহে কত্তুভাৰসমারোপনেন করণত্তঞ্চ পরিযাযতোৰ ¶ লব্ভতীতি. তথা নিদস্সনং পন ধম্মসভাৰতো অঞ্ঞস্স কত্তাদিনো অভাৰপরিদীপনত্থন্তি ৰেদিতব্বং.

‘‘ৰিসযৰিজানন’’ন্তি চ এতেন চিত্তস্স আরম্মণূপলদ্ধিলক্খণতা ৰুত্তাতি ইদানিস্স রসাদীনি ৰুচ্চন্তি. পুব্বঙ্গমরসঞ্হি চিত্তং সন্ধানপচ্চুপট্ঠানং নামরূপপদট্ঠানং. দ্ৰারং পত্ৰা তদারম্মণঞ্হি ৰিভাৰনট্ঠেন চিত্তং পুব্বঙ্গমং পুরেচারিকং. তথা হি চক্খুদ্ৰারেন দট্ঠব্বং রূপারম্মণং চিত্তেনেৰ জানাতি…পে… মনোদ্ৰারেন ৰিঞ্ঞাতব্বং ধম্মারম্মণং চিত্তেনেৰ জানাতি. যথা হি নগরগুত্তিকো নগরমজ্ঝে সিঙ্ঘাটকে নিসীদিত্ৰা ‘‘অযং নেৰাসিকো, অযং আগন্তুকো’’তি আগতাগতং জনং উপধারেতি, এৰং সম্পদমিদং দট্ঠব্বং, তস্মা দ্ৰারং পত্ৰা তদারম্মণং ৰিভাৰনট্ঠেন পুরেচারিকন্তি পুব্বঙ্গমরসং. পচ্ছিমং পচ্ছিমং উপ্পজ্জমানং পুরিমং পুরিমং নিরন্তরং কত্ৰা সন্দহমানমিৰ উপট্ঠাতি, গহণভাৰং গচ্ছতীতি সন্ধানপচ্চুপট্ঠানং. পঞ্চৰোকারে পনস্স নিযমতো নামরূপং, চতুৰোকারভৰে নামমেৰ পদট্ঠানন্তি নামরূপপদট্ঠানঞ্চ হোতি. নানত্তং পন লক্খণাদীনং উপরি ৰক্খমাননযেন ৰেদিতব্বং. ৰক্খতি হি রূপপরিচ্ছেদে –

‘‘সামঞ্ঞং ৰা সভাৰো ৰা, ধম্মানং লক্খণং মতং;

কিচ্চং ৰা তস্স সম্পত্তি, রসোতি পরিদীপিতো.

‘‘ফলং ¶ ৰা পচ্চুপট্ঠানং, উপট্ঠাননযোপি ৰা;

আসন্নকারণং যং তু, তং পদট্ঠানসঞ্ঞিত’’ন্তি. (অভিধ. ৬৩৩-৬৩৪);

যত্থ যত্থ পন লক্খণাদীনি ৰুচ্চন্তি, তত্থ তত্থ ইমিনাৰ নযেন তেসং নানত্তং ৰেদিতব্বং.

ৰচনত্থৰিজাননেন ৰিদিতচিত্তসামঞ্ঞস্স উত্তরি চিত্তৰিভাগো ৰুচ্চমানো সোভেয্যাতি ৰচনত্থৰিজাননমেৰ তাৰ ¶ আদিম্হি যুত্ততরন্তি তং তাৰ কথেতুকম্যতায পুচ্ছতি ‘‘তস্স পন কো ৰচনত্থো’’তি. পঞ্চৰিধা হি পুচ্ছা – (দী. নি. অট্ঠ. ১.৭; ম. নি. অট্ঠ. ১.৪৪৯; সং. নি. অট্ঠ. ২.২.১; অ. নি. অট্ঠ. ১.১.১৭০) অদিট্ঠজোতনাপুচ্ছা দিট্ঠসংসন্দনাপুচ্ছা ৰিমতিচ্ছেদনাপুচ্ছা অনুমতিপুচ্ছা কথেতুকম্যতাপুচ্ছাতি. তত্থ যং অঞ্ঞাতং অদিট্ঠং, তস্স ঞাণায দস্সনায পঞ্হাকরণং অদিট্ঠজোতনাপুচ্ছা নাম. যং পন ঞাতং দিট্ঠং, তস্স অঞ্ঞেহি পণ্ডিতেহি সংসন্দনত্থায পঞ্হাকরণং দিট্ঠসংসন্দনাপুচ্ছা নাম. পকতিযা পন সংসযপক্খন্দনস্স অত্তনো সংসযসমুগ্ঘাটনত্থং পঞ্হাকরণং ৰিমতিচ্ছেদনাপুচ্ছা নাম. ‘‘তং কিং মঞ্ঞথ, ভিক্খৰে, রূপং নিচ্চং ৰা অনিচ্চং ৰাতি? অনিচ্চং, ভন্তে. যং পনানিচ্চং, দুক্খং ৰা তং সুখং ৰা’’তিআদিনা (সং. নি. ৩.৭৯; মহাৰ. ২১) অনুমতিগ্গহণত্থং পঞ্হাকরণং অনুমতিপুচ্ছা নাম. ‘‘চত্তারোমে, ভিক্খৰে, সতিপট্ঠানা. কতমে চত্তারো’’তিআদিনা (দী. নি. ২.৩৭৩; সং. নি. ৫.৪০২-৪০৪) পন তংতংধম্মানং দেসনাধিপ্পাযেন পঞ্হাকরণং কথেতুকম্যতাপুচ্ছা নাম.

তাসু পুরিমা তিস্সো আচরিযানং ন সম্ভৰন্তি. ন হি তে গন্থকরণত্থায আরভিত্ৰা ইদানি অদিট্ঠং জোতেন্তি, দিট্ঠং সংসন্দেন্তি, সংসযং ৰা পক্খন্দন্তি তব্বিসোধনপুব্বকমেৰ গন্থকরণে অভিনিৰেসনতো. ইতরা পন দ্ৰে সম্ভৰন্তি. তাসু অযং কথেতুকম্যতাপুচ্ছা. অপিচ চোদনং সমুট্ঠাপেন্তা আচরিযা অঞ্ঞং চোদকং পরিকপ্পেত্ৰা তস্স ৰচনৰসেন সমুট্ঠাপেন্তীতি তংৰসেনেত্থ অদিট্ঠজোতনাৰিমতিচ্ছেদনাপুচ্ছাপি লব্ভন্তেৰাতি দট্ঠব্বং. তস্সাতি তস্স চিত্ত-সদ্দস্স. চিত্তে হি অধিগতে তস্স ৰাচকো সদ্দোপি সহচরিযতো অধিগতোৰ হোতীতি তস্স ইধ ত-সদ্দেন পরিগ্গহো. কেচি পন ‘‘তস্স চিত্তস্সা’’তি অত্থং ৰদন্তি, তং ‘‘তস্স ¶ কো ৰচনত্থো’’তি ইমিনা ন সমেতি. ন হি চিত্তস্স ‘‘কো ৰচনত্থো’’তি পুচ্ছা সম্ভৰতীতি.

ইদানি ¶ যথাপুচ্ছিতমত্থং ৰিস্সজ্জেতুং ‘‘ৰুচ্চতে’’তি তাৰ পটিঞ্ঞং কত্ৰা ‘‘সব্বসঙ্গাহকৰসেনা’’তিআদিনা ৰিস্সজ্জনমারদ্ধং. তত্থ সব্বসঙ্গাহকৰসেনাতি হেট্ঠিমন্ততো চক্খুৰিঞ্ঞাণাদযো উপাদায সব্বেসং আরম্মণৰিজাননসভাৰত্তা তেসং সব্বেসমেৰ সঙ্গাহকৰসেন, ন পন ৰক্খমাননিব্বচনেসু ৰিয যথালাভৰসেনাতি অত্থো. চিন্তেতীতি ৰিজানাতি. চিন্তেন্তি তেন গোচরন্তি ৰা চিত্তং. সম্পযুত্তধম্মানং কত্তুতাসমারোপনেন হিস্স করণভাৰো লব্ভতি. সব্বসঙ্গাহকৰসেন তাৰ অত্থং দস্সেত্ৰা ইদানি যথালাভৰসেনপি দস্সেতুং ‘‘অত্তসন্তানং ৰা চিনোতীতিপী’’তিআদি ৰুত্তং. সব্বচিত্তসাধারণত্তা হি চিত্ত-সদ্দস্স যত্থ যত্থ যথা যথা অত্থো লব্ভতি, তত্থ তত্থ তথা তথা গহেতব্বো. যস্স পন চিত্তস্স যথাৰুত্তঅত্থৰিসেসো ন লব্ভতি, তং রুল়্হীৰসেন চিত্তন্তি ৰেদিতব্বং. যথা কিলঞ্জাদীহি কতম্পি তালপণ্ণেহি কতসরিক্খকতায রুল়্হীসদ্দেন ‘‘তালৰণ্ট’’ন্ত্ৰেৰ ৰুচ্চতীতি. অত্তসন্তানন্তি সকসন্তানং, জৰনসন্তানন্তি অত্থো. অত্ত-সদ্দস্স হি পরপচ্চনীকৰচনত্তা অত্তনো সন্তানোতি সদিসৰসেন উপ্পজ্জমানো জৰনসন্তানো ৰুচ্চতি. তং চিনোতি রাসিং করোতীতি অযমত্থো সাসেৰনকানং জৰনচিত্তানং ৰসেন দট্ঠব্বো. তানি হি পুরেজাতানি পচ্ছাজাতানং আসেৰনপচ্চযা হুত্ৰা অত্তনো জৰনসন্তানস্স পগুণবলৰভাৰকরণেন তং চিনন্তি নাম. ৰা-সদ্দো অসব্বসঙ্গাহকত্থৰিকপ্পনে. পি-সদ্দো কিরিযাসম্পিণ্ডনত্থে. অথ ৰা ‘‘সব্বসঙ্গাহকৰসেনা’’তি ইমস্স ইধাপি সম্বন্ধো হোতীতি ইদম্পি সব্বসঙ্গাহকৰসেন ৰুত্তন্তি গয্হমানে অত্তসন্তানন্তি ৰিঞ্ঞাণৰচনস্স অত্ত-সদ্দস্স সকত্থৰুত্তিত্তাযেৰ তংৰসেন চিত্তসন্তানন্তি অত্থো. অনন্তরাদিপচ্চযৰসেন হি চিত্তসন্তানস্স অব্বোচ্ছিন্নপ্পৰত্তিকরণতো সব্বমেৰ চিত্তজাতং চিত্তসন্তানং চিনোতি নাম. ইমস্মিং পনত্থে ¶ ৰা-সদ্দো কিরিযাৰিকপ্পনত্থো. পি-সদ্দো ‘‘চিত্ত’’ন্তি ইমস্স আকড্ঢনত্থোতি দট্ঠব্বং. পুরিমপক্খে পন চিত্তন্তি অধিকারতোৰ গহেতব্বং.

৯. ৰিচিত্তং করোতি, ৰিচিত্তস্স ৰা করণন্তি ৰিচিত্তকরণং, ততো ৰিচিত্তকরণা, ৰিচিত্তচিত্তকম্মাদীনং করণতোতি অত্থো. লোকস্মিঞ্হি যং কিঞ্চি চিত্তকম্মাদিভেদং ৰিচিত্তং সিপ্পজাতং, সব্বং তং চিত্তেনেৰ চিন্তেত্ৰা করীযতীতি. তেনাহ ভগৰা – ‘‘দিট্ঠং ৰো, ভিক্খৰে ¶ , চরণং নাম চিত্তন্তি? এৰং, ভন্তে. তম্পি খো, ভিক্খৰে, চরণং নাম চিত্তং চিত্তেনেৰ চিন্তিত’’ন্তি (সং. নি. ৩.১০০). স্ৰাযমত্থো সৰিঞ্ঞত্তিকানং বাত্তিংসচিত্তানমুপলব্ভতি. সাসৰকুসলাকুসলং ৰা ৰিচিত্তগতিআদিকরণতো ৰা ৰিচিত্তকরণট্ঠেন চিত্তং. ননু চ ৰিচিত্তগতিআদযো কম্মৰসেন নিপ্ফজ্জন্তি. যথাহ –

‘‘কম্মনানাকরণং পটিচ্চ সত্তানং গতিযা নানাকরণং পঞ্ঞাযতি অপদা দ্ৰিপদা চতুপ্পদা বহুপ্পদা রূপিনো অরূপিনো সঞ্ঞিনো অসঞ্ঞিনো নেৰসঞ্ঞীনাসঞ্ঞিনো, কম্মনানাকরণং পটিচ্চ সত্তানং উপপত্তিযা নানাকরণং পঞ্ঞাযতি উচ্চনীচতা হীনপণীততা সুগতদুগ্গততা, কম্মনানাকরণং পটিচ্চ সত্তানং অত্তভাৰে নানাকরণং পঞ্ঞাযতি সুৰণ্ণদুব্বণ্ণতা সুজাতদুজ্জাততা সুসণ্ঠিতদুস্সণ্ঠিততা, কম্মনানাকরণং পটিচ্চ সত্তানং লোকধম্মে নানাকরণং পঞ্ঞাযতি লাভালাভে যসাযসে নিন্দাপসংসাযং সুখদুক্খে’’তি (ধ. স. অট্ঠ. ১).

তস্মা কম্মভেদনিব্বত্তত্তা গতিআদীনং চিত্ততা. কম্মন্তি চ চেতসিকধম্মভূতা চেতনা, অভিজ্ঝাদযো চ ৰুচ্চন্তি, ন চিত্তন্তি. কথং চিত্তস্স ৰিচিত্তগতিআদিকরণন্তি? ৰুচ্চতে ¶ – কম্মস্স চিত্তসন্নিস্সিতত্তা তন্নিপ্ফাদিতম্পি চিত্তেনেৰ কতং হোতি, যথা রাজযোধেন পরাজিতো সত্তুরঞ্ঞা জিতোতি ৰুচ্চতি. ৰিচিত্তং করণমস্সাতি ৰা ৰিচিত্তকরণং. ততো একট্ঠানিকৰজ্জিতঞ্হি চিত্তং পচ্চেকং পটিসন্ধাদিৰিচিত্তকিরিযৰন্ততায, সব্বমেৰ ৰা চিত্তং আৰজ্জনাদিঅঞ্ঞমঞ্ঞৰিসদিসকিরিযৰন্ততায ৰিচিত্তকরণং যুত্তন্তি. সব্বৰিকপ্পেসুপি ‘‘রূপভৰো রূপ’’ন্তিআদীসু ৰিয উত্তরপদলোপো চিত্তপরিযাযেন চ ৰিচিত্ত-সদ্দেন ৰা ৰিগ্গহো ৰি-সদ্দলোপো ৰা দট্ঠব্বো. অথ ৰা ‘‘ৰিচিত্তকরণা’’তি ইদং চিত্তৰিচিত্তভাৰস্স ঞাপকহেতুনিদস্সনং. তেন যস্মা ইদং ৰিচিত্তকরণং, তস্মা তস্স ৰিচিত্তস্স নিপ্ফাদকং সযম্পি তথেৰ ৰিচিত্তন্তি ৰিঞ্ঞাতব্বন্তি এৰং করণৰিচিত্ততায ৰিচিত্তত্তা চিত্তন্তি অত্থো. ঠপেত্ৰা তং করণৰিচিত্ততায ৰিচিত্তভাৰং অত্তনো এৰ জাতিভূমিসম্পযোগাদিৰসেন ৰিচিত্ততায চিত্তন্তি দস্সেন্তো আহ ‘‘অত্তনো চিত্ততায ৰা’’তি. তত্থ যস্মা অঞ্ঞদেৰ কুসলং, অঞ্ঞং অকুসলং, অঞ্ঞং অব্যাকতং, অঞ্ঞং কামাৰচরং, অঞ্ঞং রূপাৰচরাদিভেদং, অঞ্ঞং সরাগং, অঞ্ঞং ৰীতরাগং, অঞ্ঞং সদোসং, অঞ্ঞং ৰীতদোসং, অঞ্ঞং সমোহং, অঞ্ঞং ৰীতমোহং, অঞ্ঞং রূপারম্মণং, অঞ্ঞং সদ্দাদিআরম্মণং, রূপারম্মণেসু চ অঞ্ঞং নীলারম্মণং, অঞ্ঞং ¶ পীতাদিআরম্মণং. এৰং সদ্দারম্মণাদীসুপি যথাসম্ভৰং. সব্বেসু চেৰ তেসু অঞ্ঞং হীনং, অঞ্ঞং মজ্ঝিমং, অঞ্ঞং পণীতং, হীনাদীসু চ অঞ্ঞং ছন্দাধিপতেয্যং, অঞ্ঞং চিত্তাধিপতেয্যং, অঞ্ঞং ৰীরিযাধিপতেয্যং, অঞ্ঞং ৰীমংসাধিপতেয্যন্তি এৰমাদিনা জাতিভূমিসম্পযুত্তআরম্মণহীনমজ্ঝিমপণীতঅধিপতিআদীনং ৰসেন ৰিচিত্তমনেকপ্পকারং, তস্মা ইমায অত্তৰিচিত্ততায ৰা চিত্তন্তি ৰুচ্চতীতি.

কামঞ্চেত্থ একমেৰ চিত্তং এৰং ৰিচিত্তং নাম ন হোতি, ৰিচিত্তানং পন অন্তোগধত্তা এতেসু যং কিঞ্চি একম্পি ৰিচিত্ততায ¶ চিত্তন্তি ৰত্তুং ৰট্টতি সমুদাযৰোহারেন অৰযৰস্সাপি ৰোহরিযমানত্তা যথা পব্বতনদীসমুদ্দাদীনমেকদেসা দিট্ঠা পব্বতাদযো দিট্ঠাতি, যথা চ একেকচিত্তসম্পযুত্তাপি ৰেদনাদযো রাসট্ঠেন খন্ধৰোহারেন ‘‘ৰেদনাক্খন্ধো সঞ্ঞাক্খন্ধো’’তিআদিনা ৰুচ্চন্তি. অপিচেত্থ ৰিপাকৰিঞ্ঞাণং কম্মকিলেসেহি চিতন্তি চিত্তং, তং কিলেসসহাযেন কম্মুনা ফলভাৰেন নিব্বত্তিতং তেহি চিতং নাম হোতি. হোতু তাৰিদং লোকিযৰিপাকং সন্ধায, লোকুত্তরং পন পত্ৰা কথন্তি? ৰুচ্চতে – ‘‘কতমে ধম্মা কুসলা, যস্মিং সমযে লোকুত্তরং কুসলং চিত্তং উপ্পন্নং হোতি…পে… তস্মিং সমযে অৰিজ্জাপচ্চযা সঙ্খারা’’তিআদিনা অরিযমগ্গচেতনাযপি অৰিজ্জূপনিস্সযভাৰস্স পকাসিতত্তা লোকুত্তরকুসলস্সাপি অনুসযা উপনিস্সযা হোন্তীতি তন্নিব্বত্তিতস্স ৰিপাকস্স কম্মকিলেসসঞ্চিততাপরিযাযো লব্ভতীতি. চিতং তাযতীতি ৰা চিত্তং. কম্মাদিসঞ্চিতোপি হি অত্তভাৰো ৰিঞ্ঞাণূপরমে মতোতি ৰুচ্চতি. যথাহ –

‘‘আযু উস্মা চ ৰিঞ্ঞাণং, যদা কাযং জহন্তিমং;

অপ্পৰিদ্ধো তদা সেতি, নিরত্থংৰ কলিঙ্গর’’ন্তি. (সং. নি. ৩.৯৫);

সো পনাযং চিত্ত-সদ্দো কিঞ্চাপি অনেকত্থেসু দিস্সতি. তথা হেস ‘‘চিত্তো চ গহপতী’’তিআদীসু (অ. নি. ২.১৩৩; ৪.১৭৬) পঞ্ঞত্তিযং আগতো. ‘‘সব্বো লোকো পরচিত্তেন অচিত্তো’’তিআদীসু ৰিঞ্ঞাণে. ‘‘নাহং, ভিক্খৰে, অঞ্ঞং একনিকাযম্পি সমনুপস্সামি, এৰং চিত্ত’’ন্তিআদীসু (সং. নি. ৩.১০০) ৰিচিত্তে, নানপ্পকারেতি অত্থো. ‘‘চরণং নাম চিত্ত’’ন্তিআদীসু চিত্তকম্মকে. ইধ পন চতুব্বিধধম্মে নিদ্দেসতো পকরণৰসেন যথাৰুত্তৰচনত্থযুত্তো ৰিঞ্ঞাণৰচনোৰ দট্ঠব্বোতি ইমমত্থং দস্সেন্তো আহ ‘‘পঞ্ঞত্তিযম্পী’’তিআদি ¶ . পঞ্ঞাপীযতি এতাযাতি ¶ পঞ্ঞত্তি, তস্সং নামপঞ্ঞত্তিযন্তি অত্থো. চিত্তোতি হি একস্স গহপতিনো নামং. পি-সদ্দো ৰক্খমানসম্পিণ্ডনত্থো. ৰিঞ্ঞাণেতি সৰিপাকাৰিপাকভেদে চিত্তে. তঞ্হি ৰিজাননট্ঠেন ‘‘ৰিঞ্ঞাণ’’ন্তি ৰুচ্চতি. যথাহ – ‘‘ৰিজানাতীতি খো, ভিক্খৰে, ৰিঞ্ঞাণং, তস্মা ৰিঞ্ঞাণন্তি ৰুচ্চতী’’তি. চিত্তসম্মুতীতি চিত্তৰোহারো. দট্ঠব্বাতি ৰিঞ্ঞাতব্বা. ইধাতি ইমস্মিং চতুব্বিধধম্মনিদ্দেসট্ঠানে. ৰিঞ্ঞুনাতি ৰিজানতা, আভিধম্মিকেনাতি অত্থো.

ৰিভাগৰন্তানং ধম্মানং সভাৰৰিভাৰনং ৰিভাগেন ৰিনা ন হোতীতি চিত্তস্স ৰিভাগং দস্সেতুং ‘‘সারম্মণতো’’তিআদি আরদ্ধং. তত্থ আলম্বন্তি তং নিস্সায পৰত্তন্তীতি আরম্মণং, পচ্চযো, গোচরো চ. তথা হি ‘‘লভতি মারো আরম্মণং, লভতি মারো ওতার’’ন্তিআদীসু (দী. নি. ৩.৮০) পচ্চযো ‘‘আরম্মণ’’ন্তি ৰুচ্চতি. ‘‘নিমিত্তং অস্সাসপস্সাসা, অনারম্মণমেকচিত্তস্সা’’তিআদীসু (পটি. ম. ১.১৫৯) গোচরো. ইধ পন উভযম্পি ৰট্টতি সব্বস্সেৰ চিত্তস্স সপ্পচ্চযসগোচরত্তা. সহ আরম্মণেন ৰত্ততি তদৰিনাভাৰতোতি সারম্মণং. ভাৰপ্পধাননিদ্দেসৰসেন চেত্থ সারম্মণভাৰো সারম্মণ-সদ্দেন ৰুত্তো যথা ‘‘ইদম্পি বুদ্ধে রতনং পণীতং (খু. পা. ৬.৩). চক্খু সুঞ্ঞং অত্তেন ৰা অত্তনিযেন ৰা’’তিআদীসু (সং. নি. ৪.৮৫) রতনঅত্তত্তনিযাদিভাৰো রতনাদীহি সদ্দেহীতি, ততো সারম্মণভাৰতোতি অত্থো. এৰমঞ্ঞত্থাপি যথানুরূপং দট্ঠব্বং. একৰিধন্তি একপ্পকারং, এককোট্ঠাসন্তি অত্থো.

সৰিপাকাৰিপাকতোতি ৰিপাকুপ্পাদনসভাৰস্স ৰিজ্জমানাৰিজ্জমানভাৰতো. ৰিপাক-সদ্দো হি দ্ৰীসু অত্থেসু পৰত্ততি. কত্থচি ৰিপক্কভাৰমাপন্নেসু অরূপধম্মেসু, কত্থচি ৰিপাকুপ্পাদনসভাৰে ¶ . তথা হেস ‘‘ৰিপাকা ধম্মা’’তিআদীসু (ধ. স. তিকমাতিকা ৩) ৰিপক্কভাৰমাপন্নেসু অরূপধম্মেসু পৰত্ততি. ‘‘ৰিপাকধম্মধম্মা’’তিআদীসু (ধ. স. তিকমাতিকা ৩) ৰিপাকুপ্পাদনসভাৰে. ইধ পন ৰিপাকুপ্পাদনসভাৰো দট্ঠব্বো. ইতরথা হি অভিঞ্ঞাকুসলাদীনং সৰিপাক-পদে অসঙ্গহিতভাৰাপত্তি সিযা. তথা হি যদি ৰিপক্কভাৰমাপন্না এৰ ধম্মা ইধ গহিতা সিযুং, তে যস্স সন্তি, তং সৰিপাকমিতরমৰিপাকন্তি অভিঞ্ঞাকুসলস্স চেৰ কদাচি অৰিপাকস্স দিট্ঠধম্মৰেদনীযাদিকম্মস্স ভাৰনাযপহাতব্বাকুসলস্স চ ৰিপাকুপ্পত্তিযা অভাৰতো অৰিপাক-পদসঙ্গহো সিযা, এৰঞ্চ ¶ সতি ‘‘অৰিপাকং অব্যাকত’’ন্তি ৰক্খমানত্তা নেসং অব্যাকতভাৰো আপজ্জতি, ন চেতমিট্ঠং কুসলাকুসলনিদ্দেসেযেৰ তেসং নিদ্দেসতো. ৰিপাকুপ্পাদনসভাৰে পন গহিতে তংসভাৰো নাম অনুপচ্ছিন্নাৰিজ্জমানতণ্হানুসযস্মিং সন্তানে সব্যাপারপ্পৰত্তি এৰাতি তস্সা তেসুপি অত্থিতায অসতিপি ৰিপাকুপ্পাদনে সৰিপাক-পদসঙ্গহো সিদ্ধোতি ন কোচি ইট্ঠৰিঘাতো আপজ্জতি. যেন পন কারণেন অভিঞ্ঞাকুসলাদিকমৰিপাকং, যো চেত্থ ৰত্তব্বো ৰিনিচ্ছযো, তং সব্বং তস্স তস্স আগতট্ঠানেযেৰ দস্সযিস্সাম.

কতমং পনেত্থ সৰিপাকং, কতমমৰিপাকন্তি চোদনং সন্ধাযাহ ‘‘তত্থ সৰিপাক’’ন্তিআদি. অব্যাকতন্তি ৰিপাককিরিযাৰসেন দুৰিধমব্যাকতং. তেসু ৰিপাকচিত্তং তাৰ আদাসতলে মুখনিমিত্তং ৰিয নিরুস্সাহত্তা ৰিপাকুপ্পাদনে অসমত্থং. কিরিযচিত্তেসু চ যদেতং খীণাসৰসন্তানেযেৰ নিযতমট্ঠারসৰিধং ৰিঞ্ঞাণং, তং উপচ্ছিন্নভৰমূলায সন্ততিযং পৰত্ততীতি সমুচ্ছিন্নমূলায লতায পুপ্ফং ¶ ৰিয ফলদাযী ন হোতি. আৰজ্জনদ্ৰযং পন অনুপচ্ছিন্নভৰমূলেপি সন্তানে পৰত্তমানং অনাসেৰনভাৰেন দুব্বলত্তা মোঘপুপ্ফমিৰ বীজভাৰে অসমত্থং অফলমেৰ. ইতি সব্বমেতং অব্যাকতং ৰিপাকারহতাভাৰতো অৰিপাকন্তি ৰুত্তং ‘‘অৰিপাকং অব্যাকত’’ন্তি. জাযন্তি এত্থ অসদিসাপি সদিসাকারাতি জাতি, সমানাকারো, কুসলাকুসলাব্যাকতানং জাতি কুসলাকুসলাব্যাকতজাতি, তস্সা ভেদতো তিৰিধং কুসলং অকুসলং অব্যাকতন্তি. ৰচনত্থপুচ্ছায পযোজনং ৰুত্তমেৰ.

১০. ‘‘কুচ্ছিতান’’ন্তিআদি ৰিস্সজ্জনং. তত্থ কুচ্ছিতানন্তি নিন্দিতানং, অসুচি ৰিয নাগরিকেহি ৰিঞ্ঞূহি গরহিতব্বানং পাপধম্মানন্তি অত্থো. সলনতোতি হিংসনতো, অপনযনতো ৰা. কুসলঞ্হি যথানুরূপং তদঙ্গাদিৰসেন অকুসলধম্মে পজহন্তং তে হিংসতি, অপনযতীতি ৰা ৰুচ্চতি. অথ ৰা সলনতো সংৰরণতো, পিদহনতোতি অত্থো. কুসলধম্মৰসেন হি অকুসলপ্পৰত্তিনিৰারণেন, অপ্পৰত্তিধম্মতাপাদনেন চ মনচ্ছট্ঠেসু দ্ৰারেসু অপ্পৰত্তিযা সংৰুতা পিহিতা হোন্তি. কুসানন্তি রাগাদিঅসুচিসম্পযোগেন নানাৰিধদুক্খহেতুতায চ কুচ্ছিতেনাকারেন অপ্পহীনভাৰেন সন্তানে সযন্তি পৰত্তন্তীতি কুসা, পাপধম্মা. অথ ৰা কুচ্ছিতানং পাণাতিপাতাদীনং সাৰজ্জধম্মানং সানতো নিসানতো তেজনতো কুসা, দোসলোভাদযো. দোসাদীনঞ্হি ৰসেন চেতনায তিক্খভাৰপ্পত্তিযা পাণাতিপাতাদীনং মহাসাৰজ্জতাতি. তেসং লৰনেন ছিন্দনেন যথানুরূপং পজহনেনাতি অত্থো. কুসেনাতি কুচ্ছিতানং সানতো তনুকরণতো, ওসানকরণতো ¶ ৰা ‘‘কুসা’’তি লদ্ধনামেন ঞাণেন. লাতব্বত্তাতি আদাতব্বত্তা, সহজাতউপনিস্সযভাৰেন সন্তানে পৰত্তেতব্বত্তা. ঞাণঞ্হি তিহেতুককুসলং সহজাতভাৰেন ¶ চেৰ উপনিস্সযভাৰেন চ, দুহেতুককুসলং উপনিস্সযভাৰেনেৰ সন্তানে পৰত্তেতি. এৰঞ্চ কত্ৰা কোসল্লসম্ভূতট্ঠো কুসলট্ঠোতি সব্বকুসলানং সাধারণৰসেন অত্থো ৰুচ্চতি. অথ ৰা কুসেনাতি জাতিসদ্দতায একৰচননিদ্দেসো, কুসেহীতি পন অত্থো. পুঞ্ঞকিরিযাৰসেন হি পৰত্তানি সদ্ধাদীনি ইন্দ্রিযানি যথাৰুত্তনযেন ‘‘কুসানী’’তি ৰুচ্চন্তি, তেহি লাতব্বত্তা ৰুত্তনযেন পৰত্তেতব্বত্তা. অপিচেত্থ –

‘‘কুসো ৰিয লুনাতীতি, কুসা ৰিয লুনাতি ৰা;

কুসলং কুং সলেতীতি, লুনাতি কুসমিচ্চপী’’তি.

তত্থ যথা কুসো গহিতো উভযভাগগতং হত্থপদেসং লুনাতি, এৰমিদম্পি উপ্পন্নানুপ্পন্নৰসেন উভযভাগগতং কিলেসপক্খং লুনাতি ছিন্দতি, সেয্যথাপি – ‘‘অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি, ৰাযমতি, উপ্পন্নানং…পে… পহানাযা’’তি আগতং সম্মপ্পধানং. তস্মা কুসো ৰিয লুনাতীতি কুসলং. কুসা ৰিয লুনাতীতি এত্থ ‘‘কু’’ইতি ভূমি ৰুচ্চতি, ধম্মানং অধিট্ঠানভাৰেন তংসদিসতায ইধ রূপারূপক্খন্ধো ৰুত্তো. অত্তনো নিস্সযভূতস্স তস্স এতরহি, আযতিঞ্চ অনুদহনতো ৰিনাসনতো কুং সাযন্তীতি কুসা, রাগাদযো, তে ৰিয অত্তনো নিস্সযং লুনাতি ছিন্দতীতি কুসলং. পযোগসম্পাদিতা হি কুসলধম্মা অচ্চন্তমেৰ রূপারূপধম্মে অপ্পৰত্তিকরণেন সমুচ্ছিন্দন্তি অনুপাদিসেসনিব্বানধাতুপাপনতোতি. ৰুত্তনযেন পন ‘‘কু’’ন্তি লদ্ধনামস্স রূপারূপক্খন্ধস্স সলনতো অপনযনতো কুং সলেতীতি কুসলং. কুসং লুনাতীতি পন কুচ্ছিতা এত্থ সযন্তীতি কুসো, কাযো, তং লুনাতি যথাৰুত্তৰসেনেৰাতি কুসলং.

১১. ইদানি ¶ কুসল-সদ্দস্স অত্থুদ্ধারদস্সনত্থমাহ ‘‘ছেকে কুসল-সদ্দোয’’ন্তিআদি. তত্থ ‘‘কুসলো ত্ৰং রথস্স অঙ্গপচ্চঙ্গানং (ম. নি. ২.৮৭), কুসলানচ্চগীতস্স, সিক্খিতা চাতুরিত্থিযো’’তিআদীসু (জা. ২.২২.৯৪) ছেকে দিট্ঠো, ছেকপরিযাযো পৰীণত্থোতি অত্থো. ‘‘কচ্চি নু ভোতো কুসলং, কচ্চি ভোতো অনাময’’ন্তিআদীসু (জা. ১.১৫.১৪৬; ২.২০.১২৯) আরোগ্যে. ‘‘কতমো পন, ভন্তে, কাযসমাচারো কুসলো? যো খো, মহারাজ, কাযসমাচারো ¶ অনৰজ্জো’’তি (ম. নি. ২.৩৬১) চ ‘‘অপরং পন, ভন্তে, এতদানুত্তরিযং, যথা ভগৰা ধম্মং দেসেতি কুসলেসু ধম্মেসূ’’তি (দী. নি. ৩.১৪৫) চ এৰমাদীসু অনৰজ্জে. ‘‘কুসলানং ধম্মানং সমাদানহেতু এৰমিদং পুঞ্ঞং ৰড্ঢতি (দী. নি. ৩.৮০), কুসলস্স কম্মস্স কতত্তা উপচিতত্তা’’তি (ধ. স. ৪৩১) চ আদীসু ইট্ঠৰিপাকে. অনৰজ্জাদিকেতি অনৰজ্জইট্ঠৰিপাকে, ‘‘অনৰজ্জাদিকে’’তি চ অত্তনা ৰক্খমানলক্খণস্স অনুরূপত্তা ৰুত্তং, ন পন আরোগ্যত্থস্স অসম্ভৰতো. কিলেসরোগস্স হি অভাৰতো কুসলং আরোগ্যং হোতি.

ৰজ্জা রাগাদযো, তে যস্স ন সন্তি, তং অনৰজ্জং, ইট্ঠো ৰিপাকো চতুক্খন্ধসঙ্খাতো যস্স, তং ইট্ঠৰিপাকং, ইট্ঠৰিপাকতা চস্স তংসভাৰৰন্ততায দট্ঠব্বা, ন তস্স অৰস্সং ইট্ঠৰিপাকসম্ভৰতোযেৰ, লক্খীযতি অনেনাতি লক্খণং, অনৰজ্জঞ্চ তং ইট্ঠৰিপাকঞ্চাতি অনৰজ্জইট্ঠৰিপাকং. তং লক্খণমস্সাতি অনৰজ্জইট্ঠৰিপাকলক্খণং.

ননু চ কুসলমেৰ অনৰজ্জইট্ঠৰিপাকং, ৰুত্তনিযামেন পন অনৰজ্জইট্ঠৰিপাকতো অঞ্ঞং কুসলং সিযা. ন হি সযমেৰ অত্তনো লক্খণন্তি সক্কা ৰত্তুন্তি? নাযং দোসো পরিঞ্ঞাতাপরিঞ্ঞাতৰচনত্থভাৰভেদে ¶ একস্সাপি লক্খিতব্বলক্খণভাৰপরিকপ্পনতো. ‘‘অনৰজ্জইট্ঠৰিপাক’’ন্তি হি পরিঞ্ঞাতৰচনত্থং. ‘‘কুসল’’ন্তি অপরিঞ্ঞাতৰচনত্থং. এৰঞ্চ যেন সভাৰেন পরিঞ্ঞাতৰচনত্থস্স সদ্দস্স অত্থো হোতি, যেন চ অপরিঞ্ঞাতৰচনত্থস্স, তেসং পরিঞ্ঞাতাপরিঞ্ঞাতৰচনত্থসভাৰানং ভেদেন তংসমঙ্গিস্স কুসলস্স একস্সাপি ভেদো পরিকপ্পীযতি যথা ‘‘পুরে ভৰং পটু আসি, পটুতরো এতরহী’’তি গুণভেদেন, ৰত্থুভেদেন চ পরিকপ্পীযতি, তস্মা পরিঞ্ঞাতৰচনত্থভাৰেন লক্খণং, অপরিঞ্ঞাতৰচনত্থভাৰেন লক্খিতব্বন্তি এৰং পরিকপ্পিতভেদে পরিগ্গয্হমানে ন কোচি দোসো আপজ্জতি.

অথ ৰা লক্খীযতীতি লক্খণং, অনৰজ্জইট্ঠৰিপাকঞ্চ তং লক্খণঞ্চাতি অনৰজ্জইট্ঠৰিপাকলক্খণং, যং অনৰজ্জইট্ঠৰিপাকং হুত্ৰা লক্খীযতি, তং কুসলন্তি অত্থো. অথ ৰা অনৰজ্জ-সদ্দেন অনৰজ্জভাৰো ৰুত্তো, ইট্ঠৰিপাকসদ্দেন ইট্ঠৰিপাকভাৰো, তস্মা অনৰজ্জো চ ইট্ঠৰিপাকো চ অনৰজ্জইট্ঠৰিপাকং, তং লক্খণমেতস্সাতি করণত্থে, কম্মত্থে ৰা লক্খণ-সদ্দেন অনৰজ্জইট্ঠৰিপাকলক্খণন্তি অনৰজ্জইট্ঠৰিপাকসভাৰৰন্তং, অনৰজ্জইট্ঠৰিপাকভাৰেন ¶ লক্খিতব্বং ৰাতি অত্থো. কিং পনেত্থ কারণং পদদ্ৰযপরিগ্গহেন, ননু একেনেৰ পদেন অধিপ্পেতত্থসিদ্ধি সিযা. কিঞ্চাপি হি ‘‘অনৰজ্জলক্খণ’’ন্তি ৰুত্তে ‘‘অপরং পন, ভন্তে, এতদানুত্তরিযং, যথা ভগৰা ধম্মং দেসেতি কুসলেসু ধম্মেসূ’’তিআদীসু (দী. নি. ৩.১৪৫) ৰিয ৰজ্জরহিতত্তা অব্যাকতস্সাপি পসঙ্গো সিযাতি ইট্ঠৰিপাক-পদং ৰত্তব্বমেৰ, ‘‘ইট্ঠৰিপাকলক্খণ’’ন্তি পন ৰুত্তে ইতরং ন ৰত্তব্বং অব্যাকতস্স ৰিপাকারহভাৰেন ইট্ঠৰিপাকতাপসঙ্গভাৰতো? সচ্চমেতং, অনৰজ্জ-পদেন কুসলস্স পৰত্তিসুখতং, ইট্ঠৰিপাক-পদেন চ ৰিপাকসুখতং দস্সেতুং ¶ পদদ্ৰযং ৰুত্তং. অনৰজ্জপদঞ্হি অত্তনো পৰত্তিসভাৰৰসেন লক্খণৰচনং, ইতরং কালন্তরে ৰিপাকুপ্পাদনসমত্থতাৰসেনাতি. অথ ৰা কুসলস্স অত্থৰিসুদ্ধিং দস্সেতুং পুরিমপদং ৰুত্তং, পরিসুদ্ধৰিপাকতং দস্সেতুং পচ্ছিমং. পুরিমং ৰা কুসলস্স অকুসলসভাৰতো নিৰত্তনং, পচ্ছিমং অব্যাকতসভাৰতোতি অলমতিপপঞ্চেন. এত্থ চ ‘‘অনৰজ্জ…পে… লক্খণ’’ন্তি ৰচনেন কুসলস্স সামঞ্ঞলক্খণং ৰুত্তং অনৰজ্জইট্ঠৰিপাকসভাৰস্স কুসলজাতিযা সাধারণত্তা. অকুসলাদীনমসাধারণভাৰেন সভাৰলক্খণং ৰাতি দট্ঠব্বং.

অকুসলৰিদ্ধংসনরসন্তি যথানুরূপং অকুসলপ্পজহনকিচ্চং. কুসলঞ্হি পরিত্তমহগ্গতলোকুত্তরভেদভিন্নং যথাক্কমং তদঙ্গৰিক্খম্ভনসমুচ্ছেদপ্পহানৰসেন অকুসলপক্খং পজহতি. অথ তদঙ্গাদিপ্পহানানং কিং নানাকরণন্তি? ৰুচ্চতে – দানাদিপুঞ্ঞকিরিযৰত্থুগতেন তেন তেন কুসলঙ্গেন তস্স তস্স মচ্ছেরাদিঅকুসলঙ্গস্স পহানং তদঙ্গপ্পহানং, তং দীপালোকেন অন্ধকারৰিদ্ধংসনং ৰিয দট্ঠব্বং, কামাৰচরকুসলানং পরিত্তানুভাৰতায তেহি অত্তনো ঠিতিক্খণে ৰিদ্ধংসিতানমকুসলানং তদপগমে সতি পুন আগমেন ৰোত্থরণতো. তেসং তেসং নীৰরণধম্মানং ৰিক্খম্ভনসঙ্খাতং পৰত্তিনিৰারণৰসেন পহানং ৰিক্খম্ভনপ্পহানং, তং ঘটপ্পহারেন জলতলে সেৰালৰিযূহনং ৰিয দট্ঠব্বং. যথা হি বলৰতা ঘটপ্পহারেন দূরীকতং সেৰালং তস্মিং অপনীতেপি তংপহারৰেগেন সহসা ন ওত্থরতি, এৰমেৰ উপচারপ্পনাভেদেন ঝানেন ৰিক্খম্ভিতা কামচ্ছন্দাদযো তদপ্পৰত্তিকালেপি তস্স বলেন সহসা ন ওত্থরন্তীতি. অনুপ্পত্তিধম্মতাপাদনসঙ্খাতং সম্মা উচ্ছেদৰসেন পহানং সমুচ্ছেদপ্পহানং, তং পন অসনিসম্পাতেন রুক্খাদীনং সমূলৰিদ্ধংসনং ৰিয দট্ঠব্বং. ন হি অরিযমগ্গেন ¶ সমুচ্ছিন্নকিলেসা অনুসযমত্তকেনাপি সন্তানে পৰত্তন্তি. যথা পন একৰারপ্পৰত্তেনপি ইন্দগ্গিনা সহ মূলেহি ৰিদ্ধংসিতা রুক্খাদযো ন পুন ৰিরুহন্তি, এৰমেৰং একচিত্তক্খণিকেনপি ¶ তেন অত্তনো উপ্পাদমত্তেনেৰ অনুসযমত্তট্ঠাযিনোপি কিলেসা সব্বেন সব্বং ৰিদ্ধংসিতাযেৰ হোন্তি.

ৰোদানং ৰিসুদ্ধি, সংকিলেসমলৰিমুত্তীতি অত্থো, তথা হুত্ৰা পচ্চুপট্ঠানমস্সাতি ৰোদানপচ্চুপট্ঠানং, পরিসুদ্ধাকারেন যোগিনো ঞাণস্স উপট্ঠাতীতি ৰুত্তং হোতি.

এৰং কুসলস্স ৰজ্জরহিতইট্ঠৰিপাকসভাৰেহি লক্খণং, কিচ্চউপট্ঠানাকারৰসেন চ রসপচ্চুপট্ঠানানি ৰত্ৰা পুন ৰজ্জপটিপক্খভাৰৰসেন চ লক্খণং, সম্পত্তিফলৰসেন চ রসাদিকং দস্সেতুং ‘‘ৰজ্জপটিপক্খত্তা’’তিআদি ৰুত্তং. তত্থ ৰজ্জানং পটিপক্খভাৰো ৰজ্জপটিপক্খত্তং, ততো. এতেন ‘‘অনৰজ্জলক্খণ’’ন্তি এত্থ অ-কারো পটিপক্খত্থোতি দস্সেতি, তেন পনস্স অব্যাকততো নিৰত্তনং কতং. ইতরথা হি নাস্স ৰজ্জং, ৰজ্জতো অঞ্ঞং ৰা অনৰজ্জন্তি অব্যাকতস্সাপি তংলক্খণতাপসঙ্গো সিযা. ‘‘ৰজ্জপটিপক্খত্তা’’তি পন ৰুত্তে যস্মা কুসলাকুসলানমেৰ পহাযকপ্পহাতব্বভাৰেন আলোকন্ধকারানং ৰিয অঞ্ঞমঞ্ঞং উজুৰিপচ্চনীকভাৰো, তস্মা কুসলমেৰ ৰজ্জপটিপক্খত্তা অনৰজ্জলক্খণং, ন অঞ্ঞন্তি অযমত্থো সিদ্ধো হোতি. ৰোদানভাৰরসন্তি ৰোদানভাৰসম্পত্তিকং, কিলেসমলেহি অসংকিলিট্ঠভাৰেন সম্পজ্জনকন্তি অত্থো. পচ্চুপট্ঠাপীযতি উপনীযতি কারণেন, অত্তনো ৰা কারণং পটিচ্চ, তপ্পটিবদ্ধভাৰেন পটিমুখং ৰা উপট্ঠাতীতি পচ্চুপট্ঠানং, ইট্ঠো ৰিপাকো পচ্চুপট্ঠানমস্সাতি ইট্ঠৰিপাকপচ্চুপট্ঠানং.

অসতি ¶ যোনিসোমনসিকারে কুসলস্স অনুপ্পজ্জনতো, সতি চ তস্মিং উপ্পজ্জনতো তস্স সো আসন্নকারণন্তি আহ ‘‘যোনিসোমনসিকারপদট্ঠান’’ন্তি. তত্থ যোনিসো পথেন উপাযেন মনসিকারো যোনিসোমনসিকারো, অত্থতো পন সানুসযসন্তানৰতো ছন্নং দ্ৰারানমাপাথগতেস্ৰারম্মণেসু পতিরূপদেসৰাসাদিসম্পত্তিযা কুসলধম্মানং পচ্চযভাৰেন ভৰঙ্গং আৰট্টেত্ৰা উপ্পন্নমাৰজ্জনং যোনিসোমনসিকারো নাম. ৰুত্তপটিপক্খৰসেন অযোনিসোমনসিকারোপি দট্ঠব্বো. যং পন নিরনুসযসন্তানসমঙ্গিস্স কিরিযচিত্তানং পচ্চযভাৰেন উপ্পন্নং, তং ঠপেত্ৰা নিরৰজ্জধম্মং সাৰজ্জধম্মস্স কস্সচি পচ্চযভাৰানুপগমনতো যোনিসোমনসিকারপক্খং ৰা ভজেয্য. খীণাসৰসন্তানগতত্তা যোনিসোঅযোনিসোভাৰমনপেক্খিত্ৰা আপাথগতারম্মণেসু উপ্পত্তিমত্তং ¶ ৰিনা ন কস্সচি কুসলাকুসলভাৰস্স পচ্চযো হোতীতি তদুভযৰসেন নৰত্তব্বত্তা অব্যাকতমনসিকারোতি ৰা সঙ্খং গচ্ছেয্যাতি.

সাৰজ্জানিট্ঠৰিপাকলক্খণমকুসলন্তি এত্থাপি ‘‘ৰজ্জা রাগাদযো, তে যস্স সন্তি, তং সাৰজ্জং, অনিট্ঠো ৰিপাকো যস্স, তং অনিট্ঠৰিপাক’’ন্তিআদিনা ৰুত্তনযানুসারেন পটিপক্খযোজনা দট্ঠব্বা. রসাদিতো পনেতং অনত্থজননরসং, সংকিলেসপচ্চুপট্ঠানং. অথ ৰা গারয্হভাৰতো সাৰজ্জলক্খণমেৰ, সংকিলেসভাৰরসং, অনিট্ঠৰিপাকপচ্চুপট্ঠানং, অযোনিসোমনসিকারপদট্ঠানং. ৰচনত্থতো পন ন কুসলন্তি অকুসলং, কুসলপটিপক্খন্তি অত্থো. পটিপক্খত্থে হি অযং অকারো, ন পন অঞ্ঞত্থে, নাপি অভাৰে. ইতরথা হি তিকং ন সিযা, দুকং, চতুক্কং ৰা আপজ্জেয্য. তথা হি যদি কুসলতো অঞ্ঞমকুসলং সিযা ¶ , তদা অব্যাকতস্সাপি ততো অঞ্ঞভাৰেন অকুসল-সদ্দসঙ্গহোতি কুসলাকুসলজাতিভেদতো দুৰিধন্তি দুকং ৰত্তব্বং. যদি চ কুসলাভাৰো অকুসলং, তেন ন কাচি জাতি গয্হতীতি কুসলাব্যাকতজাতিভেদতো দুকমেৰ ৰত্তব্বং. অথ সিযা ‘‘অভাৰোপি ৰিসুং গহেতব্বো’’তি, এৰং সতি তস্স জাতিযা অভাৰতো জাতি-সদ্দেন সহ সম্বন্ধো ন সিযা. ৰিজ্জমানস্স হি জাতি নাম হোতি. যথেৰ ৰা কুসলস্স অভাৰো, এৰং অব্যাকতস্সাপি অভাৰো অত্থীতি অনব্যাকতজাতিপি ৰত্তব্বাতি চতুক্কং আপজ্জেয্য. ন চেতমিট্ঠং কুসলাদিৰসেন তিৰিধজাতিযা এৰ ইচ্ছিতত্তা, পাল়িযঞ্চ ‘‘কুসলা ধম্মা অকুসলা ধম্মা অব্যাকতা ধম্মা’’তি তিকৰসেনেৰ ৰুত্তত্তা ‘‘কুসলপটিপক্খ’’ন্তি পন ৰুচ্চমানে মিত্তপটিপক্খো অমিত্তো ৰিয, লোভপটিপক্খো অলোভো ৰিয চ যং ধম্মজাতং কুসলস্স উজুৰিপচ্চনীকভূতং, তং অকুসলন্তি তস্স ৰসেন তিকং উপপন্নং হোতি, উজুৰিপচ্চনীকতা চস্স সাৰজ্জানিট্ঠৰিপাকত্তা, তেন পহাতব্বভাৰতো চ ৰেদিতব্বা, ন পন কুসলৰিনাসনতো. ন হি অকুসলেন কুসলং পহীযতি, মহাবলত্তা পন কুসলমেৰ তং পজহতি. কুসলঞ্হি মহাবলং, অকুসলং দুব্বলং. তেনেৰাহ ‘‘অবলা নং বলীযন্তি, মদ্দন্তেনং পরিস্সযা’’তি (সু. নি. ৭৭৬), তস্মা কুসলমেৰ যথাৰুত্তনযেন অকুসলস্স পহাযকং, নাকুসলং ইতরস্সাতি ৰেদিতব্বং.

তদুভয…পে… অব্যাকতন্তি যং ধম্মজাতং কুসলং ৰিয ন অনৰজ্জইট্ঠৰিপাকলক্খণং, নাপি অকুসলং ৰিয সাৰজ্জানিট্ঠৰিপাকলক্খণং, অথ খো অৰিপাকত্তা ¶ তদুভযৰিপরীতলক্খণং, তং অব্যাকতন্তি অত্থো. ননু চ ‘‘তদুভযৰিপরীতলক্খণ’’ন্তি ৰুত্তে সুখদুক্খৰেদনানং ৰিপরীতা উপেক্খাৰেদনা ¶ ৰিয ইট্ঠানিট্ঠৰিপাকানং ৰিপরীতো অঞ্ঞো কোচি ৰিপাকো যস্স অত্থি, তং অব্যাকতন্তি আপজ্জতীতি? নাপজ্জতি তথা অসম্ভৰতো. যথা হি আলোকন্ধকারানং ৰিপরীতো অঞ্ঞো কোচি নত্থি, এৰমিট্ঠানিট্ঠৰিপাকানং ৰিপরীতো ন কোচি ৰিপাকো অত্থীতি. অথ ৰা তং-সদ্দো ইধ ইট্ঠানিট্ঠৰিপাকনিরপেক্খং কুসলাকুসলমত্তমেৰ পচ্চামসতীতি কুসলাকুসলানং সৰিপাকত্তা তদুভযৰিপরীতলক্খণং, তং অৰিপাকলক্খণন্তি অত্থোতি অলমেত্থ অনুযোগেন. কুসলাকুসলভাৰেন ন ব্যাকতন্তি অব্যাকতং. কুসলাকুসলঞ্হি ৰত্ৰা অব্যাকতস্স ৰুত্তত্তা কুসলাকুসলভাৰেনেৰ অৰুত্তত্তাতি ৰিঞ্ঞাযতি, ন পকারন্তরেন. তথা অৰচনঞ্চ তস্স তদুভযৰিপরীতলক্খণত্তাযেৰ, ন পন অৰত্তব্বত্তামত্তেনাতি দট্ঠব্বং. অথ ৰা ৰি-সদ্দো ৰিরোধিৰচনো. আ-সদ্দো অভিমুখভাৰপ্পকাসনো, তস্মা অত্তনো পচ্চযেহি অঞ্ঞমঞ্ঞং ৰিরোধাভিমুখতং কতং লক্খণৰিরোধতো পহাযকপ্পহাতব্বভাৰতো ৰাতি ব্যাকতং, কুসলাকুসলং. ততো অঞ্ঞং অব্যাকতং. তঞ্হি লক্খণতো অঞ্ঞমঞ্ঞং কুসলাকুসলং ৰিয ন তস্স ৰিরুদ্ধং. ন হি অৰিপাকতং অনিট্ঠৰিপাকতা ৰিয, ইট্ঠৰিপাকতায ইট্ঠৰিপাকতা ৰিয চ অনিট্ঠৰিপাকতায ইট্ঠানিট্ঠৰিপাকতাহি ৰিরুজ্ঝতি, ন চাপি অব্যাকতং কুসলাকুসলেসু কিঞ্চি পজহতি, ন চ কেনচি পহাতব্বন্তি. ‘‘তদুভযৰিপরীতলক্খণমব্যাকত’’ন্তি ৰিঞ্ঞাযমানে অহোসি কম্মং, নাহোসি কম্মৰিপাকো, নত্থি কম্মৰিপাকো, ন ভৰিস্সতি কম্মৰিপাকোতি ইমিনা তিকেন সঙ্গহিতস্স গতিউপধিকালপ্পযোগৰিপত্তীহি অৰিপাকস্স দিট্ঠধম্মৰেদনীযাদিকম্মস্স ভাৰনাযপহাতব্বস্স অকুসলস্স চ অভিঞ্ঞাকুসলস্স চ ৰিপাকুপ্পাদনাভাৰতো ‘‘সিযা নু খো অব্যাকতভাৰো ৰা’’তি কদাচি কোচি চিন্তেয্যাতি তন্নিৰারণত্থমাহ ‘‘অৰিপাকারহং ৰা’’তি, ৰিপাকং ¶ দাতুং নারহতি তত্থ সামত্থিযাভাৰতোতি অৰিপাকারহং. ইদং ৰুত্তং হোতি – দিট্ঠধম্মৰেদনীযাদযো তাৰ পচ্চযৰেকল্লাদীহি কারণেহি অৰিপাকা, সচে পনেতে তব্বিদূরা অস্সু, তদা ৰিপাকদানে সমত্থতায ৰিপাকারহাযেৰ, তং পন ন তথা, অথ খো যেন কেনচি আকারেন ৰিপাকদানে অসমত্থতাযেৰ ৰিপাকারহং ন হোতি, তং অব্যাকতং নামাতি.

ইদানি এৰং তিকৰসেন নিদ্দিট্ঠেসু কুসলাদীসু পঠমং তাৰ কুসলচিত্তং ৰিভজন্তো ‘‘তত্থ কুসলচিত্ত’’ন্তিআদিনা তস্স গণনপরিচ্ছেদং দস্সেতি. একৰীসতিৰিধন্তি অট্ঠ কামাৰচরানি ¶ , পঞ্চ রূপাৰচরানি, চত্তারি অরূপাৰচরানি, চত্তারি লোকুত্তরানীতি এৰং সঙ্খেপতো একৰীসতিৰিধং. ভূমিতো চতুব্বিধন্তি কামরূপারূপলোকুত্তরভূমিসঙ্খাতানং চতুন্নং ভূমীনং ৰসেন তত্থ পৰত্তমানং চিত্তম্পি চতুব্বিধং হোতি. তত্থ ভৰন্তি এত্থাতি ভূমি, ঠানং, অৰত্থা চ. অৰত্থাপি হি অৰত্থৰন্তানং পৰত্তিট্ঠানং ৰিয গয্হতি. এৰঞ্হি নেসং সুখগ্গহণং হোতি. অৰত্থাতি চেত্থ ধম্মানং কামতণ্হাদীহি পরিচ্ছিন্নাপরিচ্ছিন্নভাৰো. তত্থ পুরিমা তিস্সো ভূমিযো উভযৰসেন ৰেদিতব্বা, ইতরা অৰত্থাৰসেনেৰ. ন হি লোকুত্তরধম্মানং কামভৰাদিতো অঞ্ঞং ঠানমুপলব্ভতীতি.

অঞ্ঞত্থ পৰত্তমানস্সাপি ৰক্খমাননযেন কামভূমিপরিযাপন্নত্তা ভূমিতো একৰিধন্তি. সৰত্থুকাৰত্থুকভেদতোতি চক্খাদীনি পঞ্চ, হদযঞ্চাতি ছ ৰত্থূনি. কুসলস্স পন চক্খাদিনিস্সিতত্তাভাৰতো হদযৰত্থু ইধ ৰত্থূতি অধিপ্পেতং. তেন সহিতং একন্তেন তন্নিস্সিতপ্পৰত্তিতোতি সৰত্থুকং, কামরূপধাতুযং পৰত্তমানৰিঞ্ঞাণং. তত্থ হি অরূপস্স রূপপটিবন্ধপ্পৰত্তি, অরূপধাতুযং পন রূপাভাৰতো ৰত্থুৰিরহিতমেৰ পৰত্ততীতি তত্থ পৰত্তমানং ¶ অৰত্থুকং. হীন…পে… তিৰিধন্তি এত্থ পচ্চযতো, ফলতো চ মজ্ঝিমপণীতেহি নিহীনং, তেসং ৰা গুণেহি পরিহীনন্তি হীনং, অত্তনো পচ্চযেহি পধানভাৰং নীতন্তি পণীতং, উভিন্নং ৰেমজ্ঝে ভৰং মজ্ঝিমং. তত্থ হীনেন ছন্দেন চিত্তেন ৰীরিযেন ৰীমংসায ৰা পৰত্তিতং হীনং, মজ্ঝিমেহি ছন্দাদীহি পৰত্তিতং মজ্ঝিমং, পণীতেহি পণীতং. ছন্দাদীনং পন হীনাদিভাৰো অধিমুত্তিৰসেন দট্ঠব্বো. হীনাধিমুত্তিৰসেন হি নেসং হীনতা, পণীতাধিমুত্তিৰসেন পণীততা, তদুভযৰেমজ্ঝৰসেন মজ্ঝিমতা. যসকামতায ৰা কতং কুসলং হীনং, পুঞ্ঞফলকামতায মজ্ঝিমং, ‘‘পুঞ্ঞং নামেতং সাধূহি কত্তব্বমেৰা’’তি এৰং অরিযভাৰং নিস্সায কতং পণীতং. ‘‘অহমস্মি দানপতি, ইমে পনঞ্ঞে দানদাসাদযো’’তিআদিনা অত্তুক্কংসনপরৰম্ভনাহি উপক্কিলিট্ঠং পৰত্তিতং ৰা হীনং, তথা অনুপক্কিলিট্ঠং মজ্ঝিমং, মগ্গফলপদট্ঠানং পণীতং. ভৰভোগসম্পত্তিনিমিত্তং ৰা কতং হীনং, সাৰকপচ্চেকবোধিপারমিতাৰসেন অত্তনো ৰিমোক্খত্থায কতং মজ্ঝিমং, সম্মাসম্বোধিপারমিতাৰসেন সব্বেসং ৰিমোক্খত্থায কতং পণীতন্তি.

সোমনস্সু…পে… ভেদতোতি ভেদ-সদ্দো পচ্চেকং সম্বন্ধিতব্বো ‘‘সোমনস্সুপেক্খাভেদতো ঞাণভেদতো পযোগভেদতো’’তি. তত্থ পযোগভেদতোতি সঙ্খারভেদতোতি অত্থো. ননু চ সোমনস্সুপেক্খাভেদো ¶ তাৰ যুত্তো তেসং ভিন্নসভাৰত্তা. ঞাণপ্পযোগভেদো পন কথন্তি? ৰুচ্চতে – ঞাণপ্পযোগকতো ভেদো ঞাণপ্পযোগভেদো তেসং ভাৰাভাৰমুপাদায পৰত্তত্তা. ইদানি তমেৰ সোমনস্সুপেক্খাদিভেদং ৰিভাগেন দস্সেতুং ‘‘সেয্যথিদ’’ন্তি পুচ্ছিত্ৰা ‘‘সোমনস্সসহগত’’ন্তিআদিনা ৰিস্সজ্জেতি. তত্থ সেয্যথিদন্তি তং কতমং, তং কথন্তি ৰা অত্থো.

সোভনং ¶ মনো, সোভনং ৰা মনো এতস্সাতি সুমনো, তস্স ভাৰো সোমনস্সং, মানসিকসুখৰেদনাযেতং অধিৰচনং, সোমনস্সেন উপ্পাদতো যাৰ নিরোধা সহগতং পৰত্তং সংসট্ঠং সম্পযুত্তন্তি অত্থো. অথ ৰা সোমনস্সেন সহ একুপ্পাদাদিভাৰং গতন্তি সোমনস্সসহগতং. জানাতি যথাসভাৰং পটিৰিজ্ঝতীতি ঞাণং, তেন সমং একুপ্পাদাদীহি পকারেহি যুত্তন্তি ঞাণসম্পযুত্তং. নাস্স সঙ্খারো অত্থীতি অসঙ্খারং, অসঙ্খারমেৰ অসঙ্খারিকং. সহ সঙ্খারেন পৰত্তমানং সসঙ্খারং, তদেৰ সসঙ্খারিকং. সঙ্খারোতি চেত্থ অত্তনো, পরস্স ৰা পুব্বপ্পযোগো ‘‘সঙ্খরোতি তিক্খভাৰসঙ্খাতেন মণ্ডনৰিসেসেন সজ্জেতি, সঙ্খরীযতি ৰা সজ্জীযতি চিত্তং এতেনা’’তি কত্ৰা. তত্থ দানাদিপুঞ্ঞকরণকালে মচ্ছেরমলথিনমিদ্ধাদীহি উপক্কিলেসেহি সংসীদমানে চিত্তে উপক্কিলেসৰূপসমৰসেন, চিত্তস্স চ উস্সাহজননৰসেন তীসু দ্ৰারেসু পৰত্তো সম্মাৰাযামো অত্তনো পযোগো নাম. কুসলকরণে নিরুস্সাহস্স পন ‘‘অম্ভো, সপ্পুরিস, কুসলকরণং নাম পণ্ডিতেহি আসেৰিতমগ্গো, তত্থ তযাপি পটিপজ্জিতুং ৰট্টতি, তস্মা দানং দেহি, সীলং রক্খ, তঞ্হি তে অত্থায হিতায সুখায ভৰিস্সতী’’তিআদিনা কুসলকরণত্থায উস্সাহজননৰসেন পরেসং কাযৰচীদ্ৰারেসু পৰত্তা আণত্তি পরপ্পযোগো নাম. তেসু পন পুরিমো পুব্বভাগপ্পৰত্তচিত্তসন্তানে, পচ্ছিমো পরেসং চিত্তসন্তানেযেৰ সম্ভৰতীতি তন্নিব্বত্তিতো চিত্তস্স তিক্খভাৰসঙ্খাতো ৰিসেসো ইধ উপচারতো সঙ্খারোতি ৰেদিতব্বো. তেনাহু আচরিযা –

‘‘পুব্বপ্পযোগসম্ভূতো, ৰিসেসো চিত্তসম্ভৰী;

সঙ্খারো ইতি সঙ্খার-সভাৰঞ্ঞূহি কিত্তিতো’’তি.

অথ ¶ ৰা ‘‘সসঙ্খারিকমসঙ্খারিক’’ন্তি চ এতং কেৰলং সঙ্খারস্স ভাৰাভাৰমত্তাপেক্খায ৰুত্তং, ন তস্স সহপ্পৰত্তিসব্ভাৰাভাৰতোতি ভিন্নসন্তানপ্পৰত্তিনোপি সঙ্খারস্স ইদমত্থিতায তংৰসেন নিব্বত্তং চিত্তং সঙ্খারো অস্স অত্থীতি সসঙ্খারিকং সহ-সদ্দস্স ৰিজ্জমানত্থপরিদীপনতো ¶ ‘‘সলোমকো সপক্খকো’’তিআদীসু ৰিয. তব্বিপরীতং পন তদভাৰতো যথাৰুত্তৰসেনেৰ অসঙ্খারিকং. অথ ৰা সঙ্খরণং, সঙ্খরীযতি ৰা এতেন আগন্তুকসম্ভূতেন চিত্তসংসীদনসভাৰাপনযনৰসেনেৰ সজ্জীযতি, সঙ্খরোতি ৰা তং যথাৰুত্তৰসেনেৰাতি সঙ্খারোতি উজুকমেৰ পুব্বপ্পযোগজনিতো তিক্খভাৰো ৰুচ্চতি, তদভাৰতো অসঙ্খারিকং, সভাৰতিক্খন্তি অত্থো. তংসহগতায সসঙ্খারিকং, অথ ৰা মচ্ছেরমলাদীহি সঙ্খরীযতীতি সঙ্খারো, চিত্তস্স সংসীদনসভাৰো, সো যস্স নত্থীতি অসঙ্খারিকং, ইতরং সসঙ্খারিকং. পণীতউতুভোজনাদিকো ৰা বলৰপচ্চযো সঙ্খারো ‘‘সঙ্খরোতি চিত্তং তিক্খভাৰেন, সঙ্খরীযতি ৰা তং এতেনা’’তি কত্ৰা. অ-কারস্স ৰুড্ঢত্থৰুত্তিতায ৰুড্ঢিপ্পত্তো সঙ্খারো অস্সাতি অসঙ্খারিকং, বলৰপচ্চযৰন্তন্তি অত্থো. ৰুড্ঢিপরিদীপকেন পন অ-কারেন অৰিসেসিতত্তা সসঙ্খারিকং সপ্পচ্চযং দুব্বলপচ্চযন্তি অধিপ্পাযো. ঞাণেন ৰিপ্পযুত্তং ৰিরহিতন্তি ঞাণৰিপ্পযুত্তং.

উপেক্খতীতি উপেক্খা, ৰেদিযমানাপি আরম্মণং অজ্ঝুপেক্খতি, মজ্ঝত্তাকারসণ্ঠিতিযাতি অত্থো. অথ ৰা ইট্ঠে, অনিট্ঠে চ আরম্মণে পক্খপাতাভাৰেন উপপত্তিতো যুত্তিতো ইক্খতি অনুভৰতীতি উপেক্খা. অথ ৰা উপেতা সুখদুক্খানং অৰিরুদ্ধা ইক্খা অনুভৰনন্তি উপেক্খা. অৰিরুদ্ধত্তাযেৰ হেসা তেসং অনন্তরম্পি পৰত্ততি. সুখদুক্খৰেদনা পন ৰিসুং ৰিসুং ৰিরুদ্ধসভাৰত্তা নাঞ্ঞমঞ্ঞং অনন্তরং পৰত্তন্তি ¶ . তেনেৰ হি পট্ঠানে সোমনস্সস্স অনন্তরং দোমনস্সস্স, দোমনস্সস্স অনন্তরং সোমনস্সস্স চ উপ্পত্তি পটিসিদ্ধা. অযঞ্চ অত্থো লোভসহগতচিত্তসম্পযুত্তৰেদনাযপি লব্ভতি, পুরিমা পন দ্ৰে ন তথা. ন হি লোভসহগতাদীনং মজ্ঝত্তাকারেন অজ্ঝুপেক্খনং, উপপত্তিতো ইক্খনং ৰা অত্থীতি. উপেক্খাসহগতন্তি সব্বং হেট্ঠা ৰুত্তনযমেৰ.

ননু চ অঞ্ঞেপি ফস্সাদযো সম্পযুত্তধম্মা অত্থীতি সোমনস্সাদীনং ৰসেনেৰ পন অট্ঠৰিধতা কস্মা গহিতাতি? ভেদকরভাৰতো. ফস্সাদীনঞ্হি সব্বচিত্তসাধারণত্তা, সদ্ধাদীনঞ্চ সব্বকুসলসাধারণত্তা ন তেহি চিত্তস্স ৰিভাগো, সোমনস্সাদযো পন কত্থচি চিত্তে হোন্তি, কত্থচি ন হোন্তীতি পাকটোৰ তেহি চিত্তস্স ৰিভাগোতি. কস্মা পনেতে কত্থচি চিত্তে হোন্তি, কত্থচি ন হোন্তীতি? কারণস্স সন্নিহিতাসন্নিহিতভাৰতো. কিং পন নেসং কারণন্তি? ৰুচ্চতে – তত্থ সোমনস্সসহগতভাৰো তাৰ আরম্মণৰসেন হোতি. ইট্ঠারম্মণস্মিঞ্হি ¶ সোমনস্সসহগতচিত্তমুপ্পজ্জতি. ননু চ ইট্ঠারম্মণং লোভস্স ৰত্থু রজ্জনীযত্তাতি কথং তত্থ কুসলং উপ্পজ্জতীতি? নযিদমেকন্তিকং ইট্ঠেপি আরম্মণে নিযমিতাদিৰসেন কুসলস্স উপ্পজ্জনতো. যস্স হি ‘‘কুসলমেৰ মযা কত্তব্ব’’ন্তি কুসলকরণেযেৰ চিত্তং নিযমিতং হোতি, অকুসলপ্পৰত্তিতোৰ নিৰত্তেত্ৰা কুসলকরণেযেৰ পরিণামিতং, অভিণ্হকরণেন চ কুসলং সমুদাচিণ্ণং, পটিরূপদেসৰাসসদ্ধম্মস্সৰনসপ্পুরিসূপনিস্সযপুব্বেকতপুঞ্ঞতাসঙ্খাতচতুচক্কূপনিস্সযৰসেন, যোনিসো চ আভোগো পৰত্ততি, তস্স ইট্ঠেপি আরম্মণে অলোভসম্পযুত্তমেৰ চিত্তমুপ্পজ্জতি, ন লোভসম্পযুত্তং. হোতি চেত্থ –

‘‘নিযামপরিণামেহি ¶ , সমুদাচিণ্ণতায চ;

ঞাণপুব্বঙ্গমাভোগা, ইট্ঠেপি কুসলং সিযা’’তি.

অপিচ সদ্ধাবহুলতাদীহি চ কারণেহি চিত্তস্স সোমনস্সসহগততা ৰেদিতব্বা. অস্সদ্ধানং, হি মিচ্ছাদিট্ঠিকানঞ্চ একন্তমিট্ঠারম্মণভূতং তথাগতরূপম্পি দিস্ৰা সোমনস্সং ন উপ্পজ্জতি. যে চ কুসলপ্পৰত্তিযং আনিসংসং ন পস্সন্তি, তেসং পরেহি উস্সাহিতানং কুসলং করোন্তানম্পি সোমনস্সং ন উপ্পজ্জতি, তস্মা সদ্ধাবহুলতা ৰিসুদ্ধিদিট্ঠিতা আনিসংসদস্সাৰিতাতি ইমেহিপি কারণেহি চিত্তস্স সোমনস্সসহগততা হোতি.

অপিচ যে তে একাদস ধম্মা পীতিসম্বোজ্ঝঙ্গস্স উপ্পাদায সংৰত্তন্তি. সেয্যথিদং – বুদ্ধানুস্সতি ধম্মানুস্সতি সংঘানুস্সতি সীলানুস্সতি চাগানুস্সতি দেৰতানুস্সতি উপসমানুস্সতি লূখপুগ্গলপরিৰজ্জনং সিনিদ্ধপুগ্গলসেৰনা পসাদনীযসুত্তন্তপচ্চৰেক্খণা তদধিমুত্ততাতি ইমেহিপি কারণেহি চিত্তস্স সোমনস্সসহগতভাৰো ৰেদিতব্বো. বুদ্ধাদিগুণে অনুস্সরন্তস্স হি যাৰ উপচারুপ্পাদা সকলসরীরং ফরমানা পীতি উপ্পজ্জতি. তথা দীঘরত্তং অক্খণ্ডতাদিৰসেন অত্তনা রক্খিতং চতুপারিসুদ্ধিসীলং পচ্চৰেক্খন্তস্স, গিহিনো দসসীলং পঞ্চসীলং পচ্চৰেক্খন্তস্স, দুব্ভিক্খভযাদীসু পণীতং ভোজনং সব্রহ্মচারীনং দত্ৰা ‘‘এৰংনাম দানং অদাসি’’ন্তি অত্তনোচাগং পচ্চৰেক্খন্তস্স, গিহিনোপি তথারূপে কালে সীলৰন্তানং দিন্নদানং পচ্চৰেক্খন্তস্স, যেহি গুণেহি সমন্নাগতা দেৰা দেৰত্তং গতা, তথারূপানং গুণানং অত্তনি অত্থিতং পচ্চৰেক্খন্তস্স, সমথৰিপস্সনাহি ৰিক্খম্ভিতকিলেসে সট্ঠিপি ¶ সত্ততিপি ৰস্সানি অসমুদাচরন্তে দিস্ৰা ‘‘অহো ময্হং কিলেসা ন সমুদাচরন্তী’’তি চিন্তেন্তস্স, চেতিযদস্সনথেরদস্সনেসু অসক্কচ্চকিরিযায সংসুচিতলূখভাৰেন বুদ্ধাদীসু পসাদসিনেহাভাৰেন গদ্রভপিট্ঠে রজসদিসে লূখপুগ্গলে ¶ পরিৰজ্জন্তস্স, বুদ্ধাদীসু পসাদবহুলে মুদুচিত্তে সিনিদ্ধপুগ্গলে পটিসেৰন্তস্স, রতনত্তযগুণপরিদীপকে পসাদনীযসুত্তন্তে পচ্চৰেক্খন্তস্স, ঠাননিসজ্জাদীসুপি পীতিউপ্পাদনত্থং তন্নিন্নতাদিৰসেন পৰত্তেন্তস্স যেভুয্যেন পীতি উপ্পজ্জতি. পীতিযা চ সোমনস্সেন সহ অৰিনাভাৰতো তদুপ্পত্তিযা তস্সাপি উপ্পত্তি নিযতাতি এৰং পীতিকারণানিপি সোমনস্সকারণানীতি দট্ঠব্বানি. কিঞ্চ – অগম্ভীরপকতিতা, সোমনস্সপটিসন্ধিকতাতি ইমেহি দ্ৰীহি কারণেহি সোমনস্সসহগততা হোতি. যো হি অগম্ভীরপকতিকো হোতি, অপ্পমত্তকেপি হিতোপকরণে তুস্সতি, যো চ সোমনস্সপটিসন্ধিকো অপ্পসন্নেসু আরম্মণেসুপি অপ্পটিক্কূলদস্সাৰী, তস্স যেভুয্যেন সোমনস্সসহগতচিত্তং উপ্পজ্জতি. যথাৰুত্তানং পন সোমনস্সকারণানমভাৰেন মজ্ঝত্তারম্মণতায চ উপেক্খাসহগততা ৰেদিতব্বা.

