📜

নমো তস্স ভগৰতো অরহতো সম্মাসম্বুদ্ধস্স

ৰিসুদ্ধিমগ্গো

(দুতিযো ভাগো)

১২. ইদ্ধিৰিধনিদ্দেসো

অভিঞ্ঞাকথা

৩৬৫. ইদানি ¶ ¶ যাসং লোকিকাভিঞ্ঞানং ৰসেন অযং সমাধিভাৰনা অভিঞ্ঞানিসংসাতি ৰুত্তা, তা অভিঞ্ঞা সম্পাদেতুং যস্মা পথৰীকসিণাদীসু অধিগতচতুত্থজ্ঝানেন যোগিনা যোগো কাতব্বো. এৰঞ্হিস্স সা সমাধিভাৰনা অধিগতানিসংসা চেৰ ভৰিস্সতি থিরতরা চ, সো অধিগতানিসংসায থিরতরায সমাধিভাৰনায সমন্নাগতো সুখেনেৰ পঞ্ঞাভাৰনং সম্পাদেস্সতি. তস্মা অভিঞ্ঞাকথং তাৰ আরভিস্সাম.

ভগৰতা হি অধিগতচতুত্থজ্ঝানসমাধীনং কুলপুত্তানং সমাধিভাৰনানিসংসদস্সনত্থঞ্চেৰ উত্তরুত্তরি পণীতপণীতধম্মদেসনত্থঞ্চ ¶ ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে ইদ্ধিৰিধায চিত্তং অভিনীহরতি অভিনিন্নামেতি. সো অনেকৰিহিতং ইদ্ধিৰিধং পচ্চনুভোতি একোপি হুত্ৰা বহুধা হোতী’’তিআদিনা (দী. নি. ১.২৩৮) নযেন ইদ্ধিৰিধং, দিব্বসোতধাতুঞাণং, চেতোপরিযঞাণং, পুব্বেনিৰাসানুস্সতিঞাণং, সত্তানং চুতূপপাতে ঞাণন্তি পঞ্চ লোকিকাভিঞ্ঞা ৰুত্তা.

তত্থ ¶ একোপি হুত্ৰা বহুধা হোতীতিআদিকং ইদ্ধিৰিকুব্বনং কাতুকামেন আদিকম্মিকেন যোগিনা ওদাতকসিণপরিযন্তেসু অট্ঠসু কসিণেসু অট্ঠ অট্ঠ সমাপত্তিযো নিব্বত্তেত্ৰা –

কসিণানুলোমতো, কসিণপটিলোমতো, কসিণানুলোমপটিলোমতো, ঝানানুলোমতো, ঝানপটিলোমতো, ঝানানুলোমপটিলোমতো, ঝানুক্কন্তিকতো, কসিণুক্কন্তিকতো, ঝানকসিণুক্কন্তিকতো, অঙ্গসঙ্কন্তিতো, আরম্মণসঙ্কন্তিতো, অঙ্গারম্মণসঙ্কন্তিতো, অঙ্গৰৰত্থাপনতো, আরম্মণৰৰত্থাপনতোতি.

ইমেহি চুদ্দসহি আকারেহি চিত্তং পরিদমেতব্বং.

৩৬৬. কতমং পনেত্থ কসিণানুলোমং…পে… কতমং আরম্মণৰৰত্থাপনন্তি. ইধ ভিক্খু পথৰীকসিণে ঝানং সমাপজ্জতি, ততো আপোকসিণেতি এৰং পটিপাটিযা অট্ঠসু কসিণেসু সতক্খত্তুম্পি সহস্সক্খত্তুম্পি সমাপজ্জতি, ইদং কসিণানুলোমং নাম.

ওদাতকসিণতো পন পট্ঠায তথেৰ পটিলোমক্কমেন সমাপজ্জনং কসিণপটিলোমং নাম.

পথৰীকসিণতো পট্ঠায যাৰ ওদাতকসিণং, ওদাতকসিণতোপি পট্ঠায যাৰ পথৰীকসিণন্তি এৰং অনুলোমপটিলোমৰসেন পুনপ্পুনং সমাপজ্জনং কসিণানুলোমপটিলোমং নাম.

পঠমজ্ঝানতো পন পট্ঠায পটিপাটিযা যাৰ নেৰসঞ্ঞানাসঞ্ঞাযতনং, তাৰ পুনপ্পুনং সমাপজ্জনং ঝানানুলোমং নাম.

নেৰসঞ্ঞানাসঞ্ঞাযতনতো ¶ পট্ঠায যাৰ পঠমজ্ঝানং, তাৰ পুনপ্পুনং সমাপজ্জনং ঝানপটিলোমং নাম.

পঠমজ্ঝানতো পট্ঠায যাৰ নেৰসঞ্ঞানাসঞ্ঞাযতনং, নেৰসঞ্ঞানাসঞ্ঞাযতনতো পট্ঠায যাৰ পঠমজ্ঝানন্তি এৰং অনুলোমপটিলোমৰসেন পুনপ্পুনং সমাপজ্জনং ঝানানুলোমপটিলোমং নাম.

পথৰীকসিণে পন পঠমং ঝানং সমাপজ্জিত্ৰা তত্থেৰ ততিযং সমাপজ্জতি, ততো তদেৰ উগ্ঘাটেত্ৰা আকাসানঞ্চাযতনং, ততো আকিঞ্চঞ্ঞাযতনন্তি ¶ এৰং কসিণং অনুক্কমিত্ৰা ঝানস্সেৰ একন্তরিকভাৰেন উক্কমনং ঝানুক্কন্তিকং নাম. এৰং আপোকসিণাদিমূলিকাপি যোজনা কাতব্বা.

পথৰীকসিণে পঠমং ঝানং সমাপজ্জিত্ৰা পুন তদেৰ তেজোকসিণে, ততো নীলকসিণে, ততো লোহিতকসিণেতি ইমিনা নযেন ঝানং অনুক্কমিত্ৰা কসিণস্সেৰ একন্তরিকভাৰেন উক্কমনং কসিণুক্কন্তিকং নাম.

পথৰীকসিণে পঠমং ঝানং সমাপজ্জিত্ৰা ততো তেজোকসিণে ততিযং, নীলকসিণং উগ্ঘাটেত্ৰা আকাসানঞ্চাযতনং, লোহিতকসিণতো আকিঞ্চঞ্ঞাযতনন্তি ইমিনা নযেন ঝানস্স চেৰ কসিণস্স চ উক্কমনং ঝানকসিণুক্কন্তিকং নাম.

পথৰীকসিণে পন পঠমং ঝানং সমাপজ্জিত্ৰা তত্থেৰ ইতরেসম্পি সমাপজ্জনং অঙ্গসঙ্কন্তিকং নাম.

পথৰীকসিণে পঠমং ঝানং সমাপজ্জিত্ৰা তদেৰ আপোকসিণে…পে… তদেৰ ওদাতকসিণেতি এৰং সব্বকসিণেসু একস্সেৰ ঝানস্স সমাপজ্জনং আরম্মণসঙ্কন্তিকং নাম.

পথৰীকসিণে পঠমং ঝানং সমাপজ্জিত্ৰা আপোকসিণে দুতিযং, তেজোকসিণে ততিযং, ৰাযোকসিণে চতুত্থং, নীলকসিণং উগ্ঘাটেত্ৰা আকাসানঞ্চাযতনং, পীতকসিণতো ৰিঞ্ঞাণঞ্চাযতনং ¶ , লোহিতকসিণতো আকিঞ্চঞ্ঞাযতনং, ওদাতকসিণতো নেৰসঞ্ঞানাসঞ্ঞাযতনন্তি এৰং একন্তরিকৰসেন অঙ্গানঞ্চ আরম্মণানঞ্চ সঙ্কমনং অঙ্গারম্মণসঙ্কন্তিকং নাম.

পঠমং ঝানং পন পঞ্চঙ্গিকন্তি ৰৰত্থপেত্ৰা দুতিযং তিৰঙ্গিকং, ততিযং দুৰঙ্গিকং, তথা চতুত্থং আকাসানঞ্চাযতনং…পে… নেৰসঞ্ঞানাসঞ্ঞাযতনন্তি এৰং ঝানঙ্গমত্তস্সেৰ ৰৰত্থাপনং অঙ্গৰৰত্থাপনং নাম.

তথা ইদং পথৰীকসিণন্তি ৰৰত্থপেত্ৰা ইদং আপোকসিণং…পে… ইদং ওদাতকসিণন্তি এৰং আরম্মণমত্তস্সেৰ ৰৰত্থাপনং আরম্মণৰৰত্থাপনং নাম ¶ . অঙ্গারম্মণৰৰত্থাপনম্পি একে ইচ্ছন্তি. অট্ঠকথাসু পন অনাগতত্তা অদ্ধা তং ভাৰনামুখং ন হোতি.

৩৬৭. ইমেহি পন চুদ্দসহি আকারেহি চিত্তং অপরিদমেত্ৰা পুব্বে অভাৰিতভাৰনো আদিকম্মিকো যোগাৰচরো ইদ্ধিৰিকুব্বনং সম্পাদেস্সতীতি নেতং ঠানং ৰিজ্জতি. আদিকম্মিকস্স হি কসিণপরিকম্মম্পি ভারো, সতেসু সহস্সেসু ৰা একোৰ সক্কোতি. কতকসিণপরিকম্মস্স নিমিত্তুপ্পাদনং ভারো, সতেসু সহস্সেসু ৰা একোৰ সক্কোতি. উপ্পন্নে নিমিত্তে তং ৰড্ঢেত্ৰা অপ্পনাধিগমো ভারো, সতেসু সহস্সেসু ৰা একোৰ সক্কোতি. অধিগতপ্পনস্স চুদ্দসহাকারেহি চিত্তপরিদমনং ভারো, সতেসু সহস্সেসু ৰা একোৰ সক্কোতি. চুদ্দসহাকারেহি পরিদমিতচিত্তস্সাপি ইদ্ধিৰিকুব্বনং নাম ভারো, সতেসু সহস্সেসু ৰা একোৰ সক্কোতি. ৰিকুব্বনপ্পত্তস্সাপি খিপ্পনিসন্তিভাৰো নাম ভারো, সতেসু সহস্সেসু ৰা একোৰ খিপ্পনিসন্তী হোতি. থেরম্বত্থলে মহারোহণগুত্তত্থেরস্স গিলানুপট্ঠানং আগতেসু তিংসমত্তেসু ইদ্ধিমন্তসহস্সেসু উপসম্পদায অট্ঠৰস্সিকো রক্খিতত্থেরো ৰিয. তস্সানুভাৰো পথৰীকসিণনিদ্দেসে (ৰিসুদ্ধি. ১.৭৮ আদযো) ৰুত্তোযেৰ. তং পনস্সানুভাৰং দিস্ৰা থেরো আহ ‘‘আৰুসো, সচে রক্খিতো নাভৰিস্স সব্বে গরহপ্পত্তা অস্সাম ‘নাগরাজানং রক্খিতুং নাসক্খিংসূ’তি. তস্মা অত্তনা গহেত্ৰা ৰিচরিতব্বং আৰুধং নাম মলং সোধেত্ৰাৰ গহেত্ৰা ৰিচরিতুং ৰট্টতী’’তি. তে থেরস্স ওৰাদে ঠত্ৰা তিংসসহস্সাপি ভিক্খূ খিপ্পনিসন্তিনো অহেসুং.

খিপ্পনিসন্তিযাপি ¶ চ সতি পরস্স পতিট্ঠাভাৰো ভারো, সতেসু সহস্সেসু ৰা একোৰ হোতি, গিরিভণ্ডৰাহনপূজায মারেন অঙ্গারৰস্সে পৰত্তিতে আকাসে পথৰিং মাপেত্ৰা অঙ্গারৰস্সপরিত্তারকো থেরো ৰিয.

বলৰপুব্বযোগানং পন বুদ্ধপচ্চেকবুদ্ধঅগ্গসাৰকাদীনং ৰিনাপি ইমিনা ৰুত্তপ্পকারেন ভাৰনানুক্কমেন অরহত্তপটিলাভেনেৰ ইদঞ্চ ইদ্ধিৰিকুব্বনং অঞ্ঞে ¶ চ পটিসম্ভিদাদিভেদা গুণা ইজ্ঝন্তি. তস্মা যথা পিল়ন্ধনৰিকতিং কত্তুকামো সুৰণ্ণকারো অগ্গিধমনাদীহি সুৰণ্ণং মুদুং কম্মঞ্ঞং কত্ৰাৰ করোতি, যথা চ ভাজনৰিকতিং কত্তুকামো কুম্ভকারো মত্তিকং সুপরিমদ্দিতং মুদুং কত্ৰা করোতি, এৰমেৰ আদিকম্মিকেন ইমেহি চুদ্দসহাকারেহি চিত্তং পরিদমেত্ৰা ছন্দসীসচিত্তসীসৰীরিযসীসৰীমংসাসীসসমাপজ্জনৰসেন চেৰ আৰজ্জনাদিৰসীভাৰৰসেন চ মুদুং কম্মঞ্ঞং কত্ৰা ইদ্ধিৰিধায যোগো করণীযো. পুব্বহেতুসম্পন্নেন পন কসিণেসু চতুত্থজ্ঝানমত্তে চিণ্ণৰসিনাপি কাতুং ৰট্টতি. যথা পনেত্থ যোগো কাতব্বো, তং ৰিধিং দস্সেন্তো ভগৰা ‘‘সো এৰং সমাহিতে চিত্তে’’তিআদিমাহ.

৩৬৮. তত্রাযং পাল়িনযানুসারেনেৰ ৰিনিচ্ছযকথা. তত্থ সোতি সো অধিগতচতুত্থজ্ঝানো যোগী. এৰন্তি চতুত্থজ্ঝানক্কমনিদস্সনমেতং. ইমিনা পঠমজ্ঝানাধিগমাদিনা কমেন চতুত্থজ্ঝানং পটিলভিত্ৰাতি ৰুত্তং হোতি. সমাহিতেতি ইমিনা চতুত্থজ্ঝানসমাধিনা সমাহিতে. চিত্তেতি রূপাৰচরচিত্তে. পরিসুদ্ধেতিআদীসু পন উপেক্খাসতিপারিসুদ্ধিভাৰেন পরিসুদ্ধে. পরিসুদ্ধত্তাযেৰ পরিযোদাতে, পভস্সরেতি ৰুত্তং হোতি. সুখাদীনং পচ্চযানং ঘাতেন ৰিহতরাগাদিঅঙ্গণত্তা অনঙ্গণে. অনঙ্গণত্তাযেৰ ৰিগতূপক্কিলেসে. অঙ্গণেন হি তং চিত্তং উপক্কিলিস্সতি. সুভাৰিতত্তা মুদুভূতে, ৰসীভাৰপ্পত্তেতি ৰুত্তং হোতি. ৰসে ৰত্তমানং হি চিত্তং মুদুন্তি ৰুচ্চতি. মুদুত্তাযেৰ চ কম্মনিযে, কম্মক্খমে কম্মযোগ্গেতি ৰুত্তং হোতি. মুদুং হি চিত্তং কম্মনিযং হোতি সুদন্তমিৰ সুৰণ্ণং, তঞ্চ উভযম্পি সুভাৰিতত্তাযেৰাতি. যথাহ ‘‘নাহং, ভিক্খৰে, অঞ্ঞং একধম্মম্পি সমনুপস্সামি, যং এৰং ভাৰিতং বহুলীকতং মুদুঞ্চ হোতি কম্মনিযঞ্চ, যথযিদং, ভিক্খৰে, চিত্ত’’ন্তি (অ. নি. ১.২২).

এতেসু পরিসুদ্ধভাৰাদীসু ঠিতত্তা ঠিতে. ঠিতত্তাযেৰ আনেঞ্জপ্পত্তে, অচলে নিরিঞ্জনেতি ৰুত্তং হোতি. মুদুকম্মঞ্ঞভাৰেন ৰা অত্তনো ৰসে ঠিতত্তা ঠিতে. সদ্ধাদীহি পরিগ্গহিতত্তা আনেঞ্জপ্পত্তে ¶ . সদ্ধাপরিগ্গহিতং হি চিত্তং অস্সদ্ধিযেন ন ইঞ্জতি. ৰীরিযপরিগ্গহিতং কোসজ্জেন ন ইঞ্জতি. সতিপরিগ্গহিতং পমাদেন ন ইঞ্জতি. সমাধিপরিগ্গহিতং উদ্ধচ্চেন ন ইঞ্জতি ¶ . পঞ্ঞাপরিগ্গহিতং অৰিজ্জায ন ইঞ্জতি. ওভাসগতং কিলেসন্ধকারেন ন ইঞ্জতি. ইমেহি ছহি ধম্মেহি পরিগ্গহিতং আনেঞ্জপ্পত্তং হোতি. এৰং অট্ঠঙ্গসমন্নাগতং চিত্তং অভিনীহারক্খমং হোতি অভিঞ্ঞাসচ্ছিকরণীযানং ধম্মানং অভিঞ্ঞাসচ্ছিকিরিযায.

অপরো নযো, চতুত্থজ্ঝানসমাধিনা সমাহিতে. নীৰরণদূরভাৰেন পরিসুদ্ধে. ৰিতক্কাদিসমতিক্কমেন পরিযোদাতে. ঝানপটিলাভপচ্চযানং ইচ্ছাৰচরানং অভাৰেন অনঙ্গণে. অভিজ্ঝাদীনং চিত্তস্স উপক্কিলেসানং ৰিগমেন ৰিগতূপক্কিলেসে. উভযম্পি চেতং অনঙ্গণসুত্তৰত্থসুত্তানুসারেন (ম. নি. ১.৫৭ আদযো) ৰেদিতব্বং. ৰসিপ্পত্তিযা মুদুভূতে. ইদ্ধিপাদভাৰূপগমেন কম্মনিযে. ভাৰনাপারিপূরিযা পণীতভাৰূপগমেন ঠিতে আনেঞ্জপ্পত্তে. যথা আনেঞ্জপ্পত্তং হোতি, এৰং ঠিতেতি অত্থো. এৰম্পি অট্ঠঙ্গসমন্নাগতং চিত্তং অভিনীহারক্খমং হোতি অভিঞ্ঞাসচ্ছিকরণীযানং ধম্মানং অভিঞ্ঞাসচ্ছিকিরিযায পাদকং পদট্ঠানভূতন্তি.

দসইদ্ধিকথা

৩৬৯. ইদ্ধিৰিধায চিত্তং অভিনীহরতি অভিনিন্নামেতীতি এত্থ ইজ্ঝনট্ঠেন ইদ্ধি, নিপ্ফত্তিঅত্থেন পটিলাভট্ঠেন চাতি ৰুত্তং হোতি. যঞ্হি নিপ্ফজ্জতি পটিলব্ভতি চ, তং ইজ্ঝতীতি ৰুচ্চতি. যথাহ ‘‘কামং কামযমানস্স, তস্স চেতং সমিজ্ঝতী’’তি (সু. নি. ৭৭২). তথা ‘‘নেক্খম্মং ইজ্ঝতীতি ইদ্ধি, পটিহরতীতি পাটিহারিযং. অরহত্তমগ্গো ইজ্ঝতীতি ইদ্ধি, পটিহরতীতি পাটিহারিয’’ন্তি (পটি. ম. ৩.৩২).

অপরো নযো, ইজ্ঝনট্ঠেন ইদ্ধি. উপাযসম্পদাযেতমধিৰচনং. উপাযসম্পদা হি ইজ্ঝতি অধিপ্পেতফলপ্পসৰনতো. যথাহ – ‘‘অযং খো চিত্তো গহপতি সীলৰা কল্যাণধম্মো, সচে পণিদহিস্সতি ‘অনাগতমদ্ধানং রাজা অস্সং চক্কৰত্তী’তি, তস্স খো অযং ইজ্ঝিস্সতি সীলৰতো চেতোপণিধি ৰিসুদ্ধত্তা’’তি (সং. নি. ৪.৩৫২).

অপরো নযো, এতায সত্তা ইজ্ঝন্তীতি ইদ্ধি. ইজ্ঝন্তীতি ইদ্ধা ৰুদ্ধা উক্কংসগতা হোন্তীতি ¶ ৰুত্তং হোতি. সা দসৰিধা. যথাহ ‘‘কতি ইদ্ধিযোতি দস ইদ্ধিযো’’. পুন চপরং আহ ‘‘কতমা দস ইদ্ধিযো ¶ ? অধিট্ঠানা ইদ্ধি, ৰিকুব্বনা ইদ্ধি, মনোমযা ইদ্ধি, ঞাণৰিপ্ফারা ইদ্ধি, সমাধিৰিপ্ফারা ইদ্ধি, অরিযা ইদ্ধি, কম্মৰিপাকজা ইদ্ধি, পুঞ্ঞৰতো ইদ্ধি, ৰিজ্জামযা ইদ্ধি, তত্থ তত্থ সম্মাপযোগপচ্চযা ইজ্ঝনট্ঠেন ইদ্ধী’’তি (পটি. ম. ৩.৯).

৩৭০. তত্থ ‘‘পকতিযা একো বহুকং আৰজ্জতি. সতং ৰা সহস্সং ৰা সতসহস্সং ৰা আৰজ্জিত্ৰা ঞাণেন অধিট্ঠাতি ‘বহুকো হোমী’’’তি (পটি. ম. ৩.১০) এৰং ৰিভজিত্ৰা দস্সিতা ইদ্ধি অধিট্ঠানৰসেন নিপ্ফন্নত্তা অধিট্ঠানা ইদ্ধি নাম.

৩৭১. ‘‘সো পকতিৰণ্ণং ৰিজহিত্ৰা কুমারকৰণ্ণং ৰা দস্সেতি নাগৰণ্ণং ৰা…পে… ৰিৰিধম্পি সেনাব্যূহং দস্সেতী’’তি (পটি. ম. ৩.১৩) এৰং আগতা ইদ্ধি পকতিৰণ্ণৰিজহনৰিকারৰসেন পৰত্তত্তা ৰিকুব্বনা ইদ্ধি নাম.

৩৭২. ‘‘ইধ ভিক্খু ইমম্হা কাযা অঞ্ঞং কাযং অভিনিম্মিনাতি রূপিং মনোময’’ন্তি (পটি. ম. ৩.১৪) ইমিনা নযেন আগতা ইদ্ধি সরীরব্ভন্তরে অঞ্ঞস্সেৰ মনোমযস্স সরীরস্স নিপ্ফত্তিৰসেন পৰত্তত্তা মনোমযা ইদ্ধি নাম.

৩৭৩. ঞাণুপ্পত্তিতো পন পুব্বে ৰা পচ্ছা ৰা তংখণে ৰা ঞাণানুভাৰনিব্বত্তো ৰিসেসো ঞাণৰিপ্ফারা ইদ্ধি নাম. ৰুত্তঞ্হেতং – ‘‘অনিচ্চানুপস্সনায নিচ্চসঞ্ঞায পহানট্ঠো ইজ্ঝতীতি ঞাণৰিপ্ফারা ইদ্ধি…পে… অরহত্তমগ্গেন সব্বকিলেসানং পহানট্ঠো ইজ্ঝতীতি ঞাণৰিপ্ফারা ইদ্ধি. আযস্মতো বাক্কুলস্স ঞাণৰিপ্ফারা ইদ্ধি. আযস্মতো সংকিচ্চস্স ঞাণৰিপ্ফারা ইদ্ধি. আযস্মতো ভূতপালস্স ঞাণৰিপ্ফারা ইদ্ধী’’তি (পটি. ম. ৩.১৫).

তত্থ আযস্মা বাক্কুলো দহরোৰ মঙ্গলদিৰসে নদিযা ন্হাপিযমানো ধাতিযা পমাদেন সোতে পতিতো. তমেনং মচ্ছো গিলিত্ৰা বারাণসীতিত্থং অগমাসি. তত্র তং মচ্ছবন্ধো গহেত্ৰা সেট্ঠিভরিযায ৰিক্কিণি. সা মচ্ছে সিনেহং উপ্পাদেত্ৰা অহমেৰ নং পচিস্সামীতি ফালেন্তী মচ্ছকুচ্ছিযং সুৰণ্ণবিম্বং ৰিয দারকং দিস্ৰা পুত্তো মে লদ্ধোতি সোমনস্সজাতা অহোসি. ইতি মচ্ছকুচ্ছিযং অরোগভাৰো আযস্মতো বাক্কুলস্স ¶ পচ্ছিমভৰিকস্স তেন অত্তভাৰেন পটিলভিতব্বঅরহত্তমগ্গঞাণানুভাৰেন ¶ নিব্বত্তত্তা ঞাণৰিপ্ফারা ইদ্ধি নাম. ৰত্থু পন ৰিত্থারেন কথেতব্বং.

সংকিচ্চত্থেরস্স পন গব্ভগতস্সেৰ মাতা কালমকাসি. তস্সা চিতকং আরোপেত্ৰা সূলেহি ৰিজ্ঝিত্ৰা ঝাপিযমানায দারকো সূলকোটিযা অক্খিকূটে পহারং লভিত্ৰা সদ্দং অকাসি. ততো দারকো জীৰতীতি ওতারেত্ৰা কুচ্ছিং ফালেত্ৰা দারকং অয্যিকায অদংসু. সো তায পটিজগ্গিতো ৰুদ্ধিমন্ৰায পব্বজিত্ৰা সহ পটিসম্ভিদাহি অরহত্তং পাপুণি. ইতি ৰুত্তনযেনেৰ দারুচিতকায অরোগভাৰো আযস্মতো সংকিচ্চস্স ঞাণৰিপ্ফারা ইদ্ধি নাম.

ভূতপালদারকস্স পন পিতা রাজগহে দলিদ্দমনুস্সো. সো দারূনং অত্থায সকটেন অটৰিং গন্ত্ৰা দারুভারং কত্ৰা সাযং নগরদ্ৰারসমীপং পত্তো. অথস্স গোণা যুগং ওস্সজ্জিত্ৰা নগরং পৰিসিংসু. সো সকটমূলে পুত্তকং নিসীদাপেত্ৰা গোণানং অনুপদং গচ্ছন্তো নগরমেৰ পাৰিসি. তস্স অনিক্খন্তস্সেৰ দ্ৰারং পিহিতং. দারকস্স ৰাল়যক্খানুচরিতেপি বহিনগরে তিযামরত্তিং অরোগভাৰো ৰুত্তনযেনেৰ ঞাণৰিপ্ফারা ইদ্ধি নাম. ৰত্থু পন ৰিত্থারেতব্বং.

৩৭৪. সমাধিতো পুব্বে ৰা পচ্ছা ৰা তংখণে ৰা সমথানুভাৰনিব্বত্তো ৰিসেসো সমাধিৰিপ্ফারা ইদ্ধি. ৰুত্তঞ্হেতং ‘‘পঠমজ্ঝানেন নীৰরণানং পহানট্ঠো ইজ্ঝতীতি সমাধিৰিপ্ফারা ইদ্ধি…পে… নেৰসঞ্ঞানাসঞ্ঞাযতনসমাপত্তিযা আকিঞ্চঞ্ঞাযতনসঞ্ঞায পহানট্ঠো ইজ্ঝতীতি সমাধিৰিপ্ফারা ইদ্ধি. আযস্মতো সারিপুত্তস্স সমাধিৰিপ্ফারা ইদ্ধি, আযস্মতো সঞ্জীৰস্স, আযস্মতো খাণুকোণ্ডঞ্ঞস্স, উত্তরায উপাসিকায, সামাৰতিযা উপাসিকায সমাধিৰিপ্ফারা ইদ্ধী’’তি (পটি. ম. ৩.১৬).

তত্থ যদা আযস্মতো সারিপুত্তস্স মহামোগ্গল্লানত্থেরেন সদ্ধিং কপোতকন্দরাযং ৰিহরতো জুণ্হায রত্তিযা নৰোরোপিতেহি কেসেহি অজ্ঝোকাসে নিসিন্নস্স একো দুট্ঠযক্খো সহাযকেন যক্খেন ৰারিযমানোপি সীসে পহারমদাসি. যস্স মেঘস্স ৰিয গজ্জতো ¶ সদ্দো অহোসি. তদা থেরো তস্স পহরণসমযে সমাপত্তিং অপ্পেসি. অথস্স তেন পহারেন ন কোচি আবাধো অহোসি ¶ . অযং তস্সাযস্মতো সমাধিৰিপ্ফারা ইদ্ধি. ৰত্থু পন উদানে (উদা. ৩৪) আগতমেৰ.

সঞ্জীৰত্থেরং পন নিরোধসমাপন্নং কালকতোতি সল্লক্খেত্ৰা গোপালকাদযো তিণকট্ঠগোমযানি সঙ্কড্ঢেত্ৰা অগ্গিং অদংসু. থেরস্স চীৰরে অংসুমত্তম্পি নজ্ঝাযিত্থ. অযমস্স অনুপুব্বসমাপত্তিৰসেন পৰত্তসমথানুভাৰনিব্বত্তত্তা সমাধিৰিপ্ফারা ইদ্ধি. ৰত্থু পন সুত্তে (ম. নি. ১.৫০৭) আগতমেৰ.

খাণুকোণ্ডঞ্ঞত্থেরো পন পকতিযাৰ সমাপত্তিবহুলো. সো অঞ্ঞতরস্মিং অরঞ্ঞে রত্তিং সমাপত্তিং অপ্পেত্ৰা নিসীদি. পঞ্চসতা চোরা ভণ্ডকং থেনেত্ৰা গচ্ছন্তা ‘‘ইদানি অম্হাকং অনুপথং আগচ্ছন্তা নত্থী’’তি ৰিস্সমিতুকামা ভণ্ডকং ওরোপযমানা ‘‘খাণুকো অয’’ন্তি মঞ্ঞমানা থেরস্সেৰ উপরি সব্বভণ্ডকানি ঠপেসুং. তেসং ৰিস্সমিত্ৰা গচ্ছন্তানং পঠমং ঠপিতভণ্ডকস্স গহণকালে কালপরিচ্ছেদৰসেন থেরো ৰুট্ঠাসি. তে থেরস্স চলনাকারং দিস্ৰা ভীতা ৰিরৰিংসু. থেরো ‘‘মা ভাযিত্থ উপাসকা, ভিক্খু অহ’’ন্তি আহ. তে আগন্ত্ৰা ৰন্দিত্ৰা থেরগতেন পসাদেন পব্বজিত্ৰা সহ পটিসম্ভিদাহি অরহত্তং পাপুণিংসু (ধ. প. অট্ঠ. ১.১). অযমেত্থ পঞ্চহি ভণ্ডকসতেহি অজ্ঝোত্থটস্স থেরস্স আবাধাভাৰো সমাধিৰিপ্ফারা ইদ্ধি.

উত্তরা পন উপাসিকা পুণ্ণসেট্ঠিস্স ধীতা. তস্সা সিরিমা নাম গণিকা ইস্সাপকতা তত্ততেলকটাহং সীসে আসিঞ্চি. উত্তরা তংখণঞ্ঞেৰ মেত্তং সমাপজ্জি. তেলং পোক্খরপত্ততো উদকবিন্দু ৰিয ৰিৰট্টমানং অগমাসি. অযমস্সা সমাধিৰিপ্ফারা ইদ্ধি. ৰত্থু পন ৰিত্থারেতব্বং.

সামাৰতী নাম উদেনস্স রঞ্ঞো অগ্গমহেসী. মাগণ্ডিযব্রাহ্মণো অত্তনো ধীতায অগ্গমহেসিট্ঠানং পত্থযমানো তস্সা ৰীণায আসীৰিসং ¶ পক্খিপাপেত্ৰা রাজানং আহ ‘‘মহারাজ, সামাৰতী তং মারেতুকামা ৰীণায আসীৰিসং গহেত্ৰা পরিহরতী’’তি. রাজা তং দিস্ৰা কুপিতো সামাৰতিং ৰধিস্সামীতি ধনুং আরোপেত্ৰা ৰিসপীতং খুরপ্পং সন্নয্হি. সামাৰতী সপরিৰারা রাজানং মেত্তায ফরি. রাজা নেৰ সরং খিপিতুং ন ওরোপেতুং সক্কোন্তো ৰেধমানো অট্ঠাসি. ততো নং দেৰী আহ ‘‘কিং, মহারাজ, কিলমসী’’তি? ‘‘আম কিলমামী’’তি. ‘‘তেন ¶ হি ধনুং ওরোপেহী’’তি. সরো রঞ্ঞো পাদমূলেযেৰ পতি. ততো নং দেৰী ‘‘মহারাজ, অপ্পদুট্ঠস্স নপ্পদুস্সিতব্ব’’ন্তি ওৰদি. ইতি রঞ্ঞো সরং মুঞ্চিতুং অৰিসহনভাৰো সামাৰতিযা উপাসিকায সমাধিৰিপ্ফারা ইদ্ধীতি.

৩৭৫. পটিক্কূলাদীসু অপ্পটিক্কূলসঞ্ঞিৰিহারাদিকা পন অরিযা ইদ্ধি নাম. যথাহ – ‘‘কতমা অরিযা ইদ্ধি? ইধ – ভিক্খু সচে আকঙ্খতি ‘পটিক্কূলে অপ্পটিক্কূলসঞ্ঞী ৰিহরেয্য’ন্তি, অপ্পটিক্কূলসঞ্ঞী তত্থ ৰিহরতি…পে… উপেক্খকো তত্থ ৰিহরতি সতো সম্পজানো’’তি (পটি. ম. ৩.১৭). অযঞ্হি চেতোৰসিপ্পত্তানং অরিযানংযেৰ সম্ভৰতো অরিযা ইদ্ধীতি ৰুচ্চতি.

এতায হি সমন্নাগতো খীণাসৰো ভিক্খু পটিক্কূলে অনিট্ঠে ৰত্থুস্মিং মেত্তাফরণং ৰা ধাতুমনসিকারং ৰা করোন্তো অপ্পটিক্কূলসঞ্ঞী ৰিহরতি. অপ্পটিক্কূলে ইট্ঠে ৰত্থুস্মিং অসুভফরণং ৰা অনিচ্চন্তি মনসিকারং ৰা করোন্তো পটিক্কূলসঞ্ঞী ৰিহরতি. তথা পটিক্কূলাপটিক্কূলেসু তদেৰ মেত্তাফরণং ৰা ধাতুমনসিকারং ৰা করোন্তো অপ্পটিক্কূলসঞ্ঞী ৰিহরতি. অপ্পটিক্কূলপটিক্কূলেসু চ তদেৰ অসুভফরণং ৰা অনিচ্চন্তি মনসিকারং ৰা করোন্তো পটিক্কূলসঞ্ঞী ৰিহরতি. চক্খুনা রূপং দিস্ৰা নেৰ সুমনো হোতীতিআদিনা নযেন ৰুত্তং পন ছল়ঙ্গুপেক্খং পৰত্তযমানো পটিক্কূলে চ অপ্পটিক্কূলে চ তদুভযং অভিনিৰজ্জিত্ৰা উপেক্খকো ৰিহরতি সতো সম্পজানো. পটিসম্ভিদাযঞ্হি ‘‘কথং পটিক্কূলে অপ্পটিক্কূলসঞ্ঞী ৰিহরতি? অনিট্ঠস্মিং ৰত্থুস্মিং মেত্তায ৰা ফরতি ধাতুসো ৰা উপসংহরতী’’তিআদিনা (পটি. ম. ৩.১৭) নযেন অযমেৰ অত্থো ৰিভত্তো. অযং চেতোৰসিপ্পত্তানং অরিযানংযেৰ সম্ভৰতো অরিযা ইদ্ধীতি ৰুচ্চতি.

৩৭৬. পক্খীআদীনং পন ¶ ৰেহাসগমনাদিকা কম্মৰিপাকজা ইদ্ধি নাম. যথাহ – ‘‘কতমা কম্মৰিপাকজা ইদ্ধি? সব্বেসং পক্খীনং সব্বেসং দেৰানং একচ্চানং মনুস্সানং একচ্চানঞ্চ ৰিনিপাতিকানং অযং কম্মৰিপাকজা ইদ্ধী’’তি (পটি. ম. ৩.১৮). এত্থ হি সব্বেসং পক্খীনং ঝানং ৰা ৰিপস্সনং ৰা ৰিনাযেৰ আকাসেন গমনং. তথা সব্বেসং দেৰানং পঠমকপ্পিকানঞ্চ একচ্চানং মনুস্সানং. তথা পিযঙ্করমাতা (সং. নি. ১.২৪০) যক্খিনী ¶ উত্তরমাতা ফুস্সমিত্তা ধম্মগুত্তাতি এৰমাদীনং একচ্চানং ৰিনিপাতিকানং আকাসেন গমনং কম্মৰিপাকজা ইদ্ধীতি.

৩৭৭. চক্কৰত্তিআদীনং ৰেহাসগমনাদিকা পন পুঞ্ঞৰতো ইদ্ধি নাম. যথাহ ‘‘কতমা পুঞ্ঞৰতো ইদ্ধি? রাজা চক্কৰত্তী ৰেহাসং গচ্ছতি সদ্ধিং চতুরঙ্গিনিযা সেনায অন্তমসো অস্সবন্ধগোবন্ধপুরিসে উপাদায. জোতিকস্স গহপতিস্স পুঞ্ঞৰতো ইদ্ধি. জটিলকস্স গহপতিস্স পুঞ্ঞৰতো ইদ্ধি. ঘোসিতস্স গহপতিস্স পুঞ্ঞৰতো ইদ্ধি. মেণ্ডকস্স গহপতিস্স পুঞ্ঞৰতো ইদ্ধি. পঞ্চন্নং মহাপুঞ্ঞানং পুঞ্ঞৰতো ইদ্ধী’’তি. সঙ্খেপতো পন পরিপাকং গতে পুঞ্ঞসম্ভারে ইজ্ঝনকৰিসেসো পুঞ্ঞৰতো ইদ্ধি.

এত্থ চ জোতিকস্স গহপতিস্স পথৰিং ভিন্দিত্ৰা মণিপাসাদো উট্ঠহি. চতুসট্ঠি চ কপ্পরুক্খাতি অযমস্স পুঞ্ঞৰতো ইদ্ধি. জটিলকস্স অসীতিহত্থো সুৰণ্ণপব্বতো নিব্বত্তি. ঘোসিতস্স সত্তসু ঠানেসু মারণত্থায উপক্কমে কতেপি অরোগভাৰো পুঞ্ঞৰতো ইদ্ধি. মেণ্ডকস্স এককরীসমত্তে পদেসে সত্তরতনমযানং মেণ্ডকানং পাতুভাৰো পুঞ্ঞৰতো ইদ্ধি. পঞ্চ মহাপুঞ্ঞা নাম মেণ্ডকসেট্ঠি, তস্স ভরিযা চন্দপদুমসিরী, পুত্তো ধনঞ্চযসেট্ঠি, সুণিসা সুমনদেৰী, দাসো পুণ্ণো নামাতি. তেসু সেট্ঠিস্স সীসং ন্হাতস্স আকাসং উল্লোকনকালে অড্ঢতেল়সকোট্ঠসহস্সানি আকাসতো রত্তসালীনং পূরেন্তি. ভরিযায নাল়িকোদনমত্তম্পি গহেত্ৰা সকলজম্বুদীপৰাসিকে পরিৰিসমানায ভত্তং ন খীযতি. পুত্তস্স সহস্সত্থৰিকং গহেত্ৰা সকলজম্বুদীপৰাসিকানম্পি দেন্তস্স কহাপণা ন খীযন্তি. সুণিসায একং ¶ ৰীহিতুম্বং গহেত্ৰা সকলজম্বুদীপৰাসিকানম্পি ভাজযমানায ধঞ্ঞং ন খীযতি. দাসস্স একেন নঙ্গলেন কসতো ইতো সত্ত ইতো সত্তাতি চুদ্দস মগ্গা হোন্তি. অযং নেসং পুঞ্ঞৰতো ইদ্ধি.

৩৭৮. ৰিজ্জাধরাদীনং ৰেহাসগমনাদিকা পন ৰিজ্জামযা ইদ্ধি. যথাহ ‘‘কতমা ৰিজ্জামযা ইদ্ধি? ৰিজ্জাধরা ৰিজ্জং পরিজপিত্ৰা ৰেহাসং গচ্ছন্তি. আকাসে অন্তলিক্খে হত্থিম্পি দস্সেন্তি…পে… ৰিৰিধম্পি সেনাব্যূহং দস্সেন্তী’’তি (পটি. ম. ৩.১৮).

৩৭৯. তেন তেন পন সম্মাপযোগেন তস্স তস্স কম্মস্স ইজ্ঝনং তত্থ তত্থ সম্মাপযোগপচ্চযা ইজ্ঝনট্ঠেন ইদ্ধি. যথাহ – ‘‘নেক্খম্মেন কামচ্ছন্দস্স পহানট্ঠো ইজ্ঝতীতি তত্থ ¶ তত্থ সম্মাপযোগপচ্চযা ইজ্ঝনট্ঠেন ইদ্ধি…পে… অরহত্তমগ্গেন সব্বকিলেসানং পহানট্ঠো ইজ্ঝতীতি তত্থ তত্থ সম্মাপযোগপচ্চযা ইজ্ঝনট্ঠেন ইদ্ধী’’তি (পটি. ম. ৩.১৮). এত্থ চ পটিপত্তিসঙ্খাতস্সেৰ সম্মাপযোগস্স দীপনৰসেন পুরিমপাল়িসদিসাৰ পাল়ি আগতা. অট্ঠকথাযং পন সকটব্যূহাদিকরণৰসেন যংকিঞ্চি সিপ্পকম্মং যংকিঞ্চি ৰেজ্জকম্মং তিণ্ণং বেদানং উগ্গহণং তিণ্ণং পিটকানং উগ্গহণং অন্তমসো কসনৰপনাদীনি উপাদায তং তং কম্মং কত্ৰা নিব্বত্তৰিসেসো তত্থ তত্থ সম্মাপযোগপচ্চযা ইজ্ঝনট্ঠেন ইদ্ধীতি আগতা. (১০)

ইতি ইমাসু দসসু ইদ্ধীসু ইদ্ধিৰিধাযাতি ইমস্মিং পদে অধিট্ঠানা ইদ্ধিযেৰ আগতা. ইমস্মিং পনত্থে ৰিকুব্বনামনোমযাইদ্ধিযোপি ইচ্ছিতব্বা এৰ.

৩৮০. ইদ্ধিৰিধাযাতি ইদ্ধিকোট্ঠাসায, ইদ্ধিৰিকপ্পায ৰা. চিত্তং অভিনীহরতি অভিনিন্নামেতীতি সো ভিক্খু ৰুত্তপ্পকারৰসেন তস্মিং চিত্তে অভিঞ্ঞাপাদকে জাতে ইদ্ধিৰিধাধিগমত্থায পরিকম্মচিত্তং অভিনীহরতি কসিণারম্মণতো অপনেত্ৰা ইদ্ধিৰিধাভিমুখং পেসেতি. অভিনিন্নামেতীতি অধিগন্তব্বইদ্ধিপোণং ইদ্ধিপব্ভারং করোতি. সোতি সো এৰং কতচিত্তাভিনীহারো ভিক্খু. অনেকৰিহিতন্তি অনেকৰিধং নানপ্পকারকং. ইদ্ধিৰিধন্তি ইদ্ধিকোট্ঠাসং. পচ্চনুভোতীতি পচ্চনুভৰতি, ফুসতি ¶ সচ্ছিকরোতি পাপুণাতীতি অত্থো. ইদানিস্স অনেকৰিহিতভাৰং দস্সেন্তো ‘‘একোপি হুত্ৰা’’তিআদিমাহ. তত্থ একোপি হুত্ৰাতি ইদ্ধিকরণতো পুব্বে পকতিযা একোপি হুত্ৰা. বহুধা হোতীতি বহূনং সন্তিকে চঙ্কমিতুকামো ৰা সজ্ঝাযং ৰা কত্তুকামো পঞ্হং ৰা পুচ্ছিতুকামো হুত্ৰা সতম্পি সহস্সম্পি হোতি. কথং পনাযমেৰং হোতি? ইদ্ধিযা চতস্সো ভূমিযো চত্তারো পাদা অট্ঠ পদানি সোল়স চ মূলানি সম্পাদেত্ৰা ঞাণেন অধিট্ঠহন্তো.

৩৮১. তত্থ চতস্সো ভূমিযোতি চত্তারি ঝানানি ৰেদিতব্বানি. ৰুত্তঞ্হেতং ধম্মসেনাপতিনা ‘‘ইদ্ধিযা কতমা চতস্সো ভূমিযো? ৰিৰেকজভূমি পঠমং ঝানং, পীতিসুখভূমি দুতিযং ঝানং, উপেক্খাসুখভূমি ততিযং ঝানং, অদুক্খমসুখভূমি চতুত্থং ঝানং. ইদ্ধিযা ইমা চতস্সো ভূমিযো ইদ্ধিলাভায ইদ্ধিপটিলাভায ইদ্ধিৰিকুব্বনতায ইদ্ধিৰিসৰিতায ইদ্ধিৰসিতায ইদ্ধিৰেসারজ্জায সংৰত্তন্তী’’তি (পটি. ম. ৩.৯). এত্থ চ পুরিমানি তীণি ঝানানি যস্মা পীতিফরণেন চ সুখফরণেন চ সুখসঞ্ঞঞ্চ লহুসঞ্ঞঞ্চ ওক্কমিত্ৰা ¶ লহুমুদুকম্মঞ্ঞকাযো ইদ্ধিং পাপুণাতি, তস্মা ইমিনা পরিযাযেন ইদ্ধিলাভায সংৰত্তনতো সম্ভারভূমিযোতি ৰেদিতব্বানি. চতুত্থজ্ঝানং পন ইদ্ধিলাভায পকতিভূমিযেৰ.

৩৮২. চত্তারো পাদাতি চত্তারো ইদ্ধিপাদা ৰেদিতব্বা. ৰুত্তঞ্হেতং ‘‘ইদ্ধিযা কতমে চত্তারো পাদা? ইধ ভিক্খু ছন্দসমাধিপধানসঙ্খারসমন্নাগতং ইদ্ধিপাদং ভাৰেতি. ৰীরিয… চিত্ত… ৰীমংসাসমাধিপধানসঙ্খারসমন্নাগতং ইদ্ধিপাদং ভাৰেতি. ইদ্ধিযা ইমে চত্তারো পাদা ইদ্ধিলাভায…পে… ইদ্ধিৰেসারজ্জায সংৰত্তন্তী’’তি (পটি. ম. ৩.৯). এত্থ চ ছন্দহেতুকো ছন্দাধিকো ৰা সমাধি ছন্দসমাধি. কত্তুকম্যতাছন্দং অধিপতিং করিত্ৰা পটিলদ্ধসমাধিস্সেতং অধিৰচনং. পধানভূতা সঙ্খারা পধানসঙ্খারা. চতুকিচ্চসাধকস্স সম্মপ্পধানৰীরিযস্সেতং অধিৰচনং. সমন্নাগতন্তি ছন্দসমাধিনা চ পধানসঙ্খারেহি চ উপেতং. ইদ্ধিপাদন্তি নিপ্ফত্তিপরিযাযেন ৰা ইজ্ঝনট্ঠেন, ইজ্ঝন্তি এতায সত্তা ইদ্ধা ৰুদ্ধা উক্কংসগতা হোন্তীতি ইমিনা ৰা পরিযাযেন ইদ্ধীতি সঙ্খং গতানং অভিঞ্ঞাচিত্তসম্পযুত্তানং ছন্দসমাধিপধানসঙ্খারানং ¶ অধিট্ঠানট্ঠেন পাদভূতং সেসচিত্তচেতসিকরাসিন্তি অত্থো. ৰুত্তঞ্হেতং ‘‘ইদ্ধিপাদোতি তথাভূতস্স ৰেদনাক্খন্ধো…পে… ৰিঞ্ঞাণক্খন্ধো’’তি (ৰিভ. ৪৩৪).

অথ ৰা পজ্জতে অনেনাতি পাদো. পাপুণীযতীতি অত্থো. ইদ্ধিযা পাদো ইদ্ধিপাদো. ছন্দাদীনমেতং অধিৰচনং. যথাহ – ‘‘ছন্দঞ্চে, ভিক্খৰে, ভিক্খু নিস্সায লভতি সমাধিং, লভতি চিত্তস্সেকগ্গতং, অযং ৰুচ্চতি ছন্দসমাধি. সো অনুপ্পন্নানং পাপকানং…পে… পদহতি, ইমে ৰুচ্চন্তি পধানসঙ্খারা. ইতি অযঞ্চ ছন্দো অযঞ্চ ছন্দসমাধি ইমে চ পধানসঙ্খারা, অযং ৰুচ্চতি, ভিক্খৰে, ছন্দসমাধিপধানসঙ্খারসমন্নাগতো ইদ্ধিপাদো’’তি (সং. নি. ৫.৮২৫). এৰং সেসিদ্ধিপাদেসুপি অত্থো ৰেদিতব্বো.

৩৮৩. অট্ঠ পদানীতি ছন্দাদীনি অট্ঠ ৰেদিতব্বানি. ৰুত্তঞ্হেতং ‘‘ইদ্ধিযা কতমানি অট্ঠ পদানি? ছন্দঞ্চে ভিক্খু নিস্সায লভতি সমাধিং, লভতি চিত্তস্সেকগ্গতং. ছন্দো ন সমাধি, সমাধি ন ছন্দো. অঞ্ঞো ছন্দো, অঞ্ঞো সমাধি. ৰীরিযঞ্চে ভিক্খু… চিত্তঞ্চে ভিক্খু… ৰীমংসঞ্চে ভিক্খু নিস্সায লভতি সমাধিং, লভতি চিত্তস্সেকগ্গতং. ৰীমংসা ন সমাধি, সমাধি ন ৰীমংসা. অঞ্ঞা ৰীমংসা, অঞ্ঞো সমাধি. ইদ্ধিযা ইমানি অট্ঠ পদানি ইদ্ধিলাভায…পে… ইদ্ধিৰেসারজ্জায সংৰত্তন্তী’’তি (পটি. ম. ৩.৯). এত্থ হি ইদ্ধিমুপ্পাদেতুকামতাছন্দো ¶ সমাধিনা একতো নিযুত্তোৰ ইদ্ধিলাভায সংৰত্ততি; তথা ৰীরিযাদযো. তস্মা ইমানি অট্ঠ পদানি ৰুত্তানীতি ৰেদিতব্বানি.

৩৮৪. সোল়স মূলানীতি সোল়সহি আকারেহি আনেঞ্জতা চিত্তস্স ৰেদিতব্বা. ৰুত্তঞ্হেতং – ‘‘ইদ্ধিযা কতি মূলানি? সোল়স মূলানি – অনোনতং চিত্তং কোসজ্জে ন ইঞ্জতীতি আনেঞ্জং, অনুন্নতং চিত্তং উদ্ধচ্চে ন ইঞ্জতীতি আনেঞ্জং, অনভিনতং চিত্তং রাগে ন ইঞ্জতীতি আনেঞ্জং, অনপনতং চিত্তং ব্যাপাদে ন ইঞ্জতীতি আনেঞ্জং, অনিস্সিতং চিত্তং দিট্ঠিযা ন ইঞ্জতীতি আনেঞ্জং, অপ্পটিবদ্ধং চিত্তং ছন্দরাগে ন ইঞ্জতীতি আনেঞ্জং, ৰিপ্পমুত্তং চিত্তং কামরাগে ন ইঞ্জতীতি আনেঞ্জং, ৰিসংযুত্তং চিত্তং কিলেসে ন ইঞ্জতীতি আনেঞ্জং, ৰিমরিযাদিকতং চিত্তং কিলেসমরিযাদে ন ইঞ্জতীতি আনেঞ্জং, একত্তগতং চিত্তং নানত্তকিলেসে ন ইঞ্জতীতি আনেঞ্জং, সদ্ধায পরিগ্গহিতং ¶ চিত্তং অস্সদ্ধিযে ন ইঞ্জতীতি আনেঞ্জং, ৰীরিযেন পরিগ্গহিতং চিত্তং কোসজ্জে ন ইঞ্জতীতি আনেঞ্জং, সতিযা পরিগ্গহিতং চিত্তং পমাদে ন ইঞ্জতীতি আনেঞ্জং, সমাধিনা পরিগ্গহিতং চিত্তং উদ্ধচ্চে ন ইঞ্জতীতি আনেঞ্জং, পঞ্ঞায পরিগ্গহিতং চিত্তং অৰিজ্জায ন ইঞ্জতীতি আনেঞ্জং, ওভাসগতং চিত্তং অৰিজ্জন্ধকারে ন ইঞ্জতীতি আনেঞ্জং. ইদ্ধিযা ইমানি সোল়স মূলানি ইদ্ধিলাভায…পে… ইদ্ধিৰেসারজ্জায সংৰত্তন্তী’’তি (পটি. ম. ৩.৯).

কামঞ্চ এস অত্থো এৰং সমাহিতে চিত্তেতিআদিনাপি সিদ্ধোযেৰ, পঠমজ্ঝানাদীনং পন ইদ্ধিযা ভূমিপাদপদমূলভাৰদস্সনত্থং পুন ৰুত্তো. পুরিমো চ সুত্তেসু আগতনযো. অযং পটিসম্ভিদাযং. ইতি উভযত্থ অসম্মোহত্থম্পি পুন ৰুত্তো.

৩৮৫. ঞাণেন অধিট্ঠহন্তোতি স্ৰাযমেতে ইদ্ধিযা ভূমিপাদপদভূতে ধম্মে সম্পাদেত্ৰা অভিঞ্ঞাপাদকং ঝানং সমাপজ্জিত্ৰা ৰুট্ঠায সচে সতং ইচ্ছতি ‘‘সতং হোমি সতং হোমী’’তি পরিকম্মং কত্ৰা পুন অভিঞ্ঞাপাদকং ঝানং সমাপজ্জিত্ৰা ৰুট্ঠায অধিট্ঠাতি, অধিট্ঠানচিত্তেন সহেৰ সতং হোতি. সহস্সাদীসুপি এসেৰ নযো. সচে এৰং ন ইজ্ঝতি পুন পরিকম্মং কত্ৰা দুতিযম্পি সমাপজ্জিত্ৰা ৰুট্ঠায অধিট্ঠাতব্বং. সংযুত্তট্ঠকথাযং হি একৰারং দ্ৰেৰারং সমাপজ্জিতুং ৰট্টতীতি ৰুত্তং. তত্থ পাদকজ্ঝানচিত্তং নিমিত্তারম্মণং. পরিকম্মচিত্তানি সতারম্মণানি ৰা সহস্সারম্মণানি ৰা, তানি চ খো ৰণ্ণৰসেন, নো পণ্ণত্তিৰসেন. অধিট্ঠানচিত্তম্পি তথেৰ সতারম্মণং ¶ ৰা সহস্সারম্মণং ৰা. তং পুব্বে ৰুত্তং অপ্পনাচিত্তমিৰ গোত্রভুঅনন্তরং একমেৰ উপ্পজ্জতি রূপাৰচরচতুত্থজ্ঝানিকং.

৩৮৬. যম্পি পটিসম্ভিদাযং ৰুত্তং ‘‘পকতিযা একো বহুকং আৰজ্জতি সতং ৰা সহস্সং ৰা সতসহস্সং ৰা, আৰজ্জিত্ৰা ঞাণেন অধিট্ঠাতি ‘বহুকো হোমী’তি, বহুকো হোতি, যথা আযস্মা চূল়পন্থকো’’তি (পটি. ম. ৩.১০). তত্রাপি আৰজ্জতীতি পরিকম্মৰসেনেৰ ৰুত্তং. আৰজ্জিত্ৰা ঞাণেন অধিট্ঠাতীতি অভিঞ্ঞাঞাণৰসেন ৰুত্তং. তস্মা বহুকং আৰজ্জতি, ততো তেসম্পি পরিকম্মচিত্তানং অৰসানে সমাপজ্জতি, সমাপত্তিতো ৰুট্ঠহিত্ৰা পুন বহুকো হোমীতি আৰজ্জিত্ৰা ততো পরং পৰত্তানং তিণ্ণং চতুন্নং ৰা পুব্বভাগচিত্তানং অনন্তরা উপ্পন্নেন সন্নিট্ঠাপনৰসেন অধিট্ঠানন্তি ¶ লদ্ধনামেন একেনেৰ অভিঞ্ঞাঞাণেন অধিট্ঠাতীতি এৰমেত্থ অত্থো দট্ঠব্বো.

যং পন ৰুত্তং ‘‘যথা আযস্মা চূল়পন্থকো’’তি, তং বহুধাভাৰস্স কাযসক্খিদস্সনত্থং ৰুত্তং. তং পন ৰত্থুনা দীপেতব্বং. তে কির দ্ৰেভাতরো পন্থে জাতত্তা পন্থকাতি নামং লভিংসু. তেসং জেট্ঠো মহাপন্থকো, সো পব্বজিত্ৰা সহ পটিসম্ভিদাহি অরহত্তং পাপুণি. অরহা হুত্ৰা চূল়পন্থকং পব্বাজেত্ৰা –

পদুমং যথা কোকনদং সুগন্ধং, পাতো সিযা ফুল্লমৰীতগন্ধং;

অঙ্গীরসং পস্স ৰিরোচমানং, তপন্তমাদিচ্চমিৰন্তলিক্খেতি. (অ. নি. ৫.১৯৫) –

ইমং গাথং অদাসি. সো তং চতূহি মাসেহি পগুণং কাতুং নাসক্খি. অথ নং থেরো অভব্বো ত্ৰং সাসনেতি ৰিহারতো নীহরি. তস্মিঞ্চ কালে থেরো ভত্তুদ্দেসকো হোতি. জীৰকো থেরং উপসঙ্কমিত্ৰা ‘‘স্ৰে, ভন্তে, ভগৰতা সদ্ধিং পঞ্চভিক্খুসতানি গহেত্ৰা অম্হাকং গেহে ভিক্খং গণ্হথা’’তি আহ. থেরোপি ঠপেত্ৰা চূল়পন্থকং সেসানং অধিৰাসেমীতি অধিৰাসেসি.

চূল়পন্থকো দ্ৰারকোট্ঠকে ঠত্ৰা রোদতি. ভগৰা দিব্বচক্খুনা দিস্ৰা তং উপসঙ্কমিত্ৰা কস্মা রোদসীতি আহ. সো তং পৰত্তিমাচিক্খি. ভগৰা ন সজ্ঝাযং কাতুং অসক্কোন্তো মম ¶ সাসনে অভব্বো নাম হোতি, মা সোচি ভিক্খূতি তং বাহাযং গহেত্ৰা ৰিহারং পৰিসিত্ৰা ইদ্ধিযা পিলোতিকখণ্ডং অভিনিম্মিনিত্ৰা অদাসি, হন্দ ভিক্খু ইমং পরিমজ্জন্তো রজোহরণং রজোহরণন্তি পুনপ্পুনং সজ্ঝাযং করোহীতি. তস্স তথা করোতো তং কাল়ৰণ্ণং অহোসি. সো পরিসুদ্ধং ৰত্থং, নত্থেত্থ দোসো, অত্তভাৰস্স পনাযং দোসোতি সঞ্ঞং পটিলভিত্ৰা পঞ্চসু খন্ধেসু ঞাণং ওতারেত্ৰা ৰিপস্সনং ৰড্ঢেত্ৰা অনুলোমতো গোত্রভুসমীপং পাপেসি. অথস্স ভগৰা ওভাসগাথা অভাসি –

‘‘রাগো রজো ন চ পন রেণু ৰুচ্চতি,

রাগস্সেতং অধিৰচনং রজোতি;

এতং রজং ৰিপ্পজহিত্ৰা পণ্ডিতা,

ৰিহরন্তি তে ৰিগতরজস্স সাসনে.

‘‘দোসো ¶ …পে….

‘‘মোহো রজো ন চ পন রেণু ৰুচ্চতি,

মোহস্সেতং অধিৰচনং রজোতি;

এতং রজং ৰিপ্পজহিত্ৰা পণ্ডিতা,

ৰিহরন্তি তে ৰিগতরজস্স সাসনে’’তি. (মহানি. ২০৯);

তস্স গাথাপরিযোসানে চতুপটিসম্ভিদাছল়ভিঞ্ঞাপরিৰারা নৰ লোকুত্তরধম্মা হত্থগতাৰ অহেসুং.

সত্থা দুতিযদিৰসে জীৰকস্স গেহং অগমাসি সদ্ধিং ভিক্খুসঙ্ঘেন. অথ দক্খিণোদকাৰসানে যাগুযা দিয্যমানায হত্থেন পত্তং পিদহি. জীৰকো কিং ভন্তেতি পুচ্ছি. ৰিহারে একো ভিক্খু অত্থীতি. সো পুরিসং পেসেসি ‘‘গচ্ছ, অয্যং গহেত্ৰা সীঘং এহী’’তি. ৰিহারতো নিক্খন্তে পন ভগৰতি,

সহস্সক্খত্তুমত্তানং ¶ , নিম্মিনিত্ৰান পন্থকো;

নিসীদম্বৰনে রম্মে, যাৰ কালপ্পৰেদনাতি. (থেরগা. ৫৬৩);

অথ সো পুরিসো গন্ত্ৰা কাসাৰেহি একপজ্জোতং আরামং দিস্ৰা আগন্ত্ৰা ভিক্খূহি ভরিতো ভন্তে আরামো, নাহং জানামি কতমো সো অয্যোতি আহ. ততো নং ভগৰা আহ ‘‘গচ্ছ যং পঠমং পস্সসি, তং চীৰরকণ্ণে গহেত্ৰা ‘সত্থা তং আমন্তেতী’তি ৰত্ৰা আনেহী’’তি. সো তং গন্ত্ৰা থেরস্সেৰ চীৰরকণ্ণে অগ্গহেসি. তাৰদেৰ সব্বেপি নিম্মিতা অন্তরধাযিংসু. থেরো ‘‘গচ্ছ ত্ৰ’’ন্তি তং উয্যোজেত্ৰা মুখধোৰনাদিসরীরকিচ্চং নিট্ঠপেত্ৰা পঠমতরং গন্ত্ৰা পত্তাসনে নিসীদি. ইদং সন্ধায ৰুত্তং ‘‘যথা আযস্মা চূল়পন্থকো’’তি.

