📜

নমো তস্স ভগৰতো অরহতো সম্মাসম্বুদ্ধস্স

অভিধম্মমাতিকাপাল়ি

একং ¶ ¶ সমযং ভগৰা দেৰেসু ৰিহরতি তাৰতিংসভৰনে পারিচ্ছত্তকমূলে পণ্ডুকম্বলসিলাযং. তত্র খো ভগৰা দেৰানং তাৰতিংসানং অভিধম্মকথং কথেসি.

১. ধম্মসঙ্গণীমাতিকা

তিকমাতিকা

কুসলা ধম্মা (ধ. স. তিকমাতিকা ১-২২), অকুসলা ধম্মা, অব্যাকতা ধম্মা. সুখায ৰেদনায সম্পযুত্তা ধম্মা, দুক্খায ৰেদনায সম্পযুত্তা ধম্মা, অদুক্খমসুখায ৰেদনায সম্পযুত্তা ধম্মা. ৰিপাকা ধম্মা, ৰিপাকধম্মধম্মা, নেৰৰিপাকনৰিপাকধম্মধম্মা. উপাদিণ্ণুপাদানিযা ¶ ধম্মা, অনুপাদিণ্ণুপাদানিযা ধম্মা, অনুপাদিণ্ণঅনুপাদানিযা ধম্মা. সংকিলিট্ঠসংকিলেসিকা ধম্মা, অসংকিলিট্ঠসংকিলেসিকা ধম্মা, অসংকিলিট্ঠঅসংকিলেসিকা ধম্মা. সৰিতক্কসৰিচারা ধম্মা, অৰিতক্কৰিচারমত্তা ধম্মা, অৰিতক্কঅৰিচারা ধম্মা. পীতিসহগতা ধম্মা, সুখসহগতা ধম্মা, উপেক্খাসহগতা ধম্মা. দস্সনেন পহাতব্বা ধম্মা, ভাৰনায পহাতব্বা ধম্মা, নেৰ দস্সনেন ন ভাৰনায পহাতব্বা ধম্মা. দস্সনেন পহাতব্বহেতুকা ধম্মা, ভাৰনায পহাতব্বহেতুকা ধম্মা, নেৰ দস্সনেন ন ভাৰনায পহাতব্বহেতুকা ধম্মা ¶ . আচযগামিনো ধম্মা, অপচযগামিনো ধম্মা, নেৰাচযগামিনাপচযগামিনো ধম্মা. সেক্খা ধম্মা, অসেক্খা ধম্মা, নেৰসেক্খনাসেক্খা ধম্মা. পরিত্তা ধম্মা, মহগ্গতা ধম্মা, অপ্পমাণা ধম্মা. পরিত্তারম্মণা ধম্মা, মহগ্গতারম্মণা ধম্মা, অপ্পমাণারম্মণা ধম্মা. হীনা ধম্মা, মজ্ঝিমা ধম্মা, পণীতা ধম্মা. মিচ্ছত্তনিযতা ধম্মা, সম্মত্তনিযতা ধম্মা, অনিযতা ধম্মা. মগ্গারম্মণা ধম্মা, মগ্গহেতুকা ধম্মা, মগ্গাধিপতিনো ধম্মা. উপ্পন্না ধম্মা, অনুপ্পন্না ধম্মা, উপ্পাদিনো ধম্মা. অতীতা ধম্মা, অনাগতা ধম্মা, পচ্চুপ্পন্না ধম্মা. অতীতারম্মণা ধম্মা, অনাগতারম্মণা ধম্মা, পচ্চুপ্পন্নারম্মণা ধম্মা. অজ্ঝত্তা ধম্মা, বহিদ্ধা ধম্মা, অজ্ঝত্তবহিদ্ধা ধম্মা. অজ্ঝত্তারম্মণা ধম্মা, বহিদ্ধারম্মণা ধম্মা, অজ্ঝত্তবহিদ্ধারম্মণা ধম্মা. সনিদস্সনসপ্পটিঘা ধম্মা, অনিদস্সনসপ্পটিঘা ধম্মা, অনিদস্সনঅপ্পটিঘা ধম্মা (ধ. স. তিকমাতিকা ১-২২).

দ্ৰাৰীসতিতিকং.

দুকমাতিকা

হেতুগোচ্ছকং

হেতূ ধম্মা, ন হেতূ ধম্মা. সহেতুকা ধম্মা, অহেতুকা ধম্মা. হেতুসম্পযুত্তা ধম্মা, হেতুৰিপ্পযুত্তা ধম্মা. হেতূ চেৰ ধম্মা সহেতুকা চ, সহেতুকা চেৰ ধম্মা ন চ হেতূ. হেতূ চেৰ ¶ ধম্মা হেতুসম্পযুত্তা চ, হেতুসম্পযুত্তা চেৰ ধম্মা ন চ হেতূ. ন হেতূ খো পন ধম্মা সহেতুকাপি, অহেতুকাপি. হেতুগোচ্ছকং.

চূল়ন্তরদুকং

সপ্পচ্চযা ধম্মা, অপ্পচ্চযা ধম্মা. সঙ্খতা ধম্মা, অসঙ্খতা ধম্মা. সনিদস্সনা ধম্মা, অনিদস্সনা ধম্মা. সপ্পটিঘা ধম্মা, অপ্পটিঘা ¶ ধম্মা. রূপিনো ধম্মা, অরূপিনো ধম্মা. লোকিযা ধম্মা, লোকুত্তরা ধম্মা. কেনচি ৰিঞ্ঞেয্যা ধম্মা, কেনচি ন ৰিঞ্ঞেয্যা ধম্মা. চূল়ন্তরদুকং.

আসৰগোচ্ছকং

আসৰা ধম্মা, নো আসৰা ধম্মা. সাসৰা ধম্মা, অনাসৰা ধম্মা. আসৰসম্পযুত্তা ধম্মা, আসৰৰিপ্পযুত্তা ধম্মা. আসৰা চেৰ ধম্মা সাসৰা চ, সাসৰা চেৰ ধম্মা নো চ আসৰা. আসৰা চেৰ ধম্মা আসৰসম্পযুত্তা চ, আসৰসম্পযুত্তা চেৰ ধম্মা নো চ আসৰা. আসৰৰিপ্পযুত্তা খো পন ধম্মা সাসৰাপি, অনাসৰাপি. আসৰগোচ্ছকং.

সঞ্ঞোজনগোচ্ছকং

সঞ্ঞোজনা ধম্মা, নো সঞ্ঞোজনা ধম্মা. সঞ্ঞোজনিযা ধম্মা, অসঞ্ঞোজনিযা ধম্মা. সঞ্ঞোজনসম্পযুত্তা ধম্মা, সঞ্ঞোজনৰিপ্পযুত্তা ধম্মা. সঞ্ঞোজনা চেৰ ধম্মা সঞ্ঞোজনিযা চ, সঞ্ঞোজনিযা চেৰ ধম্মা নো চ সঞ্ঞোজনা. সঞ্ঞোজনা চেৰ ধম্মা সঞ্ঞোজনসম্পযুত্তা চ, সঞ্ঞোজনসম্পযুত্তা চেৰ ধম্মা নো চ সঞ্ঞোজনা. সঞ্ঞোজনৰিপ্পযুত্তা খো পন ধম্মা সঞ্ঞোজনিযাপি, অসঞ্ঞোজনিযাপি. সঞ্ঞোজনগোচ্ছকং.

গন্থগোচ্ছকং

গন্থা ধম্মা, নো গন্থা ধম্মা. গন্থনিযা ধম্মা, অগন্থনিযা ধম্মা. গন্থসম্পযুত্তা ধম্মা, গন্থৰিপ্পযুত্তা ধম্মা. গন্থা চেৰ ধম্মা গন্থনিযা চ, গন্থনিযা চেৰ ধম্মা নো চ গন্থা ¶ . গন্থা চেৰ ধম্মা গন্থসম্পযুত্তা চ, গন্থসম্পযুত্তা চেৰ ধম্মা নো চ গন্থা. গন্থৰিপ্পযুত্তা খো পন ধম্মা গন্থনিযাপি, অগন্থনিযাপি. গন্থগোচ্ছকং.

ওঘগোচ্ছকং

ওঘা ¶ ধম্মা, নো ওঘা ধম্মা. ওঘনিযা ধম্মা, অনোঘনিযা ধম্মা. ওঘসম্পযুত্তা ধম্মা, ওঘৰিপ্পযুত্তা ধম্মা. ওঘা চেৰ ধম্মা ওঘনিযা চ, ওঘনিযা চেৰ ধম্মা নো চ ওঘা. ওঘা চেৰ ধম্মা ওঘসম্পযুত্তা চ, ওঘসম্পযুত্তা চেৰ ধম্মা নো চ ওঘা. ওঘৰিপ্পযুত্তা খো পন ধম্মা ওঘনিযাপি, অনোঘনিযাপি. ওঘগোচ্ছকং.

যোগগোচ্ছকং

যোগা ধম্মা, নো যোগা ধম্মা. যোগনিযা ধম্মা, অযোগনিযা ধম্মা. যোগসম্পযুত্তা ধম্মা, যোগৰিপ্পযুত্তা ধম্মা. যোগা চেৰ ধম্মা যোগনিযা চ, যোগনিযা চেৰ ধম্মা নো চ যোগা. যোগা চেৰ ধম্মা যোগসম্পযুত্তা চ, যোগসম্পযুত্তা চেৰ ধম্মা নো চ যোগা. যোগৰিপ্পযুত্তা খো পন ধম্মা যোগনিযাপি, অযোগনিযাপি. যোগগোচ্ছকং.

নীৰরণগোচ্ছকং

নীৰরণা ধম্মা, নো নীৰরণা ধম্মা. নীৰরণিযা ধম্মা, অনীৰরণিযা ধম্মা. নীৰরণসম্পযুত্তা ধম্মা, নীৰরণৰিপ্পযুত্তা ধম্মা. নীৰরণা চেৰ ধম্মা নীৰরণিযা চ, নীৰরণিযা চেৰ ধম্মা নো চ নীৰরণা. নীৰরণা চেৰ ধম্মা নীৰরণসম্পযুত্তা চ, নীৰরণসম্পযুত্তা চেৰ ধম্মা নো চ নীৰরণা. নীৰরণৰিপ্পযুত্তা খো পন ধম্মা নীৰরণিযাপি, অনীৰরণিযাপি. নীৰরণগোচ্ছকং.

পরামাসগোচ্ছকং

পরামাসা ধম্মা, নো পরামাসা ধম্মা. পরামট্ঠা ধম্মা, অপরামট্ঠা ধম্মা. পরামাসসম্পযুত্তা ধম্মা, পরামাসৰিপ্পযুত্তা ধম্মা. পরামাসা চেৰ ধম্মা ¶ পরামট্ঠা চ, পরামট্ঠাচেৰ ¶ ধম্মা নো চ পরামাসা. পরামাসৰিপ্পযুত্তা খো পন ধম্মা পরামট্ঠাপি, অপরামট্ঠাপি. পরামাসগোচ্ছকং.

মহন্তরদুকং

সারম্মণা ধম্মা, অনারম্মণা ধম্মা. চিত্তা ধম্মা, নো চিত্তা ধম্মা. চেতসিকা ধম্মা, অচেতসিকা ধম্মা. চিত্তসম্পযুত্তা ধম্মা, চিত্তৰিপ্পযুত্তা ধম্মা. চিত্তসংসট্ঠা ধম্মা, চিত্তৰিসংসট্ঠা ধম্মা. চিত্তসমুট্ঠানা ধম্মা, নো চিত্তসমুট্ঠানা ধম্মা. চিত্তসহভুনো ধম্মা, নো চিত্তসহভুনো ধম্মা. চিত্তানুপরিৰত্তিনো ধম্মা, নো চিত্তানুপরিৰত্তিনো ধম্মা. চিত্তসংসট্ঠসমুট্ঠানা ধম্মা, নো চিত্তসংসট্ঠসমুট্ঠানা ধম্মা. চিত্তসংসট্ঠসমুট্ঠানসহভুনো ধম্মা, নো চিত্তসংসট্ঠসমুট্ঠানসহভুনো ধম্মা. চিত্তসংসট্ঠসমুট্ঠানানুপরিৰত্তিনো ধম্মা, নো চিত্তসংসট্ঠসমুট্ঠানানুপরিৰত্তিনো ধম্মা. অজ্ঝত্তিকা ধম্মা, বাহিরা ধম্মা. উপাদা ধম্মা, নো উপাদা ধম্মা. উপাদিণ্ণা ধম্মা, অনুপাদিণ্ণা ধম্মা. মহন্তরদুকং.

উপাদানগোচ্ছকং

উপাদানা ধম্মা, নো উপাদানা ধম্মা. উপাদানিযা ধম্মা, অনুপাদানিযা ধম্মা. উপাদানসম্পযুত্তা ধম্মা, উপাদানৰিপ্পযুত্তা ধম্মা. উপাদানা চেৰ ধম্মা উপাদানিযা চ, উপাদানিযা চেৰ ধম্মা নো চ উপাদানা. উপাদানা চেৰ ধম্মা উপাদানসম্পযুত্তা চ, উপাদানসম্পযুত্তা চেৰ ধম্মা নো চ উপাদানা. উপাদানৰিপ্পযুত্তা খো পন ধম্মা উপাদানিযাপি, অনুপাদানিযাপি. উপাদানগোচ্ছকং.

কিলেসগোচ্ছকং

কিলেসা ধম্মা, নো কিলেসা ধম্মা. সংকিলেসিকা ধম্মা, অসংকিলেসিকা ধম্মা. সংকিলিট্ঠা ধম্মা, অসংকিলিট্ঠা ধম্মা. কিলেসসম্পযুত্তা ধম্মা, কিলেসৰিপ্পযুত্তা ধম্মা. কিলেসা ¶ চেৰ ধম্মা সংকিলেসিকা চ, সংকিলেসিকা চেৰ ধম্মা নো চ কিলেসা. কিলেসা চেৰ ধম্মা সংকিলিট্ঠা চ, সংকিলিট্ঠা চেৰ ধম্মা নো চ কিলেসা. কিলেসা চেৰ ধম্মা কিলেসসম্পযুত্তা ¶ চ, কিলেসসম্পযুত্তা চেৰ ধম্মা নো চ কিলেসা. কিলেসৰিপ্পযুত্তা খো পন ধম্মা সংকিলেসিকাপি, অসংকিলেসিকাপি. কিলেসগোচ্ছকং.

পিট্ঠিদুকং

দস্সনেন পহাতব্বা ধম্মা, ন দস্সনেন পহাতব্বা ধম্মা. ভাৰনায পহাতব্বা ধম্মা, ন ভাৰনায পহাতব্বা ধম্মা. দস্সনেন পহাতব্বহেতুকা ধম্মা, ন দস্সনেন পহাতব্বহেতুকা ধম্মা. ভাৰনায পহাতব্বহেতুকা ধম্মা, ন ভাৰনায পহাতব্বহেতুকা ধম্মা. সৰিতক্কা ধম্মা, অৰিতক্কা ধম্মা. সৰিচারা ধম্মা, অৰিচারা ধম্মা. সপ্পীতিকা ধম্মা, অপ্পীতিকা ধম্মা. পীতিসহগতা ধম্মা, ন পীতিসহগতা ধম্মা. সুখসহগতা ধম্মা, ন সুখসহগতা ধম্মা. উপেক্খাসহগতা ধম্মা, ন উপেক্খাসহগতা ধম্মা. কামাৰচরা ধম্মা, ন কামাৰচরা ধম্মা. রূপাৰচরা ধম্মা, ন রূপাৰচরা ধম্মা. অরূপাৰচরা ধম্মা, ন অরূপাৰচরা ধম্মা. পরিযাপন্না ধম্মা, অপরিযাপন্না ধম্মা. নিয্যানিকা ধম্মা, অনিয্যানিকা ধম্মা. নিযতা ধম্মা, অনিযতা ধম্মা. সউত্তরা ধম্মা, অনুত্তরা ধম্মা. সরণা ধম্মা, অরণা ধম্মা. পিট্ঠিদুকং.

অভিধম্মদুকমাতিকা.

সুত্তন্তিকদুকমাতিকা

ৰিজ্জাভাগিনো ধম্মা, অৰিজ্জাভাগিনো ধম্মা. ৰিজ্জূপমা ধম্মা, ৰজিরূপমা ধম্মা. বালা ধম্মা, পণ্ডিতা ধম্মা. কণ্হা ধম্মা ¶ , সুক্কা ধম্মা. তপনীযা ধম্মা, অতপনীযা ধম্মা. অধিৰচনা ধম্মা, অধিৰচনপথা ধম্মা. নিরুত্তি ধম্মা, নিরুত্তিপথা ধম্মা. পঞ্ঞত্তি ধম্মা, পঞ্ঞত্তিপথা ধম্মা. নামঞ্চ, রূপঞ্চ. অৰিজ্জা চ, ভৰতণ্হা চ. ভৰদিট্ঠি চ, ৰিভৰদিট্ঠি চ. সস্সতদিট্ঠি চ, উচ্ছেদদিট্ঠি চ. অন্তৰা দিট্ঠি চ, অনন্তৰা দিট্ঠি চ. পুব্বন্তানুদিট্ঠি চ, অপরন্তানুদিট্ঠি চ. অহিরিকঞ্চ, অনোত্তপ্পঞ্চ. হিরী চ, ওত্তপ্পঞ্চ. দোৰচস্সতা চ, পাপমিত্ততা চ. সোৰচস্সতা চ, কল্যাণমিত্ততা চ. আপত্তিকুসলতা চ, আপত্তিৰুট্ঠানকুসলতা চ. সমাপত্তিকুসলতা চ, সমাপত্তিৰুট্ঠানকুসলতা চ. ধাতুকুসলতা চ, মনসিকারকুসলতা ¶ চ. আযতনকুসলতা চ, পটিচ্চসমুপ্পাদকুসলতা চ. ঠানকুসলতা চ, অট্ঠানকুসলতা চ. অজ্জৰো চ, মদ্দৰো চ. খন্তি চ, সোরচ্চঞ্চ. সাখল্যঞ্চ, পটিসন্থারো চ. ইন্দ্রিযেসু অগুত্তদ্ৰারতা চ, ভোজনে অমত্তঞ্ঞুতা চ. ইন্দ্রিযেসু গুত্তদ্ৰারতা চ, ভোজনে মত্তঞ্ঞুতা চ. মুট্ঠস্সচ্চঞ্চ, অসম্পজঞ্ঞঞ্চ. সতি চ, সম্পজঞ্ঞঞ্চ. পটিসঙ্খানবলঞ্চ, ভাৰনাবলঞ্চ. সমথো চ, ৰিপস্সনা চ. সমথনিমিত্তঞ্চ, পগ্গাহনিমিত্তঞ্চ. পগ্গাহো চ, অৰিক্খেপো চ. সীলৰিপত্তি চ, দিট্ঠিৰিপত্তি চ. সীলসম্পদা চ, দিট্ঠিসম্পদা চ. সীলৰিসুদ্ধি চ, দিট্ঠিৰিসুদ্ধি চ. দিট্ঠিৰিসুদ্ধি খো পন, যথাদিট্ঠিস্স চ পধানং. সংৰেগো চ সংৰেজনিযেসু ঠানেসু, সংৰিগ্গস্স চ যোনিসো পধানং. অসন্তুট্ঠিতা চ কুসলেসু ধম্মেসু, অপ্পটিৰানিতা চ পধানস্মিং. ৰিজ্জা চ, ৰিমুত্তি চ. খযে ঞাণং, অনুপ্পাদে ঞাণন্তি.

সুত্তন্তিকদুকমাতিকা.

ধম্মসঙ্গণীমাতিকা নিট্ঠিতা.

২. ৰিভঙ্গমাতিকা

খন্ধৰিভঙ্গো

পঞ্চক্খন্ধা ¶ – (ৰিভ. ১) রূপক্খন্ধো ৰেদনাক্খন্ধো সঞ্ঞাক্খন্ধো সঙ্খারক্খন্ধো ৰিঞ্ঞাণক্খন্ধোতি. খন্ধৰিভঙ্গং.

আযতনৰিভঙ্গো

দ্ৰাদসাযতনানি (ৰিভ. ১৫৪) – চক্খাযতনং রূপাযতনং সোতাযতনং সদ্দাযতনং ঘানাযতনং গন্ধাযতনং জিৰ্হাযতনং রসাযতনং কাযাযতনং ফোট্ঠব্বাযতনং মনাযতনং ধম্মাযতনন্তি. আযতনৰিভঙ্গং.

ধাতুৰিভঙ্গো

অট্ঠারস ¶ ধাতুযো (ৰিভ. ১৮৩) – চক্খুধাতু রূপধাতু চক্খুৰিঞ্ঞাণধাতু, সোতধাতু সদ্দধাতু সোতৰিঞ্ঞাণধাতু, ঘানধাতু গন্ধধাতু ঘানৰিঞ্ঞাণধাতু, জিৰ্হাধাতু রসধাতু জিৰ্হাৰিঞ্ঞাণধাতু, কাযধাতু ফোট্ঠব্বধাতু কাযৰিঞ্ঞাণধাতু, মনোধাতু ধম্মধাতু মনোৰিঞ্ঞাণধাতূতি. ধাতুৰিভঙ্গং.

সচ্চৰিভঙ্গো

চত্তারি অরিযসচ্চানি (ৰিভ. ১৮৯) – দুক্খং অরিযসচ্চং, দুক্খসমুদযং অরিযসচ্চং, দুক্খনিরোধং অরিযসচ্চং, দুক্খনিরোধগামিনী পটিপদা অরিযসচ্চন্তি. সচ্চৰিভঙ্গং.

ইন্দ্রিযৰিভঙ্গো

বাৰীসতিন্দ্রিযানি (ৰিভ. ২১৯) – চক্খুন্দ্রিযং সোতিন্দ্রিযং ঘানিন্দ্রিযং জিৰ্হিন্দ্রিযং কাযিন্দ্রিযং মনিন্দ্রিযং ইত্থিন্দ্রিযং পুরিসিন্দ্রিযং জীৰিতিন্দ্রিযং সুখিন্দ্রিযং ¶ দুক্খিন্দ্রিযং সোমনস্সিন্দ্রিযং দোমনস্সিন্দ্রিযং উপেক্খিন্দ্রিযং সদ্ধিন্দ্রিযং ৰীরিযিন্দ্রিযং সতিন্দ্রিযং সমাধিন্দ্রিযং পঞ্ঞিন্দ্রিযং অনঞ্ঞাতঞ্ঞস্সামীতিন্দ্রিযং অঞ্ঞিন্দ্রিযং অঞ্ঞাতাৰিন্দ্রিযন্তি. ইন্দ্রিযৰিভঙ্গং.

পটিচ্চসমুপ্পাদৰিভঙ্গো

অৰিজ্জাপচ্চযা সঙ্খারা (ৰিভ. ২২৫), সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপং, নামরূপপচ্চযা সল়াযতনং, সল়াযতনপচ্চযা ফস্সো, ফস্সপচ্চযা ৰেদনা, ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৰো, ভৰপচ্চযা জাতি, জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি, এৰমেতস্স কেৰলস্স দুক্খক্খন্ধস্স সমুদযো হোতি. পটিচ্চসমুপ্পাদৰিভঙ্গং.

সতিপট্ঠানৰিভঙ্গো

চত্তারো ¶ সতিপট্ঠানা (ৰিভ. ৩৫৫) – ইধ ভিক্খু অজ্ঝত্তং কাযে কাযানুপস্সী ৰিহরতি, বহিদ্ধা কাযে কাযানুপস্সী ৰিহরতি, অজ্ঝত্তবহিদ্ধা কাযে কাযানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং.

অজ্ঝত্তং ৰেদনাসু ৰেদনানুপস্সী ৰিহরতি, বহিদ্ধা ৰেদনাসু ৰেদনানুপস্সী ৰিহরতি, অজ্ঝত্তবহিদ্ধা ৰেদনাসু ৰেদনানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং.

অজ্ঝত্তং চিত্তে চিত্তানুপস্সী ৰিহরতি, বহিদ্ধা চিত্তে চিত্তানুপস্সী ৰিহরতি, অজ্ঝত্তবহিদ্ধা চিত্তে চিত্তানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং.

অজ্ঝত্তং ¶ ধম্মেসু ধম্মানুপস্সী ৰিহরতি, বহিদ্ধা ধম্মেসু ধম্মানুপস্সী ৰিহরতি, অজ্ঝত্তবহিদ্ধা ধম্মেসু ধম্মানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং. সতিপট্ঠানৰিভঙ্গং.

সম্মপ্পধানৰিভঙ্গো

চত্তারো সম্মপ্পধানা (ৰিভ. ৩৯০) – ইধ ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি.

উপ্পন্নানং পাপকানং অকুসলানং ধম্মানং পহানায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি.

অনুপ্পন্নানং কুসলানং ধম্মানং উপ্পাদায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি.

উপ্পন্নানং ¶ কুসলানং ধম্মানং ঠিতিযা অসম্মোসায ভিয্যোভাৰায ৰেপুল্লায ভাৰনায পারিপূরিযা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. সম্মপ্পধানৰিভঙ্গং.

ইদ্ধিপাদৰিভঙ্গো

চত্তারো ইদ্ধিপাদা (ৰিভ. ৪৩০) – ইধ ভিক্খু ছন্দসমাধিপধানসঙ্খারসমন্নাগতং ইদ্ধিপাদং ভাৰেতি, ৰীরিযসমাধিপধানসঙ্খারসমন্নাগতং ইদ্ধিপাদং ভাৰেতি, চিত্তসমাধিপধানসঙ্খারসমন্নাগতং ইদ্ধিপাদং ভাৰেতি, ৰীমংসাসমাধিপধানসঙ্খারসমন্নাগতং ইদ্ধিপাদং ভাৰেতি. ইদ্ধিপাদৰিভঙ্গং.

বোজ্ঝঙ্গৰিভঙ্গো

সত্ত ¶ বোজ্ঝঙ্গা (ৰিভ. ৪৬৬) – সতিসম্বোজ্ঝঙ্গো ধম্মৰিচযসম্বোজ্ঝঙ্গো ৰীরিযসম্বোজ্ঝঙ্গো পীতিসম্বোজ্ঝঙ্গো পস্সদ্ধিসম্বোজ্ঝঙ্গো সমাধিসম্বোজ্ঝঙ্গো উপেক্খাসম্বোজ্ঝঙ্গো. বোজ্ঝঙ্গৰিভঙ্গং.

মগ্গঙ্গৰিভঙ্গো

অরিযো অট্ঠঙ্গিকো মগ্গো (ৰিভ. ৪৮৬). সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি. মগ্গঙ্গৰিভঙ্গং.

ঝানৰিভঙ্গো

ইধ ভিক্খু পাতিমোক্খসংৰরসংৰুতো ৰিহরতি (ৰিভ. ৫০৮) আচারগোচরসম্পন্নো অণুমত্তেসু ৰজ্জেসু ভযদস্সাৰী সমাদায সিক্খতি সিক্খাপদেসু ইন্দ্রিযেসু গুত্তদ্ৰারো ভোজনে মত্তঞ্ঞূ পুব্বরত্তাপররত্তং জাগরিযানুযোগমনুযুত্তো সাতচ্চং নেপক্কং বোধিপক্খিকানং ধম্মানং ভাৰনানুযোগমনুযুত্তো.

সো ¶ অভিক্কন্তে পটিক্কন্তে সম্পজানকারী হোতি, আলোকিতে ৰিলোকিতে সম্পজানকারী হোতি, সমিঞ্জিতে পসারিতে সম্পজানকারী হোতি, সঙ্ঘাটিপত্তচীৰরধারণে সম্পজানকারী হোতি, অসিতে পীতে খাযিতে সাযিতে সম্পজানকারী হোতি, উচ্চারপস্সাৰকম্মে সম্পজানকারী হোতি, গতে ঠিতে নিসিন্নে সুত্তে জাগরিতে ভাসিতে তুণ্হীভাৰে সম্পজানকারী হোতি.

সো ¶ ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং অপ্পসদ্দং অপ্পনিগ্ঘোসং ৰিজনৰাতং মনুস্সরাহস্সেয্যকং পটিসল্লানসারুপ্পং.

সো অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা নিসীদতি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা, সো অভিজ্ঝং লোকে পহায ৰিগতাভিজ্ঝেন চেতসা ৰিহরতি, অভিজ্ঝায চিত্তং পরিসোধেতি, ব্যাপাদপদোসং পহায অব্যাপন্নচিত্তো ৰিহরতি সব্বপাণভূতহিতানুকম্পী, ব্যাপাদপদোসা চিত্তং পরিসোধেতি, থিনমিদ্ধং পহায ৰিগতথিনমিদ্ধো ৰিহরতি আলোকসঞ্ঞী সতো সম্পজানো, থিনমিদ্ধা চিত্তং পরিসোধেতি, উদ্ধচ্চকুক্কুচ্চং পহায অনুদ্ধতো ৰিহরতি অজ্ঝত্তং ৰূপসন্তচিত্তো, উদ্ধচ্চকুক্কুচ্চা চিত্তং পরিসোধেতি, ৰিচিকিচ্ছং পহায তিণ্ণৰিচিকিচ্ছো ৰিহরতি অকথংকথী কুসলেসু ধম্মেসু, ৰিচিকিচ্ছায চিত্তং পরিসোধেতি.

সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি, ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি, পীতিযা চ ৰিরাগা উপেক্খকো চ ৰিহরতি সতো চ সম্পজানো সুখঞ্চ কাযেন পটিসংৰেদেতি, যং তং অরিযা আচিক্খন্তি ‘‘উপেক্খকো সতিমা সুখৰিহারী’’তি, ততিযং ঝানং উপসম্পজ্জ ৰিহরতি, সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি.

সব্বসো ¶ ¶ রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘‘অনন্তো আকাসো’’তি আকাসানঞ্চাযতনং উপসম্পজ্জ ৰিহরতি, সব্বসো আকাসানঞ্চাযতনং সমতিক্কম্ম ‘‘অনন্তং ৰিঞ্ঞাণ’’ন্তি ৰিঞ্ঞাণঞ্চাযতনং উপসম্পজ্জ ৰিহরতি, সব্বসো ৰিঞ্ঞাণঞ্চাযতনং সমতিক্কম্ম ‘‘নত্থি কিঞ্চী’’তি আকিঞ্চঞ্ঞাযতনং উপসম্পজ্জ ৰিহরতি, সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি. ঝানৰিভঙ্গং.

অপ্পমঞ্ঞাৰিভঙ্গো

চতস্সো অপ্পমঞ্ঞাযো (ৰিভ. ৬৪২) – ইধ ভিক্খু মেত্তাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি.

করুণাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধিসব্বত্ততায সব্বাৰন্তং লোকং করুণাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি.

মুদিতাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মুদিতাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি.

উপেক্খাসহগতেন ¶ চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি. অপ্পমঞ্ঞাৰিভঙ্গং.

সিক্খাপদৰিভঙ্গো

পঞ্চ ¶ সিক্খাপদানি (ৰিভ. ৭০৩) – পাণাতিপাতা ৰেরমণী সিক্খাপদং, অদিন্নাদানা ৰেরমণী সিক্খাপদং, কামেসুমিচ্ছাচারা ৰেরমণী সিক্খাপদং, মুসাৰাদা ৰেরমণী সিক্খাপদং, সুরামেরযমজ্জপমাদট্ঠানা ৰেরমণী সিক্খাপদং. সিক্খাপদৰিভঙ্গং.

পটিসম্ভিদাৰিভঙ্গো

চতস্সো পটিসম্ভিদা (ৰিভ. ৭১৮) – অত্থপটিসম্ভিদা ধম্মপটিসম্ভিদা নিরুত্তিপটিসম্ভিদা পটিভানপটিসম্ভিদা. পটিসম্ভিদাৰিভঙ্গং.

ঞাণৰিভঙ্গো

একৰিধেন ঞাণৰত্থু (ৰিভ. ৭৫১) – পঞ্চ ৰিঞ্ঞাণা ন হেতূ, অহেতুকা, হেতুৰিপ্পযুত্তা, সপ্পচ্চযা, সঙ্খতা, অরূপা, লোকিযা, সাসৰা, সংযোজনিযা, গন্থনিযা, ওঘনিযা, যোগনিযা, নীৰরণিযা, পরামট্ঠা, উপাদানিযা, সংকিলেসিকা, অব্যাকতা, সারম্মণা, অচেতসিকা, ৰিপাকা, উপাদিণ্ণুপাদানিযা, অসংকিলিট্ঠসংকিলেসিকা, ন সৰিতক্কসৰিচারা, ন অৰিতক্কৰিচারমত্তা, অৰিতক্কঅৰিচারা, ন পীতিসহগতা, নেৰ দস্সনেন ন ভাৰনায পহাতব্বা, নেৰ দস্সনেন ন ভাৰনায পহাতব্বহেতুকা, নেৰাচযগামিনাপচযগামিনো, নেৰসেক্খনাসেক্খা, পরিত্তা, কামাৰচরা, ন ¶ রূপাৰচরা, ন অরূপাৰচরা, পরিযাপন্না, নো অপরিযাপন্না, অনিযতা, অনিয্যানিকা.

উপ্পন্নৰত্থুকা, উপ্পন্নারম্মণা, পুরেজাতৰত্থুকা, পুরেজাতারম্মণা, অজ্ঝত্তিকৰত্থুকা, বাহিরারম্মণা, অসম্ভিন্নৰত্থুকা, অসম্ভিন্নারম্মণা, নানাৰত্থুকা, নানারম্মণা, ন অঞ্ঞমঞ্ঞস্স গোচরৰিসযং পচ্চনুভোন্তি, ন অসমন্নাহারা উপ্পজ্জন্তি, ন অমনসিকারা উপ্পজ্জন্তি, ন অব্বোকিণ্ণা উপ্পজ্জন্তি, ন অপুব্বং অচরিমং উপ্পজ্জন্তি, ন অঞ্ঞমঞ্ঞস্স সমনন্তরা উপ্পজ্জন্তি.

পঞ্চ ৰিঞ্ঞাণা অনাভোগা, পঞ্চহি ৰিঞ্ঞাণেহি ন কঞ্চি ধম্মং পটিৰিজানাতি, অঞ্ঞত্র ¶ অভিনিপাতমত্তা, পঞ্চন্নং ৰিঞ্ঞাণানং সমনন্তরাপি ন কঞ্চি ধম্মং পটিৰিজানাতি, পঞ্চহি ৰিঞ্ঞাণেহি ন কঞ্চি ইরিযাপথং কপ্পেতি, পঞ্চন্নং ৰিঞ্ঞাণানং সমনন্তরাপি ন কঞ্চি ইরিযাপথং কপ্পেতি, পঞ্চহি ৰিঞ্ঞাণেহি ন কাযকম্মং ন ৰচীকম্মং পট্ঠপেতি, পঞ্চন্নং ৰিঞ্ঞাণানং সমনন্তরাপি ন কাযকম্মং ন ৰচীকম্মং পট্ঠপেতি, পঞ্চহি ৰিঞ্ঞাণেহি ন কুসলাকুসলং ধম্মং সমাদিযতি, পঞ্চন্নং ৰিঞ্ঞাণানং সমনন্তরাপি ন কুসলাকুসলং ধম্মং সমাদিযতি, পঞ্চহি ৰিঞ্ঞাণেহি ন সমাপজ্জতি ন ৰুট্ঠাতি, পঞ্চন্নং ৰিঞ্ঞাণানং সমনন্তরাপি ন সমাপজ্জতি ন ৰুট্ঠাতি, পঞ্চহি ৰিঞ্ঞাণেহি ন চৰতি ন উপ্পজ্জতি, পঞ্চন্নং ৰিঞ্ঞাণানং সমনন্তরাপি ন চৰতি ন উপ্পজ্জতি, পঞ্চহি ৰিঞ্ঞাণেহি ন সুপতি ন পটিবুজ্ঝতি ন সুপিনং পস্সতি, পঞ্চন্নং ৰিঞ্ঞাণানং সমনন্তরাপি ন সুপতি ন পটিবুজ্ঝতি ন সুপিনং পস্সতি, যাথাৰকৰত্থুৰিভাৰনা পঞ্ঞা. এৰং একৰিধেন ঞাণৰত্থু.

দুৰিধেন ¶ ঞাণৰত্থু – লোকিযা পঞ্ঞা, লোকুত্তরা পঞ্ঞা. কেনচি ৰিঞ্ঞেয্যা পঞ্ঞা, কেনচি ন ৰিঞ্ঞেয্যা পঞ্ঞা. সাসৰা পঞ্ঞা, অনাসৰা পঞ্ঞা. আসৰৰিপ্পযুত্তা সাসৰা পঞ্ঞা, আসৰৰিপ্পযুত্তা অনাসৰা পঞ্ঞা. সংযোজনিযা পঞ্ঞা, অসংযোজনিযা পঞ্ঞা. সংযোজনৰিপ্পযুত্তা সংযোজনিযা পঞ্ঞা, সংযোজনৰিপ্পযুত্তা অসংযোজনিযা পঞ্ঞা. গন্থনিযা পঞ্ঞা, অগন্থনিযা পঞ্ঞা. গন্থৰিপ্পযুত্তা গন্থনিযা পঞ্ঞা, গন্থৰিপ্পযুত্তা অগন্থনিযা পঞ্ঞা.

ওঘনিযা পঞ্ঞা, অনোঘনিযা পঞ্ঞা. ওঘৰিপ্পযুত্তা ওঘনিযা পঞ্ঞা, ওঘৰিপ্পযুত্তা অনোঘনিযা পঞ্ঞা. যোগনিযা পঞ্ঞা, অযোগনিযা পঞ্ঞা. যোগৰিপ্পযুত্তা যোগনিযা পঞ্ঞা, যোগৰিপ্পযুত্তা অযোগনিযা পঞ্ঞা. নীৰরণিযা পঞ্ঞা, অনীৰরণিযা পঞ্ঞা. নীৰরণৰিপ্পযুত্তা নীৰরণিযা পঞ্ঞা, নীৰরণৰিপ্পযুত্তা অনীৰরণিযা পঞ্ঞা. পরামট্ঠা পঞ্ঞা, অপরামট্ঠা পঞ্ঞা. পরামাসৰিপ্পযুত্তা পরামট্ঠা পঞ্ঞা, পরামাসৰিপ্পযুত্তা অপরামট্ঠা পঞ্ঞা. উপাদিণ্ণা পঞ্ঞা, অনুপাদিণ্ণা পঞ্ঞা. উপাদানিযা পঞ্ঞা, অনুপাদানিযা পঞ্ঞা. উপাদানৰিপ্পযুত্তা উপাদানিযা পঞ্ঞা, উপাদানৰিপ্পযুত্তা অনুপাদানিযা পঞ্ঞা.

সংকিলেসিকা পঞ্ঞা, অসংকিলেসিকা পঞ্ঞা. কিলেসৰিপ্পযুত্তা সংকিলেসিকা পঞ্ঞা, কিলেসৰিপ্পযুত্তা ¶ অসংকিলেসিকা পঞ্ঞা. সৰিতক্কা পঞ্ঞা, অৰিতক্কা পঞ্ঞা. সৰিচারা পঞ্ঞা, অৰিচারা পঞ্ঞা. সপ্পীতিকা পঞ্ঞা, অপ্পীতিকা পঞ্ঞা. পীতিসহগতা পঞ্ঞা, ন পীতিসহগতা পঞ্ঞা. সুখসহগতা পঞ্ঞা, ন সুখসহগতা পঞ্ঞা. উপেক্খাসহগতা পঞ্ঞা, ন উপেক্খাসহগতা পঞ্ঞা ¶ . কামাৰচরা পঞ্ঞা, ন কামাৰচরা পঞ্ঞা. রূপাৰচরা পঞ্ঞা, ন রূপাৰচরা পঞ্ঞা. অরূপাৰচরা পঞ্ঞা, ন অরূপাৰচরা পঞ্ঞা. পরিযাপন্না পঞ্ঞা, অপরিযাপন্না পঞ্ঞা. নিয্যানিকা পঞ্ঞা, অনিয্যানিকা পঞ্ঞা. নিযতা পঞ্ঞা, অনিযতা পঞ্ঞা. সউত্তরা পঞ্ঞা, অনুত্তরা পঞ্ঞা. অত্থজাপিকা পঞ্ঞা, জাপিতত্থা পঞ্ঞা. এৰং দুৰিধেন ঞাণৰত্থু.

তিৰিধেন ঞাণৰত্থু – চিন্তামযা পঞ্ঞা, সুতমযা পঞ্ঞা, ভাৰনামযা পঞ্ঞা. দানমযা পঞ্ঞা, সীলমযা পঞ্ঞা, ভাৰনামযা পঞ্ঞা. অধিসীলে পঞ্ঞা, অধিচিত্তে পঞ্ঞা, অধিপঞ্ঞায পঞ্ঞা. আযকোসল্লং, অপাযকোসল্লং, উপাযকোসল্লং.

ৰিপাকা পঞ্ঞা, ৰিপাকধম্মধম্মা পঞ্ঞা, নেৰৰিপাকনৰিপাকধম্মধম্মা পঞ্ঞা. উপাদিণ্ণুপাদানিযা পঞ্ঞা, অনুপাদিণ্ণুপাদানিযা পঞ্ঞা, অনুপাদিণ্ণঅনুপাদানিযা পঞ্ঞা. সৰিতক্কসৰিচারা পঞ্ঞা, অৰিতক্কৰিচারমত্তা পঞ্ঞা, অৰিতক্কঅৰিচারা পঞ্ঞা. পীতিসহগতা পঞ্ঞা, সুখসহগতা পঞ্ঞা, উপেক্খাসহগতা পঞ্ঞা. আচযগামিনী পঞ্ঞা, অপচযগামিনী পঞ্ঞা, নেৰাচযগামিনাপচযগামিনী পঞ্ঞা. সেক্খা পঞ্ঞা, অসেক্খা পঞ্ঞা, নেৰসেক্খনাসেক্খা পঞ্ঞা. পরিত্তা পঞ্ঞা, মহগ্গতা পঞ্ঞা, অপ্পমাণা পঞ্ঞা. পরিত্তারম্মণা পঞ্ঞা, মহগ্গতারম্মণা পঞ্ঞা, অপ্পমাণারম্মণা পঞ্ঞা. মগ্গারম্মণা পঞ্ঞা, মগ্গহেতুকা পঞ্ঞা, মগ্গাধিপতিনী পঞ্ঞা. উপ্পন্না পঞ্ঞা, অনুপ্পন্না পঞ্ঞা, উপ্পাদিনী পঞ্ঞা. অতীতা পঞ্ঞা, অনাগতা পঞ্ঞা, পচ্চুপ্পন্না পঞ্ঞা. অতীতারম্মণা পঞ্ঞা, অনাগতারম্মণা পঞ্ঞা, পচ্চুপ্পন্নারম্মণা পঞ্ঞা. অজ্ঝত্তা পঞ্ঞা, বহিদ্ধা পঞ্ঞা, অজ্ঝত্তবহিদ্ধা পঞ্ঞা. অজ্ঝত্তারম্মণা পঞ্ঞা, বহিদ্ধারম্মণা পঞ্ঞা, অজ্ঝত্তবহিদ্ধারম্মণা পঞ্ঞা.

সৰিতক্কসৰিচারা ¶ পঞ্ঞা অত্থি ৰিপাকা, অত্থি ৰিপাকধম্মধম্মা, অত্থি নেৰৰিপাকনৰিপাকধম্মধম্মা. অত্থি উপাদিণ্ণুপাদানিযা, অত্থি অনুপাদিণ্ণুপাদানিযা, অত্থি অনুপাদিণ্ণঅনুপাদানিযা ¶ . অত্থি পীতিসহগতা, অত্থি সুখসহগতা, অত্থি উপেক্খাসহগতা. অত্থি আচযগামিনী, অত্থি অপচযগামিনী, অত্থি নেৰাচযগামিনাপচযগামিনী. অত্থি সেক্খা, অত্থি অসেক্খা, অত্থি নেৰসেক্খনাসেক্খা. অত্থি পরিত্তা, অত্থি মহগ্গতা, অত্থি অপ্পমাণা. অত্থি পরিত্তারম্মণা, অত্থি মহগ্গতারম্মণা, অত্থি অপ্পমাণারম্মণা. অত্থি মগ্গারম্মণা, অত্থি মগ্গহেতুকা, অত্থি মগ্গাধিপতিনী. অত্থি উপ্পন্না, অত্থি অনুপ্পন্না, অত্থি উপ্পাদিনী. অত্থি অতীতা, অত্থি অনাগতা, অত্থি পচ্চুপ্পন্না. অত্থি অতীতারম্মণা, অত্থি অনাগতারম্মণা, অত্থি পচ্চুপ্পন্নারম্মণা. অত্থি অজ্ঝত্তা, অত্থি বহিদ্ধা, অত্থি অজ্ঝত্তবহিদ্ধা. অত্থি অজ্ঝত্তারম্মণা, অত্থি বহিদ্ধারম্মণা, অত্থি অজ্ঝত্তবহিদ্ধারম্মণা.

অৰিতক্কৰিচারমত্তা পঞ্ঞা অত্থি ৰিপাকা, অত্থি ৰিপাকধম্মধম্মা, অত্থি নেৰৰিপাকনৰিপাকধম্মধম্মা. অত্থি উপাদিণ্ণুপাদানিযা, অত্থি অনুপাদিণ্ণুপাদানিযা, অত্থি অনুপাদিণ্ণঅনুপাদানিযা. অত্থি আচযগামিনী, অত্থি অপচযগামিনী, অত্থি নেৰাচযগামিনাপচযগামিনী. অত্থি সেক্খা, অত্থি অসেক্খা, অত্থি নেৰসেক্খনাসেক্খা. অত্থি উপ্পন্না, অত্থি অনুপ্পন্না, অত্থি উপ্পাদিনী. অত্থি অতীতা, অত্থি অনাগতা, অত্থি পচ্চুপ্পন্না. অত্থি অজ্ঝত্তা, অত্থি বহিদ্ধা, অত্থি অজ্ঝত্তবহিদ্ধা.

অৰিতক্কঅৰিচারা পঞ্ঞা অত্থি ৰিপাকা, অত্থি ৰিপাকধম্মধম্মা, অত্থি নেৰৰিপাকনৰিপাকধম্মধম্মা. অত্থি উপাদিণ্ণুপাদানিযা, অত্থি অনুপাদিণ্ণুপাদানিযা, অত্থি অনুপাদিণ্ণঅনুপাদানিযা. অত্থি পীতিসহগতা, অত্থি সুখসহগতা, অত্থি ¶ উপেক্খাসহগতা. অত্থি আচযগামিনী, অত্থি অপচযগামিনী, অত্থি নেৰাচযগামিনাপচযগামিনী. অত্থি সেক্খা, অত্থি অসেক্খা, অত্থি নেৰসেক্খনাসেক্খা. অত্থি পরিত্তারম্মণা, অত্থি মহগ্গতারম্মণা, অত্থি অপ্পমাণারম্মণা. অত্থি মগ্গারম্মণা, অত্থি মগ্গহেতুকা, অত্থি মগ্গাধিপতিনী. অত্থি উপ্পন্না, অত্থি অনুপ্পন্না, অত্থি উপ্পাদিনী. অত্থি অতীতা, অত্থি অনাগতা, অত্থি পচ্চুপ্পন্না. অত্থি অতীতারম্মণা, অত্থি অনাগতারম্মণা, অত্থি পচ্চুপ্পন্নারম্মণা. অত্থি অজ্ঝত্তা, অত্থি বহিদ্ধা, অত্থি অজ্ঝত্তবহিদ্ধা. অত্থি অজ্ঝত্তারম্মণা, অত্থি বহিদ্ধারম্মণা, অত্থি অজ্ঝত্তবহিদ্ধারম্মণা.

পীতিসহগতা পঞ্ঞা, সুখসহগতা পঞ্ঞা অত্থি ৰিপাকা, অত্থি ৰিপাকধম্মধম্মা, অত্থি নেৰৰিপাকনৰিপাকধম্মধম্মা ¶ . অত্থি উপাদিণ্ণুপাদানিযা, অত্থি অনুপাদিণ্ণুপাদানিযা, অত্থি অনুপাদিণ্ণঅনুপাদানিযা. অত্থি সৰিতক্কসৰিচারা, অত্থি অৰিতক্কৰিচারমত্তা, অত্থি অৰিতক্কঅৰিচারা. অত্থি আচযগামিনী, অত্থি অপচযগামিনী, অত্থি নেৰাচযগামিনাপচযগামিনী. অত্থি সেক্খা, অত্থি অসেক্খা, অত্থি নেৰসেক্খনাসেক্খা. অত্থি পরিত্তা, অত্থি মহগ্গতা, অত্থি অপ্পমাণা. অত্থি পরিত্তারম্মণা, অত্থি মহগ্গতারম্মণা, অত্থি অপ্পমাণারম্মণা. অত্থি মগ্গারম্মণা, অত্থি মগ্গহেতুকা, অত্থি মগ্গাধিপতিনী. অত্থি উপ্পন্না, অত্থি অনুপ্পন্না, অত্থি উপ্পাদিনী. অত্থি অতীতা, অত্থি অনাগতা, অত্থি পচ্চুপ্পন্না. অত্থি অতীতারম্মণা, অত্থি অনাগতারম্মণা, অত্থি পচ্চুপ্পন্নারম্মণা. অত্থি অজ্ঝত্তা, অত্থি বহিদ্ধা, অত্থি অজ্ঝত্তবহিদ্ধা. অত্থি অজ্ঝত্তারম্মণা, অত্থি বহিদ্ধারম্মণা, অত্থি অজ্ঝত্তবহিদ্ধারম্মণা.

উপেক্খাসহগতা পঞ্ঞা অত্থি ৰিপাকা, অত্থি ৰিপাকধম্মধম্মা, অত্থি নেৰৰিপাকনৰিপাকধম্মধম্মা. অত্থি উপাদিণ্ণুপাদানিযা ¶ , অত্থি অনুপাদিণ্ণুপাদানিযা, অত্থি অনুপাদিণ্ণঅনুপাদানিযা. অত্থি আচযগামিনী, অত্থি অপচযগামিনী, অত্থি নেৰাচযগামিনাপচযগামিনী. অত্থি সেক্খা, অত্থি অসেক্খা, অত্থি নেৰসেক্খনাসেক্খা. অত্থি পরিত্তা, অত্থি মহগ্গতা, অত্থি অপ্পমাণা. অত্থি পরিত্তারম্মণা, অত্থি মহগ্গতারম্মণা, অত্থি অপ্পমাণারম্মণা. অত্থি মগ্গারম্মণা, অত্থি মগ্গহেতুকা, অত্থি মগ্গাধিপতিনী. অত্থি উপ্পন্না, অত্থি অনুপ্পন্না, অত্থি উপ্পাদিনী. অত্থি অতীতা, অত্থি অনাগতা, অত্থি পচ্চুপ্পন্না. অত্থি অতীতারম্মণা, অত্থি অনাগতারম্মণা, অত্থি পচ্চুপ্পন্নারম্মণা. অত্থি অজ্ঝত্তা, অত্থি বহিদ্ধা, অত্থি অজ্ঝত্তবহিদ্ধা. অত্থি অজ্ঝত্তারম্মণা, অত্থি বহিদ্ধারম্মণা, অত্থি অজ্ঝত্তবহিদ্ধারম্মণা. এৰং তিৰিধেন ঞাণৰত্থু.

চতুব্বিধেন ঞাণৰত্থু – কম্মস্সকতঞাণং, সচ্চানুলোমিকং ঞাণং, মগ্গসমঙ্গিস্স ঞাণং, ফলসমঙ্গিস্স ঞাণং. দুক্খে ঞাণং, দুক্খসমুদযে ঞাণং, দুক্খনিরোধে ঞাণং, দুক্খনিরোধগামিনিযা পটিপদায ঞাণং. কামাৰচরা পঞ্ঞা, রূপাৰচরা পঞ্ঞা, অরূপাৰচরা পঞ্ঞা, অপরিযাপন্না পঞ্ঞা. ধম্মে ঞাণং, অন্ৰযে ঞাণং, পরিচ্চে ঞাণং, সম্মুতি ঞাণং. অত্থি পঞ্ঞা আচযায, নো অপচযায, অত্থি পঞ্ঞা অপচযায, নো আচযায, অত্থি পঞ্ঞা আচযায চেৰ, অপচযায চ, অত্থি পঞ্ঞা নেৰাচযায, নো অপচযায. অত্থি পঞ্ঞা নিব্বিদায, নো পটিৰেধায, অত্থি পঞ্ঞা পটিৰেধায, নো নিব্বিদায ¶ , অত্থি পঞ্ঞা নিব্বিদায চেৰ, পটিৰেধায চ, অত্থি পঞ্ঞা নেৰ নিব্বিদায, নো পটিৰেধায. হানভাগিনী পঞ্ঞা, ঠিতিভাগিনী পঞ্ঞা, ৰিসেসভাগিনী পঞ্ঞা, নিব্বেধভাগিনী পঞ্ঞা.

চতস্সো ¶ পটিসম্ভিদা. চতস্সো পটিপদা. চত্তারি আরম্মণানি. জরামরণে ঞাণং, জরামরণসমুদযে ঞাণং, জরামরণনিরোধে ঞাণং, জরামরণনিরোধগামিনিযা পটিপদায ঞাণং. জাতিযা ঞাণং…পে… ভৰে ঞাণং…পে… উপাদানে ঞাণং…পে… তণ্হায ঞাণং…পে… ৰেদনায ঞাণং…পে… ফস্সে ঞাণং…পে… সল়াযতনে ঞাণং…পে… নামরূপে ঞাণং…পে… ৰিঞ্ঞাণে ঞাণং…পে… সঙ্খারেসু ঞাণং, সঙ্খারসমুদযে ঞাণং, সঙ্খারনিরোধে ঞাণং, সঙ্খারনিরোধগামিনিযা পটিপদায ঞাণং. এৰং চতুব্বিধেন ঞাণৰত্থু.

পঞ্চৰিধেন ঞাণৰত্থু – পঞ্চঙ্গিকো সম্মাসমাধি, পঞ্চঞাণিকো সম্মাসমাধি. এৰং পঞ্চৰিধেন ঞাণৰত্থু.

ছব্বিধেন ঞাণৰত্থু – ছসু অভিঞ্ঞাসু পঞ্ঞা. এৰং ছব্বিধেন ঞাণৰত্থু.

সত্তৰিধেন ঞাণৰত্থু – সত্তসত্ততি ঞাণৰত্থূনি. এৰং সত্তৰিধেন ঞাণৰত্থু.

অট্ঠৰিধেন ঞাণৰত্থু – চতূসু মগ্গেসু, চতূসু ফলেসু পঞ্ঞা. এৰং অট্ঠৰিধেন ঞাণৰত্থু.

নৰৰিধেন ঞাণৰত্থু – নৰসু অনুপুব্বৰিহারসমাপত্তীসু পঞ্ঞা. এৰং নৰৰিধেন ঞাণৰত্থু.

দসৰিধেন ঞাণৰত্থু – দস তথাগতস্স তথাগতবলানি, যেহি বলেহি সমন্নাগতো তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি. কতমানি দস? ইধ তথাগতো ঠানঞ্চ ঠানতো অট্ঠানঞ্চ অট্ঠানতো যথাভূতং পজানাতি, যম্পি তথাগতো ঠানঞ্চ ঠানতো অট্ঠানঞ্চ অট্ঠানতো যথাভূতং পজানাতি, ইদম্পি তথাগতস্স তথাগতবলং ¶ হোতি. যং বলং আগম্ম তথাগতো আসভং ¶ ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

পুন চপরং তথাগতো অতীতানাগতপচ্চুপ্পন্নানং কম্মসমাদানানং ঠানসো হেতুসো ৰিপাকং যথাভূতং পজানাতি. যম্পি তথাগতো অতীতানাগতপচ্চুপ্পন্নানং কম্মসমাদানানং ঠানসো হেতুসো ৰিপাকং যথাভূতং পজানাতি, ইদম্পি তথাগতস্স তথাগতবলং হোতি. যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

পুন চপরং তথাগতো সব্বত্থগামিনিং পটিপদং যথাভূতং পজানাতি, যম্পি তথাগতো সব্বত্থগামিনিং পটিপদং যথাভূতং পজানাতি, ইদম্পি তথাগতস্স তথাগতবলং হোতি. যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

পুন চপরং তথাগতো অনেকধাতুনানাধাতুলোকং যথাভূতং পজানাতি, যম্পি তথাগতো অনেকধাতুনানাধাতুলোকং যথাভূতং পজানাতি, ইদম্পি তথাগতস্স তথাগতবলং হোতি. যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

পুন চপরং তথাগতো সত্তানং নানাধিমুত্তিকতং যথাভূতং পজানাতি, যম্পি তথাগতো সত্তানং নানাধিমুত্তিকতং যথাভূতং পজানাতি, ইদম্পি তথাগতস্স তথাগতবলং হোতি. যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

পুন চপরং তথাগতো পরসত্তানং পরপুগ্গলানং ইন্দ্রিযপরোপরিযত্তং যথাভূতং পজানাতি, যম্পি তথাগতো পরসত্তানং ¶ পরপুগ্গলানং ইন্দ্রিযপরোপরিযত্তং যথাভূতং পজানাতি, ইদম্পি তথাগতস্স তথাগতবলং হোতি. যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

পুন চপরং তথাগতো ঝানৰিমোক্খসমাধিসমাপত্তীনং সংকিলেসং ৰোদানং ৰুট্ঠানং যথাভূতং পজানাতি, যম্পি তথাগতো ঝানৰিমোক্খসমাধিসমাপত্তীনং সংকিলেসং ৰোদানং ৰুট্ঠানং যথাভূতং পজানাতি ¶ , ইদম্পি তথাগতস্স তথাগতবলং হোতি. যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

পুন চপরং তথাগতো পুব্বেনিৰাসানুস্সতিং যথাভূতং পজানাতি, যম্পি তথাগতো পুব্বেনিৰাসানুস্সতিং যথাভূতং পজানাতি, ইদম্পি তথাগতস্স তথাগতবলং হোতি. যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

পুন চপরং তথাগতো সত্তানং চুতূপপাতং যথাভূতং পজানাতি, যম্পি তথাগতো সত্তানং চুতূপপাতং যথাভূতং পজানাতি, ইদম্পি তথাগতস্স তথাগতবলং হোতি. যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

পুন চপরং তথাগতো আসৰানং খযং যথাভূতং পজানাতি, যম্পি তথাগতো আসৰানং খযং যথাভূতং পজানাতি, ইদম্পি তথাগতস্স তথাগতবলং হোতি. যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি.

ইমানি ¶ দস তথাগতস্স তথাগতবলানি. যেহি বলেহি সমন্নাগতো তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতি. এৰং দসৰিধেন ঞাণৰত্থু.

ঞাণৰিভঙ্গং.

খুদ্দকৰত্থুৰিভঙ্গো

এককং

জাতিমদো (ৰিভ. ৮৩২), গোত্তমদো, আরোগ্যমদো, যোব্বনমদো, জীৰিতমদো, লাভমদো, সক্কারমদো, গরুকারমদো, পুরেক্খারমদো, পরিৰারমদো, ভোগমদো, ৰণ্ণমদো, সুতমদো ¶ , পটিভানমদো, রত্তঞ্ঞুমদো, পিণ্ডপাতিকমদো, অনৰঞ্ঞাতমদো, ইরিযাপথমদো, ইদ্ধিমদো, যসমদো, সীলমদো, ঝানমদো, সিপ্পমদো, আরোহমদো, পরিণাহমদো, সণ্ঠানমদো, পারিপূরিমদো, মদো, পমাদো, থম্ভো, সারম্ভো, অত্রিচ্ছতা, মহিচ্ছতা, পাপিচ্ছতা, সিঙ্গং, তিন্তিণং, চাপল্যং, অসভাগৰুত্তি, অরতি, তন্দী, ৰিজম্ভিতা, ভত্তসম্মদো, চেতসো চ লীনত্তং, কুহনা, লপনা, নেমিত্তিকতা, নিপ্পেসিকতা, লাভেন লাভং নিজিগীসনতা, ‘‘সেয্যোহমস্মী’’তি মানো, ‘‘সদিসোহমস্মী’’তি মানো, ‘‘হীনোহমস্মী’’তি মানো. সেয্যস্স ‘‘সেয্যোহমস্মী’’তি মানো, সেয্যস্স ‘‘সদিসোহমস্মী’’তি মানো, সেয্যস্স ‘‘হীনোহমস্মী’’তি মানো, সদিসস্স ‘‘সেয্যোহমস্মী’’তি মানো, সদিসস্স ‘‘সদিসোহমস্মী’’তি মানো, সদিসস্স ‘‘হীনোহমস্মী’’তি মানো, হীনস্স ‘‘সেয্যোহমস্মী’’তি মানো, হীনস্স ¶ ‘‘সদিসোহমস্মী’’তি মানো, হীনস্স ‘‘হীনোহমস্মী’’তি মানো, মানো, অতিমানো, মানাতিমানো, ওমানো, অধিমানো, অস্মিমানো, মিচ্ছামানো, ঞাতিৰিতক্কো, জনপদৰিতক্কো, অমরৰিতক্কো, পরানুদ্দযতাপটিসংযুত্তো ৰিতক্কো, লাভসক্কারসিলোকপটিসংযুত্তো ৰিতক্কো, অনৰঞ্ঞত্তিপটিসংযুত্তো ৰিতক্কো (ৰিভ. ৮৩২). এককং.

দুকং

কোধো চ উপনাহো চ, মক্খো চ পল়াসো চ, ইস্সা চ মচ্ছরিযঞ্চ, মাযা চ সাঠেয্যঞ্চ, অৰিজ্জা চ ভৰতণ্হা চ, ভৰদিট্ঠি চ ৰিভৰদিট্ঠি চ, সস্সতদিট্ঠি চ উচ্ছেদদিট্ঠি চ, অন্তৰাদিট্ঠি চ অনন্তৰাদিট্ঠি চ, পুব্বন্তানুদিট্ঠি চ অপরন্তানুদিট্ঠি চ, অহিরিকঞ্চ অনোত্তপ্পঞ্চ, দোৰচস্সতা চ পাপমিত্ততা চ, অনজ্জৰো চ অমদ্দৰো চ, অক্খন্তি চ অসোরচ্চঞ্চ, অসাখল্যঞ্চ অপ্পটিসন্থারো চ, ইন্দ্রিযেসু অগুত্তদ্ৰারতা চ ভোজনে অমত্তঞ্ঞুতা চ, মুট্ঠস্সচ্চঞ্চ অসম্পজঞ্ঞঞ্চ, সীলৰিপত্তি চ দিট্ঠিৰিপত্তি চ, অজ্ঝত্তসংযোজনঞ্চ বহিদ্ধাসংযোজনঞ্চ. দুকং.

তিকং

তীণি অকুসলমূলানি, তযো অকুসলৰিতক্কা, তিস্সো অকুসলসঞ্ঞা, তিস্সো অকুসলধাতুযো, তীণি দুচ্চরিতানি, তযো আসৰা, তীণি সংযোজনানি, তিস্সো তণ্হা, অপরাপি তিস্সো তণ্হা, অপরাপি তিস্সো তণ্হা, তিস্সো এসনা, তিস্সো ৰিধা, তীণি ভযানি ¶ , তীণি তমানি, তীণি তিত্থাযতনানি, তযো কিঞ্চনা, তীণি অঙ্গণানি, তীণি মলানি, তীণি ৰিসমানি, অপরানিপি তীণি ৰিসমানি, তযো অগ্গী, তযো কসাৰা, অপরেপি তযো কসাৰা.

অস্সাদদিট্ঠি ¶ অত্তানুদিট্ঠি মিচ্ছাদিট্ঠি, অরতি ৰিহেসা অধম্মচরিযা, দোৰচস্সতা পাপমিত্ততা নানত্তসঞ্ঞা, উদ্ধচ্চং কোসজ্জং পমাদো, অসন্তুট্ঠিতা অসম্পজঞ্ঞতা মহিচ্ছতা, অহিরিকং অনোত্তপ্পং পমাদো, অনাদরিযং দোৰচস্সতা পাপমিত্ততা, অস্সদ্ধিযং অৰদঞ্ঞুতা কোসজ্জং, উদ্ধচ্চং অসংৰরো দুস্সীল্যং, অরিযানং অদস্সনকম্যতা সদ্ধম্মং অসোতুকম্যতা উপারম্ভচিত্ততা, মুট্ঠস্সচ্চং অসম্পজঞ্ঞং চেতসো ৰিক্খেপো, অযোনিসো মনসিকারো কুম্মগ্গসেৰনা চেতসো চ লীনত্তং. তিকং.

চতুক্কং

চত্তারো আসৰা, চত্তারো গন্থা, চত্তারো ওঘা, চত্তারো যোগা, চত্তারি উপাদানানি, চত্তারো তণ্হুপ্পাদা, চত্তারি অগতিগমনানি, চত্তারো ৰিপরিযাসা, চত্তারো অনরিযৰোহারা, অপরেপি চত্তারো অনরিযৰোহারা, চত্তারি দুচ্চরিতানি, অপরাপি চত্তারি দুচ্চরিতানি, চত্তারি ভযানি, (অপরানিপি চত্তারি ভযানি,) চতস্সো দিট্ঠিযো. চতুক্কং.

পঞ্চকং

পঞ্চোরম্ভাগিযানি সংযোজনানি, পঞ্চুদ্ধম্ভাগিযানি সংযোজনানি, পঞ্চ মচ্ছরিযানি, পঞ্চ সঙ্গা, পঞ্চ সল্লা, পঞ্চ চেতোখিলা, পঞ্চ চেতসোৰিনিবন্ধা, পঞ্চ নীৰরণানি, পঞ্চ কম্মানি আনন্তরিকানি, পঞ্চ দিট্ঠিযো, পঞ্চ ৰেরা, পঞ্চ ব্যসনা, পঞ্চ অক্খন্তিযা আদীনৰা, পঞ্চ ভযানি, পঞ্চ দিট্ঠধম্মনিব্বানৰাদা. পঞ্চকং.

ছক্কং

ছ ৰিৰাদমূলানি, ছ ছন্দরাগা ধম্মা, ছ ৰিরোধৰত্থূনি, ছ তণ্হাকাযা, ছ অগারৰা, ছ পরিহানিযা ধম্মা, অপরেপি ¶ ছ পরিহানিযা ধম্মা, ছ সোমনস্সুপৰিচারা, ছ ¶ দোমনস্সুপৰিচারা, ছ উপেক্খুপৰিচারা, ছ গেহসিতানি সোমনস্সানি, ছ গেহসিতানি দোমনস্সানি, ছ গেহসিতা উপেক্খা, ছ দিট্ঠিযো. ছক্কং.

সত্তকং

সত্ত অনুসযা, সত্ত সংযোজনানি, সত্ত পরিযুট্ঠানানি, সত্ত অসদ্ধম্মা, সত্ত দুচ্চরিতানি, সত্ত মানা, সত্ত দিট্ঠিযো. সত্তকং.

অট্ঠকং

অট্ঠ কিলেসৰত্থূনি, অট্ঠ কুসীতৰত্থূনি, অট্ঠসু লোকধম্মেসু চিত্তস্স পটিঘাতো, অট্ঠ অনরিযৰোহারা, অট্ঠ মিচ্ছত্তা, অট্ঠ পুরিসদোসা, অট্ঠ অসঞ্ঞিৰাদা, অট্ঠ নেৰসঞ্ঞিনাসঞ্ঞিৰাদা. অট্ঠকং.

নৰকং

নৰ আঘাতৰত্থূনি, নৰ পুরিসমলানি, নৰৰিধা মানা, নৰ তণ্হামূলকা ধম্মা, নৰ ইঞ্জিতানি, নৰ মঞ্ঞিতানি, নৰ ফন্দিতানি, নৰ পপঞ্চিতানি, নৰ সঙ্খতানি. নৰকং.

দসকং

দস কিলেসৰত্থূনি, দস আঘাতৰত্থূনি, দস অকুসলকম্মপথা, দস সংযোজনানি, দস মিচ্ছত্তা, দসৰত্থুকা মিচ্ছাদিট্ঠি, দসৰত্থুকা অন্তগ্গাহিকা দিট্ঠি. দসকং.

অট্ঠারস তণ্হাৰিচরিতানি অজ্ঝত্তিকস্স উপাদায, অট্ঠারস তণ্হাৰিচরিতানি বাহিরস্স উপাদায, তদেকজ্ঝং অভিসঞ্ঞুহিত্ৰা অভিসঙ্খিপিত্ৰা ছত্তিংস তণ্হাৰিচরিতানি হোন্তি ¶ , ইতি অতীতানি ছত্তিংস তণ্হাৰিচরিতানি, অনাগতানি ছত্তিংস তণ্হাৰিচরিতানি, পচ্চুপ্পন্নানি ছত্তিংস তণ্হাৰিচরিতানি, তদেকজ্ঝং অভিসঞ্ঞুহিত্ৰা অভিসঙ্খিপিত্ৰা অট্ঠ তণ্হাৰিচরিতসতং হোতি, যানি চ দ্ৰাসট্ঠি দিট্ঠিগতানি ব্রহ্মজালে ৰেয্যাকরণে ৰুত্তানি ভগৰতা.

খুদ্দকৰত্থুৰিভঙ্গং.

ধম্মহদযৰিভঙ্গো

কতি ¶ খন্ধা, কতি আযতনানি, কতি ধাতুযো, কতি সচ্চানি, কতি ইন্দ্রিযানি, কতি হেতূ, কতি আহারা, কতি ফস্সা, কতি ৰেদনা, কতি সঞ্ঞা, কতি চেতনা, কতি চিত্তানি (ৰিভ. ৯৭৮)?

পঞ্চক্খন্ধা, দ্ৰাদসাযতনানি, অট্ঠারস ধাতুযো, চত্তারি সচ্চানি, বাৰীসতিন্দ্রিযানি, নৰ হেতূ, চত্তারো আহারা, সত্ত ফস্সা, সত্ত ৰেদনা, সত্ত সঞ্ঞা, সত্ত চেতনা, সত্ত চিত্তানি (ৰিভ. ৯৭৮).

ধম্মহদযৰিভঙ্গং.

ৰিভঙ্গমাতিকা নিট্ঠিতা.

৩. ধাতুকথামাতিকা

নযমাতিকা

সঙ্গহো অসঙ্গহো (ধাতু. ১). সঙ্গহিতেন অসঙ্গহিতং. অসঙ্গহিতেন সঙ্গহিতং. সঙ্গহিতেন সঙ্গহিতং. অসঙ্গহিতেন অসঙ্গহিতং. সম্পযোগো ৰিপ্পযোগো. সম্পযুত্তেন ৰিপ্পযুত্তং. ৰিপ্পযুত্তেন সম্পযুত্তং. সম্পযুত্তেন সম্পযুত্তং. ৰিপ্পযুত্তেন ¶ ৰিপ্পযুত্তং. সঙ্গহিতেন সম্পযুত্তং ৰিপ্পযুত্তং. সম্পযুত্তেন সঙ্গহিতং অসঙ্গহিতং. অসঙ্গহিতেন সম্পযুত্তং ৰিপ্পযুত্তং. ৰিপ্পযুত্তেন সঙ্গহিতং অসঙ্গহিতং.

অব্ভন্তরমাতিকা

পঞ্চক্খন্ধা. দ্ৰাদসাযতনানি. অট্ঠারস ধাতুযো. চত্তারি সচ্চানি. বাৰীসতিন্দ্রিযানি. পটিচ্চসমুপ্পাদো. চত্তারো সতিপট্ঠানা. চত্তারো সম্মপ্পধানা. চত্তারো ইদ্ধিপাদা ¶ . চত্তারি ঝানানি. চতস্সো অপ্পমঞ্ঞাযো. পঞ্চিন্দ্রিযানি. পঞ্চ বলানি. সত্ত বোজ্ঝঙ্গা. অরিযো অট্ঠঙ্গিকো মগ্গো. ফস্সো ৰেদনা সঞ্ঞা চেতনা চিত্তং অধিমোক্খো মনসিকারো.

নযমুখমাতিকা

তীহি সঙ্গহো. তীহি অসঙ্গহো. চতূহি সম্পযোগো. চতূহি ৰিপ্পযোগো.

লক্খণমাতিকা

সভাগো. ৰিসভাগো.

বাহিরমাতিকা

সব্বাপি ধম্মসঙ্গণী ধাতুকথায মাতিকাতি.

ধাতুকথামাতিকা নিট্ঠিতা.

৪. পুগ্গলপঞ্ঞত্তিমাতিকা

ছ পঞ্ঞত্তিযো (পু. প. মাতিকা ১) – খন্ধপঞ্ঞত্তি আযতনপঞ্ঞত্তি ধাতুপঞ্ঞত্তি সচ্চপঞ্ঞত্তি ইন্দ্রিযপঞ্ঞত্তি পুগ্গলপঞ্ঞত্তীতি.

পুগ্গলপঞ্ঞত্তিমাতিকা নিট্ঠিতা.

৫. কথাৰত্থুমাতিকা

পুগ্গলকথা

সুদ্ধসচ্চিকট্ঠঅনুলোমপচ্চনীকং

পুগ্গলো ¶ ¶ উপলব্ভতি সচ্চিকট্ঠপরমত্থেনাতি (কথা. ১), আমন্তা. যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনাতি? ন হেৰং ৰত্তব্বে.

আজানাহি নিগ্গহং – হঞ্চি পুগ্গলো উপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা.

অনুলোমপঞ্চকং.

পুগ্গলো নুপলব্ভতি সচ্চিকট্ঠপরমত্থেনাতি? আমন্তা. যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনাতি? ন হেৰং ৰত্তব্বে.

আজানাহি ¶ পটিকম্মং – হঞ্চি পুগ্গলো নুপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’তি. যং ¶ তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা.

পটিকম্মচতুক্কং.

ত্ৰং চে পন মঞ্ঞসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি. তেন তৰ তত্থ হেতায পটিঞ্ঞায হেৰং পটিজানন্তং হেৰং নিগ্গহেতব্বে, অথ তং নিগ্গণ্হাম, সুনিগ্গহিতো চ হোসি –

হঞ্চি পুগ্গলো নুপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা.

নো ¶ চে পন ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি, ইদং তে মিচ্ছা.

নিগ্গহচতুক্কং.

এসে ¶ চে দুন্নিগ্গহিতে হেৰমেৰং তত্থ দক্খ, ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি, নো চ মযং তযা তত্থ হেতায পটিঞ্ঞায হেৰং পটিজানন্তা হেৰং নিগ্গহেতব্বা, অথ মং নিগ্গণ্হাসি, দুন্নিগ্গহিতা চ হোম –

হঞ্চি পুগ্গলো উপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো উপলব্ভতি সচ্চিকট্ঠপরমত্থেনা’’তি, যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি, ইদং তে মিচ্ছা.

উপনযনচতুক্কং.

ন ¶ হেৰং নিগ্গহেতব্বে, তেন হি যং নিগ্গণ্হাসি – হঞ্চি পুগ্গলো উপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি ¶ , ইদং তে মিচ্ছা. তেন হি যে কতে নিগ্গহে, সে নিগ্গহে দুক্কটে. সুকতে পটিকম্মে. সুকতা পটিপাদনাতি.

নিগ্গমনচতুক্কং.

পঠমো নিগ্গহো.

সুদ্ধসচ্চিকট্ঠপচ্চনীকানুলোমং

পুগ্গলো নুপলব্ভতি সচ্চিকট্ঠপরমত্থেনাতি? আমন্তা. যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনাতি? ন হেৰং ৰত্তব্বে.

আজানাহি নিগ্গহং – হঞ্চি পুগ্গলো নুপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো ¶ পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো নুপলব্ভতি সচ্চিকট্ঠপরমত্থেনা’’তি, যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা.

পচ্চনীকপঞ্চকং.

পুগ্গলো উপলব্ভতি সচ্চিকট্ঠপরমত্থেনাতি? আমন্তা. যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনাতি? ন হেৰং ৰত্তব্বে.

আজানাহি ¶ পটিকম্মং – হঞ্চি পুগ্গলো উপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা.

পটিকম্মচতুক্কং.

ত্ৰং ¶ চে পন মঞ্ঞসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি. তেন তৰ তত্থ হেতায পটিঞ্ঞায হেৰং পটিজানন্তং হেৰং নিগ্গহেতব্বে, অথ তং নিগ্গণ্হাম, সুনিগ্গহিতো চ হোসি –

হঞ্চি পুগ্গলো উপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো উপলব্ভতি সচ্চিকট্ঠপরমত্থেনা’’তি, যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো উপলব্ভতি সচ্চিকট্ঠপরমত্থেনা’’’তি, ইদং তে মিচ্ছা.

নিগ্গহচতুক্কং.

এসে ¶ চে দুন্নিগ্গহিতে হেৰমেৰং তত্থ দক্খ, ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি, নো চ মযং তযা তত্থ হেতায পটিঞ্ঞায হেৰং পটিজানন্তা হেৰং নিগ্গহেতব্বা, অথ মং নিগ্গণ্হাসি, দুন্নিগ্গহিতা চ হোম –

হঞ্চি ¶ পুগ্গলো নুপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি, ইদং তে মিচ্ছা.

উপনযনচতুক্কং.

ন হেৰং নিগ্গহেতব্বে, তেন হি যং নিগ্গণ্হাসি – হঞ্চি পুগ্গলো নুপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘যো সচ্চিকট্ঠো পরমত্থো, ততো সো পুগ্গলো নুপলব্ভতি সচ্চিকট্ঠপরমত্থেনা’’’তি ¶ , ইদং তে মিচ্ছা, তেন হি যে কতে নিগ্গহে ¶ , সে নিগ্গহে দুক্কটে. সুকতে পটিকম্মে, সুকতা পটিপাদনাতি.

নিগ্গমনচতুক্কং.

দুতিযো নিগ্গহো.

ওকাসসচ্চিকট্ঠঅনুলোমপচ্চনীকং

পুগ্গলো উপলব্ভতি সচ্চিকট্ঠপরমত্থেনাতি? আমন্তা. সব্বত্থ পুগ্গলো উপলব্ভতি সচ্চিকট্ঠপরমত্থেনাতি? ন হেৰং ৰত্তব্বে.

আজানাহি নিগ্গহং – হঞ্চি পুগ্গলো উপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘সব্বত্থ পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বত্থ পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘সব্বত্থ পুগ্গলো উপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বত্থ পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা…পে….

ততিযো নিগ্গহো.

কালসচ্চিকট্ঠঅনুলোমপচ্চনীকং

পুগ্গলো ¶ উপলব্ভতি সচ্চিকট্ঠপরমত্থেনাতি? আমন্তা. সব্বদা পুগ্গলো উপলব্ভতি সচ্চিকট্ঠপরমত্থেনাতি? ন হেৰং ৰত্তব্বে.

আজানাহি ¶ নিগ্গহং – হঞ্চি পুগ্গলো উপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘সব্বদা পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বদা পুগ্গলো উপলব্ভতি সচ্চিকট্ঠপরমত্থেনা’’’তি মিচ্ছা.

নো চে পন ৰত্তব্বে ‘‘সব্বদা পুগ্গলো উপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বদা পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা…পে….

চতুত্থো নিগ্গহো.

অৰযৰসচ্চিকট্ঠঅনুলোমপচ্চনীকং

পুগ্গলো উপলব্ভতি সচ্চিকট্ঠপরমত্থেনাতি? আমন্তা. সব্বেসু পুগ্গলো উপলব্ভতি সচ্চিকট্ঠপরমত্থেনাতি? ন হেৰং ৰত্তব্বে.

আজানাহি নিগ্গহং – হঞ্চি পুগ্গলো উপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘সব্বেসু পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বেসু পুগ্গলো উপলব্ভতি সচ্চিকট্ঠপরমত্থেনা’’’তি? মিচ্ছা.

নো ¶ চে পন ৰত্তব্বে ‘‘সব্বেসু পুগ্গলো উপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো উপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো উপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বেসু পুগ্গলো উপলব্ভতি সচ্চিকট্ঠপরমত্থেনা’’’তি, মিচ্ছা…পে….

পঞ্চমো নিগ্গহো.

ওকাসসচ্চিকট্ঠপচ্চনীকানুলোমং

পুগ্গলো ¶ নুপলব্ভতি সচ্চিকট্ঠপরমত্থেনাতি? আমন্তা. সব্বত্থ পুগ্গলো নুপলব্ভতি সচ্চিকট্ঠপরমত্থেনাতি? ন হেৰং ৰত্তব্বে.

আজানাহি নিগ্গহং – হঞ্চি পুগ্গলো নুপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘সব্বত্থ পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বত্থ পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা.

নো চে পন ৰত্তব্বে ‘‘সব্বত্থ পুগ্গলো নুপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বত্থ পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা…পে….

ছট্ঠো নিগ্গহো.

কালসচ্চিকট্ঠপচ্চনীকানুলোমং

পুগ্গলো ¶ নুপলব্ভতি সচ্চিকট্ঠপরমত্থেনাতি? আমন্তা. সব্বদা পুগ্গলো নুপলব্ভতি সচ্চিকট্ঠপরমত্থেনাতি? ন হেৰং ৰত্তব্বে.

আজানাহি নিগ্গহং – হঞ্চি পুগ্গলো নুপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘সব্বদা পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বদা পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা.

নো ¶ চে পন ৰত্তব্বে ‘‘সব্বদা পুগ্গলো নুপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বদা পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা…পে….

সত্তমো নিগ্গহো.

অৰযৰসচ্চিকট্ঠপচ্চনীকানুলোমং

পুগ্গলো নুপলব্ভতি সচ্চিকট্ঠপরমত্থেনাতি? আমন্তা. সব্বেসু পুগ্গলো নুপলব্ভতি সচ্চিকট্ঠপরমত্থেনাতি? ন হেৰং ৰত্তব্বে.

আজানাহি নিগ্গহং – হঞ্চি পুগ্গলো নুপলব্ভতি সচ্চিকট্ঠপরমত্থেন, তেন ৰত রে ৰত্তব্বে ‘‘সব্বেসু পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বেসু পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা.

নো ¶ চে পন ৰত্তব্বে ‘‘সব্বেসু পুগ্গলো নুপলব্ভতি সচ্চিকট্ঠপরমত্থেনা’’তি, নো চ ৰত রে ৰত্তব্বে ‘‘পুগ্গলো নুপলব্ভতি সচ্চিকট্ঠপরমত্থেনা’’তি. যং তত্থ ৰদেসি ‘‘ৰত্তব্বে খো ‘পুগ্গলো নুপলব্ভতি সচ্চিকট্ঠপরমত্থেন’, নো চ ৰত্তব্বে ‘সব্বেসু পুগ্গলো নুপলব্ভতি সচ্চিকট্ঠপরমত্থেনা’’’তি, মিচ্ছা…পে….

অট্ঠমো নিগ্গহো.

কথাৰত্থুমাতিকা নিট্ঠিতা.

৬. যমকমাতিকা

মূলযমকং

কুসলপদনযচতুক্কং

যে ¶ কেচি কুসলা ধম্মা (যম. ১.মূলযমক.১ আদযো), সব্বে তে কুসলমূলা. যে ৰা পন কুসলমূলা, সব্বে তে ধম্মা কুসলা.

যে কেচি কুসলা ধম্মা, সব্বে তে কুসলমূলেন একমূলা. যে ৰা পন কুসলমূলেন একমূলা, সব্বে তে ধম্মা কুসলা.

যে কেচি কুসলমূলেন একমূলা ধম্মা, সব্বে তে কুসলমূলেন অঞ্ঞমঞ্ঞমূলা. যে ৰা পন কুসলমূলেন অঞ্ঞমঞ্ঞমূলা, সব্বে তে ধম্মা কুসলা.

যে কেচি কুসলা ধম্মা, সব্বে তে কুসলমূলমূলা. যে ৰা পন কুসলমূলমূলা, সব্বে তে ধম্মা কুসলা.

যে ¶ কেচি কুসলা ধম্মা, সব্বে তে কুসলমূলেন একমূলমূলা. যে ৰা পন কুসলমূলেন একমূলমূলা, সব্বে তে ধম্মা কুসলা.

যে কেচি কুসলমূলেন একমূলমূলা ধম্মা, সব্বে তে কুসলমূলেন অঞ্ঞমঞ্ঞমূলমূলা. যে ৰা পন কুসলমূলেন অঞ্ঞমঞ্ঞমূলমূলা, সব্বে তে ধম্মা কুসলা.

যে কেচি কুসলা ধম্মা, সব্বে তে কুসলমূলকা. যে ৰা পন কুসলমূলকা, সব্বে তে ধম্মা কুসলা.

যে কেচি কুসলা ধম্মা, সব্বে তে কুসলমূলেন একমূলকা. যে ৰা পন কুসলমূলেন একমূলকা, সব্বে তে ধম্মা কুসলা.

যে ¶ কেচি কুসলমূলেন একমূলকা ধম্মা, সব্বে তে কুসলমূলেন অঞ্ঞমঞ্ঞমূলকা. যে ৰা পন কুসলমূলেন অঞ্ঞমঞ্ঞমূলকা, সব্বে তে ধম্মা কুসলা.

যে কেচি কুসলা ধম্মা, সব্বে তে কুসলমূলমূলকা. যে ৰা পন কুসলমূলমূলকা, সব্বে তে ধম্মা কুসলা.

যে কেচি কুসলা ধম্মা, সব্বে তে কুসলমূলেন একমূলমূলকা. যে ৰা পন কুসলমূলেন একমূলমূলকা, সব্বে তে ধম্মা কুসলা.

যে কেচি কুসলমূলেন একমূলমূলকা ধম্মা, সব্বে তে কুসলমূলেন অঞ্ঞমঞ্ঞমূলমূলকা. যে ৰা পন কুসলমূলেন অঞ্ঞমঞ্ঞমূলমূলকা, সব্বে তে ধম্মা কুসলা.

অকুসলপদনযচতুক্কং

যে কেচি অকুসলা ধম্মা, সব্বে তে অকুসলমূলা. যে ৰা পন অকুসলমূলা, সব্বে তে ধম্মা অকুসলা.

যে ¶ কেচি অকুসলা ধম্মা, সব্বে তে অকুসলমূলেন একমূলা. যে ৰা পন অকুসলমূলেন একমূলা, সব্বে তে ধম্মা অকুসলা.

যে কেচি অকুসলমূলেন একমূলা ধম্মা, সব্বে তে অকুসলমূলেন অঞ্ঞমঞ্ঞমূলা. যে ৰা পন অকুসলমূলেন অঞ্ঞমঞ্ঞমূলা, সব্বে তে ধম্মা অকুসলা.

যে কেচি অকুসলা ধম্মা, সব্বে তে অকুসলমূলমূলা. যে ৰা পন অকুসলমূলমূলা, সব্বে তে ধম্মা অকুসলা.

যে কেচি অকুসলা ধম্মা, সব্বে তে অকুসলমূলেন একমূলমূলা. যে ৰা পন অকুসলমূলেন একমূলমূলা, সব্বে তে ধম্মা অকুসলা.

যে ¶ কেচি অকুসলমূলেন একমূলমূলা ধম্মা, সব্বে তে অকুসলমূলেন অঞ্ঞমঞ্ঞমূলমূলা. যে ৰা পন অকুসলমূলেন অঞ্ঞমঞ্ঞমূলমূলা, সব্বে তে ধম্মা অকুসলা.

যে কেচি অকুসলা ধম্মা, সব্বে তে অকুসলমূলকা. যে ৰা পন অকুসলমূলকা, সব্বে তে ধম্মা অকুসলা.

যে কেচি অকুসলা ধম্মা, সব্বে তে অকুসলমূলেন একমূলকা. যে ৰা পন অকুসলমূলেন একমূলকা, সব্বে তে ধম্মা অকুসলা.

যে কেচি অকুসলমূলেন একমূলকা ধম্মা, সব্বে তে অকুসলমূলেন অঞ্ঞমঞ্ঞমূলকা. যে ৰা পন অকুসলমূলেন অঞ্ঞমঞ্ঞমূলকা, সব্বে তে ধম্মা অকুসলা.

যে কেচি অকুসলা ধম্মা, সব্বে তে অকুসলমূলমূলকা. যে ৰা পন অকুসলমূলমূলকা, সব্বে তে ধম্মা অকুসলা.

যে ¶ কেচি অকুসলা ধম্মা, সব্বে তে অকুসলমূলেন একমূলমূলকা. যে ৰা পন অকুসলমূলেন একমূলমূলকা, সব্বে তে ধম্মা অকুসলা.

যে কেচি অকুসলমূলেন একমূলমূলকা ধম্মা, সব্বে তে অকুসলমূলেন অঞ্ঞমঞ্ঞমূলমূলকা. যে ৰা পন অকুসলমূলেন অঞ্ঞমঞ্ঞমূলমূলকা, সব্বে তে ধম্মা অকুসলা.

অব্যাকতপদনযচতুক্কং

যে কেচি অব্যাকতা ধম্মা, সব্বে তে অব্যাকতমূলা. যে ৰা পন অব্যাকতমূলা, সব্বে তে ধম্মা অব্যাকতা.

যে ¶ কেচি অব্যাকতা ধম্মা, সব্বে তে অব্যাকতমূলেন একমূলা. যে ৰা পন অব্যাকতমূলেন একমূলা, সব্বে তে ধম্মা অব্যাকতা.

যে কেচি অব্যাকতমূলেন একমূলা ধম্মা, সব্বে তে অব্যাকতমূলেন অঞ্ঞমঞ্ঞমূলা. যে ৰা পন অব্যাকতমূলেন অঞ্ঞমঞ্ঞমূলা, সব্বে তে ধম্মা অব্যাকতা.

যে কেচি অব্যাকতা ধম্মা, সব্বে তে অব্যাকতমূলমূলা. যে ৰা পন অব্যাকতমূলমূলা, সব্বে তে ধম্মা অব্যাকতা.

যে কেচি অব্যাকতা ধম্মা, সব্বে তে অব্যাকতমূলেন একমূলমূলা. যে ৰা পন অব্যাকতমূলেন একমূলমূলা, সব্বে তে ধম্মা অব্যাকতা.

যে কেচি অব্যাকতমূলেন একমূলমূলা ধম্মা, সব্বে তে অব্যাকতমূলেন অঞ্ঞমঞ্ঞমূলমূলা. যে ৰা পন অব্যাকতমূলেন অঞ্ঞমঞ্ঞমূলমূলা, সব্বে তে ধম্মা অব্যাকতা.

যে ¶ কেচি অব্যাকতা ধম্মা, সব্বে তে অব্যাকতমূলকা. যে ৰা পন অব্যাকতমূলকা, সব্বে তে ধম্মা অব্যাকতা.

যে কেচি অব্যাকতা ধম্মা, সব্বে তে অব্যাকতমূলেন একমূলকা. যে ৰা পন অব্যাকতমূলেন একমূলকা, সব্বে তে ধম্মা অব্যাকতা.

যে কেচি অব্যাকতমূলেন একমূলকা ধম্মা, সব্বে তে অব্যাকতমূলেন অঞ্ঞমঞ্ঞমূলকা. যে ৰা পন অব্যাকতমূলেন অঞ্ঞমঞ্ঞমূলকা, সব্বে তে ধম্মা অব্যাকতা.

যে কেচি অব্যাকতা ধম্মা, সব্বে তে অব্যাকতমূলমূলকা. যে ৰা পন অব্যাকতমূলমূলকা, সব্বে তে ধম্মা অব্যাকতা.

যে ¶ কেচি অব্যাকতা ধম্মা, সব্বে তে অব্যাকতমূলেন একমূলমূলকা. যে ৰা পন অব্যাকতমূলেন একমূলমূলকা, সব্বে তে ধম্মা অব্যাকতা.

যে কেচি অব্যাকতমূলেন একমূলমূলকা ধম্মা, সব্বে তে অব্যাকতমূলেন অঞ্ঞমঞ্ঞমূলমূলকা. যে ৰা পন অব্যাকতমূলেন অঞ্ঞমঞ্ঞমূলমূলকা, সব্বে তে ধম্মা অব্যাকতা.

নামপদনযচতুক্কং

যে কেচি নামা ধম্মা, সব্বে তে নামমূলা. যে ৰা পন নামমূলা, সব্বে তে ধম্মা নামা.

যে কেচি নামা ধম্মা, সব্বে তে নামমূলেন একমূলা. যে ৰা পন নামমূলেন একমূলা, সব্বে তে ধম্মা নামা.

যে ¶ কেচি নামমূলেন একমূলা ধম্মা, সব্বে তে নামমূলেন অঞ্ঞমঞ্ঞমূলা. যে ৰা পন নামমূলেন অঞ্ঞমঞ্ঞমূলা, সব্বে তে ধম্মা নামা.

যে কেচি নামা ধম্মা, সব্বে তে নামমূলমূলা. যে ৰা পন নামমূলমূলা, সব্বে তে ধম্মা নামা.

যে কেচি নামা ধম্মা, সব্বে তে নামমূলেন একমূলমূলা. যে ৰা পন নামমূলেন একমূলমূলা, সব্বে তে ধম্মা নামা.

যে কেচি নামমূলেন একমূলমূলা ধম্মা, সব্বে তে নামমূলেন অঞ্ঞমঞ্ঞমূলমূলা. যে ৰা পন নামমূলেন অঞ্ঞমঞ্ঞমূলমূলা, সব্বে তে ধম্মা নামা.

যে কেচি নামা ধম্মা, সব্বে তে নামমূলকা. যে ৰা পন নামমূলকা, সব্বে তে ধম্মা নামা.

যে ¶ কেচি নামা ধম্মা, সব্বে তে নামমূলেন একমূলকা. যে ৰা পন নামমূলেন একমূলকা, সব্বে তে ধম্মা নামা.

যে কেচি নামমূলেন একমূলকা ধম্মা, সব্বে তে নামমূলেন অঞ্ঞমঞ্ঞমূলকা. যে ৰা পন নামমূলেন অঞ্ঞমঞ্ঞমূলকা, সব্বে তে ধম্মা নামা.

যে কেচি নামা ধম্মা, সব্বে তে নামমূলমূলকা. যে ৰা পন নামমূলমূলকা, সব্বে তে ধম্মা নামা.

যে কেচি নামা ধম্মা, সব্বে তে নামমূলেন একমূলমূলকা. যে ৰা পন নামমূলেন একমূলমূলকা, সব্বে তে ধম্মা নামা.

যে ¶ কেচি নামমূলেন একমূলমূলকা ধম্মা, সব্বে তে নামমূলেন অঞ্ঞমঞ্ঞমূলমূলকা. যে ৰা পন নামমূলেন অঞ্ঞমঞ্ঞমূলমূলকা, সব্বে তে ধম্মা নামা.

যে কেচি কুসলা ধম্মা, সব্বে তে কুসলহেতূ…পে… কুসলনিদানা…পে… কুসলসম্ভৰা…পে… কুসলপ্পভৰা…পে… কুসলসমুট্ঠানা…পে… কুসলাহারা…পে… কুসলারম্মণা…পে… কুসলপচ্চযা…পে… কুসলসমুদযা…পে….

মূলং হেতু নিদানঞ্চ, সম্ভৰো পভৰেন চ;

সমুট্ঠানাহারারম্মণা, পচ্চযো সমুদযেন চাতি.

মূলযমকমাতিকা নিট্ঠিতা.

খন্ধযমকং

পণ্ণত্তিৰারো

পঞ্চক্খন্ধা (যম. ১.খন্ধযমক.১ আদযো) – রূপক্খন্ধো ৰেদনাক্খন্ধো সঞ্ঞাক্খন্ধো সঙ্খারক্খন্ধো ৰিঞ্ঞাণক্খন্ধো.

পদসোধনৰারো

অনুলোমং

রূপং ¶ রূপক্খন্ধো, রূপক্খন্ধো রূপং.

ৰেদনা ৰেদনাক্খন্ধো, ৰেদনাক্খন্ধো ৰেদনা.

সঞ্ঞা সঞ্ঞাক্খন্ধো, সঞ্ঞাক্খন্ধো সঞ্ঞা.

সঙ্খারা সঙ্খারক্খন্ধো, সঙ্খারক্খন্ধো সঙ্খারা.

ৰিঞ্ঞাণং ৰিঞ্ঞাণক্খন্ধো, ৰিঞ্ঞাণক্খন্ধো ৰিঞ্ঞাণং.

পচ্চনীকং

ন ¶ রূপং ন রূপক্খন্ধো, ন রূপক্খন্ধো ন রূপং.

ন ৰেদনা ন ৰেদনাক্খন্ধো, ন ৰেদনাক্খন্ধো ন ৰেদনা.

ন সঞ্ঞা ন সঞ্ঞাক্খন্ধো, ন সঞ্ঞাক্খন্ধো ন সঞ্ঞা.

ন সঙ্খারা ন সঙ্খারক্খন্ধো, ন সঙ্খারক্খন্ধো ন সঙ্খারা.

ন ৰিঞ্ঞাণং ন ৰিঞ্ঞাণক্খন্ধো, ন ৰিঞ্ঞাণক্খন্ধো ন ৰিঞ্ঞাণং.

পদসোধনমূলচক্কৰারো

অনুলোমং

রূপং রূপক্খন্ধো, খন্ধা ৰেদনাক্খন্ধো.

রূপং রূপক্খন্ধো, খন্ধা সঞ্ঞাক্খন্ধো.

রূপং রূপক্খন্ধো, খন্ধা সঙ্খারক্খন্ধো.

রূপং রূপক্খন্ধো, খন্ধা ৰিঞ্ঞাণক্খন্ধো.

ৰেদনা ৰেদনাক্খন্ধো, খন্ধা রূপক্খন্ধো.

ৰেদনা ৰেদনাক্খন্ধো, খন্ধা সঞ্ঞাক্খন্ধো.

ৰেদনা ৰেদনাক্খন্ধো, খন্ধা সঙ্খারক্খন্ধো.

ৰেদনা ৰেদনাক্খন্ধো, খন্ধা ৰিঞ্ঞাণক্খন্ধো.

সঞ্ঞা ¶ সঞ্ঞাক্খন্ধো, খন্ধা রূপক্খন্ধো.

সঞ্ঞা সঞ্ঞাক্খন্ধো, খন্ধা ৰেদনাক্খন্ধো.

সঞ্ঞা সঞ্ঞাক্খন্ধো, খন্ধা সঙ্খারক্খন্ধো.

সঞ্ঞা সঞ্ঞাক্খন্ধো, খন্ধা ৰিঞ্ঞাণক্খন্ধো.

সঙ্খারা ¶ সঙ্খারক্খন্ধো, খন্ধা রূপক্খন্ধো.

সঙ্খারা সঙ্খারক্খন্ধো, খন্ধা ৰেদনাক্খন্ধো.

সঙ্খারা সঙ্খারক্খন্ধো, খন্ধা সঞ্ঞাক্খন্ধো.

সঙ্খারা সঙ্খারক্খন্ধো, খন্ধা ৰিঞ্ঞাণক্খন্ধো.

ৰিঞ্ঞাণং ৰিঞ্ঞাণক্খন্ধো, খন্ধা রূপক্খন্ধো.

ৰিঞ্ঞাণং ৰিঞ্ঞাণক্খন্ধো, খন্ধা ৰেদনাক্খন্ধো.

ৰিঞ্ঞাণং ৰিঞ্ঞাণক্খন্ধো, খন্ধা সঞ্ঞাক্খন্ধো.

ৰিঞ্ঞাণং ৰিঞ্ঞাণক্খন্ধো, খন্ধা সঙ্খারক্খন্ধো.

পচ্চনীকং

ন রূপং ন রূপক্খন্ধো, ন খন্ধা ন ৰেদনাক্খন্ধো.

ন রূপং ন রূপক্খন্ধো, ন খন্ধা ন সঞ্ঞাক্খন্ধো.

ন রূপং ন রূপক্খন্ধো, ন খন্ধা ন সঙ্খারক্খন্ধো.

ন রূপং ন রূপক্খন্ধো, ন খন্ধা ন ৰিঞ্ঞাণক্খন্ধো.

ন ৰেদনা ন ৰেদনাক্খন্ধো, ন খন্ধা ন রূপক্খন্ধো.

ন ৰেদনা ন ৰেদনাক্খন্ধো, ন খন্ধা ন সঞ্ঞাক্খন্ধো.

ন ৰেদনা ন ৰেদনাক্খন্ধো, ন খন্ধা ন সঙ্খারক্খন্ধো.

ন ৰেদনা ন ৰেদনাক্খন্ধো, ন খন্ধা ন ৰিঞ্ঞাণক্খন্ধো.

ন সঞ্ঞা ন সঞ্ঞাক্খন্ধো, ন খন্ধা ন রূপক্খন্ধো.

ন সঞ্ঞা ন সঞ্ঞাক্খন্ধো, ন খন্ধা ন ৰেদনাক্খন্ধো.

ন সঞ্ঞা ন সঞ্ঞাক্খন্ধো, ন খন্ধা ন সঙ্খারক্খন্ধো.

ন সঞ্ঞা ন সঞ্ঞাক্খন্ধো, ন খন্ধা ন ৰিঞ্ঞাণক্খন্ধো.

ন ¶ ¶ সঙ্খারা ন সঙ্খারক্খন্ধো, ন খন্ধা ন রূপক্খন্ধো.

ন সঙ্খারা ন সঙ্খারক্খন্ধো, ন খন্ধা ন ৰেদনাক্খন্ধো.

ন সঙ্খারা ন সঙ্খারক্খন্ধো, ন খন্ধা ন সঞ্ঞাক্খন্ধো.

ন সঙ্খারা ন সঙ্খারক্খন্ধো, ন খন্ধা ন ৰিঞ্ঞাণক্খন্ধো.

ন ৰিঞ্ঞাণং ন ৰিঞ্ঞাণক্খন্ধো, ন খন্ধা ন রূপক্খন্ধো.

ন ৰিঞ্ঞাণং ন ৰিঞ্ঞাণক্খন্ধো, ন খন্ধা ন ৰেদনাক্খন্ধো.

ন ৰিঞ্ঞাণং ন ৰিঞ্ঞাণক্খন্ধো, ন খন্ধা ন সঞ্ঞাক্খন্ধো.

ন ৰিঞ্ঞাণং ন ৰিঞ্ঞাণক্খন্ধো, ন খন্ধা ন সঙ্খারক্খন্ধো.

সুদ্ধখন্ধৰারো

অনুলোমং

রূপং খন্ধো, খন্ধা রূপং.

ৰেদনা খন্ধো, খন্ধা ৰেদনা.

সঞ্ঞা খন্ধো, খন্ধা সঞ্ঞা.

সঙ্খারা খন্ধো, খন্ধা সঙ্খারা.

ৰিঞ্ঞাণং খন্ধো, খন্ধা ৰিঞ্ঞাণং.

পচ্চনীকং

ন রূপং ন খন্ধো, ন খন্ধা ন রূপং.

ন ৰেদনা ন খন্ধো, ন খন্ধা ন ৰেদনা.

ন সঞ্ঞা ন খন্ধো, ন খন্ধা ন সঞ্ঞা.

ন সঙ্খারা ন খন্ধো, ন খন্ধা ন সঙ্খারা.

ন ৰিঞ্ঞাণং ন খন্ধো, ন খন্ধা ন ৰিঞ্ঞাণং.

সুদ্ধখন্ধমূলচক্কৰারো

অনুলোমং

রূপং ¶ খন্ধো, খন্ধা ৰেদনা.

রূপং খন্ধো, খন্ধা সঞ্ঞা.

রূপং খন্ধো, খন্ধা সঙ্খারা.

রূপং খন্ধো, খন্ধা ৰিঞ্ঞাণং.

ৰেদনা ¶ খন্ধো, খন্ধা রূপং.

ৰেদনা খন্ধো, খন্ধা সঞ্ঞা.

ৰেদনা খন্ধো, খন্ধা সঙ্খারা.

ৰেদনা খন্ধো, খন্ধা ৰিঞ্ঞাণং.

সঞ্ঞা খন্ধো, খন্ধা রূপং.

সঞ্ঞা খন্ধো, খন্ধা ৰেদনা.

সঞ্ঞা খন্ধো, খন্ধা সঙ্খারা.

সঞ্ঞা খন্ধো, খন্ধা ৰিঞ্ঞাণং.

সঙ্খারা খন্ধো, খন্ধা রূপং.

সঙ্খারা খন্ধো, খন্ধা ৰেদনা.

সঙ্খারা খন্ধো, খন্ধা সঞ্ঞা.

সঙ্খারা খন্ধো, খন্ধা ৰিঞ্ঞাণং.

ৰিঞ্ঞাণং খন্ধো, খন্ধা রূপং.

ৰিঞ্ঞাণং খন্ধো, খন্ধা ৰেদনা.

ৰিঞ্ঞাণং খন্ধো, খন্ধা সঞ্ঞা.

ৰিঞ্ঞাণং খন্ধো, খন্ধা সঙ্খারা.

পচ্চনীকং

ন ¶ রূপং ন খন্ধো, ন খন্ধা ন ৰেদনা.

ন রূপং ন খন্ধো, ন খন্ধা ন সঞ্ঞা.

ন রূপং ন খন্ধো, ন খন্ধা ন সঙ্খারা.

ন রূপং ন খন্ধো, ন খন্ধা ন ৰিঞ্ঞাণং.

ন ৰেদনা ন খন্ধো, ন খন্ধা ন রূপং.

ন ৰেদনা ন খন্ধো, ন খন্ধা ন সঞ্ঞা.

ন ৰেদনা ন খন্ধো, ন খন্ধা ন সঙ্খারা.

ন ৰেদনা ন খন্ধো, ন খন্ধা ন ৰিঞ্ঞাণং.

ন ¶ সঞ্ঞা ন খন্ধো, ন খন্ধা ন রূপং.

ন সঞ্ঞা ন খন্ধো, ন খন্ধা ন ৰেদনা.

ন সঞ্ঞা ন খন্ধো, ন খন্ধা ন সঙ্খারা.

ন সঞ্ঞা ন খন্ধো, ন খন্ধা ন ৰিঞ্ঞাণং.

ন সঙ্খারা ন খন্ধো, ন খন্ধা ন রূপং.

ন সঙ্খারা ন খন্ধো, ন খন্ধা ন ৰেদনা.

ন সঙ্খারা ন খন্ধো, ন খন্ধা ন সঞ্ঞা.

ন সঙ্খারা ন খন্ধো, ন খন্ধা ন ৰিঞ্ঞাণং.

ন ৰিঞ্ঞাণং ন খন্ধো, ন খন্ধা ন রূপং.

ন ৰিঞ্ঞাণং ন খন্ধো, ন খন্ধা ন ৰেদনা.

ন ৰিঞ্ঞাণং ন খন্ধো, ন খন্ধা ন সঞ্ঞা.

ন ৰিঞ্ঞাণং ন খন্ধো, ন খন্ধা ন সঙ্খারা.

খন্ধযমকমাতিকা নিট্ঠিতা.

আযতনযমকং

পণ্ণত্তিৰারো

দ্ৰাদসাযতনানি ¶ (যম. ১.আযতনযমক.১ আদযো) – চক্খাযতনং সোতাযতনং ঘানাযতনং জিৰ্হাযতনং কাযাযতনং রূপাযতনং সদ্দাযতনং গন্ধাযতনং রসাযতনং ফোট্ঠব্বাযতনং মনাযতনং ধম্মাযতনং.

পদসোধনৰারো

অনুলোমং

চক্খু চক্খাযতনং, চক্খাযতনং চক্খু.

সোতং সোতাযতনং, সোতাযতনং সোতং.

ঘানং ঘানাযতনং, ঘানাযতনং ঘানং.

জিৰ্হা ¶ জিৰ্হাযতনং, জিৰ্হাযতনং জিৰ্হা.

কাযো কাযাযতনং, কাযাযতনং কাযো.

রূপং রূপাযতনং, রূপাযতনং রূপং.

সদ্দো সদ্দাযতনং, সদ্দাযতনং সদ্দো.

গন্ধো গন্ধাযতনং, গন্ধাযতনং গন্ধো.

রসো রসাযতনং, রসাযতনং রসো.

ফোট্ঠব্বো ফোট্ঠব্বাযতনং, ফোট্ঠব্বাযতনং ফোট্ঠব্বো.

মনো মনাযতনং, মনাযতনং মনো.

ধম্মো ধম্মাযতনং, ধম্মাযতনং ধম্মো.

পচ্চনীকং

ন ¶ চক্খু ন চক্খাযতনং, ন চক্খাযতনং ন চক্খু.

ন সোতং ন সোতাযতনং, ন সোতাযতনং ন সোতং.

ন ঘানং ন ঘানাযতনং, ন ঘানাযতনং ন ঘানং.

ন জিৰ্হা ন জিৰ্হাযতনং, ন জিৰ্হাযতনং ন জিৰ্হা.

ন কাযো ন কাযাযতনং, ন কাযাযতনং ন কাযো.

ন রূপং ন রূপাযতনং, ন রূপাযতনং ন রূপং.

ন সদ্দো ন সদ্দাযতনং, ন সদ্দাযতনং ন সদ্দো.

ন গন্ধো ন গন্ধাযতনং, ন গন্ধাযতনং ন গন্ধো.

ন রসো ন রসাযতনং, ন রসাযতনং ন রসো.

ন ফোট্ঠব্বো ন ফোট্ঠব্বাযতনং, ন ফোট্ঠব্বাযতনং ন ফোট্ঠব্বো.

ন মনো ন মনাযতনং, ন মনাযতনং ন মনো.

ন ধম্মো ন ধম্মাযতনং, ন ধম্মাযতনং ন ধম্মো.

পদসোধনমূলচক্কৰারো

অনুলোমং

চক্খু ¶ চক্খাযতনং, আযতনা সোতাযতনং.

চক্খু চক্খাযতনং, আযতনা ঘানাযতনং.

চক্খু চক্খাযতনং, আযতনা জিৰ্হাযতনং…পে….

চক্খু চক্খাযতনং, আযতনা ধম্মাযতনং.

সোতং সোতাযতনং, আযতনা চক্খাযতনং.

সোতং সোতাযতনং, আযতনা ঘানাযতনং…পে….

সোতং সোতাযতনং, আযতনা ধম্মাযতনং.

ঘানং ¶ ঘানাযতনং, আযতনা চক্খাযতনং…পে….

ঘানং ঘানাযতনং, আযতনা ধম্মাযতনং…পে….

ধম্মো ধম্মাযতনং, আযতনা চক্খাযতনং.

ধম্মো ধম্মাযতনং, আযতনা সোতাযতনং…পে….

ধম্মো ধম্মাযতনং, আযতনা মনাযতনং. (চক্কং বন্ধিতব্বং.)

পচ্চনীকং

ন চক্খু ন চক্খাযতনং, নাযতনা ন সোতাযতনং.

ন চক্খু ন চক্খাযতনং, নাযতনা ন ঘানাযতনং…পে….

ন চক্খু ন চক্খাযতনং, নাযতনা ন ধম্মাযতনং.

ন সোতং ন সোতাযতনং, নাযতনা ন চক্খাযতনং…পে….

ন সোতং ন সোতাযতনং, নাযতনা ন ধম্মাযতনং.

ন ঘানং ন ঘানাযতনং, নাযতনা ন চক্খাযতনং…পে….

ন ঘানং ন ঘানাযতনং, নাযতনা ন ধম্মাযতনং…পে….

ন ধম্মো ন ধম্মাযতনং, নাযতনা ন চক্খাযতনং.

ন ধম্মো ন ধম্মাযতনং, নাযতনা ন সোতাযতনং…পে….

ন ধম্মো ন ধম্মাযতনং, নাযতনা ন মনাযতনং. (চক্কং বন্ধিতব্বং.)

সুদ্ধাযতনৰারো

অনুলোমং

চক্খু ¶ ¶ আযতনং, আযতনা চক্খু.

সোতং আযতনং, আযতনা সোতং.

ঘানং আযতনং, আযতনা ঘানং.

জিৰ্হা আযতনং, আযতনা জিৰ্হা.

কাযো আযতনং, আযতনা কাযো.

রূপং আযতনং, আযতনা রূপং.

সদ্দো আযতনং, আযতনা সদ্দো.

গন্ধো আযতনং, আযতনা গন্ধো.

রসো আযতনং, আযতনা রসো.

ফোট্ঠব্বো আযতনং, আযতনা ফোট্ঠব্বো.

মনো আযতনং, আযতনা মনো.

ধম্মো আযতনং, আযতনা ধম্মো.

পচ্চনীকং

ন চক্খু নাযতনং, নাযতনা ন চক্খু.

ন সোতং নাযতনং, নাযতনা ন সোতং.

ন ঘানং নাযতনং, নাযতনা ন ঘানং.

ন জিৰ্হা নাযতনং, নাযতনা ন জিৰ্হা.

ন কাযো নাযতনং, নাযতনা ন কাযো.

ন রূপং নাযতনং, নাযতনা ন রূপং.

ন সদ্দো নাযতনং, নাযতনা ন সদ্দো.

ন গন্ধো নাযতনং, নাযতনা ন গন্ধো.

ন রসো নাযতনং, নাযতনা ন রসো.

ন ¶ ফোট্ঠব্বো নাযতনং, নাযতনা ন ফোট্ঠব্বো.

ন মনো নাযতনং, নাযতনা ন মনো.

ন ধম্মো নাযতনং, নাযতনা ন ধম্মো.

সুদ্ধাযতনমূলচক্কৰারো

অনুলোমং

চক্খু ¶ আযতনং, আযতনা সোতং…পে….

চক্খু আযতনং, আযতনা ধম্মো.

সোতং আযতনং, আযতনা চক্খু…পে….

সোতং আযতনং, আযতনা ধম্মো.

ঘানং আযতনং, আযতনা চক্খু…পে….

ঘানং আযতনং, আযতনা ধম্মো…পে….

ধম্মো আযতনং, আযতনা চক্খু.

ধম্মো আযতনং, আযতনা সোতং…পে….

ধম্মো আযতনং, আযতনা মনো. (চক্কং বন্ধিতব্বং.)

পচ্চনীকং

ন চক্খু নাযতনং, নাযতনা ন সোতং…পে….

ন চক্খু নাযতনং, নাযতনা ন ধম্মো.

ন সোতং নাযতনং, নাযতনা ন চক্খু…পে….

ন সোতং নাযতনং, নাযতনা ন ধম্মো.

ন ¶ ঘানং নাযতনং, নাযতনা ন চক্খু…পে….

ন ঘানং নাযতনং, নাযতনা ন ধম্মো…পে….

ন ধম্মো নাযতনং, নাযতনা ন চক্খু.

ন ধম্মো নাযতনং, নাযতনা ন সোতং…পে….

ন ধম্মো নাযতনং, নাযতনা ন মনো. (চক্কং বন্ধিতব্বং.)

আযতনযমকমাতিকা নিট্ঠিতা.

ধাতুযমকং

পণ্ণত্তিৰারো

অট্ঠারস ¶ ধাতুযো (যম. ১.ধাতুরমক.১ আদযো) – চক্খুধাতু সোতধাতু ঘানধাতু জিৰ্হাধাতু কাযধাতু রূপধাতু সদ্দধাতু গন্ধধাতু রসধাতু ফোট্ঠব্বধাতু চক্খুৰিঞ্ঞাণধাতু সোতৰিঞ্ঞাণধাতু ঘানৰিঞ্ঞাণধাতু জিৰ্হাৰিঞ্ঞাণধাতু কাযৰিঞ্ঞাণধাতু মনোধাতু মনোৰিঞ্ঞাণধাতু ধম্মধাতু.

পদসোধনৰারো

অনুলোমং

চক্খু চক্খুধাতু, চক্খুধাতু চক্খু.

সোতং সোতধাতু, সোতধাতু সোতং…পে….

চক্খুৰিঞ্ঞাণং চক্খুৰিঞ্ঞাণধাতু, চক্খুৰিঞ্ঞাণধাতু চক্খুৰিঞ্ঞাণং…পে….

মনো মনোধাতু, মনোধাতু মনো.

মনোৰিঞ্ঞাণং ¶ মনোৰিঞ্ঞাণধাতু, মনোৰিঞ্ঞাণধাতু মনোৰিঞ্ঞাণং.

ধম্মো ধম্মধাতু, ধম্মধাতু ধম্মো.

পচ্চনীকং

ন চক্খু ন চক্খুধাতু, ন চক্খুধাতু ন চক্খু.

ন সোতং ন সোতধাতু, ন সোতধাতু ন সোতং…পে….

ন চক্খুৰিঞ্ঞাণং ন চক্খুৰিঞ্ঞাণধাতু, ন চক্খুৰিঞ্ঞাণধাতু ন চক্খুৰিঞ্ঞাণং…পে….

ন মনো ন মনোধাতু, ন মনোধাতু ন মনো.

ন ¶ মনোৰিঞ্ঞাণং ন মনোৰিঞ্ঞাণধাতু, ন মনোৰিঞ্ঞাণধাতু ন মনোৰিঞ্ঞাণং.

ন ধম্মো ন ধম্মধাতু, ন ধম্মধাতু ন ধম্মো.

পদসোধনমূলচক্কৰারো

অনুলোমং

চক্খু চক্খুধাতু, ধাতূ সোতধাতু…পে….

চক্খু চক্খুধাতু, ধাতূ ধম্মধাতু. (যথা আযতনযমকে চক্কং বন্ধিতং, এৰমিধ চক্কং বন্ধিতব্বং.)

পচ্চনীকং

ন চক্খু ন চক্খুধাতু, ন ধাতূ ন সোতধাতু.

ন চক্খু ন চক্খুধাতু, ন ধাতূ ন ঘানধাতু…পে….

ন চক্খু ন চক্খুধাতু, ন ধাতূ ন ধম্মধাতু…পে….

ন ধম্মো ন ধম্মধাতু, ন ধাতূ ন চক্খুধাতু…পে….

ন ধম্মো ন ধম্মধাতু, ন ধাতূ ন মনোৰিঞ্ঞাণধাতু. (চক্কং বন্ধিতব্বং.)

সুদ্ধধাতুৰারো

অনুলোমং

চক্খু ¶ ধাতু, ধাতূ চক্খু…পে….

চক্খুৰিঞ্ঞাণং ধাতু, ধাতূ চক্খুৰিঞ্ঞাণং…পে….

মনোৰিঞ্ঞাণং ধাতু, ধাতূ মনোৰিঞ্ঞাণং.

ধম্মো ধাতু, ধাতূ ধম্মো.

পচ্চনীকং

ন চক্খু ন ধাতু, ন ধাতূ ন চক্খু…পে….

ন চক্খুৰিঞ্ঞাণং ন ধাতু, ন ধাতূ ন চক্খুৰিঞ্ঞাণং…পে….

ন ¶ মনোৰিঞ্ঞাণং ন ধাতু, ন ধাতূ ন মনোৰিঞ্ঞাণং.

ন ধম্মো ন ধাতু, ন ধাতূ ন ধম্মো.

সুদ্ধধাতুমূলচক্কৰারো

অনুলোমং

চক্খু ধাতু, ধাতূ সোতং…পে….

চক্খু ধাতু, ধাতূ ধম্মো…পে….

ধম্মো ধাতু, ধাতূ চক্খু…পে….

ধম্মো ধাতু, ধাতূ মনোৰিঞ্ঞাণং. (চক্কং বন্ধিতব্বং.)

পচ্চনীকং

ন ¶ চক্খু ন ধাতু, ন ধাতূ ন সোতং…পে….

ন চক্খু ন ধাতু, ন ধাতূ ন ধম্মো…পে….

ন ধম্মো ন ধাতু, ন ধাতূ ন চক্খু…পে….

ন ধম্মো ন ধাতু, ন ধাতূ ন মনোৰিঞ্ঞাণং. (চক্কং বন্ধিতব্বং. )

ধাতুযমকমাতিকা নিট্ঠিতা.

সচ্চযমকং

পণ্ণত্তিৰারো

চত্তারি সচ্চানি (যম. ১.সচ্চযমক.১ আদযো) – দুক্খসচ্চং সমুদযসচ্চং নিরোধসচ্চং মগ্গসচ্চং.

পদসোধনৰারো

অনুলোমং

দুক্খং ¶ দুক্খসচ্চং, দুক্খসচ্চং দুক্খং.

সমুদযো সমুদযসচ্চং, সমুদযসচ্চং সমুদযো.

নিরোধো নিরোধসচ্চং, নিরোধসচ্চং নিরোধো.

মগ্গো মগ্গসচ্চং, মগ্গসচ্চং মগ্গো.

পচ্চনীকং

ন ¶ দুক্খং ন দুক্খসচ্চং, ন দুক্খসচ্চং ন দুক্খং.

ন সমুদযো ন সমুদযসচ্চং, ন সমুদযসচ্চং ন সমুদযো.

ন নিরোধো ন নিরোধসচ্চং, ন নিরোধসচ্চং ন নিরোধো.

ন মগ্গো ন মগ্গসচ্চং, ন মগ্গসচ্চং ন মগ্গো.

পদসোধনমূলচক্কৰারো

অনুলোমং

দুক্খং দুক্খসচ্চং, সচ্চা সমুদযসচ্চং.

দুক্খং দুক্খসচ্চং, সচ্চা নিরোধসচ্চং.

দুক্খং দুক্খসচ্চং, সচ্চা মগ্গসচ্চং.

সমুদযো সমুদযসচ্চং, সচ্চা দুক্খসচ্চং.

সমুদযো সমুদযসচ্চং, সচ্চা নিরোধসচ্চং.

সমুদযো সমুদযসচ্চং, সচ্চা মগ্গসচ্চং.

নিরোধো নিরোধসচ্চং, সচ্চা দুক্খসচ্চং.

নিরোধো নিরোধসচ্চং, সচ্চা সমুদযসচ্চং.

নিরোধো নিরোধসচ্চং, সচ্চা মগ্গসচ্চং.

মগ্গো মগ্গসচ্চং, সচ্চা দুক্খসচ্চং.

মগ্গো মগ্গসচ্চং, সচ্চা সমুদযসচ্চং.

মগ্গো মগ্গসচ্চং, সচ্চা নিরোধসচ্চং.

পচ্চনীকং

ন ¶ ¶ দুক্খং ন দুক্খসচ্চং, ন সচ্চা ন সমুদযসচ্চং.

ন দুক্খং ন দুক্খসচ্চং, ন সচ্চা ন নিরোধসচ্চং.

ন দুক্খং ন দুক্খসচ্চং, ন সচ্চা ন মগ্গসচ্চং.

ন সমুদযো ন সমুদযসচ্চং, ন সচ্চা ন দুক্খসচ্চং.

ন সমুদযো ন সমুদযসচ্চং, ন সচ্চা ন নিরোধসচ্চং.

ন সমুদযো ন সমুদযসচ্চং, ন সচ্চা ন মগ্গসচ্চং.

ন নিরোধো ন নিরোধসচ্চং, ন সচ্চা ন দুক্খসচ্চং.

ন নিরোধো ন নিরোধসচ্চং, ন সচ্চা ন সমুদযসচ্চং.

ন নিরোধো ন নিরোধসচ্চং, ন সচ্চা ন মগ্গসচ্চং.

ন মগ্গো ন মগ্গসচ্চং, ন সচ্চা ন দুক্খসচ্চং.

ন মগ্গো ন মগ্গসচ্চং, ন সচ্চা ন সমুদযসচ্চং.

ন মগ্গো ন মগ্গসচ্চং, ন সচ্চা ন নিরোধসচ্চং.

সুদ্ধসচ্চৰারো

অনুলোমং

দুক্খং সচ্চং, সচ্চা দুক্খং.

সমুদযো সচ্চং, সচ্চা সমুদযো.

নিরোধো সচ্চং, সচ্চা নিরোধো.

মগ্গো সচ্চং, সচ্চা মগ্গো.

পচ্চনীকং

ন ¶ দুক্খং ন সচ্চং, ন সচ্চা ন দুক্খং.

ন সমুদযো ন সচ্চং, ন সচ্চা ন সমুদযো.

ন নিরোধো ন সচ্চং, ন সচ্চা ন নিরোধো.

ন মগ্গো ন সচ্চং, ন সচ্চা ন মগ্গো.

সুদ্ধসচ্চমূলচক্কৰারো

অনুলোমং

দুক্খং ¶ সচ্চং, সচ্চা সমুদযো.

দুক্খং সচ্চং, সচ্চা নিরোধো.

দুক্খং সচ্চং, সচ্চা মগ্গো.

সমুদযো সচ্চং, সচ্চা দুক্খং…পে… সচ্চা মগ্গো.

নিরোধো সচ্চং, সচ্চা দুক্খং…পে… সচ্চা মগ্গো.

মগ্গো সচ্চং, সচ্চা দুক্খং.

মগ্গো সচ্চং, সচ্চা সমুদযো.

মগ্গো সচ্চং, সচ্চা নিরোধো.

পচ্চনীকং

ন দুক্খং ন সচ্চং, ন সচ্চা ন সমুদযো.

ন দুক্খং ন সচ্চং, ন সচ্চা ন নিরোধো.

ন দুক্খং ন সচ্চং, ন সচ্চা ন মগ্গো.

ন ¶ সমুদযো ন সচ্চং, ন সচ্চা ন দুক্খং…পে… ন সচ্চা ন মগ্গো.

ন নিরোধো ন সচ্চং, ন সচ্চা ন দুক্খং…পে… ন সচ্চা ন মগ্গো.

ন মগ্গো ন সচ্চং, ন সচ্চা ন দুক্খং.

ন মগ্গো ন সচ্চং, ন সচ্চা ন সমুদযো.

ন মগ্গো ন সচ্চং, ন সচ্চা ন নিরোধো.

সচ্চযমকমাতিকা নিট্ঠিতা.

সঙ্খারযমকং

পণ্ণত্তিৰারো

তযো ¶ সঙ্খারা (যম. ২.সঙ্খারযমক.১ আদযো) – কাযসঙ্খারো ৰচীসঙ্খারো চিত্তসঙ্খারো. অস্সাসপস্সাসা কাযসঙ্খারো, ৰিতক্কৰিচারা ৰচীসঙ্খারো, সঞ্ঞা চ ৰেদনা চ চিত্তসঙ্খারো, ঠপেত্ৰা ৰিতক্কৰিচারে সব্বেপি চিত্তসম্পযুত্তকা ধম্মা চিত্তসঙ্খারো.

পদসোধনৰারো

অনুলোমং

কাযো কাযসঙ্খারো, কাযসঙ্খারো কাযো.

ৰচী ৰচীসঙ্খারো, ৰচীসঙ্খারো ৰচী.

চিত্তং চিত্তসঙ্খারো, চিত্তসঙ্খারো চিত্তং.

পচ্চনীকং

ন ¶ কাযো ন কাযসঙ্খারো, ন কাযসঙ্খারো ন কাযো.

ন ৰচী ন ৰচীসঙ্খারো, ন ৰচীসঙ্খারো ন ৰচী.

ন চিত্তং ন চিত্তসঙ্খারো, ন চিত্তসঙ্খারো ন চিত্তং.

পদসোধনমূলচক্কৰারো

অনুলোমং

কাযো কাযসঙ্খারো, সঙ্খারা ৰচীসঙ্খারো.

কাযো কাযসঙ্খারো, সঙ্খারা চিত্তসঙ্খারো.

ৰচী ৰচীসঙ্খারো, সঙ্খারা কাযসঙ্খারো.

ৰচী ৰচীসঙ্খারো, সঙ্খারা চিত্তসঙ্খারো.

চিত্তং ¶ চিত্তসঙ্খারো, সঙ্খারা কাযসঙ্খারো.

চিত্তং চিত্তসঙ্খারো, সঙ্খারা ৰচীসঙ্খারো.

পচ্চনীকং

ন কাযো ন কাযসঙ্খারো, ন সঙ্খারা ন ৰচীসঙ্খারো.

ন কাযো ন কাযসঙ্খারো, ন সঙ্খারা ন চিত্তসঙ্খারো.

ন ৰচী ন ৰচীসঙ্খারো, ন সঙ্খারা ন কাযসঙ্খারো.

ন ৰচী ন ৰচীসঙ্খারো, ন সঙ্খারা ন চিত্তসঙ্খারো.

ন চিত্তং ন চিত্তসঙ্খারো, ন সঙ্খারা ন কাযসঙ্খারো.

ন চিত্তং ন চিত্তসঙ্খারো, ন সঙ্খারা ন ৰচীসঙ্খারো.

সুদ্ধসঙ্খারৰারো

অনুলোমং

কাযসঙ্খারো ¶ ৰচীসঙ্খারো, ৰচীসঙ্খারো কাযসঙ্খারো.

কাযসঙ্খারো চিত্তসঙ্খারো, চিত্তসঙ্খারো কাযসঙ্খারো.

ৰচীসঙ্খারো চিত্তসঙ্খারো, চিত্তসঙ্খারো ৰচীসঙ্খারো.

পচ্চনীকং

ন কাযসঙ্খারো ন ৰচীসঙ্খারো, ন ৰচীসঙ্খারো ন কাযসঙ্খারো.

ন কাযসঙ্খারো ন চিত্তসঙ্খারো, ন চিত্তসঙ্খারো ন কাযসঙ্খারো.

ন ৰচীসঙ্খারো ন চিত্তসঙ্খারো, ন চিত্তসঙ্খারো ন ৰচীসঙ্খারো.

সঙ্খারযমকমাতিকা নিট্ঠিতা.

অনুসযযমকং

সত্তানুসযা ¶ (যম. ২.অনুসযযমক.১) – কামরাগানুসযো পটিঘানুসযো মানানুসযো দিট্ঠানুসযো ৰিচিকিচ্ছানুসযো ভৰরাগানুসযো অৰিজ্জানুসযো.

অনুসযযমকমাতিকা নিট্ঠিতা.

চিত্তযমকং

সুদ্ধচিত্তসামঞ্ঞং

পুগ্গলৰারো

১. উপ্পাদনিরোধকালসম্ভেদৰারো

যস্স ¶ চিত্তং উপ্পজ্জতি ন নিরুজ্ঝতি (যম. ২.চিত্তযমক.১ আদযো), তস্স চিত্তং নিরুজ্ঝিস্সতি ন উপ্পজ্জিস্সতি. যস্স ৰা পন চিত্তং নিরুজ্ঝিস্সতি ন উপ্পজ্জিস্সতি, তস্স চিত্তং উপ্পজ্জতি ন নিরুজ্ঝতি.

যস্স চিত্তং ন উপ্পজ্জতি নিরুজ্ঝতি, তস্স চিত্তং ন নিরুজ্ঝিস্সতি উপ্পজ্জিস্সতি. যস্স ৰা পন চিত্তং ন নিরুজ্ঝিস্সতি উপ্পজ্জিস্সতি, তস্স চিত্তং ন উপ্পজ্জতি নিরুজ্ঝতি.

২. উপ্পাদুপ্পন্নৰারো

যস্স চিত্তং উপ্পজ্জতি, তস্স চিত্তং উপ্পন্নং. যস্স ৰা পন চিত্তং উপ্পন্নং, তস্স চিত্তং উপ্পজ্জতি.

যস্স চিত্তং ন উপ্পজ্জতি, তস্স চিত্তং ন উপ্পন্নং. যস্স ৰা পন চিত্তং ন উপ্পন্নং, তস্স চিত্তং ন উপ্পজ্জতি.

৩. নিরোধুপ্পন্নৰারো

যস্স ¶ চিত্তং নিরুজ্ঝতি, তস্স চিত্তং উপ্পন্নং. যস্স ৰা পন চিত্তং উপ্পন্নং, তস্স চিত্তং নিরুজ্ঝতি.

যস্স ¶ চিত্তং ন নিরুজ্ঝতি, তস্স চিত্তং ন উপ্পন্নং. যস্স ৰা পন চিত্তং ন উপ্পন্নং, তস্স চিত্তং ন নিরুজ্ঝতি.

৪. উপ্পাদৰারো

যস্স চিত্তং উপ্পজ্জতি, তস্স চিত্তং উপ্পজ্জিত্থ. যস্স ৰা পন চিত্তং উপ্পজ্জিত্থ, তস্স চিত্তং উপ্পজ্জতি.

যস্স চিত্তং ন উপ্পজ্জতি, তস্স চিত্তং ন উপ্পজ্জিত্থ. যস্স ৰা পন চিত্তং ন উপ্পজ্জিত্থ, তস্স চিত্তং ন উপ্পজ্জতি.

যস্স চিত্তং উপ্পজ্জতি, তস্স চিত্তং উপ্পজ্জিস্সতি. যস্স ৰা পন চিত্তং উপ্পজ্জিস্সতি, তস্স চিত্তং উপ্পজ্জতি.

যস্স চিত্তং ন উপ্পজ্জতি, তস্স চিত্তং ন উপ্পজ্জিস্সতি. যস্স ৰা পন চিত্তং ন উপ্পজ্জিস্সতি, তস্স চিত্তং ন উপ্পজ্জতি.

যস্স চিত্তং উপ্পজ্জিত্থ, তস্স চিত্তং উপ্পজ্জিস্সতি. যস্স ৰা পন চিত্তং উপ্পজ্জিস্সতি, তস্স চিত্তং উপ্পজ্জিত্থ.

যস্স চিত্তং ন উপ্পজ্জিত্থ, তস্স চিত্তং ন উপ্পজ্জিস্সতি. যস্স ৰা পন চিত্তং ন উপ্পজ্জিস্সতি, তস্স চিত্তং ন উপ্পজ্জিত্থ.

৫. নিরোধৰারো

যস্স চিত্তং নিরুজ্ঝতি, তস্স চিত্তং নিরুজ্ঝিত্থ. যস্স ৰা পন চিত্তং নিরুজ্ঝিত্থ, তস্স চিত্তং নিরুজ্ঝতি.

যস্স চিত্তং ন নিরুজ্ঝতি, তস্স চিত্তং ন নিরুজ্ঝিত্থ. যস্স ৰা পন চিত্তং ন নিরুজ্ঝিত্থ, তস্স চিত্তং ন নিরুজ্ঝতি.

যস্স চিত্তং নিরুজ্ঝতি, তস্স চিত্তং নিরুজ্ঝিস্সতি. যস্স ৰা পন চিত্তং নিরুজ্ঝিস্সতি, তস্স চিত্তং নিরুজ্ঝতি.

যস্স ¶ ¶ চিত্তং ন নিরুজ্ঝতি, তস্স চিত্তং ন নিরুজ্ঝিস্সতি. যস্স ৰা পন চিত্তং ন নিরুজ্ঝিস্সতি, তস্স চিত্তং ন নিরুজ্ঝতি.

যস্স চিত্তং নিরুজ্ঝিত্থ, তস্স চিত্তং নিরুজ্ঝিস্সতি. যস্স ৰা পন চিত্তং নিরুজ্ঝিস্সতি, তস্স চিত্তং নিরুজ্ঝিত্থ.

যস্স চিত্তং ন নিরুজ্ঝিত্থ, তস্স চিত্তং ন নিরুজ্ঝিস্সতি. যস্স ৰা পন চিত্তং ন নিরুজ্ঝিস্সতি, তস্স চিত্তং ন নিরুজ্ঝিত্থ.

৬. উপ্পাদনিরোধৰারো

যস্স চিত্তং উপ্পজ্জতি, তস্স চিত্তং নিরুজ্ঝিত্থ. যস্স ৰা পন চিত্তং নিরুজ্ঝিত্থ, তস্স চিত্তং উপ্পজ্জতি.

যস্স চিত্তং ন উপ্পজ্জতি, তস্স চিত্তং ন নিরুজ্ঝিত্থ. যস্স ৰা পন চিত্তং ন নিরুজ্ঝিত্থ, তস্স চিত্তং ন উপ্পজ্জতি.

যস্স চিত্তং উপ্পজ্জতি, তস্স চিত্তং নিরুজ্ঝিস্সতি. যস্স ৰা পন চিত্তং নিরুজ্ঝিস্সতি, তস্স চিত্তং উপ্পজ্জতি.

যস্স চিত্তং ন উপ্পজ্জতি, তস্স চিত্তং ন নিরুজ্ঝিস্সতি. যস্স ৰা পন চিত্তং ন নিরুজ্ঝিস্সতি, তস্স চিত্তং ন উপ্পজ্জতি.

যস্স চিত্তং উপ্পজ্জিত্থ, তস্স চিত্তং নিরুজ্ঝিস্সতি. যস্স ৰা পন চিত্তং নিরুজ্ঝিস্সতি, তস্স চিত্তং উপ্পজ্জিত্থ.

যস্স চিত্তং ন উপ্পজ্জিত্থ, তস্স চিত্তং ন নিরুজ্ঝিস্সতি. যস্স ৰা পন চিত্তং ন নিরুজ্ঝিস্সতি, তস্স চিত্তং ন উপ্পজ্জিত্থ.

৭. উপ্পজ্জমানননিরোধৰারো

যস্স ¶ চিত্তং উপ্পজ্জতি, তস্স চিত্তং ন নিরুজ্ঝতি. যস্স ৰা পন চিত্তং ন নিরুজ্ঝতি, তস্স চিত্তং উপ্পজ্জতি.

যস্স চিত্তং ন উপ্পজ্জতি, তস্স চিত্তং নিরুজ্ঝতি. যস্স ৰা পন চিত্তং নিরুজ্ঝতি, তস্স চিত্তং ন উপ্পজ্জতি.

৮. উপ্পজ্জমানুপ্পন্নৰারো

যস্স ¶ চিত্তং উপ্পজ্জমানং, তস্স চিত্তং উপ্পন্নং. যস্স ৰা পন চিত্তং উপ্পন্নং, তস্স চিত্তং উপ্পজ্জমানং.

যস্স চিত্তং ন উপ্পজ্জমানং, তস্স চিত্তং ন উপ্পন্নং. যস্স ৰা পন চিত্তং ন উপ্পন্নং, তস্স চিত্তং ন উপ্পজ্জমানং.

৯. নিরুজ্ঝমানুপ্পন্নৰারো

যস্স চিত্তং নিরুজ্ঝমানং, তস্স চিত্তং উপ্পন্নং. যস্স ৰা পন চিত্তং উপ্পন্নং, তস্স চিত্তং নিরুজ্ঝমানং.

যস্স চিত্তং ন নিরুজ্ঝমানং, তস্স চিত্তং ন উপ্পন্নং. যস্স ৰা পন চিত্তং ন উপ্পন্নং, তস্স চিত্তং ন নিরুজ্ঝমানং.

১০. উপ্পন্নুপ্পাদৰারো

যস্স চিত্তং উপ্পন্নং, তস্স চিত্তং উপ্পজ্জিত্থ. যস্স ৰা পন চিত্তং উপ্পজ্জিত্থ, তস্স চিত্তং উপ্পন্নং.

যস্স ¶ চিত্তং ন উপ্পন্নং, তস্স চিত্তং ন উপ্পজ্জিত্থ. যস্স ৰা পন চিত্তং ন উপ্পজ্জিত্থ, তস্স চিত্তং ন উপ্পন্নং.

যস্স চিত্তং উপ্পন্নং, তস্স চিত্তং উপ্পজ্জিস্সতি. যস্স ৰা পন চিত্তং উপ্পজ্জিস্সতি, তস্স চিত্তং উপ্পন্নং.

যস্স চিত্তং ন উপ্পন্নং, তস্স চিত্তং ন উপ্পজ্জিস্সতি. যস্স ৰা পন চিত্তং ন উপ্পজ্জিস্সতি, তস্স চিত্তং ন উপ্পন্নং.

১১. অতীতানাগতৰারো

যস্স চিত্তং উপ্পজ্জিত্থ, নো চ তস্স চিত্তং উপ্পন্নং, তস্স চিত্তং উপ্পজ্জিস্সতি. যস্স ৰা পন চিত্তং উপ্পজ্জিস্সতি, নো চ তস্স চিত্তং উপ্পন্নং, তস্স চিত্তং উপ্পজ্জিত্থ.

যস্স ¶ চিত্তং ন উপ্পজ্জিত্থ, নো চ তস্স চিত্তং ন উপ্পন্নং, তস্স চিত্তং ন উপ্পজ্জিস্সতি. যস্স ৰা পন চিত্তং ন উপ্পজ্জিস্সতি, নো চ তস্স চিত্তং ন উপ্পন্নং, তস্স চিত্তং ন উপ্পজ্জিত্থ.

১২. উপ্পন্নুপ্পজ্জমানৰারো

উপ্পন্নং উপ্পজ্জমানং, উপ্পজ্জমানং উপ্পন্নং.

ন উপ্পন্নং ন উপ্পজ্জমানং, ন উপ্পজ্জমানং ন উপ্পন্নং.

১৩. নিরুদ্ধনিরুজ্ঝমানৰারো

নিরুদ্ধং নিরুজ্ঝমানং, নিরুজ্ঝমানং নিরুদ্ধং.

ন নিরুদ্ধং ন নিরুজ্ঝমানং, ন নিরুজ্ঝমানং ন নিরুদ্ধং.

১৪. অতিক্কন্তকালৰারো

যস্স ¶ চিত্তং উপ্পজ্জমানং খণং খণং ৰীতিক্কন্তং অতিক্কন্তকালং, নিরুজ্ঝমানং খণং খণং ৰীতিক্কন্তং অতিক্কন্তকালং তস্স চিত্তং. যস্স ৰা পন চিত্তং নিরুজ্ঝমানং খণং খণং ৰীতিক্কন্তং অতিক্কন্তকালং, উপ্পজ্জমানং খণং খণং ৰীতিক্কন্তং অতিক্কন্তকালং তস্স চিত্তং.

যস্স চিত্তং ন উপ্পজ্জমানং খণং খণং ৰীতিক্কন্তং অতিক্কন্তকালং, ন নিরুজ্ঝমানং খণং খণং ৰীতিক্কন্তং অতিক্কন্তকালং তস্স চিত্তং. যস্স ৰা পন চিত্তং ন নিরুজ্ঝমানং খণং খণং ৰীতিক্কন্তং অতিক্কন্তকালং, ন উপ্পজ্জমানং খণং খণং ৰীতিক্কন্তং অতিক্কন্তকালং তস্স চিত্তং.

সুদ্ধচিত্তসামঞ্ঞং

ধম্মৰারো

১. উপ্পাদনিরোধকালসম্ভেদৰারো

যং চিত্তং উপ্পজ্জতি ন নিরুজ্ঝতি, তং চিত্তং নিরুজ্ঝিস্সতি ন উপ্পজ্জিস্সতি. যং ৰা পন চিত্তং নিরুজ্ঝিস্সতি ন উপ্পজ্জিস্সতি, তং চিত্তং উপ্পজ্জতি ন নিরুজ্ঝতি.

যং ¶ চিত্তং ন উপ্পজ্জতি নিরুজ্ঝতি, তং চিত্তং ন নিরুজ্ঝিস্সতি উপ্পজ্জিস্সতি. যং ৰা পন চিত্তং ন নিরুজ্ঝিস্সতি উপ্পজ্জিস্সতি, তং চিত্তং ন উপ্পজ্জতি নিরুজ্ঝতি.

২. উপ্পাদুপ্পন্নৰারো

যং চিত্তং উপ্পজ্জতি, তং চিত্তং উপ্পন্নং. যং ৰা পন চিত্তং উপ্পন্নং, তং চিত্তং উপ্পজ্জতি.

যং ¶ চিত্তং ন উপ্পজ্জতি, তং চিত্তং ন উপ্পন্নং. যং ৰা পন চিত্তং ন উপ্পন্নং, তং চিত্তং ন উপ্পজ্জতি.

৩. নিরোধুপ্পন্নৰারো

যং চিত্তং নিরুজ্ঝতি, তং চিত্তং উপ্পন্নং. যং ৰা পন চিত্তং উপ্পন্নং, তং চিত্তং নিরুজ্ঝতি.

যং চিত্তং ন নিরুজ্ঝতি, তং চিত্তং ন উপ্পন্নং. যং ৰা পন চিত্তং ন উপ্পন্নং, তং চিত্তং ন নিরুজ্ঝতি.

৪. উপ্পাদৰারো

যং চিত্তং উপ্পজ্জতি, তং চিত্তং উপ্পজ্জিত্থ. যং ৰা পন চিত্তং উপ্পজ্জিত্থ, তং চিত্তং উপ্পজ্জতি.

যং চিত্তং ন উপ্পজ্জতি, তং চিত্তং ন উপ্পজ্জিত্থ. যং ৰা পন চিত্তং ন উপ্পজ্জিত্থ, তং চিত্তং ন উপ্পজ্জতি.

যং চিত্তং উপ্পজ্জতি, তং চিত্তং উপ্পজ্জিস্সতি. যং ৰা পন চিত্তং উপ্পজ্জিস্সতি, তং চিত্তং উপ্পজ্জতি.

যং চিত্তং ন উপ্পজ্জতি, তং চিত্তং ন উপ্পজ্জিস্সতি. যং ৰা পন চিত্তং ন উপ্পজ্জিস্সতি, তং চিত্তং ন উপ্পজ্জতি.

যং চিত্তং উপ্পজ্জিত্থ, তং চিত্তং উপ্পজ্জিস্সতি. যং ৰা পন চিত্তং উপ্পজ্জিস্সতি, তং চিত্তং উপ্পজ্জিত্থ.

যং ¶ ¶ চিত্তং ন উপ্পজ্জিত্থ, তং চিত্তং ন উপ্পজ্জিস্সতি. যং ৰা পন চিত্তং ন উপ্পজ্জিস্সতি, তং চিত্তং ন উপ্পজ্জিত্থ.

৫. নিরোধৰারো

যং চিত্তং নিরুজ্ঝতি, তং চিত্তং নিরুজ্ঝিত্থ. যং ৰা পন চিত্তং নিরুজ্ঝিত্থ, তং চিত্তং নিরুজ্ঝতি.

যং চিত্তং ন নিরুজ্ঝতি, তং চিত্তং ন নিরুজ্ঝিত্থ. যং ৰা পন চিত্তং ন নিরুজ্ঝিত্থ, তং চিত্তং ন নিরুজ্ঝতি.

যং চিত্তং নিরুজ্ঝতি, তং চিত্তং নিরুজ্ঝিস্সতি. যং ৰা পন চিত্তং নিরুজ্ঝিস্সতি, তং চিত্তং নিরুজ্ঝতি.

যং চিত্তং ন নিরুজ্ঝতি, তং চিত্তং ন নিরুজ্ঝিস্সতি. যং ৰা পন চিত্তং ন নিরুজ্ঝিস্সতি, তং চিত্তং ন নিরুজ্ঝতি.

যং চিত্তং নিরুজ্ঝিত্থ, তং চিত্তং নিরুজ্ঝিস্সতি. যং ৰা পন চিত্তং নিরুজ্ঝিস্সতি, তং চিত্তং নিরুজ্ঝিত্থ.

যং চিত্তং ন নিরুজ্ঝিত্থ, তং চিত্তং ন নিরুজ্ঝিস্সতি. যং ৰা পন চিত্তং ন নিরুজ্ঝিস্সতি, তং চিত্তং ন নিরুজ্ঝিত্থ.

৬. উপ্পাদনিরোধৰারো

যং চিত্তং উপ্পজ্জতি, তং চিত্তং নিরুজ্ঝিত্থ. যং ৰা পন চিত্তং নিরুজ্ঝিত্থ, তং চিত্তং উপ্পজ্জতি.

যং ¶ চিত্তং ন উপ্পজ্জতি, তং চিত্তং ন নিরুজ্ঝিত্থ. যং ৰা পন চিত্তং ন নিরুজ্ঝিত্থ, তং চিত্তং ন উপ্পজ্জতি.

যং চিত্তং উপ্পজ্জতি, তং চিত্তং নিরুজ্ঝিস্সতি. যং ৰা পন চিত্তং নিরুজ্ঝিস্সতি, তং চিত্তং উপ্পজ্জতি.

যং চিত্তং ন উপ্পজ্জতি, তং চিত্তং ন নিরুজ্ঝিস্সতি. যং ৰা পন চিত্তং ন নিরুজ্ঝিস্সতি, তং চিত্তং ন উপ্পজ্জতি.

যং ¶ চিত্তং উপ্পজ্জিত্থ, তং চিত্তং নিরুজ্ঝিস্সতি. যং ৰা পন চিত্তং নিরুজ্ঝিস্সতি, তং চিত্তং উপ্পজ্জিত্থ.

যং চিত্তং ন উপ্পজ্জিত্থ, তং চিত্তং ন নিরুজ্ঝিস্সতি. যং ৰা পন চিত্তং ন নিরুজ্ঝিস্সতি, তং চিত্তং ন উপ্পজ্জিত্থ.

৭. উপ্পজ্জমানননিরোধৰারো

যং চিত্তং উপ্পজ্জতি, তং চিত্তং ন নিরুজ্ঝতি. যং ৰা পন চিত্তং ন নিরুজ্ঝতি, তং চিত্তং উপ্পজ্জতি.

যং চিত্তং ন উপ্পজ্জতি, তং চিত্তং নিরুজ্ঝতি. যং ৰা পন চিত্তং নিরুজ্ঝতি, তং চিত্তং ন উপ্পজ্জতি.

৮. উপ্পজ্জমানুপ্পন্নৰারো

যং চিত্তং উপ্পজ্জমানং, তং চিত্তং উপ্পন্নং. যং ৰা পন চিত্তং উপ্পন্নং, তং চিত্তং উপ্পজ্জমানং.

যং ¶ চিত্তং ন উপ্পজ্জমানং, তং চিত্তং ন উপ্পন্নং. যং ৰা পন চিত্তং ন উপ্পন্নং, তং চিত্তং ন উপ্পজ্জমানং.

৯. নিরুজ্ঝমানুপ্পন্নৰারো

যং চিত্তং নিরুজ্ঝমানং, তং চিত্তং উপ্পন্নং. যং ৰা পন চিত্তং উপ্পন্নং, তং চিত্তং নিরুজ্ঝমানং.

যং চিত্তং ন নিরুজ্ঝমানং, তং চিত্তং ন উপ্পন্নং. যং ৰা পন চিত্তং ন উপ্পন্নং, তং চিত্তং ন নিরুজ্ঝমানং.

১০. উপ্পন্নুপ্পাদৰারো

যং চিত্তং উপ্পন্নং, তং চিত্তং উপ্পজ্জিত্থ. যং ৰা পন চিত্তং উপ্পজ্জিত্থ, তং চিত্তং উপ্পন্নং.

যং চিত্তং ন উপ্পন্নং, তং চিত্তং ন উপ্পজ্জিত্থ. যং ৰা পন চিত্তং ন উপ্পজ্জিত্থ, তং চিত্তং ন উপ্পন্নং.

যং ¶ চিত্তং উপ্পন্নং, তং চিত্তং উপ্পজ্জিস্সতি. যং ৰা পন চিত্তং উপ্পজ্জিস্সতি, তং চিত্তং উপ্পন্নং.

যং চিত্তং ন উপ্পন্নং, তং চিত্তং ন উপ্পজ্জিস্সতি. যং ৰা পন চিত্তং ন উপ্পজ্জিস্সতি, তং চিত্তং ন উপ্পন্নং.

১১. অতীতানাগতৰারো

যং চিত্তং উপ্পজ্জিত্থ, নো চ তং চিত্তং উপ্পন্নং, তং চিত্তং উপ্পজ্জিস্সতি. যং ৰা পন চিত্তং উপ্পজ্জিস্সতি, নো চ তং চিত্তং উপ্পন্নং, তং চিত্তং উপ্পজ্জিত্থ.

যং ¶ চিত্তং ন উপ্পজ্জিত্থ, নো চ তং চিত্তং ন উপ্পন্নং, তং চিত্তং ন উপ্পজ্জিস্সতি. যং ৰা পন চিত্তং ন উপ্পজ্জিস্সতি, নো চ তং চিত্তং ন উপ্পন্নং, তং চিত্তং ন উপ্পজ্জিত্থ.

১২. উপ্পন্নুপ্পজ্জমানৰারো

উপ্পন্নং উপ্পজ্জমানং, উপ্পজ্জমানং উপ্পন্নং.

ন উপ্পন্নং ন উপ্পজ্জমানং, ন উপ্পজ্জমানং ন উপ্পন্নং.

১৩. নিরুদ্ধনিরুজ্ঝমানৰারো

নিরুদ্ধং নিরুজ্ঝমানং, নিরুজ্ঝমানং নিরুদ্ধং.

ন নিরুদ্ধং ন নিরুজ্ঝমানং, ন নিরুজ্ঝমানং ন নিরুদ্ধং.

১৪. অতিক্কন্তকালৰারো

যং চিত্তং উপ্পজ্জমানং খণং খণং ৰীতিক্কন্তং অতিক্কন্তকালং, নিরুজ্ঝমানং খণং খণং ৰীতিক্কন্তং অতিক্কন্তকালং তং চিত্তং. যং ৰা পন চিত্তং নিরুজ্ঝমানং খণং খণং ৰীতিক্কন্তং অতিক্কন্তকালং, উপ্পজ্জমানং খণং খণং ৰীতিক্কন্তং অতিক্কন্তকালং তং চিত্তং.

যং চিত্তং ন উপ্পজ্জমানং খণং খণং ৰীতিক্কন্তং অতিক্কন্তকালং, ন নিরুজ্ঝমানং খণং খণং ৰীতিক্কন্তং অতিক্কন্তকালং তং চিত্তং. যং ৰা ¶ পন চিত্তং ন নিরুজ্ঝমানং খণং খণং ৰীতিক্কন্তং অতিক্কন্তকালং, ন উপ্পজ্জমানং খণং খণং ৰীতিক্কন্তং অতিক্কন্তকালং তং চিত্তং.

সুদ্ধচিত্তসামঞ্ঞং

পুগ্গলধম্মৰারো

১. উপ্পাদনিরোধকালসম্ভেদৰারো

যস্স ¶ যং চিত্তং উপ্পজ্জতি ন নিরুজ্ঝতি, তস্স তং চিত্তং নিরুজ্ঝিস্সতি ন উপ্পজ্জিস্সতি. যস্স ৰা পন যং চিত্তং নিরুজ্ঝিস্সতি ন উপ্পজ্জিস্সতি, তস্স তং চিত্তং উপ্পজ্জতি ন নিরুজ্ঝতি.

যস্স যং চিত্তং ন উপ্পজ্জতি নিরুজ্ঝতি, তস্স তং চিত্তং ন নিরুজ্ঝিস্সতি উপ্পজ্জিস্সতি. যস্স ৰা পন যং চিত্তং ন নিরুজ্ঝিস্সতি উপ্পজ্জিস্সতি, তস্স তং চিত্তং ন উপ্পজ্জতি নিরুজ্ঝতি.

২. উপ্পাদুপ্পন্নৰারো

যস্স যং চিত্তং উপ্পজ্জতি, তস্স তং চিত্তং উপ্পন্নং. যস্স ৰা পন যং চিত্তং উপ্পন্নং, তস্স তং চিত্তং উপ্পজ্জতি.

যস্স যং চিত্তং ন উপ্পজ্জতি, তস্স তং চিত্তং ন উপ্পন্নং. যস্স ৰা পন যং চিত্তং ন উপ্পন্নং, তস্স তং চিত্তং ন উপ্পজ্জতি.

৩. নিরোধুপ্পন্নৰারো

যস্স যং চিত্তং নিরুজ্ঝতি, তস্স তং চিত্তং উপ্পন্নং. যস্স ৰা পন যং চিত্তং উপ্পন্নং, তস্স তং চিত্তং নিরুজ্ঝতি.

যস্স যং চিত্তং ন নিরুজ্ঝতি, তস্স তং চিত্তং ন উপ্পন্নং. যস্স ৰা পন যং চিত্তং ন উপ্পন্নং, তস্স তং চিত্তং ন নিরুজ্ঝতি.

৪. উপ্পাদৰারো

যস্স ¶ যং চিত্তং উপ্পজ্জতি, তস্স তং চিত্তং উপ্পজ্জিত্থ. যস্স ৰা পন যং চিত্তং উপ্পজ্জিত্থ, তস্স তং চিত্তং উপ্পজ্জতি.

যস্স ¶ যং চিত্তং ন উপ্পজ্জতি, তস্স তং চিত্তং ন উপ্পজ্জিত্থ. যস্স ৰা পন যং চিত্তং ন উপ্পজ্জিত্থ, তস্স তং চিত্তং ন উপ্পজ্জতি.

যস্স যং চিত্তং উপ্পজ্জতি, তস্স তং চিত্তং উপ্পজ্জিস্সতি. যস্স ৰা পন যং চিত্তং উপ্পজ্জিস্সতি, তস্স তং চিত্তং উপ্পজ্জতি.

যস্স যং চিত্তং ন উপ্পজ্জতি, তস্স তং চিত্তং ন উপ্পজ্জিস্সতি. যস্স ৰা পন যং চিত্তং ন উপ্পজ্জিস্সতি, তস্স তং চিত্তং ন উপ্পজ্জতি.

যস্স যং চিত্তং উপ্পজ্জিত্থ, তস্স তং চিত্তং উপ্পজ্জিস্সতি. যস্স ৰা পন যং চিত্তং উপ্পজ্জিস্সতি, তস্স তং চিত্তং উপ্পজ্জিত্থ.

যস্স যং চিত্তং ন উপ্পজ্জিত্থ, তস্স তং চিত্তং ন উপ্পজ্জিস্সতি. যস্স ৰা পন যং চিত্তং ন উপ্পজ্জিস্সতি, তস্স তং চিত্তং ন উপ্পজ্জিত্থ.

৫. নিরোধৰারো

যস্স যং চিত্তং নিরুজ্ঝতি, তস্স তং চিত্তং নিরুজ্ঝিত্থ. যস্স ৰা পন যং চিত্তং নিরুজ্ঝিত্থ, তস্স তং চিত্তং নিরুজ্ঝতি.

যস্স যং চিত্তং ন নিরুজ্ঝতি, তস্স তং চিত্তং ন নিরুজ্ঝিত্থ. যস্স ৰা পন যং চিত্তং ন নিরুজ্ঝিত্থ, তস্স তং চিত্তং ন নিরুজ্ঝতি.

যস্স ¶ যং চিত্তং নিরুজ্ঝতি, তস্স তং চিত্তং নিরুজ্ঝিস্সতি. যস্স ৰা পন যং চিত্তং নিরুজ্ঝিস্সতি, তস্স তং চিত্তং নিরুজ্ঝতি.

যস্স যং চিত্তং ন নিরুজ্ঝতি, তস্স তং চিত্তং ন নিরুজ্ঝিস্সতি. যস্স ৰা পন যং চিত্তং ন নিরুজ্ঝিস্সতি, তস্স তং চিত্তং ন নিরুজ্ঝতি.

যস্স যং চিত্তং নিরুজ্ঝিত্থ, তস্স তং চিত্তং নিরুজ্ঝিস্সতি. যস্স ৰা পন যং চিত্তং নিরুজ্ঝিস্সতি, তস্স তং চিত্তং নিরুজ্ঝিত্থ.

যস্স যং চিত্তং ন নিরুজ্ঝিত্থ, তস্স তং চিত্তং ন নিরুজ্ঝিস্সতি. যস্স ৰা পন যং চিত্তং ন নিরুজ্ঝিস্সতি, তস্স তং চিত্তং ন নিরুজ্ঝিত্থ.

৬. উপ্পাদনিরোধৰারো

যস্স ¶ যং চিত্তং উপ্পজ্জতি, তস্স তং চিত্তং নিরুজ্ঝিত্থ. যস্স ৰা পন যং চিত্তং নিরুজ্ঝিত্থ, তস্স তং চিত্তং উপ্পজ্জতি.

যস্স যং চিত্তং ন উপ্পজ্জতি, তস্স তং চিত্তং ন নিরুজ্ঝিত্থ. যস্স ৰা পন যং চিত্তং ন নিরুজ্ঝিত্থ, তস্স তং চিত্তং ন উপ্পজ্জতি.

যস্স যং চিত্তং উপ্পজ্জতি, তস্স তং চিত্তং নিরুজ্ঝিস্সতি. যস্স ৰা পন যং চিত্তং নিরুজ্ঝিস্সতি, তস্স তং চিত্তং উপ্পজ্জতি.

যস্স যং চিত্তং ন উপ্পজ্জতি, তস্স তং চিত্তং ন নিরুজ্ঝিস্সতি. যস্স ৰা পন যং চিত্তং ন নিরুজ্ঝিস্সতি, তস্স তং চিত্তং ন উপ্পজ্জতি.

যস্স যং চিত্তং উপ্পজ্জিত্থ, তস্স তং চিত্তং নিরুজ্ঝিস্সতি. যস্স ৰা পন যং চিত্তং নিরুজ্ঝিস্সতি, তস্স তং চিত্তং উপ্পজ্জিত্থ.

যস্স ¶ যং চিত্তং ন উপ্পজ্জিত্থ, তস্স তং চিত্তং ন নিরুজ্ঝিস্সতি. যস্স ৰা পন যং চিত্তং ন নিরুজ্ঝিস্সতি, তস্স তং চিত্তং ন উপ্পজ্জিত্থ.

৭. উপ্পজ্জমানননিরোধৰারো

যস্স যং চিত্তং উপ্পজ্জতি, তস্স তং চিত্তং ন নিরুজ্ঝতি. যস্স ৰা পন যং চিত্তং ন নিরুজ্ঝতি, তস্স তং চিত্তং উপ্পজ্জতি.

যস্স যং চিত্তং ন উপ্পজ্জতি, তস্স তং চিত্তং নিরুজ্ঝতি. যস্স ৰা পন যং চিত্তং নিরুজ্ঝতি, তস্স তং চিত্তং ন উপ্পজ্জতি.

৮. উপ্পজ্জমানুপ্পন্নৰারো

যস্স যং চিত্তং উপ্পজ্জমানং, তস্স তং চিত্তং উপ্পন্নং. যস্স ৰা পন যং চিত্তং উপ্পন্নং, তস্স তং চিত্তং উপ্পজ্জমানং.

যস্স যং চিত্তং ন উপ্পজ্জমানং, তস্স তং চিত্তং ন উপ্পন্নং. যস্স ৰা পন যং চিত্তং ন উপ্পন্নং, তস্স তং চিত্তং ন উপ্পজ্জমানং.

৯. নিরুজ্ঝমানুপ্পন্নৰারো

যস্স ¶ যং চিত্তং নিরুজ্ঝমানং, তস্স তং চিত্তং উপ্পন্নং. যস্স ৰা পন যং চিত্তং উপ্পন্নং, তস্স তং চিত্তং নিরুজ্ঝমানং.

যস্স যং চিত্তং ন নিরুজ্ঝমানং, তস্স তং চিত্তং ন উপ্পন্নং. যস্স ৰা পন যং চিত্তং ন উপ্পন্নং, তস্স তং চিত্তং ন নিরুজ্ঝমানং.

১০. উপ্পন্নুপ্পাদৰারো

যস্স ¶ যং চিত্তং উপ্পন্নং, তস্স তং চিত্তং উপ্পজ্জিত্থ. যস্স ৰা পন যং চিত্তং উপ্পজ্জিত্থ, তস্স তং চিত্তং উপ্পন্নং.

যস্স যং চিত্তং ন উপ্পন্নং, তস্স তং চিত্তং ন উপ্পজ্জিত্থ. যস্স ৰা পন যং চিত্তং ন উপ্পজ্জিত্থ, তস্স তং চিত্তং ন উপ্পন্নং.

যস্স যং চিত্তং উপ্পন্নং, তস্স তং চিত্তং উপ্পজ্জিস্সতি. যস্স ৰা পন যং চিত্তং উপ্পজ্জিস্সতি, তস্স তং চিত্তং উপ্পন্নং.

যস্স যং চিত্তং ন উপ্পন্নং, তস্স তং চিত্তং ন উপ্পজ্জিস্সতি, যস্স ৰা পন যং চিত্তং ন উপ্পজ্জিস্সতি, তস্স তং চিত্তং ন উপ্পন্নং.

১১. অতীতানাগতৰারো

যস্স যং চিত্তং উপ্পজ্জিত্থ, নো চ তস্স তং চিত্তং উপ্পন্নং, তস্স তং চিত্তং উপ্পজ্জিস্সতি. যস্স ৰা পন যং চিত্তং উপ্পজ্জিস্সতি, নো চ তস্স তং চিত্তং উপ্পন্নং, তস্স তং চিত্তং উপ্পজ্জিত্থ.

যস্স যং চিত্তং ন উপ্পজ্জিত্থ, নো চ তস্স তং চিত্তং ন উপ্পন্নং, তস্স তং চিত্তং ন উপ্পজ্জিস্সতি. যস্স ৰা পন যং চিত্তং ন উপ্পজ্জিস্সতি, নো চ তস্স তং চিত্তং ন উপ্পন্নং, তস্স তং চিত্তং ন উপ্পজ্জিত্থ.

১২. উপ্পন্নুপ্পজ্জমানৰারো

উপ্পন্নং উপ্পজ্জমানং, উপ্পজ্জমানং উপ্পন্নং.

ন উপ্পন্নং ন উপ্পজ্জমানং, ন উপ্পজ্জমানং ন উপ্পন্নং.

১৩. নিরুদ্ধনিরুজ্ঝমানৰারো

নিরুদ্ধং ¶ ¶ নিরুজ্ঝমানং, নিরুজ্ঝমানং নিরুদ্ধং.

ন নিরুদ্ধং ন নিরুজ্ঝমানং, ন নিরুজ্ঝমানং ন নিরুদ্ধং.

১৪. অতিক্কন্তকালৰারো

যস্স যং চিত্তং উপ্পজ্জমানং খণং খণং ৰীতিক্কন্তং অতিক্কন্তকালং, নিরুজ্ঝমানং খণং খণং ৰীতিক্কন্তং অতিক্কন্তকালং তস্স তং চিত্তং. যস্স ৰা পন যং চিত্তং নিরুজ্ঝমানং খণং খণং ৰীতিক্কন্তং অতিক্কন্তকালং, উপ্পজ্জমানং খণং খণং ৰীতিক্কন্তং অতিক্কন্তকালং তস্স তং চিত্তং.

যস্স যং চিত্তং ন উপ্পজ্জমানং খণং খণং ৰীতিক্কন্তং অতিক্কন্তকালং, ন নিরুজ্ঝমানং খণং খণং ৰীতিক্কন্তং অতিক্কন্তকালং তস্স তং চিত্তং. যস্স ৰা পন যং চিত্তং ন নিরুজ্ঝমানং খণং খণং ৰীতিক্কন্তং অতিক্কন্তকালং, ন উপ্পজ্জমানং খণং খণং ৰীতিক্কন্তং অতিক্কন্তকালং তস্স তং চিত্তং.

সুত্তন্তচিত্তমিস্সকৰিসেসো

যস্স সরাগং চিত্তং উপ্পজ্জতি…পে… যস্স ৰীতরাগং চিত্তং উপ্পজ্জতি. যস্স সদোসং চিত্তং উপ্পজ্জতি. যস্স ৰীতদোসং চিত্তং উপ্পজ্জতি. যস্স সমোহং চিত্তং উপ্পজ্জতি. যস্স ৰীতমোহং চিত্তং উপ্পজ্জতি. যস্স সংখিত্তং চিত্তং উপ্পজ্জতি. যস্স ৰিক্খিত্তং চিত্তং উপ্পজ্জতি. যস্স মহগ্গতং চিত্তং উপ্পজ্জতি. যস্স অমহগ্গতং চিত্তং উপ্পজ্জতি. যস্স সউত্তরং চিত্তং উপ্পজ্জতি. যস্স অনুত্তরং চিত্তং উপ্পজ্জতি. যস্স সমাহিতং চিত্তং উপ্পজ্জতি. যস্স অসমাহিতং চিত্তং উপ্পজ্জতি. যস্স ৰিমুত্তং চিত্তং উপ্পজ্জতি. যস্স অৰিমুত্তং চিত্তং উপ্পজ্জতি.

অভিধম্মচিত্তমিস্সকৰিসেসো

যস্স ¶ ¶ কুসলং চিত্তং উপ্পজ্জতি…পে… যস্স অকুসলং চিত্তং উপ্পজ্জতি. যস্স অব্যাকতং চিত্তং উপ্পজ্জতি. যস্স সুখায ৰেদনায সম্পযুত্তং চিত্তং উপ্পজ্জতি.

(এতেন উপাযেন যাৰ সরণঅরণা উদ্ধরিতব্বা.)

যস্স অরণং চিত্তং উপ্পজ্জতি ন নিরুজ্ঝতি, তস্স অরণং চিত্তং নিরুজ্ঝিস্সতি ন উপ্পজ্জিস্সতি. যস্স ৰা পন অরণং চিত্তং নিরুজ্ঝিস্সতি ন উপ্পজ্জিস্সতি, তস্স অরণং চিত্তং উপ্পজ্জতি ন নিরুজ্ঝতি.

চিত্তযমকমাতিকা নিট্ঠিতা.

ধম্মযমকং

পণ্ণত্তিৰারো

পদসোধনৰারো

অনুলোমং

কুসলা কুসলা ধম্মা (যম. ৩.ধম্মযমক.১ আদযো). কুসলা ধম্মা কুসলা.

অকুসলা অকুসলা ধম্মা. অকুসলা ধম্মা অকুসলা.

অব্যাকতা অব্যাকতা ধম্মা. অব্যাকতা ধম্মা অব্যাকতা.

পচ্চনীকং

ন ¶ কুসলা ন কুসলা ধম্মা. ন কুসলা ধম্মা ন কুসলা.

ন ¶ অকুসলা ন অকুসলা ধম্মা. ন অকুসলা ধম্মা ন অকুসলা.

ন অব্যাকতা ন অব্যাকতা ধম্মা. ন অব্যাকতা ধম্মা ন অব্যাকতা.

পদসোধনমূলচক্কৰারো

অনুলোমং

কুসলা কুসলা ধম্মা. ধম্মা অকুসলা ধম্মা.

কুসলা কুসলা ধম্মা. ধম্মা অব্যাকতা ধম্মা.

অকুসলা অকুসলা ধম্মা. ধম্মা কুসলা ধম্মা.

অকুসলা অকুসলা ধম্মা. ধম্মা অব্যাকতা ধম্মা.

অব্যাকতা অব্যাকতা ধম্মা. ধম্মা কুসলা ধম্মা.

অব্যাকতা অব্যাকতা ধম্মা. ধম্মা অকুসলা ধম্মা.

পচ্চনীকং

ন কুসলা ন কুসলা ধম্মা. ন ধম্মা ন অকুসলা ধম্মা.

ন কুসলা ন কুসলা ধম্মা. ন ধম্মা ন অব্যাকতা ধম্মা.

ন অকুসলা ন অকুসলা ধম্মা. ন ধম্মা ন কুসলা ধম্মা.

ন অকুসলা ন অকুসলা ধম্মা. ন ধম্মা ন অব্যাকতা ধম্মা.

ন অব্যাকতা ন অব্যাকতা ধম্মা. ন ধম্মা ন কুসলা ধম্মা.

ন অব্যাকতা ন অব্যাকতা ধম্মা. ন ধম্মা ন অকুসলা ধম্মা.

সুদ্ধধম্মৰারো

অনুলোমং

কুসলা ¶ ¶ ধম্মা. ধম্মা কুসলা.

অকুসলা ধম্মা. ধম্মা অকুসলা.

অব্যাকতা ধম্মা. ধম্মা অব্যাকতা.

পচ্চনীকং

ন কুসলা ন ধম্মা. ন ধম্মা ন কুসলা.

ন অকুসলা ন ধম্মা. ন ধম্মা ন অকুসলা.

ন অব্যাকতা ন ধম্মা. ন ধম্মা ন অব্যাকতা.

সুদ্ধধম্মমূলচক্কৰারো

অনুলোমং

কুসলা ধম্মা. ধম্মা অকুসলা.

কুসলা ধম্মা. ধম্মা অব্যাকতা.

অকুসলা ধম্মা. ধম্মা কুসলা.

অকুসলা ধম্মা. ধম্মা অব্যাকতা.

অব্যাকতা ধম্মা. ধম্মা কুসলা.

অব্যাকতা ধম্মা. ধম্মা অকুসলা.

পচ্চনীকং

ন ¶ কুসলা ন ধম্মা. ন ধম্মা ন অকুসলা.

ন কুসলা ন ধম্মা. ন ধম্মা ন অব্যাকতা.

ন অকুসলা ন ধম্মা. ন ধম্মা ন কুসলা.

ন অকুসলা ন ধম্মা. ন ধম্মা ন অব্যাকতা.

ন অব্যাকতা ন ধম্মা. ন ধম্মা ন কুসলা.

ন অব্যাকতা ন ধম্মা. ন ধম্মা ন অকুসলা.

ধম্মযমকমাতিকা নিট্ঠিতা.

ইন্দ্রিযযমকং

পণ্ণত্তিৰারো

বাৰীসতিন্দ্রিযানি ¶ (যম. ৩.ইন্দ্রিযযমক.১ আদযো) – চক্খুন্দ্রিযং সোতিন্দ্রিযং ঘানিন্দ্রিযং জিৰ্হিন্দ্রিযং কাযিন্দ্রিযং মনিন্দ্রিযং ইত্থিন্দ্রিযং পুরিসিন্দ্রিযং জীৰিতিন্দ্রিযং সুখিন্দ্রিযং দুক্খিন্দ্রিযং সোমনস্সিন্দ্রিযং দোমনস্সিন্দ্রিযং উপেক্খিন্দ্রিযং সদ্ধিন্দ্রিযং ৰীরিযিন্দ্রিযং সতিন্দ্রিযং সমাধিন্দ্রিযং পঞ্ঞিন্দ্রিযং অনঞ্ঞাতঞ্ঞস্সামীতিন্দ্রিযং অঞ্ঞিন্দ্রিযং অঞ্ঞাতাৰিন্দ্রিযং.

পদসোধনৰারো

অনুলোমং

চক্খু ¶ চক্খুন্দ্রিযং, চক্খুন্দ্রিযং চক্খু.

সোতং সোতিন্দ্রিযং, সোতিন্দ্রিযং সোতং.

ঘানং ঘানিন্দ্রিযং, ঘানিন্দ্রিযং ঘানং.

জিৰ্হা জিৰ্হিন্দ্রিযং, জিৰ্হিন্দ্রিযং জিৰ্হা.

কাযো কাযিন্দ্রিযং, কাযিন্দ্রিযং কাযো.

মনো মনিন্দ্রিযং, মনিন্দ্রিযং মনো.

ইত্থী ইত্থিন্দ্রিযং, ইত্থিন্দ্রিযং ইত্থী.

পুরিসো পুরিসিন্দ্রিযং, পুরিসিন্দ্রিযং পুরিসো.

জীৰিতং জীৰিতিন্দ্রিযং, জীৰিতিন্দ্রিযং জীৰিতং.

সুখং সুখিন্দ্রিযং, সুখিন্দ্রিযং সুখং.

দুক্খং দুক্খিন্দ্রিযং, দুক্খিন্দ্রিযং দুক্খং.

সোমনস্সং সোমনস্সিন্দ্রিযং, সোমনস্সিন্দ্রিযং সোমনস্সং.

দোমনস্সং দোমনস্সিন্দ্রিযং, দোমনস্সিন্দ্রিযং দোমনস্সং.

উপেক্খা উপেক্খিন্দ্রিযং, উপেক্খিন্দ্রিযং উপেক্খা.

সদ্ধা সদ্ধিন্দ্রিযং, সদ্ধিন্দ্রিযং সদ্ধা.

ৰীরিযং ৰীরিযিন্দ্রিযং, ৰীরিযিন্দ্রিযং ৰীরিযং.

সতি ¶ সতিন্দ্রিযং, সতিন্দ্রিযং সতি.

সমাধি সমাধিন্দ্রিযং, সমাধিন্দ্রিযং সমাধি.

পঞ্ঞা পঞ্ঞিন্দ্রিযং, পঞ্ঞিন্দ্রিযং পঞ্ঞা.

অনঞ্ঞাতঞ্ঞস্সামীতি অনঞ্ঞাতঞ্ঞস্সামীতিন্দ্রিযং, অনঞ্ঞাতঞ্ঞস্সামীতিন্দ্রিযং অনঞ্ঞাতঞ্ঞস্সামীতি.

অঞ্ঞং অঞ্ঞিন্দ্রিযং, অঞ্ঞিন্দ্রিযং অঞ্ঞং.

অঞ্ঞাতাৰী অঞ্ঞাতাৰিন্দ্রিযং, অঞ্ঞাতাৰিন্দ্রিযং অঞ্ঞাতাৰী.

পচ্চনীকং

ন ¶ চক্খু ন চক্খুন্দ্রিযং, ন চক্খুন্দ্রিযং ন চক্খু.

ন সোতং ন সোতিন্দ্রিযং, ন সোতিন্দ্রিযং ন সোতং.

ন ঘানং ন ঘানিন্দ্রিযং, ন ঘানিন্দ্রিযং ন ঘানং.

ন জিৰ্হা ন জিৰ্হিন্দ্রিযং, ন জিৰ্হিন্দ্রিযং ন জিৰ্হা.

ন কাযো ন কাযিন্দ্রিযং, ন কাযিন্দ্রিযং ন কাযো.

ন মনো ন মনিন্দ্রিযং, ন মনিন্দ্রিযং ন মনো.

ন ইত্থী ন ইত্থিন্দ্রিযং, ন ইত্থিন্দ্রিযং ন ইত্থী.

ন পুরিসো ন পুরিসিন্দ্রিযং, ন পুরিসিন্দ্রিযং ন পুরিসো.

ন জীৰিতং ন জীৰিতিন্দ্রিযং, ন জীৰিতিন্দ্রিযং ন জীৰিতং.

ন সুখং ন সুখিন্দ্রিযং, ন সুখিন্দ্রিযং ন সুখং.

ন দুক্খং ন দুক্খিন্দ্রিযং, ন দুক্খিন্দ্রিযং ন দুক্খং.

ন সোমনস্সং ন সোমনস্সিন্দ্রিযং, ন সোমনস্সিন্দ্রিযং ন সোমনস্সং.

ন দোমনস্সং ন দোমনস্সিন্দ্রিযং, ন দোমনস্সিন্দ্রিযং ন দোমনস্সং.

ন উপেক্খা ন উপেক্খিন্দ্রিযং, ন উপেক্খিন্দ্রিযং ন উপেক্খা.

ন সদ্ধা ন সদ্ধিন্দ্রিযং, ন সদ্ধিন্দ্রিযং ন সদ্ধা.

ন ৰীরিযং ন ৰীরিযিন্দ্রিযং, ন ৰীরিযিন্দ্রিযং ন ৰীরিযং.

ন সতি ন সতিন্দ্রিযং, ন সতিন্দ্রিযং ন সতি.

ন সমাধি ন সমাধিন্দ্রিযং, ন সমাধিন্দ্রিযং ন সমাধি.

ন ¶ পঞ্ঞা ন পঞ্ঞিন্দ্রিযং, ন পঞ্ঞিন্দ্রিযং ন পঞ্ঞা.

ন অনঞ্ঞাতঞ্ঞস্সামীতি ন অনঞ্ঞাতঞ্ঞস্সামীতিন্দ্রিযং, ন অনঞ্ঞাতঞ্ঞস্সামীতিন্দ্রিযং ন অনঞ্ঞাতঞ্ঞস্সামীতি.

ন অঞ্ঞং ন অঞ্ঞিন্দ্রিযং, ন অঞ্ঞিন্দ্রিযং ন অঞ্ঞং.

ন অঞ্ঞাতাৰী ন অঞ্ঞাতাৰিন্দ্রিযং, ন অঞ্ঞাতাৰিন্দ্রিযং ন অঞ্ঞাতাৰী.

পদসোধনমূলচক্কৰারো

অনুলোমং

চক্খু ¶ চক্খুন্দ্রিযং, ইন্দ্রিযা সোতিন্দ্রিযং.

চক্খু চক্খুন্দ্রিযং, ইন্দ্রিযা ঘানিন্দ্রিযং.

চক্খু চক্খুন্দ্রিযং, ইন্দ্রিযা জিৰ্হিন্দ্রিযং.

চক্খু চক্খুন্দ্রিযং, ইন্দ্রিযা কাযিন্দ্রিযং.

চক্খু চক্খুন্দ্রিযং, ইন্দ্রিযা মনিন্দ্রিযং.

চক্খু চক্খুন্দ্রিযং, ইন্দ্রিযা ইত্থিন্দ্রিযং.

চক্খু চক্খুন্দ্রিযং, ইন্দ্রিযা পুরিসিন্দ্রিযং.

চক্খু চক্খুন্দ্রিযং, ইন্দ্রিযা জীৰিতিন্দ্রিযং.

চক্খু চক্খুন্দ্রিযং, ইন্দ্রিযা সুখিন্দ্রিযং.

চক্খু চক্খুন্দ্রিযং, ইন্দ্রিযা দুক্খিন্দ্রিযং.

চক্খু চক্খুন্দ্রিযং, ইন্দ্রিযা সোমনস্সিন্দ্রিযং.

চক্খু চক্খুন্দ্রিযং, ইন্দ্রিযা দোমনস্সিন্দ্রিযং.

চক্খু চক্খুন্দ্রিযং, ইন্দ্রিযা উপেক্খিন্দ্রিযং.

চক্খু চক্খুন্দ্রিযং, ইন্দ্রিযা সদ্ধিন্দ্রিযং.

চক্খু চক্খুন্দ্রিযং, ইন্দ্রিযা ৰীরিযিন্দ্রিযং.

চক্খু চক্খুন্দ্রিযং, ইন্দ্রিযা সতিন্দ্রিযং.

চক্খু চক্খুন্দ্রিযং, ইন্দ্রিযা সমাধিন্দ্রিযং.

চক্খু চক্খুন্দ্রিযং, ইন্দ্রিযা পঞ্ঞিন্দ্রিযং.

চক্খু চক্খুন্দ্রিযং, ইন্দ্রিযা অনঞ্ঞাতঞ্ঞস্সামীতিন্দ্রিযং.

চক্খু চক্খুন্দ্রিযং, ইন্দ্রিযা অঞ্ঞিন্দ্রিযং.

চক্খু চক্খুন্দ্রিযং, ইন্দ্রিযা অঞ্ঞাতাৰিন্দ্রিযং.

সোতং ¶ ¶ সোতিন্দ্রিযং, ইন্দ্রিযা চক্খুন্দ্রিযং…পে….

সোতং সোতিন্দ্রিযং, ইন্দ্রিযা অঞ্ঞাতাৰিন্দ্রিযং.

ঘানং ঘানিন্দ্রিযং, ইন্দ্রিযা চক্খুন্দ্রিযং…পে….

ঘানং ঘানিন্দ্রিযং, ইন্দ্রিযা অঞ্ঞাতাৰিন্দ্রিযং.

জিৰ্হা জিৰ্হিন্দ্রিযং, ইন্দ্রিযা চক্খুন্দ্রিযং…পে….

জিৰ্হা জিৰ্হিন্দ্রিযং, ইন্দ্রিযা অঞ্ঞাতাৰিন্দ্রিযং.

কাযো কাযিন্দ্রিযং, ইন্দ্রিযা চক্খুন্দ্রিযং…পে….

কাযো কাযিন্দ্রিযং, ইন্দ্রিযা অঞ্ঞাতাৰিন্দ্রিযং.

মনো মনিন্দ্রিযং, ইন্দ্রিযা চক্খুন্দ্রিযং…পে….

মনো মনিন্দ্রিযং, ইন্দ্রিযা অঞ্ঞাতাৰিন্দ্রিযং.

ইত্থী ইত্থিন্দ্রিযং, ইন্দ্রিযা চক্খুন্দ্রিযং…পে….

ইত্থী ইত্থিন্দ্রিযং, ইন্দ্রিযা অঞ্ঞাতাৰিন্দ্রিযং.

পুরিসো পুরিসিন্দ্রিযং, ইন্দ্রিযা চক্খুন্দ্রিযং…পে….

পুরিসো পুরিসিন্দ্রিযং, ইন্দ্রিযা অঞ্ঞাতাৰিন্দ্রিযং.

জীৰিতং জীৰিতিন্দ্রিযং, ইন্দ্রিযা চক্খুন্দ্রিযং…পে….

জীৰিতং জীৰিতিন্দ্রিযং, ইন্দ্রিযা অঞ্ঞাতাৰিন্দ্রিযং.

সুখং সুখিন্দ্রিযং, ইন্দ্রিযা চক্খুন্দ্রিযং…পে….

সুখং সুখিন্দ্রিযং, ইন্দ্রিযা অঞ্ঞাতাৰিন্দ্রিযং.

দুক্খং ¶ দুক্খিন্দ্রিযং, ইন্দ্রিযা চক্খুন্দ্রিযং…পে….

দুক্খং দুক্খিন্দ্রিযং, ইন্দ্রিযা অঞ্ঞাতাৰিন্দ্রিযং.

সোমনস্সং সোমনস্সিন্দ্রিযং, ইন্দ্রিযা চক্খুন্দ্রিযং…পে….

সোমনস্সং সোমনস্সিন্দ্রিযং, ইন্দ্রিযা অঞ্ঞাতাৰিন্দ্রিযং.

দোমনস্সং দোমনস্সিন্দ্রিযং, ইন্দ্রিযা চক্খুন্দ্রিযং…পে….

দোমনস্সং দোমনস্সিন্দ্রিযং, ইন্দ্রিযা অঞ্ঞাতাৰিন্দ্রিযং.

উপেক্খা উপেক্খিন্দ্রিযং, ইন্দ্রিযা চক্খুন্দ্রিযং…পে….

উপেক্খা উপেক্খিন্দ্রিযং, ইন্দ্রিযা অঞ্ঞাতাৰিন্দ্রিযং.

সদ্ধা ¶ সদ্ধিন্দ্রিযং, ইন্দ্রিযা চক্খুন্দ্রিযং…পে….

সদ্ধা সদ্ধিন্দ্রিযং, ইন্দ্রিযা অঞ্ঞাতাৰিন্দ্রিযং.

ৰীরিযং ৰীরিযিন্দ্রিযং, ইন্দ্রিযা চক্খুন্দ্রিযং…পে….

ৰীরিযং ৰীরিযিন্দ্রিযং, ইন্দ্রিযা অঞ্ঞাতাৰিন্দ্রিযং.

সতি সতিন্দ্রিযং, ইন্দ্রিযা চক্খুন্দ্রিযং…পে….

সতি সতিন্দ্রিযং, ইন্দ্রিযা অঞ্ঞাতাৰিন্দ্রিযং.

সমাধি সমাধিন্দ্রিযং, ইন্দ্রিযা চক্খুন্দ্রিযং…পে….

সমাধি সমাধিন্দ্রিযং, ইন্দ্রিযা অঞ্ঞাতাৰিন্দ্রিযং.

পঞ্ঞা পঞ্ঞিন্দ্রিযং, ইন্দ্রিযা চক্খুন্দ্রিযং…পে….

পঞ্ঞা পঞ্ঞিন্দ্রিযং, ইন্দ্রিযা অঞ্ঞাতাৰিন্দ্রিযং.

অনঞ্ঞাতঞ্ঞস্সামীতি ¶ অনঞ্ঞাতঞ্ঞস্সামীতিন্দ্রিযং, ইন্দ্রিযা চক্খুন্দ্রিযং…পে….

অনঞ্ঞাতঞ্ঞস্সামীতি অনঞ্ঞাতঞ্ঞস্সামীতিন্দ্রিযং, ইন্দ্রিযা অঞ্ঞাতাৰিন্দ্রিযং.

অঞ্ঞং অঞ্ঞিন্দ্রিযং, ইন্দ্রিযা চক্খুন্দ্রিযং…পে….

অঞ্ঞং অঞ্ঞিন্দ্রিযং, ইন্দ্রিযা অঞ্ঞাতাৰিন্দ্রিযং.

অঞ্ঞাতাৰী অঞ্ঞাতাৰিন্দ্রিযং, ইন্দ্রিযা চক্খুন্দ্রিযং…পে….

অঞ্ঞাতাৰী অঞ্ঞাতাৰিন্দ্রিযং, ইন্দ্রিযা অঞ্ঞিন্দ্রিযং.

পচ্চনীকং

ন চক্খু ন চক্খুন্দ্রিযং, ন ইন্দ্রিযা ন সোতিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন ঘানিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন জিৰ্হিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন কাযিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন মনিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন ইত্থিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন পুরিসিন্দ্রিযং.

ন ¶ চক্খু ন চক্খুন্দ্রিযং, ন ইন্দ্রিযা ন জীৰিতিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন সুখিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন দুক্খিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন সোমনস্সিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন দোমনস্সিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন উপেক্খিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন সদ্ধিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন ৰীরিযিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন সতিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন সমাধিন্দ্রিযং.

ন ¶ চক্খু ন চক্খুন্দ্রিযং, ন ইন্দ্রিযা ন পঞ্ঞিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন অনঞ্ঞাতঞ্ঞস্সামীতিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন অঞ্ঞিন্দ্রিযং.

ন চক্খু ন চক্খুন্দ্রিযং, ন ইন্দ্রিযা ন অঞ্ঞাতাৰিন্দ্রিযং.

ন সোতং ন সোতিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন ঘানং ন ঘানিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন জিৰ্হা ন জিৰ্হিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন কাযো ন কাযিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন মনো ন মনিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন ইত্থী ন ইত্থিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন ¶ পুরিসো ন পুরিসিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন জীৰিতং ন জীৰিতিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন ¶ সুখং ন সুখিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন দুক্খং ন দুক্খিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন সোমনস্সং ন সোমনস্সিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন দোমনস্সং ন দোমনস্সিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন উপেক্খা ন উপেক্খিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন সদ্ধা ন সদ্ধিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন ৰীরিযং ন ৰীরিযিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন সতি ন সতিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন সমাধি ন সমাধিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন পঞ্ঞা ন পঞ্ঞিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন অনঞ্ঞাতঞ্ঞস্সামীতি ন অনঞ্ঞাতঞ্ঞস্সামীতিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন ¶ ¶ অঞ্ঞং ন অঞ্ঞিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞাতাৰিন্দ্রিযং.

ন অঞ্ঞাতাৰী ন অঞ্ঞাতাৰিন্দ্রিযং, ন ইন্দ্রিযা ন চক্খুন্দ্রিযং…পে… ন ইন্দ্রিযা ন অঞ্ঞিন্দ্রিযং.

সুদ্ধিন্দ্রিযৰারো

অনুলোমং

চক্খু ইন্দ্রিযং, ইন্দ্রিযা চক্খু.

সোতং ইন্দ্রিযং, ইন্দ্রিযা সোতং.

ঘানং ইন্দ্রিযং, ইন্দ্রিযা ঘানং.

জিৰ্হা ইন্দ্রিযং, ইন্দ্রিযা জিৰ্হা.

কাযো ইন্দ্রিযং, ইন্দ্রিযা কাযো.

মনো ইন্দ্রিযং, ইন্দ্রিযা মনো.

ইত্থী ইন্দ্রিযং, ইন্দ্রিযা ইত্থী.

পুরিসো ইন্দ্রিযং, ইন্দ্রিযা পুরিসো.

জীৰিতং ইন্দ্রিযং, ইন্দ্রিযা জীৰিতং.

সুখং ইন্দ্রিযং, ইন্দ্রিযা সুখং.

দুক্খং ইন্দ্রিযং, ইন্দ্রিযা দুক্খং.

সোমনস্সং ইন্দ্রিযং, ইন্দ্রিযা সোমনস্সং.

দোমনস্সং ইন্দ্রিযং, ইন্দ্রিযা দোমনস্সং.

উপেক্খা ইন্দ্রিযং, ইন্দ্রিযা উপেক্খা.

সদ্ধা ইন্দ্রিযং, ইন্দ্রিযা সদ্ধা.

ৰীরিযং ইন্দ্রিযং, ইন্দ্রিযা ৰীরিযং.

সতি ইন্দ্রিযং, ইন্দ্রিযা সতি.

সমাধি ইন্দ্রিযং, ইন্দ্রিযা সমাধি.

পঞ্ঞা ¶ ইন্দ্রিযং, ইন্দ্রিযা পঞ্ঞা.

অনঞ্ঞাতঞ্ঞস্সামীতি ইন্দ্রিযং, ইন্দ্রিযা অনঞ্ঞাতঞ্ঞস্সামীতি.

অঞ্ঞং ¶ ইন্দ্রিযং, ইন্দ্রিযা অঞ্ঞং.

অঞ্ঞাতাৰী ইন্দ্রিযং, ইন্দ্রিযা অঞ্ঞাতাৰী.

পচ্চনীকং

ন চক্খু ন ইন্দ্রিযং, ন ইন্দ্রিযা ন চক্খু.

ন সোতং ন ইন্দ্রিযং, ন ইন্দ্রিযা ন সোতং.

ন ঘানং ন ইন্দ্রিযং, ন ইন্দ্রিযা ন ঘানং.

ন জিৰ্হা ন ইন্দ্রিযং, ন ইন্দ্রিযা ন জিৰ্হা.

ন কাযো ন ইন্দ্রিযং, ন ইন্দ্রিযা ন কাযো.

ন মনো ন ইন্দ্রিযং, ন ইন্দ্রিযা ন মনো.

ন ইত্থী ন ইন্দ্রিযং, ন ইন্দ্রিযা ন ইত্থী.

ন পুরিসো ন ইন্দ্রিযং, ন ইন্দ্রিযা ন পুরিসো.

ন জীৰিতং ন ইন্দ্রিযং, ন ইন্দ্রিযা ন জীৰিতং.

ন সুখং ন ইন্দ্রিযং, ন ইন্দ্রিযা ন সুখং.

ন দুক্খং ন ইন্দ্রিযং, ন ইন্দ্রিযা ন দুক্খং.

ন সোমনস্সং ন ইন্দ্রিযং, ন ইন্দ্রিযা ন সোমনস্সং.

ন দোমনস্সং ন ইন্দ্রিযং, ন ইন্দ্রিযা ন দোমনস্সং.

ন উপেক্খা ন ইন্দ্রিযং, ন ইন্দ্রিযা ন উপেক্খা.

ন সদ্ধা ন ইন্দ্রিযং, ন ইন্দ্রিযা ন সদ্ধা.

ন ৰীরিযং ন ইন্দ্রিযং, ন ইন্দ্রিযা ন ৰীরিযং.

ন সতি ন ইন্দ্রিযং, ন ইন্দ্রিযা ন সতি.

ন সমাধি ন ইন্দ্রিযং, ন ইন্দ্রিযা ন সমাধি.

ন পঞ্ঞা ন ইন্দ্রিযং, ন ইন্দ্রিযা ন পঞ্ঞা.

ন অনঞ্ঞাতঞ্ঞস্সামীতি ন ইন্দ্রিযং, ন ইন্দ্রিযা ন অনঞ্ঞাতঞ্ঞস্সামীতি.

ন অঞ্ঞং ন ইন্দ্রিযং, ন ইন্দ্রিযা ন অঞ্ঞং.

ন অঞ্ঞাতাৰী ন ইন্দ্রিযং, ন ইন্দ্রিযা ন অঞ্ঞাতাৰী.

সুদ্ধিন্দ্রিযমূলচক্কৰারো

অনুলোমং

চক্খু ¶ ¶ ইন্দ্রিযং, ইন্দ্রিযা সোতং.

চক্খু ইন্দ্রিযং, ইন্দ্রিযা ঘানং.

চক্খু ইন্দ্রিযং, ইন্দ্রিযা জিৰ্হা.

চক্খু ইন্দ্রিযং, ইন্দ্রিযা কাযো.

চক্খু ইন্দ্রিযং, ইন্দ্রিযা মনো.

চক্খু ইন্দ্রিযং, ইন্দ্রিযা ইত্থী.

চক্খু ইন্দ্রিযং, ইন্দ্রিযা পুরিসো.

চক্খু ইন্দ্রিযং, ইন্দ্রিযা জীৰিতং.

চক্খু ইন্দ্রিযং, ইন্দ্রিযা সুখং.

চক্খু ইন্দ্রিযং, ইন্দ্রিযা দুক্খং.

চক্খু ইন্দ্রিযং, ইন্দ্রিযা সোমনস্সং.

চক্খু ইন্দ্রিযং, ইন্দ্রিযা দোমনস্সং.

চক্খু ইন্দ্রিযং, ইন্দ্রিযা উপেক্খা.

চক্খু ইন্দ্রিযং, ইন্দ্রিযা সদ্ধা.

চক্খু ইন্দ্রিযং, ইন্দ্রিযা ৰীরিযং.

চক্খু ইন্দ্রিযং, ইন্দ্রিযা সতি.

চক্খু ইন্দ্রিযং, ইন্দ্রিযা সমাধি.

চক্খু ইন্দ্রিযং, ইন্দ্রিযা পঞ্ঞা.

চক্খু ইন্দ্রিযং, ইন্দ্রিযা অনঞ্ঞাতঞ্ঞস্সামীতি.

চক্খু ইন্দ্রিযং, ইন্দ্রিযা অঞ্ঞং.

চক্খু ইন্দ্রিযং, ইন্দ্রিযা অঞ্ঞাতাৰী.

সোতং ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

ঘানং ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

জিৰ্হা ¶ ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

কাযো ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

মনো ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

ইত্থী ¶ ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

পুরিসো ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

জীৰিতং ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

সুখং ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

দুক্খং ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

সোমনস্সং ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

দোমনস্সং ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

উপেক্খা ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

সদ্ধা ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

ৰীরিযং ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

সতি ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

সমাধি ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

পঞ্ঞা ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

অনঞ্ঞাতঞ্ঞস্সামীতি ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

অঞ্ঞং ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞাতাৰী.

অঞ্ঞাতাৰী ইন্দ্রিযং, ইন্দ্রিযা চক্খু…পে… ইন্দ্রিযা অঞ্ঞং.

পচ্চনীকং

ন চক্খু ন ইন্দ্রিযং, ন ইন্দ্রিযা ন সোতং.

ন চক্খু ন ইন্দ্রিযং, ন ইন্দ্রিযা ন ঘানং.

ন চক্খু ন ইন্দ্রিযং, ন ইন্দ্রিযা ন জিৰ্হা.

ন চক্খু ন ইন্দ্রিযং, ন ইন্দ্রিযা ন কাযো.

ন চক্খু ন ইন্দ্রিযং, ন ইন্দ্রিযা ন মনো.

ন চক্খু ন ইন্দ্রিযং, ন ইন্দ্রিযা ন ইত্থী.

ন ¶ চক্খু ন ইন্দ্রিযং, ন ইন্দ্রিযা ন পুরিসো.

ন চক্খু ন ইন্দ্রিযং, ন ইন্দ্রিযা ন জীৰিতং.

ন চক্খু ন ইন্দ্রিযং, ন ইন্দ্রিযা ন সুখং.

ন চক্খু ন ইন্দ্রিযং, ন ইন্দ্রিযা ন দুক্খং.

ন চক্খু ন ইন্দ্রিযং, ন ইন্দ্রিযা ন সোমনস্সং.

ন ¶ চক্খু ন ইন্দ্রিযং, ন ইন্দ্রিযা ন দোমনস্সং.

ন চক্খু ন ইন্দ্রিযং, ন ইন্দ্রিযা ন উপেক্খা.

ন চক্খু ন ইন্দ্রিযং, ন ইন্দ্রিযা ন সদ্ধা.

ন চক্খু ন ইন্দ্রিযং, ন ইন্দ্রিযা ন ৰীরিযং.

ন চক্খু ন ইন্দ্রিযং, ন ইন্দ্রিযা ন সতি.

ন চক্খু ন ইন্দ্রিযং, ন ইন্দ্রিযা ন সমাধি.

ন চক্খু ন ইন্দ্রিযং, ন ইন্দ্রিযা ন পঞ্ঞা.

ন চক্খু ন ইন্দ্রিযং, ন ইন্দ্রিযা ন অনঞ্ঞাতঞ্ঞস্সামীতি.

ন চক্খু ন ইন্দ্রিযং, ন ইন্দ্রিযা ন অঞ্ঞং.

ন চক্খু ন ইন্দ্রিযং, ন ইন্দ্রিযা ন অঞ্ঞাতাৰী.

ন সোতং ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন ঘানং ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন জিৰ্হা ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন কাযো ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন মনো ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন ইত্থী ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন পুরিসো ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন জীৰিতং ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন সুখং ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন ¶ দুক্খং ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন সোমনস্সং ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন ¶ দোমনস্সং ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন উপেক্খা ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন সদ্ধা ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন ৰীরিযং ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন সতি ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন সমাধি ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন পঞ্ঞা ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন অনঞ্ঞাতঞ্ঞস্সামীতি ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন অঞ্ঞং ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞাতাৰী.

ন অঞ্ঞাতাৰী ন ইন্দ্রিযং, ন ইন্দ্রিযা ন চক্খু…পে… ন ইন্দ্রিযা ন অঞ্ঞং.

ইন্দ্রিযযমকমাতিকা নিট্ঠিতা.

যমকমাতিকা নিট্ঠিতা.

৭. পট্ঠানমাতিকা

হেতুপচ্চযো ¶ আরম্মণপচ্চযো অধিপতিপচ্চযো অনন্তরপচ্চযো সমনন্তরপচ্চযো সহজাতপচ্চযো অঞ্ঞমঞ্ঞপচ্চযো নিস্সযপচ্চযো উপনিস্সযপচ্চযো পুরেজাতপচ্চযো পচ্ছাজাতপচ্চযো আসেৰনপচ্চযো কম্মপচ্চযো ৰিপাকপচ্চযো আহারপচ্চযো ইন্দ্রিযপচ্চযো ঝানপচ্চযো মগ্গপচ্চযো সম্পযুত্তপচ্চযো ৰিপ্পযুত্তপচ্চযো অত্থিপচ্চযো নত্থিপচ্চযো ৰিগতপচ্চযো অৰিগতপচ্চযোতি (পট্ঠা. ১.১.পচ্চযুদ্দেস).

পট্ঠানমাতিকা নিট্ঠিতা.

নিগমনং

সত্তপ্পকরণনামতো ¶ ¶ , অভিধম্মমদেসযি;

দেৰাতিদেৰো দেৰানং, দেৰলোকম্হি তং পুরে.

তস্সাযং মাতিকা সব্বা, সকলস্সাপি উদ্ধরা;

চিরট্ঠিতত্থং ধম্মস্স, তং পগ্গণ্হন্তু সাধৰো.

দ্ৰাৰীসতি তিকা চেৰ, তথেৰ হেতুগোচ্ছকং;

চূল়ন্তরদুকা সত্ত, গোচ্ছকা চ ততো পরং.

মহন্তরদুকা চাপি, ততো চুদ্দস নিদ্দিসে;

গোচ্ছকানি দুৰে পিট্ঠি-দুকানিট্ঠারসেদিসা.

দ্ৰাচত্তালীস সুত্তন্ত-দুকা তেৰন্তি পঞ্চধা;

সত্তপ্পকরণিকা ভিন্না, ধম্মসঙ্গণিমাতিকা.

অভিধম্মমাতিকাপাল়ি নিট্ঠিতা.

নমো তস্স ভগৰতো অরহতো সম্মাসম্বুদ্ধস্স

মোহৰিচ্ছেদনী

গন্থারম্ভকথা

১. কারুঞ্ঞভাৰিতং ¶ ¶ যস্স, ঞাণচক্খু মহোদযং.

অন্ধভূতস্স লোকস্স, জাতং সামঞ্ঞলোচনং.

২. তং বুদ্ধং সুগতং ধীরং, সসদ্ধম্মং সসাৰকং.

ৰন্দিত্ৰানুস্সরিত্ৰা চ, থোমেত্ৰা চ ৰিনাযকং.

৩. থেরে চ থিরসীলাদি-গুণালঙ্কারসোভিতে.

সাসনুজ্জোতকে ধীরে, পুব্বকে ৰংসপালকে.

৪. ৰিসুদ্ধিদেৰদেৰো ¶ যং, দেৰানং তিদসালযে.

পঞ্ঞায দেসযী তস্স, অভিধম্মস্স মাতিকা.

৫. যা তস্সা ৰিপুলত্থায, ধম্মসঙ্গণিআদিহি.

অনেকেহি পকারেহি, পাল়িঅট্ঠকথাহি চ.

৬. অত্থো ৰিনিচ্ছযো চেৰ,

ৰিভত্তো সাগরূপমো;

অনন্তনযৰোকিণ্ণো,

দুক্খোগাহো যতো ততো.

৭. সমাসেনাভিধম্মত্থং, মাতিকামুখতোখিলং.

ঞাতুকামেহি সুদ্ধেহি, অন্তেৰাসীহি যাচিতো.

৮. সঙ্কড্ঢিত্ৰান ¶ নযতো, পাল়িঅট্ঠকথাগতং.

অত্থং ৰিনিচ্ছযঞ্চেৰ, সমাসেন নিরাকুলং.

৯. সামত্থিযগতং অত্থং, নিকাযন্তরনিস্সটং.

মহাৰিহারৰাসীনং, কমাভতনযানুগং.

১০. দীপযন্তো নযঞ্ঞূনং, সদা সম্মোদকারিনিং.

মোহৰিচ্ছেদনিং নাম, করিস্সামত্থৰণ্ণনন্তি.

গন্থারম্ভকথা নিট্ঠিতা.

১. ধম্মসঙ্গণীমাতিকা

তিকপদত্থৰণ্ণনা

তত্থ ¶ ¶ অভিধম্মস্স মাতিকাতি এত্থ কেনট্ঠেন অভিধম্মো? ধম্মাতিরেকধম্মৰিসেসট্ঠেন. অতিরেকৰিসেসত্থদীপকো হি এত্থ অভি-সদ্দো ‘‘বাল়্হা মে দুক্খা ৰেদনা অভিক্কমন্তি, নো পটিক্কমন্তি (সং. নি. ৪.৮৭; ৫.১৯৫, ১০২২; ম. নি. ৩.৩৮৪, ৩৮৯), অভিক্কন্তৰণ্ণা’’তিআদীসু (সং. নি. ১.১; খু. পা. ৫.১; সু. নি. মঙ্গলসুত্ত; ৰি. ৰ. ৮৫৭) ৰিয, তস্মা যথা সমুস্সিতেসু বহূসু ছত্তেসু চেৰ ধজেসু চ যং অতিরেকপ্পমাণং, ৰিসেসৰণ্ণসণ্ঠানঞ্চ ছত্তং, তং অতিচ্ছত্তং, যো অতিরেকপ্পমাণো, ৰিসেসৰণ্ণসণ্ঠানো চ ধজো, সো অতিদ্ধজোতি চ ৰুচ্চতি, এৰমেৰ অযম্পি ধম্মো ধম্মাতিরেকধম্মৰিসেসট্ঠেন ‘‘অভিধম্মো’’তি ৰুচ্চতি. ভগৰতা হি সুত্তন্তং পত্ৰা খন্ধাযতনধাতুসচ্চইন্দ্রিযপচ্চযাকারাদযো ধম্মা একদেসেন ৰিভত্তা, ন নিপ্পদেসেন, অভিধম্মং পত্ৰা পন অনেকেহি নযৰিসেসেহি নিপ্পদেসতোৰ ৰিভত্তা. এৰং ধম্মাতিরেকধম্মৰিসেসট্ঠেন ‘‘অভিধম্মো’’তি ৰেদিতব্বো.

কেনট্ঠেন মাতিকা? মাতুসমট্ঠেন. মাতা ৰিযাতি হি মাতিকা যথা পদুমিকং মুখন্তি. যথা হি মাতা নানাৰিধে পুত্তে পসৰতি, তে পালেতি, পোসেতি চ, এৰমযম্পি নানাৰিধে ধম্মে, অত্থে চ পসৰতি, তে চ অৰিনস্সমানে পালেতি, পোসেতি চ, তস্মা ‘‘মাতিকা’’তি ৰুচ্চতি. মাতিকং হি নিস্সায ধম্মসঙ্গণীআদিসত্তপ্পকরণৰসেন ৰিত্থারিযমানা অনন্তাপরিমাণা ধম্মা, অত্থা চ তায পসুতা, পালিতা, পোসিতা ৰিয চ হোন্তি. তথা হি ধম্মসঙ্গণিপ্পকরণে চতস্সো ৰিভত্তিযো চিত্তৰিভত্তি রূপৰিভত্তি নিক্খেপরাসি অত্থুদ্ধারোতি ¶ . তত্থ নানানযেহি একূননৰুতিচিত্তৰিভাৰিনী ¶ চিত্তৰিভত্তি ৰিত্থারিযমানা অনন্তাপরিমাণভাণৰারা হোতি, তদনন্তরং একৰিধাদিনা রূপৰিভাৰিনী রূপৰিভত্তি ৰিত্থারিযমানা অনন্তাপরিমাণভাণৰারা হোতি, তদনন্তরং মূলখন্ধদ্ৰারাদীনি নিক্খিপিত্ৰা দেসিতো নিক্খেপরাসি ৰিত্থারিযমানো অনন্তাপরিমাণভাণৰারো হোতি, তদনন্তরং তেপিটকস্স বুদ্ধৰচনস্স অট্ঠকথাভূতো অত্থুদ্ধারো ৰিত্থারিযমানো অনন্তাপরিমাণভাণৰারো হোতি. এৰমিদং ধম্মসঙ্গণিপ্পকরণং ৰাচনামগ্গতো অতিরেকতেরসমত্তভাণৰারম্পি সমানং ৰিত্থারিযমানং অনন্তাপরিমাণভাণৰারং হোতি.

তথা ৰিভঙ্গপ্পকরণে খন্ধৰিভঙ্গো আযতনধাতুসচ্চইন্দ্রিযপচ্চযাকারসতিপট্ঠানসম্মপ্পধানইদ্ধিপাদবোজ্ঝঙ্গমগ্গঙ্গঝানঅপ্পমঞ্ঞাসিক্খাপদপটিসম্ভিদাঞাণখুদ্দকৰত্থুধম্মহদযৰিভঙ্গাতি অট্ঠারস ৰিভঙ্গা ৰিভত্তা, তে সুত্তন্তভাজনীযঅভিধম্মভাজনীযাদিনানানযেহি ৰিত্থারিযমানা পচ্চেকং অনন্তাপরিমাণভাণৰারা হোন্তি. এৰমিদং ৰিভঙ্গপ্পকরণং ৰাচনামগ্গতো পঞ্চতিংসমত্তভাণৰারম্পি সমানং ৰিত্থারিযমানং অনন্তাপরিমাণভাণৰারং হোতি.

তথা ধাতুকথাপকরণং ‘‘সঙ্গহো অসঙ্গহো’’তিআদিনা চুদ্দসৰিধেন ৰিভত্তং ৰাচনামগ্গতো অতিরেকছভাণৰারমত্তম্পি সমানং ৰিত্থারিযমানং অনন্তাপরিমাণভাণৰারং হোতি.

তথা পুগ্গলপঞ্ঞত্তিপ্পকরণং খন্ধপঞ্ঞত্তি আযতনধাতুসচ্চইন্দ্রিযপুগ্গলপঞ্ঞত্তীতি ছব্বিধেন ৰিভত্তং ৰাচনামগ্গতো অতিরেকপঞ্চভাণৰারমত্তম্পি ৰিত্থারিযমানং অনন্তাপরিমাণভাণৰারং হোতি.

তথা ¶ কথাৰত্থুপ্পকরণং সকৰাদে পঞ্চ সুত্তসতানি, পরৰাদে পঞ্চ সুত্তসতানীতি সুত্তসহস্সং সমোধানেত্ৰা ৰিভত্তং ৰাচনামগ্গতো সঙ্গীতিআরোপিতনযেন দীঘনিকাযপ্পমাণম্পি ৰিত্থারিযমানং অনন্তাপরিমাণভাণৰারং হোতি.

তথা যমকপ্পকরণং মূলযমকং খন্ধাযতনধাতুসচ্চসঙ্খারঅনুসযচিত্তধম্মইন্দ্রিযযমকন্তি দসৰিধেন ৰিভত্তং ৰাচনামগ্গতো ৰীসভাণৰারসতম্পি ৰিত্থারিযমানং অনন্তাপরিমাণভাণৰারং হোতি.

পট্ঠানপ্পকরণং ¶ হেতুপচ্চযআরম্মণপচ্চযাদিচতুৰীসতিপচ্চযে গহেত্ৰা তিকপট্ঠানাদিচতুৰীসতিৰিধেন ৰিভত্তং পচ্চেকং কতিপযভাণৰারম্পি ৰিত্থারিযমানং অনন্তাপরিমাণভাণৰারং হোতি. এৰং অনন্তাপরিমাণানং ধম্মানং, অত্থানঞ্চ পসৰনতো, পালনতো, পোসনতো চ ‘‘মাতা ৰিযাতি মাতিকা’’তি ৰুচ্চতি. পালনপোসনঞ্চেত্থ সম্মুট্ঠানং, ৰিরদ্ধানঞ্চ পাল়িঅত্থানং মাতিকানুসারেন সল্লক্খেত্ৰা সমানযনতো, রক্খণতো চ ৰেদিতব্বং. সা পনাযং পরিচ্ছেদতো ধম্মসঙ্গণীমাতিকা ৰিভঙ্গমাতিকা ধাতুকথামাতিকা পুগ্গলপঞ্ঞত্তিমাতিকা কথাৰত্থুমাতিকা যমকমাতিকা পট্ঠানমাতিকাতি সত্তন্নং পকরণানং আদিম্হি ঠপিতা সত্তৰিধা হোতি.