ঞাণসম্পযুত্তস্স পন কম্মতো উপপত্তিতো ইন্দ্রিযপরিপাকতো কিলেসদূরীভাৰতোতি ইমেহি কারণেহি হোতি. যো হি পরেসং হিতজ্ঝাসযেন ধম্মং দেসেতি হীনুক্কট্ঠাদীনি চ নল়কারমুদ্দাগণনাদীনি সিপ্পাযতনানি, ৰড্ঢকীকসিৰাণিজ্জাদীনি চ কম্মাযতনানি, ৰিসহরণাদীনি চ ৰিজ্জাযতনানীতি এৰং নিরৰজ্জসিপ্পাযতনাদীনি সিক্খাপেতি, সযং ৰা সিক্খতি, ধম্মকথিকস্স সক্কারং কত্ৰা ধম্মং কথাপেতি, ‘‘আযতিং পঞ্ঞৰা ভৰিস্সামী’’তি পত্থনং পট্ঠপেত্ৰা নানপ্পকারং পুঞ্ঞকম্মং করোতি, তস্সেৰং নানপ্পকারং পঞ্ঞাসংৰত্তনিককম্মং সম্পাদেন্তস্স তং কম্মং উপনিস্সায উপ্পজ্জমানং কুসলং ঞাণসম্পযুত্তং উপ্পজ্জতি. তথা অব্যাপজ্জে লোকে উপ্পন্নস্স উপ্পজ্জমানং কুসলং ঞাণসম্পযুত্তং হোতি. ৰুত্তঞ্হেতং –

‘‘তস্স ¶ তত্থ সুখিনো ধম্মপদানি পিলৰন্তি, দন্ধো, ভিক্খৰে, সতুপ্পাদো, অথ সো সত্তো খিপ্পমেৰ ৰিসেসভাগী হোতী’’তি (অ. নি. ৪.১৯১).

তথা পঞ্ঞাদসকং সম্পত্তস্স ইন্দ্রিযপরিপাকং নিস্সায উপ্পজ্জমানং কুসলং ঞাণসম্পযুত্তং হোতি. যেন পন সমথৰিপস্সনাভাৰনাহি কিলেসা ৰিক্খম্ভিতা, তস্স কিলেসদূরীভাৰং নিস্সায উপ্পজ্জমানং চিত্তং ঞাণসম্পযুত্তং উপ্পজ্জতি. যথাহ –

‘‘যোগা ¶ ৰে জাযতে ভূরি, অযোগা ভূরিসঙ্খযো’’তি. (ধ. প. ২৮২).

অপিচ যে তে ধম্মা ধম্মৰিচযসম্বোজ্ঝঙ্গস্স উপ্পাদায সংৰত্তন্তি. সেয্যথিদং – পরিপুচ্ছকতা ৰত্থুৰিসদকিরিযা ইন্দ্রিযসমত্তপটিপাদনা দুপ্পঞ্ঞপুগ্গলপরিৰজ্জনা পঞ্ঞৰন্তপুগ্গলসেৰনা গম্ভীরঞাণচরিযপচ্চৰেক্খণা তদধিমুত্ততাতি ইমেহি কারণেহি ঞাণসম্পযুত্তভাৰো হোতি. তথা হি যো পঞ্ঞৰন্তে উপসঙ্কম্ম খন্ধধাতুআযতনইন্দ্রিযবলবোজ্ঝঙ্গমগ্গঙ্গঝানঙ্গসমথৰিপস্সনাদীনং পরিপুচ্ছাবহুলো হোতি, তস্স তংৰসেন উপ্পন্নং সুতমযঞাণং আদিং কত্ৰা উপ্পজ্জমানং চিত্তং ঞাণসহগতং হোতি. যেন পন নখকেসচীৰরসেনাসনাদীনি অজ্ঝত্তিকবাহিরৰত্থূনি পুব্বে অৰিসদানি ছেদনমলহরণাদিনা ৰিসদানি কতানি, তস্সেৰং ৰিসদৰত্থুকস্স উপ্পন্নেসু চিত্তচেতসিকেসু ৰিসদং ঞাণং হোতি পরিসুদ্ধানি দীপকপল্লকাদীনি নিস্সায উপ্পন্নদীপসিখায ওভাসো ৰিয. যস্স চ সদ্ধিন্দ্রিযাদীসু অঞ্ঞতরং বলৰং হোতি, ইতরানি মন্দানি, ততো তানি সকসককিচ্চং কাতুং ন সক্কোন্তি, তস্মা সো তস্স বোজ্ঝঙ্গৰিভঙ্গে আগতনযেন তেন তেন আকারেন সমত্তং পটিপাদেতি, তস্সেৰং ইন্দ্রিযানং সমত্তং পটিপাদেন্তস্স ৰিপস্সনাঞাণাদীনং ৰসেন ¶ চিত্তং ঞাণসহগতং হোতি. যো পন দুপ্পঞ্ঞপুগ্গলে পরিৰজ্জেতি, পঞ্ঞৰন্তপুগ্গলে ৰা পযিরুপাসতি, খন্ধাদীসু ওগাল়্হং ভগৰতো গম্ভীরঞাণচরিযং ৰা পচ্চৰেক্খতি, ঠাননিসজ্জাদীসু তদধিমুত্তচিত্তো ৰা ৰিহরতি, ইমেসম্পি উপ্পজ্জমানং কুসলং ঞাণসম্পযুত্তং হোতি. অপিচ বুদ্ধাদিগুণানুস্সরণেনপি চিত্তং ঞাণসহগতং হোতি. যথাহ –

‘‘যস্মিং, মহানাম, সমযে অরিযসাৰকো তথাগতং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি, ন দোস…পে… ন মোহপরিযুট্ঠিতং চিত্তং হোতি, উজুগতমেৰস্স তস্মিং সমযে চিত্তং হোতি তথাগতং আরব্ভ. উজুগতচিত্তো খো পন, মহানাম, অরিযসাৰকো লভতি অত্থৰেদং, লভতি ধম্মৰেদং, লভতি ধম্মূপসংহিতং পামোজ্জং, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদেতি, সুখিনো চিত্তং সমাধিযতি, সমাহিতো যথাভূতং পজানাতী’’তিআদি (অ. নি. ৬.১০; ১১.১১).

এৰং বুদ্ধানুস্সতিআদযোপি রাগাদিমলৰিসোধনেন ঞাণুপ্পত্তিহেতুকাযেৰাতি দট্ঠব্বং. কিঞ্চ ¶ – তিহেতুকপটিসন্ধিকতা ঞাণুপ্পত্তিকারণং. পটিসন্ধিপঞ্ঞা হি আদিতো পট্ঠায ভৰঙ্গসন্ততিৰসেন বহুলং পৰত্তমানা সন্তানপরিভাৰনেন ঞাণুপ্পত্তিযা সৰিসেসউপনিস্সযো হোতি. অসঙ্খারিকত্তং পন সপ্পাযউতুভোজনআৰাসাদিপচ্চযেহি হোতীতি. হোন্তি চেত্থ –

‘‘ইট্ঠারম্মণতা সদ্ধাবাহুল্যং দিট্ঠিসুদ্ধি চ;

ফলদস্সাৰিতা চেৰ, পীতিবোজ্ঝঙ্গহেতুযো.

‘‘একাদস ¶ তথা ধম্মা, অগম্ভীরসভাৰতা;

সোমনস্সযুত্তা সন্ধি, ইচ্চেতে সুখহেতুযো.

‘‘অভাৰো সুখহেতূনং, মজ্ঝত্তারম্মণন্তি চ;

উপেক্খুপ্পত্তিহেতু চ, এৰং ঞেয্যা ৰিভাৰিনা.

‘‘কম্মূপপত্তিতো চেৰ, তথা ইন্দ্রিযপাকতো;

কিলেসূপসমা ধম্ম-ৰিচযস্স চ হেতুহি.

‘‘সত্তধম্মেহি বুদ্ধাদি-গুণানুস্সরণেন চ;

সপ্পঞ্ঞসন্ধিতো চেৰ, চিত্তং ঞাণযুতং সিযা.

‘‘উতুভোজনআৰাস-সপ্পাযাদীহি হেতুহি;

অসঙ্খারিকভাৰোপি, ৰিঞ্ঞাতব্বো ৰিভাৰিনা’’তি.

এৰং ৰেদনাঞাণপ্পযোগভেদতো অট্ঠৰিধং কামাৰচরচিত্তং নিদ্দিসিত্ৰা ইদানি তং নিগমেন্তো আহ ‘‘ইদং…পে… নামা’’তি.

১২. যেন পনত্থেন ইদং ‘‘কামাৰচর’’ন্তি ৰুচ্চতি, তং দানি দস্সেতুং ‘‘উদ্দানতো’’তিআদি আরদ্ধং. তত্থ উদ্দানতোতি উদ্দেসতো, সঙ্খেপতোতি অত্থো. কিঞ্চাপি অৰসিট্ঠকিলেসাদযো ৰিয কিলেসকামোপি অস্সাদেতব্বতায ৰত্থুকামে সঙ্গহিতো ঞাণং ৰিয ঞেয্যেতি ¶ সঙ্খেপতো একোযেৰ কামো সিযা, তথাপি কিলেসকামো ৰত্থুকামভাৰং গচ্ছন্তো কামনীযট্ঠেন গচ্ছতি, ন কামনৰসেন. কামনৰসেন চ পন কিলেসকামোৰ হোতি, ন পন ৰত্থুকামোতি আহ ‘‘ক্লেসৰত্থুৰসা’’তিআদি. কো পনেত্থ ৰত্থুকামো, কো কিলেসকামোতি চোদনং মনসি নিধায ‘‘ছন্দো কামো, রাগো কামো, ছন্দরাগো কামো, সঙ্কপ্পো কামো, রাগো কামো, সঙ্কপ্পরাগো কামো’’তি (মহানি. ১) এৰং নিদ্দেসপাল়িযং আগতা নিদ্দিট্ঠা ¶ কামতণ্হাৰ ইধ কিলেসকামো. ৰত্থুকামোতি চ ‘‘মনাপিকা রূপা…পে… মনাপিকা ফোট্ঠব্বা…পে… সব্বেপি কামাৰচরা ধম্মা…পে… সব্বেপি রূপাৰচরা…পে… সব্বেপি অরূপাৰচরা…পে… কামা’’তি (মহানি. ১) তত্থেৰ নিদ্দিট্ঠা সৰিঞ্ঞাণাৰিঞ্ঞাণপ্পভেদা তেভূমকধম্মাতি দস্সেন্তো আহ ‘‘কিলেসো…পে… ৰট্টক’’ন্তি. ‘‘ছন্দরাগোৰা’’তি অৰধারণেন কিলেসভাৰেন নিরুল়্হেসু লোভদোসমোহাদীসু দসসু দোসমোহাদযো নৰ কিলেসে পটিক্খিপতি. কামরূপারূপতণ্হায ৰত্থু পতিট্ঠানং, কারণভূতন্তি ৰা ৰত্থু.

১৩. কথং পন কিলেসকামো নাম, কথঞ্চ ৰত্থুকামোতি আহ ‘‘কিলেসকামো’’তিআদি. কামেতীতি ৰত্থুকামং পত্থেতি. কামীযতীতি কিলেসকামেন পত্থীযতি. ইতি-সদ্দো ‘‘তস্মা’’তি ইমস্স অত্থে. চ-সদ্দো এৰ-কারত্থে, তেন যস্মা কিলেসকামো কামেতীতি কামো, ৰত্থুকামো চ কামীযতীতি, তস্মা এৰ কিলেসকামো, ৰত্থুকামো চাতি দুৰিধোপি এস কামো কারকদ্ৰযে কত্তরি, কম্মনি চ সিজ্ঝতি, কত্তুভাৰং, কম্মভাৰঞ্চ পচ্চনুভোতীতি অত্থো. অথ ৰা দুৰিধোতি দ্ৰিন্নং কামানং ৰাচকতো দুৰিধো. ‘‘কামো’’তি অযং সদ্দো কারকদ্ৰযে সিজ্ঝতি যথাৰুত্তকারকযুগল়ে নিপ্ফজ্জতি, কত্তরি, কম্মনি চ ‘‘কামো’’তি পদসম্ভৰো হোতীতি অত্থো. ৰো-কারো পন নিপাতমত্তং ‘‘এৰং ৰো কালামা’’তিআদীসু (অ. নি. ৩.৬৬) ৰিয. অথ ৰা ৰোকারকদ্ৰযেতি খন্ধদ্ৰযেতি অত্থো. কিলেসকামো হি সঙ্খারসভাৰত্তা সঙ্খারক্খন্ধে, ৰত্থুকামো চ ৰক্খমাননযেন পঞ্চকামগুণভূতো রূপসভাৰত্তা রূপক্খন্ধেতি এৰং দুৰিধোপেস কামো খন্ধদ্ৰযে সিজ্ঝতি নিপ্ফজ্জতি, অন্তোভাৰং গচ্ছতীতি.

১৪. সম্পজ্জনানি ¶ সম্পত্তিযো, তাসং ৰসেন ৰিসযৰিসযীভাৰেন অঞ্ঞমঞ্ঞং সমোসরণৰসেন, সম্পাপুণনৰসেনাতি অত্থো. ইমিনা পন ইদং দীপেতি – যত্থ দুৰিধোপি কামো ৰিসযৰিসযীভাৰেন সহিতো পৰত্ততি, সোযেৰ একাদসৰিধো পদেসো কামাৰচরসঞ্ঞিতো ¶ . যত্থ পন রূপারূপধাতুযং কেৰলং ৰত্থুকামোৰ পৰত্ততি, ন সো পদেসো কামাৰচরো নামাতি. ননু চ দুৰিধোপি সহিতো রূপারূপধাতূসু পৰত্ততি, রূপারূপাৰচরধম্মানং ৰত্থুকামত্তা, তদারম্মণভূতানঞ্চ রূপারূপতণ্হানং তংযোগেন কিলেসকামভাৰসিদ্ধিতোতি? নযিদমেৰং ওরম্ভাগিযভূতস্স বহলকিলেসস্সেৰ কামরাগস্স ইধ কিলেসকামভাৰেন অধিপ্পেতত্তা. ‘‘উদ্দানতো দুৰে কামা’’তি সব্বে কামে উদ্দিসিত্ৰাপি হি ‘‘পদেসো চতুপাযান’’ন্তিআদিনা ৰিসযনিযমনেন ‘‘দুৰিধোপি অয’’ন্তি এত্থ কামেকদেসভূতো নীৰরণাৰত্থায কথিতো কামরাগো কিলেসকামভাৰেন, তব্বত্থুকাযেৰ ধম্মা ৰত্থুকামভাৰেন গহিতা, ন রূপারূপতণ্হা, তব্বত্থুকধম্মা চাতি ঞাপীযতি. এৰঞ্চ কত্ৰা উপরি ৰক্খমানা সসত্থাৰচরূপমা উপপন্না হোতি, যথাৰুত্তানমেৰ কামানং ইধ অধিপ্পেতত্তা রূপারূপধাতূসু ৰিমানকপ্পরুক্খৰত্থালঙ্কারপরিত্তকুসলাদিভেদেসু কামাৰচরধম্মেসু পৰত্তো ছন্দরাগো কিলেসকামো নাম ন হোতি, ন চ তব্বত্থুভূতং ৰিমানকপ্পরুক্খাদিপরিত্তধম্মজাতং ৰত্থুকামো নামাতি সিদ্ধং. তেনেৰাহ ‘‘কামো ৰা কামসঞ্ঞা ৰা ব্রহ্মলোকে ন ৰিজ্জতী’’তি. কামাৰচরসত্তসন্তানগততণ্হায ৰিসযভাৰে সতি পন তংযোগেন রূপারূপধাতূসুপি পৰত্তমানো পরিত্তধম্মো ৰত্থুকামোযেৰাতি ৰেদিতব্বং. অথ ৰা নিদ্দেসে আগতনযেন নিরৰসেসো কিলেসকামো কামতণ্হাভৰতণ্হাৰিভৰতণ্হানিরোধতণ্হাপভেদো ইধ পৰত্ততি. ৰত্থুকামেসুপি ¶ অপ্পকং রূপারূপৰিপাকমত্তং ঠপেত্ৰা সব্বোযেৰ ইধ পৰত্ততীতি অনৰসেসপ্পৰত্তিং সন্ধায ‘‘কামোযং দুৰিধোপি চা’’তি ৰুত্তং. কিঞ্চাপি এৰং ৰুত্তং, তেসু পন বহলকিলেসকামভূতো বহলকামরাগো চ তব্বত্থুকা পঞ্চ কামগুণা চ ইধ গহিতাতি দস্সনত্থং ‘‘সম্পত্তীনং ৰসেনা’’তি ৰুত্তং. সম্পজ্জনৰসেন, সমিজ্ঝনৰসেনাতি অত্থো. অৰচরতীতি পৰত্ততি. ইতি-সদ্দো হেতুম্হি, যস্মা দুৰিধোপি অযং কামো অৰচরতি, তস্মা কামো এত্থ অৰচরতীতি কামাৰচরসঞ্ঞিতোতি অত্থো.

১৫. সগ্গমোক্খহেতুভূতা পুঞ্ঞসম্মতা অযা যেভুয্যেন অপেতাতি অপাযা. নিরযাদিৰসেন চত্তারো অপাযা চতুপাযা. ছন্নন্তি চাতুমহারাজিকতাৰতিংসযামাতুসিতানিম্মানরতিপরনিম্মিতৰসৰত্তিসঙ্খাতানং ছন্নং দেৰলোকানং. মেরুপাদৰাসিনো পন অসুরা তাৰতিংসেসুযেৰ সঙ্গয্হন্তীতি ন তেহি সদ্ধিং সত্তন্নন্তি ৰুত্তং. মনসো উস্সন্নতায মনুস্সা, সতিসূরভাৰব্রহ্মচরিযযোগ্যতাদিগুণৰসেন উপচিতমানসতায উক্কট্ঠগুণচিত্ততাযাতি অত্থো, তে পন নিপ্পরিযাযতো জম্বুদীপৰাসিনো ৰেদিতব্বা. যথাহ –

‘‘তীহি ¶ , ভিক্খৰে, ঠানেহি জম্বুদীপকা মনুস্সা উত্তরকুরুকে চ মনুস্সে অধিগ্গণ্হন্তি দেৰে চ তাৰতিংসে. কতমেহি তীহি? সূরা সতিমন্তো ইধ ব্রহ্মচরিযৰাসো’’তি (অ. নি. ৯.২১).

তেহি পন সমানরূপাদিতায সদ্ধিং পরিত্তদীপৰাসীহি ইতরমহাদীপৰাসিনোপি ‘‘মনুস্সা’’ইচ্চেৰ পঞ্ঞাযিংসু. লোকিযা পন মনুনো অপচ্চভাৰেনেৰ ‘‘মনুস্সা’’তি ৰদন্তি ¶ . একাদসৰিধোতি চতুরাপাযেসু তিরচ্ছানপেত্তিৰিসযানং ৰিসুং পরিচ্ছিন্নস্স ওকাসস্স অভাৰেপি যত্থ তে অরঞ্ঞসমুদ্দপব্বতপাদাদিকে নিবদ্ধৰাসং ৰসন্তি, তাদিসস্স ঠানস্স গহিতত্তা একাদসৰিধো.

১৬. ননু চেত্থ অঞ্ঞেসম্পি ধম্মানং পৰত্তিসম্ভৰতো কামস্সেৰ অৰচরণৰসেন কথং নামলাভোতি আহ ‘‘অস্সাভিলক্খিতত্তা’’তিআদি. তত্থ অস্সাতি ইমস্স দুৰিধস্স কামস্স. অভিলক্খিতত্তাতি একাদসৰিধে পদেসে পাকটত্তা. অথ ৰা অস্সাতি করণত্থে সামিৰচনং, তস্মা অনেন দুৰিধেন কামেন একাদসৰিধস্স পদেসস্স অভিলক্খিতত্তা, পঞ্ঞাপিতত্তাতি অত্থো. অথ ৰা উপযোগত্থে সামিৰচনৰসেন অস্স একাদসৰিধস্স পদেসস্স তেন দুৰিধেন অভিলক্খিতত্তাতি অত্থো. সহ সত্থেহীতি সসত্থা, যত্থ তে অৰচরন্তি, সো সসত্থাৰচরো, পদেসো. সো ৰিয. যথা হি যস্মিং পদেসে সসত্থা পুরিসা অৰচরন্তি, সো ৰিজ্জমানেসুপি অঞ্ঞেসু দ্ৰিপদচতুপ্পদাদীসু অৰচরন্তেসু তেসং তত্থ পাকটত্তা, তেহি ৰা অভিলক্খিতত্তা ‘‘সসত্থাৰচরো’’ত্ৰেৰ পঞ্ঞাযতি, এৰং ৰিজ্জমানেসুপি অঞ্ঞেসু রূপাৰচরাদীসু অৰচরন্তেসু অভিলক্খণৰসেন অযং পদেসো ‘‘কামাৰচরো’’ত্ৰেৰ সঞ্ঞিতোতি. এস নযো রূপারূপাৰচরেসু.

১৭-৮. ননু চ চিত্তং কামাৰচরন্তি ৰুত্তং, যথাৰুত্তনযেন পন পদেসস্স গহিতত্তা কথং তত্থ অৰচরন্তং কামাৰচরং নামাতি আহ ‘‘স্ৰায’’ন্তিআদি. সো অযং কামাৰচরো ‘‘কামো’’তি সঞ্ঞিতোতি সম্বন্ধো. রূপভৰো রূপন্তি যথা রূপভৰো রূপং. অৰুত্তোপি হি যথাসদ্দো এৰং-সদ্দসন্নিট্ঠানতো লব্ভতি. যথা ‘‘রূপূপপত্তিযা মগ্গং ভাৰেতী’’তি এত্থ ‘‘রূপভৰূপপত্তিযা’’তি ৰত্তব্বে রূপভৰো ¶ ‘‘রূপ’’ন্তি সঞ্ঞিতোতি অযমেত্থ অত্থো. কথং পনেস এৰং সঞ্ঞিতোতি আহ ‘‘উত্তরস্সা’’তিআদি. অথ ৰা যথা উত্তরস্স পদস্স লোপং কত্ৰা ¶ উদীরিতো এস রূপভৰো ‘‘রূপ’’ন্তি সঞ্ঞিতো, এৰং স্ৰাযং কামাৰচরো কামোতি সম্বন্ধো. তস্মিং কামেতি তস্মিং উত্তরপদলোপৰসেন কামসঞ্ঞিতে পদেসে. ইদন্তি ইদং অট্ঠৰিধং চিত্তং. অধিকারৰসেন পন তস্স গহণেপি সব্বেসমেৰ পরিত্তচিত্তানমযমত্থো লব্ভতি সব্বেসম্পি কামে অৰচরণতো. সদাতি সব্বকালং, বাহুল্যেনাতি অধিপ্পাযো. ইমিনা পন ইদং দীপেতি – যথা সঙ্গামে যেভুয্যেন অৰচরন্তো ‘‘সঙ্গামাৰচরো’’তি লদ্ধনামো হত্থী অঞ্ঞত্থ অৰচরন্তোপি বাহুল্লপ্পৰত্তিৰসেন ‘‘সঙ্গামাৰচরো’’ত্ৰেৰ পঞ্ঞাযতি, এৰমিদং অঞ্ঞত্থ অৰচরন্তম্পি কামলোকে বাহুল্লৰুত্তিতো ‘‘কামাৰচর’’মিচ্চেৰ ৰুত্তন্তি. তেন পন ননু চেতং রূপারূপভৰেসুপি অৰচরণতো রূপাৰচরাদিনামম্পি লভেয্যাতি ইদং চোদনং পরিহরতি. হোতি চেত্থ –

‘‘কামেৰচরতীত্যেতং, কামাৰচরসঞ্ঞিতং;

সেসে অৰচরন্তম্পি, সঙ্গামাৰচরো যথা’’তি.

ইতি-সদ্দো হেতুম্হি. চ-সদ্দো ৰত্তব্বন্তরসমুচ্চযে. তেন যস্মা উত্তরপদলোপেন কামাৰচরো ‘‘কামো’’তি সঞ্ঞিতো, যস্মা চ তস্মিং কামে ইদং চিত্তং সদা অৰচরতি, তস্মা ‘‘কামাৰচর’’মিচ্চেৰ কথিতং, ন পন কামাৰচরাৰচরং, নাপি রূপারূপাৰচরন্তি ৰাতি অধিপ্পাযো. কামঘাতিনাতি দেসনাঞাণেন ৰিনেয্যসন্তানগতস্স কিলেসকামস্স হননসীলেন সম্মাসম্বুদ্ধেন.

১৯. পটিসন্ধিং ¶ …পে… অৰচারযতীতি ৰাতি অথ ৰা যস্মা যত্থ কত্থচি উপ্পন্নম্পি কামে ভৰেযেৰ পটিসন্ধিং অৰচারযতি, তস্মা ইদং কামে অৰচারযতীতি ‘‘কামাৰচর’’ন্তি কথিতং চা-সদ্দস্স রস্সত্তং কত্ৰাতি অত্থো. এৰং উত্তরপদলোপৰসেন পদসম্ভৰং দস্সেত্ৰা ইদানি ৰিনাপি উত্তরপদলোপং কামাৰচর-সদ্দস্স সম্ভৰং দস্সেতুং ‘‘পরিযাপন্নন্তি তত্র ৰা’’তি ৰুত্তং. তত্রাতি তস্মিং কামভৰে. পরিযাপন্নন্তি অন্তোগধং. অযং পনেত্থ অধিপ্পাযো –

‘‘কতমে ধম্মা কামাৰচরা? হেট্ঠতো অৰীচিনিরযং পরিযন্তং কত্ৰা উপরিতো পরনিম্মিতৰসৰত্তী দেৰে অন্তোকরিত্ৰা যং এতস্মিং অন্তরে এত্থাৰচরা এত্থ পরিযাপন্না খন্ধধাতুআযতনা ¶ রূপং ৰেদনা সঞ্ঞা সঙ্খারা ৰিঞ্ঞাণং. ইমে ধম্মা কামাৰচরা’’তি (ধ. স. ১২৮৭) –

ৰুত্তত্তা যথা মনুস্সিত্থিযা কুচ্ছিস্মিং নিব্বত্তোপি তিরচ্ছানগতিকো তিরচ্ছানযোনিযমেৰ পরিযাপন্নত্তা ‘‘তিরচ্ছানো’’ত্ৰেৰ ৰুচ্চতি, এৰমিদং রূপারূপভৰেসু উপ্পন্নম্পি কামভৰপরিযাপন্নত্তা ‘‘কামাৰচর’’মিচ্চেৰ কথিতন্তি. তপ্পরিযাপন্নতা চস্স অৰীচিপরনিম্মিতপরিচ্ছিন্নোকাসনিন্নায কামতণ্হায ৰিসযভাৰতোতি ৰেদিতব্বা. তথা হি ৰুত্তং আচরিযধম্মপালত্থেরেন নিক্খেপকণ্ডেপি ‘‘‘এত্থাৰচরা’তি ৰচনং অৰীচিপরনিম্মিতপরিচ্ছিন্নোকাসায কামতণ্হায ৰিসযভাৰং সন্ধায ৰুত্ত’’ন্তি. পদসম্ভৰো পনেত্থ এৰং ৰেদিতব্বো – কামতণ্হা কামো, সো এত্থ আরম্মণকরণৰসেন অৰচরতীতি কামাৰচরন্তি. ননু চেত্থ কতমা কামতণ্হা, যা কামাৰচরধম্মারম্মণা তণ্হা. কতমে কামাৰচরধম্মা, যে কামতণ্হাৰিসযাতি এৰং ইতরীতরনিস্সযতাদোসো আপজ্জতীতি ¶ ? নাপজ্জতি, অৰীচিআদিএকাদসোকাসনিন্নতায যংকিঞ্চি তণ্হং কামতণ্হাভাৰেন গহেত্ৰা তংসভাৰায তণ্হায ৰিসযভাৰেন কামাৰচরধম্মানং উপলক্খেতব্বভাৰতো. অথ ৰা কিলেসৰত্থুৰসেন দুৰিধোপি কামো যথারহং সহজাতৰসেন এত্থ অৰচরতীতি কামাৰচরং, আরম্মণকরণৰসেন ৰা দুৰিধেপি কামে এতং অৰচরতীতি কামাৰচরং. অথ ৰা মঞ্চনিস্সিতকেসু উক্কুট্ঠিং করোন্তেসু নিস্সযনিস্সিতানং অভেদস্স বুদ্ধিযা গহিতত্তা নিস্সিতকেসু নিস্সযূপচারৰসেন ‘‘মঞ্চা উক্কুট্ঠিং করোন্তী’’তি ৰুচ্চতি, এৰমেতম্পি কামাৰচরভৰে পৰত্তনৰসেন তন্নিস্সিতত্তা নিস্সযৰোহারেন ‘‘কামাৰচর’’ন্তি ৰুচ্চতি. হোতি চেত্থ –

‘‘কামোৰচরতীত্যেত্থ, কামেৰচরতীতি ৰা;

ঠানূপচারতো ৰাপি, তং কামাৰচরং ভৰে’’তি.

২০. পুজ্জফলনিব্বত্তনতো, অত্তসন্তানং পুননতো চ পুঞ্ঞানি, কত্তব্বতায কিরিযা, তেসং তেসং আনিসংসানং ৰত্থুতায ৰত্থূনি চাতি পুঞ্ঞকিরিযৰত্থূনি. গণনতো দসপরিমাণত্তা দস চ তানি পুঞ্ঞকিরিযৰত্থূনি চাতি দস পুঞ্ঞকিরিযৰত্থূনি, তেসং ৰসেনাতি দসপুঞ্ঞক্রিযৰত্থুৰসেন, দসপুঞ্ঞকিরিযৰত্থুভাৰেন তংমযং হুত্ৰাতি অত্থো. এৰ-কারেন পন রূপারূপলোকুত্তরং ¶ ৰিয ন কেৰলং ভাৰনাৰসেনেৰাতি দস্সেতি. অথ ৰা দসপুঞ্ঞকিরিযৰত্থুৰসেনেৰ পৰত্ততি, ন পন পরেহি পরিকপ্পিতপরপসংসাদিপুঞ্ঞকিরিযৰত্থুৰসেনাতি এৰ-সদ্দেন অৰধারণং. যতো ৰক্খতি ‘‘সব্বানুস্সতিপুঞ্ঞঞ্চা’’তিআদি.

২১. কানি পন তানি দসপুঞ্ঞকিরিযৰত্থূনি, যেসং ৰসেন ইদং অট্ঠৰিধং চিত্তং পৰত্ততীতি ৰুত্তন্তি ইমং অনুযোগং সন্ধায তানি সরূপতো দস্সেতুং ‘‘দানং সীল’’ন্তিআদি ৰুত্তং ¶ . তত্থ দিয্যতি এতেনাতি দানং, পরিচ্চাগচেতনা. ইধ পন চিত্তাধিকারৰসেন তংসম্পযুত্তং গহেতব্বং. তথা ‘‘সীলা’’দীসুপি. সীলতীতি সীলং, কাযৰচীকম্মানি সমাদহতীতি অত্থো. সুসিল্যৰসেন হি কাযকম্মাদীনি অৰিপ্পকিণ্ণানি সম্পতি, আযতিঞ্চ হিতসুখাৰহানি সম্মা ঠপিতানি সমাহিতানি হোন্তি, সীলযতি উপধারেতীতি ৰা সীলং. উপধারণং পনেত্থ কুসলানং অধিট্ঠানভাৰো. ভাৰেতি কুসলধম্মে আসেৰতি ৰড্ঢেতি এতাযাতি ভাৰনা. অত্তনো সন্তানে নিপ্ফন্না পত্তি দিয্যতি এতেনাতি পত্তিদানং. তংতংকিচ্চকরণে ব্যাৰটস্স ভাৰো ৰেয্যাৰচ্চং. দেসেতি এতাযাতি দেসনা. পত্তিং অনুমোদতি এতেনাতি পত্তানুমোদো. পুব্বপদলোপেন পন ‘‘অনুমোদো’’তি ৰুত্তং. দিট্ঠিযা উজুভাৰো দিট্ঠিজুত্তং, সম্মাদিট্ঠিযা উজুকরণন্তি অত্থো. অত্তনো, পরস্স ৰা হিতজ্ঝাসযৰসেন সম্মা সুণন্তি এতাযাতি সংসুতি. পূজাৰসেন অপচাযতি সামীচিং করোতি এতেনাতি অপচাযো. পুঞ্ঞকিরিযৰত্থূনং পভেদো পুঞ্ঞকিরিযৰত্থুপ্পভেদো. মজ্ঝপদলোপৰসেন পন ‘‘পুঞ্ঞৰত্থুপ্পভেদো’’তি ৰুত্তং যথা আজঞ্ঞযুত্তো রথো ‘‘আজঞ্ঞরথো’’তি. অযং তাৰেত্থ পদৰিচারো.

অযং পন ৰিনিচ্ছযো – তত্থ সেখপুথুজ্জনানং পরং উদ্দিস্স পূজানুগ্গহকামতায অত্তনো ৰিজ্জমানৰত্থুপরিচ্চজনৰসেন পৰত্তা চেতনা দানমযপুঞ্ঞকিরিযৰত্থু নাম. খীণাসৰানম্পি তথা পৰত্তা দানমেৰ, সা পন পুঞ্ঞকিরিযা নাম ন হোতীতি ন ইধ অধিপ্পেতা. পুজ্জফলনিব্বত্তনতো, হি অত্তসন্তানং পুননতো চ পুঞ্ঞং, ন চ খীণাসৰসন্তানে পৰত্তা ফলনিব্বত্তিকা হোতি, ন চ তং পুনাতি ৰিসুদ্ধসন্তানপ্পৰত্তত্তাতি. এৰং সেসেসুপি.

যা পন নিচ্চসীলউপোসথসীলাদিৰসেন পঞ্চসীলং অট্ঠসীলং দসসীলং সমাদিযন্তস্স, অসমাদিযন্তস্সপি কুলচারিত্তৰসেন ¶ সম্পত্তকাযদুচ্চরিতাদীহি ৰিরমন্তস্স, উপসম্পদমাল়কে সংৰরং সমাদিযন্তস্স, পাতিমোক্খং পরিপূরেন্তস্স, আপাথগতৰিসযেসু চক্খাদীনি ইন্দ্রিযানি থকেন্তস্স ¶ , চীৰরাদিকে চ পচ্চযে পচ্চৰেক্খন্তস্স, কুহনাদিৰত্থুতো আজীৰং পরিসোধেন্তস্স পৰত্তা চেতনা, অযং সীলমযপুঞ্ঞকিরিযৰত্থুনাম. এত্থাহ – ‘‘দানং নামেতং ময্হং কুলৰংসো কুলচারিত্ত’’ন্তি এৰং চারিত্তসীলে ঠত্ৰা দেন্তস্স পৰত্তা দানমযপুঞ্ঞকিরিযৰত্থু কিং, উদাহু সীলমযন্তি? সীলমযমেৰ চারিত্তসীলভাৰতো. দেয্যধম্মপরিচ্চাগৰসেন পৰত্তাপি হেসা পুব্বাভিসঙ্খারস্স অপরভাগে চেতনায চ তথা পৰত্তত্তা সীলমযমেৰ পুঞ্ঞকিরিযৰত্থু, ন দানমযং. পূজানুগ্গহকামতায হি দিন্নং দানমযন্তি.

‘‘চক্খু অনিচ্চ’’ন্তিআদিনা পন চক্খাদিকে তিলক্খণং আরোপেত্ৰা সম্মসন্তস্স পৰত্তা গোত্রভুৰোদানপরিযোসানা ৰিপস্সনাচেতনা, কসিণাদীসু আরম্মণেসু অপ্পনং অপ্পত্তা গোত্রভুপরিযোসানা পরিকম্মচেতনা চাতি অযং ভাৰনামযপুঞ্ঞকিরিযৰত্থু নাম. অপ্পনাপ্পত্তাপি ভাৰনাযেৰ, সা পন ন কামাৰচরাতি ইধ ন গহিতা. নিরৰজ্জৰিজ্জাযতনকম্মাযতনসিপ্পাযতনানং সিক্খনচেতনাপি ভাৰনামযেযেৰ সমোধানং গচ্ছতীতি আচরিযা. যা চেত্থ দেয্যধম্মং খযতো ৰযতো সম্মসিত্ৰা দদতো পৰত্তা, সাপি পুব্বে ৰিয উভযভাগে চেতনানং তথা পৰত্তত্তা ভাৰনামযপুঞ্ঞকিরিযৰত্থুযেৰাতি ৰেদিতব্বং.

দানাদিকং যং কিঞ্চি সুচরিতকম্মং কত্ৰা ‘‘অসুকস্স চ নাম পত্তি হোতু, সব্বসত্তানং ৰা হোতূ’’তি এৰং অত্তনা কতস্স পরেহি সাধারণভাৰং পচ্চাসীসনৰসেন পৰত্তা পত্তিদানমযপুঞ্ঞকিরিযৰত্থু নাম. কিং পনেৰং পত্তিং দদতো পুঞ্ঞক্খযো হোতীতি? ন হোতি, যথা পন একং দীপং জালেত্ৰা ততো দীপসহস্সং জালেন্তস্স পঠমদীপো খীণোতি ¶ ন ৰত্তব্বো, পুরিমালোকেন পন সদ্ধিং পচ্ছিমালোকস্স একীভাৰে অতিমহাৰ হোতি, এৰমেৰ পত্তিং দদতো পরিহানি নাম ন হোতি, ৰুড্ঢিযেৰ পন হোতীতি দট্ঠব্বা. কথং পনেসা দিন্না নাম হোতীতি? ‘‘ইদং মে পুঞ্ঞকম্মং সব্বসত্তানং, অসুকস্স ৰা পরিণমতূ’’তি এৰং পুব্বভাগে, পচ্ছাপি ৰা ৰচীভেদং করোন্তেন মনসা এৰ ৰা চিন্তেন্তেন দিন্না নাম হোতি. কেচি পন ‘‘যং মযা কতং সুচরিতং, তস্স ফলং ‘দম্মী’তি ৰুত্তেপি পত্তি দিন্নাৰ হোতী’’তি ৰদন্তি. কুসলকম্মাধিকারত্তা পন পরেহি চ কম্মস্সেৰ অনুমোদিতব্বত্তা কম্মমেৰ দাতব্বং, অনুমোদেন্তেনপি কম্মমেৰ অনুমোদিতব্বন্তি ইদমেত্থ আচরিযানং সন্নিট্ঠানং.

চীৰরাদীসু ¶ পচ্চাসারহিতস্স অসংকিলিট্ঠেন অজ্ঝাসযেন সমণব্রাহ্মণানং ৰত্তপটিৰত্তকরণৰসেন, গিলানুপট্ঠানৰসেন চ পৰত্তা ৰেয্যাৰচ্চমযপুঞ্ঞকিরিযৰত্থু নাম.

আমিসকিঞ্চক্খাদিনিরপেক্খচিত্তস্স অত্তনো পগুণং ধম্মং ৰিমুত্তাযতনসীসে ঠত্ৰা দেসেন্তস্স, তথেৰ নিরৰজ্জৰিজ্জাযতনাদিকং উপদিসন্তস্স চ পৰত্তা দেসনামযপুঞ্ঞকিরিযৰত্থু নাম. পরেহি কতং যং কিঞ্চি সুচরিতকম্মং দিন্নমদিন্নম্পি ৰা ইস্সামচ্ছেরমলং পহায ‘‘সাধু সুট্ঠূ’’তি অনুমোদন্তস্স পৰত্তা অনুমোদনপুঞ্ঞকিরিযৰত্থু নাম, ‘‘অত্থি দিন্ন’’ন্তিআদিনা কম্মস্সকতাঞাণৰসেন দিট্ঠিং উজুং করোন্তস্স পৰত্তা দিট্ঠিজুকম্মপুঞ্ঞকিরিযৰত্থু নাম. যদি এৰং ঞাণৰিপ্পযুত্তচিত্তস্স দিট্ঠিজুকম্মপুঞ্ঞকিরিযতা ন লব্ভতীতি? নো ন লব্ভতি পুরিমপচ্ছিমচেতনানম্পি তংতংপুঞ্ঞকিরিযাস্ৰেৰ সঙ্গণ্হনতো. তথা হি ৰক্খতি –

‘‘পুরিমা মুঞ্চনা চেৰ, পরা তিস্সোপি চেতনা;

হোতি দানমযং পুঞ্ঞং, এৰং সেসেসু দীপযে’’তি.

তস্মা ¶ কিঞ্চাপি উজুকরণৰেলাযং ঞাণসম্পযুত্তমেৰ চিত্তং হোতি, পুরিমপচ্ছাভাগে পন ঞাণৰিপ্পযুত্তম্পি হোতীতি তস্সাপি দিট্ঠিজুকম্মপুঞ্ঞকিরিযভাৰো উপ্পজ্জতি.

অপরে পনাহু – ৰিঞ্ঞাণপঞ্ঞাণৰসেন দস্সনং দিট্ঠি, চিত্তং পঞ্ঞা চ. দিট্ঠিযা উজুভাৰো দিট্ঠিজুত্তং. কিং তং? কুসলঞ্চ ৰিঞ্ঞাণং কম্মস্সকতাঞাণাদি চ সম্মাদস্সনং. তত্থ কুসলৰিঞ্ঞাণেন ঞাণুপ্পাদেপি অত্তনো সুচরিতানুস্সরণপরগুণপসংসাসরণগমনানং সঙ্গহো, কম্মস্সকতাঞাণেন কম্মপথসম্মাদিট্ঠিযাতি. দানাদিসম্পযুত্তং পন ঞাণং দানাদীস্ৰেৰ অন্তোগধন্তি ৰেদিতব্বং. ‘‘এৰমিমং ধম্মং সুত্ৰা তত্থ ৰুত্তনযেন পটিপজ্জন্তো লোকিযলোকুত্তরগুণৰিসেসং অধিগমিস্সামি, বহুস্সুতো ৰা হুত্ৰা পরে ধম্মদেসনায অনুগ্গণ্হিস্সামী’’তি এৰং অত্তনো, পরেসং ৰা ৰিমুত্তাযতনসীসেন সদ্ধম্মং সুণন্তস্স পৰত্তা সৰনমযপুঞ্ঞকিরিযৰত্থু নাম. নিরৰজ্জৰিজ্জাযতনাদিসৰনচেতনাপি এত্থেৰ সঙ্গয্হতি. পূজারহে, গরুট্ঠানিযে, মহল্লকে চ দিস্ৰা আসনা ৰুট্ঠহন্তস্স পত্তচীৰরপটিগ্গহণমগ্গদানঅভিৰাদনঅঞ্জলিকম্মকরণআসনপুপ্ফগন্ধাদিঅভিহারং করোন্তস্স চ পৰত্তা বহুমানচেতনা অপচিতিসহগতপুঞ্ঞকিরিযৰত্থু ¶ নাম. ৰেয্যাৰচ্চাপচাযনানঞ্হি অযং ৰিসেসো – ৰযসা, গুণেন চ জেট্ঠানং, গিলানানঞ্চ তংতংকিচ্চকরণং ৰেয্যাৰচ্চং, সামীচিকিরিযা অপচাযনন্তি.

২২-৩. এৰং অট্ঠকথায আগতনযেন দসপুঞ্ঞকিরিযৰত্থূনি দস্সেত্ৰা ইদানি সুত্তে আগতনযেন দানং সীলং ভাৰনাতি তীণিযেৰ দস্সেতুং তেসু ইতরেসম্পি সঙ্গহং দীপেন্তো আহ ‘‘গচ্ছন্তি সঙ্গহ’’ন্তিআদি. তত্থ পত্তিদানানুমোদনা দানে সঙ্গহং গচ্ছন্তি তংসভাৰত্তা. দানম্পি হি ইস্সামচ্ছেরানং পটিপক্খং, এতেপি, তস্মা সমানপটিপক্খতায ¶ দানেন সহ একলক্খণত্তা এতে দানমযপুঞ্ঞকিরিযৰত্থুম্হি সঙ্গহং গচ্ছন্তি. ৰেয্যাৰচ্চাপচাযনা সীলমযে পুঞ্ঞে সঙ্গহং গচ্ছন্তি চারিত্তসীলসভাৰত্তা. দেসনাসৰনদিট্ঠিউজুকা পন কুসলধম্মাসেৰনতো ভাৰনতো ভাৰনামযে সঙ্গহং গচ্ছন্তি. কেচি পন ‘‘দেসেন্তো, সুণন্তো চ দেসনানুসারেন ঞাণং পেসেত্ৰা লক্খণং পটিৰিজ্ঝ দেসেতি, সুণাতি চ, তানি চ দেসনাসৰনানি পটিৰেধমেৰ আহরন্তীতি দেসনাসৰনং ভাৰনামযে সঙ্গহং গচ্ছতী’’তি ৰদন্তি. ধম্মদানভাৰতো ‘‘দেসনা দানমযে সঙ্গহং গচ্ছতী’’তিপি সক্কা ৰত্তুং. তথা দিট্ঠিজুকম্মং সব্বত্থাপি সব্বেসং নিযমনলক্খণত্তাতি. দানাদীসু হি যং কিঞ্চি ‘‘অত্থি দিন্ন’’ন্তিআদিনযপ্পৰত্তায সম্মাদিট্ঠিযাৰ ৰিসোধিতং মহপ্ফলং হোতি মহানিসংসন্তি. এৰঞ্চ কত্ৰা দীঘনিকাযট্ঠকথাযং ‘‘দিট্ঠিজুকম্মং পন সব্বেসং নিযমনলক্খণ’’ন্তি (দী. নি. অট্ঠ. ৩.৩০৫) ৰুত্তং. মহাসংঘিযা পন অভযগিরিৰাসিনো চ দিট্ঠিজুকম্মং ৰিসুং পুঞ্ঞকিরিযভাৰেন ন গণ্হন্তি. তথা হি তে দানং সীলং ভাৰনা সংসুতি দেসনানুস্সতিমোদনং ৰেয্যাৰচ্চপূজাসরণপ্পত্তিপসংসা চাতি অত্তনা কতপুঞ্ঞানুস্সরণং বুদ্ধাদীসু সরণগমনং পরগুণপসংসাতি ইমানি তীণি পক্খিপিত্ৰা দিট্ঠিজুকম্মং অগ্গহেত্ৰা দ্ৰাদস পুঞ্ঞকিরিযৰত্থূনি পঞ্ঞাপেন্তি. পুন তীণেৰাতি পঠমং দসাপি সমানা পুন সঙ্খেপতো তীণেৰ সম্ভোন্তি.

২৪. ইদানি পরেহি নিদ্দিসিযমানানং পুঞ্ঞানুস্সরণাদীনং অত্তনা নিদ্দিট্ঠেস্ৰেৰ সমোধানং দস্সেতুং ‘‘সব্বানুস্সতিপুঞ্ঞঞ্চা’’তিআদি ৰুত্তং. তত্থ সব্বস্সেৰ অত্তনা কতসুচরিতস্স অনুস্সরণং সব্বানুস্সতিপুঞ্ঞং নাম. পসংসাতি পরেহি কতায পুঞ্ঞকিরিযায, সম্মাপটিপত্তিযা চ ৰিপ্পসন্নচিত্তেন ¶ পসংসনং, সন্তুস্সনন্তি অত্থো. সরণত্তযন্তি এত্থ সরন্তি হিংসন্তীতি সরণানি, বুদ্ধাদীনি তীণি রতনানি. তানি হি সরণগতানং তেনেৰ সরণগমনেন ভযং সন্তাসং দুগ্গতিপরিক্কিলেসং হিংসন্তি ৰিনাসেন্তি. তযো অৰযৰা অস্সাতি তযং, তীহি অৰযৰেহি ¶ যুত্তসমুদাযস্সেতং অধিৰচনং, সরণানং তযং সরণত্তযং, তীণি সরণানীতি ৰুত্তং হোতি. ন হি অৰযৰৰিনিমুত্তো সমুদাযো নাম কোচি অত্থীতি. ইধ পন সরণত্তযগ্গহণেন উপচারতো, উত্তরপদলোপতো ৰা সরণগমনং অধিপ্পেতং. ন হি সরণত্তযং পুঞ্ঞকিরিযৰত্থু নাম হোতি. অত্থতো পনেতং ‘‘সম্মাসম্বুদ্ধো ৰত সো ভগৰা, স্ৰাক্খাতো ধম্মো, সুপ্পটিপন্নো সংঘো’’তিআদিনা বুদ্ধাদীসু পসাদপটিলাভৰসেন পৰত্তা চেতনা দিট্ঠিজুকম্মস্মিং সঙ্গহং যন্তি তংৰসেনেৰ তেসং ইজ্ঝতো. ন হি ৰিপরীতদিট্ঠিকস্স ইমানি তীণি সম্ভৰন্তি, তস্মা তে একন্তেন দিট্ঠিজুকম্মপুঞ্ঞকিরিযৰত্থুস্মিং সঙ্গহং গচ্ছন্তি, ন ৰিসুং পুঞ্ঞকিরিযভাৰেন গহেতব্বাতি অধিপ্পাযো. তেনাহ ‘‘নত্থি সংসযো’’তি. দিট্ঠিজুকম্মস্স ভাৰনামযসঙ্গহেপি সঙ্খেপনযেন ভাৰনামযে সঙ্গয্হন্তি, ৰিত্থারনযেন পন ‘‘কত্থ নু খো’’তি সংসযো সিযাতি ইমেসং ভাৰনামযসঙ্গহো ন ৰুত্তো. দিট্ঠিজুকম্মস্স ৰা সব্বেসং মহপ্ফলভাৰনিযামকত্তেন মূলভূতত্তা তস্স পধানভাৰং দস্সেতুং ৰিসুং তত্থ সঙ্গয্হন্তীতি ৰুত্তং. অপরে পন ‘‘সঙ্গণ্হন্তো সঙ্গণ্হাতি, গণ্হন্তো ‘মুঞ্চতী’তি ৰচনতো সরণগমনস্স সীলসমাদানে ৰিয গহণং সম্ভৰতীতি সীলমযে সঙ্গয্হতী’’তি ৰদন্তি. ‘‘সরণগমনং পণিপাতভাৰতো অপচিতিসহগতে সঙ্গয্হতী’’তি কেচি.

২৫. ইদানি যথাৰুত্তপুঞ্ঞকিরিযৰত্থূনং পুরিমপচ্ছিমভাগৰসেন পৰত্তমানাপি চেতনা তত্থ তত্থেৰ সঙ্গহং গচ্ছন্তীতি ¶ দস্সেতুং ‘‘পুরিমা মুঞ্চনা’’তিআদি ৰুত্তং. তত্থ পুরিমাতি দানত্থায দেয্যধম্মং ধম্মেন সমেন উপ্পাদেন্তস্স, উপ্পন্নং ‘‘পরিচ্চজিস্সামী’’তি চিন্তেন্তস্স, দক্খিণেয্যং পরিযেসন্তস্স চ যাৰ ৰত্থুনো পটিগ্গাহকস্স হত্থে ৰিস্সজ্জনং, পরিণামনং ৰা, তাৰ পৰত্তা পুব্বভাগচেতনা. পটিগ্গাহকস্স পন হত্থে ৰিস্সজ্জনচেতনা, পরিণামনচেতনা ৰা মুঞ্চনচেতনা নাম. সাযেৰ নিগ্গহীতলোপেন ‘‘মুচনা’’তি ৰুত্তা. ‘‘মুঞ্চনা’’ইতিযেৰ ৰা পাঠো. পরাতি অত্তনা ৰিস্সট্ঠৰত্থুম্হি আলযং অকত্ৰা ‘‘সাধু সুট্ঠু অগ্গং দানং মে দিন্ন’’ন্তি সোমনস্সচিত্তেন পচ্চৰেক্খন্তস্স উপ্পন্না অপরভাগচেতনা. তিস্সোপি চেতনাতি ইতি অযঞ্চ পুরিমা চেতনা, অযঞ্চ মুঞ্চনচেতনা, অযঞ্চ অপরচেতনাতি তিস্সোপি চেতনা একতো হুত্ৰা দানমযং পুঞ্ঞং হোতি, দানমযপুঞ্ঞকিরিযৰত্থু নাম হোতীতি অত্থো. ‘‘পুঞ্ঞ’’ন্তি পদং অপেক্খিত্ৰা ‘‘হোতী’’তি একৰচননিদ্দেসো. ইদানি যথাৰুত্তমত্থং সেসেসুপি অতিদিসন্তো আহ ‘‘এৰং সেসেসু দীপযে’’তি. সেসেসূতি সীলাদীসু পুঞ্ঞকিরিযৰত্থূসু এৰং যথাৰুত্তনযেন ‘‘সীলং ‘রক্খিস্সামী’তি চিন্তেন্তস্স, ‘পব্বজিস্সামী’তি ৰিহারং গচ্ছন্তস্স পৰত্তা পুরিমচেতনা, সীলং ¶ সমাদিযন্তস্স, পব্বজন্তস্স, সীলং পরিপূরেন্তস্স উপ্পন্না মজ্ঝিমচেতনা, ‘পূরিতং মে’তি পচ্চৰেক্খন্তস্স উপ্পন্না অপরচেতনাতি এৰং তিস্সোপি চেতনা একতো হুত্ৰা সীলমযপুঞ্ঞকিরিযৰত্থু নামা’’তিআদিনা দীপযে, পকাসেয্যাতি অত্থো. ননু চ অত্তনা কতপুঞ্ঞানুস্সরণচেতনা দিট্ঠিজুকম্মসঙ্গহিতা, অযঞ্চ অপরচেতনা সাযেৰাতি কথমস্সা তত্থ সঙ্গহোতি? নাযং দোসো, ৰিসযভেদেন উভিন্নম্পি ৰিসেসসব্ভাৰতো. পুঞ্ঞানুস্সরণঞ্হি অত্তনা কতপুঞ্ঞৰিসযমেৰ. অযং পন তব্বত্থুৰিসযাতি পাকটোযেৰ দ্ৰিন্নং ৰিসেসোতি.

এত্তাৰতা ¶ চ যং ৰুত্তং ‘‘দসপুঞ্ঞকিরিযৰত্থুৰসেনেৰ পৰত্ততী’’তি, তত্থ দসপুঞ্ঞকিরিযৰত্থূনি সরূপতো, সঙ্গহতো চ নিদ্দিসিত্ৰা ইদানি তথাপৰত্তমানস্স চস্স পাটেক্কং পৰত্তাকারৰিসযং দস্সেতুং ‘‘ইদানী’’তিআদি আরদ্ধং. তত্থ অযন্তি ৰক্খমাননিদস্সনং. দাতব্বো ধম্মো দেয্যধম্মো, অন্নাদিদসৰিধং ৰত্থু. ৰুত্তঞ্হি –

‘‘অন্নং পানং ৰত্থং যানং, মালাগন্ধৰিলেপনং;

সেয্যাৰসথপদীপেয্যং, দানৰত্থূ দসাৰিমে’’তি.

পটিগ্গাহকো আদি যেসং দেসকালমিত্তাদীনং তে পটিগ্গাহকাদযো, দেয্যধম্মস্স, পটিগ্গাহকাদীনঞ্চ সম্পত্তি সম্পন্নতা দেয্যধম্মপটিগ্গাহকাদিসম্পত্তি. তত্থ দেয্যধম্মস্স পণীতমনাপভাৰো ধম্মেন সমেন উপ্পন্নভাৰো দেয্যধম্মসম্পত্তি. পটিগ্গাহকানং অগ্গদক্খিণেয্যভাৰো পটিগ্গাহকসম্পত্তি. দুল্লভঅন্নপানাদিকো দেসো দেসসম্পত্তি. তাদিসোৰ কালো কালসম্পত্তি. দুল্লভঅন্নপানাদিকে হি দেসে, কালে ৰা দিন্নং অজ্ঝাসযস্স বলৰতায মহপ্ফলং, সোমনস্সহেতুকঞ্চ হোতি, তস্মা তে দানস্স সম্পত্তিৰসেন ৰুত্তা. মিত্তসম্পত্তি পন কল্যাণমিত্তভাৰো. কল্যাণমিত্তঞ্হি নিস্সায দানাদীসু চিত্তং ওদগ্যপ্পত্তং হোতি. পরিচারিকসম্পত্তি পন অনাণত্তিযাপি তংতংকিচ্চসম্পাদনে অপ্পমত্তস্স পরিচারিকজনস্স পটিলাভো. অঞ্ঞং ৰা সোমনস্সহেতুন্তি সদ্ধাবহুলতাৰিসুদ্ধিদিট্ঠিতাদিভেদং অঞ্ঞং সোমনস্সকারণং ৰা. আগম্মাতি উপাগম্ম, পটিচ্চাতি অত্থো. হট্ঠপহট্ঠোতি সোমনস্সৰসেন হট্ঠো চেৰ পহট্ঠো চ. উভযেনপি অধিকসোমনস্সং ৰুত্তং. অত্থি…পে… পৰত্তন্তি ‘‘অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৰিপাকো, অত্থি অযং লোকো, অত্থি পরো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে ¶ সমণব্রাহ্মণা সম্মগ্গতা ¶ সম্মাপটিপন্না, যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি (ম. নি. ১.৪৪১) এৰং পৰত্তং দসৰিধং সম্মাদিট্ঠিৰত্থুৰসেন চেৰ ধম্মৰিচযসম্বোজ্ঝঙ্গট্ঠানিযাদীনং ৰসেন চ পৰত্তং. আদি-সদ্দেন হি ন কেৰলং নৰন্নংযেৰ সম্মাদিট্ঠিৰত্থূনং গহণং, অথ খো ধম্মৰিচযসম্বোজ্ঝঙ্গট্ঠানিযানম্পি সঙ্গহো. সম্মা ঞাযেন পৰত্তা দিট্ঠি, পসত্থা ৰা দিট্ঠীতি সম্মাদিট্ঠি, তং. পুরক্খত্ৰাতি পুব্বঙ্গমং কত্ৰা. তঞ্চ খো সহজাতপুব্বঙ্গমৰসেন ‘‘মনোপুব্বঙ্গমা ধম্মা’’তিআদীসু (ধ. প. ১-২) ৰিয সম্পযোগস্স অধিপ্পেতত্তা.

অনুস্সাহিতোতি লোভমচ্ছরিযাদিৰসেন পুঞ্ঞকিরিযায সঙ্কোচং অনাপজ্জনতো অত্তনা, পরেন ৰা কেনচি অনুস্সাহিতো হুত্ৰা. সভাৰতো হি পুঞ্ঞপ্পৰত্তিদস্সনমিদং. পরেহীতি পন পরপাকটুস্সাহদস্সনৰসেন ৰুত্তং. পঠমন্তি দেসনাক্কমেন, ইধ নিদ্দিট্ঠক্কমেন ৰা পঠমং. মহাকুসলচিত্তন্তি সোমনস্সসহগততাদিঅঙ্গপারিপূরিযা মহন্তং কুসলচিত্তং. অথ ৰা পচ্ছিমভৰিকবোধিসত্তানং পটিসন্ধিআকড্ঢনতো মহন্তং পূজিতং কুসলচিত্তন্তি মহাকুসলচিত্তং. সব্বেসম্পি হি সব্বঞ্ঞুবোধিসত্তানং পটিসন্ধি মেত্তাপুব্বঙ্গমস্স তিহেতুকসোমনস্সমযস্স অসঙ্খারিকচিত্তস্স ৰিপাকোতি ৰুত্তং. এত্থ ‘‘দেয্যধম্ম…পে… হট্ঠপহট্ঠো’’তি এত্তাৰতা ইমস্স সোমনস্সসহগতভাৰমাহ, ‘‘সম্মাদিট্ঠিং পুরক্খত্ৰা’’তি ঞাণসম্পযুত্তভাৰং, ‘‘অনুস্সাহিতো’’তি পন ইমিনা অসঙ্খারিকভাৰন্তি দট্ঠব্বং.

ৰুত্তনযেনেৰাতি ‘‘দেয্যধম্মপটিগ্গাহকাদিসম্পত্তিং, অঞ্ঞং ৰা সোমনস্সকারণং আগম্মা’’তি এৰং ৰুত্তনযেন. উস্সাহিতোতি দেয্যধম্মে সাপেক্খাদিতায, সীলসম্পদাদীসু অনধিমুত্ততাদীহি চ পুঞ্ঞকিরিযায সঙ্কোচাপজ্জনতো অত্তনা, পরেন ৰা কেনচি উস্সাহিতো. পরেহীতি ¶ পন ৰুত্তনযমেৰ. করোতি দানাদীনি পুঞ্ঞানীতি সম্বন্ধো. তমেৰাতি সোমনস্সসহগতাদিনা তংসদিসতায ৰুত্তং. হোতি হি তংসদিসেপি তংৰোহারো যথা চ ‘‘সাযেৰ তিত্তিরী, তানিযেৰ ওসধানী’’তি. এত্থ পন ‘‘উস্সাহিতো’’তি ইমিনা সসঙ্খারিকতং দস্সেতি. সেসং ৰুত্তনযমেৰ. ইমস্মিং পনত্থেতি ইমস্মিং সসঙ্খারিকসদ্দাভিধেয্যে, উস্সাহিতব্বচিত্তসঙ্খাতে অত্থে তংৰিসযেতি অত্থো. পুব্বপ্পযোগস্সাতি পুঞ্ঞকিরিযায সঙ্কোচে জাযমানে ততো ৰিৰেচেত্ৰা সমুস্সাহনৰসেন পৰত্তস্স চিত্তপ্পযোগস্স. পুব্ব-গ্গহণং পনেত্থ তথাপৰত্তপুব্বাভিসঙ্খারৰসেন ¶ সো পযোগো হোতীতি কত্ৰা ৰুত্তং, ন তস্স পুব্বকালিকতাযাতি ৰুত্তোৰাযমত্থো.

পটিপত্তিদস্সনেনাতি ভিক্খূ দিস্ৰা দেয্যধম্মপরিচ্চজনৰন্দনাদিপটিপত্তিদস্সনেন. বলন্তি অনন্তীতি বালা, অস্সাসিতপস্সাসিতমত্তেনেৰ জীৰন্তি, ন পঞ্ঞাজীৰিতেনাতি অধিপ্পাযো. বালাযেৰ বালকা. তে পন ইধ ‘‘অত্থি দিন্ন’’ন্তিআদিনযপ্পৰত্তায সম্মাদিট্ঠিযা অভাৰেন অসঞ্জাতবুদ্ধিনো দারকা. পাকটৰসেন চেত্থ বালক-গ্গহণং. সহসা করণাদিকালে পন ইতরেসম্পি ঞাণৰিপ্পযুত্তং হোতীতি. সোমনস্সং জাতং এতেসন্তি সোমনস্সজাতা, জাতসোমনস্সাতি অত্থো. সহসাতি সীঘং সীঘং দাতুকামতায উপ্পত্তিসমকালমেৰ.

এত্থ চ ‘‘পটিপত্তিদস্সনেনা’’তি ইমিনা পরেসং পযোগাভাৰমাহ, ‘‘জাতপরিচযা’’তি অত্তনো পযোগাভাৰং. উভযেনাপি ইমস্স অসঙ্খারিকভাৰং দীপেতি. ‘‘বালকা, সহসা’’তি চ ইমেহি ঞাণৰিপ্পযুত্তভাৰমাহ, ‘‘ভিক্খূ…পে… জাতা’’তি সোমনস্সসহগতভাৰং. অথ ৰা ‘‘পটিপত্তি…পে… পরিচযা’’তি ইমিনা অসঙ্খারিকভাৰস্স ‘‘বালকা ভিক্খূ…পে… জাতা’’তি ¶ চ ইমেহি ঞাণৰিপ্পযুত্তসোমনস্সসহগতভাৰস্স চ দীপিতত্তা ‘‘সহসা’’তি ৰচনেন যথাৰুত্তমেৰ ঞাণৰিপ্পযুত্তঅসঙ্খারিকভাৰং পকাসেতি. এৰং সতি পটিলোমতো সোমনস্সসহগতাদিভাৰো দস্সিতো হোতি. অনুলোমতো পন ‘‘সোমনস্সজাতা’’তি ইমিনা সোমনস্সসহগতভাৰং, সহসা-গ্গহণেন ঞাণৰিপ্পযুত্তাসঙ্খারিকভাৰং দীপেতি. ‘‘পটিপত্তি…পে… দিস্ৰা’’তি এত্তাৰতা পন সোমনস্সসহগতাদিভাৰস্স কারণং ৰুত্তন্তি. তেতি তে ঞাতকা, তে বালকাতি ৰা অত্থো. ‘‘সোমনস্সহেতূনং অভাৰং আগম্মা’’তি ইদং নিদস্সনমত্তং দট্ঠব্বং. মজ্ঝত্তারম্মণং তথারূপে চেতোভিসঙ্খারাদযোপি হি উপেক্খাসহগততায কারণমেৰাতি. চিত্তস্স সোমনস্সাভাৰে পুগ্গলস্সপি সোমনস্সরহিততা হোতীতি ‘‘চতূসুপি…পে… হোন্তী’’তি পুগ্গলাধিট্ঠানং কত্ৰা ৰুত্তং, সোমনস্সরহিতা হোন্তি পুঞ্ঞং করোন্তাতি অধিপ্পাযো. ‘‘এৰ’’ন্তিআদি নিগমনং.

ইমেসু পন অট্ঠসু ৰিঞ্ঞাণেসু সোমনস্সসহগততো উপেক্খাসহগতং বলৰতরং, ঞাণৰিপ্পযুত্ততো ঞাণসম্পযুত্তং, সসঙ্খারিকতো অসঙ্খারিকং সদিসং বলৰতরং. ৰিসদিসং পন ৰেদনাঞাণপ্পযোগৰসেন বলৰং, দুব্বলঞ্চ হোতি. সোমনস্সসহগততিহেতুকঅসঙ্খারিকতো হি উপেক্খাসহগততিহেতুকসসঙ্খারিকং ¶ বলৰতরং, উপেক্খাসহগতদুহেতুকঅসঙ্খারিকতো সোমনস্সসহগততিহেতুকঅসঙ্খারিকং বলৰতরং. ইতি চতুত্থচিত্ততো ততিযচিত্তং বলৰতরং, ততো অট্ঠমচিত্তং, ততো সত্তমচিত্তং, ততো দুতিযচিত্তং, ততো পঠমচিত্তং, ততো ছট্ঠচিত্তং, ততো পঞ্চমচিত্তন্তি এৰমিমেসং বলৰবলৰতরভাৰো ৰেদিতব্বো.

২৬. এৰং ¶ পাল়িযং আগতনযেন ৰেদনাঞাণপ্পযোগভেদতো অট্ঠৰিধতং নিদ্দিসিত্ৰা ইদানি অট্ঠকথাযং আগতপুঞ্ঞকিরিযাদীনং ৰসেনপি পভেদং দস্সেতুং ‘‘দস পুঞ্ঞক্রিযাদীন’’ন্তিআদি ৰুত্তং. আদি-সদ্দেন ছন্নং আরম্মণানং, চতুন্নং অধিপতীনং, তিণ্ণং কম্মানং, হীনাদিভেদস্স চ সঙ্গহো দট্ঠব্বো. তেনেৰাহু –

‘‘কমেন পুঞ্ঞৰত্থূহি, গোচরাধিপতীহি চ;

কম্মহীনাদিতো চাপি, গণেয্য নযকোৰিদো’’তি.

২৭. ইদানি তথাপৰত্তমানস্স তস্স যো যো তেসং তেসং ৰসেন লব্ভমানো গণনপরিচ্ছেদো, তং সম্পিণ্ডিত্ৰা দস্সেতুং ‘‘সত্তরস সহস্সানী’’তিআদি ৰুত্তং. তত্থেৰং গণনা ৰেদিতব্বা – ইমানি তাৰ অট্ঠ ৰিঞ্ঞাণানি দসন্নং পুঞ্ঞকিরিযৰত্থূনং ৰসেন পৰত্তনতো পচ্চেকং দস দসাতি কত্ৰা অসীতি চিত্তানি হোন্তি, তানি চ ছসু আরম্মণেসু পৰত্তনতো ছগ্গুণিতানি সাসীতিকানি চত্তারি সতানি হোন্তি, তানি চতুন্নং অধিপতীনং সহযোগৰসেন চতুগ্গুণিতানি সহস্সং, ৰীসাধিকানি চ নৰ সতানি হোন্তি, তানি চ কাযৰচীমনোসঙ্খাতানং তিণ্ণং কম্মানং ৰসেন তিগুণিতানি সসট্ঠিসত্তসতাধিকানি পঞ্চ সহস্সানি হোন্তি, তানি চ হীনমজ্ঝিমপণীতভেদতো তিগুণিতানি সাসীতিকদ্ৰিসতাধিকানি সত্তরস সহস্সানি হোন্তীতি. ননু চ ঞাণৰিপ্পযুত্তচিত্তানং ৰীমংসাধিপতিসহযোগাভাৰতো অধিপতিৰসেন সহস্সং, সাসীতিকানি চ ছ সতানি হোন্তীতি তানি কম্মাদীনং ৰসেন সম্পিণ্ডিতানি ৰীসসতাধিকানি পন্নরস সহস্সানি ভৰন্তীতি? সচ্চমেতং, সোতপতিতৰসেন পন তং অনাদিযিত্ৰা অধিপতিগণনা গহিতাতি ন তস্স ৰসেন গণনহানি কতাতি দট্ঠব্বং.

ননু ¶ চ ‘‘সৰিপাকং কুসল’’ন্তি ৰুত্তং, তং পন কথং, কুহিং, কিং ফলতীতি চোদনং সন্ধাযাহ ‘‘তং পনা’’তিআদি. যস্মা তিহেতুকং কুসলং তিহেতুকং ৰা দুহেতুকং ৰা পটিসন্ধিং দেতি ¶ , নাহেতুকং পটিসন্ধিং দেতি. যদা চ তিহেতুকং পটিসন্ধিং জনেতি, তদা পৰত্তে সোল়স ৰিপাকানি অভিনিপ্ফাদেতি. যদা দ্ৰিহেতুকং, তদা দ্ৰাদস. দুহেতুকং পন দুহেতুকমহেতুকঞ্চ পটিসন্ধিং জনেতি, ন তিহেতুকং. যদা চ দুহেতুকং জনেতি, তদা পৰত্তিযং দ্ৰাদস. যদা অহেতুকং, তদা অট্ঠ. যে পন আগমনতো ৰিপাকস্স সঙ্খারভেদমিচ্ছন্তি, তেসং মতেন তিহেতুকং দ্ৰাদস, দস ৰা ৰিপচ্চতি, দুহেতুকং দস, অট্ঠ ৰা, তস্মা ৰুত্তং ‘‘যথানুরূপ’’ন্তি. নানাৰিধসম্পত্তিট্ঠানভাৰতো সোভনা, গন্তব্বতো গতি চাতি সুগতি, কামাৰচরভৰোৰ সুগতি কামাৰচরসুগতি. তস্সং কামাৰচরসুগতিযং. ভৰভোগসম্পত্তিন্তি এত্থ চ ভৰতীতি ভৰো, উপপত্তিভৰসঙ্খাতানং ৰিপাকক্খন্ধকটত্তারূপানমেতং গহণং, ভুঞ্জিতব্বতো ভোগো, পৰত্তিযং পটিলভিতব্বসম্পত্তি, ভৰোতি ৰা পটিসন্ধি, ভোগো সেসৰিপাককটত্তারূপেহি সহ পৰত্তিযং পটিলভিতব্বা সম্পত্তি, ভৰো চ ভোগো চ ভৰভোগো, তেযেৰ সম্পন্নভাৰতো সম্পত্তি, তেসং ৰা সম্পত্তি ভৰভোগসম্পত্তি, তং অভিনিপ্ফাদেতি, জনকৰসেন চ উপনিস্সযৰসেন চ সাধেতীতি অত্থো. এত্থ চ ভৰভোগসম্পত্তীনং নিরৰসেসতো লব্ভমানট্ঠানং সন্ধায ‘‘কামাৰচরসুগতিয’’ন্তি ৰুত্তং. সহেতুকৰিপাকৰজ্জং পন পৰত্তিৰিপাককটত্তারূপসভাৰং ভৰসম্পত্তিং, একচ্চভোগসম্পত্তিঞ্চ, ভোগসম্পদমেৰ ৰা অৰিসেসেন সুগতিযং দুগ্গতিযম্পি অভিনিপ্ফাদেতিযেৰ. নাগসুপণ্ণাদীনম্পি হিস্স দেৰসম্পত্তিসদিসং মনুঞ্ঞং ভোগজাতং, তব্বিসযানি চ ৰিপাকচিত্তানি, সুৰণ্ণতাসুস্সরতাদি চ তং সব্বং কামাৰচরকুসলস্সেৰ ফলং. ন হি অকুসলস্স ইট্ঠফলং অত্থি. ৰুত্তঞ্হেতং ¶ – ‘‘অট্ঠানমেতং অনৰকাসো, যং অকুসলস্স ইট্ঠো কন্তো ৰিপাকো সংৰিজ্জতী’’তি.

কামাৰচরকুসলৰণ্ণনা নিট্ঠিতা.

রূপাৰচরকুসলৰণ্ণনা

ইদানি যস্মা কামাৰচরকুসলানন্তরং উদ্দিট্ঠস্স রূপাৰচরকুসলস্স নিদ্দেসাৰকাসো অনুপ্পত্তো, তস্মা তং দস্সনত্থং ‘‘ইতরেসূ’’তিআদি আরদ্ধং. তত্থ ইতরেসূতি যথাৰুত্তকামাৰচরকুসলতো ইতরেসু, রূপাৰচরাদীসূতি অত্থো. সৰত্থুকতো একৰিধং একন্তেন ৰত্থুসন্নিস্সিতত্তা ¶ . ন হি অরূপধাতুযং রূপাৰচরধম্মা লব্ভন্তি রূপৰিরাগভাৰনায নিব্বত্তত্তা পুন রূপাৰচরজ্ঝানসমাপত্তিযা অভাৰতো.

হীনমজ্ঝিমপণীতভেদতোতি এত্থ পুব্বে ৰিয অধিপতীনং হীনাদিভাৰেহি ঝানস্স হীনাদিভাৰো যোজেতব্বো. অথ ৰা পটিলদ্ধমত্তমনাসেৰিতং হীনং পরিদুব্বলভাৰতো, নাতিসুভাৰিতং অপরিপুণ্ণৰসিভাৰং মজ্ঝিমং, অতিৰিয সুভাৰিতং পন সব্বসো পরিপুণ্ণৰসিভাৰং পণীতং. তথা উল়ারপুঞ্ঞফলকামতাৰসেন পৰত্তিতং হীনং, লোকিযাভিঞ্ঞত্থায পৰত্তিতং মজ্ঝিমং, ৰিৰেককামতায অরিযভাৰে ঠিতেন পৰত্তিতং পণীতং. অত্তহিতায ৰা পৰত্তিতং হীনং, কেৰলং অলোভজ্ঝাসযেন পৰত্তিতং মজ্ঝিমং, পরহিতায পৰত্তিতং পণীতং. ৰট্টজ্ঝাসযেন ৰা পৰত্তিতং হীনং, ৰিৰেকজ্ঝাসযেন পৰত্তিতং মজ্ঝিমং, ৰিৰট্টজ্ঝাসযেন লোকুত্তরপাদকত্থং পৰত্তিতং পণীতং.

পটিপদাদিভেদতোতি দুক্খপটিপদাদন্ধাভিঞ্ঞাদীনং পটিপদাভিঞ্ঞানং ভেদেন. পটিপদাৰচনেনেৰ ৰা তদৰিনাভাৰতো অভিঞ্ঞাপি লব্ভতি. তথা হেত্থ পটিপদাচতুক্কন্তি ৰোহরন্তীতি ¶ আদি-সদ্দেন অধিপতিআদীনং সঙ্গহো দট্ঠব্বো, তস্মা পটিপদাদিভেদতোতি পটিপদাভেদতো, অধিপতিভেদতো, আরম্মণভেদতো, হানভাগিযাদিভেদতোতি অত্থো. তত্থ পটিপদাভেদতো তাৰ দুক্খপটিপদং দন্ধাভিঞ্ঞং, দুক্খপটিপদং খিপ্পাভিঞ্ঞং, সুখপটিপদং দন্ধাভিঞ্ঞং, সুখপটিপদং খিপ্পাভিঞ্ঞন্তি এৰং চতুব্বিধং হোতি. তত্থ দুক্খা পটিপদা অস্সাতি দুক্খপটিপদং. দন্ধা অভিঞ্ঞা অস্সাতি দন্ধাভিঞ্ঞং. এস নযো ‘‘দুক্খপটিপদং খিপ্পাভিঞ্ঞ’’ন্তিআদীসুপি.