তত্র যে তে বহূ নিম্মিতা তে অনিযমেত্ৰা নিম্মিতত্তা ইদ্ধিমতা সদিসাৰ হোন্তি. ঠাননিসজ্জাদীসু ৰা ভাসিততুণ্হীভাৰাদীসু ৰা যং যং ইদ্ধিমা করোতি, তং তদেৰ করোন্তি. সচে পন নানাৰণ্ণে কাতুকামো হোতি, কেচি পঠমৰযে, কেচি মজ্ঝিমৰযে, কেচি পচ্ছিমৰযে, তথা ¶ দীঘকেসে, উপড্ঢমুণ্ডে, মুণ্ডে, মিস্সকেসে, উপড্ঢরত্তচীৰরে, পণ্ডুকচীৰরে, পদভাণধম্মকথাসরভঞ্ঞপঞ্হপুচ্ছনপঞ্হৰিস্সজ্জনরজনপচনচীৰরসিব্বনধোৰনাদীনি করোন্তে অপরেপি ৰা নানপ্পকারকে কাতুকামো হোতি, তেন পাদকজ্ঝানতো ৰুট্ঠায এত্তকা ভিক্খূ পঠমৰযা হোন্তূতিআদিনা নযেন পরিকম্মং কত্ৰা পুন সমাপজ্জিত্ৰা ৰুট্ঠায অধিট্ঠাতব্বং. অধিট্ঠানচিত্তেন সদ্ধিং ইচ্ছিতিচ্ছিতপ্পকারাযেৰ হোন্তীতি. এস নযো বহুধাপি হুত্ৰা একো হোতীতিআদীসু.

অযং পন ৰিসেসো, ইমিনা ভিক্খুনা এৰং বহুভাৰং নিম্মিনিত্ৰা পুন ‘‘একোৰ হুত্ৰা চঙ্কমিস্সামি, সজ্ঝাযং করিস্সামি, পঞ্হং পুচ্ছিস্সামী’’তি চিন্তেত্ৰা ৰা, ‘‘অযং ৰিহারো অপ্পভিক্খুকো, সচে কেচি আগমিস্সন্তি ‘কুতো ইমে এত্তকা একসদিসা ভিক্খূ, অদ্ধা থেরস্স এস আনুভাৰো’তি মং জানিস্সন্তী’’তি অপ্পিচ্ছতায ৰা অন্তরাৰ ‘‘একো হোমী’’তি ইচ্ছন্তেন পাদকজ্ঝানং সমাপজ্জিত্ৰা ৰুট্ঠায ‘‘একো হোমী’’তি পরিকম্মং কত্ৰা পুন সমাপজ্জিত্ৰা ৰুট্ঠায ‘‘একো হোমী’’তি অধিট্ঠাতব্বং. অধিট্ঠানচিত্তেন সদ্ধিংযেৰ একো হোতি. এৰং অকরোন্তো পন যথা পরিচ্ছিন্নকালৰসেন সযমেৰ একো হোতি.

৩৮৭. আৰিভাৰং তিরোভাৰন্তি এত্থ আৰিভাৰং করোতি তিরোভাৰং করোতীতি অযমত্থো ¶ . ইদমেৰ হি সন্ধায পটিসম্ভিদাযং ৰুত্তং ‘‘আৰিভাৰন্তি কেনচি অনাৰটং হোতি অপ্পটিচ্ছন্নং ৰিৰটং পাকটং. তিরোভাৰন্তি কেনচি আৰটং হোতি পটিচ্ছন্নং পিহিতং পটিকুজ্জিত’’ন্তি (পটি. ম. ৩.১১). তত্রাযং ইদ্ধিমা আৰিভাৰং কাতুকামো অন্ধকারং ৰা আলোকং করোতি, পটিচ্ছন্নং ৰা ৰিৰটং, অনাপাথং ৰা আপাথং করোতি. কথং? অযঞ্হি যথা পটিচ্ছন্নোপি দূরে ঠিতোপি ৰা দিস্সতি, এৰং অত্তানং ৰা পরং ৰা কাতুকামো পাদকজ্ঝানতো ৰুট্ঠায ইদং অন্ধকারট্ঠানং আলোকজাতং হোতূতি ৰা, ইদং পটিচ্ছন্নং ৰিৰটং হোতূতি ৰা, ইদং অনাপাথং আপাথং হোতূতি ৰা আৰজ্জিত্ৰা পরিকম্মং কত্ৰা ৰুত্তনযেনেৰ অধিট্ঠাতি, সহ অধিট্ঠানচিত্তেন যথাধিট্ঠিতমেৰ হোতি. পরে দূরে ঠিতাপি পস্সন্তি. সযম্পি পস্সিতুকামো পস্সতি.

৩৮৮. এতং ¶ পন পাটিহারিযং কেন কতপুব্বন্তি? ভগৰতা. ভগৰা হি চূল়সুভদ্দায নিমন্তিতো ৰিস্সকম্মুনা নিম্মিতেহি পঞ্চহি কূটাগারসতেহি সাৰত্থিতো সত্তযোজনব্ভন্তরং সাকেতং গচ্ছন্তো যথা সাকেতনগরৰাসিনো সাৰত্থিৰাসিকে, সাৰত্থিৰাসিনো চ সাকেতৰাসিকে পস্সন্তি, এৰং অধিট্ঠাসি. নগরমজ্ঝে চ ওতরিত্ৰা পথৰিং দ্ৰিধা ভিন্দিত্ৰা যাৰ অৰীচিং আকাসঞ্চ দ্ৰিধা ৰিযূহিত্ৰা যাৰ ব্রহ্মলোকং দস্সেসি.

দেৰোরোহণেনপি চ অযমত্থো ৰিভাৰেতব্বো. ভগৰা কির যমকপাটিহারিযং কত্ৰা চতুরাসীতিপাণসহস্সানি বন্ধনা পমোচেত্ৰা অতীতা বুদ্ধা যমকপাটিহারিযাৰসানে কুহিং গতাতি আৰজ্জিত্ৰা তাৰতিংসভৰনং গতাতি অদ্দস. অথেকেন পাদেন পথৰীতলং অক্কমিত্ৰা দুতিযং যুগন্ধরপব্বতে পতিট্ঠপেত্ৰা পুন পুরিমপাদং উদ্ধরিত্ৰা সিনেরুমত্থকং অক্কমিত্ৰা তত্থ পণ্ডুকম্বলসিলাতলে ৰস্সং উপগন্ত্ৰা সন্নিপতিতানং দসসহস্সচক্কৰাল়দেৰতানং আদিতো পট্ঠায অভিধম্মকথং আরভি. ভিক্খাচারৰেলায নিম্মিতবুদ্ধং মাপেসি. সো ধম্মং দেসেতি. ভগৰা নাগলতাদন্তকট্ঠং খাদিত্ৰা অনোতত্তদহে মুখং ধোৰিত্ৰা উত্তরকুরূসু পিণ্ডপাতং গহেত্ৰা অনোতত্তদহতীরে পরিভুঞ্জতি. সারিপুত্তত্থেরো তত্থ গন্ত্ৰা ভগৰন্তং ৰন্দতি. ভগৰা অজ্জ এত্তকং ধম্মং দেসেসিন্তি থেরস্স নযং দেতি. এৰং তযো মাসে অব্বোচ্ছিন্নং অভিধম্মকথং কথেসি. তং সুত্ৰা অসীতিকোটিদেৰতানং ধম্মাভিসমযো অহোসি.

যমকপাটিহারিযে সন্নিপতিতাপি দ্ৰাদসযোজনা পরিসা ভগৰন্তং পস্সিত্ৰাৰ গমিস্সামাতি ¶ খন্ধাৰারং বন্ধিত্ৰা অট্ঠাসি. তং চূল়অনাথপিণ্ডিকসেট্ঠিযেৰ সব্বপচ্চযেহি উপট্ঠাসি. মনুস্সা কুহিং ভগৰাতি জাননত্থায অনুরুদ্ধত্থেরং যাচিংসু. থেরো আলোকং ৰড্ঢেত্ৰা অদ্দস দিব্বেন চক্খুনা তত্থ ৰস্সূপগতং ভগৰন্তং দিস্ৰা আরোচেসি.

তে ভগৰতো ৰন্দনত্থায মহামোগ্গল্লানত্থেরং যাচিংসু. থেরো পরিসমজ্ঝেযেৰ মহাপথৰিযং নিমুজ্জিত্ৰা সিনেরুপব্বতং নিব্বিজ্ঝিত্ৰা তথাগতপাদমূলে ¶ ভগৰতো পাদে ৰন্দমানোৰ উম্মুজ্জিত্ৰা ভগৰন্তং এতদৰোচ ‘‘জম্বুদীপৰাসিনো, ভন্তে, ভগৰতো পাদে ৰন্দিত্ৰা পস্সিত্ৰাৰ গমিস্সামাতি ৰদন্তী’’তি. ভগৰা আহ ‘‘কুহিং পন তে, মোগ্গল্লান, এতরহি জেট্ঠভাতা ধম্মসেনাপতী’’তি? ‘‘সঙ্কস্সনগরে ভন্তে’’তি. ‘‘মোগ্গল্লান, মং দট্ঠুকামা স্ৰে সঙ্কস্সনগরং আগচ্ছন্তু, অহং স্ৰে মহাপৰারণপুণ্ণমাসীউপোসথদিৰসে সঙ্কস্সনগরে ওতরিস্সামী’’তি. ‘‘সাধু, ভন্তে’’তি থেরো দসবলং ৰন্দিত্ৰা আগতমগ্গেনেৰ ওরুয্হ মনুস্সানং সন্তিকং সম্পাপুণি. গমনাগমনকালে চ যথা নং মনুস্সা পস্সন্তি, এৰং অধিট্ঠাসি. ইদং তাৰেত্থ মহামোগ্গল্লানত্থেরো আৰিভাৰপাটিহারিযং অকাসি.

সো এৰং আগতো তং পৰত্তিং আরোচেত্ৰা ‘‘দূরন্তি সঞ্ঞং অকত্ৰা কতপাতরাসাৰ নিক্খমথা’’তি আহ. ভগৰা সক্কস্স দেৰরঞ্ঞো আরোচেসি ‘‘মহারাজ, স্ৰে মনুস্সলোকং গচ্ছামী’’তি. দেৰরাজা ৰিস্সকম্মং আণাপেসি ‘‘তাত, স্ৰে ভগৰা মনুস্সলোকং গন্তুকামো, তিস্সো সোপানপন্তিযো মাপেহি একং কনকমযং, একং রজতমযং, একং মণিময’’ন্তি. সো তথা অকাসি. ভগৰা দুতিযদিৰসে সিনেরুমুদ্ধনি ঠত্ৰা পুরত্থিমলোকধাতুং ওলোকেসি, অনেকানি চক্কৰাল়সহস্সানি ৰিৰটানি হুত্ৰা একঙ্গণং ৰিয পকাসিংসু. যথা চ পুরত্থিমেন, এৰং পচ্ছিমেনপি উত্তরেনপি দক্খিণেনপি সব্বং ৰিৰটমদ্দস. হেট্ঠাপি যাৰ অৰীচি, উপরি যাৰ অকনিট্ঠভৰনং, তাৰ অদ্দস.

তং দিৰসং কির লোকৰিৰরণং নাম অহোসি. মনুস্সাপি দেৰে পস্সন্তি, দেৰাপি মনুস্সে. তত্থ নেৰ মনুস্সা উদ্ধং উল্লোকেন্তি, ন দেৰা অধো ওলোকেন্তি, সব্বে সম্মুখাৰ অঞ্ঞমঞ্ঞং পস্সন্তি. ভগৰা মজ্ঝে মণিমযেন সোপানেন ওতরতি, ছকামাৰচরদেৰা ৰামপস্সে কনকমযেন, সুদ্ধাৰাসা চ মহাব্রহ্মা চ দক্খিণপস্সে রজতমযেন. দেৰরাজা পত্তচীৰরং অগ্গহেসি, মহাব্রহ্মা তিযোজনিকং সেতচ্ছত্তং, সুযামো ৰাল়বীজনিং, পঞ্চসিখো গন্ধব্বপুত্তো ¶ তিগাৰুতমত্তং বেল়ুৰপণ্ডুৰীণং গহেত্ৰা তথাগতস্স পূজং করোন্তো ওতরতি. তংদিৰসং ভগৰন্তং দিস্ৰা বুদ্ধভাৰায পিহং অনুপ্পাদেত্ৰা ঠিতসত্তো নাম নত্থি. ইদমেত্থ ভগৰা আৰিভাৰপাটিহারিযং অকাসি.

অপিচ ¶ তম্বপণ্ণিদীপে তলঙ্গরৰাসী ধম্মদিন্নত্থেরোপি তিস্সমহাৰিহারে চেতিযঙ্গণস্মিং নিসীদিত্ৰা ‘‘তীহি, ভিক্খৰে, ধম্মেহি সমন্নাগতো ভিক্খু অপণ্ণকপটিপদং পটিপন্নো হোতী’’তি অপণ্ণকসুত্তং (অ. নি. ৩.১৬) কথেন্তো হেট্ঠামুখং বীজনিং অকাসি, যাৰ অৰীচিতো একঙ্গণং অহোসি. ততো উপরিমুখং অকাসি, যাৰ ব্রহ্মলোকা একঙ্গণং অহোসি. থেরো নিরযভযেন তজ্জেত্ৰা সগ্গসুখেন চ পলোভেত্ৰা ধম্মং দেসেসি. কেচি সোতাপন্না অহেসুং, কেচি সকদাগামী অনাগামী অরহন্তোতি.

৩৮৯. তিরোভাৰং কাতুকামো পন আলোকং ৰা অন্ধকারং করোতি, অপ্পটিচ্ছন্নং ৰা পটিচ্ছন্নং, আপাথং ৰা অনাপাথং করোতি. কথং? অযঞ্হি যথা অপ্পটিচ্ছন্নোপি সমীপে ঠিতোপি ৰা ন দিস্সতি, এৰং অত্তানং ৰা পরং ৰা কাতুকামো পাদকজ্ঝানতো ৰুট্ঠায ‘‘ইদং আলোকট্ঠানং অন্ধকারং হোতূ’’তি ৰা, ‘‘ইদং অপ্পটিচ্ছন্নং পটিচ্ছন্নং হোতূ’’তি ৰা, ‘‘ইদং আপাথং অনাপাথং হোতূ’’তি ৰা আৰজ্জিত্ৰা পরিকম্মং কত্ৰা ৰুত্তনযেনেৰ অধিট্ঠাতি. সহ অধিট্ঠানচিত্তেন যথাধিট্ঠিতমেৰ হোতি. পরে সমীপে ঠিতাপি ন পস্সন্তি. সযম্পি অপস্সিতুকামো ন পস্সতি.

৩৯০. এতং পন পাটিহারিযং কেন কতপুব্বন্তি? ভগৰতা. ভগৰা হি যসং কুলপুত্তং সমীপে নিসিন্নংযেৰ যথা নং পিতা ন পস্সতি, এৰমকাসি. তথা ৰীসযোজনসতং মহাকপ্পিনস্স পচ্চুগ্গমনং কত্ৰা তং অনাগামিফলে, অমচ্চসহস্সঞ্চস্স সোতাপত্তিফলে পতিট্ঠাপেত্ৰা, তস্স অনুমগ্গং আগতা সহস্সিত্থিপরিৰারা অনোজাদেৰী আগন্ত্ৰা সমীপে নিসিন্নাপি যথা সপরিসং রাজানং ন পস্সতি, তথা কত্ৰা ‘‘অপি, ভন্তে, রাজানং পস্সথা’’তি ৰুত্তে ‘‘কিং পন তে রাজানং গৰেসিতুং ৰরং, উদাহু অত্তান’’ন্তি? ‘‘অত্তানং, ভন্তে’’তি ৰত্ৰা নিসিন্নায তস্সা তথা ধম্মং দেসেসি, যথা সা সদ্ধিং ইত্থিসহস্সেন সোতাপত্তিফলে পতিট্ঠাসি, অমচ্চা অনাগামিফলে, রাজা অরহত্তেতি. অপিচ তম্বপণ্ণিদীপং ¶ ¶ আগতদিৰসে যথা অত্তনা সদ্ধিং আগতে অৰসেসে রাজা ন পস্সতি, এৰং করোন্তেন মহিন্দত্থেরেনাপি ইদং কতমেৰ (পারা. অট্ঠ. ১.ততিযসঙ্গীতিকথা).

৩৯১. অপিচ সব্বম্পি পাকটং পাটিহারিযং আৰিভাৰং নাম. অপাকটপাটিহারিযং তিরোভাৰং নাম. তত্থ পাকটপাটিহারিযে ইদ্ধিপি পঞ্ঞাযতি ইদ্ধিমাপি. তং যমকপাটিহারিযেন দীপেতব্বং. তত্র হি ‘‘ইধ তথাগতো যমকপাটিহারিযং করোতি অসাধারণং সাৰকেহি. উপরিমকাযতো অগ্গিক্খন্ধো পৰত্ততি, হেট্ঠিমকাযতো উদকধারা পৰত্ততী’’তি (পটি. ম. ১.১১৬) এৰং উভযং পঞ্ঞাযিত্থ. অপাকটপাটিহারিযে ইদ্ধিযেৰ পঞ্ঞাযতি, ন ইদ্ধিমা. তং মহকসুত্তেন (সং. নি. ৪.৩৪৬) চ ব্রহ্মনিমন্তনিকসুত্তেন (ম. নি. ১.৫০১ আদযো) চ দীপেতব্বং. তত্র হি আযস্মতো চ মহকস্স, ভগৰতো চ ইদ্ধিযেৰ পঞ্ঞাযিত্থ, ন ইদ্ধিমা.

যথাহ –

‘‘একমন্তং নিসিন্নো খো চিত্তো গহপতি আযস্মন্তং মহকং এতদৰোচ ‘সাধু মে, ভন্তে, অয্যো মহকো উত্তরিমনুস্সধম্মা ইদ্ধিপাটিহারিযং দস্সেতূ’তি. তেন হি ত্ৰং গহপতি আল়িন্দে উত্তরাসঙ্গং পঞ্ঞাপেত্ৰা তিণকলাপং ওকাসেহীতি. ‘এৰং, ভন্তে’তি খো চিত্তো গহপতি আযস্মতো মহকস্স পটিস্সুত্ৰা আল়িন্দে উত্তরাসঙ্গং পঞ্ঞাপেত্ৰা তিণকলাপং ওকাসেসি. অথ খো আযস্মা মহকো ৰিহারং পৰিসিত্ৰা তথারূপং ইদ্ধাভিসঙ্খারং অভিসঙ্খাসি, যথা তালচ্ছিগ্গল়েন চ অগ্গল়ন্তরিকায চ অচ্চি নিক্খমিত্ৰা তিণানি ঝাপেসি, উত্তরাসঙ্গং ন ঝাপেসী’’তি (সং. নি. ৪.৩৪৬).

যথা চাহ –

‘‘অথ খ্ৰাহং, ভিক্খৰে, তথারূপং ইদ্ধাভিসঙ্খারং অভিসঙ্খাসিং ‘এত্তাৰতা ব্রহ্মা চ ব্রহ্মপরিসা চ ব্রহ্মপারিসজ্জা চ সদ্দঞ্চ মে সোস্সন্তি, ন চ মং দক্খিস্সন্তী’তি অন্তরহিতো ইমং গাথং অভাসিং –

‘ভৰে ¶ ¶ ৰাহং ভযং দিস্ৰা, ভৰঞ্চ ৰিভৰেসিনং;

ভৰং নাভিৰদিং কিঞ্চি, নন্দিঞ্চ ন উপাদিযি’’’ন্তি. (ম. নি. ১.৫০৪);

৩৯২. তিরোকুট্টং তিরোপাকারং তিরোপব্বতং অসজ্জমানো গচ্ছতি সেয্যথাপি আকাসেতি এত্থ তিরোকুট্টন্তি পরকুট্টং, কুট্টস্স পরভাগন্তি ৰুত্তং হোতি. এস নযো ইতরেসু. কুট্টোতি চ গেহভিত্তিযা এতমধিৰচনং. পাকারোতি গেহৰিহারগামাদীনং পরিক্খেপপাকারো. পব্বতোতি পংসুপব্বতো ৰা পাসাণপব্বতো ৰা. অসজ্জমানোতি অলগ্গমানো. সেয্যথাপি আকাসেতি আকাসে ৰিয. এৰং গন্তুকামেন পন আকাসকসিণং সমাপজ্জিত্ৰা ৰুট্ঠায কুট্টং ৰা পাকারং ৰা সিনেরুচক্কৰাল়েসুপি অঞ্ঞতরং পব্বতং ৰা আৰজ্জিত্ৰা কতপরিকম্মেন আকাসো হোতূতি অধিট্ঠাতব্বো. আকাসোযেৰ হোতি. অধো ওতরিতুকামস্স, উদ্ধং ৰা আরোহিতুকামস্স সুসিরো হোতি, ৰিনিৰিজ্ঝিত্ৰা গন্তুকামস্স ছিদ্দো. সো তত্থ অসজ্জমানো গচ্ছতি.

তিপিটকচূল়াভযত্থেরো পনেত্থাহ – ‘‘আকাসকসিণসমাপজ্জনং, আৰুসো, কিমত্থিযং, কিং হত্থিঅস্সাদীনি অভিনিম্মিনিতুকামো হত্থিঅস্সাদি কসিণানি সমাপজ্জতি, ননু যত্থ কত্থচি কসিণে পরিকম্মং কত্ৰা অট্ঠসমাপত্তিৰসীভাৰোযেৰ পমাণং. যং যং ইচ্ছতি, তং তদেৰ হোতী’’তি. ভিক্খূ আহংসু – ‘‘পাল়িযা, ভন্তে, আকাসকসিণংযেৰ আগতং, তস্মা অৰস্সমেতং ৰত্তব্ব’’ন্তি. তত্রাযং পাল়ি –

‘‘পকতিযা আকাসকসিণসমাপত্তিযা লাভী হোতি. তিরোকুট্টং তিরোপাকারং তিরোপব্বতং আৰজ্জতি. আৰজ্জিত্ৰা ঞাণেন অধিট্ঠাতি – ‘আকাসো হোতূ’তি. আকাসো হোতি. তিরোকুট্টং তিরোপাকারং তিরোপব্বতং অসজ্জমানো গচ্ছতি. যথা মনুস্সা পকতিযা অনিদ্ধিমন্তো কেনচি অনাৰটে অপরিক্খিত্তে অসজ্জমানা গচ্ছন্তি, এৰমেৰ সো ইদ্ধিমা চেতোৰসিপ্পত্তো তিরোকুট্টং তিরোপাকারং তিরোপব্বতং অসজ্জমানো গচ্ছতি, সেয্যথাপি আকাসে’’তি (পটি. ম. ৩.১১).

সচে ¶ পনস্স ভিক্খুনো অধিট্ঠহিত্ৰা গচ্ছন্তস্স অন্তরা পব্বতো ৰা রুক্খো ৰা উট্ঠেতি, কিং পুন সমাপজ্জিত্ৰা অধিট্ঠাতব্বন্তি? দোসো নত্থি. পুন সমাপজ্জিত্ৰা অধিট্ঠানং হি ¶ উপজ্ঝাযস্স সন্তিকে নিস্সযগ্গহণসদিসং হোতি. ইমিনা চ পন ভিক্খুনা আকাসো হোতূতি অধিট্ঠিতত্তা আকাসো হোতিযেৰ. পুরিমাধিট্ঠানবলেনেৰ চস্স অন্তরা অঞ্ঞো পব্বতো ৰা রুক্খো ৰা উতুমযো উট্ঠহিস্সতীতি অট্ঠানমেৰেতং. অঞ্ঞেন ইদ্ধিমতা নিম্মিতে পন পঠমনিম্মানং বলৰং হোতি. ইতরেন তস্স উদ্ধং ৰা অধো ৰা গন্তব্বং.

৩৯৩. পথৰিযাপি উম্মুজ্জনিমুজ্জন্তি এত্থ উম্মুজ্জন্তি উট্ঠানং ৰুচ্চতি. নিমুজ্জন্তি সংসীদনং. উম্মুজ্জঞ্চ নিমুজ্জঞ্চ উম্মুজ্জনিমুজ্জং. এৰং কাতুকামেন আপোকসিণং সমাপজ্জিত্ৰা উট্ঠায এত্তকে ঠানে পথৰী উদকং হোতূতি পরিচ্ছিন্দিত্ৰা পরিকম্মং কত্ৰা ৰুত্তনযেনেৰ অধিট্ঠাতব্বং. সহ অধিট্ঠানেন যথা পরিচ্ছিন্নে ঠানে পথৰী উদকমেৰ হোতি. সো তত্থ উম্মুজ্জনিমুজ্জং করোতি. তত্রাযং পাল়ি –

‘‘পকতিযা আপোকসিণসমাপত্তিযা লাভী হোতি. পথৰিং আৰজ্জতি. আৰজ্জিত্ৰা ঞাণেন অধিট্ঠাতি – ‘উদকং হোতূ’তি. উদকং হোতি. সো পথৰিযা উম্মুজ্জনিমুজ্জং করোতি. যথা মনুস্সা পকতিযা অনিদ্ধিমন্তো উদকে উম্মুজ্জনিমুজ্জং করোন্তি, এৰমেৰ সো ইদ্ধিমা চেতোৰসিপ্পত্তো পথৰিযা উম্মুজ্জনিমুজ্জং করোতি, সেয্যথাপি উদকে’’তি (পটি. ম. ৩.১১).

ন কেৰলঞ্চ উম্মুজ্জনিমুজ্জমেৰ, ন্হানপানমুখধোৰনভণ্ডকধোৰনাদীসু যং যং ইচ্ছতি, তং তং করোতি. ন কেৰলঞ্চ উদকমেৰ, সপ্পিতেলমধুফাণিতাদীসুপি যং যং ইচ্ছতি, তং তং ইদঞ্চিদঞ্চ এত্তকং হোতূতি আৰজ্জিত্ৰা পরিকম্মং কত্ৰা অধিট্ঠহন্তস্স যথাধিট্ঠিতমেৰ হোতি. উদ্ধরিত্ৰা ভাজনগতং করোন্তস্স সপ্পি সপ্পিমেৰ হোতি. তেলাদীনি তেলাদীনিযেৰ. উদকং উদকমেৰ. সো তত্থ তেমিতুকামোৰ তেমেতি, ন তেমিতুকামো ন তেমেতি. তস্সেৰ চ সা পথৰী উদকং হোতি সেসজনস্স পথৰীযেৰ. তত্থ মনুস্সা পত্তিকাপি গচ্ছন্তি, যানাদীহিপি গচ্ছন্তি, কসিকম্মাদীনিপি করোন্তিযেৰ. সচে পনাযং তেসম্পি উদকং হোতূতি ¶ ইচ্ছতি, হোতিযেৰ. পরিচ্ছিন্নকালং পন অতিক্কমিত্ৰা যং পকতিযা ঘটতল়াকাদীসু উদকং, তং ঠপেত্ৰা অৰসেসং পরিচ্ছিন্নট্ঠানং পথৰীযেৰ হোতি.

৩৯৪. উদকেপি অভিজ্জমানেতি এত্থ যং উদকং অক্কমিত্ৰা সংসীদতি, তং ভিজ্জমানন্তি ¶ ৰুচ্চতি. ৰিপরীতং অভিজ্জমানং. এৰং গন্তুকামেন পন পথৰীকসিণং সমাপজ্জিত্ৰা ৰুট্ঠায এত্তকে ঠানে উদকং পথৰী হোতূতি পরিচ্ছিন্দিত্ৰা পরিকম্মং কত্ৰা ৰুত্তনযেনেৰ অধিট্ঠাতব্বং. সহ অধিট্ঠানেন যথা পরিচ্ছিন্নট্ঠানে উদকং পথৰীযেৰ হোতি. সো তত্থ গচ্ছতি, তত্রাযং পাল়ি –

‘‘পকতিযা পথৰীকসিণসমাপত্তিযা লাভী হোতি. উদকং আৰজ্জতি. আৰজ্জিত্ৰা ঞাণেন অধিট্ঠাতি – ‘পথৰী হোতূ’তি. পথৰী হোতি. সো অভিজ্জমানে উদকে গচ্ছতি. যথা মনুস্সা পকতিযা অনিদ্ধিমন্তো অভিজ্জমানায পথৰিযা গচ্ছন্তি, এৰমেৰ সো ইদ্ধিমা চেতোৰসিপ্পত্তো অভিজ্জমানে উদকে গচ্ছতি, সেয্যথাপি পথৰিয’’ন্তি (পটি. ম. ৩.১১).

ন কেৰলঞ্চ গচ্ছতি, যং যং ইরিযাপথং ইচ্ছতি, তং তং করোতি. ন কেৰলঞ্চ পথৰিমেৰ করোতি, মণিসুৰণ্ণপব্বতরুক্খাদীসুপি যং যং ইচ্ছতি, তং তং ৰুত্তনযেনেৰ আৰজ্জিত্ৰা অধিট্ঠাতি, যথাধিট্ঠিতমেৰ হোতি. তস্সেৰ চ তং উদকং পথৰী হোতি, সেসজনস্স উদকমেৰ, মচ্ছকচ্ছপা চ উদককাকাদযো চ যথারুচি ৰিচরন্তি. সচে পনাযং অঞ্ঞেসম্পি মনুস্সানং তং পথৰিং কাতুং ইচ্ছতি, করোতিযেৰ. পরিচ্ছিন্নকালাতিক্কমেন পন উদকমেৰ হোতি.

৩৯৫. পল্লঙ্কেন কমতীতি পল্লঙ্কেন গচ্ছতি. পক্খী সকুণোতি পক্খেহি যুত্তসকুণো. এৰং কাতুকামেন পন পথৰীকসিণং সমাপজ্জিত্ৰা ৰুট্ঠায সচে নিসিন্নো গন্তুমিচ্ছতি, পল্লঙ্কপ্পমাণং ঠানং পরিচ্ছিন্দিত্ৰা পরিকম্মং কত্ৰা ৰুত্তনযেনেৰ অধিট্ঠাতব্বং. সচে নিপন্নো গন্তুকামো হোতি মঞ্চপ্পমাণং, সচে পদসা গন্তুকামো হোতি মগ্গপ্পমাণন্তি এৰং যথানুরূপং ঠানং পরিচ্ছিন্দিত্ৰা ৰুত্তনযেনেৰ পথৰী হোতূতি অধিট্ঠাতব্বং, সহ অধিট্ঠানেন পথৰীযেৰ হোতি. তত্রাযং পাল়ি –

‘‘আকাসেপি ¶ পল্লঙ্কেন কমতি, সেয্যথাপি পক্খী সকুণোতি. পকতিযা পথৰীকসিণসমাপত্তিযা লাভী হোতি, আকাসং আৰজ্জতি. আৰজ্জিত্ৰা ঞাণেন অধিট্ঠাতি – ‘পথৰী হোতূ’তি. পথৰী হোতি. সো আকাসে অন্তলিক্খে চঙ্কমতিপি তিট্ঠতিপি ¶ নিসীদতিপি সেয্যম্পি কপ্পেতি. যথা মনুস্সা পকতিযা অনিদ্ধিমন্তো পথৰিযং চঙ্কমন্তিপি…পে… সেয্যম্পি কপ্পেন্তি, এৰমেৰ সো ইদ্ধিমা চেতোৰসিপ্পত্তো আকাসে অন্তলিক্খে চঙ্কমতিপি…পে… সেয্যম্পি কপ্পেতী’’তি (পটি. ম. ৩.১১).

আকাসে গন্তুকামেন চ ভিক্খুনা দিব্বচক্খুলাভিনাপি ভৰিতব্বং. কস্মা? অন্তরে উতুসমুট্ঠানা ৰা পব্বতরুক্খাদযো হোন্তি, নাগসুপণ্ণাদযো ৰা উসূযন্তা মাপেন্তি, নেসং দস্সনত্থং. তে পন দিস্ৰা কিং কাতব্বন্তি? পাদকজ্ঝানং সমাপজ্জিত্ৰা ৰুট্ঠায আকাসো হোতূতি পরিকম্মং কত্ৰা অধিট্ঠাতব্বং. থেরো পনাহ ‘‘সমাপত্তিসমাপজ্জনং, আৰুসো, কিমত্থিযং, ননু সমাহিতমেৰস্স চিত্তং, তেন যং যং ঠানং আকাসো হোতূতি অধিট্ঠাতি, আকাসোযেৰ হোতী’’তি. কিঞ্চাপি এৰমাহ, অথ খো তিরোকুট্টপারিহারিযে ৰুত্তনযেনেৰ পটিপজ্জিতব্বং.

অপিচ ওকাসে ওরোহণত্থম্পি ইমিনা দিব্বচক্খুলাভিনা ভৰিতব্বং, অযঞ্হি সচে অনোকাসে ন্হানতিত্থে ৰা গামদ্ৰারে ৰা ওরোহতি. মহাজনস্স পাকটো হোতি. তস্মা দিব্বচক্খুনা পস্সিত্ৰা অনোকাসং ৰজ্জেত্ৰা ওকাসে ওতরতীতি.

৩৯৬. ইমেপি চন্দিমসূরিযে এৰংমহিদ্ধিকে এৰংমহানুভাৰে পাণিনা পরামসতি পরিমজ্জতীতি এত্থ চন্দিমসূরিযানং দ্ৰাচত্তালীসযোজনসহস্সস্স উপরি চরণেন মহিদ্ধিকতা, তীসু দীপেসু একক্খণে আলোককরণেন মহানুভাৰতা ৰেদিতব্বা. এৰং উপরি চরণআলোককরণেহি ৰা মহিদ্ধিকে তেনেৰ মহানুভাৰে. পরামসতীতি পরিগ্গণ্হতি একদেসে ৰা ছুপতি. পরিমজ্জতীতি সমন্ততো আদাসতলং ৰিয পরিমজ্জতি. অযং পনস্স ইদ্ধি অভিঞ্ঞাপাদকজ্ঝানৰসেনেৰ ইজ্ঝতি, নত্থেত্থ কসিণসমাপত্তিনিযমো. ৰুত্তঞ্হেতং পটিসম্ভিদাযং –

‘‘ইমেপি ¶ চন্দিমসূরিযে…পে… পরিমজ্জতীতি ইধ সো ইদ্ধিমা চেতোৰসিপ্পত্তো চন্দিমসূরিযে আৰজ্জতি, আৰজ্জিত্ৰা ঞাণেন অধিট্ঠাতি – ‘হত্থপাসে হোতূ’তি. হত্থপাসে হোতি. সো নিসিন্নকো ৰা নিপন্নকো ৰা চন্দিমসূরিযে পাণিনা আমসতি পরামসতি পরিমজ্জতি. যথা মনুস্সা পকতিযা অনিদ্ধিমন্তো কিঞ্চিদেৰ রূপগতং হত্থপাসে ¶ আমসন্তি পরামসন্তি পরিমজ্জন্তি, এৰমেৰ সো ইদ্ধিমা…পে… পরিমজ্জতী’’তি (পটি. ম. ৩.১২).

স্ৰাযং যদি ইচ্ছতি গন্ত্ৰা পরামসিতুং, গন্ত্ৰা পরামসতি, যদি পন ইধেৰ নিসিন্নকো ৰা নিপন্নকো ৰা পরামসিতুকামো হোতি, হত্থপাসে হোতূতি অধিট্ঠাতি, অধিট্ঠানবলেন ৰণ্টা মুত্ততালফলং ৰিয আগন্ত্ৰা হত্থপাসে ঠিতে ৰা পরামসতি, হত্থং ৰা ৰড্ঢেত্ৰা. ৰড্ঢেন্তস্স পন কিং উপাদিণ্ণকং ৰড্ঢতি, অনুপাদিণ্ণকন্তি? উপাদিণ্ণকং নিস্সায অনুপাদিণ্ণকং ৰড্ঢতি.

তত্থ তিপিটকচূল়নাগত্থেরো আহ ‘‘কিং পনাৰুসো, উপাদিণ্ণকং খুদ্দকম্পি মহন্তম্পি ন হোতি, ননু যদা ভিক্খু তালচ্ছিদ্দাদীহি নিক্খমতি, তদা উপাদিণ্ণকং খুদ্দকং হোতি. যদা মহন্তং অত্তভাৰং করোতি, তদা মহন্তং হোতি মহামোগ্গল্লানত্থেরস্স ৰিযা’’তি.

নন্দোপনন্দনাগদমনকথা

একস্মিং কির সমযে অনাথপিণ্ডিকো গহপতি ভগৰতো ধম্মদেসনং সুত্ৰা ‘‘স্ৰে, ভন্তে, পঞ্চহি ভিক্খুসতেহি সদ্ধিং অম্হাকং গেহে ভিক্খং গণ্হথা’’তি নিমন্তেত্ৰা পক্কমি. ভগৰা অধিৰাসেত্ৰা তংদিৰসাৰসেসং রত্তিভাগঞ্চ ৰীতিনামেত্ৰা পচ্চূসসমযে দসসহস্সিলোকধাতুং ওলোকেসি. অথস্স নন্দোপনন্দো নাম নাগরাজা ঞাণমুখে আপাথমাগচ্ছি. ভগৰা ‘‘অযং নাগরাজা ময্হং ঞাণমুখে আপাথমাগচ্ছি, অত্থি নু খো অস্স উপনিস্সযো’’তি আৰজ্জেন্তো ‘‘অযং মিচ্ছাদিট্ঠিকো তীসু রতনেসু অপ্পসন্নোতি দিস্ৰা কো নু খো ইমং মিচ্ছাদিট্ঠিতো ৰিৰেচেয্যা’’তি আৰজ্জেন্তো মহামোগ্গল্লানত্থেরং অদ্দস.

ততো ¶ পভাতায রত্তিযা সরীরপটিজগ্গনং কত্ৰা আযস্মন্তং আনন্দং আমন্তেসি – ‘‘আনন্দ, পঞ্চন্নং ভিক্খুসতানং আরোচেহি তথাগতো দেৰচারিকং গচ্ছতী’’তি. তং দিৰসঞ্চ নন্দোপনন্দস্স আপানভূমিং সজ্জযিংসু. সো দিব্বরতনপল্লঙ্কে দিব্বেন সেতচ্ছত্তেন ধারিযমানেন তিৰিধনাটকেহি চেৰ নাগপরিসায চ পরিৰুতো দিব্বভাজনেসু উপট্ঠাপিতং অন্নপানৰিধিং ওলোকযমানো নিসিন্নো হোতি. অথ ভগৰা যথা নাগরাজা পস্সতি, তথা কত্ৰা তস্স ৰিতানমত্থকেনেৰ পঞ্চহি ভিক্খুসতেহি সদ্ধিং তাৰতিংসদেৰলোকাভিমুখো পাযাসি.

তেন ¶ খো পন সমযেন নন্দোপনন্দস্স নাগরাজস্স এৰরূপং পাপকং দিট্ঠিগতং উপ্পন্নং হোতি – ‘‘ইমে হি নাম মুণ্ডকা সমণকা অম্হাকং উপরূপরিভৰনেন দেৰানং তাৰতিংসানং ভৰনং পৰিসন্তিপি নিক্খমন্তিপি, ন দানি ইতো পট্ঠায ইমেসং অম্হাকং মত্থকে পাদপংসুং ওকিরন্তানং গন্তুং দস্সামী’’তি উট্ঠায সিনেরুপাদং গন্ত্ৰা তং অত্তভাৰং ৰিজহিত্ৰা সিনেরুং সত্তক্খত্তুং ভোগেহি পরিক্খিপিত্ৰা উপরি ফণং কত্ৰা তাৰতিংসভৰনং অৰকুজ্জেন ফণেন গহেত্ৰা অদস্সনং গমেসি.

অথ খো আযস্মা রট্ঠপালো ভগৰন্তং এতদৰোচ ‘‘পুব্বে, ভন্তে, ইমস্মিং পদেসে ঠিতো সিনেরুং পস্সামি, সিনেরুপরিভণ্ডং পস্সামি, তাৰতিংসং পস্সামি, ৰেজযন্তং পস্সামি, ৰেজযন্তস্স পাসাদস্স উপরি ধজং পস্সামি. কো নু খো, ভন্তে, হেতু কো পচ্চযো, যং এতরহি নেৰ সিনেরুং পস্সামি…পে… ন ৰেজযন্তস্স পাসাদস্স উপরি ধজং পস্সামী’’তি. ‘‘অযং, রট্ঠপাল, নন্দোপনন্দো নাম নাগরাজা তুম্হাকং কুপিতো সিনেরুং সত্তক্খত্তুং ভোগেহি পরিক্খিপিত্ৰা উপরি ফণেন পটিচ্ছাদেত্ৰা অন্ধকারং কত্ৰা ঠিতো’’তি. ‘‘দমেমি নং, ভন্তে’’তি. ন ভগৰা অনুজানি. অথ খো আযস্মা ভদ্দিযো আযস্মা রাহুলোতি অনুক্কমেন সব্বেপি ভিক্খূ উট্ঠহিংসু. ন ভগৰা অনুজানি.

অৰসানে মহামোগ্গল্লানত্থেরো ‘‘অহং, ভন্তে, দমেমি ন’’ন্তি আহ. ‘‘দমেহি মোগ্গল্লানা’’তি ভগৰা অনুজানি. থেরো অত্তভাৰং ৰিজহিত্ৰা মহন্তং নাগরাজৰণ্ণং অভিনিম্মিনিত্ৰা নন্দোপনন্দং চুদ্দসক্খত্তুং ভোগেহি পরিক্খিপিত্ৰা তস্স ফণমত্থকে অত্তনো ফণং ঠপেত্ৰা সিনেরুনা ¶ সদ্ধিং অভিনিপ্পীল়েসি. নাগরাজা পধূমাযি. থেরোপি ন তুয্হংযেৰ সরীরে ধূমো অত্থি, ময্হম্পি অত্থীতি পধূমাযি. নাগরাজস্স ধূমো থেরং ন বাধতি. থেরস্স পন ধূমো নাগরাজানং বাধতি. ততো নাগরাজা পজ্জলি. থেরোপি ন তুয্হংযেৰ সরীরে অগ্গি অত্থি, ময্হম্পি অত্থীতি পজ্জলি. নাগরাজস্স তেজো থেরং ন বাধতি. থেরস্স পন তেজো নাগরাজানং বাধতি. নাগরাজা অযং মং সিনেরুনা অভিনিপ্পীল়েত্ৰা ধূমাযতি চেৰ পজ্জলতি চাতি চিন্তেত্ৰা ‘‘ভো ত্ৰং কোসী’’তি পটিপুচ্ছি. ‘‘অহং খো, নন্দ, মোগ্গল্লানো’’তি. ‘‘ভন্তে, অত্তনো ভিক্খুভাৰেন তিট্ঠাহী’’তি.

থেরো তং অত্তভাৰং ৰিজহিত্ৰা তস্স দক্খিণকণ্ণসোতেন পৰিসিত্ৰা ৰামকণ্ণসোতেন নিক্খমি ¶ , ৰামকণ্ণসোতেন পৰিসিত্ৰা দক্খিণকণ্ণসোতেন নিক্খমি, তথা দক্খিণনাসসোতেন পৰিসিত্ৰা ৰামনাসসোতেন নিক্খমি, ৰামনাসসোতেন পৰিসিত্ৰা দক্খিণনাসসোতেন নিক্খমি. ততো নাগরাজা মুখং ৰিৰরি. থেরো মুখেন পৰিসিত্ৰা অন্তোকুচ্ছিযং পাচীনেন চ পচ্ছিমেন চ চঙ্কমতি. ভগৰা ‘‘মোগ্গল্লান, মনসিকরোহি মহিদ্ধিকো এস নাগো’’তি আহ. থেরো ‘‘ময্হং খো, ভন্তে, চত্তারো ইদ্ধিপাদা ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা, তিট্ঠতু, ভন্তে, নন্দোপনন্দো, অহং নন্দোপনন্দসদিসানং নাগরাজানং সতম্পি সহস্সম্পি সতসহস্সম্পি দমেয্য’’ন্তি আহ.

নাগরাজা চিন্তেসি ‘‘পৰিসন্তো তাৰ মে ন দিট্ঠো, নিক্খমনকালে দানি নং দাঠন্তরে পক্খিপিত্ৰা সঙ্খাদিস্সামী’’তি চিন্তেত্ৰা নিক্খম ভন্তে, মা মং অন্তোকুচ্ছিযং অপরাপরং চঙ্কমন্তো বাধযিত্থাতি আহ. থেরো নিক্খমিত্ৰা বহি অট্ঠাসি. নাগরাজা অযং সোতি দিস্ৰা নাসৰাতং ৰিস্সজ্জি. থেরো চতুত্থং ঝানং সমাপজ্জি. লোমকূপম্পিস্স ৰাতো চালেতুং নাসক্খি. অৰসেসা ভিক্খূ কির আদিতো পট্ঠায সব্বপাটিহারিযানি কাতুং সক্কুণেয্যুং, ইমং পন ঠানং পত্ৰা এৰং খিপ্পনিসন্তিনো হুত্ৰা সমাপজ্জিতুং ন সক্খিস্সন্তীতি তেসং ভগৰা নাগরাজদমনং নানুজানি.

নাগরাজা ¶ ‘‘অহং ইমস্স সমণস্স নাসৰাতেন লোমকূপম্পি চালেতুং নাসক্খিং, মহিদ্ধিকো সমণো’’তি চিন্তেসি. থেরো অত্তভাৰং ৰিজহিত্ৰা সুপণ্ণরূপং অভিনিম্মিনিত্ৰা সুপণ্ণৰাতং দস্সেন্তো নাগরাজানং অনুবন্ধি. নাগরাজা তং অত্তভাৰং ৰিজহিত্ৰা মাণৰকৰণ্ণং অভিনিম্মিনিত্ৰা ‘‘ভন্তে, তুম্হাকং সরণং গচ্ছামী’’তি ৰদন্তো থেরস্স পাদে ৰন্দি. থেরো ‘‘সত্থা, নন্দ, আগতো, এহি গমিস্সামা’’তি নাগরাজানং দমযিত্ৰা নিব্বিসং কত্ৰা গহেত্ৰা ভগৰতো সন্তিকং অগমাসি. নাগরাজা ভগৰন্তং ৰন্দিত্ৰা ‘‘ভন্তে, তুম্হাকং সরণং গচ্ছামী’’তি আহ. ভগৰা ‘‘সুখী হোহি, নাগরাজা’’তি ৰত্ৰা ভিক্খুসঙ্ঘপরিৰুতো অনাথপিণ্ডিকস্স নিৰেসনং অগমাসি.

অনাথপিণ্ডিকো ‘‘কিং, ভন্তে, অতিদিৰা আগতত্থা’’তি আহ. মোগ্গল্লানস্স চ নন্দোপনন্দস্স চ সঙ্গামো অহোসীতি. কস্স, ভন্তে, জযো, কস্স পরাজযোতি. মোগ্গল্লানস্স জযো, নন্দস্স পরাজযোতি. অনাথপিণ্ডিকো ‘‘অধিৰাসেতু মে, ভন্তে, ভগৰা সত্তাহং ¶ একপটিপাটিযা ভত্তং, সত্তাহং থেরস্স সক্কারং করিস্সামী’’তি ৰত্ৰা সত্তাহং বুদ্ধপমুখানং পঞ্চন্নং ভিক্খুসতানং মহাসক্কারং অকাসি. ইতি ইমং ইমস্মিং নন্দোপনন্দদমনে কতং মহন্তং অত্তভাৰং সন্ধাযেতং ৰুত্তং ‘‘যদা মহন্তং অত্তভাৰং করোতি, তদা মহন্তং হোতি মহামোগ্গল্লানত্থেরস্স ৰিযা’’তি. এৰং ৰুত্তেপি ভিক্খূ উপাদিণ্ণকং নিস্সায অনুপাদিণ্ণকমেৰ ৰড্ঢতীতি আহংসু. অযমেৰ চেত্থ যুত্তি.

সো এৰং কত্ৰা ন কেৰলং চন্দিমসূরিযে পরামসতি. সচে ইচ্ছতি পাদকথলিকং কত্ৰা পাদে ঠপেতি, পীঠং কত্ৰা নিসীদতি, মঞ্চং কত্ৰা নিপজ্জতি, অপস্সেনফলকং কত্ৰা অপস্সযতি. যথা চ একো, এৰং অপরোপি. অনেকেসুপি হি ভিক্খুসতসহস্সেসু এৰং করোন্তেসু তেসঞ্চ একমেকস্স তথেৰ ইজ্ঝতি. চন্দিমসূরিযানঞ্চ গমনম্পি আলোককরণম্পি তথেৰ হোতি. যথা হি পাতিসহস্সেসু উদকপূরেসু সব্বপাতীসু চ চন্দমণ্ডলানি দিস্সন্তি. পাকতিকমেৰ চ চন্দস্স গমনং আলোককরণঞ্চ হোতি. তথূপমমেতং পাটিহারিযং.

৩৯৭. যাৰ ব্রহ্মলোকাপীতি ব্রহ্মলোকম্পি পরিচ্ছেদং কত্ৰা. কাযেন ৰসং ৰত্তেতীতি তত্থ ব্রহ্মলোকে কাযেন অত্তনো ৰসং ৰত্তেতি. তস্সত্থো পাল়িং অনুগন্ত্ৰা ৰেদিতব্বো. অযঞ্হেত্থ পাল়ি –

‘‘যাৰ ¶ ব্রহ্মলোকাপি কাযেন ৰসং ৰত্তেতীতি. সচে সো ইদ্ধিমা চেতোৰসিপ্পত্তো ব্রহ্মলোকং গন্তুকামো হোতি, দূরেপি সন্তিকে অধিট্ঠাতি সন্তিকে হোতূতি, সন্তিকে হোতি. সন্তিকেপি দূরে অধিট্ঠাতি দূরে হোতূতি, দূরে হোতি. বহুকম্পি থোকন্তি অধিট্ঠাতি থোকং হোতূতি, থোকং হোতি. থোকম্পি বহুকন্তি অধিট্ঠাতি বহুকং হোতূতি, বহুকং হোতি. দিব্বেন চক্খুনা তস্স ব্রহ্মুনো রূপং পস্সতি. দিব্বায সোতধাতুযা তস্স ব্রহ্মুনো সদ্দং সুণাতি. চেতোপরিযঞাণেন তস্স ব্রহ্মুনো চিত্তং পজানাতি. সচে সো ইদ্ধিমা চেতোৰসিপ্পত্তো দিস্সমানেন কাযেন ব্রহ্মলোকং গন্তুকামো হোতি, কাযৰসেন চিত্তং পরিণামেতি, কাযৰসেন চিত্তং অধিট্ঠাতি, কাযৰসেন চিত্তং পরিণামেত্ৰা কাযৰসেন চিত্তং অধিট্ঠহিত্ৰা সুখসঞ্ঞঞ্চ লহুসঞ্ঞঞ্চ ওক্কমিত্ৰা দিস্সমানেন কাযেন ব্রহ্মলোকং গচ্ছতি. সচে সো ইদ্ধিমা চেতোৰসিপ্পত্তো অদিস্সমানেন কাযেন ব্রহ্মলোকং গন্তুকামো হোতি, চিত্তৰসেন কাযং পরিণামেতি, চিত্তৰসেন ¶ কাযং অধিট্ঠাতি. চিত্তৰসেন কাযং পরিণামেত্ৰা চিত্তৰসেন কাযং অধিট্ঠহিত্ৰা সুখসঞ্ঞঞ্চ লহুসঞ্ঞঞ্চ ওক্কমিত্ৰা অদিস্সমানেন কাযেন ব্রহ্মলোকং গচ্ছতি. সো তস্স ব্রহ্মুনো পুরতো রূপং অভিনিম্মিনাতি মনোমযং সব্বঙ্গপঞ্চঙ্গিং অহীনিন্দ্রিযং. সচে সো ইদ্ধিমা চঙ্কমতি, নিম্মিতোপি তত্থ চঙ্কমতি. সচে সো ইদ্ধিমা তিট্ঠতি, নিসীদতি, সেয্যং কপ্পেতি, নিম্মিতোপি তত্থ সেয্যং কপ্পেতি. সচে সো ইদ্ধিমা ধূমাযতি, পজ্জলতি, ধম্মং ভাসতি, পঞ্হং পুচ্ছতি, পঞ্হং পুট্ঠো ৰিস্সজ্জেতি, নিম্মিতোপি তত্থ পঞ্হং পুট্ঠো ৰিস্সজ্জেতি. সচে সো ইদ্ধিমা তেন ব্রহ্মুনা সদ্ধিং সন্তিট্ঠতি, সল্লপতি, সাকচ্ছং সমাপজ্জতি, নিম্মিতোপি তত্থ তেন ব্রহ্মুনা সদ্ধিং সন্তিট্ঠতি, সল্লপতি, সাকচ্ছং সমাপজ্জতি. যং যদেৰ হি সো ইদ্ধিমা করোতি, তং তদেৰ নিম্মিতো করোতী’’তি (পটি. ম. ৩.১২).

তত্থ ¶ দূরেপি সন্তিকে অধিট্ঠাতীতি পাদকজ্ঝানতো ৰুট্ঠায দূরে দেৰলোকং ৰা ব্রহ্মলোকং ৰা আৰজ্জতি সন্তিকে হোতূতি. আৰজ্জিত্ৰা পরিকম্মং কত্ৰা পুন সমাপজ্জিত্ৰা ঞাণেন অধিট্ঠাতি সন্তিকে হোতূতি, সন্তিকে হোতি. এস নযো সেসপদেসুপি.

তত্থ কো দূরং গহেত্ৰা সন্তিকং অকাসীতি? ভগৰা. ভগৰা হি যমকপাটিহারিযাৰসানে দেৰলোকং গচ্ছন্তো যুগন্ধরঞ্চ সিনেরুঞ্চ সন্তিকে কত্ৰা পথৰীতলতো একপাদং যুগন্ধরে পতিট্ঠপেত্ৰা দুতিযং সিনেরুমত্থকে ঠপেসি. অঞ্ঞো কো অকাসি? মহামোগ্গল্লানত্থেরো. থেরো হি সাৰত্থিতো ভত্তকিচ্চং কত্ৰা নিক্খন্তং দ্ৰাদসযোজনিকং পরিসং তিংসযোজনং সঙ্কস্সনগরমগ্গং সঙ্খিপিত্ৰা তঙ্খণঞ্ঞেৰ সম্পাপেসি.

অপিচ তম্বপণ্ণিদীপে চূল়সমুদ্দত্থেরোপি অকাসি. দুব্ভিক্খসমযে কির থেরস্স সন্তিকং পাতোৰ সত্ত ভিক্খুসতানি আগমংসু. থেরো ‘‘মহা ভিক্খুসঙ্ঘো কুহিং ভিক্খাচারো ভৰিস্সতী’’তি চিন্তেন্তো সকলতম্বপণ্ণিদীপে অদিস্ৰা ‘‘পরতীরে পাটলিপুত্তে ভৰিস্সতী’’তি দিস্ৰা ভিক্খূ পত্তচীৰরং গাহাপেত্ৰা ‘‘এথাৰুসো, ভিক্খাচারং গমিস্সামা’’তি পথৰিং সঙ্খিপিত্ৰা পাটলিপুত্তং গতো. ভিক্খূ ‘‘কতরং, ভন্তে, ইমং নগর’’ন্তি পুচ্ছিংসু. পাটলিপুত্তং, আৰুসোতি. পাটলিপুত্তং নাম দূরে ভন্তেতি. আৰুসো, মহল্লকত্থেরা নাম দূরেপি গহেত্ৰা সন্তিকে করোন্তীতি. মহাসমুদ্দো কুহিং, ভন্তেতি? ননু, আৰুসো, অন্তরা একং নীলমাতিকং অতিক্কমিত্ৰা ¶ আগতত্থাতি? আম, ভন্তে. মহাসমুদ্দো পন মহন্তোতি. আৰুসো, মহল্লকত্থেরা নাম মহন্তম্পি খুদ্দকং করোন্তীতি.

যথা চাযং, এৰং তিস্সদত্তত্থেরোপি সাযন্হসমযে ন্হাযিত্ৰা কতুত্তরাসঙ্গো মহাবোধিং ৰন্দিস্সামীতি চিত্তে উপ্পন্নে সন্তিকে অকাসি.

সন্তিকং পন গহেত্ৰা কো দূরমকাসীতি? ভগৰা. ভগৰা হি অত্তনো চ অঙ্গুলিমালস্স (ম. নি. ২.৩৪৮) চ অন্তরং সন্তিকম্পি দূরমকাসীতি.

অথ কো বহুকং থোকং অকাসীতি? মহাকস্সপত্থেরো. রাজগহে কির নক্খত্তদিৰসে পঞ্চসতা কুমারিযো চন্দপূৰে গহেত্ৰা নক্খত্তকীল়নত্থায গচ্ছন্তিযো ভগৰন্তং দিস্ৰা কিঞ্চি নাদংসু. পচ্ছতো আগচ্ছন্তং পন থেরং দিস্ৰা অম্হাকং থেরো এতি পূৰং দস্সামাতি সব্বা পূৰে ¶ গহেত্ৰা থেরং উপসঙ্কমিংসু. থেরো পত্তং নীহরিত্ৰা সব্বং একপত্তপূরমত্তমকাসি. ভগৰা থেরং আগমযমানো পুরতো নিসীদি. থেরো আহরিত্ৰা ভগৰতো অদাসি.

ইল্লিসসেট্ঠিৰত্থুস্মিং পন মহামোগ্গল্লানত্থেরো থোকং বহুকমকাসি, কাকৰলিযৰত্থুস্মিঞ্চ ভগৰা. মহাকস্সপত্থেরো কির সত্তাহং সমাপত্তিযা ৰীতিনামেত্ৰা দলিদ্দসঙ্গহং করোন্তো কাকৰলিযস্স নাম দুগ্গতমনুস্সস্স ঘরদ্ৰারে অট্ঠাসি. তস্স জাযা থেরং দিস্ৰা পতিনো পক্কং অলোণম্বিলযাগুং পত্তে আকিরি. থেরো তং গহেত্ৰা ভগৰতো হত্থে ঠপেসি. ভগৰা মহাভিক্খুসঙ্ঘস্স পহোনকং কত্ৰা অধিট্ঠাসি. একপত্তেন আভতা সব্বেসং পহোসি. কাকৰলিযোপি সত্তমে দিৰসে সেট্ঠিট্ঠানং অলত্থাতি.

ন কেৰলঞ্চ থোকস্স বহুকরণং, মধুরং অমধুরং, অমধুরং মধুরন্তিআদীসুপি যং যং ইচ্ছতি, সব্বং ইদ্ধিমতো ইজ্ঝতি. তথা হি মহাঅনুল়ত্থেরো নাম সম্বহুলে ভিক্খূ পিণ্ডায চরিত্ৰা সুক্খভত্তমেৰ লভিত্ৰা গঙ্গাতীরে নিসীদিত্ৰা পরিভুঞ্জমানে দিস্ৰা গঙ্গায উদকং সপ্পিমণ্ডন্তি অধিট্ঠহিত্ৰা সামণেরানং সঞ্ঞং অদাসি. তে থালকেহি আহরিত্ৰা ভিক্খুসঙ্ঘস্স অদংসু. সব্বে মধুরেন সপ্পিমণ্ডেন ভুঞ্জিংসূতি.

দিব্বেন ¶ চক্খুনাতি ইধেৰ ঠিতো আলোকং ৰড্ঢেত্ৰা তস্স ব্রহ্মুনো রূপং পস্সতি. ইধেৰ চ ঠিতো সব্বং তস্স ভাসতো সদ্দং সুণাতি. চিত্তং পজানাতি. কাযৰসেন চিত্তং পরিণামেতীতি করজকাযস্স ৰসেন চিত্তং পরিণামেতি. পাদকজ্ঝানচিত্তং গহেত্ৰা কাযে আরোপেতি. কাযানুগতিকং করোতি দন্ধগমনং. কাযগমনং হি দন্ধং হোতি. সুখসঞ্ঞঞ্চ লহুসঞ্ঞঞ্চ ওক্কমতীতি পাদকজ্ঝানারম্মণেন ইদ্ধিচিত্তেন সহজাতং সুখসঞ্ঞঞ্চ লহুসঞ্ঞঞ্চ ওক্কমতি পৰিসতি ফস্সেতি সম্পাপুণাতি. সুখসঞ্ঞা নাম উপেক্খাসম্পযুত্তসঞ্ঞা. উপেক্খা হি সন্তং সুখন্তি ৰুত্তা. সাযেৰ চ সঞ্ঞা নীৰরণেহি চেৰ ৰিতক্কাদীহি পচ্চনীকেহি চ ৰিমুত্তত্তা লহুসঞ্ঞাতিপি ৰেদিতব্বা. তং ওক্কন্তস্স পনস্স করজকাযোপি তূলপিচু ৰিয সল্লহুকো হোতি. সো এৰং ৰাযুক্খিত্ততূলপিচুনা ¶ ৰিয সল্লহুকেন দিস্সমানেন কাযেন ব্রহ্মলোকং গচ্ছতি. এৰং গচ্ছন্তো চ সচে ইচ্ছতি পথৰীকসিণৰসেন আকাসে মগ্গং নিম্মিনিত্ৰা পদসা গচ্ছতি. সচে ইচ্ছতি ৰাযোকসিণৰসেন ৰাযুং অধিট্ঠহিত্ৰা তূলপিচু ৰিয ৰাযুনা গচ্ছতি. অপিচ গন্তুকামতা এৰ এত্থ পমাণং. ‘‘সতি হি গন্তুকামতায’’ এৰং কতচিত্তাধিট্ঠানো অধিট্ঠানৰেগুক্খিত্তোৰ সো ইস্সাসখিত্তসরো ৰিয দিস্সমানো গচ্ছতি.