তত্থ ধম্মসঙ্গণীমাতিকা আদি, সাপি তিকমাতিকা দুকমাতিকাতি দুৰিধা. তত্থ দ্ৰাৰীসতি তিকা তিকমাতিকা নাম. দ্ৰেচত্তালীসসতদুকা দুকমাতিকা নাম, সা পুন আহচ্চভাসিতা সাৰকভাসিতাতি দুৰিধা. তত্থ দ্ৰাৰীসতি তিকা চেৰ, ‘‘হেতূ ধম্মা ন হেতূ ধম্মা…পে… সরণা ধম্মা অরণা ধম্মা’’তি ইমে চ সতং ¶ দুকাতি অযং আহচ্চভাসিতা সম্মাসম্বুদ্ধদেসিতা সত্তন্নং পকরণানং মাতিকা নাম, তদনন্তরা ‘‘ৰিজ্জাভাগিনো ধম্মা অৰিজ্জাভাগিনো ধম্মা…পে… খযেঞাণং অনুপ্পাদেঞাণ’’ন্তি ইমে দ্ৰাচত্তালীস সুত্তন্তিকদুকা ধম্মসেনাপতিসারিপুত্তত্থেরেন ঠপিতত্তা সাৰকভাসিতা নাম. ইমে ঠপেন্তো পন থেরো ন সামুক্কংসিকেন অত্তনো ঞাণেন ঠপেসি, একুত্তরিযং পন এককনিপাতদুকনিপাতসঙ্গীতিসুত্তদসুত্তরসুত্তেহি সমোধানেত্ৰা আভিধম্মিকত্থেরানং সুত্তন্তং পত্ৰা অকিলমনত্থং ঠপেসি.

সা পুন সপ্পদেসনিপ্পদেসৰসেন দ্ৰে কোট্ঠাসা হোন্তি. এত্থ হি নৰ তিকা, একসত্ততি চ দুকা সপ্পদেসানং সাৰসেসানং নামরূপানং পরিগ্গহিতত্তা সপ্পদেসা নাম, অৰসেসা তেরস তিকা, একসত্ততি চ দুকা নিপ্পদেসানং নিরৰসেসানং নামরূপানং গহিতত্তা নিপ্পদেসা নাম. তেসং ৰিভাগো তত্থ তত্থেৰ আৰি ভৰিস্সতি. তথা নামলাভৰসেন দ্ৰিধা. সব্বেৰ হি এতে তিকদুকা আদিপদৰসেন, সব্বপদৰসেন চাতি দ্ৰিধা নামং লভন্তি. তত্থ ‘‘কুসলা ধম্মা, অকুসলা ধম্মা, অব্যাকতা ধম্মা’’তি অযং তাৰ আদিপদৰসেন লদ্ধনামো কুসলত্তিকো নাম. ‘‘সুখায ৰেদনায সম্পযুত্তা ধম্মা…পে… ধম্মা’’তি অযং সব্বপদৰসেন লদ্ধনামো ৰেদনাত্তিকো নাম. এৰং সব্বেসম্পি তিকদুকানং নামং ৰেদিতব্বং.

সা পনেসা পঞ্চদসহি পরিচ্ছেদেহি ৰৰত্থিতা. তিকানং হি একো পরিচ্ছেদো, দুকানং চুদ্দস ¶ . ‘‘হেতূ ধম্মা নহেতূ ধম্মা’’তিআদযো হি ছ দুকা গন্থতো চ অত্থতো চ অঞ্ঞমঞ্ঞসম্বন্ধেন কণ্ণিকা ৰিয, ঘটা ৰিয চ হুত্ৰা ঠিতত্তা ‘‘হেতুগোচ্ছকো’’তি ৰুচ্চতি. ততো অপরে ‘‘সপ্পচ্চযা ধম্মা’’তিআদযো সত্ত দুকা অঞ্ঞমঞ্ঞং অসম্বন্ধা ¶ কেৰলং দুকসামঞ্ঞেন উচ্চিনিত্ৰা গোচ্ছকন্তরে ঠপিতত্তা, অঞ্ঞেহি চ অন্তরদুকেহি চূল়কত্তা ‘‘চূল়ন্তরদুকা’’তি ৰেদিতব্বা. ততো পরং আসৰদুকাদীনং ছন্নং দুকানং ৰসেন আসৰগোচ্ছকো নাম. ততো সংযোজনদুকাদীনং ছন্নং ৰসেন সংযোজনগোচ্ছকো নাম. তথা গন্থওঘযোগনীৰরণদুকাদীনং ছন্নং ছন্নং ৰসেন গন্থওঘযোগনীৰরণগোচ্ছকা নাম. পরামাসদুকাদীনং পঞ্চন্নং ৰসেন পরামাসগোচ্ছকো নাম. ততো পরং সারম্মণদুকাদযো চতুদ্দস দুকা মহন্তরদুকা নাম. ততো পরং উপাদানদুকাদযো ছ দুকা উপাদানগোচ্ছকো নাম. ততো কিলেসদুকাদযো অট্ঠদুকা কিলেসগোচ্ছকো নাম. ততো পরং দস্সনেনপহাতব্বদুকাদযো অট্ঠারস দুকা অভিধম্মমাতিকায পরিযোসানে ঠপিতত্তা পিট্ঠিদুকা নাম. ৰিজ্জাভাগিযদুকাদযো পন দ্ৰাচত্তালীস দুকা সুত্তন্তিকদুকা নাম. এৰমেতিস্সা পঞ্চদসহি পরিচ্ছেদেহি ৰৰত্থিতায তাৰ অযং অত্থৰণ্ণনা ভৰিস্সতি.

কুসলত্তিকৰণ্ণনা

যস্মা পনেত্থ তিকমাতিকা আদি, তত্থাপি কুসলত্তিকো আদি, তস্মা কুসলত্তিকস্স তাৰ –

অত্থতো ভূমিভেদা চ, পচ্চেকং সম্পযোগতো;

উদ্দেসতো চ ধম্মানং, লক্খণাদিৰিভাগতো.

সঙ্গহা সুঞ্ঞতো চেৰ, ৰিসযাদিপ্পভেদতো;

যথানুরূপং সব্বত্থ, ৰেদিতব্বো ৰিনিচ্ছযো.

তত্থ অত্থতো তাৰ কুসলা ধম্মাতি এত্থ কুসলসদ্দো আরোগ্যানৰজ্জছেকসুখৰিপাকেসু দিস্সতি. অযং হি ¶ ‘‘কচ্চি নু ভোতো কুসলং, কচ্চি ভোতো অনাময’’ন্তিআদীসু (জা. ১.১৫.২৪৬; ২.২০.১২৯) আরোগ্যে দিস্সতি. ‘‘কতমো পন, ভন্তে, কাযসমাচারো কুসলো ¶ ? যো খো, মহারাজ, কাযসমাচারো অনৰজ্জো’’তিআদীসু (ম. নি. ২.৩৬১) অনৰজ্জে. ‘‘কুসলো ত্ৰং রথস্স অঙ্গপচ্চঙ্গান’’ন্তিআদীসু (ম. নি. ২.৮৭) ছেকে. ‘‘কুসলস্স কম্মস্স কতত্তা উপচিতত্তা’’তিআদীসু (ধ. স. ৪৩১) সুখৰিপাকে. স্ৰাযমিধ আরোগ্যেপি অনৰজ্জেপি সুখৰিপাকেপি ৰত্ততি. যথেৰ হি রূপকাযে নিব্যাধিতায আরোগ্যট্ঠেন কুসলং ৰুত্তং, এৰং অরূপধম্মেপি কিলেসব্যাধিনো অভাৰেন আরোগ্যট্ঠেন কুসলং ৰেদিতব্বং. কিলেসৰজ্জস্স পন অভাৰা অনৰজ্জট্ঠেন কুসলং.

ধম্ম-সদ্দো পনাযং পরিযত্তিহেতুগুণনিস্সত্তনিজ্জীৰতাদীসু দিস্সতি. অযং হি ‘‘ধম্মং পরিযাপুণাতি সুত্তং গেয্য’’ন্তিআদীসু (অ. নি. ৪.১০২) পরিযত্তিযং দিস্সতি. ‘‘হেতুম্হি ঞাণং ধম্মপটিসম্ভিদা’’তিআদীসু (ৰিভ. ৭২০) হেতুম্হি. ‘‘ন হি ধম্মো অধম্মো চ, উভো সমৰিপাকিনো’’তিআদীসু (থেরগা. ৩০৪) গুণে. ‘‘ধম্মেসু ধম্মানুপস্সী ৰিহরতী’’তিআদীসু (দী. নি. ২.৩৭৩) নিস্সত্তনিজ্জীৰতাযং, স্ৰাযমিধাপি নিস্সত্তনিজ্জীৰতাযমেৰ ৰট্টতি.

ৰচনত্থো পনেত্থ – কুচ্ছিতে পাপধম্মে সলযন্তি চলযন্তি কম্পেন্তি ৰিদ্ধংসেন্তীতি কুসলা. কুচ্ছিতেন ৰা আকারেন সযন্তীতি কুসা, তে কুসে লুনন্তি ছিন্দন্তীতি কুসলা. কুচ্ছিতানং ৰা সানতো তনুকরণতো ঞাণং কুসং নাম, তেন কুসেন লাতব্বা পরিৰত্তেতব্বাতি কুসলা. অথ ৰা কোসল্লং ৰুচ্চতি পঞ্ঞা, ততো কোসল্লতো সম্ভূতত্তা কুসলা. ইদং পন অনন্তরে ৰুত্তঞ্চাতি নিব্বচনদ্ৰযং কিঞ্চাপি নিপ্পরিযাযতো ঞাণসম্পযুত্তানমেৰ ¶ যুজ্জতি, রুল়্হীৰসেন পন তংসদিসতায ঞাণৰিপ্পযুত্তানম্পীতি গহেতব্বং. যথা ৰা কুসা উভযভাগগতং হত্থপ্পদেসং লুনন্তি, এৰমিমেপি উপ্পন্নানুপ্পন্নভাৰেন উভযভাগগতং সংকিলেসপক্খং লুনন্তি, তস্মা কুসা ৰিয লুনন্তীতি কুসলা. অত্তনো পন সভাৰং ধারেন্তীতি ধম্মা, ধারীযন্তি ৰা পচ্চযেহি, ধারীযন্তি ৰা যথাসভাৰতো আধারীযন্তীতিপি ধম্মা. ন কুসলা অকুসলা, মিত্তপটিপক্খা অমিত্তা ৰিয কুসলপটিপক্খাতি অত্থো. ন ব্যাকতাতি অব্যাকতা, কুসলাকুসলভাৰেন অকথিতাতি অত্থো. তেসু অনৰজ্জসুখৰিপাকলক্খণা কুসলা, সাৰজ্জদুক্খৰিপাকলক্খণা অকুসলা, অৰিপাকলক্খণা অব্যাকতা.

কিং পনেতানি কুসলাতি ৰা ধম্মাতি ৰাতিআদীনি একত্থানি, উদাহু নানত্থানীতি? কিঞ্চেত্থ ¶ যদি তাৰ একত্থানি, ‘‘কুসলা ধম্মা’’তি ইদং ‘‘কুসলা কুসলা’’তি ৰুত্তসদিসং হোতি. অথ নানত্থানি, তিকদুকানং ছক্কচতুক্কভাৰো আপজ্জতি, পদানঞ্চ অসম্বন্ধো ‘‘কুসলা রূপং চক্খুমা’’তিআদীনং ৰিয. অথাপি যদি এতানি একত্থানি, কুসলাকুসলাব্যাকতপদানং তিণ্ণম্পি ধম্মানং ধম্মসভাৰেন একত্তা কুসলাদীনম্পি একত্তং আপজ্জতি. অথ ‘‘কুসলপদতো অকুসলাদিপদস্স অঞ্ঞত্তং সিযা’’তি ৰদথ, ন এতানি একত্থানি. তদা ধম্মো নাম ভাৰো. ভাৰতো চ অঞ্ঞো অভাৰোতি. এৰং অঞ্ঞোঞ্ঞাপেক্খায অভাৰত্তমাপন্নেহি ধম্মেহি অনঞ্ঞে কুসলাদযোপি অভাৰা এৰ সিযুন্তি? সব্বমেতং অকারণং, কস্মা? যথানুমতিৰোহারসিদ্ধিতো, ন হি ‘‘কুসলা ধম্মা’’তিআদীনি পদানি যথা কুসলা কুসলাতি, এৰং অত্থৰিসেসাভাৰেন পণ্ডিতেহি ¶ অনুমতানি, নাপি কুসলা রূপং চক্খুমা-সদ্দা ৰিয অঞ্ঞমঞ্ঞং অনোলোকিতত্থভাৰেন, অথ খো অনৰজ্জইট্ঠৰিপাকত্তাদিসঙ্খাতস্স অত্থৰিসেসস্স, সভাৰসাধারণাদিঅত্থসামঞ্ঞস্স চ জোতকত্তেন যথাক্কমং অনুমতানি. কুসল-সদ্দো হি ধম্ম-সদ্দস্স পুরতো ৰুচ্চমানো কুসলাকুসলাদিসব্বসাধারণসামঞ্ঞত্থদীপকং ধম্ম-সদ্দং অকুসলাদিতো নিৰত্তেত্ৰা অত্তনো অত্তনো অত্থৰিসেসৰিসিট্ঠত্থদীপকং করোতি. এৰং পচ্চেকং ভিন্নৰিসযানম্পি নেসং ৰিসেসনৰিসেসিতব্বভাৰেন পৰত্তিযং একত্থতায পণ্ডিতানুমততায যথাৰুত্তদোসারোপনে কারণং ৰুত্তং, সব্বমেতং অকারণং. এৰং ততো পরেসুপি সব্বত্থ যথানুরূপতো ঞাতব্বং. অযং তাৰ পদত্থতো ৰিনিচ্ছযো.

কুসলপদত্থো

ভূমিভেদাতি তেসু কুসলাকুসলাব্যাকতেসু ধম্মেসু কুসলা তাৰ ধম্মা ভূমিভেদতো চতুব্বিধা হোন্তি – কামাৰচরা রূপাৰচরা অরূপাৰচরা লোকুত্তরাতি. অযং ভূমিভেদতো ৰিনিচ্ছযো.

সম্পযোগতোতি এৰং ভূমিভেদতো চতুব্বিধানম্পি নেসং পচ্চেকং সম্পযোগতো ৰিনিচ্ছযো ৰেদিতব্বো. তত্থ কামাৰচরা তাৰ সম্পযোগতো অট্ঠৰিধা হোন্তি. সেয্যথিদং? সোমনস্সসহগতং ঞাণসম্পযুত্তং অসঙ্খারং, তথা সসঙ্খারং. উপেক্খাসহগতং ঞাণসম্পযুত্তং অসঙ্খারং, তথা সসঙ্খারং. সোমনস্সসহগতং ঞাণৰিপ্পযুত্তং অসঙ্খারং, তথা সসঙ্খারং. উপেক্খাসহগতং ঞাণৰিপ্পযুত্তং অসঙ্খারং, তথা সসঙ্খারন্তি. তত্থ ইট্ঠারম্মণতা, সদ্ধাবাহুল্লতা, ৰিসুদ্ধদিট্ঠিতা, আনিসংসদস্সাৰিতা চ একাদস পীতিসম্বোজ্ঝঙ্গকারণানি চাতি ¶ ইমেহি তাৰ কারণেহি সোমনস্সসহগতভাৰো ৰেদিতব্বো. ঞাণসম্পত্তিং পন ¶ পত্থেত্ৰা কতকম্মতো, ব্রহ্মাদিউপপত্তিতো, পঞ্ঞাদসকৰসেন ইন্দ্রিযপরিপাকতো, ৰিক্খম্ভনেন কিলেসদূরিভাৰতো চ সত্তৰিধধম্মৰিচযসম্বোজ্ঝঙ্গকারণতো চ ঞাণসম্পযুত্ততা ৰেদিতব্বা. অত্তনো ৰা পরেসং ৰা ৰসেন পৰত্তো পুব্বপযোগো সঙ্খারো নাম.

তেন উপ্পন্নং সসঙ্খারং, তদভাৰা অসঙ্খারঞ্চ ৰেদিতব্বং. এতেসু হি যথাৰুত্তসোমনস্সঞাণহেতুং আগম্ম পহট্ঠো ‘‘অত্থি দিন্ন’’ন্তি আদিনযপ্পৰত্তং সম্মাদিট্ঠিং পুরক্খত্ৰা অসংসীদন্তো, পরেহি চ অনুস্সাহিতো দানাদীনি পুঞ্ঞানি করোতি, তদাস্স সোমনস্সসহগতং ঞাণসম্পযুত্তং পঠমং কুসলং উপ্পজ্জতি. যদা পন ৰুত্তনযেন হট্ঠতুট্ঠো সম্মাদিট্ঠিং পুরক্খত্ৰা অমুত্তচাগিতাদিৰসেন সংসীদমানো, অত্তনো পটিসঙ্খারেন ৰা পরেহি ৰা উস্সাহিতো করোতি, তদাস্স তদেৰ সসঙ্খারং দুতিযং কুসলং হোতি. যদা পন ঞাতিজনাদিপটিপত্তিদস্সনেন জাতপরিচযা বালদারকাদযো ভিক্খুআদিদস্সনেন সোমনস্সজাতা সহসা দানৰন্দনাদীনি করোন্তি, তদা ঞাণৰিপ্পযুত্তং ততিযং কুসলং উপ্পজ্জতি. যদা পন ঞাতিআদীহি উস্সাহিতা এৰং পটিপজ্জন্তি, তদা তদেৰ চতুত্থং সসঙ্খারচিত্তং হোতি. যদা পন সোমনস্সহেতুনো অভাৰেন ৰিসুং চতূসুপি ৰিকপ্পেসু সোমনস্সরহিতা হোন্তি, তদা সেসানি চত্তারি উপেক্খাসহগতানি কুসলানি উপ্পজ্জন্তি. এৰং পচ্চেকং সম্পযোগতো ৰিনিচ্ছযো ৰেদিতব্বো.

উদ্দেসতো চ ধম্মানন্তি এৰং সম্পযোগতো অট্ঠৰিধেসু কুসলেসু পচ্চেকং ধম্মানং উদ্দেসতোপি ৰিনিচ্ছযো ৰেদিতব্বো. তত্থ পঠমকুসলে তাৰ পাল়িযা সরূপেন আগতা তিংস ধম্মা, যেৰাপনকা নৰাতি একূনচত্তালীস ধম্মা ¶ হোন্তি. সেয্যথিদং – ফস্সো ৰেদনা সঞ্ঞা চেতনা চিত্তং ৰিতক্কো ৰিচারো পীতি ৰীরিযং চিত্তেকগ্গতা জীৰিতং সদ্ধা সতি হিরী ওত্তপ্পং অলোভো অদোসো অমোহো কাযপস্সদ্ধি চিত্তপস্সদ্ধি কাযলহুতা চিত্তলহুতা কাযমুদুতা চিত্তমুদুতা কাযকম্মঞ্ঞতা চিত্তকম্মঞ্ঞতা কাযপাগুঞ্ঞতা চিত্তপাগুঞ্ঞতা কাযুজুকতা চিত্তুজুকতাতি ইমে সরূপেন আগতা তিংসধম্মা. ছন্দো অধিমোক্খো মনসিকারো তত্রমজ্ঝত্ততা করুণা মুদিতা কাযদুচ্চরিতৰিরতি ৰচীদুচ্চরিতৰিরতি মিচ্ছাজীৰৰিরতীতি ইমে যেৰাপনকা নৰাতি.

পদভাজনীযে ¶ পন –

‘‘যস্মিং সমযে কামাৰচরং কুসলং চিত্তং উপ্পন্নং হোতি…পে… তস্মিং সমযে ফস্সো হোতি, ৰেদনা…পে… সঞ্ঞা চেতনা চিত্তং ৰিতক্কো ৰিচারো পীতি সুখং চিত্তস্সেকগ্গতা সদ্ধিন্দ্রিযং ৰীরিযিন্দ্রিযং সতিন্দ্রিযং সমাধিন্দ্রিযং পঞ্ঞিন্দ্রিযং মনিন্দ্রিযং সোমনস্সিন্দ্রিযং জীৰিতিন্দ্রিযং সম্মাদিট্ঠি সম্মাসঙ্কপ্পো সম্মাৰাযামো সম্মাসতি সম্মাসমাধি সদ্ধাবলং ৰীরিযবলং সতিবলং সমাধিবলং পঞ্ঞাবলং হিরিবলং ওত্তপ্পবলং অলোভো অদোসো অমোহো অনভিজ্ঝা অব্যাপাদো সম্মাদিট্ঠি হিরী ওত্তপ্পং কাযপস্সদ্ধি চিত্তপস্সদ্ধি কাযলহুতা চিত্তলহুতা কাযমুদুতা চিত্তমুদুতা কাযকম্মঞ্ঞতা চিত্তকম্মঞ্ঞতা কাযপাগুঞ্ঞতা চিত্তপাগুঞ্ঞতা কাযুজুকতা চিত্তুজুকতা সতি সম্পজঞ্ঞং সমথো ৰিপস্সনা পগ্গাহো অৰিক্খেপো হোতী’’তি (ধ. স. ১) –

এৰং সরূপতো উদ্দিট্ঠা ছপঞ্ঞাস ধম্মা ‘‘যে ৰা পন তস্মিং সমযে অঞ্ঞেপি অত্থি পটিচ্চসমুপ্পন্না অরূপিনো ধম্মা’’তি ¶ (ধ. স. ১) এৰং যেৰাপনকৰসেন সামঞ্ঞতো উদ্দিট্ঠা, অট্ঠকথাযং চস্সা তেসু তেসু সুত্তপ্পদেসেসু আগতে গহেত্ৰা সরূপতো নিদ্দিট্ঠা ছন্দাদযো নৰাতি পঞ্চসট্ঠি ধম্মা আগতা. যস্মা পন তেসু সরূপেন আগতা ঝানঙ্গইন্দ্রিযমগ্গঙ্গবলমূলাদীনং ৰসেন একস্সেৰ বহুকিচ্চতাদস্সনত্থং পুনপ্পুনং গহেত্ৰা পরিযাযেন ছপঞ্ঞাসৰিধেন দেসিতাপি অগহিতগ্গহণেন যথাৰুত্তা সমতিংসেৰ ধম্মা হোন্তি, তে পন সৰিভত্তিকা অৰিভত্তিকাতি দুৰিধা. তত্থ ফস্সাদযো অট্ঠারস এককত্তা অৰিভত্তিকা. ৰেদনাদযো দ্ৰাদস ধম্মা অট্ঠতিংসপ্পভেদেন যথাযোগং ৰিভত্তত্তা সৰিভত্তিকা, যেৰাপনকা পন অৰিভত্তিকা এৰ. তস্মা তে সব্বেপি নিপ্পরিযাযেন একূনচত্তালীস ধম্মাৰ হোন্তি. হোন্তি চেত্থ –

ফস্সাদিপঞ্চকং পঞ্চঝানঙ্গানিন্দ্রিযট্ঠকং;

মগ্গঙ্গপঞ্চকং সত্তবলং মূলত্তিকম্পি চ.

কম্মপথত্তিকঞ্চেৰ ¶ , লোকপালদুকং তথা;

পস্সদ্ধিআদী ছ দুকা, তীণি পিট্ঠিদুকানিতি.

সত্তরসহি রাসীহি, ছপঞ্ঞাসেৰ পাল়িযং;

ৰুত্তা সভাৰতো তিংস, ধম্মা অগহিতগ্গহে.

ফস্সো জীৰিতসঞ্ঞা চ, চেতনা চারপীতিযো;

ছ দুকা কাযপস্সদ্ধি-পমুখাট্ঠারসেককা.

চিত্তং ৰিতক্কো সদ্ধা চ, হিরিওত্তপ্পিযম্পি চ;

অলোভো চ অদোসো চ, সত্ত দ্ৰিধা ৰিভাৰিতা.

ৰেদনা তিৰিধা ৰীরিযং, সতি চ চতুধা মতা;

ছদ্ধা একগ্গতা পঞ্ঞা, সত্তধাৰ ৰিভাৰিতা.

ৰিরতী ¶ অপ্পমঞ্ঞাযো, মনক্কারো ছন্দমজ্ঝত্তা;

ধিমোক্খো যেৰাপনকা, নৰেতে পঠমে মনে.

পঞ্চসট্ঠিৰিধেনেৰ, পরিযাযেন দেসিতা;

নৰাধিকা চ তেত্তিংস, ধম্মাৰ পরমত্থতোতি.

এত্থ চ সরূপেন আগতা তিংস ধম্মা, যেৰাপনকেসু চত্তারো চাতি চতুত্তিংস ধম্মা একক্খণে নিযতা লব্ভন্তি, সেসা পন করুণাদযো পঞ্চ করুণাপুব্বভাগমুদিতাপুব্বভাগৰসেন, কাযদুচ্চরিতৰচীদুচ্চরিতমিচ্ছাজীৰেহি ৰিরমণৰসেন চ চিত্তস্স পৰত্তিকালেসু এৰ উপ্পজ্জিত্ৰা অঞ্ঞথানুপ্পজ্জনতো অনিযতা. তে চ যস্মা দুক্খিতসুখিতসত্তৰসেন, কাযদুচ্চরিতাদিত্তযৰসেন চ পচ্চেকং ভিন্নৰিসযত্তা একতো ন উপ্পজ্জন্তি, তস্মা করুণাপুব্বভাগাদিৰসেন পৰত্তেসু পঞ্চসু চিত্তক্খণেসু নিযতা চতুত্তিংস, করুণাদীসু ¶ একন্তি পঞ্চতিংস ধম্মা উপ্পজ্জন্তি, কেৰলং পন দানাদিৰসেন পৰত্তিযং নিযতা চতুত্তিংসেৰ উপ্পজ্জন্তীতি ৰেদিতব্বং. অযং ধম্মুদ্দেসতো ৰিনিচ্ছযো.

লক্খণাদিৰিভাগতোতি এৰং উদ্দিট্ঠানং ধম্মানং লক্খণরসাদিতো ৰিনিচ্ছযো ৰেদিতব্বো. ফুসতীতি ফস্সো. স্ৰাযং ফুসনলক্খণো, সঙ্ঘট্টনরসো, সন্নিপাতপচ্চুপট্ঠানো, আপাথগতৰিসযপদট্ঠানো. অযং হি অরূপধম্মোপি সমানো আরম্মণে ফুসনাকারেন পৰত্ততীতি ফুসনলক্খণো, সা চস্স ফুসনাকারপ্পৰত্তি অম্বিলাদিদস্সনে খেল়ুপ্পাদাদিনা ঞাতব্বা. একদেসেন পন অনল্লীযমানোপি রূপং ৰিয চক্খুং, সদ্দো ৰিয চ সোতং চিত্তমারম্মণঞ্চ সঙ্ঘট্টেতীতি সঙ্ঘট্টনরসো. তিকসন্নিপাতসঙ্খাতস্স পন অত্তনো কারণস্স ৰসেন পৰেদিতত্তা সন্নিপাতপচ্চুপট্ঠানো, ফলট্ঠেন পচ্চুপট্ঠানেন পনেস ৰেদনাপচ্চুপট্ঠানো নাম হোতি. তজ্জাসমন্নাহারেন চেৰ ¶ ইন্দ্রিযেন চ পরিক্খতে ৰিসযে অনন্তরাযেন উপ্পজ্জনতো আপাথগতৰিসযপদট্ঠানোতি ৰুচ্চতি. ৰেদনাধিট্ঠানভাৰতো পনেস নিচ্চম্মা গাৰী ৰিয দট্ঠব্বো. লক্খণাদীসু চ তেসং তেসং ধম্মানং সভাৰো ৰা সামঞ্ঞং ৰা লক্খণং নাম, কিচ্চং ৰা সম্পত্তি ৰা রসো নাম, উপট্ঠানাকারো ৰা ফলং ৰা পচ্চুপট্ঠানং নাম, আসন্নকারণং পদট্ঠানং নাম. এৰং উপরিপি সব্বত্থ লক্খণাদীনং নানত্তং ৰেদিতব্বং.

ৰেদযতীতি ৰেদনা, সা ৰেদযিতলক্খণা, সভাৰভেদতো পনেসা পঞ্চৰিধা হোতি – সুখং দুক্খং সোমনস্সং দোমনস্সং উপেক্খাতি. তত্থ ইট্ঠফোট্ঠব্বানুভৰনলক্খণং সুখং, সম্পযুত্তানং উপব্রূহনরসং, কাযিকঅস্সাদপচ্চুপট্ঠানং, কাযিন্দ্রিযপদট্ঠানং. অনিট্ঠফোট্ঠব্বানুভৰনলক্খণং দুক্খং, সম্পযুত্তানং মিলাপনরসং, কাযিকাবাধপচ্চুপট্ঠানং, কাযিন্দ্রিযপদট্ঠানং. ইট্ঠারম্মণানুভৰনলক্খণং সোমনস্সং, যথা তথা ৰা ইট্ঠাকারসম্ভোগরসং, সম্পযুত্তানং উপব্রূহনরসং ৰা, চেতসিকঅস্সাদপচ্চুপট্ঠানং, ইট্ঠাকারদস্সনপদট্ঠানং. অনিট্ঠারম্মণানুভৰনলক্খণং দোমনস্সং, যথা তথা ৰা অনিট্ঠাকারসম্ভোগরসং, সম্পযুত্তানং মিলাপনরসং ৰা, চেতসিকাবাধপচ্চুপট্ঠানং, একন্তেন হদযৰত্থুপদট্ঠানং. মজ্ঝত্তৰেদযিতলক্খণা উপেক্খা, সম্পযুত্তানং নাতিউপব্রূহনমিলাপনরসা, সন্তভাৰপচ্চুপট্ঠানা, নিপ্পীতিকচিত্তপদট্ঠানা. এত্থ চ সুখং, দুক্খঞ্চ একন্তমব্যাকতং, দোমনস্সমেকন্তমকুসলং, সোমনস্সুপেক্খা পন সিযা কুসলা, সিযা অকুসলা, সিযা অব্যাকতা. ইধ পন কুসলা সোমনস্সৰেদনা অধিপ্পেতা.

নীলাদিভেদং ¶ আরম্মণং সঞ্জানাতীতি সঞ্ঞা. সা সঞ্জাননলক্খণা, পচ্চাভিঞ্ঞাণরসা, পুনসঞ্জাননপচ্চযনিমিত্তকরণরসা ৰা দারুআদীসু তচ্ছকাদযো ৰিয, যথাগহিতনিমিত্তৰসেন ¶ অভিনিৰেসকরণপচ্চুপট্ঠানা হত্থিদস্সকঅন্ধা ৰিয, আরম্মণে অনোগাল়্হৰুত্তিতায অচিরট্ঠানপচ্চুপট্ঠানা ৰা ৰিজ্জু ৰিয, যথাউপট্ঠিতৰিসযপদট্ঠানা তিণপুরিসেসু মিগপোতকানং পুরিসাতি উপ্পন্নসঞ্ঞা ৰিয.

চেতেতীতি চেতনা, সদ্ধিং অত্তনা সম্পযুত্তধম্মে আরম্মণে অভিসন্দহতীতি অত্থো. সা চেতনাভাৰলক্খণা, আযূহনরসা, সা চ কুসলাকুসলেসু এৰ হোতি. ইতরেসু পন তংসদিসতায সংৰিদহনপচ্চুপট্ঠানা সকিচ্চপরকিচ্চসাধকা জেট্ঠসিস্সমহাৰড্ঢকিআদযো ৰিয. অচ্চাযিককম্মানুস্সরণাদীসু পনাযং সম্পযুত্তেসু উস্সাহনভাৰেন পৰত্তমানা পাকটা হোতি.

আরম্মণং চিন্তেতীতি চিত্তং, ৰিঞ্ঞাণং. ৰিত্থারতো পনস্স ৰচনত্থো চিত্তদুকে আৰি ভৰিস্সতি. তদেতং ৰিজাননলক্খণং চিত্তং, পুব্বঙ্গমরসং, নিরন্তরপ্পৰত্তিতো সন্ধানপচ্চুপট্ঠানং, নামরূপপদট্ঠানং.

ৰিতক্কেতি ঊহেতি, ৰিতক্কনমত্তমেৰ ৰা সোতি ৰিতক্কো. স্ৰাযমারম্মণে চিত্তস্স অভিরোপনলক্খণো, আহননপরিযাহননরসো, আরম্মণে চিত্তস্স আনযনপচ্চুপট্ঠানো.

আরম্মণে তেন চিত্তং ৰিচরতি, ৰিচরণমত্তমেৰ ৰা সোতি ৰিচারো. স্ৰাযমারম্মণানুমজ্জনলক্খণো, তত্থ সহজাতানুযোজনরসো, চিত্তস্স অনুপ্পবন্ধনপচ্চুপট্ঠানো. অভিনিরোপনানুমজ্জনৰসেন পনেসং যথাক্কমং ওল়ারিকসুখুমতায ঘণ্টাভিঘাতো ৰিয চেতসো পঠমাভিনিপাতো ৰিতক্কো, ঘণ্টানুরৰো ৰিয অনুপ্পবন্ধো ৰিচারো. ৰিপ্ফারৰা চেত্থ ৰিতক্কো আকাসে উপ্পতিতুকামপক্খিনো পক্খৰিক্খেপো ৰিয, সন্তৰুত্তি ৰিচারো আকাসে ¶ উপ্পতিতস্স পক্খিনো পক্খপসারণং ৰিয. সো পন নেসং ৰিসেসো পঠমদুতিযজ্ঝানেসু পাকটো হোতি. উভোপি পনেতে সম্পযুত্তধম্মপদট্ঠানা.

পিণযতীতি পীতি. সা সম্পিযাযনলক্খণা, কাযচিত্তপীণনরসা, ফরণরসা ৰা, ওদগ্যপচ্চুপট্ঠানা, সোমনস্সসহগতচিত্তপদট্ঠানা.

ৰীরানং ¶ ভাৰো, কম্মং ৰা ৰীরিযং, ৰিৰিধেন ৰা উপাযেন ঈরযিতব্বং পৰত্তযিতব্বন্তি ৰীরিযং. তঞ্চ উস্সাহলক্খণং, সহজাতানং উপত্থম্ভনরসং, অসংসীদনভাৰপচ্চুপট্ঠানং, ‘‘সংৰিগ্গো যোনিসো পদহতী’’তি (অ. নি. ৪.১১৩) ৰচনতো সংৰেগপদট্ঠানং, ৰীরিযারম্ভৰত্থুপদট্ঠানং ৰা. ইদং পন কুসলপক্খে পদট্ঠানং, অকুসলাদিপক্খে পন সাধারণৰসেন যথা তথা ৰা দুক্খৰিনোদনকামতাপদট্ঠানং, সম্পযুত্তধম্মপদট্ঠানং ৰা. তং সমারদ্ধং সব্বাসং সম্পত্তীনং মূলং হোতীতি দট্ঠব্বং.

একো অগ্গো ৰিসযো অস্সাতি একগ্গং, চিত্তং, তস্স ভাৰো একগ্গতা, চিত্তস্স একগ্গতা চিত্তেকগ্গতা, সমাধিস্সেতং নামং. সা অৰিসারণলক্খণা, সহজাতানং সম্পিণ্ডনরসা নহানীযচুণ্ণানং উদকং ৰিয, উপসমপচ্চুপট্ঠানা, ঞাণপচ্চুপট্ঠানা ৰা, সুখপদট্ঠানা, অকুসলাদিসাধারণৰসেন পনেত্থাপি পচ্চুপট্ঠানপদট্ঠানানি ৰুত্তনযেন যোজেত্ৰা ঞাতব্বানি. নিৰাতে দীপচ্চীনং ঠিতি ৰিয চেতসো ঠিতীতি দট্ঠব্বা.

এত্থ চ কিঞ্চাপি আরম্মণং ভিন্দিত্ৰা অনুপৰিসন্তা ৰিয কুসলপক্খে চত্তারো ধম্মা আরম্মণং ওগাহন্তি সদ্ধা সতি একগ্গতা পঞ্ঞাতি, তেনেৰ সদ্ধা ‘‘ওকপ্পনা’’তি ৰুত্তা, সতি চ ‘‘অপিলাপনা’’তি, একগ্গতা ‘‘অৰট্ঠিতী’’তি, পঞ্ঞা ¶ ‘‘পরিযোগাহনা’’তি চ ৰুত্তা. অকুসলপক্খে চ তযো তণ্হা দিট্ঠি অৰিজ্জাতি. তেন তে এৰ ‘‘ওঘা’’তি ৰুত্তা. তথাপি নেসং লক্খণাদিতো নানত্তম্পি সিদ্ধমেৰ. অকুসলপক্খে পন একগ্গতা উদ্ধচ্চসমাগতত্তা ‘‘ওগাহনা’’তি ন ৰুত্তা. অকুসলধম্মা হি একৰিসযে সম্পিণ্ডনকিচ্চেন সমাধিনা যুত্তাপি উদকসিত্তরজুট্ঠানং ৰিয তঙ্খণঞ্ঞেৰ ৰিকিরণসভাৰা হোন্তি. তেনেৰ হেত্থ উপচারপ্পনাপ্পত্তি ন হোতি, কুসলধম্মা পন যস্মা উদকং আসিঞ্চিত্ৰা আসিঞ্চিত্ৰা আকোটনমজ্জনাদীনি কত্ৰা উপলিত্তট্ঠানং ৰিয সকলম্পি দিৰসং নিচ্চলপৰত্তনসমত্থাতি উপচারপ্পনাপ্পত্তাপি হোতি, তস্মা তত্থ ওগাহনাতি ৰুত্তাতি গহেতব্বং.

জীৰন্তি তেন, জীৰনমত্তং ৰা তন্তি জীৰিতং, তং সহজাতানুপালনলক্খণং, তেসং পৰত্তনরসং, তেসঞ্ঞেৰ ঠপনপচ্চুপট্ঠানং, যাপযিতব্বধম্মপদট্ঠানং. অত্তনো ঠিতিক্খণে এৰ চেতং তে ধম্মে অনুপালেতি উদকং ৰিয উপ্পলাদীনি, ন ভঙ্গক্খণে. সযং ভিজ্জমানত্তা সযং পৰত্তিতধম্মসম্বন্ধেনেৰ পৰত্ততি নিযামকো ৰিযাতি দট্ঠব্বং.

সদ্দহন্তি ¶ এতায, সযং ৰা সদ্দহতি, সদ্দহনমত্তং ৰা এসাতি সদ্ধা. সা সদ্দহনলক্খণা, ওকপ্পনলক্খণা ৰা, পসাদনরসা উদকপ্পসাদকমণি ৰিয, পক্খন্দনরসা ৰা ওঘুত্তারকৰীরপুরিসো ৰিয, অকালুসিযপচ্চুপট্ঠানা, অধিমুত্তিপচ্চুপট্ঠানা ৰা, সদ্ধেয্যৰত্থুপদট্ঠানা, সদ্ধম্মসৰনাদিসোতাপত্তিযঙ্গপদট্ঠানা ৰা, হত্থৰিত্তবীজানি ৰিয দট্ঠব্বা.

সরন্তি তায, সযং ৰা সরতি, সরণমত্তমেৰ ৰা এসাতি সতি. সা অপিলাপনলক্খণা, অসম্মোসনরসা, আরক্খপচ্চুপট্ঠানা, ৰিসযাভিমুখভাৰপচ্চুপট্ঠানা ৰা, থিরসঞ্ঞাপদট্ঠানা, কাযাদিসতিপট্ঠানপদট্ঠানা ৰা. আরম্মণে ¶ দল়্হপতিট্ঠিতত্তা পন এসিকা ৰিয, চক্খুদ্ৰারাদিরক্খণতো দোৰারিকো ৰিয চ দট্ঠব্বা.

কাযদুচ্চরিতাদীহি হিরীযতীতি হিরী, লজ্জাযেতং অধিৰচনং. তেহিযেৰ ওত্তপ্পতীতি ওত্তপ্পং, পাপতো উব্বেগস্সেতং অধিৰচনং. তত্থ পাপতো জিগুচ্ছনলক্খণা হিরী, উত্তাসলক্খণং ওত্তপ্পং. লজ্জনাকারেন পাপকানং অকরণরসা হিরী, উত্তাসাকারেন ওত্তপ্পং. অসুচিমক্খিতস্স, অগ্গিসন্তত্তস্স চ অযোগুল়স্স গহেতুং অৰিসহনং ৰিয এতেসং যথাক্কমং জিগুচ্ছনসন্তাসাকারেহি পাপাকরণং ৰেদিতব্বং. ৰুত্তাকারেনেৰ চ পাপতো সংকোচনপচ্চুপট্ঠানানি এতানি, অত্তপরগারৰপদট্ঠানানি কুলৰধূৰেসিযা ভাৰো ৰিয, লোকপালকানি চাতি দট্ঠব্বানি. উভিন্নম্পি পনেসং সমুট্ঠানং অধিপতি সভাৰো লক্খণেন চাতি মাতিকং ঠপেত্ৰা যথাক্কমং অজ্ঝত্তবহিদ্ধাসমুট্ঠানতা, অত্তলোকাধিপতিতা, লজ্জাভযসভাৰসণ্ঠিততা, সপ্পতিস্সৰৰজ্জভযদস্সাৰিতালক্খণতা চ অট্ঠসালিনিযং (ধ. স. অট্ঠ. ১ বলরাসিৰণ্ণনা) ৰিত্থারতো ৰিভত্তা, অত্থিকেহি তং তত্থেৰ গহেতব্বং.

ন লুব্ভতি এতেন, সযং ৰা ন লুব্ভতি, অলুব্ভনমত্তমেৰ ৰা তন্তি অলোভো. অদোসামোহেসুপি এসেৰ নযো. তেসু অলোভো আরম্মণে চিত্তস্স অগেধলক্খণো, অলগ্গভাৰলক্খণো ৰা কমলদলে জলবিন্দু ৰিয, অপরিগ্গহরসো মুত্তভিক্খু ৰিয, অনল্লীনভাৰপচ্চুপট্ঠানো অসুচিম্হি পতিতপুরিসো ৰিয.

অদোসো অচণ্ডিক্কলক্খণো, অৰিরোধলক্খণো ৰা অনুকূলমিত্তো ৰিয, আঘাতৰিনযনরসো, পরিল়াহৰিনযনরসো ৰা চন্দনং ৰিয, সোম্মভাৰপচ্চুপট্ঠানো পুণ্ণচন্দো ৰিয.

অমোহো ¶ ¶ যথাসভাৰপ্পটিৰেধলক্খণো, অক্খলিতপ্পটিৰেধলক্খণো ৰা কুসলিস্সাসক্খিত্তউসুপ্পটিৰেধো ৰিয, ৰিসযোভাসনরসো অনুদ্ধটো পদীপো ৰিয, অসম্মোহপচ্চুপট্ঠানো অরঞ্ঞগতসুদেসকো ৰিয. তযোপি চেতে সব্বকুসলানং মূলভূতাতি দট্ঠব্বা.

অপিচ অলোভো চেত্থ দানহেতু, অদোসো সীলহেতু, অমোহো ভাৰনাহেতু. তীহিপি চেতেহি যথাপটিপাটিযা নেক্খম্মসঞ্ঞা অব্যাপাদসঞ্ঞা অৰিহিংসাসঞ্ঞা হোন্তি, তথা অধিকঊনৰিপরীতগ্গহণানং অভাৰো, তথা পিযৰিপ্পযোগঅপ্পিযসম্পযোগইচ্ছিতালাভদুক্খানং, জাতিজরামরণদুক্খানং, পেতনিরযতিরচ্ছানগতিদুক্খানঞ্চ অভাৰো, তথা ভোগমিত্তঅত্তসম্পত্তিপচ্চযভাৰো, তথা কামসুখপরিচ্চাগঅত্তকিলমথপরিচ্চাগমজ্ঝিমপটিপত্তীনং সম্ভৰো, তথা অসুভঅপ্পমাণধাতুসঞ্ঞানং, অনিচ্চদুক্খঅনত্তসঞ্ঞানং, দিব্বব্রহ্মঅরিযৰিহারানঞ্চ সম্ভৰো হোতীতি এৰমাদীহি নযেহি তেসং ৰিত্থারো ৰেদিতব্বো.

এত্থ চ অমোহো নাম পঞ্ঞা, সা পজাননলক্খণা. ৰিঞ্ঞাণং ৰিজাননলক্খণং. সঞ্ঞা সঞ্জাননলক্খণা. কিং পনেতাসং সঞ্ঞাৰিঞ্ঞাণপঞ্ঞানং নানত্তন্তি? সঞ্জাননৰিজাননপজাননমেৰ. এতাসং হি সমানেপি জাননভাৰে সঞ্ঞায ‘‘নীলং পীত’’ন্তিআদিনা পুন সঞ্ঞুপ্পাদকমত্তেন আকারেন সঞ্জাননমত্তমেৰ হোতি, অজাতবুদ্ধিদারকস্স ৰিয চিত্তৰট্টাদিভাৰমত্তাকারেন কহাপণাদিদস্সনং, ন ততো উদ্ধং. ৰিঞ্ঞাণস্স পন যথাৰুত্তেন চ ততো ৰিসিট্ঠেন চ অনিচ্চাদিনা আকারেন জাননং হোতি, গামিকপুরিসস্স ৰিয যথাৰুত্তেন চেৰ উপভোগারহতাদিনা চ আকারেন কহাপণাদিদস্সনং, ন ততো উদ্ধং. পঞ্ঞায পন তেহি চ যথাৰুত্তেহি নানপ্পকারেহি চ ¶ মগ্গপাতুভাৰাদিহেতূহি সব্বেহি আকারেহি পজাননং হোতি, হেরঞ্ঞিকস্স ৰিয যথাৰুত্তেহি চেৰ ছেককূটঅদ্ধসারাদিসব্বেহি আকারেহি চ কহাপণাদিদস্সনং. পঞ্ঞায হি অজানিতব্বং নাম নত্থি. এৰং সঞ্জাননৰিজাননপজাননাকারেহি এতাসং নানত্তং ৰেদিতব্বং. এত্থ চ চক্খুৰিঞ্ঞাণাদীনি ৰিতক্কৰীরিযাদিসহজাতপচ্চযৰিরহতো রূপাদীসু সঞ্ঞাকিচ্চতো অধিকৰিজাননকিচ্চং কাতুং ন সক্কোন্তি, বলপরিণাযকানি ৰিয সেনঙ্গানি পঞ্ঞানুৰত্তকানেৰ হোন্তীতি ৰেদিতব্বানি. তেনাহ ভগৰা ‘‘পঞ্চহি ৰিঞ্ঞাণেহি ন কঞ্চি ধম্মং পটিৰিজানাতি অঞ্ঞত্র অভিনিপাতমত্তা’’তিআদি (ৰিভ. ৭৬৬).

কাযপস্সম্ভনং ¶ কাযপস্সদ্ধি. চিত্তপস্সম্ভনং চিত্তপস্সদ্ধি. কাযোতি পনেত্থ ৰেদনাদযো তযো খন্ধা. উভোপি পনেতা কাযচিত্তদরথৰূপসমলক্খণা, কাযচিত্তদরথনিম্মদ্দনরসা, কাযচিত্তানং অপরিপ্ফন্দসীতিভাৰপচ্চুপট্ঠানা, কাযচিত্তপদট্ঠানা. কাযচিত্তানঞ্চ অৰূপসমকরউদ্ধচ্চাদিকিলেসপটিপক্খভূতাতি দট্ঠব্বা.

কাযলহুভাৰো কাযলহুতা. চিত্তলহুভাৰো চিত্তলহুতা. এৰং উপরিপি পদত্থো দট্ঠব্বো. কাযচিত্তানং গরুভাৰৰূপসমলক্খণা কাযলহুতা, চিত্তলহুতা চ, তেসং গরুভাৰনিম্মদ্দনরসা, তেসং অদন্ধতাপচ্চুপট্ঠানা, তেসং গরুভাৰকরথিনমিদ্ধাদিকিলেসপটিপক্খভূতাতি দট্ঠব্বা.

কাযচিত্তানং থদ্ধভাৰৰূপসমলক্খণা কাযমুদুতা, চিত্তমুদুতা চ, তেসং থদ্ধভাৰনিম্মদ্দনরসা, অপ্পটিঘাতপচ্চুপট্ঠানা, কাযচিত্তপদট্ঠানা, তেসং থদ্ধভাৰকরদিট্ঠিমানাদিকিলেসপটিপক্খভূতাতি দট্ঠব্বা.

কাযচিত্তানং ¶ অকম্মঞ্ঞভাৰৰূপসমলক্খণা কাযকম্মঞ্ঞতা, চিত্তকম্মঞ্ঞতা চ, তেসং অকম্মঞ্ঞভাৰনিম্মদ্দনরসা, কাযচিত্তানং আরম্মণকরণসম্পত্তিপচ্চুপট্ঠানা, তেসং অকম্মঞ্ঞভাৰকরাৰসেসনীৰরণপটিপক্খভূতাতি দট্ঠব্বা. পসাদনীযৰত্থূসু পসাদাৰহা, হিতকিরিযাসু ৰিনিযোগক্খমভাৰাৰহা সুৰণ্ণৰিসুদ্ধি ৰিযাতি দট্ঠব্বা.

কাযচিত্তানং অগেলঞ্ঞভাৰলক্খণা কাযপাগুঞ্ঞতা, চিত্তপাগুঞ্ঞতা চ, তেসং গেলঞ্ঞনিম্মদ্দনরসা, নিরাদীনৰপচ্চুপট্ঠানা, তেসং গেলঞ্ঞকরঅস্সদ্ধিযাদিকিলেসপটিপক্খভূতাতি দট্ঠব্বা. কাযচিত্তানং অজ্জৰলক্খণা কাযুজুকতা, চিত্তুজুকতা চ, তেসং কুটিলভাৰনিম্মদ্দনরসা, অজিম্হতাপচ্চুপট্ঠানা, তেসং কুটিলভাৰকরমাযাসাঠেয্যাদিপটিপক্খভূতাতি দট্ঠব্বা. সব্বেপেতে পস্সদ্ধিআদযো ধম্মা কাযচিত্তপদট্ঠানাতি ৰেদিতব্বা.

কিং পনেত্থ পস্সদ্ধাদযো ধম্মা উদ্ধচ্চাদিং ৰিনোদেতুং ন সক্কোন্তি, যেন ইমে পস্সদ্ধাদযো ধম্মা ন ৰিসুং ৰিভত্তাতি? নো ন সক্কোন্তি, ইমে পন সহিতা এৰ সক্কোন্তি, ইতরথা তেসং উপ্পত্তিযা এৰ অসম্ভৰতো. যথা ৰা পস্সদ্ধাদীসু ৰিজ্জমানেসু মোহাহিরিকাদীনং উজুপটিপক্খভাৰেন ¶ অমোহহিরিআদযো হোন্তি, এৰমেতেপি উদ্ধচ্চাদিউজুপটিপক্খভাৰেন ইচ্ছিতব্বাতি গহেতব্বা. যস্মা চেত্থ দ্ৰীহি দ্ৰীহি এৰ যথাসকং পটিপক্খা হরিতব্বা, তস্মা তে এতে এৰ দ্ৰিধা ৰিভত্তা, ন অমোহাদযোতি ঞাতব্বা.

যেৰাপনকেসু ছন্দোতি কত্তুকামতাযেতং অধিৰচনং, তস্মা সো কত্তুকামতালক্খণো, আরম্মণপরিযেসনরসো, আরম্মণেন অত্থিকতাপচ্চুপট্ঠানো, তদেৰস্স ¶ পদট্ঠানং. আরম্মণগ্গহণে চাযং চেতসো হত্থপ্পসারণং ৰিয দট্ঠব্বো. অযঞ্চ যস্মা ৰিরজ্জিতব্বাদীসুপি নেক্খম্মাদিনা সহ লোভৰিসদিসেন কত্তুকামতাকারেন পৰত্ততি, তস্মা অসেখানম্পি উপ্পজ্জতি. লোভো পন সুভসুখাদিৰিপল্লাসপুব্বকেন অভিসঙ্গাকারেনেৰ পৰত্ততীতি অযমেতেসং ৰিসেসো. এৰং মেত্তাকরুণাদীনম্পি লোভাদীহি ৰিসেসো যথানুরূপং ঞাতব্বো.

অধিমুচ্চনং অধিমোক্খো. সো সন্নিট্ঠানলক্খণো, অসংসপ্পনরসো, নিচ্ছযপচ্চুপট্ঠানো, সন্নিট্ঠাতব্বধম্মপদট্ঠানো, আরম্মণে নিচ্চলভাৰেন ইন্দখীলো ৰিয দট্ঠব্বো. ননু চ সদ্ধাপি অধিমোক্খোতি ৰুচ্চতি. তথা হি অধিমোক্খলক্খণে ইন্দট্ঠং কারেতীতি সদ্ধিন্দ্রিযন্তি ৰুচ্চতীতি? সচ্চং, সা চ খো সম্পসাদনভাৰেন অধিমোক্খো, অযং পন যথা তথা ৰা নিচ্ছযভাৰেনাতি ন কোচি ৰিরোধো.

কিরিযা কারো, মনস্মিং কারো মনসিকারো, পুরিমমনতো ৰিসদিসং মনং করোতীতিপি মনসিকারো, স্ৰাযং আরম্মণপটিপাদকো ৰীথিপটিপাদকো জৰনপটিপাদকোতি তিপ্পকারো, তত্থ আরম্মণপটিপাদকো ইধ মনসিকারো. সো সারণলক্খণো, সম্পযুত্তানং আরম্মণেসু পযোজনরসো, আরম্মণাভিমুখভাৰপচ্চুপট্ঠানো, আরম্মণপদট্ঠানো, সঙ্খারক্খন্ধপরিযাপন্নো. আরম্মণপটিপাদকত্তেন সম্পযুত্তানং সারথি ৰিয দট্ঠব্বো. ৰীথিপটিপাদকোতি পন পঞ্চদ্ৰারাৰজ্জনস্সেতং অধিৰচনং. জৰনপটিপাদকোতি মনোদ্ৰারাৰজ্জনস্স, ন তে ইধ অধিপ্পেতা. এত্থ চাযং মনসিকারো সমন্নাহারমত্তাকারেন আরম্মণে সম্পযুত্তানং পযোজকো, চেতনা চেতোকিরিযাভাৰেন, ৰিতক্কো পন সঙ্কপ্পাকারেন, উপনিজ্ঝাযনাকারেন চ অভিনিরোপকো. তেনেৰ হেত্থ পদভাজনীযে ‘‘তক্কো ¶ সঙ্কপ্পোতি চ, ঝানঙ্গ’’ন্তি চ ৰুচ্চতীতি অযমেতেসং ৰিসেসো.

তেসু ¶ তেসু ধম্মেসু মজ্ঝত্ততা তত্রমজ্ঝত্ততা. সা চিত্তচেতসিকানং সমৰাহিতলক্খণা, ঊনাধিকতানিৰারণরসা, পক্খপাতুপচ্ছেদনরসা ৰা, মজ্ঝত্তভাৰপচ্চুপট্ঠানা, সমপ্পৰত্তসম্পযুত্তধম্মপদট্ঠানা. সম্পযুত্তধম্মানং অজ্ঝুপেক্খণেন সমপ্পৰত্তানং আজানীযানং অজ্ঝুপেক্খকসারথি ৰিয দট্ঠব্বা.

পরদুক্খে সতি সাধূনং হদযকম্পনং করোতীতি করুণা, কিরতি ৰা পরদুক্খং হিংসতি চ, কিরীযতি ৰা দুক্খিতেসু পসারীযতীতি করুণা. সা পরদুক্খাপনযনাকারপ্পৰত্তিলক্খণা, পরদুক্খাসহনরসা, অৰিহিংসাপচ্চুপট্ঠানা, দুক্খাভিভূতানং অনাথভাৰদস্সনপদট্ঠানা. মোদন্তি তায তংসমঙ্গিনো, সযং ৰা মোদতি, মোদনমত্তমেৰ ৰা তন্তি মুদিতা. সা পমোদলক্খণা, অনিস্সাযনরসা, অরতিৰিঘাতপচ্চুপট্ঠানা, সত্তানং সম্পত্তিদস্সনপদট্ঠানা.

কস্মা পনেত্থ মেত্তুপেক্খা ন ৰুত্তাতি? পুব্বে গহিতত্তা. অদোসো এৰ হি সত্তেসু হিতফরণৰসেন পৰত্তিযং মেত্তা. তত্রমজ্ঝত্ততা এৰ চ ইট্ঠানিট্ঠসত্তেসু মজ্ঝত্তাকারেন পৰত্তিযং উপেক্খা. তে চ ধম্মা নিযতা, কেৰলং পন নেসং সত্তেসু মেত্তুপেক্খাভাৰেন পৰত্তি অনিযতাতি. কাযদুচ্চরিততো ৰিরতি কাযদুচ্চরিতৰিরতি. সেসপদদ্ৰযেপি এসেৰ নযো. লক্খণাদিতো পনেতা তিস্সোপি কাযদুচ্চরিতাদিৰত্থূনং অৰীতিক্কমলক্খণা, ততো সংকোচনরসা, তেসং অকিরিযপচ্চুপট্ঠানা, সদ্ধাহিরোত্তপ্পঅপ্পিচ্ছতাদিগুণপদট্ঠানা, পাপকিরিযতো চিত্তস্স ৰিমুখভাৰভূতাতি দট্ঠব্বা. এৰং লক্খণাদিতো ৰিনিচ্ছযো ৰেদিতব্বো.

সঙ্গহাতি ¶ এৰং যে ইমে ইমস্মিং কামাৰচরপঠমকুসলে ৰিভত্তা একূনচত্তালীস ধম্মা, সব্বেতে খন্ধতো চতুব্বিধা হোন্তি – ৰেদনাক্খন্ধো সঞ্ঞাক্খন্ধো সঙ্খারক্খন্ধো ৰিঞ্ঞাণক্খন্ধোতি. তত্থ রাসট্ঠেন সোমনস্সৰেদনা ৰেদনাক্খন্ধো, তথা সঞ্ঞা সঞ্ঞাক্খন্ধো, চিত্তং ৰিঞ্ঞাণক্খন্ধো, অৰসেসা ফস্সাদযো ছত্তিংস ধম্মা সঙ্খারক্খন্ধোতি ৰেদিতব্বা.

ননু চ যদি রাসট্ঠেন খন্ধো, ফস্সাদীনং তাৰ অনেকত্তা সঙ্খারক্খন্ধতা যুত্তা, কথং পন ৰেদনাদীনং তিণ্ণং খন্ধতাতি? উপচারতো. পচ্চেকং হি অতীতাদিভেদভিন্নেসু ৰেদনাসঞ্ঞাৰিঞ্ঞাণেসু নিরুল়্হোপি খন্ধ-সদ্দো তদেকদেসেসু একেকৰেদনাদীসুপি সমুদাযোপচারেন ¶ ৰোহরীযতীতি তদেকদেসেপি তব্বোহারো, যথা রুক্খস্স সাখায ছিজ্জমানায ‘‘রুক্খো ছিজ্জতী’’তিআদীসু ৰিযাতি. এৰং খন্ধতো চতুব্বিধা হোন্তি.

তে পুন আযতনতো দুৰিধা হোন্তি – মনাযতনং ধম্মাযতনন্তি. সঞ্জাতিসমোসরণট্ঠানট্ঠেন হেত্থ চিত্তং মনাযতনং, সেসা পন অট্ঠতিংস ধম্মা ধম্মাযতনন্তি. এৰং আযতনতো দুৰিধা হোন্তি. তে পুন ধাতুৰসেন দুৰিধা মনোৰিঞ্ঞাণধাতু ধম্মধাতূতি. নিস্সত্তনিজ্জীৰট্ঠেন হেত্থ চিত্তং মনোৰিঞ্ঞাণধাতু, সেসা ধম্মধাতূতি. এৰং ধাতুৰসেন দুৰিধা.

তথা আহারানাহারৰসেন. তত্থ ফস্সো চেতনা চিত্তন্তি ইমে তযো ধম্মা ৰিসেসপচ্চযত্তেন যথাক্কমং ‘‘ফস্সাহারো মনোসঞ্চেতনাহারো ৰিঞ্ঞাণাহারো’’তি ৰুচ্চন্তি, অৰসেসা ন আহারাতি. কিং পনেতে পচ্চযা ন হোন্তি, যে ন আহারাতি ৰুচ্চেয্যুন্তি? নো ন হোন্তি, ৰিসেসপচ্চযা পন ন হোন্তি, ফস্সাদযো পন তেসং ধম্মানং ৰিসেসপচ্চযা হোন্তি, ৰিসেসতো ৰেদনাদযো ¶ চ আহরন্তি. ফস্সাহারো হি তিস্সো ৰেদনাযো আহরতি, মনোসঞ্চেতনাহারো তযো ভৰে, ৰিঞ্ঞাণাহারো পটিসন্ধিনামরূপং. ননু চ সো ৰিপাকো, ইদং পন কুসলৰিঞ্ঞাণন্তি? কিঞ্চাপি এৰং, তংসরিক্খতায পন ৰিঞ্ঞাণাহারোত্ৰেৰ ৰুত্তং. যস্মা ৰা ইমে ‘‘অরূপিনো আহারা সম্পযুত্তকানং ধম্মানং তংসমুট্ঠানানঞ্চ রূপানং আহারপচ্চযেন পচ্চযো’’তি (পট্ঠা. ১.১.১৫) ৰচনতো কবল়ীকারাহারো ৰিয রূপকাযস্স উপত্থম্ভকট্ঠেন নামকাযস্স আহারপচ্চযা হোন্তি, তস্মা ইমেৰ ‘‘আহারা’’তি ৰুত্তাতি ৰেদিতব্বং. এৰং আহারানাহারৰসেন দুৰিধা.

তথা ইন্দ্রিযানিন্দ্রিযতো. তত্থ সদ্ধা ৰীরিযং সতি একগ্গতা অমোহো চিত্তং সোমনস্সৰেদনা জীৰিতন্তি ইমে অট্ঠ ধম্মা অধিপতিযট্ঠেন যথাক্কমং ‘‘সদ্ধিন্দ্রিযং ৰীরিযিন্দ্রিযং সতিন্দ্রিযং সমাধিন্দ্রিযং পঞ্ঞিন্দ্রিযং মনিন্দ্রিযং সোমনস্সিন্দ্রিযং জীৰিতিন্দ্রিয’’ন্তি ৰুচ্চন্তি, অৰসেসা ন ‘‘ইন্দ্রিযানী’’তি. এৰং ইন্দ্রিযানিন্দ্রিযতো দুৰিধা.

তথা ঝানঙ্গাঝানঙ্গৰসেন. তত্থ ৰিতক্কো ৰিচারো পীতি সোমনস্সং একগ্গতাতি ইমে পঞ্চ ধম্মা উপনিজ্ঝাযনট্ঠেন ‘‘ঝানঙ্গানী’’তি ৰুচ্চন্তি, ইতরে ‘‘অঝানঙ্গানী’’তি. এৰং ঝানঙ্গাঝানঙ্গৰসেন দুৰিধা.

তথা ¶ মগ্গঙ্গামগ্গঙ্গৰসেন. তত্থ অমোহো ৰিতক্কো ৰিরতিত্তযং ৰীরিযং সতি একগ্গতাতি ইমে অট্ঠ ধম্মা নিয্যানট্ঠেন, ৰিমোক্খট্ঠেন চ যথাক্কমং ‘‘সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধী’’তি নামেন ‘‘মগ্গঙ্গানী’’তি ৰুচ্চন্তি, ইতরে ‘‘অমগ্গঙ্গানী’’তি. পাল়িযং পন লোকিযচিত্তে ৰিরতীনং ¶ অনিযতত্তা, যেৰাপনকত্তা চ তা ৰজ্জেত্ৰা ‘‘পঞ্চঙ্গিকো মগ্গো হোতী’’তি (ধ. স. ৫৮, ১২১) ৰুচ্চতি. এৰং মগ্গঙ্গামগ্গঙ্গৰসেন দুৰিধা.

তথা বলাবলৰসেন. তত্থ সদ্ধাৰীরিযং সতি সমাধি পঞ্ঞা হিরী ওত্তপ্পন্তি ইমে সত্ত ধম্মা অকম্পিযট্ঠেন বলানীতি ৰুচ্চন্তি, ইতরে অবলানীতি. এৰং বলাবলৰসেন দুৰিধা.

তথা হেতুনহেতুৰসেন. তত্থ অলোভো অদোসো অমোহোতি ইমে তযো ধম্মা মূলট্ঠেন হেতূতি ৰুচ্চন্তি, ইতরে নহেতূতি. এৰং হেতুনহেতুৰসেন দুৰিধা. এৰং ফস্সাফস্সৰেদনাৰেদনা সঞ্ঞাসঞ্ঞাচিত্তাচিত্তাদিৰসেনপি ৰুত্তনযানুসারেন যথাযোগং সঙ্গহৰিভাগো ৰেদিতব্বো. অযমেত্থ সঙ্খেপো, ৰিত্থারো পন পদভাজনীযসঙ্গহৰারে (ধ. স. ১০৩ আদযো), তদট্ঠকথাযঞ্চ (ধ. স. অট্ঠ. ৫৮-১২০) গহেতব্বো. এৰং সঙ্গহতো ৰিনিচ্ছযো ৰেদিতব্বো.

সুঞ্ঞতো চেৰাতি এৰং খন্ধাদীহি সঙ্গহিতেসু তেসু ধম্মেসু তব্বিনিমুত্তো কারকৰেদকাদিসভাৰো অত্তা ৰা সস্সতো ৰা ভাৰো ন উপলব্ভতি. সুঞ্ঞা তে ধম্মা অত্তেন ৰা অত্তনিযেন ৰা, কেৰলং পটিচ্চসমুপ্পন্না, সলক্খণধারণতো ধম্মমত্তা, নিচ্চসুখাদিসারৰিরহতো অসারা, পৰত্তকনিযামকাভাৰতো অপরিণাযকা অনিচ্চা, দুক্খা, অনত্তা, অনত্তনিযা চ হুত্ৰা পৰত্তন্তীতি অযমেত্থ সঙ্খেপো, ৰিত্থারো পন পদভাজনীযসুঞ্ঞতৰারে, তদট্ঠকথাযঞ্চ গহেতব্বোতি. এৰং সুঞ্ঞতো ৰিনিচ্ছযো ৰেদিতব্বো.

নিট্ঠিতা পঠমকুসলস্স অত্থৰণ্ণনা.

দুতিযাদীসুপি ¶ পঠমকুসলে ৰুত্তনযেন ধম্মুদ্দেসাদিনা সব্বো ৰিনিচ্ছযো ৰেদিতব্বো. ন কেৰলঞ্চ এত্থেৰ, ইতো পরেসুপি সব্বত্থ হেট্ঠা ৰুত্তসদিসানং পদানং, ধম্মানঞ্চ অত্থো, সব্বো চ ৰিনিচ্ছযো ¶ এত্থ ৰুত্তনযেনেৰ ৰেদিতব্বো. ইতো পরং পন অপুব্বমেৰ ৰণ্ণযিস্সাম. দুতিযচিত্তে তাৰ সসঙ্খারভাৰমত্তমেৰ পঠমচিত্ততো ৰিসেসো, সেসং তাদিসমেৰ. দুতিযকুসলং.

ততিযেপি ধম্মুদ্দেসে অমোহাভাৰা ইন্দ্রিযমগ্গঙ্গবলমূলসঙ্গহেসু পঞ্ঞিন্দ্রিযসম্মাদিট্ঠিমগ্গঙ্গপঞ্ঞাবলঅমোহমূলানং পরিহানিযা সদ্ধিন্দ্রিযাদীনং ভাৰোৰ ৰিসেসো, সেসং তাদিসমেৰ. তথা চতুত্থে সসঙ্খারভাৰমত্তমেৰ ৰিসেসো. ততিযচতুত্থানি.

পঞ্চমছট্ঠসত্তমট্ঠমেসু পন সুখসোমনস্সট্ঠানেসু উপেক্খাভাৰো, পীতিযা চ অভাৰো. তেনেৰ ঝানঙ্গসঙ্গহৰারে চতুরঙ্গজ্ঝানতাৰ ৰিসেসো, সেসং পঠমদুতিযততিযচতুত্থচিত্তসদিসমেৰ. উপেক্খাসহগতেসু চেত্থ চতূসু করুণামুদিতা ন উপ্পজ্জন্তীতি কেচি ৰদন্তি, পরিকম্মভূতানং পনেত্থ তাসং উপ্পত্তিযা মহাঅট্ঠকথাযং অনুঞ্ঞাতত্তা উপচারপ্পত্তা পন উপ্পজ্জন্তি, ন ইতরাতি গহেতব্বং. পঞ্চমছট্ঠসত্তমট্ঠমানি.

ৰিসযাদিপ্পভেদতোতি এৰং ধম্মুদ্দেসাদিনা ৰিভত্তানি অট্ঠ কামাৰচরকুসলানি আরম্মণৰিভাগতো পচ্চেকং ছব্বিধানি হোন্তি রূপারম্মণং…পে… ধম্মারম্মণন্তি. তত্থ নীলাদিভেদভিন্না, অতীতানাগতপচ্চুপ্পন্নঅজ্ঝত্তিকবাহিরওল়ারিকসুখুমাদিভেদভিন্না চ ৰণ্ণধাতু রূপারম্মণং নাম. এৰং সদ্দারম্মণাদীসুপি যথানুরূপং ভেদো ৰেদিতব্বো.

এত্থ ¶ চ ফোট্ঠব্বন্তি আপোধাতুৰজ্জিতভূতত্তযং, ধম্মারম্মণন্তি পঞ্চারম্মণানি ৰজ্জেত্ৰা অৰসেসা রূপারূপপঞ্ঞত্তিযো ৰেদিতব্বা, সেসং তাদিসমেৰ. কেচি পনেত্থ ‘‘চক্খুৰিঞ্ঞাণাদীনমাপাথগতানি এতানারম্মণানি রূপারম্মণাদিৰোহারং লভন্তি, অনাপাথগতানি পন অতীতানাগতদূরসুখুমাদিভেদভিন্নানি ধম্মারম্মণানেৰা’’তি ৰদন্তি, তং ন যুত্তং দিব্বচক্খাদীনং রূপারম্মণতাদিৰচনতো.

অনাপাথগতা এৰ হি তানি দিব্বচক্খুআদীনং আরম্মণং, ন চ তানি ধম্মারম্মণানি. রূপাদযো হি পঞ্চ পচ্চেকং দ্ৰীসু দ্ৰীসু দ্ৰারেসু একস্মিং খণে আপাথমাগন্ত্ৰা তংতংদ্ৰারিকজৰনানং, তদনন্তরে মনোদ্ৰারিকানঞ্চ অপরভাগে চ দিট্ঠসুতাদিৰসেনানুস্সরন্তস্স সুদ্ধমনোদ্ৰারিকানঞ্চ আরম্মণানি হোন্তি. তথা হি নানাৰণ্ণৰিচিত্তচেতিযাদিদস্সনং করোন্তস্স, ধম্মং ¶ সুণন্তস্স, ভেরিসদ্দাদীহি ৰা পূজাদিং করোন্তস্স চ গন্ধমালাদীনি ঘাযিত্ৰা, খাদনীযভোজনীযাদিঞ্চ সাযিত্ৰা, সুখসম্ফস্সানি অত্থরণপাৰুরণাদীনি চ ফুসিত্ৰা মনাপভাৰং ঞত্ৰা তেহি চেতিযপূজং করোন্তস্স, তত্থ তত্থ অকুসলং ৰা উপ্পাদেন্তস্স, তস্মিং তস্মিং খণে গয্হমানানি রূপাদিপঞ্চারম্মণানি সাখায অক্কমনং, পথৰিযং ছাযাফরণঞ্চ একক্খণে কুরুমানং রুক্খগ্গে নিলীযমানং পক্খিনো সরীরং ৰিয যথাসকং পসাদঞ্চ ঘট্টেত্ৰা তস্মিংযেৰ খণে ভৰঙ্গচলনপচ্চযভাৰেন মনোদ্ৰারেপি আপাথমাগন্ত্ৰা ততো ভৰঙ্গং ৰিচ্ছিন্দিত্ৰা উপ্পন্নানং আৰজ্জনাদিৰোট্ঠব্বনপরিযোসানানং, ৰীথিচিত্তানং, তদনন্তরানঞ্চ কুসলাকুসলাদিজৰনানং আরম্মণং হুত্ৰা তদনন্তরাসু মনোদ্ৰারৰীথীসু চ অপরভাগে তথারূপং পচ্চযং আগম্ম অত্তনা পূজাদিকরণকালেসু, দিট্ঠসুতঘাযিতসাযিতফুট্ঠৰসেনানুস্সরন্তস্স, পচ্চক্খতো অনুভুয্যমানানি ৰিয মনোদ্ৰারে চ আরম্মণানি হোন্তি.

অথাপি ¶ পঞ্চহি দ্ৰারেহি অগহিতপুব্বানি বুদ্ধরূপাদীনি, দিব্বরূপাদীনি চ পঞ্চারম্মণানি সৰনৰসেন সল্লক্খেত্ৰা জৰনক্খণে ৰা অপরভাগে সুতৰসেনেৰ অনুস্সরিত্ৰা ৰা পসাদং, কম্মফলসদ্ধাদিং, লোভাদিঞ্চ উপ্পাদেন্তস্সাপি মনোদ্ৰারে আপাথমাগচ্ছন্তি. অভিঞ্ঞানং পন সুদ্ধমনোদ্ৰারে এৰ, তস্মা এৰং পঞ্চদ্ৰারে, মনোদ্ৰারে, সুদ্ধমনোদ্ৰারে চ আপাথগতানি অতীতাদিভেদভিন্নানি সব্বানিপি পঞ্চারম্মণানি কদাচিপি ধম্মারম্মণং ন হোন্তি, তদিতরা নামরূপপঞ্ঞত্তিযো ধম্মারম্মণন্তি গহেতব্বং. ননু চেতানি ইট্ঠকন্তমনাপানি আরম্মণানি লোভস্স ৰত্থু, কথমেত্থ কুসলং উপ্পজ্জতীতি? নিযমাদিকারণতো. চিত্তং হি ‘‘কুসলমেৰ মযা কত্তব্ব’’ন্তি পুব্বে নিযমিতৰসেন সব্বত্থ অকুসলপ্পৰত্তিং নিৰত্তেত্ৰা কুসলে পরিণামনৰসেন চ অভিণ্হং আসেৰিতকুসলসমুদাচারৰসেন চ সপ্পুরিসূপনিস্সযাদিউপনিস্সযৰসেন চ যোনিসোআভুজিতৰসেন চাতি ইমেহি কারণেহি কুসলং হুত্ৰা উপ্পজ্জতীতি ৰেদিতব্বং. এৰমিমেসু ছসু আরম্মণেসু উপ্পজ্জনতো পচ্চেকং ছব্বিধানি হোন্তি. আরম্মণৰৰত্থানকথা.

এৰং আরম্মণভেদভিন্নেসু রূপারম্মণং তাৰ কুসলং দসপুঞ্ঞকিরিযৰত্থুৰসেন দসৰিধং হোতি. তত্থ একেকং পন কাযকম্মং ৰচীকম্মং মনোকম্মন্তি তিৰিধং. তত্থ কাযদ্ৰারে পৰত্তং কাযকম্মং, ৰচীদ্ৰারে পৰত্তং ৰচীকম্মং, মনোদ্ৰারে পৰত্তং মনোকম্মং. তত্থ কাযদ্ৰারন্তি কাযৰিঞ্ঞত্তি. ৰচীদ্ৰারন্তি ৰচীৰিঞ্ঞত্তি. তাসং ৰিভাগো রূপৰিভত্তিযং আৰি ভৰিস্সতি. মনোদ্ৰারন্তি ¶ সব্বং চেতনাসম্পযুত্তং চিত্তং ৰুচ্চতি, ৰিসেসতো কুসলাকুসলং. তং হি সহজাতানং চেতনানং, কাযঙ্গৰাচঙ্গচোপনং অসম্পাপুণিত্ৰা পৰত্তানং সুদ্ধমনোকম্মানং পৰত্তিওকাসদানতো দ্ৰারন্তি ৰুচ্চতি, ইমেসু পন তীসু ¶ দ্ৰারেসু পৰত্তা চেতনা কাযকম্মাদযো নাম. অপিচ পাণাতিপাতাদযো, পাণাতিপাতাৰেরমণিআদযো চ কাযকম্মং নাম, মুসাৰাদাদযো, মুসাৰাদাৰেরমণিআদযো চ ৰচীকম্মং নাম, অভিজ্ঝাদযো, অনভিজ্ঝাদযো চ মনোকম্মং নাম.

কুসলপক্খে পন দানাদিদসপুঞ্ঞকিরিযৰত্থূনি চ যথারহং কাযৰচীমনোকম্মানি হোন্তি. এৰং যেভুয্যৰুত্তিতো চেস কাযকম্মাদিভাৰো ৰুত্তো পাণাতিপাতাদীনম্পি ৰচীদ্ৰারাদীসু পৰত্তিতো কেসঞ্চি পুরিসানং ৰনচরকাদিভাৰো ৰিয, দ্ৰারানঞ্চ কাযকম্মদ্ৰারাদিভাৰো কেসঞ্চি গামানং ব্রাহ্মণগামাদিভাৰো ৰিয. অকুসলে তাৰ এত্থ পাণাতিপাতাদিকাযকম্মং কাযদ্ৰারে, ৰচীদ্ৰারে চ যথারহং সমুট্ঠাতি, নো মনোদ্ৰারে. তথা মুসাৰাদাদিৰচীকম্মং. পাণাতিপাতাদিনিপ্ফাদনত্থং হি মনোদ্ৰারে এৰ চিন্তেন্তস্স চেতনাব্যাপাদাদীসু কম্মপথপ্পত্তেসু ৰা কম্মপথং অপ্পত্তেসু ৰা মনোকম্মেসু এৰ পৰিসনতো কাযকম্মাদিভাৰং ন পাপুণাতি. ননু ৰিজ্জামযেনাপি কেৰলং মনোকম্মেন পাণাতিপাতাদিং করোন্তীতি? ন অলোণভোজনদব্ভসযনমন্তপরিজপ্পনাদিকাযৰচীপযোগং ৰিনা তস্সাসিজ্ঝনতো. অভিজ্ঝাদিমনোকম্মং পন তীসুপি দ্ৰারেসু সমুট্ঠাতি. অভিজ্ঝায হি কাযেন পরভণ্ডগ্গাহাদীনং, ব্যাপাদেন দণ্ডপরামসনাদীনং, মিচ্ছাদিট্ঠিযা তিত্থিযৰন্দনাদীনং করণকালে, ৰাচায পরসম্পত্তিপত্থনায ‘‘হঞ্ঞন্তু বজ্ঝন্তূ’’তি অনত্থপত্থনায চ তিত্থিযত্থুতিতদত্থদীপনাদীনঞ্চ যথাক্কমং পৰত্তিকালে চ তস্স মনোকম্মস্স কাযৰাচাসু পৰত্তি ৰেদিতব্বা.

কামাৰচরকুসলং পন পাণাতিপাতাৰেরমণিআদিকং কাযৰচীমনোকম্মং পচ্চেকং দ্ৰারত্তযেপি পৰত্ততি. তত্থ পাণাতিপাতাদীহি ¶ সম্ফপ্পলাপপরিযোসানেহি সত্তহি ৰিরমন্তস্স তাৰ হত্থমুদ্দায, ৰচীভেদেন চ সমাদিযনকালে, মনসা ৰিরমণকালে চ তেসং কাযৰচীকম্মানং তীসু দ্ৰারেসু পৰত্তি ৰেদিতব্বা. অনভিজ্ঝাদীহি সহগতেন চেতসা তজ্জস্স কাযপযোগস্স, ‘‘পরৰিত্তুপকরণং চিরট্ঠিতিকং হোতু, সব্বে সত্তা অৰেরা হোন্তু, সো ভগৰা অরহং সম্মাসম্বুদ্ধো’’তিআদিনা ৰচীপযোগস্স, কেৰলং মনোপযোগস্স চ করণকালে মনোকম্মস্স তীসুপি দ্ৰারেসু পৰত্তি ৰেদিতব্বা. এত্থ চ পঞ্চদ্ৰারে উপ্পন্নানি জৰনানি কাযৰচীকম্মানি ¶ ন হোন্তি, মনোকম্মানি এৰ. তানি চ ন কম্মপথপ্পত্তানি, কেৰলং কুসলাদীনি হোন্তি. মনোদ্ৰারে পটুতরপ্পৰত্তানি এৰ হি কম্মপথপ্পত্তানি মনোকম্মানি হোন্তি, রূপারূপজৰনানি পন একন্তং ভাৰনামযং মনোকম্মমেৰ মনোদ্ৰারে এৰ চ পৰত্তন্তি.

কিঞ্চাপি অভিঞ্ঞাঞাণানি ৰিঞ্ঞত্তিদ্ৰযজনকানি, তথাপি কাযৰচীকম্মৰোহারং ন লভন্তি, লোকুত্তরকুসলং পন কাযৰচীদ্ৰারেসু অনুপ্পজ্জমানম্পি মিচ্ছাৰাচাকম্মন্তাজীৰানং সমুচ্ছেদপ্পহানকারীনং ৰিরতীনং ৰসেন কাযৰচীকম্মম্পি হোতি, তদিতরমগ্গঙ্গৰসেন মনোকম্মম্পীতি একক্খণে তীণিপি কম্মানি হোন্তি, তঞ্চ ভাৰনামযং, দ্ৰারং পনস্স মনোদ্ৰারমেৰ. যথা চ পাণাতিপাতাৰেরমণিযাদীনং ৰসেন কুসলস্স দ্ৰারত্তযে পৰত্তি ৰুত্তা, এৰং দসপুঞ্ঞকিরিযৰত্থূনম্পি ৰসেন ৰত্তব্বা. অট্ঠকথাসু পন ন ৰিচারিতা, তথাপি নযতো এৰং ৰেদিতব্বা.

তেসু দানং কাযকম্মমেৰ, ৰচীকম্মম্পি ৰা. পত্তানুপ্পদানং, অব্ভনুমোদনং, দেসনা ৰচীকম্মমেৰ. সীলং অপচিতিসহগতং, ৰেয্যাৰচ্চসহগতঞ্চ কাযকম্মম্পি অত্থি, ৰচীকম্মম্পি অত্থি. তত্থ সীলস্স কাযৰচীকম্মভাৰো সিদ্ধো এৰ. অপচিতিযা পন ¶ পুপ্ফপূজাদিনা, ৰন্দনাদিনা ৰা পৰত্তিকালে কাযকম্মভাৰো, থুতিমযপূজাদিনা পৰত্তিকালে ৰচীকম্মভাৰো চ ৰেদিতব্বো. ৰেয্যাৰচ্চস্সাপি সহত্থা করণকালে কাযকম্মভাৰো, গিলানাদীনং চতুপচ্চযসমাদাপনাদিৰসেন, গরূহি আণত্তসদ্দেন আরোচনপক্কোসনাদিৰসেন ৰচীকম্মভাৰো চ ৰেদিতব্বো. ভাৰনা, সৰনং, দিট্ঠিজুকম্মঞ্চ মনোকম্মমেৰ, অব্ভনুমোদনম্পীতি কেচি. সৰনম্পি হি সোতদ্ৰারানুসারেন মনোদ্ৰারে এৰ ধম্মত্থসল্লক্খণৰসেন পৰত্তিকালে মনোকম্মমেৰ.

তত্থ দানং অপচিতি ৰেয্যাৰচ্চং পত্তানুপ্পদানং দেসনাতি ইমানি পঞ্চ কাযৰচীদ্ৰারেসু এৰ পৰত্তন্তি, ন মনোদ্ৰারে. এত্থ চ পত্তানুপ্পদানদেসনানং কাযৰিকারেন পত্তিং দেন্তস্স, ধম্মং দেসেন্তস্স চ কাযদ্ৰারেপি পৰত্তি ৰেদিতব্বা. সীলং ভাৰনা অব্ভনুমোদনং সৰনং দিট্ঠিজুকম্মন্তি ইমানি পন পঞ্চ তীসুপি দ্ৰারেসু পৰত্তন্তি, ‘‘ন পুনেৰং করিস্সামী’’তি চেত্থ মনসাৰ দুচ্চরিততো ৰিরমন্তস্স, অব্ভনুমোদন্তস্স চ ৰসেন সীলব্ভনুমোদনানং মনোদ্ৰারেপি পৰত্তি ৰেদিতব্বা. যং পন অট্ঠসালিনিযং ‘‘দানমযং কাযৰচীমনোকম্মৰসেন তিৰিধং ¶ হোতী’’তিআদি ৰুত্তং, তং পুব্বচেতনাৰসেন মনোদ্ৰারে পৰত্তং গহেত্ৰা পরিযাযতো ৰুত্তং, নিপ্পরিযাযতো কাযৰচীদ্ৰারপ্পৰত্তা সন্নিট্ঠানচেতনাৰ. তেনেৰ হি তত্থেৰ ৰুত্তং ‘‘ৰিনযপরিযাযং পত্ৰা হি ‘দস্সামি করিস্সামী’তি ৰাচা ভিন্না হোতীতি. ইমিনা লক্খণেন দানং নাম হোতি, অভিধম্মপরিযাযং পত্ৰা পন ৰিজ্জমানকৰত্থুং আরব্ভ মনসা চিন্তিতকালতো পট্ঠায কুসলং হোতি. অপরভাগে কাযেন ৰা ৰাচায ৰা কত্তব্বং করিস্সতী’’তি (ধ. স. অট্ঠ. ১). ইতরথা ‘‘দস্সামী’’তি চিন্তিতমত্তেনাপি দানং ¶ নাম ভৰেয্য, তথা চ তাদিসং ৰত্থুং যথাচিন্তিতনিযামেন অদেন্তস্স ধুরনিক্খেপে অদিন্নাদানম্পি সিযা. এৰং মনসা পাণাতিপাতাদযোপি সিযুং, তঞ্চ ন যুত্তং, তস্মা ৰুত্তনযেনেৰ গহেতব্বং. অথ ৰা ‘‘সব্বং সাপতেয্যং দিন্নঞ্ঞেৰ হরতূ’’তি পরিচ্চজনসম্ভৰতো দানস্স মনোদ্ৰারেপি পৰত্তি ৰেদিতব্বা.

এত্থ চ দানসীলাদিকাযকম্মানং কাযদ্ৰারে পৰত্তিযং কম্মং কাযকম্মমেৰ, দ্ৰারম্পি কাযদ্ৰারমেৰ. ৰচীদ্ৰারে পৰত্তিযং কম্মং কাযকম্মমেৰ, দ্ৰারং পন ৰচীদ্ৰারং. মনোদ্ৰারে পৰত্তিযম্পি কম্মং কাযকম্মং, দ্ৰারং পন মনোদ্ৰারং. দেসনাব্ভনুমোদনাদীনং ৰচীকম্মানং ৰচীদ্ৰারে পৰত্তিযং কম্মম্পি ৰচীকম্মং, দ্ৰারম্পি ৰচীদ্ৰারমেৰ. কাযদ্ৰারে পৰত্তিযম্পি কম্মং ৰচীকম্মমেৰ, দ্ৰারং পন কাযদ্ৰারং. মনোদ্ৰারে পৰত্তিযম্পি কম্মং ৰচীকম্মং, দ্ৰারং পন মনোদ্ৰারং. ভাৰনাদিমনোকম্মানং মনোদ্ৰারে পৰত্তিযং কম্মম্পি মনোকম্মং, দ্ৰারম্পি মনোদ্ৰারমেৰ. কাযদ্ৰারে পৰত্তিযম্পি কম্মং মনোকম্মমেৰ, দ্ৰারং পন কাযদ্ৰারং. ৰচীদ্ৰারে পৰত্তিযম্পি কম্মং মনোকম্মমেৰ, দ্ৰারং পন ৰচীদ্ৰারং. এৰং পাণাতিপাতাদীনং, পাণাতিপাতাৰেরমণিআদীনঞ্চ ৰুত্তানুসারেন কম্মৰৰত্থানং, দ্ৰারৰৰত্থানঞ্চ যথানুরূপং যোজেত্ৰা অসঙ্করতো ঞাতব্বং.

দ্ৰারকম্মৰৰত্থানকথা নিট্ঠিতা.

ইদানি যস্মা দসৰিধানি চেতানি পুঞ্ঞকিরিযৰত্থূনি তীসু এৰং সঙ্গয্হন্তি দানমযে সীলমযে ভাৰনামযেতি. পত্তানুপ্পদানং হি দানমযে সঙ্গয্হতি, ‘‘অব্ভনুমোদনম্পী’’তি (ধ. স. অট্ঠ. ১৫৬-১৫৯ পুঞ্ঞকিরিযৰত্থাদিকথা) অট্ঠকথাযং. অপচিতিৰেয্যাৰচ্চানি সীলমযে. দেসনাসৰনদিট্ঠিজুকম্মানি ভাৰনামযে, তস্মা রূপারম্মণস্স কুসলস্স ¶ দানসীলভাৰনাৰসেন দ্ৰারত্তযপ্পৰত্তিং যোজেত্ৰা দস্সেস্সাম. তদনুসারেনেৰ ইতরেসং ৰসেনাপি সক্কা ঞাতুন্তি. কুসলং হি ৰণ্ণারম্মণং হুত্ৰা উপ্পজ্জমানং দানসীলভাৰনাৰসেনেৰ তীসু দ্ৰারেসু ¶ পৰত্ততি. কথং? যদা হি নীলপীতাদিৰণ্ণৰিচিত্তং পুপ্ফৰত্থাদিদেয্যধম্মং লভিত্ৰা ‘‘ৰণ্ণদানং মে ভৰিস্সতী’’তি ৰণ্ণৰসেন আভুজিত্ৰা চেতিযাদীসু সহত্থেন পূজেতি, তদা রূপারম্মণং দানমযং কাযদ্ৰারে পৰত্ততি, তঞ্চ পুব্বচেতনা সন্নিট্ঠানচেতনা অপরচেতনাতি তিৰিধং হোতি. এৰং উপরিপি সব্বৰারেসু তিৰিধতা ৰেদিতব্বা. যদা পন তদেৰ যথাৰুত্তৰত্থুং ৰাচায আণাপেত্ৰা পুত্তদারাদীহি দাপেতি, তদারূপারম্মণং দানমযং ৰচীদ্ৰারে পৰত্ততি. যদা পন তদেৰ ৰিজ্জমানকৰত্থুং ‘‘দস্সামী’’তি চিন্তেতি, পচ্চাসীসতি, যথাধিপ্পাযং নিপ্ফাদেস্সতি, তদা পুব্বচেতনাৰসেন পরিযাযতো দানমযং মনোদ্ৰারে পৰত্ততি নাম. এৰং রূপারম্মণং দানমযং দ্ৰারৰসেন তিৰিধং হোতি.

যদা পন ৰুত্তপ্পকারৰণ্ণং দেয্যধম্মং লভিত্ৰা ‘‘এৰং মনাপৰণ্ণানং পরিচ্চজনং নাম ময্হং কুলৰংসাগতৰত্তমেত’’ন্তি সহত্থা পূজেতি, তাদিসৰণ্ণৰন্তং ৰা পরপরিগ্গহিতাদিভোগসম্পত্তিং পরিচ্চজিত্ৰা সীলং রক্খতি, তদা রূপারম্মণং সীলং কাযদ্ৰারে চ পৰত্ততি. যদা পন ৰুত্তপ্পকারৰণ্ণং দেয্যধম্মং কুলৰংসাদিৰসেন ৰাচায আণাপেত্ৰা পরেহি দাপেতি, তাদিসং ৰা পরপরিগ্গহিতাদিং ৰাচায অপনেত্ৰা সীলং রক্খতি, তদা রূপারম্মণং সীলং ৰচীদ্ৰারে পৰত্ততি. যদা পন তাদিসং ৰিজ্জমানকৰত্থুং কুলৰংসাদিৰসেন ‘‘দস্সামী’’তি, তাদিসং পরপরিগ্গহিতাদিকং অনামসিত্ৰা ‘‘সীলং রক্খিস্সামী’’তি ৰা চিন্তেতি, তদা রূপারম্মণং সীলং মনোদ্ৰারে পৰত্ততি. এৰং রূপারম্মণং সীলমযং দ্ৰারৰসেন তিৰিধং হোতি.

যদা ¶ পন ৰুত্তপ্পকারং ৰণ্ণৰন্তং দত্ৰা তদেৰ ৰণ্ণং, সব্বং ৰা রূপাযতনং চঙ্কমন্তো অনিচ্চাদিতো ৰিপস্সতি, তদা রূপারম্মণং ভাৰনামযং কাযদ্ৰারে পৰত্ততি. তদেৰ ৰচীভেদং কত্ৰা সম্মসন্তস্স রূপারম্মণং ভাৰনামযং ৰচীদ্ৰারে পৰত্ততি. তদেৰ কাযঙ্গৰাচঙ্গং অচোপেত্ৰা সম্মসন্তস্স রূপারম্মণং ভাৰনামযং মনোদ্ৰারে পৰত্ততি. এৰং রূপারম্মণং ভাৰনামযং দ্ৰারৰসেন তিৰিধং হোতি. ইতি রূপারম্মণস্স কুসলস্স তিৰিধপুঞ্ঞকিরিযৰত্থুৰসেন নৰসু কম্মদ্ৰারেসু পৰত্তিৰিভাগো ৰেদিতব্বো. ইমিনাৰ নযেন রূপারম্মণস্স কুসলস্স দসপুঞ্ঞকিরিযৰত্থুৰসেনাপি তিংসায কম্মদ্ৰারেসু পৰত্তিৰিভাগো যোজেত্ৰা ঞাতব্বো. যথা চ রূপারম্মণস্স, এৰং সদ্দারম্মণাদীনম্পি পঞ্চন্নং কুসলানং পুঞ্ঞকিরিযৰত্থুদ্ৰারেহি ৰিভাগো, যোজনানযো চ যথানুরূপং ঞাতব্বো.

অপিচ ¶ সদ্দং নাম কন্দমূলং ৰিয হত্থেন গহেত্ৰা দাতুং ন সক্কা. যদা পন ‘‘সদ্দদানং মে’’তি আভুজিত্ৰা ভেরিআদিতূরিযে তিণ্ণং রতনানং দেতি, তেহি উপহারং ৰা করোতি, ধম্মকথিকাদীনং সরভেসজ্জাদিং দেতি, ধম্মস্সৰনং ঘোসেতি, সরভঞ্ঞধম্মকথাদিং ৰা করোতি, তদা কুসলং সদ্দারম্মণং হোতি. এৰং গন্ধাদিৰত্থুপরিচ্চাগেপি গন্ধাদিআরম্মণং. ধম্মারম্মণং পন ওজাজীৰিতিন্দ্রিযতদাযত্তানং ৰসেন ঞাতব্বং. যদা হি ওজৰন্তানি অন্নপানসপ্পিনৰনীতাদীনি ‘‘ওজদানং মে ভৰিস্সতী’’তি দেতি, গিলানানং ভেসজ্জং ৰা ৰেজ্জং ৰা উপনেত্ৰা, পাণোপরোধকং আৰুধজালকুমিনাদিং ৰিনাসেত্ৰা ৰা, ৰজ্ঝপ্পত্তে পাণিনো মোচেত্ৰা ৰা ‘‘জীৰিতদানং মে ভৰিস্সতি জীৰিতাযত্তৰুত্তিতায, পঞ্চপসাদসোল়সসুখুমরূপচিত্তচেতসিকানং ৰসেন পসাদাদিদানং মে ভৰিস্সতী’’তি চ মনসি করোতি, তদা কুসলং ধম্মারম্মণং হোতি. সেসং তাদিসমেৰ.

অযং ¶ নানাৰত্থূসু ঠিতারম্মণানং যোজনা. একৰত্থুস্মিম্পি ছারম্মণং লব্ভতেৰ. পিণ্ডপাতস্মিং হি মনাপো ৰণ্ণো, খাদনকালে মুরুমুরাযনসদ্দো, গন্ধো, রসো, ফোট্ঠব্বং, ওজা, তদাযত্তা ৰা জীৰিতপসাদাদযো, তব্বিসযানি চ ৰিঞ্ঞাণাদীনীতি ছারম্মণম্পি ৰেদিতব্বং. এৰং চীৰরাদীসু চেৰ ৰত্থাদীসু চ যথানুরূপং ঞাতব্বং. এত্থপি দানসীলভাৰনামযতা, কাযৰচীমনোকম্মভাৰো চ ৰুত্তনযেনেৰ ৰেদিতব্বো. যথা চ কুসলানং, এৰং অকুসলানম্পি আরম্মণকম্মদ্ৰারৰৰত্থানং, অপুঞ্ঞকিরিযৰত্থূসু যোজনানযো চ ৰুত্তানুসারেন যথাযোগং ঞাতব্বো.

এৰং আরম্মণতো, পুঞ্ঞকিরিযৰত্থুতো, কম্মতো, দ্ৰারতো চ অনেকসহস্সপ্পভেদেসু চেতেসু কুসলেসু উপড্ঢানি পন ঞাণসম্পযুত্তানি চতুন্নং অধিপতীনং ৰসেন পচ্চেকং চতুব্বিধানি, ঞাণৰিপ্পযুত্তানি পন উপড্ঢানি ৰীমংসাধিপতিৰজ্জিতাধিপতিত্তযৰসেন পচ্চেকং তিৰিধানি, তদুভযানি পুন হীনত্তিকৰসেন পচ্চেকং তিৰিধানি, তানি পুন অপরিমাণেসু পন চক্কৰাল়েসু পচ্চেকং অপরিমাণেসু সত্তেসু একেকস্মিং অতীতানাগতপচ্চুপ্পন্নওল়ারিকসুখুমতাদীহি অনন্তেহি পকারেহি উপ্পজ্জনতো অনন্তাপরিমাণানি হোন্তি. তানি সব্বানি সম্বুদ্ধো অনন্তেন বুদ্ধঞাণেন মহাতুলায তুলযমানো ৰিয, মহাতুম্বে পক্খিপিত্ৰা মিনযমানো ৰিয সব্বাকারতো পরিচ্ছিন্দিত্ৰা মহাকরুণায কামাৰচরট্ঠেন সরিক্খতায একত্তং উপনেত্ৰা, পুন সোমনস্সুপেক্খাসহগতট্ঠেন, ঞাণসম্পযুত্তৰিপ্পযুত্তট্ঠেন, অসঙ্খারিকসসঙ্খারিকট্ঠেন ¶ চ কোট্ঠাসে কত্ৰা দেসেসি, যথা তং লোকৰিদূ সত্থা দেৰমনুস্সানন্তি. অযমেত্থ সঙ্খেপো, ৰিত্থারো পন আদিতো পট্ঠায ধম্মসঙ্গণিযা (ধ. স. ১), তদট্ঠকথায চ অট্ঠসালিনিযা (ধ. স. অট্ঠ. ১) সব্বাকারতো ¶ ঞাতব্বোতি. এৰং ৰিসযাদিপ্পভেদতো ৰিনিচ্ছযো ৰেদিতব্বো.

কামাৰচরকুসলধম্মা নিট্ঠিতা.

রূপাৰচরধম্মা পন কুসলা ঝানঙ্গসম্পযোগভেদতো পঞ্চৰিধা হোন্তি. সেয্যথিদং – ৰিতক্কৰিচারপীতিসুখেকগ্গতাসম্পযুত্তং পঠমজ্ঝানিকং, ততো ৰূপসন্তং অতিক্কন্তৰিতক্কং ৰিচারপীতিসুখেকগ্গতাসম্পযুত্তং দুতিযজ্ঝানিকং, ততো ৰূপসন্তং অতিক্কন্তৰিচারং পীতিসুখেকগ্গতাসম্পযুত্তং ততিযজ্ঝানিকং, ততো ৰূপসন্তং ৰিরত্তপীতিকং সুখেকগ্গতাসম্পযুত্তং চতুত্থজ্ঝানিকং, ততো ৰূপসন্তং অত্থঙ্গতসুখং উপেক্খেকগ্গতাসম্পযুত্তং পঞ্চমজ্ঝানিকন্তি. এৰং সম্পযোগভেদতো ৰিনিচ্ছযো ৰেদিতব্বো.

ধম্মুদ্দেসাদিতো পন পঠমজ্ঝানে তাৰ কামাৰচরপঠমকুসলে ৰুত্তেসু ঠপেত্ৰা ৰিরতিত্তযং সেসা ছত্তিংস ধম্মা হোন্তি. তত্থ ছন্দাদযো চত্তারো, করুণা, মুদিতা চাতি ছ যেৰাপনকা. সেসং সুঞ্ঞতৰারপরিযোসানং সব্বং কামাৰচরপঠমকুসলে ৰুত্তসদিসমেৰ. কেৰলং হি ৰিরতীনং অভাৰো, সঙ্গহৰারে পঞ্চমগ্গঙ্গভাৰো, ভূমন্তরৰসেন রূপাৰচরভাৰো চ ৰিসেসো, সেসং তাদিসমেৰ. পঠমজ্ঝানং.

তথা দুতিযজ্ঝানেপি কেৰলং ধম্মুদ্দেসে ৰিতক্কাভাৰো, সঙ্গহৰারে চতুক্কজ্ঝানঙ্গমগ্গঙ্গভাৰো চ ৰিসেসো, সেসং পঠমসদিসমেৰ. দুতিযং.

তথা ততিযজ্ঝানেপি কেৰলং ধম্মুদ্দেসে ৰিচারাভাৰো, সঙ্গহৰারে তিৰঙ্গিকজ্ঝানতা চ ৰিসেসো, সেসং দুতিযসদিসমেৰ. ততিযং.

তথা ¶ চতুত্থে কেৰলং ধম্মুদ্দেসে পীতিযা অভাৰো, কোট্ঠাসৰারে দুৰঙ্গিকজ্ঝানভাৰো চ ৰিসেসো, সেসং ততিযসদিসমেৰ. চতুত্থং.

তথা ¶ পঞ্চমে কেৰলং ধম্মুদ্দেসে করুণামুদিতাদীনং অভাৰো, সোমনস্সট্ঠানে উপেক্খাভাৰো, কোট্ঠাসৰারে ঝানিন্দ্রিযেসু উপেক্খাঝানঙ্গভাৰো, উপেক্খিন্দ্রিযভাৰো চ ৰিসেসো, সেসং চতুত্থসমমেৰ. পঞ্চমং.

পদভাজনীযে পন ৰিতক্কৰিচারানং ৰূপসমা দুতিযং, পীতিযা চ ৰিরাগা ততিযং, সোমনস্সস্স চ অত্থঙ্গমা চতুত্থন্তি চতুক্কনযোপি আগতো, সো তিক্খপঞ্ঞানং একপ্পহারেনেৰ ৰিতক্কৰিচারসমতিক্কমসম্ভৰতো ৰুত্তো. তত্থ দুতিযাদীনং সব্বসো পঞ্চকনযে ততিযাদিসমত্তা তত্থ ৰুত্তনযেনেৰ সব্বো ৰিনিচ্ছযো ৰেদিতব্বো তত্থেৰ অন্তোগধভাৰো চাতি. চতুক্কনযো.

ৰিসযাদিপ্পভেদতো পন ৰিনিচ্ছযং পঞ্চকনযেনেৰ ৰক্খাম, তদনুসারতো এৰ চতুক্কনযৰসেনাপি সক্কা ঞাতুন্তি. এৰং উপরি লোকুত্তরেপি. পঞ্চৰিধাপি চেতে রূপাৰচরকুসলধম্মা কসিণারম্মণভেদতো পচ্চেকং অট্ঠৰিধা হোন্তি পথৰীকসিণং আপোতেজোৰাযোনীলপীতলোহিতোদাতকসিণঞ্চাতি, আলোকাকাসকসিণেহি সদ্ধিং দসৰিধা হোন্তি. পদভাজনীযে (ধ. স. ২০২) পন আলোককসিণস্স ওদাতকসিণেন সঙ্গহিতত্তা অগ্গহণং দট্ঠব্বং, আকাসকসিণস্স পন উগ্ঘাটনাসম্ভৰতো অনারুপ্পজ্ঝানিকত্তা. তং হি পুনপ্পুনং উগ্ঘাটিযমানম্পি আকাসমেৰ হোতি, তস্মা তত্থুপ্পন্নং রূপাৰচরপঞ্চমজ্ঝানং ভৰৰিসেসায, দিট্ঠধম্মসুখৰিহারায চ সংৰত্ততি, অভিঞ্ঞায, ৰিপস্সনায চ পাদকম্পি হোতি, অনারুপ্পত্তা পন ¶ নিরোধপাদকং ন হোতি. সেসানি পন নৰ কসিণানি নিরোধপাদকানিপীতি অযমেতেসং ৰিসেসো. আনাপানজ্ঝানস্সাপি পনেত্থ ৰাযোকসিণে সঙ্গহো দট্ঠব্বোতি. কসিণকথা.

এৰং কসিণৰসেন অট্ঠৰিধা চেতে অভিভাযতনৰসেন পন পচ্চেকং অট্ঠৰিধা হোন্তি. ভগৰতা হি –

‘‘অজ্ঝত্তং অরূপসঞ্ঞী বহিদ্ধা রূপানি পস্সতি পরিত্তানি, তানি অভিভুয্য…পে… অপ্পমাণানি. তানি অভিভুয্য ¶ …পে… পরিত্তানি সুৰণ্ণদুব্বণ্ণানি…পে… অপ্পমাণানি সুৰণ্ণদুব্বণ্ণানি সুৰিসুদ্ধং নীলং পীতং লোহিতং ওদাত’’ন্তি (ধ. স. ২১১ আদযো) –

অট্ঠ অভিভাযতনানি দেসিতানি, তানি চ কসিণেস্ৰেৰ অভিভৰিত্ৰা সমাপজ্জনৰসেন ঝানুপ্পত্তিৰিসেসতো, অনারম্মণৰিসেসতো. তত্থ হি অজ্ঝত্তং অরূপসঞ্ঞীতি অলাভিতায ৰা অনত্থিকতায ৰা অজ্ঝত্তরূপে কসিণৰসেন পরিকম্মসঞ্ঞাৰিরহিতোৰ. বহিদ্ধা রূপানি পস্সতীতি বহিদ্ধা অট্ঠ কসিণরূপানি পরিকম্মৰসেন চেৰ অপ্পনাৰসেন চ পস্সতি. পরিত্তানীতি খুদ্দকপরিমাণানি, তানি অভিভুয্য পস্সন্তো চ সম্পন্নগহণিকো কটচ্ছুমত্তং ভত্তং লভিত্ৰা ‘‘কিং এত্থ ভুঞ্জিতব্বং অত্থী’’তি সঙ্কড্ঢিত্ৰা সব্বং এককবল়মেৰ করোতি, এৰমেৰ ঞাণুত্তরিকো ‘‘কিমেত্থ পরিত্তকে আরম্মণে সমাপজ্জিতব্বং অত্থি, নাযং মম ভারো’’তি তানি অভিভৰিত্ৰা সহ নিমিত্তুপ্পাদেনেৰ অপ্পনং নিব্বত্তেতি, তস্মা তং ঝানং ‘‘অভিভাযতন’’ন্তি ৰুচ্চতি. অপ্পমাণানীতি মহন্তানি. তানি অভিভুয্যাতি মহগ্ঘসো একং ভত্তপাতিং লভিত্ৰা ৰিয ঞাণুত্তরো অপ্পমাণং লভিত্ৰা ‘‘এতং ৰা হোতু অঞ্ঞং ৰা, কিমেত্থ সমাপজ্জিতব্ব’’ন্তি অপ্পনং নিব্বত্তেতি. সুৰণ্ণদুব্বণ্ণানীতি পরিসুদ্ধাপরিসুদ্ধৰণ্ণানি ¶ . পরিসুদ্ধানি হি নীলাদীনি, অপরিসুদ্ধানি চ সুৰণ্ণদুব্বণ্ণানীতি ইধ অধিপ্পেতানি, এতানিপি ‘‘সুৰণ্ণানি ৰা হোন্তু দুব্বণ্ণানি ৰা, পরিত্তঅপ্পমাণৰসেনেৰ অভিভাযতনানী’’তি আগমট্ঠকথাসু (দী. নি. অট্ট. ২.১৭৩; ম. নি. অট্ঠ. ২.২৪৯; অ. নি. অট্ঠ. ৩.৮.৬৫) ৰণ্ণিতানি. ৰণ্ণাভোগস্স হি অত্থিতায পুরিমানি অভিভাযতনানি ৰণ্ণাভোগরহিতসহিততায এত্থ কেৰলতো ৰিসেসসব্ভাৰা চতুধা ৰুত্তানি, নীলাদীনি পন চত্তারি সুৰিসুদ্ধৰণ্ণৰসেন সুখারোহতায ঞাণুত্তরিকো অভিভৰিত্ৰা অপ্পনং নিব্বত্তেতি, তস্মা আরম্মণৰিসেসাভাৰেপি ঝানুপ্পত্তিৰিসেসতো ইমেসং অট্ঠন্নং অভিভাযতনানং ৰসেন পচ্চেকং অট্ঠৰিধা হোন্তীতি ৰেদিতব্বা. অভিভাযতনকথা.

তানি পুন যথা চ অভিভাযতনৰসেন, এৰং ৰিমোক্খৰসেনাপি পচ্চেকং তিৰিধা হোন্তি. ভগৰতা হি ‘‘রূপী রূপানি পস্সতি, অজ্ঝত্তং অরূপসঞ্ঞী বহিদ্ধা রূপানি পস্সতি, সুভন্ত্ৰেৰ অধিমুত্তো হোতী’’তি (ধ. স. ২৪০ আদযো; দী. নি. ৩.৩৩৯, ৩৫৮; অ. নি. ৮.৬৬) তযো ৰিমোক্খা দেসিতা. তে চ কসিণেস্ৰেৰ অধিমুচ্চনৰসেন ঝানুপ্পত্তিৰিসেসতো, ভাৰনারম্মণৰিসেসতো কিমিদং অধিমুচ্চনং নাম? পচ্চনীকধম্মেহি ¶ সুট্ঠু ৰিমুচ্চনং, আরম্মণেসু চ সুট্ঠু অভিরতি, পিতু মাতু অঙ্কে ৰিস্সট্ঠঙ্গপচ্চঙ্গস্স দারকস্স সযনং ৰিয অনিগ্গহিতভাৰেন নিরাসঙ্কতায আরম্মণে পৰত্তীতি ৰুত্তং হোতি. তত্থ রূপীতি অজ্ঝত্তং কেসাদীসু উপ্পাদিতং রূপজ্ঝানং রূপং নাম, তদস্স অত্থীতি রূপী. অজ্ঝত্তম্পি হি কেসাদীসু নীলং, মেদাদীসু পীতং, মংসাদীসু লোহিতং, দন্তাদীসু ওদাতঞ্চ ৰণ্ণকসিণৰসেন আভুজিত্ৰা পরিকম্মং করোন্তস্স রূপজ্ঝানানি, কসিণং উগ্ঘাটেত্ৰা চ অরূপজ্ঝানানি উপ্পজ্জন্তেৰ ¶ . রূপানি পস্সতীতি বহিদ্ধাপি নীলকসিণাদিরূপানি ঝানচক্খুনা পস্সতি, ইমিনা অজ্ঝত্তবহিদ্ধৰত্থুকেসু কসিণেসু ঝানপ্পটিলাভো দস্সিতো. অজ্ঝত্তং অরূপসঞ্ঞীতি অত্তনো কেসাদীসু অনুপ্পাদিতরূপাৰচরজ্ঝানো, ইমিনা বহিদ্ধা পটিলদ্ধজ্ঝানতা দস্সিতা. সুভন্ত্ৰেৰ অধিমুত্তো হোতীতি ইমিনা সুৰিসুদ্ধেসু নীলাদিৰণ্ণকসিণেসু ‘‘সুভ’’ন্তি অধিমুত্তিৰসেন পটিলদ্ধজ্ঝানতা দস্সিতা. এৰং আরম্মণৰিসেসাভাৰেপি অধিমুত্তিৰসেন ঝানুপ্পত্তিৰিসেসতো ইমেসং তিণ্ণং ৰিমোক্খানং ৰসেন পচ্চেকং তিৰিধা হোন্তীতি ৰেদিতব্বা. ৰিমোক্খকথা.

যথা চ ৰিমোক্খতো, এৰং পটিপদাভেদতো পচ্চেকং চতুব্বিধা হোন্তি দুক্খপটিপদং দন্ধাভিঞ্ঞং, দুক্খপটিপদং খিপ্পাভিঞ্ঞং, সুখপটিপদং দন্ধাভিঞ্ঞং, সুখপটিপদং খিপ্পাভিঞ্ঞন্তি. তত্থ পঠমসমন্নাহারতো পট্ঠায যাৰ উপচারং উপ্পজ্জতি, তাৰ পৰত্তা ঝানভাৰনা ‘‘পটিপদা’’তি ৰুচ্চতি. সা একচ্চস্স দুক্খা নীৰরণাদিপচ্চনীকধম্মসমুদাচারগহনতায অসুখসেৰনা হোতি, একচ্চস্স তদভাৰতো সুখা. উপচারতো পন পট্ঠায যাৰ অপ্পনা, তাৰ পৰত্তা পঞ্ঞা ‘‘অভিঞ্ঞা’’তি ৰুচ্চতি. সা একচ্চস্স দন্ধা অসীঘপ্পৰত্তিনী, একচ্চস্স খিপ্পা. অসপ্পাযসেৰিনো দুক্খা পটিপদা হোতি দন্ধা চ অভিঞ্ঞা, সপ্পাযসেৰিনো সুখা পটিপদা হোতি খিপ্পা চ অভিঞ্ঞা. পুব্বাপরকালেসু সপ্পাযাসপ্পাযসেৰনৰসেন ৰোমিস্সতা চ ৰেদিতব্বা. তথা পলিবোধুপচ্ছেদাদিকং পুব্বকিচ্চং অসম্পাদেন্তস্স পটিপদা দুক্খা, সম্পাদেন্তস্স সুখা পটিপদা. অপ্পনাকোসল্লং অসম্পাদেন্তস্স দন্ধাভিঞ্ঞা, সম্পাদেন্তস্স খিপ্পা. কিলেসিন্দ্রিযানং ৰা তিক্খমুদুতায পঠমা, ৰিপরিযাযেন চতুত্থা, ৰোমিস্সতায মজ্ঝিমা দ্ৰেতি ৰেদিতব্বা. তণ্হাৰিজ্জাভিভৰনানভিভৰনৰসেন ৰা সমথৰিপস্সনাসু কতাধিকারাকতাধিকারতাৰসেন ৰাপি ¶ এতাসং পভেদো ৰেদিতব্বো. পঠমজ্ঝানাদিআগমনৰসেনাপি দুতিযাদীনং পটিপদাভিঞ্ঞাভেদো হোতিযেৰাতি দট্ঠব্বং. এৰং পটিপদাৰসেন পচ্চেকং চতুব্বিধা হোন্তীতি ৰেদিতব্বা. পটিপদাকথা.

যথা ¶ চ পটিপদাহি, এৰং আরম্মণভেদতোপি পচ্চেকং চতুব্বিধা হোন্তি পরিত্তং পরিত্তারম্মণং, পরিত্তং অপ্পমাণারম্মণং, অপ্পমাণং পরিত্তারম্মণং, অপ্পমাণং অপ্পমাণারম্মণন্তি. তত্থ যং অপ্পগুণং, উপরিজ্ঝানস্স পচ্চযো ভৰিতুং ন সক্কোতি, ইদং পরিত্তং. যং পন অৰড্ঢিতে আরম্মণে পৰত্তং, তং পরিত্তং আরম্মণং অস্সাতি পরিত্তারম্মণং. ৰিপরিযাযতো অপ্পমাণং অপ্পমাণারম্মণং. তদুভযৰোমিস্সতায মজ্ঝে ইতরদ্ৰযং ৰেদিতব্বং. এৰং আরম্মণভেদতো চতুব্বিধা হোন্তীতি ৰেদিতব্বা. আরম্মণকথা.

যথা চ পটিপদারম্মণেহি, এৰং অধিপতীনং ৰসেন পচ্চেকং চতুব্বিধতা, হীনত্তিকৰসেন পুন তিৰিধতা চ যোজেত্ৰা ৰেদিতব্বা.

দসকসিণমূলৰিভাগকথা নিট্ঠিতা.

যথা কসিণমূলেসু, এৰং ব্রহ্মৰিহারমূলেসুপি যথাযোগং ৰিভাগো ৰেদিতব্বো – মেত্তাকরুণামুদিতাৰসেন হি আদিতো চত্তারি ঝানানি পচ্চেকং তিৰিধা হোন্তি মেত্তাসহগতং, করুণাসহগতং, মুদিতাসহগতন্তি. পঞ্চমজ্ঝানং পন উপেক্খাব্রহ্মৰিহারৰসেন একৰিধং উপেক্খাসহগতন্তি. পুরিমেসু হি তীসু পঞ্চমজ্ঝানং নুপ্পজ্জতি. কস্মা? সোমনস্সাৰিপ্পযোগতো, সোমনস্সসমুট্ঠিতানং ব্যাপাদৰিহিংসারতীনং যথাক্কমং নিস্সরণত্তা, পচ্ছিমে চ তিকচতুক্কজ্ঝানং নুপ্পজ্জতি. কস্মা? উপেক্খাৰেদনাসম্পযোগতো, তস্সা চ পটিঘানুনযনিস্সরণতো মজ্ঝত্তাকারেন পৰত্তিতো, তানি পুন পটিপদারম্মণাধিপতিহীনত্তিকভেদেহি পুব্বে ¶ ৰুত্তনযেন যোজেত্ৰা ৰেদিতব্বানি. এত্থ চ অপ্পসত্তারম্মণৰসেন পরিত্তারম্মণতা, বহুসত্তারম্মণৰসেন অপ্পমাণারম্মণতা চ একস্মিং সত্তে অপ্পনং পাপেত্ৰা অনুক্কমেন একাৰাসএকৰীথিগামাদিগতসত্তেসু পাপনৰসেন ৰড্ঢনা চ ৰেদিতব্বা. ধম্মুদ্দেসে পনেত্থ করুণাসহগতে মুদিতাৰিরহিতা পঞ্চতিংস ধম্মা, তেসু ছন্দাদযো চত্তারো, করুণা চাতি পঞ্চেৰ যেৰাপনকা, করুণা চ নিযতাতি ৰেদিতব্বা. এৰং মুদিতাসহগতেপি. কেৰলং করুণাৰিরহিতা মুদিতা নিযতা পৰত্তাতি অযমেত্থ ৰিসেসো. অৰসেসব্রহ্মৰিহারদ্ৰযে, পন কসিণাসুভাদীসু চ সব্বত্থ করুণামুদিতাৰিরহিতা চ চতুত্তিংস ধম্মা, তত্থ চ ছন্দাদযো চত্তারোৰ যেৰাপনকা ৰেদিতব্বাতি. ব্রহ্মৰিহারমূলৰিভাগকথা.

অসুভভেদতো ¶ পন পঠমজ্ঝানমেৰেকং দসৰিধং হোতি উদ্ধুমাতকসঞ্ঞাসহগতং ৰিনীলকৰিপুব্বকৰিচ্ছিদ্দকৰিক্খাযিতকৰিক্খিত্তকহতৰিক্খিত্তকলোহিতকপুল়ৰকঅট্ঠিকসঞ্ঞাসহগতন্তি, দসৰিধেপি চেতস্মিং অসুভে পটিকূলত্তা, দুব্বলত্তা চ ৰিতক্কবলেনেৰ ঝানং তিট্ঠতি, ন ৰিনা ৰিতক্কেন সীঘসোতায নদিযা অরিত্তবলেনেৰ নাৰা ৰিয, তস্মা পঠমজ্ঝানমেৰেত্থ উপ্পজ্জতি, সমথৰিপস্সনাদিআনিসংসদস্সাৰিতায, পনেত্থ নীৰরণপ্পহানেন চ পীতিসোমনস্সং উপ্পজ্জতি বহুৰেতনলাভদস্সনেন পুপ্ফছড্ডকস্স গূথরাসিম্হি ৰিয, উপসন্তব্যাধিদুক্খস্স চ রোগিনো ৰমনৰিরেচনপ্পৰত্তিযং ৰিযাতি দট্ঠব্বং. তং পন দসৰিধম্পি পঠমজ্ঝানং পটিপদারম্মণাধিপতিহীনত্তিকৰসেন পচ্চেকং যোজেত্ৰা ৰেদিতব্বং. এত্থ চ অসুভারম্মণস্স অৰড্ঢনীযতায খুদ্দকে উদ্ধুমাতকাদিট্ঠানে উপ্পন্নং নিমিত্তং পরিত্তারম্মণং, মহন্তে অপ্পমাণারম্মণং ৰেদিতব্বং. এতেসু পন ¶ দসসু অসুভেসু সামঞ্ঞতো দ্ৰত্তিংসাকারৰসেন, নৰসিৰথিকপব্বৰসেন চ পৰত্তা কাযগতাসতি সঙ্গহিতা, ৰণ্ণকসিণেসু চ কেসাদীনং কোট্ঠাসানং নীলাদিৰণ্ণারম্মণা, চতুক্কপঞ্চকজ্ঝানৰসেন উপ্পন্না কাযগতাসতি চ সঙ্গহিতা. পদভাজনীযে ৰিসুং ন ৰুত্তা, তস্মা তেসং ৰসেনাপি ৰিভাগো ৰেদিতব্বো. অসুভমূলৰিভাগকথা.

এৰং আরম্মণাদিভেদতো চ ভিন্নানং রূপাৰচরকুসলধম্মানং কালদেসাদিভেদেন অনন্ততা, ভগৰতা চ একত্তং উপনেত্ৰা দেসিতভাৰো, ৰিত্থারনযাতিদেসো চ কামাৰচরকুসলে ৰুত্তানুসারেন যথানুরূপং ঞাতব্বো. ইতো পরং অরূপাৰচরাদীসুপি ৰিসেসমত্তমেৰ ৰক্খাম. এৰং ৰিসযাদিপ্পভেদতো ৰিনিচ্ছযো ৰেদিতব্বো.

রূপাৰচরকুসলধম্মা নিট্ঠিতা.

অরূপাৰচরা পন কুসলধম্মা সম্পযোগতো ন ভিন্না, সব্বেপি উপেক্খেকগ্গতাসম্পযুত্তাৰ, ধম্মুদ্দেসাদিতোপি সব্বসো রূপাৰচরপঞ্চমজ্ঝানসদিসা. অরূপাৰচরভাৰো এৰ হেত্থ ৰিসেসো. ৰিসযাদিপ্পভেদতোতি এত্থ পন আরম্মণতো তে চতুব্বিধা হোন্তি. সেয্যথিদং – আকাসানঞ্চাযতনং ৰিঞ্ঞাণঞ্চাযতনং আকিঞ্চঞ্ঞাযতনং নেৰসঞ্ঞানাসঞ্ঞাযতনন্তি. তত্থ হি কসিণুগ্ঘাটিমাকাসে ‘‘অনন্তো আকাসো’’তি পৰত্তং পঠমং, তস্মিং পঠমারুপ্পৰিঞ্ঞাণে ‘‘অনন্তং ৰিঞ্ঞাণ’’ন্তি পৰত্তং দুতিযং, তস্স পঠমারুপ্পৰিঞ্ঞাণস্স অভাৰে ‘‘নত্থি কিঞ্চী’’তি পৰত্তং ¶ ততিযং, তস্মিং ততিযে ‘‘সন্তমেতং পণীতমেত’’ন্তি পৰত্তং চতুত্থং. পুরিমপুরিমেহি পচ্ছিমপচ্ছিমং সন্তসন্ততরসন্ততমন্তি চ ৰেদিতব্বং.

ননু ¶ রূপাৰচরেসু ৰিতক্কাদিঅঙ্গসমতিক্কমতো উপরূপরিঝানানং সন্ততরাদিভাৰো ৰুত্তো, অঙ্গাতিক্কমরহিতেসু পন আরুপ্পেসু কথন্তি? আরম্মণাতিক্কমতো. এতেসু হি কসিণরূপসমতিক্কমতো পঠমং ঝানং রূপাৰচরপঞ্চমজ্ঝানতো সন্তং, ততোপি কসিণুগ্ঘাটিমাকাসাতিক্কমতো দুতিযং, ততোপি আকাসে পৰত্তৰিঞ্ঞাণাতিক্কমতো ততিযং, ততোপি আকাসে পৰত্তৰিঞ্ঞাণস্স সমতিক্কমতো চতুত্থন্তি. এৰং অঙ্গসমত্তেপি থূলথূলাতিক্কমেন সুখুমসুখুমারম্মণতায উপরূপরিজ্ঝানানং সন্ততরাদিভাৰো ৰেদিতব্বো সমাযামৰিত্থারানম্পি ৰত্থানং সুত্তসুখুমতরাদিভাৰো ৰিয. ননু অভাৰারম্মণতায ততিযারুপ্পং সন্তপণীততো মনসি করোন্তস্স চতুত্থারুপ্পস্স কথং তত্থ নিকন্তিপরিযাদানং, কথং চ সমতিক্কমো ৰা হোতীতি? অসমাপজ্জিতুকামতায, সা চ অত্তনো সন্তপণীততায. যথা হি রাজা দন্তকারাদিসিপ্পিকানং অতিসুখুমমনাপসিপ্পং দিস্ৰা ‘‘ছেকা ৰতিমে আচরিযা’’তি তেসং ছেকতায তুস্সন্তোপি ন তং সিপ্পিকভাৰং পত্থেতি, তং সমতিক্কম্ম রাজভাৰে এৰ তিট্ঠতি, এৰংসম্পদমিদং দট্ঠব্বং. এৰং আরম্মণভেদতো চতুব্বিধানম্পেতেসং পুন পটিপদারম্মণাধিপতিহীনত্তিকভেদেহি পুব্বে ৰুত্তনযেনেৰ পচ্চেকং ভেদো ৰেদিতব্বো.

এত্থ চ রূপাৰচরচতুত্থজ্ঝাননিকন্তি পরিযাদানদুক্খতায পঠমারুপ্পস্স, পঠমারুপ্পাদিনিকন্তিপরিযাদানদুক্খতায দুতিযারুপ্পাদীনঞ্চ দুক্খপটিপদতা, পরিযাদিণ্ণনিকন্তিকস্স তদপ্পনাপরিৰাসদন্ধতায দন্ধাভিঞ্ঞতা, ৰিপরিযাযেন ইতরা চ ৰেদিতব্বা. পরিত্তকসিণুগ্ঘাটিমাকাসমূলকানং পন চতুন্নং পরিত্তারম্মণতা, ৰিপরিযাযানং অপ্পমাণারম্মণতা ৰেদিতব্বা. রূপারূপাৰচরা পনেত্থ অধিপতিসহিতাৰ উপ্পজ্জন্তি, ন ৰিনা অধিপতীহি. কামাৰচরা তু অধিপতিরহিতাপি উপ্পজ্জন্তি ¶ , তে চ আরম্মণাধিপতি সহজাতাধিপতীতি দ্ৰেপি লব্ভন্তি. রূপারূপাৰচরা পন সহজাতাধিপতিমেৰ, নেতরং. তত্থ চ ছন্দাধিপতিনা সহজাতা ধম্মা ছন্দাধিপতেয্যা, ছন্দো পন অধিপতি এৰ, ন ছন্দাধিপতেয্যো. ইতরে পন অধিপতেয্যাৰ, নাধিপতযো অঞ্ঞস্স অত্তনা সহজাতস্স ছন্দস্স, ইতরেসঞ্চ অধিপতিযত্থস্স অভাৰা. একস্মিং হি চিত্তুপ্পাদে ছন্দাদীসু চতূসুপি ৰিজ্জমানেসু যথাপচ্চযং সহজাতাধিপতি ¶ একোৰ লব্ভতি. এৰং ৰীরিযাধিপতিযাদীসুপি যথানুরূপং ঞাতব্বং. এৰং ৰিসযাদিপ্পভেদতো ৰিনিচ্ছযো ঞাতব্বো.

অরূপাৰচরকুসলধম্মা নিট্ঠিতা.

লোকুত্তরা পন কুসলা মগ্গসম্পযোগভেদতো চতুব্বিধা. সেয্যথিদং – সোতাপত্তিমগ্গসম্পযুত্তং সকদাগামিমগ্গসম্পযুত্তং অনাগামিমগ্গসম্পযুত্তং অরহত্তমগ্গসম্পযুত্তন্তি. ননু চতূসুপি চেতেসু মগ্গসম্পযোগো সমানো অট্ঠন্নম্পি মগ্গঙ্গানং সব্বত্থ উপ্পত্তিতো কথং তত্থ ভেদোতি? অনুসযপ্পহানসঙ্খাতস্স মগ্গকিচ্চস্স ভেদতো. অনুসযে মারেন্তো গচ্ছতীতি হি মগ্গো. মগ্গা হি যথাসকং অনুসযে পজহন্তি এৰ, নিমিত্তা ৰুট্ঠহন্তি, পৰত্তঞ্চ ছিন্দন্তি নামাতি ৰুচ্চন্তি. নিমিত্তন্তি চ পঞ্চক্খন্ধা, পৰত্তন্তিপি তে এৰ. তং দুৰিধং উপাদিন্নকং, অনুপাদিন্নকঞ্চ.

তত্থপি সোতাপত্তিমগ্গো দিট্ঠানুসযং, ৰিচিকিচ্ছানুসযং, তদেকট্ঠে চ কিলেসে, তংসহজাতানি দিট্ঠিসম্পযুত্তানি, ৰিচিকিচ্ছাসম্পযুত্তঞ্চাতি পঞ্চাকুসলচিত্তানি চ উপ্পজ্জমানোৰ সমুগ্ঘাতেতি, সমুগ্ঘাতেন্তো চ অপাযভৰতো চেৰ সুগতিভৰতো চ ঠপেত্ৰা সত্ত ভৰে তদৰসেসতো ৰুট্ঠাতি ¶ . তত্থ যদেতং পঠমমগ্গানুপ্পত্তিযং উপ্পজ্জমানারহং দিট্ঠিৰিচিকিচ্ছাসম্পযুত্তপঞ্চচিত্তসমুট্ঠানং রূপং, তং রূপক্খন্ধো, তানি পঞ্চ চিত্তানি ৰিঞ্ঞাণক্খন্ধো, তংসম্পযুত্তা ৰেদনাদযো ইতরে তযো খন্ধা. ইমে অনুপাদিন্নপঞ্চক্খন্ধা অনুপাদিন্ননিমিত্তং, অনুপাদিন্নপ্পৰত্তং নাম. ততো পঠমমগ্গো ৰুট্ঠাতি, তং ছিন্দতি নাম. যদেতং অপাযভৰে, সুগতিযঞ্চ ঠপেত্ৰা সত্ত ভৰে তদৰসেসে চ পঠমমগ্গানুপ্পত্তিযং আযতিং উপ্পজ্জমানারহং কম্মজক্খন্ধপঞ্চকং, তং উপাদিন্ননিমিত্তং, উপাদিন্নপ্পৰত্তং নাম. ততো পঠমমগ্গো ৰুট্ঠাতি, তঞ্চ ছিন্দতি নাম. ততোৰ পঠমমগ্গো অনুসযং পজহন্তোৰ নিমিত্তা ৰুট্ঠহতি, পৰত্তঞ্চ ছিন্দতি নামাতি ৰেদিতব্বং. এৰং ইতরমগ্গেসুপি উপাদিন্নানুপাদিন্ননিমিত্তপ্পৰত্তং ৰুট্ঠানং ছিন্দনং যথানুরূপং ঞাতব্বং.

সকদাগামিমগ্গো পন ওল়ারিককামরাগানুসযং, পটিঘানুসযং, তদেকট্ঠে চ কিলেসে, তংসহজাতানি চ তথা পৰত্তানি চত্তারি দিট্ঠিৰিপ্পযুত্তানি, দ্ৰে চ দোমনস্সসহগতানীতি ছ অকুসলচিত্তানি ¶ চ উপ্পজ্জমানোৰ সমুগ্ঘাতেতি, সমুগ্ঘাতেন্তো চ কামসুগতিতো ঠপেত্ৰা একভৰং তদৰসেসতো ৰুট্ঠাতি, পতনুভূতাৰ তংসমঙ্গিনো কামরাগব্যাপাদা অধিমত্তা, তে চ কদাচি ৰিরল়াৰ উপ্পজ্জন্তীতি ৰেদিতব্বা.

অনাগামিমগ্গোপি তানেৰ তনুসহগতকামরাগপ্পটিঘানুসযৰসেন উপ্পন্নানি ছ চিত্তানি উপ্পজ্জমানোৰ সমুগ্ঘাতেতি, সমুগ্ঘাতেন্তো চ কামভৰতো ৰুট্ঠাতি. অরহত্তমগ্গো পন রূপরাগঅরূপরাগমানাৰিজ্জানুসযে, উদ্ধচ্চং, তদেকট্ঠে সব্বে কিলেসে চ তংসহজাতানি চত্তারি দিট্ঠিৰিপ্পযুত্তানি, উদ্ধচ্চসহগতঞ্চাতি পঞ্চাকুসলচিত্তানি চ উপ্পজ্জমানোৰ সমুগ্ঘাতেতি, সমুগ্ঘাতেন্তো চ রূপারূপতো, সব্বভৰতোপি ¶ ৰুট্ঠাতি. সেসং পঠমমগ্গে ৰুত্তানুসারতো ৰেদিতব্বং. এৰং অনুসযপ্পহানসঙ্খাতকিচ্চভেদতো চতুন্নং মগ্গানং ভেদো ৰেদিতব্বো.

তদেৰং মগ্গসম্পযোগভেদতো চতুব্বিধং, পুন ঝানঙ্গসম্পযোগভেদতো পচ্চেকং পঞ্চৰিধা হোন্তি. কথং? পঠমমগ্গসম্পযুত্তং তাৰ ৰিতক্কৰিচারপীতিসুখেকগ্গতাসম্পযুত্তং পঠমজ্ঝানিকং, ৰিচারপীতিসুখেকগ্গতাসম্পযুত্তং দুতিযজ্ঝানিকং, পীতিসুখেকগ্গতাসম্পযুত্তং ততিযজ্ঝানিকং, সুখেকগ্গতাসম্পযুত্তং চতুত্থজ্ঝানিকং, উপেক্খেকগ্গতাসম্পযুত্তং পঞ্চমজ্ঝানিকঞ্চাতি পঞ্চৰিধং হোতি. এৰং দুতিযমগ্গাদিসম্পযুত্তা চাতি ৰীসতিৰিধা হোন্তি, এত্থ চ চতুক্কনযৰসেন সোল়সৰিধতাপি যোজেতব্বা. কিং পনেত্থ এৰং ঝানঙ্গযোগভেদস্স নিযামকং কারণন্তি? সঙ্খারুপেক্খাঞাণং. তস্মিং হি ৰুট্ঠানগামিনিৰিপস্সনাভূতে সোমনস্সসহগতে অরিযমগ্গা পঞ্চমজ্ঝানিকা ন উপ্পজ্জন্তি, সোমনস্সসহগতা চতুক্কজ্ঝানিকাৰ উপ্পজ্জন্তি, উপেক্খাসহগতে চ চতুক্কজ্ঝানিকা ন উপ্পজ্জন্তি, উপেক্খাসহগতা পঞ্চমজ্ঝানিকাৰ উপ্পজ্জন্তি.

ননু চেত্থ সঙ্খারুপেক্খাঞাণং সোমনস্সুপেক্খাসহগতত্তা চতুক্কপঞ্চমজ্ঝানিকানং সোমনস্সুপেক্খাসহগতভাৰস্স নিযামকহেতু, ৰিতক্কাদিঅঙ্গসমতিক্কমতো পন নেসং দুতিযাদিজ্ঝানভাৰস্স নিযামকেন অঞ্ঞেন ভৰিতব্বং. ন হি সঙ্খারুপেক্খাঞাণং ৰিতক্কাদিৰিকলং উপ্পজ্জতি. যেন তং নিযামকং ভৰেয্য, কিং তং নিযামককারণন্তি? পাদকজ্ঝানং, সম্মসিতজ্ঝানং ৰা. রূপারূপাৰচরেসু হি যং যং ঝানং সমাপজ্জিত্ৰা ততুট্ঠায যে কেচি পকিণ্ণকসঙ্খারে সম্মসিত্ৰা যে মগ্গে উপ্পাদেতি, তে সব্বে তংতংঝানসদিসাৰ হোন্তি. যং ¶ যং ৰা পন ঝানং, তংসম্পযুত্তে চ অনিচ্চাদিতো ৰিপস্সিত্ৰা যে ¶ যে মগ্গে উপ্পাদেতি, তে চ তংতংঝানসদিসাৰ হোন্তি ভূমিৰণ্ণসদিসৰণ্ণা গোধা ৰিয. তত্থ চ সুক্খৰিপস্সকস্স উপ্পন্নমগ্গাপি, সমাপত্তিলাভিনা ঝানং পাদকং অকত্ৰা অসম্মসিত্ৰাৰ উপ্পাদিতমগ্গাপি পঠমজ্ঝানং পাদকং কত্ৰা তং তং ৰা সম্মসিত্ৰা উপ্পাদিতমগ্গাপি সব্বে একসদিসা পঠমজ্ঝানিকাৰ হোন্তি. ন হি লোকুত্তরমগ্গো অপ্পনং অপ্পত্তো নাম অত্থি. দুতিযততিযচতুত্থজ্ঝানানি পাদকানি কত্ৰা ৰা তত্থ গতে ধম্মে সম্মসিত্ৰা ৰা উপ্পাদিতমগ্গা যথাক্কমং চতুরঙ্গিকা, তিৰঙ্গিকা, দুৰঙ্গিকা চ হোন্তি. পঞ্চমজ্ঝানং, পন আরুপ্পজ্ঝানানি চ পাদকং কত্ৰা ৰা তত্থ গতে ধম্মে সম্মসিত্ৰা ৰা উপ্পাদিতমগ্গা উপেক্খেকগ্গতাৰসেন দুৰঙ্গিকাৰ হোন্তি. এতেসঞ্চ পঞ্চন্নং ঝানিকানম্পি পুব্বভাগে ৰিপস্সনা সোমনস্সসহগতাপি হোতি উপেক্খাসহগতাপি, ৰুট্ঠানগামিনী পন ৰিপস্সনা চতুক্কজ্ঝানিকানং সোমনস্সসহগতা হোতি. পঞ্চমজ্ঝানিকানং পন উপেক্খাসহগতাৰাতি তদেৰ পাদকজ্ঝানং, সম্মসিতজ্ঝানং ৰা নিযামককারণন্তি ৰেদিতব্বং. এৰং সম্পযোগতো ৰিনিচ্ছযো.

ধম্মুদ্দেসাদিতো পন পঠমজ্ঝানিকেসু তাৰ চতূসু কামাৰচরপঠমকুসলে ৰুত্তধম্মেসু ঠপেত্ৰা করুণামুদিতা সত্ততিংস ধম্মা হোন্তি. ৰিরতিযো পনেত্থ নিযতা, পাল়িযঞ্চ (ধ. স. ২৭৭) রূপেন নিদ্দিট্ঠা, ছন্দাদযো চ চত্তারো যেৰাপনকাতি ৰেদিতব্বা.

সঙ্গহৰারে পন বোধিপক্খিযধম্মেসু পুব্বে সঙ্গহিতাৰসেসানং সতিপট্ঠানসম্মপ্পধানইদ্ধিপাদবোজ্ঝঙ্গানং ৰসেন অতিরেকা চত্তারো সঙ্গহা ৰেদিতব্বা. পঠমজ্ঝানিকমগ্গসম্পযুত্তেসু হি ধম্মেসু সতি উপট্ঠানট্ঠেন সতিপট্ঠানং, সা ৰিসযভেদেন চতুব্বিধা, ইতরে অস্সতিপট্ঠানাতি সব্বেৰ ¶ তে দ্ৰিধা হোন্তি. তথা ৰীরিযং পদহনট্ঠেন সম্মপ্পধানং, তং কিচ্চভেদেন চতুব্বিধং, ইতরে অসম্মপ্পধানাতি. তথা ছন্দো ৰীরিযং চিত্তং অমোহোতি চত্তারো ধম্মা ইজ্ঝনকট্ঠেন যথাক্কমং ‘‘ছন্দিদ্ধিপাদো ৰীরিযচিত্তৰীমংসিদ্ধিপাদো’’তি নামেন ‘‘ইদ্ধিপাদা’’তি ৰুচ্চন্তি, ইতরে ‘‘অনিদ্ধিপাদা’’তি. তথা সতি অমোহো ৰীরিযং পীতি পস্সদ্ধি সমাধি তত্রমজ্ঝত্ততাতি ইমে সত্ত ধম্মা বুজ্ঝনট্ঠেন যথাক্কমং ‘‘সতিসম্বোজ্ঝঙ্গো ধম্মৰিচযসম্বোজ্ঝঙ্গো ৰীরিযপীতিপস্সদ্ধিসমাধিউপেক্খাসম্বোজ্ঝঙ্গো’’তি ৰুচ্চন্তি, ইতরে অবোজ্ঝঙ্গাতি এৰং চত্তারো সঙ্গহা.

সেসং সব্বং লক্খণাদিতো পট্ঠায সুঞ্ঞতৰারপরিযোসানং কামাৰচরপঠমকুসলে ৰুত্তসদিসমেৰ ¶ , কেৰলং পন মগ্গঙ্গসঙ্গহে ‘‘অট্ঠঙ্গিকো মগ্গো হোতী’’তি (ধ. স. ৩৩৭) পদভাজনীযে সরূপেনেৰ নিদ্দিট্ঠং, ইন্দ্রিযসঙ্গহে পঞ্ঞিন্দ্রিযট্ঠানে পঠমমগ্গস্স অনঞ্ঞাতঞ্ঞস্সামীতিন্দ্রিযং গহেত্ৰা ইতরমগ্গানং অঞ্ঞিন্দ্রিযং গহেত্ৰাৰ অট্ঠিন্দ্রিযন্তি অট্ঠিন্দ্রিযতা, সব্বত্থ লোকুত্তরতা চ ৰিসেসো, সেসং তাদিসমেৰ. পঠমজ্ঝানিকা চত্তারো মগ্গা.

তথা দুতিযজ্ঝানিকেসুপি কেৰলং ধম্মুদ্দেসে ৰিতক্কাভাৰো, সঙ্গহৰারে চতুরঙ্গজ্ঝানতা, সত্তঙ্গমগ্গতা চ ৰিসেসো, সেসং পঠমজ্ঝানিকসদিসমেৰ. দুতিযজ্ঝানিকমগ্গা.

তথা ততিযজ্ঝানিকেসুপি কেৰলং ধম্মুদ্দেসে ৰিচারাভাৰো, সঙ্গহৰারে তিৰঙ্গিকজ্ঝানতা চ ৰিসেসো, সেসং দুতিযজ্ঝানিকসদিসমেৰ. ততিযজ্ঝানিকমগ্গা.

তথা চতুত্থজ্ঝানিকেসুপি কেৰলং ধম্মুদ্দেসে পীতিযা অভাৰো, কোট্ঠাসৰারে দুৰঙ্গিকজ্ঝানতা, ছল়ঙ্গিকবোজ্ঝঙ্গতা ¶ চ ৰিসেসো, সেসং ততিযজ্ঝানিকসদিসমেৰ. চতুত্থজ্ঝানিকমগ্গা.

তথা পঞ্চমজ্ঝানিকেসুপি কেৰলং সব্বত্থ ৰেদনাপরিৰত্তনমেৰ ৰিসেসো, সেসং চতুত্থজ্ঝানিকসদিসমেৰ. পঞ্চমজ্ঝানিকমগ্গা. এৰং ধম্মুদ্দেসাদিতো ৰিনিচ্ছযো.

ৰিসযাদিপ্পভেদতো পন সব্বেপি লোকুত্তরকুসলা আরম্মণতো নিব্বানারম্মণাৰ, তস্মা ন ততো নেসং ভেদো, পটিপদাদিভেদতো পন পুব্বে ৰুত্তনযেন পচ্চেকং ভেদো ৰেদিতব্বো. এত্থ চ যো নামরূপপরিগ্গহতো পট্ঠায কিলমন্তো ৰিপস্সনং আরভিত্ৰা দুক্খেন কসিরেন কিলেসে ৰিক্খম্ভেতি, তস্স দুক্খা পটিপদা হোতি. যো পন ৰিক্খম্ভিতকিলেসো, সো ৰিপস্সনাপরিৰাসং ৰাসেন্তো চিরেন মগ্গপাতুভাৰং পাপুণাতি, তস্স দন্ধাভিঞ্ঞা হোতি. ইমিনা নযেন ইতরা তিস্সোপি পটিপদাভিঞ্ঞাযো ৰেদিতব্বা. যথা চ পটিপদাদিভেদতো, এৰং ৰিমোক্খভেদতোপি পচ্চেকং দ্ৰিধা হোন্তি – সুঞ্ঞতৰিমোক্খো অপ্পণিহিতৰিমোক্খোতি.

তত্থ সুঞ্ঞতন্তি, অপ্পণিহিতন্তি চ লোকুত্তরমগ্গস্স নামং. সো হি আগমনতো সগুণতো আরম্মণতোতি তীহি কারণেহি নামং লভতি. কথং? ইধ ভিক্খু ৰিপস্সনাকম্মট্ঠানিকো আদিতো পট্ঠায ‘‘অনিচ্চং দুক্খমনত্তা’’তি তিৰিধং অনুপস্সনং আরোপেত্ৰা ¶ সম্মসন্তো ৰিচরতি, সচস্স ৰুট্ঠানগামিনিৰিপস্সনা তেভূমকে সঙ্খারে অনত্ততো ৰিপস্সতি, অযং অত্তসুঞ্ঞতাদস্সনট্ঠেন সুঞ্ঞতা নাম হোতি. সচে দুক্খতো ৰিপস্সতি, অযং তণ্হাপণিধিরহিতট্ঠেন অপ্পণিহিতা নাম হোতি, তা উভোপি আগমনীযট্ঠানে ঠত্ৰা অত্তনো অত্তনো মগ্গস্স যথাক্কমং সুঞ্ঞতমগ্গো ¶ অপ্পণিহিতমগ্গোতি নামং দেন্তি. এৰং আগমনতো নামলাভো ৰেদিতব্বো. ননু সুত্তন্তেসু সচে ৰুট্ঠানগামিনিৰিপস্সনা অনিচ্চতো পস্সতি, তস্সা ৰসেন মগ্গো অনিমিত্তৰিমোক্খো হোতীতি কত্ৰা তযো ৰিমোক্খা কথিতাতি? সচ্চং, অপি চ খো পরিযাযতো কথিতা, নিপ্পরিযাযতো পন সযম্পি সনিমিত্তা অত্তনো মগ্গস্স অনিমিত্তনামং দাতুং অসক্কুণেয্যতায দ্ৰে এৰ ৰিমোক্খা হোন্তীতি. তিস্সোপি হি ৰিপস্সনা নিচ্চনিমিত্তং, সুখনিমিত্তঞ্চ উগ্ঘাটনেন অনিমিত্তৰোহারং লভন্তি, তিস্সোপি নিমিত্তভূতেসু খন্ধেসু চরণতো সনিমিত্তাৰ, তস্মা সযং আগমনীযট্ঠানে ঠত্ৰা অত্তনো মগ্গস্স নিপ্পরিযাযতো অনিমিত্তনামং দাতুং ন সক্কোন্তি. যস্মা পন মগ্গো সযং রাগাদীহি সুঞ্ঞো, রাগাদিনিমিত্তপণিধিরহিতো চ, তস্মা সগুণেনেৰ সুঞ্ঞতনামং, অপ্পণিহিতনামঞ্চ লভতি. এৰমস্স সগুণতো নামলাভো ৰেদিতব্বো. যস্মা পন নিব্বানং রাগাদীহি, সঙ্খারেহি চ সুঞ্ঞত্তা, রাগাদিনিমিত্তপণিধিরহিতত্তা চ ‘‘সুঞ্ঞতং, অনিমিত্তং, অপ্পণিহিত’’ন্তি চ ৰুচ্চতি, তস্মা তং আরম্মণং কত্ৰা উপ্পন্নমগ্গোপি ‘‘সুঞ্ঞতো, অনিমিত্তো, অপ্পণিহিতো’’তি চ নামং লভতি. এৰং আরম্মণতো নামলাভো ৰেদিতব্বো.

তেসু ইধ আগমনতোৰ মগ্গো নামং লভতি, ন সগুণতো, নাপি আরম্মণতো, সগুণারম্মণতো নামলাভস্স সুত্তন্তেসু পরিযাযদেসিতত্তা. তেনেৰ হেত্থ মগ্গানং সগুণারম্মণতোপি অনিমিত্তৰিমোক্খতং অগ্গহেত্ৰা সুঞ্ঞতঅপ্পণিহিতৰিমোক্খতাৰ আগমনতো ৰুত্তা, তঞ্চাগমনং দুৰিধং ৰিপস্সনাগমনং, মগ্গাগমনঞ্চ. তত্থ ৰিপস্সনাগমনতো মগ্গো চ সুঞ্ঞতাদিনামং লভতি, মগ্গাগমনতো চ লভতেৰ, ইধ পন মগ্গস্স অধিপ্পেতত্তা ¶ ৰিপস্সনাগমনতোৰ ৰেদিতব্বং. এৰং ৰিমোক্খভেদতো পচ্চেকং দ্ৰিধা হোন্তি. এৰং ৰিসযাদিপ্পভেদতো ৰিনিচ্ছযো.

লোকুত্তরকুসলধম্মা নিট্ঠিতা.

নিট্ঠিতা চ মোহৰিচ্ছেদনিযা নাম

অভিধম্মমাতিকত্থসংৰণ্ণনায

‘‘কুসলা ধম্মা’’তি পদস্স অত্থৰণ্ণনা.

অকুসলপদত্থো

লোভমূলৰণ্ণনা

অকুসলা ¶ পন ধম্মা ভূমিতো একৰিধা কামাৰচরাৰ, সম্পযোগতো পন মূলৰসেন তিৰিধা হোন্তি লোভমূলা দোসমূলা মোহমূলাতি. তত্থ লোভমূলা অট্ঠৰিধা সোমনস্সসহগতং দিট্ঠিগতসম্পযুত্তং অসঙ্খারং, তথা সসঙ্খারং, সোমনস্সসহগতং দিট্ঠিগতৰিপ্পযুত্তং অসঙ্খারং, তথা সসঙ্খারং, উপেক্খাসহগতং দিট্ঠিগতসম্পযুত্তং অসঙ্খারং, তথা সসঙ্খারং, উপেক্খাসহগতং দিট্ঠিগতৰিপ্পযুত্তং অসঙ্খারং, তথা সসঙ্খারন্তি.

তত্থ ইট্ঠারম্মণে লোভবহুলতাদীহি কারণেহি সোমনস্সসহগততা, অসদ্ধম্মসৰনঅকল্যাণমিত্ততাদীহি দিট্ঠিসম্পযুত্ততা চ ৰেদিতব্বা. যদা হি ‘‘নত্থি কামেসু আদীনৰো’’তিআদিনা নযেন মিচ্ছাদিট্ঠিং পুরক্খত্ৰা হট্ঠতুট্ঠো কামে ৰা পরিভুঞ্জতি, দিট্ঠমঙ্গলাদীনি ৰা সারতো পচ্চেতি সভাৰতিক্খেনেৰ অনুস্সাহিতেন চিত্তেন, তদা পঠমং অকুসলচিত্তং উপ্পজ্জতি. যদা মন্দেন সমুস্সাহিতেন, তদা দুতিযং. যদা মিচ্ছাদিট্ঠিং অপুরক্খত্ৰা কেৰলং হট্ঠতুট্ঠো মেথুনং ৰা সেৰতি, পরসম্পত্তিং ¶ ৰা অভিজ্ঝাযতি, পরভণ্ডং ৰা হরতি সভাৰতিক্খেনানুস্সাহিতেন, তদা ততিযং. যদা সমুস্সাহিতেন, তদা চতুত্থং. যদা পন কামানং ৰা অসম্পত্তিং আগম্ম, অঞ্ঞেসং ৰা সোমনস্সহেতূনং অভাৰেন চতূসুপি ৰিকপ্পেসু সোমনস্সরহিততা হোতি, তদা সেসানি চত্তারি উপেক্খাসহগতানি উপ্পজ্জন্তীতি অযং সম্পযোগতো ৰিনিচ্ছযো.

ধম্মুদ্দেসতো পন পঠমাকুসলে তাৰ নিযতা পাল়িযং সরূপেনাগতা সোল়স, যেৰাপনকৰসেন চত্তারোতি ৰীসতি ধম্মা হোন্তি. কথং? ফস্সো ৰেদনা সঞ্ঞা চেতনা চিত্তং ৰিতক্কো ৰিচারো পীতি ৰীরিযং একগ্গতা জীৰিতং অহিরিকং অনোত্তপ্পং লোভো মোহো মিচ্ছাদিট্ঠীতি ইমে সরূপেনাগতা সোল়স ধম্মা, ছন্দো অধিমোক্খো মনসিকারো উদ্ধচ্চন্তি ইমে যেৰাপনকা চত্তারোতি. পদভাজনীযে পন পুব্বে ৰুত্তনযেনেৰ ‘‘ফস্সপঞ্চকং ঝানঙ্গপঞ্চকং ৰীরিযসমাধিমনোসোমনস্সজীৰিতৰসেন ইন্দ্রিযানি পঞ্চ, মিচ্ছাদিট্ঠিসঙ্কপ্পৰাযামসমাধিৰসেন মগ্গঙ্গানি চত্তারি, ৰীরিযসমাধিঅহিরিকানোত্তপ্পৰসেন বলানি চত্তারি, লোভো মোহোতি দ্ৰে মূলানি, অভিজ্ঝা মিচ্ছাদিট্ঠীতি দ্ৰে কম্মপথানি, অহিরিকং অনোত্তপ্পন্তি ¶ লোকনাসদুকং, সমথো পগ্গাহো অৰিক্খেপো চাতি এৰং সরূপেনাগতানং দ্ৰত্তিংসধম্মানং সোল়সসু এৰ সমৰরোধো, সৰিভত্তিকাৰিভত্তিকভেদো চ কামাৰচরপঠমকুসলে ৰুত্তানুসারতো ঞাতব্বো. অযং ধম্মুদ্দেসতো ৰিনিচ্ছযো.

লক্খণাদিৰিভাগতো পন ন হিরীযতীতি অহিরিকো, অহিরিকস্স ভাৰো অহিরিক্কং, ন ওত্তপ্পং অনোত্তপ্পং. তেসু অহিরিক্কং কাযদুচ্চরিতাদীহি অজিগুচ্ছনলক্খণং, অলজ্জালক্খণং ৰা, অনোত্তপ্পং তেহেৰ অসারজ্জনলক্খণং, অনুত্তাসলক্খণং ¶ ৰা, সেসং হিরিওত্তপ্পানং ৰুত্তপ্পটিপক্খৰসেন ৰেদিতব্বং.

লুব্ভতি তেন, সযং ৰা লুব্ভতি, লুব্ভনমত্তমেৰ ৰা তন্তি লোভো. সো আরম্মণগহণলক্খণো মক্কটালেপো ৰিয, অভিসঙ্গরসো তত্তকপালে খিত্তমংসপেসি ৰিয, অপরিচ্চাগপচ্চুপট্ঠানো তেলঞ্জনরাগো ৰিয, সঞ্ঞোজনীযধম্মেসু অস্সাদদস্সনপদট্ঠানো. তণ্হানদিভাৰেন ৰড্ঢমানো সীঘসোতা নদী ৰিয মহাসমুদ্দং অপাযমেৰ গহেত্ৰা গচ্ছতীতি দট্ঠব্বো.

মুয্হন্তি তেন, সযং ৰা মুয্হতি, মুয্হনমত্তমেৰ ৰা তন্তি মোহো. সো চিত্তস্স অন্ধকারলক্খণো, অঞ্ঞাণলক্খণো ৰা, অসম্পটিৰেধরসো, আরম্মণসভাৰচ্ছাদনরসো ৰা, অসম্মাপটিপত্তিপচ্চুপট্ঠানো, অন্ধকারপচ্চুপট্ঠানো ৰা, অযোনিসোমনসিকারপদট্ঠানো, সব্বাকুসলানং মূলন্তি দট্ঠব্বো.

মিচ্ছা পস্সন্তি তায, সযং ৰা মিচ্ছা পস্সতি, মিচ্ছাদস্সনমত্তমেৰ ৰা এসাতি মিচ্ছাদিট্ঠি. সা অযোনিসো অভিনিৰেসলক্খণা, পরামাসরসা, মিচ্ছাভিনিৰেসপচ্চুপট্ঠানা, অরিযানং অদস্সনকামতাদিপদট্ঠানা, পরমং ৰজ্জন্তি দট্ঠব্বা.

উদ্ধতভাৰো উদ্ধচ্চং. তং অৰূপসমলক্খণং, অনৰট্ঠানরসং, ভন্ততাপচ্চুপট্ঠানং, অযোনিসোমনসিকারপদট্ঠানং, চিত্তৰিক্খেপোতি দট্ঠব্বো. সেসো পনেত্থ সুঞ্ঞতৰারপরিযোসানো সব্বোপি ৰিনিচ্ছযো কুসলাধিকারে ৰুত্তানুসারতো ৰেদিতব্বো. কেৰলং সঙ্গহৰারে পাল়িযং আগতৰসেন ¶ পঞ্চিন্দ্রিযতা, চতুরঙ্গমগ্গতা, চতুব্বিধবলতা, দ্ৰেহেতুতা, সব্বত্থ অকুসলভাৰো চ ৰিসেসো, সেসং তাদিসমেৰ. পঠমাকুসলং নিট্ঠিতং.

যথা ¶ চ পঠমে, এৰং দুতিযেপি সসঙ্খারতা, যেৰাপনকেসু থিনমিদ্ধানং সম্ভৰো, নিযততা চ ৰিসেসো. তত্থ থিননতা থিনং, মিদ্ধনতা মিদ্ধং, অনুস্সাহনসংসীদনতা, সত্তিৰিঘাতো চাতি অত্থো. তত্থ থিনং অনুস্সাহলক্খণং, ৰীরিযৰিনোদনরসং, সংসীদনপচ্চুপট্ঠানং. মিদ্ধং অকম্মঞ্ঞতালক্খণং, ওনহনরসং, লীনতাপচ্চুপট্ঠানং, পচলাযিকানিদ্দাপচ্চুপট্ঠানং ৰা, উভযম্পি অরতিতন্দিৰিজম্ভিকাদীসু অযোনিসোমনসিকারপদট্ঠানং. দুতিযং.

ততিযে সব্বোপি ৰিনিচ্ছযো পঠমাকুসলে ৰুত্তনযোৰ. কেৰলং দিট্ঠিযা অভাৰো, যেৰাপনকেসু মানস্স সম্ভৰো, অনিযততা চ, সঙ্গহৰারে তিৰঙ্গিকমগ্গতা চ ৰিসেসো, সেসং তাদিসমেৰ. তত্থ মঞ্ঞতীতি মানো. সো উণ্ণতিলক্খণো, সম্পগ্গহরসো, কেতুকম্যতাপচ্চুপট্ঠানো, দিট্ঠিৰিপ্পযুত্তলোভপদট্ঠানো, উম্মাদো ৰিয দট্ঠব্বো. ততিযং.

যথা চ ততিযে, এৰং চতুত্থেপি. থিনমিদ্ধঞ্চেত্থ সসঙ্খারতা চ অধিকা, সেসং তাদিসমেৰ. চতুত্থং.

পঞ্চমছট্ঠসত্তমট্ঠমেসু সোমনস্সট্ঠানে উপেক্খাসম্ভৰো, পীতিযা চ অভাৰো, ততো এৰ সঙ্গহৰারে চতুরঙ্গজ্ঝানতা চ ৰিসেসো, সেসং সব্বং পঠমদুতিযততিযচতুত্থচিত্তসদিসমেৰ.

লোভমূলা নিট্ঠিতা.

দোসমূলৰণ্ণনা

দোসমূলা পন দ্ৰিধা দোমনস্সসহগতং পটিঘসম্পযুত্তং অসঙ্খারং, তথা সসঙ্খারং. এৰং সম্পযোগতো. ধম্মুদ্দেসাদিতো পন পঠমে তাৰ পঠমাকুসলে ৰুত্তেসু পীতিলোভদিট্ঠিযো ৰজ্জেত্ৰা দোসং ¶ , যেৰাপনকেসু অনিযতানি ¶ ইস্সামচ্ছরিযকুক্কুচ্চানি, সোমনস্সট্ঠানে দোমনস্সঞ্চ পক্খিপিত্ৰা একৰীসতি ধম্মা হোন্তি. যেৰাপনকা চেত্থ সত্ত. তত্থ দুস্সন্তি তেন, সযং ৰা দুস্সতি, দুস্সনমত্তমেৰ ৰা তন্তি দোসো. সো চণ্ডিক্কলক্খণো পহটাসীৰিসো ৰিয, ৰিসপ্পনরসো ৰিসনিপাতো ৰিয, অত্তনো নিস্সযদহনরসো ৰা দাৰগ্গি ৰিয, দুস্সনপচ্চুপট্ঠানো লদ্ধোকাসো ৰিয সপত্তো, আঘাতৰত্থুপদট্ঠানো, ৰিসসংসট্ঠপূতিমুত্তং ৰিয দট্ঠব্বো. ইস্সাযনা ইস্সা. সা পরসম্পত্তীনং উসূযনলক্খণা, তত্থেৰ অনভিরতিরসা, ততো ৰিমুখভাৰপচ্চুপট্ঠানা, পরসম্পত্তিপদট্ঠানা, সঞ্ঞোজনন্তি দট্ঠব্বা. মচ্ছেরভাৰো মচ্ছরিযং. তং লদ্ধানং ৰা লভিতব্বানং ৰা অত্তনো সম্পত্তীনং নিগূহনলক্খণং, তাসঞ্ঞেৰ পরেহি সাধারণভাৰঅক্খমনরসং, সঙ্কোচনপচ্চুপট্ঠানং, কটুকঞ্চুকতাপচ্চুপট্ঠানং ৰা, অত্তসম্পত্তিপদট্ঠানং, চেতসো ৰিরূপভাৰোতি দট্ঠব্বং. কুচ্ছিতং কতং কুকতং, তস্স ভাৰো কুক্কুচ্চং. তং পচ্ছানুতাপলক্খণং, কতাকতানুসোচনরসং, ৰিপ্পটিসারপচ্চুপট্ঠানং, কতাকতপদট্ঠানং, দাসব্যমিৰ দট্ঠব্বং. সঙ্গহৰারে দুক্খেন সদ্ধিং চতুরঙ্গজ্ঝানতা, দোমনস্সেন পঞ্চিন্দ্রিযতা, তিৰঙ্গিকমগ্গতা, দোসমোহৰসেন দ্ৰিহেতুকতা চ ৰেদিতব্বা. সেসো পন সব্বো ৰিনিচ্ছযো পঠমাকুসলে ৰুত্তসদিসো এৰ. যথা চ পঠমে, এৰং দুতিযেপি, সসঙ্খারতা পন থিনমিদ্ধেহি সদ্ধিং নৰযেৰাপনকতা চ ৰিসেসো, সেসং তাদিসমেৰ.

দোসমূলা নিট্ঠিতা.

মোহমূলৰণ্ণনা

মোহমূলাপি দ্ৰিধা উপেক্খাসহগতং ৰিচিকিচ্ছাসম্পযুত্তং, তথা উদ্ধচ্চসম্পযুত্তন্তি. তত্থ পঠমে ধম্মুদ্দেসতো তাৰ ফস্সপঞ্চকং ৰিতক্কো ৰিচারো ৰীরিযং একগ্গতা জীৰিতং অহিরিকং অনোত্তপ্পং মোহো ৰিচিকিচ্ছাতি সরূপেনাগতা চুদ্দস ¶ , উদ্ধচ্চং মনসিকারোতি যেৰাপনকা দ্ৰে চাতি সোল়স ধম্মা হোন্তি, একগ্গতা চেত্থ চিত্তট্ঠিতিমত্তা, ইন্দ্রিযমগ্গবলভাৰং ন সম্পাপুণাতি. ততো এৰ সঙ্গহৰারে সমাধিং ৰজ্জেত্ৰা উপেক্খায সদ্ধিং চত্তারি ইন্দ্রিযানি, দ্ৰে ¶ মগ্গঙ্গানি, তীণি বলানি হোন্তি. মোহো পনেত্থ একোৰ হেতু. সেসো পনেত্থ সব্বো ৰিনিচ্ছযো ৰুত্তনযো এৰ.

তত্থ ৰিগতা চিকিচ্ছা এতিস্সাতি ৰিচিকিচ্ছা. সা সংসযলক্খণা, কম্পনরসা, অনিচ্ছযপচ্চুপট্ঠানা, অনেকংসভাৰপচ্চুপট্ঠানা ৰা, অযোনিসোমনসিকারপদট্ঠানা, পটিপত্তিঅন্তরাযকরাতি দট্ঠব্বা. যথা চ ৰিচিকিচ্ছাসম্পযুত্তে, এৰং উদ্ধচ্চসম্পযুত্তেপি. কেৰলং ৰিচিকিচ্ছায অভাৰো, অধিমোক্খস্স চ ভাৰো, ততো এৰ বলৰতরসমাধিতা, তেনেৰ সঙ্গহৰারে সমাধিনা সদ্ধিং পঞ্চিন্দ্রিযতা, তিৰঙ্গিকমগ্গতা, চতুব্বলতা চ হোতি. উদ্ধচ্চঞ্চেত্থ সরূপেনেৰ নিদ্দিট্ঠং, অধিমোক্খমনসিকারা দ্ৰে যেৰাপনকৰসেনাতি অযং ৰিসেসো, সেসং তাদিসমেৰ. ইমানি পন দ্ৰে চিত্তানি নানাৰিসযে, একৰিসযে চ অসণ্ঠহনতো পৰট্টনকানি. উদ্ধচ্চসহগতং হি লদ্ধাধিমোক্খতায লদ্ধপতিট্ঠং একারম্মণেযেৰ পতিট্ঠায পতিট্ঠায পৰট্টতি চতুরস্সমণি ৰিয, ইতরং নানারম্মণেসু ৰট্টমণি ৰিযাতি দট্ঠব্বং. উদ্ধচ্চসহগতঞ্চ ঠপেত্ৰা সেসা একাদস পটিসন্ধিং জনেন্তীতি ৰেদিতব্বং.

ৰিসযাদিপ্পভেদতো পনেতে দ্ৰাদসপি ৰত্থারম্মণৰসেন তাৰ ছব্বিধা হোন্তি. তেসু লোভমোহমূলা পন দস পঞ্চদ্ৰারে হদযৰত্থুং নিস্সাযেৰ, মনোদ্ৰারে নিস্সায ৰা অনিস্সায ৰা জৰনকিচ্চং সাধযমানা ছব্বিধা. তথা দোসমূলা নিস্সাযেৰ পন পৰত্তন্তি. লোভমূলা পন ¶ অদিন্নাদানকামমিচ্ছাচারমুসাৰাদপেসুঞ্ঞসম্ফপ্পলাপাভিজ্ঝাসঙ্খাতানং ছন্নং কম্মপথানং ৰসেন ছব্বিধা. দিট্ঠিসম্পযুত্তা পনেত্থ মিচ্ছাদিট্ঠিৰসেনাপীতি সত্তৰিধা হোন্তি. দোসমূলা পন পাণাভিপাতাদিন্নাদানমুসাৰাদপেসুঞ্ঞফরুসসম্ফপ্পলাপব্যাপাদৰসেন সত্তৰিধা হোন্তি. দসন্নম্পি পনেসং দ্ৰারকম্মৰসেন চেৰ ৰীমংসাৰজ্জিতাধিপতিত্তযৰসেন চ কুসলে ৰুত্তনযেন ৰিভাগো ৰেদিতব্বো. একন্তহীনত্তা হীনত্তিকভেদো নত্থি. আরম্মণাধিপতি পনেত্থ লোভমূলেসু এৰ, ন ইতরেসু, মোহমূলেসু পন সহজাতাধিপতিপি নত্থি, তথা কম্মপথভেদোপি. ন হি পৰট্টমানং কঞ্চি অধিপতিং করোতি. দোসো ৰা সৰিসযং, ৰিচিকিচ্ছাচিত্তঞ্চ পটিপত্তিমন্তরাযকরত্তেন দুচ্চরিতহেতুভূতম্পি পাণাতিপাতাদীনং দোসলোভমূলচিত্তেহেৰ সন্নিট্ঠাপনিযতো কম্মপথভেদং ন গচ্ছতি, পুব্বভাগে এৰ পন হেতু হোতি. তেনেৰস্স অপাযহেতুতা পঠমমগ্গৰজ্ঝতাতি দট্ঠব্বং. অতীতাদিভেদতো পন দ্ৰাদসন্নং পচ্চেকমনন্ততা, সেসো চ ৰিনিচ্ছযো কুসলাধিকারে ৰুত্তনযেনেৰ ৰেদিতব্বোতি.

অকুসলা ধম্মা নিট্ঠিতা.

অব্যাকতপদত্থো

অহেতুককুসলৰিপাকৰণ্ণনা

অব্যাকতা ¶ পন ধম্মা জাতিতো চতুব্বিধা ৰিপাককিরিযরূপনিব্বানৰসেন. তত্থ ৰিপাকাব্যাকতা ধম্মা জাতিতো চ দ্ৰিধা হোন্তি কুসলাকুসলৰিপাকৰসেন. তত্থ কুসলৰিপাকা ভূমিতো চতুব্বিধা কামরূপারূপাৰচরলোকুত্তরৰিপাকৰসেন. তত্থ কামাৰচরৰিপাকা অহেতুকা সহেতুকাতি দুৰিধা. তত্থ অলোভাদিসহজাতহেতুৰিরহিতা অহেতুকা. তে সম্পযোগৰত্থারম্মণাদিভেদতো ¶ অট্ঠৰিধা. সেয্যথিদং – উপেক্খাসহগতং চক্খুৰিঞ্ঞাণং, তথা সোতঘানজিৰ্হাৰিঞ্ঞাণং, সুখসহগতং কাযৰিঞ্ঞাণং, উপেক্খাসহগতা মনোধাতু, সোমনস্সসহগতা মনোৰিঞ্ঞাণধাতু, তথা উপেক্খাসহগতা চাতি. চক্খুৰিঞ্ঞাণাদীনি হি চত্তারি চক্খুপসাদাদীসু চতূসু উপাদাযরূপেসু উপাদাযরূপানং ঘট্টনানিঘংসস্স পিচুপিণ্ডে পিচুপিণ্ডস্সেৰাতিদুব্বলতায উপেক্খাৰেদনাসম্পযুত্তানেৰ হোন্তি. কাযৰিঞ্ঞাণং পন কাযিন্দ্রিযে ফোট্ঠব্বভূতত্তযঘট্টনানিঘংসস্স অধিকরণিমত্থকে ঠপিতপিচুপিণ্ডে কূটপহারস্সেৰ বলৰতায পসাদনিস্সযেসুপি ভূতেসু পটিঘাতসম্ভৰতো সুখসহগতং হোতি, মনোধাতু অত্তনো গহণদুব্বলতায অতিইট্ঠেপি উপেক্খাসহগতাৰ, মনোৰিঞ্ঞাণধাতু পন অতিইট্ঠে সোমনস্সসহগতা, ইট্ঠমজ্ঝত্তে উপেক্খাসহগতাতি অযং সম্পযোগতো ৰিনিচ্ছযো.

ধম্মুদ্দেসাদিতো পন চক্খুৰিঞ্ঞাণে তাৰ ফস্সপঞ্চকং, একগ্গতা, জীৰিতন্তি সরূপেনাগতা সত্ত, যেৰাপনকৰসেন মনসিকারো একো চাতি অট্ঠ ধম্মা হোন্তি. সঙ্গহতো পনেত্থ খন্ধাযতনধাতুআহারিন্দ্রিযৰসেন পঞ্চেৰসঙ্গহা. তত্থ চক্খুৰিঞ্ঞাণধাতুধম্মধাতুৰসেন ধাতুসঙ্গহো, মনো উপেক্খাজীৰিতিন্দ্রিযৰসেন ইন্দ্রিযসঙ্গহো চ ৰেদিতব্বো. সেসং ৰুত্তনযমেৰ. এত্থ চ ৰিজ্জমানাপি ৰেদনা ঝানঙ্গতং ন গচ্ছতি, ইন্দ্রিযং পন হোতি. একগ্গতা ইন্দ্রিযমগ্গঙ্গবলভাৰম্পি ন গচ্ছতি অতিদুব্বলত্তা. ৰিতক্কপচ্ছিমকং হি ঝানং, হেতুপচ্ছিমকো মগ্গো, বলঞ্চ. যথা চেত্থ, এৰং সোতঘানজিৰ্হাকাযৰিঞ্ঞাণেসুপি. কেৰলং পন সঙ্গহৰারে সোতৰিঞ্ঞাণধাতুআদিৰসেন ধাতুসঙ্গহো, কাযৰিঞ্ঞাণে ৰেদনাপরিৰত্তনঞ্চ ৰিসেসো. যথা ¶ চেত্থ, এৰং মনোধাতুযাপি. কেৰলং পন ৰিতক্কৰিচারা দ্ৰে যেৰাপনকা চ অধিমোক্খোতি তযো ধম্মা অধিকা. সঙ্গহৰারে মনোধাতুধম্মধাতুৰসেন ধাতুসঙ্গহো, ৰিতক্কৰিচারুপেক্খেকগ্গতাহি চতূহি ঝানঙ্গসঙ্গহো চ ৰিসেসো. পাল়িযং পনেত্থ কিঞ্চাপি ঝানঙ্গসঙ্গহো ¶ ন উদ্ধটো, তথাপি সৰিতক্কেসু নিযমেন ঝানঙ্গতাসম্ভৰতো গহেতব্বোৰ. যথা চেত্থ, এৰং মনোৰিঞ্ঞাণধাতুদ্ৰযেপি. সোমনস্সসহগততায পনেত্থ পীতি অধিকা, সঙ্গহৰারে চ পঞ্চঙ্গজ্ঝানতা, ৰেদনাপরিৰত্তনং, উভযত্থাপি মনোৰিঞ্ঞাণধাতুধম্মধাতুৰসেন ধাতুসঙ্গহো চ ৰিসেসো, সেসং তাদিসমেৰ.

ৰিসযাদিপ্পভেদতো পন চক্খুৰিঞ্ঞাণাদীনি পঞ্চ যথাক্কমং চক্খাদিএকেকমেৰ ৰত্থুং নিস্সায পচ্চুপ্পন্নে, ইট্ঠে চ রূপাদিএকেকারম্মণে এৰ কিরিযমনোধাতুঅনন্তরং আলোকাকাসৰাযুজলপথৰীসহকারীনি পসাদকাদীনি দস্সনসৰনঘাযনসাযনফুসনকিচ্চানি সাধযমানানি চক্খুদ্ৰারাদীসু একেকস্মিং এৰ ৰিপচ্চন্তি. এৰমেতেসং ৰত্থুদ্ৰারারম্মণকিচ্চানি ৰিসুং নিযতানি. ঠানং পন তেসং পঞ্চন্নম্পি একমেৰ, তেন নেসং ন ভেদো. মনোধাতু পন হদযৰত্থুং নিস্সাযেৰ পচ্চুপ্পন্নেসু রূপাদীসু পঞ্চসুপি আরম্মণেসু পঞ্চৰিঞ্ঞাণানন্তরং সম্পটিচ্ছনকিচ্চং সাধযমানা পঞ্চসুপি দ্ৰারেসু পৰত্ততি, সোমনস্সসহগতা মনোৰিঞ্ঞাণধাতু পন হদযৰত্থুং নিস্সাযেৰ অতিইট্ঠে পচ্চুপ্পন্নে পঞ্চারম্মণে ৰিপাকমনোধাতুঅনন্তরং সন্তীরণকিচ্চং, ছসুপি দ্ৰারেসু ছসু বলৰকামাৰচরারম্মণেসু অতীতাদীসু জৰনানন্তরং তদারম্মণকিচ্চঞ্চ সাধযমানা ৰিপচ্চতি. এৰমেতিস্সা দ্ৰারারম্মণকিচ্চট্ঠানানি অনিবদ্ধানি, ততো তেহি ভেদো হোতি, ৰত্থু পন তত্থেৰ নিবদ্ধং, ততো ন ভেদো, এৰমুপেক্খাসহগতাযপি. কেৰলং ¶ পনেসা দ্ৰারৰিনিমুত্তাপি হুত্ৰা সুগতিযং জচ্চন্ধবধিরজচ্চুম্মত্তকাদীনং পটিসন্ধিকালে পুরিমচুতিচিত্তানন্তরং কম্মবলেনোপট্ঠিতং কম্মকম্মনিমিত্তগতিনিমিত্তেসু অঞ্ঞতরং অতীতাদিভেদং ছব্বিধম্পি কামাৰচরারম্মণমারব্ভ পটিসন্ধিকিচ্চং, তদনন্তরতো পট্ঠায যাৰতাযুকং ভৰঙ্গকিচ্চং, অন্তে চুতিকিচ্চঞ্চ, ৰুত্তনযেন সন্তীরণতদারম্মণকিচ্চানি চ সাধযমানা ইমেসু পঞ্চসু ঠানেসু ৰিপচ্চতীতি অযং ৰিসেসো, সেসং তাদিসমেৰ.

এত্থ চ ৰধবন্ধাদিৰসপ্পৰত্তে অনিট্ঠারম্মণে খন্তিপটিসঙ্খানাদিৰসেন কুসলুপ্পত্তিতো তন্নিব্বত্তানং পটিসন্ধিআদিৰিঞ্ঞাণানং কম্মনিমিত্তঞ্চে আরম্মণং হোতি, অনিট্ঠেনেৰ তেন ভৰিতব্বং. এৰং ইট্ঠৰিসযে উপ্পন্নানং কুসলৰিপাকানং অনিট্ঠারম্মণেসু অনুপ্পত্তিতো কম্মগতিনিমিত্তমেৰ তেসং আরম্মণং হোতীতি ৰিঞ্ঞাযতি. ৰিচারেত্ৰা যথা অৰিরোধো হোতি, তথা গহেতব্বং. এৰং ইট্ঠৰিসযে উপ্পন্নকুসলতো নিব্বত্তানম্পি পটিসন্ধিআদিৰিঞ্ঞাণানং কম্মনিমিত্তারম্মণতায ¶ অৰিরোধো ঞাতব্বো. অতীতাদিভেদতো পন অট্ঠন্নম্পি পচ্চেকমনন্তরতা হেট্ঠা ৰুত্তনযেন গহেতব্বা.

অহেতুককুসলৰিপাকা নিট্ঠিতা.

সহেতুককুসলৰিপাকৰণ্ণনা

অলোভাদিৰিপাকহেতুসম্পযুত্তা পন সহেতুকা, তে সম্পযোগতো কামাৰচরকুসলা ৰিয অট্ঠৰিধা. সোমনস্সঞাণাদিসম্পযোগো পনেত্থ আগমনাদিতো ৰেদিতব্বো. তিহেতুকং হি কামাৰচরকুসলং তিহেতুকদ্ৰিহেতুকপটিসন্ধিযো দত্ৰা পৰত্তে ছসু দ্ৰারেসু সোল়স ৰিপাকানি দেতি, দুহেতুকং পন কুসলং দুহেতুকাহেতুকপটিসন্ধিযো দত্ৰা পৰত্তে ছসু দ্ৰারেসু তিহেতুকরহিতানি ¶ দ্ৰাদস ৰিপাকানি দেতি. অসঙ্খারিকসসঙ্খারিকভাৰো পনেত্থ পচ্চযৰিসেসতোপি হোতি. বলৰপচ্চযেনাপি হি উপ্পন্নং অসঙ্খারিকং হোতি, দুব্বলেনাপি ইতরং. কেচি পন অসঙ্খারিকেন সসঙ্খারৰিপাকানং, সসঙ্খারিকেন চ অসঙ্খারিকানং উপ্পত্তিং ন ইচ্ছন্তি. যস্মা পনেতানি পটিসন্ধিদাযকতো অঞ্ঞেনাপি কম্মেন পৰত্তে অকুসলৰিপাকানি পৰত্তন্তি, পট্ঠানে চ ‘‘সহেতুকং ভৰঙ্গং অহেতুকস্স ভৰঙ্গস্স অনন্তরপচ্চযেন পচ্চযো’’তি (পট্ঠা. ৩.১.১০২) ৰুত্তং, তস্মা অহেতুকপটিসন্ধিকস্স পুগ্গলস্স সুগতিযং পৰত্তে সহেতুকানিপি ৰিপাকানি পৰত্তন্তি. দুগ্গতিযং, পন রূপাৰচরভূমিযঞ্চ অহেতুকানেৰ পৰত্তন্তি. তেসুপি অতিইট্ঠে আরম্মণে সোমনস্সসহগতানি, ইট্ঠমজ্ঝত্তে উপেক্খাসহগতানীতি এৰং আগমনাদিতো সম্পযোগভেদো ৰেদিতব্বো.

ধম্মুদ্দেসাদিতো পন যাৰ সুঞ্ঞতৰারপরিযোসানা কামাৰচরকুসলসদিসোৰ সব্বো ৰিনিচ্ছযো, কেৰলঞ্চেত্থ যেৰাপনকেসু করুণামুদিতা ন সন্তি সত্তারম্মণত্তা. একন্তপরিত্তারম্মণা হি কামাৰচরৰিপাকা. ৰিরতিযোপেত্থ লোকিযেসু একন্তকুসলসভাৰত্তা ন সন্তি. ‘‘পঞ্চসিক্খাপদা কুসলা এৰা’’তি (ৰিভ. ৭১৫ আদযো) হি ৰুত্তং. ফস্সাদযো চেত্থ ¶ ৰিপাকত্তা আদাসে মুখনিমিত্তং ৰিয নিরুস্সাহসন্তা, কুসলা পন মুখং ৰিয সউস্সাহা. সঙ্গহৰারে চ পঞ্চঙ্গিকো মগ্গো হোতি, অযং ৰিসেসো. সেসং তাদিসমেৰ.

ৰিসযাদিপ্পভেদতো পন য্ৰাযং কুসলেসু কম্মদ্ৰারপুঞ্ঞকিরিযাধিপতীহি ভেদো ৰুত্তো, সো ইধ নত্থি অৰিঞ্ঞত্তিজনকতো, অৰিপাকধম্মতো, তথা অপ্পৰত্তিতো চ. হীনত্তিকভেদো পন অত্থি হীনমজ্ঝিমপ্পণীতানং কুসলানং ৰিপাকত্তা ¶ , তথা দ্ৰারারম্মণাদিভেদো. এতে হি হদযৰত্থুং নিস্সায দ্ৰারৰিনিমুত্তা হুত্ৰা দেৰমনুস্সেসু দ্ৰিহেতুকতিহেতুকানং হেট্ঠা ৰুত্তনযেন পটিসন্ধিভৰঙ্গচুতিকিচ্চানি, ছদ্ৰারে ছসু আরম্মণেসু তদারম্মণকিচ্চঞ্চ সাধযমানা এৰং চতূসু ঠানেসু ৰিপচ্চন্তি. এৰমেতেসং দ্ৰারারম্মণকিচ্চট্ঠানানি অনিবদ্ধানি, ততো তেহি ভেদো হোতি. ৰত্থু পন তত্থেৰ নিবদ্ধং, ততো ন ভেদো. অতীতাদিভেদতো পনেত্থাপি অনন্ততা ৰুত্তনযা এৰাতি.

কামাৰচরসহেতুককুসলৰিপাকা নিট্ঠিতা.

রূপাৰচরৰিপাকৰণ্ণনা

রূপাৰচরৰিপাকাপি সম্পযোগভেদতো অত্তনো কুসলা ৰিয পঞ্চৰিধা হোন্তি. সব্বো চেত্থ ৰিনিচ্ছযভেদো কুসলে ৰুত্তনযো এৰ. ৰিপাকভাৰতো পনেত্থ যথা হত্থিআদীনং ছাযা তংসদিসা, এৰং কুসলাগমনতো চ ঝানঙ্গাদিসম্পযুত্তধম্মসমাযোগো, পটিপদাদিভেদো চ হোতি. অপিচেত্থ তিৰিধায পঠমজ্ঝানভূমিযা পঠমজ্ঝানৰিপাকা, তথা দুতিযজ্ঝানভূমিযা দুতিযজ্ঝানৰিপাকা ততিযজ্ঝানৰিপাকা চ, ততিযজ্ঝানভূমিযা চতুত্থজ্ঝানৰিপাকা, ৰেহপ্ফলপঞ্চসুদ্ধাৰাসৰসেন ছব্বিধায চতুত্থজ্ঝানভূমিযা পঞ্চমজ্ঝানৰিপাকা চ ৰুত্তনযেন পটিসন্ধিভৰঙ্গচুতিকিচ্চানি সাধযমানা হদযৰত্থুং নিস্সায দ্ৰারৰিনিমুত্তাৰ কম্মনিমিত্তসঙ্খাতপঞ্ঞত্তারম্মণা হুত্ৰা ৰিপচ্চন্তীতি অযং ৰিসেসো, সেসং তাদিসমেৰ.

রূপাৰচরৰিপাকা নিট্ঠিতা.

অরূপাৰচরৰিপাকৰণ্ণনা

এৰং ¶ অরূপাৰচরৰিপাকাপি আরম্মণভেদতো অত্তনো কুসলা ৰিয চতুব্বিধা হোন্তি. ৰিনিচ্ছযো চ সব্বো কুসলে ¶ ৰুত্তনযোৰ. কুসলতো চেত্থ ৰিসেসো রূপাৰচরৰিপাকে ৰুত্তনযেন ৰেদিতব্বো. কেৰলং পনেত্থ কম্মনিমিত্তভূতপঞ্ঞত্তারম্মণো আকাসানঞ্চাযতনৰিপাকো পঠমারুপ্পভূমিযং, তথা মহগ্গতারম্মণো ৰিঞ্ঞাণঞ্চাযতনৰিপাকো দুতিযারুপ্পভূমিযং, কম্মনিমিত্তভূতপঞ্ঞত্তারম্মণো আকিঞ্চঞ্ঞাযতনৰিপাকো ততিযারুপ্পভূখিযং, মহগ্গতারম্মণো নেৰসঞ্ঞানাসঞ্ঞাযতনৰিপাকো চতুত্থারুপ্পভূমিযঞ্চ অৰত্থুকা ৰুত্তনযেন পটিসন্ধিভৰঙ্গচুতিকিচ্চানি সাধযমানাৰ পৰত্তন্তীতি অযমেৰ ৰিসেসো.

অরূপাৰচরৰিপাকা নিট্ঠিতা.

লোকুত্তরৰিপাকৰণ্ণনা

তথা লোকুত্তরৰিপাকাপি অত্তনো কুসলা ৰিয তংতংমগ্গফলত্তা চতুব্বিধা, ঝানঙ্গযোগভেদতো পচ্চেকং পঞ্চ পঞ্চ কত্ৰা ৰীসতিৰিধাৰ হোন্তি. ৰিনিচ্ছযো চেত্থ কুসলে ৰুত্তনযোৰ. কেৰলং সঙ্গহৰারে সোতাপত্তিমগ্গফলং সকদাগামিমগ্গফলং অনাগামিমগ্গফলন্তি ইমেসং তিণ্ণং অঞ্ঞিন্দ্রিযং, অরহত্তফলস্স চ অঞ্ঞাতাৰিন্দ্রিযং পঞ্ঞিন্দ্রিযট্ঠানে গহেত্ৰা অট্ঠিন্দ্রিযতা, বোজ্ঝঙ্গমগ্গঙ্গাদিবোধিপক্খিযধম্মা, পটিপদাদিভেদো চ মগ্গাগমনৰসেনেৰ হোতীতি ৰেদিতব্বো. অধিপতিভেদোপেত্থ লব্ভতি. লোকুত্তরকুসলা হি অত্তনো ফলানং অনন্তরুপ্পত্তিতো, জৰনৰুত্তিতো চ অধিপতিং ৰিধাতুং সক্কোন্তি, লোকিযা পন ৰিপরীততো ন সক্কোন্তি. তেনাহু পোরাণা ‘‘ৰিপাকে অধিপতী নত্থি ঠপেত্ৰা লোকুত্তর’’ন্তি (ধ. স. অট্ঠ. ৫০৫). ৰিমোক্খভেদতো পনেতে মগ্গাগমনতো তিৰিধা হোন্তি সুঞ্ঞতঅনিমিত্তঅপ্পণিহিতৰিমোক্খৰসেন. মগ্গা হি ৰিপস্সনাগমনতো ‘‘সুঞ্ঞতো অপ্পণিহিতো’’তি দ্ৰে নামানি লভিত্ৰা সগুণারম্মণতো পরিযাযেন ¶ অনিমিত্তাতিপি ৰুচ্চন্তি, তস্মা সযং আগমনীযট্ঠানে ঠত্ৰা অত্তনো অত্তনো অনন্তরফলানং নিপ্পরিযাযতো তীণিপি নামানি দেন্তি. অপরভাগে পন ফলসমাপত্তিভূতানং ন দেন্তি. তত্থ ৰিপস্সনাগমনতোৰ মগ্গে ৰুত্তনযেন ¶ দুৰিধো নামলাভো ৰেদিতব্বো. তে চ ন মগ্গা ৰিয একচিত্তক্খণিকা, মগ্গৰীথিযং পন দ্ৰত্তিক্খত্তুং, ফলসমাপত্তিৰীথিযং সকলম্পি দিৰসং অপ্পনাজৰনৰসেনেৰ নিরন্তরং মহগ্গতজৰনানি ৰিয পৰত্তন্তীতি অযং ৰিসেসো.

লোকুত্তরৰিপাকা নিট্ঠিতা.

অকুসলৰিপাকা পন কামাৰচরাৰ, লোভাদিসম্পযুত্তহেতু অভাৰতো অহেতুকা এৰ চ হোন্তি. তে সম্পযোগতো উপেক্খাসহগতং চক্খুৰিঞ্ঞাণং, তথা সোতঘানজিৰ্হাৰিঞ্ঞাণানি, তথা দুক্খসহগতং কাযৰিঞ্ঞাণং, উপেক্খাসহগতা মনোধাতু, তথা মনোৰিঞ্ঞাণধাতূতি সত্তৰিধা. ৰিনিচ্ছযো পনেস সব্বত্থ তাদিসাহেতুককুসলৰিপাকেসু ৰুত্তনযো এৰ. কেৰলং পনানিট্ঠারম্মণতা, কাযৰিঞ্ঞাণস্স দুক্খসহগততা, উপেক্খাসহগতমনোৰিঞ্ঞাণধাতুযা উদ্ধচ্চৰজ্জিতাকুসলপচ্চযা চতূসু অপাযেসু পটিসন্ধিভৰঙ্গচুতিকিচ্চানি, সুগতিযঞ্চ সন্তীরণতদারম্মণকিচ্চানি চ সাধনৰসেন পৰত্তি চ ৰিসেসো, সেসং তাদিসমেৰ.

অকুসলৰিপাকা নিট্ঠিতা.

নিট্ঠিতা চ ৰিপাকাব্যাকতা.

অহেতুককিরিযাৰণ্ণনা

কিরিযাব্যাকতা পন কামরূপারূপাৰচরৰসেন তিৰিধা. তত্থ কামাৰচরকিরিযা অহেতুকা সহেতুকাতি দুৰিধা. তত্থ সহজাতহেতুৰিরহিতা অহেতুকা. তা ¶ সম্পযোগাদিতো তিৰিধা উপেক্খাসহগতা মনোধাতু, সোমনস্সসহগতা মনোৰিঞ্ঞাণধাতু, তথা উপেক্খাসহগতাতি. কিরিযাতি করণমত্তং, কিচ্চমত্তন্তি অত্থো. সব্বেসুযেৰ হি কিরিযচিত্তেসু যং আৰজ্জনকিচ্চদ্ৰযং, তং অজৰনৰুত্তিতো মোঘপুপ্ফং ৰিয. যং জৰনৰুত্তিকং, তং নিরানুসযসন্তানপ্পৰত্তিতো ছিন্নমূলরুক্খপুপ্ফং ৰিয অফলং হোতি. তংতংআৰজ্জনজৰনকিচ্চসাধনৰসেন পৰত্তত্তা পন কিচ্চমত্ততং উপাদায ‘‘কিরিযা’’তি ৰুত্তং. তত্থ মনোধাতুযা ৰিপাকমনোধাতুযং ৰুত্তনযেন ¶ সব্বো ৰিনিচ্ছযো ৰেদিতব্বো. কেৰলং পন পঞ্চদ্ৰারে ইট্ঠেসু ৰা অনিট্ঠেসু ৰা পঞ্চারম্মণেসু পঞ্চপসাদে ঘট্টিতেসু উপ্পন্নভৰঙ্গুপচ্ছেদানন্তরং তমেৰ পঞ্চারম্মণমারব্ভ হদযৰত্থুং নিস্সাযেৰাৰজ্জনকিচ্চং সাধযমানা পঞ্চসুপি দ্ৰারেসু পৰত্ততীতি অযং ৰিসেসো.

মনোৰিঞ্ঞাণধাতুদ্ৰযম্পি যথাক্কমং কুসলৰিপাকাহেতুকমনোৰিঞ্ঞাণধাতুদ্ৰযসদিসং, ৰীরিযং পনেত্থ অধিকং, ৰীরিযূপত্থম্ভোৰ সমাধি বলৰা হোতি. ততো এৰেত্থ সঙ্গহৰারে ৰীরিযসমাধিমনোসোমনস্সজীৰিতিন্দ্রিযানং পঞ্চন্নং ৰসেন ইন্দ্রিযসঙ্গহো হোতি, ইধাপি বলসঙ্গহো নত্থেৰ. যং পনেত্থ পদভাজনীযে সমাধিৰীরিযানং নিদ্দেসে ‘‘সমাধিবলং ৰীরিযবল’’ন্তি (ধ. স. ৫৭০-৫৭২) বলৰেৰচনং ৰুত্তং, তং ইতরাহেতুকচিত্তসম্পযুত্তেহি ইমেসং বলৰতরতাদস্সনত্থং পরিযাযতো ৰুত্তং. ততো এৰ হি সঙ্গহৰারে ‘‘দ্ৰে বলানি হোন্তী’’তি ন ৰুত্তং, তস্মা অহেতুকেসু নিপ্পরিযাযতো বলং নত্থি এৰাতি গহেতব্বং.

ৰিসযাদিপ্পভেদতো পনেত্থ সোমনস্সসহগতা তাৰ হদযৰত্থুঞ্ঞেৰ নিস্সায পঞ্চদ্ৰারে ৰোট্ঠব্বনকিচ্চায চ, মনোদ্ৰারে অনুল়ারেসু ছসু কামাৰচরারম্মণেসু আৰজ্জনকিচ্চায ¶ চ মনোৰিঞ্ঞাণধাতুযা অনন্তরং জৰনকিচ্চং সাধযমানা খীণাসৰানঞ্ঞেৰ হসিতং উপ্পাদেন্তী পৰত্ততি. হসিতং হি সোমনস্সসহগতকামাৰচরেহেৰ জৰনেহি, তেসু অসেখানং পঞ্চহি কিরিযাজৰনেহি, সেখানং পন কুসলেহি চেৰ দিট্ঠিৰিপ্পযুত্তলোভমূলেহি চাতি ছহি, পুথুজ্জনানং দিট্ঠিসম্পযুত্তেহি চাতি অট্ঠহীতি তেরসহি চিত্তেহি উপ্পজ্জতি. উপেক্খাসহগতা পন পঞ্চদ্ৰারে হদযৰত্থুঞ্ঞেৰ নিস্সায সন্তীরণকিচ্চায ৰিপাকমনোৰিঞ্ঞাণধাতুযা অনন্তরং ৰোট্ঠব্বনকিচ্চং, মনোদ্ৰারে সব্বেসু ছসুপি আরম্মণেসু সৰত্থুকা, অৰত্থুকা ৰা ভৰঙ্গচলনানন্তরং আৰজ্জনকিচ্চং সাধযমানা পৰত্ততি. অযং হি তীসু ভৰেসু কস্সচি সচিত্তকপুগ্গলস্স ন কিস্মিঞ্চি ৰিসযে ন উপ্পজ্জতি, সব্বঞ্ঞুতঞ্ঞাণসদিসং মহাগমনং নামেতং চিত্তন্তি অযং ৰিসেসো, সেসং তাদিসমেৰ.

অহেতুককিরিযা নিট্ঠিতা.

সহেতুককামাৰচরকিরিযাৰণ্ণনা

অলোভাদিকিরিযাহেতুসম্পযুত্তা ¶ পন সহেতুকা, তে সম্পযোগতো কুসলা ৰিয অট্ঠৰিধা. সব্বোপেত্থ ৰিনিচ্ছযো কুসলেসু ৰুত্তনযো এৰ. কেৰলং পনেত্থ ৰিরতিযো ন সন্তি, কুসলা চ সেখপুথুজ্জনানং ৰুত্তনযেন ছসু দ্ৰারেসু ৰত্থুং নিস্সায ৰা অনিস্সায ৰা জৰনকিচ্চং সাধযমানা পৰত্তন্তি, ইমে পন অসেখানন্তি অযং ৰিসেসো. কামাৰচরকিরিযা.

রূপাৰচরকিরিযাৰণ্ণনা

রূপাৰচরকিরিযা চ কুসলা ৰিয পঞ্চৰিধা. ৰিনিচ্ছযো চ তত্থ ৰুত্তনযো এৰ. কেৰলং হি কুসলা সেখপুথুজ্জনানং পঞ্ঞত্তারম্মণা ¶ , অভিঞ্ঞাৰসেন পৰত্তং পঞ্চমজ্ঝানং সব্বারম্মণঞ্চ হুত্ৰা মনোদ্ৰারে হদযৰত্থুঞ্ঞেৰ নিস্সায জৰনকিচ্চং সাধযমানা পৰত্তন্তি, ইমে পন অসেখানন্তি অযমেৰ ৰিসেসো. রূপাৰচরকিরিযা.

অরূপাৰচরকিরিযাৰণ্ণনা

অরূপাৰচরকিরিযা চ কুসলা ৰিয চতুব্বিধা. ৰিনিচ্ছযো চ তত্থ ৰুত্তনযো এৰ. কেৰলং হি কুসলা সেখপুথুজ্জনানং সৰত্থুকা, অৰত্থুকা ৰা হেট্ঠা ৰুত্তনযেন যথাযোগং পঞ্ঞত্তিমহগ্গতারম্মণা মনোদ্ৰারে জৰনকিচ্চং সাযেমানা পৰত্তন্তি, ইমে পন অসেখানন্তি অযং ৰিসেসো. অরূপাৰচরকিরিযা.

কিরিযাব্যাকতা নিট্ঠিতা.

পকিণ্ণককথাৰণ্ণনা

এত্থ ¶ ঠত্ৰা সব্বে চিত্তচেতসিকধম্মে জাতিসঙ্গহাদিতো সমোধানেত্ৰা পকিণ্ণককথা ৰত্তব্বা. যথাৰুত্তানি হি চিত্তানি কুসলানি একৰীসতি, অকুসলানি দ্ৰাদস, ৰিপাকানি ছত্তিংস, কিরিযানি ৰীসতি চাতি সব্বানিপি একূননৰুতিৰিধানি, লোকুত্তরানং ঝানঙ্গযোগভেদতো চত্তালীসৰিধত্তা একৰীসসতং ৰা হোন্তি. তেসু কামাৰচরানি চতুপঞ্ঞাস, রূপাৰচরানি পন্নরস, অরূপাৰচরানি দ্ৰাদস, লোকুত্তরানি অট্ঠ, চত্তালীসং ৰা. কামাৰচরেসু চ কুসলানি অট্ঠ, ৰিপাকানি তেৰীসতি, কিরিযানি একাদস, অহেতুকানি অট্ঠারস. সেসানি পন চতুভূমকানিপি সহেতুকানি. তেসু চ জাতিতো চিত্তগণনা পুব্বে ৰুত্তাৰ ¶ . চেতসিকা পন সদ্ধা সতি হিরীওত্তপ্পং অলোভো অদোসো কাযপস্সদ্ধাদযো দ্ৰাদস, তত্রমজ্ঝত্ততা অমোহো অপ্পমঞ্ঞাদ্ৰযং, ৰিরতিত্তযঞ্চ মোহো অহিরিকং অনোত্তপ্পং উদ্ধচ্চঞ্চ লোভো দিট্ঠি দোসো ৰিচিকিচ্ছা চ মানো ইস্সা মচ্ছরিযং কুক্কুচ্চং থিনং মিদ্ধঞ্চ ফস্সো ৰেদনা সঞ্ঞা চেতনা একগ্গতা জীৰিতিন্দ্রিযঞ্চ মনসিকারো চ ৰিতক্কো ৰিচারো পীতি ৰীরিযং ছন্দো অধিমোক্খো চাতি দ্ৰেপঞ্ঞাস হোন্তি.

তত্থ তত্রমজ্ঝত্ততা, অপ্পমঞ্ঞাদ্ৰযং, মানাদীনি ছ, মনসিকারো ছন্দো অধিমোক্খো চাতি দ্ৰাদস ধম্মা যথাঠানে যেৰাপনকা এৰ, ৰিরতিত্তযং, উদ্ধচ্চঞ্চ কত্থচি যেৰাপনকা. তেসু চ তত্রমজ্ঝত্ততা মনসিকারো ছন্দো অধিমোক্খো উদ্ধচ্চং ৰিরতিযোতি ইমে ঠপেত্ৰা সেসা অট্ঠ যথাঠানে অনিযতা এৰ, ৰিরতিযো পন কত্থচি অনিযতা, ইমে পন একাদস ঠপেত্ৰা সেসা একচত্তালীস ধম্মা নিযতা এৰ. তত্থ সদ্ধাদযো পঞ্চৰীসতি ধম্মা কুসলাব্যাকতাযেৰ, মোহাদযো চুদ্দস অকুসলা এৰ, ফস্সাদযো তেরস কুসলাকুসলাব্যাকতা তিজাতিকা. একন্ততো হি কুসলা ৰা অব্যাকতা ৰা ধম্মা নত্থি, কুসলচিত্তসম্পযুত্তসমযে পন কুসলা, অব্যাকতচিত্তসম্পযুত্তসমযে অব্যাকতা চ হোন্তি. মোহাদযো পন সরূপেনেৰ অকুসলা, ইতরে চ তংসম্পযোগেন সব্বেপি চেতে অত্থনা সম্পযুত্তচিত্তভেদেন ভেদৰন্তোৰ হোন্তীতি ৰেদিতব্বা.

তেসু হি সদ্ধাদযো একূনৰীসতি সব্বেসু কুসলেসু চেৰ সহেতুকাব্যাকতেসু চাতি একূনসট্ঠিচিত্তেসু উপ্পজ্জন্তি, ততো পচ্চেকং একূনসট্ঠিপ্পভেদা চ হোন্তি. এৰমঞ্ঞেপি ঞাতব্বা ¶ . অমোহো তেসু ঞাণৰিপ্পযুত্তানি দ্ৰাদস ¶ ঠপেত্ৰা সেসেসু, অপ্পমঞ্ঞা পন কামাৰচরেসু সহেতুককিরিযকুসলেসু চেৰ পঞ্চমজ্ঝানৰজ্জিতরূপাৰচরেসু চাতি অট্ঠৰীসতিচিত্তেসু, ৰিরতিযো পন কামাৰচরকুসলেসু, লোকুত্তরেসু চাতি সোল়সসু. এৰমেতে পঞ্চৰীসতি ধম্মা কুসলাব্যাকতেসু উপ্পজ্জনতো কুসলাব্যাকতা নাম জাতা. অকুসলেসু পন মোহাদযো চত্তারো দ্ৰাদসসুপি অকুসলচিত্তেসু উপ্পজ্জন্তি, লোভো অট্ঠসু লোভমূলেসু, দিট্ঠি তত্থ দিট্ঠিসম্পযুত্তেসু, মানো দিট্ঠিৰিপ্পযুত্তেসু, দোসো ইস্সা মচ্ছরিযং কুক্কুচ্চং পটিঘসম্পযুত্তেসু, থিনমিদ্ধং পঞ্চসু সসঙ্খারিকেসু, ৰিচিকিচ্ছা ৰিচিকিচ্ছাসম্পযুত্তে এৰাতি. এৰমেতে চুদ্দসপি সযং অকুসলত্তা, অকুসলেস্ৰেৰ উপ্পজ্জনতো চ অকুসলা নাম.

ইতরেসু চ ফস্সাদযো সত্ত ধম্মা সব্বচিত্তেসু, ন হি তং চিত্তমত্থি, যং ইমেসু একেনাপি ৰিনা উপ্পজ্জতি. সব্বত্থকা হি এতে. ৰিতক্কাদযো পন যথাযোগিকা. তেসু হি ৰিতক্কো তাৰ দ্ৰিপঞ্চৰিঞ্ঞাণৰজ্জিতকামাৰচরেসু চেৰ একাদসসু পঠমজ্ঝানিকরূপাৰচরলোকুত্তরেসু চাতি পঞ্চপঞ্ঞাসচিত্তেসু উপ্পজ্জতি. ৰিচারো পন তেসু চেৰ তথা দুতিযজ্ঝানিকচিত্তেসু চাতি ছসট্ঠিচিত্তেসু. পীতি চতুত্থজ্ঝানিকৰজ্জিতসোমনস্সসহগতেসু. ৰীরিযং দ্ৰিপঞ্চৰিঞ্ঞাণমনোধাতুসন্তীরণত্তিকৰজ্জিতেসু. ছন্দো অহেতুকমোমূহৰজ্জিতেসু. অধিমোক্খো দ্ৰিপঞ্চৰিঞ্ঞাণৰিচিকিচ্ছাযুত্তৰজ্জিতেসু. এৰমেতে তেরস কুসলাকুসলাব্যাকতেসু উপ্পজ্জনতো তিজাতিকা নাম জাতা. সম্পযুত্তচিত্তভেদেন চেসং পচ্চেকং গণনাভেদোপি ৰেদিতব্বো. যথা হি চিত্তং সলক্খণতো একৰিধম্পি সম্পযোগাৰত্থাদিভেদেনেৰ ভিন্নং, তথা চেতসিকাপি পচ্চেকন্তি ঞাতব্বা, ৰিসেসং পন নেসং ৰক্খাম.

ৰত্থুসঙ্গহে ¶ পন নেসং চিত্তেসু তাৰ কামাৰচরৰিপাকমনোধাতুহসিতানি, দোসসম্পযুত্তপটিঘরূপাৰচরপঠমমগ্গানি চাতি তেচত্তালীস চিত্তানি হেট্ঠা ৰুত্তনযেন যথাসকং ৰত্থূনি নিস্সাযেৰ উপ্পজ্জন্তি, অরূপাৰচরৰিপাকানি পন অনিস্সাযেৰ, সেসানি দ্ৰেচত্তালীস নিস্সাযপি, আরুপ্পেসুপি উপ্পজ্জনতো অনিস্সাযপি. অরূপীনং হি ছপি ৰত্থূনি ন সন্তি, রূপীনং পন ঘানাদীনি তীণি, সব্বত্থ চ তংতংৰত্থুরহিতানং সব্বত্থ নিযতৰিঞ্ঞাণানিপি, অসঞ্ঞীনং পন সব্বানিপি ৰত্থুৰিঞ্ঞাণানি ন সন্তি. তেসং হি জীৰিতনৰকমেৰ রূপং পটিসন্ধি, পৰত্তিযং ভৰঙ্গং, মরণকালে চুতি চ হুত্ৰা পৰত্ততি. যথা চেত্থ চিত্তানং, এৰং তংসম্পযুত্তচেতসিকানম্পি ৰত্থুতো সঙ্গহভেদো ৰেদিতব্বো. অযং পন ৰিসেসো – তেসু হি দোসো ইস্সা ¶ মচ্ছরিযং কুক্কুচ্চঞ্চ হদযৰত্থুং নিস্সায কামলোকে এৰ উপ্পজ্জতি. করুণামুদিতা পন রূপলোকেপি, ন অরূপে. তত্থ হি রূপাৰচরপুব্বভাগানিপি ন উপ্পজ্জন্তি, সেসা পন সব্বে নিস্সাযপি অনিস্সাযপি তীসুপি ভৰেসু উপ্পজ্জন্তি. তত্থ হি ফস্সাদযো সত্ত ছপি ৰত্থূনি, ইতরে পন হদযমেৰাতি, সেসং চিত্তসমং.

কিচ্চদ্ৰারসঙ্গহে পন নেসং চিত্তং যথা চ চুদ্দসহি কিচ্চেহি ছদ্ৰারিকদ্ৰারৰিনিমুত্তভাৰেন, এৰং পৰত্তিক্কমো ৰেদিতব্বো. যদা হি কুসলাকুসলবলেন তীসু ভূমীসু সত্তা নিব্বত্তন্তি, তদা তেসং মরণকালে যেভুয্যেন ছন্নং দ্ৰারানমঞ্ঞতরস্মিং পচ্চুপট্ঠিতং কম্মকম্মনিমিত্তগতিনিমিত্তানমঞ্ঞতরং গহেত্ৰা উপেক্খাসহগতৰিপাকাহেতুকমনোৰিঞ্ঞাণধাতুদ্ৰযঞ্চেৰ অট্ঠ মহাৰিপাকানি, নৰ রূপারূপৰিপাকানি চেতি একূনৰীসতি চিত্তানি হেট্ঠা ৰুত্তনযেন যথাসকভূমীসু পটিসন্ধি হুত্ৰা উপ্পজ্জন্তি, তানেৰ ভৰঙ্গচুতিৰসেন দ্ৰারৰিনিমুত্তানি নাম হোন্তি. মরণকালে হি ¶ সত্তানং অসঞ্ঞিসত্তৰিরহিতানং ভৰন্তরে পটিসন্ধিজনকং অতীতং কম্মং ৰা তংকম্মকরণকালে ৰিসযোপকরণাদিভূতং রূপাদিছব্বিধম্পি অতীতাদিভেদং কালৰিনিমুত্তঞ্চ কম্মনিমিত্তং ৰা উপপজ্জমানভৰানুরূপং কপ্পরুক্খমাতুকুচ্ছিনিরযগ্গিজালাদিগতিনিমিত্তং ৰা কম্মবলেন যথারহং ছন্নং দ্ৰারানমঞ্ঞতরস্মিং সাযন্হে পব্বতচ্ছাযা পথৰিযং ৰিয চিত্তসন্তানে অল্লীযমানং উপট্ঠাতি. এৰং উপট্ঠিতে চ তস্মিং আরম্মণে কম্মবলেন নিরন্তরং পৰত্তমানচিত্তসন্তানস্স আযুক্খযকম্মক্খযউভযক্খযউপচ্ছেদককম্মানমঞ্ঞতরেন পচ্চাসন্নমরণস্স তস্স তস্স ৰীথিচিত্তভৰঙ্গানন্তরং চুতিচিত্তং হোতি, তদনন্তরং কম্মকম্মনিমিত্তাদীসু যথাগহিতং আরব্ভ যথারহং তীসু ভৰেসু যং কিঞ্চি পটিসন্ধিচিত্তং ভৰন্তরে পঠমচিত্তং হুত্ৰা উপ্পজ্জতি.

তত্থ চ দুহেতুকাহেতুকচুতিযানন্তরং দস কামাৰচরপটিসন্ধিযোৰ হোন্তি, ন ইতরা, কামাৰচরতিহেতুকায চুতিযা সব্বাপি হোন্তি, রূপাৰচরায পন চুতিযাপি অহেতুকপটিসন্ধিরহিতা, অরূপাৰচরায চুতিযা হেট্ঠিমৰজ্জিতারুপ্পপটিসন্ধিযো চেৰ কামাৰচরতিহেতুকপটিসন্ধিযো চ, অসঞ্ঞীনং পন রূপচুতিতো ভৰন্তরে গহিতপুব্বং কম্মাদিমেৰারব্ভ অহেতুকরহিতা কামাৰচরপটিসন্ধিযোৰ হোন্তি, ন ইতরা. পুথুজ্জনানং, পন সোতাপন্নসকদাগামীনঞ্চ চুতিযা সুদ্ধাৰাসেসু পটিসন্ধি ন হোতি, সেখানং দ্ৰিহেতুকাহেতুকাসঞ্ঞিপটিসন্ধিযো, অসেখানং পন সব্বাপি পটিসন্ধিযো ন হোন্তি. তে হি চুতিতো ¶ নিরুপধিসেসনিব্বানেন অনুপাদাপরিনিব্বানপ্পত্তা নাম হোন্তি. এৰং গহিতপটিসন্ধিনিরোধতো পরং তদেৰ চিত্তং তস্মিঞ্ঞেৰারম্মণে ভৰঙ্গং হুত্ৰা চুতিপরিযোসানং অসতি ৰীথিচিত্তুপ্পাদে সুপিনম্পি অদিস্ৰা নিদ্দোক্কমনকালাদীসু ¶ অপরিমাণসঙ্খম্পি নদীসোতং ৰিয নিরন্তরং পৰত্ততি. এৰং একূনৰীসতিৰিঞ্ঞাণানং পটিসন্ধিভৰঙ্গচুতিৰসেন পৰত্তিক্কমো ৰেদিতব্বো.

এৰং পন ৰত্তমানে ভৰঙ্গসন্তানে যদা ইন্দ্রিযপরিপাকমাগম্ম সভাগপচ্চযন্তরসহিতং অতিমহন্তং রূপারম্মণং চক্খুদ্ৰারে ঘট্টেতি, তদা ঘট্টনানুভাৰেন দ্ৰিক্খত্তুং তত্থ ভৰঙ্গচলনং হোতি, তদনন্তরং ভৰঙ্গং ৰোচ্ছিন্দিত্ৰা তস্মিং রূপারম্মণে কিরিযমনোধাতু আৰজ্জনকিচ্চং সাধযমানা উপ্পজ্জিত্ৰা নিরুজ্ঝতি, তথা তদনন্তরং চক্খুৰিঞ্ঞাণদ্ৰযে যথারহমেকং দস্সনকিচ্চং, তদনন্তরং ৰিপাকমনোধাতুদ্ৰযা অঞ্ঞতরং সম্পটিচ্ছনকিচ্চং, তদনন্তরং ৰিপাকমনোৰিঞ্ঞাণধাতুত্তযা অঞ্ঞতরং সন্তীরণকিচ্চং, তদনন্তরং উপেক্খাসহগতকিরিযাহেতুকমনোৰিঞ্ঞাণধাতু ৰোট্ঠব্বনকিচ্চং, তদনন্তরং একূনতিংসকামাৰচরজৰনেসু যং কিঞ্চি যথারহং সত্তক্খত্তুং, ছক্খত্তুং, মরণকালাদীসু পঞ্চক্খত্তুমেৰ ৰা জৰনকিচ্চং সাধযমানং, তদনন্তরং একাদসসু তদারম্মণকিচ্চেসু মহাৰিপাকসন্তীরণেসু যথারহমেকং সকিং, দ্ৰিক্খত্তুং ৰা তদারম্মণকিচ্চং সাধযমানং উপ্পজ্জিত্ৰা নিরুজ্ঝতি, তদনন্তরং ভৰঙ্গসন্ততি এৰ পৰত্ততি. এৰং চক্খুদ্ৰারে সত্তকিচ্চানি ছচত্তালীস চিত্তানি সম্ভৰন্তি.