তত্থ অপ্পহীননীৰরণস্স, অৰিক্খম্ভিতঝাননিকন্তিকস্স চ ঞাণকিচ্চস্স অপরিব্যত্ততায পরিনিট্ঠিতসকলপুব্বকিচ্চস্স ‘‘পথৰী পথৰী’’তি ৰা ‘‘আপো আপো’’তি ৰা এৰং পৰত্তপঠমসমন্নাহারতো পট্ঠায যাৰ তস্স তস্স ঝানস্স উপচারুপ্পত্তিযা নীৰরণপ্পহানং, নিকন্তিৰিক্খম্ভনঞ্চ হোতি, তাৰ পৰত্তা পুব্বভাগভাৰনা পটিপদা নাম ‘‘পটিপজ্জতি ঝানং এতাযা’’তি কত্ৰা. পহীননীৰরণস্স, পন ৰিক্খম্ভিতঝাননিকন্তিকস্স চ ঞাণকিচ্চস্স পরিব্যত্তভাৰতো উপচারজ্ঝানং আদিং কত্ৰা যাৰ অপ্পনায উপ্পত্তি, তাৰ পৰত্তা পঞ্ঞা পুব্বভাগপঞ্ঞায ৰিসিট্ঠভাৰতো অভিঞ্ঞা নাম, তস্মা যো আদিতো কিলেসে ঝাননিকন্তিঞ্চ ¶ ৰিক্খম্ভেন্তো দুক্খেন সসঙ্খারেন সপ্পযোগেন কিলমন্তো ৰিক্খম্ভেতি, ৰিক্খম্ভিতকিলেসঝাননিকন্তি চ অপ্পনাপরিৰাসং ৰসন্তো চিরেন অঙ্গপাতুভাৰং পাপুণাতি, তস্স দুক্খপটিপদং, দন্ধাভিঞ্ঞঞ্চ ঝানং হোতি. যো পন সসঙ্খারেন কিলেসাদিকে ৰিক্খম্ভেত্ৰা ন চিরেন অঙ্গপাতুভাৰং পাপুণাতি, তস্স দুক্খপটিপদং, খিপ্পাভিঞ্ঞঞ্চ. যো কিলেসাদিকে ৰিক্খম্ভেন্তো সুখেন অকিলমন্তো ৰিক্খম্ভেতি, অপ্পনাপরিৰাসং পন চিরাযতি, তস্স সুখপটিপদং, দন্ধাভিঞ্ঞং. যো পন সুখেনেৰ কিলেসাদিকে ৰিক্খম্ভেত্ৰা ¶ সীঘমেৰ অপ্পনং পাপুণাতি, তস্স সুখপটিপদং, খিপ্পাভিঞ্ঞন্তি ৰেদিতব্বং.

সো পনাযং পটিপদাভিঞ্ঞানং ভেদো কিলেসিন্দ্রিযাধিকারৰসেন ৰেদিতব্বো. যস্স হি রাগাদযো কিলেসা তিব্বা হোন্তি, সদ্ধাপঞ্চমকানি চ ইন্দ্রিযানি মুদূনি. যো চ সমথৰিপস্সনাসু অকতাধিকারো, তস্স পৰত্তঝানং দুক্খপটিপদং, দন্ধাভিঞ্ঞঞ্চ হোতি. তস্স হি কিলেসসমুদাচারতিব্বতায নীৰরণৰিক্খম্ভনস্স কিচ্ছেন কসিরেন সমিজ্ঝনতো পটিপদা দুক্খা অসুখা, তস্সেৰ সদ্ধাদীনং ইন্দ্রিযানং মুদুতায অভিঞ্ঞাপি দন্ধা মন্দা অসীঘপ্পৰত্তিনী হোতি. ভৰন্তরে ৰা সমথে অকতাধিকারত্তা পটিপদা দুক্খা, ৰিপস্সনায অকতাধিকারত্তা অভিঞ্ঞাপি দন্ধা. যো পন ৰুত্তৰিপরীতো হোতি, তস্স কিলেসানং অতিব্বসমুদাচারতায, ইন্দ্রিযানঞ্চ তিখীণতায সমথৰিপস্সনাসু কতাধিকারতায যথাক্কমং সুখপটিপদা, খিপ্পাভিঞ্ঞা চ হোতি. ভৰন্তরে কতপরিচযস্স হি যথা পগুণং কত্ৰা ৰিস্সট্ঠগন্থো অপ্পমত্তকেন পযোগেন সুপ্পৰত্তি ৰাচুগ্গতো চ হোতি, এৰং ভাৰনা অপ্পকসিরেনেৰ ইজ্ঝতীতি. স্ৰাযং অকতো, কতো চ অধিকারো সমথনিস্সিতো পটিপদাযং ৰুত্তো সমাধিপ্পধানত্তা পটিপদায. ৰিপস্সনানিস্সিতো অভিঞ্ঞায ঞাণপ্পধানত্তা অপ্পনাযাতি দট্ঠব্বং.

যো পন তিব্বকিলেসো তিক্খিন্দ্রিযো ৰিপস্সনাযমেৰ ৰা কতাধিকারো হোতি, তস্স ৰুত্তনযেন দুক্খা পটিপদা, খিপ্পা পন অভিঞ্ঞা হোতি, তব্বিপরীতস্স সুখপটিপদা দন্ধাভিঞ্ঞাতি. তস্মা কিলেসানং তিব্বমন্দভাৰতো, ইন্দ্রিযানং তিখিণমুদুভাৰতো, পুব্বপরিচযস্স চ সম্ভৰাসম্ভৰৰসেনাতি এৰং কিলেসিন্দ্রিযাধিকারৰসেন ইমাসং ভেদো ৰেদিতব্বো.

অপিচ ¶ যানি পরতো সপ্পাযাসপ্পাযানি, পলিবোধুপচ্ছেদাদীনি পুব্বকিচ্চানি, অপ্পনাকোসল্লানি ¶ চ আগমিস্সন্তি, তেসু যো উপচারাধিগমতো পুব্বে, পচ্ছা চ অসপ্পাযসেৰী হোতি, তস্স দুক্খা পটিপদা, দন্ধা চ অভিঞ্ঞা হোতি. উভযত্থ সপ্পাযসেৰিনো সুখা পটিপদা, খিপ্পা চ অভিঞ্ঞা. যো পন ততো পুব্বভাগে অসপ্পাযং সেৰিত্ৰা অপরভাগে সপ্পাযসেৰী হোতি, তস্স দুক্খা পটিপদা, খিপ্পা অভিঞ্ঞা. তব্বিপরীতস্স সুখা পটিপদা, দন্ধা অভিঞ্ঞা চ ৰেদিতব্বা.

তথা পলিবোধুপচ্ছেদাদিপুব্বকিচ্চং অসম্পাদেত্ৰা ভাৰনমনুযুঞ্জন্তস্স সপরিপন্থতায দুক্খা পটিপদা, ৰিপরিযাযেন অপরিপন্থতায সুখা. অপ্পনাকোসল্লানি অসম্পাদেন্তস্স ঞাণস্স অৰিসদতায দন্ধা অভিঞ্ঞা হোতি, সম্পাদেন্তস্স ৰিপরিযাযতো খিপ্পা অভিঞ্ঞাতি. কিঞ্চ – তণ্হাৰিজ্জাতিভৰনৰসেন এতাসং ভেদো ৰেদিতব্বো. তণ্হাভিভূতস্স হি দুক্খা পটিপদা হোতি তস্সা সমাধিস্স উজুপটিপক্খত্তা সমথপটিপদায পরিপন্থকভাৰতো, অনভিভূতস্স তদভাৰতো সুখা. অৰিজ্জাভিভূতস্স চ তস্সা পঞ্ঞায উজুপটিপক্খভাৰতো দন্ধা অভিঞ্ঞা, ইতরস্স খিপ্পা অভিঞ্ঞাতি. সো পনাযং পটিপদাভেদো কেৰলং সমথভাৰনাৰসেন পটিলদ্ধজ্ঝানস্স, মগ্গাধিগমৰসেন পটিলদ্ধজ্ঝানস্স পন নত্থি দুক্খপটিপদাদিভেদো. কেচি পন মগ্গৰসেনেৰ তস্স পটিপদাদিভেদং ৰণ্ণেন্তি ‘‘মগ্গস্স হি দুক্খপটিপদাদিভাৰে তস্মিং দুক্খপটিপদাদিক’’ন্তি.

অধিপতিভেদাদীসু পন ছন্দাধিপতেয্যং চিত্তাধিপতেয্যং ৰীরিযাধিপতেয্যং ৰীমংসাধিপতেয্যন্তি এৰং অধিপতিভেদতো, পরিত্তং পরিত্তারম্মণং, পরিত্তং অপ্পমাণারম্মণং, অপ্পমাণং পরিত্তারম্মণং ¶ , অপ্পমাণং অপ্পমাণারম্মণন্তি এৰং আরম্মণভেদতো, হানভাগিযং ঠিতিভাগিযং ৰিসেসভাগিযং নিব্বেধভাগিযন্তি এৰং হানভাগিযাদিভেদতো চ চতুব্বিধতা ৰেদিতব্বা. তত্থ ‘‘ছন্দৰতো চে ঝানং নিব্বত্তিস্সতি, ময্হম্পি নিব্বত্তিস্সতী’’তি এৰং ছন্দং ধুরং কত্ৰা উপ্পন্নং ছন্দাধিপতেয্যং. এস নযো ‘‘চিত্তাধিপতেয্যা’’দীসুপি. অপ্পগুণং পন উপরিঝানস্স পচ্চযো ভৰিতুং অসক্কোন্তং পরিত্তং, সুপ্পসরাৰমত্তেসু অৰড্ঢিতারম্মণেসু নিব্বত্তং পরিত্তারম্মণং. ৰুত্তপটিপক্খতো পন যথাক্কমং অপ্পমাণারম্মণাদীনি ৰেদিতব্বানি. হানভাগিযাদিৰিসেসং সযমেৰ ৰক্খতি.

ঝানঙ্গযোগভেদতোতি কত্থচি পঞ্চ ঝানঙ্গানি, কত্থচি চত্তারি, কত্থচি তীণি, কত্থচি দ্ৰে ¶ , কত্থচি অপরানি দ্ৰেতি এৰং ঝানঙ্গানং সম্পযোগভেদতো. ননু চেত্থ কামাৰচরকুসলে ৰিয সঙ্খারভেদো কস্মা ন গহিতো. ইদম্পি হি কেৰলং সমথানুযোগৰসেন পটিলদ্ধং সসঙ্খারং, মগ্গাধিগমৰসেন পটিলদ্ধমসঙ্খারং, তস্মা ‘‘ঝানঙ্গসঙ্খারযোগভেদতো দসৰিধ’’ন্তি ৰত্তব্বন্তি? নযিদমেৰং, মগ্গাধিগমৰসেন সত্তিতো পটিলদ্ধস্সাপি অপরভাগে পরিকম্মৰসেনেৰ উপ্পজ্জনতো, তস্মা সব্বস্সপি ঝানস্স পরিকম্মসঙ্খাতপুব্বাভিসঙ্খারেন ৰিনা কেৰলং অধিকারৰসেন অনুপ্পজ্জনতো ‘‘অসঙ্খার’’ন্তিপি ৰত্তুং ন সক্কা, অধিকারেন চ ৰিনা কেৰলং পরিকম্মাভিসঙ্খারেনেৰ অনুপ্পজ্জনতো ‘‘সসঙ্খার’’ন্তিপি ৰত্তুং ন সক্কাতি ঝানঙ্গযোগভেদতো পঞ্চৰিধতা চ ৰুত্তাতি.

কামচ্ছন্দো ব্যাপাদো থিনমিদ্ধং উদ্ধচ্চকুক্কুচ্চং ৰিচিকিচ্ছাতি ইমানি পঞ্চ নীৰরণানি ৰিপ্পহীনানি এতস্সাতি কামচ্ছন্দ…পে… ৰিপ্পহীনং. ‘‘অগ্যাহিতো’’তি এত্থ আহিত-সদ্দস্স ৰিয ৰিপ্পহীন-সদ্দস্সেত্থ পরৰচনং দট্ঠব্বং. কামচ্ছন্দাদীহি ৰা ৰিপ্পহীনং ৰিসংযুত্তং তেসং পহাযকভাৰেনাতি কামচ্ছন্দ…পে… ৰিপ্পহীনং. তত্থ কামেতীতি কামো, ছন্দনট্ঠেন ছন্দো চাতি ¶ কামচ্ছন্দো, বহলকামরাগস্সেতং অধিৰচনং. ব্যাপাদাদীনমত্থং ৰক্খতি. যস্মা কামচ্ছন্দাদীসু অপ্পহীনেসু ঝানং নুপ্পজ্জতি, তস্মা তানিস্স পহানঙ্গানীতি ৰেদিতব্বানি. ননু অঞ্ঞেপি অকুসলা ধম্মা ইমিনা ঝানেন পহীযন্তি, অথ কস্মা পঞ্চেৰ পহানঙ্গৰসেন ৰুত্তানীতি? ৰিসেসেন ঝানন্তরাযকরত্তা. কামচ্ছন্দৰসেন হি নানাৰিসযপলোভিতং চিত্তং ন একত্তারম্মণে সমাধিযতি. কামচ্ছন্দাভিভূতং ৰা নানাৰিসযসমুপব্যূল়্হায কামধাতুযা পহানপটিপদং ন পটিপজ্জতি, ব্যাপাদেন চ আরম্মণে পটিহঞ্ঞমানং ন সমাহিতং পৰত্ততি, থিনমিদ্ধাভিভূতং অকম্মঞ্ঞং হোতি, উদ্ধচ্চকুক্কুচ্চপরেতং অৰূপসন্তমেৰ হুত্ৰা পরিব্ভমতি, ৰিচিকিচ্ছাউপহতং ঝানাধিগমপটিপদং নারোহতি ‘‘সম্মাসম্বুদ্ধো নু খো, ন নু খো, পথৰী পথৰী’’তিআদিনা পৰত্তমনসিকারেন ‘‘ঝানং সিযা নু খো, ন নু খো’’তিআদিনা ৰিচিকিচ্ছন্তস্স ঝানাধিগমপটিপদায অসংসিজ্ঝনতো. যতো ৰক্খতি –

‘‘ভাগী অস্সমহং অদ্ধা, ইমায পটিপত্তিযা;

পৰিৰেকসুখস্সাতি, কত্ৰা উস্সাহমুত্তম’’ন্তি.

তস্মা ¶ সমাধিআদীনং উজুৰিপচ্চনীকভাৰেন ৰিসেসেন ঝানাধিগমস্স অন্তরাযকরণতো এতানেৰ পহানঙ্গানীতি ৰুত্তানি. হোতি চেত্থ –

‘‘পচ্চনীকা যতো পঞ্চ, সমাধাদীনমেত্থ হি;

ঝানন্তরাযিকা তস্মা, পহানঙ্গে নিযামিতা’’তি.

এৰমিদং পহানঙ্গৰসেন দস্সেত্ৰা ইদানি সম্পযোগঙ্গৰসেন দস্সেতুং ‘‘ৰিতক্ক…পে… সম্পযুত্ত’’ন্তি ৰুত্তং. তত্থ ৰিতক্কাদযো ৰচনত্থলক্খণাদিৰসেন উপরি আগমিস্সন্তি. যস্মা পন ইমেসু উপ্পন্নেসু ঝানং উপ্পন্নং নাম হোতি, তেনস্স ইমানি সম্পযোগঙ্গানীতি ৰেদিতব্বানি, তস্মা ন এতেহি ¶ সমন্নাগতং অঞ্ঞদেৰ ঝানং নাম অত্থীতি গহেতব্বং. যথা পন নেমিআদিঅঙ্গসমুদাযে রথাদিৰোহারো হোতি, এৰং ঝানঙ্গসমুদাযে ঝানৰোহারো. ৰুত্তম্পি হেতং ৰিভঙ্গে ‘‘ঝানন্তি ৰিতক্কো ৰিচারো পীতি সুখং চিত্তস্সেকগ্গতা’’তি (ৰিভ. ৫৬৯). কস্মা পন অঞ্ঞেসুপি ফস্সাদীসু সম্পযুত্তধম্মেসু ৰিজ্জমানেসু ইমানিযেৰ পঞ্চ ঝানঙ্গৰসেন ৰুত্তানীতি? ৰুচ্চতে – উপনিজ্ঝানকিচ্চৰন্ততায, কামচ্ছন্দাদীনং উজুপটিপক্খভাৰতো চ. ৰিতক্কো হি আরম্মণে চিত্তং অভিনিরোপেতি, ৰিচারো অনুবন্ধতি. এৰং ঝানাধিগমস্স ৰিসেসপচ্চযভূতেহি তেহি অৰিক্খেপায সমাদহিতপযোগস্স চেতসো পযোগসম্পত্তিসমুট্ঠানা পীতি পীণনং, সুখঞ্চ উপব্রূহনং করোতি. অথ নং সসম্পযুত্তধম্মং এতেহি অভিনিরোপনানুবন্ধনপীণনউপব্রূহনেহি অনুগ্গহিতা একগ্গতা সমাধানকিচ্চেন অত্তানং অনুৰত্তাপেন্তী একত্তারম্মণে সমং, সম্মা চ আধিযতি, ইন্দ্রিযসমতাৰসেন সমং, পটিপক্খধম্মানং দূরীভাৰেন লীনুদ্ধচ্চাভাৰেন সম্মা চ ঠপেতীতি এৰমেতেসমেৰ উপনিজ্ঝানকিচ্চং আৰেণিকং. কামচ্ছন্দাদিপটিপক্খভাৰেন পন সযমেৰ ৰক্খতি. এৰং উপনিজ্ঝানকিচ্চৰন্ততায, কামচ্ছন্দাদীনং উজুপটিপক্খভাৰতো চ ইমেযেৰ পঞ্চ ঝানঙ্গভাৰেন ৰৰত্থিতাতি. যথাহু –

‘‘উপনিজ্ঝানকিচ্চত্তা, কামাদিপটিপক্খতো;

সন্তেসুপি চ অঞ্ঞেসু, পঞ্চেৰ ঝানসঞ্ঞিতা’’তি.

দেসনাক্কমতো, মহগ্গতধম্মেসু পঠমং অধিগন্তব্বতো চ পঠমং, পঠমং সমাপজ্জিতব্বন্তিপি ¶ পঠমন্তি ৰদন্তি. তং পন ন একন্তলক্খণং ঝানপটিলোমাদিৰসেন সমাপজ্জনে অসম্ভৰতো.

পুরিমপচ্ছিমচিত্তেসু উপ্পজ্জমানস্সাপি অপ্পনাক্খণে অনুপ্পজ্জনতো ৰিতক্কো ৰিপ্পহীনো এতস্স, ততো ৰা এতং ৰিপ্পহীনন্তি ¶ ৰিতক্কৰিপ্পহীনং. ভাৰনায হি পহীনত্তা ৰিতক্কো ঝানক্খণে নুপ্পজ্জতি. অসংকিলিট্ঠসভাৰত্তা পন উপচারভাৰনায চ তং পহাতুং অসমত্থভাৰতো পুরিমভাগে, পচ্ছাভাগে চ অপচ্চনীকচিত্তপ্পৰত্তিতো উপ্পজ্জতিযেৰাতি.

ননু চ ‘‘অসংকিলিট্ঠসভাৰত্তা’’তি ৰুত্তং, অথ কথং ঝানেন এস পহীযতি? ন হি কুসলেহি অসংকিলিট্ঠধম্মস্স পহানং অত্থি রাগাদিসংকিলিট্ঠানং পাপধম্মানমেতস্স উজুপটিপক্খভাৰতোতি? ৰুচ্চতে – অসংকিলিট্ঠসভাৰস্সাপি এতস্স ওল়ারিকতায দুব্বলভাৰতো ঝানক্খণে অনুপ্পত্তিসভাৰাপাদনত্থং তত্থ নিকন্তিৰিক্খম্ভনৰসেন দুতিযজ্ঝানভাৰনা হোতীতি তস্সা বলেন তং ঝানক্খণে অনুপ্পজ্জন্তং নিকন্তিৰিক্খম্ভনৰসেন ৰা ৰিক্খম্ভিতং পহীনং নাম হোতি. যদি এৰং উপচারেনপি নিকন্তি ৰিক্খম্ভীযতীতি তত্থপিস্স পহানং সিযা, যথা পঠমজ্ঝানস্স উপচারে নীৰরণানীতি? নযিদমেৰং, নীৰরণপ্পহানস্স ৰিয ৰিতক্কারম্মণিকনিকন্তি ৰিক্খম্ভনস্স উপচারেন সাতিসযং অনিপ্ফজ্জনতো. সাতিসযঞ্হি তত্থ নিকন্তিপ্পহানং অপ্পনায এৰ হোতি, তস্মা যদৰোচুম্হা ‘‘উপচারভাৰনায চ তং পহাতুং অসমত্থভাৰতো’’তি, তং সুট্ঠু উপপরিক্খিত্ৰা ৰুত্তন্তি দট্ঠব্বং. ‘‘ৰিচারৰিপ্পহীন’’ন্তিআদীসুপি ৰুত্তনযানুসারেন অত্থো দট্ঠব্বো. দুতিযজ্ঝানেযেৰ পহীনস্স ৰিতক্কস্স ইধ অপ্পৰত্তিমত্তদস্সনত্থং ‘‘ৰিতক্কৰিচারৰিপ্পহীন’’ন্তি ৰিতক্ক-গ্গহণং কতং. এৰং ‘‘ৰিতক্কৰিচারপীতিৰিপ্পহীন’’ন্তিআদীসুপি.

যথাসম্ভৰন্তি পথৰীকসিণাদীসু যং যং আরম্মণং যস্স যস্স সম্ভৰতি, তদনতিক্কমতো. কসিণানাপানেসু হি পঞ্চেৰ ঝানানি পৰত্তন্তি, অসুভকাযগতাসতীসু পঠমজ্ঝানং, অনুপেক্খাব্রহ্মৰিহারেসু পঞ্চমজ্ঝানৰজ্জানি, উপেক্খাব্রহ্মৰিহারে পঞ্চমজ্ঝানন্তি.

পথৰীকসিণাদীসূতি ¶ ¶ এত্থ আদি-গ্গহণেন কেৰলং আপোকসিণাদীনমেৰ, অথ খো অসুভাদীনম্পি অপ্পনাৰহকম্মট্ঠানানং সঙ্গহোতি দট্ঠব্বং. এত্থ চ অভিভাযতনৰিমোক্খঝানানি পৰত্তাকারমত্ততো ভিন্নানি, আরম্মণতো পন কসিণাযতনানেৰ হোন্তীতি কসিণাযতনঝানেহেৰ তানি সঙ্গহিতানি. ‘‘যথাসম্ভৰং…পে… অনেকৰিধ’’ন্তি ৰা ৰচনেন রূপাৰচরজ্ঝানে সব্বোপি লব্ভমানকভেদো সঙ্গহিতোতি অভিভাযতনৰিমোক্খঝানানি ৰিসুং ন ৰুত্তানি, তানি পন সরূপতো এৰং ৰেদিতব্বানি.

তত্থ ঞাণুত্তরস্স যোগাৰচরস্স পথৰীকসিণাদিআরম্মণং অভিভৰিত্ৰা ‘‘ন মেত্থ অপ্পনানিব্বত্তনে ভারো’’তি পটিপন্নস্স নিমিত্তুপ্পত্তিতো উদ্ধং দুতিযততিযৰীথিযং, চতুত্থপঞ্চমৰীথিযং ৰা পটিলদ্ধং ঝানং অভিভাযতনং নাম. তঞ্হি আরম্মণং অভিভৰতীতি অভিভূ, যোগিনো সুখৰিসেসানং অধিট্ঠানতায, মনাযতনধম্মাযতনপরিযাপন্নতায ৰা আযতনন্তি অভিভাযতনং, অভিভৰিতব্বং ৰা অভিভূ, আলম্বণং, তং আযতনমস্সাতি অভিভাযতনং. অথ ৰা আলম্বণাভিভৰনতোযেৰ অভিভূ, পরিকম্মং, ঞাণং ৰা, তং আযতনং কারণমস্সাতি অভিভাযতনং. পরিকম্মং, ঞাণং ৰা আলম্বণং অভিভৰিত্ৰা পৰত্তমানং উপচারুপ্পত্তিতো পঞ্চমৰীথিমনতিক্কমিত্ৰা অপ্পনং নিব্বত্তেতি. পঞ্চমৰীথিতো পরং নিব্বত্তং পন অভিভৰিতুকামতায নিব্বত্তিতম্পি অভিভাযতনং নাম ন হোতি. সামঞ্ঞগতিযা পন কসিণাযতনমেৰ হোতি. ইমমেৰ হি সীঘতরপ্পৰত্তিং সন্ধায অট্ঠকথাযং ‘‘তানি অভিভৰিত্ৰা সমাপজ্জতি, সহ নিমিত্তুপ্পাদেনেৰেত্থ অপ্পনং নিব্বত্তেতী’’তি (ধ. স. অট্ঠ. ২০৪) ৰুত্তং. ননু চ অট্ঠকথাযং যথারুতৰসেনেৰ অত্থো কস্মা ন গয্হতি. ‘‘সহ নিমিত্তুপ্পাদেনেৰা’’তি (ধ. স. অট্ঠ. ২০৪) হি ৰুত্তত্তা নিমিত্তুপ্পত্তিযা সহুপ্পন্নং ঝানমভিভাযতনন্তি ¶ ৰিঞ্ঞাযতীতি? নযিদমেৰং, নিমিত্তুপ্পাদেন সহ অপ্পনায অসম্ভৰতো. নিমিত্তুপ্পাদোতি হি ইধ পটিভাগনিমিত্তস্স উপ্পত্তি তদারম্মণস্স ৰা উপচারজ্ঝানস্স, কিং তাৰ পটিভাগনিমিত্তুপ্পত্তিযা সহ অপ্পনায নিব্বত্তি উপচারজ্ঝানে অসতি তস্সা অসম্ভৰতো, নাপি উপচারজ্ঝানেন সহ একৰীথিযং নিব্বত্তি তস্সা উপচারভাৰনাপবন্ধসেৰিতব্বভাৰেন তদা অসম্ভৰতো, তস্মা নাতিচিরাযনপ্পৰত্তিদস্সনত্থং সমীপিম্হি সমীপকারীযূপচারেন অট্ঠকথাযং তথা ৰুত্তন্তি ৰেদিতব্বং. যদি নিমিত্তুপ্পত্তিতো নাতিচিরপ্পৰত্তমভিভাযতনং, কথং তস্স দন্ধাভিঞ্ঞাখিপ্পাভিঞ্ঞাভেদো পাল়িযং ৰুত্তোতি? ৰুচ্চতে – চতুত্থপঞ্চমজৰনৰীথিযং উপ্পন্নং চিরকালনিব্বত্তিতায দন্ধাভিঞ্ঞং, দুতিযততিযৰীথিযং ¶ উপ্পন্নং তব্বিপরীতলক্খণতায খিপ্পাভিঞ্ঞন্তি. কেচি পন ‘‘অভিভাযতনং নাম ৰসিভাৰপ্পত্তমেৰ, নেতর’’ন্তি ৰদন্তি, তং তেসং মতিমত্তং, ৰসিভাৰপ্পত্তিযা নিমিত্তুপ্পত্তিতো দূরতরভাৰেন ‘‘সহ নিমিত্তুপ্পাদেনেৰেত্থ অপ্পনং নিব্বত্তেতী’’তি অট্ঠকথাৰচনেন সহ ৰিরুজ্ঝনতো.

অপিচ ৰসিভাৰপ্পত্তং ঝানং অভিভৰনকারণনিরপেক্খং ৰসিভাৰবলেনেৰ সক্কচ্চং সমাপজ্জিতুং ন সক্কাতি ন তং অভিভাযতনং নাম হোতি, তস্মা অপ্পত্তৰসিভাৰা পঠমুপ্পন্নাযেৰ অভিভাযতনন্তি নিট্ঠমেত্থ গন্তব্বং. যদি এৰং কথং ‘‘অপ্পমাণং পরিত্তারম্মণং, অপ্পমাণং অপ্পমাণারম্মণ’’ন্তি (ধ. স. ২১২-২১৩) অভিভাযতনদেসনাযং ৰুত্তং. ৰসিভাৰপ্পত্তঞ্হি ঝানং অপ্পমাণন্তি ৰুচ্চতি. ইদঞ্চ উপ্পন্নমত্তত্তা পরিত্তমেৰাতি? নাযং দোসো. পঠমং অভিভাযতনৰসেন পটিলদ্ধজ্ঝানং পচ্ছা ৰসিভাৰপ্পত্তম্পি অভিভাযতননামমেৰ লভতীতি ৰসিভাৰপ্পত্তমভিভাযতনং অপ্পমাণং, ইতরং পরিত্তং.

অথ ¶ ৰা ৰসিভাৰপ্পত্তং অপ্পমাণন্তি উক্কংসগতিপরিগ্গহৰসেন ৰুচ্চতি. তং পন যং বলৰতরং, তং অপ্পমাণন্তি ইমস্স অত্থস্স উপলক্খণং কত্ৰা ৰদন্তি. বলৰভাৰনিবন্ধনং অপ্পমাণত্তং. বলৰভাৰো চ পঠমঅপ্পনাৰারতো পচ্ছিমপচ্ছিমঅপ্পনাৰারানং বলৰতায অৰসিতাপত্তেপি ঝানে সম্ভৰতীতি বলৰন্তং অপ্পমাণং, ইতরং পরিত্তন্তি এৰং অৰসিতাপত্তেপি ঝানে অপ্পমাণাদিভাৰো ৰেদিতব্বো. অথ ৰা অপ্পনায বলৰভাৰো নাম উপচারস্স বলৰতায সতি হোতি. উপচারঞ্চ তং বলৰং, যং সহসা অপ্পনং উপ্পাদেতুং সক্কুণেয্য, তস্মা খিপ্পাভিঞ্ঞানং দ্ৰিন্নং অভিভাযতনঝানানং উপচারৰীথিযা অনন্তরং দুতিযৰীথিযং উপ্পন্নং উপচারজ্ঝানস্স বলৰতায সযম্পি বলৰতরন্তি অপ্পমাণং নাম হোতি. দুতিযৰীথিমতিক্কমিত্ৰা ততিযৰীথিযং উপ্পন্নং তদিতরসভাৰতায পরিত্তং. তথা দন্ধাভিঞ্ঞানং চতুত্থৰীথিযং উপ্পন্নং অপ্পমাণং. পঞ্চমৰীথিযং উপ্পন্নং পরিত্তন্তি. অথ ৰা যত্থ কত্থচি অপ্পনাৰীথিযং পঞ্চমং উপ্পজ্জনকঅপ্পনাতো চতুত্থং উপ্পজ্জমানায বলৰভাৰোতি তংৰসেনাপেত্থ পরিত্তঅপ্পমাণতা ৰেদিতব্বা.

তং পনেতং গণনতো অট্ঠৰিধং হোতি. যথাহ –

‘‘অজ্ঝত্তং ¶ অরূপসঞ্ঞী বহিদ্ধা রূপানি পস্সতি পরিত্তানি, ‘তানি অভিভুয্য জানামি পস্সামী’তি এৰংসঞ্ঞী হোতি. অজ্ঝত্তং অরূপসঞ্ঞী বহিদ্ধা রূপানি পস্সতি পরিত্তানি সুৰণ্ণদুব্বণ্ণানি. অজ্ঝত্তং অরূপসঞ্ঞী বহিদ্ধা রূপানি পস্সতি অপ্পমাণানি. অজ্ঝত্তং অরূপসঞ্ঞী বহিদ্ধা রূপানি পস্সতি অপ্পমাণানি সুৰণ্ণদুব্বণ্ণানি, তানি অভিভুয্য জানামি পস্সামি. নীলানি নীলৰণ্ণানি নীলনিদস্সনানি নীলনিভাসানি, তানি অভিভুয্য জানামি পস্সামি. পীতানি পীতৰণ্ণানি পীতনিদস্সনানি পীতনিভাসানি. লোহিতানি লোহিতৰণ্ণানি লোহিতনিদস্সনানি ¶ লোহিতনিভাসানি. ওদাতানি ওদাতৰণ্ণানি ওদাতনিদস্সনানি ওদাতনিভাসানি, ‘তানি অভিভুয্য জানামি পস্সামী’তি এৰংসঞ্ঞী হোতী’’তি (দী. নি. ২.১৭৩; ৩.৩৩৮; ম. নি. ২.২৪৯; অ. নি. ১.৪২৭-৪৩৪; ৮.৬৫).

তত্থ অজ্ঝত্তং অরূপসঞ্ঞীতি অলাভিতায ৰা অনত্থিকতায ৰা অজ্ঝত্তেসু কেসাদীসু পরিকম্মঅপ্পনাসঞ্ঞাৰিরহিতো. বহিদ্ধা রূপানি পস্সতীতি বহিদ্ধা অট্ঠসু কসিণেসু, চতূসু ভূতকসিণেসু এৰ ৰা কতপরিকম্মকতায পরিকম্মৰসেন চেৰ অপ্পনাৰসেন চ তানি বহিদ্ধা অট্ঠ, চত্তারি ৰা কসিণরূপানি পস্সতি. পরিত্তানীতি অমহন্তানি. অভিভুয্যাতি যথা মহগ্ঘসো সম্পন্নগহণিকো পুরিসো কটচ্ছুমত্তং ভত্তং লভিত্ৰা ‘‘কিং এত্থ ভুঞ্জিতব্বং ভত্তং অত্থী’’তি সঙ্কড্ঢিত্ৰা সব্বং এককবল়মেৰ করোতি, এৰমেৰ ঞাণুত্তরিকো পুগ্গলো ৰিসদঞাণো ‘‘কিং এত্থ পরিত্তকে আরম্মণে সমাপজ্জিতব্বং অত্থি, নাযং মম ভারো’’তি তানি রূপানি পরিকম্মেন, ঞাণেন ৰা অভিভৰিত্ৰা সমাপজ্জতি. হেট্ঠা ৰুত্তনযেন সীঘং অপ্পনং নিব্বত্তেতি. ‘‘জানামি পস্সামী’’তি ইমিনা পনস্স পুব্বাভোগো কথিতো, তদাগমনতো চ অন্তোসমাপত্তিযং চিত্তাভিসঙ্খারো. ইতরথা অনেন আভোগমত্তে কথিতে তেন সাধিতব্বং ঝানং ন ৰুত্তং হোতি, অভিভাযতনদেসনাৰাযং ঝানৰিসযাতি. আগমট্ঠকথাসু পন সমাপত্তিতো ৰুট্ঠিতস্স পুব্বভাগভাৰনাৰসেন ঝানক্খণে পৰত্তমভিভৰনাকারং গহেত্ৰা পৰত্তমাভোগং সন্ধায –

‘‘ইমিনা পনস্স আভোগো কথিতো. সো চ খো সমাপত্তিতো ৰুট্ঠিতস্স, ন অন্তোসমাপত্তিয’’ন্তি ¶ (দী. নি. অট্ঠ. ২.১৭৩; ম. নি. অট্ঠ. ২.২৪৯; অ. নি. অট্ঠ. ৩.৮.৬৫) ৰুত্তং.

দুতিযে ¶ সুৰণ্ণদুব্বণ্ণানীতি পরিসুদ্ধাপরিসুদ্ধৰণ্ণানি. পরিসুদ্ধানি হি নীলাদীনি সুৰণ্ণানি, অপরিসুদ্ধানি দুব্বণ্ণানীতি ইধ অধিপ্পেতানি.

ততিযে অপ্পমাণানীতি ৰুদ্ধিপ্পমাণানি ৰিপুলানি খলমণ্ডলাদীনি. ৰড্ঢনৰসেন পনেত্থ অপ্পমাণতা ন গহিতা কসিণৰড্ঢনস্স ইধ অসম্ভৰতো. কসিণস্স হি দ্ৰে ৰড্ঢনভূমিযো উপচারভূমি, অপ্পনাভূমি ৰা. তত্থ ন তাৰ ইধ উপচারভূমিযং ৰড্ঢনং সম্ভৰতি. নিমিত্তুপ্পত্তিযা সমকালং ৰিয উপ্পজ্জমানে ঝানে কুতো তস্স ওকাসোতি, নাপি অপ্পনাভূমিযং. ৰড্ঢিতস্স পঠমুপ্পন্নঝানারম্মণতা ন যুজ্জতি, তস্মা সভাৰমহন্তানেৰ আলম্বণানি ইধ অপ্পমাণানীতি অধিপ্পেতানি. কেচি পন ‘‘ৰড্ঢিতৰসেনেৰ অপ্পমাণানীতি গহেত্ৰা পঠমং অভিভৰনিচ্ছায অভাৰেন ৰড্ঢেত্ৰা পচ্ছা অভিভৰনিচ্ছায সতি অভিভৰনাকারেন পৰত্তো তস্মিং অপ্পনং নিব্বত্তেতীতি অপ্পনং পটিলভিত্ৰা ৰড্ঢিতনিমিত্তেসু ইদং অভিভাযতনং ৰুত্ত’’ন্তি ৰদন্তি.

চতুত্থে অভিভুয্যাতি অভিভৰিত্ৰা. যথা নাম সম্পন্নগহণিকো মহগ্ঘসো পুরিসো একং ভত্তৰড্ঢিতকং লভিত্ৰা ‘‘‘অঞ্ঞোপি হোতু, অঞ্ঞোপি হোতূ’তি কিং এস ময্হং করিস্সতী’’তি ন তং মহন্ততো পস্সতি, এৰমেৰ ঞাণুত্তরো ৰিসদঞাণো পুগ্গলো ‘‘‘কিং এত্থ সমাপজ্জিতব্বং, নযিদং অপ্পমাণ’ন্তি ময্হং চিত্তেকগ্গতাকরণে ভারো’’তি অভিভৰিত্ৰা সমাপজ্জতি. ৰুত্তনযেনেৰ অপ্পনং নিব্বত্তেতি.

পঞ্চমে নীলানি…পে… নীলনিভাসানীতি এতানি পরিযাযনামানীতি তত্থ ‘‘নীলানী’’তি সব্বসঙ্গাহকৰসেন ৰুত্তং. এত্তকেযেৰ পন ৰুত্তে তংযোগতো তব্বোহারেন গুণযুত্তেপি পসঙ্গো সিযাতি তন্নিৰারণত্থং ‘‘নীলৰণ্ণানী’’তি ৰণ্ণৰসেন ৰুত্তং. এৰম্পি হি বহুব্বীহিৰসেন গুণোপি পসঙ্গো হোতীতি ‘‘নীলনিদস্সনানী’’তি নিদস্সনৰসেন ৰুত্তং ¶ . নিদস্সিতব্বঞ্হি নিদস্সনং, চক্খুনা দট্ঠব্বং রূপং. ততো সেতাদিনিৰারণত্থং নীল-সদ্দেন সহ সমাসো কতোতি অপঞ্ঞাযমানচীৰরানি অসম্ভিন্নৰণ্ণানি একনীলানেৰ হুত্ৰা দিস্সমানানীতি ¶ ৰুত্তং হোতি. ‘‘নীলনিভাসানী’’তি ইদং পন ওভাসৰসেন ৰুত্তং, নীলোভাসানি নীলপ্পভাযুত্তানীতি অত্থো. এতেন তেসং সুৰিসুদ্ধত্তং দস্সেতি. ‘পীতানী’’তিআদীসুপি ইমিনাৰ নযেন অত্থো ৰেদিতব্বো. অট্ঠসু চেতেসু পুরিমং অভিভৰনাকারেন ৰণ্ণাভোগরহিতানি অট্ঠপি কসিণানি পরিত্তানি আরম্মণং কত্ৰা উপ্পন্নং সন্ধায ৰুত্তং. ততিযং তথা অপ্পমাণানি. দুতিযচতুত্থানিযেৰ দ্ৰে ৰণ্ণাভোগসহিতানি আরব্ভ উপ্পন্নং, ন পন ৰণ্ণকসিণৰসেন উপ্পন্নং তস্স ৰিসুং ৰক্খমানত্তা.

পঞ্চমাদীনি পন তেসু কতাধিকারে সন্ধায সুৰিসুদ্ধৰণ্ণৰসেনেৰ দেসিতানি. ন হি তেসং অভিভৰনস্স পরিত্ততা, অপ্পমাণতা ৰা কারণং, অথ খো সুৰিসুদ্ধনীলাদিভাৰো. তত্থ হি তে কতাধিকারাতি. ননু চ আগমট্ঠকথাসু ‘‘সুৰণ্ণানি ৰা হোন্তু দুব্বণ্ণানি ৰা, পরিত্তঅপ্পমাণৰসেনেৰ ইমানি অভিভাযতনানি দেসিতানী’’তি (দী. নি. অট্ঠ. ২.১৭৩; ম. নি. অট্ঠ. ২.২৪৯; অ. নি. অট্ঠ. ৩.৮.৬৫) ৰুত্তন্তি? সচ্চং, তং পন আগমে অভিভাযতনানং অঞ্ঞথা আগতত্তা ৰুত্তং. তত্থ হি –

‘‘অজ্ঝত্তং রূপসঞ্ঞী একো বহিদ্ধা রূপানি পস্সতি পরিত্তানি সুৰণ্ণদুব্বণ্ণানি, অপ্পমাণানি সুৰণ্ণদুব্বণ্ণানি, অজ্ঝত্তং অরূপসঞ্ঞী একো বহিদ্ধা রূপানি পস্সতি পরিত্তানি সুৰণ্ণদুব্বণ্ণানি, অপ্পমাণানি সুৰণ্ণদুব্বণ্ণানী’’তি (দী. নি. ২.১৭৩; ৩.৩৩৮; ম. নি. ২.২৪৯; অ. নি. ১.৪২৭-৪৩৪; ৮.৬৫) –

এৰং চত্তারিযেৰ অভিভাযতনানি আগতানি, তস্মা তদট্ঠকথাসু ৰণ্ণাভোগে ৰিজ্জমানে অৰিজ্জমানেপি পরিত্তঅপ্পমাণতাৰসেনেৰ ¶ ইমেসং দেসিতভাৰো ৰুত্তো. পরিত্তঅপ্পমাণতা হি ইমেসু চতূসু অভিভৰনস্স কারণং ৰণ্ণাভোগে ৰিজ্জমানে অৰিজ্জমানেপীতি. ননু চ সব্বত্থ ‘‘সুৰণ্ণদুব্বণ্ণানী’’তি ৰচনতো ৰণ্ণাভোগসহিতানিযেৰ তত্থ গহিতানীতি? তং ন, ৰণ্ণাভোগরহিতানি, সহিতানি চ সব্বানি পরিত্তানি একতো কত্ৰা ‘‘পরিত্তানি সুৰণ্ণদুব্বণ্ণানী’’তি ৰুত্তানি, তথা ‘‘অপ্পমাণানি সুৰণ্ণদুব্বণ্ণানী’’তি. যদি এৰং কথং ৰিসিট্ঠানং ৰণ্ণাভোগরহিতানং, সহিতানঞ্চ একজ্ঝং মনসিকারো, ন একজ্ঝং, ৰিসুংযেৰ তেসং মনসিকারো. যদি এৰং ৰিসুং কথমেকত্তন্তি? পরিত্তভাৰসামঞ্ঞতো. যদি এৰং সুৰণ্ণদুব্বণ্ণ-গ্গহণমতিরিচ্চতি ¶ অৰসিট্ঠোতি? নাতিরিচ্চতি পরিযাযদেসনাভাৰতো. অত্থি হি এস পরিযাযো, যদিদং ৰণ্ণাভোগজনিতাজনিতং ৰিসেসং অগ্গহেত্ৰা পরিত্তভাৰসামঞ্ঞেন একত্তং নেত্ৰা ‘‘পরিত্তানি অভিভুয্যা’’তি ৰত্ৰা পুন তদন্তোগধমেৰ পভেদং ৰিনেয্যৰসেন দস্সেতুং তানি চ কদাচি ৰণ্ণৰসেন আৰজ্জিতানি হোন্তি, ‘‘সুৰণ্ণদুব্বণ্ণানি অভিভুয্যা’’তি ৰত্তব্বতায ৰণ্ণাভোগরহিতানি, সহিতানি চ ৰিসুং মনসি কত্ৰা উভযত্থাপি ৰণ্ণাভোগরহিতপরিত্তাভিভৰনে, তংসহিতপরিত্তাভিভৰনে চ পরিত্তাভিভৰনসামঞ্ঞং গহেত্ৰা একত্তং কতন্তি. অভিধম্মে পন নিপ্পরিযাযদেসনত্তা ৰণ্ণাভোগরহিতানি, সহিতানি চ ৰিসুং ৰুত্তানি. অত্থি হি উভযত্থাভিভৰনৰিসেসোতি. হোতু তাৰ, এৰং সুত্তাভিধম্মপাঠৰিসেসতো অট্ঠকথায পাঠভেদে পন কো অধিপ্পাযোতি? ৰুচ্চতে – সুত্তন্তে হি পঠমৰিমোক্খং দ্ৰেধা ভিন্দিত্ৰা পঠমদুতিযঅভিভাযতনানি ৰুত্তানি, পরিযাযদেসনত্তা ৰিমোক্খানম্পি অভিভৰনপরিযাযো ৰিজ্জতীতি ‘‘অজ্ঝত্তং রূপসঞ্ঞী’’তি অভিভাযতনদ্ৰযং ৰুত্তং.

ততিযচতুত্থঅভিভাযতনেসু ¶ দুতিযৰিমোক্খো, ৰণ্ণাভিভাযতনেসু ততিযৰিমোক্খো চ অভিভৰনপ্পৰত্তিতো সঙ্গহিতো, ইধ পন নিপ্পরিযাযদেসনত্তা ৰিমোক্খাভিভাযতনানি অসঙ্করতো দস্সেতুং ৰিমোক্খে ৰজ্জেত্ৰা অভিভাযতনানি কথিতানি. সব্বানি চ ৰিমোক্খকিচ্চানি ৰিমোক্খদেসনায ৰুত্তানি, তদেতং ‘‘অজ্ঝত্তং রূপসঞ্ঞী’’তি সুত্তে আগতস্স অভিভাযতনদ্ৰযস্স অভিধম্মে অৰচনতো ‘‘রূপী রূপানি পস্সতী’’তিআদীনঞ্চ সব্বৰিমোক্খকিচ্চসাধারণৰচনভাৰতো ৰৰত্থানং কতন্তি ৰিঞ্ঞাযতি. অৰস্সঞ্চেতং এৰ সম্পটিচ্ছিতব্বং, ন সম্পটিচ্ছন্তেহি সুত্তাভিধম্মপাঠভেদে অঞ্ঞং কারণং ৰত্তব্বং. অথ কিমেত্থ ৰত্তব্বং, ননু অট্ঠকথাযমেৰ ‘‘কস্মা পন যথা সুত্তন্তে ‘অজ্ঝত্তং রূপসঞ্ঞী একো বহিদ্ধা রূপানি পস্সতি পরিত্তানী’তিআদি ৰুত্তং, এৰং অৰত্ৰা ইধ চতূসুপি অভিভাযতনেসু অজ্ঝত্তং অরূপসঞ্ঞিতাৰ ৰুত্তা’’তি ৰত্ৰা ‘‘অজ্ঝত্তরূপানং অনভিভৰনীযতো’’তি কারণং ৰুত্তন্তি? ন তং তস্স কারণৰচনং, অথ খো কত্থচি ‘‘অজ্ঝত্তং রূপানি পস্সতী’’তি অৰত্ৰা সব্বত্থ যং ৰুত্তং ‘‘বহিদ্ধা রূপানি পস্সতী’’তি, তস্স চ কারণৰচনং. তেনেৰ হি তত্থ ৰা ইধ ৰা ‘‘বহিদ্ধা রূপানিযেৰ অভিভৰিতব্বানী’’তি তত্থেৰ ৰুত্তং, অনভিভৰনীযতা চ অজ্ঝত্তরূপানং বহিদ্ধা রূপানি ৰিয অৰিভূতত্তা. ন হি সুট্ঠু ৰিভূতভাৰমন্তরেন ঞাণুত্তরানং আরম্মণাভিভৰনং সম্ভৰতীতি. ননু চ অট্ঠকথাযং পাঠদ্ৰযৰিসেসস্স দেসনাৰিলাসো কারণভাৰেন ৰুত্তোতি? সচ্চং ৰুত্তো, সো চ যথাৰুত্তৰৰত্থানৰসেনেৰ ৰেদিতব্বো ¶ . দেসনাৰিলাসো হি নাম ৰিনেয্যজ্ঝাসযানুরূপং ৰিজ্জমানস্সেৰ পরিযাযস্স ৰিভাৰনং, ন যস্স কস্সচীতি. এৰং তাৰ অভিভাযতনং ৰেদিতব্বং.

তত্থ ¶ ৰিমোক্খোতি পটিলদ্ধজ্ঝানস্স ঝানং সমাপজ্জিতুকামতাৰসপ্পৰত্তজৰনৰীথিসমনন্তরমেৰ পিতুঅঙ্কে ৰিস্সট্ঠঅঙ্গপচ্চঙ্গস্স ৰিয দারকস্স আরম্মণে নিরাসঙ্কমেৰ হুত্ৰা পঠমকপ্পনা ৰিয চ লহুং অৰুট্ঠহিত্ৰা অন্তমসো চতুপঞ্চচিত্তক্খণতো অনোসক্কিত্ৰা আরম্মণে অভিরতিৰসেন পৰত্তস্স ৰসিভাৰপ্পত্তস্স ঝানস্সেতং অধিৰচনং. তঞ্হি কসিণাযতনৰসেন ৰা অভিভাযতনৰসেন ৰা উপ্পন্নং পচ্চনীকধম্মেহি সুট্ঠু ৰিমুত্তত্তা, আরম্মণে অধিমুত্ততায চ ‘‘ৰিমোক্খো’’তি ৰুচ্চতি. ৰুত্তম্পি চেতং অট্ঠকথাযং –

‘‘কেনট্ঠেন পন ৰিমোক্খো ৰেদিতব্বোতি? অধিমুচ্চনট্ঠেন. কো অযং অধিমুচ্চনট্ঠো নাম? পচ্চনীকধম্মেহি চ সুট্ঠু ৰিমুচ্চনট্ঠো, আরম্মণে চ অভিরতিৰসেন সুট্ঠু অধিমুচ্চনট্ঠো’’তি (ধ. স. অট্ঠ. ২৪৮).

যদি ৰসিভাৰপ্পত্তমেৰ ৰিমোক্খো, কথমস্স আরম্মণচতুক্কে পরিত্ততা পাল়িযং ৰুত্তা. অৰসিতাপত্তঞ্হি ঝানং পরিত্তন্তি ৰুচ্চতীতি? নাযং দোসো, পরিপুণ্ণৰসিভাৰপ্পত্তং সন্ধায অপরিপুণ্ণৰসিভাৰপ্পত্তস্স পরিত্তভাৰেন তত্থ অধিপ্পেতত্তা, তস্মা ৰসিভাৰপ্পত্তমেৰ ঝানং ৰিমোক্খো নাম, ন ইতরং. ইতরং পন যদি কসিণাযতনৰসেন উপ্পন্নং, কসিণাযতনং. অথ অভিভাযতনৰসেন, অভিভাযতনমেৰাতি. কেচি পন ‘‘পঠমঅপ্পনাতো পচ্ছিমপচ্ছিমায পটিপক্খতো সুট্ঠু ৰিমুত্তত্তা কসিণাযতনৰসেন, অভিভাযতনৰসেন চ উপ্পন্নং পঠমকপ্পনং ঠপেত্ৰা সেসং ৰিমোক্খোযেৰা’’তি ৰদন্তি.

তং পনেতং গণনতো তিৰিধং. যথাহ –

‘‘রূপী ¶ রূপানি পস্সতি, অজ্ঝত্তং অরূপসঞ্ঞী বহিদ্ধা রূপানি পস্সতি, সুভন্তেৰ অধিমুত্তো হোতী’’তি (দী. নি. ২.১৭৪; ৩.৩৩৯; পটি. ম. ১.২০৯).

তত্থ ¶ রূপীতি অজ্ঝত্তং কেসাদীসু উপ্পাদিতং রূপজ্ঝানং রূপং, তদস্স অত্থীতি রূপী. রূপানি পস্সতীতি বহিদ্ধাপি নীলকসিণাদিরূপানি ঝানচক্খুনা পস্সতি. ইমিনা অজ্ঝত্তবহিদ্ধৰত্থুকেসু কসিণেসু ঝানপটিলাভো দস্সিতো. অজ্ঝত্তং অরূপসঞ্ঞীতি অজ্ঝত্তং নরূপসঞ্ঞী, অত্তনো কেসাদীসু অনুপ্পাদিতরূপাৰচরজ্ঝানোতি অত্থো. ইমিনা বহিদ্ধা পরিকম্মং কত্ৰা বহিদ্ধাৰ পটিলদ্ধজ্ঝানতা দস্সিতা. ‘‘সুভ’’ন্তি ইমিনা সুৰিসুদ্ধেসু নীলাদীসু ৰণ্ণকসিণেসু ঝানানি দস্সিতানি. তত্থ কিঞ্চাপি অন্তোঅপ্পনাযং ‘‘সুভ’’ন্তি আভোগো নত্থি, যো পন সুৰিসুদ্ধং সুভকসিণং আরম্মণং কত্ৰা ৰিহরতি, সো যস্মা ‘‘সুভ’’ন্তি অধিমুচ্চনৰসেন পঠমজ্ঝানং উপসম্পজ্জিত্ৰা ৰিহরতি, তথা দুতিযাদীনি, তস্মা এৰং দেসনা কতাতি. পটিসম্ভিদামগ্গে পন ‘‘ইধ ভিক্খু মেত্তাসহগতেন চেতসা একং দিসং ফরিত্ৰা ৰিহরতী’’তিআদিনা (পটি. ম. ১.২১২) ব্রহ্মৰিহারৰসেন সুভৰিমোক্খো ৰুত্তো. ধম্মসঙ্গণিযং পন ব্রহ্মৰিহারানং ৰিসুংযেৰ আগতত্তা তং নযং পটিক্খিপিত্ৰা সুনীলকাদিৰসেনেৰ সুভৰিমোক্খো অট্ঠকথাযং অনুঞ্ঞাতোতি ইধাপি তত্থ ৰুত্তনযেনেৰ ৰৰত্থানং কতন্তি এৰং তাৰ ৰিমোক্খঝানং ৰেদিতব্বং.

যথানুরূপন্তি হীনাদিঅনুরূপং. পঠমজ্ঝানঞ্হি হীনং কপ্পস্স ততিযভাগাযুকে ব্রহ্মপারিসজ্জে উপপত্তিং নিপ্ফাদেতি, মজ্ঝিমং উপড্ঢকপ্পাযুকে ব্রহ্মপুরোহিতে, পণীতং এককপ্পাযুকে মহাব্রহ্মে. তথা দুতিযজ্ঝানং, ততিযজ্ঝানঞ্চ হীনং দ্ৰিকপ্পাযুকে পরিত্তাভে, মজ্ঝিমং চতুকপ্পাযুকে অপ্পমাণাভে, পণীতং অট্ঠকপ্পাযুকে আভস্সরে. চতুত্থজ্ঝানং হীনং ¶ সোল়সকপ্পাযুকে পরিত্তাসুভে, মজ্ঝিমং দ্ৰত্তিংসকপ্পাযুকে অপ্পমাণসুভে, পণীতং চতুসট্ঠিকপ্পাযুকে সুভকিণ্হে. পঞ্চমজ্ঝানং পন তিৰিধম্পি পঞ্চকপ্পসতাযুকে ৰেহপ্ফলে উপপত্তিং নিপ্ফাদেতি, তদেৰ তিত্থিযেহি সঞ্ঞাৰিরাগৰসেন ভাৰিতং পঞ্চকপ্পসতাযুকেযেৰ অসঞ্ঞসত্তে. অনাগামীহি পন পুথুজ্জনাদিকালে পচ্ছাপি ভাৰিতং সদ্ধাদিইন্দ্রিযাধিমুত্ততানুক্কমেন যথাক্কমং সহস্সদ্ৰিসহস্সচতুসহস্সঅট্ঠসহস্সসোল়সসহস্সকপ্পাযুকেসু অৰিহাঅতপ্পাসুদস্সাসুদস্সীঅকনিট্ঠনামকেসু পঞ্চসুদ্ধাৰাসেসু উপপত্তিং নিপ্ফাদেতীতি এৰমেতং যথানুরূপং সোল়সরূপাৰচরব্রহ্মলোকূপপত্তিনিপ্ফাদকন্তি আহ ‘‘যথানুরূপং…পে… হোতী’’তি.

যস্মা পন রূপভৰেপি পৰত্তিযং লভিতব্বা উপভোগসম্পত্তি কামাৰচরস্সেৰ ফলং, তস্মা ¶ ইধ ‘‘ভৰভোগসম্পত্তিং নিপ্ফাদেতী’’তি অৰত্ৰা উপপত্তিনিপ্ফাদনমেৰ ৰুত্তন্তি দট্ঠব্বং. এত্থ চ দুতিযজ্ঝানভূমিং উপাদায সব্বত্থ পরিপুণ্ণস্স মহাকপ্পস্স ৰসেন পরিচ্ছেদো দট্ঠব্বো, পঠমজ্ঝানভূমিযং পন অসঙ্খ্যেয্যকপ্পৰসেন. ন হি তত্থ ইতরৰসেন পরিচ্ছেদো সম্ভৰতি এককপ্পেপি অৰিনাসাভাৰেন মহাকপ্পস্স চতুত্থভাগেযেৰ তস্স সণ্ঠহনতো.

রূপাৰচরকুসলৰণ্ণনা নিট্ঠিতা.

অরূপাৰচরকুসলৰণ্ণনা

ইদানি অরূপাৰচরকুসলস্স নিদ্দেসাৰকাসো অনুপ্পত্তোতি তন্নিদ্দেসত্থমাহ ‘‘সেসেসু পনা’’তিআদি. আকাসকসিণৰজ্জিতস্স যস্স কস্সচি কসিণস্স উগ্ঘাটনতো লদ্ধমাকাসং কসিণুগ্ঘাটিমাকাসং. তত্থ পৰত্তং ৰিঞ্ঞাণন্তি আকাসানঞ্চাযতনমাহ. তঞ্হি দুতিযারুপ্পস্স ¶ আরম্মণং হোতি. সব্বসোতি সব্বাকারেন, রূপনিমিত্তদণ্ডাদানসম্ভৰদস্সনাদিনা সব্বেন রূপধম্মেসু, পথৰীকসিণাদিরূপনিমিত্তেসু তদারম্মণজ্ঝানেসু চ দোসদস্সনাকারেন, তেসু এৰ ৰা রূপনিমিত্তেসু নিকন্তিপ্পহানঅসমাপজ্জিতুকামতাদিনা আকারেনাতি অত্থো. অথ ৰা সব্বসোতি সব্বাসং, কুসলাদিভেদেন অনৰসেসানন্তি অত্থো. রূপসঞ্ঞানন্তি সঞ্ঞাসীসেন ৰুত্তরূপাৰচরজ্ঝানানঞ্চেৰ তদারম্মণানঞ্চ. রূপাৰচরজ্ঝানম্পি হি ‘‘রূপ’’ন্তি ৰুচ্চতি উত্তরপদলোপেন ‘‘রূপী রূপানি পস্সতী’’তিআদীসু ৰিয. তদারম্মণম্পি কসিণরূপং পুরিমপদলোপেন ‘‘দেৰেন দত্তোতি, বহিদ্ধা রূপানি পস্সতী’’তিআদীসু ৰিয, তস্মা ইধ রূপে রূপজ্ঝানে তংসহগতসঞ্ঞা রূপসঞ্ঞাতি গহিতা, সঞ্ঞাসীসেন ৰুত্তরূপাৰচরজ্ঝানানমেতং অধিৰচনং. ‘‘রূপ’’ন্তি সঞ্ঞা অস্সাতি রূপসঞ্ঞং, রূপনামৰন্তন্তি অত্থো. তংগহিতেন পথৰীকসিণাদিভেদস্স তদারম্মণস্স চেতং নামন্তি দট্ঠব্বং. ‘‘রূপসঞ্ঞান’’ন্তি হি সরূপেকসেসৰসেন নিদ্দেসো কতো. সমতিক্কমাতি ৰিরাগা, নিরোধা চ. কিং ৰুত্তং হোতি? এতাসং কুসলৰিপাককিরিযাৰসেন পঞ্চদসন্নং ঝানসঙ্খাতানং রূপসঞ্ঞানং, এতেসঞ্চ পথৰীকসিণাদিৰসেন নৰন্নং আরম্মণসঙ্খাতানং রূপসঞ্ঞানং অনৰসেসানং সব্বাকারেন চ, তেসু এৰ ৰা নিকন্তিপ্পহানঅসমাপজ্জিতুকামতাদিনা আকারেন ¶ ৰিরাগা, নিরোধা চ জিগুচ্ছনতো চেৰ তপ্পটিবন্ধছন্দরাগৰিক্খম্ভনতো চ নিব্বত্তং আকাসানঞ্চাযতনসঞ্ঞায সহগতং অরূপাৰচরকুসলচিত্তং. ন হি সক্কা সব্বসো অনতিক্কন্তরূপসঞ্ঞেন তং নিব্বত্তেতুন্তি.

ন কেৰলং এতাসংযেৰ সমতিক্কমনতো ইদং নিব্বত্তং, অথ খো পটিঘসঞ্ঞাদীনমত্থঙ্গমাদিতোপীতি আহ ‘‘পটিঘসঞ্ঞান’’ন্তিআদি. তত্থ চক্খাদীনং ৰত্থূনং, রূপাদীনঞ্চ আরম্মণানং ¶ পটিঘাতেন অঞ্ঞমঞ্ঞসমোধানসঙ্খাতেন পটিহননেন উপ্পন্না সঞ্ঞা পটিঘসঞ্ঞা, রূপসঞ্ঞাদিদ্ৰিপঞ্চসঞ্ঞানমেতং অধিৰচনং. যথাহ –

‘‘তত্থ কতমা পটিঘসঞ্ঞা? রূপসঞ্ঞা সদ্দসঞ্ঞা গন্ধসঞ্ঞা রসসঞ্ঞা ফোট্ঠব্বসঞ্ঞা, ইমা ৰুচ্চন্তি পটিঘসঞ্ঞাযো’’তি (ৰিভ. ৬০৩).

তাসং কুসলাকুসলৰিপাকভূতানং অত্থঙ্গমা পহানা অসমুপ্পাদা অপ্পৰত্তিকরণেনাতি ৰুত্তং হোতি. ননু চ এতা রূপাৰচরজ্ঝানসমাপন্নস্সাপি ন সন্তি. ন হি পঠমজ্ঝানাদিসমাপন্নকালে পঞ্চদ্ৰারৰসেন চিত্তং পৰত্ততীতি? সচ্চমেতং, যথা পন ‘‘সুখস্স চ পহানা দুক্খস্স চ পহানা অদুক্খমসুখং উপেক্খাসতিপারিসুদ্ধিং চতুত্থজ্ঝানং উপসম্পজ্জ ৰিহরতী’’তি এত্থ পসংসাৰসেন অঞ্ঞত্থ পহীনানম্পি সুখদুক্খানং চতুত্থজ্ঝানে, ‘‘সক্কাযদিট্ঠিৰিচিকিচ্ছানং পহানা রাগদোসমোহানং তনুত্তা সকদাগামিমগ্গং উপসম্পজ্জ ৰিহরতী’’তি এত্থ পঠমমগ্গেযেৰ পহীনানং সক্কাযদিট্ঠাদীনং দুতিযমগ্গে চ ৰচনং, এৰমেৰ ইমস্মিং ঝানে পটিপজ্জনকানং উস্সাহজননত্থং ইমস্স ঝানস্স পসংসাৰসেন এতাসং এত্থ ৰচনন্তি ৰেদিতব্বং. অথ ৰা কিঞ্চাপি তা রূপাৰচরসমাপন্নস্সাপি ন সন্তি, ন পন পহীনত্তা ন সন্তি. কিঞ্চরহি পচ্চযাভাৰেন. ন হি রূপাৰচরভাৰনা রূপৰিরাগায সংৰত্ততি, রূপাযত্তা এৰ তাসং পৰত্তীতি. অরূপভাৰনা পন রূপৰিরাগায সংৰত্ততি, তস্মা ‘‘তা এত্থ পহীনা’’তি ৰত্তুং ৰট্টতি. তথা হি এতাসং ইতো পুব্বে অপ্পহীনত্তাযেৰ ‘‘পঠমজ্ঝানং সমাপন্নস্স সদ্দো কণ্টকো’’তি ৰুত্তো ভগৰতা. ইধ চ পহীনত্তা এৰ অরূপসমাপত্তীনং আনেঞ্জাভিসঙ্খারৰচনাদীহি, ‘‘যে তে সন্তা ৰিমোক্খা অতিক্কম্ম রূপে ¶ অরূপা’’তিআদিনা চ আনেঞ্জতা, সন্তৰিমোক্খতা চ ৰুত্তা.

নানত্তসঞ্ঞানন্তি ¶ নানত্তে গোচরে পৰত্তানং, নানত্তানং ৰা সঞ্ঞানং, ৰুত্তাৰসেসানং চতুচত্তালীসকামাৰচরসঞ্ঞানন্তি অত্থো. এতা এৰ হি –

‘‘তত্থ কতমা নানত্তসঞ্ঞা? অসমাপন্নস্স মনোধাতুসমঙ্গিস্স ৰা মনোৰিঞ্ঞাণধাতুসমঙ্গিস্স ৰা সঞ্ঞা সঞ্জাননা সঞ্জানিতত্তং, ইমা ৰুচ্চন্তি নানত্তসঞ্ঞাযো’’তি (ৰিভ. ৬০৪) –

এৰং ৰিভঙ্গে ৰিভজিত্ৰা ৰুত্তা. তা পন যস্মা রূপসদ্দাদিভেদে নানত্তে নানাসভাৰে আরম্মণে পৰত্তন্তি, যস্মা চ অট্ঠ কামাৰচরকুসলসঞ্ঞা, দ্ৰাদস অকুসলসঞ্ঞা, একাদস কামাৰচরকুসলৰিপাকসঞ্ঞা, দ্ৰে অকুসলৰিপাকসঞ্ঞা, একাদস কামাৰচরকিরিযসঞ্ঞাতি এৰং চতুচত্তালীসপ্পভেদা নানাসভাৰা, অঞ্ঞমঞ্ঞং অসদিসা, তস্মা ‘‘নানত্তসঞ্ঞা’’তি ৰুচ্চন্তি. অমনসিকারাতি সব্বসো অনাৰজ্জনা অসমন্নাহারা অপচ্চৰেক্খণহেতু জৰনপটিপাদকেন ৰা ভৰঙ্গচিত্তস্স অন্তো অকরণা ঠপেত্ৰা কসিণুগ্ঘাটিমাকাসং নানারম্মণে চিত্তস্স অসঙ্খরণতোতি ৰুত্তং হোতি. ইমিনা হি নানত্তসঞ্ঞামনসিকারহেতূনং রূপধম্মানং সমতিক্কমোপি ৰুত্তো, রূপজ্ঝানে পন তদভাৰতো ‘‘নানত্তসঞ্ঞানং অমনসিকারা’’তি ন ৰুত্তং. অথ সমতিক্কমাদীনং কিং নানাকরণন্তি? ৰুচ্চতে – যস্মা রূপসঞ্ঞা, পটিঘসঞ্ঞা চ ইমিনা ঝানেন নিব্বত্তিতভৰেপি ন ৰিজ্জন্তি, অরূপসঞ্ঞায ভাৰনায অভাৰে চুতিতো উদ্ধং উপ্পত্তিরহানং রূপসঞ্ঞাপটিঘসঞ্ঞানং যাৰ অত্তনো ¶ ৰিপাকুপ্পত্তি, তাৰ অনুপ্পত্তিধম্মতং আপাদিযমানত্তা, পগেৰ পন ইমং ঝানং সমাপন্নকালে, তস্মা ‘‘সমতিক্কমা, অত্থঙ্গমা’’তি উভযথাপি তাসং অভাৰোযেৰ দস্সিতো. নানত্তসঞ্ঞাসু পন যা তস্মিং ভৰে ন উপ্পজ্জন্তি একন্তরূপনিস্সিতত্তা, তা অনোকাসতায ন উপ্পজ্জন্তি, ন অরূপভাৰনায নিৰারিতত্তা, অনিৰারিতত্তা চ কাচি উপ্পজ্জন্তি, তস্মা তাসং অমনসিকারো অনাৰজ্জনং অপচ্চৰেক্খণং জৰনপটিপাদকেন ৰা ভৰঙ্গমনস্স অন্তো অকরণং অপ্পৰেসনং ৰুত্তং. তত্র পৰত্তমানানম্পি হি ঝানং সমাপন্নস্স তাসং অমনসিকারোযেৰ ইতরথা ঝানসমাপত্তিযা অভাৰতো. ইতি সঙ্খেপতো ‘‘রূপসঞ্ঞানং সমতিক্কমা’’তি ইমিনা সব্বরূপাৰচরধম্মানং পহানং ৰুত্তং, ‘‘পটিঘসঞ্ঞানং অত্থঙ্গমা নানত্তসঞ্ঞানং অমনসিকারা’’তি সব্বেসং কামাৰচরচিত্তচেতসিকানং পহানং, অমনসিকারো চ ৰুত্তো, তীহি পনেতেহি সমাধিস্স থিরভাৰো কথিতোতি.

আকাসানঞ্চাযতনসঞ্ঞাসহগতন্তি ¶ এত্থ পন নাস্স অন্তোতি অনন্তং, অনন্তং আকাসং আকাসানন্তং, কসিণুগ্ঘাটিমাকাসং, অনন্ততা পন উপ্পাদৰযন্তাভাৰতো অনন্তমনসিকারৰসেন ৰা ৰেদিতব্বা. ন হি এতস্স উপ্পাদন্তো, ৰযন্তো ৰা পঞ্ঞাযতি অসভাৰধম্মত্তা. সভাৰধম্মো হি অহুত্ৰা সম্ভৰনতো, হুত্ৰা চ ৰিনস্সনতো উপ্পাদৰযন্তপরিচ্ছিন্নো, নেতরো. ন চ পনেতং মনসি করোন্তো যোগাৰচরো তস্স পরিচ্ছেদসঙ্খাতমন্তং গণ্হাতি, অথ খো রূপৰিৰেকমত্তস্সেৰ গহণেন অনন্তফরণাকারেনেৰ মনসিকারং পৰত্তেতি, তস্মা উপ্পাদৰযন্তৰিরহতো মনসিকারৰসেন ৰা এতমনন্তন্তি ৰেদিতব্বং. ‘‘অনন্তাকাস’’ন্তি চ ৰত্তব্বে অনন্ত-সদ্দস্স পরনিপাতৰসেন ‘‘আকাসানন্ত’’ন্তি ৰুচ্চতি. আকাসানন্তমেৰ আকাসানঞ্চং ¶ সংযোগপরস্স ত-কারস্স চ-কারং কত্ৰা, তদেৰ আযতনং সসম্পযুত্তধম্মস্স ঝানস্স আরম্মণভাৰতো অধিট্ঠানট্ঠেন দেৰাযতনং ৰিযাতি আকাসানঞ্চাযতনং, তস্মিং অপ্পনাপত্তা সঞ্ঞা আকাসানঞ্চাযতনসঞ্ঞা, তায সহগতং ৰিঞ্ঞাণং আকাসানঞ্চাযতনসঞ্ঞাসহগতং. অথ ৰা আকাসানঞ্চং আযতনমস্সা সসম্পযুত্তধম্মায সঞ্ঞাযাতি আকাসানঞ্চাযতনা, সাযেৰ সঞ্ঞা, তায ঝানং সহগতন্তি আকাসানঞ্চাযতনসঞ্ঞাসহগতং.

ৰিঞ্ঞাণ…পে… সহগতন্তি যদেতং পঠমারুপ্পৰিঞ্ঞাণং, তংসভাৰধম্মত্তা উপ্পাদাদিঅন্তৰন্তম্পি আরম্মণকরণৰসেন অনন্তাকাসে ফরণতো অত্তানং আরব্ভ অন্তস্স অগ্গহণৰসেন পৰত্তমনসিকারতো ৰা অনন্তং ৰিঞ্ঞাণন্তি ৰিঞ্ঞাণানন্তং, ‘‘ৰিঞ্ঞাণানঞ্চ’’ন্তি ৰত্তব্বে ৰিঞ্ঞাণঞ্চ-সদ্দো তদত্থে নিরূল়্হো আ-কার ন-কারলোপোতি ৰা কত্ৰা ‘‘ৰিঞ্ঞাণঞ্চ’’মিচ্চেৰ ৰুত্তং. এৰঞ্চ কত্ৰা ৰক্খতি –

‘‘ৰিঞ্ঞাণানন্তমিচ্চেৰং, ৰত্তব্বং পনিদং সিযা’’তি.

অথ ৰা দুতিযারুপ্পৰিঞ্ঞাণেন অঞ্চিতব্বং আরম্মণৰসেন পাপুণিতব্বন্তি ৰিঞ্ঞাণঞ্চং. সেসং পুরিমসদিসমেৰ.

আকিঞ্চঞ্ঞা…পে… সহগতন্তি নাস্স পঠমারুপ্পৰিঞ্ঞাণস্স কিঞ্চনন্তি অকিঞ্চনং, অন্তমসো ভঙ্গমত্তম্পি অৰসিট্ঠং নত্থীতি ৰুত্তং হোতি. সতি হি ভঙ্গমত্তেপি তস্স সকিঞ্চনতা ¶ সিযা. অকিঞ্চনস্স ভাৰো আকিঞ্চঞ্ঞং, আকাসানঞ্চাযতনৰিঞ্ঞাণাভাৰস্সেতং অধিৰচনং. সেসং ৰুত্তনযমেৰ.

নেৰসঞ্ঞা…পে… সহগতন্তি হেট্ঠিমঝানেসু ৰিয ওল়ারিকায সঞ্ঞায অভাৰতো নেৰস্স সঞ্ঞা অত্থীতি নেৰসঞ্ঞং, সুখুমায চ সঞ্ঞায অত্থিতায নাস্স সঞ্ঞা নত্থীতি ¶ নাসঞ্ঞং, নেৰসঞ্ঞঞ্চ তং নাসঞ্ঞঞ্চেতি নেৰসঞ্ঞানাসঞ্ঞং, চতুত্থারুপ্পজ্ঝানং. যদি এৰং ‘‘নেৰসঞ্ঞনাসঞ্ঞ’’ন্তি ৰত্তব্বং? সচ্চমেতং. ৰচনসোভনত্থং পন দীঘং কত্ৰা ৰুত্তং. অথ ৰা নেৰস্স সঞ্ঞা নাসঞ্ঞাতি এৰং একজ্ঝং বহুব্বীহিসমাসৰসেন ‘‘নেৰসঞ্ঞানাসঞ্ঞ’’ন্তি ৰুত্তং. নেৰসঞ্ঞানাসঞ্ঞঞ্চ তং আযতনঞ্চ মনাযতনধম্মাযতনপরিযাপন্নত্তাতি নেৰসঞ্ঞানাসঞ্ঞাযতনং, তেন সম্পযুত্তং সঞ্ঞাসহগতং নেৰসঞ্ঞানাসঞ্ঞাযতনসঞ্ঞাসহগতং. অথ ৰা সঞ্ঞাযেৰ পটুসঞ্ঞাকিচ্চকরণে অসমত্থতায নেৰসঞ্ঞা, উণ্হোদকে তেজোধাতু ৰিয সঙ্খারাৰসেসসুখুমভাৰপ্পত্তিযা নাসঞ্ঞাতি নেৰসঞ্ঞানাসঞ্ঞা, সা এৰ সেসধম্মানং নিস্সযপচ্চযতায, অধিট্ঠানট্ঠেন ধম্মাযতনপরিযাপন্নতায এৰ ৰা আযতনন্তি নেৰসঞ্ঞানাসঞ্ঞাযতনং, নেৰসঞ্ঞানাসঞ্ঞাযতনভূতায সঞ্ঞায সহগতন্তি নেৰসঞ্ঞানাসঞ্ঞাযতনসঞ্ঞাসহগতং.

যথানুরূপং…পে… নিপ্ফাদকন্তি ‘‘পঠমারুপ্পভূমিযা পঠমং, দুতিযারুপ্পভূমিযা দুতিয’’ন্তিআদিনা অত্তনো অনুরূপৰসেন চতূসু অরূপভূমীসু উপপত্তিসাধকং. তাসু পন পঠমা ৰীসতিসহস্সকপ্পাযুকা হোতি, দুতিযা চত্তালীসসহস্সকপ্পাযুকা, ততিযা সট্ঠিসহস্সকপ্পাযুকা, চতুত্থা পন চতুরাসীতিসহস্সকপ্পাযুকাতি ৰেদিতব্বং.

অরূপাৰচরকুসলৰণ্ণনা নিট্ঠিতা.