চিত্তৰসেন কাযং পরিণামেতীতি কাযং গহেত্ৰা চিত্তে আরোপেতি. চিত্তানুগতিকং করোতি সীঘগমনং. চিত্তগমনং হি সীঘং হোতি. সুখসঞ্ঞঞ্চ লহুসঞ্ঞঞ্চ ওক্কমতীতি রূপকাযারম্মণেন ইদ্ধিচিত্তেন সহজাতং সুখসঞ্ঞঞ্চ লহুসঞ্ঞঞ্চ ওক্কমতীতি. সেসং ৰুত্তনযেনেৰ ৰেদিতব্বং. ইদং পন চিত্তগমনমেৰ হোতি. এৰং অদিস্সমানেন কাযেন গচ্ছন্তো পনাযং কিং তস্স অধিট্ঠানচিত্তস্স উপ্পাদক্খণে গচ্ছতি, উদাহু ঠিতিক্খণে ভঙ্গক্খণে ৰাতি ৰুত্তে তীসুপি খণেসু গচ্ছতীতি থেরো আহ. কিং পন সো সযং গচ্ছতি নিম্মিতং পেসেতীতি. যথারুচি করোতি. ইধ পনস্স সযং গমনমেৰ আগতং.

মনোমযন্তি অধিট্ঠানমনেন নিম্মিতত্তা মনোমযং. অহীনিন্দ্রিযন্তি ইদং চক্খুসোতাদীনং সণ্ঠানৰসেন ৰুত্তং. নিম্মিতরূপে পন পসাদো নাম নত্থি. সচে ইদ্ধিমা চঙ্কমতি নিম্মিতোপি তত্থ চঙ্কমতীতিআদি সব্বং সাৰকনিম্মিতং সন্ধায ৰুত্তং. বুদ্ধনিম্মিতো পন যং যং ভগৰা করোতি, তং তম্পি করোতি. ভগৰতো রুচিৰসেন অঞ্ঞম্পি করোতীতি. এত্থ চ যং সো ইদ্ধিমা ইধেৰ ঠিতো দিব্বেন চক্খুনা রূপং পস্সতি, দিব্বায সোতধাতুযা সদ্দং সুণাতি, চেতোপরিযঞাণেন ¶ চিত্তং পজানাতি, ন এত্তাৰতা কাযেন ৰসং ৰত্তেতি. যম্পি সো ইধেৰ ঠিতো তেন ব্রহ্মুনা সদ্ধিং সন্তিট্ঠতি সল্লপতি সাকচ্ছং সমাপজ্জতি, এত্তাৰতাপি ন কাযেন ৰসং ৰত্তেতি. যম্পিস্স দূরেপি সন্তিকে অধিট্ঠাতীতিআদিকং অধিট্ঠানং, এত্তাৰতাপি ন কাযেন ৰসং ৰত্তেতি. যম্পি সো দিস্সমানেন ৰা অদিস্সমানেন ৰা কাযেন ব্রহ্মলোকং গচ্ছতি, এত্তাৰতাপি ন কাযেন ৰসং ৰত্তেতি. যঞ্চ খো সো তস্স ব্রহ্মুনো পুরতো রূপং অভিনিম্মিনাতীতিআদিনা নযেন ¶ ৰুত্তৰিধানং আপজ্জতি, এত্তাৰতা কাযেন ৰসং ৰত্তেতি নামং. সেসং পনেত্থ কাযেন ৰসং ৰত্তনায পুব্বভাগদস্সনত্থং ৰুত্তন্তি অযং তাৰ অধিট্ঠানা ইদ্ধি.

৩৯৮. ৰিকুব্বনায পন মনোমযায চ ইদং নানাকরণং. ৰিকুব্বনং তাৰ করোন্তেন ‘‘সো পকতিৰণ্ণং ৰিজহিত্ৰা কুমারকৰণ্ণং ৰা দস্সেতি, নাগৰণ্ণং ৰা দস্সেতি, সুপণ্ণৰণ্ণং ৰা দস্সেতি, অসুরৰণ্ণং ৰা দস্সেতি, ইন্দৰণ্ণং ৰা দস্সেতি, দেৰৰণ্ণং ৰা দস্সেতি, ব্রহ্মৰণ্ণং ৰা দস্সেতি, সমুদ্দৰণ্ণং ৰা দস্সেতি, পব্বতৰণ্ণং ৰা দস্সেতি, সীহৰণ্ণং ৰা দস্সেতি, ব্যগ্ঘৰণ্ণং ৰা দস্সেতি, দীপিৰণ্ণং ৰা দস্সেতি, হত্থিম্পি দস্সেতি, অস্সম্পি দস্সেতি, রথম্পি দস্সেতি, পত্তিম্পি দস্সেতি, ৰিৰিধম্পি সেনাব্যূহং দস্সেতী’’তি (পটি. ম. ৩.১৩) এৰং ৰুত্তেসু কুমারকৰণ্ণাদীসু যং যং আকঙ্খতি, তং তং অধিট্ঠাতব্বং. অধিট্ঠহন্তেন চ পথৰীকসিণাদীসু অঞ্ঞতরারম্মণতো অভিঞ্ঞাপাদকজ্ঝানতো ৰুট্ঠায অত্তনো কুমারকৰণ্ণো আৰজ্জিতব্বো. আৰজ্জিত্ৰা পরিকম্মাৰসানে পুন সমাপজ্জিত্ৰা ৰুট্ঠায এৰরূপো নাম কুমারকো হোমীতি অধিট্ঠাতব্বং. সহ অধিট্ঠানচিত্তেন কুমারকো হোতি দেৰদত্তো ৰিয (চূল়ৰ. ৩৩৩). এস নযো সব্বত্থ.

হত্থিম্পি দস্সেতীতিআদি পনেত্থ বহিদ্ধাপি হত্থিআদিদস্সনৰসেন ৰুত্তং. তত্থ হত্থী হোমীতি অনধিট্ঠহিত্ৰা হত্থী হোতূতি অধিট্ঠাতব্বং, অস্সাদীসুপি এসেৰ নযোতি. অযং ৰিকুব্বনা ইদ্ধি.

৩৯৯. মনোমযং কাতুকামো পন পাদকজ্ঝানতো ৰুট্ঠায কাযং তাৰ আৰজ্জিত্ৰা ৰুত্তনযেনেৰ সুসিরো হোতূতি অধিট্ঠাতি, সুসিরো হোতি. অথস্স অব্ভন্তরে অঞ্ঞং কাযং আৰজ্জিত্ৰা পরিকম্মং কত্ৰা ৰুত্তনযেনেৰ অধিট্ঠাতি, তস্স অব্ভন্তরে অঞ্ঞো কাযো হোতূতি. সো তং মুঞ্জম্হা ঈসিকং ৰিয কোসিযা অসিং ৰিয করণ্ডায অহিং ৰিয চ অব্বাহতি ¶ . তেন ৰুত্তং ‘‘ইধ ভিক্খু ইমম্হা কাযা অঞ্ঞং কাযং অভিনিম্মিনাতি রূপিং মনোমযং সব্বঙ্গপচ্চঙ্গিং অহীনিন্দ্রিযং. সেয্যথাপি পুরিসো মুঞ্জম্হা ঈসিকং পৰাহেয্য, তস্স এৰমস্স অযং মুঞ্জো অযং ঈসিকা ¶ , অঞ্ঞো মুঞ্জো অঞ্ঞা ঈসিকা, মুঞ্জম্হাত্ৰেৰ ঈসিকা পৰাল়্হা’’তিআদি (পটি. ম. ৩.১৪). এত্থ চ যথা ঈসিকাদযো মুঞ্জাদীহি সদিসা হোন্তি, এৰং মনোমযরূপং ইদ্ধিমতাসদিসমেৰ হোতীতি দস্সনত্থং এতা উপমা ৰুত্তাতি. অযং মনোমযা ইদ্ধি.

ইতি সাধুজনপামোজ্জত্থায কতে ৰিসুদ্ধিমগ্গে

ইদ্ধিৰিধনিদ্দেসো নাম

দ্ৰাদসমো পরিচ্ছেদো.

১৩. অভিঞ্ঞানিদ্দেসো

দিব্বসোতধাতুকথা

৪০০. ইদানি ¶ ¶ দিব্বসোতধাতুযা নিদ্দেসক্কমো অনুপ্পত্তো. তত্থ ততো পরাসু চ তীসু অভিঞ্ঞাসু সো এৰং সমাহিতে চিত্তেতিআদীনং (দী. নি. ১.২৪০ আদযো) অত্থো ৰুত্তনযেনেৰ ৰেদিতব্বো. সব্বত্থ পন ৰিসেসমত্তমেৰ ৰণ্ণযিস্সাম. তত্র দিব্বায সোতধাতুযাতি এত্থ দিব্বসদিসত্তা দিব্বা. দেৰানং হি সুচরিতকম্মনিব্বত্তা পিত্তসেম্হরুহিরাদীহি অপলিবুদ্ধা উপক্কিলেসৰিমুত্ততায দূরেপি আরম্মণং সম্পটিচ্ছনসমত্থা দিব্বপসাদসোতধাতু হোতি. অযঞ্চাপি ইমস্স ভিক্খুনো ৰীরিযভাৰনাবলনিব্বত্তা ঞাণসোতধাতু তাদিসাযেৰাতি দিব্বসদিসত্তা দিব্বা. অপিচ দিব্বৰিহারৰসেন পটিলদ্ধত্তা অত্তনা চ দিব্বৰিহারসন্নিস্সিতত্তাপি দিব্বা. সৰনট্ঠেন নিজ্জীৰট্ঠেন চ সোতধাতু. সোতধাতুকিচ্চকরণেন চ সোতধাতু ৰিযাতিপি সোতধাতু. তায দিব্বায সোতধাতুযা.

ৰিসুদ্ধাযাতি পরিসুদ্ধায নিরুপক্কিলেসায. অতিক্কন্তমানুসিকাযাতি মনুস্সূপচারং অতিক্কমিত্ৰা সদ্দসৰনেন মানুসিকং মংসসোতধাতুং অতিক্কন্তায ৰীতিৰত্তিত্ৰা ঠিতায. উভো সদ্দে সুণাতীতি দ্ৰে সদ্দে সুণাতি. কতমে দ্ৰে? দিব্বে চ মানুসে চ, দেৰানঞ্চ মনুস্সানঞ্চ সদ্দেতি ৰুত্তং হোতি. এতেন পদেসপরিযাদানং ৰেদিতব্বং. যে দূরে সন্তিকে চাতি যে সদ্দা দূরে পরচক্কৰাল়েপি যে চ সন্তিকে অন্তমসো সদেহসন্নিস্সিতপাণকসদ্দাপি, তে সুণাতীতি ৰুত্তং হোতি. এতেন নিপ্পদেসপরিযাদানং ৰেদিতব্বং.

কথং পনাযং উপ্পাদেতব্বাতি? তেন ভিক্খুনা অভিঞ্ঞাপাদকজ্ঝানং সমাপজ্জিত্ৰা ৰুট্ঠায পরিকম্মসমাধিচিত্তেন পঠমতরং পকতিসোতপথে দূরে ওল়ারিকো অরঞ্ঞে সীহাদীনং সদ্দো আৰজ্জিতব্বো. ৰিহারে ঘণ্ডিসদ্দো, ভেরিসদ্দো, সঙ্খসদ্দো, সামণেরদহরভিক্খূনং সব্বথামেন সজ্ঝাযন্তানং ¶ সজ্ঝাযনসদ্দো, পকতিকথং কথেন্তানং ‘‘কিং ভন্তে, কিমাৰুসো’’তিআদিসদ্দো, সকুণসদ্দো, ৰাতসদ্দো, পদসদ্দো, পক্কুথিতউদকস্স ¶ চিচ্চিটাযনসদ্দো, আতপে সুস্সমানতালপণ্ণসদ্দো, কুন্থকিপিল্লিকাদিসদ্দোতি এৰং সব্বোল়ারিকতো পভুতি যথাক্কমেন সুখুমসদ্দা আৰজ্জিতব্বা. তেন পুরত্থিমায দিসায সদ্দানং সদ্দনিমিত্তং মনসিকাতব্বং. পচ্ছিমায, উত্তরায, দক্খিণায, হেট্ঠিমায, উপরিমায দিসায, পুরত্থিমায অনুদিসায, পচ্ছিমায, উত্তরায, দক্খিণায অনুদিসায সদ্দানং সদ্দনিমিত্তং মনসিকাতব্বং. ওল়ারিকানম্পি সুখুমানম্পি সদ্দানং সদ্দনিমিত্তং মনসিকাতব্বং. তস্স তে সদ্দা পাকতিকচিত্তস্সাপি পাকটা হোন্তি. পরিকম্মসমাধিচিত্তস্স পন অতিৰিয পাকটা.

তস্সেৰং সদ্দনিমিত্তং মনসিকরোতো ইদানি দিব্বসোতধাতু উপ্পজ্জিস্সতীতি তেসু সদ্দেসু অঞ্ঞতরং আরম্মণং কত্ৰা মনোদ্ৰারাৰজ্জনং উপ্পজ্জতি. তস্মিং নিরুদ্ধে চত্তারি পঞ্চ ৰা জৰনানি জৰন্তি, যেসং পুরিমানি তীণি চত্তারি ৰা পরিকম্মউপচারানুলোমগোত্রভুনামকানি কামাৰচরানি, চতুত্থং পঞ্চমং ৰা অপ্পনাচিত্তং রূপাৰচরং চতুত্থজ্ঝানিকং. তত্থ যং তেন অপ্পনাচিত্তেন সদ্ধিং উপ্পন্নং ঞাণং, অযং দিব্বসোতধাতূতি ৰেদিতব্বা. ততো পরং তস্মিং সোতে পতিতো হোতি. তং থামজাতং করোন্তেন ‘‘এত্থন্তরে সদ্দং সুণামী’’তি একঙ্গুলমত্তং পরিচ্ছিন্দিত্ৰা ৰড্ঢেতব্বং. ততো দ্ৰঙ্গুলচতুরঙ্গুলঅট্ঠঙ্গুলৰিদত্থিরতনঅন্তোগব্ভপমুখপাসাদপরিৰেণসঙ্ঘারামগোচরগামজনপদাদিৰসেন যাৰ চক্কৰাল়ং ততো ৰা ভিয্যোপি পরিচ্ছিন্দিত্ৰা পরিচ্ছিন্দিত্ৰা ৰড্ঢেতব্বং.

এৰং অধিগতাভিঞ্ঞো এস পাদকজ্ঝানারম্মণেন ফুট্ঠোকাসব্ভন্তরগতেপি সদ্দে পুন পাদকজ্ঝানং অসমাপজ্জিত্ৰাপি অভিঞ্ঞাঞাণেন সুণাতিযেৰ. এৰং সুণন্তো চ সচেপি যাৰ ব্রহ্মলোকা সঙ্খভেরিপণৰাদিসদ্দেহি এককোলাহলং হোতি, পাটিযেক্কং ৰৰত্থপেতুকামতায সতি অযং সঙ্খসদ্দো অযং ভেরিসদ্দোতি ৰৰত্থপেতুং সক্কোতিযেৰাতি.

দিব্বসোতধাতুকথা নিট্ঠিতা.

চেতোপরিযঞাণকথা

৪০১. চেতোপরিযঞাণকথায ¶ ¶ চেতোপরিযঞাণাযাতি এত্থ পরিযাতীতি পরিযং, পরিচ্ছিন্দতীতি অত্থো. চেতসো পরিযং চেতোপরিযং. চেতোপরিযঞ্চ তং ঞাণঞ্চাতি চেতোপরিযঞাণং. তদত্থাযাতি ৰুত্তং হোতি. পরসত্তানন্তি অত্তানং ঠপেত্ৰা সেসসত্তানং. পরপুগ্গলানন্তি ইদম্পি ইমিনা একত্থমেৰ. ৰেনেয্যৰসেন পন দেসনাৰিলাসেন চ ব্যঞ্জননানত্তং কতং. চেতসা চেতোতি অত্তনো চিত্তেন তেসং চিত্তং. পরিচ্চ পজানাতীতি পরিচ্ছিন্দিত্ৰা সরাগাদিৰসেন নানপ্পকারতো জানাতি.

কথং পনেতং ঞাণং উপ্পাদেতব্বন্তি? এতঞ্হি দিব্বচক্খুৰসেন ইজ্ঝতি, তং এতস্স পরিকম্মং. তস্মা তেন ভিক্খুনা আলোকং ৰড্ঢেত্ৰা দিব্বেন চক্খুনা পরস্স হদযরূপং নিস্সায ৰত্তমানস্স লোহিতস্স ৰণ্ণং পস্সিত্ৰা চিত্তং পরিযেসিতব্বং. যদা হি সোমনস্সচিত্তং ৰত্ততি, তদা রত্তং নিগ্রোধপক্কসদিসং হোতি. যদা দোমনস্সচিত্তং ৰত্ততি, তদা কাল়কং জম্বুপক্কসদিসং. যদা উপেক্খাচিত্তং ৰত্ততি, তদা পসন্নতিলতেলসদিসং. তস্মা তেন ‘‘ইদং রূপং সোমনস্সিন্দ্রিযসমুট্ঠানং, ইদং দোমনস্সিন্দ্রিযসমুট্ঠানং, ইদং উপেক্খিন্দ্রিযসমুট্ঠান’’ন্তি পরস্স হদযলোহিতৰণ্ণং পস্সিত্ৰা চিত্তং পরিযেসন্তেন চেতোপরিযঞাণং থামগতং কাতব্বং. এৰং থামগতে হি তস্মিং অনুক্কমেন সব্বম্পি কামাৰচরচিত্তং রূপাৰচরারূপাৰচরচিত্তঞ্চ পজানাতি চিত্তা চিত্তমেৰ সঙ্কমন্তো ৰিনাপি হদযরূপদস্সনেন. ৰুত্তম্পি চেতং অট্ঠকথাযং ‘‘আরুপ্পে পরস্স চিত্তং জানিতুকামো কস্স হদযরূপং পস্সতি, কস্সিন্দ্রিযৰিকারং ওলোকেতীতি? ন কস্সচি. ইদ্ধিমতো ৰিসযো এস যদিদং যত্থ কত্থচি চিত্তং আৰজ্জন্তো সোল়সপ্পভেদং চিত্তং জানাতি. অকতাভিনিৰেসস্স পন ৰসেন অযং কথা’’তি.

সরাগং ৰা চিত্তন্তিআদীসু পন অট্ঠৰিধং লোভসহগতং চিত্তং সরাগং চিত্তন্তি ৰেদিতব্বং. অৰসেসং চতুভূমকং কুসলাব্যাকতং চিত্তং ৰীতরাগং. দ্ৰে দোমনস্সচিত্তানি দ্ৰে ৰিচিকিচ্ছুদ্ধচ্চচিত্তানীতি ইমানি পন চত্তারি চিত্তানি ইমস্মিং দুকে সঙ্গহং ন গচ্ছন্তি. কেচি পন থেরা তানিপি সঙ্গণ্হন্তি. দুৰিধং পন দোমনস্সচিত্তং সদোসং চিত্তং নাম. সব্বম্পি চতুভূমকং ¶ কুসলাব্যাকতং ৰীতদোসং. সেসানি দসাকুসলচিত্তানি ইমস্মিং দুকে সঙ্গহং ন গচ্ছন্তি. কেচি পন থেরা তানিপি সঙ্গণ্হন্তি.

সমোহং ¶ ৰীতমোহন্তি এত্থ পন পাটিপুগ্গলিকনযেন ৰিচিকিচ্ছুদ্ধচ্চসহগতদ্ৰযমেৰ সমোহং, মোহস্স পন সব্বাকুসলেসু সম্ভৰতো দ্ৰাদসৰিধম্পি অকুসলচিত্তং সমোহং চিত্তন্তি ৰেদিতব্বং. অৰসেসং ৰীতমোহং. থিনমিদ্ধানুগতং পন সংখিত্তং. উদ্ধচ্চানুগতং ৰিক্খিত্তং. রূপাৰচরারূপাৰচরং মহগ্গতং. অৰসেসং অমহগ্গতং. সব্বম্পি তেভূমকং সউত্তরং. লোকুত্তরং অনুত্তরং. উপচারপ্পত্তং অপ্পনাপ্পত্তঞ্চ সমাহিতং. উভযমপ্পত্তং অসমাহিতং. তদঙ্গৰিক্খম্ভনসমুচ্ছেদপটিপস্সদ্ধিনিস্সরণৰিমুত্তিপ্পত্তং ৰিমুত্তং. পঞ্চৰিধম্পি এতং ৰিমুত্তিমপ্পত্তং অৰিমুত্তন্তি ৰেদিতব্বং. ইতি চেতোপরিযঞাণলাভী ভিক্খু সব্বপ্পকারম্পি ইদং সরাগং ৰা চিত্তং…পে… অৰিমুত্তং ৰা চিত্তং অৰিমুত্তং চিত্তন্তি পজানাতীতি.

চেতোপরিযঞাণকথা নিট্ঠিতা.

পুব্বেনিৰাসানুস্সতিঞাণকথা

৪০২. পুব্বেনিৰাসানুস্সতিঞাণকথাযং পুব্বেনিৰাসানুস্সতিঞাণাযাতি (দী. নি. ১.২৪৪) পুব্বেনিৰাসানুস্সতিম্হি যং ঞাণং, তদত্থায. পুব্বেনিৰাসোতি পুব্বে অতীতজাতীসু নিৰুত্থক্খন্ধা. নিৰুত্থাতি অজ্ঝাৰুত্থা অনুভূতা অত্তনো সন্তানে উপ্পজ্জিত্ৰা নিরুদ্ধা. নিৰুত্থধম্মা ৰা. নিৰুত্থাতি গোচরনিৰাসেন নিৰুত্থা অত্তনো ৰিঞ্ঞাণেন ৰিঞ্ঞাতা পরিচ্ছিন্না, পরৰিঞ্ঞাণৰিঞ্ঞাতাপি ৰা ছিন্নৰটুমকানুস্সরণাদীসু, তে বুদ্ধানংযেৰ লব্ভন্তি. পুব্বেনিৰাসানুস্সতীতি যায সতিযা পুব্বেনিৰাসং অনুস্সরতি, সা পুব্বেনিৰাসানুস্সতি. ঞাণন্তি তায সতিযা সম্পযুত্তঞাণং. এৰমিমস্স পুব্বেনিৰাসানুস্সতিঞাণস্স অত্থায পুব্বেনিৰাসানুস্সতিঞাণায এতস্স ঞাণস্স অধিগমায পত্তিযাতি ৰুত্তং হোতি.

অনেকৰিহিতন্তি অনেকৰিধং, অনেকেহি ৰা পকারেহি পৰত্তিতং, সংৰণ্ণিতন্তি অত্থো. পুব্বেনিৰাসন্তি সমনন্তরাতীতভৰং আদিং কত্ৰা তত্থ তত্থ নিৰুত্থসন্তানং. অনুস্সরতীতি খন্ধপটিপাটিৰসেন ¶ চুতিপটিসন্ধিৰসেন ৰা অনুগন্ত্ৰা অনুগন্ত্ৰা সরতি. ইমঞ্হি পুব্বেনিৰাসং ছ জনা অনুস্সরন্তি – তিত্থিযা, পকতিসাৰকা, মহাসাৰকা, অগ্গসাৰকা, পচ্চেকবুদ্ধা, বুদ্ধাতি.

তত্থ ¶ তিত্থিযা চত্তালীসংযেৰ কপ্পে অনুস্সরন্তি, ন ততো পরং. কস্মা, দুব্বলপঞ্ঞত্তা. তেসঞ্হি নামরূপপরিচ্ছেদৰিরহিতত্তা দুব্বলা পঞ্ঞা হোতি. পকতিসাৰকা কপ্পসতম্পি কপ্পসহস্সম্পি অনুস্সরন্তিযেৰ, বলৰপঞ্ঞত্তা. অসীতিমহাসাৰকা সতসহস্সকপ্পে অনুস্সরন্তি. দ্ৰে অগ্গসাৰকা একং অসঙ্খ্যেয্যং সতসহস্সঞ্চ. পচ্চেকবুদ্ধা দ্ৰে অসঙ্খ্যেয্যানি সতসহস্সঞ্চ. এত্তকো হি এতেসং অভিনীহারো. বুদ্ধানং পন পরিচ্ছেদো নাম নত্থি.

তিত্থিযা চ খন্ধপটিপাটিমেৰ সরন্তি, পটিপাটিং মুঞ্চিত্ৰা চুতিপটিসন্ধিৰসেন সরিতুং ন সক্কোন্তি. তেসঞ্হি অন্ধানং ৰিয ইচ্ছিতপদেসোক্কমনং নত্থি. যথা পন অন্ধা যট্ঠিং অমুঞ্চিত্ৰাৰ গচ্ছন্তি, এৰং তে খন্ধানং পটিপাটিং অমুঞ্চিত্ৰাৰ সরন্তি. পকতিসাৰকা খন্ধপটিপাটিযাপি অনুস্সরন্তি চুতিপটিসন্ধিৰসেনপি সঙ্কমন্তি. তথা অসীতিমহাসাৰকা. দ্ৰিন্নং পন অগ্গসাৰকানং খন্ধপটিপাটিকিচ্চং নত্থি. একস্স অত্তভাৰস্স চুতিং দিস্ৰা পটিসন্ধিং পস্সন্তি, পুন অপরস্স চুতিং দিস্ৰা পটিসন্ধিন্তি এৰং চুতিপটিসন্ধিৰসেনেৰ সঙ্কমন্তা গচ্ছন্তি. তথা পচ্চেকবুদ্ধা.

বুদ্ধানং পন নেৰ খন্ধপটিপাটিকিচ্চং, ন চুতিপটিসন্ধিৰসেন সঙ্কমনকিচ্চং অত্থি. তেসঞ্হি অনেকাসু কপ্পকোটীসু হেট্ঠা ৰা উপরি ৰা যং যং ঠানং ইচ্ছন্তি, তং তং পাকটমেৰ হোতি. তস্মা অনেকাপি কপ্পকোটিযো পেয্যালপাল়িং ৰিয সংখিপিত্ৰা যং যং ইচ্ছন্তি, তত্র তত্রেৰ ওক্কমন্তা সীহোক্কন্তৰসেন গচ্ছন্তি. এৰং গচ্ছন্তানঞ্চ নেসং ঞাণং যথা নাম কতৰালৰেধপরিচযস্স সরভঙ্গসদিসস্স ধনুগ্গহস্স খিত্তো সরো অন্তরা রুক্খলতাদীসু অসজ্জমানো লক্খেযেৰ পততি, ন সজ্জতি, ন ৰিরজ্ঝতি, এৰং অন্তরন্তরাসু জাতীসু ন সজ্জতি, ন ৰিরজ্ঝতি, অসজ্জমানং অৰিরজ্ঝমানং ইচ্ছিতিচ্ছিতট্ঠানংযেৰ গণ্হাতি.

ইমেসু চ পন পুব্বেনিৰাসং অনুস্সরণসত্তেসু তিত্থিযানং পুব্বেনিৰাসদস্সনং খজ্জুপনকপভাসদিসং হুত্ৰা উপট্ঠাতি. পকতিসাৰকানং দীপপ্পভাসদিসং. মহাসাৰকানং উক্কাপভাসদিসং ¶ . অগ্গসাৰকানং ওসধিতারকপ্পভাসদিসং. পচ্চেকবুদ্ধানং চন্দপ্পভাসদিসং. বুদ্ধানং রস্মিসহস্সপটিমণ্ডিতসরদসূরিযমণ্ডলসদিসং হুত্ৰা উপট্ঠাতি.

তিত্থিযানঞ্চ ¶ পুব্বেনিৰাসানুস্সরণং অন্ধানং যট্ঠিকোটিগমনং ৰিয হোতি. পকতিসাৰকানং দণ্ডকসেতুগমনং ৰিয. মহাসাৰকানং জঙ্ঘসেতুগমনং ৰিয. অগ্গসাৰকানং সকটসেতুগমনং ৰিয. পচ্চেকবুদ্ধানং মহাজঙ্ঘমগ্গগমনং ৰিয. বুদ্ধানং মহাসকটমগ্গগমনং ৰিয.

ইমস্মিং পন অধিকারে সাৰকানং পুব্বেনিৰাসানুস্সরণং অধিপ্পেতং. তেন ৰুত্তং ‘‘অনুস্সরতীতি খন্ধপটিপাটিৰসেন চুতিপটিসন্ধিৰসেন ৰা অনুগন্ত্ৰা অনুগন্ত্ৰা সরতী’’তি.

৪০৩. তস্মা এৰমনুস্সরিতুকামেন আদিকম্মিকেন ভিক্খুনা পচ্ছাভত্তং পিণ্ডপাতপটিক্কন্তেন রহোগতেন পটিসল্লিনেন পটিপাটিযা চত্তারি ঝানানি সমাপজ্জিত্ৰা অভিঞ্ঞাপাদকচতুত্থজ্ঝানতো ৰুট্ঠায সব্বপচ্ছিমা নিসজ্জা আৰজ্জিতব্বা. ততো আসনপঞ্ঞাপনং, সেনাসনপ্পৰেসনং, পত্তচীৰরপটিসামনং, ভোজনকালো, গামতো আগমনকালো, গামে পিণ্ডায চরিতকালো, গামং পিণ্ডায পৰিট্ঠকালো, ৰিহারতো নিক্খমনকালো, চেতিযঙ্গণবোধিযঙ্গণৰন্দনকালো, পত্তধোৰনকালো, পত্তপটিগ্গহণকালো, পত্তপটিগ্গহণতো যাৰ মুখধোৰনা কতকিচ্চং, পচ্চূসকালে কতকিচ্চং, মজ্ঝিমযামে কতকিচ্চং, পঠমযামে কতকিচ্চন্তি এৰং পটিলোমক্কমেন সকলং রত্তিন্দিৰং কতকিচ্চং আৰজ্জিতব্বং. এত্তকং পন পকতিচিত্তস্সপি পাকটং হোতি. পরিকম্মসমাধিচিত্তস্স পন অতিপাকটমেৰ.

সচে পনেত্থ কিঞ্চি ন পাকটং হোতি, পুন পাদকজ্ঝানং সমাপজ্জিত্ৰা ৰুট্ঠায আৰজ্জিতব্বং. এত্তকেন দীপে জলিতে ৰিয পাকটং হোতি. এৰং পটিলোমক্কমেনেৰ দুতিযদিৰসেপি ততিযচতুত্থপঞ্চমদিৰসেপি দসাহেপি অড্ঢমাসেপি মাসেপি যাৰ সংৰচ্ছরাপি কতকিচ্চং আৰজ্জিতব্বং. এতেনেৰ উপাযেন দসৰস্সানি ৰীসতিৰস্সানীতি যাৰ ইমস্মিং ভৰে অত্তনো পটিসন্ধি, তাৰ আৰজ্জন্তেন পুরিমভৰে চুতিক্খণে পৰত্তিতনামরূপং আৰজ্জিতব্বং. পহোতি হি পণ্ডিতো ভিক্খু পঠমৰারেনেৰ পটিসন্ধিং উগ্ঘাটেত্ৰা চুতিক্খণে নামরূপমারম্মণং কাতুং.

যস্মা ¶ পন পুরিমভৰে নামরূপং অসেসং নিরুদ্ধং অঞ্ঞং উপ্পন্নং, তস্মা তং ঠানং আহুন্দরিকং অন্ধতমমিৰ হোতি দুদ্দসং দুপ্পঞ্ঞেন. তেনাপি ‘‘ন সক্কোমহং ¶ পটিসন্ধিং উগ্ঘাটেত্ৰা চুতিক্খণে পৰত্তিতনামরূপমারম্মণং কাতু’’ন্তি ধুরনিক্খেপো ন কাতব্বো. তদেৰ পন পাদকজ্ঝানং পুনপ্পুনং সমাপজ্জিতব্বং. ততো চ ৰুট্ঠায ৰুট্ঠায তং ঠানং আৰজ্জিতব্বং.

এৰং করোন্তো হি সেয্যথাপি নাম বলৰা পুরিসো কূটাগারকণ্ণিকত্থায মহারুক্খং ছিন্দন্তো সাখাপলাসচ্ছেদনমত্তেনেৰ ফরসুধারায ৰিপন্নায মহারুক্খং ছিন্দিতুং অসক্কোন্তোপি ধুরনিক্খেপং অকত্ৰাৰ কম্মারসালং গন্ত্ৰা তিখিণং ফরসুং কারাপেত্ৰা পুন আগন্ত্ৰা ছিন্দেয্য, পুন ৰিপন্নায চ পুনপি তথেৰ কারেত্ৰা ছিন্দেয্য. সো এৰং ছিন্দন্তো ছিন্নস্স ছিন্নস্স পুন ছেতব্বাভাৰতো অচ্ছিন্নস্স চ ছেদনতো নচিরস্সেৰ মহারুক্খং পাতেয্য, এৰমেৰং পাদকজ্ঝানা ৰুট্ঠায পুব্বে আৰজ্জিতং অনাৰজ্জিত্ৰা পটিসন্ধিমেৰ আৰজ্জন্তো নচিরস্সেৰ পটিসন্ধিং উগ্ঘাটেত্ৰা চুতিক্খণে পৰত্তিতনামরূপং আরম্মণং করেয্যাতি. কট্ঠফালককেসোহারকাদীহিপি অযমত্থো দীপেতব্বো.

তত্থ পচ্ছিমনিসজ্জতো পভুতি যাৰ পটিসন্ধিতো আরম্মণং কত্ৰা পৰত্তং ঞাণং পুব্বেনিৰাসঞাণং নাম ন হোতি. তং পন পরিকম্মসমাধিঞাণং নাম হোতি. অতীতংসঞাণন্তিপি একে ৰদন্তি. তং রূপাৰচরং সন্ধায ন যুজ্জতি. যদা পনস্স ভিক্খুনো পটিসন্ধিং অতিক্কম্ম চুতিক্খণে পৰত্তিতনামরূপং আরম্মণং কত্ৰা মনোদ্ৰারাৰজ্জনং উপ্পজ্জতি, তস্মিঞ্চ নিরুদ্ধে তদেৰারম্মণং কত্ৰা চত্তারি পঞ্চ ৰা জৰনানি জৰন্তি. সেসং পুব্বে ৰুত্তনযেনেৰ পুরিমানি পরিকম্মাদিনামকানি কামাৰচরানি হোন্তি. পচ্ছিমং রূপাৰচরং চতুত্থজ্ঝানিকং অপ্পনাচিত্তং. তদাস্স যং তেন চিত্তেন সহ ঞাণং উপ্পজ্জতি, ইদং পুব্বেনিৰাসানুস্সতিঞাণং নাম. তেন ঞাণেন সম্পযুত্তায সতিযা অনেকৰিহিতং পুব্বেনিৰাসং অনুস্সরতি. সেয্যথিদং, একম্পি জাতিং দ্ৰেপি জাতিযো…পে… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতীতি (দী. নি. ১.২৪৪).

৪০৪. তত্থ একম্পি জাতিন্তি একম্পি পটিসন্ধিমূলং চুতিপরিযোসানং একভৰপরিযাপন্নং খন্ধসন্তানং. এস নযো দ্ৰেপি জাতিযোতিআদীসুপি. অনেকেপি সংৰট্টকপ্পেতিআদীসু পন পরিহাযমানো কপ্পো সংৰট্টকপ্পো, ৰড্ঢমানো ৰিৰট্টকপ্পোতি ৰেদিতব্বো. তত্থ সংৰট্টেন সংৰট্টট্ঠাযী ¶ গহিতো ¶ হোতি, তংমূলকত্তা. ৰিৰট্টেন চ ৰিৰট্টট্ঠাযী, এৰঞ্হি সতি যানি তানি ‘‘চত্তারিমানি, ভিক্খৰে, কপ্পস্স অসঙ্খ্যেয্যানি. কতমানি চত্তারি? সংৰট্টো, সংৰট্টট্ঠাযী, ৰিৰট্টো, ৰিৰট্টট্ঠাযীতি (অ. নি. ৪.১৫৬ থোকং ৰিসদিসং) ৰুত্তানি, তানি পরিগ্গহিতানি হোন্তি.

তত্থ তযো সংৰট্টা – আপোসংৰট্টো, তেজোসংৰট্টো, ৰাযোসংৰট্টোতি. তিস্সো সংৰট্টসীমা – আভস্সরা, সুভকিণ্হা, ৰেহপ্ফলাতি.

যদা কপ্পো তেজেন সংৰট্টতি, আভস্সরতো হেট্ঠা অগ্গিনা ডয্হতি. যদা আপেন সংৰট্টতি, সুভকিণ্হতো হেট্ঠা উদকেন ৰিলীযতি. যদা ৰাযুনা সংৰট্টতি, ৰেহপ্ফলতো হেট্ঠা ৰাতেন ৰিদ্ধংসতি. ৰিত্থারতো পন সদাপি একং বুদ্ধখেত্তং ৰিনস্সতি.

বুদ্ধখেত্তং নাম তিৰিধং হোতি – জাতিখেত্তং, আণাখেত্তং, ৰিসযখেত্তঞ্চ. তত্থ জাতিখেত্তং দসসহস্সচক্কৰাল়পরিযন্তং হোতি. যং তথাগতস্স পটিসন্ধিগহণাদীসু কম্পতি. আণাখেত্তং কোটিসতসহস্সচক্কৰাল়পরিযন্তং, যত্থ রতনসুত্তং (খু. পা. ৬.১ আদযো) খন্ধপরিত্তং (চূল়ৰ. ২৫১; অ. নি. ৪.৬৭) ধজগ্গপরিত্তং (সং. নি. ১.২৪৯) আটানাটিযপরিত্তং (দী. নি. ৩.২৭৫ আদযো) মোরপরিত্তন্তি (জা. ১.২.১৭-১৮) ইমেসং পরিত্তানং আনুভাৰো ৰত্ততি. ৰিসযখেত্তং অনন্তমপরিমাণং. যং ‘‘যাৰতা ৰা পন আকঙ্খেয্যা’’তি (অ. নি. ৩.৮১) ৰুত্তং, যত্থ যং যং তথাগতো আকঙ্খতি, তং তং জানাতি. এৰমেতেসু তীসু বুদ্ধখেত্তেসু একং আণাখেত্তং ৰিনস্সতি. তস্মিং পন ৰিনস্সন্তে জাতিখেত্তম্পি ৰিনট্ঠমেৰ হোতি. ৰিনস্সন্তঞ্চ একতোৰ ৰিনস্সতি, সণ্ঠহন্তম্পি একতো সণ্ঠহতি. তস্সেৰং ৰিনাসো চ সণ্ঠহনঞ্চ ৰেদিতব্বং.

৪০৫. যস্মিং হি সমযে কপ্পো অগ্গিনা নস্সতি, আদিতোৰ কপ্পৰিনাসকমহামেঘো ৰুট্ঠহিত্ৰা কোটিসতসহস্সচক্কৰাল়ে একং মহাৰস্সং ৰস্সতি. মনুস্সা তুট্ঠহট্ঠা সব্ববীজানি নীহরিত্ৰা ৰপন্তি. সস্সেসু পন গোখাযিতকমত্তেসু জাতেসু গদ্রভরৰং রৰন্তো একবিন্দুম্পি ন ৰস্সতি, তদা পচ্ছিন্নং পচ্ছিন্নমেৰ ৰস্সং হোতি. ইদং সন্ধায হি ভগৰতা ‘‘হোতি খো সো, ভিক্খৰে, সমযো যং বহূনি ৰস্সানি বহূনি ৰস্সসতানি ¶ বহূনি ৰস্সসহস্সানি বহূনি ¶ ৰস্সসতসহস্সানি দেৰো ন ৰস্সতী’’তি (অ. নি. ৭.৬৬) ৰুত্তং. ৰস্সূপজীৰিনো সত্তা কালঙ্কত্ৰা ব্রহ্মলোকে নিব্বত্তন্তি, পুপ্ফফলূপজীৰিনিযো চ দেৰতা. এৰং দীঘে অদ্ধানে ৰীতিৰত্তে তত্থ তত্থ উদকং পরিক্খযং গচ্ছতি, অথানুপুব্বেন মচ্ছকচ্ছপাপি কালঙ্কত্ৰা ব্রহ্মলোকে নিব্বত্তন্তি, নেরযিকসত্তাপি. তত্থ নেরযিকা সত্তমসূরিযপাতুভাৰে ৰিনস্সন্তীতি একে.

ঝানং ৰিনা নত্থি ব্রহ্মলোকে নিব্বত্তি, এতেসঞ্চ কেচি দুব্ভিক্খপীল়িতা কেচি অভব্বা ঝানাধিগমায, তে কথং তত্থ নিব্বত্তন্তীতি. দেৰলোকে পটিলদ্ধজ্ঝানৰসেন. তদা হি ‘‘ৰস্সসতসহস্সস্সচ্চযেন কপ্পুট্ঠানং ভৰিস্সতী’’তি লোকব্যূহা নাম কামাৰচরদেৰা মুত্তসিরা ৰিকিণ্ণকেসা রুদমুখা অস্সূনি হত্থেহি পুঞ্ছমানা রত্তৰত্থনিৰত্থা অতিৰিয ৰিরূপৰেসধারিনো হুত্ৰা মনুস্সপথে ৰিচরন্তা এৰং আরোচেন্তি ‘‘মারিসা ইতো ৰস্সসতসহস্সস্সচ্চযেন কপ্পৰুট্ঠানং ভৰিস্সতি, অযং লোকো ৰিনস্সিস্সতি, মহাসমুদ্দোপি উস্সুস্সিস্সতি, অযঞ্চ মহাপথৰী সিনেরু চ পব্বতরাজা উদ্দয্হিস্সন্তি ৰিনস্সিস্সন্তি. যাৰ ব্রহ্মলোকা লোকৰিনাসো ভৰিস্সতি. মেত্তং মারিসা ভাৰেথ, করুণং, মুদিতং, উপেক্খং মারিসা ভাৰেথ, মাতরং উপট্ঠহথ, পিতরং উপট্ঠহথ, কুলে জেট্ঠাপচাযিনো হোথা’’তি.

তেসং ৰচনং সুত্ৰা যেভুয্যেন মনুস্সা চ ভুম্মদেৰতা চ সংৰেগজাতা অঞ্ঞমঞ্ঞং মুদুচিত্তা হুত্ৰা মেত্তাদীনি পুঞ্ঞানি করিত্ৰা দেৰলোকে নিব্বত্তন্তি. তত্থ দিব্বসুধাভোজনং ভুঞ্জিত্ৰা ৰাযোকসিণে পরিকম্মং কত্ৰা ঝানং পটিলভন্তি. তদঞ্ঞে পন অপরাপরিযৰেদনীযেন কম্মেন দেৰলোকে নিব্বত্তন্তি. অপরাপরিযৰেদনীযকম্মরহিতো হি সংসারে সংসরমানো সত্তো নাম নত্থি. তেপি তত্থ তথেৰ ঝানং পটিলভন্তি. এৰং দেৰলোকে পটিলদ্ধজ্ঝানৰসেন সব্বেপি ব্রহ্মলোকে নিব্বত্তন্তীতি.

ৰস্সূপচ্ছেদতো পন উদ্ধং দীঘস্স অদ্ধুনো অচ্চযেন দুতিযো সূরিযো পাতুভৰতি. ৰুত্তম্পি চেতং ভগৰতা ‘‘হোতি খো সো, ভিক্খৰে, সমযো’’তি সত্তসূরিযং (অ. নি. ৭.৬৬) ৰিত্থারেতব্বং. পাতুভূতে চ পন তস্মিং নেৰ ¶ রত্তিপরিচ্ছেদো, ন দিৰাপরিচ্ছেদো পঞ্ঞাযতি. একো সূরিযো উট্ঠেতি, একো অত্থং গচ্ছতি. অৰিচ্ছিন্নসূরিযসন্তাপোৰ লোকো হোতি. যথা চ পকতিসূরিযে সূরিযদেৰপুত্তো হোতি, এৰং কপ্পৰিনাসকসূরিযে নত্থি. তত্থ পকতিসূরিযে ¶ ৰত্তমানে আকাসে ৰলাহকাপি ধূমসিখাপি চরন্তি. কপ্পৰিনাসকসূরিযে ৰত্তমানে ৰিগতধূমৰলাহকং আদাসমণ্ডলং ৰিয নিম্মলং নভং হোতি. ঠপেত্ৰা পঞ্চ মহানদিযো সেসকুন্নদীআদীসু উদকং সুস্সতি.

ততোপি দীঘস্স অদ্ধুনো অচ্চযেন ততিযো সূরিযো পাতুভৰতি. যস্স পাতুভাৰা মহানদিযোপি সুস্সন্তি.

ততোপি দীঘস্স অদ্ধুনো অচ্চযেন চতুত্থো সূরিযো পাতুভৰতি. যস্স পাতুভাৰা হিমৰতি মহানদীনং পভৰা ‘‘সীহপপাতো হংসপাতনো কণ্ণমুণ্ডকো রথকারদহো অনোতত্তদহো ছদ্দন্তদহো কুণালদহো’’তি ইমে সত্ত মহাসরা সুস্সন্তি.

ততোপি দীঘস্স অদ্ধুনো অচ্চযেন পঞ্চমো সূরিযো পাতুভৰতি. যস্স পাতুভাৰা অনুপুব্বেন মহাসমুদ্দে অঙ্গুলিপব্বতেমনমত্তম্পি উদকং ন সণ্ঠাতি.

ততোপি দীঘস্স অদ্ধুনো অচ্চযেন ছট্ঠো সূরিযো পাতুভৰতি. যস্স পাতুভাৰা সকলচক্কৰাল়ং একধূমং হোতি. পরিযাদিণ্ণসিনেহং ধূমেন. যথা চিদং, এৰং কোটিসতসহস্সচক্কৰাল়ানিপি.

ততোপি দীঘস্স অদ্ধুনো অচ্চযেন সত্তমো সূরিযো পাতুভৰতি. যস্স পাতুভাৰা সকলচক্কৰাল়ং একজালং হোতি সদ্ধিং কোটিসতসহস্সচক্কৰাল়েহি. যোজনসতিকাদিভেদানি সিনেরুকূটানিপি পলুজ্জিত্ৰা আকাসেযেৰ অন্তরধাযন্তি. সা অগ্গিজালা উট্ঠহিত্ৰা চাতুমহারাজিকে গণ্হাতি. তত্থ কনকৰিমানরতনৰিমানমণিৰিমানানি ঝাপেত্ৰা তাৰতিংসভৰনং গণ্হাতি. এতেনেৰ উপাযেন যাৰ পঠমজ্ঝানভূমিং গণ্হাতি. তত্থ তযোপি ব্রহ্মলোকে ঝাপেত্ৰা আভস্সরে আহচ্চ তিট্ঠতি. সা যাৰ অণুমত্তম্পি সঙ্খারগতং অত্থি, তাৰ ন নিব্বাযতি. সব্বসঙ্খারপরিক্খযা পন সপ্পিতেলঝাপনগ্গিসিখা ৰিয ছারিকম্পি ¶ অনৰসেসেত্ৰা নিব্বাযতি. হেট্ঠাআকাসেন সহ উপরিআকাসো একো হোতি মহন্ধকারো.

৪০৬. অথ দীঘস্স অদ্ধুনো অচ্চযেন মহামেঘো উট্ঠহিত্ৰা পঠমং সুখুমং সুখুমং ৰস্সতি ¶ . অনুপুব্বেন কুমুদনাল়যট্ঠিমুসলতালক্খন্ধাদিপ্পমাণাহি ধারাহি ৰস্সন্তো কোটিসতসহস্সচক্কৰাল়েসু সব্বং দড্ঢট্ঠানং পূরেত্ৰা অন্তরধাযতি. তং উদকং হেট্ঠা চ তিরিযঞ্চ ৰাতো সমুট্ঠহিত্ৰা ঘনং করোতি পরিৰটুমং পদুমিনিপত্তে উদকবিন্দুসদিসং. কথং তাৰ মহন্তং উদকরাসিং ঘনং করোতীতি চে? ৰিৰরসম্পদানতো. তঞ্হিস্স তম্হি তম্হি ৰিৰরং দেতি. তং এৰং ৰাতেন সম্পিণ্ডিযমানং ঘনং করিযমানং পরিক্খযমানং অনুপুব্বেন হেট্ঠা ওতরতি. ওতিণ্ণে ওতিণ্ণে উদকে ব্রহ্মলোকট্ঠানে ব্রহ্মলোকা, উপরি চতুকামাৰচরদেৰলোকট্ঠানে চ দেৰলোকা পাতুভৰন্তি.

পুরিমপথৰিট্ঠানং ওতিণ্ণে পন বলৰৰাতা উপ্পজ্জন্তি. তে তং পিহিতদ্ৰারে ধমকরণে ঠিতউদকমিৰ নিরস্সাসং কত্ৰা রুন্ধন্তি. মধুরোদকং পরিক্খযং গচ্ছমানং উপরি রসপথৰিং সমুট্ঠাপেতি. সা ৰণ্ণসম্পন্না চেৰ হোতি গন্ধরসসম্পন্না চ নিরুদকপাযাসস্স উপরি পটলং ৰিয.

তদা চ আভস্সরব্রহ্মলোকে পঠমতরাভিনিব্বত্তা সত্তা আযুক্খযা ৰা পুঞ্ঞক্খযা ৰা ততো চৰিত্ৰা ইধূপপজ্জন্তি. তে হোন্তি সযংপভা অন্তলিক্খচরা. তে অগ্গঞ্ঞসুত্তে (দী. নি. ৩.১১৯) ৰুত্তনযেন তং রসপথৰিং সাযিত্ৰা তণ্হাভিভূতা আলুপ্পকারকং পরিভুঞ্জিতুং উপক্কমন্তি. অথ নেসং সযংপভা অন্তরধাযতি, অন্ধকারো হোতি. তে অন্ধকারং দিস্ৰা ভাযন্তি.

ততো নেসং ভযং নাসেত্ৰা সূরভাৰং জনযন্তং পরিপুণ্ণপণ্ণাসযোজনং সূরিযমণ্ডলং পাতুভৰতি, তে তং দিস্ৰা ‘‘আলোকং পটিলভিম্হা’’তি হট্ঠতুট্ঠা হুত্ৰা ‘‘অম্হাকং ভীতানং ভযং নাসেত্ৰা সূরভাৰং জনযন্তো উট্ঠিতো, তস্মা ‘‘সূরিযো হোতূ’’তি সূরিযোত্ৰেৰস্স নামং করোন্তি.

অথ ¶ সূরিযে দিৰসং আলোকং কত্ৰা অত্থঙ্গতে যম্পি আলোকং লভিম্হা, সোপি নো নট্ঠোতি পুন ভীতা হোন্তি. তেসং এৰং হোতি ‘‘সাধু ৰতস্স সচে অঞ্ঞং আলোকং লভেয্যামা’’তি. তেসং চিত্তং ঞত্ৰা ৰিয একূনপণ্ণাসযোজনং চন্দমণ্ডলং পাতুভৰতি. তে তং দিস্ৰা ভিয্যোসো মত্তায হট্ঠতুট্ঠা হুত্ৰা ‘‘অম্হাকং ছন্দং ঞত্ৰা ৰিয উট্ঠিতো, তস্মা চন্দো হোতূ’’তি ¶ চন্দোত্ৰেৰস্স নামং করোন্তি. এৰং চন্দিমসূরিযেসু পাতুভূতেসু নক্খত্তানি তারকরূপানি পাতুভৰন্তি.

ততো পভুতি রত্তিন্দিৰা পঞ্ঞাযন্তি, অনুক্কমেন চ মাসদ্ধমাসউতুসংৰচ্ছরা. চন্দিমসূরিযানং পন পাতুভূতদিৰসেযেৰ সিনেরুচক্কৰাল়হিমৰন্তপব্বতা পাতুভৰন্তি. তে চ খো অপুব্বং অচরিমং ফগ্গুণপুণ্ণমদিৰসেযেৰ পাতুভৰন্তি. কথং? যথা নাম কঙ্গুভত্তে পচ্চমানে একপ্পহারেনেৰ পুপ্ফুল়কানি উট্ঠহন্তি. একে পদেসা থূপথূপা হোন্তি, একে নিন্ননিন্না, একে সমসমা. এৰমেৰং থূপথূপট্ঠানে পব্বতা হোন্তি, নিন্ননিন্নট্ঠানে সমুদ্দা, সমসমট্ঠানে দীপাতি.

অথ তেসং সত্তানং রসপথৰিং পরিভুঞ্জন্তানং কমেন একচ্চে ৰণ্ণৰন্তো, একচ্চে দুব্বণ্ণা হোন্তি. তত্থ ৰণ্ণৰন্তো দুব্বণ্ণে অতিমঞ্ঞন্তি. তেসং অতিমানপচ্চযা সাপি রসপথৰী অন্তরধাযতি. ভূমিপপ্পটকো পাতুভৰতি. অথ নেসং তেনেৰ নযেন সোপি অন্তরধাযতি. পদালতা পাতুভৰতি. তেনেৰ নযেন সাপি অন্তরধাযতি. অকট্ঠপাকো সালি পাতুভৰতি অকণো অথুসো সুদ্ধো সুগন্ধো তণ্ডুলপ্ফলো.

ততো নেসং ভাজনানি উপ্পজ্জন্তি. তে সালিং ভাজনে ঠপেত্ৰা পাসাণপিট্ঠিযা ঠপেন্তি, সযমেৰ জালসিখা উট্ঠহিত্ৰা তং পচতি. সো হোতি ওদনো সুমনজাতিপুপ্ফসদিসো, ন তস্স সূপেন ৰা ব্যঞ্জনেন ৰা করণীযং অত্থি. যং যং রসং ভুঞ্জিতুকামা হোন্তি, তং তং রসোৰ হোতি. তেসং তং ওল়ারিকং আহারং আহরযতং ততো পভুতি মুত্তকরীসং সঞ্জাযতি. অথ নেসং তস্স নিক্খমনত্থায ৰণমুখানি পভিজ্জন্তি, পুরিসস্স পুরিসভাৰো, ইত্থিযাপি ইত্থিভাৰো পাতুভৰতি.

তত্র ¶ সুদং ইত্থী পুরিসং, পুরিসো চ ইত্থিং অতিৰেলং উপনিজ্ঝাযতি. তেসং অতিৰেলং উপনিজ্ঝাযনপচ্চযা কামপরিল়াহো উপ্পজ্জতি. ততো মেথুনধম্মং পটিসেৰন্তি. তে অসদ্ধম্মপটিসেৰনপচ্চযা ৰিঞ্ঞূহি গরহিযমানা ৰিহেঠিযমানা তস্স অসদ্ধম্মস্স পটিচ্ছাদনহেতু অগারানি করোন্তি. তে অগারং অজ্ঝাৰসমানা অনুক্কমেন অঞ্ঞতরস্স অলসজাতিকস্স সত্তস্স দিট্ঠানুগতিং আপজ্জন্তা সন্নিধিং করোন্তি. ততো পভুতি কণোপি থুসোপি তণ্ডুলং পরিযোনন্ধতি, লাযিতট্ঠানম্পি ন পটিৰিরূহতি.

তে ¶ সন্নিপতিত্ৰা অনুত্থুনন্তি ‘‘পাপকা ৰত ভো ধম্মা সত্তেসু পাতুভূতা, মযং হি পুব্বে মনোমযা অহুম্হা’’তি অগ্গঞ্ঞসুত্তে (দী. নি. ৩.১২৮) ৰুত্তনযেন ৰিত্থারেতব্বং. ততো মরিযাদং ঠপেন্তি. অথ অঞ্ঞতরো সত্তো অঞ্ঞস্স ভাগং অদিন্নং আদিযতি. তং দ্ৰিক্খত্তুং পরিভাসেত্ৰা ততিযৰারে পাণিলেট্টুদণ্ডেহি পহরন্তি. তে এৰং অদিন্নাদানগরহমুসাৰাদদণ্ডাদানেসু উপ্পন্নেসু সন্নিপতিত্ৰা চিন্তযন্তি ‘‘যংনূন মযং একং সত্তং সম্মন্নেয্যাম, যো নো সম্মা খীযিতব্বং খীযেয্য, গরহিতব্বং গরহেয্য, পব্বাজেতব্বং পব্বাজেয্য, মযং পনস্স সালীনং ভাগং অনুপ্পদস্সামা’’তি.

এৰং কতসন্নিট্ঠানেসু পন সত্তেসু ইমস্মিং তাৰ কপ্পে অযমেৰ ভগৰা বোধিসত্তভূতো তেন সমযেন তেসু সত্তেসু অভিরূপতরো চ দস্সনীযতরো চ মহেসক্খতরো চ বুদ্ধিসম্পন্নো পটিবলো নিগ্গহপগ্গহং কাতুং. তে তং উপসঙ্কমিত্ৰা যাচিত্ৰা সম্মন্নিংসু. সো তেন মহাজনেন সম্মতোতি মহাসম্মতো, খেত্তানং অধিপতীতি খত্তিযো, ধম্মেন সমেন পরে রঞ্জেতীতি রাজাতি তীহি নামেহি পঞ্ঞাযিত্থ. যঞ্হি লোকে অচ্ছরিযট্ঠানং, বোধিসত্তোৰ তত্থ আদিপুরিসোতি এৰং বোধিসত্তং আদিং কত্ৰা খত্তিযমণ্ডলে সণ্ঠিতে অনুপুব্বেন ব্রাহ্মণাদযোপি ৰণ্ণা সণ্ঠহিংসু.

তত্থ কপ্পৰিনাসকমহামেঘতো যাৰ জালুপচ্ছেদো, ইদমেকং অসঙ্খ্যেয্যং সংৰট্টোতি ৰুচ্চতি.

কপ্পৰিনাসকজালুপচ্ছেদতো ¶ যাৰ কোটিসতসহস্সচক্কৰাল়পরিপূরকো সম্পত্তিমহামেঘো, ইদং দুতিযং অসঙ্খ্যেয্যং সংৰট্টট্ঠাযীতি ৰুচ্চতি.

সম্পত্তিমহামেঘতো যাৰ চন্দিমসূরিযপাতুভাৰো, ইদং ততিযং অসঙ্খ্যেয্যং ৰিৰট্টোতি ৰুচ্চতি.

চন্দিমসূরিযপাতুভাৰতো যাৰ পুন কপ্পৰিনাসকমহামেঘো, ইদং চতুত্থং অসঙ্খ্যেয্যং ৰিৰট্টট্ঠাযীতি ৰুচ্চতি. ইমানি চত্তারি অসঙ্খ্যেয্যানি একো মহাকপ্পো হোতি. এৰং তাৰ অগ্গিনা ৰিনাসো চ সণ্ঠহনঞ্চ ৰেদিতব্বং.

৪০৭. যস্মিং পন সমযে কপ্পো উদকেন নস্সতি, আদিতোৰ কপ্পৰিনাসকমহামেঘো উট্ঠহিত্ৰাতি ¶ পুব্বে ৰুত্তনযেনেৰ ৰিত্থারেতব্বং. অযং পন ৰিসেসো, যথা তত্থ দুতিযসূরিযো, এৰমিধ কপ্পৰিনাসকো খারুদকমহামেঘো ৰুট্ঠাতি. সো আদিতো সুখুমং সুখুমং ৰস্সন্তো অনুক্কমেন মহাধারাহি কোটিসতসহস্সচক্কৰাল়ানং পূরেন্তো ৰস্সতি. খারুদকেন ফুট্ঠফুট্ঠা পথৰীপব্বতাদযো ৰিলীযন্তি, উদকং সমন্ততো ৰাতেহি ধারিযতি. পথৰিতো যাৰ দুতিযজ্ঝানভূমিং উদকং গণ্হাতি. তত্থ তযোপি ব্রহ্মলোকে ৰিলীযাপেত্ৰা সুভকিণ্হে আহচ্চ তিট্ঠতি. তং যাৰ অণুমত্তম্পি সঙ্খারগতং অত্থি, তাৰ ন ৰূপসম্মতি. উদকানুগতং পন সব্বসঙ্খারগতং অভিভৰিত্ৰা সহসা ৰূপসম্মতি অন্তরধানং গচ্ছতি. হেট্ঠাআকাসেন সহ উপরিআকাসো একো হোতি মহন্ধকারোতি সব্বং ৰুত্তসদিসং. কেৰলং পনিধ আভস্সরব্রহ্মলোকং আদিং কত্ৰা লোকো পাতুভৰতি. সুভকিণ্হতো চ চৰিত্ৰা আভস্সরট্ঠানাদীসু সত্তা নিব্বত্তন্তি.

তত্থ কপ্পৰিনাসকমহামেঘতো যাৰ কপ্পৰিনাসকুদকূপচ্ছেদো, ইদমেকং অসঙ্খ্যেয্যং. উদকূপচ্ছেদতো যাৰ সম্পত্তিমহামেঘো, ইদং দুতিযং অসঙ্খ্যেয্যং. সম্পত্তিমহামেঘতো…পে… ইমানি চত্তারি অসঙ্খ্যেয্যানি একো মহাকপ্পো হোতি. এৰং উদকেন ৰিনাসো চ সণ্ঠহনঞ্চ ৰেদিতব্বং.

৪০৮. যস্মিং ¶ সমযে কপ্পো ৰাতেন ৰিনস্সতি, আদিতোৰ কপ্পৰিনাসকমহামেঘো উট্ঠহিত্ৰাতি পুব্বে ৰুত্তনযেনেৰ ৰিত্থারেতব্বং. অযং পন ৰিসেসো, যথা তত্থ দুতিযসূরিযো, এৰমিধ কপ্পৰিনাসনত্থং ৰাতো সমুট্ঠাতি. সো পঠমং থূলরজং উট্ঠাপেতি. ততো সণ্হরজং সুখুমৰালিকং থূলৰালিকং সক্খরপাসাণাদযোতি যাৰ কূটাগারমত্তে পাসাণে ৰিসমট্ঠানে ঠিতমহারুক্খে চ উট্ঠাপেতি. তে পথৰিতো নভমুগ্গতা ন চ পুন পতন্তি. তত্থেৰ চুণ্ণৰিচুণ্ণা হুত্ৰা অভাৰং গচ্ছন্তি.