যদা পন ৰুত্তনযেন সদ্দারম্মণাদীনি সোতদ্ৰারাদীসু ঘট্টেন্তি, তদাপি চক্খুদ্ৰারে ৰিয পচ্চেকঞ্চ ছচত্তালীসেৰ ভৰন্তি. কেৰলং হেত্থ আৰজ্জনানন্তরং চক্খুৰিঞ্ঞাণট্ঠানে সোতৰিঞ্ঞাণাদিদ্ৰযানি যথাক্কমং সৰনাদিকিচ্চানি সাধযমানানি উপ্পজ্জন্তীতি. এৰং পঞ্চদ্ৰারে অতিমহন্তে পঞ্চারম্মণে চতুপঞ্ঞাস কামাৰচরচিত্তানেৰ সম্ভৰন্তি. কেচি পনেত্থ ‘‘সসঙ্খারিকজৰনানি পঞ্চদ্ৰারে ন উপ্পজ্জন্তি পুব্বপ্পযোগাসম্ভৰা, মনোদ্ৰারেযেৰেতানি উপ্পজ্জন্তী’’তি ৰদন্তি.

মহন্তে ¶ পন তদারম্মণৰজ্জিতানি. ৰিসযস্স জৰনসমকালমেৰ অতীতত্তা জৰনাৰসানে ভৰঙ্গং হোতি. পরিত্তে পন জৰনম্পি নত্থি. ৰোট্ঠব্বনং হেত্থ জৰনট্ঠানে ঠত্ৰা দ্ৰত্তিক্খত্তুং পৰত্তিত্ৰা নিরুজ্ঝতি, ততো পরং ভৰঙ্গং হোতি. অযং পন ৰারো ‘‘দিট্ঠং ৰিয মে ¶ , সুতং ৰিয মে’’তিআদিকথনকালে লব্ভতি. অতিপরিত্তে পন ৰোট্ঠব্বনপ্পাদা অসণ্ঠহনতো ভৰঙ্গচলনমত্তমেৰ, ন আৰজ্জনাদীনি. আৰজ্জনেন হি ভৰঙ্গে আৰট্টিতে ৰোট্ঠব্বনং অপ্পত্ৰা অন্তরা চক্খুৰিঞ্ঞাণানন্তরং চিত্তং ভৰঙ্গং ওতরিস্সতীতি নেতং ঠানং ৰিজ্জতি, নাপি অপ্পৰত্তমানে ৰিসযে পঞ্চদ্ৰারিকৰীথিচিত্তানি পৰত্তন্তীতি. অযং পঞ্চদ্ৰারে ৰিসযপ্পৰত্তিভেদেন চিত্তপ্পৰত্তিনিযমো.

মনোদ্ৰারে পন ছসু আরম্মণেসু আপাথগতেসু ৰুত্তনযেন ভৰঙ্গচলনমনোদ্ৰারাৰজ্জনানন্তরং কুসলাকুসলফলনাৰজ্জনকিরিযচিত্তেসু পঞ্চপঞ্ঞাসজৰনকিচ্চেসু যং কিঞ্চি কামাৰচরারম্মণমারব্ভ পৰত্ততি, ততো পভুতি কামাৰচরারম্মণে তদারম্মণং হোতি. অপ্পনাজৰনে অযং পৰত্তিক্কমো – সমথৰিপস্সনাকম্মট্ঠানিকানং হি যথাসকৰিসযে উপ্পাদিতপুব্বভাগভাৰনানং ‘‘ইদানি অপ্পনা উপ্পজ্জিস্সতী’’তি ভৰঙ্গচলনাৰজ্জনাৰসানে ঞাণসম্পযুত্তকামাৰচরজৰনেসু অঞ্ঞতরস্মিং যথারহং পরিকম্মোপচারানুলোমগোত্রভুনামেন চতুক্খত্তুং, তিক্খত্তুমেৰ ৰা উপ্পজ্জিত্ৰা নিরুদ্ধে চতুত্থং, পঞ্চমং ৰা মহগ্গতজৰনেসু যং কিঞ্চি পঠমকপ্পনাভিঞ্ঞাভূতং একৰারমেৰ, ঝানসমাপত্তিভূতং অনন্তৰারম্পি জৰতি. লোকুত্তরজৰনেসু পন কুসলানি একসন্তানে একৰারমেৰ জৰন্তি, তদনন্তরং যথাসকং ফলচিত্তঞ্চ দ্ৰত্তিৰারং, ফলসমাপত্তিৰীথিযং ফলমেৰ অনন্তৰারম্পি জৰতি, নিরোধসমাপত্তিযং পন অনুপুব্বনিরোধৰসেন ¶ পঠমজ্ঝানতো যাৰাকিঞ্চঞ্ঞাযতনা যথাক্কমং আৰজ্জনপরিকম্মাদিৰসেনেৰ সমাপজ্জিত্ৰা ৰুট্ঠিতস্স গোত্রভুতো অনন্তরং চতুত্থারুপ্পজৰনে দ্ৰিক্খত্তুং জৰিত্ৰা নিরুদ্ধে যথাপরিচ্ছিন্নকালঞ্চ চিত্তং ন উপ্পজ্জতি, ৰুট্ঠানকালে চ আৰজ্জনপরিকম্মচিত্তনিযামেন অনাগামিফলং, অরহত্তফলং ৰা যথারহমেকৰারমেৰ উপ্পজ্জতি. তত্থ চ কুসলগোত্রভুতো অনন্তরং কুসলঞ্চেৰ আদিতো ফলত্তযঞ্চ অপ্পেতি, কিরিযাগোত্রভুতো কিরিযং, অরহত্তফলঞ্চ. তত্থাপি সোমনস্সসহগততো সোমনস্সসহগতমেৰ, উপেক্খাসহগততো চ উপেক্খাসহগতমেৰ অপ্পেতি. অসেখানমেৰ চেত্থ অরহত্তফলকিরিযাজৰনানি, যথাসকং সেখানমেৰ সেসলোকুত্তরানি, সেখপুথুজ্জনানমেৰ কুসলাকুসলানি, তিহেতুকানমেৰ অপ্পনা হোন্তি, অযং জৰননিযমো.

অপ্পনাজৰনতো পরং পন তদারম্মণং নত্থি. জৰনারম্মণেসু হি কামাৰচরভূতেস্ৰেৰ কামাৰচরপটিসন্ধিকানমেৰ অতিমহন্তে, ৰিভূতে চ ৰিসযে তদারম্মণমুপ্পজ্জতি. অতিইট্ঠে পনারম্মণে ¶ সন্তীরণকিরিযাজৰনতদারম্মণানি সোমনস্সসহগতানি, ইট্ঠমজ্ঝত্তে, অনিট্ঠে চ উপেক্খাসহগতানি হোন্তি. যদা পন দোমনস্সানন্তরং সোমনস্সস্স পট্ঠানে পটিক্খিত্তত্তা সোমনস্সপটিসন্ধিকস্স অতিইট্ঠাদীসু পটিঘে জৰিতে তদারম্মণভৰঙ্গানি ন উপ্পজ্জন্তি, তদা অঞ্ঞং পরিচিতপুব্বং পরিত্তারম্মণমারব্ভ অনাৰজ্জনম্পি নিরোধতো ৰুট্ঠহন্তস্স সামঞ্ঞফলং ৰিয অন্তরা উপেক্খাসহগতসন্তীরণং উপ্পজ্জতি, তমনন্তরিত্ৰা ভৰঙ্গং হোতীতি অযং তদারম্মণনিযমো.

এৰং পন ভৰঙ্গানন্তরং ছদ্ৰারে আৰজ্জনাদীনি ৰীথিচিত্তানি. ইতি যাৰতাযুকং ইমিনাৰ কমেন চিত্তনিযামতো ৰিঞ্ঞাণানি পৰত্তন্তি. ৰীথিচিত্তানন্তরং, পন ভৰঙ্গানন্তরং ৰা সব্বপচ্ছিমং ¶ তং একূনৰীসতিৰিধং ভৰঙ্গমেৰ তস্মিঞ্ঞেৰারম্মণে চুতিকিচ্চঞ্চ সাধযমানং পৰত্ততি, তস্মিং নিরুদ্ধে সত্তো চুতো নাম হোতি. ততোপি চুতিতো পুন পটিসন্ধিভৰঙ্গৰীথিচুতিযোতি এৰং পুনপ্পুনং চিত্তসন্তানং যন্তযুত্তগোণো ৰিয ভৰাদীসু যাৰানুপাদায আসৰেহি ন ৰিমুচ্চতি, তাৰাৰিচ্ছিন্নং পৰত্ততি এৰ. এৰং পৰত্তমানে চ চিত্তসন্তানে ‘‘ত্ৰং ভৰঙ্গং নাম হোতি, ত্ৰং তদনন্তরং আৰজ্জনং…পে… ত্ৰং তদনন্তরং তদারম্মণং নাম হোতি, ত্ৰং পন ভৰঙ্গ’’ন্তিআদিনা নিযামকো কত্তা নাম নত্থি, চিত্তনিযামেনেৰেতং পৰত্ততি.

পঞ্চৰিধো হি নিযামো – বীজনিযামো উতুনিযামো কম্মনিযামো ধম্মনিযামো চিত্তনিযামোতি, তত্থ অঙ্কুরপণ্ণদণ্ডপুপ্ফফলাদিক্কমেন তেসং তেসং বীজানং অঞ্ঞোঞ্ঞৰিসদিসরুক্খতিণগচ্ছলতাদিসন্তানে অত্তনা সদিসফলদানং বীজনিযামো নাম. তস্মিং তস্মিং সমযে তেসং তেসং রুক্খানং একপ্পহারেন পুপ্ফফলপল্লৰানং গহণং উতুনিযামো নাম. তস্স তস্স ৰা কুসলাকুসলকম্মস্স তংতংসদিসাসদিসরূপারূপৰিপাকদানং, কম্মসরিক্খকৰিপাকদানঞ্চ কম্মনিযামো নাম. বোধিসত্তানং পটিসন্ধিগ্গহণে, মাতুকুচ্ছিতো অভিনিক্খমনে, অভিসম্বোধিধম্মচক্কপ্পৰত্তনাদীসু চ দ্ৰত্তিংস পুব্বনিমিত্তানি ধম্মনিযামো নাম. যথাৰুত্তেন ভৰঙ্গাৰজ্জনাদিকিচ্চক্কমেনেৰ চিত্তপ্পৰত্তি চিত্তনিযামো নাম. ইমিনা পন চিত্তনিযামেন যথাক্কমং কিচ্চৰন্তেসু চেতেসু চিত্তেসু দ্ৰিপঞ্চৰিঞ্ঞাণমনোধাতুজৰনানি যথাসম্ভৰং এককিচ্চট্ঠানানি, সেসানি পন দ্ৰিতিচতুপঞ্চকিচ্চট্ঠানানি, তানি চ পুব্বে ৰুত্তানি, সুৰিঞ্ঞেয্যানি চ. এৰং একদ্ৰারিকাদীনি চ. যথা চ চিত্তানং, এৰং তংসম্পযুত্তচেতসিকানম্পি ¶ কিচ্চদ্ৰারৰসেন সঙ্গহো ৰেদিতব্বো. অযং পন ৰিসেসো – কিচ্চতো হি সব্বত্থকা তাৰ সত্ত চিত্তং ৰিয চুদ্দস কিচ্চানি করোন্তি. ৰিতক্কৰিচারাধিমোক্খা ¶ পন তযো দস্সনাদিপঞ্চকিচ্চানি ৰজ্জেত্ৰা নৰ, ৰীরিযং ততো সম্পটিচ্ছনসন্তীরণানি ৰজ্জেত্ৰা সত্ত, পীতি ৰোট্ঠব্বনাৰজ্জনানিপি ৰজ্জেত্ৰা সন্তীরণেন সদ্ধিং ছ, ৰিরতিঅপ্পমঞ্ঞাৰজ্জিতা পন ৰীসতি কুসলাব্যাকতা চেৰ ছন্দো চ সন্তীরণম্পি ৰজ্জেত্ৰা পঞ্চ, ততো অপ্পমঞ্ঞা তদারম্মণম্পি ৰজ্জেত্ৰা চত্তারি, ৰিরতিযো পন কুসলা জৰনকিচ্চমেৰ করোন্তি. দ্ৰারতো চ ৰিরতিযো মনোদ্ৰারিকা এৰ, তথা করুণামুদিতা, দ্ৰারৰিনিমুত্তা চ পন হোন্তি. মনোদ্ৰারে এৰ হি দুচ্চরিতৰিরমণং সত্তপঞ্ঞত্তিগ্গহণঞ্চ হোতি. অকুসলা পন ছদ্ৰারিকা, তত্থাপি মানইস্সামচ্ছরিযকুক্কুচ্চানি মনোদ্ৰারিকানেৰাতি কেচি. অৰসেসা ছদ্ৰারিকা চেৰ দ্ৰারৰিনিমুত্তা চ. সেসং চিত্তসদিসমেৰ. আরম্মণসঙ্গহো পন নেসং পরিত্তারম্মণত্তিকে আৰি ভৰিস্সতীতি. অযং পকিণ্ণককথা.

চিত্তুপ্পাদকণ্ডৰণ্ণনা নিট্ঠিতা.

অব্যাকতপদং পন নেৰ তাৰ নিট্ঠিতং. অব্যাকতেসু হি ৰিপাকাব্যাকতং, কিরিযাব্যাকতঞ্চ ৰিভত্তং, রূপাব্যাকতং, পন নিব্বানাব্যাকতঞ্চ অৰসিট্ঠং. তত্থ রূপাব্যাকতং তাৰ ভূমিতো কামাৰচরমেৰ, ন ভিন্নং, তথা সম্পযোগতোপি অসম্ভৰো এৰ. সারম্মণধম্মানমেৰ, হি অঞ্ঞমঞ্ঞসম্পযোগো, ন ইতরেসন্তি. ধম্মুদ্দেসতো পনেতং অট্ঠৰীসতিৰিধং হোতি. সেয্যথিদং – পথৰীধাতু আপোধাতু তেজোধাতু ৰাযোধাতু চক্খু সোতং ঘানং জিৰ্হা কাযো রূপং সদ্দো গন্ধো রসো ইত্থিন্দ্রিযং পুরিসিন্দ্রিযং জীৰিতিন্দ্রিযং হদযৰত্থু কাযৰিঞ্ঞত্তি ৰচীৰিঞ্ঞত্তি আকাসো রূপস্স লহুতা মুদুতা কম্মঞ্ঞতা রূপস্স উপচযো সন্ততি জরতা অনিচ্চতা কবল়ীকারো আহারোতি. পদভাজনীযে পনেত্থ কিঞ্চাপি হদযৰত্থু ন আগতং, উপরি পন পট্ঠানপাল়িযং ¶ ‘‘যং রূপং নিস্সায মনোধাতু চ মনোৰিঞ্ঞাণধাতু চ ৰত্তন্তী’’তিআদিনা (পট্ঠা. ১.১.৮) সরূপেনেৰ আগমিস্সতীতি তং ইধ গহিতং. কেচি পন মিদ্ধরূপং বলরূপং সম্ভৰরূপং জাতিরূপং রোগরূপন্তি ইমানিপি পঞ্চ গহেত্ৰা ‘‘তেত্তিংস রূপানি হোন্তী’’তি ৰদন্তি, তে তেসং অভাৰং, অন্তোগধভাৰঞ্চ ৰত্ৰা পটিক্খিপিতব্বা. ইমেসু হি মিদ্ধং রূপমেৰ ন হোতি অরূপধম্মত্তা নীৰরণানং. মিদ্ধেনেৰ হি পচলাযিকাকারেন রূপপ্পৰত্তি হোতি, বলরূপং পন ৰাযোধাতুযা অন্তোগধং তংসভাৰত্তা, সম্ভৰরূপং আপোধাতুযা, জাতিরূপং ¶ উপচযসন্ততীসু, রোগরূপঞ্চ জরতাঅনিচ্চতাসু পৰিসতি সপ্পচ্চযসমুট্ঠিতরূপৰিকারভেদেসু রোগব্যপদেসতোতি সব্বং রূপং অট্ঠৰীসতিৰিধমেৰ হোতি. অযং ধম্মুদ্দেসতো ৰিনিচ্ছযো.

লক্খণাদিতো পনেত্থ কক্খল়ত্তলক্খণা পথৰীধাতু, পতিট্ঠানরসা, সম্পটিচ্ছনপচ্চুপট্ঠানা. পগ্ঘরণলক্খণা আপোধাতু, ব্রূহনরসা, সঙ্গহপচ্চুপট্ঠানা. উণ্হত্তলক্খণা তেজোধাতু, পরিপাচনরসা, মদ্দৰানুপ্পদানপচ্চুপট্ঠানা. ৰিত্থম্ভনলক্খণা ৰাযোধাতু, সমুদীরণরসা, অভিনীহারপচ্চুপট্ঠানা. চতস্সোপি চেতা সেসভূতত্তযপদট্ঠানা. রূপাভিঘাতারহভূতপ্পসাদলক্খণং, দট্ঠুকামতানিদানকম্মসমুট্ঠানভূতপ্পসাদলক্খণং ৰা চক্খু, রূপেসু আৰিঞ্ছনরসং, চক্খুৰিঞ্ঞাণস্স আধারভাৰপচ্চুপট্ঠানং, দট্ঠুকামতানিদানকম্মজভূতপদট্ঠানং. ইদং পন যদেতং অক্খিকূপকে পতিট্ঠিতং নহারুসুত্তকেন মত্থলুঙ্গেন আবদ্ধমংসযুত্তং, যত্থ সেতম্পি অত্থি কণ্হম্পি লোহিতম্পি চত্তারিপি মহাভূতানি, যঞ্চ সেম্হুস্সদত্তা সেতং, পিত্তুস্সদত্তা কণ্হং, রুহিরুস্সদত্তা লোহিতকং, পথৰুস্সদত্তা পত্থিণ্ণং হোতি, আপুস্সদত্তা পগ্ঘরতি, তেজুস্সদত্তা ¶ পরিদয্হতি, ৰাযুস্সদত্তা পরিব্ভমতি, যঞ্চ লোকে নীলপখুমসমাকিণ্ণং কণ্হসুক্কমণ্ডলৰিচিত্তং নীলুপ্পলদলসন্নিভং দীঘং পুথুলং চক্খূতি ৰুচ্চতি, তস্স সসম্ভারচক্খুনো সেতমণ্ডলপরিক্খিত্তস্স কণ্হমণ্ডলস্স মজ্ঝে অভিমুখে ঠিতানং সরীরসণ্ঠানুপ্পত্তিদেসে সত্তসু পিচুপটলেসু আসিত্ততেলং পিচুপটলানি ৰিয সত্ত অক্খিপটলানি ব্যাপেত্ৰা ধারণনহাপনমণ্ডনবীজনকিচ্চাহি চতূহি ধাতীহি খত্তিযকুমারো ৰিয সন্ধারণাবন্ধনপরিপাচনসমুদীরণকিচ্চাহি চতূহি ধাতূহি কতূপকারং আযুনা অনুপালিযমানং ৰণ্ণগন্ধরসাদীহি পরিৰুতং উতুচিত্তাহারেহি উপত্থম্ভিযমানং পমাণতো ঊকাসিরমত্তং চক্খুৰিঞ্ঞাণাদীনং যথারহং ৰত্থুদ্ৰারভাৰং সাধযমানং তিট্ঠতি. ৰুত্তম্পি চেতং ধম্মসেনাপতিনা –

‘‘যেন চক্খুপসাদেন, রূপানি মনুপস্সতি;

পরিত্তং সুখুমং এতং, ঊকাসিরসমূপম’’ন্তি.

সদ্দাভিঘাতারহভূতপ্পসাদলক্খণং, সোতুকামতানিদানকম্মসমুট্ঠানভূতপ্পসাদলক্খণং ৰা সোতং, সদ্দেসু আৰিঞ্ছনরসং, সোতৰিঞ্ঞাণস্স আধারভাৰপচ্চুপট্ঠানং, সোতুকামতানিদানকম্মজভূতপদট্ঠানং ¶ . ইদং পন সসম্ভারসোতবিলস্স অন্তো তনুতম্বলোমাচিতে অঙ্গুলিৰেধকসণ্ঠানে পদেসে ৰুত্তপ্পকারাহি ধাতুআদীহি কতূপকারানুপালনপরিৰারোপত্থম্ভং সোতৰিঞ্ঞাণাদীনং যথারহং ৰত্থুদ্ৰারভাৰং সাধযমানং তিট্ঠতি.

গন্ধাভিঘাতারহভূতপ্পসাদলক্খণং, ঘাযিতুকামতানিদানকম্মসমুট্ঠানভূতপ্পসাদলক্খণং ৰা ঘানং, গন্ধেসু আৰিঞ্ছনরসং, ঘানৰিঞ্ঞাণস্স আধারভাৰপচ্চুপট্ঠানং, ঘাযিতুকামতানিদানকম্মজভূতপদট্ঠানং ¶ . ইদঞ্চ সসম্ভারঘানবিলস্স অন্তো অজপদসণ্ঠানে পদেসে ৰুত্তপ্পকারোপকারানুপালনপরিৰারোপত্থম্ভং ঘানৰিঞ্ঞাণাদীনং যথারহং ৰত্থুদ্ৰারভাৰং সাধযমানং তিট্ঠতি.

রসাভিঘাতারহভূতপ্পসাদলক্খণা, সাযিতুকামতানিদানকম্মসমুট্ঠানভূতপ্পসাদলক্খণা ৰা জিৰ্হা, রসেসু আৰিঞ্ছনরসা, জিৰ্হাৰিঞ্ঞাণস্স আধারভাৰপচ্চুপট্ঠানা, সাযিতুকামতানিদানকম্মজভূতপদট্ঠানা. এসা চ সসম্ভারজিৰ্হামজ্ঝস্স উপরি উপ্পলদলগ্গসণ্ঠানে পদেসে ৰুত্তপ্পকারোপকারানুপালনপরিৰারোপত্থম্ভা জিৰ্হাৰিঞ্ঞাণাদীনং যথারহং ৰত্থুদ্ৰারভাৰং সাধযমানা তিট্ঠতি.

ফোট্ঠব্বাভিঘাতারহভূতপ্পসাদলক্খণো, ফুসিতুকামতানিদানকম্মসমুট্ঠানভূতপ্পসাদলক্খণো ৰা কাযো, ফোট্ঠব্বেসু আৰিঞ্ছনরসো, কাযৰিঞ্ঞাণস্স আধারভাৰপচ্চুপট্ঠানো, ফুসিতুকামতানিদানকম্মজভূতপদট্ঠানো. অযং পন ইমস্মিং কাযে যাৰতা উপাদিন্না পথৰীআপোকোট্ঠাসা হোন্তি, তত্থ সব্বত্থ কপ্পাসপটলে স্নেহো ৰিয অনুগতো ৰুত্তপ্পকারোপকারানুপালনপরিৰারোপত্থম্ভো কাযৰিঞ্ঞাণাদীনং যথারহং ৰত্থুদ্ৰারভাৰং সাধযমানো তিট্ঠতি. কেচি (ধ. স. অট্ঠ. ৬০০) পন ‘‘তেজাধিকানং ভূতানং পসাদো চক্খু, ৰিৰরৰাযুআপপথৰিঅধিকানং সোতঘানজিৰ্হাকাযা’’তি ৰদন্তি. অপরে (ধ. স. অ. ৬০০) ‘‘তেজোসভাৰং চক্খু, আকাসপথৰিআপৰাযুসভাৰা সোতঘানজিৰ্হাকাযা’’তি ৰদন্তি. ‘‘তেজাদিসহকারিত্তা, তেজাদিগুণরূপাদিৰিসযত্তা চা’’তি কারণঞ্চ যথাক্কমং ৰদন্তি. তে চ ৰত্তব্বা – কো পনেৰমাহ ‘‘সহকারিসভাৰেহেৰ ইন্দ্রিযেহি ভৰিতব্ব’’ন্তি, ‘‘রূপাদযো ৰা তেজাদীনং ¶ গুণা’’তি. অৰিনিব্ভোগেসু হি ভূতেসু ‘‘অযং ইমস্স গুণো, অযং ইমস্স গুণো’’তি ন লব্ভা ৰত্তুন্তি. অথাপি ৰদেয্যুং ‘‘তেজাদিঅধিকেসু সম্ভারেসু রূপাদীনং অধিকভাৰদস্সনতো ¶ ইচ্ছিতব্বমেতং ‘রূপাদযো তেজাদীনং গুণা’’’তি, তে ৰত্তব্বা ইচ্ছেয্যাম, যদি আপাধিকস্স আসৰস্স গন্ধতো পথৰিঅধিকে কপ্পাসে গন্ধো অধিকতরো সিযা, তেজাধিকস্স চ উণ্হোদকস্স ৰণ্ণতোপি সীতূদকস্স ৰণ্ণো পরিহাযেথ. যস্মা পনেতং উভযম্পি নত্থি, তস্মা পহাযেথ তমেতেসং নিস্সযভূতানং ৰিসেসকপ্পনং. যথা অৰিসেসেপি এককলাপে ভূতানং রূপরসাদযো অঞ্ঞমঞ্ঞং ৰিসদিসা হোন্তি, এৰং চক্খুপসাদাদযোপীতি গহেতব্বমেতং. কিং পনেসং ৰিসেসকারণং নত্থীতি? নো নত্থি. কিং পন তন্তি? কম্মমেৰ নেসং অসাধারণং কারণং জনকতণ্হাজনিতানং ভূতানং ৰিসেসতো. ভূতৰিসেসে হি সতি পসাদোৰ নুপ্পজ্জতি. সমানানং হি ভূতানং পসাদো, ন ৰিসমানানন্তি পোরাণা. এৰং কম্মৰিসেসতো ৰিসেসৰন্তেসু চেতেসু চক্খুসোতানি অসম্পত্তৰিসযগ্গাহকানি অত্তনো নিস্সযং অনল্লীননিস্সযেৰ ৰিসযে ৰিঞ্ঞাণহেতুত্তা. ঘানজিৰ্হাকাযা পন সম্পত্তৰিসযগ্গাহকা নিস্সযৰসেন চেৰ সযঞ্চ অত্তনো নিস্সযং অল্লীনে এৰ ৰিসযে ৰিঞ্ঞাণহেতুত্তা.

কেচি পন ‘‘চক্খুসোতানিপি সম্পত্তৰিসযগ্গাহকানেৰ, দূরে ঠিতেসুপি চন্দরূপাদীসু সীঘযাযিনযনরংসিসঞ্ঞোগেন, সদ্দানঞ্চ পরম্পরাযাগন্ত্ৰা সোতবিলে ঘট্টনেন ৰিঞ্ঞাণুপ্পত্তিতো. তেনেৰ হি কুট্টাদিঅন্তরিতেসু, ৰিচ্ছিদ্দপব্বতলেণাদিগতেসু চ রূপসদ্দেসু ৰিঞ্ঞাণং ন ¶ উপ্পজ্জতী’’তি ৰদন্তি. তেসম্পি হি চক্খুনো দূরাসন্নেসু চন্দরুক্খাদীসু অনুপলক্খিতকালভেদেন রংসিসমাযোজনসামত্থিযং, সদ্দানম্পি দূরাসন্নানং অৰিদিততাভেদং আগন্ত্ৰা সোতবিলঘট্টনসামত্থিযং ৰিঞ্ঞাণুপ্পত্তিহেতুভূতং উপগন্তব্বং. ততো পরং তত্থেৰ ঠিতানঞ্ঞেৰ ৰিঞ্ঞাণুপ্পাদনসামত্থিযোপগমনং. কুট্টলেণাদিঅন্তরিতানঞ্চ রূপসদ্দানং সহকারিপচ্চযৰিরহতো অনাপাথগমনং. ইতরথা তেসম্পি তাদিসেসু ইন্দ্রিযসঞ্ঞোগং ন ধাৰিতব্বং. গমননিৰারণম্পি উপ্পত্তিনিৰারণমেৰ, তথেৰ সহকারিপচ্চযৰিরহতো যাদিসেৰ তেসং ইন্দ্রিযসঞ্ঞোগো হোতি, তাদিসে ৰিঞ্ঞাণুপ্পত্তি হোতীতি গহেতব্বং.

চক্খু তাৰ দূরে ঠিতানং চন্দাদীনম্পি গহণতো অসম্পত্তগ্গাহকং হোতু, সোতং পন দূরে রুক্খং ছিন্দন্তানং, ৰত্থং ধোৰন্তানঞ্চ দূরতোৰ পঞ্ঞাযমানকাযৰিকারাদিনা সদ্ধিং সদ্দং গহেতুং অসমত্থতায কথং সণিকং ৰৰত্থাপযমানং তং অসম্পত্তগ্গাহকং হোতীতি? তত্থাপি চ কুঠারিৰত্থাদীনং পঠমনিপাতসদ্দানং মন্দতায যথা হত্থছিজ্জমানসাখাপলাসচলনাদিসমুট্ঠিতমন্দসদ্দানং পরম্পরাযাগমনং নত্থি, তথা অনাপাথগমনম্পি, পচ্ছা পন ঘট্টনানিঘংসস্স বলৰতায ¶ উপ্পন্নমহাসদ্দানং আগমনং ৰিয তত্থেৰ ঠিতানঞ্ঞেৰ আপাথগমনং হোতি, ইতরথা দূরাসন্নাদিৰৰত্থানানি ন সিযুং গন্ধাদীনং ৰিয, তস্মা অসম্পত্তগোচরানেৰেতানি, ঘানাদীনি চ সম্পত্তগোচরানীতি ৰেদিতব্বানি.

অহিসুংসুমারপক্খিকুক্কুরসিঙ্গালসদিসানি চেতানি. যথা হি অহি নাম বহিসিত্তসম্মট্ঠট্ঠানে নাভিরমতি, তং ৰিহায তিণপণ্ণগহনৰম্মিকাদিৰিসমজ্ঝাসযোৰ হোতি, এৰং ¶ চক্খুপি সম্মট্ঠভিত্তিআদিং ৰিহায ইত্থিপুরিসপুপ্ফলতাচিত্তাদিৰিসমজ্ঝাসযং হোতি. যথা চ সুংসুমারোপি বহি চরণং ৰিহায উদকে বিলজ্ঝাসযো হোতি, এৰং সোতম্পি ৰাতপানচ্ছিদ্দাদিবিলজ্ঝাসযং হোতি. যথা হি গিজ্ঝাদিপক্খীপি ভূমিরুক্খাদিং ৰিহায আকাসে পক্খন্দনজ্ঝাসযো হোতি, এৰং ঘানম্পি উদ্ধগ্গং হুত্ৰা গন্ধপৰেসকৰাতাকড্ঢনত্থং আকাসজ্ঝাসযং হোতি. যথা কুক্কুরো বহিগামচারং ৰিহায আমিসগৰেসী গামজ্ঝাসযো মহানসাদিনিন্নচিত্তো হোতি, এৰং জিৰ্হাপি আপজ্ঝাসযা হোতি. যথা চ সিঙ্গালো বহিসুসানচারং ৰিহায মংসগৰেসী সুসানজ্ঝাসযো হোতি, এৰং কাযোপি অনুপাদিন্নং সুখসম্ফস্সসযনাদিং লভিত্ৰাপি উপাদিন্নজ্ঝাসযো হোতি. অঞ্ঞং হি উপাদিন্নকং অলভমানা সত্তা অত্তনো জণ্ণুকানি উরন্তরং পৰেসেত্ৰা হত্থতলে সীসং কত্ৰাপি নিপজ্জন্তি. আলোকৰিৰরৰাযুজলপথৰিপচ্চযানি চেতানি ৰিঞ্ঞাণুপ্পাদকানি. এৰমেতেসং পঞ্চন্নং পসাদানং লক্খণরসপচ্চুপট্ঠানপদেসনিস্সযগোচরজ্ঝাসযপ্পচ্চযভেদেন ৰৰত্থানং ৰেদিতব্বং.

চক্খুপটিহননলক্খণং রূপং, চক্খুৰিঞ্ঞাণস্স ৰিসযভাৰরসং, তস্সেৰ গোচরভাৰপচ্চুপট্ঠানং, চতুমহাভূতপদট্ঠানং, যথা চেতস্স, এৰং সব্বেসম্পি উপাদারূপানং পদট্ঠানং ৰেদিতব্বং, ৰিসেসং পন ৰক্খাম. তযিদং রূপং নীলপীতলোহিতোদাতকাল়মঞ্জিট্ঠসামছাযাতপআলোকন্ধকারাদিৰসেন অনেকৰিধং. কেচি পন ‘‘অন্ধকারো নাম আলোকাভাৰমত্তো এৰ, ততো এৰ তত্থ গতরূপানি ন দিস্সন্তী’’তি ৰদন্তি, তং ন যুত্তং. যথা হি নীলমেঘমণিআদীনং ছাযা আলোকৰিসদিসা ৰণ্ণাযতনভূতা হোতি, এৰং ভিত্তিচ্ছদনভূমিপব্বতাদিচ্ছাযা চ ঘনীভূতা ঘটরূপাদিচ্ছাদনতো আলোকৰিসদিসো অন্ধকারোতি ¶ দট্ঠব্বো, সোতপটিহননলক্খণো সদ্দো, সোতৰিঞ্ঞাণস্স ৰিসযভাৰরসো, তস্সেৰ গোচরভাৰপচ্চুপট্ঠানো. সো গীতভেরিসদ্দাদিৰসেন অনেকৰিধো. ঘানপটিহননলক্খণো গন্ধো, ঘানৰিঞ্ঞাণস্স ৰিসযভাৰরসো, তস্সেৰ গোচরভাৰপচ্চুপট্ঠানো. সো মূলগন্ধসারগন্ধাদিৰসেন অনেকৰিধো ¶ . জিৰ্হাপটিহননলক্খণো রসো, জিৰ্হাৰিঞ্ঞাণস্স ৰিসযভাৰরসো, তস্সেৰ গোচরভাৰপচ্চুপট্ঠানো. সো মূলরসতচরসাদীনং ৰসেন অনেকৰিধো.

ইত্থিভাৰলক্খণং ইত্থিন্দ্রিযং, ইত্থীতি পকাসনরসং, ইত্থিলিঙ্গনিমিত্তকুত্তাকপ্পানং কারণভাৰপচ্চুপট্ঠানং. পুরিসভাৰলক্খণং পুরিসিন্দ্রিযং, পুরিসোতি পকাসনরসং, পুরিসলিঙ্গনিমিত্তকুত্তাকপ্পানং কারণভাৰপচ্চুপট্ঠানং. উভিন্নম্পেসং ইত্থিপুরিসলিঙ্গাদীনং কারণভাৰো ন সরসতো অত্থি কেনচি পচ্চযেন নেসং পচ্চযভাৰস্স পট্ঠানে অনাগতত্তা, অত্তনো পন জনকপচ্চযভূতআগমনতোৰ. ইত্থিপুরিসানং পটিনিযতলিঙ্গনিমিত্তকুত্তাকপ্পভাৰানুগুণরূপানম্পি নিযমেন উপ্পজ্জনতো, লিঙ্গনিমিত্তাদিৰোহারানঞ্চ তপ্পধানতো পচ্চযভাৰো, ইন্দ্রিযভাৰো চ পরিযাযতো ৰুত্তো. তেনেৰ হি ইত্থিউভতোব্যঞ্জনকস্স পুরিসিন্দ্রিযাভাৰেপি পুরিসলিঙ্গনিমিত্তাদিব্যঞ্জনং, পুরিসউভতোব্যঞ্জনকস্স ইত্থিন্দ্রিযাভাৰেপি ইত্থিলিঙ্গনিমিত্তাদিব্যঞ্জনঞ্চ পুরিমকম্মতো এৰ উপ্পজ্জতি. যদি হি নেসং তংতংইন্দ্রিযেনেৰ পটিনিযতব্যঞ্জনানি উপ্পজ্জেয্যুং, দুতিযব্যঞ্জনস্স অভাৰো আপজ্জতি. ন হি তেসং ভাৰদ্ৰযং অত্থি. যদি সিযা, সব্বদাপি ব্যঞ্জনদ্ৰযস্স ভাৰপ্পসঙ্গো সিযা. ইত্থিউভতোব্যঞ্জনকস্স হি ইত্থিন্দ্রিযমেৰ ৰিজ্জতি, ন ইতরং. তস্স পন যদা ইত্থিযং রাগচিত্তং উপ্পজ্জতি, তদা পুরিসব্যঞ্জনং পাতুভৰতি, ইত্থিব্যঞ্জনং পটিচ্ছন্নং হোতি. তথা ইতরস্স ইতরং. যস্মা পনেসং একমেৰ ইন্দ্রিযং নিযতং ¶ , তস্মা ইত্থিউভতোব্যঞ্জনকো সযম্পি গব্ভং গণ্হাতি, পরম্পি গণ্হাপেতি. পুরিসউভতোব্যঞ্জনকো পরং গণ্হাপেতি, সযং পন ন গণ্হাতি. যথা তেসং উভতোব্যঞ্জনকানং কম্মসহাযং রাগচিত্তমেৰ ব্যঞ্জনকারণং, ন ভাৰো, এৰং পকতিত্থিপুরিসানম্পি ভাৰদ্ৰযজনককম্মাদিপচ্চযো এৰ তংতংলিঙ্গনিমিত্তাদিকারণন্তি গহেতব্বং. উভযম্পি চেতং পঠমকপ্পিকানং পৰত্তে সমুট্ঠাতি, ততো অপরভাগে পটিসন্ধিযমেৰ, সব্বেসং পন পৰত্তে এৰ পরিৰত্ততি. ইমেসু চ পুরিসলিঙ্গং উত্তমং, ইত্থিলিঙ্গং হীনং, তস্মা পুরিসলিঙ্গং বলৰঅকুসলেন অন্তরধাযতি, ইত্থিলিঙ্গং দুব্বলকুসলেন পতিট্ঠাতি. ইত্থিলিঙ্গং পন অন্তরধাযন্তং দুব্বলাকুসলেন অন্তরধাযতি, ইতরং বলৰকুসলেন পতিট্ঠাতি. এৰং উভযম্পি সুগতিযং অকুসলেনেৰ অন্তরধাযতি, কুসলেনেৰ পতিট্ঠাতি. কাযপ্পসাদো ৰিয চ সকলসরীরব্যাপকমেৰ, ন চ কাযপ্পসাদাদীনং ঠিতোকাসে তিট্ঠতি.

যদি এৰং ন সব্বত্থ কাযভাৰিন্দ্রিযানীতি? নেৰং পরমত্থতো সব্বত্থ, ৰিনিব্ভুজিত্ৰা পনেসং ¶ ওকাসভেদং পঞ্ঞাপেতুং ন সক্কা রূপরসাদীনং ৰিয. ন হি পরমত্থতো রূপে রসো অত্থি. যদি সিযা, রূপগ্গহণেনেৰ গহণং গচ্ছেয্য. এৰং কাযভাৰিন্দ্রিযানি পরমত্থতো ন সব্বত্থ, ন চ সব্বত্থ নত্থি ৰিৰেচেতুং অসক্কুণেয্যতায হেট্ঠা ৰুত্তলক্খণাদিৰৰত্থানতোপি চেসং অসম্মিস্সতা দেসতো ন ৰিৰেকাভাৰেপি. ন কেৰলঞ্চ ইমানেৰ, সব্বানিপি রূপানি অসম্মিস্সানেৰ হোন্তি. যথা হি পঞ্চৰণ্ণেন কপ্পাসেন ৰট্টিং কত্ৰা দীপে জলিতে কিঞ্চাপি জালা একাবদ্ধা ৰিয হোন্তি, তস্স তস্স পন অংসুনো পাটিযেক্কং জালা অঞ্ঞমঞ্ঞং অসম্মিস্সাৰ. এৰং কাযভাৰিন্দ্রিযাদীনি একস্মিং ঠানে সমোসটানিপি ভিন্নট্ঠানেসু হেট্ঠুপরিযাদিৰসেন নত্থি, তানিপি অসম্মিস্সানেৰ হোন্তি.

সহজরূপানং ¶ অনুপালনলক্খণং জীৰিতিন্দ্রিযং, তেসং পৰত্তনরসং, তেসংযেৰ ঠপনপচ্চুপট্ঠানং, যাপযিতব্বধম্মপদট্ঠানং. অত্থিক্খণে এৰ চেতং সহজরূপানি অনুপালেতি উদকং ৰিয উপ্পলাদীনি, ন ভঙ্গক্খণে সযং ভিজ্জমানত্তা, যথাসকং পচ্চযুপ্পন্নেপি চ ধম্মে পালেতি ধাতী ৰিয কুমারং, সযংপৰত্তিতধম্মসম্বন্ধেনেৰ চ পৰত্ততি নিযামকো ৰিযাতি দট্ঠব্বং.

মনোধাতুমনোৰিঞ্ঞাণধাতূনং নিস্সযলক্খণং হদযৰত্থু, তাসঞ্ঞেৰ ধাতূনং ধারণরসং, উব্বহনপচ্চুপট্ঠানং. ইদং পন হদযৰত্থু যদেতং অন্তোসরীরে দ্ৰিন্নং থনানং মজ্ঝে বাহিরপত্তানি অপনেত্ৰা অধোমুখট্ঠপিতরত্তপদুমমকুলসণ্ঠানং বহি মট্ঠং, অন্তো কোসাতকীফলস্স অব্ভন্তরসদিসং, পঞ্ঞৰন্তানং থোকং ৰিকসিতং, মন্দপঞ্ঞানং মকুল়িতং, হদযমংসযমকং পরিক্খিপিত্ৰা ৰক্কযকনকিলোমকপিহকাদযো তিট্ঠন্তি. তস্স সসম্ভারহদযমংসস্স অন্তো পুন্নাগট্ঠিপতিট্ঠানমত্তে আৰাটকে সণ্ঠিতং অদ্ধপসতমত্তলোহিতং সণ্ঠাতি. তঞ্চ রাগচরিতস্স রত্তং, দোসচরিতস্স কাল়কং, মোহচরিতস্স মংসধোৰনউদকসদিসং, ৰিতক্কচরিতস্স কুলত্থযূসৰণ্ণং, সদ্ধাচরিতস্স কণিকারপুপ্ফৰণ্ণং, বুদ্ধিচরিতস্স অচ্ছং ৰিপ্পসন্নং অনাৰিলং পণ্ডরং পরিসুদ্ধং নিদ্ধোতজাতিমণি ৰিয জুতিমন্তং হোতি, ব্যাপেত্ৰা সন্ধারণাদিকিচ্চেহি ভূতেহি কতূপকারং আযুনা অনুপালিযমানং ৰণ্ণাদিপরিৰুতং উতুচিত্তাহারেহি উপত্থম্ভিযমানং মনোধাতুমনোৰিঞ্ঞাণধাতূনঞ্চেৰ তংসম্পযুত্তানঞ্চ ৰত্থুভাৰং সাধযমানং তিট্ঠতি.

অভিক্কমাদিপ্পৰত্তকচিত্তসমুট্ঠানৰাযোধাতুযা সহজরূপকাযসন্থম্ভনসন্ধারণচলনস্স পচ্চযাকারৰিকারলক্খণা কাযৰিঞ্ঞত্তি, অধিপ্পাযপ্পকাসনরসা, কাযৰিপ্ফন্দনহেতুভাৰপচ্চুপট্ঠানা ¶ , চিত্তসমুট্ঠানৰাযোধাতুপদট্ঠানা. ৰচীভেদপ্পৰত্তকচিত্তসমুট্ঠানপথৰীধাতুযা উপাদিন্নঘট্টনস্স ¶ পচ্চযাকারৰিকারলক্খণা ৰচীৰিঞ্ঞত্তি, অধিপ্পাযপ্পকাসনরসা, ৰচীঘোসস্স হেতুভাৰপচ্চুপট্ঠানা, চিত্তসমুট্ঠানপথৰীধাতুপদট্ঠানা. উভোপেতা কাযৰিপ্ফন্দনৰচীঘোসেহি সযং ৰিঞ্ঞেয্যত্তা, অধিপ্পাযৰিঞ্ঞাপনতো চ ‘‘কাযৰচীৰিঞ্ঞত্তিযো’’তি ৰুচ্চন্তি. চক্খুসোতপথস্মিং হি ঠত্ৰা কেনচি হত্থৰিকারসীসুক্খিপনাদিকাযৰিকারে, সদ্দে ৰা কতে তথাপৰত্তরূপসদ্দাযতনানি চক্খুসোতৰিঞ্ঞেয্যানি, ন তানি ৰিঞ্ঞত্তিযো, চিত্তসমুট্ঠিতকলাপগতায পন ৰাযোধাতুযা সহজাতরূপকাযসন্ধারণচলনাদীনং পচ্চযভূতো ৰিকারো কাযৰিঞ্ঞত্তি, তথা চিত্তসমুট্ঠিতপথৰীধাতুযা উপাদিন্নঘট্টনস্স পচ্চযভূতো আকারৰিকারো ৰচীৰিঞ্ঞত্তি. ন চ তা চক্খুসোতৰিঞ্ঞেয্যা, তা পন মনোদ্ৰারিকজৰনেহি তালপণ্ণাদিসঞ্ঞায উদপানাদীনি ৰিয যথাগহিতকাযৰিকারৰচীঘোসানুসারেন তিরচ্ছানানম্পি ৰিঞ্ঞেয্যা, তদনুসারেনেৰ ‘‘ইদঞ্চিদঞ্চ এস কারেতি, ৰদতি চা’’তি অধিপ্পাযো চ ৰিঞ্ঞেয্যো হোতি, তস্মা সযং ৰিঞ্ঞেয্যতো, অধিপ্পাযৰিঞ্ঞাপনতো চ ‘‘ৰিঞ্ঞত্তিযো’’তি ৰুচ্চন্তি.

তত্থ চ মনোদ্ৰারিকজৰনৰীথিযং সত্তসু কামাৰচরজৰনেসু কাযৰিঞ্ঞত্তিজনকেসু পুরিমেহি ছহি জৰনেহি সমুট্ঠিতৰাযোধাতুযো উপত্থম্ভনসন্ধারণকিচ্চমেৰ কাতুং সক্কোন্তি, অভিক্কমাদিং পন নিপ্ফাদেতুং ন সক্কোন্তি. সত্তমজৰনসমুট্ঠিতা পন হেট্ঠা ছহি জৰনেহি সমুট্ঠিতৰাযোধাতুযোপত্থম্ভং লভিত্ৰা সত্তহি যুগেহি আকড্ঢিতব্বভারং সকটং সত্তমযুগযুত্তগোণো ৰিয ইতরছযুগযুত্তগোণোপত্থম্ভং লভিত্ৰা রূপকাযস্স অভিক্কমপটিক্কমাদিং কারেতুং সক্কোতি, এৰং ৰচীৰিঞ্ঞত্তিজনকেপি সত্তমজৰনেহি সমুট্ঠিতায পথৰীধাতুযাপি উপাদিন্নঘট্টনস্স ¶ পচ্চযভাৰো ৰেদিতব্বো. ইধ পন পুরিমজৰনসমুট্ঠিতায উপত্থম্ভকত্তং, সত্তমজৰনসমুট্ঠিতায চলনপচ্চযত্তঞ্চ নত্থি তেসং ৰাযোধাতুকিচ্চত্তা, পুরিমসহগতা পন পচ্ছিমা পথৰীধাতু উপাদিন্নঘট্টনসমত্থা হোতি, সেসং তাদিসমেৰ. চিত্তসমুট্ঠিতকাযে পন ৰাযোধাতুযা চলন্তে তদুপত্থম্ভিততেসমুট্ঠানিকানম্পি চলনতো সকলকাযস্স অভিক্কমাদযো হোন্তি উদকে গচ্ছন্তে তত্থ পতিততিণপণ্ণানি ৰিযাতি দট্ঠব্বং.

রূপপরিচ্ছেদলক্খণা আকাসধাতু, রূপপরিযন্তপ্পকাসনরসা, রূপমরিযাদপচ্চুপট্ঠানা, অসম্ফুট্ঠভাৰপচ্চুপট্ঠানা, ছিদ্দৰিৰরভাৰপচ্চুপট্ঠানা ৰা, পরিচ্ছিন্নরূপপদট্ঠানা, যায পরিচ্ছিন্নেসু রূপেসু ‘‘ইদমিতো উদ্ধং, অধো, তিরিয’’ন্তি চ হোতি.

অদন্ধতালক্খণা ¶ রূপস্সলহুতা, রূপানং গরুভাৰৰিনোদনরসা, লহুপরিৰত্তিতাপচ্চুপট্ঠানা, লহুরূপপদট্ঠানা. অথদ্ধতালক্খণা রূপস্সমুদুতা, রূপানং থদ্ধভাৰৰিনোদনরসা, সব্বকিরিযাসু অৰিরোধিতাপচ্চুপট্ঠানা, মুদুরূপপদট্ঠানা. সরীরকিরিযানুকূলকম্মঞ্ঞভাৰলক্খণা রূপস্সকম্মঞ্ঞতা, অকম্মঞ্ঞতাৰিনোদনরসা, অদুব্বলভাৰপচ্চুপট্ঠানা, কম্মঞ্ঞতারূপপদট্ঠানা. এতা পন তিস্সোপি অঞ্ঞমঞ্ঞং ন ৰিজহন্তি, গরুথদ্ধঅকম্মঞ্ঞরূপপটিপক্খভাৰেন চ সমুট্ঠিতানং উতুচিত্তাহারজানং লহুমুদুকম্মঞ্ঞভূতানং রূপানং ৰিকারতায চ পরিযাযতো গরুথদ্ধাকম্মঞ্ঞভাৰৰিনোদনকিচ্চা ৰুত্তা, ন পন সভাৰতো সযং অৰিজ্জমানত্তা.

আচযলক্খণো রূপস্সউপচযো, পুব্বন্ততো রূপানং উম্মুজ্জাপনরসো, নিয্যাতনপচ্চুপট্ঠানো, পরিপুণ্ণভাৰপচ্চুপট্ঠানো ৰা, উপচিতরূপপদট্ঠানো. পৰত্তিলক্খণা রূপস্সসন্ততি, অনুপ্পবন্ধনরসা, অনুপচ্ছেদপচ্চুপট্ঠানা, অনুপ্পবন্ধকরূপপদট্ঠানা ¶ . উভযম্পেতং জাতিরূপস্সেৰাধিৰচনং. সম্পিণ্ডিতানং হি চতুসমুট্ঠানিকরূপানং পঠমুপ্পত্তি উপচযো নাম, উপরূপরুপ্পত্তি সন্ততি নাম. তেনেৰ তাসং পদভাজনীযে ‘‘যো রূপস্স উপচযো, সা রূপস্স সন্ততী’’তি (ধ. স. ৬৪২) ৰুত্তং, আকারনানত্ততো পন ৰিসুং উদ্দিট্ঠা.

রূপপরিপাকলক্খণা রূপস্সজরতা, উপনযনরসা, সভাৰানপগমেপি নৰভাৰাপগমপচ্চুপট্ঠানা ৰীহিপুরাণভাৰো ৰিয, পরিপচ্চমানরূপপদট্ঠানা. খণে খণে ভিজ্জমানাপি চেসা উপাদিন্নেসু খণ্ডদন্তাদিতো, অনুপাদিন্নেসু রুক্খলতাদীসু ৰণ্ণৰিকারাদিতো চ অন্তরন্তরা চ সুৰিঞ্ঞেয্যৰিকারত্তা ‘‘পাকটজরা, সৰীচিজরা’’তি চ ৰুচ্চতি, মণিকনকচন্দসূরিযাদীসু দুৰিঞ্ঞেয্যত্তা, নিরন্তরত্তা চ ‘‘অপাকটজরা, অৰীচিজরা’’তি ৰুচ্চতি. ঈদিসেসু হি কপ্পৰিনাসাদিকালে ৰিকারতো জরা পঞ্ঞাযেয্য. সব্বদাপি পন অপঞ্ঞাযমানৰিকারত্তা অরূপধম্মেসু জরা পটিচ্ছন্নজরা নাম. ন চ তত্থ ৰণ্ণৰিকারাদযো জরা তেসং চক্খুৰিঞ্ঞেয্যতো. ন হি জরা চক্খুৰিঞ্ঞেয্যা, মনোৰিঞ্ঞেয্যা পন হোতি. যথা ওঘেন পরিভিন্নভূমিআদিদস্সনেন অদিট্ঠোপি ওঘো সুৰিঞ্ঞেয্যো হোতি, এৰং ৰিকারদস্সনেন জরাতি গহেতব্বং.

পরিভেদলক্খণা রূপস্সঅনিচ্চতা, সংসীদনরসা, খযৰযপচ্চুপট্ঠানা, পরিভিজ্জমানরূপপদট্ঠানা. ন কেৰলঞ্চেতানি উপচযাদিচতূহি গহিতানি জাতিজরামরণানি রূপধম্মানমেৰ ¶ , অরূপধম্মানম্পি হোন্তিযেৰ. এতানি চ ইমেসং সত্তানং অরঞ্ঞপ্পৰেসকপৰিট্ঠপরিপাতকপতিতঘাতকচোরেহি যথাক্কমং সদিসানীতি দট্ঠব্বানি.

ওজালক্খণো ¶ কবল়ীকারো আহারো, রূপাহরণরসো, উপত্থম্ভনপচ্চুপট্ঠানো, কবল়ং কত্ৰা আহরিতব্বৰত্থুপদট্ঠানো. অযং লক্খণাদিতো ৰিনিচ্ছযো.

সঙ্গহতো পন সব্বম্পেতং রূপং খন্ধতো একৰিধং রূপক্খন্ধোৰ হোতি, তথা অহেতুকং সপ্পচ্চযং সঙ্খতং লোকিযং সাসৰং সঞ্ঞোজনীযং ওঘনীযং যোগনীযং নীৰরণীযং পরামট্ঠং সংকিলেসিকং অনারম্মণং অপ্পহাতব্বন্তিআদিনা চ একৰিধং, তং পুন ভূতোপাদাযৰসেন দুৰিধং, তথা নিপ্ফন্নানিপ্ফন্নাদিৰসেন চ. তত্থ পথৰীআদীনি চত্তারি মহাভূতানি ভূতরূপং নাম, সেসং উপাদারূপং নাম. পথৰীআদযো সত্তরস, কবল়ীকারো আহারো চেতি অট্ঠারসৰিধম্পি পরমত্থতো ৰিজ্জমানত্তা নিপ্ফন্নরূপং নাম, ইতরং অনিপ্ফন্নরূপং নাম. চক্খাদযো পঞ্চ পসাদা, ভাৰদ্ৰযং, জীৰিতিন্দ্রিযন্তি অট্ঠৰিধম্পি ইন্দ্রিযরূপং নাম, ইতরং অনিন্দ্রিযং. তানি ইন্দ্রিযানি চেৰ হদযঞ্চাতি নৰৰিধম্পি উপাদিন্নং, ইতরং অনুপাদিন্নং, পঞ্চ পসাদা, চত্তারো রূপসদ্দগন্ধরসা, আপোধাতুৰিৰজ্জিতভূতত্তযঞ্চাতি দ্ৰাদসৰিধম্পি ওল়ারিকরূপং, সন্তিকেরূপং, সপ্পটিঘরূপঞ্চ, সেসং সুখুমরূপং, দূরেরূপং, অপ্পটিঘরূপঞ্চ. পসাদা, হদযঞ্চ ৰত্থুরূপং, ইতরং অৰত্থুরূপং. পসাদা, ৰিঞ্ঞত্তিদ্ৰযঞ্চ দ্ৰাররূপং, ইতরং অদ্ৰারং. পসাদা অজ্ঝত্তিকরূপং, গোচরগ্গাহিকরূপঞ্চ, ইতরং বাহিরং, অগোচরগ্গাহিকরূপঞ্চ. চত্তারি ভূতরূপানি, রূপগন্ধরসওজা চাতি ইদং সুদ্ধট্ঠকং অৰিনিব্ভোগরূপং নাম, ইতরং ৰিনিব্ভোগরূপং.

চক্খু নচক্খূতি এৰমাদিৰসেন চ দুৰিধং হোতি. পুন তং সনিদস্সনত্তিকৰসেন তিৰিধং হোতি. তত্থ রূপাযতনং সনিদস্সনসপ্পটিঘং, সেসমোল়ারিকরূপং অনিদস্সনসপ্পটিঘং, সব্বম্পি সুখুমরূপং অনিদস্সনঅপ্পটিঘং. তথা কম্মজাদিত্তিকৰসেন. তত্থ নৰৰিধং উপাদিন্নরূপং, সুদ্ধট্ঠকং, আকাসো চ কম্মজং নাম, ৰিঞ্ঞত্তিদ্ৰযং, লহুতাদিত্তযঞ্চ সদ্দো ¶ চ অকম্মজং নাম, উপচযাদিচতুব্বিধং লক্খণরূপং অজং নাম. সুদ্ধট্ঠকং, আকাসো, ৰিঞ্ঞত্তিদ্ৰযং, লহুতাদিত্তযং, সদ্দো চ চিত্তজং নাম, তদৰসেসং লক্খণরূপৰিরহিতং অচিত্তজং নাম, লক্খণরূপং অজং নাম. সুদ্ধট্ঠকং, আকাসো, লহুতাদিত্তযঞ্চ আহারজং নাম, সেসং লক্খণৰজ্জিতং ¶ অনাহারজং নাম, লক্খণং অজং নাম. সুদ্ধট্ঠকং, আকাসো, লহুতাদিত্তযং, সদ্দো চ উতুজং নাম, সেসং লক্খণৰিরহিতং অনুতুজং নাম, লক্খণং অজং নাম. লক্খণানি হি জাযমানজীযমানপরিভিজ্জমানধম্মানং সভাৰতায কুতোচি জাতিৰোহারং ন লভন্তি ভেসম্পি জাতিআদিপ্পসঙ্গতো. ন হি ‘‘জাতি জাযতি, জরা জীরতি, মরণং মীযতী’’তি ৰোহরিতুং যুত্তং অনৰট্ঠানতো. তদৰসেসানং পন আকাসৰিঞ্ঞত্তাদিঅনিপ্ফন্নানং যদিপি পরমত্থতো অৰিজ্জমানতায ন কুতোচি উপ্পত্তি অত্থি, তথাপি তথা তথা পৰত্তরূপং উপাদায নেসং ৰিজ্জমানৰোহারস্সেৰ হেতুসমুপ্পন্নৰোহারস্সাপি ৰিরোধাভাৰতো সহেতুকতা ৰুত্তা. যং পন পাল়িযং ‘‘রূপাযতনং…পে… রূপস্স উপচযো রূপস্স সন্ততি কবল়ীকারো আহারো. ইমে ধম্মা চিত্তসমুট্ঠানা’’তিআদীসু (ধ. স. ১২০২) জাতিযাপি কুতোচি জাতত্তং ৰুত্তং, তং রূপজনকপচ্চযানং কিচ্চানুভাৰলক্খণে দিট্ঠত্তা রূপুপ্পত্তিক্খণে ৰিজ্জমানতং সন্ধায ৰুত্তং, জরামরণানং পন রূপুপ্পত্তিক্খণে অভাৰতো ন ৰুত্তং. ‘‘জরামরণং, ভিক্খৰে, অনিচ্চং সঙ্খতং পটিচ্চসমুপ্পন্ন’’ন্তি (সং. নি. ২.২০) ইদং পন জরামরণসীসেন তথাপৰত্তৰিঞ্ঞাণনামরূপাদীনমেৰ গহিতত্তা ৰুত্তন্তি ৰেদিতব্বং. যং তং রূপং অজ্ঝত্তিকং, তং উপাদা, যং তং রূপং বাহিরং, তং অত্থি উপাদা, অত্থি নো উপাদাতি এৰমাদিনা নযেনাপি তিৰিধং হোতি.

পুন ¶ তং সব্বং দিট্ঠসুতমুতৰিঞ্ঞাতৰসেন চতুব্বিধং হোতি. তত্থ রূপাযতনং দিট্ঠং নাম, সদ্দো সুতং নাম, গন্ধরসফোট্ঠব্বানি পত্ৰাৰ গহেতব্বতো মুতং নাম, সেসং মনসা ৰিঞ্ঞাতব্বতো ৰিঞ্ঞাতং নাম. তথা রূপরূপচতুক্কাদিৰসেন চতুব্বিধং, তত্থ অট্ঠারসৰিধং নিপ্ফন্নং রূপরূপং নাম, আকাসো পরিচ্ছেদরূপং নাম, ৰিঞ্ঞত্তিদ্ৰযং, লহুতাদিত্তযঞ্চ ৰিকাররূপং নাম, উপচযাদিচতুব্বিধং লক্খণরূপং নাম. তথা হদযৰত্থু ৰত্থু, ন দ্ৰারং নাম, ৰিঞ্ঞত্তিদ্ৰযং দ্ৰারং, ন ৰত্থু নাম, চক্খাদযো পঞ্চ পসাদা ৰত্থু চেৰ দ্ৰারঞ্চ নাম, সেসং নেৰ ৰত্থু ন দ্ৰারং নামাতি এৰমাদিনা নযেন চতুব্বিধং.

তং পুন একজাদিৰসেন পঞ্চৰিধং. নৰৰিধং হি উপাদিন্নরূপং কম্মেনেৰ, ৰিঞ্ঞত্তিদ্ৰযঞ্চ চিত্তেনেৰ উপ্পজ্জনতো একজং নাম, সদ্দো উতুচিত্তেহি উপ্পজ্জনতো দ্ৰিজং নাম, লহুতাদিত্তযং উতুচিত্তাহারেহি উপ্পজ্জনতো তিজং নাম, সুদ্ধট্ঠকং, আকাসো চ চতূহিপি উপ্পজ্জনতো চতুজ্জং নাম, লক্খণানি অজং নাম. এৰমাদিনা পঞ্চৰিধং হোতি.

তং পুন চক্খুসোতঘানজিৰ্হাকাযমনইন্দ্রিযৰিঞ্ঞেয্যৰসেন ছব্বিধং. সত্তৰিঞ্ঞাণধাতুৰিঞ্ঞেয্যৰসেন ¶ সত্তৰিধং. তদেৰ মনোৰিঞ্ঞাণধাতুৰিঞ্ঞেয্যং ভূতোপাদাযৰসেন দ্ৰিধা কত্ৰা অট্ঠৰিধং হোতি. তত্থ হি আপোধাতু মনোৰিঞ্ঞাণেনেৰ ৰিঞ্ঞেয্যং ভূতরূপং নাম, ইতরং পসাদসহিতসুখুমরূপং মনোৰিঞ্ঞাণৰিঞ্ঞেয্যোপাদাযরূপং নাম. তদেৰ পুন মনোৰিঞ্ঞাণৰিঞ্ঞেয্যোপাদাযরূপং ইন্দ্রিযানিন্দ্রিযৰসেন দ্ৰিধা কত্ৰা নৰৰিধং হোতি. তং পুন পসাদৰিসযআপোধাতুভাৰহদযজীৰিতপরিচ্ছেদৰিকারলক্খণআহারৰসেন দসৰিধং হোতি.

তদেৰ পুন চক্খাযতনং সোতাযতনং ঘানাযতনং জিৰ্হাযতনং কাযাযতনং রূপাযতনং সদ্দাযতনং গন্ধাযতনং ¶ রসাযতনং ফোট্ঠব্বাযতনং ধম্মাযতনন্তি এৰং আযতনতো একাদসৰিধং হোতি, তথা ধাতুৰসেন. তত্থ আপোধাতুৰিৰজ্জিতভূতত্তযং ফোট্ঠব্বাযতনং ফোট্ঠব্বধাতু ‘‘কাযৰিঞ্ঞেয্যং, কাযৰিঞ্ঞাণৰিঞ্ঞেয্য’’ন্তি চ ৰুচ্চতি, সুখুমরূপং ধম্মাযতনং ধম্মধাতূতি, তদেৰ পসাদসহিতং ‘‘মনোৰিঞ্ঞেয্যং, মনোৰিঞ্ঞাণৰিঞ্ঞেয্য’’ন্তি চ ৰুত্তং. সেসং সুৰিঞ্ঞেয্যমেৰ.

কস্মা পনেত্থ আপোধাতুৰিৰজ্জিতানঞ্ঞেৰ ভূতানং ফোট্ঠব্বতা ৰুত্তা, ননু আপোধাতুপি সীতৰসেন ফুসিত্ৰা ৰেদিতব্বাতি? ন সীতস্সাপি তেজোধাতুত্তা. উণ্হমেৰ হি সীতন্তি ব্যপদিস্সতি. কঠিনাকঠিনতং উপাদায রুক্খাদিৰিরল়চ্ছাযা ৰিয, তং ৰা উপাদায সন্দচ্ছাযাদি, অঞ্ঞথা কস্সেতং সীতত্তং সভাৰং সিযা. ‘‘আপোধাতুযা’’ ইতি চে. যদি এৰং উণ্হোদকাদীসু আপত্তং ন সিযা আপোতেজানঞ্চ সহপৰত্তানং ৰিরুদ্ধলক্খণত্তা, ন চ সা তেজোসন্নিধানে সীতত্তং ৰিহায তিট্ঠতি. ন হি সভাৰা কেনচি সহভাৰেন তংসভাৰং জহন্তি অভাৰাপত্তিতো, নাপিস্সা সীতভাৰং মুঞ্চিত্ৰা অপরসভাৰো অত্থি, যেন সহভাৰো যুজ্জেয্য. যদি সিযা ‘‘আপো সীতত্ত’’ন্তি, ভাৰদ্ৰযং সিযা অঞ্ঞোঞ্ঞৰিলক্খণসভাৰত্তা ভাৰস্স, অথাপি ন সীতত্তং, আপোধাতুযা সরূপং সীতগুণো, সো চ উণ্হসন্নিধানে ৰিগচ্ছতি, গুণীরূপমেৰ তিট্ঠতীতি চে? তদা তহিং সযং অফোট্ঠব্বাৰ আপোধাতু, ন নিযতফস্সৰতীতি চ সিযা, যো চ সীতফস্সো গুণোতি সুৰুত্তো, সো অম্হেহি তেজোধাতুৰিসেসোতি.

অযমেৰ ৰিসেসোতি চে, ননু সীতত্তং, উণ্হত্তঞ্চ অঞ্ঞোঞ্ঞৰিরুদ্ধং, কথং তেজোধাতুযা সভাৰং সিযাতি? নাযং দোসো এককলাপে তেসং সম্ভৰাভাৰতো, ভিন্নকলাপেসু ¶ পন পৰত্তিযং আলোকন্ধকারনীলপীতাদীনং ৰণ্ণাযতনতা ৰিয তেজোধাতুত্তং ন ৰিরুজ্ঝতীতি. যদি আপোধাতুযা ন সীতত্তং সরূপং, কিং পনস্সা সরূপন্তি? দ্রৰতা. যদি এৰং দ্রৰতাপি ফুসিত্ৰা ¶ ঞাতব্বতো ফোট্ঠব্বং সিযাতি? ন সীতাদিং ফুসিত্ৰা মনসাৰ ৰণ্ণং দিস্ৰা ঞাতব্বতো. অন্ধকারে সযন্তা হি অতিসীতলতায পত্তাদিং ফুসিত্ৰা ‘‘উদকং এত্থা’’তি আসঙ্কিতা হোন্তি, উদকং ৰা ফুসিত্ৰা সপ্পাদিসঞ্ঞিনো, তস্মা অফোট্ঠব্বমেৰ আপোধাতু, ইতরভূতত্তযমেৰ ফোট্ঠব্বন্তি গহেতব্বং.

কিং পনেতং ভূতত্তযং একতো আরম্মণং কত্ৰা কাযৰিঞ্ঞাণং উপ্পজ্জিতুং সক্কোতি, ন সক্কোতীতি? ন সক্কোতি. কস্মা? আভুজিতৰসেন ৰা উস্সদৰসেন ৰা তেসু একমেৰারম্মণং কত্ৰা উপ্পজ্জনতো. আভুজিতৰসেন হি ওদনথালিযং সিত্থং গহেত্ৰা থদ্ধমুদুভাৰং ৰীমংসন্তস্স, উণ্হোদকভাজনে ৰা হত্থং ওতারেত্ৰা উণ্হভাৰং ৰীমংসন্তস্স, উণ্হসমযে ৰা ৰাতপানং ৰিৰরিত্ৰা ৰাতেন সরীরং পহরাপেন্তস্স চ তত্থ তত্থ কিঞ্চাপি ইতরং ভূতত্তযম্পি অত্থি, যথাভুজিতং পন তংতংপথৰীতেজোৰাযোধাতুমেৰ যথাক্কমং আরব্ভ কাযৰিঞ্ঞাণং উপ্পজ্জতি. এৰং আভুজিতৰসেন আরম্মণং করোতি নাম. উস্সদৰসেন পন ভুঞ্জনসমযে সক্খরং ডংসন্তস্স, মগ্গে ৰা অগ্গিং অক্কমন্তস্স, বলৰৰাতেন ৰা কণ্ণসক্খলিযম্পি পহরন্তস্স চ তত্থ তত্থ কিঞ্চাপি ইতরভূতত্তযম্পি অত্থি, যথাউস্সদং পন তংতংপথৰীতেজোৰাযোধাতুমেৰারব্ভ যথাক্কমং কাযৰিঞ্ঞাণং উপ্পজ্জতি. অগ্গিম্হি ৰা নিমুগ্গসকলসরীরস্স যদিপি একপ্পহারেন অগ্গিনা কাযো ঘট্টীযতি, যস্মিং যস্মিং পন ঠানে কাযপ্পসাদো উস্সন্নো হোতি, যত্থ যত্থ ৰা পন ৰিসযঘট্টনানিঘংসো বলৰা হোতি, তত্থ তত্থেৰ পঠমং কাযৰিঞ্ঞাণং ¶ উপ্পজ্জতি, পচ্ছা ইতরট্ঠানেসু. খণপরিত্ততায পন সহসা পরিৰত্তিত্ৰা উপ্পজ্জনৰসেন একপ্পহারেন সকলসরীরং ডয্হমানং ৰিয খাযতি. ন হি একস্মিং খণে বহূনি ৰিঞ্ঞাণানি উপ্পজ্জন্তি, ব্যাপেত্ৰা ৰা একং. একেকস্মিং পন অৰিনিব্ভোগে কাযদসকে একমেৰ কাযৰিঞ্ঞাণং উস্সদৰসেন উপ্পজ্জতি, এৰং ইতরৰত্থূসুপি ৰিঞ্ঞাণানং অৰিনিব্ভোগে পদেসে একেকানমেৰ উপ্পত্তি ৰেদিতব্বা. এৰং উস্সদৰসেন আরম্মণং করোতি নাম.

কেন পন চিত্তস্স আরম্মণসঙ্কন্তি হোতীতি? অজ্ঝাসযতো, ৰিসযাধিমত্ততো ৰা. নানাঠানেসু হি চিত্তপটিমাদীনি পস্সিতুকামস্স পঠমং একট্ঠানে দিস্ৰা ততো ইতরট্ঠানেসু চ রূপানি পস্সিতুং সরসেনাৰজ্জনং উপ্পজ্জতি. এৰং অজ্ঝাসযতো সঙ্কন্তি হোতি. রূপারম্মণং পন মহন্তম্পি পস্সন্তস্স সব্বতূরিযনিগ্ঘোসে উট্ঠিতে তং ৰা সুণন্তস্স মনুঞ্ঞামনুঞ্ঞে অধিমত্তগন্ধরসফোট্ঠব্বে ¶ ইন্দ্রিযেসু ঘট্টিতে ইতরিতরে চিত্তং সঙ্কমতি, এৰং ৰিসযাধিমত্ততো সঙ্কন্তি হোতীতি অযমেত্থ সঙ্গহতো ৰিনিচ্ছযো. সুঞ্ঞতো, পন অতীতাদিৰসেন পচ্চেকং অনন্তপ্পভেদতো চ ৰিনিচ্ছযো চিত্তৰিভত্তিযং ৰুত্তনযানুসারেন যথানুরূপং ৰেদিতব্বো.

সমুট্ঠানতো, পনেত্থ ভৰযোনীসু পৰত্তিক্কমতো চ পকিণ্ণককথা ৰেদিতব্বা – চতুসমুট্ঠানিকানি হি রূপানি উপ্পজ্জমানানি দ্ৰীসু ভৰেসু চতূসু যোনীসু দসকাদিকলাপৰসেনেৰ পটিসন্ধিপ্পৰত্তীসু যথাসম্ভৰং সমুপ্পজ্জন্তি. তত্থ কম্মজেসু তাৰ ৰীসতিযা কামাৰচরকুসলাকুসলেহি কামলোকেযেৰ সংসেদজানং, ওপপাতিকানঞ্চ ছ ৰত্থূনি, ভাৰদ্ৰযে অঞ্ঞতরং, জীৰিতঞ্চাতি অট্ঠ রূপানি যথাসম্ভৰং পটিসন্ধিতো পট্ঠায পাতুভৰন্তি. তানি চ সুদ্ধট্ঠকং, জীৰিতঞ্চ জীৰিতনৰকং, তদেৰ নৰকং চক্খুনা সহ ¶ চক্খুদসকং, সোতেন সোতদসকং, ঘানেন ঘানদসকং, জিৰ্হায জিৰ্হাদসকং, কাযেন কাযদসকং, হদযৰত্থুনা ৰত্থুদসকং, ভাৰঞ্ঞতরেন ভাৰদসকঞ্চাতি নৰ কলাপা হুত্ৰা উপ্পজ্জন্তি. নপুংসকানং পনেত্থ ভাৰদসকং নত্থি, তথা জচ্চন্ধাদীনং চক্খুসোতঘানদসকানি. এৰং অণ্ডজজলাবুজানম্পি, তেসং পন পটিসন্ধিচিত্তেন সহ কাযৰত্থুভাৰদসকানেৰ উপ্পজ্জন্তি, ততো পৰত্তিকালে জীৰিতনৰকচক্খুদসকাদীনি যথানুরূপং উপ্পজ্জন্তি. রূপভৰে পন ঘানদসকাদিত্তযং, ভাৰদসকদ্ৰযং, উদরগ্গিনৰকঞ্চ নত্থি, সেসানি পঞ্চহি রূপাৰচরকুসলকম্মেহি পটিসন্ধিতো পভুতি উপ্পজ্জন্তি. অঞ্ঞঞ্ঞীনং পন পঞ্চমজ্ঝানকুসলেন জীৰিতনৰকমেৰ. এৰং কামরূপাৰচরকম্মসমুট্ঠিতা নৰ রূপকলাপা দ্ৰীসু ভৰেসু চতূসু যোনীসু যথাসম্ভৰং পটিসন্ধিতো পট্ঠায যাৰ চুতিচিত্তোপরিসত্তরসমচিত্তস্স ঠিতি, তাৰ চিত্তস্স উপ্পাদঠিতিভঙ্গসঙ্খাতেসু তীসু খণেসু নিরন্তরং অজ্ঝত্তসন্তানে এৰ উপ্পজ্জন্তি, ততো পভুতি অনুপ্পজ্জিত্ৰা চুতিচিত্তেন সহ নিরুজ্ঝন্তি.

চিত্তজানি পন পঞ্চৰোকারভৰে দ্ৰিপঞ্চৰিঞ্ঞাণআরুপ্পৰিপাকৰজ্জিতপঞ্চসত্ততিচিত্তেহি অত্তনো অত্তনো উপ্পত্তিক্খণে এৰ সমুট্ঠাপিতানি পঠমভৰঙ্গমুপাদায চুতিচিত্তপরিযোসানং অজ্ঝত্তসন্তানে এৰ সুদ্ধট্ঠকং, তদেৰ কাযৰিঞ্ঞত্তিযা সহ কাযৰিঞ্ঞত্তিনৰকং, ৰচীৰিঞ্ঞত্তিসদ্দেহি ৰচীৰিঞ্ঞত্তিদসকং, লহুতাদিত্তযেন লহুতাদেকাদসকং, কাযৰিঞ্ঞত্তিলহুতাদীহি দ্ৰাদসকং, ৰচীৰিঞ্ঞত্তিসদ্দলহুতাদীহি তেরসকঞ্চাতি ছ কলাপা হুত্ৰা যথাযোগং পৰত্তন্তি. রূপজনকচিত্তেসু চেত্থ সোমনস্সসহগতকামাৰচরজৰনানি ইরিযাপথৰিঞ্ঞত্তিহসনসহিতং ¶ সব্বং চিত্তজরূপং সমুট্ঠাপেন্তি, সেসকামাৰচরজৰনাভিঞ্ঞাৰোট্ঠব্বনানি হসনৰজ্জং, অপ্পনাজৰনানি চ ইরিযাপথাদিৰিরহিতমেৰ, যথাপৰত্তং পন ইরিযাপথং ¶ অৰিনস্সমানং উপত্থম্ভেন্তি. সেসানি পন রূপাৰচরৰিপাকমনোধাতুতদারম্মণানি একূনৰীসতি তম্পি ন করোন্তি, সুদ্ধট্ঠকং, সদ্দনৰকং, লহুতাদেকাদসকং, সদ্দলহুতাদিদ্ৰাদসকঞ্চাতি চত্তারো কলাপে উপ্পাদেন্তি, তত্থাপি সব্বেসম্পি পটিসন্ধিচিত্তানি, অরহন্তানং চুতিচিত্তানি, অরূপভৰূপপন্নানি চ ন কিঞ্চি রূপং সমুট্ঠাপেন্তি, আরুপ্পৰিপাকদ্ৰিপঞ্চৰিঞ্ঞাণানি সব্বথা ন উপ্পাদেন্তীতি.

আহারজানি পন কামভৰে এৰ অজ্ঝোহটাহারে ঠিতেন ঠিতিপ্পত্তেন ওজাসঙ্খাতেন আহারেন সমুট্ঠিতানি অজ্ঝত্তসন্তানে এৰ সুদ্ধট্ঠকং, লহুতাদেকাদসকঞ্চাতি দ্ৰে কলাপা হুত্ৰা যাৰতাযুকং পৰত্তন্তি, ন রূপভূমিযং. উতুজানি অজ্ঝত্তিকবাহিরেন তেজোধাতুসঙ্খাতেন ঠিতিপ্পত্তেন উতুনা অজ্ঝত্তসন্তানে সমুট্ঠিতানি সুদ্ধট্ঠকং, সদ্দনৰকং, লহুতাদেকাদসকং, সদ্দলহুতাদেকাদসকং, সদ্দলহুতাদিদ্ৰাদসকঞ্চাতি চত্তারো কলাপা হুত্ৰা যাৰতাযুকং, বহিদ্ধা পন পথৰীপব্বতদেৰব্রহ্মৰিমানাদীসু সুদ্ধট্ঠকং, সমুদ্দঘোসাদিসদ্দনৰকঞ্চাতি দ্ৰে কলাপাৰ হুত্ৰা পৰত্তন্তি. আকাসলক্খণানি চেত্থ সব্বকলাপেসু ৰিজ্জমানানিপি কলাপসঙ্গহে ৰোহারাভাৰা ন গণীযন্তি. পটিসন্ধিক্খণে চেত্থ উতুচিত্তাহারজানি ন হোন্তি, ন সব্বত্থাপি উপ্পত্তিক্খণে জরামরণানীতি এৰং চতুসমুট্ঠানিকরূপস্স ভৰযোনীসু, পটিসন্ধিপ্পৰত্তীসু চ পৰত্তিক্কমো ৰেদিতব্বো.

অপিচ দ্ৰাচত্তালীসায কোট্ঠাসানং ৰসেনাপি চেত্থ তস্স অজ্ঝত্তং, মহাভূতাদিৰসেন বহিদ্ধা চ পৰত্তি এৰং ৰেদিতব্বা – অজ্ঝত্তিকা হি কেসা লোমা…পে… করীসং মত্থলুঙ্গন্তি ইমে ৰীসতি পথৰাধিককোট্ঠাসা, পিত্তং…পে… মুত্তন্তি ইমে দ্ৰাদস আপাধিককোট্ঠাসা, যেন চ সন্তপ্পতি, যেন ¶ চ জীরতি, যেন চ পরিডয্হতি, যেন চ অসিতপীতখাযিতসাযিতং সম্মাপরিণামং গচ্ছতীতি ইমে চত্তারো তেজাধিককোট্ঠাসা, উদ্ধংগমো অধোগমো কুচ্ছিসযো কোট্ঠাসযো অঙ্গমঙ্গানুসারী অস্সাসপস্সাসো চাতি ইমে ছ ৰাযুঅধিককোট্ঠাসাতি দ্ৰেচত্তালীস কোট্ঠাসা হোন্তি. তেসু উদরিযং করীসং পুব্বো মুত্তন্তি ইমে চত্তারো কোট্ঠাসা উতুজা. এৰমেতেসু একেকং উতুজট্ঠকমেৰ হোতি, সেদো অস্সু খেল়ো সিঙ্ঘাণিকাতি ইমে চত্তারো উতুচিত্তজা, তেসু একেকস্মিং দ্ৰে দ্ৰে অট্ঠকা হোন্তি. অসিতাদিপরিপাচকো ¶ তেজো কম্মজোৰ, তত্থ জীৰিতনৰকমেৰ. অস্সাসপস্সাসো পন চিত্তজোৰ, তত্থ চিত্তজসদ্দনৰকমেৰ. ইমে দস কোট্ঠাসে ঠপেত্ৰা সেসা দ্ৰত্তিংস চতুজা.

তত্থ অট্ঠসু তেজোৰাযোকোট্ঠাসেসু একেকস্মিং জীৰিতনৰকঞ্চেৰ তীণি চ উতুচিত্তাহারজট্ঠকানি হোন্তি, ৰাযোকোট্ঠাসেসু চেত্থ উতুচিত্তজসদ্দনৰকম্পি হোতি, সেসেসু চতুৰীসতিযা কোট্ঠাসেসু কেসলোমনখদন্তানং মংসৰিনিমুত্তট্ঠানং ঠপেত্ৰা সব্বত্থ দ্ৰে কাযভাৰদসকানি, তীণি চ অট্ঠকানি, মংসমুত্তেসু পন কেসাদীসু উতুজট্ঠকমেৰ হোতি. তানি চ যথাৰুত্তদসকনৰকট্ঠকানি সকলসরীরব্যাপীসু তচমংসরুহিরাদীসু, অব্যাপীসু চ কেসাদীসু কোট্ঠাসেসু অৰিনিব্ভোগে একস্মিং অণুপদেসে হোন্তীতি পচ্চেকং অনন্তাপরিমাণা, অনন্তধাতুপচ্চযত্তা তেসং সরীরস্মিং হি পরমাণুভেদসঞ্চুণ্ণানি অনন্তানি চত্তারি মহাভূতানি চেৰ সউপাদারূপানি চ অঞ্ঞোঞ্ঞপচ্চযভূতানি অজ্ঝত্তং দ্ৰাচত্তালীসকোট্ঠাসসরীরারোহপরিণাহসণ্ঠানাদিনা, বহিদ্ধা চ পথৰীপব্বতাদিনা চ আকারেন যথাপচ্চযং সমুপ্পন্নানি. মাযাকারাদযো ৰিয ন বালজনপ্পবোধকানি হোন্তি.

পথৰীধাতু ¶ চেত্থ সুখুমসঞ্চুণ্ণা রজভূতা এৰ আপোধাতুযা সঙ্গহিতা, তেজোধাতুযা অনুপালিতা, ৰাযোধাতুযা ৰিত্থম্ভিতা, ৰণ্ণাদীহি পরিৰারিতা ন ৰিকিরিযমানা অজ্ঝত্তং ইত্থিপুরিসমিগপক্খিদেৰব্রহ্মাদিসরীরভাৰং, বহিদ্ধা চ পথৰীপব্বতরুক্খদেৰব্রহ্মলোকচন্দসূরিযনক্খত্তমণিকনকাদিভাৰঞ্চ উপগচ্ছতি, যূসগতা বন্ধনভূতা পনেত্থ আপোধাতু পথৰীপতিট্ঠিতা. অৰসেসানুপালনৰিত্থম্ভনপরিপাচনপরিৰারিতা ন পগ্ঘরতি, অপগ্ঘরমানা পীণিতভাৰং দস্সেতি, উসুমত্তগতা তেজোধাতু সেসধাতুপতিট্ঠানসঙ্গহৰিত্থম্ভনপরিৰারিতা ইমং কাযং পরিপাচেতি, ৰণ্ণসম্পত্তিঞ্চস্স অপূতিভাৰঞ্চ সাধেতি, ৰাযোধাতু ৰিত্থম্ভনসমুদীরণসভাৰা সেসধাতুপতিট্ঠানসঙ্গহানুপালনপরিৰারিতা ৰিত্থম্ভেতি চালেতি, সরীরৰিমানাদীনং গমনাদিপদৰীতিহরণাদীনং ঠিতিঞ্চ সম্পাদেতি. চতস্সোপি চেতা সম্ভূয পথৰীঅধিকতায কেসাদিভাৰং, পথৰীপব্বতাদিভাৰঞ্চ, আপাধিকতায পিত্তাদিভাৰং, সমুদ্দজলাদিভাৰঞ্চ, ৰাযুঅধিকতায উদ্ধঙ্গমৰাতাদিভাৰং, পথৰীসন্ধারকৰাতাদিভাৰঞ্চ, তেজাধিকতায পরিপাচকগ্গিআদিভাৰং, নরকগ্গিআদিভাৰঞ্চ সাধেন্তি, যাসং পকোপেন রোগজরামরণঞ্চেৰ কপ্পৰিনাসাদযো চ হোন্তি. এৰমেতাসং চুণ্ণৰিচুণ্ণানং ধাতূনং সঞ্চযত্তা পচ্চেকং ¶ অনন্তাপরিমাণা কলাপা এৰ অজ্ঝত্তিককোট্ঠাসা হোন্তি, তথা বাহিরানি রূপানি. তানি চ তেন তেন পচ্চযেন তথাতথাকারেন সমুদিতাৰ উপ্পজ্জন্তি চেৰ উপ্পজ্জিস্সন্তি চ.

যদি পঠমং ধাতুযো অণুরূপেন ঠত্ৰা পচ্ছা সংযুজ্জন্তি, তথা ঠানে ৰিনিযোগাভাৰতো অপরেনাপি পরিযাযেন চেত্থ কম্মজং কম্মপচ্চযং কম্মপচ্চযউতুসমুট্ঠানং, আহারজং ¶ আহারপচ্চযং আহারপচ্চযউতুসমুট্ঠানং, উতুজং উতুপচ্চযং উতুপচ্চযউতুসমুট্ঠানং, চিত্তজং চিত্তপচ্চযং চিত্তপচ্চযউতুসমুট্ঠানন্তি এৰং সমুট্ঠানভেদো ৰেদিতব্বো. তত্থ উপাদিন্নরূপং কম্মজং নাম, মংসমুত্তকেসলোমদন্তসিঙ্ঘাণিকাদি কম্মপচ্চযং নাম, সম্পত্তিকরমহামেঘপথৰীপব্বতাদি, চক্করতনদেৰৰিমানাদি চ কম্মপচ্চযউতুসমুট্ঠানং নাম. আহারতো সমুট্ঠিতং সুদ্ধট্ঠকং আহারজং নাম, কবল়ীকারো আহারো আহারজস্স জনকো হুত্ৰা কম্মজস্স অনুপালকো হোতীতি তদনুপালিতং কম্মজরূপং আহারপচ্চযং নাম, ৰিসভাগাহারং সেৰিত্ৰা আতপে গচ্ছন্তস্স কাল়কুট্ঠাদীনি উপ্পজ্জন্তি, ইদং আহারপচ্চযউতুসমুট্ঠানং নাম. কম্মজউতুতো সমুট্ঠিতং সুদ্ধট্ঠকং উতুজং নাম, তস্মিং উতু অঞ্ঞং অট্ঠকং সমুট্ঠাপেতি, ইদং উতুপচ্চযং নাম, তস্মিম্পি উতু অঞ্ঞং অট্ঠকং সমুট্ঠাপেতি, ইদং উতুপচ্চযউতুসমুট্ঠানং নাম. এৰং উপাদিন্নকে তিস্সো এৰ সন্ততিযো ঘট্টেতুং সক্কোন্তি, অনুপাদিন্নকে পন ৰলাহকো উতুজং নাম, ৰুট্ঠিধারা উতুপচ্চযং নাম, দেৰে পন ৰুট্ঠে পথৰী গন্ধং মুঞ্চতি, বীজানি ৰিরুহন্তীতি এৰং যং অনন্তং সন্ততিৰসেন পৰত্তং, এতং উতুপচ্চযউতুসমুট্ঠানং নাম. চিত্ততো সমুট্ঠিতং সুদ্ধট্ঠকাদি চিত্তজং নাম, চিত্তেন পচ্ছাজাতপচ্চযভাৰেন উপত্থম্ভিতো কাযো চিত্তপচ্চযং নাম, অভিঞ্ঞাচিত্তেন বহিদ্ধা সমুট্ঠাপিতহত্থিঅস্সাদিকং চিত্তপচ্চযউতুসমুট্ঠানং নাম. পকিণ্ণককথা.

রূপাব্যাকতং নিট্ঠিতং.

নিব্বানাব্যাকতৰণ্ণনা

নিব্বানাব্যাকতং পন ভূমিতো লোকুত্তরমেৰ, ধম্মতোপি চ একমেৰ, ভেদো নত্থি, লক্খণাদিতো পন সন্তিলক্খণং ¶ নিব্বানং, নিৰত্তিলক্খণং, অসঙ্খতলক্খণং ৰা, অচ্চুতিরসং ¶ , অনিমিত্তপচ্চুপট্ঠানং, অসঙ্খততায পনস্স কারকহেতুৰিরহতো পদট্ঠানং নত্থি, পাপকহেতুৰসেন পনেতং ‘‘দুক্খনিরোধগামিনিপটিপদা’’তিআদিৰচনতো (ৰিভ. ২০৬) ‘‘অরিযমগ্গপদট্ঠান’’ন্তি ৰত্তুং ৰট্টতি. সঙ্গহতো পন ভেদাভাৰা খন্ধেসু সঙ্গহং ন গচ্ছতি, আযতনাদীসু ধম্মাযতনধম্মধাতূসু সঙ্গহং গচ্ছতি. সুঞ্ঞতো পন অত্তসুঞ্ঞং, সলক্খণধারণতো অনত্তকং ধম্মমত্তং, অসঙ্খততায ৰা অচ্চন্তত্তা চ অনিচ্চতাসুঞ্ঞং, দুক্খতাসুঞ্ঞং, রাগাদিসুঞ্ঞং, নিমিত্তসুঞ্ঞন্তি পৰত্তং সুঞ্ঞন্তি গহেতব্বং.

ভেদতো পন সন্তিলক্খণাদিসভাৰতো একৰিধম্পি কারণপরিযাযতো সউপাদিসেসনিব্বানধাতু, অনুপাদিসেসনিব্বানধাতু চেতি দুৰিধং হোতি. সরসৰসেন পন পরিকপ্পিতাকারভেদতো সুঞ্ঞতং অনিমিত্তং অপ্পণিহিতন্তি তিৰিধং হোতি. সঙ্খতধম্মভেদমুপাদায পটিক্খিপিতব্বাকারতো ন চিত্তং, ন চেতসিকং, ন রূপং, ন অতীতং, ন অনাগতং, ন পচ্চুপ্পন্নং, ন মগ্গো, ন ফলন্তিআদিনা অনন্তপ্পকারং হোতি.

নিব্বানাব্যাকতং নিট্ঠিতং.

এৰং ইমস্মিং কুসলত্তিকে অৰুত্তো সভাৰধম্মো নাম নত্থি. অসভাৰধম্মেসু পনেত্থ কিঞ্চাপি রূপধম্মানং পরিচ্ছেদাকাসলক্খণানি এৰ ৰুত্তানি, কসিণাদিপটিভাগনিমিত্তানি পন কসিণুগ্ঘাটিমাকাসো, ৰিঞ্ঞাণাভাৰো, নিরোধসমাপত্তি, তিস্সো নামপুগ্গলউপাদাপঞ্ঞত্তিযো, অরূপধম্মানং অনিচ্চতাদিলক্খণাদযো চ ন ৰুত্তা, তথাপি তেসম্পি সভাৰধম্মব্যতিরেকাভাৰতো গহণং হোতি, তস্মা অযং তিকো নিপ্পদেসত্তিকোতি ৰেদিতব্বো ¶ . যথা চেত্থ, এৰং ইতো পরেসুপি তিকদুকেসু পঞ্ঞত্তিগ্গহণাভাৰেপি নিরৰসেসপরমত্থগ্গহণেনেৰ নিপ্পদেসতা, ৰিপরিযাযতো সপ্পদেসতা চ ৰেদিতব্বা. যত্থ পন সম্মুতিগ্গহণং অত্থি, তত্থ ৰক্খাম.

রূপনিব্বানকণ্ডো নিট্ঠিতো.

ইতি মোহৰিচ্ছেদনিযা

অভিধম্মমাতিকত্থসংৰণ্ণনায

কুসলত্তিকসংৰণ্ণনা নিট্ঠিতা.

ৰেদনাত্তিকাদিৰণ্ণনা

ইদানি ¶ কুসলত্তিকানন্তরং ৰেদনাত্তিকাদীনং অত্থৰণ্ণনা অনুপ্পত্তা, যস্মা পন য্ৰাযং কুসলত্তিকস্স –

‘‘অত্থতো ভূমিভেদা চ, পচ্চেকং সম্পযোগতো;

উদ্দেসতো চ ধম্মানং, লক্খণাদিৰিভাগতো’’তি. –

আদিনা মাতিকং নিক্খিপিত্ৰা ‘‘কুসলা তাৰ ধম্মা ভূমিতো চতুব্বিধা হোন্তি কামাৰচরা…পে… লোকুত্তরা’’তিএৰমাদিনা ৰিনিচ্ছযনযো ৰুত্তো, সো এৰ সেসত্তিকদুকানম্পি যথাযোগং হোতি. যথা হি এত্থ, এৰং ‘‘সুখায ৰেদনায সম্পযুত্তা তাৰ ধম্মা ভূমিতো তিৰিধা হোন্তি কামাৰচরা রূপাৰচরা লোকুত্তরা’’তিআদিনা অনুক্কমেন সব্বত্তিকদুকানম্পি পণ্ডিতেহি সক্কা ৰিনিচ্ছযনযং সল্লক্খেতুং, তস্মা তং ৰিত্থারনযং ৰজ্জেত্ৰা নিক্খেপকণ্ডে, অত্থুদ্ধারকণ্ডে চ ৰুত্তানুসারতো নাতিসঙ্খেপৰিত্থারনযেন ৰেদনাত্তিকাদীনং তিকদুকানং –

পদত্থা তংসরূপা চ, নৰত্তব্বৰিভাগতো;

ৰিনিচ্ছযো ৰিজানীযো, তত্থ তত্থ যথারহং.

তত্থ ¶ ৰেদনাত্তিকে পদত্থতো তাৰ ‘‘সুখায ৰেদনাযা’’তিআদীসু সুখ-সদ্দো সুখৰেদনাসুখমূলসুখারম্মণসুখহেতুসুখপচ্চযট্ঠানঅব্যাবজ্ঝনিব্বানাদীসু দিস্সতি. অযং হি ‘‘সুখস্স চ পহানা’’তিআদীসু (দী. নি. ১.২৩২; ধ. স. ১৬৫; ৰিভ. ৫৯৪) সুখৰেদনায দিস্সতি. ‘‘সুখো বুদ্ধানমুপ্পাদো’’তিআদীসু (ধ. প. ১৯৪) সুখমূলে. ‘‘যস্মা চ খো, মহালি, রূপং সুখং সুখানুপতিতং সুখাৰক্কন্ত’’ন্তিআদীসু (সং. নি. ৩.৬০) সুখারম্মণে. ‘‘সুখস্সেতং, ভিক্খৰে, অধিৰচনং, যদিদং পুঞ্ঞানী’’তিআদীসু (অ. নি. ৭.৬২; ইতিৰু. ২২) সুখহেতুম্হি. ‘‘যাৰঞ্চিদং, ভিক্খৰে, ন সুকরং অক্খানেন পাপুণিতুং, যাৰ সুখা সগ্গা (ম. নি. ৩.২৫৫). ন তে সুখং পজানন্তি, যে ন পস্সন্তি নন্দন’’ন্তি (সং. নি. ১.১১) আদীসু সুখপচ্চযট্ঠানে. ‘‘দিট্ঠধম্মসুখৰিহারা ¶ এতে ধম্মা’’তিআদীসু (ম. নি. ১.৮২) অব্যাবজ্ঝে. ‘‘নিব্বানং পরমং সুখ’’ন্তিআদীসু (ধ. প. ২০৩-২০৪; ম. নি. ২১৫, ২১৭) নিব্বানে. ইধ পনাযং সুখৰেদনাযমেৰ দট্ঠব্বো.

ৰেদনা-সদ্দো ‘‘ৰিদিতা ৰেদনা উপ্পজ্জন্তী’’তিআদীসু (ম. নি. ৩.২০৮) ৰেদযিতস্মিং যেৰ ৰত্ততি. দুক্খ-সদ্দো দুক্খৰেদনাদুক্খৰত্থুদুক্খারম্মণদুক্খপচ্চযদুক্খপচ্চযট্ঠানাদীসু দিস্সতি. অযং হি ‘‘দুক্খস্স চ পহানা’’তিআদীসু (দী. নি. ১.২৩২; ধ. স. ১৬৫; ৰিভ. ৫৯৪) দুক্খৰেদনাযং দিস্সতি. ‘‘জাতিপি দুক্খা’’তিআদীসু (দী. নি. ২.৩৮৭; ৰিভ. ১৯০) দুক্খৰত্থুস্মিং. ‘‘যস্মা চ খো, মহালি, রূপং দুক্খং দুক্খানুপতিতং দুক্খাৰক্কন্ত’’ন্তিআদীসু (সং. নি. ৩.৬০) দুক্খারম্মণে. ‘‘দুক্খো পাপস্স উচ্চযো’’তিআদীসু (ধ. প. ১১৭) দুক্খপচ্চযে. ‘‘যাৰঞ্চিদং, ভিক্খৰে, ন সুকরং অক্খানেন পাপুণিতুং, যাৰ দুক্খা নিরযা’’তিআদীসু (ম. নি. ৩.২৫০) দুক্খপচ্চযট্ঠানে. ইধ পনাযং দুক্খৰেদনাযমেৰ দট্ঠব্বো.

ৰচনত্থো ¶ পনেত্থ – সুখযতি সত্তং, সুট্ঠু ৰা খাদতি, খনতি চ কাযচিত্তাবাধন্তি সুখা, কাযিকচেতসিকানং সুখসোমনস্সানমেতং অধিৰচনং. দুক্খযতীতি দুক্খা, কাযিকচেতসিকানং দুক্খদোমনস্সানমেতং অধিৰচনং. ন দুক্খা ন সুখাতি অদুক্খমসুখা, উপেক্খাযেতং অধিৰচনং. ম-কারো পদসন্ধিকরো. এৰং তীহি পদেহি পঞ্চৰিধাপি ৰেদনা গহিতা. সব্বাপি আরম্মণরসং ৰেদিযন্তি অনুভৰন্তীতি ৰেদনা. যো পনাযং তীসুপি পদেসু সম্পযুত্ত-সদ্দো, তস্সত্থো – সমং পকারেহি যুত্তাতি সম্পযুত্তা, কতরেহি পকারেহীতি? ‘‘অত্থি কেচি ধম্মা কেহিচি ধম্মেহি সহগতা সহজাতা সংসট্ঠা একুপ্পাদা একনিরোধা একৰত্থুকা একারম্মণা’’তি (কথা. ৪৭৩) এৰং ৰুত্তেহি ইমেহি একুপ্পাদতাদীহি চতূহি পকারেহি. উক্কট্ঠনিদ্দেসো চেস. আরুপ্পে হি ৰিনাপি একৰত্থুকভাৰং সম্পযোগো লব্ভতীতি. সেসং ৰুত্তত্থমেৰ. অযং তাৰেত্থ পদত্থতো ৰিনিচ্ছযো.

তংসরূপাতি তস্স পদত্থস্স সরূপমত্তদস্সনতো. তত্থ সুখসহগতং কাযৰিঞ্ঞাণং, সোমনস্সসহগতানি অট্ঠারস কামাৰচরচিত্তানি, পঠমদুতিযততিযচতুত্থজ্ঝানিকানি চতুচত্তালীস রূপাৰচরলোকুত্তরচিত্তানি চাতি তেসট্ঠি চিত্তানি সুখায ৰেদনায সম্পযুত্তা নাম ¶ . তথা দুক্খসহগতং কাযৰিঞ্ঞাণং, দ্ৰে দোমনস্সসহগতানি চাতি তীণি চিত্তানি দুক্খায ৰেদনায সম্পযুত্তা নাম. সেসানি উপেক্খাসহগতানি পঞ্চপঞ্ঞাস চিত্তানি অদুক্খমসুখায ৰেদনায সম্পযুত্তা নাম. যথা চ চিত্তানং সুখাদিসম্পযোগো, এৰং তংচিত্তসম্পযুত্তানং চেতসিকানম্পি. ন কেৰলঞ্চ এত্থেৰ, ইতো পরেসুপি তিকদুকেসু চিত্তৰসেনেৰ তংসম্পযুত্তচেতসিকানম্পি সঙ্গহো ৰেদিতব্বো ¶ . যত্থ পন ৰিসেসো হোতি, তত্থ ৰক্খাম. ইধ পন চেতসিকেসু সপ্পীতিকানি ৰেদনাৰজ্জিতানি ছ চেতসিকানি এৰ পঞ্চহিপি ৰেদনাহি সম্পযুত্তানি, ইতরানি পন কাযিকসুখদুক্খৰজ্জিতাহি তীহেৰ. তেসু চ পীতিৰজ্জিতা পঞ্চ যথাযোগিকা চেৰ মোহো অহিরিকং অনোত্তপ্পং উদ্ধচ্চং থিনং মিদ্ধঞ্চাতি ইমে একাদস যথাযোগং তীহিপি. তত্থাপি ৰিতক্কৰিচারা মহগ্গতলোকুত্তরভূতায সুখায এৰ, পীতি পন সব্বত্থ সুখায এৰ, দোসইস্সামচ্ছেরকুক্কুচ্চানি দুক্খায এৰ, ৰিচিকিচ্ছা উপেক্খায এৰ, সেসানি অট্ঠৰীসতিসোমনস্সুপেক্খাহি এৰ ৰেদনাহি সম্পযুত্তানি, তত্থাপি করুণামুদিতা মহগ্গতভূতায সুখায এৰাতি অযং ৰিসেসো. সেসং চিত্তসম্পযোগসদিসং. অযং সরূপতো ৰিনিচ্ছযো.

নৰত্তব্বৰিভাগতোতি ইমস্মিং তিকে সব্বা ৰেদনা সব্বং রূপং নিব্বানং সম্মুতিযোতি ইমে ধম্মা ‘‘সুখায ৰেদনায সম্পযুত্তা’’তি ৰা ‘‘দুক্খায ৰেদনায সম্পযুত্তা’’তি ৰা ‘‘অদুক্খমসুখায ৰেদনায সম্পযুত্তা’’তি ৰা ন ৰত্তব্বা. ন হি ৰেদনা ৰেদনায সম্পযুত্তা হোতি রূপাদযো ৰা, তস্মা ইমে ইমস্মিং তিকে ন লব্ভন্তি. অযঞ্চ সপ্পদেসত্তিকো হোতি. যথা চেত্থ, এৰং ইতো পরেসুপি তিকদুকেসু নৰত্তব্বযোজনা. যং যস্মিঞ্চ ন ৰুত্তং অত্থি, তস্স সপ্পদেসতা ৰেদিতব্বা. ইতো পরং পন যত্থ অসঙ্গহিতা ধম্মা হোন্তি, তত্থ তেসং ৰিভাগং দস্সেত্ৰা ‘‘ইমে নৰত্তব্বা’’তি এত্তকমেৰ ৰক্খাম, তেনস্স সপ্পদেসতাপি ঞাতব্বা. যত্থ পন অসঙ্গহিতা নত্থি, তং নিপ্পদেসন্তি ৰক্খাম. তেন তত্থ নৰত্তব্বাভাৰোপি ৰিঞ্ঞাতব্বো. সব্বত্থ পন মাতিকং অনুদ্ধরিত্ৰাৰ পদত্থং, তংসরূপৰিভাগঞ্চ ৰক্খাম. অযং নৰত্তব্বৰিভাগতো ৰিনিচ্ছযো.

ৰেদনাত্তিকং নিট্ঠিতং.

ৰিপাকত্তিকে ¶ অঞ্ঞমঞ্ঞৰিসিট্ঠানং কুসলাকুসলানং পাকাতি ৰিপাকা, ৰিপক্কভাৰমাপন্নানং অরূপধম্মানমেতং অধিৰচনং. কিঞ্চাপি অরূপধম্মা ৰিয রূপধম্মাপি কম্মসমুট্ঠানা ¶ অত্থি, অনারম্মণত্তা পন তে কম্মসরিক্খকা ন হোন্তীতি সারম্মণা অরূপধম্মাৰ কম্মসরিক্খত্তা ৰিপাকাতি ৰুত্তা বীজসরিক্খকং ফলং ৰিয. যথা হি সালিবীজতো নিক্খন্তসীসমেৰ সালিফলন্তি ৰুচ্চতি, ন অঙ্কুরাদীনি, তানি পন ‘‘সালিজাতানি, সালিনিব্বত্তানি চা’’তি ৰুচ্চন্তি, এৰং কম্মসদিসা অরূপধম্মাৰ ‘‘ৰিপাকা’’তি ৰুচ্চন্তি, রূপধম্মা পন কম্মজা ‘‘উপাদিন্না’’তি ৰুচ্চন্তি. ৰিপাকধম্মধম্মাতি ৰিপাকসভাৰা ধম্মা. যথা হি জাতিজরাসভাৰা সত্তা ‘‘জাতিধম্মা জরাধম্মা’’তি ৰুচ্চন্তি, এৰং ৰিপাকজনকট্ঠেন ৰিপাকসভাৰা ৰিপাকপকতিকা ধম্মাতি অত্থো. ততিযপদং উভযসভাৰপটিক্খেপৰসেন ৰুত্তং, অযং পদত্থো.

তত্থ চতূসু ভূমীসু ছত্তিংস ৰিপাকচিত্তানি ৰিপাকা নাম, তথা একৰীসতি কুসলানি, দ্ৰাদস অকুসলানি চাতি তেত্তিংস ৰিপাকধম্মধম্মা নাম, তীসু ভূমীসু ৰীসতি কিরিযচিত্তানি, সব্বঞ্চ রূপং, নিব্বানঞ্চাতি ইমে নেৰৰিপাকনৰিপাকধম্মধম্মা নাম. চেতসিকেসু পন চুদ্দস অকুসলা ৰিপাকধম্মধম্মা এৰ, ৰিরতিযো সিযা ৰিপাকা, সিযা ৰিপাকধম্মধম্মা, তদৰসেসা পন সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মাতি চিত্তং ৰিয তিৰিধা হোন্তীতি অযং ৰিসেসো, সেসং চিত্তসমং, ইদঞ্চ নিপ্পদেসত্তিকন্তি ৰেদিতব্বং.

ৰিপাকত্তিকং নিট্ঠিতং.

আরম্মণকরণৰসেন তণ্হাদিট্ঠীহি উপেতেন কম্মুনা আদিন্না ফলভাৰেন গহিতাতি উপাদিন্না, আরম্মণভাৰং উপগন্ত্ৰা উপাদানসম্বন্ধেন উপাদানানং হিতাতি উপাদানিযা, উপাদানস্স আরম্মণপচ্চযভূতানমেতং অধিৰচনং. উপাদিন্না চ ¶ তে উপাদানিযা চাতি উপাদিন্নুপাদানিযা, সাসৰকম্মনিব্বত্তানং রূপারূপধম্মানমেতং অধিৰচনং. ইমিনা নযেন সেসপদদ্ৰযেপি পটিসেধসহিতো অত্থো ৰেদিতব্বো.

তত্থ দ্ৰত্তিংস লোকিযৰিপাকচিত্তানি, নৰ কম্মজকলাপা চ উপাদিন্নুপাদানিযা নাম. অৰসেসলোকিযচিত্তানি চেৰ অকম্মজরূপকলাপা চ অনুপাদিন্নুপাদানিযা নাম. লোকুত্তরচিত্তনিব্বানানি অনুপাদিন্নঅনুপাদানিযা নাম. কিঞ্চাপি খীণাসৰানং উপাদানক্খন্ধা ¶ ‘‘অম্হাকং মাতুলত্থেরো’’তিআদিনা ৰদন্তানং পরেসং উপাদানস্স আরম্মণপচ্চযা হোন্তি, মগ্গফলনিব্বানানি পন দিৰসং সন্তত্তঅযোগুল়ো ৰিয মক্খিকাহি তেজুস্সদত্তা উপাদানেহি অনুপাদিন্নানেৰ. অসংকিলিট্ঠঅসংকিলেসিকেসুপি এসেৰ নযো. চেতসিকেসু পন কুসলা অনুপাদিন্নুপাদানিযা এৰ, করুণামুদিতা সিযা উপাদিন্নুপাদানিযা, সিযা অনুপাদিন্নুপাদানিযা ৰিরতিযো পন সিযা অনুপাদিন্নুপাদানিযা, সিযা অনুপাদিন্নঅনুপাদানিযা, সেসা চিত্তং ৰিয তিৰিধা হোন্তি, ইদঞ্চ নিপ্পদেসত্তিকন্তি ৰেদিতব্বং. উপাদিন্নুপাদানিযত্তিকং.

সংকিলেসেতীতি সংকিলেসো, ৰিবাধতি উপতাপেতীতি অত্থো. সংকিলেসেন সম্পযুত্তা সংকিলিট্ঠা, সংকিলেসসহগতাতি অত্থো. অত্তানং আরম্মণং কত্ৰা পৰত্তনেন সংকিলেসং অরহন্তি, সংকিলেসে ৰা নিযুত্তা তস্স আরম্মণভাৰং অনতিক্কমনতোতি সংকিলেসিকা, সংকিলেসস্স আরম্মণপচ্চযভূতানমেতং অধিৰচনং. সংকিলিট্ঠা চ তে সংকিলেসিকা চাতি সংকিলিট্ঠসংকিলেসিকা. সেসপদদ্ৰযং পুরিমত্তিকে ৰুত্তনযেনেৰ ৰেদিতব্বং.

তত্থ দ্ৰাদস অকুসলচিত্তুপ্পাদা সংকিলিট্ঠসংকিলেসিকা নাম. সেসলোকিযচিত্তানি চেৰ সব্বং রূপঞ্চ ¶ অসংকিলিট্ঠসংকিলেসিকা নাম. লোকুত্তরচিত্তানি, নিব্বানঞ্চ অসংকিলিট্ঠঅসংকিলেসিকা নাম. চেতসিকেসু পন অকুসলা সংকিলিট্ঠসংকিলেসিকাৰ, করুণামুদিতা অসংকিলিট্ঠঅসংকিলেসিকাৰ, সেসকুসলাব্যাকতা সিযা সংকিলিট্ঠসংকিলেসিকা, সিযা অসংকিলিট্ঠসংকিলেসিকা, সিযা অসংকিলিট্ঠঅসংকিলেসিকাতি তিধাপি হোন্তি, ইদঞ্চ নিপ্পদেসত্তিকং. সংকিলিট্ঠসংকিলেসিকত্তিকং.

সম্পযোগৰসেন ৰত্তমানেন সহ ৰিতক্কেন সৰিতক্কা, তথা সহ ৰিচারেন সৰিচারা, সৰিতক্কা চ তে সৰিচারা চাতি সৰিতক্কসৰিচারা. উভযরহিতা অৰিতক্কঅৰিচারা. ৰিতক্কৰিচারেসু ৰিচারোৰ মত্তা পমাণমেতেসন্তি ৰিচারমত্তা, ৰিচারতো উত্তরিং ৰিতক্কেন সদ্ধিং সম্পযোগং ন গচ্ছন্তীতি অত্থো. অৰিতক্কা চ তে ৰিচারমত্তা চাতি অৰিতক্কৰিচারমত্তা.

তত্থ দ্ৰিপঞ্চৰিঞ্ঞাণৰজ্জিতকামাৰচরচিত্তানি চেৰ একাদস মহগ্গতলোকুত্তরপঠমজ্ঝানিকচিত্তানি ¶ চ তংসম্পযুত্তেসু ৰিতক্কৰিচারে ঠপেত্ৰা সেসা চ সৰিতক্কসৰিচারা নাম. তেসু ৰিতক্কো একাদস দুতিযজ্ঝানিকমহগ্গতলোকুত্তরানি চ তংসম্পযুত্তেসু ৰিচারং ঠপেত্ৰা সেসা চ অৰিতক্কৰিচারমত্তা নাম. দুতিযজ্ঝানিকেসু ৰিচারো, সেসা পঞ্চচত্তালীস মহগ্গতলোকুত্তরচিত্তানি, দ্ৰিপঞ্চৰিঞ্ঞাণানি, তংসম্পযুত্তা চ সব্বঞ্চ রূপং, নিব্বানঞ্চ অৰিতক্কঅৰিচারা নাম. অপিচ কুসলচেতসিকা সৰিতক্কসৰিচারাৰ, ৰিতক্কো অৰিতক্কৰিচারমত্তোৰ, ৰিচারো পন দুতিযজ্ঝানিকেসু সিযা অৰিতক্কঅৰিচারো, সৰিতক্কচিত্তেসু সিযা ন ৰত্তব্বো, অৰসেসা পন সব্বে চেতসিকা ধম্মা তিধাপি হোন্তি. ইমস্মিং পন তিকে ৰিতক্কসহজাতো ৰিচারোৰ ন ৰত্তব্বো. ৰিতক্কত্তিকং.

পীতিযা ¶ সহ একুপ্পাদাদিভাৰং গতাতি পীতিসহগতা, পীতিসম্পযুত্তাতি অত্থো. সেসপদদ্ৰযেপি এসেৰ নযো. উপেক্খাতি চেত্থ অদুক্খমসুখা ৰেদনা ৰুত্তা. সা হি সুখদুক্খাকারপ্পৰত্তিং উপেক্খতি মজ্ঝত্তাকারসণ্ঠিতত্তা তেনাকারেন পৰত্ততীতি উপেক্খা. ইতি ৰেদনাত্তিকতো পদদ্ৰযমেৰ গহেত্ৰা নিপ্পীতিকসুখস্স সপ্পীতিকসুখতো ৰিসেসদস্সনৰসেন অযং তিকো ৰুত্তো.

তত্থ পীতি পঞ্চৰিধা খুদ্দিকা খণিকা ওক্কন্তিকা উব্বেগা ফরণাতি. তত্থ খুদ্দিকা পীতি সরীরে লোমহংসনমত্তমেৰ কাতুং সক্কোতি. খণিকা পীতি খণে খণে ৰিজ্জুপ্পাদসদিসা হোতি. ওক্কন্তিকা পীতি সমুদ্দতীরং ৰীচি ৰিয কাযং ওক্কমিত্ৰা ওক্কমিত্ৰা ভিজ্জতি. উব্বেগা পীতি বলৰতী হোতি কাযং উদ্ধগ্গং কত্ৰা আকাসে লঙ্ঘাপনপ্পমাণপ্পত্তা. ফরণায পীতিযা পন উপ্পন্নায সকলসরীরং ধমিত্ৰা পূরিতৰত্থি ৰিয, মহতা উদকোঘেন পক্খন্দপব্বতকুচ্ছি ৰিয চ অনুপরিপ্ফুটং হোতি. তত্থ ফরণা রূপাৰচরলোকুত্তরাৰ, সেসা কামাৰচরাৰ.

সুখং পন কাযিকং, চেতসিকঞ্চেতি দুৰিধং হোতি. সতিপি চ নেসং কত্থচি অৰিপ্পযোগে ইট্ঠারম্মণপটিলাভতুট্ঠি পীতি, পটিলদ্ধরসানুভৰনং সুখং. যত্থ পীতি, তত্থ সুখং. যত্থ সুখং, তত্থ ন নিযমতো পীতি. সঙ্খারক্খন্ধসঙ্গহিতা পীতি, ৰেদনাক্খন্ধসঙ্গহিতং সুখং. কন্তারখিন্নস্স ৰনন্তোদকদস্সনসৰনেসু ৰিয পীতি, ৰনচ্ছাযাপৰেসনউদকপরিভোগেসু ৰিয সুখং. তস্মিং তস্মিং সমযে পাকটভাৰতো চেতং ৰুত্তন্তি ৰেদিতব্বং.

তত্থ ¶ সুখসহগতা, উপেক্খাসহগতা চ ৰেদনাত্তিকে ৰুত্তাৰ, সুখসহগতং পন কাযৰিঞ্ঞাণং, মহগ্গতলোকুত্তরচতুত্থজ্ঝানিকচিত্তে চ ৰজ্জেত্ৰা সেসা পীতিসহগতা নাম, তত্থ পীতি ন পীতিসহগতা, সুখসহগতাৰ হোতি ¶ , সুখং পন পীতিসহগতং নাম সিযা ন পীতিসুখসহগতা. ইমস্মিং তিকে দ্ৰে দোমনস্সসহগতচিত্তুপ্পাদা, দুক্খসহগতং কাযৰিঞ্ঞাণং, রূপং, নিব্বানঞ্চ নৰত্তব্বা. চেতসিকেসু পন পীতি সুখসহগতাৰ, ৰিচিকিচ্ছা উপেক্খাসহগতাৰ, লোভদিট্ঠিমানা, পঞ্চৰীসতি কুসলাব্যাকতা চ তিধাপি হোন্তি, চেতসিকসুখং সিযা পীতিসহগতং, পঠমদুতিযততিযজ্ঝানিকেসু চতুত্থজ্ঝানিকেসু সিযা নৰত্তব্বং, কাযিকং পন সুখং দুক্খং দোমনস্সং সব্বা চ উপেক্খা দোসো ইস্সা মচ্ছরিযং কুক্কুচ্চঞ্চ নৰত্তব্বাৰ, সেসা সত্তরস ধম্মা সিযা তিধাপি হোন্তি নৰত্তব্বাপি. সেসং সুৰিঞ্ঞেয্যমেৰ. পীতিত্তিকং.

দস্সনেনাতি সোতাপত্তিমগ্গেন. সো হি পঠমং নিব্বানদস্সনতো ‘‘দস্সন’’ন্তি ৰুত্তো. গোত্রভু পন কিঞ্চাপি পঠমতরং পস্সতি, যথা পন রঞ্ঞো সন্তিকং কেনচিদেৰ করণীযেন আগতো পুরিসো দূরতোৰ রথিকায চরন্তং হত্থিক্খন্ধগতং রাজানং দিস্ৰাপি ‘‘দিট্ঠো তে রাজা’’তি পুট্ঠো দিস্ৰাপি কাতব্বকিচ্চস্স অকতত্তা ‘‘ন পস্সামী’’তি ৰদতি, এৰমেৰ নিব্বানং দিস্ৰা কত্তব্বস্স কিলেসপ্পহানস্স অভাৰা ‘‘দস্সন’’ন্তি ন ৰুচ্চতি. তং হি ঞাণং মগ্গস্স আৰজ্জনট্ঠানে তিট্ঠতি. ভাৰনাযাতি সেসমগ্গত্তযেন. সেসমগ্গত্তযং হি পঠমমগ্গেন দিট্ঠস্মিংযেৰ ধম্মে ভাৰনাৰসেন উপ্পজ্জতি, অদিট্ঠপুব্বং কঞ্চি ন পস্সতি, তস্মা ‘‘ভাৰনা’’তি ৰুচ্চতি. ততিযপদং উভযপটিক্খেপৰসেন ৰুত্তং.

তত্থ চত্তারো দিট্ঠিগতসম্পযুত্তচিত্তুপ্পাদা, ৰিচিকিচ্ছাসহগতো চাতি পঞ্চ দস্সনেন পহাতব্বাৰ, উদ্ধচ্চসহগতো ভাৰনায এৰ পহাতব্বো, অৰসেসা ছ অকুসলচিত্তুপ্পাদা অপাযহেতুভাৰেন পৰত্তিতো, অপ্পৰত্তিতো চ সিযা দস্সনেনপহাতব্বা, সিযা ভাৰনাযপহাতব্বা, অকুসলৰজ্জিতা ¶ পন সব্বে চিত্তুপ্পাদা, রূপং, নিব্বানঞ্চ নেৰদস্সনেননভাৰনাযপহাতব্বা. চেতসিকেসু পন দিট্ঠি ৰিচিকিচ্ছা ইস্সা মচ্ছরিযং কুক্কুচ্চং দস্সনেনপহাতব্বাৰ, সেসা অকুসলা সিযা দস্সনেনপহাতব্বা, সিযা ভাৰনাযপহাতব্বাতি তিজাতিকা তেরসৰিধা হোন্তি, ৰুত্তাৰসেসা নেৰদস্সনেননভাৰনাযপহাতব্বাৰ. যং পন ‘‘সোতাপত্তিমগ্গঞাণেন অভিসঙ্খারৰিঞ্ঞাণস্স নিরোধেন সত্ত ভৰে ¶ ঠপেত্ৰা অনমতগ্গে সংসারে যে উপ্পজ্জেয্যুং নামঞ্চ রূপঞ্চ, এত্থেতে নিরুজ্ঝন্তী’’তিআদিনা (চূল়নি. অজিতমাণৰপুচ্ছানিদ্দেস ৬) নযেন কুসলাব্যাকতানম্পি পহানং অনুঞ্ঞাতং, তং তেসং মগ্গানং অভাৰিতত্তা যে উপ্পজ্জেয্যুং, তে উপনিস্সযপচ্চযানং কিলেসানং পহীনত্তা পহীনাতি ইমং পরিযাযং সন্ধায ৰুত্তং, ইদঞ্চ নিপ্পদেসত্তিকং. দস্সনেনপহাতব্বত্তিকং.

দস্সনেন পহাতব্বো হেতু এতেসন্তি দস্সনেনপহাতব্বহেতুকা. দুতিযপদেপি এসেৰ নযো. ততিযপদে পন নেৰদস্সনেননভাৰনাযপহাতব্বো হেতু এতেসন্তি এৰমত্থং অগ্গহেত্ৰা নেৰদস্সনেননভাৰনায পহাতব্বো হেতু এতেসং অত্থীতি এৰমত্থো গহেতব্বো. ইতরথা হি অহেতুকানং অগ্গহণং ভৰেয্য. হেতু এৰ হি তেসং নত্থি, যো দস্সনভাৰনাহি পহাতব্বো সিযা. সহেতুকেসুপি হেতুৰজ্জানং পহানং আপজ্জতি, ন হেতূনং. হেতুযেৰ হি এতেসং নেৰদস্সনেননভাৰনাযপহাতব্বোতি ৰুত্তো, ন তে ধম্মা. উভযম্পি চেতং অনধিপ্পেতং, তস্মা ৰুত্তনযেন অত্থো গহেতব্বো. ইতো পরং সব্বো ৰিনিচ্ছযো অনন্তরত্তিকসদিসোৰ. কেৰলং চেতসিকেসু ৰিচিকিচ্ছুদ্ধচ্চসম্পযুত্তো মোহো দস্সনভাৰনাহি পহাতব্বহেতুকেসু ন পৰিসতি সহজাতস্স অঞ্ঞস্স হেতুনো অভাৰা, নেৰদস্সনেননভাৰনাযপহাতব্বহেতুকেসু ¶ পন পৰিসতি. লোভদোসমূলচিত্তেসু পন হেতূসু মোহো লোভেন চেৰ দোসেন চ সহেতুকো, লোভদোসা চ মোহেনেৰাতি ইমে পহাতব্বহেতুকপদে পৰিট্ঠাতি অযং ৰিসেসো, সেসং তাদিসমেৰাতি. দস্সনেনপহাতব্বহেতুকত্তিকং.

কম্মকিলেসেহি আচীযতীতি আচযো, পটিসন্ধিচুতিগতিপৰত্তিসঙ্খাতানং উপাদিন্নক্খন্ধানমেতং অধিৰচনং. তস্স কারণং হুত্ৰা নিপ্ফাদনভাৰেন তং আচযং গচ্ছন্তি, যস্স ৰা পৰত্তন্তি, তং পুগ্গলং যথাৰুত্তমেৰ আচযং গমেন্তীতি আচযগামিনো. ততো এৰ আচযসঙ্খাতা চযা অপেতত্তা নিব্বানং অপেতং চযাতি অপচযো, তং আরম্মণং কত্ৰা পৰত্তনতো অপচযং গচ্ছন্তীতি অপচযগামিনো. অপিচ পাকারং ইট্ঠকৰড্ঢকী ৰিয পৰত্তং আচিনন্তা গচ্ছন্তীতি আচযগামিনো. তেনেৰ ৰড্ঢকিনা চিতং চিতং ৰিদ্ধংসযমানো পুরিসো ৰিয তদেৰ পৰত্তং অপচিনন্তা গচ্ছন্তীতি অপচযগামিনো. ততিযপদং উভযপটিক্খেপেন ৰুত্তং.

তত্থ লোকিযকুসলাকুসলানি আচযগামিনো নাম, চত্তারি মগ্গানি অপচযগামিনো নাম ¶ , সব্বানি ৰিপাকফলকিরিযানি, রূপং, নিব্বানঞ্চ নেৰআচযগামিনো ন অপচযগামিনো নাম. চেতসিকেসু পন অকুসলা আচযগামিনো এৰ, করুণা মুদিতা সিযা আচযগামিনো, সিযা নেৰাচযগামিনো ন অপচযগামিনো নাম, সেসা তিধাপি হোন্তি, ইদঞ্চ নিপ্পদেসত্তিকং. আচযগামিত্তিকং.

তীসু সিক্খাসু জাতা, সত্তন্নং ৰা সেখানং এতেতিপি সেখা, অপরিযোসিতসিক্খত্তা সযমেৰ সিক্খন্তীতিপি সেখা. উপরি সিক্খিতব্বাভাৰতো ন সেখাতি অসেখা, ৰুদ্ধিপ্পত্তা ৰা সেখাতিপি অসেখা. ততিযপদং উভযপটিক্খেপেন ৰুত্তং.

তত্থ ¶ চত্তারি লোকুত্তরকুসলানি, হেট্ঠিমানি চ তীণি সামঞ্ঞফলানীতি সত্ত সেখা নাম, অরহত্তফলং অসেখা নাম, লোকিযচিত্তানি, রূপং, নিব্বানঞ্চ নেৰসেখা নাসেখা নাম. চেতসিকেসু পন অকুসলা চ অপ্পমঞ্ঞা চ নেৰসেখা নাসেখা এৰ, সেসা তিধাপি হোন্তি, ইদঞ্চ নিপ্পদেসত্তিকং. সেখত্তিকং.

সমন্ততো খণ্ডিতত্তা অপ্পমত্তকং পরিত্তন্তি ৰুচ্চতি ‘‘পরিত্তং গোমযপিণ্ড’’ন্তি (সং. নি. ৩.৯৬) আদীসু ৰিয. কামাৰচরধম্মা হি অপ্পানুভাৰতায পরিত্তা ৰিযাতি পরিত্তা. কিলেসৰিক্খম্ভনসমত্থতায, মহন্তৰিপুলফলতায, দীঘসন্তানতায চ মহন্তভাৰং গতা, মহন্তেহি ৰা উল়ারচ্ছন্দৰীরিযচিত্তপঞ্ঞেহি গতা পটিপন্নাতিপি মহগ্গতা. পমাণকরা ধম্মা রাগাদযো পমাণং নাম, আরম্মণতো ৰা সম্পযোগতো ৰা নত্থি এতেসং পমাণং, পমাণস্স চ পটিপক্খাতি অপ্পমাণা.

তত্থ চতুপঞ্ঞাস কামাৰচরচিত্তানি, রূপঞ্চ পরিত্তা নাম, সত্তৰীসতি রূপারূপাৰচরচিত্তানি মহগ্গতা নাম, লোকুত্তরচিত্তানি, নিব্বানঞ্চ অপ্পমাণা নাম. চেতসিকেসু পন অকুসলা পরিত্তা এৰ, অপ্পমঞ্ঞা পরিত্তমহগ্গতা এৰ, ৰিরতিযো পরিত্তঅপ্পমাণা এৰ, সেসা তিধাপি হোন্তি, ইদঞ্চ নিপ্পদেসত্তিকং. পরিত্তত্তিকং.

পরিত্তং আরম্মণং এতেসন্তি পরিত্তারম্মণা. সেসপদদ্ৰযেপি এসেৰ নযো. সযং পরিত্তা ৰা হোন্তু মহগ্গতা ৰা, পরিত্তাদিধম্মে আরব্ভ পৰত্তা তদারম্মণাতি ৰুচ্চন্তি.

তত্থ ¶ তেৰীসতি কামাৰচরৰিপাকা, কিরিযামনোধাতুঅহেতুকজৰনঞ্চ পরিত্তারম্মণাৰ, ৰিঞ্ঞাণঞ্চাযতননেৰসঞ্ঞানাসঞ্ঞাযতনকুসলৰিপাককিরিযানি মহগ্গতারম্মণাৰ, অট্ঠ লোকুত্তরচিত্তানি অপ্পমাণারম্মণাৰ, অকুসলচিত্তানি ¶ চ অট্ঠ ঞাণৰিপ্পযুত্তজৰনানি চ সিযা পরিত্তারম্মণা, সিযা মহগ্গতারম্মণা, সিযা নৰত্তব্বারম্মণতায ন ৰত্তব্বা, ন কদাচি অপ্পমাণারম্মণা, অট্ঠ ঞাণসম্পযুত্তকামাৰচরজৰনানি, অভিঞ্ঞা, মনোদ্ৰারাৰজ্জনঞ্চাতি একাদস তিধাপি হোন্তি নৰত্তব্বাপি. তেসু চ কুসলানি পঞ্চ অরহত্তমগ্গফলৰজ্জিতসব্বারম্মণানি. তত্থাপি তংতংসেখানমেৰ যথাসকং মগ্গফলানি আরম্মণানি হোন্তি, কিরিযানি ছ সব্বথাপি সব্বারম্মণানি, অভিঞ্ঞাৰজ্জিতরূপাৰচরানি চেৰ ছ আকাসানঞ্চাযতনআকিঞ্চঞ্ঞাযতনচিত্তানি চ নিযমেন পঞ্ঞত্তারম্মণতায, রূপনিব্বানানঞ্চ অনারম্মণতায সব্বথা নৰত্তব্বাতি. চেতসিকেসু পন অকুসলা অকুসলচিত্তসদিসাৰ, ৰিরতিযো সিযা পরিত্তারম্মণা, সিযা অপ্পমাণারম্মণা, করুণামুদিতা নৰত্তব্বাৰ, সেসা তিধাপি হোন্তি সিযা নৰত্তব্বাতি. সেসং সুৰিঞ্ঞেয্যমেৰ. পরিত্তারম্মণত্তিকং.

হীনাতি লামকা, অকুসলা ধম্মা. হীনপণীতানং মজ্ঝে ভৰাতি মজ্ঝিমা, অৰসেসা তেভূমকা রূপারূপধম্মাৰ. উত্তমট্ঠেন, অতপ্পকট্ঠেন চ পণীতা, লোকুত্তরচিত্তনিব্বানানি. চেতসিকেসু পন অকুসলা হীনাৰ, করুণামুদিতা মজ্ঝিমাৰ, সেসকুসলাব্যাকতা মজ্ঝিমপণীতাৰ, সেসা তিধাপি হোন্তি, ইদঞ্চ নিপ্পদেসত্তিকং. সেসং সুৰিঞ্ঞেয্যমেৰ. হীনত্তিকং.

‘‘হিতসুখাৰহা মে ভৰিস্সন্তী’’তি এৰং আসীসিতাপি তথা অভাৰতো, অসুভাদীসুযেৰ সুভন্তিআদিৰিপরীতপ্পৰত্তিতো চ মিচ্ছা সভাৰাতি মিচ্ছত্তা, ৰিপাকদানে সতি খন্ধভেদানন্তরমেৰ ৰিপাকদানতো নিযতা, মিচ্ছত্তা চ তে নিযতা চাতি মিচ্ছত্তনিযতা. ৰুত্তৰিপরীতেন অত্থেন সম্মা সভাৰাতি সম্মত্তা, সম্মত্তা চ তে নিযতা চাতি সম্মত্তনিযতা. উভযথাপি ন নিযতাতি অনিযতা.

আনন্তরিকভাৰেন ¶ পৰত্তিযং সিযা মিচ্ছত্তনিযতা, অঞ্ঞথা পৰত্তিযং সিযা অনিযতা. অহেতুকঅকিরিযনত্থিকদিট্ঠীসু হি অঞ্ঞতরা দিট্ঠি যস্স নিযতা, তং বুদ্ধসতম্পি ৰিবোধেতুং ¶ ন সক্কোতি. যেন চ অনন্তরে এৰ অত্তভাৰে ফলদানতো আনন্তরিকেসু মাতুঘাতকপিতুঘাতকঅরহন্তঘাতকসঙ্ঘভেদকলোহিতুপ্পাদকসঙ্খাতেসু পঞ্চসু কম্মেসু একম্পি কম্মং পটিঘচিত্তেন কতং হোতি, সো সিনেরুপ্পমাণেপি সুৰণ্ণথূপে কত্ৰা সকলচক্কৰাল়ং পূরেত্ৰা নিসিন্নসম্বুদ্ধপ্পমুখং সঙ্ঘং যাৰজীৰং চতূহি পচ্চযেহি উপট্ঠহিত্ৰাপি তেন কুসলেন আনন্তরিকস্স ৰিপাকং পটিবাহিতুং ন সক্কোতি, আনন্তরিকেন পন অধিকেন আনন্তরিকং পটিবাহতি, তস্মা নিযতমিচ্ছাদিট্ঠি আনন্তরিকা চ মগ্গফলানং, মহগ্গতানঞ্চ পটিবাহকতায অনন্তরমেৰ নিরযে ৰিপাকদানতো মিচ্ছত্তনিযতা চ জাতা, চত্তারো পন মগ্গা সম্মত্তনিযতা নাম, সেসচিত্তরূপনিব্বানানি অনিযতা নাম. চেতসিকেসু পন মোহো অহিরিকং অনোত্তপ্পং উদ্ধচ্চং লোভো দিট্ঠি দোসো থিনং মিদ্ধন্তি ইমে নৰ সিযা মিচ্ছত্তনিযতা, সিযা অনিযতা, সেসঅকুসলা, করুণা, মুদিতা চ অনিযতা এৰ, সেসকুসলাব্যাকতা সিযা সম্মত্তনিযতা, সিযা অনিযতা, তিজাতিকা পন তিধাপি হোন্তি, ইদঞ্চ নিপ্পদেসত্তিকন্তি. মিচ্ছত্তত্তিকং.

নিব্বানং মগ্গতি, কিলেসে ৰা মারেন্তো গচ্ছতীতি মগ্গো, অরিযমগ্গো, সো আরম্মণমেতেসন্তি মগ্গারম্মণা. লোকিযো অট্ঠঙ্গিকোপি মগ্গো পচ্চযট্ঠেন এতেসং হেতূতি মগ্গহেতুকা, মগ্গসম্পযুত্তা ধম্মা. মগ্গে ৰা হেতূতি মগ্গহেতূ, অলোভাদযো. তে এতেসং হেতূতি মগ্গহেতুকা. সম্মাদিট্ঠি সযং মগ্গো চেৰ হেতু চ, ইতি মগ্গভূতো হেতু এতেসন্তি মগ্গহেতুকা, লোকুত্তরাৰ ¶ . অভিভৰিত্ৰা পৰত্তনট্ঠেন মগ্গো অধিপতি আরম্মণভূতো, সহজাতো ৰা এতেসন্তি মগ্গাধিপতিনো, তদুভযং.

তত্থ রূপাৰচরচতুত্থজ্ঝানকুসলকিরিযা চ অভিঞ্ঞাভূতা, মনোদ্ৰারাৰজ্জনঞ্চ সিযা মগ্গারম্মণা, সিযা নৰত্তব্বা, অরিযানং হি চেতোপরিযঅনাগতংসঞাণানি পরেসঞ্ঞেৰ মগ্গচিত্তস্স জাননকালে মগ্গারম্মণানি, পুব্বেনিৰাসঞাণমনোদ্ৰারাৰজ্জনানি পন অত্তনো, পরেসঞ্চাপি তদঞ্ঞারম্মণকালে পন নৰত্তব্বানি, চেতোপরিযঞাণস্স পন নিযমেন পরচিত্তৰিসযত্তা তেন অত্তনা অধিগতমগ্গং অরিযা আলম্বিতুং ন সক্কোন্তি, অনাগতংসঞাণেন পন অত্তনো অনাগতে উপ্পজ্জনকস্স উপরিমগ্গস্স অৰিসযত্তা ন সক্কোন্তি. অরিযা হি যথাসকং, হেট্ঠিমঞ্চ মগ্গফলং জানিতুং সক্কোন্তি, ন উপরিমং. তানি পন অভিঞ্ঞাজৰনানি মগ্গেন অসহজাতত্তা ন মগ্গহেতুকানি. মগ্গং গরুংকত্ৰা অপ্পৰত্তনতো ¶ ন মগ্গাধিপতীনি. ন হি তানি কিঞ্চি আরম্মণং অধিপতিং করোন্তি, অন্তমসো লোকুত্তরমপি. কস্মা? অত্তনো মহগ্গততায রাজানং দিস্ৰা তস্স মাতাপিতরো ৰিয, মনোদ্ৰারাৰজ্জনং পন অত্তনো অহেতুকতায রাজানং দিস্ৰা খুজ্জচেটকাদযো ৰিয. চত্তারি মগ্গট্ঠচিত্তানি সব্বদা মগ্গহেতুকা এৰ, তানেৰ চ ৰীমংসাৰীরিযানং অধিপতিভাৰেন পৰত্তিযং সিযা মগ্গাধিপতিনো, ইতরেসং ছন্দচিত্তানং অধিপতিভাৰেন পৰত্তিযং সিযা নৰত্তব্বা, অট্ঠ ঞাণসম্পযুত্তকামাৰচরজৰনানি সিযা মগ্গারম্মণা, সিযা মগ্গাধিপতিনো, সিযা নৰত্তব্বা. তানি হি অত্তনা, পরেহি চ পটিৰিদ্ধমগ্গপচ্চৰেক্খণকালে মগ্গারম্মণা, অত্তনো মগ্গং গরুংকত্ৰা পচ্চৰেক্খণকালে মগ্গাধিপতিনো চ তথাঅপ্পৰত্তিযং নৰত্তব্বা চ হোন্তি. অরিযা হি পরেসং মগ্গফলানি পচ্চৰেক্খন্তা ¶ গরুং করোন্তাপি অত্তনো মগ্গফলানি ৰিয গরুং ন করোন্তি, অপি সম্মাসম্বুদ্ধানং. তেসু সোতাপন্নো সোতাপন্নানমেৰ মগ্গফলানি জানিতুং সক্কোতি, নাঞ্ঞেসং, সকদাগামী পন সকদাগামীনম্পি, ন অনাগামিঅরহন্তানং, অনাগামী পন অনাগামীনম্পি, ন অরহন্তানং, অরহা পন সব্বেসম্পি মগ্গফলানি জানাতি, সোভনলোকিযচিত্তরূপনিব্বানানি নৰত্তব্বানেৰ. চেতসিকেসু পন ৰিরতিযো লোকুত্তরকুসলে মগ্গসদিসাৰ, অঞ্ঞত্থ নৰত্তব্বা, করুণা, মুদিতা, অকুসলা চ নৰত্তব্বা, সেসা তিধাপি হোন্তি নৰত্তব্বা চ. সেসং সুৰিঞ্ঞেয্যমেৰাতি. মগ্গারম্মণত্তিকং.

উপ্পন্নাতি এত্থ ৰত্তমানভূতাপগতওকাসকতভূমিলদ্ধৰসেন উপ্পন্না অনেকপ্পভেদা হোন্তি. তত্থ সব্বম্পি উপ্পাদজরাভঙ্গসমঙ্গীসঙ্খাতং সঙ্খতং ৰত্তমানুপ্পন্নং নাম, আরম্মণরসং অনুভৰিত্ৰা নিরুদ্ধং অনুভূতাপগতসঙ্খাতং কুসলাকুসলঞ্চ উপ্পাদাদিত্তযং অনুপ্পত্ৰা নিরুদ্ধং ভূতাপগতসঙ্খাতং, সেসসঙ্খতঞ্চ ভূতাপগতুপ্পন্নং নাম, ‘‘যানিস্স তানি পুব্বেকতানি কম্মানী’’তি এৰমাদিনা নযেন ৰুত্তং কম্মং অতীতম্পি সমানং অঞ্ঞং ৰিপাকং পটিবাহিত্ৰা অত্তনো ৰিপাকস্সোকাসং কত্ৰা ঠিতত্তা, তথাকতোকাসঞ্চ ৰিপাকং অনুপ্পন্নম্পি একংসেন উপ্পজ্জনকতো ওকাসকতুপ্পন্নং নাম, তাসু তাসু ভূমীসু অসমূহতং অকুসলং ভূমিলদ্ধুপ্পন্নং নাম. এত্থ চ ৰিপস্সনায আরম্মণভূতা তেভূমকা পঞ্চক্খন্ধা ভূমি নাম, তেসু খন্ধেসু উপ্পত্তারহকিলেসজাতা ভূমিলদ্ধং নাম, তেহি কিলেসেহি সা ভূমি লদ্ধা হোতীতি এৰমেতেসু উপ্পন্নেসু ইধ ৰত্তমানুপ্পন্না অধিপ্পেতা.

তত্রাযং ৰচনত্থো – পুব্বন্ততো উপ্পাদতো পট্ঠায যাৰ ভঙ্গা পন্না গতা পৰত্তাতি উপ্পন্না, পচ্চুপ্পন্নাতি ¶ অত্থো ¶ . ন উপ্পন্নাতি অনুপ্পন্না. পরিনিট্ঠিতকারণেকদেসত্তা অৰস্সং উপ্পজ্জিস্সন্তীতি উপ্পাদিনো, উভযেনাপি অনাগতাৰ দস্সিতা. অযং হি তিকো দ্ৰিন্নং অদ্ধানং ৰসেন পূরেত্ৰা দস্সিতো. লদ্ধোকাসস্স হি কম্মস্স ৰিপাকো উপ্পাদী নাম. যদি পন আযূহিতকুসলাকুসলং কম্মং সব্বং ৰিপাকং দদেয্য, অস্স ওকাসো ন ভৰেয্য. তং পন দুৰিধং হোতি ধুৰৰিপাকং, অদ্ধুৰৰিপাকঞ্চ. তত্থ পঞ্চানন্তরিকঅট্ঠসমাপত্তিচতুত্থমগ্গাদি ধুৰৰিপাকং নাম. তং পন কম্মং খণপ্পত্তম্পি অত্থি অপ্পত্তম্পি. তত্থ খণপ্পত্তং উপ্পন্নং নাম, অপ্পত্তং অনুপ্পন্নং নাম. তস্স দুৰিধস্স চ ৰিপাকো দুৰিধো হোতি খণপ্পত্তো চ অপ্পত্তো চ. তত্থ খণপ্পত্তো উপ্পন্নো নাম, অপ্পত্তো চিত্তানন্তরে ৰা উপ্পজ্জতু, কপ্পসতসহস্সাতিক্কমে ৰা ধুৰপচ্চযট্ঠেন উপ্পাদী নাম হোতি. মেত্তেয্যস্স বোধিসত্তস্স মগ্গো অনুপ্পন্নো নাম হোতি, ফলং উপ্পাদী নাম. তত্থ চতূসু ভূমীসু ৰিপাকো, কম্মজরূপঞ্চ ৰত্তমানুপ্পন্না নাম, উপ্পজ্জনারহা উপ্পাদিনো নাম, ন পন ৰত্তব্বা ‘‘অনুপ্পন্না’’তি. কুসলাকুসলকিরিযা, কম্মজরূপঞ্চ সিযা উপ্পন্না, সিযা অনুপ্পন্না, ন পন ৰত্তব্বা ‘‘উপ্পাদিনো’’তি. চেতসিকেসু পন অকুসলা অকুসলচিত্তসদিসাৰ, সেসা দুৰিধাপি হোন্তি, অতীতা, পনেত্থ নিব্বানঞ্চ নৰত্তব্বা. সেসং সুৰিঞ্ঞেয্যমেৰাতি. উপ্পন্নত্তিকং.

অত্তনো সভাৰং, উপ্পাদাদিক্খণং ৰা পত্ৰা তং অতিক্কমিত্ৰা ইতা গতা পত্তাতি অতীতা. তদুভযম্পি ন আগতাতি অনাগতা. তং তং কারণং পটিচ্চ উপ্পন্নাতি পচ্চুপ্পন্না, সব্বে সঙ্খতা নামরূপধম্মা. ন সঙ্খতধম্মেসু তেকালিকভাৰং অপ্পত্তো নাম অত্থি, সব্বেপি তে তিধা হোন্তি. নিব্বানং পনেত্থ নৰত্তব্বন্তি. অতীতত্তিকং.

অতীতং আরম্মণং এতেসন্তি অতীতারম্মণা. সেসপদদ্ৰযেপি এসেৰ নযো.

তত্থ ¶ কুসলৰিপাককিরিযাৰসেন ছব্বিধানি ৰিঞ্ঞাণঞ্চাযতননেৰসঞ্ঞানাসঞ্ঞাযতনানি হেট্ঠা অতীতসমাপত্তিং আরব্ভ পৰত্তিতো অতীতারম্মণানি, দ্ৰিপঞ্চৰিঞ্ঞাণমনোধাতুযো পচ্চুপ্পন্নারম্মণাৰ, সেসা একাদস কামাৰচরৰিপাকা, অহেতুকহসনচিত্তঞ্চ তিধাপি হোন্তি, সেসকামাৰচরকিরিযকুসলাকুসলা চ অভিঞ্ঞাভূতরূপাৰচরচতুত্থজ্ঝানকুসলকিরিযা চ তিধাপি হোন্তি নৰত্তব্বা চ. তেসু কামাৰচরানং অতীতাদীসু ছসু আরম্মণেসু পৰত্তিৰিভাগো হেট্ঠা ৰুত্তোৰ. নৰত্তব্বতা পন তেসু ঞাণৰিপ্পযুত্তজৰনকুসলানং ¶ পঞ্ঞত্তারম্মণৰসেনেৰ, ন নিব্বানারম্মণৰসেন, তেসুপি তিহেতুকজৰনাৰজ্জনানং মগ্গফলরূপারূপজ্ঝানানং, পুরেচারিকভাৰেনাপি নিব্বানচতুক্কজ্ঝানৰিসযানঞ্চ পচ্চৰেক্খণভাৰেনাপি নৰত্তব্বতা ৰেদিতব্বা, অভিঞ্ঞানং পন ইদ্ধিৰিধঞাণস্স তাৰ কাযৰসেন চিত্তং পরিণামেত্ৰা কাযসন্নিস্সিতং কত্ৰা দিস্সমানেন কাযেন গচ্ছন্তস্স অতীতং পাদকজ্ঝানচিত্তং আরব্ভ পৰত্তনতো অতীতারম্মণং, ‘‘অনাগতেসু রূপানি এৰং হোন্তূ’’তি অধিট্ঠহন্তস্স অনাগতারম্মণং, কাযং পন চিত্তসন্নিস্সিতং কত্ৰা অদিস্সমানেন কাযেন গমনকালে, অজ্ঝত্তং কুমারৰণ্ণাদীনং, বহিদ্ধাপাসাদকূটাগারাদীনঞ্চ পচ্চুপ্পন্নানং নিম্মানকালে চ পচ্চুপ্পন্নারম্মণঞ্চ তাৰ হোতীতি এৰং ইদ্ধিৰিধস্স ছব্বিধম্পি অজ্ঝত্তিকং, বাহিরঞ্চ তেকালিকং আরম্মণং হোতীতি ৰেদিতব্বং.

দিব্বসোতস্স কুচ্ছিগতং অজ্ঝত্তিকং, বাহিরঞ্চ পচ্চুপ্পন্নং সদ্দাযতনমেৰারম্মণং. চেতোপরিযঞাণস্স অতীতে সত্তদিৰসব্ভন্তরে, অনাগতে সত্তদিৰসব্ভন্তরে চ পরেসঞ্ঞেৰ চিত্তং অতীতঞ্চ অনাগতঞ্চারম্মণং হোতি. সত্তদিৰসাতিক্কমে পনেতং পরচিত্তং জানিতুং ন সক্কোতি. অতীতংসঅনাগতংসঞাণানং ¶ হি এস ৰিসযো, ন এতস্স. পচ্চুপ্পন্নচিত্তজাননকালে পনস্স পচ্চুপ্পন্নমারম্মণং হোতি.

পচ্চুপ্পন্নঞ্চ নামেতং তিৰিধং খণপচ্চুপ্পন্নং সন্ততিপচ্চুপ্পন্নং অদ্ধাপচ্চুপ্পন্নঞ্চাতি. তত্থ উপ্পাদট্ঠিতিভঙ্গপ্পত্তং খণপচ্চুপ্পন্নং নাম. সন্ততিপচ্চুপ্পন্নং পন দুৰিধং রূপারূপৰসেন. তত্থ আতপট্ঠানা আগন্ত্ৰা গব্ভং পৰিট্ঠস্স যাৰ অন্ধকারভাৰো ন ৰিগচ্ছতি, অন্তোগব্ভে ৰা ৰসিত্ৰা দিৰা আতপট্ঠানং ওলোকেন্তস্স যাৰ অক্খীনং ফন্দনভাৰো ন ৰূপসম্মতি, অযং রূপসন্ততি নাম. দ্ৰে তযো জৰনৰারা অরূপসন্ততি নাম, তদুভযং সন্ততিপচ্চুপ্পন্নন্তি ৰেদিতব্বং. একভৰপরিচ্ছিন্নং অদ্ধাপচ্চুপ্পন্নং নাম. ইমস্মিং পন চেতোপরিযঞাণৰিসযে কতিপযজৰনৰারা অদ্ধাপচ্চুপ্পন্নং নাম. তত্থ খণপচ্চুপ্পন্নং চিত্তং চেতোপরিযঞাণস্স আরম্মণং ন হোতি আৰজ্জনেন সদ্ধিং নিরুজ্ঝনতো. ন হি আৰজ্জনজৰনানং এত্থ ভিন্নারম্মণতা যুত্তা. রূপসন্ততিপচ্চুপ্পন্নং পন কতিপযজৰনৰারপরিচ্ছিন্নং অদ্ধাপচ্চুপ্পন্নং অস্স আরম্মণং হোতি. ইদ্ধিমা হি পরস্স চিত্তং জানিতুকামো আৰজ্জেতি, তং আৰজ্জিতক্খণে পচ্চুপ্পন্নচিত্তমারম্মণং কত্ৰা তেনেৰ সহ নিরুজ্ঝতি. ততো তদেৰ নিরুদ্ধং চিত্তমালম্বিত্ৰা চত্তারি, পঞ্চ ৰা জৰনানি উপ্পজ্জন্তি, তেসং পচ্ছিমং ইদ্ধিচিত্তং, সেসানি কামাৰচরজৰনানি ¶ . তেসঞ্চ একারম্মণত্তেপি ইদ্ধিচিত্তমেৰ পরস্স চিত্তং জানাতি, ন ইতরানি. যথা চক্খুদ্ৰারৰীথিযং চক্খুৰিঞ্ঞাণমেৰ রূপং পস্সতি, ন ইতরানি, তেসু চ আৰজ্জনমেৰ নিপ্পরিযাযতো পচ্চুপ্পন্নারম্মণং, ইতরানি পন অদ্ধাসন্ততিৰসেন পরিযাযতোতি গহেতব্বং, এৰমেতস্স অতীতানাগতপচ্চুপ্পন্নং চিত্তমেৰারম্মণং হোতি, তঞ্চ খো পরস্সেৰ, ন অত্তনো.

পুব্বেনিৰাসঞাণং পন নামগোত্তকসিণপঞ্ঞত্তাদিঅনুস্সরণে, নিব্বানানুস্সরণে চ নৰত্তব্বারম্মণং, সঙ্খতধম্মানুস্সরণে ¶ অতীতারম্মণমেৰ. তস্স হি অতীতেসু সাসৰানাসৰেসু, অজ্ঝত্তিকবাহিরেসু চ ধম্মেসু অনারম্মণং নাম নত্থি, বুদ্ধানং সব্বঞ্ঞুতঞ্ঞাণসমগতিকং হোতি. যথাকম্মূপগঞাণস্স অজ্ঝত্তিকং, বাহিরঞ্চ অতীতং কুসলাকুসলচেতনামত্তমেৰ. ‘‘চেতোপরিযঞাণস্স চিত্তমেৰারম্মণং হোতি, ন তংসম্পযুত্তধম্মা’’তি অট্ঠকথাসু ৰুত্তং, পট্ঠানে পন ‘‘কুসলা খন্ধা ইদ্ধিৰিধঞাণস্স চেতোপরিযঞাণস্স পুব্বেনিৰাসানুস্সতিঞাণস্স যথাকম্মূপগঞাণস্স অনাগতংসঞাণস্স আরম্মণপচ্চযেন পচ্চযো’’তি (পট্ঠা. ১.১.৪০৪) ৰুত্তত্তা চেতোপরিযঞাণযথাকম্মূপগঞাণানং চিত্তসম্পযুত্তাপি চেতনাসম্পযুত্তাপি চত্তারো খন্ধা আরম্মণং হোন্তি এৰাতি দট্ঠব্বং.

দিব্বচক্খুঞাণস্স পন অজ্ঝত্তিকং, বাহিরঞ্চ পচ্চুপ্পন্নং ৰণ্ণাযতনমেৰারম্মণং. অনাগতংসঞাণস্স ছব্বিধম্পি অনাগতমেৰ অজ্ঝত্তঞ্চ বাহিরঞ্চারম্মণং, ইদম্পি পুব্বেনিৰাসঞাণং ৰিয অনাগতে সব্বঞ্ঞুতঞ্ঞাণসদিসন্তি. এৰং অভিঞ্ঞানং অতীতানাগতপচ্চুপ্পন্নেসু, নৰত্তব্বেসু চ অজ্ঝত্তিকবাহিরেসু ছসু আরম্মণেসু যথাযোগং পৰত্তি ৰেদিতব্বা. সেসানি পন্নরস রূপাৰচরচিত্তানি, আকাসানঞ্চাযতনআকিঞ্চঞ্ঞাযতনকুসলৰিপাককিরিযানি, অট্ঠ লোকুত্তরচিত্তানি, রূপনিব্বানানি চ নৰত্তব্বানি. চেতসিকেসু পন অপ্পমঞ্ঞা নৰত্তব্বাৰ. সেসং সুৰিঞ্ঞেয্যমেৰ. অতীতারম্মণত্তিকং.

‘‘এৰং পৰত্তমানা মযং অত্তাতি গহণং গমিস্সামা’’তি ইমিনা ৰিয অধিপ্পাযেন অত্তানং অধিকারং কত্ৰা পৰত্তাতি অজ্ঝত্তা. অজ্ঝত্ত-সদ্দো পনাযং গোচরজ্ঝত্তে নিযকজ্ঝত্তে অজ্ঝত্তজ্ঝত্তে ৰিসযজ্ঝত্তেতি চতূসু অত্থেসু দিস্সতি. ‘‘অজ্ঝত্তরতো ¶ সমাহিতো’’তিআদীসু (ধ. প. ৩৬২) হি অযং গোচরজ্ঝত্তে দিস্সতি. ‘‘অজ্ঝত্তং ৰা ধম্মেসু ধম্মানুপস্সী ৰিহরতী’’তিআদীসু ¶ (দী. নি. ২.৩৭৩) নিযকজ্ঝত্তে. ‘‘ছ অজ্ঝত্তিকানি আযতনানী’’তিআদীসু (ম. নি. ৩.৩০৪) অজ্ঝত্তজ্ঝত্তে. ‘‘অজ্ঝত্তং সুঞ্ঞতং উপসম্পজ্জ ৰিহরতী’’তিআদীসু (ম. নি. ৩.১৮৭) ৰিসযজ্ঝত্তে, ইস্সরিযট্ঠানেতি অত্থো. ফলসমাপত্তি হি বুদ্ধানং ইস্সরিযট্ঠানং নাম. ইধ পনাযং নিযকজ্ঝত্তে ৰত্ততি, তস্মা অত্তনো সন্তানে পৰত্তা পাটিপুগ্গলিকা রূপারূপধম্মা ইধ অজ্ঝত্তাতি ৰেদিতব্বা. ততো বহিভূতা ইন্দ্রিযবদ্ধা ৰা অনিন্দ্রিযবদ্ধা ৰা রূপারূপপঞ্ঞত্তিযো বহিদ্ধা নাম, ততিযপদং তদুভযৰসেন ৰুত্তং.

তত্থ সব্বানি চিত্তচেতসিকানি ইন্দ্রিযবদ্ধরূপং তিধা হোন্তি, অনিন্দ্রিযবদ্ধরূপং, নিব্বানপঞ্ঞত্তিযো চ বহিদ্ধাৰ. ইমস্মিং হি তিকে কুসলত্তিকে অলব্ভমানা পঞ্ঞত্তিযোপি লব্ভন্তি ঠপেত্ৰা আকিঞ্চঞ্ঞাযতনারম্মণং, তদেৰ ইধ নৰত্তব্বং. তেনেৰ হি ভগৰতা অনন্তরত্তিকে ‘‘কসিণাদিপঞ্ঞত্তারম্মণানি কামরূপাৰচরাদিচিত্তানি বহিদ্ধারম্মণানি, আকিঞ্চঞ্ঞাযতনঞ্চ নৰত্তব্ব’’ন্তি ৰুত্তং, ইদঞ্চ নিপ্পদেসত্তিকং. অজ্ঝত্তত্তিকং.

যথাৰুত্তে অজ্ঝত্তাদিকে আরম্মণং কত্ৰা পৰত্তানং ৰসেন অযং তিকো ৰুত্তো. তত্থ ছব্বিধানি ৰিঞ্ঞাণঞ্চাযতননেৰসঞ্ঞানাসঞ্ঞাযতনচিত্তানি অজ্ঝত্তারম্মণানেৰ, আকাসানঞ্চাযতনত্তযং, রূপাৰচরলোকুত্তরচিত্তানি চ বহিদ্ধারম্মণানেৰ, ৰোট্ঠব্বনৰজ্জিতা অহেতুকমহাৰিপাকা তিধাপি হোন্তি, অৰসেসা পন আকিঞ্চঞ্ঞাযতনৰজ্জিতানি আৰজ্জনজৰনানি, অভিঞ্ঞা চ সিযা তিধাপি হোন্তি, আকিঞ্চঞ্ঞাযতনারম্মণস্স আৰজ্জনপরিকম্মপচ্চৰেক্খণাদিভাৰপ্পৰত্তিযং সিযা নৰত্তব্বাতি. তেসং ¶ অজ্ঝত্তাদিআরম্মণতা অনন্তরত্তিকে, হেট্ঠা চ ৰুত্তনযানুসারেন ঞাতব্বা, আকিঞ্চঞ্ঞাযতনত্তযং, পন রূপনিব্বানানি চ নৰত্তব্বাৰ. চেতসিকেসু পন অপ্পমঞ্ঞাৰিরতী বহিদ্ধারম্মণাৰ, সেসা তিধাপি হোন্তি নৰত্তব্বা চ. সেসং সুৰিঞ্ঞেয্যমেৰ. অজ্ঝত্তারম্মণত্তিকং.

দট্ঠব্বভাৰসঙ্খাতেন সহ নিদস্সনেনাতি সনিদস্সনা, পটিহননভাৰসঙ্খাতেন সহ পটিঘেনাতি সপ্পটিঘা, সনিদস্সনা চ তে সপ্পটিঘা চাতি সনিদস্সনসপ্পটিঘা, রূপাযতনমেৰ. নীলাদিভেদমুপাদায পন বহুৰচননিদ্দেসো. নত্থি এতেসং দট্ঠব্বভাৰসঙ্খাতং নিদস্সনন্তি অনিদস্সনা, অনিদস্সনা চ তে ৰুত্তনযেন সপ্পটিঘা চাতি অনিদস্সনসপ্পটিঘা, ¶ সেসানি ওল়ারিকরূপানি. ততিযপদং উভযপটিক্খেপেন ৰুত্তং, সুখুমরূপচিত্তচেতসিকনিব্বানানি অনিদস্সনঅপ্পটিঘা নাম, ইদঞ্চ নিপ্পদেসত্তিকন্তি ৰেদিতব্বং. সনিদস্সনত্তিকং.

তিকমাতিকত্থৰণ্ণনা নিট্ঠিতা.

অভিধম্মদুকমাতিকত্থৰণ্ণনা

দুকমাতিকায পন হেট্ঠা অনাগতপদত্থৰণ্ণনংযেৰ করিস্সাম. হেতুগোচ্ছকে তাৰ হেতূ ধম্মাতি এত্থ হেতুহেতু পচ্চযহেতু উত্তমহেতু সাধারণহেতূতি চতুব্বিধা হেতূ. তত্থ অলোভাদযো ছ ধম্মা হেতুহেতূ নাম, উপাদারূপাদীনং মহাভূতাদযো পচ্চযহেতূ নাম, ৰিপাকুপ্পত্তিযং কুসলাকুসলং, ইট্ঠানিট্ঠারম্মণঞ্চ উত্তমহেতূ নাম, সঙ্খারাদীনং অৰিজ্জাদযো সাধারণহেতূ নাম. ইধ পন হেতুহেতু অধিপ্পেতো. হেতূ ধম্মাতি মূলট্ঠেন হেতুসঙ্খাতা ধম্মা, ‘‘হেতুধম্মা’’তিপি পাঠো, সোযেৰত্থো. ন হেতূতি তেসঞ্ঞেৰ পটিক্খেপৰচনং.

তত্থ ¶ অলোভো অদোসো অমোহোতি কুসলাব্যাকতা তযো, লোভো দোসো মোহোতি অকুসলা তযো চাতি ইমে ছ ধম্মা হেতূ নাম. ইমে ঠপেত্ৰা অৰসেসা চেতসিকা, সব্বানি চ চিত্তানি, রূপনিব্বানানি চাতি ইমে ধম্মা ন হেতূ নাম, ইদঞ্চ নিপ্পদেসদুকন্তি ৰেদিতব্বং. হেতুদুকং পঠমং.

সম্পযোগতো পৰত্তেন সহ হেতুনাতি সহেতুকা. তথেৰ পৰত্তো নত্থি এতেসং হেতূতি অহেতুকা.

তত্থ অহেতুকচিত্তৰজ্জিতানি একসত্ততি চিত্তানি সহেতুকা নাম. তেসু দ্ৰে মোহমূলানি মোহেনেৰ সহেতুকানি, অট্ঠ লোভমূলানি লোভমোহেহি দ্ৰীহি, দ্ৰে দোসমূলানি দোসমোহেহি, দ্ৰাদস ঞাণৰিপ্পযুত্তকুসলাব্যাকতানি অলোভাদোসেহি, সেসানি সত্তচত্তালীস অলোভাদীহি তীহিপি সহেতুকানীতি, মোহমূলেসু পন মোহো, দ্ৰিপঞ্চৰিঞ্ঞাণং, মনোধাতু, সন্তীরণত্তযং, ৰোট্ঠব্বনং, হসিতুপ্পাদকানি অট্ঠারস চিত্তানি, রূপনিব্বানানি চাতি ইমে ধম্মা অহেতুকা নাম. চেতসিকেসু পন লোভদোসা, ৰিচিকিচ্ছা চ মোহেনেৰ সহেতুকা, দিট্ঠিমানো ¶ লোভমোহেহি দ্ৰীহি, ইস্সামচ্ছরিযকুক্কুচ্চানি দোসমোহেহি, মোহো পন সিযা লোভেন, সিযা দোসেনাতি দ্ৰীহি সহেতুকোপি মোহমূলেসু অহেতুকোপি, থিনমিদ্ধানি সিযা লোভমোহেহি, সিযা দোসমোহেহীতি তীহিপি সহেতুকানি, অহিরিকানোত্তপ্পউদ্ধচ্চানি তথা চ কেৰলমোহেন চ, অমোহো পন অলোভাদোসেহেৰ দ্ৰীহি, অলোভো সিযা অদোসামোহেহি, সিযা অদোসেনাতি ¶ দ্ৰীহি, অদোসো সিযা অলোভামোহেহি, সিযা অলোভেনাতি দ্ৰীহি, সেসা পন দ্ৰাৰীসতি কুসলাব্যাকতা সিযা তীহি, সিযা দ্ৰীহিপি হেতূহি সহেতুকা, ছন্দো পন যথাযোগং তীহি, পীতিদোসৰজ্জিতেহি পঞ্চহি সিযা সহেতুকাপি অহেতুকাপি, সেসা একাদস তিজাতিকা ছহি হেতূহি সহেতুকাপি অহেতুকাপি, ৰেদনা চেত্থ দোমনস্সভূতা দ্ৰিহেতুকাৰ, সোমনস্সউপেক্খা যথাযোগং দোসৰজ্জিতেহি পঞ্চহি সহেতুকাপি অহেতুকাপি, সুখদুক্খভূতা অহেতুকাৰ, ইদঞ্চ নিপ্পদেসদুকন্তি. দুতিযং.

একুপ্পাদাদিতায হেতুনা সম্পযুত্তাতি হেতুসম্পযুত্তা. হেতুনা ৰিপ্পযুত্তাতি হেতুৰিপ্পযুত্তা. অযং হেতুসম্পযুত্তদুকো অনন্তরে ৰুত্তসহেতুকদুকেন অত্থতো নিন্নানাকরণো. সহেতুকদুকো এৰ হি ভগৰতা দেসনাৰিলাসেন, তথা বুজ্ঝনকপুগ্গলানং ৰা অজ্ঝাসযৰসেন হেতুসম্পযুত্তদুকভাৰেনাপি ৰুত্তো. এৰং উপরিপি সমানত্থদুকানং ৰচনে কারণং ৰেদিতব্বং. ততিযং.

চতুত্থাদযো পন যস্মা পঠমদুকদুতিযততিযদুকেসু পঠমপদেন যোজেত্ৰা দ্ৰে দুকা, পঠমদুকে চ পচ্ছিমপদং দুতিযদুকেন যোজেত্ৰা একং দুকন্তি তযো দুকা দেসিতা, তস্মা তেসং পদত্থো ৰুত্তনযোৰ.

তত্থ চ যথেৰ ‘‘হেতূ চেৰ ধম্মা সহেতুকা চ, সহেতুকা চেৰ ধম্মা ন চ হেতূ’’তি অযং দুকো সম্ভৰতি, তথা ‘‘হেতূ চেৰ ধম্মা অহেতুকা চ, অহেতুকা চেৰ ধম্মা ন চ হেতূ’’তি অযম্পি সম্ভৰতি. ইমিনা নযেন হেতুসম্পযুত্তদুকেন যোজনাযপি একো ¶ লব্ভতি. যথা চ ‘‘ন হেতূ খো পন ধম্মা সহেতুকাপি, অহেতুকাপী’’তি অযং লব্ভতি, তথা ‘‘হেতূ খো পন ধম্মা সহেতুকাপি, অহেতুকাপী’’তি অযম্পি. যথা চেত্থ সহেতুকদুকে দ্ৰে দুকা, এৰং হেতুসম্পযুত্তদুকেপি ‘‘ন হেতূ খো পন ধম্মা হেতুসম্পযুত্তাপি, হেতুৰিপ্পযুত্তাপী’’তি চ ‘‘হেতূ খো পন ধম্মা হেতুসম্পযুত্তাপি, হেতুৰিপ্পযুত্তাপী’’তি চ দ্ৰে দুকা লব্ভন্তীতি অপরেপি পঞ্চ দুকা হেতুগোচ্ছকে যোজেতুং সক্কা. তে পন ভগৰতা ৰুত্তানুসারেনেৰ সক্কা ঞাতুন্তি ছসু এৰ ¶ সঙ্গহিতাতি ৰেদিতব্বা. তত্থ যে তাৰ একস্মিং চিত্তে দ্ৰে তযো হেতূ একতো উপ্পজ্জন্তি, তে হেতূ চেৰ অঞ্ঞোঞ্ঞাপেক্খায সহেতুকা চ নাম. সহেতুকচিত্তেসু পন হেতুং ঠপেত্ৰা সেসা চিত্তচেতসিকা ধম্মা সহেতুকা চেৰ ন চ হেতূ নাম. ইমস্মিং দুকে সব্বে অহেতুকধম্মা ন ৰত্তব্বা. চেতসিকেসু পন হেতুৰজ্জিতা অকুসলা চেৰ কুসলাব্যাকতা চ, ছন্দো চ সহেতুকো চেৰ ন হেতু এৰ, সেসা তিজাতিকা, তথা নৰত্তব্বা চ, মোহো পন হেতু চেৰ সহেতুকো চ নৰত্তব্বো চ. চতুত্থং.

অনন্তরদুকোপি ইমিনা দুকেন সব্বথাপি সদিসোৰাতি. পঞ্চমং.

সহেতুকচিত্তেসু হেতুৰজ্জিতা চিত্তচেতসিকা ধম্মা নহেতূ সহেতূ নাম, অহেতুকচিত্তরূপনিব্বানানি নহেতূ অহেতুকা নাম. ইমস্মিং পন দুকে ছ হেতূ ন ৰত্তব্বা. সেসং সুৰিঞ্ঞেয্যমেৰাতি. ছট্ঠং.

হেতুগোচ্ছকং নিট্ঠিতং.

সত্তসু ¶ চূল়ন্তরদুকেসু অত্তনো নিপ্ফাদকেন সহ পচ্চযেনাতি সপ্পচ্চযা, চিত্তচেতসিকরূপানি. নত্থি এতেসং উপ্পাদে ৰা ঠিতিযং ৰা পচ্চযো অহুত্ৰা ভৰনস্সেৰাভাৰাতি অপ্পচ্চযা, নিব্বানমেৰ. দেসনায পনেত্থ পরমতায সোতপতিতৰসেন বহুৰচননিদ্দেসো কতো. এৰং সনিদস্সনাদীসুপি. ইদঞ্চ ইতো পরানি ছ চ নিপ্পদেসদুকানীতি ৰেদিতব্বানি. ততো পরঞ্চ যত্থ ‘‘ইমে ন ৰত্তব্বা’’তি ন ৰক্খাম, তং নিপ্পদেসন্তি গহেতব্বং. সপ্পচ্চযদুকং.

পচ্চযেহি সমাগন্ত্ৰা কতাতি সঙ্খতা. ন সঙ্খতাতি অসঙ্খতা. ইদঞ্চ সব্বথা সপ্পচ্চযদুকসদিসমেৰ. সপ্পচ্চযসঙ্খতউভযদুকং সব্বথা সদিসমেৰ. সঙ্খতদুকং.

রূপাযতনং সনিদস্সনং নাম. সেসরূপচিত্তচেতসিকনিব্বানানি অনিদস্সনা নাম. সনিদস্সনদুকং.

পসাদৰিসযরূপানি ¶ দ্ৰাদস সপ্পটিঘা নাম. সেসরূপচিত্তচেতসিকনিব্বানানি অপ্পটিঘা নাম. সপ্পটিঘদুকং.

অৰিনিব্ভোগৰসেন রূপং এতেসং অত্থীতি রূপিনো, রুপ্পনলক্খণং ৰা রূপং, তং এতেসং অত্থীতি রূপিনো, ভূতোপাদাযরূপমেৰ. ন রূপিনো অরূপিনো, চিত্তচেতসিকনিব্বানানি. রূপিদুকং.

লোকো ৰুচ্চতি লুজ্জনপলুজ্জনট্ঠেন ৰট্টং, তস্মিং পরিযাপন্নভাৰেন লোকে নিযুত্তাতি লোকিযা, পঞ্চুপাদানক্খন্ধা. ততো লোকতো তত্থ অপরিযাপন্নভাৰেন উত্তিণ্ণাতি লোকুত্তরা, অরিযমগ্গফলনিব্বানানি. চেতসিকেসু পনেত্থ যং ৰত্তব্বং, তং অসেখত্তিকে ৰুত্তনযেন ৰেদিতব্বং. লোকিযদুকং.

কেনচি ¶ ৰিঞ্ঞেয্যাতি চক্খুৰিঞ্ঞাণাদীসু কেনচি একেন চক্খুৰিঞ্ঞাণেন ৰা সোতৰিঞ্ঞাণাদিনা ৰা ৰিজানিতব্বা. কেনচি ন ৰিঞ্ঞেয্যাতি তেনেৰ চক্খুৰিঞ্ঞাণেন ৰা সোতৰিঞ্ঞাণাদিনা ৰা ন কেনচি ৰিজানিতব্বানি. এৰং হি সতি দ্ৰিন্নম্পি পদানং অত্থনানত্ততো দুকো হোতি. পদভাজনীযস্মিম্পি ‘‘যে তে ধম্মা চক্খুৰিঞ্ঞেয্যা, ন তে ধম্মা সোতৰিঞ্ঞেয্যা’’তি (ধ. স. ১১০১) এত্তকং একদুকন্তি অগ্গহেত্ৰা ‘‘যে তে ধম্মা চক্খুৰিঞ্ঞেয্যা, ন তে ধম্মা সোতৰিঞ্ঞেয্যা, যে ৰা পন তে ধম্মা সোতৰিঞ্ঞেয্যা, ন তে ধম্মা চক্খুৰিঞ্ঞেয্যা’’তি (ধ. স. ১১০১) অযমেকো দুকোতি ৰেদিতব্বো. তস্স পন রূপং চক্খুৰিঞ্ঞেয্যং, সদ্দো ন চক্খুৰিঞ্ঞেয্যোতি অযমত্থো. এৰং সেসেসুপি দুকপরিচ্ছেদো ঞাতব্বো. তত্থ রূপাযতনং চক্খুনা ৰা চক্খুৰিঞ্ঞাণেন ৰা ৰিঞ্ঞেয্যং নাম. সেসরূপারূপধম্মা তেনেৰ চক্খুনা ৰা চক্খুৰিঞ্ঞাণেন ৰা কেনচি নৰিঞ্ঞেয্যা. এৰং সোতঘানজিৰ্হাকাযতব্বিঞ্ঞাণমূলিকাসুপি চতূসু যোজনাসু ৰিভাগো যথানুরূপং ঞাতব্বো. রূপাদযো পন পঞ্চৰিসযা মনোধাতুত্তযেন কেনচি ৰিঞ্ঞেয্যা. সেসরূপারূপধম্মা তেনেৰ মনোধাতুত্তযেন কেনচি নৰিঞ্ঞেয্যা. কিঞ্চাপি সামঞ্ঞতো মনোৰিঞ্ঞাণেন অৰিঞ্ঞেয্যস্স অভাৰতো পাল়িযং মনোৰিঞ্ঞাণৰিঞ্ঞেয্যৰসেন দুকো ন ৰুত্তো, তথাপি ৰিসেসতো ৰত্তব্বোৰ. তথা হি ছব্বিধাপি কামাৰচরধম্মা কামাৰচরৰিপাকাদিনা মনোৰিঞ্ঞাণেন কেনচি ৰিঞ্ঞেয্যা, রূপারূপাৰচরলোকুত্তরপঞ্ঞত্তিযো তেনেৰ কেনচি নৰিঞ্ঞেয্যা. তথা কামরূপারূপাৰচরপঞ্ঞত্তিযো অকুসলাদিনা ¶ কেনচি ৰিঞ্ঞেয্যা, লোকুত্তরা তেনেৰ কেনচি নৰিঞ্ঞেয্যা. তথা নিব্বানং লোকুত্তরেন কেনচি ৰিঞ্ঞেয্যং ¶ , সেসলোকিযলোকুত্তরা তেনেৰ কেনচি নৰিঞ্ঞেয্যাতি ইমিনা নযেন রূপারূপাৰচরাদিভেদেন মনোৰিঞ্ঞাণেন কেনচি ৰিঞ্ঞেয্যাৰিঞ্ঞেয্যধম্মা যথাযোগং যোজেতব্বা. এৰং সব্বে ধম্মা কেনচি ৰিঞ্ঞেয্যা, কেনচি ন ৰিঞ্ঞেয্যা নাম. ইমস্মিঞ্চ দুকে পঞ্ঞত্তিযোপি লব্ভন্তীতি ৰেদিতব্বাতি. কেনচিৰিঞ্ঞেয্যদুকং.

চূল়ন্তরদুকা নিট্ঠিতা.

আসৰগোচ্ছকে আসমন্ততো সৰন্তীতি আসৰা, চক্খুতোপি…পে… মনতোপি সৰন্তি, পৰত্তন্তীতি ৰুত্তং হোতি. ধম্মতো যাৰগোত্রভুং, ওকাসতো যাৰভৰগ্গা সৰন্তীতি ৰা আসৰা, এতে ধম্মে, এতঞ্চ ওকাসং অন্তোকরিত্ৰা পৰত্তন্তীতি অত্থো. অন্তোকরণত্থো হি অযং আ-কারো. চিরপারিৰাসিযট্ঠেন মদিরাদিআসৰা ৰিযাতিপি আসৰা. যদি চ চিরপারিৰাসিযট্ঠেন আসৰা, এতে এৰ ভৰিতুং অরহন্তি. অনাদিত্তা আযতং ৰা সংসারদুক্খং সৰন্তি পসৰন্তীতিপি আসৰা. ততো অঞ্ঞে নো আসৰা নাম.

তত্থ কামাসৰো ভৰাসৰো দিট্ঠাসৰো অৰিজ্জাসৰোতি ইমে চত্তারো আসৰা নাম. তত্থ অট্ঠসু লোভসহগতচিত্তেসু উপ্পন্নো সব্বোপি লোভো কামাসৰো নাম. অট্ঠসালিনিযং পন ‘‘পঞ্চকামগুণিকো রাগো কামাসৰো’’তি (ধ. স. অট্ঠ. ১১০২) চ, ‘‘দিট্ঠিসহজাতো রাগো কামাসৰো ন হোতি, দিট্ঠিরাগো নাম হোতী’’তি (ধ. স. অট্ঠ. ১১০৫) চ, ‘‘যো ব্রহ্মানং ৰিমানকপ্পরুক্খাভরণেসু ছন্দরাগো উপ্পজ্জতি, সো কামাসৰো ন হোতি পঞ্চকামগুণিকস্স রাগস্স ইধেৰ পহীনত্তা’’তি চ ৰুত্তং. পাল়িযং পন ‘‘কামাসৰো অট্ঠসু লোভসহগতেসু ¶ চিত্তুপ্পাদেসু উপ্পজ্জতী’’তি (ধ. স. ১৪৬৫) চ, ‘‘কামাসৰং পটিচ্চ দিট্ঠাসৰো অৰিজ্জাসৰো’’তি (পট্ঠা. ৩.৩.১) চ ৰুত্তত্তা ভৰাসৰং ঠপেত্ৰা অৰসেসো সব্বোপি লোভো কামাসৰোতি পঞ্ঞাযতি দিট্ঠিসম্পযুত্তরাগস্স, ব্রহ্মানং ৰত্থাভরণাদীসু রাগস্স চ ভৰাসৰত্তাভাৰা. দিট্ঠিৰিপ্পযুত্তরাগো এৰ হি রূপারূপভৰপত্থনাৰসেন পৰত্তিযং ভৰাসৰো হোতি ‘‘রূপধাতুযা অরূপধাতুযা এত্থ ভৰরাগানুসযো অনুসেতী’’তিআদিৰচনতো (যম. ২.অনুসযযমক.২), ন চ কামাসৰভৰাসৰৰিনিমুত্তো লোভো অত্থি. যদি সিযা, ‘‘লোভো সিযা আসৰো, সিযা নো আসৰো’’তি পাল়িযং ৰত্তব্বো ভৰেয্য, ‘‘দিট্ঠিৰিপ্পযুত্তলোভেন সম্পযুত্তো ¶ অৰিজ্জাসৰো সিযা আসৰসম্পযুত্তো, সিযা আসৰৰিপ্পযুত্তো’’তি চ ৰত্তব্বো সিযা. পদভাজনীযে চ কামাসৰনিদ্দেসে আগতস্স ‘‘কামেসু কামচ্ছন্দো’’তি (ধ. স. ১১০৩) ইমস্স পদস্স অট্ঠসালিনিযং ‘‘পঞ্চকামগুণেসু কামচ্ছন্দো’’তি (ধ. স. অ. ১১০৩) অত্থো ৰুত্তো, তস্স পন পদস্স ৰত্থুকামেসু কিলেসকামোতিপি অত্থযোজনা সক্কা কাতুং তেভুমকস্স ধম্মস্স ৰত্থুকামত্তা, তত্থ সব্বত্থ রাগস্স চ কিলেসকামত্তা. ৰুত্তং হেতং ধম্মসেনাপতিনা মহানিদ্দেসে –

‘‘কতমে ৰত্থুকামা? মনাপিকা রূপা…পে… সব্বেপি কামাৰচরা ধম্মা, সব্বেপি রূপাৰচরা ধম্মা, সব্বেপি অরূপাৰচরা ধম্মা…পে… ইমে ৰুচ্চন্তি ৰত্থুকামা.

‘‘কতমে কিলেসকামা? ছন্দো কামো রাগো কামো…পে… যো কামেসু কামচ্ছন্দো কামরাগো ¶ কামনন্দী কামতণ্হা কামস্নেহো কামপরিল়াহো কামমুচ্ছা কামজ্ঝোসানং কামোঘো কামযোগো কামুপাদানং কামচ্ছন্দনীৰরণং…পে… ইমে ৰুচ্চন্তি কিলেসকামা’’তি (মহানি. ১).

অপিচেত্থ ‘‘কামোঘো কামযোগো’’তিআদিনা কিলেসকামস্স কামোঘাদিভাৰং ৰদতা ধম্মসেনাপতিনা ৰত্থুকামত্তৰিসযস্স রাগস্স আসৰাদিভাৰো অনুঞ্ঞাতো, ন পঞ্চকআমগুণিকস্সেৰ রাগস্স. ন চ ওঘাসৰেসু কোচি ৰিসেসো অত্থি. অট্ঠসালিনিযম্পি হি উপাদানগোচ্ছকস্স পদভাজনীযে ‘‘কামেসু কামচ্ছন্দো’’তি (ধ. স. ১২২০) ইমস্স ‘‘ৰত্থুকামেসু কামচ্ছন্দো’’তি (ধ. স. অ. ১২২০) অযমেৰত্থো ৰুত্তো. ততো অঞ্ঞেসু হেতুগন্থকিলেসগোচ্ছকেসু লোভস্সেৰ অনৰসেসপরিযাদানং ৰুত্তং, ন ইতরগোচ্ছকেসু. তেসু চ লোভস্স পাল়িঅনুসারতো ওলোকিযমানে কিলেসকামমত্তকো. অনৰসেসলোভপরিযাদানং পঞ্ঞাযতি. ৰীমংসিত্ৰা গহেতব্বং.

চতূসু পন দিট্ঠিগতৰিপ্পযুত্তচিত্তেসু উপ্পন্নো রূপারূপভৰেসু ছন্দরাগভাৰেন, কামজ্ঝোসাননিকন্তিভাৰেন ¶ চ পৰত্তো লোভো ভৰাসৰো নাম. অট্ঠসালিনিযং পন ‘‘সস্সতদিট্ঠিসহজাতো রাগো ভৰাসৰো’’তি (ধ. স. অট্ঠ. ১১০২) ৰুত্তং. পাল়িযং পন ‘‘ভৰাসৰো চতূসু দিট্ঠিগতৰিপ্পযুত্তলোভসহগতেসূ’’তি (ধ. স. ১৪৬৫) নিযমিতত্তা ন সক্কা গহেতুং, অধিপ্পাযো পন গৰেসিতব্বো. দ্ৰাসট্ঠিপভেদা সব্বাপি দিট্ঠি দিট্ঠাসৰো নাম. অট্ঠৰত্থুকো সব্বোপি মোহো অৰিজ্জাসৰো নাম. তেসু দিট্ঠাসৰো পঠমেন মগ্গেন পহীযতি, কামাসৰো ¶ চতূহিপীতি ৰত্তুং যুত্তং, ‘‘ততিযেনা’’তি পন ৰুত্তং. ভৰাসৰো, অৰিজ্জাসৰো চ চতুত্থেন পহীযতি. ইমেসঞ্চ কামাসৰভৰাসৰানং লোভসভাৰত্তা সভাৰতো তযো ধম্মা ৰিভাগতো চত্তারো আসৰা নাম জাতা. ইমে ঠপেত্ৰা সেসা লোকিযলোকুত্তরা সব্বে ধম্মা নো আসৰা নাম. আসৰদুকং পঠমং.

অত্তানং আরম্মণং কত্ৰা পৰত্তেহি সহ আসৰেহীতি সাসৰা, সব্বে লোকিযধম্মা. এৰং পৰত্তমানা নত্থি এতেসং আসৰাতি অনাসৰা, নৰ লোকুত্তরধম্মাৰ. চেতসিকা পনেত্থ লোকিযদুকে ৰুত্তসদিসাৰ. সাসৰদুকং দুতিযং.

ততিযাদীনং চতুন্নং দুকানং পদত্থো ৰুত্তনযোৰ. সেসমেত্থ হেতুগোচ্ছকে ৰুত্তনযেন ৰেদিতব্বং. অযং পন ৰিসেসো – যথা তত্থ ‘‘ন হেতূ খো পন ধম্মা সহেতুকাপি, অহেতুকাপী’’তি অযং ওসানদুকো পঠমদুকে দুতিযপদং দুতিযদুকেন যোজেত্ৰা ৰুত্তো, এৰমিধ ‘‘নো আসৰা খো পন ধম্মা সাসৰাপি, অনাসৰাপী’’তি ন ৰুত্তো. অযঞ্চ তত্থ তত্থ ৰুত্তনযেন ইহ সঙ্গহিতোতি ৰেদিতব্বো. যথা চেত্থ, এৰং সঞ্ঞোজনগোচ্ছকাদীসুপি যথানুরূপং ঞাতব্বং.

তত্থ দ্ৰাদস অকুসলচিত্তুপ্পাদা আসৰসম্পযুত্তা নাম. দোসমোহমূলচিত্তেসু মোহো, কুসলাব্যাকতচিত্তরূপনিব্বানানি চ আসৰৰিপ্পযুত্তা নাম. চেতসিকেসু পন মোহং ঠপেত্ৰা সেসা অকুসলা আসৰসম্পযুত্তাৰ, মোহো পন তিজাতিকো চ দ্ৰিধাপি হোতি, সেসা আসৰৰিপ্পযুত্তা এৰাতি. ততিযং.

চত্তারো ¶ আসৰা আসৰা চেৰ সাসৰা চ নাম. তদৰসেসা লোকিযধম্মা সাসৰা চেৰ নো চ আসৰা নাম. ইধ পন লোকুত্তরা ন ৰত্তব্বা. চেতসিকেসু পন আসৰাতি ৰুত্তেহি ¶ সেসা অকুসলা, করুণামুদিতা চ সাসৰা চেৰ নো চ আসৰা এৰ, সেসা তথা চ ন ৰত্তব্বা চ. চতুত্থং.

যে পন লোভমূলেসু লোভমোহা, লোভদিট্ঠিমোহো চাতি দ্ৰে তযো একতো কত্ৰা উপ্পজ্জন্তি, তে আসৰা চেৰ আসৰসম্পযুত্তা চ নাম. দ্ৰাদস অকুসলচিত্তানি চেৰ আসৰৰজ্জিতা তংসম্পযুত্তা চ আসৰসম্পযুত্তা চেৰ নো চ আসৰা নাম. ইধ পন আসৰৰিপ্পযুত্তা ন ৰত্তব্বা. চেতসিকেসু পন আসৰৰজ্জিতা অকুসলা আসৰসম্পযুত্তা চেৰ নো চ আসৰা এৰ, মোহো সিযা আসৰো চেৰ আসৰসম্পযুত্তো চ, সিযা ন ৰত্তব্বো, তিজাতিকা সিযা আসৰসম্পযুত্তা চেৰ নো চ আসৰা, সিযা ন ৰত্তব্বা, কুসলাব্যাকতা ন ৰত্তব্বাৰ. সেসং সুৰিঞ্ঞেয্যমেৰ. পঞ্চমং.

লোকুত্তরৰজ্জিতা আসৰৰিপ্পযুত্তা সাসৰা নাম. লোকুত্তরা আসৰৰিপ্পযুত্তা অনাসৰা নাম. ইধ পন আসৰসম্পযুত্তা ন ৰত্তব্বাৰ. চেতসিকেসু পন করুণামুদিতা আসৰৰিপ্পযুত্তা সাসৰা এৰ, মোহো তথা চ ন ৰত্তব্বো চ, সেসকুসলাব্যাকতা দ্ৰিধাপি হোন্তি, তিজাতিকা দ্ৰিধাপি ন ৰত্তব্বাৰ, মোহৰজ্জিতা পন অকুসলা ন ৰত্তব্বাৰ. ছট্ঠং.

আসৰগোচ্ছকং নিট্ঠিতং.

সংযোজনগোচ্ছকে ¶ যস্স সংৰিজ্জন্তি, তং পুগ্গলং ৰট্টস্মিং সংযোজেন্তি বন্ধন্তীতি সংযোজনা. ততো অঞ্ঞে নো সংযোজনা.

তত্থ কামরাগসংযোজনং ভৰরাগপটিঘমানদিট্ঠিৰিচিকিচ্ছাসীলব্বতপরামাসইস্সামচ্ছরিযঅৰিজ্জাসংযোজনন্তি ইমে দস ধম্মা সংযোজনা নাম. তেসু কামভৰদিট্ঠিঅৰিজ্জাসংযোজনানি আসৰগোচ্ছকে ৰুত্তনযানেৰ. ‘‘অনত্থং মে অচরি, চরতি, চরিস্সতি, পিযস্স মে অনত্থং অচরি, চরতি, চরিস্সতি, অপ্পিযস্স মে অত্থং অচরি, চরতি, চরিস্সতী’’তি (ধ. স. ১০৬৬) এৰং ৰুত্তেহি নৰহি আকারেহি সত্তেসু, অট্ঠানকোপৰসেন সঙ্খারেসু চ উপ্পজ্জমানো সব্বোপি দোসো পটিঘসংযোজনং নাম.

‘‘সেয্যোহমস্মি ¶ , সদিসোহমস্মি, হীনোহমস্মী’’তি এৰং তীহি আকারেহি পৰত্তো সব্বো মানো মানসংযোজনং নাম. তত্থ সেয্যস্সেৰ সতো পুগ্গলস্স ‘‘সেয্যোহমস্মি, সদিসো, হীনো’’তি চ তিধা মানো উপ্পজ্জতি, তথা সদিসহীনানম্পি. তত্থ সেয্যস্স সেয্যমানোৰ যাথাৰমানো. তথা সদিসস্স সদিসমানো, হীনস্স হীনমানো চ. তিণ্ণম্পি ইতরে দ্ৰে দ্ৰে মানা অযাথাৰমানাতি ঞাতব্বা.

সত্থুধম্মসঙ্ঘসিক্খাসু, পুব্বন্তাপরন্ততদুভযপটিচ্চসমুপ্পন্নেসু চ কঙ্খতাৰসেন পৰত্তা সব্বাপি ৰিচিকিচ্ছা ৰিচিকিচ্ছাসংযোজনং নাম.

গোসীলগোৰতাদীহি সুদ্ধীতি গহণাকারপ্পৰত্তা দিট্ঠি এৰ সীলব্বতপরামাসসংযোজনং নাম.

তদৰসেসা দিট্ঠি দিট্ঠিসংযোজনন্তি গহেতব্বং.

পরলাভসক্কারগরুকারমাননৰন্দনপূজনাদীসু ¶ অসহনাকারেন পৰত্তা ইস্সা ইস্সাসংযোজনং নাম. আৰাসমচ্ছরিযং কুললাভৰণ্ণধম্মমচ্ছরিযন্তি পঞ্চৰিধং মচ্ছরিযং মচ্ছরিযসংযোজনং নাম. সকলারামেপি হি পরিৰেণোৰরকাদীসু ৰা ৰসন্তো তত্থ অঞ্ঞস্স ৰত্তসম্পন্নস্স পেসলস্স ভিক্খুনো আগমনং ন ইচ্ছতি, আগতস্সাপি খিপ্পং গমনঞ্ঞেৰ ইচ্ছতি, ইদং আৰাসমচ্ছরিযং নাম. ভণ্ডনকারকাদীনং পন তত্থ ৰাসং অনিচ্ছতো আৰাসমচ্ছরিযং নাম ন হোতি.

অত্তনো পন উপট্ঠাককুলে ৰা ঞাতিকুলে ৰা অঞ্ঞস্স পেসলস্স উপসঙ্কমনং অনিচ্ছতো কুলমচ্ছরিযং হোতি, পাপপুগ্গলস্স অনিচ্ছতো পন ন হোতি. সো হি তেসং পসাদভেদায পটিপজ্জতীতি.

অত্তনা লভনট্ঠানে চতুপচ্চযং লভন্তে সীলৰন্তে দিস্ৰা ‘‘মা লভন্তূ’’তি চিন্তেন্তস্স লাভমচ্ছরিযং হোতি. যো পন সদ্ধাদেয্যং ৰিনিপাতেতি, পূতিভাৰম্পি গচ্ছন্তং অঞ্ঞস্স ন দেতি ¶ , তং লভন্তং দিস্ৰা ‘‘সচে ইমং অঞ্ঞো সীলৰা লভেয্য, পরিভোগং গচ্ছেয্যা’’তি চিন্তেন্তস্স মচ্ছরিযং নাম নত্থি.

ৰণ্ণো নাম অত্তনা সদিসো সরীরৰণ্ণোপি গুণৰণ্ণোপি. তত্থ ‘‘রূপৰা পাসাদিকো’’তি পরস্স সরীরৰণ্ণং, ‘‘সীলৰা, ধুতৰা’’তিআদিনা গুণৰণ্ণঞ্চ অত্তনো ৰণ্ণভণনট্ঠানে ৰুচ্চমানং অসহন্তস্স দুৰিধং ৰণ্ণমচ্ছরিযং নাম হোতি, অপেসলং পন ৰিপন্নং পসংসিত্ৰা পরিসাসু উপত্থম্ভেন্তং দিস্ৰা পাপগরহিতায অসহন্তস্স ন হোতি.

ধম্মোতি পরিযত্তিযেৰ, ন পটিৰেধো অরিযানং তত্থ মচ্ছরিযাভাৰা. পরিযত্তিং পন গুল়্হগন্থং অঞ্ঞেসং অকথেতুকামস্স ধম্মমচ্ছরিযং নাম হোতি, ধম্মানুগ্গহেন পন লোলস্স ¶ , কালেন সমণো, কালেন নিগণ্ঠাদি চ হুত্ৰা ৰিচরন্তস্স পৰেণিআগতং তন্তিং ‘‘সণ্হসুখুমং ধম্মন্তরং ভিন্দিত্ৰা আলুল়িস্সতি, অম্হাকং সমযং ভিন্দিস্সতী’’তি চ ন দেন্তস্স, পুগ্গলানুগ্গহেন ৰা পকতিযা সঠস্স মাযাৰিনো ‘‘সণ্হসুখুমধম্মং উগ্গণ্হিত্ৰা অঞ্ঞং ব্যাকরিত্ৰা নস্সিস্সতী’’তি ন দেন্তস্স চ ধম্মমচ্ছরিযং ন হোতি. যথা চ ভিক্খূনং, এৰং গহট্ঠানম্পি পঞ্চৰিধং মচ্ছরিযং যথানুরূপং ঞাতব্বং. সঙ্খেপতো পন গহট্ঠপব্বজিতানং অত্তসম্পত্তিনিগূহনলক্খণং মচ্ছরিযং নামাতি গহেতব্বং.

ইমেসু চ সংযোজনেসু দিট্ঠিৰিচিকিচ্ছাসীলব্বতপরামাসইস্সামচ্ছরিযানি সোতাপত্তিমগ্গেন পহীযন্তি, পটিঘো অনাগামিমগ্গেন, কামরাগো চতূহিপীতি ৰত্তব্বং, ‘‘ততিযেনা’’তি পন ৰুত্তং. মানভৰরাগঅৰিজ্জা অরহত্তমগ্গেন. তত্থ চ অযাথাৰমানো পঠমমগ্গেন পহীযতীতি দট্ঠব্বো, ইমেসং কামরাগভৰরাগানং লোভসভাৰত্তা দিট্ঠিসীলব্বতপরামাসানং মিচ্ছাদিট্ঠিসভাৰত্তা সভাৰতো অট্ঠেৰ ধম্মা দস সংযোজনা নাম জাতা. ইমে দস ঠপেত্ৰা সেসা লোকিযলোকুত্তরধম্মা নো সংযোজনা নাম. সেসং আসৰদুকসদিসং. সংযোজনদুকং পঠমং.

আরম্মণভাৰং উপগন্ত্ৰা সংযোজনসংৰড্ঢনেন সংযোজনানং হিতাতি সংযোজনিযা, সাসৰধম্মা এৰ. তথা নীৰরণিযাতি এত্থাপি. ন সংযোজনিযা অসংযোজনিযা, অনাসৰা. সেসং সাসৰদুকসদিসমেৰ. দুতিযং.

ততিযাদযোপি ¶ আসৰগোচ্ছকে ততিযাদিসদিসা এৰ, ৰিসেসমত্তমেৰেত্থ ৰক্খাম. তত্থ হি দ্ৰাদসাকুসলচিত্তানি সংযোজনসম্পযুত্তা নাম, উদ্ধচ্চসহগতো মোহো, সেসচিত্তরূপনিব্বানানি সংযোজনৰিপ্পযুত্তা নাম. সেসং সমমেৰ. ততিযং.

দস ¶ সংযোজনানি সংযোজনা চেৰ সংযোজনিযা চ নাম. তদৰসেসলোকিযধম্মা সংযোজনিযা চেৰ নো চ সংযোজনা নাম. সেসং সুৰিঞ্ঞেয্যমেৰ. চতুত্থং.

যে পন উদ্ধচ্চৰিরহিতেসু একাদসসু অকুসলচিত্তেসু ৰিচিকিচ্ছামোহা দোসমোহা দোসইস্সামোহা দোসমচ্ছরিযমোহা লোভমানমোহা লোভদিট্ঠিমোহা চাতি দ্ৰে তযো একতো উপ্পজ্জন্তি, তে সংযোজনা চেৰ সংযোজনসম্পযুত্তা চ নাম. দ্ৰাদসাকুসলচিত্তানি চেৰ সংযোজনৰজ্জিততংসম্পযুত্তা চ সংযোজনসম্পযুত্তা চেৰ নো চ সংযোজনা নাম. সেসমিধ অনন্তরদুকঞ্চ আসৰগোচ্ছকে পঞ্চমছট্ঠদুকসদিসমেৰ. কেৰলং আসৰপদট্ঠানে সংযোজনপদমেৰ ৰিসেসো. পঞ্চমছট্ঠদুকানি.

সংযোজনগোচ্ছকং নিট্ঠিতং.

গন্থগোচ্ছকে যস্স সংৰিজ্জন্তি, তং চুতিপটিসন্ধিৰসেন ৰট্টস্মিং গন্থেন্তি ঘটেন্তীতি গন্থা. ততো অঞ্ঞে নো গন্থা.

তত্থ অভিজ্ঝাকাযগন্থো, ব্যাপাদো, সীলব্বতপরামাসো, ইদংসচ্চাভিনিৰেসো কাযগন্থোতি ইমে চত্তারো ধম্মা গন্থা নাম. তত্থ অভিজ্ঝা এৰ নামকাযং ৰুত্তনযেন গন্থেতীতি অভিজ্ঝাকাযগন্থো. এৰং সেসেসুপি. সব্বঞ্ঞুভাসিতম্পি পটিক্খিপিত্ৰা ‘‘সস্সতো লোকো, ইদমেৰ সচ্চং, মোঘমঞ্ঞ’’ন্তি ইমিনা আকারেন অভিনিৰিসনতো সীলব্বতপরামাসৰিরহিতা সব্বাপি দিট্ঠি ইদংসচ্চাভিনিৰেসো নাম. সেসা ৰুত্তত্থাৰ. ইমেসু চ পচ্ছিমা দ্ৰে গন্থা পঠমেন মগ্গেন পহীযন্তি, ব্যাপাদো ততিযেন, অভিজ্ঝা চতূহিপি. ইমে চ সভাৰতো তযো ধম্মা চত্তারো ¶ গন্থা নাম জাতা. ইমে পন ঠপেত্ৰা সেসা সব্বে ধম্মা নো গন্থা নাম. গন্থদুকং পঠমং.

আরম্মণকরণৰসেন ¶ গন্থেহি গন্থিতব্বাতি গন্থনিযা. ন গন্থনিযা অগন্থনিযা. সেসং সাসৰদুকসদিসমেৰ. দুতিযং.

মোহমূলৰজ্জিতানি দস অকুসলচিত্তানি, দিট্ঠিৰিপ্পযুত্তচিত্তেসু লোভং, দোসমূলেসু চ দোসং ঠপেত্ৰা তংসম্পযুত্তা চ গন্থসম্পযুত্তা নাম. যথাৰুত্তো লোভো, দোসো, মোহমূলানি, কুসলাব্যাকতানি চিত্তানি, রূপনিব্বানানি চ গন্থৰিপ্পযুত্তা নাম. চেতসিকেসু পন দিট্ঠিমানইস্সামচ্ছরিযকুক্কুচ্চথিনমিদ্ধানি গন্থসম্পযুত্তা এৰ. দোসৰিচিকিচ্ছা, কুসলাব্যাকতা চ গন্থৰিপ্পযুত্তা এৰ, সেসা দ্ৰিধাপি হোন্তি. ততিযং.

চত্তারো গন্থা গন্থা চেৰ গন্থনিযা চ নাম. তদৰসেসা লোকিযা গন্থনিযা চেৰ নো চ গন্থা নাম. তথা চেতসিকেসু গন্থৰজ্জিতা অকুসলা, অপ্পমঞ্ঞা চ, সেসা চেতসিকা পন তথা চ ন ৰত্তব্বা চ, ইধ পন লোকুত্তরা ন ৰত্তব্বা. চতুত্থং.

দিট্ঠি গন্থাচেৰ গন্থসম্পযুত্তা চ নাম. লোভো তথা চ ন ৰত্তব্বো চ, গন্থসম্পযুত্তেসু গন্থে ঠপেত্ৰা সেসা গন্থসম্পযুত্তা চেৰ নো চ গন্থা নাম. ইধ পন গন্থৰিপ্পযুত্তা ন ৰত্তব্বা. চেতসিকেসু পন মানইস্সামচ্ছরিযকুক্কুচ্চথিনমিদ্ধানি গন্থসম্পযুত্তা চেৰ নো চ গন্থা এৰ, মোহাহিরিকানোত্তপ্পউদ্ধচ্চানি তিজাতিকা চ সিযা, তথা নৰত্তব্বা চ, সেসা ন ৰত্তব্বা. সেসং সুৰিঞ্ঞেয্যমেৰ. পঞ্চমং.

লোকুত্তরৰজ্জিতা গন্থৰিপ্পযুত্তা গন্থনিযা নাম. লোকুত্তরা পন গন্থৰিপ্পযুত্তা অগন্থনিযা নাম. ইধ পন গন্থসম্পযুত্তা ন ৰত্তব্বা. চেতসিকেসু পন দোসো ৰিচিকিচ্ছা ¶ করুণা মুদিতা গন্থৰিপ্পযুত্তা গন্থনিযা এৰ, মোহাহিরিকানোত্তপ্পউদ্ধচ্চলোভা তথা ন ৰত্তব্বা চ, সেসা কুসলাব্যাকতা দ্ৰিধাপি হোন্তি, তিজাতিকা পন দ্ৰিধাপি ন ৰত্তব্বা চ, সেসা অকুসলাপি ন ৰত্তব্বা চ. ছট্ঠং.

গন্থগোচ্ছকং নিট্ঠিতং.

ওঘযোগগোচ্ছকানি সব্বথা আসৰগোচ্ছকসদিসানি. পদত্থমত্তমেৰ, হেত্থ নামমত্তঞ্চ ৰিসেসো ¶ . তত্থ যস্স সংৰিজ্জন্তি, তং ৰট্টস্মিং ওহনন্তি ওসীদাপেন্তীতি ওঘা. আরম্মণং কত্ৰা অতিক্কমনীযতো ওঘেহি অতিক্কমিতব্বাতি ওঘনিযা. তথা যোগনিযাতি এত্থাপি. ৰট্টস্মিং যোজেন্তীতি যোগা. সেসং তাদিসমেৰ.

ওঘযোগগোচ্ছকানি নিট্ঠিতানি.

নীৰরণগোচ্ছকে চিত্তং নীৰরন্তি পরিযোনন্ধন্তীতি নীৰরণা. তত্থ কামচ্ছন্দনীৰরণং ব্যাপাদনীৰরণং থিনমিদ্ধনীৰরণং উদ্ধচ্চকুক্কুচ্চনীৰরণং ৰিচিকিচ্ছানীৰরণং অৰিজ্জানীৰরণন্তি ইমে ছ নীৰরণা নাম. তত্থ থিনন্তি সপ্পিপিণ্ডো ৰিয অৰিপ্ফারিকতায চিত্তস্স ঘনভাৰো, থদ্ধতাতি অত্থো. মেধতীতি মিদ্ধং, অকম্মঞ্ঞভাৰো, পচলাযিকভাৰকরোতি অত্থো. ইদঞ্চ সেখপুথুজ্জনানং নিদ্দায পুব্বভাগে, অপরভাগে চ পচলাযনহেতুকং উপ্পজ্জতি, ন নিদ্দোক্কমনকালে. খীণাসৰানম্পি হি করজকাযস্স দুব্বলভাৰেন অসম্মিস্সভৰঙ্গসন্ততিৰসেন নিদ্দোক্কমনং হোতি, তং পন তেসং থিনমিদ্ধহেতুকং ন হোতি, ইতরেসমেৰ হোতি.

কেচি ¶ পন রূপমেৰ ‘‘মিদ্ধ’’ন্তি ৰদন্তি, তং ন যুত্তং, ‘‘থিনমিদ্ধনীৰরণং অৰিজ্জানীৰরণেন নীৰরণঞ্চেৰ নীৰরণসম্পযুত্তঞ্চা’’তি অরূপধম্মেহি সম্পযোগৰচনতো অরূপমেৰ. অকুসলঞ্চ ‘‘থিনমিদ্ধনীৰরণস্স পহীনত্তা’’তিআদিপহানৰচনতো. অকুসলা এৰ হি পহাতব্বা, তস্মা আরুপ্পেপি চেতং উপ্পজ্জতি. ‘‘নীৰরণং ধম্মং পটিচ্চ নীৰরণো ধম্মো উপ্পজ্জতি ন পুরেজাতপচ্চযা’’তি (পট্ঠা. ৩.৮.৮) এতস্স ৰিভঙ্গে ‘‘আরুপ্পে কামচ্ছন্দনীৰরণং পটিচ্চ থিনমিদ্ধউদ্ধচ্চঅৰিজ্জানীৰরণ’’ন্তি (পট্ঠা. ৩.৮.৮) সব্বং ৰিত্থারেতব্বং. ‘‘সোপ্পং পচলাযিকা’’তি (ধ. স. ১১৬৩) পদভাজনীযে পনস্স ফলূপচারেন ৰুত্তন্তি ৰেদিতব্বং. থিনং মিদ্ধঞ্চাতি ইদং দ্ৰযং নীৰরণট্ঠানে একনীৰরণং ৰুত্তং, তথা উদ্ধচ্চকুক্কুচ্চঞ্চাতি ইদং দ্ৰযং. তত্থ কুক্কুচ্চন্তি ‘‘অকতং ৰত মে কল্যাণং, কতং পাপ’’ন্তিআদিনা উপ্পজ্জমানো ৰিপ্পটিসারো. তেনেৰস্স পদভাজনীযে ‘‘চেতসো ৰিপ্পটিসারো মনোৰিলেখো’’তি চ ৰুত্তং. ‘‘অকপ্পিযে কপ্পিযসঞ্ঞিতা’’তিআদি পন কুক্কুচ্চমূলদস্সনত্থং. এৰংসঞ্ঞিতায হি কতে ৰীতিক্কমে পচ্ছা ‘‘দুট্ঠু মযা কত’’ন্তি সুদিন্নাদীনং ৰিয ৰিপ্পটিসারো উপ্পজ্জতি. যং পন ৰিনযে ‘‘অথ খো আযস্মা সারিপুত্তো…পে… কুক্কুচ্চাযন্তো ন পটিগ্গহেসী’’তি (পাচি. ২০৪) কুক্কুচ্চং আগতং, তং নীৰরণকুক্কুচ্চং ¶ . ন হি অরহতো নীৰরণং অত্থি, নীৰরণৰতিরূপকং পন ‘‘কপ্পতি, ন কপ্পতী’’তি ৰীমংসনসঙ্খাতং ৰিনযকুক্কুচ্চং নামেতন্তি ৰেদিতব্বং. সেসনীৰরণানি ৰুত্তত্থানি এৰ. ইমেসু চ কুক্কুচ্চৰিচিকিচ্ছা পঠমেন মগ্গেন পহীযন্তি, ব্যাপাদো ততিযেন, থিনমিদ্ধুদ্ধচ্চাৰিজ্জা চতুত্থেন, কামচ্ছন্দো চতূহিপীতি ৰত্তব্বং, ‘‘ততিযেনা’’তি পন ৰুত্তং. ইমে চ সভাৰতো অট্ঠ ধম্মা ছ নীৰরণা নাম জাতা, ইমে পন ঠপেত্ৰা সেসা নো নীৰরণা নাম. নীৰরণদুকং পঠমং.

দুতিযং ¶ সাসৰদুকসদিসমেৰ. দ্ৰাদস অকুসলচিত্তানি নীৰরণসম্পযুত্তা নাম. সেসচিত্তরূপনিব্বানানি নীৰরণৰিপ্পযুত্তা নাম. চেতসিকেসু অকুসলা নীৰরণসম্পযুত্তাৰ, কুসলাব্যাকতা নীৰরণৰিপ্পযুত্তাৰ, সেসা দ্ৰিধাপি হোন্তি. ততিযং.

ছ নীৰরণা নীৰরণা চেৰ নীৰরণিযা চ নাম. সেসা লোকিযা নীৰরণিযা চেৰ নো চ নীৰরণা নাম. লোকুত্তরা ন ৰত্তব্বা. সেসং আসৰগোচ্ছকে চতুত্থসদিসমেৰ. চতুত্থং.

ছ নীৰরণা নীৰরণা চেৰ নীৰরণসম্পযুত্তা চ নাম. তদঞ্ঞে নীৰরণসম্পযুত্তা পন নীৰরণসম্পযুত্তা চেৰ নো চ নীৰরণা নাম. তথা চেতসিকেসু নীৰরণৰিরহিতা অকুসলা, তিজাতিকা পন তথা চ ন ৰত্তব্বা চ, কুসলাব্যাকতা ন ৰত্তব্বাৰ. ইধ পন নীৰরণৰিপ্পযুত্তা সব্বে ন ৰত্তব্বা. পঞ্চমং.

লোকুত্তরৰজ্জিতা নীৰরণৰিপ্পযুত্তা নীৰরণিযা নাম. লোকুত্তরা নীৰরণৰিপ্পযুত্তা অনীৰরণিযা নাম. ইধ পন নীৰরণসম্পযুত্তা ন ৰত্তব্বা. চেতসিকেসু পন করুণামুদিতা নীৰরণৰিপ্পযুত্তা নীৰরণিযাৰ, কুসলাব্যাকতা দ্ৰিধাপি হোন্তি, তিজাতিকা তথা চ ন ৰত্তব্বা চ, অকুসলা পন ন ৰত্তব্বাৰ. ছট্ঠং.

নীৰরণগোচ্ছকং নিট্ঠিতং.

পরামাসগোচ্ছকে ধম্মানং যথাভূতং অনিচ্চাদিআকারং অতিক্কমিত্ৰা ‘‘নিচ্চ’’ন্তিআদিৰসেন ¶ পৰত্তমানা পরতো আমসন্তীতি পরামাসা. মিচ্ছাদিট্ঠি. বহুৰচননিদ্দেসে কারণং ৰুত্তমেৰ. তদঞ্ঞে সব্বে ধম্মা নো পরামাসা নাম. পরামাসদুকং পঠমং.

পরামাসেহি ¶ আরম্মণকরণৰসেন পরামট্ঠত্তা পরামট্ঠা. সেসং আসৰদুকসদিসমেৰ. দুতিযং.

দিট্ঠিসম্পযুত্তচিত্তেসু দিট্ঠিৰিরহিতা ধম্মা পরামাসসম্পযুত্তা নাম. সেসচিত্তরূপনিব্বানানি পরামাসৰিপ্পযুত্তা নাম. ইধ পন দিট্ঠি ন ৰত্তব্বা, সেসচেতসিকেসু পন মানদোসইস্সামচ্ছরিযকুক্কুচ্চৰিচিকিচ্ছা, কুসলাব্যাকতা চ পরামাসৰিপ্পযুত্তা এৰ, সেসা দ্ৰিধাপি হোন্তি. ততিযং.

দিট্ঠি এৰ পরামাসা চেৰ পরামট্ঠা চ নাম. সেসলোকিযা পরামট্ঠা চেৰ নো চ পরামাসা নাম. ইধ পন লোকুত্তরা ন ৰত্তব্বা. সেসং সুৰিঞ্ঞেয্যমেৰ. চতুত্থং.