লোকুত্তরকুসলৰণ্ণনা

এৰং তিৰিধম্পি লোকিযকুসলং নিদ্দিসিত্ৰা ইদানি লোকুত্তরকুসলং নিদ্দিসন্তো আহ ‘‘ইতরং ¶ পনা’’তিআদি. লুজ্জনপলুজ্জনট্ঠেন ¶ লোকো, সো তিৰিধো – সঙ্খারলোকো সত্তলোকো ভাজনলোকোতি. ততো ইদং উত্তরতীতি লোকুত্তরং. চত্তারোপি হি মগ্গা উপাদানক্খন্ধসঙ্খাতসঙ্খারলোকতো উত্তরন্তি অনাসৰভাৰেন. সত্তলোকেসু চ সোতাপত্তিমগ্গো অনরিযলোকতো উত্তরতি, সকদাগামিমগ্গো সোতাপন্নলোকতো, অনাগামিমগ্গো সকদাগামিলোকতো, অরহত্তমগ্গো অনাগামিলোকতো উত্তরতি. ভাজনলোকেসু পন পঠমমগ্গো অপাযলোকতো উত্তরতি, সকদাগামিমগ্গো কামলোকেকদেসতো, অনাগামিমগ্গো সকলকামলোকতো, অরহত্তমগ্গো রূপারূপলোকতো উত্তরতি. ইতি চতুব্বিধম্পি মগ্গচিত্তং তিৰিধলোকতো উত্তরতীতি লোকুত্তরং, কুচ্ছিতসলনাদিতো পন কুসলং, চিন্তনাদিতো চিত্তঞ্চাতি লোকুত্তরকুসলচিত্তং. ফলং পন লোকতো উত্তিণ্ণত্তা লোকুত্তরং, উভযম্পি ৰা সহ নিব্বানেন উপাদানক্খন্ধসঙ্খাতলোকতো উত্তরং ৰিসিট্ঠতরন্তি লোকুত্তরং. যথাহ ‘‘যাৰতা, ভিক্খৰে, ধম্মা সঙ্খতা ৰা অসঙ্খতা ৰা, ৰিরাগো তেসং ধম্মানং অগ্গমক্খাযতী’’তি (অ. নি. ৪.৩৪; ইতিৰু. ৯০).

নিযতানিযতৰত্থুকভেদতোতি সোতাপত্তিমগ্গস্স পরতোঘোসপচ্চযেন ৰিনা অনুপ্পজ্জনতো অরূপভৰে সম্ভৰো নত্থীতি তং নিযতৰত্থুকং, ইতরং পন সত্তৰিধম্পি পরতোঘোসং ৰিনাপি ৰিপস্সনাবলেনেৰ নিপ্ফজ্জনতো তত্থাপি সম্ভৰতীতি অনিযতৰত্থুকং.

তীহি…পে… তিৰিধন্তি লোকুত্তরৰিমোক্খানং দ্ৰারভাৰতো ৰিমোক্খমুখসঙ্খাতাহি সুঞ্ঞতানুপস্সনাদীহি তীহি ৰুট্ঠানগামিনিৰিপস্সনাহি পত্তব্বতো ইদং লোকুত্তরকুসলং তিৰিধং সুঞ্ঞতং অনিমিত্তং অপ্পণিহিতন্তি. কতমে পন ¶ তে লোকুত্তরৰিমোক্খাতি? নৰ লোকুত্তরধম্মা. যথাহ ‘‘চত্তারো চ অরিযমগ্গা চত্তারি চ সামঞ্ঞফলানি নিব্বানঞ্চ, অযং অনাসৰো ৰিমোক্খো’’তি (পটি. ম. ১.২১৩). ইমানি হি সংকিলেসধম্মেহি সুট্ঠু ৰিমুত্তত্তা ৰিমোক্খা নাম. তানি পন পচ্চেকং সুঞ্ঞতো ৰিমোক্খো, অনিমিত্তো ৰিমোক্খো, অপ্পণিহিতো ৰিমোক্খোতি তিৰিধানি. যথাহ ‘‘তযোমে, ভিক্খৰে, ৰিমোক্খা – সুঞ্ঞতো ৰিমোক্খো, অনিমিত্তো ৰিমোক্খো, অপ্পণিহিতো ৰিমোক্খো’’তি (পটি. ম. ১.২০৯). ইধ পন কুসলাধিকারত্তা চতুমগ্গসঙ্খাতাযেৰ লোকুত্তরধম্মা অধিপ্পেতা.

সুঞ্ঞতাদিনামলাভো চ নেসং আগমনতো, সগুণতো, আরম্মণতো চ ৰেদিতব্বো. তথা হি ¶ আগচ্ছতি মগ্গো, ফলঞ্চ এতেনাতি আগমনং. তঞ্হি দুৰিধং মগ্গাগমনং, ফলাগমনঞ্চ. তেসু ৰুট্ঠানগামিনিৰিপস্সনা মগ্গাগমনং, অরিযমগ্গো ফলাগমনং. তত্থ মগ্গস্স আগতট্ঠানে মগ্গাগমনং গহেতব্বং, ফলস্স আগতট্ঠানে ফলাগমনং. ইধ পন মগ্গস্স আগতত্তা মগ্গাগমনং গহিতন্তি. ততো আগমনতো. সগুণতোতি সভাৰতো. আরম্মণতোতি আরম্মণধম্মতো.

যো হি সব্বসঙ্খারানং অনত্তলক্খণপটিৰেধৰসপ্পৰত্তায অনত্তানুপস্সনায ৰসেন মগ্গং পটিলভতি, তস্স সা অনুপস্সনা অসুঞ্ঞত্তকরানং অত্তাভিনিৰেসপচ্চযানং দিট্ঠেকট্ঠকিলেসানং ৰিক্খম্ভিতভাৰেন তেভূমকধম্মানং অত্তসুঞ্ঞতায যাথাৰতো গহণতো সুঞ্ঞতানুপস্সনা নাম হোতি. তায পন পটিলদ্ধমগ্গো সুঞ্ঞতায আগতত্তা সুঞ্ঞতো নাম. তেনাহ ‘‘অনত্ততো মনসিকরোন্তো সুঞ্ঞতৰিমোক্খেন ৰিমুচ্চতী’’তি (পটি. ম. ১.২২৭).

যো ¶ পন সব্বসঙ্খারানং অনিচ্চলক্খণপটিৰেধৰসপ্পৰত্তায অনিচ্চানুপস্সনায মগ্গং পটিলভতি, তস্স সা অনুপস্সনা নিচ্চনিমিত্তাদিগাহকরানং কিলেসানং ৰিক্খম্ভিতত্তা ধুৰভাৰূপট্ঠানসঙ্খাতনিচ্চনিমিত্তাদিনো অগ্গহণতো অনিমিত্তানুপস্সনা নাম. তায পন লদ্ধমগ্গো অনিমিত্তায আগতত্তা অনিমিত্তো নাম. তেনাহ ‘‘অনিচ্চতো মনসিকরোন্তো অনিমিত্তৰিমোক্খেন ৰিমুচ্চতী’’তি (পটি. ম. ১.২২৭).

যো পন সব্বসঙ্খারানং দুক্খলক্খণপটিৰেধৰসপ্পৰত্তায দুক্খানুপস্সনায ৰসেন মগ্গং পটিলভতি, তস্স সা অনুপস্সনা তণ্হাপণিধানস্স ৰিক্খম্ভনেন পণিধিৰিরহিতত্তা অপ্পণিহিতানুপস্সনা নাম. তায পন লদ্ধমগ্গো অপ্পণিহিতায আগতত্তা অপ্পণিহিতো নাম. তেনাহ ‘‘দুক্খতো মনসিকরোন্তো অপ্পণিহিতৰিমোক্খেন ৰিমুচ্চতী’’তি. অযং তাৰস্স আগমনৰসেন নামলাভো.

অত্তনো পন রাগাদীহি সুঞ্ঞতত্তা, নিচ্চনিমিত্তাদিৰিরহিতত্তা, তণ্হাপণিধিঅভাৰতো চ সগুণতো, রাগাদিসুঞ্ঞস্সেৰ, নিচ্চনিমিত্তাদিৰিরহিতস্স, পণিধিৰিপ্পমুত্তস্স চ নিব্বানস্স আরম্মণকরণতো আরম্মণতো চ সুঞ্ঞতাদিৰিমোক্খো নাম হোতীতি এৰমস্স সগুণারম্মণেহি নামলাভো দট্ঠব্বো. সো চ খো সুত্তন্তপরিযাযেনেৰ, নো অভিধম্মপরিযাযেন. সুত্তন্তকথা হি পরিযাযদেসনা, ইতরা নিপ্পরিযাযদেসনা, তস্মা সগুণারম্মণতো নামস্স সব্বসাধারণভাৰেন ¶ অৰৰত্থানকরত্তা পরিযাযভাৰতো সুত্তন্তপরিযাযেনেৰ লাভো, আগমনতো পন অভিধম্মপরিযাযেনপি ৰৰত্থানকরভাৰেন নিপ্পরিযাযত্তা. তেনেৰ হি আচরিযেন ‘‘তীহি ৰিমোক্খমুখেহি পত্তব্বতো তিৰিধ’’ন্তি ৰিমোক্খমুখমেৰ ধুরং কত্ৰা ৰুত্তং, ন ‘‘সুঞ্ঞতাদিনামতো তিৰিধ’’ন্তি. অনিমিত্তনামং পনেত্থ ¶ আগমনতোপি সুত্তন্তপরিযাযেনেৰ লব্ভতি অভিধম্মে মগ্গং পতি অনিমিত্তনামস্স অনুদ্ধতত্তা. অনুদ্ধটত্তং পন ন অনুদ্ধরিতব্বতামত্তেন, অথ খো নিপ্পরিযাযতো তস্স মগ্গে অলব্ভনতো. কিঞ্চাপি হি অযং ৰিপস্সনা নিচ্চনিমিত্তং উগ্ঘাটেন্তী পৰত্ততি, সঙ্খারনিমিত্তস্স পন অনিস্সজ্জনতো ন নিপ্পরিযাযতো অনিমিত্তনামং লভতি. যং পনেতং সুত্তে –

‘‘অনিমিত্তঞ্চ ভাৰেহি, মানানুসযমুজ্জহ;

ততো মানাভিসমযা, উপসন্তো চরিস্সসী’’তি. (সু. নি. ৩৪৪) –

মগ্গস্স অনিমিত্তভাৰৰচনং, তং যথাৰুত্তপরিযাযৰসেন লব্ভমানং গহেত্ৰা ৰুত্তং. অভিধম্মে পন যা সযম্পি নিপ্পরিযাযতো অনিমিত্তনামং ন লভতি, সা কথং মগ্গস্স তং দদেয্যাতি মগ্গস্স অনিমিত্তনামং ন উদ্ধটং. যদি এৰং সুঞ্ঞতনামেনপি ইদং সমানং. অনত্তানুপস্সনাপি হি কিঞ্চাপি পুগ্গলসুঞ্ঞতং গণ্হাতি, ধম্মসুঞ্ঞতং পন ন গণ্হাতীতি সযং নিপ্পরিযাযেন সুঞ্ঞতানুপস্সনা নাম ন হোতীতি সুঞ্ঞতনামম্পি মগ্গস্স ন দদেয্য. অথ পুগ্গলসুঞ্ঞতাগ্গহণমত্তেন সযং সুঞ্ঞতানুপস্সনা হুত্ৰা মগ্গস্স তং দদেয্য, অনিচ্চানুপস্সনাপি সঙ্খারনিমিত্তস্স গহণেপি নিচ্চনিমিত্তাদিউগ্ঘাটনতো সযং অনিমিত্তানুপস্সনা হুত্ৰা মগ্গস্স অনিমিত্তনামং দদেয্যাতি? ন ইদমেৰং, নিচ্চাদিনিমিত্তুগ্ঘাটনেন অনিমিত্তভাৰস্স নিপ্পরিযাযেন মগ্গে অলব্ভনতো নিচ্চাদিনিমিত্তুগ্ঘাটনস্সপি পরিযাযভাৰতো. ননু ইদম্পি সব্বত্থ সমানং. সুঞ্ঞতঅপ্পণিহিতভাৰোপি হি নিপ্পরিযাযেন অমগ্গে ন লব্ভতি পুগ্গলসুঞ্ঞতগ্গহণস্স, পণিধিসোসনস্স চ উজুকং মগ্গেনেৰ নিপ্ফজ্জনতো, তস্মা সুঞ্ঞতানুপস্সনাপি অপ্পণিহিতানুপস্সনাপি পরিযাযেনেৰ তং তং নামং লভন্তীতি মগ্গস্স নিপ্পরিযাযতো নামং ন দেন্তীতি? ন, ততো ¶ লদ্ধঅরিযমগ্গস্স নিপ্পরিযাযতো সম্পযুত্তধম্মৰসেনেৰ সুঞ্ঞতঅপ্পণিহিতনামসম্ভৰতো. কথং? ঠপেত্ৰা বুদ্ধুপ্পাদং সরভঙ্গসত্থারাদিকালেপি দুব্বিজানীযভাৰেন সুখুমস্স অনত্তলক্খণস্স পঞ্ঞায এৰ গোচরভাৰতো অনত্তানুপস্সনায অনুপস্সনতো ¶ মগ্গক্খণে পঞ্ঞিন্দ্রিযং অধিমত্তং হোতি. যথাহ – ‘‘অনত্ততো মনসিকরোতো পঞ্ঞিন্দ্রিযং অধিমত্তং হোতী’’তি (পটি. ম. ১.২২১).

তঞ্চ পন সযং অত্তাভিনিৰেসসমুগ্ঘাটনতো, অরিযমগ্গপরিযাপন্নত্তা চ নিপ্পরিযাযতোৰ সুঞ্ঞতনামং লভতি. দুক্খানুপস্সনায সমাধিৰিপচ্চনীকস্স পণিধিসঙ্খাতরাগস্স সোসনতো তস্সা ৰসেন অনুপস্সন্তস্স মগ্গক্খণে সমাধিন্দ্রিযং অধিমত্তং হোতি. যথাহ – ‘‘দুক্খতো মনসিকরোতো সমাধিন্দ্রিযং অধিমত্তং হোতী’’তি. তঞ্চ পন সযং পণিধিসোসনতো, অরিযমগ্গপরিযাপন্নত্তা চ নিপ্পরিযাযতোৰ অপ্পণিহিতনামং লভতি. সব্বসঙ্খারানং পন অনিচ্চভাৰং আগমনতো সুত্ৰা পচ্ছা সযং পচ্চক্খতো পস্সতো ‘‘অনিচ্চমেৰ ৰত সো ভগৰা ‘অনিচ্চ’ন্তি আহা’’তি ভগৰতি সদ্ধাবাহুল্লপটিলাভতো অনিচ্চানুপস্সনায মনসিকরোতো মগ্গক্খণে সদ্ধিন্দ্রিযং অধিমত্তং হোতি. যথাহ – ‘‘অনিচ্চতো মনসিকরোতো সদ্ধিন্দ্রিযং অধিমত্তং হোতী’’তি. তং পন সযং সঙ্খারনিমিত্ততো ৰুট্ঠহন্তম্পি অরিযমগ্গপরিযাপন্নং ন হোতীতি নিপ্পরিযাযতো অনিমিত্তনামং ন লভতি, তস্মা যথা কাযকম্মাধিকং চিত্তং ‘‘কাযকম্ম’’ন্তি ৰুচ্চতি, এৰং সুঞ্ঞতসঙ্খাতপঞ্ঞিন্দ্রিযাধিমত্তো মগ্গো সুঞ্ঞতনামং লভতি, অপ্পণিহিতসঙ্খাতসমাধিন্দ্রিযাধিমত্তো অপ্পণিহিতনামং, সদ্ধিন্দ্রিযাধিমত্তো পন সদ্ধায অনিমিত্তনামালাভতো সযম্পি তং ন লভতি. যদি সম্পযুত্তধম্মৰসেন সুঞ্ঞতাদিনামালাভো, অথ কথং ‘‘আগমনতো’’তি ¶ ৰুত্তং? সচ্চং, আগমনতো অধিমত্তস্স পন ইন্দ্রিযস্স ৰসেন লদ্ধনামম্পি আগমনতোৰ লদ্ধং হোতি.

অথ ৰা অভিধম্মপরিযাযেনপি সুঞ্ঞতভাৰো নাম পুগ্গলসুঞ্ঞতাযেৰাতি পুগ্গলসুঞ্ঞতগ্গাহিতায অনত্তানুপস্সনায সুঞ্ঞতনামং নিপ্পরিযাযতোৰ লব্ভতি. পণিধি নাম রাগাদিকা এৰাতি রাগাদিসোসিতায দুক্খানুপস্সনায অপ্পণিহিতনামম্পি নিপ্পরিযাযতোৰ লব্ভতি.

নিমিত্তন্তি পন ঠপেত্ৰা সুত্তন্তপরিযাযং অভিধম্মপরিযাযেন সঙ্খারনিমিত্তং হোতীতি সঙ্খারনিমিত্তগ্গাহিতায অনিচ্চানুপস্সনায অনিমিত্তনামং নিপ্পরিযাযতো ন লব্ভতি, তস্মা নিপ্পরিযাযতো সুঞ্ঞতঅপ্পণিহিতনামিকানং অনত্তদুক্খানুপস্সনানং ৰসেন পটিলদ্ধমগ্গো আগমনতো সুঞ্ঞতঅপ্পণিহিতনামং লভতি, অনিমিত্তনামং পন পরিযাযতোৰ লভতি. তেন ৰুত্তং ¶ – ‘‘অনিমিত্তনামং পনেত্থ আগমনতোপি সুত্তন্তপরিযাযেনেৰ লব্ভতি অভিধম্মে মগ্গং পতি অনিমিত্তনামস্স অনুদ্ধটত্তা’’তি. ইতি ইমেসং তিণ্ণং ৰিমোক্খানং পৰেসনদ্ৰারভাৰতো সুঞ্ঞতানুপস্সনাদিনামিকা অনত্তানুপস্সনাদিকা তিস্সো অনুক্কমেন বলৰভাৰং পত্ৰা ৰুট্ঠানগামিনিৰিপস্সনাভূতা তীণি ৰিমোক্খমুখানীতি ৰেদিতব্বানি. ৰুত্তঞ্হেতং –

‘‘তীণি খো পনিমানি ৰিমোক্খমুখানি লোকনিয্যানায সংৰত্তন্তি, সব্বসঙ্খারে পরিচ্ছেদপরিৰটুমতো সমনুপস্সনতায অনিমিত্তায চ ধাতুযা চিত্তসম্পক্খন্দনতায, সব্বসঙ্খারেসু মনোসমুত্তেজনতায অপ্পণিহিতায চ ধাতুযা চিত্তসম্পক্খন্দনতায, সব্বধম্মে পরতো সমনুপস্সনতায সুঞ্ঞতায চ ধাতুযা ¶ চিত্তসম্পক্খন্দনতায, ইমানি তীণি ৰিমোক্খমুখানি লোকনিয্যানায সংৰত্তন্তী’’তি (পটি. ম. ১.২১৯).

এত্থ হি পরিচ্ছেদপরিৰটুমতোতি উদযব্বযৰসেন পরিচ্ছেদতো চেৰ পরিৰটুমতো চ. অনিচ্চানুপস্সনা হি ‘‘উদযতো পুব্বে সঙ্খারা নত্থী’’তি পরিচ্ছিন্দিত্ৰা তেসং গতিং সমন্নেসমানা ৰযতো পরং ন গচ্ছন্তি, এত্থেৰ অন্তরধাযন্তীতি পরিৰটুমতো পরিযন্ততো সমনুপস্সতি. সমনুপস্সনতাযাতি সম্মদেৰ অনুপস্সনতায সংৰত্তন্তীতি সম্বন্ধো. মনোসমুত্তেজনতাযাতি চিত্তসংৰেজনতায. দুক্খানুপস্সনেন হি সঙ্খারেসু চিত্তং সংৰিজ্জতি. পরতো সমনুপস্সনতাযাতি ‘‘নাহং, ন মম’’ন্তি এৰং অনত্ততো সমনুপস্সনতায. ইতি ইমানি তীণি পদানি অনিচ্চানুপস্সনাদীনং তিণ্ণং ৰসেন ৰুত্তানীতি ৰেদিতব্বানি. তেনেৰ চ তদনন্তরে পঞ্হাৰিস্সজ্জনে –

‘‘অনিচ্চতো মনসিকরোতো খযতো সঙ্খারা উপট্ঠহন্তি, দুক্খতো মনসিকরোতো ভযতো সঙ্খারা উপট্ঠহন্তি, অনত্ততো মনসিকরোতো সুঞ্ঞতো সঙ্খারা উপট্ঠহন্তী’’তি (পটি. ম. ১.২১৯) –

ৰুত্তং. ননু চেত্থ অভিধম্মাৰতারস্স ভাসমানত্তা অভিধম্মপরিযাযেনেৰ ৰিমোক্খমুখানি চ ৰৰত্থপেতুং যুত্তন্তি? সচ্চং, অনিচ্চানুপস্সনাযপি পন মগ্গৰুট্ঠানং হোতীতি পকাসনত্থং সুত্তন্তপরিযাযেনপি ¶ একং ৰৰত্থানং কতং, তথা ৰুট্ঠিতো পন মগ্গো অভিধম্মপরিযাযেন সুদ্ধিকপটিপদাযমেৰ সঙ্গয্হতীতি দট্ঠব্বং.

চতুমগ্গযোগভেদতোতি সোতাপত্তিআদীহি চতূহি অরিযমগ্গেহি সম্পযোগপ্পভেদতো. অরিযমগ্গানং পন সম্মাদিট্ঠাদিঅট্ঠঙ্গসভাৰত্তা, তেসঞ্চ সব্বলোকুত্তরে অত্থিতায ¶ ভঙ্গৰসেন অভেদেপি ইন্দ্রিযানং অপাটৰপাটৰতরতমভাৰেন সচ্ছিকিরিযাৰিসেসতো কিলেসানং পহানভেদো হোতীতি তংৰসেন চতুব্বিধতা দট্ঠব্বা. তেনেৰাহ ‘‘সক্কাযদিট্ঠিৰিচিকিচ্ছা’’তিআদি. সতি ৰিজ্জমানে পঞ্চক্খন্ধসঙ্খাতে কাযে দিট্ঠি সক্কাযদিট্ঠি, সযং ৰা তত্থ সতি দিট্ঠি সক্কাযদিট্ঠি, পঞ্চসু খন্ধেসু অত্তত্তনিযাভিনিৰেসৰসেন পৰত্তায মিচ্ছাদিট্ঠিযা এতং অধিৰচনং. সা পন একেকস্মিং খন্ধে চতুধা অভিনিৰেসনৰসেন ৰীসতিৰিধা হোতি. তথা হি কোচি রূপং অত্ততো সমনুপস্সতি ‘‘যং রূপং, সো অত্তা, যো অত্তা, তং রূপং, যথা দীপস্স ৰণ্ণোযেৰ অচ্চি, অচ্চিযেৰ ৰণ্ণো’’তি. রূপৰন্তং ৰা অত্তানং সমনুপস্সতি, ছাযাৰন্তং ৰিয রুক্খং. অত্তনি ৰা রূপং, পুপ্ফে ৰিয গন্ধং. রূপস্মিং ৰা অত্তানং, সমুগ্গে ৰিয মণি. এৰং ৰেদনাদীসুপি ‘‘ৰেদনং অত্ততো সমনুপস্সতী’’তিআদিনা যোজেতব্বং. তত্থ যো পঞ্চৰিধো অব্যতিরিত্তঅত্তাভিনিৰেসো, সা উচ্ছেদদিট্ঠি. যো পন পন্নরসৰিধো ব্যতিরিত্তঅত্তাভিনিৰেসো, সা সস্সতদিট্ঠীতি ৰেদিতব্বং.

সভাৰং ৰিচিনন্তো তায কিচ্ছতি কিলমতীতি ৰিচিকিচ্ছা, তিকিচ্ছিতুং দুক্করতায ৰা ৰিগতা চিকিচ্ছা ঞাণপতিকারো ইমিস্সাতি ৰিচিকিচ্ছা. সা পন –

‘‘সত্থরি কঙ্খতি ৰিচিকিচ্ছতি, ধম্মে, সঙ্ঘে, সিক্খায, পুব্বন্তে, অপরন্তে, পুব্বন্তাপরন্তে, ইদপ্পচ্চযতাপটিচ্চসমুপ্পন্নেসু ধম্মেসু কঙ্খতি ৰিচিকিচ্ছতী’’তি (ধ. স. ১০০৮ থোকং. ৰিসদিসং) –

এৰং বুদ্ধাদীসু কঙ্খাৰসেন অট্ঠৰত্থুকা,

‘‘অহোসিং নু খো অহমতীতমদ্ধানং, ন নু খো অহোসিং, কিং নু খো অহোসিং, কথং নু খো অহোসিং ¶ , কিং হুত্ৰা কিং অহোসিং নু খো অহমতীতমদ্ধানং, ভৰিস্সামি নু খো অহমনাগতমদ্ধানং ¶ , ন নু খো ভৰিস্সামি, কিং নু খো ভৰিস্সামি, কথং নু খো ভৰিস্সামি, কিং হুত্ৰা কিং ভৰিস্সামি নু খো অহমনাগতমদ্ধানং, এতরহি ৰা পন পচ্চুপ্পন্নমদ্ধানং অজ্ঝত্তং কথংকথী হোতি, অহং নু খোস্মি, নো নু খোস্মি, কিং নু খোস্মি, কথং নু খোস্মি, অযং নু খো সত্তো কুতো আগতো, সো কুহিং গামী ভৰিস্সতী’’তি (ম. নি. ১.১৮; সং. নি. ২.২০) –

এৰং পুব্বন্তাদযো আরব্ভ পৰত্তিৰসেন সোল়সৰত্থুকা চ নিদ্দিট্ঠা.

তত্থ সত্থরি কঙ্খন্তো তস্স রূপকাযধম্মকাযানং ৰিজ্জমানতং, অৰিজ্জমানতঞ্চ কঙ্খতি, ধম্মে কঙ্খন্তো তস্স স্ৰাক্খাতদ্ৰাক্খাতভাৰে কঙ্খতি, সঙ্ঘে কঙ্খন্তো তস্স সুপ্পটিপন্নৰিপ্পটিপন্নতাদিভাৰে কঙ্খতি, সিক্খায কঙ্খন্তো তস্সা সুপঞ্ঞত্তদুপ্পঞ্ঞত্তভাৰং কঙ্খতি, পুব্বন্তে কঙ্খন্তো সস্সতাকারং, অধিচ্চসমুপ্পত্তিআকারঞ্চ নিস্সায অতীতে অত্তনো ৰিজ্জমানতং, অৰিজ্জমানতঞ্চ কঙ্খতি, অপরন্তে কঙ্খন্তো সস্সতাকারং, উচ্ছেদাকারঞ্চ নিস্সায অনাগতে অত্তনো উপ্পত্তিং, অনুপ্পত্তিঞ্চ কঙ্খতি, পুব্বন্তাপরন্তে কঙ্খন্তো পচ্চুপ্পন্নে অত্তনো অত্থিভাৰং, নত্থিভাৰঞ্চ কঙ্খতি. পচ্চুপ্পন্নো হি অদ্ধা পুব্বভাগাপরভাগকোট্ঠাসৰন্ততায ‘‘পুব্বন্তাপরন্তো’’তি ৰুচ্চতি, যুত্তং পন তং আরব্ভ কঙ্খাজননন্তি? যুত্তং, অযুত্তন্তি কা এত্থ চিন্তা. উম্মত্তকো ৰিয হি বালপুথুজ্জনো. তস্মা সো যং কিঞ্চি কঙ্খতিযেৰ. তেনেৰ চ সোল়সৰত্থুকৰিচিকিচ্ছানিদ্দেসে ‘‘এতরহি ৰা পনা’’তিআদি ৰুত্তং. আচরিযা পন ‘‘পুব্বন্তাপরন্তোতি অতীতানাগতে একজ্ঝং গহেত্ৰা তদুভযমারব্ভ ¶ কঙ্খন্তো পুব্বন্তাপরন্তে কঙ্খতী’’তিপি ৰদন্তি. ইদপ্পচ্চযতাপটিচ্চসমুপ্পন্নেসু ধম্মেসু কঙ্খন্তো পন অৰিজ্জাদীনং পচ্চযানং, সঙ্খারাদীনঞ্চ পচ্চযুপ্পন্নানং হেতুহেতুসমুপ্পন্নভাৰস্স সব্ভাৰাসব্ভাৰং কঙ্খতীতি এৰং তাৰ অট্ঠৰত্থুককঙ্খায পৰত্তি ৰেদিতব্বা.

সোল়সৰত্থুকা পন ‘‘অহোসিং নু খো…পে… ন নু খো অহোসি’’ন্তি কঙ্খন্তো ৰুত্তনযেনেৰ অতীতে অত্তনো ৰিজ্জমানাৰিজ্জমানতং কঙ্খতি. কিং নু খো অহোসিন্তি জাতিলিঙ্গুপপত্তিযো নিস্সায ‘‘খত্তিযো নু খো অহোসিং, ব্রাহ্মণাদীসু গহট্ঠাদীসু দেৰাদীসু অঞ্ঞতরো নু খো’’তি কঙ্খতি. কথং নু খোতি সণ্ঠানাকারং নিস্সায ‘‘দীঘো নু খো অহোসিং, রস্সওদাতকাল়াদীনঞ্চ অঞ্ঞতরো’’তি কঙ্খতি. ইস্সরনিম্মানাদীনি নিস্সায ‘‘কেন ¶ নু খো পকারেন অহোসি’’ন্তি নিব্বত্তনাকারতো কঙ্খতীতি ৰদন্তি. কিং হুত্ৰা কিং অহোসিন্তি জাতিআদীনি নিস্সায ‘‘খত্তিযো হুত্ৰা নু খো ব্রাহ্মণো অহোসিং…পে… দেৰো হুত্ৰা নু খো মনুস্সো অহোসি’’ন্তি অত্তনো অপরাপরং পৰত্তিং কঙ্খতি. ভৰিস্সামি নু খো, ন নু খোতি হেট্ঠা ৰুত্তনযেনেৰ অনাগতে অত্তনো ৰিজ্জমানাৰিজ্জমানতং কঙ্খতি. ‘‘কিং নু খো ভৰিস্সামী’’তিআদি ৰুত্তনযমেৰ. অহং নু খোস্মি, ন নু খোস্মীতি ইদানি অত্তনো অত্থিভাৰং, নত্থিভাৰঞ্চ কঙ্খতি. তত্থ কারণং ৰুত্তমেৰ. কিং নু খোস্মীতি খত্তিযাদিকোৰ সমানো অত্তনো খত্তিযাদিভাৰং কঙ্খতি. এসেৰ নযো সেসেসুপি. কথং নু খোস্মীতি ‘‘অব্ভন্তরে জীৰো নাম অত্থী’’তি গহেত্ৰা তস্স দীঘাদিভাৰং কঙ্খতি. পচ্চুপ্পন্নং পন অত্তনো সরীরসণ্ঠানং অজানন্তো নাম নত্থি. কুতো আগতো, কুহিং গামী ভৰিস্সতীতি অত্তভাৰস্স আগতগতট্ঠানানি কঙ্খতীতি ৰেদিতব্বং.

সীলঞ্চ ¶ ৰতঞ্চ সীলব্বতং, তত্থ গোসীলাদিঅসুদ্ধিমগ্গো সমাদানৰসেন সীলং, অৰীতিক্কমৰসেন ৰতং. উভযথাপি ৰা সীলং, তপোকম্মভাৰেন গহিতত্তা ৰতং. গৰাদিপকতিভাৰতো অত্তনো ৰা গৰাদিভাৰাধিট্ঠানং সীলং, ‘‘গচ্ছন্তো ভক্খেতি, তিট্ঠন্তো মুত্তেতী’’তিআদিনা গৰাদিকিরিযায করণং ৰতং. তংতংঅকিচ্চসম্মসতো ৰা নিৰত্তি সীলং, তংসমাদানৰতো ৰেসভোজনকিচ্চচরণাদিৰিসেসপটিপত্তি ৰতং. সভাৰং অতিক্কম্ম পরতো আমসনং গহণন্তি পরামাসো, সীলব্বতস্স পরামাসো সীলব্বতপরামাসো. ইতো বহিদ্ধা সমণব্রাহ্মণানং সীলেন সুদ্ধি, ৰতেন সুদ্ধি, সীলব্বতেন সুদ্ধীতি এৰং অসুদ্ধিমগ্গে ‘‘সুদ্ধিমগ্গো’’তি পৰত্তস্স মিচ্ছাভিনিৰেসস্সেতং অধিৰচনং. সক্কাযদিট্ঠি চ ৰিচিকিচ্ছা চ সীলব্বতপরামাসো চাতি সক্কায…পে… পরামাসো, তেযেৰ কম্মৰিপাকেসু, ৰট্টস্মিং ৰা সত্তে সংযোজেন্তি বন্ধন্তীতি সংযোজনানি, তেসং দিট্ঠিৰিসুদ্ধিআদীহি তদঙ্গৰসেন পহীনানং অনুপ্পত্তিধম্মতাপাদনেন অচ্চন্তসমুচ্ছেদপ্পহানং করোতীতি সক্কা…পে…প্পহানকরং.

নিব্বানং পতি সৰনতো সন্দনতো সোতো ৰুচ্চতি অরিযো অট্ঠঙ্গিকমগ্গো, তস্স আদিতো পজ্জনং সোতাপত্তি, নিব্বানং মগ্গতি, নিব্বানত্থিকেহি মগ্গীযতি, কিলেসে মারেন্তো গচ্ছতীতি ৰা মগ্গো, সোতাপত্তি এৰ মগ্গো সোতাপত্তিমগ্গো. অথ ৰা সোতং আদিতো পজ্জতি অধিগচ্ছতীতি সোতাপত্তি, পঠমো অরিযপুগ্গলো, তস্স মগ্গো সোতাপত্তিমগ্গো, সম্মাদিট্ঠিআদীনি অট্ঠঙ্গানি, তেন সম্পযুত্তং চিত্তং সোতাপত্তিমগ্গচিত্তং.

রজ্জতি ¶ অভিসজ্জতীতি রাগো, সো ইধ পঞ্চকামৰিসযা, কামভৰৰিসযা চ তণ্হা. দুস্সতীতি দোসো, দসৰিধআঘাতৰত্থুপদট্ঠানো ¶ ব্যাপাদো. মুয্হতীতি মোহো, দুক্খাদীসু অট্ঠসু অঞ্ঞাণং. এতেসং কিলেসানং তনুত্তং তনুভাৰং করোতীতি রাগ…পে… তনুত্তকরং. তত্থ দ্ৰীহি কারণেহি তনুত্তং অভিণ্হানুপ্পত্তিতো, পরিযুট্ঠানমন্দতায চাতি. সকদাগামিস্স হি ৰট্টানুসারিমহাজনস্স ৰিয কিলেসা অভিণ্হং ন উপ্পজ্জন্তি, কদাচি ৰিরল়াকারা হুত্ৰা উপ্পজ্জন্তি, তথা উপ্পজ্জন্তাপি মদ্দন্তা ছাদেন্তা অন্ধকারং করোন্তা নুপ্পজ্জন্তি. দ্ৰীহি পন মগ্গেহি পহীনত্তা মন্দমন্দা তনুকতনুকা উপ্পজ্জন্তি. কেচি পন সকদাগামিস্স কিলেসা চিরেন উপ্পজ্জন্তাপি বহলাৰ উপ্পজ্জন্তি. তথা হিস্স পুত্তধীতরো দিস্সন্তীতি ৰদন্তি. তং অকারণং, ৰত্থুপটিসেৰনেন ৰিনাপি গব্ভগ্গহণসব্ভাৰতো, তস্মা ৰুত্তনযেনেৰ দ্ৰীহি কারণেহি নেসং তনুভাৰো ৰেদিতব্বো. কস্মা পনেত্থ মোহস্স তনুভাৰো ৰুত্তো, ননু ততিযমগ্গৰজ্ঝানমেৰ ইমিনা তনুত্তকরণং ৰত্তব্বং, ইতরথা হেট্ঠা তীহিপি মগ্গেহি উপরিমগ্গৰজ্ঝকিলেসানং বহলাবহলাৰত্থায পহীযমানত্তা ইধ সব্বেসমেৰ উদ্ধম্ভাগিযসংযোজনানং তনুভাৰো ৰত্তব্বো, তেনেৰ চ পাল়িযম্পি ‘‘কামরাগব্যাপাদানং তনুভাৰায দুতিযায ভূমিযা পত্তিযা’’তি ৰুত্তন্তি. সচ্চমেতং, সুত্তে পন উপরিমগ্গৰজ্ঝানং তনুভাৰপরিযাযং গহেত্ৰা ‘‘রাগদোসমোহানং তনুত্তা সকদাগামী হোতী’’তি হেতুত্তযতনুভাৰস্স আগতত্তা ইধাপি তদনুলোমেন ৰুত্তং. ‘‘কামরাগব্যাপাদান’’মিচ্চেৰ ৰা পাঠো. তথা হি এত্থেৰ উপরি দুতিযমগ্গঞাণনিদ্দেসে ‘‘ব্যাপাদকামরাগানং, তনুভাৰং তু সাধয’’ন্তি (অভিধ. ১৩৫৩) ৰুত্তং. পটিসন্ধিৰসেন সকিদেৰ ইমং মনুস্সলোকং আগচ্ছতীতি সকদাগামী, তস্স মগ্গো সকদাগামিমগ্গো. কিঞ্চাপি হি মগ্গট্ঠস্স পটিসন্ধিৰসেন আগমনাসম্ভৰতো ¶ ফলট্ঠোযেৰ সকদাগামী নাম হোতি, তস্স পন আগমনভূতো মগ্গো মগ্গন্তরাৰচ্ছেদনত্থং তদাযত্তভাৰূপনযনেন সকদাগামিমগ্গোতি ৰুচ্চতি, তংসম্পযুত্তং চিত্তং সকদাগামিমগ্গচিত্তং.

পঞ্চসু কামগুণেসু, কামভৰে চ রাগো কামরাগো. ব্যাপজ্জতি তেন চিত্তন্তি ব্যাপাদো. পটিসন্ধিৰসেন ইমং কামধাতুং ন আগচ্ছতীতি অনাগামী. রূপভৰে ছন্দরাগো রূপরাগো. অরূপভৰে ছন্দরাগো অরূপরাগো. মানো ইধ অরহত্তাধিগমং পটিচ্চ উণ্ণতিমত্তং. উদ্ধচ্চম্পি ‘‘কো মে ভারো কিলেসসমুচ্ছেদনে’’তি এৰমাকারপ্পৰত্তং চিত্তস্স অৰূপসমমত্তং. অৰিজ্জাপি অসুখে সুখসঞ্ঞাৰিপল্লাসো. আরকত্তা কিলেসেহি, মিচ্ছাপটিপন্নেহি ৰা, রাগাদিঅরীনং, সংসারচক্কস্স অরানঞ্চ হতত্তা, পচ্চযাদীনং অরহত্তা, রহোপি পাপাকরণেন পাপকরণে ¶ রহস্স অভাৰা, রহিতব্বতো জহিতব্বতো ‘‘রহা’’তি লদ্ধনামানং ৰা পাপধম্মানং অভাৰতো, সাধূহি অরহিতব্বতো অপরিচ্চজিতব্বতো, রহসঙ্খাতস্স ৰা গমনস্স সংসারে অভাৰতো অরহা, অট্ঠমো অরিযপুগ্গলো, তস্স ভাৰো অরহত্তং, অগ্গফলস্সেতং অধিৰচনং. তঞ্হি ‘‘অরহা’’তি অভিধানস্স, বুদ্ধিযা চ পৰত্তিনিবন্ধনত্তা অরহতো ভাৰোতি কত্ৰা ‘‘অরহত্ত’’ন্তি ৰুচ্চতি, তস্স আগমনভূতো মগ্গো অরহত্তমগ্গো, তংসম্পযুত্তং চিত্তং অরহত্তমগ্গচিত্তং.

ঝানঙ্গযোগভেদতোতি রূপাৰচরং ৰিয পঞ্চহি ঝানঙ্গেহি সম্পযোগভেদতো. কথং পনস্স ভেদোতি? এত্থ তাৰ অট্ঠকথাৰাদো, তযো চ থেরৰাদাতি চত্তারো ৰাদা হোন্তি. তথা হি অট্ঠকথাযং তাৰ ‘‘সঙ্খারুপেক্খাভাৰং পত্ৰা ৰুট্ঠানগামিনিৰিপস্সনামগ্গস্স ঝানঙ্গং নিযমেতী’’তি ৰুত্তং. তিপিটকচূল়নাগত্থেরো পন ‘‘মগ্গাসন্নৰিপস্সনায ¶ পদট্ঠানভূতং পাদকজ্ঝানং নিযমেতী’’তি আহ. মোরৰাপিৰাসিমহাদত্তত্থেরো ‘‘ৰিপস্সনায আরম্মণভূতা খন্ধা নিযমেন্তি. যঞ্হি ঝানং সম্মসিত্ৰা ৰুট্ঠাতি, তংসদিসোৰ হোতী’’তি আহ. তিপিটকচূল়াভযত্থেরো পন ‘‘পুগ্গলজ্ঝাসযো নিযমেতি, ‘অহো ৰত পঞ্চঙ্গিকং, চতুরঙ্গিকং ৰা মগ্গং পাপুণেয্য’ন্তিআদিনা যথা যথাস্স অজ্ঝাসযো হোতি, তথা তথা মগ্গো হোতী’’তি আহ.

যস্মা পন অট্ঠকথাৰাদো পমাণং, তযো চ থেরা পণ্ডিতা ব্যত্তা, তস্মা চত্তারোপি ৰাদা অঞ্ঞমঞ্ঞং অপ্পটিবাহনৰসেন এৰং ৰেদিতব্বা. কথং? কামাৰচরধম্মে তাৰ সম্মসিত্ৰা সুক্খৰিপস্সকস্স উপ্পন্নমগ্গোপি সমাপত্তিলাভিনো ঝানং পাদকং অকত্ৰা উপ্পাদিতমগ্গোপি ৰিপস্সনানিযামেন পঠমজ্ঝানিকাৰ হোন্তি. সচে পন কিঞ্চি ঝানং পাদকং কত্ৰা উপ্পাদিতো হোতি, তস্স ৰসেন অঙ্গপরিণামো হোতীতি তংতংঝানসদিসো হোতি. যস্মা পনেত্থ কামাৰচরক্খন্ধে আরব্ভ পৰত্তা ৰিপস্সনা কামাৰচরধম্মেসু চ মহগ্গতধম্মেসু ৰিয ভাৰনাৰিসেসতো ঝানঙ্গৰিসেসো নত্থি, তস্মা ‘‘ৰিপস্সনায আরম্মণভূতা খন্ধা নিযমেন্তী’’তি এৰং পৰত্তো দুতিযত্থেরৰাদো ইমং ৰাদং ন পৰিসতি. ঝানধম্মে সম্মসিত্ৰা উপ্পাদিতমগ্গো সচে পাদকজ্ঝানং নত্থি, সম্মসিতজ্ঝাননিযামেন তংতংঝানিকো হোতি. সচে পঠমজ্ঝানতো ৰুট্ঠায দুতিযাদিঝানে সম্মসিত্ৰা উপ্পাদিতো, পুগ্গলজ্ঝাসযনিযামেন দ্ৰীসু অঞ্ঞতরজ্ঝানসদিসো হোতি. সচে পন পুগ্গলস্স তথাৰিধো অজ্ঝাসযো নত্থি, তদা কথন্তি? এত্থ তাৰ কেচি ‘‘নানাৰজ্জনৰীথিযমেৰ নিৰত্তমানপাদকজ্ঝানতো একাৰজ্জনৰীথিযং ¶ গোত্রভুভাৰং পত্ৰা নিৰত্তমানায ৰিপস্সনায আরম্মণভূতা খন্ধাযেৰ ¶ বলৰন্তো, তস্মা সম্মসিতক্খন্ধনিযামেন তংসদিসো মগ্গো হোতী’’তি ৰদন্তি. এৰঞ্চ সতি ‘‘পাদকজ্ঝাননিযামেন হোতী’’তি এৰং পৰত্তো পঠমত্থেরৰাদো পাদকজ্ঝানতো ৰুট্ঠায কামাৰচরক্খন্ধে সম্মসিত্ৰা উপ্পাদিতমগ্গমেৰ সন্ধায তিট্ঠতীতি.

অপরে পন ‘‘পাদকজ্ঝানং মগ্গস্স মূলকারণৰসেন পচ্চযো হোতি আসন্নকারণৰসেনপি, সম্মসিতক্খন্ধা পন মূলকারণৰসেনেৰ পচ্চযা হোন্তি, তস্মা সম্মসিতক্খন্ধতো পাদকজ্ঝানমেৰ বলৰতরন্তি পাদকজ্ঝানসদিসো মগ্গো হোতী’’তি ৰদন্তি. এৰং সন্তে পন ‘‘সম্মসিতক্খন্ধনিযামেনা’’তি এৰং পৰত্তো দুতিযত্থেরৰাদো সমাপত্তিং পাদকং অকত্ৰা কেৰলং ঝানধম্মেযেৰ সম্মসিত্ৰা উপ্পাদিতমগ্গমেৰ সন্ধায তিট্ঠতি. যস্মা পন হেট্ঠিমহেট্ঠিমজ্ঝানতো উপরূপরিঝানং বলপ্পত্তং হোতি, তস্মা হেট্ঠিমহেট্ঠিমজ্ঝানতো ৰুট্ঠায উপরূপরিঝানধম্মে ৰিপস্সতো উপ্পন্নমগ্গো পাদকজ্ঝানং অনপেক্খিত্ৰা সম্মসিতজ্ঝানৰসেন তংতংঝানিকো হোতি. উপরূপরিঝানতো পন ৰুট্ঠায হেট্ঠিমহেট্ঠিমজ্ঝানধম্মে সম্মসিত্ৰা উপ্পাদিতমগ্গো সম্মসিতজ্ঝানং অনপেক্খিত্ৰা পাদকজ্ঝানসদিসো হোতীতি ইদমেত্থ সারতরং. এৰঞ্হি সতি দ্ৰিন্নম্পি থেরানং ৰাদা নিপ্পদেসৰিসযা সমফলা হোন্তি.

ততিযত্থেরৰাদো চেত্থ পাদকজ্ঝানং, সম্মসিতজ্ঝানং ৰা ৰিনা অজ্ঝাসযমত্তেনেৰ ন ইজ্ঝতি. তীসুপি ৰাদেসু ঠপেত্ৰা সেসঝানঙ্গপরিণামং ৰেদনাপরিণামো ৰিপস্সনানিযামেনেৰ হোতি. তযোপি থেরৰাদা ৰিপস্সনানিযামেন ৰিনা ন হোন্তীতি দট্ঠব্বং. ননু চ ৰেদনাপি ঝানঙ্গমেৰ, তস্মা তাযপি পাদকজ্ঝাননিযামেনেৰ ভৰিতব্বন্তি? তং ন, ৰেদনাযপি পাদকজ্ঝাননিযামেন পরিণামে সতি ৰিপস্সনানিযামং অনপেক্খিত্ৰা পাদকজ্ঝাননিযামেনেৰ মগ্গক্খণে ¶ সেসঝানঙ্গানি পরিণামট্ঠানেযেৰ ৰেদনাযপি পরিণামো ভৰেয্য, তথা পন অহুত্ৰা একাৰজ্জনৰীথিযা আদিতোৰ পরিণামনতো মগ্গৰুট্ঠানৰীথিযা আসন্নতরপ্পৰত্তায ৰিপস্সনায ৰসেন ৰেদনানিযামো হোতি.

অথ ৰা পাদকজ্ঝানসম্মসিতজ্ঝানানং সম্ভৰে তেসু অনুপ্পন্না ৰেদনা ৰিপস্সনায ন হোতীতি পাদকজ্ঝানসম্মসিতজ্ঝাননিযামেন পরিণমতীতিপি ন সক্কা ৰত্তুং. এত্থ সিযা – যত্থ তাৰ পাদকজ্ঝানং অত্থি, তত্থ তং নিযমেতি. যত্থ পন তিকচতুক্কপাদকজ্ঝানং নত্থি, তস্মিং ¶ অরূপভৰে কিং নিযমেতীতি? তত্থাপি পাদকজ্ঝানমেৰ নিযমেতি. যো হি ভিক্খু অট্ঠসমাপত্তিলাভী পঠমজ্ঝানং পাদকং কত্ৰা সোতাপত্তিমগ্গফলানি নিব্বত্তেত্ৰা অপরিহীনজ্ঝানো কালং কত্ৰা অরূপভৰে নিব্বত্তো পঠমজ্ঝানিকায সোতাপত্তিফলসমাপত্তিযা ৰুট্ঠায ৰিপস্সনং পট্ঠপেত্ৰা উপরি তীণি মগ্গফলানি নিব্বত্তেতি, তস্স তানি পঠমজ্ঝানিকানেৰ হোন্তি. দুতিযজ্ঝানিকাদীসুপি এসেৰ নযো. অরূপেপি হি লোকুত্তরং তিকচতুক্কজ্ঝানং উপ্পজ্জতীতি এৰমেত্থ একেকস্স লোকুত্তরকুসলস্স ঝানঙ্গযোগভেদো ৰেদিতব্বোতি.

মগ্গা…পে… নিপ্ফাদেতীতি তেভূমককুসলং ৰিয পটিসন্ধিপ্পৰত্তীসু অৰিপচ্চৰন্তম্পি অত্তনো অত্তনো অনুরূপস্স ফলস্স নিপ্ফাদনেন তংতংফলপ্পত্তে সোতাপন্নো সকদাগামী অনাগামী অরহাতি সামঞ্ঞতো চত্তারো অরিযপুগ্গলে অভিনিপ্ফাদেতীতি. ৰিসেসতো পন সত্তক্খত্তুপরমতাদিকে অনেকেপি সোতাপন্নাদযো নিপ্ফাদেতি.

লোকুত্তরকুসলৰণ্ণনা নিট্ঠিতা.

চতুভূমককুসলৰণ্ণনা

২৮. এৰং ¶ চতুভূমককুসলচিত্তং সরূপতো নিদ্দিসিত্ৰা ইদানি তং নিগমেন্তো আহ ‘‘কামে অট্ঠেৰা’’তিআদি. তত্থ কামেতি কামভৰে. তথা ‘‘রূপে’’তিআদীসু.

২৯. কুসলাকুসলাপগতেনাতি কুসলাকুসলকম্মতো অপগতেন. অগ্গমগ্গস্স হি উপ্পন্নকালতো পট্ঠায অরহতো সব্বানি কুসলাকুসলকম্মানি পহীনানি নাম হোন্তি পচ্চযৰেকল্লেন পটিসন্ধিদানে অসমত্থভাৰতো. যতো চ অরিযমগ্গঞাণং ‘‘কম্মক্খযকর’’ন্তি ৰুচ্চতি. অথ ৰা অহেতুঅপচ্চযৰিসুজ্ঝনস্স অভাৰতো কিলেসসমুচ্ছেদকেন মগ্গকুসলেন অকুসলেহি অপগতেন. কুসলে কুসলেনাতি কুচ্ছিতানং সলনাদীহি ¶ কুসলসঙ্খাতায পটিপত্তিযং দেসনুপ্পাদনাদীসু ছেকেন. মুনিনাতি উভযলোকমুননকেন অগ্গফলঞাণেন, সব্বঞ্ঞুতঞ্ঞাণেন ৰা সমন্নাগতত্তা মুনিনা. তেনাহ –

‘‘যো মুনাতি উভো লোকে, মুনি তেন পৰুচ্চতী’’তি.

ৰসিনাতি ছল়ভিঞ্ঞতায পরমেন চিত্তৰসিভাৰেন সমন্নাগতত্তা, ঝানাদীসু পঞ্চৰিধৰসিসব্ভাৰতো চ ৰসিভূতেন ৰসিভাৰূপগতিন্দ্রিযেন.

চতুভূমককুসলৰণ্ণনা নিট্ঠিতা.

অকুসলৰণ্ণনা

এত্তাৰতা চ যং ‘‘কুসলাকুসলাব্যাকতজাতিভেদতো তিৰিধ’’ন্তি এত্থ ৰুত্তং কুসলং, তং সরূপতো নিদ্দিসিত্ৰা ইদানি তদনন্তরুদ্দিট্ঠং অকুসলং নিদ্দিসন্তো আহ ‘‘অকুসলং পনা’’তিআদি. ‘‘ভূমিতো একৰিধ’’ন্তি ৰুত্তমত্থং নিযমেত্ৰা দস্সেন্তো আহ ‘‘কামাৰচরমেৰা’’তি. নিকাযন্তরিকা পন রূপারূপাৰচরম্পি অকুসলং ইচ্ছন্তীতি তেসং ¶ মতিনিসেধনত্থং অৰধারণং কতং. মহগ্গতভূমিযং উপ্পজ্জন্তম্পি হেতং তত্থ রূপধাতুযং পৰত্তিৰিপাকং দেন্তম্পি একন্তেন কামাৰচরমেৰাতি. কুতো পনেস নিযমোতি? কামতণ্হাৰিসযভাৰতো. কামতণ্হাৰিসযতা হি কামাৰচরভাৰস্স কারণং যথা রূপারূপতণ্হাৰিসযতা রূপারূপভাৰস্স. একংসেন চেতং এৰং সম্পটিচ্ছিতব্বং. ইতরথা ব্যাপিতলক্খণং ন সিযা. যদি হি আলম্বিতব্বধম্মৰসেন ভূমিৰৰত্থানং করেয্য, এৰং সতি অনারম্মণানং সঙ্গহো ন সিযা. অথ ৰিপাকদানৰসেন, এৰম্পি অৰিপাকানং সঙ্গহো ন সিযা, তস্মা আলম্বণধম্মৰসেনেৰ পরিযাপন্নানং সা কাতব্বা. অপরিযাপন্নানং পন লোকতো উত্তিণ্ণতায লোকুত্তরতা, উত্তরিতরাভাৰতো অনুত্তরতা চ ৰেদিতব্বাতি.

দোমনস্সস্স অনীৰরণাৰত্থায অভাৰেন তংসহগতচিত্তুপ্পাদো কামভূমিযংযেৰ পৰত্ততীতি সো ¶ নিযতৰত্থুকো, ইতরে অরূপভূমিযম্পি পৰত্তনতো অনিযতৰত্থুকাতি আহ ‘‘নিযতা…পে… দুৰিধ’’ন্তি. ৰিচিকিচ্ছুদ্ধচ্চসহগতানং মোহেকহেতুকত্তা, ইতরেসম্পি লোভমোহদোসমোহৰসেন দ্ৰিহেতুকত্তা আহ ‘‘একহেতুকদুহেতুকতো’’তি. আদিতো একাদসন্নং অকুসলচিত্তানং পটিসন্ধিজননতো, উদ্ধচ্চসহগতস্স তদভাৰতো আহ ‘‘পটিসন্ধিজনকাজনকতো’’তি. উদ্ধচ্চসহগতঞ্হি পৰত্তিৰিপাকং দেন্তম্পি পটিসন্ধিং নাকড্ঢতি. যতো ৰক্খতি –

‘‘একাদসৰিধানং তু, হিত্ৰা উদ্ধচ্চমানসং;

একাদসৰিধা চেৰ, ভৰন্তি পটিসন্ধিযো’’তি. (অভিধ. ৫৩৬);

যেন পন কারণেন তং পটিসন্ধিং নাকড্ঢতি, তং পটিসন্ধিৰিনিচ্ছযকথাহি ইমিস্সা গাথায ৰণ্ণনাপদেসেযেৰ ৰক্খাম ¶ . তীহি ৰেদনাহীতি সুখদুক্খোপেক্খাসঙ্খাতাহি তীহি ৰেদনাহি. যথাহ – ‘‘তিস্সো ইমা, ভিক্খৰে, ৰেদনা. কতমা তিস্সো? সুখা দুক্খা অদুক্খমসুখা’’তি (সং. নি. ৪.২৪৯). যং পন কত্থচি সুত্তে ‘‘দ্ৰেমা, ভিক্খৰে, ৰেদনা সুখা দুক্খা’’তি (সং. নি. ৪.২৬৭) ৰচনং, তং কুসলপক্খিকং উপেক্খং সুখে, অকুসলপক্খিকঞ্চ দুক্খে পক্খিপিত্ৰা পরিযাযেন ৰুত্তন্তি দট্ঠব্বং. সুপ্পতিট্ঠিতভাৰকারণত্তা মূলমিৰাতি মূলং, লোভো মূলং এতস্সাতি লোভমূলং. কিঞ্চাপি হি মোহোপি লোভমূলেসু অত্থি, সো পন সব্বাকুসলসাধারণত্তা ৰৰত্থানকরো ন হোতীতি অসাধারণধম্মৰসেন ‘‘লোভমূল’’ন্ত্ৰেৰ ৰুত্তং যথা ‘‘ভেরিসদ্দো যৰঙ্কুরো’’তি. তথা ‘‘দোসমূল’’ন্তি এত্থাপি. মূলন্তরৰিরহতো মোহো এৰ মূলং ইমস্স, নাঞ্ঞন্তি মোহমূলং.

মিচ্ছাৰসেন দস্সনং দিট্ঠি, দিট্ঠিযেৰ দিট্ঠিগতং যথা ‘‘আকাসগতং থামগত’’ন্তি. অথ ৰা ৰিপরিযেসগ্গাহিকায দিট্ঠিযা গতমেৰ, ন এত্থ গন্তব্বৰত্থু তথাসভাৰন্তি দিট্ঠিগতং, দ্ৰাসট্ঠিযা ৰা দিট্ঠীসু অন্তোগধন্তি দিট্ঠিগতং, তেন সমং পকারেহি যুত্তন্তি দিট্ঠিগতসম্পযুত্তং.

‘‘যদা হী’’তিআদি লোভমূলচিত্তানং পৰত্তিআকারদস্সনং. মিচ্ছাদিট্ঠিন্তি উচ্ছেদদিট্ঠিআদিং মিচ্ছাদিট্ঠিং. তায হি ৰিপল্লত্তচিত্তা তাৰ কোধৰিসযো, যাৰ ইন্দ্রিযগোচরোতি ¶ পরলোকং পটিক্খিপিত্ৰা ‘‘নত্থি কামেসু আদীনৰো’’তি গণ্হন্তি. আদি-সদ্দেন –

‘‘এস পন্থোৰিতথো দেৰযানে,

যেন যন্তি পুত্তৰন্তো ৰিসোকা;

তং পস্সন্তি পসৰো পক্খিনো চ,

তেন তে মাতরিপি মিথুনং চরন্তী’’তি. –

আদিনা ¶ নযেন পুত্তমুখদস্সনং সগ্গমোক্খমগ্গোতি এৰমাদিকং মিচ্ছাদিট্ঠিং সঙ্গণ্হাতি. কামে ৰাতি এত্থ ৰা-সদ্দো অনিযমত্থো. তেন ‘‘ব্রাহ্মণানং সুৰণ্ণহরণমেৰ অদিন্নাদানে সাৰজ্জং, ইতরং অনৰজ্জং, গুরূনং, গুন্নং, অত্তনো জীৰিতস্স, ৰিৰাহস্স চ অত্থায মুসাৰাদো অনৰজ্জো, ইতরো সাৰজ্জো, গুরুআদীনং অত্থায পেসুঞ্ঞকরণং অনৰজ্জং, ইতরং সাৰজ্জং, ভারতযুদ্ধসীতাহরণাদিকথা পাপৰূপসমায হোতী’’তি এৰমাদিকে মিচ্ছাগাহে সঙ্গণ্হাতি. দিট্ঠমঙ্গলাদীনীতি দিট্ঠসুতমুতমঙ্গলানি. সারতো পচ্চেতীতি ৰুড্ঢিযা পুব্বনিমিত্তভাৰেন অগ্গহেত্ৰা ‘‘ইদমেৰ ৰুড্ঢিকারণ’’ন্তি এৰং সারৰসেন গণ্হাতি. সভাৰতিক্খেনেৰাতি লোভস্স, মিচ্ছাভিনিৰেসস্স ৰা ৰসেন সরসেনেৰ তিখিণেন কুরুরেন. মন্দেনাতি দন্ধেন অতিখিণেন. তাদিসং পন অত্তনো, পরস্স ৰা সমুস্সাহনেন পৰত্ততীতি আহ ‘‘সমুস্সাহিতেনা’’তি. পরস্স ভণ্ডং ৰা হরতীতি ৰা-সদ্দেন তথাপৰত্তনকমুসাৰাদাদীনম্পি সঙ্গহো ৰেদিতব্বো. কামানং ৰাতি অনুভুয্যমানানং কামগুণানং. ৰা-সদ্দেন পরসন্তকস্স অযথাধিপ্পেততায যং লদ্ধং, তং গহেতব্বন্তি গহণাদিকং সঙ্গণ্হাতি.

সম্পযুত্তধম্মৰসেন ভেদাভাৰতো দোসমূলং অসঙ্খারিকসসঙ্খারিকভেদতো দুৰিধং. যদি এৰং কস্মা ‘‘দোমনস্সসহগতং পটিঘসম্পযুত্ত’’ন্তি ৰুত্তং? অসাধারণধম্মেহি তস্স চিত্তস্স উপলক্খণত্থং. পাণস্স অতীৰ, অতিক্কমিত্ৰা ৰা পাতনং পাণাতিপাতো. আদি-সদ্দেন অদিন্নাদানমুসাৰাদপেসুঞ্ঞফরুসসম্ফপ্পলাপব্যাপাদে সঙ্গণ্হাতি. দসঅকুসলকম্মপথেসু হি কামেসুমিচ্ছাচারঅভিজ্ঝামিচ্ছাদিট্ঠিসঙ্খাতা তযোৰ কম্মপথা ইমিনা ন সিজ্ঝন্তি. সভাৰতিক্খং হুত্ৰা পৰত্তমানং চিত্তং অসঙ্খারমেৰ হোতি, ইতরং সসঙ্খারন্তি অধিপ্পাযেনাহ ‘‘তিক্খমন্দপ্পৰত্তিকালে’’তি. মন্দং ¶ পন হুত্ৰা পৰত্তমানং একংসেন সসঙ্খারমেৰাতি ন সক্কাৰ ¶ ৰিঞ্ঞাতুং. যং সসঙ্খারেন সপ্পযোগেন পৰত্ততি, তং মন্দমেৰ হোতীতি কত্ৰা তথা ৰুত্তন্তি দট্ঠব্বং.

মোহমূলং চিত্তং মূলন্তরৰিরহতো অতিমূল়্হং ৰিচিকিচ্ছুদ্ধচ্চযোগতো চঞ্চলঞ্চাতি উপেক্খাসহগতমেৰ হোতি, ন তস্স কদাচিপি সভাৰতিক্খতা অত্থি. আরম্মণে হি সংসপ্পনৰসেন, ৰিক্খিপনৰসেন চ পৰত্তমানস্স চিত্তদ্ৰযস্স কিং তাদিসে কিচ্চে সভাৰতিক্খতায, উস্সাহেতব্বতায ৰা ভৰিতব্বং, তস্মা ন তত্থ সঙ্খারভেদো অত্থি. ননু চ উদ্ধচ্চং সব্বাকুসলসাধারণং, কস্মা পন এতমেৰ তেন ৰিসেসেত্ৰা ৰুত্তং ‘‘উদ্ধচ্চসহগত’’ন্তি. ৰিসেসতো বলৰভাৰতো. ইদঞ্হি এতস্মিং চিত্তে বলৰং, তস্মা সম্পযুত্তধম্মেসু পধানং হুত্ৰা পৰত্ততীতি ইদমেৰ তেন ৰিসেসিতব্বং. তেনেৰ হি পাল়িযং সেসাকুসলেসু উদ্ধচ্চং যেৰাপনকৰসেন আগতং, ইধ পন সরূপতোযেৰ নিদ্দিট্ঠং. এৰং অসাধারণপ্পধানধম্মৰসেন মোহমূলং ৰিচিকিচ্ছাসম্পযুত্তং উদ্ধচ্চসম্পযুত্তন্তি দুৰিধং ৰুত্তন্তি দট্ঠব্বং. অসন্নিট্ঠানং সংসযো, ৰিক্খেপো অৰূপসমো, ভন্ততাতি অত্থো. তত্থ ৰিচিকিচ্ছাসহগতস্স অসন্নিট্ঠানকালে, উদ্ধচ্চসহগতস্স ৰিক্খেপকালে চ পৰত্তি ৰেদিতব্বা.

যথানুরূপন্তি পটিসন্ধিজনকাজনকস্স, কম্মপথভাৰপ্পত্তাপত্তস্স চ অনুরূপতো. অথ ৰা যথানুরূপন্তি যো যস্স হেতু, তদনুরূপতো. যেভুয্যেন হি লোভমূলকেন খুপ্পিপাসাদিনিরন্তরপেতৰিসযে উপ্পজ্জন্তি, দোসমূলকেন দোসো ৰিয চণ্ডজাততায তংসরিক্খকে নিরযে, মোহমূলকেন নিচ্চসম্মূল়্হায তিরচ্ছানযোনিযং, তস্মা লোভাদিহেতুঅনুরূপতো তত্থ তত্থ অপাযে উপপত্তিং নিপ্ফাদেতীতি আহ ‘‘যথানুরূপং…পে… উপপত্তিযা’’তি ¶ . অকুসলৰিপাকানং দুক্খপ্পধানতায ‘‘দুক্খৰিসেসস্সা’’তি ৰুত্তং.

৩১. অপাপেন অলামকেন পাপাপাপপ্পহীনেন পাপাপাপেসু মানসেসু যং পাপমানসং ৰুত্তং, পাপাপাপেসু পুগ্গলেসু অপাপেন পাপাপাপপ্পহীনেন যং পাপমানসং ৰুত্তন্তি ৰা সম্বন্ধো. অথ ৰা পাপাপাপেসু মানসেসু পাপেন পাপমানসেন পাপৰসেন পাপাপাপপ্পহীনেন যং পাপমানসং ৰুত্তন্তি যোজনা. অযং পনেত্থ অধিপ্পাযো – অসম্মাসম্বুদ্ধেন তাৰ ধম্মসভাৰস্স দুব্বিজানীযত্তা কুসলম্পি অকুসলতো, অকুসলম্পি কুসলতো ৰুচ্চেয্য, ভগৰতো পন সহ ৰাসনাহি ¶ ৰিদ্ধংসিতাকুসলস্স কম্মক্খযকরঞাণেন পচ্চযৰেকল্লতো ৰিদ্ধংসিতকুসলকম্মস্স চ সম্মাসম্বুদ্ধভাৰতো একন্তেনেৰ অকুসলদেসনা অকুসলধম্মৰসেনেৰাতি.

অকুসলৰণ্ণনা নিট্ঠিতা.

অব্যাকতৰণ্ণনা

অঞ্ঞমঞ্ঞৰিসিট্ঠানং কুসলাকুসলানং পাকন্তি ৰিপাকং, ৰিপক্কভাৰমাপন্নানমরূপধম্মানমেতমধিৰচনং. যথা হি লোকে সালিবীজাদীনং ফলানি তংসদিসানি নিব্বত্তানি ৰিপক্কানি নাম হোন্তি, ৰিপাকনিরুত্তিঞ্চ লভন্তি, ন মূলঙ্কুরপত্তদণ্ডনল়াদীনি, এৰং কুসলাকুসলানং ফলানি অরূপধম্মভাৰেন, সারম্মণভাৰেন চ তংসদিসানি ৰিপক্কভাৰমাপন্নানীতি ৰিপাকনিরুত্তিং লভন্তি, ন পন কম্মাভিনিব্বত্তাপি রূপধম্মা কম্মৰিসদিসত্তা. ৰিপাকমেৰ চিত্তং ৰিপাকচিত্তং. করণমত্তং কিরিযা ফলদানাসম্ভৰতো. যেন পন কারণেন তস্স ফলদানং ন সম্ভৰতি, তং হেট্ঠা ৰুত্তমেৰ. কিরিযা ¶ এৰ চিত্তং কিরিযচিত্তং. ৰিপাকস্স কামাৰচরাদিভাৰো কুসলে ৰুত্তনযেন যথাসম্ভৰং ৰেদিতব্বো. অলোভাদিসম্পযুত্তহেতূহি সহ ৰত্তনতো সহেতুকং. তদভাৰতো অহেতুকং. নিব্বত্তকহেতুৰসেন সিজ্ঝমানম্পি হেতং সম্পযুত্তহেতুৰসেনেৰ ‘‘সহেতুকমহেতুক’’ন্তি ৰুচ্চতি, ইতরথা ৰৰত্থানাভাৰতো.

সককুসলং ৰিযাতি অত্তনো জনকং কামাৰচরকুসলং ৰিয. জনকজনিতব্বসম্বন্ধৰসেন হি তং তং কুসলং তস্স তস্স ৰিপাকস্স সকং নামং হোতি.

‘‘সককুসলং ৰিযা’’তি ৰুত্তত্তা পৰত্তাকারআরম্মণাদিতো চস্স তংসদিসতা আপজ্জেয্যাতি তংনিৰারণত্থমাহ ‘‘যথা পনা’’তিআদি. ছসু আরম্মণেসূতি পরিত্তাদিঅতীতাদিঅজ্ঝত্তাদিভেদেসু ছসু রূপাদিআরম্মণেসু. ভৰন্তরপটিসন্ধানতো পটিসন্ধি. অৰিচ্ছেদপ্পৰত্তিহেতুভাৰেন ভৰস্স অঙ্গন্তি ভৰঙ্গং. নিব্বত্তিতভৰতো পরিগঞ্ঞতায চুতিহেতুতায চুতি. পরিত্তধম্মপরিযাপন্নেসূতি কামাৰচরধম্মপরিযাপন্নেসু. কামাৰচরধম্মা হি কিলেসৰিক্খম্ভনাদীসু ¶ অসমত্থভাৰেন পরিত্তানুভাৰতায, ওল়ারিকাহি ৰা কামতণ্হাদীহি পরিতো গহিতত্তা ‘‘পরিত্তা’’তি ৰুচ্চন্তি. ৰিপাকস্স সঙ্কপ্পেত্ৰা আরম্মণগ্গহণাভাৰতো কম্মানুরূপমেৰ পৰত্ততীতি পরিত্তকম্মৰিপাকো পরিত্তারম্মণেযেৰ পৰত্তিতুমরহতি, ন মহগ্গতঅপ্পমাণারম্মণেতি ৰুত্তং ‘‘পরিত্তধম্মপরিযাপন্নেসূ’’তি. যদি এৰং মহগ্গতৰিপাকোপি মহগ্গতারম্মণেযেৰ আপজ্জতীতি? নাপজ্জতি, সঞ্ঞাযত্তারম্মণস্স সমাধিপ্পধানস্স কম্মস্স অপ্পনাপত্তস্স তাদিসেনেৰ ৰিপাকেন ভৰিতব্বত্তা. ৰণ্ণলক্খণাদিকঞ্হি অগ্গহেত্ৰা লোকসঞ্ঞানুরোধেনেৰ গহিতে পথৰাদিকে পরিকম্মসঞ্ঞায সমুপ্পাদিতং ¶ পটিভাগনিমিত্তসঙ্খাতমারম্মণং সঞ্ঞাৰসং সঞ্ঞাযত্তং হোতি, তস্মা তদারম্মণস্স সমাধিপ্পধানস্স অপ্পনাপত্তস্স কম্মস্স ৰিপাকেন সমাধিপ্পধানঅপ্পনাপত্তেহি ৰিয সঞ্ঞাযত্তারম্মণতায নিব্বিসেসেনেৰ ভৰিতব্বং. পরিত্তৰিপাকো পন মহগ্গতঅপ্পমাণপঞ্ঞত্তারম্মণকম্মনিব্বত্তোপি হোতি, সো পরতো আগমিস্সতি.

মুখনিমিত্তং ৰিযাতি মুখং পটিচ্চ উপ্পন্ননিমিত্তং ৰিয. যথা হি তং নিরীহং অপরং মুখনিমিত্তং উপ্পাদেতুং, অঞ্ঞং ৰা কিঞ্চি অত্তনো বলেন কাতুং ন সক্কোতি, এৰমেতম্পি ৰিপাকুপ্পাদনাদীসু ন উস্সহতি. তেনাহ ‘‘নিরুস্সাহ’’ন্তি. উস্সাহোতি চেত্থ অনুপচ্ছিন্নাৰিজ্জাতণ্হামানানুসযস্মিং সন্তানে ৰিপাকুপ্পাদনসমত্থতাসঙ্খাতো, আসেৰনপচ্চযভাৰসঙ্খাতো, ৰিঞ্ঞত্তিজনকতাসঙ্খাতো চ ব্যাপারো. সো ৰিপাকে নত্থি কম্মৰেগুক্খিত্তত্তা পতিতং ৰিয হুত্ৰা পৰত্তমানস্স তস্স একন্তেন দুব্বলভাৰতোতি তং নিরুস্সাহং.

ৰিপচ্চনট্ঠানন্তি ৰিপচ্চনৰসেন পৰত্তনট্ঠানং, পটিসন্ধিভৰঙ্গচুতিতদারম্মণৰসেন চতুকিচ্চানমেতেসং পৰত্তিওকাসোতি অত্থো. তত্থ চুতিভৰঙ্গানং অন্তরাল়ং পটিসন্ধিকিচ্চানং ঠানং, পটিসন্ধিআৰজ্জনানং, তদারম্মণাৰজ্জনানং, জৰনাৰজ্জনানং, ৰোট্ঠব্বনাৰজ্জনানঞ্চ অন্তরাল়ং ভৰঙ্গকিচ্চানং ঠানং, তদারম্মণপটিসন্ধীনং, জৰনপটিসন্ধীনং, ভৰঙ্গপটিসন্ধীনং ৰা অন্তরাল়ং চুতিকিচ্চানং ঠানং, জৰনভৰঙ্গানং অন্তরাল়ং তদারম্মণকিচ্চানং ঠানন্তি দট্ঠব্বং. যস্মা পনেতং ঠানং ধম্মানং তংতংকিচ্চৰসেন পাকটং হোতি, তস্মা ঠানং ৰেদিতব্বন্তি ঠানং উদ্ধরিত্ৰা পাকটকিচ্চৰসেনেৰ তং পকাসেতুং ‘‘ইমানি হী’’তিআদি ¶ ৰুত্তং. অথ ৰা কিচ্চম্পি কিচ্চৰন্তানং পৰত্তিট্ঠানভাৰেন গয্হতীতি ঠানন্তিপি কিচ্চমেৰ উদ্ধটন্তি তং সরূপতো দস্সেতুং ‘‘ইমানি হী’’তিআদি ৰুত্তং.

৩২. অণ্ডজজলাবুজযোনিসম্ভৰানং ¶ মনুস্সানং, ৰিনিপাতিকাসুরানঞ্চ অহেতুকপটিসন্ধিযাপি সব্ভাৰতো আহ ‘‘দুহেতুকতিহেতূন’’ন্তি. পটিসন্ধিৰিঞ্ঞাণসম্পযুত্তা দ্ৰে অলোভাদযো হেতূ যেসং তে দুহেতুকা. এস নযো তিহেতুকেসুপি. তত্থ দুহেতুকানং ঞাণৰিপ্পযুত্তানি চত্তারি, তিহেতুকানং ঞাণসম্পযুত্তানি চত্তারি পটিসন্ধিযো হোন্তি, তথা ভৰঙ্গচুতিযোপি. যেন যেন হি চিত্তেন পটিসন্ধি হোতি, তং তদেৰ ভৰঙ্গচুতিৰসেনপি পৰত্ততি. তদারম্মণং পন অৰিসেসেন দট্ঠব্বং দুহেতুকানম্পি তিহেতুকতদারম্মণস্স ইচ্ছিতত্তা. ননু চেতং অসমপেক্খিতাভিধানং আচরিযেনেৰ ইমস্স পটিসিদ্ধত্তা. তথা হি ৰক্খতি –

‘‘অহেতুপটিসন্ধিস্স, ন তদারম্মণং ভৰে;

দুহেতুকং তিহেতুং ৰা, দুহেতুপটিসন্ধিনো’’তি. (অভিধ. ৪৪৩);

নযিদমসমপেক্খিতাভিধানং পটিসন্ধিজনককম্মং সন্ধায তত্থ পটিসিদ্ধত্তা. যেন হি কম্মেন যা পটিসন্ধি আদিন্না, ন তং ততো অধিকতরং তদারম্মণং পৰত্তে অভিনিপ্ফাদেতি. যং পন অঞ্ঞম্পি কিঞ্চি কম্মং তদালদ্ধাৰকাসং সিযা, ন তং তত্থ ততো অধিকতরম্পি ৰিপাকং ন নিব্বত্তেতীতি অত্থি. ‘‘সহেতুকং ভৰঙ্গং অহেতুকস্স ভৰঙ্গস্স অনন্তরপচ্চযেন পচ্চযো’’তি (পট্ঠা. ৩.১.১০২) হি পট্ঠানৰচনেন অহেতুকস্সাপি নানাকম্মেন সুগতিযং সহেতুকতদারম্মণমনুঞ্ঞাতং. তেনাহু আচরিযা –

‘‘হোতি অঞ্ঞেন কম্মেন, সহেতুকং অহেতুন’’ন্তি.