অথানুক্কমেন হেট্ঠা মহাপথৰিযা ৰাতো সমুট্ঠহিত্ৰা পথৰিং পরিৰত্তেত্ৰা উদ্ধংমূলং কত্ৰা আকাসে খিপতি. যোজনসতপ্পমাণাপি পথৰিপ্পদেসা দ্ৰিযোজনতিযোজনচতুযোজনপঞ্চযোজনসতপ্পমাণাপি ভিজ্জিত্ৰা ৰাতৰেগেন খিত্তা আকাসেযেৰ চুণ্ণৰিচুণ্ণা হুত্ৰা অভাৰং গচ্ছন্তি. চক্কৰাল়পব্বতম্পি সিনেরুপব্বতম্পি ৰাতো উক্খিপিত্ৰা আকাসে খিপতি. তে অঞ্ঞমঞ্ঞং অভিহন্ত্ৰা চুণ্ণৰিচুণ্ণা হুত্ৰা ৰিনস্সন্তি. এতেনেৰ উপাযেন ভুম্মট্ঠকৰিমানানি চ আকাসট্ঠকৰিমানানি চ ৰিনাসেন্তো ছকামাৰচরদেৰলোকে ৰিনাসেত্ৰা কোটিসতসহস্সচক্কৰাল়ানি ¶ ৰিনাসেতি. তত্থ চক্কৰাল়া চক্কৰাল়েহি হিমৰন্তা হিমৰন্তেহি সিনেরূ সিনেরূহি অঞ্ঞমঞ্ঞং সমাগন্ত্ৰা চুণ্ণৰিচুণ্ণা হুত্ৰা ৰিনস্সন্তি. পথৰিতো যাৰ ততিযজ্ঝানভূমিং ৰাতো গণ্হাতি. তত্থ তযোপি ব্রহ্মলোকে ৰিনাসেত্ৰা ৰেহপ্ফলং আহচ্চ তিট্ঠতি. এৰং সব্বসঙ্খারগতং ৰিনাসেত্ৰা সযম্পি ৰিনস্সতি. হেট্ঠাআকাসেন সহ উপরিআকাসো একো হোতি মহন্ধকারোতি সব্বং ৰুত্তসদিসং. ইধ পন সুভকিণ্হব্রহ্মলোকং আদিং কত্ৰা লোকো পাতুভৰতি. ৰেহপ্ফলতো চ চৰিত্ৰা সুভকিণ্হট্ঠানাদীসু সত্তা নিব্বত্তন্তি.

তত্থ কপ্পৰিনাসকমহামেঘতো যাৰ কপ্পৰিনাসকৰাতূপচ্ছেদো, ইদমেকং অসঙ্খ্যেয্যং. ৰাতূপচ্ছেদতো যাৰ সম্পত্তিমহামেঘো, ইদং দুতিযং অসঙ্খ্যেয্যং…পে… ইমানি চত্তারি অসঙ্খ্যেয্যানি একো মহাকপ্পো হোতি. এৰং ৰাতেন ৰিনাসো চ সণ্ঠহনঞ্চ ৰেদিতব্বং.

৪০৯. কিংকারণা ¶ এৰং লোকো ৰিনস্সতি? অকুসলমূলকারণা. অকুসলমূলেসু হি উস্সন্নেসু এৰং লোকো ৰিনস্সতি. সো চ খো রাগে উস্সন্নতরে অগ্গিনা ৰিনস্সতি. দোসে উস্সন্নতরে উদকেন ৰিনস্সতি. কেচি পন দোসে উস্সন্নতরে অগ্গিনা. রাগে উস্সন্নতরে উদকেনাতি ৰদন্তি. মোহে উস্সন্নতরে ৰাতেন ৰিনস্সতি. এৰং ৰিনস্সন্তোপি চ নিরন্তরমেৰ সত্তৰারে অগ্গিনা ৰিনস্সতি. অট্ঠমে ৰারে উদকেন. পুন সত্তৰারে অগ্গিনা. অট্ঠমে ৰারে উদকেনাতি এৰং অট্ঠমে অট্ঠমে ৰারে ৰিনস্সন্তো সত্তক্খত্তুং উদকেন ৰিনস্সিত্ৰা পুন সত্তৰারে অগ্গিনা নস্সতি. এত্তাৰতা তেসট্ঠি কপ্পা অতীতা হোন্তি. এত্থন্তরে উদকেন নস্সনৰারং সম্পত্তম্পি পটিবাহিত্ৰা লদ্ধোকাসো ৰাতো পরিপুণ্ণচতুসট্ঠিকপ্পাযুকে সুভকিণ্হে ৰিদ্ধংসেন্তো লোকং ৰিনাসেতি.

৪১০. পুব্বেনিৰাসং অনুস্সরন্তোপি চ কপ্পানুস্সরণকো ভিক্খু এতেসু কপ্পেসু অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে অনুস্সরতি. কথং? ‘‘অমুত্রাসি’’ন্তিআদিনা (দী. নি. ১.২৪৪) নযেন.

তত্থ অমুত্রাসিন্তি অমুম্হি সংৰট্টকপ্পে অহং অমুম্হি ভৰে ৰা যোনিযা ৰা গতিযা ৰা ৰিঞ্ঞাণট্ঠিতিযা ৰা সত্তাৰাসে ৰা সত্তনিকাযে ৰা আসিং. এৰংনামোতি তিস্সো ৰা ফুস্সো ৰা. এৰংগোত্তোতি কচ্চানো ৰা কস্সপো ৰা. ইদমস্স অতীতভৰে অত্তনো নামগোত্তানুস্সরণৰসেন ¶ ৰুত্তং. সচে পন তস্মিং কালে অত্তনো ৰণ্ণসম্পত্তিং ৰা লূখপণীতজীৰিকভাৰং ৰা সুখদুক্খবহুলতং ৰা অপ্পাযুকদীঘাযুকভাৰং ৰা অনুস্সরিতুকামো হোতি, তম্পি অনুস্সরতিযেৰ. তেনাহ ‘‘এৰংৰণ্ণো…পে… এৰমাযুপরিযন্তো’’তি.

তত্থ এৰংৰণ্ণোতি ওদাতো ৰা সামো ৰা. এৰমাহারোতি সালিমংসোদনাহারো ৰা পৰত্তফলভোজনো ৰা. এৰং সুখদুক্খপটিসংৰেদীতি অনেকপ্পকারেন কাযিকচেতসিকানং সামিসনিরামিসাদিপ্পভেদানং ৰা সুখদুক্খানং পটিসংৰেদী. এৰমাযুপরিযন্তোতি এৰং ৰস্সসতপরিমাণাযুপরিযন্তো ৰা চতুরাসীতিকপ্পসতসহস্সাযুপরিযন্তো ৰা. সো ততো চুতো অমুত্র উদপাদিন্তি সোহং ততো ¶ ভৰতো যোনিতো গতিতো ৰিঞ্ঞাণট্ঠিতিতো সত্তাৰাসতো সত্তনিকাযতো ৰা চুতো পুন অমুকস্মিং নাম ভৰে যোনিযা গতিযা ৰিঞ্ঞাণট্ঠিতিযা সত্তাৰাসে সত্তনিকাযে ৰা উদপাদিং. তত্রাপাসিন্তি অথ তত্রাপি ভৰে যোনিযা গতিযা ৰিঞ্ঞাণট্ঠিতিযা সত্তাৰাসে সত্তনিকাযে ৰা পুন অহোসিং. এৰংনামোতিআদি ৰুত্তনযমেৰ.

অপিচ যস্মা অমুত্রাসিন্তি ইদং অনুপুব্বেন আরোহন্তস্স যাৰদিচ্ছকং অনুস্সরণং. সো ততো চুতোতি পটিনিৰত্তন্তস্স পচ্চৰেক্খণং, তস্মা ‘‘ইধূপপন্নো’’তি ইমিস্সা ইধূপপত্তিযা অনন্তরমেৰস্স উপপত্তিট্ঠানং সন্ধায ‘‘অমুত্র উদপাদি’’ন্তি ইদং ৰুত্তন্তি ৰেদিতব্বং. তত্রাপাসিন্তি এৰমাদি পনস্স তত্র ইমিস্সা উপপত্তিযা অনন্তরে উপপত্তিট্ঠানে নামগোত্তাদীনং অনুস্সরণদস্সনত্থং ৰুত্তং. সো ততো চুতো ইধূপপন্নোতি স্ৰাহং ততো অনন্তরূপপত্তিট্ঠানতো চুতো ইধ অসুকস্মিং নাম খত্তিযকুলে ৰা ব্রাহ্মণকুলে ৰা নিব্বত্তোতি. ইতীতি এৰং. সাকারং সউদ্দেসন্তি নামগোত্তৰসেন সউদ্দেসং, ৰণ্ণাদিৰসেন সাকারং. নামগোত্তেন হি সত্তো তিস্সো কস্সপোতি উদ্দিসীযতি. ৰণ্ণাদীহি সামো ওদাতোতি নানত্ততো পঞ্ঞাযতি. তস্মা নামগোত্তং উদ্দেসো, ইতরে আকারা. অনেকৰিহিতং পুব্বেনিৰাসমনুস্সরতীতি ইদং উত্তানত্থমেৰাতি.

পুব্বেনিৰাসানুস্সতিঞাণকথা নিট্ঠিতা.

চুতূপপাতঞাণকথা

৪১১. সত্তানং ¶ চুতূপপাতঞাণকথায চুতূপপাতঞাণাযাতি (দী. নি. ১.২৪৭) চুতিযা চ উপপাতে চ ঞাণায. যেন ঞাণেন সত্তানং চুতি চ উপপাতো চ ঞাযতি, তদত্থং দিব্বচক্খুঞাণত্থন্তি ৰুত্তং হোতি. চিত্তং অভিনীহরতি অভিনিন্নামেতীতি পরিকম্মচিত্তং অভিনীহরতি চেৰ অভিনিন্নামেতি চ. সোতি সো কতচিত্তাভিনীহারো ভিক্খু. দিব্বেনাতিআদীসু পন দিব্বসদিসত্তা দিব্বং. দেৰতানঞ্হি সুচরিতকম্মনিব্বত্তং পিত্তসেম্হরুহিরাদীহি অপলিবুদ্ধং উপক্কিলেসৰিমুত্ততায দূরেপি আরম্মণং সম্পটিচ্ছনসমত্থং দিব্বং পসাদচক্খু হোতি. ইদঞ্চাপি ৰীরিযভাৰনাবলনিব্বত্তং ঞাণচক্খু ¶ তাদিসমেৰাতি দিব্বসদিসত্তা দিব্বং. দিব্বৰিহারৰসেন পটিলদ্ধত্তা অত্তনা চ দিব্বৰিহারসন্নিস্সিতত্তাপি দিব্বং. আলোকপরিগ্গহেন মহাজুতিকত্তাপি দিব্বং. তিরোকুট্টাদিগতরূপদস্সনেন মহাগতিকত্তাপি দিব্বং. তং সব্বং সদ্দসত্থানুসারেনেৰ ৰেদিতব্বং.

দস্সনট্ঠেন চক্খু. চক্খুকিচ্চকরণেন চক্খুমিৰাতিপি চক্খু. চুতূপপাতদস্সনেন দিট্ঠিৰিসুদ্ধিহেতুত্তা ৰিসুদ্ধং. যো হি চুতিমত্তমেৰ পস্সতি, ন উপপাতং. সো উচ্ছেদদিট্ঠিং গণ্হাতি. যো উপপাতমত্তমেৰ পস্সতি, ন চুতিং, সো নৰসত্তপাতুভাৰদিট্ঠিং গণ্হাতি. যো পন তদুভযং পস্সতি, সো যস্মা দুৰিধম্পি তং দিট্ঠিগতং অতিৰত্ততি. তস্মাস্স তংদস্সনং দিট্ঠিৰিসুদ্ধিহেতু হোতি. উভযম্পি চেতং বুদ্ধপুত্তা পস্সন্তি. তেন ৰুত্তং ‘‘চুতূপপাতদস্সনেন দিট্ঠিৰিসুদ্ধিহেতুত্তা ৰিসুদ্ধ’’ন্তি.

মনুস্সূপচারং অতিক্কমিত্ৰা রূপদস্সনেন অতিক্কন্তমানুসকং, মানুসকং ৰা মংসচক্খুং অতিক্কন্তত্তা অতিক্কন্তমানুসকন্তি ৰেদিতব্বং. তেন দিব্বেন চক্খুনা ৰিসুদ্ধেন অতিক্কন্তমানুসকেন. সত্তে পস্সতীতি মনুস্সানং মংসচক্খুনা ৰিয সত্তে ওলোকেতি.

চৰমানে উপপজ্জমানেতি এত্থ চুতিক্খণে উপপত্তিক্খণে ৰা দিব্বচক্খুনা দট্ঠুং ন সক্কা. যে পন আসন্নচুতিকা ইদানি চৰিস্সন্তি, তে চৰমানা. যে চ গহিতপটিসন্ধিকা সম্পতিনিব্বত্তাৰ, তে উপপজ্জমানাতি অধিপ্পেতা. তে এৰরূপে চৰমানে চ উপপজ্জমানে চ পস্সতীতি দস্সেতি.

হীনেতি ¶ মোহনিস্সন্দযুত্তত্তা হীনানং জাতিকুলভোগাদীনং ৰসেন হীল়িতে ওহীল়িতে ওঞ্ঞাতে অৰঞ্ঞাতে. পণীতেতি অমোহনিস্সন্দযুত্তত্তা তব্বিপরীতে. সুৰণ্ণেতি অদোসনিস্সন্দযুত্তত্তা ইট্ঠকন্তমনাপৰণ্ণযুত্তে. দুব্বণ্ণেতি দোসনিস্সন্দযুত্তত্তা অনিট্ঠাকন্তঅমনাপৰণ্ণযুত্তে. অনভিরূপে ৰিরূপেতিপি অত্থো. সুগতেতি সুগতিগতে. অলোভনিস্সন্দযুত্তত্তা ৰা অড্ঢে মহদ্ধনে. দুগ্গতেতি দুগ্গতিগতে. লোভনিস্সন্দযুত্তত্তা ৰা দলিদ্দে অপ্পন্নপানে.

যথাকম্মুপগেতি যং যং কম্মং উপচিতং, তেন তেন উপগতে. তত্থ পুরিমেহি চৰমানেতিআদীহি দিব্বচক্খুকিচ্চং ৰুত্তং. ইমিনা পন পদেন যথাকম্মুপগঞাণকিচ্চং. তস্স চ ঞাণস্স অযমুপ্পত্তিক্কমো, ইধ ভিক্খু হেট্ঠা নিরযাভিমুখং ¶ আলোকং ৰড্ঢেত্ৰা নেরযিকে সত্তে পস্সতি মহাদুক্খমনুভৰমানে. তং দস্সনং দিব্বচক্খুকিচ্চমেৰ. সো এৰং মনসিকরোতি ‘‘কিং নু খো কম্মং কত্ৰা ইমে সত্তা এতং দুক্খং অনুভৰন্তী’’তি. অথস্স ইদং নাম কত্ৰাতি তংকম্মারম্মণং ঞাণং উপ্পজ্জতি. তথা উপরিদেৰলোকাভিমুখং আলোকং ৰড্ঢেত্ৰা নন্দনৰনমিস্সকৰনফারুসকৰনাদীসু সত্তে পস্সতি মহাসম্পত্তিং অনুভৰমানে. তম্পি দস্সনং দিব্বচক্খুকিচ্চমেৰ. সো এৰং মনসিকরোতি ‘‘কিং নু খো কম্মং কত্ৰা ইমে সত্তা এতং সম্পত্তিং অনুভৰন্তী’’তি. অথস্স ইদং নাম কত্ৰাতি তংকম্মারম্মণং ঞাণং উপ্পজ্জতি. ইদং যথাকম্মুপগঞাণং নাম. ইমস্স ৰিসুং পরিকম্মং নাম নত্থি, যথা চিমস্স, এৰং অনাগতংসঞাণস্সাপি. দিব্বচক্খুপাদকানেৰ হি ইমানি দিব্বচক্খুনা সহেৰ ইজ্ঝন্তি.

কাযদুচ্চরিতেনাতিআদীসু দুট্ঠু চরিতং, দুট্ঠং ৰা চরিতং কিলেসপূতিকত্তাতি দুচ্চরিতং. কাযেন দুচ্চরিতং, কাযতো ৰা উপ্পন্নং দুচ্চরিতন্তি কাযদুচ্চরিতং, ইতরেসুপি এসেৰ নযো. সমন্নাগতাতি সমঙ্গীভূতা. অরিযানং উপৰাদকাতি বুদ্ধপচ্চেকবুদ্ধসাৰকানং অরিযানং অন্তমসো গিহিসোতাপন্নানম্পি অনত্থকামা হুত্ৰা অন্তিমৰত্থুনা ৰা গুণপরিধংসনেন ৰা উপৰাদকা অক্কোসকা গরহকাতি ৰুত্তং হোতি. তত্থ নত্থি ইমেসং সমণধম্মো, অস্সমণা এতেতি ৰদন্তো অন্তিমৰত্থুনা উপৰদতি. নত্থি ইমেসং ঝানং ৰা ৰিমোক্খো ৰা মগ্গো ৰা ফলং ৰাতিআদীনি ৰদন্তো গুণপরিধংসনৰসেন উপৰদতীতি ৰেদিতব্বো. সো চ জানং ৰা উপৰদেয্য অজানং ৰা, উভযথাপি অরিযূপৰাদোৰ হোতি. ভারিযং কম্মং আনন্তরিযসদিসং সগ্গাৰরণঞ্চ মগ্গাৰরণঞ্চ, সতেকিচ্ছং পন হোতি. তস্স আৰিভাৰত্থং ইদং ৰত্থু ৰেদিতব্বং.

অঞ্ঞতরস্মিং ¶ কির গামে একো থেরো চ দহরভিক্খু চ পিণ্ডায চরন্তি. তে পঠমঘরেযেৰ উল়ুঙ্কমত্তং উণ্হযাগুং লভিংসু. থেরস্স চ কুচ্ছিৰাতো রুজ্ঝতি. সো চিন্তেসি ‘‘অযং যাগু ময্হং সপ্পাযা, যাৰ ন সীতলা হোতি, তাৰ নং পিৰামী’’তি. সো মনুস্সেহি উম্মারত্থায আহটে দারুখণ্ডে নিসীদিত্ৰা পিৰি. ইতরো তং জিগুচ্ছন্তো ‘‘অতিখুদ্দাভিভূতো মহল্লকো, অম্হাকং লজ্জিতব্বকং অকাসী’’তি আহ. থেরো ¶ গামে চরিত্ৰা ৰিহারং গন্ত্ৰা দহরভিক্খুং আহ ‘‘অত্থি তে, আৰুসো, ইমস্মিং সাসনে পতিট্ঠা’’তি? আম, ভন্তে, সোতাপন্নো অহন্তি. তেন হাৰুসো, উপরিমগ্গত্থায ৰাযামং মা অকাসি. খীণাসৰো তযা উপৰদিতোতি. সো তং খমাপেসি. তেনস্স তং কম্মং পাকতিকং অহোসি.

তস্মা যো অঞ্ঞোপি অরিযং উপৰদতি, তেন গন্ত্ৰা সচে অত্তনা ৰুড্ঢতরো হোতি, উক্কুটিকং নিসীদিত্ৰা ‘‘অহং আযস্মন্তং ইদঞ্চিদঞ্চ অৰচং, তং মে খমাহী’’তি খমাপেতব্বো. সচে নৰকতরো হোতি, ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা ‘‘অহং, ভন্তে, তুম্হে ইদঞ্চিদঞ্চ অৰচং, তং মে খমথা’’তি খমাপেতব্বো. সচে দিসাপক্কন্তো হোতি, সযং ৰা গন্ত্ৰা সদ্ধিৰিহারিকাদিকে ৰা পেসেত্ৰা খমাপেতব্বো.

সচে চ নাপি গন্তুং, ন পেসেতুং সক্কা হোতি, যে তস্মিং ৰিহারে ভিক্খূ ৰসন্তি, তেসং সন্তিকং গন্ত্ৰা সচে নৰকতরা হোন্তি, উক্কুটিকং নিসীদিত্ৰা, সচে ৰুড্ঢতরা, ৰুড্ঢে ৰুত্তনযেনেৰ পটিপজ্জিত্ৰা ‘‘অহং, ভন্তে, অসুকং নাম আযস্মন্তং ইদঞ্চিদঞ্চ অৰচং, খমতু মে সো আযস্মা’’তি ৰত্ৰা খমাপেতব্বং. সম্মুখা অখমন্তেপি এতদেৰ কত্তব্বং.

সচে একচারিকভিক্খু হোতি, নেৰস্স ৰসনট্ঠানং, ন গতট্ঠানং পঞ্ঞাযতি, একস্স পণ্ডিতস্স ভিক্খুনো সন্তিকং গন্ত্ৰা ‘‘অহং, ভন্তে, অসুকং নাম আযস্মন্তং ইদঞ্চিদঞ্চ অৰচং, তং মে অনুস্সরতো ৰিপ্পটিসারো হোতি, কিং করোমী’’তি ৰত্তব্বং. সো ৰক্খতি ‘‘তুম্হে মা চিন্তযিত্থ, থেরো তুম্হাকং খমতি, চিত্তং ৰূপসমেথা’’তি. তেনাপি অরিযস্স গতদিসাভিমুখেন অঞ্জলিং পগ্গহেত্ৰা খমতূতি ৰত্তব্বং. সচে সো পরিনিব্বুতো হোতি, পরিনিব্বুতমঞ্চট্ঠানং গন্ত্ৰা যাৰসিৰথিকং গন্ত্ৰাপি খমাপেতব্বং. এৰং কতে নেৰ সগ্গাৰরণং, ন মগ্গাৰরণং হোতি, পাকতিকমেৰ হোতীতি.

মিচ্ছাদিট্ঠিকাতি ¶ ৰিপরীতদস্সনা. মিচ্ছাদিট্ঠিকম্মসমাদানাতি মিচ্ছাদিট্ঠিৰসেন সমাদিন্ননানাৰিধকম্মা, যে চ মিচ্ছাদিট্ঠিমূলকেসু কাযকম্মাদীসু অঞ্ঞেপি সমাদপেন্তি. এত্থ চ ৰচীদুচ্চরিতগ্গহণেনেৰ অরিযূপৰাদে মনোদুচ্চরিতগ্গহণেন চ মিচ্ছাদিট্ঠিযা সঙ্গহিতাযপি ইমেসং দ্ৰিন্নং পুন ৰচনং ¶ মহাসাৰজ্জভাৰদস্সনত্থন্তি ৰেদিতব্বং. মহাসাৰজ্জো হি অরিযূপৰাদো, আনন্তরিযসদিসত্তা. ৰুত্তম্পি চেতং ‘‘সেয্যথাপি, সারিপুত্ত, ভিক্খু সীলসম্পন্নো সমাধিসম্পন্নো পঞ্ঞাসম্পন্নো দিট্ঠেৰ ধম্মে অঞ্ঞং আরাধেয্য, এৰংসম্পদমিদং, সারিপুত্ত, ৰদামি তং ৰাচং অপ্পহায তং চিত্তং অপ্পহায তং দিট্ঠিং অপ্পটিনিস্সজ্জিত্ৰা যথাভতং নিক্খিত্তো, এৰং নিরযে’’তি (ম. নি. ১.১৪৯). মিচ্ছাদিট্ঠিতো চ মহাসাৰজ্জতরং নাম অঞ্ঞং নত্থি. যথাহ ‘‘নাহং, ভিক্খৰে, অঞ্ঞং একধম্মম্পি সমনুপস্সামি, যং এৰং মহাসাৰজ্জং, যথযিদং, ভিক্খৰে, মিচ্ছাদিট্ঠি. মিচ্ছাদিট্ঠিপরমানি, ভিক্খৰে, ৰজ্জানী’’তি (অ. নি. ১.৩১০).

কাযস্স ভেদাতি উপাদিণ্ণক্খন্ধপরিচ্চাগা. পরম্মরণাতি তদনন্তরং অভিনিব্বত্তিক্খন্ধগ্গহণে. অথ ৰা কাযস্স ভেদাতি জীৰিতিন্দ্রিযস্স উপচ্ছেদা. পরম্মরণাতি চুতিচিত্ততো উদ্ধং. অপাযন্তি এৰমাদি সব্বং নিরযৰেৰচনমেৰ.

নিরযো হি সগ্গমোক্খহেতুভূতা পুঞ্ঞসম্মতা অযা অপেতত্তা, সুখানং ৰা আযস্স অভাৰা অপাযো. দুক্খস্স গতি পটিসরণন্তি দুগ্গতি, দোসবহুলতায ৰা দুট্ঠেন কম্মুনা নিব্বত্তা গতীতি দুগ্গতি. ৰিৰসা নিপতন্তি এত্থ দুক্কটকারিনোতি ৰিনিপাতো. ৰিনস্সন্তা ৰা এত্থ পতন্তি সংভিজ্জমানঙ্গপচ্চঙ্গাতিপি ৰিনিপাতো. নত্থি এত্থ অস্সাদসঞ্ঞিতো অযোতি নিরযো.

অথ ৰা অপাযগ্গহণেন তিরচ্ছানযোনিং দীপেতি. তিরচ্ছানযোনি হি অপাযো সুগতিতো অপেতত্তা, ন দুগ্গতি মহেসক্খানং নাগরাজাদীনং সম্ভৰতো. দুগ্গতিগ্গহণেন পেত্তিৰিসযং. সো হি অপাযো চেৰ দুগ্গতি চ, সুগতিতো অপেতত্তা দুক্খস্স চ গতিভূতত্তা. ন তু ৰিনিপাতো অসুরসদিসং অৰিনিপতিতত্তা. ৰিনিপাতগ্গহণেন অসুরকাযং. সো হি যথাৰুত্তেন অত্থেন অপাযো চেৰ দুগ্গতি চ সব্বসমুস্সযেহি চ ৰিনিপতিতত্তা ৰিনিপাতোতি ৰুচ্চতি. নিরযগ্গহণেন ¶ অৰীচিআদিঅনেকপ্পকারং নিরযমেৰাতি. উপপন্নাতি উপগতা, তত্থ অভিনিব্বত্তাতি অধিপ্পাযো. ৰুত্তৰিপরিযাযেন সুক্কপক্খো ৰেদিতব্বো.

অযং ¶ পন ৰিসেসো, তত্থ সুগতিগ্গহণেন মনুস্সগতিপি সঙ্গয্হতি. সগ্গগ্গহণেন দেৰগতিযেৰ. তত্থ সুন্দরা গতীতি সুগতি. রূপাদীহি ৰিসযেহি সুট্ঠু অগ্গোতি সগ্গো. সো সব্বোপি লুজ্জনপলুজ্জনট্ঠেন লোকোতি অযং ৰচনত্থো.

‘‘ইতি দিব্বেন চক্খুনা’’তিআদি সব্বং নিগমনৰচনং. এৰং দিব্বেন চক্খুনা…পে… পস্সতীতি অযমেত্থ সঙ্খেপত্থো.

৪১২. এৰং পস্সিতুকামেন পন আদিকম্মিকেন কুলপুত্তেন কসিণারম্মণং অভিঞ্ঞাপাদকজ্ঝানং সব্বাকারেন অভিনীহারক্খমং কত্ৰা ‘‘তেজোকসিণং, ওদাতকসিণং, আলোককসিণ’’ন্তি ইমেসু তীসু কসিণেসু অঞ্ঞতরং আসন্নং কাতব্বং. উপচারজ্ঝানগোচরং কত্ৰা ৰড্ঢেত্ৰা ঠপেতব্বং. ন তত্থ অপ্পনা উপ্পাদেতব্বাতি অধিপ্পাযো. সচে হি উপ্পাদেতি, পাদকজ্ঝাননিস্সযং হোতি, ন পরিকম্মনিস্সযং. ইমেসু চ পন তীসু আলোককসিণংযেৰ সেট্ঠতরং. তস্মা তং ৰা ইতরেসং ৰা অঞ্ঞতরং কসিণনিদ্দেসে ৰুত্তনযেন উপ্পাদেত্ৰা উপচারভূমিযংযেৰ ঠত্ৰা ৰড্ঢেতব্বং. ৰড্ঢনানযোপি চস্স তত্থ ৰুত্তনযেনেৰ ৰেদিতব্বো.

ৰড্ঢিতট্ঠানস্স অন্তোযেৰ রূপগতং পস্সিতব্বং. রূপগতং পস্সতো পনস্স পরিকম্মস্স ৰারো অতিক্কমতি. ততো আলোকো অন্তরধাযতি. তস্মিং অন্তরহিতে রূপগতম্পি ন দিস্সতি. অথানেন পুনপ্পুনং পাদকজ্ঝানমেৰ পৰিসিত্ৰা ততো ৰুট্ঠায আলোকো ফরিতব্বো. এৰং অনুক্কমেন আলোকো থামগতো হোতীতি এত্থ আলোকো হোতূতি যত্তকং ঠানং পরিচ্ছিন্দতি, তত্থ আলোকো তিট্ঠতিযেৰ. দিৰসম্পি নিসীদিত্ৰা পস্সতো রূপদস্সনং হোতি. রত্তিং তিণুক্কায মগ্গপটিপন্নো চেত্থ পুরিসো ওপম্মং.

একো কির রত্তিং তিণুক্কায মগ্গং পটিপজ্জি. তস্স সা তিণুক্কা ৰিজ্ঝাযি. অথস্স সমৰিসমানি ন পঞ্ঞাযিংসু. সো তং তিণুক্কং ভূমিযং ঘংসিত্ৰা তিণুক্কা পুন উজ্জালেসি. সা পজ্জলিত্ৰা পুরিমালোকতো মহন্ততরং আলোকং অকাসি. এৰং পুনপ্পুনং ৰিজ্ঝাতং ¶ উজ্জালযতো কমেন সূরিযো উট্ঠাসি. সূরিযে উট্ঠিতে উক্কায কম্মং নত্থীতি তং ছড্ডেত্ৰা দিৰসম্পি অগমাসি. তত্থ উক্কালোকো ৰিয পরিকম্মকালে কসিণালোকো. উক্কায ¶ ৰিজ্ঝাতায সমৰিসমানং অদস্সনং ৰিয রূপগতং পস্সতো পরিকম্মস্স ৰারাতিক্কমেন আলোকে অন্তরহিতে রূপগতানং অদস্সনং. উক্কায ঘংসনং ৰিয পুনপ্পুনং পৰেসনং. উক্কায পুরিমালোকতো মহন্ততরালোককরণং ৰিয পুন পরিকম্মং করোতো বলৰতরালোকফরণং. সূরিযুট্ঠানং ৰিয থামগতালোকস্স যথাপরিচ্ছেদেন ঠানং. তিণুক্কং ছড্ডেত্ৰা দিৰসম্পি গমনং ৰিয পরিত্তালোকং ছড্ডেত্ৰা থামগতেনালোকেন দিৰসম্পি রূপদস্সনং.

তত্থ যদা তস্স ভিক্খুনো মংসচক্খুস্স অনাপাথগতং অন্তোকুচ্ছিগতং হদযৰত্থুনিস্সিতং হেট্ঠাপথৰীতলনিস্সিতং তিরোকুট্টপব্বতপাকারগতং পরচক্কৰাল়গতন্তি ইদং রূপং ঞাণচক্খুস্স আপাথং আগচ্ছতি, মংসচক্খুনা দিস্সমানং ৰিয হোতি, তদা দিব্বচক্খু উপ্পন্নং হোতীতি ৰেদিতব্বং. তদেৰ চেত্থ রূপদস্সনসমত্থং, ন পুব্বভাগচিত্তানি.

তং পনেতং পুথুজ্জনস্স পরিবন্ধো হোতি. কস্মা? সো হি যস্মা যত্থ যত্থ আলোকো হোতূতি অধিট্ঠাতি, তং তং পথৰীসমুদ্দপব্বতে ৰিনিৰিজ্ঝিত্ৰাপি একালোকং হোতি, অথস্স তত্থ ভযানকানি যক্খরক্খসাদিরূপানি পস্সতো ভযং উপ্পজ্জতি. যেন চিত্তৰিক্খেপং পত্ৰা ঝানৰিব্ভন্তকো হোতি, তস্মা রূপদস্সনে অপ্পমত্তেন ভৰিতব্বং.

তত্রাযং দিব্বচক্খুনো উপ্পত্তিক্কমো. ৰুত্তপ্পকারমেতং রূপমারম্মণং কত্ৰা মনোদ্ৰারাৰজ্জনে উপ্পজ্জিত্ৰা নিরুদ্ধে তদেৰ রূপং আরম্মণং কত্ৰা চত্তারি পঞ্চ ৰা জৰনানি উপ্পজ্জন্তীতি সব্বং পুরিমনযেনেৰ ৰেদিতব্বং. ইধাপি পুব্বভাগচিত্তানি সৰিতক্কসৰিচারানি কামাৰচরানি. পরিযোসানে অত্থসাধকচিত্তং চতুত্থজ্ঝানিকং রূপাৰচরং. তেন সহজাতং ঞাণং সত্তানং চুতূপপাতে ঞাণন্তিপি দিব্বচক্খুঞাণন্তিপি ৰুচ্চতীতি.

চুতূপপাতঞাণকথা নিট্ঠিতা.

পকিণ্ণককথা

৪১৩.

ইতি ¶ পঞ্চক্খন্ধৰিদূ, পঞ্চ অভিঞ্ঞা অৰোচ যা নাথো;

তা ঞত্ৰা তাসু অযং, পকিণ্ণককথাপি ৰিঞ্ঞেয্যা.

এতাসু ¶ হি যদেতং চুতূপপাতঞাণসঙ্খাতং দিব্বচক্খু, তস্স অনাগতংসঞাণঞ্চ যথাকম্মুপগঞাণঞ্চাতি দ্ৰেপি পরিভণ্ডঞাণানি হোন্তি. ইতি ইমানি চ দ্ৰে ইদ্ধিৰিধাদীনি চ পঞ্চাতি সত্ত অভিঞ্ঞাঞাণানি ইধাগতানি. ইদানি তেসং আরম্মণৰিভাগে অসম্মোহত্থং –

আরম্মণত্তিকা ৰুত্তা, যে চত্তারো মহেসিনা;

সত্তন্নমপি ঞাণানং, পৰত্তিং তেসু দীপযে.

তত্রাযং দীপনা. চত্তারো হি আরম্মণত্তিকা মহেসিনা ৰুত্তা. কতমে চত্তারো? পরিত্তারম্মণত্তিকো, মগ্গারম্মণত্তিকো, অতীতারম্মণত্তিকো, অজ্ঝত্তারম্মণত্তিকোতি (ধ. স. তিকমাতিকা ১৩, ১৬, ১৯, ২১).

৪১৪. তত্থ ইদ্ধিৰিধঞাণং পরিত্তমহগ্গতঅতীতানাগতপচ্চুপ্পন্নঅজ্ঝত্তবহিদ্ধারম্মণৰসেন সত্তসু আরম্মণেসু পৰত্ততি. কথং? তঞ্হি যদা কাযং চিত্তসন্নিস্সিতং কত্ৰা অদিস্সমানেন কাযেন গন্তুকামো চিত্তৰসেন কাযং পরিণামেতি, মহগ্গতচিত্তে সমোদহতি সমারোপেতি, তদা উপযোগলদ্ধং আরম্মণং হোতীতি কত্ৰা রূপকাযারম্মণতো পরিত্তারম্মণং হোতি. যদা চিত্তং কাযসন্নিস্সিতং কত্ৰা দিস্সমানেন কাযেন গন্তুকামো কাযৰসেন চিত্তং পরিণামেতি, পাদকজ্ঝানচিত্তং রূপকাযে সমোদহতি সমারোপেতি, তদা উপযোগলদ্ধং আরম্মণং হোতীতি কত্ৰা মহগ্গতচিত্তারম্মণতো মহগ্গতারম্মণং হোতি.

যস্মা পন তদেৰ চিত্তং অতীতং নিরুদ্ধং আরম্মণং করোতি, তস্মা অতীতারম্মণং হোতি. মহাধাতুনিধানে মহাকস্সপত্থেরাদীনং ৰিয অনাগতং অধিট্ঠহন্তানং অনাগতারম্মণং হোতি. মহাকস্সপত্থেরো কির মহাধাতুনিধানং করোন্তো ‘‘অনাগতে অট্ঠারসৰস্সাধিকানি দ্ৰেৰস্সসতানি ইমে গন্ধা মা সুস্সিংসু, পুপ্ফানি মা মিলাযিংসু, দীপা মা নিব্বাযিংসূ’’তি ¶ (ধ. স. অট্ঠ. ১৪৩৪) অধিট্ঠহি. সব্বং তথেৰ অহোসি. অস্সগুত্তত্থেরো ৰত্তনিযসেনাসনে ভিক্খুসঙ্ঘং সুক্খভত্তং ভুঞ্জমানং দিস্ৰা উদকসোণ্ডিং দিৰসে দিৰসে পুরেভত্তে দধিরসং হোতূতি অধিট্ঠাসি. পুরেভত্তে গহিতং দধিরসং হোতি. পচ্ছাভত্তে পাকতিকউদকমেৰ (ধ. স. অট্ঠ. ১৪৩৪). কাযং পন চিত্তসন্নিস্সিতং ¶ কত্ৰা অদিস্সমানেন কাযেন গমনকালে পচ্চুপ্পন্নারম্মণং হোতি.

কাযৰসেন চিত্তং, চিত্তৰসেন ৰা কাযং পরিণামনকালে অত্তনো কুমারকৰণ্ণাদিনিম্মানকালে চ সকাযচিত্তানং আরম্মণকরণতো অজ্ঝত্তারম্মণং হোতি. বহিদ্ধা হত্থিঅস্সাদিদস্সনকালে পন বহিদ্ধারম্মণন্তি এৰং তাৰ ইদ্ধিৰিধঞাণস্স সত্তসু আরম্মণেসু পৰত্তি ৰেদিতব্বা.

৪১৫. দিব্বসোতধাতুঞাণং পরিত্তপচ্চুপ্পন্নঅজ্ঝত্তবহিদ্ধারম্মণৰসেন চতূসু আরম্মণেসু পৰত্ততি. কথং? তঞ্হি যস্মা সদ্দং আরম্মণং করোতি, সদ্দো চ পরিত্তো, তস্মা পরিত্তারম্মণং হোতি. ৰিজ্জমানংযেৰ পন সদ্দং আরম্মণং কত্ৰা পৰত্তনতো পচ্চুপ্পন্নারম্মণং হোতি. তং অত্তনো কুচ্ছিসদ্দসৰনকালে অজ্ঝত্তারম্মণং. পরেসং সদ্দসৰনকালে বহিদ্ধারম্মণন্তি এৰং দিব্বসোতধাতুঞাণস্স চতূসু আরম্মণেসু পৰত্তি ৰেদিতব্বা.

৪১৬. চেতোপরিযঞাণং পরিত্তমহগ্গতঅপ্পমাণমগ্গঅতীতানাগতপচ্চুপ্পন্নবহিদ্ধারম্মণৰসেন অট্ঠসু আরম্মণেসু পৰত্ততি. কথং? তঞ্হি পরেসং কামাৰচরচিত্তজাননকালে পরিত্তারম্মণং হোতি. রূপাৰচরঅরূপাৰচরচিত্তজাননকালে মহগ্গতারম্মণং হোতি. মগ্গফলজাননকালে অপ্পমাণারম্মণং হোতি.

এত্থ চ পুথুজ্জনো সোতাপন্নস্স চিত্তং ন জানাতি. সোতাপন্নো ৰা সকদাগামিস্সাতি এৰং যাৰ অরহতো নেতব্বং. অরহা পন সব্বেসং চিত্তং জানাতি. অঞ্ঞোপি চ উপরিমো হেট্ঠিমস্সাতি অযং ৰিসেসো ৰেদিতব্বো. মগ্গচিত্তারম্মণকালে মগ্গারম্মণং হোতি. যদা পন অতীতে সত্তদিৰসব্ভন্তরে চ অনাগতে সত্তদিৰসব্ভন্তরে চ পরেসং চিত্তং জানাতি, তদা অতীতারম্মণং অনাগতারম্মণঞ্চ হোতি.

কথং ¶ পচ্চুপ্পন্নারম্মণং হোতি. পচ্চুপ্পন্নং নাম তিৰিধং – খণপচ্চুপ্পন্নং, সন্ততিপচ্চুপ্পন্নং, অদ্ধাপচ্চুপ্পন্নঞ্চ. তত্থ উপ্পাদট্ঠিতিভঙ্গপ্পত্তং খণপচ্চুপ্পন্নং. একদ্ৰেসন্ততিৰারপরিযাপন্নং সন্ততিপচ্চুপ্পন্নং. তত্থ অন্ধকারে নিসীদিত্ৰা আলোকট্ঠানং গতস্স ন তাৰ আরম্মণং পাকটং হোতি, যাৰ পন তং পাকটং হোতি ¶ , এত্থন্তরে একদ্ৰেসন্ততিৰারা ৰেদিতব্বা. আলোকট্ঠানে ৰিচরিত্ৰা ওৰরকং পৰিট্ঠস্সাপি ন তাৰ সহসা রূপং পাকটং হোতি, যাৰ পন তং পাকটং হোতি, এত্থন্তরে একদ্ৰেসন্ততিৰারা ৰেদিতব্বা. দূরে ঠত্ৰা পন রজকানং হত্থৰিকারং, ঘণ্ডিভেরীআকোটনৰিকারঞ্চ দিস্ৰাপি ন তাৰ সদ্দং সুণাতি, যাৰ পন তং সুণাতি, এতস্মিম্পি অন্তরে একদ্ৰেসন্ততিৰারা ৰেদিতব্বা. এৰং তাৰ মজ্ঝিমভাণকা.

সংযুত্তভাণকা পন রূপসন্ততি অরূপসন্ততীতি দ্ৰে সন্ততিযো ৰত্ৰা উদকং অক্কমিত্ৰা গতস্স যাৰ তীরে অক্কন্তউদকলেখা ন ৰিপ্পসীদতি, অদ্ধানতো আগতস্স যাৰ কাযে উসুমভাৰো ন ৰূপসম্মতি, আতপা আগন্ত্ৰা গব্ভং পৰিট্ঠস্স যাৰ অন্ধকারভাৰো ন ৰিগচ্ছতি, অন্তোগব্ভে কম্মট্ঠানং মনসি করিত্ৰা দিৰা ৰাতপানং ৰিৰরিত্ৰা ওলোকেন্তস্স যাৰ অক্খীনং ফন্দনভাৰো ন ৰূপসম্মতি, অযং রূপসন্ততি নাম. দ্ৰে তযো জৰনৰারা অরূপসন্ততি নামাতি ৰত্ৰা তদুভযম্পি সন্ততিপচ্চুপ্পন্নং নামাতি ৰদন্তি.

একভৰপরিচ্ছিন্নং পন অদ্ধাপচ্চুপ্পন্নং নাম. যং সন্ধায ভদ্দেকরত্তসুত্তে ‘‘যো চাৰুসো, মনো যে চ ধম্মা উভযমেতং পচ্চুপ্পন্নং, তস্মিং চে পচ্চুপ্পন্নে ছন্দরাগপ্পটিবদ্ধং হোতি ৰিঞ্ঞাণং, ছন্দরাগপ্পটিবদ্ধত্তা ৰিঞ্ঞাণস্স তদভিনন্দতি, তদভিনন্দন্তো পচ্চুপ্পন্নেসু ধম্মেসু সংহীরতী’’তি (ম. নি. ৩.২৮৪) ৰুত্তং. সন্ততিপচ্চুপ্পন্নঞ্চেত্থ অট্ঠকথাসু আগতং. অদ্ধাপচ্চুপ্পন্নং সুত্তে.

তত্থ কেচি খণপচ্চুপ্পন্নং চিত্তং চেতোপরিযঞাণস্স আরম্মণং হোতীতি ৰদন্তি. কিং কারণা? যস্মা ইদ্ধিমতো চ পরস্স চ একক্খণে চিত্তং উপ্পজ্জতীতি. ইদঞ্চ নেসং ওপম্মং, যথা আকাসে খিত্তে পুপ্ফমুট্ঠিম্হি অৰস্সং একং পুপ্ফং একস্স ৰণ্টেন ৰণ্টং পটিৰিজ্ঝতি, এৰং পরস্স চিত্তং জানিস্সামীতি রাসিৰসেন মহাজনস্স চিত্তে আৰজ্জিতে অৰস্সং একস্স চিত্তং একেন চিত্তেন উপ্পাদক্খণে ৰা ঠিতিক্খণে ৰা ভঙ্গক্খণে ৰা পটিৰিজ্ঝতীতি. তং পন ৰস্সসতম্পি ৰস্সসহস্সম্পি আৰজ্জন্তো যেন চ চিত্তেন আৰজ্জতি ¶ , যেন চ জানাতি. তেসং দ্ৰিন্নং সহঠানাভাৰতো আৰজ্জনজৰনানঞ্চ অনিট্ঠট্ঠানে নানারম্মণভাৰপ্পত্তিদোসতো অযুত্তন্তি অট্ঠকথাসু পটিক্খিত্তং.

সন্ততিপচ্চুপ্পন্নং ¶ পন অদ্ধাপচ্চুপ্পন্নঞ্চ আরম্মণং হোতীতি ৰেদিতব্বং. তত্থ যং ৰত্তমানজৰনৰীথিতো অতীতানাগতৰসেন দ্ৰিত্তিজৰনৰীথিপরিমাণে কালে পরস্স চিত্তং, তং সব্বম্পি সন্ততিপচ্চুপ্পন্নং নাম. ‘‘অদ্ধাপচ্চুপ্পন্নং পন জৰনৰারেন দীপেতব্ব’’ন্তি সংযুত্তট্ঠকথাযং ৰুত্তং. তং সুট্ঠু ৰুত্তং.

তত্রাযং দীপনা, ইদ্ধিমা পরস্স চিত্তং জানিতুকামো আৰজ্জতি, আৰজ্জনং খণপচ্চুপ্পন্নং আরম্মণং কত্ৰা তেনেৰ সহ নিরুজ্ঝতি. ততো চত্তারি পঞ্চ ৰা জৰনানি. যেসং পচ্ছিমং ইদ্ধিচিত্তং, সেসানি কামাৰচরানি, তেসং সব্বেসম্পি তদেৰ নিরুদ্ধং চিত্তমারম্মণং হোতি, ন চ তানি নানারম্মণানি হোন্তি, অদ্ধাৰসেন পচ্চুপ্পন্নারম্মণত্তা. একারম্মণত্তেপি চ ইদ্ধিচিত্তমেৰ পরস্স চিত্তং জানাতি, ন ইতরানি. যথা চক্খুদ্ৰারে চক্খুৰিঞ্ঞাণমেৰ রূপং পস্সতি, ন ইতরানীতি. ইতি ইদং সন্ততিপচ্চুপ্পন্নস্স চেৰ অদ্ধাপচ্চুপ্পন্নস্স চ ৰসেন পচ্চুপ্পন্নারম্মণং হোতি. যস্মা ৰা সন্ততিপচ্চুপ্পন্নম্পি অদ্ধাপচ্চুপ্পন্নেযেৰ পততি, তস্মা অদ্ধাপচ্চুপ্পন্নৰসেনেৰেতং পচ্চুপ্পন্নারম্মণন্তি ৰেদিতব্বং. পরস্স চিত্তারম্মণত্তাযেৰ পন বহিদ্ধারম্মণং হোতীতি এৰং চেতোপরিযঞাণস্স অট্ঠসু আরম্মণেসু পৰত্তি ৰেদিতব্বা.

৪১৭. পুব্বেনিৰাসঞাণং পরিত্তমহগ্গতঅপ্পমাণমগ্গঅতীতঅজ্ঝত্তবহিদ্ধানৰত্তব্বারম্মণৰসেন অট্ঠসু আরম্মণেসু পৰত্ততি. কথং? তঞ্হি কামাৰচরক্খন্ধানুস্সরণকালে পরিত্তারম্মণং হোতি. রূপাৰচরারূপাৰচরক্খন্ধানুস্সরণকালে মহগ্গতারম্মণং. অতীতে অত্তনা পরেহি ৰা ভাৰিতমগ্গং সচ্ছিকতফলঞ্চ অনুস্সরণকালে অপ্পমাণারম্মণং. ভাৰিতমগ্গমেৰ অনুস্সরণকালে মগ্গারম্মণং. নিযমতো পনেতং অতীতারম্মণমেৰ.

তত্থ কিঞ্চাপি চেতোপরিযঞাণযথাকম্মুপগঞাণানিপি অতীতারম্মণানি হোন্তি, অথ খো তেসং চেতোপরিযঞাণস্স সত্তদিৰসব্ভন্তরাতীতং চিত্তমেৰ আরম্মণং. তঞ্হি অঞ্ঞং খন্ধং ৰা খন্ধপটিবদ্ধং ৰা ন জানাতি. মগ্গসম্পযুত্তচিত্তারম্মণত্তা পন পরিযাযতো মগ্গারম্মণন্তি ¶ ৰুত্তং. যথাকম্মুপগঞাণস্স চ অতীতং চেতনামত্তমেৰ আরম্মণং. পুব্বেনিৰাসঞাণস্স পন অতীতা খন্ধা খন্ধপটিবদ্ধঞ্চ কিঞ্চি অনারম্মণং নাম নত্থি ¶ . তঞ্হি অতীতক্খন্ধখন্ধপটিবদ্ধেসু ধম্মেসু সব্বঞ্ঞুতঞ্ঞাণগতিকং হোতীতি অযং ৰিসেসো ৰেদিতব্বো. অযমেত্থ অট্ঠকথানযো. যস্মা পন ‘‘কুসলা খন্ধা ইদ্ধিৰিধঞাণস্স চেতোপরিযঞাণস্স পুব্বেনিৰাসানুস্সতিঞাণস্স যথাকম্মুপগঞাণস্স অনাগতংসঞাণস্স আরম্মণপচ্চযেন পচ্চযো’’তি (পট্ঠা. ১.১.৪০৪) পট্ঠানে ৰুত্তং. তস্মা চত্তারোপি খন্ধা চেতোপরিযঞাণযথাকম্মুপগঞাণানং আরম্মণা হোন্তি. তত্রাপি যথাকম্মুপগঞাণস্স কুসলাকুসলা এৰাতি.

অত্তনো খন্ধানুস্সরণকালে পনেতং অজ্ঝত্তারম্মণং. পরস্স খন্ধানুস্সরণকালে বহিদ্ধারম্মণং. ‘‘অতীতে ৰিপস্সী ভগৰা অহোসি. তস্স মাতা বন্ধুমতী, পিতা বন্ধুমা’’তিআদিনা (দী. নি. ২.১২) নযেন নামগোত্তপথৰীনিমিত্তাদিঅনুস্সরণকালে নৰত্তব্বারম্মণং হোতি. নামগোত্তন্তি চেত্থ খন্ধূপনিবন্ধো সম্মুতিসিদ্ধো ব্যঞ্জনত্থো দট্ঠব্বো, ন ব্যঞ্জনং. ব্যঞ্জনঞ্হি সদ্দাযতনসঙ্গহিতত্তা পরিত্তং হোতি. যথাহ ‘‘নিরুত্তিপটিসম্ভিদা পরিত্তারম্মণা’’তি (ৰিভ. ৭৪৯). অযমেত্থ অম্হাকং খন্তি. এৰং পুব্বেনিৰাসঞাণস্স অট্ঠসু আরম্মণেসু পৰত্তি ৰেদিতব্বা.

৪১৮. দিব্বচক্খুঞাণং পরিত্তপচ্চুপ্পন্নঅজ্ঝত্তবহিদ্ধারম্মণৰসেন চতূসু আরম্মণেসু পৰত্ততি. কথং? তঞ্হি যস্মা রূপং আরম্মণং করোতি, রূপঞ্চ পরিত্তং, তস্মা পরিত্তারম্মণং হোতি. ৰিজ্জমানেযেৰ চ রূপে পৰত্তত্তা পচ্চুপ্পন্নারম্মণং. অত্তনো কুচ্ছিগতাদিরূপদস্সনকালে অজ্ঝত্তারম্মণং. পরস্স রূপদস্সনকালে বহিদ্ধারম্মণন্তি এৰং দিব্বচক্খুঞাণস্স চতূসু আরম্মণেসু পৰত্তি ৰেদিতব্বা.

৪১৯. অনাগতংসঞাণং পরিত্তমহগ্গতঅপ্পমাণমগ্গঅনাগতঅজ্ঝত্তবহিদ্ধানৰত্তব্বারম্মণৰসেন অট্ঠসু আরম্মণেসু পৰত্ততি. কথং? তঞ্হি ‘‘অযং অনাগতে কামাৰচরে নিব্বত্তিস্সতী’’তি জাননকালে পরিত্তারম্মণং হোতি. ‘‘রূপাৰচরে অরূপাৰচরে ৰা নিব্বত্তিস্সতী’’তি জাননকালে মহগ্গতারম্মণং. ‘‘মগ্গং ভাৰেস্সতি, ফলং সচ্ছিকরিস্সতী’’তি জাননকালে ¶ অপ্পমাণারম্মণং. ‘‘মগ্গং ভাৰেস্সতি’’চ্চেৰ জাননকালে মগ্গারম্মণং. নিযমতো পন তং অনাগতারম্মণমেৰ.

তত্থ ¶ কিঞ্চাপি চেতোপরিযঞাণম্পি অনাগতারম্মণং হোতি, অথ খো তস্স সত্তদিৰসব্ভন্তরানাগতং চিত্তমেৰ আরম্মণং. তঞ্হি অঞ্ঞং খন্ধং ৰা খন্ধপটিবদ্ধং ৰা ন জানাতি. অনাগতংসঞাণস্স পুব্বেনিৰাসঞাণে ৰুত্তনযেন অনাগতে অনারম্মণং নাম নত্থি. ‘‘অহং অমুত্র নিব্বত্তিস্সামী’’তি জাননকালে অজ্ঝত্তারম্মণং. ‘‘অসুকো অমুত্র নিব্বত্তিস্সতী’’তি জাননকালে বহিদ্ধারম্মণং. ‘‘অনাগতে মেত্তেয্যো ভগৰা উপ্পজ্জিস্সতি (দী. নি. ৩.১০৭). সুব্রহ্মা নামস্স ব্রাহ্মণো পিতা ভৰিস্সতি. ব্রহ্মৰতী নাম ব্রাহ্মণী মাতা’’তিআদিনা পন নযেন নামগোত্তজাননকালে পুব্বেনিৰাসঞাণে ৰুত্তনযেনেৰ ন ৰত্তব্বারম্মণং হোতীতি এৰং অনাগতংসঞাণস্স অট্ঠসু আরম্মণেসু পৰত্তি ৰেদিতব্বা.

৪২০. যথাকম্মুপগঞাণং পরিত্তমহগ্গতঅতীতঅজ্ঝত্তবহিদ্ধারম্মণৰসেন পঞ্চসু আরম্মণেসু পৰত্ততি. কথং? তঞ্হি কামাৰচরকম্মজাননকালে পরিত্তারম্মণং হোতি. রূপাৰচরারূপাৰচরকম্মজাননকালে মহগ্গতারম্মণং. অতীতমেৰ জানাতীতি অতীতারম্মণং. অত্তনো কম্মং জাননকালে অজ্ঝত্তারম্মণং. পরস্স কম্মং জাননকালে বহিদ্ধারম্মণং হোতি. এৰং যথাকম্মুপগঞাণস্স পঞ্চসু আরম্মণেসু পৰত্তি ৰেদিতব্বা. যঞ্চেত্থ অজ্ঝত্তারম্মণঞ্চেৰ বহিদ্ধারম্মণঞ্চাতি ৰুত্তং, তং কালেন অজ্ঝত্তং কালেন বহিদ্ধা জাননকালে অজ্ঝত্তবহিদ্ধারম্মণম্পি হোতিযেৰাতি.

ইতি সাধুজনপামোজ্জত্থায কতে ৰিসুদ্ধিমগ্গে

অভিঞ্ঞানিদ্দেসো নাম

তেরসমো পরিচ্ছেদো.

১৪. খন্ধনিদ্দেসো

পঞ্ঞাকথা

৪২১. ইদানি ¶ ¶ যস্মা এৰং অভিঞ্ঞাৰসেন অধিগতানিসংসায থিরতরায সমাধিভাৰনায সমন্নাগতেন ভিক্খুনা সীলে পতিট্ঠায নরো সপঞ্ঞো, চিত্তং পঞ্ঞঞ্চ ভাৰযন্তি এত্থ চিত্তসীসেন নিদ্দিট্ঠো সমাধি সব্বাকারেন ভাৰিতো হোতি.

তদনন্তরা পন পঞ্ঞা ভাৰেতব্বা. সা চ অতিসঙ্খেপদেসিতত্তা ৰিঞ্ঞাতুম্পি তাৰ ন সুকরা, পগেৰ ভাৰেতুং. তস্মা তস্সা ৰিত্থারং ভাৰনানযঞ্চ দস্সেতুং ইদং পঞ্হাকম্মং হোতি.

কা পঞ্ঞা, কেনট্ঠেন পঞ্ঞা, কানস্সা লক্খণরসপচ্চুপট্ঠানপদট্ঠানানি, কতিৰিধা পঞ্ঞা, কথং ভাৰেতব্বা, পঞ্ঞাভাৰনায কো আনিসংসোতি?

৪২২. তত্রিদং ৰিস্সজ্জনং, কা পঞ্ঞাতি পঞ্ঞা বহুৰিধা নানপ্পকারা. তং সব্বং ৰিভাৰযিতুং আরব্ভমানং ৰিস্সজ্জনং অধিপ্পেতঞ্চেৰ অত্থং ন সাধেয্য, উত্তরি চ ৰিক্খেপায সংৰত্তেয্য, তস্মা ইধ অধিপ্পেতমেৰ সন্ধায ৰদাম. কুসলচিত্তসম্পযুত্তং ৰিপস্সনাঞাণং পঞ্ঞা.

৪২৩. কেনট্ঠেন পঞ্ঞাতি পজাননট্ঠেন পঞ্ঞা. কিমিদং পজাননং নাম? সঞ্জাননৰিজাননাকারৰিসিট্ঠং নানপ্পকারতো জাননং. সঞ্ঞাৰিঞ্ঞাণপঞ্ঞানং হি সমানেপি জাননভাৰে, সঞ্ঞা ‘‘নীলং পীতক’’ন্তি আরম্মণসঞ্জাননমত্তমেৰ হোতি. ‘‘অনিচ্চং দুক্খমনত্তা’’তি লক্খণপটিৰেধং পাপেতুং ন সক্কোতি. ৰিঞ্ঞাণং ‘‘নীলং পীতক’’ন্তি আরম্মণঞ্চ জানাতি, লক্খণপটিৰেধঞ্চ পাপেতি. উস্সক্কিত্ৰা পন মগ্গপাতুভাৰং পাপেতুং ন ¶ সক্কোতি. পঞ্ঞা ৰুত্তনযৰসেন আরম্মণঞ্চ জানাতি, লক্খণপটিৰেধঞ্চ পাপেতি, উস্সক্কিত্ৰা মগ্গপাতুভাৰঞ্চ পাপেতি.

যথা হি হেরঞ্ঞিকফলকে ঠপিতং কহাপণরাসিং একো অজাতবুদ্ধিদারকো, একো গামিকপুরিসো, একো হেরঞ্ঞিকোতি তীসু জনেসু পস্সমানেসু ¶ অজাতবুদ্ধিদারকো কহাপণানং চিত্তৰিচিত্তদীঘচতুরস্সপরিমণ্ডলভাৰমত্তমেৰ জানাতি, ‘‘ইদং মনুস্সানং উপভোগপরিভোগং রতনসম্মত’’ন্তি ন জানাতি. গামিকপুরিসো চিত্তৰিচিত্তাদিভাৰং জানাতি, ‘‘ইদং মনুস্সানং উপভোগপরিভোগং রতনসম্মত’’ন্তি চ. ‘‘অযং ছেকো, অযং কূটো, অযং অদ্ধসারো’’তি ইমং পন ৰিভাগং ন জানাতি. হেরঞ্ঞিকো সব্বেপি তে পকারে জানাতি, জানন্তো চ কহাপণং ওলোকেত্ৰাপি জানাতি, আকোটিতস্স সদ্দং সুত্ৰাপি, গন্ধং ঘাযিত্ৰাপি, রসং সাযিত্ৰাপি, হত্থেন ধারযিত্ৰাপি, অসুকস্মিং নাম গামে ৰা নিগমে ৰা নগরে ৰা পব্বতে ৰা নদীতীরে ৰা কতোতিপি, অসুকাচরিযেন কতোতিপি জানাতি, এৰংসম্পদমিদং ৰেদিতব্বং.

সঞ্ঞা হি অজাতবুদ্ধিনো দারকস্স কহাপণদস্সনং ৰিয হোতি, নীলাদিৰসেন আরম্মণস্স উপট্ঠানাকারমত্তগহণতো. ৰিঞ্ঞাণং গামিকস্স পুরিসস্স কহাপণদস্সনমিৰ হোতি, নীলাদিৰসেন আরম্মণাকারগহণতো, উদ্ধংপি চ লক্খণপটিৰেধসম্পাপনতো. পঞ্ঞা হেরঞ্ঞিকস্স কহাপণদস্সনমিৰ হোতি, নীলাদিৰসেন আরম্মণাকারং গহেত্ৰা, লক্খণপটিৰেধঞ্চ পাপেত্ৰা, ততো উদ্ধম্পি মগ্গপাতুভাৰপাপনতো. তস্মা যদেতং সঞ্জাননৰিজাননাকারৰিসিট্ঠং নানপ্পকারতো জাননং. ইদং পজাননন্তি ৰেদিতব্বং. ইদং সন্ধায হি এতং ৰুত্তং ‘‘পজাননট্ঠেন পঞ্ঞা’’তি.