ইমস্মিং পন গোচ্ছকে ‘‘পরামাসা চেৰ ধম্মা পরামাসসম্পযুত্তা চা’’তি অযং দুকো ন লব্ভতি. ন হি দিট্ঠি দিট্ঠিযা সম্পযুজ্জতি. পচ্ছিমদুকে লোকুত্তরৰজ্জিতা পরামাসৰিপ্পযুত্তা পরামট্ঠা নাম. লোকুত্তরা পরামাসৰিপ্পযুত্তা অপরামট্ঠা নাম. ইধ পন পরামাসো, তংসম্পযুত্তা চ ন ৰত্তব্বা. সেসং ৰুত্তনযমেৰ.

পরামাসগোচ্ছকং নিট্ঠিতং.

মহন্তরদুকেসু আরম্মণং অগ্গহেত্ৰা অপ্পৰত্তিতো সহ আরম্মণেনাতি সারম্মণা, চিত্তচেতসিকা. নত্থি আরম্মণমেতেসন্তি অনারম্মণা, রূপনিব্বানানি. সারম্মণদুকং.

চিন্তনট্ঠেন চিত্তং, চিত্ততায ৰা চিত্তং. তং হি ৰত্থুদ্ৰারারম্মণকিচ্চাদিভেদতো, অতীতাদিভেদতো চ অত্তনো ৰিচিত্ততায চিত্তন্তি ৰুচ্চতি চিত্তকরণতায ৰা. লোকস্মিং হি চিত্তকম্মতো উত্তরিতরং চিত্তং নাম নত্থি, তস্মিম্পি চরণং ¶ নাম চিত্তং অতিচিত্তং হোতি. যং ৰা পনঞ্ঞম্পি লোকে সিপ্পজাতং, সব্বং তং চিত্তেনেৰ করীযতি. এৰং তস্স তস্স চিত্তস্স নিপ্ফাদকং ¶ চিত্তম্পি তথেৰ চিত্তং হোতি. যথা চিন্তিতস্স ৰা অনৰসেসস্স অনিপ্ফজ্জনতো ততোপি চিত্তমেৰ চিত্ততরং, তথা যদেতং দেৰমনুস্সনিরযতিরচ্ছানভেদাসু গতীসু কুসলাকুসলকম্মনানত্তং, তেন তাসু গতীসু অপদদ্ৰিপদাদিউচ্চত্তনীচত্তাদিনানত্তং, তস্মিং তস্মিং অত্তভাৰে দীঘরস্সথূলাথূলসুৰণ্ণদুব্বণ্ণাদিলাভালাভাদি চাতি এৰমাদি অজ্ঝত্তং চিত্তং, বহিদ্ধা চ পথৰীপব্বততিণরুক্খলতাদিদেৰব্রহ্মৰিমানকপ্পরুক্খাদিভূতং কম্মপচ্চযং চিত্তং, তম্পি চিত্তেনেৰ কতং, ততো চিত্তমেৰ চিত্ততরং চিন্তিতনিযামেন সব্বাকারস্স অসম্ভৰতো. এৰং চিন্তনট্ঠেন, চিত্তৰিচিত্তট্ঠেন, চিত্তকরণট্ঠেন চ ‘‘চিত্ত’’ন্তি ৰিঞ্ঞাণং ৰেদিতব্বং, তদেৰ ৰিঞ্ঞাণং চিত্তং নাম. চেতসিকরূপনিব্বানানি নো চিত্তা নাম. চিত্তদুকং.

অৰিপ্পযোগৰসেন চেতসি নিযুত্তা চেতসিকা, ফস্সাদযো দ্ৰিপঞ্ঞাস ধম্মা. চিত্তরূপনিব্বানানি অচেতসিকা নাম. চেতসিকদুকং.

চেতসিকা এৰ চিত্তসম্পযুত্তা নাম. রূপনিব্বানানি চিত্তৰিপ্পযুত্তা নাম, ইধ পন চিত্তং ন ৰত্তব্বং. চিত্তসম্পযুত্তদুকং.

নিরন্তরভাৰূপগমনতায উপ্পাদতো যাৰ ভঙ্গাচিত্তেন সংসট্ঠাতি চিত্তসংসট্ঠা. একতো ৰত্তমানাপি নিরন্তরভাৰং অনুপগমনতায চিত্তেন ৰিসংসট্ঠাতি চিত্তৰিসংসট্ঠা. সেসং অনন্তরদুকসদিসমেৰ. চিত্তসংসট্ঠদুকং.

সমুট্ঠহন্তি এতেনাতি সমুট্ঠানং, চিত্তং সমুট্ঠানং এতেসন্তি চিত্তসমুট্ঠানা, চেতসিকানি চেৰ চিত্তজরূপকলাপা চ ¶ . চিত্তং, পন অচিত্তজরূপকলাপা, নিব্বানঞ্চ নো চিত্তসমুট্ঠানা নাম. চিত্তসমুট্ঠানদুকং.

সহ ভৰন্তীতি সহভুনো, চিত্তেন সহভুনো চিত্তসহভুনো, চেতসিকানি চেৰ কাযৰচীৰিঞ্ঞত্তিযো চ. চিত্তং, পন ৰিঞ্ঞত্তিৰজ্জিতরূপনিব্বানানি চ নো চিত্তসহভুনো নাম. চিত্তসহভুদুকং.

অনুপরিৰত্তন্তীতি ¶ অনুপরিৰত্তিনো, কিং অনুপরিৰত্তন্তি? চিত্তং, চিত্তস্স অনুপরিৰত্তিনো চিত্তানুপরিৰত্তিনো. সেসং অনন্তরদুকসদিসমেৰ. চিত্তানুপরিৰত্তিদুকং.

ইতো পরে পন তযো দুকা চেতসিকদুকসদিসাৰ, কেৰলং পদত্থমত্তমেৰ ৰিসেসো. তত্থ চিত্তসংসট্ঠা চ তে চিত্তসমুট্ঠানা এৰ চাতি চিত্তসংসট্ঠসমুট্ঠানা. চিত্তসংসট্ঠা চ তে চিত্তসমুট্ঠানা চ চিত্তসহভুনো এৰ চাতি চিত্তসংসট্ঠসমুট্ঠানসহভুনো, চিত্তসংসট্ঠা চ তে চিত্তসমুট্ঠানা চ চিত্তানুপরিৰত্তিনো এৰ চাতি চিত্তসংসট্ঠসমুট্ঠানানুপরিৰত্তিনো. সেসং সুৰিঞ্ঞেয্যমেৰ.

তদনন্তরে পন অজ্ঝত্তিকদুকে অজ্ঝত্তজ্ঝত্তং অজ্ঝত্তত্তিকে ৰুত্তৰসেন অজ্ঝত্তাৰ অজ্ঝত্তিকা. পসাদরূপচিত্তসঙ্খাতানি ছ অজ্ঝত্তিকানি আযতনানি. ততো বহিভূতা বাহিরা. সেসরূপচেতসিকনিব্বানপঞ্ঞত্তিসঙ্খাতানি ছ বাহিরাযতনানি, ইধ পন পঞ্ঞত্তিযোপি লব্ভন্তি. অজ্ঝত্তিকদুকং.

উপাদিযন্তেৰ ভূতানি, ন ভূতা ৰিয উপাদিযন্তীতি উপাদা, চতুৰীসতি উপাদারূপানি এৰ. ন উপাদিযন্তীতি নো উপাদা, চতুমহাভূতচিত্তচেতসিকনিব্বানানি. উপাদাদুকং.

দ্ৰত্তিংস লোকিযৰিপাকচিত্তানি, কম্মজরূপঞ্চ উপাদিন্না নাম. সেসলোকিযলোকুত্তরানি, নিব্বানঞ্চ অনুপাদিন্না নাম ¶ . সেসং উপাদিন্নুপাদানিযত্তিকে ৰুত্তানুসারেন ঞাতব্বং. উপাদিন্নদুকং.

মহন্তরদুকা নিট্ঠিতা.

উপাদানগোচ্ছকেভুসং আদিযন্তীতি উপাদানা, দল়্হগ্গাহং গণ্হন্তীতি অত্থো. দল়্হত্থো হি এত্থ উপ-সদ্দো ‘‘উপাযাসো’’তিআদীসু ৰিয. ততো অঞ্ঞে নো উপাদানা. তত্থ কামুপাদানং দিট্ঠুপাদানং সীলব্বতুপাদানং অত্তৰাদুপাদানন্তি ইমে উপাদানা নাম. তত্থ ৰত্থুকামেসু উপ্পন্নো কিলেসকামোৰ ৰুত্তনযেন উপাদানন্তি কামুপাদানং. এৰং সেসেসুপি. তত্থ ৰীসতিৰত্থুকা সক্কাযদিট্ঠি অত্তৰাদুপাদানং নাম. সেসানি পুব্বে ৰুত্তানেৰ. পচ্ছিমানি পনেত্থ তীণি উপাদানানি তথাপৰত্তদিট্ঠি এৰ. তানি চ পঠমেন মগ্গেন পহীযন্তি, কামুপাদানং চতূহিপি ¶ . ইমে চ সভাৰতো দ্ৰে ধম্মা ৰিভাগতো চতুরুপাদানা নাম জাতা. ইমে পন ঠপেত্ৰা সেসা সব্বে ধম্মা নো উপাদানা নাম. উপাদানদুকং পঠমং.

উপাদানিযদুকো সংযোজনিযদুকসদিসোৰ. দুতিযং.

অট্ঠলোভসহগতচিত্তানি, তংসম্পযুত্তেসু দিট্ঠিৰিপ্পযুত্তলোভং ঠপেত্ৰা সেসা চ উপাদানসম্পযুত্তা নাম. দিট্ঠিৰিপ্পযুত্তলোভদোসমোহমূলানি, কুসলাব্যাকতানি চ চিত্তানি, রূপনিব্বানানি চ উপাদানৰিপ্পযুত্তা নাম. চেতসিকেসু পন দিট্ঠিমানা উপাদানসম্পযুত্তাৰ, দোসইস্সামচ্ছরিযকুক্কুচ্চৰিচিকিচ্ছা, কুসলাব্যাকতা চ উপাদানৰিপ্পযুত্তা এৰ. সেসা দুৰিধাপি হোন্তি. ততিযং.

চত্তারি উপাদানানি উপাদানা চেৰ উপাদানিযা চ নাম. তদৰসেসা লোকিযা উপাদানিযা চেৰ নো চ ¶ উপাদানা নাম. ইধ পন লোকুত্তরা ন ৰত্তব্বা. সেসং ৰুত্তনযমেৰ. চতুত্থং.

পঞ্চমছট্ঠদুকা পাঠতো গন্থগোচ্ছকে পঞ্চমছট্ঠদুকসদিসাৰ, কেৰলং পঞ্চমদুকে ‘‘চেতসিকেসু মানো উপাদানসম্পযুত্তো চেৰ নো চ উপাদানো এৰ, মোহাহিরিকানোত্তপ্পউদ্ধচ্চথিনমিদ্ধানি তিজাতিকানি তথা চ ন ৰত্তব্বা চা’’তি ইদঞ্চ, ছট্ঠদুকে ‘‘চেতসিকেসু দোসইস্সামচ্ছরিযকুক্কুচ্চৰিচিকিচ্ছা অপ্পমঞ্ঞা উপাদানৰিপ্পযুত্তা উপাদানিযা এৰ, মোহাহিরিকানোত্তপ্পউদ্ধচ্চলোভথিনমিদ্ধানি তথা চ ন ৰত্তব্বানি চা’’তি এত্তকমেৰ পাঠতো ৰিসেসো, অত্থতো পন নামমত্তকোৰ ৰিসেসো. সেসো সুৰিঞ্ঞেয্যোৰ. পঞ্চমছট্ঠানি.

উপাদানগোচ্ছকং নিট্ঠিতং.

কিলেসগোচ্ছকে সংকিলিট্ঠত্তিকে ৰুত্তনযেন পদত্থো ৰেদিতব্বো. লোভো দোসো মোহো মানো দিট্ঠি ৰিচিকিচ্ছা থিনং উদ্ধচ্চং অহিরিকং অনোত্তপ্পন্তি ইমে দস ধম্মা কিলেসা নাম. ইমে চ ৰুত্তত্থা এৰ, ইধ পন লোভো, হেতুগন্থনীৰরণউপাদানগোচ্ছকেসু লোভো চ নিপ্পদেসতো চতুমগ্গৰজ্ঝোপি একেনেৰ কোট্ঠাসেন ঠিতো, সেসগোচ্ছকেসু সো সব্বোপি লোভো ‘‘কামাসৰো ভৰাসৰো’’তিআদিনা ¶ দ্ৰে দ্ৰে কোট্ঠাসা হুত্ৰা ঠিতো, ইমিনা পন অট্ঠকথাৰচনেনাপি ভৰাসৰাদিব্যতিরিত্তো সব্বো চতুমগ্গৰজ্ঝোপি রাগো কামাসৰাদীসু সঙ্গহিতো. কামচ্ছন্দনীৰরণং পন ভৰরাগোপি ন পঞ্চকামগুণিকরাগমত্তোৰাতি পঞ্ঞাযতি, ‘‘আরুপ্পে কামচ্ছন্দনীৰরণং পটিচ্চ থিনমিদ্ধনীৰরণ’’ন্তিআদিপাল়িতো (পট্ঠা. ৩.৮.৮) চেতং দট্ঠব্বং পঞ্চকামগুণিকরাগস্স রূপারূপভূমীসু অনুপ্পজ্জনতো. ইমেসু ¶ চ কিলেসেসু দিট্ঠিৰিচিকিচ্ছা পঠমেন মগ্গেন পহীযন্তি, দোসো ততিযেন, লোভাদযো চতূহিপি. ইমে পন দস ধম্মে ঠপেত্ৰা সেসা নো কিলেসা নাম. কিলেসদুকং পঠমং.

সংকিলেসিকদুকো সাসৰদুকসদিসোৰ. দুতিযং.

সংকিলিট্ঠদুকো, কিলেসসম্পযুত্তদুকো চাতি দ্ৰেপি সমানত্থাৰ. তে চ নীৰরণগোচ্ছকে ততিযদুকসদিসাৰ. ততিযচতুত্থানি.

দস কিলেসা কিলেসা চেৰ সংকিলেসিকা চ নাম. সেসা লোকিযধম্মা সংকিলেসিকা চেৰ নো চ কিলেসা নাম. ইধ পন লোকুত্তরা ন ৰত্তব্বা. সেসং নীৰরণগোচ্ছকে চতুত্থদুকসদিসমেৰ. পঞ্চমং.

ছট্ঠসত্তমদুকানিপি অঞ্ঞমঞ্ঞং সমানত্থানেৰ. তানি ছট্ঠসত্তমানি নীৰরণগোচ্ছকে যথাক্কমং পাঠতো পঞ্চমছট্ঠদুকসদিসানি, অত্থতো পন নামমত্তকোৰ ৰিসেসো. সেসো সুৰিঞ্ঞেয্যো. ছট্ঠসত্তমঅট্ঠমানি.

কিলেসগোচ্ছকং নিট্ঠিতং.

পিট্ঠিদুকেসু আদিতো চত্তারো দুকা দস্সনেনপহাতব্বত্তিকে, দস্সনেনপহাতব্বহেতুকে চ ৰুত্তনযেন ৰেদিতব্বা. কেৰলং পন তত্থ পঠমত্তিকে ৰুত্তেসু দস্সনেনপহাতব্বে ধম্মে ঠপেত্ৰা সেসা ইধ পঠমদুকস্স দুতিযপদে দস্সনেনপহাতব্বেসু পৰিসন্তি, ভাৰনাযপহাতব্বে ঠপেত্ৰা সেসা ইধ দুতিযদুকে নভাৰনাযপহাতব্বেসু পৰিসন্তি. তত্থ চ দুতিযত্তিকে ৰুত্তেসু দস্সনেনপহাতব্বহেতুকে ঠপেত্ৰা ¶ সেসা ইধ ততিযদুকে নদস্সনেনপহাতব্বহেতুকে, ভাৰনাযপহাতব্বহেতুকে চ ঠপেত্ৰা সেসা ইধ চতুত্থদুকে নভাৰনাযপহাতব্বহেতুকেসু পৰিসন্তি.

পদত্থো ¶ চ দস্সনেন পহাতব্বো হেতু এতেসং অত্থীতি দস্সনেনপহাতব্বহেতুকা. এৰং ভাৰনাযপহাতব্বহেতুকাতি এত্থাপি অত্থো ৰেদিতব্বো. এৰং হি সতি অহেতুকানং অগ্গহণং সিযাতি এত্তকমেৰ ৰিসেসো. তিকদ্ৰযমেৰ হি ভগৰা দেসনাৰিলাসেন চত্তারো দুকে কত্ৰা দেসেসি. সেসং তাদিসমেৰ. চত্তারো দুকা নিট্ঠিতা.

পঞ্চপঞ্ঞাসসৰিতক্কচিত্তেসু ৰিতক্কৰিরহিতা চিত্তচেতসিকা ধম্মা সৰিতক্কা নাম. ৰিতক্কো, পন সেসচিত্তরূপনিব্বানানি চ অৰিতক্কা নাম. পঞ্চমং.

ছসট্ঠিযা সৰিচারচিত্তেসু ৰিচারৰিরহিতা ধম্মা সৰিচারা নাম. ৰিচারো, পন সেসচিত্তরূপনিব্বানানি চ অৰিচারা নাম. সেসং ইধ, অনন্তরে ৰুত্তদুকে চ ৰিতক্কত্তিকে ৰুত্তানুসারেন ঞাতব্বং. ছট্ঠং.

ইতো পরেসু সপ্পীতিকদুকো, পীতিসহগতদুকো চ সমানত্থাৰ, তে চ সুখসহগতউপেক্খাসহগতদুকা চাতি চত্তারোপি দুকা পীতিত্তিকে ৰুত্তনযাৰ. কেৰলং পনেতেসং দুকানং পঠমং পদং তত্থ পৰিসতি, পীতিত্তিকে ইতরীতরপদদ্ৰযসঙ্গহিতা, অসঙ্গহিতা চ সব্বে অত্থা হেট্ঠা ৰুত্তনযেনেত্থ দুকানং দুতিযপদেসু অত্থতো সঙ্গহিতা, ইমে চ নিপ্পদেসদুকাতি অযমেৰ ৰিসেসো. সত্তমঅট্ঠমনৰমদসমা.

তদনন্তরেসু কামাৰচরাতি এত্থ ‘‘হেট্ঠতো অৰীচিনিরযং পরিযন্তং করিত্ৰা উপরিতো পরনিম্মিতৰসৰত্তী দেৰে অন্তো করিত্ৰা যং তস্মিং অন্তরে এত্থাৰচরা এত্থ পরিযাপন্না’’তি এৰং (ধ. স. ১২৮৭) পাল়িযং পরিচ্ছিন্নানং চতুন্নং অপাযানং, মনুস্সানং, ছন্নং দেৰলোকানঞ্চ ৰসেন ওকাসতো একাদসৰিধো কামভৰো ¶ ‘‘কামো’’তি ৰুচ্চতি উত্তরপদলোপেন যথা ‘‘রূপূপপত্তিযা’’তিআদীসু রূপভৰো ‘‘রূপ’’ন্তি. তস্মিং কামে অৰচরন্তি পৰত্তন্তীতি কামাৰচরা. যেভুয্যতো চেতং ৰুত্তং রূপারূপেসু চেতেসঞ্চ ইধ পৰত্তিতো ‘‘থলচরা’’তিআদীসু ৰিয. কামভৰসঙ্খাতে ৰা কামে পটিসন্ধিং অৰচারেন্তীতিপি কামাৰচরা, কুসলাকুসলানি ¶ . উদ্ধচ্চসহগতচিত্তং পন অব্যাকতচিত্তসদিসং. তদাযত্ততায, আরম্মণকরণৰসেন ৰা কিলেসকামো এত্থ অৰচরতীতিপি কামাৰচরং. কামঞ্চেস রূপারূপাৰচরধম্মেসুপি অৰচরতি, রুল়্হিতো পন ‘‘ৰদতীতি ৰচ্ছো’’তিআদীসু ৰিয ইমে এৰ ‘‘কামাৰচরা’’তি ৰুচ্চন্তি. অপিচ কামতণ্হা রূপতণ্হা অরূপতণ্হাতি এত্থ ৰুত্তকামতণ্হাসঙ্খাতো কামো এত্থ অৰচরতীতিপি কামাৰচরা. এৰং ব্রহ্মানং ৰিমানাভরণাদীসু ছন্দরাগস্সাপি কামতণ্হাভাৰো সিদ্ধো, রূপতণ্হাৰিসযানম্পি চ ব্রহ্মানং কম্মজরূপাদীনং কামতণ্হাযপি ৰিসযতায কামাৰচরতা সিদ্ধা হোতি. ন রূপারূপাৰচরানং তদভাৰতো তদঞ্ঞে ন কামাৰচরা. ইমিনা নযেন রূপাৰচরাদিদুকানম্পি পদত্থো যথারহং ঞাতব্বো. তত্থ চতুপঞ্ঞাস কামাৰচরচিত্তানি, সব্বঞ্চ রূপং কামাৰচরা নাম. সেসচিত্তনিব্বানানি ন কামাৰচরা নাম. চেতসিকেসু ৰত্তব্বং পরিযাপন্নদুকে এৰ আৰি ভৰিস্সতি. একাদসমং.

পন্নরস রূপাৰচরচিত্তানি রূপাৰচরা নাম. সেসচিত্তরূপনিব্বানানি ন রূপাৰচরা নাম. দ্ৰাদসমং.

দ্ৰাদস অরূপাৰচরচিত্তানি অরূপাৰচরা নাম. সেসচিত্তরূপনিব্বানানি ন অরূপাৰচরা নাম. তেরসমং.

তেভূমকৰট্টে পরিযাপন্না অন্তোগধাতি পরিযাপন্না, লোকিযধম্মাৰ. তত্থ ন পরিযাপন্নাতি অপরিযাপন্না, লোকুত্তরা. চেতসিকেসু পন কামাৰচরাদিদুকানং চতুন্নম্পি ¶ সাধারণো ৰিনিচ্ছযো এৰং ৰেদিতব্বো – অকুসলচেতসিকা কামাৰচরাৰ, অপ্পমঞ্ঞা কামরূপাৰচরা, ৰিরতিযো পন কামাৰচরপরিযাপন্না, ৰিতক্কৰিচারপীতিযো পন কামরূপাৰচরপরিযাপন্না, সেসা চতুভূমকাতি. চুদ্দসমং.

ৰট্টমূলং ছিন্দন্তা নিব্বানং আরম্মণং কত্ৰা ৰট্টতো নীযন্তীতি নিয্যানিকা, চত্তারি লোকুত্তরমগ্গচিত্তানি. ইমিনা লক্খণেন ন নিয্যন্তীতি অনিয্যানিকা, সেসচিত্তরূপনিব্বানানি. সেসং সুৰিঞ্ঞেয্যমেৰ. পঞ্চদসমং.

চুতিযা ¶ ৰা অত্তনো ৰা পৰত্তিযা অনন্তরং ফলদানে নিযতত্তা নিযতা, মিচ্ছত্তনিযতা, সম্মত্তনিযতা চ. তথা অনিযতত্তা অনিযতা, সেসধম্মা. সেসং ৰুত্তনযমেৰ. সোল়সমং.

অঞ্ঞে ধম্মে উত্তরন্তি অতিক্কমন্তীতি উত্তরা, অত্তানং উত্তরিতুং সমত্থেহি সহ উত্তরেহীতি সউত্তরা, লোকিযাৰ. নত্থি এতেসং উত্তরাতি অনুত্তরা, লোকুত্তরা. সত্তরসমং.

রণন্তি কন্দন্তি এতেহীতি রণা, যেহি অভিভূতা সত্তা নানপ্পকারতো পরিদেৰন্তি, তেসং অকুসলমূলানং এতং অধিৰচনং, তেহি সম্পযোগৰসেন, পহানেকট্ঠতাৰসেন চ সহ রণেহীতি সরণা. এতেনাকারেন নত্থি এতেসং রণাতি অরণা.

তত্থ দ্ৰাদস অকুসলচিত্তানি সরণা নাম. সরণধম্মেসু চেত্থ লোভদোসমোহা রণা চেৰ সরণা চ, তেসু লোভদোসা মোহেনেৰ সম্পযোগতো সরণা, তথা ৰিচিকিচ্ছুদ্ধচ্চসহগতচিত্তং, তংসম্পযুত্তা চ. মোহো পন তেসু সম্পযোগতো সরণো, দিট্ঠিসম্পযুত্তরাগেন, পন ভৰরাগেন চ রণভূতেন পহানেকট্ঠতাৰসেনেৰ সরণো ¶ . লোভদোসমোহমূলসম্পযুত্তেসু পন মোহো লোভেন চেৰ দোসেন চ, সেসা লোভমোহেন চেৰ দোসমোহেন চ সম্পযোগতো সরণাতি ৰেদিতব্বা. সব্বানি কুসলাব্যাকতচিত্তানি, রূপনিব্বানানি চ অরণা নাম. চেতসিকেসু পন অকুসলা সরণাৰ, কুসলাব্যাকতা অরণাৰ, তিজাতিকা পন দ্ৰিধাপি হোন্তীতি. অট্ঠারসমং.

পিট্ঠিদুকা নিট্ঠিতা.

অভিধম্মদুকমাতিকত্থৰণ্ণনা নিট্ঠিতা.

সুত্তন্তিকদুকমাতিকত্থৰণ্ণনা

সুত্তন্তিকদুকেসু ৰেদেতি, ৰিৰিধেন ৰা আকারেন জানাতীতি ৰিজ্জা, ৰিপস্সনাঞাণমনোমযিদ্ধিছঅভিঞ্ঞাৰসপ্পৰত্তা পঞ্ঞা, তস্মিং ৰিজ্জাভাগে ৰিজ্জাকোট্ঠাসে ৰিজ্জাসভাৰে ¶ ৰত্তন্তীতি ৰিজ্জাভাগিনো. তা এৰ ৰিজ্জা, তং ৰা ৰিজ্জং সম্পযোগৰসেন ভজন্তীতিপি ৰিজ্জাভাগিনো, অট্ঠৰিধৰিজ্জাসম্পযুত্তধম্মা. তাসু যা কাচি একা ৰিজ্জা ৰিজ্জা, সেসা ৰিজ্জাভাগিনোতি এৰং ৰিজ্জাপি ৰিজ্জাসম্পযুত্তধম্মাপি ৰিজ্জাভাগিনোত্ৰেৰ ৰেদিতব্বা, ইধ পন ৰিজ্জাসম্পযুত্তা ধম্মাৰ অধিপ্পেতা. ন ৰিজানাতীতি অৰিজ্জা, চতুসচ্চচ্ছাদকৰসেন চতুব্বিধো মোহো, তস্মিং অৰিজ্জাভাগে অৰিজ্জাকোট্ঠাসে অৰিজ্জাসভাৰে ৰত্তন্তীতি অৰিজ্জাভাগিনো. তা এৰ অৰিজ্জা, তং ৰা অৰিজ্জং সম্পযোগৰসেন ভজন্তীতিপি অৰিজ্জাভাগিনো, অৰিজ্জাসম্পযুত্তধম্মা. এৰং অৰিজ্জাপি অৰিজ্জাসম্পযুত্তধম্মাপি অৰিজ্জাভাগিনোত্ৰেৰ ৰেদিতব্বা, ইধ পন অৰিজ্জাসম্পযুত্তধম্মাৰ অধিপ্পেতা.

তত্থ অরহত্তমগ্গচিত্তং, পঞ্ঞাৰিরহিততংসম্পযুত্তা চ ৰিজ্জাভাগিনো চ ঞাণসম্পযুত্তকামাৰচরজৰনানি, ঞাণৰিরহিততংসম্পযুত্তা ¶ চ ৰিপস্সনাভাৰেন পৰত্তিযং ৰিজ্জাভাগিনো, অঞ্ঞদা ন ৰত্তব্বা. রূপাৰচরচতুত্থজ্ঝানিকজৰনচিত্তানি, পঞ্ঞাৰিরহিততংসম্পযুত্তা চ মনোমযিদ্ধিভাৰেন চ পঞ্চাভিঞ্ঞাভাৰেন চ পৰত্তিযং ৰিজ্জাভাগিনো, অঞ্ঞদা ন ৰত্তব্বা. তত্থ দ্ৰাদসাকুসলচিত্তানি, অৰিজ্জাৰিরহিততংসম্পযুত্তা চ অৰিজ্জাভাগিনোৰ, ইধ পন অৰিজ্জা, সেসচিত্তরূপনিব্বানানি চ ন ৰত্তব্বাৰ. চেতসিকেসু পন মোহঅপ্পমঞ্ঞা ন ৰত্তব্বাৰ, সেসা কুসলাব্যাকতা সিযা ৰিজ্জাভাগিনো, সিযা ন ৰত্তব্বা, তিজাতিকা দ্ৰিধাপি ন ৰত্তব্বা চ. সেসং সুৰিঞ্ঞেয্যমেৰ. পঠমং.

পুন অনজ্ঝোত্থরণৰসেন কিলেসন্ধকারং ৰিদ্ধংসেতুং অসমত্থতায ৰিজ্জু উপমা এতেসন্তি ৰিজ্জূপমা, আদিতো তীসু মগ্গেসু ঞাণংৰ. নিস্সেসং ৰিদ্ধংসনসমত্থতায ৰজিরং উপমা এতেসন্তি ৰজিরূপমা, অরহত্তমগ্গে ঞাণং. যথা হি মেঘন্ধকারে মগ্গপটিপন্নস্স পটিচ্ছাদনঅন্ধকারং ৰিধমিত্ৰা ৰিজ্জুযা উপ্পন্নক্খণে চাতুদিসা মগ্গা পাকটা হোন্তি, ৰিজ্জুযা নিরুদ্ধায পুন অন্ধকারো ওত্থরিত্ৰা মগ্গং পটিচ্ছাদেতি, এৰং ৰিপস্সনাযানিকস্স যথাসকং সচ্চচ্ছাদককিলেসন্ধকারং ৰিধমিত্ৰা তীসু মগ্গেসু যথাক্কমং উপ্পন্নেসু চত্তারি সচ্চানি পাকটানি হোন্তি, তেসু নিরুদ্ধেসু পুন অৰসিট্ঠকিলেসন্ধকারো চতুসচ্চং পটিচ্ছাদেতি, তস্মা তীসু মগ্গেসু পঞ্ঞা ৰিজ্জূপমা ৰুত্তা. যথা পন ৰজিরস্স অভেজ্জো পাসাণো নাম নত্থি, তঞ্চ নিস্সেসতো ৰজিরং খেপেতি, ৰজিরেন চ গতমগ্গে পাসাণস্স পুন ¶ পাকতিকভাৰো নত্থি, এৰং অরহত্তমগ্গঞাণস্স অৰজ্ঝকিলেসো নাম নত্থি, তঞ্চ নিস্সেসতো অরহত্তমগ্গঞাণং খেপেতি, তেন চ খেপিতে কিলেসে অৰসিট্ঠকিলেসাভাৰতো তস্স পুন পচ্চুদাৰত্তনং নাম নত্থি, তস্মা ¶ চতুত্থমগ্গে পঞ্ঞা ৰজিরূপমা ৰুত্তা. পঞ্ঞা এৰ হেত্থ সিযা ৰিজ্জূপমা, সিযা ন ৰত্তব্বা চ হোতি. সেসচেতসিকচিত্তরূপনিব্বানানি পন সব্বানি ন ৰত্তব্বানেৰ. দুতিযং.

বালেসু ঠিতত্তা, যত্থ ঠিতা তদুপচারেন বালা, বালকরত্তা ৰা বালা, দ্ৰাদসাকুসলচিত্তানি. ইধ পন অহিরিকঞ্চ অনোত্তপ্পঞ্চ বালা নাম. পণ্ডিতেসু ঠিতত্তা পণ্ডিতা, পণ্ডিতকরত্তা ৰা পণ্ডিতা, একৰীসতি কুসলচিত্তানি. ইধ পন হিরী চ ওত্তপ্পঞ্চ পণ্ডিতা নাম. সেসচিত্তরূপনিব্বানানি ন ৰত্তব্বানি. সেসং সুৰিঞ্ঞেয্যমেৰ. ততিযং.

কণ্হাতি কাল়কা, চিত্তস্স অপভস্সরভাৰকরণা. সুক্কাতি ওদাতা, পভস্সরভাৰকরণা. সেসং সব্বং বালদুকসদিসমেৰ. চতুত্থং.

ইধ চেৰ সম্পরাযে চ তপেন্তীতি তপনীযা. ন তপনীযা অতপনীযা. সেসং বালদুকসদিসমেৰ. পঞ্চমং.

‘‘সিরিৰড্ঢকো ধনৰড্ঢকো’’তিআদযো ৰিয ৰচনমত্তমেৰ অধিকারং কত্ৰা পৰত্তা অধিৰচনা নাম. নামধেয্যন্তি তেসং তেসং ধম্মানং নামানি. তানি চতুব্বিধানি সামঞ্ঞনামং গুণনামং কিত্তিমনামং ওপপাতিকনামন্তি. তত্থ পঠমকপ্পিকেসু মহাজনেন সম্মন্নিত্ৰা ঠপিতত্তা ‘‘মহাসম্মতো’’তি রঞ্ঞো নামন্তি এৰরূপং সামঞ্ঞনামং নাম. ‘‘ধম্মকথিকো পংসুকূলিকো কাল়ো রস্সো’’তি এৰরূপং গুণতো আগতং, ‘‘ভগৰা অরহং সম্মাসম্বুদ্ধো’’তিআদীনিপি তথাগতস্স অনেকানি নামসতানি গুণনামং নাম. যং পন জাতস্স কুমারস্স ঞাতকা কপ্পেত্ৰা পকপ্পেত্ৰা ‘‘অযং অসুকো নামা’’তি নামং করোন্তি, ইদং কিত্তিমনামং ¶ নাম. যা পন পুরিমপঞ্ঞত্তি অপরপঞ্ঞত্তিযং নিপততি, সেয্যথিদং – পুরিমকপ্পেপি চন্দো চন্দো এৰ, এতরহিপি অনাগতেপি চন্দো এৰ. তথা ‘‘সূরিযো সমুদ্দো পথৰী রূপং ৰেদনা সঞ্ঞা সঙ্খারা ৰিঞ্ঞাণং নিব্বান’’ন্তিএৰমাদি ওপপাতিকনামং নাম. তানি পুন ৰিজ্জমানপঞ্ঞত্তি অৰিজ্জমানপঞ্ঞত্তি ৰিজ্জমানেনঅৰিজ্জমানপঞ্ঞত্তি অৰিজ্জমানেনৰিজ্জমানপঞ্ঞত্তি ¶ ৰিজ্জমানেনৰিজ্জমানপঞ্ঞত্তি অৰিজ্জমানেনঅৰিজ্জমানপঞ্ঞত্তীতি এৰং নামপঞ্ঞত্তিৰসেন ছব্বিধানি হোন্তি.

তত্থ পরমত্থতো উপলব্ভমানা যথাৰুত্তদ্ৰাসত্ততিৰিধা নামরূপধম্মা ৰিজ্জমানা নাম, তেসং পকারেহি ঞাপনতো পঞ্ঞত্তি ৰিজ্জমানপঞ্ঞত্তি নাম, ‘‘চিত্তং ফস্সো পথৰী রূপং নিব্বান’’ন্তিআদযো পরমত্থৰাচকা সদ্দা. উপাদিন্ননামরূপধম্মে পন উপাদায পঞ্ঞত্তা সত্তপুগ্গলইত্থিপুরিসদেৰমনুস্সতিরচ্ছানাদিভেদা, অনুপাদিন্নরূপধম্মে উপাদায পঞ্ঞত্তা ভূমিপব্বতরুক্খসকটচন্দসূরিযনক্খত্তদিসাকালকসিণাদিভেদা চ পরমত্থতো অনুপলব্ভমানা অৰিজ্জমানা নাম, তেসং পঞ্ঞত্তি অৰিজ্জমানপঞ্ঞত্তি নাম. তথা ‘‘অত্তা ভূমী’’তিআদযো অত্থপঞ্ঞত্তিৰাচকা সদ্দা চ চিত্তসন্ততিৰণ্ণুপগন্তিআদি ৰিজ্জমানত্থৰাচকা সদ্দা ৰিজ্জমানেনঅৰিজ্জমানপঞ্ঞত্তি নাম. ‘‘পুরিসস্স চিত্তং, মেঘৰণ্ণো’’তিআদীসু অৰিজ্জমানেনৰিজ্জমানপঞ্ঞত্তি নাম. ‘‘চিত্তলহুতা পথৰীগন্ধো’’তিআদি ৰিজ্জমানেনৰিজ্জমানপঞ্ঞত্তি নাম. ‘‘মনুস্সসরীরং রুক্খসাখা’’তিআদি অৰিজ্জমানেনঅৰিজ্জমানপঞ্ঞত্তি নাম. এৰং ছব্বিধাপি চেতা অধিপ্পাযং ৰিঞ্ঞাপেতুকামতাচিত্তসমুট্ঠাপিতসৰিঞ্ঞত্তিসদ্দানুসারেন ঞাতসঙ্কেতস্স সোতৰিঞ্ঞাণৰীথিঅনন্তরং উপ্পন্নেহি মনোদ্ৰারিকৰিঞ্ঞাণেহি ‘‘ইমস্সেদং নাম’’ন্তি অনেকসদ্দেসু একত্তমারোপেত্ৰা ৰৰত্থাপিতা অত্থাভিমুখং নমনতো পকারেহি অত্থস্স ঞাপনতো ‘‘নামপঞ্ঞত্তী’’তি ৰুচ্চন্তি, তেসং ¶ অধিৰচনানং পথা অত্থা অধিৰচনপথা, সম্মুতিপরমত্থভেদা সব্বে ধম্মা সদ্দৰচনীযসভাৰা. ছট্ঠং.

ইতো পরং দ্ৰে দুকা অধিৰচনদুকসদিসাৰ, কেৰলং পদত্থমত্তমেৰ ৰিসেসো. তত্থ অভিসঙ্খরোন্তীতি সঙ্খারাতি এৰং নিদ্ধারেত্ৰা সহেতুকং কত্ৰা ৰুচ্চমানা নিরুত্তি নাম, ‘‘তক্কো ৰিতক্কো সঙ্কপ্পো’’তি এৰং তেন তেন পকারেন ঞাপনতো পঞ্ঞত্তি নাম, যথাৰুত্তনামপঞ্ঞত্তিযোৰ. ন হি অধিৰচননিরুত্তিপঞ্ঞত্তীসু অত্থতো কোচিপি ভেদো অত্থি, নিব্বত্তিনিমিত্তভেদদস্সনত্থং পন নেসং ৰিভাগেন পদত্থো দস্সিতো. ইমেসু চ তীসু দুকেসু পঞ্ঞত্তিসহিতা সব্বে ধম্মা লব্ভন্তি, অনন্তরে নামরূপদুকে পঞ্ঞত্তিরহিতাতি ইমে চত্তারো দুকা ইমেসু সুত্তন্তিকদুকেসু নিপ্পদেসা, সেসা পন অট্ঠতিংসাপি সপ্পদেসাতি ৰেদিতব্বা. সত্তমট্ঠমানি.

নামকরণট্ঠেন, নমনট্ঠেন, নামনট্ঠেন চ নামং, অরূপক্খন্ধনিব্বানানি. তানি হি সব্বদাপি ¶ ৰেদনা সঞ্ঞা সঙ্খারা ৰিঞ্ঞাণং নিব্বানন্তি ওপপাতিকনামৰসেন অত্তনো নামং করোন্তাৰ পৰত্তন্তি চন্দসূরিযাদযো ৰিয. ন হি তেসং সামঞ্ঞগুণকিত্তিমৰসেন নামকরণকিচ্চং অত্থীতি. এৰং নামকরণট্ঠেন নামং ৰেদিতব্বং. আরম্মণাভিমুখং পন নমনট্ঠেন, অঞ্ঞমঞ্ঞং তত্থ নামনট্ঠেন চ চত্তারো অরূপক্খন্ধাৰ নামং. নিব্বানং পন আরম্মণাধিপতিপচ্চযতায অত্তনি অনৰজ্জধম্মানং নামনট্ঠেনেৰ নামং ৰেদিতব্বং. রুপ্পনট্ঠেন রূপং, রূপক্খন্ধো. নৰমং.

অৰিজ্জাতি দুক্খাদিপটিচ্ছাদকো সব্বো মোহো. ভৰতণ্হাতি ভৰপত্থনাৰসেন পৰত্তো লোভো. তথা অপ্পৰত্তো পনেত্থ লোভো, সেসচেতসিকচিত্তরূপনিব্বানানি চ ন ৰত্তব্বানি. ইতো পরং পন এৰং নৰত্তব্বৰিভাগং অদস্সেত্ৰা পদত্থসরূপমত্তমেৰ দস্সযিস্সাম, দস্সিতাৰসেসা ন ৰত্তব্বাতি গহেতব্বা. দসমং.

ভৰো ¶ ৰুচ্চতি সস্সতং. ‘‘ভৰিস্সতি অত্তা চ লোকো চা’’তি সস্সতৰসেন উপ্পজ্জনকদিট্ঠি ভৰদিট্ঠি নাম. ৰিভৰো ৰুচ্চতি উচ্ছেদো. ‘‘ন ভৰিস্সতি অত্তা চ লোকো চা’’তি উচ্ছেদৰসেন উপ্পজ্জনকদিট্ঠি ৰিভৰদিট্ঠি নাম. উভযেনাপি মিচ্ছাদিট্ঠি গহিতা. তথা অনন্তরেসুপি তীসু দুকেসু. একাদসমং.

খন্ধপঞ্চকং ‘‘অত্তা চ লোকো চা’’তি গহেত্ৰা ‘‘সস্সতো অত্তা চ লোকো চা’’তি পৰত্তা দিট্ঠি সস্সতদিট্ঠি নাম. তথা ‘‘উচ্ছিজ্জিস্সতী’’তি পৰত্তা দিট্ঠি উচ্ছেদদিট্ঠি নাম. ‘‘অন্তৰা’’তি পৰত্তা অন্তৰাদিট্ঠি নাম. ‘‘অনন্তৰা’’তি পৰত্তা অনন্তৰাদিট্ঠি নাম. পুব্বন্তং অনুগতা ব্রহ্মজালে ৰুত্তনযেন অতীতকোট্ঠাসং আরম্মণং কত্ৰা পৰত্তা অট্ঠারসৰিধা পুব্বন্তানুদিট্ঠি নাম. অপরন্তং অনুগতা তত্থেৰ আগতনযেন অনাগতকোট্ঠাসং আরম্মণং কত্ৰা পৰত্তা চতুচত্তালীসৰিধা অপরন্তানুদিট্ঠি নাম. অযমেত্থ সঙ্খেপো, ৰিত্থারো পন ব্রহ্মজালে (দী. নি. ১.২৮), তদট্ঠকথায (দী. নি. অট্ঠ. ১.২৮) চ ৰেদিতব্বো. দ্ৰাদসমতেরসমচুদ্দসমানি.

অহিরিকদুকং, হিরিদুকঞ্চ সুৰিঞ্ঞেয্যমেৰ. পঞ্চদসমসোল়সমানি.

দুক্খং ¶ ৰচো এতস্মিং ৰিপ্পটিকূলগাহিম্হি ৰিপচ্চনীকসাতে অনাদরে পুগ্গলেতি দুব্বচো, সহধম্মিকং দস্সেত্ৰা ওৰদিযমানে অনাদরকারকো পুগ্গলো, তস্স কম্মং দোৰচস্সং, তস্স ভাৰো দোৰচস্সতা, অনাদরৰসেন পৰত্তা দ্ৰে পটিঘচিত্তা, তংসম্পযুত্তা চ. পাপা অস্সদ্ধাদযো পুগ্গলা এতস্স মিত্তাতি পাপমিত্তো, তস্স ভাৰো পাপমিত্ততা, পাপপুগ্গলেসু দল়্হভত্তিৰসেন, কাযচিত্তেহি তংসেৰনাতন্নিন্নতাৰসেন চ পৰত্তানি অট্ঠ লোভচিত্তানি. সত্তরসমং.

সোৰচস্সতা ¶ , কল্যাণমিত্ততা চ ৰুত্তপটিপক্খৰসেন ৰেদিতব্বা. অত্থতো পন তথাপৰত্তানি সহেতুককামাৰচরকুসলকিরিযচিত্তানি. অট্ঠারসমং.

পঞ্চসু, সত্তসু ৰা আপত্তীসু কুসলভাৰো আপত্তিকুসলতা, সহ ৰত্থুনা তাসং আপত্তীনং আপজ্জনপরিচ্ছেদজাননৰসেন পৰত্তা কামাৰচরজৰনপঞ্ঞা. আপত্তীহি ৰুট্ঠানে কুসলভাৰো আপত্তিৰুট্ঠানকুসলতা, ৰুট্ঠানৰিধানেন সদ্ধিং আপত্তিৰুট্ঠানপরিচ্ছেদজাননৰসেন পৰত্তা যথাৰুত্তচিত্তসম্পযুত্তপঞ্ঞাৰ. একূনৰীসতিমং.

সমাপজ্জিতব্বতো সমাপত্তি, তাসু লোকিযলোকুত্তরাসু সৰিতক্কসৰিচারাদীসু সমাপত্তীসু কুসলতা সমাপত্তিকুসলতা, সহ পরিকম্মেন অপ্পনাপরিচ্ছেদজাননৰসেন পৰত্তা পঞ্ঞা. সমাপত্তীহি ৰুট্ঠানে কুসলভাৰো সমাপত্তিৰুট্ঠানকুসলতা, যথাপরিচ্ছিন্নকালেযেৰ তাহি ৰুট্ঠানকপঞ্ঞা কামাৰচরজৰনপঞ্ঞাৰ. ৰীসতিমং.

অট্ঠারসসু ধাতূসু কুসলভাৰো ধাতুকুসলতা, সৰনধারণপটিৰেধপচ্চৰেক্খণপঞ্ঞা. তাসঞ্ঞেৰ ধাতূনং মনসিকারে কুসলভাৰো মনসিকারকুসলতা, তাসং সম্মসনপটিৰেধপচ্চৰেক্খণপঞ্ঞা. এস নযো আযতনকুসলতাযপি. তত্থ হি সৰনধারণপচ্চৰেক্খণা কামাৰচরাৰ, পটিৰেধো লোকুত্তরোৰ, সম্মসনং কামাৰচরলোকুত্তরং. অঞ্ঞমঞ্ঞং পটিচ্চ সহিতং ফলং উপ্পাদেতীতি পটিচ্চসমুপ্পাদো, অৰিজ্জাদীহি নিদ্দিট্ঠো পচ্চযসমূহো, তস্মিং দ্ৰাদসঙ্গে অনুলোমপটিচ্চসমুপ্পাদে কুসলভাৰো পটিচ্চসমুপ্পাদকুসলতা, ‘‘ইমিনা পচ্চযেন ইদং হোতী’’তি জাননৰসেন পৰত্তা লোকিযজৰনপঞ্ঞাৰ. একৰীসতিমদ্ৰাৰীসতিমানি.

তিট্ঠতি ¶ ¶ এত্থ ফলং তদাযত্তৰুত্তিতাযাতি ঠানং, কারণং, তস্মিং ঠানে কুসলতা ঠানকুসলতা. ন ঠানে কুসলতা অট্ঠানকুসলতা. তেৰীসতিমং.

উজুভাৰো অজ্জৰো. মুদুভাৰো মদ্দৰো. কাযচিত্তুজুকতামুদুকতাদ্ৰযং. চতুৰীসতিমং.

অধিৰাসনসঙ্খাতা খমনং খন্তি, তথাপৰত্তকামাৰচরজৰনানি. পাপতো সুট্ঠু ওরতো ৰিরতোতি সোরতো, তস্স ভাৰো সোরচ্চং. কাযৰচীমনোসংৰরসীলসঙ্খাতানি লোকিযলোকুত্তরজৰনানি. পঞ্চৰীসতিমং.

সম্মোদকপিযৰাদিতাসঙ্খাতো সখিলভাৰো সাখল্যং, যথা পরেহি সদ্ধিং অত্তনো ছিদ্দং ৰিৰরং ন হোতি, এৰং ধম্মামিসেহি পটিসন্থরণং পটিচ্ছাদনং পটিসন্থারো. আগন্তুকস্স হি পচ্চুগ্গমনপত্তচীৰরপটিগ্গহণআসনদানবীজনপাদধোৰনমক্খনাদিনা, পানীযেন আপুচ্ছনেন, কালে আগতস্স যাগুআদীনং, ৰিকালে পানকাদীনঞ্চ দানেন, পুনদিৰসে পিণ্ডায চরণট্ঠানদস্সনপৰেসননিক্খমনকালারোচনাদিনা চ পব্বজিতা, গহট্ঠানঞ্চ ৰিনযে আগতনযেন যথানুরূপং আমিসপটিসন্থারো কাতব্বো. আগন্তুকং পন উপসঙ্কমিত্ৰা ‘‘তুম্হে কতরভাণকা’’তি অপুচ্ছিত্ৰা ‘‘আচরিযুপজ্ঝাযা ৰো কতরং গন্থং ৰল়ঞ্জেন্তী’’তি পুচ্ছিত্ৰা তস্স ৰিসযে পঞ্হপুচ্ছনেন সচে ন সক্কোতি, সযং কথেত্ৰা দানেন, ধম্মকথনপঞ্হৰিস্সজ্জনকম্মট্ঠানকথনকুক্কুচ্চদিট্ঠিৰিনোদনাদিনা, পরিৰাসাদিৰিনযকম্মকরণেন, পব্বাজনউপসম্পদাদিনা চ ধম্মপটিসন্থারো কাতব্বো. অযমেত্থ সঙ্খেপো, ৰিত্থারতো পনাযং সদ্ধিং আনিসংসদীপকৰত্থূহি অট্ঠসালিনিযং (ধ. স. অট্ঠ. ১৩৫১) ঞাতব্বো. এতস্মিং দুৰিধে পটিসন্থারে কুসলভাৰো পটিসন্থারকুসলতা, তথাপৰত্তকামাৰচরজৰনানি এৰ. ছব্বীসতিমং.

ইন্দ্রিযেসু ¶ মনচ্ছট্ঠেসু আপাথগতরূপাদীসু আরম্মণেসু নিমিত্তগহণাদিনা ইন্দ্রিযসংৰরভেদসঙ্খাতো অগুত্তদ্ৰারভাৰো ইন্দ্রিযেসু অগুত্তদ্ৰারতা. পটিগ্গহণপরিভোগৰসেন ভোজনে মত্তং অজাননভাৰো ভোজনে অমত্তঞ্ঞুতা, তথাপৰত্তঅকুসলচিত্তানি. সত্তৰীসতিমং.

অনন্তরদুকেপি ¶ ৰুত্তপটিপক্খৰসেন কামাৰচরসহেতুককুসলকিরিযচিত্তানি ৰেদিতব্বানি. অট্ঠৰীসতিমং.

সতিৰিপ্পৰাসসঙ্খাতো মুট্ঠসতিভাৰো মুট্ঠস্সচ্চং, সব্বে অকুসলা ধম্মা, অসম্পজাননভাৰো অসম্পজঞ্ঞং, মোহো. একূনতিংসতিমং.

অনন্তরদুকে চতুভূমিকা সতিপঞ্ঞাৰ ৰুত্তা. তিংসতিমং.

অপ্পটিসঙ্খানে অপ্পটিৰানসঙ্খাতে অকম্পিযট্ঠেন যোনিসোদস্সনসঙ্খাতং পটিসঙ্খানমেৰ বলন্তি পটিসঙ্খানবলং, কামাৰচরপঞ্ঞাৰ. সত্তবোজ্ঝঙ্গাদিভাৰনাৰসেন পৰত্তা চতুভূমকধম্মা ভাৰনাবলং. একতিংসতিমং.

পচ্চনীকধম্মে সমেতীতি সমথো, সো তিৰিধো চিত্তসমথো অধিকরণসমথো সব্বসঙ্খারসমথোতি. তত্থ চ পুব্বভাগাসু অট্ঠসমাপত্তীসু একগ্গতা চিত্তসমথো নাম, সম্মুখাৰিনযাদি সত্তৰিধো অধিকরণসমথো নাম, নিব্বানং সব্বসঙ্খারসমথো নাম. ইধ পন চতুভূমকো সমাধি অধিপ্পেতো. অনিচ্চাদিৰসেন ৰিৰিধেনাকারেন পস্সতীতি ৰিপস্সনা, লোকিযলোকুত্তরা ৰিপস্সনাপঞ্ঞাৰ. বাত্তিংসতিমং.

সমথোৰ তং আকারং গহেত্ৰা পুন পৰত্তেতব্বস্স সমথস্স নিমিত্তন্তি সমথনিমিত্তং. পগ্গাহনিমিত্তেপি এসেৰ নযো. চতুভূমকসমাধিৰীরিযানি এৰ. তেত্তিংসতিমং.

অনন্তরদুকেপি ¶ ৰীরিযসমাধী এৰ ৰুত্তা. চতুত্তিংসতিমং.

সীলৰিনাসিকা অসংৰরসঙ্খাতা সীলস্স ৰিপত্তীতি সীলৰিপত্তি, তথাপৰত্তা অকুসলধম্মা. সম্মাদিট্ঠিযা ৰিপত্তি দিট্ঠিৰিপত্তি, মিচ্ছাদিট্ঠি এৰ. পঞ্চতিংসতিমং.

সোরচ্চমেৰ সীলস্স সম্পাদনতো সীলপরিপূরণতো সীলস্স সম্পদাতি সীলসম্পদা. দিট্ঠিপারিপূরিভূতং ¶ ঞাণমেৰ দিট্ঠিযা সম্পদাতি দিট্ঠিসম্পদা. চতুভূমকা সীলপঞ্ঞাৰ. তথা অনন্তরদুকেপি. ছত্তিংসতিমং.

ৰিসুদ্ধিভাৰং সম্পত্তা সীলসঙ্খাতা সীলস্স ৰিসুদ্ধি সীলৰিসুদ্ধি. নিব্বানসঙ্খাতং ৰিসুদ্ধিং পাপেতুং সমত্থা দস্সনসঙ্খাতা দিট্ঠিযা ৰিসুদ্ধি দিট্ঠিৰিসুদ্ধি. সত্তত্তিংসতিমং.

কম্মস্সকতাসচ্চানুলোমিকমগ্গফলসম্পযুত্তপঞ্ঞা দিট্ঠি ৰিসুদ্ধি নাম. যথাদিট্ঠিস্স তদনুরূপং পধানং যথাদিট্ঠিস্স চ পধানং নাম. অট্ঠতিংসতিমং.

সংৰেগজনকানি জাতিজরাব্যাধিমরণসঙ্খাতানি কারণানি সংৰেজনীযট্ঠানানি নাম, তেসু জাতিআদিপটিচ্চসমুপ্পন্নভযসঙ্খাতং সংৰিজনং সংৰেগো নাম, তথাপৰত্তকুসলাদি এৰ. এৰং সংৰেগজাতস্স যোনিসো উপাযেন পধানং সংৰিগ্গস্স যোনিসো পধানং, লোকিযলোকুত্তরৰীরিযমেৰ. একূনচত্তালীসতিমং.

কুসলধম্মপূরণে অসন্তুট্ঠিভাৰো অসন্তুট্ঠিতা. যো পন দানং দত্ৰা ততো তেন অসন্তুট্ঠো হুত্ৰা সরণগমনং আকঙ্খতি, ততো পঞ্চসীলাদিং, পব্বজ্জং, বুদ্ধৰচনানং উগ্গণ্হনং, সমথৰিপস্সনং, ততো তেনাপি অসন্তুট্ঠো অনুক্কমেন অরহত্তং গণ্হাতি, অযং অসন্তুট্ঠিতা কুসলেসু ধম্মেসু. অধিকুসলধম্মানং ভাৰনায উক্কণ্ঠমানো পধানং পটিৰাপেতি নিৰত্তাপেতীতি পটিৰানি, ন পটিৰানি ¶ অপ্পটিৰানি, তস্স ভৰো অপ্পটিৰানিতা. অরহত্তং অপ্পত্ৰা পধানস্মিং অনিৰত্তনতা অনোসক্কনতা, তথাপৰত্তলোকিযলোকুত্তরকুসলা ধম্মা. চত্তালীসতিমং.

ৰিজাননতো ৰিজ্জা, পুব্বেনিৰাসচুতূপপাতআসৰক্খযঞাণানি. ৰিমুচ্চনতো ৰিমুত্তি, অট্ঠ সমাপত্তিযো, নিব্বানঞ্চ. অট্ঠ সমাপত্তিযো হি আরম্মণে অধিমুচ্চনতো, সযং ৰিক্খম্ভিতকিলেসেহি ৰিমুচ্চনট্ঠেন চ ৰিমুত্তীতি ৰুত্তা, নিব্বানং পন সব্বকিলেসেহি অচ্চন্তৰিমুচ্চনট্ঠেন. একচত্তালীসতিমং.

কিলেসক্খযকরেসু ¶ চতূসু অরিযমগ্গেসু ঞাণং খযে ঞাণং নাম. পটিসন্ধিৰসেন অনুপ্পাদভূতে তংতংমগ্গৰজ্ঝকিলেসানং অনুপ্পাদপরিযোসানে উপ্পন্নঅরিযফলে ঞাণং অনুপ্পাদে ঞাণং নাম. সেসং সব্বত্থ সুৰিঞ্ঞেয্যমেৰ. দ্ৰাচত্তালীসতিমং.

সুত্তন্তিকদুকমাতিকত্থৰণ্ণনা নিট্ঠিতা.

মোহৰিচ্ছেদনিযা অভিধম্মমাতিকত্থৰণ্ণনায

ধম্মসঙ্গণীমাতিকত্থৰণ্ণনা নিট্ঠিতা.

২. ৰিভঙ্গমাতিকা

ইদানি ¶ ¶ ধম্মসঙ্গণীমাতিকানন্তরং ৰিভঙ্গমাতিকায অত্থৰণ্ণনা অনুপ্পত্তা. তস্সা পন –

অত্থতো ধম্মভেদেন, ৰিভঙ্গনযদস্সনা;

পাল়িমুত্তনযা চাপি, হোতি সংৰণ্ণনানযো.

সা পনেসা অট্ঠারসন্নং ৰিভঙ্গানং আদিম্হি ঠপিতা অট্ঠারসৰিধা হোতি – খন্ধৰিভঙ্গমাতিকা-আযতন-ধাতু-সচ্চ-ইন্দ্রিয-পচ্চযাকার-সতিপট্ঠান-সম্মপ্পধান-ইদ্ধিপাদবোজ্ঝঙ্গ-মগ্গঙ্গঝান-অপ্পমঞ্ঞা-সিক্খাপদ-পটিসম্ভিদা-ঞাণ-খুদ্দকৰত্থু-ধম্মহদযৰিভঙ্গমাতি

খন্ধৰিভঙ্গমাতিকত্থৰণ্ণনা

তত্থ আদিভূতায খন্ধৰিভঙ্গমাতিকায অত্থতো তাৰ – পঞ্চক্খন্ধাতি এত্থ পঞ্চাতি গণনপরিচ্ছেদো, তেন ন ততো হেট্ঠা, ন উদ্ধন্তি দস্সেতি. খন্ধাতি পরিচ্ছিন্নধম্মনিদস্সনং. তত্রাযং খন্ধ-সদ্দো সম্বহুলেসু ঠানেসু নিপততি রাসিম্হি গুণে পণ্ণত্তিযং রুল়্হিযন্তি. তত্থ ‘‘মহাউদকক্খন্ধো’’তিআদীসু (সং. নি. ৫.১০৩৭; অ. নি. ৪.৫১; ৫.৪৫; ৬.৩৭) হি রাসিতো খন্ধো নাম. ‘‘সীলক্খন্ধো সমাধিক্খন্ধো’’তিআদীসু (দী. নি. ৩.৩৫৫) গুণতো. ‘‘অদ্দসা খো ভগৰা মহন্তং দারুক্খন্ধ’’ন্তিআদীসু (সং. নি. ৪.২৪১) পণ্ণত্তিতো. ‘‘ৰিঞ্ঞাণং ৰিঞ্ঞাণক্খন্ধো’’তিআদীসু (ধ. স. ৬৩) একম্পি চিত্তং রুল়্হিতো খন্ধো নাম, স্ৰাযমিধ রাসিতো অধিপ্পেতো. রাসট্ঠো হি খন্ধ-সদ্দো, কোট্ঠাসট্ঠোতিপি ৰত্তুং ৰট্টতি. লোকস্মিং হি ইণং গহেত্ৰা চোদিযমানা ‘‘দ্ৰীহি খন্ধেহি দস্সাম ¶ , তীহি খন্ধেহি দস্সামা’’তি ৰদন্তি, তস্মা খন্ধোতি কোট্ঠাসোতি ৰুত্তং ¶ হোতি. রূপক্খন্ধোতি এত্থ রুপ্পতীতি রূপং, সীতুণ্হাদীহি পসিদ্ধাকারেন রুপ্পতি ঘট্টীযতি, পীল়িযতীতি অত্থো. ৰুত্তং হেতং ভগৰতা –

‘‘রুপ্পতীতি খো, ভিক্খৰে, তস্মা রূপন্তি ৰুচ্চতি. কেন রুপ্পতি? সীতেনপি রুপ্পতি, উণ্হেনপি রুপ্পতি, জিঘচ্ছাযপি রুপ্পতি, পিপাসাযপি রুপ্পতী’’তিআদি (সং. নি. ৩.৭৯).

রূপঞ্চ তং খন্ধো চাতি রূপক্খন্ধো, রূপরাসি রূপকোট্ঠাসোতি অত্থো. ৰেদনাক্খন্ধাদীসুপি এসেৰ নযোতি অযং তাৰেত্থ অত্থতো সংৰণ্ণনানযো.

ধম্মভেদতো পনেত্থ হেট্ঠা কুসলত্তিকে ৰিভত্তা অতীতাদিভেদভিন্না সব্বে রূপধম্মা রূপক্খন্ধো নাম. তথা চতুভূমকা ৰেদনাসঞ্ঞাযো ৰেদনাক্খন্ধো নাম, সঞ্ঞাক্খন্ধো নাম. ৰেদনাসঞ্ঞা পন ঠপেত্ৰা সেসা ফস্সাদযো পঞ্ঞাস চেতসিকা সঙ্খারক্খন্ধো নাম. পঞ্চসু খন্ধেসু নিব্বানমেৰ অসঙ্গহিতং, উপাদানক্খন্ধেসু পন সব্বে লোকুত্তরধম্মা. অযমেৰ হি খন্ধেহি উপাদানক্খন্ধানং ৰিসেসো. খন্ধা অৰিসেসতো ৰুত্তা, উপাদানক্খন্ধা সাসৰোপাদানিযভাৰেন ৰিসেসেত্ৰা. ইধ পন অৰিসেসেন ৰুত্তত্তা নিব্বানং ঠপেত্ৰা অৰসেসা সব্বে ধম্মা সঙ্গহং গচ্ছন্তীতি অযং ধম্মভেদতো সংৰণ্ণনানযো.

ৰিভঙ্গনযদস্সনাতি ৰিভঙ্গপাল়িযা আগতঅত্থনযদস্সনতো. ৰিভঙ্গপাল়িযং হি সুত্তন্তভাজনীযং অভিধম্মভাজনীযং পঞ্হাপুচ্ছকন্তি তীহি নযেহি খন্ধৰিভঙ্গো ৰিভত্তো. তথা আযতনৰিভঙ্গাদযো. কেৰলং হি ইন্দ্রিযৰিভঙ্গে, সিক্খাপদৰিভঙ্গে চ সুত্তন্তভাজনীযং নত্থি. পচ্চযাকারৰিভঙ্গে পঞ্হাপুচ্ছকং নত্থি. ঞাণৰিভঙ্গাদীসু পন তীসু তযোপি নযা ¶ ন সন্তি. তেসু হি ঞাণৰিভঙ্গো একৰিধতো পট্ঠায যাৰ দসৰিধা ৰিভত্তো, খুদ্দকৰত্থুৰিভঙ্গো একৰিধতো পট্ঠায যাৰ দ্ৰাসট্ঠিপভেদা ৰিভত্তো, ধম্মহদযৰিভঙ্গো পন সব্বসঙ্গহাদীহি দসহি ৰারেহি ৰিভত্তো, তস্মা তেসং তেসং নযানং মুখমত্তদস্সনৰসেন তত্থ তত্থ সংৰণ্ণনা ভৰিস্সন্তি. তত্রিদং খন্ধৰিভঙ্গে তিণ্ণং নযানং মুখমত্তদস্সনং. সেয্যথিদং – সুত্তন্তভাজনীযে তাৰ রূপক্খন্ধো –

‘‘তত্থ ¶ কতমো রূপক্খন্ধো? যং কিঞ্চি রূপং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, তদেকজ্ঝং অভিসঞ্ঞূহিত্ৰা অভিসঙ্খিপিত্ৰা অযং ৰুচ্চতি রূপক্খন্ধো’’তি (ৰিভ. ২) –

এৰং উদ্দিসিত্ৰা ৰিত্থারতো ৰিভত্তো, তথা ৰেদনাক্খন্ধাদযোপি. তত্থ নিযকজ্ঝত্তং নাম অজ্ঝত্তরূপং অজ্ঝত্তং নাম, ততো অঞ্ঞং পরপুগ্গলগতং, অৰিঞ্ঞাণঞ্চ বহিদ্ধা নাম, তথা ৰেদনাদযোপি. পসাদৰিসযরূপং পন ওল়ারিকং নাম, সেসং সুখুমং নাম. অনিট্ঠরূপং হীনং নাম, ইট্ঠরূপং পণীতং নাম.

ননু ইট্ঠানিট্ঠং নাম পাটেক্কং পটিৰিভত্তং নাম নত্থি, একং একচ্চস্স ইট্ঠং হোতি মনাপং, তদেৰ অঞ্ঞস্স চ অনিট্ঠং হোতি. ৰত্থাদীনি হি সূকরাদীনং নপ্পিযানি হোন্তি, ন মনুস্সাদীনং, তেসঞ্চ ৰত্থাভরণাদীনি পিযানি, ন সূকরাদীনন্তি, তস্মা রুচিৰসেনেৰ ইট্ঠানিট্ঠতা গহেতব্বা? ন, ইট্ঠানিট্ঠানং পাটেক্কং ৰিভত্তত্তা. কুসলকম্মজং হি কুসলৰিপাকৰিসযোৰ ইট্ঠং নাম, অকুসলকম্মজং অকুসলৰিপাকৰিসযোৰ অনিট্ঠং নাম, সঞ্ঞাৰিপল্লাসেন পন কোচি ¶ ইট্ঠমেৰ বুদ্ধরূপাদিং জৰনক্খণে অনিট্ঠতো মনসি করোতি, অনিট্ঠঞ্চ নিরযগ্গিসত্থৰিসাদিং ইট্ঠতো মনসি করোতি. জৰনেহি এৰ ৰিপল্লাসভাৰো, ন ৰিপাকেহীতি ৰিপাকৰসেন ইট্ঠানিট্ঠং নিযতং ৰেদিতব্বং.

সম্মোহৰিনোদনিযা পন ৰিভঙ্গট্ঠকথায –

‘‘সুখসম্ফস্সং হি গূথকললং চক্খুদ্ৰারঘানদ্ৰারেসু অনিট্ঠং, কাযদ্ৰারে ইট্ঠং হোতি. চক্কৰত্তিনো মণিরতনেন পোথিযমানস্স, সুৰণ্ণসূলে উত্তাসিযমানস্স চ মণিরতনসুৰণ্ণসূলানি চক্খুদ্ৰারে ইট্ঠানি হোন্তি, কাযদ্ৰারে অনিট্ঠানী’’তি (ৰিভ. অট্ঠ. ৬) –

এৰং দ্ৰারৰসেন একস্সেৰ ৰত্থুনো ইট্ঠতা, অনিট্ঠতা চ ৰুত্তা. সা চ একক্খণে ন যুত্তা এককলাপগতভূতোপাদাযরূপানং একসামগ্গিযমুপ্পত্তিতো. ন হি ভূতেসু অকুসলৰসেন অনিট্ঠেসু ¶ উপ্পজ্জন্তেসু তদুপাদাযরূপাদিকুসলেন ইট্ঠানি উপ্পজ্জন্তি, ভিন্নক্খণে পন ইট্ঠানি মণিরতনাদীনি তেহি পোথিযমানস্স অকুসলপচ্চযেন উতুনা অনিট্ঠানি ৰিপরিণমন্তি, কুসলপচ্চযেন অনিট্ঠানি গূথকললাদীনি ইট্ঠানীতি, অযং নো অত্তনোমতি. এৰং ৰিভত্তেসু চ ইট্ঠানিট্ঠেসু তং তং রূপং উপাদাযুপাদায হীনং, পণীতঞ্চ দট্ঠব্বং. সুখুমং পন রূপং দূরেরূপং নাম, ওল়ারিকং সন্তিকেরূপং নাম. তং তং ৰা পন রূপং উপাদাযুপাদায রূপং দূরে সন্তিকে দট্ঠব্বং. সেসং ৰুত্তনযমেৰ.

ৰেদনাদীসু পন অকুসলা ৰেদনা ওল়ারিকা, ইতরা সুখুমা. কুসলাকুসলা ওল়ারিকা, অব্যাকতা সুখুমা. দুক্খা ৰেদনা ওল়ারিকা, ইতরা সুখুমা. সুখদুক্খা ৰা ওল়ারিকা, ইতরা সুখুমা. অসমাপন্নস্স ৰা ৰেদনা ওল়ারিকা, সমাপন্নস্স সুখুমা. সাসৰা ওল়ারিকা ¶ , অনাসৰা সুখুমা. তং তং ৰা পন ৰেদনং উপাদাযুপাদায ওল়ারিকসুখুমতা দট্ঠব্বা. অকুসলা ৰেদনা কুসলাব্যাকতাহি দূরে, তা চ তায দূরেতি এৰং জাতিসভাৰপুগ্গলভূমিভেদতো ৰুত্তনযেন দূরেৰেদনা দট্ঠব্বা, কুসলা ৰেদনা কুসলায সন্তিকেতি এৰং জাতিআদিসামঞ্ঞতো সন্তিকেৰেদনা দট্ঠব্বা. তং তং ৰা পন ৰেদনং উপাদাযুপাদায ৰেদনা দূরেসন্তিকে দট্ঠব্বা. এৰং সঞ্ঞাক্খন্ধাদীসুপি যথানুরূপং ওল়ারিকসুখুমতাদযো ৰেদিতব্বাতি. অযমেত্থ সঙ্খেপো, ৰিত্থারো পন ৰিভঙ্গপাল়িঅট্ঠকথাসু (ৰিভ. ৮ আদযো; ৰিভ. অট্ঠ. ৮ আদযো) গহেতব্বোতি অযং সুত্তন্তভাজনীযনযো.

অভিধম্মভাজনীযনযে রূপক্খন্ধস্স তাৰ একৰিধাদিতো যাৰ একাদসৰিধা রূপকণ্ডে ৰুত্তনযেন ৰেদিতব্বা. ৰেদনাক্খন্ধো পন একৰিধো ফস্সসম্পযুত্তো, দুৰিধো সহেতুকদুকৰসেন, তিৰিধো কুসলত্তিকৰসেন, চতুব্বিধো চতুভূমকৰসেন, পঞ্চৰিধো সভাৰভেদেন, ছব্বিধো ছদ্ৰারিকৰসেন, সত্তৰিধো সত্তৰিঞ্ঞাণসম্পযোগৰসেন, অট্ঠৰিধো তেসু কাযৰিঞ্ঞাণসম্পযুত্তং সুখদুক্খৰসেন দ্ৰিধা ভিন্দিত্ৰা, নৰৰিধো তেসু মনোৰিঞ্ঞাণসম্পযুত্তং কুসলত্তিকৰসেন তিধা ভিন্দিত্ৰা, দসৰিধো তেসু কাযৰিঞ্ঞাণসম্পযুত্তং দুৰিধা, মনোৰিঞ্ঞাণসম্পযুত্তঞ্চ তিধা ভিন্দিত্ৰাতি এৰং সহেতুকদুকমূলং পঠমৰারং ৰত্ৰা পুন কুসলত্তিকট্ঠানে ৰেদনাত্তিকপীতিত্তিকসনিদস্সনত্তিকৰজ্জিতে সব্বত্তিকে যোজেত্ৰা যাৰ দসৰিধা, অপরেপি অট্ঠারস ৰারা ৰুত্তা. যথা চেত্থ সহেতুকদুকমূলিকা সব্বত্তিকযোজনা, এৰং হেতুসম্পযুত্তদুকাদীসু অনুরূপদুকমূলিকাপি সরণদুকপরিযোসানা পচ্চেকং সব্বত্তিকযোজনাপি ৰেদিতব্বাতি ¶ অযং দুকমূলকো যোজনানযো. যথা চ একেকদুকেন সব্বত্তিকযোজনাৰসেন দুকমূলকো ¶ নযো ৰুত্তো, এৰং একেকত্তিকেন যথানুরূপং সব্বদুকযোজনাৰসেন তিকমূলকো, তদুভযমিস্সকৰসেন উভতোৰড্ঢনকো চ নযো ৰেদিতব্বো. যথা চেত্থ ৰেদনাক্খন্ধে, এৰং সঞ্ঞাক্খন্ধাদীসুপি যথারহং দুকমূলকাদিনযা ৰেদিতব্বাতি অযং অভিধম্মভাজনীযনযো.

পঞ্হাপুচ্ছকনযে পন পঞ্চন্নং খন্ধানং কতি কুসলা, কতি অকুসলা, কতি অব্যাকতা, কতি সুখায ৰেদনায সম্পযুত্তা…পে… কতি সরণা, কতি অরণাতি? রূপক্খন্ধো অব্যাকতো, চত্তারো খন্ধা সিযা কুসলা, সিযা অকুসলা, সিযা অব্যাকতা, রূপং, ৰেদনা চ ৰেদনাত্তিকে ন ৰত্তব্বা, সেসা তিধাপি হোন্তি, রূপং নেৰৰিপাকনৰিপাকধম্মধম্মং, সিযা উপাদিন্নুপাদানিযং, সিযা অনুপাদিন্নুপাদানিযং, অসংকিলিট্ঠসংকিলেসিকং, সেসা চত্তারো খন্ধা তীহি তিকেহি তিধাপি হোন্তি. রূপং অৰিতক্কঅৰিচারং, তযো খন্ধা তিধাপি হোন্তি, সঙ্খারক্খন্ধো তিধা চ ন ৰত্তব্বো চ. রূপং ন ৰত্তব্বং, ৰেদনা সিযা পীতিসহগতা, ন ৰত্তব্বা, তযো তিধা চ ন ৰত্তব্বা চ. রূপং নেৰদস্সনেননভাৰনাযপহাতব্বং, নদস্সনেননভাৰনাযপহাতব্বহেতুকং, নেৰাচযগামিনঅপচযগামি, নেৰসেখংনাসেখং, পরিত্তং, সেসা তিধাপি হোন্তি. পরিত্তারম্মণত্তিকে রূপং অনারম্মণং, সেসা তিধা চ ন ৰত্তব্বা চ. রূপং মজ্ঝিমং, অনিযতং, সেসা তিধাপি. মগ্গারম্মণত্তিকে চ রূপং অনারম্মণং, সেসা তিধাপি ৰা ন ৰত্তব্বা. উপ্পন্নাতীতত্তিকেসু পঞ্চপি তিধা হোন্তি. অতীতারম্মণত্তিকে রূপং অনারম্মণং, সেসা তিধা চ ন ৰত্তব্বা চ. অজ্ঝত্তত্তিকে পঞ্চপি তিধা হোন্তি. অজ্ঝত্তারম্মণত্তিকে রূপং অনারম্মণং, সেসা তিধাপি ন ৰত্তব্বা চ. চত্তারো খন্ধা অনিদস্সনঅপ্পটিঘা, রূপক্খন্ধো তিধাপি হোতি.

চত্তারো ¶ খন্ধা নহেতূ, সঙ্খারক্খন্ধো সিযা হেতু, সিযা ন হেতু. রূপং অহেতুকং, হেতুৰিপ্পযুত্তং, সেসা দ্ৰিধাপি. তযো খন্ধা সিযা সহেতুকা চেৰ ন চ হেতূ, সিযা ন ৰত্তব্বা চ, সঙ্খারক্খন্ধো দ্ৰিধা চ ন ৰত্তব্বো চ, রূপং ন ৰত্তব্বমেৰ. তথা অনন্তরদুকেপি. রূপং নহেতুঅহেতুকং, তযো দ্ৰিধাপি, সঙ্খারক্খন্ধো দ্ৰিধা চ ন ৰত্তব্বো চ. পঞ্চপি সপ্পচ্চযা, সঙ্খতা, চত্তারো অনিদস্সনা, অপ্পটিঘা, রূপং দ্ৰিধাপি. রূপং রূপী, সেসা অরূপিনো. রূপং লোকিযং, সেসা দ্ৰিধাপি. পঞ্চপি কেনচি ৰিঞ্ঞেয্যা, ন চ কেনচি ৰিঞ্ঞেয্যা চ. চত্তারো নো আসৰা, সঙ্খারা দ্ৰিধাপি, ন ৰত্তব্বা চ. রূপং সাসৰো, আসৰৰিপ্পযুত্তো ¶ , সেসা দ্ৰিধাপি. রূপং সাসৰা চেৰ নো চ আসৰা, তযো তথা চ ন ৰত্তব্বা চ. সঙ্খারো দ্ৰিধা চ ন ৰত্তব্বো চ. রূপং ন ৰত্তব্বমেৰ, তযো সিযা আসৰসম্পযুত্তা চেৰ নো চ আসৰা, সিযা ন ৰত্তব্বা, সঙ্খারো দ্ৰিধা চ ন ৰত্তব্বো চ. রূপং আসৰৰিপ্পযুত্তং সাসৰঞ্চ, সেসা দ্ৰিধা চ ন ৰত্তব্বা চ. ইমিনা নযেন সংযোজনগোচ্ছকাদীসুপি যোজনা ৰেদিতব্বা. কেৰলং হি পরামাসসম্পযুত্তদুকে রূপং পরামাসৰিপ্পযুত্তং, তযো দ্ৰিধাপি, সঙ্খারো দ্ৰিধাপি, দিট্ঠিৰসেন ন ৰত্তব্বো চ. ততিযে এত্তকমেৰ ৰিসেসো. রূপং অনারম্মণং, সেসা সারম্মণা. ৰিঞ্ঞাণং চিত্তং, সেসা নো চিত্তা. তযো চেতসিকা, দ্ৰে অচেতসিকা. তযো চিত্তসম্পযুত্তা, রূপং চিত্তৰিপ্পযুত্তং. ৰিঞ্ঞাণং ন ৰত্তব্বং. তথা চিত্তসংসট্ঠদুকেপি. তযো চিত্তসমুট্ঠানা, ৰিঞ্ঞাণং নো চিত্তসমুট্ঠানং. রূপং দ্ৰিধাপি. তথা অনন্তরদুকদ্ৰযেপি. তযো চিত্তসংসট্ঠসমুট্ঠানা, দ্ৰে নো চিত্তসংসট্ঠসমুট্ঠানা. তথা অনন্তরদুকদ্ৰযেপি. ৰিঞ্ঞাণং অজ্ঝত্তিকং, তযো বাহিরা, রূপং দ্ৰিধাপি. চত্তারো নো উপাদা. রূপং দ্ৰিধাপি. পঞ্চপি সিযা উপাদিন্না, সিযা অনুপাদিন্না, নো উপাদানা.

কিলেসগোচ্ছকো ¶ ৰুত্তনযোৰ. রূপং নেৰদস্সনেননভাৰনায পহাতব্বং, সেসা দ্ৰিধাপি. এৰং যাৰপীতিদুকা যোজনা ৰেদিতব্বা.

রূপং ন ৰেদনা, ন সুখা, ন সুখসহগতা, সেসা দ্ৰিধাপি. তথা অনন্তরদুকেপি. রূপং কামাৰচরং, সেসা দ্ৰিধাপি. এৰং যাৰ সরণদুকা যোজনা ৰেদিতব্বা. অযং পঞ্হাপুচ্ছকনযো.

ইমে পন নযা ৰিত্থারতো পাল়িঅট্ঠকথাহি ঞাতব্বা. অত্থৰিনিচ্ছযো চ নেসং ধম্মসঙ্গণীমাতিকত্থসংৰণ্ণনায ৰুত্তানুসারেন ঞাতব্বো. ইতো পরং অতিরেকং অৰত্ৰা অপুব্বমেৰ ৰণ্ণযিস্সামাতি অযং ৰিভঙ্গনযদস্সনতো সংৰণ্ণনানযো.

ইদানি পনেত্থ –

কমতোনূনাধিকতো, দট্ঠব্বসমভেদতো;

পাল়িমুত্তনযো ঞেয্যো, খন্ধকোসল্লমিচ্ছতা.

তত্থ ¶ কমতোতি এত্থ উপ্পত্তিক্কমো পহানক্কমো পটিপত্তিক্কমো ভূমিক্কমো দেসনাক্কমোতি বহুৰিধেসু কমেসু খন্ধানং দেসনাক্কমোৰ যুজ্জতি, ন ইতরে, অসম্ভৰা. অভেদেন হি পঞ্চসু খন্ধেসু অত্তগ্গাহপতিতং ৰেনেয্যজনং সমূহঘনৰিনিব্ভোগদস্সনেন অত্তগ্গাহতো মোচেতুকামো ভগৰা হিতকামো তস্স তস্স জনস্স সুখগ্গহণত্থং চক্খুআদীনং ৰিসযভূতং ওল়ারিকং পঠমং রূপক্খন্ধং দেসেসি, ততো ইট্ঠানিট্ঠৰিসযসংৰেদকং ওল়ারিকং ৰেদনং, যং ৰেদেতি, তং সঞ্জানাতীতি এৰং ৰেদনাৰিসযস্স আকারগ্গাহিকং সঞ্ঞং, সঞ্ঞাৰসেনাভিসঙ্খারকে সঙ্খারে, তেসং ৰেদনাদীনং নিস্সযাধিপতিভূতং ৰিঞ্ঞাণন্তি অযং তাৰেত্থ কমো.

অনূনাধিকতোতি ¶ কস্মা পন ভগৰতা পঞ্চেৰ খন্ধা ৰুত্তা অনূনা অনধিকাতি? সব্বসঙ্খতসভাগেকসঙ্গহতো, অত্তত্তনিযগ্গাহৰত্থুস্স এতপ্পরমতো, অঞ্ঞেসঞ্চ তদৰরোধতো. অনেকপ্পভেদেসু হি সঙ্খতধম্মেসু সভাগৰসেন সঙ্গয্হমানেসু রূপং রূপসভাগেকসঙ্গহৰসেন একো খন্ধো হোতি, ৰেদনা ৰেদনাসভাগেকসঙ্গহৰসেন একো খন্ধো হোতি. এস নযো সঞ্ঞাদীসুপি, তস্মা সব্বসঙ্খতসভাগেকসঙ্গহতো পঞ্চেৰ ৰুত্তা. এতপরমঞ্চেতং অত্তত্তনিযগ্গাহৰত্থু, যদিদং রূপাদযো পঞ্চ, তস্মা অত্তত্তনিযগ্গাহৰত্থুস্স এতপরমতোপি পঞ্চেৰ ৰুত্তা. যেপি চঞ্ঞে সীলাদযো পঞ্চ ধম্মক্খন্ধা ৰুত্তা, তেপি সঙ্খারক্খন্ধপরিযাপন্নত্তা এত্থেৰ অৰরোধং গচ্ছন্তি, তস্মা অঞ্ঞেসং তদৰরোধতোপি পঞ্চেৰ ৰুত্তাতি অযং অনূনাধিকতো.

দট্ঠব্বসমভেদতোতি দট্ঠব্বভেদতো, উপমাভেদতো চ. তত্থ দট্ঠব্বভেদতো তাৰ পঞ্চুপাদানক্খন্ধা সামঞ্ঞতো উক্খিত্তাসিকপচ্চত্থিকতো, ভারতো, খাদকতো, অনিচ্চদুক্খঅনত্তসঙ্খাতৰধকতো চ দট্ঠব্বা. ৰিসেসতো পন ফেণপিণ্ডং ৰিয রূপং দট্ঠব্বং, উদকবুব্বুল়মরীচিককদলিক্খন্ধমাযা ৰিয যথাক্কমং ৰেদনাদযো দট্ঠব্বা. যথা হি ফেণপিণ্ডো ৰিমদ্দাসহো, সো চ পত্তথালকাদিঅত্থং গহিতোপি তমত্থং ন সাধেতি, ভিজ্জতি, এৰং রূপম্পি ৰিমদ্দাসহং, তঞ্চ সুভাদিৰসেন গহিতম্পি ন তথা তিট্ঠতি, অসুভাদিযেৰ হোতি.

যথা ৰা ফেণপিণ্ডো অনেকসন্ধিঘটিতো বহুন্নং উদকসপ্পাদিপাণকানং আৰাসো, আদিতো চেস বদরপক্কমত্তো হুত্ৰা অনুপুব্বৰড্ঢনকো উট্ঠিতমত্তোপি চেস ভিজ্জতি, থোকং গন্ত্ৰাপি, সমুদ্দং পত্ৰা পন অৰস্সমেৰ ভিজ্জতি ¶ , এৰং রূপম্পি ছিদ্দাৰছিদ্দং অনেকসন্ধিঘটিতং ¶ অসীতিকিমিকুলৰোকিণ্ণং, আদিতো চেতং কললমত্তং হুত্ৰা অনুপুব্বৰড্ঢনকং, কললমত্তেপি চেতং ভিজ্জতি, অব্বুদাদিভাৰেপি আযুক্খযং পত্ৰা অৰস্সমেৰ ভিজ্জতি. এৰং ফেণপিণ্ডসদিসং দট্ঠব্বং.

যথা পন বুব্বুল়ো মুহুত্তরমণীযো অগয্হুপগো ন চিরট্ঠিতিকোৰ, এৰং ৰেদনাপি. যথা চ বুব্বুল়ো উদকতলং, উদকবিন্দুং, উদকজল্লকং সঙ্কড্ঢিত্ৰা পুটং কত্ৰা গহণৰাতঞ্চাতি চত্তারি কারণানি পটিচ্চ উপ্পজ্জতি, এৰং ৰেদনাপি ৰত্থুং, আরম্মণং, কিলেসজল্লং, ফস্সসঙ্ঘট্টনঞ্চাতি চত্তারি কারণানি পটিচ্চ উপ্পজ্জতীতি সা বুব্বুল়সদিসা দট্ঠব্বা.

যথা পন মরীচিকা জলাসযাদিভাৰেন ৰিপ্পলম্ভিকা, এৰং সঞ্ঞাপি নিচ্চাদিভাৰেনাতি মরীচিসদিসা দট্ঠব্বা. যথা পন কদলিক্খন্ধো অগয্হুপগো বহুৰট্টিসমোধানো, এৰং সঙ্খারক্খন্ধোপি অগয্হুপগোনিচ্চাদিসারৰিরহিতো, ফস্সাদিবহুধম্মসমোধানো চ হোতীতি সো কদলিক্খন্ধসদিসো দট্ঠব্বো. যথা পন মাযা অসুৰণ্ণরজতাদিরূপানিপি তথা গাহাপেত্ৰা মহাজনং ৰঞ্চেতি, এৰং ৰিঞ্ঞাণম্পি অনিচ্চাদিরূপং তেনেৰ চিত্তেন আগচ্ছন্তং ৰিয নিচ্চাদিতো চ গাহাপেত্ৰা ৰঞ্চেতীতি তং মাযাসদিসং দট্ঠব্বং. ৰুত্তঞ্চ –

‘‘ফেণপিণ্ডূপমং রূপং, ৰেদনা বুব্বুল়ূপমা;

মরীচিকূপমা সঞ্ঞা, সঙ্খারা কদলূপমা;

মাযূপমঞ্চ ৰিঞ্ঞাণং, দেসিতাদিচ্চবন্ধুনা’’তি. (সং. নি. ৩.৯৫);

অযমেত্থ দট্ঠব্বভেদো.

উপমাভেদতো চ পন গিলানসালূপমো রূপুপাদানক্খন্ধো, গেলঞ্ঞূপমো ৰেদনুপাদানক্খন্ধো, গেলঞ্ঞসমুট্ঠানূপমো সঞ্ঞুপাদানক্খন্ধো, অসপ্পাযসেৰনূপমো সঙ্খারুপাদানক্খন্ধো ¶ , গিলানূপমো ৰিঞ্ঞাণুপাদানক্খন্ধো. অপিচ চারককারণঅপরাধকারণকারকঅপরাধিকূপমা এতে ভাজনভোজনব্যঞ্জনপরিৰেসকভুঞ্জকূপমা চাতি অযমেত্থ উপমাভেদো. এৰং পাল়িমুত্তকৰিনিচ্ছযনযো ঞেয্যো.

খন্ধৰিভঙ্গমাতিকত্থৰণ্ণনা নিট্ঠিতা.

আযতনৰিভঙ্গমাতিকত্থৰণ্ণনা

আযতনৰিভঙ্গমাতিকায ¶ পন অত্থতো তাৰ – দ্ৰাদসাযতনানীতি এত্থ আযতনতো, আযানং তননতো, আযতস্স চ নযনতো আযতনানি. চক্খুরূপাদীসু হি তংতংদ্ৰারারম্মণা চিত্তচেতসিকা ধম্মা সেন সেন অনুভৰনাদিনা কিচ্চেন আযতন্তি উপট্ঠহন্তি ঘটেন্তি ৰাযমন্তি, তে চ পন আযভূতে ধম্মে এতানি তনোন্তি ৰিত্থারেন্তি, ইদঞ্চ অতীৰ আযতং সংসারদুক্খং নযন্তেৰ, পৰত্তযন্তীতি ৰুত্তং হোতি, তস্মা ‘‘আযতনানী’’তি ৰুচ্চন্তি.

অপিচ নিৰাসট্ঠানট্ঠেন, আকরট্ঠেন, সমোসরণট্ঠানট্ঠেন, সঞ্জাভিদেসট্ঠেন, কারণট্ঠেন চ সাসনে, লোকে চ ‘‘আযতন’’ন্তি ৰুচ্চন্তি. চক্খুআদীসু হি তে তে চিত্তচেতসিকা ধম্মা তদাযত্তৰুত্তিতায নিৰসন্তি, তেসু চ আকরভূতেসু আকিণ্ণা ৰত্থারম্মণৰসেন চ সমোসরন্তি, চক্খাদযোৰ নেসং সঞ্জাতিদেসো, কারণঞ্চ, তস্মা নিৰাসট্ঠানাদিনা অত্থেন চক্খাদীনি আযতনানীতি ৰেদিতব্বানি.

চক্খাযতনন্তিআদীসু চক্খতীতি চক্খু, রূপং অস্সাদেতি, ৰিভাৰেতি চাতি অত্থো. রূপযতীতি রূপং. ৰণ্ণৰিকারং আপজ্জমানং ¶ হদযঙ্গতভাৰং পকাসেতীতি অত্থো. সুণাতীতি সোতং. সপ্পতীতি সদ্দো, উদাহরীযতীতি অত্থো. ঘাযতীতি ঘানং. গন্ধযতীতি গন্ধো, অত্তনো ৰত্থুং সূচযতীতি অত্থো. জীৰিতং অৰ্হাযতীতি জিৰ্হা. রসন্তি তং সত্তাতি রসো, অস্সাদেন্তীতি অত্থো. কুচ্ছিতানং সাসৰধম্মানং আযোতি কাযো, উপ্পত্তিদেসো. ফুসীযতীতি ফোট্ঠব্বং. মনতীতি মনো. অত্তনো লক্খণং ধারেন্তীতি ধম্মা. চক্খু চ তং যথাৰুত্তেনত্থেন আযতনঞ্চাতি চক্খাযতনং…পে… ধম্মা চ তে আযতনঞ্চাতি ধম্মাযতনন্তি অযং তাৰেত্থ পদত্থো.

ধম্মভেদতো পনেত্থ সব্বম্পি ৰিঞ্ঞাণং মনাযতনং নাম. চেতসিকসুখুমরূপনিব্বানানি ধম্মাযতনং নাম. সেসানি সুৰিঞ্ঞেয্যানি. ইমেসু চ আযতনেসু অতীতাদিভেদভিন্না, কালৰিনিমুত্তা চ লোকিযলোকুত্তরা সব্বে নামরূপধম্মা, পঞ্ঞত্তিযো চ সঙ্গহিতাতি ৰেদিতব্বা. ‘‘জাতি দ্ৰীহি খন্ধেহি একেনাযতনেন একায ধাতুযা সঙ্গহিতা’’তিআদিৰচনতো (ধাতু. ৭১) হি ¶ রূপারূপলক্খণানং জাতিজরাভঙ্গানং সঙ্খারক্খন্ধধম্মাযতনধম্মধাতূসু সঙ্গহিতত্তা ইতরাসম্পি পঞ্ঞত্তীনং যথারহং তত্থ সঙ্গহিতভাৰো ৰেদিতব্বোতি অযমেত্থ ধম্মভেদো.

ৰিভঙ্গনযতো পনেত্থ সুত্তন্তভাজনীযে তাৰ ‘‘চক্খুং অনিচ্চং দুক্খং অনত্তা ৰিপরিণামধম্মং. রূপা অনিচ্চা দুক্খা অনত্তা ৰিপরিণামধম্মা…পে… ধম্মা অনিচ্চা দুক্খা অনত্তা ৰিপরিণামধম্মা’’তি (ৰিভ. ১৫৪) এৰং ৰিসযিৰিসযাযতনৰসেন আযতনানি ৰুত্তানীতি অযং সুত্তন্তভাজনীযনযো.

অভিধম্মভাজনীযে পন পসাদৰিসযাযতনানি তাৰ ‘‘তত্থ কতমং চক্খাযতনং? যং চক্খু চতুন্নং মহাভূতানং উপাদায ¶ পসাদো’’তিআদিনা (ৰিভ. ১৫৬) রূপকণ্ডে (ধ. স. ৫৯৭) ৰুত্তনযেন ৰিভত্তানি. মনাযতনং পন একৰিধতো পট্ঠায যাৰদসৰিধা ৰেদনাক্খন্ধে ৰুত্তনযেন ৰিভত্তং. ধম্মাযতনং পন ‘‘তত্থ কতমং ধম্মাযতনং? ৰেদনাক্খন্ধো সঞ্ঞাক্খন্ধো সঙ্খারক্খন্ধো, যঞ্চ রূপং অনিদস্সনঅপ্পটিঘং ধম্মাযতনপরিযাপন্নং অসঙ্খতা চ ধাতূ’’তি (ৰিভ. ১৬৭) উদ্দিসিত্ৰা ‘‘তত্থ কতমো ৰেদনাক্খন্ধো’’তিআদিনা (ৰিভ. ১৬৭) ৰেদনাক্খন্ধাদীসু ৰুত্তনযেন ৰিভত্তং. সুখুমরূপনিব্বানানি রূপকণ্ডে ৰুত্তনযানেৰাতি অযং অভিধম্মভাজনীযনযো.

পঞ্হাপুচ্ছকনযং পন ইতো পরং ৰিত্থারতো অদস্সেত্ৰা তিকদুকানং আদিঅন্তেহি চেৰ ৰিসেসত্থদীপকেহি চ তিকদুকেহি যোজেত্ৰা দস্সযিস্সাম, সেসেহিপি তিকদুকেহি যোজনানযো খন্ধে ৰুত্তনযেন সক্কা ঞাতুন্তি. কথং দ্ৰাদসন্নং আযতনানং কতি কুসলা…পে… কতি অরণাতি? দসাযতনা অব্যাকতা, দ্ৰাযতনা সিযা কুসলা, সিযা অকুসলা, সিযা অব্যাকতা. ৰেদনাত্তিকে দসাযতনানি ন ৰত্তব্বানি, মনাযতনং তিধাপি, ধম্মাযতনং তিধা ন ৰত্তব্বঞ্চ…পে… রূপাযতনং সনিদস্সনসপ্পটিঘং, নৰাযতনানি অনিদস্সনসপ্পটিঘানি, মনাযতনধম্মাযতনানি অনিদস্সনঅপ্পটিঘানি, একাদসাযতনানি ন হেতূ, ধম্মাযতনং সিযা হেতু, সিযা ন হেতু…পে… একাদসাযতনানি সপ্পচ্চযানি, ধম্মাযতনং সিযা সপ্পচ্চযং, সিযা অপ্পচ্চযং…পে… দসাযতনানি রূপং, মনাযতনং অরূপং, ধম্মাযতনং দ্ৰিধাপি…পে… দসাযতনানি অরণানি, দ্ৰাযতনানি সিযা সরণানি, সিযা অরণানীতি অযং পঞ্হাপুচ্ছকনযো.

ইদানি ¶ পন –

কমতো তাৰত্ততো চ, তেসং দট্ঠব্বভেদতো;

পাল়িমুত্তনযেনেত্থ, ৰিঞ্ঞাতব্বো ৰিনিচ্ছযো.

তত্থ ¶ কমতোতি ইধাপি দেসনাক্কমোৰ যুজ্জতি. অজ্ঝত্তিকেসু হি আযতনেসু সনিদস্সনসপ্পটিঘৰিসযত্তা চক্খাযতনং পাকটন্তি পঠমং দেসিতং, ততো অনিদস্সনসপ্পটিঘৰিসযানি সোতাযতনাদীনি. অথ ৰা দস্সনানুত্তরিযসৰনানুত্তরিযহেতুভাৰতো বহূপকারত্তা চক্খুসোতাযতনানি পঠমং দেসিতানি, ততো ঘানাযতনাদীনি তীণি, পঞ্চন্নম্পি পন গোচরৰিসযত্তা অন্তে মনাযতনং, চক্খাযতনাদীনং গোচরত্তা তেসং অনন্তরং রূপাযতনাদীনি. অপিচ ৰিঞ্ঞাণুপ্পত্তিকারণৰৰত্থানতোপি অযমেতেসং কমো ৰেদিতব্বো. ৰুত্তং হেতং ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণ’’ন্তি (ম. নি. ৩.৪২১; সং. নি. ৪.৬০, ১১৩; মহানি. ১০৭) অযং তাৰেত্থ কমো.

তাৰত্ততোতি তাৰভাৰতো. ইদং ৰুত্তং হোতি – চক্খাদযোপি হি ধম্মা এৰ, এৰং সতি ধম্মাযতনমিচ্চেৰ অৰত্ৰা কস্মা দ্ৰাদসাযতনানি ৰুত্তানীতি চে? ছৰিঞ্ঞাণকাযুপ্পত্তিযা দ্ৰারারম্মণৰৰত্থানতো অযমেতেসং ভেদো হোতীতি দ্ৰাদস ৰুত্তানি. চক্খুৰিঞ্ঞাণৰীথিপরিযাপন্নস্স হি ৰিঞ্ঞাণকাযস্স চক্খাযতনমেৰ উপ্পত্তিদ্ৰারং, রূপাযতনমেৰারম্মণং. তথা ইতরানি ইতরেসং. ছট্ঠস্স পন ভৰঙ্গমনসঙ্খাতো মনাযতনেকদেসোৰ উপ্পত্তিদ্ৰারং, অসাধারণঞ্চ ধম্মাযতনং আরম্মণন্তি. ইতি ছন্নং ৰিঞ্ঞাণকাযানং উপ্পত্তিদ্ৰারারম্মণৰৰত্থানতো দ্ৰাদস ৰুত্তানীতি অযমেত্থ তাৰত্ততা.

দট্ঠব্বভেদতোতি এত্থ পন সব্বানি চেতানি আযতনানি অনাগমনতো, অনিগ্গমনতো চ দট্ঠব্বানি. ন হি তানি পুব্বে উদযা কুতোচি আগচ্ছন্তি, নপি উদ্ধং ৰযা কুহিঞ্চি গচ্ছন্তি ¶ , অথ খো পুব্বে উদযা অপ্পটিলদ্ধসভাৰানি উদ্ধং ৰযা পরিভিন্নসভাৰানি, পুব্বন্তাপরন্তৰেমজ্ঝে পচ্চযাযত্তৰুত্তিতায অৰসানি পৰত্তন্তি, তস্মা অনাগমনতো, অনিগ্গমনতো চ দট্ঠব্বানি. তথা নিরীহতো, অব্যাপারতো চ. ন হি চক্খুরূপাদীনং এৰং হোতি ¶ ‘‘অহো ৰত অম্হাকং সামগ্গিযং ৰিঞ্ঞাণং নাম উপ্পজ্জেয্যা’’তি, ন চ তানি ৰিঞ্ঞাণুপ্পাদনত্থং দ্ৰারভাৰেন, ৰত্থুভাৰেন, আরম্মণভাৰেন ৰা ব্যাপারমাপজ্জন্তি, অথ খো ধম্মতাৰেসা যং চক্খুরূপাদিসামগ্গিযং চক্খুৰিঞ্ঞাণাদীনি সম্ভৰন্তি, তস্মা নিরীহতো, অব্যাপারতো চ দট্ঠব্বানি. অপিচ অজ্ঝত্তিকানি সুঞ্ঞো গামো ৰিয দট্ঠব্বানি ধুৰসুভসুখত্তভাৰৰিরহিতত্তা, বাহিরানি গামঘাতকচোরা ৰিয. তথা অজ্ঝত্তিকানি ছপাণকা ৰিয দট্ঠব্বানি, বাহিরানি তেসং গোচরা ৰিযাতি অযমেত্থ দট্ঠব্বভেদো. এৰং পাল়িমুত্তনযেনেত্থ ৰিঞ্ঞাতব্বো ৰিনিচ্ছযো.

আযতনৰিভঙ্গমাতিকত্থৰণ্ণনা নিট্ঠিতা.

ধাতুৰিভঙ্গমাতিকত্থৰণ্ণনা

ধাতুৰিভঙ্গমাতিকায পন অত্থতো তাৰ – অট্ঠারস ধাতুযোতি এত্থ ৰিদহতি, ধীযতে, ৰিধানং, ৰিধীযতে এতায, এত্থ ৰা ধীযতীতি ধাতু. লোকিযা হি ধাতুযো কারণভাৰেন ৰৰত্থিতা. অনেকপ্পকারং সংসারদুক্খং ৰিদহন্তি নিপ্ফাদেন্তি, সত্তেহি চ ধীযন্তে ধারীযন্তি, দুক্খৰিধানমত্তমেৰ চেতা, এতাহি চ কারণভূতাহি সংসারদুক্খং সত্তেহি অনুৰিধীযতি, যথাৰিহিতঞ্চ দুক্খং এতাস্ৰেৰ ধীযতি ঠপীযতীতি এতেহি অত্থেহি যথাসম্ভৰং ‘‘ধাতুযো’’তি ৰুচ্চন্তি.

যথা ¶ ৰা সরীরসঙ্খাতস্স সমুদাযস্স অৰযৰভূতেসু রসসোণিতাদীসু অঞ্ঞমঞ্ঞং ৰিসভাগলক্খণপরিচ্ছিন্নেসু ধাতুসমঞ্ঞা, এৰমেতেসুপি পঞ্চক্খন্ধসঙ্খাতস্স অত্তভাৰস্স চক্খাদীসু ধাতুসমঞ্ঞা ৰেদিতব্বা. লোকিযলোকুত্তরসাধারণত্থৰসেন পন অত্তনো সভাৰং ধারেন্তীতি ধাতুযো. নিজ্জীৰমত্তানমেতং অধিৰচনং, তস্মা যথাৰুত্তেনত্থেন চক্খু চ তং ধাতু চাতি চক্খুধাতু. এৰং সেসেসুপীতি অযং তাৰেত্থ পদত্থো.

ধম্মভেদতো পনেত্থ আযতনেসু ৰুত্তনযেন ৰেদিতব্বো. অপিচ পঞ্চদ্ৰারাৰজ্জনসম্পটিচ্ছনদ্ৰযৰিঞ্ঞাণং ¶ মনোধাতু নাম. পঞ্চৰিঞ্ঞাণমনোধাতুৰজ্জিতং পন সব্বম্পি ৰিঞ্ঞাণং মনোৰিঞ্ঞাণধাতু নাম. সেসং সুৰিঞ্ঞেয্যমেৰ.

ৰিভঙ্গনযতো পনেত্থ সুত্তন্তভাজনীযে তাৰ – ‘‘পথৰীধাতু আপো তেজো ৰাযো আকাসৰিঞ্ঞাণধাতূ’’তি ছ ধাতুযো উদ্দিসিত্ৰা আদিতো পঞ্চ অজ্ঝত্তিকবাহিরৰসেন, পচ্ছিমা চ ছ ৰিঞ্ঞাণৰসেন ৰিভত্তা, অপরাপি ‘‘সুখধাতু দুক্খসোমনস্সদোমনস্সুপেক্খাঅৰিজ্জাধাতূ’’তি ছ ধাতুযো উদ্দিসিত্ৰা তথা তথা ৰিভত্তা, পুন অপরাপি ‘‘কামধাতু ব্যাপাদৰিহিংসানেক্খম্মঅব্যাপাদঅৰিহিংসাধাতূ’’তি ছ ধাতুযো উদ্দিসিত্ৰা, এৰং তীহি ছক্কেহি পচ্চেকং তেভূমকা অট্ঠারস ধাতুযো সরূপতো, লক্খণাহারতো, নিস্সযৰিসযপযোগৰিনাভাৰাদিতো চ ৰুত্তাতি ৰেদিতব্বাতি অযং সুত্তন্তভাজনীযনযো.

অভিধম্মভাজনীযে পন সরূপেনেৰ অট্ঠারস ধাতুযো উদ্দিসিত্ৰা পসাদৰিসযধাতুযো আযতনে ৰুত্তনযেন ৰিভত্তা, সত্ত ৰিঞ্ঞাণধাতুযো পন –

‘‘তত্থ কতমা চক্খুৰিঞ্ঞাণধাতু? চক্খুঞ্চ পটিচ্চ রূপে চ উপ্পজ্জতি চিত্তং…পে… চক্খুৰিঞ্ঞাণধাতু. অযং ৰুচ্চতি চক্খুৰিঞ্ঞাণধাতু…পে… কাযৰিঞ্ঞাণধাতু.

‘‘তত্থ ¶ কতমা মনোধাতু? চক্খুৰিঞ্ঞাণধাতুযা…পে… কাযৰিঞ্ঞাণধাতুযা…পে… নিরুদ্ধসমনন্তরা উপ্পজ্জতি চিত্তং…পে… সব্বধম্মেসু ৰা পন পঠমসমন্নাহারো উপ্পজ্জতি চিত্তং…পে… অযং ৰুচ্চতি মনোধাতু.

‘‘তত্থ কতমা ধম্মধাতু? ৰেদনাক্খন্ধো সঞ্ঞাক্খন্ধো সঙ্খারক্খন্ধো, যঞ্চ রূপং অনিদস্সনং অপ্পটিঘং ধম্মাযতনপরিযাপন্নং, অসঙ্খতা চ ধাতু…পে… অযং ৰুচ্চতি ধম্মধাতু.

‘‘তত্থ কতমা মনোৰিঞ্ঞাণধাতু…পে… মনোধাতুযাপি উপ্পজ্জিত্ৰা নিরুদ্ধসমনন্তরা ¶ উপ্পজ্জতি চিত্তং…পে… মনঞ্চ পটিচ্চ ধম্মে চ উপ্পজ্জতি চিত্তং…পে… অযং ৰুচ্চতি মনোৰিঞ্ঞাণধাতূ’’তি (ৰিভ. ১৮৪) –

এৰং ৰিভত্তা. তত্থ সব্বধম্মেসু ৰা পন পঠমসমন্নাহারোতি এত্থ পঞ্চৰিঞ্ঞাণৰিসযেসু সব্বধম্মেসূতি এৰং অত্থো গহেতব্বো. মনোধাতুযাপি উপ্পজ্জিত্ৰা নিরুদ্ধসমনন্তরাতি এত্থ পন পি-কারো সম্পিণ্ডনত্থো, তস্মা মনোধাতুযাপি সন্তীরণৰোট্ঠব্বনাদিমনোৰিঞ্ঞাণধাতুযাপীতি এৰমত্থো গহেতব্বো. মনঞ্চ পটিচ্চাতিআদীসু মনোদ্ৰারে ভৰঙ্গমনঞ্চেৰ চতুভূমকধম্মারম্মণঞ্চ পটিচ্চ সহাৰজ্জনকজৰনং নিব্বত্ততীতি অত্থো. অযং অভিধম্মভাজনীযনযো.

পঞ্হাপুচ্ছকনযে পন অট্ঠারসন্নং ধাতূনং কতি কুসলা…পে… কতি অরণাতি? সোল়স ধাতুযো অব্যাকতা, দ্ৰে ধাতুযো তিধাপি হোন্তি…পে… দস ধাতুযো নেৰৰিপাকনৰিপাকধম্মধম্মা, পঞ্চ ধাতুযো ৰিপাকা, মনোধাতু সিযা ৰিপাকা, সিযা নেৰৰিপাকনৰিপাকধম্মধম্মা, দ্ৰে ধাতুযো তিধাপি ¶ হোন্তি. দস ধাতুযো উপাদিন্নুপাদানিযা, সদ্দধাতুযো অনুপাদিন্নুপাদানিযা, পঞ্চ ধাতুযো সিযা উপাদিন্নুপাদানিযা, সিযা অনুপাদিন্নুপাদানিযা, দ্ৰে ধাতুযো তিধাপি…পে… দস ধাতুযো সিযা উপ্পন্না, সিযা উপ্পাদিনো, সদ্দধাতু সিযা উপ্পন্না, সিযা অনুপ্পন্না, সিযা ন ৰত্তব্বা উপ্পাদিনোতি, ছ ধাতুযো তিধাপি. ধম্মধাতু তিধাৰ…পে… রূপধাতু সনিদস্সনসপ্পটিঘা, নৰ ধাতুযো অনিদস্সনসপ্পটিঘা, অট্ঠ ধাতুযো অনিদস্সনঅপ্পটিঘা. সত্তরস ধাতুযো ন হেতূ, ধম্মধাতু দ্ৰিধাৰ…পে… সোল়স ধাতুযো অরণা, দ্ৰে ধাতুযো দ্ৰিধাপীতি অযং পঞ্হাপুচ্ছকনযো.

ইদানি পনেতাসং –

কমতাৰত্ততো দট্ঠব্বা, পচ্চযানং ৰিভাগতো;

ধাতূনমিধ ৰিঞ্ঞেয্যো, পাল়িমুত্তৰিনিচ্ছযো.

তত্থ কমতো তাৰ ইধাপি দেসনাক্কমোৰ যুজ্জতি. সো চ পনাযং হেতুফলানুপুব্বৰৰত্থানৰসেন ¶ ৰুত্তো. চক্খুধাতু রূপধাতূতি ইদং হি দ্ৰযং হেতু, চক্খুৰিঞ্ঞাণধাতূতি ইদং ফলং. এৰং সব্বত্থ. অযং তাৰেত্থ কমো.

তাৰত্ততো পন যা ইধ সুত্তন্তভাজনীযে তীহি ছক্কেহি ৰুত্তা ধাতুযো চেৰ, তেসু তেসু সুত্তাভিধম্মপদেসেসু ‘‘আভাধাতু…পে… অনেকধাতুনানাধাতুলোকো’’তিআদিনা আগতা চাতি অঞ্ঞাপি বহুধাতুযো দিস্সন্তি, তাসম্পি ৰসেন পরিচ্ছেদং অৰত্ৰা কস্মা অট্ঠারসেৰ ৰুত্তাতি? তাসম্পি তদন্তোগধত্তা.

অপিচ ৰিজাননসভাৰে ৰিঞ্ঞাণে জীৰসঞ্ঞীনং তস্সা চক্খুৰিঞ্ঞাণাদিভেদেন অনেকতং, চক্খুরূপাদিপচ্চযাযত্তৰুত্তিতায অনিচ্চতঞ্চ পকাসেত্ৰা তস্মিং দীঘরত্তানুসযিতজীৰসঞ্ঞাসমূহননত্থঞ্চ অট্ঠারসেৰ ৰুত্তা. কিঞ্চ ভিয্যো ¶ – ৰেনেয্যজ্ঝাসযৰসেন চ. ৰেনেয্যা হি অরূপমূল়্হো রূপমূল়্হো উভযমূল়্হোতি তিৰিধা হোন্তি. তেসং তিণ্ণম্পি যথাক্কমং নাতিসঙ্খেপৰিত্থারতো অরূপভেদৰিভাৰিনী খন্ধদেসনা, রূপভেদৰিভাৰিনী আযতনদেসনা, তদুভযভেদৰিভাৰিনী ধাতুদেসনা সপ্পাযাতি ৰেনেয্যজ্ঝাসযৰসেন অট্ঠারসেৰ ৰুত্তাতি. ৰুত্তঞ্চ –

‘‘সঙ্খেপৰিত্থারনযেন তথা তথা হি,

ধম্মং পকাসযতি এস যথা যথাস্স;

সদ্ধম্মতেজৰিহতং ৰিলযং খণেন,

ৰেনেয্যসত্তহদযেসু তমো পযাতী’’তি. (ৰিভ. অট্ঠ. ১৮৩);

অযমেত্থ তাৰত্ততা.

দট্ঠব্বতো পনেতা সব্বাপি সঙ্খতা ধাতুযো পুব্বন্তাপরন্তৰিৰিত্ততো, ধুৰসুভসুখত্তভাৰসুঞ্ঞতো, পচ্চযাযত্তৰুত্তিতো চ দট্ঠব্বা. ৰিসেসতো পনেত্থ ভেরিতলং ৰিয চক্খুধাতু দট্ঠব্বা, দণ্ডো ৰিয রূপধাতু, সদ্দো ৰিয চক্খুৰিঞ্ঞাণধাতু. তথা তিস্সোপি চেতা যথাক্কমং আদাসতলমুখমুখনিমিত্তানি ৰিয. তথা তিলযন্তচক্কতেলানি ৰিয, অধরারণীউত্তরারণীঅগ্গী ৰিয চ দট্ঠব্বা. এস নযো সোতধাতুআদীসুপি. মনোধাতু পন যথাসম্ভৰতো চক্খুৰিঞ্ঞাণধাতুআদীনং পুরেচরানুচরা ৰিয দট্ঠব্বা. ধম্মধাতুযং পন ৰেদনা সল্লসূলমিৰ ¶ , সঞ্ঞা রিত্তমুট্ঠি ৰিয, সঙ্খারা ৰিসরুক্খমিৰ, সুখুমরূপং খুরচক্কং ৰিয, অসঙ্খতা ধাতু খেমন্তভূমি ৰিয চ দট্ঠব্বা, মনোৰিঞ্ঞাণধাতু পন মক্কটো ৰিয, অস্সখল়ুঙ্কো ৰিয, যত্থকামনিপাতিতো ৰেহাসক্খিত্তদণ্ডো ৰিয, রঙ্গনটো ৰিয চ দট্ঠব্বা. অযমেত্থ দট্ঠব্বতা.

পচ্চযানং ¶ ৰিভাগতো পনেত্থ চক্খুৰিঞ্ঞাণধাতুযা চক্খু নিস্সযপচ্চযো, রূপং আরম্মণপচ্চযো, কিরিযামনোধাতু অনন্তরপচ্চযো, তযো অরূপিনো খন্ধা সহজাতপচ্চযো. এৰং সোতৰিঞ্ঞাণাদীসুপি. মনোৰিঞ্ঞাণধাতুযা পন মনোধাতু অনন্তরপচ্চযো, ধম্মধাতু আরম্মণপচ্চযো, সম্পযুত্তনিস্সযসহজাতাদিপচ্চযোতি অযং পচ্চযৰিভাগো. এৰং ৰিঞ্ঞেয্যো পাল়িমুত্তৰিনিচ্ছযো.

ধাতুৰিভঙ্গমাতিকত্থৰণ্ণনা নিট্ঠিতা.

সচ্চৰিভঙ্গমাতিকত্থৰণ্ণনা

সচ্চৰিভঙ্গমাতিকায পন অত্থতো তাৰ – চত্তারি অরিযসচ্চানীতি এত্থাযং সচ্চ-সদ্দো অনেকেসু অত্থেসু দিস্সতি. সেয্যথিদং – ‘‘সচ্চং ভণে ন কুজ্ঝেয্যা’’তিআদীসু (ধ. প. ২২৪) ৰাচাসচ্চে. ‘‘সচ্চে ঠিতা সমণব্রাহ্মণা’’তিআদীসু (জা. ২.২১.৪৩৩) ৰিরতিসচ্চে. ‘‘কস্মা নু সচ্চানি ৰদন্তি নানা, পৰাদিযাসে কুসলাৰদানা’’তিআদীসু (সু. নি. ৮৯১) দিট্ঠিসচ্চে. ‘‘একং হি সচ্চং, ন দুতিযমত্থী’’তিআদীসু (সু. নি. ৮৯০) পরমত্থসচ্চে, নিব্বানে চেৰ মগ্গে চ. ‘‘চতুন্নং অরিযসচ্চানং কতি কুসলা’’তিআদীসু (ৰিভ. ২১৬) অরিযসচ্চে. স্ৰাযমিধাপি অরিযসচ্চে ৰত্ততি. কেনট্ঠেন সচ্চানি? তথট্ঠেন. কোযং তথট্ঠো নাম? যো পঞ্ঞাচক্খুনা উপপরিক্খমানানং মাযাৰ ৰিপরীতো, মরীচীৰ ৰিসংৰাদকো, তিত্থিযানং অত্থা ৰিয অনুপলব্ভমানসভাৰো চ ন হোতি, অথ খো বাধনপ্পভৰসন্তিনিয্যানভূতেন তচ্ছাৰিপরীতভূতভাৰেন অরিযঞাণস্স গোচরো হোতি. অযং তথট্ঠো সচ্চট্ঠোতি ৰেদিতব্বো. ৰুত্তঞ্চ –

‘‘ইতি ¶ ¶ তচ্ছাৰিপল্লাসভূতভাৰং চতূসুপি;

দুক্খাদীস্ৰৰিসেসেন, সচ্চট্ঠং আহু পণ্ডিতা’’তি (ৰিভ. অট্ঠ. ১৮৯; সারত্থ. টী. মহাৰগ্গ ৩.১৪).

অরিযানি চ তানি সচ্চানি চাতি অরিযসচ্চানি. অরিযানীতি উত্তমানি, অৰিসংৰাদকানীতি অত্থো. অরিযেহি বুদ্ধাদীহি পটিৰিজ্ঝিতব্বানি সচ্চানি, অরিযস্স ৰা সম্মাসম্বুদ্ধস্স সন্তকানি সচ্চানি তেন উপ্পাদিতত্তা, পকাসিতত্তা চ, অরিযভাৰকরানি ৰা সচ্চানি তেসং অভিসম্বুদ্ধত্তা অরিযভাৰসিদ্ধিতোতি অরিযসচ্চানি. ‘‘দুক্খং অরিযসচ্চ’’ন্তিআদীসু পন দু-ইতি অযং সদ্দো কুচ্ছিতে দিস্সতি. কুচ্ছিতং হি পুত্তং ‘‘দুপুত্তো’’তি ৰদন্তি. খং-সদ্দো পন তুচ্ছে. তুচ্ছং হি আকাসং ‘‘খ’’ন্তি ৰুচ্চতি. ইদঞ্চ পঠমসচ্চং কুচ্ছিতং অনেকোপদ্দৰাধিট্ঠানতো, তুচ্ছং বালজনপরিকপ্পিতধুৰসুভসুখত্তভাৰৰিরহিততো, তস্মা কুচ্ছিতত্তা, তুচ্ছত্তা চ ‘‘দুক্খ’’ন্তি ৰুচ্চতি. সং-ইতি চ অযং সদ্দো ‘‘সমাগমো, সমেত’’ন্তিআদীসু সংযোগং দীপেতি. উ-ইতি অযং সদ্দো ‘‘উপ্পন্নং উদিত’’ন্তিআদীসু উপ্পত্তিং. অয-সদ্দো পন কারণং দীপেতি. ইদঞ্চ দুতিযসচ্চং অৰসেসপচ্চযসমাযোগে সতি দুক্খস্সুপ্পত্তিকারণন্তি ‘‘দুক্খসমুদযো’’তি ৰুচ্চতি.

ততিযসচ্চং পন যস্মা নি-সদ্দো অভাৰং, রোধ-সদ্দো চারকং দীপেতি, তস্মা অভাৰো এত্থ, এতস্মিং ৰা অধিগতে সংসারচারকসঙ্খাতস্স দুক্খনিরোধস্স সব্বগতিসুঞ্ঞত্তা, তপ্পটিপক্খত্তা চাতি ‘‘দুক্খনিরোধ’’ন্তি ৰুচ্চতি, দুক্খস্স ৰা অনুপ্পাদনিরোধপচ্চযত্তা. চতুত্থং পন যস্মা এতং দুক্খনিরোধং গচ্ছতি, সত্তং ৰা তং গমযতি আরম্মণৰসেন তদভিমুখত্তা, পটিপদা চ হোতি দুক্খনিরোধপ্পত্তিযা, তস্মা ‘‘দুক্খনিরোধগামিনী পটিপদা’’তি ৰুচ্চতি.

অপিচ ¶ দুক্খাদীনং চত্তারো চত্তারো অত্থা ৰিভত্তা তথা অৰিতথা অনঞ্ঞথা, যে দুক্খাদীনি অভিসমেন্তেহি অভিসমেতব্বা. যথাহ –

‘‘দুক্খস্স পীল়নট্ঠো সঙ্খতট্ঠো সন্তাপট্ঠো ৰিপরিণামট্ঠো, ইমে চত্তারো দুক্খস্স দুক্খট্ঠা তথা অৰিতথা অনঞ্ঞথা. সমুদযস্স আযূহনট্ঠো নিদানট্ঠো সংযোগট্ঠো পলিবোধট্ঠো ¶ …পে… নিরোধস্স নিস্সরণট্ঠো ৰিৰেকট্ঠো অসঙ্খতট্ঠো অমতট্ঠো…পে… মগ্গস্স নিয্যানট্ঠো হেত্ৰট্ঠো দস্সনট্ঠো আধিপতেয্যট্ঠো…পে… অনঞ্ঞথা’’তি (পটি. ম. ২.৮).

এৰং ৰিভত্তানং চতুন্নং চতুন্নং অত্থানং ৰসেন দুক্খাদীনি ৰেদিতব্বানি. অযং তাৰেত্থ পদত্থো.

ধম্মভেদতো পন তণ্হাৰজ্জিতা সব্বলোকিযধম্মা, সংকিলেসিকৰজ্জিতা ৰা দুক্খসচ্চং নাম, তণ্হা পন সব্বা অকুসলা ৰা লোকিযকুসলা ৰা ধম্মা সমুদযসচ্চং নাম, নিব্বানং নিরোধসচ্চং নাম, লোকুত্তরকুসলচিত্তসম্পযুত্তানি অট্ঠমগ্গঙ্গানি দুক্খনিরোধগামিনী পটিপদা অরিযসচ্চং নাম. ইমেহি পন মগ্গঙ্গেহি সম্পযুত্তা চিত্তচেতসিকা ধম্মা চেৰ সামঞ্ঞফলানি চেত্থ অসঙ্গহিতানীতি ৰেদিতব্বানি. তানি হি ‘‘যদনিচ্চং তং দুক্খ’’ন্তি (সং. নি. ৩.১৫) ৰচনতো সঙ্খারদুক্খসঙ্গহিতানিপি. যায পরিঞ্ঞায ভগৰতি ব্রহ্মচরিযং ৰুস্সতি তথত্তেন ন হোন্তি, দুক্খং অরিযসচ্চন্তি ন ৰুচ্চন্তি, তানি ঠপেত্ৰা সব্বে লোকিযলোকুত্তরধম্মা সঙ্গহিতাতি দট্ঠব্বা. অযং ধম্মভেদো.

ৰিভঙ্গনযতো পনেত্থ সুত্তন্তভাজনীযে দুক্খসচ্চং তাৰ –

‘‘তত্থ ¶ কতমং দুক্খং অরিযসচ্চং? জাতিপি দুক্খা, জরাপি দুক্খা, মরণম্পি দুক্খং, সোকপরিদেৰদুক্খদোমনস্সুপাযাসাপি দুক্খা, অপ্পিযেহি সম্পযোগো দুক্খো, পিযেহি ৰিপ্পযোগো দুক্খো, যম্পিচ্ছং ন লভতি, তম্পি দুক্খং, সংখিত্তেন পঞ্চুপাদানক্খন্ধা দুক্খা’’তি (ৰিভ. ১৯০) –

উদ্দিসিত্ৰা ৰিভত্তং. তত্থ দুক্খং তিৰিধং হোতি দুক্খদুক্খং ৰিপরিণামদুক্খং সঙ্খারদুক্খন্তি. তত্থ দুক্খদুক্খং দুৰিধং পরিযাযদুক্খং নিপ্পরিযাযদুক্খন্তি. তত্থ কাযিকচেতসিকদুক্খদোমনস্সৰেদনা নিপ্পরিযাযদুক্খং নাম, তদৰসেসা পন দুক্খদুক্খস্স ৰত্থুভূতা পঞ্চুপাদানক্খন্ধা পরিযাযদুক্খং নাম. সুখসোমনস্সৰেদনা ৰিপরিণামদুক্খং নাম. সব্বে পন পঞ্চুপাদানক্খন্ধা, সব্বসঙ্খতা ৰা সঙ্খারদুক্খং নাম. ইমেসং তিণ্ণং দুক্খানং ৰসেন যথাযোগং তীসু ¶ ভৰেসু জাতিআদীনং দুক্খদুক্খতা ৰেদিতব্বা. কামভৰস্মিং হি জাতি তাৰ সযং ন দুক্খা, অপাযগতিমনুস্সগতিআদীসু পন নিরযগ্গিসন্তাপাদিমূলকং, গব্ভোক্কন্তিকাদিমূলকং, জিঘচ্ছাপিপাসাদিমূলকঞ্চ দুক্খং তস্স সব্বস্স কাযিকচেতসিকদুক্খস্স ৰত্থুভাৰেন পরিযাযতো দুক্খন্তি. তথা জরামরণাদযোপি. কেৰলং জরা কাযদুব্বলতামূলস্স, পুত্তদারাদিপরিভৰমূলস্স চ, মরণং পন মারণন্তিকৰেদনাভূতস্স, নিরযাদিগতিনিমিত্তদস্সনমূলস্স চ দুক্খস্স ৰত্থুভাৰতো, সোকাদযো সোকাদিমূলস্স কাযিকচেতসিকদুক্খস্স ৰত্থুভাৰত্তা চেৰ সযং দুক্খত্তা চ দুক্খাতি ৰেদিতব্বা. ৰিপরিণামদুক্খসঙ্খারদুক্খতা চেসং পসিদ্ধাযেৰ. এৰং কামভৰে জাতিআদীনং তীহিপি দুক্খেহি দুক্খতা ৰেদিতব্বা. রূপারূপভৰেসু পন যস্মা সোকপরিদেৰদুক্খদোমনস্সুপাযাসা ন সন্তি, তস্মা তত্থ জাতিআদীনং ¶ ৰিপরিণামদুক্খসঙ্খারদুক্খৰসেন চ দুক্খতা ৰেদিতব্বা, ন দুক্খদুক্খৰসেনাতি অযং দুক্খসচ্চে নযো.

সমুদযসচ্চং পন ‘‘কামতণ্হা ভৰতণ্হা ৰিভৰতণ্হা’’তি (ৰিভ. ২০৩) তত্তকমেৰ উদ্দিসিত্ৰা ‘‘সা খো পনেসা তণ্হা কত্থ উপ্পজ্জমানা উপ্পজ্জতী’’তি (ৰিভ. ২০৩) পুচ্ছিত্ৰা ছন্নং ছন্নং ইন্দ্রিযৰিসযৰিঞ্ঞাণফস্সৰেদনাসঞ্ঞাচেতনাতণ্হাৰিতক্কৰিচারানং ৰিসযভূতানং ৰসেন তণ্হায ‘‘এত্থেসা তণ্হা উপ্পজ্জমানা উপ্পজ্জতী’’তি এৰং উপ্পত্তিং পকাসেত্ৰা ৰিত্থারতো ৰিভত্তং.

নিরোধসচ্চং পন ‘‘তস্সা এৰ তণ্হায অসেসৰিরাগনিরোধো চাগো পটিনিস্সগ্গো মুত্তি অনালযো’’তি (ৰিভ. ২০৪) ৰত্ৰা পুন ‘‘সা খো পনেসা তণ্হা কত্থ নিরুজ্ঝমানা নিরুজ্ঝতী’’তি (ৰিভ. ২০৪) পুচ্ছিত্ৰা সমুদযসচ্চে ৰুত্তইন্দ্রিযাদীনং ৰসেন পটিলোমতো তণ্হায নিরোধং পকাসেত্ৰা ৰিত্থারতো ৰিভত্তং. তত্থ অসেসৰিরাগনিরোধোতিআদীনি পদানি নিব্বানৰেৰচনানি. নিব্বানং হি আগম্ম তণ্হা অসেসা ৰিরজ্জতি, নিরুজ্ঝতি, চজীযতি, পটিনিস্সজ্জীযতি, মুচ্চতি, ন অল্লীযতি, তস্মা ‘‘অসেসৰিরাগনিরোধো চাগো পটিনিস্সগ্গো মুত্তি অনালযো’’তি ৰুচ্চতি. একমেৰ হি নিব্বানং, নামানি পনস্স সব্বসঙ্খতানং নামপটিপক্খৰসেন অনেকানি হোন্তি.

ননু পাটেক্কং নিব্বানং নাম নত্থি, কিলেসক্খযমত্তমেৰ নিব্বানং, তেনেৰ চ তাসু তাসু ¶ সুত্তাভিধম্মদেসনাসু ‘‘রাগক্খযো দোসক্খযো’’তিআদিনা (সং. নি. ৪.৩১৪) ৰুত্তন্তি চে? ন, অরহত্তনিব্বানানং একতাপজ্জনতো. অরহত্তম্পি হি ‘‘যো খো, আৰুসো, রাগক্খযো দোসক্খযো মোহক্খযো, ইদং ৰুচ্চতি অরহত্ত’’ন্তি (সং. নি. ৪.৩১৪) রাগাদীনং পরিক্খযন্তে উপ্পন্নত্তা উপচারেন ¶ অরহত্তং রাগক্খযাদিভাৰেন ৰুচ্চতি, তথা রাগাদীনং খযহেতুত্তা নিব্বানম্পি রাগক্খযাদিভাৰেন ৰুত্তন্তি গহেতব্বং. ইতরথা নিব্বানস্স বহুত্তং আপজ্জতি রাগাদীনং বহুন্নং খযস্সাপি বহুত্তা. সব্বকিলেসানম্পি খযস্স একত্তেন পঠমমগ্গেন দিট্ঠিআদীনং খযে সব্বকিলেসক্খযো আপজ্জতি, ওল়ারিকত্তঞ্চস্স সিযা তিরচ্ছানানম্পি উপ্পন্নরাগক্খযস্স পাকটত্তেন নিব্বানপ্পত্তিতো, গোত্রভূক্খণেপি চ রাগাদিক্খযো হোতি গোত্রভুনো নিব্বানৰিসযত্তা, মগ্গস্স পন নিব্বানারম্মণতাঅপ্পসঙ্গো. ন হি অত্তনা খেপিযমানকিলেসক্খযমারব্ভ মগ্গো উপ্পজ্জতি, অভাৰো চস্স আপজ্জতি রাগাদিক্খযভূতস্স পন অভাৰস্স পক্খৰসেন তুচ্ছরূপত্তা, তস্সাপি ভাৰত্তাভাৰাৰ ৰিৰেকলক্খণং ন সিযা, সঙ্খততা চস্স সিযা. ন হি কদাচি উপলব্ভমানং অসঙ্খতং ভৰিতুমরহতি সব্বেসম্পি অহেতুকত্তাপত্তিতো, সঙ্খতত্তেপি চস্স ন নিব্বানত্তং উপ্পত্তিজরাভঙ্গসমঙ্গিতায দুক্খত্তা, তথা চ অভাৰস্সাপি অভাৰো, অনৰট্ঠানঞ্চ খীণানম্পি রাগাদীনং পুন উপ্পজ্জনং যেসং তেসমেৰ অভাৰো অভাৰস্স ৰিনট্ঠত্তা.

অপিচ কারণন্তরেন ৰা ভাৰে উপ্পন্নে রাগাদীনং ন কাচি হানি হোতি. ন হি অঞ্ঞস্সুপ্পত্তিযং অঞ্ঞং ৰিগচ্ছতি. অভাৰো ভাৰস্স ৰিরোধি, ৰিরোধিসন্নিধানে চ ইতরং ৰিগচ্ছতীতি চে? কিমিদং ৰিগমনং নাম. যদি তম্পি ভাৰরূপং, সমানদোসতা চস্স সিযা অনৰট্ঠানঞ্চ, ন চ অত্থসিদ্ধি. যদি তুচ্ছরূপং, কিং পঠমমেৰস্স তুচ্ছরূপতায উপগতায দূরম্পি গন্ত্ৰা উপগন্তব্বাতি সিদ্ধা, রাগাদিক্খযভূতস্স নিব্বানস্স তুচ্ছরূপতায অভাৰো, ন চ অভাৰো এৰ নিব্বানং. অতীতানাগতদোসানমভাৰে নিব্বানপ্পত্তিযা অভাৰতো ৰত্তমানানঞ্চ ¶ অভাৰো নাম. অভাৰো নাম ন কিলেসৰিগমমত্তো, অপি তু অনুপ্পত্তিভাৰেন. অচ্চন্তৰিগমো নিব্বানেনাপি সম্পাদীযতীতি চে? ন, তস্স কারণভাৰা. ৰিপস্সনা কারণমিতি চে? ন, অত্তাদিৰিকপ্পজনকসঙ্খতধম্মদস্সনেন ৰিনা অনত্তাদিৰিকপ্পভূতায ৰিপস্সনায অনুপ্পত্তিতো. যদি হি উপ্পজ্জেয্য, তায সব্বেপি সত্তা ৰিমুত্তা এৰ সিযুং, নো চ কদাচি ন পুচ্ছেয্য ৰিরুদ্ধধম্মদস্সনাভাৰা. ন হি দস্সনং ৰিনা ৰিকপ্পো সম্ভৰতি, ন চ অত্তাতি ৰিকপ্পজনকরূপাদিদস্সনমেৰ তব্বিরুদ্ধৰিকপ্পজনকং ¶ হোতি. বুদ্ধানঞ্চ পরম্পরোপদেসেন রূপাদীসু ৰিপস্সনাৰিকপ্পো উপ্পজ্জতীতি চে? ন, তেসম্পি ৰিরুদ্ধদস্সনাভাৰেন ৰিপস্সনাৰিকপ্পানুপ্পত্তিতো. ন হি যাদিসায কারণসামগ্গিযা যাদিসং কারিযং উপ্পজ্জতি, তাদিসায এৰ তব্বিরুদ্ধং উপ্পজ্জতি অহেতুকত্তপ্পসঙ্গতো. ন চ ৰিরুদ্ধদস্সনাভাৰেন একস্স ৰিপস্সনাৰিকপ্পজনকসামত্থিযাভাৰতো তাদিসানং পরম্পরাযপি তব্ভাৰো, তদুপদেসো চ সম্ভৰতি. তিলক্খণূপদেসনানন্তরিকতায পন বুদ্ধানং নিব্বানসচ্ছিকিরিযা সিদ্ধি, তেনেৰস্স কিলেসানমচ্চন্তপ্পহানস্স, ৰিপস্সনোপদেসসামত্থিযস্স চ সিদ্ধীতি নিব্বানমেৰ তদুভযকারণং, নাঞ্ঞন্তি গহেতব্বং.

কস্মা পন নিব্বানদস্সনেন রাগাদীনং অচ্চন্তপ্পহানং, তিলক্খণঞ্চ হোতি. ন হি অঞ্ঞস্স দস্সনেন ইতররাগপ্পহানং, তিলক্খণঞাণঞ্চ যুত্তন্তি? ন, অসঙ্খতদস্সনেন সঙ্খতস্স ৰা দোসস্স ৰা পাকটত্তা. দিট্ঠঅচ্চন্তসুখানং হি ৰট্টসুখে, তন্নিস্সযারম্মণাদীসু চ সুখাভিমানো, ৰট্টাভিরতি চ পহীযতি দিট্ঠপরতীরস্স নাৰিকস্স নাৰাযেকদেসে সুখাভিমানাভিরতিযো ৰিয. অপিচ সঙ্খতধম্মেসু অল্লিনা রাগাদযো অসঙ্খতধম্মে সণ্ঠাতুং ন ¶ সক্কোন্তি অগ্গিক্খন্ধে ৰিয মক্খিকা, থলে ৰিয চ জলচরা, নিব্বানদস্সনেন পহীনদোসস্স চিত্তস্স যাথাৰতো তেসু সঙ্খতেসু তিলক্খণদস্সনং সম্ভৰতি ভেসজ্জালেপেন ৰিহতকাচতিমিরাদিদোসস্স চক্খুনো ঘটাদিরূপদস্সনং ৰিয, দিট্ঠদোসেসু চস্স সঙ্খারেসু ন পুন রাগাদীনমুপ্পত্তি ঞাতা সুচিভাৰে ৰিয ৰচ্চকূপেতি ৰেদিতব্বং.

কস্মা পন কেসঞ্চি সত্তানং এৰ নিব্বানসচ্ছিকিরিযাসম্ভৰো, ন সব্বেসন্তি? অনাদিবুদ্ধপরম্পরোপদেসসাপেক্খত্তা, তেসঞ্চ উপদেসকানং সব্বত্থ সব্বদা অভাৰতো, সোতূনঞ্চ খণসম্পত্তিযা অচ্চন্তদুল্লভত্তা, চক্কৰাল়ানঞ্চ অনন্তত্তা, তস্মা কেচি এৰ বুদ্ধুপ্পাদকালে তিলক্খণোপদেসলাভেন নিব্বানং সচ্ছিকরোন্তি, ন সব্বেতি গহেতব্বং.

কথং পনেত্থ রাগাদীনং অচ্চন্তৰিগমো নিব্বানেন সাধীযতীতি? ন তাৰ সো, অতীতানাগতানং তেসমিদানি অভাৰা, পুব্বে চ তস্স ৰিজ্জমানত্তা, ৰত্তমানানং সরসনিরোধতো. কথঞ্চস্স তুচ্ছরূপস্স নিব্বানস্স হেতুত্তে যথাৰুত্তদোসানমৰসরোতি চে? ন, তস্স ভাৰরূপত্তা. পুব্বভাগপটিপত্তিযা হি নিব্বানমারব্ভ অনুসযাজননভাৰেন উপ্পন্নমগ্গা এৰ ¶ কিলেসানমনুপ্পাদনিরোধো তদুপ্পত্তিযা আযতিং উপ্পজ্জনারহানং অনুপ্পত্তিতো অগ্গিসন্নিধানে অঙ্কুরাজনকভাৰেন উপ্পন্নসালিক্খন্ধস্স বীজতাভাৰরূপতা ৰিয. ন হি অভাৰো নাম কোচি পরমত্থতো অত্থি, যো কারণেন জনীযতি তব্বিরুদ্ধক্খণুপ্পাদনভাৰোৰুপ্পাদনং অনেকক্খণুপ্পাদনেন খন্ধকারাভাৰুপ্পাদনং ৰিয, তস্মা কিলেসানং অনুপ্পত্তিনিরোধসঙ্খাতস্স অরিযমগ্গস্স উপনিস্সযত্তা উপনিস্সযোপচারেন নিব্বানং ‘‘অসেসৰিরাগনিরোধো’’তিআদিনা ৰুত্তং. সরূপেনেৰ কস্মা ন ৰুত্তন্তি চে? অভিসুখুমত্তা, অনুপলদ্ধপুব্বত্তা চ, সুখুমতা চস্স ভগৰতো ¶ অপ্পোস্সুক্কতাৰচনতো, অরিযেন চক্খুনা পস্সিতব্বতো চ ৰেদিতব্বা.

এত্থ পন পরৰাদী আহ – ‘‘নত্থেৰ নিব্বানং অনুপলব্ভনীযতো’’তি. ন অনুপলব্ভনীযং তস্স সিদ্ধত্তা. উপলব্ভতি হি তং তদনুরূপপটিপত্তিযা অরিযেহি. অপিচ নিব্বানং নত্থীতি ন ৰত্তব্বং সব্বসত্তানং ৰিরুদ্ধধম্মানং ভাৰেন অপৰগ্গাভাৰপ্পসঙ্গতো. ন চ তং যুত্তং উণ্হাদিপটিপক্খস্স সীতাদিনো ৰিয ভৰপটিপক্খস্স নিব্বানস্সপি অৰস্সংভাৰা. ৰুত্তঞ্চ –

‘‘যথাপি উণ্হে ৰিজ্জন্তে, অপরং ৰিজ্জতি সীতলং;

এৰং তিৰিধগ্গি ৰিজ্জন্তে, নিব্বানং ইচ্ছিতব্বক’’ন্তি. (বু. ৰং. ২.১১) –

আদি. অচ্চন্তনিরোধহেতুনো ৰিপস্সনোপদেসস্স দস্সনতো চ অত্থেৰ নিব্বানং তং ৰিনা তস্সাসম্ভৰতোতি ৰুত্তোৰাযমত্থো. তদেতং পুরিমায কোটিযা অভাৰতো অপ্পভৰং, ততোৰ অজরামরণং, নিচ্চঞ্চ হোতীতি অণুআদীনম্পি নিচ্চভাৰপত্তি নিব্বানস্সেৰ নিচ্চত্তাতি চে? ন, ভিন্নাধিকরণত্তেন হেতুলক্খণস্সানুপপত্তিতো. অণুআদীনম্পি অসঙ্খততা ইতি চে? ন, অসঙ্খততাসিদ্ধিতো অসঙ্খতানঞ্চানেকত্তানুপপত্তিতো. যদি হি অসঙ্খতং নাম ভৰেয্য, একেনেৰ ভৰিতব্বং দেসকালসভাৰভেদস্স কারণভেদকত্তা, ভিন্নসভাৰানম্পি অহেতুকত্তে অতিপ্পসঙ্গতো.

সঙ্খতেহি সভাৰভিন্নস্স নিব্বানস্স কথং অহেতুকতাতি চে? অসঙ্খতসভাৰেন সঙ্খতসভাৰেহি ভিন্নস্স কারণানপেক্খত্তা. অসঙ্খতত্তে হি সমানে ভৰসভাৰভেদো ¶ কারণভেদং সূচযতি ¶ , তস্মা একমেৰ নিচ্চং ভৰিতুমরহতি, তঞ্চ যথাৰুত্তযুত্তিতো, সব্বঞ্ঞুৰচনতো চ পরমত্থতো ৰিজ্জমানং নিব্বানমেৰ. ৰুত্তং হেতং ভগৰতা ‘‘অত্থি, ভিক্খৰে, অজাতং অভূতং অকতং অসঙ্খত’’ন্তি (ইতিৰু. ৪৩). অযং দুক্খনিরোধসচ্চে নযো.

ইতরং পন ‘‘সম্মাদিট্ঠি…পে… সম্মাসমাধী’’তি উদ্দিসিত্ৰা ৰিত্থারতো ৰিভত্তং. ৰিনিচ্ছযো পনেত্থ মগ্গঙ্গৰিভঙ্গে আৰি ভৰিস্সতীতি অযং সুত্তন্তভাজনীযনযো.

অভিধম্মভাজনীযে পন –

‘‘চত্তারি সচ্চানি দুক্খং দুক্খসমুদযো দুক্খনিরোধো দুক্খনিরোধগামিনী পটিপদা. তত্থ তণ্হা দুক্খসমুদযো. অৰসেসা সাসৰধম্মা…পে… দুক্খং. তণ্হায পহানং দুক্খনিরোধো. অট্ঠঙ্গিকো মগ্গো দুক্খনিরোধগামিনী পটিপদা’’তি (ৰিভ. ২০৬) –

ৰত্ৰা অট্ঠ মগ্গঙ্গানি ৰিত্থারতো নিদ্দিসিত্ৰা ‘‘অৰসেসা ধম্মা দুক্খনিরোধগামিনিযা পটিপদায সম্পযুত্তা’’তি (ৰিভ. ২০৬ আদযো) এৰং পঠমৰারে চত্তারি সচ্চানি ৰিভত্তানি. তানি পুন অপরেহিপি ‘‘তণ্হা, অৰসেসা চ কিলেসা সমুদযো, তথা তণ্হা, অৰসেসা চ কিলেসা, অৰসেসা চ অকুসলা সমুদযো, তথা তণ্হা, অৰসেসা চ কিলেসা, অৰসেসা চ অকুসলা, তীণি চ কুসলমূলানি, সাসৰানি সমুদযো, তথা তণ্হা, অৰসেসা চ কিলেসা, অৰসেসা চ অকুসলা, তীণি চ কুসলমূলানি, সাসৰানি, অৰসেসা চ সাসৰকুসলধম্মা সমুদযো. অৰসেসা সাসৰধম্মা দুক্খং, তস্স তস্স সমুদযস্স পহানং নিরোধো, অট্ঠঙ্গিকো মগ্গো পটিপদা’’তি ¶ ইমেহি ৰারেহি ৰিভত্তানি. তত্থ ‘‘অরিযসচ্চানী’’তি অৰত্ৰা নিপ্পদেসতো পচ্চযসঙ্খাতং সমুদযং দস্সেতুং ‘‘সচ্চানী’’তি ৰুত্তং. অরিযসচ্চেসু হি তণ্হাৰ সমুদযো, ন ইতরে. ন চ কেৰলং তণ্হাৰ দুক্খং সমুদানেতি, অৰসেসা কুসলাকুসলাপি পচ্চযং সমুদানেন্তিযেৰাতি তেপি সমুদযতো দস্সেতুং ‘‘সচ্চানি’’ত্ৰেৰ ৰুত্তং. ততো পরং যস্মা অট্ঠঙ্গিকো মগ্গোৰ পটিপদাতি. সম্পযুত্তা পন ফস্সাদযো সব্বেপি ধম্মা পটিপদা এৰ, তস্মা তং নযং দস্সেতুং সব্বসঙ্গাহিকৰারেপি সব্বানি ৰিভত্তানি ¶ . এত্থ হি অরিযধনানেৰ সঙ্গহিতানি. সেসং সদিসমেৰাতি অযং অভিধম্মভাজনীযনযো.

পঞ্হাপুচ্ছকনযে পন চতুন্নং অরিযসচ্চানং কতি কুসলা…পে… কতি অরণা? সমুদযসচ্চং অকুসলং, নিরোধসচ্চং অব্যাকতং, দুক্খসচ্চং তিধাপি. সমুদযো সৰিতক্কসৰিচারো, নিরোধো অৰিতক্কঅৰিচারো, মগ্গো তিধাপি, দুক্খং তিধাপি, ন ৰত্তব্বং চ. তীণি সচ্চানি অনিদস্সনঅপ্পটিঘানি, দুক্খং তিধাপি. সমুদযো হেতু, নিরোধো ন হেতু, সেসা দ্ৰিধাপি. দ্ৰে সচ্চানি লোকিযানি, মগ্গনিরোধা লোকুত্তরা. সমুদযসচ্চং সরণং, দ্ৰে সচ্চানি অরণানি, দুক্খং দুৰিধাপি. অযং পঞ্হাপুচ্ছকনযো. ইদানি পনেত্থ –

কমতোনূনাধিকতো, লক্খণাদীহি সুঞ্ঞতো;

ঞাণকিচ্চোপমা ঞেয্যো, পাল়িমুত্তৰিনিচ্ছযো.

তত্থ কমতো তাৰ ইধাপি দেসনাক্কমোৰ যুজ্জতি. এত্থ ওল়ারিকত্তা, সব্বসত্তসাধারণত্তা চ সুৰিঞ্ঞেয্যন্তি দুক্খসচ্চং পঠমং ৰুত্তং, ততো তস্সেৰ হেতুদস্সনত্থং সমুদযসচ্চং, ততো ‘‘হেতুনিরোধা ভৰনিরোধো’’তি ঞাপনত্থং নিরোধসচ্চং, তদধিগমুপাযদস্সনত্থং অন্তে মগ্গসচ্চং. ভৰসুখস্সাদগধিতানং সংৰেগজননত্থং পঠমং দুক্খমাহ, ততো ‘‘ভৰং ¶ নেৰ অহেতুকং আগচ্ছতি, ন ইস্সরনিম্মানাদিনা হোতি, ইতো পন হোতী’’তি ঞাপনত্থং সমুদযসচ্চং, ততো সহেতুকেন দুক্খেন অভিভূতত্তা সংৰিগ্গমানসানং তন্নিস্সরণদস্সনেন অস্সাসজননত্থং নিরোধং, ততো নিরোধসম্পাপকং মগ্গন্তি অযমেত্থ কমো.

অনূনাধিকতো পন কস্মা চত্তারি এৰ সচ্চানীতি চে? ততো অঞ্ঞস্স অসম্ভৰতো, অঞ্ঞতরস্স চ অনপনেয্যতো. অপিচ পৰত্তিমাচিক্খন্তো ভগৰা সহেতুকং আচিক্খতি, নিৰত্তিঞ্চ সউপাযং. ইতি পৰত্তিনিৰত্তিতদুভযহেতূনং এতপরমতো চত্তারি এৰ ৰুত্তানীতি অযমেত্থানূনাধিকতো.

লক্খণাদীহি পনেত্থ লক্খণতো বাধনলক্খণং দুক্খসচ্চং, সন্তাপনরসং, পৰত্তিপচ্চুপট্ঠানং. পভৰলক্খণং সমুদযসচ্চং, অনুপচ্ছেদকরণরসং, পলিবোধপচ্চুপট্ঠানং. সন্তিলক্খণং ¶ নিরোধসচ্চং, অচ্চুতিরসং, অনিমিত্তপচ্চুপট্ঠানং. নিয্যানলক্খণং মগ্গসচ্চং, কিলেসপহানকরণরসং, ৰুট্ঠানপচ্চুপট্ঠানং. অপিচ পৰত্তিপৰত্তকনিৰত্তিনিৰত্তকলক্খণানি পটিপাটিযা, তথা সঙ্খততণ্হাঅসঙ্খতদস্সনলক্খণানি চাতি ইমানেত্থ লক্খণানি.

সুঞ্ঞতো পনেতানি যথাক্কমং ৰেদককারকনিব্বুতগমকাভাৰতো সুঞ্ঞানি. ৰুত্তঞ্চ –

‘‘দুক্খমেৰ হি, ন কোচি দুক্খিতো,

কারকো ন, কিরিযাৰ ৰিজ্জতি;

অত্থি নিব্বুতি, ন নিব্বুতো পুমা,

মগ্গমত্থি, গমকো ন ৰিজ্জতী’’তি. (ৰিভ. অট্ঠ. ১৮৯);

অথ ¶ ৰা –

ধুৰসুভসুখত্তসুঞ্ঞং,

পুরিমদ্ৰযমত্তসুঞ্ঞমমতপদং;

ধুৰসুভসুখঅত্তৰিরহিতো,

মগ্গো ইতি সুঞ্ঞতো তেসু. (ৰিভ. অট্ঠ. ১৮৯);

নিরোধসুঞ্ঞানি ৰা তীণি. নিরোধো চ সেসত্তযসুঞ্ঞো. ফলসুঞ্ঞো ৰা হেত্থ হেতু সমুদযমগ্গেসু দুক্খনিরোধানং অভাৰা পকতিৰাদীনং পকতি ৰিয. হেতুসুঞ্ঞঞ্চ ফলং দুক্খসমুদযানং, নিরোধমগ্গানঞ্চ অসমৰাযা, ন হেতুসমৰেতং হেতুফলং. হেতুফলসমৰাযৰাদীনং দ্ৰিঅণুকাদীনি ৰিযাতি অযমেত্থ সুঞ্ঞতা.

ঞাণকিচ্চতোতি এত্থ দুৰিধং সচ্চঞাণং অনুবোধঞাণং, পটিৰেধঞাণঞ্চ. তত্থ অনুবোধঞাণং লোকিযং, তং অনুস্সৰাদিৰসেন নিরোধে, মগ্গে চ পৰত্ততি. পটিৰেধঞাণং লোকুত্তরং, তং সচ্চাৰবোধপটিপক্খকিলেসে খেপেন্তং নিরোধমারম্মণং কত্ৰা কিচ্চতো চত্তারিপি সচ্চানি পটিৰিজ্ঝতি. যং পনেতং লোকিযং, তত্থ দুক্খঞাণং পরিযুট্ঠানাভিভৰনৰসেন পৰত্তমানং সক্কাযদিট্ঠিং নিৰত্তেতি, সমুদযঞাণং উচ্ছেদদিট্ঠিং, নিরোধঞাণং সস্সতদিট্ঠিং, মগ্গঞাণং ¶ অকিরিযদিট্ঠিং. দুক্খঞাণং ৰা তেসু ধুৰসুভসুখত্তভাৰরহিতেসু খন্ধেসু ধুৰসুভসুখত্তভাৰসঞ্ঞাসঙ্খাতং ফলে ৰিপ্পটিপত্তিং, সমুদযঞাণং ‘‘ইস্সরপধানকালসভাৰাদীহি লোকো পৰত্ততী’’তি অকারণে কারণাভিমানপ্পৰত্তং হেতুম্হি ৰিপ্পটিপত্তিং, নিরোধঞাণং অরূপলোকাদীসু অপৰগ্গগ্গাহভূতং নিরোধে ৰিপ্পটিপত্তিং, মগ্গঞাণং কামসুখল্লিকঅত্তকিলমথানুযোগপ্পভেদে অৰিসুদ্ধিমগ্গে ৰিসুদ্ধিমগ্গগ্গাহৰসেন পৰত্তং উপাযে ৰিপ্পটিপত্তিং নিৰত্তেতি. ইদমেত্থ ঞাণকিচ্চং.

উপমাতো ¶ পনেত্থ ভারো ৰিয হি দুক্খসচ্চং দট্ঠব্বং, ভারাদানমিৰ সমুদযসচ্চং, ভারনিক্খেপনমিৰ নিরোধসচ্চং, ভারনিক্খেপনুপাযো ৰিয মগ্গসচ্চং. অপিচ রোগতন্নিদানতদুপসমভেসজ্জেহি, ওরিমতীরমহোঘপারিমতীরতংসম্পাপকোপাযেহি চাতি এৰমাদীহি যথাক্কমং যোজেত্ৰাপি এতানি উপমাতো ৰেদিতব্বানি. অযমেত্থ উপমা. এৰং ঞেয্যো পাল়িমুত্তৰিনিচ্ছযো.

সচ্চৰিভঙ্গমাতিকত্থৰণ্ণনা নিট্ঠিতা.

ইন্দ্রিযৰিভঙ্গমাতিকত্থৰণ্ণনা

ইন্দ্রিযৰিভঙ্গমাতিকায পন অত্থতো তাৰ – দ্ৰাৰীসতি ইন্দ্রিযানীতি এত্থ ইন্দ্রিযট্ঠসম্ভৰতো ইন্দ্রিযানি. কো পনেস ইন্দ্রিযট্ঠো নামাতি? ইন্দলিঙ্গট্ঠো, ইন্দদেসিতট্ঠো, ইন্দদিট্ঠট্ঠো, ইন্দসিট্ঠট্ঠো, ইন্দজুট্ঠট্ঠো চ, সো সব্বোপি ইধ যথাযোগং যুজ্জতি. কুসলাকুসলং কম্মং ইন্দো নাম কম্মেসু কস্সচি ইস্সরিযাভাৰতো, তেনেৰেত্থ কম্মসঞ্জনিতানি তাৰ ইন্দ্রিযানি অত্তনো জনককম্মং উল্লিঙ্গেন্তি, তেন চ সিট্ঠানীতি ইন্দলিঙ্গট্ঠেন, ইন্দসিট্ঠট্ঠেন চ ইন্দ্রিযানি. সম্মাসম্বুদ্ধো পন পরমিস্সরিযভাৰতো ইন্দো, ততো সব্বানিপেতানি ইন্দ্রিযানি ভগৰতা যথাভূততো পকাসিতানি, অভিসম্বুদ্ধানি চাতি ইন্দদেসিতট্ঠেন, ইন্দদিট্ঠট্ঠেন চ ইন্দ্রিযানি. তেনেৰ ভগৰতা কানিচি গোচরাসেৰনায, কানিচি ভাৰনাসেৰনায সেৰিতানীতি ইন্দজুট্ঠট্ঠেনপি ইন্দ্রিযানি. অপিচ আধিপচ্চসঙ্খাতেন ইস্সরিযট্ঠেনাপি এতানি ইন্দ্রিযানি.

চক্খুন্দ্রিযন্তিআদীসু ¶ চক্খাদীনং পদত্থো হেট্ঠা পকাসিতো. পচ্ছিমেসু পন তীসু পুব্বভাগে অনঞ্ঞাতং অমতং পদং, চতুসচ্চধম্মং ৰা জানিস্সামীতি এৰং পটিপন্নস্স উপ্পজ্জনতো ¶ , ইন্দ্রিযট্ঠসম্ভৰতো চ অনঞ্ঞাতঞ্ঞস্সামীতিন্দ্রিযং. আজাননতো অঞ্ঞা এৰ ইন্দ্রিযন্তি অঞ্ঞিন্দ্রিযং. অঞ্ঞাতাৰিনো চতূসু সচ্চেসু নিট্ঠিতঞাণকিচ্চস্স খীণাসৰস্স ইন্দ্রিযন্তি অঞ্ঞাতাৰিন্দ্রিযং. তত্থ চ পসাদিন্দ্রিযানন্তরং চক্খুৰিঞ্ঞাণাদিৰীথিচিত্তপ্পৰত্তিযং রূপাদীনং নিযতভাৰস্স, অত্তনো তিক্খমন্দতানুৰিধানস্স চ আপাদনতো আধিপচ্চং ৰেদিতব্বং. মনিন্দ্রিযাদীনং পন অত্তনো অত্তনো ৰিজাননাদিলক্খণে আধিপচ্চং ৰেদিতব্বং. সেসং সুৰিঞ্ঞেয্যমেৰ. অযং তাৰেত্থ পদত্থো.

ধম্মভেদতো পনেত্থ জীৰিতিন্দ্রিযং রূপারূপৰসেন দ্ৰিধা. সুখিন্দ্রিযাদীনি পঞ্চ ৰেদনাভাৰতো একধম্মো, তথা পঞ্ঞিন্দ্রিযাদীনি চত্তারি অমোহভাৰতো. সেসানি পন ইন্দ্রিযানি একেকধম্মা এৰাতি এৰং পরমত্থতো সোল়স ধম্মাৰ দ্ৰাৰীসতিন্দ্রিযভাৰেন দেসিতানি. সেসানি পনেত্থ চেতসিকরূপনিব্বানানি অসঙ্গহিতানীতি অযং ধম্মভেদো.

ৰিভঙ্গনযতো পনেত্থ সুত্তন্তভাজনীযং নাম ন গহিতং. কস্মা? সুত্তন্তে ইমায পটিপাটিযা দ্ৰাৰীসতিযা ইন্দ্রিযানং অনাগতত্তা. সুত্তন্তস্মিং হি কত্থচি দ্ৰে ইন্দ্রিযানি কথিতানি, কত্থচি তীণি, কত্থচি পঞ্চ, এৰং পন নিরন্তরং দ্ৰাৰীসতি আগতানি নাম নত্থি. অভিধম্মভাজনীযেপি ৰিসেসো নত্থি.

পঞ্হাপুচ্ছকনযে পন দ্ৰাৰীসতিযা ইন্দ্রিযানং কতি কুসলা…পে… কতি অরণাতি? অনঞ্ঞাতঞ্ঞস্সামীতিন্দ্রিযং কুসলং, দোমনস্সিন্দ্রিযং অকুসলং, সদ্ধাসতিপঞ্ঞাঅঞ্ঞিন্দ্রিযানি চত্তারি কুসলাব্যাকতানি, মনজীৰিতসোমনস্সউপেক্খাৰীরিযসমাধিন্দ্রিযানি ছ তিধাপি, সেসানি দস অব্যাকতানি. ছ ইন্দ্রিযানি সিযা সুখায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তাতি, তীণি তিধাপি, জীৰিতং তিধা চ ন ৰত্তব্বঞ্চ, দ্ৰাদসিন্দ্রিযানি ন ৰত্তব্বানি ¶ এৰ. তীণি ৰিপাকানি, দ্ৰে ৰিপাকধম্মধম্মানি, রূপিন্দ্রিযানি সত্ত নেৰৰিপাকনৰিপাকধম্মধম্মানি, অঞ্ঞিন্দ্রিযং সিযা ৰিপাকং, সিযা ৰিপাকধম্মধম্মং, নৰিন্দ্রিযানি তিধাপি. নৰিন্দ্রিযানি উপাদিন্নুপাদানিযানি, দোমনস্সিন্দ্রিযং অনুপাদিন্নুপাদানিযং, তীণি অনুপাদিন্নঅনুপাদানিযানি, নৰ তিধাপি. দোমনস্সিন্দ্রিযং সৰিতক্কসৰিচারং, উপেক্খিন্দ্রিযং ¶ তথা চ অৰিতক্কঅৰিচারঞ্চ, নৰ অৰিতক্কঅৰিচারানি, একাদস তিধাপি. সত্ত রূপিন্দ্রিযানি চেৰ সুখদুক্খদোমনস্সিন্দ্রিযানি চাতি দস পরিত্তানি, পচ্ছিমানি তীণি অপ্পমাণানি, সেসানি নৰ তিধাৰ. তত্থ চ সোমনস্সিন্দ্রিযং রূপাৰচরৰসেনেৰ মহগ্গতং, তদৰসেসানি অরূপাৰচরৰসেনাপীতি ৰেদিতব্বং. পঞ্চিন্দ্রিযানি অনিদস্সনসপ্পটিঘানি, সত্তরস অনিদস্সনঅপ্পটিঘানেৰ.

পঞ্ঞিন্দ্রিযাদীনি চত্তারি হেতূ, সেসা ন হেতূ…পে… দোমনস্সিন্দ্রিযং সরণং, মনজীৰিতসোমনস্সউপেক্খাৰীরিযসমাধিন্দ্রিযানি দ্ৰিধাপি, সেসানি পন্নরস অরণানেৰাতি অযং পঞ্হাপুচ্ছকনযো.

ইন্দ্রিযেসু পনেতেসু, পাল়িমুত্তৰিনিচ্ছযো;

কমতো দানি ৰিঞ্ঞেয্যো, তত্থ কোসল্লমিচ্ছতা.

কমতোতি অযম্পি দেসনাক্কমোৰ. তত্থ অজ্ঝত্তধম্মে পরিঞ্ঞায অরিযভূমিপটিলাভো হোতীতি অত্তভাৰপরিযাপন্নানি চক্খুন্দ্রিযাদীনি পঠমং দেসিতানি. সো মনুস্সত্তভাৰো যং ধম্মং উপাদায ‘‘ইত্থী’’তি ৰা ‘‘পুরিসো’’তি ৰা সঙ্খং গচ্ছতি, ‘‘অযং সো’’তি নিদস্সনত্থং ততো ইত্থিন্দ্রিযং, পুরিসিন্দ্রিযঞ্চ. সো দুৰিধোপি জীৰিতিন্দ্রিযপটিবদ্ধৰুত্তীতি ঞাপনত্থং ততো জীৰিতিন্দ্রিযং. যাৰ তস্স পৰত্তি, তাৰ এতেসং ৰেদযিতানং অনিৰত্তি. যঞ্চ কিঞ্চি ৰেদযিতং, সব্বং তং সুখং দুক্খন্তি ঞাপনত্থং ততো সুখিন্দ্রিযাদীনি. তন্নিরোধত্থং পন এতে ধম্মা ভাৰেতব্বাতি পটিপত্তিদস্সনত্থং ততো সদ্ধাদীনি. ‘‘ইমায পটিপত্তিযা এস ধম্মো পঠমং অত্তনি পাতুভৰতী’’তি পটিপত্তিযা ¶ অমোঘভাৰদস্সনত্থং ততো অনঞ্ঞাতঞ্ঞস্সামীতিন্দ্রিযং. তস্সেৰ ফলত্তা, ততো অনন্তরং ভাৰেতব্বত্তা চ ততো অঞ্ঞিন্দ্রিযং. ইতো পরং ভাৰনায ইমস্স অধিগমো, অধিগতে চ পন ইমস্মিং নত্থি কিঞ্চি উত্তরি করণীযন্তি ঞাপনত্থং অন্তে পরমস্সাসভূতং অঞ্ঞাতাৰিন্দ্রিযং দেসিতন্তি এৰং কমতো পাল়িমুত্তৰিনিচ্ছযনযো ৰিঞ্ঞেয্যো.

ইন্দ্রিযৰিভঙ্গমাতিকত্থৰণ্ণনা নিট্ঠিতা.

পচ্চযাকারৰিভঙ্গমাতিকত্থৰণ্ণনা

পচ্চযাকারৰিভঙ্গমাতিকায ¶ পন অত্থতো তাৰ – অৰিজ্জাপচ্চযাতিআদীসু অৰিন্দিযং কাযদুচ্চরিতাদিং ৰিন্দতি পটিলভতি, ৰিন্দিযং ৰা কাযসুচরিতাদিং ন ৰিন্দতি, ধম্মানং ৰা যথাসভাৰং অৰিদিতং করোতি, অন্তৰিরহিতে ৰা সংসারে সত্তে জৰাপেতি, অৰিজ্জমানেসু ৰা জৰতি, ৰিজ্জমানেসু ৰা ন জৰতীতি অৰিজ্জা. পটিচ্চ ফলমেতি এতস্মাতি পচ্চযো, ধম্মানং উপ্পত্তিযা, ঠিতিযা চ উপকারকো ধম্মো. অৰিজ্জা চ সা পচ্চযো চাতি অৰিজ্জাপচ্চযো, তস্মা অৰিজ্জাপচ্চযা. সঙ্খতমভিসঙ্খরোন্তীতি সঙ্খারা.

ইতো পরং সঙ্খারপচ্চযা ৰিঞ্ঞাণন্তিআদীসু ৰুত্তং ৰুত্তনযেনেৰ ৰেদিতব্বং. অৰুত্তেসু পন ৰিজানাতীতি ৰিঞ্ঞাণং. নমতীতি নামং, রুপ্পতীতি রূপং, নামঞ্চ রূপঞ্চ নামরূপঞ্চ নামরূপন্তি একদেসসরূপেকসেসনযেন ৰেদিতব্বং. আযে তনোতি, আযতঞ্চ নযতীতি আযতনং, ছট্ঠাযতনঞ্চ সল়াযতনঞ্চ সল়াযতনন্তি একসেসনযেন ৰেদিতব্বং. ফুসতীতি ফস্সো. ৰেদযতীতি ৰেদনা. পরিতস্সতীতি তণ্হা. উপাদিযতীতি উপাদানং. ভৰতি, ভাৰযতি চাতি ভৰো. জননং জাতি. জীরণং জরা. মরন্তি এতেনাতি ¶ মরণং. সোচনং সোকো. পরিদেৰনং পরিদেৰো. দুক্খযতি, উপ্পাদট্ঠিতিৰসেন দ্ৰিধা খণতীতিপি দুক্খং. দুম্মনস্স ভাৰো দোমনস্সং. ভুসো আযাসো উপাযাসো. সম্ভৰন্তীতি নিব্বত্তন্তি. ন কেৰলঞ্চ সোকাদীহেৰ, অথ খো অৰিজ্জাপচ্চযা সঙ্খারা সম্ভৰন্তীতিআদিনা সব্বপদেহিপি সম্ভৰন্তি-সদ্দস্স যোজনা কাতব্বা. এৰং হি পচ্চযপচ্চযুপ্পন্নৰৰত্থানং কতং হোতি.

এৰন্তি নিদ্দিট্ঠনযনিদস্সনং, তেন অৰিজ্জাদীহেৰ কারণেহি, ন ইস্সরনিম্মানাদীহীতি দস্সেতি. এতস্সাতি যথাৰুত্তস্স. কেৰলস্সাতি অসম্মিস্সস্স, সকলস্স ৰা, দুক্খক্খন্ধস্সাতি দুক্খসমূহস্স, ন সত্তস্স, ন সুখসুভাদীনং. সমুদযোতি নিব্বত্তি, হোতীতি সম্ভৰতি. অযং তাৰেত্থ পদত্থো.

ধম্মভেদতো পনেত্থ অৰিজ্জাতি সুত্তন্তপরিযাযেন দুক্খাদীসু চতূসু, অভিধম্মপরিযাযেন পুব্বন্তাদীহি সদ্ধিং অট্ঠসু ৰা ঠানেসু অঞ্ঞাণং. সঙ্খারা পন পুঞ্ঞাপুঞ্ঞানেঞ্জাভিসঙ্খারা তযো, কাযৰচীচিত্তসঙ্খারা তযো চাতি ছব্বিধা. তত্থ অট্ঠ কামাৰচরকুসলচেতনা, পঞ্চ রূপাৰচরকুসলচেতনা ¶ চেতি তেরস চেতনা পুঞ্ঞাভিসঙ্খারো নাম. দ্ৰাদস অকুসলচেতনা অপুঞ্ঞাভিসঙ্খারো নাম. চতস্সো অরূপাৰচরকুসলচেতনা আনেঞ্জাভিসঙ্খারো নাম. ইমেসং পন তিণ্ণং সঙ্খারানং এৰ দ্ৰারতো পৰত্তিদস্সনত্থং অযং সঙ্খারাদিত্তিকো ৰুত্তো.

অট্ঠ কামাৰচরকুসলচেতনা চেৰ দ্ৰাদসাকুসলচেতনা চ কাযদ্ৰারে পৰত্তিযং কাযসঙ্খারো, ৰচীদ্ৰারে পৰত্তিযং ৰচীসঙ্খারো, এতা চেৰ মনোদ্ৰারে পৰত্তিযং, মনোদ্ৰারে এৰ পৰত্তনকা রূপারূপকুসলচেতনা চ চিত্তসঙ্খারোতি ৰুচ্চন্তি. অভিঞ্ঞাচেতনা, পনেত্থ উদ্ধচ্চচেতনা চ পরতো পটিসন্ধিৰিঞ্ঞাণপচ্চযভাৰে অপনেতব্বাপি ¶ অৰিজ্জাপচ্চযা সম্ভৰতো ইধ গহেতব্বাৰাতি অযং তিকো পুরিমত্তিকমেৰ পৰিসতীতি অত্থতো লোকিযকুসলাকুসলচেতনাৰ অৰিজ্জাপচ্চযা সঙ্খারাতি ৰেদিতব্বং. ইদঞ্চ সুত্তন্তভাজনীযনযেন, অভিধম্মভাজনীযনযেন পন লোকিযলোকুত্তরে একেকচিত্তক্খণে দ্ৰাদসঙ্গস্স পটিচ্চসমুপ্পাদস্স গহণতো সব্বাপি চেতনা সঙ্খারাতি ৰেদিতব্বং. এৰং ৰিঞ্ঞাণনামরূপাদীসুপি সব্বচিত্তসম্পযুত্তৰসেন চ ধম্মভেদো ৰেদিতব্বো. সুত্তন্তভাজনীযনযেনেৰ পন দস্সযিস্সাম.

সঙ্খারপচ্চযা ৰিঞ্ঞাণঞ্চ চক্খুৰিঞ্ঞাণাদিছব্বিধং বাত্তিংসলোকিযৰিপাকৰিঞ্ঞাণমেৰ হোতি, লোকুত্তরানি পন ৰট্টকথায ন যুজ্জন্তীতি ন গহিতানি. ৰিঞ্ঞাণপচ্চযা নামরূপং পন সব্বলোকিযৰিঞ্ঞাণসম্পযুত্তা তযো অরূপিনো খন্ধা. রূপং সব্বানি ভূতুপাদাযরূপানি. সল়াযতনং মনচ্ছট্ঠানি ইন্দ্রিযানি. ফস্সো চক্খুসম্ফস্সাদিকো ছৰিপাকফস্সো, তথা ৰেদনাপি. তণ্হা রূপতণ্হাদিভেদতো ছব্বিধো লোভো. উপাদানং কামুপাদানাদিতো চতুব্বিধা লোভদিট্ঠিযোৰ. ভৰো পন দুৰিধো কম্মভৰো, উপপত্তিভৰোতি. তত্থ কম্মভৰো তেভূমককুসলাকুসলচেতনা চ তংসম্পযুত্তা অভিজ্ঝাদযো চ. উপপত্তিভৰো পন কম্মাভিনিব্বত্তা পঞ্চপি খন্ধা. সো পভেদতো কামরূপারূপভৰা তযো, সঞ্ঞা অসঞ্ঞা নেৰসঞ্ঞানাসঞ্ঞা ভৰা তযো, একচতুপঞ্চৰোকারভৰা তযোতি নৰৰিধো নিদ্দিট্ঠো. জাতিআদীনি পুব্বে ৰুত্তানি. তেসু জাতিগ্গহণেন ৰিঞ্ঞাণনামরূপসল়াযতনফস্সৰেদনাৰ গহিতা তদৰিনাভাৰতো. তথা জরামরণগ্গহণেনাপি তেসঞ্ঞেৰ পাকভেদত্তা. সোকাদযো পন জরামরণেন দ্ৰাদসমেন অঙ্গেন একসঙ্খেপং কত্ৰা ৰুত্তা, ন ৰিসুং অঙ্গভাৰেন. কিমত্থন্তি চে? ভৰচক্কস্স অৰিচ্ছেদদস্সনত্থং. সোকাদিতো ¶ হি অৰিজ্জা সিদ্ধা হোতি অৰিজ্জাৰিপ্পযোগতো ¶ , অৰিজ্জাসমুপ্পত্তিতো চ. জরামরণব্ভাহতস্স হি বালস্সেৰ তে সম্ভৰন্তি, তেহি চ অৰিজ্জায সিদ্ধায পুন অৰিজ্জাপচ্চযা সঙ্খারাতি এৰং হেতুফলপরম্পরায ভৰচক্কং অৰিচ্ছিন্নং, অনাদিকং, অপরিযন্তং, অপরিযোসানঞ্চ হোতি.

যদি এৰং, কস্মা অৰিজ্জা আদিতো ৰুত্তাতি? পধানদস্সনত্থং পন আদিতো ৰুত্তা. তিণ্ণং হি ৰট্টানং অৰিজ্জা পধানো হেতু তস্সা ভাৰে ভাৰতো, নিরোধেন চ নিরুজ্ঝনতো. এৰং অৰিজ্জাদীহি দ্ৰাদসহি অঙ্গেহি সুত্তন্তভাজনীযনযেন সব্বে লোকিযধম্মাৰ পচ্চযপচ্চযুপ্পন্নভাৰেন ৰুত্তাতি ৰেদিতব্বা. অভিধম্মপরিযাযেন পন লোকুত্তরাপীতি অযমেত্থ ধম্মভেদো.

ৰিভঙ্গনযতো পনেত্থ পঞ্হাপুচ্ছকনযো নত্থি, সুত্তন্তভাজনীযনযাপি ধম্মভেদে ৰুত্তনযেনেৰ ৰিত্থারতো ৰিভত্তাতি ৰেদিতব্বো. অভিধম্মভাজনীযে পন –

‘‘অৰিজ্জাপচ্চযা সঙ্খারো, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামং, নামপচ্চযা ছট্ঠাযতনং, ছট্ঠাযতনপচ্চযা ফস্সো, ফস্সপচ্চযা ৰেদনা, ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৰো, ভৰপচ্চযা জাতি, জাতিপচ্চযা জরামরণং, এৰমেতস্স কেৰলস্স দুক্খক্খন্ধস্স সমুদযো হোতি.

‘‘অৰিজ্জাপচ্চযা সঙ্খারো…পে… ৰিঞ্ঞাণপচ্চযা নামং, নামপচ্চযা ফস্সো…পে… সমুদযো হোতি.

‘‘অৰিজ্জাপচ্চযা…পে… ৰিঞ্ঞাণপচ্চযা নামরূপং, নামরূপপচ্চযা ছট্ঠাযতনং, ছট্ঠাযতনপচ্চযা ফস্সো…পে… সমুদযো হোতি.

‘‘অৰিজ্জাপচ্চযা ¶ …পে… ৰিঞ্ঞাণপচ্চযা নামরূপং, নামরূপপচ্চযা সল়াযতনং, ছট্ঠাযতনপচ্চযা ফস্সো…পে… সমুদযো হোতী’’তি (ৰিভ. ২৪৩) –

এৰং পচ্চযচতুক্কং, পুন ‘‘অৰিজ্জাপচ্চযা সঙ্খারো অৰিজ্জাহেতুকো’’তিআদিনা (ৰিভ. ২৪৪) ৰুত্তনযেনেৰ ¶ হেতুচতুক্কং, পুন ‘‘অৰিজ্জাপচ্চযা সঙ্খারো অৰিজ্জাসম্পযুত্তো’’তিআদিনা (ৰিভ. ২৪৫) সম্পযুত্তচতুক্কং, পুন ‘‘অৰিজ্জাপচ্চযা সঙ্খারো, সঙ্খারপচ্চযাপি অৰিজ্জা’’তিআদিনা (ৰিভ. ২৪৬) অঞ্ঞমঞ্ঞপচ্চযচতুক্কন্তি এৰং অৰিজ্জামূলকানি চত্তারি চতুক্কানি ৰুত্তানি. এৰং ‘‘সঙ্খারপচ্চযা অৰিজ্জা’’তিআদিনা সঙ্খারাদিমূলকাদিউপাদানমূলকপরিযোসানানি অট্ঠসু পদেসু চত্তারি চত্তারি চতুক্কানীতি বাত্তিংস চতুক্কানি মাতিকং কত্ৰা নিক্খিপিত্ৰা পুন অকুসলকুসলৰিপাককিরিযচিত্তেসু লোকিযলোকুত্তরেসু একেকস্মিং চিত্তে যথানিক্খিত্তেহি ছত্তিংসবাত্তিংসমাতিকাচতুক্কেহি ৰিত্থারতো যথানুরূপং পচ্চযাকারো ৰিভত্তো. ইদঞ্চ যস্মা ন কেৰলং অযং পচ্চযাকারো নানাচিত্তেসু এৰ হোতি, একচিত্তেপি হোতিযেৰ. নাপি ৰট্টচিত্তে এৰ হোতি, তণ্হাভাৰতো ৰিৰট্টচিত্তেপি, তস্মা তং নিপ্পদেসতো একচিত্তক্খণিকং পচ্চযাকারং দস্সেতুং ৰুত্তং. তেনেৰ হেত্থ ‘‘অৰিজ্জাপচ্চযা সঙ্খারা’’তি অৰত্ৰা ‘‘অৰিজ্জাপচ্চযা সঙ্খারো’’তি একৰচনেন ৰুত্তং একচিত্তক্খণে বহুচেতনাভাৰা. তত্থ যদেতং পঠমচতুক্কং, তত্থ পঠমৰারো নামরূপট্ঠানে নামং, সল়াযতনট্ঠানে ছট্ঠাযতনঞ্চ গহেত্ৰা রূপারূপাদিসব্বভৰসাধারণৰসেন, একচিত্তক্খণপরিযাপন্নধম্মগ্গহণৰসেন চ রূপং ছড্ডেত্ৰা ৰুত্তো রূপস্স সব্বভৰাসাধারণত্তা, বহুচিত্তক্খণিকত্তা চ. দুতিযো নামরূপট্ঠানে নামং, ‘‘নামপচ্চযা ফস্সো’’তি সল়াযতনট্ঠানে ফস্সমেৰ ¶ গহেত্ৰা ফস্সস্স সল়াযতনং ৰিনাপি পচ্চযৰিসেসসম্ভৰদস্সনৰসেন চেৰ মহানিদানসুত্তনযদস্সনৰসেন (দী. নি. ২.৯৫ আদযো) চ ৰুত্তো. ততিযো সল়াযতনট্ঠানে ছট্ঠাযতনমেৰ গহেত্ৰা গব্ভসেয্যকানং অপরিপুণ্ণাযতনানং, রূপভৰিকাদীনঞ্চ ৰসেন ৰুত্তো. চতুত্থো ‘‘নামপচ্চযা সল়াযতনং, সল়াযতনপচ্চযা ফস্সো’’তি এৰং ইতরাযতনেহিপি সল়াযতনস্স ৰিসেসতো ফস্সপচ্চযতংৰ দস্সেত্ৰা ওপপাতিকানং, পরিপুণ্ণাযতনানং কামভৰিকানঞ্চ ৰসেন ৰুত্তো. এৰং দুতিযচতুক্কাদীসুপি.

সব্বত্থাপি চেত্থ যস্মা সোকাদযো সব্বে একচিত্তক্খণে ন সম্ভৰন্তি, সব্বস্মিঞ্চ চিত্তে, ভৰে চ নপ্পৰত্তন্তি, তস্মা ন গহিতা. জাতিজরামরণানি পনেত্থ অরূপধম্মানং লক্খণমত্তানি, তানি চ অচিত্তক্খণমত্তানিপি সমানানি চিত্তক্খণে অন্তোগধত্তা পরিযাযতো পচ্চযুপ্পন্নে কত্ৰা অঙ্গপরিপূরণত্থং গহিতানি. ভৰোতি চেত্থ উপাদানাদিপচ্চযৰিরহিতা চত্তারো অরূপিনো খন্ধা, তণ্হাপচ্চযা উপাদানন্তি এত্থ কামুপাদানং ৰজ্জেত্ৰা তীণি উপাদানানি এৰ গহেতব্বানি ¶ . দ্ৰিন্নম্পি একলক্খণানং ধম্মানং একক্খণে অসম্ভৰা লোভমূলৰিরহিতেসু দোসমোহমূলেসু চেৰ কুসলাব্যাকতেসু চ চিত্তেসু ৰেদনাপচ্চযা পটিঘং ৰিচিকিচ্ছা উদ্ধচ্চন্তি এৰং তণ্হাঠানে যথাযোগং পটিঘাদযো তযো. তেসু ৰিচিকিচ্ছাৰজ্জিতেসু চেৰ দিট্ঠিৰিপ্পযুত্তেসু চ উপাদানট্ঠানে অধিমোক্খো গহিতো. ৰিচিকিচ্ছায পন সদ্ধিং অধিমোক্খস্সাপি অসম্ভৰা ৰিচিকিচ্ছাপচ্চযা ভৰোতি চ গহিতো. উপাদানট্ঠানে চ অধিমোক্খো চ গহিতো. লোকিযানঞ্চেত্থ কুসলাব্যাকতানং উপনিস্সযৰসেন অৰিজ্জাপচ্চযতা ৰুত্তা. লোকুত্তরানং পন যস্মা অপ্পহীনাৰিজ্জো অৰিজ্জায পহানত্থং, পটিপ্পস্সম্ভনত্থঞ্চ লোকুত্তরং ¶ ভাৰেতি, তস্মা সমতিক্কমনৰসেন অৰিজ্জাপচ্চযতা ৰুত্তা, ন সহজাতৰসেন. তেনেৰ তেসং নিদ্দেসৰারেসু ‘‘তত্থ কতমা অৰিজ্জা’’তি অৰিভজিত্ৰা ‘‘তত্থ কতমো অৰিজ্জাপচ্চযা সঙ্খারো’’তি (ৰিভ. ২৪০) ৰিভত্তং. কিরিযধম্মানং পন কেনচি পরিযাযেন অৰিজ্জামূলকত্তং নত্থীতি ‘‘সঙ্খারপচ্চযা ৰিঞ্ঞাণ’’ন্তিআদিনা সঙ্খারমূলকাদিকো নযো ৰুত্তো, ন অৰিজ্জামূলকো. অপিচ লোকিযকুসলাদীসু তেসং ধম্মানং দুক্খসচ্চপরিযাপন্নত্তা ‘‘এৰমেতস্স কেৰলস্স দুক্খক্খন্ধস্স সমুদযো হোতী’’তি (ৰিভ. ২২৫) এৰং অপ্পনা কতা, লোকুত্তরকুসলাদীসু ‘‘এৰমেতেসং ধম্মান’’ন্তি. অযং লোকিযতো লোকুত্তরানং দেসনায ৰিসেসোতি অযং অভিধম্মভাজনীযে নযো.

ইদানি পচ্চযনযা, কারকাদীহি সুঞ্ঞতো;

মূলদ্ধসন্ধিসঙ্খেপাকারৰট্টৰিভাগতো.

ৰারণোপমতোপেত্থ, গম্ভীরনযভেদতো;

যথারহং ৰিজানীযো, পাল়িমুত্তৰিনিচ্ছযো.

তত্থ পচ্চযনযো সামঞ্ঞতো, ৰিসেসতো চাতি দুৰিধো হোতি. তত্থ তব্ভাৰভাৰিমত্ততাপকাসকো সামঞ্ঞতো পচ্চযনযো. ৰিসেসতো পন পট্ঠানে আগতেসু হেতুপচ্চযাদিচতুৰীসতিযা পচ্চযেসু যথানুরূপং পচ্চযৰিসেসুপ্পন্নমত্ততাপকাসকো. সা চ নেসং চতুৰীসতিযা পচ্চযানং ৰিভাগতা পট্ঠানমাতিকত্থসংৰণ্ণনায আৰি ভৰিস্সতি. তত্থ সামঞ্ঞতো সঙ্খারাদযো অৰিজ্জাদিপচ্চযভাৰে এৰ ভাৰিনোতি ৰেদিতব্বা. যস্স হি চতূসু সচ্চেসু, পুব্বন্তাদীসু চ অৰিজ্জা অপ্পহীনা হোতি, সো দুক্খে তাৰ পুব্বন্তাদীসু চ অঞ্ঞাণেন ¶ তীসু ¶ ভৰেসু জাতিজরারোগমরণাদিঅনেকাদীনৰৰোকিণ্ণং পুঞ্ঞফলসঙ্খাতং সঙ্খারৰিপরিণামদুক্খং দুক্খতো অজানন্তো সুখসঞ্ঞায পত্থেত্ৰা তীহি দ্ৰারেহি পুঞ্ঞানেঞ্জাভিসঙ্খারে আরভতি. সমুদযে অঞ্ঞাণেন দুক্খহেতুভূতেসুপি তণ্হাপরিক্খারেসু দুক্খহেতুকং আপাযিকাদিদুক্খং, দুক্খহেতুভূতেসু কামূপসেৰনাদীসু চ আদীনৰং অপস্সন্তো সুখহেতুসঞ্ঞায চেৰ কিলেসাভিভূততায চ তিৰিধেপি সঙ্খারে আরভতি. নিরোধে, পন মগ্গে চ অঞ্ঞাণেন অনিরোধভূতে গতিৰিসেসে নিরোধসঞ্ঞী, নিরোধস্স চ ৰা অমগ্গভূতেসুপি যঞ্ঞামরতপাদীসুপি নিরোধমগ্গসঞ্ঞী হুত্ৰা তিৰিধেপি সঙ্খারে আরভতি. ইদপ্পচ্চযতাপটিচ্চসমুপ্পন্নেসু ধম্মেসু অঞ্ঞাণেন ‘‘অহেতূ অপ্পচ্চযা সত্তা উপ্পজ্জন্তি, ন হোন্তি পরং মরণা’’তি ৰা ‘‘অত্তাৰ জানাতি ৰা ন জানাতি ৰা, সোৰ সঙ্খারে সঙ্খরোতি, সোৰ পটিসন্ধিযং উপ্পজ্জতি, তস্স অণুইস্সরাদযো কললাদিভাৰেন সরীরং সণ্ঠাপেন্তা ইন্দ্রিযানি সম্পাদেন্তি, সোৰ ইন্দ্রিযসম্পন্নো ফুসতি, ৰেদযতি, তণ্হিযতি, উপাদানাদীনি চ করোতী’’তি ৰা ‘‘সব্বে সত্তা নিযতিসঙ্গতিভৰপরিণতা’’তি ৰা ৰিকপ্পেতি. সো এৰং অৰিজ্জায অন্ধীকতো –

‘‘যথাপি নাম জচ্চন্ধো, নরো অপরিণাযকো;

একদা যাতি মগ্গেন, উম্মগ্গেনাপি একদা.

‘‘সংসারে সংসরং বালো, তথা অপরিণাযকো;

করোতি একদা পুঞ্ঞং, অপুঞ্ঞমপি একদা’’তি. (ৰিভ. অট্ঠ. ২২৬ সঙ্গারপদনিদ্দেস) –

ৰুত্তনযেন তিৰিধে সঙ্খারে অভিসঙ্খরোতীতি. কিং পনেত্থ একাৰ অৰিজ্জা সঙ্খারানং পচ্চযো হোতি, ননু একস্মা ¶ কারণা একংৰ কারিযং উপ্পজ্জতি, অনেকং কারিযং ন উপ্পজ্জতি, অনেকস্মা ৰা একন্তি, অনেকস্মা কারণা অনেকং কারিযং উপ্পজ্জতীতি? সচ্চং, পধানত্তপাকটত্তঅসাধারণত্তদীপনত্থং পনেত্থ অনেকেসু কারণেসুপি একা অৰিজ্জা এৰ পচ্চযভাৰেন নিদ্দিট্ঠা ‘‘ফস্সপচ্চযা ৰেদনা (উদা. ৩), সেম্হসমুট্ঠানা আবাধা’’তিআদীসু (অ. নি. ১০.৬০; মহানি. ৫; চূল়নি. খগ্গৰিসাণসুত্তনিদ্দেস ১২৮) ৰিয. অৰিজ্জা হি পধানো হেতু, সঙ্খারানং পাকটো, অসাধারণো চ তণ্হাদিহেতূনম্পি হেতুত্তা, ন ৰত্থারম্মণাদীনি ¶ খীণাসৰস্স তেসং সম্ভৰেপি সঙ্খারানং অভাৰাতি. এৰং তাৰেত্থ ৰট্টসঙ্খারানং অৰিজ্জায এৰ ভাৰে ভাৰো ৰেদিতব্বো. তথা ৰিঞ্ঞাণস্সাপি উপচিতকম্মাভাৰে অভাৰতো, সব্বত্থ সব্বেসঞ্চ সব্বৰিপাকৰিঞ্ঞাণুপ্পত্তিপ্পসঙ্গতো চ সঙ্খারানং এৰ ভাৰে ভাৰো ৰেদিতব্বো. যথা চেত্থ, এৰং উপরিপি নামরূপাদীনং ৰিঞ্ঞাণাদিভাৰে ভাৰো যথানুরূপং অনুভৰযুত্তীহি ঞাতব্বোতি অযং সামঞ্ঞতো পচ্চযনযো.

ৰিসেসতো পন অৰিজ্জা পুঞ্ঞাভিসঙ্খারানং তাৰ আরম্মণপচ্চযেন, উপনিস্সযপচ্চযেন চাতি দ্ৰিধা পচ্চযো হোতি. সা হি অৰিজ্জং আরব্ভ সম্মসনাদিৰসেন উপ্পত্তিযং কামাৰচরানং, অভিঞ্ঞাচিত্তেন সমোহচিত্তস্স জাননকালে রূপাৰচরানঞ্চ পুঞ্ঞাভিসঙ্খারানং তাৰ আরম্মণপচ্চযেন পচ্চযো হোতি, অৰিজ্জাসমতিক্কমনত্থায পন অৰিজ্জাসম্মূল়্হতায কামরূপভৰসম্পত্তিযো পত্থেত্ৰাৰ কামরূপাৰচরপুঞ্ঞানি করোন্তস্স উপনিস্সযপচ্চযেন পচ্চযো হোতি. অপুঞ্ঞাভিসঙ্খারানং পনেসা অৰিজ্জং আরব্ভ রাগাদীনং উপ্পজ্জনকালে আরম্মণাদিপচ্চযেন অৰিজ্জাসম্মূল়্হতায পাণাতিপাতাদীনি করোন্তস্স নিস্সযপচ্চযেন, দুতিযজৰনাদীনং ¶ অনন্তরূপনিস্সযাসেৰননত্থিৰিগতপচ্চযেহি যং কিঞ্চি অকুসলং করোন্তস্স হেতুসহজাতঅঞ্ঞমঞ্ঞনিস্সযসম্পযুত্তঅত্থিঅৰিগতপচ্চযেহীতি এৰং অনেকধা পচ্চযো হোতি, আনেঞ্জাভিসঙ্খারানং পন একেন উপনিস্সযপচ্চযেনেৰ পচ্চযো হোতি.

সঙ্খারপচ্চযা ৰিঞ্ঞাণপদে পন তযোপি সঙ্খারা ৰিঞ্ঞাণস্স যথারহং তীসু ভৰেসু পটিসন্ধিপৰত্তীসু কম্মপচ্চযেন চেৰ উপনিস্সযপচ্চযেন চাতি দ্ৰিধা পচ্চযা হোন্তি. অভিধম্মভাজনীযনযেন সহজাতস্স ৰিঞ্ঞাণস্স সহজাতঅঞ্ঞমঞ্ঞনিস্সযসম্পযুত্তকম্মত্থিঅৰিগতাদিপচ্চযেহি পচ্চযা হোন্তি.

ৰিঞ্ঞাণপচ্চযা নামরূপপদে পন ৰিঞ্ঞাণং ৰিপাকভূতং, অৰিপাকভূতঞ্চ নামস্স কেৰলস্স ৰা রূপমিস্সকস্স ৰা পটিসন্ধিপৰত্তীসু সহজাতঅঞ্ঞমঞ্ঞনিস্সযসম্পযুত্তৰিপাকআহারইন্দ্রিযঅত্থিঅৰিগতপচ্চযেহি যথারহং নৰধা, অট্ঠধা ৰা পচ্চযো হোতি. পটিসন্ধিযং ৰিপাকৰিঞ্ঞাণং ৰত্থুরূপস্স সহজাতঅঞ্ঞমঞ্ঞনিস্সযৰিপাকআহারইন্দ্রিযৰিপ্পযুত্তঅত্থি অৰিগতপচ্চযেহি নৰধা পচ্চযো হোতি. ঠপেত্ৰা পন ৰত্থুরূপং সেসরূপস্স তেহেৰ অঞ্ঞমঞ্ঞপচ্চযরহিতেহি অট্ঠহি পচ্চযো হোতি. অভিসঙ্খারৰিঞ্ঞাণং পন একৰোকারপঞ্চৰোকারভৰেসু ¶ কম্মজরূপস্স সুত্তন্তিকপরিযাযেন উপনিস্সযৰসেন পচ্চযো হোতি. পৰত্তিযং পন সব্বম্পি ৰিঞ্ঞাণং তস্স তস্স নামরূপস্স যথারহং পচ্চযো হোতি. তত্থ অরূপভৰে ৰিঞ্ঞাণং নামস্সেৰ, অসঞ্ঞিভৰে রূপস্সেৰ, পঞ্চৰোকারভৰে নামরূপস্স পচ্চযো হোতীতি ৰেদিতব্বং. তেনেৰ নামঞ্চ রূপঞ্চ নামরূপঞ্চ নামরূপন্তি নিব্বচনং কতন্তি.

নামরূপপচ্চযা ¶ সল়াযতনপদে পন নামং ৰিপাকভূতং, অৰিপাকভূতঞ্চ অরূপভৰে ছট্ঠাযতনস্স অৰকংসতো সহজাতঅঞ্ঞমঞ্ঞনিস্সযসম্পযুত্তৰিপাকঅত্থিঅৰিগতৰসেন যথারহং সত্তধা পচ্চযো হোতি. ইতরেসং পনেতং পঞ্চন্নং চক্খাযতনাদীনং পঞ্চৰোকারভৰে পটিসন্ধিযং চতুমহাভূতসহাযং হুত্ৰা সহজাতনিস্সযৰিপাকৰিপ্পযুত্তঅত্থিঅৰিগতৰসেন ছধা পচ্চযো হোতি. কিঞ্চি পনেত্থ হেতুপচ্চযেন, কিঞ্চি আহারপচ্চযেন চাতি তেসং ৰসেন সব্বৰারেসু উক্কংসাৰকংসো ৰেদিতব্বো. পৰত্তে পন চক্খাদীনং পঞ্চন্নং ৰিপাকমৰিপাকম্পি নামং পচ্ছাজাতৰিপ্পযুত্তঅত্থিঅৰিগতৰসেন চতুধা পচ্চযো হোতীতি. এৰং তাৰ নামমেৰ সল়াযতনস্স পচ্চযো হোতীতি ৰেদিতব্বং.

রূপং পন ৰত্থুভূতং পটিসন্ধিযং ছট্ঠাযতনস্স সহজাতঅঞ্ঞমঞ্ঞনিস্সযৰিপ্পযুত্তঅত্থিঅৰিগতৰসেন ছধা পচ্চযো হোতি. চতুমহাভূতরূপং চক্খাদীনং পঞ্চন্নং পটিসন্ধিযং, পৰত্তে চ সহজাতনিস্সযঅত্থিঅৰিগতপচ্চযেহি চতুধা পচ্চযো হোতি. রূপজীৰিতিন্দ্রিযং পন ইন্দ্রিযঅত্থিঅৰিগতৰসেন তিৰিধা. তথা আহারো আহারত্থিঅৰিগতৰসেন. সো চ আহারূপজীৰীনং পৰত্তেযেৰ, নো পটিসন্ধিযং. তানি পন পঞ্চ চক্খাযতনাদীনি পঞ্চৰিঞ্ঞাণসঙ্খাতস্স ছট্ঠস্স মনাযতনস্স নিস্সযপুরেজাতইন্দ্রিযৰিপ্পযুত্তঅত্থিঅৰিগতৰসেন ছধা পচ্চযা হোন্তি পৰত্তেযেৰ, নো পটিসন্ধিযং. তথা পঞ্চৰিঞ্ঞাণৰিরহিতমনাযতনস্স ৰত্থুরূপং নিস্সযপুরেজাতৰিপ্পযুত্তঅত্থিঅৰিগতৰসেন পঞ্চধা পচ্চযো হোতীতি. এৰং রূপমেৰ ছট্ঠাযতনস্স, সল়াযতনস্স চ পচ্চযো হোতীতি ৰেদিতব্বং. খন্ধত্তযৰত্থুরূপসঙ্খাতং পন নামরূপং ছট্ঠাযতনস্স পটিসন্ধিযং সহজাতঅঞ্ঞমঞ্ঞনিস্সযসম্পযুত্তৰিপ্পযুত্তৰিপাকঅত্থিঅৰিগতাদিৰসেন যথারহং পচ্চযো হোতীতি. এৰং ¶ নামঞ্চ রূপঞ্চ নামরূপঞ্চ যথারহং ছট্ঠাযতনস্স, সল়াযতনস্স চ পচ্চযো হোতীতি ৰেদিতব্বং.

সল়াযতনপচ্চযা ফস্সপদে পন ছট্ঠাযতনং ৰিপাকং, অৰিপাকঞ্চ সব্বত্থ সম্পযুত্তফস্সস্স ¶ সহজাতাদিৰসেন নৰধা, অট্ঠধা ৰা পচ্চযো হোতি. চক্খাযতনাদীনি পঞ্চ যথাক্কমং পৰত্তে চক্খুসম্ফস্সাদীনং পঞ্চন্নং নিস্সযপুরেজাতইন্দ্রিযৰিপ্পযুত্তঅত্থিঅৰিগতৰসেন ছধা, রূপাযতনাদীনি পঞ্চ তেসং আরম্মণপুরেজাতঅত্থিঅৰিগতৰসেন তিধা. মনোসম্ফস্সস্স পন তানি, ধম্মারম্মণঞ্চ তথা চ আরম্মণাধিপতিমত্তেন চাতি বহুধা পচ্চযা হোন্তি. এৰং ছট্ঠাযতনঞ্চ সল়াযতনঞ্চ ছব্বিধস্সাপি ফস্সস্স পচ্চযো হোতীতি ৰেদিতব্বং.

ফস্সপচ্চযা ৰেদনাপদে সব্বোপি ফস্সো সহজাতানং ৰেদনানং সহজাতঅঞ্ঞমঞ্ঞনিস্সযৰিপাকআহারসম্পযুত্তঅত্থিঅৰিগতৰসেন অট্ঠধা, সত্তধা ৰা পচ্চযো হোতি, অসহজাতানং উপনিস্সযৰসেনেৰাতি.

ৰেদনাপচ্চযা তণ্হাপদে ৰিপাকৰেদনা অনুসযপতিতায তণ্হায উপনিস্সযৰসেন, সহজাতাদিৰসেন চ পচ্চযো হোতি. যস্মা পন –

দুক্খী সুখং পত্থযতি, সুখী ভিয্যোপি ইচ্ছতি;

উপেক্খা পন সন্তত্তা, সুখমিচ্চেৰ ভাসিতা;

তণ্হায পচ্চযা তস্মা, হোন্তি তিস্সোপি ৰেদনাতি. (ৰিসুদ্ধি. ২.৬৪৪);

তণ্হাপচ্চযা উপাদানপদে তণ্হা অসহজাতা চতুন্নম্পি উপাদানানং উপনিস্সযৰসেন চেৰ অনন্তরাদিৰসেন চ, সহজাতা পন কামুপাদানৰজ্জিতানং তিণ্ণং হেতুসহজাত অঞ্ঞমঞ্ঞনিস্সযসম্পযুত্তঅত্থিঅৰিগতৰসেন সত্তধা পচ্চযো হোতি.

উপাদানপচ্চযা ¶ ভৰপদে চতুব্বিধম্পি উপাদানং অসহজাতস্স সব্বকম্মভৰস্স চেৰ উপপত্তিভৰস্স চ উপনিস্সযৰসেনেৰ পচ্চযো হোতি, সহজাতস্স পন কম্মভৰস্স হেতুসহজাতাদিৰসেন পচ্চযো হোতি.

ভৰপচ্চযা ¶ জাতিপদে ভৰোতি কম্মভৰোৰ অধিপ্পেতো, সো চ জাতিযা কম্মপচ্চযউপনিস্সযপচ্চযৰসেন দ্ৰিধা পচ্চযো হোতি.

জাতিপচ্চযা জরামরণাদিপদে জাতি পন জরামরণানং, সোকাদীনঞ্চ তব্ভাৰভাৰীভাৰমত্ততো সুত্তন্তিকনযেন উপনিস্সযকোটিযাৰ পচ্চযো হোতীতি অযং তাৰেত্থ পচ্চযনযো.

কারকাদীহি সুঞ্ঞতো পনেতে অৰিজ্জাদযো দ্ৰাদস ধম্মা যস্মা এৰং পচ্চযপচ্চযুপ্পন্নভাৰেন অঞ্ঞমঞ্ঞং পটিবদ্ধা অঞ্ঞনিরপেক্খা হুত্ৰা অৰিচ্ছিন্না অনাদিকা পৰত্তন্তি, তস্মা ততো অঞ্ঞেন ব্রহ্মাদিনা কারকেন, পকতিঅণুকালাদিহেতুনা ৰা কারকৰেদকরূপেন পরপরিকপ্পিতেন অত্তনা ৰা রহিতা. ন চেতে অত্তা, ন অত্তনি, ন অত্তৰন্তো, সুঞ্ঞা এতে অত্তেন ৰা অত্তনিযেন ৰা ধুৰভাৰেন ৰা সুভভাৰেন ৰা সুখভাৰেন ৰাতি অযং কারকাদীহি সুঞ্ঞতা.

মূলদ্ধসন্ধিসঙ্খেপাকারৰট্টৰিভাগতোতি এত্থ মূলতো তাৰ অৰিজ্জা, তণ্হা চাতি দ্ৰে ধম্মা মূলন্তি ৰেদিতব্বা. অদ্ধতো পনেত্থ অৰিজ্জা, সঙ্খারাতি দ্ৰে অঙ্গানি অতীতো অদ্ধা, ৰিঞ্ঞাণাদীনি ভৰাৰসানানি অট্ঠ পচ্চুপ্পন্নো অদ্ধা, জাতি চেৰ জরামরণঞ্চাতি দ্ৰে অনাগতো অদ্ধাতি তযো অদ্ধা ৰেদিতব্বা. সন্ধিতো পন সঙ্খারানং, পটিসন্ধিৰিঞ্ঞাণস্স চ অন্তরা একো হেতুফলসন্ধি, ৰেদনায চ তণ্হায চ অন্তরা একো ফলহেতুসন্ধি, ভৰস্স ¶ চ জাতিযা চ অন্তরা একো হেতুফলসন্ধি চাতি তযো সন্ধী ৰেদিতব্বা. সঙ্খেপতো পন সন্ধীনং আদিপরিযোসানৰৰত্থিতা চত্তারো সঙ্খেপা হোন্তি. সেয্যথিদং – অৰিজ্জাসঙ্খারা একো সঙ্খেপো, ৰিঞ্ঞাণনামরূপসল়াযতনফস্সৰেদনা দুতিযো, তণ্হুপাদানভৰা ততিযো, জাতিজরামরণানি চতুত্থোতি এৰং চত্তারো সঙ্খেপা ৰেদিতব্বা.

আকারতো পনেত্থ –

অতীতে হেতুযো পঞ্চ, ইদানি ফলপঞ্চকং;

ইদানি হেতুযো পঞ্চ, আযতিং ফলপঞ্চকন্তি. –

এৰং ¶ ৰীসতি আকারা হোন্তি.

এত্থ হি সরূপতো ৰুত্তা অৰিজ্জাসঙ্খারা, তেসং গহণেন তদৰিনাভাৰতো গহিতা তণ্হুপাদানভৰাতি ইমে পঞ্চ ধম্মা অতীতে হেতুযো নাম, সরূপতো ৰুত্তা ৰিঞ্ঞাণাদযো পঞ্চ ধম্মা ইদানি ফলপঞ্চকং নাম, সরূপতো পন ৰুত্তা তণ্হুপাদানভৰা, তেসং গহণেন তদৰিনাভাৰতো গহিতা অৰিজ্জাসঙ্খারাতি ইমে পঞ্চ ইদানি হেতুযো নাম. জাতিআদিঅপদেসেন ৰুত্তা ৰিঞ্ঞাণাদযো পঞ্চ ধম্মা আযতিং ফলপঞ্চকং নামাতি এৰং ৰীসতি আকারা ৰেদিতব্বা. ৰট্টতো পনেত্থ সঙ্খারভৰা কম্মৰট্টং, অৰিজ্জাতণ্হুপাদানা কিলেসৰট্টং, সেসানি ৰিপাকৰট্টন্তি তীণি ৰট্টানি হোন্তি. যাৰ চ তেসু কিলেসৰট্টং অরিযমগ্গেন ন উপচ্ছিজ্জতি, তাৰ ইদং ভৰচক্কং অনুপচ্ছিন্নং পৰত্ততীতি অযমেত্থ মূলদ্ধসন্ধিসঙ্খেপাকারৰট্টৰিভাগো.

ৰারণোপমতোতি ¶ এত্থ ৰারণতো তাৰ – ‘‘অৰিজ্জাপচ্চযা সঙ্খারা’’তি ইদমহেতুকৰিসমহেতুকদস্সননিৰারণং, ‘‘সঙ্খারপচ্চযা ৰিঞ্ঞাণ’’ন্তি উচ্ছেদঅত্তসঙ্কন্তিদস্সননিৰারণং, ‘‘ৰিঞ্ঞাণপচ্চযা নামরূপ’’ন্তি অত্তাতি পরিকপ্পিতৰত্থুভেদদস্সনতো ঘনসঞ্ঞানিৰারণং, ‘‘নামরূপপচ্চযা সল়াযতন’’ন্তিআদি অত্তা পস্সতি…পে… ৰিজানাতি ফুসতি, ৰেদযতি, তণ্হিযতি, উপাদিযতি, ভৰতি, জাযতি, জীযতি, মীযতীতি এৰমাদিদস্সননিৰারণন্তি ইদমেত্থ মিচ্ছাদস্সননিৰারণং.

উপমাতো পনেত্থ অন্ধো ৰিয অৰিজ্জা, তস্স উপক্খলনং ৰিয সঙ্খারা, পতনং ৰিয ৰিঞ্ঞাণং, তেন গণ্ডপাতুভাৰো ৰিয নামরূপং, তস্স গণ্ডভেদপীল়কা ৰিয সল়াযতনং, তস্স সঙ্ঘট্টনং ৰিয ফস্সো, তজ্জনিতদুক্খং ৰিয ৰেদনা, দুক্খস্স পটিকারাভিলাসো ৰিয তণ্হা, অসপ্পাযগ্গহণং ৰিয উপাদানং, অসপ্পাযালেপনং ৰিয ভৰো, তেন গণ্ডৰিকারপাতুভাৰো ৰিয জাতি, তব্বিকারভেদো ৰিয জরামরণং. যথাসভাৰদস্সননিৰারণাদিতো ৰা এতে অৰিজ্জাদযো অক্খিপটলাদি উপমাহিপি ৰেদিতব্বাতি অযমেত্থ উপমা.

গম্ভীরনযভেদতোতি এত্থ গম্ভীরভেদো তাৰ ইমেসং অৰিজ্জাদীনং পচ্চেকং ধম্মত্থদেসনাপটিৰেধগম্ভীরতা ৰেদিতব্বা. ইমে হি অৰিজ্জাদযো ধম্মা যেনাকারেন যদৰত্থা চ সঙ্খারাদীনং ¶ ফলানং পচ্চযা হোন্তি, সো নেসং পচ্চযট্ঠো দুরৰবোধতো গম্ভীরোতি অযমেত্থ ধম্মগম্ভীরতা. ধম্মোতি হেতু ‘‘হেতুম্হি ঞাণং ধম্মপটিসম্ভিদা’’তি (ৰিভ. ৭২০) ৰচনতো. জরামরণাদীনং ফলানং জাতিআদীহি পচ্চযেহি সম্ভূতসমুদাগতট্ঠো দুরৰবোধতো গম্ভীরোতি অযং অত্থগম্ভীরতা. অত্থোতি ফলং ‘‘হেতুফলে ঞাণং ¶ অত্থপটিসম্ভিদা’’তি (ৰিভ. ৭২০) ৰচনতো. তেসং পন হেতূনং, ফলানঞ্চ তেন তেনাকারেন অৰিপরীততো দেসনাপি সব্বঞ্ঞুতঞ্ঞাণস্সেৰ গোচরতো গম্ভীরাতি অযং দেসনাগম্ভীরতা. যো পনেসং অৰিজ্জাসঙ্খারাদীনং অদস্সনাযূহনাদিসভাৰো, সো মন্দপঞ্ঞেহি দুপ্পরিযোগাহত্তা গম্ভীরোতি অযং পটিৰেধগম্ভীরতাতি অযমেত্থ গম্ভীরভেদো.

নযভেদো পনেত্থ একত্তনযো নানত্তনযো অব্যাপারনযো এৰংধম্মতানযোতি ইমেসং চতুন্নং অত্থনযানং ৰসেন ৰেদিতব্বো. তত্থ হি ‘‘অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণ’’ন্তি এৰং বীজস্স অঙ্কুরাদিভাৰেন রুক্খভাৰপ্পত্তি ৰিয সন্তানানুপচ্ছেদো একত্তনযো নাম. যং সম্মা পস্সন্তো হেতুফলসম্বন্ধেন সন্তানানুপচ্ছেদাৰবোধতো উচ্ছেদদিট্ঠিং পজহতি, মিচ্ছা পস্সন্তো হেতুফলসম্বন্ধেন পৰত্তমানস্স সন্তানানুপচ্ছেদস্স একত্তগ্গহণতো সস্সতদিট্ঠিং উপাদিযতি.

অৰিজ্জাদীনং পন যথাসকং লক্খণৰৰত্থানং নানত্তনযো নাম. যং সম্মা পস্সন্তো নৰনৰানং উপ্পাদদস্সনতো সস্সতদিট্ঠিং পজহতি, মিচ্ছা পস্সন্তো একসন্তানপতিতস্স ভিন্নসন্তানস্সেৰ নানত্তগ্গহণতো উচ্ছেদদিট্ঠিং উপাদিযতি.

অৰিজ্জায পন ‘‘সঙ্খারা মযা উপ্পাদেতব্বা, সঙ্খারানং ৰা ৰিঞ্ঞাণং অম্হেহী’’তি এৰমাদিব্যাপারাভাৰো অব্যাপারনযো নাম. যং সম্মা পস্সন্তোকারকস্স অভাৰাৰবোধতো অত্তদিট্ঠিং পজহতি, মিচ্ছা পস্সন্তো যো অসতিপি ব্যাপারে অৰিজ্জাদীনং সভাৰনিযমসিদ্ধো হেতুভাৰো, তস্স অগ্গহণতো অকিরিযদিট্ঠিং উপাদিযতি.

অৰিজ্জাদীহি ¶ পন কারণেহি সঙ্খারাদীনংযেৰ সম্ভৰো খীরাদীহি দধিআদীনং ৰিয, ন অঞ্ঞেসন্তি অযং এৰংধম্মতানযো নাম. যং সম্মা পস্সন্তো পচ্চযানুরূপতো ফলাৰবোধতো অহেতুকদিট্ঠিং, অকিরিযদিট্ঠিঞ্চ পজহতি, মিচ্ছা পস্সন্তো পচ্চযানুরূপং ফলপ্পৰত্তিং অগ্গহেত্ৰা ¶ যতো কুতোচি যস্স কস্সচি অসম্ভৰগ্গহণতো অহেতুকদিট্ঠিং চেৰ নিযতৰাদঞ্চ উপাদিযতীতি অযমেত্থ নযভেদোতি এৰং ৰিজানীযো পাল়িমুত্তৰিনিচ্ছযো.

পচ্চযাকারৰিভঙ্গমাতিকত্থৰণ্ণনা নিট্ঠিতা.