যথা ¶ চ অহেতুকস্স সহেতুকং, এৰং দুহেতুকস্স তিহেতুকম্পি ইচ্ছন্তি. আচরিযজোতিপালত্থেরো পন ‘‘সহেতুক’’ন্তি অৰিসেসেন ৰুত্তত্তা অহেতুকানম্পি তিহেতুকতদারম্মণং ইচ্ছতি. ৰুত্তঞ্হি তেন ‘‘সহেতুক’’ন্তি অৰিসেসোপদেসেন দুহেতুকং, তিহেতুকঞ্চ গহেতব্বং. তথা হি অট্ঠকথাযং ‘‘অহেতুকস্সাপি তিহেতুকতদারম্মণমভিহিতং, যঞ্চরহি অত্থসমাসে অহেতুকানং তিহেতুকফলানি দেতী’’তি ৰুত্তং, তং কথং? সো এৰ পুচ্ছিতব্বো, যো তস্স কত্তাতি. অপরে পন ‘‘মূলসন্ধিযা জল়ত্তা তস্স তিহেতুকতদালম্বণং ন লব্ভতিযেৰা’’তি ৰদন্তি.

৩৩-৪. ততোতি ¶ পটিসন্ধিতো পরং, দুতিযচিত্ততো পট্ঠায. সতিপি অন্তরন্তরা ৰীথিচিত্তুপ্পাদে তদৰসানে উপ্পজ্জমানস্স যাৰতাযুকং অনিৰত্তনতো ৰুত্তং ‘‘যাৰতাযুক’’ন্তি. বলৰারম্মণেতি অতিমহন্তৰিভূতারম্মণে. পঞ্চদ্ৰারে হি অতিমহন্তারম্মণে মনোদ্ৰারে ৰিভূতারম্মণে তদারম্মণমুপ্পজ্জতি, ন অঞ্ঞেসু. একারম্মণপ্পৰত্তিযা পটিসন্ধাদীনং তিণ্ণম্পি একট্ঠানে দস্সনত্থং উদ্দেসে তদারম্মণস্স অৰসানকরণং, ইধ পন পৰত্তিক্কমৰসেন চুতিযা অৰসানকরণন্তি দট্ঠব্বং.

৩৫-৬. কম্মদ্ৰারন্তি কাযৰচীকম্মদ্ৰারস্স জনকৰসেন ন পৰত্তন্তীতি ৰুত্তং হোতি. তত্থ কাযোতি কাযৰিঞ্ঞত্তি. কম্মন্তি তংসমুট্ঠাপিকা চেতনা, কাযেন কতং কম্মং কাযকম্মং. কিঞ্চাপি হি কাযো কম্মস্স চতুৰীসতিযা পচ্চযেসু ন কেনচি পচ্চযেন পচ্চযো হোতি, তথাপি তংসমুট্ঠানস্স তস্স সব্ভাৰেযেৰ কাযকম্মাদিৰোহারোতি তং তেন কতন্তি ৰুচ্চতি. কাযকম্মস্স পৰত্তিট্ঠানভূতং দ্ৰারং কাযকম্মদ্ৰারং. যদি এৰং কম্মদ্ৰারৰৰত্থানং ন সিযা ¶ . কাযদ্ৰারেন হি সিদ্ধং কম্মং ‘‘কাযকম্ম’’ন্তি ৰুচ্চতি. তং পন ‘‘দ্ৰারে চরন্তি কম্মানী’’তি (ধ. স. অট্ঠ. ১ কাযকম্মদ্ৰার) ৰচনতো ৰচীদ্ৰারেপি সিজ্ঝতীতি দ্ৰারেন কম্মৰৰত্থানং ন সিযা, তথা ৰচীকম্মং কাযদ্ৰারেপি সিজ্ঝতীতি কম্মেন দ্ৰারৰৰত্থানম্পি ন সিযাতি? তং ন, তব্বহুলৰুত্তিযা চেৰ যেভুয্যেন ৰুত্তিযা চ ৰৰত্থিতত্তা. কাযকম্মঞ্হি কাযদ্ৰারেযেৰ বহুলং পৰত্ততি, অপ্পং ৰচীদ্ৰারে, তস্মা কাযদ্ৰারে বহুলপ্পৰত্তনতো এতস্স কাযকম্মভাৰো সিদ্ধো ৰনচরকাদীনং ৰনচরকাদিভাৰো ৰিয. তথা কাযকম্মমেৰ যেভুয্যেন কাযদ্ৰারে পৰত্ততি, ন ইতরং, তস্মা কাযকম্মস্স যেভুয্যেন এত্থেৰ পৰত্তিতো অস্স কাযকম্মদ্ৰারভাৰো সিদ্ধো ব্রাহ্মণগামাদীনং ব্রাহ্মণগামাদিভাৰো ৰিযাতি নেত্থ কম্মদ্ৰারৰৰত্থানে কোচি ৰিবন্ধোতি. ৰচীকম্মদ্ৰারেপি এস পবন্ধো যথাসম্ভৰং দট্ঠব্বো.

মনোকম্মদ্ৰারং পন সযং মনোযেৰ সমানং অত্তনা সহগতচেতনাঅনভিজ্ঝাদিকম্মানং পৰত্তিদ্ৰারভাৰেন মনোদ্ৰারসঙ্খং লভতীতি ন তং চিত্তস্স উপ্পত্তিদ্ৰারৰসেন গণ্হাতি. ন হি সযং অত্ততোৰ পৰত্ততি. যদি পন চিত্তসম্পযুত্তা কম্মদ্ৰারভাৰেন অধিপ্পেতা, তদা তেসং কম্মদ্ৰারভাৰো মনস্মিং ন উপচারীযতীতি সম্পযুত্তধম্মানং চিত্তাধিপতিভাৰো চিত্তে ৰিযাতি চিত্তং ‘‘মনোকম্মদ্ৰার’’ন্তি ৰুচ্চতি. সভাৰতো পন কম্মদ্ৰারং নাম সম্পযুত্তধম্মাযেৰাতি চিত্তং ততো পৰত্তনতো মনোকম্মদ্ৰারৰসেন পৰত্ততি. অনন্তরপচ্চযভূতস্স পন মনোকম্মদ্ৰারভাৰে ৰত্তব্বমেৰ ¶ নত্থি. ইধ পন ‘‘অৰিঞ্ঞত্তিজনত্তা’’তি ৰচনেন কাযৰচীকম্মদ্ৰারৰসেনেৰ অপ্পৰত্তিযা সাধিতত্তা মনোকম্মদ্ৰারং ন গহিতমেৰ. ন হি ‘‘অৰিঞ্ঞত্তিজনত্তা’’তি কারণং মনোকম্মদ্ৰারৰসেনপি অপ্পৰত্তিং সাধেতি. অথ ৰা ‘‘অৰিপাকসভাৰতো’’তি ¶ ৰচনেন মনোকম্মদ্ৰারৰসেনপি অপ্পৰত্তি সাধিতা হোতি. ‘‘কম্মদ্ৰার’’ন্তি এত্থ কম্মগ্গহনেন নানক্খণিককম্মস্স অধিপ্পেতত্তা তস্সাপি গহণং দট্ঠব্বং. ইতি ইমেসু কাযৰচীকম্মদ্ৰারসঙ্খাতেসু দ্ৰীসু দ্ৰারেসু, মনোকম্মদ্ৰারেন সহ তীসু এৰ ৰা যথা কুসলং পৰত্ততি, ন এৰং ৰিপাকো, যথা চ কুসলং কাযৰচীমনোকম্মস্স আযূহনৰসেন দানাদিপুঞ্ঞকিরিযৰত্থুৰসেন পৰত্ততি, ন এৰমযং. অযং পন নেৰ কাযৰচীকম্মদ্ৰারেসু পৰত্ততি ৰিঞ্ঞত্তিসমুট্ঠাপকত্তাভাৰতো, ন কম্মৰসেন, মনোকম্মদ্ৰারৰসেনাপি চ পৰত্ততি ৰিপাকুপ্পাদনভাৰাভাৰতো, ন পুঞ্ঞকিরিযৰসেন পৰত্ততি দানাদিৰসেন অপ্পৰত্তনতোতি দস্সেতুং ‘‘কম্মদ্ৰারঞ্চ…পে… নো সমা’’তি ৰুত্তং. এৰন্তি দানাদিৰসেন.

৩৭. ‘‘পরিত্তারম্মণত্তা’’তিআদি সম্পযুত্তধম্মৰসেন ৰিসেসদস্সনং. যস্মা এতে পরিত্তারম্মণা, করুণামুদিতা চ পঞ্ঞত্তারম্মণা সত্তপঞ্ঞত্তিযং পৰত্তনতো, তস্মা দ্ৰিন্নমালম্বণানং একচিত্তস্স ৰিসযভাৰাননুগমনতো ন তেসু করুণামুদিতা কদাচিপি জাযন্তীতি অযমেত্থ পঠমগাথায অধিপ্পাযো.

৩৮. দুতিযগাথায পন হি-সদ্দো যস্মাতি ইমস্স অত্থে. যস্মা ‘‘পঞ্চ সিক্খাপদা কুসলা’’তি (ৰিভ. ৭১৫) ৰুত্তা, তস্মাতি অত্থো. ইদং ৰুত্তং হোতি – ভগৰতা হি সিক্খাপদৰিভঙ্গে ‘‘পঞ্চ সিক্খাপদা কুসলা’’তি (ৰিভ. ৭১৫) এৰং ‘‘পাণাতিপাতা ৰেরমণী’’তিআদীনং পঞ্চন্নং সিক্খাপদানং কুসলভাৰো ৰুত্তো, তে চ ৰিরতিসভাৰা এৰ আদিতো তিণ্ণং সিক্খাপদানং, পচ্ছিমস্স চ সম্মাকম্মন্তে, ইতরস্স সম্মাৰাচাযং, পঞ্চন্নম্পি মিচ্ছাজীৰহেতুকপঞ্চদুচ্চরিততো ৰিরমণৰসেন ¶ পৰত্তানং সম্মাআজীৰে চ অন্তোভাৰতো, তস্মা তা একন্তকুসলভূতানং কদাচি অব্যাকতে লভন্তি, ইতরথা সদ্ধাসতিআদযো ৰিয ‘‘সিযা কুসলা, সিযা অব্যাকতা’’তি ৰুচ্চেয্যুন্তি. যদি এৰং লোকুত্তরফলেসু অট্ঠ, সত্ত ৰা মগ্গঙ্গা ন লব্ভন্তীতি? নো ন লব্ভন্তি লোকিযৰিরতীনমেৰ তত্থ একন্তকুসলভাৰস্স ৰুত্তত্তা, লোকুত্তরৰিরতিযো পন ফলস্স মগ্গপটিবিম্বভূতত্তা মগ্গসদিসতো অট্ঠঙ্গিকতায, সত্তঙ্গিকতায ¶ চ ভৰিতব্বন্তি ন চ একন্তকুসলভাৰেন ৰৰত্থাপেতুং যুত্তা. এৰঞ্চ কত্ৰা উপরি লোকুত্তরফলেসুপি অট্ঠঙ্গিকতাদিভেদো মগ্গো উদ্ধটোতি.

৩৯. ‘‘তথাধিপতিনো’’তিআদি অধিপতিৰসেন ৰিসেসদস্সনং. সব্বেসম্পি হি তেভূমককুসলানং অঞ্ঞো আযূহনকালো, অঞ্ঞো ৰিপচ্চনকালো, তস্মা ন তানি অত্তনো ৰিপাকেহি অধিপতিং গাহাপেতুং সক্কোন্তীতি ন তে ছন্দাদীনি ধুরং কত্ৰা পৰত্তন্তি. লোকুত্তরকুসলানি চ পন আযূহনকালস্স, ৰিপচ্চনকালস্স চ অন্তরাভাৰতো অত্তনো ছন্দাদীনং বলস্স অৰূপসন্তকালেযেৰ ৰিপাকং নিব্বত্তেন্তীতি অনন্তরপচ্চযা হুত্ৰা ৰিপাকেহি অধিপতিং গাহাপেতুং সক্কোন্তীতি. এৰঞ্চ কত্ৰা উপরি লোকুত্তরৰিপাকানং অধিপতিযোগং ৰক্খতি.

৪০. যস্মা মোরৰাপিৰাসিমহাদত্তত্থেরেন ৰিপাকানং আগমনতো অসঙ্খারিকসসঙ্খারিকভাৰো ইচ্ছিতো, তিপিটকচূল়নাগত্থেরেন পচ্চযতো, তস্মা উভিন্নম্পি মতিদস্সনত্থমাহ ‘‘অসঙ্খারসসঙ্খারৰিধান’’ন্তিআদি. পুরিমত্থেরো হি যথা মুখে চলিতে আদাসতলে মুখনিমিত্তং চলতি ¶ , এৰং অসঙ্খারিকস্স কুসলস্স ৰিপাকো অসঙ্খারিকো, সসঙ্খারিকস্স ৰিপাকো সসঙ্খারিকোতি আহ, তস্মা তস্স মতিদস্সনত্থং ‘‘অসঙ্খার…পে… পুঞ্ঞতো’’তি ৰুত্তং. দুতিযত্থেরো পন অসঙ্খারিকাদীসু যেন কেনচিপি চিত্তেন কম্মে আযূহিতে আসন্নমরণস্স অত্তনো, পরেসং ৰা পযোগেন ৰিনা অসঙ্খারেন অপ্পযোগেন কম্মকম্মনিমিত্তগতিনিমিত্তপচ্চুপট্ঠানে পটিসন্ধি উপ্পজ্জমানা অসঙ্খারিকা. যস্স কস্সচি সসঙ্খারেন সপ্পযোগেন কম্মাদিপচ্চুপট্ঠানে সসঙ্খারিকা. তথা ভৰঙ্গচুতিযোপি. তদারম্মণঞ্চ পণীতাপণীতউতুভোজনাদিপচ্চযৰসেন, অনন্তরনিরুদ্ধকুসলাকুসলস্স ৰসেন ৰা অসঙ্খারসসঙ্খারন্তি এৰং পচ্চযতো অসঙ্খারিকাদিৰিধানতমাহ, তস্মা তস্স মতিদস্সনত্থং ‘‘ঞেয্যং পচ্চযতো চেৰা’’তি ৰুত্তং. ইদমেৰ চ পন আচরিযা পসংসন্তি.

৪১-২. হীনাদীনং ৰিপাকত্তাতি অধিপতিযোগাভাৰেপি হীনমজ্ঝিমপণীতানং কুসলানং ৰিপাকত্তা. এতেন আগমনতো হীনাদিভাৰং ৰিভাৰেতি. ৰিনেয্যসন্তানগতকিলেসমলৰিধমনেন তস্স পুননতো পুঞ্ঞো ৰাদো ৰচীঘোসো এতস্স, ৰুত্তনযেনেৰ পুঞ্ঞং ৰদতীতি ৰা পুঞ্ঞৰাদী, তেন পুঞ্ঞৰাদিনা. ‘‘একন্তেন সৰত্থুক’’ন্তি ৰুত্তেপি রূপলোকে পৰত্তি অনিৰারিতাতি আহ ‘‘কামলোকস্মি’’ন্তি ¶ . ‘‘ন পনঞ্ঞত্থ জাযতে’’তি ইমিনা পন ব্যতিরেকতো লদ্ধমত্থং দস্সেতীতি.

এৰং তাৰ সহেতুকৰিপাকে নিদ্দিসিত্ৰা ইদানি অহেতুকে নিদ্দিসিতুং ‘‘অহেতুকৰিপাকচিত্তং পনা’’তিআদি ৰুত্তং. কস্মা পন সহেতুকস্স কম্মস্স অহেতুকৰিপাকো হোতীতি? ৰুচ্চতে – চক্খুৰিঞ্ঞাণাদীনং তাৰ পঞ্চন্নং আরম্মণাভিনিপাতমত্তত্তা অলোভাদিসম্পযোগো ন সম্ভৰতি, তথা মন্দতরকিচ্চেসু সম্পটিচ্ছনসন্তীরণেসূতি ¶ এৰং হেতূনং উপ্পত্তিযা অসম্ভৰতো চ নেসং অহেতুকতা দট্ঠব্বা. উপেক্খাদিযোগে পন চক্খুৰিঞ্ঞাণাদীনং তাৰ চতুন্নং ইট্ঠারম্মণেপি পৰত্তমানানং ৰত্থারম্মণসঙ্ঘট্টনায দুব্বলভাৰতো উপেক্খাসহগততা, কাযৰিঞ্ঞাণস্স চ তায বলৰভাৰতো সুখসহগততা হোতি. সম্পটিচ্ছনং পন আরম্মণঘট্টনযোগ্যভাৰেন ওল়ারিকত্তা, চতুচিত্তক্খণাতীতৰসেন চিরজাতত্তা চ দুব্বলমত্তনো নিস্সযেন সহ অসমানজাতিকঞ্চ চক্খাদিৰত্থুং নিস্সায উপ্পন্নেহি চক্খুৰিঞ্ঞাণাদীহি লদ্ধানন্তরপচ্চযতায, অপুব্বনিস্সযতায চ আরম্মণরসস্সাদে দুব্বলন্তি ইট্ঠাদীসু আরম্মণেসু উপেক্খাসহগতমেৰ. সন্তীরণং পন ৰুত্তৰিপরীততো ইট্ঠারম্মণে সুখসহগতং, ইট্ঠমজ্ঝত্তে চ উপেক্খাসহগতন্তি দট্ঠব্বং. মনোৰিঞ্ঞাণধাতু ৰিয ৰিসিট্ঠমননকিচ্চাভাৰতো মনোমত্তা নিস্সত্তনিজ্জীৰাদিঅত্থেহি ধাতু চাতি মনোধাতু. সা হি সতিপি ৰিঞ্ঞাণভাৰে মনোৰিঞ্ঞাণতো সম্ভৰস্স ৰিসিট্ঠমননকিচ্চস্স অকরণতো মননমত্তাযেৰ হোতি. ৰুত্তলক্খণৰিপরীততো পন মনো চ তং ৰিঞ্ঞাণঞ্চাতি মনোৰিঞ্ঞাণং, তদেৰ যথাৰুত্তট্ঠেন ধাতূতি মনোৰিঞ্ঞাণধাতু.

ৰিঞ্ঞাণপঞ্চকং নিযতারম্মণং যথাক্কমং রূপাদিএকেকস্সেৰ আরম্মণকরণতো. সেসত্তযমনিযতারম্মণং পঞ্চারম্মণিকছল়ারম্মণিকভাৰতো.

দট্ঠব্বতায দিট্ঠং, রূপাযতনং. সোতব্বতায সুতং, সদ্দাযতনং. মুনিতব্বতায মুতং, সম্পত্তস্সেৰ গহেতব্বতাযাতি অত্থো, গন্ধাদিত্তযস্সেতং নামং. চক্খাদীহি ৰিনা কেৰলং মনসা এৰ ৰিজানিতব্বতায ৰিঞ্ঞাতং, ধম্মাযতনং. অনামট্ঠকালৰিসেসৰচনত্তা চ নেসং অতীতানাগতাপি রূপাদযো দিট্ঠাদিসদ্দেহি ৰুচ্চন্তি. তেনেৰ হি ¶ ‘‘দট্ঠব্বতাযা’’তিআদিনা কালসামঞ্ঞেন ¶ নেসং নিব্বচনং ৰুত্তং. দিট্ঠং আরম্মণং যস্স তং দিট্ঠারম্মণং. এৰং সুতারম্মণাদীসু.

চক্খুতো পৰত্তন্তি চক্খুদ্ৰারতোৰ পৰত্তং সব্বৰাক্যানং অৰধারণফলত্তা. তেন মনোধাতুআদীনং চক্খুৰিঞ্ঞাণভাৰো নিৰারিতো হোতি তেসং দ্ৰারন্তরতোপি পৰত্তিসম্ভৰতো. অথ ৰা ‘‘চক্খুতো পৰত্ত’’ন্তি ইদং সঞ্জাতিপ্পৰত্তিং সন্ধায ৰুত্তং, ন সঞ্চরণপ্পৰত্তিং, তস্মা যথা কুণ্ডমুখতো উদকং সঞ্চরণৰসেন পৰত্ততি, ন এৰং পৰত্তমিধ গহিতং. যথা পন চন্দকন্তপাসাণতো উদকং সঞ্জাতিৰসেন পৰত্ততি, এৰং পৰত্তমেৰ চক্খুতো পৰত্তন্তি গহিতং. যথা চ কিং? যথা কুচ্ছিতো সমুট্ঠিতং পিত্তসেম্হরুহিরাদি মুখতো সন্দন্তম্পি ‘‘মুখস্সৰো’’তি ন ৰুচ্চতি, মুখতোযেৰ পন সমুট্ঠহিত্ৰা ততো সৰন্তং খেল়ং ‘‘মুখস্সৰো’’তি ৰুচ্চতি, এৰং হদযৰত্থুসন্নিস্সযতো সমুট্ঠহিত্ৰা চক্খুতো পৰত্তমানং চক্খুৰিঞ্ঞাণং নাম ন হোতি. চক্খুতোযেৰ পন সমুট্ঠহিত্ৰা ততো পৰত্তমানং চক্খুৰিঞ্ঞাণং নামাতি. যো পন ইমমত্থং অসল্লক্খেত্ৰা ব্যঞ্জনমত্তস্সেৰ অভিনিৰিসিত্ৰা তংদ্ৰারপ্পৰত্তানং সেসানম্পি চক্খুৰিঞ্ঞাণভাৰং মঞ্ঞেয্য, তং নিৰারেতুং পকারন্তরেনপি ৰিগ্গহং দস্সেন্তো আহ ‘‘চক্খুম্হি সন্নিস্সিত’’ন্তি. যথা চক্খুতো পৰত্তং, চক্খুসন্নিস্সিতং ৰা ৰিঞ্ঞাণং চক্খুৰিঞ্ঞাণং, এৰং সোতৰিঞ্ঞাণাদীসুপি ‘‘সোততো পৰত্তং, সোতস্মিং সন্নিস্সিতং ৰা ৰিঞ্ঞাণং সোতৰিঞ্ঞাণ’’ন্তিআদিনা যোজনং অতিদিসন্তো আহ ‘‘তথা সোতৰিঞ্ঞাণাদীনী’’তি.

চক্খুসন্নিস্সিতং হুত্ৰা রূপস্স ৰিজাননলক্খণমেতস্সাতি চক্খুসন্নিস্সিতরূপৰিজাননলক্খণং. তত্থ চক্খুসন্নিস্সিতৰচনেন দিব্বচক্খাদিকং অঞ্ঞং রূপারম্মণং ৰিঞ্ঞাণং নিৰত্তেতি ¶ . ৰিজানন-গ্গহণেন চক্খুসন্নিস্সিতে ফস্সাদিধম্মে নিৰত্তেতি. চক্খুরূপ-গ্গহণেন নিস্সযতো, আরম্মণতো চ চিত্তং ৰিভাৰেতি উভযাধীনৰুত্তিকত্তা. যদি হি চক্খু নাম ন সিযা, অন্ধাপি রূপং পস্সেয্যুং, ন চ পস্সন্তি. যদি চ নীলাদিরূপং নাম ন সিযা, দেসাদিনিযমেন ন ভৰিতব্বং, অত্থেৰ চ নিযমো. একন্তসারম্মণতা চ চিত্তস্স ৰুত্তাতি আরম্মণেন ৰিনা নীলাদিআভাসং চিত্তং পৰত্ততীতি এৰং পৰত্তো ৰাদো মিচ্ছাৰাদোতি গহেতব্বো. তেনাহ ভগৰা ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তিআদি (ম. নি. ১.২০৪, ৪০০; ৩.৪২১, ৪২৫; সং. নি. ৪.৬০; কথা. ৪৬৫). এত্থ ¶ সিযা – কিং পনেতং চক্খু, রূপঞ্চ ৰিঞ্ঞাণস্স পচ্চযো হোন্তং একমেৰ পচ্চযো হোতি, উদাহু অনেকন্তি? চক্খু তাৰ একম্পি, রূপং পন অনেকমেৰ সঙ্গতং. কিং কারণং? পচ্চযভাৰৰিসেসতো. চক্খু হি চক্খুৰিঞ্ঞাণস্স নিস্সযপুরেজাতইন্দ্রিযৰিপ্পযুত্তপচ্চযেহি পচ্চযো হোন্তং অত্থিভাৰেনেৰ হোতি তস্মিং সতি তস্স ভাৰতো, অসতি অভাৰতো. যতো তং অত্থিঅৰিগতপচ্চযেহিস্স পচ্চযোতি ৰুত্তং, স্ৰাযং পচ্চযভাৰো ন একস্মিং ন সম্ভৰতীতি একম্পি চক্খুৰিঞ্ঞাণস্স পচ্চযো হোতি. রূপং পন যদিপি চক্খু ৰিয পুরেজাতঅত্থিঅৰিগতপচ্চযেহি পচ্চযো হোতি পুরেতরং উপ্পন্নং হুত্ৰা ৰিজ্জমানক্খণেযেৰ উপকারকত্তা, তথাপি অনেকমেৰ সঙ্গতং হুত্ৰা পচ্চযো হোতি আরম্মণভাৰতো. যঞ্হি তং আরম্মণং তস্স যথা তথা উপলব্ভনীযৰসেনেৰ আরম্মণপচ্চযভাৰো, ৰিঞ্ঞাণস্স চ ইন্দ্রিযাধীনৰুত্তিকস্স আরম্মণসভাৰূপলদ্ধি ন একদ্ৰিকলাপগতৰণ্ণৰসেন হোতি, নাপি কতিপযকলাপগতৰণ্ণৰসেন, অথ খো আভোগানুরূপং আপাথগতৰণ্ণৰসেনাতি অনেকমেৰ রূপং সংহচ্চকারিতায ৰিঞ্ঞাণস্স পচ্চযো হোতীতি. অমুমেৰ ¶ হি ৰিসেসং ৰিভাৰেতুং ‘‘চক্খুঞ্চ পটিচ্চ রূপে চা’’তি (ম. নি. ১.২০৪, ৪০০; ৩.৪২১, ৪২৫; সং. নি. ৪.৬০; কথা. ৪৬৫) পাল়িযং ৰচনভেদো কতোতি. এৰং সোতৰিঞ্ঞাণেপি যথারহং ৰত্তব্বং. ঘানৰিঞ্ঞাণাদীনং পন সম্পত্তগ্গাহতায অত্তনো নিস্সযেন সহ অল্লীনস্সেৰ গহণতো এককলাপগতম্পি গন্ধাদিকং তেসং উপ্পত্তিযা পচ্চযো হোতি.

রূপমত্তারম্মণরসন্তি রূপাযতনমত্তস্সেৰ আরম্মণকরণরসং. মত্ত-সদ্দেন যথা আরম্মণন্তরং নিৰত্তেতি, এৰং রূপাযতনেপি লব্ভমানে একচ্চে ৰিসেসে নিৰত্তেতি. ন হি চক্খুৰিঞ্ঞাণং ৰণ্ণমত্ততো অঞ্ঞং কিঞ্চি নীলাদিৰিসেসং তত্থ গহেতুং সক্কোতি. তেনাহ ভগৰা – ‘‘পঞ্চহি ৰিঞ্ঞাণেহি ন কিঞ্চি ধম্মং পটিৰিজানাতি অঞ্ঞত্র অভিনিপাতমত্তা’’তি. চক্খুৰিঞ্ঞাণং উপ্পজ্জমানং রূপারম্মণে এৰ উপ্পজ্জনতো তদভিমুখভাৰেন গণ্হাতীতি ৰুত্তং ‘‘রূপাভিমুখভাৰপচ্চুপট্ঠান’’ন্তি. অত্তনো অনন্তরং উপ্পজ্জমানানং অরূপধম্মানং সমনন্তরৰিগতা অরূপধম্মা পৰত্তিওকাসদানেন অনন্তরসমনন্তরনত্থিৰিগতপচ্চযেহি উপকারকা, নিস্সযারম্মণা ধম্মা ৰিয আসন্নকারণাতি দস্সেন্তো আহ ‘‘রূপারম্মণায কিরিযামনোধাতুযা অপগমপদট্ঠান’’ন্তি. সোতৰিঞ্ঞাণাদীসুপি ৰুত্তনযেনেৰ অত্থো ৰেদিতব্বো. কিরিযামনোধাতুযা আরম্মণভেদতো ভিন্নসভাৰত্তা আহ ‘‘কিরিযামনোধাতূন’’ন্তি. চক্খুৰিঞ্ঞাণাদীহি গহিতং রূপাদিআরম্মণং তদনন্তরমেৰ অপরিপতন্তং ¶ কত্ৰা সম্পটিচ্ছন্তং গণ্হন্তং ৰিয হোতীতি ৰুত্তং ‘‘রূপাদিসম্পটিচ্ছনরস’’ন্তি. তথাভাৰেন সম্পটিচ্ছনভাৰেন পচ্চুপট্ঠাতীতি তথাভাৰপচ্চুপট্ঠানং.

ছসু আরম্মণেসু কদাচি পঞ্চন্নং জচ্চন্ধাদিৰসেন ততোপি ঊনানং, ব্রহ্মলোকে চ দ্ৰিন্নমেৰ ৰিজাননসভাৰাপি ছল়ারম্মণৰিজাননলক্খণা ¶ ৰুত্তা তংসভাৰানতিৰত্তনতো, ছস্ৰেৰ ৰা ইতরেসং আরম্মণানং অন্তোগধত্তা. সন্তীরণাদিরসাতি যথাসম্ভৰং সন্তীরণতদারম্মণাদিকিচ্চা, সন্তীরণতদারম্মণপটিসন্ধিভৰঙ্গচুতিকিচ্চাতি অধিপ্পাযো. ‘‘হদযৰত্থুপদট্ঠানা’’তি ইদং ইমাসং দ্ৰিন্নং মনোৰিঞ্ঞাণধাতূনং অনিবদ্ধট্ঠানতায নিবদ্ধকারণং দস্সেতুং ৰুত্তং. ৰুত্তনযেন পন ‘‘তংতংঅনন্তরাতীতৰিঞ্ঞাণাপগমপদট্ঠান’’ন্তিপি ৰত্তুং ৰট্টতিযেৰ. অহেতুকচিত্তানং ৰিসুং ৰিসুং লক্খণাদিকস্স দস্সিতত্তা পরিসেসতো সহেতুকচিত্তানং একসদিসমেৰ লক্খণাদিকন্তি ৰিঞ্ঞাযতি. তং পন হেট্ঠা ৰিভাৰিতমেৰ.

ইদানি ইমাসং আরম্মণাদিতো ভেদং দস্সেতুং ‘‘তত্থ পঠমা’’তিআদি ৰুত্তং. একন্তমিট্ঠারম্মণেতি একন্তেনেৰ ইট্ঠারম্মণে, অতিইট্ঠারম্মণেতি অত্থো. পঞ্চসু ঠানেসূতি সহেতুকৰিপাকানং ৰুত্তেসু চতূসু, সম্পটিচ্ছনৰোট্ঠব্বনানং অন্তরাল়সঙ্খাতসন্তীরণট্ঠানে চাতি পঞ্চসু ঠানেসু, পঞ্চসু কিচ্চেসূতি ৰা অত্থো. কিঞ্চাপি সোমনস্সপটিসন্ধিকস্স দোমনস্সজৰনাৰসানে তদারম্মণসম্ভৰে অসতি যং কিঞ্চি পরিচিতপুব্বং পরিত্তারম্মণমারব্ভ উপেক্খাসহগতসন্তীরণমুপ্পজ্জতীতি ইচ্ছিতং, তথা পন উপ্পজ্জমানস্স কদাচিযেৰ সম্ভৰতো যেভুয্যপ্পৰত্তিং গহেত্ৰা ছ ঠানানি অৰত্ৰা পঞ্চেৰ ৰুত্তানি. অথ ৰা তং উপ্পজ্জমানং তদারম্মণট্ঠানেযেৰ নিব্বত্ততীতি তংৰসেনেৰ তস্সাপি ঠানং গহিতন্তি দট্ঠব্বং. অচক্খুসংৰত্তনিককম্মনিব্বত্ততায জাতিযা অন্ধো জচ্চন্ধো. কিঞ্চাপি হি জাতিক্খণে অণ্ডজজলাবুজানং সব্বেসম্পি চক্খু নত্থি, যস্স ভাৰাভাৰতো অন্ধানন্ধৰিচারণা ভৰেয্য, তথাপি চক্খুস্স উপ্পজ্জমানারহকালেপি চক্খুৰিপত্তিৰিবন্ধকেন কম্মুনা পটিহতসামত্থিযেন পটিসন্ধিদাযকেন ¶ ইতরেনাপি ৰা কম্মেন তস্স অনুপাদিযমানত্তা সত্তো ‘‘জচ্চন্ধো’’তি ৰুচ্চতি. অথ ৰা জচ্চন্ধোতি পসূতিযংযেৰ অন্ধো, মাতুকুচ্ছিযংযেৰ অন্ধো হুত্ৰা নিক্খন্তোতি অত্থো. তেন দুহেতুকতিহেতুকানং মাতুকুচ্ছিগতকালেপি চক্খুস্স অৰিপজ্জনং সিদ্ধং হোতি, এৰং জাতিবধিরাদীসুপি যথারহং ৰত্তব্বং. জচ্চজল়োতি জাতিযা অঞ্ঞাণকো ¶ . কিঞ্চাপি দুহেতুকপটিসন্ধিকোপি জাতিযং অঞ্ঞাণকো, তস্স পন পৰত্তিযং পঞ্ঞা সম্ভৰতীতি ৰুত্তনযেন যেভুয্যতো পৰত্তিযম্পি পঞ্ঞাযাসম্ভৰতো জচ্চজল়ো ৰেদিতব্বো. জচ্চুম্মত্তকো সুরামেরযপানাদিউম্মত্তকভাৰসংৰত্তনিককম্মপরিভাৰিতেন কম্মেন গহিতপটিসন্ধিকো. পণ্ডকোতি পরদারগমনাদিকম্মপরিভাৰিতেন কম্মুনা গহিতপটিসন্ধিকো. সো পঞ্চৰিধো আসিত্তপণ্ডকো উসূযপণ্ডকো পক্খপণ্ডকো ওপক্কমিকপণ্ডকো নপুংসকপণ্ডকোতি. ইধ পন ওপক্কমিকপণ্ডকস্স সহেতুকস্সাপি ভাৰতো, নপুংসকস্স চ ৰিসুং গহণতো তযো পণ্ডকা অধিপ্পেতা. আদি-সদ্দেন জাতিমূগজাতিপঙ্গুলমম্মনাদীনং সঙ্গহো. কেচি পন ‘‘একচ্চে অহেতুকপটিসন্ধিকা অৰিকলিন্দ্রিযা হুত্ৰা থোকং ৰিচারণপকতিকাপি হোন্তি, তস্মা তাদিসানম্পি ইধ আদি-সদ্দেন সঙ্গহো’’তি ৰদন্তি. এত্থ চ জচ্চন্ধাদীনমেৰ অযং পটিসন্ধীতি ন গহেতব্বা. জচ্চন্ধাদযো পন ইমিনা পটিসন্ধিং গণ্হন্তীতি গহেতব্বং.

৪৩. তিহেতুকপুঞ্ঞস্সাতি তিহেতুকস্সপি উক্কট্ঠপুঞ্ঞস্স. দুহেতুকম্মস্স পন সব্বথাপি সোল়সন্নং ৰিপাকানং অসম্ভৰতো তপ্পটিক্খেপপরত্তা চেতনায ‘‘তিহেতুকপুঞ্ঞস্সা’’তি অৰিসেসতো ৰুত্তং.

কামাৰচরৰিপাকৰণ্ণনা নিট্ঠিতা.

রূপাৰচরারূপাৰচরৰিপাকৰণ্ণনা

মহগ্গতৰিপাকানং ¶ তংতংকুসলাগমনৰসেনেৰ ঝানঙ্গহানি, ন পন ভাৰনাৰিসেসেনাতি তেসং পহানঙ্গানি অনুদ্ধটানি. উপপত্তিযন্তি উপপত্তিভৰে.

অরূপাৰচরৰিপাকচিত্তানি ৰুচ্চন্তীতি সম্বন্ধো.

৪৪. কুসলানুগতং কত্ৰাতি কুসলানুরূপং কুসলসদিসং কত্ৰা. যথা কামাৰচরৰিপাকং কুসলতো ৰিসদিসম্পি কত্ৰা ৰিভত্তং, এৰমকত্ৰা কুসলসদিসমেৰ কত্ৰাতি অত্থং ৰদন্তি. অট্ঠকথাযং ¶ পন কুসলানন্তরং কত্ৰা মহগ্গতৰিপাকানং ভাজিতপাল়িং সন্ধায ‘‘কুসলানুগতং কত্ৰা ভাজিত’’ন্তি ৰুত্তং. পাল়িযঞ্হি –

‘‘কতমে ধম্মা অব্যাকতা? যস্মিং সমযে কামাৰচরস্স কুসলস্স কম্মস্স কতত্তা উপচিতত্তা ৰিপাকং চক্খুৰিঞ্ঞাণং উপ্পন্নং হোতী’’তিআদিনা (ধ. স. ৪৩১) –

কামাৰচরৰিপাকং ৰিভজিত্ৰা মহগ্গতৰিপাকং ৰিভজন্তেন –

‘‘কতমে ধম্মা অব্যাকতা? যস্মিং সমযে রূপপত্তিযা মগ্গং ভাৰেতি, ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি পথৰীকসিণং, তস্মিং সমযে ফস্সো হোতি…পে… অৰিক্খেপো হোতি, ইমে ধম্মা কুসলা, তস্সেৰ রূপাৰচরস্স কুসলস্স কম্মস্স কতত্তা উপচিতত্তা ৰিপাকং ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি পথৰীকসিণং…পে… ইমে ধম্মা অব্যাকতা’’তি (ধ. স. ৪৯৮).

এৰং কুসলং উদ্দিসিত্ৰা তদনন্তরং কত্ৰা মহগ্গতং ৰিপাকং ৰিভত্তং, তস্মা যথা কামাৰচরৰিপাকং, এৰং অৰিভজিত্ৰা ¶ ইদং কুসলানন্তরং কত্ৰা ৰিভত্তন্তি ইমমত্থং জোতেতুং অট্ঠকথাযং ‘‘কুসলানুগতং কত্ৰা’’তি ৰুত্তং. ইমিনাপি চ আচরিযেন পরিহারমুখেন ৰক্খমানঅত্থৰিসেসৰচনিচ্ছায তত্থ ৰুত্তনযেনেৰ চোদনা কতা. এৰঞ্হি সতি কুসলানন্তরংযেৰ ফলং উপ্পজ্জতীতি ঞাপনং সুট্ঠূপপন্নং হোতীতি অযমেত্থ অম্হাকং আচরিযস্স মগ্গো.

মহগ্গতন্তি মহগ্গতৰিপাকং. তঞ্হি ইধ অধিগতং. কামা…পে… যতোতি যস্মা কামাৰচরকুসলং অসমানফলং হোতি তিহেতুকস্স দুহেতুকাহেতুকৰিপাকানং, দুহেতুকস্স চ অহেতুকৰিপাকানম্পি জননতো, ন এৰমিদং, ইদং পন একন্তেনেৰ সদিসৰিপাকজননতো সমানফলমেৰ, তস্মাতি অত্থো. এত্থ চ ‘‘কুসল’’ন্তি অৰুত্তেপি কামাৰচরপুঞ্ঞংৰাতি উপমিতত্তা উপমেয্যস্সপি কুসলভাৰো ৰিঞ্ঞাযতি. কস্মা পনেতং সদিসৰিপাকং, ন কামাৰচরং ৰিয ৰিসদিসৰিপাকম্পীতি? ৰুচ্চতে – কামাৰচরপুঞ্ঞঞ্হি আচিনন্তো রূপতণ্হাদিনানাৰত্থুককামতণ্হূপনিস্সযতো ¶ আচিনতি, তস্মা তদূপনিস্সযকুসলং তদনুরূপতো নানাৰত্থুকং ৰিপাকং জনেতি. মহগ্গতং পন আচিনন্তো একৰত্থুকাযেৰ ভৰতণ্হায ৰসেন আচিনতীতি তদনুরূপতো তং নানাৰত্থুং অজনেত্ৰা একৰত্থুমেৰ জনেতীতি.

৪৫-৬. সব্বথাতি ধম্মতো আরম্মণতো পটিপদাদিতো চ. তথা হি যে ফস্সাদযো কুসলে চ লব্ভন্তি, তে ৰিপাকেপি লব্ভন্তি, যস্মিঞ্চ আরম্মণে কুসলং পৰত্ততি, তত্থেৰ ইদং ৰিপাকম্পি. যাৰ পটিপদাদযো কুসলস্স লব্ভন্তি, তাৰ ইমস্স ৰিপাকস্সপীতি. কামং যস্স কস্সচি ছাযা তংতংৰত্থুসদিসাৰ, মহন্তস্স পন কুসলৰিপাকস্স মহন্তাহিযেৰ উপমাহি ¶ ভৰিতব্বন্তি ‘‘গজাদীন’’ন্তিআদি ৰুত্তং. অপরে অপরে অত্তভাৰে ভৰং ৰেদনমস্সাতি অপরাপরিযৰেদনং. যদি অপরাপরিযৰেদনং ন হোতি, কথঞ্চরহি ইমস্স ফলুপ্পত্তীতি আহ ‘‘ঝানা অপরিহীনস্সা’’তিআদি.

৪৭. কুসলানন্তরন্তি কুসলভৰানন্তরং. যস্মিঞ্হি ভৰে তং কুসলং কতং, সো ইধ কুসল-সদ্দেন উপচারতো গহিতো কম্মানন্তরংযেৰ ফলস্স অসম্ভৰতো. ন হি তং লোকুত্তরকুসলং ৰিয অনন্তরফলনিপ্ফাদকং, অথ খো একচ্চকামাৰচরকুসলং ৰিয অপরাপরিযৰেদনং অহুত্ৰা সতিপি অনেকেযেৰ কামাৰচরকম্মে মহোঘো ৰিয পরিত্তং উদকং তমজ্ঝোত্থরিত্ৰা অত্তনোযেৰ ৰিপাকদানেন একন্তেন অনন্তরভৰেযেৰ ফলং নিব্বত্তেতি. ননু চ অপরিহীনজ্ঝানস্সেৰ কস্সচি নিকন্তিৰসেন কামভৰে পটিসন্ধি হোতি. তথা হি তিস্সমহাব্রহ্মা উপরিব্রহ্মলোকূপপত্তিযা ভাৰিতমগ্গো ভিক্খূহি যাচিতো ততো চৰিত্ৰা মোগ্গলিব্রাহ্মণস্স গেহে পটিসন্ধিং অগ্গহেসীতি ৰুত্তন্তি তং কথন্তি? নিকন্তিবলেনেৰ ঝানং পরিহাযতীতি ততো পরিহীনজ্ঝানো নিব্বত্ততীতি ৰদন্তি. অপরে পন আচরিযা ‘‘অনীৰরণাৰত্থায নিকন্তিযা ঝানস্স পরিহানি ৰীমংসিত্ৰা গহেতব্বা’’তি ৰত্ৰা ‘‘সতিপি মহগ্গতকম্মুনো ৰিপাকং পটিবাহনসমত্থস্সেৰ পরিত্তকম্মস্স অভাৰে ‘ইজ্ঝতি, ভিক্খৰে, সীলৰতো চেতোপণিধি ৰিসুদ্ধত্তা’তি (অ. নি. ৮.৩৫) ৰচনতো কামভৰে চেতোপণিধি মহগ্গতকম্মস্স ৰিপাকং পটিবাহিত্ৰা পরিত্তকম্মুনো ৰিপাকস্স ওকাসং করোতী’’তি ৰদন্তি, তং যুত্তং. এতস্সাতি ইমস্সত্থস্স ঞাপনত্থন্তি সম্বন্ধো.

৪৮-৯. এৰং ¶ অৰিসেসেন কুসলসদিসতং অতিদিসিত্ৰা ইদানি ৰিসেসং দস্সেতুং ‘‘পটিপদাক্কমো ¶ চেৰা’’তিআদি ৰুত্তং. যথা হি দুক্খপটিপদং দন্ধাভিঞ্ঞং ঝানং উপ্পাদেত্ৰা পুনপ্পুনং সমাপজ্জন্তস্স তং ঝানং তংপটিপদমেৰ হোতি, এৰং তস্মিং তস্মিং অপরিহীনে তস্স তস্স ৰিপাকো নিব্বত্তমানো তংতংপটিপদোৰ ভৰিতুং অরহতি. ছন্দাধিপতেয্যাদিভাৰো পন তস্মিং খণে ৰিজ্জমানানং ছন্দাদীনং অধিপতিপচ্চযভাৰেন হোতি, ন আগমনৰসেন. তথা হি একমেৰ ঝানং নানক্খণেসু নানাধিপতেয্যং হোতি, তস্মা ৰিপাকস্স আগমনৰসেন ছন্দাধিপতেয্যাদিতা ন গহিতা. তেনাহ ‘‘অভাৰোধিপতীন’’ন্তি. তদভাৰতোৰ সরসতো তস্স হীনাদিতা ন সম্ভৰতীতি সাপি ঝানাগমনতোৰ ৰুত্তা.

রূপাৰচরারূপাৰচরৰিপাকৰণ্ণনা নিট্ঠিতা.

লোকুত্তরৰিপাকৰণ্ণনা

মগ্গচিত্তস্স ৰিয ফলচিত্তস্স মগ্গযোগতো ভেদাভাৰেন ‘‘চতুমগ্গযোগতো’’তি অৰত্ৰা ‘‘চতুমগ্গসম্পযুত্তচিত্তফলত্তা’’তি ৰুত্তং, চতূহি অরিযমগ্গেহি সম্পযুত্তকুসলচিত্তস্স ফলত্তা চতুব্বিধসামঞ্ঞফলসম্পযুত্তচিত্তভাৰতোতি অত্থো. সোতাপত্তিমগ্গস্স ফলং চিত্তং সোতাপত্তিমগ্গফলচিত্তং. এৰং সেসেসু. মগ্গৰীথিযং দ্ৰিক্খত্তুং, তিক্খত্তুং ৰা ফলসমাপত্তিযা অপরিচ্ছিন্নপরিমাণং পৰত্তমানম্পি দ্ৰীস্ৰেৰ ঠানেসু পৰত্তিযা দুৰিধমেৰ হোতীতি আহ ‘‘মগ্গৰীথিফলসমাপত্তিৰসেন পৰত্তিতো দুৰিধ’’ন্তি.

৫০-১. মগ্গস্সানন্তরে ফলে লব্ভন্তি মগ্গাগমনতোতি অধিপ্পাযো. মগ্গো হি আগমনতো ‘‘সুঞ্ঞতো’’তি লদ্ধনামো সগুণালম্বণৰসেন অনিমিত্তঅপ্পণিহিতনামম্পি লভতীতি ফলস্স নামত্তযম্পি দেতি, তথা আগমনতো অপ্পণিহিতো ¶ মগ্গো সগুণারম্মণৰসেন অনিমিত্তসুঞ্ঞতঅপ্পণিহিতনামকোতি ফলস্স নামত্তযম্পি দেতি. এৰঞ্চ কত্ৰা অভিধম্মে একেকস্স ফলস্স তীণি তীণি নামানি ৰুত্তানি. ননু চ অভিধম্মে ‘‘সগুণারম্মণতো নামং অনধিপ্পেত’’ন্তি ৰুত্তং? সচ্চং ৰুত্তং, তং পন নামলাভং সন্ধায, ন নামদানং. তত্থ হি ৰৰত্থানকরত্তাভাৰতো তথা অনধিপ্পেতং, ন অলব্ভনতো. ইধ পন একেকস্স ¶ ফলং নামত্তযম্পি লভতীতি ৰৰত্থানপ্পযোজনাভাৰতো সগুণারম্মণেহি লদ্ধনামদানস্স অধিপ্পেতত্তা তিৰিধম্পি নামং দেতি. একন্তেন চেতং এৰং সম্পটিচ্ছিতব্বং, ইতরথা ৰিপস্সনাপি ৰিপস্সতো লদ্ধনামমগ্গস্স তং ন দদেয্যাতি. পরভাগস্মিন্তি অপরভাগে. ৰল়ঞ্জনফলেসূতি সমাপজ্জনৰসেন অনুভৰিতব্বফলেসু. ‘‘ৰল়ঞ্জনফলেসু না’’তি মগ্গাগমনং সন্ধায পটিক্খিত্তন্তি আহ ‘‘ৰিপস্সনাৰসেনেৰা’’তিআদি. ৰল়ঞ্জনফলঞ্হি ৰিসুং ৰিপস্সনাৰসেনেৰ নিব্বত্ততীতি তস্স তংৰসেন নামলাভো. যদি এৰং মগ্গস্স ৰিয অনিমিত্তনামলাভো ন সিযা? তং ন, যথা মগ্গানন্তরস্স ফলস্স ৰিয ৰল়ঞ্জনকফলসমাপত্তিযাপি মগ্গাগমনতো চ ঝানপটিপদাভেদো হোতি, এৰং অনিমিত্তনামম্পি লব্ভতীতি.

৫২-৩. হোন্তি সাধিপতীনেৰাতি এত্থ কারণং ৰুত্তমেৰ. মগ্গভাৰেনাতি সোল়সহি আকারেহি চতুসচ্চপটিৰেধকমগ্গভাৰেন, কিলেসমারণৰসেন গমনসঙ্খাতেন, নিব্বানত্থিকেহি মগ্গিতব্বভাৰসঙ্খাতেন ৰা মগ্গভাৰেন. ফলং…পে… ৰুচ্চতীতি সযং ফলভাৰম্পি মগ্গস্স ফলত্তা, তংসদিসতায ৰা তমুপাদায মগ্গোতি ৰুচ্চতি ‘‘মগ্গঙ্গং মগ্গপরিযাপন্ন’’ন্তিআদীসূতি অধিপ্পাযো.

লোকুত্তরৰিপাকৰণ্ণনা নিট্ঠিতা.

অকুসলৰিপাকৰণ্ণনা

যথা ¶ অতিইট্ঠে ইট্ঠমজ্ঝত্তে চ আরম্মণে ৰেদনাভেদসম্ভৰতো কুসলৰিপাকমনোৰিঞ্ঞাণধাতু দুৰিধা হোতি সোমনস্সসহগতা, উপেক্খাসহগতাতি, এৰং অতিঅনিট্ঠে অনিট্ঠমজ্ঝত্তে চ আরম্মণে ৰেদনাভেদো নত্থীতি অকুসলৰিপাকমনোৰিঞ্ঞাণধাতু একৰিধাৰাতি ‘‘সত্তাকুসলৰিপাকানী’’তি ৰুত্তং. সতি হি তত্থ ৰেদনাভেদে অতিঅনিট্ঠে দোমনস্সেন ভৰিতব্বং, ন চ পটিঘেন ৰিনা দোমনস্সং উপ্পজ্জতীতি. কাযৰিঞ্ঞাণস্স দুক্খসহগতা কুসলৰিপাকে ৰুত্তৰিপরিযাযেন ৰেদিতব্বা. এত্থ চ অকুসলৰিপাকেসু লব্ভমানদুক্খং ¶ ৰিয নাতিকটুকাপি উপেক্খা একন্তনিহীনস্স অকুসলস্স ৰিপাকভাৰতো দুক্খসভাৰত্তা হীনা এৰ. ন হি অকুসলস্স ৰিপাকো অদুক্খো হোতি, উপেক্খাভাৰো পনস্স বলৰতা বাধিযমানস্স পটিপহরিতুং অসক্কোন্তস্স দুব্বলপুরিসস্স তেন করিযমানবাধস্স উপেক্খনা ৰিযাতি দট্ঠব্বং. ইমানি…পে… চিত্তানীতি ইমানি সত্ত একেকস্স অকুসলস্স ৰিপাকচিত্তানি, ন পন কুসলৰিপাকে ৰিয তিহেতুকাদিপুঞ্ঞৰিসেসেন. উদ্ধচ্চসহগতস্সপি হি পৰত্তিযং সত্তেৰ ৰিপাকা লব্ভন্তি. কস্মা পনেত্থ যথা কুসলৰিপাকং সহেতুকম্পি উদ্ধটং, ন এৰং অকুসলৰিপাকন্তি? হেতূনং অসম্ভৰতো. লোভাদীনঞ্হি একন্তসাৰজ্জতায অযোনিসোমনসিকারহেতুকানং নত্থি ৰিপাকভাৰো, অলোভাদীনম্পি একন্তমনৰজ্জসভাৰানং ৰা কারণস্স তব্বিদূরতায নত্থেৰ অকুসলৰিপাকভাৰো. ন হি অলোভাদীনং পটিপক্খলোভাদযো তে অভিনিপ্ফাদেন্তি, তস্মা ইদং সব্বথা সহেতুপ্পৰত্তিযা অসম্ভৰতো অহেতুকমেৰাতি.

কম্মকম্মনিমিত্তগতিনিমিত্তেসূতি এত্থ অতীতভৰে আযূহিতং অপরাপরিযৰেদনীযং, উপপজ্জৰেদনীযং ৰা কম্মং কম্মং নাম ¶ . কম্মকরণকালে চেতনায গহিতমারম্মণং কম্মনিমিত্তং নাম. উপপজ্জিতব্বভৰপরিযাপন্নো নরকাদীসু অগ্গিজালাদিৰণ্ণো গতিনিমিত্তং নাম.

৫৪. ইমেতি অকুসলৰিপাকা. তেসং অনিট্ঠানিট্ঠমজ্ঝত্তৰিসযেসু পৰত্তিৰচনেন তব্বিপরিযাযেন কুসলৰিপাকানং ইট্ঠইট্ঠমজ্ঝত্তৰিসযেসু পৰত্তি অত্থতো আপন্নাতি সা ৰিসুং ন ৰুত্তা. সুখাদিত্তযযুত্তাতি সুখসোমনস্সুপেক্খাযুত্তা.

‘‘এৰ’’ন্তিআদি যথাৰুত্তৰিপাকানং নিগমনং.

অকুসলৰিপাকৰণ্ণনা নিট্ঠিতা.

ৰিপাকচিত্তৰণ্ণনা

৫৫. পাকস্স ¶ অসুরকঞ্ঞানং গব্ভপরিপাকস্স সাসনতো ৰিনাসনতো, পাকসঙ্খাতস্স ৰা অসুরস্স ৰিনাসনতো পাকসাসনো ৰুচ্চতি সক্কো দেৰরাজা, তেন পূজিতো পাকসাসনপূজিতো. পাকং ৰা পরিপক্কং সাসনমেতেসূতি পাকসাসনা, খীণাসৰা, তেহি পূজিতোতি পাকসাসনপূজিতো.

ৰিপাকচিত্তৰণ্ণনা নিট্ঠিতা.

দানাদিৰসেনাতি পৰত্তাকারমত্ততো দানাদিৰসেন, ন পন পুঞ্ঞকিরিযৰত্থুৰসেন খীণাসৰসন্তানগতস্স পুঞ্ঞকিরিযভাৰাভাৰতোতি ৰুত্তোৰাযমত্থো.

আৰজ্জতীতি আৰজ্জনং, আভুঞ্জতি ওণোজেতি পরিণামেতি ৰারেতীতি ৰা অত্থো. তঞ্হি আপাথগতং আরম্মণং পঠমমাভুঞ্জতি, চক্খুৰিঞ্ঞাণাদীনি ৰীথিচিত্তানি আপাথগতারম্মণাভিমুখং ওণোজেতি, চিত্তসন্তানং ৰা পুরিমাকারতো অঞ্ঞথা পরিণামেতি, অনুপ্পবন্ধতো পৰত্তনকং ভৰঙ্গচিত্তসন্তানং পরতো পৰত্তিতুং অদত্ৰা আপাথগতং ¶ ৰা আরম্মণং অঞ্ঞত্থ গন্তুং অদত্ৰা ৰারেতি. হসিতং উপ্পজ্জতি, উপ্পাদীযতি ৰা এতেনাতি হসিতুপ্পাদং, তদেৰ চিত্তন্তি হসিতুপ্পাদচিত্তং. ৰোট্ঠপেতীতি ৰোট্ঠব্বনং. কস্মা পনেত্থ আৰজ্জনৰোট্ঠব্বনানি উপেক্খাসহগতানি, হসিতুপ্পাদঞ্চ সোমনস্সসহগতন্তি? ৰুচ্চতে – আৰজ্জনং তাৰ অপুব্বারম্মণে সকিদেৰ চ পৰত্তমানসন্ততিৰিচ্ছেদৰসেন পৰত্তনতো, দুব্বলভৰঙ্গপচ্চযং ৰা সব্বথা ৰিসযরসমনুভৰিতুং ন সক্কোতীতি ইট্ঠাদীসু সব্বত্থ উপেক্খাযুত্তমেৰ হোতি. ৰোট্ঠব্বনঞ্চ ৰুত্তৰিপরিযাযেন ৰেদনাভেদারহম্পি সমানং ৰিপাকপ্পবন্ধং ৰিচ্ছিন্দিত্ৰা ৰিসদিসচিত্তপ্পবন্ধস্স নিব্বত্তনতো সন্ততিপরিণামনেযেৰ কিচ্চন্তরে ব্যাৰটত্তা ৰিপাকং ৰিয আরম্মণরসস্সাদে অসমত্থমেৰাতি সব্বত্থ উপেক্খাসহগতমেৰ. হসিতুপ্পাদং পন ৰুত্তৰিপরীততো পরিহীনৰিপল্লাসানং খীণাসৰানং সন্তানে ইট্ঠারম্মণেযেৰ উপ্পজ্জনতো সব্বথা সোমনস্সসহগতমেৰাতি.

লক্খণাদিতো পনেতাসু পুরিমং চক্খুৰিঞ্ঞাণাদীনং পুরেচরং রূপাদিৰিজাননলক্খণং, আৰজ্জনরসং ¶ , তথাভাৰপচ্চুপট্ঠানং, ভৰঙ্গৰিচ্ছেদপদট্ঠানং. দুতিযং ছল়ারম্মণৰিজাননলক্খণং, অরহতং অনোল়ারিকেসু ৰত্থূসু হসিতুপ্পাদরসং, তথাভাৰপচ্চুপট্ঠানং, একন্ততো হদযৰত্থুপদট্ঠানং. ততিযম্পি ছল়ারম্মণৰিজাননলক্খণং, পঞ্চদ্ৰারমনোদ্ৰারেসু ৰোট্ঠব্বনাৰজ্জনরসং, তথাভাৰপচ্চুপট্ঠানং, অহেতুকৰিপাকমনোৰিঞ্ঞাণধাতুভৰঙ্গানং অঞ্ঞতরাপগমপদট্ঠানন্তি.

ভৰঙ্গং আৰট্টযমানাতি ভৰঙ্গসন্তানং আৰট্টযন্তী ৰিয. সাধারণাতি সেক্খাসেক্খপুথুজ্জনানং সাধারণা. অসাধারণাতি অসেক্খানংযেৰ আৰেণিকা. তেনাহ ‘‘খীণাসৰস্সা’’তি. ছসু দ্ৰারেসু…পে… আরম্মণেসূতি ¶ চক্খাদীসু ছসু দ্ৰারেসু, পধানসারুপ্পট্ঠানাদিগতেসু ছসু রূপাদিআরম্মণেসু. পধানসারুপ্পঞ্হি ঠানং দিস্ৰা দিট্ঠধম্মসুখৰিহারত্থায ‘‘সারুপ্পমিদং ঠানং মযা লদ্ধ’’ন্তি তুসন্তস্স চক্খুদ্ৰারে রূপারম্মণে, ভণ্ডভাজনট্ঠানে মহাসদ্দং সুত্ৰা ‘‘এৰরূপা লোলুপ্পতণ্হা মে পহীনা’’তি তুসন্তস্স সোতদ্ৰারে সদ্দারম্মণে, গন্ধেহি ৰা পুপ্ফেহি ৰা চেতিযপূজনকালে ‘‘এৰরূপেন ৰত সুগন্ধেন ভগৰন্তং পূজেমী’’তি তুসন্তস্স ঘানদ্ৰারে গন্ধারম্মণে, রসসম্পন্নং পিণ্ডপাতং সব্রহ্মচারীহি সহ ভাজেত্ৰা পরিভুঞ্জনকালে ‘‘সারণীযধম্মো ৰত মে পূরিতো’’তি তুসন্তস্স জিৰ্হাদ্ৰারে রসারম্মণে, আভিসমাচারিকৰত্তপূরণকালে ‘‘কাযেন ৰত্তপটিৰত্তং পূরেমী’’তি তুসন্তস্স কাযদ্ৰারে ফোট্ঠব্বারম্মণেতি এৰং পঞ্চদ্ৰারেসু পঞ্চারম্মণেসু পৰত্ততি.

মনোদ্ৰারে পন যথাৰুত্তেস্ৰেৰ পঞ্চসু পচ্চুপ্পন্নারম্মণেসু ঘটিকারসুত্তাদীসু (ম. নি. ২.২৮২ আদযো) ৰিয ভগৰতো পুব্বেনিৰাসঞাণেন পরিঞ্ঞাতে অতীতারম্মণে, ‘‘অট্ঠিস্সরো নাম পচ্চেকবুদ্ধো ভৰিস্সতী’’তি (ধ. প. অট্ঠ. ১.১৬ দেৰদত্তৰত্থু) আগতট্ঠানাদীসু ৰিয অনাগতংসঞাণেন পরিচ্ছিন্নে অনাগতারম্মণে চাতি এৰং ছস্ৰেৰারম্মণেসু হসিতং উপ্পাদেতীতি ৰেদিতব্বং. ননু চ অতীতংসাদীসু অপ্পটিহতাদীসু অপ্পটিহতঞাণং ৰত্ৰা ‘‘ইমেহি তীহি ধম্মেহি সমন্নাগতস্স বুদ্ধস্স ভগৰতো সব্বং কাযকম্মং ঞাণপুব্বঙ্গমং ঞাণানুপরিৰত্ত’’ন্তি ৰচনতো ৰিচারণপঞ্ঞারহিতায এতায কথং ভগৰতো উপ্পত্তি যুজ্জেয্যাতি? হসিতুপ্পাদচিত্তেন পৰত্তিযমানম্পি ভগৰতো সিতকরণং পুব্বেনিৰাসঅনাগতংসসব্বঞ্ঞুতঞ্ঞাণানং অনুৰত্তকত্তা ঞাণানুপরিৰত্তিযেৰ, এৰং পন ঞাণানুপরিৰত্তিভাৰে সতি ন কোচি পাল়িৰিরোধো. এৰঞ্চ কত্ৰা অট্ঠকথাযং ‘‘তেসং ঞাণানং চিণ্ণপরিযন্তে ইদং ¶ চিত্তং উপ্পজ্জতী’’তি ৰুত্তং. অৰস্সঞ্চেতং এৰং ইচ্ছিতব্বং, ইতরথা অঞ্ঞস্সাপি ৰিঞ্ঞত্তিসমুট্ঠাপকস্স অহেতুকচিত্তস্স ভগৰতো উপ্পত্তি ন ¶ যুজ্জেয্য. ন হি ৰিঞ্ঞত্তিসমুট্ঠাপকস্স তংসমুট্ঠিতায ৰিঞ্ঞত্তিযা কাযকম্মাদিভাৰং আপজ্জনভাৰো ৰিবন্ধতীতি. এৰঞ্চ কত্ৰা পঞ্চদ্ৰারে ইমিনা চিত্তেন সোমনস্সুপ্পাদনমত্তং দট্ঠব্বং, ন হাসুপ্পাদনং পঞ্চদ্ৰারিকচিত্তানং অৰিঞ্ঞত্তিজনকত্তা. মনোদ্ৰারে পন হাসুপ্পাদনং. তেনেৰ হি অট্ঠকথাযং পঞ্চদ্ৰারে ‘‘সোমনস্সিতো হোতী’’তি (ধ. স. অট্ঠ. ৫৬৮) এত্তকমেৰ ৰুত্তং, মনোদ্ৰারে চ ‘‘হাসযমান’’ন্তি. ইধ পন ‘‘হসিতুপ্পাদকিচ্চা’’তি অৰিসেসৰচনং পঞ্চদ্ৰারে সোমনস্সকরণৰসেন পৰত্তস্সপি মনোদ্ৰারে হাসজননস্স পচ্চযভাৰং সন্ধায ৰুত্তন্তি ৰেদিতব্বং. হসিতুপ্পাদকিচ্চাতি হসিতস্সেৰ উপ্পাদনকিচ্চা. তেনেৰ হি তং ‘‘হসিতুপ্পাদ’’ন্তি ৰুচ্চতি, ন পন অঞ্ঞেসং হসিতুপ্পাদচিত্তানং অভাৰতো. তথা হি ৰক্খতি ‘‘কুসলতো চতূহী’’তিআদি.

ছ অসাধারণঞাণানীতি আসযানুসযঞাণং, ইন্দ্রিযপরোপরিযঞাণং, যমকপাটিহারিযঞাণং, মহাকরুণাসমাপত্তিঞাণং, সব্বঞ্ঞুতঞ্ঞাণং, অনাৰরণঞাণন্তি ইমানি ছ পচ্চেকবুদ্ধাদীহি অসাধারণানি ঞাণানি. ননু চ সব্বঞ্ঞুতঞ্ঞাণমেৰ অনাৰরণঞাণং, ইতরথা সব্বঞ্ঞুতানাৰরণঞাণানং অসব্বঞ্ঞুতসাৰরণঞাণতা চ আপজ্জেয্য, তথা হি যদি সব্বঞ্ঞুতঞ্ঞাণতো অঞ্ঞমনাৰরণঞাণং সিযা, তস্স সাৰরণত্তা সাৰরণে চ ৰিসযে সভাৰপটিৰেধাভাৰতো সব্বঞ্ঞুভাৰং ন সিজ্ঝেয্য, অনাৰরণঞাণস্স চ অসব্বধম্মারম্মণভাৰেন যত্থ তং ন পৰত্ততি, তত্থাৰরণসম্ভৰতো অনাৰরণভাৰোপি ন ¶ সিযাতি? সচ্চমেতং, একমেৰ তং ঞাণং অনৰসেসসঙ্খতাসঙ্খতসম্মুতিধম্মৰিসযত্তা সব্বঞ্ঞুতঞ্ঞাণং, তত্থ চ আৰরণাভাৰতো নিস্সঙ্গৰারমুপাদায অনাৰরণঞাণন্তি এৰং ৰিসযপৰত্তিভেদেন অঞ্ঞেহি অসাধারণভাৰদস্সনত্থং দ্ৰেধা ৰুত্তন্তি. যথাহ –

‘‘সব্বং সঙ্খতমসঙ্খতং অনৰসেসং জানাতীতি সব্বঞ্ঞুতঞ্ঞাণং, তত্থ আৰরণং নত্থীতি অনাৰরণঞাণ’’ন্তিআদি (পটি. ম. ১.১১৯).

ইধ ঠত্ৰাতি হসিতস্স উপ্পাদনতো হসিতস্স উপ্পাদনন্তি ৰুত্তচিত্তস্স আগতট্ঠানে ঠত্ৰা. পরিগ্গণ্হিতব্বানীতি পরিচ্ছিন্দিত্ৰা গণ্হিতব্বানি. কিঞ্চাপি রূপাৰচরকিরিযানং ঝানঙ্গপ্পহানং ৰিপাকে ৰিয আগমনতো অহুত্ৰা কুসলে ৰিয ভাৰনাৰিসেসেন পৰত্তাকারমত্তংৰ ¶ হোতি, পঠমজ্ঝানস্স পন পহানঙ্গসম্ভৰাভাৰতো একস্স ৰসেনেৰ নিদ্দিসিতুং সেসানম্পি পহানঙ্গং অৰত্ৰা সম্পযোগঙ্গমেৰ তেসু দস্সিতন্তি.

৫৭. যস্মা পন ভাৰনাৰসেন পৰত্তাকারমত্তং ৰিনা ভাৰনায কাতব্বস্স নীৰরণপ্পহানাদিকিচ্চস্স অভাৰতো উজুকং ভাৰনা নাম ন হোতি, তস্মা ‘‘ভাৰনাকারৰসপ্পৰত্তানী’’তি আকার-গ্গহণং কতন্তি.

৫৮-৯. নন্তি তং যথাৰুত্তরূপারূপসমাপত্তিং. সমাপন্না সচে ক্রিযাতি এত্থ কিঞ্চাপি সা এৰ সমাপত্তি সমাপজ্জিতুং ন সক্কা, নিরুদ্ধানং অনুপ্পন্নতো, পটিলদ্ধসমাপত্তিকস্সেৰ সমাপজ্জিতুকামতায সদ্ধিংযেৰ সমাপজ্জনতো, পঠমজ্ঝানাদিকমেৰ পটিলভিত্ৰা দুতিযজ্ঝানাদিকং সমাপজ্জিতুং অসক্কুণেয্যভাৰতো চ, পুব্বে পটিলদ্ধসমাপত্তিসদিসং পুন সমাপজ্জনতো পুথুজ্জনকালস্মিং অভিনিব্বত্তিতসমাপত্তিসদিসা এত্থ সা এৰ তথা ৰুত্তা.

৬১. একচিত্তক্খণত্তাতি ¶ একচিত্তক্খণেযেৰ পৰত্তনতো. যদি হি সো পুনপ্পুনং উপ্পজ্জেয্য, তদাস্স অরহতো উপ্পত্তিযা কিরিযভাৰো ইচ্ছিতব্বো সিযা. সকিংযেৰ পন পৰত্ততি চতুসচ্চপটিৰেধকিচ্চস্স একৰারেনেৰ পরিনিট্ঠানতো, তক্কিচ্চেন চ ৰিনা তস্স অনুপলব্ভনীযত্তা. তেনাহ – ‘‘ন পারং দিগুণং যন্তী’’তি (সু. নি. ৭১৯), তস্মা নত্থি লোকুত্তরং কিরিযচিত্তন্তি অযমেত্থ অধিপ্পাযো.

৬২. ক্রিযা…পে… দেসকোতি যা আপত্তিযো কাযৰাচাহি অকাতব্বং কত্ৰা আপজ্জতি, তা কিরিযা, যা পন আপত্তিযো কাযৰাচাহি কাতব্বং অকরোন্তো আপজ্জতি, তা অকিরিযা, কিরিযা চ অকিরিযা চাতি কিরিযাকিরিযা, কিরিযাকিরিযা চ তা আপজ্জিতব্বতো আপত্তিযো চাতি কিরিযাকিরিযাপত্তিযো, তাসং ৰিভাগং দেসেতীতি কিরিযা…পে… দেসকো. অথ ৰা কিরিযাঝানভূতা সমাপত্তিযো কিরিযাপত্তিযো, কুসলভূতা পন সমাপত্তিযো অকিরিযাপত্তিযো, তাসং ৰিভাগং দেসেতীতি ক্রিযা…পে… দেসকো. যং কিরিযাকিরিযং চিত্তন্তি সম্বন্ধো. পঞ্চন্নং মারানং জিতত্তা জিনো. হিতাহিতানন্তি অত্থানত্থানং. সাতি সো জিনো. ক্রিযাক্রিযারতোতি সব্বসত্তানং হিতস্স করণে, অহিতস্স চ অকরণে নিরতো. অথ ৰা একন্তমিট্ঠৰিপাকত্তা হিতাতি কুসলানমেতং অধিৰচনং ¶ . তপ্পটিপক্খত্তা অহিতাতি অকুসলানমেতং অধিৰচনং. যথাক্কমং তেসং কিরিযাযং, অকিরিযাযঞ্চ রতোতি হিতাহিতানং…পে… রতো. অথ ৰা হিতাহিতাতি কুসলাকুসলা এৰ, তেসং কিরিযাকিরিযামত্তমৰিপাকভাৰং কাতুং ইচ্ছতীতি হিতাহিতানং…পে… রতো. অথ ৰা হিতাহিতানং পুগ্গলানং সকিরিযাকিরিযায অত্তনো অত্তনো কিচ্চস্স ইধলোকপরলোকনিপ্ফাদনস্স ¶ করণে রতো অভিরতোতি হিতাহিতানং…পে… রতো.

৬৪-৬. সব্বে লোকুত্তরে অট্ঠ কত্ৰা যে একূননৰুতি চিত্তুপ্পাদা ৰুত্তা, তানি চিত্তানি মযা নিদ্দিট্ঠানীতি সম্বন্ধো. পাটৰং অত্থেন্তি পত্থেন্তি, পাটৰসঙ্খাতো ৰা অত্থো এতেসন্তি পাটৰত্থিনো. উগ্গহেতব্বোতি সৰনপটিপুচ্ছাৰসেন উগ্গহিতব্বো, উগ্গণ্হিত্ৰা পন ন কেৰলং উগ্গহণমত্তেযেৰ ঠাতব্বন্তি দস্সেন্তো আহ ‘‘চিন্তেতব্বো পুনপ্পুন’’ন্তি, ন হি সক্কা উগ্গহণমত্তেনেৰেত্থ সব্বথা সন্নিট্ঠানং গন্তুন্তি অধিপ্পাযো. অভিধম্মমহোদধিন্তি ধম্মসঙ্গণীআদিসত্তপ্পকরণৰসেন ঠিতমভিধম্মপিটকমহণ্ণৰং, খন্ধাযতনাদিৰসেন ঠিতং পরমত্থমহণ্ণৰং ৰা. তরন্তীতি অত্থগ্গহণৰসেন উত্তরন্তি, সুতমযঞাণমূলকেন ৰা ভাৰনাঞাণেন ওতরন্তীতি অত্থো. ইমং লোকন্তি পচ্চুপ্পন্নভৰং. পরং লোকন্তি অনাগতভৰং. তরন্তীতি অতিক্কমন্তি. ইধ লোকস্মিঞ্হি ছন্দরাগপ্পহানৰসেন ইমং লোকং তরন্তি, আযতিং ভৰূপপাদকস্স কম্মস্স কম্মক্খযকরঞাণেন ৰিনাসনতো পরলোকং তরন্তি, অনুপাদাপরিনিব্বানৰসেন পরিনিব্বাযন্তীতি অত্থো.

ইতি অভিধম্মত্থৰিকাসিনিযা নাম

অভিধম্মাৰতারসংৰণ্ণনায

চিত্তনিদ্দেসৰণ্ণনা নিট্ঠিতা.

২. দুতিযো পরিচ্ছেদো

চেতসিকনিদ্দেসৰণ্ণনা

৬৭. এত্তাৰতা ¶ চ চিত্তং চেতসিকং রূপং নিব্বানন্তি এৰং উদ্দিট্ঠেসু চতূসু ধম্মেসু চিত্তং তাৰ জাতিভূমিসম্পযোগপ্পৰত্তাকারাদিৰসেন ৰিভাগেন নিদ্দিসিত্ৰা ইদানি তদনন্তরং উদ্দিট্ঠে ¶ চেতসিকধম্মে নিদ্দিসিতুং ‘‘চিত্তানন্তরমুদ্দিট্ঠা’’তিআদি আরদ্ধং. ৰিভাজনন্তি জাতিভূমিআদিৰসেন ৰিভাগং, তেসু তেসু চিত্তেসু যথারহং সম্পযোগৰসেন ৰিসুং ৰিসুং ভাজনঞ্চ.

কতমে পন চেতসিকা, যেসং ৰিভাজনং ৰুচ্চতীতি তে সহ নিব্বচনেন সরূপতো দস্সেতুং ‘‘তত্থ চিত্তসম্পযুত্তা’’তিআদি ৰুত্তং. তত্থ ‘‘চিত্তসম্পযুত্তা’’তি ইদং চেতসিকলক্খণদস্সনং. তেন যে চিত্তেন সহ সম্পযোগলক্খণেন যুত্তা, তেযেৰ চেতসিকাতি দস্সেতি. কিং পন তং সম্পযোগলক্খণন্তি? একুপ্পাদএকনিরোধএকৰত্থুকএকারম্মণসঙ্খাতা পকারা. সমং পকারেহি যুত্তাতি হি সম্পযুত্তা. তত্থ যদি একুপ্পাদতামত্তেনেৰ চ সম্পযুত্ততা অধিপ্পেতা, সহুপ্পত্তিকানং রূপারূপধম্মানং অঞ্ঞমঞ্ঞসম্পযুত্ততা আপজ্জেয্যাতি একনিরোধ-গ্গহণং. এৰম্পি অৰিনিব্ভোগরূপানং অঞ্ঞমঞ্ঞসম্পযুত্ততা আপজ্জেয্যাতি একৰত্থুক-গ্গহণং. এৰম্পি ‘‘অৰিনিব্ভোগরূপেসু একং মহাভূতং সেসমহাভূতোপাদারূপানং নিস্সযপচ্চযো হোতীতি তস্মা তানি একৰত্থুকানীতি, চক্খাদীনং নিস্সযভূতানি ৰা ভূতানি একং ৰত্থু এতেসু নিস্সিতন্তি একৰত্থুকানী’’তি কপ্পেন্তস্স তেসং সম্পযুত্ততাপত্তি সিযাতি তন্নিৰারণত্থং একারম্মণ-গ্গহণং.