সা পনেসা যত্থ সঞ্ঞাৰিঞ্ঞাণানি, ন তত্থ একংসেন হোতি. যদা পন হোতি, তদা অৰিনিব্ভুত্তা তেহি ধম্মেহি ‘‘অযং সঞ্ঞা, ইদং ৰিঞ্ঞাণং, অযং পঞ্ঞা’’তি ৰিনিব্ভুজ্জিত্ৰা অলব্ভনেয্যনানত্তা সুখুমা দুদ্দসা. তেনাহ আযস্মা নাগসেনো ‘‘দুক্করং, মহারাজ, ভগৰতা কত’’ন্তি. কিং, ভন্তে, নাগসেন ভগৰতা দুক্করং কতন্তি? ‘দুক্করং, মহারাজ, ভগৰতা কতং যং অরূপীনং চিত্তচেতসিকানং ধম্মানং একারম্মণে পৰত্তমানানং ৰৰত্থানং অক্খাতং অযং ফস্সো, অযং ৰেদনা, অযং সঞ্ঞা, অযং চেতনা, ইদং চিত্ত’’’ন্তি (মি. প. ২.৭.১৬).

৪২৪. কানস্সা ¶ ¶ লক্খণরসপচ্চুপট্ঠানপদট্ঠানানীতি এত্থ পন ধম্মসভাৰপটিৰেধলক্খণা পঞ্ঞা, ধম্মানং সভাৰপটিচ্ছাদকমোহন্ধকারৰিদ্ধংসনরসা, অসম্মোহপচ্চুপট্ঠানা. ‘‘সমাহিতো যথাভূতং জানাতি পস্সতী’’তি (অ. নি. ১০.২) ৰচনতো পন সমাধি তস্সা পদট্ঠানং.

পঞ্ঞাপভেদকথা

৪২৫. কতিৰিধা পঞ্ঞাতি ধম্মসভাৰপটিৰেধলক্খণেন তাৰ একৰিধা. লোকিযলোকুত্তরৰসেন দুৰিধা. তথা সাসৰানাসৰাদিৰসেন, নামরূপৰৰত্থাপনৰসেন, সোমনস্সুপেক্খাসহগতৰসেন, দস্সনভাৰনাভূমিৰসেন চ. তিৰিধা চিন্তাসুতভাৰনামযৰসেন. তথা পরিত্তমহগ্গতঅপ্পমাণারম্মণৰসেন, আযাপাযউপাযকোসল্লৰসেন, অজ্ঝত্তাভিনিৰেসাদিৰসেন চ. চতুব্বিধা চতূসু সচ্চেসু ঞাণৰসেন চতুপটিসম্ভিদাৰসেন চাতি.

৪২৬. তত্থ একৰিধকোট্ঠাসো উত্তানত্থোযেৰ. দুৰিধকোট্ঠাসে লোকিযমগ্গসম্পযুত্তা লোকিযা. লোকুত্তরমগ্গসম্পযুত্তা লোকুত্তরাতি এৰং লোকিযলোকুত্তরৰসেন দুৰিধা.

দুতিযদুকে আসৰানং আরম্মণভূতা সাসৰা. তেসং অনারম্মণা অনাসৰা. অত্থতো পনেসা লোকিযলোকুত্তরাৰ হোতি. আসৰসম্পযুত্তা সাসৰা. আসৰৰিপ্পযুত্তা অনাসৰাতিআদীসুপি এসেৰ নযো. এৰং সাসৰানাসৰাদিৰসেন দুৰিধা.

ততিযদুকে যা ৰিপস্সনং আরভিতুকামস্স চতুন্নং অরূপক্খন্ধানং ৰৰত্থাপনে পঞ্ঞা, অযং নামৰৰত্থাপনপঞ্ঞা. যা রূপক্খন্ধস্স ৰৰত্থাপনে পঞ্ঞা, অযং রূপৰৰত্থাপনপঞ্ঞাতি এৰং নামরূপৰৰত্থাপনৰসেন দুৰিধা.

চতুত্থদুকে দ্ৰীসু কামাৰচরকুসলচিত্তেসু সোল়সসু চ পঞ্চকনযেন চতুক্কজ্ঝানিকেসু মগ্গচিত্তেসু পঞ্ঞা সোমনস্সসহগতা. দ্ৰীসু কামাৰচরকুসলচিত্তেসু চতূসু চ পঞ্চমজ্ঝানিকেসু মগ্গচিত্তেসু পঞ্ঞা উপেক্খাসহগতাতি এৰং সোমনস্সুপেক্খাসহগতৰসেন দুৰিধা.

পঞ্চমদুকে ¶ পঠমমগ্গপঞ্ঞা ¶ দস্সনভূমি. অৰসেসমগ্গত্তযপঞ্ঞা ভাৰনাভূমীতি এৰং দস্সনভাৰনাভূমিৰসেন দুৰিধা.

৪২৭. তিকেসু পঠমত্তিকে পরতো অস্সুত্ৰা পটিলদ্ধপঞ্ঞা অত্তনো চিন্তাৰসেন নিপ্ফন্নত্তা চিন্তামযা. পরতো সুত্ৰা পটিলদ্ধপঞ্ঞা সুতৰসেন নিপ্ফন্নত্তা সুতমযা. যথা তথা ৰা ভাৰনাৰসেন নিপ্ফন্না অপ্পনাপ্পত্তা পঞ্ঞা ভাৰনামযা. ৰুত্তঞ্হেতং –

‘‘তত্থ কতমা চিন্তামযা পঞ্ঞা? যোগৰিহিতেসু ৰা কম্মাযতনেসু যোগৰিহিতেসু ৰা সিপ্পাযতনেসু যোগৰিহিতেসু ৰা ৰিজ্জাট্ঠানেসু কম্মস্সকতং ৰা সচ্চানুলোমিকং ৰা রূপং অনিচ্চন্তি ৰা ৰেদনা…পে… সঞ্ঞা… সঙ্খারা… ৰিঞ্ঞাণং অনিচ্চন্তি ৰা, যং এৰরূপিং অনুলোমিকং খন্তিং দিট্ঠিং রুচিং মুতিং পেক্খং ধম্মনিজ্ঝানখন্তিং পরতো অস্সুত্ৰা পটিলভতি, অযং ৰুচ্চতি চিন্তামযা পঞ্ঞা…পে… সুত্ৰা পটিলভতি, অযং ৰুচ্চতি সুতমযা পঞ্ঞা. সব্বাপি সমাপন্নস্স পঞ্ঞা ভাৰনামযা পঞ্ঞা’’তি (ৰিভ. ৭৬৮).

এৰং চিন্তাসুতভাৰনামযৰসেন তিৰিধা.

দুতিযত্তিকে কামাৰচরধম্মে আরব্ভ পৰত্তা পঞ্ঞা পরিত্তারম্মণা. রূপাৰচরারূপাৰচরে আরব্ভ পৰত্তা মহগ্গতারম্মণা. সা লোকিযৰিপস্সনা. নিব্বানং আরব্ভ পৰত্তা অপ্পমাণারম্মণা. সা লোকুত্তরৰিপস্সনাতি এৰং পরিত্তমহগ্গতাপ্পমাণারম্মণৰসেন তিৰিধা.

ততিযত্তিকে আযো নাম ৰুদ্ধি, সা দুৰিধা অনত্থহানিতো অত্থুপ্পত্তিতো চ. তত্থ কোসল্লং আযকোসল্লং. যথাহ –

‘‘তত্থ কতমং আযকোসল্লং? ইমে মে ধম্মে মনসিকরোতো অনুপ্পন্না চেৰ অকুসলা ধম্মা ন উপ্পজ্জন্তি, উপ্পন্না চ অকুসলা ধম্মা পহীযন্তি, ইমে ৰা পনিমে ধম্মে মনসিকরোতো অনুপ্পন্না চেৰ কুসলা ধম্মা উপ্পজ্জন্তি. উপ্পন্না চ কুসলা ধম্মা ভিয্যোভাৰায ৰেপুল্লায ভাৰনায পারিপূরিযা সংৰত্তন্তীতি, যা তত্থ পঞ্ঞা ¶ পজাননা…পে… অমোহো ধম্মৰিচযো সম্মাদিট্ঠি, ইদং ৰুচ্চতি আযকোসল্ল’’ন্তি (ৰিভ. ৭৭১).

অপাযোতি ¶ পন অৰুদ্ধি, সাপি দুৰিধা অত্থহানিতো চ অনত্থুপ্পত্তিতো চ. তত্থ কোসল্লং অপাযকোসল্লং. যথাহ ‘‘তত্থ কতমং অপাযকোসল্লং? ইমে ধম্মে মনসিকরোতো অনুপ্পন্না চেৰ কুসলা ধম্মা ন উপ্পজ্জন্তী’’তিআদি (ৰিভ. ৭৭১).

সব্বত্থ পন তেসং তেসং ধম্মানং উপাযেসু নিব্বত্তিকারণেসু তংখণপ্পৰত্তং ঠানুপ্পত্তিকং কোসল্লং উপাযকোসল্লং নাম. যথাহ – ‘‘সব্বাপি তত্রুপাযা পঞ্ঞা উপাযকোসল্ল’’ন্তি (ৰিভ. ৭৭১). এৰং আযাপাযউপাযকোসল্লৰসেন তিৰিধা.

চতুত্থত্তিকে অত্তনো খন্ধে গহেত্ৰা আরদ্ধা ৰিপস্সনা পঞ্ঞা অজ্ঝত্তাভিনিৰেসা. পরস্স খন্ধে বাহিরং ৰা অনিন্দ্রিযবদ্ধরূপং গহেত্ৰা আরদ্ধা বহিদ্ধাভিনিৰেসা. উভযং গহেত্ৰা আরদ্ধা অজ্ঝত্তবহিদ্ধাভিনিৰেসাতি এৰং অজ্ঝত্তাভিনিৰেসাদিৰসেন তিৰিধা.

৪২৮. চতুক্কেসু পঠমচতুক্কে দুক্খসচ্চং আরব্ভ পৰত্তং ঞাণং দুক্খে ঞাণং. দুক্খসমুদযং আরব্ভ পৰত্তং ঞাণং দুক্খসমুদযে ঞাণং. দুক্খনিরোধং আরব্ভ পৰত্তং ঞাণং দুক্খনিরোধে ঞাণং. দুক্খনিরোধগামিনিং পটিপদং আরব্ভ পৰত্তং ঞাণং দুক্খনিরোধগামিনিযা পটিপদায ঞাণন্তি এৰং চতূসু সচ্চেসু ঞাণৰসেন চতুব্বিধা.

দুতিযচতুক্কে চতস্সো পটিসম্ভিদা নাম অত্থাদীসু পভেদগতানি চত্তারি ঞাণানি. ৰুত্তঞ্হেতং – ‘‘অত্থে ঞাণং অত্থপটিসম্ভিদা. ধম্মে ঞাণং ধম্মপটিসম্ভিদা. তত্রধম্মনিরুত্তাভিলাপে ঞাণং নিরুত্তিপটিসম্ভিদা. ঞাণেসু ঞাণং পটিভানপটিসম্ভিদা’’তি (ৰিভ. ৭১৮).

তত্থ অত্থোতি সঙ্খেপতো হেতুফলস্সেতং অধিৰচনং. হেতুফলং হি যস্মা হেতুঅনুসারেন অরিযতি অধিগমিযতি সম্পাপুণিযতি, তস্মা অত্থোতি ৰুচ্চতি. পভেদতো পন যং কিঞ্চি পচ্চযসম্ভূতং, নিব্বানং, ভাসিতত্থো, ৰিপাকো, কিরিযাতি ইমে পঞ্চ ধম্মা অত্থোতি ৰেদিতব্বা ¶ . তং অত্থং পচ্চৰেক্খন্তস্স তস্মিং অত্থে পভেদগতং ঞাণং অত্থপটিসম্ভিদা. ধম্মোতিপি সঙ্খেপতো পচ্চযস্সেতং অধিৰচনং. পচ্চযো হি যস্মা তং তং দহতি পৰত্তেতি ৰা সম্পাপুণিতুং ৰা দেতি, তস্মা ধম্মোতি ৰুচ্চতি. পভেদতো ¶ পন যো কোচি ফলনিব্বত্তকো হেতু, অরিযমগ্গো, ভাসিতং, কুসলং, অকুসলন্তি ইমে পঞ্চ ধম্মা ধম্মোতি ৰেদিতব্বা. তং ধম্মং পচ্চৰেক্খন্তস্স তস্মিং ধম্মে পভেদগতং ঞাণং ধম্মপটিসম্ভিদা.

অযমেৰ হি অত্থো অভিধম্মে –

‘‘দুক্খে ঞাণং অত্থপটিসম্ভিদা. দুক্খসমুদযে ঞাণং ধম্মপটিসম্ভিদা. হেতুম্হি ঞাণং ধম্মপটিসম্ভিদা. হেতুফলে ঞাণং অত্থপটিসম্ভিদা. যে ধম্মা জাতা ভূতা সঞ্জাতা নিব্বত্তা অভিনিব্বত্তা পাতুভূতা. ইমেসু ধম্মেসু ঞাণং অত্থপটিসম্ভিদা. যম্হা ধম্মা তে ধম্মা জাতা ভূতা সঞ্জাতা নিব্বত্তা অভিনিব্বত্তা পাতুভূতা, তেসু ধম্মেসু ঞাণং ধম্মপটিসম্ভিদা. জরামরণে ঞাণং অত্থপটিসম্ভিদা. জরামরণসমুদযে ঞাণং ধম্মপটিসম্ভিদা…পে… সঙ্খারনিরোধে ঞাণং অত্থপটিসম্ভিদা. সঙ্খারনিরোধগামিনিযা পটিপদায ঞাণং ধম্মপটিসম্ভিদা. ইধ ভিক্খু ধম্মং জানাতি সুত্তং গেয্যং…পে… ৰেদল্লং. অযং ৰুচ্চতি ধম্মপটিসম্ভিদা. সো তস্স তস্সেৰ ভাসিতস্স অত্থং জানাতি ‘অযং ইমস্স ভাসিতস্স অত্থো, অযং ইমস্স ভাসিতস্স অত্থো’তি. অযং ৰুচ্চতি অত্থপটিসম্ভিদা. কতমে ধম্মা কুসলা? যস্মিং সমযে কামাৰচরং কুসলং চিত্তং উপ্পন্নং হোতি…পে… ইমে ধম্মা কুসলা. ইমেসু ধম্মেসু ঞাণং ধম্মপটিসম্ভিদা. তেসং ৰিপাকে ঞাণং অত্থপটিসম্ভিদা’’তিআদিনা (ৰিভ. ৭১৯ আদযো) নযেন ৰিভজিত্ৰা দস্সিতো.

তত্রধম্মনিরুত্তাভিলাপে ঞাণন্তি তস্মিং অত্থে চ ধম্মে চ যা সভাৰনিরুত্তি অব্যভিচারী ৰোহারো. তদভিলাপে তস্স ভাসনে উদীরণে তং ভাসিতং লপিতং উদীরিতং সুত্ৰাৰ অযং সভাৰনিরুত্তি, অযং ন সভাৰনিরুত্তীতি এৰং তস্সা ধম্মনিরুত্তিসঞ্ঞিতায সভাৰনিরুত্তিযা মাগধিকায সব্বসত্তানং মূলভাসায পভেদগতং ঞাণং নিরুত্তিপটিসম্ভিদা. নিরুত্তিপটিসম্ভিদাপ্পত্তো হি ফস্সো ৰেদনাতি এৰমাদিৰচনং সুত্ৰাৰ অযং সভাৰনিরুত্তীতি জানাতি. ফস্সা ৰেদনোতি এৰমাদিকং পন অযং ন সভাৰনিরুত্তীতি.

ঞাণেসু ¶ ¶ ঞাণন্তি সব্বত্থ ঞাণমারম্মণং কত্ৰা পচ্চৰেক্খন্তস্স ঞাণারম্মণং ঞাণং, যথাৰুত্তেসু ৰা তেসু ঞাণেসু সগোচরকিচ্চাদিৰসেন ৰিত্থারতো ঞাণং পটিভানপটিসম্ভিদাতি অত্থো.

৪২৯. চতস্সোপি চেতা পটিসম্ভিদা দ্ৰীসু ঠানেসু পভেদং গচ্ছন্তি সেক্খভূমিযঞ্চ অসেক্খভূমিযঞ্চ.

তত্থ অগ্গসাৰকানং মহাসাৰকানঞ্চ অসেক্খভূমিযং পভেদগতা. আনন্দত্থেরচিত্তগহপতিধম্মিকউপাসকউপালিগহপতিখুজ্জুত্তরাউপাসিকাদীনং সেক্খভূমিযং. এৰং দ্ৰীসু ভূমীসু পভেদং গচ্ছন্তিযোপি চেতা অধিগমেন পরিযত্তিযা সৰনেন পরিপুচ্ছায পুব্বযোগেন চাতি ইমেহি পঞ্চহাকারেহি ৰিসদা হোন্তি.

তত্থ অধিগমো নাম অরহত্তপ্পত্তি. পরিযত্তি নাম বুদ্ধৰচনস্স পরিযাপুণনং. সৰনং নাম সক্কচ্চং অত্থিং কত্ৰা ধম্মস্সৰনং. পরিপুচ্ছা নাম পাল়িঅট্ঠকথাদীসু গণ্ঠিপদঅত্থপদৰিনিচ্ছযকথা, পুব্বযোগো নাম পুব্ববুদ্ধানং সাসনে গতপচ্চাগতিকভাৰেন যাৰ অনুলোমং গোত্রভুসমীপং, তাৰ ৰিপস্সনানুযোগো.

অপরে আহু –

‘‘পুব্বযোগো বাহুসচ্চং, দেসভাসা চ আগমো;

পরিপুচ্ছা অধিগমো, গরুসন্নিস্সযো তথা;

মিত্তসম্পত্তি চেৰাতি, পটিসম্ভিদপচ্চযা’’তি.

তত্থ পুব্বযোগো ৰুত্তনযোৰ. বাহুসচ্চং নাম তেসু তেসু সত্থেসু চ সিপ্পাযতনেসু চ কুসলতা. দেসভাসা নাম একসতৰোহারকুসলতা. ৰিসেসেন পন মাগধিকে কোসল্লং. আগমো নাম অন্তমসো ওপম্মৰগ্গমত্তস্সপি বুদ্ধৰচনস্স পরিযাপুণনং. পরিপুচ্ছা নাম একগাথাযপি অত্থৰিনিচ্ছযপুচ্ছনং. অধিগমো নাম সোতাপন্নতা ৰা…পে… অরহত্তং ৰা. গরুসন্নিস্সযো ¶ নাম সুতপটিভানবহুলানং গরূনং সন্তিকে ৰাসো. মিত্তসম্পত্তি নাম তথারূপানংযেৰ মিত্তানং পটিলাভোতি.

তত্থ বুদ্ধা চ পচ্চেকবুদ্ধা চ পুব্বযোগঞ্চেৰ অধিগমঞ্চ নিস্সায পটিসম্ভিদা পাপুণন্তি. সাৰকা সব্বানিপি এতানি কারণানি. পটিসম্ভিদাপ্পত্তিযা চ পাটিযেক্কো ¶ কম্মট্ঠানভাৰনানুযোগো নাম নত্থি. সেক্খানং পন সেক্খফলৰিমোক্খন্তিকা. অসেক্খানং অসেক্খফলৰিমোক্খন্তিকাৰ পটিসম্ভিদাপ্পত্তি হোতি. তথাগতানং হি দসবলানি ৰিয অরিযানং অরিযফলেনেৰ পটিসম্ভিদা ইজ্ঝন্তীতি ইমা পটিসম্ভিদা সন্ধায ৰুত্তং চতুপটিসম্ভিদাৰসেন চতুব্বিধাতি.

পঞ্ঞাভূমি-মূল-সরীরৰৰত্থানং

৪৩০. কথং ভাৰেতব্বাতি এত্থ পন যস্মা ইমায পঞ্ঞায খন্ধাযতনধাতুইন্দ্রিযসচ্চপটিচ্চসমুপ্পাদাদিভেদা ধম্মা ভূমি. সীলৰিসুদ্ধি চেৰ চিত্তৰিসুদ্ধি চাতি ইমা দ্ৰে ৰিসুদ্ধিযো মূলং. দিট্ঠিৰিসুদ্ধি, কঙ্খাৰিতরণৰিসুদ্ধি, মগ্গামগ্গঞাণদস্সনৰিসুদ্ধি, পটিপদাঞাণদস্সনৰিসুদ্ধি, ঞাণদস্সনৰিসুদ্ধীতি ইমা পঞ্চ ৰিসুদ্ধিযো সরীরং. তস্মা তেসু ভূমিভূতেসু ধম্মেসু উগ্গহপরিপুচ্ছাৰসেন ঞাণপরিচযং কত্ৰা মূলভূতা দ্ৰে ৰিসুদ্ধিযো সম্পাদেত্ৰা সরীরভূতা পঞ্চ ৰিসুদ্ধিযো সম্পাদেন্তেন ভাৰেতব্বা. অযমেত্থ সঙ্খেপো.

৪৩১. অযং পন ৰিত্থারো, যং তাৰ ৰুত্তং ‘‘খন্ধাযতনধাতুইন্দ্রিযসচ্চপটিচ্চসমুপ্পাদাদিভেদা ধম্মা ভূমী’’তি, এত্থ খন্ধাতি পঞ্চ খন্ধা রূপক্খন্ধো ৰেদনাক্খন্ধো সঞ্ঞাক্খন্ধো সঙ্খারক্খন্ধো ৰিঞ্ঞাণক্খন্ধোতি.

রূপক্খন্ধকথা

৪৩২. তত্থ যং কিঞ্চি সীতাদীহি রুপ্পনলক্খণং ধম্মজাতং, সব্বং তং একতো কত্ৰা রূপক্খন্ধোতি ৰেদিতব্বং.

তদেতং রুপ্পনলক্খণেন একৰিধম্পি ভূতোপাদাযভেদতো দুৰিধং.

তত্থ ¶ ভূতরূপং চতুব্বিধং – পথৰীধাতু আপোধাতু তেজোধাতু ৰাযোধাতূতি. তাসং লক্খণরসপচ্চুপট্ঠানানি চতুধাতুৰৰত্থানে ৰুত্তানি. পদট্ঠানতো পন তা সব্বাপি অৰসেসধাতুত্তযপদট্ঠানা.

উপাদারূপং চতুৰীসতিৰিধং – চক্খু, সোতং, ঘানং, জিৰ্হা, কাযো, রূপং, সদ্দো, গন্ধো, রসো, ইত্থিন্দ্রিযং, পুরিসিন্দ্রিযং, জীৰিতিন্দ্রিযং, হদযৰত্থু, কাযৰিঞ্ঞত্তি, ৰচীৰিঞ্ঞত্তি, আকাসধাতু, রূপস্স লহুতা, রূপস্স মুদুতা ¶ , রূপস্স কম্মঞ্ঞতা, রূপস্স উপচযো, রূপস্স সন্ততি, রূপস্স জরতা, রূপস্স অনিচ্চতা, কবল়ীকারো আহারোতি.

৪৩৩. তত্থ রূপাভিঘাতারহতপ্পসাদলক্খণং দট্ঠুকামতানিদানকম্মসমুট্ঠানভূতপ্পসাদলক্খণং ৰা চক্খু, রূপেসু আৰিঞ্ছনরসং, চক্খুৰিঞ্ঞাণস্স আধারভাৰপচ্চুপট্ঠানং, দট্ঠুকামতানিদানকম্মজভূতপদট্ঠানং.

সদ্দাভিঘাতারহভূতপ্পসাদলক্খণং, সোতুকামতানিদানকম্মসমুট্ঠানভূতপ্পসাদলক্খণং ৰা সোতং, সদ্দেসু আৰিঞ্ছনরসং, সোতৰিঞ্ঞাণস্স আধারভাৰপচ্চুপট্ঠানং, সোতুকামতানিদানকম্মজভূতপদট্ঠানং.

গন্ধাভিঘাতারহভূতপ্পসাদলক্খণং, ঘাযিতুকামতানিদানকম্মসমুট্ঠানভূতপ্পসাদলক্খণং ৰা ঘানং, গন্ধেসু আৰিঞ্ছনরসং, ঘানৰিঞ্ঞাণস্স আধারভাৰপচ্চুপট্ঠানং, ঘাযিতুকামতানিদানকম্মজভূতপদট্ঠানং.

রসাভিঘাতারহভূতপ্পসাদলক্খণা, সাযিতুকামতানিদানকম্মসমুট্ঠানভূতপ্পসাদলক্খণা ৰা জিৰ্হা, রসেসু আৰিঞ্ছনরসা, জিৰ্হাৰিঞ্ঞাণস্স আধারভাৰপচ্চুপট্ঠানা, সাযিতুকামতানিদানকম্মজভূতপদট্ঠানা.

ফোট্ঠব্বাভিঘাতারহভূতপ্পসাদলক্খণো, ফুসিতুকামতানিদানকম্মসমুট্ঠানভূতপ্পসাদলক্খণো ৰা কাযো, ফোট্ঠব্বেসু আৰিঞ্ছনরসো, কাযৰিঞ্ঞাণস্স আধারভাৰপচ্চুপট্ঠানো, ফুসিতুকামতানিদানকম্মজভূতপদট্ঠানো.

৪৩৪. কেচি ¶ পন ‘‘তেজাধিকানং ভূতানং পসাদো চক্খু, ৰাযুপথৰীআপাধিকানং ভূতানং পসাদা সোতঘানজিৰ্হা, কাযো সব্বেসম্পী’’তি ৰদন্তি. অপরে ‘‘তেজাধিকানং পসাদো চক্খু, ৰিৰরৰাযুআপপথৰাধিকানং সোতঘানজিৰ্হাকাযা’’তি ৰদন্তি. তে ৰত্তব্বা ‘‘সুত্তং আহরথা’’তি. অদ্ধা সুত্তমেৰ ন দক্খিস্সন্তি. কেচি পনেত্থ ‘‘তেজাদীনং গুণেহি রূপাদীহি অনুগয্হভাৰতো’’তি কারণং দস্সেন্তি. তে ৰত্তব্বা ‘‘কো পনেৰমাহরূপাদযো তেজাদীনং গুণা’তি. অৰিনিব্ভোগৰুত্তীসু হি ভূতেসু অযং ইমস্স গুণো অযং ইমস্স গুণোতি ন লব্ভা ৰত্তু’’ন্তি. অথাপি ৰদেয্যুং ‘‘যথা তেসু তেসু সম্ভারেসু তস্স তস্স ¶ ভূতস্স অধিকতায পথৰীআদীনং সন্ধারণাদীনি কিচ্চানি ইচ্ছথ, এৰং তেজাদিঅধিকেসু সম্ভারেসু রূপাদীনং অধিকভাৰদস্সনতো ইচ্ছিতব্বমেতং রূপাদযো তেসং গুণা’’তি. তে ৰত্তব্বা ‘‘ইচ্ছেয্যাম, যদি আপাধিকস্স আসৰস্স গন্ধতো পথৰীঅধিকে কপ্পাসে গন্ধো অধিকতরো সিযা, তেজাধিকস্স চ উণ্হোদকস্স ৰণ্ণতো সীতুদকস্স ৰণ্ণো পরিহাযেথ’’. যস্মা পনেতং উভযম্পি নত্থি, তস্মা পহাযেতং এতেসং নিস্সযভূতানং ৰিসেসকপ্পনং, ‘‘যথা অৰিসেসেপি এককলাপে ভূতানং রূপরসাদযো অঞ্ঞমঞ্ঞং ৰিসদিসা হোন্তি, এৰং চক্খুপসাদাদযো অৰিজ্জমানেপি অঞ্ঞস্মিং ৰিসেসকারণে’’তি গহেতব্বমেতং.

কিং পন তং যং অঞ্ঞমঞ্ঞস্স অসাধারণং? কম্মমেৰ নেসং ৰিসেসকারণং. তস্মা কম্মৰিসেসতো এতেসং ৰিসেসো, ন ভূতৰিসেসতো. ভূতৰিসেসে হি সতি পসাদোৰ ন উপ্পজ্জতি. সমানানঞ্হি পসাদো, ন ৰিসমানানন্তি পোরাণা.

৪৩৫. এৰং কম্মৰিসেসতো ৰিসেসৰন্তেসু চ এতেসু চক্খুসোতানি অসম্পত্তৰিসযগাহকানি, অত্তনো নিস্সযং অনল্লীননিস্সযে এৰ ৰিসযে ৰিঞ্ঞাণহেতুত্তা. ঘানজিৰ্হাকাযা সম্পত্তৰিসযগাহকা, নিস্সযৰসেন চেৰ, সযঞ্চ, অত্তনো নিস্সযং অল্লীনেযেৰ ৰিসযে ৰিঞ্ঞাণহেতুত্তা.

৪৩৬. চক্খু চেত্থ যদেতং লোকে নীলপখুমসমাকিণ্ণকণ্হসুক্কমণ্ডলৰিচিত্তং নীলুপ্পলদলসন্নিভং চক্খূতি ৰুচ্চতি. তস্স সসম্ভারচক্খুনো সেতমণ্ডলপরিক্খিত্তস্স কণ্হমণ্ডলস্স মজ্ঝে অভিমুখে ঠিতানং সরীরসণ্ঠানুপ্পত্তিপদেসে সত্তসু পিচুপটলেসু আসিত্ততেলং পিচুপটলানি ৰিয সত্ত অক্খিপটলানিব্যাপেত্ৰা ধারণন্হাপনমণ্ডনবীজনকিচ্চাহি ¶ চতূহি ধাতীহি খত্তিযকুমারো ৰিয সন্ধারণবন্ধনপরিপাচনসমুদীরণকিচ্চাহি চতূহি ধাতূহি কতূপকারং উতুচিত্তাহারেহি উপত্থম্ভিযমানং আযুনা অনুপালিযমানং ¶ ৰণ্ণগন্ধরসাদীহি পরিৰুতং পমাণতো ঊকাসিরমত্তং চক্খুৰিঞ্ঞাণাদীনং যথারহং ৰত্থুদ্ৰারভাৰং সাধযমানং তিট্ঠতি. ৰুত্তম্পি চেতং ধম্মসেনাপতিনা –

‘‘যেন চক্খুপসাদেন, রূপানি মনুপস্সতি;

পরিত্তং সুখুমং এতং, ঊকাসিরসমূপম’’ন্তি.

সসম্ভারসোতবিলস্স অন্তো তনুতম্বলোমাচিতে অঙ্গুলিৰেধকসণ্ঠানে পদেসে সোতং ৰুত্তপ্পকারাহি ধাতূহি কতূপকারং উতুচিত্তাহারেহি উপত্থম্ভিযমানং আযুনা অনুপালিযমানং ৰণ্ণাদীহি পরিৰুতং সোতৰিঞ্ঞাণাদীনং যথারহং ৰত্থুদ্ৰারভাৰং সাধযমানং তিট্ঠতি.

সসম্ভারঘানবিলস্স অন্তো অজপদসণ্ঠানে পদেসে ঘানং যথাৰুত্তপ্পকারুপকারুপত্থম্ভনানুপালনপরিৰারং ঘানৰিঞ্ঞাণাদীনং যথারহং ৰত্থুদ্ৰারভাৰং সাধযমানং তিট্ঠতি.

সসম্ভারজিৰ্হামজ্ঝস্স উপরি উপ্পলদলগ্গসণ্ঠানে পদেসে জিৰ্হা যথাৰুত্তপ্পকারুপকারুপত্থম্ভনানুপালনপরিৰারা জিৰ্হাৰিঞ্ঞাণাদীনং যথারহং ৰত্থুদ্ৰারভাৰং সাধযমানা তিট্ঠতি.

যাৰতা পন ইমস্মিং কাযে উপাদিণ্ণরূপং নাম অত্থি. সব্বত্থ কাযো কপ্পাসপটলে স্নেহো ৰিয ৰুত্তপ্পকারুপকারুপত্থম্ভনানুপালনপরিৰারোৰ হুত্ৰা কাযৰিঞ্ঞাণাদীনং যথারহং ৰত্থুদ্ৰারভাৰং সাধযমানো তিট্ঠতি.

ৰম্মিকউদকাকাসগামসিৰথিকসঙ্খাতসগোচরনিন্না ৰিয চ অহিসুসুমারপক্খীকুক্কুরসিঙ্গালারূপাদিসগোচরনিন্নাৰ এতে চক্খাদযোতি দট্ঠব্বা.

৪৩৭. ততো পরেসু পন রূপাদীসু চক্খুপটিহননলক্খণং রূপং, চক্খুৰিঞ্ঞাণস্স ৰিসযভাৰরসং ¶ , তস্সেৰ গোচরপচ্চুপট্ঠানং, চতুমহাভূতপদট্ঠানং. যথা চেতং তথা সব্বানিপি উপাদারূপানি. যত্থ পন ৰিসেসো অত্থি, তত্থ ৰক্খাম. তযিদং নীলং পীতকন্তিআদিৰসেন অনেকৰিধং.

সোতপটিহননলক্খণো ¶ সদ্দো, সোতৰিঞ্ঞাণস্স ৰিসযভাৰরসো, তস্সেৰ গোচরপচ্চুপট্ঠানো. ভেরিসদ্দো মুদিঙ্গসদ্দোতিআদিনা নযেন অনেকৰিধো.

ঘানপটিহননলক্খণো গন্ধো, ঘানৰিঞ্ঞাণস্স ৰিসযভাৰরসো, তস্সেৰ গোচরপচ্চুপট্ঠানো. মূলগন্ধো সারগন্ধোতিআদিনা নযেন অনেকৰিধো.

জিৰ্হাপটিহননলক্খণো রসো, জিৰ্হাৰিঞ্ঞাণস্স ৰিসযভাৰরসো, তস্সেৰ গোচরপচ্চুপট্ঠানো. মূলরসো খন্ধরসোতিআদিনা নযেন অনেকৰিধো.

৪৩৮. ইত্থিভাৰলক্খণং ইত্থিন্দ্রিযং, ইত্থীতি পকাসনরসং, ইত্থিলিঙ্গনিমিত্তকুত্তাকপ্পানং কারণভাৰপচ্চুপট্ঠানং. পুরিসভাৰলক্খণং পুরিসিন্দ্রিযং, পুরিসোতি পকাসনরসং, পুরিসলিঙ্গনিমিত্তকুত্তাকপ্পানং কারণভাৰপচ্চুপট্ঠানং. তদুভযম্পি কাযপ্পসাদো ৰিয সকলসরীরং ব্যাপকমেৰ, ন চ কাযপসাদেন ঠিতোকাসে ঠিতন্তি ৰা অট্ঠিতোকাসে ঠিতন্তি ৰাতি ৰত্তব্বতং আপজ্জতি, রূপরসাদযো ৰিয অঞ্ঞমঞ্ঞং সঙ্করো নত্থি.

৪৩৯. সহজরূপানুপালনলক্খণং জীৰিতিন্দ্রিযং, তেসং পৰত্তনরসং, তেসঞ্ঞেৰ ঠপনপচ্চুপট্ঠানং, যাপযিতব্বভূতপদট্ঠানং. সন্তেপি চ অনুপালনলক্খণাদিম্হি ৰিধানে অত্থিক্খণেযেৰ তং সহজরূপানি অনুপালেতি উদকং ৰিয উপ্পলাদীনি. যথাসকং পচ্চযুপ্পন্নেপি চ ধম্মে পালেতি ধাতি ৰিয কুমারং. সযং পৰত্তিতধম্মসম্বন্ধেনেৰ চ পৰত্ততি নিযামকো ৰিয. ন ভঙ্গতো উদ্ধং পৰত্ততি, অত্তনো চ পৰত্তযিতব্বানঞ্চ অভাৰা. ন ভঙ্গক্খণে ঠপেতি, সযং ভিজ্জমানত্তা. খীযমানো ৰিয ৰট্টিস্নেহো দীপসিখং. ন চ অনুপালনপৰত্তনট্ঠপনানুভাৰৰিরহিতং, যথাৰুত্তক্খণে তস্স তস্স সাধনতোতি দট্ঠব্বং.

৪৪০. মনোধাতুমনোৰিঞ্ঞাণধাতূনং নিস্সযলক্খণং হদযৰত্থু, তাসঞ্ঞেৰ ধাতূনং আধারণরসং ¶ , উব্বহনপচ্চুপট্ঠানং. হদযস্স অন্তো কাযগতাসতিকথাযং ¶ ৰুত্তপ্পকারং লোহিতং নিস্সায সন্ধারণাদিকিচ্চেহি ভূতেহি কতূপকারং উতুচিত্তাহারেহি উপত্থম্ভিযমানং আযুনা অনুপালিযমানং মনোধাতুমনোৰিঞ্ঞাণধাতূনঞ্চেৰ তংসম্পযুত্তধম্মানঞ্চ ৰত্থুভাৰং সাধযমানং তিট্ঠতি.

৪৪১. অভিক্কমাদিপৰত্তকচিত্তসমুট্ঠানৰাযোধাতুযা সহজরূপকাযথম্ভনসন্ধারণচলনস্স পচ্চযো আকারৰিকারো কাযৰিঞ্ঞত্তি, অধিপ্পাযপকাসনরসা, কাযৰিপ্ফন্দনহেতুভাৰপচ্চুপট্ঠানা, চিত্তসমুট্ঠানৰাযোধাতুপদট্ঠানা. সা পনেসা কাযৰিপ্ফন্দনেন অধিপ্পাযৰিঞ্ঞাপনহেতুত্তা, সযঞ্চ তেন কাযৰিপ্ফন্দনসঙ্খাতেন কাযেন ৰিঞ্ঞেয্যত্তা ‘‘কাযৰিঞ্ঞত্তী’’তি ৰুচ্চতি. তায চ পন চলিতেহি চিত্তজরূপেহি অভিসম্বন্ধানং উতুজাদীনম্পি চলনতো অভিক্কমাদযো পৰত্তন্তীতি ৰেদিতব্বা.

ৰচীভেদপৰত্তকচিত্তসমুট্ঠানপথৰীধাতুযা উপাদিণ্ণঘট্টনস্স পচ্চযো আকারৰিকারো ৰচীৰিঞ্ঞত্তি, অধিপ্পাযপ্পকাসনরসা, ৰচীঘোসহেতুভাৰপচ্চুপট্ঠানা, চিত্তসমুট্ঠানপথৰীধাতুপদট্ঠানা. সা পনেসা ৰচীঘোসেন অধিপ্পাযৰিঞ্ঞাপনহেতুত্তা, সযঞ্চ তায ৰচীঘোসসঙ্খাতায ৰাচায ৰিঞ্ঞেয্যত্তা ‘‘ৰচীৰিঞ্ঞত্তী’’তি ৰুচ্চতি. যথা হি অরঞ্ঞে উস্সাপেত্ৰা বন্ধগোসীসাদিউদকনিমিত্তং দিস্ৰা উদকমেত্থ অত্থীতি ৰিঞ্ঞাযতি, এৰং কাযৰিপ্ফন্দনঞ্চেৰ ৰচীঘোসঞ্চ গহেত্ৰা কাযৰচীৰিঞ্ঞত্তিযোপি ৰিঞ্ঞাযন্তি.

৪৪২. রূপপরিচ্ছেদলক্খণা আকাসধাতু, রূপপরিযন্তপ্পকাসনরসা, রূপমরিযাদাপচ্চুপট্ঠানা, অসম্ফুট্ঠভাৰচ্ছিদ্দৰিৰরভাৰপচ্চুপট্ঠানা ৰা, পরিচ্ছিন্নরূপপদট্ঠানা. যায পরিচ্ছিন্নেসু রূপেসু ইদমিতো উদ্ধমধো তিরিযন্তি চ হোতি.

৪৪৩. অদন্ধতালক্খণা রূপস্স লহুতা, রূপানং গরুভাৰৰিনোদনরসা, লহুপরিৰত্তিতাপচ্চুপট্ঠানা, লহুরূপপদট্ঠানা. অথদ্ধতালক্খণা রূপস্স মুদুতা, রূপানং থদ্ধভাৰৰিনোদনরসা, সব্বকিরিযাসু অৰিরোধিতাপচ্চুপট্ঠানা, মুদুরূপপদট্ঠানা. সরীরকিরিযানুকূলকম্মঞ্ঞভাৰলক্খণা রূপস্স ¶ কম্মঞ্ঞতা, অকম্মঞ্ঞতাৰিনোদনরসা, অদুব্বলভাৰপচ্চুপট্ঠানা, কম্মঞ্ঞরূপপদট্ঠানা.

এতা ¶ পন তিস্সো ন অঞ্ঞমঞ্ঞং ৰিজহন্তি, এৰং সন্তেপি যো অরোগিনো ৰিয রূপানং লহুভাৰো অদন্ধতা লহুপরিৰত্তিপ্পকারো রূপদন্ধত্তকরধাতুক্খোভপটিপক্খপচ্চযসমুট্ঠানো, সো রূপৰিকারো রূপস্স লহুতা. যো পন সুপরিমদ্দিতচম্মস্সেৰ রূপানং মুদুভাৰো সব্বকিরিযাৰিসেসেসু ৰসৰত্তনভাৰমদ্দৰপ্পকারো রূপত্থদ্ধত্তকরধাতুক্খোভপটিপক্খপচ্চযসমুট্ঠানো, সো রূপৰিকারো রূপস্স মুদুতা. যো পন সুদন্তসুৰণ্ণস্সেৰ রূপানং কম্মঞ্ঞভাৰো সরীরকিরিযানুকূলভাৰপ্পকারো সরীরকিরিযানং অননুকূলকরধাতুক্খোভপটিপক্খপচ্চযসমুট্ঠানো, সো রূপৰিকারো রূপস্স কম্মঞ্ঞতাতি এৰমেতাসং ৰিসেসো ৰেদিতব্বো.

৪৪৪. আচযলক্খণো রূপস্স উপচযো, পুব্বন্ততো রূপানং উম্মুজ্জাপনরসো, নিয্যাতনপচ্চুপট্ঠানো, পরিপুণ্ণভাৰপচ্চুপট্ঠানো ৰা, উপচিতরূপপদট্ঠানো. পৰত্তিলক্খণা রূপস্স সন্ততি, অনুপ্পবন্ধনরসা, অনুপচ্ছেদপচ্চুপট্ঠানা, অনুপ্পবন্ধকরূপপদট্ঠানা. উভযম্পেতং জাতিরূপস্সেৰাধিৰচনং, আকারনানত্ততো পন ৰেনেয্যৰসেন চ ‘‘উপচযো সন্ততী’’তি উদ্দেসদেসনা কতা. যস্মা পনেত্থ অত্থতো নানত্তং নত্থি, তস্মা ইমেসং পদানং নিদ্দেসে ‘‘যো আযতনানং আচযো, সো রূপস্স উপচযো. যো রূপস্স উপচযো, সা রূপস্স সন্ততী’’তি (ধ. স. ৬৪১-৬৪২) ৰুত্তং. অট্ঠকথাযম্পি ‘‘আচযো নাম নিব্বত্তি, উপচযো নাম ৰড্ঢি, সন্ততি নাম পৰত্তী’’তি (ধ. স. অট্ঠ. ৬৪১) ৰত্ৰা ‘‘নদীতীরে খতকূপকম্হি উদকুগ্গমনকালো ৰিয আচযো নিব্বত্তি, পরিপুণ্ণকালো ৰিয উপচযো ৰড্ঢি, অজ্ঝোত্থরিত্ৰা গমনকালো ৰিয সন্ততি পৰত্তী’’তি (ধ. স. অট্ঠ. ৬৪১) উপমা কতা.

উপমাৰসানে চ ‘‘এৰং কিং কথিতং হোতি? আযতনেন আচযো কথিতো, আচযেন আযতনং কথিত’’ন্তি ৰুত্তং. তস্মা যা রূপানং পঠমাভিনিব্বত্তি, সা আচযো. যা তেসং উপরি অঞ্ঞেসম্পি নিব্বত্তমানানং নিব্বত্তি, সা ৰড্ঢিআকারেন উপট্ঠানতো উপচযো. যা তেসম্পি উপরি পুনপ্পুনং ¶ অঞ্ঞেসং নিব্বত্তমানানং নিব্বত্তি, সা অনুপবন্ধাকারেন উপট্ঠানতো সন্ততীতি চ পৰুচ্চতীতি ৰেদিতব্বা.

রূপপরিপাকলক্খণা জরতা, উপনযনরসা, সভাৰানপগমেপি নৰভাৰাপগমপচ্চুপট্ঠানা ৰীহিপুরাণভাৰো ৰিয, পরিপচ্চমানরূপপদট্ঠানা. খণ্ডিচ্চাদিভাৰেন দন্তাদীসু ৰিকারদস্সনতো ¶ ইদং পাকটজরং সন্ধায ৰুত্তং. অরূপধম্মানং পন পটিচ্ছন্নজরা নাম হোতি, তস্সা এস ৰিকারো নত্থি, যা চ পথৰী উদকপব্বতচন্দিমসূরিযাদীসু অৰীচিজরা নাম.

পরিভেদলক্খণা রূপস্স অনিচ্চতা, সংসীদনরসা, খযৰযপচ্চুপট্ঠানা, পরিভিজ্জমানরূপপদট্ঠানা.

৪৪৫. ওজালক্খণো কবল়ীকারো আহারো, রূপাহরণরসো, উপত্থম্ভনপচ্চুপট্ঠানো, কবল়ং কত্ৰা আহরিতব্বৰত্থুপদট্ঠানো. যায ওজায সত্তা যাপেন্তি, তস্সা এতং অধিৰচনং.

৪৪৬. ইমানি তাৰ পাল়িযং আগতরূপানেৰ. অট্ঠকথাযং পন বলরূপং সম্ভৰরূপং জাতিরূপং রোগরূপং একচ্চানং মতেন মিদ্ধরূপন্তি এৰং অঞ্ঞানিপি রূপানি আহরিত্ৰা ‘‘অদ্ধা মুনীসি সম্বুদ্ধো, নত্থি নীৰরণা তৰা’’তিআদীনি (সু. নি. ৫৪৬) ৰত্ৰা মিদ্ধরূপং তাৰ নত্থিযেৰাতি পটিক্খিত্তং. ইতরেসু রোগরূপং জরতাঅনিচ্চতাগ্গহণেন গহিতমেৰ, জাতিরূপং উপচযসন্ততিগ্গহণেন, সম্ভৰরূপং আপোধাতুগ্গহণেন, বলরূপং ৰাযোধাতুগ্গহণেন গহিতমেৰ. তস্মা তেসু একম্পি ৰিসুং নত্থীতি সন্নিট্ঠানং কতং.

ইতি ইদং চতুৰীসতিৰিধং উপাদারূপং পুব্বে ৰুত্তং চতুব্বিধং ভূতরূপঞ্চাতি অট্ঠৰীসতিৰিধং রূপং হোতি অনূনমনধিকং.

৪৪৭. তং সব্বম্পি ন হেতু অহেতুকং হেতুৰিপ্পযুত্তং সপ্পচ্চযং লোকিযং সাসৰমেৰাতিআদিনা নযেন একৰিধং.

অজ্ঝত্তিকং বাহিরং, ওল়ারিকং সুখুমং, দূরে সন্তিকে, নিপ্ফন্নং অনিপ্ফন্নং, পসাদরূপং নপসাদরূপং, ইন্দ্রিযং অনিন্দ্রিযং, উপাদিণ্ণং অনুপাদিণ্ণন্তিআদিৰসেন দুৰিধং.

তত্থ ¶ চক্খাদিপঞ্চৰিধং অত্তভাৰং অধিকিচ্চ পৰত্তত্তা অজ্ঝত্তিকং, সেসং ততো বাহিরত্তা বাহিরং. চক্খাদীনি নৰ আপোধাতুৰজ্জিতা তিস্সো ধাতুযো চাতি দ্ৰাদসৰিধং ঘট্টনৰসেন গহেতব্বতো ওল়ারিকং, সেসং ততো ৰিপরীতত্তা সুখুমং. যং সুখুমং তদেৰ দুপ্পটিৰিজ্ঝসভাৰত্তা ¶ দূরে, ইতরং সুপ্পটিৰিজ্ঝসভাৰত্তা সন্তিকে. চতস্সো ধাতুযো, চক্খাদীনি তেরস, কবল়ীকারাহারো চাতি অট্ঠারসৰিধং রূপং পরিচ্ছেদৰিকারলক্খণভাৰং অতিক্কমিত্ৰা সভাৰেনেৰ পরিগ্গহেতব্বতো নিপ্ফন্নং, সেসং তব্বিপরীততায অনিপ্ফন্নং. চক্খাদিপঞ্চৰিধং রূপাদীনং গহণপচ্চযভাৰেন আদাসতলং ৰিয ৰিপ্পসন্নত্তা পসাদরূপং, ইতরং ততো ৰিপরীতত্তা নপসাদরূপং. পসাদরূপমেৰ ইত্থিন্দ্রিযাদিত্তযেন সদ্ধিং অধিপতিযট্ঠেন ইন্দ্রিযং, সেসং ততো ৰিপরীতত্তা অনিন্দ্রিযং. যং কম্মজন্তি পরতো ৰক্খাম, তং কম্মেন উপাদিণ্ণত্তা উপাদিণ্ণং, সেসং ততো ৰিপরীতত্তা অনুপাদিণ্ণং.

৪৪৮. পুন সব্বমেৰ রূপং সনিদস্সনকম্মজাদীনং তিকানং ৰসেন তিৰিধং হোতি. তত্থ ওল়ারিকে রূপং সনিদস্সনসপ্পটিঘং, সেসং অনিদস্সনসপ্পটিঘং. সব্বম্পি সুখুমং অনিদস্সনঅপ্পটিঘং. এৰং তাৰ সনিদস্সনত্তিকৰসেন তিৰিধং. কম্মজাদিত্তিকৰসেন পন কম্মতো জাতং কম্মজং, তদঞ্ঞপচ্চযজাতং অকম্মজং, নকুতোচিজাতং নেৰ কম্মজং নাকম্মজং. চিত্ততো জাতং চিত্তজং, তদঞ্ঞপচ্চযজাতং অচিত্তজং, নকুতোচিজাতং নেৰ চিত্তজং নাচিত্তজং, আহারতো জাতং আহারজং, তদঞ্ঞপচ্চযজাতং অনাহারজং, নকুতোচিজাতং নেৰ আহারজং নঅনাহারজং. উতুতো জাতং উতুজং, তদঞ্ঞপচ্চযজাতং অনুতুজং, নকুতোচিজাতং নেৰ উতুজং নঅনুতুজন্তি এৰং কম্মজাদিত্তিকৰসেন তিৰিধং.

৪৪৯. পুন দিট্ঠাদিরূপরূপাদিৰত্থাদিচতুক্কৰসেন চতুব্বিধং. তত্থ রূপাযতনং দিট্ঠং নাম দস্সনৰিসযত্তা, সদ্দাযতনং সুতং নাম সৰনৰিসযত্তা, গন্ধরসফোট্ঠব্বত্তযং মুতং নাম সম্পত্তগাহকইন্দ্রিযৰিসযত্তা, সেসং ৰিঞ্ঞাতং নাম ৰিঞ্ঞাণস্সেৰ ৰিসযত্তাতি এৰং তাৰ দিট্ঠাদিচতুক্কৰসেন চতুব্বিধং.

নিপ্ফন্নরূপং পনেত্থ রূপরূপং নাম, আকাসধাতু পরিচ্ছেদরূপং নাম, কাযৰিঞ্ঞত্তিআদি কম্মঞ্ঞতাপরিযন্তং ৰিকাররূপং নাম, জাতিজরাভঙ্গং লক্খণরূপং নামাতি এৰং রূপরূপাদিচতুক্কৰসেন চতুব্বিধং.

যং ¶ পনেত্থ হদযরূপং নাম, তং ৰত্থু ন দ্ৰারং. ৰিঞ্ঞত্তিদ্ৰযং দ্ৰারং ন ৰত্থু. পসাদরূপং ৰত্থু চেৰ দ্ৰারঞ্চ. সেসং নেৰ ৰত্থু ন দ্ৰারন্তি এৰং ৰত্থাদিচতুক্কৰসেন চতুব্বিধং.

৪৫০. পুন ¶ একজং, দ্ৰিজং, তিজং, চতুজং, নকুতোচিজাতন্তি ইমেসং ৰসেন পঞ্চৰিধং. তত্থ কম্মজমেৰ চিত্তজমেৰ চ একজং নাম. তেসু সদ্ধিং হদযৰত্থুনা ইন্দ্রিযরূপং কম্মজমেৰ. ৰিঞ্ঞত্তিদ্ৰযং চিত্তজমেৰ. যং পন চিত্ততো চ উতুতো চ জাতং, তং দ্ৰিজং নাম, তং সদ্দাযতনমেৰ. যং উতুচিত্তাহারেহি জাতং, তং তিজং নাম, তং পন লহুতাদিত্তযমেৰ. যং চতূহিপি কম্মাদীহি জাতং, তং চতুজং নাম, তং লক্খণরূপৰজ্জং অৰসেসং হোতি. লক্খণরূপং পন নকুতোচিজাতং. কস্মা? ন হি উপ্পাদস্স উপ্পাদো অত্থি, উপ্পন্নস্স চ পরিপাকভেদমত্তং ইতরদ্ৰযং. যম্পি ‘‘রূপাযতনং সদ্দাযতনং গন্ধাযতনং রসাযতনং ফোট্ঠব্বাযতনং আকাসধাতু আপোধাতু রূপস্স লহুতা, রূপস্স মুদুতা, রূপস্স কম্মঞ্ঞতা, রূপস্স উপচযো, রূপস্স সন্ততি, কবল়ীকারো আহারো, ইমে ধম্মা চিত্তসমুট্ঠানা’’তিআদীসু (ধ. স. ১২০১) জাতিযা কুতোচিজাতত্তং অনুঞ্ঞাতং, তং পন রূপজনকপচ্চযানং কিচ্চানুভাৰক্খণে দিট্ঠত্তাতি ৰেদিতব্বং.

ইদং তাৰ রূপক্খন্ধে ৰিত্থারকথামুখং.

ৰিঞ্ঞাণক্খন্ধকথা

৪৫১. ইতরেসু পন যংকিঞ্চি ৰেদযিতলক্খণং, সব্বং তং একতো কত্ৰা ৰেদনাক্খন্ধো; যংকিঞ্চি সঞ্জাননলক্খণং, সব্বং তং একতো কত্ৰা সঞ্ঞাক্খন্ধো; যংকিঞ্চি অভিসঙ্খরণলক্খণং, সব্বং তং একতো কত্ৰা সঙ্খারক্খন্ধো; যংকিঞ্চি ৰিজাননলক্খণং, সব্বং তং একতো কত্ৰা ৰিঞ্ঞাণক্খন্ধো ৰেদিতব্বো. তত্থ যস্মা ৰিঞ্ঞাণক্খন্ধে ৰিঞ্ঞাতে ইতরে সুৰিঞ্ঞেয্যা হোন্তি, তস্মা ৰিঞ্ঞাণক্খন্ধং আদিং কত্ৰা ৰণ্ণনং করিস্সাম.

যংকিঞ্চি ৰিজাননলক্খণং, সব্বং তং একতো কত্ৰা ৰিঞ্ঞাণক্খন্ধো ৰেদিতব্বোতি হি ৰুত্তং. কিঞ্চ ৰিজাননলক্খণং ৰিঞ্ঞাণং? যথাহ ‘‘ৰিজানাতি ৰিজানাতীতি খো, আৰুসো, তস্মা ৰিঞ্ঞাণন্তি ৰুচ্চতী’’তি (ম. নি. ১.৪৪৯). ৰিঞ্ঞাণং চিত্তং মনোতি অত্থতো একং. তদেতং ৰিজাননলক্খণেন সভাৰতো ¶ একৰিধম্পি জাতিৰসেন তিৰিধং কুসলং, অকুসলং, অব্যাকতঞ্চ.

৪৫২. তত্থ ¶ কুসলং ভূমিভেদতো চতুব্বিধং কামাৰচরং রূপাৰচরং অরূপাৰচরং লোকুত্তরঞ্চ. তত্থ কামাৰচরং সোমনস্সুপেক্খাঞাণসঙ্খারভেদতো অট্ঠৰিধং. সেয্যথিদং – সোমনস্সসহগতং ঞাণসম্পযুত্তং অসঙ্খারং সসঙ্খারঞ্চ, তথা ঞাণৰিপ্পযুত্তং. উপেক্খাসহগতং ঞাণসম্পযুত্তং অসঙ্খারং সসঙ্খারঞ্চ, তথা ঞাণৰিপ্পযুত্তং.

যদা হি দেয্যধম্মপটিগ্গাহকাদিসম্পত্তিং অঞ্ঞং ৰা সোমনস্সহেতুং আগম্ম হট্ঠপহট্ঠো ‘‘অত্থি দিন্ন’’ন্তিআদিনযপ্পৰত্তং (ম. নি. ১.৪৪১) সম্মাদিট্ঠিং পুরক্খত্ৰা অসংসীদন্তো অনুস্সাহিতো পরেহি দানাদীনি পুঞ্ঞানি করোতি, তদাস্স সোমনস্সসহগতং ঞাণসম্পযুত্তং চিত্তং অসঙ্খারং হোতি. যদা পন ৰুত্তনযেন হট্ঠতুট্ঠো সম্মাদিট্ঠিং পুরক্খত্ৰা অমুত্তচাগতাদিৰসেন সংসীদমানো ৰা পরেহি ৰা উস্সাহিতো করোতি, তদাস্স তদেৰ চিত্তং সসঙ্খারং হোতি. ইমস্মিঞ্হি অত্থে সঙ্খারোতি এতং অত্তনো ৰা পরেসং ৰা ৰসেন পৰত্তস্স পুব্বপযোগস্সাধিৰচনং. যদা পন ঞাতিজনস্স পটিপত্তিদস্সনেন জাতপরিচযা বালদারকা ভিক্খূ দিস্ৰা সোমনস্সজাতা সহসা কিঞ্চিদেৰ হত্থগতং দদন্তি ৰা ৰন্দন্তি ৰা, তদা ততিযং চিত্তং উপ্পজ্জতি. যদা পন ‘‘দেথ ৰন্দথাতি’’ ঞাতীহি উস্সাহিতা এৰং পটিপজ্জন্তি, তদা চতুত্থং চিত্তং উপ্পজ্জতি. যদা পন দেয্যধম্মপটিগ্গাহকাদীনং অসম্পত্তিং অঞ্ঞেসং ৰা সোমনস্সহেতূনং অভাৰং আগম্ম চতূসুপি ৰিকপ্পেসু সোমনস্সরহিতা হোন্তি, তদা সেসানি চত্তারি উপেক্খাসহগতানি উপ্পজ্জন্তীতি. এৰং সোমনস্সুপেক্খাঞাণসঙ্খারভেদতো অট্ঠৰিধং কামাৰচরকুসলং ৰেদিতব্বং.

রূপাৰচরং পন ঝানঙ্গযোগভেদতো পঞ্চৰিধং হোতি. সেয্যথিদং, ৰিতক্কৰিচারপীতিসুখসমাধিযুত্তং পঠমং, অতিক্কন্তৰিতক্কং দুতিযং, ততো অতিক্কন্তৰিচারং ততিযং, ততো ৰিরত্তপীতিকং চতুত্থং, অত্থঙ্গতসুখং উপেক্খাসমাধিযুত্তং পঞ্চমন্তি.

অরূপাৰচরং চতুন্নং আরুপ্পানং যোগৰসেন চতুব্বিধং. ৰুত্তপ্পকারেন হি আকাসানঞ্চাযতনজ্ঝানেন সম্পযুত্তং পঠমং, ৰিঞ্ঞাণঞ্চাযতনাদীহি দুতিযততিযচতুত্থানি ¶ . লোকুত্তরং চতুমগ্গসম্পযোগতো চতুব্বিধন্তি এৰং তাৰ কুসলৰিঞ্ঞাণমেৰ একৰীসতিৰিধং হোতি.

৪৫৩. অকুসলং ¶ পন ভূমিতো একৰিধং কামাৰচরমেৰ, মূলতো তিৰিধং লোভমূলং দোসমূলং মোহমূলঞ্চ.

তত্থ লোভমূলং সোমনস্সুপেক্খাদিট্ঠিগতসঙ্খারভেদতো অট্ঠৰিধং. সেয্যথিদং, সোমনস্সসহগতং দিট্ঠিগতসম্পযুত্তং অসঙ্খারং সসঙ্খারঞ্চ, তথা দিট্ঠিগতৰিপ্পযুত্তং. উপেক্খাসহগতং দিট্ঠিগতসম্পযুত্তং অসঙ্খারং সসঙ্খারঞ্চ, তথা দিট্ঠিগতৰিপ্পযুত্তং.

যদা হি ‘‘নত্থি কামেসু আদীনৰো’’তি (ম. নি. ১.৪৬৯) আদিনা নযেন মিচ্ছাদিট্ঠিং পুরক্খত্ৰা হট্ঠতুট্ঠো কামে ৰা পরিভুঞ্জতি, দিট্ঠমঙ্গলাদীনি ৰা সারতো পচ্চেতি সভাৰতিক্খেনেৰ অনুস্সাহিতেন চিত্তেন, তদা পঠমং অকুসলচিত্তং উপ্পজ্জতি. যদা মন্দেন সমুস্সাহিতেন চিত্তেন, তদা দুতিযং. যদা মিচ্ছাদিট্ঠিং অপুরক্খত্ৰা কেৰলং হট্ঠতুট্ঠো মেথুনং ৰা সেৰতি, পরসম্পত্তিং ৰা অভিজ্ঝাযতি, পরভণ্ডং ৰা হরতি সভাৰতিক্খেনেৰ অনুস্সাহিতেন চিত্তেন, তদা ততিযং. যদা মন্দেন সমুস্সাহিতেন চিত্তেন, তদা চতুত্থং. যদা পন কামানং ৰা অসম্পত্তিং আগম্ম অঞ্ঞেসং ৰা সোমনস্সহেতূনং অভাৰেন চতূসুপি ৰিকপ্পেসু সোমনস্সরহিতা হোন্তি, তদা সেসানি চত্তারি উপেক্খাসহগতানি উপ্পজ্জন্তীতি এৰং সোমনস্সুপেক্খাদিট্ঠিগতসঙ্খারভেদতো অট্ঠৰিধং লোভমূলং ৰেদিতব্বং.

দোসমূলং পন দোমনস্সসহগতং পটিঘসম্পযুত্তং অসঙ্খারং সসঙ্খারন্তি দুৰিধমেৰ হোতি, তস্স পাণাতিপাতাদীসু তিক্খমন্দপ্পৰত্তিকালে পৰত্তি ৰেদিতব্বা.