সতিপট্ঠানৰিভঙ্গমাতিকত্থৰণ্ণনা

সতিপট্ঠানৰিভঙ্গমাতিকায পন অত্থতো তাৰ – চত্তারোতি গণনপরিচ্ছেদো, তেন ন ততো হেট্ঠা, ন উদ্ধন্তি দীপেতি. সতিপট্ঠানাতি এত্থ দ্ৰে সতিপট্ঠানা সতিগোচরোপি সতিপি. ‘‘চতুন্নং, ভিক্খৰে, সতিপট্ঠানানং সমুদযঞ্চ অত্থঙ্গমঞ্চ দেসেস্সামী’’তিআদীসু (সং. নি. ৫.৪০৮) হি সতিগোচরো ‘‘সতিপট্ঠান’’ন্তি ৰুচ্চতি, তস্সত্থো পতিট্ঠাতি তস্মিন্তি পট্ঠানং, কা পতিট্ঠাতি? সতি. সতিযা পট্ঠানং সতিপট্ঠানং. পধানং ঠানন্তি ৰা পট্ঠানং, সতিযা পট্ঠানং সতিপট্ঠানং. ‘‘চত্তারো সতিপট্ঠানা ভাৰিতা বহুলীকতা সত্ত বোজ্ঝঙ্গে পরিপূরেন্তী’’তিআদীসু (ম. নি. ৩.১৪৭) পন সতি. তস্সত্থো পতিট্ঠাতীতি পট্ঠানং, উপট্ঠাতি ওক্কন্তিত্ৰা পক্খন্দিত্ৰা পৰত্ততীতি অত্থো. সতিযেৰ পট্ঠানত্থেন সতিপট্ঠানং. অথ ৰা সরণট্ঠেন সতি, সা চ উপট্ঠানট্ঠেন পট্ঠানন্তি সতিপট্ঠানং, ইদমিধ অধিপ্পেতং. যদি এৰং, কস্মা সতিপট্ঠানাতি বহুৰচনং কতং? সতিযা বহুত্তা. আরম্মণভেদেন হি বহুকা তা সতিযো.

ইধাতি ¶ ইমস্মিং সাসনে, তেন অজ্ঝত্তাদিৰসেন সব্বপ্পকারচতুচত্তালীসৰিধসতিপট্ঠাননিব্বত্তকস্স পুগ্গলস্স নিস্সযভূতং সাসনমেৰ, নাঞ্ঞং সাসনন্তি দীপেতি. ৰুত্তং হেতং ‘‘ইধেৰ, ভিক্খৰে, সমণো…পে… সুঞ্ঞা পরপ্পৰাদা সমণেহি অঞ্ঞেহী’’তি (দী. নি. ২.২১৪; ম. নি. ১.১৩৯; অ. নি. ৪.২৪১).

ভিক্খূতি সংসারে ভযং ইক্খনকো. তেন কিঞ্চাপি ভগৰতো দেৰলোকে নিসীদিত্ৰা সতিপট্ঠানং দেসেন্তস্স সন্তিকে দেৰগণং মুঞ্চিত্ৰা একভিক্খুপি নিসিন্নো নাম নত্থি, তথাপি দেৰো ৰা হোতু মনুস্সো ৰা গহট্ঠো ৰা পব্বজিতো ৰা, সংসারে ভযন্তি সম্মা ইক্খমানো যথানুসিট্ঠং ¶ পটিপজ্জমানোৰ ভিক্খু নাম হোতি, নাঞ্ঞোতি দস্সেতি. যথাহ ‘‘অলঙ্কতো চেপী’’তি (ধ. প. ১৪২).

অজ্ঝত্তন্তি নিযকজ্ঝত্তং. কাযেতি এত্থ আযন্তি ততোতি আযো. কে আযন্তি? কুচ্ছিতা কেসাদযো, ইতি কুচ্ছিতানং আযোতি কাযো. অথ ৰা অঙ্গপচ্চঙ্গানং, কেসাদীনঞ্চ সমূহট্ঠেনপি কাযো, রূপকাযো, তস্মিং অত্তনো কাযেতি অত্থো. কাযানুপস্সীতি কাযং অনুপস্সনসীলো. ‘‘কাযে’’তি চ ৰত্ৰা পুন ‘‘কাযানুপস্সী’’তি দুতিযকায-গ্গহণং ‘‘এৰং ন কাযে অঙ্গপচ্চঙ্গৰিনিমুত্তএকধম্মানুপস্সী, নাপি কেসলোমাদিৰিনিমুত্তইত্থিপুরিসানুপস্সী, ন চ ভূতুপাদাযৰিনিমুত্তএকধম্মানুপস্সী, অথ খো রথসম্ভারনগরাৰযৰকদলিক্খন্ধৰিভাগানুপস্সকো ৰিয যথাক্কমং অঙ্গপচ্চঙ্গকেসাদিভূতুপাদাযসমূহানুপস্সী এৰা’’তি দস্সনত্থং কতং. তথা হেত্থ যথাৰুত্তধম্মসমূহৰিনিমুত্তো ইত্থিপুরিসাদিকো, অঞ্ঞো ৰা কোচি ধম্মো ন দিস্সতি, যথাৰুত্তধম্মসমূহমত্তেযেৰ পন বালা তথা তথা সুভাদিতো চ মিচ্ছাভিনিৰেসং করোন্তি, অযং ¶ পন যোগী তত্থ কাযানুপস্সী এৰ অনিচ্চদুক্খঅনত্তাসুভানুপস্সী এৰাতি ৰুত্তং হোতি. অথ ৰা য্ৰাযং মহাসতিপট্ঠানে অস্সাসপস্সাসাদিকো চুদ্দসৰিধো কাযো ৰুত্তো, তস্স সব্বস্স ইমস্মিংযেৰ কাযে অনুপস্সনতো ‘‘কাযে কাযানুপস্সী’’তি এৰমাদিনাপি অত্থো দট্ঠব্বো.

ৰিহরতীতি ইরিযতি, চতূসু ইরিযাপথেসু একেনাগতং সরীরবাধনং অঞ্ঞেন ইরিযাপথেন ৰিচ্ছিন্দিত্ৰা অপতমানং অত্তভাৰং হরতি, পৰত্তেতীতি অত্থো. বহিদ্ধা কাযেতি পরস্স কাযে. অজ্ঝত্তবহিদ্ধা কাযেতি কালেন অত্তনো, কালেন পরস্স কাযে. কালেন হি অজ্ঝত্তবহিদ্ধাকাযেসুপি একস্মিং খণে কাযানুপস্সনা উপ্পজ্জতি, পগুণকম্মট্ঠানস্স পন অপরাপরং সঞ্চরণকালো এত্থ কথিতো. আতাপীতি কাযপরিগ্গাহকৰীরিযেন ৰীরিযৰা. সো হি যস্মা কিলেসানং আতাপনতো আতাপো ৰুচ্চতি ৰীরিযং, সো চস্স অত্থি, তস্মা আতাপীতি ৰুচ্চতি. সম্পজানোতি কাযপরিগ্গাহকেন সম্পজঞ্ঞেন সমন্নাগতো. সতিমাতি কাযপরিগ্গাহিকায সতিযা সমন্নাগতো. অযং পন যস্মা সতিযা আরম্মণং পরিগ্গহেত্ৰা পঞ্ঞায অনুপস্সতি, ৰীরিযেন চ অন্তরা ৰোসানং নাপজ্জতি, তস্মা যেসং ধম্মানং আনুভাৰেন তং সতিপট্ঠানং সম্পজ্জতি, তেসং দস্সনত্থং ‘‘আতাপী সম্পজানো সতিমা’’তি ইদং ৰুত্তন্তি ৰেদিতব্বং.

ইতি ¶ কাযানুপস্সনাসতিপট্ঠানং, সম্পযোগঙ্গঞ্চ দস্সেত্ৰা ইদানি পহানঙ্গং দস্সেতুং ‘‘ৰিনেয্য লোকে অভিজ্ঝাদোমনস্স’’ন্তি ৰুত্তং. তত্থ ৰিনেয্যাতি তদঙ্গৰিনযেন ৰা ৰিক্খম্ভনৰিনযেন ৰা ৰিনযিত্ৰা. লোকেতি য্ৰাযং অজ্ঝত্তাদিভেদো কাযো ৰুত্তো, স্ৰেৰ ইধ লুজ্জনপলুজ্জনট্ঠেন লোকো নাম. ৰিভঙ্গে পন যস্মা রূপকাযে ¶ পহীনঅভিজ্ঝাদযো ৰেদনাদীসুপি পহীযন্তি এৰ, তস্মা পঞ্চপি উপাদানক্খন্ধা ‘‘লোকো’’তি ৰুত্তং. তস্মিং লোকে অভিজ্ঝাদোমনস্সসঙ্খাতং কামচ্ছন্দব্যাপাদং ৰিনেয্যাতি সম্বন্ধো. ইমস্স চ নীৰরণেসু বলৰধম্মদ্ৰযস্স পহানদস্সনেন সেসনীৰরণানম্পি পহানং ৰুত্তংযেৰাতি ৰেদিতব্বং. ৰিসেসেন চেত্থ অভিজ্ঝাদোমনস্সৰিনযেন যথাক্কমং কাযসম্পত্তিৰিপত্তিমূলানং অনুরোধৰিরোধানং, অত্তঅভিরতিতদসুভাকারাদিভাৰনানভিরতীনং, অভূতগুণপক্খেপভূতদোসাপনযনানঞ্চ পহানং ৰুত্তং, তেন যোগাৰচরস্স যোগানুভাৰনিব্বত্তফলং, যোগসমত্থতা চ দীপিতা হোতি.

অজ্ঝত্তং ৰেদনাসূতিআদীসুপি অজ্ঝত্তাদীনি ৰুত্তনযেন ৰেদিতব্বানি. এত্থ পন ৰেদনাতি তিস্সো ৰেদনা লোকিযা, তথা চিত্তং, ধম্মা চ, তেসং ৰিভাগো ৰিভঙ্গনযে আৰি ভৰিস্সতি. কেৰলং পনেত্থ যথা ৰেদনাদযো অনুপস্সন্তো ৰেদনাদিঅনুপস্সী নাম হোতি, সো নযো দস্সেতব্বো. সেয্যথিদং – ৰেদনাসু তাৰ সুখা ৰেদনা দুক্খতো, দুক্খা সল্লতো, ইতরা চ অনিচ্চতো অনুপস্সিতব্বা. যথাহ –

‘‘যো সুখং দুক্খতো অদ্দ, দুক্খমদ্দক্খি সল্লতো;

অদুক্খমসুখং সন্তং, অদ্দক্খি নং অনিচ্চতো’’তি (সং. নি. ৪.২৫৩; ইতিৰু. ৫৩).

সব্বা এৰ এতা দুক্খতো অনুপস্সিতব্বা ‘‘যং কিঞ্চি ৰেদযিতং, তং দুক্খস্মিন্তি ৰদামী’’তি (সং. নি. ৪.২৫৯) ৰচনতো. এৰং অনুপস্সন্তো পন অনিচ্চাদিসত্তানুপস্সনাৰসেন ৰা অনুপস্সন্তোপি ‘‘ইমং ৰেদনং কো ৰেদযতি, কস্সাযং ৰেদনা, কিং কারণাযং ৰেদনা’’তি উপপরিক্খিত্ৰা ‘‘ন কোচি সত্তাদিকো ৰেদযতি, ন কেসঞ্চি সত্তাদীনং ৰেদনা, ৰত্থারম্মণাদিকারণা ¶ পনাযং ৰেদনা উপ্পজ্জতী’’তি অনুপস্সন্তোপি ৰেদনানুপস্সী নাম হোতি. অথ ৰা সুখাদীনং উপ্পত্তিক্খণে দুক্খাদীনং অসম্ভৰা অনিচ্চা অদ্ধুৰা ৰিপরিণামধম্মাতি এৰং ৰা অনুপস্সন্তো ৰেদনানুপস্সী নাম হোতি. ইমিনাৰ নযেন পাল়িনযানুসারেন ¶ সেসচিত্তধম্মানম্পি অনুপস্সনাকারো ৰেদিতব্বো. ৰিসেসতো পনেত্থ চিত্তেসু অনিচ্চতাৰসেন, ধম্মেসু অনত্ততাৰসেন চ অনুপস্সন্তো চিত্তানুপস্সী, ধম্মানুপস্সী চ নাম হোতীতি ৰেদিতব্বং. সেসং সুৰিঞ্ঞেয্যমেৰ. অযং তাৰেত্থ পদত্থো.

ধম্মভেদো পনেত্থ নত্থি, সরণৰসেন চ একাৰ সতি আরম্মণৰসেন ‘‘চত্তারো সতিপট্ঠানা’’তি ৰুত্তাতি.

ৰিভঙ্গনযতো পনেত্থ সুত্তন্তভাজনীযে তাৰ অজ্ঝত্তবহিদ্ধাতদুভযকাযে কেসাদিকোট্ঠাসভাৰনাৰসেন পঠমং সতিপট্ঠানং ৰিত্থারিতং. তথা অজ্ঝত্তাদীসু পচ্চেকং সামিসনিরামিসৰসেন দুৰিধানং সুখদুক্খঅদুক্খমসুখৰেদনানং ৰসেন দুতিযং, সরাগৰীতরাগসদোসৰীতদোসসমোহৰীতমোহসংখিত্তৰিক্খিত্তমহগ্গতঅমহগ্গতসউত্তরানুত্তরসমাহিতাসমাহিতৰিমুত্তাৰিমুত্তভেদতো সোল়সৰিধেহি চিত্তপজাননৰসেন ততিযং, পঞ্চনীৰরণানং, সত্তবোজ্ঝঙ্গানঞ্চ সম্ভৰাসম্ভৰউপ্পাদপহানপহীনানুপ্পত্তিভাৰনাপারিপূরিহেতুজ্ঝানৰসেন চতুত্থং সতিপট্ঠানং ৰিত্থারিতং. অযং সুত্তন্তভাজনীযনযো.

অভিধম্মভাজনীযে পন তাৰ ‘‘চত্তারো সতিপট্ঠানা. ইধ ভিক্খু কাযে কাযানুপস্সী ৰিহরতি ৰেদনাসু…পে… ধম্মেসু ধম্মানুপস্সী ৰিহরতী’’তি (ৰিভ. ৩৮০) এৰং মাতিকং ঠপেত্ৰা ধম্মসঙ্গণিযং ৰুত্তনযস্স ৰিত্থারেসু অট্ঠসু লোকুত্তরচিত্তেসু সম্পযুত্তসতিৰসেনেৰ ৰিত্থারতো ৰিভত্তা.

পঞ্হাপুচ্ছকনযেপি ¶ চতুন্নং সতিপট্ঠানানং কতি কুসলা…পে… কতি অরণা? সিযা কুসলা, সিযা অব্যাকতা…পে… অনুপাদিন্নঅনুপাদানিযাৰ, অসংকিলিট্ঠঅসংকিলেসিকাৰ…পে… অনিদস্সনঅপ্পটিঘাৰ. ন হেতূ অহেতুকাৰ…পে… অনুত্তরা অরণাৰাতি লোকুত্তরৰসেনেৰ ৰিভত্তা. সম্মাসম্বুদ্ধেন হি সুত্তন্তভাজনীযস্মিঞ্ঞেৰ লোকিযলোকুত্তরমিস্সকা সতিপট্ঠানা কথিতা, অভিধম্মভাজনীযপঞ্হাপুচ্ছকেসু পন লোকুত্তরাযেৰ. তেসু চ লোকিযা নানাচিত্তেসু এৰ লব্ভন্তি. অঞ্ঞেনেৰ হি চিত্তেন কাযং পগ্গণ্হন্তি, অঞ্ঞেন ৰেদনাদযোতি. লোকুত্তরা পন চত্তারোপি মগ্গক্খণে একচিত্তেযেৰ লব্ভন্তি. একস্মিঞ্হি মগ্গচিত্তক্খণে আরম্মণতো নিব্বানারম্মণা একাৰ সতি কাযাদীসু সুভসুখনিচ্চঅত্তৰিপল্লাসসমুচ্ছেদকতায ¶ চতুকিচ্চসাধনট্ঠেন চত্তারিপি নামানি লভতীতি অযমেত্থ ৰিভঙ্গনযো.

কমতো সতিপট্ঠানে, অনূনাধিকতোপি চ;

পাল়িমুত্তনযো ঞেয্যো, তত্থ কোসল্লমিচ্ছতা.

তত্থ কমতো তাৰ অযম্পি দেসনাক্কমোৰ, সোপি পাকটাপাকটৰসেন ৰুত্তো. ইমাসু হি রূপকম্মট্ঠানং পাকটন্তি পঠমং কাযানুপস্সনা ৰুত্তা. ততো অরূপকম্মট্ঠানং. তত্থাপি আরম্মণং অনুভৰন্তী উপ্পজ্জমানা ৰেদনা পাকটাতি অনন্তরা ৰেদনানুপস্সনা, ততো আরম্মণং ৰিজানন্তং ৰিঞ্ঞাণং পাকটন্তি চিত্তানুপস্সনা, চিত্তে পাকটে তন্নিস্সিতা সুখুমাপি ধম্মা পাকটা হোন্তীতি অন্তে ধম্মানুপস্সনা ৰুত্তা. অযং তাৰেত্থ কমো.

অনূনাধিকতোতি এত্থ পন কস্মা ভগৰতা চত্তারোৰ সতিপট্ঠানা ৰুত্তা, অনূনা অনধিকাতি? তণ্হাচরিতদিট্ঠিচরিতসমথযানিকৰিপস্সনাযানিকানং মন্দতিক্খৰসেন দ্ৰিধা পৰত্তানং ৰিসুদ্ধিমগ্গৰসেন. মন্দস্স হি তণ্হাচরিতস্স ওল়ারিকং ¶ কাযানুপস্সনাসতিপট্ঠানং ৰিসুদ্ধিমগ্গো, তিক্খস্স সুখুমং ৰেদনানুপস্সনাসতিপট্ঠানং, দিট্ঠিচরিতস্সাপি মন্দস্স নাতিপ্পভেদগতং চিত্তানুপস্সনাসতিপট্ঠানং, তিক্খস্স অতিপ্পভেদগতং ধম্মানুপস্সনাসতিপট্ঠানং ৰিসুদ্ধিমগ্গো. সমথযানিকস্স চ মন্দস্স অকিচ্ছেন অধিগন্তব্বনিমিত্তং পঠমং সতিপট্ঠানং ৰিসুদ্ধিমগ্গো, তিক্খস্স দুতিযং, ৰিপস্সনাযানিকস্সাপি মন্দস্স ততিযং, তিক্খস্স চতুত্থং ৰিসুদ্ধিমগ্গোতি ৰেনেয্যজ্ঝাসযতো চত্তারো ৰুত্তা. সুভসুখনিচ্চঅত্তভাৰৰিপল্লাসপ্পহানত্থং ৰা চতুরোঘযোগাসৰগন্থউপাদানঅগতিপ্পহানত্থম্পি চতুব্বিধাহারপরিঞ্ঞত্থঞ্চ চত্তারোৰ ৰুত্তা, অনূনা অনধিকাতি অযমেত্থ অনূনাধিকতা. এৰং পাল়িমুত্তনযো ঞেয্যো.

সতিপট্ঠানৰিভঙ্গমাতিকত্থৰণ্ণনা নিট্ঠিতা.

সম্মপ্পধানৰিভঙ্গমাতিকত্থৰণ্ণনা

সম্মপ্পধানৰিভঙ্গমাতিকায ¶ পন অত্থতো তাৰ – সম্মপ্পধানাতি কারণপ্পধানা উপাযপ্পধানা. যোনিসো পদহনতো পরমং ধানং পধানং, পধানৰীরিযানীতি অত্থো. ইধ ভিক্খূতি ইমস্মিং সাসনে পটিপন্নকো ভিক্খু. অনুপ্পন্নানন্তি অনিব্বত্তানং. পাপকানন্তি লামকানং. অকুসলানং ধম্মানন্তি অকোসল্লসম্ভূতানং ধম্মানং. অনুপ্পাদাযাতি ন উপ্পাদনত্থায. ছন্দং জনেতীতি কত্তুকম্যতাসঙ্খাতং কুসলচ্ছন্দং জনেতি উপ্পাদেতি. ৰাযমতীতি পযোগং পরক্কমং করোতি. ৰীরিযং আরভতীতি কাযিকচেতসিকৰীরিযং করোতি. চিত্তং পগ্গণ্হাতীতি তেনেৰ সহজাতৰীরিযেন চিত্তং উক্খিপতি. পদহতীতি পধানৰীরিযং করোতি. পটিপাটিযা পনেতানি চত্তারিপি পদানি ৰীরিযস্সেৰ আসেৰনাভাৰনাবহুলীকম্মসাতচ্চকিরিযাহি যোজেতব্বানি.

উপ্পন্নানন্তি ¶ অনুপ্পন্নাতি অৰত্তব্বতং আপন্নানং. পহানাযাতি পজহনত্থায. অনুপ্পন্নানং কুসলানং ধম্মানন্তি অনিব্বত্তানং কোসল্লসম্ভূতানং ধম্মানং. উপ্পাদাযাতি উপ্পাদনত্থায. উপ্পন্নানন্তি নিব্বত্তানং. ঠিতিযাতি ঠিতত্থায. অসম্মোসাযাতি অনস্সনত্থং. ভিয্যোভাৰাযাতি পুনপ্পুনং ভৰনায. ৰেপুল্লাযাতি ৰিপুলভাৰায. ভাৰনাযাতি ৰড্ঢিযা. পারিপূরিযাতি পরিপূরণত্থায. সেসং পদতো উত্তানমেৰ.

অত্থতো পনেত্থ ‘‘অনুপ্পন্নানং পাপকান’’ন্তিআদীসু অসমুদাচারৰসেন ৰা অননুভূতারম্মণৰসেন ৰা কিলেসানং অনুপ্পত্তি ৰেদিতব্বা. অঞ্ঞথা হি অনমতগ্গে সংসারে অনুপ্পন্না অকুসলধম্মা নাম নত্থি. কুসলধম্মেসু পন রতনত্তযপ্পসাদৰিপস্সনাদিৰিৰট্টূপনিস্সযকুসলাদিৰসেন অনুপ্পন্নাপি অত্থি. তেসম্পি উপ্পন্নপুব্বত্তে সতি সব্বসত্তানং ইতো পুব্বে চ আসৰক্খযপ্পসঙ্গতো. একন্তপ্পৰত্তসাধকা তেসং. তত্থ একচ্চস্স ৰত্তগন্থধুতঙ্গসমাধিৰিপস্সনানৰকম্মেসু অঞ্ঞতরস্মিং নিচ্চপ্পযুত্তস্স, ঘটতো, ৰাযমতো চ ব্রহ্মলোকা আগতত্তা ভৰৰসেন কিলেসেসু অলদ্ধাসেৰনস্স সত্তস্স কিলেসা ন সমুদাচরন্তি, অপরভাগে পনস্স ৰত্তাদীনি ৰিস্সজ্জেত্ৰা কুসীতস্স চরতো চেৰ অকল্যাণমিত্তাদিতো কিলেসেসু লদ্ধাসেৰনস্স চ অযোনিসোমনসিকারং, সতিৰোস্সগ্গঞ্চ আগম্ম উপ্পজ্জন্তি. এৰং তাৰ অসমুদাচারৰসেন কিলেসানং অনুপ্পত্তি ৰেদিতব্বা.

একচ্চস্স ¶ পন তস্মিং অত্তভাৰে অননুভূতপুব্বং দিব্বাদিভেদং মনাপিযং আরম্মণং লভিত্ৰা তত্থ অযোনিসোমনসিকারসতিৰোস্সগ্গে আগম্ম কিলেসা উপ্পজ্জন্তি, অলভিত্ৰা এৰং অননুভূতারম্মণৰসেন কিলেসানং অনুপ্পত্তি ৰেদিতব্বা.

‘‘উপ্পন্নানং ¶ পাপকান’’ন্তি এত্থ পন চতুব্বিধং উপ্পন্নং ৰত্তমানভূতাপগতওকাসকতভূমিলদ্ধৰসেন, তেসং ৰিভাগো উপ্পন্নত্তিকে ৰুত্তোৰ. অপরম্পি চতুব্বিধং উপ্পন্নং সমুদাচারআরম্মণাধিগ্গহিতঅৰিক্খম্ভিতঅসমুগ্ঘাতিতৰসেন. তত্থ সম্পতি ৰত্তমানংযেৰ সমুদাচারুপ্পন্নং নাম. সেসং পাকটমেৰ. যস্মা পনেত্থ ইমেসু উপ্পন্নেসু ৰত্তমানভূতাপগতওকাসকতসমুদাচারসঙ্খাতং চতুব্বিধং উপ্পন্নং ন মগ্গাদিৰজ্ঝং, তস্মা ভূমিলদ্ধআরম্মণাধিগ্গহিতঅসমুগ্ঘাতিতসঙ্খাতং চতুব্বিধং উপ্পন্নং সন্ধাযেত্থ ‘‘উপ্পন্নানং পাপকানং পহানাযা’’তি ৰুত্তং.

কথং পন মগ্গক্খণে অনুপ্পন্নানং কুসলানং উপ্পাদায ৰাযামো হোতি, কথঞ্চ উপ্পন্নানং ঠিতিযাতি? মগ্গপ্পৰত্তিযা এৰ. মগ্গো হি পৰত্তমানো পুব্বে অনুপ্পন্নপুব্বত্তা অনুপ্পন্নো নাম ৰুচ্চতি. যা চস্স পৰত্তি, অযমেৰ ঠিতি নামাতি অযং তাৰেত্থ পদত্থো.

ধম্মভেদো পনেত্থাপি একস্সেৰ ৰীরিযস্স কিচ্চভেদতো চতুধা ৰুত্তাতি অযমেত্থ পাল়িমুত্তৰিনিচ্ছযো.

ৰিভঙ্গনযতো পন সুত্তন্তভাজনীযে তাৰ চত্তারো সম্মপ্পধানা লোকিযলোকুত্তরকুসলচিত্তসম্পযুত্তৰীরিযৰসেন অকুসলাদিপদেহি সদ্ধিং ৰিত্থারতো ৰিভত্তা. অভিধম্মভাজনীযপঞ্হাপুচ্ছকেসু পনেতে লোকুত্তরকুসলচিত্তসম্পযুত্তৰসেনেৰ ৰিভত্তা, ফলচিত্তসম্পযুত্তা পন ন গহিতা. তেনেৰ পঞ্হাপুচ্ছকে ‘‘কুসলা এৰ, ৰিপাকধম্মধম্মা এৰ, অপচযগামিনোৰ, সেখাৰা’’তিআদিনা ৰুত্তা. সেসো পনেত্থ ৰিনিচ্ছযো সতিপট্ঠানে ৰুত্তনযানুসারেন ৰেদিতব্বো.

সম্মপ্পধানৰিভঙ্গমাতিকত্থৰণ্ণনা নিট্ঠিতা.

ইদ্ধিপাদৰিভঙ্গমাতিকত্থৰণ্ণনা

ইদ্ধিপাদৰিভঙ্গমাতিকায ¶ ¶ পন চত্তারো ইদ্ধিপাদাতি এত্থ ইজ্ঝতীতি ইদ্ধি, সমিজ্ঝতি নিপ্ফজ্জতীতি অত্থো, ইদ্ধি এৰ পাদো ইদ্ধিপাদো, ইদ্ধিকোট্ঠাসোতি অত্থো. ইজ্ঝন্তি ৰা এতায সত্তা ইদ্ধা ৰুদ্ধা উক্কংসগতা হোন্তীতিপি ইদ্ধি, পজ্জন্তি এতেনাতি পাদো, পতিট্ঠা অধিগমূপাযোতি অত্থো, ইদ্ধিযা পাদো ইদ্ধিপাদো. ছন্দসমাধিপধানসঙ্খারসমন্নাগতন্তি এত্থ ছন্দহেতুকো, ছন্দাধিকো ৰা সমাধি ছন্দসমাধি, কত্তুকম্যতাছন্দং অধিপতিং করিত্ৰা পটিলদ্ধসমাধিস্সেতং অধিৰচনং. পধানভূতা সঙ্খারা পধানসঙ্খারা, চতুকিচ্চসাধকস্স সম্মপ্পধানৰীরিযস্সেতং অধিৰচনং. সমন্নাগতন্তি তেন ছন্দসমাধিনা, পধানসঙ্খারেন চ উপেতং. ইদ্ধিপাদন্তি যথাৰুত্তত্থেন ‘‘ইদ্ধী’’তি সঙ্খ্যং গতানং উপচারজ্ঝানাদিকুসলচিত্তসম্পযুত্তানং ছন্দসমাধিপধানসঙ্খারানং অধিট্ঠানট্ঠেন পাদভূতসেসচিত্তচেতসিকরাসিং. ভাৰেতীতি ৰড্ঢেতি, অত্তনো সন্তানে পুনপ্পুনং জনেতীতি অত্থো. ইমিনা নযেন সেসেসুপি অত্থো ৰেদিতব্বো. তত্থ ৰীমংসাতি পঞ্ঞা. সেসং পদতো সুৰিঞ্ঞেয্যমেৰ.

অত্থতো পনেত্থ তেন কিং কথিতং? চতুন্নং ভিক্খূনং মত্থকপ্পত্তং কম্মট্ঠানং কথিতং. যথা হি চতূসু অমচ্চপুত্তেসু ঠানন্তরং পত্থেত্ৰা ৰিচরন্তেসু একো উপট্ঠানেন, একো সূরভাৰেন, একো জাতিসম্পত্তিযা, একো মন্তবলেনাতি এৰং তে পচ্চেককারণেন রাজানং আরাধেত্ৰা ঠানন্তরং পাপুণন্তি, এৰং ভিক্খূপি ছন্দৰীরিযচিত্তৰীমংসাসু একেকং জেট্ঠং ধুরং পুব্বঙ্গমং কত্ৰা লোকুত্তরধম্মনিব্বত্তকা হোন্তি. এত্থ চ ছন্দো সমাধি পধানসঙ্খারোতি তযো ধম্মা ইদ্ধীপি হোন্তি ইদ্ধিপাদাপি, সেসা পন সম্পযুত্তা চত্তারো খন্ধা ইদ্ধিপাদা এৰ. এৰং সেসাধিপতিযুত্তচিত্তেসুপি ইদ্ধিপাদাতি ৰেদিতব্বা.

অপিচ ¶ ঝানৰিপস্সনাসু পুব্বভাগো ইদ্ধিপাদো. যো পটিলাভো, সা ইদ্ধি. পঠমজ্ঝানাদীনং হি পুব্বভাগপরিকম্মানি ইদ্ধিপাদো নাম, পঠমজ্ঝানাদযো ইদ্ধি নাম. পঠমমগ্গাদীনং পুব্বভাগৰিপস্সনা ইদ্ধিপাদো নাম, পঠমমগ্গাদযো ইদ্ধি নাম. পটিলাভৰসেনাপি দীপেতুং ৰট্টতি. পঠমজ্ঝানাদযো হি পঠমমগ্গাদযো চ ইদ্ধিপাদো নাম, দুতিযজ্ঝানাদযো, দুতিযমগ্গাদযো চ ইদ্ধি নামাতি অযং তাৰেত্থ পদত্থো.

ধম্মভেদো ¶ পনেত্থ ৰিভঙ্গনযেনেৰ পাকটো ভৰিস্সতি. তত্থ হি সুত্তন্তভাজনীযে তাৰ ছন্দাদীনং পদানং ৰিভঙ্গং ৰত্ৰা অন্তে ‘‘ইদ্ধিপাদোতি তথাভূতস্স ৰেদনাক্খন্ধো…পে… ৰিঞ্ঞাণক্খন্ধো. ইদ্ধিপাদং ভাৰেতীতি তে ধম্মে আসেৰতি ভাৰেতি বহুলীকরোতি, তেন ৰুচ্চতি ইদ্ধিপাদং ভাৰেতী’’তি (ৰিভ. ৪৩৪) এৰং সব্বে লোকিযলোকুত্তরধম্মা ইদ্ধিপাদোতি ৰুত্তা.

অভিধম্মভাজনীযে পন ছন্দাদীনি পদানি ৰিভজিত্ৰা অন্তে ‘‘ইদ্ধিপাদোতি তথাভূতস্স ফস্সো…পে… পগ্গাহো অৰিক্খেপো’’তি (ৰিভ. ৪৪৭) এৰং সব্বে লোকুত্তরকুসলধম্মা ইদ্ধিপাদাতি ৰত্ৰা পুন ‘‘ছন্দিদ্ধিপাদো ৰীরিযিদ্ধিপাদো চিত্তিদ্ধিপাদো ৰীমংসিদ্ধিপাদো’’তি (ৰিভ. ৪৫৭) মাতিকং ঠপেত্ৰা ‘‘তত্থ কতমো ছন্দিদ্ধিপাদো? ইধ ভিক্খু যস্মিং সমযে লোকুত্তরং ঝানং ভাৰেতি…পে… যো তস্মিং সমযে ছন্দো ছন্দিকতা…পে… অযং ৰুচ্চতি ছন্দিদ্ধিপাদো’’তিআদিনা লোকুত্তরকুসলচিত্তসম্পযুত্তছন্দৰীরিযচিত্তৰীমংসা এৰ ইদ্ধিপাদাতি ৰুত্তা. তথা পঞ্হাপুচ্ছকেপি কুসলা এৰ, অনিদস্সনঅপ্পটিঘা এৰ, ৰীমংসিদ্ধিপাদো হেতু, সেসা ন হেতূ…পে… চিত্তিদ্ধিপাদো ন ৰত্তব্বো, সেসা চিত্তসম্পযুত্তা…পে… অনুত্তরাৰ, অরণাৰাতি. সেসমেত্থ সতিপট্ঠানে ৰুত্তসদিসমেৰ. পাল়িমুত্তকনযো পনেত্থাপি ন উদ্ধটোতি.

ইদ্ধিপাদৰিভঙ্গমাতিকত্থৰণ্ণনা নিট্ঠিতা.

বোজ্ঝঙ্গৰিভঙ্গমাতিকত্থৰণ্ণনা

বোজ্ঝঙ্গৰিভঙ্গমাতিকায ¶ পন অত্থতো তাৰ – সত্ত বোজ্ঝঙ্গাতি এত্থ বোধিযা, বোধিস্স ৰা অঙ্গাতি বোজ্ঝঙ্গা. ইদং ৰুত্তং হোতি – যায এৰ ধম্মসামগ্গিযা মগ্গক্খণে উপ্পজ্জমানায লীনুদ্ধচ্চাদিঅনেকেসং উপদ্দৰানং পটিপক্খভূতায সতিধম্মৰিচযাদিসত্তৰিধায ধম্মসামগ্গিযা অরিযসাৰকো বুজ্ঝতি, কিলেসনিদ্দায উট্ঠহতি, সচ্চানি ৰা পটিৰিজ্ঝতি, তস্সা ধম্মসামগ্গিসঙ্খাতায বোধিযা অঙ্গাতি বোজ্ঝঙ্গা ঝানঙ্গমগ্গঙ্গানি ৰিয. যো পনেস যথাৰুত্তপ্পকারায এতায ধম্মসামগ্গিযা বুজ্ঝতীতি কত্ৰা অরিযসাৰকো ‘‘বোধী’’তি ৰুচ্চতি, তস্স বোধিস্স অঙ্গাতি বোজ্ঝঙ্গা সেনঙ্গরথঙ্গাদযো ৰিয. অপিচ ‘‘বোধায সংৰত্তন্তীতি বোজ্ঝঙ্গা’’তিআদিনা ¶ পটিসম্ভিদানযেনাপি বোজ্ঝঙ্গত্থো ৰেদিতব্বো. পসত্থো, সুন্দরো ৰা বোজ্ঝঙ্গো সম্বোজ্ঝঙ্গো, সতিযেৰ সম্বোজ্ঝঙ্গো সতিসম্বোজ্ঝঙ্গো. এৰং সেসেসুপি. তত্থ ধম্মে ৰিচিনাতি অনিচ্চাদিতো পরিৰীমংসতি জানাতি, ধম্মে ৰা এতেন সত্তা ৰিচিনন্তীতি ধম্মৰিচযো, পঞ্ঞা. উপেক্খতি সমরসানং ধম্মানং হাপনৰড্ঢনে অৰাৰটতায পটিসঙ্খানাকারেন মজ্ঝত্তা হোতীতি উপেক্খা, তত্রমজ্ঝত্ততা. পটিসঙ্খানলক্খণো হি উপেক্খাসম্বোজ্ঝঙ্গোতি. সেসং সুৰিঞ্ঞেয্যমেৰ. অযং তাৰেত্থ পদত্থো. ধম্মভেদোপেত্থ সুৰিঞ্ঞেয্যোৰ.

ৰিভঙ্গনযতো পনেত্থ সুত্তন্তভাজনীযে তাৰ লোকিযলোকুত্তরৰসেন সেসেসু লোকুত্তরকুসলৰিপাকৰসেন ৰিভত্তা. পঞ্হাপুচ্ছকে পন সিযা কুসলা, সিযা অব্যাকতা, পীতিসম্বোজ্ঝঙ্গো সুখায ৰেদনায সম্পযুত্তোৰ, সেসা দ্ৰীহি…পে… পীতিসম্বোজ্ঝঙ্গো সুখসহগতোৰ, সেসা তিধাপি, অনিদস্সনঅপ্পটিঘা, ধম্মৰিচযসম্বোজ্ঝঙ্গো ¶ হেতু, সেসা ন হেতূ…পে… রূপাৰচরাৰ, অরণাৰাতি. সেসং সতিপট্ঠানে ৰুত্তনযমেৰ. অযমেত্থ ৰিভঙ্গনযো.

ইদানি পন –

কমতো তাৰত্ততো চ, হেতুভূমিৰিভাগতো;

ৰিৰেকতো চ ৰিঞ্ঞেয্যো, পাল়িমুত্তৰিনিচ্ছযো.

তত্থ কমতো তাৰ অযম্পি দেসনাক্কমোৰ. সব্বেসং হি বোজ্ঝঙ্গানং উপকারত্তা সতিসম্বোজ্ঝঙ্গো পঠমং ৰুত্তো, ততো যস্মা উপট্ঠিতসতিকো ধম্মে পঞ্ঞায পৰিচিনাতি, পৰিচিতধম্মো ৰীরিযং আরভতি, আরদ্ধৰীরিযস্স পীতি উপ্পজ্জতি, পীতিমনস্স কাযোপি চিত্তম্পি পস্সম্ভতি, পস্সদ্ধকাযস্স সুখিনো চিত্তং সমাধিযতি, সমাহিতচিত্তো তং চিত্তং সাধুকং অজ্ঝুপেক্খিতা হোতি, তস্মা ধম্মৰিচযসম্বোজ্ঝঙ্গাদযো যথাক্কমং ৰুত্তাতি অযং তাৰেত্থ কমো.

তাৰত্ততো পন কস্মা তে সত্তেৰ ৰুত্তা, অনূনা অনধিকাতি? লীনুদ্ধচ্চপটিপক্খতো, সব্বত্তিকতো চ. এত্থ হি তযো বোজ্ঝঙ্গা লীনস্স পটিপক্খা. যথাহ – ‘‘যস্মিং চ খো, ভিক্খৰে, সমযে লীনং চিত্তং হোতি, কালো তস্মিং সমযে ধম্মৰিচযসম্বোজ্ঝঙ্গস্স ভাৰনায, কালো ¶ ৰীরিয…পে… পীতিসম্বোজ্ঝঙ্গস্স ভাৰনাযা’’তি (সং. নি. ৫.২৩৪). তযো উদ্ধচ্চস্স পটিপক্খা. যথাহ – ‘‘যস্মিং চ খো, ভিক্খৰে, সমযে উদ্ধতং চিত্তং হোতি, কালো তস্মিং সমযে পস্সদ্ধিসম্বোজ্ঝঙ্গস্স ভাৰনায, কালো সমাধি…পে… উপেক্খাসম্বোজ্ঝঙ্গস্স ভাৰনাযা’’তি (সং. নি. ৫.২৩৪). একো পনেত্থ লোণধূপনং ৰিয সব্বব্যঞ্জনেসু সব্ববোজ্ঝঙ্গেসু ইচ্ছিতব্বো. যথাহ – ‘‘সতিঞ্চ ¶ খ্ৰাহং, ভিক্খৰে, সব্বত্থিকং ৰদামী’’তি (সং. নি. ৫.২৩৪). এৰং লীনুদ্ধচ্চপটিপক্খতো চ সব্বত্থিকতো চ সত্তেৰ ৰুত্তাতি অযং তাৰত্ততো.

হেতুভূমিৰিভাগতোতি এত্থ হেতুৰিভাগতো তাৰ – চত্তারো সতিসম্বোজ্ঝঙ্গস্স উপ্পাদায সংৰত্তন্তি সতিসম্পজঞ্ঞং মুট্ঠস্সতিপুগ্গলপরিৰজ্জনতা উপট্ঠিতস্সতিপুগ্গলসেৰনতা তদধিমুত্ততাতি. তথা সত্ত ধম্মা দুতিযস্স পরিপুচ্ছকতা ৰত্থুৰিসদকিরিযা ইন্দ্রিযসমত্তপটিপাদনা দুপ্পঞ্ঞপুগ্গলপরিৰজ্জনা পঞ্ঞৰন্তপুগ্গলসেৰনা গম্ভীরঞাণচরিযপচ্চৰেক্খণতা তদধিমুত্ততাতি. তত্থ অজ্ঝত্তিকবাহিরানং সরীরপরিক্খারভূতানং ৰত্থূনং ৰিসদভাৰকরণং ৰত্থুৰিসদকিরিযা নাম. তথা একাদস ধম্মা ততিযস্স অপাযভযগমনৰীথিদাযজ্জমহত্তসত্থুমহত্তজাতিমহত্তসব্রহ্মচারিমহত্তানং পচ্চৰেক্খণতা আনিসংসদস্সাৰিতা পিণ্ডপাতাপচাযনতা কুসীতপুগ্গলপরিৰজ্জনতা আরদ্ধৰীরিযপুগ্গলসেৰনতা তদধিমুত্ততাতি. তত্থ ‘‘বুদ্ধাদীহি গতমগ্গো মযা গন্তব্বো’’তি পচ্চৰেক্খণা ৰীথিপচ্চৰেক্খণা নাম. ‘‘দাযকেহি দিন্নপিণ্ডপাতস্স মহপ্ফলতং সম্পাদেস্সামী’’তি অত্তানং দমনং পিণ্ডপাতাপচাযনং নাম. তথা একাদস ধম্মা চতুত্থস্স বুদ্ধধম্মসঙ্ঘসীলচাগদেৰতোপসমানুস্সতিযো সত্ত, লূখপুগ্গলপরিৰজ্জনতা সিনিদ্ধপুগ্গলসেৰনতা পসাদনীযসুত্তন্তপচ্চৰেক্খণতা তদধিমুত্ততাতি. তথা সত্ত ধম্মা পঞ্চমস্স পণীতভোজনসেৰনতা, উতুসুখইরিযাপথসুখসেৰনতা দ্ৰে মজ্ঝত্তপ্পযোগতা সারদ্ধকাযপুগ্গলপরিৰজ্জনতা সন্তকাযপুগ্গলসেৰনতা তদধিমুত্ততাতি. একাদস ধম্মা ছট্ঠস্স ৰত্থুৰিসদকিরিযা ইন্দ্রিযসমত্তপটিপাদনা নিমিত্তকুসলতা সমযে চিত্তস্স পগ্গহনিগ্গহসম্পহংসনজ্ঝুপেক্খনা চতস্সো ¶ , অসমাহিতসমাহিতপুগ্গলানং পরিৰজ্জনসেৰনতা দ্ৰে, ঝানৰিমোক্খপচ্চৰেক্খণতা তদধিমুত্ততাতি. তত্থ কসিণাদিনিমিত্তানং উগ্গহণকুসলতা নিমিত্তকুসলতা নাম. পঞ্চ ধম্মা সত্তমস্স সত্তসঙ্খারকেলাযনমজ্ঝত্তপুগ্গলানং পরিৰজ্জনসেৰনতা ¶ দ্ৰে দ্ৰে, তদধিমুত্ততাতি. অযমেত্থ সঙ্খেপো, ৰিত্থারো পন সম্মোহৰিনোদনিযা ৰিভঙ্গট্ঠকথায গহেতব্বোতি অযমেত্থ হেতুৰিভাগো.

ভূমিৰিভাগতো পনেতে কামাৰচরা, লোকুত্তরা ৰা হোন্তি, কামাৰচরেসু বলৰৰিপস্সনাদীসু এৰ বোজ্ঝঙ্গা লব্ভন্তি, ন ইতরেসু. লোকুত্তরেসু পন সব্বত্থ লব্ভন্তি, রূপাৰচরারূপাৰচরচিত্তেসু সব্বথা ন লব্ভন্তি অবোধিপক্খিকত্তা. কেচি পন থেরা ৰিপস্সনাপাদকেসু কসিণাসুভব্রহ্মৰিহারজ্ঝানেসুপি বোজ্ঝঙ্গে উদ্ধরন্তি, ন চ তে পটিসিদ্ধা অট্ঠকথাচরিযেহি, তস্মা তেসং মতেন রূপাৰচরাপি হোন্তি, ন কেনচি পরিযাযেন অরূপাৰচরাতি অযমেত্থ ভূমিৰিভাগো.

ৰিৰেকতোতি এত্থ ৰিৰেকোতি ৰিৰিত্ততা, স্ৰাযং পঞ্চৰিধো তদঙ্গৰিক্খম্ভনসমুচ্ছেদপটিপস্সদ্ধিনিস্সরণৰিৰেকৰসেন. তদঙ্গৰিৰেকোতি ৰিপস্সনা, ৰিক্খম্ভনৰিৰেকোতি অট্ঠ সমাপত্তিযো, সমুচ্ছেদৰিৰেকোতি মগ্গো, পটিপস্সদ্ধিৰিৰেকোতি ফলং, নিস্সরণৰিৰেকোতি সব্বনিমিত্তনিস্সটং নিব্বানং. তত্রিমে তদঙ্গসমুচ্ছেদপটিপস্সদ্ধিনিস্সরণৰিৰেকনিস্সিতা হোন্তি. তথা হেতে ৰিপস্সনাক্খণে কিচ্চতো তদঙ্গৰিৰেকনিস্সিতা, অজ্ঝাসযতো নিস্সরণৰিৰেকনিস্সিতা. মগ্গকালে পন কিচ্চতো সমুচ্ছেদৰিৰেকনিস্সিতা, আরম্মণতো নিস্সরণৰিৰেকনিস্সিতা, ফলক্খণে কিচ্চতো পটিপস্সদ্ধিৰিৰেকনিস্সিতা. আরম্মণতো নিস্সরণৰিৰেকনিস্সিতা ¶ চ হোন্তি. কেসঞ্চি থেরানং মতে ৰিপস্সনাপাদকরূপাৰচরজ্ঝানক্খণে ৰিক্খম্ভনৰিৰেকনিস্সিতাৰাতি পঞ্চৰিৰেকনিস্সিতাপি হোন্তীতি অযমেত্থ ৰিৰেকো. এৰং ৰিঞ্ঞেয্যো পাল়িমুত্তৰিনিচ্ছযো.

বোজ্ঝঙ্গৰিভঙ্গমাতিকত্থৰণ্ণনা নিট্ঠিতা.

মগ্গঙ্গৰিভঙ্গমাতিকত্থৰণ্ণনা

মগ্গঙ্গৰিভঙ্গমাতিকায পন অত্থতো তাৰ – অরিযোতি তংতংমগ্গৰজ্ঝকিলেসেহি আরকত্তা ¶ , অরিযভাৰকরত্তা চ অরিযো, অট্ঠ অঙ্গানি অস্সাতি অট্ঠঙ্গিকো, নিব্বানত্থিকেহি মগ্গীযতি, নিব্বানং ৰা মগ্গতি, কিলেসে ৰা মারেন্তো গচ্ছতীতি মগ্গো. সেয্যথিদন্তি সো কতমোতি চে, ইদানি স্ৰাযং মগ্গো চতুরঙ্গিনী ৰিয সেনা অঙ্গমত্তমেৰ হোতি, অঙ্গৰিনিমুত্তো নত্থীতি দস্সেন্তো ‘‘সম্মাদিট্ঠি…পে… সম্মাসমাধী’’তি আহ. তত্থ সম্মা পস্সতীতি সম্মাদিট্ঠি, পঞ্ঞা. সম্মা সঙ্কপ্পেতি তক্কেতীতি সম্মাসঙ্কপ্পো, ৰিতক্কো. সেসং সুৰিঞ্ঞেয্যমেৰ. ততো ধম্মভেদোপি ৰিভঙ্গনযোপি বোজ্ঝঙ্গেসু ৰুত্তসদিসো.

অভিধম্মভাজনীযে পন ৰিরতিত্তযৰজ্জিতো পঞ্চঙ্গিকোপি মগ্গো ৰিভত্তো, তঞ্চ পঞ্চন্নং অঙ্গানং কিচ্চাধিকতং, ৰিরতীনঞ্চ অৰুত্তসিদ্ধতং সন্ধায, ৰিরতিৰজ্জিতস্স পন লোকুত্তরমগ্গস্স অভাৰা সোপি অট্ঠঙ্গিকোৰাতি ৰেদিতব্বো.

পঞ্হাপুচ্ছকেপি সম্মাসঙ্কপ্পো সুখায ৰেদনায সম্পযুত্তোৰ, সেসা দ্ৰীহি. সম্মাসঙ্কপ্পো অৰিতক্কৰিচারমত্তো, পীতিসহগতো সুখসহগতোৰ, ন উপেক্খাসহগতো, সেসা তিধাপি. সম্মাদিট্ঠি হেতু, সেসা নহেতূতি অযং ৰিসেসো. সেসং সমমেৰ. ইদানি পন –

কমতো ¶ কিচ্চভেদতো, ভূমিভেদৰিৰেকতো;

মগ্গঙ্গেসু ৰিজানীযো, পাল়িমুত্তৰিনিচ্ছযো.

তত্থ কমতো তাৰ অযম্পি দেসনাক্কমোৰ. ভগৰতা হি নিব্বানাধিগমায পটিপন্নস্স পঞ্ঞাপজ্জোতপঞ্ঞাসত্থতায অৰিজ্জন্ধকারৰিধমনতো বহূপকারত্তা পঠমং সম্মাদিট্ঠি দেসিতা. ততো হেরঞ্ঞিকস্স কহাপণপরিৰত্তকহত্থো ৰিয যথাসভাৰদস্সনস্স সম্মাদিট্ঠিযা বহূপকারত্তা সম্মাসঙ্কপ্পো. স্ৰাযং যথা সম্মাদিট্ঠিযা, এৰং সম্মাৰাচাযপি উপকারকো. যথাহ ‘‘পুব্বে খো, গহপতি, তক্কেত্ৰা ৰিচারেত্ৰা পচ্ছা ৰাচং ভিন্দতী’’তি (ম. নি. ১.৪৬৩), তস্মা তদনন্তরং সম্মাৰাচা. যস্মা পন ৰাচায সংৰিদহিত্ৰা লোকে কম্মন্তে পযোজেন্তি, তস্মা তদনন্তরং সম্মাকম্মন্তো. কাযৰচীদুচ্চরিতং পহায উভযসুচরিতং পূরেন্তস্সেৰ যস্মা আজীৰট্ঠমকং সীলং পূরতি, ন ইতরস্স, তস্মা তদুভযানন্তরং সম্মাআজীৰো ৰুত্তো. এৰং ‘‘ৰিসুদ্ধদিট্ঠিসীলেনাপি এত্তাৰতা পরিতোসং অকত্ৰা ইদং ৰীরিযং আরভিতব্ব’’ন্তি দস্সেতুং তদনন্তরং সম্মাৰাযামো. আরদ্ধৰীরিযেনাপি কাযাদীসু সতি সূপট্ঠিতা কাতব্বাতি দস্সনত্থং তদনন্তরং ¶ সম্মাসতি. সূপট্ঠিতায সতিযা একত্তারম্মণে চিত্তং সমাধাতুং সক্কাতি তদনন্তরং সম্মাসমাধি ৰুত্তোতি অযং তাৰেত্থ কমো.

কিচ্চতো পনেসং একেকস্স তীণি তীণি কিচ্চানি, সেয্যথিদং – সম্মাদিট্ঠি তাৰ অঞ্ঞেহিপি অত্তনো পচ্চনীককিলেসেহি সদ্ধিং মিচ্ছাদিট্ঠিং পজহতি, আরম্মণতো নিরোধসচ্চং সচ্ছিকরোতি, অসম্মোহতো সেসসচ্চানি পটিৰিজ্ঝতি. এৰং সম্মাসঙ্কপ্পাদীনং মিচ্ছাসঙ্কপ্পপজহনাদিৰসেন যথানুরূপন্তি কিচ্চতা ৰেদিতব্বা. ৰিসেসতো পনেত্থ সম্মাসঙ্কপ্পো সহজাতধম্মে অভিনিরোপেতি, সম্মাৰাচা পরিগ্গণ্হাতি ¶ , সম্মাকম্মন্তো সমুট্ঠাপেতি, সম্মাআজীৰো ৰোদাপেতি, সম্মাৰাযামো পগ্গণ্হাতি, সম্মাসতি উপট্ঠাপেতি, সম্মাসমাধি সমাদহতীতি ইদমেত্থ কিচ্চং.

ভেদতো পন পুব্বভাগে সম্মাদিট্ঠি ‘‘দুক্খে ঞাণ’’ন্তিআদিনা চতূসু সচ্চেসু ঞাণৰসেন নানক্খণা নানারম্মণা নানানামা হোতি, দুতিযো পন নেক্খম্মঅব্যাপাদঅৰিহিংসাসঙ্কপ্পৰসেন, ৰিরতিযো চতুব্বিধৰচীদুচ্চরিততিৰিধকাযদুচ্চরিতমিচ্ছাজীৰৰিরমণসঙ্খাতচেতনাৰসেনপি ৰিরতিৰসেনপি, ছট্ঠসত্তমা চতুব্বিধসম্মপ্পধানসতিপট্ঠানৰসেন নানক্খণা নানারম্মণা নানানামা হোন্তি. মগ্গকালে পনেতে সম্মাদিট্ঠিআদযো একক্খণা একারম্মণা. কিচ্চতো পন তানি পুব্বভাগে নানানামানি লভন্তি, সম্মাসমাধি পন পুব্বভাগেপি মগ্গক্খণেপি চতুক্কপঞ্চকজ্ঝানৰসেন নানক্খণো নানানামো, মগ্গক্খণে পন একারম্মণো হোতি. একস্স হি পঠমমগ্গো পাদকজ্ঝানাদিনিযমতো পঠমজ্ঝানাদিকো ৰা দুতিযজ্ঝানাদীসু অঞ্ঞতরজ্ঝানিকো ৰা, দুতিযমগ্গাদযোপিস্স পঠমমগ্গসদিসজ্ঝানিকা ৰা ৰিসদিসজ্ঝানিকা ৰাতি সো মগ্গকালেপি নানক্খণো নানানামো ৰাতি অযমেত্থ ভেদো.

ভূমিতো চ ৰিৰেকতো চ ৰিনিচ্ছযো বোজ্ঝঙ্গেসু ৰুত্তানুসারেন ৰেদিতব্বোতি এৰং ৰিজানীযো পাল়িমুত্তৰিনিচ্ছযো.

মগ্গঙ্গৰিভঙ্গমাতিকত্থৰণ্ণনা নিট্ঠিতা.

ঝানৰিভঙ্গমাতিকত্থৰণ্ণনা

ঝানৰিভঙ্গমাতিকায ¶ পন অত্থতো তাৰ – পাতিমোক্খসংৰরসংৰুতোতিআদীসু পাতিমোক্খন্তি সিক্খাপদসীলং. তং হি যো নং পাতি রক্খতি, তং মোক্খেতি মোচেতি আপাযিকাদীহি ¶ দুক্খেহি, তস্মা ‘‘পাতিমোক্খ’’ন্তি ৰুচ্চতি. সংৰরণং, সংৰরন্তি ৰা তেনাতি সংৰরো, পাতিমোক্খমেৰ সংৰরো পাতিমোক্খসংৰরো, কম্মৰাচাপরিযোসানে ইজ্ঝনকস্স অত্থতো চেতনাদিরূপস্স পাতিমোক্খসংৰরসীলস্সেৰেতং অধিৰচনং. তেন সংৰুতো পিহিতকাযৰচীপযোগোতি পাতিমোক্খসংৰরসংৰুতো. ৰিহরতীতি ইরিযতি পৰত্তেতি. আচারগোচরসম্পন্নোতি এত্থ আচরিতব্বতো আচারো, গাৰো চরন্তি এত্থাতি গোচরো, গুন্নং চরণট্ঠানং. তংসদিসতায পন সব্বোপি পৰত্তিৰিসযো গোচরোতি ৰেদিতব্বো. তেসং ৰিভাগো নিদ্দেসে ৰুত্তনযেনেৰ ৰেদিতব্বো.

নিদ্দেসে হি –

‘‘আচারগোচরসম্পন্নোতি অত্থি আচারো, অত্থি অনাচারো. তত্থ কতমো অনাচারো? কাযিকো ৰীতিক্কমো, ৰাচসিকো ৰীতিক্কমো, কাযিকৰাচসিকো ৰীতিক্কমো, অযং ৰুচ্চতি অনাচারো, সব্বম্পি দুস্সীল্যং অনাচারো, ইধেকচ্চো ৰেল়ুদানেন ৰা পত্ত…পে… পুপ্ফফলসিনানদন্তকট্ঠদানেন ৰা চাটুকম্যতায ৰা মুগ্গসুপ্যতায ৰা পারিভটুতায ৰা জঙ্ঘপেসনিকেন ৰা অঞ্ঞতরঞ্ঞতরেন ৰা বুদ্ধপতিকুট্ঠেন মিচ্ছাআজীৰেন জীৰিকং কপ্পেতি, অযং ৰুচ্চতি অনাচারো.

‘‘তত্থ কতমো আচারো? কাযিকো অৰীতিক্কমো’’তিআদিনা (ৰিভ. ৫১৩) –

ৰুত্তৰিপরিযাযেন আচারো নিদ্দিট্ঠো.

‘‘গোচরোতি ¶ অত্থি গোচরো, অত্থি অগোচরো. তত্থ কতমো অগোচরো? ইধেকচ্চো ৰেসিযাগোচরো ৰা হোতি, ৰিধৰা…পে… থুল্লকুমারীপণ্ডকভিক্খুনীপানাগারগোচরো ¶ ৰা, সংসট্ঠো ৰিহরতি রাজূহি রাজমহামত্তেহি তিত্থিযেহি তিত্থিযসাৰকেহি অননুলোমিকেন সংসগ্গেন, যানি ৰা পন তানি কুলানি অস্সদ্ধানি অপ্পসন্নানি…পে… তথারূপানি কুলানি সেৰতি ভজতি পযিরুপাসতি, অযং ৰুচ্চতি অগোচরো.

‘‘তত্থ কতমো গোচরো? ইধেকচ্চো ন ৰেসিযাগোচরো হোতী’’তিআদিনা (ৰিভ. ৫১৪) –

ৰুত্তৰিপরিযাযেন গোচরো নিদ্দিট্ঠো.

অপিচেত্থ থেরানং ভিক্খূনং পুরতো গমননিসীদনচঙ্কমনঘট্টনাভিভৰনাদিকাযিকাচিত্তীকারকিরিযানঞ্চেৰ থেরে ভিক্খূ অনাপুচ্ছা ধম্মকথনখুংসনাদিৰাচসিকাচিত্তীকারকিরিযানঞ্চ অনাচারানং পটিপক্খৰসেন কাযিকৰাচসিকো আচারো ৰেদিতব্বো. অপিচ ভিক্খু সগারৰো সপ্পতিস্সো হিরোত্তপ্পসম্পন্নো সুনিৰত্থো সুপারুতো পাসাদিকেন অভিক্কন্তাদিনা ওক্খিত্তচক্খু ইরিযাপথসম্পন্নো আভিসমাচারিকেসু সক্কচ্চকারী গরুচিত্তীকারবহুলো ৰিহরতি, অযং ৰুচ্চতি আচারো. গোচরো পন তিৰিধো উপনিস্সযগোচরো আরক্খগোচরো উপনিবন্ধগোচরোতি. তত্থ দসকথাৰত্থুগুণসমন্নাগতো কল্যাণমিত্তো উপনিস্সযগোচরো নাম. অন্তরঘরাদীসু ওক্খিত্তচক্খুতাদীহি দিসা ৰিদিসা অনোলোকেত্ৰা গমনং আরক্খগোচরো নাম. চত্তারো পন সতিপট্ঠানা উপনিবন্ধগোচরো নাম. যত্থ চিত্তং উপনিবন্ধতি, অযং তিৰিধোপেত্থ ¶ গোচরোতি ৰেদিতব্বো. ইমিনাতি ইমিনা আচারেন, গোচরেন চ সমন্নাগতো আচারগোচরসম্পন্নো নাম.

অণুমত্তেসু ৰজ্জেসূতি অণুপ্পমাণেসু দোসেসু. ভযদস্সাৰীতি ভযদস্সনসীলো, অণুমত্তং রেণুং সিনেরুসদিসং পস্সন্তো ৰিয সব্বলহুকম্পি দুক্কটদুব্ভাসিতমত্তং পারাজিকসদিসং কত্ৰা ৰজ্জতো ভযতো দস্সনসীলোতি অত্থো. সমাদায সিক্খতি সিক্খাপদেসূতি যং কিঞ্চি সিক্খাপদেসু সিক্খিতব্বং, তং সুট্ঠু আদায গহেত্ৰা সিক্খতি.

ইন্দ্রিযেসু গুত্তদ্ৰারোতি মনচ্ছট্ঠেসু ইন্দ্রিযেসু রূপাদিআরম্মণনিমিত্তাদীনং অগ্গহণসঙ্খাতসতিসংৰরেন ¶ পিহিতদ্ৰারো. ভোজনে মত্তঞ্ঞূতি পিণ্ডপাতে পটিগ্গহণপরিভোগেসু পচ্চৰেক্খণঞাণৰসেন চেৰ অপ্পিচ্ছতাদীহি চ মত্তজাননকো, পিণ্ডপাতৰসেন চেত্থ চতুন্নং পচ্চযানং গহণং ৰেদিতব্বং. অথ ৰা ভুঞ্জিতব্বতো ভোজনন্তি চতুন্নং পচ্চযানং গহণং ৰেদিতব্বং. পুব্বরত্তাপররত্তন্তি এত্থ অড্ঢরত্তিসঙ্খাতায রত্তিযা পুব্বে পুব্বরত্তং, ইমিনা পঠমযামঞ্চেৰ পচ্ছাভত্তঞ্চ গণ্হাতি. রত্তিযা পচ্ছা অপররত্তং, ইমিনা পচ্ছিমযামঞ্চেৰ পুরেভত্তঞ্চ গণ্হাতি. পচ্ছিমযামো পনস্স ভিক্খুনো নিদ্দাকিলমথৰিনোদনোকাসোতি ন গহিতো.

জাগরিযানুযোগমনুযুত্তোতি অসুভভাৰনাসঙ্খাতস্স ভাৰনারামস্স অনুযোগসঙ্খাতং আসেৰনভাৰনং অনুযুত্তো চঙ্কমননিসজ্জাহি যোনিসোমনসিকারেন আৰরণীযেহি ধম্মেহি চিত্তপরিসোধনে যুত্তপ্পযুত্তোতি অত্থো. সাতচ্চং নেপক্কন্তি সততং পৰত্তযিতব্বতো সাতচ্চসঙ্খাতং ৰীরিযং, পরিপাকগতত্তা নেপক্কসঙ্খাতঞ্চ পঞ্ঞং অনুযুত্তোতি সম্বন্ধো. ইমিনা ৰীরিযপঞ্ঞাহি যুত্তস্সেৰ জাগরিযানুযোগসিদ্ধীতি দস্সেতি.

ইদানি ¶ তং জাগরিযানুযোগং সরূপতো দস্সেন্তো ‘‘বোধিপক্খিকানং ধম্মান’’ন্তিআদিমাহ. বোধিপক্খিকানং ধম্মানন্তি চতুসচ্চাৰবোধসঙ্খাতস্স মগ্গঞাণস্স পক্খে ভৰানং চতুসচ্চসতিপট্ঠানাদিসত্ততিংসধম্মানং. নিদ্দেসে পনস্স লোকিযভাৰনায ৰিসেসবোধিপক্খিযধম্মে একারম্মণে পৰত্তনসমত্থতায সত্ত বোজ্ঝঙ্গা এৰ নিদ্দিট্ঠা. তেসং গহণেন পন সেসানম্পি তত্থ গহণং ৰেদিতব্বং. সো অভিক্কন্তে পটিক্কন্তেতিআদীসু অভিক্কন্তং ৰুচ্চতি পুরতো গমনং, পটিক্কন্তং নিৰত্তনং, তদুভযঞ্চ ঠাননিসজ্জাসযনেসুপি পুরতো, পচ্ছতো চ কাযস্স অভিগমনঅপগমনৰসেন লব্ভতি. সম্পজানকারী হোতীতি সম্পজঞ্ঞেন সব্বকিচ্চকারী, সম্পজঞ্ঞস্সেৰ ৰা কারী, সম্পজঞ্ঞ-গ্গহণেন চেত্থ অৰিপ্পযোগতো সতিপি গহিতাৰ হোতি. তেনেৰস্স নিদ্দেসে ‘‘সতো সম্পজানো অভিক্কমতী’’তিআদি ৰুত্তং.

আলোকিতেতিআদীসু আলোকিতং নাম পুরতো পেক্খনং. ৰিলোকিতং নাম অনুদিসাপেক্খনং. ইমেসং পন দ্ৰিন্নং গহণেন হেট্ঠা উপরি পচ্ছতো পেক্খনসঙ্খাতানি ওলোকিতুল্লোকিতাপলোকিতানিপি গহিতানীতি ৰেদিতব্বানি.

সমিঞ্জিতে ¶ পসারিতেতি পব্বানং সমিঞ্জনে, পসারণে চ. সঙ্ঘাটিপত্তচীৰরধারণেতি এত্থ সঙ্ঘাটিচীৰরানং নিৰাসনপারুপনৰসেন, পত্তস্স ভিক্খাপটিগ্গহণাদিৰসেন চ পরিভোগো ধারণং নাম. অসিতেতি পিণ্ডপাতাদিভোজনে. পীতেতি যাগুআদিপানে. খাযিতেতি পিট্ঠখজ্জাদিখাদনে. সাযিতেতি মধুফাণিতাদিসাযিতে. উচ্চারপস্সাৰকম্মেতি উচ্চারস্স চ পস্সাৰস্স চ করণে. গতেতি গমনে. ঠিতেতি ঠানে. নিসিন্নেতি নিসজ্জায. সুত্তেতি সযনে. জাগরিতেতি জাগরণে. এত্থ চ ভিক্খাচারগমনাদিৰসেন ¶ ‘‘অভিক্কন্তে’’তি ৰুত্তং. ৰিহারে পন চঙ্কমনাদিইরিযাপথৰসেনেৰ ‘‘গতে’’তিআদি ৰুত্তন্তি ৰেদিতব্বং. ভাসিতেতি কথনে. তুণ্হীভাৰেতি অকথনে.

সব্বেসু পন তেসু অভিক্কন্তাদীসু পচ্চেকং সাত্থকসম্পজঞ্ঞং সপ্পাযসম্পজঞ্ঞং গোচরসম্পজঞ্ঞং অসম্মোহসম্পজঞ্ঞন্তি চতুব্বিধং সম্পজঞ্ঞং ৰেদিতব্বং. তত্থ অভিক্কমিতুকামতাদিচিত্তে উপ্পন্নে চিত্তৰসেনেৰ গমনাদিং অকত্ৰা ‘‘কিং নু মে তত্থ গতেন অত্থো’’তি পরিগ্গণ্হিত্ৰা চেতিযদস্সনাদিনো তস্স তস্স অত্থস্স পরিগ্গণ্হনং সাত্থকসম্পজঞ্ঞং নাম. সাত্থকেসু পনেতেসু গমনাদীসু জীৰিতব্রহ্মচরিযন্তরাযানঞ্চেৰ সল্লেখপটিপত্তিৰিঘাতকরানং কাযিকচেতসিকপরিক্কিলেসানঞ্চ সব্বেসানং সব্ভাৰাভাৰং পরিগ্গহেত্ৰা সপ্পাযপরিগ্গণ্হনং সপ্পাযসম্পজঞ্ঞং নাম. এৰং পরিগ্গহিতসাত্থকসপ্পাযস্স পন অট্ঠতিংসায কম্মট্ঠানেসু, ৰিপস্সনায ৰা অত্তনো অভিরুচিতং কম্মট্ঠানসঙ্খাতং গোচরং অৰিস্সজ্জেত্ৰাৰ অভিক্কমাদীনং করণং গোচরসম্পজঞ্ঞং নাম. অভিক্কমাদীসু পন অন্ধবালপুথুজ্জনা ‘‘অত্তা অভিক্কমাদীনি করোতি, অহং করোমী’’তি ৰা সম্মুয্হন্তি, তথা অসম্মুয্হিত্ৰা ‘‘অভিক্কমিতুকামতাদিচিত্তকিরিযৰাযোধাতু ৰিপ্ফারাদিকারণসামগ্গিযা অযং কাযসঙ্খাতো অট্ঠিসঙ্ঘাটো অভিক্কমাদীনি করোতি, ততো অঞ্ঞো অব্ভন্তরে অত্তা ৰা সত্তো ৰা অভিক্কমন্তো ৰা পটিক্কমন্তো ৰা…পে… তুণ্হী ভৰন্তো ৰা নত্থী’’তি এৰমাদিনা যাথাৰতো জাননৰসেন পঞ্ঞায পৰত্তনং অসম্মোহসম্পজঞ্ঞং নাম. অযমেত্থ সঙ্খেপো, ৰিত্থারো পন সম্মোহৰিনোদনিযং (ৰিভ. অট্ঠ. ৫০৮) গহেতব্বো.

ইদানি যস্মা যস্স অব্ভন্তরে যথাৰুত্তা এত্তকা গুণা নত্থি, তস্স অরঞ্ঞৰাসো পন মক্কটাদীনং ৰিয অনুচ্ছৰিকো ¶ ন হোতি, উপচারমত্তম্পিস্স ঝানং ন উপ্পজ্জতি. যস্স পন সন্তি, তস্স অরঞ্ঞৰাসো অনুচ্ছৰিকো হোতি. সো হি তত্থ সব্বপ্পকারজ্ঝানং নিব্বত্তেতুং ¶ সক্কোতি, অরঞ্ঞৰাসঞ্চেৰ আরঞ্ঞকে চ উপসোভেতি, সকলঞ্চ সাসনং পসাদেতি, তস্মা এৰরূপস্স ভিক্খুনো উপাসনট্ঠানযোগপথং সপ্পাযসেনাসনং দস্সেন্তো ‘‘সো ৰিৰিত্তং সেনাসনং ভজতী’’তিআদিমাহ. তত্থ ৰিৰিত্তন্তি সুঞ্ঞং. সেতি চেৰ আসতি চ এত্থাতি সেনাসনং, মঞ্চাদি, ৰিহারাদি চ. তেনেৰস্স নিদ্দেসে ‘‘মঞ্চো পীঠ’’ন্তিআদি ৰুত্তং.

ইদানি অঞ্ঞম্পিস্স পভেদং দস্সেতুং ‘‘অরঞ্ঞ’’ন্তিআদি ৰুত্তং. তত্থ অরঞ্ঞন্তি ৰিনযপরিযাযেন তাৰ ঠপেত্ৰা গামঞ্চ গামূপচারঞ্চ অৰসেসং, সুত্তন্তপরিযাযেন চ আরঞ্ঞকং ভিক্খুং সন্ধায পঞ্চধনুসতিকং পচ্ছিমং অরঞ্ঞন্তি ৰুত্তং, অভিধম্মপরিযাযেন পন গামদ্ৰারস্স ইন্দখীলতো বহি সব্বং ‘‘অরঞ্ঞ’’ন্তি গহেতব্বং. ‘‘নিক্খমিত্ৰা বহি ইন্দখীলা’’তি (ৰিভ. ৫২৯) হি ৰুত্তং. কন্দরন্তি কং ৰুচ্চতি উদকং, তেন দরিতং উদকেন ভিন্নং পব্বতপদেসং, যং ‘‘নিতুম্ব’’ন্তিপি ‘‘নদীকুঞ্জ’’ন্তিপি ৰদন্তি. তত্থ হি রজতপট্টসদিসৰালিকাপুলিনে মণিৰিতানসদিসে সন্দচ্ছাযে ৰনগহনে নিসীদিত্ৰা মণিক্খন্ধসদিসে উদকে সন্দমানে সীতেন ৰাতেন বীজিযমানস্স সমণধম্মং করোতো চিত্তং একগ্গং হোতি. গিরিগুহন্তি দ্ৰিন্নং পব্বতানমন্তরং, একস্মিঞ্ঞেৰ ৰা উমঙ্গসদিসং মহাৰিৰরং. ৰনপত্থন্তি গামন্তং অতিক্কমিত্ৰা মনুস্সানং অনুপচারট্ঠানং, যত্থ ন কসন্তি ন ৰপন্তি. তেনেৰস্স নিদ্দেসে ‘‘ৰনপত্থন্তি দূরানমেতং সেনাসনানং অধিৰচন’’ন্তিআদি ৰুত্তং.

অব্ভোকাসন্তি অচ্ছন্নং. আকঙ্খমানো পনেত্থ চীৰরকুটিং কত্ৰা ৰসতি. পলালপুঞ্জন্তি পলালরাসিং. মহাপলালপুঞ্জতো ¶ হি পলালং নিক্কড্ঢিত্ৰা পব্ভারলেণসদিসে আলযে করোন্তি, গচ্ছগুম্বাদীনম্পি উপরি পলালং পক্খিপিত্ৰা হেট্ঠা নিসীদন্তি, তং সন্ধাযেতং ৰুত্তং. অপ্পসদ্দন্তিআদীসু ৰচনসদ্দেন ৰিরহিতত্তা অপ্পসদ্দং. নগরনিগ্ঘোসসদ্দেন চেৰ মিগপক্খিনিগ্ঘোসেন চ রহিতত্তা অপ্পনিগ্ঘোসং. ৰিজনৰাতন্তি অনুসঞ্চরকজনস্স সরীরৰাতেন ৰিরহিতত্তা ৰিজনৰাতং, ‘‘ৰিজনৰাদ’’ন্তিপি পাঠো. সেনাসনস্স অন্তো জনৰাদসদ্দেন রহিতন্তি অত্থো. মনুস্সানং রহস্স কিরিযারহত্তা মনুস্সরাহস্সেয্যকং, ততো ততো পটিনিৰত্তিত্ৰা সম্মদেৰ কম্মট্ঠানে চিত্তস্স লীযনতো পটিসল্লানসঙ্খাতস্স ৰিৰেকস্স ভাৰনারামস্স অনুরূপত্তা পটিসল্লানসারুপ্পং. ভজতীতি সম্বন্ধো. অরঞ্ঞগতোতিআদীসু অরঞ্ঞং, রুক্খমূলঞ্চ ঠপেত্ৰা অৰসেসং সব্বম্পি সেনাসনং সুঞ্ঞাগারেন সঙ্গহিতং.

পল্লঙ্কং ¶ আভুজিত্ৰাতি সমন্ততো ঊরুবদ্ধাসনং বন্ধিত্ৰা. উজুং কাযং পণিধাযাতি উপরিমকাযং উজুং ঠপেত্ৰা, অট্ঠারস পিট্ঠিকণ্টকে কোটিযা কোটিং পটিপাদেত্ৰা. এৰং নিসিন্নস্স হি চম্মমংসনহারূনি ন পণমন্তি, অথস্স তেসং অপণমনপচ্চযা খণে খণে ৰেদনা ন উপ্পজ্জন্তি, ততো চিত্তং একগ্গং হোতি, কম্মট্ঠানং ৰুদ্ধিং উপগচ্ছতি. পরিমুখং সতিং উপট্ঠপেত্ৰাতি কম্মট্ঠানাভিমুখং সতিং পট্ঠপেত্ৰা, মুখসমীপে ৰা কত্ৰা. তেনেৰস্স নিদ্দেসে ‘‘অযং সতি উপট্ঠিতা হোতি সূপট্ঠিতা, নাসিকগ্গে ৰা মুখনিমিত্তে ৰা’’তি (ৰিভ. ৫৩৭) ৰুত্তং. মুখনিমিত্তন্তি চেত্থ উত্তরোট্ঠস্স ৰেমজ্ঝপদেসো, যত্থ নাসিকাৰাতো পটিহঞ্ঞতি. অথ ৰা ‘‘পরীতি পরিগ্গহট্ঠো, মুখন্তি নিয্যানট্ঠো, সতীতি উপট্ঠানট্ঠো, তেন ৰুচ্চতি পরিমুখং সতি’’ন্তি (পটি. ম. ১.১৬৪) ৰং পটিসম্ভিদাযং ৰুত্তনযেনপেত্থ অত্থো দট্ঠব্বো. তত্রাযং সঙ্খেপত্থো ‘‘পরিগ্গহিতনিয্যানং সতিং কত্ৰা’’তি.

অভিজ্ঝং ¶ লোকেতিআদীসু অভিমুখং ঝাযতি চিন্তেতীতি অভিজ্ঝা, রাগো. লুজ্জনপলুজ্জনট্ঠেন লোকো, পঞ্চুপাদানক্খন্ধা. তেসু কামচ্ছন্দং ৰিক্খম্ভেত্ৰাতি অত্থো. ৰিক্খম্ভনৰসেনেৰ ৰিগতাভিজ্ঝেন, ন চক্খুৰিঞ্ঞাণাদিসদিসেনাতি অত্থো. চেতসাতি চিত্তেন, ইত্থম্ভূতো ৰিহরতীতি অত্থো. অভিজ্ঝাযাতি অভিজ্ঝাতো. চিত্তং পরিসোধেতীতি যথা নং সা মুঞ্চিত্ৰা ন পুন গণ্হাতি, এৰং পরিমোচেতীতি অত্থো. ব্যাপজ্জতি ইমিনা চিত্তং পূতিকুম্মাসাদযো ৰিয পকতিং জহাতীতি ব্যাপাদো. ৰিকারপ্পত্তিযা পদুস্সতি, পরং ৰা পদূসেতি ৰিনাসেতীতি পদোসো, উভযম্পেতং কোধস্সেৰাধিৰচনং. যস্মা চেতং সব্বকম্মট্ঠানসাধারণৰসেন দেসীযতি, তস্মা ‘‘সব্বপাণভূতহিতানুকম্পী’’তি এৰং মেত্তাৰসেন অৰত্ৰা ‘‘অব্যাপন্নচিত্তো’’তি এত্তকমেৰ ৰুত্তং.

থিনং চিত্তস্স গেলঞ্ঞং, মিদ্ধং চেতসিকানং. আলোকসঞ্ঞীতি রত্তিযম্পি দিৰাপি দিট্ঠআলোকসঞ্জাননসঞ্ঞায সমন্নাগতো, তায পন আলোকসঞ্ঞায থিনমিদ্ধৰিনোদনস্স ৰিসেসতো সতিসম্পজঞ্ঞং ইচ্ছিতব্বন্তি আহ ‘‘সতো সম্পজানো’’তি.

অনুদ্ধতোতি অৰিক্খিত্তো তথা এৰ অজ্ঝত্তং ৰূপসন্তচিত্তো. তিণ্ণৰিচিকিচ্ছোতি ৰিচিকিচ্ছং অতিক্কমিত্ৰা ঠিতো. অকথংকথী কুসলেসু ধম্মেসূতি অনৰজ্জধম্মেসু ‘‘কথং ইমে, কথং ইমে’’তি এৰং পৰত্তনতো কথংকথীসঙ্খাতায ৰিচিকিচ্ছায ৰিরহিতো. এৰং পঞ্চনীৰরণপ্পহানং ¶ দস্সেত্ৰা ইদানি যস্মা অপ্পহীননীৰরণস্স ঝানং ন উপ্পজ্জতি, ন হি কামচ্ছন্দাদীহি নানাৰিসযৰিক্খিত্তচিত্তং একত্তারম্মণে সমাধিযতি, ন কামধাতুসমতিক্কমনায ৰা পটিপজ্জতি, তস্মা ‘‘সো ইমে পঞ্চ নীৰরণে পহাযা’’তিআদি ৰুত্তং. তত্থ ¶ সোতি যো যথাৰুত্তসীলাদিগুণে পতিট্ঠায অরঞ্ঞাদিঅনুরূপসেনাসনগতো অত্তনো চরিযানুকুলকম্মট্ঠানে লীনুদ্ধচ্চরহিতায সাতচ্চকিরিযায উপ্পাদিতুপচারজ্ঝানেন পহীনপঞ্চনীৰরণো পঠমজ্ঝানাধিগমায ৰাযমতি, সোতি অত্থো.

চেতসো উপক্কিলেসেতি চিত্তস্স অপ্পভস্সরভাৰকরণে. পঞ্ঞায দুব্বলীকরণেতি যস্মা ইমে নীৰরণা উপ্পজ্জমানা অনুপ্পন্নায লোকিযলোকুত্তরায পঞ্ঞায উপ্পজ্জিতুং ন দেন্তি, উপ্পন্নায পন লোকিযঅট্ঠসমাপত্তিযা, অভিঞ্ঞাভূতায ৰা মূলং উপচ্ছিন্দিত্ৰা পাতেন্তি, তস্মা ‘‘পঞ্ঞায দুব্বলীকরণা’’তি ৰুচ্চন্তি. ৰিৰিচ্চেৰ কামেহীতিআদীসু কামেহীতি ৰত্থুকামকিলেসকামেহি. ৰিৰিচ্চেৰাতি ৰিৰিচ্চিত্ৰা ৰিনা হুত্ৰা, অপক্কমিত্ৰাতি অত্থো. নিযমত্থেন পনেত্থ এৰ-কারেন ঝানপটিপক্খভূতানং কামানং পরিচ্চাগেনেৰ পঠমজ্ঝানাধিগমো, অন্ধকারপরিচ্চাগেনেৰ দীপপ্পৰত্তি ৰিযাতি দস্সেতি. উত্তরপদেপি চেস এৰ-কারো আনেত্ৰা ‘‘ৰিৰিচ্চেৰ অকুসলেহি ধম্মেহী’’তি সম্বন্ধিতব্বো. ন হি সক্কা কামতো অঞ্ঞেহি নীৰরণসঙ্খাতেহি অকুসলধম্মেহি অৰিৰিচ্চাপি ঝানং উপসম্পজ্জ ৰিহরিতুং. পদদ্ৰযেপি পন ‘‘ৰিৰিচ্চা’’তি ইমিনা কাযৰিৰেকাদীসু, তদঙ্গৰিৰেকাদীসু চ তদঙ্গনিস্সরণৰিৰেকৰজ্জিতা সব্বেপি ৰিৰেকা ইধ অধিপ্পেতা. ৰত্থুকামৰিৰেকৰচনতো হি কাযৰিৰেকো ৰুত্তো, কিলেসকামেহি পন সেসাকুসলেহি চ ৰিৰেকৰচনতো চিত্তউপধিৰিৰেকা, ৰিক্খম্ভনাদিৰিৰেকা চ ৰুত্তা. লোকুত্তরজ্ঝানম্পি সঙ্গহিতত্তা দট্ঠব্বং. এৰমেতেন পদদ্ৰযেন যথাক্কমং কামচ্ছন্দনীৰরণসেসনীৰরণৰিক্খম্ভনাদিকো ৰুত্তো. এৰং ওঘাদীসুপি যথারহং যোজেতব্বং.

এত্তাৰতা চ পঠমস্স ঝানস্স পহানঙ্গং দস্সেত্ৰা ইদানি সম্পযোগঙ্গং দস্সেতুং ‘‘সৰিতক্কং সৰিচার’’ন্তিআদি ৰুত্তং ¶ . তত্থ ৰিতক্কেন চ ৰিচারেন চ সহ ৰত্ততি রুক্খো ৰিয পুপ্ফেন, ফলেন চাতি ইদং ঝানং ‘‘সৰিতক্কং সৰিচার’’ন্তি ৰুচ্চতি. ৰিৰেকজন্তি এত্থ ৰিৰিত্তি ৰিৰেকো, নীৰরণৰিগমোতি অত্থো. ৰিৰিত্তোতি ৰা ৰিৰেকো, নীৰরণৰিৰিত্তো ঝানসম্পযুত্তধম্মরাসীতি অত্থো, তস্মা ৰিৰেকতো, তস্মিং ৰা ৰিৰেকে জাতন্তি ৰিৰেকজং. পীতিসুখন্তি এত্থ পীতীতি অপ্পনাপ্পত্তা ফরণাপীতি, সুখঞ্চ তংসম্পযুত্তং, ইতি অযঞ্চ পীতি ¶ ইদঞ্চ সুখং অস্স ঝানস্স, অস্মিং ৰা অত্থীতি ইদং ঝানং ‘‘পীতিসুখ’’ন্তি ৰুচ্চতি. অথ ৰা পীতি চ সুখঞ্চ পীতিসুখং, ৰিৰেকজং পীতিসুখং অস্স, অস্মিং ৰাতি ৰিৰেকজং পীতিসুখং, এৰং একপদৰসেন ‘‘ৰিৰেকজপীতিসুখ’’ন্তি ৰত্তব্বে নিগ্গহীতাগমং কত্ৰা ‘‘ৰিৰেকজং পীতিসুখ’’ন্তিপি ৰত্তুং যুজ্জতি. যথেৰ হি ঝানং, এৰং পীতিসুখম্পি ৰিৰেকজমেৰ হোতীতি. পঠমং ঝানন্তি গণনানুপুব্বতো পঠমং, পঠমং উপ্পত্তিতোপি পঠমং. আরম্মণূপনিজ্ঝানতো, পচ্চনীকঝাপনতো ৰা ঝানং, ইমিনা নযেন উপরি ‘‘দুতিযং ঝান’’ন্তিআদীসু অত্থো ৰেদিতব্বো. উপসম্পজ্জ ৰিহরতীতি এৰং পঞ্চঙ্গৰিপ্পহীনং পঞ্চঙ্গসমন্নাগতং তিৰিধকল্যাণং দসলক্খণসম্পন্নং পঠমং ঝানং অধিগন্ত্ৰা তদনুরূপেন ইরিযাপথৰিহারেন পৰত্ততীতি অত্থো. এত্থ চ চিত্তেকগ্গতা কিঞ্চাপি ‘‘সৰিতক্কসৰিচার’’ন্তি ইমস্মিং পাঠে ন নিদ্দিট্ঠা, তথাপি ৰিভঙ্গে ‘‘ঝানন্তি ৰিতক্কো ৰিচারো পীতি সুখং চিত্তস্সেকগ্গতা’’তি (ৰিভ. ৫৬৯) ৰুত্তত্তা অঙ্গমেৰ.

এৰং পঠমজ্ঝানাধিগমং দস্সেত্ৰা ইদানি তদনন্তরং অধিগতপঠমজ্ঝানস্স তং আৰজ্জনসমাপজ্জনৰুট্ঠানাধিট্ঠানপচ্চৰেক্খণসঙ্খাতাহি পঞ্চহি ৰসীহি ৰসীভূতং কত্ৰা ততো ৰুট্ঠায তত্থ আসন্ননীৰরণপচ্চত্থিকতায চেৰ ওল়ারিকৰিতক্কৰিচারক্খোভসমঙ্গিতায চ দোসং দিস্ৰা নিকন্তিং পরিযাদায ৰিতক্কাদিভেদোল়ারিকঙ্গপ্পহানায, পীতিআদিসন্তঙ্গপটিলাভায ¶ চ তদেৰ কম্মট্ঠানং পুনপ্পুনং মনসিকরোতো দুতিযং ঝানং উপ্পজ্জতি, তপ্পাদকঞ্চ লোকুত্তরজ্ঝানং পুগ্গলাধিট্ঠানেন দস্সেতুং ‘‘ৰিতক্কৰিচারানং ৰূপসমা’’তিআদিমাহ. তত্থ ৰূপসমাতি সমতিক্কমা, দুতিযজ্ঝানক্খণে অপাতুভাৰাতি ৰুত্তং হোতি. অজ্ঝত্তন্তি অত্তনি জাতং, অত্তসন্তানে নিব্বত্তন্তি অত্থো. সম্পসাদনন্তি সদ্ধাসঙ্খাতসম্পসাদনযোগতো ঝানম্পি সম্পসাদনং নীলৰণ্ণযোগতো নীলৰত্থং ৰিয. একোদিভাৰন্তি এত্থ ৰিতক্কৰিচারেহি অনজ্ঝারুল়্হত্তা একো অগ্গো সেট্ঠো উদেতীতি একোদি, সমাধি. তং ভাৰেতি ৰড্ঢেতীতি দুতিযজ্ঝানং একোদিভাৰং. সো পনাযং একোদি যস্মা চেতসো, ন সত্তস্স, ন জীৰস্স, তস্মা এতং ‘‘চেতসো একোদিভাৰ’’ন্তি ৰুত্তং.

ননু চাযং সদ্ধা পঠমজ্ঝানেপি অত্থি, অযঞ্চ একোদিনামকো সমাধি, অথ কস্মা ইদমেৰ এৰং ৰুত্তন্তি? ৰুচ্চতে – ইমস্মিঞ্হি ঝানে ৰিতক্কৰিচারক্খোভাভাৰেন বলৰতী সদ্ধা, সমাধি চ, তস্মা ইদমেৰ এৰং ৰুত্তন্তি. অৰিতক্কং অৰিচারন্তি ভাৰনায পহীনত্তা নত্থি ¶ এতস্মিং, এতস্স ৰা ৰিতক্কো ৰিচারো, ন ততিযজ্ঝানাদি ৰিয, চক্খুৰিঞ্ঞাণাদি ৰিয চ অভাৰপ্পত্তিতো, তস্মা ইমস্স ‘‘ৰিতক্কৰিচারানং ৰূপসমা’’তি ইদং কারণৰচনন্তি দট্ঠব্বং. সমাধিজন্তি পঠমজ্ঝানসমাধিতো, সম্পযুত্তসমাধিতো ৰা জাতং, ৰিতক্কাদিক্খোভাভাৰেন চেতস্স ৰণ্ণভণনত্থং ইদমেৰ ‘‘সমাধিজ’’ন্তি ৰুত্তং. উপসম্পজ্জ ৰিহরতীতি এৰং দুৰঙ্গৰিপ্পহীনং তিৰঙ্গসমন্নাগতং তিৰিধকল্যাণাদিযুত্তং দুতিযং ঝানং অধিগন্ত্ৰা ৰুত্তনযেন ৰত্ততীতি অত্থো.

এৰং দুতিযজ্ঝানাধিগমং দস্সেত্ৰা ইদানি তদনন্তরং অধিগতদুতিযজ্ঝানস্স তং ৰুত্তনযেনেৰ ৰসীভূতং কত্ৰা তত্থ ¶ আসন্নৰিতক্কৰিচারপচ্চত্থিকতায চেৰ ওল়ারিকপীতঙ্গসমঙ্গিতায চ দোসং দিস্ৰা নিকন্তিং পরিযাদায তদোল়ারিকঙ্গপ্পহানায সেসসন্তঙ্গপটিলাভায তদেৰারম্মণং পুনপ্পুনং মনসিকরোতো ততিযং ঝানং উপ্পজ্জতি, তপ্পাদকঞ্চ লোকুত্তরং, তং দস্সেতুং ‘‘পীতিযা চ ৰিরাগা’’তিআদিমাহ. তত্থ ৰিরজ্জনং ৰিরাগো, সমতিক্কমো, তস্মা ৰিরাগা. চ-কারেন ৰিতক্কৰিচারানং ৰূপসমং সম্পিণ্ডেতি ‘‘পীতিযা চ ৰিরাগা, ৰিতক্কৰিচারানঞ্চ ৰূপসমা’’তি. ইদঞ্চেতস্স আগমনমগ্গপরিদীপনত্থং, ৰণ্ণভণনত্থঞ্চ ৰুত্তং. উপেক্খকো ৰিহরতীতি এত্থ উপপত্তিতো ইক্খতি অপক্খপতিতা হুত্ৰা পস্সতীতি উপেক্খা, তত্রমজ্ঝত্ততা. তায ৰিসদায পীতিৰিরাগপদট্ঠানায থামগতায সমন্নাগতত্তা ততিযজ্ঝানসমঙ্গী ‘‘উপেক্খকো’’তি ৰুচ্চতি, ৰিতক্কাদিক্খোভাভাৰেন পনেসা এত্থেৰ পরিব্যত্তকিচ্চা জাতা, ন পঠমজ্ঝানাদীসূতি. সতো চ সম্পজানোতি পুগ্গলাধিট্ঠানেন সতি চ সম্পজঞ্ঞঞ্চ ৰুত্তং, ইদঞ্চ সতিসম্পজঞ্ঞবলেনেৰ ঠিতং তংপীতিসহচরিতং সুখং, ততো অপনীতং ৰচ্ছো ৰিয বন্ধনবলেন ধেনুং পীতিং ন উপগচ্ছতি, ইমস্মিঞ্চ সতি অতিমধুরে সুখে যোগিনো ন সারজ্জন্তি, নো অঞ্ঞথাতি ইমম্পি অত্থৰিসেসং দস্সেতুং ইধেৰ ৰুত্তন্তি ৰেদিতব্বং. সুখঞ্চ কাযেন পটিসংৰেদেতীতি এত্থ কিঞ্চাপি ততিযজ্ঝানসমঙ্গিনো সুখপটিসংৰেদনাভোগো নত্থি, এৰং সন্তেপি যস্মা তস্স নামকাযেন সম্পযুত্তং অতিপণীতং সুখং, তংসমুট্ঠিতেন তস্স অতিপণীতেন রূপেন রূপকাযো ফুট্ঠো, যস্স ফুট্ঠত্তা ঝানা ৰুট্ঠিতোপি কাযিকসুখং পটিসংৰেদেয্য, তস্মা এতমত্থং দস্সেন্তো ‘‘সুখঞ্চ কাযেন পটিসংৰেদেতী’’তি আহ. যং তন্তিআদীসু যন্তি যস্মা, যং ¶ ঝানহেতূতি অত্থো. তন্তি তং ততিযজ্ঝানসমঙ্গিপুগ্গলং বুদ্ধাদযো অরিযা আচিক্খন্তি পসংসন্তি. কিন্তি? ‘‘উপেক্খকো সতিমা সুখৰিহারী’’তি. এৰং একঙ্গৰিপ্পহীনং দুৰঙ্গসমন্নাগতং তিৰিধকল্যাণাদিযুত্তং ¶ ততিযং ঝানং অধিগন্ত্ৰা পৰত্ততীতি অত্থো. যং পন ঝানং ৰিভঙ্গে ‘‘ঝানন্তি উপেক্খা সতি সম্পজঞ্ঞং সুখং চিত্তস্সেকগ্গতা’’তি (ৰিভ. ৫৯১) ৰুত্তং, তং সপরিক্খারং ঝানং দস্সেতুং পরিযাযেন ৰুত্তং. উপনিজ্ঝানলক্খণানং পন সুখচিত্তেকগ্গতানং ৰসেন দুৰঙ্গিকমেৰেতং ৰেদিতব্বং. যথাহ – ‘‘দুৰঙ্গিকং ঝানং হোতী’’তিআদি (ৰিভ. ৬২৪).

এৰং ততিযজ্ঝানাধিগমং দস্সেত্ৰা ইদানি তদনন্তরং অধিগতততিযজ্ঝানস্স তং ৰসীভূতং কত্ৰা ততো ৰুট্ঠায তত্থ ৰুত্তনযেন দোসং দিস্ৰা নিকন্তিং পরিযাদায ওল়ারিকসুখঙ্গপ্পহানায, উপেক্খেকগ্গতাসঙ্খাতসেসসন্তঙ্গপটিলাভায চ তদেৰ নিমিত্তং মনসিকরোতো চতুত্থং ঝানং উপ্পজ্জতি, তপ্পাদকঞ্চ লোকুত্তরং, তং পুগ্গলাধিট্ঠানেন দস্সেতুং ‘‘সুখস্স চ পহানা’’তিআদিমাহ. তত্থ সুখস্স চ পহানা দুক্খস্স চ পহানাতি কাযিকস্স সুখস্স, দুক্খস্স চ পহানা. পুব্বেৰাতি তঞ্চ খো পুব্বেৰ, ন চতুত্থজ্ঝানক্খণেতি অত্থো. সোমনস্সদোমনস্সানং অত্থঙ্গমাতি চেতসিকস্স সুখস্স, দুক্খস্স চ পুব্বেৰ পহানা. কদা পন তেসং পহানং হোতীতি? চতুন্নং ঝানানং উপচারক্খণে. দুক্খদোমনস্সসুখসোমনস্সানি হি যথাক্কমং পঠমাদিচতুন্নং ঝানানং উপচারক্খণে এৰ পহীযন্তি. যদি এৰং, কস্মা পনেস ‘‘ৰিৰিচ্চেৰ…পে… পঠমং ঝানং উপসম্পজ্জ ৰিহরতি, এত্থুপ্পন্নং দুক্খিন্দ্রিযং অপরিসেসং নিরুজ্ঝতি…পে… চতুত্থং ঝানং উপসম্পজ্জ ৰিহরতি, এত্থুপ্পন্নং সোমনস্সিন্দ্রিযং অপরিসেসং নিরুজ্ঝতী’’তি (সং. নি. ৫.৫১০) এৰং ঝানেস্ৰেৰ নিরোধো ৰুত্তোতি? অতিসযনিরোধস্স ¶ ৰুত্তত্তা. উপচারক্খণেসু হি যো নিরোধো, সো নিরোধো এৰ, নাতিসযনিরোধো, সো পন ঝানক্খণেসু এৰ. ততো এৰ হি তত্থ তত্থ অপরিসেসগ্গহণং কতন্তি, তত্থ তত্থ পন পহীনাপি এতা ৰেদনা এত্থ দুৰিঞ্ঞেয্যলক্খণায অদুক্খমসুখায ৰেদনায দুক্খাদিব্যতিরেকেন সুখগ্গহণত্থং, ৰণ্ণভণনত্থঞ্চস্স ঝানস্স সমাহটা, পচ্চযদস্সনত্থঞ্চস্স. যথাহ – ‘‘চত্তারো খো, আৰুসো, পচ্চযা অদুক্খমসুখায চেতোৰিমুত্তিযা সমাপত্তিযা, ইধাৰুসো, ভিক্খু সুখস্স চ পহানা’’তিআদি (ম. নি. ১.৪৫৮).

উপেক্খাসতিপারিসুদ্ধিন্তি তত্রমজ্ঝত্ততাসঙ্খাতায উপেক্খায জনিতসতিযা পারিসুদ্ধি. নিরুপক্লেসতায হি তং পরিসুদ্ধত্তং. ন কেৰলঞ্চেত্থ উপেক্খায সতি এৰ পরিসুদ্ধা, অপিচ খো সব্বেপি সম্পযুত্তধম্মা, সতিসীসেন পনাযং দেসনা কতাতি. উপসম্পজ্জ ৰিহরতীতি এৰং একঙ্গৰিপ্পহীনং ¶ দুৰঙ্গসমন্নাগতং তিৰিধকল্যাণাদিযুত্তং চতুত্থং ঝানং অধিগন্ত্ৰা তদনুরূপেন ইরিযাপথৰিহারেন পৰত্ততীতি অত্থো.

এৰং রূপাৰচরলোকুত্তরচতুক্কজ্ঝানং দস্সেত্ৰা ইদানি অরূপাৰচরজ্ঝানং দস্সেন্তো যং তত্থ পঠমং, এৰং অধিগতরূপাৰচরচতুত্থজ্ঝানস্স করজরূপে দণ্ডাদানাদীনঞ্চেৰ চক্খুরোগাদিআবাধানঞ্চ ৰসেন দিট্ঠাদীনৰস্স করজরূপস্স সমতিক্কমায আকাসকসিণৰিরহিতেসু নৰসু কসিণেসু অঞ্ঞতরস্মিং চতুত্থং ঝানং উপ্পাদেত্ৰা তস্সারম্মণভূতং কসিণপটিভাগরূপম্পি করজরূপপটিভাগতায, অরঞ্ঞে সপ্পানুবন্ধস্স ভযেন পলাযতো রজ্জুতালপণ্ণাদিং সপ্পপটিভাগতায ৰিয সমতিক্কমিতুকামস্স পঞ্চহাকারেহি তং ঝানং ৰসীভূতং কত্ৰা ততো ৰুট্ঠায তত্থ ¶ নিব্বেজনীযরূপপটিভাগারম্মণতায, আসন্নসোমনস্সপচ্চত্থিকতায চ দোসং দিস্ৰা নিকন্তিং পরিযাদায অঙ্গেসু সমতিক্কমিতব্বাভাৰেন আরম্মণসমতিক্কমভূতং আকাসানঞ্চাযতনং সন্ততো মনসিকরিত্ৰা চক্কৰাল়পরিযন্তং ৰা যত্তকং ৰা ইচ্ছতি, তত্তকং কসিণং পত্থরিত্ৰা ৰা কসিণং অমনসিকরিত্ৰা তেন ফুট্ঠোকাসং ‘‘আকাসো আকাসো’’তি ৰা ‘‘অনন্তো আকাসো’’তি ৰা মনসিকারেন কসিণং উগ্ঘাটেত্ৰা ৰা তং কসিণুগ্ঘাটিমাকাসনিমিত্তং ‘‘আকাসো’’তি পুনপ্পুনং মনসিকরোতো আকাসানঞ্চাযতনং উপ্পজ্জতি, তং তাৰ দস্সেতুং ‘‘সব্বসো রূপসঞ্ঞানং সমতিক্কমা’’তিআদিমাহ.

তত্থ সব্বসোতি সব্বাকারেন, সব্বাসং ৰা অনৰসেসানন্তি অত্থো. রূপসঞ্ঞানন্তি সঞ্ঞাসীসেন ৰুত্তানং কুসলৰিপাককিরিযৰসেন পঞ্চদসরূপাৰচরজ্ঝানানঞ্চেৰ তদারম্মণানঞ্চ. রূপজ্ঝানম্পি হি ‘‘রূপে সঞ্ঞা রূপসঞ্ঞা’’তি এৰং সঞ্ঞাসীসেন ৰুচ্চতি, তদারম্মণকসিণম্পি রূপন্তি সঞ্ঞা নামমস্সাতি ‘‘রূপসঞ্ঞ’’ন্তি ৰুচ্চতি. সমতিক্কমাতি ৰিরাগা, নিরোধা চ. ৰিভঙ্গে পন সঞ্ঞাসু সমতিক্কন্তাসু আরম্মণং সমতিক্কন্তমেৰ হোতীতি ‘‘সমাপন্নস্স ৰা উপপন্নস্স ৰা দিট্ঠধম্মসুখৰিহারিস্স ৰা’’তিআদিনা (ৰিভ. ৬০২) সঞ্ঞানমেৰ সমতিক্কমো ৰুত্তো, আরম্মণে অৰিরত্তস্স সঞ্ঞাসমতিক্কমো নত্থেৰাতি তং সমতিক্কমৰসেনাপি অত্থৰণ্ণনা কাতব্বাৰ.

পটিঘসঞ্ঞানং অত্থঙ্গমাতি চক্খাদীনং ৰত্থূনং, রূপাদীনঞ্চ আরম্মণানং পটিঘাতেন সমুপ্পন্না ¶ দ্ৰিপঞ্চৰিঞ্ঞাণসঞ্ঞা পটিঘসঞ্ঞা, তাসং অত্থঙ্গমা. কিঞ্চাপি তা রূপাৰচরজ্ঝানসমাপন্নস্সাপি ন সন্তি, অথ খো ন পহীনত্তা ন সন্তি. ন হি রূপৰিরাগায রূপাৰচরভাৰনা সংৰত্ততি, রূপাযত্তাৰ এতাসং ¶ পৰত্তি, অযং পন ভাৰনা রূপৰিরাগায সংৰত্ততি, তস্মা তা এত্থ পহীনাতি ৰত্তুং ৰট্টতি. নানত্তসঞ্ঞানং অমনসিকারাতি নানত্তে গোচরে পৰত্তানং, নানত্তানং ৰা মনোৰিঞ্ঞাণধাতুৰসেন পৰত্তানঞ্চ চতুচত্তালীসকামাৰচরসঞ্ঞানং অমনসিকারা অনাৰজ্জনা. এত্থ চ রূপপটিঘসঞ্ঞানং ইমিনা ঝানেন নিব্বত্তভৰেপি অনুপ্পত্তিতো ‘‘সমতিক্কমা অত্থঙ্গমা’’তি এৰং অভাৰো এৰ ৰুত্তো. ‘‘নানত্তসঞ্ঞানং অমনসিকারা’’তি অট্ঠকামাৰচরকুসলানং নৰকিরিযানং দসাকুসলানং ৰসেন সত্তৰীসতিসঞ্ঞানং অরূপভৰেপি মনসিকারেন উপ্পত্তিসম্ভৰতো তাসং অমনসিকারা ইচ্চেৰ ৰুত্তন্তি ৰেদিতব্বং.

অনন্তো আকাসোতি এত্থ নাস্স উপ্পাদন্তো ৰা ৰযন্তো ৰা পঞ্ঞাযতীতি অনন্তো. আকাসোতি কসিণুগ্ঘাটিমাকাসো ৰুচ্চতি, মনসিকারৰসেনপেত্থ অনন্ততা ৰেদিতব্বা. তেনেৰ ৰিভঙ্গে ৰুত্তং ‘‘তস্মিং আকাসে চিত্তং ঠপেতি…পে… অনন্তং ফরতি, তেন ৰুচ্চতি অনন্তো আকাসো’’তি (ৰিভ. ৬০৫). ইদং পনস্স ভাৰনাকারদস্সনং. আকাসানঞ্চাযতনন্তি এত্থ নাস্স অন্তোতি অনন্তং আকাসমেৰ অনন্তং আকাসানন্তং, আকাসানন্তমেৰ আকাসানঞ্চং, তদেৰ আকাসানঞ্চং অধিট্ঠানট্ঠেন, সঞ্জাতিসমোসরণট্ঠেন চ আযতনং, তং আরম্মণমস্স সসম্পযুত্তধম্মস্স ঝানস্সাতি আকাসানঞ্চাযতনং. তং উপসম্পজ্জ ৰুত্তনযেন ৰিহরতীতি অত্থো.

এৰং আকাসানঞ্চাযতনাধিগমং দস্সেত্ৰা ইদানি যং তদনন্তরং অধিগতপঠমারুপ্পস্স তং ৰসীভূতং কত্ৰা তত্থ আসন্নরূপজ্ঝানপচ্চত্থিকতায, রূপপটিভাগাকাসারম্মণতায চ দোসং দিস্ৰা নিকন্তিং পরিযাদায তং সমতিক্কমায আকাসং ফরিত্ৰা পৰত্তং ৰিঞ্ঞাণং ‘‘অনন্তং ৰিঞ্ঞাণ’’ন্তি পুনপ্পুনং ¶ মনসিকরোতো ৰিঞ্ঞাণঞ্চাযতনং উপ্পজ্জতি, তং দস্সেতুং ‘‘সব্বসো আকাসানঞ্চাযতনং সমতিক্কম্মা’’তিআদি ৰুত্তং. তত্থ পুব্বে ৰুত্তনযেন ঝানম্পি আকাসানঞ্চাযতনং আরম্মণম্পি. আরম্মণম্পি হি পুরিমনযেন আকাসানঞ্চঞ্চ তং পঠমারুপ্পস্স আরম্মণত্তা ৰুত্তনযেন আযতনঞ্চাতি ‘‘আকাসানঞ্চাযতন’’ন্তি ৰুচ্চতি. ইতি উভযস্সাপি অপ্পৰত্তিকরণেন, অমনসিকরণেন চ একজ্ঝং কত্ৰা ‘‘আকাসানঞ্চাযতনং সমতিক্কম্মা’’তি ইদং ৰুত্তন্তি ৰেদিতব্বং.

অনন্তং ¶ ৰিঞ্ঞাণন্তি তঞ্ঞেৰ পঠমারুপ্পৰিঞ্ঞাণং আকাসং অনন্ততো ফরিত্ৰা পৰত্তং ‘‘অনন্তং ৰিঞ্ঞাণ’’ন্তি এৰং মনসিকরোতোতি ৰুত্তং হোতি, মনসিকারৰসেন ৰা অনন্তং. ৰিভঙ্গেপি হি ‘‘অনন্তং ফরতী’’তি (ৰিভ. ৬১০) ৰুত্তং. ৰিঞ্ঞাণঞ্চাযতনন্তি এত্থ ৰুত্তনযেন অনন্তমেৰ আনঞ্চং, ৰিঞ্ঞাণঞ্চ তং আনঞ্চঞ্চাতি ৰিঞ্ঞাণানন্তন্তি ৰত্তব্বে রুল়্হিতো ‘‘ৰিঞ্ঞাণঞ্চ’’ন্তি ৰুত্তং, তদেৰ আযতনমারম্মণমস্সাতি ৰিঞ্ঞাণঞ্চাযতনং. সেসং ৰুত্তনযমেৰ.

এৰং ৰিঞ্ঞাণঞ্চাযতনং দস্সেত্ৰা ইদানি যং তদনন্তরং অধিগতদুতিযারুপ্পস্স তং ৰসীভূতং কত্ৰা তত্থ আসন্নাকাসানঞ্চাযতনপচ্চত্থিকতায, তদারম্মণতায চ দোসং দিস্ৰা নিকন্তিং পরিযাদায তং সমতিক্কমায পঠমারুপ্পৰিঞ্ঞাণাভাৰং ‘‘নত্থি নত্থী’’তি ৰা ‘‘সুঞ্ঞং সুঞ্ঞ’’ন্তি ৰা ‘‘ৰিৰিত্তং ৰিৰিত্ত’’ন্তি ৰা পুনপ্পুনং মনসিকরোতো আকিঞ্চঞ্ঞাযতনং উপ্পজ্জতি, তং দস্সেতুং ‘‘সব্বসো’’তিআদিমাহ. ইধাপি ৰুত্তনযেন ঝানস্স, তদারম্মণস্স চ ৰিঞ্ঞাণঞ্চাযতনস্স সমতিক্কমোৰ ৰেদিতব্বো. নত্থি কিঞ্চীতি ‘‘নত্থি নত্থি, সুঞ্ঞং সুঞ্ঞং, ৰিৰিত্তং ৰিৰিত্ত’’ন্তি এৰং মনসিকরোতোতি অত্থো.

আকিঞ্চঞ্ঞাযতনন্তি ¶ এত্থ নাস্স কিঞ্চনন্তি অকিঞ্চনং, অন্তমসো ভঙ্গমত্তম্পিস্স অৰসিট্ঠং নত্থীতি ৰুত্তং হোতি, অকিঞ্চনস্স ভাৰো আকিঞ্চঞ্ঞং, আকাসানঞ্চাযতনৰিঞ্ঞাণাপগমস্সেতং অধিৰচনং, আকিঞ্চঞ্ঞং আযতনমারম্মণমস্সাতি আকিঞ্চঞ্ঞাযতনং. সেসং সুৰিঞ্ঞেয্যমেৰ.

এৰং আকিঞ্চঞ্ঞাযতনাধিগমং দস্সেত্ৰা ইদানি যং তদনন্তরং অধিগতততিযারুপ্পস্স তং ৰসীভূতং কত্ৰা তত্থ আসন্নৰিঞ্ঞাণঞ্চাযতনপচ্চত্থিকতায দোসং দিস্ৰা নিকন্তিং পরিযাদায তং সমতিক্কমায তদেৰ আকিঞ্চঞ্ঞাযতনং ‘‘সন্তং সন্ত’’ন্তি পুনপ্পুনং মনসিকরোতো নেৰসঞ্ঞানাসঞ্ঞাযতনং উপ্পজ্জতি, তং দস্সেতুং ‘‘সব্বসো’’তিআদিমাহ. তত্থ নেৰসঞ্ঞানাসঞ্ঞাযতনন্তি ওল়ারিকায সঞ্ঞায অভাৰতো, সুখুমায চ ভাৰতো নেৰস্স সসম্পযুত্তধম্মস্স ঝানস্স সঞ্ঞা নাসঞ্ঞাতি নেৰসঞ্ঞানাসঞ্ঞং, তদেৰ ধম্মাযতনমনাযতনপরিযাপন্নত্তা আযতনন্তি নেৰসঞ্ঞানাসঞ্ঞাযতনং.

অথ ৰা যাযমেত্থ সঞ্ঞা, সা পটুসঞ্ঞাকিচ্চং কাতুং অসমত্থতায নেৰসঞ্ঞা, সঙ্খারাৰসেসসুখুমভাৰেন ¶ ৰিজ্জমানত্তা নাসঞ্ঞাতি নেৰসঞ্ঞানাসঞ্ঞা, নেৰসঞ্ঞানাসঞ্ঞা চ সা সম্পযুত্তধম্মানং অধিট্ঠানট্ঠেন আযতনঞ্চাতি নেৰসঞ্ঞানাসঞ্ঞাযতনং. ন কেৰলঞ্চেত্থ সঞ্ঞাৰ এদিসী, অপি তু ফস্সোপি নেৰফস্সো নাফস্সো, চিত্তম্পি নেৰচিত্তং নাচিত্তং, এৰং সেসসম্পযুত্তধম্মাপি, সঞ্ঞাসীসেন পনাযং দেসনা কতাতি ৰেদিতব্বা. তত্থ সঙ্খারাৰসেসসুখুমভাৰেনাতি অচ্চন্তসুখুমভাৰপ্পত্তসঙ্খারভাৰেন. সেসং ৰুত্তনযমেৰ.

অযং পনেত্থ আদিতো পট্ঠায পিণ্ডত্থপ্পকাসনা – ‘‘ইধ ভিক্খু পাতিমোক্খসংৰরসংৰুতো’’তিআদিনা সাসনে লোকিযলোকুত্তরজ্ঝাননিব্বত্তকপুগ্গলস্স ¶ পতিট্ঠাভূতসীলেসু পাতিমোক্খসংৰরসীলৰিসুদ্ধিং উপদিসতি. ‘‘ৰিহরতী’’তি ইমিনা তদনুরূপৰিহারসমঙ্গিভাৰং. ‘‘আচারগোচরসম্পন্নো’’তি ইমিনা আজীৰপারিসুদ্ধিসীলং, তদুপকারকে চ ধম্মে. ‘‘অণুমত্তেসূ’’তিআদিনা যথাৰুত্তসীলেহি অচৰনং, তেসঞ্চ অনৰসেসতো সমাদানং. ‘‘ইন্দ্রিযেসু গুত্তদ্ৰারো’’তি ইমিনা ইন্দ্রিযসংৰরসীলং. ‘‘ভোজনে মত্তঞ্ঞূ’’তি ইমিনা পচ্চযসন্নিস্সিতসীলং, সন্তোসাদিগুণঞ্চ. ‘‘পুব্বরত্তাপররত্ত’’ন্তিআদিনা সীলধুতঙ্গেসু পতিট্ঠিতস্স ভাৰনারামস্স তদুপকারকে ধম্মে. ‘‘বোধিপক্খিকান’’ন্তিআদিনা পটিপত্তিযা নিব্বেধভাগিযতং. ‘‘সো অভিক্কন্তে’’তিআদিনা যথাৰুত্তগুণানং অপরিহানায, ৰক্খমানানঞ্চ পটিলাভায সতিসম্পযোগং. ‘‘সো ৰিৰিত্ত’’ন্তিআদিনা ভাৰনানুরূপসেনাসনপরিগ্গহং. ‘‘সো অরঞ্ঞগতো’’তিআদিনা ঝানভাৰনারম্ভপ্পকারং. ‘‘সো অভিজ্ঝ’’ন্তিআদিনা ঝানভাৰনাভিযোগেন পহীনপঞ্চনীৰরণস্স উপচারজ্ঝানুপ্পত্তিং. ‘‘সো ইমে পঞ্চ নীৰরণে’’তিআদিনা তস্স উপরূপরি ৰাযমতো রূপারূপজ্ঝানুপ্পত্তিক্কমং উপদিসতি. অযং তাৰেত্থ পদত্থো.

ধম্মভেদো পনেত্থ ৰিভঙ্গনযে পাকটো ভৰিস্সতি. তীসু হি নযেসু মহগ্গতলোকুত্তরা কুসলৰিপাককিরিযচিত্তসম্পযুত্তা ৰিতক্কৰিচারপীতিসুখউপেক্খাএকগ্গতাসঙ্খাতা ঝানধম্মা নানানযেহি ৰিভত্তা, ঝানসম্পযুত্তা পন সেসকামাৰচরধম্মাৰ ইধ সঙ্গহিতা. কিঞ্চাপি পনেত্থ পাতিমোক্খসংৰরসীলাদযোপি ৰুত্তা, তথাপি তে ঝানানং পুব্বভাগপ্পটিপত্তিদস্সনৰসেন চেৰ ঝানসম্পযুত্তধম্মৰসেন চ ৰুত্তা, ইধ পন ন সঙ্গহিতাতি ৰেদিতব্বা.

পঞ্হাপুচ্ছকে পন সিযা কুসলা, সিযা অব্যাকতা, তীণি ঝানানি সুখায ৰেদনায সম্পযুত্তা, চতুত্থং অদুক্খমসুখায ¶ ৰেদনায সম্পযুত্তং, উপেক্খা পনেত্থ ৰেদনা ন ৰত্তব্বা, সিযা ¶ ৰিপাকা, সিযা ৰিপাকধম্মধম্মা, পঠমজ্ঝানং ৰিতক্কৰিচারৰজ্জিতং সৰিতক্কসৰিচারং, ৰিতক্কো পনেত্থ অৰিতক্কৰিচারমত্তো, ৰিচারো ন ৰত্তব্বো, তীণি ঝানানি অৰিতক্কঅৰিচারা, দ্ৰে ঝানানি পীতিৰজ্জিতানি পীতিসহগতানি, তীণি সুখৰজ্জিতানি সুখসহগতানি, চতুত্থং উপেক্খাৰজ্জিতং উপেক্খাসহগতং, ততিযজ্ঝানে সুখং, উপেক্খা চ ইধ ন ৰত্তব্বং…পে… সিযা মহগ্গতা, সিযা অপ্পমাণা, তীণি সিযা অপ্পমাণারম্মণা, সিযা ন ৰত্তব্বা, চতুত্থং তিধাপি ন ৰত্তব্বঞ্চ, তীণি সিযা মগ্গহেতুকা, সিযা মগ্গাধিপতিনো, সিযা ন ৰত্তব্বা, চতুত্থং তিধাপি ন ৰত্তব্বঞ্চ…পে… পীতি বহিদ্ধারম্মণানি, চতুত্থং তিধাপি ন ৰত্তব্বঞ্চ…পে… অনিদস্সনঅপ্পটিঘা ন হেতূ…পে… নোচিত্তচেতসিকা অরণাতি. সেসং সুৰিঞ্ঞেয্যমেৰ. পাল়িমুত্তনযো পনেত্থ নত্থি, ইতো পরং পন এত্তকম্পি অৰত্ৰা ৰিজ্জমানট্ঠানে এৰ ৰক্খাম.

ঝানৰিভঙ্গমাতিকত্থৰণ্ণনা নিট্ঠিতা.

অপ্পমঞ্ঞাৰিভঙ্গমাতিকত্থৰণ্ণনা

অপ্পমঞ্ঞাৰিভঙ্গমাতিকায পন অত্থতো তাৰ – চতস্সো অপ্পমঞ্ঞাযোতিআদীসু ফরণঅপ্পমাণৰসেন অপ্পমঞ্ঞাযো. এতা হি আরম্মণৰসেন অপ্পমাণে ৰা সত্তে ফরন্তি, একসত্তম্হি ৰা অনৰসেসফরণৰসেন অপ্পমাণতো ফরন্তীতি এৰং ফরণঅপ্পমাণৰসেন ‘‘অপ্পমঞ্ঞাযো’’তি ৰুচ্চন্তি, সত্ত অপ্পমাণৰসেনাপি ৰত্তুং ৰট্টতি. মেত্তাসহগতেনাতি মেত্তায সমন্নাগতেন. একং দিসন্তি পুরত্থিমাদীসু চতূসু দিসাসু যং কিঞ্চি একং দিসং, তংদিসাপরিযাপন্নসত্তফরণৰসেন চেতং ৰুত্তং. ফরিত্ৰাতি ফুসিত্ৰা আরম্মণং ¶ কত্ৰা. ৰিহরতীতি পৰত্তেতি. তথা দুতিযন্তিআদীসু. যথা একং দিসং ফরিত্ৰা, তথেৰ তদনন্তরং দুতিযং, ততিযং, চতুত্থঞ্চাতি অত্থো. ইতি উদ্ধমধো তিরিযন্তি এতেনেৰ নযেন উপরিমং দিসং, হেট্ঠিমং দিসং, অনুদিসঞ্চ অনুক্কমেন মেত্তাসহগতেন চেতসা ফরিত্ৰা ৰিহরতীতি অত্থো. এত্তাৰতা একমেকং দিসং পরিগ্গহেত্ৰা ওধিসো মেত্তাফরণতং দস্সিতং.

সব্বধীতিআদি ¶ পন অনোধিসো দস্সনত্থং ৰুত্তং. তত্থ সব্বধীতি সব্বত্থ. সব্বত্ততাযাতি সব্বেসু হীনমজ্ঝিমুক্কট্ঠমিত্তসপত্তমজ্ঝত্তাদিপ্পভেদেসু অত্ততায, তেসু ৰিভাগং অকত্ৰা অত্তসমতাযাতি ৰুত্তং হোতি. অথ ৰা সব্বত্ততাযাতি সব্বেন চিত্তভাৰেন, ঈসকম্পি বহি অৰিক্খেপমানোতি অত্থো. সব্বাৰন্তন্তি সব্বসত্তৰন্তং, সব্বসত্তযুত্তন্তি অত্থো. লোকন্তি সত্তলোকং. পুন ‘‘মেত্তাসহগতেনা’’তি ইদং ‘‘ৰিপুলেনা’’তিআদীহি ৰিসেসনেহি সম্বন্ধদস্সনৰসেন ৰা ৰুত্তং, নিগমনৰসেন ৰা. তত্থ ফরণৰসেন ৰিপুলতা ৰেদিতব্বা. ভূমিৰসেন পন মহগ্গততা. পগুণৰসেন, অপ্পমাণসত্তারম্মণৰসেন চ অপ্পমাণতা. ব্যাপাদপচ্চত্থিকপ্পহানেন অৰেরতা. দোমনস্সপ্পহানেন নিদ্দুক্খতা, সঙ্খততা, অব্যাপজ্জতা চ দট্ঠব্বা. এৰং করুণাসহগতেনাতিআদীসুপি অত্থো ৰেদিতব্বোতি অযং তাৰেত্থ পদত্থো.

ধম্মভেদো পনেত্থ সুৰিঞ্ঞেয্যোৰ. ৰিভঙ্গনযেন পন তীসু রূপাৰচরকুসলৰিপাককিরিযাচিত্তেসু সম্পযুত্তা সত্তেসু মেত্তাদিব্রহ্মৰিহারভূতা অদোসো করুণা মুদিতা তত্রমজ্ঝত্ততাতি চত্তারো ধম্মা নানানযেহি ৰিভত্তা, তংসম্পযুত্তা পন কামাৰচরভূতা চ এতা ইধ ন গহিতা. অরূপাৰচরলোকুত্তরেসু পনেতা অপ্পমঞ্ঞা নত্থেৰাতি. পঞ্হাপুচ্ছকে পনেতা তাৰ সিযা কুসলা, সিযা ¶ অব্যাকতা. তিস্সো সুখায, চতুত্থা অদুক্খমসুখায ৰেদনায সম্পযুত্তা. ৰিপাকত্তিকে তিধাপি, উপেক্খা অৰিতক্কঅৰিচারা, সেসা তিধাপি, মহগ্গতাৰ, পরিত্তারম্মণঅতীতারম্মণত্তিকেসু ন ৰত্তব্বাৰ, বহিদ্ধারম্মণাৰ, অনিদস্সনঅপ্পটিঘাৰ, মেত্তা হেতু, সেসা ন হেতূ, নো চিত্তা, চেতসিকা, রূপাৰচরা, সউত্তরাৰ. সেসং সুৰিঞ্ঞেয্যমেৰাতি.

অপ্পমঞ্ঞাৰিভঙ্গমাতিকত্থৰণ্ণনা নিট্ঠিতা.

সিক্খাপদৰিভঙ্গমাতিকত্থৰণ্ণনা

সিক্খাপদৰিভঙ্গমাতিকায পন অত্থতো তাৰ – সিক্খাপদানীতি সিক্খিতব্বপদানি, সিক্খাকোট্ঠাসাতি অত্থো. অপিচ সব্বেপি কুসলা ধম্মা সিক্খিতব্বতো সিক্খা, তাসং পতিট্ঠানট্ঠেন ¶ পদং, পঞ্চসু পন সীলঙ্গেসু যং কিঞ্চি অঙ্গং. পাণাতিপাতাদীসু পাণস্স অতীৰ পাতো পাণাতিপাতো, পাণৰধোতি অত্থো. পাণোতি চেত্থ ৰোহারতো সত্তো, পরমত্থতো জীৰিতিন্দ্রিযং, তস্মিং পন পাণে পাণসঞ্ঞিনো জীৰিতিন্দ্রিযুপচ্ছেদকউপক্কমসমুট্ঠাপিকা কাযৰচীদ্ৰারানং অঞ্ঞতরদ্ৰারপ্পৰত্তা ৰধকচেতনা পাণাতিপাতো, তস্মা পাণাতিপাতা. ৰেরমণীতি ৰিরতি, সা এৰ ৰুত্তনযেন সিক্খাপদন্তি ৰেরমণিসিক্খাপদং. অদিন্নন্তি ন দিন্নং, পরপরিগ্গহিতং, পরপরিগ্গহিতস্স অদিন্নস্স আদানং অদিন্নাদানং. পরস্স হরণং থেয্যং চোরিকাতি ৰুত্তং হোতি. অত্থতো পন পরপরিগ্গহিতে তথাসঞ্ঞিনো তদাদাযকউপক্কমসমুট্ঠাপিকা থেয্যচেতনা অদিন্নাদানং. কামেসূতি ৰত্থুকামেসু. মিচ্ছাচারাতি কিলেসকামৰসেন লামকাচারা, পুরিসস্স মাতুরক্খিতাদিসঙ্খাতাসু, ইত্থিযা অত্তনো ¶ নিযমিতপুরিসতো পরপুরিসসঙ্খাতেসু চ অগমনীযট্ঠানেসু ৰীতিক্কমাচারাতি ৰুত্তং হোতি. অত্থতো পন অগমনীযৰত্থূসু মগ্গেনমগ্গপ্পটিপাদনোপক্কমসমুট্ঠাপিকা, অধিৰাসনাকারপ্পৰত্তা ৰা মেথুনচেতনা কামেসুমিচ্ছাচারো. মুসাতি অভূতং অতচ্ছং ৰত্থু, ৰাদোতি তস্স অভূততং ঞত্ৰাৰ ভূততো তচ্ছতো ৰিঞ্ঞাপনং. লক্খণতো পন অতথং ৰত্থুং ঞত্ৰা তথতো পরং ৰিঞ্ঞাপেতুকামস্স অত্থভঞ্জককাযৰচীপযোগসমুট্ঠাপিকা চেতনা মুসাৰাদো. সুরাতি পিট্ঠসুরা পূৰসুরা ওদনসুরা কিণ্ণপক্খিত্তা সম্ভারসংযুত্তাতি পঞ্চ সুরা. মেরযন্তি পুপ্ফাসৰো ফলাসৰো গুল়াসৰো মধ্ৰাসৰো সম্ভারসংযুত্তোতি পঞ্চ আসৰা. তদুভযম্পি মদনীযট্ঠেন মজ্জং, যায চেতনায তং মজ্জং পিৰতি, সা পমাদকারণত্তা পমাদট্ঠানং, তস্মা সুরামেরযমজ্জপমাদট্ঠানা. সেসং সুৰিঞ্ঞেয্যমেৰাতি অযং তাৰেত্থ পদত্থো.

ধম্মভেদো পন ৰিভঙ্গনযে পাকটো ভৰিস্সতি. এৰং উপরিপি. ৰিভঙ্গনযেসু চেত্থ সুত্তন্তভাজনীযং নত্থি, অভিধম্মভাজনীযে পনেতানি পঞ্চ সিক্খাপদানি কামাৰচরকুসলচিত্তসম্পযুত্তানং ৰিরতীনং ৰসেন নানপ্পকারতো পঠমৰারে ৰিভত্তানি, তথা দুতিযৰারে চেতনাৰসেন, ৰিরতিচেতনাসম্পযুত্তা পনেত্থ ধম্মা ন সিক্খাপদানি, সিক্খাপদসম্পযুত্তা পন হোন্তি, তথা ততিযনযে ফস্সাদীনং সব্বেসং ধম্মানং ৰসেন নানপ্পকারতো ৰিভত্তাতি.

পঞ্হাপুচ্ছকে পন চেতনায, ফস্সাদীনঞ্চ পরিযাযসিক্খাপদত্তা নিপ্পরিযাযসিক্খাপদভূতানং ৰিরতীনং ৰসেনেৰ ৰিভত্তানি. তত্থ হি পঞ্চ সিক্খাপদানি কুসলা এৰ, সিযা ¶ সুখায, সিযা অদুক্খমসুখায সম্পযুত্তা…পে… পরিত্তারম্মণাৰ, পচ্চুপ্পন্নারম্মণাৰ, বহিদ্ধারম্মণাৰ, অনিদস্সনঅপ্পটিঘাৰ, ন হেতূ, সহেতুকা, নো চিত্তা, চেতসিকা, কামাৰচরা ¶ , সউত্তরাৰ, অরণাৰাতি. এত্থ চ যানি সিক্খাপদানি সত্তারম্মণানি ৰুত্তানি, তানি চ ৰিরতিসভাৰত্তা যস্মা ‘‘সত্তো’’তি সঙ্খং গতে পরিত্তধম্মে এৰ পচ্চুপ্পন্নে এৰ ধম্মে আরম্মণং করোন্তি, তস্মা পরিত্তারম্মণাতি চ ৰুত্তাতি ৰেদিতব্বা. ইদানি ৰিরমিতব্বপাণাতিপাতাদীনং –

ধম্মকম্মপথালম্ব-ৰেদনামূলকম্মতো;

সাৰজ্জঙ্গাদিতো ঞেয্যো, পাল়িমুত্তৰিনিচ্ছযো.

তত্থ ধম্মতো তাৰ – পঞ্চপেতে পাণাতিপাতাদযো চেতনাসভাৰাৰ হোন্তি. কম্মপথতো পঞ্চ কম্মপথাৰ. আরম্মণতো পন পাণাতিপাতো জীৰিতিন্দ্রিযারম্মণো, অদিন্নাদানং সত্তারম্মণং, সঙ্খারারম্মণং ৰা, তথা মুসাৰাদো, মিচ্ছাচারো ইত্থিপুরিসারম্মণো, সুরাপানং সঙ্খারারম্মণং. ৰেদনাতো পন পাণাতিপাতো দুক্খৰেদনো, অদিন্নাদানং তিৰেদনং, তথা মুসাৰাদো, মিচ্ছাচারো পন সুখমজ্ঝত্তৰসেন দ্ৰিৰেদনো, তথা সুরাপানং. মূলতো পন পঠমো দোসমোহমূলো, দুতিযং সিযা লোভমোহমূলং, সিযা দোসমোহমূলং, তথা মুসাৰাদো, মিচ্ছাচারো পন লোভমোহমূলোৰ, তথা সুরাপানং. কম্মতো পনেত্থ মুসাৰাদো ৰচীকম্মং, সেসা কাযকম্মমেৰ.

সাৰজ্জতো পন পাণাতিপাতো তাৰ অমনুস্সকে পাণে অপ্পসাৰজ্জো, মনুস্সকে মহাসাৰজ্জো. তেসু চ খুদ্দকসরীরে অপ্পসাৰজ্জো, মহাসরীরে মহাসাৰজ্জো. কস্মা? পযোগমহন্ততায. পযোগসমত্তেপি অপ্পগুণে অপ্পসাৰজ্জো, মহাগুণে মহাসাৰজ্জো. সরীরগুণানং সমভাৰে সতি কিলেসানং, উপক্কমানঞ্চ মুদুতিব্বতায অপ্পমহাসাৰজ্জো হোতি, খীণাসৰে পন মহাসাৰজ্জতরোতি. অদিন্নাদানং ৰত্থুনো হীনপ্পণীততায চেৰ গুণৰিরহিততব্বন্তসন্তকতায ¶ চ. তত্থাপি তং তং উপাদাযুপাদায চ অপ্পমহাসাৰজ্জং, খীণাসৰসন্তকে মহাসাৰজ্জতরন্তি ৰেদিতব্বং. মিচ্ছাচারো দুস্সীলসীলৰন্তৰত্থুৰীতিক্কমনেন. তত্থাপি তং তং উপাদাযুপাদায চ অপ্পমহাসাৰজ্জো, খীণাসৰৰত্থুৰীতিক্কমনে মহাসাৰজ্জতরোতি চ ৰেদিতব্বো. মুসাৰাদো যমত্থং ভঞ্জতি, তস্স অপ্পমহন্ততং, ৰত্থুসামিনো গুণৰিরহিততং, তব্বন্ততঞ্চ উপাদাযুপাদায অপ্পমহাসাৰজ্জো হোতি. অপিচ অত্তনো ¶ সন্তকং অদাতুকামতায, হসাধিপ্পাযেন ৰা ‘‘নত্থেত’’ন্তিআদিনযপ্পৰত্তো অপ্পসাৰজ্জো, অদিট্ঠং ‘‘দিট্ঠ’’ন্তিআদিনা কূটসক্খিআদিভাৰেন ৰা পৰত্তো মহাসাৰজ্জো, মুসা ৰত্ৰা পন সঙ্ঘভেদনে মহাসাৰজ্জতরো. সুরাপানং বিন্দুমত্ততো পট্ঠায তং তং উপাদাযুপাদায অপ্পসাৰজ্জং, বহুকে মহাসাৰজ্জং, কাযৰিকারজননপহোনকপানে পন মহাসাৰজ্জতরমেৰ.

অঙ্গাদিতো পন পাণাতিপাতস্স পাণো পাণসঞ্ঞিতা ৰধকচিত্তং উপক্কমো তেন মরণন্তি পঞ্চ অঙ্গানি. সাহত্থিকো আণত্তিকো নিস্সগ্গিকো থাৰরো ৰিজ্জামযো ইদ্ধিমযোতি ছ পযোগা. অদিন্নাদানস্স পরপরিগ্গহিততা তথাসঞ্ঞিতা থেয্যচিত্তং উপক্কমো তেন হরণন্তি পঞ্চ অঙ্গানি. সাহত্থিকাদযো ছ এৰ পযোগা. তে চ খো যথানুরূপং থেয্যাৰহারাদীনং ৰসেন পৰত্তা. মিচ্ছাচারস্স অগমনীযৰত্থুতা সেৰনচিত্তং মগ্গেন মগ্গপ্পটিপত্তীতি তীণি অঙ্গানি. সাহত্থিকো একোৰ পযোগো. এৰং সেসানম্পি পযোগো ৰেদিতব্বো. মুসাৰাদস্স অতথং ৰত্থু, ৰিসংৰাদনচিত্তং, তজ্জো ৰাযামো, পরস্স তদত্থৰিজাননন্তি চত্তারি অঙ্গানি. সুরাপানস্স সুরাদীনং অঞ্ঞতরতা অজ্ঝোহরণন্তি দ্ৰে অঙ্গানীতি.

এৰং ¶ পাণাতিপাতাদীনং ধম্মাদিতো ৰিনিচ্ছযং ঞত্ৰা ইদানি পাণাতিপাতাৰেরমণিআদীনং পঞ্চন্নম্পি –

ধম্মকম্মপথালম্ব-সমাদানপযোগতো;

খণ্ডতো চ ৰিজানীযো, পাল়িমুত্তৰিনিচ্ছযো.

তত্থ ধম্মকম্মপথতো ৰিনিচ্ছযো ৰুত্তনযোৰ. আরম্মণতো পনেতানি জীৰিতিন্দ্রিযাদিতংতংৰীতিক্কমিতব্বৰত্থারম্মণানি. সমাদানতো একস্স সন্তিকে ৰা সযমেৰ ৰা ‘‘পঞ্চ সীলানি অধিট্ঠহামী’’তি একতো ৰা পাটিএক্কং ৰা সমাদিযন্তেন এতানি সমাদিন্নানেৰ হোন্তি. পযোগতো পন সব্বানিপি সাহত্থিকপযোগানেৰ. খণ্ডতো গহট্ঠা যং যং ৰীতিক্কমন্তি, তং তদেৰ খণ্ডং হোতি, নেতরে. গহট্ঠা অনিবদ্ধসীলা হোন্তি, যং যং সক্কোন্তি, তং তদেৰ গোপেন্তি. সামণেরানং পন একস্মিং ৰীতিক্কমিতে সব্বানিপি ভিজ্জন্তীতি এৰং ৰিজানীযো পাল়িমুত্তৰিনিচ্ছযো.

সিক্খাপদৰিভঙ্গমাতিকত্থৰণ্ণনা নিট্ঠিতা.

পটিসম্ভিদাৰিভঙ্গমাতিকত্থৰণ্ণনা

পটিসম্ভিদাৰিভঙ্গমাতিকায ¶ অত্থতো তাৰ – চতস্সো পটিসম্ভিদাতি চত্তারো পভেদা. নিদ্দেসে পন ‘‘অত্থে ঞাণং অত্থপ্পটিসম্ভিদা’’তিআদিনা (ৰিভ. ৭১৮) ঞাণৰসেন নিদ্দিট্ঠত্তা ঞাণস্সেৰ, ন অঞ্ঞস্স কস্সচীতি ৰেদিতব্বং. অত্থপটিসম্ভিদাতি অত্থৰিসযঞাণপ্পভেদা, অত্থপ্পভেদসল্লক্খণৰিভাৰনৰৰত্থানকরণসমত্থতাৰসেন অত্থে পভেদগতং ঞাণন্তি অত্থো. সেসপদেসুপি এসেৰ নযো. এত্থ চ অত্থোতি হেতুফলং. সো হি হেতুৰসেন অরণীযতো গন্তব্বতো, উপ্পাদেতব্বতো চ ‘‘অত্থো’’তি ৰুচ্চতি. পভেদতো ¶ পনেসোপি পঞ্চৰিধো হোতি যং কিঞ্চি পচ্চযুপ্পন্নং, নিব্বানং, ভাসিতত্থো, ৰিপাকো, কিরিযাতি.

ধম্মোতি পচ্চযো, সো হি ফলং ৰিদহতি পৰত্তেতি উপ্পাদেতি চেৰ পাপেতি চাতি ‘‘ধম্মো’’তি ৰুচ্চতি. পভেদতো পনেসোপি পঞ্চৰিধো হোতি যো কোচি ফলনিব্বত্তকো হেতু, অরিযমগ্গো, ভাসিতং, কুসলং, অকুসলন্তি.

নিরুত্তীতি যথাৰুত্তানং ধম্মানং, অত্থানঞ্চ ৰাচকো সভাৰনিরুত্তিসঙ্খাতো সদ্দো. ইমা ধম্মত্থনিরুত্তিযো আরম্মণং কত্ৰা পচ্চৰেক্খন্তস্স তত্থ তত্থ পভেদগতং ঞাণং নিরুত্তিপটিসম্ভিদা নাম.

এত্থ চ নিরুত্তিপটিসম্ভিদা সদ্দারম্মণা, ন পঞ্ঞত্তারম্মণা, পটিসম্ভিদাপত্তো হি ‘‘ফস্সো ৰেদনা’’তিআদিকং সদ্দং সুত্ৰা ‘‘অযং সভাৰনিরুত্তী’’তি জানাতি, ‘‘ফস্সা ৰেদনো’’তিআদিকং পন ‘‘ন সভাৰনিরুত্তী’’তি জানাতি. সভাৰনিরুত্তীতি (ৰিভ. অট্ঠ. ৭১৮) চ মাগধিকা ভাসা, যায সম্মাসম্বুদ্ধা তেপিটকং বুদ্ধৰচনং তন্তিং আরোপেন্তি, ব্রহ্মানো চ অগামকে অরঞ্ঞে কিঞ্চি ৰচনং অসুত্ৰা ৰড্ঢিতদারকা চ অত্তনো ধম্মতায ভাসন্তি, যা চ অপাযেসু মনুস্সে দেৰলোকে চেৰ মাগধভাসা উস্সন্না, পচ্ছা চ ততো অন্ধকযোনকদমিল়াদিদেসভাসা চেৰ সক্কতাদিঅট্ঠারসমহাভাসা চ নিব্বত্তা, সা হি যস্মা ইতরাসু ভাসাসু পরিৰত্তন্তাসুপি ন পরিৰত্ততি, সব্বকালং অত্তনো সভাৰে এৰ তিট্ঠতি, তস্মা ‘‘সভাৰনিরুত্তী’’তি ৰুচ্চতি. যা ব্রহ্মৰোহারো, অরিযৰোহারোতি চ ৰুচ্চতি, তায পন মাগধভাসায তন্তিং আরুল়্হস্স বুদ্ধৰচনস্স পটিসম্ভিদাপত্তানং সোতপথাগমনমেৰ পপঞ্চো ¶ ¶ . সোতে পন সঙ্ঘট্টিতমত্তে এৰ নযসতেন নযসহস্সেন অত্থো উপট্ঠাতি. অঞ্ঞায পন ভাসায তন্তিং আরুল়্হং তং তেসং চিত্তং সহসা নারোহতি, কিচ্ছেন উগ্গহেতব্বং হোতি, পুথুজ্জনানঞ্চ সকলং বুদ্ধৰচনং উগ্গহেত্ৰাপি পটিসম্ভিদাপত্তি নাম নত্থি, অরিযসাৰকো নো পটিসম্ভিদাপত্তো নাম নত্থি, পটিসম্ভিদাপত্তো অঞ্ঞং সদ্দং নামাখ্যাতোপসগ্গনিপাতভেদতো জানাতি, ন জানাতীতি? যদগ্গেন সদ্দং সুত্ৰা ‘‘অযং সভাৰনিরুত্তি, অযং ন সভাৰনিরুত্তী’’তি জানাতি, তদগ্গেন এতম্পি জানিস্সতি, ন চেতং পটিসম্ভিদাকিচ্চন্তি ৰেদিতব্বং.

পটিভানন্তি ধম্মত্থাদিৰিসযং সব্বত্থকঞাণং, তং ঞাণং আরম্মণং কত্ৰা পচ্চৰেক্খন্তস্স পভেদগতং ঞাণং পটিভানপটিসম্ভিদা নাম, ইমা চতস্সোপি পটিসম্ভিদা অধিগমেন পরিযত্তিউগ্গহণেন সক্কচ্চধম্মস্সৰনেন অত্থপরিপুচ্ছায পুব্বযোগেনাতি পঞ্চহি কারণেহি ৰিসদা হোন্তি, সেখভূমিযং, অসেখভূমিযঞ্চাতি দ্ৰীসু ঠানেসু পভেদং গচ্ছন্তীতি ৰেদিতব্বা. অযং তাৰেত্থ পদত্থো.

ধম্মভেদো পনেত্থাপি ৰিভঙ্গনযে পাকটো ভৰিস্সতি. ৰিভঙ্গনযেসু হি তীসুপি ধম্মনিরুত্তিপটিভানপটিসম্ভিদা তিস্সোপি কামাৰচরজৰনসম্পযুত্তঞাণানং ৰসেন তব্বিসযপ্পভেদেন সদ্ধিং নানপ্পকারতো ৰিভত্তা. অত্থপটিসম্ভিদা পন তেসং ঞাণানঞ্চেৰ অট্ঠলোকুত্তরচিত্তসম্পযুত্তানঞ্চ ৰসেন তব্বিসযপ্পভেদেন সদ্ধিং. লোকুত্তরঞাণানিপি হি মগ্গপ্পত্তব্বতায অত্থভূতনিব্বানারম্মণত্তা ‘‘অত্থপটিসম্ভিদা’’তি ৰুচ্চতি.

পঞ্হাপুচ্ছকে পন সিযা কুসলা, সিযা অব্যাকতা, তিস্সো পটিসম্ভিদা সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা, অত্থপটিসম্ভিদা তিধাপি, তিস্সো পটিসম্ভিদা পরিত্তা, অত্থপটিসম্ভিদা সিযা পরিত্তা, সিযা অপ্পমাণা ¶ , নিরুত্তিপটিসম্ভিদা পরিত্তারম্মণা, বহিদ্ধারম্মণা চ, সেসা তিধাপি, নিরুত্তিপটিসম্ভিদা পচ্চুপ্পন্নারম্মণাৰ, অত্থপটিসম্ভিদা তিধাপি ন ৰত্তব্বা চ, অনিদস্সনঅপ্পটিঘা, হেতূ, সহেতুকা, তিস্সো পটিসম্ভিদা সউত্তরা, অত্থপটিসম্ভিদা দ্ৰিধাপি, অরণা চাতি. সেসং সুৰিঞ্ঞেয্যমেৰ.

পটিসম্ভিদাৰিভঙ্গমাতিকত্থৰণ্ণনা নিট্ঠিতা.

ঞাণৰিভঙ্গমাতিকত্থৰণ্ণনা

ঞাণৰিভঙ্গমাতিকায ¶ পন অত্থতো তাৰ – একৰিধেনাতি একপ্পকারেন, এককোট্ঠাসেন ৰা. ঞাণৰত্থূতি এত্থ পন ঞাণঞ্চ তং ৰত্থু চ নানপ্পকারানং সম্পত্তীনন্তি ঞাণৰত্থু. পঞ্চ ৰিঞ্ঞাণাতি চক্খুৰিঞ্ঞাণাদীনি পঞ্চ. ন হেতূ অহেতুকাতিআদীসু হেট্ঠা হেতুদুকাদীসু ৰুত্তনযানুসারেন সব্বত্থ অত্থো ৰেদিতব্বো. অপিচ হেতুদুকাদীসু পঞ্চ ৰিঞ্ঞাণা হেতূ ধম্মাতি ৰা সহেতুকা ধম্মাতি ৰা ন ৰত্তব্বা, একন্তেন পন ন হেতূ এৰ, অহেতুকা এৰাতি. এৰং ‘‘যাথাৰকৰত্থুৰিভাৰনা পঞ্ঞা’’তি ইমিনা উপরি একৰিধপরিচ্ছেদাৰসানে ৰক্খমানেন সম্বন্ধোতি. ইমিনা নযেন সব্বত্থ যথানুরূপং অত্থো ৰেদিতব্বো. তত্থ চ অচেতসিকাতি চিত্তানি এৰ পঞ্চৰিঞ্ঞাণসম্পযুত্তানং ইধ অপরামট্ঠত্তা.

উপ্পন্নৰত্থুকা উপ্পন্নারম্মণাতি খণপচ্চুপ্পন্নৰসেন অনাগতপটিক্খেপো. ন হি তানি অনাগতেসু পঞ্চসু ৰত্থারম্মণেসু উপ্পজ্জন্তি. পুরেজাতৰত্থুকা পুরেজাতারম্মণাতি সহুপ্পত্তিপটিক্খেপো. ন হি তানি সহুপ্পন্নং ৰত্থারম্মণং পটিচ্চ উপ্পজ্জন্তি. অজ্ঝত্তিকৰত্থুকাতি অজ্ঝত্তজ্ঝত্তভূতে পঞ্চ পসাদে ৰত্থুং কত্ৰা উপ্পজ্জনকা. এত্থ চ পঞ্চ ৰিঞ্ঞাণা সযম্পি অজ্ঝত্তিকা, অজ্ঝত্তিকৰত্থুকা চ, মনোৰিঞ্ঞাণং ¶ হদযনিস্সিতং অজ্ঝত্তিকং, বাহিরৰত্থুকং, পঞ্চৰিঞ্ঞাণসম্পযুত্তা তযো খন্ধা বাহিরা, অজ্ঝত্তিকৰত্থুকা, মনোৰিঞ্ঞাণসম্পযুত্তা তযো খন্ধা বাহিরা, বাহিরৰত্থুকাতি এৰং চতুক্কং ৰেদিতব্বং.

অসম্ভিন্নৰত্থুকা অসম্ভিন্নারম্মণাতি অনিরুদ্ধৰত্থারম্মণা. ন হি তানি নিরুদ্ধৰত্থারম্মণং পটিচ্চ উপ্পজ্জন্তি. নানাৰত্থুকা নানারম্মণাতি তানি যথাক্কমং চক্খুরূপাদিনিযতেকেকৰত্থারম্মণতায অঞ্ঞমঞ্ঞং ভিন্নৰত্থুকা, ভিন্নারম্মণা চ. ন হি চক্খুৰিঞ্ঞাণং চক্খুং মুঞ্চিত্ৰা সোতাদীসু অঞ্ঞতরং ৰত্থুং কত্ৰা রূপং মুঞ্চিত্ৰা সদ্দাদীসু অঞ্ঞতরারম্মণং পটিচ্চ উপ্পজ্জতি, ন ইতরানি চেতরানি. ন অঞ্ঞমঞ্ঞস্স গোচরৰিসযং পচ্চনুভোন্তীতি ইমিনা চ নেসং নানারম্মণতংযেৰ ৰিভাৰেতি. ন অসমন্নাহারা উপ্পজ্জন্তীতি অনাৰজ্জনে ন উপ্পজ্জন্তি, পঞ্চদ্ৰারাৰজ্জনেন অনাৰজ্জিতে ৰিসযে ন উপ্পজ্জন্তীতি অত্থো. ন অমনসিকারাতি তমেৰেত্থ পরিযাযন্তরেন ৰিভাৰেতি. ন অব্বোকিণ্ণাতি অঞ্ঞমঞ্ঞং নিরন্তরা হুত্ৰা ন উপ্পজ্জন্তি. ন অপুব্বং অচরিমন্তি একক্খণেপি সহ ন উপ্পজ্জন্তি. ন ¶ কেৰলঞ্চ এতানি, অঞ্ঞানিপি ৰিঞ্ঞাণানি দ্ৰে ৰা তদুত্তরিং ৰা একতো ন উপ্পজ্জন্তি, একেকমেৰ পন ৰিঞ্ঞাণং উপ্পজ্জতীতি ৰেদিতব্বং. যথাহ – ‘‘অঞ্ঞং উপ্পজ্জতে চিত্তং, অঞ্ঞং চিত্তং নিরুজ্ঝতী’’তিআদি (দী. নি. অট্ঠ. ১.২১৪; ম. নি. অট্ঠ. ১.১০৯; সং. নি. অট্ঠ. ৩.৫.৩৬৮; ৰিভ. অট্ঠ. ৫২৩). ন অঞ্ঞমঞ্ঞস্স সমনন্তরাতি ইমিনা অনব্বোকিণ্ণতায এৰ ৰিভাৰনা.

অনাভোগাতি অনাৰজ্জনভূতা আৰজ্জনট্ঠানে ঠত্ৰা আৰজ্জনকিচ্চং কাতুং ন সমত্থাতি অত্থো. ন কঞ্চি ধম্মং পটিৰিজানাতীতি ‘‘মনোপুব্বঙ্গমা ধম্মা’’তি (ধ. প. ১-২) এৰং ৰুত্তং একম্পি কুসলাকুসলং ধম্মং কোচিপি পুগ্গলো ন পটিৰিজানাতি, তেহি ৰিঞ্ঞাণেহি ন সাধেতীতি অত্থো. অঞ্ঞত্র ¶ অভিনিপাতমত্তাতি ঠপেত্ৰা রূপাদিআরম্মণানং অভিনিপাতমত্তং আপাথগমনমত্তং, ব্যত্ততরোপি পুগ্গলো পঞ্চৰিঞ্ঞাণেহি আপাথগতারম্মণপটিৰিজাননমত্ততো অঞ্ঞং কুসলাকুসলপটিৰিজাননং কাতুং ন সক্কোতীতি অত্থো.

পঞ্চন্নং ৰিঞ্ঞাণানং সমনন্তরাপীতি মনোধাতুযাপি. অপি-সদ্দো চেত্থ সম্পিণ্ডনত্থো, তেন ন কেৰলং মনোধাতুযাৰ, ততো পরেহিপি পঞ্চদ্ৰারিকৰিঞ্ঞাণেহি তদারম্মণপরিযোসানেহি ন কিঞ্চি কুসলাকুসলং ধম্মং পটিৰিজানাতীতি অযমত্থো দস্সিতোতি গহেতব্বো. কিঞ্চাপি পঞ্চদ্ৰারে কুসলাকুসলাদীনি জৰনানি উপ্পজ্জন্তি, তথাপি তানি মোঘপুপ্ফানি ৰিয অব্বোহারিকানীতি দট্ঠব্বানি. ন কঞ্চি ইরিযাপথং কপ্পেতীতিআদীসুপি এসেৰ নযো. ন হি পঞ্চদ্ৰারিকৰিঞ্ঞাণেহি গমনাদীসু কঞ্চি ইরিযাপথং কপ্পেতি, ন কাযৰচীকম্মং পট্ঠপেতি, ন ৰিঞ্ঞত্তিং ৰা সমুট্ঠাপেতি, ন কুসলাকুসলং ধম্মং সমাদিযতি, ন লোকিযলোকুত্তরং সমাধিং সমাপজ্জতি, ন ততো ৰুট্ঠাতি, ন ভৰতো চৰতি, ন ভৰন্তরে উপ্পজ্জতি, সব্বম্পেতং কিচ্চং মনোদ্ৰারিকচিত্তেনেৰ হোতি. যথা চেতেসং এতানি কিচ্চানি নত্থি, এৰং নিযামোক্কমনাদীনিপি. ন হি কোচি পঞ্চদ্ৰারিকজৰনেহি মিচ্ছত্তনিযামং, সম্মত্তনিযামং ৰা ওক্কমতি, ন চেতানি নামগোত্তং ৰা কসিণাদিপঞ্ঞত্তিং ৰা তিলক্খণাদিং ৰা আরব্ভ ভৰন্তি. ন সুপতীতিআদীসু সব্বেহি পঞ্চদ্ৰারিকচিত্তেহি ন নিদ্দং ওক্কমতি, ন কিঞ্চি সুপিনং পস্সতি. নিদ্দাযন্তস্স হি ইন্দ্রিযেসু মহাপদীপতুরিযসদ্দাদিওল়ারিকেহিপি রূপাদিপঞ্চারম্মণেহি ঘট্টিতেসু পঠমং পঞ্চদ্ৰারিকানি আৰজ্জনানি ভৰঙ্গং আৰট্টেতুং ন সক্কোন্তি, মনোদ্ৰারিকমেৰ আৰজ্জনং সক্কোতি, তস্মিঞ্চ উপ্পন্নে মনোদ্ৰারিকজৰনং জৰিত্ৰা ভৰঙ্গং ¶ ওতরতি. দুতিযৰারে পন পঞ্চদ্ৰারিকআৰজ্জনেসু যং কিঞ্চি যথারহং ¶ ভৰঙ্গং আৰট্টেতি, ততো তদারম্মণপরিযোসানানি তংতংদ্ৰারিকৰীথিচিত্তানি যথাক্কমং পৰত্তিত্ৰা ভৰঙ্গং ওতরন্তি. ততিযৰারে পন মনোদ্ৰারিকাৰজ্জনজৰনানি পৰত্তন্তি, তস্মিং খণে রূপাদিপঞ্চারম্মণৰৰত্থানং হোতি, সত্তো চ নিদ্দায পটিবুদ্ধোতি, এৰং মনোদ্ৰারিকচিত্তেনেৰ পটিবুজ্ঝতি.

সুপিনম্পি হি তেনেৰ পস্সতি, ন পঞ্চদ্ৰারিকেন, তঞ্চ পনেতং সুপিনং পস্সন্তো চতূহি কারণেহি পস্সতি ধাতুক্খোভতো ৰা অনুভূতপুব্বতো ৰা দেৰতোপসংহারতো ৰা পুব্বনিমিত্ততো ৰা. ইমেসং পন সংসগ্গসন্নিপাততোপি বহুধা পপঞ্চেন্তি. তত্থ যং ৰাতপিত্তাদিধাতুক্খোভতো, অনুভূতপুব্বতো চ সুপিনং পস্সতি, ন তং সচ্চং. যং দেৰতোপসংহারতো পস্সতি, তং সচ্চং ৰা হোতি অলিকং ৰা. কুদ্ধা হি দেৰতা ৰিপরীতম্পি কত্ৰা দস্সেন্তি. যং পুব্বনিমিত্ততো পস্সতি, তং একন্তসচ্চমেৰ বোধিসত্তকোসলরাজাদীনং পঞ্চসোল়সমহাসুপিনানি ৰিয. তঞ্চ পনেতং চতুব্বিধং সুপিনং সেখপুথুজ্জনাৰ পস্সন্তি, ন অসেখা পহীনৰিপল্লাসত্তা. কিং পনেতং পস্সন্তো সুত্তো পস্সতি পটিবুদ্ধো ৰা? কিঞ্চেত্থ, যদি সুত্তো পস্সতি, সুপিনস্স কুসলাদিসভাৰতো, ভৰঙ্গস্স চ তদভাৰা অভিধম্মৰিরোধো আপজ্জতি. অথ পটিবুদ্ধো, সুপিনং পস্সন্তেন কতস্স অব্বোহারিকস্সাপি ৰীতিক্কমস্স সব্বোহারিকস্সেৰ একন্তসাৰজ্জত্তা অনাপত্তি ন সিযাতি ৰিনযৰিরোধো আপজ্জতি. পকারন্তরো চ নত্থি, যেন সুপিনং পস্সেয্যাতি সুপিনস্স অভাৰোৰ আপজ্জতীতি? নাপজ্জতি. কস্মা? যস্মা কপিমিদ্ধপরেতো পস্সতি ‘‘কপিমিদ্ধপরেতো খো, মহারাজ, সুপিনং পস্সতী’’তি (মি. প. ৫.৩.৫) ৰচনতো, যা পন নিদ্দা মক্কটনিদ্দা ৰিয পুনপ্পুনং কুসলাদিচিত্তৰোকিণ্ণত্তা লহুপরিৰত্তা, তং কপিমিদ্ধং, তেন ¶ সুত্তো সুপিনং পস্সতি, তস্মা সুপিনো কুসলোপি হোতি অকুসলোপি, আৰজ্জনতদারম্মণৰসেন অব্যাকতোপি, সুপিনে চ কতং কুসলাকুসলদুব্বলতায পটিসন্ধিং আকড্ঢিতুং ন সক্কোতি, পৰত্তে ৰেদনীযং পন হোতি. ‘‘যাথাৰকৰত্থুৰিভাৰনা পঞ্ঞা’’তি এত্থ যো পঞ্চন্নং ৰিঞ্ঞাণানং যথাৰুত্তো ন হেতুকট্ঠো, অহেতুকট্ঠো…পে… ন সুপিনং পস্সনট্ঠো, সো যাথাৰট্ঠো, তংতংযাথাৰত্থুং ৰিভাৰেতীতি যাথাৰকৰত্থুৰিভাৰনা পঞ্ঞা. এৰং একৰিধেন ঞাণৰত্থূতি এৰং ৰুত্তেন একেন পকারেন একেন আকারেন, এককোট্ঠাসেন ঞাণৰত্থু হোতীতি.

এককং নিট্ঠিতং.

দুকেসু ¶ অত্থজাপিকাতি এত্থ অত্থপটিসম্ভিদাৰিভঙ্গে ৰুত্তেসু পঞ্চসু অত্থেসু যথানুরূপং অত্থং জাপেতি জনেতি পৰত্তেতীতি অত্থজাপিকা, চতুভূমককুসলচিত্তেসু চেৰ অসেখানং অভিঞ্ঞাসমাপত্তীনং পরিকম্মাদিভূতকামাৰচরকিরিযাচিত্তেসু চ সম্পযুত্তা পঞ্ঞা. তাসু হি যস্মা কুসলসম্পযুত্তাৰ পঞ্ঞা অত্তনো অত্তনো ভূমিপরিযাপন্নং ৰিপাকসঙ্খাতং অত্থং জাপেতি জনেতি. কামাৰচরকিরিযাসম্পযুত্তা পন পরিকম্মাদিভূতা অভিঞ্ঞাসমাপত্তিকিরিযা অরহত্তফলসঙ্খাতং অত্থং জাপেতি জনেতি, তস্মা এতা অত্থজাপিকাতি ৰুত্তা. অট্ঠকথাসু পন পাল়িযং অৰুত্তাপি তীসু ভূমীসু কিরিযজৰনপঞ্ঞা অনন্তরাদিপচ্চযৰসেন অত্তনো অনন্তরং কিরিযত্থং জাপেতীতি ‘‘অত্থজাপিকা’’ত্ৰেৰ ৰুত্তা. জাপিতত্থা পঞ্ঞাতি সহজাতং ৰিপাকত্থং জাপেত্ৰা ঠিতা, অত্তনো ৰা কারণেহি জাপিতা জনিতা পৰত্তিতা সযম্পি অত্থভূতাতি জাপিতত্থা. চতুভূমকৰিপাকেসু চ কিরিযাভিঞ্ঞাসমাপত্তীসু চ সম্পযুত্তা পঞ্ঞা. অট্ঠকথাসু পন পাল়িযং অৰুত্তা সেসকিরিযাসম্পযুত্তাপি পঞ্ঞা যথাসকং কারণেহি জাপিতা, সযঞ্চ অত্থভূতাতি ¶ ‘‘জাপিতত্থা’’ত্ৰেৰ ৰুত্তা. সেসং সুৰিঞ্ঞেয্যমেৰ.

দুকং নিট্ঠিতং.

তিকেসু পন চিন্তামযত্তিকে পরতো অদিস্ৰা অসুত্ৰাৰ অত্তনো ধম্মতায ‘‘এৰং সতি এৰং ভৰিস্সতী’’তি এৰং চিন্তামযঅনুবুদ্ধিযা উপ্পাদিতা অনৰজ্জকম্মাযতনসিপ্পাযতনৰিজ্জাট্ঠানেসু পঞ্ঞা চেৰ কম্মস্সকতঞাণং, সচ্চানুলোমিকঞাণঞ্চ চিন্তামযা নাম পঞ্ঞা. তত্থ ৰড্ঢকিকম্মপুপ্ফছড্ডককম্মাদি হীনঞ্চেৰ কসিৰাণিজ্জাদি উক্কট্ঠঞ্চ কম্মমেৰ কম্মাযতনং. নল়কারপেসকারসিপ্পাদি হীনঞ্চেৰ মুদ্দাগণনালেখাদি উক্কট্ঠঞ্চ সিপ্পমেৰ সিপ্পাযতনং. নাগমণ্ডলপরিত্তাদি ধম্মিকৰিজ্জাৰ ৰিজ্জাট্ঠানং. তেসু চিন্তাবলেনেৰ উপ্পন্না পঞ্ঞা. বোধিসত্তাদযো হি সত্তহিতায অদিট্ঠং অসুতং তংতংঅনৰজ্জকম্মসিপ্পতদুপকরণকরণপ্পকারঞ্চ ঞাণবলেন চিন্তেত্ৰা নিপ্ফাদেন্তি. নাগমণ্ডলপরিত্তাদিৰিজ্জম্পি উপ্পাদেন্তি, এৰং কতানিপি তানি পুব্বে উগ্গণ্হিত্ৰা করোন্তেহি কতসিপ্পসদিসানেৰ হোন্তি. কম্মস্সকতঞাণং নাম কুসলকম্মং সত্তানং সকং, অকুসলং নো সকন্তি এৰং জাননপঞ্ঞা. অথ ৰা কুসলকম্মমেৰ সত্তানং সকং তদাযত্থৰুত্তিতায, নাঞ্ঞন্তি এৰং জাননপঞ্ঞাপি. সচ্চানুলোমিকং ঞাণন্তি ৰিপস্সনাঞাণং. তং হি মগ্গসচ্চস্স পরমত্থসচ্চস্স অনুলোমনতো ‘‘সচ্চানুলোমিক’’ন্তি ৰুচ্চতি. ইদম্পি হি ঞাণদ্ৰযং পরতো অসুত্ৰা চিন্তাবলেন উপ্পাদিতং চিন্তামযঞাণমেৰ হোতি. ইদঞ্চ ন যেসং কেসঞ্চি সত্তানং উপ্পজ্জতি, অভিঞ্ঞাতানং পন পুঞ্ঞৰন্তানং মহাসত্তানমেৰ উপ্পজ্জতি. তত্থাপি সচ্চানুলোমিকঞাণং পচ্ছিমভৰিকানং দ্ৰিন্নঞ্ঞেৰ বোধিসত্তানং উপ্পজ্জতীতি ৰেদিতব্বং. সুতমযা পঞ্ঞাতি পরতো সুত্ৰা সুতৰসেন উপ্পাদিতা যথাৰুত্তকম্মাযতনাদিপঞ্ঞাৰ. পরতো অসুত্ৰা ¶ পন কম্মাযতনাদি পরেন কযিরমানং, কতং ৰা দিস্ৰা ¶ উগ্গহেত্ৰা ৰা পটিলদ্ধাপি পঞ্ঞা ‘‘সুতমযা’’ত্ৰেৰ ৰুচ্চতি. তদুভযাপি চিন্তামযা, সুতমযা চ কামাৰচরাৰ. ভাৰনামযা পন পঞ্ঞা চিন্তামযৰসেন, সুতমযৰসেন ৰা পৰত্তিতকামাৰচরপুব্বভাগভাৰনানিপ্ফত্তিযা সমুপ্পন্না মহগ্গতলোকুত্তরজৰনপঞ্ঞা.

দানমযত্তিকে দেয্যধম্মপরিচ্চাগৰসেন পৰত্তা দানমযা, সীলপূরণৰসেন পৰত্তা সীলমযা, তদুভযাপি কামাৰচরাৰ. ভাৰনামযা পনেত্থ সমথৰিপস্সনাৰসেন পৰত্তা চতুভূমকপঞ্ঞা. নিদ্দেসে পনস্স কিঞ্চাপি ‘‘সমাপন্নস্স পঞ্ঞা’’তি (ৰিভ. ৭৬৮) এৰং মহগ্গতলোকুত্তরপঞ্ঞাৰ ৰুত্তা, তথাপি তং উক্কট্ঠৰসেন ৰুত্তং. কামাৰচরানং পন পুব্বভাগভাৰনানং, অনুস্সতিউপচারভাৰনানঞ্চ ভাৰনামযে সঙ্গহোতি দট্ঠব্বং. পুরিমত্তিকে পনেতাসং চিন্তামযে সঙ্গহিতত্তা ভাৰনামযে অসঙ্গহো, তত্থাপি ভাৰনাবলনিপ্ফন্নানমেৰ সঙ্গহো দট্ঠব্বো.

অধিসীলত্তিকে পাতিমোক্খসংৰরসীলং ৰিপস্সনাহেতুত্তা সেসসীলতো অধিকং সীলন্তি অধিসীলং, তস্মিং সম্পযুত্তা পঞ্ঞা অধিসীলে পঞ্ঞা. ৰিপস্সনাপাদিকা পন অট্ঠ সমাপত্তিযো সেসচিত্তেহি অধিকত্তা অধিচিত্তং, তস্মিং পঞ্ঞা অধিচিত্তে পঞ্ঞা, চিত্তসীসেন চেত্থ সমাধি নিদ্দিট্ঠো. সৰিপস্সনা পন মগ্গফলপঞ্ঞা সেসাহি অধিকত্তা অধিপঞ্ঞা নাম. সা চ অধিপঞ্ঞায পঞ্ঞাতি দেসনায সমরসতায ৰুত্তা. সীলাদযো ‘‘সীলং চিত্তং পঞ্ঞা, অধিসীলং অধিচিত্তং অধিপঞ্ঞা’’তি পচ্চেকং দুৰিধা হোন্তি. তেসু পুরিমা পঞ্চসীলদসসীলানি, ৰট্টপাদিকঅট্ঠসমাপত্তিযো, নিব্বেধভাগিযকম্মস্সকতপঞ্ঞা চ যথাক্কমং হোন্তি. তে চ ধম্মা অনুপ্পন্নেপি তথাগতে বোধিসত্তানং, তাপসপরিব্বাজকানং, চক্কৰত্তিরাজাদীনঞ্চ ¶ কালে পৰত্তন্তি, পচ্ছিমা পন ৰুত্তাৰসেসা উপ্পন্নে এৰ তথাগতে ৰিত্থারিকা হোন্তি, নো অনুপ্পন্নেতি ৰেদিতব্বো. এত্থ চ রতনত্তযে দানাপচাযনাদিৰসেন, সরণগমনসদ্ধম্মসৰনাদিৰসেন চ পৰত্তা ৰিৰট্টূপনিস্সযভূতা কুসলধম্মাপি অধিসীলঅধিপঞ্ঞাসু গহিতা এৰাতি গহেতব্বা.

আযকোসল্লত্তিকে ¶ আযোতি ৰড্ঢি, সা অকুসলাদিঅনত্থহানিতো, কুসলাদিঅত্থুপ্পত্তিতো চ দুৰিধা. অপাযোতি অৰড্ঢি, সাপি কুসলাদিঅত্থহানিতো, অকুসলাদিঅনত্থুপ্পত্তিতো চ দুৰিধা. তেসু কোসল্লং, কুসলসভাৰা পঞ্ঞা. অপাযকোসল্লং পঞ্ঞৰতো এৰ ‘‘এৰং মনসিকারাদিপ্পৰত্তিযং অৰড্ঢি উপ্পজ্জতি, ৰড্ঢি পরিহাযতী’’তি ঞত্ৰা তদুভযপটিপত্তিসম্ভৰতো. উপাযকোসল্লন্তি অত্র উপাযো অচ্চাযিককিচ্চাদীসু ঠানুপ্পত্তিকউপাযজাননপঞ্ঞা, তিৰিধাপি চেতা কামাৰচরপঞ্ঞাতি ৰেদিতব্বা. সেসং সুৰিঞ্ঞেয্যমেৰ.

তিকং নিট্ঠিতং.

চতুক্কেসু পন পঠমে কম্মস্সকতঞাণং সচ্চানুলোমিকং ঞাণঞ্চ ৰুত্তমেৰ, ইধ পন ঠপেত্ৰা সচ্চানুলোমিকঞাণং সব্বাপি সাসৰা কুসলা পঞ্ঞা কম্মস্সকতঞাণন্তি ৰেদিতব্বং. চতূসু মগ্গেসু, ফলেসু চ পঞ্ঞাৰ মগ্গসমঙ্গিস্স ঞাণং, ফলসমঙ্গিস্স ঞাণঞ্চাতি.

সচ্চচতুক্কে অরিযমগ্গফলপঞ্ঞাৰ চতূসু সচ্চেসু একপটিৰেধৰসেন ‘‘দুক্খে ঞাণ’’ন্তিআদিনা চতূসু ঠানেসু গহিতা. কিঞ্চাপি হি কামাৰচরঞাণম্পি চতূসু সচ্চেসু আরম্মণৰসেন পৰত্ততি, পটিৰেধকিচ্চৰসেন পন ইধাধিপ্পেতত্তা পাল়িযং তং ন গহিতন্তি ৰেদিতব্বং.

ধম্মচতুক্কে মগ্গফলেসু পঞ্ঞা ধম্মে ঞাণং নাম. তেসু হি মগ্গঞাণং তাৰ চতুসচ্চধম্মানং একপটিৰেধৰসেন জাননতো ‘‘ধম্মে ¶ ঞাণ’’ন্তি ৰুচ্চতি. ফলঞাণং পন নিরোধসচ্চৰসেন ধম্মে ঞাণন্তি ৰেদিতব্বং. মগ্গানুভাৰনিব্বত্তং পন অতীতানাগতেসু সচ্চপটিৰেধনযসঙ্গহণৰসেন পৰত্তং পচ্চৰেক্খণঞাণং অন্ৰযে ঞাণং নাম. তস্স চ যেহি নযেহি অরিযা অতীতমদ্ধানং চতুসচ্চধম্মং জানিংসু, তেপি ইমঞ্ঞেৰ চতুসচ্চং এৰমেৰ জানিংসু, অনাগতমদ্ধানম্পি জানিস্সন্তীতি এৰং জাননৰসেন পৰত্তি আকারো ৰেদিতব্বো. সরাগাদিৰসেন পরচিত্তপরিচ্ছেদঞাণং পরিযে ঞাণং নাম. ধম্মন্ৰযপরিযঞাণানি পন ঠপেত্ৰা সব্বলোকিযপঞ্ঞাঞাণন্তি সম্মতত্তা সম্মুতিম্হি ঞাণন্তি সম্মুতিঞাণং নাম.

আচযচতুক্কে কামাৰচরকুসলে পঞ্ঞা আচযায নো অপচযায. সা হি চুতিপটিসন্ধিং ¶ আচিনোতি এৰ, নো অপচিনোতি. মগ্গপঞ্ঞা পন অপচযায নো আচযায. রূপারূপকুসলপঞ্ঞা আচযায চেৰ অপচযায চ. সা হি ৰিক্খম্ভনৰসেন কিলেসে চ তম্মূলকে চ ৰিপাকধম্মে অপচিনোতি. সেসা অব্যাকতা পঞ্ঞা নেৰাচযায নো অপচযায.

নিব্বিদাচতুক্কে রূপাৰচরপঠমজ্ঝানপঞ্ঞা নিব্বিদায নো পটিৰেধায. সা হি কামৰিৰেকেন পত্তব্বত্তা কিলেসনিব্বিদায পৰত্ততি, অভিঞ্ঞাপাদকভাৰং পন অপ্পত্ততায নেৰাভিঞ্ঞাপটিৰেধায সংৰত্ততি. চতুত্থজ্ঝানপঞ্ঞা পটিৰেধায নো নিব্বিদায. সা হি অভিঞ্ঞাপাদকভাৰেনাপি অভিঞ্ঞাভাৰপ্পত্তিযাপি পটিৰেধায সংৰত্ততি. পঠমজ্ঝানক্খণে এৰ নীৰরণনিব্বিন্দনত্তা নো নিব্বিদায. দুতিযততিযজ্ঝানপঞ্ঞা পন সোমনস্সসহগততায পঠমজ্ঝানসন্নিস্সিতা ৰা অৰিতক্কতায চতুত্থজ্ঝানসন্নিস্সিতা ৰা কাতব্বা. মগ্গপঞ্ঞা পন নিব্বিদায চেৰ পটিৰেধায চ. এত্থ হি চতুসচ্চপটিৰেধৰসেন নিব্বিদায চেৰেতাসং ছল়ভিঞ্ঞাপ্পত্তিযা পটিৰেধায চ সংৰত্তনং ৰেদিতব্বং. সেসা লোকিযলোকুত্তরা ¶ পঞ্ঞা নেৰ নিব্বিদায নো পটিৰেধায.

হানভাগিযচতুক্কে হানং ভজতীতি হানভাগিনী, এৰং সেসেসুপি. নিব্বেধোতি চেত্থ অরিযমগ্গো তন্নিব্বত্তকৰিপস্সনাপাদকত্তা. নিব্বেধভাগিনীতি চতূসুপি ঠানেসু রূপারূপকুসলপঞ্ঞাৰ ৰুত্তা. তানি হি অত্তনো সভাৰা পরিহাযিত্ৰা হেট্ঠা ওরোহণপচ্চযভূতা হানভাগিনী. উপনিজ্ঝানপচ্চযভূতা ৰিসেসভাগিনী, তং পন ঝাননিকন্তিযা বলৰতায ৰিসেসং, হানিং ৰা অনুস্সুক্কিত্ৰা ঠিতিকোট্ঠাসিকা ঠিতিভাগিনী, অরিযমগ্গপদট্ঠানৰিপস্সনাপাদকভূতাৰ নিব্বেধভাগিনী চ হোন্তীতি ৰেদিতব্বা.

চতস্সো পটিসম্ভিদাতি অত্থধম্মনিরুত্তিপটিভানপটিসম্ভিদাৰ. চতস্সো পটিপদাতি দুক্খাপটিপদাদন্ধাভিঞ্ঞাদযো হেট্ঠা ৰুত্তাৰ. চত্তারি আরম্মণানীতি পরিত্তা, পরিত্তারম্মণাতিআদিকা হেট্ঠা ৰুত্তনযাৰ. জরামরণাদিচতুক্কেসুপি মগ্গঞাণৰসেনেৰ চতস্সো যোজনা ৰুত্তা. সেসং সুৰিঞ্ঞেয্যমেৰ.

চতুক্কং নিট্ঠিতং.

পঞ্চকেসু ¶ পন পঞ্চঙ্গিকো সম্মাসমাধীতি পীতিফরণতা সুখফরণতা চেতোফরণতা আলোকফরণতা পচ্চৰেক্খণনিমিত্তন্তি এৰং পাল়িযং ৰুত্তেহি পঞ্চহি ঞাণঙ্গেহি সমন্নাগতো সমাধি. তত্থ পীতিং ফরমানা উপ্পজ্জতীতি দ্ৰীসু ঝানেসু পঞ্ঞা পীতিফরণতা নাম, সুখং ফরমানা উপ্পজ্জতীতি তীসু ঝানেসু পঞ্ঞা সুখফরণতা নাম. পরেসং চেতোফরমানা উপ্পজ্জতীতি চেতোপরিযঞাণং চেতোফরণতা নাম. আলোকফরণে উপ্পজ্জতীতি দিব্বচক্খুঞাণং আলোকফরণতা নাম. পচ্চৰেক্খণঞাণং পচ্চৰেক্খণনিমিত্তং নাম. এত্থ চ পীতিফরণতা, সুখফরণতা চ দ্ৰে পাদা ৰিয, চেতোফরণতা, আলোকফরণতা চ দ্ৰে ¶ হত্থা ৰিয, পচ্চৰেক্খণনিমিত্তং সীসং ৰিয, অভিঞ্ঞাপাদকজ্ঝানং মজ্ঝিমকাযো ৰিয. ইতি ভগৰা পঞ্চঙ্গিকং সম্মাসমাধিং অঙ্গপচ্চঙ্গসম্পন্নং পুরিসং ৰিয কত্ৰা দস্সেতি. ইমিনা চ সমাধিনা অঙ্গানি পঞ্চ ঞাণঙ্গানি ৰুত্তানীতি ৰেদিতব্বানি.

পঞ্চঞাণিকো সম্মাসমাধীতি –

‘‘‘অযং সমাধি পচ্চুপ্পন্নসুখো চেৰ আযতিঞ্চ সুখৰিপাকো’তি পচ্চত্তঞ্ঞেৰ ঞাণং উপ্পজ্জতি, ‘অযং সমাধি অরিযো নিরামিসো’তি…পে… ‘মহাপুরিসসেৰিতো’তি…পে… ‘সন্তো পণীতো পটিপস্সদ্ধিলদ্ধো একোদিভাৰাধিগতো ন সসঙ্খারনিগ্গয্হৰারিতগতো’তি…পে… ‘সো খো পনাহং ইমং সমাধিং সতোৰ সমাপজ্জামি, সতো ৰুট্ঠহামী’তি পচ্চত্তঞ্ঞেৰ ঞাণং উপ্পজ্জতী’’তি (ৰিভ. ৮০৪) –

এৰং পাল়িযং ৰুত্তেহি পঞ্চহি পচ্চৰেক্খণঞাণেহি যুত্তো অরহত্তফলসঙ্খাতো সমাপত্তিফলসমাধি. সো এৰং হি অপ্পিতপ্পিতক্খণে সুখত্তা পচ্চুপ্পন্নসুখো, পুরিমো পুরিমো পচ্ছিমস্স পচ্ছিমস্স সমাধিসুখস্স চেৰ অত্তনা সমুট্ঠাপিতম্পি পণীতরূপেন ফুট্ঠসকলকাযতায ফলসমাপত্তিতো ৰুট্ঠিতকালে অতিপণীতং কাযৰিঞ্ঞাণসুখস্স পচ্চযত্তা আযতিং সুখৰিপাকো উপ্পজ্জতি, ইমিনাপি পরিযাযেন আযতিং সুখৰিপাকোতি একং অঙ্গং, কিলেসেহি আরকত্তা অরিযো কামামিসৰট্টামিসলোকামিসানং অভাৰা নিরামিসোতি একং, বুদ্ধাদীহি মহাপুরিসেহি সেৰিতত্তা অকাপুরিসসেৰিসোতি একং, অঙ্গারম্মণে সন্ততায, সব্বকিলেসদরথসন্ততায চ সন্তো অতপ্পনীযট্ঠেন পণীতো ¶ কিলেসপটিপস্সদ্ধিভাৰস্স লদ্ধত্তা পটিপস্সদ্ধলদ্ধো ¶ একোদিভাৰেন চ অধিগতো অপ্পগুণসাসৰসমাধি ৰিয সসঙ্খারেন সপ্পযোগেন পচ্চনীকধম্মে নিগ্গয্হ কিলেসে ৰারেত্ৰা অনধিগতত্তা ন সসঙ্খারনিগ্গয্হৰারিতগতো. পুগ্গলস্সাযং সমাধীতি এৰং খীণাসৰস্স সতিৰেপুল্লপ্পত্তিযা যথাপরিচ্ছিন্নকালৰসেন ইমং সমাধিং সতোৰ সমাপজ্জতি, উট্ঠহতি চাতি একমঙ্গন্তি ইমেহি পঞ্চহি অঙ্গেহি সব্বাকারতো যুত্তত্তা ‘‘পঞ্চঞাণিকো সম্মাসমাধী’’তি ৰুচ্চতি.

পঞ্চকং নিট্ঠিতং.

ছক্কে ছসু অভিঞ্ঞাসু পঞ্ঞাতি ইদ্ধিৰিধে ঞাণং, দিব্বসোতধাতুযা ঞাণং, চেতোপরিযে ঞাণং, পুব্বেনিৰাসানুস্সতিযং ঞাণং, চুতূপপাতে ঞাণং, আসৰানং খযে ঞাণন্তি এৰং ৰুত্তানি ছল়ভিঞ্ঞাচিত্তসম্পযুত্তানি ঞাণানি. তেসু পচ্ছিমং লোকুত্তরং, সেসানি রূপাৰচরপঞ্চমজ্ঝানিকানীতি.

ছক্কং নিট্ঠিতং.

সত্তকে সত্তসত্ততি ঞাণৰত্থূনীতি ‘‘অৰিজ্জাপচ্চযা সঙ্খারা’’তি পচ্চৰেক্খণঞাণং একং, ‘‘অসতি অৰিজ্জায নত্থি সঙ্খারা’’তি একন্তি দ্ৰে ঞাণানি, এৰং অতীতেপি দ্ৰে, অনাগতেপি দ্ৰেতি ছ, তং ছব্বিধম্পি ঞাণং ‘‘খযধম্ম’’ন্তিআদিনা পচ্চৰেক্খণঞাণেন সদ্ধিং সত্ত ঞাণানি. এৰং সেসেসুপি জাতিপরিযোসানেসু চাতি এৰং একাদসসু পটিচ্চসমুপ্পাদঙ্গেসু পচ্চেকং কালত্তযেপি অন্ৰযব্যতিরেকঞাণং তেসং ৰযদস্সনঞাণস্স চ ৰসেন সত্ত সত্ত কত্ৰা সত্তসত্ততি ঞাণানি.

সত্তকং নিট্ঠিতং.

অট্ঠকং সুৰিঞ্ঞেয্যমেৰ.

নৰকে নৰসু অনুপুব্বৰিহারসমাপত্তীসু পঞ্ঞাতি নিরোধসমাপত্তিং সমাপজ্জন্তস্স অনুপটিপাটিযা ৰিহাতব্বতো উপ্পাদেতব্বতো অনুপুব্বৰিহারসঙ্খাতাসু রূপারূপসমাপত্তীসু ¶ সম্পযুত্তা ¶ অট্ঠ পঞ্ঞা চেৰ তদনন্তরং নিরোধং ফুসিত্ৰা ৰুট্ঠিতস্স নিরোধং সন্ততো পচ্চৰেক্খণঞাণঞ্চাতি নৰ.

নৰকং নিট্ঠিতং.

দসকে তথাগতস্সাতি যথা ৰিপস্সীআদযো পুব্বকা ইসযো আগতা, তথা আগতস্স সম্মাসম্বুদ্ধস্স. তথাগতবলানীতি অঞ্ঞেহি অসাধারণানি তথাগতস্সেৰ বলানি, যথা ৰা পুব্ববুদ্ধানং বলানি পুঞ্ঞুস্সযসম্পত্তিযা আগতানি, তথা আগতানি বলানীতিপি অত্থো. তত্থ দুৰিধং তথাগতস্স বলং কাযবলং, ঞাণবলঞ্চ. তেসু কাযবলং হত্থিকুলানুসারেন ৰেদিতব্বং. ৰুত্তং হেতং পোরাণেহি –

‘‘কাল়াৰকঞ্চ গঙ্গেয্যং, পণ্ডরং তম্বপিঙ্গলং;

গন্ধমঙ্গলহেমঞ্চ, উপোসথছদ্দন্তিমে দসা’’তি. (ৰিভ. অট্ঠ. ৭৬০; ম. নি. অট্ঠ. ১.১৪৮; সং. নি. অট্ঠ. ২.২.২২; অ. নি. ১০.২১; উদা. অট্ঠ. ৭৫; বু. ৰং. অট্ঠ. ১.৩৯; পটি. ম. অট্ঠ. ২.২.৪৪; চূল়নি. অট্ঠ. ৮১);

ইমানি হি দস হত্থিকুলানি. তত্থ কাল়াৰকন্তি পকতিহত্থিকুলং, যং দসন্নং পুরিসানং কাযবলং, তং একস্স কাল়াৰকহত্থিনো বলং, যং তেসং দসন্নং বলং, তং একস্স গঙ্গেয্যস্স, তেসং দসন্নং পণ্ডরস্স, তেসং দসন্নং তম্বস্স, তেসং দসন্নং পিঙ্গলস্স, তেসং দসন্নং গন্ধহত্থিনো, তেসং দসন্নং মঙ্গলস্স, তেসং দসন্নং হেমস্স, তেসং দসন্নং উপোসথস্স, তেসং দসন্নং বলং ছদ্দন্তস্স, যং দসন্নং ছদ্দন্তানং বলং, তং তথাগতস্স নারাযণবলন্তি ৰুচ্চতি. তদেতং পকতিহত্থিগণনায হত্থীনং কোটিসহস্সং, পুরিসগণনায দসন্নং পুরিসকোটিসহস্সানং বলং হোতি. ইদং তাৰ তথাগতস্স কাযবলং. যানি পন দসবলচতুৰেসারজ্জাদীনি অনেকানি ঞাণসহস্সানি, এতং ঞাণবলং নাম. ইধাপি ঞাণবলমেৰ অধিপ্পেতং. ঞাণঞ্হি অকম্পিযট্ঠেন, উপত্থম্ভনট্ঠেন চ বলন্তি ৰুত্তং.

যেহি ¶ বলেহি সমন্নাগতোতি যেহি দসহি ঞাণবলেহি উপেতো. আসভণ্ঠানন্তি সেট্ঠট্ঠানং. অপিচ ¶ গৰসতজেট্ঠকো উসভো, গৰসহস্সজেট্ঠকো ৰসভো. ৰজসতজেট্ঠকো ৰা উসভো, ৰজসহস্সজেট্ঠকো ৰসভো, সব্বগৰসেট্ঠো নিসভো, সেতো পাসাদিকো মহাভারৰহো সব্বপরিস্সযসহো অসনিসতসদ্দেহিপি অকম্পনীযো নিসভো, সো ইধ উসভোতি অধিপ্পেতো. ইদম্পি হি তস্স পরিযাযৰচনং. উসভস্স ইদন্তি আসভং. ঠানন্তি তস্স নিসভবলসমন্নাগতস্স চতূহি পাদেহি পথৰিং উপ্পীল়েত্ৰা অচলট্ঠানং, ইদং পন আসভং ৰিযাতি আসভং. যথেৰ হি নিসভসঙ্খাতো উসভো উসভবলেন সমন্নাগতো চতূহি পাদেহি পথৰিং উপ্পীল়েত্ৰা অচলট্ঠানেন তিট্ঠতি, এৰং তথাগতোপি হি দসবলসমন্নাগতো চতুৰেসারজ্জপাদেহি অট্ঠপরিসপথৰিং উপ্পীল়েত্ৰা সদেৰকে লোকে কেনচি অপ্পধংসিযো অচলেন ঠানেন তিট্ঠতি, তঞ্চেস পটিজানাতি উপগচ্ছতি ন পচ্চক্খাতি অত্তনি আরোপেতি, তেন ৰুত্তং ‘‘আসভং ঠানং পটিজানাতী’’তি (ৰিভ. ৭৬০).

পরিসাসূতি অট্ঠসু পরিসাসু. সীহনাদং নদতীতি সেট্ঠনাদং অভীতনাদং, সীহনাদসদিসং ৰা নাদং নদতি. অযমত্থো সীহনাদসুত্তেন দীপেতব্বো. যথা ৰা সীহো সহনতো চ হননতো চ ‘‘সীহো’’তি ৰুচ্চতি, এৰং তথাগতোপি লোকধম্মানং সহনতো, পরপ্পৰাদানঞ্চ হননতো ‘‘সীহো’’তি ৰুচ্চতি, তস্স নাদং নদতি.

ব্রহ্মচক্কন্তিআদীসু ব্রহ্মন্তি উত্তমং ৰিসুদ্ধং. চক্ক-সদ্দো পনাযং ‘‘চত্তারিমানি, ভিক্খৰে, চক্কানি, যেহি সমন্নাগতানং দেৰমনুস্সান’’ন্তিআদীসু (অ. নি. ৪.৩১) সম্পত্তিযং দিস্সতি. ‘‘পাদতলেসু চক্কানি ¶ জাতানী’’তিআদীসু (দী. নি. ২.৩৫; ৩.২০৪; ম. নি. ২.৩৮৬) লক্খণে. ‘‘চক্কংৰ ৰহতো পদ’’ন্তি (ধ. প. ১) এত্থ রথঙ্গে. ‘‘চতুচক্কং নৰদ্ৰার’’ন্তি (সং. নি. ১.২৯) এত্থ ইরিযাপথে. ‘‘চক্কং পৰত্তয সব্বপাণিন’’ন্তি (জা. ১.৭.১৪৯) এত্থ দানে. ‘‘দিব্বং চক্করতনং পাতুরহোসী’’তি (দী. নি. ৩.৮৫) এত্থ রতনচক্কে. ‘‘ইচ্ছাহতস্স পোসস্স, চক্কং ভমতি মত্থকে’’তি (জা. ১.১.১০৪; ১.৫.১০৩) এত্থ উরচক্কে. ‘‘খুরপরিযন্তেন চেপি চক্কেনা’’তি (দী. নি. ১.১৬৬) এত্থ পহরণচক্কে. ‘‘অসনিচক্ক’’ন্তি (দী. নি. ৩.৬১; সং. নি. ২.১৬২) এত্থ অসনিমণ্ডলে. ‘‘মযা পৰত্তিতং চক্ক’’ন্তি (সু. নি. ৫৬২) এত্থ ধম্মচক্কে. ইধ পন ধম্মচক্কে পৰত্ততি.

ধম্মচক্কঞ্চ ¶ দুৰিধং হোতি পটিৰেধঞাণঞ্চ দেসনাঞাণঞ্চ. তত্থ পঞ্ঞাপভাৰিতং অত্তনো অরিযফলাৰহং লোকুত্তরং পটিৰেধঞাণং, করুণাপভাৰিতং সাৰকানং অরিযফলাৰহং কামাৰচরং দেসনাঞাণং, উভযম্পি পনেতং অঞ্ঞেহি অসাধারণং বুদ্ধানঞ্ঞেৰ ওরসঞাণং, তং পৰত্তেতি উপ্পাদেতি ৰিভাৰেতি ৰিত্থারিকং করোতীতি অত্থো.

ইদানি যানি দস ঞাণানি আদিতো ‘‘তথাগতবলানী’’তি নিক্খিত্তানি, তানি ৰিত্থারেতুং ‘‘কতমানি দস? ইধ তথাগতো’’তিআদিমাহ. তত্থ ঠানঞ্চ ঠানতোতি কারণঞ্চ কারণতো. কারণং হি যস্মা তত্থ ফলং তিট্ঠতি তদাযত্তৰুত্তিতায উপ্পজ্জতি চেৰ পৰত্ততি চ, তস্মা ঠানন্তি ৰুচ্চতি. অট্ঠানঞ্চ অট্ঠানতোতি অকারণঞ্চ অকারণতো. যম্পীতি যেন ঞাণেন যথাভূতং পজানাতি, ইদম্পি ঠানাঠানঞাণং তথাগতস্স তথাগতবলং নাম হোতীতি অত্থো. এৰং উপরিপি সব্বত্থ যোজনা ৰেদিতব্বা. কথং পনেত্থ ভগৰা ঠানঞ্চ ঠানতো, অট্ঠানঞ্চ অট্ঠানতো ¶ যথাভূতং পজানাতীতি? অট্ঠানমেতং অনৰকাসো, যং দিট্ঠিসম্পন্নো পুগ্গলো কঞ্চি সঙ্খারং নিচ্চতো উপগচ্ছেয্য…পে… কঞ্চি ধম্মং অত্ততো উপগচ্ছেয্য, মাতরং জীৰিতা ৰোরোপেয্য, পিতরং…পে… অরহন্তং জীৰিতা ৰোরোপেয্য, পদুট্ঠচিত্তেন তথাগতস্স লোহিতং উপ্পাদেয্য, সঙ্ঘং ভিন্দেয্য, অঞ্ঞং সত্থারং উদ্দিসেয্য, অট্ঠমং ভৰং নিব্বত্তেয্য, নেতং ঠানং ৰিজ্জতি, পুথুজ্জনো পনেতং সব্বং করেয্যাতি ঠানমেতং ৰিজ্জতীতি পজানাতি, তথা যং একিস্সা লোকধাতুযা দ্ৰে অরহন্তো সম্মাসম্বুদ্ধা অপুব্বং অচরিমং উপ্পজ্জেয্যুং, তথা দ্ৰে রাজানো চক্কৰত্তী উপ্পজ্জেয্যুং, নেতং ঠানং ৰিজ্জতি, একো পন উপ্পজ্জতি, ঠানমেতং ৰিজ্জতীতি পজানাতি, তথা যং কাযদুচ্চরিতাদীনং তিণ্ণং দুচ্চরিতানং ইট্ঠো ৰিপাকো, সুচরিতানঞ্চ অনিট্ঠো ৰিপাকো নিব্বত্তেয্যাতি নেতং ঠানং ৰিজ্জতি, তব্বিপরীতো পন নেসং ৰিপাকো নিব্বত্তেয্যাতি ঠানমেতং ৰিজ্জতীতি, যে যে ধম্মা যেসং যেসং ধম্মানং হেতূ পচ্চযা উপ্পাদায, তং তং ঠানং, ইতরে অট্ঠানন্তি যথাভূতং পজানাতি, এত্থ পনাযং সঙ্খেপতো অট্ঠকথাৰিনিচ্ছযো. ‘‘সুখতো উপগচ্ছেয্যা’’তি ইদং ‘‘একন্তসুখী অত্তা’’তিআদিনা (ম. নি. ৩.২৭) দিট্ঠিৰিপল্লাসৰসেন সুখতো গাহং সন্ধায ৰুত্তং, সঞ্ঞাচিত্তৰিপল্লাসৰসেন পন অরিযসাৰকোপি কিলেসপরিল়াহাভিভূতো মত্তহত্থিপরিতাসিতো ৰিয, সুচিকামো গূথকূপং ৰিয কঞ্চি সঙ্খারং সুখতো উপগচ্ছতি, অত্ততো উপগমনৰারে কসিণাদিপণ্ণত্তিযা, নিব্বানস্স চ সঙ্গণ্হনত্থং ‘‘সঙ্খার’’ন্তি অৰত্ৰা ‘‘কঞ্চি ধম্ম’’ন্তি ৰুত্তং.

মাতরন্তিআদীসু ¶ কিঞ্চাপি অরিযসাৰকো সীসচ্ছেদং পাপুণন্তোপি কুন্থকিপিল্লিকং উপাদায পাণাতিপাতং, অদিন্নাদানাদীসু ৰা যংকিঞ্চি দুচ্চরিতং অপাযহেতুভূতং কাতুং ভৰন্তরেপি ¶ ন সক্কোতি, পুথুজ্জনভাৰস্স পন মহাসাৰজ্জতাদস্সনত্থমেত্থ পঞ্চানন্তরিযানেৰ উদ্ধটানি. সাৰজ্জো হি পুথুজ্জনভাৰো, যত্র হি নাম আনন্তরিযানিপি করিস্সতীতি. এত্থ চ মনুস্সভূতস্সেৰ মনুস্সভূতং জনিকং মাতরং, পিতরং ৰা অপি পরিৰত্তলিঙ্গং জীৰিতা ৰোরোপেন্তস্স কম্মং আনন্তরিযং হোতি. তিরচ্ছানভূতং পন মাতরং, পিতরং ৰা সযং ৰা তিরচ্ছানভূতো মনুস্সভূতং, তিরচ্ছানভূতং ৰা জীৰিতা ৰোরোপেন্তো আনন্তরিযং ন ফুসতি, কম্মং পন ভারিযং, আনন্তরিযং আহচ্চেৰ তিট্ঠতি. অরহন্তম্পি মনুস্সভূতমেৰ ঘাতেন্তো আনন্তরিযং ফুসতি. তস্স চ পুথুজ্জনকালে পহারং দত্ৰা অরহত্তং পত্ৰা তস্মিং তেনেৰ রোগেন মতেপি অরহন্তঘাতকো হোতি, ন যক্খভূতং অরহন্তং, সেসঅরিযপুগ্গলে ৰা মনুস্সভূতেপি ঘাতেন্তো, কম্মং পন আনন্তরিযসদিসং হোতি. যং পন পুথুজ্জনকালে দিন্নং দানং অরহত্তং পত্ৰা পরিভুঞ্জতি, পুথুজ্জনস্সেৰ তং দিন্নং হোতি, সেসঅরিযপুগ্গলে মারেন্তস্স আনন্তরিযং নত্থি, কম্মং পন গরুকং হোতি. এত্থ চ এল়কাদিচতুক্কং ৰেদিতব্বং – ‘‘এল়কং মারেমী’’তি হি অভিসন্ধিনা এল়কট্ঠানে নিপন্নং মাতরং, পিতরং, অরহন্তং ৰা মারেন্তো আনন্তরিযং ফুসতি, এল়কাভিসন্ধিনা ৰা মাতাদিঅভিসন্ধিনা ৰা এল়কং মারেন্তো আনন্তরিযং ন ফুসতি, মাতাদিঅভিসন্ধিনা তে এৰ মারেন্তো ফুসতেৰ. এস নযো চোরচতুক্কাদীসুপি.

লোহিতুপ্পাদে তথাগতস্স অভেজ্জকাযতায কুদ্ধচিত্তস্স পরস্স উপক্কমেন চম্মচ্ছেদো, লোহিতপগ্ঘরণং ৰা নত্থি, দেৰদত্তেন পন পৰিদ্ধসিলাতো ভিজ্জিত্ৰা গতসক্খলিকপ্পহারেন ৰিয সরীরস্স অন্তোযেৰ একস্মিং ঠানে যথা খুদ্দিকমক্খিকাপিৰনমত্তম্পি লোহিতং ৰিসমং সমোসরতি, তথা করোন্তস্স আনন্তরিযং হোতি, ন পন জীৰকস্সেৰ মুদুচিত্তেন দুট্ঠলোহিতং নীহরিত্ৰা ফাসুকং করোন্তস্স ¶ , পুঞ্ঞমেৰ পনস্স হোতি, পরিনিব্বুতে ভগৰতি চেতিযং ভিন্দন্তস্স, বোধিং ছিন্দন্তস্স, ধাতূসু উপক্কমন্তস্স চ আনন্তরিযং ন হোতি, কম্মং পন আনন্তরিযসদিসং হোতি. বোধিরুক্খস্স পন থূপং ৰা সধাতুকং পটিমং ৰা বাধযমানং সাখং, চেতিযৰত্থুং ভিন্দিত্ৰা গচ্ছন্তং বোধিমূলঞ্চ ছিন্দিত্ৰা হরিতুং ৰট্টতি. সচেপি সাখায নিলীনা সকুণা চেতিযে ৰচ্চং পাতেন্তি, ছিন্দিতুং ৰট্টতি. পরিভোগচেতিযতো হি সরীরচেতিযমেৰ মহন্ততরং. ধাতুনিধানরহিতং পটিমাঘরং ৰা বোধিঘরং ৰা বাধেন্তং ¶ সাখং ছিন্দিতুং ন ৰট্টতি, ওজোহরণসাখং, পনস্স পূতিট্ঠানং ৰা ছিন্দিতুং ৰট্টতি, সরীরপটিজগ্গনে ৰিয পুঞ্ঞমেৰ হোতি.

সঙ্ঘভেদে সমানসংৰাসসীমায সমানসংৰাসকে সঙ্ঘে একতো ঠিতে ৰিসুং ৰগ্গসঙ্ঘং গহেত্ৰা পঞ্চহি কারণেহি সঙ্ঘং ভিন্দন্তস্স সঙ্ঘভেদো হোতি আনন্তরিযকম্মঞ্চ. ৰুত্তং হেতং ‘‘পঞ্চহি, উপালি, আকারেহি সঙ্ঘো ভিজ্জতি. কতমেহি পঞ্চহি? কম্মেন উদ্দেসেন ৰোহরন্তো অনুস্সাৰনেন সলাকগ্গাহেনা’’তি (পরি. ৪৫৮). তত্থ কম্মেনাতি অপলোকনাদীসু চতূসু অঞ্ঞতরেন কম্মেন. উদ্দেসেনাতি পাতিমোক্খুদ্দেসেন. ৰোহরন্তো কথযন্তো তাহি তাহি উপপত্তীহি ‘‘অধম্মং ধম্মো’’তিআদীনি অট্ঠারস ভেদকরৰত্থূনি দীপেন্তো. অনুস্সাৰনেনাতি ‘‘ননু তুম্হে জানাথ ময্হং বহুস্সুতাদিভাৰং, কথং হি নাম মাদিসো উদ্ধম্মং উব্বিনযং সত্থুসাসনং গাহেয্য, কিমহং অপাযতো ন ভাযামী’’তিআদিনা নযেন কণ্ণমূলে ৰচীভেদং কত্ৰা অনুস্সাৰনেন. সলাকগ্গাহেনাতি এৰং ৰোহারানুস্সাৰনেহি তেসং চিত্তং উপত্থম্ভেত্ৰা অনিৰত্তিধম্মং কত্ৰা ‘‘গণ্হথ ইমং সলাক’’ন্তি সলাকগ্গাহেন.

এত্থ ¶ চ কম্মমেৰ উদ্দেসো ৰা পমাণং, ৰোহারানুস্সাৰনসলাকগ্গাহা পন পুব্বভাগা. তেসু নিপ্ফন্নেসুপি অভিন্নোৰ হোতি সঙ্ঘো. যদা পন ৰোহারানুস্সাৰনেহি চত্তারো ৰা অতিরেকে ৰা ভিক্খূ সলাকং গাহেত্ৰা ৰগ্গং সঙ্ঘং গহেত্ৰা ৰিসুং কম্মং ৰা উদ্দেসং ৰা করোতি, তদা সঙ্ঘো ভিন্নো নাম হোতি. অভেদপুরেক্খারস্স পন সমগ্গসঞ্ঞায ৰট্টতি. সমগ্গসঞ্ঞায হি করোন্তস্স নেৰ ভেদো হোতি, ন আনন্তরিযং, তথা ততো ঊনপরিসায করোন্তস্স. ৰুত্তং হেতং ‘‘একতো, উপালি, চত্তারো হোন্তি একতো চত্তারো, নৰমো অনুস্সাৰেতী’’তিআদি (চূল়ৰ. ৩৫১).

ইমেসু পন পঞ্চসু আনন্তরিযেসু সঙ্ঘভেদো ৰচীকম্মং, সেসানি কাযকম্মানি, সব্বানেৰ খো তানি কাযদ্ৰারতোপি ৰচীদ্ৰারতোপি সমুট্ঠহন্তি. সঙ্ঘভেদোপি হি হত্থমুদ্দায ভেদং করোন্তস্স কাযদ্ৰারতোপি সমুট্ঠাতি, সঙ্ঘভেদো চেত্থ কপ্পট্ঠিতিযো. কপ্পৰিনাসে এৰ হি সঙ্ঘভেদতো মুচ্চতি, সেসানং পন তথা নিযমো নত্থি. যেন চ পঞ্চপেতানি কম্মানি কতানি হোন্তি, তস্স সঙ্ঘভেদোৰ নিরযে ৰিপচ্চতি, সেসানি ‘‘অহোসি কম্মং নাহোসি কম্মৰিপাকো’’তি এৰমাদীসু সঙ্খ্যং গচ্ছন্তি. সঙ্ঘভেদাভাৰে লোহিতুপ্পাদো, তদভাৰে অরহন্তঘাতো ¶ , তদভাৰে মাতুঘাতো, পিতুঘাতো ৰা, তস্মিম্পি সীলসম্পন্নতরে. পুরিমানি চেত্থ চত্তারি সব্বেসং গহট্ঠপব্বজিতানং সাধারণানি, সঙ্ঘভেদো পন পকতত্তস্স ভিক্খুনোৰ, অসাধারণো অঞ্ঞেসং, ভিক্খুনীপি হি সঙ্ঘং ন ভিন্দতি, পগেৰ ইতরে. পঞ্চপি চেতানি দুক্খৰেদনাসম্পযুত্তানি, দোসমূলানি চাতি ৰেদিতব্বানি.

অট্ঠমং ভৰং নিব্বত্তেয্যাতি এত্থ অরিযসাৰকস্স অট্ঠমভৰাগহণং কেন নিযামিতন্তি? ৰিপস্সনায. যস্স হি সা ¶ তিক্খা, সো একং এৰ ভৰং নিব্বত্তিত্ৰা অরহত্তং পত্ৰা একবীজী নাম হোতি. যস্স মন্দা, সো দুতিযে…পে… ছট্ঠে ৰা ভৰে অরহত্তং পত্ৰা কোলংকোলো নাম হোতি. যস্স পন অতিমন্দা, সো সত্তমং ভৰং নাতিক্কমতি, তত্থ নিযমেন অরহত্তং পাপুণিত্ৰা সত্তক্খত্তুপরমো নাম হোতি. সচেপি হিস্স সত্তমে ভৰে নিদ্দং ওক্কন্তস্স মত্থকে অসনি ৰা পব্বতকূটো ৰা পতেয্য, তস্মিম্পি কালে অরহত্তং পত্ৰাৰ পরিনিব্বাতি. উত্তমকোটিযা হি সত্তমভৰানতিক্কমনঞ্ঞেৰ সন্ধাযেৰ ‘‘নিযতো সম্বোধিপরাযণো’’তি (ম. নি. ১.৬৬; ২.১৬৯; সং. নি. ৫.৯৯৮) ৰুত্তোতি.

একিস্সা লোকধাতুযা দ্ৰে অরহন্তো সম্মাসম্বুদ্ধাতিআদীসু দসসহস্সচক্কৰাল়সঙ্খাতং জাতিখেত্তং একা লোকধাতু নাম আণাৰিসযখেত্তেসু বুদ্ধুপ্পত্তিসঙ্কায এৰাভাৰতো. তত্থ দ্ৰিন্নং বুদ্ধানং উপ্পত্তিপটিসেধং অকত্ৰা জাতিখেত্তে এৰ কতো. ঠপেত্ৰা ইমং চক্কৰাল়ং অঞ্ঞস্মিং চক্কৰাল়ে বুদ্ধা ন উপ্পজ্জন্তি বুদ্ধত্তহেতূনং অনাদিবুদ্ধপরম্পরাদীনং তথাভাৰা. ততো এৰ হি সত্তা নিরৰসেসতো নিব্বুতিং ন পাপুণন্তি. যদি হি সব্বচক্কৰাল়েসু বুদ্ধা উপ্পজ্জেয্যুং, সব্বে সত্তা ইতো পুব্বে নিরৰসেসতো নিব্বুতিং পাপুণেয্যুং, ন চ তং অত্থি, তস্মা অনাদিবুদ্ধপরম্পরায ৰিৰট্টূপনিস্সযসম্পন্নানং নিৰাসভূতে ইমস্মিং চক্কৰাল়ে এৰ উপ্পজ্জন্তীতি ৰেদিতব্বা. তে চেত্থাপি দুল্লভা, তেসং দুল্লভত্তা এৰেত্থ কপ্পানং অসঙ্খ্যেয্যম্পি বুদ্ধুপ্পাদরহিতং হোতি. যদি চ তে সুলভা ভৰেয্যুং, একস্মিং ৰিৰট্টট্ঠাযিঅসঙ্খ্যেয্যে চতুসট্ঠিবুদ্ধানম্পি উপ্পজ্জিতুং সক্কা ভৰেয্য অন্তরকপ্পস্স বুদ্ধন্তরত্তা. ভদ্দকপ্পেসু চেত্থ পঞ্চ বুদ্ধা এৰ উপ্পজ্জন্তি. কথং পনেত্থাপি দুল্লভতরা চক্কৰাল়ন্তরেসু উপ্পজ্জেয্যুং, বুদ্ধানঞ্চ দুল্লভতা কারণদুল্লভতায, তস্মা ইমস্মিঞ্ঞেৰ ¶ চক্কৰাল়ে বুদ্ধা উপ্পজ্জন্তি? এত্থাপি ন দেৰব্রহ্মলোকেসু, মনুস্সলোকে এৰ পন উপ্পজ্জন্তি এত্থেৰ সব্বসো তিৰিধসদ্ধম্মাধারস্স সঙ্ঘরতনস্স পাতুভাৰতো, ইতরলোকেসু নিরৰসেসতো পকারাসম্ভৰতো চ.

যদি ¶ হি বুদ্ধা দেৰলোকাদীসু উপ্পজ্জেয্যুং, মনুস্সা ভযেন উপসঙ্কমিতুমেৰ ন সক্কোন্তি, পগেৰ ধম্মসৰনপব্বজ্জাদিং কাতুং, তেনেৰ অম্হাকং বোধিসত্তো অত্তনো রূপকাযানুভাৰাদিসম্পত্তিযা উপ্পন্নঅমনুস্সসঙ্কাকুতূহলং জনং নিজ্ঝাপেতুং উত্তানসেয্যকাদিনিযামেন ৰড্ঢিত্ৰা দারপরিগ্গহাদিং অকাসি, এৰং কত্ৰা পব্বজিতম্পি নং রাজগহে পিণ্ডায পৰিসিত্ৰা পণ্ডৰপব্বতপস্সে নিসীদিত্ৰা পিণ্ডপাতং পরিভুঞ্জন্তং বিম্বিসারো নানপ্পকারতো মনুস্সভাৰং ৰিচিনিত্ৰাৰ উপসঙ্কমিতুং ৰিসহি, নো অঞ্ঞথা. লোকনিত্থারণত্থায হি বুদ্ধা উপ্পজ্জন্তি, ন অত্তনো সক্কারাদিঅত্থায, তস্মা মনুস্সেসু এৰ উপ্পজ্জন্তীতি ৰেদিতব্বো. তত্থাপি ইমস্মিং জম্বুদীপে এৰ, তত্থাপি ইমস্মিং মজ্ঝিমপদেসে এৰ. ন কেৰলঞ্চ বুদ্ধাৰ, পচ্চেকবুদ্ধা, অগ্গসাৰকমহাসাৰকা চ চক্কৰত্তিআদযো চ অঞ্ঞেপি পুঞ্ঞৰন্তসত্তা এত্থেৰ উপ্পজ্জন্তি.

অপুব্বং অচরিমন্তি এত্থ মাতুকুচ্ছিস্মিং পটিসন্ধিগ্গহণতো পুরে পুব্বং নাম, ধাতুঅন্তরধানতো পচ্ছা চরিমং নাম, উভিন্নমন্তরা অপুব্বং অচরিমং নাম. এত্থন্তরে অঞ্ঞস্স বুদ্ধস্স উপ্পত্তি নিৰারিতা, ধাতুঅন্তরধানে পন জাতে অঞ্ঞস্স উপ্পত্তি ন নিৰারিতা. কিঞ্চাপি ন নিৰারিতা, অন্তরকপ্পং পন খেপেত্ৰাৰ উপ্পজ্জন্তীতি ৰেদিতব্বং.

পঞ্চ হি অন্তরধানানি নাম অধিগমঅন্তরধানং পটিপত্তিঅন্তরধানং পরিযত্তিঅন্তরধানং লিঙ্গঅন্তরধানং ধাতুঅন্তরধানন্তি. তত্থ অধিগমোতি মগ্গফলাভিঞ্ঞাপটিসম্ভিদাযো, সো ¶ পরিহাযমানো পটিসম্ভিদাতো পট্ঠায পরিহাযতি. পরিনিব্বানতো হি ৰস্সসহস্সমেৰ পটিসম্ভিদা নিব্বত্তেতুং সক্কোন্তি, ততো পরং অভিঞ্ঞা, তাপি নিব্বত্তেতুং অসক্কোন্তা সুক্খৰিপস্সকখীণাসৰা হোন্তি, ততো অনাগামিনো, ততো সকদাগামিনো, সোতাপন্না চ হোন্তি, তেসু ধরন্তেসুপি অধিগমো অনন্তরহিতোৰ হোতি, পচ্ছিমকস্স পন সোতাপন্নস্স জীৰিতক্খযেন অধিগমো অন্তরহিতো নাম হোতি. ইদং অধিগমঅন্তরধানং.

ততো মগ্গফলানি নিব্বত্তেতুং অসক্কোন্তা ‘‘নত্থি দানি নো অরিযধম্মপটিৰেধো’’তি ঝানৰিপস্সনাসু ৰোসানং আপজ্জিত্ৰা কোসজ্জবহুলা চতুপারিসুদ্ধিসীলমত্তং রক্খন্তো অঞ্ঞমঞ্ঞং ন চোদেন্তি, ন সারেন্তি, অকুক্কুচ্চকা হোন্তি, ততো পট্ঠায খুদ্দানুখুদ্দকানি মদ্দন্তি, ততো গরুকাপত্তিং আপজ্জন্তি, পারাজিকমত্তমেৰ রক্খন্তি, তেসু ধরন্তেসুপি পটিপত্তি ¶ অনন্তরহিতাৰ হোতি, পচ্ছিমকস্স পন ভিক্খুনো সীলভেদেন ৰা জীৰিতক্খযেন ৰা পটিপত্তি অন্তরহিতা নাম হোতি. ইদং পটিপত্তিঅন্তরধানং নাম.