পটিলোমতো ৰা ‘‘একারম্মণা’’তি ৰুত্তে একৰীথিযং পঞ্চৰিঞ্ঞাণসম্পটিচ্ছনাদীনং, নানাৰীথিযং পরসন্তানে চ একস্মিং আরম্মণে উপ্পজ্জমানানং ভিন্নৰত্থুকানং সম্পযুত্ততা আপজ্জেয্যাতি একৰত্থুক-গ্গহণং. এৰম্পি মরণাসন্নৰীথিযং সম্পটিচ্ছনসন্তীরণাদীনং সম্পযুত্ততা আপজ্জেয্যাতি একনিরোধ-গ্গহণং. কিং পন নানুপ্পাদাপি এৰং তিৰিধলক্খণা হোন্তি ¶ , অথ একুপ্পাদা এৰাতি ৰিচারণায একুপ্পাদা ¶ এৰ এৰং তিৰিধলক্খণা হোন্তীতি দস্সনত্থং ‘‘একুপ্পাদা’’তি ৰুত্তং. ইতি ইমেহি চতূহি সম্পযোগলক্খণেহি যে চিত্তসম্পযুত্তা, তে চেতসিকা নামাতি এৰং চেতসিকলক্খণং ঠপিতং হোতি. কথং পনেতে চেতসিকা নামাতি আহ ‘‘চিত্তে ভৰা’’তি. ‘‘চেতসি ভৰা চেতসিকা’’তি ৰত্তব্বে চিত্ত-সদ্দস্সপি চেতো-সদ্দেন সহ সমানত্থতায অত্থমত্তং দস্সেতুং ‘‘চিত্তে ভৰা চেতসিকা’’তি ৰুত্তং.

নিযতাতি নিযতুপ্পত্তিকা, করুণামুদিতাদযো ৰিয কদাচি অনুপ্পজ্জিত্ৰা যদা যদা তং চিত্তং উপ্পজ্জতি, তদা তদাৰ তেন অৰিনিভুত্তা হুত্ৰা জাযমানাতি অত্থো. সরূপেন আগতাতি ছন্দাদযো ৰিয ‘‘যে ৰা পন তস্মিং সমযে অঞ্ঞেপি অত্থি পটিচ্চসমুপ্পন্না অরূপিনো ধম্মা’’তি এৰং যেৰাপনকৰসেন অনাগন্ত্ৰা ‘‘ফস্সো হোতি, ৰেদনা হোতী’’তিআদিনা (ধ. স. ১) সরূপেনেৰ পাল়িযং আগতা. যেৰাপনাতি এৰং দেসনা এতেসন্তি যেৰাপনকা. একূনতিংস ধম্মাতি কিচ্চভেদং অনামসিত্ৰা কেৰলং অসম্ভিন্নধম্মৰসেনেৰ একেনূনা তিংস ধম্মা. পাল়িযং পন চিত্তেন সহ তিংস ধম্মে গহেত্ৰা তেসং কিচ্চভেদতো গহণেন ছপ্পঞ্ঞাস ধম্মা ৰুত্তা. সেয্যথিদন্তি সরূপপুচ্ছা. ফস্সো…পে… চিত্তুজুকতাতি যথাপুচ্ছিতানং সরূপদস্সনং. ইতি-সদ্দো পরিসমাপনে, নিদস্সনে ৰা. পুন তেত্তিংস হোন্তীতি সম্বন্ধো. তেত্তিংস হোন্তীতি তেযেৰ একূনতিংস ধম্মাতি অধিপ্পাযো.

‘‘কদাচি উপ্পজ্জন্তী’’তি ৰুত্তং, তং কথং দট্ঠব্বন্তি আহ ‘‘ইমেসূ’’তিআদি. করুণামুদিতাৰসেনাতি পঠমসমন্নাহারতো পট্ঠায গোত্রভুপরিযোসানপ্পৰত্তিতকরুণামুদিতাপরিকম্মৰসেন. করুণাপুব্বভাগোতি করুণায ¶ পুব্বভাগো, পরিকম্মপ্পনাৰসেন পৰত্তকরুণাভাৰনায অপ্পনাকোট্ঠাসতো পুরিমকোট্ঠাসো, পঠমসমন্নাহারতো পট্ঠায গোত্রভুপরিযোসানপ্পৰত্তপরিকম্মকোট্ঠাসো হুত্ৰাতি অত্থো. এৰং ‘‘মুদিতাপুব্বভাগো’’তি এত্থাপি. ভাগ-সদ্দস্স দ্রব্যৰুত্তিতায তপ্পুরিসস্স চ উত্তরপদত্থপ্পধানতায ‘‘করুণাপুব্বভাগো’’তিআদিনা পুল্লিঙ্গেন ৰুত্তং. এত-সদ্দস্স পন গুণৰুত্তিতায গুণৰিসেসৰতি ৰত্তমানো তস্স লিঙ্গৰসেন পরিণমতীতি করুণামুদিতাপেক্খায ‘‘এতা’’তি ইত্থিলিঙ্গৰসেন ৰুত্তন্তি. ন পনেকতো উপ্পজ্জন্তি, কিঞ্চরহি ৰিসুং ৰিসুংযেৰাতি অত্থো. তেনেৰ হি ‘‘করুণাপুব্বভাগো ৰা মুদিতাপুব্বভাগো ৰা’’তি ৰিকপ্পো ৰুত্তোতি. কস্মা পনেতা দ্ৰে একতো নুপ্পজ্জন্তীতি? ভিন্নারম্মণত্তা. করুণা হি দুক্খিতসত্তে আরব্ভ তেসং দুক্খাপনযনকামতাৰসেন পৰত্ততি, মুদিতা ¶ সুখিতসত্তে আরব্ভ তেসং সুখানুমোদনৰসেন, তস্মা উভিন্নম্পি ভিন্নৰিসযত্তা ন একস্মিং চিত্তে উপ্পত্তি সম্ভৰতীতি. মিচ্ছাকম্মন্তাদীহীতি আদি-সদ্দেন মিচ্ছাৰাচামিচ্ছাজীৰানং গহণং. সম্মাকম্মন্তাদীনি পরিপূরেন্তীতি সম্মাকম্মন্তসম্মাৰাচাসম্মাআজীৰানি পরিপূরেন্তি. কো ৰিরতীতি তীসু একা ৰিরতি উপ্পজ্জতি, সম্মাকম্মন্তং পূরেন্তী পঠমা, সম্মাৰাচং পূরেন্তী দুতিযা, সম্মাআজীৰং পূরেন্তী ততিযা ৰিরতি উপ্পজ্জতীতি অত্থো. করুণামুদিতাহি সহ ন উপ্পজ্জন্তি তাসং পঞ্ঞত্তারম্মণত্তা, ৰিরতিযা চ একন্তপরিত্তারম্মণত্তা. অঞ্ঞমঞ্ঞেন চ ন উপ্পজ্জন্তি অঞ্ঞমঞ্ঞস্সপি ভিন্নৰিসযত্তা. মিচ্ছাকম্মন্তাদীনঞ্হি আরম্মণানেৰ যথাক্কমং সম্মাকম্মন্তাদীনং আরম্মণানি ততো ৰিরতিভাৰতো. এতেসূতি ইমেসু পঞ্চসু.

৬৮. ৰিরতীনম্পি ¶ সঙ্গহণত্থং ‘‘করুণামুদিতাদীসূ’’তি ৰত্তব্বে গাথাবন্ধসুখত্থং আদি-সদ্দলোপৰসেন ‘‘করুণামুদিতাসূ’’তি ৰুত্তং. এৰঞ্চ কত্ৰা ৰুত্তং ‘‘একেনা’’তি, ইতরথা ‘‘একাযা’’তি ৰত্তব্বন্তি.

৬৯-৭১. কিং পনেত্থ কারণং, চতূসু ব্রহ্মৰিহারেসু দ্ৰে ইধ নিদ্দিট্ঠা, ন ইতরাতি চোদেন্তো আহ ‘‘কস্মা পনা’’তিআদি. উপেক্খা চ ন উদ্ধটাতি সম্বন্ধো. নৰহি লোকুত্তরধম্মেহি জনং রঞ্জেতীতি ধম্মরাজা. দিট্ঠধম্মিকসম্পরাযিকত্থেহি সদেৰকং লোকং অনুসাসতীতি সত্থা. অব্যাপাদেন মেত্তা গহিতা তস্সেৰ হিতাকারপ্পৰত্তিকালে মেত্তাভাৰূপগমনতো. তেনেৰ হেস ‘‘মেত্তা মেত্তাযনা’’তিআদিনা নিদ্দিট্ঠো. তত্রমজ্ঝত্ততায উপেক্খা গহিতা তাযেৰ সত্তেসু মজ্ঝত্তাকারপ্পৰত্তায উপেক্খাব্রহ্মৰিহারভাৰতো. আদিচ্চেন সহ সমানগোত্ততায, অরিযসাৰকভাৰেন ৰা তস্স ভগৰতো পুত্ততায আদিচ্চো বন্ধু ইমস্স, আদিচ্চস্স ৰা বন্ধূতি আদিচ্চবন্ধু.

৭২. রাসিন্তি ফস্সপঞ্চকাদিসত্তরসরাসিং. পঠমমহাচিত্তুপ্পাদৰসেন হি –

‘‘ফস্সো হোতি, ৰেদনা হোতি, সঞ্ঞা হোতি, চেতনা হোতি, চিত্তং হোতি, ৰিতক্কো হোতি, ৰিচারো হোতি, পীতি হোতি, সুখং হোতি, চিত্তস্সেকগ্গতা হোতি, সদ্ধিন্দ্রিযং হোতি, ৰীরিযিন্দ্রিযং হোতি, সতিন্দ্রিযং হোতি, সমাধিন্দ্রিযং হোতি, পঞ্ঞিন্দ্রিযং ¶ হোতি, মনিন্দ্রিযং হোতি, সোমনস্সিন্দ্রিযং হোতি, জীৰিতিন্দ্রিযং হোতি, সম্মাদিট্ঠি হোতি, সম্মাসঙ্কপ্পো হোতি, সম্মাৰাযামো হোতি, সম্মাসতি হোতি, সম্মাসমাধি হোতি, সদ্ধাবলং হোতি, ৰীরিযবলং হোতি, সতিবলং হোতি ¶ , সমাধিবলং হোতি, পঞ্ঞাবলং হোতি, হিরিবলং হোতি, ওত্তপ্পবলং হোতি, অলোভো হোতি, অদোসো হোতি, অমোহো হোতি, অনভিজ্ঝা হোতি, অব্যাপাদো হোতি, সম্মাদিট্ঠি হোতি, হিরী হোতি, ওত্তপ্পং হোতি, কাযপস্সদ্ধি হোতি, চিত্তপস্সদ্ধি হোতি, কাযলহুতা হোতি, চিত্তলহুতা হোতি, কাযমুদুতা হোতি, চিত্তমুদুতা হোতি, কাযকম্মঞ্ঞতা হোতি, চিত্তকম্মঞ্ঞতা হোতি, কাযপাগুঞ্ঞতা হোতি, চিত্তপাগুঞ্ঞতা হোতি, কাযুজুকতা হোতি, চিত্তুজুকতা হোতি, সতি হোতি, সম্পজঞ্ঞং হোতি, সমথো হোতি, ৰিপস্সনা হোতি, পগ্গাহো হোতি, অৰিক্খেপো হোতী’’তি (ধ. স. ১) –

এৰং ধম্মুদ্ধারং করোন্তেন ভগৰতা ফস্সাদযো তিংস ধম্মে ছপ্পঞ্ঞাস কত্ৰা ফস্সপঞ্চকরাসি ঝানপঞ্চকরাসি ইন্দ্রিযট্ঠকরাসি মগ্গপঞ্চকরাসি বলসত্তকরাসি হেতুত্তিকরাসি কম্মপথতিকরাসি লোকপালদুকরাসি ছযুগল়দুকরাসি উপকারদুকরাসি যুগনন্ধদুকরাসি ৰীরিযসমথদুকরাসীতি সত্তরসন্নং রাসীনং ৰসেন ৰিভাগো কতো.

কথং? এতেসুপি চিত্তং তাৰ ফস্সপঞ্চকং পত্ৰা ‘‘চিত্তং হোতী’’তি ৰুত্তং, ইন্দ্রিযানি পত্ৰা ‘‘মনিন্দ্রিয’’ন্তি. ৰিতক্কো ঝানঙ্গানি পত্ৰা ‘‘ৰিতক্কো হোতী’’তি ৰুত্তো, মগ্গঙ্গানি পত্ৰা ‘‘সম্মাসঙ্কপ্পো’’তি. সদ্ধা ইন্দ্রিযানি পত্ৰা ‘‘সদ্ধিন্দ্রিযং হোতী’’তি ৰুত্তা, বলানি পত্ৰা ‘‘সদ্ধাবল’’ন্তি. হিরী বলানি পত্ৰা ‘‘হিরিবলং হোতী’’তি ৰুত্তা, লোকপালদুকং পত্ৰা ‘‘হিরী’’তি. ওত্তপ্পেপি এসেৰ নযো. অলোভো মূলং পত্ৰা ‘‘অলোভো হোতী’’তি ৰুত্তো, কম্মপথং পত্ৰা ‘‘অনভিজ্ঝা’’তি. অদোসো মূলং পত্ৰা ¶ ‘‘অদোসো হোতী’’তি ৰুত্তো, কম্মপথং পত্ৰা ‘‘অব্যাপাদো’’তি. ইমে সত্ত দ্ৰীসু ঠানেসু ৰিভত্তা. ৰেদনা পন ফস্সপঞ্চকং পত্ৰা ‘‘ৰেদনা হোতী’’তি ৰুত্তা, ঝানঙ্গানি পত্ৰা ‘‘সুখ’’ন্তি, ইন্দ্রিযানি পত্ৰা ‘‘সোমনস্সিন্দ্রিয’’ন্তি. এৰমযং একো ধম্মো তীসু ঠানেসু ৰিভত্তো. ৰীরিযং পন ইন্দ্রিযানি পত্ৰা ‘‘ৰীরিযিন্দ্রিযং হোতী’’তি ৰুত্তং, মগ্গঙ্গানি পত্ৰা ‘‘সম্মাৰাযামো’’তি, বলানি পত্ৰা ‘‘ৰীরিযবল’’ন্তি, ৰীরিযসমথং পত্ৰা ‘‘পগ্গাহো’’তি. সতিপি ইন্দ্রিযানি পত্ৰা ‘‘সতিন্দ্রিযং হোতী’’তি ৰুত্তা, মগ্গঙ্গানি পত্ৰা ‘‘সম্মাসতী’’তি, বলানি পত্ৰা ‘‘সতিবল’’ন্তি, উপকারদুকং পত্ৰা ‘‘সতি হোতী’’তি ¶ . এৰং ইমে দ্ৰে ধম্মা চতূসু ঠানেসু ৰিভত্তা. সমাধি পন ঝানঙ্গানি পত্ৰা ‘‘চিত্তস্সেকগ্গতা হোতী’’তি ৰুত্তো, ইন্দ্রিযানি পত্ৰা ‘‘সমাধিন্দ্রিয’’ন্তি, মগ্গঙ্গানি পত্ৰা ‘‘সম্মাসমাধী’’তি, বলানি পত্ৰা ‘‘সমাধিবল’’ন্তি, যুগনন্ধদুকং পত্ৰা ‘‘সমথো’’তি, ৰীরিযসমথং পত্ৰা ‘‘অৰিক্খেপো হোতী’’তি. এৰমযং একো ধম্মো ছসু ঠানেসু ৰিভত্তো. পঞ্ঞা পন ইন্দ্রিযানি পত্ৰা ‘‘পঞ্ঞিন্দ্রিযং হোতী’’তি ৰুত্তা, মগ্গঙ্গানি পত্ৰা ‘‘সম্মাদিট্ঠী’’তি, বলানি পত্ৰা ‘‘পঞ্ঞাবল’’ন্তি, মূলানি পত্ৰা ‘‘অমোহো’’তি, কম্মপথং পত্ৰা ‘‘সম্মাদিট্ঠী’’তি, উপকারদুকং পত্ৰা ‘‘সম্পজঞ্ঞ’’ন্তি, যুগনন্ধদুকং পত্ৰা ‘‘ৰিপস্সনা’’তি. এৰমযং একো ধম্মো সত্তসু ঠানেসু ৰিভত্তোতি এৰমেতে দ্ৰাদস ধম্মা ইন্দ্রিযাদিতংতংকিচ্চৰন্ততায দ্ৰিট্ঠানিকাদিভেদেন সত্তরসসু রাসীসু ৰিভত্তা. ইতরে অট্ঠারস কিচ্চৰসেন ভেদাভাৰতো একট্ঠানিকাযেৰাতি ইমেসু সত্তরসসু রাসীসু যেৰাপনকধম্মা একরাসিম্পি ন ভজন্তি তংতংকিচ্চভাৰতোতি কত্ৰা ৰুত্তং ‘‘রাসিং ভজন্তি না’’তি.

ননু চেতে কিঞ্চাপি সেসরাসযো ন ভজন্তি তেসং সদিসকিচ্চসঙ্গহৰসেন ঠিতত্তা. ফস্সপঞ্চকরাসি পন খন্ধসঙ্গহৰসেনেৰ ¶ ঠপিতোতি চেতনায ৰিয নেসং সঙ্খারক্খন্ধসঙ্গহতো তত্থ সমৰরোধো যুত্তোতি? তং ন, খন্ধসঙ্গহৰসেন ঠপিতোপি হি ফস্সপঞ্চকরাসি সব্বচিত্তসাধারণধম্মে সঙ্গহেত্ৰা ঠপিতোতি ছন্দাদীনং তিণ্ণং পকিণ্ণকৰসেন উপ্পজ্জমানানং সব্বচিত্তসাধারণতায অভাৰতো, মনসিকারস্স চ সতিপি সব্বচিত্তসাধারণত্তে নিপ্পরিযাযতো সঙ্খারক্খন্ধসঙ্গহাভাৰতো ন এতেসং ফস্সপঞ্চকরাসিভজনম্পি যুত্তন্তি. কস্মা পন মনসিকারস্স নিপ্পরিযাযতো সঙ্খারক্খন্ধসঙ্গহাভাৰোতি? ৰুচ্চতে – ঠপেত্ৰা চেতনং সেসধম্মানং সকসককিচ্চেসুপি পরাধীনভাৰেন পৰত্তনতো অভিসঙ্খরণলক্খণং নিপ্পরিযাযতো ন লব্ভতি. যদি লভেয্য, চিত্তেকগ্গতাজীৰিতিন্দ্রিযানং সব্বচিত্তসাধারণত্তা ৰেদনাৰিঞ্ঞাণানি ৰিয তানি ফস্সপঞ্চকে ৰত্তব্বানি সিযুং, ন পনেৰং ৰুত্তা, তস্মা ঠপেত্ৰা চেতনং সেসধম্মানং অভিসঙ্খরণলক্খণং নিপ্পরিযাযতো ন লব্ভতীতি ন তেসং নিপ্পরিযাযতো খন্ধসঙ্গহো লব্ভতি. চেতনাযযেৰ পন সকিচ্চপরকিচ্চসাধনৰসেন পৰত্তনতো নিপ্পরিযাযতো অভিসঙ্খরণলক্খণস্স অত্থিতায খন্ধসঙ্গহো লব্ভতীতি. যদি এৰং কথং ফস্সো ফস্সপঞ্চকে ৰুত্তোতি? ‘‘ফস্সপচ্চযা ৰেদনা (ৰিভ. ২২৫), ফুট্ঠো ৰেদেতি, ফুট্ঠো সঞ্জানাতী’’তিআদিৰচনতো (সং. নি. ৪.৯৩) ৰেদনা সঞ্ঞা চেতনা ৰিঞ্ঞাণন্তি ইমেসং অরূপক্খন্ধানং উদ্দেসট্ঠানে ঠত্ৰা তেসং পচ্চযস্সপি উদ্দিসিতুকামতায ফস্সো তত্থ ৰুত্তো ¶ . দুব্বলাতি সকৰিসযেপি পরাযত্তভাৰেনেৰ পৰত্তনতো দুব্বলা. অধিমোক্খো হি সমাধিস্স পরিব্যত্তভাৰে পরিব্যত্তভাৰতো সমাধাযত্তৰুত্তি, মনসিকারোপি চেতনায পরিব্যত্তভাৰতো চেতনাযত্তৰুত্তীতি পরাযত্তাৰ তে হোন্তি.

৭৩. মনসী ¶ চ কারোতি মনসিকারো চ. মনসিকারসদ্দস্স হি অত্থমত্তসন্দস্সনৰসেন গাথাবন্ধসুখত্থং অসমাসনিদ্দেসো, দীঘকরণং, মজ্ঝে চ চ-সদ্দৰচনন্তি. তেন মুনিৰরেনাতি সম্বন্ধো.

৭৪-৮০. পঠমাভিনিপাতত্তাতি আরম্মণে ফুসনৰসেন পঠমমেৰ অভিনিপতনতো. সব্বেপি চেতসিকা চিত্তাযত্তা চিত্তকিরিযভাৰেন ৰুচ্চন্তীতি ‘‘চিত্তস্সা’’তি ৰুত্তং. কিরাতি অরুচিসূচনং. এৰং মহাসংঘিকমতং দস্সেত্ৰা ইদানি তমেৰ ৰিত্থারেতুং ‘‘ফুসিত্ৰা পনা’’তিআদি ৰুত্তং. মহাসংঘিকা হি ‘‘পঠমং ফস্সো আরম্মণং ফুসতি, অথ তেন ফুট্ঠং দুতিযং ৰেদনা ৰেদিযতি, এৰং এতেহি ফুট্ঠৰেদিতং ততিযং সঞ্ঞা সঞ্জানাতি, তেহি পন ফুট্ঠৰেদিতসঞ্ঞাতে চতুত্থং চেতনায সম্পযুত্তধম্মে অভিসন্দহতী’’তিআদিনা ৰদন্তি. বলৰপচ্চযত্তাতি যথা পাসাদং পত্ৰা থম্ভা সেসদব্বসম্ভারানং বলৰপচ্চযা, এৰমেস যস্মা সেসসম্পযুত্তানং বলৰপচ্চযো, তস্মাতি অত্থো. তস্মাতি হেতুনিগমনং.

সহেৰ চাতি চ-সদ্দো অট্ঠানপ্পযুত্তো, সো ‘‘চিত্তজান’’ন্তি ইমস্স অনন্তরং দট্ঠব্বো. কস্মা? চিত্তানং, চিত্তজানঞ্চ একুপ্পাদাদিভাৰেন সহেৰ পৰত্তিতোতি এৰমেত্থ পদসম্বন্ধো ৰেদিতব্বো. ইদন্তি ইদং যথাৰুত্তৰিধানং, এৰং ‘‘পঠমাভিনিপাতত্তা’’তি কারণং পরিহরিত্ৰা ইদানি ‘‘বলৰপচ্চযত্তা’’তি ইদং পরিহরন্তো আহ ‘‘বলৰ…পে… দিস্সতী’’তি. চ-সদ্দো অৰধারণে, নেৰ দিস্সতীতি অত্থো. সেসধম্মানম্পি হি সহজাতপচ্চযভাৰস্স সাধারণত্তা তস্সেৰ বলৰপচ্চযভাৰে ন কিঞ্চি কারণং দিস্সতীতি. যদি সব্বমিদমকারণং, কথঞ্চরহি ফস্সো পঠমং ৰুত্তোতি আহ ‘‘দেসনাক্কমতো’’তিআদি. ‘‘ৰেদনা হোতি, ফস্সো ¶ হোতি, সঞ্ঞা হোতি, ফস্সো হোতি, চেতনা হোতি, ফস্সো হোতি, চিত্তং হোতি, ফস্সো হোতি, ৰেদনা হোতি, সঞ্ঞা হোতি, চেতনা হোতি, ৰিতক্কো হোতী’’তিআদীহি আহরিতুম্পি ৰট্টেয্য, দেসনাৰারেন পন ফস্সোৰ পঠমং ৰুত্তোতি ৰেদিতব্বো. যথা চেত্থ, এৰং সেসধম্মেসুপি পুব্বাপরক্কমো ¶ নাম ন পরিযেসিতব্বো. ৰচনত্থলক্খণাদীহীতি ৰচনত্থতো চ লক্খণাদিতো চ.

ফুসতীতি কত্তুনিদ্দেসো. তত্থ কারণং হেট্ঠা ৰুত্তমেৰ, ফুসন্তি এতেন ৰাতি ফস্সো. সম্পযুত্তধম্মা হি আরম্মণে পৰত্তমানা তং ফুসনলক্খণেন ফস্সেন ফুসন্তা ৰিয হোন্তি, আরম্মণফুসনমত্তং ৰা ফস্সোতিপি সাধনত্তযম্পি যুজ্জতেৰ. ফুসনং লক্খণমেতস্সাতি ফুসনলক্খণো, ৰেদনায পচ্চযভাৰট্ঠেন আরম্মণফুসনলক্খণোতি অত্থো. সংঘট্টনরসোতি মনোদ্ৰারে চিত্তারম্মণানং সংঘট্টনতো সংঘট্টনকিচ্চো. অযঞ্হি আরম্মণে অনল্লীযমানোপি রূপং ৰিয চক্খুং, সদ্দো ৰিয চ সোতং চিত্তমারম্মণঞ্চ ঘট্টেতি. পঞ্চদ্ৰারেসু ৰা ৰত্থারম্মণসংঘট্টনেন সম্পজ্জতীতি সংঘট্টনসম্পত্তিকো ফস্সো ‘‘সংঘট্টনরসো’’তি ৰুত্তো. যথা ‘‘দ্ৰে পাণী ৰজ্জেয্যু’’ন্তিআদীসু পাণিম্হি ঘট্টনং তব্বিসেসভূতা রূপধম্মা, এৰং চিত্তস্স আরম্মণে সংঘট্টনং তব্বিসেসভূতো একো চেতসিকধম্মো দট্ঠব্বো. তিণ্ণং সন্নিপাতসঙ্খাতস্স অত্তনো কারণস্স ৰসেন পৰেদিতত্তা সন্নিপাতপচ্চুপট্ঠানো. ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং, তিণ্ণং সঙ্গতি ফস্সো’’তি (ম. নি. ১.২০৪, ৪০০; ৩.৪২১, ৪২৫; সং. নি ২.৪.৬০; কথা. ৪৬৫) হি ৰচনতো চক্খুরূপৰিঞ্ঞাণাদীনং তিণ্ণং সন্নিপাতৰসেন গহেতব্বতায উপট্ঠানতো সন্নিপাতসঙ্খাতস্স কারণস্স ৰসেন উপট্ঠানমস্সাতি উপট্ঠানট্ঠেন পচ্চুপট্ঠানেন সন্নিপাতপচ্চুপট্ঠানতা ¶ ৰুত্তা. ‘‘ফস্সপচ্চযা ৰেদনা’’তি (ৰিভ. ২২৫) ৰচনতো ৰেদনা ফলমস্সাতি ৰেদনাপচ্চুপট্ঠানো. তজ্জসমন্নাহারেন চেৰ ইন্দ্রিযেন চ পরিক্খতে ৰিসযে অনন্তরাযেনেৰ উপ্পজ্জনতো আপাথগতৰিসযপদট্ঠানো. অযঞ্হি তস্স ফস্সস্স কারণভূতো তদনুরূপভূতো সমন্নাহারোতি তজ্জসমন্নাহারসঙ্খাতেন আৰজ্জনেন চেৰ চক্খাদিইন্দ্রিযেন চ যথাক্কমং আরম্মণকরণতদভিমুখভাৰৰসেন পরিক্খতে অভিসঙ্খাতে আপাথগতেযেৰ ৰিসযে একন্তেন উপ্পজ্জনতো আপাথগতো ৰিসযো পদট্ঠানং আসন্নকারণং ইমস্সাতি আপাথগতৰিসযপদট্ঠানো.

ননু চাযং ধম্মো চেতসিকো, স্ৰাযং অরূপধম্মো সমানো কথং ফুসনলক্খণো হোতীতি অন্তোলীনচোদনং মনসি কত্ৰা তস্সা সোধনত্থং ‘‘অরূপধম্মোপি সমানো’’তিআদি ৰুত্তং. তত্থ ‘‘ফুসনাকারেনেৰ পৰত্ততী’’তি ইমিনা অরূপস্সাপি সতো তস্স ধম্মস্স অযং সভাৰোতি দস্সেতি. সা চ তস্স ফুসনাকারপ্পৰত্তি অম্বিলং অম্বপক্কাদিং খাদন্তং পস্সন্তস্স পরস্স খেল়ুপ্পত্তিপরং ¶ বাধিযমানং দিস্ৰা দযালুকস্স সরীরকম্পনং, রুক্খসাখগ্গে দুট্ঠিতং পুরিসং দিস্ৰা ভূমিযং ঠিতস্স পুরিসস্স জঙ্ঘচলনং, পিসাচাদিভাযিতব্বং দিস্ৰা ঊরুপত্থম্ভোতি এৰমাদি ৰিয দট্ঠব্বা. সোতি সো যথাৰুত্তলক্খণাদিকো ফস্সো.

সুন্দরন্তি সুখৰেদনাসম্পযুত্তত্তা পসত্থং. মনোতি ৰিঞ্ঞাণং. সুমনস্স ভাৰোতি সুমনসঙ্খাতস্স ৰিঞ্ঞাণস্স ভাৰো. য্ৰাযং সদ্দপ্পৰত্তিনিবন্ধনো অত্থো, সো সোমনস্সং. সোমনস্সৰেদনাসম্পযুত্তত্তা হি সুমন-সদ্দো তস্মিং ৰিঞ্ঞাণে পৰত্ততি. ৰেদেন অনুভৰনাকারেন ¶ অযিতং পৰত্তং ৰেদযিতং, তং লক্খণমস্সাতি ৰেদযিতলক্খণা. ইট্ঠস্স ইট্ঠাকারতোৰ অনুভৰনং কিচ্চমস্সাতি ইট্ঠাকারানুভৰনরসা. সা হি সভাৰতো ইট্ঠমারম্মণং ইট্ঠৰসেন, ইতরঞ্চ ইট্ঠাকারেনেৰ অনুভৰতি, তত্থ ইট্ঠাকারানুভৰনং কুসলাকুসলচিত্তসম্পযুত্তৰেদনায লব্ভতি তস্সা অনিট্ঠস্সপি কপ্পনাৰসেন ইট্ঠাকারেন গহণতো, সভাৰতো পন ইট্ঠানুভৰনং অব্যাকতচিত্তসম্পযুত্তাযপি লব্ভতি তস্সা ৰিপল্লাসগ্গাহাভাৰতো. ‘‘রাজা ৰিয সুভোজনরস’’ন্তি ইমিনা ইমং দীপেতি – ফস্সস্স ফুসনমত্তমেৰ হোতি, সঞ্ঞায সঞ্জাননমত্তমেৰ, চেতনায সঞ্চেতনামত্তমেৰ, ৰিঞ্ঞাণস্স ৰিজাননমত্তমেৰ, একংসতো পন ইস্সরৰতায সামিভাৰেন ৰেদনাৰ আরম্মণরসং অনুভৰতি, রাজা ৰিয সূদকারেন সম্পাদিতসুভোজনরসন্তি. অস্সাদীযতীতি অস্সাদো, সুখৰেদনা. তেনাহ ভগৰা – ‘‘যং, ভিক্খৰে, পঞ্চুপাদানক্খন্ধে পটিচ্চ উপ্পজ্জতি সুখং সোমনস্সং, অযং ৰুচ্চতি, ভিক্খৰে, পঞ্চুপাদানক্খন্ধেসু অস্সাদো’’তি. চেতোসন্নিস্সিতত্তা চেতসি ভৰো অস্সাদোতি চেতসিকঅস্সাদো, তথা পচ্চুপট্ঠাতীতি চেতসিকঅস্সাদপচ্চুপট্ঠানা. পস্সদ্ধকাযো সুখং ৰেদিযতীতি আহ ‘‘পস্সদ্ধিপদট্ঠানা’’তি. ইদং পন নিরামিসসোমনস্সৰসেন ৰেদিতব্বং.

নীলাদিভেদস্স আরম্মণস্স সঞ্জাননং তমেৰ সঞ্ঞং কত্ৰা জাননং লক্খণং এতস্সাতি সঞ্জাননলক্খণা. পচ্চাভিঞ্ঞাণকরণরসাতি পতি অভিঞ্ঞাযতি এতেনাতি পচ্চাভিঞ্ঞাণং, তদেৰেতন্তি পুন পচ্চাভিঞ্ঞাণনিমিত্তং সণ্ঠানাদিকো আকারো, তস্স করণরসো কিচ্চমস্সাতি পচ্চাভিঞ্ঞাণকরণরসা. সা হি উপ্পজ্জমানা পচ্ছা সঞ্জাননস্স কারণভূতং সণ্ঠানাদিকং আকারং গহেত্ৰা ¶ উপ্পজ্জতীতি. ইদঞ্চ নিমিত্তকারিকায নিমিত্তেন সঞ্জানন্তিযা চ সব্বায সমানসঞ্ঞায যোজেতব্বং. নিমিত্তেন সঞ্জানন্তীপি হি পুন অপরায সঞ্ঞায চ সঞ্জাননস্স নিমিত্তং করোতীতি. তঞ্চ কুসলাকুসলকিরিযাজৰনসঞ্ঞং ধুরং ¶ কত্ৰা ৰেদিতব্বং. তং পনেতং অভিঞ্ঞাণকরণং কথং দট্ঠব্বন্তি আহ ‘‘ৰড্ঢকিস্স অভিঞ্ঞাণকরণমিৰা’’তি. যথা ৰড্ঢকিস্স দারূসু ‘‘ইদং উদ্ধং, ইদং অধো’’তি এৰং পচ্ছা সঞ্জাননপচ্চযভূতস্স সঞ্ঞাণস্স করণং, এৰমস্সা পুন সঞ্জাননপচ্চযনিমিত্তকরণন্তি ৰুত্তং হোতি. হত্থিদস্সকঅন্ধো ৰিয ‘‘ইদমেৰ সচ্চ’’ন্তি সঞ্ঞায যথাগহিতনিমিত্তৰসেন অভিনিৰেসকরণতো যথা…পে… পচ্চুপট্ঠানা. এতেন সঞ্ঞায আকারগ্গহণং কত্ৰা ঠিতস্স দিট্ঠিআদীনং উপ্পজ্জনতো অকুসলসঞ্ঞায অনুরূপৰসেন ফলপচ্চুপট্ঠানং দস্সিতং হোতি. অথ ৰা অভিনিৰেসকরণন্তি ‘‘ইদমেৰ সচ্চ’’ন্তি সঞ্ঞাভিনিৰেসমত্তমেৰ, তস্মা উপপরিক্খাভাৰেন যথাগহিতনিমিত্তৰসেন অভিনিৰেসাকারেন উপট্ঠানতো আকারপচ্চুপট্ঠানং ৰুত্তং. তিণপুরিসকেসু মিগপোতকানং ‘‘পুরিসা’’তি উপ্পন্নসঞ্ঞা ৰিয অৰিকপ্পসভাৰত্তা যথাউপট্ঠিতৰিসযপদট্ঠানা. এত্থ চ ঞাণৰিপ্পযুত্তসঞ্ঞায আকারগ্গহণৰসেন উপ্পজ্জনকালে চিত্তং অব্বোহারিকং সঞ্ঞানুগতিকং হোতি. ঞাণসম্পযুত্তে চিত্তে পন সসম্ভারপথৰিযা অনুগতা সেসধাতুযো ৰিয সঞ্ঞাচিত্তঞ্চ অব্বোহারিকং ঞাণানুগতিকং হোতি.

অভিসন্দহতীতি পবন্ধতি পৰত্তেতি, ‘‘গণ্হথ গণ্হথা’’তি ৰদন্তী ৰিয সম্পযুত্তধম্মে আরম্মণে পযোজেতি, সকসককিচ্চে চ পট্ঠপেতীতি অত্থো. চেতযিতলক্খণাতি নিদ্দোক্কন্তস্স পবুদ্ধক্খণে সম্ভমপ্পৰত্তি ৰিয চেতসো উস্সাহতাৰ ¶ লক্খণা. অথ ৰা ‘‘অভিসন্দহতী’’তি ৰুত্তত্তা পযোজনলক্খণাত্ৰেৰ অত্থো. আযূহনরসাতি চেতসিকইরিযনরসা, পযোগরসাতি ৰুত্তং হোতি. কুসলাকুসলকিরিযাজৰনসম্পযুত্তাযযেৰ পনেতং লব্ভতি. সংৰিদহনপচ্চুপট্ঠানাতি ‘‘ত্ৰং ইদং করোহী’’তি ৰিচারেন্তী ৰিয হোতীতি ৰিচারণপচ্চুপট্ঠানা. এতায হি পৰত্তমানায সব্বেপি সম্পযুত্তধম্মা যথা সকিচ্চপসুতা হোন্তি, তেনেৰ হেসা সকিচ্চপরকিচ্চসাধিকা ৰুত্তা. জেট্ঠসিস্সো পরে সজ্ঝাযনে উয্যোজেন্তো সযম্পি সজ্ঝাযতি. তস্মিঞ্হি সজ্ঝাযিতুং আরদ্ধে সেসসিস্সাপি সজ্ঝাযন্তি. মহাৰড্ঢকিস্মিম্পি ৰড্ঢকিকম্মং কাতুং আরদ্ধে ইতরেপি করোন্তি যেৰাতি আহ ‘‘জেট্ঠসিস্সমহাৰড্ঢকিআদযো ৰিযা’’তি. আদি-সদ্দেন জেট্ঠন্তেৰাসিকাদীনং গহণং.

যথাপচ্চযং পৰত্তমানানং ধম্মানং নত্থি কাচি ৰসৰত্তিতাতি ৰসৰত্তিভাৰনিৰারণত্থং ‘‘ৰিতক্কনং ৰিতক্কো’’তি ৰুত্তং. ঊহনং আরম্মণস্স পরিকপ্পনং, তস্মিং অভিনিরোপনন্তি ৰা ৰুত্তং হোতি. যস্মা চিত্তং ৰিতক্কবলেন আরম্মণং অভিরুল়্হং ৰিয হোতি, তস্মা ৰুত্তং ‘‘আরম্মণে ¶ চিত্তস্স অভিনিরোপনলক্খণো’’তি. যথা হি কোচি গামৰাসী পুরিসো রাজৰল্লভং, তংসম্বন্ধিনং মিত্তং ৰা নিস্সায রাজগেহং আরোহতি অনুপৰিসতি, এৰং ৰিতক্কং নিস্সায চিত্তং আরম্মণং আরোহতি. যদি এৰং কথং অৰিতক্কচিত্তং আরম্মণং আরোহতি, ন হি দ্ৰিপঞ্চৰিঞ্ঞাণদুতিযজ্ঝানাদিকে ৰিতক্কো উপলব্ভতি, যস্স বলেন তং আরম্মণং আরোহতি, তস্মা সভাৰতো ভাৰনাবলেন তত্থ অনুপ্পজ্জনকো? সচ্চং, তম্পি ৰিতক্কবলেন আরোহতি. যথা হি সো পুরিসো পরিচযেন তেন ৰিনাপি নিরাসঙ্কো রাজগেহং পৰিসতি, এৰং পরিচযেন ৰিতক্কেন ৰিনাপি অৰিতক্কচিত্তং ¶ আরম্মণং আরোহতি. পরিচযোতি চেত্থ সন্তানে অভিণ্হং পৰত্তচিত্তভাৰনাসঙ্খাতো পরিচযো. ৰিতক্কস্স হি সন্তানে অভিণ্হং পৰত্তস্স ৰসেন চিত্তস্স আরম্মণাভিরোহনং চিরপরিচিতং, তেন তং চিত্তং কদাচি ৰিতক্কেন ৰিনাপি তত্থ ৰত্ততেৰ. যথা তং ঞাণসহিতং হুত্ৰা সম্মসনৰসেন চিরপরিচিতং কদাচি ঞাণরহিতম্পি সম্মসনৰসেন পৰত্ততি, যথা ৰা কিলেসসহিতং হুত্ৰা পৰত্তং সব্বসো কিলেসরহিতম্পি পরিচযেন কিলেসৰাসনাৰসেন পৰত্ততি, এৰংসম্পদমিদং দট্ঠব্বং.

অথ ৰা দ্ৰিপঞ্চৰিঞ্ঞাণং অৰিতক্কম্পি ৰত্থারম্মণঘট্টনস্স বলৰতায, দুতিযজ্ঝানাদীনি চ হেট্ঠিমহেট্ঠিমভাৰনায বলৰতায আরম্মণং আরোহতীতি. আদিতো, অভিমুখং ৰা হননং পহরণমত্তং আহননং, পরিতো, পরিৰত্তেত্ৰা ৰা হননং ৰিসেসেন পহরণং পরিযাহননং, তং কিচ্চমস্সাতি আহননপরিযাহননরসো. তথা হি তেন যোগাৰচরো আরম্মণং ৰিতক্কাহতং ৰিতক্কপরিযাহতং করোতীতি ৰুচ্চতি. আনযনং চিত্তস্স আরম্মণে উপনযনং, আকড্ঢনং ৰা, তথা হুত্ৰা পচ্চুপট্ঠানমস্সাতি আনযনপচ্চুপট্ঠানো.

তেনাতি তেন ৰিচারেন করণভূতেন, হেতুভূতেন ৰা চিত্তং আরম্মণে ৰিচরতি অনুৰিচরতি, অৰিচারচিত্তস্স পন অৰিতক্কচিত্তে ৰুত্তানুসারেন পৰত্তি ৰেদিতব্বা. ৰিচরণং অনুসঞ্চরণং অনুপরিগমনং. স্ৰাযং ৰিসেসো সন্তানম্হি লব্ভমানো জৰনসন্তানে পাকটো হোতীতি দট্ঠব্বো. এস নযো সেসেসুপি. আরম্মণস্স অনুমজ্জনং অনুমসনং পরিমজ্জনমস্স লক্খণন্তি আরম্মণানুমজ্জনলক্খণো. তথা হি ৰিচারো পরিমজ্জনহত্থো ৰিয, সংসরণহত্থো ৰিযাতি ৰুচ্চতি. তত্থাতি আরম্মণে. সহজাতানং ¶ অনুযোজনং আরম্মণে অনুৰিচরণসঙ্খাতঅনুমজ্জনৰসেন ৰেদিতব্বং. ধম্মানঞ্হি সভাৰৰিনিমুত্তা কাচি কিরিযা নাম নত্থি. তথাগহেতব্বাকারো বোধনেয্যজনানুরোধেন পরমত্থতো একসভাৰোপি সভাৰধম্মো পরিযাযৰচনেহি ¶ ৰিসযসমারোপিতরূপেহি বহূহি পকারেহি পকাসীযতি. এৰঞ্হি সো সুট্ঠু পকাসিতো হোতীতি. অনুপবন্ধপচ্চুপট্ঠানোতি আরম্মণে চিত্তস্স অৰিচ্ছিন্নস্স ৰিয পৰত্তিপচ্চুপট্ঠানো. তথা হি সো অনুসন্ধানতাতি নিদ্দিট্ঠো.

এত্থ চ ৰিচারতো ওল়ারিকট্ঠেন তস্সেৰ পুব্বঙ্গমট্ঠেন পঠমঘণ্টাভিরৰো ৰিয চেতসো পঠমাভিনিপাতো ৰিতক্কো, অনুরৰো ৰিয অনুসঞ্চরণং ৰিচারো. যথা হি ঘণ্টাভিঘাতজো পঠমাভিরৰো অনুরৰতো ওল়ারিকো, পুব্বঙ্গমো চ হোতি, এৰং আরম্মণাভিরোপনট্ঠেন ৰিতক্কো ওল়ারিকো, পুব্বঙ্গমো ৰিয চ হোতি. ততো সুখুমট্ঠেন অনুমজ্জনসভাৰেন চ ঘণ্টানুরৰো ৰিয অনুপবন্ধো ৰিচারো. ৰিপ্ফারৰা চেত্থ ৰিতক্কো চিত্তস্স পঠমুপ্পত্তিকালে চিত্তস্স পরিপ্ফন্দনভূতো আকাসে উপ্পতিতুকামস্স সকুণস্স পক্খৰিক্খেপো ৰিয, পদুমাভিমুখপাতো ৰিয চ গন্ধানুবন্ধচেতসো ভমরস্স. সন্তৰুত্তি ৰিচারো চিত্তস্স নাতিপরিপ্ফন্দনভাৰো, আকাসে উপ্পতিতস্স সকুণস্স পক্খপ্পসারণং ৰিয, পদুমস্স উপরিভাগে পরিব্ভমনং ৰিয চ পদুমাভিমুখপতিতস্স ভমরস্স. আগমট্ঠকথাযং পন ৰিপরিযাযেন আগতং. তথা চ ৰুত্তং দুকনিপাতট্ঠকথাযং –

‘‘আকাসে গচ্ছতো মহাসকুণস্স উভোহি পক্খেহি ৰাতং গহেত্ৰা পক্খে সন্নিসীদাপেত্ৰা গমনং ৰিয আরম্মণে চেতসো অভিনিরোপনভাৰেন পৰত্তো ¶ ৰিতক্কো, ৰাতগ্গহণত্থং পক্খে ফন্দাপযমানস্স গমনং ৰিয অনুমজ্জনভাৰেন পৰত্তো ৰিচারো’’তি.

তম্পি অনুপবন্ধেন পৰত্তিযং যুজ্জতি. তথা হি উপচারে, অপ্পনাযং ৰা সন্তানেন পৰত্তিযং ৰিতক্কো নিচ্চলো হুত্ৰা আরম্মণং অনুপৰিসিত্ৰা ৰিয পৰত্ততি, ন পঠমাভিনিপাতে ৰিয পাকটো হোতীতি.

পিনযতীতি কাযচিত্তং অপ্পেতি, ৰড্ঢেতি ৰা. সম্পিযাযনলক্খণাতি আরম্মণং কল্লতো গহণলক্খণা. পীণনরসাতি কাযচিত্তানং পরিব্রূহনকিচ্চা. ফরণরসাতি পণীতরূপেহি কাযস্স ব্যাপনরসা, অত্তনা সম্পযুত্তচিত্তসমুট্ঠানেহি রূপেহি সকলরূপকাযব্যাপনং ¶ করোতীতি ৰুত্তং হোতি. ন হি অঞ্ঞথা ইমিস্সা ফরণং হোতি, ধম্মানং অব্যাপারতায কেসগ্গমত্তম্পি সঙ্কমনাভাৰতো. উদগ্গভাৰো ওদগ্যং.

একং আরম্মণং অগ্গমেতস্সাতি একগ্গং, চিত্তং, যেন পন ধম্মেন যোগতো তং একগ্গং নাম হোতি, সো একগ্গভাৰো. সো পন চিত্তস্সেৰ হোতি, ন যস্স কস্সচীতি আহ ‘‘চিত্তস্স একগ্গভাৰো’’তি, নিৰাতে দীপসিখায ঠিতি ৰিয চিত্তস্স ঠিতীতি ৰুত্তং হোতি. ৰিসারস্স ব্যগ্গভাৰস্স পটিপক্খো সভাৰো অৰিসারো, ন ৰিসারাভাৰমত্তং, তং ইমস্স লক্খণন্তি আহ ‘‘অৰিসারলক্খণো’’তি. অৰিক্খেপো সম্পযুত্তধম্মানং অৰিক্খিত্ততা, অৰিসারাৰিক্খেপানং সমাধানভাৰতো অত্থতো ৰিসেসাভাৰেপি সমুখেন, সম্পযুত্তমুখেন চ উভযং ৰুত্তন্তি দট্ঠব্বং. অৰূপসমলক্খণস্স ৰিক্খেপস্স পটিপক্খতায চিত্তস্স উপসমনাকারেন পচ্চুপট্ঠাতীতি উপসমপচ্চুপট্ঠানো. ৰিসেসতোতি যেভুয্যেন. সুখৰিরহিতোপি হি অত্থি সমাধীতি সো যেভুয্যেন সুখপদট্ঠানো হোতি. অথ ৰা ¶ ৰিসেসতোতি অতিসযেন. ‘‘সুখিনো চিত্তং সমাধিযতী’’তি (অ. নি. ১১.১১) ৰচনতো হি সুখং সমাধিস্স ৰিসেসকারণং সুখৰিরহিতস্সপি তদুপনিস্সযেনেৰ সমিজ্ঝনতো.

সদ্দহন্তি এতাযাতি কম্মফলাদিসদ্দহনকিরিযায পৰত্তমানানং ধম্মানং তত্থ আধিপচ্চভাৰেন সদ্ধায পচ্চযতং দস্সেতি. তস্সা হি ধম্মানং তথা পচ্চযভাৰে সতি তংসমঙ্গিপুগ্গলো ‘‘সদ্দহতী’’তি ৰোহরীযতি. সদ্দহনং সদ্ধেয্যৰত্থুনো পত্তিযাযনং, তং লক্খণমেতিস্সাতি সদ্দহনলক্খণা. কালুসিযমলং ৰিধমেত্ৰা সম্পযুত্তানং, পুগ্গলস্সেৰ ৰা পসাদং অনাৰিলভাৰকারণং কিচ্চমেতিস্সাতি পসাদনরসা. যথা কথং ৰিযাতি আহ ‘‘উদকপ্পসাদকমণি ৰিযা’’তি. অকালুসিযপচ্চুপট্ঠানাতি অনাৰিলভাৰপচ্চুপট্ঠানা. রতনত্তযং কম্মং কম্মফলঞ্চ সদ্ধেয্যৰত্থু, তং ইমিস্সা আসন্নকারণন্তি সদ্ধেয্যৰত্থুপদট্ঠানা. ন হি সদ্ধায অৰত্থুভূতেসু তিত্থিযাদীসু সা উপ্পজ্জতি. সা পনাযং কুসলধম্মানং আদানে হত্থো ৰিয, সব্বসম্পত্তিসম্পদানে ৰিত্তং ৰিয, অমতকসিফলফলনে বীজং ৰিয চ দট্ঠব্বা. ‘‘সদ্ধাহত্থো, মহানাম, অরিযসাৰকো, সদ্ধীধ ৰিত্তং পুরিসস্স সেট্ঠং (সং. নি. ১.২৪৬; সু. নি. ১৮৪), সদ্ধা বীজং তপো ৰুট্ঠী’’তিআদিৰচনঞ্হেত্থ (সং. নি. ১.১৯৭; সু. নি. ৭৭) সাধকং.

সরন্তি ২৩৭ এতাযাতি সরণকিরিযায পৰত্তমানানং ধম্মানং তত্থ আধিপচ্চভাৰেন সতিযা পচ্চযতং দস্সেতি. তস্সা হি ধম্মানং তথা পচ্চযভাৰে সতি তংসমঙ্গিপুগ্গলো ‘‘সরতী’’তি ৰোহরীযতি. উদকে অলাবু ৰিয পিলৰিত্ৰা গন্তুং অদত্ৰা পাসাণস্স ৰিয নিচ্চলস্স আরম্মণস্স ঠপনং অসম্মুট্ঠতাকরণং অপিলাপনং, তং লক্খণমস্সাতি অপিলাপনলক্খণা. সা হি আরম্মণে দল়্হং ¶ পতিট্ঠিতত্তা এসিকা ৰিয ৰুচ্চতি. সম্মোসপচ্চনীককিচ্চং অসম্মোসরসো, ন সম্মোসাভাৰমত্তং. ‘‘সতারক্খেন চেতসা ৰিহরতী’’তি (অ. নি. ১০.২০) ৰুত্তত্তা চেতোগুণরতনহারকানং কিলেসচোরানং নিৰারণতো আহ ‘‘আরক্খপচ্চুপট্ঠানা’’তি. তথা হেসা চক্খুদ্ৰারাদিরক্খনতো দোৰারিকো ৰিযাতি ৰুচ্চতি. পঠমং সঞ্ঞায থিরুপ্পন্নভাৰে পচ্ছা সতিযা পতিট্ঠানভাৰতো আহ ‘‘থিরসঞ্ঞাপদট্ঠানা’’তি. অথ সতিসঞ্ঞানং কিং নানাকরণন্তি? সঞ্ঞা তাৰ পঠমং অগ্গহিতনিমিত্তং সঞ্জানাতি, গহিতনিমিত্তে পুন পচ্চাভিঞ্ঞাণপচ্চযনিমিত্তং করোতি, পঠমং অগ্গহিতে পন সঞ্ঞাকিচ্চং অপ্পধানং হোতি, সতি পন পঠমং অগ্গহিতনিমিত্তম্পি সরতি গহিতনিমিত্তম্পি, গহিতনিমিত্তে পন সতিকিচ্চং গুণভূতং হোতীতি ইদমেৰ তাসং নানত্তং.

ৰীরভাৰোতি যেন ৰীরিযেন ৰীরো নাম হোতি, সো ধম্মো. ৰীরানং ৰা কম্মন্তি যেন কম্মেন ৰীরো নাম হোতি, তং ৰীরানং কম্মং নাম. ৰীরিযং পনস্স সাধকভাৰতো তথা ৰুত্তং. ধম্মৰিনিমুত্তং ৰা কিঞ্চি কম্মং নত্থীতি ৰীরিযমেৰ কম্মভাৰেন ৰুত্তন্তি দট্ঠব্বং. ৰিধিনা ঈরেতব্বং পৰত্তেতব্বন্তি ৰা ৰীরিযং. উস্সাহো তং তং কিচ্চং সমারম্ভো, পরক্কমো ৰা. উপত্থম্ভনং পন সম্পযুত্তধম্মানং কোসজ্জপক্খে পতিতুং অদত্ৰা ধারণং অনুবলপ্পদানং. সম্পযুত্তধম্মানং সংসীদনভাৰনিৰারকো ধম্মো, ন সংসীদনাভাৰমত্তং, অসংসীদনভাৰেন পচ্চুপট্ঠাতীতি অসংসীদনভাৰপচ্চুপট্ঠানং. ‘‘সংৰিগ্গো যোনিসো পদহতী’’তি (অ. নি. ৪.১১৩) ৰচনতো সংৰেগপদট্ঠানং. সংৰেগোতি চেত্থ সংৰেগমযং ঞাণং. অসংৰেগপুব্বিকায পন কুসলকিরিযায ৰীরিযারম্ভৰত্থুপদট্ঠানং. তত্থ ৰীরিযারম্ভৰত্থূনি নাম –

‘‘মগ্গো ¶ গন্তব্বো হোতি, মগ্গো গতো. কম্মং কাতব্বং হোতি, কম্মং কতং. অপ্পমত্তকো আবাধো উপ্পন্নো হোতি, গিলানা ৰুট্ঠিতো হোতি, অচিরৰুট্ঠিতো গেলঞ্ঞা. গামং ৰা নিগমং ৰা পিণ্ডায চরন্তো ন লভতি, লূখস্স ৰা পণীতস্স ৰা ভোজনস্স যাৰদত্থং পারিপূরিং লভতি…পে… পারিপূরি’’ন্তি –

এৰং ¶ ৰুত্তানি এতানি অনুরূপপচ্চৰেক্খণসহিতানি অট্ঠ ৰীরিযারম্ভৰত্থূনি, তম্মূলকানি ৰা পচ্চৰেক্খণানি. এত্থ চ ৰিতক্কো সম্পযুত্তধম্মে আরম্মণং আরোপেতি. চেতনা তে তংতংকিচ্চেসু নিযোজেতি. ৰীরিযং পন তে সংসীদিতুং অদত্ৰা উস্সাহেতীতি অযং ৰিতক্কচেতনাৰীরিযানং ৰিসেসো.

ৰিজাননলক্খণাতি ৰিসেসেন জাননলক্খণা, যথাসভাৰপটিৰেধলক্খণাতি অত্থো. ৰিসযস্স আরম্মণস্স ওভাসনং পকাসনং তপ্পটিচ্ছাদকসম্মোহন্ধকারস্স ৰিধমনতোতি ৰিসযোভাসনং, তং কিচ্চমস্সাতি ৰিসযোভাসনরসা. কত্থচি ৰিসযে অসম্মুয্হনাকারেন সম্মোহপটিপক্খতায ৰা পচ্চুপট্ঠানতো সম্মোহাভাৰস্স পচ্চুপট্ঠানতো ৰা অসম্মোহপচ্চুপট্ঠানা.

অত্তনা অনুপালেতব্বানং সহজাতধম্মানং অনুপালনং জীৰিতস্স ব্যাপারো, তঞ্চ তেসং জীৰনন্তি তং তস্স কারণভাৰং পুরক্খত্ৰা ৰুত্তং ‘‘জীৰন্তি তেনা’’তি. রূপারূপজীৰিতিন্দ্রিযস্স অনুরূপতো লক্খণাদিকং দস্সেতুং ‘‘অত্তনা অৰিনিভুত্তান’’ন্তি ৰুত্তং. ‘‘সম্পযুত্তান’’ন্তি হি ৰুচ্চমানে রূপধম্মানং সম্পযোগাভাৰতো রূপজীৰিতিন্দ্রিযস্স সঙ্গহো ন সিযা. ‘‘অৰিনিভুত্তান’’ন্তি পন ৰুত্তত্তা যানি ¶ অৰিনিব্ভোগরূপানি রূপজীৰিতিন্দ্রিযেন সদ্ধিং অৰিনিভুত্তানি অৰিসংসট্ঠানি. যে চ অরূপধম্মা অরূপজীৰিতিন্দ্রিযেন সম্পযুত্তা, তেসং সব্বেসং সঙ্গহো হোতীতি. পৰত্তনরসন্তি উপ্পাদতো যাৰ ভঙ্গা অনুপালনতো অন্তরা অনিৰত্তনসভাৰসাধনেন তেসং পৰত্তনকিচ্চং. কেচি পন ‘‘রূপজীৰিতিন্দ্রিযং তেসং ঠিতিক্খণতো পট্ঠায, অরূপজীৰিতিন্দ্রিযং উপ্পাদতো পট্ঠায পৰত্তিযা পচ্চযো’’তি ৰদন্তি, তং ন যুত্তং. পট্ঠানে হি ‘‘অব্যাকতং ধম্মং পটিচ্চ অসঞ্ঞসত্তানং একং মহাভূতং পটিচ্চ ইন্দ্রিযপচ্চযং কম্মপচ্চযসদিস’’ন্তি অসঞ্ঞসত্তানং ইন্দ্রিযপচ্চযো কম্মপচ্চযসদিসং কত্ৰা ৰুত্তো, তস্মা রূপজীৰিতিন্দ্রিযম্পি উপ্পাদতো পট্ঠায পচ্চযো হোতীতি দট্ঠব্বং. উপ্পাদতো যাৰ ভঙ্গা ঠপনতো ঠপনপচ্চুপট্ঠানং. অনুপালনৰসেন যাপযিতব্বা পৰত্তেতব্বা ধম্মা পদট্ঠানমস্সাতি যাপযিতব্বধম্মপদট্ঠানং. যদি এৰং তেসং অনুপালনাদিসাধকং, কথং তেসং নিরোধো হোতি. এৰঞ্হি সব্বকালং ঠাতব্বন্তি আহ ‘‘সন্তেপি চা’’তিআদি. অনুপালনলক্খণাদিম্হীতি আদি-সদ্দেন পৰত্তনরসাদিমেৰ সঙ্গণ্হাতি. অত্থিক্খণেযেৰাতি অত্তনা অনুপালেতব্বানং, অত্তনো ৰা অত্থিক্খণেযেৰ. উদকন্তি তল়াকগতজলং, দণ্ডগতজলং ৰা ¶ . তত্থ তল়াকগতউদকস্স গহণে অত্তনা অনুপালেতব্বধম্মানং অত্থিক্খণে অনুপালনং সাধিতং হোতি, দণ্ডগতজলস্স পন গহণে অত্তনো অত্থিক্খণে অনুপালনং. অত্তনা অনুপ্পাদিতধম্মে কথং পালেতীতি আহ ‘‘ধাতি ৰিয কুমার’’ন্তি. যদি সেসধম্মানং পৰত্তিকারণেন কেনচি ভৰিতব্বং, জীৰিতস্স পন কিং পৰত্তিকারণন্তি আহ ‘‘সযং…পে… পৰত্ততী’’তি. যথা কথং ৰিযাতি আহ ‘‘নিযামকো ৰিযা’’তি. সোপি অত্তনা পৰত্তিতনাৰাসম্বন্ধেন পৰত্ততি. যদি ধম্মানং পৰত্তি জীৰিতিন্দ্রিযপটিবদ্ধং, ভঙ্গতো উদ্ধম্পি কিং পন পৰত্তেতীতি আহ ‘‘ন ভঙ্গতো উদ্ধ’’ন্তি. কস্মাতি আহ ‘‘অত্তনো ¶ চ পৰত্তেতব্বানঞ্চ অভাৰা’’তি. ভঙ্গক্খণে পন কথন্তি আহ ‘‘ন ভঙ্গক্খণে ঠপেতী’’তি.

যস্মা পন লোভপটিপক্খো অলোভো হোতি, যে ধম্মা তেন সম্পযুত্তা, তংসমঙ্গিনো ৰা সত্তা, তে ন লুব্ভন্তি, সযম্পি কদাচি ন লুব্ভতেৰ, অত্থতো ৰা অলুব্ভনাকারো এৰ চ সো হোতি, তস্মা ৰুত্তং ‘‘ন লুব্ভন্তি তেনা’’তিআদি. এস নযো ‘‘ন দুস্সন্তি তেনা’’তিআদীসুপি. অলগ্গভাৰো আরম্মণং নিস্সায পৰত্তন্তস্সপি তত্থ অনাসত্ততা. তেনাহ ‘‘কমলদলে জলবিন্দু ৰিযা’’তি. অপরিগ্গহো কস্সচি ৰত্থুনো মমত্তৰসেন অসঙ্গহো. মুত্তভিক্খু ৰিযাতি খীণাসৰভিক্খু ৰিয. সো হি মুত্তরাগত্তা কত্থচি মমাযনরহিতো হোতি. অনল্লীনো ভাৰো অধিপ্পাযো এতস্সাতি অনল্লীনভাৰো. এৰঞ্হি ‘‘অসুচিম্হি পতিতপুরিসো ৰিযা’’তি উপমায সমেতি. যথা হি তস্স পুরিসস্স সতিপি কাযেন অল্লীযনে ভাৰো অনল্লীনো, এৰং অলোভোপি আরম্মণকরণৰসেন গহিতেপি আরম্মণে অলগ্গভাৰেন অনল্লীনভাৰো অনল্লীনাকারোযেৰ পৰত্ততি. এৰংসভাৰো হি সো ধম্মোতি.

চণ্ডিকস্স ভাৰো চণ্ডিক্কং, ফরুসভাৰো, অত্থতো পন কোপোযেৰ, তপ্পটিপক্খো অফরুসভাৰো অচণ্ডিক্কং. অৰিরোধো অৰিগ্গহো অপ্পটিপক্খো সভাৰো. আঘাতৰিনযনরসোতি এত্থ আঘাতো নাম পরস্স অত্তানং, অত্তনো পরং উদ্দিস্স, পরস্সেৰ চ পরং উদ্দিস্স পৰত্তো উপনাহো বলৰকোপো. তস্স ৰিনযনরসো অপনযনরসো. সোম্মভাৰো মজ্জনৰসেন হিলাদনিযতা সীতলভাৰো. তেনাহ ‘‘পুণ্ণচন্দো ৰিযা’’তি.

কাযদুচ্চরীতাদীহীতি ¶ হেতুম্হি করণৰচনং. হিরীযতি লজ্জনাকারেন জিগুচ্ছিযতি. তেহিযেৰাতি কাযদুচ্চরিতাদীহিযেৰ. ওত্তপ্পতীতি উব্বিজ্জতি. হিরী পাপে গূথে ৰিয পস্সন্তী জিগুচ্ছতীতি ¶ আহ ‘‘পাপতো জিগুচ্ছনলক্খণা হিরী’’তি. ওত্তপ্পং তে উণ্হং ৰিয পস্সন্তং ততো উত্তসতীতি ৰুত্তং ‘‘উত্তাসলক্খণং ওত্তপ্প’’ন্তি. উভোপি পাপানং অকরণরসাতি লজ্জনাকারেন পাপানং অকরণরসা হিরী, উত্তাসাকারেন ওত্তপ্পং. পাপতো সঙ্কোচনপচ্চুপট্ঠানাতি ৰুত্তপ্পকারেনেৰ পাপতো সঙ্কোচনাকারেন পচ্চুপট্ঠানা. অত্তগারৰপরগারৰপদট্ঠানাতি অত্তগারৰপদট্ঠানা হিরী অজ্ঝত্তসমুট্ঠানতায, অত্তাধিপতিতায চ. পরগারৰপদট্ঠানং ওত্তপ্পং বহিদ্ধাসমুট্ঠানতায, লোকাধিপতিতায চ. অত্তানঞ্হি গরুং কত্ৰা হিরিযা পাপং পজহতি কুলৰধূ ৰিয. পরং গরুং কত্ৰা ওত্তপ্পেন পাপং পজহতি ৰেসিযা ৰিয. অজ্ঝত্তসমুট্ঠানাদিতা চ নেসং তত্থ তত্থ পাকটভাৰেন ৰেদিতব্বা, ন পন তেসং কদাচি অঞ্ঞমঞ্ঞৰিযোগতো. ন হি লজ্জনং নিব্ভযং ৰা পাপভযং ৰা অলজ্জনং অত্থীতি. হিরিযা বলৰভাৰে পন ওত্তপ্পং অব্বোহারিকং হোতি, ওত্তপ্পস্স বলৰভাৰে হিরী অব্বোহারিকা. ইমে চ দ্ৰে ধম্মা ‘‘লোকপালা’’তি ৰুচ্চন্তি. যথাহ –

‘‘দ্ৰেমে, ভিক্খৰে, সুক্কা ধম্মা লোকং পালেন্তি. কতমে দ্ৰে? হিরী চ ওত্তপ্পঞ্চ, ইমে খো, ভিক্খৰে, দ্ৰে সুক্কা ধম্মা লোকং ন পালেয্যুং, নযিধ পঞ্ঞাযেথ ‘মাতা’তি ৰা ‘মাতুচ্ছা’তি ৰা ‘মাতুলানী’তি ৰা’’তিআদি (অ. নি. ২.৯).

পস্সম্ভনং দরথৰূপসমো, কায-সদ্দো সমূহৰচনো. সো চেত্থ ৰেদনাদিক্খন্ধত্তযং. ৰত্তিচ্ছাৰসেন হি সদ্দো ৰিসিট্ঠৰুত্তি হোতীতি আহ ‘‘কাযোতি চেত্থা’’তিআদি. ৰেদনাদযোতি ¶ ৰেদনাক্খন্ধো সঞ্ঞাক্খন্ধো সঙ্খারক্খন্ধোতি তযো খন্ধা. তথা চ ৰুত্তং তত্থ ‘‘কতমা তস্মিং সমযে কাযপস্সদ্ধি হোতি, যা তস্মিং সমযে ৰেদনাক্খন্ধস্সা’’তিআদি (ধ. স. ৪০). দরথো সারম্ভো দোমনস্সপচ্চযানং উদ্ধচ্চাদীনং কিলেসানং, তথা পৰত্তানং ৰা চতুন্নং খন্ধানমেতং অধিৰচনং. তস্স ৰূপসমং লক্খণমস্সাতি কাযচিত্তদরথৰূপসমলক্খণা. কাযচিত্ত…পে… রসাতি যথাৰুত্তানমেৰ পটিপক্খধম্মানং অভিভৰনরসা. দরথনিম্মদ্দনেন পরিল়াহপরিপ্ফন্দনৰিরহিতো সীতিভাৰো অপরিপ্ফন্দনসীতিভাৰো. অৰূপসমো পরিপ্ফন্দনং অসন্তৰুত্তিতা. উদ্ধচ্চাদিকিলেসাতি উদ্ধচ্চপ্পধানা উদ্ধচ্চাধিকচিত্তুপ্পাদসম্পযুত্তা কিলেসা. তেপি হি উদ্ধচ্চৰসেন অৰূপসমকরা. উদ্ধচ্চং ৰা আদিং কত্ৰা সব্বেযেৰ কিলেসা উদ্ধচ্চাদিকিলেসা. এৰং সেসেসুপি.

গরুভাৰো ¶ দন্ধতা, থিনমিদ্ধাধিকানং তথা পৰত্তানং ৰা চতুন্নং খন্ধানমেতং অধিৰচনং. দন্ধতায পটিপক্খো অদন্ধতা অগরুভাৰো.

থদ্ধভাৰো থম্ভো. দিট্ঠিমানাধিকানং, তপ্পধানানং ৰা চতুন্নং খন্ধানং এতং নামং. থদ্ধভাৰনিম্মদ্দনতোযেৰ কত্থচি আরম্মণে অপ্পটিহতাকারেন পচ্চুপট্ঠন্তি, সম্পযুত্তানং ৰা তত্থ অপ্পটিঘাতং পচ্চুপট্ঠাপেন্তীতি অপ্পটিঘাতপচ্চুপট্ঠানা.

কম্মনি সাধু কম্মঞ্ঞং, ন কম্মঞ্ঞং অকম্মঞ্ঞং, তস্স ভাৰো অকম্মঞ্ঞভাৰো, দানসীলাদিপুঞ্ঞকিরিযায অসমত্থতা. অত্থতো কামচ্ছন্দাদিসংকিলেসধম্মা, তপ্পধানা ৰা চত্তারো অকুসলক্খন্ধা. অকম্মঞ্ঞভাৰনিম্মদ্দনেনেৰ সম্পন্নাকারেন আরম্মণস্স গহণং আরম্মণকরণসম্পত্তি. ৰুত্তাৰসেসা কামচ্ছন্দাদযো, তদেকট্ঠা চ সংকিলেসধম্মা সেসনীৰরণাদযো. ইমা পন দ্ৰে ৰিনিবন্ধনিম্মদ্দনেন ¶ পসাদনীযৰত্থূসু পসাদাৰহা, হিতকিরিযাসু ৰিনিযোগক্খমভাৰাৰহা সুৰণ্ণৰিসুদ্ধি ৰিযাতি দট্ঠব্বা.

গেলঞ্ঞং অস্সদ্ধিযাদযো, তদেকট্ঠা চ পাপধম্মা, তপ্পটিপক্খো অগেলঞ্ঞভাৰো লক্খণং এতাসন্তি অগেলঞ্ঞভাৰলক্খণা. গেলঞ্ঞনিম্মদ্দনেনেৰ নত্থি এতাসং আদীনৰো দোসো উপদ্দৰো ৰা, ন ৰা এতা আদীনং কপণং ৰন্তি পৰত্তন্তীতি নিরাদীনৰা, তেনাকারেন পচ্চুপট্ঠন্তি, তং ৰা সম্পযুত্তেসু পচ্চুপট্ঠাপেন্তীতি নিরাদীনৰপচ্চুপট্ঠানা.

কাযসম্বন্ধী, চিত্তসম্বন্ধী চ উজুভাৰোতি লক্খিতব্বতায কাযচিত্তানং অজ্জৰলক্খণা. কাযচিত্তানং নঙ্গলসীসচন্দকোটিগোমুত্তৰঙ্কতাসঙ্খাতানং কুটিলভাৰানং অত্থতো মাযাসাঠেয্যাদিভূতানং নিম্মদ্দনতো কাযচিত্তানং কুটিলভাৰনিম্মদ্দনরসা. ততোযেৰ সব্বথাপি অজিম্হভাৰেন পচ্চুপট্ঠন্তি, সম্পযুত্তানং ৰা অজিম্হতং পচ্চুপট্ঠাপেন্তীতি অজিম্হতাপচ্চুপট্ঠানা.

ননু চ কাযপস্সদ্ধিআদীনং দ্ৰিন্নং দ্ৰিন্নং ধম্মানং একেকপটিপক্খত্তা দরথনিম্মদ্দনাদিকিচ্চং একেকমেৰ করোতি. কস্মা পন দ্ৰে দ্ৰে ধম্মা ৰুত্তাতি? ন খো পনেৰং চিন্তিতব্বং ভগৰতাপি তথেৰ দেসিতত্তা. কস্মা পন ভগৰতা তথা দেসিতা? সভাৰধম্মভাৰতো. ন হি ভগৰতা পুব্বে অৰিজ্জমানা এতে ধম্মা দেসনাৰসেন উপ্পাদিতা, অথ ¶ খো সভাৰতো ৰিজ্জমানাযেৰ সযম্ভুঞাণেন সম্মা সচ্ছিকত্ৰা যথাসভাৰা দেসিতা, তস্মা কথমেত্থ ভগৰতা সভাৰতো ৰিজ্জমানস্স হাপনং কাতুং সক্কা. সভাৰতো ৰিজ্জমানতায চেত্থ ভগৰতো ৰচনমেৰ পমাণং. ন হি ভগৰা যথাধম্মসাসনাধিকারে অযথাধম্মং কথেয্যাতি, যস্স পন ৰিজ্জমানস্সাপি অকথনং, তং অঞ্ঞহেতুকং. ন চেত্থ তাদিসো হেতু উপলব্ভতি, যেন ইমেসু ¶ একেকধম্মস্স অকথনন্তি. যথা পন দ্ৰিন্নং পুরিসানং একোযেৰ ৰেরিকো হোতি, তস্স তে পুরিসা ওতারং দিস্ৰা একতো হুত্ৰাৰ হনন্তি, এৰমেৰ দ্ৰে দ্ৰে ধম্মা একতো হুত্ৰা একং পটিপক্খধম্মং হনন্তি, যথা চ পনেতে ৰিসুং দিস্ৰাপি তং ৰেরিং হনন্তি, ন এৰমেতে তং ৰিসুং হনন্তি তেসং অঞ্ঞমঞ্ঞং অৰিনাভাৰতোতি, তস্মা এতে পটিপক্খধম্মানং একেকভাৰেপি দ্ৰে দ্ৰেযেৰ ৰুত্তাতি, অপিচ চিত্তপস্সদ্ধিআদীহি চিত্তমেৰ পস্সদ্ধি লহু মুদু কম্মঞ্ঞং পগুণং উজুঞ্চ হোতি. কাযপস্সদ্ধিআদীহি পন রূপকাযোপীতি তদত্থদস্সনত্থং ভগৰতা এত্থেৰ দুৰিধতা ৰুত্তা, ন সমাধিআদীসু.

ছন্দনং ছন্দো, আরম্মণেন অত্থিকতা. ‘‘ছন্দো কামো’’তিআদীসু (মহানি. ১) পন তণ্হাপি ছন্দোতি ৰুচ্চতি. ‘‘ছন্দং জনেতি ৰাযমতী’’তিআদীসু ৰীরিযম্পীতি ততো নিৰত্তনত্থং ৰুত্তং ‘‘কত্তুকম্যতাযেতং অধিৰচন’’ন্তি. কত্তুকম্যতা ৰুচ্চতি করণিচ্ছা. চেতসিকস্স ধম্মস্স সারম্মণত্তা করণিচ্ছা নাম আরম্মণস্স আলম্বিতুকামতামুখেনেৰ হোতীতি আরম্মণকরণিচ্ছালক্খণো ছন্দো ‘‘কত্তুকম্যতালক্খণো’’তি ৰুত্তো. তেনেৰাহ ‘‘আরম্মণপরিযেসনরসো, আরম্মণেন অত্থিকতাপচ্চুপট্ঠানো’’তি চ. যদগ্গেন পনাযং অত্তনো আরম্মণপরিযেসনরসো, তদগ্গেন সম্পযুত্তধম্মানম্পি হোতিযেৰ একারম্মণতায. তেন তেসং আরম্মণগ্গহণে চেতসো হত্থপ্পসারণং ৰিযাতি ৰুচ্চতি. কথং পন দানৰত্থুৰিস্সজ্জনৰসেন পৰত্তমানচেতনাসম্পযুত্তো ছন্দো আরম্মণেন অত্থিকো হোতীতি? ননু অৰোচুম্হা ‘‘আরম্মণকরণিচ্ছালক্খণো’’তি, তস্মা সঙ্গামগতইস্সাসস্স খিপিতব্বউসূনং গহণে অত্থিকতা ৰিয দানৰত্থুৰিস্সজ্জনৰসেন ¶ পৰত্তচ্ছন্দোপি ৰিস্সজ্জিতব্বেন তেন অত্থিকোযেৰাতি. স্ৰাযং কুসলেসু উপ্পন্নো কুসলচ্ছন্দো নাম হোতি যোনিসোমনসিকারসমুট্ঠানত্তা. তব্বিপরীততো পন অকুসলেসু উপ্পন্নো অকুসলচ্ছন্দো.