মোহমূলং উপেক্খাসহগতং ৰিচিকিচ্ছাসম্পযুত্তং উদ্ধচ্চসম্পযুত্তঞ্চাতি দুৰিধং. তস্স সন্নিট্ঠানৰিক্খেপকালে পৰত্তি ৰেদিতব্বাতি এৰং অকুসলৰিঞ্ঞাণং দ্ৰাদসৰিধং হোতি.

৪৫৪. অব্যাকতং জাতিভেদতো দুৰিধং ৰিপাকং কিরিযঞ্চ. তত্থ ৰিপাকং ভূমিতো চতুব্বিধং কামাৰচরং রূপাৰচরং অরূপাৰচরং লোকুত্তরঞ্চ. তত্থ ¶ কামাৰচরং দুৰিধং কুসলৰিপাকং অকুসলৰিপাকঞ্চ. কুসলৰিপাকম্পি দুৰিধং অহেতুকং সহেতুকঞ্চ.

তত্থ অলোভাদিৰিপাকহেতুৰিরহিতং অহেতুকং, তং চক্খুৰিঞ্ঞাণং, সোতঘানজিৰ্হাকাযৰিঞ্ঞাণং ¶ , সম্পটিচ্ছনকিচ্চা মনোধাতু, সন্তীরণাদিকিচ্চা দ্ৰে মনোৰিঞ্ঞাণধাতুযো চাতি অট্ঠৰিধং.

তত্থ চক্খুসন্নিস্সিতরূপৰিজাননলক্খণং চক্খুৰিঞ্ঞাণং, রূপমত্তারম্মণরসং, রূপাভিমুখভাৰপচ্চুপট্ঠানং, রূপারম্মণায কিরিযমনোধাতুযা অপগমপদট্ঠানং. সোতাদিসন্নিস্সিতসদ্দাদিৰিজাননলক্খণানি সোতঘানজিৰ্হাকাযৰিঞ্ঞাণানি, সদ্দাদিমত্তারম্মণরসানি, সদ্দাদিঅভিমুখভাৰপচ্চুপট্ঠানানি, সদ্দারম্মণাদীনং কিরিযমনোধাতূনং অপগমপদট্ঠানানি.

চক্খুৰিঞ্ঞাণাদীনং অনন্তরং রূপাদিৰিজাননলক্খণা মনোধাতু, রূপাদিসম্পটিচ্ছনরসা, তথাভাৰপচ্চুপট্ঠানা, চক্খুৰিঞ্ঞাণাদিঅপগমপদট্ঠানা.

অহেতুকৰিপাকা সল়ারম্মণৰিজাননলক্খণা দুৰিধাপি সন্তীরণাদিকিচ্চা মনোৰিঞ্ঞাণধাতু, সন্তীরণাদিরসা, তথাভাৰপচ্চুপট্ঠানা, হদযৰত্থুপদট্ঠানা. সোমনস্সুপেক্খাযোগতো পন দ্ৰিপঞ্চট্ঠানভেদতো চ তস্সা ভেদো. এতাসু হি একা একন্তমিট্ঠারম্মণে পৰত্তিসব্ভাৰতো সোমনস্সসম্পযুত্তা হুত্ৰা সন্তীরণতদারম্মণৰসেন পঞ্চদ্ৰারে চেৰ জৰনাৰসানে চ পৰত্তনতো দ্ৰিট্ঠানা হোতি. একা ইট্ঠমজ্ঝত্তারম্মণে পৰত্তিসব্ভাৰতো উপেক্খাসম্পযুত্তা হুত্ৰা সন্তীরণতদারম্মণপটিসন্ধিভৰঙ্গচুতিৰসেন পৰত্তনতো পঞ্চট্ঠানা হোতি.

অট্ঠৰিধম্পি চেতং অহেতুকৰিপাকৰিঞ্ঞাণং নিযতানিযতারম্মণত্তা দুৰিধং. উপেক্খাসুখসোমনস্সভেদতো তিৰিধং. ৰিঞ্ঞাণপঞ্চকং হেত্থ নিযতারম্মণং যথাক্কমং রূপাদীসুযেৰ পৰত্তিতো, সেসং অনিযতারম্মণং. তত্র হি মনোধাতু পঞ্চসুপি রূপাদীসু পৰত্ততি, মনোৰিঞ্ঞাণধাতুদ্ৰযং ছসূতি. কাযৰিঞ্ঞাণং পনেত্থ সুখযুত্তং, দ্ৰিট্ঠানা মনোৰিঞ্ঞাণধাতু সোমনস্সযুত্তা, সেসং উপেক্খাযুত্তন্তি. এৰং তাৰ কুসলৰিপাকাহেতুকং অট্ঠৰিধং ৰেদিতব্বং.

অলোভাদিৰিপাকহেতুসম্পযুত্তং পন সহেতুকং, তং কামাৰচরকুসলং ৰিয সোমনস্সাদি ভেদতো অট্ঠৰিধং. যথা পন কুসলং দানাদিৰসেন ¶ ছসু আরম্মণেসু পৰত্ততি, ন ইদং তথা. ইদঞ্হি পটিসন্ধিভৰঙ্গচুতিতদারম্মণৰসেন পরিত্তধম্মপরিযাপন্নেসুযেৰ ছসু আরম্মণেসু পৰত্ততি ¶ . সঙ্খারাসঙ্খারভাৰো পনেত্থ আগমনাদিৰসেন ৰেদিতব্বো. সম্পযুত্তধম্মানঞ্চ ৰিসেসে অসতিপি আদাসতলাদীসু মুখনিমিত্তং ৰিয নিরুস্সাহং ৰিপাকং, মুখং ৰিয সউস্সাহং কুসলন্তি ৰেদিতব্বং.

কেৰলং হি অকুসলৰিপাকং অহেতুকমেৰ, তং চক্খুৰিঞ্ঞাণং, সোতঘানজিৰ্হাকাযৰিঞ্ঞাণং, সম্পটিচ্ছনকিচ্চা মনোধাতু, সন্তীরণাদিকিচ্চা পঞ্চট্ঠানা মনোৰিঞ্ঞাণধাতূতি সত্তৰিধং. তং লক্খণাদিতো কুসলাহেতুকৰিপাকে ৰুত্তনযেনেৰ ৰেদিতব্বং.

কেৰলঞ্হি কুসলৰিপাকানি ইট্ঠইট্ঠমজ্ঝত্তারম্মণানি, ইমানি অনিট্ঠঅনিট্ঠমজ্ঝত্তারম্মণানি. তানি চ উপেক্খাসুখসোমনস্সভেদতো তিৰিধানি, ইমানি দুক্খউপেক্খাৰসেন দুৰিধানি. এত্থ হি কাযৰিঞ্ঞাণং দুক্খসহগতমেৰ, সেসানি উপেক্খাসহগতানি. সা চ তেসু উপেক্খা হীনা দুক্খং ৰিয নাতিতিখিণা, ইতরেসু উপেক্খা পণীতা সুখং ৰিয নাতিতিখিণা. ইতি ইমেসং সত্তন্নং অকুসলৰিপাকানং পুরিমানঞ্চ সোল়সন্নং কুসলৰিপাকানং ৰসেন কামাৰচরং ৰিপাকৰিঞ্ঞাণং তেৰীসতিৰিধং.

রূপাৰচরং পন কুসলং ৰিয পঞ্চৰিধং. কুসলং পন সমাপত্তিৰসেন জৰনৰীথিযং পৰত্ততি. ইদং উপপত্তিযং পটিসন্ধিভৰঙ্গচুতিৰসেন. যথা চ রূপাৰচরং, এৰং অরূপাৰচরম্পি কুসলং ৰিয চতুব্বিধং. পৰত্তিভেদোপিস্স রূপাৰচরে ৰুত্তনযো এৰ. লোকুত্তরৰিপাকং চতুমগ্গযুত্তচিত্তফলত্তা চতুব্বিধং, তং মগ্গৰীথিৰসেন চেৰ সমাপত্তিৰসেন চ দ্ৰিধা পৰত্ততি. এৰং সব্বম্পি চতূসু ভূমীসু ছত্তিংসৰিধং ৰিপাকৰিঞ্ঞাণং হোতি.

কিরিযং পন ভূমিভেদতো তিৰিধং কামাৰচরং রূপাৰচরং অরূপাৰচরঞ্চ. তত্থ কামাৰচরং দুৰিধং অহেতুকং সহেতুকঞ্চ. তত্থ অলোভাদিকিরিযহেতুৰিরহিতং অহেতুকং, তং মনোধাতুমনোৰিঞ্ঞাণধাতুভেদতো দুৰিধং.

তত্থ চক্খুৰিঞ্ঞাণাদিপুরেচররূপাদিৰিজাননলক্খণা মনোধাতু, আৰজ্জনরসা, রূপাদিঅভিমুখভাৰপচ্চুপট্ঠানা, ভৰঙ্গৰিচ্ছেদপদট্ঠানা, সা উপেক্খাযুত্তাৰ হোতি.

মনোৰিঞ্ঞাণধাতু ¶ ¶ পন দুৰিধা সাধারণা অসাধারণা চ. তত্থ সাধারণা উপেক্খাসহগতাহেতুককিরিযা সল়ারম্মণৰিজাননলক্খণা, কিচ্চৰসেন পঞ্চদ্ৰারমনোদ্ৰারেসু ৰোট্ঠব্বনাৰজ্জনরসা, তথাভাৰপচ্চুপট্ঠানা, অহেতুকৰিপাকমনোৰিঞ্ঞাণধাতু ভৰঙ্গানং অঞ্ঞতরাপগমপদট্ঠানা.

অসাধারণা সোমনস্সসহগতাহেতুককিরিযা সল়ারম্মণৰিজাননলক্খণা, কিচ্চৰসেন অরহতং অনুল়ারেসু ৰত্থূসু হসিতুপ্পাদনরসা, তথাভাৰপচ্চুপট্ঠানা, একন্ততো হদযৰত্থুপদট্ঠানাতি. ইতি কামাৰচরকিরিযং অহেতুকং তিৰিধং.

সহেতুকং পন সোমনস্সাদিভেদতো কুসলং ৰিয অট্ঠৰিধং. কেৰলঞ্হি কুসলং সেক্খপুথুজ্জনানং উপ্পজ্জতি, ইদং অরহতংযেৰাতি অযমেত্থ ৰিসেসো. এৰং তাৰ কামাৰচরং একাদসৰিধং.

রূপাৰচরং পন অরূপাৰচরঞ্চ কুসলং ৰিয পঞ্চৰিধং চতুব্বিধঞ্চ হোতি. অরহতং উপ্পত্তিৰসেনেৰ চস্স কুসলতো ৰিসেসো ৰেদিতব্বোতি. এৰং সব্বম্পি তীসু ভূমীসু ৰীসতিৰিধং কিরিযৰিঞ্ঞাণং হোতি.

৪৫৫. ইতি একৰীসতি কুসলানি দ্ৰাদসাকুসলানি ছত্তিংস ৰিপাকানি ৰীসতি কিরিযানীতি সব্বানিপি একূননৰুতি ৰিঞ্ঞাণানি হোন্তি. যানি পটিসন্ধিভৰঙ্গাৰজ্জনদস্সনসৰনঘাযনসাযনফুসনসম্পটিচ্ছনসন্তীরণৰোট্ঠব্বনজৰনতদারম্মণচুতিৰসেন চুদ্দসহি আকারেহি পৰত্তন্তি.

কথং? যদা হি অট্ঠন্নং কামাৰচরকুসলানং আনুভাৰেন দেৰমনুস্সেসু সত্তা নিব্বত্তন্তি, তদা নেসং মরণকালে পচ্চুপট্ঠিতং কম্মকম্মনিমিত্তগতিনিমিত্তানং অঞ্ঞতরং আরম্মণং কত্ৰা অট্ঠ সহেতুককামাৰচরৰিপাকানি, মনুস্সেসু পণ্ডকাদিভাৰং আপজ্জমানানং দুব্বলদ্ৰিহেতুককুসলৰিপাকউপেক্খাসহগতাহেতুকৰিপাকমনোৰিঞ্ঞাণধাতু চাতি পটিসন্ধিৰসেন নৰ ৰিপাকচিত্তানি পৰত্তন্তি. যদা রূপাৰচরারূপাৰচরকুসলানুভাৰেন রূপারূপভৰেসু নিব্বত্তন্তি ¶ , তদা নেসং মরণকালে পচ্চুপট্ঠিতং কম্মনিমিত্তমেৰ আরম্মণং কত্ৰা নৰ রূপারূপাৰচরৰিপাকানি পটিসন্ধিৰসেন পৰত্তন্তি.

যদা ¶ পন অকুসলানুভাৰেন অপাযে নিব্বত্তন্তি, তদা নেসং মরণকালে পচ্চুপট্ঠিতং কম্মকম্মনিমিত্তগতিনিমিত্তানং অঞ্ঞতরং আরম্মণং কত্ৰা একা অকুসলৰিপাকাহেতুকমনোৰিঞ্ঞাণধাতু পটিসন্ধিৰসেন পৰত্ততীতি এৰং তাৰেত্থ একূনৰীসতিযা ৰিপাকৰিঞ্ঞাণানং পটিসন্ধিৰসেন পৰত্তি ৰেদিতব্বা.

পটিসন্ধিৰিঞ্ঞাণে পন নিরুদ্ধে তং তং পটিসন্ধিৰিঞ্ঞাণমনুবন্ধমানং তস্স তস্সেৰ কম্মস্স ৰিপাকভূতং তস্মিঞ্ঞেৰ আরম্মণে তাদিসমেৰ ভৰঙ্গৰিঞ্ঞাণং নাম পৰত্ততি, পুনপি তাদিসন্তি এৰং অসতি সন্তানৰিনিৰত্তকে অঞ্ঞস্মিং চিত্তুপ্পাদে নদীসোতং ৰিয সুপিনং অপস্সতো নিদ্দোক্কমনকালাদীসু অপরিমাণসঙ্খ্যম্পি পৰত্ততিযেৰাতি এৰং তেসঞ্ঞেৰ ৰিঞ্ঞাণানং ভৰঙ্গৰসেনাপি পৰত্তি ৰেদিতব্বা.

এৰং পৰত্তে পন ভৰঙ্গসন্তানে যদা সত্তানং ইন্দ্রিযানি আরম্মণগহণক্খমানি হোন্তি, তদা চক্খুস্সাপাথগতে রূপে রূপং পটিচ্চ চক্খুপসাদস্স ঘট্টনা হোতি, ততো ঘট্টনানুভাৰেন ভৰঙ্গচলনং হোতি, অথ নিরুদ্ধে ভৰঙ্গে তদেৰ রূপং আরম্মণং কত্ৰা ভৰঙ্গং ৰিচ্ছিন্দমানা ৰিয আৰজ্জনকিচ্চং সাধযমানা কিরিযমনোধাতু উপ্পজ্জতি. সোতদ্ৰারাদীসুপি এসেৰ নযো. মনোদ্ৰারে পন ছব্বিধেপি আরম্মণে আপাথগতে ভৰঙ্গচলনানন্তরং ভৰঙ্গং ৰিচ্ছিন্দমানা ৰিয আৰজ্জনকিচ্চং সাধযমানা অহেতুককিরিযমনোৰিঞ্ঞাণধাতু উপ্পজ্জতি উপেক্খাসহগতাতি এৰং দ্ৰিন্নং কিরিযৰিঞ্ঞাণানং আৰজ্জনৰসেন পৰত্তি ৰেদিতব্বা.

আৰজ্জনানন্তরং পন চক্খুদ্ৰারে তাৰ দস্সনকিচ্চং সাধযমানং চক্খুপসাদৰত্থুকং চক্খুৰিঞ্ঞাণং, সোতদ্ৰারাদীসু সৰনাদিকিচ্চং সাধযমানানি সোতঘানজিৰ্হাকাযৰিঞ্ঞাণানি পৰত্তন্তি. তানি ইট্ঠইট্ঠমজ্ঝত্তেসু ৰিসযেসু কুসলৰিপাকানি, অনিট্ঠঅনিট্ঠমজ্ঝত্তেসু ৰিসযেসু অকুসলৰিপাকানীতি এৰং দসন্নং ৰিপাকৰিঞ্ঞাণানং দস্সনসৰনঘাযনসাযনফুসনৰসেন পৰত্তি ৰেদিতব্বা.

‘‘চক্খুৰিঞ্ঞাণধাতুযা ¶ উপ্পজ্জিত্ৰা নিরুদ্ধসমনন্তরা উপ্পজ্জতি চিত্তং মনো মানসং তজ্জা মনোধাতূ’’তিআদিৰচনতো (ৰিভ. ১৮৪) পন চক্খুৰিঞ্ঞাণাদীনং অনন্তরা ¶ তেসঞ্ঞেৰ ৰিসযং সম্পটিচ্ছমানা কুসলৰিপাকানন্তরং কুসলৰিপাকা, অকুসলৰিপাকানন্তরং অকুসলৰিপাকা মনোধাতু উপ্পজ্জতি. এৰং দ্ৰিন্নং ৰিপাকৰিঞ্ঞাণানং সম্পটিচ্ছনৰসেন পৰত্তি ৰেদিতব্বা.

‘‘মনোধাতুযাপি উপ্পজ্জিত্ৰা নিরুদ্ধসমনন্তরা উপ্পজ্জতি চিত্তং মনো মানসং তজ্জামনোৰিঞ্ঞাণধাতূ’’তি (ৰিভ. ১৮৪) ৰচনতো পন মনোধাতুযা সম্পটিচ্ছিতমেৰ ৰিসযং সন্তীরযমানা অকুসলৰিপাকমনোধাতুযা অনন্তরা অকুসলৰিপাকা, কুসলৰিপাকায অনন্তরা ইট্ঠারম্মণে সোমনস্সসহগতা, ইট্ঠমজ্ঝত্তে উপেক্খাসহগতা উপ্পজ্জতি ৰিপাকাহেতুকমনোৰিঞ্ঞাণধাতূতি এৰং তিণ্ণং ৰিপাকৰিঞ্ঞাণানং সন্তীরণৰসেন পৰত্তি ৰেদিতব্বা.

সন্তীরণানন্তরং পন তমেৰ ৰিসযং ৰৰত্থাপযমানা উপ্পজ্জতি কিরিযাহেতুকমনোৰিঞ্ঞাণধাতু উপেক্খাসহগতাতি এৰং একস্সেৰ কিরিযৰিঞ্ঞাণস্স ৰোট্ঠব্বনৰসেন পৰত্তি ৰেদিতব্বা.

ৰোট্ঠব্বনানন্তরং পন সচে মহন্তং হোতি রূপাদিআরম্মণং, অথ যথাৰৰত্থাপিতে ৰিসযে অট্ঠন্নং ৰা কামাৰচরকুসলানং দ্ৰাদসন্নং ৰা অকুসলানং নৰন্নং ৰা অৰসেসকামাৰচরকিরিযানং অঞ্ঞতরৰসেন ছ সত্ত ৰা জৰনানি জৰন্তি, এসো তাৰ পঞ্চদ্ৰারে নযো.

মনোদ্ৰারে পন মনোদ্ৰারাৰজ্জনানন্তরং তানিযেৰ. গোত্রভুতো উদ্ধং রূপাৰচরতো পঞ্চ কুসলানি পঞ্চ কিরিযানি, অরূপাৰচরতো চত্তারি কুসলানি চত্তারি কিরিযানি, লোকুত্তরতো চত্তারি মগ্গচিত্তানি চত্তারি ফলচিত্তানীতি ইমেসু যং যং লদ্ধপচ্চযং হোতি, তং তং জৰতীতি এৰং পঞ্চপঞ্ঞাসায কুসলাকুসলকিরিযৰিপাকৰিঞ্ঞাণানং জৰনৰসেন পৰত্তি ৰেদিতব্বা.

জৰনাৰসানে পন সচে পঞ্চদ্ৰারে অতিমহন্তং, মনোদ্ৰারে চ ৰিভূতমারম্মণং হোতি, অথ কামাৰচরসত্তানং কামাৰচরজৰনাৰসানে ইট্ঠারম্মণাদীনং পুরিমকম্মজৰনচিত্তাদীনঞ্চ ৰসেন যো যো পচ্চযো লদ্ধো হোতি, তস্স তস্স ৰসেন অট্ঠসু সহেতুককামাৰচরৰিপাকেসু তীসু ¶ ৰিপাকাহেতুকমনোৰিঞ্ঞাণধাতূসু চ অঞ্ঞতরং পটিসোতগতং নাৰং অনুবন্ধমানং কিঞ্চি অন্তরং উদকমিৰ ভৰঙ্গস্সারম্মণতো অঞ্ঞস্মিং আরম্মণে ¶ জৰিতং জৰনমনুবন্ধং দ্ৰিক্খত্তুং সকিং ৰা ৰিপাকৰিঞ্ঞাণং উপ্পজ্জতি. তদেতং জৰনাৰসানে ভৰঙ্গস্স আরম্মণে পৰত্তনারহং সমানং তস্স জৰনস্স আরম্মণং আরম্মণং কত্ৰা পৰত্তত্তা তদারম্মণন্তি ৰুচ্চতি. এৰং একাদসন্নং ৰিপাকৰিঞ্ঞাণানং তদারম্মণৰসেন পৰত্তি ৰেদিতব্বা.

তদারম্মণাৰসানে পন পুন ভৰঙ্গমেৰ পৰত্ততি, ভৰঙ্গে ৰিচ্ছিন্নে পুন আৰজ্জনাদীনীতি এৰং লদ্ধপচ্চযচিত্তসন্তানং ভৰঙ্গানন্তরং আৰজ্জনং আৰজ্জনানন্তরং দস্সনাদীনীতি চিত্তনিযমৰসেনেৰ পুনপ্পুনং তাৰ পৰত্ততি, যাৰ একস্মিং ভৰে ভৰঙ্গস্স পরিক্খযো. একস্মিং হি ভৰে যং সব্বপচ্ছিমং ভৰঙ্গচিত্তং, তং ততো চৰনত্তা চুতীতি ৰুচ্চতি. তস্মা তম্পি একূনৰীসতিৰিধমেৰ হোতি. এৰং একূনৰীসতিযা ৰিপাকৰিঞ্ঞাণানং চুতিৰসেন পৰত্তি ৰেদিতব্বা.

চুতিতো পন পুন পটিসন্ধি, পটিসন্ধিতো পুন ভৰঙ্গন্তি এৰং ভৰগতিঠিতিনিৰাসেসু সংসরমানানং সত্তানং অৰিচ্ছিন্নং চিত্তসন্তানং পৰত্ততিযেৰ. যো পনেত্থ অরহত্তং পাপুণাতি, তস্স চুতিচিত্তে নিরুদ্ধে নিরুদ্ধমেৰ হোতীতি.

ইদং ৰিঞ্ঞাণক্খন্ধে ৰিত্থারকথামুখং.

ৰেদনাক্খন্ধকথা

৪৫৬. ইদানি যং ৰুত্তং ‘‘যংকিঞ্চি ৰেদযিতলক্খণং, সব্বং তং একতো কত্ৰা ৰেদনাক্খন্ধো ৰেদিতব্বো’’তি, এত্থাপি ৰেদযিতলক্খণং নাম ৰেদনাৰ. যথাহ – ‘‘ৰেদযতি ৰেদযতীতি খো আৰুসো, তস্মা ৰেদনাতি ৰুচ্চতী’’তি (ম. নি. ১.৪৫০). সা পন ৰেদযিতলক্খণেন সভাৰতো একৰিধাপি জাতিৰসেন তিৰিধা হোতি কুসলা, অকুসলা, অব্যাকতা চাতি.

তত্থ কামাৰচরং সোমনস্সুপেক্খাঞাণসঙ্খারভেদতো অট্ঠৰিধন্তিআদিনা নযেন ৰুত্তেন কুসলৰিঞ্ঞাণেন ¶ সম্পযুত্তা কুসলা, অকুসলেন সম্পযুত্তা অকুসলা, অব্যাকতেন সম্পযুত্তা অব্যাকতাতি ৰেদিতব্বা. সা সভাৰভেদতো পঞ্চৰিধা হোতি – সুখং দুক্খং সোমনস্সং দোমনস্সং উপেক্খাতি.

তত্থ ¶ কুসলৰিপাকেন কাযৰিঞ্ঞাণেন সম্পযুত্তং সুখং. অকুসলৰিপাকেন দুক্খং. কামাৰচরতো চতূহি কুসলেহি, চতূহি সহেতুকৰিপাকেহি, একেন অহেতুকৰিপাকেন, চতূহি সহেতুককিরিযেহি, একেন অহেতুককিরিযেন, চতূহি অকুসলেহি, রূপাৰচরতো ঠপেত্ৰা পঞ্চমজ্ঝানৰিঞ্ঞাণং চতূহি কুসলেহি, চতূহি ৰিপাকেহি, চতূহি কিরিযেহি, লোকুত্তরং পন যস্মা অঝানিকং নাম নত্থি, তস্মা অট্ঠ লোকুত্তরানি পঞ্চন্নং ঝানানং ৰসেন চত্তালীসং হোন্তি. তেসু ঠপেত্ৰা অট্ঠ পঞ্চমজ্ঝানিকানি সেসেহি দ্ৰত্তিংসায কুসলৰিপাকেহীতি এৰং সোমনস্সং দ্ৰাসট্ঠিযা ৰিঞ্ঞাণেহি সম্পযুত্তং. দোমনস্সং দ্ৰীহি অকুসলেহি. উপেক্খা অৰসেসপঞ্চপঞ্ঞাসায ৰিঞ্ঞাণেহি সম্পযুত্তা.

তত্থ ইট্ঠফোট্ঠব্বানুভৰনলক্খণং সুখং, সম্পযুত্তানং উপব্রূহনরসং, কাযিকঅস্সাদপচ্চুপট্ঠানং, কাযিন্দ্রিযপদট্ঠানং.

অনিট্ঠফোট্ঠব্বানুভৰনলক্খণং দুক্খং, সম্পযুত্তানং মিলাপনরসং, কাযিকাবাধপচ্চুপট্ঠানং, কাযিন্দ্রিযপদট্ঠানং.

ইট্ঠারম্মণানুভৰনলক্খণং সোমনস্সং, যথা তথা ৰা ইট্ঠাকারসম্ভোগরসং, চেতসিকঅস্সাদপচ্চুপট্ঠানং, পস্সদ্ধিপদট্ঠানং.

অনিট্ঠারম্মণানুভৰনলক্খণং দোমনস্সং, যথা তথা ৰা অনিট্ঠাকারসম্ভোগরসং, চেতসিকাবাধপচ্চুপট্ঠানং, একন্তেনেৰ হদযৰত্থুপদট্ঠানং.

মজ্ঝত্তৰেদযিতলক্খণা উপেক্খা, সম্পযুত্তানং নাতিউপব্রূহনমিলাপনরসা, সন্তভাৰপচ্চুপট্ঠানা, নিপ্পীতিকচিত্তপদট্ঠানাতি.

ইদং ৰেদনাক্খন্ধে ৰিত্থারকথামুখং.

সঞ্ঞাক্খন্ধকথা

৪৫৭. ইদানি ¶ যং ৰুত্তং ‘‘যংকিঞ্চি সঞ্জাননলক্খণং, সব্বং তং একতো কত্ৰা সঞ্ঞাক্খন্ধো ৰেদিতব্বো’’তি, এত্থাপি সঞ্জাননলক্খণং নাম সঞ্ঞাৰ. যথাহ – ‘‘সঞ্জানাতি সঞ্জানাতীতি খো, আৰুসো, তস্মা সঞ্ঞাতি ৰুচ্চতী’’তি ¶ (ম. নি. ১.৪৫০). সা পনেসা সঞ্জাননলক্খণেন সভাৰতো একৰিধাপি জাতিৰসেন তিৰিধা হোতি কুসলা, অকুসলা, অব্যাকতা চ.

তত্থ কুসলৰিঞ্ঞাণসম্পযুত্তা কুসলা, অকুসলসম্পযুত্তা অকুসলা, অব্যাকতসম্পযুত্তা অব্যাকতা. ন হি তং ৰিঞ্ঞাণং অত্থি, যং সঞ্ঞায ৰিপ্পযুত্তং, তস্মা যত্তকো ৰিঞ্ঞাণস্স ভেদো, তত্তকো সঞ্ঞাযাতি.

সা পনেসা এৰং ৰিঞ্ঞাণেন সমপ্পভেদাপি লক্খণাদিতো সব্বাৰ সঞ্জাননলক্খণা, তদেৰেতন্তি পুন সঞ্জাননপচ্চযনিমিত্তকরণরসা দারুআদীসু তচ্ছকাদযো ৰিয, যথাগহিতনিমিত্তৰসেন অভিনিৰেসকরণপচ্চুপট্ঠানা হত্থিদস্সকঅন্ধা (উদা. ৫৪) ৰিয, যথাউপট্ঠিতৰিসযপদট্ঠানা তিণপুরিসকেসু মিগপোতকানং পুরিসাতি উপ্পন্নসঞ্ঞা ৰিযাতি.

ইদং সঞ্ঞাক্খন্ধে ৰিত্থারকথামুখং.

সঙ্খারক্খন্ধকথা

৪৫৮. যং পন ৰুত্তং ‘‘যংকিঞ্চি অভিসঙ্খরণলক্খণং, সব্বং তং একতো কত্ৰা সঙ্খারক্খন্ধো ৰেদিতব্বো’’তি, এত্থ অভিসঙ্খরণলক্খণং নাম রাসিকরণলক্খণং. কিং পন তন্তি, সঙ্খারাযেৰ. যথাহ – ‘‘সঙ্খতমভিসঙ্খরোন্তীতি খো, ভিক্খৰে, তস্মা সঙ্খারাতি ৰুচ্চন্তী’’তি (সং. নি. ৩.৭৯). তে অভিসঙ্খরণলক্খণা, আযূহনরসা, ৰিপ্ফারপচ্চুপট্ঠানা, সেসখন্ধত্তযপদট্ঠানা.

এৰং লক্খণাদিতো একৰিধাপি চ জাতিৰসেন তিৰিধা কুসলা, অকুসলা, অব্যাকতাতি ¶ . তেসু কুসলৰিঞ্ঞাণসম্পযুত্তা কুসলা. অকুসলসম্পযুত্তা অকুসলা. অব্যাকতসম্পযুত্তা অব্যাকতা.

তত্থ কামাৰচরপঠমকুসলৰিঞ্ঞাণসম্পযুত্তা তাৰ নিযতা সরূপেন আগতা সত্তৰীসতি, যেৰাপনকা চত্তারো, অনিযতা পঞ্চাতি ছত্তিংস. তত্থ ফস্সো, চেতনা, ৰিতক্কো, ৰিচারো, পীতি, ৰীরিযং, জীৰিতং, সমাধি, সদ্ধা, সতি, হিরী, ওত্তপ্পং, অলোভো, অদোসো, অমোহো, কাযপস্সদ্ধি, চিত্তপস্সদ্ধি, কাযলহুতা, চিত্তলহুতা, কাযমুদুতা, চিত্তমুদুতা, কাযকম্মঞ্ঞতা, চিত্তকম্মঞ্ঞতা, কাযপাগুঞ্ঞতা, চিত্তপাগুঞ্ঞতা, কাযুজুকতা, চিত্তুজুকতাতি ইমে সরূপেন ¶ আগতা সত্তৰীসতি (ধ. স. ১; ধ. স. অট্ঠ. ১ যেৰাপনকৰণ্ণনা). ছন্দো, অধিমোক্খো, মনসিকারো, তত্রমজ্ঝত্ততাতি ইমে যেৰাপনকা চত্তারো (ধ. স. অট্ঠ. ১ যেৰাপনকৰণ্ণনা). করুণা, মুদিতা, কাযদুচ্চরিতৰিরতি, ৰচীদুচ্চরিতৰিরতি, মিচ্ছাজীৰৰিরতীতি ইমে অনিযতা পঞ্চ. এতে হি কদাচি উপ্পজ্জন্তি, উপ্পজ্জমানাপি চ ন একতো উপ্পজ্জন্তি.

৪৫৯. তত্থ ফুসতীতি ফস্সো. স্ৰাযং ফুসনলক্খণো. সঙ্ঘট্টনরসো, সন্নিপাতপচ্চুপট্ঠানো, আপাথগতৰিসযপদট্ঠানো. অযঞ্হি অরূপধম্মোপি সমানো আরম্মণে ফুসনাকারেনেৰ পৰত্ততি. একদেসেন চ অনল্লিযমানোপি রূপং ৰিয চক্খু, সদ্দো ৰিয চ সোতং চিত্তং আরম্মণঞ্চ সঙ্ঘট্টেতি, তিকসন্নিপাতসঙ্খাতস্স অত্তনো কারণস্স ৰসেন পৰেদিতত্তা সন্নিপাতপচ্চুপট্ঠানো. তজ্জাসমন্নাহারেন চেৰ ইন্দ্রিযেন চ পরিক্খতে ৰিসযে অনন্তরাযেনেৰ উপ্পজ্জনতো আপাথগতৰিসযপদট্ঠানোতি ৰুচ্চতি. ৰেদনাধিট্ঠানভাৰতো পন নিচ্চম্মগাৰী (সং. নি. ২.৬৩) ৰিয দট্ঠব্বো.

৪৬০. চেতযতীতি চেতনা. অভিসন্দহতীতি অত্থো. সা চেতনাভাৰলক্খণা, আযূহনরসা, সংৰিদহনপচ্চুপট্ঠানা সকিচ্চপরকিচ্চসাধিকা জেট্ঠসিস্সমহাৰড্ঢকীআদযো ৰিয. অচ্চাযিককম্মানুস্সরণাদীসু চ পনাযং সম্পযুত্তানং উস্সহনভাৰেন পৰত্তমানা পাকটা হোতি.

ৰিতক্কৰিচারপীতীসু যং ৰত্তব্বং সিযা, তং সব্বং পথৰীকসিণনিদ্দেসে পঠমজ্ঝানৰণ্ণনাযং (ৰিসুদ্ধি. ১.৭১) ৰুত্তমেৰ.

৪৬১. ৰীরভাৰো ¶ ৰীরিযং. তং উস্সহনলক্খণং, সহজাতানং উপত্থম্ভনরসং, অসংসীদনভাৰপচ্চুপট্ঠানং. ‘‘সংৰিগ্গো যোনিসো পদহতী’’তি (অ. নি. ৪.১১৩) ৰচনতো সংৰেগপদট্ঠানং, ৰীরিযারম্ভৰত্থুপদট্ঠানং ৰা, সম্মা আরদ্ধং সব্বসম্পত্তীনং মূলং হোতীতি দট্ঠব্বং.

৪৬২. জীৰন্তি তেন, সযং ৰা জীৰতি, জীৰনমত্তমেৰ ৰা তন্তি জীৰিতং. লক্খণাদীনি পনস্স রূপজীৰিতে ৰুত্তনযেনেৰ ৰেদিতব্বানি. তঞ্হি রূপধম্মানং জীৰিতং, ইদং অরূপধম্মানন্তি ইদমেৰেত্থ নানাকরণং.

৪৬৩. আরম্মণে ¶ চিত্তং সমং আধিযতি, সম্মা ৰা আধিযতি, সমাধানমত্তমেৰ ৰা এতং চিত্তস্সাতি সমাধি. সো অৰিসারলক্খণো, অৰিক্খেপলক্খণো ৰা, সহজাতানং সম্পিণ্ডনরসো ন্হানিযচুণ্ণানং উদকং ৰিয, উপসমপচ্চুপট্ঠানো, ৰিসেসতো সুখপদট্ঠানো, নিৰাতে দীপচ্চীনং ঠিতি ৰিয চেতসো ঠিতীতি দট্ঠব্বো.

৪৬৪. সদ্দহন্তি এতায, সযং ৰা সদ্দহতি, সদ্দহনমত্তমেৰ ৰা এসাতি সদ্ধা. সা সদ্দহনলক্খণা, ওকপ্পনলক্খণা ৰা, পসাদনরসা উদকপ্পসাদকমণি ৰিয, পক্খন্দনরসা ৰা ওঘুত্তরণো ৰিয. অকালুস্সিযপচ্চুপট্ঠানা, অধিমুত্তিপচ্চুপট্ঠানা ৰা, সদ্ধেয্যৰত্থুপদট্ঠানা, সদ্ধম্মস্সৰনাদিসোতাপত্তিযঙ্গ(দী. নি. ৩.৩১১; সং. নি. ৫.১০০১) পদট্ঠানা ৰা, হত্থৰিত্তবীজানি ৰিয দট্ঠব্বা.

৪৬৫. সরন্তি তায, সযং ৰা সরতি সরণমত্তমেৰ ৰা এসাতি সতি. সা অপিলাপনলক্খণা, অসম্মোসরসা, আরক্খপচ্চুপট্ঠানা, ৰিসযাভিমুখভাৰপচ্চুপট্ঠানা ৰা, থিরসঞ্ঞাপদট্ঠানা, কাযাদিসতিপট্ঠানপদট্ঠানা ৰা. আরম্মণে দল়্হপতিট্ঠিতত্তা পন এসিকা ৰিয, চক্খুদ্ৰারাদিরক্খণতো দোৰারিকো ৰিয চ দট্ঠব্বা.

৪৬৬. কাযদুচ্চরিতাদীহি হিরিযতীতি হিরী. লজ্জাযেতং অধিৰচনং. তেহিযেৰ ওত্তপ্পতীতি ওত্তপ্পং. পাপতো উব্বেগস্সেতং অধিৰচনং. তত্থ পাপতো জিগুচ্ছনলক্খণা হিরী. উত্তাসনলক্খণং ওত্তপ্পং. লজ্জাকারেন পাপানং অকরণরসা হিরী. উত্তাসাকারেন ওত্তপ্পং. ৰুত্তপ্পকারেনেৰ ¶ চ পাপতো সঙ্কোচনপচ্চুপট্ঠানা এতা, অত্তগারৰপরগারৰপদট্ঠানা. অত্তানং গরুং কত্ৰা হিরিযা পাপং জহাতি কুলৰধূ ৰিয. পরং গরুং কত্ৰা ওত্তপ্পেন পাপং জহাতি ৰেসিযা ৰিয. ইমে চ পন দ্ৰে ধম্মা লোকপালকাতি (অ. নি. ২.৯) দট্ঠব্বা.

৪৬৭. ন লুব্ভন্তি তেন, সযং ৰা ন লুব্ভতি, অলুব্ভনমত্তমেৰ ৰা তন্তি অলোভো. অদোসামোহেসুপি এসেৰ নযো. তেসু অলোভো আরম্মণে চিত্তস্স অগেধলক্খণো, অলগ্গভাৰলক্খণো ৰা কমলদলে জলবিন্দু ৰিয. অপরিগ্গহরসো মুত্তভিক্খু ৰিয, অনল্লীনভাৰপচ্চুপট্ঠানো অসুচিম্হি পতিতপুরিসো ৰিয.

৪৬৮. অদোসো ¶ অচণ্ডিক্কলক্খণো, অৰিরোধলক্খণো ৰা অনুকূলমিত্তো ৰিয, আঘাতৰিনযরসো, পরিল়াহৰিনযরসো ৰা চন্দনং ৰিয, সোম্মভাৰপচ্চুপট্ঠানো পুণ্ণচন্দো ৰিয.

৪৬৯. অমোহো যথাসভাৰপটিৰেধলক্খণো, অক্খলিতপটিৰেধলক্খণো ৰা কুসলিস্সাসখিত্তউসুপটিৰেধো ৰিয, ৰিসযোভাসনরসো পদীপো ৰিয. অসম্মোহপচ্চুপট্ঠানো অরঞ্ঞগতসুদেসকো ৰিয. তযোপি চেতে সব্বকুসলানং মূলভূতাতি দট্ঠব্বা.

৪৭০. কাযস্স পস্সম্ভনং কাযপস্সদ্ধি. চিত্তস্স পস্সম্ভনং চিত্তপস্সদ্ধি. কাযোতি চেত্থ ৰেদনাদযো তযো খন্ধা. উভোপি পনেতা একতো কত্ৰা কাযচিত্তদরথৰূপসমলক্খণা কাযচিত্তপস্সদ্ধিযো, কাযচিত্তদরথনিমদ্দনরসা, কাযচিত্তানং অপরিপ্ফন্দনসীতিভাৰপচ্চুপট্ঠানা, কাযচিত্তপদট্ঠানা. কাযচিত্তানং অৰূপসমকরউদ্ধচ্চাদিকিলেসপটিপক্খভূতাতি দট্ঠব্বা.

কাযস্স লহুভাৰো কাযলহুতা. চিত্তস্স লহুভাৰো চিত্তলহুতা. তা কাযচিত্তগরুভাৰৰূপসমলক্খণা, কাযচিত্তগরুভাৰনিমদ্দনরসা, কাযচিত্তানং অদন্ধতাপচ্চুপট্ঠানা, কাযচিত্তপদট্ঠানা. কাযচিত্তানং গরুভাৰকরথিনমিদ্ধাদিকিলেসপটিপক্খভূতাতি দট্ঠব্বা.

কাযস্স মুদুভাৰো কাযমুদুতা. চিত্তস্স মুদুভাৰো চিত্তমুদুতা. তা কাযচিত্তত্থম্ভৰূপসমলক্খণা ¶ , কাযচিত্তথদ্ধভাৰনিমদ্দনরসা, অপ্পটিঘাতপচ্চুপট্ঠানা, কাযচিত্তপদট্ঠানা. কাযচিত্তানং থদ্ধভাৰকরদিট্ঠিমানাদিকিলেসপটিপক্খভূতাতি দট্ঠব্বা.

কাযস্স কম্মঞ্ঞভাৰো কাযকম্মঞ্ঞতা. চিত্তস্স কম্মঞ্ঞভাৰো চিত্তকম্মঞ্ঞতা. তা কাযচিত্তাকম্মঞ্ঞভাৰৰূপসমলক্খণা, কাযচিত্তাকম্মঞ্ঞভাৰনিমদ্দনরসা, কাযচিত্তানং আরম্মণকরণসম্পত্তিপচ্চুপট্ঠানা, কাযচিত্তপদট্ঠানা. কাযচিত্তানং অকম্মঞ্ঞভাৰকরাৰসেসনীৰরণাদিপটিপক্খভূতা, পসাদনীযৰত্থূসু পসাদাৰহা, হিতকিরিযাসু ৰিনিযোগক্খমভাৰাৰহা সুৰণ্ণৰিসুদ্ধি ৰিযাতি দট্ঠব্বা.

কাযস্স ¶ পাগুঞ্ঞভাৰো কাযপাগুঞ্ঞতা. চিত্তস্স পাগুঞ্ঞভাৰো চিত্তপাগুঞ্ঞতা. তা কাযচিত্তানং অগেলঞ্ঞভাৰলক্খণা, কাযচিত্তগেলঞ্ঞনিমদ্দনরসা, নিরাদীনৰপচ্চুপট্ঠানা, কাযচিত্তপদট্ঠানা. কাযচিত্তানং গেলঞ্ঞকরঅসদ্ধিযাদিপটিপক্খভূতাতি দট্ঠব্বা.

কাযস্স উজুকভাৰো কাযুজুকতা. চিত্তস্স উজুকভাৰো চিত্তুজুকতা. তা কাযচিত্তঅজ্জৰলক্খণা, কাযচিত্তকুটিলভাৰনিমদ্দনরসা, অজিম্হতাপচ্চুপট্ঠানা, কাযচিত্তপদট্ঠানা. কাযচিত্তানং কুটিলভাৰকরমাযাসাঠেয্যাদিপটিপক্খভূতাতি দট্ঠব্বা.

৪৭১. ছন্দোতি কত্তুকামতাযেতং অধিৰচনং. তস্মা সো কত্তুকামতালক্খণো ছন্দো, আরম্মণপরিযেসনরসো, আরম্মণেন অত্থিকতাপচ্চুপট্ঠানো, তদেৰস্স পদট্ঠানং. আরম্মণগ্গহণে অযং চেতসো হত্থপ্পসারণং ৰিয দট্ঠব্বো.

৪৭২. অধিমুচ্চনং অধিমোক্খো. সো সন্নিট্ঠানলক্খণো, অসংসপ্পনরসো, নিচ্ছযপচ্চুপট্ঠানো, সন্নিট্ঠেয্যধম্মপদট্ঠানো, আরম্মণে নিচ্চলভাৰেন ইন্দখীলো ৰিয দট্ঠব্বো.

৪৭৩. কিরিযা কারো. মনম্হি কারো মনসিকারো. পুরিমমনতো ৰিসদিসমনং করোতীতিপি মনসিকারো. স্ৰাযং আরম্মণপটিপাদকো, ৰীথিপটিপাদকো, জৰনপটিপাদকোতি তিপ্পকারো.

তত্থ ¶ আরম্মণপটিপাদকো মনম্হি কারোতি মনসিকারো. সো সারণলক্খণো, সম্পযুত্তানং আরম্মণে সংযোজনরসো, আরম্মণাভিমুখভাৰপচ্চুপট্ঠানো, আরম্মণপদট্ঠানো. সঙ্খারক্খন্ধপরিযাপন্নো, আরম্মণপটিপাদকত্তেন সম্পযুত্তানং সারথি ৰিয দট্ঠব্বো. ৰীথিপটিপাদকোতি পন পঞ্চদ্ৰারাৰজ্জনস্সেতং অধিৰচনং. জৰনপটিপাদকোতি মনোদ্ৰারাৰজ্জনস্সেতং অধিৰচনং. ন তে ইধ অধিপ্পেতা.

৪৭৪. তেসু ধম্মেসু মজ্ঝত্ততা তত্রমজ্ঝত্ততা. সা চিত্তচেতসিকানং সমৰাহিতলক্খণা, ঊনাধিকতানিৰারণরসা, পক্খপাতুপচ্ছেদনরসা ৰা, মজ্ঝত্তভাৰপচ্চুপট্ঠানা, চিত্তচেতসিকানং অজ্ঝুপেক্খনভাৰেন সমপ্পৰত্তানং আজানীযানং অজ্ঝুপেক্খকসারথি ৰিয দট্ঠব্বা.

করুণামুদিতা ¶ চ ব্রহ্মৰিহারনিদ্দেসে (ৰিসুদ্ধি. ১.২৬২) ৰুত্তনযেনেৰ ৰেদিতব্বা. কেৰলঞ্হি তা অপ্পনাপ্পত্তা রূপাৰচরা, ইমা কামাৰচরাতি অযমেৰ ৰিসেসো.

কেচি পন মেত্তুপেক্খাযোপি অনিযতেসু ইচ্ছন্তি, তং ন গহেতব্বং. অত্থতো হি অদোসোযেৰ মেত্তা, তত্রমজ্ঝত্তুপেক্খাযেৰ উপেক্খাতি.

৪৭৫. কাযদুচ্চরিততো ৰিরতি কাযদুচ্চরিতৰিরতি. এস নযো সেসাসুপি. লক্খণাদিতো পনেতা তিস্সোপি কাযদুচ্চরিতাদিৰত্থূনং অৰীতিক্কমলক্খণা, অমদ্দনলক্খণাতি ৰুত্তং হোতি. কাযদুচ্চরিতাদিৰত্থুতো সঙ্কোচনরসা, অকিরিযপচ্চুপট্ঠানা, সদ্ধাহিরোত্তপ্পঅপ্পিচ্ছতাদিগুণপদট্ঠানা, পাপকিরিযতো চিত্তস্স ৰিমুখভাৰভূতাতি দট্ঠব্বা.

৪৭৬. ইতি ইমেৰ ছত্তিংস সঙ্খারা পঠমেন কামাৰচরকুসলৰিঞ্ঞাণেন সম্পযোগং গচ্ছন্তীতি ৰেদিতব্বা. যথা চ পঠমেন, এৰং দুতিযেনাপি. সসঙ্খারভাৰমত্তমেৰ হেত্থ ৰিসেসো.

ততিযেন পন ঠপেত্ৰা অমোহং অৰসেসা ৰেদিতব্বা. তথা চতুত্থেন. সসঙ্খারভাৰমত্তমেৰ হেত্থ ৰিসেসো.

পঠমে ¶ ৰুত্তেসু পন ঠপেত্ৰা পীতিং অৰসেসা পঞ্চমেন সম্পযোগং গচ্ছন্তি. যথা চ পঞ্চমেন, এৰং ছট্ঠেনাপি. সসঙ্খারভাৰমত্তমেৰ হেত্থ ৰিসেসো. সত্তমেন চ পন ঠপেত্ৰা অমোহং অৰসেসা ৰেদিতব্বা. তথা অট্ঠমেন. সসঙ্খারভাৰমত্তমেৰ হেত্থ ৰিসেসো.

পঠমে ৰুত্তেসু ঠপেত্ৰা ৰিরতিত্তযং সেসা রূপাৰচরকুসলেসু পঠমেন সম্পযোগং গচ্ছন্তি. দুতিযেন ততো ৰিতক্কৰজ্জা. ততিযেন ততো ৰিচারৰজ্জা. চতুত্থেন ততো পীতিৰজ্জা. পঞ্চমেন ততো অনিযতেসু করুণামুদিতাৰজ্জা. তেযেৰ চতূসু আরুপ্পকুসলেসু. অরূপাৰচরভাৰোযেৰ হি এত্থ ৰিসেসো.

লোকুত্তরেসু পঠমজ্ঝানিকে তাৰ মগ্গৰিঞ্ঞাণে পঠমরূপাৰচরৰিঞ্ঞাণে ৰুত্তনযেন, দুতিযজ্ঝানিকাদিভেদে দুতিযরূপাৰচরৰিঞ্ঞাণাদীসু ৰুত্তনযেনেৰ ৰেদিতব্বা. করুণামুদিতানং পন অভাৰো, নিযতৰিরতিতা ¶ , লোকুত্তরতা চাতি অযমেত্থ ৰিসেসো. এৰং তাৰ কুসলাযেৰ সঙ্খারা ৰেদিতব্বা.

৪৭৭. অকুসলেসু লোভমূলে পঠমাকুসলসম্পযুত্তা তাৰ নিযতা সরূপেন আগতা তেরস, যেৰাপনকা চত্তারোতি সত্তরস. তত্থ ফস্সো, চেতনা, ৰিতক্কো, ৰিচারো, পীতি, ৰীরিযং, জীৰিতং, সমাধি, অহিরিকং, অনোত্তপ্পং, লোভো, মোহো, মিচ্ছাদিট্ঠীতি ইমে সরূপেন আগতা তেরস (ধ. স. ৩৬৫; ধ. স. অট্ঠ. ৩৬৫). ছন্দো, অধিমোক্খো, উদ্ধচ্চং, মনসিকারোতি ইমে যেৰাপনকা চত্তারো (ধ. স. অট্ঠ. ৩৬৫).

৪৭৮. তত্থ ন হিরিযতীতি অহিরিকো. অহিরিকস্স ভাৰো অহিরিকং. ন ওতপ্পতীতি অনোত্তপ্পং. তেসু অহিরিকং কাযদুচ্চরিতাদীহি অজিগুচ্ছনলক্খণং, অলজ্জালক্খণং ৰা. অনোত্তপ্পং তেহেৰ অসারজ্জলক্খণং, অনুত্তাসলক্খণং ৰা. অযমেত্থ সঙ্খেপো. ৰিত্থারো পন হিরোত্তপ্পানং ৰুত্তপটিপক্খৰসেন ৰেদিতব্বো.

৪৭৯. লুব্ভন্তি তেন, সযং ৰা লুব্ভতি, লুব্ভনমত্তমেৰ ৰা তন্তি লোভো. মুয্হন্তি তেন, সযং ৰা মুয্হতি, মুয্হনমত্তমেৰ ৰা তন্তি মোহো. তেসু লোভো আরম্মণগ্গহণলক্খণো মক্কটালেপো ৰিয, অভিসঙ্গরসো তত্তকপালে খিত্তমংসপেসি ৰিয. অপরিচ্চাগপচ্চুপট্ঠানো তেলঞ্জনরাগো ¶ ৰিয. সংযোজনিযধম্মেসু অস্সাদদস্সনপদট্ঠানো. তণ্হানদীভাৰেন ৰড্ঢমানো সীঘসোতা নদী ইৰ মহাসমুদ্দং অপাযমেৰ গহেত্ৰা গচ্ছতীতি দট্ঠব্বো.

৪৮০. মোহো চিত্তস্স অন্ধভাৰলক্খণো, অঞ্ঞাণলক্খণো ৰা, অসম্পটিৰেধরসো, আরম্মণসভাৰচ্ছাদনরসো ৰা, অসম্মাপটিপত্তিপচ্চুপট্ঠানো, অন্ধকারপচ্চুপট্ঠানো ৰা, অযোনিসোমনসিকারপদট্ঠানো, সব্বাকুসলানং মূলন্তি দট্ঠব্বো.

৪৮১. মিচ্ছা পস্সন্তি তায, সযং ৰা মিচ্ছা পস্সতি, মিচ্ছাদস্সনমত্তং ৰা এসাতি মিচ্ছাদিট্ঠি. সা অযোনিসো অভিনিৰেসলক্খণা, পরামাসরসা, মিচ্ছাভিনিৰেসপচ্চুপট্ঠানা, অরিযানং অদস্সনকামতাদিপদট্ঠানা, পরমং ৰজ্জন্তি দট্ঠব্বা.

৪৮২. উদ্ধতভাৰো ¶ উদ্ধচ্চং. তং অৰূপসমলক্খণং ৰাতাভিঘাতচলজলং ৰিয, অনৰট্ঠানরসং ৰাতাভিঘাতচলধজপটাকা ৰিয, ভন্তত্তপচ্চুপট্ঠানং পাসাণাভিঘাতসমুদ্ধতভস্মং ৰিয, চেতসো অৰূপসমে অযোনিসোমনসিকারপদট্ঠানং, চিত্তৰিক্খেপোতি দট্ঠব্বং. সেসা কুসলে ৰুত্তনযেনেৰ ৰেদিতব্বা. অকুসলভাৰোযেৰ হি অকুসলভাৰেন চ লামকত্তং এতেসং তেহি ৰিসেসো.

৪৮৩. ইতি ইমে সত্তরস সঙ্খারা পঠমেন অকুসলৰিঞ্ঞাণেন সম্পযোগং গচ্ছন্তীতি ৰেদিতব্বা. যথা চ পঠমেন, এৰং দুতিযেনাপি. সসঙ্খারতা পনেত্থ থিনমিদ্ধস্স চ অনিযততা ৰিসেসো.

তত্থ থিননতা থিনং. মিদ্ধনতা মিদ্ধং. অনুস্সাহসংহননতা অসত্তিৰিঘাতো চাতি অত্থো. থিনঞ্চ মিদ্ধঞ্চ থিনমিদ্ধং. তত্থ থিনং অনুস্সাহলক্খণং, ৰীরিযৰিনোদনরসং, সংসীদনপচ্চুপট্ঠানং. মিদ্ধং অকম্মঞ্ঞতালক্খণং, ওনহনরসং, লীনতাপচ্চুপট্ঠানং, পচলাযিকানিদ্দাপচ্চুপট্ঠানং ৰা. উভযম্পি অরতিৰিজম্ভিকাদীসু অযোনিসোমনসিকারপদট্ঠানং.

ততিযেন পঠমে ৰুত্তেসু ঠপেত্ৰা মিচ্ছাদিট্ঠিং অৰসেসা ৰেদিতব্বা. মানো পনেত্থ অনিযতো ¶ হোতি. অযং ৰিসেসো, সো উণ্ণতিলক্খণো, সম্পগ্গহরসো, কেতুকম্যতাপচ্চুপট্ঠানো, দিট্ঠিৰিপ্পযুত্তলোভপদট্ঠানো, উম্মাদো ৰিয দট্ঠব্বো.

চতুত্থেন দুতিযে ৰুত্তেসু ঠপেত্ৰা মিচ্ছাদিট্ঠিং অৰসেসা ৰেদিতব্বা. এত্থাপি চ মানো অনিযতেসু হোতিযেৰ. পঠমে ৰুত্তেসু পন ঠপেত্ৰা পীতিং অৰসেসা পঞ্চমেন সম্পযোগং গচ্ছন্তি. যথা চ পঞ্চমেন, এৰং ছট্ঠেনাপি. সসঙ্খারতা পনেত্থ থিনমিদ্ধস্স চ অনিযতভাৰো ৰিসেসো. সত্তমেন পঞ্চমে ৰুত্তেসু ঠপেত্ৰা দিট্ঠিং অৰসেসা ৰেদিতব্বা. মানো পনেত্থ অনিযতো হোতি. অট্ঠমেন ছট্ঠে ৰুত্তেসু ঠপেত্ৰা দিট্ঠিং অৰসেসা ৰেদিতব্বা. এত্থাপি চ মানো অনিযতেসু হোতিযেৰাতি.

৪৮৪. দোসমূলেসু পন দ্ৰীসু পঠমসম্পযুত্তা তাৰ নিযতা সরূপেন আগতা একাদস, যেৰাপনকা চত্তারো, অনিযতা তযোতি অট্ঠারস ¶ . তত্থ ফস্সো, চেতনা, ৰিতক্কো, ৰিচারো, ৰীরিযং, জীৰিতং, সমাধি, অহিরিকং, অনোপ্পত্তং, দোসো, মোহোতি ইমে সরূপেন আগতা একাদস (ধ. স. ৪১৩; ধ. স. অট্ঠ. ৪১৩). ছন্দো, অধিমোক্খো, উদ্ধচ্চং, মনসিকারোতি ইমে যেৰাপনকা চত্তারো (ধ. স. অট্ঠ. ৪১৩). ইস্সা, মচ্ছরিযং, কুক্কুচ্চন্তি ইমে অনিযতা তযো (ধ. স. অট্ঠ. ৪১৩).

৪৮৫. তত্থ দুস্সন্তি তেন, সযং ৰা দুস্সতি, দুস্সনমত্তমেৰ ৰা তন্তি দোসো. সো চণ্ডিক্কলক্খণো পহটাসীৰিসো ৰিয, ৰিসপ্পনরসো ৰিসনিপাতো ৰিয, অত্তনো নিস্সযদহনরসো ৰা দাৰগ্গি ৰিয. দূসনপচ্চুপট্ঠানো লদ্ধোকাসো ৰিয সপত্তো, আঘাতৰত্থুপদট্ঠানো, ৰিসসংসট্ঠপূতিমুত্তং ৰিয দট্ঠব্বো.

৪৮৬. ইস্সাযনা ইস্সা. সা পরসম্পত্তীনং উসূযনলক্খণা. তত্থেৰ অনভিরতিরসা, ততো ৰিমুখভাৰপচ্চুপট্ঠানা, পরসম্পত্তিপদট্ঠানা, সংযোজনন্তি দট্ঠব্বা.

৪৮৭. মচ্ছরভাৰো মচ্ছরিযং. তং লদ্ধানং ৰা লভিতব্বানং ৰা অত্তনো সম্পত্তীনং নিগূহনলক্খণং, তাসংযেৰ পরেহি সাধারণভাৰঅক্খমনরসং, সঙ্কোচনপচ্চুপট্ঠানং, কটুকঞ্চুকতাপচ্চুপট্ঠানং ৰা, অত্তসম্পত্তিপদট্ঠানং, চেতসো ৰিরূপভাৰোতি দট্ঠব্বং.

৪৮৮. কুচ্ছিতং ¶ কতং কুকতং. তস্স ভাৰো কুক্কুচ্চং. তং পচ্ছানুতাপলক্খণং, কতাকতানুসোচনরসং, ৰিপ্পটিসারপচ্চুপট্ঠানং, কতাকতপদট্ঠানং, দাসব্যমিৰ দট্ঠব্বং. সেসা ৰুত্তপ্পকারাযেৰাতি.

ইতি ইমে অট্ঠারস সঙ্খারা পঠমেন দোসমূলেন সম্পযোগং গচ্ছন্তীতি ৰেদিতব্বা. যথা চ পঠমেন, এৰং দুতিযেনাপি. সসঙ্খারতা পন অনিযতেসু চ থিনমিদ্ধসম্ভৰোৰ ৰিসেসো.

৪৮৯. মোহমূলেসু দ্ৰীসু ৰিচিকিচ্ছাসম্পযুত্তেন তাৰ ফস্সো, চেতনা, ৰিতক্কো, ৰিচারো, ৰীরিযং, জীৰিতং, চিত্তট্ঠিতি, অহিরিকং, অনোত্তপ্পং ¶ , মোহো, ৰিচিকিচ্ছাতি সরূপেন আগতা একাদস (ধ. স. ৪২২; ধ. স. অট্ঠ. ৪২২), উদ্ধচ্চং, মনসিকারোতি যেৰাপনকা দ্ৰে চাতি তেরস.

৪৯০. তত্থ চিত্তট্ঠিতীতি পৰত্তিট্ঠিতিমত্তো দুব্বলো সমাধি. ৰিগতা চিকিচ্ছাতি ৰিচিকিচ্ছা. সা সংসযলক্খণা, কম্পনরসা, অনিচ্ছযপচ্চুপট্ঠানা, অনেকংসগাহপচ্চুপট্ঠানা ৰা, ৰিচিকিচ্ছাযং অযোনিসোমনসিকারপদট্ঠানা, পটিপত্তিঅন্তরাযকরাতি দট্ঠব্বা. সেসা ৰুত্তপ্পকারাযেৰ.

উদ্ধচ্চসম্পযুত্তেন ৰিচিকিচ্ছাসম্পযুত্তে ৰুত্তেসু ঠপেত্ৰা ৰিচিকিচ্ছং সেসা দ্ৰাদস. ৰিচিকিচ্ছায অভাৰেন পনেত্থ অধিমোক্খো উপ্পজ্জতি. তেন সদ্ধিং তেরসেৰ, অধিমোক্খসব্ভাৰতো চ বলৰতরো সমাধি হোতি. যঞ্চেত্থ উদ্ধচ্চং, তং সরূপেনেৰ আগতং. অধিমোক্খমনসিকারা যেৰাপনকৰসেনাতি এৰং অকুসলসঙ্খারা ৰেদিতব্বা.