পরিযত্তীতি সাট্ঠকথং তেপিটকং বুদ্ধৰচনং, গচ্ছন্তে গচ্ছন্তে কালে অধম্মিকেহি কলিযুগরাজাদীহি ৰিপন্নসস্সাদিসম্পত্তিতায পচ্চযদাযকা দুগ্গতা হোন্তি, ভিক্খূ চ পচ্চযেহি কিলমন্তা অন্তেৰাসিকে গহেতুং ন সক্কোন্তি. ততো অট্ঠকথা পরিহাযতি, পাল়িৰসেনেৰ পরিযত্তিং ধারেন্তি, ততো পাল়িং সকলং ধারেতুং ন সক্কোন্তি, পঠমং অভিধম্মপিটকং পরিহাযতি, তঞ্চস্স পরিহাযনং মত্থকতো পঠায. পঠমমেৰ হি মহাপকরণং পরিহাযতি, ততো যমকং কথাৰত্থু পুগ্গলপঞ্ঞত্তি ধাতুকথা ৰিভঙ্গো ধম্মসঙ্গহো চ অনুক্কমেন পরিহাযন্তি, ততো মত্থকতো পট্ঠায সুত্তন্তপিটকং পরিহাযতি, পঠমং হি অঙ্গুত্তরনিকাযো ¶ একাদসকনিপাততো পট্ঠায যাৰএককনিপাতা পরিহাযতি, ততো মত্থকতো পট্ঠায সংযুত্তনিকাযো, পঠমং হি মহাৰগ্গো পরিহাযতি, ততো সল়াযতনৰগ্গো খন্ধকৰগ্গো নিদানৰগ্গো সগাথাৰগ্গোতি, এৰং মজ্ঝিমনিকাযদীঘনিকাযাদযো চ মত্থকতো পট্ঠায পরিহাযন্তি, ততো ৰিনযপিটকমেৰ তিট্ঠতি, তম্পি পরিৰারতো পট্ঠায যাৰ মহাৰিভঙ্গা পরিহাযতি, ততো উপোসথক্খন্ধকতো মাতিকামত্তমেৰ ধারেন্তি, তদাপি যাৰ চতুপ্পদিকাপি গাথা মনুস্সেসু পৰত্ততি, তাৰ পরিযত্তি অনন্তরহিতাৰ হোতি, তায অন্তরহিতায পরিযত্তি অন্তরহিতা নাম হোতি. ইদং পরিযত্তিঅন্তরধানং নাম.

গচ্ছন্তে গচ্ছন্তে কালে পত্তচীৰরগ্গহণাদিআকপ্পং ন পাসাদিকং হোতি, নিগণ্ঠাদযো ৰিয অলাবুপত্তাদিং অগ্গবাহায পক্খিপিত্ৰাপি ওলম্বিত্ৰাপি সিক্কায ওলগ্গেত্ৰাপি ৰিচরন্তি, চীৰররজনম্পি ন সারুপ্পং, ওট্ঠট্ঠিকৰণ্ণং কত্ৰা ধারেন্তি, ততো রজনম্পি ওৰট্টিকৰিজ্ঝনম্পি ন হোতি, দসা ছেত্ৰা পরিব্বাজকা ৰিয কাসাৰমত্তমেৰ ধারেন্তি, ততো পরিক্খীণে কালে খুদ্দককাসাৰখণ্ডং হত্থে ৰা গীৰায ৰা বন্ধিত্ৰা কসিকম্মাদীনি কত্ৰা দারভরণাদিং করোন্তি, তদা দক্খিণং দেন্তো জনো সঙ্ঘং উদ্দিস্স এতেসং দেতি, ইদং সন্ধায ভগৰতা ৰুত্তং ‘‘ভৰিস্সন্তি খো পনানন্দ, অনাগতমদ্ধানং গোত্রভুনো কাসাৰকণ্ঠা দুস্সীলা পাপধম্মা, তেসু দুস্সীলেসু সঙ্ঘং উদ্দিস্স দানং দস্সন্তি, তদাপহং, আনন্দ, সঙ্ঘগতং দক্খিণং অসঙ্খ্যেয্যং অপ্পমেয্যং ৰদামী’’তি (ম. নি. ৩.৩৮০). ততো ‘‘পপঞ্চো এস, কিং ইমিনা অম্হাক’’ন্তি ¶ তং কাসাৰখণ্ডং ছিন্দিত্ৰা অরঞ্ঞে খিপন্তি, এতস্মিং ¶ কালে লিঙ্গং অন্তরহিতং নাম হোতি. ইদং লিঙ্গঅন্তরধানং নাম.

ততো তত্থ তত্থ সক্কারসম্মানং অলভমানা ধাতুযো বুদ্ধানং অধিট্ঠানবলেন সক্কারসম্মানলব্ভমানকট্ঠানং গমিস্সন্তি, ততো সব্বত্থ অলভমানা সব্বধাতুযো মহাবোধিমণ্ডমেৰ গমিস্সন্তি. সাসপমত্তাপি হি ধাতু ন অন্তরা নস্সিস্সতি, তা পন বোধিমণ্ডে পল্লঙ্কেন নিসিন্নবুদ্ধসরীরসিরিং, যমকপাটিহারিযঞ্চ দস্সেস্সন্তি, ততো ধাতুসরীরতো তেজো সমুট্ঠায তং সরীরং অপণ্ণত্তিকভাৰং গমেতি, তদা দসসহস্সচক্কৰাল়ে দেৰতা পরিনিব্বানদিৰসে ৰিয পরিদেৰিত্ৰা পূজাসক্কারং কত্ৰা পক্কমন্তি. ইদং ধাতুঅন্তরধানং নাম.

ইমস্স পঞ্চৰিধস্স অন্তরধানস্স পরিযত্তিঅন্তরধানমেৰ মূলং. পরিযত্তিযং হি সতি পটিৰেধাদযোপি নট্ঠা নাম ন হোন্তি, অসতি নট্ঠাতি. যথা চ নিধিকুম্ভিযা জাননত্থায পাসাণপিট্ঠে উপনিবদ্ধঅক্খরেসু ধরন্তেসু নিধিকুম্ভি নট্ঠা নাম ন হোতি, অক্খরেসু পন নট্ঠেসু নট্ঠা, এৰংসম্পদমিদং ৰেদিতব্বং. যথাহ –

‘‘যাৰ তিট্ঠন্তি সুত্তন্তা,

ৰিনযো যাৰ দিপ্পতি;

তাৰ দক্খন্তি আলোকং,

সূরিযে অব্ভুট্ঠিতে যথা.

‘‘সুত্তন্তেসু অসন্তেসু,

পমুট্ঠে ৰিনযম্হি চ;

তমো ভৰিস্সতি লোকে,

সূরিযে অত্থঙ্গতে যথা.

‘‘সুত্তন্তে ¶ রক্খিতে সন্তে,

পটিপত্তি হোতি রক্খিতা;

পটিপত্তিযং ¶ ঠিতো ধীরো,

যোগক্খেমা ন ধংসতী’’তি; (অ. নি. অট্ঠ. ১.১.১৩০; সারত্থ. টী. পাচিত্তিয ৩.৪৩৮);

এৰমিমেসু পঞ্চসু অন্তরধানেসু ধাতুঅন্তরধানতো পচ্ছা চরিমং নামাতি ৰেদিতব্বং.

কস্মা পন দ্ৰে সম্মাসম্বুদ্ধা অপুব্বং অচরিমং ন উপ্পজ্জন্তীতি? নিরত্থকতোৰ. একোৰ হি সম্মাসম্বুদ্ধো অনন্তেসু চক্কৰাল়েসু সব্বসত্তানম্পি যদি উপনিস্সযো ভৰেয্য, একক্খণে সপাটিহারিযং সব্বানুকূলং ধম্মং দেসেত্ৰা তে ৰিনেতুং সক্কোতি, কিমঙ্গং পন নানক্খণেসু, তস্মা একস্মিং কালে অনেকেসং সম্মাসম্বুদ্ধানং উপ্পত্তি নিরত্থিকাৰ. অনত্থকতা পন অনচ্ছরিযঅগারৰৰিৰাদাদিদোসতো চেৰ মহাপথৰিযা দ্ৰিন্নং বুদ্ধানং ধারণে অসমত্থতায ৰিকিরণাদিদোসতো চ ৰেদিতব্বা. চক্কৰত্তিনো পন একস্মিং চক্কৰাল়ে দ্ৰে একতো ন উপ্পজ্জন্তি, একোৰ উপ্পজ্জতি. নানাচক্কৰাল়েসু পন বহূপি একতো উপ্পজ্জন্তীতি ৰেদিতব্বা. এত্থ হি ‘‘একিস্সা লোকধাতুযা’’তি এতস্স একস্মিং চক্কৰাল়েতি অত্থো গহেতব্বো. অপুব্বং অচরিমঞ্চেত্থ চক্করতনপাতুভাৰঅন্তরধানানং ৰেমজ্ঝং ৰেদিতব্বং. অন্তরধানঞ্চস্স চক্কৰত্তিনো কালকিরিযতো, পব্বজ্জাতো ৰা সত্তমে দিৰসে হোতি, তস্স চ আনুভাৰেন দ্ৰিন্নং একত্থ সহঅনুপ্পত্তি চ ৰেদিতব্বা. সেসং সুৰিঞ্ঞেয্যমেৰ. ঠানাঠানঞাণবলং পঠমং.

দুতিযে কম্মসমাদানানন্তি সমাদিযিত্ৰা কতানং কুসলাকুসলানং, কম্মমেৰ ৰা কম্মসমাদানং. ঠানসো হেতুসোতি পচ্চযতো চেৰ হেতুসঙ্খাতকারণতো চ ¶ . তত্থ গতিউপধিকালপযোগা ৰিপাকস্স পচ্চযা, কম্মং হেতু. তদুভযতো কম্মৰিপাকং যথাভূতং পজানাতি. কথং? ভগৰা হি ‘‘একচ্চস্স বহূনি পাপকম্মানি গতিউপধিকালপযোগানং সম্পত্তিযা পটিবাহিতানি ন ৰিপচ্চন্তি, তেসং ৰিপত্তিং আগম্ম ৰিপচ্চন্তি, একচ্চস্স বহূনি কল্যাণকম্মানি তেসং ৰিপত্তিযা পটিবাহিতানি ন ৰিপচ্চন্তি, তেসং সম্পত্তিং আগম্ম ৰিপচ্চন্তী’’তি পজানাতি.

তত্থ গতিৰিপত্তীতি চত্তারো অপাযা. গতিসম্পত্তীতি মনুস্সদেৰগতিযো. উপধীতি অত্তভাৰো ¶ . তস্স সমিদ্ধি সম্পত্তি নাম, অসমিদ্ধি ৰিপত্তি নাম. কালসম্পত্তীতি সুরাজসুমনুস্সকালসঙ্খাতো সম্পন্নকালো, তপ্পটিপক্খো কালৰিপত্তি নাম. তস্স তস্স পন কম্মস্স সম্মাপযোগো পযোগসম্পত্তি, মিচ্ছাপযোগো পযোগৰিপত্তি নাম. তত্থ হি একচ্চস্স কুসলকম্মেন দেৰগতিআদীসু গতিযং নিব্বত্তস্স তং গতিসম্পত্তিং আগম্ম কুসলানি এৰ ৰিপচ্চন্তি. তায পন গতিসম্পত্তিযা পটিবাহিতানি অকুসলানি তত্থ ৰিপচ্চিতুং ন সক্কোন্তি. তানি পুন নিরযাদীসু অপাযেসু নিব্বত্তস্স তং গতিৰিপত্তিং আগম্ম যথাসুখং ৰিপচ্চন্তি. তায পন গতিৰিপত্তিযা পটিবাহিতানি কুসলানি তত্থ ৰিপচ্চিতুং ন সক্কোন্তি. একচ্চস্স দস্সনীযেনাভিরূপেন কাযেন সমন্নাগতস্স যদিপি সো দাসো ৰা হোতি হীনজচ্চো ৰা, তং উপধিসম্পত্তিং আগম্ম কুসলানি এৰস্স ৰিপচ্চন্তি. তাদিসং হি সুরূপং ‘‘অযং কিলিট্ঠকম্মস্স নানুচ্ছৰিকো’’তি উচ্চেসু অমচ্চাদিট্ঠানেসু ঠপেন্তি, চণ্ডালিম্পি সুরূপং অগ্গমহেসিআদিট্ঠানেসু ঠপেন্তি. তায পন উপধিসম্পত্তিযা পটিবাহিতানি অকুসলানস্স ৰিপচ্চিতুং ন সক্কোন্তি. তানি পন উপধিৰিপত্তিযং চ ঠিতস্স যথাসুখং ৰিপচ্চন্তি. রাজকুলাদীসু হি উপ্পন্নম্পি দুরূপং হীনেসু ঠপেন্তি. একচ্চস্স পন পঠমকপ্পিকানং ৰা চক্কৰত্তিরঞ্ঞো ৰা বুদ্ধানং ৰা সুরাজসুমনুস্সানং ¶ সম্পন্নে কালে নিব্বত্তস্স তং কালসম্পত্তিং আগম্ম কুসলানি এৰ ৰিপচ্চন্তি, ন অকুসলানি. তানি পুন দুরাজদুমনুস্সানং ৰিপন্নে কালে তং কালৰিপত্তিং আগম্ম ৰিপচ্চন্তি, ন পন কুসলানি তায কালৰিপত্তিযা পটিবাহিতত্তা. একচ্চস্স পন সীলসংযমাদিঅনৰজ্জপযোগেন চেৰ সাৰজ্জেন ৰা অনৰজ্জেন ৰা দেসকালানুসারেন আযুধসিপ্পাদিপযোগসামত্থিযেন চ সমন্নাগতস্স তং পযোগসম্পত্তিং আগম্ম কুসলানি এৰ ৰিপচ্চন্তি, ন অকুসলানি. তানি পুন যথাৰুত্তৰিপরীতপযোগৰিপত্তিং আগম্ম ৰিপচ্চন্তি, ন পন কুসলানি তায পটিবাহিতত্তা. যুদ্ধাদীসু হি পাণাতিপাতাদিঅকুসলং করোন্তাপি তংতংআযুধসিপ্পাদিপযোগসম্পত্তিং নিস্সাযেৰ সেনাপতিট্ঠানাদিমহাসম্পত্তিং লভন্তি, ন পন তং অকুসলং নিস্সায. যথা দানৰেয্যাৰচ্চাদীসু কুসলং করোন্তাপি অধিমত্তৰাযামাদিপযোগৰিপত্তিং নিস্সায অনযব্যসনম্পি পাপুণন্তি, ন পন তং কুসলং নিস্সায. এৰমেতাহি চতূহি সম্পত্তীহি, ৰিপত্তীহি চ কুসলাকুসলানং ৰিপচ্চনাৰিপচ্চনৰিভাগং ভগৰা যথাভূতং পজানাতি. অযং তাৰেত্থ ৰিভঙ্গনযেন দুতিযবলস্স ৰিভাৰনা.

অপরেন চস্স –

‘‘অহোসি ¶ কম্মং অহোসি কম্মৰিপাকো, অহোসি কম্মং নাহোসি কম্মৰিপাকো, অহোসি কম্মং অত্থি কম্মৰিপাকো, অহোসি কম্মং নত্থি কম্মৰিপাকো, অহোসি কম্মং ভৰিস্সতি কম্মৰিপাকো, অহোসি কম্মং ন ভৰিস্সতি কম্মৰিপাকো, অত্থি কম্মং নত্থি কম্মৰিপাকো, অত্থি কম্মং নত্থি কম্মৰিপাকো, অত্থি কম্মং ভৰিস্সতি কম্মৰিপাকো, অত্থি কম্মং ন ভৰিস্সতি কম্মৰিপাকো, ভৰিস্সতি কম্মং ভৰিস্সতি কম্মৰিপাকো ¶ , ভৰিস্সতি কম্মং ন ভৰিস্সতি কম্মৰিপাকো’’তি (পটি. ম. ১.২৩৪) –

ইমিনা পটিসম্ভিদাযং ৰুত্তেনাপি নযেন ৰিভাৰনা ৰেদিতব্বা. তত্থ যং অতীতত্তভাৰে আযূহিতং কম্মং ৰুত্তং, হেতুপচ্চযং আগম্ম তত্থেৰ ৰিপাকং অদাসি. ইদং সন্ধায ‘‘অহোসি কম্মং অহোসি কম্মৰিপাকো’’তি পঠমং পদং ৰুত্তং. যং অতীতেসু পন দিট্ঠধম্মৰেদনীযাদীসু বহূসু একং দিট্ঠধম্মৰেদনীযং লদ্ধপচ্চযং ৰিপাকং দেতি, সেসানি অৰিপাকানি. একং উপপজ্জৰেদনীযং পন পটিসন্ধিং আকড্ঢতি, একং আনন্তরিযং নিরযপটিসন্ধিং দেতি, সেসানি অৰিপাকানি. অট্ঠসু সমাপত্তীসু একায ব্রহ্মলোকে নিব্বত্ততি, সেসা অৰিপাকা. ইদং সন্ধায ‘‘অহোসি কম্মং নাহোসি কম্মৰিপাকো’’তি দুতিযং পদং ৰুত্তং. যং অতীতং কম্মং এতরহি ৰিপাকং দেতি, ইদং সন্ধায ততিযং. যং পুরিমনযেন ন ৰিপচ্চতি, ইদং সন্ধায চতুত্থং. যং অনাগতে ৰিপাকং দস্সতি, ইদং সন্ধায পঞ্চমং. যং ন ৰিপচ্চতি, ইদং সন্ধায ছট্ঠং. যং এতরহি আযূহিতং কম্মং এতরহেৰ ৰিপাকং দেতি, ইদং সন্ধায সত্তমং. যং ন ৰিপচ্চতি, ইদং সন্ধায অট্ঠমং. ইমিনা নযেন সেসপদানম্পি অত্থো দট্ঠব্বো. ইদং তথাগতস্সাতি ইদং সব্বেহি এতেহি পকারেহি অতীতানাগতপচ্চুপ্পন্নানং কম্মন্তরৰিপাকন্তরানং যথাভূততো জাননঞাণন্তি অত্থো. দুতিযবলং.

ততিযে সব্বত্থগামিনিন্তি সব্বগতিগামিনিঞ্চ অগতিগামিনিঞ্চ. পটিপদন্তি মগ্গং. যথাভূতং পজানাতীতি বহূসুপি মনুস্সেসু পাণাতিপাতাদীসু একমেৰ অকুসলং একতো করোন্তেসু ইমস্স চেতনা নিরযগামিনী ভৰিস্সতি, ইমস্স তিরচ্ছানযোনিগামিনী, ইমস্স পেত্তিৰিসযগামিনী, নিরযাদীসুপি পনেসা এৰরূপে এৰরূপে ঠানে এৰঞ্চেৰঞ্চ ৰিপাকং দস্সতি, ইমস্স পটিসন্ধিং আকড্ঢিতুং ন সক্কোতি, অঞ্ঞেন কম্মেন ¶ দিন্নপটিসন্ধিকস্স দুব্বলং উপধিৰেপক্কং ভৰিস্সতি. বহূসু ৰা একতো দানাদিকুসলং, ৰিপস্সনং ৰা পট্ঠপেন্তেসু ইমস্স ¶ চেতনা মনুস্সগতিগামিনী ভৰিস্সতি, ইমস্স দেৰগতিগামিনী, তত্থাপি এৰঞ্চেৰঞ্চ ৰিপাকং দস্সতি, ইমস্স ৰা ৰিপস্সনা একং মগ্গং দ্ৰে ৰা তযো ৰা চত্তারো ৰা পটিসম্ভিদাদিসহিতে ৰা রহিতে ৰা নিপ্ফাদেস্সতি, ইমস্স ন কঞ্চি পটিৰেধং সাধেস্সতীতিআদিনা অনন্তেহি আকারেহি একৰত্থুস্মিম্পি উপ্পন্নং কুসলাকুসলসঙ্খাতং সব্বত্থগামিনিপটিপদং অৰিপরীততো পজানাতীতি. ততিযবলং.

চতুত্থে অনেকধাতুন্তি চক্খুধাতুআদীহি, কামধাতুআদীহি ৰা বহুধাতুং. নানাধাতুন্তি তাসঞ্ঞেৰ ধাতূনং ৰিলক্খণত্তা নানপ্পকারং ধাতুং. লোকন্তি খন্ধাযতনধাতুলোকং. যথাভূতং পজানাতীতি তাসং তাসং ধাতূনং খন্ধাযতনধাতুৰিভঙ্গাদীসু ৰুত্তনযেন অনন্তপ্পভেদং নানত্তং অৰিপরীততো পজানাতি. ন কেৰলঞ্চ তথাগতো উপাদিন্নকসঙ্খারলোকস্সেৰ নানত্তং পজানাতি, অথ খো অনুপাদিন্নকসঙ্খারলোকস্সাপি পচ্চেকবুদ্ধাদীহি পটিৰিজ্ঝিতুং অসক্কুণেয্যং নানত্তং পজানাতিযেৰ. তেহি উপাদিন্নকলোকস্সাপি নানত্তং একদেসতোৰ জানন্তি, অনুপাদিন্নস্স পন নেৰ জানন্তি, সব্বঞ্ঞুবুদ্ধস্সেৰেতং ৰিসযো. এৰং হি ইমায নাম ধাতুযা উস্সন্নায ইমেসং রুক্খগচ্ছলতাদীনং, খন্ধদণ্ডৰল্লিতচপত্তপুপ্ফফলাদিনো সণ্ঠানৰণ্ণগন্ধরসওজাহি, দেসকালেহি চ অনন্তপ্পভেদং নানত্তং, পথৰীপব্বতাদীনঞ্চ নানত্তং হোতীতি অনন্তেহি আকারেহি জানিতুং সক্কোতি, নাঞ্ঞেতি. চতুত্থবলং.

পঞ্চমে নানাধিমুত্তিকন্তি হীনাদীহি অধিমুত্তীহি নানাধিমুত্তিকভাৰং. যথাভূতং পজানাতীতি তীসুপি কালেসু হীনাধিমুত্তিকা হীনাধিমুত্তিকে এৰ সেৰন্তি, পণীতাধিমুত্তিকা চ পণীতাধিমুত্তিকে. তত্থাপি অস্সদ্ধা অস্সদ্ধে, দুস্সীলা ¶ দুস্সীলে, মিচ্ছাদিট্ঠিকা মিচ্ছাদিট্ঠিকে, সদ্ধা সদ্ধে, সীলসুতচাগপঞ্ঞাদিসম্পন্না চ তে তে এৰ সেৰন্তীতি নানপ্পকারতো জানাতি. সদ্ধাসীলাদিসম্পন্না হি তব্বিরহিতে অত্তনো আচরিযুপজ্ঝাযেপি ন সেৰন্তি, তেপি ইতরে, অত্তনা অত্তনা পন সদিসে এৰ সেৰন্তীতি. পঞ্চমবলং.

ছট্ঠে পরসত্তানন্তি পধানসত্তানং. পরপুগ্গলানন্তি ততো পরেসং হীনসত্তানং. একত্থমেৰ ৰা এতং পদদ্ৰযং ৰেনেয্যৰসেন দ্ৰিধা ৰুত্তং. ইন্দ্রিযপরোপরিযত্তন্তি সদ্ধাদীনং ইন্দ্রিযানং পরভাৰঞ্চ অপরভাৰঞ্চ, ৰুদ্ধিঞ্চ হানিঞ্চাতি অত্থো. যথাভূতন্তি সব্বেসং সত্তানং আসযানুসযচরিতাধিমুত্তিআদীহি সদ্ধাদি তিক্খিন্দ্রিযমুদিন্দ্রিযতং সব্বাকারতো জানাতি. তত্থ আসযোতি ¶ নিৰাসট্ঠানং, যত্থ সত্তানং চিত্তসন্তানং নিচ্চং নিৰসতি. সো দুৰিধো ৰট্টাসযো ৰিৰট্টাসযো চ. তত্থ সস্সতুচ্ছেদৰসেন পৰত্তং সব্বং দিট্ঠিগতং ৰট্টাসযো নাম. সপ্পচ্চযনামরূপপরিগ্গহতো পট্ঠায সব্বং ৰিপস্সনাঞাণং, মগ্গঞাণঞ্চ ৰিৰট্টাসযো নাম. মগ্গঞাণম্পি হি ‘‘দসযিমে, ভিক্খৰে, অরিযাৰাসা, যদরিযা আৰসিংসূ’’তিআদিৰচনতো (অ. নি. ১০.১৯) আসযোৰ. ইমং পন ভগৰা সত্তানং আসযং জানন্তো উভিন্নং দিট্ঠিঞাণানং অপ্পৰত্তিক্খণেপি জানাতি এৰ. কামরাগাদিকিলেসাধিমুত্তঞ্ঞেৰ হি পুগ্গলং ভগৰা তথেৰ জানাতি. ‘‘অযং নেক্খম্মাদিঅভিরতো ৰিৰট্টাসযো’’তি নেক্খম্মাদিং সেৰন্তঞ্ঞেৰ জানাতি, ‘‘অযং কামাদিঅভিরতো ৰট্টাসযো’’তি অনুসযচরিতাদিজাননেপি এসেৰ নযো. তত্থ অনুসযো কামরাগানুসযাদিতো সত্তৰিধো. চরিতন্তি তীহি দ্ৰারেহি অভিসঙ্খতলোকিযকুসলাকুসলং. অধিমুত্তীতি অজ্ঝাসযো. এৰমেত্থ আসযানুসযঞাণং, ইন্দ্রিযপরোপরিযত্তঞাণঞ্চাতি দ্ৰে ঞাণানি একতো হুত্ৰা একং বলঞাণং নাম জাতন্তি. ছট্ঠবলং.

সত্তমে ¶ ঝানৰিমোক্খসমাধিসমাপত্তীনন্তি পঠমাদীনং চতুন্নং ঝানানং, ‘‘রূপী রূপানি পস্সতী’’তিআদীনং অট্ঠন্নং ৰিমোক্খানং, সৰিতক্কসৰিচারাদীনং তিণ্ণং সমাধীনং, পঠমজ্ঝানসমাপত্তিআদীনং নৰন্নং অনুপুব্বসমাপত্তীনং. সংকিলেসন্তি হানভাগিযধম্মং. ৰোদানন্তি ৰিসেসভাগিযং ধম্মং. ৰুট্ঠানন্তি যেন কারণেন ঝানাদীহি ৰুট্ঠহন্তি, তং কারণং. তং পন দুৰিধং ৰোদানম্পি ভৰঙ্গম্পি. হেট্ঠিমং হি পগুণং ঝানং অত্তনো ৰোদানৰসেন উপরিমস্স ঝানস্স পদট্ঠানতো ‘‘ৰুট্ঠান’’ন্তি ৰুচ্চতি, তম্হা তম্হা পন সমাধিম্হা ভৰঙ্গৰসেনেৰ ৰুট্ঠানতো ভৰঙ্গম্পি. নিরোধতো পন ফলসমাপত্তিযাৰ ৰুট্ঠহন্তি. ইদং পাল়িমুত্তকৰুট্ঠানং নাম, তং সব্বং ভগৰা যথাভূতং সব্বাকারেন পজানাতি. সত্তমবলং.

অট্ঠমে পুব্বেনিৰাসানুস্সতীতি পুব্বেনিৰুত্থক্খন্ধানুস্সরণং, তং নামগোত্তৰণ্ণাহারসুখদুক্খাদীহি তত্থ তত্থ ভৰে ৰিজ্জমানেহি অনন্তেহি আকারেহি যথাভূতং পজানাতীতি. অট্ঠমবলং.

নৰমে চুতূপপাতন্তি চুতিঞ্চ উপপাতঞ্চ, তং চৰমানউপপজ্জমানহীনপণীতসুৰণ্ণদুব্বণ্ণাদিতো অনন্তপভেদে যথাকম্মূপগে সত্তে দিব্বচক্খুঞাণেন ৰণ্ণাযতনগ্গহণমুখেন দিস্ৰা সব্বাকারতো পজানাতীতি. নৰমবলং.

দসমে ¶ আসৰানং খযন্তি আসৰনিরোধং নিব্বানং, তং অরহত্তমগ্গঞাণেন চতুসচ্চপটিৰেধতো পজানাতীতি. দসমবলং.

ইমানীতি যানি হেট্ঠা ‘‘তথাগতস্স দস তথাগতবলানী’’তি অৰোচ, ইমানি তানীতি অপ্পনং করোতি. যস্মা চেতোপরিযঞাণাদীনি সাৰকাদীনম্পি যথারহং ৰিজ্জমানানিপি সৰিসযং কিঞ্চিদেৰ জানন্তি, ন চ সব্বাকারতো. বুদ্ধানং ¶ পন সব্বঞ্ঞুতঞ্ঞাণং ৰিয সব্বধম্মেসু যথাসকং ৰিসযে সব্বত্থ সব্বাকারতো একক্খণে অপ্পটিহতং পৰত্ততি, তস্মা ‘‘তথাগতবলানী’’তি ৰুচ্চন্তি. যদি এৰং সব্বঞ্ঞুতঞ্ঞাণস্সেৰাযং পভেদো হোতি, কস্মা পন ‘‘দসবলঞাণানী’’তি ৰিসুং ৰিভত্তানীতি? ৰিসযকিচ্চভূমিভেদতো নেসং অঞ্ঞত্তা. দসবলঞাণেসু হি পঠমং কারণাকারণমেৰ জানাতি, দুতিযং কম্মন্তরৰিপাকন্তরমেৰ জানাতি, ততিযং কম্মপরিচ্ছেদমেৰ, চতুত্থং নানত্তকারণমেৰ, পঞ্চমং সত্তানং অজ্ঝাসযাধিমুত্তিমেৰ, ছট্ঠং ইন্দ্রিযানং তিক্খমুদুভাৰমেৰ, সত্তমং ঝানাদীহি সদ্ধিং তেসং সংকিলেসাদিমেৰ, অট্ঠমং পুব্বেনিৰুত্থক্খন্ধসন্ততিমেৰ, নৰমং সত্তানং চুতিপটিসন্ধিমেৰ, দসমং সচ্চপরিচ্ছেদমেৰ, নাঞ্ঞং.

সব্বঞ্ঞুতঞ্ঞাণং পন এতেহি জানিতব্বঞ্চ ততো উত্তরিঞ্চ সব্বং অতীতাদিভেদং একক্খণে সব্বাকারতো জানাতি, এতেসং পন কিচ্চং ন সব্বং করোতি. তং হি ঝানং হুত্ৰা অপ্পেতুং, ইদ্ধি হুত্ৰা ৰিকুব্বিতুং, মগ্গো হুত্ৰা কিলেসে খেপেতুং ন সক্কোতি. দসবলঞাণানি পন তং সব্বং যথারহং কাতুং সক্কোন্তি. তেসু চ পটিপাটিযা সত্ত ঞাণানি কামাৰচরানি, ততো দ্ৰে রূপাৰচরানি, অৰসানে একং লোকুত্তরং. সব্বঞ্ঞুতঞ্ঞাণং পন কামাৰচরমেৰাতি এৰং ৰিসযকিচ্চভূমিভেদতো অঞ্ঞমেৰ দসবলঞাণং. অঞ্ঞং সব্বঞ্ঞুতঞ্ঞাণন্তি. অযং তাৰ পদত্থানুসারতো ৰিনিচ্ছযো. ধম্মভেদাদিতো পন সব্বোপি ৰিনিচ্ছযো একৰিধকোট্ঠাসতো পট্ঠায এত্থ ৰুত্তানুসারতোৰ ঞাতব্বো, সুত্তন্তভাজনীযাদযো হি ৰিভঙ্গনযভেদা এত্থ, ইতো পরেসু চ ৰিভঙ্গেসু নত্থীতি.

ঞাণৰিভঙ্গমাতিকত্থৰণ্ণনা নিট্ঠিতা.

খুদ্দকৰত্থুৰিভঙ্গমাতিকত্থৰণ্ণনা

খুদ্দকৰত্থুৰিভঙ্গমাতিকায ¶ ¶ পনাযং নিক্খেপপরিচ্ছেদেন সদ্ধিং অত্থতো ৰিনিচ্ছযো. মাতিকায হি আদিতো তাৰ – জাতিমদোতিআদযো তেসত্ততি এককা নিক্খিত্তা, ততো কোধো চ উপনাহো চাতিআদযো অট্ঠারস দুকা, অকুসলমূলাদযো পঞ্চতিংস তিকা, আসৰচতুক্কাদযো চুদ্দস চতুক্কা, ওরম্ভাগিযসংযোজনাদযো পন্নরস পঞ্চকা, ৰিৰাদমূলাদযো চুদ্দস ছক্কা, অনুসযাদযো সত্ত সত্তকা, কিলেসৰত্থুআদযো অট্ঠ অট্ঠকা, আঘাতৰত্থুআদযো নৰ নৰকা, কিলেসৰত্থুআদযো সত্ত দসকা, ছন্নং অট্ঠারসকানং ৰসেন অট্ঠসততণ্হাৰিচরিতানি চ যথাক্কমং নিক্খিপিত্ৰা অন্তে দ্ৰাসট্ঠি দিট্ঠিগতানি ব্রহ্মজালসুত্তে অতিদস্সিতানীতি সব্বানিপি তেসট্ঠিঅধিকানি অট্ঠকিলেসসতানি নিক্খিত্তানীতি ৰেদিতব্বানি. অযং তাৰ নিক্খেপপরিচ্ছেদো.

অত্থতো পন ‘‘জাতিমদো’’তিআদীসু জাতিউচ্চাকুলীনতং নিস্সায ‘‘খত্তিযাদীনং চতুন্নম্পি ৰণ্ণানং অহং উত্তমজাতিকো, ইমে ন উত্তমজাতিকা’’তি এৰং অত্তুক্কংসনপরৰম্ভনৰসেন উপ্পন্নো মজ্জনাকারপ্পৰত্তো মানো জাতিমদো নাম. সেসপদেসুপি এসেৰ নযো. তত্থ আদিচ্চগোত্তকস্সপগোত্তাদিউত্তমগোত্তং নিস্সায গোত্তমদো. নিরাবাধতং, যোব্বঞ্ঞং, ‘‘চিরং সুখং জীৰিং জীৰামি জীৰিস্সামী’’তি এৰং জীৰিতং, বহুলাভঞ্চ নিস্সায যথাক্কমং আরোগ্যমদাদযো ৰুত্তা. সুকতপণীতপচ্চযলাভং, মাননৰন্দনাদিগরুকারং মঞ্ঞেৰ পমুখং কত্ৰা পঞ্হং পুচ্ছন্তি, পরিৰারেত্ৰা গচ্ছন্তীতি এৰং পুরেক্খারং, মহাপরিৰারং, সুচিপরিৰারঞ্চ নিস্সায যথাক্কমং সক্কারমদাদযো চ ৰেদিতব্বা. ভোগো পন কিঞ্চাপি লাভগ্গহণেনেৰ গহিতো, নিহিতধনৰসেন পনেত্থ ¶ লাভো ৰেদিতব্বো, ‘‘অন্নপানৰত্থাভরণমালাগন্ধাদিউপভোগসমিদ্ধিৰসেনাপি ৰত্তুং ৰট্টতী’’তিপি ৰদন্তি. সরীরৰণ্ণং, গুণৰণ্ণঞ্চ নিস্সায ৰণ্ণমদো. বাহুসচ্চং, পটিভানং, ‘‘ৰণ্ণং বুদ্ধৰংসং রাজৰংসং জনপদৰংসং গামৰংসং রত্তিন্দিৰপরিচ্ছেদং নক্খত্তমুহুত্তযোগং জানামী’’তি এৰং রত্তঞ্ঞুতং ৰা নিস্সায যথাক্কমং সুতমদাদযো চ ৰেদিতব্বা. জাতিপিণ্ডপাতিকতং, অনৰঞ্ঞাততং, ইরিযাপথপাসাদিকতং, মহিদ্ধিকতঞ্চ নিস্সায যথাক্কমং পিণ্ডপাতিকমদাদযো. কিঞ্চাপি পরিৰার-গ্গহণেন যসো গহিতো. পরিৰারস্স পন সৰসৰত্তকভাৰেন পত্থটতং কিত্তিযসঞ্ঞেৰ ৰা নিস্সায যসমদো. পরিসুদ্ধসীলং ¶ , উপচারপ্পনাঝানং, সিপ্পকোসল্লং, সরীরস্স আরোহসম্পদং, পরিণাহসম্পদং, অনূননিদ্দোসঅঙ্গপচ্চঙ্গতায সরীরপারিপূরিঞ্চ নিস্সায সীলমদাদযো ৰেদিতব্বা.

ইমিনা এত্তকেন ঠানেন সৰত্থুকং মানং দস্সেত্ৰা ইদানি অৰত্থুকমেৰ সামঞ্ঞতো মানং দস্সেন্তো ‘‘মদো’’তি আহ. পমাদোতিআদীসু পঞ্চকামগুণেসু চিত্তৰোস্সগ্গসঙ্খাতো সুচরিতাসেৰনায, দুচ্চরিতসেৰনায চ হেতুভূতো পমজ্জনাকারপ্পৰত্তো অকুসলচিত্তুপ্পাদো পমাদো নাম, স্ৰাযং সতিৰোস্সগ্গলক্খণো. ৰাতভরিতভত্তা ৰিয মাতাপিতূসুপি অনোণতভাৰসঙ্খাতো কক্খল়মানো থম্ভো নাম, স্ৰাযং চিত্তস্স উদ্ধুমাতভাৰলক্খণো. অঞ্ঞেসং গেহাদিউপকরণসম্পদং, ৰিজ্জাসম্পদং ৰা দিস্ৰা তদ্দিগুণসমারম্ভনৰসপ্পৰত্তো অকুসলচিত্তুপ্পাদো সারম্ভো নাম. গন্থোপি হি সারম্ভৰসেন উগ্গহেতুং ন ৰট্টতি, অকুসলমেৰ হোতি. স্ৰাযং করণুত্তরিযলক্খণো.

অত্র ¶ অত্র ৰিসযে ইচ্ছা অস্সাতি অত্রিচ্ছো, পুগ্গলো, তস্স ভাৰো অত্রিচ্ছতা. এৰং মহিচ্ছতাদীসুপি অত্থো ৰেদিতব্বো. তত্থ যং যং লদ্ধং, তেন তেন অসন্তুস্সিত্ৰা অপরস্স অপরস্স পত্থনাৰসেন পৰত্তো লোভো অত্রিচ্ছতা. যায অত্তনা লদ্ধং পণীতম্পি লামকং ৰিয খাযতি, পরেন লদ্ধং লামকম্পি পণীতং ৰিয খাযতি. সাযং অপরাপরলাভপত্থনালক্খণা. সন্তগুণৰিভাৰনাৰসপ্পৰত্তো চেৰ তদুপ্পন্নেহি অতিমহন্তেহিপি ৰত্থূহি অসন্তুস্সনাকারপ্পৰত্তো চ লোভো মহিচ্ছতা. যায সমন্নাগতো পুগ্গলো পচ্চযেহি দুপ্পূরো অগ্গি ৰিয উপাদানেন, সমুদ্দো ৰিয চ উদকেন. যা চাযং সন্তগুণসম্ভাৰনতা, পটিগ্গহণে চ পরিভোগে চ অমত্তঞ্ঞুতা, এতং মহিচ্ছতালক্খণং.

অসন্তানং পন সদ্ধাসীলানং, মগ্গফলাদীনঞ্চ লোকিযলোকুত্তরানং গুণানং ৰিভাৰনাৰসপ্পৰত্তো চেৰ তদুপ্পন্নেহি অতিমহন্তেহিপি পচ্চযেহি অসন্তুস্সনাকারপ্পৰত্তো চ লোভো পাপিচ্ছতা. যা চাযং অসন্তগুণসম্ভাৰনতা, পটিগ্গহণে চ পরিভোগে চ অমত্তঞ্ঞুতা এতং পাপিচ্ছতালক্খণং.

সিঙ্গন্তি ৰিজ্ঝনট্ঠেন সিঙ্গং, নাগরিকভাৰসঙ্খাতস্স কিলেসসিঙ্গস্সেতং অধিৰচনং, তং অত্থতো সিঙ্গারকরণৰসপ্পৰত্তো লোভোৰ. তিন্তিণন্তি খীযনং, তং অত্থতো নিৰাসট্ঠানে সুনখানং ¶ ৰিয অঞ্ঞমঞ্ঞং সত্তানং ‘‘তৰ সন্তকং, মম সন্তক’’ন্তি খিয্যনাকারপ্পৰত্তো দোসোৰ. চাপল্যন্তি চপলতা, তং পত্তচীৰরাদিপরিক্খারানং, অত্তভাৰস্স চ মণ্ডনৰিভূসনকেল়াযনৰসপ্পৰত্তো রাগোৰ, যেন সমন্নাগতো জিণ্ণোপি দহরো ৰিয হোতি. অসভাগৰুত্তীতি ৰিসভাগৰুত্তি ৰিসভাগকিরিযা, সা গরুট্ঠানিযেসুপি অনাদরৰসেন ৰিপচ্চনীকগ্গাহিতাৰসপ্পৰত্তো দোসোৰ ¶ , যায সমন্নাগতো গিলানেপি মাতাপিতুআচরিযুপজ্ঝাযাদিকে ন ওলোকেতি, তেহি সদ্ধিং লাভসক্কারকারণা কলহং করোতি, তেসু হিরোত্তপ্পং, চেতিযাদীসু চিত্তীকারঞ্চ ন পচ্চুপট্ঠপেতি. অরতীতি পন্তেসু সেনাসনেসু, সমথৰিপস্সনাসু চ অনভিরমণা উক্কণ্ঠিততা, সা তথাপৰত্তো অকুসলচিত্তুপ্পাদো. তন্দীতি আলস্যং. ৰিজম্ভিতাতি কাযস্স আনমনাদিআকারেন ফন্দনা ৰিজম্ভনা. ভত্তসম্মদোতি ভত্তমুচ্ছায কাযস্স অকম্মঞ্ঞতা. চেতসো চ লীনত্তন্তি চিত্তসঙ্কোচো. অত্থতো পনেতানি সব্বানিপি থিনমিদ্ধৰসেন চিত্তস্স গিলানাকারোৰ.

কুহনাতিআদীসু লাভসক্কারসিলোকসন্নিস্সিতস্স পাপিচ্ছস্স তেন তেন উপাযেন ৰিম্হাপনা কুহনা নাম. সা তিৰিধা পচ্চযপটিসেৰনসামন্তজপ্পনইরিযাপথসণ্ঠাপনৰসেন. তত্থ চীৰরাদীহি নিমন্তিতস্স তদত্থিকস্সেৰ সতো পাপিচ্ছতং নিস্সায পটিক্খিপনেন, তে চ গহপতিকে অত্তনি সুপ্পতিট্ঠিতসদ্ধে ঞত্ৰা পুন তেসং ‘‘অহো অয্যো অপ্পিচ্ছো ন কিঞ্চি পটিগ্গণ্হিতুং ইচ্ছতি, সুলদ্ধং ৰত নো অস্স, সচে অপ্পমত্তকং কিঞ্চি পটিগ্গণ্হেয্যা’’তি নানাৰিধেহি উপাযেহি পণীতানি চীৰরাদীনি উপনামেন্তানং তদনুগ্গহকামতঞ্ঞেৰ আৰিকত্ৰা পটিগ্গহণেন চ ততো পভুতি অপি সকটভারেহি উপনামনহেতুভূতং ৰিম্হাপনং পচ্চযপটিসেৰনসঙ্খাতা কুহনা নাম. পাপিচ্ছস্সেৰ পন সতো ‘‘যো এৰরূপং চীৰরং ধারেতি, সো সমণো মহেসক্খো’’তিআদিনা উত্তরিমনুস্সধম্মাধিগমপরিদীপনৰাচায তথা তথা ৰিম্হাপনং সামন্তজপ্পনসঙ্খাতা কুহনা নাম. পাপিচ্ছস্সেৰ পন সতো সমাহিতস্সেৰ সম্ভাৰনাধিপ্পাযকতেন পণিধায সণ্ঠপিতেন গমনাদিইরিযাপথেন ৰিম্হাপনং ইরিযাপথসণ্ঠপনসঙ্খাতা কুহনা নাম.

আলপনাতিআদিনা ¶ পন ৰুত্তপচ্চযপটিসংযুত্তা ৰাচাযেৰ দস্সিতা. অনুপ্পিযভাণিতা, চাটুকম্যতা, মুগ্গসূপ্যতা, পারিভটযতা চ আলপনা নাম. তত্থ আলপনাতিআদিতোৰ লপনা. অনুপ্পিযভাণিতাতি সচ্চানুরূপং, ধম্মানুরূপং ৰা অনপলোকেত্ৰা পুনপ্পুনং পিযভণনং. চাটুকম্যতাতি ¶ নীচৰুত্তিতা, অত্তানং হেট্ঠতো ঠপেত্ৰা পৰত্তনং. মুগ্গসূপ্যতাতি মুগ্গসূপসদিসতা, অপক্কমুগ্গসদিসেন অপ্পসচ্চেন সমন্নাগতৰচনতা. পারিভটযতাতি কুলদারকানং অঙ্কেন পরিহরণাদিকং পরিভটস্স কিচ্চং. এৰমযং সব্বোপি কিরিযাভেদো ‘‘লপনা’’ত্ৰেৰ ৰুচ্চতি. পরেসং পন পচ্চযদানসঞ্ঞাজনকং কাযৰচীকম্মং নেমিত্তিকতা নাম, যা ‘‘পরিকথোভাসনিমিত্তকম্ম’’ন্তি ৰুচ্চতি. অক্কোসনৰম্ভনগরহণাদীহি যথা দাযকো অৰণ্ণং ভাযতি, এৰং তং নিপ্পীল়নং নিপ্পেসিকতা নাম. অযং হি যস্মা ৰেল়ুপেসিকায ৰিয অব্ভঙ্গং ইমায পরস্স গুণং নিপ্পেসেতি নিপুঞ্ছতি, যস্মা ৰা গন্ধজাতং পিসিত্ৰা গন্ধমগ্গনা ৰিয পরগুণে নিপ্পিসিত্ৰা ৰিচুণ্ণেত্ৰা এসা লাভমগ্গনা হোতি, তস্মা ‘‘নিপ্পেসিকতা’’তি ৰুচ্চতি. একস্মিং পন কুলে লদ্ধামিসং অঞ্ঞত্থ দানৰসেন লাভেন লাভস্স পত্থনা লাভেন লাভং নিজিগীসনা নাম. ইমে চ কুহনাদযো পঞ্চপি তথা তথা পৰত্তা লোভাদিঅকুসলচিত্তুপ্পাদাতি ৰেদিতব্বা. ‘‘সেয্যোহমস্মী’’তিআদযো দ্ৰাদস মানা হেট্ঠা সংযোজনগোচ্ছকে ৰুত্তানুসারেন সুৰিঞ্ঞেয্যাৰ. তত্থ চ আদিতো তযো মানা পুগ্গলং অনিস্সায জাতিগোত্তরূপভোগসিপ্পসুতাদিমানৰত্থুৰসেনেৰ কথিতা, ততো পরং পন নৰ মানা সেয্যসদিসহীনপুগ্গলে নিস্সায কথিতা.

এৰমেতেহি দ্ৰাদসহি পদেহি সৰত্থুকে মানে কথেত্ৰা ইদানি অৰত্থুকং দস্সেতুং ‘‘মানো’’তিআদি ৰুত্তং. ততো ¶ পরং অতিমানোতিআদীসু ‘‘জাতিআদীহি মযা সদিসো নত্থী’’তি অতিক্কমিত্ৰা মঞ্ঞনাৰসেন পৰত্তো মানো অতিমানো নাম. ‘‘ইমে মযা পুব্বে সদিসা, ইদানি অহং সেট্ঠো, ইমে হীনতরা’’তি উপ্পন্নো মানো ভারাতিভারো ৰিয মানাতিমানো নাম. অত্তানং পন অৰমঞ্ঞনাৰসেন পৰত্তো মানো ওমানো নাম, সো ‘‘হীনোহমস্মী’’তি পৰত্তহীনমানসদিসোৰ. অনধিগতেসু অরিযধম্মেসু ‘‘অধিগতা মযা’’তি উপ্পন্নো মানো অধিকমানত্তা অধিমানো নাম, অযং পন সোতাপন্নাদিঅরিযসাৰকানং ‘‘অহং সকদাগামী’’তিআদিনা ন উপ্পজ্জতি তেসং মগ্গফলনিব্বানপহীনকিলেসাৰসিট্ঠকিলেসপচ্চৰেক্খণেন অরিযগুণপটিৰেধে নিক্কঙ্খত্তা. দুস্সীলস্স পন ন উপ্পজ্জতেৰ, সীলৰতোপি পরিচ্চত্তকম্মট্ঠানস্স ন উপ্পজ্জতি, পরিসুদ্ধসীলস্সেৰ পন সুদ্ধসমথলাভিনো, সুদ্ধৰিপস্সনালাভিনো, তদুভযলাভিনো ৰা উপ্পজ্জতি. তেসু তদুভযলাভী অরহত্তে এৰ অধিমঞ্ঞিত্ৰা পতিট্ঠাতি সুৰিক্খম্ভিতকিলেসত্তা, পরিমদ্দিতসঙ্খারত্তা চ, ইতরে সোতাপন্নাদীসুপীতি ৰেদিতব্বা. পঞ্চসু পন খন্ধেসু ‘‘অহমস্মী’’তিআদিনা পৰত্তো মানো অস্মিমানো ¶ নাম. পাপকেন পন পরূপঘাতকেন কম্মাযতনসিপ্পাযতনৰিজ্জাট্ঠানাদিনা অত্তানং সেয্যাদিতো জপ্পনৰসেন পৰত্তো মানো মিচ্ছামানো নাম.

ঞাতিৰিতক্কোতিআদীসু ‘‘ময্হং ঞাতকা সুখজীৰিনো সম্পত্তিযুত্তা’’তি এৰং গেহসিতপেমেন ঞাতকে উদ্দিস্স উপ্পন্নো ৰিতক্কো ঞাতিৰিতক্কো নাম, ‘‘ঞাতকা খযং গতা ৰযং গতা সদ্ধা পসন্না’’তিআদিনা পন নেক্খম্মসিতো ঞাতিৰিতক্কো নাম ন হোতি. এৰং জনপদৰিতক্কেপি, তস্স পন ‘‘অম্হাকং জনপদো সুভিক্খো সুন্দরো’’তিআদিনা পৰত্তিআকারো ৰেদিতব্বো. অমরত্থায ৰিতক্কো, অমরো ¶ ৰা ৰিতক্কোতি অমরৰিতক্কো. তত্থ যো উক্কুটিকপ্পধানাদীহি দুক্খে নিজ্জিণ্ণে সম্পরাযে অত্তা সুখী অমরো হোতীতি এৰং পৰত্তো, সো অমরত্থায ৰিতক্কো নাম. যো পন দিট্ঠিগতিকস্স একস্মিং পক্খে অসণ্ঠহিত্ৰা ‘‘এৰম্পি মে নো, তথাপি মে নো, অঞ্ঞথাপি মে নো’’তিআদিনা অমরমচ্ছো ৰিয গহেতুং অসক্কুণেয্যতায পৰত্তো, সো অমরো ৰিতক্কো নাম. তং দুৰিধম্পি একতো কত্ৰা ইধ ‘‘অমরৰিতক্কো’’তি ৰুত্তো.

অনুদ্দযতা পতিরূপকেন পন গিহীহি সহসোকিসহনন্দিতাদিৰসেন গেহসিতপেমেন যুত্তো পরানুদ্দযতাপটিসংযুত্তো ৰিতক্কো নাম. লাভেন চেৰ সক্কারেন চ কিত্তিসদ্দেন চ সদ্ধিং আরম্মণকরণৰসেন যুত্তো গেহসিতো ৰিতক্কো লাভসক্কারসিলোকপটিসংযুত্তো ৰিতক্কো নাম, তস্স পন ‘‘অহো ৰত মে লাভাদযো উপ্পজ্জেয্যু’’ন্তিআদিনা পৰত্তিআকারো ৰেদিতব্বো. ‘‘অহো ৰত মং পরে ন অৰজানেয্যু’’ন্তি উপ্পন্নো গেহসিতো ৰিতক্কো অনৰঞ্ঞত্তিপটিসংযুত্তো ৰিতক্কো নাম. এককং.

দুকাদীসু কোধাদযো হেট্ঠা ৰুত্তত্থে ৰজ্জেত্ৰা অৰসেসানঞ্ঞেৰ ৰণ্ণনা হোতি. তত্থ দুকেসু তাৰ উপনাহোতিআদীসু পুব্বভাগে কোধো ‘‘অক্কোচ্ছিম’’ন্তিআদিনা আসেৰনেন অপরকালে ৰেরচিত্তে দল়্হতরং আবদ্ধো উপনাহো নাম, যেন সমন্নাগতো ৰেরং নিস্সজ্জিতুং ন সক্কোতি ৰসাতেলমক্খিতপিলোতিকা ৰিয, সোধিযমানম্পিস্স চিত্তং ন পরিসুজ্ঝতি, স্ৰাযং ৰেরুপনিবন্ধনলক্খণো.

পরগুণং পন ৰিনাসেত্ৰা তত্থ দোসমক্খনৰসেন পৰত্তো কোধো মক্খো নাম. অযং হি পঠমতরং ¶ অত্তনো চিত্তং গূথো ৰিয গূথগ্গাহকং হত্থং মক্খেতি, পচ্ছা ¶ পরন্তি ‘‘মক্খো’’তি ৰুত্তো, স্ৰাযং পরগুণমক্খনলক্খণো. পল়াসেতীতি পল়াসো, পরস্স গুণে দস্সেত্ৰা অত্তনো গুণেহি সমে করোতীতি অত্থো. তথাপৰত্তো লোভো, স্ৰাযং যুগগ্গাহলক্খণো.

দ্ৰারত্তযেপি ৰিজ্জমানস্সেৰ দোসস্স পটিচ্ছাদনতো চক্খুমোহনমাযা ৰিযাতি মাযা, সা কতদোসপটিচ্ছাদনলক্খণা. সঠস্স ভাৰো, কম্মং ৰা সাঠেয্যং, কেরাটিযং, তং অৰিজ্জমানগুণপ্পকাসনলক্খণং.

অনজ্জৰাদযো হেট্ঠা ৰুত্তঅজ্জৰাদিপটিপক্খঅকুসলৰসেন ৰেদিতব্বা. অজ্ঝত্তসংযোজনন্তিআদীসু অজ্ঝত্তন্তি কামভৰো, তত্থ সত্তে বন্ধনৰসেন পৰত্তানি পঞ্চোরম্ভাগিযসংযোজনানি অজ্ঝত্তসংযোজনং নাম. বহিদ্ধাতি রূপারূপভৰো. তত্থ বন্ধনৰসেন পৰত্তানি পঞ্চ উদ্ধম্ভাগিযসংযোজনানি বহিদ্ধাসংযোজনং নাম. কামভৰে হি সত্তানং আলযো বহুকো, ন ইতরেসু, তস্মা সো অজ্ঝত্তং ইতরে চ বহিদ্ধাতি ৰেদিতব্বা. দুকং.

তিকেসু পন লোভাদীনি তীণি অকুসলমূলানি নাম. কামব্যাপাদৰিহিংসাসম্পযুত্তা ৰিতক্কা তযো অকুসলৰিতক্কা নাম. তে এৰ সঞ্ঞাসীসেন তিস্সো অকুসলসঞ্ঞা. সভাৰট্ঠেন তিস্সো অকুসলধাতুযোতি চ ৰুচ্চন্তি. কাযৰচীমনোদুচ্চরিতানি তীণি দুচ্চরিতানি নাম, তানি দ্ৰারত্তযপ্পৰত্তানং পাণাতিপাতাদীনং, সব্বাকুসলানং ৰা ৰসেন যোজেতব্বানি. সুত্তন্তপরিযাযেন পন দিট্ঠাসৰৰজ্জিতা কামাসৰাদযো তযো আসৰা নাম. সক্কাযদিট্ঠিৰিচিকিচ্ছাসীলব্বতপরামাসা তীণি সংযোজনানি নাম.

কামতণ্হা ভৰতণ্হা ৰিভৰতণ্হা চ তিস্সো তণ্হা নাম. তত্থ সস্সতদিট্ঠিসহগতো রাগো ভৰতণ্হা, উচ্ছেদদিট্ঠিসহগতো ¶ রাগো ৰিভৰতণ্হা, অৰসেসা পন সব্বাপি তণ্হা কামতণ্হা. কামধাতুপটিসংযুত্তো ৰা রাগো কামতণ্হা, রূপারূপধাতুপটিসংযুত্তো ভৰতণ্হা, উচ্ছেদদিট্ঠিসহগতো ৰিভৰতণ্হাতি ৰেদিতব্বা. কামতণ্হা রূপতণ্হা অরূপতণ্হা চ অপরাপি তিস্সো তণ্হা নাম. রূপতণ্হা অরূপতণ্হা নিরোধতণ্হা চ পুন অপরাপি তিস্সো তণ্হা নাম. তত্থ নিরোধতণ্হাতি উচ্ছেদদিট্ঠিসহগতো. কামেসনা ভৰেসনা ব্রহ্মচরিযেসনা চ তিস্সো এসনা নাম. তত্থ ব্রহ্মচরিযেসনাতি সস্সতুচ্ছেদদিট্ঠিসঙ্খাতব্রহ্মচরিযস্স গৰেসনা. ‘‘সেয্যোহমস্মীতি ¶ ৰিধা, সদিসোহমস্মীতি ৰিধা, হীনোহমস্মীতি ৰিধা’’তি এৰং ৰুত্তমানৰিধা তিস্সো ৰিধা নাম. মানো হি সেয্যাদিৰসেন ৰিদহনতো মঞ্ঞনতো ‘‘ৰিধা’’তি ৰুচ্চতি. জাতিজরামরণানি পটিচ্চ উপ্পন্নানি ভযানি তীণি ভযানি নাম. ‘‘অতীতং ৰা অদ্ধানং আরব্ভা’’তিআদিনা ৰুত্তানি তীণি, বুদ্ধাদীসু কঙ্খনৰিচিকিচ্ছনৰসেন পৰত্তা তিস্সো অৰিজ্জা তীণি তমানি নাম. ৰিচিকিচ্ছাসীসেন তস্স ৰিভঙ্গে তংসম্পযুত্তা অৰিজ্জাৰ ৰুত্তা, তস্সা এৰ পটিচ্ছাদকত্তেনপি তমভাৰতোতি দট্ঠব্বং.

যং কিঞ্চি পন সত্তস্স সুখাদিকং উপ্পজ্জতি, তং সব্বং পুব্বেকতহেতূতি একং তিত্থাযতনং, ইস্সরনিম্মানহেতূতি দুতিযং, অহেতুঅপ্পচ্চযাতি ততিযন্তি ইমানি তীণি তিত্থাযতনানি নাম. তত্থ পঠমৰাদী কুসলাকুসলকিরিযউতুচিত্তাহারাদিকং, গতিউপধিআদিকং, সপ্পুরিসূপনিস্সযসদ্ধম্মস্সৰনাদিকঞ্চ সব্বং পচ্চযপচ্চযুপ্পন্নং পটিক্খিপিত্ৰা একং কম্মৰিপাকমেৰ সম্পটিচ্ছতি, ইতরে পন দ্ৰেপি সব্বং হেতুং পটিক্খিপিত্ৰা ইস্সরহেতুকং, অহেতুকঞ্চ সম্পটিচ্ছন্তি, তেসং তিণ্ণং ৰাদানং ৰসেনেৰ পযোজনাভাৰাদিতো যথানুরূপং দোসো ঞাতব্বো. গন্থৰিত্থারভযেন পনেত্থ ন ৰিত্থারযিম্হ.

রাগদোসমোহা ¶ পন তযো পলিবোধট্ঠেন কিঞ্চনা নাম. তে এৰ হি কিলেসট্ঠেন অঙ্গণানি, মলীনভাৰকরণট্ঠেন মলানি, পক্খলনপাতহেতুতো ৰিসমানি চ হোন্তি. পাণাতিপাতাদীনি কাযৰচীমনোৰিসমানি অপরানিপি তীণি ৰিসমানি নাম. রাগদোসমোহা অনুদহনট্ঠেন তযো অগ্গী, কসটনিরোজট্ঠেন কসাৰা চ হোন্তি. পাণাতিপাতাদীনি কাযকসাৰাদযো পন অপরেপি তযো কসাৰা নাম. অস্সাদদিট্ঠিত্তিকে কামপরিভোগে ‘‘নত্থি কামেসু দোসো’’তি এৰং পৰত্তা সস্সতদিট্ঠি অস্সাদদিট্ঠি নাম. ৰীসতিৰত্থুকা পন অত্তদিট্ঠি অত্তানং অনুগতত্তা অত্তানুদিট্ঠি নাম. তস্সা পন ‘‘রূপং অত্ততো সমনুপস্সতি, রূপৰন্তং ৰা অত্তানং, অত্তনি ৰা রূপং, রূপস্মিং ৰা অত্তানং সমনুপস্সতী’’তি এৰং রূপক্খন্ধে চতস্সো দিট্ঠিযো. এৰং সেসক্খন্ধেসুপীতি ৰীসতিৰত্থুকতা ৰেদিতব্বা.

তত্থ চ রূপং অত্ততোদিআদিনা পঞ্চক্খন্ধে অত্ততো গহণৰসেন পৰত্তা পঞ্চ উচ্ছেদদিট্ঠিযো, সেসা পন সস্সতদিট্ঠিযোতি ৰেদিতব্বা. ‘‘নত্থি দিন্ন’’ন্তিআদিনযপ্পৰত্তা পন নত্থিকদিট্ঠি মিচ্ছাদিট্ঠি নাম, লামকদিট্ঠীতি অত্থো. অরতিত্তিকে পাণিলেড্ডুদণ্ডাদীহি সত্তানং ¶ ৰিহিংসনা ৰিহেসা নাম. দ্ৰারত্তযপ্পৰত্তঅকুসলধম্মস্স চরিযা অধম্মচরিযা নাম. দোৰচস্সতাতিকে সাৰ কামব্যাপাদৰিহিংসাসঞ্ঞা নানারম্মণেসু পৰত্তিতো, নানাভূতত্তা চ নানত্তসঞ্ঞা নাম. উদ্ধচ্চত্তিকে কুসীতস্স ভাৰো কোসজ্জং, পমাদোৰ. অনাদরিযত্তিকে ওৰাদস্স অনাদিযনৰসপ্পৰত্তো কোধো অনাদরিযং নাম. অস্সদ্ধিযত্তিকে রতনত্তযকম্মফলানং অসদ্দহনৰসপ্পৰত্তা অকুসলধম্মা অস্সদ্ধিযং নাম. পঞ্চৰিধমচ্ছরিযৰসেন ‘‘দেহী’’তি ৰচনস্স অজাননা অৰদঞ্ঞুতা নাম.

উদ্ধচ্চত্তিকে ¶ মনচ্ছট্ঠেসু ইন্দ্রিযেসু অগুত্তদ্ৰারতা অসংৰরো নাম. কাযিকৰাচসিকৰীতিক্কমো দুস্সীল্যং নাম. অরিযত্তিকে বুদ্ধপচ্চেকবুদ্ধসাৰকানং দস্সনোপাসনাদীসু অনিচ্ছা অরিযানং অদস্সনকম্যতা নাম. বোধিপক্খিকসদ্ধম্মস্স সৰনধারণাদীসু অনিচ্ছা সদ্ধম্মং অসোতুকম্যতা নাম. পরস্স দোসারোপনে রন্ধগৰেসিতাসঙ্খাতো উপারম্ভোৰ উপারম্ভচিত্ততা নাম. মুট্ঠস্সচ্চত্তিকে উদ্ধচ্চং চেতসো ৰিক্খেপো নাম. অযোনিসোমনসিকারত্তিকে ‘‘অনিচ্চে নিচ্চ’’ন্তিআদিনা, সচ্চপটিপক্খৰসেন ৰা অনুপাযমনসিকারসঙ্খাতং আৰজ্জনচিত্তং অযোনিসোমনসিকারো নাম. মিচ্ছাদিট্ঠিমিচ্ছাসঙ্কপ্পাদযো অট্ঠ মিচ্ছামগ্গা কুম্মগ্গো নাম, মিচ্ছামগ্গস্স আসেৰনা কুম্মগ্গসেৰনা নাম. থিনমিদ্ধং চেতসো চ লীনত্তং নাম. তিকং.

চতুক্কেসু চীৰরাদীসু চতূসু পচ্চযেসু ‘‘কত্থ মনাপং লভিস্সামী’’তি তণ্হায উপ্পাদো চত্তারো তণ্হুপ্পাদা নাম. ন গচ্ছন্তি এতাহি অরিযাতি অগতিযো, ছন্দদোসমোহভযা. তা হি অগন্তব্বমগ্গগমনানি অকত্তব্বকরণানি চত্তারি অগতিগমনানি নাম. তত্থ ছন্দোতি পক্খপাতরাগো. ভযন্তি তথাপৰত্তো দোসো. অনিচ্চাদীসু ‘‘নিচ্চং সুখং অত্তা সুভ’’ন্তি এৰং পৰত্তা চত্তারো ৰিপরিযাসা ৰিপরীততো ধম্মে এসনতো. তেসু ৰা আসনতো পৰিসনতো চত্তারো ৰিপরিযাসা নাম. তে সঞ্ঞাচিত্তদিট্ঠিৰিপরিযাসৰসেন পচ্চেকং তযো তযো হুত্ৰা দ্ৰাদস হোন্তি. তেসু অনিচ্চে নিচ্চং, অনত্তনি অত্তাতি সঞ্ঞাচিত্তদিট্ঠিৰিপরিযাসা ছ, দুক্খে সুখং, অসুভে সুভন্তি দিট্ঠিৰিপরিযাসা দ্ৰে চাতি অট্ঠ সোতাপত্তিমগ্গেন পহীযন্তি, অসুভে সুভন্তি সঞ্ঞাচিত্তৰিপরিযাসা দ্ৰে অনাগামিমগ্গেন, দুক্খে সুখন্তি সঞ্ঞাচিত্তৰিপরিযাসা দ্ৰে অরহত্তমগ্গেনাতি ৰেদিতব্বা.

অদিট্ঠে ¶ ¶ দিট্ঠং, অসুতে সুতং, অমুতে মুতং, অৰিঞ্ঞাতে ৰিঞ্ঞাতন্তি এৰং পৰত্তা চত্তারো অনরিযৰোহারা নাম. দিট্ঠাদীসু পন অদিট্ঠং অসুতং অমুতং অৰিঞ্ঞাতন্তি এৰং পৰত্তা অপরেপি চত্তারো অনরিযৰোহারা নাম. ইমে চ পুরিমেহি সদ্ধিং অট্ঠ অনরিযৰোহারাতিপি ৰুচ্চন্তি. পাণাতিপাতঅদিন্নাদানকামেসুমিচ্ছাচারমুসাৰাদা চত্তারি দুচ্চরিতানি নাম. মুসাৰাদাদিৰচীদুচ্চরিতানি অপরানিপি চত্তারি ৰচীদুচ্চরিতানি নাম. জাতিজরাব্যাধিমরণভযানি চত্তারি ভযানি নাম. রাজচোরঅগ্গিউদকভযানি চত্তারি, সমুদ্দং ওরোহন্তস্স পন উপ্পজ্জনকানি ঊমিকুম্ভীলআৰট্টসুসুকাভযানি চ চত্তারি, অত্তানুৰাদপরানুৰাদদণ্ডদুগ্গতিভযানি চত্তারি চাতি ইমানি ৰা অপরানি তীণি চতুক্কানি চত্তারি ভযানি নাম. তত্থ সুসুকাতি চণ্ডমচ্ছা. সব্বানিপি চেতানি ভযানি পটিঘচিত্তানীতি ৰেদিতব্বানি. সব্বং সুখদুক্খাদিকং সযংকতং পরংকতং উভযকতং অধিচ্চসমুপ্পন্নন্তি এৰং উপ্পজ্জমানা ইমা চতস্সো দিট্ঠিযো নাম. চতুক্কং.

পঞ্চকেসু পঞ্চোরম্ভাগিযাতিআদীসু ওরং ৰুচ্চতি কামধাতু হেট্ঠাভাৰতো, তত্থ উপপত্তিনিপ্ফাদনতো তং ওরং ভজন্তীতি সক্কাযদিট্ঠিৰিচিকিচ্ছাসীলব্বতপরামাসকামরাগপটিঘা পঞ্চ ওরম্ভাগিযসংযোজনানি নাম. উদ্ধন্তি রূপারূপধাতু উপরিভাৰতো, তং ৰুত্তনযেন ভজন্তীতি রূপরাগঅরূপরাগমানউদ্ধচ্চঅৰিজ্জা পঞ্চ উদ্ধম্ভাগিযসংযোজনানি নাম. রাগদোসমোহমানদিট্ঠিযো পঞ্চ লগ্গনট্ঠেন সঙ্গা নাম. তে এৰ পঞ্চ অনুপৰিসনট্ঠেন, তুদনট্ঠেন চ পঞ্চ সল্লা নাম. সত্থুধম্মসঙ্ঘসিক্খাসু কঙ্খনানি চত্তারি, সব্রহ্মচারীসু কুপিতচিত্ততা চাতি ইমে পঞ্চ চিত্তস্স থদ্ধকচৰরখাণুকভাৰকরণত্তা চেতোখিলা নাম. কামেসু অৰীতরাগো. কাযে…পে… রূপে…পে… যাৰদত্থং ভুঞ্জিত্ৰা সেয্যসুখং ¶ পস্সসুখং মিদ্ধসুখং অনুযুত্তো ৰিহরতি, অঞ্ঞতরং দেৰনিকাযং পণিধায ব্রহ্মচরিযং চরতীতি এৰং পৰত্তা পঞ্চ ধম্মা চিত্তং বন্ধিত্ৰা মুট্ঠিযং কত্ৰা ৰিয গহণতো চেতসোৰিনিবন্ধা নাম. তত্থ কাযেতি অজ্ঝত্তিকে কাযে, রূপেতি বহিদ্ধারূপে. সঞ্ঞী অত্তা, অসঞ্ঞী অত্তা, নেৰসঞ্ঞীনাসঞ্ঞী অত্তা, সংৰিজ্জমানো পন অত্তা উচ্ছিজ্জতি, দিট্ঠধম্মনিব্বানং ৰা পাপুণাতীতি এৰং পৰত্তা পঞ্চ দিট্ঠিযো নাম.

পাণাতিপাতাদিমজ্জপানপরিযোসানা পঞ্চ ৰেরকরণট্ঠেন ৰেরা নাম. ঞাতিভোগরোগসীলদিট্ঠিব্যসনানি পঞ্চ ব্যসনা নাম. তত্থ ব্যসনাতি ৰিনাসসহজাতা, ততো উপ্পন্না অকুসলা ¶ . বহুজনস্স অপ্পিযতা, ৰেরবহুলতা, ৰজ্জবহুলতা, সম্মূল়্হমরণং, অপাযগমনন্তি ইমে পঞ্চ অক্খন্তিযা আদীনৰা, অনধিৰাসনায দোসাতি অত্থো. আজীৰকভযং অসিলোকভযং পরিসসারজ্জভযং মরণভযং দুগ্গতিভযন্তি ইমানি পঞ্চ ভযানি নাম. যাৰদত্থং পঞ্চকামগুণপরিভোগেন চেৰ পঠমজ্ঝানাদীহি চতূহি ঝানেহি চাতি পঞ্চহি কারণেহি অত্তা পরমদিট্ঠধম্মনিব্বানপ্পত্তো হোতীতি পৰত্তা ৰাদা পঞ্চ দিট্ঠধম্মনিব্বানৰাদা নাম. পঞ্চকং.

ছক্কেসু পন কোধো মক্খো ইস্সা সাঠেয্যং পাপিচ্ছতা সন্দিট্ঠিপরামাসিতাতি ইমানি ছ ৰিৰাদমূলানি. মনাপিযেসু রূপাদীসু ছসু আরম্মণেসু ছন্দরাগোতি ইমে ছ ছন্দরাগা গেহসিতা ধম্মা নাম. অমনাপিযেসু ছসু আরম্মণেসু পটিঘো ছ ৰিরোধৰত্থূনি নাম. ৰিরোধো এৰ ৰত্থু ৰিরোধৰত্থু. ছসু আরম্মণেসু তণ্হাৰ ছ তণ্হাকাযা নাম. সত্থুধম্মসঙ্ঘসিক্খাসু, অপ্পমাদে, পটিসন্থারে চ অগারৰা ছ অগারৰা নাম. কম্মারামতা, ভস্সনিদ্দাসঙ্গণিকসংসগ্গপপঞ্চারামতা চ ছ পরিহানিযা ধম্মা নাম, পরিহানিকরাতি অত্থো. তত্থ সৰনদস্সনসমুল্লপনপরিভোগকাযসংসগ্গেসু ¶ পঞ্চসু যুত্তপযুত্ততা সংসগ্গারামতা. তণ্হামানদিট্ঠিপপঞ্চেসু যুত্তপযুত্ততা পপঞ্চারামতাতি ৰেদিতব্বং. কম্মভস্সনিদ্দাসঙ্গণিকারামতা চত্তারো, দোৰচস্সতা, পাপমিত্ততা দ্ৰে চাতি ইমে অপরেপি ছ পরিহানিযা ধম্মা নাম.

সোমনস্সট্ঠানিযেসু রূপাদীসু ছসু আরম্মণেসু উপ্পন্না গেহসিতসোমনস্সসম্পযুত্তা ৰিচারা সোমনস্সুপৰিচারা নাম, ৰিতক্কাদযো ধম্মা, তংসম্পযুত্তা চাতি গহেতব্বা. এস নযো ইতরদ্ৰযেপি. অঞ্ঞাণসহিতা পনেত্থ ৰেদনুপেক্খা উপেক্খাতি ৰেদিতব্বা, যা ‘‘অঞ্ঞাণুপেক্খা’’তিপি ৰুচ্চতি. ইট্ঠানিট্ঠমজ্ঝত্তেসু ছসু আরম্মণেসু যথাক্কমং উপ্পন্না ৰেদনা ‘‘ছ গেহসিতানি সোমনস্সানী’’তিআদিনা ছক্কত্তযেন ৰুত্তা. ‘‘অত্থি মে অত্তা’’তি ৰা, ‘‘নত্থি মে অত্তা’’তি ৰা, ‘‘অত্তনা ৰা অত্তানং সঞ্জানামী’’তি ৰা, ‘‘অত্তনা ৰা অনত্তানং সঞ্জানামী’’তি ৰা, ‘‘অত্তনা ৰা অত্তানং সঞ্জানামী’’তি ৰা, ‘‘সো মে অযং অত্তা কারকো ৰেদকো নিচ্চো ধুৰো’’তি এৰং উপ্পজ্জমানা ইমা ছ দিট্ঠিযো নাম. তত্থ অত্থীতি সস্সতদিট্ঠি. নত্থীতি উচ্ছেদদিট্ঠি. পঞ্চপি খন্ধে ‘‘অত্তা’’তি গহেত্ৰা সঞ্ঞাক্খন্ধেন সেসানং জাননৰসেন অত্তনা ৰা অত্তানং সঞ্জানামীতি দিট্ঠি, সঞ্ঞাক্খন্ধং পন ‘‘অত্তা’’তি, ইতরে চ ‘‘অনত্তা’’তি গহেত্ৰা অত্তনা ৰা অনত্তানং সঞ্জানামীতি দিট্ঠি, সঞ্ঞাক্খন্ধং ¶ পন ‘‘অনত্তা’’তি, ইতরে চ ‘‘অত্তা’’তি গহেত্ৰা অনত্তনা ৰা অত্তানং সঞ্জানামীতি দিট্ঠি চ ৰেদিতব্বা. ছক্কং.

সত্তকেসু পন কামরাগপটিঘমানদিট্ঠিৰিচিকিচ্ছাভৰরাগঅৰিজ্জা সত্ত থামগতট্ঠেন, অপ্পহীনট্ঠেন চ চিত্তসন্তানে অনু অনু সযনতো অনুসযা নাম. তে এৰ সত্তে ৰট্টস্মিং সংযোজনতো সংযোজনানি. সমুদাচারৰসেন পরিযুট্ঠানতো পরিযুট্ঠানাতি ৰেদিতব্বা. অস্সদ্ধিযং ¶ অহিরিকং অনোত্তপ্পং অপ্পস্সুততা কোসজ্জং মুট্ঠস্সচ্চং দুপ্পঞ্ঞতাতি ইমে সত্ত অসতং অসপ্পুরিসানং, অসন্তা ৰা লামকা ধম্মাতি অসদ্ধম্মা নাম. পাণাতিপাতাদযো কাযৰচীদুচ্চরিতানি সত্ত দুচ্চরিতানি নাম. মানো অতিমানো মানাতিমানো ওমানো অধিমানো অস্মিমানো মিচ্ছামানোতি ইমে সত্ত মানা নাম. ‘‘মনুস্সলোকে মাতাপেত্তিকসম্ভৰো অত্তা উচ্ছিজ্জতি, তথা ছসু দেৰলোকেসু দিব্বো কবল়ীকারভক্খো অত্তা, রূপলোকে রূপী মনোমযো অত্তা, চতূসু অরূপভৰেসু চতুব্বিধো অরূপী অত্তা তত্থ তত্থ উচ্ছিজ্জতি ৰিনস্সতি ন হোতি পরং মরণা’’তি এৰং পৰত্তা সত্ত উচ্ছেদদিট্ঠিযো সত্ত দিট্ঠিযো নাম. এত্থ চ আদিতো তিস্সো দিট্ঠিযো রূপক্খন্ধং অত্ততো গহেত্ৰা পৰত্তা উচ্ছেদদিট্ঠিযো, সেসা চতস্সো অরূপক্খন্ধেতি ঞাতব্বা. সত্তকং.

অট্ঠকেসু পন লোভো দোসো মোহো মানো দিট্ঠি ৰিচিকিচ্ছা থিনং উদ্ধচ্চঞ্চাতি অট্ঠ কিলেসৰত্থূনি নাম. ‘‘যং কিঞ্চি কম্মং কত্তব্বং মে’’তি একং, তথা ‘‘কতং মে’’তি, ‘‘মগ্গো মে গন্তব্বো’’তি, ‘‘গতো’’তি, ‘‘অপ্পকং মে ভুত্ত’’ন্তি, ‘‘সুভুত্ত’’ন্তি, ‘‘আবাধো মে উপ্পন্নো’’তি, ‘‘অচিরৰুট্ঠিতো গেলঞ্ঞা’’তি একন্তি ইমানি অট্ঠ কুসীতৰত্থূনি নাম, কুসীতস্স কোসজ্জকারণানীতি অত্থো. লাভে অলাভে চ যসে অযসে চ পসংসায নিন্দায চ সুখে দুক্খে চ যথাক্কমং রাগদোসেহি চিত্তস্স পটিহননং অট্ঠসু লোকধম্মেসু চিত্তস্স পটিঘাতো নাম. হেট্ঠা দ্ৰীহি চতুক্কেহি ৰুত্তা অট্ঠ অনরিযৰোহারা নাম. মিচ্ছাদিট্ঠিমিচ্ছাসঙ্কপ্পাদযো অট্ঠ মিচ্ছত্তা নাম. ভিক্খূহি ৰিজ্জমানায আপত্তিযা চোদিযমানস্স ‘‘ন সরামী’’তি নিব্বেঠনং একং, ‘‘ত্ৰং বালো’’তিআদিনা ¶ চোদকপটিপ্ফরণং একং, তথা ‘‘তুৰং চেতমাপন্নো’’তি চোদকস্স পচ্চারোপনং, অঞ্ঞেনঞ্ঞং পটিচরণং, সঙ্ঘে বাহাৰিক্খেপভণনং, তুণ্হীভাৰেন ৰিহেঠনং, সঙ্ঘং, চোদকঞ্চ অনাদিযিত্ৰা পক্কমনং, চোদনাভযা সিক্খাপচ্চক্খানন্তি ইমে অট্ঠ পুরিসদোসা নাম. অসঞ্ঞী অত্তা রূপী, অরূপী ¶ , রূপী চ অরূপী চ, নেৰরূপীনারূপী, অন্তৰা, অনন্তৰা, অন্তৰা চ অনন্তৰা চ, নেৰন্তৰানানন্তৰাতি এৰং পৰত্তা অট্ঠ অসঞ্ঞীৰাদা নাম. নেৰসঞ্ঞীনাসঞ্ঞী অত্তা রূপী অরূপীতিআদিনা পৰত্তা অট্ঠ নেৰসঞ্ঞীনাসঞ্ঞীৰাদা নাম. অট্ঠকং.

নৰকেসু পন ‘‘অনত্থং মে অচরি, চরতি, চরিস্সতি, পিযস্স মে অনত্থং অচরি, চরতি, চরিস্সতি, অপ্পিযস্স মে অত্থং অচরি, চরতি, চরিস্সতী’’তি এৰং পৰত্তা নৰ আঘাতা এৰ আঘাতৰত্থূনি নাম. কোধো মক্খো ইস্সা মচ্ছরিযং মাযা সাঠেয্যং মুসাৰাদো পাপিচ্ছতা মিচ্ছাদিট্ঠীতি ইমানি নৰ পুরিসমলানি নাম. ‘‘সেয্যস্স সেয্যোহমস্মী’’তিআদযো নৰৰিধা মানা নাম. ‘‘তণ্হং পটিচ্চ পরিযেসনা, পরিযেসনং পটিচ্চ লাভো, তং পটিচ্চ ৰিনিচ্ছযো, তং পটিচ্চ ছন্দরাগো, তং পটিচ্চ অজ্ঝোসানং, তথা পরিগ্গহো, মচ্ছরিযং, আরক্খো, আরক্খাধিকরণং দণ্ডাদানসত্থাদানকলহৰিগ্গহৰিৰাদাদিঅনেকে পাপকা ধম্মা’’তি এৰং ৰুত্তা ইমে নৰ তণ্হামূলকা ধম্মা নাম. তত্থ ৰিনিচ্ছযোতি ঞাণতণ্হাদিট্ঠিৰিতক্কৰসেন চতূসু ৰিনিচ্ছযেসু ৰিতক্কৰিনিচ্ছযো ইধ অধিপ্পেতো. লাভং হি লভিত্ৰা ‘‘ইদং রূপারম্মণত্থায, ইদং সদ্দারম্মণাদিঅত্থাযা’’তি এৰং ৰিতক্কেনেৰ ৰিনিচ্ছযো. ছন্দরাগো দুব্বলরাগো, অজ্ঝোসানন্তি বলৰসন্নিট্ঠানং. পরিগ্গহোতি তণ্হাদিট্ঠিৰসেন পরিগ্গহকরণন্তি ৰেদিতব্বং. ‘‘অস্মী’’তি, ‘‘অহমস্মী’’তি, ‘‘অযমহমস্মী’’তি, ‘‘ভৰিস্স’’ন্তি, ‘‘রূপী ভৰিস্স’’ন্তি, ‘‘অরূপী ভৰিস্স’’ন্তি, ‘‘সঞ্ঞী ভৰিস্স’’ন্তি, ‘‘অসঞ্ঞী ¶ ভৰিস্স’’ন্তি, ‘‘নেৰসঞ্ঞীনাসঞ্ঞী ভৰিস্স’’ন্তি এৰং ৰুত্তানি ইমানি নৰ চলনট্ঠেন ইঞ্জিতানি নাম. ইমানেৰ মঞ্ঞনট্ঠেন মঞ্ঞিতানি, ৰিপ্ফন্দনতো ৰিপ্ফন্দিতানি, পপঞ্চনতো পপঞ্চিতানি, তানেৰ তেহি তেহি কারণেহি সঙ্খতত্তা সঙ্খতানি চ নাম হোন্তি. সব্বেহি তেহি পঞ্চহি নৰকেহি মানো এৰ কথিতো. সোপি হি ‘‘অস্মী’’তিআদীহি সঞ্ঞীহি চ আকারেহি দিট্ঠি ৰিয পৰত্ততীতি. নৰকং.

দসকেসু পন লোভো দোসো মোহো মানো দিট্ঠি ৰিচিকিচ্ছা থিনং উদ্ধচ্চং অহিরিকং অনোত্তপ্পন্তি ইমে দস কিলেসা এৰ কিলেসৰত্থূনি নাম. ‘‘অনত্থং মে অচরী’’তিআদযো নৰ খাণুকণ্টকাদীসু অট্ঠানআঘাতেন সদ্ধিং দস আঘাতৰত্থূনি নাম. পাণাতিপাতাদযো দস অকুসলকম্মপথা নাম. কামরাগসংযোজনং পটিঘমানদিট্ঠিৰিচিকিচ্ছাসীলব্বতপরামাসভৰরাগইস্সামচ্ছরিযঅৰিজ্জাসংযোজনন্তি ইমানি দস সংযোজনানি নাম. মিচ্ছাদিট্ঠিমিচ্ছাসঙ্কপ্পাদযো ¶ অট্ঠ, মিচ্ছাঞাণমিচ্ছাৰিমুত্তীহি সদ্ধিং দস মিচ্ছত্তা নাম. তত্থ মিচ্ছাঞাণন্তি পাপকিরিযাসু উপাযচিন্তাৰসেন চেৰ পাপকং কত্ৰা ‘‘সুকতং মযা’’তি পচ্চৰেক্খণৰসেন চ পৰত্তো মোহো. মিচ্ছাৰিমুত্তীতি অৰিমুত্তস্সেৰ সতো ৰিমুত্তসঞ্ঞিতা. ‘‘নত্থি দিন্নং, নত্থি যিট্ঠ’’ন্তিআদীহি দসহি আকারেহি পৰত্তং নত্থিকদস্সনং দসৰত্থুকা মিচ্ছাদিট্ঠি নাম. ‘‘সস্সতো লোকো, তথা অসস্সতো, অন্তৰা, অনন্তৰা, তং জীৰং তং সরীর’’ন্তি ৰা, ‘‘অঞ্ঞং জীৰং অঞ্ঞং সরীর’’ন্তি ৰা, ‘‘হোতি তথাগতো পরং মরণা’’তি ৰা, ‘‘ন হোতি…পে… হোতি চ ন হোতি চ, নেৰ হোতি ন ন হোতি তথাগতো পরং মরণা’’তি ৰা এৰং পৰত্তা দসৰত্থুকা অন্তগ্গাহিকা দিট্ঠি নাম. তত্থ লোকোতি খন্ধাদযো, ‘‘অন্তৰা’’তি ইদং পরিত্তং কসিণজ্ঝানং সন্ধায ৰুত্তং. ‘‘অনন্তৰা’’তি ইদং ৰিপুলন্তি গহেতব্বং. তথাগতোতি সত্তো. দসকং.

অট্ঠারসকেসু ¶ তণ্হাৰিচরিতানীতি তণ্হাসমুদাচারা তণ্হাপৰত্তিযো. অজ্ঝত্তিকস্সুপাদাযাতি অজ্ঝত্তিকং খন্ধপঞ্চকং উপাদায. ইদং হি উপযোগত্থে সামিৰচনং. তত্থ ‘‘অস্মীতি হোতি, ইত্থস্মীতি হোতি, এৰস্মীতি হোতি, অঞ্ঞথাস্মীতি হোতি, তথা ভৰিস্সন্তি, ইত্থং ভৰিস্সন্তি, এৰং ভৰিস্সন্তি, অঞ্ঞথা ভৰিস্সন্তি হোতি, তথা অস্মীতি, সাতস্মীতি হোতি, তথা সিযন্তি, ইত্থং সিযন্তি, এৰং সিযন্তি, অঞ্ঞথা সিযন্তি হোতি, তথা অপাহং সিযন্তি, অপাহং ইত্থং সিযন্তি, অপাহং এৰং সিযন্তি, অপাহং অঞ্ঞতা সিযন্তি হোতী’’তি এৰং ৰুত্তানি ইমানি অজ্ঝত্তিকস্সুপাদায অট্ঠারস তণ্হাৰিচরিতানি নাম.

তত্থ অস্মীতি হোতীতি অজ্ঝত্তিকেসু খন্ধপঞ্চকেসু সমূহতো ‘‘অহমস্মী’’তি গহণে সতীতি অত্থো. এৰং পন গহণে সতি ততো পরং অনুপনিধায, উপনিধায ৰাতি দ্ৰিধা গহণং হোতি. তত্থ অনুপনিধাযাতি অঞ্ঞং আকারং অনুপনিধায অনুপগম্ম সকভাৰমেৰারম্মণং কত্ৰা ইত্থস্মীতি হোতি. তস্স ‘‘খত্তিযাদীসু ইদংপকারো অহ’’ন্তি তণ্হামানদিট্ঠিৰসেন গহণং হোতীতি অত্থো. উপনিধায গহণং পন দুৰিধং হোতি সমতো চ অসমতো চ. তত্থ সমতো গহণং এৰস্মীতি ইদং, তস্স যথা অযং খত্তিযো, ব্রাহ্মণাদযো ৰা দেৰমনুস্সরূপীঅরূপিআদযো ৰা, এৰমহমস্মীতি অত্থো. অঞ্ঞথাস্মীতি ইদং পন অসমতো গহণং, তস্স যথা ইমে খত্তিযাদযো, ততো অঞ্ঞথা অহং হীনো ৰা অধিকো ৰাতি অত্থো. ইমানি তাৰ পচ্চুপ্পন্নৰসেন চত্তারি তণ্হাৰিচরিতানি, ভৰিস্সন্তিআদীনি পন চত্তারি অনাগতৰসেন ¶ ৰুত্তানি. তেসং পুরিমচতুক্কে ৰুত্তনযৰসেন অত্থো ৰেদিতব্বো. তত্থ অস্মীতিআদিদ্ৰযং সস্সতুচ্ছেদগ্গাহৰসেন ৰুত্তং. তত্থ হি অস্মীতি সস্সতং, সীদতীতি সাতং, অসস্সতং, ইতো পরানি ¶ সিযন্তিআদীনি চত্তারি সংসযপরিৰিতক্কৰসেন ৰুত্তানি. অপাহং সিযন্তিআদীনি চত্তারি ‘‘অপি নামাহং ভৰেয্য’’ন্তি এৰং পৰত্তপত্থনাকপ্পনৰসেন ৰুত্তানীতি দট্ঠব্বং. অট্ঠারসকং পঠমং.

দুতিযে বাহিরস্সুপাদাযাতি বাহিরং খন্ধপঞ্চকং উপাদায. তত্থ ‘‘ইমিনা অস্মীতি হোতি, ইমিনা ইত্থস্মীতি হোতি, ইমিনা এৰস্মীতি হোতি, ইমিনা অঞ্ঞথাস্মীতি হোতী’’তিআদিনা অনন্তরে ৰুত্তনযেন বাহিরস্সুপাদায অট্ঠারস তণ্হাৰিচরিতানীতি ৰেদিতব্বানি. ‘‘ইমিনা’’তি পদমত্তমেৰ হেত্থ পুরিমেহি ৰিসেসো. তত্থ ইমিনাতি ইমিনা বাহিরেন রূপেন ৰা…পে… ৰিঞ্ঞাণেন ৰাতি অত্থো. তত্থ চ ছত্তখগ্গবীজনিঅন্নপানধনধঞ্ঞাদিউপকরণৰসেন বাহিরং রূপং ৰেদিতব্বং. দাসদাসিঞাতিপরিজনহত্থিঅস্সাদিউপকরণৰসেন ৰেদনাদযো ৰেদিতব্বা. ইমেহি বাহিরেহি রূপাদীহি ‘‘ইত্থস্মীতি এৰস্মী’’তিআদিনা সব্বত্থ যোজনা ৰেদিতব্বা. অট্ঠারসকং দুতিযং.

ইতরেসু পন তদেকজ্ঝং অভিসংযূহিত্ৰাতিআদীসু তদুভযং অট্ঠারসকং একতো যোজেত্ৰা ছত্তিংসতণ্হাৰিচরিতানি হোন্তি, এৰং একেকস্স পুগ্গলস্স অতীতকালে দ্ৰিন্নং অট্ঠারসকানং ৰসেন ছত্তিংস, তথা অনাগতে ছত্তিংস হোন্তি. পচ্চুপ্পন্নে পন একস্স যথালাভৰসেন তানিপি লব্ভন্তি, সব্বসত্তানং ৰসেন পচ্চুপ্পন্নেপি ছত্তিংস লব্ভন্তি. ইতি এৰং ৰুত্তেন পকারেন তং সব্বং একতো কত্ৰা সব্বসত্তানং কালত্তযেপি ছন্নং অট্ঠারসকানং ৰসেন অট্ঠসতং তণ্হাৰিচরিতানি হোন্তীতি অত্থো. অট্ঠতণ্হাৰিচরিতসতং হোতীতি এত্থাপি এৰমেৰ অত্থো দট্ঠব্বো.

তণ্হাৰিচরিতানি নিট্ঠিতানি.

যানি চাতিআদীসু যানি চেত্থ দ্ৰাসট্ঠি দিট্ঠিগতানি ৰত্তব্বানি, তানি ব্রহ্মজালনামকে দীঘনিকাযস্স পঠমসুত্তন্তে ¶ (দী. নি. ১.২৯ আদযো) সত্থারা সযং আহচ্চ ভাসিতানীতি অত্থো. ব্রহ্মজালে হি চত্তারো সস্সতৰাদা, চত্তারো একচ্চসস্সতিকা, চত্তারো অন্তানন্তিকা, চত্তারো অমরাৰিক্খেপিকা, দ্ৰে অধিচ্চসমুপ্পন্নিকা, সোল়স সঞ্ঞীৰাদা, অট্ঠ অসঞ্ঞীৰাদা ¶ , অট্ঠ নেৰসঞ্ঞীনাসঞ্ঞীৰাদা, সত্ত উচ্ছেদৰাদা, পঞ্চ দিট্ঠধম্মনিব্বানৰাদাতি ইমানি দ্ৰাসট্ঠি দিট্ঠিগতানি সনিদানানি নানানযতো ৰুত্তানি, তত্থ ৰুত্তনযেনেৰ নেসং ৰিভাগো ৰেদিতব্বো. অযং তাৰেত্থ পদত্থানুসারতো ৰিনিচ্ছযো, সেসোপেত্থ ৰিনিচ্ছযো পদত্থে ৰুত্তানুসারতোৰ সুৰিঞ্ঞেয্যোতি.

খুদ্দকৰত্থুৰিভঙ্গমাতিকত্থৰণ্ণনা নিট্ঠিতা.

ধম্মহদযৰিভঙ্গমাতিকত্থৰণ্ণনা

ধম্মহদযৰিভঙ্গমাতিকায পন পদত্থাদিতো ৰিনিচ্ছযো পুব্বে ৰুত্তোৰ. যস্মা পন ভগৰতা হেট্ঠা নানানযতো ৰিভত্তানঞ্ঞেৰ খন্ধাযতনাদীনং দ্ৰাদসন্নং ধম্মকোট্ঠাসানং পুন সব্বসঙ্গাহিকচতুভূমুপ্পত্তিতপ্পরিযাপন্নতাদীহি দসহি ৰারেহি অপুব্বনযসহস্সৰিভাৰকেহি সব্বধম্মাধিপ্পাযসঙ্খাতেহি ধম্মহদযেহি ৰিভাগদস্সনত্থমেৰাযং ৰিভঙ্গো ৰুত্তো, তস্মা ৰিভঙ্গনযতো চেত্থ ৰিনিচ্ছযো হোতি. ৰিভঙ্গে হি পঠমং ‘‘কতি খন্ধা’’তিআদিনা সপুচ্ছকং দ্ৰাদসপদিকং মাতিকং নিক্খিপিত্ৰা হেট্ঠা ৰুত্তানুসারেনেৰ চতুভূমকসামঞ্ঞতো সব্বসঙ্গাহিকৰারো নাম ৰিভত্তো, তত্থ সত্ত ফস্সাদযো সত্তন্নং ৰিঞ্ঞাণধাতূনং ৰসেন ৰেদিতব্বা.

দুতিযো ¶ পন ৰারো তেসং চতূসু ভূমীসু চতূহি কোট্ঠাসেহি উপ্পত্তানুপ্পত্তিদস্সনৰসেন পৰত্তো. তত্থ পঠমকোট্ঠাসে তাৰ –

‘‘কামধাতুযা কতি খন্ধা…পে… কতি চিত্তানি? কামধাতুযা পঞ্চক্খন্ধা, দ্ৰাদসাযতনানি, অট্ঠারস ধাতুযো, তীণি সচ্চানি, বাৰীসতিন্দ্রিযানি, নৰ হেতূ, চত্তারো আহারা, সত্ত ফস্সা, ৰেদনা, সঞ্ঞা, চেতনা, চিত্তানী’’তি –

মাতিকং নিক্খিপিত্ৰা ৰিভত্তা. তত্থ যস্মা চতুভূমকাপি ধম্মা যেভুয্যেন কামাৰচরসত্তানং উপ্পজ্জন্তি ¶ , ন কামাৰচরাৰ. তেনেত্থ ‘‘পঞ্চক্খন্ধা’’তিআদিনা চতুভূমকাপি ৰুত্তা. তত্থুপ্পজ্জনকধম্মা হেত্থ অধিপ্পেতা, ন তংভূমিপরিযাপন্নাৰ. রূপধাতুআদীসুপি এসেৰ নযো.

এত্থ চ তীণি সচ্চানীতি ইদং নিরোধসচ্চস্স দেসৰিনিমুত্ততায কত্থচি দেসে অনিদ্দিসিতব্বতো তং ৰজ্জেত্ৰা ৰুত্তং. কারণসাপেক্খা হি ধম্মা অত্তনো নিস্সযকারণভূতং দেসং সমাৰসন্তি অকারণস্স অনিস্সযত্তা, যথা ৰা কদাচি উপলব্ভমানা ধম্মা কালনিযততায অত্তনো সঙ্খতত্তংৰ সূচেন্তি. অঞ্ঞথা ইতরকালেসুপি ভাৰস্স চ পসঙ্গতো, এতরহিপি ৰা অভাৰস্স, এৰং ক্ৰচি দেসে উপলব্ভমানাপীতি গহেতব্বং. সব্বদেসঅব্যাপিতা পন অসঙ্খতস্স, সঙ্খতস্স ৰা অসম্ভৰতো এৰ নোপপজ্জতি, তস্মা দেসকালৰিনিমুত্তমেৰ অসঙ্খতন্তি গহেতব্বং.

দুতিযকোট্ঠাসে পন –

‘‘রূপধাতুযা পঞ্চক্খন্ধা, ছ আযতনানি, নৰ ধাতুযো, তীণি সচ্চানি, চুদ্দসিন্দ্রিযানি, অট্ঠ হেতূ, তযো ¶ আহারা, চত্তারো ফস্সা…পে… চত্তারি চিত্তানী’’তি –

মাতিকং নিক্খিপিত্ৰা ৰিভত্তা. যস্মা পন রূপীনং ঘানাদীনং অভাৰেন ৰিজ্জমানানিপি গন্ধাযতনাদীনি আযতনাদিকিচ্চং ন করোন্তি, তস্মা তে ৰজ্জেত্ৰা ‘‘ছ আযতনানি, নৰ ধাতুযো’’তিআদি ৰুত্তং ন তেসং অভাৰা. কেচি পন ‘‘রূপলোকে গন্ধরসা কবল়ীকারো আহারো চ মহাভূতানঞ্চ ফোট্ঠব্বকিচ্চতা নত্থি, তেনেৰ পাল়িযং ন উদ্ধটা’’তি ৰত্ৰা তং সাধেতুং বহুং হেতুপটিরূপকং ৰত্ৰা পপঞ্চেন্তি, তং তেসং মতিমত্তমেৰাতি ন গহেতব্বং. গন্ধাদীনং অৰিনিব্ভোগত্তা, ফোট্ঠব্বত্তা, ধাতুসভাৰত্তা চ ঘানাদিত্তযভাৰদ্ৰযসুখদুক্খদোমনস্সিন্দ্রিযানি, পন দোমনস্সহেতুকবল়ীকারাহারঘানাদিত্তযসম্ফস্সাদীনি চ ৰজ্জেত্ৰা চুদ্দসিন্দ্রিযাদিভাৰো ৰেদিতব্বো.

ততিযকোট্ঠাসে পন –

‘‘অরূপধাতুযা ¶ চত্তারো খন্ধা, দ্ৰে আযতনানি, দ্ৰে ধাতুযো, তীণি সচ্চানি, একাদসিন্দ্রিযানি, অট্ঠ হেতূ, তযো আহারা, একো ফস্সো…পে… একং চিত্ত’’ন্তি –

মাতিকং নিক্খিপিত্ৰা ৰিভত্তা. এত্থ চ চক্খুসোতঅনঞ্ঞাতঞ্ঞস্সামীতিন্দ্রিযানম্পি অভাৰা একাদসিন্দ্রিযানি ৰেদিতব্বানি.

চতুত্থকোট্ঠাসে পন –

‘‘অপরিযাপন্নে চত্তারো খন্ধা, দ্ৰে আযতনানি, দ্ৰে ধাতুযো, দ্ৰে সচ্চানি, দ্ৰাদসিন্দ্রিযানি, ছ হেতূ, তযো আহারা, একো ফস্সো…পে… একং চিত্ত’’ন্তি –

মাতিকং ¶ নিক্খিপিত্ৰা ৰিভত্তা. যস্মা চ ওকাসৰসেন ৰা সত্তুপ্পত্তিৰসেন ৰা অপরিযাপন্নধাতু নাম নত্থি, তস্মা ‘‘অপরিযাপন্নধাতুযা’’তি অৰত্ৰা নিব্বত্তিতলোকুত্তরমেৰ দস্সেতুং ‘‘অপরিযাপন্নে চত্তারো খন্ধা’’তিআদি ৰুত্তং. এৰং চতূহি কোট্ঠাসেহি দুতিযো ৰারো ৰেদিতব্বো.

ততিযো পন ৰারো –

‘‘রূপক্খন্ধো কামধাতুপরিযাপন্নো, চত্তারো খন্ধা সিযা কামধাতুপরিযাপন্না, সিযা ন কামধাতুপরিযাপন্না’’তিআদিনা –

চতূসু ভূমীসু চতূহি কোট্ঠাসেহি তংতংভূমিপরিযাপন্নধম্মদস্সনৰসেন পৰত্তো, সো চ হেট্ঠা ৰুত্তানুসারেন সক্কা ঞাতুন্তি ন ৰিত্থারিতো. তত্থ চ কামধাতুপরিযাপন্নোতি কামাৰচরভাৰেন তত্থ অন্তোগধো কামাৰচরোতি অত্থো. সেসেসুপি এসেৰ নযো.

চতুত্থো পন ৰারো তীসু ভূমীসু চতূহি কোট্ঠাসেহি পটিসন্ধিক্খণে উপ্পজ্জনকানুপ্পজ্জনকধম্মদস্সনৰসেন পৰত্তো. তত্থ পঠমকোট্ঠাসে তাৰ –

‘‘কামধাতুযা ¶ উপপত্তিক্খণে সব্বেসং পঞ্চক্খন্ধা পাতুভৰন্তি, কস্সচি একাদসাযতনানি পাতুভৰন্তি, কস্সচি দসাযতনানি পাতুভৰন্তি, কস্সচি অপরানি দস, কস্সচি নৰ, কস্সচি সত্ত, কস্সচি একাদস ধাতুযো…পে… সত্ত ধাতুযো. সব্বেসং একং সচ্চং পাতুভৰতি. কস্সচি চুদ্দসিন্দ্রিযানি, কস্সচি তেরস, কস্সচি অপরানি তেরস, কস্সচি দ্ৰাদস, কস্সচি দস, কস্সচি নৰ, কস্সচি অপরানি নৰ, কস্সচি অট্ঠ, কস্সচি অপরানি অট্ঠ, কস্সচি সত্ত ¶ , কস্সচি পঞ্চ, কস্সচি চত্তারিন্দ্রিযানি পাতুভৰন্তি, কস্সচি তযো হেতূ পাতুভৰন্তি, কস্সচি দ্ৰে, কস্সচি অহেতুকা পাতুভৰন্তি. সব্বেসং চত্তারো আহারা, একো ফস্সো…পে… একং চিত্তং পাতুভৰতী’’তি –

মাতিকং নিক্খিপিত্ৰা ৰিভত্তা. তত্থ পটিসন্ধিক্খণে কামাৰচরানং ওপপাতিকানং, আপাযিকানং, দেৰমনুস্সানং পরিপুণ্ণাযতনানং সদ্দাযতনৰজ্জিতানি একাদসাযতনানি পাতুভৰন্তি, তানেৰ একাদস ধাতুযো হোন্তি. সদ্দো হি একন্তেন পটিসন্ধিযং ন উপ্পজ্জতি, তেসঞ্ঞেৰ পন জচ্চন্ধানং দস, জচ্চবধিরানং অপরানি দস, জচ্চন্ধবধিরানং নৰ, গব্ভসেয্যকানং রূপগন্ধরসকাযফোট্ঠব্বমনোধম্মৰসেন সত্ত আযতনধাতুযো পাতুভৰন্তি. ওপপাতিকানং তিহেতুকানং মনচ্ছট্ঠানি ইন্দ্রিযানি, ভাৰদ্ৰযে একং, জীৰিতিন্দ্রিযং, সোমনস্সুপেক্খিন্দ্রিযেসু একং, সদ্ধাদীনি পঞ্চাতি চুদ্দসিন্দ্রিযানি, তেসং দ্ৰিহেতুকানং পঞ্ঞিন্দ্রিযং ৰজ্জেত্ৰা তেরস, পঠমকপ্পিকানং মনুস্সানং তিহেতুকানং ভাৰিন্দ্রিযং ৰজ্জেত্ৰা অপরানিপি তেরস, তেসঞ্ঞেৰ দুহেতুকানং দ্ৰাদস, গব্ভসেয্যকানং পন তিহেতুকানং পুরিমেসু চুদ্দসসু চক্খাদীনি চত্তারি ৰজ্জেত্ৰা দস, তেসং দুহেতুকানং নৰ, ওপপাতিকানং অহেতুকানং পরিপুণ্ণাযতনানং পুরিমেসু চুদ্দসসু সদ্দাদীনি ৰজ্জেত্ৰা অপরানি নৰ, তেসঞ্ঞেৰ জচ্চন্ধানং অট্ঠ, তথা বধিরানং, অন্ধবধিরানং পন সত্ত, গব্ভসেয্যকানং পন অহেতুকানং কাযমনোভাৰজীৰিতউপেক্খিন্দ্রিযানি পঞ্চ, তেসঞ্ঞেৰ নপুংসকানং চত্তারি পাতুভৰন্তি. অহেতুকচিত্তেসু হি ৰিজ্জমানাপি একগ্গতা সমাধিন্দ্রিযতং ন গচ্ছতি, মনোৰিঞ্ঞাণধাতুৰসেন পন ‘‘একো ফস্সো’’তিআদযো ৰেদিতব্বা.

দুতিযকোট্ঠাসে ¶ পন –

‘‘রূপধাতুযা ¶ উপপত্তিক্খণে ঠপেত্ৰা অসঞ্ঞসত্তানং দেৰানং পঞ্চক্খন্ধা পাতুভৰন্তি. পঞ্চাযতনানি, পঞ্চ ধাতুযো, একং সচ্চং, দসিন্দ্রিযানি, তযো হেতূ, তযো আহারা, একো ফস্সো…পে… একং চিত্ত’’ন্তি –

মাতিকং নিক্খিপিত্ৰা ৰিভত্তা. তত্থ চক্খুরূপসোতমনোধম্মানং ৰসেন পঞ্চাযতনধাতুযো ৰেদিতব্বা. এত্থাপি গন্ধরসফোট্ঠব্বানং অগ্গহণে কারণং পুব্বে ৰুত্তমেৰ. চক্খুসোতমনোজীৰিতিন্দ্রিযানি, সোমনস্সুপেক্খানং অঞ্ঞতরং, সদ্ধাদীনি পঞ্চাতি দসিন্দ্রিযানি ৰেদিতব্বানি.

ততিযকোট্ঠাসে পন –

‘‘অসঞ্ঞসত্তানং দেৰানং উপপত্তিক্খণে একো খন্ধো পাতুভৰতি রূপক্খন্ধো, দ্ৰে আযতনানি রূপাযতনং ধম্মাযতনং, দ্ৰে ধাতুযো রূপধাতু ধম্মধাতু, একং দুক্খসচ্চং, একং রূপজীৰিতিন্দ্রিযং, অসঞ্ঞসত্তা দেৰা অহেতুকা, অনাহারা, অফস্সকা…পে… অচিত্তকা’’তি –

সনিদ্দেসমাতিকা নিক্খিত্তা. এত্থ চ রূপম্পি কিঞ্চাপি তেসং আযতনাদিকিচ্চং ন করোতি, সৰিঞ্ঞাণকরূপীসু পন গহিতত্তা ইধাপি গহিতং. গন্ধাদযো পন তত্থ ন গহিতত্তা ইধাপি ন গহিতা, নো অৰিজ্জমানতায. একতলৰাসিকানং ৰা সেসব্রহ্মানং চক্খুৰিসযত্তা ইধাপি রূপাযতনং উদ্ধটং, অসঞ্ঞীনং পন পঞ্চাযতনানি, একো আহারো উপ্পজ্জতীতি ৰেদিতব্বং.

চতুত্থকোট্ঠাসে –

‘‘অরূপধাতুযা উপপত্তিক্খণে চত্তারো খন্ধা, দ্ৰে আযতনানি, দ্ৰে ধাতুযো, একং সচ্চং, অট্ঠিন্দ্রিযানি ¶ , তযো হেতূ, তযো আহারা, একো ফস্সো…পে… একং চিত্ত’’ন্তি –

মাতিকাপদানি নিক্খিপিত্ৰা ৰিভত্তা. এত্থ চ মনোজীৰিতউপেক্খিন্দ্রিযানি, সদ্ধাদীনি পঞ্চাতি ¶ অট্ঠিন্দ্রিযানি ৰেদিতব্বানি. সেসং সুৰিঞ্ঞেয্যমেৰ. এৰং চতূহি কোট্ঠাসেহি চতুত্থো ৰারো ৰেদিতব্বো.

পঞ্চমো পন ৰারো তেসং ধম্মানং ভূমন্তরৰসেন ‘‘কামাৰচরধম্মা, ন কামাৰচরা…পে… পরিযাপন্না’’তি চত্তারো দুকে মাতিকাৰসেন নিক্খিপিত্ৰা ৰিভজনৰসেন পৰত্তো, সো হেট্ঠা ৰুত্তত্থোৰ.

ছট্ঠো পন ৰারো সম্মুতিদেৰউপপত্তিদেৰৰিসুদ্ধিদেৰে নিদ্দিসিত্ৰা মনুস্সদেৰগতীসু উপ্পাদককম্মআযুপ্পমাণদস্সনৰসেন ৰুত্তো. তত্থাযং সঙ্খেপত্থো – সত্তা হি দানসীলাদিকামাৰচরকুসলং কত্ৰা মনুস্সলোকে খত্তিযমহাসালাদিকুলেসু চেৰ চাতুমহারাজিকতাৰতিংসযামতুসিতনিম্মানরতিপরনিম্মিতৰসৰত্তিসঙ্খাতেসু ছসু দেৰলোকেসু চ উপ্পজ্জন্তি, তত্থ সিনেরুপব্বতৰেমজ্ঝপরিভণ্ডপব্বততো পট্ঠায হেট্ঠা যাৰ ভূমি তিরিযং চক্কৰাল়পব্বতং আহচ্চ এত্থন্তরে পব্বতআকাসরুক্খপথৰিনিস্সিতা চাতুমহারাজচন্দসূরিযা সব্বে চাতুমহারাজিকা. ততো উদ্ধং চক্কৰাল়পরিযন্তং তাৰতিংসাদযো যথাক্কমং উপরূপরি ঠিতাতি ৰেদিতব্বা. দেৰলোকোপি পরম্পরচক্কৰাল়পব্বতং অপ্পত্তো নাম নত্থি.

পঠমজ্ঝানং পন পরিত্তং ভাৰেত্ৰা ব্রহ্মপারিসজ্জেসু উপ্পজ্জন্তি, মজ্ঝিমং ভাৰেত্ৰা ব্রহ্মপুরোহিতেসু, পণীতং ভাৰেত্ৰা মহাব্রহ্মেসু, ইমে তযোপি জনা পঠমজ্ঝানভূমিযং একতলে ¶ ৰসন্তি. আযুআভাদিভেদেন পনেসং ভেদো, এৰং উপরিপি.

চতুক্কনযে পন দুতিযজ্ঝানং, পঞ্চকনযে দুতিযততিযজ্ঝানঞ্চ পরিত্তং, মজ্ঝিমং, পণীতঞ্চ ভাৰেত্ৰা পরিত্তাভাঅপ্পমাণাভাআভস্সরেসু উপ্পজ্জন্তি. ততিযজ্ঝানং পরিত্তাদিৰসেন ভাৰেত্ৰা পরিত্তসুভঅপ্পমাণসুভসুভকিণ্হেসু. চতুত্থজ্ঝানং পন ভাৰেত্ৰা আরম্মণমনসিকারছন্দাধিমুত্তিআদিনানত্ততো কেচি অসঞ্ঞীসু, কেচি ৰেহপ্ফলেসু, কেচি অৰিহেসু, অতপ্পেসু, সুদস্সেসু, সুদস্সীসু, কেচি অকনিট্ঠেসু, আকাসানঞ্চাযতনাদীসু চতূসু চ যথাক্কমং উপ্পজ্জন্তি. তত্থ হি একচ্চে তিত্থিযা ‘‘চিত্তং নিস্সায রজ্জনদুস্সনাদযো, তন্নিদানানি চ দুক্খানি সমুপ্পজ্জন্তী’’তি চিত্তে দোসং দিস্ৰা ‘‘দিট্ঠধম্মনিব্বানমেত’’ন্তি সঞ্ঞাৰিরাগং ¶ জনেত্ৰা তত্রূপপত্তিযা ঝানং ভাৰেত্ৰা রূপকাযমত্তা ঠিতা ৰা নিসিন্না ৰা নিপন্না ৰা হুত্ৰা নিব্বত্তিত্ৰা তত্থেৰ পঞ্চকপ্পসতানি তিট্ঠন্তীতি ৰেদিতব্বা.

অট্ঠসমাপত্তিলাভীনং কতরং ঝানং ৰিপচ্চতীতি? পগুণং, সব্বেসু পগুণেসু যস্স ৰিপাকভূমিং পত্থেতি, তংপত্থনায চ অসতি যং মরণসমযে সমাপজ্জতি, তং, তস্মিম্পি অসতি উত্তমৰসেন নেৰসঞ্ঞানাসঞ্ঞাযতনং ৰিপচ্চতি. সুদ্ধাৰাসেসু চ অৰিহাদীসু অনাগামিৰজ্জিতা সত্তা ন উপ্পজ্জন্তি, অনাগামিনো পন অসঞ্ঞীৰজ্জিতব্রহ্মলোকেসু সব্বত্থ উপ্পজ্জিতুং লভন্তি. সব্বেসম্পি চ অরিযানং তত্রূপপত্তিতো উপরূপপত্তিপি, ন হেট্ঠূপপত্তি. তে হি পঠমজ্ঝানভূমিযং নিব্বত্তা অনাগামিনো নৰ ব্রহ্মলোকে সোধেত্ৰা মত্থকে ৰেহপ্ফলেসু ঠিতা পরিনিব্বন্তি, ন নিৰত্তন্তি অরিযানং হেট্ঠূপপত্তিঅভাৰা. ৰেহপ্ফলঅকনিট্ঠনেৰসঞ্ঞানাসঞ্ঞাযতনভৰা তযোপি সেট্ঠভৰা নাম. ইমেসু তীসু ঠানেসু নিব্বত্তা অনাগামিনো নেৰ উদ্ধং গচ্ছন্তি, ন অধো. তত্থেৰ পরিনিব্বাযন্তি ¶ . মনুস্সলোকে চ সেখা গিহিভাৰে যাৰজীৰং তিট্ঠন্তি, ন অসেখা. তে হি অরহত্তং পত্তদিৰসে পব্বজন্তি ৰা, পরিনিব্বন্তি ৰা. ভুম্মদেৰেসু পন খীণাসৰাপি যাৰজীৰং তিট্ঠন্তি. ছসু কামাৰচরদেৰেসু সোতাপন্নসকদাগামিনোৰ তিট্ঠন্তি, অনাগামিনো পন তদহেৰ রূপভৰং গন্তুং ৰট্টতি খীণাসৰেন পরিনিব্বাতুন্তি গহেতব্বং. এৰং ইমাসু সত্তৰীসতিযা ভূমীসু পরিযাপন্নমনুস্সদেৰব্রহ্মলোকেসু নিব্বত্তসত্তেসু মনুস্সানং তাৰ ইমস্মিং বুদ্ধুপ্পাদেৰ ৰস্সসতং আযুপ্পমাণং, অপ্পং ৰা ভিয্যো. আপাযিকানং, ভুম্মদেৰানঞ্চ কদাচি আযুপরিচ্ছেদো নত্থি, কম্মমেৰ পমাণং. তে হি সত্তাহেনপি মরন্তি, কপ্পম্পি তিট্ঠন্তীতি.

চাতুমহারাজিকানং পন মানুসকানি পঞ্ঞাস ৰস্সানি একং রত্তিন্দিৰং, তায রত্তিযা তিংস রত্তিযো মাসো, তেন মাসেন দ্ৰাদসমাসিযো সংৰচ্ছরো, তেন সংৰচ্ছরেন দিব্বানি পঞ্চৰস্সসতানি আযুপ্পমাণং. তানি মনুস্সগণনায নৰুতিৰস্সসতসহস্সানি হোন্তি. তাৰতিংসানং মানুসকং ৰস্সসতং একং রত্তিন্দিৰং কত্ৰা এৰমাগতং দিব্বং ৰস্সসহস্সং. এৰং যামাদীনং ৰস্সগণনঞ্চ দিগুণং কত্ৰা হেট্ঠিমতো দিগুণচতুগ্গুণং আযুপ্পমাণং ৰেদিতব্বং.

ব্রহ্মেসু পন ব্রহ্মপারিসজ্জানং কপ্পস্স ততিযো ভাগো আযুপ্পমাণং, ব্রহ্মপুরোহিতানং উপড্ঢকপ্পো ¶ , মহাব্রহ্মানং একো কপ্পো, পরিত্তাভানং দ্ৰে কপ্পাতি এৰং উপরূপরি দিগুণং কত্ৰা যাৰ সুভকিণ্হা যোজেতব্বং. সুভকিণ্হানং হি চতুসট্ঠিকপ্পং আযুপ্পমাণং, অসঞ্ঞীনং, ৰেহপ্ফলানঞ্চ পঞ্চকপ্পসতানি, অৰিহানং কপ্পসহস্সন্তি উপরূপরি দিগুণৰসেন যাৰ অকনিট্ঠা যোজেতব্বং. অকনিট্ঠানং হি সোল়সকপ্পসহস্সানি, অরূপানং চতুন্নং যথাক্কমং ৰীসতি, চত্তারি, সট্ঠি, চতুরাসীতি কপ্পসহস্সানি আযুপ্পমাণন্তি.

উক্খিত্তা ¶ পুঞ্ঞতেজেন, কামরূপগতিং গতা;

ভৰগ্গতম্পি সম্পত্তা, পুনাগচ্ছন্তি দুগ্গতিং.

তাৰ দীঘাযুকা সত্তা, চৰন্তি আযুসঙ্খযা;

নত্থি কোচি ভৰো নিচ্চো, ইতি ৰুত্তং মহেসিনা.

তস্মা হি ধীরা নিপকা, নিপুণা অত্থচিন্তকা;

জরামরণমোক্খায, ভাৰেন্তি মগ্গমুত্তমং.

ভাৰযিত্ৰা সুচিং মগ্গং, নিব্বানোগধগামিনং;

সব্বাসৰে পরিঞ্ঞায, পরিনিব্বন্তি অনাসৰাতি. (ৰিভ. ১০২৯);

অযং ছট্ঠৰারে নযো.

সত্তমো পন ৰারো তেসং খন্ধাদীনং অভিঞ্ঞেয্যাদিভাৰৰিভাৰনৰসেন পৰত্তো. তত্থ হি –

‘‘রূপক্খন্ধো অভিঞ্ঞেয্যো, পরিঞ্ঞেয্যো, ন পহাতব্বো, ন ভাৰেতব্বো, ন সচ্ছিকাতব্বো. চত্তারো খন্ধা অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা’’তিআদিনা –

দ্ৰাদসপি কোট্ঠাসা ৰিত্থারতো ৰিভত্তা. তত্থ লক্খণপরিগ্গাহিকায পঞ্ঞায খন্ধাদযো সব্বে ধম্মা ¶ অভিঞ্ঞেয্যা. ঞাততীরণপহানপরিঞ্ঞাসু যথাযোগং যায কাযচি পরিঞ্ঞায ৰসেন সব্বেপি ধম্মা পরিঞ্ঞেয্যা. লোকুত্তরধম্মাপি ঞাতপরিঞ্ঞেয্যাৰ. অকুসলা পন পহাতব্বা. মগ্গো ভাৰেতব্বো, ফলং, নিব্বানঞ্চ সচ্ছিকাতব্বং. তত্থ রূপক্খন্ধো ঞাততীরণৰসেন পরিঞ্ঞেয্যো. ৰিপস্সনাৰিসযে হি সব্বং তীরণপরিঞ্ঞায পরিঞ্ঞেয্যন্তি. ইমিনা নযেন সব্বত্থ অভিঞ্ঞেয্যাদিভাৰো ৰেদিতব্বো.

অট্ঠমো ¶ পন ৰারো তেসং সারম্মণতাৰিভাৰনৰসেন পৰত্তো, নৰমো পনেসং দিট্ঠসুতমুতৰিঞ্ঞাতেসু সঙ্গহদস্সনৰসেন. দসমো কুসলত্তিকাদীহি সরণদুকপরিযোসানেহি তিকদুকেহি ৰিভাগদস্সনৰসেন পৰত্তো, তেপি হেট্ঠা ৰুত্তনযাৰাতি অযমেত্থ সঙ্খেপো, ৰিত্থারো পনেত্থ হেট্ঠা ৰুত্তোযেৰ. আদিতো পট্ঠায সব্বত্থ ৰিভঙ্গপাল়িঅট্ঠকথাসু (ৰিভ. ৯৭৮ আদযো; ৰিভ. অট্ঠ. ৯৭৮ আদযো) গহেতব্বোতি.

ধম্মহদযৰিভঙ্গমাতিকত্থৰণ্ণনা নিট্ঠিতা.

মোহৰিচ্ছেদনিযা অভিধম্মমাতিকত্থৰণ্ণনায

ৰিভঙ্গমাতিকত্থৰণ্ণনা নিট্ঠিতা.

৩. ধাতুকথামাতিকা

ইদানি ¶ ¶ ৰিভঙ্গমাতিকানন্তরং –

অযং ধাতুকথাদীনং, সম্পত্তা অত্থৰণ্ণনা;

মাতিকানং যতো তস্মা, পঞ্চন্নম্পি যথারহং.

অনুত্তানত্থতো চেৰ, সঙ্খেপেনত্থনিচ্ছযা;

ৰিভঙ্গনযতো চেৰ, হোতি সংৰণ্ণনানযো.

তত্থ ধাতুকথামাতিকায তাৰ সংৰণ্ণনা হোতি. সা পনেসা নিক্খেপতো পঞ্চধা ঠিতা – নযমাতিকা অব্ভন্তরমাতিকা নযমুখমাতিকা লক্খণমাতিকা বাহিরমাতিকাতি. তত্থ ‘‘সঙ্গহো, অসঙ্গহো…পে… ৰিপ্পযুত্তেন সঙ্গহিতং অসঙ্গহিত’’ন্তি অযং চুদ্দসহি পদেহি নিক্খিত্তা সঙ্গহাদিকেন নযেন ধাতুকথায ধম্মা ৰিভত্তাতি দস্সেতুং ঠপিতত্তা নযমাতিকা নাম, যা ‘‘মূলমাতিকা’’তিপি ৰুচ্চতি.

‘‘পঞ্চক্খন্ধা…পে… মনসিকারো’’তি অযং পঞ্চৰীসাধিকেন পদসতেন নিক্খিত্তা সঙ্গহাদিনযেন ৰিভজিতব্বভাৰেন ধাতুকথায অব্ভন্তরে এৰ ঠপিতত্তা অব্ভন্তরমাতিকা নাম, যা ‘‘ধাতুকথামাতিকা’’তিপি ৰুচ্চতি.

‘‘তীহি সঙ্গহো, তীহি অসঙ্গহো, চতূহি সম্পযোগো, চতূহি ৰিপ্পযোগো’’তি অযং চতূহি পদেহি নিক্খিত্তা খন্ধাদীসু চ কুসলত্তিকাদীসু চ মাতিকাধম্মেসু তীহি খন্ধাযতনধাতুপদেহেৰ ¶ সঙ্গহো অসঙ্গহো চ, তথা চতূহি অরূপক্খন্ধেহি সম্পযোগো, ৰিপ্পযোগো চাতি ইমেসং সঙ্গহাসঙ্গহাদীনং নযানং মুখানীতি দস্সেতুং ঠপিতত্তা নযমুখমাতিকা নাম.

‘‘সভাগো ¶ ৰিসভাগো’’তি অযং দ্ৰীহি পদেহি নিক্খিত্তা সভাগৰিসভাগলক্খণৰসেনেৰ সঙ্গহাসঙ্গহনযা চেৰ সম্পযোগৰিপ্পযোগনযা চ হোন্তীতি দস্সেতুং ঠপিতত্তা লক্খণমাতিকা নাম. সব্বাপি ধম্মসঙ্গণী ধাতুকথায মাতিকাতি অযং ছসট্ঠি তিকপদানি, দ্ৰে চ দুকপদসতানি সঙ্খিপিত্ৰা নিক্খিত্তা ধাতুকথা মাতিকাতো বহি ঠপিতত্তা বাহিরমাতিকা নাম. এৰমেতিস্সা পঞ্চৰিধায মাতিকায অযমনুত্তানত্থৰণ্ণনা.

সঙ্গহোতিআদীসু হি সঙ্গহো তাৰ জাতিসঞ্জাতিকিরিযাগণনৰসেন চতুব্বিধো. তত্থ ‘‘সব্বে খত্তিযা আগচ্ছন্তু, যা চাৰুসো ৰিসাখ, সম্মাৰাচা, যো চ সম্মাকম্মন্তো, যো চ সম্মাআজীৰো, ইমে ধম্মা সীলক্খন্ধে সঙ্গহিতা’’তি (ম. নি. ১.৪৬২) অযং জাতিসঙ্গহো নাম. ‘‘সব্বে কোসলকা আগচ্ছন্তু, যো চাৰুসো ৰিসাখ, সম্মাৰাযামো, যা চ সম্মাসতি, যো চ সম্মাসমাধি, ইমে ধম্মা সমাধিক্খন্ধে সঙ্গহিতা’’তি (ম. নি. ১.৪৬২) অযং সঞ্জাতিসঙ্গহো নাম, একট্ঠানে জাতিসম্বন্ধভাৰেন সঙ্গহোতি অত্থো. ‘‘সব্বে হত্থারোহা আগচ্ছন্তু, যা চাৰুসো ৰিসাখ, সম্মাদিট্ঠি, যো চ সম্মাসঙ্কপ্পো, ইমে ধম্মা পঞ্ঞাক্খন্ধে সঙ্গহিতা’’তি (ম. নি. ১.৪৬২) অযং কিরিযাসঙ্গহো নাম. ‘‘হঞ্চি চক্খাযতনং রূপক্খন্ধগণনং গচ্ছতি, তেন ৰত রে ৰত্তব্বে ‘চক্খাযতনং রূপক্খন্ধেন সঙ্গহিত’’’ন্তি (কথা. ৪৭১) অযং গণনসঙ্গহো নাম, অযমিধ অধিপ্পেতো. তপ্পটিপক্খেন অসঙ্গহো ৰেদিতব্বো. তেসং ৰিকপ্পতো সঙ্গহিতেন অসঙ্গহিতাদীনি, একুপ্পাদেকনিরোধএকৰত্থুকএকারম্মণতাৰসেন সম্পযোগো, তপ্পটিপক্খতো ৰিপ্পযোগো, তেসং ৰিকপ্পতো সম্পযুত্তেন ৰিপ্পযুত্তাদীনি, তদুভযসংসগ্গৰিকপ্পতো সঙ্গহিতেন সম্পযুত্তং ৰিপ্পযুত্তন্তিআদীনি চ ¶ ৰেদিতব্বানি. সেসং ৰুত্তত্থমেৰ. অযং তাৰেত্থ অনুত্তানপদত্থো.

সঙ্গহাসঙ্গহপদত্থৰণ্ণনা

অত্থৰিনিচ্ছযতো পন যস্মা অব্ভন্তরমাতিকায রূপক্খন্ধাদীনি, বাহিরমাতিকায কুসলাদীনি চ ‘‘সঙ্গহো অসঙ্গহো’’তিআদিকেহি নযমাতিকাপদেহি ‘‘তীহি সঙ্গহো, তীহি অসঙ্গহো’’তিআদিনযমুখমাতিকাৰসেন ¶ যথারহং নিদ্দেসত্থায ভগৰতা ঠপিতানি, তস্মা খন্ধাদীনং সঙ্গহাদীনং পাল়িযং ৰুত্তানুসারেনেৰ সঙ্খেপতো অত্থৰিনিচ্ছযো হোতি. ইমিনা নযেন ৰিভঙ্গনযো সক্কা ঞাতুন্তি তং ৰিসুং ন ৰক্খাম.

তত্থ সঙ্গহাসঙ্গহৰারে খন্ধানং তাৰ অযং নিদ্দেসে নযো – রূপক্খন্ধো একেন খন্ধেন একাদসহি আযতনেহি একাদসহি ধাতূহি সঙ্গহিতো. চতূহি খন্ধেহি একেনাযতনেন সত্তহি ধাতূহি অসঙ্গহিতো. তত্থ একাদসহীতি মনাযতনৰজ্জেহি. ধম্মাযতনেনাপি হি কেচি রূপধম্মা সঙ্গহিতা. একাদসহীতি সত্তৰিঞ্ঞাণধাতুৰজ্জাহি. সেসং সুৰিঞ্ঞেয্যমেৰ.

ৰেদনাদযো তযো খন্ধা যথাসকং একেন খন্ধেন একেনাযতনেন একায ধাতুযা সঙ্গহিতা, চতূহি খন্ধেহি একাদসহি আযতনেহি সত্তরসহি ধাতূহি অসঙ্গহিতা, তথা ৰিঞ্ঞাণক্খন্ধোপি. কেৰলং পনেত্থ সত্তহি ৰিঞ্ঞাণধাতূহি সঙ্গহিতো, একাদসহি ধাতূহি অসঙ্গহিতোতি এত্তকমেৰ ৰিসেসো. তত্থ হি ৰেদনাদীনং তিণ্ণং খন্ধানং একেন ধম্মাযতনেন চ একায ধম্মধাতুযা চ সঙ্গহিততা ৰেদিতব্বা. পাল়িযং পনেত্থ খন্ধপদনিদ্দেসে, উপরি আযতনাদিনিদ্দেসেসু চ ‘‘রূপক্খন্ধো চ ৰেদনাক্খন্ধো চ দ্ৰীহি খন্ধেহি একাদসহাযতনেহি একাদসহি ¶ ধাতূহি সঙ্গহিতা’’তিআদিনা (ধাতু. ১৫) দ্ৰিমূলকাদিনযেনাপি ৰিত্থারনযো ৰিভত্তো, সোপি ইমিনা একমূলনযানুসারেন সব্বত্থ সুৰিঞ্ঞেয্যোতি ন ৰিত্থারযিম্হা. অযং খন্ধপদনিদ্দেসনযো.

আযতনধাতুপদানম্পি খন্ধপদে ৰুত্তানুসারেনেৰ তীহি সঙ্গহো, তীহি অসঙ্গহো চ যথাযোগং যোজেত্ৰা ঞাতব্বো. কেৰলং পনেত্থ ধম্মাযতনধম্মধাতূসু অসঙ্খতস্স খন্ধসঙ্গহাভাৰা তং ঠপেত্ৰা সেসানং খন্ধেসু সঙ্গহো ৰেদিতব্বো.

সচ্চেসু দুক্খসচ্চং সব্বেহি খন্ধাযতনধাতূহি. সমুদযমগ্গসচ্চানি সঙ্খারক্খন্ধেন, ধম্মাযতনধম্মধাতূহি চ সঙ্গহিতানি. নিরোধসচ্চং খন্ধেন অসঙ্গহিতং, ধম্মাযতনধম্মধাতূহি এৰ সঙ্গহিতং.

ইন্দ্রিযেসু জীৰিতিন্দ্রিযং দ্ৰীহি রূপক্খন্ধসঙ্খারক্খন্ধেহি. সুখিন্দ্রিযাদীনি পঞ্চ ৰেদনাক্খন্ধেন ¶ , সদ্ধাদীনি সঙ্খারক্খন্ধেন, সব্বানি চেতানি জীৰিতিন্দ্রিযাদীনি, ইত্থিন্দ্রিযপুরিসিন্দ্রিযাদীনিপি ধম্মাযতনধম্মধাতূহি সঙ্গহিতানি. সেসিন্দ্রিযানি সুৰিঞ্ঞেয্যানি.

পটিচ্চসমুপ্পাদেসু নামরূপং ৰিঞ্ঞাণৰজ্জিতেহি চতূহি খন্ধেহি, একাদসহি আযতনধাতূহি চ সঙ্গহিতং. এত্থ হি পৰত্তিযং নামরূপস্সাপি গহিতত্তা সদ্দাযতনম্পি গহিতন্তি ৰেদিতব্বং. সল়াযতনং দ্ৰীহি খন্ধেহি, পসাদৰিঞ্ঞাণভূতেহি ছহি আযতনেহি, দ্ৰাদসহি ধাতূহি সঙ্গহিতং. উপপত্তিভৰো পন কামভৰভূতো পঞ্চহি খন্ধেহি, সদ্দাযতনৰজ্জিতেহি একাদসহি আযতনেহি, সত্তরসহি ধাতূহি. রূপভৰো পঞ্চহি খন্ধেহি, সদ্দাদিচতুক্কঘানাদিত্তযতব্বিঞ্ঞাণৰজ্জেহি পঞ্চহাযতনেহি, অট্ঠহি ধাতূহি ¶ সঙ্গহিতো. অসঞ্ঞীভৰো একেন রূপক্খন্ধেন, রূপধম্মৰসেন দ্ৰীহি আযতনধাতূহি সঙ্গহিতো. ঘানাদিত্তযং পনেত্থ আযতনাদিকিচ্চাকরণতো আযতনধাতূহি অসঙ্গহিতম্পি রূপক্খন্ধেন সঙ্গহিতন্তি দট্ঠব্বং. ভৰস্স চ একন্তমুপাদিন্নত্তা পৰত্তিৰিপাকানং চক্খুৰিঞ্ঞাণাদীনং গহণেপি অনুপাদিন্নসদ্দাযতনস্স ইধ অগ্গহণং দট্ঠব্বং. অরূপভৰো চতূহি খন্ধেহি দ্ৰীহি আযতনধাতূহি. জাতিজরামরণানি নামরূপধম্মানং লক্খণত্তা দ্ৰীহি রূপক্খন্ধসঙ্খারক্খন্ধেহি. সোকদুক্খদোমনস্সানি ৰেদনাক্খন্ধেন. উপাযাসো সঙ্খারক্খন্ধেন, ধম্মাযতনধম্মধাতূহি চ সঙ্গহিতো. পরিদেৰো রূপক্খন্ধসদ্দাযতনসদ্দধাতূহি. সেসানি পনেত্থ পটিচ্চসমুপ্পাদঙ্গানি, সতিপট্ঠানসম্মপ্পধানা চ সুৰিঞ্ঞেয্যাৰ.

ইদ্ধিপাদা দ্ৰীহি খন্ধেহি, আযতনেহি, ধাতূহি সঙ্গহিতা. এত্থ চ চিত্তিদ্ধিপাদস্স ধম্মধাতুমনোৰিঞ্ঞাণধাতুনিযমতো সোল়সহি ধাতূহি অসঙ্গহো ৰেদিতব্বো. ঝানানি দ্ৰীহি ৰেদনাসঙ্খারক্খন্ধেহি, একেনাযতনেন, একায ধাতুযা চ সঙ্গহিতানি. অপ্পমঞ্ঞা একেন খন্ধেন, একেন আযতনেন, একায ধাতুযা সঙ্গহিতা. এৰং পঞ্চিন্দ্রিযাদীনিপি. কেৰলং পন চিত্তং সত্তহি ৰিঞ্ঞাণধাতূহি সঙ্গহিতন্তি এত্তকমেৰ ৰিসেসো. সব্বেসম্পি চেস ৰুত্তাৰসেসেহি খন্ধাযতনধাতূহি অসঙ্গহিতভাৰো ৰেদিতব্বো.

ইমিনা নযেন বাহিরমাতিকাযপি ‘‘কুসলা ধম্মা, অকুসলা ধম্মা চতূহি খন্ধেহি, দ্ৰীহি আযতনেহি, ধাতূহি সঙ্গহিতা. অব্যাকতা পন অসঙ্খতং খন্ধতো ঠপেত্ৰা পঞ্চহি খন্ধেহি দ্ৰাদসহি আযতনেহি অট্ঠারসহি ধাতূহি সঙ্গহিতা’’তিআদিনা যোজেত্ৰা সঙ্গহাসঙ্গহো ঞাতব্বোতি ¶ ¶ অযমেত্থ সঙ্খেপো, ৰিত্থারো পন ধাতুকথাপাল়িঅট্ঠকথাসু (ধাতু. ৭৭ আদযো; ধাতু. অট্ঠ. ৭৭) গহেতব্বোতি.

নিট্ঠিতো ‘‘সঙ্গহো অসঙ্গহো’’তি পদস্স

অত্থৰিনিচ্ছযো.

সঙ্গহিতেনঅসঙ্গহিতপদত্থৰণ্ণনা

সঙ্গহিতেনঅসঙ্গহিতপদে সব্বেসং রূপক্খন্ধাদিপদানং নিদ্দেসো ন সম্ভৰতি. যানি পনেত্থ পদানি রূপেকদেসং, অরূপেন অসম্মিস্সং ৰিঞ্ঞাণেকদেসঞ্চ অঞ্ঞেন অসম্মিস্সং দীপেন্তি, তেসমিধ নিদ্দেসো. তানি পন মনাযতনধম্মাযতনৰজ্জিতানং দসাযতনানং, ধম্মধাতুৰজ্জিতানং সত্তরসন্নং ধাতূনং, সত্তরূপিন্দ্রিযানঞ্চ ৰসেন ৰেদিতব্বানি, ন রূপক্খন্ধাদীনং. তেনেৰ পাল়িযং –

‘‘দসাযতনা সত্তরস ধাতুযো,

সত্তিন্দ্রিযা অসঞ্ঞাভৰো একৰোকারভৰো;

পরিদেৰো সনিদস্সনসপ্পটিঘং,

অনিদস্সনং পুনদেৰ সপ্পটিঘং উপাদা’’তি. (ধাতু. ১৭৮) –

এৰং উদ্দানগাথা ৰুত্তা. রূপক্খন্ধেন হি রূপক্খন্ধোৰ সঙ্গহিতো, এৰং ৰেদনাক্খন্ধাদীহি চ ৰেদনাক্খন্ধাদযোৰ. তেপি চ যেহি কেহিচি আযতনধাতূহি অসঙ্গহিতা নাম নত্থীতি তেসং সঙ্গহিতেন অসঙ্গহিতত্তাভাৰা যথাৰুত্তাযতনানং ৰসেনেৰেত্থ অত্থৰিনিচ্ছযো হোতি. ইদং হেত্থ লক্খণং – যং খন্ধপদেন সঙ্গহিতং হুত্ৰা আযতনধাতুপদেহি অসঙ্গহিতং, খন্ধাযতনপদেহি ৰা সঙ্গহিতং হুত্ৰা ধাতুপদেন অসঙ্গহিতং, তস্স খন্ধাযতনধাতূহি অসঙ্গহো ¶ ৰুচ্চতি. কথং? চক্খাযতনেন যে ধম্মা খন্ধসঙ্গহেন সঙ্গহিতা, আযতনসঙ্গহেন, ধাতুসঙ্গহেন চ অসঙ্গহিতা, তে ধম্মা কতিহি খন্ধেহি, আযতনেহি, ধাতূহি অসঙ্গহিতা? তে ধম্মা চতূহি খন্ধেহি দ্ৰীহি আযতনেহি ¶ অট্ঠহি ধাতূহি অসঙ্গহিতা. এৰং রূপাযতনাদীসুপি পসাদৰিসযভূতেসু ধাতূসু, রূপিন্দ্রিযাদীসু চ যোজনক্কমো ৰেদিতব্বো.

তত্রাযং নযো – চক্খাযতনেন যে রূপধম্মা খন্ধসঙ্গহেন রূপক্খন্ধোতি সঙ্গহিতা, আযতনধাতুসঙ্গহেন চক্খাযতনেন অসঙ্গহিতা, চক্খুধাতুযা অসঙ্গহিতা, চক্খাযতনচক্খুধাতূহি একস্সেৰেতস্স চক্খুস্স ৰিসুং আযতনধাতূসু সঙ্গহিতত্তা তে চক্খাযতনৰিরহিতা সব্বে রূপধম্মা চতূহি অরূপক্খন্ধেহি চক্খাযতনং মনাযতনন্তি দ্ৰীহি আযতনেহি চক্খুধাতু সত্তৰিঞ্ঞাণধাতূতি অট্ঠহি ধাতূহি অসঙ্গহিতা. উপরি রূপাযতনাদীসুপি এসেৰ নযো. ইমস্মিং হি ৰারে চক্খাযতনস্স অত্তনো তীহিপি খন্ধাযতনধাতুসঙ্গহেহি সঙ্গহিততায অসঙ্গহিতত্তাভাৰা খন্ধসঙ্গহেন সঙ্গহিতং, আযতনসঙ্গহেন অসঙ্গহিতং, ধাতুসঙ্গহেন অসঙ্গহিতন্তি এৰং তীহিপি সঙ্গহিতাসঙ্গহিতৰিসেসনেহি ৰিসিট্ঠস্সেৰ ‘‘কতিহি খন্ধেহী’’তিআদিনা খন্ধাদীহি অসঙ্গহস্স ৰুচ্চমানত্তা চ অরূপক্খন্ধেহি সহ বহিভূততা ৰেদিতব্বা. যথা চেত্থ চক্খাযতনেন উপলক্খিতানং রূপধম্মানংযেৰ সঙ্গহিতেন অসঙ্গহিততা, ন চক্খাযতনস্স, এৰং উপরি রূপাযতনাদীহি উপলক্খিতৰারেপি যথারহং ঞাতব্বা.

সেসেসু পন চক্খুৰিঞ্ঞাণধাতুযা যে ধম্মা খন্ধসঙ্গহেন সঙ্গহিতা, আযতনসঙ্গহেন সঙ্গহিতা, ধাতুসঙ্গহেন অসঙ্গহিতা, তে ধম্মা চতূহি খন্ধেহি একাদসহি আযতনেহি ¶ দ্ৰাদসহি ধাতূহি অসঙ্গহিতা. এৰং সেসৰিঞ্ঞাণধাতূসুপি. পটিচ্চসমুপ্পাদঙ্গেসু অসঞ্ঞীভৰেন যে ধম্মা…পে… তে ধম্মা চতূহি খন্ধেহি দসহাযতনেহি সোল়সহি ধাতূহি অসঙ্গহিতা. উপাদাধম্মেহি যে ধম্মা…পে… তে ধম্মা চতূহি খন্ধেহি একাদসহাযতনেহি সত্তরসহি ধাতূহি অসঙ্গহিতাতি ইমে চত্তারো ৰারা অপুব্বৰিসেসা সমাযেৰ. তত্থ চক্খুৰিঞ্ঞাণৰারে দ্ৰাদসহীতি ছ ৰিঞ্ঞাণধাতুযো ৰজ্জেত্ৰা অৰসেসাহি ধাতূহি সেসা ছ ৰিঞ্ঞাণধাতুযোৰ খন্ধাযতনসঙ্গহেহি সঙ্গহিতা, ধাতুসঙ্গহেনেৰ অসঙ্গহিতা. অৰসেসাহি দ্ৰাদসহি ধাতূহি অসঙ্গহিতাতি. এস নযো সেসৰিঞ্ঞাণধাতূসুপি.

দুতিযে তীহাযতনেহীতি রূপাযতনধম্মাযতনমনাযতনেহি. অসঞ্ঞিব্রহ্মলোকে হি রূপাযতনধম্মাযতনৰসেন দ্ৰে আযতনানি উপপত্তিভৰভাৰেন পাল়িযং আগতানি, তে পন খন্ধেহি সঙ্গহিতানি, আযতনধাতূসু অসঙ্গহিতানি. তদৰসেসানি নৰ রূপাযতনানি, তানি তেহেৰ ¶ চ দ্ৰীহি মনাযতনধম্মাযতনেহি চ অসঙ্গহিতানি নাম হোন্তি. নৰহি ধাতূহীতি রূপধাতুধম্মধাতূহি সদ্ধিং সত্তহি ৰিঞ্ঞাণধাতূহি.

ততিযে দসহীতি রূপাযতনধম্মাযতনৰজ্জেহি. সোল়সহীতি রূপধাতুধম্মধাতুৰজ্জাহি. অনিদস্সনসপ্পটিঘানি নাম নৰ ওল়ারিকাযতনানি, তানি তেহি খন্ধসঙ্গহেন সঙ্গহিতানি, আযতনধাতুসঙ্গহেহি চ অসঙ্গহিতানি, রূপাযতনধম্মাযতনানি দ্ৰেপি সেসেহি আযতনধাতূহি অসঙ্গহিতানি নাম হোন্তি.

চতুত্থে একাদসহীতি ফোট্ঠব্বাযতনৰজ্জেহি ফোট্ঠব্বাযতনস্স উপাদাধম্মেহি আযতনাদীসু অসঙ্গহিতত্তা. সেসং ¶ সুৰিঞ্ঞেয্যমেৰ. অযং সঙ্গহিতেনঅসঙ্গহিতপদে নযো.

অসঙ্গহিতেনসঙ্গহিতপদত্থৰণ্ণনা

অসঙ্গহিতেনসঙ্গহিতপদে পন যানি পদানি ৰিঞ্ঞাণেন ৰা ওল়ারিকরূপেন ৰা অসম্মিস্সং ধম্মাযতনেকদেসং দীপেন্তি, তানেৰ নিদ্দিসীযন্তি, তানি পন ৰেদনাদীনং তিণ্ণং খন্ধানং, দুক্খসচ্চৰজ্জিতানং তিণ্ণং সচ্চানং, পসাদমনোৰজ্জিতানং সোল়সন্নং ইন্দ্রিযানং, অৰিজ্জাসঙ্খারফস্সৰেদনাতণ্হুপাদানকম্মভৰজাতিজরামরণসোকদুক্খদোমনস্সুপাযাসৰসেন চুদ্দসপচ্চযাকারপদানঞ্চ ৰসেন ৰেদিতব্বানি, ন রূপক্খন্ধাদীনং. তেনেৰ অট্ঠকথাযং –

‘‘তযো খন্ধা তথা সচ্চা, ইন্দ্রিযানি চ সোল়স;

পদানি পচ্চযাকারে, চুদ্দসূপরি চুদ্দস.

‘‘সমতিংস পদা হোন্তি, গোচ্ছকেসু দসস্ৰথ;

দুৰে চূল়ন্তরদুকা, অট্ঠ হোন্তি মহন্তরা’’তি. (ধাতু. অট্ঠ. ১৭৯) –

এৰং উদ্দানগাথা ৰুত্তা. ইদং হেত্থ লক্খণং – যং খন্ধপদেন অসঙ্গহিতং, আযতনধাতুপদেহি সঙ্গহিতং, তস্সেৰ তীহি ৰিসেসনেহি ৰিসিট্ঠস্স খন্ধাদীহি সঙ্গহো ৰুচ্চতি. কথং? ৰেদনাক্খন্ধেন যে ধম্মা খন্ধসঙ্গহেন অসঙ্গহিতা, আযতনধাতুসঙ্গহেহি সঙ্গহিতা, তে ধম্মা কতিহি ¶ খন্ধেহি, আযতনেহি, ধাতূহি সঙ্গহিতা? তে ধম্মা অসঙ্খতং খন্ধতো ঠপেত্ৰা তীহি খন্ধেহি একেনাযতনেন একায ধাতুযা সঙ্গহিতাতি.

তত্রাযং নযো – ৰেদনাক্খন্ধেন হি নিব্বানং, সুখুমরূপং, সঞ্ঞাসঙ্খারা চ খন্ধসঙ্গহেন অসঙ্গহিতা হুত্ৰা ধম্মাযতনধম্মধাতুসঙ্গহেন সঙ্গহিতা. তেসু নিব্বানং খন্ধসঙ্গহং ন ¶ গচ্ছতি, সেসা তীহি রূপসঞ্ঞাসঙ্খারক্খন্ধেহি সঙ্গহং গচ্ছন্তি, আযতনধাতুযো পনেত্থ ধম্মাযতনধম্মধাতূনং ৰসেনেৰ সব্বত্থ ৰেদিতব্বা ইতরাসং অসম্ভৰা, ইমেসু চ নিব্বানম্পি সঙ্গহং গচ্ছতি. তেনেৰ হি ‘‘অসঙ্খতং খন্ধতো ঠপেত্ৰা’’তি ৰুত্তং. তস্সাযমত্থো – খন্ধসঙ্গহে এৰ অসঙ্খতং ঠপেত্ৰা, ন ইতরসঙ্গহেসূতি এৰং সঞ্ঞাক্খন্ধাদীসুপি যোজনা ৰেদিতব্বা. অযং পন ৰিসেসো – জীৰিতিন্দ্রিযেন যে ধম্মা…পে… তে ধম্মা দ্ৰীহি ৰেদনাসঞ্ঞাক্খন্ধেহি সঙ্গহিতা, রূপারূপজীৰিতিন্দ্রিযেহি নিব্বানৰেদনাসঞ্ঞাৰিঞ্ঞাণক্খন্ধা খন্ধসঙ্গহেন অসঙ্গহিতা, তেসু চ নিব্বানৰেদনাসঞ্ঞাৰ আযতনধাতুসঙ্গহেন সঙ্গহিতাতি. সেসং সুৰিঞ্ঞেয্যমেৰ. অযং অসঙ্গহিতেনসঙ্গহিতপদে নযো.

সঙ্গহিতেনসঙ্গহিতপদত্থৰণ্ণনা

সঙ্গহিতেনসঙ্গহিতপদে পন যানি পদানি সঙ্খারেকদেসং অঞ্ঞেন অসম্মিস্সং দীপেন্তি ৰেদনেকদেসং ৰা সুখুমরূপং ৰা সদ্দেকদেসং ৰা, তানেৰ নিদ্দিসীযন্তি. খন্ধাযতনধাতূসু একম্পি কোট্ঠাসং সকলেন গহেত্ৰা ঠিতপদানি ন যুজ্জন্তি. তানি পন দ্ৰিন্নং সমুদযমগ্গসচ্চানং, পন্নরসিন্দ্রিযানং, একাদসপটিচ্চপদাদীনঞ্চ ৰসেন ৰেদিতব্বানি. ইদং হেত্থ লক্খণং – যং অত্তনা খন্ধাদিৰসেন সঙ্গহিতেহি খন্ধাদিতো সঙ্গহিতং, তস্সেৰ পঠমং উদ্ধটপদস্স পুন খন্ধাদীহি সঙ্গহো ৰুচ্চতি.

তত্রাযং আদিপদে নযো – সমুদযসচ্চেন যে ধম্মা খন্ধাদীহি তীহি সঙ্গহেহিপি সঙ্গহিতা, তেহি ধম্মেহি যে ধম্মা খন্ধাদীহি তীহিপি সঙ্গহিতা, তে ধম্মা ¶ একেন খন্ধেন একেনাযতনেন একায ধাতুযা সঙ্গহিতাতি. সমুদযসচ্চেন হি তণ্হাৰজ্জা সেসা সঙ্খারা খন্ধাদীহি সঙ্গহেহি সঙ্গহিতা, পুন তেহি চ তণ্হাৰ সঙ্গহিতা, সা চ পুন সঙ্খারক্খন্ধধম্মাযতনধম্মধাতূহি ¶ সঙ্গহিতা. সেসেসুপি এসেৰ নযো. অযং সঙ্গহিতেনসঙ্গহিতপদে নযো.

অসঙ্গহিতেনঅসঙ্গহিতপদত্থৰণ্ণনা

অসঙ্গহিতেনঅসঙ্গহিতপদে পন যানি পদানি পঞ্চক্খন্ধগাহকেহি দুক্খসচ্চাদীহি, ৰিঞ্ঞাণেন সদ্ধিং সুখুমরূপগাহকেহি অচেতসিকাদীহি চ পদেহি ৰিৰজ্জিতানি রূপক্খন্ধাদীনি, তানেৰ নিদ্দিসীযন্তি. ইদং হেত্থ লক্খণং – যং পঠমং উদ্ধটেন রূপক্খন্ধাদিপদেন খন্ধাদিতো অসঙ্গহিতং, যং তেহি অসঙ্গহিতং, তস্সেৰ পুন খন্ধাদীহি অসঙ্গহো ৰুচ্চতি.

তত্রাযং একপদযোজনা – রূপক্খন্ধেন যে ধম্মা খন্ধাদীহি তীহিপি অসঙ্গহেহি অসঙ্গহিতা, তেহি ধম্মেহি যে ধম্মা খন্ধাদীহি তীহি অসঙ্গহিতা, তে ধম্মা একেন খন্ধেন একেনাযতনেন সত্তহি ধাতূহি অসঙ্গহিতা. রূপক্খন্ধেন হি চত্তারো খন্ধা, নিব্বানঞ্চ খন্ধসঙ্গহেন অসঙ্গহিতা, আযতনাদীহি পন ৰিঞ্ঞাণমেৰ ঠপেত্ৰা ৰেদনাদযো ধম্মাযতনেন রূপক্খন্ধেকদেসেন সঙ্গহিতাতি ৰিঞ্ঞাণমেৰ তীহিপি খন্ধসঙ্গহাদীহি রূপক্খন্ধেন অসঙ্গহিতং নাম. তেন পুন ৰিঞ্ঞাণেন সদ্ধিং সনিব্বানা চত্তারো খন্ধা খন্ধাদীহি অসঙ্গহিতা, তে সব্বেপি পুন ৰিঞ্ঞাণভূতেন একেন খন্ধেন একেনাযতনেন সত্তহি ধাতূহি অসঙ্গহিতাতি. অযং অসঙ্গহিতেনঅসঙ্গহিতপদে নযো.

সম্পযোগৰিপ্পযোগপদত্থৰণ্ণনা

সম্পযোগৰিপ্পযোগপদে ¶ পন যানি পদানি নিব্বানেন, রূপেন ৰা মিস্সেসু সত্তসু ৰিঞ্ঞাণধাতূসু একাযপি অৰিপ্পযুত্তে অরূপধম্মে পকাসেন্তি, তেসং ধম্মাযতনদুক্খসচ্চাদীনং নিদ্দেসো ন সম্ভৰতি. কাহিচি পন ৰিঞ্ঞাণধাতূহি ৰিপ্পযুত্তানং রূপমিস্সারূপধম্মানং, কেৰলানারম্মণানং ৰা সকলরূপক্খন্ধানং ৰা পকাসকানং রূপভৰরূপক্খন্ধকুসলাদিপদানং সম্পযোগপদে এৰ নিদ্দেসো ন সম্ভৰতি, ৰিপ্পযোগপদে পন সম্ভৰতি. অরূপক্খন্ধানং পন পচ্চেকং, দ্ৰিন্নং, তিণ্ণং, তদেকদেসানং ৰা তদুভযেপি সম্ভৰতি. ‘‘চতূহি সম্পযোগো, চতূহি ৰিপ্পযোগো, সভাগো ৰিসভাগো’’তি হি ৰচনতো চতূহি অরূপক্খন্ধেহেৰ সভাগানং একসন্তানে একক্খণেৰ উপ্পন্নানং অরূপক্খন্ধানং এৰ অঞ্ঞমঞ্ঞং সম্পযোগো লব্ভতি. রূপধম্মানং ¶ পন রূপেন, নিব্বানেন ৰা, নিব্বানস্স চ রূপেন সদ্ধিং সম্পযোগো নাম নত্থি, তথা রূপনিব্বানানং অরূপক্খন্ধেহি. ৰিসভাগা হি তে তেসং যথা অরূপক্খন্ধানং রূপনিব্বানেহি, এৰং ভিন্নসন্তানিকেহি নানক্খণিকেহি অরূপধম্মেহিপি সদ্ধিং নত্থিযেৰ. তেপি হি তেসং সন্তানক্খণৰিসভাগতায ৰিসভাগা এৰ. অযং পন ৰিসভাগতা ইধ সামঞ্ঞতো ন গহিতা তেসং অৰিসেসেন সম্পযোগস্সাপি সম্ভৰা. যত্থ পন ৰিসেসেত্ৰা চক্খুৰিঞ্ঞাণতংসম্পযুত্তাদযো নিক্খিত্তা, তত্থাযম্পি ৰিসভাগতা গহিতা. যত্থ পন যে অনিদ্ধারিতৰিসেসনা, তত্থাপি সব্বথা সম্পযোগলক্খণং ন সম্ভৰতি. সো চ তস্স একন্তেন ৰিসভাগোতি ইধ গয্হতি.

তত্রাযং নযো – রূপক্খন্ধো কেনচি সম্পযুত্তোতি? নত্থি. কতিহি ৰিপ্পযুত্তো? চতূহি খন্ধেহি একেনাযতনেন সত্তহি ¶ ধাতূহি ৰিপ্পযুত্তো, একেনাযতনেন একায ধাতুযা কেহিচি ৰিপ্পযুত্তো. এস নযো চক্খাযতনাদিঅনারম্মণেসুপি. সারম্মণেসু পন ৰেদনাক্খন্ধো তীহি খন্ধেহি একেনাযতনেন সত্তহি ধাতূহি সম্পযুত্তো, একেনাযতনেন একায ধাতুযা কেহিচি সম্পযুত্তো. একেন খন্ধেন দসহি আযতনেহি দসহি ধাতূহি ৰিপ্পযুত্তো, একেনাযতনেন একায ধাতুযা কেহিচি ৰিপ্পযুত্তো. এস নযো সঞ্ঞাক্খন্ধাদীসুপি.

তত্থ একেনাতি মনাযতনেন. সত্তহীতি ৰিঞ্ঞাণধাতূহি. কেহিচীতি ধম্মাযতনধম্মধাতুপরিযাপন্নেহি ৰেদনাসঞ্ঞাসঙ্খারেহি. দুতিযনযে তীহীতি অত্তানং ঠপেত্ৰা সেসেহি অরূপক্খন্ধেহি. কেহিচি ৰিপ্পযুত্তোতি ধম্মাযতনধম্মধাতূসু সঞ্ঞাসঙ্খারেহি. কেহিচি ৰিপ্পযুত্তোতি রূপনিব্বানেহি. এৰং উপরিপি সব্বত্থ যথানুরূপং ঞাতব্বং. সেসং ৰুত্তনযমেৰ. অযং পন ৰিসেসো ‘‘সমুদযমগ্গসচ্চাদযো একায মনোৰিঞ্ঞাণধাতুযা সম্পযুত্তা, অধিমোক্খো পন মনোধাতুমনোৰিঞ্ঞাণধাতূহি দ্ৰীহেৰা’’তি. অযং সম্পযোগৰিপ্পযোগপদে নযো.

সম্পযুত্তেনৰিপ্পযুত্তপদত্থৰণ্ণনা

সম্পযুত্তেনৰিপ্পযুত্তপদে পন সম্পযোগারহপদেসু যানি পদানি ধম্মধাতুযা সম্পযুত্তে ধম্মে, ৰিঞ্ঞাণঞ্চ অঞ্ঞেন অসম্মিস্সং দীপেন্তি, তেসমেৰ নিদ্দেসো. তানি পন চতুন্নং অরূপক্খন্ধপদানং, মনাযতনস্স, সত্তন্নং ৰিঞ্ঞাণধাতূনং, মনোপেক্খাৰসেন দ্ৰিন্নং ইন্দ্রিযানং, ৰিঞ্ঞাণফস্সৰেদনানং ¶ তিণ্ণং পটিচ্চসমুপ্পাদপদানং, ফস্সসত্তকস্স, অদুক্খমসুখসৰিতক্কসৰিচারউপেক্খাসহগতানং ৰসেন তিণ্ণং তিকপদানং, সত্তমহন্তরদুকপদাদীনঞ্চ ৰসেন ৰেদিতব্বানি, ন ইতরেসং অসম্ভৰা. তেনেৰ অট্ঠকথাযং –

‘‘চত্তারো ¶ খন্ধাযতনঞ্চ একং,

দ্ৰে ইন্দ্রিযা ধাতুপদানি সত্ত;

তযো পটিচ্চা অথ ফস্সসত্তকং,

তিকে তযো সত্ত মহন্তরে চ;

একং সৰিতক্কং সৰিচারমেকং,

যুত্তং উপেক্খায চ একমেৰা’’তি. (ধাতু. অট্ঠ. ৩০৬) –

উদ্দানগাথা ৰুত্তা. ইদং হেত্থ লক্খণং – যে ধম্মা পঠমং উদ্ধটপদেন সম্পযুত্তা, তেহি যে ধম্মা ৰিপ্পযুত্তা, তেসং খন্ধাদীহি ৰিপ্পযোগো ৰুচ্চতি.

তত্রাযং নযো – ৰেদনাক্খন্ধেন যে ধম্মা সম্পযুত্তা, তেহি ধম্মেহি যে ধম্মা ৰিপ্পযুত্তা, তে ধম্মা চতূহি খন্ধেহি একেনাযতনেন সত্তহি ধাতূহি ৰিপ্পযুত্তা, একেনাযতনেন একায ধাতুযা কেহিচি ৰিপ্পযুত্তা. চক্খুৰিঞ্ঞাণধাতুযা যে ধম্মা সম্পযুত্তা, তেহি ধম্মেহি যে ধম্মা ৰিপ্পযুত্তা, তে ধম্মা ন কেহিচি খন্ধাযতনেহি ৰিপ্পযুত্তা, একায পন ধাতুযা ৰিপ্পযুত্তাতি এৰং সব্বত্থ যোজনা ৰেদিতব্বা.

তত্থ তে ধম্মাতি রূপনিব্বানধম্মা, তে ৰেদনায সম্পযুত্তেহি ৰিপ্পযুত্তা. একেনাতি মনাযতনেন. দুতিযনযে তে ধম্মাতি সপ্পীতিকা তে ধম্মা. ন কেহিচীতি পঠমং উদ্ধটং চক্খুৰিঞ্ঞাণধাতুং ঠপেত্ৰা সেসা ছৰিঞ্ঞাণধাতূ, তংসম্পযুত্তা, রূপং, নিব্বানঞ্চ. তেহি সব্বেসং খন্ধাযতনানং সঙ্গহিতত্তা ন কেহিচি খন্ধেহি, আযতনেহি ৰা ৰিপ্পযুত্তা. ন হি সযং অত্তনা ৰিপ্পযুজ্জতি, সম্পযুজ্জতি ৰাতি. একাযাতি চক্খুৰিঞ্ঞাণধাতুযা. সেসং সুৰিঞ্ঞেয্যমেৰ. অযং সম্পযুত্তেনৰিপ্পযুত্তপদে নযো.

ৰিপ্পযুত্তেনসম্পযুত্তপদত্থৰণ্ণনা

ৰিপ্পযুত্তেনসম্পযুত্তপদে ¶ ¶ পন ৰিপ্পযুত্তেন সম্পযুত্তো নাম ধম্মো নত্থি, দেসনাসম্পদমত্তায পন মোঘম্পেতং পদং উদ্ধটং, তেনেৰ পাল়িযং সব্বৰারেসুপি ‘‘নত্থি নত্থি’’ ইচ্চেৰ ৰুত্তং. রূপক্খন্ধাদিঅনারম্মণধম্মেহি ৰিপ্পযুত্তা চত্তারো খন্ধা, তেসঞ্চ অঞ্ঞেহি সম্পযোগো নত্থি. ৰেদনাদীহিপি রূপনিব্বানাদীনি ৰিপ্পযুত্তানি, তেসঞ্চ কেনচি সম্পযোগোৰ নত্থীতি. অযং ৰিপ্পযুত্তেনসম্পযুত্তপদে নযো.

সম্পযুত্তেনসম্পযুত্তপদত্থৰণ্ণনা

সম্পযুত্তেনসম্পযুত্তপদে পন যানি পদানি রূপেন অসম্মিস্সং অরূপক্খন্ধেকদেসমেৰ দীপেন্তি, তেসমেৰ নিদ্দেসো, ন রূপারূপসম্মিস্সানং, সব্বরূপক্খন্ধদীপকানং তেসং সম্পযুত্ততাযোগাভাৰা. সব্বারূপক্খন্ধেনাপি হি কুসলাদিনা অঞ্ঞো সম্পযুত্তো নাম নত্থি. ইদং হেত্থ লক্খণং – যে ধম্মা পঠমং উদ্ধটা, অত্তনা সম্পযুত্তেন পুন সম্পযুত্তা, তেসঞ্ঞেৰ খন্ধাদীহি সম্পযোগো ৰুচ্চতি.

তত্রাযং নযো – ৰেদনাক্খন্ধেন যে ধম্মা সম্পযুত্তা, তেহি ধম্মেহি যে ধম্মা সম্পযুত্তা, তে ধম্মা তীহি খন্ধেহি একেনাযতনেন সত্তহি ধাতূহি সম্পযুত্তা, একেনাযতনেন…পে… কেহিচি সম্পযুত্তা. সমুদযসচ্চেন যে ধম্মা সম্পযুত্তা, তেহি ধম্মেহি যে ধম্মা সম্পযুত্তা, তে ধম্মা তীহি খন্ধেহি একেনাযতনেন একায মনোৰিঞ্ঞাণধাতুযা সম্পযুত্তা, একেন খন্ধেন একেনাযতনেন একায ধাতুযা কেহিচি সম্পযুত্তাতি. সেসং সুৰিঞ্ঞেয্যমেৰ. অযং সম্পযুত্তেনসম্পযুত্তপদে নযো.

ৰিপ্পযুত্তেনৰিপ্পযুত্তপদত্থৰণ্ণনা

ৰিপ্পযুত্তেনৰিপ্পযুত্তপদে ¶ পন সম্পযোগপদে ৰুত্তপদানেৰ নিদ্দিসীযন্তি. ইদং হেত্থ লক্খণং – যে ধম্মা পঠমং উদ্ধটপদেন ৰিপ্পযুত্তেহি পুন ৰিপ্পযুত্তা, তেসং খন্ধাদীহি ৰিপ্পযোগো ৰুচ্চতি.

তত্রাযং ¶ নযো – রূপক্খন্ধেন যে ধম্মা ৰিপ্পযুত্তা, তেহি ধম্মেহি যে ধম্মা ৰিপ্পযুত্তা, তে ধম্মা চতূহি খন্ধেহি একেনাযতনেন সত্তহি ধাতূহি ৰিপ্পযুত্তা, একেনাযতনেন…পে… কেহিচি ৰিপ্পযুত্তা. ৰেদনাক্খন্ধেন যে ধম্মা ৰিপ্পযুত্তা, তেহি ধম্মেহি যে ধম্মা ৰিপ্পযুত্তা, তে ধম্মা একেন খন্ধেন দসহাযতনেহি দসহি ধাতূহি ৰিপ্পযুত্তা, একেন…পে… কেহিচি ৰিপ্পযুত্তাতি. সেসং সুৰিঞ্ঞেয্যমেৰ. অযং ৰিপ্পযুত্তেনৰিপ্পযুত্তপদে নযো.

সঙ্গহিতেনসম্পযুত্তৰিপ্পযুত্তপদত্থৰণ্ণনা

সঙ্গহিতেনসম্পযুত্তৰিপ্পযুত্তপদে পন সঙ্গহিতেনসঙ্গহিতপদে নিদ্দিট্ঠানি সমুদযসচ্চাদিপদানেৰ নিদ্দিসীযন্তি. ইদং হেত্থ লক্খণং – যে ধম্মা পঠমং উদ্ধটপদেন খন্ধাদীহি তীহিপি সঙ্গহিতা, তেসং খন্ধাদীহি সম্পযোগো, ৰিপ্পযোগো চ ৰুচ্চতি.

তত্রাযং নযো – সমুদযসচ্চেন যে ধম্মা খন্ধাদীহি তীহিপি সঙ্গহেহি সঙ্গহিতা, তে ধম্মা তীহি খন্ধেহি একেনাযতনেন সত্তহি ধাতূহি সম্পযুত্তা, একেন খন্ধেন একেনাযতনেন একায ধাতুযা কেহিচি সম্পযুত্তা. একেন খন্ধেন দসহাযতনধাতূহি ৰিপ্পযুত্তা, একেনাযতনেন একায ধাতুযা কেহিচি ৰিপ্পযুত্তা. ইত্থিন্দ্রিযেন যে ধম্মা খন্ধাদীহি তীহিপি সঙ্গহিতা, তে ধম্মা ¶ ন কেহিচি সম্পযুত্তা, চতূহি খন্ধেহি একেনাযতনেন সত্তহি ধাতূহি ৰিপ্পযুত্তা, একেন…পে… কেহিচি ৰিপ্পযুত্তাতি.

তত্থ একেনাতি মনাযতনেন. একেন খন্ধেনাতি সঙ্খারক্খন্ধেন. কেহিচীতি সঙ্খারক্খন্ধে তণ্হায ধম্মাযতনধম্মধাতূসু তণ্হাৰেদনাসঞ্ঞাহি. সেসং সুৰিঞ্ঞেয্যমেৰ. অযং সঙ্গহিতেনসম্পযুত্তৰিপ্পযুত্তপদে নযো.

সম্পযুত্তেনসঙ্গহিতাসঙ্গহিতপদত্থৰণ্ণনা

সম্পযুত্তেনসঙ্গহিতাসঙ্গহিতপদে পন সম্পযুত্তেনসম্পযুত্তপদে নিদ্দিট্ঠানি ৰেদনাক্খন্ধাদিপদানেৰ নিদ্দিসীযন্তি. ইদং হেত্থ লক্খণং – যে ধম্মা পঠমং উদ্ধটপদেন সম্পযুত্তা, তেসং খন্ধাদীহি সঙ্গহো, অসঙ্গহো চ ৰুচ্চতি.

তত্রাযং ¶ নযো – ৰেদনাক্খন্ধেন যে ধম্মা সম্পযুত্তা, তে ধম্মা তীহি খন্ধেহি দ্ৰীহি আযতনেহি অট্ঠহি ধাতূহি সঙ্গহিতা, সেসেহি অসঙ্গহিতা. ৰিঞ্ঞাণক্খন্ধেন যে ধম্মা সম্পযুত্তা, তে ধম্মা তীহি খন্ধেহি একেনাযতনেন একায ধাতুযা সঙ্গহিতা, সেসেহি অসঙ্গহিতাতি.

তত্থ তীহীতি সঞ্ঞাক্খন্ধাদীহি তীহি. তেহি ৰেদনায সম্পযুত্তা. দ্ৰীহীতি ধম্মাযতনমনাযতনেহি. সেসং সুৰিঞ্ঞেয্যমেৰ. অযং সম্পযুত্তেনসঙ্গহিতাসঙ্গহিতপদে নযো.

অসঙ্গহিতেনসম্পযুত্তৰিপ্পযুত্তপদত্থৰণ্ণনা

অসঙ্গহিতেনসম্পযুত্তৰিপ্পযুত্তপদে পন যানি পদানি সুখুমরূপং অৰিঞ্ঞাণং, অরূপং সৰিঞ্ঞাণং ৰা, কেৰলং অরূপং ৰা থূলরূপস্সপি কেৰলং ৰা, সুখুমরূপং দীপেন্তি, তেসমেৰ নিদ্দেসো ¶ . ইদং হেত্থ লক্খণং – যে ধম্মা পঠমং উদ্ধটধম্মেহি খন্ধাদীহি তীহিপি অসঙ্গহিতা, তেসং খন্ধাদীহি সম্পযোগো, ৰিপ্পযোগো চ ৰুচ্চতি.

তত্রাযং নযো – রূপক্খন্ধেন যে ধম্মা খন্ধাদীহি অসঙ্গহিতা, তে ধম্মা তীহি খন্ধেহি সম্পযুত্তা, একেনাযতনেন একায ধাতুযা কেহিচি সম্পযুত্তা, একেন খন্ধেন দসহি আযতনধাতূহি ৰিপ্পযুত্তা, একেনাযতনেন একায ধাতুযা কেহিচি ৰিপ্পযুত্তা. এৰং ধম্মাযতনইত্থিন্দ্রিযাদীসুপি যোজনা.

অরূপভৰেন যে ধম্মা খন্ধাদীহি অসঙ্গহিতা, তে সম্পযুত্তাতি নত্থি. তে চতূহি খন্ধেহি একেনাযতনেন সত্তহি ধাতূহি ৰিপ্পযুত্তা, একেনাযতনেন একায ধাতুযা কেহিচি ৰিপ্পযুত্তা. এৰং ইদ্ধিপাদকুসলাদিপদেসুপি যোজনা.

তত্থ রূপক্খন্ধেন ৰিঞ্ঞাণস্সেৰ তীহিপি অসঙ্গহিতত্তা তস্স তীহি ৰেদনাদীহি সম্পযোগো, ইতরেহি চ ৰিপ্পযোগো ঞাতব্বো. সেসং সুৰিঞ্ঞেয্যমেৰ. অযং অসঙ্গহিতেনসম্পযুত্তৰিপ্পযুত্তপদে নযো.

ৰিপ্পযুত্তেনসঙ্গহিতাসঙ্গহিতপদত্থৰণ্ণনা

ৰিপ্পযুত্তেনসঙ্গহিতাসঙ্গহিতপদে ¶ পন যানি পদানি কেৰলানং সারম্মণানং, অনারম্মণানং ৰা ধম্মানং পকাসকানি চ সভাৰজাতিভূমিকালসন্তানৰসেন ভিন্নতায কেহিচি অরূপক্খন্ধেহি ৰিপ্পযুত্তানং অনারম্মণধম্মমিস্সারূপক্খন্ধানং পকাসকানি দুক্খসচ্চঅব্যাকতপরিত্তঅতীতঅজ্ঝত্তাদিপদানি, তেসমেৰ নিদ্দেসো ইতরেসং ধম্মাযতনজীৰিতিন্দ্রিযনামরূপসল়াযতনজাতিজরামরণঅজ্ঝত্তবহিদ্ধাঅনিদস্সনঅপ্পটিঘনহেতুআদীনং তেসং কেনচি ৰিপ্পযোগাসম্ভৰা. ইদং হেত্থ লক্খণং – যে ধম্মা পঠমং উদ্ধটপদেন ¶ ৰিপ্পযুত্তা, তেসং খন্ধাদীহি সঙ্গহো, অসঙ্গহো চ ৰুচ্চতি.

তত্রাযং নযো – রূপক্খন্ধেন যে ধম্মা ৰিপ্পযুত্তা, তে ধম্মা চতূহি খন্ধেহি দ্ৰীহাযতনেহি অট্ঠহি ধাতূহি সঙ্গহিতা, একেন খন্ধেন দসহি আযতনধাতূহি অসঙ্গহিতা. দুক্খসচ্চেন যে ধম্মা ৰিপ্পযুত্তা, তে ধম্মা চতূহি খন্ধেহি দ্ৰীহাযতনেহি দ্ৰীহি ধাতূহি সঙ্গহিতা. তত্থ দুক্খসচ্চেন ৰিপ্পযুত্তা নাম লোকুত্তরচিত্তচেতসিকানি, তে চ ধম্মা ৰেদনাক্খন্ধাদিচতুক্খন্ধেহি মনোৰিঞ্ঞাণধম্মধাতুৰসেন দ্ৰীহি ধাতূহি সঙ্গহিতাতি. সেসং সুৰিঞ্ঞেয্যমেৰ. অযং ৰিপ্পযুত্তেনসঙ্গহিতাসঙ্গহিতপদে নযো. অযমেত্থ সঙ্খেপতো ৰিভঙ্গনযেন সদ্ধিং অত্থনিচ্ছযো, ৰিত্থারো পন ধাতুকথাপাল়িঅট্ঠকথাসু (ধাতু. ১২; ধাতু. অট্ঠ. ১-২) গহেতব্বোতি.

মোহৰিচ্ছেদনিযা অভিধম্মমাতিকত্থৰণ্ণনায

ধাতুকথামাতিকত্থৰণ্ণনা নিট্ঠিতা.

৪. পুগ্গলপঞ্ঞত্তিমাতিকা

এককমাতিকত্থৰণ্ণনা

ইদানি ¶ ¶ পুগ্গলপঞ্ঞত্তিমাতিকাসংৰণ্ণনানযো হোতি. তত্থ অনুত্তানত্থতো তাৰ ছ পঞ্ঞত্তিযোতি এত্থ ‘‘আচিক্খতি দেসেতি পঞ্ঞপেতি পট্ঠপেতী’’তি (সং. নি. ২.২০) আগতট্ঠানে সন্দস্সনা পকাসনা পঞ্ঞত্তি নাম. ‘‘সুপঞ্ঞত্তং মঞ্চপীঠ’’ন্তি (পারা. ২৬৯) আগতট্ঠানে ঠপনা নিক্খিপনা পঞ্ঞত্তি নাম, ইধ উভযম্পি ৰট্টতি. ছ পঞ্ঞত্তিযোতি হি ছ পঞ্ঞাপনা ছ সন্দস্সনা পকাসনাতিপি, ছ ঠপনা নিক্খিপনাতিপি ৰুত্তং হোতি. নামপঞ্ঞত্তিযেৰ হি তে তে ৰিজ্জমানাৰিজ্জমানে ধম্মে সন্দস্সেতীতিপি. তেন তেন কোট্ঠাসেন ঠপেতীতিপি. খন্ধপঞ্ঞত্তীতিআদি পন সঙ্খেপতো তাসং পঞ্ঞত্তীনং সরূপদস্সনং. তত্থ খন্ধানং ‘‘খন্ধা’’তি পঞ্ঞাপনা সন্দস্সনা পকাসনা চ ঠপনা নিক্খিপনা চ খন্ধপঞ্ঞত্তি নাম…পে… পুগ্গলানং ‘‘পুগ্গলা’’তি পঞ্ঞাপনা সন্দস্সনা পকাসনা চ ঠপনা নিক্খিপনা চ পুগ্গলপঞ্ঞত্তি নাম. ইমা এৰ ছ পঞ্ঞত্তিযো ৰিজ্জন্তি. অঞ্ঞাসম্পি সম্মুতিপরমত্থকথানং পঞ্ঞত্তীনং অনন্তত্তা, উপলক্খণৰসেন পন পধানভাৰতো চ এতাৰ ৰুত্তা. পাল়িমুত্তকনযেন পন সব্বসঙ্গাহিকা ৰিজ্জমানপঞ্ঞত্তিআদযো ছ নামপঞ্ঞত্তিযো অট্ঠকথাসু (পু. প. অট্ঠ. মাতিকাৰণ্ণনা ১) আগতা, তা চ হেট্ঠা ৰুত্তাতি ইধ ন ৰুত্তা. তাসু ইধ পুগ্গলপঞ্ঞত্তিপদেন অৰিজ্জমানপঞ্ঞত্তি, সেসেহি ৰিজ্জমানপঞ্ঞত্তি চাতি দ্ৰে এৰ লব্ভন্তি.

অট্ঠকথামুত্তকেন পন আচরিযনযেন অপরাপি ছ পঞ্ঞত্তিযো – উপাদাপঞ্ঞত্তি উপনিধাপঞ্ঞত্তি সমোধানপঞ্ঞত্তি উপনিক্খিত্তপঞ্ঞত্তি তজ্জাপঞ্ঞত্তি সন্ততিপঞ্ঞত্তীতি, যা ‘‘অত্থপঞ্ঞত্তী’’তি ¶ ৰুচ্চতি. তত্থ যা খন্ধপঞ্চকং উপাদায নিস্সায সম্মতা ¶ সত্তাদিকা, অঙ্গানি উপাদায রথাদিকা, চন্দাদিপরিৰত্তাদযো উপাদায কালদিসাদিকা, তংতংভূতনিমিত্তং, ভাৰনাৰিসেসঞ্চ উপাদায কসিণাদিউগ্গহপটিভাগনিমিত্তাদিকাতি অযং এৰরূপা সভাৰধম্মেহি একত্তেন ৰা সচ্ছিকট্ঠপরমত্থেন অনুপলব্ভসভাৰা উপাদাপঞ্ঞত্তি নাম. পঞ্ঞাপেতব্বট্ঠেন চেসা পঞ্ঞত্তি ৰুত্তা, ন পন পঞ্ঞাপনট্ঠেন. যা তস্স তস্সত্থস্স পঞ্ঞাপনা, সা অৰিজ্জমানপঞ্ঞত্তিযেৰ.

যা পন অঞ্ঞং পঠমাদিং উপনিধায অপেক্খিত্ৰা দুতিযং রস্সং দীঘং দূরং সন্তিকন্তিআদিকা তদঞ্ঞাপেক্খূপনিধা, ছত্তপাণীতিআদিকা হত্থগতূপনিধা, কুণ্ডলীতিআদিকা সম্পযুত্তূপনিধা, ধঞ্ঞসকটন্তি আদিকা সমারোপিতূপনিধা, ইন্দসালগুহাতিআদিকা অৰিদূরগতূপনিধা, সুৰণ্ণৰণ্ণোতিআদিকা পটিভাগূপনিধা, ব্রাহ্মণগামোতিআদিকা তব্বহুলূপনিধা, মণিকটকন্তিআদিকা তব্বিসিট্ঠূপনিধাতি এৰমাদি অনেকপ্পকারা পঞ্ঞাপনা, অযং উপনিধাপঞ্ঞত্তি নাম.

ধঞ্ঞরাসীতিআদিকা পন সমোধানপঞ্ঞত্তি নাম. পুরিমস্স পুরিমস্স উপনিক্খিপিত্ৰা দ্ৰে তীণীতিআদিকা উপনিক্খিত্তপঞ্ঞত্তি নাম. তংতংসভাৰনিস্সিতা পথৰীআদিকা তজ্জাপঞ্ঞত্তি নাম. আসীতিকোতিআদিকা পন সন্ততিপঞ্ঞত্তি নাম.

অট্ঠকথামুত্তকেনেৰ আচরিযনযেন অপরাপি ধম্মকথিকাদিকা কিচ্চপঞ্ঞত্তি, কিসথূলাদিকা সণ্ঠানপঞ্ঞত্তি, ইত্থিপুরিসাদিকা লিঙ্গপঞ্ঞত্তি, কামাৰচরাদিকা, কোসলকাদিকা চ ভূমিপঞ্ঞত্তি, তিস্সো নাগোতিআদিকা পচ্চত্তপঞ্ঞত্তি, নিরোধাদিকা অসঙ্খতপঞ্ঞত্তি চাতি ছ পঞ্ঞত্তিযো.

এতাসু ¶ পন দ্ৰাদসসু তজ্জাপঞ্ঞত্তি, একচ্চা ভূমিপঞ্ঞত্তি, অসঙ্খতপঞ্ঞত্তি চ ৰিজ্জমানপঞ্ঞত্তিসঙ্খাতা নামপঞ্ঞত্তি, তদঞ্ঞা পরমত্থাৰসেসা, পন অত্থপঞ্ঞত্তীতি দীপিতা অৰিজ্জমানাদিপঞ্ঞত্তিযো চাতি. অযং তাৰেত্থ অনুত্তানত্থতো সংৰণ্ণনা.

অত্থনিচ্ছযো পনেত্থাপি পাল়িনযেনেৰ সদ্ধিং হোতি, ন ৰিনা পাল়িং তস্স ৰত্তুমসক্কুণেয্যত্তা ¶ . পাল়িযঞ্চ যস্মা আদিতো পঞ্চ পঞ্ঞত্তিযো, তদত্থভূতা খন্ধাদযো চ হেট্ঠা ৰিভঙ্গপ্পকরণে নিপ্পদেসতো কথিতাতি তা ইধ ‘‘কিত্তাৰতা খন্ধানং খন্ধপঞ্ঞত্তি, যাৰতা পঞ্চক্খন্ধা রূপক্খন্ধো’’তিআদিনা সঙ্খেপেনেৰ নিদ্দিট্ঠা, তা চেত্থাপি ৰুত্তত্থা. পুগ্গলপঞ্ঞত্তি পন হেট্ঠা ন ৰুত্তাতি ‘‘কিত্তাৰতা পুগ্গলানং পুগ্গলপঞ্ঞত্তি? সমযৰিমুত্তো, অসমযৰিমুত্তো’’তিআদিনা এককাদিভেদেন যাৰ দসকা দসধা মাতিকং ঠপেত্ৰা ৰিত্থারেনেৰ ৰিভত্তা, সা চ ঞাতব্বপভেদতো অৰুচ্চমানা দুব্বিঞ্ঞেয্যা, তস্মা পুগ্গলপঞ্ঞত্তিযা এৰ চেত্থ পাল়িনযানুসারেন সঙ্খেপতো অত্থনিচ্ছযো হোতি, সো চেত্থ মাতিকাযং ৰুত্তে সব্বপুগ্গলে অনুদ্ধরিত্ৰা ঞাতব্বানং দুব্বিঞ্ঞেয্যানং পুগ্গলানং এককাদিভেদতোৰ মাতিকং উদ্ধরিত্ৰা ৰিভজনৰসেন সঙ্খেপতোৰ হোতি. কথং? ‘‘সমযৰিমুত্তো অসমযৰিমুত্তো, কুপ্পধম্মো অকুপ্পধম্মো, চেতনাভব্বো অনুরক্খণাভব্বো, ভযূপরতো অভযূপরতো, ভব্বাগমনো অভব্বাগমনো, নিযতো অনিযতো, পটিপন্নকো ফলে ঠিতো, সমসীসী ঠিতকপ্পী, সোতাপন্নো সত্তক্খত্তুপরমো কোলংকোলো একবীজী, সকদাগামী, অনাগামী অন্তরাপরিনিব্বাযী উপহচ্চপরিনিব্বাযী অসঙ্খারপরিনিব্বাযী সসঙ্খারপরিনিব্বাযী উদ্ধংসোতো অকনিট্ঠগামী, অরহা’’তি এককমাতিকা.

তত্থ ¶ যো অপ্পনং নিব্বত্তেতুং যুত্তপত্তকালে রূপারূপসমাপত্তিসঙ্খাতেহি অট্ঠহি ৰিমোক্খেহি পচ্চনীকধম্মতো ৰিমুচ্চিত্ৰা তীসু মগ্গেসু যেন কেনচি যথাসকং আসৰে খেপেত্ৰা ৰুট্ঠিতো, অযং সমযৰিমুত্তো নাম. ‘‘একচ্চে আসৰা পরিক্খীণা’’তিআদিৰচনতো (পু. প. ১) হি অট্ঠসমাপত্তিলাভী পুথুজ্জনো ৰা খীণাসৰো ৰা ইধ ন গহিতো, সমাপত্তিলাভিনো পন ফলট্ঠসেখাৰ গহিতাতি ৰেদিতব্বা. সুক্খৰিপস্সকখীণাসৰো, সব্বেপি চ অরিযা মগ্গৰিমোক্খং সন্ধায অসমযৰিমুত্তা নাম. বাহিরানঞ্হি অট্ঠন্নং সমাপত্তীনং সমাপজ্জন্তস্স পৰিৰেকট্ঠানলাভাদিসমযোপি অত্থি, ৰত্তকরণকালাদিঅসমযোপি অত্থি. মগ্গৰিমোক্খেন ৰিমুচ্চনস্স পন তাদিসো সমযো ৰা অসমযো ৰা নত্থি, যস্স সদ্ধা বলৰতী, ৰিপস্সনা চ আরদ্ধা, তস্স গচ্ছন্তস্স ৰা ভুঞ্জন্তস্স ৰা মগ্গফলপটিৰেধো নাম ন হোতীতি নত্থি, তস্মা সব্বে অরিযা অরিযৰিমোক্খে অসমযৰিমুত্তাতি ৰেদিতব্বা. পুরিমপদেপি লোকিযসমাপত্তিঞ্ঞেৰ সন্ধায সেখা সমযৰিমুত্তা নাম জাতা.

অৰসিভাৰা অট্ঠসমাপত্তিলাভী পন পুথুজ্জনো, সোতাপন্নসকদাগামিনো দ্ৰে সেখা অট্ঠসমাপত্তিং ¶ সন্ধায কুপ্পধম্মো নাম. পরিহানধম্মোতিপি দুৰিধা এৰ. অনাগামিআদযো সুপ্পহীনসমাধিপারিপন্থিকত্তা ৰসিভাৰা সমাপত্তিলাভী পুথুজ্জনো, অরিযা চ লোকুত্তরধম্মেপি সন্ধায অকুপ্পধম্মো নাম. অপরিহানধম্মোতি তে এৰ. চেতনাভব্বোতি চেতনাসঙ্খাতেন ঝানসমাপত্তিৰল়ঞ্জনেন অপরিহানিং আপজ্জিতুং ভব্বো. যো হি রূপারূপজ্ঝানেসু আচিণ্ণৰসিতায চেতনাসঙ্খাতায ঝানসমাপত্তিযা নিরন্তরং ৰল়ঞ্জমানো তেহি ন পরিহাযতি, অৰল়ঞ্জমানো চ পরিহাযতি, অযং ৰল়ঞ্জমানো চেতনাভব্বো ¶ নাম. অনুরক্খণাভব্বোতি ঝানস্স উপকারানুপকারধম্মে জানিত্ৰা অনুরক্খণায অৰল়ঞ্জমানোপি অপরিহানিং আপজ্জিতুং ভব্বো, এসো চ পুরিমতো বলৰতরো, আচিণ্ণৰসিনো পঞ্ঞাসম্পদায উপকারানুপকারধম্মে জানিত্ৰা তদনুরূপং পটিপজ্জনতোতি ৰেদিতব্বো.

ভযূপরতোতি ভযেন পাপতো উপরতো ৰিরতো সেখো, কল্যাণপুথুজ্জনো চ. তেসু পচ্ছিমো দুগ্গতিৰট্টকিলেসউপৰাদসঙ্খাতেহি চতূহি ভযেহি পাপতো ওরমতি, সেখো দুগ্গতিৰজ্জেহি, অপাযেহি মুত্তত্তা. খীণাসৰো পন অভযূপরতো নাম সমুচ্ছিন্নভযত্তা, উপৰাদতো পন ওরমিতব্বো.

অভব্বাগমনোতি সম্মত্তনিযামাগমনস্স অভব্বো, যে আনন্তরিযসঙ্খাতেন কম্মাৰরণেন, নিযতমিচ্ছাদিট্ঠিসঙ্খাতেন কিলেসাৰরণেন, অহেতুকদুহেতুকপটিসন্ধিসঙ্খাতেন ৰিপাকাৰরণেন চ সমন্নাগতা, বুদ্ধাদীসু চ সদ্ধারহিতা, মগ্গভাৰনায চ উত্তরকুরুকাদযো ৰিয অচ্ছন্দিকা, পুব্বূপনিস্সযরহিতা চ, সব্বেতে অভব্বাগমনা নাম. ৰিপরীতা ভব্বাগমনা নাম. পঞ্চানন্তরিযনিযতমিচ্ছাদিট্ঠিকা নিরযগমনে, অট্ঠ অরিযপুগ্গলা অনুপাদাপরিনিব্বানাদীসু নিযতা নাম. অৰসেসপুগ্গলা অনিবদ্ধগতিকতায অনিযতা নাম, উত্তরকুরুকা পন সুগতিনিযতাপি মিচ্ছত্তসম্মত্তনিযামস্সেৰ ইধাধিপ্পেতত্তা ‘‘নিযতা’’তি ন ৰুত্তা. মগ্গসমঙ্গী পুগ্গলো মগ্গক্খণে ফলত্থায পটিপন্নকো নাম, ফলসমঙ্গী ফলানুপ্পত্তিযম্পি ফলে ঠিতো নাম.

যস্স পন অপুব্বাচরিমং আসৰপরিযাদানঞ্চ হোতি জীৰিতপরিযাদানঞ্চ, অযং সমসীসী নাম. সো চ তিৰিধো হোতি ইরিযাপথসমসীসী রোগসমসীসী জীৰিতসমসীসীতি. তত্থ যো চতূসু ইরিযাপথেসু একস্মিং ৰিপস্সনং পট্ঠপেত্ৰা ¶ অরহত্তং পত্ৰা তস্মিঞ্ঞেৰ ইরিযাপথে পরিনিব্বাতি, অযং ইরিযাপথসমসীসী নাম. যো পন একং রোগং পত্ৰা অন্তোরোগে এৰ ¶ ৰিপস্সনং পট্ঠপেত্ৰা অরহত্তং পত্ৰা তেনেৰ রোগেন পরিনিব্বাতি, অযং রোগসমসীসী নাম. যস্স পন কিলেসসীসসঙ্খাতা অৰিজ্জা, অরহত্তমগ্গেন পৰত্তসীসসঙ্খাতং জীৰিতিন্দ্রিযঞ্চ চুতিচিত্তেন সমং পরিযাদানং গচ্ছতি, অযং জীৰিতসমসীসী নাম. কথমিদং সমং হোতীতি? ৰারসমতায. যস্মিং হি ৰারে মগ্গেন কিলেসে খেপিতে পচ্চৰেক্খণঞাণানি পৰত্তন্তি, তস্সানন্তরমেৰ পরিনিব্বাযতো ইমায ৰারসমতায ইদং উভযসীসপরিযাদানম্পি সমং হোতি নাম, অযমেৰ জীৰিতসমসীসী ইধাধিপ্পেতো.

ঠিতকপ্পীতি ঠিতো কপ্পো ঠিতকপ্পো, স্ৰাস্স অত্থীতি ঠিতকপ্পী, কপ্পম্হি ৰিনস্সমানম্হি কপ্পং ঠপেতুং সমত্থোতি অত্থো.

সচে হি যেসং মগ্গসমঙ্গিক্খণে কপ্পৰিনাসো ভৰেয্য, নেৰ তাৰ কপ্পো ৰিনস্সেয্য, যাৰাযং যথাসকং ফলং ন সচ্ছিকরোতীতি তে ৰিনস্সমানম্পি কপ্পং ঠপেন্তীতি ঠিতকপ্পিনো নাম জাতাতি. কিঞ্চাপি কপ্পৰিনাসনকালে সাসনং নত্থি, গতকোটিকে হি কালে কপ্পৰিনাসো হোতি, এৰং সন্তেপি মগ্গানন্তরফলস্স অনন্তরাযং দীপেতুং ইদং অভূতম্পি কারণং আহটং.

সোতাপন্নোতি নিব্বানসমুদ্দনিন্নতায সোতসঙ্খাতস্স মগ্গস্স পঠমসমঙ্গী ৰুচ্চতি, ইধ পন ফলট্ঠো অধিপ্পেতো. তস্সেৰ চ পভেদদস্সনত্থং ‘‘সত্তক্খত্তুপরমো’’তিআদি ৰুত্তং. সত্তৰারা পরমা অস্স ভৰূপপত্তীতি সত্তক্খত্তুপরমো, ততো পরং অট্ঠমং ভৰং নাদিযতীতি অত্থো. সোতাপন্নো হি যো সত্তক্খত্তুং দেৰেসু, মনুস্সেসু চ পটিসন্ধিং ¶ গহেত্ৰা সত্তমে ভৰে দুক্খস্সন্তং করোতি, অযং সত্তক্খত্তুপরমো নাম. কুলতো কুলং ভৰতো ভৰং গচ্ছতীতি কোলংকোলো. সো হি দেৰমনুস্সৰসেন দ্ৰে গতিযো ভৰে সংসরিত্ৰা দুক্খস্সন্তং করোতি, অযং কোলংকোলো নাম. কম্মপটিসন্ধিযা একং কম্মং কিলেসবীজং অস্সাতি একবীজী. সো হি একস্মিঞ্ঞেৰ ভৰে খীণাসৰো হোতি. কিং পনস্স ভেদস্স নিযামকন্তি? ৰিপস্সনাভিঞ্ঞাভেদা. সোতাপন্নেসু হি যো ৰিপস্সনায পমত্তো, সো সত্তক্খত্তুপরমো হোতি. যো কিঞ্চি অপ্পমত্তো, সো কোলংকোলো. যো পন ৰিপস্সনায অতিৰিয অপ্পমত্তো, সো একবীজী হোতি. যে পন অভিৰিয পমত্তা ৰট্টজ্ঝাসযা অনাথপিণ্ডিকৰিসাখাসক্কাদযো, তে পুনপ্পুনং ৰট্টস্মিংযেৰ ৰিচরন্তা আদিতো পট্ঠায ছ দেৰলোকে ওসাপেত্ৰা ব্রহ্মলোকেসুপি যথাক্কমং নিব্বত্তিত্ৰা অকনিট্ঠে ঠত্ৰা পরিনিব্বন্তি, ন তে ইধ গহিতা. তে হি মনুস্সগতিং পুনপ্পুনং ¶ আদিযন্তি. যে পন মনুস্সগতিযম্পি ভৰং আদিযন্তি, তেসং ৰসেন সত্তক্খত্তুপরমো কোলংকোলো মানুসিকভৰনিব্বত্তকো এৰ একবীজী গহিতো. তে পন সদ্ধাধুরেন আগতা তযো, পঞ্ঞাধুরেন আগতা তযোতি সোতাপন্নো ছব্বিধো হোতীতি ৰেদিতব্বো.

পটিসন্ধিৰসেন পন সকিং ইমং মনুস্সগতিং আগচ্ছতীতি সকদাগামী, দুতিযমগ্গফলসমঙ্গী. ইমিনা পঞ্চসু সকদাগামীসু চত্তারো ৰজ্জেত্ৰা একোৰ গহিতো. একচ্চো হি সকদাগামিফলে ঠত্ৰা পুন দুতিযভৰে ইধেৰ পরিনিব্বাতি, একচ্চো ইধ পত্ৰা দেৰলোকে পরিনিব্বাতি, একচ্চো দেৰলোকে পত্ৰা দুতিযভৰে তত্থেৰ পরিনিব্বাতি, একচ্চো দেৰলোকে পত্ৰা ইধূপপজ্জিত্ৰা পরিনিব্বাতি, ইমে চত্তারোপি ইধ ন গহিতা. যো পন ইধ পত্ৰা দেৰলোকে ¶ নিব্বত্তিত্ৰা পুন ইধূপপজ্জিত্ৰা পরিনিব্বাতি, অযমেকোৰ ইধ গহিতো. ইমস্স চ দ্ৰে পটিসন্ধিযো, একবীজিস্স পন একাৰাতি ইদং তেসং নানাকরণন্তি ৰেদিতব্বং.

পটিসন্ধিৰসেন কামভৰং নাগচ্ছতীতি অনাগামী, ততিযমগ্গফলসমঙ্গী. তস্সেৰ পন পভেদদস্সনত্থং ‘‘অন্তরাপরিনিব্বাযী’’তিআদি ৰুত্তং. তত্থ অন্তরাপরিনিব্বাযীতি আযুৰেমজ্ঝস্স অন্তরা এৰ অরহত্তমগ্গং উপ্পাদেত্ৰা কিলেসপরিনিব্বানেন পরিনিব্বাযনসীলো একো অনাগামী. সো চ উপ্পন্নসমনন্তরং পরিনিব্বাযী, আযুৰেমজ্ঝং অপ্পত্ৰা পরিনিব্বাযী, আযুৰেমজ্ঝং পত্ৰা পরিনিব্বাযীতি তিৰিধো হোতি. উপহচ্চপরিনিব্বাযীতি আযুৰেমজ্ঝং উপহচ্চ অতিক্কমিত্ৰা, মরণসমযং ৰা উপহচ্চ উপগন্ত্ৰা পরিনিব্বাযী, আযুৰেমজ্ঝং অতিক্কমিত্ৰা যাৰ মরণসমযা পরিনিব্বাযীতি অত্থো. অসঙ্খারপরিনিব্বাযীতি অসঙ্খারেন অপ্পদুক্খেন অধিমত্তপ্পযোগং অকত্ৰা পরিনিব্বাযনসীলো. সসঙ্খারপরিনিব্বাযীতি সসঙ্খারেন দুক্খেন কসিরেন অধিমত্তপ্পযোগেন পরিনিব্বাযনসীলো. উদ্ধংসোতোতি উদ্ধংৰাহিভাৰেন উদ্ধমস্স তণ্হাসোতং ৰট্টসোতঞ্চ, উদ্ধং ৰা গন্ত্ৰা পটিলভিতব্বতো উদ্ধং মগ্গসোতমস্সাতিপি উদ্ধংসোতো. অকনিট্ঠং গচ্ছতীতি অকনিট্ঠগামী. ইমেসং পন অনাগামীনং পভেদদস্সনত্থম্পেত্থ উদ্ধংসোতো অকনিট্ঠগামীতিআদি চতুক্কং ৰেদিতব্বং.

তত্থ যো অৰিহতো পট্ঠায চতূসু যথাক্কমং উপ্পজ্জিত্ৰা যাৰতাযুকং ঠত্ৰা চুতো অকনিট্ঠে উপ্পজ্জিত্ৰা পরিনিব্বাতি, অযং উদ্ধংসোতো অকনিট্ঠগামী নাম. যো পন অকনিট্ঠং অপ্পত্ৰা অন্তরা পরিনিব্বাতি, অযং উদ্ধংসোতো ন অকনিট্ঠগামী নাম. যো মনুস্সলোকো অকনিট্ঠমেৰ ¶ গন্ত্ৰা পরিনিব্বাতি, অযং ন উদ্ধংসোতো অকনিট্ঠগামী নাম. যো পন হেট্ঠা চতূসু সুদ্ধাৰাসেসু অঞ্ঞতরস্মিং উপ্পজ্জিত্ৰা তত্থেৰ পরিনিব্বাতি, অযং ন উদ্ধংসোতো ন অকনিট্ঠগামী নাম ¶ . এৰমেতে অনাগামিনো অট্ঠচত্তালীসৰিধা হোন্তি. কথং? অৰিহেসু তাৰ তযো অন্তরাপরিনিব্বাযিনো, একো উপহচ্চপরিনিব্বাযী, একো উদ্ধংসোতোতি পঞ্চ, তে অসঙ্খারপরিনিব্বাযিসসঙ্খারপরিনিব্বাযিৰসেন দস হোন্তি, এৰং অতপ্পসুদস্সসুদস্সীসূতি চত্তালীসং, অকনিট্ঠে পন উদ্ধংসোতো নত্থি, তস্মা তত্থ তং সসঙ্খারাসঙ্খারৰসেন দুৰিধং উদ্ধংসোতং ৰজ্জেত্ৰা অট্ঠ চাতি অট্ঠচত্তালীস হোন্তি.

অরহাতি কিলেসারীনং হতত্তাদিনা খীণাসৰো অরহা নাম. সো সুঞ্ঞতাদিৰিমোক্খত্তযৰসেন তিৰিধো হুত্ৰা পুন পচ্চেকং পটিপদাচতুক্কৰসেন দ্ৰাদসৰিধা হোন্তি. যথা চ অরহা দ্ৰাদসৰিধো, এৰং দ্ৰাদসেৰ সকদাগামিনো, চতুৰীসতি সোতাপন্না অট্ঠচত্তালীস অনাগামিনোৰ পচ্চেকন্তি ৰেদিতব্বং. ইমে চ সব্বে অরিযা ইমস্মিং সাসনে এৰ উপ্পজ্জন্তি, নো বহিদ্ধাতি. এককনযো.

দুকাদিমাতিকত্থৰণ্ণনা

দুকাদীসু ‘‘দ্ৰে পুগ্গলা – কোধনো চ উপনাহী চ মক্খী চ পল়াসী চা’’তিআদিনা দুকঞ্চ, ‘‘তযো পুগ্গলা – নিরাসো আসংসো ৰিগতাসো’’তিআদিনা তিকঞ্চ, ‘‘চত্তারো পুগ্গলা – অসপ্পুরিসো, অসপ্পুরিসেনঅসপ্পুরিসতরো, সপ্পুরিসো, সপ্পুরিসেনসপ্পুরিসতরো’’তিআদিনা চতুক্কঞ্চ, ‘‘পঞ্চ পুগ্গলা – অত্থেকচ্চো পুগ্গলো আরভতি চ ৰিপ্পটিসারী চ হোতি, তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি. যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি, অত্থেকচ্চো পুগ্গলো আরভতি ন ৰিপ্পটিসারী চ হোতি…পে… অপরিসেসা নিরুজ্ঝন্তি, অত্থেকচ্চো পুগ্গলো নারভতি ৰিপ্পটিসারী চ হোতি…পে… অপরিসেসা নিরুজ্ঝন্তি. অত্থেকচ্চো ¶ পুগ্গলো নারভতি ন ৰিপ্পটিসারী হোতি…পে… অপরিসেসা নিরুজ্ঝন্তী’’তিআদিনা পঞ্চকঞ্চ ৰিত্থারতো মাতিকং নিক্খিপিত্ৰা সব্বেপি তে পুগ্গলা নিদ্দিট্ঠা, ইধ পন তে গন্থৰিত্থারভযেন সব্বে ন উদ্দিট্ঠা, পাল়িযা এৰ ঞাতব্বাতি.

তত্থ ¶ তিকে নিরাসোতি অরহত্তাসায ৰিরহিতো দুস্সীলো. তস্স হি অত্তনো অভব্বতায ভব্বসহাযকস্স সীলৰতো অরহত্তপ্পত্তিং সুত্ৰা, চণ্ডালপুত্তস্স ৰিয কস্সচি রাজপুত্তস্স রজ্জাভিসেকং সুত্ৰা অভিসেকপ্পত্তিযং, ‘‘কুদাস্সু নামাহম্পি অরহত্তং পাপুণেয্য’’ন্তি অরহত্তপ্পত্তিযং পত্থনাপি ন উপ্পজ্জতি. আসংসোতি অরহত্তং আসীসমানো পত্থযমানো সীলৰা. তস্স হি অরহত্তপত্থনায সীলসম্পত্তিযা ঠিতত্তা কস্সচি অরহত্তপ্পত্তিং সুত্ৰা, উভতোসুজাতস্স রাজকুমারস্স ৰিয তাদিসস্স কস্সচি রজ্জাভিসেকং সুত্ৰা অভিসেকপ্পত্তিযং, অরহত্তপ্পত্তিযং পত্থনা উপ্পজ্জতি. ৰিগতাসোতি অরহা. সো হি পত্তঅরহত্ততায তত্থ ৰিগতাসো হোতি পত্তাভিসেকো ৰিয খত্তিযো অভিসেকপ্পত্তিযন্তি ৰেদিতব্বং.

চতুক্কে পন পাণাতিপাতাদিঅকুসলকম্মপথসমন্নাগতো অসপ্পুরিসো নাম. যো পন সযম্পি পাণাতিপাতাদীনি কত্ৰা পরঞ্চ তত্থ সমাদপেতি, অযং অসপ্পুরিসেনঅসপ্পুরিসতরো, অসপ্পুরিসতোপি অসপ্পুরিসতরোতি অত্থো. ৰুত্তপটিপক্খকুসলৰসেন সপ্পুরিসো, সপ্পুরিসেনসপ্পুরিসতরো চ ৰেদিতব্বো.

পঞ্চকে আরভতি চ ৰিপ্পটিসারী চ হোতীতি এত্থ আরম্ভ-সদ্দো আপত্তিৰীতিক্কমে ৰত্ততি, তস্মা আপত্তিৰীতিক্কমৰসেন আরভতি চেৰ তপ্পচ্চযা চ ৰিপ্পটিসারী হোতীতি অত্থো. চেতোৰিমুত্তিন্তি ফলসম্পযুত্তসমাধিং. পঞ্ঞাৰিমুত্তিন্তি ফলসম্পযুত্তঞাণং. যথাভূতং নপ্পজানাতীতি অনধিগতত্তা ¶ যথাসভাৰতো নপ্পজানাতি. যত্থস্সাতি যস্মিং অরহত্তফলসঙ্খাতে ঝানে অধিগতে অস্স পুগ্গলস্স সব্বে পাপকা অকুসলা ধম্মা নিরৰসেসা নিরুজ্ঝন্তি, তে নপ্পজানাতীতি সম্বন্ধো. কিঞ্চাপি তে মগ্গক্খণে এৰ নিরুজ্ঝন্তি নাম, ফলক্খণে পন নিরুদ্ধা নাম হোন্তি, ইধ পন মগ্গকিচ্চৰসেন ‘‘ফলক্খণে নিরুজ্ঝন্তী’’তি ৰুত্তাতি ৰেদিতব্বা.

আরভতি ন ৰিপ্পটিসারী চ হোতীতি আপত্তিং আপজ্জতি, তং পন দেসেতুং সভাগপুগ্গলং পরিযেসতি, ৰুট্ঠাপেতি ৰা, তস্মা ন ৰিপ্পটিসারী হোতি. নারভতি ৰিপ্পটিসারী চ হোতীতি আপত্তিং নাপজ্জতি, ৰিনযপঞ্ঞত্তিযং পন অকোৰিদত্তা অনাপত্তিযা আপত্তিসঞ্ঞিতায ৰুট্ঠিতাযপি তং আপত্তিযা ৰিপ্পটিসারং ৰিনোদেতুং অসক্কুণেয্যতায ৰিপ্পটিসারী হোতি. নারভতি ন ৰিপ্পটিসারী হোতীতি নারভতি নেৰ আপত্তিং আপজ্জতি, ন ৰিপ্পটিসারী হোতি. অরহত্তঞ্চ ¶ ন পাপুণাতি. কতরো পনেস পুগ্গলোতি? সীলৰা ওস্সট্ঠৰীরিযো পুগ্গলো. সো হি ‘‘কিং মে ইমস্মিং বুদ্ধকালে পরিনিব্বানেন, অনাগতে মেত্তেয্যসম্মাসম্বুদ্ধকালে পরিনিব্বাযিস্সামী’’তি ৰিসুদ্ধসীলোপি পটিপত্তিং ন পূরেতি. ইমে চত্তারোপি পুগ্গলা তথা তথা ওৰদিত্ৰা আসৰক্খযে পতিট্ঠাপেতব্বা. এৰং হি তেপি য্ৰাযং পঞ্চমো পুগ্গলো নারভতি ন ৰিপ্পটিসারী আরদ্ধৰীরিযো অরহত্তং পাপুণাতি, তেন সমসমাৰ ভৰিস্সন্তীতি.

ছক্কাদীসু –

‘‘ছ পুগ্গলা – অত্থেকচ্চো পুগ্গলো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝতি, তত্থ চ সব্বঞ্ঞুতং পাপুণাতি বলেসু চ ৰসীভাৰং. অত্থেকচ্চো পুগ্গলো…পে… অভিসম্বুজ্ঝতি, ন চ তত্থ সব্বঞ্ঞুতং ¶ পাপুণাতি, ন চ বলেসু ৰসিভাৰং. অত্থেকচ্চো পুগ্গলো…পে… অনভিসম্বুজ্ঝতি, দিট্ঠেৰ ধম্মে দুক্খস্সন্তকরো হোতি, সাৰকপারমিঞ্চ পাপুণাতি. অত্থেকচ্চো পুগ্গলো…পে… দুক্খস্সন্তকরো হোতি, ন চ সাৰকপারমিং পাপুণাতি. অত্থেকচ্চো পুগ্গলো…পে… অনভিসম্বুজ্ঝতি, ন চ দিট্ঠেৰ ধম্মে দুক্খস্সন্তকরো হোতি, অনাগামী হোতি অনাগন্তা ইত্থত্তং. অত্থেকচ্চো পুগ্গলো…পে… অনভিসম্বুজ্ঝতি, ন চ দিট্ঠেৰ ধম্মে দুক্খস্সন্তকরো হোতি, আগামী হোতি আগন্তা ইত্থত্ত’’ন্তি –

ছক্কং, ‘‘সত্ত পুগ্গলা – সত্ত উদকূপমা পুগ্গলা সকিং নিমুগ্গো নিমুগ্গোৰ হোতি, উম্মুজ্জিত্ৰা নিমুজ্জতি, উম্মুজ্জিত্ৰা ঠিতো হোতি, উম্মুজ্জিত্ৰা ৰিপস্সতি ৰিলোকেতি, উম্মুজ্জিত্ৰা পতরতি, উম্মুজ্জিত্ৰা পটিগাধপ্পত্তো হোতি, উম্মুজ্জিত্ৰা তিণ্ণো হোতি পারঙ্গতো, থলে তিট্ঠতি ব্রাহ্মণো’’তিআদিনা সত্তকং, ‘‘অট্ঠ পুগ্গলা – চত্তারো মগ্গসমঙ্গিনো, চত্তারো ফলসমঙ্গিনো পুগ্গলা’’তি অট্ঠকং, ‘‘নৰ পুগ্গলা – সম্মাসম্বুদ্ধো পচ্চেকসম্বুদ্ধো উভতোভাগৰিমুত্তো পঞ্ঞাৰিমুত্তো কাযসক্খী দিট্ঠিপ্পত্তো সদ্ধাৰিমুত্তো ধম্মানুসারী সদ্ধানুসারী’’তি নৰকং, ‘‘দস পুগ্গলা – পঞ্চন্নং ইধ নিট্ঠা, পঞ্চন্নং ইধ ৰিহায নিট্ঠা’’তি দসকঞ্চ মাতিকং নিক্খিপিত্ৰা পাল়িযং নিদ্দেসো কতো. তত্থ ছক্কে পঠমেন পদেন সম্মাসম্বুদ্ধো দট্ঠব্বো. সো হি অনাচরিযকো অত্তনা উপ্পাদিতেন সব্বঞ্ঞুতঞ্ঞাণপদট্ঠানেন অরহত্তমগ্গঞাণেন সব্বাকারতো সচ্চানি অভিসম্বুজ্ঝিত্ৰা সব্বঞ্ঞুতং পাপুণি, দসঞাণবলেসু ¶ চ ৰসিভাৰন্তি. দুতিযেন পন পচ্চেকসম্বুদ্ধো দট্ঠব্বো. ততিযেন অগ্গসাৰকো, চতুত্থেন অৰসেসা অরহন্তো ¶ , পঞ্চমেন অনাগামী, ছট্ঠেন সোতাপন্নসকদাগামিনো দট্ঠব্বা. তে হি ‘‘আগন্তা ইত্থত্ত’’ন্তি ৰুত্তাতি.