অধিমুচ্চনং আরম্মণে সন্নিট্ঠানৰসেন ৰেদিতব্বং, ন পসাদনৰসেন. তেনাহ ‘‘সন্নিট্ঠানলক্খণো’’তি. যথা তথা হি আরম্মণে নিচ্ছযনং অধিমুচ্চনং অনধিমুচ্চন্তস্স পাণাতিপাতাদীসু ¶ , দানাদীসু ৰা পৰত্তিযা অভাৰতো, সদ্ধা পন পসাদনীযেসু পসাদাধিমোক্খোতি অযমেতেসং ৰিসেসো. ৰোট্ঠব্বনং পন যথা সন্তীরিতে অত্থে নিচ্ছযনাকারেন পৰত্তিত্ৰা পরতো পৰত্তমানানং তথা পৰত্তিযা পচ্চযো হোতি. যদি এৰং ৰিচিকিচ্ছাসম্পযুত্তেসু ধম্মেসু কথন্তি? তেসম্পি একংসেনেৰ সংসপ্পনাকারস্স পচ্চযতায দট্ঠব্বং, দারকস্স ৰিয ইতো চিতো চ সংসপ্পনস্স ‘‘করিস্সামি, ন করিস্সামী’’তি অনিচ্ছযস্স পটিপক্খকিরিযা অসংসপ্পনং. যেসু চিত্তুপ্পাদেসু অযং সন্নিট্ঠানলক্খণো অধিমোক্খো, তেসং আরম্মণধম্মোযেৰ সন্নিট্ঠাতব্বত্তা সন্নিট্ঠেয্যধম্মো. সো পদট্ঠানমস্সাতি সন্নিট্ঠেয্যধম্মপদট্ঠানো. ইন্দখিলোতি এসিকাথম্ভো ৰুচ্চতি.

তেসু তেসু ধম্মেসূতি যেসু ধম্মেসু সযং উপ্পন্না, তেসু অত্তনা সম্পযুত্তেসু চিত্তচেতসিকধম্মেসু. অনারম্মণত্তেপি হি তেসু সমপ্পৰত্তেসু উদাসীনভাৰো ‘‘তত্রমজ্ঝত্ততা’’তি ৰুচ্চতি. সমং অৰিসমং ৰাহিতং অত্তনা পৰত্তিতসম্পযুত্তানং ৰা যথাসককিচ্চেসু পৰত্তনং লক্খণমেতিস্সাতি সমৰাহিতলক্খণা. তত্থ সমং হুত্ৰা পৰত্তনলক্খণাতি অত্থে অপক্খপতিতভাৰো ৰুত্তো হোতি, অৰিসমং কত্ৰা পৰত্তনলক্খণাতি অত্থে ঊনাধিকতানিৰারণং ¶ . উদাসীনভাৰেন পৰত্তমানাপি হি এসা সম্পযুত্তধম্মে সমং কত্ৰা যথাসককিচ্চেসু পৰত্তেতি, যথা রাজা তুণ্হী নিসিন্নোপি অধিকরণধম্মট্ঠে যথাসককিচ্চেসু সমং অপ্পমত্তে পৰত্তেতি. অলীনানুদ্ধতপ্পৰত্তিপচ্চযানং ধম্মানং ঊনাধিকতায লীনুদ্ধতভাৰস্স নিৰারণকিচ্চাতি ৰুত্তং ‘‘ঊনাধিকতানিৰারণরসা’’তি. যদি এৰং কথং সহজাতাধিপতীনং অধিপতিভাৰো. আধিপচ্চঞ্হি তেসং কিচ্চতো অধিকভাৰোতি? নাযং দোসো. তম্পি তস্স কিচ্চমেৰ, যং সহজাতধম্মানং অধিপতিভাৰে পৰত্তাপনং. যথা হি রঙ্গমণ্ডলং গতো নটকাচরিযো তে তে নটকে যথাসকং অনুরূপং ভূমিযং যোজেতি, এৰমেসাপি অত্তনা সম্পযুত্তধম্মেসু অধিপতিভাৰে ঠিতে অধিপতিভাৰে যোজেতি, ইন্দ্রিযত্তে ঠিতে ইন্দ্রিযত্তে, ন পন সকসককিচ্চতো ঊনতং, অধিকতং ৰা পত্তুং দেতীতি. ‘‘ইদং নিহীনকিচ্চং হোতু, ইদং অতিরেককিচ্চ’’ন্তি এৰং পক্খপাতৰসেন ৰিয পৰত্তি পক্খপাতো. তং উপচ্ছিন্দন্তী ৰিয হোতীতি পক্খপাতুপচ্ছেদনরসা. সা চিত্তচেতসিকানং অজ্ঝুপেক্খনেন সমপ্পৰত্তেসু আজানীযেসু সারথি ৰিয দট্ঠব্বা.

কিরিযা কারোতি কার-সদ্দস্স ভাৰসাধনতং আহ. তেন কারোতি নাঞ্ঞং, কিরিযাযেৰাতি দীপিতং ¶ হোতি. মনস্মিং কারোতি মনসি আরম্মণস্স করণং. যেন হি মনো আরম্মণে করীযতি আরম্মণেনস্স সংযোজনতো, ততো এৰ তেন আরম্মণম্পি মনসি করীযতীতি. মনসিকারোতি চেত্থ অলুত্তসমাসো দট্ঠব্বো. পুরিমমনতোতি ভৰঙ্গমনতো. ৰিসদিসং মনন্তি ৰীথিজৰনমনং, তং করোতীতি মনসিকারো, মনসিকারসামঞ্ঞেন ৰীথিজৰনপটিপাদকে দস্সেতি. এত্থ পন উপযোগত্থভুম্মৰচনে সমাসো দট্ঠব্বো. সম্পযুত্তধম্মে আরম্মণাভিমুখং সারেন্তো পযোজেন্তো ৰিয হোতীতি মনসিকারো ¶ সারণলক্খণোতি ৰুত্তো. সংযোজনরসোতি পযোজনরসো. ৰিতক্কো সম্পযুত্তানং আরম্মণে অভিনিরোপনসভাৰত্তা আরম্মণে চিত্তং পক্খিপন্তো ৰিয হোতি. চেতনা অত্তনো আরম্মণং গণ্হন্তী সম্পযুত্তেপি সকসককিচ্চং কারেতীতি অত্তনা করণেন বলং নিযোজেন্তো বলনাযকো ৰিয হোতি. মনসিকারো সম্পযুত্তে আরম্মণে পযোজেতীতি আজানীযপ্পযোজনকসারথি ৰিযাতি অযমেতেসং ৰিসেসো.

আরম্মণাভিমুখভাৰপচ্চুপট্ঠানোতি আরম্মণে সংযোজনৰসেন তদভিমুখভাৰপচ্চুপট্ঠানো. এত্থ সতিযা অপ্পমুস্সনচ্ছন্দতা ৰিসযাভিমুখপচ্চুপট্ঠানতা, মনসিকারস্স পন সংযোজনৰসেনাতি অযমেতেসং ৰিসেসো. আরম্মণপটিপাদকস্স সঙ্খারক্খন্ধপরিযাপন্নতাৰচনং ইতরমনসিকারানং ৰিঞ্ঞাণক্খন্ধপরিযাপন্নতং দস্সেতি. মহিসাসকা পন ‘‘আৰজ্জনস্স ৰিঞ্ঞাণভাৰে সব্বঞ্ঞুতঞ্ঞাণস্স সব্বৰিসযতা পরিহাযেয্য, তস্মা তং জৰনসম্পযুত্তসঙ্খারক্খন্ধপরিযাপন্নমেৰা’’তি ৰদন্তি. তেসঞ্হি অযমধিপ্পাযো – যদি তং ৰিসুং চিত্তসভাৰং সিযা, পচ্চুপ্পন্নচিত্তং আরম্মণং কত্ৰা পৰত্তস্স তস্স অনন্তরং উপ্পজ্জমানজৰনানং পচ্চুপ্পন্নারম্মণতা ন ভৰেয্য, অঞ্ঞদত্থু অতীতারম্মণতাৰ সিযা, এৰঞ্চ সতি সব্বঞ্ঞুতঞ্ঞাণস্সাপি পচ্চুপ্পন্নচিত্তারম্মণতায অভাৰতো অসব্বৰিসযতা আপজ্জেয্য, যদগ্গেন চ তং অসব্বৰিসযং, তদগ্গেন সাৰরণম্পি হোতি যত্থ ন পৰত্ততি, তত্থ আৰরণসম্ভৰতো, তস্মাস্স সকললোকসিদ্ধো সব্বঞ্ঞুভাৰো, অনাৰরণভাৰো চ পরিহাযেথ, জৰনসম্পযুত্তভাৰে পন সতি আৰজ্জনস্স নাযং ইট্ঠৰিঘাতো আপজ্জতীতি. তযিদং তেসমভিনিৰেসমত্তং ‘‘আৰজ্জনা কুসলানং খন্ধানং, অকুসলানং খন্ধানং অনন্তরপচ্চযেন ¶ পচ্চযো’’তি (পট্ঠা. ১.১.৪১৭) ৰচনেন তস্সানন্তরং কুসলাকুসলুপ্পত্তিযা দীপিতত্তা. সব্বঞ্ঞুতঞ্ঞাণস্স পন পচ্চুপ্পন্নচিত্তারম্মণভাৰো এৰং ৰেদিতব্বো – অতীতাদিৰসেন হি ৰিভাগমকত্ৰা ‘‘ইমস্স চিত্তং জানামী’’তি পৰত্তস্স আৰজ্জনং সামঞ্ঞেন যং কিঞ্চি অভিমুখীভূতং চিত্তমাৰজ্জতি, ততো জৰনানিপি অত্তনো অত্তনো ¶ অভিমুখীভূতং চিত্তমারম্মণং কত্ৰা পৰত্তন্তি, ন চেত্থ জৰনানং ভিন্নারম্মণতা আসঙ্কিতব্বা চিত্তসামঞ্ঞেন আরম্মণস্স অভিন্নত্তা, তস্মা সব্বঞ্ঞুতঞ্ঞাণস্স পচ্চুপ্পন্নচিত্তারম্মণতং পটিচ্চ ন কাচি ৰিহেসা অনুভৰিতব্বাতি. কিং ৰা এতেন যুত্তিৰাদেন, ননু ৰুত্তং ভগৰতা – ‘‘অচিন্তেয্যো বুদ্ধৰিসযো’’তি (অ. নি. ৪.৭৭), তস্মা অপরিমিতপুঞ্ঞসম্ভারেকফলস্স অচিন্তেয্যসভাৰত্তা আৰজ্জনেন ৰিনাপি ৰিসযগ্গহণে ৰিবন্ধনাভাৰতো যত্থ কত্থচি পৰত্তি অপ্পটিহতাযেৰাতি. কেচি পনেত্থ ‘‘আৰজ্জনং অনাগতচিত্তমারম্মণং কত্ৰা নিরুজ্ঝতি, জৰনমেৰ পন পচ্চুপ্পন্নমারম্মণং গণ্হাতী’’তি ৰদন্তি. যস্মা পন ‘‘অনাগতারম্মণা আৰজ্জনা পচ্চুপ্পন্নারম্মণানং খন্ধানং অনন্তরপচ্চযেন পচ্চযো’’তি পাল়ি নত্থি, তস্মা তং অপ্পমাণং.

করোতীতি করুণা. কিং করোতি, কেসং কিং নিমিত্তন্তি আহ ‘‘পরদুক্খে সতি সাধূনং হদযকম্পন’’ন্তি. কম্পনন্তি চ পরেসং দুক্খং দিস্ৰা তস্স অসহনাকারেন চিত্তস্স অঞ্ঞথত্তং, তদিদং সপ্পুরিসানংযেৰ হোতীতি আহ ‘‘সাধূন’’ন্তি. সপ্পুরিসা হি অত্তহিতপরহিতসাধনেন ‘‘সাধূ’’তি ৰুচ্চন্তি. ‘‘কিণাতী’’তি ইমস্স অত্থমাহ ‘‘ৰিনাসেতী’’তি, অদস্সনং গমেতি অপনেতীতি অত্থো. তেনাহ ‘‘পরদুক্খাপনযনাকারপ্পৰত্তিলক্খণা’’তি. পরেসং দুক্খস্স অপনযনং হোতু ৰা, মা ৰা, সো ¶ পরদুক্খাপনযনাকারো, তথাপৰত্তিলক্খণাতি পর…পে… লক্খণা. অপনেতুকামতায পরেসং দুক্খস্স অসহনং অনধিৰাসনং পরদুক্খাসহনং. ন ৰিহিংসা অৰিহিংসা, সত্তানং অৰিহেঠনং, তং পচ্চুপট্ঠাপেতি, ৰিহিংসায ৰা পটিপক্খভাৰেন পচ্চুপট্ঠাতীতি অৰিহিংসাপচ্চুপট্ঠানা.

পমোদনলক্খণাতি পরসম্পত্তিযা পমোদনলক্খণা. অনিস্সাযনরসাতি ইস্সাযনস্স উসূযনস্স পটিপক্খভাৰকিচ্চা. পন্তসেনাসনেসু, অধিকুসলধম্মেসু চ অরমণং অরতি. সা অত্থতো ইস্সাধিকং দোমনস্সসহগতং, থিনমিদ্ধাধিকঞ্চ উদ্ধচ্চং. তত্থ পুরিমং পরসম্পত্তিৰিসযং, দুতিযং পন্তসেনাসনাদিৰিসযন্তি দট্ঠব্বং. অরতিযা ৰিহননাকারেন পচ্চুপট্ঠাতি, তস্সা ৰিঘাতং ৰা ৰূপসমং পচ্চুপট্ঠাপেতীতি অরতিৰিঘাতপচ্চুপট্ঠানা. ‘‘অনিযতে ইচ্ছন্তী’’তি ইমিনা চেতসিকন্তরভাৰেন ইচ্ছন্তীতি দস্সেতি.

কাযদুচ্চরিততোতি ৰত্থুৰীতিক্কমসঙ্খাতদুচ্চরিততো. কাযদুচ্চরিতাদিৰত্থূনন্তি পরপাণপরধনপরইত্থিআদীনং ¶ কাযদুচ্চরিতাদীনমালম্বণভূতানমেৰ ৰত্থূনং. অৰীতিক্কমলক্খণাতি অমদ্দনলক্খণা. কাযদুচ্চরিতাদিৰত্থুতো সঙ্কোচনকিরিযাপদেসেন কাযদুচ্চরিতাদিতোযেৰ সঙ্কোচনকিরিযা ৰুত্তাতি দট্ঠব্বং. ন হি ৰিরতিযো দুচ্চরিতৰত্থুনো অকিরিযপচ্চুপট্ঠানা যুজ্জন্তি, অথ খো দুচ্চরিতস্সেৰ, ৰিরতীনঞ্চ সোরচ্চৰসেন সঙ্কোচনং, অকিরিযা চ হিরোত্তপ্পানং জিগুচ্ছাদিৰসেনাতি অযমেতেসং ৰিসেসো. সদ্ধা…পে… পদট্ঠানাতি এত্থ সদ্ধাদযো সব্বেৰ ধম্মা কাযসুচরিতাদীনং পদট্ঠানাতি একে. অপরে পন ‘‘কম্মং কম্মফলং সদ্দহন্তস্স কাযদুচ্চরিতাদিঅকরণতো, হিরোত্তপ্পসম্পন্নস্স মুসাৰাদাদিঅকথনতো, অপ্পিচ্ছসন্তুট্ঠীসল্লেখগুণসমন্নাগতস্স মিচ্ছাজীৰৰিৰজ্জনতো চ সদ্ধাদযো ¶ তিণ্ণং ধম্মানং যথাক্কমেন পদট্ঠানা’’তি ৰদন্তি. কেচীতি অভযগিরিৰাসিনো. ইমাসূতি ইমাসু তীসু ৰিরতীসু. একেকং নিযতং ৰিরতিমিচ্ছন্তীতি অঞ্ঞং একং চতুত্থনিযতৰিরতিমিচ্ছন্তি. অথ ৰা নিদ্ধারণত্থে ভুম্মৰসেন ইমাসং অন্তরে একং নিযতং ৰিরতিমিচ্ছন্তীতি অত্থো. উভযথাপি পন তেসং ইচ্ছা ন যুজ্জতি অপরায ৰিরতিযা ধম্মসেনাপতিনাপি অদেসিতত্তা, ৰিসযস্স চ সদা সন্নিহিতত্তাভাৰেন নিযতায এৰ একিস্সা অভাৰতো. তেনেৰ হি অভযগিরিৰাসিনোযেৰ চ কেচি ইমাসং তিৰিধত্তং অনিযতত্তমেৰ চ ইচ্ছন্তি. ৰুত্তঞ্হি তেহি –

‘‘করুণামুদিতা সম্মাৰাচাকম্মন্তআজিৰা;

যেভুয্যতো অনিযতা, হোন্তি গোচরভেদতো’’তি. –

এত্থ পন ‘‘যেভুয্যতো’’তি ৰচনং লোকুত্তরচিত্তেসু সব্বদা একতোযেৰ চ লব্ভমানতং সন্ধায ৰুত্তং.

দুতিযচিত্তেন সম্পযোগং গচ্ছন্তীতি সম্বন্ধো. যথা চিত্তং, এৰং তংসম্পযুত্তধম্মাপীতি দুতিযে সসঙ্খারা এৰাতি আহ ‘‘সসঙ্খারভাৰমত্তমেৰ হেত্থ ৰিসেসো’’তি. তথাতি যথা ততিযে, তথা চতুত্থেপি পীতিযা সুখপদট্ঠানত্তা. সুখস্স চেত্থ অভাৰতো আহ ‘‘ঠপেত্ৰা পীতি’’ন্তি. ননু চ ‘‘করুণামুদিতা উপেক্খাসহগতে ন সম্ভৰন্তী’’তি ৰদন্তি, তস্মা যথা পীতিযা, এৰং তাসম্পি পটিক্খেপো কাতব্বোতি? ন কাতব্বো, অপ্পনাপত্তিতো পুব্বে করুণামুদিতানং উপেক্খাসহগতানম্পি সম্ভৰতো. করুণামুদিতাভাৰনাকালে হি অপ্পনাৰীথিতো পুব্বে উপেক্খাসহগতচিত্তেনাপি পরিকম্মং হোতি, অপ্পনাৰীথিযং পন সোমনস্সসহগতচিত্তেনেৰ একাৰজ্জনৰীথিযা ¶ ৰেদনাপরিৰত্তনাভাৰতো, তস্মা পুব্বভাগৰসেনেৰ করুণামুদিতানম্পি ¶ উপেক্খাসহগতেসু সম্ভৰো হোতীতি আচরিযা. অপরে পন সব্বদাপি তাসং উপেক্খাসহগতেসু সম্ভৰং ন ইচ্ছন্তি. ‘‘অৰসেসা পঞ্চমেন সম্পযোগং গচ্ছন্তী’’তি অৰিসেসেন ৰুত্তত্তা ইদানি ৰিসেসদস্সনত্থমাহ ‘‘সোমনস্সট্ঠানে চা’’তিআদি.

৮১. করুণামুদিতাদযোতি করুণামুদিতা চেৰ ৰিরতিত্তযঞ্চ. তেনাহ ‘‘পঞ্চা’’তি.

এৰং কামাৰচরকুসলচিত্তসম্পযুত্তে দস্সেত্ৰা ইদানি রূপাৰচরকুসলচিত্তসম্পযুত্তধম্মে দস্সেতুং ‘‘অৰসেসেসু পনা’’তিআদিমাহ. তত্থ ঠপেত্ৰা ৰিরতিত্তযন্তি ৰিরতিত্তযং ৰজ্জেত্ৰা. কস্মা পনেত্থ ৰিরতিত্তযং পরিচ্চত্তন্তি? ৰুচ্চতে – সুৰিসুদ্ধকাযকম্মাদিকস্স চিত্তসমাধানৰসেন রূপারূপাৰচরকুসলপ্পৰত্তি, ন কাযকম্মাদীনং সোধনৰসেন, নাপি দুচ্চরিতদুরাজীৰানং সমুচ্ছিন্দনৰসেন. তথা হি নীৰরণাদিধম্মানং অৰত্থত্তযং হোতি ৰীতিক্কমাৰত্থা পরিযুট্ঠানাৰত্থা অনুসযাৰত্থাতি. তত্থ ৰীতিক্কমাৰত্থায পটিপক্খং কামাৰচরকুসলং পরিযুট্ঠানাৰত্থায রূপারূপাৰচরং, অনুসযাৰত্থায লোকুত্তরকুসলং. দুচ্চরিতদুরাজীৰানং পন ঠপেত্ৰা ৰীতিক্কমাৰত্থং, অনুসযাৰত্থঞ্চ ৰীতিক্কমাৰত্থায ৰিসুং পরিযুট্ঠানাৰত্থা ন উপলব্ভতি. যস্সা ৰিপচ্চনীকং রূপারূপাৰচরকুসলং সিযা, তস্মা তং নেৰ কামাৰচরকুসলং ৰিয তেসং ৰীতিক্কমাৰত্থং সোধেতি, ন চ লোকুত্তরং ৰিয অনুসযাৰত্থং সমুচ্ছিন্দতি, পটিপস্সম্ভেতি ৰা. সীলৰিসুদ্ধিযং সীলসোধনৰসেন কামাৰচরকুসলেনেৰ ৰিগতৰীতিক্কমস্স পরিসুদ্ধকাযকম্মাদিকস্স যোগিনো চিত্তসমাধানৰসেন পৰত্ততীতি মহগ্গতচিত্তুপ্পাদে ৰিরতীনং অসম্ভৰোযেৰ. ইমমেৰ হি অত্থং সাধেতুং ‘‘ৰিরতিযো পনা’’তিআদি আরদ্ধং. তেত্তিংস ৰা করুণাদিঝানৰসেন পৰত্তনকালে ¶ . ততোতি ততো ততিযে ৰুত্তচেতসিকতো. করুণামুদিতানং অপ্পনাপত্তানমেকন্তসোমনস্সসহগতত্তা আহ ‘‘পঞ্চমেন…পে… করুণামুদিতাৰজ্জা’’তি.

রূপাৰচরপঞ্চমে ৰুত্তনযেনাতি তিংসেৰাতি অধিপ্পাযো. যদি এৰং রূপাৰচরতো কো ৰিসেসোতি আহ ‘‘অরূপাৰচরভাৰোৰেত্থ ৰিসেসো’’তি, পঞ্চমে রূপসঞ্ঞাভাৰতো রূপাৰচরভাৰো, ইধ পন রূপসঞ্ঞাসমতিক্কমেন পত্তব্বত্তা অরূপাৰচরভাৰোতি অযমেৰস্স ততো ৰিসেসোতি অত্থো.

পঠমজ্ঝানিকেতি ¶ পঠমজ্ঝানৰতি. মগ্গচিত্তেতি চতুব্বিধেপি মগ্গঞাণে. দুতিযজ্ঝানিকাদিভেদেতি দুতিযততিযচতুত্থপঞ্চমজ্ঝানিকে. ৰুত্তনযেনাতি ‘‘দুতিযেন ৰিতক্কৰজ্জা’’তিআদিনা ৰুত্তনযেন. কিং অৰিসেসেনাতি চে, নোতি আহ ‘‘করুণামুদিতান’’ন্তিআদি. মগ্গধম্মেসু পাদকজ্ঝানাদিৰসেন কদাচি সম্মাসঙ্কপ্পৰিরহো সিযা, ন পন ৰিরতিৰিরহো, কাযদুচ্চরিতাদীনং সমুচ্ছিন্নৰসেনেৰ অরিযমগ্গস্স পৰত্তনতোতি আহ ‘‘নিযতৰিরতিভাৰো’’তি. লোকুত্তরভাৰোতি ছব্বিসুদ্ধিপরম্পরায পত্তব্বত্তা লোকতো উত্তরণভাৰো.

এৰং কুসলচেতসিকানং সম্পযোগৰচনত্থলক্খণাদীনি দস্সেত্ৰা ইদানি অকুসলচেতসিকানি দস্সেতুং ‘‘অকুসলা পনা’’তিআদি আরদ্ধং. ছ যেৰাপনকাতি কিঞ্চাপি পঠমে অনিযতযেৰাপনকা ন লব্ভন্তি, অকুসলেসু পন লব্ভমানকযেৰাপনধম্মে একত্থ দস্সেতুং তেসম্পি ইধেৰ ৰচনং দট্ঠব্বং. এৰঞ্চ কত্ৰা উপরি ধম্মানং উদ্দেসানন্তরং ‘‘এৰং যেৰাপনা’’তিআদি ৰুত্তং. ৰিচিকিচ্ছাসহগতে ছন্দাধিমোক্খানং, উদ্ধচ্চসহগতে ছন্দস্স চ অভাৰতো ৰুত্তং ‘‘পটিপাটিযা দসসু চিত্তেসূ’’তি.

৮২. নিদ্দিট্ঠাতি ¶ নিস্সেসেন দস্সিতা. হতা ৰিহতা ৰিদ্ধস্তা পাপা অপাযাদিদুক্খপাপনতো ‘‘পাপা’’তি সঙ্খাতা অকুসলধম্মা যেন সো ভগৰা হতপাপো, তেন. লাভো অলাভো, যসো অযসো, নিন্দা পসংসা, সুখং দুক্খন্তি ইমেসু অট্ঠসু লোকধম্মেসু অকম্পনট্ঠেন তাদিনা সম্মাসম্বুদ্ধেন. সো হি লাভাদীসু যাদিসো, অলাভাদীসুপি তাদিসোযেৰাতি ‘‘তাদী’’তি ৰুচ্চতি.

ন হিরীযতীতি ন লজ্জতি. অহিরিকোতি পুগ্গলো ধম্মসমূহো ৰা. ‘‘অহিরিক্ক’’ন্তি ৰত্তব্বে একস্স ক-কারস্স লোপং কত্ৰা ‘‘অহিরিক’’ন্তি ৰুত্তং. ন ওত্তপ্পন্তি ওত্তপ্পস্স পটিপক্খভূতং ধম্মমাহ. অজিগুচ্ছনং অহীল়নং. অলজ্জনং অৰিলা. অজিগুচ্ছনলক্খণন্তি সভাৰৰসেন ৰুত্তং, অলজ্জনলক্খণন্তি কুসলাব্যাকতস্স সাধারণায হিরিযা পটিপক্খৰসেন. তেহেৰাতি কাযদুচ্চরিতাদীহি এৰ. অসারজ্জনং নিব্ভযতা. অনুত্তাসো অসম্ভমো. রসাদীনি হিরিওত্তপ্পেসু ৰুত্তপটিপক্খৰসেন গহেতব্বানীতি ন তানি ইধ ৰুত্তানি. তেসু হি অলজ্জনাকারেন পাপানং করণরসং অহিরিকং. অনুত্তাসাকারেন অনোত্তপ্পং ¶ . ৰুত্তপ্পকারেনেৰ পাপতো অসঙ্কোচনপচ্চুপট্ঠানানি. অত্তনি, পরেসু চ অগারৰপদট্ঠানানি. গামসূকরস্স ৰিয অসুচিতো কিলেসাসুচিতো অজিগুচ্ছনং অহিরিকেন হোতি. সলভস্স ৰিয অগ্গিতো পাপতো অনুত্তাসো অনোত্তপ্পেন হোতি. যথাহু পোরাণা –

‘‘জিগুচ্ছতি নাহিরিকো, পাপা গূথাৰ সূকরো;

ন ভাযতি অনোত্তপ্পো, সলভো ৰিয পাৰকা’’তি.

এত্থ ¶ চ যথা হিরিযা বলৰভাৰে ওত্তপ্পং অব্বোহারিকং হোতি, ওত্তপ্পস্স বলৰভাৰে হিরী অব্বোহারিকা, এৰং অহিরিকস্স বলৰভাৰে অনোত্তপ্পং অব্বোহারিকং, অনোত্তপ্পস্স বলৰভাৰে অহিরিকং অব্বোহারিকং হোতীতি কেচি, তং ন যুজ্জতি. যথা হি অসুচিনা অত্তানং মক্খেন্তো, সপ্পমুখে হত্থং পৰেসেন্তো বালদারকো তত্থ পটিক্কূলভাৰস্স, আদীনৰস্স চ অনুপপরিক্খনতো নেৰ জিগুচ্ছতি, ন চ উত্তসতি, এৰমেৰং ধম্মসভাৰস্স অঞ্ঞাণতো মোহো পাপতো নেৰ জিগুচ্ছতি, ন উত্তসতি, তস্মা তংসম্পযুত্তচিত্তুপ্পাদে উভযম্পি বলৰতরং হোতীতি.

লুব্ভন্তীতি অভিগিজ্ঝন্তি, অল্লীযন্তীতি ৰুত্তং হোতি. আরম্মণগ্গহণলক্খণোতি এত্থ আরম্মণগ্গহণং নাম ‘‘মম ইদ’’ন্তি তণ্হাভিনিৰেসৰসেন অভিনিৰিট্ঠস্স আরম্মণস্স অৰিস্সজ্জনং, ন আরম্মণকরণমত্তং. অভিসঙ্গো অতিসযৰতায আসত্তিযা দুম্মোচনীযভাৰো. অপরিচ্চাগো অৰিজহনং. তেলঞ্জনরাগো ৰিযাতি ধোৰিত্ৰাপি পরিচ্চজিতুং অসক্কুণেয্যো তেলমক্খিতঅঞ্জনরাগো ৰিয. ‘‘অস্সাদানুপস্সিনো তণ্হা পৰড্ঢতী’’তি ৰচনতো ৰুত্তং ‘‘অস্সাদদস্সনপদট্ঠানো’’তি. তত্থ অস্সাদৰসেন দস্সনং অস্সাদদস্সনং. ননু চ অস্সাদদস্সনম্পি অত্থতো লোভোযেৰাতি কথং সযং অত্তনো পদট্ঠানং হোতীতি? সচ্চং, পঠমং নাতিবলৰলোভৰসেন অস্সাদদস্সনো পচ্ছা বলৰলোভো হোতীতি তস্স তংপদট্ঠানতা ৰুত্তা. তেনেৰ চ ‘‘তণ্হা পৰড্ঢতী’’তি ৰুত্তং. অপরে পন ‘‘অস্সাদো নাম সুখৰেদনা, অস্সাদদস্সনন্তি অস্সাদদিট্ঠী’’তি ৰদন্তি. সুখৰেদনায ৰা কারণভূতং সুভনিমিত্তং অস্সাদো নাম, অসুভে ‘‘সুভ’’ন্তি পৰত্তা তযো ৰিপল্লাসা অস্সাদদস্সনং নামাতি কেচি.

মুয্হন্তীতি ¶ ন বুজ্ঝন্তি. ধম্মসভাৰস্স যাথাৰতো অদস্সনং চিত্তস্স অন্ধভাৰো. অঞ্ঞাণং ¶ ঞাণপটিপক্খো ধম্মো. তত্থ পুরিমলক্খণং সভাৰৰসেন ৰুত্তং, ইতরং পটিপক্খৰসেন. অথ ৰা অঞ্ঞাণলক্খণোতি কিচ্চৰসেন ৰুত্তং. সো হি অসম্পটিৰেধরসোতি ৰুত্তো. ধম্মসভাৰং পটিৰিজ্ঝিতুং অসমত্থতা অসম্পটিৰেধো. আরম্মণসভাৰচ্ছাদনরসোতি যথা অঞ্ঞাণং, মোহসমঙ্গিপুগ্গলো ৰা আরম্মণসভাৰং পটিৰিজ্ঝিতুং ন লভতি, মোহস্স তথা পৰত্তি আরম্মণসভাৰচ্ছাদনং. এত্থ চ ঞাণং আরম্মণং যথাসভাৰতো জানাতি, দিট্ঠি যথাসভাৰং ৰিজহিত্ৰা অযাথাৰতো গণ্হাতি, মোহো পন ন কথঞ্চি ৰিজানাতি. যদি এৰং আরম্মণগ্গহণকালো কথং তদা সো আরম্মণং জানাতেৰাতি? তদাপি ন জানাতি. যথা পন ফস্সাদযো ফুসনাকারাদিমত্তৰসেনেৰ আরম্মণং গণ্হন্তি, ন জাননৰসেন, এৰমযং আরম্মণং গহেত্ৰা উপ্পজ্জমানো পটিচ্ছাদনাকারেনেৰ গণ্হাতি, ন পন জাননাকারেনাতি. যস্স উপ্পজ্জতি, তস্স অন্ধকরণং অন্ধকারো, তথা পচ্চুপট্ঠাতি, তং ৰা পচ্চুপট্ঠাপেতীতি অন্ধকারপচ্চুপট্ঠানো.

মিচ্ছা পস্সন্তীতি ধম্মসভাৰস্স ৰিপরীতৰসেন অনিচ্চাদিং নিচ্চাদিৰসেন পস্সন্তি. অযোনিসো অভিনিৰেসো উপ্পথাভিনিৰেসো. ধম্মসভাৰং অতিক্কমিত্ৰা পরতো নিচ্চাদিতো ৰা পরপ্পচ্চযতো ৰা আমসনং পরামাসো, ৰিপরীতগ্গাহৰসেন ‘‘ইদমেৰ সচ্চং, মোঘমঞ্ঞ’’ন্তি অভিনিৰেসনং মিচ্ছাভিনিৰেসো. অরিযানং অদস্সনকামতাদীতি আদি-সদ্দেন সদ্ধম্মঅসোতুকামতাদিং সঙ্গণ্হাতি.

যস্স ধম্মস্স ৰসেন উদ্ধতং হোতি চিত্তং, তংসম্পযুত্তধম্মা ৰা, সো ধম্মো উদ্ধচ্চং. তেনাহ ‘‘উদ্ধতভাৰো’’তি. অৰূপসমোতি অসন্নিসিন্নভাৰো. ৰাতা…পে… পটাকা ৰিযাতি ¶ যথা পটাকা যোত্তবলেন ধজযট্ঠিং অমুঞ্চন্তীপি ৰাতাভিঘাতেন এত্থ অৰট্ঠাতুং ন সক্কোতি, এৰমিদম্পি অধিমোক্খবলেন আরম্মণং অমুঞ্চন্তম্পি অযোনিসোমনসিকারবলেন আরম্মণে অচলং অৰট্ঠাতুং ন সক্কোতীতি ৰাতপ্পহারেনেৰ চলধজপটাকা ৰিয অনৰট্ঠানকিচ্চং. ভন্তত্তং পরিব্ভমনাকারো. উদ্ধচ্চস্স সব্বাকুসলসাধারণত্তা, অঞ্ঞেসঞ্চ অকুসলসাধারণানং ৰিসুং পদট্ঠানস্স লব্ভমানত্তা ৰুত্তং ‘‘অযোনিসো…পে… পদট্ঠান’’ন্তি. যেনাকারেন ৰা মনসিকরোতো উদ্ধচ্চং উপ্পজ্জতি, তেনাকারেন মনসিকরণং ইধ অযোনিসোমনসিকারো. অথ ৰা উদ্ধচ্চনিমিত্তস্স আরম্মণস্স মনসিকরণং ইধ অযোনিসোমনসিকারো.

মঞ্ঞতীতি ¶ অভিমঞ্ঞতি, অহংকারং করোতীতি অত্থো. সেয্যাদিৰসেন উচ্চতো নমনং উণ্ণতি. সম্পগ্গহরসোতি উণ্ণতিৰসেনেৰ অত্তনো, সম্পযুত্তধম্মানং ৰা সম্পগ্গণ্হনকিচ্চো, ন ৰীরিযং ৰিয তংতংকিচ্চসাধনেন. অভিভুস্সহনৰসেন হীনস্স অত্তানং নীচং কত্ৰা গহণম্পি পগ্গণ্হনৰসেনেৰাতি ৰেদিতব্বং. কেতু…পে… পচ্চুপট্ঠানোতি এত্থ কেতু ৰুচ্চতি অচ্চুগ্গতধজো, ইধ পন কেতু ৰিযাতি কেতু, উল়ারতমাদিভাৰো, তং কেতুভাৰসঙ্খাতং কেতুং কম্যতীতি কেতুকম্যং, যস্স ধম্মস্স ৰসেন তং কেতুকম্যং, সো কেতুকম্যতা. ‘‘অহ’’ন্তি পৰত্তনতো মানস্স দিট্ঠিসদিসী পৰত্ততীতি দিট্ঠিমানা একচিত্তুপ্পাদে ন পৰত্তন্তি, দ্ৰে কেসরসীহা ৰিয একগুহাযং, তস্মা মানো দিট্ঠিৰিপ্পযুত্তচিত্তে সব্বদা অনুপ্পজ্জমানোপি দিট্ঠিসম্পযুত্তচিত্তে নিযমেন অনুপ্পজ্জনতো দিট্ঠিৰিপ্পযুত্তলোভপদট্ঠানো. মানো ধম্মসমূহগ্গহণে বলৰং হুত্ৰা অত্তুক্কংসনভাৰেন ¶ পৰত্ততি, দিট্ঠি একেকধম্মম্পি নিচ্চাদিআকারেন গণ্হন্তী পৰত্ততি. অত্তসিনেহসন্নিস্সযো ৰা মানো, অত্তকিলমথানুযোগসন্নিস্সযা দিট্ঠীতি অযমেতেসং ৰিসেসো.

ইস্সতীতি উসূযতি. তত্থেৰাতি পরসম্পত্তীসুযেৰ. ইস্সাৰসেন পরসম্পত্তীসু অতুস্সনতো ৰুত্তং ‘‘অনভিরতিরসা’’তি. তেনেৰেতং ৰুচ্চতি –

‘‘ইস্সানলসিখা যেসং, হদযে জলতীধ তে;

নেৰ ৰিন্দন্তি পামোজ্জং, সম্বুদ্ধাদীহি সেৰিত’’ন্তি.

মচ্ছরযোগেন মচ্ছরিনি পৰত্তং মচ্ছর-সদ্দং গহেত্ৰা আহ ‘‘মচ্ছরভাৰো মচ্ছরিয’’ন্তি. নিরুত্তিনযেন পন ‘‘মা ইদং অচ্ছরিযং অঞ্ঞেসং হোতু, ময্হংৰ হোতূ’’তি মচ্ছরিযন্তি পোরাণা. নিগুহণং অত্তনো সম্পত্তিযা পরেসং অদস্সনং. সঙ্কোচনং অত্তসম্পত্তীনং পরেহি সাধারণভাৰকরণস্স অরুচ্চনাকারেন পটিকুটনং. ‘‘মা ইদং পরস্স হোতূ’’তি পরেসু পটিহননৰসেন অত্তসন্তকস্স আরম্মণকরণতো মচ্ছেরং পটিঘচিত্তেস্ৰেৰ লব্ভতীতি ৰদন্তি, তং ন যুত্তং একস্সেৰ ধম্মস্স অঞ্ঞত্থ পটিহঞ্ঞিত্ৰা অঞ্ঞারম্মণভাৰপ্পসঙ্গতো. পরেহি সাধারণভাৰে পটিহননৰসেন পন তং আরব্ভ পৰত্তনতো মচ্ছেরং পটিঘচিত্তেসু উপ্পজ্জতীতি যুত্তং. অত্তসম্পত্তীতি আৰাসাদিসম্পত্তি.

কুচ্ছিতং কতন্তি এত্থ কতম্পি অকতম্পি গরহিতব্বত্তা কুচ্ছিতং কতং নাম হোতি. এৰঞ্হি ¶ ৰত্তারো হোন্তি ‘‘যং মযা ন কতং, তং কুকত’’ন্তি. তথা হি ৰক্খতি ‘‘কতাকতানুসোচনরস’’ন্তি. এৰং কতাকতং দুচ্চরিতং সুচরিতম্পি কুচ্ছিতং কতং নাম. সুচরিতম্পি হি গরহন্তস্স কুচ্ছিতং কতন্তি হোতি ¶ . যথা পন পথৰীকসিণারম্মণং ঝানং পথৰীকসিণং, এৰং কুকতং আরব্ভ ৰিপ্পটিসারৰসেন পৰত্তং চিত্তং তংসহচরিততায ইধ কুকতন্তি গহেতব্বং. অথ ৰা কতাকতং আরব্ভ উপ্পজ্জনকৰিপ্পটিসারচিত্তংযেৰ গরহিতব্বতো ‘‘কুচ্ছিতং কতং কুকত’’ন্তি ৰুচ্চতি. যস্স ধম্মস্স ৰসেন তং চিত্তং কুকতং নাম হোতি, সো ধম্মো কুক্কুচ্চং. তেনাহ ‘‘কুকতং, তস্স ভাৰো’’তি. পচ্ছা অনুতপ্পনং ৰিহেঠনং পচ্ছানুতাপো. কতাকতানুসোচনং কতাকতস্স সুচরিতদুচ্চরিতস্স অনুসোচনং, ‘‘অকতং ৰত মে কল্যাণ’’ন্তিআদিনা অনুতপ্পনং, ‘‘অকতং মযা পুব্বে কল্যাণকম্মং, ইতো দানি পট্ঠায করোমী’’তি পৰত্তং পন কুসলপক্খিকং ৰীরিযমেৰ, ন কতাকতানুসোচনং, কতাকতাকারৰিসিট্ঠস্স সুচরিতদুচ্চরিতস্স অনুসোচনৰসেন ৰিরূপং পটিসরণং ৰিপ্পটিসারো. কতাকতানুসোচনঞ্হি অৰড্ঢিসম্পাদনতো ৰিরূপং পটিসরণং, তং পরাযত্ততাহেতুতায দাসব্যং ৰিয দট্ঠব্বং. যথা হি দাসব্যে সতি দাসো পরাযত্তো হোতি, এৰং কুক্কুচ্চে সতি তংসমঙ্গীপুগ্গলো. ন হি সো অত্তনো ধম্মতায কুসলে পৰত্তিতুং সক্কোতি. অথ ৰা কতাকতকুসলাকুসলানুসোচনৰসেন আযত্ততায তদুভযৰসেন কুক্কুচ্চেন তংসমঙ্গী হোতীতি তং দাসব্যং ৰিয হোতি.

অনুস্সাহনাৰসীদনৰসেন সংহতভাৰো থিনং, তেন যোগতো চিত্তং থিনং, তস্স ভাৰো থিনতা. তেনাহ ‘‘অনুস্সাহসংহননতা’’তি. অসমত্থতাৰিঘাতৰসেন অকম্মঞ্ঞতা মিদ্ধং. তেনাহ ‘‘অসত্তিৰিঘাতো’’তি. যস্মা মিদ্ধৰসেনেৰ তেন সম্পযুত্তধম্মা মেধিতা ৰিহতসামত্থিযা হোন্তি, তস্মা ‘‘মিদ্ধতা মিদ্ধ’’ন্তি ৰুত্তং. ন ৰিজ্জতি উস্সাহো অস্সাতি অনুস্সাহং, তব্ভাৰোপি অনুস্সাহং. অনুস্সাহসঙ্খাতো সংহননভাৰো অনুস্সাহসংসীদনতা, কুসীতভাৰোতি ¶ ৰুত্তং হোতি. অসত্তিৰিঘাতোতি যস্মা তং মিদ্ধং উপ্পজ্জমানমেৰ সত্তিৰিনাসৰসেন উপ্পজ্জতি, তস্মা নত্থি এতস্স সত্তীতি তং সম্পযুত্তচিত্তং অসত্তি, তস্স ভাৰোপি, অসত্তিযেৰ ৰিঘাতোতি অসত্তিৰিঘাতো.

অনুস্সাহনলক্খণন্তি উস্সাহপটিপক্খলক্খণং. ৰীরিযস্স ৰিনোদনং খেপনং ৰীরিযৰিনোদনং. সম্পযুত্তধম্মানং সংসীদনাকারেন পচ্চুপট্ঠাতি, তেসং ৰা সংসীদনং পচ্চুপট্ঠাপেতীতি ¶ সংসীদনপচ্চুপট্ঠানং. অকম্মঞ্ঞতালক্খণন্তি এত্থ কামং থিনম্পি অকম্মঞ্ঞতাসভাৰমেৰ, তং পন চিত্তস্স অকম্মঞ্ঞং, মিদ্ধং ৰেদনাদিক্খন্ধত্তযস্সাতি অযমেত্থ ৰিসেসো. তথা হি পাল়িযং ‘‘তত্থ কতমং থিনং? যা চিত্তস্স অকল্লতা অকম্মঞ্ঞতা. কতমং মিদ্ধং? যা কাযস্স অকল্লতা অকম্মঞ্ঞতা’’তি (ধ. স. ১১৬২) চ আদিনা ইমেসং নিদ্দেসো পৰত্তো. ওণহনং ৰিঞ্ঞাণদ্ৰারানং পিদহনং, সম্পযুত্তানং বন্ধনং ৰা. লীনতা লীনাকারো, আরম্মণগ্গহণে সঙ্কোচো. যস্মা থিনেন চিত্তস্সেৰ সংহননং হোতি, মিদ্ধেন পন ৰেদনাদিক্খন্ধত্তযস্স ৰিয রূপকাযস্সপি, তস্মা তং পচলাযিকানিদ্দং পচ্চুপট্ঠাপেতীতি পচলাযিকানিদ্দাপচ্চুপট্ঠানন্তিপি ৰট্টতি. পোত্থরূপপটিচ্ছাদকপটো ৰিয আরম্মণসভাৰাৰচ্ছাদকো মোহো. মুখে বন্ধপটো ৰিয সম্পযুত্তধম্মে পত্থরিতুং অদেন্তং মিদ্ধন্তি অযমেতেসং ৰিসেসো.

সেসাতি ইধ লক্খণাদিৰসেন ৰুত্তাৰসেসা ফস্সাদযো. কুসলেসু ৰুত্তনযেনাতি লক্খণাদিতো ৰুত্তনযেন. ন কোচি এত্থ ৰিসেসো অত্থীতি চে, নো নত্থীতি আহ ‘‘এত্থ পনা’’তিআদি, ৰিতক্কাদীনং তিণ্ণং যথাক্কমং মিচ্ছাসঙ্কপ্পাদিনামমত্তমেৰ ৰিসেসোতি অত্থো. একূনৰীসতীতি ¶ ঠপেত্ৰা মানাদযো ছ অনিযতযেৰাপনকে সেসা সরূপেনাগতা পন্নরস ছন্দাদযো চ চত্তারো নিযতযেৰাপনকাতি ইমে একেন ঊনা ৰীসতি চেতসিকা. অনিযতযেৰাপনকানং পন ইধ অলভন্তানম্পি এত্থ ৰচনে কারণং ৰুত্তমেৰ.

থিনমিদ্ধস্স অনিযতভাৰোতি থিনমিদ্ধস্স অনিযতস্স ইধ উপ্পজ্জনকভাৰমাহ, ন পন পঠমে নিযতভাৰং তত্থ সব্বসোৰ অনুপ্পজ্জনতো. ন হি সভাৰতিখিণং চিত্তং থিনমিদ্ধযোগী হোতীতি. ততিযে মানস্স অনিযতস্স সম্ভৰেপি নিযতধম্মে সন্ধায ‘‘অট্ঠারসা’’তি ৰুত্তং. তেনাহ ‘‘মানো পনেত্থ অনিযতো’’তি. দিট্ঠিযা সহ ন উপ্পজ্জতীতি এত্থ কারণং ৰুত্তমেৰ. চতুত্থে অৰসেসাতি অট্ঠারসেৰ, পঞ্চমে ঠপেত্ৰা পীতিং দিট্ঠিযা সহ অট্ঠারসেৰ, তথা ছট্ঠেপি. সত্তমে পীতিযা, দিট্ঠিযা চ অভাৰতো সত্তরস, তথা অট্ঠমেপি.

এতেপি তযোতি ন কেৰলং করুণামুদিতা এৰ, এতেপি তযো একতো ন উপ্পজ্জন্তি অঞ্ঞমঞ্ঞং ৰিসযভেদতোযেৰ. তথা হি ইস্সা পরসম্পত্তিৰিসযা, মচ্ছরিযং অত্তসম্পত্তিযা পরেহি ¶ সাধারণাভাৰৰিসযং, কুক্কুচ্চং কতাকতৰিসযন্তি, তস্মা যং অভযগিরিৰাসিনো ৰদন্তি ‘‘ইস্সামচ্ছেরং যদিচ্ছাৰসেন একতোপি উপ্পজ্জতী’’তি, ন তং গহেতব্বং.

সভাৰতো, পরিকপ্পনতো ৰা অনিট্ঠস্স আরম্মণস্স অনিট্ঠাকারং ৰা আরম্মণস্স অনুভৰনং সম্ভুঞ্জনং অনিট্ঠারম্মণানুভৰনং, তং লক্খণমস্সাতি অনিট্ঠারম্মণানুভৰনলক্খণং. তেনাহ ‘‘অনিট্ঠাকারসম্ভোগরস’’ন্তি, যথাভূতেন ৰা অযথাভূতেন ৰা অনিট্ঠাকারেন আরম্মণস্স সম্ভুঞ্জনরসং, পচ্চানুভৰনকিচ্চন্তি অত্থো. তিত্থিযাদীনঞ্হি সভাৰতো ইট্ঠে বুদ্ধাদিআরম্মণেপি অনিট্ঠাকারতো গহণৰসেন ¶ দোমনস্সং উপ্পজ্জতি. দোমনস্সস্স একন্তেন কামধাতুযংযেৰ পৰত্তনতো আহ ‘‘হদযৰত্থুপদট্ঠান’’ন্তি. তস্স হি অনীৰরণাৰত্থায অভাৰতো রূপারূপধাতুযং অসম্ভৰো.

অত্তনো পৰত্তিআকারৰসেন অনিট্ঠরূপসমুট্ঠাপনৰসেন ৰা ৰিরূপং সপ্পনং ৰিসপ্পনং, অনিট্ঠরূপসমুট্ঠাপনৰসেনেৰ ৰা ৰিসপ্পনং সরীরকম্পনং, তং রসো কিচ্চং, সম্পত্তি ৰা অস্সাতি ৰিসপ্পনরসো, নিস্সযস্স হদযৰত্থুনো, সকলস্সেৰ ৰা কাযস্স ৰিজ্ঝত্তভাৰাপাদনতো আহ ‘‘অত্তনো নিস্সযদহনরসো ৰা’’তি, ৰিজ্ঝত্তভাৰাপাদনতোতি চ মিলাতভাৰাপাদনতোতি অত্থো. যথা কথং ৰিযাতি আহ ‘‘দাৰগ্গি ৰিযা’’তি. সো হি ৰনঘটেযেৰ উপ্পন্নো তমেৰ দহতি. দুস্সনপচ্চুপট্ঠানোতি অত্তনো, পরস্স চ দূসনাকারেন পচ্চুপট্ঠানো. সো হি যস্স সন্তানে উপ্পন্নো, তং একন্তেন অন্তমসো ৰিরূপভাৰাপাদনেনপি দূসেতি, পরং পন দূসেতু ৰা, মা ৰা হত্থেন গহিতঅসুচি ৰিয. ‘‘অনত্থং মে অচরী’’তিআদীনি নৰ আঘাতৰত্থূনি পদট্ঠানমস্সাতি আঘাতৰত্থুপদট্ঠানো. সো উপযোগফলকালেসু অনিট্ঠত্তা ৰিসসংসট্ঠপূতিমুত্তং ৰিয দট্ঠব্বো. অট্ঠারস ৰাতি ইস্সাদীসু অনিযতেসু একেন সদ্ধিং অট্ঠারস ৰা.

পৰত্তিট্ঠিতিমত্তাতি চেতসো পৰত্তিসঙ্খাতা ঠিতিমত্তা, মগ্গঙ্গাদিভাৰং ন গচ্ছতি অধিমোক্খৰিরহতোতি অত্থো. অথ ৰা পৰত্তিট্ঠিতিমত্তাতি খণট্ঠিতিমত্তা. ‘‘নিৰাতে দীপচ্চীনং ঠিতি ৰিযা’’তি হি ৰুত্তং. চিত্তট্ঠিতি ৰিয সন্তানট্ঠিতিযা পচ্চযো ভৰিতুং অসমত্থত্তা নিচ্ছযাভাৰেন অসণ্ঠহনতো চেতসো পৰত্তিপচ্চযমত্ততায পৰত্তিট্ঠিতিমত্তা খণট্ঠিতিমত্তা পৰত্তিপচ্চযমত্তা ঠিতি পৰত্তিট্ঠিতীতি কত্ৰা. ৰিগতা চিকিচ্ছাতি নিস্সক্কে পচ্চত্তৰচনং ‘‘পিসুণা ¶ ৰাচা পটিৰিরতো’’তিআদীসু ¶ ৰিয, ৰিগতা তিকিচ্ছাযাতি অত্থো. অযমেৰ ৰা পাঠো. ‘‘ৰিগতা চিকিচ্ছা’’তি চিকিচ্ছিতুং দুক্করতায চেতং ৰুত্তং, ন সব্বথা চিকিচ্ছায অভাৰতো. ‘‘এৰং নু খো, ন নু খো’’তিআদিনা সংসপ্পনৰসেন সেতি, সমন্ততো ৰা সেতীতি সংসযো. কম্পনরসাতি চিত্তস্স কম্পনকিচ্চা. উদ্ধচ্চঞ্হি অত্তনা গহিতাকারেযেৰ ঠত্ৰা ভমতীতি একারম্মণস্মিং এৰ ৰিপ্ফন্দনৰসেন পৰত্ততি, ৰিচিকিচ্ছা পন যদিপি একস্মিং আরম্মণে উপ্পজ্জতি, তথাপি ‘‘এৰং নু খো, ন নু খো’’তি অঞ্ঞং গহেতব্বাকারং অপেক্খতীতি নানারম্মণে কম্পনং হোতি. অনিচ্ছযাকারেন দ্ৰেল়্হকাকারেন পচ্চুপট্ঠাতি, অনিচ্ছযং ৰা পচ্চুপট্ঠাপেতীতি অনিচ্ছযপচ্চুপট্ঠানা.

অধিমোক্খৰিচিকিচ্ছানং অঞ্ঞমঞ্ঞং ৰিপরীতকিচ্চতায আহ ‘‘ৰিচিকিচ্ছায অভাৰেনা’’তি. সমাধীতি চিত্তেকগ্গতা. সা হি আরম্মণে চিত্তস্স সম্মা আধানতো ‘‘সমাধী’’তি ৰুচ্চতি. বলৰা হোতীতি বলৰমিত্তেন দিন্নপিট্ঠিবলো পুরিসো ৰিয বলৰা হোতি, বলাদিভাৰং গচ্ছতীতি অধিপ্পাযো.

সত্তারম্মণত্তাতি সত্তপঞ্ঞত্তারম্মণত্তা. ননু পঞ্ঞত্তারম্মণাপি ৰিপাকা হোন্তীতি চোদনং সন্ধাযাহ ‘‘কামাৰচরৰিপাকানং একন্তপরিত্তারম্মণত্তা’’তি. কুতো পন ৰিরতীনং কুসলত্তমেৰাতি চারিতন্তি আহ ‘‘পঞ্চ সিক্খাপদা কুসলাতি (ৰিভ. ৭১৫) হি ৰুত্ত’’ন্তি. যদি এৰং লোকুত্তরৰিপাকেসু ৰিরতিযো ন লব্ভন্তীতি? নো ন লব্ভন্তি সিক্খাপদৰিভঙ্গে লোকিযৰিরতিযোযেৰ সন্ধায ৰুত্তত্তা. তেন লোকিযৰিপাকেসুযেৰ ৰিরতিযো ন সম্ভৰন্তীতি গহেতব্বং.

কাযপসাদসন্নিস্সিতত্তা ¶ কাযে ভৰো সাতভাৰো লক্খণমস্সাতি কাযিকসাতলক্খণা. চেতসিকসুখে ৰুত্তনযেন পচ্চুপট্ঠানাদযো নেতব্বাতি আহ ‘‘সেসা ৰুত্তনযা এৰা’’তি.

৮৪-৬. ননু চ ইট্ঠে আরম্মণে সুখৰেদনা উপ্পজ্জতি, অনিট্ঠে দুক্খৰেদনা, ইট্ঠানিট্ঠমজ্ঝত্তে উপেক্খাৰেদনা, চক্খুৰিঞ্ঞাণাদযো চ কুসলৰিপাকা ইট্ঠে, ইট্ঠমজ্ঝত্তে ৰা আরম্মণে উপ্পজ্জন্তি, তত্থ যুত্তো তাৰ ইট্ঠমজ্ঝত্তে উপেক্খাৰেদনাযোগো, ন পন ইট্ঠারম্মণে, ন চাপি এতং সক্কা ৰত্তুং পরিকপ্পনাৰসেন ইট্ঠারম্মণম্পি ইট্ঠমজ্ঝত্ততো গণ্হন্তি যথা ‘‘কম্মৰিঞ্ঞাণ’’ন্তি ৰিপাকানং অৰঞ্চনীযভাৰতো, তস্মা কথং ইট্ঠে, ইট্ঠমজ্ঝত্তে চ উপ্পজ্জমানেসু ¶ চক্খুসোতঘানজিৰ্হাৰিঞ্ঞাণেসু উপেক্খাৰেদনাযেৰ সম্ভৰতি, ন সুখৰেদনা, যতো তেসু উপেক্খাৰেদনা ৰুত্তাতি ইমং চোদনং সঙ্খেপতো দস্সেতুং ‘‘ইট্ঠারম্মণযোগস্মি’’ন্তিআদিং ৰত্ৰা পুন তস্সা সোধনত্থং ‘‘উপাদায চ রূপেনা’’তিআদি ৰুত্তং. ভূতরূপং উপাদায নিস্সায পৰত্তং রূপং উপাদাযরূপং. ‘‘উপাদায চ রূপেনা’’তি পন ‘‘মনসী চ কারো’’তি এত্থ ৰুত্তনযমেৰ. ‘‘উপাদাযকরূপেনা’’তি ৰা পাঠো, চক্খুৰিঞ্ঞাণস্স ৰত্থুভূতেন চক্খুপসাদেন, তথা সোতৰিঞ্ঞাণাদীনং ৰত্থুভূতেন সোতপসাদাদিনা চ উপাদাযরূপেনাতি অত্থো. উপাদারূপকে পনাতি য-কারলোপং কত্ৰা নিদ্দেসো ‘‘পটিসঙ্খা যোনিসো’’তিআদীসু ৰিয, যথাক্কমং চক্খুৰিঞ্ঞাণাদীনং আরম্মণভূতে রূপসদ্দাদিকে উপাদাযরূপেতি অত্থো. সংঘট্টনানিঘংসস্সাতি সংঘট্টনাসঙ্খাতস্স নিঘংসস্স. সংঘট্টনাযেৰ অঞ্ঞমঞ্ঞৰিসযৰিসযীভাৰস্স অনুরূপদেসুপ্পত্তিসঙ্খাতনিঘংসো ৰিযাতি নিঘংসোতি ৰুচ্চতি. অথ ৰা সম্পত্তাসম্পত্তগ্গহণৰসেন সংঘট্টনায নিঘংসস্স চাতি অত্থো. চক্খুরূপসোতসদ্দা হি ¶ অঞ্ঞমঞ্ঞং অসম্পত্তাযেৰ অনুরূপদেসুপ্পত্তিযা অঞ্ঞমঞ্ঞং ঘট্টন্তি নাম. ততো তেসং ৰসেন ঘট্টনাকারভূতো অঞ্ঞমঞ্ঞাভিমুখভাৰো ‘‘সংঘট্টনা’’তি ৰুত্তো. ঘানগন্ধা, পন জিৰ্হারসা চ অঞ্ঞমঞ্ঞং সম্পত্তাযেৰ আসন্নতরদেসে উপ্পন্না অঞ্ঞমঞ্ঞং নিঘংসেন্তি আহচ্চ তিট্ঠন্তি. ততো তেসং ৰসেন নিঘংসো ৰুত্তোতি. দুব্বলত্তাতি অধিকরণীমত্থকে পিচুপিণ্ডকং ঠপেত্ৰা পিচুপিণ্ডেনেৰ পহতকালে ৰিয ফুট্ঠমত্তভাৰেন দুব্বলত্তা. দীপযেতি এৰং সংঘট্টনানিঘংসস্স দুব্বলত্তা ৰেদনা মজ্ঝত্তট্ঠানে তিট্ঠতীতি উপেক্খাযোগং পকাসেয্য. যদি এৰং কাযৰিঞ্ঞাণেপি ইদং সমানন্তি, নোতি আহ ‘‘পসাদং পনা’’তিআদি. যথা হি অধিকরণীমত্থকে কপ্পাসপিচুপিণ্ডং ঠপেত্ৰা কূটেন পহরন্তস্স কূটং পিচুপিণ্ডমতিক্কম্ম অধিকরণিং গণ্হাতি, এৰমেৰং কাযদ্ৰারে বহিদ্ধা মহাভূতারম্মণং অজ্ঝত্তিককাযপসাদং ঘট্টেত্ৰা তং অতিক্কম্ম পসাদপচ্চযেসু মহাভূতেসু পটিহঞ্ঞতি, নিঘংসো বলৰা হোতি, তস্মা ইট্ঠারম্মণে কাযৰিঞ্ঞাণসম্পযুত্তা সুখৰেদনা হোতি, অনিট্ঠারম্মণে পন ৰুত্তনযেন দুক্খৰেদনাতি ৰুত্তং হোতি.

মনোধাতুনাতি এত্থ কিঞ্চাপি ধাতু-সদ্দো ইধ ইত্থিলিঙ্গেযেৰ দিস্সতি, ইমিনাযেৰ পন আচরিযস্স ৰচনেন পুল্লিঙ্গো অত্থীতি সিদ্ধং. কেচি পন ‘‘সক্কটৰোহারেন ৰুত্ত’’ন্তি ৰদন্তি. সম্পযুত্তা দস ধম্মাতি সম্বন্ধো. তস্মাৰেত্থাতি এত্থ ৰ-কারো পদসন্ধিমত্তকরো.

কাযৰিঞ্ঞাণে দুক্খৰেদনাতি কিঞ্চাপি সুখাদিকন্তি আদি-সদ্দেন অকুসলৰিপাককাযৰিঞ্ঞাণস্স ¶ দুক্খৰেদনাসম্পযোগো ৰুত্তো, ইধ পনস্সা লক্খণাদিদস্সনত্থং পুন ‘‘কাযৰিঞ্ঞাণে দুক্খৰেদনা’’তি উপঞ্ঞাসো কতো, রসাদযো ¶ পনস্স কুসলৰিপাকে সুখৰেদনায ৰুত্তৰিপরিযাযেন যোজেতব্বাতি ইধ ন ৰুত্তা. সেসাতি সেসচেতসিকা.

বলপ্পত্তোতি সেসাহেতুকচিত্তসম্পযুত্তসমাধিতো অযং ৰীরিযিন্দ্রিযযোগেন বলৰভাৰপ্পত্তো, ন পন বলরাসিপ্পত্তোতি অত্থো. যদি এৰং কস্মা চেতসিকৰিভাগনিদ্দেসে ‘‘বলানি দ্ৰে দ্ৰিচিত্তেসূ’’তি ৰুত্তং? তত্থ হি কিরিযাহেতুকমনোৰিঞ্ঞাণযুগল়ং সন্ধায তথা ৰুত্তং. সব্বং সেসাহেতুকচিত্তেসু চিত্তেকগ্গতায ৰিভঙ্গে –

‘‘কতমা তস্মিং সমযে চিত্তস্স একগ্গতা হোতি? যা তস্মিং সমযে চিত্তস্স ঠিতী’’তি (ধ. স. ১১) –

এত্তকমেৰ ৰত্ৰা কিরিযাহেতুকমনোৰিঞ্ঞাণধাতুসম্পযুত্তায একগ্গতায ৰিভঙ্গে –

‘‘কতমা তস্মিং সমযে চিত্তস্স একগ্গতা হোতি? যা তস্মিং সমযে চিত্তস্স ঠিতি সণ্ঠিতি অৰট্ঠিতি অৰিসাহারো অৰিক্খেপো অৰিসাহটমানসতা সমথো সমাধিন্দ্রিযং সমাধিবল’’ন্তি (ধ. স. ১১) –

বলপরিযোসানং কত্ৰা ৰিভজিতত্তা ৰীরিযৰিভঙ্গে চ –

‘‘কতমং তস্মিং সমযে ৰীরিযিন্দ্রিযং হোতি? যো তস্মিং সমযে চেতসিকো ৰীরিযারম্ভো নিক্কমো পরক্কমো উয্যামো ৰাযামো উস্সাহো উস্সোল়্হী থামো ধিতি অসিথিলপরক্কমতা অনিক্খিত্তছন্দতা অনিক্খিত্তধুরতা ধুরসম্পগ্গাহো ৰীরিযং ৰীরিযিন্দ্রিযং ৰীরিযবল’’ন্তি (ধ. স. ১৩) –

বলপরিযোসানং ¶ কত্ৰা ৰিভজিতত্তা ৰিভঙ্গৰারে আগতং সমাধিবলং, ৰীরিযবলঞ্চ সন্ধায ‘‘বলানি দ্ৰে দ্ৰিচিত্তেসূ’’তি ৰুত্তং, ন পন ধম্মুদ্দেসৰারে বলরাসিযং আগতবলং সন্ধায সব্বাহেতুকচিত্তেসু ধম্মুদ্দেসস্স মগ্গরাসিতো পট্ঠায পরিহীনত্তা.

৮৭. ৰিপাককিরিযাহদযেহীতি ¶ ৰিপাককিরিযচিত্তেহি. হদযং মনো মানসং চিত্তন্তি হি পরিযাযৰচনং. সোভনং গতং গমনমস্সাতি সুগতো. ভগৰতো হি ৰিনেয্যজনূপসঙ্কমনং একন্তেন তেসং হিতসুখনিপ্ফাদনতো সোভনং, তথা লক্খণানুব্যঞ্জনপটিমণ্ডিতরূপকাযতায ধুতৰিলম্বিতাদিদোসরহিতং অৰহসিতরাজহংসৰসভৰারণমিগরাজগমনং কাযগমনং, ঞাণগমনঞ্চ নিম্মলৰিপুলকরুণাসতিৰীরিযাদিগুণৰিসেসসমঙ্গীভূতমভিনীহারতো যাৰ মহাবোধিং অনৰজ্জতায সোভনমেৰাতি. অথ ৰা সকলম্পি লোকং পরিঞ্ঞাভিসমযৰসেন সযম্ভুঞাণেন পরিজানন্তো সম্মা গতো অৰগতোতি সুগতো, তথা লোকসমুদযং পহানাভিসমযৰসেন পজহন্তো অনুপ্পত্তিধম্মতং আপাদেন্তো সম্মা গতো অতীতোতি সুগতো, লোকনিরোধসঙ্খাতং নিব্বানং সচ্ছিকিরিযাভিসমযৰসেন সম্মা গতো অধিগতোতি সুগতো, লোকনিরোধগামিনিপটিপদাসঙ্খাতং মগ্গং ভাৰনাভিসমযৰসেন সম্মা গতো পত্তোতি সুগতো. অথ ৰা সম্মা গদতীতি সুগতো. ভগৰা হি ভূতং তচ্ছং অত্থসংহিতং ৰিনেয্যানং যথারহং কালযুত্তমেৰ ধম্মং ভাসতি, তস্মা সম্মা গদতীতি দ-কারস্স ত-কারং কত্ৰা ‘‘সুগতো’’তি ৰুত্তো. অথ ৰা সুন্দরং ঠানং সম্মাসম্বোধিং, নিব্বানমেৰ ৰা গতোতি সুগতো, তেন সুগতেন.

৮৮. ‘‘অৰগচ্ছতী’’তিআদীসু যো ভিক্খু অনূনং অত্থতো ৰা ব্যঞ্জনতো ৰা অনূনং সুপরিপুণ্ণং ততোযেৰ পরমং ¶ ৰিসিট্ঠং ইমং অভিধম্মাৰতারং নাম পকরণং অৰগচ্ছতি অৰবুজ্ঝতি, সম্মাউগ্গহণধারণাদিসম্পাদনৰসেন ওগাহিত্ৰা জানাতি. অথ ৰা পরমনযদীপনতো পরমং ইমং পকরণং যো অনূনং কত্ৰা অৰগচ্ছতি জানাতি, তস্সেৰং অৰগচ্ছতো যথাসভাৰং মননতো মতিসঙ্খাতা পঞ্ঞা দুরাসদে মংসচক্খুনা পরমাণু ৰিয লোকিযঞাণেন দুরাসদে দুরাধিগন্তব্বে অধিগন্তুং দুক্করতরে, অতিগম্ভীরট্ঠানে ঠপেত্ৰা সিনেরুপব্বতরাজানং রাহুআদীহি মহাকাযেহিপি সব্বেন সব্বং অজ্ঝোগাহিতুং অসক্কুণেয্যতায মহাসমুদ্দে ৰিয ঠপেত্ৰা সম্মাসম্বুদ্ধং সারিপুত্তাদীহিপি মহাঞাণেহি সাৰকেহি সব্বেন সব্বং অজ্ঝোগাহিতুং অসক্কুণেয্যরূপে অভিধম্মনযে ৰিজম্ভতে হেমন্তসালপন্তি ৰিয পত্থরতি, অভিমুখাভিমুখেযেৰ ধম্মে পৰত্ততীতি ৰা অত্থো.

ইতি অভিধম্মত্থৰিকাসিনিযা নাম

অভিধম্মাৰতারসংৰণ্ণনায

চেতসিকনিদ্দেসৰণ্ণনা নিট্ঠিতা.

৩. ততিযো পরিচ্ছেদো

চেতসিকৰিভাগনিদ্দেসৰণ্ণনা

৮৯. নামসামঞ্ঞতোযেৰ ¶ দ্ৰেপঞ্ঞাসাতি ফস্সাদিনামসামঞ্ঞেন দ্ৰীহি অধিকা পণ্ণাস হোন্তি, সম্পযুত্তধম্মভেদতো পন একূননৰুতিচিত্তসম্পযুত্তো ফস্সো একূননৰুতিৰিধোতি এৰমাদিনা বহুৰিধাপি হোন্তীতি অত্থো.

ননু চ ফস্সাদযো হেট্ঠা পাল়িক্কমেন দস্সিতা, ইধ পন কস্মা ন তথা ৰুত্তাতি? একেকসভাৰৰন্তানং তংতংসামঞ্ঞাপেক্খায ¶ একস্মিং ঠানে নিদ্দিসিতুকামত্তা. ফস্সাদযো হি মনক্কারাৰসানা তেরস কুসলাকুসলাব্যাকতসামঞ্ঞতো একতো ৰুত্তা, মজ্ঝত্তাদযো মুদিতাৰসানা পঞ্চৰীসতি কুসলাব্যাকতসামঞ্ঞতো, লোভাদযো পন অনোত্তপ্পাৰসানা অকুসলভাৰসামঞ্ঞতোতি এৰং তংতংসামঞ্ঞাপেক্খায সমানসভাৰা ধম্মা একতো ৰুত্তাতি.

৯০. এৰং ফস্সাদযো ধম্মে উদ্দিসিত্ৰা ইদানি ‘‘এত্তকেসু অযং ধম্মো সমুপলব্ভতী’’তি চিত্তুপ্পাদেসু তেসং পযোগং দস্সেতুং পঠমং তাৰ চিত্তগণনং দস্সেন্তো আহ ‘‘চতুপঞ্ঞাসধা’’তিআদি. কামেতি কামাৰচরেতি ৰুত্তং হোতি. এৰং ‘‘রূপে অরূপে’’তি এত্থাপি. আসৰৰিসযত্তাভাৰতো ন ৰিজ্জন্তি এতেসু আসৰাতি অনাসৰা.

৯১-২. সমাসতোতি ৰিত্থারাপেক্খায ৰুত্তং, ন ইতোপি সমাসস্স অভাৰতো. অতিসঙ্খেপতো পন একূননৰুতি চিত্তুপ্পাদা হোন্তি. এতেসূতি ইমেসু চিত্তুপ্পাদেসু. তেসং ফস্সাদীনং ধম্মানং উপ্পত্তিং একেকং উদ্ধরিত্ৰা চিত্তচেতসিকেসু ভিক্খূনং পাটৰত্থায পৰক্খামীতি সম্বন্ধো. এককন্তি একেকং, গাথাবন্ধৰসেন এ-কারলোপো.

৯৩. চেতসিকৰিভাগং ৰত্তুকামোপি অৰিনিব্ভোগধম্মে দস্সেতুং চিত্তেন সহ একতো কত্ৰা ¶ আহ ‘‘ফস্সপঞ্চক’’ন্তি. একতো উপ্পাদো এতেসন্তি একুপ্পাদা, সহ খীযন্তীতি সহক্খযা, একতো উপ্পজ্জিত্ৰা একতো নিরুজ্ঝনকাতি অত্থো.

৯৪. সব্বেস্ৰেৰ একৰীসসতেসু চিত্তেসু সমুপলব্ভনতো সব্বসাধারণা. কিঞ্চাপি অনন্তরগাথায চিত্তেন ¶ সহ একুপ্পাদাদিভাৰকথনেনেৰ ইমেসং সব্বসাধারণতা ৰুত্তা, তত্থ পন একুপ্পাদাদিমত্তকথনমেৰ ইচ্ছিতং, ন সব্বসাধারণতা. ৰুত্তোপি ৰাযমত্থো তত্থ অপাকটত্তা পুন পাকটং কত্ৰা ইধ ৰুত্তোতি.

৯৫-১০০. দ্ৰিপঞ্চৰিঞ্ঞাণৰজ্জিতচতুচত্তালীসকামাৰচরচিত্তেসু, লোকিযলোকুত্তরৰসেন একাদসসু পঠমজ্ঝানিকচিত্তেসু চাতি পঞ্চপঞ্ঞাসচিত্তেসু ৰিতক্কস্স দেসিতত্তা আহ ‘‘ৰিতক্কো…পে… সমুদীরিতো’’তি. ৰিচারো পঞ্চপঞ্ঞাসসৰিতক্কচিত্তেসু চেৰ একাদসসু দুতিযজ্ঝানিকচিত্তেসু চাতি ছসট্ঠিচিত্তেসু উপ্পজ্জতীতি আহ ‘‘চারো…পে… জাযতে’’তি.

একপঞ্ঞাসচিত্তেসু পীতীতি কাযৰিঞ্ঞাণৰজ্জিতেসু অট্ঠারসসু সোমনস্সসহগতকামাৰচরচিত্তেসু চেৰ চতুত্থপঞ্চমজ্ঝানৰজ্জিততেত্তিংসরূপজ্ঝানিকচিত্তেসু চাতি একপঞ্ঞাসচিত্তেসু পীতি জাযতি. তেসট্ঠিযা সুখন্তি একপণ্ণাসসপ্পীতিকচিত্তেসু চেৰ একাদসসু চতুত্থজ্ঝানিকচিত্তেসু, কুসলৰিপাককাযৰিঞ্ঞাণে চাতি তেসট্ঠিযা চিত্তেসু সুখং জাযতি. তেসট্ঠিসুখসহগতচিত্তানি চেৰ তীণি চ দুক্খসহগতানীতি ছসট্ঠিচিত্তে ৰজ্জেত্ৰা অৰসেসপঞ্চপণ্ণাসচিত্তেসু উপেক্খা উপ্পজ্জতীতি আহ ‘‘উপেক্খা পঞ্চপঞ্ঞাসচিত্তেসূ’’তি. দুক্খং তীসূতি দ্ৰীসু পটিঘচিত্তেসু চেৰ অকুসলৰিপাককাযৰিঞ্ঞাণে চাতি তীসু চিত্তেসু দুক্খং জাযতি. হোতি…পে… সোমনস্সিন্দ্রিযন্তি তেসট্ঠিযা সুখসহগতচিত্তেসু একমেৰ কাযৰিঞ্ঞাণং অপনেত্ৰা অৰসেসেসু সোমনস্সিন্দ্রিযং হোতি. অকুসলৰিপাককাযৰিঞ্ঞাণৰসেন একমেৰ দুক্খিন্দ্রিযসহগতং, তথা কুসলৰিপাককাযৰিঞ্ঞাণমেৰ সুখিন্দ্রিযসম্পযুত্তন্তি আহ ‘‘দুক্খিন্দ্রিযং…পে… সুখিন্দ্রিয’’ন্তি.

অহেতুকৰিপাককিরিযামনোধাতুৰজ্জিতেসু ¶ মজ্ঝিমগণনায পঞ্চাধিকসতপরিমিতেসু কুসলাকুসলৰিপাককিরিযাচিত্তেসু ৰীরিযং দেসিতন্তি আহ ‘‘পঞ্চুত্তর…পে… আহা’’তি. দিট্ঠধম্মিকসম্পরাযিকত্থেসু ¶ সত্তে ৰিনেতি, ৰিগতো ৰা নাযকো ইমস্স, ৰিসিট্ঠো ৰা সব্বলোকস্স নাযকো সামি, ৰিসেসেন ৰা ৰিনেয্যসত্তে নিব্বানপুরং নেতীতি ৰিনাযকো. সমাধিন্দ্রিযং ৰিচিকিচ্ছাৰজ্জিতৰীরিযসহগতচিত্তেসু ৰুত্তন্তি আহ ‘‘চতুত্তরসতে’’তিআদি.