৪৯১. অব্যাকতেসু ৰিপাকাব্যাকতা তাৰ অহেতুকসহেতুকভেদতো দুৰিধা. তেসু অহেতুকৰিপাকৰিঞ্ঞাণসম্পযুত্তা অহেতুকা. তত্থ কুসলাকুসলৰিপাকচক্খুৰিঞ্ঞাণসম্পযুত্তা তাৰ ফস্সো, চেতনা, জীৰিতং, চিত্তট্ঠিতীতি সরূপেন আগতা চত্তারো (ধ. স. ৪৩১; ধ. স. অট্ঠ. ৪৩১), যেৰাপনকো মনসিকারোযেৰাতি পঞ্চ. সোতঘানজিৰ্হাকাযৰিঞ্ঞাণসম্পযুত্তাপি এতেযেৰ. উভযৰিপাকমনোধাতুযা এতে চেৰ ৰিতক্কৰিচারাধিমোক্খা চাতি ¶ অট্ঠ, তথা তিৰিধাযপি অহেতুকমনোৰিঞ্ঞাণধাতুযা. যা পনেত্থ সোমনস্সসহগতা, তায সদ্ধিং পীতি অধিকা হোতীতি ৰেদিতব্বা.

সহেতুকৰিপাকৰিঞ্ঞাণসম্পযুত্তা পন সহেতুকা. তেসু অট্ঠকামাৰচরৰিপাকসম্পযুত্তা তাৰ অট্ঠহি কামাৰচরকুসলেহি সম্পযুত্তসঙ্খারসদিসাযেৰ. যা পন তা অনিযতেসু করুণামুদিতা, তা সত্তারম্মণত্তা ৰিপাকেসু ন সন্তি. একন্তপরিত্তারম্মণা হি কামাৰচরৰিপাকা. ন কেৰলঞ্চ করুণামুদিতা, ৰিরতিযোপি ৰিপাকেসু ন সন্তি. ‘‘পঞ্চ সিক্খাপদা কুসলাযেৰা’’তি হি ৰুত্তং.

রূপাৰচরারূপাৰচরলোকুত্তরৰিপাকৰিঞ্ঞাণসম্পযুত্তা ¶ পন তেসং কুসলৰিঞ্ঞাণসম্পযুত্তসঙ্খারেহি সদিসা এৰ.

৪৯২. কিরিযাব্যাকতাপি অহেতুকসহেতুকভেদতো দুৰিধা. তেসু অহেতুককিরিযৰিঞ্ঞাণসম্পযুত্তা অহেতুকা. তে চ কুসলৰিপাকমনোধাতুঅহেতুকমনোৰিঞ্ঞাণধাতুদ্ৰযযুত্তেহি সমানা. মনোৰিঞ্ঞাণধাতুদ্ৰযে পন ৰীরিযং অধিকং. ৰীরিযসব্ভাৰতো বলপ্পত্তো সমাধি হোতি. অযমেত্থ ৰিসেসো.

সহেতুককিরিযৰিঞ্ঞাণসম্পযুত্তা পন সহেতুকা. তেসু অট্ঠকামাৰচরকিরিযৰিঞ্ঞাণসম্পযুত্তা তাৰ ঠপেত্ৰা ৰিরতিযো অট্ঠহি কামাৰচরকুসলেহি সম্পযুত্তসঙ্খারসদিসা. রূপাৰচরারূপাৰচরকিরিযসম্পযুত্তা পন সব্বাকারেনপি তেসং কুসলৰিঞ্ঞাণসম্পযুত্তসদিসাযেৰাতি এৰং অব্যাকতাপি সঙ্খারা ৰেদিতব্বাতি.

ইদং সঙ্খারক্খন্ধে ৰিত্থারকথামুখং.

ইদং তাৰ অভিধম্মে পদভাজনীযনযেন খন্ধেসু ৰিত্থারকথামুখং.

অতীতাদিৰিভাগকথা

৪৯৩. ভগৰতা ¶ পন –

‘‘যংকিঞ্চি রূপং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, তদেকজ্ঝং অভিসংযূহিত্ৰা অভিসঙ্খিপিত্ৰা অযং ৰুচ্চতি রূপক্খন্ধো. যা কাচি ৰেদনা… যা কাচি সঞ্ঞা… যে কেচি সঙ্খারা… যংকিঞ্চি ৰিঞ্ঞাণং অতীতানাগতপচ্চুপ্পন্নং…পে… অভিসঙ্খিপিত্ৰা অযং ৰুচ্চতি ৰিঞ্ঞাণক্খন্ধো’’তি (ৰিভ. ২,২৬) –

এৰং খন্ধা ৰিত্থারিতা.

তত্থ যংকিঞ্চীতি অনৰসেসপরিযাদানং. রূপন্তি অতিপ্পসঙ্গনিযমনং. এৰং পদদ্ৰযেনাপি রূপস্স অনৰসেসপরিগ্গহো কতো হোতি. অথস্স অতীতাদিনা ¶ ৰিভাগং আরভতি. তঞ্হি কিঞ্চি অতীতং, কিঞ্চি অনাগতাদিভেদন্তি. এস নযো ৰেদনাদীসু.

৪৯৪. তত্থ রূপং তাৰ অদ্ধাসন্ততিসমযখণৰসেন চতুধা অতীতং নাম হোতি. তথা অনাগতপচ্চুপ্পন্নং.

তত্থ অদ্ধাৰসেন তাৰ একস্স একস্মিং ভৰে পটিসন্ধিতো পুব্বে অতীতং, চুতিতো উদ্ধং অনাগতং, উভিন্নমন্তরে পচ্চুপ্পন্নং.

সন্ততিৰসেন সভাগএকউতুসমুট্ঠানং একাহারসমুট্ঠানঞ্চ পুব্বাপরিযৰসেন ৰত্তমানম্পি পচ্চুপ্পন্নং, ততো পুব্বে ৰিসভাগউতুআহারসমুট্ঠানং অতীতং, পচ্ছা অনাগতং. চিত্তজং একৰীথিএকজৰনএকসমাপত্তিসমুট্ঠানং পচ্চুপ্পন্নং, ততো পুব্বে অতীতং, পচ্ছা অনাগতং. কম্মসমুট্ঠানস্স পাটিযেক্কং সন্ততিৰসেন অতীতাদিভেদো নত্থি, তেসঞ্ঞেৰ পন উতুআহারচিত্তসমুট্ঠানানং উপত্থম্ভকৰসেন তস্স অতীতাদিভাৰো ৰেদিতব্বো.

সমযৰসেন ¶ একমুহুত্তপুব্বণ্হসাযন্হরত্তিন্দিৰাদীসু সমযেসু সন্তানৰসেন পৰত্তমানং তং তং সমযং পচ্চুপ্পন্নং নাম, ততো পুব্বে অতীতং, পচ্ছা অনাগতং.

খণৰসেন উপ্পাদাদিখণত্তযপরিযাপন্নং পচ্চুপ্পন্নং, ততো পুব্বে অনাগতং, পচ্ছা অতীতং. অপিচ অতিক্কন্তহেতুপচ্চযকিচ্চং অতীতং, নিট্ঠিতহেতুকিচ্চং অনিট্ঠিতপচ্চযকিচ্চং পচ্চুপ্পন্নং, উভযকিচ্চং অসম্পত্তং অনাগতং. সকিচ্চক্খণে ৰা পচ্চুপ্পন্নং, ততো পুব্বে অনাগতং, পচ্ছা অতীতং. এত্থ চ খণাদিকথাৰ নিপ্পরিযাযা. সেসা সপরিযাযা.

৪৯৫. অজ্ঝত্তবহিদ্ধাভেদো ৰুত্তনযো এৰ. অপিচ ইধ নিযকজ্ঝত্তম্পি অজ্ঝত্তং পরপুগ্গলিকম্পি চ বহিদ্ধাতি ৰেদিতব্বং. ওল়ারিকসুখুমভেদো ৰুত্তনযোৰ.

৪৯৬. হীনপণীতভেদো দুৰিধো পরিযাযতো নিপ্পরিযাযতো চ. তত্থ অকনিট্ঠানং রূপতো সুদস্সীনং রূপং হীনং. তদেৰ সুদস্সানং রূপতো পণীতং. এৰং যাৰ নরকসত্তানং রূপং, তাৰ পরিযাযতো হীনপণীততা ৰেদিতব্বা. নিপ্পরিযাযতো পন যত্থ অকুসলৰিপাকং উপ্পজ্জতি, তং হীনং. যত্থ কুসলৰিপাকং, তং পণীতং.

দূরে ¶ সন্তিকেতি ইদম্পি ৰুত্তনযমেৰ. অপিচ ওকাসতোপেত্থ উপাদাযুপাদায দূরসন্তিকতা ৰেদিতব্বা.

৪৯৭. তদেকজ্ঝং অভিসংযূহিত্ৰা অভিসঙ্খিপিত্ৰাতি তং অতীতাদীহি পদেহি ৰিসুং ৰিসুং নিদ্দিট্ঠং রূপং সব্বং রুপ্পনলক্খণসঙ্খাতে একৰিধভাৰে পঞ্ঞায রাসিং কত্ৰা রূপক্খন্ধোতি ৰুচ্চতীতি অযমেত্থ অত্থো. এতেন সব্বম্পি রূপং রুপ্পনলক্খণে রাসিভাৰূপগমনেন রূপক্খন্ধোতি দস্সিতং হোতি. ন হি রূপতো অঞ্ঞো রূপক্খন্ধো নাম অত্থি.

৪৯৮. যথা চ রূপং, এৰং ৰেদনাদযোপি ৰেদযিতলক্খণাদীসু রাসিভাৰূপগমনেন. ন হি ৰেদনাদীহি অঞ্ঞে ৰেদনাক্খন্ধাদযো নাম অত্থি.

অতীতাদিৰিভাগে ¶ পনেত্থ সন্ততিৰসেন খণাদিৰসেন চ ৰেদনায অতীতানাগতপচ্চুপ্পন্নভাৰো ৰেদিতব্বো. তত্থ সন্ততিৰসেন একৰীথিএকজৰনএকসমাপত্তিপরিযাপন্না একৰীথিৰিসযসমাযোগপ্পৰত্তা চ পচ্চুপ্পন্না, ততো পুব্বে অতীতা, পচ্ছা অনাগতা. খণাদিৰসেন খণত্তযপরিযাপন্না পুব্বন্তাপরন্তমজ্ঝত্তগতা সকিচ্চঞ্চ কুরুমানা ৰেদনা পচ্চুপ্পন্না, ততো পুব্বে অতীতা, পচ্ছা অনাগতা. অজ্ঝত্তবহিদ্ধাভেদো নিযকজ্ঝত্তৰসেন ৰেদিতব্বো.

৪৯৯. ওল়ারিকসুখুমভেদো ‘‘অকুসলা ৰেদনা ওল়ারিকা, কুসলাব্যাকতা ৰেদনা সুখুমা’’তিআদিনা (ৰিভ. ১১) নযেন ৰিভঙ্গে ৰুত্তেন জাতিসভাৰপুগ্গললোকিযলোকুত্তরৰসেন ৰেদিতব্বো. জাতিৰসেন তাৰ অকুসলা ৰেদনা সাৰজ্জকিরিযহেতুতো, কিলেসসন্তাপভাৰতো চ অৰূপসন্তৰুত্তীতি কুসলৰেদনায ওল়ারিকা, সব্যাপারতো, সউস্সাহতো, সৰিপাকতো, কিলেসসন্তাপভাৰতো, সাৰজ্জতো চ ৰিপাকাব্যাকতায ওল়ারিকা, সৰিপাকতো, কিলেসসন্তাপভাৰতো, সব্যাবজ্ঝতো, সাৰজ্জতো চ কিরিযাব্যাকতায ওল়ারিকা. কুসলাব্যাকতা পন ৰুত্তৰিপরিযাযতো অকুসলায সুখুমা. দ্ৰেপি কুসলাকুসলৰেদনা সব্যাপারতো, সউস্সাহতো, সৰিপাকতো চ যথাযোগং দুৰিধাযপি অব্যাকতায ওল়ারিকা ¶ , ৰুত্তৰিপরিযাযেন দুৰিধাপি অব্যাকতা তাহি সুখুমা. এৰং তাৰ জাতিৰসেন ওল়ারিকসুখুমতা ৰেদিতব্বা.

৫০০. সভাৰৰসেন পন দুক্খা ৰেদনা নিরস্সাদতো, সৰিপ্ফারতো, খোভকরণতো, উব্বেজনীযতো, অভিভৰনতো চ ইতরাহি দ্ৰীহি ওল়ারিকা, ইতরা পন দ্ৰে সাততো, সন্ততো, পণীততো, মনাপতো, মজ্ঝত্ততো চ যথাযোগং দুক্খায সুখুমা. উভো পন সুখদুক্খা সৰিপ্ফারতো, খোভকরণতো, পাকটতো চ অদুক্খমসুখায ওল়ারিকা, সা ৰুত্তৰিপরিযাযেন তদুভযতো সুখুমা. এৰং সভাৰৰসেন ওল়ারিকসুখুমতা ৰেদিতব্বা.

৫০১. পুগ্গলৰসেন পন অসমাপন্নস্স ৰেদনা নানারম্মণে ৰিক্খিত্তভাৰতো সমাপন্নস্স ৰেদনায ওল়ারিকা, ৰিপরিযাযেন ইতরা সুখুমা. এৰং পুগ্গলৰসেন ওল়ারিকসুখুমতা ৰেদিতব্বা.

লোকিযলোকুত্তরৰসেন ¶ পন সাসৰা ৰেদনা লোকিযা, সা আসৰুপ্পত্তিহেতুতো, ওঘনিযতো, যোগনিযতো, গন্থনিযতো, নীৰরণিযতো, উপাদানিযতো, সংকিলেসিকতো, পুথুজ্জনসাধারণতো চ অনাসৰায ওল়ারিকা. সা ৰিপরিযাযেন সাসৰায সুখুমা. এৰং লোকিযলোকুত্তরৰসেন ওল়ারিকসুখুমতা ৰেদিতব্বা.

৫০২. তত্থ জাতিআদিৰসেন সম্ভেদো পরিহরিতব্বো. অকুসলৰিপাককআযৰিঞ্ঞাণসম্পযুত্তা হি ৰেদনা জাতিৰসেন অব্যাকতত্তা সুখুমাপি সমানা সভাৰাদিৰসেন ওল়ারিকা হোতি. ৰুত্তঞ্হেতং ‘‘অব্যাকতা ৰেদনা সুখুমা. দুক্খা ৰেদনা ওল়ারিকা. সমাপন্নস্স ৰেদনা সুখুমা. অসমাপন্নস্স ৰেদনা ওল়ারিকা. সাসৰা ৰেদনা ওল়ারিকা. অনাসৰা ৰেদনা সুখুমা’’তি (ৰিভ. ১১). যথা চ দুক্খা ৰেদনা, এৰং সুখাদযোপি জাতিৰসেন ওল়ারিকা সভাৰাদিৰসেন সুখুমা হোন্তি. তস্মা যথা জাতিআদিৰসেন সম্ভেদো ন হোতি, তথা ৰেদনানং ওল়ারিকসুখুমতা ৰেদিতব্বা. সেয্যথিদং – অব্যাকতা জাতিৰসেন কুসলাকুসলাহি সুখুমা. তত্থ কতমা অব্যাকতা? কিং দুক্খা? কিং সুখা? কিং সমাপন্নস্স? কিং অসমাপন্নস্স? কিং সাসৰা ¶ ? কিং অনাসৰাতি? এৰং সভাৰাদিভেদো ন পরামসিতব্বো. এস নযো সব্বত্থ.

অপিচ তং তং ৰা পন ৰেদনং উপাদাযুপাদায ৰেদনা ওল়ারিকসুখুমা দট্ঠব্বাতি ৰচনতো অকুসলাদীসুপি লোভসহগতায দোসসহগতা ৰেদনা অগ্গি ৰিয অত্তনো নিস্সযদহনতো ওল়ারিকা, লোভসহগতা সুখুমা. দোসসহগতাপি নিযতা ওল়ারিকা, অনিযতা সুখুমা. নিযতাপি কপ্পট্ঠিতিকা ওল়ারিকা, ইতরা সুখুমা. কপ্পট্ঠিতিকাসুপি অসঙ্খারিকা ওল়ারিকা, ইতরা সুখুমা. লোভসহগতা পন দিট্ঠিসম্পযুত্তা ওল়ারিকা, ইতরা সুখুমা. সাপি নিযতা কপ্পট্ঠিতিকা অসঙ্খারিকা ওল়ারিকা, ইতরা সুখুমা. অৰিসেসেন চ অকুসলা বহুৰিপাকা ওল়ারিকা, অপ্পৰিপাকা সুখুমা. কুসলা পন অপ্পৰিপাকা ওল়ারিকা, বহুৰিপাকা সুখুমা.

অপিচ কামাৰচরকুসলা ওল়ারিকা. রূপাৰচরা সুখুমা. ততো অরূপাৰচরা. ততো লোকুত্তরা. কামাৰচরা দানমযা ওল়ারিকা. সীলমযা সুখুমা. ততো ভাৰনামযা. ভাৰনামযাপি দুহেতুকা ওল়ারিকা. তিহেতুকা সুখুমা. তিহেতুকাপি সসঙ্খারিকা ওল়ারিকা. অসঙ্খারিকা সুখুমা. রূপাৰচরা চ পঠমজ্ঝানিকা ওল়ারিকা…পে… পঞ্চমজ্ঝানিকা ¶ সুখুমা. অরূপাৰচরা চ আকাসানঞ্চাযতনসম্পযুত্তা ওল়ারিকা…পে… নেৰসঞ্ঞানাসঞ্ঞাযতনসম্পযুত্তা সুখুমাৰ. লোকুত্তরা চ সোতাপত্তিমগ্গসম্পযুত্তা ওল়ারিকা…পে… অরহত্তমগ্গসম্পযুত্তা সুখুমাৰ. এস নযো তং তং ভূমিৰিপাককিরিযৰেদনাসু চ দুক্খাদিঅসমাপন্নাদিসাসৰাদিৰসেন ৰুত্তৰেদনাসু চ.

ওকাসৰসেন চাপি নিরযে দুক্খা ওল়ারিকা. তিরচ্ছানযোনিযং সুখুমা…পে… পরনিম্মিতৰসৰত্তীসু সুখুমাৰ. যথা চ দুক্খা, এৰং সুখাপি সব্বত্থ যথানুরূপং যোজেতব্বা. ৰত্থুৰসেন চাপি হীনৰত্থুকা যা কাচি ৰেদনা ওল়ারিকা, পণীতৰত্থুকা সুখুমা.

হীনপণীতভেদে যা ওল়ারিকা, সা হীনা. যা চ সুখুমা, সা পণীতাতি দট্ঠব্বা.

৫০৩. দূরপদং পন ‘‘অকুসলা ৰেদনা কুসলাব্যাকতাহি ৰেদনাহি দূরে’’. সন্তিকেপদং ‘‘অকুসলা ৰেদনা অকুসলায ৰেদনায সন্তিকে’’তিআদিনা ¶ নযেন ৰিভঙ্গে ৰিভত্তং. তস্মা অকুসলা ৰেদনা ৰিসভাগতো, অসংসট্ঠতো, অসরিক্খতো চ কুসলাব্যাকতাহি দূরে, তথা কুসলাব্যাকতা অকুসলায. এস নযো সব্বৰারেসু. অকুসলা পন ৰেদনা সভাগতো, সরিক্খতো চ অকুসলায সন্তিকেতি. ইদং ৰেদনাক্খন্ধস্স অতীতাদিৰিভাগে ৰিত্থারকথামুখং. তংতংৰেদনাসম্পযুত্তানং পন সঞ্ঞাদীনম্পি এৰমেৰ ৰেদিতব্বং.

কমাদিৰিনিচ্ছযকথা

৫০৪. এৰং ৰিদিত্ৰা চ পুন এতেস্ৰেৰ –

খন্ধেসু ঞাণভেদত্থং, কমতোথ ৰিসেসতো;

অনূনাধিকতো চেৰ, উপমাতো তথেৰ চ.

দট্ঠব্বতো দ্ৰিধা এৰং, পস্সন্তস্সত্থসিদ্ধিতো;

ৰিনিচ্ছযনযো সম্মা, ৰিঞ্ঞাতব্বো ৰিভাৰিনা.

তত্থ ¶ কমতোতি ইধ উপ্পত্তিক্কমো, পহানক্কমো, পটিপত্তিক্কমো, ভূমিক্কমো, দেসনাক্কমোতি বহুৰিধো কমো.

তত্থ ‘‘পঠমং কললং হোতি, কললা হোতি অব্বুদ’’ন্তি (সং. নি. ১.২৩৫) এৰমাদি উপ্পত্তিক্কমো. ‘‘দস্সনেন পহাতব্বা ধম্মা, ভাৰনায পহাতব্বা ধম্মা’’তি (ধ. স. তিকমাতিকা ৮) এৰমাদি পহানক্কমো. ‘‘সীলৰিসুদ্ধি, চিত্তৰিসুদ্ধী’’তি (ম. নি. ১.২৫৯; পটি. ম. ৩.৪১) এৰমাদি পটিপত্তিক্কমো. ‘‘কামাৰচরা, রূপাৰচরা’’তি (ধ. স. ৯৮৭) এৰমাদি ভূমিক্কমো. ‘‘চত্তারো সতিপট্ঠানা, চত্তারো সম্মপ্পধানা’’তি (দী. নি. ৩.১৪৫) ৰা, ‘‘দানকথং, সীলকথ’’ন্তি (দী. নি. ১.২৯৮) ৰা এৰমাদি দেসনাক্কমো. তেসু ইধ উপ্পত্তিক্কমো তাৰ ন যুজ্জতি, কললাদীনং ৰিয খন্ধানং পুব্বাপরিযৰৰত্থানেন অনুপ্পত্তিতো. ন পহানক্কমো, কুসলাব্যাকতানং অপ্পহাতব্বতো. নপটিপত্তিক্কমো, অকুসলানং অপ্পটিপজ্জনীযতো. ন ভূমিক্কমো, ৰেদনাদীনং চতুভূমিপরিযাপন্নত্তা. দেসনাক্কমো পন যুজ্জতি.

অভেদেন হি পঞ্চসু খন্ধেসু অত্তগাহপতিতং ৰেনেয্যজনং সমূহঘনৰিনিব্ভোগদস্সনেন অত্তগাহতো মোচেতুকামো ভগৰা হিতকামো ¶ তস্স তস্স জনস্স সুখগহণত্থং চক্খুআদীনম্পি ৰিসযভূতং ওল়ারিকং পঠমং রূপক্খন্ধং দেসেসি. ততো ইট্ঠানিট্ঠরূপসংৰেদনিকং ৰেদনং. ‘‘যং ৰেদযতি, তং সঞ্জানাতী’’তি এৰং ৰেদনাৰিসযস্স আকারগাহিকং সঞ্ঞং. সঞ্ঞাৰসেন অভিসঙ্খারকে সঙ্খারে. তেসং ৰেদনাদীনং নিস্সযং অধিপতিভূতঞ্চ নেসং ৰিঞ্ঞাণন্তি এৰং তাৰ কমতো ৰিনিচ্ছযনযো ৰিঞ্ঞাতব্বো.

৫০৫. ৰিসেসতোতি খন্ধানঞ্চ উপাদানক্খন্ধানঞ্চ ৰিসেসতো. কো পন নেসং ৰিসেসো, খন্ধা তাৰ অৰিসেসতো ৰুত্তা. উপাদানক্খন্ধা সাসৰউপাদানিযভাৰেন ৰিসেসেত্ৰা. যথাহ –

‘‘পঞ্চ চেৰ ৰো, ভিক্খৰে, খন্ধে দেসেস্সামি পঞ্চুপাদানক্খন্ধে চ, তং সুণাথ. কতমে চ, ভিক্খৰে, পঞ্চক্খন্ধা, যংকিঞ্চি, ভিক্খৰে, রূপং অতীতানাগতপচ্চুপ্পন্নং…পে… সন্তিকে ৰা, অযং ৰুচ্চতি, ভিক্খৰে, রূপক্খন্ধো. যা ¶ কাচি ৰেদনা…পে… যংকিঞ্চি ৰিঞ্ঞাণং…পে… সন্তিকে ৰা, অযং ৰুচ্চতি, ভিক্খৰে, ৰিঞ্ঞাণক্খন্ধো. ইমে ৰুচ্চন্তি, ভিক্খৰে, পঞ্চক্খন্ধা. কতমে চ, ভিক্খৰে, পঞ্চুপাদানক্খন্ধা. যংকিঞ্চি, ভিক্খৰে, রূপং…পে… সন্তিকে ৰা সাসৰং উপাদানিযং, অযং ৰুচ্চতি, ভিক্খৰে, রূপুপাদানক্খন্ধো. যা কাচি ৰেদনা…পে… যংকিঞ্চি ৰিঞ্ঞাণং…পে… সন্তিকে ৰা সাসৰং উপাদানিযং, অযং ৰুচ্চতি, ভিক্খৰে, ৰিঞ্ঞাণুপাদানক্খন্ধো. ইমে ৰুচ্চন্তি, ভিক্খৰে, পঞ্চুপাদানক্খন্ধা’’তি (সং. নি. ৩.৪৮).

এত্থ চ যথা ৰেদনাদযো অনাসৰাপি অত্থি, ন এৰং রূপং. যস্মা পনস্স রাসট্ঠেন খন্ধভাৰো যুজ্জতি, তস্মা খন্ধেসু ৰুত্তং. যস্মা রাসট্ঠেন চ সাসৰট্ঠেন চ উপাদানক্খন্ধভাৰো যুজ্জতি, তস্মা উপাদানক্খন্ধেসু ৰুত্তং. ৰেদনাদযো পন অনাসৰাৰ খন্ধেসু ৰুত্তা. সাসৰা উপাদানক্খন্ধেসু. উপাদানক্খন্ধাতি চেত্থ উপাদানগোচরা খন্ধা উপাদানক্খন্ধাতি এৰমত্থো দট্ঠব্বো. ইধ পন সব্বেপেতে একজ্ঝং কত্ৰা খন্ধাতি অধিপ্পেতা.

৫০৬. অনূনাধিকতোতি কস্মা পন ভগৰতা পঞ্চেৰ খন্ধা ৰুত্তা অনূনা অনধিকাতি. সব্বসঙ্খতসভাগেকসঙ্গহতো অত্তত্তনিযগাহৰত্থুস্স এতপরমতো অঞ্ঞেসঞ্চ তদৰরোধতো. অনেকপ্পভেদেসু হি সঙ্খতধম্মেসু ¶ সভাগৰসেন সঙ্গয্হমানেসু রূপম্পি রূপসভাগেকসঙ্গহৰসেন একো খন্ধো হোতি. ৰেদনা ৰেদনাসভাগেকসঙ্গহৰসেন একো খন্ধো হোতি. এস নযো সঞ্ঞাদীসু. তস্মা সব্বসঙ্খতসভাগেকসঙ্গহতো পঞ্চেৰ ৰুত্তা. এতপরমঞ্চেতং অত্তত্তনিযগাহৰত্থু যদিদং রূপাদযো পঞ্চ. ৰুত্তঞ্হেতং ‘‘রূপে খো, ভিক্খৰে, সতি রূপং উপাদায রূপং অভিনিৰিস্স এৰং দিট্ঠি উপ্পজ্জতি ‘এতং মম, এসোহমস্মি, এসো মে অত্তা’তি. ৰেদনায, সঞ্ঞায, সঙ্খারেসু, ৰিঞ্ঞাণে সতি ৰিঞ্ঞাণং উপাদায ৰিঞ্ঞাণং অভিনিৰিস্স এৰং দিট্ঠি উপ্পজ্জতি ‘এতং মম, এসোহমস্মি, এসো মে অত্তা’’তি (সং. নি. ৩.২০৭). তস্মা অত্তত্তনিযগাহৰত্থুস্স এতপরমতোপি পঞ্চেৰ ৰুত্তা. যেপি চঞ্ঞে সীলাদযো পঞ্চ ধম্মক্খন্ধা ৰুত্তা, তেপি সঙ্খারক্খন্ধে পরিযাপন্নত্তা এত্থেৰ অৰরোধং গচ্ছন্তি. তস্মা অঞ্ঞেসং তদৰরোধতোপি পঞ্চেৰ ৰুত্তাতি এৰং অনূনাধিকতো ৰিনিচ্ছযনযো ৰিঞ্ঞাতব্বো.

৫০৭. উপমাতোতি এত্থ হি গিলানসালুপমো রূপুপাদানক্খন্ধো, গিলানুপমস্স ৰিঞ্ঞাণুপাদানক্খন্ধস্স ¶ ৰত্থুদ্ৰারারম্মণৰসেন নিৰাসট্ঠানতো. গেলঞ্ঞুপমো ৰেদনুপাদানক্খন্ধো, আবাধকত্তা. গেলঞ্ঞসমুট্ঠানুপমো সঞ্ঞুপাদানক্খন্ধো, কামসঞ্ঞাদিৰসেন রাগাদিসম্পযুত্তৰেদনাসব্ভাৰা. অসপ্পাযসেৰনুপমো সঙ্খারুপাদানক্খন্ধো, ৰেদনাগেলঞ্ঞস্স নিদানত্তা. ‘‘ৰেদনং ৰেদনত্থায অভিসঙ্খরোন্তী’’তি (সং. নি. ৩.৭৯) হি ৰুত্তং. তথা ‘‘অকুসলস্স কম্মস্স কতত্তা উপচিতত্তা ৰিপাকং কাযৰিঞ্ঞাণং উপ্পন্নং হোতি দুক্খসহগত’’ন্তি (ধ. স. ৫৫৬). গিলানুপমো ৰিঞ্ঞাণুপাদানক্খন্ধো, ৰেদনাগেলঞ্ঞেন অপরিমুত্তত্তা. অপিচ চারককারণঅপরাধকারণকারকঅপরাধিকুপমা এতে ভাজনভোজনব্যঞ্জনপরিৰেসকভুঞ্জকূপমা চাতি এৰং উপমাতো ৰিনিচ্ছযনযো ৰিঞ্ঞাতব্বো.

৫০৮. দট্ঠব্বতো দ্ৰিধাতি সঙ্খেপতো ৰিত্থারতো চাতি এৰং দ্ৰিধা দট্ঠব্বতোপেত্থ ৰিনিচ্ছযনযো ৰিঞ্ঞাতব্বো. সঙ্খেপতো হি পঞ্চুপাদানক্খন্ধা আসীৰিসূপমে (সং. নি. ৪.২৩৮) ৰুত্তনযেন উক্খিত্তাসিকপচ্চত্থিকতো, ভারসুত্তৰসেন (সং. নি. ৩.২২) ভারতো, খজ্জনীযপরিযাযৰসেন (সং. নি. ৩.৭৯) খাদকতো, যমকসুত্তৰসেন (সং. নি. ৩.৮৫) অনিচ্চদুক্খানত্তসঙ্খতৰধকতো দট্ঠব্বা. ৰিত্থারতো পনেত্থ ফেণপিণ্ডো ৰিয রূপং দট্ঠব্বং, পরিমদ্দনাসহনতো. উদকপুব্বুল়ং ৰিয ¶ ৰেদনা, মুহুত্তরমণীযতো. মরীচিকা ৰিয সঞ্ঞা, ৰিপ্পলম্ভনতো. কদলিক্খন্ধো ৰিয সঙ্খারা, অসারকতো. মাযা ৰিয ৰিঞ্ঞাণং, ৰঞ্চকতো. ৰিসেসতো চ সুল়ারম্পি অজ্ঝত্তিকং রূপং অসুভন্তি দট্ঠব্বং. ৰেদনা তীহি দুক্খতাহি অৰিনিমুত্ততো দুক্খাতি. সঞ্ঞাসঙ্খারা অৰিধেয্যতো অনত্তাতি. ৰিঞ্ঞাণং উদযব্বযধম্মতো অনিচ্চন্তি দট্ঠব্বং.

৫০৯. এৰং পস্সন্তস্সত্থসিদ্ধিতোতি এৰঞ্চ সঙ্খেপৰিত্থারৰসেন দ্ৰিধা পস্সতো যা অত্থসিদ্ধি হোতি, ততোপি ৰিনিচ্ছযনযো ৰিঞ্ঞাতব্বো. সেয্যথিদং – সঙ্খেপতো তাৰ পঞ্চুপাদানক্খন্ধে উক্খিত্তাসিকপচ্চত্থিকাদিভাৰেন পস্সন্তো খন্ধেহি ন ৰিহঞ্ঞতি. ৰিত্থারতো পন রূপাদীনি ফেণপিণ্ডাদিসদিসভাৰেন পস্সন্তো ন অসারেসু সারদস্সী হোতি.

ৰিসেসতো চ অজ্ঝত্তিকরূপং অসুভতো পস্সন্তো কবল়ীকারাহারং পরিজানাতি, অসুভে সুভন্তি ৰিপল্লাসং পজহতি. কামোঘং উত্তরতি, কামযোগেন ৰিসংযুজ্জতি, কামাসৰেন অনাসৰো হোতি, অভিজ্ঝাকাযগন্থং ভিন্দতি, কামুপাদানং ন উপাদিযতি.

ৰেদনং ¶ দুক্খতো পস্সন্তো ফস্সাহারং পরিজানাতি, দুক্খে সুখন্তি ৰিপল্লাসং পজহতি, ভৰোঘং উত্তরতি, ভৰযোগেন ৰিসংযুজ্জতি, ভৰাসৰেন অনাসৰো হোতি, ব্যাপাদকাযগন্থং ভিন্দতি, সীলব্বতুপাদানং ন উপাদিযতি.

সঞ্ঞং সঙ্খারে চ অনত্ততো পস্সন্তো মনোসঞ্চেতনাহারং পরিজানাতি, অনত্তনি অত্তাতি ৰিপল্লাসং পজহতি, দিট্ঠোঘং উত্তরতি, দিট্ঠিযোগেন ৰিসংযুজ্জতি, দিট্ঠাসৰেন অনাসৰো হোতি. ইদংসচ্চাভিনিৰেসকাযগন্থং ভিন্দতি, অত্তৰাদুপাদানং ন উপাদিযতি.

ৰিঞ্ঞাণং অনিচ্চতো পস্সন্তো ৰিঞ্ঞাণাহারং পরিজানাতি, অনিচ্চে নিচ্চন্তি ৰিপল্লাসং পজহতি, অৰিজ্জোঘং উত্তরতি, অৰিজ্জাযোগেন ৰিসংযুজ্জতি, অৰিজ্জাসৰেন অনাসৰো হোতি, সীলব্বতপরামাসকাযগন্থং ভিন্দতি, দিট্ঠুপাদানং ন উপাদিযতি.

এৰং ¶ মহানিসংসং, ৰধকাদিৰসেন দস্সনং যস্মা;

তস্মা খন্ধে ধীরো, ৰধকাদিৰসেন পস্সেয্যাতি.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

খন্ধনিদ্দেসো নাম

চুদ্দসমো পরিচ্ছেদো.

১৫. আযতনধাতুনিদ্দেসো

আযতনৰিত্থারকথা

৫১০. আযতনানীতি ¶ ¶ দ্ৰাদসাযতনানি – চক্খাযতনং, রূপাযতনং, সোতাযতনং, সদ্দাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনন্তি. তত্থ –

অত্থ লক্খণ তাৰত্ৰ, কম সঙ্খেপ ৰিত্থারা;

তথা দট্ঠব্বতো চেৰ, ৰিঞ্ঞাতব্বো ৰিনিচ্ছযো.

তত্থ ৰিসেসতো তাৰ চক্খতীতি চক্খু, রূপং অস্সাদেতি ৰিভাৰেতি চাতি অত্থো. রূপযতীতি রূপং, ৰণ্ণৰিকারং আপজ্জমানং হদযঙ্গতভাৰং পকাসেতীতি অত্থো. সুণাতীতি সোতং. সপ্পতীতি সদ্দো, উদাহরিযতীতি অত্থো. ঘাযতীতি ঘানং. গন্ধযতীতি গন্ধো. অত্তনো ৰত্থুং সূচযতীতি অত্থো. জীৰিতং অৰ্হযতীতি জিৰ্হা. রসন্তি তং সত্তাতি রসো, অস্সাদেন্তীতি অত্থো. কুচ্ছিতানং সাসৰধম্মানং আযোতি কাযো. আযোতি উপ্পত্তিদেসো. ফুসিযতীতি ফোট্ঠব্বং. মুনাতীতি মনো. অত্তনো লক্খণং ধারেন্তীতি ধম্মা.

৫১১. অৰিসেসতো পন আযতনতো, আযানং তননতো, আযতস্স চ নযনতো আযতনন্তি ৰেদিতব্বং. চক্খুরূপাদীসু হি তংতংদ্ৰারারম্মণা চিত্তচেতসিকা ধম্মা সেন সেন অনুভৰনাদিনা কিচ্চেন আযতন্তি উট্ঠহন্তি ঘটন্তি, ৰাযমন্তীতি ৰুত্তং হোতি. তে চ আযভূতে ধম্মে এতানি তনোন্তি, ৰিত্থারেন্তীতি ৰুত্তং হোতি, ইদঞ্চ অনমতগ্গে সংসারে পৰত্তং অতীৰ আযতং সংসারদুক্খং যাৰ ন নিৰত্ততি, তাৰ নযন্তেৰ, পৰত্তযন্তীতি ৰুত্তং হোতি. ইতি ¶ সব্বেপিমে ধম্মা আযতনতো, আযানং তননতো, আযতস্স চ নযনতো আযতনং আযতনন্তি ৰুচ্চন্তি.

৫১২. অপিচ নিৰাসট্ঠানট্ঠেন আকরট্ঠেন সমোসরণট্ঠানট্ঠেন সঞ্জাতিদেসট্ঠেন কারণট্ঠেন চ আযতনং ৰেদিতব্বং. তথা হি লোকে ‘‘ইস্সরাযতনং ৰাসুদেৰাযতন’’ন্তিআদীসু নিৰাসট্ঠানং আযতনন্তি ¶ ৰুচ্চতি. ‘‘সুৰণ্ণাযতনং রজতাযতন’’ন্তিআদীসু আকরো. সাসনে পন ‘‘মনোরম্মে আযতনে সেৰন্তি নং ৰিহঙ্গমা’’তিআদীসু (অ. নি. ৫.৩৮) সমোসরণট্ঠানং. ‘‘দক্খিণাপথো গুন্নং আযতন’’ন্তিআদীসু সঞ্জাতিদেসো. ‘‘তত্র তত্রেৰ সক্খিভব্বতং পাপুণাতি সতি সতিআযতনে’’তিআদীসু (অ. নি. ৩.১০২) কারণং.

চক্খুআদীসু চাপি তে তে চিত্তচেতসিকা ধম্মা নিৰসন্তি তদাযত্তৰুত্তিতাযাতি চক্খাদযো চ নেসং নিৰাসট্ঠানং. চক্খাদীসু চ তে আকিণ্ণা তন্নিস্সিতত্তা তদারম্মণত্তা চাতি চক্খাদযো নেসং আকরো. চক্খাদযো চ নেসং সমোসরণট্ঠানং, তত্থ তত্থ ৰত্থুদ্ৰারারম্মণৰসেন সমোসরণতো. চক্খাদযো চ নেসং সঞ্জাতিদেসো, তন্নিস্সযারম্মণভাৰেন তত্থেৰ উপ্পত্তিতো. চক্খাদযো চ নেসং কারণং, তেসং অভাৰে অভাৰতোতি. ইতি নিৰাসট্ঠানট্ঠেন, আকরট্ঠেন, সমোসরণট্ঠানট্ঠেন, সঞ্জাতিদেসট্ঠেন, কারণট্ঠেনচাতি ইমেহিপি কারণেহি এতে ধম্মা আযতনং আযতনন্তি ৰুচ্চন্তি.

তস্মা যথাৰুত্তেন অত্থেন চক্খু চ তং আযতনঞ্চাতি চক্খাযতনং…পে… ধম্মা চ তে আযতনঞ্চাতি ধম্মাযতনন্তি এৰং তাৰেত্থ অত্থতো ৰিঞ্ঞাতব্বো ৰিনিচ্ছযো.

৫১৩. লক্খণাতি চক্খাদীনং লক্খণতোপেত্থ ৰিঞ্ঞাতব্বো ৰিনিচ্ছযো. তানি চ পন তেসং লক্খণানি খন্ধনিদ্দেসে ৰুত্তনযেনেৰ ৰেদিতব্বানি.

তাৰত্ৰতোতি তাৰভাৰতো. ইদং ৰুত্তং হোতি – চক্খাদযোপি হি ধম্মা এৰ, এৰং সতি ধম্মাযতনমিচ্চেৰ অৰত্ৰা কস্মা দ্ৰাদসাযতনানীতি ৰুত্তানীতি চে. ছৰিঞ্ঞাণকাযুপ্পত্তিদ্ৰারারম্মণৰৰত্থানতো ইধ ছন্নং ৰিঞ্ঞাণকাযানং দ্ৰারভাৰেন আরম্মণভাৰেন চ ৰৰত্থানতো অযমেতেসং ভেদো হোতীতি দ্ৰাদস ৰুত্তানি, চক্খুৰিঞ্ঞাণৰীথিপরিযাপন্নস্স হি ৰিঞ্ঞাণকাযস্স ¶ চক্খাযতনমেৰ উপ্পত্তিদ্ৰারং, রূপাযতনমেৰ চারম্মণং, তথা ইতরানি ইতরেসং. ছট্ঠস্স পন ভৰঙ্গমনসঙ্খাতো মনাযতনেকদেসোৰ উপ্পত্তিদ্ৰারং, অসাধারণমেৰ চ ধম্মাযতনং আরম্মণন্তি ¶ . ইতি ছন্নং ৰিঞ্ঞাণকাযানং উপ্পত্তিদ্ৰারারম্মণৰৰত্থানতো দ্ৰাদস ৰুত্তানীতি এৰমেত্থ তাৰত্ৰতো ৰিঞ্ঞাতব্বো ৰিনিচ্ছযো.

৫১৪. কমতোতি ইধাপি পুব্বে ৰুত্তেসু উপ্পত্তিক্কমাদীসু দেসনাক্কমোৰ যুজ্জতি. অজ্ঝত্তিকেসু হি আযতনেসু সনিদস্সনসপ্পটিঘৰিসযত্তা চক্খাযতনং পাকটন্তি পঠমং দেসিতং, ততো অনিদস্সনসপ্পটিঘৰিসযানি সোতাযতনাদীনি. অথ ৰা দস্সনানুত্তরিযসৰনানুত্তরিযহেতুভাৰেন বহূপকারত্তা অজ্ঝত্তিকেসু চক্খাযতনসোতাযতনানি পঠমং দেসিতানি, ততো ঘানাযতনাদীনি তীণি, পঞ্চন্নম্পি গোচরৰিসযত্তা অন্তে মনাযতনং, চক্খাযতনাদীনং পন গোচরত্তা তস্স তস্স অন্তরন্তরানি বাহিরেসু রূপাযতনাদীনি. অপিচ ৰিঞ্ঞাণুপ্পত্তিকারণৰৰত্থানতোপি অযমেতেসং কমো ৰেদিতব্বো. ৰুত্তঞ্হেতং ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণ’’ন্তি (ম. নি. ৩.৪২১; সং. নি. ২.৪৩). এৰং কমতোপেত্থ ৰিঞ্ঞাতব্বো ৰিনিচ্ছযো.

৫১৫. সঙ্খেপৰিত্থারাতি সঙ্খেপতো হি মনাযতনস্স চেৰ ধম্মাযতনেকদেসস্স চ নামেন তদৰসেসানঞ্চ আযতনানং রূপেন সঙ্গহিতত্তা দ্ৰাদসাপি আযতনানি নামরূপমত্তমেৰ হোন্তি. ৰিত্থারতো পন অজ্ঝত্তিকেসু তাৰ চক্খাযতনং জাতিৰসেন চক্খুপসাদমত্তমেৰ, পচ্চযগতিনিকাযপুগ্গলভেদতো পন অনন্তপ্পভেদং. তথা সোতাযতনাদীনি চত্তারি. মনাযতনং কুসলাকুসলৰিপাককিরিযৰিঞ্ঞাণভেদেন একূননৰুতিপ্পভেদং একৰীসুত্তরসতপ্পভেদঞ্চ. ৰত্থুপটিপদাদিভেদতো পন অনন্তপ্পভেদং. রূপসদ্দগন্ধরসাযতনানি ৰিসভাগপচ্চযাদিভেদতো অনন্তপ্পভেদানি. ফোট্ঠব্বাযতনং পথৰীধাতুতেজোধাতুৰাযোধাতুৰসেন তিপ্পভেদং. পচ্চযাদিভেদতো অনেকপ্পভেদং. ধম্মাযতনং ৰেদনাসঞ্ঞাসঙ্খারক্খন্ধসুখুমরূপনিব্বানানং সভাৰনানত্তভেদতো অনেকপ্পভেদন্তি. এৰং সঙ্খেপৰিত্থারা ৰিঞ্ঞাতব্বো ৰিনিচ্ছযো.

৫১৬. দট্ঠব্বতোতি এত্থ পন সব্বানেৰ সঙ্খতানি আযতনানি অনাগমনতো অনিগ্গমনতো চ দট্ঠব্বানি. ন হি তানি পুব্বে উদযা কুতোচি আগচ্ছন্তি, নপি উদ্ধং ৰযা ¶ কুহিঞ্চি গচ্ছন্তি, অথ খো পুব্বে উদযা অপ্পটিলদ্ধসভাৰানি ¶ , উদ্ধং ৰযা পরিভিন্নসভাৰানি, পুব্বন্তাপরন্তৰেমজ্ঝে পচ্চযাযত্তৰুত্তিতায অৰসানি পৰত্তন্তি. তস্মা অনাগমনতো অনিগ্গমনতো চ দট্ঠব্বানি. তথা নিরীহকতো অব্যাপারতো চ. ন হি চক্খুরূপাদীনং এৰং হোতি ‘‘অহো ৰত অম্হাকং সামগ্গিযং ৰিঞ্ঞাণং নাম উপ্পজ্জেয্যা’’তি, ন চ তানি ৰিঞ্ঞাণুপ্পাদনত্থং দ্ৰারভাৰেন ৰত্থুভাৰেন আরম্মণভাৰেন ৰা ঈহন্তি, ন ব্যাপারমাপজ্জন্তি, অথ খো ধম্মতাৰেসা, যং চক্খুরূপাদিসামগ্গিযং চক্খুৰিঞ্ঞাণাদীনি সম্ভৰন্তীতি. তস্মা নিরীহকতো অব্যাপারতো চ দট্ঠব্বানি. অপিচ অজ্ঝত্তিকানি সুঞ্ঞগামো ৰিয দট্ঠব্বানি, ধুৰসুভসুখত্তভাৰৰিরহিতত্তা. বাহিরানি গামঘাতকচোরা ৰিয, অজ্ঝত্তিকানং অভিঘাতকত্তা. ৰুত্তঞ্হেতং ‘‘চক্খু, ভিক্খৰে, হঞ্ঞতি মনাপামনাপেহি রূপেহী’’তি ৰিত্থারো. অপিচ অজ্ঝত্তিকানি ছ পাণকা ৰিয দট্ঠব্বানি, বাহিরানি তেসং গোচরা ৰিযাতি. এৰমেত্থ দট্ঠব্বতো ৰিঞ্ঞাতব্বো ৰিনিচ্ছযো.

ইদং তাৰ আযতনানং ৰিত্থারকথামুখং.

ধাতুৰিত্থারকথা

৫১৭. তদনন্তরা পন ধাতুযোতি অট্ঠারস ধাতুযো – চক্খুধাতু, রূপধাতু, চক্খুৰিঞ্ঞাণধাতু, সোতধাতু, সদ্দধাতু, সোতৰিঞ্ঞাণধাতু, ঘানধাতু, গন্ধধাতু, ঘানৰিঞ্ঞাণধাতু, জিৰ্হাধাতু, রসধাতু, জিৰ্হাৰিঞ্ঞাণধাতু, কাযধাতু, ফোট্ঠব্বধাতু, কাযৰিঞ্ঞাণধাতু, মনোধাতু, ধম্মধাতু, মনোৰিঞ্ঞাণধাতূতি. তত্থ –

অত্থতো লক্খণাদীহি, কম তাৰত্ৰসঙ্খতো;

পচ্চযা অথ দট্ঠব্বা, ৰেদিতব্বো ৰিনিচ্ছযো.

তত্থ অত্থতোতি চক্খতীতি চক্খু. রূপযতীতি রূপং. চক্খুস্স ৰিঞ্ঞাণং চক্খুৰিঞ্ঞাণন্তি এৰমাদিনা তাৰ নযেন চক্খাদীনং ৰিসেসত্থতো ৰেদিতব্বো ৰিনিচ্ছযো. অৰিসেসেন পন ৰিদহতি, ধীযতে, ৰিধানং, ৰিধীযতে এতায, এত্থ ৰা ধীযতীতি ধাতু. লোকিযা হি ধাতুযো কারণভাৰেন ৰৰত্থিতা হুত্ৰা সুৰণ্ণরজতাদিধাতুযো ৰিয সুৰণ্ণরজতাদিং ¶ , অনেকপ্পকারং সংসারদুক্খং ৰিদহন্তি. ভারহারেহি চ ভারো ৰিয, সত্তেহি ¶ ধীযন্তে, ধারিযন্তীতি অত্থো. দুক্খৰিধানমত্তমেৰ চেসা, অৰসৰত্তনতো. এতাহি চ করণভূতাহি সংসারদুক্খং সত্তেহি অনুৰিধীযতি. তথাৰিহিতঞ্চ তং এতাস্ৰেৰ ধীযতি, ঠপিযতীতি অত্থো. ইতি চক্খাদীসু একেকো ধম্মো যথাসম্ভৰং ৰিদহতি, ধীযতীতিআদিনা অত্থৰসেন ধাতূতি ৰুচ্চতি.

৫১৮. অপিচ যথা তিত্থিযানং অত্তা নাম সভাৰতো নত্থি, ন এৰমেতা, এতা পন অত্তনো সভাৰং ধারেন্তীতি ধাতুযো. যথা লোকে ৰিচিত্তা হরিতালমনোসিলাদযো সেলাৰযৰা ধাতুযোতি ৰুচ্চন্তি, এৰমেতাপি ধাতুযো ৰিয ধাতুযো. ৰিচিত্তা হেতে ঞাণঞেয্যাৰযৰাতি. যথা ৰা সরীরসঙ্খাতস্স সমুদাযস্স অৰযৰভূতেসু রসসোণিতাদীসু অঞ্ঞমঞ্ঞৰিসভাগলক্খণপরিচ্ছিন্নেসু ধাতুসমঞ্ঞা, এৰমেতেসুপি পঞ্চক্খন্ধসঙ্খাতস্স অত্তভাৰস্স অৰযৰেসু ধাতুসমঞ্ঞা ৰেদিতব্বা. অঞ্ঞমঞ্ঞৰিসভাগলক্খণপরিচ্ছিন্না হেতে চক্খাদযোতি. অপিচ ধাতূতি নিজ্জীৰমত্তস্সেৰেতং অধিৰচনং. তথা হি ভগৰা ‘‘ছ ধাতুরো অযং ভিক্খু পুরিসো’’তিআদীসু (ম. নি. ৩.৩৪৪) জীৰসঞ্ঞাসমূহননত্থং ধাতুদেসনং অকাসীতি.

তস্মা যথাৰুত্তেন অত্থেন চক্খু চ তং ধাতু চ চক্খুধাতু…পে… মনোৰিঞ্ঞাণঞ্চ তং ধাতু চ মনোৰিঞ্ঞাণধাতূতি. এৰং তাৰেত্থ অত্থতো ৰেদিতব্বো ৰিনিচ্ছযো.

৫১৯. লক্খণাদিতোতি চক্খাদীনং লক্খণাদিতোপেত্থ ৰেদিতব্বো ৰিনিচ্ছযো. তানি চ পন নেসং লক্খণাদীনি খন্ধনিদ্দেসে ৰুত্তনযেনেৰ ৰেদিতব্বানি.

কমতোতি ইধাপি পুব্বে ৰুত্তেসু উপ্পত্তিক্কমাদীসু দেসনাক্কমোৰ যুজ্জতি. সো চ পনাযং হেতুফলানুপুব্বৰৰত্থানৰসেন ৰুত্তো. চক্খুধাতু রূপধাতূতি ইদঞ্হি দ্ৰযং হেতু, চক্খুৰিঞ্ঞাণধাতূতি ফলং. এৰং সব্বত্থ.

৫২০. তাৰত্ৰতোতি ¶ তাৰভাৰতো. ইদং ৰুত্তং হোতি – তেসু তেসু হি সুত্তাভিধম্মপ্পদেসেসু ‘‘আভাধাতু, সুভধাতু, আকাসানঞ্চাযতনধাতু, ৰিঞ্ঞাণঞ্চাযতনধাতু, আকিঞ্চঞ্ঞাযতনধাতু, নেৰসঞ্ঞানাসঞ্ঞাযতনধাতু, সঞ্ঞাৰেদযিতনিরোধধাতু’’ (সং. নি. ২.৯৫), ‘‘কামধাতু ¶ , ব্যাপাদধাতু, ৰিহিংসাধাতু, নেক্খম্মধাতু, অব্যাপাদধাতু, অৰিহিংসাধাতু’’ (ৰিভ. ১৮২; দী. নি. ৩.৩০৫; ম. নি. ৩.১২৫), ‘‘সুখধাতু, দুক্খধাতু, সোমনস্সধাতু, দোমনস্সধাতু, উপেক্খাধাতু, অৰিজ্জাধাতু’’ (ৰিভ. ১৮০; ম. নি. ৩.১২৫), ‘‘আরম্ভধাতু, নিক্কমধাতু, পরক্কমধাতু’’ (সং. নি. ৫.১৮৩), ‘‘হীনধাতু, মজ্ঝিমধাতু, পণীতধাতু’’ (দী. নি. ৩.৩০৫), ‘‘পথৰীধাতু, আপোধাতু, তেজোধাতু, ৰাযোধাতু (দী. নি. ৩.৩১১), আকাসধাতু, ৰিঞ্ঞাণধাতু’’ (ম. নি. ৩.১২৫; ৰিভ. ১৭২), ‘‘সঙ্খতধাতু, অসঙ্খতধাতু’’ (ম. নি. ৩.১২৫), ‘‘অনেকধাতু নানাধাতু লোকো’’তি (দী. নি. ২.৩৬৬; ম. নি. ১.১৪৮) এৰমাদযো অঞ্ঞাপি ধাতুযো দিস্সন্তি. এৰং সতি সব্বাসং ৰসেন পরিচ্ছেদং অকত্ৰা কস্মা অট্ঠারসাতি অযমেৰ পরিচ্ছেদো কতোতি চে. সভাৰতো ৰিজ্জমানানং সব্বধাতূনং তদন্তোগধত্তা.

রূপধাতুযেৰ হি আভাধাতু, সুভধাতু পন রূপাদিপটিবদ্ধা. কস্মা, সুভনিমিত্তত্তা. সুভনিমিত্তঞ্হি সুভধাতু. তঞ্চ রূপাদিৰিনিমুত্তং ন ৰিজ্জতি. কুসলৰিপাকারম্মণা ৰা রূপাদযো এৰ সুভধাতূতি রূপাদিমত্তমেৰেসা. আকাসানঞ্চাযতনধাতুআদীসু চিত্তং মনোৰিঞ্ঞাণধাতুযেৰ, সেসা ধম্মধাতু. সঞ্ঞাৰেদযিতনিরোধধাতু পন সভাৰতো নত্থি. ধাতুদ্ৰযনিরোধমত্তমেৰ হি সা.

কামধাতু ধম্মধাতুমত্তং ৰা হোতি. যথাহ – ‘‘তত্থ কতমা কামধাতু? কামপটিসংযুত্তো তক্কো ৰিতক্কো মিচ্ছাসঙ্কপ্পো’’তি (ৰিভ. ১৮২). অট্ঠারসাপি ৰা ধাতুযো. যথাহ – ‘‘হেট্ঠতো অৰীচিনিরযং পরিযন্তং করিত্ৰা উপরিতো পরনিম্মিতৰসৰত্তী দেৰে অন্তোকরিত্ৰা যং এতস্মিং অন্তরে এত্থাৰচরা এত্থ পরিযাপন্না খন্ধধাতুআযতনা রূপা ৰেদনা সঞ্ঞা সঙ্খারা ৰিঞ্ঞাণং, অযং ৰুচ্চতি কামধাতূ’’তি (ৰিভ. ১৮২).

নেক্খম্মধাতু ¶ ধম্মধাতু এৰ, ‘‘সব্বেপি কুসলা ধম্মা নেক্খম্মধাতূ’’তি (ৰিভ. ১৮২) ৰচনতো মনোৰিঞ্ঞাণধাতুপি হোতিযেৰ. ব্যাপাদৰিহিংসা-অব্যাপাদ-অৰিহিংসাসুখ-দুক্খ-সোমনস্স-দোমনস্সুপেক্খা-অৰিজ্জাআরম্ভ-নিক্কম-পরক্কমধাতুযো ধম্মধাতুযেৰ.

হীনমজ্ঝিমপণীতধাতুযো অট্ঠারস ধাতুমত্তমেৰ. হীনা হি চক্খাদযো হীনা ধাতু, মজ্ঝিমপণীতা ¶ মজ্ঝিমা চেৰ পণীতা চ. নিপ্পরিযাযেন পন অকুসলা ধম্মধাতুমনোৰিঞ্ঞাণধাতুযো হীনধাতু, লোকিযা কুসলাব্যাকতা উভোপি চক্খুধাতুআদযো চ মজ্ঝিমধাতু, লোকুত্তরা পন ধম্মধাতুমনোৰিঞ্ঞাণধাতুযো পণীতধাতু.

পথৰীতেজোৰাযোধাতুযো ফোট্ঠব্বধাতুযেৰ, আপোধাতু আকাসধাতু চ ধম্মধাতুযেৰ. ৰিঞ্ঞাণধাতু চক্খুৰিঞ্ঞাণাদিসত্তৰিঞ্ঞাণধাতুসঙ্খেপোযেৰ.

সত্তরস ধাতুযো ধম্মধাতুএকদেসো চ সঙ্খতধাতু, অসঙ্খতা পন ধাতু ধম্মধাতুএকদেসোৰ. অনেকধাতুনানাধাতুলোকো পন অট্ঠারস ধাতুপ্পভেদমত্তমেৰাতি. ইতি সভাৰতো ৰিজ্জমানানং সব্বধাতূনং তদন্তোগধত্তা অট্ঠারসেৰ ৰুত্তাতি.

৫২১. অপিচ ৰিজাননসভাৰে ৰিঞ্ঞাণে জীৰসঞ্ঞীনং সঞ্ঞাসমূহননত্থম্পি অট্ঠারসেৰ ৰুত্তা. সন্তি হি সত্তা ৰিজাননসভাৰে ৰিঞ্ঞাণে জীৰসঞ্ঞিনো, তেসং চক্খুসোতঘানজিৰ্হাকাযমনোধাতুমনোৰিঞ্ঞাণধাতুভেদেন তস্স অনেকতং চক্খুরূপাদিপচ্চযাযত্তৰুত্তিতায অনিচ্চতঞ্চ পকাসেত্ৰা দীঘরত্তানুসযিতং জীৰসঞ্ঞং সমূহনিতুকামেন ভগৰতা অট্ঠারস ধাতুযো পকাসিতা. কিঞ্চ ভিয্যো তথা ৰেনেয্যজ্ঝাসযৰসেন চ. যে চ ইমায অনতিসঙ্খেপৰিত্থারায দেসনায ৰেনেয্যসত্তা, তদজ্ঝাসযৰসেন চ অট্ঠারসেৰ পকাসিতা.

সঙ্খেপৰিত্থারনযেন তথা তথা হি,

ধম্মং পকাসযতি এস যথা যথাস্স;

সদ্ধম্মতেজৰিহতং ৰিলযং খণেন,

ৰেনেয্যসত্তহদযেসু তমো পযাতীতি.

এৰমেত্থ তাৰত্ৰতো ৰেদিতব্বো ৰিনিচ্ছযো.

৫২২. সঙ্খতোতি ¶ চক্খুধাতু তাৰ জাতিতো একো ধম্মোত্ৰেৰ সঙ্খং গচ্ছতি চক্খুপসাদৰসেন, তথা সোতঘানজিৰ্হাকাযরূপসদ্দগন্ধরসধাতুযো সোতপ্পসাদাদিৰসেন, ফোট্ঠব্বধাতু পন পথৰীতেজোৰাযোৰসেন তযো ধম্মাতি সঙ্খং গচ্ছতি. চক্খুৰিঞ্ঞাণধাতু কুসলাকুসলৰিপাকৰসেন ¶ দ্ৰে ধম্মাতি সঙ্খং গচ্ছতি, তথা সোতঘানজিৰ্হাকাযৰিঞ্ঞাণধাতুযো. মনোধাতু পন পঞ্চদ্ৰারাৰজ্জনকুসলাকুসলৰিপাকসম্পটিচ্ছনৰসেন তযো ধম্মাতি সঙ্খং গচ্ছতি. ধম্মধাতু তিণ্ণং অরূপক্খন্ধানং সোল়সন্নং সুখুমরূপানং অসঙ্খতায চ ধাতুযা ৰসেন ৰীসতি ধম্মাতি সঙ্খং গচ্ছতি. মনোৰিঞ্ঞাণধাতু সেসকুসলাকুসলাব্যাকতৰিঞ্ঞাণৰসেন ছসত্ততি ধম্মাতি সঙ্খং গচ্ছতি. এৰমেত্থ সঙ্খতোপি ৰেদিতব্বো ৰিনিচ্ছযো.