সত্তকে পঠমেন পদেন সাসনে অনিৰিট্ঠসদ্ধো নিযতমিচ্ছাদিট্ঠিধম্মেহি একন্তকাল়কেহি সমন্নাগতো গহিতো. সো হি সমুদ্দে উদকভীরুকপুরিসো ৰিয সংসারে অপাযে নিমুগ্গো নিমুগ্গোৰ হোতি, ন পুন ভৰতো ৰুট্ঠাতি, অনন্তম্পি কালং ভৰে এৰ ৰিচরতি সাসনসমাযোগাভাৰা. দুতিযেন পদেন সাসনে পটিলদ্ধসদ্ধোপি দেৰদত্তাদযো ৰিয সদ্ধাদিপরিহানিযং ঠিতো দুস্সীলো গহিতো. সো হি সমুদ্দে কেনচি কারণেন উম্মুজ্জিত্ৰা পুন নিমুগ্গো ৰিয সাসনসদ্ধায উম্মুজ্জিত্ৰাপি অপাযে নিমুজ্জতি এৰ, অযং পন চিরকালাতিক্কমেন বুদ্ধাদীহি, অত্তনা এৰ ৰা পচ্চেকবোধিঞাণেন ভৰতো উদ্ধরণীযো হোতি সাসনে সকিং উপ্পন্নাযপি সদ্ধায মোক্খভাৰেন নিযমেন নিব্বানাৰহত্তা. অযমেৰ হিস্স পুরিমপুগ্গলতো ৰিসেসো, ইতরথা তস্স ৰিসুং গহণে পযোজনমেৰ ন সিযাতি গহেতব্বং. ততিযেন সাসনে উপ্পন্নসদ্ধো ঠিতিভাগিযেহি সীলাদিগুণেহি সমন্নাগতো গহিতো. সো হি উম্মুজ্জিত্ৰা তীরং অদিস্ৰাৰ সমুদ্দমজ্ঝে নাৰাদিআগমনং ওলোকেন্তো পুন অনিমুজ্জিত্ৰা উণ্ণতপ্পদেসে ঠিতো ৰিয সাসনসদ্ধায উম্মুজ্জিত্ৰা নিব্বানং অদিস্ৰাৰ বুদ্ধাদিং ওলোকযমানো সগ্গে, সীলাদিম্হি ঠিতো হোতি. চতুত্থেন পন সোতাপন্নো গহিতো. সো হি উম্মুজ্জিত্ৰা ঠিতো তীরং দিস্ৰা উত্তরণূপাযং ৰিলোকযমানো ৰিয লোকুত্তরসদ্ধায উম্মুজ্জিত্ৰা নিব্বানতীরং দিস্ৰা উত্তরণোপাযং ৰিলোকেতি. পঞ্চমেন সকদাগামী গহিতো. সো হি সমুদ্দে তীরং দিস্ৰা তদভিমুখং ¶ পতরমানো ৰিয পঠমমগ্গেন নিব্বানতীরং দিস্ৰা তদভিমুখং দুতিযমগ্গেন পতরতি নাম. ছট্ঠেন অনাগামী গহিতো. সো হি পতরিত্ৰা তীরং উপগ্গম্ম কটিপ্পমাণে উদকে ঠিতো ৰিয অরহত্তসমীপে সতিকৰাটপতিত্থে অনাৰত্তিধম্মতায ততিযমগ্গেন তিট্ঠতি. সত্তমেন পন অরহা গহিতো, সো হি তরিত্ৰা পারং পত্ৰা ঠিতপুরিসো ৰিয চত্তারো ওঘে তরিত্ৰা নিব্বানত্থলে ঠিতো খীণাসৰব্রাহ্মণো নাম হোতীতি.

নৰকে উভতোভাগৰিমুত্তোতি রূপারূপসমাপত্তিযা ৰিক্খম্ভনৰিমোক্খেন, অরিযমগ্গেন সমুচ্ছেদৰিমোক্খেন কিলেসতো ৰিমুত্তো, অরূপসমাপত্তিযা ৰা রূপকাযতো, মগ্গেন চ নামকাযতোতি ইমেহি উভতোভাগেহি ৰিমুত্তোতিপি উভতোভাগৰিমুত্তো, সো চতুন্নং অরূপসমাপত্তীনং ¶ একেকতো ৰুট্ঠায সঙ্খারে সম্মসিত্ৰা অরহত্তপ্পত্তানং চতুন্নং, নিরোধা ৰুট্ঠায অরহত্তপ্পত্তঅনাগামিনো চ ৰসেন পঞ্চৰিধো, তেসু পচ্ছিমোৰ নিপ্পরিযাযতো উভতোভাগৰিমুত্তো নাম, সেসা পরিযাযেন. এত্থ চ রূপাৰচরচতুত্থজ্ঝানং কিলেসকাযতো ৰিমুত্তম্পি রূপকাযতো অৰিমুত্তং, অরূপাৰচরং পন তদভযতোপি ৰিমুত্তং, তস্মা তদেৰ পাদকং কত্ৰা অরহত্তপ্পত্তোৰ উভতোভাগৰিমুত্তো হোতি, ন রূপাৰচরন্তি ৰেদিতব্বং. পঞ্ঞাৰিমুত্তোতি অরহত্তমগ্গপঞ্ঞায আসৰেহি ৰিমুত্তো. সো হি সুক্খৰিপস্সকো, চতূহি রূপাৰচরজ্ঝানেহি ৰুট্ঠায অরহত্তপ্পত্তা চত্তারো চাতি পঞ্চৰিধো. অরূপাৰচরজ্ঝানেসু হি একস্মিম্পি সতি উভতোভাগৰিমুত্তোৰ নাম হোতি.

কাযসক্খীতি রূপারূপজ্ঝানলাভী অরিযো. সো হি সোতাপত্তিমগ্গট্ঠৰজ্জিতানং ছন্নং সেখানং ৰসেন ছব্বিধো. তেনেৰ ¶ হিস্স ‘‘একচ্চে আসৰা পরিক্খীণা’’তি নিদ্দেসে ৰুত্তং. সোতাপত্তিমগ্গট্ঠস্স চ ন কেচিপি আসৰা পরিক্খীণাতি ৰত্তব্বা, পরিক্খীযিস্সন্তীতি পন ৰত্তব্বা, অরহতো পন সব্বেপি আসৰা পরিক্খীণা, ন একচ্চেতি. সো হি ফুট্ঠন্তং সচ্ছিকরোতীতি কাযসক্খী, ফুট্ঠানং পটিলদ্ধানং ঝানানং অনন্তরং নামকাযেন নিরোধং সচ্ছিকরোতীতিপি কাযসক্খী, কাযেনাতি চেত্থ ‘‘নামকাযেন চেৰ পরমত্থসচ্চং সচ্ছিকরোতি, পঞ্ঞায চ অতিৰিজ্ঝ পস্সতী’’তি ৰচনতো অরহত্তফলং ঠপেত্ৰা সেসমগ্গফলানমেতং অধিৰচনং, তেন কাযেন পঠমজ্ঝানানন্তরং নিব্বানস্স সচ্ছিকরণতোপি কাযসক্খীতি কেচি. দিট্ঠিপ্পত্তোতি সুক্খৰিপস্সকো, রূপজ্ঝানলাভী চ যথাৰুত্তো ছব্বিধো সেখো চ, অযং দিট্ঠন্তপ্পত্তোতি দিট্ঠিপ্পত্তো. দস্সনং দিট্ঠি, পঠমমগ্গো, তস্স অনন্তরং নিরোধপ্পত্তোতি অত্থো. দিট্ঠপ্পত্তোতিপি পাঠো, তস্স পঠমমগ্গেন দিট্ঠং নিব্বানং পুন পত্তোতি অত্থো.

সদ্ধাৰিমুত্তোতি সুক্খৰিপস্সকো, রূপজ্ঝানলাভী চ যথাৰুত্তো ছব্বিধো সেখো চ. অযং হি সদ্দহন্তো ৰিমুত্তোতি সদ্ধাৰিমুত্তো. কথং পনেতস্স দিট্ঠিপ্পত্ততো নানত্তন্তি? আগমনীযপটিপদায. দিট্ঠিপ্পত্তো হি পঞ্ঞাসম্পদায পুব্বভাগে ৰিপস্সনায কিলেসে অপ্পদুক্খেন ৰিক্খম্ভেন্তো আগতো, সদ্ধাৰিমুত্তো পন সদ্ধাবহুলতায কিলেসে দুক্খেন ৰিক্খম্ভেন্তো আগতো. এতমেৰ হি ভেদং সন্ধায নিদ্দেসে ‘‘একচ্চে আসৰা পরিক্খীণা হোন্তি, নো চ খো যথাদিট্ঠিপ্পত্তস্সা’’তি ৰুত্তং.

ধম্মানুসারীতি ¶ যস্স সোতাপত্তিমগ্গক্খণে পঞ্ঞিন্দ্রিযং অধিমত্তং হোতি, অযং পঞ্ঞাসঙ্খাতেন ধম্মেন সরতি অনুস্সরতীতি ধম্মানুসারী, সোতাপত্তিমগ্গট্ঠস্সেতং নামং. ফলে পন পত্তে দিট্ঠিপ্পত্তো নাম হোতি. সদ্ধানুসারীতি যস্স ¶ সোতাপত্তিমগ্গক্খণে সদ্ধিন্দ্রিযং অধিমত্তং হোতি, অযং সদ্ধায সরতি অনুস্সরতীতি সদ্ধানুসারী, সোতাপত্তিমগ্গট্ঠস্সেতং নামং. ফলে পন পত্তে সদ্ধাৰিমুত্তো নাম হোতি.

লোকুত্তরধম্মং হি নিব্বত্তেন্তানং দ্ৰে ধুরানি নাম, দ্ৰে অভিনিৰেসা নাম, দ্ৰে সীসানি নাম. তত্থ সদ্ধাধুরং পঞ্ঞাধুরন্তি দ্ৰে ধুরানি নাম. একো পন সমথাভিনিৰেসো, একো ৰিপস্সনাভিনিৰেসোতি দ্ৰে অভিনিৰেসা. একো চ অরহত্তং মত্থকং পাপুণন্তো উভতোভাগৰিমুত্তো হোতি, একো পঞ্ঞাৰিমুত্তোতি ইমানি দ্ৰে সীসানি নাম. যে হি কেচি লোকুত্তরং ধম্মং নিব্বত্তেন্তি, সব্বে তে দ্ৰে ইমে ধম্মে ধুরং কত্ৰা ইমেসু দ্ৰীসু ঠানেসু অভিনিৰিসিত্ৰা ইমেহি দ্ৰীহি ঠানেহি ৰিমুচ্চন্তি. তেসু যো ভিক্খু অট্ঠসমাপত্তিলাভী পঞ্ঞং ধুরং কত্ৰা সমথৰসেন অভিনিৰিট্ঠো অঞ্ঞতরং অরূপসমাপত্তিং পদট্ঠানং কত্ৰা ৰিপস্সনং পট্ঠপেত্ৰা অরহত্তং পাপুণাতি, অযং সোতাপত্তিমগ্গক্খণে ধম্মানুসারী নাম. পরতো পন ছসু ঠানেসু কাযসক্খী নাম. অরহত্তফলং পত্তে উভতোভাগৰিমুত্তো নাম.

অপরো পঞ্ঞমেৰ ধুরং কত্ৰা ৰিপস্সনাৰসেন অভিনিৰিট্ঠো সুদ্ধসঙ্খারে ৰা রূপাৰচরজ্ঝানেসু ৰা অঞ্ঞতরং সম্মসিত্ৰা অরহত্তং পাপুণাতি, অযম্পি সোতাপত্তিমগ্গক্খণে ধম্মানুসারী নাম. পরতো পন ছসু ঠানেসু দিট্ঠিপ্পত্তো নাম, অরহত্তং পত্তে পঞ্ঞাৰিমুত্তো নাম.

অপরো পন অট্ঠসমাপত্তিলাভী সদ্ধং ধুরং কত্ৰা সমাধিৰসেন অভিনিৰিট্ঠো অঞ্ঞতরং অরূপসমাপত্তিং পদট্ঠানং কত্ৰা ৰিপস্সনং পট্ঠপেত্ৰা অরহত্তং পাপুণাতি, অযং সোতাপত্তিমগ্গক্খণে সদ্ধানুসারী নাম, পরতো ছসু ঠানেসু কাযসক্খীযেৰ ¶ নাম. অরহত্তং পত্তে উভতোভাগৰিমুত্তোযেৰ নাম. অপরো সদ্ধমেৰ ধুরং কত্ৰা ৰিপস্সনাৰসেন অভিনিৰিট্ঠো সুদ্ধসঙ্খারে ৰা রূপাৰচরজ্ঝানেসু ৰা অঞ্ঞতরং সম্মসিত্ৰা অরহত্তং পাপুণাতি, অযম্পি সোতাপত্তিমগ্গক্খণে সদ্ধানুসারী নাম, পরতো ছসু ঠানেসু সদ্ধাৰিমুত্তো নাম. অরহত্তপ্পত্তে পঞ্ঞাৰিমুত্তো নাম. ইমে সত্ত পুগ্গলা সম্মাসম্বুদ্ধপচ্চেকসম্বুদ্ধেহি সদ্ধিং নৰ লোকে অগ্গদক্খিণেয্যা নামাতি.

দসকে ¶ পঞ্চন্নং ইধ নিট্ঠাতি সত্তক্খত্তুপরমো, কোলংকোলো, একবীজী, সকদাগামী কামাৰচরপটিসন্ধিকো, অরহা চাতি ইমেসং পঞ্চন্নং ইধ কামাৰচরভূমিযঞ্ঞেৰ অনুপাদিসেসনিব্বানসঙ্খাতা নিট্ঠাতি অত্থো. কামাৰচরত্তভাৰে এৰ হি এতে পরিনিব্বাযন্তি, নাঞ্ঞস্মিং. পঞ্চন্নং ইধ ৰিহায নিট্ঠাতি অন্তরাপরিনিব্বাযী উপহচ্চপরিনিব্বাযী অসঙ্খারপরিনিব্বাযী সসঙ্খারপরিনিব্বাযী উদ্ধংসোতো অকনিট্ঠগামী চাতি ইমেসং পঞ্চন্নং ইধ কামাৰচরে অত্তভাৰং ৰিহায ৰিজহিত্ৰা ব্রহ্মত্তভাৰে ঠিতানঞ্ঞেৰ নিট্ঠাতি অত্থো. সেসমেত্থ উত্তানত্থমেৰাতি. অযমেত্থ সঙ্খেপতো পাল়িনযেন সদ্ধিং অত্থনিচ্ছযো, ৰিত্থারো পন পুগ্গলপঞ্ঞত্তিপাল়িঅট্ঠকথাসু (পু. প. মাতিকা ১ আদযো; পু. প. অট্ঠ. মাতিকাৰণ্ণনা ১) গহেতব্বোতি.

মোহৰিচ্ছেদনিযা অভিধম্মমাতিকত্থৰণ্ণনায

পুগ্গলপঞ্ঞত্তিমাতিকত্থৰণ্ণনা নিট্ঠিতা.

৫. কথাৰত্থুমাতিকা

পুগ্গলকথাৰণ্ণনা

ইদানি ¶ ¶ কথাৰত্থুমাতিকায অত্থসংৰণ্ণনানযো হোতি. তত্থ অনুত্তানত্থতো তাৰ ‘‘পুগ্গলো উপলব্ভতি সচ্চিকট্ঠপরমত্থেনা’’তি অযং পুচ্ছা, ‘‘আমন্তা’’তি অযং পটিজাননা. কস্স পনাযং পুচ্ছা, কস্স পটিজাননাতি? ‘‘অসুকস্সা’’তি ন ৰত্তব্বা. ন হি ভগৰা পরৰাদীহি সদ্ধিং ৰিগ্গাহিককথং কথেন্তো ইমং মাতিকং ঠপেসি, পুগ্গলপঞ্ঞত্তিদেসনাদিং পন নিস্সায ‘‘পরমত্থতো অত্তা নাম অত্থী’’তিআদিনা অনাগতে ৰিপল্লাসগাহিভিক্খূনং, পরৰাদীনঞ্চ নানপ্পকারদিট্ঠিট্ঠানৰিসোধনত্থং মোগ্গলিপুত্ততিস্সত্থেরস্স ৰাদনযদস্সনৰসেন পুগ্গলৰাদমেতং আরব্ভ তন্তিৰসেন মাতিকং ঠপেন্তো সকৰাদিপরৰাদীনং পুচ্ছাৰিসজ্জনদোসারোপননিগ্গহপাপনাদিৰচনপটিৰচনৰসেনেৰ ঠপেসি, তস্মা তদত্থস্স সুখাৰধারণত্থং সকৰাদীপুচ্ছা পরৰাদীপুচ্ছা সকৰাদীপটিঞ্ঞা পরৰাদীপটিঞ্ঞাতি এৰং ৰিভাগং দস্সেত্ৰা অত্থৰণ্ণনং করিস্সাম.

‘‘পুগ্গলো উপলব্ভতি সচ্চিকট্ঠপরমত্থেনা’’তি অযং সকৰাদীপুচ্ছা, তায চ ‘‘যে ‘অত্থি পুগ্গলো’তি এৰংলদ্ধিকা পুগ্গলৰাদিনো, তে এৰং পুচ্ছিতব্বা’’তি দীপেতি. কে পন তে পুগ্গলৰাদিনোতি? সাসনে ৰজ্জিপুত্তকা চেৰ সম্মিতিযা চ বহিদ্ধা বহূ অঞ্ঞতিত্থিযা চ. কদা পনেতে সাসনে উপ্পন্নাতি? পরিনিব্বানতো দুতিযে ৰস্সসতে. ভগৰতি কির পরিনিব্বুতে মহাকস্সপত্থেরেন সমুস্সাহিতেহি তপ্পমুখেহি ৰসিগণেহি সুভদ্দৰুড্ঢপব্বজিতাদীনং পাপভিক্খূনং পৰেসোকাসনিসেধনত্থং অজাতসত্তুরাজানং সহাযং লভিত্ৰা ধম্মৰিনযসরীরং সঙ্গহং আরোপেত্ৰা সাসনে অচলে পৰত্তাপিতে ততো ৰস্সসতস্স অচ্চযেন ৰেসালিযং ৰজ্জিপুত্তকেহি দীপিতানি ¶ দস ৰত্থূনি মদ্দিত্ৰা তে চ ভিক্খূ ¶ নিগ্গহেত্ৰা যসত্থেরসমুস্সাহিতেহি ৰসিগণেহি পুন ধম্মৰিনযসঙ্গহে কতে তেহি নিগ্গহিতা দসসহস্সা ৰজ্জিপুত্তকা কঞ্চি দুব্বলরাজানং বলং লভিত্ৰা মূলসঙ্গহং ভিন্দিত্ৰা অত্তনো অনাচারানুকূলৰচনং পক্খিপিত্ৰা বুদ্ধৰচনঞ্চ ছড্ডেত্ৰা মহাসঙ্গীতীহি ৰিসুং ধম্মৰিনযসঙ্গহং কত্ৰা মহাসঙ্ঘিকাচরিযকুলং নাম অকংসু. পরিসুদ্ধসাসনং পন থেরেহি পরিপালিতত্তা ‘‘থেরৰাদো’’তি পঞ্ঞাযি, ইমেসু পন দ্ৰীসু ৰাদেসু মহাসঙ্ঘিকতো ভিজ্জিত্ৰা একব্যোহারিকা, গোকুলিকা চ, ততো পণ্ণত্তিৰাদা, বহুলিযা, চেতিযৰাদা চাতি পঞ্চ ৰাদা, মহাসঙ্ঘিকেহি পন সদ্ধিং ছ আচরিযকুলানি নাম জাতানি. তথা থেরৰাদতো ভিজ্জিত্ৰা মহিসাসকা, ৰজ্জিপুত্তকা চ, ততো ধম্মুত্তরিযা, ভদ্রযানিকা, ছন্নাগারিকা, সম্মিতিযা চ, মহিসাসকতো ধম্মগুত্তিকা, সব্বত্থিকা চ, ততো কস্সপিকা, ততো সঙ্কন্তিকা, ততো সুত্তৰাদা চাতি ইমে একাদস ৰাদা জাতা. তে পুরিমেহি ছহি সদ্ধিং সত্তরস ভিন্নৰাদা দুতিযে ৰস্সসতে উপ্পন্না, থেরৰাদো পন একোৰ অসম্ভিন্নকো, তেন সদ্ধিং সাসনে অট্ঠারস নিকাযা জাতাতি ৰেদিতব্বা, যে ‘‘অট্ঠারসাচরিযকুলানী’’তি পৰুচ্চন্তি. ইমেসং পন অট্ঠারসন্নং আচরিযৰাদানং ৰসেন আযতিং সাসনস্স আলুল়নং ঞত্ৰা সম্মাসম্বুদ্ধো দ্ৰিন্নং ৰস্সসতানং অচ্চযেন সাসনে পটিলদ্ধসদ্ধেন অসোকেন ধম্মরঞ্ঞা বাহিরকে অনোলোকেত্ৰা সাসনে এৰ লাভসক্কারে পৰত্তন্তে লাভসক্কারত্থায সাসনৰেসং গহেত্ৰা সকানি সকানি দিট্ঠিগতানি তথতো দীপেন্তেসু দ্ৰাসট্ঠিদিট্ঠিগতিকেসু যথাৰুত্তসত্তরসাচরিযকুলেসু চ সমযকুসলতায ৰিচিনিত্ৰা সেতকানি দত্ৰা উপ্পব্বাজিতেসু পরিসুদ্ধে মহাভিক্খুসঙ্ঘে নিসীদিত্ৰা মোগ্গলিপুত্ততিস্সত্থেরস্স যানি তদা উপ্পন্নানি ৰত্থূনি, যানি চ আযতিং উপ্পজ্জিস্সন্তি, সব্বানিপি ¶ তানি অত্তনো সত্থারা দিন্নমাতিকামুখমত্তেন পটিবাহিত্ৰা সুত্তসহস্সপটিমণ্ডিতং পরপ্পৰাদমথনং আযতিলক্খণং কথাৰত্থুপ্পকরণং মাতিকাৰিভজনৰসেন ভাসিত্ৰা তং ততিযসঙ্গীতিযং সঙ্গহং আরোপেত্ৰা আলুল়িতং সাসনং পগ্গহেতুং সমত্থভাৰং ভিক্খুসঙ্ঘে পকাসনত্থং আযতিৰাদপ্পটিবাহননযদস্সনৰসেন ইমং কথাৰত্থুমাতিকং ৰত্ৰা থেরস্স ওকাসং ঠপেন্তো তস্সা ৰিভঙ্গং ন অৰোচাতি ৰেদিতব্বং.

তত্থ পুগ্গলোতি অত্তা জীৰো সত্তো. উপলব্ভতীতি পঞ্ঞায উপগন্ত্ৰা লব্ভতি, ঞাযতীতি অত্থো. সচ্চিকট্ঠপরমত্থেনাতি এত্থ সচ্চিকট্ঠোতি মাযামরীচিআদযো ৰিয অভূতাকারেন অগ্গহেতব্বো ভূতট্ঠো. পরমত্থোতি অনুস্সৰাদিৰসেন অগ্গহেতব্বো উত্তমত্থো. উভযেনাপি যথা রূপৰেদনাদযো ¶ ধম্মা ভূতেন সভাৰেন উপলব্ভন্তি, এৰং তাৰ ‘‘পুগ্গলো উপলব্ভতী’’তি পুচ্ছতি. পরৰাদী ‘‘আমন্তা’’তি পটিজানাতি. পটিজাননঞ্হি কত্থচি ‘‘আম ভন্তে’’তি আগচ্ছতি, কত্থচি ‘‘আমো’’তি আগচ্ছতি, ইধ পন ‘‘আমন্তা’’তি আগতং. তত্রাযং অধিপ্পাযো – পরৰাদী হি যস্মা ভগৰতা ‘‘অত্থি পুগ্গলো অত্তহিতায পটিপন্নো’’তিআদিনা (অ. নি. ৪.৯৫-৯৬) পুগ্গলো পকাসিতো, ভগৰা চ অৰিতথৰাদী, তস্মা সো ‘‘সচ্চিকট্ঠপরমত্থেনেৰ অত্থী’’তি লদ্ধিং গহেত্ৰা ‘‘আমন্তা’’তি পটিজানাতি.

অথস্স তাদিসস্স লেসৰচনস্স ছলৰাদস্স ওকাসং অদদমানো সকৰাদী ‘‘যো সচ্চিকট্ঠো’’তিআদিমাহ. তত্রাযং অধিপ্পাযো – য্ৰাযং হেট্ঠা রূপৰেদনাদিকো ধম্মপ্পভেদো আগতো, ন সম্মুতিসচ্চৰসেন, নাপি অনুস্সৰাদিৰসেন গহেতব্বো, অত্তনো পন ভূততায এৰ সচ্চিকট্ঠো, অত্তপচ্চক্খতায চ পরমত্থো, সো ¶ তথাপটিঞ্ঞাতো পুগ্গলো ততো তেন সচ্চিকট্ঠপরমত্থেন আকারেন উপলব্ভতি, যথা রুপ্পনানুভৰনাদিনা সকিযেনাকারেন পুন সচ্চিকট্ঠপরমত্থো উপলব্ভতি, কিং তৰ পুগ্গলোপি এৰং উপলব্ভতীতি ৰুত্তং হোতি. ন হেৰং ৰত্তব্বেতি অৰজাননা পরৰাদিস্স. সো হি তথারূপং পুগ্গলং অনিচ্ছন্তো অৰজানাতি. ন হি অত্তা নাম খন্ধাদিৰিমুত্তো কোচি দিস্সতি অঞ্ঞত্র ব্যামোহমত্তা. তত্রাযং পদচ্ছেদো – ন হি এৰং ৰত্তব্বেতি. ‘‘ন হ এৰ’’ন্তিপি পঠন্তি, দ্ৰিন্নম্পি এৰং ন ৰত্তব্বোতি অত্থো.

আজানাহি নিগ্গহন্তি সকৰাদিৰচনং. যস্মা তে পুরিমায ৰত্তব্বপটিঞ্ঞায পচ্ছিমা নৰত্তব্বপটিঞ্ঞা, পচ্ছিমায চ পুরিমা ন সন্ধীযতি, তস্মা নিগ্গহং পত্তো, তং নিগ্গহং দোসং অপরাধং আজানাহি, সম্পটিচ্ছাহীতি অত্থো. এৰং নিগ্গহং আজানাপেত্ৰা ইদানি তং ঠপনায চেৰ অনুলোমপটিলোমতো পাপনারোপনানঞ্চ ৰসেন পাকটং করোন্তো ‘‘হঞ্চি পুগ্গলো’’তিআদিমাহ. তত্থ হঞ্চীতি যদি, সচে পুগ্গলো উপলব্ভতীতি অত্থো. অযং তাৰ পরৰাদীপক্খস্স অনুৰদনেন ঠপনতো নিগ্গহপতিট্ঠাপনতো নিগ্গহপাপনারোপনানং লক্খণভূতা অনুলোমট্ঠপনা নাম. তেন ৰত রেতিআদি অনুলোমপক্খে নিগ্গহস্স পাপিকত্তা অনুলোমপাপনা নাম. তত্থ তেনাতি কারণৰচনং. ৰতাতি ওকপ্পনৰচনং নিযমৰচনং. রেতি আমন্তনৰচনং. ইদং ৰুত্তং হোতি – তেন ৰত রে ৰত্তব্বে ৰত রে হম্ভো ভদ্রমুখ তেন কারণেন ৰত্তব্বো এৰাতি অত্থো. যং তত্থ ৰদেসীতিআদি অনুলোমপক্খে নিগ্গহস্স আরোপিতত্তা অনুলোমরোপনা নাম. যঞ্চস্স পরিযোসানে ‘‘মিচ্ছা’’তি পদং, তস্স পুরতো ‘‘ইদং ¶ তে’’তি আহরিতব্বং. ইদং তে মিচ্ছাতি অযঞ্হেত্থ অত্থো. এৰং উপরিপি ¶ . পরতো পাল়িযম্পি এতং আগতমেৰ. নো চে পন ৰত্তব্বেতিআদি ‘‘ন হেৰং ৰত্তব্বে’’তি পটিক্খিত্তপক্খস্স অনুৰদনেন ঠপিতত্তা পটিলোমতো নিগ্গহপাপনারোপনানং লক্খণভূতা পটিলোমট্ঠপনা নাম. নো চ ৰত রেতিআদি পটিলোমপক্খে নিগ্গহস্স পাপিতত্তা পটিলোমপাপনা নাম. পুন যং তত্থ ৰদেসীতিআদি পটিলোমপক্খে নিগ্গহস্স আরোপিতত্তা পটিলোমরোপনা নাম.

তত্রাযং আদিতো পট্ঠায সঙ্খেপত্থো – যদি পুগ্গলো উপলব্ভতি সচ্চিকট্ঠপরমত্থেন, তেন ৰত ভো সো উপলব্ভতীতি ৰত্তব্বো. যং পন তত্থ ৰদেসি ‘‘ৰত্তব্বো খো পুরিমপঞ্হে ‘সচ্চিকট্ঠপরমত্থেন উপলব্ভতী’তি নো চ ৰত্তব্বো দুতিযপঞ্হে ‘ততো সো পুগ্গলো উপলব্ভতী’’’তি, ইদং তে মিচ্ছাতি এৰং তাৰ অনুলোমতো ঠপনাপাপনারোপনা হোন্তি.

অথ ন ৰত্তব্বো দুতিযপঞ্হে ‘‘ততো সো পুগ্গলো উপলব্ভতী’’তি, পুরিমপঞ্হেপি ন ৰত্তব্বোৰ. যং পন তত্থ ৰদেসি ‘‘ৰত্তব্বো খো পুরিমপঞ্হে ‘সচ্চিকট্ঠপরমত্থেন উপলব্ভতী’তি, নো চ ৰত্তব্বো দুতিযপঞ্হে ‘ততো সো পুগ্গলো উপলব্ভতী’’’তি, ইদং তে মিচ্ছাতি এৰং পটিলোমতো ঠপনাপাপনারোপনা হোন্তি. এৰমেতং নিগ্গহস্স চ অনুলোমতো দ্ৰিন্নং, পটিলোমতো দ্ৰিন্নন্তি চতুন্নং পাপনারোপনানঞ্চ ৰুত্তত্তা উপলব্ভতীতিআদিকং অনুলোমপঞ্চকং নাম. এত্থ চ কিঞ্চাপি অনুলোমতো পাপনারোপনাহি একো, পটিলোমতো পাপনারোপনাহি একোতি দ্ৰে নিগ্গহা কতা, আজানাহি নিগ্গহন্তি এতস্সেৰ পন পঠমস্স নিগ্গহস্স দ্ৰীহাকারেহি আরোপিতত্তা একোৰাযং নিগ্গহোতি গহেতব্বো. পঠমো নিগ্গহো.

ইদানি ¶ পচ্চনীকনযো হোতি. তত্থ পুগ্গলো নুপলব্ভতীতি পুচ্ছা পরৰাদিস্স. সকৰাদী যথা রূপৰেদনাদযো ধম্মা উপলব্ভন্তি, এৰং অনুপলব্ভনীযতো ‘‘আমন্তা’’তি পটিজানাতি. পুন ইতরো অত্তনা অধিপ্পেতং সচ্চিকট্ঠংযেৰ সন্ধায ‘‘যো সচ্চিকট্ঠো’’তিআদিমাহ. সম্মুতিসচ্চপরমত্থসচ্চানি ৰা একতো কত্ৰাপি পরৰাদী এৰমাহ. সকৰাদী পুগ্গলো হি উপাদাযপঞ্ঞত্তিসব্ভাৰতোপি দ্ৰিন্নং সচ্চানং একতো কত্ৰা পুচ্ছিতত্তাপি ‘‘ন হেৰ’’ন্তি পটিক্খিপতি. ইদানি কিঞ্চাপি তেন পঠমং পরমত্থসচ্চৰসেন নুপলব্ভনীযতা সম্পটিচ্ছিতা, পচ্ছা পন সম্মুতিসচ্চৰসেন ৰা ৰোমিস্সকৰসেন ৰা পটিক্খিত্তা. পরৰাদী পন ¶ ‘‘নুপলব্ভতী’’তি ৰচনসামঞ্ঞমত্তং ছলৰাদং নিস্সায ‘‘যং তযা পঠমং পটিঞ্ঞাতং, তং পচ্ছা পটিক্খিত্ত’’ন্তি ভণ্ডনস্স পটিভণ্ডনং ৰিয অত্তনো কতস্স নিগ্গহকম্মস্স পটিকম্মং করোন্তো ‘‘আজানাহি পটিকম্ম’’ন্তি আহ. ইদানি যথাস্স অনুলোমপঞ্চকে সকৰাদিনা ৰাদট্ঠপনং কত্ৰা অনুলোমপটিলোমতো পাপনারোপনাহি পরৰাদিনিগ্গহো পাকটো কতো, এৰং পটিকম্মং পাকটং করোন্তো ‘‘হঞ্চি পুগ্গলো’’তিআদিমাহ. তং হেট্ঠা ৰুত্তনযেনেৰ অত্থতো ৰেদিতব্বং. যস্মা পনেত্থ ঠপনা নাম পরৰাদিপক্খস্স ঠপনতো ‘‘অযং তৰ দোসো’’তি দস্সেতুং ঠপনমত্তমেৰ হোতি, ন নিগ্গহস্স ৰা পটিকম্মস্স ৰা পাকটীভাৰকরণং, পাপনারোপনাহি পনস্স পাকটীকরণং হোতি, তস্মা ইদং অনুলোমপটিলোমতো পাপনারোপনানং ৰসেন চতূহাকারেহি পটিকম্মস্স কতত্তা পটিকম্মচতুক্কং নামাতি একং চতুক্কং ৰেদিতব্বং.

এৰং পটিকম্মং কত্ৰা ইদানি য্ৰাস্স অনুলোমপঞ্চকে সকৰাদিনা নিগ্গহো কতো, তস্স তমেৰ ছলৰাদং নিস্সায দুক্কটভাৰং দস্সেন্তো ‘‘ত্ৰং চে পন মঞ্ঞসী’’তিআদিমাহ. তত্থ ত্ৰং চে পন মঞ্ঞসীতি যদি ত্ৰং মঞ্ঞসি. ‘‘ৰত্তব্বে ¶ খো’’তি ইদং পচ্চনীকে ‘‘আমন্তা’’তি পটিজাননং সন্ধায ৰুত্তং, ‘‘নো চ ৰত্তব্বে’’তি ইদং পন ‘‘ন হেৰা’’তি অৰজাননং সন্ধায ৰুত্তং. তেন তৰ তত্থাতি তেন কারণেন ত্ৰংযেৰ তস্মিং ‘‘যো নুপলব্ভতী’’তি পক্খে হেৰং পটিজানন্তি ‘‘আমন্তা’’তি এৰং পটিজানন্তো. হেৰং নিগ্গহেতব্বেতি পুন ‘‘ন হেৰা’’তি অৰজানন্তো এৰং নিগ্গহেতব্বো. অথ তং নিগ্গণ্হামাতি অথেৰং নিগ্গণ্হনারহং তং নিগ্গণ্হাম, সুনিগ্গহিতো চ হোসীতি সকেন মতেন নিগ্গহিতত্তা সুনিগ্গহিতো চ ভৰসি. এৰমস্স নিগ্গহেতব্বভাৰং দস্সেত্ৰা ইদানি তং নিগ্গণ্হন্তো ‘‘হঞ্চী’’তিআদিমাহ. তত্থ ঠপনাপাপনারোপনা হেট্ঠা ৰুত্তনযেনেৰ ৰেদিতব্বা. পরিযোসানে পন ইদং তে মিচ্ছাতি ইদং তৰ ৰচনং মিচ্ছা হোতীতি অত্থো. ইদং ছলৰাদেন চতূহি আকারেহি নিগ্গহস্স কতত্তা নিগ্গহচতুক্কং নাম.

এৰং নিগ্গহং কত্ৰাপি ইদানি ‘‘যদি অযং মযা তৰ মতেন কতো নিগ্গহো দুন্নিগ্গহো, যোপি মম তযা হেট্ঠা অনুলোমপঞ্চকে কতো নিগ্গহো, সোপি দুন্নিগ্গহো’’তি দস্সেন্তো ‘‘এসে চে দুন্নিগ্গহিতে’’তিআদিমাহ. তত্থ এসে চে দুন্নিগ্গহিতেতি এসো চে তৰ ৰাদো মযা দুন্নিগ্গহিতো, অথ ৰা এসো চে তৰ মযা কতো নিগ্গহো দুন্নিগ্গহো. হেৰমেৰং তত্থ দক্খাতি তত্থাপি তযা মম হেট্ঠা কতে নিগ্গহে এৰমেৰং পস্স. ইদানি য্ৰাস্স হেট্ঠা সকৰাদিনা নিগ্গহো ¶ কতো, তং ‘‘ৰত্তব্বে খো’’তিআদিৰচনেন দস্সেত্ৰা পুন তং নিগ্গহং অনিগ্গহভাৰং উপনেন্তো ‘‘নো চ মযং তযা’’তিআদিমাহ. তত্থ নো চ মযং তযা তত্থ হেতায পটিঞ্ঞাযাতিআদীসু অযমত্থো – যস্মা সো তযা মম কতো নিগ্গহো দুন্নিগ্গহো, তস্মা মযং তযা তত্থ অনুলোমপঞ্চকে ‘‘আমন্তা’’তি এতায পটিঞ্ঞায এৰং পটিজানন্তা পুন ‘‘ন হেৰা’’তি পটিক্খেপে কতেপি ¶ ‘‘আজানাহি নিগ্গহ’’ন্তি এৰং নিগ্গহেতব্বাযেৰ, এৰং অনিগ্গহেতব্বম্পি মং নিগ্গণ্হাসি, ঈদিসেন পন নিগ্গহেন দুন্নিগ্গহিতা মযং হোম. ইদানি যং নিগ্গহং সন্ধায দুন্নিগ্গহিতা চ হোমাতি অৰোচ, তং দস্সেতুং ‘‘হঞ্চি পুগ্গলো…পে… ইদং তে মিচ্ছা’’তি আহ. এৰমিদং অনুলোমপটিলোমতো চতূহি পাপনারোপনাহি নিগ্গহস্স উপনীতত্তা উপনযনচতুক্কং নাম হোতি.

ইদানি ন হেৰং নিগ্গহেতব্বেতিআদিকং নিগ্গমনচতুক্কং নাম হোতি. তত্থ ন হেৰং নিগ্গহেতব্বেতি যথাহং তযা নিগ্গহিতো, ন হি এৰং নিগ্গহেতব্বো, এতস্স হি নিগ্গহস্স দুন্নিগ্গহভাৰো মযা সাধিতো. তেন হীতি তেন কারণেন. যস্মা এস নিগ্গহো দুন্নিগ্গহো, তস্মা যং মং নিগ্গণ্হাসি. হঞ্চি পুগ্গলো…পে… ইদং তে মিচ্ছাতি ইদং নিগ্গণ্হনং তৰ মিচ্ছাতি অত্থো. তেন হি যে কতে নিগ্গহেতি যেন কারণেন ইদং মিচ্ছা, তেন কারণেন যো তযা নিগ্গহো কতো, সো দুক্কটো. যং মযা পটিকম্মং কতং, তদেৰ সুকতং. যাপি চেসা পটিকম্মচতুক্কাদিৰসেন কথামগ্গসম্পটিপাদনা কতা, সাপি সুকতাতি. তদেৰ পুগ্গলো উপলব্ভতীতিআদিকস্স অনুলোমপঞ্চকস্স নুপলব্ভতীতিআদিকানং পটিকম্মনিগ্গহোপনযননিগ্গমনচতুক্কানঞ্চ ৰসেন অনুলোমপচ্চনীকং নাম নিদ্দিট্ঠন্তি ৰেদিতব্বং. এত্তাৰতা সকৰাদিনো পুব্বপক্খে সতি পরৰাদিনো ৰচনসামঞ্ঞমত্তেন ছলৰাদেন জযো হোতি.

ইদানি যথা পরৰাদিনো পুব্বপক্খে সতি সকৰাদিনো ধম্মেনেৰ তথেন জযো হোতি, তথা ৰাদুপ্পত্তিং দস্সেতুং ‘‘পুগ্গলো নুপলব্ভতী’’তি পচ্চনীকানুলোমপঞ্চকং আরদ্ধং. তত্থ পচ্চনীকে পুচ্ছা পরৰাদিস্স, রূপাদিভেদং সচ্চিকট্ঠপরমত্থং ¶ সন্ধায পটিঞ্ঞা সকৰাদিস্স, সুদ্ধসম্মুতিসচ্চং ৰা পরমত্থমিস্সকং ৰা সম্মুতিসচ্চং সন্ধায ‘‘যো সচ্চিকট্ঠো’’তি পুন অনুযোগো পরৰাদিস্স, সম্মুতিৰসেন ‘‘পুগ্গলো নুপলব্ভতী’’তি নৰত্তব্বত্তা মিস্সকৰসেন ৰা অনুযোগস্স সংকিণ্ণত্তা ‘‘ন হেৰ’’ন্তি পটিক্খেপো সকৰাদিস্স, পটিঞ্ঞাতং পটিক্খিপতীতি ৰচনসামঞ্ঞমত্তেন ‘‘আজানাহি নিগ্গহ’’ন্তিআদিৰচনং পরৰাদিস্স. এৰমযং পুগ্গলো নুপলব্ভতীতি ¶ দুতিযৰাদং নিস্সায দুতিযো নিগ্গহো হোতীতি ৰেদিতব্বো. এৰং তেন ছলেন নিগ্গহো আরোপিতো.

ইদানি ধম্মেন সমেন পরৰাদিপটিঞ্ঞায অত্তনো ৰাদে জযং দস্সেতুং অনুলোমনযে পুচ্ছা সকৰাদিস্স, অত্তনো লদ্ধিং নিস্সায পটিঞ্ঞা পরৰাদিস্স, লদ্ধিযা ওকাসং অদত্ৰা পরমত্থৰসেন পুন অনুযোগো সকৰাদিস্স, পরমত্থৰসেন পুগ্গলস্স অনুপলব্ভনতো পটিক্খেপো পরৰাদিস্স, ততো পরং ধম্মেন সমেন অত্তনো জযদস্সনত্থং ‘‘আজানাহি পটিকম্ম’’ন্তিআদি সব্বং সকৰাদিৰচনমেৰ হোতি. তত্থ সব্বেসং পটিকম্মনিগ্গহোপনযননিগ্গমনচতুক্কানং হেট্ঠা ৰুত্তনযেনেৰ অত্থো ৰেদিতব্বো. এৰমিদং ‘‘পুগ্গলো নুপলব্ভতী’’তিআদিকস্স পচ্চনীকপঞ্চকস্স ‘‘উপলব্ভতী’’তিআদীনং পটিকম্মনিগ্গহোপনযননিগ্গমনচতুক্কানঞ্চ ৰসেন পচ্চনীকানুলোমপঞ্চকং নাম নিদ্দিট্ঠং হোতি. এৰমেতানি পঠমসচ্চিকট্ঠে দ্ৰে পঞ্চকানি নিদ্দিট্ঠানি, তত্থেতং ৰুচ্চতি –

‘‘নিগ্গহো পরৰাদিস্স, সুদ্ধো পঠমপঞ্চকে;

অসুদ্ধো পন তস্সেৰ, পটিকম্মজযো তহিং.

‘‘নিগ্গহো সকৰাদিস্স, অসুদ্ধো দুতিযপঞ্চকে;

ৰিসুদ্ধো পন তস্সেৰ, পটিকম্মজযো তহিং.

‘‘তস্মা দ্ৰীসুপি ঠানেসু, জযোৰ সকৰাদিনো;

ধম্মেন হি জযো নাম, অধম্মেন কুতো জযো.

‘‘সচ্চিকট্ঠে ¶ যথা চেত্থ, পঞ্চকদ্ৰযমণ্ডিতে;

ধম্মাধম্মৰসেনেৰ, ৰুত্তো জযপরাজযো.

‘‘ইতো পরেসু সব্বেসু, সচ্চিকট্ঠেসু পণ্ডিতো;

এৰমেৰ ৰিভাৰেয্য, উভো জযপরাজযে’’তি. (কথা. অট্ঠ. ৭-১০);

পঠমো সুদ্ধিকসচ্চিকট্ঠো নিট্ঠিতো.

এৰং ¶ সুদ্ধিকসচ্চিকট্ঠং ৰিত্থারেত্ৰা ইদানি তমেৰ অপরেহিপি ওকাসাদীহি নযেহি ৰিত্থারেতুং পুন ‘‘পুগ্গলো উপলব্ভতী’’তিআদি আরদ্ধং. তত্থ পুচ্ছা সকৰাদিস্স, পটিঞ্ঞা পরৰাদিস্স. পুন সব্বত্থাতি সরীরং সন্ধায অনুযোগো সকৰাদিস্স, রূপস্মিং অত্তানং সমনুপস্সনাদোসঞ্চ ‘‘অঞ্ঞং জীৰং অঞ্ঞং সরীর’’ন্তি আপজ্জনদোসঞ্চ দিস্ৰা পটিক্খেপো পরৰাদিস্স. সেসমেত্থ অনুলোমপচ্চনীকপঞ্চকে হেট্ঠা ৰুত্তনযেনেৰ ৰেদিতব্বং. পাঠো পন সংখিত্তো. তত্থ যস্মা সরীরং সন্ধায ‘‘সব্বত্থ নুপলব্ভতী’’তি ৰুত্তে সরীরতো বহি উপলব্ভতীতি আপজ্জতি, তস্মা পচ্চনীকে পটিক্খেপো সকৰাদিস্স, পঠমং অনুজানিত্ৰা পচ্ছা অৰজানাতীতি ছলৰাদস্স ৰসেন পটিকম্মং পরৰাদিস্স, সেসং পাকটমেৰ.

দুতিযনযে সব্বদাতি পুরিমপচ্ছিমজাতিকালঞ্চ ধরমানপরিনিব্বুতকালঞ্চ সন্ধায অনুযোগো সকৰাদিস্স, স্ৰেৰ খত্তিযো সো ব্রাহ্মণোতিআদীনং আপত্তিদোসঞ্চ ধরমানপরিনিব্বুতানং ৰিসেসাভাৰদোসঞ্চ দিস্ৰা পটিক্খেপো পরৰাদিস্স. সেসং পঠমনযে ৰুত্তসদিসমেৰ.

ততিযনযে সব্বেসূতি খন্ধাযতনাদীনি সন্ধায পুচ্ছা সকৰাদিস্স, রূপস্মিং অত্তা, চক্খুস্মিং অত্তাতিআদিদোসভযেন পটিক্খেপো পরৰাদিস্স. সেসং তাদিসমেৰাতি.

এৰমিমানি ¶ তীণি মুখানি অনুলোমপচ্চনীকপঞ্চকে অনুলোমমত্তৰসেনেৰ তাৰ পটিপাটিযা ভাজেত্ৰা পুন পচ্চনীকানুলোমপঞ্চকে পচ্চনীকমত্তৰসেনেৰ ভাজেতুং ‘‘পুগ্গলো নুপলব্ভতী’’তিআদি আরদ্ধং. তত্থ হেট্ঠা ৰুত্তনযেন অত্থো ৰেদিতব্বো. এত্তাৰতা সুদ্ধিকস্স চেৰ ইমেসঞ্চ তিণ্ণন্তি চতুন্নং সচ্চিকট্ঠানং একেকস্মিং সচ্চিকট্ঠে অনুলোমপচ্চনীকস্স, পচ্চনীকানুলোমস্স চাতি দ্ৰিন্নং দ্ৰিন্নং পচ্চনীকানং ৰসেন অযং অট্ঠমুখা নাম ৰাদযুত্তি নিদ্দিট্ঠা হোতীতি ৰেদিতব্বা. যা একেকস্মিং মুখে একেকস্স নিগ্গহস্স ৰসেন ৰুচ্চতি. তত্থেতং ৰুচ্চতি –

‘‘এৰং চতুব্বিধে পঞ্হে, পঞ্চকদ্ৰযভেদতো;

এসা অট্ঠমুখা নাম, ৰাদযুত্তি পকাসিতা.

‘‘অট্ঠেৰ ¶ নিগ্গহা তত্থ, চত্তারো তেসু ধম্মিকা;

অধম্মিকা চ চত্তারো, সব্বত্থ সকৰাদিনো;

জযো পরাজযো চেৰ, সব্বত্থ পরৰাদিনো’’তি. (কথা. অট্ঠ. ১৪);

অযং তাৰেত্থ অনুত্তানত্থতো সংৰণ্ণনা.

অত্থৰিনিচ্ছযো পনেত্থাপি মোগ্গলিপুত্ততিস্সত্থেরেন কতনিদ্দেসস্স নযমুখমত্তদস্সনৰসেনেৰ হোতি. থেরেন হি ভগৰতা ঠপিতায এতিস্সা মাতিকায পদুদ্ধারৰসেন নিদ্দেসং অকত্ৰা ভগৰতা দিন্নঅট্ঠমুখৰাদযুত্তিনযে ঠত্ৰা অপরেহি পরিযাযেহি পুগ্গলৰাদং, তদঞ্ঞং নানপ্পকারং মিচ্ছাগাহঞ্চ নিরাকরোন্তেনেৰ পুগ্গলকথং আদিং কত্ৰা সাধিকদ্ৰিসতকথাহি নিদ্দেসো কতো.

তত্থ পুগ্গলৰাদনিরাকরণত্থং তাৰ খন্ধাযতনধাতুইন্দ্রিযৰসেন সত্তপঞ্ঞাসায ধম্মেসু একেকেন সদ্ধিং ‘‘পুগ্গলো উপলব্ভতি সচ্চিকট্ঠপরমত্থেন, রূপঞ্চ উপলব্ভতি সচ্চিকট্ঠপরমত্থেন…পে… পুগ্গলো উপলব্ভতি সচ্চিকট্ঠপরমত্থেন, ৰেদনাপি ¶ উপলব্ভতি সচ্চিকট্ঠপরমত্থেনা’’তিআদিনা নযেন পুগ্গলসংসন্দনৰসপ্পৰত্তং সুদ্ধিকসংসন্দনং, যথা রূপৰেদনাদযো সত্তপঞ্ঞাস ধম্মা অঞ্ঞমঞ্ঞা ৰিসদিসা উপলব্ভন্তি, এৰং রূপাদীহি ৰিসদিসো পুগ্গলো উপলব্ভতীতি পুচ্ছনৰসপ্পৰত্তং ওপম্মসংসন্দনং, ‘‘রূপং পুগ্গলো, রূপস্মিং পুগ্গলো, অঞ্ঞত্র রূপা পুগ্গলো, পুগ্গলস্মিং রূপ’’ন্তি এৰং চতুক্কনযেন সত্তপঞ্ঞাসায ধম্মেহি পুচ্ছনৰসপ্পৰত্তং চতুক্কনযসংসন্দনন্তি তিৰিধা সংসন্দননযা ৰুত্তা. তত্থ পুগ্গলস্স রূপাদিসভাৰত্তে নিচ্চসস্সতুচ্ছেদাদিপ্পসঙ্গতো যথানুরূপং নিরাকরণং ৰেদিতব্বং, অতিৰিত্থারভযেনেত্থ উপরি চেতং ন ৰিত্থারীযতি.

ততো ‘‘যথা রূপাদযো সপ্পচ্চযা, অপ্পচ্চযাদযো ৰা হোন্তি, এৰং তৰ পুগ্গলোপি সপ্পচ্চযতাদিলক্খণযুত্তো’’তি পুচ্ছনৰসপ্পৰত্তা লক্খণযুত্তিকথা, ‘‘পুগ্গলো’’তি, ‘‘উপলব্ভতী’’তি চ পদদ্ৰযাদিসোধনত্থং ‘‘যো পুগ্গলো, সো উপলব্ভতি. যো ৰা উপলব্ভতি, সো পুগ্গলো’’তিআদিপুচ্ছনৰসপ্পৰত্তং ৰচনসোধনং, ‘‘রূপধাতুযা রূপী’’তিআদি নামপঞ্ঞত্তিসোধনৰসপ্পৰত্তো পঞ্ঞত্তানুযোগো চ, ‘‘সোৰ পুগ্গলো সন্ধাৰতি অস্মা লোকা পরং লোকং, অঞ্ঞো ৰা, ন অঞ্ঞো ৰা, নেৰ অঞ্ঞো নানঞ্ঞো ৰা’’তিআদিনা গতিপরিৰত্তনমুখেন চুতিপটিসন্ধানুযোগো ¶ , ‘‘রুক্খং উপাদায ছাযাদীনং ৰিয খন্ধাদিং উপাদায পরমত্থতো পুগ্গলপঞ্ঞত্তী’’তি ৰাদে তস্স অনিচ্চসঙ্খততাদিপ্পসঙ্গদীপকো উপাদাপঞ্ঞত্তানুযোগো, ‘‘কল্যাণপাপকানং কম্মানং কারকো পুগ্গলো’’তি ৰাদে তস্স ৰট্টদুক্খানুপচ্ছেদাদিপ্পসঙ্গদীপকো পুরিসকারানুযোগো চ, ‘‘যো ইদ্ধিৰিকুব্বকো, সো পুগ্গলো’’তিআদিৰাদভেদকো অভিঞ্ঞানুযোগো, ‘‘মাতাপিতাদযো নাম অত্থি, তেন পুগ্গলো অত্থী’’তি ৰাদভেদকো ঞাতকানুযোগো ¶ , ‘‘এৰং খত্তিযো’’তিআদি জাত্যানুযোগো, ‘‘গহট্ঠো পব্বজিতো’’তিআদি পটিপত্তানুযোগো, ‘‘দেৰো মনুস্সো’’তিআদি উপপত্তানুযোগো, ‘‘সোতাপন্নো’’তিআদি পটিৰেধানুযোগো, ‘‘অট্ঠ পুরিসপুগ্গলা’’তিআদি সঙ্ঘানুযোগো, ‘‘পুগ্গলো সঙ্খতো’’তিআদিৰসপ্পৰত্তো সচ্চিকট্ঠসভাগানুযোগো, ‘‘সুখং ৰেদনং ৰেদিযমানো’’তিআদি ৰেদকানুযোগো, ‘‘কাযে কাযানুপস্সী’’তিআদি কিচ্চানুযোগো, ‘‘অত্থি পুগ্গলো অত্তহিতায পটিপন্নো’’তিআদিনা পুগ্গলসভাৰসাধকসুত্তেসু সন্নিস্সিতেসু –

সব্বে ধম্মা অনত্তা (ম. নি. ১.৩৫৩, ৩৫৬; ধ. প. ২৭৯), দুক্খমেৰ উপ্পজ্জমানং উপ্পজ্জতি (সং. নি. ২.১৫).

কিন্নু সত্তোতি পচ্চেসি, মার দিট্ঠিগতং নু তে;

সুদ্ধসঙ্খারপুঞ্জোযং, নযিধ সত্তূপলব্ভতি.

দুক্খমেৰ হি সম্ভোতি, দুক্খং তিট্ঠতি ৰেতি চ;

নাঞ্ঞত্র দুক্খা সম্ভোতি, নাঞ্ঞং দুক্খা নিরুজ্ঝতি. (সং. নি. ১.১৭১);

যস্মা চ খো, আনন্দ, সুঞ্ঞং অত্তেন ৰা অত্তনিযেন ৰা…পে… তস্মা সুঞ্ঞো লোকোতি ৰুচ্চতি (সং. নি. ৪.৮৫).

‘‘অত্তনি ৰা, ভিক্খৰে, সতি অত্তনিযং মেতি অস্সাতি…পে… অত্তনি চ ভিক্খৰে অত্তনিযে চ সচ্চতো থেততো অনুপলব্ভনিযমানে যম্পি তং দিট্ঠিট্ঠানং, সো লোকো, সো অত্তা, সো পেচ্চ ভৰিস্সামি, নিচ্চো ধুৰো সস্সতো অৰিপরিণামধম্মো, সস্সতিসমং তথেৰ ঠস্সামীতি ¶ , ননাযং, ভিক্খৰে, কেৰলো পরিপূরো বালধম্মো’’তি (ম. নি. ১.২৪৪), ‘‘তত্র, সেনিয, য্ৰাযং সত্থা দিট্ঠে চেৰ ধম্মে অত্তানং সচ্চতো থেততো ন পঞ্ঞাপেতি, অভিসম্পরাযে চ…পে… অযং ৰুচ্চতি, সেনিয, সত্থা ¶ সম্মাসম্বুদ্ধো’’তিআদিনা পুগ্গলাভাৰদীপকসুত্তসন্দস্সনৰসপ্পৰত্তো সুত্তসন্দস্সনানুযোগো চাতি এত্তকেন কথামগ্গেন ৰিত্থারতো পঠমা পুগ্গলকথা ৰিভত্তা. তত্থ ‘‘অত্থি পুগ্গলো অত্তহিতায পটিপন্নো’’তিআদীসু যথা রূপাদযো ধম্মা পচ্চত্তলক্খণসামঞ্ঞলক্খণৰসেন লব্ভন্তি, ন এৰং পুগ্গলো, রূপাদীসু পন সতি লোকৰোহারমত্তেন ‘‘অত্থি পুগ্গলো’’তি ৰুচ্চতীতি. ৰুত্তম্পি চেতং ভগৰতা – ‘‘ইমা খো, চিত্ত…পে… লোকৰোহারা লোকপঞ্ঞত্তিযো’’তি (দী. নি. ১.৪৪০). দ্ৰিধাপি বুদ্ধানং কথা সম্মুতিকথা, পরমত্থকথা চ. তত্থ ‘‘সত্তো পুগ্গলো গামো পব্বতো’’তিআদিকা সম্মুতিকথা নাম, ‘‘অনিচ্চং দুক্খং অনত্তা খন্ধা আযতনানী’’তিআদিকা পরমত্থকথা নাম. বুদ্ধা হি যে যে সত্তা যথা যথা বুজ্ঝিত্ৰা চতুসচ্চপটিৰেধং কাতুং সক্কোন্তি, তেসং তেসং তথা তথা সম্মুতিৰসেন ৰা পরমত্থৰসেন ৰা ৰোমিস্সকৰসেন ৰা দেসেত্ৰা নামরূপপরিচ্ছেদদস্সনৰসেনেৰ অমতং মগ্গং পকাসেন্তি. অযঞ্হি –

দুৰে সচ্চানি অক্খাসি, সম্বুদ্ধো ৰদতং ৰরো;

সম্মুতিং পরমত্থঞ্চ, ততিযং নুপলব্ভতি.

তত্থ –

সঙ্কেতৰচনং সচ্চং, লোকসম্মুতিকারণং;

পরমত্থৰচনং সচ্চং, ধম্মানং তথলক্খণং.

তস্মা ৰিঞ্ঞূ অকত্ৰান, ব্যঞ্জনেভিনিৰেসনং;

পরমত্থে পতিট্ঠায, পুগ্গলাদিং ৰিৰজ্জযে.

পঞ্ঞত্তিং অনতিক্কম্ম, পরমত্থো পকাসিতো;

ৰিনাযকেন সো যস্মা, তস্মা অঞ্ঞোপি পণ্ডিতো;

পরমত্থং পকাসেন্তো, সমঞ্ঞং নাতিধাৰযেতি. (কথা. অট্ঠ. ২৩৭);

অযং পুগ্গলকথানযো.

পরিহানিকথাদিৰণ্ণনা

পুগ্গলকথাতো ¶ ¶ পরং ‘‘পরিহাযতি অরহা অরহত্তা’’তিআদিনা অসেখা, সোতাপন্নৰজ্জিতসেখা চ অগ্গমগ্গফলতো পরিহাযন্তীতি পৰত্তা পরিহানিকথা. পব্বজ্জা ৰিয পটিৰেধসঙ্খাতো ব্রহ্মচরিযৰাসোপি মনুস্সেসু এৰ ভৰতি, নত্থি দেৰেসু ব্রহ্মচরিযৰাসোতি পৰত্তা ব্রহ্মচরিযকথা. দুক্খদস্সনেন একদেসতো কিলেসা পহীযন্তি, তথা সমুদযদস্সনাদীহীতি এৰং নানাভিসমযৰসেন ওধিসো কিলেসা পহীযন্তীতি পৰত্তা ওধিসোকথা. ঝানলাভী পুথুজ্জনো কামরাগব্যাপাদে সমুচ্ছেদৰসেন জহতি, সো চতুসচ্চাভিসমযা পঠমমেৰ অনাগামী হোতীতি পৰত্তা জহতিকথা. অতীতাদিভেদং সব্বং খন্ধাদিকং কালত্তযেপি খন্ধাদিসভাৰেন অত্থীতি পৰত্তা সব্বমত্থীতিকথা. অতীতং, অনাগতঞ্চ খন্ধাদিকং অত্থীতি পৰত্তা অতীতক্খন্ধাদিকথা. অতীতেসু ৰিপাকধম্মধম্মেসু একচ্চং অৰিপক্কৰিপাকমেৰ অত্থি, ন ইতরন্তি পৰত্তা একচ্চমত্থীতিকথা. সব্বে ধম্মা সতিপট্ঠানাতি পৰত্তা সতিপট্ঠানকথা. অতীতানাগতাদিৰসেন নত্থি, সকভাৰেন ৰা অত্থি, পরভাৰেন নত্থীতি পৰত্তা হেৰত্থিকথা. তত্থ হেৰত্থীতি এৰং ইমিনা পকারেন অত্থীতি অত্থো.

অধিমানিকানং, কুহকানং ৰা অরহত্তপটিঞ্ঞানং সুক্কৰিস্সট্ঠিং দিস্ৰা মারকাযিকা দেৰতা উপসংহরন্তীতি পৰত্তা পরূপহারকথা. অরহতো পরেসং নামগোত্তাদীসু অত্থি অঞ্ঞাণং, অত্থি কঙ্খা, পরেহি ঞাপনীযতো অত্থি পরৰিতরণাতি তিস্সো কথা. সোতাপত্তিমগ্গক্খণে দুক্খন্তি ৰাচা ভিজ্জতীতি পৰত্তা ৰচীভেদকথা. দুক্খন্তি ৰাচং ভাসন্তো দুক্খে ঞাণং আহরতি, তঞ্চ লোকুত্তরন্তি পৰত্তা দুক্খাহারকথা. সমাপত্তিযং, ভৰঙ্গে চ চিত্তং চিরং তিট্ঠতীতি ¶ পৰত্তা চিত্তট্ঠিতিকথা. সব্বে সঙ্খারা নিপ্পরিযাযেন আদিত্তা কুক্কুল়নিরযসদিসাতি পৰত্তা কুক্কুল়কথা. পচ্চেকং চতুসচ্চদস্সনৰসেন একেকস্স মগ্গস্স চতুক্খত্তুং উপ্পত্তিৰসেন সোল়সহি কোট্ঠাসেহি অরহত্তপ্পত্তীতি পৰত্তা অনুপুব্বাভিসমযকথা. বুদ্ধানং ৰোহারৰচনং লোকুত্তরন্তি পৰত্তা ৰোহারকথা. সুদ্ধসত্তানং অপ্পটিসঙ্খায মগ্গেন ৰিনা কিলেসনিরোধসঙ্খাতো অপ্পটিসঙ্খানিরোধো, পটিসঙ্খায তেন মগ্গেন কিলেসনিরোধোতি দ্ৰে নিরোধাতি পৰত্তা নিরোধকথা.

তথাগতবলং সাৰকসাধারণন্তি পৰত্তা বলকথা. আসৰক্খযঞাণৰিরহিতং নৰবলং লোকুত্তরন্তি ¶ পৰত্তা অরিযন্তিকথা. সরাগং চিত্তং নিব্বানং আরব্ভ রাগতো ৰিমুচ্চতীতি পৰত্তা ৰিমুত্তিকথা. ঝানেন ৰিক্খম্ভনৰিমুত্তিযা পঠমং ৰিমুত্তং চিত্তং মগ্গক্খণে সমুচ্ছেদৰিমুত্তিযা ৰিমুচ্চমানং নাম হোতীতি পৰত্তা ৰিমুচ্চমানকথা. অট্ঠমকসঙ্খাতস্স সোতাপত্তিমগ্গট্ঠস্স অনুলোমগোত্রভুক্খণে দিট্ঠিৰিচিকিচ্ছা পহীযন্তি নাম, মগ্গক্খণে পহীনা নামাতি পৰত্তা অট্ঠমককথা. অট্ঠমকস্স মগ্গক্খণে সদ্ধিন্দ্রিযাদীনি পটিলভন্তি, ন পটিলদ্ধানীতি পৰত্তা অট্ঠমকস্স ইন্দ্রিযকথা. চতুত্থজ্ঝানধম্মুপত্থদ্ধং মংসচক্খুমেৰ দিব্বচক্খু নামাতি পৰত্তা দিব্বচক্খুকথা. তথা মংসসোতে দিব্বসোতকথা. যথাকম্মূপগতঞাণমেৰ দিব্বচক্খূতি পৰত্তা যথাকম্মূপগতঞাণকথা. দেৰব্রহ্মানং পাণাতিপাতাদিঅসংৰরাভাৰমত্তেন সম্পত্তৰিরতিযা অভাৰেপি সংৰরো অত্থীতি পৰত্তা সংৰরকথা. অসঞ্ঞীনম্পি চুতিপটিসন্ধিক্খণে সঞ্ঞা অত্থীতি পৰত্তা অসঞ্ঞকথা. নেৰসঞ্ঞানাসঞ্ঞাযতনভূমিযং সঞ্ঞা নপ্পৰত্ততীতি পৰত্তা নেৰসঞ্ঞানাসঞ্ঞাযতনকথা.

অরহা ¶ গিহী অস্সাতি পৰত্তা গিহিস্স অরহাতিকথা. অনাগামিনো সুদ্ধাৰাসেসু পটিসন্ধিচিত্তেন উপপত্তিক্খণে অরহন্তো হোন্তীতি পৰত্তা উপপত্তিকথা. অরহতো লোকিযধম্মাপি অনাসৰাতি পৰত্তা অনাসৰকথা. পচ্চুপ্পন্নক্খণে সমঙ্গিভাৰসমন্নাগমো চ রূপাৰচরাদিভূমন্তরপটিলাভসমন্নাগমো চাতি দ্ৰে সমন্নাগমা, যেসং পন ইমে দ্ৰে সমন্নাগমে ঠপেত্ৰা অঞ্ঞোপি হেত্থ উপপত্তিধম্মৰসেন একো সমন্নাগমো নাম অত্থি, তেন অরহা চতূহি ফলেহি সমন্নাগতোতি পৰত্তা সমন্নাগতকথা. ইমিনাৰ নযেন অরহা ছহি উপেক্খাহি সমন্নাগতোতি পৰত্তা উপেক্খাসমন্নাগতকথা. মগ্গঞাণসব্বঞ্ঞুতঞ্ঞাণসঙ্খাতবোধিযা সদা সন্নিহিতভাৰেন বুদ্ধোতি পৰত্তা বোধিযা বুদ্ধোতিকথা. মহাপুরিসলক্খণযুত্তাৰ বোধিসত্তাতি পৰত্তা লক্খণকথা. বোধিসত্তানম্পি মগ্গনিযামো অত্থীতি পৰত্তা নিযামোক্কন্তিকথা. চতুত্থমগ্গট্ঠো তীহি ফলেহি সমন্নাগতোতিআদিনা পৰত্তা অপরাপি সমন্নাগতকথা. পঠমমগ্গাদীহি পহীনেহি সদ্ধিং নিপ্পরিযাযতো অরহত্তং সব্বসংযোজনপ্পহানন্তি পৰত্তা সব্বসংযোজনপহানকথা.

নিপ্পরিযাযতো ফলং ৰিমুত্তি নাম, ৰিপস্সনামগ্গপচ্চৰেক্খণঞাণানি পন পরিযাযতো. এৰং পন অগ্গহেত্ৰা যং কিঞ্চি কিলেসৰিপ্পযুত্তং ঞাণং ৰিমুত্তীতি পৰত্তা ৰিমুত্তিকথা. বুদ্ধাদিঅসেখারম্মণং অসেখঞাণন্তি পৰত্তা অসেখঞাণকথা. পথৰীকসিণাদিসমাপত্তিযো ¶ পরমত্থতো অৰিজ্জমানে পঞ্ঞত্তারম্মণে পৰত্তত্তা ৰিপরীতঞাণন্তি পৰত্তা ৰিপরীতকথা. তত্থ অনিচ্চে নিচ্চন্তিআদিনা চতুব্বিধো ৰিপল্লাসো ৰেদিতব্বো. সব্বেসং পুথুজ্জনানং নিযামগমনায ঞাণং অত্থীতি পৰত্তা নিযামকথা. সব্বং ঞাণং পটিসম্ভিদাতি ¶ পৰত্তা পটিসম্ভিদাকথা. সম্মুতিৰিসযম্পি ঞাণং ভূতারম্মণমেৰাতি পৰত্তা সম্মুতিঞাণকথা. চেতোপরিযঞাণং চিত্তারম্মণমেৰ, ন তংসম্পযুত্তরাগাদিচেতসিকারম্মণন্তি পৰত্তা চিত্তারম্মণকথা. সব্বস্মিং অনাগতধম্মে সব্বেসং ঞাণং অত্থীতি পৰত্তা অনাগতঞাণকথা. পচ্চুপ্পন্নে অত্তনো ঞাণেপি ঞাণং পৰত্ততীতি পৰত্তা পটুপ্পন্নঞাণকথা. বুদ্ধা ৰিয সাৰকাপি তেন তেন ৰেনেয্যজনেন পত্তব্বফলং ঞত্ৰাৰ তদত্থায ধম্মং দেসেন্তীতি পৰত্তা ফলঞাণকথা.

সম্মত্তনিযামো নিযমতো নিচ্চট্ঠেন অসঙ্খতোতি পৰত্তা নিযামকথা. ‘‘ধম্মট্ঠিততা ধম্মনিযামতা’’তিআদিৰচনতো পটিচ্চসমুপ্পাদো অসঙ্খতোতি পৰত্তা পটিচ্চসমুপ্পাদকথা. ‘‘সচ্চানি তথানি অৰিতথানী’’তিআদিৰচনতো চতুসচ্চানি অসঙ্খতানীতি পৰত্তা সচ্চকথা. ‘‘চত্তারো আরুপ্পা আনেঞ্জা’’তি ৰচনতো অসঙ্খতাতি পৰত্তা আরুপ্পকথা. নিরোধসমাপত্তি অসঙ্খতাতি পৰত্তা নিরোধসমাপত্তিকথা. অসঙ্খতো আকাসোতি আকাসকথা. আকাসো সনিদস্সনোতিকথা. পথৰীধাতু সনিদস্সনাতিআদিং কত্ৰা কাযকম্মং সনিদস্সনন্তি পরিযোসানকথা.

নত্থি কেচি ধম্মা কেহিচি ধম্মেহি সঙ্গহিতা, তেন একৰিধেন রূপসঙ্গহোতিআদি নিরত্থকন্তি পৰত্তা সঙ্গহিতকথা. ৰেদনাদযো অরূপধম্মা অঞ্ঞমঞ্ঞং ন সম্পযুত্তাতি পৰত্তা সম্পযুত্তকথা. চেতসিকং নত্থীতি পৰত্তা চেতসিককথা. চেতনাধম্মোৰ দানং, ন দেয্যধম্মোতি পৰত্তা দানকথা. পটিগ্গাহকানং পরিভোগমযং পুঞ্ঞং অত্থীতি পৰত্তা পরিভোগকথা. পেতা ইতো দিন্নচীৰরাদীহেৰ যাপেন্তীতি পৰত্তা ইতোদিন্নকথা. পথৰীকম্মৰিপাকোতিকথা ¶ . জরামরণং ৰিপাকোতিকথা. কিলেসপ্পহানমত্তমেৰ সামঞ্ঞফলং, ন চিত্তচেতসিকা ধম্মাতি পৰত্তা অরিযধম্মৰিপাককথা. অঞ্ঞমঞ্ঞাদিপচ্চযতায ৰিপাকো ৰিপাকধম্মধম্মোতিকথা.

অসুরকাযেন সদ্ধিং ছ গতিযোতি পৰত্তা গতিকথা. মতসত্তো মাতুউতুসমযঞ্চ মাতাপিতুসংযোগঞ্চ ওলোকযমানো সত্তাহং, অতিরেকসত্তাহং ৰা যস্মিং ভৰে তিট্ঠতি, সো অন্তরাভৰো ¶ নাম অত্থীতি পৰত্তা অন্তরাভৰকথা. রূপাদিপঞ্চকামগুণাৰ কামধাতু নাম, ন তু ৰত্থুকামকিলেসকামাতি পৰত্তা কামগুণকথা. পঞ্চেৰাযতনানি কামাতিকথা. রূপধম্মাৰ রূপধাতূতিকথা. অরূপধম্মাৰ অরূপধাতূতিকথা. রূপধাতুযা সত্তা ঘানাদীহি সদ্ধিং সল়াযতনিকাতি পৰত্তা রূপধাতুযাআযতনকথা. আরুপ্পেপি অত্থি সুখুমরূপন্তিকথা. কাযৰচীৰিঞ্ঞত্তিৰসেন রূপং কম্মন্তিকথা. চিত্তৰিপ্পযুত্তো অরূপধম্মোৰ জীৰিতিন্দ্রিযং, রূপজীৰিতিন্দ্রিযং নত্থীতি পৰত্তা জীৰিতিন্দ্রিযকথা. অরিযুপৰাদকম্মেন অরহত্তা পরিহাযতীতি পৰত্তা কম্মহেতুকথা.

অনিচ্চাদিৰসেন সঙ্খারে আদীনৰতো অপস্সিত্ৰা নিব্বানং আনিসংসতো পস্সন্তস্স সংযোজনপ্পহানং হোতীতি পৰত্তা আনিসংসদস্সাৰিকথা. নিব্বানারম্মণম্পি সংযোজনং অত্থীতি পৰত্তা অমতারম্মণকথা. রূপং সারম্মণন্তিকথা. অনুসযা অনারম্মণাতিকথা. ঞাণং অনারম্মণন্তিকথা. অতীতারম্মণঞ্চ অনাগতারম্মণঞ্চ চিত্তং অনারম্মণন্তিকথাদ্ৰযং. সব্বং চিত্তং ৰিতক্কানুপতিতন্তিকথা. ৰিতক্কৰিপ্ফারোৰ সদ্দো, সো চ ন সোতৰিঞ্ঞেয্যোতি পৰত্তা ৰিতক্কৰিপ্ফারসদ্দকথা. ৰিনাপি চিত্তেন ৰাচা পৰত্ততীতি পৰত্তা নযথাচিত্তস্সৰাচাতিকথা. ৰিনাপি ¶ চিত্তেন কাযকম্মং পৰত্ততীতি পৰত্তা নযথাচিত্তস্সকাযকম্মন্তিকথা. অতীতেহিপি ঝানেহি, অনাগতেহিপি যোগিনো সমন্নাগতাতি পৰত্তা অতীতানাগতসমন্নাগতকথা.

ভৰঙ্গচিত্তে অনিরুদ্ধে এৰ কুসলাকুসলচিত্তানি উপ্পজ্জন্তি, তদভাৰে চ সন্ততিনিরোধো সিযাতি পৰত্তা নিরোধকথা. সহ ৰাচাহি ৰিঞ্ঞত্তিরূপং মগ্গোতিকথা. পঞ্চৰিঞ্ঞাণসমঙ্গিস্সাপি মগ্গভাৰনা অত্থীতি পৰত্তা পঞ্চৰিঞ্ঞাণসমঙ্গিস্সমগ্গকথা. পঞ্চৰিঞ্ঞাণা কুসলাপি অকুসলাপীতিকথা. পঞ্চৰিঞ্ঞাণা সাভোগাতিকথা. মগ্গক্খণে লোকিযেন, লোকুত্তরেন চাতি দ্ৰীহি সীলেহি যুত্তাতিকথা. সীলং অচেতসিকন্তিকথা. সীলং ন চিত্তানুপরিৰত্তীতিকথা. সমাদানহেতুচিত্তৰিপ্পযুত্তো পুঞ্ঞোপচযো হোতীতি পৰত্তা সমাদানহেতুককথা. ৰিঞ্ঞত্তি সীলন্তিকথা. পাণাতিপাতাদযো ৰিনাপি ৰিঞ্ঞত্তিং হোন্তীতি পৰত্তা অৰিঞ্ঞত্তিদুস্সীল্যকথা.

অনুসযা অব্যাকতা, অহেতুকা, চিত্তৰিপ্পযুত্তাতি তিস্সোপি অনুসযকথা. অসেখস্স ঞাণৰিপ্পযুত্তপ্পৰত্তিযা সো ঞাণীতি নৰত্তব্বোতি পৰত্তা ঞাণকথা. ঞাণং চিত্তৰিপ্পযুত্তন্তিকথা ¶ . মগ্গক্খণে ইদং দুক্খন্তি ঞাণং পৰত্তন্তি পৰত্তা ইদং দুক্খন্তিকথা. বুদ্ধা ইদ্ধিবলেন আযুকপ্পং ৰিনাপি মহাকপ্পং তিট্ঠন্তীতি পৰত্তা ইদ্ধিবলকথা. চিত্তসন্ততি সমাধি, ন একচিত্তক্খণিকোতি পৰত্তা সমাধিকথা. অৰিজ্জাদিপটিচ্চসমুপ্পাদঙ্গেহি অঞ্ঞা ধম্মট্ঠিততাতি পৰত্তা ধম্মট্ঠিততাকথা. রূপাদীহি অঞ্ঞা অনিচ্চতাতি পৰত্তা অনিচ্চতাকথা.

ৰিঞ্ঞত্তিযো ৰিনাপি ইন্দ্রিযসংৰরো কাযৰচীকম্মন্তি পৰত্তা কথা. সব্বং কম্মং ৰিপাকজনকন্তি পৰত্তা কম্মকথা. সদ্দো ৰিপাকোতি পৰত্তা কথা. সল়াযতনং ৰিপাকোতি পৰত্তা ¶ কথা. মগ্গং ৰিনাপি সত্তক্খত্তুপরমোতিকথা. তথা কোলংকোলএকবীজিকথাসুপি. দিট্ঠিসম্পন্নো জীৰিতা ৰোরোপেতীতিকথা. দিট্ঠিসম্পন্নস্স অপাযদুগ্গতিযা সদ্ধিং রূপাদিতণ্হাসঙ্খাতদুগ্গতিপহীনাতি পৰত্তা দুগ্গতিকথা. সত্তমভৰিকস্স তণ্হাসম্ভৰতো দুগ্গতি অপ্পহীনাতি পৰত্তা সত্তমভৰিককথা.

সঙ্ঘভেদাদিকপ্পট্ঠং কম্মং কত্ৰা তেন মহাকপ্পং অসীতিভাগং কত্ৰা ততো একভাগমত্তং কালং আযুকপ্পং নিরযে পচ্চন্তীতি অগ্গহেত্ৰা সকলং মহাকপ্পং পচ্চন্তি, ৰিনস্সমানেপি কপ্পে চক্কৰাল়ন্তরেসু পচ্চন্তীতি পৰত্তা কপ্পট্ঠকথা. সঙ্ঘভেদকো অপ্পনাকুসলানি ৰিয কামাৰচরকুসলম্পি ন পটিলভতীতি পৰত্তা কুসলপটিলাভকথা. অঙ্গসম্পন্নায আণত্তিযা অভাৰেপি মাতুঘাতাদিআনন্তরিযকম্মপযোজকো মিচ্ছত্তনিযতো এৰাতি পৰত্তা অনন্তরাপযুত্তকথা. অনিযতধম্মেসুপি কেচি কুসলসম্পযুত্তানিযতা অত্থীতি পৰত্তা নিযতস্স নিযামকথা. নীৰরণেহি নিৰুতেন পটিচ্ছন্নেনেৰ চিত্তেন নীৰরণং পজহন্তীতি পৰত্তা নিৰুতকথা. সম্মুখীভূতং সংযোজনমেৰ জহতীতি পৰত্তা সম্মুখীভূতকথা. সমাপন্নো চ ঝানারম্মণনিকন্তিযা ঝানং অস্সাদেতীতি পৰত্তা সমাপন্নো অস্সাদেতীতিকথা. দুক্খৰেদনাযপি রাগস্সাদৰেদনা হোতীতি পৰত্তা অস্সাতরাগকথা. ধম্মতণ্হা অব্যাকতাতিকথা. ধম্মতণ্হা ন দুক্খসমুদযোতিকথা.

কুসলং ৰা অকুসলস্স, অকুসলং ৰা কুসলস্স অনন্তরা উপ্পজ্জন্তীতি পৰত্তা কুসলাকুসলপটিসন্দহনকথা. গব্ভসেয্যকানম্পি বীজমত্তং সল়াযতনং পটিসন্ধিক্খণে উপ্পজ্জতীতি পৰত্তা সল়াযতনুপ্পত্তিকথা. পঞ্চৰিঞ্ঞাণানি অঞ্ঞমঞ্ঞস্স অনন্তরা উপ্পজ্জন্তীতি ¶ পৰত্তা অনন্তরপচ্চযকথা. সম্মাৰাচাকম্মন্তৰিঞ্ঞত্তিযো অরিযরূপন্তিকথা. কামরাগাদিতো ¶ অঞ্ঞো অনুসযোতিকথা. কিলেসপরিযুট্ঠানং চিত্তৰিপ্পযুত্তন্তিকথা. যথা কামরাগো কামধাতুযং পরিযাপন্নো, এৰং রূপরাগঅরূপরাগা রূপারূপভূমিযং পরিযাপন্নাতি পৰত্তা পরিযাপন্নকথা. দ্ৰযং দিট্ঠিগতং অব্যাকতন্তিকথা. দিট্ঠিগতং অপরিযাপন্নন্তিকথা. যো যেসং হেতুপচ্চযো, সো পুন তেসং সহজাতাদিপচ্চযো ন হোতি, একধাৰ একস্স পচ্চযো হোতীতি পৰত্তা পচ্চযতাকথা. অৰিজ্জাৰ সঙ্খারানং পচ্চযো, ন পন সঙ্খারা অৰিজ্জাযাতি পৰত্তা অঞ্ঞমঞ্ঞপচ্চযকথা. কালদ্ধানা ইমে পরিনিপ্ফন্নেন পঞ্ঞত্তিমত্তাতি পৰত্তা অদ্ধাকথা. এৰং খণলযমুহুত্তকথা. অঞ্ঞস্স আসৰস্স অভাৰা আসৰা অনাসৰাতি পৰত্তা আসৰকথা. লোকুত্তরানং ধম্মানং জরামরণং লোকুত্তরন্তি পৰত্তা জরামরণকথা. নিরোধসমাপত্তি লোকুত্তরাতি পৰত্তা সঞ্ঞাৰেদযিতকথা. সা লোকিযাতি পৰত্তা দুতিযসঞ্ঞাৰেদযিতকথা. নিরোধসমাপন্নোপি কালং করেয্যাতি পৰত্তা ততিযসঞ্ঞাৰেদযিতকথা. নিরোধসমাপত্তি অসঞ্ঞসত্তুপিকাতিকথা. কম্মতো অঞ্ঞো চিত্তৰিপ্পযুত্তো কম্মূপচযোতিকথা.

বলপ্পত্তা বুদ্ধাদযো ইদ্ধিবলেন সত্তানং চিত্তং রাগাদিঅনুপ্পত্তিযা নিগ্গণ্হন্তীতি পৰত্তা নিগ্গহকথা. এৰং কুসলুপ্পত্তিযা পরচিত্তপগ্গহনকথা. বুদ্ধা ইদ্ধিযা পরেসং সুখং দেন্তীতি পৰত্তা সুখানুপ্পদানকথা. ‘‘সঙ্খারা অনিচ্চা’’তি মনসিকরোতো অতীতাদিভেদভিন্নে সব্বে সঙ্খারে আরম্মণৰসেন একতো অধিগণ্হাতীতি পৰত্তা অধিগয্হমনসিকারকথা. রূপং হেতুকন্তিকথা. এৰং রূপং সহেতুকন্তিকথা. রূপং কুসলাকুসলন্তিকথা. রূপং ৰিপাকোতিকথা, যথা কামাৰচরকম্মেন জাতং রূপং কামাৰচরং, এৰং রূপাৰচরারূপাৰচরকম্মেহি জাতং রূপং রূপাৰচরারূপাৰচরন্তিকথা ¶ . রূপরাগো রূপধাতুযা, অরূপরাগো চ অরূপধাতুযা পরিযাপন্নোতিকথা.

অত্থি অরহতো পুঞ্ঞূপচযোতিকথা. নত্থি অরহতো অকালমচ্চূতিকথা. যং কিঞ্চি উপ্পজ্জতি, সব্বমিদং কম্মতোতিকথা. ইন্দ্রিযবদ্ধমেৰ দুক্খং, ন সব্বে সঙ্খারাতি পৰত্তা ইন্দ্রিযবদ্ধকথা. সব্বে সঙ্খারা দুক্খা ঠপেত্ৰা অরিযমগ্গন্তিকথা. মগ্গফলানেৰ সঙ্ঘো নাম, ন চ তানি দক্খিণং পটিগ্গণ্হন্তি, তস্মা ন ৰত্তব্বং সঙ্ঘো দক্খিণং পটিগ্গণ্হাতীতিকথা. তথা ন ৰত্তব্বং সঙ্ঘো দক্খিণং ৰিসোধেতীতিকথা. ন ৰত্তব্বং সঙ্ঘো ভুঞ্জতীতিকথা. ন ৰত্তব্বং সঙ্ঘস্স ¶ দিন্নং মহপ্ফলন্তিকথা. বুদ্ধা ন কিঞ্চি ভুঞ্জন্তি, তস্মা ন ৰত্তব্বং বুদ্ধস্স দিন্নং মহপ্ফলন্তিকথা. দাযকতো দানং ৰিসুজ্ঝতি, ন পটিগ্গাহকতোতি পৰত্তা দক্খিণাৰিসুদ্ধিকথা.

বুদ্ধা তুসিতলোকে এৰ নিব্বত্তন্তি, ন মনুস্সলোকে. এত্থ হি নিম্মিতরূপমত্তং দস্সেন্তীতি পৰত্তা মনুস্সলোককথা. নিম্মিতরূপং ধম্মং দেসেতি, ন বুদ্ধোতি পৰত্তা ধম্মদেসনাকথা. রাগোৰ করুণা নাম, ততো নত্থি বুদ্ধানং করুণাতিকথা. বুদ্ধানং উচ্চারপস্সাৰো অঞ্ঞে গন্ধজাতে অতিৰিয অধিগণ্হাতীতি পৰত্তা গন্ধজাতকথা. বুদ্ধা একেন মগ্গেন চত্তারি সামঞ্ঞফলানি সচ্ছিকরোন্তীতি পৰত্তা একমগ্গকথা. পরিকম্মাদিং ৰিনাৰ পঠমাদিজ্ঝানা দুতিযাদিজ্ঝানং সঙ্কমতীতি পৰত্তা ঝানসঙ্কন্তিকথা. পঞ্চকনযে অৰিতক্কৰিচারমত্তং ঝানং ৰিসুং ঝানং নাম ন হোতি, ঝানন্তরিকং নাম হোতীতি পৰত্তা ঝানন্তরিককথা. সমাপন্নো সদ্দং সুণাতীতিকথা. ৰিঞ্ঞাণং ৰিনা পসাদচক্খুনা রূপং পস্সতীতিকথা.

তেকালিকে কিলেসে পজহতীতি পৰত্তা কিলেসপ্পজহনকথা. নিব্বানসঙ্খাতাপি সুঞ্ঞতা সঙ্খারক্খন্ধপরিযাপন্নাতি পৰত্তা সুঞ্ঞতকথা. অসঙ্খতমেৰ সামঞ্ঞফলন্তিকথা ¶ . যেসং কেসঞ্চি ধম্মানং পটিলাভা অসঙ্খতাতি পৰত্তা পত্তিকথা. সব্বধম্মানং সভাৰসঙ্খাতা তথতা অসঙ্খতাতি পৰত্তা তথতাকথা. অনৰজ্জট্ঠেন নিব্বানম্পি কুসলন্তিকথা. আনন্তরিযাদিং ৰিনাপি অত্থি পুথুজ্জনস্স অচ্চন্তনিযামতাতিকথা. লোকিযসদ্ধাদযো ন ইন্দ্রিযানীতি পৰত্তা ইন্দ্রিযকথা.

অসঞ্চিচ্চাপি আনন্তরিকো হোতীতি পৰত্তা অসঞ্চিচ্চকথা. নত্থি পুথুজ্জনস্স ঞাণন্তি পৰত্তা ঞাণকথা. নেরযিকানং কম্মানেৰ নিরযপালরূপেন ৰধেন্তি, ন নিরযপালাতি পৰত্তা নিরযপালকথা. অত্থি দেৰেসু তিরচ্ছানাতিকথা. ৰিরতিত্তযং চিত্তৰিপ্পযুত্তং, পঞ্চঙ্গিকোৰ মগ্গোতি পৰত্তা মগ্গকথা. পটিচ্চসমুপ্পাদেসু ঞাণং লোকুত্তরন্তি পৰত্তা ঞাণকথা.

তিস্সো সঙ্গীতিযো আরব্ভ সাসনং নৰং কতন্তি পৰত্তা সাসনকথা. পুথুজ্জনো একক্খণে তেধাতুকেহি ধম্মেহি অৰিৰিত্তোতি পৰত্তা অৰিৰিত্তকথা. ঞেয্যাৰরণহেতুকং কিঞ্চি সংযোজনং ¶ অপ্পহাযপি অরহা হোতীতি পৰত্তা সংযোজনকথা. ‘‘সঙ্খারা নিচ্চা হোন্তু, রুক্খা নিচ্চপুপ্ফফলাদিযুত্তা খেমিনো হোন্তূ’’তিআদিনা যথাধিপ্পাযং ইদ্ধি পৰত্ততীতি পৰত্তা ইদ্ধিকথা. বুদ্ধানং সরীরআযুপভাৰেমত্ততো অঞ্ঞাপি ৰেমত্ততা অত্থীতি পৰত্তা বুদ্ধকথা. একস্মিং খণে সব্বলোকধাতূসু অনেকে বুদ্ধা সন্তীতি পৰত্তা সব্বদিসাকথা. সব্বে ধম্মা নিযতাতি পৰত্তা ধম্মকথা. সব্বকম্মানি ফলদানে নিযতানীতি পৰত্তা কম্মকথা.

অরহা অসব্বঞ্ঞুভাৰেন সব্বঞ্ঞুৰিসযে কিঞ্চি সংযোজনং অপ্পহায পরিনিব্বাতীতি পৰত্তা পরিনিব্বানকথা. অরহা কুসলচিত্তো পরিনিব্বাযতীতি পৰত্তা কুসলচিত্তকথা. অরহা আনেঞ্জে সণ্ঠিতো পরিনিব্বাযতীতি পৰত্তা আনেঞ্জকথা ¶ . অত্থি গব্ভসেয্যায ধম্মাভিসমযো, অত্থি গব্ভসেয্যায অরহত্তপ্পত্তি, সুপিনন্তে ধম্মাভিসমযো, অরহত্তপ্পত্তি চাতি পৰত্তা তিস্সোপি কথা. সব্বং সুপিনচিত্তং অব্যাকতন্তিকথা. খণিকতায চিত্তানং নত্থি আসেৰনপচ্চযতাতিকথা. সব্বে সঙ্খতা একচিত্তক্খণিকাতি পৰত্তা খণিককথা.

ইত্থিযা সদ্ধিং একতো সম্পত্তিং অনুভৰিস্সামাতি পূজাদিং কত্ৰা একাধিপ্পাযপ্পত্তস্স ভিক্খুনো মেথুনো ধম্মো পটিসেৰিতব্বোতি পৰত্তা একাধিপ্পাযকথা. পাপভিক্খূসু মেথুনং পটিসেৰন্তেসু অরহন্তানং ৰণ্ণেন অমনুস্সা মেথুনং পটিসেৰন্তীতি পৰত্তা অরহন্তৰণ্ণকথা. কেচি সত্তা অত্তনো ইস্সরিযেন কামকারিকাৰসেন ৰিনিপাতং গচ্ছন্তি, ন কম্মৰসেনাতি পৰত্তা ইস্সরিযকামকারিকাকথা. ন রাগো রাগপতিরূপকোতিআদি পতিরূপকথা. খন্ধাযতনাদযো অপরিনিপ্ফন্নাতি পৰত্তা অপরিনিপ্ফন্নকথাতি সাধিকদ্ৰিসতকথা. পাল়িযং অট্ঠমুখৰাদযুত্তিৰসেনেৰ সম্মিতিযাদীনং ভিন্নলদ্ধিকানং লদ্ধিভেদৰসেন নানাপকারতো ৰিভত্তা, তা পন সব্বকথা পুগ্গলকথাৰ. তা তংতংলদ্ধিভেদৰসেন সঙ্খেপতোপি ৰুচ্চমানা অতিভারিযং গন্থং করোন্তি, তস্মা ন ৰিত্থারিতা. তং পন নযং ইচ্ছন্তেহি পাল়িঅট্ঠকথাসু (কথা. ১ আদযো; কথা. অট্ঠ. নিদানকথা) এৰ ৰিত্থারতো গহেতব্বোতি অযমেত্থ পাল়িনযেন সদ্ধিং অত্থৰিনিচ্ছযো.

মোহৰিচ্ছেদনিযা অভিধম্মমাতিকত্থৰণ্ণনায

কথাৰত্থুমাতিকত্থৰণ্ণনা নিট্ঠিতা.

৬. যমকমাতিকা

মূলযমকমাতিকত্থৰণ্ণনা

ইদানি ¶ ¶ যমকমাতিকায সংৰণ্ণনানযো হোতি. সা পনেসা মূলযমকমাতিকা খন্ধআযতনধাতুসচ্চসঙ্খারঅনুসযচিত্তধম্মইন্দ্রিযযমকমাতিকাতি দসৰিধা হোতি. কেনট্ঠেন চেত্থ যমকন্তি? যুগল়ট্ঠেন. যুগল়ং হি ‘‘যমকপাটিহারিযং’’, ‘‘যমকসালা’’তিআদীসু ‘‘যমক’’ন্তি ৰুচ্চতি, ইতি যুগল়সঙ্খাতানং যমকানং ৰসেন দেসিতত্তা ইমেসু দসসু একেকম্পি, এতেসং ৰিভজনত্তা নিদ্দেসোপি, সব্বেসং সমূহত্তা পকরণম্পি যমকং নাম. ইধ পনেতা নিদ্দেসযমকং উপাদায ‘‘যমকমাতিকা’’ত্ৰেৰ ৰুত্তা, তাসং পন দসন্নং যমকমাতিকানং মূলযমকমাতিকা আদি. তত্থাপি ‘‘যে কেচি কুসলা ধম্মা, সব্বে তে কুসলমূলা. যে ৰা পন কুসলমূলা, সব্বে তে ধম্মা কুসলা’’তি ইদং যমকং আদি. তস্স কুসলমূলসঙ্খাতানং দ্ৰিন্নং অত্থানং ৰসেন অত্থযমকন্তি ৰা, তেসঞ্ঞেৰ অত্থানং অনুলোমতো পটিলোমতো পৰত্তপাল়িধম্মৰসেন ধম্মযমকন্তি ৰা, অনুলোমপটিলোমতো পৰত্তপুচ্ছাৰসেন পুচ্ছাযমকন্তি ৰা তিধা যমকভাৰো ৰেদিতব্বো. সেসেসুপি এসেৰ নযো.

ইদানি ইমেসং যমকানং ৰসেন দেসিতায ইমিস্সা মূলযমকমাতিকায তাৰ নযযমকপুচ্ছাঅত্থৰারপ্পভেদৰসেন পাল়িৰৰত্থানং এৰং ৰেদিতব্বং – কুসলত্তিকমাতিকায হি ‘‘কুসলা ধম্মা’’তি ইদং আদিপদং নিস্সায মূলনযো মূলমূলনযো মূলকনযো মূলমূলকনযোতি ইমে চত্তারো নযা হোন্তি. তেসু একেকস্মিং নযে মূলযমকং একমূলযমকং অঞ্ঞমঞ্ঞমূলযমকন্তি তীণি তীণি যমকানীতি ¶ দ্ৰাদস যমকানি. একেকস্মিং যমকে অনুলোমপটিলোমৰসেন ¶ দ্ৰে দ্ৰে পুচ্ছাতি চতুৰীসতি পুচ্ছা, একেকপুচ্ছায সন্নিট্ঠানসংসযৰসেন দ্ৰে দ্ৰে অত্থাতি অট্ঠচত্তালীস অত্থা.

তত্থ যে কেচি কুসলাতি কুসলেসু ‘‘কুসলা নু খো, ন কুসলা নু খো’’তি সন্দেহাভাৰতো ইমস্মিং পদে সন্নিট্ঠানত্থো ৰেদিতব্বো. সব্বে তে কুসলমূলাতি ‘‘সব্বে তে কুসলা ধম্মা কুসলমূলা নু খো, ন নু খো’’তি এৰং ৰিমতিৰসেন পুচ্ছিতত্তা ইমস্মিং পদে সংসযত্থো ৰেদিতব্বো. সো চ খো ৰেনেয্যানং সংসযট্ঠানে সংসযং দীপেত্ৰা তংৰিনোদনত্থং ভগৰতা ৰুত্তো, তথাগতস্স পন সংসযট্ঠানং নাম নত্থি. ইতো পরেসুপি পুচ্ছাপদেসু এসেৰ নযো. যথা চ কুসলপদং নিস্সায ইমে চতুনযাদযো হোন্তি, অকুসলপদং নিস্সাযপি তথেৰ, অব্যাকতপদং নিস্সাযপি তথেৰ, কুসলাদীনি তীণিপি পদানি একতো কত্ৰা নিদ্দিট্ঠং নামপদং নিস্সায তথেৰাতি কুসলত্তিকমাতিকায চতূসু পদেসু সব্বেপি সোল়স নযা, অট্ঠচত্তালীস যমকানি, ছন্নৰুতি পুচ্ছা, দ্ৰানৰুতিসতং অত্থা চ উদ্দেসৰসেন ৰুত্তাতি ৰেদিতব্বা. এত্তাৰতা মূলৰারো হেতুৰারো নিদানৰারো সম্ভৰৰারো পভৰৰারো সমুট্ঠানৰারো আহারৰারো আরম্মণৰারো পচ্চযৰারো সমুদযৰারোতি সব্বেপি দস ৰারা হোন্তি. তত্থ মূলৰারে আগতপরিচ্ছেদেনেৰ অৰসেসেসুপি নযাদযো ৰেদিতব্বা. পাল়ি পনেত্থ অতিসংখিত্তা. ইতি সব্বেসুপি দসসু ৰারেসু সট্ঠিসতং নযা, অসীতিঅধিকানি চত্তারি যমকসতানি, সট্ঠিঅধিকানি নৰ পুচ্ছাসতানি, ৰীসাধিকানি একূনৰীসতি অত্থসতানি চ উদ্দিট্ঠানীতি ৰেদিতব্বানি.

এৰমেত্থ ¶ নযযমকপুচ্ছা অত্থৰারপ্পভেদৰসেন পাল়িৰৰত্থানং ৰিদিত্ৰা ইদানি তস্সা অনুত্তানপদত্থানুসারেনেৰ ৰিভঙ্গনযসহিতো সঙ্খেপত্থৰণ্ণনানযো এৰং ৰেদিতব্বো – তত্থ যে কেচীতি অনৰসেসৰচনং. কুসলা ধম্মাতি অনৰজ্জসুখৰিপাকা নিস্সত্তসভাৰা. সব্বে তে কুসলমূলাতি কিং তে সব্বেযেৰ কুসলমূলা হোন্তীতি পুচ্ছা. ইমানি পন ৰিস্সজ্জনমাতিকায নত্থি. যমকমাতিকায হি সব্বত্থ পুচ্ছাপদানেৰ উদ্ধটানি, ন ৰিস্সজ্জনানীতি. ৰিস্সজ্জনানি পন নিদ্দেসেযেৰ ৰুত্তানি, তস্মা সব্বত্থ নিদ্দেসনযেনেৰ ৰিস্সজ্জনমুখং দস্সযিস্সাম. ইমিস্সাৰ ‘‘যে কেচি কুসলা ধম্মা, সব্বে তে কুসলমূলা’’তি পুচ্ছায ৰিভঙ্গনযেন ইদং ৰিস্সজ্জনমুখং. ‘‘তীণেৰ কুসলমূলানি, অৰসেসা কুসলা ধম্মা ন কুসলমূলা’’তি তস্সা চাযমত্থো – ন তে সব্বে কুসলা ধম্মা কুসলমূলানি হোন্তি, অলোভাদীনি পন তীণেৰ কুসলমূলানীতি. যে ৰা পন কুসলমূলা তযো অলোভাদযো কুসলানং ¶ মূলাতি ৰুত্তা, সব্বে তে কুসলা ধম্মাতি কিং তে সব্বে তযোপি ধম্মা কুসলাতি পুচ্ছা. তস্সা নিদ্দেসে ‘‘আমন্তা’’তি ৰিস্সজ্জনং. তস্স তেসং তিণ্ণং মূলানং কুসলভাৰম্পি সম্পটিচ্ছামীতি অত্থো. অযং তাৰ মূলনযে মূলযমকনযো.

একমূলযমকে পন সব্বে তে কুসলমূলেন একমূলাতি গণনট্ঠেন একমূলকং অগ্গহেত্ৰা সমানত্থেন গহেতব্বা, অযং হেত্থ অত্থো – ‘‘সব্বে তে কুসলমূলেন একং সমানং মূলং এতেসন্তি একমূলা’’তি. যং ফস্সস্স মূলং, কিং তদেৰ ৰেদনাদীনন্তি অযং পুচ্ছা. অথ নেসং তথাভাৰং সম্পটিচ্ছনৰসেন ‘‘আমন্তা’’তি ৰিভঙ্গে ৰিস্সজ্জনং. যে ৰা পন কুসলমূলেন একমূলা, সব্বে তে ধম্মা কুসলাতি পুচ্ছা. তস্সা ¶ পন কুসলচিত্তসমুট্ঠানং রূপং কুসলমূলেন একমূলমেৰ, ন কুসলং, ফস্সাদিধম্মজাতং পন কুসলমূলেন একমূলঞ্চেৰ কুসলঞ্চাতি ইদং ৰিস্সজ্জনং. যথেৰ হি ফস্সাদীনং অলোভাদযো সুপ্পতিট্ঠিতভাৰসাধনেন হেতুপচ্চযত্তা মূলং, তথা তংসমুট্ঠানরূপস্সাপীতি তংরূপম্পি অরূপধম্মেহি সদ্ধিং সমানমূলন্তি ৰুচ্চতি, ন পন কুসলং অনৰজ্জসুখৰিপাকত্তাভাৰা. একমূলযমকনযো.

অঞ্ঞমঞ্ঞমূলযমকে পন ‘‘যে কেচি কুসলা’’তি অপুচ্ছিত্ৰা ‘‘যে কেচি কুসলমূলেন একমূলা’’তি পুচ্ছা কতা. কস্মা? ইমিনাপি ব্যঞ্জনেন তস্সেৰত্থস্স সম্ভৰদস্সনত্থং, কুসলসমুট্ঠানরূপস্সাপি সম্পিণ্ডনত্থঞ্চ. অঞ্ঞমঞ্ঞমূলাতি সব্বেৰ তে কিং অঞ্ঞমঞ্ঞস্স হেতুপচ্চযট্ঠেন মূলানি হোন্তীতি পুচ্ছা. তস্সা যানি দ্ৰে তীণি মূলানি একতো উপ্পজ্জন্তি, তানেৰ একমূলানি চেৰ অঞ্ঞমঞ্ঞমূলানি চ, অৰসেসা কুসলমূলসহজাতা রূপারূপধম্মা কুসলমূলেন একমূলাৰ, ন চ অঞ্ঞমঞ্ঞমূলাতি ৰিস্সজ্জনং. তস্সেৰ পটিলোমনযে সব্বে তে অঞ্ঞমঞ্ঞমূলা অলোভাদযো কুসলাতি পুচ্ছা. আমন্তাতি ৰিস্সজ্জনং. মূলনযো.

যথা চ মূলনযে মূলযমকএকমূলযমকঅঞ্ঞমঞ্ঞমূলযমকৰসেন ছব্বিধা পুচ্ছাৰিস্সজ্জননযা ৰুত্তা, এৰং মূলমূলনযাদীসুপি ৰেদিতব্বা. অযং পনেত্থ ৰিসেসো – সব্বে তে কুসলমূলমূলাতি সব্বে তে কুসলমূলসঙ্খাতা মূলা, কুসলমূলমূলাত্ৰেৰ অত্থো. একমূলমূলাতি সমানট্ঠেন একমেৰ মূলমূলং এতেসন্তি একমূলমূলা, সমানমূলমূলাত্ৰেৰ অত্থো. অঞ্ঞমঞ্ঞমূলমূলাতি অঞ্ঞমঞ্ঞস্স মূলং অঞ্ঞমঞ্ঞমূলং, তং হেতুপচ্চযট্ঠেন মূলং এতেসন্তি অঞ্ঞমঞ্ঞমূলমূলা, অঞ্ঞমঞ্ঞমূলমূলাত্ৰেৰ অত্থো. সেসং তাদিসমেৰাতি. মূলমূলনযো.

মূলকনযে ¶ ¶ পন সব্বে তে কুসলমূলকাতি সব্বে তে কুসলা হেতুপচ্চযট্ঠেন কুসলভূতং মূলং এতেসন্তি কুসলমূলকাতি পুচ্ছা. আমন্তাতি ৰিস্সজ্জনং. ‘‘যে ৰা পন কুসলমূলকা, সব্বে তে ধম্মা কুসলা’’তি পুচ্ছা. যং রূপং, তং ঠপেত্ৰা সেসং কুসলন্তি ৰিস্সজ্জনং, সেসং তাদিসমেৰাতি. মূলকনযো.

মূলমূলকনযে পন কুসলমূলমূলকাতি কুসলমূলসঙ্খাতং মূলং এতেসন্তি কুসলমূলমূলকা. সেসং তাদিসমেৰাতি.

অযং তাৰ কুসলপদেসু পুচ্ছাৰিস্সজ্জননযো. অকুসলপদাদীসুপি এসেৰ নযো. অযং পন ৰিসেসো – অকুসলপদমূলেসু একমূলযমকে ‘‘যে কেচি অকুসলা ধম্মা, সব্বে তে অকুসলমূলেন একমূলা’’তি পঠমপুচ্ছায ‘‘অহেতুকং অকুসলং অকুসলমূলেন একমূল’’ন্তি নিদ্দেসে ৰিস্সজ্জনং কতং. তত্থ অহেতুকং অকুসলন্তি দ্ৰীসু মোহমূলচিত্তেসু মোহং সন্ধায ৰুত্তং, অব্যাকতপদমূলেসু একমূলযমকে ‘‘যে কেচি অব্যাকতা ধম্মা, সব্বে তে অব্যাকতমূলেন একমূলা’’তি পুচ্ছায ‘‘অহেতুকং অব্যাকতং ঠপেত্ৰা সেসা অব্যাকতমূলেন একমূলকা’’তি ৰিস্সজ্জনং. তত্থ অহেতুকং অব্যাকতন্তি অট্ঠারসাহেতুকচিত্তুপ্পাদা, রূপং, নিব্বানঞ্চ. এত্থ চ কিঞ্চাপি সহেতুকঅব্যাকতচিত্তসমুট্ঠানরূপম্পি অব্যাকতমূলেন একমূলমেৰ, তং পন অব্বোহারিকং কত্ৰা নিদ্দেসে একতো লব্ভমানকৰসেনপেতং ৰিস্সজ্জনং কতন্তি ৰেদিতব্বং.

নামপদমূলেসু চ ‘‘যে কেচি নামা ধম্মা, সব্বে তে নামমূলা’’তি পুচ্ছায ‘‘নৰেৰ নামমূলানি, অৰসেসা নামা ধম্মা, ন নামমূলা’’তি ৰিস্সজ্জনং. একমূলনযে পনেত্থ ‘‘যে কেচি নামা ধম্মা, সব্বে তে নামমূলেন একমূলা’’তি পুচ্ছা. ‘‘অহেতুকং নামং ঠপেত্ৰা সেসং নামমূলেন একমূল’’ন্তি ¶ ৰিস্সজ্জনং. তত্থ অহেতুকচিত্তুপ্পাদৰিচিকিচ্ছুদ্ধচ্চসম্পযুত্তমোহনিব্বানৰসেন অহেতুকং নামং ৰেদিতব্বং. সেসং সব্বত্থ কুসলপদে ৰুত্তানুসারেন সুৰিঞ্ঞেয্যমেৰাতি. অযং মূলৰারে নযো.

ইতো পরেসু হেতুৰারাদীসু নৰসু ৰারেসু মূলৰারসদিসোৰ সব্বত্থ সংৰণ্ণনানযো. হেতুআদিপদমত্তমেৰ হেত্থ ৰিসেসো, তানি চ মূল-সদ্দপরিযাযতো অলোভাদিহেতুকানেৰ. অলোভাদযো হি সহজাতধম্মসঙ্খাতস্স অত্তনো ফলস্স পতিট্ঠানট্ঠেন মূলং. তস্স নিপ্ফাদনত্থং হিনোতি ¶ পৰত্ততীতি হেতু, ‘‘হন্দ নং গণ্হথা’’তি দস্সেন্তং ৰিয অত্তনো ফলং নিদেতীতি নিদানং. এতস্মা ফলং সম্ভৰতীতি সম্ভৰো. পভৰতীতি পভৰো. সমুট্ঠাতি তং এত্থ, এতেনাতি ৰা সমুট্ঠানং. তং আহরতীতি আহারো. অপটিক্খিপিতব্বট্ঠেন তেন আলম্বীযতীতি আলম্বণং. এতং পটিচ্চ তং এতীতি পচ্চযো. এতস্মা তং সমুদেতীতি সমুদযো. সব্বং কারণপরিযাযেন ৰুত্তা ‘‘মূলং হেতু নিদানঞ্চা’’তি গাথা দসন্নম্পি ৰারানং উদ্দানগাথা নাম. অযং মূলযমকমাতিকত্থৰণ্ণনানযো.

খন্ধযমকমাতিকত্থৰণ্ণনা

খন্ধযমকপাল়িযা পন পাল়িৰৰত্থানং তাৰ এৰং ৰেদিতব্বং – ‘‘পঞ্চক্খন্ধা’’তি পদং আদিং কত্ৰা যাৰ ‘‘ন খন্ধা ন সঙ্খারা’’তি পদং, তাৰ পৰত্তা অযং খন্ধযমকমাতিকা নাম. সা পণ্ণত্তিৰারস্স ‘‘উদ্দেসৰারো’’তিপি ‘‘পুচ্ছাৰারো’’তিপি ৰুচ্চতি. সো চ পদসোধনৰারো পদসোধনমূলচক্কৰারো সুদ্ধখন্ধৰারো সুদ্ধখন্ধমূলচক্কৰারোতি চতূহি নযৰারেহি পটিমণ্ডিতো. তত্থ ‘‘রূপং রূপক্খন্ধো, রূপক্খন্ধো রূপ’’ন্তিআদিনা নযেন পদমেৰ সোধেত্ৰা গতো পদসোধনৰারো নাম. সো অনুলোমপটিলোমৰসেন দুৰিধো হোতি ¶ . তস্স অনুলোমৰারে ‘‘রূপং রূপক্খন্ধো, রূপক্খন্ধো রূপ’’ন্তিআদীনি পঞ্চ যমকানি. পটিলোমৰারেপি ‘‘ন রূপং ন রূপক্খন্ধো, ন রূপক্খন্ধো ন রূপ’’ন্তিআদিনা পঞ্চ ৰারা.

ততো পরং তেসঞ্ঞেৰ পদসোধনৰারে সোধিতানং খন্ধানং ‘‘রূপং রূপক্খন্ধো, খন্ধা ৰেদনাক্খন্ধো’’তিআদিনা নযেন একেকখন্ধমূলকানি চত্তারি চত্তারি চক্কানি বন্ধিত্ৰা গতো পদসোধনমূলকানং চক্কানং অত্থিতায পদসোধনমূলচক্কৰারো নাম. সোপি অনুলোমপটিলোমৰসেন দুৰিধো হোতি. তস্স অনুলোমৰারে ‘‘রূপং রূপক্খন্ধো, খন্ধা ৰেদনাক্খন্ধো’’তিআদীনি একেকখন্ধমূলকানি চত্তারি চত্তারি কত্ৰা ৰীসতি যমকানি. পটিলোমৰারেপি ‘‘ন রূপং ন রূপক্খন্ধো, ন খন্ধা ন ৰেদনাক্খন্ধো’’তিআদীনি ৰীসতিমেৰ.

ততো পরং ‘‘রূপং খন্ধো, খন্ধা রূপ’’ন্তিআদিনা নযেন সুদ্ধখন্ধৰসেনেৰ গতো সুদ্ধখন্ধৰারো নাম. সোপি অনুলোমপটিলোমৰসেন দুৰিধো হোতি. তস্স অনুলোমৰারে ‘‘রূপং খন্ধো ¶ , খন্ধা রূপ’’ন্তিআদীনি পঞ্চ যমকানি. পটিলোমৰারেপি ‘‘ন রূপং ন খন্ধো, ন খন্ধা ন রূপ’’ন্তিআদীনি পঞ্চেৰ.

ততো পরং তেসঞ্ঞেৰ সুদ্ধখন্ধানং ‘‘রূপং খন্ধো, খন্ধা ৰেদনা’’তিআদিনা নযেন একেকখন্ধমূলকানি চত্তারি চত্তারি চক্কানি বন্ধিত্ৰা গতো সুদ্ধখন্ধমূলকানং চক্কানং অত্থিতায সুদ্ধখন্ধমূলচক্কৰারো নাম. সোপি অনুলোমপটিলোমৰসেন দুৰিধো হোতি. তস্স অনুলোমৰারে ‘‘রূপং খন্ধো, খন্ধা ৰেদনা’’তিআদীনি একেকখন্ধমূলকানি চত্তারি চত্তারি কত্ৰা ৰীসতি যমকানি. পটিলোমৰারেপি ‘‘ন রূপং ন খন্ধো, ন খন্ধা ন ৰেদনা’’তিআদীনি ৰীসতিমেৰ. এৰমেত্থ চতূসু নযৰারেসু একং যমকসতং, দ্ৰে পুচ্ছাসতানি, একেকপুচ্ছায সন্নিট্ঠানসংসযৰসেন দ্ৰে ¶ দ্ৰে অত্থে কত্ৰা চত্তারি চ অত্থসতানি উদ্দিট্ঠানীতি ৰেদিতব্বানি.

এৰমেতিস্সা পাল়িৰৰত্থানং ৰিদিত্ৰা ইদানি অনুত্তানপদত্থানুসারেন ৰিভঙ্গনযসহিতসঙ্খেপত্থৰণ্ণনানযো এৰং ৰেদিতব্বো. পঞ্চক্খন্ধাতি অযং যমকৰসেন পুচ্ছিতব্বানং খন্ধানং উদ্দেসো. রূপক্খন্ধো…পে… ৰিঞ্ঞাণক্খন্ধোতি তেসঞ্ঞেৰ পভেদতো নামৰৰত্থানং. ততো পরং পদসোধনৰারাদযো চত্তারো নযৰারা. তত্থ রূপং রূপক্খন্ধোতি যং কিঞ্চি ‘‘রূপ’’ন্তি ৰুচ্চতি, সব্বং তং ‘‘রূপক্খন্ধো’’তি পুচ্ছতীতি ৰচনসোধনত্থং পুচ্ছা. তস্সা চ ‘‘পিযরূপং সাতরূপং রূপং ন রূপক্খন্ধো, রূপক্খন্ধো রূপঞ্চেৰ রূপক্খন্ধো চা’’তি ইদং নিদ্দেসনযেন ৰিস্সজ্জনং. তত্থ পিযরূপং সাতরূপন্তিআদীসু যং ‘‘রূপ’’ন্তি ৰুত্তং, তং রূপমেৰ ন রূপক্খন্ধো. যো পন ‘‘রূপক্খন্ধো’’তি ৰুত্তো, সো ‘‘রূপ’’ন্তিপি ‘‘রূপক্খন্ধো’’তিপি ৰত্তুং ৰট্টতীতি অত্থো. রূপক্খন্ধো রূপন্তি এত্থ পন ‘‘আমন্তা’’তি ৰিস্সজ্জনং রূপক্খন্ধস্স নিযমেন রূপন্তি ৰত্তব্বত্তা. ৰেদনা ৰেদনাক্খন্ধোতি পুচ্ছায, ৰেদনাক্খন্ধো ৰেদনাতি পুচ্ছায চ ‘‘আমন্তা’’তি ৰিস্সজ্জনং. সঞ্ঞাসঞ্ঞাক্খন্ধোতি পুচ্ছায ‘‘পপঞ্চসঞ্ঞা’’তিআদীসু আগতা দিট্ঠিসঞ্ঞা সঞ্ঞা ন সঞ্ঞাক্খন্ধো, সঞ্ঞাক্খন্ধো সঞ্ঞা চেৰ সঞ্ঞাক্খন্ধো চাতি ৰিস্সজ্জনং. সঞ্ঞাক্খন্ধো সঞ্ঞাতি পুচ্ছায চ ‘‘আমন্তা’’তি ৰিস্সজ্জনং. সঙ্খারা সঙ্খারক্খন্ধোতি পুচ্ছায ‘‘অনিচ্চা ৰত সঙ্খারা’’তিআদীসু আগতো সঙ্খারক্খন্ধো, ততো অৰসেসা সঙ্খতধম্মা সঙ্খারা ন সঙ্খারক্খন্ধোতি ৰিস্সজ্জনং. সঙ্খারক্খন্ধো সঙ্খারাতি পুচ্ছায ‘‘আমন্তা’’তি ৰিস্সজ্জনং. ৰিঞ্ঞাণং ¶ ৰিঞ্ঞাণক্খন্ধোতি পুচ্ছায, ৰিঞ্ঞাণক্খন্ধো ৰিঞ্ঞাণন্তি পুচ্ছায চ ‘‘আমন্তা’’তি ৰিস্সজ্জনং.

পটিলোমৰারে ন রূপং ন রূপক্খন্ধোতি পুচ্ছায ‘‘আমন্তা’’তি ৰিস্সজ্জনং. তস্স রূপ-সদ্দৰচনীযা ধম্মা রূপক্খন্ধো ¶ ন হোন্তীতি অত্থো. ন রূপক্খন্ধো ন রূপন্তি পুচ্ছায রূপক্খন্ধৰিরহিতা ‘‘পিযরূপং সাতরূপ’’ন্তি ৰুত্তা ধম্মা ন রূপক্খন্ধো, রূপং, পিযরূপসাতরূপরূপক্খন্ধৰিরহিতা পন ধম্মা ন রূপক্খন্ধো চেৰ ন রূপঞ্চাতি ৰিস্সজ্জনং. ন ৰেদনা ন ৰেদনাক্খন্ধোতি পুচ্ছায, ন ৰেদনাক্খন্ধো ন ৰেদনাতি পুচ্ছায, ন সঞ্ঞা ন সঞ্ঞাক্খন্ধোতি পুচ্ছায চ ‘‘আমন্তা’’তি ৰিস্সজ্জনং. ন সঙ্খারা ন সঙ্খারক্খন্ধোতি পুচ্ছায ‘‘আমন্তা’’তি ৰিস্সজ্জনং. ন সঞ্ঞাক্খন্ধো ন সঞ্ঞাতি পুচ্ছায পন দিট্ঠিসঞ্ঞা ন সঞ্ঞাক্খন্ধো, সঞ্ঞা, তং দিট্ঠিসঞ্ঞং, সঞ্ঞাক্খন্ধঞ্চ ঠপেত্ৰা অৰসেসা ন চেৰ সঞ্ঞা ন চ সঞ্ঞাক্খন্ধোতি ৰিস্সজ্জনং. ন সঙ্খারা ন সঙ্খারক্খন্ধোতি পুচ্ছায ‘‘আমন্তা’’তি ৰিস্সজ্জনং. ন সঙ্খারক্খন্ধো ন সঙ্খারাতি পুচ্ছায সঙ্খারক্খন্ধং ঠপেত্ৰা অৰসেসসঙ্খতধম্মা ন সঙ্খারক্খন্ধো, সঙ্খারা, অসঙ্খতা পন ধাতু ন চেৰ সঙ্খারা ন চ সঙ্খারক্খন্ধোতি ৰিস্সজ্জনং. ন ৰিঞ্ঞাণং ন ৰিঞ্ঞাণক্খন্ধোতি পুচ্ছায, ন ৰিঞ্ঞাণক্খন্ধো ন ৰিঞ্ঞাণন্তি পুচ্ছায চ ‘‘আমন্তা’’তি ৰিস্সজ্জনং. ইমিনাৰ নযেন ইতো পরেসুপি সব্বত্থ ৰিস্সজ্জননযো ৰেদিতব্বো, ৰিসেসমত্তমেৰ পন ৰক্খাম.

পদসোধনমূলচক্কৰারে পন অযং ৰিসেসো – খন্ধা ৰেদনাক্খন্ধোতি যে কেচি খন্ধা, সব্বে তে ৰেদনাক্খন্ধোতি পুচ্ছা. তস্সা ‘‘ৰেদনাক্খন্ধো খন্ধো চেৰ ৰেদনাক্খন্ধো চ, অৰসেসা পন খন্ধা, ন ৰেদনাক্খন্ধো’’তি ৰিস্সজ্জনং. সেসেসুপি এসেৰ নযো. পটিলোমে পন ন খন্ধা ন ৰেদনাক্খন্ধোতি পুচ্ছায ‘‘আমন্তা’’তি ৰিস্সজ্জনং. এত্থ চ যে পঞ্ঞত্তিনিব্বানসঙ্খাতা ধম্মা খন্ধাপি ন হোন্তি, তে যস্মা ৰেদনাক্খন্ধোপি ন হোতি, তস্মা ‘‘আমন্তা’’তি ৰিস্সজ্জনং, সেসং সুৰিঞ্ঞেয্যমেৰ. পদসোধনমূলচক্কৰারো.

সুদ্ধখন্ধৰারে পন ‘‘রূপং খন্ধো’’তি পুচ্ছায ‘‘আমন্তা’’তি ৰিস্সজ্জনং পিযরূপাদীনঞ্চ পঞ্চসু খন্ধেসু সঙ্গহিতত্তা. ‘‘খন্ধা রূপ’’ন্তিআদীসু ¶ যে কেচি খন্ধা, সব্বে তে রূপক্খন্ধোতিআদিনা অত্থো গহেতব্বো. তেনেৰ হিস্স নিদ্দেসে ‘‘খন্ধা রূপ’’ন্তিআদিনা পদং অনুদ্ধরিত্ৰা ¶ ‘‘খন্ধা রূপক্খন্ধো’’তিআদিনা অত্থৰসেনেৰ পদং উদ্ধরিত্ৰা ‘‘রূপক্খন্ধো খন্ধো চেৰ রূপক্খন্ধো চ, অৰসেসা খন্ধা, ন রূপক্খন্ধো’’তি ৰিস্সজ্জনং কতং. তেনেৰ চ কারণেন সুদ্ধখন্ধৰারোতি ৰুত্তো. ৰচনসোধনে ৰিয হি এত্থ ন ৰচনং পমাণং, যথা পন সুদ্ধখন্ধা লব্ভন্তি, তথা তথা অত্থোৰ পমাণং. পরতো আযতনযমকমাতিকাদীসুপি এসেৰ নযো. পটিলোমে ‘‘ন রূপং ন খন্ধো’’তি যং ধম্মজাতং রূপং ন হোতি, তং খন্ধোপি ন হোতীতি পুচ্ছা, তস্সা ‘‘রূপক্খন্ধৰিরহিতা খন্ধা, ন রূপং, তথা নিব্বানং ন পন রূপঞ্চেৰ ন খন্ধো চা’’তি ৰিস্সজ্জনং. সেসং সুৰিঞ্ঞেয্যমেৰ. সুদ্ধখন্ধৰারো.

সুদ্ধখন্ধমূলচক্কৰারেপি ‘‘খন্ধা ৰেদনাক্খন্ধো’’তিআদিনা হেট্ঠা ৰুত্তনযেন অত্থো ৰেদিতব্বোতি অযং পণ্ণত্তিৰারে নযো.

যস্মা পন নিদ্দেসে ইমিস্সা পন মাতিকায পণ্ণত্তিৰারসঙ্খাতং নিদ্দেসং ৰত্ৰা ততো ইমং মাতিকাক্কমং মুঞ্চিত্ৰা অপরেন পরিযাযেন অঞ্ঞেপি উদ্দেসৰারৰিরহিতা ‘‘পৰত্তিৰারো পরিঞ্ঞাৰারো’’তি দ্ৰে মহাৰারা পুচ্ছাৰিস্সজ্জনৰসেন ৰুত্তা, তস্মা তেসং দ্ৰিন্নম্পি ৰারানং নযো দস্সেতব্বো. ততো পৰত্তিৰারে তাৰ পাল়িৰৰত্থানপুব্বিকা মুখমত্তপ্পকাসনা – ইমস্মিং হি উপ্পাদৰারো নিরোধৰারো উপ্পাদনিরোধৰারোতি তযো অন্তরৰারা হোন্তি. তত্থ উপ্পাদৰারে তাৰ তিণ্ণং অদ্ধানং ৰসেন ছ কালভেদা হোন্তি পচ্চুপ্পন্নো, অতীতো, অনাগতো, পচ্চুপ্পন্নেনাতীতো, পচ্চুপ্পন্নেনানাগতো, অতীতেনানাগতোতি. এৰমেতেসু ছসু কালভেদেসু য্ৰাযং পঠমো ¶ পচ্চুপ্পন্নো, তত্থ পুগ্গলতো ওকাসতো পুগ্গলোকাসতোতি তযো ৰারা হোন্তি.

তত্থ ‘‘যস্স রূপক্খন্ধো উপ্পজ্জতি, তস্স ৰেদনাক্খন্ধো উপ্পজ্জতীতি? অসঞ্ঞসত্তং উপপজ্জন্তানং তেসং রূপক্খন্ধো উপ্পজ্জতি, নো চ তেসং ৰেদনাক্খন্ধো উপ্পজ্জতি. পঞ্চৰোকারং উপপজ্জন্তানং তেসং রূপক্খন্ধো চ উপ্পজ্জতি, ৰেদনাক্খন্ধো চ উপ্পজ্জতি. যস্স ৰা পন ৰেদনাক্খন্ধো উপ্পজ্জতি, তস্স রূপক্খন্ধো উপ্পজ্জতীতি? অরূপং উপপজ্জন্তানং তেসং ৰেদনাক্খন্ধো উপ্পজ্জতি, নো চ তেসং রূপক্খন্ধো উপ্পজ্জতি. পঞ্চৰোকারং উপপজ্জন্তানং তেসং ৰেদনাক্খন্ধো চ উপ্পজ্জতি, রূপক্খন্ধো চ উপ্পজ্জতি. যস্স রূপক্খন্ধো উপ্পজ্জতি…পে… তস্স ৰিঞ্ঞাণক্খন্ধো উপ্পজ্জতি…পে… যস্স ৰা পন ৰিঞ্ঞাণক্খন্ধো উপ্পজ্জতি, তস্স রূপক্খন্ধো উপ্পজ্জতীতি…পে… পঞ্চৰোকারং ¶ …পে… উপ্পজ্জতী’’তি এৰং রূপক্খন্ধমূলকানি চত্তারি, ‘‘যস্স ৰেদনাক্খন্ধো উপ্পজ্জতি, তস্স সঞ্ঞাক্খন্ধো উপ্পজ্জতী’’তিআদিনা চ ৰেদনাক্খন্ধমূলকানি তীণি, সঞ্ঞাক্খন্ধমূলকানি দ্ৰে, সঙ্খারক্খন্ধমূলকং একন্তি এৰমেতানি পচ্চুপ্পন্নকালে পুগ্গলৰারে অনুলোমনযে দস যমকানি হোন্তি. তত্থ রূপক্খন্ধমূলকেসু চতূসু আদিতো একমেৰ পাল়িযং ৰিস্সজ্জিতং, সেসানি তেন সদিসৰিস্সজ্জনানীতি তন্তিযা লহুভাৰত্থং সংখিত্তানি.

ৰেদনাক্খন্ধমূলকে পন সব্বত্থ ‘‘আমন্তা’’তি একসদিসমেৰ ৰিস্সজ্জনং. ৰেদনাদীসু উপ্পন্নেসু নিযমেন সঞ্ঞাদীনং উপ্পজ্জনতো তত্থ সব্বানি সংখিত্তানি. যথা চ পুগ্গলৰারে দস যমকানি, এৰং ওকাসৰারেপি ‘‘যত্থ রূপক্খন্ধো উপ্পজ্জতি, তত্থ ৰেদনাক্খন্ধো উপ্পজ্জতীতি? অসঞ্ঞসত্তে তত্থ…পে… পঞ্চৰোকারে তত্থ…পে… উপ্পজ্জতী’’তিআদিনা, পুগ্গলোকাসৰারেপি ‘‘যস্স যত্থ রূপক্খন্ধো উপ্পজ্জতি, তস্স তত্থ ৰেদনাক্খন্ধো উপ্পজ্জতীতি? অসঞ্ঞসত্তং…পে… পঞ্চৰোকারং…পে… উপ্পজ্জতী’’তিআদিনা. পচ্চুপ্পন্নকালে তীসু ৰারেসু ¶ অনুলোমনযে তিংস যমকা হোন্তি. যথা অনুলোমনযে তিংস, এৰং পটিলোমনযেপি ‘‘যস্স রূপক্খন্ধো নুপ্পজ্জতি, তস্স ৰেদনাক্খন্ধো নুপ্পজ্জতীতি? অরূপং উপপজ্জন্তানং তেসং রূপক্খন্ধো নুপ্পজ্জতি, নো চ তেসং ৰেদনাক্খন্ধো নুপ্পজ্জতি. সব্বেসং চৰন্তানং তেসং রূপক্খন্ধো চ নুপ্পজ্জতি ৰেদনাক্খন্ধো চ নুপ্পজ্জতি. যস্স ৰা পন ৰেদনাক্খন্ধো নুপ্পজ্জতি, তস্স রূপক্খন্ধো নুপ্পজ্জতীতি? অসঞ্ঞসত্তং উপপজ্জন্তানং তেসং ৰেদনাক্খন্ধো নুপ্পজ্জতি, নো চ তেসং রূপক্খন্ধো নুপ্পজ্জতি. সব্বেসং চৰন্তানং তেসং ৰেদনাক্খন্ধো চ নুপ্পজ্জতি রূপক্খন্ধো চ নুপ্পজ্জতী’’তিআদিনা, ‘‘যত্থ রূপক্খন্ধো নুপ্পজ্জতি, তত্থ ৰেদনাক্খন্ধো নুপ্পজ্জতীতি? উপ্পজ্জতি. যত্থ ৰা পন…পে… নুপ্পজ্জতীতি? উপ্পজ্জতী’’তিআদিনা চ, ‘‘যস্স যত্থ রূপক্খন্ধো নুপ্পজ্জতি, তস্স তত্থ ৰেদনাক্খন্ধো নুপ্পজ্জতীতি…পে… সব্বেসং চৰন্তানং তদুভযং নুপ্পজ্জতী’’তিআদিনা চাতি তিংস যমকা. এৰং পচ্চুপ্পন্নকালে সট্ঠি যমকানি, তদ্দিগুণা পুচ্ছা, তদ্দিগুণা চ অত্থা ৰেদিতব্বা.

তত্থ যস্স রূপক্খন্ধো উপ্পজ্জতীতি যস্স পুগ্গলস্স পটিসন্ধিক্খণে রূপক্খন্ধো উপ্পজ্জতি. তস্স ৰেদনাক্খন্ধোতি ৰেদনাক্খন্ধোপি তস্স তস্মিংযেৰ খণে উপ্পজ্জতীতি অত্থো ইমিনাৰ নযেন. তত্থ অসঞ্ঞসত্তন্তি অসঞ্ঞত্তভৰং পটিসন্ধিৰসেন উপপজ্জন্তানং তেসং উপ্পজ্জনক্খণে রূপক্খন্ধো উপ্পজ্জতি, নো চ তেসং অচিত্তকত্তা ৰেদনাক্খন্ধো উপ্পজ্জতীতি অত্থো ¶ . ইমিনাৰ নযেন ‘‘যস্স ৰা পন ৰেদনাক্খন্ধো’’তিআদিকেসু পুচ্ছাৰিস্সজ্জনেসু, ততো পরেসুপি সব্বত্থ অত্থো ৰেদিতব্বো.

ইদং পনেত্থ উপ্পাদনিরোধেসু নিযমলক্খণং – সকলেপি হি ইমস্মিং খন্ধযমকে তত্থ তত্থ উপ্পন্নানং সত্তানং পৰত্তে যাৰ মরণা ৰা খন্ধানং অপরিযন্তেসু উপ্পাদনিরোধেসু ৰিজ্জমানেসুপি লহুপরিৰত্তানং ধম্মানং ৰিনিব্ভোগং কত্ৰা উপ্পাদনিরোধে ¶ দস্সেতুং ন সুকরন্তি পৰত্তিযং উপ্পাদনিরোধে অনামসিত্ৰা পটিসন্ধিউপ্পাদৰসেনেৰ উপ্পাদৰারো, নিরোধমরণকালে নিরোধৰসেনেৰ চ নিরোধৰারো কথিতো. এৰমেত্থ উপ্পাদনিরোধেসু নিযমলক্খণং ৰিদিত্ৰা পটিসন্ধিউপ্পাদমেৰ চ চুতিনিরোধমেৰ চ গহেত্ৰা তেসু তেসু ঠানেসু আগতানং পুচ্ছাৰিস্সজ্জনানং অত্থৰিনিচ্ছযো ৰেদিতব্বো.

পটিলোমনযে পন সব্বেসং চৰন্তানন্তি মরণচিত্তস্স ভঙ্গক্খণসমন্নাগতানং. তেসং হি তত্থ রূপক্খন্ধো নুপ্পজ্জতি, ৰেদনাক্খন্ধো চ চুতিচিত্তস্স উপ্পত্তিক্খণে এৰ উপ্পন্নত্তা. ‘‘যত্থ রূপক্খন্ধো নুপ্পজ্জতি, তত্থ ৰেদনাক্খন্ধো নুপ্পজ্জতী’’তি পুচ্ছায অরূপভৰং সন্ধায ‘‘উপ্পজ্জতী’’তি ইদং ৰিস্সজ্জনং কতং, অনন্তরপুচ্ছায অসঞ্ঞিভৰং সন্ধায ‘‘উপ্পজ্জতী’’তি ইদং ৰিস্সজ্জনন্তি ৰেদিতব্বং. সেসং সুৰিঞ্ঞেয্যমেৰাতি অযং পচ্চুপ্পন্নকালে নযো.

যথা চ পচ্চুপ্পন্নকালে সট্ঠি যমকাদীনি, এৰং সেসেসুপি পঞ্চসু কালভেদেসু পচ্চেকন্তি গহেতব্বং. পুচ্ছাৰিস্সজ্জনেসু পনেত্থ কিঞ্চাপি ‘‘যস্স রূপক্খন্ধো উপ্পজ্জিত্থ, তস্স ৰেদনাক্খন্ধো উপ্পজ্জিত্থাতি? আমন্তা’’তিআদিনা, ‘‘যত্থ রূপক্খন্ধো উপ্পজ্জিত্থ, তত্থ ৰেদনাক্খন্ধো উপ্পজ্জিত্থাতি? পঞ্চৰোকারে উপ্পজ্জিত্থ, নাঞ্ঞত্থা’’তিআদিনা চ, ‘‘যস্স যত্থ রূপক্খন্ধো উপ্পজ্জিত্থ, তস্স তত্থ ৰেদনাক্খন্ধো উপ্পজ্জিত্থাতি? পঞ্চৰোকারানং তেসং তত্থ উপ্পজ্জিত্থ, নাঞ্ঞত্থা’’তিআদিনা চ অতীতকালে অনুলোমনযে, ‘‘যস্স রূপক্খন্ধো নুপ্পজ্জিত্থ, তস্স ৰেদনাক্খন্ধো নুপ্পজ্জিত্থাতি? নত্থী’’তিআদিনা, ‘‘যত্থ রূপক্খন্ধো নুপ্পজ্জিত্থ, তত্থ ৰেদনাক্খন্ধো নুপ্পজ্জিত্থাতি? উপ্পজ্জিত্থা’’তিআদিনা, ‘‘যস্স যত্থ রূপক্খন্ধো নুপ্পজ্জিত্থ, তস্স তত্থ ৰেদনাক্খন্ধো নুপ্পজ্জিত্থাতি? অরূপানং তেসং তত্থ রূপক্খন্ধো নুপ্পজ্জিত্থ, নো চ তেসং…পে… সুদ্ধাৰাসানং ¶ তেসং তত্থ তদুভযং নুপ্পজ্জিত্থা’’তিআদিনা তীসু ৰারেসু পটিলোমনযে চ,

‘‘যস্স ¶ রূপক্খন্ধো উপ্পজ্জিস্সতি, তস্স ৰেদনাক্খন্ধো উপ্পজ্জিস্সতীতি? আমন্তা’’তিআদিনা, ‘‘যত্থ রূপক্খন্ধো উপ্পজ্জিস্সতি, তত্থ ৰেদনাক্খন্ধো উপ্পজ্জিস্সতীতি…পে… পঞ্চৰোকারে উপ্পজ্জিস্সতী’’তিআদিনা, ‘‘যস্স যত্থ রূপক্খন্ধো উপ্পজ্জিস্সতি, তস্স তত্থ ৰেদনাক্খন্ধো উপ্পজ্জিস্সতি…পে… পঞ্চৰোকারানং তেসং তত্থ উপ্পজ্জিস্সতী’’তিআদিনা চ অনাগতকালে অনুলোমনযে, ‘‘যস্স রূপক্খন্ধো নুপ্পজ্জিস্সতি, তস্স ৰেদনাক্খন্ধো নুপ্পজ্জিস্সতীতি? যে অরূপং উপপজ্জিত্ৰা পরিনিব্বাযিস্সন্তি, তেসং রূপক্খন্ধো নুপ্পজ্জিস্সতি, নেতরো, পচ্ছিমভৰিকানং তদুভযং নুপ্পজ্জিস্সতী’’তিআদিনা, ‘‘যত্থ রূপক্খন্ধো নুপ্পজ্জিস্সতি, তত্থ ৰেদনাক্খন্ধো নুপ্পজ্জিস্সতী’’তিআদিনা, ‘‘যস্স যত্থ রূপক্খন্ধো নুপ্পজ্জিস্সতি, তস্স তত্থ ৰেদনাক্খন্ধো নুপ্পজ্জিস্সতীতি? অরূপানং তেসং তত্থ রূপক্খন্ধো নুপ্পজ্জিস্সতি, নেতরো, পচ্ছিমভৰিকানং তদুভযং নুপ্পজ্জিস্সতী’’তিআদিনা পটিলোমনযে চ,

‘‘যস্স রূপক্খন্ধো উপ্পজ্জতি, তস্স ৰেদনাক্খন্ধো উপ্পজ্জিত্থা’’তিআদিনা, ‘‘যত্থ রূপক্খন্ধো উপ্পজ্জতি, তত্থ ৰেদনাক্খন্ধো উপ্পজ্জিত্থাতি…পে… পঞ্চৰোকারে উপ্পজ্জতী’’তিআদিনা, ‘‘যস্স যত্থ রূপক্খন্ধো উপ্পজ্জতি, তস্স তত্থ ৰেদনাক্খন্ধো উপ্পজ্জিত্থাতি? সুদ্ধাৰাসং অসঞ্ঞসত্তং উপপজ্জন্তানং তেসং তত্থ রূপক্খন্ধো উপ্পজ্জতি, নো চ তেসং তত্থ ৰেদনাক্খন্ধো উপ্পজ্জিত্থ, পঞ্চৰোকারে পন উপ্পজ্জিত্থা’’তিআদিনা পচ্চুপ্পন্নেন অতীতকালে অনুলোমনযে, ‘‘যস্স রূপক্খন্ধো নুপ্পজ্জতি, তস্স ৰেদনাক্খন্ধো নুপ্পজ্জিত্থা’’তিআদিনা, ‘‘যত্থ রূপক্খন্ধো নুপ্পজ্জতি, তত্থ ৰেদনাক্খন্ধো নুপ্পজ্জিত্থাতি? উপ্পজ্জিত্থা’’তিআদিনা, ‘‘যস্স যত্থ রূপক্খন্ধো নুপ্পজ্জতি ¶ , তস্স তত্থ ৰেদনাক্খন্ধো নুপ্পজ্জিত্থাতি? পঞ্চৰোকারা চৰন্তানং অরূপানঞ্চ তেসং তত্থ রূপক্খন্ধো নুপ্পজ্জতি, নো চ তেসং তত্থ ৰেদনাক্খন্ধো নুপ্পজ্জিত্থ, সুদ্ধাৰাসে পরিনিব্বন্তানং অসঞ্ঞসত্তা চৰন্তানং তেসং তত্থ রূপক্খন্ধো চ নুপ্পজ্জতি ৰেদনাক্খন্ধো চ নুপ্পজ্জিত্থা’’তিআদিনা পটিলোমনযে চ,

‘‘যস্স রূপক্খন্ধো উপ্পজ্জতি, তস্স ৰেদনাক্খন্ধো উপ্পজ্জিস্সতীতি? পচ্ছিমভৰিকানং পঞ্চৰোকারং উপপজ্জন্তানং তেসং রূপক্খন্ধো উপ্পজ্জতী’’তিআদিনা, ‘‘যত্থ রূপক্খন্ধো উপ্পজ্জতি, তত্থ ৰেদনাক্খন্ধো উপ্পজ্জিস্সতীতি? পঞ্চৰোকারে…পে… উপ্পজ্জিস্সতী’’তিআদিনা চ, ‘‘যস্স যত্থ রূপক্খন্ধো উপ্পজ্জতি, তস্স তত্থ ৰেদনাক্খন্ধো উপ্পজ্জিস্সতীতি ¶ ? পচ্ছিমভৰিকানং পঞ্চৰোকারে…পে… উপ্পজ্জিস্সতী’’তিআদিনা চ পচ্চুপ্পন্নেন অনাগতকালে অনুলোমনযে, ‘‘যস্স রূপক্খন্ধো নুপ্পজ্জতি, তস্স ৰেদনাক্খন্ধো নুপ্পজ্জিস্সতীতি পঞ্চৰোকারে পরিনিব্বন্তানং অরূপে পচ্ছিমভৰিকানং…পে… নুপ্পজ্জিস্সতী’’তিআদিনা, ‘‘যত্থ রূপক্খন্ধো নুপ্পজ্জতি, তত্থ ৰেদনাক্খন্ধো নুপ্পজ্জিস্সতীতি? উপ্পজ্জিস্সতী’’তিআদিনা, ‘‘যস্স যত্থ রূপক্খন্ধো নুপ্পজ্জতি, তস্স তত্থ ৰেদনাক্খন্ধো নুপ্পজ্জিস্সতীতি…পে… পঞ্চৰোকারে পরিনিব্বন্তানং অরূপে পচ্ছিমভৰিকানং অসঞ্ঞসত্তা চৰন্তানং তেসং তত্থ…পে… নুপ্পজ্জিস্সতী’’তিআদিনা পটিলোমনযে চ,

‘‘যস্স রূপক্খন্ধো উপ্পজ্জিত্থ, তস্স ৰেদনাক্খন্ধো উপ্পজ্জিস্সতীতি? পচ্ছিমভৰিকানং উপ্পজ্জিস্সতী’’তিআদিনা, ‘‘যত্থ রূপক্খন্ধো উপ্পজ্জিত্থ, তত্থ ৰেদনাক্খন্ধো উপ্পজ্জিস্সতীতি…পে… পঞ্চৰোকারে উপ্পজ্জিস্সতী’’তিআদিনা, ‘‘যস্স যত্থ রূপক্খন্ধো উপ্পজ্জিত্থ, তস্স তত্থ ৰেদনাক্খন্ধো উপ্পজ্জিস্সতীতি? পঞ্চৰোকারে পচ্ছিমভৰিকানং অসঞ্ঞসত্তানং…পে… উপ্পজ্জিস্সতী’’তিআদিনা অতীতেন অনাগতকালে অনুলোমনযে, ‘‘যস্স রূপক্খন্ধো উপ্পজ্জিত্থ, তস্স ৰেদনাক্খন্ধো উপ্পজ্জিস্সতীতি? নত্থী’’তিআদিনা, ‘‘যত্থ রূপক্খন্ধো ¶ নুপ্পজ্জিত্থ, তত্থ ৰেদনাক্খন্ধো নুপ্পজ্জিস্সতীতি? উপ্পজ্জিস্সতী’’তিআদিনা, ‘‘যস্স যত্থ রূপক্খন্ধো নুপ্পজ্জিত্থ, তস্স তত্থ ৰেদনাক্খন্ধো নুপ্পজ্জিস্সতীতি…পে… সুদ্ধাৰাসানং অরূপে পচ্ছিমভৰিকানং তেসং তত্থ রূপক্খন্ধো চ নুপ্পজ্জিত্থ ৰেদনাক্খন্ধো চ নুপ্পজ্জিস্সতী’’তিআদিনা পটিলোমনযে চ সুদ্ধা অত্থৰিসেসা উপলব্ভন্তি. তথাপি গন্থৰিত্থারভযেন অনৰসেসতো ন দস্সযিস্সাম, দস্সিতনযেনেৰ সব্বত্থ পুচ্ছাৰিস্সজ্জনং সক্কা পণ্ডিতেন ঞাতুন্তি অযং উপ্পাদৰারে নযো.

যথা চ উপ্পাদৰারে ছসু কালভেদেসু পচ্চেকং পুগ্গলাদিভেদতো অনুলোমপটিলোমনযুভযেন ছ ছ ৰারা, একেকস্মিং ৰারে দস দস কত্ৰা সট্ঠি সট্ঠি যমকানি, সব্বানিপি সট্ঠিঅধিকানি তীণি যমকসতানি, ততো দ্ৰিগুণা পুচ্ছা, দ্ৰিগুণা অত্থা চ হোন্তি, এৰং নিরোধৰারে উপ্পাদনিরোধৰারেপি ৰেদিতব্বা. তত্থ চ ‘‘যস্স রূপক্খন্ধো নিরুজ্ঝতি, তস্স ৰেদনাক্খন্ধো নিরুজ্ঝতীতি…পে… পঞ্চৰোকারা চৰন্তানং…পে… নিরুজ্ঝতী’’তিআদিনা, ‘‘যস্স রূপক্খন্ধো ন নিরুজ্ঝতি, তস্স ৰেদনাক্খন্ধো ন নিরুজ্ঝতীতি…পে… সব্বেসং উপপজ্জন্তানং…পে… ন নিরুজ্ঝতী’’তিআদিনা নিরোধৰারে, ‘‘যস্স ¶ রূপক্খন্ধো উপ্পজ্জতি, তস্স ৰেদনাক্খন্ধো নিরুজ্ঝতীতি? নো. যস্স রূপক্খন্ধো নুপ্পজ্জতি, তস্স ৰেদনাক্খন্ধো ন নিরুজ্ঝতীতি…পে… অরূপং উপপজ্জন্তানং অসঞ্ঞসত্তা চৰন্তানং তেসং রূপক্খন্ধো চ নুপ্পজ্জতি, ৰেদনাক্খন্ধো চ ন নিরুজ্ঝতী’’তিআদিনা উপ্পাদনিরোধৰারে চ হেট্ঠা ৰুত্তানুসারেন সব্বত্থ পুচ্ছাৰিস্সজ্জননযো ঞাতব্বোতি অযং পৰত্তিৰারে নযো.

পরিঞ্ঞাৰারে পন পুগ্গলৰারাদীসু তীসু পুগ্গলৰারো একোৰ লব্ভতি, ন ওকাসপুগ্গলোকাসৰারা সদিসৰিস্সজ্জনত্তা. যো হি কোচি পুগ্গলো রূপাদিং পরিজানন্তোৰ ¶ , যত্থ কত্থচি নিরুদ্ধোপি তাদিসোৰ হোতি, তস্মা ছসু কালভেদেসু অনুলোমতো পুগ্গলৰসেন দ্ৰে দ্ৰে ৰারা, একেকস্মিং ৰারে দস দস কত্ৰা ৰীসতি ৰীসতি যমকানীতি ৰীসং যমকসতং, তদ্দিগুণা পুচ্ছা, তদ্দিগুণা চ অত্থা ৰেদিতব্বা. তত্থ চ ‘‘যো রূপক্খন্ধং পরিজানাতি, সো ৰেদনাক্খন্ধং পরিজানাতীতি? আমন্তা’’তিআদিনা চ, ‘‘যো রূপক্খন্ধং ন পরিজানাতি, সো ৰেদনাক্খন্ধং ন পরিজানাতীতি? আমন্তা’’তি আদিনা চ অনুলোমপটিলোমতো আদিতো তীসু কালেসু সব্বপুচ্ছানং ‘‘আমন্তা আমন্তা’’ত্ৰেৰ ৰিস্সজ্জনং. ইতরেসু পন তীসু মিস্সককালেসু ‘‘যো রূপক্খন্ধং পরিজানাতি, সো ৰেদনাক্খন্ধং পরিজানিত্থাতি? নো. যো ৰা পন…পে… নো’’তি এৰং ইতরকালদ্ৰযেপি অনুলোমনযে ‘‘নো নো’’ত্ৰেৰ ৰিস্সজ্জনং.

পটিলোমনযে পন ‘‘যো রূপক্খন্ধং ন পরিজানাতি, সো ৰেদনাক্খন্ধং ন পরিজানিত্থাতি? অরহা রূপক্খন্ধং ন পরিজানাতি, নো চ সো ৰেদনাক্খন্ধং ন পরিজানিত্থ. অগ্গমগ্গসমঙ্গিঞ্চ অরহন্তঞ্চ ঠপেত্ৰা অৰসেসা পুগ্গলা রূপক্খন্ধঞ্চ ন পরিজানন্তি, ৰেদনাক্খন্ধঞ্চ ন পরিজানিংসূ’’তিআদিনা, ‘‘যো রূপক্খন্ধং ন পরিজানাতি, সো ৰেদনাক্খন্ধং ন পরিজানিস্সতীতি? যে মগ্গং পটিলভিস্সন্তি, তে রূপক্খন্ধং ন পরিজানন্তি, নো চ ৰেদনাক্খন্ধং ন পরিজানিস্সন্তি. অরহা যে চ পুথুজ্জনা মগ্গং ন পটিলভিস্সন্তি, তে রূপক্খন্ধঞ্চ ন পরিজানন্তি, ৰেদনাক্খন্ধঞ্চ ন পরিজানিস্সন্তী’’তিআদিনা চ, ‘‘যো রূপক্খন্ধং ন পরিজানিত্থ, সো ৰেদনাক্খন্ধং ন পরিজানিস্সন্তীতি? যে মগ্গং পটিলভিস্সন্তি, তে রূপক্খন্ধং ন পরিজানিংসু, নো চ ৰেদনাক্খন্ধং ন পরিজানিস্সন্তি. অগ্গমগ্গসমঙ্গী যে চ পুথুজ্জনা মগ্গং ন পটিলভিস্সন্তি, তে ¶ রূপক্খন্ধঞ্চ ন পরিজানিংসু, ৰেদনাক্খন্ধঞ্চ ন পরিজানিস্সন্তী’’তিআদিনা চ পুচ্ছাৰিস্সজ্জননযো ৰেদিতব্বো.

এত্থ ¶ চ অতীতানাগতপচ্চুপ্পন্নসঙ্খাতা তযো অদ্ধা পৰত্তিৰারে চুতিপটিসন্ধিৰসেন ন লব্ভন্তি, পৰত্তে চিত্তক্খণৰসেনেৰ লব্ভন্তি. লোকুত্তরমগ্গক্খণস্মিং হি নিব্বানারম্মণেন চিত্তেন পঞ্চসু খন্ধেসু পরিঞ্ঞাকিচ্চনিপ্ফত্তিযা যং কঞ্চি একং খন্ধং পরিজানন্তো ইতরম্পি ‘‘পরিজানাতী’’তি অনুলোমপঞ্হেসু পরিঞ্ঞাকিচ্চস্স মত্থকপ্পত্তং অগ্গমগ্গসমঙ্গিং সন্ধায ‘‘আমন্তা’’তি ৰিস্সজ্জনং ৰুত্তং. ‘‘ন পরিজানাতী’’তি পটিলোমপঞ্হেসু পুথুজ্জনাদযো সন্ধায ‘‘আমন্তা’’তি ৰিস্সজ্জনং ৰুত্তন্তি ৰেদিতব্বং. ‘‘পরিজানিত্থা’’তি ইমস্মিং পন অতীতকালৰারে মগ্গানন্তরে অগ্গফলে ঠিতোপি পরিঞ্ঞাকিচ্চস্স নিট্ঠিতত্তা পরিজানিত্থযেৰ নাম. ‘‘পরিজানাতী’’তি চ অগ্গমগ্গসমঙ্গী ৰুচ্চতি, ‘‘পরিজানিস্সন্তী’’তি পুথুজ্জনাদযো, তস্মা যো ন পরিজানাতি, সো পরিজানিত্থাতি ৰা, পরিজানিস্সতীতিআদিনা ৰা ৰত্তুং অসক্কুণেয্যতায ‘‘আমন্তা’’তি ৰিস্সজ্জনং কতং.

পটিলোমনযে পন ‘‘অগ্গমগ্গসমঙ্গিঞ্চ অরহন্তঞ্চ ঠপেত্ৰা’’তি ইদং অগ্গমগ্গসমঙ্গিনো ‘‘ন পরিজানাতী’’তি ৰচনং, অরহতো চ ‘‘ন পরিজানিত্থা’’তি ৰত্তুং অসক্কুণেয্যতায ৰুত্তং, ‘‘যে চ পুথুজ্জনা মগ্গং ন পটিলভিস্সন্তী’’তি ইমিনা অতীতে ৰিয অনাগতেপি অনন্তকালং অমুচ্চনকা সত্তা নাম অত্থীতি দস্সেতি, তে চ অরহতা নিট্ঠিতপরিঞ্ঞাকিচ্চেন, ‘‘ন পরিজানিস্সন্তী’’তি ৰত্তব্বতং ৰা আপন্নেন সমকা জাতা, সব্বত্থ চ একং খন্ধং পরিজানন্তো সব্বং পরিজানাতি, অপরিজানন্তোপি চ সব্বং ন পরিজানাতীতি ৰেদিতব্বন্তি অযং খন্ধযমকমাতিকত্থসংৰণ্ণনানযো.

আযতনযমকমাতিকত্থৰণ্ণনা

আযতনযমকমাতিকায পন পাল়িৰৰত্থানাদিকং সব্বং খন্ধযমকমাতিকায ৰুত্তনযেনেৰ ৰেদিতব্বং অঞ্ঞত্র ৰিসেসা ¶ , তত্রাযং ৰিসেসো – ‘‘দ্ৰাদসাযতনানী’’তি পদং আদিং কত্ৰা যাৰ ‘‘নাযতনা ন মনো’’তি, তাৰ পৰত্তা অযং আযতনমাতিকা নাম. তত্থ দ্ৰাদসাযতনানি উদ্দিসিত্ৰা যমকৰসেন পুচ্ছাসু খন্ধপদং ঠপেত্ৰা চক্খাদীনি পঞ্চ অজ্ঝত্তিকাযতনানি ¶ পঠমং ৰুত্তানি, পচ্ছা রূপাদিপঞ্চবাহিরাযতনানি, পরিযোসানে মনাযতনধম্মাযতনানীতি এৰং পাল়িৰৰত্থানে পঞ্হে. ৰিস্সজ্জনে পন ‘‘চক্খু চক্খাযতনন্তি? দিব্বচক্খু পঞ্ঞাচক্খু চক্খুমেৰ, ন চক্খাযতনং, চক্খাযতনং চক্খু চেৰ চক্খাযতনঞ্চ. সোতং সোতাযতনন্তি? দিব্বসোতং তণ্হাসোতং সোতমেৰ, ন সোতাযতনং. ঘানং ঘানাযতনন্তি? আমন্তা…পে… কাযো কাযাযতনন্তি? নামকাযো চিত্তকাযোতিআদি কাযো, ন কাযাযতনং. রূপং রূপাযতনন্তি? ভূতাদি, পিযরূপাদি চ রূপংৰ, ন রূপাযতনং. সদ্দো সদ্দাযতনন্তি? আমন্তা. গন্ধো গন্ধাযতনন্তি? সীলগন্ধাদযো গন্ধোৰ, ন গন্ধাযতনং. রসো রসাযতনন্তি? অত্থরসাদযো রসোৰ, ন রসাযতনং. ধম্মো ধম্মাযতনন্তি? পরিযত্তিধম্মাদযো ধম্মোৰ, ন ধম্মাযতনং. ধম্মাযতনং ধম্মোতি? আমন্তা’’তি অযং পণ্ণত্তিৰারে ৰিসেসো.

পৰত্তিৰারে পন ‘‘যস্স চক্খাযতনং উপ্পজ্জতি, তস্স সোতাযতনং উপ্পজ্জতীতি? সচক্খুকানং অসোতকানং উপপজ্জন্তানং তেসং চক্খাযতনং উপ্পজ্জতি, নো চ তেসং সোতাযতনং উপ্পজ্জতি. সচক্খুকানং সসোতকানং উপপজ্জন্তানং তেসং চক্খাযতনঞ্চ উপ্পজ্জতি, সোতাযতনঞ্চ উপ্পজ্জতি…পে… যস্স রূপাযতনং উপ্পজ্জতি, তস্স মনাযতনং উপ্পজ্জতীতি? অচিত্তকানং রূপাযতনং উপ্পজ্জতি, নো চ তেসং মনাযতনং উপ্পজ্জতি. পঞ্চৰোকারে উপ্পাদক্খণে তদুভযং উপ্পজ্জতি. যস্স ৰা পন মনাযতনং উপ্পজ্জতি, তস্স রূপাযতনং উপ্পজ্জতীতি? অরূপভৰৰজ্জিতে সঞ্ঞাভৰে উপপজ্জন্তানং…পে… উপ্পজ্জতি ¶ . যস্স রূপাযতনং উপ্পজ্জতি, তস্স ধম্মাযতনং উপ্পজ্জতীতি? আমন্তা. যস্স ৰা পন…পে… উপ্পজ্জতীতি? অরূপভৰৰজ্জিতে সব্বত্থ উপ্পজ্জতি. যস্স মনাযতনং উপ্পজ্জতি, তস্স ধম্মাযতনং উপ্পজ্জতীতি? আমন্তা, যস্স ৰা পন…পে… উপ্পজ্জতীতি? অসঞ্ঞভৰৰজ্জিতে সব্বত্থ উপ্পজ্জতী’’তি এৰং সদ্দাযতনৰজ্জিতা সেসাযতনমাতিকাযমকযোজনা যথানুরূপং ৰেদিতব্বা. সদ্দাযতনং হি পটিসন্ধিক্খণে ন লব্ভতি, অযং উপ্পাদৰারে ৰিসেসো, ইমিনা নযেন নিরোধৰারাদীসু, পরিঞ্ঞাৰারে চ যোজনাৰিসেসো ৰেদিতব্বো, সব্বত্থ চ খন্ধতো আযতনানং বহুতা চ যমকৰারবহুতা চ ৰেদিতব্বা. সেসং তাদিসমেৰাতি অযং আযতনযমকমাতিকত্থসংৰণ্ণনানযো.

ধাতুযমকমাতিকত্থৰণ্ণনা

ধাতুযমকমাতিকায ¶ পন পাল়িৰৰত্থানং সব্বং আযতনযমকমাতিকায ৰুত্তনযেনেৰ ৰেদিতব্বন্তি অযং ধাতুযমকমাতিকত্থসংৰণ্ণনানযো.

সচ্চযমকমাতিকত্থৰণ্ণনা

সচ্চযমকমাতিকায পন খন্ধযমকে ৰুত্তনযেন ৰারভেদা, কালাদিভেদা চ ৰেদিতব্বা, পাল়িৰৰত্থানে পনেত্থ চতুন্নং সচ্চানং ৰসেন পদসোধনৰারো পদসোধনমূলচক্কৰারো সুদ্ধসচ্চৰারো সুদ্ধসচ্চমূলচক্কৰারোতি ইমেসু চতূসু ৰারেসু যমকগণনা ৰেদিতব্বা. পুচ্ছাৰিস্সজ্জনেসু পন ‘‘দুক্খং দুক্খসচ্চন্তি? আমন্তা. দুক্খসচ্চং দুক্খন্তি? কাযিকচেতসিকং দুক্খং ঠপেত্ৰা অৰসেসং দুক্খসচ্চং, ন দুক্খং. কাযিকচেতসিকং দুক্খং পন দুক্খঞ্চেৰ দুক্খসচ্চঞ্চ. সমুদযো সমুদযসচ্চন্তি? তণ্হং ঠপেত্ৰা অৰসেসা সচ্চৰিভঙ্গে নিদ্দিট্ঠা কুসলাদিধম্মা সমুদযো, ন সমুদযসচ্চং. তণ্হা ¶ পন সমুদযো চেৰ সমুদযসচ্চঞ্চ. সমুদযসচ্চং সমুদযোতি? আমন্তা. নিরোধো নিরোধসচ্চন্তি? তদঙ্গনিরোধাদযো, খণিকনিরোধো চ নিরোধোৰ, ন নিরোধসচ্চং. নিব্বানং পন নিরোধো চেৰ নিরোধসচ্চঞ্চ. নিরোধসচ্চং নিরোধোতি? আমন্তা. মগ্গো মগ্গসচ্চন্তি? মিচ্ছামগ্গঙ্গাদযো মগ্গো, ন মগ্গসচ্চং. অরিযমগ্গো পন মগ্গো চেৰ মগ্গসচ্চঞ্চ. মগ্গসচ্চং মগ্গোতি? আমন্তা’’তিআদিনা পণ্ণত্তিৰারে নযো ৰেদিতব্বো.

পৰত্তিৰারে পন ‘‘যস্স দুক্খসচ্চং উপ্পজ্জতি, তস্স সমুদযসচ্চং উপ্পজ্জতীতি? সব্বেসং উপপজ্জন্তানং পৰত্তে তণ্হাৰিপ্পযুত্তচিত্তস্স উপ্পাদক্খণে তেসং দুক্খসচ্চং উপ্পজ্জতি, নো চ তেসং সমুদযসচ্চং উপ্পজ্জতি. তণ্হায উপ্পাদক্খণে তদুভযং উপ্পজ্জতি. যস্স দুক্খসচ্চং উপ্পজ্জতি, তস্স মগ্গসচ্চং উপ্পজ্জতীতি…পে… পঞ্চৰোকারে মগ্গস্স উপ্পাদক্খণে তদুভযং উপ্পজ্জতি. যস্স ৰা পন…পে… উপ্পজ্জতীতি? অরূপে মগ্গস্স উপ্পাদক্খণে তেসং মগ্গসচ্চং উপ্পজ্জতি, নো চ তেসং দুক্খসচ্চং উপ্পজ্জতি. পঞ্চৰোকারে তদুভযং উপ্পজ্জতি. যস্স সমুদযসচ্চং উপ্পজ্জতি, তস্স মগ্গসচ্চং উপ্পজ্জতীতি? নো, যস্স ৰা পন…পে… নো’’তিআদিনা পুগ্গলৰারে, ‘‘যত্থ দুক্খসচ্চং উপ্পজ্জতি, তত্থ সমুদযসচ্চং উপ্পজ্জতীতি? অসঞ্ঞসত্তে তত্থ দুক্খসচ্চং উপ্পজ্জতি, নো চ তত্থ তদঞ্ঞং, অঞ্ঞত্থ ¶ তদুভযম্পি. যত্থ দুক্খসচ্চং উপ্পজ্জতি, তত্থ মগ্গসচ্চং উপ্পজ্জতীতি? অপাযে, অসঞ্ঞসত্তে চ দুক্খমেৰ, নো চ তত্থ তদঞ্ঞং, অঞ্ঞত্থ তদুভযম্পী’’তিআদিনা ওকাসৰারে, পুগ্গলোকাসৰারেপীতি এৰং অনুলোমনযে,

‘‘যস্স দুক্খসচ্চং নুপ্পজ্জতি, তস্স সমুদযসচ্চং নুপ্পজ্জতীতি? আমন্তা. যস্স ৰা পন…পে… নুপ্পজ্জতীতি? সব্বেসং উপপজ্জন্তানং পৰত্তে তণ্হাৰিপ্পযুত্তচিত্তস্স উপ্পাদক্খণে সমুদযসচ্চং নুপ্পজ্জতি, নো চ তেসং দুক্খসচ্চং নুপ্পজ্জতি. সব্বেসং ¶ চৰন্তানং পৰত্তে চিত্তস্স ভঙ্গক্খণে অরূপে মগ্গস্স চ ফলস্স চ উপ্পাদক্খণে তেসং সমুদযসচ্চঞ্চ নুপ্পজ্জতি, দুক্খসচ্চঞ্চ নুপ্পজ্জতী’’তিআদিনা, ‘‘যত্থ দুক্খসচ্চং নুপ্পজ্জতি, তত্থ সমুদযসচ্চং নুপ্পজ্জতীতি? নত্থি. যত্থ ৰা পন সমুদযসচ্চং নুপ্পজ্জতি, তত্থ দুক্খসচ্চং নুপ্পজ্জতীতি? উপ্পজ্জতী’’তিআদিনা চ, ‘‘যস্স যত্থ দুক্খসচ্চং নুপ্পজ্জতি, তস্স তত্থ সমুদযসচ্চং নুপ্পজ্জতীতি? আমন্তা. যস্স ৰা পন যত্থ সমুদযসচ্চং নুপ্পজ্জতি, তস্স তত্থ দুক্খসচ্চং নুপ্পজ্জতীতি? সব্বেসং উপপজ্জন্তানং পৰত্তে তণ্হাৰিপ্পযুত্তচিত্তস্স উপ্পাদক্খণে তেসং তত্থ সমুদযসচ্চং এৰ নুপ্পজ্জতি, নেতরং, সব্বেসং পন চৰন্তানং পৰত্তে চিত্তস্স ভঙ্গক্খণে অরূপে মগ্গস্স চ ফলস্স চ উপ্পাদক্খণে তেসং তত্থ তদুভযম্পি নুপ্পজ্জতী’’তিআদিনা চ সব্বত্থ পটিলোমনযে চ,

‘‘যস্স দুক্খসচ্চং উপ্পজ্জিত্থ, তস্স সমুদযসচ্চং উপ্পজ্জিত্থাতি? আমন্তা. যস্স দুক্খসচ্চং উপ্পজ্জিত্থ, তস্স মগ্গসচ্চং উপ্পজ্জিত্থাতি? অভিসমেতাৰীনং উপ্পজ্জিত্থ, ন ইতরেস’’ন্তিআদিনা, ‘‘যস্স যত্থ দুক্খসচ্চং উপ্পজ্জিত্থ, তস্স তত্থ সমুদযসচ্চং উপ্পজ্জিত্থাতি? সুদ্ধাৰাসানং দুতিযে চিত্তে ৰত্তমানে অসঞ্ঞসত্তানং তত্থ দুক্খসচ্চং উপ্পজ্জিত্থ, নেতরং, ইতরেসং তদুভযং উপ্পজ্জিত্থা’’তিআদিনা, ‘‘যস্স দুক্খসচ্চং উপ্পজ্জিস্সতি, তস্স সমুদযসচ্চং উপ্পজ্জিস্সতীতি? অগ্গমগ্গসমঙ্গীনং অরহন্তানং যস্স চিত্তস্স অনন্তরা অগ্গমগ্গং পটিলভিস্সন্তি, তেসং দুক্খসচ্চং উপ্পজ্জিস্সতি, নেতরং, ইতরেসং তদুভযং উপ্পজ্জিস্সতী’’তিআদিনা চ, ‘‘যস্স দুক্খসচ্চং উপ্পজ্জতি, তস্স সমুদযসচ্চং উপ্পজ্জিত্থাতি? আমন্তা, যস্স ৰা পন…পে… উপ্পজ্জতীতি? সব্বেসং চৰন্তানং পৰত্তে চিত্তস্স ভঙ্গক্খণে অরূপে মগ্গফলুপ্পত্তিক্খণে তেসং সমুদযসচ্চং উপ্পজ্জিত্থ, নো চ তেসং দুক্খসচ্চং উপ্পজ্জতি. সব্বেসং উপপজ্জন্তানং পৰত্তে চিত্তস্স উপ্পাদক্খণে সমুদযসচ্চঞ্চ উপ্পজ্জিত্থ ¶ , দুক্খসচ্চঞ্চ উপ্পজ্জতী’’তিআদিনা চ সেসকালভেদেসু ¶ চ অনুলোমপটিলোমাদীসু চ ৰুত্তানুসারেন উপ্পাদৰারে সব্বত্থ ৰিস্সজ্জননযো যথানুরূপং ঞাতব্বো. ‘‘যস্স দুক্খসচ্চং নিরুজ্ঝতি, তস্স সমুদযসচ্চং নিরুজ্ঝতীতি…পে… তণ্হায ভঙ্গক্খণে তেসং তদুভযং নিরুজ্ঝতী’’তিআদিনা নিরোধৰারে, উপ্পাদনিরোধৰারেপীতি এৰং পৰত্তিৰারে সব্বত্থ যথানুরূপতো যোজনা ৰেদিতব্বা.

তথা ‘‘যো দুক্খসচ্চং পরিজানাতি, সো সমুদযসচ্চং পজহতীতি? আমন্তা’’তিআদিনা পরিঞ্ঞাৰারেপীতি এৰমেত্থ পাল়িনযো ঞাতব্বো.

অত্থৰিনিচ্ছযে পনেত্থ ইদং লক্খণং – পৰত্তি ৰারে তাৰেত্থ নিরোধসচ্চং ন লব্ভতেৰ, সেসেসু পন তীসু সচ্চেসু সমুদযমগ্গসচ্চানি একন্তেন পৰত্তিযং এৰ লব্ভন্তি. দুক্খসচ্চং চুতিপটিসন্ধীসুপি পৰত্তেপীতি এৰমেত্থ যং যং সব্বত্থ লব্ভতি, তস্স তস্স ৰসেন অত্থৰিনিচ্ছযো ৰেদিতব্বো. তত্রিদং নযমুখং – সব্বেসং উপপজ্জন্তানন্তি অন্তমসো সুদ্ধাৰাসানম্পি. তেপি হি দুক্খসচ্চেনেৰ উপ্পজ্জন্তি. তণ্হাৰিপ্পযুত্তচিত্তস্সাতি ইদং দুক্খসচ্চসমুদযসচ্চেসু এককোট্ঠাসস্স উপ্পত্তিদস্সনত্থং ৰুত্তং, তস্মা পঞ্চৰোকারৰসেনেৰ গহেতব্বং. চতুৰোকারে পন তণ্হাৰিপ্পযুত্তফলসমাপত্তিযা উপ্পাদক্খণে একম্পি সচ্চং নুপ্পজ্জতি. তদুভযন্তি দুক্খসমুদযসচ্চদ্ৰযং. তস্মিং হি খণে তণ্হং ঠপেত্ৰা সেসং দুক্খসচ্চং নাম হোতীতি তং সন্ধাযেতং ৰুত্তং. মগ্গস্স উপ্পাদক্খণে পন রূপমেৰ দুক্খসচ্চং নাম, সেসা মগ্গসহজাতা ধম্মা সচ্চৰিনিমুত্তাৰ. তেনেৰ কারণেন ‘‘অরূপে মগ্গস্স উপ্পাদক্খণে তেসং মগ্গসচ্চং উপ্পজ্জতি, নো চ তেসং দুক্খসচ্চং উপ্পজ্জতী’’তি ৰুত্তং. সব্বেসং উপপজ্জন্তানং পৰত্তে তণ্হাৰিপ্পযুত্তচিত্তস্স উপ্পাদক্খণে. তেসং তত্থাতি তেসং তস্মিং উপপত্তিক্খণে তণ্হাৰিপ্পযুত্তচিত্তুপ্পত্তিক্খণে চাতি এৰমেত্থ খণৰসেন ওকাসো ৰেদিতব্বো. অঞ্ঞেসুপি এৰরূপেসু এসেৰ নযো. অনভিসমেতাৰীনন্তি ¶ অনভিসমিতসচ্চানন্তি ইমিনা নযমুখেন সব্বত্থ অত্থৰিনিচ্ছযো ৰেদিতব্বো.

পরিঞ্ঞাৰারে পন ঞাততীরণপহানৰসেন তিস্সোপি পরিঞ্ঞাযো লব্ভন্তি. যস্মা পন লোকুত্তরধম্মেসু পরিঞ্ঞানাম নত্থি, তস্মা ইধ দ্ৰে এৰ সচ্চানি গহিতানি. তত্থ ‘‘দুক্খসচ্চং পরিজানাতী’’তি ঞাততীরণপরিঞ্ঞাৰসেন ৰুত্তং, ‘‘সমুদযসচ্চং পজহতী’’তি ঞাতপহানপরিঞ্ঞাৰসেন ¶ , ইতি ইমাসং পরিঞ্ঞানং ৰসেন সব্বত্থ অত্থো ৰেদিতব্বো. অযং সচ্চযমকমাতিকত্থসংৰণ্ণনানযো.

সঙ্খারযমকমাতিকত্থৰণ্ণনা

সঙ্খারযমকমাতিকায পন হেট্ঠা ৰুত্তনযেনেৰ মহাৰারন্তরাদিভেদা ৰেদিতব্বা. অযং পনেত্থ ৰিসেসো – মাতিকায তাৰ যথা হেট্ঠা খন্ধাদযো ধম্মে উদ্দিসিত্ৰা ‘‘রূপং রূপক্খন্ধো’’তিআদিনা পদসোধনৰারো আরদ্ধো, তথা অনারভিত্ৰা ‘‘অস্সাসপস্সাসা কাযসঙ্খারো’’তিআদিনা পঠমং তযোপি সঙ্খারা ৰিভজিত্ৰা দস্সিতা. তত্থ কাযস্স সঙ্খারো কাযসঙ্খারো, অস্সাসপস্সাসা. ‘‘কাযিকা এতে ধম্মা কাযপটিবদ্ধা’’তি (ম. নি. ১.৪৬৩; সং. নি. ৪.৩৪৮) ৰচনতো কারণভূতস্স করজকাযস্স ফলভূতো এস সঙ্খারোতি কাযসঙ্খারো. অপরো নযো – সঙ্খরীযতীতি সঙ্খারো. কেন সঙ্খরীযতি? কাযেন. অযং হি ৰাতো ৰিয ভস্তায করজকাযেন সঙ্খরীযতি, এৰম্পি কাযস্স সঙ্খারোতি কাযসঙ্খারো, কাযেন কতো অস্সাসপস্সাসৰাতোতি অত্থো. চেতসা ৰিতক্কেত্ৰা ৰিচারেত্ৰা পচ্ছা ৰাচং ভিন্দতি, তস্মা ‘‘ৰিতক্কৰিচারা ৰচীসঙ্খারো’’তি (ম. নি. ১.৪৬৩) ৰচনতো পন সঙ্খরোতীতি সঙ্খারো, কিং সঙ্খরোতি? ৰচিং. ৰচিযা সঙ্খারোতি ৰচীসঙ্খারো, ৰচীভেদসমুট্ঠাপকস্স ¶ ৰিতক্কৰিচারদ্ৰযস্সেতং নামং. ‘‘সঞ্ঞা চ ৰেদনা চ চেতসিকা এতে ধম্মা চিত্তপটিবদ্ধা’’তি (ম. নি. ১.৪৬৩; সং. নি. ৪.৩৪৮) ৰচনতোযেৰ পন ততিযপদে সঙ্খরীযতীতি সঙ্খারো, কেন সঙ্খরীযতি? চিত্তেন, ইতি চিত্তস্স সঙ্খারোতি চিত্তসঙ্খারো, সব্বেসম্পি চিত্তসমুট্ঠানানং চেতসিকানং ধম্মানং এতং অধিৰচনং. ৰিতক্কৰিচারানং পন ৰচীসঙ্খারভাৰেন ৰিসুং গহিতত্তা ‘‘ঠপেত্ৰা ৰিতক্কৰিচারে’’তি ৰুত্তং.

ইদানি ‘‘কাযো কাযসঙ্খারো’’তি পদসোধনৰারো আরদ্ধো, তস্স অনুলোমনযে তীণি, পটিলোমনযে তীণীতি ছ যমকানি. পদসোধনমূলচক্কৰারে একেকসঙ্খারমূলকানি দ্ৰে দ্ৰে কত্ৰা অনুলোমনযে ছ, পটিলোমনযে ছাতি দ্ৰাদস যমকানি. সুদ্ধসঙ্খারৰারে পন যথা সুদ্ধখন্ধৰারাদীসু ‘‘রূপং খন্ধো, খন্ধা রূপ’’ন্তিআদিনা নযেন যমকানিৰুত্তানি, এৰং ‘‘কাযো সঙ্খারো, সঙ্খারা কাযো’’তি অৰত্ৰা ‘‘কাযসঙ্খারো ৰচীসঙ্খারো’’তিআদিনা নযেন কাযসঙ্খারমূলকানি দ্ৰে, ৰচীসঙ্খারমূলকং একন্তি অনুলোমে তীণি, পটিলোমে তীণীতি ছ যমকানি ¶ ৰুত্তানি. কিং কারণা? সুদ্ধিকএকেকপদৰসেন অত্থভেদাভাৰতো, কাযসঙ্খারোতি পন দ্ৰীহিপি পদেহি একোৰ অত্থো লব্ভতীতি অযং ৰিসেসোৰ, তস্মা একেকপদৰসেন ন ৰুত্তং, ‘‘কাযো কাযসঙ্খারো’’তিআদি পন ৰত্তব্বং সিযা, সোপি নযো পদসোধনৰারে ৰিনাপি অত্থেন ৰচনং যুজ্জতীতি তত্থেৰ ৰুত্তো, ইধ পন কাযসঙ্খারাদীনং ৰচীসঙ্খারাদীহি অঞ্ঞত্তা ‘‘কাযসঙ্খারো ৰচীসঙ্খারো’’তিআদিনাপি যমকানি ৰুত্তানি. সুদ্ধসঙ্খারমূলচক্কৰারো পনেত্থ ন গহিতোতি অযং তাৰেত্থ পাল়িৰৰত্থানে ৰিসেসো.

পঞ্হৰিস্সজ্জনেসু ¶ পন ‘‘কাযো কাযসঙ্খারোতি? নো, কাযসঙ্খারো কাযোতি? নো’’তি ৰা এৰং সব্বত্থ পটিসেধো. ৰিস্সজ্জনানং কাযাদীনং এৰ কাযসঙ্খারাদিনামত্তা. ন হি কাযাদযো ৰিয কাযসঙ্খারাদীনং নামং হোতি, পটিলোমে পন ন কাযো ন কাযসঙ্খারোতি যো কাযো ন হোতি, সো কাযসঙ্খারোপি ন হোতীতি পুচ্ছায অত্থো, তস্সা কাযসঙ্খারো ন কাযো কাযসঙ্খারোতি কাযসঙ্খারো কাযো ন হোতি, কাযসঙ্খারোযেৰ পনেসো হোতি, কাযঞ্চ কাযসঙ্খারঞ্চ ঠপেত্ৰা অৰসেসং সঙ্খতাসঙ্খতাদিভেদং সব্বং ন চ কাযো, ন চ কাযসঙ্খারোতি ৰিস্সজ্জনং. সেসেসুপি এসেৰ নযো, ইতরেসু চ অনুলোমপটিলোমেসু ‘‘কাযো কাযসঙ্খারোতি? নো, সঙ্খারা ৰচীসঙ্খারোতি? ৰচীসঙ্খারো সঙ্খারো চেৰ ৰচীসঙ্খারো চ, অৰসেসা সঙ্খারা, ন ৰচীসঙ্খারো, ন সঙ্খারা ন ৰচীসঙ্খারোতি? আমন্তা’’তিআদিনা সব্বত্থ পুচ্ছাৰিস্সজ্জননযো ৰেদিতব্বো.

পৰত্তিৰারে পন ‘‘যস্স কাযসঙ্খারো উপ্পজ্জতি, তস্স ৰচীসঙ্খারো উপ্পজ্জতীতি? ৰিনা ৰিতক্কৰিচারেহি অস্সাসপস্সাসানং উপ্পাদক্খণে তেসং কাযসঙ্খারো উপ্পজ্জতি, নেতরো, সৰিতক্কসৰিচারচিত্তসমঙ্গীনং পন কামাৰচরসত্তানং তদুভযম্পি উপ্পজ্জতি. যস্স ৰা পন…পে… উপ্পজ্জতীতি? রূপারূপভৰিকানং ৰিতক্কৰিচারুপ্পাদক্খণে ৰচীসঙ্খারোৰ উপ্পজ্জতি, নেতরো…পে… যথাৰুত্তকামাৰচরানং পন তদুভযং উপ্পজ্জতি. যস্স কাযসঙ্খারো উপ্পজ্জতি, তস্স চিত্তসঙ্খারো উপ্পজ্জতীতি? আমন্তা…পে… যস্স ৰা পন…পে… উপ্পজ্জতীতি…পে… অস্সাসপস্সাসানং উপ্পাদক্খণে তদুভযং উপ্পজ্জতি. যস্স ৰচীসঙ্খারো উপ্পজ্জতি, তস্স চিত্তসঙ্খারো উপ্পজ্জতীতি? আমন্তা…পে… যত্থ কাযসঙ্খারো উপ্পজ্জতি, তত্থ ৰচীসঙ্খারো উপ্পজ্জতীতি ¶ ? কামাৰচরসত্তানং দুতিযজ্ঝানে ততিযজ্ঝানে তত্থ কাযসঙ্খারোৰ উপ্পজ্জতি, নেতরো, পঠমজ্ঝানাদীসু পন তদুভযং উপ্পজ্জতি. যত্থ ৰা পন ¶ …পে… উপ্পজ্জতীতি? কামাৰচরে উপ্পজ্জতি, ন রূপারূপভৰেসু. যত্থ কাযসঙ্খারো উপ্পজ্জতি, তত্থ চিত্তসঙ্খারো উপ্পজ্জতীতি? আমন্তা. যত্থ ৰা পন…পে… উপ্পজ্জতীতি? কামাৰচরসত্তানং চতুত্থজ্ঝানে রূপারূপভৰে চ তত্থ চিত্তসঙ্খারোৰ উপ্পজ্জতি, নেতরো, ইতরজ্ঝানাদীসু পন তদুভযং উপ্পজ্জতী’’তিআদিনা,

‘‘যস্স কাযসঙ্খারো নুপ্পজ্জতি, তস্স ৰচীসঙ্খারো নুপ্পজ্জতীতি? ৰিনা অস্সাসপস্সাসেহি ৰিতক্কৰিচারানং উপ্পাদক্খণে তেসং কাযসঙ্খারোৰ নুপ্পজ্জতি, নেতরো, সব্বেসং চিত্তস্স ভঙ্গক্খণে ৰিনা অস্সাসপস্সাসেহি অৰিতক্কঅৰিচারচিত্তস্স উপ্পাদক্খণে নিরোধসমাপন্নানং অসঞ্ঞসত্তানঞ্চ তদুভযম্পি নুপ্পজ্জতি…পে… যস্স কাযসঙ্খারো নুপ্পজ্জতি, তস্স চিত্তসঙ্খারো নুপ্পজ্জতীতি…পে… সব্বচিত্তানং ভঙ্গক্খণে নিরোধসমাপন্নানং অসঞ্ঞসত্তানঞ্চ নুপ্পজ্জতী’’তিআদিনা চ, ‘‘যত্থ কাযসঙ্খারো নুপ্পজ্জতি, তত্থ ৰচীসঙ্খারো নুপ্পজ্জতীতি…পে… চতুত্থজ্ঝানক্খণে রূপভৰাদীসু নুপ্পজ্জতী’’তিআদিনা চ, ‘‘যস্স কাযসঙ্খারো উপ্পজ্জিত্থ, তস্স ৰচীসঙ্খারো উপ্পজ্জিত্থাতি? আমন্তা’’তিআদিনা, ‘‘যস্স কাযসঙ্খারো নুপ্পজ্জিত্থ, তস্স চিত্তসঙ্খারো নুপ্পজ্জিত্থাতি? নত্থী’’তিআদিনা, ‘‘যস্স যত্থ কাযসঙ্খারো নুপ্পজ্জিত্থ, তস্স তত্থ ৰচীসঙ্খারো নুপ্পজ্জিত্থাতি…পে… চতুত্থজ্ঝানং সমাপন্নানং সুদ্ধাৰাসানং দুতিযে চিত্তে ৰত্তমানে অসঞ্ঞসত্তানং তেসং তত্থ কাযসঙ্খারো চ নুপ্পজ্জিত্থ ৰচীসঙ্খারো চা’’তিআদিনা চ,

‘‘যস্স কাযসঙ্খারো উপ্পজ্জিস্সতি, তস্স ৰচীসঙ্খারো উপ্পজ্জিস্সতীতি? আমন্তা. যস্স ৰা পন…পে… উপ্পজ্জিস্সতীতি? যস্স চিত্তস্স অনন্তরা কামাৰচরানং পচ্ছিমচিত্তং উপ্পজ্জিস্সতি, রূপারূপভৰে পচ্ছিমভৰিকানং ৰচীসঙ্খারোৰ উপ্পজ্জিস্সতি, ন কাযসঙ্খারো ¶ , অঞ্ঞেসং পন তদুভযং উপ্পজ্জিস্সতী’’তিআদিনা চ, ‘‘যস্স কাযসঙ্খারো নুপ্পজ্জিস্সতি, তস্স ৰচীসঙ্খারো নুপ্পজ্জিস্সতীতি…পে… পচ্ছিমচিত্তসমঙ্গীনং যস্স চিত্তস্স অনন্তরা অৰিতক্কঅৰিচারং পচ্ছিমচিত্তং উপ্পজ্জিস্সতি, তেসং তদুভযং নুপ্পজ্জিস্সতী’’তিআদিনা সব্বকালভেদেসু যথানুরূপতো উপ্পাদৰারে যোজনানযো ৰেদিতব্বো. ‘‘যস্স কাযসঙ্খারো নিরুজ্ঝতি, তস্স ৰচীসঙ্খারো নিরুজ্ঝতীতি…পে… পঠমজ্ঝানং সমাপন্নানং কামাৰচরানং অস্সাসপস্সাসানং ভঙ্গক্খণে তদুভযং নিরুজ্ঝতি. যস্স কাযসঙ্খারো নিরুজ্ঝতি, তস্স চিত্তসঙ্খারো নিরুজ্ঝতীতি? আমন্তা’’তিআদিনা নিরোধৰারে, ‘‘যস্স ¶ কাযসঙ্খারো উপ্পজ্জতি, তস্স ৰচীসঙ্খারো নিরুজ্ঝতীতি? নো’’তিআদিনা উপ্পাদনিরোধৰারে চ,

‘‘যো কাযসঙ্খারং পরিজানাতি, সো ৰচীসঙ্খারং পরিজানাতীতি? আমন্তা’’তিআদিনা পরিঞ্ঞাৰারে চ হেট্ঠা ৰুত্তানুসারেন সব্বত্থ পাল়িনযো ৰেদিতব্বো.

পৰত্তিৰারে পনেত্থ পচ্চুপ্পন্নকালে পুগ্গলৰারস্স অনুলোমনযে কাযসঙ্খারমূলকানি দ্ৰে, ৰচীসঙ্খারমূলকং একন্তি তীণেৰ যমকানি লব্ভন্তি. তস্স পটিলোমনযেপি ওকাসৰারাদীসুপি এসেৰ নযো. এৰমেত্থ সব্বৰারেসু তিণ্ণং তিণ্ণং যমকানং ৰসেন যমকগণনা ৰেদিতব্বা. অত্থৰিনিচ্ছযে পনেত্থ ইদং লক্খণং – ইমস্মিং হি সঙ্খারযমকে ‘‘অস্সাসপস্সাসানং উপ্পাদক্খণে, ৰিতক্কৰিচারানং উপ্পাদক্খণে’’তিআদিৰচনতো (যম. ২.সঙ্খারযমক.১৯) পচ্চুপ্পন্নাদিকালভেদো পৰত্তিৰসেনাপি গহেতব্বো, ন চুতিপটিসন্ধিৰসেনেৰ. ‘‘দুতিযজ্ঝানে ততিযজ্ঝানে তত্থ কাযসঙ্খারো উপ্পজ্জতী’’তিআদিৰচনতো (যম. ২.সঙ্খারযমক.২১) চ ঝানম্পি ওকাসৰসেন গহিতন্তি ৰেদিতব্বং. এৰমেত্থ যং যং লব্ভতি, তস্স তস্স ৰসেন অত্থৰিনিচ্ছযো ¶ ৰেদিতব্বো. তত্রিদং নযমুখং – ‘‘ৰিনা ৰিতক্কৰিচারেহী’’তি দুতিযততিযজ্ঝানৰসেন ৰুত্তং, ন চতুত্থজ্ঝানৰসেন তত্থ অস্সাসপস্সাসানং অভাৰতো. ‘‘চিত্তস্স ভঙ্গক্খণে’’তি ইদং কাযসঙ্খারস্স একন্তচিত্তসমুট্ঠানত্তা ৰুত্তং, উপ্পজ্জমানমেৰ হি চিত্তং রূপং, অরূপং ৰা সমুট্ঠাপেতি, ন ভিজ্জমানং, ঠিতং ৰা. ‘‘পচ্ছিমচিত্তসমঙ্গীন’’ন্তি সব্বপচ্ছিমেন অপ্পটিসন্ধিকচিত্তেন সমঙ্গীনং খীণাসৰানং. ‘‘অৰিতক্কঅৰিচারং পচ্ছিমচিত্ত’’ন্তি এত্থ রূপাৰচরানং দুতিযজ্ঝানিকাদিচুতিচিত্তৰসেন, অরূপাৰচরানঞ্চ চতুত্থজ্ঝানিকচুতিচিত্তৰসেন অত্থো গহেতব্বো.

‘‘যস্স কাযসঙ্খারো নিরুজ্ঝতি, তস্স চিত্তসঙ্খারো নিরুজ্ঝতী’’তি এত্থ নিযমতো কাযসঙ্খারস্স চিত্তসঙ্খারেন সদ্ধিং একক্খণে নিরুজ্ঝনতো ‘‘আমন্তা’’তি পটিৰচনং দিন্নং ন একচিত্তক্খণিকত্তা. চিত্তসঙ্খারো হি কাযসঙ্খারেন ৰিনাপি উপ্পজ্জতি চ নিরুজ্ঝতি চ. কাযসঙ্খারো পন চিত্তসমুট্ঠানত্তা যেন চিত্তেন সদ্ধিং উপ্পজ্জতি, ততো পট্ঠায সত্তরসমেন সদ্ধিং নিরুজ্ঝতি, এসা চিত্তসমুট্ঠানরূপস্স ধম্মতা. যং পন ৰিভঙ্গপ্পকরণস্স সীহল়ট্ঠকথায ‘‘চিত্তসমুট্ঠানরূপং সত্তরসমচিত্তস্স উপ্পাদক্খণে নিরুজ্ঝতী’’তি ৰুত্তং, তং ইমায ¶ পাল়িযা ৰিরুজ্ঝতি. ‘‘যস্স কাযসঙ্খারো উপ্পজ্জতি, তস্স ৰচীসঙ্খারো নিরুজ্ঝতী’’তি এত্থ যস্মা কাযসঙ্খারো চিত্তস্স উপ্পাদক্খণে উপ্পজ্জতি, ন চ তস্মিং খণে ৰিতক্কৰিচারা নিরুজ্ঝন্তি, তস্মা ‘‘নো’’তি পটিসেধো কতো. ইমিনা নযমুখেন সব্বত্থ ৰিনিচ্ছযো ৰেদিতব্বো. অযং সঙ্খারযমকমাতিকত্থসংৰণ্ণনানযো.

অনুসযযমকমাতিকত্থৰণ্ণনা

অনুসযযমকমাতিকায পন পাল়িৰৰত্থানং তাৰ এৰং ৰেদিতব্বং. অনুসযযমকেপি খন্ধযমকমাতিকাদীসু ৰিয দেসনং ¶ অকত্ৰা অঞ্ঞেন নযেন পাল়িদেসনা কতা. কথং? পঠমং তাৰ পরিচ্ছেদৰারো পরিচ্ছিন্নুদ্দেসৰারোতি দ্ৰে ৰারা উদ্দেসৰসেন দেসিতা, ততো উপ্পত্তিট্ঠানৰারোতি একো খুদ্দকৰারো. ততো অনুসযৰারো সানুসযৰারো পজহনৰারো পরিঞ্ঞাৰারো পহীনৰারো উপ্পজ্জনৰারো ধাতুৰারোতি অনুসযে যোজেত্ৰা যমকৰসেন পপঞ্চতো নিদ্দিট্ঠা সত্ত মহাৰারাতি অট্ঠকনিদ্দেসৰসেন দেসিতা, এৰং দসহি ৰারেহি অনুসযযমকদেসনা কতা. তেসু যে ইমে হি পরিচ্ছেদৰারোতিআদিনা দ্ৰে ৰারা উদ্দেসৰসেন ৰুত্তা, তে ইধ অনুসযযমকমাতিকাতি গহেতব্বা.

তত্থ হি সত্ত অনুসযাতি অযং গণনায পরিচ্ছিন্দিত্ৰা অনুসযানং দেসিতত্তা পরিচ্ছেদৰারো নাম. কামরাগানুসযো…পে… অৰিজ্জানুসযোতি অযং পরিচ্ছেদৰসেন পরিচ্ছিন্নানং নামমত্তং উদ্দিসিত্ৰা ‘‘ইমে নাম তে’’তি দেসিতত্তা পরিচ্ছিন্নুদ্দেসৰারো নাম. তত্থ অনুত্তানত্থতো তাৰ অনুসযাতি কেনট্ঠেন অনুসযা? অনুসযনট্ঠেন. কো এস অনুসযনট্ঠো নামাতি? অপ্পহীনট্ঠো. কামরাগানুসযাদযো হি অপ্পহীনট্ঠেন তস্স তস্স সন্তানে অনুসেন্তি নাম, তস্মা ‘‘অনুসযা’’তি ৰুচ্চন্তি, অনুসেন্তীতি চ তং তং অনুরূপং কারণং লভিত্ৰা উপ্পজ্জন্তীতি অত্থো. অথাপি সিযা – অনুসযনট্ঠো নাম অপ্পহীনাকারো, অপ্পহীনাকারো চ ন উপ্পজ্জতি, তস্মা অনুসযা ন উপ্পজ্জন্তীতি. তত্রিদং পটিৰচনং – অপ্পহীনাকারো অনুসযো, অনুসযোতি পন অপ্পহীনট্ঠেন থামগতকিলেসো ৰুচ্চতি, সো চিত্তসম্পযুত্তো সারম্মণো সপ্পচ্চযট্ঠেন সহেতুকো একন্তাকুসলোৰ হোতি কথাৰত্থুস্মিং (কথা. ৫৫৪ আদযো) অনুসযানং চিত্তৰিপ্পযুত্তভাৰস্স পটিসেধিতত্তা ¶ , সো চ অতীতোপি হোতি, অনাগতোপি পচ্চুপ্পন্নোপি, তস্মা উপ্পজ্জতীতি ৰত্তুং যুত্তং. তথা হি ধম্মসঙ্গহে মোহস্স পদভাজনে ৩১৭ ‘‘অৰিজ্জানুসযো অৰিজ্জাপরিযুট্ঠানং…পে… অযং তস্মিং সমযে মোহো হোতী’’তি (ধ. স. ৩৯০). ইমস্মিঞ্চ যমকে উপ্পজ্জনৰারে ‘‘যস্স কামরাগানুসযো উপ্পজ্জতি, তস্স পটিঘানুসযো উপ্পজ্জতী’’তিআদি ৰুত্তং, তস্মা ‘‘অনুসেন্তীতি তং তং অনুরূপং কারণং লভিত্ৰা উপ্পজ্জন্তী’’তি যং ৰুত্তং, তং সুৰুত্তন্তি ৰেদিতব্বং. কামরাগানুসযোতি কামরাগো চ সো অপ্পহীনট্ঠেন অনুসযো চাতি কামরাগানুসযো. সেসপদেসুপি এসেৰ নযো. অযং তাৰেত্থ অনুত্তানত্থো. অত্থৰিনিচ্ছযো পনেত্থাপি নিদ্দেসনযমুখদস্সনৰসেনেৰ হোতি, নিদ্দেসো চেত্থ হেট্ঠা ৰুত্তো.

উপ্পত্তিট্ঠানৰারাদযো অট্ঠ ৰারা চ, তত্রাযং পাল়িৰৰত্থানানুপুব্বিকামুখমত্তপ্পকাসনা. তেসং হি পঠমো অনুসযানং উপ্পত্তিট্ঠানৰারো নাম. তত্থ ৰারভেদো যমকযোজনৰারে নত্থি, ইতরেসু পন সত্তসু মহাৰারেসু অত্থি. তেসু হি পঠমো অনুসযৰারো অনুলোমপটিলোমনযৰসেন দুৰিধো হোতি. তত্থ অনুলোমনযে ‘‘যস্স যত্থ…পে… অনুসেতী’’তি পুগ্গলোকাসতদুভযনামৰসেন তযো অন্তরৰারা হোন্তি, তেসু একেকস্মিং একমূলকদ্ৰিমূলকতিমূলকচতুমূলকপঞ্চমূলকছমূলকানং ৰসেন যমকভেদা হোন্তি. যথা চ অনুলোমনযে, এৰং পটিলোমনযেপি ৰেদিতব্বা. যথা চেত্থ অনুসযৰারে, এৰং সানুসযৰারপজহনৰারপরিঞ্ঞাৰারপহীনৰারউপ্পজ্জনৰারেসু পঞ্চসুপি. অযং পনেত্থ পুরিমেসু তীসু ৰারেসু ৰিসেসো. ওকাসৰারে ‘‘যত্থ তত্থা’’তি অৰত্ৰা ‘‘যতো ততো’’তি নিস্সক্কৰচনেন দেসনা কতা. সেসং তাদিসমেৰ ¶ . যো পনাযং সব্বপচ্ছিমো ধাতুৰারো নাম, সো পুচ্ছাৰারো ৰিস্সজ্জনৰারোতি দ্ৰিধা ঠিতো. তত্থ পুচ্ছাৰারো অনুলোমপটিলোমৰসেন দুৰিধো. তস্সাৰসানে পুচ্ছানুক্কমেন ৰিস্সজ্জনং কতন্তি. এৰং তাৰেত্থ পাল়িৰৰত্থানং ৰেদিতব্বং.

তত্রিদং অট্ঠন্নং ৰারানং আদিতো পট্ঠায মুখমত্তদস্সনং. ‘‘কত্থ কামরাগানুসযো অনুসেতি? কামধাতুযা দ্ৰীসু ৰেদনাসু এত্থ কামরাগানুসযো অনুসেতি. কত্থ পটিঘানুসযো অনুসেতি? দুক্খায ৰেদনায…পে… মানানুসযো কামধাতুযা দ্ৰীসু ৰেদনাসু রূপধাতুযা অরূপধাতুযা চ অনুসেতি. দিট্ঠানুসযো, ৰিচিকিচ্ছানুসযো চ সব্বসক্কাযপরিযাপন্নেসু ধম্মেসু, ভৰরাগানুসযো রূপারূপধাতূসু, অৰিজ্জানুসযো সব্বসক্কাযপরিযাপন্নেসু ধম্মেসু অনুসেতী’’তি অযং তাৰ পঠমৰারে পাল়িনযো.

তত্থ ¶ কামধাতুযা দ্ৰীসু ৰেদনাসূতি কামাৰচরভূমিযং সুখায চেৰ উপেক্খায চাতি দ্ৰীসু ৰেদনাসু, কামরাগানুসযো পন সহজাতৰসেন, আরম্মণৰসেন চাতি দ্ৰীহাকারেহি অনুসেতি উপ্পজ্জতি, তত্থ অকুসলাহি সুখউপেক্খাহি সহজাতোপি হুত্ৰা তা আরম্মণং কত্ৰাপি উপ্পজ্জতি. অৰসেসা পন কামাৰচরকুসলৰিপাককিরিযৰেদনা আরম্মণমেৰ কত্ৰা উপ্পজ্জতি, ইমাসু ৰেদনাসু অনুসযমানো চেস তাহি ৰেদনাহি সম্পযুত্তেসু সঞ্ঞাসঙ্খারৰিঞ্ঞাণেসুপি অনুসেতিযেৰ. ইমাসং পন ৰেদনানং অস্সাদট্ঠেন কামরাগানুসযুপ্পত্তিযা সেসসম্পযুত্তেহি পধানত্তা, ওল়ারিকত্তেন ৰেনেয্যানং সুবোধত্তা চ দ্ৰীসু ৰেদনাসুযেৰ অনুসেতীতি ৰুত্তং, এৰং উপরিপি. ন কেৰলঞ্চেস অনুসযমানো ইমাসু দ্ৰীসু ৰেদনাসুযেৰ, ৰেদনাসম্পযুত্তেসু ধম্মেসু চ অনুসেতি, ইট্ঠেসু ¶ পন রূপাদীসুপি অনুসেতি এৰ. ৰুত্তম্পি চেতং ৰিভঙ্গপ্পকরণে ‘‘যং লোকে পিযরূপং সাতরূপং, এত্থ সত্তানং কামরাগানুসযো অনুসেতী’’তি (ৰিভ. ৮১৬), এত্থানুসযযমকেপি ৰুত্তং ‘‘দুক্খায ৰেদনায রূপধাতুযা এত্থ কামরাগানুসযো নানুসেতী’’তিআদি. এতেন ৰুত্তাৰসেসরূপাদীসু ছসুপি আরম্মণেসু অনুসেতীতি ৰুত্তং হোতি. ইধ পন তং সব্বং অৰত্ৰা কিঞ্চিদেৰ পধানত্তাদিনা কারণেন ৰুত্তন্তি গহেতব্বং.

দুক্খাযাতি এত্থ পটিঘচিত্তসম্পযুত্তা দ্ৰে দোমনস্সৰেদনা, কাযৰিঞ্ঞাণসম্পযুত্তা দুক্খৰেদনা চাতি তিস্সো ৰেদনা, তং সম্পযুত্তা চ ধম্মা, অনিট্ঠা ছ রূপাদযো ধম্মা পটিঘানুসযসহজাতৰসেন, আরম্মণৰসেন চ যথারহং অনুসযনট্ঠানং. কিং পন ইতরা দ্ৰে ৰেদনা ইট্ঠারম্মণং ৰা পটিঘস্স আরম্মণং ন হোন্তীতি? নো ন হোন্তি. পরিহীনজ্ঝানস্স হি নট্ঠং ইট্ঠং সসম্পযুত্তধম্মং ঝানমারব্ভ দোমনস্সং উপ্পজ্জতি, তং পন আরম্মণমত্তমেৰ, নানুসযনট্ঠানং ইট্ঠত্তা. অনিট্ঠমেৰ হি ইট্ঠতো পটিহনননিমিত্তং, যং পন তত্থুপ্পন্নং, তস্স পটিঘমত্তমেৰ হোতি, ন পটিঘানুসযোতি. পটিঘানুসযো হি অনিট্ঠারম্মণে পটিহননৰসেন উপ্পন্নো থামগতো কিলেসো, ইতরো দোমনস্সেন সদ্ধিং উপ্পন্নোপি অত্তনো পটিহননকিচ্চস্স অকরণতো পটিঘানুসযো ন হোতি, অব্বোহারিকত্তং গচ্ছতি. যথা হি পাণাতিপাতচেতনায সদ্ধিং উপ্পন্নোপি ব্যাপাদো মনোকম্মং নাম ন হোতি, অব্বোহারিকত্তং গচ্ছতি, এৰন্তি গহেতব্বং. তেনেৰ নেক্খম্মস্সিতং দোমনস্সং সেৰিতব্বং ৰুত্তং. মানানুসযস্স পন দুক্খদোমনস্সৰজ্জিতা সব্বে লোকিযা ধম্মা অনুসযনট্ঠানং. ‘‘দুক্খায ৰেদনায অপরিযাপন্নে এত্থ…পে… মানানুসযো চ নানুসেতী’’তি হি ¶ ৰুত্তং. দিট্ঠানুসযৰিচিকিচ্ছানুসযানং পন লোকুত্তরৰজ্জিতা সব্বেপি ধম্মা অনুসযনট্ঠানং. তেন ৰুত্তং ‘‘সব্বসক্কাযপরিযাপন্নেসু ¶ ধম্মেসূ’’তি. তত্থ সংসারৰট্টনিস্সিতট্ঠেন সক্কাযপরিযাপন্নেসু সব্বধম্মেসূতি অত্থো. এৰং অৰিজ্জানুসযোপি ৰেদিতব্বো. সব্বত্থ চ সহজাতারম্মণভেদো হেট্ঠা ৰুত্তনযেনেৰ ৰেদিতব্বো.

ভৰরাগানুসযো পন কিঞ্চাপি দিট্ঠিৰিপ্পযুত্তেসু চতূসু চিত্তেসু উপ্পজ্জনতো সহজাতৰসেন কামধাতুযা দ্ৰীসু ৰেদনাসু অনুসেতীতি ৰত্তব্বো ভৰেয্য, সো পন যস্মা রূপারূপাৰচরমেৰারম্মণং লভতি, ন কামাৰচরারম্মণমেৰ, অনুসযানং পন তং ন অনুসযনট্ঠানং, তস্মা আরম্মণৰসেন নিযমং অকত্ৰা ‘‘রূপধাতুযা অরূপধাতুযা এত্থ ভৰরাগানুসযো অনুসেতী’’তি ৰুত্তং. তং রাগৰসেন সো চ সব্বোপি রাগো কামরাগানুসযো গহেতব্বোতি অযং উপ্পত্তিট্ঠানৰারে নযো.

ইতরেসু পন সত্তসু মহাৰারেসু তাৰ ‘‘যস্স কামরাগানুসযো অনুসেতি, তস্স পটিঘানুসযো অনুসেতীতি? আমন্তা. যস্স ৰা পন পটিঘানুসযো অনুসেতি, তস্স কামরাগানুসযো অনুসেতীতি? আমন্তা. যস্স কামরাগানুসযো অনুসেতি, তস্স মানানুসযো অনুসেতীতি? আমন্তা. যস্স ৰা পন মানানুসযো অনুসেতি, তস্স কামরাগানুসযো অনুসেতীতি? অনাগামিস্স মানানুসযো অনুসেতি, নো চ তস্স কামরাগানুসযো অনুসেতি, তিণ্ণং পুগ্গলানং মানানুসযো চ অনুসেতি, কামরাগানুসযো চ অনুসেতি. যস্স কামরাগানুসযো অনুসেতি, তস্স দিট্ঠানুসযো অনুসেতীতি? দ্ৰিন্নং পুগ্গলানং কামরাগানুসযো অনুসেতি, নো চ…পে… দিট্ঠানুসযো চ অনুসেতি, যস্স ৰা পন…পে… আমন্তা. যস্স কামরাগানুসযো অনুসেতি, তস্স ৰিচিকিচ্ছানুসযো ¶ অনুসেতী’’তি পুচ্ছাযপি দিট্ঠানুসযসদিসমেৰ ৰিস্সজ্জনং. যস্স কামরাগানুসযো অনুসেতি, তস্স ভৰরাগানুসযো অনুসেতীতি? আমন্তা. যস্স ৰা পন…পে… অনুসেতীতি…পে… তিণ্ণং পুগ্গলানং ভৰরাগানুসযো চ অনুসেতি, কামরাগানুসযো চ অনুসেতি. অৰিজ্জানুসযেপি এসেৰ নযো. ইমিনা নযেন পটিঘানুসযাদিমূলিকাসু পুচ্ছাসু ৰিস্সজ্জননযো ৰেদিতব্বো. অযং একমূলকে নযো.

যস্স কামরাগানুসযো চ পটিঘানুসযো চ অনুসেতি, তস্স মানানুসযো অনুসেতীতি? আমন্তা. দ্ৰিন্নং দ্ৰিমূলিকা…পে… পঞ্চমূলিকানং পন একমূলে ৰুত্তানুসারেন ৰিস্সজ্জননযো ¶ ঞাতব্বো. তত্রাযং পচ্ছিমানুসযে যোজনা – ‘‘যস্স কামরাগানুসযো চ পটিঘানুসযো চ মানানুসযো চ দিট্ঠানুসযো চ ৰিচিকিচ্ছানুসযো চ ভৰরাগানুসযো চ অনুসেতি, তস্স অৰিজ্জানুসযো অনুসেতীতি? আমন্তা. যস্স ৰা পন অৰিজ্জানুসযো অনুসেতি, তস্স কামরাগানুসযো চ…পে… ভৰরাগানুসযো চ অনুসেতীতি? অনাগামিস্স অৰিজ্জানুসযো চ মানানুসযো চ ভৰরাগানুসযো চ অনুসেতি, ন ইতরে, দ্ৰিন্নং পুগ্গলানং অৰিজ্জানুসযো চ কামরাগপটিঘমানভৰরাগানুসযা চ অনুসেন্তি, ন দিট্ঠিৰিচিকিচ্ছানুসযা, পুথুজ্জনস্স পন সব্বেপি অনুসেন্তী’’তি অযং পুগ্গলৰারে নযো.

ওকাসৰারে পন ‘‘যত্থ কামরাগানুসযো অনুসেতি, তত্থ পটিঘানুসযো অনুসেতীতি? নো. যত্থ ৰা পন…পে… অনুসেতীতি? নো. যত্থ কামরাগানুসযো অনুসেতি, তত্থ মানানুসযো অনুসেতীতি? আমন্তা. যত্থ ৰা পন মানানুসযো অনুসেতি, তত্থ কামরাগানুসযো অনুসেতীতি? রূপধাতুযা অরূপধাতুযা এত্থ মানানুসযো অনুসেতি ¶ , ন কামরাগানুসযো, কামধাতুযা দ্ৰীসু ৰেদনাসু তদুভযং অনুসেতি. যত্থ কামরাগানুসযো…পে… অনুসেতীতি? আমন্তা. যত্থ ৰা পন…পে… অনুসেতীতি? দুক্খায ৰেদনায রূপধাতুযা অরূপধাতুযা এত্থ ৰিচিকিচ্ছানুসযো অনুসেতি, ন কামরাগানুসযো, কামধাতুযা দ্ৰীসু ৰেদনাসু তদুভযং অনুসেতি. যত্থ কামরাগানুসযো…পে… অনুসেতি, তত্থ ভৰরাগানুসযো অনুসেতীতি? নো. যত্থ ৰা পন…পে… নো. যত্থ কামরাগানুসযো অনুসেতি, তত্থ অৰিজ্জানুসযো অনুসেতীতি? আমন্তা. যত্থ ৰা পন…পে… অনুসেতীতি? দুক্খায ৰেদনায রূপারূপধাতুযা এত্থ অৰিজ্জানুসযো অনুসেতি, ন কামরাগানুসযো, কামধাতুযা দ্ৰীসু ৰেদনাসু তদুভযং অনুসেতি.

যত্থ পটিঘানুসযো অনুসেতি, তত্থ মানানুসযো অনুসেতীতি? নো. যত্থ ৰা পন…পে… নো. যত্থ পটিঘানুসযো অনুসেতি, তত্থ দিট্ঠানুসযো ৰিচিকিচ্ছানুসযো অনুসেতীতি? আমন্তা. যত্থ ৰা পন…পে… অনুসেতীতি? কামধাতুযা দ্ৰীসু ৰেদনাসু রূপারূপধাতুযা এত্থ ৰিচিকিচ্ছানুসযো অনুসেতি, ন পটিঘানুসযো, দুক্খায পন ৰেদনায তদুভযং অনুসেতি. যত্থ পটিঘানুসযো অনুসেতি, তত্থ ভৰরাগানুসযো অনুসেতীতি? নো. যত্থ ৰা পন…পে… নো. যত্থ পটিঘানুসযো অনুসেতি, তত্থ অৰিজ্জানুসযো অনুসেতীতি? আমন্তা. যত্থ ৰা পন…পে… অনুসেতীতি…পে… দুক্খায ৰেদনায তদুভযং অনুসেতি, অঞ্ঞত্থ অৰিজ্জানুসযো চ.