অট্ঠারস অহেতুকচিত্তানি, দ্ৰে একহেতুকচিত্তানি চ ৰজ্জেত্ৰা অৰসেসএকুত্তরসতে চিত্তে ছন্দো উপ্পজ্জতীতি দস্সেতুং ‘‘সব্বাহেতুকচিত্তানী’’তিআদি ৰুত্তং. দস ৰিঞ্ঞাণেতি কুসলাকুসলৰিপাকৰসেন দ্ৰিগুণিতে চক্খাদিকে পঞ্চৰিঞ্ঞাণে.

১০২-৬. নিযতা ন যেৰাপনকা ৰিয কদাচীতি অত্থো. কথং পনেতে একনৰুতিযা চিত্তেস্ৰেৰ জাযন্তীতি আহ ‘‘অহেতুকেসূ’’তিআদি. একূনাসীতিযাতি দ্ৰাদস ঞাণসম্পযুত্তকামাৰচরানি, পঞ্চদস রূপাৰচরানি, দ্ৰাদস অরূপাৰচরানি, সমচত্তালীস লোকুত্তরচিত্তানীতি এৰং একূনাসীতিযা তিহেতুকচিত্তেসু. অট্ঠৰীসতিযা চিত্তেতি সোল়সসু কামাৰচরকুসলমহাকিরিযাসু, দ্ৰাদসসু চ লোকিযচতুত্থজ্ঝানচিত্তেসু চাতি অট্ঠৰীসতিচিত্তেসু. সাট্ঠকে চত্তালীসৰিধেতি অট্ঠসহিতে চত্তালীসৰিধে, অট্ঠচত্তালীসৰিধেতি ৰুত্তং হোতি. ছ যুগল়ানীতি কাযপস্সদ্ধিচিত্তপস্সদ্ধাদীনি ছ যুগল়ানি. কুসলাব্যাকতা চাতি কুসলচিত্তসম্পযোগতো কুসলা, অব্যাকতচিত্তসম্পযোগতো অব্যাকতাতি কুসলেনপকাসনৰিধানেসু ছেকেন সত্থুনা পকাসিতা দেসিতাতি অত্থো.

১০৮-১১১. সংসযোতি ¶ ৰিচিকিচ্ছা. সা হি সংসেতি সমন্ততো সেতি, ‘‘এৰং নু খো, নো নু খো’’তি পরিসপ্পতীতি সংসযো. মহন্তে সীলক্খন্ধাদিকে এসতি গৰেসতীতি মহেসী. তেন মহেসিনা সম্মাসম্বুদ্ধেন. অট্ঠসূতি অট্ঠলোভসহগতচিত্তেসু. চতূসূতি তেস্ৰেৰ দিট্ঠিসহগতচিত্তেসু. দিট্ঠিৰিযুত্তেসু চতূসূতি সম্বন্ধো. দ্ৰীস্ৰেৰাতি দ্ৰীসু দোসমূলকচিত্তেসু. দ্ৰীসু জাযন্তি নো সহাতি দোসমূলেস্ৰেৰ দ্ৰীসু জাযন্তি, সহ পন ন উপ্পজ্জন্তি, উসূযনকালে ইস্সা, মচ্ছরণকালে মচ্ছেরন্তিআদিনা নানা হুত্ৰাৰ উপ্পজ্জন্তি. পঞ্চসূতি পঞ্চসু সসঙ্খারিকচিত্তেসু.

১১২. চিত্তস্স চেতসিকত্তাভাৰেপি কুসলাকুসলাব্যাকতধম্মানং গণনট্ঠানতো ‘‘মনো’’তি চিত্তম্পি ৰুত্তং.

১১৪-৫. এত্তাৰতা ¶ চেতসিকৰিভাগং দস্সেত্ৰা ইদানি একেকস্মিং চিত্তুপ্পাদে লব্ভমানরাসীসু অঙ্গৰিভাগদস্সনত্থং ‘‘একূনতিংসচিত্তেসূ’’তিআদি ৰুত্তং. ননু চ ফস্সপঞ্চমকরাসি সব্বপঠমং আগতা, সা কস্মা ন ৰুত্তাতি? সব্বসাধারণভাৰতো. ন হি সো চিত্তুপ্পাদো অত্থি, যো ফস্সপঞ্চমকৰিনিমুত্তোতি. একাদস পঠমজ্ঝানিকানি সোমনস্সসহগতানি, দ্ৰাদস সহেতুককামাৰচরানি, তথা চত্তারি অকুসলানি, সুখসন্তীরণহসিতুপ্পাদানি দ্ৰেতি একূনতিংসচিত্তেসু পঞ্চঙ্গিকং ঝানং পঞ্চকরাসিসঙ্খাতং মতং. চতু…পে… নিদ্দিসেতি একাদস দুতিযজ্ঝানিকানি, কুসলৰিপাককিরিযাৰসেন দ্ৰাদস উপেক্খাসহগতসহেতুককামাৰচরানি, উপেক্খাদোমনস্সসহগতানি অট্ঠ অকুসলানি, দ্ৰিপঞ্চৰিঞ্ঞাণৰজ্জিতউপেক্খাসহগতানি ছ অহেতুকচিত্তানি চাতি ইমানি সত্ততিংস চিত্তানি যথাযোগং চতূহি ঝানঙ্গেহি যুত্তানি. এত্থ ¶ হি একাদস দুতিযজ্ঝানিকানি ৰিচারপীতিসুখসমাধীহি সহগতানি, ইতরানি যথাযোগং উপেক্খাদোমনস্সেসু একেকেন ৰিতক্কৰিচারসমাধীহীতি চতূহি সম্পযুত্তানি.

একাদসৰিধন্তি একাদসৰিধং ততিযজ্ঝানিকচিত্তং পীতিসুখচিত্তেকগ্গতাযোগতো তিৰঙ্গিকমুদীরিতং. চতুত্তিংস…পে… মুদীরিতন্তি দ্ৰাদস অরূপাৰচরচিত্তানি, দ্ৰাৰীসতি চতুত্থপঞ্চমজ্ঝানিকানি সাসৰানাসৰানীতি চতুত্তিংস চিত্তানি যথাযোগং উপেক্খেকগ্গতাযোগতো, সুখেকগ্গতাযোগতো চ দুৰঙ্গিকমুদীরিতং. চতুত্থজ্ঝানিকানি হি একাদস সুখেকগ্গতাসহিতানি, সেসানি তেৰীসতি উপেক্খেকগ্গতাসহিতানি.

১১৬. সভাৰেনাৰিতক্কেসূতি দুতিযজ্ঝানাদযো ৰিয ভাৰনাবলেন ৰিনা সভাৰেনেৰ অৰিতক্কেসু দ্ৰিপঞ্চৰিঞ্ঞাণেসু. তেসু হি ৰিজ্জমানানিপি সেসঝানঙ্গানি ৰিতক্কৰিরহেন উপনিজ্ঝানকিচ্চেসু অসমত্থানি. তেনেৰ হি অট্ঠকথাযম্পি ‘‘ৰিতক্কপচ্ছিমকঞ্হি ঝানঙ্গং নামা’’তি ৰুত্তং. ভাৰনায অৰিতক্কভাৰপ্পত্তানি পন ভাৰনাবলেনেৰ উপনিজ্ঝানকিচ্চেসু পটুতরা, তস্মা সভাৰেনাৰিতক্কেসু ঝানঙ্গানি ন উদ্ধরেয্য. ‘‘ন উদ্ধটা’’তি ৰা পাঠো, ন উদ্ধটানীতি অত্থো.

যদি এৰং কস্মা দ্ৰিপঞ্চৰিঞ্ঞাণেসু সরূপেনেৰ চিত্তেকগ্গতা ৰুত্তা, ননু তস্সা ৰিতক্কৰিরহেন ঝানঙ্গকিচ্চে অসমত্থতায রাসিভজনাভাৰতো যেৰাপনকৰসেন ৰচনং যুত্তন্তি ¶ ? ৰুচ্চতে – কুসলাকুসলেসু অৰিজ্জমানধম্মস্স ৰিপাকেসুপি অনুপলব্ভনতো ঝানঙ্গকিচ্চস্স অকরণেপি কুসলাকুসলেসু দেসিতনিযামেনেৰ সরূপেন ইধাপি ৰুত্তা. হোতু তাৰ এতং, ঝানরাসিযং ৰেদনা কস্মা ৰুত্তা. সা হি সব্বচিত্তসাধারণভাৰতো ¶ ফস্সপঞ্চকরাসিম্হি চেৰ, উপেক্খাদিইন্দ্রিযভাৰতো ইন্দ্রিযরাসিম্হিযেৰ ৰত্তব্বা, ন ইতরত্থ তদভাৰতোতি? সচ্চং, ৰেদনা পন সব্বৰেদনানং সামঞ্ঞসভাৰেন ফস্সপঞ্চকে আগতৰেদনা চ অপরেন ৰিসেসৰচনেন তত্থ নিদ্দিট্ঠা, ন তত্থ অন্তোকরণত্থং. তেনেৰ হি ধম্মসঙ্গণিযং দ্ৰিপঞ্চৰিঞ্ঞাণেসু সঙ্গহৰারে ঝানঙ্গরাসি ন উদ্ধটাতি রূপধাতুযং তিণ্ণং মহাভূতানং অপ্পটিঘভাৰেপি কামধাতুযং সপ্পটিঘমহাভূতেহি সমানভাৰতো তত্থাপি সপ্পটিঘভাৰো ৰিয দ্ৰিপঞ্চৰিঞ্ঞাণেসু ৰেদনাচিত্তেকগ্গতানং ৰিতক্কৰিযোগেন ঝানকিচ্চাকরণেপি সৰিতক্কচিত্তেসু ঝানচিত্তসমঙ্গীৰেদনাদীহি সমানত্তা ঝানঙ্গভাৰেন ৰচনং নাম যুত্তং. তেনেৰ চ নামরূপসমাসে ‘‘ফস্সপঞ্চকরাসিঝানদুকরাসিইন্দ্রিযত্তিকরাসী’’তি ৰুত্তন্তি. অথ ৰা কিং এতায যুত্তিচিন্তায, ধম্মসভাৰৰেদিনা তথাগতেন ধম্মসভাৰং অৰিরজ্ঝিত্ৰা দেসিতন্তি ন এত্থ অনুযোগো কাতব্বোতি. অহেতুকচিত্তানং আরম্মণে সুপ্পতিট্ঠিততাভাৰেন অনিয্যানিকত্তা ৰুত্তং ‘‘সব্বা…পে… ন উদ্ধরে’’তি. ৰুত্তঞ্হেতং অট্ঠকথাযম্পি ‘‘হেতুপচ্ছিমকো মগ্গো’’তি.

১১৭. তীণি সোল়সচিত্তেসূতি পন্নরসসু অহেতুকৰিপাকচিত্তেসু চেৰ কিরিযামনোধাতুম্হি চাতি সোল়সসু চিত্তেসু. মনিন্দ্রিযং জীৰিতিন্দ্রিযং ৰেদনিন্দ্রিযেসু লব্ভমানমেকন্তি তীণিন্দ্রিযানি হোন্তি. ইমেসুপি কুসলৰিপাককাযৰিঞ্ঞাণধাতুযং মনিন্দ্রিযসুখিন্দ্রিযজীৰিতিন্দ্রিযৰসেন তীণিন্দ্রিযানি, অকুসলৰিপাককাযৰিঞ্ঞাণধাতুযং দুক্খিন্দ্রিযেন সহ তীণি, সুখসন্তীরণে সোমনস্সিন্দ্রিযেন সহ তীণি, অৰসেসতেরসচিত্তেসু উপেক্খিন্দ্রিযেন সহ তীণীতি. এত্থ চিত্তন্তি সসম্পযুত্তধম্মস্স চিত্তুপ্পাদস্স অধিপ্পেতত্তা মনিন্দ্রিযস্সাপি আধারভাৰো যুজ্জেয্য. ইতরথা হি মনিন্দ্রিযন্তি ¶ চিত্তস্সেৰ গহণে তস্স অত্তনো চ আধারভাৰো ন যুজ্জতীতি. একস্মিং পন চত্তারীতি একস্মিং ৰিচিকিচ্ছাসহগতে ৰীরিযিন্দ্রিযমনিন্দ্রিযজীৰিতিন্দ্রিযউপেক্খিন্দ্রিযৰসেন চত্তারি. পঞ্চ তেরসসূতি ঠপেত্ৰা ৰিচিকিচ্ছাসহগতং অৰসেসানি একাদস অকুসলচিত্তানি, কিরিযাহেতুকমনোৰিঞ্ঞাণধাতুদ্ৰযন্তি তেরসসু চিত্তেসু ৰীরিযিন্দ্রিযাদীনি তীণি, সমাধিন্দ্রিযং, ৰেদনিন্দ্রিযেসু লব্ভমানং একন্তি পঞ্চিন্দ্রিযানি. এত্থ হি দ্ৰীসু দোসমূলেসু ৰীরিযিন্দ্রিযসমাধিন্দ্রিযমনিন্দ্রিযজীৰিতিন্দ্রিযদোমনস্সিন্দ্রিযৰসেন ¶ পঞ্চ, পঞ্চসু সোমনস্সসহগতেসু পুরিমানি চত্তারি সোমনস্সিন্দ্রিযেন সদ্ধিং পঞ্চ, সেসেসু উপেক্খিন্দ্রিযেন সদ্ধিং পঞ্চ হোন্তি.

১১৮. সত্ত দ্ৰাদসচিত্তেসূতি দ্ৰাদসসু ঞাণৰিপ্পযুত্তচিত্তেসু সদ্ধাসতিসমাধিৰীরিযজীৰিতমনিন্দ্রিযানি চ ৰেদনিন্দ্রিযেসু লব্ভমানমেকন্তি সত্ত ইন্দ্রিযানি. তত্থ হি ছসু সোমনস্সসহগতেসু সদ্ধিন্দ্রিযাদীনি ছ সোমনস্সিন্দ্রিযেন সদ্ধিং সত্ত, ইতরেসু ছসু উপেক্খিন্দ্রিযেন সদ্ধিং সত্ত হোন্তি. একেনূনেসু…পে… মনেসু চাতি দ্ৰাদস ঞাণসম্পযুত্তানি কামাৰচরানি, সত্তৰীসতি লোকিযজ্ঝানচিত্তানি চাতি একূনচত্তালীসৰিধেসু লোকিযচিত্তেসু পুরিমানি সত্ত, পঞ্ঞিন্দ্রিযঞ্চাতি অট্ঠেৰ ইন্দ্রিযানি. এত্থ হি সোমনস্সসহগতেসু ছসু কামাৰচরেসু, দ্ৰাদসসু রূপাৰচরচতুক্কজ্ঝানেসু চাতি অট্ঠারসচিত্তেসু সোমনস্সিন্দ্রিযেন, সেসেসু চ উপেক্খিন্দ্রিযেন সদ্ধিং যোজেত্ৰা অট্ঠিন্দ্রিযানি ৰেদিতব্বানি.

১১৯. চত্তালীসায চিত্তেসু নৰকন্তি সমচত্তালীসৰিধেসু লোকুত্তরচিত্তেসু পুরিমানি অট্ঠইন্দ্রিযানি, অনঞ্ঞাতঞ্ঞস্সামীতিন্দ্রিযং অঞ্ঞিন্দ্রিযং অঞ্ঞাতাৰিন্দ্রিযন্তি ইমেসু লব্ভমানমেকন্তি ইন্দ্রিযানং নৰকা. সোতাপত্তিমগ্গেসু হি অনঞ্ঞাতঞ্ঞস্সামীতিন্দ্রিযং ¶ লব্ভতি. সোতাপত্তিফলতো পট্ঠায অরহত্তমগ্গপরিযোসানেসু তং ন লব্ভতি. তস্স ঠানে অঞ্ঞিন্দ্রিযং. অরহত্তফলে তম্পি ন লব্ভতি. তস্স ঠানে অঞ্ঞাতাৰিন্দ্রিযং তিট্ঠতীতি. এৰন্তি ছহি ইন্দ্রিযেহি সম্পযুত্তস্স অভাৰতো কত্থচি তীণি, কত্থচি চত্তারি, কত্থচি পঞ্চ, কত্থচি সত্ত, কত্থচি অট্ঠ, কত্থচি নৰিন্দ্রিযানীতি এৰং ছহি আকারেহি ইন্দ্রিযযোগোপি, ন কেৰলং ঝানঙ্গযোগোৰ, অথ খো ইন্দ্রিযেহি সহ চিত্তুপ্পাদানং সম্পযোগোপি ৰেদিতব্বোতি.

১২০-৩. ইদানি মগ্গঙ্গসম্পযোগং দস্সেন্তো পঠমং তাৰ যেসু চিত্তেসু মগ্গঙ্গানি ন লব্ভন্তি, তানি দস্সেত্ৰা পচ্ছা মগ্গঙ্গযোগচিত্তুপ্পাদে দস্সেতুং ‘‘অমগ্গঙ্গানী’’তিআদিমাহ. এত্থাতি এতস্মিং একৰীসসতপ্পভেদে চিত্তস্মিং, ইমস্মিং মগ্গঙ্গাধিকারে ৰা. ৰিঞ্ঞাণেসু দ্ৰিপঞ্চসূতি সভাৰাৰিতক্কেসু চক্খাদীসু দ্ৰিপঞ্চৰিঞ্ঞাণেসু. কিঞ্চাপি হেট্ঠা দ্ৰিপঞ্চৰিঞ্ঞাণেসু ঝানঙ্গাভাৰো, অহেতুকেসু চ মগ্গঙ্গাভাৰো ৰুত্তোৰ, অঝানঙ্গানি পন তত্থ অধিকারৰসেন ৰুত্তানি, ইধ পসঙ্গাগতৰসেন. অমগ্গঙ্গানি তত্থ পসঙ্গাগতৰসেন, ইধ অধিকারৰসেনাতি ন কোচি পুনরুত্তিদোসো.

একন্তি ¶ ৰিচিকিচ্ছাসম্পযুত্তং চিত্তং. তঞ্হি মিচ্ছাসঙ্কপ্পমিচ্ছাৰাযামযোগতো দ্ৰে মগ্গঙ্গানি এত্থাতি দুমগ্গঙ্গং. তিমগ্গঙ্গানি সত্তসূতি চত্তারি দিট্ঠিৰিপ্পযুত্তানি, দ্ৰে দোসমূলানি, উদ্ধচ্চসহগতচিত্তন্তি সত্তসু মিচ্ছাসঙ্কপ্পমিচ্ছাৰাযামমিচ্ছাসমাধিযোগতো তিমগ্গঙ্গানি. চত্তালীস…পে… চতুরঙ্গিকোতি দ্ৰাদস ঞাণৰিপ্পযুত্তানি, চত্তারি দিট্ঠিসম্পযুত্তানি, পঠমজ্ঝানিকৰজ্জানি চতুৰীসতি মহগ্গতচিত্তানীতি চত্তালীসচিত্তেসু যো মগ্গো লব্ভতি, সো যথাযোগং সম্মাসঙ্কপ্পসম্মাৰাযামসম্মাসতিসম্মাসমাধিযোগতো, মিচ্ছাদিট্ঠিমিচ্ছাসঙ্কপ্পমিচ্ছাৰাযামমিচ্ছাসমাধিযোগতো, সম্মাদিট্ঠিসম্মাৰাযামসম্মাসতিসম্মাসমাধিযোগতো ¶ চ চতুরঙ্গিকো মতো. তত্থ ঞাণৰিপ্পযুত্তেসু দ্ৰাদসসু পঠমানি চত্তারি, দিট্ঠিসম্পযুত্তেসু মজ্ঝিমানি, সেসেসু পচ্ছিমানি লব্ভন্তি.

পঞ্চদ্দসসু…পে… পঞ্চঙ্গিকোতি দ্ৰাদসসু ঞাণসম্পযুত্তকামাৰচরেসু চেৰ তীসু লোকিযপঠমজ্ঝানিকেসু চাতি পন্নরসসু চিত্তেসু সম্মাদিট্ঠিসম্মাসঙ্কপ্পসম্মাৰাযামসম্মাসতিসম্মাসমাধিৰসেন পঞ্চঙ্গিকো মগ্গো. ননু চ সম্মাৰাচাদযো কামাৰচরেসু লব্ভন্তীতি? সচ্চং লব্ভন্তি, পাঠে পন অনাগতত্তা ইধ পরিচ্চত্তাতি. দ্ৰত্তিংসচিত্তেসূতি পঠমজ্ঝানিকৰজ্জেসু দ্ৰত্তিংসলোকুত্তরচিত্তেসু. সত্তঙ্গিকোতি অৰিতক্কত্তা সম্মাসঙ্কপ্পো ন লব্ভতীতি তং পরিচ্চজিত্ৰা অৰসেসসত্তমগ্গঙ্গৰসেন সত্তঙ্গিকো ৰুত্তো.

যত্থ পন সম্মাসঙ্কপ্পো লব্ভতি, তত্থ তেন সহ অট্ঠঙ্গিকোতি আহ ‘‘মগ্গো অট্ঠসূ’’তিআদি. তত্থ অট্ঠসু চিত্তেসূতি পঠমজ্ঝানিকেসু অট্ঠসু লোকুত্তরচিত্তেসু. এৰন্তি ছহি মগ্গঙ্গেহি সম্পযুত্তস্স অভাৰতো কত্থচি দ্ৰে মগ্গঙ্গানি, কত্থচি তীণি, কত্থচি চত্তারি, কত্থচি পঞ্চ, কত্থচি সত্ত, কত্থচি অট্ঠাতি এৰং ছহি পকারেহি.

১২৪-৬. ইদানি বলসম্পযোগং দস্সেন্তো আহ ‘‘বলানি দ্ৰে’’তিআদি. তত্থ ৰীরিযবলসমাধিবলৰসেন দ্ৰে বলানি কিরিযাহেতুকমনোৰিঞ্ঞাণধাতুদ্ৰযে ৰিভঙ্গৰারে আগতানি ৰীরিযবলসমাধিবলানি পচ্চেকং লব্ভন্তীতি ‘‘দ্ৰে দ্ৰিচিত্তেসূ’’তি ৰুত্তং. একস্মিং তীণীতি একস্মিং ৰিচিকিচ্ছাসহগতে ৰীরিযবলঅহিরিকবলঅনোত্তপ্পবলৰসেন তীণি বলানি. একাদসসু চত্তারীতি ৰিচিকিচ্ছাসহগতৰজ্জেসু একাদসসু অকুসলচিত্তেসু সমাধিবলঞ্চেৰ পুব্বে ¶ ৰুত্তানি তীণীতি চত্তারিবলানি. ছ দ্ৰাদসসূতি দ্ৰাদসসু ঞাণৰিপ্পযুত্তচিত্তেসু সদ্ধাৰীরিযসতিসমাধিহিরিওত্তপ্পৰসেন ছ বলানি.

একূনাসীতিযা ¶ সত্তাতি দ্ৰাদসসু ঞাণসম্পযুত্তকামাৰচরচিত্তেসু চেৰ সত্তৰীসতিমহগ্গতচিত্তেসু চ চত্তালীসায লোকুত্তরচিত্তেসু চাতি একূনাসীতিৰিধেসু চিত্তেসু সদ্ধাৰীরিযসতিসমাধিপঞ্ঞাহিরিওত্তপ্পৰসেন সত্ত বলানি. সোল়সেৰাবলানীতি পঞ্চদস অহেতুকৰিপাকানি, কিরিযামনোধাতুআৰজ্জনঞ্চাতি সোল়স বলৰিপ্পযোগতো অবলচিত্তানি. এৰন্তি পঞ্চহি বলেহি সম্পযুত্তস্স অভাৰতো কত্থচি দ্ৰে, কত্থচি তীণি, কত্থচি চত্তারি, কত্থচি ছ, কত্থচি সত্তাতি পঞ্চহি আকারেহি সবলং, ইমেসু একস্সাপি অভাৰতো অবলম্পি চ ৰিঞ্ঞেয্যং, ৰিজানিতব্বন্তি অত্থো. হেতুরাসিআদযো ৰিনিচ্ছযভাৰতো ন ৰুত্তাতি ৰেদিতব্বং. যেসু চিত্তেসু যানি ঝানঙ্গমগ্গঙ্গবলিন্দ্রিযানি জাযন্তীতি সম্বন্ধো. গাথাবন্ধসুখত্থং ইন্দ্রিযানং ওসানকরণং.

ইতি অভিধম্মত্থৰিকাসিনিযা নাম

অভিধম্মাৰতারসংৰণ্ণনায

চেতসিকৰিভাগনিদ্দেসৰণ্ণনা নিট্ঠিতা.

৪. চতুত্থো পরিচ্ছেদো

একৰিধাদিনিদ্দেসৰণ্ণনা

১২৮-৩০. ৰিজাননসভাৰতোতি আরম্মণৰিজাননসভাৰত্তা. ননু চ হেট্ঠা সারম্মণতো একৰিধভাৰো ৰুত্তোতি? সচ্চং ৰুত্তো, সো পন চেতসিকানঞ্চ সাধারণোতি ইধ তব্বিৰজ্জনত্থং ৰিজাননলক্খণতাৰ ৰুত্তা. সঙ্খেপগণনৰসেন চ সহেতুকানং একসত্ততিৰিধতা ৰুত্তা. হেতুৰাদিনাতি কুসলাকুসলাব্যাকতহেতূনং ব্যাকরণকুসলেন ¶ . অথ ৰা ‘‘যে ধম্মা হেতুপ্পভৰা ¶ , তেসং হেতুং তথাগতো আহা’’তি (অপ. থের ১.১.২৮৬; মহাৰ. ৬০) ৰচনতো তংতংপচ্চযুপ্পন্নধম্মানং তংতংপচ্চযৰাদিনা.

১৩১-৪. সৰত্থুকাৰত্থুকতোতি একন্তেন সব্বৰত্থুনিস্সিতভাৰতো চেৰ তদভাৰতো চ. কেচি পন হদযৰত্থুৰসেন সৰত্থুকাৰত্থুকতং ৰণ্ণেন্তি, তং ন যুজ্জতি সৰত্থুকনিদ্দেসে ‘‘সব্বো কামৰিপাকো’’তি পসাদনিস্সিতানম্পি সঙ্গহিতত্তা. উভযৰসেনাতি সৰত্থুকাৰত্থুকৰসেন. কানিচি হি চিত্তানি একন্তেন সৰত্থুকানি, কানিচি অৰত্থুকানেৰ, কানিচি উভযসভাৰানি. তথা চেৰ নিদ্দিসতি ‘‘সব্বো কামৰিপাকো চা’’তিআদি.

সব্বো কামৰিপাকো চাতি সহেতুকাহেতুকভিন্নো সব্বো তেৰীসতিৰিধো কামাৰচরৰিপাকো চ. আদিমগ্গোতি সোতাপত্তিমগ্গো. সো হি সব্বলোকুত্তরেসু আদিতো উপ্পজ্জনতো, অট্ঠসু অরিযপুগ্গলেসু আদিপুগ্গলস্স সম্বন্ধীতি ৰা ‘‘আদিমগ্গো’’তি ৰুচ্চতি. ৰিনা ৰত্থুন্তি সকসকৰত্থুং ৰিনা নুপ্পজ্জন্তি. তেনেৰ হেতানি অরূপভৰে নুপ্পজ্জন্তি তত্থ ৰত্থূনং অভাৰতো. ‘‘নুপ্পজ্জন্তি ৰিনা ৰত্থু’’ন্তি চ ইদং অন্তোভাৰিতকারণত্থং কত্ৰা ৰুত্তং. তেন যস্মা ৰত্থুং ৰিনা নুপ্পজ্জন্তি, তস্মা একন্তেন সৰত্থুকাতি ৰুত্তং হোতি.

একন্তেন অৰত্থুকা অরূপভৰেযেৰ পটিসন্ধাদিৰসেন পৰত্তনতো. কথং পন রূপসন্নিস্সযেন ৰিনা তত্থ অরূপং পৰত্ততি, কস্মা ন পৰত্ততি পঞ্চৰোকারেতি? তথা অদস্সনতো. যদি এৰং কবল়ীকারাহারেনপি ৰিনা রূপধাতুযং রূপেন পৰত্তিতব্বং, কিং কারণা? কামধাতুযং তথা অদস্সনতো. অপি তু যস্স চিত্তসন্তানস্স পৰত্তিকারণং ¶ রূপে অৰিগততণ্হং, তস্স সহ রূপেন পৰত্তি. যস্স পন নিব্বত্তিকারণং রূপে ৰিগততণ্হং, তস্স ৰিনা রূপেন পৰত্তি কারণস্স তংৰিমুখতাযাতি রূপসন্নিস্সযেন ৰিনা তত্থ অরূপং পৰত্ততি. দ্ৰেচত্তালীস সেসানীতি মনোদ্ৰারাৰজ্জনং কুসলকিরিযাৰসেন সোল়স কামাৰচরানি, তথেৰ অট্ঠ অরূপাৰচরানি, পঠমমগ্গৰজ্জানি সত্ত লোকুত্তরানি, পটিঘদ্ৰযৰজ্জিতদসঅকুসলানি চেতি দ্ৰেচত্তালীস ৰুত্তাৰসেসচিত্তানি.

১৩৫-৭. রূপাদীসু একেকমেৰ আরম্মণং ইমস্সাতি একেকারম্মণং. তস্স তস্স আরম্মণস্স আপাথগতকালে তংতংৰিজাননৰসেন পঞ্চপি আরম্মণানি ইমস্সাতি পঞ্চারম্মণং. এৰম্পীতি ¶ ন কেৰলং সৰত্থুকাদিৰসেনেৰ, অথ খো একেকারম্মণাদিতোপি. অভিঞ্ঞাৰজ্জিতানং সব্বমহগ্গতানম্পি ধম্মারম্মণভাৰেন একারম্মণত্তা আহ ‘‘সব্বং মহগ্গত’’ন্তি. পণ্ণত্তারম্মণতো একারম্মণন্তি কেচি. তং অরূপাৰচরদুতিযচতুত্থজ্ঝানানি পত্ৰা ন যুজ্জতি তেসং মহগ্গতারম্মণত্তা. অভিঞ্ঞাদ্ৰযস্স ছল়ারম্মণিকভাৰেন, তস্স চ রূপাৰচরপঞ্চমজ্ঝানতো অভিন্নত্তা তং পহায ‘‘তেচত্তালীসা’’তি ৰুত্তং.

১৪১. পুঞ্ঞৰিপাককিরিযতো কামে দ্ৰাদসাতি সম্বন্ধো. ধাতি নিপাতমত্তং. পুঞ্ঞৰিপাকক্রিযতোতি ঞাণৰিপ্পযুত্তকুসলৰিপাককিরিযতো.

১৪৩-৯. ইরিযায কাযিকায কিরিযায পৰত্তিপথভাৰতো ইরিযাপথো, গমনাদি. অত্থতো তদৰত্থা রূপপ্পৰত্তি. কামঞ্চেত্থ রূপৰিনিমুত্তো ইরিযাপথো, ৰিঞ্ঞত্তি ৰা নত্থি, তথাপি সব্বং রূপসমুট্ঠাপকচিত্তং ইরিযাপথুপত্থম্ভকং, ৰিঞ্ঞত্তিৰিকারুপ্পাদনঞ্চ হোতি. যং পন চিত্তং ৰিঞ্ঞত্তিজনকং ¶ , তং একংসতো ইতরদ্ৰযস্স জনকং অৰিনাভাৰতো, তথা ইরিযাপথুপত্থম্ভকং রূপস্সাতি ইমস্স ৰিসেসস্স দস্সনত্থং ‘‘রূপীরিযাপথৰিঞ্ঞত্তি-জনকাজনকাদিতো’’তি ইরিযাপথৰিঞ্ঞত্তীনং ৰিসুং গহণং. জনকাজনকাদিতোতি তিণ্ণম্পি জনকতো, কস্সচিপি অজনকতো, দ্ৰিন্নং একস্স চ জনকতো. কানিচি হি চিত্তানি রূপং সমুট্ঠাপেন্তি, ইরিযাপথং কপ্পেন্তি, ৰিঞ্ঞত্তিং জনযন্তি. কানিচি রূপং সমুট্ঠাপেন্তি, ইরিযাপথং কপ্পেন্তি, ৰিঞ্ঞত্তিং ন জনযন্তি. কানিচি রূপমেৰ সমুট্ঠাপেন্তি, ইতরদ্ৰযং ন করোন্তি. কানিচি তীণি ন করোন্তেৰ. তথা চেৰ দস্সেতি ‘‘দ্ৰাদসাকুসলা’’তিআদি. এৰঞ্চাপি হি তং চিত্তন্তি ন কেৰলং অহেতুকাদিতোৰ, এৰং রূপাদিজনকাদিতোপি তং চতুব্বিধং. ‘‘এৰঞ্চাদিম্হি ত’’ন্তিপি লিখন্তি. তস্স পন আদিম্হি নিক্খিত্তং চিত্তং এৰঞ্চ চতুব্বিধন্তি অত্থং ৰদন্তি. তত্থাতি তেসু রূপজনকাদীসু. দস কিরিযাতি মনোধাতুৰজ্জা দস কিরিযা.

সমুট্ঠাপেন্তি রূপানীতি অত্তনো উপ্পাদক্খণেযেৰ অত্তনা জনেতব্বরূপানি সমুট্ঠাপেন্তি. কপ্পেন্তীতি সন্নামেন্তি. যথাপৰত্তং ইরিযাপথং উপত্থম্ভেন্তি. যথা হি অন্তরন্তরা উপ্পজ্জমানেহি ৰীথিচিত্তেহি অব্বোকিণ্ণে ভৰঙ্গে পৰত্তমানে অঙ্গানি ওসীদন্তি, পৰেধন্তা ৰিয হোন্তি, ন এৰং দ্ৰত্তিংসৰিধেসু ৰক্খমানেসু চ ছব্বীসতিৰিধেসু জাগরণচিত্তেসু পৰত্তমানেসু. তদা পন অঙ্গানি ¶ উপত্থদ্ধানি যথাপৰত্তইরিযাপথভাৰেনেৰ পৰত্তন্তি. জনযন্তি চ ৰিঞ্ঞত্তিন্তি মনোদ্ৰারে পৰত্তা এৰ ৰিঞ্ঞত্তিং জনযন্তি, ন পন পঞ্চদ্ৰারে পৰত্তাতি দট্ঠব্বং.

দ্ৰিপঞ্চৰিঞ্ঞাণানং ঝানঙ্গযোগাভাৰেন রূপাজনকত্তা আহ ‘‘দ্ৰেপঞ্চৰিঞ্ঞাণা’’তি. ঝানঙ্গানি হি চিত্তেন সহ রূপসমুট্ঠাপকানি, তেসং অনুবলপ্পদাযকানি মগ্গঙ্গাদীনি তেসু ¶ ৰিজ্জমানেসু সৰিসেসং রূপপ্পৰত্তিদস্সনতো. অরূপৰিপাকা পন রূপৰিরাগভাৰনায নিব্বত্তত্তা হেতুনো তংৰিমুখতায রূপং ন সমুট্ঠাপেন্তীতি আহ ‘‘ৰিপাকা চ অরূপিসূ’’তি.

১৫০. সব্বেসং সন্ধিচিত্তন্তি সব্বেসং সত্তানং পটিসন্ধিচিত্তং. তঞ্হি ৰত্থুদুব্বলতায, অপ্পতিট্ঠিততায, পচ্চযৰেকল্লতো, আগন্তুকতায চ রূপং ন সমুট্ঠাপেতি. তথা হি পটিসন্ধিৰিঞ্ঞাণেন সহজাতং ৰত্থু পচ্ছাজাতপচ্চযরহিতং, আহারাদীহি চ অনুপত্থদ্ধং দুব্বলং, তস্স চ দুব্বলত্তা তন্নিস্সিতৰিঞ্ঞাণম্পি দুব্বলন্তি. যথা চ পপাতে পতিতো অঞ্ঞস্স নিস্সযো ভৰিতুং ন সক্কোতি, এৰং তম্পি ভিন্নসন্ততিযং কম্মক্খিত্ততায পপাতে পতিতং ৰিয অপ্পতিট্ঠিতং ন রূপসমুট্ঠাপনে উস্সহতি চ ৰত্থুনো চ অত্তনা সহ অপচ্ছা অপুরে উপ্পজ্জমানত্তা পুরেজাতপচ্চযস্স অলাভতো. যথা পন আগন্তুকো পুরিসো অগতপুব্বং দেসং গতো অঞ্ঞেসং ‘‘এথ ভো অন্তোগামে ৰো অন্নপানগন্ধমালাদীনি দস্সামী’’তি ৰত্তুং ন সক্কোতি অত্তনো অৰিসযতায, অপ্পহুতায চ, এৰমেৰং পটিসন্ধিচিত্তম্পি আগন্তুকন্তি. এৰং ৰত্থুদুব্বলতাদীহি কারণেহি রূপং ন সমুট্ঠাপেতি. অপিচ আহারিন্দ্রিযাদিৰসেন যেহাকারেহি চিত্তসমুট্ঠানরূপানং চিত্তচেতসিকা পচ্চযা হোন্তি, তেহি সব্বেহি পটিসন্ধিযং চিত্তচেতসিকা সমতিংসকম্মজরূপানং যথাযোগং পচ্চযা হোন্তি. ৰুত্তঞ্হেতং পট্ঠানে –

‘‘পটিসন্ধিক্খণে ৰিপাকাব্যাকতা আহারা সম্পযুত্তানং খন্ধানং কটত্তা চ রূপানং আহারপচ্চযেন পচ্চযো’’তিআদি (পট্ঠা. ১.১.৪২৯).

তস্মা ¶ সমতিংসকম্মজরূপানি চিত্তসমুট্ঠানরূপানং ঠানং গহেত্ৰা ঠিতানীতি পটিসন্ধিচিত্তং রূপং ন সমুট্ঠাপেতীতি ৰেদিতব্বং.

চুতিচিত্তঞ্চারহতোতি এত্থ খীণাসৰস্স চুতিচিত্তং উপসন্তৰট্টমূলস্মিং সন্তানে সাতিসযং সন্তৰুত্তিতায ¶ রূপং ন সমুট্ঠাপেতি, অনাগামিআদীনং তদভাৰতোতি ৰদন্তি. টীকাকারো পন আনন্দাচরিযো ভণতি –

‘‘কামাৰচরানং পচ্ছিমচিত্তস্স উপ্পাদক্খণে যস্স চিত্তস্স অনন্তরা কামাৰচরানং পচ্ছিমচিত্তং উপ্পজ্জিস্সতি, রূপাৰচরে, অরূপাৰচরে পচ্ছিমভৰিকানং, যে চ রূপাৰচরং, অরূপাৰচরং উপপজ্জিত্ৰা পরিনিব্বাযিস্সন্তি, তেসং চৰন্তানং, তেসং ৰচীসঙ্খারো নিরুজ্ঝিস্সতি, নো চ তেসং কাযসঙ্খারো নিরুজ্ঝিস্সতীতি ৰচনতো অঞ্ঞেসম্পি চুতিচিত্তং রূপং ন সমুট্ঠাপেতী’’তি.

আচরিযস্স হি অযমধিপ্পাযো – ‘‘কামাৰচরানং পচ্ছিমচিত্তস্সা’’তি এতেন অৰিসেসেন কামাৰচরসত্তানং চুতিচিত্তস্স, ‘‘যে চ রূপাৰচরং…পে… নিরুজ্ঝিস্সতী’’তি ইমিনা কামভৰতো চৰিত্ৰা রূপারূপভৰূপপজ্জনকানং কামাৰচরচুতিচিত্তস্সাপি উপ্পাদক্খণতো উদ্ধং ৰচীসঙ্খারস্স নিরোধং ৰত্ৰা কাযসঙ্খারস্স তদভাৰৰচনতো চুতিচিত্তস্স কাযসঙ্খারাসমুট্ঠাপনং সিদ্ধং. যদগ্গেন চ তং কাযসঙ্খারং ন সমুট্ঠাপেতি, তদগ্গেন তং সেসরূপম্পি ন জনেতি. ন হি রূপসমুট্ঠাপকস্স গব্ভগততাদিৰিবন্ধাভাৰে কাযসঙ্খারাসমুট্ঠাপনে কারণং অত্থি. ন চ যুত্তং চুতিতো উদ্ধং চিত্তসমুট্ঠানঞ্চস্স রূপং পৰত্ততীতি, নাপি ‘‘চুতিচিত্তং রূপং সমুট্ঠাপেতী’’তি পাল়ি অত্থি, ন চাপি ৰট্টমূলানুপসমো চুতিচিত্তস্স রূপুপ্পাদনে ¶ কারণং চুতিচিত্তেন ন উপ্পন্নানম্পি ততো পুরিমতরেহি উপ্পন্নানং ৰিয ভৰন্তরে অনুপ্পজ্জনতো, তস্মা সব্বেসম্পি চুতিচিত্তং রূপং ন সমুট্ঠাপেতীতি. যদি কাযসঙ্খারসমুট্ঠাপনমেৰ রূপজননারহভাৰং সাধেতি, তদা চতুত্থজ্ঝানে কথন্তি? নাযং দোসো, তস্স ভাৰনাবলেন সাতিসযং সন্তৰুত্তিতায কাযসঙ্খারাসমুট্ঠাপনেপি মরণাসন্নচিত্তানং ৰিয পরিদুব্বলত্তাভাৰতো রূপসমুট্ঠাপনে ৰিবন্ধো নত্থীতি. কুতো পন পট্ঠায চিত্তজরূপং নুপ্পজ্জতীতি? যতো পট্ঠায কাযসঙ্খারে নুপ্পজ্জতি. কদা চ কাযসঙ্খারো নুপ্পজ্জতীতি? চুতিতো পুব্বে দ্ৰত্তিংসমচিত্তক্খণতো পট্ঠায নুপ্পজ্জতি, তেত্তিংসমচিত্তক্খণে উপ্পন্নং পচ্ছিমসোল়সকতো পুরেতরমেৰ নিরুজ্ঝতীতি ৰদন্তি. ‘‘যস্স কাযসঙ্খারো ন নিরুজ্ঝতি, তস্স চিত্তসঙ্খারো ন নিরুজ্ঝিস্সতী’’তি (যম. ২.সঙ্খারযমক.১১৩) পঞ্হে ‘‘পচ্ছিমচিত্তস্স ভঙ্গক্খণে তেসং কাযসঙ্খারো চ ন নিরুজ্ঝতি, চিত্তসঙ্খারো চ ন নিরুজ্ঝিস্সতী’’তি পচ্ছিমচিত্তস্সেৰ ৰজ্জিতত্তা চুতিতো দুতিযততিযচিত্তেনাপি সহ নিরুজ্ঝতীতি অপরে. যস্স চিত্তস্স অনন্তরা কামাৰচরানং ¶ পচ্ছিমচিত্তং উপ্পজ্জতীতি এত্থ ‘‘যস্সা’’তি কামাৰচরচুতিচিত্তস্স অনন্তরপচ্চযভূতং চিত্তং সন্ধায ৰুত্তন্তি তস্স উপ্পাদতোপি উদ্ধং কাযসঙ্খারাভাৰৰচনেন হেট্ঠিমকোটিযা চুতিতো ততিযচিত্তেনেৰ সহ নিরুজ্ঝতি. দুতিযচিত্তং ন পাপুণাতীতি একে.

১৫১-৭. একং দ্ৰে তীণি চত্তারি ঠানানি ইমস্সাতি একদ্ৰিতিচতুট্ঠানং, একদ্ৰিতিচতুট্ঠানত্তাতি অত্থো. ঠানন্তি চ ইধ কিচ্চমধিপ্পেতং. তঞ্হি তিট্ঠন্তি এত্থ ধম্মা অৰট্ঠিতা ৰিয হোন্তীতি ‘‘ঠান’’ন্তি ৰুচ্চতি. মংসচক্খুদিব্বচক্খুঞাণচক্খুবুদ্ধচক্খুসমন্তচক্খুৰসেন পঞ্চ নিম্মলানি লোচনানি ইমস্সাতি পঞ্চনিম্মললোচনো.

নিপ্পপঞ্চেনাতি ¶ রাগাদিপপঞ্চরহিতেন. রাগাদযো হি সংসারে পপঞ্চনতো ‘‘পপঞ্চা’’তি ৰুচ্চন্তি.

আৰজ্জনে পটিচ্ছনে ঠানে মনোধাতুত্তিকন্তি সম্বন্ধো, কিরিযামনোধাতু আৰজ্জনট্ঠানে, ৰিপাকদ্ৰযং সম্পটিচ্ছনট্ঠানেতি অত্থো.

‘‘সোমনস্সযুত্তসন্তীরণং পঞ্চদ্ৰারে সন্তীরণং সিযা’’তি ৰত্তব্বে ‘‘সন্তীরণ’’ন্তি অধিকারতোৰ লব্ভতীতি গাথাবন্ধসুখত্থং ‘‘সোমনস্সযুত’’ন্তি এত্তকমেৰ ৰুত্তং.

বলৰারম্মণে সতীতি তদারম্মণকিচ্চস্স বলৰারম্মণেযেৰ লব্ভনতো ৰুত্তং, ন ইমস্সেৰ আৰেণিকভাৰেন সব্বেসম্পি তদারম্মণানং বলৰারম্মণেযেৰ উপ্পজ্জনতো. ৰোট্ঠব্বনন্তি কিরিযামনোৰিঞ্ঞাণধাতুসঙ্খাতং ৰোট্ঠব্বনকিচ্চং চিত্তং.

১৫৮-৯. সব্বেসন্তি সব্বেসং কামরূপারূপভৰিকসত্তানং. ইমিনা ইদং দস্সেতি – পঞ্চদ্ৰারেসু ৰোট্ঠব্বনকিচ্চং কেসঞ্চিদেৰ সত্তানং অরূপভৰে সব্বসো পঞ্চদ্ৰারিকচিত্তপ্পৰত্তিযা, রূপভৰে চ দ্ৰারত্তযপ্পৰত্তিযা অভাৰতো. মনোদ্ৰারে আৰজ্জনকিচ্চং পন সব্বেসমেৰ সচিত্তকসত্তানং করোতীতি. দ্ৰিট্ঠানিকং নাম হোতীতি যথাৰুত্তট্ঠানদ্ৰযৰন্ততায দ্ৰিট্ঠানিকচিত্তং নাম হোতি. কেচি পন ‘‘সোমনস্সসহগতসন্তীরণং কামসুগতিযং পটিসন্ধিং আকড্ঢতি ¶ , তস্মা তং পঞ্চট্ঠানিক’’ন্তি ৰদন্তি, তং তেসং মতিমত্তং পট্ঠানে তথা অদীপিতত্তা. তত্থ হি –

‘‘উপেক্খাসহগতং ধম্মং পটিচ্চ উপেক্খাসহগতো ধম্মো উপ্পজ্জতি নহেতুপচ্চযা’’তি এত্থ (পট্ঠা. ২.৭.৮) ‘‘অহেতুকং উপেক্খাসহগতং একং খন্ধং পটিচ্চ তযো খন্ধা, তযো খন্ধে পটিচ্চ একো খন্ধো, দ্ৰে খন্ধে পটিচ্চ দ্ৰে খন্ধা ¶ , অহেতুকপটিসন্ধিক্খণে উপেক্খাসহগতং একং খন্ধং পটিচ্চ তযো খন্ধা, তযো খন্ধে পটিচ্চ একো খন্ধো, দ্ৰে খন্ধে পটিচ্চ দ্ৰে খন্ধা’’তি (পট্ঠা. ২.৭.৮) –

এৰং উপেক্খাসহগত-পদস্স পৰত্তিপটিসন্ধিৰসেন পটিচ্চনযো উদ্ধটো. পীতিসহগতসুখসহগত-পদানং পন –

‘‘পীতিসহগতং ধম্মং পটিচ্চ পীতিসহগতো ধম্মো উপ্পজ্জতি নহেতুপচ্চযা. অহেতুকং পীতিসহগতং একং খন্ধং পটিচ্চ তযো খন্ধা, তযো খন্ধে পটিচ্চ একো খন্ধো, দ্ৰে খন্ধে পটিচ্চ দ্ৰে খন্ধা. সুখসহগতং ধম্মং পটিচ্চ সুখসহগতো ধম্মো উপ্পজ্জতি নহেতুপচ্চযা. অহেতুকং সুখসহগতং একং খন্ধং পটিচ্চ তযো খন্ধা, তযো খন্ধে পটিচ্চ একো খন্ধো, দ্ৰে খন্ধে পটিচ্চ দ্ৰে খন্ধা’’তি (পট্ঠা. ২.৭.৬) –

এৰং পৰত্তিৰসেনেৰ উদ্ধটো, ন ‘‘অহেতুকপটিসন্ধিক্খণে’’তিআদিনা পটিসন্ধিৰসেন, তস্মা যথাধম্মসাসনে অৰচনম্পি অভাৰমেৰ দীপেতীতি ন তস্স পটিসন্ধিদানং অত্থীতি দ্ৰিট্ঠানিকতাৰ ৰুত্তাতি. তে মহগ্গতৰিপাকা নৰাতি সম্বন্ধো.

১৬২. ছদ্ৰারা এৰ ছদ্ৰারিকা. অথ ৰা ছদ্ৰারিকেসূতি ছদ্ৰারিকচিত্তেসূতি অত্থো.

১৬৪-৬. ‘‘পঞ্চকিচ্চ’’ন্তিআদি যথাৰুত্তানমেৰ নিগমনং. সেসন্তি অট্ঠসট্ঠিৰিধং চিত্তং. এককিচ্চযোগতো, একং কিচ্চমস্সাতি ৰা একং, একমেৰ এককং. সব্বচিত্তানং কিচ্চৰসেন নিদ্দেসট্ঠানেযেৰ কিচ্চানং পটিপাটিম্পি দস্সেতুং ‘‘ভৰঙ্গাৰজ্জন’’ন্তিআদি ৰুত্তং. যদি এৰং পটিসন্ধিতো পট্ঠায চুতিপরিযোসানং ৰত্তব্বন্তি? সচ্চং, চুতিপটিসন্ধীনং পন পাকটত্তা ¶ তথা ¶ ন ৰুত্তং. ভৰস্স হি পটিসন্ধি আদি, চুতি পরিযোসানন্তি পাকটমেৰ, তস্মা পাকটট্ঠানং পহায অপাকটট্ঠানতো পট্ঠায দস্সেতুং ভৰঙ্গমেৰ আদিতো ৰুত্তং. তদারম্মণং পন কিঞ্চাপি অপাকটং, অথ খো অনেকন্তিকং কিস্মিঞ্চি ভৰে কত্থচি জৰনৰীথিযং অলব্ভনতোতি একন্তলব্ভমানপরিদীপনত্থং তং ন ৰুত্তং. অথ ৰা তদারম্মণচিত্তম্পি যেভুয্যেন ভৰঙ্গনামং লব্ভতীতি পুরিমজৰনৰীথিযং তদারম্মণং পচ্ছিমজৰনৰীথিযা আৰজ্জনস্স পুরেচরভূতং ভৰঙ্গ-গ্গহণেনেৰ সঙ্গহিতন্তি ৰিসুং ন ৰুত্তং. কেচি পন ‘‘পঞ্চদ্ৰারেসু পৰত্তিৰসেন পঞ্চৰিধতায দস্সনত্থং ‘ভৰঙ্গাৰজ্জন’ন্তিআদি ৰুত্ত’’ন্তি ৰদন্তি, তত্থ পন অপ্পৰত্তমানানং কেসঞ্চি সব্ভাৰতো তং ন যুজ্জতি, ছদ্ৰারপ্পৰত্তিৰসেন ছব্বিধত্তনযদস্সনত্থন্তি ৰত্তুং ৰট্টতি. যথা চেত্থ ‘‘ভৰঙ্গাৰজ্জন’’ন্তিআদিনা চক্খুদ্ৰারে ৰুত্তং, এৰং সোতদ্ৰারাদীসুপি দস্সনাদিং অপনেত্ৰা সৰনাদিং পক্খিপিত্ৰা কিচ্চপ্পৰত্তি যোজেতব্বা. মনোদ্ৰারে পন –

‘‘ভৰঙ্গং পঠমং হোতি, ততো আৰজ্জনং মতং;

দুতিযং তমতিক্কম্ম, জৰনং ততিযং সিযা’’তি. –

যোজনা দট্ঠব্বা. ছন্নং ৰিঞ্ঞাণানন্তি চক্খুৰিঞ্ঞাণাদীনং পঞ্চন্নং, মনোৰিঞ্ঞাণস্স চ. সত্তৰিঞ্ঞাণধাতূনন্তি চক্খুৰিঞ্ঞাণধাতাদীনং পঞ্চন্নং, মনোধাতুমনোৰিঞ্ঞাণধাতুদ্ৰযস্সাতি সত্তন্নং ৰিঞ্ঞাণধাতূনং.

১৬৯-৭১. পঞ্চাভিঞ্ঞাৰিৰজ্জিতন্তি –

‘‘ইদ্ধিৰিধং দিব্বসোতো, পরচিত্তৰিজাননা;

পুব্বেনিৰাসানুস্সতি, দিব্বচক্খূতি পঞ্চধা’’তি. –

এৰমাগতাহি পঞ্চহি অভিঞ্ঞাহি যুত্তেন রূপাৰচরপঞ্চমজ্ঝানচিত্তেন ৰজ্জিতং. দিব্বসোতাদীনং একেকারম্মণত্তেপি পঞ্চন্নম্পি অভিঞ্ঞানং একস্সেৰ চিত্তস্স অৰত্থাভেদভাৰতো ৰুত্তং ‘‘পঞ্চাভিঞ্ঞাৰিৰজ্জিত’’ন্তি ¶ . কেচি পন ‘‘ইধ একন্তেন ধম্মারম্মণিকচিত্তানমেৰ ৰচনতো ¶ পরচিত্তৰিজাননং ৰজ্জেত্ৰা অনাগতংসঞাণেন সহ পঞ্চাভিঞ্ঞানং পটিক্খেপো’’তি ৰদন্তি.

দ্ৰিপঞ্চৰিঞ্ঞাণানং, মনোধাতুত্তযস্স চ পরিচ্চাগেন একচত্তালীস হোন্তীতি আহ ‘‘চত্তালীসং তথেকক’’ন্তি. অভিঞ্ঞানি চাতি চ-সদ্দো অট্ঠানপ্পযুত্তো, সো ‘‘চত্তালীসং তথেকক’’ন্তি ইমস্সানন্তরং দট্ঠব্বো, তেন পন অভিঞ্ঞাচিত্তদ্ৰযং সঙ্গণ্হাতি. অথ ৰা অভিঞ্ঞা নাম হেট্ঠা একেকারম্মণিকেসু ৰুত্তস্স পঞ্চমজ্ঝানস্সেৰ অৰত্থাৰিসেসোতি অভিঞ্ঞাচিত্তানং ছল়ারম্মণিকেসু অগ্গহণন্তি দট্ঠব্বং.

১৭২-৩. তিধা কত্ৰাতি তিধা করণহেতু. হেত্ৰত্থো হি অযং ত্ৰা-সদ্দো যথা ‘‘সীহং দিস্ৰা ভযং ছম্ভিতত্তং উপ্পজ্জতি, পঞ্ঞায চস্স দিস্ৰা আসৰা পরিক্খীণা হোন্তী’’তি. ‘‘পুঞ্ঞাপুঞ্ঞৰসেনা’’তিআদিনা জাতিভূমিহেতুৰেদনাদিৰসেন যাৰ ছসত্ততিৰিধো ভেদো, তাৰ মনোৰিঞ্ঞাণধাতুং ভিন্দিত্ৰা তংৰসেন চিত্তৰিভাগদস্সনত্থং নযদানং কতন্তি ৰেদিতব্বং.

১৭৫. তিধা কত্ৰাতি পঠমং ৰিপাকদ্ৰযকিরিযাভেদতো, দুতিযং কুসলাকুসলাদিতোতি এৰং ধাতুদ্ৰযং পচ্চেকং তিধা কত্ৰা.

১৮০. ভূমি…পে… ৰিভাৰযেতি তিংসভূমীনং নানত্তৰসেন পৰত্তিতো তিংসৰিধং, তত্থেৰ তিংসপুগ্গলানং নানত্তৰসেন পৰত্তিতো চ তিংসৰিধন্তিআদিনা ইদং যথানিদ্দিট্ঠচিত্তং বহুধা হোতীতি চ ৰিভাৰেয্যাতি অত্থো.

১৮১. ইধাতি ¶ ইমস্মিং সাসনে. হত্থগতামলকা ৰিয হোন্তীতি যথা হত্থগতং আমলকং চক্খুমতো সুপাকটং হোতি, এৰমিমস্স মতিমতো ভিক্খুনো অভিধম্মপিটকগতা অত্থা সুপাকটা হোন্তি, আৰজ্জিতাৰজ্জিতক্খণে সুৰিসদাৰ পঞ্ঞাযন্তীতি অত্থো.

ইতি অভিধম্মত্থৰিকাসিনিযা নাম

অভিধম্মাৰতারসংৰণ্ণনায

একৰিধাদিনিদ্দেসৰণ্ণনা নিট্ঠিতা.

৫. পঞ্চমো পরিচ্ছেদো

ভূমিপুগ্গলচিত্তুপ্পত্তিনিদ্দেসৰণ্ণনা

১৮২-৮. বুদ্ধিযা ¶ ৰুদ্ধিং ৰিরুল়্হিং করোতীতি বুদ্ধিৰুদ্ধিকরং. যস্স যস্স নযস্স কথনং পটিঞ্ঞাতং, তং তং দস্সেন্তো আহ ‘‘চিত্তানং ভূমীসুপ্পত্তি’’ন্তি. তং ৰত্ৰা ভূমীনং আধারৰসেন পসঙ্গাগতং গতিভেদং, ভৰভেদঞ্চ দস্সেতুং ‘‘দেৰা চেৰা’’তিআদি ৰুত্তং. ‘‘চতস্সোপাযভূমিযো’’তি ৰত্ৰা অসুরগতিযা পেতগতিযংযেৰ সঙ্গহিতত্তা ‘‘গতিযো পঞ্চা’’তি ৰুত্তন্তি ৰদন্তি. মযং পন ‘‘তিস্সোৰাপাযভূমিযো’’তি পাঠেন ভৰিতব্বন্তি মঞ্ঞাম. ন হি এস অনাকুলৰচনো আচরিযো ঈদিসং পুব্বাপরৰিরুদ্ধং ৰিয সম্মোহজনকং ৰচনং ভাসতি. পাল়িযম্পি হি –

‘‘পঞ্চ খো ইমা, সারিপুত্ত, গতিযো. কতমা পঞ্চ? নিরযো তিরচ্ছানযোনি পেত্তিৰিসযো মনুস্সা দেৰা’’তি (অ. নি. ৯.৬৮) –

এৰং ¶ তিণ্ণমেৰ অপাযানং ৰসেন ৰুত্তং. কামরূপারূপৰসেন তযো ভৰা. তত্থাতি তেসু তীসু ভৰেসু. তিংসেৰাতি চতস্সো অপাযভূমিযো, সত্তৰিধা কামসুগতিভূমি, সোল়স রূপীব্রহ্মলোকা, চতস্সো অরূপভূমিযোতি একতিংসভূমীনমন্তরে চিত্তপ্পৰত্তিঅধিকারত্তা অসঞ্ঞভূমিং অপনেত্ৰা অৰসেসা তিংসেৰ ভূমিযোতি অত্থো. তাসু তিংসেৰ পুগ্গলাতি তাসু ভূমীসু উপ্পন্না পুগ্গলা ভূমিগণনৰসেন তিংসেৰ হোন্তি. ভূমিৰসেন তিংসৰিধাপি পন পটিসন্ধিচিত্তগণনায একূনৰীসতি হোন্তীতি দস্সেন্তো আহ ‘‘ভূমীস্ৰেতাসূ’’তিআদি.

পটিসন্ধিকচিত্তানন্তি দস কামাৰচরপটিসন্ধিচিত্তানি, পঞ্চ রূপাৰচরপটিসন্ধিচিত্তানি, চত্তারি অরূপাৰচরপটিসন্ধিচিত্তানীতি ইমেসং একূনৰীসতিপটিসন্ধিচিত্তানং ৰসেন. অসঞ্ঞীনমচিত্তকাতি অসঞ্ঞসত্তানং অচিত্তকা পটিসন্ধি. ৰুত্তঞ্হেতং –

‘‘অসঞ্ঞসত্তা ¶ দেৰা অহেতুকা অনাহারকা অফস্সকা অৰেদনকা অসঞ্ঞকা অচেতনকা অচিত্তকা পাতুভৰন্তী’’তি.

যদি পটিসন্ধিৰসেন ৰীসতি পুগ্গলা, কথং ভূমিৰসেন তিংসাতি ৰুত্তা. একতিংসাতি হি ৰত্তব্বন্তি আহ ‘‘ইধা’’তিআদি.

ন ৰিজ্জতি হেতু ইমেসন্তি অহেতূ, দুৰে, তীণি চ হেতূ ইমেসন্তি দ্ৰিতিহেতূ, পটিসন্ধিৰসেন অহেতুকা, দুহেতুকা, তিহেতুকা চাতি অত্থো. তত্থ অহেতুকা আপাযিকা চ, একচ্চে ভূমদেৰা, মনুস্সেসু জচ্চন্ধজচ্চবধিরজচ্চুম্মত্তকনপুংসকউভতোব্যঞ্জনকাদযো চ. ৰুত্তাৰসেসা কামসুগতিৰাসিনোৰ দুহেতুকা. তিহেতুকা পন কামসুগতিৰাসিনোৰ. অরিযা পন অট্ঠাতি চতুন্নং অরিযমগ্গসমঙ্গীনং, চতুন্নঞ্চ অরিযফলসমঙ্গীনং ৰসেন অট্ঠ অরিযপুগ্গলা ¶ . ননু চ অরিযাপি তিহেতুকাযেৰাতি? সচ্চং, চিত্তুপ্পাদং পন পত্ৰা তেসং ৰিসেসসব্ভাৰতো ৰিসুংযেৰ উদ্ধটাতি দট্ঠব্বং.

১৮৯-৯২. ‘‘ভূমীসুপ্পত্তিং ভণতো মে নিবোধথা’’তি সুত্ৰা চোদকো ‘‘তিংসভূমীসূ’’তিআদিনা সব্বেসং ভূমীনং সাধারণচিত্তানি পুচ্ছতি, ইতরো ‘‘চুদ্দসেৰা’’তি ৰিস্সজ্জেতি. তত্থ অট্ঠ পরিত্তকুসলানি, চত্তারি দিট্ঠিৰিপ্পযুত্তানি, উদ্ধচ্চসহগতং, মনোদ্ৰারাৰজ্জনঞ্চাতি চুদ্দসেৰ, ন ঊনানি নাধিকানি, সব্বাসু তিংসভূমীসু হোন্তি, সব্বভূমীনং সাধারণানীতি অত্থো.

সদা…পে… সিযুন্তি দ্ৰে দোসমূলানি, কুসলৰিপাকচক্খুসোতৰিঞ্ঞাণসম্পটিচ্ছনসন্তীরণদ্ৰযৰজ্জিতানি অট্ঠারস কামাৰচরৰিপাকচিত্তানীতি ৰীসতি চিত্তানি সদা কামেযেৰ ভৰে সিযুং, ন কদাচি অঞ্ঞত্থ উপ্পজ্জন্তীতি অত্থো. ননু চ ব্রহ্মূনম্পি অকুসলৰিপাকানি উপ্পজ্জন্তীতি? সচ্চং উপ্পজ্জন্তি, তানি কামভৰে অনিট্ঠরূপাদযো আরব্ভ উপ্পজ্জন্তি ব্রহ্মলোকে তেসং অভাৰতোতি কামভৰেযেৰ নিযমিতানি. রূপাৰচরৰিপাকচিত্তানি পঞ্চ রূপাৰচরভৰেযেৰ সিযুং, চত্তারো চ অরূপাৰচরৰিপাকা অরূপীসূতি আহ ‘‘পঞ্চ রূপভৰে’’তিআদি.

কাম ¶ …পে… ভৰন্তীতি রূপাৰচরকুসলকিরিযচিত্তানি চেৰ কুসলৰিপাকানি চ চক্খুসোতৰিঞ্ঞাণসম্পটিচ্ছনসন্তীরণানি ৰোট্ঠব্বনৰজ্জানি চ দ্ৰে অহেতুককিরিযচিত্তানি পঠমমগ্গৰিঞ্ঞাণন্তি অট্ঠারস চিত্তানি কামরূপভৰেযেৰ ভৰন্তি, ন অরূপভৰে. তত্থ হি সব্বসো রূপসঞ্ঞানং সমতিক্কন্তত্তা রূপাৰচরকুসলকিরিযা নুপ্পজ্জন্তি. চক্খুৰিঞ্ঞাণাদীনি ৰত্থুদ্ৰারৰিরহতো, হসিতুপ্পাদো একন্তৰত্থুনিস্সযত্তা, সোতাপত্তিমগ্গো পরতোঘোসপচ্চযাযেৰ নিব্বত্তনতো ¶ ন উপ্পজ্জতি. দ্ৰেচত্তালীসাতি অট্ঠ পরিত্তকুসলানি, চত্তারি অরূপকুসলানি, পঠমমগ্গৰজ্জানি সত্ত লোকুত্তরচিত্তানি, পটিঘদ্ৰযৰজ্জিতানি চ দস অকুসলচিত্তানি, পুব্বে ৰুত্তঅহেতুককিরিযাদ্ৰযৰজ্জিতানি নৰ কামাৰচরকিরিযচিত্তানি, চত্তারি অরূপাৰচরকিরিযচিত্তানীতি এৰং দ্ৰেচত্তালীস চিত্তানি তীসু ভৰেসু হোন্তি.

১৯৩-২০৪. এৰং ভৰৰসেন চিত্তুপ্পত্তিং দস্সেত্ৰা ইদানি কালৰসেন দস্সেন্তো আহ ‘‘ঠপেত্ৰা পনা’’তিআদি. সব্বাসন্তি নিদ্ধারণত্থে সামিৰচনং. অট্ঠ মহাকিরিযা, অরহত্তমগ্গফলচিত্তানি, অনাগামিফলং, নেৰসঞ্ঞানাসঞ্ঞাযতনকুসলকিরিযাতি তেরসেৰ চিত্তানি অপাযরহিতাসু ছব্বীসভূমীসু হোন্তি অপাযেসু ৰিপাকাৰরণসব্ভাৰে এতেসং অনুপ্পজ্জনতো. অপরানি ছ চিত্তানীতি সম্বন্ধো. তানি পন রূপভৰসাধারণানং পঞ্চপরিত্তৰিপাকানং, কিরিযমনোধাতুযা চ ৰসেন ৰেদিতব্বানি.

পঞ্চ চিত্তানীতি দিট্ঠিসম্পযুত্তৰিচিকিচ্ছাৰসেন পঞ্চ চিত্তানি. তানি হি পঞ্চসু সুদ্ধাৰাসভূমীসু ন লব্ভন্তি. তত্থ অনাগামিখীণাসৰানমেৰ অধিৰুত্থত্তা, তেসঞ্চ পঠমমগ্গেনেৰ ইমেসং পঞ্চন্নং ৰিঞ্ঞাণানং অনুপ্পাদধম্মতং আপাদিতত্তা.

অপরানি দুৰেতি ততিযারুপ্পকুসলকিরিযচিত্তানি. তানি হি নেৰসঞ্ঞানাসঞ্ঞাযতনেসু অতিক্কন্তারম্মণত্তা, অপাযেসু চ অহেতুকপটিসন্ধিকত্তা নুপ্পজ্জন্তি. চতুৰীসতীভূমিসু দ্ৰে চাতি ৰিঞ্ঞাণঞ্চাযতনকুসলকিরিযাৰসেন দ্ৰে চিত্তানি. তেৰীসভূমিসু দ্ৰেযেৰাতি আকাসানঞ্চাযতনকুসলকিরিযচিত্তানি.

একাদসৰিধন্তি রূপাৰচরকুসলকিরিযা হসিতুপ্পাদোতি একাদস. সোতাপত্তিফলং যাৰ অনাগামিমগ্গো চত্তারি চ চিত্তানি সুদ্ধাৰাসঅপাযৰজ্জাসু একৰীসতিভূমীসু ভৰন্তি. একং ¶ ¶ সোতাপত্তিমগ্গচিত্তং সুদ্ধাৰাসঅপাযঅরূপভূমিৰজ্জেসু সত্তরসসু ভূমীসু জাযতি. দ্ৰে দোসমূলানি, কুসলৰিপাকঘানজিৰ্হাকাযৰিঞ্ঞাণানি, সত্ত অকুসলৰিপাকাতি দ্ৰাদস চিত্তানি মহগ্গতভূমিৰজ্জাসু একাদসসু কামভূমীসু জাযন্তি. অট্ঠ মহাৰিপাকচিত্তানি কামাৰচরদেৰমনুস্সৰসেন সত্তভূমীসু জাযন্তি. ছসু ভূমিসূতি ৰেহপ্ফলসুদ্ধাৰাসসঙ্খাতাসু ছসু পঞ্চমজ্ঝানভূমীসু.

চত্তারি…পে… ভূমিসূতি চতুত্থজ্ঝানৰিপাকো পরিত্তসুভঅপ্পমাণসুভসুভকিণ্হৰসেন তীসু ভূমীসু জাযতি, দুতিযজ্ঝানৰিপাকো, ততিযজ্ঝানৰিপাকো চ পরিত্তাভাঅপ্পমাণাভাআভস্সরৰসেন তীসু ভূমীসু, পঠমজ্ঝানৰিপাকো ব্রহ্মপারিসজ্জব্রহ্মপুরোহিতমহাব্রহ্মাৰসেন তীসু ভূমীসু হোতীতি এৰং চত্তারি চিত্তানি একেকৰসেন তীসু তীসু ভূমীসু জাযন্তি.

২০৬-৯. এৰং এত্তকানেৰ চিত্তানি এত্তকাসু ভূমীসু উপ্পজ্জন্তীতি চিত্তনিযমৰসেন উপ্পত্তিং দস্সেত্ৰা ইদানি এত্তকাসু এৰ ভূমীসু এত্তকানেৰ চিত্তানি উপ্পজ্জন্তীতি ভূমিনিযমৰসেন দস্সেতুং ‘‘কুসলাকুসলা কামে’’তিআদি আরদ্ধং. তত্থ কামে কুসলাকুসলা ৰীসতি, তেসং পন্নরস অহেতুকা পাকা, আৰজ্জনদ্ৰযঞ্চাতি সত্ততিংসেৰ মানসা নরকাদীসু চতূসুপি অপাযেসু জাযরে. অৰসেসানি পন সত্তরস কামাৰচরৰিপাককিরিযচিত্তানি, পঞ্চতিংস মহগ্গতলোকুত্তরানীতি দ্ৰেপঞ্ঞাস মানসা কদাচিপি তেসু নুপ্পজ্জন্তি অভূমিভাৰতোতি অত্থো.

অসীতি হদযাতি ৰুত্তাৰসেসানি অসীতি চিত্তানি. ঘানাদিৰিঞ্ঞাণত্তযন্তি কুসলৰিপাকঘানাদিৰিঞ্ঞাণত্তযং. ‘‘অপুঞ্ঞজা পাকা’’তি অকুসলৰিপাকানং সব্বেসমেৰ গহিতত্তা ঘানাদিৰিঞ্ঞাণত্তযং অগ্গহিতৰিসেসম্পি পারিসেসঞাযেন কুসলৰিপাকমেৰ ৰিঞ্ঞাযতি.

২১৩. দোমনস্সন্তি ¶ দোমনস্সসহগতং. ক্রিযা চ দ্ৰেতি ৰোট্ঠব্বনৰজ্জিতা দ্ৰে অহেতুককিরিযা.

২১৪. ভূমিৰসেনেৰাতি পুগ্গলে অনামসিত্ৰা কেৰলং ভূমিৰসেন. পুগ্গলানং ৰসেন চ ভূমিৰসেন চ চিত্তুপ্পত্তিং ৰিভাৰযেতি সম্বন্ধো.

২১৬-৮. পঞ্চভূমিসূতি ¶ চতুরাপাযমনুস্সৰসেন পঞ্চভূমীসু. অহেতুকানং পটিসন্ধিসদিসতদারম্মণৰসেন ‘‘সত্ততিংসেৰা’’তি ৰুত্তং, অঞ্ঞকম্মেন পন দ্ৰিহেতুকতদারম্মণস্সাপি সম্ভৰতো একচত্তালীস হোন্তি. আচরিযজোতিপালত্থেরস্স অধিপ্পাযেন তিহেতুকৰিপাকেহিপি সদ্ধিং পঞ্চচত্তালীসেৰাতি দট্ঠব্বং. অহেতুকস্স ৰুত্তেহীতি অহেতুকসত্তস্স ৰুত্তেহি সত্ততিংসমানসেহি সহ. নৰ ক্রিযাতি অট্ঠ মহাকিরিযা, হসিতুপ্পাদো চাতি ইমানি অসাধারণকিরিযচিত্তানি নৰ.

২২০-১. ‘‘চতুপঞ্ঞাস মানসা’’তি ৰত্ৰা তেসং সরূপতো দস্সনত্থং আহ ‘‘দ্ৰিহেতুকস্সা’’তিআদি. পুন ‘‘চতুপঞ্ঞাসা’’তিআদি পন নিগমনং.

২২৩-৪. পঞ্ঞাসেৰস্স চিত্তানীতি তিহেতুকস্স পুথুজ্জনস্স ৰুত্তচতুপঞ্ঞাসচিত্তেসু দিট্ঠিৰিচিকিচ্ছাসহগতৰজ্জানি একূনপঞ্ঞাস, সোতাপত্তিফলন্তি ইমানি পঞ্ঞাসেৰ চিত্তানি অস্স কামাৰচরস্স সোতাপন্নদেহিনো জাযন্তে. নৰতিংসেৰাতি একূনচত্তালীসচিত্তানি. পঠমং ফলন্তি সোতাপত্তিফলং.

২২৫-৮. দুতিযঞ্চ ফলং হিত্ৰাতি সকদাগামিফলং হিত্ৰা. চ-সদ্দেন সোতাপত্তিফলঞ্চ হিত্ৰাতি অত্থো. অত্তনো ফলেন ¶ সহ যানি অট্ঠচত্তালীস চিত্তানি, তানি অনাগামিস্স সত্তস্স জাযন্তি. চত্তালীসঞ্চ চত্তারীতি তেৰীসতি কামাৰচরৰিপাকচিত্তানি, ৰীসতি কিরিযচিত্তানি, অরহত্তফলঞ্চাতি চতুচত্তালীস চিত্তানি. সকং সকন্তি ‘‘সোতাপন্নস্স সোতাপত্তিমগ্গচিত্তং, সকদাগামিনো সকদাগামিমগ্গচিত্ত’’ন্তিআদিনা অত্তনো অত্তনো মগ্গচিত্তং. কস্মা পন তেসং একেকমেৰ চিত্তং হোতীতি আহ ‘‘একচিত্তক্খণাহি তে’’তি. পঞ্চতিংসেৰাতি সত্তরস কামরূপারূপকুসলচিত্তানি, পটিঘদ্ৰযৰজ্জানি দস অকুসলানি, রূপভৰে লব্ভমানকানি পঞ্চ অহেতুকৰিপাকানি, আৰজ্জনদ্ৰযং, পঠমজ্ঝানৰিপাকো চাতি পঞ্চতিংস চিত্তানি তীসু পঠমজ্ঝানভূমীসু পুথুজ্জনস্স জাযন্তি.

২৩২-৫. হিত্ৰা চাতি এত্থ চ-সদ্দেন পঠমফলস্স গহণং দস্সেতি. তেন অপুঞ্ঞপঞ্চকং হিত্ৰা পঠমং ফলং গহেত্ৰা চাতি অত্থো. অপুঞ্ঞপঞ্চকন্তি দিট্ঠিসম্পযুত্তৰিচিকিচ্ছাসহগতৰসেন ¶ পঞ্চ অকুসলচিত্তানি. তত্থাতি তেসু সোতাপন্নস্স ৰুত্তেসু. তত্থেৰাতি সকদাগামিস্স ৰুত্তেসু. পুঞ্ঞজং সম্পটিচ্ছনং সন্তীরণদ্ৰযঞ্চেৰাতি সম্বন্ধো.

২৩৭. এৰং পঠমজ্ঝানভূমিযং পুথুজ্জনসোতাপন্নাদিৰসেন চিত্তসম্ভৰং দস্সেত্ৰা ইদানি তেসমেৰ ৰসেন দুতিযজ্ঝানভূমিযং দস্সেতুং ‘‘পুথুজ্জনস্সা’’তিআদি আরদ্ধং. দুতিযজ্ঝানততিযজ্ঝানৰিপাকানং একসত্তস্সেৰ অসম্ভৰেপি দুতিযজ্ঝানতলে নিব্বত্তে পুথুজ্জনাদযো পুথুজ্জনাদিভাৰসামঞ্ঞেন একতো গহেত্ৰা ‘‘দুতিযজ্ঝানততিযজ্ঝানপাকতো’’তি ৰুত্তং.