যত্থ ¶ মানানুসযো অনুসেতি, তত্থ দিট্ঠানুসযো ৰিচিকিচ্ছানুসযো অনুসেতীতি? আমন্তা. যত্থ ৰা পন…পে… অনুসেতীতি? দুক্খায ৰেদনায দিট্ঠানুসযোৰ, নেতরো ¶ , তদঞ্ঞেসু সব্বত্থ অনুসেতি. যত্থ মানানুসযো অনুসেতি, তত্থ ভৰরাগানুসযো অনুসেতীতি? কামধাতুযা দ্ৰীসু ৰেদনাসু মানানুসযো, নেতরো, রূপারূপধাতুযা পন তদুভযং অনুসেতি. যত্থ ৰা পন…পে… আমন্তা. যত্থ মানানুসযো অনুসেতি, তত্থ অৰিজ্জানুসযো…পে… আমন্তা. যত্থ ৰা পন…পে… অনুসেতীতি? দুক্খৰেদনং ঠপেত্ৰা তদঞ্ঞাসু সব্বত্থ তদুভযং অনুসেতি. যত্থ দিট্ঠানুসযো, তত্থ ৰিচিকিচ্ছানুসযো…পে… আমন্তা. যত্থ দিট্ঠানুসযো, তত্থ ভৰরাগানুসযো অনুসেতীতি? কামধাতুযা তীসু ৰেদনাসু দিট্ঠানুসযোৰ, রূপারূপভৰেসু তদুভযং অনুসেতি. যত্থ ৰা পন…পে… আমন্তা. যত্থ দিট্ঠানুসযো অনুসেতি, তত্থ অৰিজ্জানুসযো…পে… আমন্তা. যত্থ ৰা পন…পে… আমন্তা. এস নযো ৰিচিকিচ্ছামূলকেসুপি. যত্থ ভৰরাগানুসযো, তত্থ অৰিজ্জানুসযো অনুসেতীতি? আমন্তা. যত্থ ৰা পন…পে… অনুসেতি, তত্থ কামধাতুযা তীসু ৰেদনাসু অৰিজ্জানুসযোৰ, রূপারূপভৰেসু পন তদুভযং অনুসেতী’’তি অযমেত্থ একমূলনযো.

‘‘যস্স…পে… নানুসেতি. যস্স…পে… নানুসেতি মানানুসযো, অরহতো পন তদুভযম্পি নানুসেতি. যস্স ৰা পন…পে… আমন্তা. যস্স কামরাগানুসযো নানুসেতি, তস্স দিট্ঠানুসযো ৰিচিকিচ্ছানুসযো নানুসেতীতি? আমন্তা. যস্স ৰা পন…পে… নানুসেতীতি? দ্ৰিন্নং পুগ্গলানং ৰিচিকিচ্ছানুসযোৰ নানুসেতি, নেতরো, অনাগামিঅরহন্তানং তদুভযম্পি নানুসেতী’’তিআদিনা নযেন পুগ্গলৰারে,

‘‘যত্থ কামরাগানুসযো নানুসেতি, তত্থ পটিঘানুসযো নানুসেতীতি? দুক্খায ৰেদনায কামরাগানুসযোৰ নানুসেতি, নেতরো, রূপারূপধাতুপরিযাপন্নেসু তদুভযং নানুসেতি. যত্থ ৰা পন…পে… নানুসেতীতি ¶ ? কামধাতুযা দ্ৰীসু ৰেদনাসু পটিঘানুসযোৰ, রূপারূপপরিযাপন্নেসু পন তদুভযং নানুসেতি. যত্থ কামরাগানুসযো নানুসেতি, তত্থ মানানুসযো নানুসেতীতি? রূপারূপধাতূসু কামরাগানুসযোৰ, দুক্খায পন ৰেদনায, অপরিযাপন্নেসু চ তদুভযং নানুসেতি. যত্থ ৰা পন…পে… আমন্তা. যত্থ কামরাগানুসযো নানুসেতি, তত্থ দিট্ঠানুসযো, ৰিচিকিচ্ছানুসযো নানুসেতীতি? দুক্খায ৰেদনায রূপারূপধাতূসু কামরাগানুসযোৰ, অপরিযাপন্নে পন তদুভযং নানুসেতী’’তিআদিনা নযেন ওকাসৰারে চ,

‘‘যস্স ¶ যত্থ কামরাগানুসযো নানুসেতি, তস্স তত্থ পটিঘানুসযো নানুসেতীতি? তিণ্ণং পুগ্গলানং দুক্খায ৰেদনায কামরাগানুসযোৰ, রূপারূপপরিযাপন্নেসু তদুভযং নানুসেতি, দ্ৰিন্নং পুগ্গলানং সব্বত্থ তদুভযং নানুসেতি. যস্স ৰা পন যত্থ…পে… নানুসেতীতি? তিণ্ণং পুগ্গলানং কামধাতুযা দ্ৰীসু ৰেদনাসু পটিঘানুসযোৰ, রূপারূপপরিযাপন্নেসু তদুভযং নানুসেতি, দ্ৰিন্নং পুগ্গলানং সব্বত্থ তদুভযং নানুসেতি. যস্স যত্থ কামরাগানুসযো নানুসেতি, তস্স তত্থ মানানুসযো নানুসেতীতি? তিণ্ণং পুগ্গলানং রূপারূপধাতুযা কামরাগানুসযোৰ, নেতরো, দুক্খায ৰেদনায, অপরিযাপন্নে চ তদুভযং নানুসেতি, অনাগামিস্স কামধাতুযা দ্ৰীসু ৰেদনাসু রূপারূপধাতুযা কামরাগানুসযোৰ, অরহতো পন সব্বত্থ তদুভযং নানুসেতী’’তিআদিনা পুগ্গলোকাসৰারে চ ৰুত্তানুসারেন নযো ঞাতব্বোতি অযং পাল়িনযো.

তত্থ ‘‘যস্স কামরাগানুসযো অনুসেতি, তস্স পটিঘানুসযো অনুসেতী’’তি এত্থ যদেতং ‘‘আমন্তা’’তি পটিৰচনং দিন্নং, তং দুদ্দিন্নং ৰিয খাযতি. কস্মা? কামরাগপটিঘানং একক্খণে অনুপ্পত্তিতো. যথা হি ‘‘যস্স মনাযতনং ¶ উপ্পজ্জতি, তস্স ধম্মাযতনং উপ্পজ্জতী’’তিআদীসু মনাযতনধম্মাযতনাদীনি একক্খণে উপ্পজ্জন্তি, ন তথা কামরাগপটিঘা, ৰিসুঞ্ঞেৰ উপ্পজ্জনতো, তস্মা এত্থ ‘‘নো’’তি পটিসেধো কত্তব্বো সিযা, তং পন অকত্ৰা ‘‘আমন্তা’’তি পটিৰচনস্স দিন্নত্তা হেট্ঠা যমকেসু ৰিয এত্থ খণপচ্চুপ্পন্নৰসেন ৰত্তমানৰোহারং অগ্গহেত্ৰা অঞ্ঞথা গহেতব্বো. কথং গহেতব্বো? অপ্পহীনৰসেন. অপ্পহীনতং হি সন্ধায অযং অনুসেতীতি ৰত্তমানৰোহারো ৰুত্তো, ন খণপচ্চুপ্পন্নতং, তস্মা ইমিস্সা পুচ্ছায যস্স কামরাগানুসযো অপ্পহীনো, ন অনুপ্পত্তিধম্মতং আপাদিতো, তস্স পটিঘানুসযো অপ্পহীনো, ন অনুপ্পত্তিধম্মতং আপাদিতো, তস্স পটিঘানুসযো অপ্পহীনোতি এৰমত্থো গহেতব্বো. যস্মা চ তেসু কামরাগপটিঘেসু যস্সেকো অপ্পহীনো, তস্স ইতরোপি অপ্পহীনোৰ হোতি, তস্মা ‘‘আমন্তা’’তি ৰুত্তং. ইতো পরেসুপি এৰরূপেসু উপ্পজ্জতিৰারাদিৰিস্সজ্জনেসু এসেৰ নযো. তিণ্ণং পুগ্গলানন্তি পুথুজ্জনসোতাপন্নসকদাগামীনং. দ্ৰিন্নন্তি সোতাপন্নসকদাগামীনং. এৰং উপ্পজ্জনং দীপিতং. ওকাসৰারস্স পঠমদুতিযপুচ্ছাসু যস্মা কামরাগপটিঘা একচিত্তে ন উপ্পজ্জন্তি, তস্মা ‘‘নো’’তি পটিসেধো কতো. দুকমূলাদীসু চ যস্মা কামরাগপটিঘাদযো একস্মিং ঠানসঙ্খাতে চিত্তে, আরম্মণে ৰা ন উপ্পজ্জন্তি, তস্মা ‘‘নত্থী’’তি তত্থ পটিক্খেপো কতো, অযং পুচ্ছা অপুব্বা ¶ এৰাতি অধিপ্পাযো. পুগ্গলোকাসৰারে চতুন্নন্তি পুথুজ্জনসোতাপন্নসকদাগামিঅনাগামীনং. পটিলোমে দ্ৰিন্নন্তি অনাগামিঅরহন্তে সন্ধায ৰুত্তন্তি অযং অনুসযৰারে নযো.

সানুসযৰারে পন ‘‘যো কামরাগানুসযেন সানুসযো, সো পটিঘানুসযেন সানুসযোতি? আমন্তা…পে… মানানুসযেন ¶ সানুসযোতি? আমন্তা. যো ৰা পন মানানুসযেন সানুসযো, সো কামরাগানুসযেন সানুসযোতি? অনাগামী মানানুসযেনেৰ, ন কামরাগানুসযেন, তযো পন পুগ্গলা তদুভযেনাপি অনুসযেনা’’তি ইমিনা নযেন সেসেসু দুকমূলাদীসু পুচ্ছাৰিস্সজ্জননযো ঞাতব্বো, অযং পুগ্গলৰারে নযো.

‘‘যতো কামরাগানুসযেন সানুসযো, ততো পটিঘানুসযেন সানুসযোতি? নো…পে… মানানুসযেন সানুসযোতি? আমন্তা. যতো ৰা পন মানানুসযেন সানুসযো, ততো কামরাগানুসযেন সানুসযোতি? রূপারূপধাতুযা মানানুসযেনেৰ, নেতরেন, কামধাতুযা দ্ৰীসু ৰেদনাসু তদুভযেনাপী’’তিআদিনা ওকাসৰারে চ,

‘‘যো যতো কামরাগানুসযেন সানুসযো, সো ততো পটিঘানুসযেন সানুসযোতি? নো’’তিআদিনা পুগ্গলোকাসৰারে চাতি এৰং অনুলোমনযে চ, ‘‘যো কামরাগানুসযেন নিরনুসযো, সো পটিঘানুসযেন নিরনুসযোতি? আমন্তা’’তিআদিনা পটিলোমনযেপি সব্বত্থ অনুসযৰারে ৰুত্তানুসারতো পুচ্ছাৰিস্সজ্জননযো ঞাতব্বো.

তত্থ যতো কামরাগানুসযেন সানুসযোতি যতো কারণতো উপ্পন্নেন কামরাগানুসযেন সানুসযো, কিং সো ততো কারণতো উপ্পন্নপটিঘানুসযেনপি সানুসযোতি ৰুচ্চতি. যস্মা পনেতে দ্ৰে একস্মা ঠানা ন উপ্পজ্জন্তি, তস্মা ‘‘নো’’তি পটিসেধো কতো সেসং তাদিসমেৰাতি অযং সানুসযৰারে নযো.

পজহনৰারে ¶ পন ‘‘যো কামরাগানুসযং পজহতি, সো পটিঘানুসযং পজহতীতি? আমন্তা…পে… মানানুসযং পজহতীতি? তদেকট্ঠং পজহতি. যো ৰা পন মানানুসযং পজহতি, সো কামরাগানুসযং পজহতীতি? নো…পে… সো দিট্ঠানুসযং ৰিচিকিচ্ছানুসযং পজহতীতি? নো. যো ৰা পন ৰিচিকিচ্ছানুসযং পজহতি, সো কামরাগানুসযং পজহতীতি ¶ ? তদেকট্ঠং পজহতি. যো…পে… ভৰরাগানুসযং অৰিজ্জানুসযং পজহতীতি? তদেকট্ঠং পজহতি…পে… যো কামরাগানুসযঞ্চ পটিঘানুসযঞ্চ মানানুসযঞ্চ…পে… পজহতীতি? নত্থী’’তিআদিনা পুগ্গলৰারে,

‘‘যতো কামরাগানুসযং পজহতি, ততো পটিঘানুসযং পজহতীতি? নো…পে… যতো কামরাগানুসযং পজহতি, ততো মানানুসযং পজহতীতি? আমন্তা. যতো ৰা পন মানানুসযং পজহতি, ততো কামরাগানুসযং পজহতীতি? রূপারূপধাতুযা ততো মানানুসযমেৰ, কামধাতুযা পন দ্ৰীসু ৰেদনাসু ততো মানানুসযং পজহতী’’তিআদিনা ওকাসৰারে চ,

‘‘যো যতো কামরাগানুসযং পজহতি, সো ততো পটিঘানুসযং পজহতীতি? নো…পে… মানানুসযং পজহতীতি? তদেকট্ঠং পজহতি…পে… ৰিচিকিচ্ছানুসযং পজহতীতি? নো. যো ৰা পন যতো ৰিচিকিচ্ছানুসযং পজহতি, সো ততো কামরাগানুসযং পজহতীতি? অট্ঠমকো দুক্খায ৰেদনায রূপারূপধাতুযা সো ততো ৰিচিকিচ্ছানুসযং পজহতি, নো চ সো ততো কামরাগানুসযং পজহতি, স্ৰেৰ পুগ্গলো কামধাতুযা দ্ৰীসু ৰেদনাসু সো ততো ৰিচিকিচ্ছানুসযং পজহতি, কামরাগানুসযং তদেকট্ঠং পজহতী’’তিআদিনা পুগ্গলোকাসৰারে চাতি এৰং অনুলোমনযে চ, ‘‘যো কামরাগানুসযং ন পজহতি, সো পটিঘানুসযং ন পজহতীতি? আমন্তা…পে… ৰিচিকিচ্ছানুসযং ন পজহতীতি ¶ ? অট্ঠমকো কামরাগানুসযং ন পজহতি, নেতরং, অনাগামিমগ্গসমঙ্গিং, অট্ঠমকঞ্চ ঠপেত্ৰা অৰসেসা পুগ্গলা তদুভযং ন পজহন্তী’’তিআদিনা পটিলোমনযে চ সব্বত্থ পুচ্ছাৰিস্সজ্জননযো ঞাতব্বো.

তত্থ পজহতীতি তেন তেন মগ্গেন পহানপরিঞ্ঞাৰসেন পজহতি. তদেকট্ঠন্তি পহানেকট্ঠতং সন্ধায ৰুত্তং. পঠমমগ্গাদিনা হি ন কেৰলং দিট্ঠাদিকা এৰ ধম্মা পহীযন্তি, অথ খো অপাযগমনিযা তেন কামরাগপটিঘমানাদযোপি পহীযন্তি এৰ. পঠমমগ্গৰজ্ঝা হি কামরাগা, অপাযগমনিযা চ মানাৰিজ্জাদযোপি, ততিযমগ্গৰজ্ঝাতি পহানেকট্ঠা হুত্ৰা পহীযন্তি এৰাতি ‘‘নো’’তি অরহত্তমগ্গট্ঠং সন্ধায ৰুত্তং. সো হি কামরাগানুসযংযেৰ পহীনত্তা ন পজহতীতি. যতো কামরাগানুসযং পজহতীতি যতো উপ্পজ্জনকং কামরাগানুসযং পজহতীতি অত্থো, অট্ঠমকোতি সোতাপত্তিমগ্গট্ঠো. সো হি দক্খিণেয্যক্কমেন অরহত্তফলট্ঠতো পট্ঠায গণিযমানো অট্ঠমকো নাম. পটিলোমনযে অনাগামিমগ্গসমঙ্গিঞ্চ অট্ঠমকঞ্চ ঠপেত্ৰা অৰসেসাতি ¶ পুথুজ্জনসেসসেখাসেখা. তেসু হি পুথুজ্জনা পহানপরিঞ্ঞায অভাৰেন ন পজহন্তি, সেসা তেসং পহীনত্তাতি ইমিনা নযেন সব্বত্থ ৰিনিচ্ছযো ৰেদিতব্বোতি অযং পজহনৰারে নযো.

পরিঞ্ঞাৰারো পন ‘‘যো কামরাগানুসযং পরিজানাতি, সো পটিঘানুসযং পরিজানাতী’’তিআদিনা পজহনৰারসদিসোৰ. অযম্পি হি পজহনৰারো ৰিয মগ্গট্ঠানঞ্ঞেৰ ৰসেন ৰিস্সজ্জিতো. তত্থ পরিজানাতীতি তীহি পরিঞ্ঞাহি পরিজানাতীতি অত্থো. অযং পরিঞ্ঞাৰারে নযো.

পহীনৰারে পন ‘‘যস্স কামরাগানুসযো পহীনো, তস্স পটিঘানুসযো পহীনোতি? আমন্তা…পে… মানানুসযো পহীনোতি? অনাগামিস্স কামরাগানুসযোৰ, অরহতো ¶ পন মানানুসযোপি পহীনো’’তিআদিনা পুগ্গলৰারে, ‘‘যত্থ কামরাগানুসযো পহীনো, তত্থ পটিঘানুসযো পহীনোতি? ন ৰত্তব্বো পহীনোতি ৰা অপ্পহীনোতি ৰা. যত্থ ৰা পন…পে… ন ৰত্তব্বো…পে… তত্থ মানানুসযো পহীনোতি? আমন্তা. যত্থ ৰা পন…পে… পহীনোতি? রূপারূপধাতুযা এত্থ মানানুসযো পহীনো, কামরাগানুসযো ন ৰত্তব্বো, কামধাতুযা দ্ৰীসু ৰেদনাসু এত্থ তদুভযং পহীন’’ন্তিআদিনা ওকাসৰারে, পুগ্গলোকাসৰারেতি এৰং অনুলোমনযে, ‘‘যস্স কামরাগানুসযো অপ্পহীনো, তস্স পটিঘানুসযো অপ্পহীনোতি? আমন্তা. যস্স ৰা পন…পে… আমন্তা…পে… যস্স ৰা পন মানানুসযো অপ্পহীনো, তস্স কামরাগানুসযো অপ্পহীনোতি? অনাগামিস্স মানানুসযোৰ, তিণ্ণং পুগ্গলানং তদুভযং অপ্পহীন’’ন্তিআদিনা পটিলোমনযে চ ৰুত্তনযেনেৰ পুচ্ছাৰিস্সজ্জননযো ঞাতব্বো.

এত্থ চ ফলট্ঠৰসেনেৰ অত্থো গহেতব্বো মগ্গট্ঠানং পহীনকিলেসত্তাভাৰা. তেসং হি অনুসযা পহীযন্তি এৰ, ন পন পহীনাতি অনাগামিআদযো ফলট্ঠাৰ গহেতব্বা, ওকাসৰারে পন ‘‘ন ৰত্তব্বো’’তি ইদং উভিন্নং উপ্পত্তিট্ঠানস্স অসাধারণত্তা ৰুত্তং. অঞ্ঞং হি কামরাগানুসযস্স উপ্পত্তিট্ঠানং, অঞ্ঞং পটিঘানুসযস্স. অভাৰিতমগ্গস্স চ যত্থ অনুসযো উপ্পজ্জতি, মগ্গে ভাৰিতে তত্থেৰ সো পহীনো নাম হোতি, তস্মা সো তত্থ পহীনোতি ৰা, অপ্পহীনোতি ৰা ন ৰত্তব্বো, সব্বত্থাপি পন সযং অভাৰেন তত্থ অপ্পহীনোতি ন ৰত্তব্বো. উভিন্নং পন সাধারণট্ঠানং সন্ধায ¶ ‘‘আমন্তা’’তি ৰুত্তং. মানানুসযো হি কামধাতুযা ৰেদনাদ্ৰযসঙ্খাতে সাধারণট্ঠানে কামরাগেন সদ্ধিং পহীনো নাম হোতি ¶ . যস্স কামরাগানুসযো অপ্পহীনোতি পুথুজ্জনস্স, সোতাপত্তিসকদাগামিফলট্ঠানঞ্চ ৰসেন অত্থো গহেতব্বো. ‘‘তিণ্ণং পুগ্গলান’’ন্তি হি ৰুত্তং. সেসং সুৰিঞ্ঞেয্যমেৰাতি অযং পহীনৰারে নযো.

উপ্পজ্জনৰারে পন ‘‘যস্স কামরাগানুসযো উপ্পজ্জতি, তস্স পটিঘানুসযো উপ্পজ্জতী’’তিআদিনা সব্বত্থ অনুসযৰারসদিসোৰাতি অযং উপ্পজ্জনৰারে নযো.

ধাতুৰারে পন ‘‘কামধাতুযা চুতস্স কামধাতুং উপপজ্জন্তস্স কতি অনুসযা অনুসেন্তি, কতি অনুসযা নানুসেন্তি, কতি অনুসযা ভঙ্গা? কামধাতুযা চুতস্স রূপধাতুং উপপজ্জন্তস্স…পে… কতি ভঙ্গা? কামধাতুযা চুতস্স অরূপধাতুং উপপজ্জন্তস্স…পে… রূপধাতুং উপপজ্জন্তস্স ন অরূপধাতুং উপপজ্জন্তস্স…পে… কতি ভঙ্গং? কামধাতুযা চুতস্স ন কামধাতুং, ন অরূপধাতুং উপপজ্জন্তস্স…পে… ন রূপধাতুং ন অরূপধাতুং উপপজ্জন্তস্স. ন কামধাতুং ন রূপধাতুং উপপজ্জন্তস্স কতি ভঙ্গা’’তি এৰং কামধাতুমূলকা নৰ পুচ্ছা, তথা ‘‘রূপধাতুযা চুতস্সা’’তিআদিনা রূপধাতুমূলকা নৰ, অরূপধাতুযা নৰ চাতি সত্তৰীসতি অনুলোমপুচ্ছা, তথা ‘‘ন কামধাতুযা চুতস্সা’’তিআদিনা সত্তৰীসতি পটিলোমপুচ্ছা চ, তথা ‘‘ন কামধাতুযা ন অরূপধাতুযা চুতস্স কামধাতুং উপপজ্জন্তস্সা’’তিআদিনা সত্তৰীসতি দুকমূলকা পুচ্ছা চাতি এৰং পুচ্ছাৰারে একাসীতি পুচ্ছা ৰেদিতব্বা.

তত্থ অনুসেন্তীতি চিত্তসন্তানে অনুগতা হুত্ৰা কতি অনুসেন্তি, ভঙ্গাতি অনুসেন্তি চ নানুসেন্তি চাতি এৰং কতি ৰিভজিতব্বাতি অত্থো. ন কামধাতুং উপপজ্জন্তস্সাতি কামধাতুৰিরহিতা দ্ৰে রূপারূপধাতুযো উপপজ্জন্তস্স. ন কামধাতুং ন রূপধাতুন্তি অরূপধাতুং উপপজ্জন্তস্স. ন কামধাতুযাতি রূপারূপধাতূহি চুতস্স, এৰং সেসেসুপি সব্বত্থ ¶ পটিসন্ধিৰসেন, ধাতুৰসেন চ অত্থো ৰেদিতব্বোতি অযং উদ্দেসৰারে নযো.

নিদ্দেসৰারে পনস্স ‘‘কামধাতুযা চুতস্স কামধাতুং উপপজ্জন্তস্স কস্সচি সত্ত অনুসযা অনুসেন্তি, কস্সচি পঞ্চ অনুসযা অনুসেন্তি, অনুসযা ভঙ্গা নত্থি, কামধাতুযা চুতস্স রূপধাতুং উপপজ্জন্তস্স কস্সচি সত্ত অনুসযা অনুসেন্তি, কস্সচি পঞ্চ, কস্সচি তযো ¶ …পে… ভঙ্গা নত্থী’’তি ইমিনা নযেন সব্বত্থ ৰিস্সজ্জনং ৰেদিতব্বং, অযং পনেত্থ ৰিসেসো – রূপধাতুযা চুতস্স কামধাতুং উপপজ্জন্তস্স সত্তেৰ অনুসযা অনুসেন্তি, তথা ‘‘অরূপধাতুযা চুতস্স কামধাতুং উপপজ্জন্তস্সা’’তিআদীসুপি, অরূপধাতুযা পন চুতস্স রূপধাতুযা উপপত্তি নত্থি, হেট্ঠা উপপজ্জমানো কামধাতুং এৰ উপপজ্জতি, সত্তেৰ অনুসযা অনুসেন্তীতি এৰং অঞ্ঞেসুপি এৰরূপেসু ৰিস্সজ্জননযো ৰেদিতব্বোতি অযং ৰিসেসো, সেসং ৰুত্তনযমেৰাতি অযমেত্থ পাল়িনযো.

তত্থ কস্সচি সত্তাতি পুথুজ্জনৰসেন ৰুত্তং, পঞ্চাতি সোতাপন্নসকদাগামীনং ৰসেন. তেসং হি দিট্ঠিৰিচিকিচ্ছানুসযা পহীনাতি, কামধাতুযা পন অনাগামীনং উপপত্তিঅভাৰতো পঠমৰারে ‘‘কস্সচি তযো’’তি ন ৰুত্তং, রূপারূপধাতূসু উপ্পজ্জনৰারেসু এৰ ৰুত্তং…পে… অনাগামীনং হি কামরাগপটিঘানম্পি পহীনত্তা তযোৰ অনুসযা অনুসেন্তি, ইধ চ অনুসযানং উপ্পত্তিৰসেন নযো, অনুসযানং অনুসযনং অগ্গহেত্ৰা অপ্পহীনভাৰেন পটিসন্ধিক্খণে অপি অনুসযনং গহেতব্বং. সত্তেৰাতি অরিযসাৰকস্স রূপারূপধাতুযা চুতস্স হেট্ঠা কামভৰাদীসু উপপত্তি নাম নত্থি, পুথুজ্জনস্সেৰ হোতি, তস্মা ‘‘সত্তেৰা’’তি নিযমেত্ৰা ৰুত্তং, অরূপধাতুযা চুতস্স রূপধাতুযা উপপত্তি নত্থীতি. কস্মা নত্থি? অরূপীনং রূপজ্ঝানস্স অভাৰা. তে ¶ হি সব্বসো রূপসঞ্ঞানং সমতিক্কমনরূপধাতুং উপপন্নাতি. সেসং নযতো সুৰিঞ্ঞেয্যমেৰাতি অযং ধাতুৰারে নযো. অযং অনুসযযমকমাতিকত্থসংৰণ্ণনানযো.

চিত্তযমকমাতিকত্থৰণ্ণনা

চিত্তযমকমাতিকাযং পন পাল়িৰৰত্থানং তাৰ এৰং ৰেদিতব্বং. ইমিস্সং হি মাতিকাযং পুগ্গলৰারো ধম্মৰারো পুগ্গলধম্মৰারোতি আদিতোৰ তযো সুদ্ধিকমহাৰারা হোন্তি, তত্থ ‘‘যস্স চিত্তং উপ্পজ্জতি ন নিরুজ্ঝতী’’তি এৰং পুগ্গলৰসেন চিত্তস্স উপ্পজ্জননিরুজ্ঝনাদিভেদং দীপেন্তো গতো পুগ্গলৰারো নাম. ‘‘যং চিত্তং উপ্পজ্জতি ন নিরুজ্ঝতী’’তি এৰং ধম্মৰসেনেৰ চিত্তস্স উপ্পজ্জননিরুজ্ঝনাদিভেদং দীপেন্তো গতো ধম্মৰারো নাম. ‘‘যস্স যং চিত্তং উপ্পজ্জতি ন নিরুজ্ঝতী’’তি এৰং উভযৰসেনেৰ চিত্তস্স উপ্পজ্জননিরুজ্ঝনাদিভেদং দীপেন্তো গতো পুগ্গলধম্মৰারো নাম.

ততো ¶ ‘‘যস্স সরাগং চিত্ত’’ন্তিআদীনং সোল়সন্নং পদানং ৰসেন অপরে সরাগাদিপদৰিসেসিতা সোল়স পুগ্গলৰারা, সোল়স ধম্মৰারা, সোল়স পুগ্গলধম্মৰারাতি অট্ঠচত্তালীস মিস্সকৰারা হোন্তি, তে সরাগাদিপদমত্তং দস্সেত্ৰা সংখিত্তা. ততো ‘‘যস্স কুসলং চিত্ত’’ন্তিআদিনা নযেন ছসট্ঠিদ্ৰিসতসঙ্খাতানং অভিধম্মমাতিকাপদানং ৰসেন অপরে কুসলাদিপদৰিসেসিতা ছসট্ঠিদ্ৰিসতপুগ্গলৰারা, ছসট্ঠিদ্ৰিসতধম্মৰারা, ছসট্ঠিদ্ৰিসতপুগ্গলধম্মৰারাতি অট্ঠনৰুতিসত্তসতা মিস্সকৰারা হোন্তি, তেপি কুসলাদিপদমত্তং দস্সেত্ৰা সংখিত্তাযেৰ, যানিপেত্থ সনিদস্সনাদীনি পদানি চিত্তেন সদ্ধিং ন যুজ্জন্তি, তানি মোঘপুচ্ছাৰসেন গহিতানীতি.

তেসু পন তীসু ৰারেসু সব্বপঠমে সুদ্ধিকপুগ্গলমহাৰারে তাৰ উপ্পাদনিরোধকালসম্ভেদৰারো উপ্পাদুপ্পন্নৰারো নিরোধুপ্পন্নৰারো ¶ উপ্পাদৰারো নিরোধৰারো উপ্পাদনিরোধৰারো উপ্পজ্জমানননিরোধৰারো উপ্পজ্জমানুপ্পন্নৰারো নিরুজ্ঝমানুপ্পন্নৰারো উপ্পন্নুপ্পাদৰারো অতীতানাগতৰারো উপ্পন্নুপ্পজ্জমানৰারো নিরুদ্ধনিরুজ্ঝমানৰারো অতিক্কন্তকালৰারো চাতি চুদ্দস অন্তরৰারা, তেসু উপ্পাদৰারো নিরোধৰারো উপ্পাদনিরোধৰারোতি ইমেসু তীসু ৰারেসু পচ্চেকং ৰত্তমানাতীতস্স, ৰত্তমানানাগতস্স, অতীতানাগতস্স চাতি তিণ্ণং কালভেদানং ৰসেন অনুলোমপটিলোমতো ছ ছ কত্ৰা অট্ঠারস যমকানি, উপ্পন্নুপ্পাদৰারে অতীতানাগতকালৰসেন অনুলোমতো দ্ৰে, পটিলোমতো দ্ৰেতি চত্তারি যমকানি, সেসেসু আদিতো নিদ্দিট্ঠেসু তীসু, অন্তরে নিদ্দিট্ঠেসু তীসু, অৰসানে নিদ্দিট্ঠেসু চতূসূতি দসসু ৰারেসু অনুলোমতো একং, পটিলোমতো একন্তি দ্ৰে দ্ৰে কত্ৰা ৰীসতি যমকানি, এৰং সব্বেসুপি চুদ্দসসু অন্তরৰারেসু দ্ৰাচত্তালীস যমকানি, চতুরাসীতি পুচ্ছা, অট্ঠসট্ঠিঅত্থসতং হোতি. যথা চ একস্মিং সুদ্ধিকপুগ্গলমহাৰারে, তথা সুদ্ধিকধম্মমহাৰারে, সুদ্ধিকপুগ্গলধম্মমহাৰারেপীতি তীসু মহাৰারেসু ছব্বীসতিযমকসতং, ততো দিগুণা পুচ্ছা, দিগুণা অত্থা চ ৰেদিতব্বা, ইদং পন ৰারত্তযং সরাগাদিৰসেন সোল়সগুণং, কুসলাদিৰসেন ছসট্ঠিদ্ৰিসতগুণং কত্ৰা ইমিস্সা চিত্তযমকমাতিকায অনেকানি যমকসহস্সানি, তদ্দিগুণা পুচ্ছা, তদ্দিগুণা অত্থা চ হোন্তি, পাঠো পন সংখিত্তো. এৰমেত্থ পাল়িৰৰত্থানং ৰিদিত্ৰা ইদানি অনুত্তানপদত্থানুসারেন ৰিভঙ্গনযসহিতো সঙ্খেপত্থৰণ্ণনানযো এৰং ৰেদিতব্বো.

যস্স চিত্তং উপ্পজ্জতীতি যস্স পুগ্গলস্স চিত্তং উপ্পাদক্খণসমঙ্গিতায উপ্পজ্জতি. ন নিরুজ্ঝতীতি ¶ নিরোধক্খণং অপ্পত্ততায ন নিরুজ্ঝতি. তস্স চিত্তন্তি কিং তস্স পুগ্গলস্স ততো পট্ঠায ¶ চিত্তং নিরুজ্ঝিস্সতীতি পুচ্ছা, তস্সা চ, ‘‘পচ্ছিমচিত্তস্স উপ্পাদক্খণে তেসং চিত্তং উপ্পজ্জতি ন নিরুজ্ঝতি, নিরুজ্ঝিস্সতি নুপ্পজ্জিস্সতি, ইতরেসং চিত্তস্স উপ্পাদক্খণে তেসং চিত্তং উপ্পজ্জতি ন নিরুজ্ঝতি, নিরুজ্ঝিস্সতি চেৰ উপ্পজ্জিস্সতি চা’’তি ৰিস্সজ্জনং. তত্থ তেসং চিত্তন্তি যেসং খীণাসৰানং পচ্ছিমচিত্তসঙ্খাতস্স চুতিচিত্তস্স উপ্পাদক্খণে ৰত্ততি, তেসং তদেৰ চুতিচিত্তং উপ্পাদপ্পত্ততায উপ্পজ্জতি নাম, ভঙ্গং অপ্পত্ততায ন নিরুজ্ঝতি নাম, ইদানি পন ভঙ্গং পত্ৰা তং তেসং চিত্তং নিরুজ্ঝিস্সতি, ততো অপ্পটিসন্ধিকত্তা অঞ্ঞং নুপ্পজ্জিস্সতি. ইতরেসন্তি পচ্ছিমচিত্তসমঙ্গিং খীণাসৰং ঠপেত্ৰা অৰসেসানং সেখাসেখপুথুজ্জনানং নিরুজ্ঝিস্সতি চেৰ অঞ্ঞং পন তস্মিং ৰা অত্তভাৰে উপ্পজ্জিস্সতি চাতি অত্থো.

‘‘যস্স ৰা পন চিত্তং নিরুজ্ঝিস্সতি নুপ্পজ্জিস্সতি, তস্স চিত্তং উপ্পজ্জতি ন নিরুজ্ঝতী’’তি ইমিস্সা দুতিযপুচ্ছায পচ্ছিমচিত্তসমঙ্গিনো খীণাসৰস্স চিত্তং সন্ধায ‘‘আমন্তা’’তি ৰিস্সজ্জনং. ‘‘যস্স চিত্তং নুপ্পজ্জতি নিরুজ্ঝতি, তস্স চিত্তং ন নিরুজ্ঝিস্সতি উপ্পজ্জিস্সতী’’তি পুচ্ছায ‘‘নো’’তি পটিসেধোৰ ৰিস্সজ্জনং. ন উপ্পজ্জতি নিরুজ্ঝতীতি হি ভঙ্গক্খণে অরহতো পচ্ছিমচিত্তম্পি সেসানং ভিজ্জমানচিত্তম্পি পুচ্ছতি, ততো পট্ঠায পন অরহতো তাৰ চিত্তং ন নিরুজ্ঝিস্সতীতি সক্কা ৰত্তুং, উপ্পজ্জিস্সতীতি পন ন সক্কা, তস্মা ‘‘নো’’তি এত্থ পটিসেধো কতো, ‘‘যস্স ৰা পন চিত্তং ন নিরুজ্ঝিস্সতি উপ্পজ্জিস্সতি, তস্স চিত্তং নুপ্পজ্জতি নিরুজ্ঝতী’’তি পুচ্ছায ‘‘নত্থী’’তি পটিক্খেপোৰ ৰিস্সজ্জনং. যস্স হি চিত্তং ন নিরুজ্ঝিস্সতি উপ্পজ্জিস্সতি, সো চ পুগ্গলো নত্থীতি.

যস্স চিত্তং উপ্পজ্জতি, তস্স চিত্তং উপ্পন্নন্তি? আমন্তা, যস্স ৰা পন…পে… উপ্পজ্জতীতি? সব্বেসং চিত্তস্স ভঙ্গক্খণে তং চিত্তং উপ্পন্নং, নো চ উপ্পজ্জতি, সব্বেসং চিত্তস্স উপ্পাদক্খণে তেসং চিত্তং উপ্পন্নঞ্চেৰ উপ্পজ্জতি চ, যস্স চিত্তং নুপ্পজ্জতি ¶ , তস্স চিত্তং নুপ্পন্নন্তি? চিত্তস্স ভঙ্গক্খণে চিত্তং নুপ্পজ্জতি, নো চ নুপ্পন্নং, নিরোধসমাপন্নানং অসঞ্ঞসত্তানং চিত্তং নুপ্পজ্জতি চেৰ নুপ্পন্নঞ্চ. যস্স ৰা পন…পে… নুপ্পজ্জতীতি? আমন্তা. এত্থ চ উপ্পন্নন্তি উপ্পাদসমঙ্গিনোপেতং নামং, উপ্পজ্জতীতি চ উপ্পাদসমঙ্গিনোৰ.

যস্স ¶ চিত্তং নিরুজ্ঝতি, তস্স চিত্তং উপ্পন্নন্তি? আমন্তা. যস্স ৰা পন…পে… নিরুজ্ঝতীতি? ভঙ্গক্খণে তথা. যস্স চিত্তং ন নিরুজ্ঝতি, তস্স চিত্তং নুপ্পন্নন্তি? নিরোধসমাপন্নাদীনং চিত্তং. যস্স ৰা পন…পে… আমন্তা.

যস্স চিত্তং উপ্পজ্জতি, তস্স চিত্তং উপ্পজ্জিত্থাতি? আমন্তা. যস্স ৰা পন…পে… উপ্পজ্জতীতি? সব্বেসং চিত্তস্স উপ্পাদক্খণে তথা. এত্থ চ উপ্পাদপ্পত্তত্তা উপ্পজ্জিত্থ, তং অনতীতত্তা উপ্পজ্জতি নামাতি অত্থোতি অট্ঠকথাযং খণপচ্চুপ্পন্নৰসেন অত্থো ৰুত্তো. উপ্পজ্জিত্থাতি পন ইমস্স অতীতচিত্তক্খণৰসেন অত্থে গয্হমানে এৰ উপরিপাল়িযা ন ৰিরুজ্ঝতি, ন অঞ্ঞথাতি পঞ্ঞাযতি, তস্মা পুব্বাপরং ওলোকেত্ৰা পাল়িঅৰিরোধেন অত্থো গহেতব্বো.

যস্স চিত্তং নুপ্পজ্জতি, তস্স চিত্তং নুপ্পজ্জিত্থাতি? উপ্পজ্জিত্থ. যস্স ৰা পন…পে… নুপ্পজ্জতীতি? নত্থি. যস্স চিত্তং উপ্পজ্জতি, তস্স চিত্তং উপ্পজ্জিস্সতীতি? পচ্ছিমচিত্তসমঙ্গিখীণাসৰৰিরহিতানং চিত্তং তথা. যস্স ৰা পন…পে… উপ্পজ্জতীতি? উপ্পাদক্খণে তথা. যস্স চিত্তং…পে… নুপ্পজ্জিস্সতীতি? অসেখানং পচ্ছিমচিত্তস্স ভঙ্গক্খণে তথা. যস্স ৰা পন…পে… নুপ্পজ্জতীতি? পচ্ছিমচিত্তস্স ভঙ্গক্খণে তথা. যস্স চিত্তং উপ্পজ্জিত্থ, তস্স চিত্তং উপ্পজ্জিস্সতীতি? পচ্ছিমচিত্তসমঙ্গিং ঠপেত্ৰা সেসানং তথা. যস্স ৰা পন…পে… আমন্তা. যস্স চিত্তং নুপ্পজ্জিত্থ, তস্স চিত্তং নুপ্পজ্জিস্সতীতি? নত্থি. যস্স ৰা পন…পে… নুপ্পজ্জিত্থাতি? উপ্পজ্জিত্থ.

যস্স ¶ চিত্তং নিরুজ্ঝতি, তস্স চিত্তং নিরুজ্ঝিত্থাতি? আমন্তা. যস্স ৰা পন…পে… নিরুজ্ঝতীতি? ভঙ্গক্খণে তথা. যস্স চিত্তং…পে… ন নিরুজ্ঝিত্থাতি? নিরুজ্ঝিত্থ. যস্স ৰা পন…পে… নত্থি. যস্স চিত্তং নিরুজ্ঝতি, তস্স চিত্তং নিরুজ্ঝিস্সতীতি? পচ্ছিমচিত্তসমঙ্গিং ঠপেত্ৰা সেসানং চিত্তস্স ভঙ্গক্খণে তথা. যস্স ৰা পন…পে… সেসানং ভঙ্গক্খণে তথা. যস্স চিত্তং…পে… নিরুজ্ঝিস্সতি. যস্স ৰা পন…পে… নিরুজ্ঝতি.

যস্স চিত্তং নিরুজ্ঝিত্থ, তস্স চিত্তং নিরুজ্ঝিস্সতীতি? পচ্ছিমচিত্তস্স ভঙ্গক্খণে ঠপেত্ৰা ¶ সেসানং চিত্তং তথা. যস্স ৰা পন…পে… আমন্তা. যস্স চিত্তং ন নিরুজ্ঝিত্থ, তস্স চিত্তং ন নিরুজ্ঝিস্সতীতি? নত্থি. যস্স ৰা পন…পে… ন নিরুজ্ঝিত্থাতি? নিরুজ্ঝিত্থ.

যস্স চিত্তং উপ্পজ্জতি, তস্স চিত্তং নিরুজ্ঝিত্থাতি? আমন্তা. যস্স ৰা পন…পে… উপ্পজ্জতীতি? সব্বেসং চিত্তস্স উপ্পাদক্খণে তথা. যস্স চিত্তং নুপ্পজ্জতি, তস্স চিত্তং ন নিরুজ্ঝিত্থাতি? নিরুজ্ঝিত্থ. যস্স ৰা পন…পে… নত্থি, যস্স চিত্তং উপ্পজ্জতি, তস্স চিত্তং নিরুজ্ঝিস্সতীতি? আমন্তা. যস্স ৰা পন…পে… উপ্পজ্জতীতি? সব্বেসং চিত্তস্স উপ্পাদক্খণে তথা. যস্স চিত্তং নুপ্পজ্জতি, তস্স চিত্তং ন নিরুজ্ঝিস্সতীতি? পচ্ছিমচিত্তস্স ভঙ্গক্খণে তথা. যস্স ৰা পন…পে… আমন্তা. যস্স চিত্তং উপ্পজ্জিত্থ, তস্স চিত্তং নিরুজ্ঝিস্সতীতি? নিরুজ্ঝমানং পচ্ছিমচিত্তং ঠপেত্ৰা তথা. যস্স ৰা পন…পে… আমন্তা. যস্স চিত্তং নুপ্পজ্জিত্থ, তস্স চিত্তং ন নিরুজ্ঝিস্সতীতি? নত্থি. যস্স ৰা পন…পে… নুপ্পজ্জিত্থাতি? উপ্পজ্জিত্থ.

যস্স চিত্তং উপ্পজ্জতি, তস্স চিত্তং ন নিরুজ্ঝতীতি? আমন্তা. যস্স ৰা পন…পে… উপ্পজ্জতীতি? সব্বেসং চিত্তস্স উপ্পাদক্খণে তথা. যস্স চিত্তং নুপ্পজ্জতি, তস্স চিত্তং নিরুজ্ঝতীতি? সব্বেসং চিত্তস্স ভঙ্গক্খণে তথা. যস্স ৰা পন…পে… নুপ্পজ্জতীতি? আমন্তা.

যস্স ¶ চিত্তং উপ্পজ্জমানং, তস্স চিত্তং উপ্পন্নন্তি? আমন্তা. যস্স ৰা পন…পে… উপ্পজ্জমানন্তি? সব্বেসং চিত্তস্স উপ্পাদক্খণে তথা. যস্স চিত্তং নুপ্পজ্জমানং, তস্স চিত্তং নুপ্পন্নন্তি? নিরোধসমাপন্নাদীনং চিত্তং তথা. যস্স ৰা পন…পে… আমন্তা.

যস্স চিত্তং নিরুজ্ঝমানং, তস্স চিত্তং উপ্পন্নন্তি? আমন্তা. যস্স ৰা পন…পে… ভঙ্গক্খণে তথা. যস্স চিত্তং ন নিরুজ্ঝমানং, তস্স চিত্তং নুপ্পন্নন্তি? নিরোধসমাপন্নাদীনং চিত্তং তথা. যস্স ৰা পন…পে… আমন্তা.

যস্স চিত্তং উপ্পন্নং, তস্স চিত্তং উপ্পজ্জিত্থাতি? আমন্তা. যস্স ৰা পন…পে… উপ্পন্নন্তি ¶ ? চিত্তসমঙ্গীনং তথা. যস্স চিত্তং নুপ্পন্নং, তস্স চিত্তং নুপ্পজ্জিত্থাতি? উপ্পজ্জিত্থ. যস্স ৰা পন…পে… নুপ্পন্নন্তি? নত্থি…পে… যস্স চিত্তং নুপ্পন্নং, তস্স চিত্তং নুপ্পজ্জিস্সতীতি? উপ্পজ্জিস্সতি. যস্স ৰা পন…পে… নুপ্পন্নন্তি? উপ্পন্নং.

যস্স চিত্তং উপ্পজ্জিত্থ নো চ তস্স চিত্তং উপ্পন্নং, তস্স চিত্তং উপ্পজ্জিস্সতীতি? আমন্তা. যস্স ৰা পন চিত্তং উপ্পজ্জিস্সতি নো চ তস্স চিত্তং উপ্পন্নং, তস্স চিত্তং উপ্পজ্জিত্থাতি? আমন্তা. এত্থ ‘‘নো চ তস্স চিত্তং নুপ্পন্ন’’ন্তি ইদং অসঞ্ঞাদিঅচিত্তকে সন্ধায ৰুত্তং. তেসং নিযমেন চিত্তুপ্পত্তিযা অভাৰতো ‘‘আমন্তা’’তি উভযত্থ ৰিস্সজ্জনং ৰুত্তং. অযঞ্চ ৰারো কালত্তযে গহেত্ৰা সমত্থিতোতি গহেতব্বো.

‘‘যস্স চিত্তং নুপ্পজ্জিত্থ নো চ তস্স চিত্তং নুপ্পন্নং, তস্স চিত্তং নুপ্পজ্জিস্সতীতি? নত্থি. যস্স ৰা পন চিত্তং নুপ্পজ্জিস্সতি নো চ তস্স চিত্তং নুপ্পন্নং, তস্স চিত্তং নুপ্পজ্জিত্থাতি? উপ্পজ্জিত্থ.

উপ্পন্নং উপ্পজ্জমানন্তি? উপ্পাদক্খণে চিত্তং তথা. উপ্পজ্জমানং উপ্পন্নন্তি? আমন্তা. নুপ্পন্নং নুপ্পজ্জমানন্তি? আমন্তা. নুপ্পজ্জমানং নুপ্পন্নন্তি? অতীতানাগতচিত্তং তথা.

নিরুদ্ধং ¶ নিরুজ্ঝমানন্তি? নো, নিরুজ্ঝমানং নিরুদ্ধন্তি? নো, ননিরুদ্ধং ননিরুজ্ঝমানন্তি? উপ্পাদক্খণে অনাগতঞ্চ চিত্তং তথা. ননিরুজ্ঝমানং ননিরুদ্ধন্তিপি তথেৰ.

যস্স চিত্তং উপ্পজ্জমানং খণং খণং ৰীতিক্কন্তং অতিক্কন্তকালং, নিরুজ্ঝমানং খণং খণং ৰীতিক্কন্তং অতিক্কন্তকালং, তস্স চিত্তন্তি? নো চ ভঙ্গক্খণং ৰীতিক্কন্তং, অতীতং চিত্তং তদুভযং ৰীতিক্কন্তং, যস্স ৰা পন চিত্তং নিরুজ্ঝমানং খণং খণং ৰীতিক্কন্তং অতিক্কন্তকালং, উপ্পজ্জমানং খণং খণং ৰীতিক্কন্তং অতিক্কন্তকালং, তস্স চিত্তন্তি? অতীতং চিত্ত’’ন্তি ইমিনা নযেন পুগ্গলৰারে সব্বত্থ ৰিস্সজ্জননযো ৰেদিতব্বো.

তত্থ উপ্পজ্জমানং খণন্তি উপ্পজ্জমানস্স খণং, উপ্পাদক্খণন্তি অত্থো. খণং ৰীতিক্কন্তং ¶ অতিক্কন্তকালন্তি ন চিরং ৰীতিক্কন্তং, তমেৰ পন উপ্পাদক্খণং ৰীতিক্কন্তং হুত্ৰা অতিক্কন্তকালন্তি সঙ্খং গচ্ছতি, নিরুজ্ঝমানং খণন্তি নিরুজ্ঝমানস্স খণং, ভঙ্গক্খণন্তি অত্থো. খণং ৰীতিক্কন্তং অতিক্কন্তকালন্তি কিং তস্স চিত্তং এৰং নিরোধক্খণম্পি ৰীতিক্কন্তং হুত্ৰা অতিক্কন্তকালং নাম হোতীতি পুচ্ছতি. যস্স ভঙ্গক্খণে চিত্তং উপ্পাদক্খণং খণং ৰীতিক্কন্তং হুত্ৰা অতিক্কন্তকালং নাম হোতি, নিরোধক্খণং ৰীতিক্কন্তং হুত্ৰা অতিক্কন্তকালং নাম হোতি, অতীতং পন চিত্তং উভোপি খণে খণং ৰীতিক্কন্তং হুত্ৰা অতিক্কন্তকালং নাম হোতীতি অতীতচিত্তৰসেন ৰিস্সজ্জনং কতং. ইমিনাৰ উপাযেন উপরিমেসু অত্থধম্মৰারাদীসু চ সব্বৰিস্সজ্জনেসু অত্থো ৰেদিতব্বো. অযং অতিক্কন্তকালৰারে নযো.

যং চিত্তং উপ্পজ্জতি ননিরুজ্ঝতি, তং চিত্তং নিরুজ্ঝিস্সতি নুপ্পজ্জিস্সতীতি? আমন্তা. যং ৰা পন…পে… আমন্তা. যং চিত্তং নুপ্পজ্জতি নিরুজ্ঝতি, তং চিত্তং ননিরুজ্ঝিস্সতি উপ্পজ্জিস্সতীতি? নো. যং ৰা পন চিত্তং ননিরুজ্ঝিস্সতি উপ্পজ্জিস্সতি, তং চিত্তং নুপ্পজ্জতি নিরুজ্ঝতীতি? নত্থি.

যং ¶ চিত্তং উপ্পজ্জতি, তং চিত্তং উপ্পন্নন্তি? আমন্তা. যং ৰা পন…পে… উপ্পজ্জতীতি? উপ্পাদক্খণে চিত্তং তথা, এৰং পটিলোমপুচ্ছাসুপি ততো সেসাসুপি. ‘‘যং চিত্তং নুপ্পজ্জতি, তং চিত্তং নুপ্পন্নন্তি? অতীতানাগতং চিত্তং তথা. যং ৰা পন…পে… আমন্তা…পে… ভঙ্গক্খণে চিত্ত’’ন্তিআদিনা, ‘‘যং চিত্তং উপ্পজ্জতি, তং চিত্তং উপ্পজ্জিত্থাতি? নো. যং চিত্তং নুপ্পজ্জতি, তং চিত্তং নুপ্পজ্জিত্থাতি? ভঙ্গক্খণে চিত্তং অনাগতঞ্চা’’তিআদিনা, ‘‘যং চিত্তং উপ্পজ্জতি, তং চিত্তং উপ্পজ্জিস্সতীতি? নো. যং ৰা পন…পে… নো, যং চিত্তং নুপ্পজ্জতি, তং চিত্তং নুপ্পজ্জিস্সতীতি? অনাগতং চিত্তং নুপ্পজ্জতি, নো চ তং চিত্তং নুপ্পজ্জিস্সতি, ভঙ্গক্খণে চিত্তং অতীতং চিত্ত’’ন্তিআদিনা চ, ‘‘যং চিত্তং উপ্পজ্জিত্থ, তং চিত্তং উপ্পজ্জিস্সতীতি? নো. যং ৰা পন…পে… নো, যং চিত্তং নুপ্পজ্জিত্থ, তং চিত্তং নুপ্পজ্জিস্সতীতি? অনাগতং চিত্ত’’ন্তিআদিনা চ,

‘‘যং চিত্তং নিরুজ্ঝতি, তং চিত্তং নিরুজ্ঝিত্থাতি? নো’’তিআদিনা চ, ‘‘যং চিত্তং উপ্পজ্জতি, তং চিত্তং নিরুজ্ঝিত্থাতি? নো’’তিআদিনা চ, ‘‘যং চিত্তং উপ্পজ্জতি, তং চিত্তং নিরুজ্ঝিস্সতীতি ¶ ? আমন্তা’’তিআদিনা চ, ‘‘যং চিত্তং উপ্পজ্জিত্থ, তং চিত্তং নিরুজ্ঝিস্সতীতি? নো’’তিআদিনা চ,

‘‘যং চিত্তং উপ্পজ্জমানং, তং চিত্তং উপ্পন্নন্তি? আমন্তা. যং ৰা পন…পে… উপ্পজ্জমানন্তি…পে… উপ্পাদক্খণে চিত্ত’’ন্তিআদিনা চ, ‘‘যং চিত্তং নিরুজ্ঝমানং, তং চিত্তং উপ্পন্নন্তি? আমন্তা’’তিআদিনা চ, ‘‘যং চিত্তং উপ্পন্নং, তং চিত্তং উপ্পজ্জিত্থাতি? নো. যং ৰা পন…পে… নো’’তিআদিনা চ,

‘‘যং চিত্তং উপ্পজ্জিত্থ নো চ তং চিত্তং উপ্পন্নং, তং চিত্তং উপ্পজ্জিস্সতীতি? নো. যং ৰা পন…পে… নো. যং চিত্তং নুপ্পজ্জিত্থ নো চ তং চিত্তং নুপ্পন্নং, তং চিত্তং নুপ্পজ্জিস্সতীতি? আমন্তা’’তিআদিনা চ, ‘‘উপ্পন্নং উপ্পজ্জমানন্তি…পে… উপ্পাদক্খণে উপ্পন্নঞ্চেৰ উপ্পজ্জমানঞ্চ. উপ্পজ্জমানং উপ্পন্নন্তি? আমন্তা’’তিআদিনা চ, ‘‘নিরুদ্ধং নিরুজ্ঝমানন্তি? নো’’তিআদিনা চ,

‘‘যং ¶ চিত্তং উপ্পজ্জমানং খণং খণং ৰীতিক্কন্তং অতিক্কন্তকালং, নিরুজ্ঝমানং খণং খণং ৰীতিক্কন্তং অতিক্কন্তকালং, তং চিত্তন্তি…পে… অতীতং চিত্ত’’ন্তিআদিনা চ ধম্মৰারে,

‘‘যস্স যং চিত্তং উপ্পজ্জতি ন নিরুজ্ঝতি, তস্স তং চিত্তং নিরুজ্ঝিস্সতি নুপ্পজ্জিস্সতীতি? আমন্তা’’তিআদিনা চ পুগ্গলধম্মৰারে চ, সরাগাদিপদেহি, কুসলাদিপদেহি চ মিস্সেসু সব্বৰারেসু চ পুচ্ছাসু হেট্ঠা ৰুত্তানুসারেন ৰিস্সজ্জননযো ৰেদিতব্বো. অযং চিত্তযমকমাতিকত্থসংৰণ্ণনানযো.

ধম্মযমকমাতিকত্থৰণ্ণনা

ধম্মযমকমাতিকায পন খন্ধযমকে ৰুত্তনযেনেৰ পাল়িৰৰত্থানং ৰেদিতব্বং. ‘‘যো কুসলং ধম্মং ভাৰেতি, সো অকুসলং ধম্মং পজহতী’’তি আগতত্তা পনেত্থ পরিঞ্ঞাৰারো ভাৰনাৰারো নাম. তত্থ যস্মা অব্যাকতো ধম্মো নেৰ ভাৰেতব্বো ন পহাতব্বো, তস্মা পদমেৰ ন উদ্ধটন্তি ৰেদিতব্বং ¶ . পুচ্ছাৰিস্সজ্জনে পনেত্থ ‘‘কুসলাকুসলা ধম্মাতি? আমন্তা’’তিআদিনা, ‘‘ধম্মা অকুসলা ধম্মাতি? অকুসলা ধম্মা ধম্মা চেৰ অকুসলা ধম্মা চ, অৰসেসা ধম্মা ন অকুসলা ধম্মা’’তিআদিনা চ পণ্ণত্তিৰারে ৰিস্সজ্জননযো ঞাতব্বো.

‘‘যস্স কুসলা ধম্মা উপ্পজ্জন্তি, তস্স অকুসলা ধম্মা উপ্পজ্জন্তীতি? নো. যস্স ৰা পন…পে… যস্স কুসলা ধম্মা উপ্পজ্জন্তি, তস্স অব্যাকতা ধম্মা উপ্পজ্জন্তীতি? পঞ্চৰোকারে কুসলানং উপ্পাদক্খণে…পে… উপ্পজ্জন্তী’’তিআদিনা চ, ‘‘যত্থ কুসলা ধম্মা উপ্পজ্জন্তি, তত্থ অকুসলা ধম্মা উপ্পজ্জন্তীতি? আমন্তা…পে… তত্থ অব্যাকতা ধম্মা উপ্পজ্জন্তীতি? আমন্তা. যত্থ ৰা পন অব্যাকতা ধম্মা উপ্পজ্জন্তি, তত্থ কুসলা ধম্মা উপ্পজ্জন্তীতি ¶ …পে… চতুৰোকারে…পে… উপ্পজ্জন্তী’’তিআদিনা চ, ‘‘যস্স যত্থ কুসলা ধম্মা…পে… উপ্পজ্জন্তীতি? নো’’তিআদিনা চ,

‘‘যস্স কুসলা ধম্মা নুপ্পজ্জন্তি, তস্স অকুসলা ধম্মা নুপ্পজ্জন্তীতি…পে… সব্বেসং চিত্তস্স ভঙ্গক্খণে অব্যাকতচিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং কুসলা চ ধম্মা নুপ্পজ্জন্তি, অকুসলা চ ধম্মা নুপ্পজ্জন্তী’’তিআদিনা চ, ‘‘যস্স কুসলা ধম্মা নুপ্পজ্জন্তি, তস্স অব্যাকতা ধম্মা নুপ্পজ্জন্তীতি…পে… সব্বেসং চৰন্তানং পৰত্তে চিত্তস্স ভঙ্গক্খণে আরুপ্পে অকুসলানং উপ্পাদক্খণে চ নুপ্পজ্জন্তী’’তিআদিনা চ, ‘‘যত্থ কুসলা ধম্মা নুপ্পজ্জন্তি, তত্থ অকুসলা ধম্মা নুপ্পজ্জন্তীতি? আমন্তা…পে… তত্থ অব্যাকতা ধম্মা নুপ্পজ্জন্তীতি? উপ্পজ্জন্তি. যত্থ ৰা পন অব্যাকতা ধম্মা নুপ্পজ্জন্তি, তত্থ অকুসলা ধম্মা নুপ্পজ্জন্তীতি? নত্থী’’তিআদিনা চ উপ্পাদৰারে,

‘‘যস্স কুসলা ধম্মা নিরুজ্ঝন্তি, তস্স অকুসলা ধম্মা নিরুজ্ঝন্তীতি? নো’’তিআদিনা নিরোধৰারে চ,

‘‘যস্স কুসলা ধম্মা উপ্পজ্জন্তি, তস্স অকুসলা ধম্মা নিরুজ্ঝন্তীতি? নো’’তিআদিনা উপ্পাদনিরোধৰারে চ,

‘‘যো কুসলং ধম্মং ভাৰেতি, সো অকুসলং ধম্মং পজহিত্থাতি? নো…পে… যো কুসলং ধম্মং ¶ ন ভাৰেতি, সো অকুসলং ধম্মং নপ্পজহিত্থাতি? অগ্গমগ্গসমঙ্গিঞ্চ অরহন্তঞ্চ ঠপেত্ৰা অৰসেসা পুগ্গলা’’তিআদিনা ভাৰনাৰারে চ পুচ্ছাৰিস্সজ্জননযো হেট্ঠা ৰুত্তানুসারেন ঞাতব্বো.

অত্থৰিনিচ্ছযে পনেত্থ ইদং লক্খণং. ইমস্স হি ধম্মযমকস্স পৰত্তিমহাৰারে উপ্পজ্জন্তি নিরুজ্ঝন্তীতি ইমেসু উপ্পাদনিরোধেসু কুসলাকুসলধম্মা তাৰ একন্তেন পৰত্তিযংযেৰ লব্ভন্তি, ন চুতিপটিসন্ধীসু, অব্যাকতধম্মা পন পৰত্তে ¶ চ চুতিপটিসন্ধীসু চাতি তীসুপি কালেসু লব্ভন্তি, এৰমেত্থ যং যত্থ যত্থ লব্ভতি, তস্স ৰসেন তত্থ তত্থ ৰিনিচ্ছযো ৰেদিতব্বো.

তত্রিদং নযমুখং – কুসলাকুসলানং তাৰ একক্খণে অনুপ্পজ্জনতো ‘‘নো’’তি পটিসেধো কতো. অব্যাকতা চাতি ইদং চিত্তসমুট্ঠানরূপং সন্ধায ৰুত্তং. যত্থ কুসলা ধম্মা নুপ্পজ্জন্তীতি অসঞ্ঞভৰং সন্ধায ৰুত্তং, অব্যাকতানং ধম্মানং অনুপ্পত্তিট্ঠানস্সাভাৰা ‘‘নত্থী’’তি পটিক্খেপো কতো, নিরোধৰারে কুসলাকুসলানং একতো অনিরুজ্ঝনতো ‘‘নো’’তি ৰুত্তন্তি ইমিনাৰ নযমুখেন সব্বত্থ ৰিনিচ্ছযো ৰেদিতব্বো. অযং ধম্মযমকমাতিকত্থসংৰণ্ণনানযো.

ইন্দ্রিযযমকমাতিকত্থৰণ্ণনা

ইন্দ্রিযযমকমাতিকাযং পন খন্ধযমকমাতিকাদীসু ৰুত্তনযেনেৰ পাল়িৰৰত্থানাদিকো সব্বো অত্থসংৰণ্ণনানযো ৰেদিতব্বো. মনিন্দ্রিযং পনেত্থ যথা চক্খুন্দ্রিযাদিমূলকেহি, তথেৰ ইত্থিন্দ্রিযাদিমূলকেহি সদ্ধিং সম্পযোগং গচ্ছতি, তস্মা নিক্খিত্তপটিপাটিযা অযোজেত্ৰা সব্বেহিপি চক্খুন্দ্রিযমূলাদীহি সদ্ধিং পরিযোসানে যোজিতং, চক্খুন্দ্রিযেন চ সদ্ধিং সুখিন্দ্রিযদুক্খিন্দ্রিযদোমনস্সিন্দ্রিযানি, লোকুত্তরিন্দ্রিযানি চ পটিসন্ধিযং নত্থীতি ন গহিতানি. যথা চেত্থ, এৰং সেসিন্দ্রিযমূলকেসুপি যথানুরূপং ঞাতব্বং. ইন্দ্রিযানং পন বহুকতায ধাতুযমকতোপি বহুতরানি যমকানি হোন্তি অযং ৰিসেসো, সেসং হেট্ঠা ৰুত্তানুসারেন ঞাতব্বন্তি. অযং ইন্দ্রিযযমকমাতিকত্থসংৰণ্ণনানযো.

মোহৰিচ্ছেদনিযা অভিধম্মমাতিকত্থৰণ্ণনায

যমকমাতিকত্থৰণ্ণনা নিট্ঠিতা.

৭. পট্ঠানমাতিকত্থৰণ্ণনা

ইদানি ¶ ¶ পট্ঠানমাতিকায অত্থসংৰণ্ণনানযো হোতি. কেনট্ঠেন পট্ঠানন্তি? নানপ্পকারপচ্চযট্ঠেন. প-সদ্দো হি নানপ্পকারত্থং দীপেতি, ঠান-সদ্দো পচ্চযত্থং. অথ ৰা ৰিভজনট্ঠেন পট্ঠানং. যথা হি পঞ্ঞাপনা পট্ঠপনা ৰিৰরণা ৰিভজনা উত্তানীকম্মন্তি আগতট্ঠানে ৰিভজনট্ঠো পট্ঠানসদ্দসমানত্থো পট্ঠপনা-সদ্দো দিস্সতি, এৰমিধাপি কুসলাদীনং ধম্মানং হেতুপচ্চযাদীহি ৰিভজনতো ৰিভজনট্ঠেন পট্ঠানং নাম. অথ ৰা পট্ঠিতট্ঠেন পট্ঠানং, গমনট্ঠেনাতি অত্থো. সব্বধম্মেসু হি অসঙ্গগমনস্স সব্বঞ্ঞুতঞ্ঞাণস্স হেতুপচ্চযাদিভেদভিন্নেসু কুসলাদীসু ৰিত্থারিতনযলাভতো নিস্সঙ্গৰসেন পৰত্তগমনত্তা গমনট্ঠেন পট্ঠানং নাম, ইতি নানপ্পকারপচ্চযট্ঠেন, ৰিভজনট্ঠেন, গমনট্ঠেন চ তিকপট্ঠানাদীসু চতুৰীসতিযা পট্ঠানেসু একেকম্পি পট্ঠানং নাম, তেসং পন সমূহতো পকরণং পট্ঠানং নাম, তেসং পট্ঠানানং মাতিকা. সযম্পি ৰা পট্ঠানভূতা মাতিকা, সব্বম্পেতং পট্ঠানমাতিকা. যা সা ‘‘হেতুপচ্চযো, আরম্মণপচ্চযো…পে… অৰিগতপচ্চযো’’তি এৰং তিকপট্ঠানাদিচতুৰীসতিপ্পভেদসমন্তপট্ঠানদেসনায মূলভূতপচ্চযভেদস্স ৰসেন ভগৰতা পকরণস্স আদিম্হি ঠপিতা, অযং ইধ পট্ঠানমাতিকা নাম.

তত্থ অনুত্তানত্থাদিসহিতো সঙ্খেপত্থৰিনিচ্ছযো তাৰ এৰং ৰেদিতব্বো – হেতুপচ্চযোতিআদীসু হি হেতু চ সো পচ্চযো চাতি হেতুপচ্চযো, হেতু হুত্ৰা পচ্চযো হেতুপচ্চযো, হেতুভাৰেন পচ্চযোতি ৰুত্তং হোতি. তত্থ হেতূতি ৰচনাৰযৰকারণমূলানমেতং অধিৰচনং. ‘‘পটিঞ্ঞাহেতূ’’তিআদীসু হি লোকে ৰচনাৰযৰো ‘‘হেতূ’’তি ৰুচ্চতি, সাসনে পন ‘‘যে ধম্মা হেতুপ্পভৰা’’তিআদীসু ¶ (মহাৰ. ৬০; অপ. থের ১.১.২৮৬) কারণং, ‘‘তযো কুসলা হেতূ, তযো অকুসলা হেতূ’’তিআদীসু (ধ. স. ১০৫৯) মূলং, ইদং ইধ অধিপ্পেতং ¶ , তং পটিচ্চ এতস্মা এতীতি পচ্চযো, অপচ্চক্খায নং ৰত্ততীতি অত্থো. যো হি ধম্মো যং ধম্মং পটিচ্চ অপচ্চক্খায তিট্ঠতি ৰা উপ্পজ্জতি ৰা, সো তস্স উপকারকলক্খণেন পচ্চযো নাম. ইতি মূলট্ঠেন হেতু, উপকারকট্ঠেন পচ্চযোতি সঙ্খেপতো মূলট্ঠেন উপকারকো ধম্মো হেতুপচ্চযো, কুসলাদীনং কুসলাদিভাৰসাধকোতি কেচি, এৰং সন্তে পন তংসমুট্ঠানরূপেসু হেতুপচ্চযতা ন সম্পজ্জতি, অহেতুকচিত্তানঞ্চ ৰিনা এতেহি অব্যাকতভাৰো সিদ্ধো, সহেতুকানম্পি চ যোনিসোমনসিকারাদিপটিবদ্ধো কুসলাদিভাৰো, ন সম্পযুত্তহেতুপটিবদ্ধো. যদি চ সিযা, হেতূসুপি কুসলাদিভাৰসাধকেন অঞ্ঞেন ভৰিতব্বং, কুসলাদিভাৰসাধনৰসেন পন হেতূনং মূলট্ঠং অগ্গহেত্ৰা সুপ্পতিট্ঠিতভাৰসাধনৰসেন গয্হমানে ন কিঞ্চি ৰিরুজ্ঝতি. লদ্ধহেতুপচ্চযা হি ধম্মা ৰিরুল়্হমূলা ৰিয পাদপা থিরা হোন্তি সুপ্পতিট্ঠিতা, ইতরে পন তিলবীজকাদিসেৰালা ৰিয ন সুপ্পতিট্ঠিতা, ইতি মূলট্ঠেন উপকারকোতি সুপ্পতিট্ঠিতভাৰসাধনেন উপকারকো ধম্মো হেতুপচ্চযোতি ৰেদিতব্বো.

নিদ্দেসে ‘‘হেতূ হেতুসম্পযুত্তকানং ধম্মানং তংসমুট্ঠানানঞ্চ রূপানং হেতুপচ্চযেন পচ্চযো’’তি ৰুত্তং, তত্থ ‘‘চিত্তসমুট্ঠানান’’ন্তি অৰত্ৰা ‘‘তংসমুট্ঠানান’’ন্তি ইদং অচিত্তসমুট্ঠানানম্পি সঙ্গণ্হনত্থং. পঞ্হাৰারস্মিং হি ‘‘পটিসন্ধিক্খণে ৰিপাকাব্যাকতা হেতূ সম্পযুত্তকানং খন্ধানং কটত্তা চ রূপানং হেতুপচ্চযেন পচ্চযো’’তি আগতং, কস্মা পনাযং হেতু পটিসন্ধিযমেৰ কটত্তারূপানং হেতুপচ্চযেন পচ্চযো হোতি ¶ , ন পৰত্তেতি? পটিসন্ধিযং কম্মজরূপানং চিত্তপটিবদ্ধৰুত্তিতায, ভৰপঠমনিপাততো চিত্তজাতি. ইতররূপসন্ততিউপ্পত্থম্ভাভাৰেন এৰ দুব্বলৰত্থুং চিত্তমেৰ নিস্সায উপ্পজ্জতি চেৰ তিট্ঠতি চ. তং চিত্তম্পি হি পটিসন্ধিক্খণে কম্মৰেগক্খিত্ততায চেৰ অপুরেজাতৰত্থুকতায চ অপ্পতিট্ঠিতং, পপাতে পতিতমত্তকো পুরিসো ন কিঞ্চি সিপ্পং কাতুং ৰিয চিত্তজরূপং জনেতুং ন সক্কোতি, তমেৰ কটত্তারূপং নিস্সায পতিট্ঠাতি. পটিসন্ধিচিত্তানি হি রূপং ন জনেন্তি, কম্মজরূপমেৰ পন তেসং চিত্তসমুট্ঠানরূপট্ঠানে তিট্ঠতি, পৰত্তিযং পন পটিলদ্ধুপত্থম্ভতায তং রূপং ৰিনাপি কম্মপটিবদ্ধাৰ পৰত্তি, হেতুপচ্চযস্স পনেত্থ কুসলাদিভেদতো, ভূমিভেদতো চ ৰিভাগো হেট্ঠা ৰুত্তনযেনেৰ ৰেদিতব্বোতি অযং হেতুপচ্চযে নযো.

ততো পরেসু আরম্মণভাৰেন উপকারকো ধম্মো আরম্মণপচ্চযো, সো নিদ্দেসে ‘‘রূপাযতনং চক্খুৰিঞ্ঞাণধাতুযা…পে… ফোট্ঠব্বাযতনং কাযৰিঞ্ঞাণধাতুযা তংসম্পযুত্তকানঞ্চ ¶ ধম্মানং…পে… রূপাযতনং সদ্দগন্ধরসফোট্ঠব্বাযতনং মনোধাতুযা…পে… সব্বে ধম্মা মনোৰিঞ্ঞাণধাতুযা…পে… যং যং ধম্মং আরব্ভ যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং আরম্মণপচ্চযেন পচ্চযো’’তি এৰং নিদ্দিট্ঠত্তা ন কোচি ধম্মো ন হোতি. যথা হি দুব্বলপুরিসো দণ্ডং ৰা রজ্জুং ৰা আলম্বিত্ৰা উট্ঠহতি চেৰ তিট্ঠতি চ, এৰং চিত্তচেতসিকা ধম্মা রূপাদীসু ছসু যং কিঞ্চি আলম্বিত্ৰা উপ্পজ্জন্তি চেৰ তিট্ঠন্তি চ, তস্মা লোকিযলোকুত্তরাদিভেদা সব্বেপি ধম্মা যথাযোগং চিত্তচেতসিকানং আরম্মণপচ্চযোতি ৰেদিতব্বোতি অযং আরম্মণপচ্চযে নযো.

জেট্ঠকট্ঠেন উপকারকো ধম্মো অধিপতিপচ্চযো, সো নিদ্দেসে ‘‘ছন্দাধিপতি ছন্দসম্পযুত্তকানং ধম্মানং তংসমুট্ঠানানঞ্চ ¶ রূপানং…পে… ৰীরিযচিত্তৰীমংসাধিপতি…পে… অধিপতিপচ্চযেন পচ্চযো, যং যং ধম্মং গরুং কত্ৰা যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং অধিপতিপচ্চযেন পচ্চযো’’তি এৰং দ্ৰিধা নিদ্দিট্ঠো. তত্থ ছন্দাদযো সহজাতাধিপতিভাৰেন ৰুত্তা, গরুকাতব্বং আরম্মণাধিপতিভাৰেন. তত্থ চ লোকিযকুসলভূতো আরম্মণাধিপতি লোকিযকুসলানঞ্চেৰ লোভসহগতচিত্তানঞ্চ আরম্মণাধিপতি হোতি, নাঞ্ঞস্স, অকুসলভূতো পন লোভসহগতচিত্তুপ্পাদোতি ৰুচ্চতি ইতরেসু গরুকাতব্বতায অভাৰতো, সো দ্ৰিহেতুকাহেতুকাদিলোকিযৰিপাকরূপক্খন্ধভূতো চ লোভসহগতস্সেৰ, নাঞ্ঞস্স, তথা কিরিযভূতোপীতি অট্ঠকথাযং আগতং, তং ঞাণসম্পযুত্তকিরিযানং সব্বঞ্ঞুতঞ্ঞাণাভিঞ্ঞাদিপুব্বৰসপ্পৰত্তানং কামাৰচরকুসলেহি গরুকাতব্বভাৰস্সাৰিরোধভাৰস্স দস্সনতো ৰীমংসিতব্বং. লোকুত্তরকুসলানি পন কামাৰচরঞাণসম্পযুত্তজৰনানমেৰ আরম্মণাধিপতিপচ্চযা হোন্তি, নিব্বানং পন তেসঞ্ঞেৰ লোকুত্তরকুসলৰিপাকানঞ্চাতি ৰেদিতব্বন্তি অযং অধিপতিপচ্চযে নযো.

অনন্তরভাৰেন উপকারকো ধম্মো অনন্তরপচ্চযো, সোৰ সমনন্তরপচ্চযো, ব্যঞ্জনমত্তমেৰ নানং ‘‘উপচযসন্ততী’’তিআদীসু ৰিয. যম্পি ‘‘অত্থানন্তরতায অনন্তরপচ্চযো, কালানন্তরতায সমনন্তরপচ্চযো’’তি আচরিযানং মতং, তং ‘‘নিরোধা ৰুট্ঠহন্তস্স নেৰসঞ্ঞানাসঞ্ঞাযতনকুসলং ফলসমাপত্তিযা সমনন্তরপচ্চযেন পচ্চযো’’তিআদীহি ৰিরুজ্ঝতি, তংনিদ্দেসে ‘‘চক্খুৰিঞ্ঞাণধাতু তংসম্পযুত্তকা চ ধম্মা মনোধাতুযা…পে… কাযৰিঞ্ঞাণধাতু…পে… মনোধাতু…পে… মনোৰিঞ্ঞাণধাতুযা…পে… পুরিমা পুরিমা কুসলা ¶ ধম্মা পচ্ছিমানং পচ্ছিমানং ¶ কুসলানং ধম্মানং…পে… অব্যাকতানং ধম্মানং…পে… পুরিমা পুরিমা অকুসলা ধম্মা পচ্ছিমানং পচ্ছিমানং অকুসলানং…পে… অব্যাকতানং…পে… যেসং যেসং ধম্মানং অনন্তরা যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং অনন্তরপচ্চযেন পচ্চযো’’তি ইমিনা অনন্তরপচ্চযনিদ্দেসসমকো এৰ সমনন্তরপচ্চযো নিদ্দিট্ঠো অঞ্ঞত্র নামনানাত্তাতি অযং অনন্তরসমনন্তরপচ্চযদ্ৰযে নযো.

উপ্পজ্জমানোৰ সহ উপ্পজ্জমানভাৰেন উপকারকো ধম্মো সহজাতপচ্চযো, সো নিদ্দেসে ‘‘চত্তারো খন্ধা অরূপিনো অঞ্ঞমঞ্ঞং সহজাতপচ্চযেন পচ্চযো, চত্তারো মহাভূতা অঞ্ঞমঞ্ঞং…পে… ওক্কন্তিক্খণে নামরূপং অঞ্ঞমঞ্ঞং…পে… চিত্তচেতসিকা ধম্মা চিত্তসমুট্ঠানানং রূপানং…পে… মহাভূতা উপাদারূপানং…পে… রূপিনো ধম্মা অরূপীনং ধম্মানং কিঞ্চিকালে সহজাতপচ্চযেন পচ্চযো, কিঞ্চিকালে নসহজাতপচ্চযেন পচ্চযো’’তি এৰং ছব্বিধো নিদ্দিট্ঠো. তত্থ অঞ্ঞমঞ্ঞন্তি ইমিনা তেসং ধম্মানং একক্খণে পচ্চযভাৰঞ্চেৰ পচ্চযুপ্পন্নভাৰঞ্চ দীপেতি, পটিসন্ধিক্খণে ৰত্থুরূপং রূপং নাম. চিত্তচেতসিকাতি পৰত্তিযং চত্তারো খন্ধা, পটিসন্ধিযম্পীতি কেচি তত্থ কটত্তারূপানম্পি চিত্তসমুট্ঠানে পৰিট্ঠত্তা. তেসং হি পটিসন্ধিচিত্তচেতসিকা সহজাতপচ্চযা হোন্তিযেৰ, তানি পন ৰত্থুৰিরহিতানি রূপানি পৰত্তিযং চিত্তসমুট্ঠানানং ৰিয চিত্তচেতসিকানং পচ্চযত্থং ন ফরন্তি, তস্মা ‘‘অঞ্ঞমঞ্ঞ’’ন্তি ন ৰুত্তং, তথা ভূতানং উপাদারূপং. এৰং হি অগয্হমানে পটিসন্ধিযং কটত্তারূপানং সহজাতা নাম নিস্সযতা ন ৰুত্তাতি সহজাতপচ্চযনিদ্দেসো অপরিপুণ্ণো এৰ সিযা. কিঞ্চিকালেতি ইদম্পি ওক্কন্তিক্খণে হদযৰত্থুমেৰ সন্ধায ৰুত্তত্তা ততিযকোট্ঠাসমেৰ ভজতীতি অত্থতো অযং পচ্চযো পঞ্চৰিধোতি অযং সহজাতপচ্চযে নযো.

অঞ্ঞমঞ্ঞং ¶ উপ্পাদনুপত্থম্ভনভাৰেন উপকারকো ধম্মো অঞ্ঞমঞ্ঞপচ্চযো তিদণ্ডকং ৰিয. সো নিদ্দেসে ‘‘চত্তারো খন্ধা অরূপিনো অঞ্ঞমঞ্ঞপচ্চযেন পচ্চযো, চত্তারো মহাভূতা…পে… ওক্কন্তিক্খণে নামরূপং অঞ্ঞমঞ্ঞপচ্চযেন পচ্চযো’’তি এৰং তিধা নিদ্দিট্ঠোতি অযং অঞ্ঞমঞ্ঞপচ্চযে নযো.

অধিট্ঠানাকারেন, নিস্সযাকারেন চ উপকারকো ধম্মো নিস্সযপচ্চযো তরুচিত্তকম্মাদীনং পথৰীপটাদযো ৰিয, সো নিদ্দেসে সহজাতপচ্চযে ৰিয ছধাৰ নিদ্দিট্ঠো. ছট্ঠো পনেত্থ কোট্ঠাসো ‘‘চক্খাযতনং ¶ চক্খুৰিঞ্ঞাণধাতুযা, সোতঘানজিৰ্হাকাযাযতনং কাযৰিঞ্ঞাণধাতুযা…পে… যং রূপং নিস্সায মনোধাতু চ মনোৰিঞ্ঞাণধাতু চ ৰত্তন্তি, তং রূপং মনোধাতুযা চ মনোৰিঞ্ঞাণধাতুযা চ তংসম্পযুত্তকানঞ্চ ধম্মানং নিস্সযপচ্চযেন পচ্চযো’’তি এৰং পুরেজাতনিস্সযদস্সনৰসেন ৰিভত্তো, সেসং তাদিসমেৰ. তত্থ রূপন্তি হদযৰত্থু.

উপনিস্সযপচ্চযোতি এত্থ পনাযং ৰচনত্থো – তদধীনৰুত্তিতায অত্তনো ফলেন নিস্সিতো, নপ্পটিক্খিত্তোতি নিস্সযো, যথা পন ভুসো আযাসো উপাযাসো, এৰং ভুসো নিস্সযো উপনিস্সযো, বলৰকারণস্সেতং অধিৰচনং, তস্মা বলৰকারণভাৰেন উপকারকো ধম্মো উপনিস্সযপচ্চযোতি ৰেদিতব্বো. সো আরম্মণূপনিস্সযো অনন্তরূপনিস্সযো পকতূপনিস্সযোতি তিৰিধো হোতি. তত্থ আরম্মণূপনিস্সযো তাৰ আরম্মণাধিপতিনা সদ্ধিং নানত্তং অকত্ৰা ৰিভত্তো. তত্থ যং আরম্মণং গরুং কত্ৰা চিত্তচেতসিকা উপ্পজ্জন্তি, তং নিযমতো তেসং আরম্মণেসু বলৰারম্মণং হোতি, ইতি গরুকাতব্বমত্তট্ঠেন আরম্মণাধিপতি, বলৰকারণট্ঠেন আরম্মণূপনিস্সযোতি এৰমেতেসং নানত্তং ৰেদিতব্বং.

অনন্তরূপনিস্সযোপি ¶ অনন্তরপচ্চযেন নানত্তং অকত্ৰাৰ ৰিভত্তো, এৰং সন্তেপি অত্তনো অত্তনো অনন্তরং অনুরূপস্স চিত্তুপ্পাদস্স পৰত্তনসমত্থতায অনন্তরতা, পুরিমচিত্তস্স পচ্ছিমচিত্তুপ্পাদনে বলৰতায অনন্তরূপনিস্সযতা চ ৰেদিতব্বা. যথা হি হেতুপচ্চযাদীসু কঞ্চি ধম্মং ৰিনাপি চিত্তং উপ্পজ্জতি, ন এৰং অনন্তরচিত্তং ৰিনা চিত্তস্স উপ্পত্তি নাম অত্থি, তস্মা বলৰপচ্চযো হোতি, ইতি বলৰকারণট্ঠেন অনন্তরোৰ অনন্তরূপনিস্সযোতি এৰমেতেসং নানত্তং ৰেদিতব্বং.

পকতো উপনিস্সযো পকতূপনিস্সযো, পকতো নাম অত্তনো সন্তানে উপ্পাদিতো ৰা সদ্ধাসীলাদিউপসেৰিতো ৰা উতুভোজনাদিপকতিযাযেৰ ৰা উপনিস্সযো পকতূপনিস্সযো, ইতি পরূপনিস্সযেন অমিস্সোতি অত্থো. সো চ পকতূপনিস্সযো ‘‘সদ্ধং উপনিস্সায দানং দেতি, সীলং সমাদিযতি, উপোসথকম্মং করোতি, ঝানং উপ্পাদেতি; ৰিপস্সনং, মগ্গং, অভিঞ্ঞং, সমাপত্তিং উপ্পাদেতি; সীলং, সুতং, চাগং, পঞ্ঞং উপনিস্সায দানং দেতি…পে… সমাপত্তিং উপ্পাদেতী’’তিআদিনা ইমেসং সদ্ধাদীনং ৰসেন বহুধা ৰিভত্তো, এৰং উপনিস্সযপচ্চযো তিৰিধো. নিদ্দেসে পনাযং ‘‘পুরিমা পুরিমা কুসলা ধম্মা পচ্ছিমানং পচ্ছিমানং কুসলানং ধম্মানং ¶ …পে… অকুসলানং কেসঞ্চি…পে… অব্যাকতানং ধম্মানং…পে… পুরিমা পুরিমা অকুসলা ধম্মা পচ্ছিমানং পচ্ছিমানং অকুসলানং…পে… কুসলানং কেসঞ্চি…পে… অব্যাকতানং ধম্মানং…পে… পুরিমা পুরিমা অব্যাকতা ধম্মা…পে… অব্যাকতানং, কুসলানং, অকুসলানং উপনিস্সযপচ্চযেন পচ্চযো, পুগ্গলোপি উপনিস্সযপচ্চযেন পচ্চযো, সেনাসনম্পী’’তি এৰং নিদ্দিট্ঠো. তত্থ পুরিমাতি অনন্তরূপনিস্সযে সমনন্তরাতীতাৰ লব্ভন্তি.

আরম্মণূপনিস্সযপকতূপনিস্সযেসু ¶ পন নানাৰিধিৰসেন পুরিমতরাৰাতি তযোপি রাসী কুসলেন কুসলপদে লব্ভন্তি. কুসলেন পনাকুসলে সমনন্তরাতীতা ন লব্ভন্তি, তেনাহ ‘‘কেসঞ্চী’’তি. ইদং হি ‘‘কুসলো ধম্মো অকুসলস্স ধম্মস্স আরম্মণূপনিস্সযো পকতূপনিস্সযো, আরম্মণূপনিস্সযো পন দানং দত্ৰা…পে… তং গরুং কত্ৰা রাগো উপ্পজ্জতি…পে… পকতূপনিস্সযো সদ্ধং উপনিস্সায মানং জপ্পেতী’’তিআদিনা পঞ্হাৰারে আগতং ইমং নযং সন্ধায ৰুত্তং.

অকুসলেন কুসলপদে হি সমনন্তরাতীতা ন লব্ভন্তি, তেনাহ ‘‘কেসঞ্চী’’তি. ইদং পন ‘‘অকুসলো ধম্মো কুসলস্স ধম্মস্স পকতূপনিস্সযো. রাগং উপনিস্সায দানং দেতি…পে… পাণং হন্ত্ৰা তস্স পটিঘাতত্থায দানং দেতী’’তিআদিনা নযেন পঞ্হাৰারে আগতং পকতূপনিস্সযমেৰ সন্ধায ৰুত্তং. যথা হি অকুসলং কুসলস্স অনন্তরূপনিস্সযো ন হোতি, তথা আরম্মণূপনিস্সযোপি ন হোতি. ন হি তং গরুং কত্ৰা কুসলং পৰত্ততি.

অকুসলেন অব্যাকতপদে পন আরম্মণূপনিস্সযোৰ ন লব্ভতি. ন হি তং অব্যাকতা গরুং করোন্তি, অনন্তরা পনস্স হোন্তি. তেনেৰেত্থ ‘‘কেসঞ্চী’’তি ন ৰুত্তং. সেসপদেসু তযোপি উপনিস্সযা লব্ভন্তেৰ. ‘‘পুগ্গলোপি, সেনাসনম্পী’’তি ইদম্পি দ্ৰযং পকতূপনিস্সযৰসেনেৰেত্থ ৰুত্তং, উতুভোজনাদযো চেত্থ সঙ্গহেতব্বা. ইমস্মিঞ্চ পচ্চযে একচ্চায পঞ্ঞত্তিযা সদ্ধিং সব্বেপি চতুভূমকা ধম্মা সঙ্গহিতাতি ৰেদিতব্বাতি অযং উপনিস্সযপচ্চযে নযো.

পঠমতরং উপ্পজ্জিত্ৰা ৰত্তমানভাৰেন উপকারকা রূপধম্মা পুরেজাতপচ্চযো, সো পসাদতব্বিসযহদযৰত্থুৰসেন একাদসৰিধো. নিদ্দেসে চ ‘‘চক্খাযতনং চক্খুৰিঞ্ঞাণধাতুযা ¶ তংসম্পযুত্তকানঞ্চ ধম্মানং পুরেজাতপচ্চযেন পচ্চযো…পে… কাযাযতনং কাযৰিঞ্ঞাণধাতুযা ¶ …পে… রূপাযতনং চক্খুৰিঞ্ঞাণধাতুযা…পে… ফোট্ঠব্বাযতনং কাযৰিঞ্ঞাণধাতুযা…পে… রূপাযতনং সদ্দগন্ধরসফোট্ঠব্বাযতনং মনোধাতুযা…পে… যং রূপং নিস্সায…পে… তং রূপং মনোধাতুযা চ মনোৰিঞ্ঞাণধাতুযা চ কিঞ্চিকালে পুরেজাতপচ্চযেন পচ্চযো, কিঞ্চিকালে ন পুরেজাতপচ্চযেন পচ্চযো’’তি এৰং সব্বথাপি পঞ্চদ্ৰারে ৰত্থারম্মণৰসেন, মনোদ্ৰারে ৰত্থুৰসেনেৰ চাযং নিদ্দিট্ঠো. পঞ্হাৰারে পন আরম্মণপুরেজাতং ‘‘অরহা চক্খুং অনিচ্চতো দুক্খতো অনত্ততো ৰিপস্সতী’’তি আগতত্তা মনোদ্ৰারেপি অট্ঠারসন্নং রূপানং ৰসেন আরম্মণপুরেজাতম্পি লব্ভতেৰাতি অযং পুরেজাতপচ্চযে নযো.

পুরেজাতানং রূপধম্মানং উপত্থম্ভকট্ঠেন উপকারকো অরূপধম্মো পচ্ছাজাতপচ্চযো গিজ্ঝপোতকসরীরানং আহারাসা চেতনা ৰিয. নিদ্দেসেপি চস্স ‘‘পচ্ছাজাতা চিত্তচেতসিকা ধম্মা পুরেজাতস্স ইমস্স কাযস্স পচ্ছাজাতপচ্চযেন পচ্চযো’’তি এৰং ৰুত্তং. তত্থ ইমস্স কাযস্সাতি চতুসমুট্ঠানিকতিসমুট্ঠানিকভূতুপাদাযরূপকাযস্স. ধম্মতো চাযং ঠপেত্ৰা পটিসন্ধিৰিপাকে আরুপ্পৰিপাকে অৰসেসা সব্বে চতুভূমকা অরূপধম্মাতি ৰেদিতব্বাতি অযং পচ্ছাজাতপচ্চযে নযো.

আসেৰনট্ঠেন অনন্তরানং পগুণবলৰভাৰেন উপকারকো ধম্মো আসেৰনপচ্চযো গন্থাদিপুরিমাভিযোগো ৰিয. সো কুসলাকুসলকিরিযজৰনৰসেন তিৰিধো. নিদ্দেসে পনস্স ‘‘পুরিমা পুরিমা কুসলা ধম্মা পচ্ছিমানং পচ্ছিমানং কুসলানং ধম্মানং…পে… অকুসলানং ধম্মানং…পে… কিরিযাব্যাকতানং ধম্মানং আসেৰনপচ্চযেন পচ্চযো’’তি নিদ্দিট্ঠো. তত্থ পুরিমা পুরিমাতি সব্বত্থ সমনন্তরাতীতাৰ দট্ঠব্বা, তত্থাপি ¶ কুসলাদযো অব্যাকতাদীনং ভিন্নজাতিকানং সমনন্তরানম্পি ৰাসনাসঙ্খাতেন আসেৰনেন পগুণতরবলৰভাৰৰিসিট্ঠং অত্তনো কুসলাদিভাৰসঙ্খাতগতিং গাহাপেতুং অসমত্থতায আসেৰনপচ্চযা ন হোন্তি, ভূমিতো, পন আরম্মণতো চ ভিন্নাপি কামাৰচরতিহেতুককুসলকিরিযা অত্তনা সদিসৰেদনানমেৰ মহগ্গতলোকুত্তরকুসলকিরিযানম্পি, সঙ্খারারম্মণঞ্চ অনুলোমকুসলং নিব্বানারম্মণস্স গোত্রভুকুসলস্স আসেৰনপচ্চযা হোন্তিযেৰ. লোকুত্তরো পন আসেৰনপচ্চযো নত্থি, তথা ৰিপাকো কম্মপরিণামিতত্তাতি অযং আসেৰনপচ্চযে নযো.

চিত্তপ্পযোগসঙ্খাতেন কিরিযভাৰেন উপকারকো ধম্মো কম্মপচ্চযো. সো নানক্খণিকায ¶ কুসলাকুসলচেতনায চেৰ সহজাতায চ সব্বাযপি চেতনায ৰসেন দুৰিধো হোতি. নিদ্দেসেপি চস্স ‘‘কুসলাকুসলং কম্মং ৰিপাকানং খন্ধানং কটত্তা চ রূপানং…পে… চেতনা সম্পযুত্তকানং ধম্মানং তংসমুট্ঠানানঞ্চ রূপানং কম্মপচ্চযেন পচ্চযো’’তি দ্ৰিধাৰ ৰুত্তো. তত্থ কম্মন্তি চেতনাকম্মমেৰ. কটত্তা চ রূপানন্তি কম্মস্স কটত্তা উপচিতত্তা নিপ্ফাদিতত্তা উপ্পন্নানং কম্মজানং রূপানং কটত্তা এৰ, কম্মম্পি কালন্তরেযেৰ অৰসেসপচ্চযসমাযোগে সতি অত্তনো ফলং উপ্পাদেতি, ন তু ৰিনট্ঠত্তা ঠিতত্তা তং ৰা ঠিতং পন কম্মং ন জনেতি. এৰং তংসমুট্ঠানন্তি ইমিনা পটিসন্ধিযং কটত্তারূপগ্গহণং দট্ঠব্বন্তি অযং কম্মপচ্চযে নযো.

নিরুস্সাহসন্তভাৰেন নিরুস্সাহসন্তভাৰায উপকারকো ৰিপাকধম্মো ৰিপাকপচ্চযো. সো পৰত্তে চিত্তসমুট্ঠানানং, পটিসন্ধিক্খণে কটত্তারূপানং, সব্বত্থ চ সম্পযুত্তধম্মানং পচ্চযো হোতি. যথাহ সব্বপঞ্হাৰারে – ‘‘ৰিপাকাব্যাকতো ¶ একো খন্ধো তিণ্ণন্নং খন্ধানং চিত্তসমুট্ঠানানঞ্চ রূপানং পটিসন্ধিক্খণে…পে… কটত্তা চ রূপানং ৰিপাকপচ্চযেন পচ্চযো’’তিআদি. নিদ্দেসে পনস্স ‘‘ৰিপাকা চত্তারো খন্ধা অরূপিনো অঞ্ঞমঞ্ঞং ৰিপাকপচ্চযেন পচ্চযো’’তি এত্তকমেৰ ৰুত্তং. তং পঞ্হাৰারে ৰুত্তৰিধানং সন্ধায সাৰসেসং ৰুত্তন্তি অযং ৰিপাকপচ্চযে নযো.

রূপারূপানং উপত্থম্ভকট্ঠেন উপকারকা চত্তারো আহারা আহারপচ্চযো. নিদ্দেসে পন ‘‘কবল়ীকারো আহারো ইমস্স কাযস্স…পে… অরূপিনো আহারা সম্পযুত্তকানং ধম্মানং তংসমুট্ঠানানঞ্চ রূপানং আহারপচ্চযেন পচ্চযো’’তি এৰং নিদ্দিট্ঠো. তত্থ চতুসমুট্ঠানমুপগতা ওজা কবল়ীকারো আহারো নাম. সো যস্মা আহারূপসেৰীনঞ্ঞেৰ অজ্ঝোহটাহারউতুজাহারূপত্থদ্ধো এৰ চ কম্মজাদিআহারো ইমস্স কাযস্স ঠিতিযা পৰত্ততি, ন অঞ্ঞথা, তস্মা কবল়ীকাতব্বউতুজৰত্থুসন্নিস্সিততাদস্সনত্থং কবল়ীকারো আহারোতি ৰুত্তো. কিঞ্চাপি চাযং ‘‘ইমস্স কাযস্সা’’তি অৰিসেসেন ৰুত্তো, ৰিসেসতো পন আহারজরূপস্স জনকো চেৰ অনুপালকো চ হুত্ৰা সেসতিসন্ততিসমুট্ঠানরূপস্স অনুপালকো এৰ হুত্ৰা আহারপচ্চযো হোতি. তংসমুট্ঠানানন্তি ইমিনা পটিসন্ধিযং কম্মসমুট্ঠানানি গহিতানেৰ. পঞ্হাৰারে হি ‘‘পটিসন্ধিক্খণে ৰিপাকাব্যাকতা আহারা সম্পযুত্তকানং খন্ধানং কটত্তা চ রূপানং আহারপচ্চযেন পচ্চযো’’তি ৰুত্তন্তি অযং আহারপচ্চযে নযো.

অধিপতিযট্ঠেন ¶ উপকারকা ইত্থিন্দ্রিযপুরিসিন্দ্রিযৰজ্জা ৰীসতি ইন্দ্রিযা ইন্দ্রিযপচ্চযো. ইত্থিন্দ্রিযপুরিসিন্দ্রিযানি হি কিঞ্চাপি ইত্থিপুরিসলিঙ্গাকপ্পাদীনং বীজভূতানি, নেৰ পন তেসং, ন অঞ্ঞেসং ইন্দ্রিযাদিপচ্চযতং ফরন্তি. সুত্তন্তিকপরিযাযেন পন ¶ তেসং পকতূপনিস্সযভাৰং ফরন্তীতি বাৰীসতেৰ ইন্দ্রিযানি. তত্থ চক্খুন্দ্রিযাদযো পঞ্চ অরূপধম্মানমেৰ ইন্দ্রিযপচ্চযো, রূপজীৰিতিন্দ্রিযং কটত্তারূপানমেৰ, সেসা রূপারূপানং. নিদ্দেসে ‘‘চক্খুন্দ্রিযং চক্খুৰিঞ্ঞাণধাতুযা তংসম্পযুত্তকানঞ্চ ধম্মানং…পে… কাযৰিঞ্ঞাণধাতুযা…পে… রূপজীৰিতিন্দ্রিযং কটত্তারূপানং, অরূপিনো ইন্দ্রিযা সম্পযুত্তকানং ধম্মানং তংসমুট্ঠানানঞ্চ রূপানং ইন্দ্রিযপচ্চযেন পচ্চযো’’তি এৰং নিদ্দিট্ঠো. তংসমুট্ঠানানন্তি এত্থাপি কটত্তারূপম্পি সঙ্গহিতং. পঞ্হাৰারে হি ‘‘পটিসন্ধিক্খণে ৰিপাকাব্যাকতা ইন্দ্রিযা সম্পযুত্তকানং খন্ধানং কটত্তা চ রূপান’’ন্তি ৰুত্তন্তি অযং ইন্দ্রিযপচ্চযে নযো.

উপনিজ্ঝাযনট্ঠেন উপকারকানি ঠপেত্ৰা দ্ৰিপঞ্চৰিঞ্ঞাণেসু ৰেদনাত্তযং, একগ্গতঞ্চ সেসানি কুসলাদিভেদানি সত্ত ঝানঙ্গানি ঝানপচ্চযো. দ্ৰিপঞ্চৰিঞ্ঞাণানং হি অভিনিপাতমত্তত্তা তেসু ৰেদনেকগ্গতা উপনিজ্ঝাযনাকারস্স অভাৰেন ঝানঙ্গেসু ন উদ্ধটা, নিদ্দেসে পনস্স ‘‘ঝানঙ্গানি ঝানসম্পযুত্তকানং ধম্মানং তংসমুট্ঠানানঞ্চ রূপানং ঝানপচ্চযেন পচ্চযো’’তি নিদ্দিট্ঠো. ইধাপি তংসমুট্ঠানানন্তি ইমিনা চ কটত্তারূপম্পি গহিতং. পঞ্হাৰারেহি ‘‘পটিসন্ধিক্খণে ৰিপাকাব্যাকতানি ঝানঙ্গানি সম্পযুত্তকানং খন্ধানং কটত্তা চ রূপান’’ন্তি ৰুত্তন্তি অযং ঝানপচ্চযে নযো.

যতো ততো ৰা নিয্যানট্ঠেন উপকারকানি কুসলাদিভেদানি দ্ৰাদস মগ্গঙ্গানি মগ্গপচ্চযো. নিদ্দেসে পন ‘‘মগ্গঙ্গানি মগ্গসম্পযুত্তকানং ধম্মানং তংসমুট্ঠানানঞ্চ রূপানং মগ্গপচ্চযেন পচ্চযো’’তি নিদ্দিট্ঠো. এত্থাপি তংসমুট্ঠানানন্তি ইমিনা কটত্তারূপগ্গহণং. পঞ্হাৰারে হি ‘‘পটিসন্ধিক্খণে ৰিপাকাব্যাকতানি মগ্গঙ্গানি সম্পযুত্তকানং খন্ধানং কটত্তা চ রূপান’’ন্তি ৰুত্তং, অহেতুকচিত্তেসু চেত্থ ৰিজ্জমানানি মগ্গঙ্গানি মগ্গপচ্চযা ন হোন্তি. অযং মগ্গপচ্চযে নযো.

একৰত্থুকএকারম্মণএকুপ্পাদএকনিরোধসঙ্খাতেন ¶ সম্পযুত্তভাৰেন উপকারকা অরূপিনো ধম্মা ¶ সম্পযুত্তপচ্চযো. নিদ্দেসে পন ‘‘চত্তারো খন্ধা অরূপিনো ধম্মা অঞ্ঞমঞ্ঞং সম্পযুত্তপচ্চযেন পচ্চযো’’তি নিদ্দিট্ঠোতি অযং সম্পযুত্তপচ্চযে নযো.

একৰত্থুকাদিভাৰানুপগমেন উপকারকা রূপিনো ধম্মা অরূপীনং, অরূপিনো ধম্মা রূপীনং ৰিপ্পযুত্তপচ্চযো, সো সহজাতপুরেজাতপচ্ছাজাতৰসেন তিৰিধো হোতি. ৰুত্তং হেতং ‘‘সহজাতা কুসলা খন্ধা চিত্তসমুট্ঠানানং রূপানং…পে… পচ্ছাজাতা কুসলা খন্ধা পুরেজাতস্স ইমস্স কাযস্স ৰিপ্পযুত্তপচ্চযেন পচ্চযো’’তিআদি. পুরেজাতং পন ছৰত্থুৰসেনেৰ ৰেদিতব্বং. নিদ্দেসে পনস্স ‘‘রূপিনো ধম্মা অরূপীনং…পে… অরূপিনো ধম্মা রূপীনং ধম্মানং ৰিপ্পযুত্তপচ্চযেন পচ্চযো’’তি এৰং সামঞ্ঞতো নিদ্দিট্ঠো. তত্থ রূপিনোতি ইদং ছৰত্থূনং ৰসেন ৰুত্তং, রূপাদযো পন আরম্মণধম্মা সম্পযোগাসঙ্কাযাভাৰেন ৰিপ্পযুত্তপচ্চযা ন ৰুত্তা. চক্খাদীনং হি ৰত্থূনং অব্ভন্তরতো অরূপধম্মা নিক্খমন্তা ৰিয উপ্পজ্জন্তি, তত্থ সম্পযোগাসঙ্কা হোতি. পঞ্হাৰারেপি হি ‘‘ৰত্থু কুসলানং খন্ধানং…পে… চক্খাযতনং চক্খুৰিঞ্ঞাণধাতুযা’’তিআদিনা ছ ৰত্থূনেৰ উদ্ধটানি, অরূপিনো ধম্মা রূপীনন্তি এত্থাপি নিব্বানং অরূপম্পি সমানং রূপস্স ৰিপ্পযুত্তপচ্চযো ন হোতি সব্বথা সম্পযোগাসঙ্কাভাৰতো, ‘‘চতূহি সম্পযোগো চতূহি ৰিপ্পযোগো’’তি (ধাতু. ৩) হি ৰুত্তন্তি অযং ৰিপ্পযুত্তপচ্চযে নযো.

পচ্চুপ্পন্নলক্খণেন অত্থিভাৰেন তাদিসস্সেৰ ধম্মস্স উপত্থম্ভকট্ঠেন উপকারকো ধম্মো অত্থিপচ্চযো, সো নিদ্দেসে ‘‘চত্তারো খন্ধা অরূপিনো অঞ্ঞমঞ্ঞং…পে… চত্তারো মহাভূতা অঞ্ঞমঞ্ঞং, ওক্কন্তিক্খণে নামরূপং অঞ্ঞমঞ্ঞং, চিত্তচেতসিকা ¶ ধম্মা চিত্তসমুট্ঠানানং রূপানং, মহাভূতা উপাদারূপানং, চক্খাযতনং চক্খুৰিঞ্ঞাণধাতুযা…পে… রূপাযতনং চক্খুৰিঞ্ঞাণধাতুযা তংসম্পযুত্তকানঞ্চ ধম্মানং…পে… রূপাযতনং…পে… ফোট্ঠব্বাযতনং মনোধাতুযা…পে… মনোধাতুযা চ মনোৰিঞ্ঞাণধাতুযা চ তংসম্পযুত্তকানঞ্চ ধম্মানং অত্থিপচ্চযেন পচ্চযো’’তি এৰং সহজাতপুরেজাতৰসেন চ বহুধা নিদ্দিট্ঠো, পঞ্হাৰারে পন ‘‘সহজাতং পুরেজাতং পচ্ছাজাতং আহারং ইন্দ্রিয’’ন্তি ইমেসং পঞ্চন্নম্পি ৰসেন আগতত্তা পচ্ছাজাতকবল়ীকারআহাররূপজীৰিতিন্দ্রিযানং ৰসেনাপি অত্থিপচ্চযো গহেতব্বোৰাতি অযং অত্থিপচ্চযে নযো.

অত্তনো অনন্তরং উপ্পজ্জমানানং অরূপধম্মানং পৰত্তিওকাসদানৰসেন উপকারকা সমনন্তরনিরুদ্ধা ¶ অরূপধম্মা নত্থিপচ্চযো, নিদ্দেসে পন ‘‘সমনন্তরনিরুদ্ধা চিত্তচেতসিকা ধম্মা পটুপ্পন্নানং চিত্তচেতসিকানং ধম্মানং নত্থিপচ্চযেন পচ্চযো’’তি এৰং সামঞ্ঞতোৰ নিদ্দিট্ঠো. সব্বথা অনন্তরপচ্চযসদিসতায তত্থ নিদ্দিট্ঠনযেনেৰেত্থ ৰিসেসো ঞাতব্বোতি অযং নত্থিপচ্চযে নযো.

নত্থিপচ্চযধম্মাৰ ৰিগতভাৰেন উপকারকত্তা ৰিগতপচ্চযোতি সহ নিদ্দেসেন নত্থিপচ্চযসদিসোৰাতি.

অৰিগতপচ্চযোপি সব্বথা অত্থিপচ্চযসদিসোৰ, দেসনাৰিলাসেন, ৰেনেয্যৰসেন ৰা অযং দুকো ৰুত্তোতি অযং অৰিগতপচ্চযে নযো.

পকিণ্ণকৰিনিচ্ছযো

ইমেসু পন চতুৰীসতিযা পচ্চযেসু ঞাণচারস্স ৰিসদভাৰত্থং –

ধম্মতো কালতো চেৰ, একস্সানেকপচ্চযা;

অনেকেসঞ্চ ধম্মানং, একপচ্চযভাৰতো.

সভাগা ¶ ৰিসভাগা চ, যুগল়া জনকাদিতো;

সব্বট্ঠানাদিভেদা চ, রূপারূপৰিকপ্পতো;

ভৰতো সঙ্গহা ঞেয্যো, পকিণ্ণকৰিনিচ্ছযো.

তত্থ ধম্মতোতি ইমেসু হি পচ্চযেসু হেতুপচ্চযো তাৰ নামরূপধম্মেসু নামধম্মেকদেসো, তথা সহজাতাধিপতিকম্মঝানমগ্গপচ্চযা, তথা আসেৰনৰিপাকপচ্চযা, চতুক্খন্ধসঙ্গহিতাপি ৰিপাকধম্মা অনন্তরসমনন্তরপচ্ছাজাতসম্পযুত্তনত্থিৰিগতপচ্চযা. নিব্বানস্স অসঙ্গহতো নামেকদেসোতিপি ৰত্তুং ৰট্টতি. পুরেজাতপচ্চযো রূপধম্মোৰ, সেসা যথালাভৰসেন নামরূপধম্মা. তত্থ চ আরম্মণাধিপতিআরম্মণূপনিস্সযপকতূপনিস্সযেসু পঞ্ঞত্তিপি সঙ্গহিতাতি অযং ধম্মতো ৰিনিচ্ছযো.

কালতো ¶ পন হেতুসহজাতঅঞ্ঞমঞ্ঞনিস্সযপুরেজাতপচ্ছাজাতৰিপাকআহারইন্দ্রিযঝানমগ্গসম্পযুত্তৰিপ্পযুত্তঅত্থিঅৰিগতপচ্চযা পন্নরস পচ্চুপ্পন্নাৰ হুত্ৰা অত্তনো ফলস্স পচ্চযা হোন্তি, অনন্তরসমনন্তরআসেৰননত্থিৰিগতপচ্চযা পঞ্চ অতীতা এৰ হুত্ৰা, কম্মপচ্চযো পনেকো পচ্চুপ্পন্নোপি অতীতোপি হুত্ৰা, সেসা আরম্মণঅধিপতিউপনিস্সযপচ্চযা তযোপি তেকালিকাপি, নিব্বানপঞ্ঞত্তিৰসেন কালৰিমুত্তাপি হুত্ৰা অত্তনো ফলস্স পচ্চযা হোন্তীতি অযং কালতো ৰিনিচ্ছযো.

একস্সানেকপচ্চযাতি একধম্মস্স, একপচ্চযস্স চ অনেকপচ্চযভাৰতো. কথং? হেতুপচ্চযে তাৰ অমোহো একো ধম্মো, সো পুরেজাতকম্মআহারঝানৰজ্জানং ৰীসতিযা পচ্চযানং ৰসেন অনেকপচ্চযো হোতি, হেতুপচ্চযত্তং অৰিজহন্তোৰ অধিপতিসহজাতঅঞ্ঞমঞ্ঞনিস্সযৰিপাকিন্দ্রিযমগ্গসম্পযুত্তৰিপ্পযুত্তঅত্থিঅৰিগতানং অঞ্ঞেসং একাদসন্নং ৰসেন ৰা অনেকপচ্চযো হোতি ¶ , তথা অলোভাদযো, তেসু পন অলোভাদোসা ইন্দ্রিযমগ্গপচ্চযা ন হোন্তি, তে তযো অৰিপাকভূতা লোভদোসমোহা ৰিপাকপচ্চযাপি ন হোন্তি, তে পন অমোহৰজ্জিতা পঞ্চ অধিপতিপচ্চযা ন হোন্তি, তথা সেসাপি অৰিপাকভূতা.

আরম্মণপচ্চযে রূপাযতনং চক্খুৰিঞ্ঞাণধাতুযা আরম্মণপুরেজাতঅত্থিঅৰিগতানং চতুন্নং ৰসেন অনেকপচ্চযো হোতি, তথা মনোধাতুযা, অহেতুকমনোৰিঞ্ঞাণধাতুযা চ. সহেতুকায পন আরম্মণাধিপতিআরম্মণূপনিস্সযানম্পি ৰসেন, সদ্দাদীসুপি এসেৰ নযো. ধম্মাযতনং পন নিস্সযৰিপ্পযুত্তানং ৰসেনাপি অনেকপচ্চযো হোতি, তথা আরম্মণপচ্চযত্তং অৰিজহন্তোৰ আরম্মণাধিপতিনিস্সযউপনিস্সযপুরেজাতৰিপ্পযুত্তঅত্থিঅৰিগতানং ৰসেন অপরেসম্পি সত্তন্নং ৰসেন অনেকপচ্চযো হোতীতি অযমেত্থ উক্কট্ঠপরিচ্ছেদো. তত্থ অরূপানং পন রূপানং ৰা অতীতানাগতানং আরম্মণপচ্চযভাৰে সতি আরম্মণাধিপতিউপনিস্সযমত্তমেৰ উত্তরি লব্ভতি.

অধিপতিপচ্চযে আরম্মণাধিপতি ৰুত্তনযোৰ. সহজাতাধিপতীসু চিত্তং হেতুপুরেজাতকম্মঝানমগ্গৰজ্জানং একূনৰীসতিযা পচ্চযানং ৰসেন অনেকপচ্চযো হোতি, অধিপতিপচ্চযত্তং অৰিজহন্তো অপরেসং সহজাতঅঞ্ঞমঞ্ঞনিস্সযৰিপাকাহারিন্দ্রিযসম্পযুত্তৰিপ্পযুত্তঅত্থিঅৰিগতানং দসন্নং ৰসেনেৰ, তথা ৰীরিযং আহারপচ্চযৰজ্জানং মগ্গপচ্চযসহিতানং ¶ ৰসেন, ছন্দো আহারিন্দ্রিযৰজ্জানং ৰসেন অনেকপচ্চযো হোতি, ৰীমংসা হেতুপচ্চযে ৰুত্তনযাৰ.

অনন্তরপচ্চযে চতূসু খন্ধেসু ৰেদনাক্খন্ধো তাৰ হেতুপুরেজাতকম্মাহারমগ্গপচ্চযৰজ্জানং একূনৰীসতিযা ৰসেন ¶ , সঞ্ঞাক্খন্ধো তেসু ইন্দ্রিযঝানৰজ্জানং সত্তরসন্নং ৰসেন, সঙ্খারক্খন্ধো হেতুপুরেজাতকম্মিন্দ্রিযঝানমগ্গৰজ্জানং অট্ঠারসন্নং ৰসেন, তথা চেতনা কম্মসহিতানং, ৰিতক্কো হেতুপুরেজাতকম্মআহারিন্দ্রিযৰজ্জানং ঝানমগ্গসহিতানং, ৰিচারো, পীতি চ আনন্তরিযানং মগ্গৰজ্জানং, একগ্গতা হেতুপুরেজাতকম্মাহারৰজ্জানং ৰীসতিযা পচ্চযানং ৰসেন, সদ্ধা, জীৰিতিন্দ্রিযঞ্চ অনন্তরানং হেতুপুরেজাতকম্মাহারঝানমগ্গৰজ্জানং অট্ঠারসন্নং, সতি মগ্গসহিতানং একূনৰীসতিযা, হিরিওত্তপ্পকাযপস্সদ্ধাদিছযুগা, যেৰাপনকেসু অধিমোক্খমনসিকারতত্রমজ্ঝত্ততা, করুণামুদিতা চ হেতুপুরেজাতকম্মাহারঝানমগ্গিন্দ্রিযৰজ্জানং সত্তরসন্নং, ৰিরতিযো পন মগ্গসহিতানং অট্ঠারসন্নং, মিচ্ছাদিট্ঠি ততো ৰিপাকৰজ্জানং সত্তরসন্নং ৰসেন, মিচ্ছাৰাচাকম্মন্তাজীৰা তেহি চেৰ কম্মাহারপচ্চযেহি চাতি একূনৰীসতিযা পচ্চযানং ৰসেন, অহিরিকং অনোত্তপ্পং মানো থিনং মিদ্ধং উদ্ধচ্চন্তি ইমে হেতুপুরেজাতকম্মৰিপাকাহারিন্দ্রিযঝানমগ্গৰজ্জানং সোল়সন্নং, ৰিচিকিচ্ছা ইস্সামচ্ছরিযকুক্কুচ্চানি ততো অধিপতিৰজ্জানং পন্নরসন্নং ৰসেন অনেকপচ্চযা হোন্তি. অনন্তরপচ্চযত্তং অৰিজহন্তানং পনেতেসং সমনন্তরউপনিস্সযকম্মনত্থিৰিগতানং অপরেসং ছন্নং ৰসেন চ. ৰিঞ্ঞাণক্খন্ধস্স অধিপতিপচ্চযেনেৰ অনেকপচ্চযভাৰো ৰেদিতব্বো.

সহজাতপচ্চযে মহাভূতানি আরম্মণআরম্মণাধিপতিসহজাতঅঞ্ঞমঞ্ঞনিস্সযউপনিস্সযপুরেজাতঅত্থিঅৰিগতানং নৰন্নং, হদযৰত্থু তেসঞ্ঞেৰ ৰিপ্পযুত্তসহিতানং ৰসেন. নিস্সযপচ্চযে চক্খাযতনাদীনি আরম্মণআরম্মণাধিপতিনিস্সযউপনিস্সযপুরেজাতইন্দ্রিযৰিপ্পযুত্তঅত্থিঅৰিগতানং নৰন্নং ৰসেন. পুরেজাতপচ্চযে রূপসদ্দগন্ধরসাযতনাদীনি আরম্মণআরম্মণাধিপতিউপনিস্সযপুরেজাতঅত্থিঅৰিগতানং ছন্নং ৰসেন. আহারপচ্চযে ওজা ¶ আরম্মণআরম্মণাধিপতিউপনিস্সযাহারঅত্থিঅৰিগতানং ছন্নং পচ্চযানং ৰসেন অনেকধা পচ্চযো হোতি. তংতংপচ্চযত্তং অৰিজহন্তানং তেসং তেসং সব্বত্থ আরম্মণাধিপতিঅনন্তরসমনন্তরূপনিস্সযাদিপচ্চযতা ৰুত্তনযেন ৰেদিতব্বা. সেসং সুৰিঞ্ঞেয্যমেৰাতি অযং একস্সানেকপচ্চযতো ৰিনিচ্ছযো.

অনেকেসঞ্চ ¶ ধম্মানং, একপচ্চযভাৰতোতি এতেসু হি ঠপেত্ৰা কম্মপচ্চযং সেসেসু তেৰীসতিযা পচ্চযেসু অনেকে অনেকেসং ধম্মানং একতো একেকং পচ্চযা হোন্তি. কম্মপচ্চযো পন চেতনা একধম্মোৰাতি অযং অনেকধম্মানং একপচ্চযভাৰতো ৰিনিচ্ছযো.

সভাগা ৰিসভাগা চাতি এতেসু হি অনন্তরসমনন্তরঅনন্তরূপনিস্সযাসেৰননত্থিৰিগতপচ্চযা সভাগা, তথা আরম্মণআরম্মণাধিপতিআরম্মণূপনিস্সযা. পুরেজাতপচ্চযো পনেত্থ পচ্ছাজাতেন ৰিসভাগো, তথা সম্পযুত্তো ৰিপ্পযুত্তেন, অত্থি নত্থিনা, ৰিগতো অৰিগতেনাতি অযং সভাগৰিসভাগতো ৰিনিচ্ছযো.

যুগল়াতি এত্থ অত্থসরিক্খতায সদ্দসরিক্খতায কালপটিপক্খতায হেতুফলতায অঞ্ঞমঞ্ঞপটিপক্খতাযাতি ইমেহি কারণেহি যুগল়ং ৰেদিতব্বং. অনন্তরসমনন্তরা হি অত্থসরিক্খতায একং যুগল়ং নাম. নিস্সযূপনিস্সযা সদ্দসরিক্খতায, পুরেজাতপচ্ছাজাতা কালপটিপক্খতায, কম্মৰিপাকা হেতুফলতায, সম্পযুত্তৰিপ্পযুত্তা অঞ্ঞমঞ্ঞপটিপক্খতায একং যুগল়ং, তথা অত্থিনত্থিপচ্চযা, ৰিগতঅৰিগতপচ্চযাতি অযং যুগল়তো ৰিনিচ্ছযো.

জনকাদিতোতি জনকোপত্থম্ভকতো. এতেসু হি অনন্তরসমনন্তরূপনিস্সযপকতূপনিস্সযাসেৰনপচ্চযা, নানক্খণিকো ¶ কম্মপচ্চযো, নত্থিৰিগতপচ্চযা চাতি ইমে জনকা এৰ, ন উপত্থম্ভকা. পচ্ছাজাতপচ্চযো উপত্থম্ভকো এৰ, ন জনকো. সেসা জনকা চেৰ উপত্থম্ভকা চাতি অযং জনকাদিতো ৰিনিচ্ছযো.

সব্বট্ঠানাদিভেদাতি সব্বট্ঠানিকঅসব্বট্ঠানিকভেদতো. এতেসু হি সহজাতনিস্সযঅত্থিঅৰিগতপচ্চযা সব্বট্ঠানিকা. সব্বেসু পচ্চযুপ্পন্নেসু ইচ্ছিতব্বা. এতেহি ৰিনা উপ্পজ্জমানো একধম্মোপি নত্থি. সেসা অসব্বট্ঠানিকা. তত্থ চ আরম্মণআরম্মণাধিপতিঅনন্তরসমনন্তরানন্তরূপনিস্সযপকতূপনিস্সযপুরেজাতাসেৰনসম্পযুত্ত অত্থিনত্থিৰিগতপচ্চযা অরূপধম্মানঞ্ঞেৰ কারণতো অসব্বট্ঠানিকা. তথা পচ্ছাজাতপচ্চযো রূপানঞ্ঞেৰ কারণতো, সেসা একচ্চানং রূপারূপধম্মানং কারণতো অসব্বট্ঠানিকা. অযং সব্বট্ঠানাদিভেদতো ৰিনিচ্ছযো.

রূপারূপৰিকপ্পতোতি ¶ রূপং রূপস্স, রূপং অরূপস্সাতিআদি ৰিকপ্পতো. এতেসু হি একোপি পচ্চযো রূপমেৰ হুত্ৰা রূপস্সেৰ পচ্চযো ভৰন্তো নাম নত্থি, রূপমেৰ পন অরূপস্সেৰ অত্থি, সো পুরেজাতপচ্চযো একো এৰ. রূপমেৰ হুত্ৰা রূপারূপস্সেৰ পচ্চযো নামাতিপি নত্থি, অরূপমেৰ হুত্ৰা অরূপস্সেৰ পচ্চযোপি অত্থি, সো অনন্তরসমনন্তরআসেৰনসম্পযুত্তনত্থিৰিগতৰসেন ছব্বিধো. অরূপমেৰ পন রূপস্সেৰ পচ্চযোপি অত্থি, সো পচ্ছাজাতপচ্চযো একো এৰ. অরূপমেৰ হুত্ৰা রূপারূপানম্পি অত্থি, সো হেতুকম্মৰিপাকঝানমগ্গৰসেন পঞ্চৰিধো. রূপারূপপঞ্ঞত্তি হুত্ৰা অরূপস্সেৰ পচ্চযোপি অত্থি, সো আরম্মণউপনিস্সযৰসেন দুৰিধো. রূপারূপং পন রূপারূপস্সাপি অত্থি, সো অধিপতিসহজাতঅঞ্ঞমঞ্ঞনিস্সযাহারিন্দ্রিযৰিপ্পযুত্তঅত্থিঅৰিগতৰসেন নৰৰিধোতি অযং রূপারূপৰিকপ্পতো ৰিনিচ্ছযো.

ভৰতোতি ¶ ইমেসু হি পচ্চযেসু পঞ্চৰোকারভৰে তাৰ ন কোচি পচ্চযো ন লব্ভতি নাম, সব্বেপি লব্ভন্তি. চতুৰোকারভৰে পন পুরেজাতপচ্ছাজাতৰিপ্পযুত্তপচ্চযে অপনেত্ৰা সেসা একৰীসতিমেৰ. একৰোকারভৰে সহজাতঅঞ্ঞমঞ্ঞনিস্সযকম্মিন্দ্রিযঅত্থিঅৰিগতৰসেন সত্তেৰ. বাহিরে পন অনিন্দ্রিযবদ্ধরূপে তেসু কম্মিন্দ্রিযৰজ্জা পঞ্চেৰ লব্ভন্তীতি অযং ভৰতো ৰিনিচ্ছযো.

সঙ্গহাতি সব্বেপি হি ইমে চতুৰীসতি পচ্চযা আরম্মণসহজাতউপনিস্সযপুরেজাতপচ্ছাজাতকম্মাহারিন্দ্রিযেসু অট্ঠসু চ পচ্চযেসু সঙ্গহং গচ্ছন্তি. কথং? তেসু হি হেতুঅঞ্ঞমঞ্ঞৰিপাকঝানমগ্গসম্পযুত্তপচ্চযা ছ সহজাতপচ্চযে সঙ্গহং গচ্ছন্তি. অনন্তরসমনন্তরাসেৰননত্থিৰিগতপচ্চযা পঞ্চ অনন্তরূপনিস্সযে উপনিস্সযপচ্চযে. নিস্সযপচ্চযো সহজাতপুরেজাতভেদতো দুৰিধো. তত্থ সহজাতো সহজাতপচ্চযে, পুরেজাতো পুরেজাতপচ্চযে. অধিপতিপচ্চযোপি আরম্মণভূতো আরম্মণূপনিস্সযে, সহজাতভূতো সহজাতপচ্চযে. ৰিপ্পযুত্তপচ্চযোপি সহজাতপুরেজাতপচ্ছাজাতভূততায তত্থ তত্থ সঙ্গহং গচ্ছতি. অত্থিঅৰিগতপচ্চযাপি সহজাতপুরেজাতপচ্ছাজাতাহারিন্দ্রিযভূততায তত্থ তত্থ পচ্চযেসু সঙ্গহং গচ্ছন্তি. এৰং ইমেসু পচ্চযেসু সব্বপচ্চযানং সঙ্গহো ৰেদিতব্বো. তেনেৰ তিকপট্ঠানপাল়িযং পচ্চনীযনযে ইমেসং অট্ঠন্নং পচ্চযানং ৰসেনেৰ কতিপযপঞ্হা ৰিস্সজ্জিতা. ইমেসং পন অট্ঠন্নম্পি অঞ্ঞমঞ্ঞসঙ্গহোপি অত্থিযেৰ. তেসু হি আরম্মণপচ্চযো অধিপতিভূতো উপনিস্সযে ¶ , অনধিপতিভূতো ন কত্থচীতি আরম্মণপচ্চযো হুত্ৰা ৰিসুঞ্ঞেৰ তিট্ঠতি. কম্মপচ্চযোপি সহজাতো সহজাতে. নানক্খণিকো পন ¶ বলৰা ৰিপাকধম্মানং উপনিস্সযো হোতীতি উপনিস্সযপচ্চযে সঙ্গহং গচ্ছতি. বলৰাপি পন কম্মজরূপানং, দুব্বলো অরূপানং নানক্খণিককম্মপচ্চযো হুত্ৰা ৰিসুঞ্ঞেৰ তিট্ঠতি. আহারপচ্চযোপি অরূপভূতো সহজাতে, রূপভূতো ন কত্থচীতি ৰিসুঞ্ঞেৰ তিট্ঠতি, ইন্দ্রিযপচ্চযোপি অরূপভূতো সহজাতে, পসাদিন্দ্রিযা পুরেজাতে, রূপজীৰিতিন্দ্রিযং ন কত্থচি সঙ্গহং গচ্ছতীতি ইন্দ্রিযপচ্চযো হুত্ৰা ৰিসুঞ্ঞেৰ তিট্ঠতীতি এৰমেৰং অঞ্ঞমঞ্ঞসঙ্গহোপি অত্থেৰ. সব্বেপি পনেতে চতুৰীসতি পচ্চযা আরম্মণউপনিস্সযকম্মঅত্থিপচ্চযেসু চতূসুপি সঙ্গহং গচ্ছন্তীতি অযং সঙ্গহতো ৰিনিচ্ছযো. অযং অনুত্তানপদত্থসহিতো সঙ্খেপত্থৰিনিচ্ছযো.

পকিণ্ণকৰিনিচ্ছযো নিট্ঠিতো.

ৰিভঙ্গনযে পনেত্থ পাল়িৰৰত্থানং তাৰ সঙ্খেপতো এৰং ৰেদিতব্বং. পট্ঠানপাল়িযং হি ‘‘হেতুপচ্চযো…পে… অৰিগতপচ্চযো’’তি পচ্চযপদানি মাতিকাৰসেন নিক্খিপিত্ৰা তেসং পচ্চযানং – ‘‘হেতূ হেতুসম্পযুত্তকানং ধম্মানং তংসমুট্ঠানানঞ্চ রূপানং হেতুপচ্চযেন পচ্চযো’’তিআদিনা নযেন পচ্চযভাজনীযসঙ্খাতো নিদ্দেসৰারো পঠমং ৰুত্তো. সোপি চ অনন্তরসঙ্খেপত্থৰিনিচ্ছযো তত্থ তত্থ দস্সিতো এৰ. তদনন্তরং তেসং চতুৰীসতিযা পচ্চযানং কুসলত্তিকাদযো দ্ৰাৰীসতিতিকে, হেতুদুকাদযো সতং দুকে চ নিস্সায নানানযতো ৰিভজনৰসেন চতুৰীসতিসমন্তপট্ঠানসমোধানং অনন্তনযসমন্তপট্ঠানং ৰিভত্তং. কথং? চতুব্বিধং হি পট্ঠানং – অনুলোমপট্ঠানং, পচ্চনীকপট্ঠানং, অনুলোমপচ্চনীকপট্ঠানং, পচ্চনীকানুলোমপট্ঠানন্তি. তত্থ ‘‘কুসলং ধম্মং পটিচ্চ কুসলো ধম্মো উপ্পজ্জতি হেতুপচ্চযা’’তিআদিনা, ‘‘হেতুং ধম্মং পটিচ্চ হেতুধম্মো উপ্পজ্জতি হেতুপচ্চযা’’তিআদিনা কুসলাদীনং, হেতুআদীনঞ্চ ধম্মানং অনুলোমৰসেন পৰত্তং অনুলোমপট্ঠানং নাম. ‘‘নকুসলং ধম্মং পটিচ্চ নকুসলো ধম্মো উপ্পজ্জতি হেতুপচ্চযা…পে… নহেতুং ধম্মং পটিচ্চ নহেতুধম্মো উপ্পজ্জতি হেতুপচ্চযা’’তিআদিনা কুসলাদীনং, হেতুআদীনঞ্চ ¶ ধম্মানং পচ্চনীকৰসেন পৰত্তং পচ্চনীকপট্ঠানং নাম. ‘‘কুসলং ধম্মং পটিচ্চ নকুসলো ধম্মো উপ্পজ্জতি হেতুপচ্চযা…পে… হেতুং ধম্মং পটিচ্চ নহেতুধম্মো উপ্পজ্জতি হেতুপচ্চযা’’তিআদিনা পৰত্তং অনুলোমপচ্চনীকপট্ঠানং নাম ¶ . ‘‘নকুসলং ধম্মং পটিচ্চ কুসলো ধম্মো…পে… নহেতুং ধম্মং পটিচ্চ হেতুধম্মো উপ্পজ্জতি হেতুপচ্চযা’’তিআদিনা পৰত্তং পচ্চনীকানুলোমপট্ঠানং নাম.

এৰমেতেসু চতূসু পট্ঠানেসু যং ধম্মং অনুলোমপট্ঠানং নাম, তং তাৰ ছব্বিধং হোতি – তিকপট্ঠানং দুকপট্ঠানং দুকতিকপট্ঠানং তিকদুকপট্ঠানং তিকতিকপট্ঠানং দুকদুকপট্ঠানন্তি. যথা চেতং, এৰং পচ্চনীকপট্ঠানাদীনিপি তীণি তীণি পচ্চেকন্তি চতুৰীসতিসমন্তপট্ঠানসমোধানং পট্ঠানপ্পকরণং ৰেদিতব্বং. সম্মাসম্বুদ্ধেন হি অনুলোমপট্ঠানে দ্ৰাৰীসতিতিকে নিস্সায তিকপট্ঠানং নাম নিদ্দিট্ঠং. সতং দুকে নিস্সায দুকপট্ঠানং নাম. ততো তিকে দুকেসু পক্খিপিত্ৰা দুকতিকপট্ঠানং নাম. ততো দুকে তিকেসু পক্খিপিত্ৰা তিকদুকপট্ঠানং নাম. তিকে পন তিকেসুযেৰ পক্খিপিত্ৰা তিকতিকপট্ঠানং নাম. দুকে চ দুকেসু এৰ পক্খিপিত্ৰা দুকদুকপট্ঠানং নাম নিদ্দিট্ঠং. পঠমং তাৰেত্থ অনুলোমপট্ঠানে তিকপট্ঠাননযো নিদ্দিট্ঠো. এৰং পচ্চনীকপট্ঠানে, অনুলোমপচ্চনীকপট্ঠানে, পচ্চনীকানুলোমপট্ঠানেতি চতুৰীসতিসমন্তপট্ঠানং দেসিতং.

এত্থ চ দুৰিধং অনুলোমং, পচ্চনীকঞ্চ ধম্মানুলোমং ধম্মপচ্চনীকং, পচ্চযানুলোমং পচ্চযপচ্চনীকন্তি. তত্থ ‘‘কুসলং ধম্মং ¶ পটিচ্চ কুসলো ধম্মো’’তিআদিনা কুসলাদীনং তিকধম্মানং, হেতুআদীনং দুকধম্মানঞ্চ অনুলোমদেসনাৰসেন ধম্মানুলোমং ৰেদিতব্বং. ‘‘নকুসলং ধম্মং পটিচ্চ নকুসলো ধম্মো’’তিআদিনা তিকদুকধম্মানং পচ্চনীকৰসেন ধম্মপচ্চনীকং ৰেদিতব্বং. ‘‘হেতুপচ্চযা আরম্মণপচ্চযা’’তি এৰং চতুৰীসতিযা পচ্চযানং অনুলোমদেসনাৰসেন পচ্চযানুলোমং ৰেদিতব্বং. ‘‘নহেতুপচ্চযা নারম্মণপচ্চযা’’তি এৰং পচ্চযানং পচ্চনীকৰসেন পচ্চযপচ্চনীকঞ্চ ৰেদিতব্বং. তত্র যদিদং ধম্মানুলোমং ধম্মপচ্চনীকঞ্চ, তস্স ৰসেন চতুৰীসতিসমন্তপট্ঠানং ৰেদিতব্বং. পচ্চযানুলোমং পচ্চযপচ্চনীকঞ্চ অনুলোমতিকপট্ঠানাদীসু চতুৰীসতিযা পট্ঠানেসু একেকতিকদুকেসু এৰং লব্ভতি. তঞ্চ উপরি পাল়িনযদস্সনে এৰ পাকটং ভৰিস্সতি. তত্রিমানি চতুৰীসতি পট্ঠানানি ইমেসং তিকদুকানং ৰসেন নিদ্দিট্ঠত্তা তিকপট্ঠানং…পে… দুকদুকপট্ঠানন্তি ৰুচ্চতি.

তেসু তিকদুকেসু একেকং তিকদুকং ইমেসং হেতুপচ্চযাদীনং চতুৰীসতিযা পচ্চযানং অনুলোমাদিনযচতুক্কৰসেন সত্তহি সত্তহি মহাৰারেহি ৰিত্থারতো ৰিভত্তং. কতমেহি সত্তহি? পটিচ্চৰারো সহজাতৰারো পচ্চযৰারো নিস্সযৰারো সংসট্ঠৰারো সম্পযুত্তৰারো পঞ্হাৰারোতি ইমেহি ¶ . তত্থ ‘‘কুসলং ধম্মং পটিচ্চ কুসলো ধম্মো’’তিআদিনা পটিচ্চাভিধানেন ৰুত্তো পটিচ্চৰারো নাম. ‘‘কুসলং ধম্মং সহজাতো, কুসলং ধম্মং পচ্চযা, কুসলং ধম্মং নিস্সায, কুসলং ধম্মং সংসট্ঠো, কুসলং ধম্মং সম্পযুত্তো’’তি এৰং সহজাতাদিঅভিধানেহি ৰুত্তা পঞ্চ ৰারা সহজাতাদিৰারানি. পরতো চ সংসট্ঠসম্পযুত্তৰারেসু দ্ৰীসু অরূপধম্মৰসেনেৰ পচ্চযপচ্চযুপ্পন্না চ, সেসেসু চতূসু ৰারেসু, সত্তমেৰ পঞ্হাৰারে চ রূপারূপৰসেন, পচ্চযৰারে, নিস্সযৰারে চ সহজাতপচ্ছাজাতপুরেজাতৰসেন, সেসেসু ¶ সহজাতৰসেন পচ্চযপচ্চযুপ্পন্না চ কথিতাতি অযং ৰিসেসো. সত্তমৰারে পন যস্মা ‘‘কুসলো ধম্মো কুসলস্স ধম্মস্স হেতুপচ্চযেন পচ্চযো’’তিআদিনা নযেন তে তে পঞ্হে উদ্ধরিত্ৰা পুন ‘‘কুসলা হেতূ সম্পযুত্তকানং খন্ধান’’ন্তিআদিনা নযেন সব্বেপি তে পঞ্হা নিজ্জটা, নিগ্গুম্বা চ কত্ৰা ৰিভত্তা, তস্মা সো ৰারো পঞ্হানং সাধুকং ৰিভত্তত্তা পঞ্হাৰারোত্ৰেৰ সঙ্খং গতো. ইতি ইমেহি সত্তহি মহাৰারেহি চতুৰীসতিযা সমন্তপট্ঠানেসু সব্বেপি তিকদুকা চতুৰীসতিযা পচ্চযানং অনুলোমাদিৰসেন ৰিত্থারতো ৰিভত্তা. কথং? অনুলোমপট্ঠানে হি যদিদং দ্ৰাৰীসতিতিকে নিস্সায তিকপট্ঠানং নাম সব্বপঠমং নিদ্দিট্ঠং. তত্থ কুসলত্তিকং তাৰ ইমেহি পটিচ্চৰারাদীহি মহাৰারেহি পচ্চযানুলোমাদিনযচতুক্কতো ৰিভত্তং. তত্থ যো তাৰেস সব্বপঠমো পটিচ্চৰারো নাম, সো উদ্দেসনিদ্দেসতো দুৰিধো হোতি.

তত্থ উদ্দেসৰারো কুসলাদযো পটিচ্চ হেতুপচ্চযাদিৰসেন কুসলাদীনং যুত্তানং, অকুসলাদীনং অযুত্তকানঞ্চ ধম্মানং উপ্পত্তিপুচ্ছনৰসেনেৰ পৰত্তত্তা ‘‘পুচ্ছাৰারো’’তিপি, পুচ্ছানঞ্ঞেৰ পঞ্ঞাপনতো ‘‘পণ্ণত্তিৰারো’’তিপি ৰুচ্চতি. ন হি তত্থ ৰিস্সজ্জনং অত্থি. নিদ্দেসৰারো পন পুচ্ছাৰারে পরিপুচ্ছিতেসু পঞ্হেসু ‘‘সিযা অকুসলং ধম্মং পটিচ্চ অকুসলো ধম্মো উপ্পজ্জেয্যা’’তিআদিকং অযুত্তং পঞ্হং অনুদ্ধরিত্ৰা লব্ভমানানঞ্ঞেৰ পঞ্হানং ৰসেন পৰত্তো. ইতরেসু পন সহজাতাদীসু, সেসেসু চ তিকেসু, সেসপট্ঠানেসু চ সব্বত্থ পুচ্ছাৰারো নত্থি, লব্ভমানৰসেন সব্বৰিস্সজ্জনমেৰ দস্সিতন্তি ইদমেত্থ সঙ্খেপতো পাল়িৰৰত্থানং.

ইদানি পনেত্থ আদিতো পট্ঠায এৰং ৰিভঙ্গনযো ৰেদিতব্বো. অনুলোমপট্ঠানস্মিঞ্হি তিকপট্ঠানে কুসলত্তিকস্স সত্তসু মহাৰারেসু পঠমস্স পটিচ্চৰারস্স পুচ্ছাৰারে তাৰ ¶ – ‘‘সিযা কুসলং ধম্মং পটিচ্চ কুসলো ধম্মো উপ্পজ্জেয্য হেতুপচ্চযা…পে… অকুসলো ধম্মো…পে… অব্যাকতো…পে… কুসলো চ অব্যাকতো চ…পে… অকুসলো চ অব্যাকতো ¶ চ…পে… কুসলো চ অকুসলো চ…পে… কুসলো চ অকুসলো চ অব্যাকতো চ ধম্মা উপ্পজ্জেয্যুং হেতুপচ্চযা’’তি কুসলপদমূলা সত্ত পুচ্ছা উদ্ধটা.

এৰং অকুসলপদমূলা, অব্যাকতপদমূলা চ. ‘‘সিযা কুসলঞ্চ অব্যাকতঞ্চ ধম্মং পটিচ্চ অকুসলো…পে… সিযা অকুসলঞ্চ অব্যাকতঞ্চ…পে… সিযা কুসলঞ্চ অকুসলঞ্চ…পে… সিযা কুসলঞ্চ অকুসলঞ্চ অব্যাকতঞ্চ ধম্মং পটিচ্চা’’তি দ্ৰিমূলকা, তিমূলকা চ সত্ত সত্ত পুচ্ছাতি একূনপঞ্ঞাস পুচ্ছা হেতুপচ্চযমূলকা উদ্ধটা.

ইমিনাৰ নযেন ‘‘সিযা কুসলং ধম্মং পটিচ্চ কুসলো ধম্মো উপ্পজ্জেয্য আরম্মণপচ্চযা…পে… অৰিগতপচ্চযা’’তি এৰং সেসপচ্চযমূলকাপি পুচ্ছাৰেদিতব্বা. একমূলকনযো.

যথা চ একমূলকে, এৰং ‘‘সিযা কুসলং ধম্মং পটিচ্চ কুসলো ধম্মো উপ্পজ্জেয্য হেতুপচ্চযা আরম্মণপচ্চযা…পে… হেতুপচ্চযা অৰিগতপচ্চযা’’তিআদিনা দ্ৰিমূলকেপি. ‘‘হেতুপচ্চযা আরম্মণপচ্চযা অধিপতিপচ্চযা…পে… হেতুপচ্চযা আরম্মণপচ্চযা অনন্তরপচ্চযা…পে… হেতুপচ্চযা আরম্মণপচ্চযা অৰিগতপচ্চযা’’তিআদিনা তিমূলকাদীসু সব্বমূলকপরিযোসানেসু ৰারেসু নযা ৰেদিতব্বা. হেতুপচ্চযমূলকনযো.

যথা চ হেতুমূলকে, এৰং ‘‘সিযা কুসলং ধম্মং পটিচ্চ কুসলো ধম্মো উপ্পজ্জেয্য আরম্মণপচ্চযা’’তিআদিনা সেসপচ্চযমূলকেসুপি নযো ঞাতব্বো. পচ্চযানুলোমৰারো. এতেনেৰ উপাযেন ‘‘সিযা কুসলং ধম্মং পটিচ্চ কুসলো ধম্মো উপ্পজ্জেয্য নহেতুপচ্চযা’’তিআদিনা সব্বপ্পকারযুত্তো ¶ পচ্চযপচ্চনীকৰারোপি. ‘‘সিযা কুসলং ধম্মং…পে… উপ্পজ্জতি হেতুপচ্চযা নারম্মণপচ্চযা’’তিআদিনা অনুলোমপচ্চনীকপচ্চযৰারোপি. ‘‘সিযা কুসলং ধম্মং…পে… উপ্পজ্জেয্য নহেতুপচ্চযা আরম্মণপচ্চযা’’তিআদিনা পচ্চনীযানুলোমৰারোপি সব্বত্থ নেতব্বোতি অযং তাৰেত্থ পুচ্ছাৰারে নযো.

নিদ্দেসৰারো পন উদ্দেসৰারে দস্সিতাসু পুচ্ছাসু কুসলাকুসলাদীনং সহুপ্পত্তিযা অভাৰতো যা এতা ‘‘কুসলং ধম্মং পটিচ্চ কুসলো ধম্মো উপ্পজ্জতী’’তিআদিকা পুচ্ছা সব্বসো ¶ ৰিস্সজ্জনং লভন্তি, তা পহায যা ৰিস্সজ্জনং লভন্তি, তাসমেৰ ৰিস্সজ্জনৰসেন পৰত্তো. তত্রাযং নযো – ‘‘কুসলং ধম্মং পটিচ্চ কুসলো ধম্মো উপ্পজ্জতি হেতুপচ্চযা. কুসলং একং খন্ধং পটিচ্চ তযো খন্ধা. তযো খন্ধে পটিচ্চ একো খন্ধো. দ্ৰে খন্ধে পটিচ্চ দ্ৰে খন্ধা. কুসলং ধম্মং পটিচ্চ অব্যাকতো ধম্মো উপ্পজ্জতি হেতুপচ্চযা. কুসলে খন্ধে পটিচ্চ চিত্তসমুট্ঠানং রূপং. কুসলং ধম্মং পটিচ্চ কুসলো চ অব্যাকতো চ ধম্মা উপ্পজ্জন্তি হেতুপচ্চযা. কুসলং একং খন্ধং পটিচ্চ তযো খন্ধা চিত্তসমুট্ঠানঞ্চ রূপং. তযো খন্ধে পটিচ্চ একো খন্ধো চিত্তসমুট্ঠানঞ্চ রূপং. দ্ৰে খন্ধে পটিচ্চ দ্ৰে খন্ধা চিত্তসমুট্ঠানঞ্চ রূপ’’ন্তি এৰং কুসলপদমূলাসু সত্তসু পুচ্ছাসু তিস্সোৰ লব্ভমানা ৰিস্সজ্জিতা. তথা অকুসলপদমূলাসুপি তিস্সোৰ. অব্যাকতপদমূলাসু পন ‘‘অব্যাকতং ধম্মং পটিচ্চ অব্যাকতো ধম্মো উপ্পজ্জতি হেতুপচ্চযা. ৰিপাকাব্যাকতং কিরিযাব্যাকতং একং খন্ধং পটিচ্চ তযো খন্ধা চিত্তসমুট্ঠানঞ্চ রূপং…পে… দ্ৰে খন্ধে পটিচ্চ দ্ৰে খন্ধা চিত্তসমুট্ঠানঞ্চ রূপং. পটিসন্ধিক্খণে ৰিপাকাব্যাকতং একং খন্ধং পটিচ্চ তযো খন্ধা কটত্তা চ রূপং…পে… দ্ৰে খন্ধা কটত্তা চ রূপং. খন্ধে পটিচ্চ ৰত্থু, ৰত্থুং পটিচ্চ খন্ধা. একং মহাভূতং পটিচ্চ তযো মহাভূতা…পে… দ্ৰে মহাভূতে পটিচ্চ ¶ দ্ৰে মহাভূতা. মহাভূতে পটিচ্চ চিত্তসমুট্ঠানং রূপং কটত্তারূপং উপাদারূপ’’ন্তি একাৰ. দ্ৰিমূলিকাদীসু চ ‘‘কুসলঞ্চ অব্যাকতঞ্চ ধম্মং পটিচ্চ অব্যাকতো ধম্মো উপ্পজ্জতি হেতুপচ্চযা. কুসলে খন্ধে চ মহাভূতে চ পটিচ্চ চিত্তসমুট্ঠানং রূপ’’ন্তি একা. তথা ‘‘অকুসলঞ্চ অব্যাকতঞ্চ পটিচ্চা’’তি, এৰং হেতুপচ্চযমূলিকাসু একূনপঞ্ঞাসায পুচ্ছাসু নৰেৰ লব্ভমানা ৰিস্সজ্জিতা. সেসা চত্তালীস মোঘপুচ্ছাতি ন ৰিস্সজ্জিতা. এৰং উপরি আরম্মণপচ্চযাদীসু ৰিস্সজ্জিতাৰসেসা মোঘপুচ্ছাতি গহেতব্বা. ৰিজাননসুখত্থং পন ভগৰতা পুচ্ছাৰারে লব্ভমানা, অলব্ভমানা চ সব্বাপি তা দস্সিতাতি ৰেদিতব্বাতি.

তত্থ কুসলং ধম্মং পটিচ্চাতি সহজাতেসু ৰেদনাক্খন্ধাদিভেদং একং কুসলং ধম্মং পটিচ্চ পটিগন্ত্ৰা, সহুপ্পত্তিসঙ্খাতেন সদিসভাৰেন পত্ৰাতি অত্থো. সদিসত্থো হি এত্থ পটিসদ্দো ‘‘পটিপুগ্গলো’’তিআদীসু ৰিয. কুসলো ধম্মোতি সঞ্ঞাক্খন্ধাদিভেদো সহুপ্পন্নো কুসলো ধম্মো. উপ্পজ্জতীতি পাকটভাৰতো উদ্ধং উপ্পাদাদিং পাপুণাতি, অত্তানং ৰা পটিলভতি. হেতুপচ্চযাতি ন কেৰলং কুসলধম্মমত্তমেৰ পটিচ্চ উপ্পজ্জতি, অথ খো কুসলহেতুনা হেতুপচ্চযতং সাধেন্তেন চ উপ্পজ্জতীতি এৰমত্থো গহেতব্বো.

এৰমিদং ¶ ‘‘উপ্পজ্জেয্যা’’তি পুচ্ছায ‘‘উপ্পজ্জতী’’তি অৰিসেসেন ৰিস্সজ্জনং ৰত্ৰা ইদানি যং ধম্মং পটিচ্চ যে ধম্মা উপ্পজ্জন্তি, তে পচ্চযপচ্চযুপ্পন্নে খন্ধৰসেন ৰিসেসেত্ৰা দস্সেতুং ‘‘কুসলং একং খন্ধ’’ন্তিআদি ৰুত্তং. যস্মা পনেত্থ একো খন্ধো একস্সেৰ, দ্ৰিন্নংযেৰ ৰা, দ্ৰে ৰা পন একস্সেৰ পচ্চযা নাম ন হোন্তি, তস্মা তে পকারেন অনামসিত্ৰা ‘‘একং খন্ধং পটিচ্চ তযো খন্ধা’’তিআদিনা পচ্চযভাৰেন গহিতাৰসেসং সব্বং পচ্চযুপ্পন্নং কত্ৰা দস্সিতন্তি ৰেদিতব্বং. এৰং উপরিপি সব্বত্থ. চিত্তসমুট্ঠানং রূপন্তি ইদং পটিচ্চত্থস্স সহজাতত্থত্তা ¶ যং কুসলেন সহজাতঞ্চেৰ হেতুপচ্চযঞ্চ লভতি, তং দস্সেতুং ৰুত্তং ‘‘ৰিপাকাব্যাকতং কিরিযাব্যাকত’’ন্তি. এত্থ হেতুপচ্চযাধিকারে অহেতুকা ন গহেতব্বা. খন্ধে পটিচ্চ ৰত্থূতিআদি কটত্তারূপগ্গহণেন ৰত্থুস্মিং গহিতেপি ৰত্থুং পটিচ্চ অরূপক্খন্ধানং উপ্পত্তিদস্সনত্থং ৰুত্তং. একং মহাভূতন্তিআদি পন রূপাব্যাকতং পটিচ্চ রূপাব্যাকতস্স উপ্পত্তিদস্সনত্থং. হেতুপচ্চযে উপত্থম্ভকানমেৰ চেত্থ চিত্তজানং, পটিসন্ধিযং কম্মজানঞ্চ অঞ্ঞমঞ্ঞং পচ্চযপচ্চযুপ্পন্নতা গহেতব্বা, ন অহেতুকচিত্তজউতুজাদীনং তেসং হেতুপচ্চযা উপ্পত্তিযা অভাৰতো. মহাভূতে পটিচ্চ চিত্তসমুট্ঠানন্তিআদি মহাভূতে পটিচ্চ উপাদাদীনং উপ্পত্তিদস্সনত্থং ৰুত্তং. ইমিনা উপাযেন আরম্মণপচ্চযাদীসুপি ৰিস্সজ্জনানং অত্থো ৰেদিতব্বো.

আরম্মণপচ্চযে ‘‘কুসলং ধম্মং পটিচ্চ কুসলো ধম্মো উপ্পজ্জতি আরম্মণপচ্চযা. একং খন্ধং…পে… দ্ৰে খন্ধে পটিচ্চ দ্ৰে খন্ধা. অকুসলং ধম্মং পটিচ্চ অকুসলো ধম্মো…পে… অব্যাকতং ধম্মং পটিচ্চ অব্যাকতো ধম্মো উপ্পজ্জতি আরম্মণপচ্চযা. ৰিপাকাব্যাকতং কিরিযাব্যাকতং একং খন্ধং…পে… দ্ৰে খন্ধা. পটিসন্ধিক্খণে ৰিপাকাব্যাকতং একং খন্ধং…পে… দ্ৰে খন্ধা. ৰত্থুং পটিচ্চ খন্ধা’’তি এৰং তিস্সো ৰিস্সজ্জিতা. সেসা রূপমিস্সকত্তা, রূপস্স চ আরম্মণপচ্চযেন অনুপ্পত্তিতো ন গহিতা. তেনেৰ ‘‘ৰত্থুং পটিচ্চ খন্ধা’’তি ৰত্ৰা ‘‘খন্ধে পটিচ্চ ৰত্থূ’’তি ন ৰুত্তং. এত্থ চ আরম্মণপচ্চযাতি সহজাতং কুসলং ধম্মং পটিচ্চ উপ্পজ্জমানো কুসলো ধম্মো ততো অঞ্ঞেন অসহজাতেন ছব্বিধেন আরম্মণভূতেন পচ্চযেনাতি এৰং অত্থো গহেতব্বো. ন হি অত্তনা সহজাতং আরম্মণং কত্ৰা চিত্তচেতসিকা উপ্পজ্জন্তি.

অধিপতিপচ্চযে হেতুপচ্চযসদিসং ৰিস্সজ্জনং. অনন্তরসমনন্তরেসু পন রূপাভাৰতো আরম্মণপচ্চযসদিসং. সহজাতপচ্চযেপি ¶ হেতুপচ্চযসদিসং. অব্যাকতং পটিচ্চ অব্যাকতুপ্পত্তিযা ¶ পন ‘‘বাহিরং একং মহাভূতং পটিচ্চ…পে… দ্ৰে মহাভূতা. মহাভূতে পটিচ্চ উপাদারূপং…পে… আহারসমুট্ঠানং একং মহাভূতং…পে… দ্ৰে মহাভূতা…পে… উতুসমুট্ঠানং একং…পে… দ্ৰে মহাভূতা…পে… অসঞ্ঞসত্তানং একং মহাভূতং পটিচ্চ…পে… দ্ৰে মহাভূতা…পে… কটত্তারূপং উপাদারূপ’’ন্তি ইদং অধিকং. এৰং অঞ্ঞমঞ্ঞপচ্চযেপি. কেৰলং তত্থ কটত্তারূপং উপাদারূপঞ্চ ন গহিতং তেসং অঞ্ঞমঞ্ঞপচ্চযত্তাভাৰা. নিস্সযপচ্চযেপি সহজাতপচ্চযসদিসং ৰিস্সজ্জনং. পটিচ্চত্থস্স পন সহজাতত্থত্তা চক্খাদীসু পুরেজাতনিস্সযা ইধ ন গহিতাতি. উপনিস্সযপচ্চযেপি রূপস্স উপনিস্সযপচ্চযুপ্পন্নত্তাভাৰা আরম্মণপচ্চযসদিসমেৰ ৰিস্সজ্জনং.

পুরেজাতপচ্চযে পন ‘‘কুসলং ধম্মং পটিচ্চ কুসলো ধম্মো উপ্পজ্জতি পুরেজাতপচ্চযা. কুসলং একং…পে… দ্ৰে খন্ধা. ৰত্থুং পুরেজাতপচ্চযা. অকুসলং ধম্মং পটিচ্চ অকুসলো…পে… অব্যাকতং ধম্মং পটিচ্চ অব্যাকতো…পে… পুরেজাতপচ্চযা. ৰিপাকাব্যাকতং কিরিযাব্যাকতং একং খন্ধং…পে… দ্ৰে খন্ধা. ৰত্থুং পুরেজাতপচ্চযা’’তি এৰং তিস্সো পুচ্ছা ৰিস্সজ্জিতা. তত্থ ৰত্থুং পুরেজাতপচ্চযাতি ইদং আরম্মণপুরেজাতনিৰত্তনত্থং ৰুত্তং. তং হি চক্খুৰিঞ্ঞাণাদীনংযেৰ পুরেজাতপচ্চযতং সাধযতি, ন মনোৰিঞ্ঞাণধাতুযাতি ইধ ন গহিতং.

পচ্ছাজাতপচ্চযো ইধ অরূপধম্মেসু ন লব্ভতি. রূপধম্মেসু চ উপত্থম্ভকোৰ, ন জনকো, তস্মা ‘‘অব্যাকতং ধম্মং পটিচ্চ অব্যাকতো ধম্মো উপ্পজ্জতী’’তিআদি ন ৰত্তব্বোৰাতি অযং ন গহিতো. আসেৰনপচ্চযেপি আরম্মণপচ্চযে ৰিয তিস্সোৰ পুচ্ছা ৰিস্সজ্জিতা.

কম্মপচ্চযে ¶ ‘‘কুসলং ধম্মং পটিচ্চ কুসলো ধম্মো উপ্পজ্জতি কম্মপচ্চযা. কুসলং একং খন্ধং…পে… অব্যাকতো ধম্মো উপ্পজ্জতি…পে… চিত্তসমুট্ঠানঞ্চ রূপং…পে… কুসলো চ অব্যাকতো চ ধম্মা…পে… চিত্তসমুট্ঠানং রূপ’’ন্তি কুসলপদে তিস্সো, তথা অকুসলপদে. অব্যাকতপদে পন ‘‘অব্যাকতং ধম্মং পটিচ্চ অব্যাকতো…পে… ৰিপাকাব্যাকতং কিরিযাব্যাকতং একং খন্ধং পটিচ্চ…পে… মহাভূতে পটিচ্চ চিত্তসমুট্ঠানং রূপং কটত্তারূপং উপাদারূপং, অসঞ্ঞসত্তানং…পে… কটত্তারূপং উপাদারূপ’’ন্তি এৰং তিস্সো. ‘‘কুসলঞ্চ অব্যাকতঞ্চ ধম্মং পটিচ্চ অব্যাকতো…পে… কুসলে খন্ধে চ মহাভূতে ¶ চ পটিচ্চ চিত্তসমুট্ঠানং রূপ’’ন্তিআদিনা সহজাতসদিসং ৰিস্সজ্জনং. নত্থিৰিগতপচ্চযেসু আরম্মণসদিসং.

এৰং সব্বপচ্চযেসু লব্ভমানপঞ্হে ৰিস্সজ্জনং দস্সেত্ৰা ততো হেতুঅধিপতিঝানমগ্গপচ্চযা একসদিসা. আরম্মণানন্তরসমনন্তরূপনিস্সযাসেৰননত্থিৰিগতপচ্চযা একসদিসা. সহজাতঅঞ্ঞমঞ্ঞনিস্সযঅত্থিঅৰিগতা একসদিসা. আসেৰনপচ্চযে ৰিপাকো ন লব্ভতি. অঞ্ঞমঞ্ঞপচ্চযে চিত্তজরূপং, উপাদারূপঞ্চ ন লব্ভতীতিআদিনা পচ্চযানং অঞ্ঞমঞ্ঞসদিসত্তং ৰত্ৰা পুন তেসং ‘‘হেতুযা নৰ. আরম্মণে তীণি. অধিপতিযা নৰ. অনন্তরসমনন্তরেসু তীণি. সহজাতে নৰ. অঞ্ঞমঞ্ঞে তীণি. নিস্সযে নৰ. উপনিস্সযে তীণি. পুরেজাতে তীণি. আসেৰনে তীণি. কম্মে নৰ. ৰিপাকে একং. আহারে নৰ. ইন্দ্রিযে নৰ. ঝানে নৰ. মগ্গে নৰ. সম্পযুত্তে তীণি. ৰিপ্পযুত্তে নৰ. অত্থিযা নৰ. নত্থিযা তীণি. ৰিগতে তীণি. অৰিগতে নৰা’’তি এৰং হেতুপচ্চযাদীনং একেকস্মিং পুচ্ছাৰিস্সজ্জনৰারগণনা ৰুত্তাতি অযং একমূলকনযো.

যথা চ একমূলকে, এৰং ‘‘হেতুপচ্চযা আরম্মণপচ্চযা’’তিআদিনা দ্ৰিমূলকাদীসুপি সব্বমূলকপরিযোসানেসু যথানুরূপং ¶ নযো নেতব্বো. পাল়িযম্পি ৰিত্থারনযং অদস্সেত্ৰা ‘‘হেতুপচ্চযা আরম্মণে তীণী’’তিআদিনা ৰিস্সজ্জনৰারগণনভেদো দস্সিতোতি অযং পচ্চযানুলোমে নযো.

পচ্চযপচ্চনীযে পন ‘‘অকুসলং ধম্মং পটিচ্চ অকুসলো ধম্মো উপ্পজ্জতি নহেতুপচ্চযা. ৰিচিকিচ্ছাসহগতে উদ্ধচ্চসহগতে খন্ধে পটিচ্চ ৰিচিকিচ্ছাসহগতো উদ্ধচ্চসহগতো মোহো. অব্যাকতং ধম্মং পটিচ্চ অব্যাকতো ধম্মো উপ্পজ্জতি নহেতুপচ্চযা. অহেতুকং ৰিপাকাব্যাকতং কিরিযাব্যাকতং একং খন্ধং…পে… দ্ৰে খন্ধা চিত্তসমুট্ঠানঞ্চ রূপং. অহেতুকপটিসন্ধিক্খণে ৰিপাকাব্যাকতং একং খন্ধং…পে… দ্ৰে খন্ধা কটত্তা চ রূপং…পে… ৰত্থুং পটিচ্চ খন্ধা. একং মহাভূতং পটিচ্চ…পে… মহাভূতে পটিচ্চ চিত্তসমুট্ঠানং রূপং, কটত্তারূপং উপাদারূপং…পে… একং মহাভূতং পটিচ্চ…পে… উপাদারূপ’’ন্তি ইমা দ্ৰে ৰিস্সজ্জিতা.

নারম্মণপচ্চযে ¶ ‘‘কুসলং ধম্মং পটিচ্চ অব্যাকতো…পে… কুসলে…পে… অকুসলং ধম্মং পটিচ্চ অব্যাকতো…পে… অকুসলে…পে… অব্যাকতং ধম্মং পটিচ্চ অব্যাকতো…পে… কুসলঞ্চ অব্যাকতঞ্চ ধম্মং পটিচ্চ অব্যাকতো…পে… চিত্তসমুট্ঠানং রূপং, অকুসলঞ্চ অব্যাকতঞ্চ ধম্মং পটিচ্চ অব্যাকতো…পে… মহাভূতে পটিচ্চ চিত্তসমুট্ঠানং রূপ’’ন্তি ইমা পঞ্চ ৰিস্সজ্জিতা.

নাধিপতিপচ্চযে ‘‘কুসলং ধম্মং পটিচ্চ কুসলো…পে… কুসলং একং খন্ধং…পে… দ্ৰে খন্ধা. কুসলং ধম্মং পটিচ্চ অব্যাকতো…পে… কুসলে খন্ধে পটিচ্চ চিত্তসমুট্ঠানং রূপং. কুসলং ধম্মং পটিচ্চ কুসলো চ অব্যাকতো চ ধম্মা উপ্পজ্জন্তি…পে… অকুসলং ধম্মং পটিচ্চ অকুসলো…পে… দ্ৰে খন্ধে পটিচ্চ দ্ৰে খন্ধা, অকুসলং ধম্মং পটিচ্চ অব্যাকতো…পে… অকুসলে খন্ধে পটিচ্চ চিত্তসমুট্ঠানং রূপং. অকুসলং ধম্মং পটিচ্চ অকুসলো চ অব্যাকতো চ ধম্মা…পে… অব্যাকতং ধম্মং পটিচ্চ অব্যাকতো ¶ …পে… মহাভূতে পটিচ্চ…পে… কটত্তারূপং উপাদারূপং. কুসলঞ্চ অব্যাকতঞ্চ ধম্মং পটিচ্চ অব্যাকতো…পে… কুসলে খন্ধে চ মহাভূতে চ পটিচ্চ চিত্তসমুট্ঠানং রূপং. অকুসলঞ্চ অব্যাকতঞ্চ ধম্মং পটিচ্চ অব্যাকতো…পে… অকুসলে খন্ধে চ মহাভূতে চ পটিচ্চ চিত্তসমুট্ঠানং রূপ’’ন্তি নৰ পুচ্ছা ৰিস্সজ্জিতা. নানন্তরনসমনন্তরপচ্চযা নারম্মণপচ্চযসদিসা.

নাঞ্ঞমঞ্ঞপচ্চযে ‘‘কুসলং ধম্মং পটিচ্চ অব্যাকতো…পে… কুসলে…পে… চিত্তসমুট্ঠানং রূপং. অকুসলং ধম্মং পটিচ্চ অব্যাকতো…পে… অকুসলে…পে… চিত্তসমুট্ঠানং রূপং. অব্যাকতং ধম্মং পটিচ্চ অব্যাকতো…পে… ৰিপাকাব্যাকতে কিরিযাব্যাকতে খন্ধে পটিচ্চ চিত্তসমুট্ঠানং রূপং. পটিসন্ধিক্খণে ৰিপাকাব্যাকতে…পে… কটত্তা রূপং. মহাভূতে পটিচ্চ চিত্তসমুট্ঠানং রূপং কটত্তারূপং উপাদারূপং. বাহিরে মহাভূতে পটিচ্চ উপাদারূপং. আহারসমুট্ঠানে মহাভূতে পটিচ্চ উপাদারূপং. উতুসমুট্ঠানে…পে… উপাদারূপং. অসঞ্ঞসত্তানং মহাভূতে পটিচ্চ কটত্তারূপং উপাদারূপং. কুসলঞ্চ অব্যাকতঞ্চ ধম্মং পটিচ্চ অব্যাকতো…পে… কুসলে খন্ধে চ মহাভূতে চ পটিচ্চ চিত্তসমুট্ঠানং রূপং. অকুসলঞ্চ অব্যাকতঞ্চ ধম্মং পটিচ্চ অব্যাকতো…পে… অকুসলে খন্ধে চ মহাভূতে চ পটিচ্চ চিত্তসমুট্ঠানং রূপ’’ন্তি পঞ্চ ৰিস্সজ্জিতা. তত্থ ৰিপাকাব্যাকতে ¶ খন্ধে পটিচ্চ কটত্তারূপন্তি হদযৰত্থুৰজ্জং ৰেদিতব্বং. নউপনিস্সযপচ্চযো নারম্মণপচ্চযসদিসো.

নপুরেজাতপচ্চযে ‘‘কুসলং ধম্মং পটিচ্চ কুসলো…পে… অরূপে কুসলং…পে… দ্ৰে খন্ধা. কুসলং পটিচ্চ অব্যাকতো…পে… চিত্তসমুট্ঠানং রূপ’’ন্তি কুসলপদে দ্ৰে, তথা অকুসলপদেপি. ‘‘অব্যাকতং পটিচ্চ অব্যাকতো…পে… অরূপে ৰিপাকাব্যাকতং কিরিযাব্যাকতং…পে… বাহিরং…পে… উপাদারূপং. কুসলঞ্চ ¶ অব্যাকতঞ্চ ধম্মং পটিচ্চ অব্যাকতো. কুসলে খন্ধে চ মহাভূতে চ পটিচ্চ চিত্তসমুট্ঠানং রূপং. অকুসলঞ্চ অব্যাকতঞ্চ…পে… অকুসলে খন্ধে চ…পে… রূপ’’ন্তি ইমা তিস্সোতি সত্ত ৰিস্সজ্জিতা. নপচ্ছাজাতনাসেৰনপচ্চযা নাধিপতিপচ্চযসদিসা. তত্থ কুসলাকুসলকিরিযানং পঠমজৰনৰসেন নাসেৰনপচ্চযপ্পৰত্তি ৰেদিতব্বা.

নকম্মপচ্চযে ‘‘কুসলং পটিচ্চ কুসলো, কুসলা চেতনা. অকুসলং পটিচ্চ অকুসলো, অকুসলা চেতনা. অব্যাকতং পটিচ্চ অব্যাকতো, ৰিপাককিরিযা চেতনা. বাহিরং, আহারসমুট্ঠানং, উতুসমুট্ঠান’’ন্তি তিস্সো ৰিস্সজ্জিতা.

নৰিপাকপচ্চযে ‘‘কুসলং পটিচ্চ কুসলো, অব্যাকতো. কুসলো চ অব্যাকতো চা’’তি কুসলপদে তিস্সো, তথা অকুসলপদেপি. ‘‘অব্যাকতং পটিচ্চ অব্যাকতো…পে… বাহিরং আহারসমুট্ঠানং উতুসমুট্ঠানং অসঞ্ঞ…পে… উপাদারূপং…পে… অকুসলঞ্চ অব্যাকতঞ্চ অব্যাকতো’’তি ইমা তিস্সোতি নৰ ৰিস্সজ্জিতা.

নাহারপচ্চযে ‘‘অব্যাকতং পটিচ্চ অব্যাকতো. বাহিরং উতুসমুট্ঠানং, অসঞ্ঞ…পে… উপাদারূপ’’ন্তি একাৰ.

নইন্দ্রিযপচ্চযে ‘‘অব্যাকতং পটিচ্চ অব্যাকতো. বাহিরং আহারসমুট্ঠানং…পে… উতুসমুট্ঠানং…পে… অসঞ্ঞসত্তানং মহাভূতে পটিচ্চ রূপজীৰিতিন্দ্রিয’’ন্তি একাৰ.

নঝানপচ্চযে ¶ ‘‘অব্যাকতং পটিচ্চ অব্যাকতো. পঞ্চৰিঞ্ঞাণসহগতং…পে… বাহিরং আহারউতুঅসঞ্ঞউপাদারূপ’’ন্তি একাৰ.

নমগ্গপচ্চযে ‘‘অব্যাকতং পটিচ্চ অব্যাকতো. অহেতুকং ৰিপাকাব্যাকতং কিরিযাব্যাকতং…পে… চিত্তসমুট্ঠানং…পে… অহেতুকপটিসন্ধিক্খণে ¶ ৰিপাকা…পে… কটত্তা চ রূপং…পে… বাহিরং আহারউতুঅসঞ্ঞউপাদারূপ’’ন্তি একাৰ.

নসম্পযুত্তপচ্চযো নারম্মণপচ্চযসদিসো.

নৰিপ্পযুত্তপচ্চযে ‘‘কুসলং পটিচ্চ কুসলো. অরূপে কুসলোৰ. অকুসলং…পে… অরূপে অকুসলো. অব্যাকতং পটিচ্চ অব্যাকতো, অরূপে ৰিপাককিরিযাব্যাকতং. বাহিরং অসঞ্ঞ…পে… উপাদারূপ’’ন্তি ইমা তিস্সোৰ পুচ্ছা ৰিস্সজ্জিতা. নোনত্থিনোৰিগতপচ্চযা নারম্মণপচ্চযসদিসা. নসহজাতননিস্সযনোঅত্থিনোঅৰিগতপচ্চযা পনেত্থ চত্তারোপি ন লব্ভন্তীতি.

এৰং পচ্চনীকে লব্ভমানপঞ্হৰিস্সজ্জনং দস্সেত্ৰা ততো ‘‘নহেতুযা দ্ৰে. নারম্মণে পঞ্চ. নাধিপতিযা নৰ. নানন্তরে নসমনন্তরে নাঞ্ঞমঞ্ঞে নউপনিস্সযে পঞ্চ. নপুরেজাতে সত্ত. নপচ্ছাজাতে নাসেৰনে নৰ. নকম্মে তীণি. নৰিপাকে নৰ. নাহারে নইন্দ্রিযে নঝানে নমগ্গে একং. নসম্পযুত্তে পঞ্চ. নৰিপ্পযুত্তে তীণি. নোনত্থিনোৰিগতেসু পঞ্চা’’তি ৰিস্সজ্জনৰারগণনা ৰুত্তাতি অযং একমূলকনযো.

ইমিনাৰ নযেন দ্ৰিমূলকাদীসুপি যথানুরূপং নযো নেতব্বো, পাল়িযং পন ‘‘নহেতুপচ্চযা নারম্মণে এক’’ন্তিআদিনা ৰিস্সজ্জনৰারগণনাৰ দস্সিতাতি অযং পচ্চযপচ্চনীযনযো.

ইমিনা ৰুত্তানুসারেনেৰ ‘‘কুসলং ধম্মং পটিচ্চ অব্যাকতো ধম্মো উপ্পজ্জতি হেতুপচ্চযা নারম্মণপচ্চযা’’তিআদিনা অনুলোমপচ্চনীযনযে, ‘‘অকুসলং ধম্মং পটিচ্চ অকুসলো ধম্মো উপ্পজ্জতি নহেতুপচ্চযা আরম্মণপচ্চযা’’তিআদিনা পচ্চনীযানুলোমনযে পঞ্হৰিস্সজ্জননযো ৰেদিতব্বো ¶ . পাল়িযং পনেত্থ ৰিস্সজ্জনৰারগণনাৰ দস্সিতাতি ¶ অযং অনুলোমপচ্চনীযকুসলত্তিকে পটিচ্চৰারনযো.

সহজাতৰারাদীসুপি ছৰারেসু পটিচ্চৰারে ৰুত্তানুসারেন সব্বত্থ নযো নেতব্বো. যে পন তত্থ তত্থ পাল়িৰিসেসা, অত্থৰিসেসা চ উপলব্ভন্তি, তে পট্ঠানপাল়িঅট্ঠকথাসু এৰ সব্বাকারতো গহেতব্বা. ইধ পন তে সব্বে সঙ্খেপনযতো দস্সিযমানাপি গন্থভারিযং করোন্তীতি ন দস্সিতা.

তেসু পন ৰারেসু ‘‘কুসলং ধম্মং সহজাতো কুসলো ধম্মো উপ্পজ্জতি হেতুপচ্চযা. কুসলং ধম্মং পচ্চযা… কুসলং ধম্মং নিস্সায… কুসলং ধম্মং সংসট্ঠো… কুসলং ধম্মং সম্পযুত্তো কুসলো ধম্মো উপ্পজ্জতি হেতুপচ্চযা’’তি এৰং আদিতো পঞ্চসু ৰারেসু পাল়িগতি ঞাতব্বা. তেসু চ পটিচ্চসহজাতা একত্থা, পচ্চযনিস্সযা একত্থা, সংসট্ঠসম্পযুত্তা একত্থা. তত্থ ‘‘কুসলং ধম্মং সহজাতো’’তিআদীসু কুসলং ধম্মং পটিচ্চ তেন সহজাতো হুত্ৰাতিআদিনা যথানুরূপং অত্থো ৰেদিতব্বো. পচ্ছিমে পন পঞ্হাৰারে ‘‘কুসলো ধম্মো কুসলস্স ধম্মস্স হেতুপচ্চযেন পচ্চযো. কুসলা হেতূ সম্পযুত্তকানং খন্ধানং হেতুপচ্চযেন পচ্চযো. কুসলো অব্যাকতস্স…পে… কুসলস্স চ অব্যাকতস্স চ…পে… কুসলা হেতূ সম্পযুত্তকানং খন্ধানং চিত্তসমুট্ঠানানঞ্চা’’তিআদিনা হেতুপচ্চযে,

‘‘কুসলো ধম্মো কুসলস্স ধম্মস্স আরম্মণপচ্চযেন পচ্চযো. দানং দত্ৰা সীলং সমাদিযিত্ৰা উপোসথকম্মং কত্ৰা তং পচ্চৰেক্খতি. পুব্বে সুচিণ্ণানি…পে… ঝানা ৰুট্ঠহিত্ৰা ঝানং… সেখা গোত্রভুং ৰোদানং মগ্গং পচ্চৰেক্খন্তি. সেখা ৰা পুথুজ্জনা ৰা কুসলং অনিচ্চতো দুক্খতো অনত্ততো ৰিপস্সন্তি. চেতোপরিযঞাণেন কুসলচিত্তসমঙ্গিস্স চিত্তং জানন্তি ¶ . আকাসানঞ্চাযতনকুসলং ৰিঞ্ঞাণঞ্চাযতনকুসলস্স আরম্মণপচ্চযেন পচ্চযো. আকিঞ্চঞ্ঞাযতনকুসলং নেৰসঞ্ঞানাসঞ্ঞাযতনকুসলস্স… কুসলা খন্ধা ইদ্ধিৰিধঞাণস্স চেতোপরিযপুব্বেনিৰাসযথাকম্মূপগঅনাগতংসঞাণস্স আরম্মণপচ্চযেন পচ্চযো.

কুসলো অকুসলস্স…পে… দানং দত্ৰা…পে… কত্ৰা তং অস্সাদেতি অভিনন্দতি. তং আরব্ভ রাগো উপ্পজ্জতি. দিট্ঠি ৰিচিকিচ্ছা উদ্ধচ্চং দোমনস্সং উপ্পজ্জতি. পুব্বে সুচিণ্ণানি অস্সাদেতি ¶ …পে… দোমনস্সং উপ্পজ্জতি. ঝানা ৰুট্ঠহিত্ৰা ঝানং অস্সাদেতি…পে… উদ্ধচ্চং উপ্পজ্জতি. ঝানে পরিহীনে ৰিপ্পটিসারিস্স দোমনস্সং উপ্পজ্জতি.

কুসলো অব্যাকতস্স…পে… পচ্চযো. অরহা মগ্গং পচ্চৰেক্খতি. পুব্বে সুচিণ্ণানি… কুসল…পে… ৰিপস্সতি…পে… ৰিপাকো তদারম্মণতা উপ্পজ্জতি. আকাসানঞ্চাযতনকুসলং ৰিঞ্ঞাণঞ্চাযতনৰিপাকস্স…পে… কিরিযস্স. আকিঞ্চঞ্ঞাযতন…পে… ৰিপাকস্স চ কিরিযস্স চ. কুসলা খন্ধা চেতোপরিয…পে… অনাগতংসঞাণস্স আৰজ্জনায.

অকুসলো অকুসলস্স…পে… পচ্চযো. রাগং অস্সাদেতি…পে… উদ্ধচ্চং উপ্পজ্জতি. অকুসলো কুসলস্স…পে… পচ্চযো. সেখা পহীনে কিলেসে…পে… অনাগতংসঞাণস্স. অকুসলো অব্যাকতস্স… অরহা পহীনে কিলেসে…পে… আৰজ্জনায.

অব্যাকতো অব্যাকতস্স… অরহা ফলং পচ্চৰেক্খতি. নিব্বানং, চক্খুং…পে… ফোট্ঠব্বং ৰিপস্সতি. দিব্বেন চক্খুনা রূপং পস্সতি…পে… আকিঞ্চঞ্ঞাযতনকিরিযং…পে… কিরিযস্স. রূপাযতনং চক্খুৰিঞ্ঞাণস্স…পে… আৰজ্জনায. অব্যাকতো কুসলস্স… সেখা ফলং…পে… অনাগতংসঞাণস্স. অব্যাকতো অকুসলস্স… চক্খুং অস্সাদেতী’’তিআদিনা আরম্মণপচ্চযে চ,

‘‘কুসলো ¶ কুসলস্স অধিপতিপচ্চযেন পচ্চযো. আরম্মণাধিপতি, সহজাতাধিপতি. আরম্মণাধিপতি – দানং দত্ৰা’’তিআদিনা অধিপতিপচ্চযে চ,

‘‘কুসলো কুসলস্স অনন্তরপচ্চযেন পচ্চযো’’তিআদিনা ৰিত্থারতো অনন্তরসমনন্তরসহজাতঅঞ্ঞমঞ্ঞনিস্সযপচ্চযেসু চ,

‘‘কুসলো কুসলস্স উপনিস্সযপচ্চযেন পচ্চযো. আরম্মণূপনিস্সযো অনন্তরূপনিস্সযো পকতূপনিস্সযো. আরম্মণূপনিস্সযো – দানং দত্ৰা’’তিআদিনা আরম্মণপচ্চযে ৰুত্তনযেন, ‘‘অনন্তরূপনিস্সযো – পুরিমা পুরিমা কুসলা খন্ধা পচ্ছিমানং পচ্ছিমান’’ন্তিআদিনা ¶ অনন্তরপচ্চযে ৰুত্তনযেনেৰ, ‘‘পকতূপনিস্সযো – সদ্ধং উপনিস্সায…পে… উপোসথকম্মং করোতি. ঝানং, ৰিপস্সনং, মগ্গং, অভিঞ্ঞং, সমাপত্তিং উপ্পাদেতি. সীলং, সুতং, চাগং, পঞ্ঞং উপনিস্সায…পে… পঠমস্স ঝানস্স পরিকম্মং পঠমস্স ঝানস্স উপনিস্সযপচ্চযেন পচ্চযো…পে… আকিঞ্চঞ্ঞাযতনং নেৰসঞ্ঞানাসঞ্ঞাযতনস্স…পে… যথাকম্মূপগঞাণং অনাগতংসঞাণস্স…পে… পঠমস্স মগ্গস্স পরিকম্মং পঠমস্স…পে… ততিযো মগ্গো চতুত্থস্স. মগ্গো সেখানং অত্থপটিসম্ভিদায…পে… ঠানাঠানকোসল্লস্স উপনিস্সয. কুসলো অকুসলস্স…পে… আরম্মণূপনিস্সযো. পকতূপ…পে… পকতূপনিস্সযো – সদ্ধং উপনিস্সায মানং জপ্পেতি. দিট্ঠিং গণ্হাতি…পে… সদ্ধা সীলং সুতং চাগো পঞ্ঞা রাগস্স, দোসস্স, মোহস্স, মানস্স, দিট্ঠিযা. পত্থনায…পে… কুসলো অব্যাকতস্স…পে… আরম্মণূপনিস্সযো. অনন্তরূপনিস্সযো. পকতূপ…পে… পকতূপনিস্সযো – সদ্ধং উপনিস্সায অত্তানং আতাপেতি…পে… কাযিকস্স সুখস্স, দুক্খস্স, ফলসমাপত্তিযা. কুসলং কম্মং ৰিপাকস্স…পে… মগ্গো অরহতো অত্থপটিসম্ভিদায পচ্চযো.

অকুসলো ¶ অকুসলস্স…পে… পকতূপনিস্সযো – রাগং উপনিস্সায পাণং হনতি…পে… সম্ফং পলপতি…পে… সঙ্ঘং ভিন্দতি. দোসং, মোহং, মানং, দিট্ঠিং, পত্থনং উপনিস্সায…পে… সঙ্ঘং ভিন্দতি…পে… পাণাতিপাতো পাণাতিপাতস্স…পে… সঙ্ঘভেদকম্মস্স…পে… পচ্চযো.

অকুসলো কুসলস্স…পে… পকতূপনিস্সযো – রাগং উপনিস্সায দানং দেতি…পে… মগ্গং উপ্পাদেতি…পে… সমাপত্তিং উপ্পাদেতি. রাগো…পে… পত্থনা. সদ্ধায, সীলস্স…পে… পঞ্ঞায উপনিস্সয. পাণং হন্ত্ৰা তস্স পটিঘাতত্থায দানং দেতী’’তিআদিনা চ উপনিস্সযপচ্চযে চ,

‘‘অব্যাকতো অব্যাকতস্স পুরেজাতপচ্চযেন পচ্চযো…পে… আরম্মণপুরেজাতং – অরহা চক্খুং…পে… ফোট্ঠব্বে, ৰত্থুং ৰিপস্সতি…পে… দিব্বেন চক্খুনা রূপং পস্সতি…পে… রূপাযতনং চক্খুৰিঞ্ঞাণস্স…পে… ৰত্থুপুরেজাতং – চক্খাযতনং চক্খুৰিঞ্ঞাণস্স…পে… ৰত্থু ৰিপাকাব্যাকতান’’ন্তিআদিনা পুরেজাতপচ্চযে চ,

‘‘কুসলো ¶ অব্যাকতস্স…পে… পচ্ছাজাতা কুসলা খন্ধা পুরেজাতস্স ইমস্স কাযস্সা’’তিআদিনা পচ্ছাজাতপচ্চযে চ,

‘‘কুসলো কুসলস্স…পে… পুরিমা পুরিমা কুসলা খন্ধা’’তিআদিনা আসেৰনপচ্চযে চ,

‘‘সহজাতা নানাক্খণিকা, সহজাতা কুসলা চেতনা…পে… সম্পযুত্তকানং খন্ধানং চিত্তসমুট্ঠানানঞ্চ রূপানং. নানাক্খণিকা ৰিপাকানং খন্ধানং কটত্তা চ রূপান’’ন্তিআদিনা কম্মপচ্চযে চ,

‘‘অব্যাকতো অব্যাকতস্স…পে… একো খন্ধো তিণ্ণন্ন’’ন্তিআদিনা ৰিপাকপচ্চযে চ,

‘‘কুসলো ¶ কুসলস্সা’’তিআদিনা আহারপচ্চযাদীসু চ, ‘‘কুসলো অব্যাকতস্স, সহজাতং, পচ্ছাজাতং, সহজাতা চিত্তসমুট্ঠানানং রূপানং. পচ্ছাজাতা ইমস্স কাযস্স…পে… অব্যাকতো কুসলস্স…পে… পুরেজাতং ৰত্থু কুসলানং খন্ধানং ৰিপ্পযুত্তপচ্চযেন পচ্চযো’’তিআদিনা ৰিপ্পযুত্তপচ্চযাদীসু চ পাল়িগতি ৰেদিতব্বা.

তত্থ কুসলধম্মো নামেস যস্মা উপ্পজ্জন্তো ঠপেত্ৰা পচ্ছাজাতপচ্চযং, ৰিপাকপচ্চযঞ্চ সেসেহি দ্ৰাৰীসতিযা পচ্চযেহি উপ্পজ্জতি. কুসলস্স চ পচ্চযো হোন্তো ঠপেত্ৰা পুরেজাতপচ্ছাজাতৰিপাকৰিপ্পযুত্তপচ্চযে সেসেহি ৰীসতিযা পচ্চযেহি পচ্চযো হোতি. এৰং কুসলো কুসলাদীনং, অকুসলো চ অকুসলাদীনং যথানুরূপং পচ্চযা হোন্তি, তস্মা কুসলাদীনং তংতংপচ্চযুপ্পন্নৰিভাগং দস্সেতুং পঞ্হাৰারো ৰুত্তো. তত্থ সেখা গোত্রভুন্তি সোতাপন্নং সন্ধায ৰুত্তং, ৰোদানন্তি সকদাগামিঅনাগামিনো. তেসং হি গোত্রভুচিত্তং ৰোদানং নাম. মগ্গা ৰুট্ঠহিত্ৰাতি মগ্গৰীথিতো ৰুট্ঠায. ন হি মগ্গানন্তরা পচ্চৰেক্খণা নাম অত্থীতি অযং অনুলোমপট্ঠানে কুসলত্তিকনযো.

ৰেদনাত্তিকাদীসু ‘‘সুখায ৰেদনায সম্পযুত্তং ধম্মং পটিচ্চ সুখায ৰেদনায সম্পযুত্তো ধম্মো উপ্পজ্জতি হেতুপচ্চযা. সুখায ৰেদনায সম্পযুত্তং একং খন্ধং পটিচ্চ দ্ৰে খন্ধা. দ্ৰে খন্ধে ¶ পটিচ্চ একো খন্ধো’’তিআদিনা কুসলত্তিকে ৰুত্তানুসারেন পটিচ্চৰারাদীসু পঞ্হাৰারপরিযোসানেসু সত্তসু ৰারেসু একেকস্মিং পচ্চযানুলোমাদীহি চ একমূলাদীহি নযেহি চ সব্বত্তিকেসু লব্ভমানপদৰসেন গণনানযো যোজেত্ৰা ঞাতব্বো. তত্থ ৰেদনাত্তিকে ৰেদনাক্খন্ধস্স অলব্ভনতো ‘‘একং খন্ধং নিস্সায দ্ৰে খন্ধা’’তিআদি ৰুত্তং. সব্বত্থ ৰিসেসো ¶ পাল়িঅট্ঠকথানুসারেনেৰ ঞাতব্বোতি অযং অনুলোমপটিলোমে তিকপট্ঠাননযো.

দুকপট্ঠানে পন ‘‘হেতুং ধম্মং পটিচ্চ হেতু ধম্মো উপ্পজ্জতি হেতুপচ্চযা. অলোভং পটিচ্চ অদোসো. অমোহো. অদোসং অমোহং পটিচ্চ অলোভো. অদোসো. লোভং পটিচ্চ মোহো. মোহং পটিচ্চ লোভো. দোসং পটিচ্চ মোহো. মোহং পটিচ্চ দোসো. পটিসন্ধিক্খণে হেতুং ধম্মং পটিচ্চ নহেতু ধম্মো উপ্পজ্জতি…পে… হেতূ চ নহেতূ চ. নহেতুং পটিচ্চ নহেতু ধম্মো ন…পে… হেতূ চ নহেতূ চা’’তিআদিনা হেতুদুকে,

‘‘সহেতুকং ধম্মং পটিচ্চ সহেতুকো ধম্মো উপ্পজ্জতি হেতুপচ্চযা. সহেতুকং একং খন্ধং…পে… সহেতুকং ধম্মং পটিচ্চ. অহেতুকো…পে… চিত্তসমুট্ঠানং রূপং. পটিসন্ধিক্খণে…পে… সহেতুকো চ, অহেতুকো চ…পে… অহেতুকং খন্ধং পটিচ্চ অহেতুকো. ৰিচিকিচ্ছাসহগতং উদ্ধচ্চসহগতং মোহং পটিচ্চ সম্পযুত্তকা খন্ধা…পে… চিত্তসমুট্ঠানং. আহারসমুট্ঠান’’ন্তিআদিনা সহেতুকদুকাদীসু চ কেনচিৰিঞ্ঞেয্যদুকৰজ্জিতেসু সব্বদুকেসু পচ্চেকং পটিচ্চৰারাদীসু সত্তসু মহাৰারেসু একেকস্মিং পচ্চযানুলোমাদীসু চতূসু নযেসু একমূলকাদীহি সব্বৰারেহি কুসলত্তিকে ৰুত্তানুসারেন যথানুরূপং ৰিভঙ্গনযো যোজেত্ৰা ঞাতব্বো. সব্বস্মিম্পি হি পট্ঠানে কেনচিৰিঞ্ঞেয্যদুকং ন লব্ভতীতি অযং দুকপট্ঠাননযো.

দুকতিকপট্ঠানে পন ‘‘হেতুং কুসলং ধম্মং পটিচ্চ হেতু কুসলো ধম্মো উপ্পজ্জতি হেতুপচ্চযা’’তিআদিনা হেতুদুকেন সদ্ধিং কুসলত্তিকে কুসলং পদং যোজেত্ৰা পটিচ্চৰারাদীসু সত্তসু ৰারেসু পচ্চযানুলোমাদীনং চতুন্নং নযানং ৰসেন লব্ভমানকপচ্চযা একমূলকাদিনযেহি দস্সিতা ¶ . যথা চ কুসলং পদং, এৰং অকুসলং পদং, অব্যাকতঞ্চ হেতুদুকেন যোজেত্ৰা ৰুত্তনযেন দস্সেত্ৰা হেতুকুসলদুকতিকন্তি ঠপিতং. পাল়ি পন অতিসংখিত্তা. যথা কুসলত্তিকং, এৰং ‘‘হেতুং সুখায ৰেদনায সম্পযুত্তং ধম্মং পটিচ্চ হেতু সুখায ৰেদনায সম্পযুত্তো ধম্মো উপ্পজ্জতি হেতুপচ্চযা’’তিআদিনা লব্ভমানকপদৰসেন ৰেদনাত্তিকাদযোপি হেতুদুকেন ¶ যোজেত্ৰা হেতুৰেদনদুকতিকাদীনি একৰীসতিদুকতিকানি দস্সিতানীতি. যথা চ হেতুদুকেন সদ্ধিং লব্ভমানকপদৰসেন দ্ৰাৰীসতিতিকা যোজিতা, এৰং সহেতুকদুকাদীহি সব্বেহি সদ্ধিং পচ্চেকং দ্ৰাৰীসতিতিকা যোজেতব্বা. পাল়ি পনেত্থ ইতো পরেসুপি সব্বত্থ অতিসংখিত্তা. এৰং দ্ৰাৰীসতিতিকে গহেত্ৰা দুকসতে পক্খিপিত্ৰা দুকতিকপট্ঠানং দেসিতন্তি অযং দুকতিকপট্ঠাননযো.

তিকদুকপট্ঠানেপি ‘‘কুসলং হেতুং ধম্মং পটিচ্চ কুসলো হেতু ধম্মো উপ্পজ্জতি হেতুপচ্চযা’’তিআদিনা কুসলত্তিকেন সদ্ধিং হেতুপদং যোজেত্ৰা পটিচ্চৰারাদীসু সত্তসু মহাৰারেসু পচ্চযানুলোমাদিনযচতুক্কৰসেন লব্ভমানকপচ্চযা একমূলাদীহি সব্বৰারেহি দস্সিতা. যথা হেতুপদং, এৰং নহেতুপদম্পি কুসলত্তিকেন সদ্ধিং যোজেত্ৰা কুসলহেতু তিকদুকন্তি ঠপিতং. যথা চ কুসলত্তিকেন সদ্ধিং হেতুদুকং, এৰং ‘‘সুখায ৰেদনায সম্পযুত্তং হেতুং কুসলং ধম্মং পটিচ্চা’’তিআদিনা ৰেদনাত্তিকাদীহিপি তং যোজেত্ৰা ৰেদনাত্তিকদুকাদীনি একৰীসতিতিকদুকাদীনি দস্সিতানি. যথা চ হেতুদুকং, এৰং সহেতুকাদযোপি সব্বে পচ্চেকং দ্ৰাৰীসতিযা তিকেহি লব্ভমানপদৰসেনেৰ যোজিতা. এৰং দুকসতং দ্ৰাৰীসতিযা তিকেসু পক্খিপিত্ৰা তিকদুকপট্ঠানং দেসিতন্তি অযং তিকদুকপট্ঠাননযো.

তিকতিকপট্ঠানেপি ¶ ‘‘কুসলং সুখায ৰেদনায সম্পযুত্তং ধম্মং পটিচ্চ কুসলো সুখায ৰেদনায সম্পযুত্তো ধম্মো উপ্পজ্জতি হেতুপচ্চযা’’তিআদিনা কুসলত্তিকং ৰেদনাত্তিকাদীহি সব্বত্তিকেহি, ৰেদনাত্তিকাদযো চ কুসলত্তিকাদীহি ৰুত্তনযেন যোজেত্ৰা পচ্চযা দস্সিতা. এৰং তিকেসু এৰ তিকে পক্খিপিত্ৰা তিকতিকপট্ঠানং দেসিতন্তি অযং তিকতিকপট্ঠাননযো.

দুকদুকপট্ঠানেপি ‘‘হেতুং সহেতুকং ধম্মং পটিচ্চ হেতু সহেতুকো ধম্মো উপ্পজ্জতি হেতুপচ্চযা’’তিআদিনা হেতুদুকং সহেতুকাদীহি, সহেতুকঞ্চ হেতুদুকাদীহি যোজেত্ৰা হেট্ঠা ৰুত্তনযেহি পচ্চযা দস্সিতা. এৰং দুকেসু এৰ দুকে পক্খিপিত্ৰা দুকদুকপট্ঠানং দেসিতন্তি অযং দুকদুকপট্ঠাননযো. এৰং তাৰ অনুলোমপট্ঠানে –

‘‘তিকঞ্চ পট্ঠানৰরং দুকুত্তমং,

দুকতিকঞ্চেৰ ¶ তিকদুকঞ্চ;

তিকতিকঞ্চেৰ দুকদুকঞ্চ,

ছ অনুলোমম্হি নযা সুগম্ভীরা’’তি. –

ৰুত্তা ছ নযা ৰেদিতব্বা. পচ্চযৰসেন পনেতেসু ছসু একেকস্মিং পট্ঠানে পচ্চযানুলোমাদীনং চতুন্নং নযানং ৰসেন এতেন পরিযাযেন চতুৰীসতিনযপটিমণ্ডিতমিদং ধম্মানুলোমপট্ঠানন্তি ৰেদিতব্বং. অযং অনুলোমপট্ঠাননযো.

পচ্চনীযপট্ঠানে পন ‘‘নকুসলং ধম্মং পটিচ্চ নকুসলো ধম্মো উপ্পজ্জতি হেতুপচ্চযা. অকুসলং অব্যাকতং একং খন্ধং পটিচ্চ…পে… দ্ৰে খন্ধা, চিত্তসমুট্ঠানঞ্চ রূপ’’ন্তিআদিনা তিকপট্ঠানে, ‘‘নহেতুং ধম্মং পটিচ্চ নহেতু ধম্মো উপ্পজ্জতি হেতুপচ্চযা. নহেতুং একং খন্ধং পটিচ্চ…পে… চিত্তসমুট্ঠানঞ্চ রূপ’’ন্তিআদিনা দুকপট্ঠানে চ, ‘‘নহেতুং নকুসলং ধম্মং পটিচ্চ নহেতু নকুসলো ধম্মো উপ্পজ্জতি হেতুপচ্চযা. নহেতুং নকুসলং অব্যাকতং ¶ একং খন্ধং পটিচ্চ তযো খন্ধা’’তিআদিনা দুকতিকপট্ঠানে চ, ‘‘নকুসলং নহেতুং ধম্মং পটিচ্চ নকুসলো নহেতু ধম্মো উপ্পজ্জতী’’তিআদিনা তিকদুকপট্ঠানে চ, ‘‘নকুসলং নসুখায ৰেদনায সম্পযুত্তং ধম্মং পটিচ্চ নকুসলো নসুখায ৰেদনায সম্পযুত্তো ধম্মো উপ্পজ্জতী’’তিআদিনা তিকতিকপট্ঠানে চ, ‘‘নহেতুং নসহেতুকং ধম্মং পটিচ্চ নহেতু নসহেতুকো ধম্মো উপ্পজ্জতি হেতুপচ্চযা’’তিআদিনা দুকদুকপট্ঠানে চাতি ছসু পচ্চনীযপট্ঠানেসু অনুলোমতিকপট্ঠানাদীসু ছসু পট্ঠানেসু ৰুত্তেন সব্বেন পকারেন পাল়িনযো ৰেদিতব্বো. ইদঞ্চ কুসলাদীনং, হেতুআদীনঞ্চ ধম্মানং পচ্চযুপ্পন্নভাৰপটিক্খেপৰসেন পৰত্তত্তা ধম্মপচ্চনীযপট্ঠানং নাম জাতং. তত্থ হি নকুসলং ধম্মং পটিচ্চাতি কুসলস্স পচ্চযপটিক্খেপো. নকুসলো ধম্মো উপ্পজ্জতীতি কুসলস্স পচ্চযুপ্পন্নভাৰপটিক্খেপো. তথা ‘‘অকুসলং অব্যাকতং একং খন্ধং পটিচ্চ…পে… অকুসলা, অব্যাকতা খন্ধা চিত্তসমুট্ঠানঞ্চ রূপং উপ্পজ্জতী’’তি এৰমাদিনা নযেনেত্থ অত্থো ৰেদিতব্বো. এৰমেত্থ পচ্চনীযপট্ঠানে –

‘‘তিকঞ্চ পট্ঠানৰরং দুকুত্তমং,

দুকতিকঞ্চেৰ তিকদুকঞ্চ;

তিকতিকঞ্চেৰ দুকদুকঞ্চ,

ছ পচ্চনীযম্হি নযা সুগম্ভীরা’’তি. –

ৰুত্তা ¶ ছ নযা ৰেদিতব্বা. পচ্চযৰসেন পনেত্থাপি একেকস্মিং পচ্চযানুলোমাদীনং চতুন্নং চতুন্নং নযানং ৰসেন চতুৰীসতিনযপটিমণ্ডিতমিদং ধম্মপচ্চনীযপট্ঠানন্তি ৰেদিতব্বন্তি অযং পচ্চনীযপট্ঠাননযো.

অনুলোমপচ্চনীযপট্ঠানে পন ‘‘কুসলং ধম্মং পটিচ্চ নকুসলো ধম্মো উপ্পজ্জতি হেতুপচ্চযা. কুসলে খন্ধে পটিচ্চ চিত্তসমুট্ঠানং রূপ’’ন্তিআদিনা তিকপট্ঠানে, ‘‘হেতুং ধম্মং পটিচ্চ নহেতু ¶ ধম্মো উপ্পজ্জতি হেতুপচ্চযা’’তিআদিনা দুকপট্ঠানে চ, ‘‘হেতুং কুসলং ধম্মং পটিচ্চ নহেতু নকুসলো ধম্মো উপ্পজ্জতী’’তিআদিনা দুকতিকপট্ঠানে চ, ‘‘কুসলং হেতুং ধম্মং পটিচ্চ নকুসলো নহেতু ধম্মো উপ্পজ্জতী’’তিআদিনা তিকদুকপট্ঠানে চ, ‘‘কুসলং সুখায ৰেদনায সম্পযুত্তং ধম্মং পটিচ্চ নকুসলো নসুখায ৰেদনায সম্পযুত্তো ধম্মো উপ্পজ্জতী’’তিআদিনা তিকতিকপট্ঠানে চ, ‘‘হেতুং সহেতুকং ধম্মং পটিচ্চ নহেতু নসহেতুকো ধম্মো উপ্পজ্জতী’’তিআদিনা দুকদুকপট্ঠানে চ হেট্ঠা ৰুত্তনযেন সব্বেন পকারেন পাল়িনযো ৰেদিতব্বো. ইদং কুসলাদীনং ধম্মানং পচ্চযত্তং অপ্পটিক্খিপিত্ৰা পচ্চযুপ্পন্নানং কুসলাদিভাৰপটিক্খেপৰসেন পৰত্তত্তা ধম্মানুলোমপচ্চনীযপট্ঠানং নাম জাতং. তত্থ হি কুসলং ধম্মং পটিচ্চাতি কুসলস্স পচ্চযভাৰৰিধানং. নকুসলো ধম্মো উপ্পজ্জতীতি কুসলস্স পচ্চযুপ্পন্নভাৰনিৰারণং, তস্মা ‘‘কুসলে খন্ধে পটিচ্চ চিত্তসমুট্ঠানং রূপ’’ন্তিআদিনা ৰিস্সজ্জনং ৰুত্তন্তি ৰেদিতব্বন্তি এৰমেত্থ অনুলোমপচ্চনীযপট্ঠানে –

‘‘তিকঞ্চ পট্ঠানৰরং দুকুত্তমং,

দুকতিকঞ্চেৰ তিকদুকঞ্চ;

তিকতিকঞ্চেৰ দুকদুকঞ্চ,

ছ অনুলোমপচ্চনীযম্হি নযা সুগম্ভীরা’’তি. –

ৰুত্তা ছ নযা ৰেদিতব্বা. পচ্চযৰসেন পনেত্থাপি একেকস্মিং পচ্চযানুলোমাদীনং চতুন্নং চতুন্নং নযানং ৰসেন চতুৰীসতিনযপটিমণ্ডিতমিদং ধম্মানুলোমপচ্চনীযপট্ঠানন্তি ৰেদিতব্বন্তি অযং অনুলোমপচ্চনীযপট্ঠাননযো.

পচ্চনীযানুলোমপট্ঠানে ‘‘নকুসলং ধম্মং পটিচ্চ অকুসলো ধম্মো…পে… নকুসলং ধম্মং পটিচ্চ ¶ অব্যাকতো ধম্মো উপ্পজ্জতি হেতুপচ্চযা’’তিআদিনা তিকপট্ঠানে, ‘‘নহেতুং ধম্মং পটিচ্চ হেতু ধম্মো উপ্পজ্জতী’’তিআদিনা দুকপট্ঠানে চ, ‘‘নহেতুং ¶ নকুসলং ধম্মং পটিচ্চ হেতু অকুসলো ধম্মো…পে… হেতু অব্যাকতো ধম্মো উপ্পজ্জতীতি’’আদিনা দুকতিকপট্ঠানে চ, ‘‘নকুসলং নহেতুং ধম্মং পটিচ্চ অকুসলো হেতু ধম্মো…পে… অব্যাকতো হেতু ধম্মো উপ্পজ্জতী’’তিআদিনা তিকদুকপট্ঠানে চ, ‘‘নকুসলং নসুখায ৰেদনায সম্পযুত্তং ধম্মং পটিচ্চ অকুসলো সুখায ৰেদনায সম্পযুত্তো ধম্মো…পে… অব্যাকতো সুখায ৰেদনায সম্পযুত্তো ধম্মো উপ্পজ্জতী’’তিআদিনা তিকতিকপট্ঠানে চ, ‘‘নহেতুং নসহেতুকং ধম্মং পটিচ্চ হেতু সহেতুকো ধম্মো উপ্পজ্জতী’’তিআদিনা দুকদুকপট্ঠানে চ, হেট্ঠা ৰুত্তেন পকারেন পাল়িনযো ৰেদিতব্বো. ইদঞ্চ কুসলাদিধম্মানং পচ্চযত্তং পটিক্খিপিত্ৰা তেসং পচ্চযুপ্পন্নভাৰঅপ্পটিক্খেপৰসেন পৰত্তত্তা ধম্মপচ্চনীযানুলোমপট্ঠানং নাম জাতং. তত্থ নকুসলং ধম্মন্তি কুসলস্স পচ্চযভাৰনিৰারণং. অকুসলো ধম্মো উপ্পজ্জতীতি অকুসলস্স উপ্পত্তিৰিধানং. কুসলং পন পটিচ্চ কুসলস্স উপ্পত্তিঅভাৰতো ‘‘কুসলো ধম্মো উপ্পজ্জতী’’তি অৰত্ৰা ‘‘অকুসলো ধম্মো উপ্পজ্জতী’’তি লব্ভমানপদৰসেন ৰুত্তং. কুসলং, হি অকুসলং, অব্যাকতং ৰা সহজাতপচ্চযং কত্ৰা উপ্পজ্জমানো কুসলো নাম নত্থি, তস্মা অকুসলস্স চ অব্যাকতস্স চ ৰসেন দেসনা কতা. এৰমঞ্ঞত্থ. এৰমেত্থ ধম্মপচ্চনীযানুলোমপট্ঠানে –

‘‘তিকঞ্চ পট্ঠানৰরং দুকুত্তমং,

দুকতিকঞ্চেৰ তিকদুকঞ্চ;

তিকতিকঞ্চেৰ দুকদুকঞ্চ,

ছ পচ্চনীযানুলোমম্হি নযা সুগম্ভীরা’’তি. –

ৰুত্তা ছ নযা ৰেদিতব্বা. পচ্চযৰসেন পনেত্থাপি তিকপট্ঠানাদীসু একেকস্মিং পচ্চযানুলোমাদীনং চতুন্নং চতুন্নং ¶ নযানং ৰসেন একেন পরিযাযেন চতুৰীসতিনযপটিমণ্ডিতমিদং ধম্মপচ্চনীযানুলোমপট্ঠানন্তি ৰেদিতব্বন্তি অযং পচ্চনীযানুলোমপট্ঠাননযো.

এৰমিদং ভগৰতা অনুলোমপট্ঠানাদীসু চতূসু একেকস্মিং পট্ঠানে তিকদুকাদীনঞ্ঞেৰ ছন্নং ছন্নং নযানং ৰসেন চতুৰীসতিনযপটিমণ্ডিতং সমন্তপট্ঠানমহাপকরণং দেসিতং. পচ্চযৰসেন পনেতেসু চতুৰীসতিযা পট্ঠানেসু একেকস্মিং পচ্চযানুলোমাদীনং চতুন্নং চতুন্নং নযানং ¶ ৰসেনেতং ছন্নৰুতিনযপটিমণ্ডিতং হোতি, ধম্মৰসেনেৰ চেতং পকরণং চতুৰীসতিসমন্তপট্ঠানং ৰুত্তন্তি অযমেত্থ ৰিভঙ্গনযো.

মোহৰিচ্ছেদনিযা অভিধম্মমাতিকত্থৰণ্ণনায

পট্ঠানমাতিকত্থৰণ্ণনা নিট্ঠিতা.

নিগমনকথা

এত্তাৰতা ¶ চ –

১.

মাতিকাযাভিধম্মস্স, আরদ্ধা অত্থৰণ্ণনা;

মোহৰিচ্ছেদনী নাম, যা সা নিট্ঠমুপাগতা.

২.

নিট্ঠং যথাযং সম্পত্তা, লজ্জীহি অভিপত্থিতা;

সব্বে নিট্ঠং তথা সন্তা, সমেন্তু সুমনোরথা.

৩.

যো গম্ভীরো সসাদীনং, সমুদ্দোৰ ভযাৰহো;

কালেস্মিং ধীমতঞ্চাপি, অপি গন্থাৰলোকনে.

৪.

পঠমন্তরধানস্স, অভিধম্মস্স তস্স যং;

সিলালেখা নিধীনংৰ, ধম্মত্থানং পকাসিকা.

৫.

নাৰা ৰিয সমুদ্দস্স, সুখোতরণপদ্ধতি;

পাল়িঅট্ঠকথা চেসা, পরিসুদ্ধা অনাকুলা.

৬.

নযতোপি ¶ অৰিক্কিণ্ণা, অসংকিণ্ণা নিকাযতো;

যতো সক্কচ্চ সোতব্বা, সদ্ধম্মট্ঠিতিযা সতা.

৭.

সদ্ধম্মট্ঠিতিকামেন, অনত্তুক্কংসনাদিতো;

মযাপি ৰণ্ণযন্তেন, রচিতা সুদ্ধচেতসা;

তেত্তিংসভাণৰারায, পরিমাণেন তন্তিযা.

৮.

মাতিকাৰণ্ণনা যা সা, যাৰ নিট্ঠং যথাবলং;

সব্বত্থসঙ্গহা এসা, অনাকুলপদক্কমা.

৯.

যং পত্তং কুসলং তেন, পত্ৰা সম্বোধিমুত্তমং;

নিট্ঠং পাপেয্যমখিলে, পাণিনো হিতচেতসা.

১০.

নানাজনাধিরমণীযতরস্স,

চোল়রট্ঠস্স ভারমধিৰাহকুলন্ধরস্স;

কাৰেরিপূতসলিলেন হিতালযস্স,

রাজাধিরাজৰরৰংসসুপীণিতস্স.

১১.

মজ্ঝম্হি ¶ চোল়ককলঙ্কনিভেন মগ্গং,

পূরং ৰিসালৰিভৰেহি মহাকুলেহি;

পাকারচক্কপরিখাহি চ গোপুরেহি,

যুত্তং জনাকুলসুসজ্জিতরাজমগ্গং.

১২.

সব্বূপভোগপরিভোগধনেহি নানা-

ৰণ্ণেহি পুণ্ণৰিৰিধাপণিকেহি সোভং;

চোল়াধিনাগপুরনন্দননাথভূতং,

যে তত্থ সোগতৰিহারৰরাভিরামা.

১৩.

তেসং ¶ মুখে জনমনোহরসত্থুবিম্ব-

সম্ভাৰিতে মহতি সজ্জনমাননীযে;

ৰিজ্জালযেহি উদযাচলসন্নিভেহি,

কেলাসকূটসিখরোপমচেতিযেহি.

১৪.

পাসাদহম্মিযৰরেহি চ মণ্ডপেহি,

জম্বম্বতালপনসাদিতরাৰলীহি;

নন্দোপনন্দভুজগস্স ৰরস্স ভোগ-

চক্কাৰলীসমসুধাকতগোপুরেহি.

১৫.

যুত্তে ৰিসালসিকতাসিতমাল়কেহি,

যুত্তে সুসীলযতিসঙ্ঘনিসেৰিতম্হি;

কল্যাণকম্মনিরতেহি হটূপহারে,

নাগজ্জুনৰ্হযৰিহারৰরে ৰসন্তো.

১৬.

নামেন যো ধুতধরগ্গসমাননামো,

চন্দোৰ পাকটনভোদিতৰীতপঞ্ঞো;

সত্থন্তরেসু নিপুণো পিটকত্তযে চ,

ৰাদীভযূথৰিপিনে মিগরাজলীলো.

১৭.

যো ¶ সাগরোৰ ন ৰিলঙ্ঘতি সীলৰেল-

মপ্পিচ্ছতাদিগুণসারৰিভূসিতত্তো;

জোতেতি সাসনমলং নিখিলং জহন্তো,

সক্কচ্চ ধম্মৰিনযং পরিদীপযন্তো.

১৮.

তেনাভিধম্মপিটকণ্ণৰৰিপ্পকিণ্ণ-

সারত্থরত্ননিকরেৰ সমুদ্ধরিত্ৰা;

সম্মাপজানগল়লঙ্করণায ¶ মোহ-

ৰিচ্ছেদনী ৰিরচিতা রতনাৰলী যা.

১৯.

সাযং পভাসতু সুকিত্তিৰিরাজমানা,

ধম্মেসু মোহতিমিরং ৰিনিহচ্চ সম্মা;

আভাতু তাৰ জিনসাসনজোতি যাৰ,

ৰত্তিস্সতিস্স জনতাহিতমাৰহন্তী.

ইতি চোল়রট্ঠে মহাকস্সপত্থেরেন ৰিরচিতা

মোহৰিচ্ছেদনী নাম

অভিধম্মমাতিকত্থৰণ্ণনা নিট্ঠিতা.