৫২৩. পচ্চযাতি এত্থ চ চক্খুধাতু তাৰ চক্খুৰিঞ্ঞাণধাতুযা ৰিপ্পযুত্তপুরেজাতঅত্থিঅৰিগতনিস্সযিন্দ্রিযপচ্চযানং ৰসেন ছহি পচ্চযেহি পচ্চযো হোতি, রূপধাতু পুরেজাতঅত্থিঅৰিগতারম্মণপচ্চযানং ৰসেন চতূহি পচ্চযেহি পচ্চযো হোতি. এৰং সোতৰিঞ্ঞাণধাতুআদীনং সোতধাতুসদ্দধাতুআদযো. পঞ্চন্নং পন নেসং আৰজ্জনমনোধাতু অনন্তরসমনন্তরনত্থিৰিগতানন্তরূপনিস্সযৰসেন পঞ্চহি পচ্চযেহি পচ্চযো হোতি, তা চ পঞ্চপি সম্পটিচ্ছনমনোধাতুযা. তথা সম্পটিচ্ছনমনোধাতু সন্তীরণমনোৰিঞ্ঞাণধাতুযা, সা চ ৰোট্ঠব্বনমনোৰিঞ্ঞাণধাতুযা, ৰোট্ঠব্বনমনোৰিঞ্ঞাণধাতু চ জৰনমনোৰিঞ্ঞাণধাতুযা. জৰনমনোৰিঞ্ঞাণধাতু পন অনন্তরায জৰনমনোৰিঞ্ঞাণধাতুযা তেহি চেৰ পঞ্চহি আসেৰনপচ্চযেন চাতি ছহি পচ্চযেহি পচ্চযো হোতি. এস তাৰ পঞ্চদ্ৰারে নযো.

মনোদ্ৰারে পন ভৰঙ্গমনোৰিঞ্ঞাণধাতু আৰজ্জনমনোৰিঞ্ঞাণধাতুযা. আৰজ্জনমনোৰিঞ্ঞাণধাতু চ জৰনমনোৰিঞ্ঞাণধাতুযা পুরিমেহি পঞ্চহি পচ্চযেহি পচ্চযো হোতি. ধম্মধাতু পন সত্তন্নম্পি ৰিঞ্ঞাণধাতূনং সহজাতঅঞ্ঞমঞ্ঞনিস্সযসম্পযুত্তঅত্থিঅৰিগতাদীহি বহুধা পচ্চযো হোতি. চক্খুধাতুআদযো পন একচ্চা চ ধম্মধাতু একচ্চায মনোৰিঞ্ঞাণধাতুযা আরম্মণপচ্চযাদীহিপি পচ্চযা হোন্তি. চক্খুৰিঞ্ঞাণধাতুআদীনঞ্চ ন কেৰলং চক্খুরূপাদযো পচ্চযা হোন্তি, অথ খো আলোকাদযোপি. তেনাহু পুব্বাচরিযা –

‘‘চক্খুরূপালোকমনসিকারে ¶ পটিচ্চ উপ্পজ্জতি চক্খুৰিঞ্ঞাণং. সোতসদ্দৰিৰরমনসিকারে পটিচ্চ উপ্পজ্জতি সোতৰিঞ্ঞাণং. ঘানগন্ধৰাযুমনসিকারে পটিচ্চ উপ্পজ্জতি ঘানৰিঞ্ঞাণং. জিৰ্হারসআপমনসিকারে পটিচ্চ উপ্পজ্জতি জিৰ্হাৰিঞ্ঞাণং. কাযফোট্ঠব্বপথৰীমনসিকারে পটিচ্চ উপ্পজ্জতি কাযৰিঞ্ঞাণং. ভৰঙ্গমনধম্মমনসিকারে পটিচ্চ উপ্পজ্জতি মনোৰিঞ্ঞাণ’’ন্তি.

অযমেত্থ ¶ সঙ্খেপো. ৰিত্থারতো পন পচ্চযপ্পভেদো পটিচ্চসমুপ্পাদনিদ্দেসে আৰিভৰিস্সতীতি এৰমেত্থ পচ্চযতোপি ৰেদিতব্বো ৰিনিচ্ছযো.

৫২৪. দট্ঠব্বতোতি দট্ঠব্বতোপেত্থ ৰিনিচ্ছযো ৰেদিতব্বোতি অত্থো. সব্বা এৰ হি সঙ্খতধাতুযো পুব্বন্তাপরন্তৰিৰিত্ততো ধুৰসুভসুখত্তভাৰসুঞ্ঞতো পচ্চযাযত্তৰুত্তিতো চ দট্ঠব্বা.

ৰিসেসতো পনেত্থ ভেরিতলং ৰিয চক্খুধাতু দট্ঠব্বা, দণ্ডো ৰিয রূপধাতু, সদ্দো ৰিয চক্খুৰিঞ্ঞাণধাতু. তথা আদাসতলং ৰিয চক্খুধাতু, মুখং ৰিয রূপধাতু, মুখনিমিত্তং ৰিয চক্খুৰিঞ্ঞাণধাতু. অথ ৰা উচ্ছুতিলা ৰিয চক্খুধাতু, যন্তচক্কযট্ঠি ৰিয রূপধাতু, উচ্ছুরসতেলানি ৰিয চক্খুৰিঞ্ঞাণধাতু. তথা অধরারণী ৰিয চক্খুধাতু, উত্তরারণী ৰিয রূপধাতু, অগ্গি ৰিয চক্খুৰিঞ্ঞাণধাতু. এস নযো সোতধাতুআদীসু.

মনোধাতু পন যথাসম্ভৰতো চক্খুৰিঞ্ঞাণধাতুআদীনং পুরেচরানুচরা ৰিয দট্ঠব্বা.

ধম্মধাতুযা ৰেদনাক্খন্ধো সল্লমিৰ সূলমিৰ চ দট্ঠব্বো. সঞ্ঞাসঙ্খারক্খন্ধা ৰেদনাসল্লসূলযোগাআতুরা ৰিয, পুথুজ্জনানং ৰা সঞ্ঞা আসাদুক্খজননতো রিত্তমুট্ঠি ৰিয. অযথাভুচ্চনিমিত্তগাহকতো ৰনমিগো ৰিয. সঙ্খারা পটিসন্ধিযং পক্খিপনতো অঙ্গারকাসুযং খিপনকপুরিসা ৰিয. জাতি দুক্খানুবন্ধতো রাজপুরিসানুবন্ধচোরা ৰিয. সব্বানত্থাৰহস্স খন্ধসন্তানস্স হেতুতো ৰিসরুক্খবীজানি ৰিয. রূপং নানাৰিধুপদ্দৰনিমিত্ততো খুরচক্কং ৰিয দট্ঠব্বং. অসঙ্খতা পন ধাতু অমততো সন্ততো খেমতো চ দট্ঠব্বা. কস্মা? সব্বানত্থাৰহস্স পটিপক্খভূতত্তা.

মনোৰিঞ্ঞাণধাতু ¶ আরম্মণেসু ৰৰত্থানাভাৰতো অরঞ্ঞমক্কটো ৰিয, দুদ্দমনতো অস্সখল়ুঙ্কো ৰিয, যত্থকামনিপাতিতো ৰেহাসক্খিত্তদণ্ডো ৰিয, লোভদোসাদিনানপ্পকারকিলেসৰেসযোগতো রঙ্গনটো ৰিয দট্ঠব্বাতি.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

আযতনধাতুনিদ্দেসো নাম

পন্নরসমো পরিচ্ছেদো.

১৬. ইন্দ্রিযসচ্চনিদ্দেসো

ইন্দ্রিযৰিত্থারকথা

৫২৫. ধাতূনং ¶ ¶ অনন্তরং উদ্দিট্ঠানি পন ইন্দ্রিযানীতি বাৰীসতিন্দ্রিযানি – চক্খুন্দ্রিযং সোতিন্দ্রিযং ঘানিন্দ্রিযং জিৰ্হিন্দ্রিযং কাযিন্দ্রিযং মনিন্দ্রিযং ইত্থিন্দ্রিযং পুরিসিন্দ্রিযং জীৰিতিন্দ্রিযং সুখিন্দ্রিযং দুক্খিন্দ্রিযং সোমনস্সিন্দ্রিযং দোমনস্সিন্দ্রিযং উপেক্খিন্দ্রিযং সদ্ধিন্দ্রিযং ৰীরিযিন্দ্রিযং সতিন্দ্রিযং সমাধিন্দ্রিযং পঞ্ঞিন্দ্রিযং অনঞ্ঞাতঞ্ঞস্সামীতিন্দ্রিযং অঞ্ঞিন্দ্রিযং অঞ্ঞাতাৰিন্দ্রিযন্তি. তত্থ –

অত্থতো লক্খণাদীহি, কমতো চ ৰিজানিযা;

ভেদাভেদা তথা কিচ্চা, ভূমিতো চ ৰিনিচ্ছযং.

তত্থ চক্খাদীনং তাৰ চক্খতীতি চক্খূতিআদিনা নযেন অত্থো পকাসিতো. পচ্ছিমেসু পন তীসু পঠমং পুব্বভাগে অনঞ্ঞাতং অমতং পদং চতুসচ্চধম্মং ৰা জানিস্সামীতি এৰং পটিপন্নস্স উপ্পজ্জনতো ইন্দ্রিযট্ঠসম্ভৰতো চ অনঞ্ঞাতঞ্ঞস্সামীতিন্দ্রিযন্তি ৰুত্তং. দুতিযং আজাননতো ইন্দ্রিযট্ঠসম্ভৰতো চ অঞ্ঞিন্দ্রিযং. ততিযং অঞ্ঞাতাৰিনো চতূসু সচ্চেসু নিট্ঠিতঞ্ঞাণকিচ্চস্স খীণাসৰস্স উপ্পজ্জনতো ইন্দ্রিযট্ঠসম্ভৰতো চ অঞ্ঞাতাৰিন্দ্রিযং.

কো পন নেসং ইন্দ্রিযট্ঠো নামাতি? ইন্দলিঙ্গট্ঠো ইন্দ্রিযট্ঠো. ইন্দদেসিতট্ঠো ইন্দ্রিযট্ঠো. ইন্দদিট্ঠট্ঠো ইন্দ্রিযট্ঠো. ইন্দসিট্ঠট্ঠো ইন্দ্রিযট্ঠো. ইন্দজুট্ঠট্ঠো ইন্দ্রিযট্ঠো. সো সব্বোপি ইধ যথাযোগং যুজ্জতি. ভগৰা হি সম্মাসম্বুদ্ধো পরমিস্সরিযভাৰতো ইন্দো. কুসলাকুসলঞ্চ কম্মং, কম্মেসু কস্সচি ইস্সরিযাভাৰতো. তেনেৰেত্থ কম্মসঞ্জনিতানি তাৰ ইন্দ্রিযানি কুসলাকুসলকম্মং ¶ উল্লিঙ্গেন্তি. তেন চ সিট্ঠানীতি ইন্দলিঙ্গট্ঠেন ইন্দসিট্ঠট্ঠেন চ ইন্দ্রিযানি. সব্বানেৰ পনেতানি ভগৰতা যথাভূততো পকাসিতানি অভিসম্বুদ্ধানি চাতি ইন্দদেসিতট্ঠেন ইন্দদিট্ঠট্ঠেন চ ইন্দ্রিযানি. তেনেৰ ভগৰতা মুনিন্দেন কানিচি গোচরাসেৰনায কানিচি ভাৰনাসেৰনায সেৰিতানীতি ইন্দজুট্ঠট্ঠেনাপি ইন্দ্রিযানি.

অপিচ ¶ আধিপচ্চসঙ্খাতেন ইস্সরিযট্ঠেনাপি এতানি ইন্দ্রিযানি. চক্খুৰিঞ্ঞাণাদিপ্পৰত্তিযঞ্হি চক্খাদীনং সিদ্ধং আধিপচ্চং, তস্মিং তিক্খে তিক্খত্তা মন্দে চ মন্দত্তাতি. অযং তাৰেত্থ অত্থতো ৰিনিচ্ছযো.

লক্খণাদীহীতি লক্খণরসপচ্চুপট্ঠানপদট্ঠানেহিপি চক্খাদীনং ৰিনিচ্ছযং ৰিজানিযাতি অত্থো. তানি চ নেসং লক্খণাদীনি খন্ধনিদ্দেসে ৰুত্তানেৰ. পঞ্ঞিন্দ্রিযাদীনি হি চত্তারি অত্থতো অমোহোযেৰ. সেসানি তত্থ সরূপেনেৰ আগতানি.

৫২৬. কমতোতি অযম্পি দেসনাক্কমোৰ. তত্থ অজ্ঝত্তধম্মে পরিঞ্ঞায অরিযভূমিপটিলাভো হোতীতি অত্তভাৰপরিযাপন্নানি চক্খুন্দ্রিযাদীনি পঠমং দেসিতানি. সো পন অত্তভাৰো যং ধম্মং উপাদায ইত্থীতি ৰা পুরিসোতি ৰা সঙ্খং গচ্ছতি, অযং সোতি নিদস্সনত্থং ততো ইত্থিন্দ্রিযং পুরিসিন্দ্রিযঞ্চ. সো দুৰিধোপি জীৰিতিন্দ্রিযপটিবদ্ধৰুত্তীতি ঞাপনত্থং ততো জীৰিতিন্দ্রিযং. যাৰ তস্স পৰত্তি, তাৰ এতেসং ৰেদযিতানং অনিৰত্তি. যঞ্চ কিঞ্চি ৰেদযিতং, সব্বং তং দুক্খন্তি ঞাপনত্থং ততো সুখিন্দ্রিযাদীনি. তংনিরোধত্থং পন এতে ধম্মা ভাৰেতব্বাতি পটিপত্তিদস্সনত্থং ততো সদ্ধাদীনি. ইমায পটিপত্তিযা এস ধম্মো পঠমং অত্তনি পাতুভৰতীতি পটিপত্তিযা অমোঘভাৰদস্সনত্থং ততো অনঞ্ঞাতঞ্ঞস্সামীতিন্দ্রিযং. তস্সেৰ ফলত্তা ততো অনন্তরং ভাৰেতব্বতো চ ততো অঞ্ঞিন্দ্রিযং. ততো পরং ভাৰনায ইমস্স অধিগমো, অধিগতে চ পন ইমস্মিং নত্থি কিঞ্চি উত্তরি করণীযন্তি ঞাপনত্থং অন্তে পরমস্সাসভূতং অঞ্ঞাতাৰিন্দ্রিযং দেসিতন্তি অযমেত্থ কমো.

ভেদাভেদাতি জীৰিতিন্দ্রিযস্সেৰ চেত্থ ভেদো. তঞ্হি রূপজীৰিতিন্দ্রিযং অরূপজীৰিতিন্দ্রিযন্তি দুৰিধং হোতি. সেসানং অভেদোতি এৰমেত্থ ভেদাভেদতো ৰিনিচ্ছযং ৰিজানিযা.

৫২৭. কিচ্চাতি ¶ কিং ইন্দ্রিযানং কিচ্চন্তি চে. চক্খুন্দ্রিযস্স তাৰ ‘‘চক্খাযতনং চক্খুৰিঞ্ঞাণধাতুযা তংসম্পযুত্তকানঞ্চ ধম্মানং ইন্দ্রিযপচ্চযেন পচ্চযো’’তি ৰচনতো যং তং ইন্দ্রিযপচ্চযভাৰেন সাধেতব্বং অত্তনো তিক্খমন্দাদিভাৰেন চক্খুৰিঞ্ঞাণাদিধম্মানং তিক্খমন্দাদিসঙ্খাতং অত্তাকারানুৰত্তাপনং, ইদং কিচ্চং. এৰং সোতঘানজিৰ্হাকাযানং. মনিন্দ্রিযস্স পন ¶ সহজাতধম্মানং অত্তনো ৰসৰত্তাপনং. জীৰিতিন্দ্রিযস্স সহজাতধম্মানুপালনং. ইত্থিন্দ্রিযপুরিসিন্দ্রিযানং ইত্থিপুরিসলিঙ্গনিমিত্তকুত্তাকপ্পাকারানুৰিধানং. সুখদুক্খসোমনস্সদোমনস্সিন্দ্রিযানং সহজাতধম্মে অভিভৰিত্ৰা যথাসকং ওল়ারিকাকারানুপাপনং. উপেক্খিন্দ্রিযস্স সন্তপণীতমজ্ঝত্তাকারানুপাপনং. সদ্ধাদীনং পটিপক্খাভিভৰনং সম্পযুত্তধম্মানঞ্চ পসন্নাকারাদিভাৰসম্পাপনং. অনঞ্ঞাতঞ্ঞস্সামীতিন্দ্রিযস্স সংযোজনত্তযপ্পহানঞ্চেৰ সম্পযুত্তানঞ্চ তপ্পহানাভিমুখভাৰকরণং. অঞ্ঞিন্দ্রিযস্স কামরাগব্যাপাদাদিতনুকরণপ্পহানঞ্চেৰ সহজাতানঞ্চ অত্তনো ৰসানুৰত্তাপনং. অঞ্ঞাতাৰিন্দ্রিযস্স সব্বকিচ্চেসু উস্সুক্কপ্পহানঞ্চেৰ অমতাভিমুখভাৰপচ্চযতা চ সম্পযুত্তানন্তি এৰমেত্থ কিচ্চতো ৰিনিচ্ছযং ৰিজানিযা.

৫২৮. ভূমিতোতি চক্খুসোতঘানজিৰ্হাকাযইত্থিপুরিসসুখদুক্খদোমনস্সিন্দ্রিযানি চেত্থ কামাৰচরানেৰ. মনিন্দ্রিযজীৰিতিন্দ্রিযউপেক্খিন্দ্রিযানি সদ্ধাৰীরিযসতিসমাধিপঞ্ঞিন্দ্রিযানি চ চতুভূমিপরিযাপন্নানি. সোমনস্সিন্দ্রিযং কামাৰচররূপাৰচরলোকুত্তরৰসেন ভূমিত্তযপরিযাপন্নং. অৰসানে তীণি লোকুত্তরানেৰাতি এৰমেত্থ ভূমিতোপি ৰিনিচ্ছযং ৰিজানেয্য. এৰং হি ৰিজানন্তো –

সংৰেগবহুলো ভিক্খু, ঠিতো ইন্দ্রিযসংৰরে;

ইন্দ্রিযানি পরিঞ্ঞায, দুক্খস্সন্তং করিস্সতীতি.

ইদং ইন্দ্রিযানং ৰিত্থারকথামুখং.

সচ্চৰিত্থারকথা

৫২৯. তদনন্তরানি পন সচ্চানীতি চত্তারি অরিযসচ্চানি – দুক্খং অরিযসচ্চং, দুক্খসমুদযো ¶ অরিযসচ্চং, দুক্খনিরোধো অরিযসচ্চং, দুক্খনিরোধগামিনী পটিপদা অরিযসচ্চন্তি. তত্থ –

ৰিভাগতো ¶ নিব্বচন, লক্খণাদিপ্পভেদতো;

অত্থত্থুদ্ধারতো চেৰ, অনূনাধিকতো তথা.

কমতো জাতিআদীনং, নিচ্ছযা ঞাণকিচ্চতো;

অন্তোগধানং পভেদা, উপমাতো চতুক্কতো.

সুঞ্ঞতেকৰিধাদীহি, সভাগৰিসভাগতো;

ৰিনিচ্ছযো ৰেদিতব্বো, ৰিঞ্ঞুনা সাসনক্কমে.

তত্থ ৰিভাগতোতি দুক্খাদীনং হি চত্তারো চত্তারো অত্থা ৰিভত্তা তথা অৰিতথা অনঞ্ঞথা, যে দুক্খাদীনি অভিসমেন্তেহি অভিসমেতব্বা. যথাহ – ‘‘দুক্খস্স পীল়নট্ঠো সঙ্খতট্ঠো সন্তাপট্ঠো ৰিপরিণামট্ঠো, ইমে চত্তারো দুক্খস্স দুক্খট্ঠা তথা অৰিতথা অনঞ্ঞথা. সমুদযস্স আযূহনট্ঠো নিদানট্ঠো সংযোগট্ঠো পলিবোধট্ঠো. নিরোধস্স নিস্সরণট্ঠো ৰিৰেকট্ঠো অসঙ্খতট্ঠো অমতট্ঠো. মগ্গস্স নিয্যানট্ঠো হেতুট্ঠো দস্সনট্ঠো অধিপতেয্যট্ঠো. ইমে চত্তারো মগ্গস্স মগ্গট্ঠা তথা অৰিতথা অনঞ্ঞথা’’তি (পটি. ম. ২.৮). তথা ‘‘দুক্খস্স পীল়নট্ঠো সঙ্খতট্ঠো সন্তাপট্ঠো ৰিপরিণামট্ঠো অভিসমযট্ঠো’’তি (পটি. ম. ২.১১) এৰমাদি. ইতি এৰং ৰিভত্তানং চতুন্নং চতুন্নং অত্থানং ৰসেন দুক্খাদীনি ৰেদিতব্বানীতি. অযং তাৰেত্থ ৰিভাগতো ৰিনিচ্ছযো.

৫৩০. নিব্বচনলক্খণাদিপ্পভেদতোতি এত্থ পন নিব্বচনতো তাৰ ইধ দু-ইতি অযং সদ্দো কুচ্ছিতে দিস্সতি. কুচ্ছিতং হি পুত্তং দুপ্পুত্তোতি ৰদন্তি. খং-সদ্দো পন তুচ্ছে. তুচ্ছং হি আকাসং ‘‘খ’’ন্তি ৰুচ্চতি. ইদঞ্চ পঠমসচ্চং কুচ্ছিতং অনেকউপদ্দৰাধিট্ঠানতো. তুচ্ছং বালজনপরিকপ্পিতধুৰসুভসুখত্তভাৰৰিরহিততো. তস্মা কুচ্ছিতত্তা তুচ্ছত্তা চ দুক্খন্তি ৰুচ্চতি.

সং-ইতি ¶ চ অযং সদ্দো ‘‘সমাগমো সমেত’’ন্তিআদীসু (দী. নি. ২.৩৯৬; ৰিভ. ১৯৯) সংযোগং দীপেতি. উ-ইতি অযং ‘‘উপ্পন্নং উদিত’’ন্তিআদীসু (ধ. স. ১; মহাৰ. ৮৪) উপ্পত্তিং. অয-সদ্দো কারণং দীপেতি. ইদঞ্চাপি দুতিযসচ্চং অৰসেসপচ্চযসমাযোগে সতি দুক্খস্সুপ্পত্তিকারণং. ইতি দুক্খস্স সংযোগে উপ্পত্তিকারণত্তা দুক্খসমুদযন্তি ৰুচ্চতি.

ততিযসচ্চং ¶ পন যস্মা নি-সদ্দো অভাৰং, রোধ-সদ্দো চ চারকং দীপেতি. তস্মা অভাৰো এত্থ সংসারচারকসঙ্খাতস্স দুক্খরোধস্স সব্বগতিসুঞ্ঞত্তা, সমধিগতে ৰা তস্মিং সংসারচারকসঙ্খাতস্স দুক্খরোধস্স অভাৰো হোতি, তপ্পটিপক্খত্তাতিপি দুক্খনিরোধন্তি ৰুচ্চতি. দুক্খস্স ৰা অনুপ্পাদনিরোধপচ্চযত্তা দুক্খনিরোধন্তি.

চতুত্থসচ্চং পন যস্মা এতং দুক্খনিরোধং গচ্ছতি আরম্মণৰসেন তদভিমুখভূতত্তা, পটিপদা চ হোতি দুক্খনিরোধপ্পত্তিযা. তস্মা দুক্খনিরোধগামিনী পটিপদাতি ৰুচ্চতি.

৫৩১. যস্মা পনেতানি বুদ্ধাদযো অরিযা পটিৰিজ্ঝন্তি, তস্মা অরিযসচ্চানীতি ৰুচ্চন্তি. যথাহ ‘‘চত্তারিমানি, ভিক্খৰে, অরিযসচ্চানি. কতমানি…পে… ইমানি খো, ভিক্খৰে, চত্তারি অরিযসচ্চানি. অরিযা ইমানি পটিৰিজ্ঝন্তি, তস্মা অরিযসচ্চানীতি ৰুচ্চন্তী’’তি. অপিচ অরিযস্স সচ্চানীতিপি অরিযসচ্চানি. যথাহ ‘‘সদেৰকে, ভিক্খৰে, লোকে…পে… মনুস্সায তথাগতো অরিযো, তস্মা অরিযসচ্চানীতি ৰুচ্চন্তী’’তি (সং. নি. ৫.১০৯৮). অথ ৰা এতেসং অভিসম্বুদ্ধত্তা অরিযভাৰসিদ্ধিতোপি অরিযসচ্চানি. যথাহ – ‘‘ইমেসং খো, ভিক্খৰে, চতুন্নং অরিযসচ্চানং যথাভূতং অভিসম্বুদ্ধত্তা তথাগতো অরহং সম্মাসম্বুদ্ধো অরিযোতি ৰুচ্চতী’’তি. অপিচ খো পন অরিযানি সচ্চানীতিপি অরিযসচ্চানি. অরিযানীতি তথানি অৰিতথানি অৰিসংৰাদকানীতি অত্থো. যথাহ – ‘‘ইমানি খো, ভিক্খৰে, চত্তারি অরিযসচ্চানি তথানি অৰিতথানি অনঞ্ঞথানি, তস্মা অরিযসচ্চানীতি ৰুচ্চন্তী’’তি (সং. নি. ৫.১০৯৭) এৰমেত্থ নিব্বচনতো ৰিনিচ্ছযো ৰেদিতব্বো.

৫৩২. কথং লক্খণাদিপ্পভেদতো? এত্থ হি বাধনলক্খণং দুক্খসচ্চং, সন্তাপনরসং, পৰত্তিপচ্চুপট্ঠানং. পভৰলক্খণং সমুদযসচ্চং, অনুপচ্ছেদকরণরসং, পলিবোধপচ্চুপট্ঠানং. সন্তিলক্খণং ¶ নিরোধসচ্চং, অচ্চুতিরসং, অনিমিত্তপচ্চুপট্ঠানং. নিয্যানলক্খণং মগ্গসচ্চং, কিলেসপ্পহানরসং, ৰুট্ঠানপচ্চুপট্ঠানং. অপিচ পৰত্তিপৰত্তননিৰত্তিনিৰত্তনলক্খণানি পটিপাটিযা. তথা সঙ্খততণ্হা অসঙ্খতদস্সনলক্খণানি চাতি এৰমেত্থ লক্খণাদিপ্পভেদতো ৰিনিচ্ছযো ৰেদিতব্বো.

৫৩৩. অত্থত্থুদ্ধারতো ¶ চেৰাতি এত্থ পন অত্থতো তাৰ কো সচ্চট্ঠোতি চে? যো পঞ্ঞাচক্খুনা উপপরিক্খমানানং মাযাৰ ৰিপরীতো, মরীচিৰ ৰিসংৰাদকো, তিত্থিযানং অত্তাৰ অনুপলব্ভসভাৰো চ ন হোতি, অথ খো বাধনপ্পভৰসন্তিনিয্যানপ্পকারেন তচ্ছাৰিপরীতভূতভাৰেন অরিযঞাণস্স গোচরো হোতিযেৰ. এস অগ্গিলক্খণং ৰিয, লোকপকতি ৰিয চ তচ্ছাৰিপরীতভূতভাৰো সচ্চট্ঠোতি ৰেদিতব্বো. যথাহ – ‘‘ইদং দুক্খন্তি, ভিক্খৰে, তথমেতং অৰিতথমেতং অনঞ্ঞথমেত’’ন্তি (সং. নি. ৫.১০৯০) ৰিত্থারো. অপিচ –

নাবাধকং যতো দুক্খং, দুক্খা অঞ্ঞং ন বাধকং;

বাধকত্তনিযামেন, ততো সচ্চমিদং মতং.

তং ৰিনা নাঞ্ঞতো দুক্খং, ন হোতি ন চ তং ততো;

দুক্খহেতুনিযামেন, ইতি সচ্চং ৰিসত্তিকা.

নাঞ্ঞা নিব্বানতো সন্তি, সন্তং ন চ ন তং যতো;

সন্তভাৰনিযামেন, ততো সচ্চমিদং মতং.

মগ্গা অঞ্ঞং ন নিয্যানং, অনিয্যানো ন চাপি সো;

তচ্ছনিয্যানভাৰত্তা, ইতি সো সচ্চসম্মতো.

ইতি তচ্ছাৰিপল্লাস, ভূতভাৰং চতূস্ৰপি;

দুক্খাদীস্ৰৰিসেসেন, সচ্চট্ঠং আহু পণ্ডিতাতি.

এৰং অত্থতো ৰিনিচ্ছযো ৰেদিতব্বো.

৫৩৪. কথং ¶ অত্থুদ্ধারতো? ইধাযং সচ্চ-সদ্দো অনেকেসু অত্থেসু দিস্সতি. সেয্যথিদং – ‘‘সচ্চং ভণে ন কুজ্ঝেয্যা’’তিআদীসু (ধ. প. ২২৪) ৰাচাসচ্চে. ‘‘সচ্চে ঠিতা সমণব্রাহ্মণা চা’’তিআদীসু (জা. ২.২১.৪৩৩) ৰিরতিসচ্চে. ‘‘কস্মা নু সচ্চানি ৰদন্তি নানা পৰাদিযাসে কুসলাৰদানা’’তিআদীসু (সু. নি. ৮৯১) দিট্ঠিসচ্চে. ‘‘একং হি সচ্চং ন দুতিয’’ন্তিআদীসু (সু. নি. ৮৯০) পরমত্থসচ্চে নিব্বানে চেৰ মগ্গে চ. ‘‘চতুন্নং অরিযসচ্চানং কতি কুসলা’’তিআদীসু (ৰিভ. ২১৬) অরিযসচ্চে. স্ৰাযমিধাপি অরিযসচ্চে ৰত্ততীতি এৰমেত্থ অত্থুদ্ধারতোপি ৰিনিচ্ছযো ৰেদিতব্বো.

৫৩৫. অনূনাধিকতোতি ¶ কস্মা পন চত্তারেৰ অরিযসচ্চানি ৰুত্তানি অনূনানি অনধিকানীতি চে? অঞ্ঞস্সাসম্ভৰতো অঞ্ঞতরস্স চ অপনেয্যাভাৰতো. ন হি এতেহি অঞ্ঞং অধিকং ৰা, এতেসং ৰা একম্পি অপনেতব্বং সম্ভোতি. যথাহ – ‘‘ইধ, ভিক্খৰে, আগচ্ছেয্য সমণো ৰা ব্রাহ্মণো ৰা ‘নেতং দুক্খং অরিযসচ্চং, অঞ্ঞং দুক্খং অরিযসচ্চং. অহমেতং দুক্খং অরিযসচ্চং ঠপেত্ৰা অঞ্ঞং দুক্খং অরিযসচ্চং পঞ্ঞপেস্সামী’তি নেতং ঠানং ৰিজ্জতী’’তিআদি. যথা চাহ – ‘‘যো হি কোচি, ভিক্খৰে, সমণো ৰা ব্রাহ্মণো ৰা এৰং ৰদেয্য ‘নেতং দুক্খং পঠমং অরিযসচ্চং যং সমণেন গোতমেন দেসিতং, অহমেতং দুক্খং পঠমং অরিযসচ্চং পচ্চক্খায অঞ্ঞং দুক্খং পঠমং অরিযসচ্চং পঞ্ঞপেস্সামী’তি নেতং ঠানং ৰিজ্জতী’’তিআদি (সং. নি. ৫.১০৮৬).

অপিচ পৰত্তিমাচিক্খন্তো ভগৰা সহেতুকং আচিক্খি, নিৰত্তিঞ্চ সউপাযং. ইতি পৰত্তিনিৰত্তিতদুভযহেতূনং এতপরমতো চত্তারেৰ ৰুত্তানি. তথা পরিঞ্ঞেয্যপহাতব্বসচ্ছিকাতব্বভাৰেতব্বানং, তণ্হাৰত্থুতণ্হাতণ্হানিরোধতণ্হানিরোধুপাযানং, আলযআলযারামতাআলযসমুগ্ঘাতআলযসমুগ্ঘাতুপাযানঞ্চ ৰসেনাপি চত্তারেৰ ৰুত্তানীতি এৰমেত্থ অনূনাধিকতো ৰিনিচ্ছযো ৰেদিতব্বো.

৫৩৬. কমতোতি অযম্পি দেসনাক্কমোৰ. এত্থ চ ওল়ারিকত্তা, সব্বসত্তসাধারণত্তা চ সুৰিঞ্ঞেয্যন্তি দুক্খসচ্চং পঠমং ৰুত্তং. তস্সেৰ হেতুদস্সনত্থং তদনন্তরং সমুদযসচ্চং. হেতুনিরোধা ফলনিরোধোতি ঞাপনত্থং ততো নিরোধসচ্চং. তদধিগমুপাযদস্সনত্থং অন্তে মগ্গসচ্চং. ভৰসুখস্সাদগধিতানং ৰা সত্তানং সংৰেগজননত্থং পঠমং দুক্খমাহ. তং নেৰ অকতং আগচ্ছতি ¶ , ন ইস্সরনিম্মানাদিতো হোতি, ইতো পন হোতীতি ঞাপনত্থং তদনন্তরং সমুদযং. ততো সহেতুকেন দুক্খেন অভিভূতত্তা সংৰিগ্গমানসানং দুক্খনিস্সরণগৰেসীনং নিস্সরণদস্সনেন অস্সাসজননত্থং নিরোধং. ততো নিরোধাধিগমত্থং নিরোধসম্পাপকং মগ্গন্তি এৰমেত্থ কমতো ৰিনিচ্ছযো ৰেদিতব্বো.

৫৩৭. জাতিআদীনং নিচ্ছযাতি যে তে অরিযসচ্চানি নিদ্দিসন্তেন ভগৰতা ‘‘জাতিপি দুক্খা, জরাপি দুক্খা, মরণম্পি দুক্খং, সোকপরিদেৰদুক্খদোমনস্সুপাযাসাপি দুক্খা, অপ্পিযেহি সম্পযোগো দুক্খো, পিযেহি ¶ ৰিপ্পযোগো দুক্খো, যম্পিচ্ছং ন লভতি তম্পি দুক্খং, সংখিত্তেন পঞ্চুপাদানক্খন্ধা দুক্খা’’তি (ৰিভ. ১৯০) দুক্খনিদ্দেসে দ্ৰাদস ধম্মা, ‘‘যাযং তণ্হা পোনোব্ভৰিকা নন্দীরাগসহগতা তত্রতত্রাভিনন্দিনী. সেয্যথিদং, কামতণ্হা, ভৰতণ্হা, ৰিভৰতণ্হা’’তি (ৰিভ. ২০৩) সমুদযনিদ্দেসে তিৰিধা তণ্হা, ‘‘যো তস্সাযেৰ তণ্হায অসেসৰিরাগনিরোধো চাগো পটিনিস্সগ্গো মুত্তি অনালযো’’তি (ৰিভ. ২০৪) এৰং নিরোধনিদ্দেসে অত্থতো একমেৰ নিব্বানং, ‘‘কতমং দুক্খনিরোধগামিনীপটিপদা অরিযসচ্চং, অযমেৰ অরিযো অট্ঠঙ্গিকো মগ্গো. সেয্যথিদং – সম্মাদিট্ঠি…পে… সম্মাসমাধী’’তি (ৰিভ. ২০৫) এৰং মগ্গনিদ্দেসে অট্ঠ ধম্মাতি ইতি চতুন্নং সচ্চানং নিদ্দেসে জাতিআদযো ধম্মা ৰুত্তা, তেসং জাতিআদীনং নিচ্ছযাপি এত্থ ৰিনিচ্ছযো ৰেদিতব্বো.

দুক্খনিদ্দেসকথা

জাতিনিদ্দেসো

সেয্যথিদং, অযঞ্হি জাতি-সদ্দো অনেকত্থো. তথা হেস ‘‘একম্পি জাতিং দ্ৰেপি জাতিযো’’তি (দী. নি. ১.২৪৪; পারা. ১২) এত্থ ভৰে আগতো. ‘‘অত্থি, ৰিসাখে, নিগণ্ঠা নাম সমণজাতী’’তি (অ. নি. ৩.৭১) এত্থ নিকাযে. ‘‘জাতি দ্ৰীহি খন্ধেহি সঙ্গহিতা’’তি (ধাতু. ৭১) এত্থ সঙ্খতলক্খণে. ‘‘যং মাতুকুচ্ছিস্মিং পঠমং চিত্তং উপ্পন্নং, পঠমং ৰিঞ্ঞাণং পাতুভূতং, তদুপাদায সাৰস্স জাতী’’তি (মহাৰ. ১২৪) এত্থ পটিসন্ধিযং. ‘‘সম্পতিজাতো, আনন্দ, বোধিসত্তো’’তি (ম. নি. ৩.২০৭) এত্থ পসূতিযং. ‘‘অক্খিত্তো অনুপকুট্ঠো জাতিৰাদেনা’’তি (দী. নি. ১.৩৩১) এত্থ কুলে. ‘‘যতোহং, ভগিনি, অরিযায জাতিযা জাতো’’তি (ম. নি. ২.৩৫১) এত্থ অরিযসীলে.

৫৩৮. স্ৰাযমিধ ¶ গব্ভসেয্যকানং পটিসন্ধিতো পট্ঠায যাৰ মাতুকুচ্ছিম্হা নিক্খমনং, তাৰ পৰত্তেসু খন্ধেসু. ইতরেসং পটিসন্ধিখন্ধেস্ৰেৰাতি দট্ঠব্বো. অযম্পি চ পরিযাযকথাৰ. নিপ্পরিযাযতো পন তত্থ তত্থ নিব্বত্তমানানং সত্তানং যে যে খন্ধা পাতুভৰন্তি, তেসং তেসং পঠমপাতুভাৰো জাতি নাম.

সা ¶ পনেসা তত্থ তত্থ ভৰে পঠমাভিনিব্বত্তিলক্খণা, নিয্যাতনরসা, অতীতভৰতো ইধ উম্মুজ্জনপচ্চুপট্ঠানা, দুক্খৰিচিত্ততাপচ্চুপট্ঠানা ৰা.

৫৩৯. কস্মা পনেসা দুক্খাতি চে? অনেকেসং দুক্খানং ৰত্থুভাৰতো. অনেকানি হি দুক্খানি. সেয্যথিদং – দুক্খদুক্খং, ৰিপরিণামদুক্খং, সঙ্খারদুক্খং, পটিচ্ছন্নদুক্খং, অপ্পটিচ্ছন্নদুক্খং, পরিযাযদুক্খং, নিপ্পরিযাযদুক্খন্তি.

তত্থ কাযিকচেতসিকা দুক্খা ৰেদনাসভাৰতো চ নামতো চ দুক্খত্তা দুক্খদুক্খন্তি ৰুচ্চতি.

সুখা ৰেদনা ৰিপরিণামেন দুক্খুপ্পত্তিহেতুতো ৰিপরিণামদুক্খং.

উপেক্খা ৰেদনা চেৰ অৰসেসা চ তেভূমকা সঙ্খারা উদযব্বযপ্পটিপীল়িতত্তা সঙ্খারদুক্খং. কণ্ণসূলদন্তসূলরাগজপরিল়াহদোসজপরিল়াহাদি কাযিকচেতসিকো আবাধো পুচ্ছিত্ৰা জানিতব্বতো উপক্কমস্স চ অপাকটভাৰতো পটিচ্ছন্নদুক্খং নাম. অপাকটদুক্খন্তিপি ৰুচ্চতি.

দ্ৰত্তিংসকম্মকারণাদিসমুট্ঠানো আবাধো অপুচ্ছিত্ৰাৰ জানিতব্বতো উপক্কমস্স চ পাকটভাৰতো অপ্পটিচ্ছন্নদুক্খং নাম. পাকটদুক্খন্তিপি ৰুচ্চতি.

ঠপেত্ৰা দুক্খদুক্খং সেসং দুক্খসচ্চৰিভঙ্গে আগতং জাতিআদি সব্বম্পি তস্স তস্স দুক্খস্স ৰত্থুভাৰতো পরিযাযদুক্খং. দুক্খদুক্খং পন নিপ্পরিযাযদুক্খন্তি ৰুচ্চতি.

তত্রাযং ¶ জাতি যং তং বালপণ্ডিতসুত্তাদীসু (ম. নি. ৩.২৪৬ আদযো) ভগৰতাপি উপমাৰসেন পকাসিতং আপাযিকং দুক্খং, যঞ্চ সুগতিযম্পি মনুস্সলোকে গব্ভোক্কন্তিমূলকাদিভেদং দুক্খং উপ্পজ্জতি, তস্স ৰত্থুভাৰতো দুক্খা.

৫৪০. তত্রিদং গব্ভোক্কন্তিমূলকাদিভেদং দুক্খং – অযং হি সত্তো মাতুকুচ্ছিম্হি নিব্বত্তমানো ন উপ্পলপদুমপুণ্ডরীকাদীসু নিব্বত্ততি, অথ খো হেট্ঠা আমাসযস্স উপরি পক্কাসযস্স উদরপটলপিট্ঠিকণ্টকানং ৰেমজ্ঝে পরমসম্বাধে তিব্বন্ধকারেনানাকুণপগন্ধপরিভাৰিতপরমদুগ্গন্ধপৰনৰিচরিতে অধিমত্তজেগুচ্ছে কুচ্ছিপদেসে পূতিমচ্ছপূতিকুম্মাসচন্দনিকাদীসু কিমি ৰিয নিব্বত্ততি. সো তত্থ নিব্বত্তো দস মাসে মাতুকুচ্ছিসম্ভৰেন উস্মনা পুটপাকং ৰিয পচ্চমানো পিট্ঠপিণ্ডি ৰিয সেদিযমানো সমিঞ্জনপসারণাদিরহিতো অধিমত্তং দুক্খমনুভোতীতি, ইদং তাৰ গব্ভোক্কন্তিমূলকং দুক্খং.

যং ¶ পন সো মাতু সহসা উপক্খলনগমননিসীদনৰুট্ঠানপরিৰত্তনাদীসু সুরাধুত্তহত্থগতো এল়কো ৰিয অহিতুণ্ডিকহত্থগতো সপ্পপোতকো ৰিয চ আকড্ঢনপরিকড্ঢনওধূনননিদ্ধূননাদিনা উপক্কমেন অধিমত্তং দুক্খমনুভৰতি, যঞ্চ মাতু সীতূদকপানকালে সীতনরকুপপন্নো ৰিয, উণ্হযাগুভত্তাদিঅজ্ঝোহরণকালে অঙ্গারৰুট্ঠিসম্পরিকিণ্ণো ৰিয, লোণম্বিলাদিঅজ্ঝোহরণকালে খারাপটিচ্ছকাদিকম্মকারণপত্তো ৰিয তিব্বং দুক্খমনুভোতি, ইদং গব্ভপরিহরণমূলকং দুক্খং.

যং পনস্স মূল়্হগব্ভায মাতুযা মিত্তামচ্চসুহজ্জাদীহিপি অদস্সনারহে দুক্খুপ্পত্তিট্ঠানে ছেদনফালনাদীহি দুক্খং উপ্পজ্জতি, ইদং গব্ভৰিপত্তিমূলকং দুক্খং.

যং ৰিজাযমানায মাতুযা কম্মজেহি ৰাতেহি পরিৰত্তেত্ৰা নরকপপাতং ৰিয অতিভযানকং যোনিমগ্গং পটিপাতিযমানস্স পরমসম্বাধেন যোনিমুখেন তাল়চ্ছিগ্গল়েন ৰিয নিক্কড্ঢিযমানস্স মহানাগস্স নরকসত্তস্স ৰিয চ সঙ্ঘাতপব্বতেহি ৰিচুণ্ণিযমানস্স দুক্খং উপ্পজ্জতি, ইদং ৰিজাযনমূলকং দুক্খং.

যং পন জাতস্স তরুণৰণসদিসসুখুমালসরীরস্স হত্থগহণনহাপনধোৰনচোল়পরিমজ্জনাদিকালে ¶ সূচিমুখখুরধারাহি ৰিজ্ঝনফালনসদিসং দুক্খং উপ্পজ্জতি, ইদং মাতুকুচ্ছিতো বহিনিক্খমনমূলকং দুক্খং.

যং ততো পরং পৰত্তিযং অত্তনাৰ অত্তানং ৰধেন্তস্স অচেলকৰতাদিৰসেন আতাপনপরিতাপনানুযোগমনুযুত্তস্স, কোধৰসেন অভুঞ্জন্তস্স, উব্বন্ধন্তস্স চ দুক্খং উপ্পজ্জতি, ইদং অত্তূপক্কমমূলকং দুক্খং. যং পন পরতো ৰধবন্ধনাদীনি অনুভৰন্তস্স উপ্পজ্জতি, ইদং পরূপক্কমমূলকং দুক্খন্তি.

ইতি ইমস্স সব্বস্সাপি দুক্খস্স অযং জাতি ৰত্থুমেৰ হোতি.

৫৪১. তেনেতং ৰুচ্চতি –

জাযেথ নো চে নরকেসু সত্তো,

তত্তগ্গিদাহাদিকমপ্পসয্হং;

লভেথ দুক্খং নু কুহিং পতিট্ঠং,

ইচ্চাহ দুক্খাতি মুনীধ জাতিং.

দুক্খং ¶ তিরচ্ছেসু কসাপতোদ-

দণ্ডাভিঘাতাদিভৰং অনেকং;

যং তং কথং তত্থ ভৰেয্য জাতিং,

ৰিনা তহিং জাতি ততোপি দুক্খা.

পেতেসু দুক্খং পন খুপ্পিপাসা-

ৰাতাতপাদিপ্পভৰং ৰিচিত্তং;

যস্মা অজাতস্স ন তত্থ অত্থি,

তস্মাপি দুক্খং মুনি জাতিমাহ.

তিব্বন্ধকারে ¶ চ অসয্হসীতে,

লোকন্তরে যং অসুরেসু দুক্খং;

ন তং ভৰে তত্থ ন চস্স জাতি,

যতো অযং জাতি ততোপি দুক্খা.

যঞ্চাপি গূথনরকে ৰিয মাতুগব্ভে,

সত্তো ৰসং চিরমতো বহি নিক্খমঞ্চ;

পপ্পোতি দুক্খমতিঘোরমিদম্পি নত্থি,

জাতিং ৰিনা ইতিপি জাতি অযঞ্হি দুক্খা.

কিং ভাসিতেন বহুনা ননু যং কুহিঞ্চি,

অত্থীধ কিঞ্চিদপি দুক্খমিদং কদাচি;

নেৰত্থি জাতিৰিরহেন যতো মহেসি,

দুক্খাতি সব্বপঠমং ইমমাহ জাতিন্তি.

অযং তাৰ জাতিযং ৰিনিচ্ছযো.

জরানিদ্দেসো

৫৪২. জরাপি দুক্খাতি এত্থ দুৰিধা জরা সঙ্খতলক্খণঞ্চ, খণ্ডিচ্চাদিসম্মতো সন্ততিযং একভৰপরিযাপন্নখন্ধপুরাণভাৰো চ, সা ইধ অধিপ্পেতা. সা পনেসা জরা খন্ধপরিপাকলক্খণা, মরণূপনযনরসা, যোব্বনৰিনাসপচ্চুপট্ঠানা. দুক্খা সঙ্খারদুক্খভাৰতো চেৰ দুক্খৰত্থুতো চ ¶ . যং হি অঙ্গপচ্চঙ্গসিথিলীভাৰইন্দ্রিযৰিকারৰিরূপতাযোব্বনৰিনাসবলূপঘাতসতিমতিৰিপ্পৰাসপরপরিভৰাদিঅনেকপচ্চযং কাযিকচেতসিকদুক্খং উপ্পজ্জতি, জরা তস্স ৰত্থু. তেনেতং ৰুচ্চতি –

‘‘অঙ্গানং সিথিলীভাৰা, ইন্দ্রিযানং ৰিকারতো;

যোব্বনস্স ৰিনাসেন, বলস্স উপঘাততো.

‘‘ৰিপ্পৰাসা ¶ সতাদীনং, পুত্তদারেহি অত্তনো;

অপসাদনীযতো চেৰ, ভিয্যো বালত্তপত্তিযা.

‘‘পপ্পোতি দুক্খং যং মচ্চো, কাযিকং মানসং তথা;

সব্বমেতং জরাহেতু, যস্মা তস্মা জরা দুখা’’তি.

অযং জরাযং ৰিনিচ্ছযো.

মরণনিদ্দেসো

৫৪৩. মরণম্পি দুক্খন্তি এত্থাপি দুৰিধং মরণং সঙ্খতলক্খণঞ্চ, যং সন্ধায ৰুত্তং ‘‘জরামরণং দ্ৰীহি খন্ধেহি সঙ্গহিত’’ন্তি (ধাতু. ৭১). একভৰপরিযাপন্নজীৰিতিন্দ্রিযপ্পবন্ধৰিচ্ছেদো চ, যং সন্ধায ৰুত্তং ‘‘নিচ্চং মরণতো ভয’’ন্তি (সু. নি. ৫৮১). তং ইধ অধিপ্পেতং. জাতিপচ্চযা মরণং উপক্কমমরণং সরসমরণং আযুক্খযমরণং পুঞ্ঞক্খযমরণন্তিপি তস্সেৰ নামং. তযিদং চুতিলক্খণং, ৰিযোগরসং, গতিৰিপ্পৰাসপচ্চুপট্ঠানং. দুক্খস্স পন ৰত্থুভাৰতো দুক্খন্তি ৰেদিতব্বং. তেনেতং ৰুচ্চতি –

‘‘পাপস্স পাপকম্মাদি-নিমিত্তমনুপস্সতো;

ভদ্দস্সাপসহন্তস্স, ৰিযোগং পিযৰত্থুকং;

মীযমানস্স যং দুক্খং, মানসং অৰিসেসতো.

সব্বেসঞ্চাপি যং সন্ধি-বন্ধনচ্ছেদনাদিকং;

ৰিতুজ্জমানমম্মানং, হোতি দুক্খং সরীরজং.

অসয্হমপ্পতিকারং, দুক্খস্সেতস্সিদং যতো;

মরণং ৰত্থু তেনেতং, দুক্খমিচ্চেৰ ভাসিত’’ন্তি.

অযং মরণে ৰিনিচ্ছযো.

সোকাদিনিদ্দেসা

৫৪৪. সোকাদীসু ¶ ¶ সোকো নাম ঞাতিব্যসনাদীহি ফুট্ঠস্স চিত্তসন্তাপো. সো কিঞ্চাপি অত্থতো দোমনস্সমেৰ হোতি. এৰং সন্তেপি অন্তোনিজ্ঝানলক্খণো, চেতসো পরিজ্ঝাপনরসো, অনুসোচনপচ্চুপট্ঠানো. দুক্খো পন দুক্খদুক্খতো দুক্খৰত্থুতো চ. তেনেতং ৰুচ্চতি –

‘‘সত্তানং হদযং সোকো, ৰিসসল্লংৰ তুজ্জতি;

অগ্গিতত্তোৰ নারাচো, ভুসংৰ দহতে পুন.

‘‘সমাৰহতি চ ব্যাধি-জরামরণভেদনং;

দুক্খম্পি ৰিৰিধং যস্মা, তস্মা দুক্খোতি ৰুচ্চতী’’তি.

অযং সোকে ৰিনিচ্ছযো.

পরিদেৰো

৫৪৫. পরিদেৰো নাম ঞাতিব্যসনাদীহি ফুট্ঠস্স ৰচীপলাপো. সো লালপ্পনলক্খণো, গুণদোসকিত্তনরসো, সম্ভমপচ্চুপট্ঠানো. দুক্খো পন সঙ্খারদুক্খভাৰতো দুক্খৰত্থুতো চ. তেনেতং ৰুচ্চতি –

‘‘যং সোকসল্লৰিহতো পরিদেৰমানো,

কণ্ঠোট্ঠতালুতলসোসজমপ্পসয্হং;

ভিয্যোধিমত্তমধিগচ্ছতিযেৰ দুক্খং,

দুক্খোতি তেন ভগৰা পরিদেৰমাহা’’তি.

অযং পরিদেৰে ৰিনিচ্ছযো.

দুক্খং

৫৪৬. দুক্খং ¶ নাম কাযিকং দুক্খং, তং কাযপীল়নলক্খণং, দুপ্পঞ্ঞানং দোমনস্সকরণরসং, কাযিকাবাধপচ্চুপট্ঠানং. দুক্খং পন দুক্খদুক্খতো মানসদুক্খাৰহনতো চ. তেনেতং ৰুচ্চতি –

‘‘পীল়েতি কাযিকমিদং, দুক্খঞ্চ মানসং ভিয্যো;

জনযতি যস্মা তস্মা, দুক্খন্তি ৰিসেসতো ৰুত্ত’’ন্তি.

অযং দুক্খে ৰিনিচ্ছযো.

দোমনস্সং

৫৪৭. দোমনস্সং ¶ নাম মানসং দুক্খং. তং চিত্তপীল়নলক্খণং, মনোৰিঘাতরসং, মানসব্যাধিপচ্চুপট্ঠানং. দুক্খং পন দুক্খদুক্খতো কাযিকদুক্খাৰহনতো চ. চেতোদুক্খসমপ্পিতা হি কেসে পকিরিয কন্দন্তি, উরানি পটিপিসন্তি, আৰট্টন্তি, ৰিৰট্টন্তি, উদ্ধংপাদং পপতন্তি, সত্থং আহরন্তি, ৰিসং খাদন্তি, রজ্জুযা উব্বন্ধন্তি, অগ্গিং পৰিসন্তীতি তং নানপ্পকারকং দুক্খমনুভৰন্তি. তেনেতং ৰুচ্চতি –

‘‘পীল়েতি যতো চিত্তং, কাযস্স চ পীল়নং সমাৰহতি;

দুক্খন্তি দোমনস্সং, ৰিদোমনস্সা ততো আহূ’’তি.

অযং দোমনস্সে ৰিনিচ্ছযো.

উপাযাসো

৫৪৮. উপাযাসো নাম ঞাতিব্যসনাদীহি ফুট্ঠস্স অধিমত্তচেতোদুক্খপ্পভাৰিতো দোসোযেৰ. সঙ্খারক্খন্ধপরিযাপন্নো একো ধম্মোতি একে. সো চিত্তপরিদহনলক্খণো, নিত্থুননরসো ¶ , ৰিসাদপচ্চুপট্ঠানো. দুক্খো পন সঙ্খারদুক্খভাৰতো চিত্তপরিদহনতো কাযৰিসাদনতো চ. তেনেতং ৰুচ্চতি –

‘‘চিত্তস্স চ পরিদহনা, কাযস্স ৰিসাদনা চ অধিমত্তং;

যং দুক্খমুপাযাসো, জনেতি দুক্খো ততো ৰুত্তো’’তি.

অযং উপাযাসে ৰিনিচ্ছযো.

এত্থ চ মন্দগ্গিনা অন্তোভাজনে পাকো ৰিয সোকো. তিক্খগ্গিনা পচ্চমানস্স ভাজনতো বহিনিক্খমনং ৰিয পরিদেৰো. বহিনিক্খন্তাৰসেসস্স নিক্খমিতুং অপ্পহোন্তস্স অন্তোভাজনেযেৰ যাৰ পরিক্খযা পাকো ৰিয উপাযাসো দট্ঠব্বো.

অপ্পিযসম্পযোগো

৫৪৯. অপ্পিযসম্পযোগো নাম অমনাপেহি সত্তসঙ্খারেহি সমোধানং. সো অনিট্ঠসমোধানলক্খণো, চিত্তৰিঘাতকরণরসো, অনত্থভাৰপচ্চুপট্ঠানো. দুক্খো পন দুক্খৰত্থুতো. তেনেতং ৰুচ্চতি –

‘‘দিস্ৰাৰ ¶ অপ্পিযে দুক্খং, পঠমং হোতি চেতসি;

তদুপক্কমসম্ভূত-মথকাযে যতো ইধ.

‘‘ততো দুক্খদ্ৰযস্সাপি, ৰত্থুতো সো মহেসিনা;

দুক্খো ৰুত্তোতি ৰিঞ্ঞেয্যো, অপ্পিযেহি সমাগমো’’তি.

অযং অপ্পিযসম্পযোগে ৰিনিচ্ছযো.

পিযৰিপ্পযোগো

৫৫০. পিযৰিপ্পযোগো নাম মনাপেহি সত্তসঙ্খারেহি ৰিনাভাৰো. সো ইট্ঠৰত্থুৰিযোগলক্খণো ¶ , সোকুপ্পাদনরসো, ব্যসনপচ্চুপট্ঠানো. দুক্খো পন সোকদুক্খস্স ৰত্থুতো. তেনেতং ৰুচ্চতি –

‘‘ঞাতিধনাদিৰিযোগা,

সোকসরসমপ্পিতা ৰিতুজ্জন্তি;

বালা যতো ততো যং,

দুক্খোতি মতো পিযৰিপ্পযোগো’’তি.

অযং পিযৰিপ্পযোগে ৰিনিচ্ছযো.

ইচ্ছিতালাভো

৫৫১. যম্পিচ্ছং ন লভতীতি এত্থ ‘‘অহো ৰত মযং ন জাতিধম্মা অস্সামা’’তিআদীসু (দী. নি. ২.৩৯৮; ৰিভ. ২০১) অলব্ভনেয্যৰত্থূসু ইচ্ছাৰ যম্পিচ্ছং ন লভতি, তম্পি দুক্খন্তি ৰুত্তা. সা অলব্ভনেয্যৰত্থুইচ্ছনলক্খণা, তপ্পরিযেসনরসা, তেসং অপ্পত্তিপচ্চুপট্ঠানা. দুক্খা পন দুক্খৰত্থুতো. তেনেতং ৰুচ্চতি –

‘‘তং তং পত্থযমানানং, তস্স তস্স অলাভতো;

যং ৰিঘাতমযং দুক্খং, সত্তানং ইধ জাযতি.

‘‘অলব্ভনেয্যৰত্থূনং, পত্থনা তস্স কারণং;

যস্মা তস্মা জিনো দুক্খং, ইচ্ছিতালাভমব্রৰী’’তি.

অযং ইচ্ছিতালাভে ৰিনিচ্ছযো.

পঞ্চুপাদানক্খন্ধা

৫৫২. সংখিত্তেন ¶ পঞ্চুপাদানক্খন্ধা দুক্খাতি এত্থ পন –

জাতিপ্পভুতিকং ¶ দুক্খং, যং ৰুত্তমিধ তাদিনা;

অৰুত্তং যঞ্চ তং সব্বং, ৰিনা এতে ন ৰিজ্জতি.

যস্মা তস্মা উপাদান-ক্খন্ধা সঙ্খেপতো ইমে;

দুক্খাতি ৰুত্তা দুক্খন্ত-দেসকেন মহেসিনা.

তথা হি ইন্ধনমিৰ পাৰকো, লক্খমিৰ পহরণানি, গোরূপং ৰিয ডংসমকসাদযো, খেত্তমিৰ লাযকা, গামং ৰিয গামঘাতকা উপাদানক্খন্ধপঞ্চকমেৰ জাতিআদযো নানপ্পকারেহি ৰিবাধেন্তা তিণলতাদীনি ৰিয ভূমিযং, পুপ্ফফলপল্লৰানি ৰিয রুক্খেসু উপাদানক্খন্ধেসুযেৰ নিব্বত্তন্তি. উপাদানক্খন্ধানঞ্চ আদিদুক্খং জাতি, মজ্ঝেদুক্খং জরা, পরিযোসানদুক্খং মরণং, মারণন্তিকদুক্খাভিঘাতেন পরিডয্হনদুক্খং সোকো, তদসহনতো লালপ্পনদুক্খং পরিদেৰো, ততো ধাতুক্খোভসঙ্খাতঅনিট্ঠফোট্ঠব্বসমাযোগতো কাযস্স আবাধনদুক্খং দুক্খং, তেন বাধিযমানানং পুথুজ্জনানং তত্থ পটিঘুপ্পত্তিতো চেতোবাধনদুক্খং দোমনস্সং, সোকাদিৰুদ্ধিযা জনিতৰিসাদানং অনুত্থুননদুক্খং উপাযাসো, মনোরথৰিঘাতপ্পত্তানং ইচ্ছাৰিঘাতদুক্খং ইচ্ছিতালাভোতি এৰং নানপ্পকারতো উপপরিক্খিযমানা উপাদানক্খন্ধাৰ দুক্খাতি. যদেতং একমেকং দস্সেত্ৰা ৰুচ্চমানং অনেকেহিপি কপ্পেহি ন সক্কা অসেসতো ৰত্তুং, তস্মা তং সব্বম্পি দুক্খং একজলবিন্দুম্হি সকলসমুদ্দজলরসং ৰিয যেসু কেসুচি পঞ্চসু উপাদানক্খন্ধেসু সংখিপিত্ৰা দস্সেতুং ‘‘সংখিত্তেন পঞ্চুপাদানক্খন্ধা দুক্খা’’তি ভগৰা অৰোচাতি. অযং উপাদানক্খন্ধেসু ৰিনিচ্ছযো.

অযং তাৰ দুক্খনিদ্দেসে নযো.

সমুদযনিদ্দেসকথা

৫৫৩. সমুদযনিদ্দেসে পন যাযং তণ্হাতি যা অযং তণ্হা. পোনোব্ভৰিকাতি পুনব্ভৰকরণং পুনোব্ভৰো, পুনোব্ভৰো সীলমেতিস্সাতি ¶ পোনোব্ভৰিকা. নন্দীরাগেন সহগতাতি নন্দীরাগসহগতা, নন্দীরাগেন সদ্ধিং অত্থতো একত্তমেৰ গতাতি ৰুত্তং হোতি. তত্র তত্রাভিনন্দিনীতি যত্র যত্র অত্তভাৰো নিব্বত্ততি, তত্র তত্রাভিনন্দিনী. সেয্যথিদন্তি নিপাতো ¶ , তস্স সা কতমাতি চেতি অত্থো. কামতণ্হা ভৰতণ্হা ৰিভৰতণ্হাতি ইমা পটিচ্চসমুপ্পাদনিদ্দেসে আৰিভৰিস্সন্তি. ইধ পনাযং তিৰিধাপি দুক্খসচ্চস্স নিব্বত্তকট্ঠেন একত্তং উপনেত্ৰা দুক্খসমুদযং অরিযসচ্চন্তি ৰুত্তাতি ৰেদিতব্বা.

অযং সমুদযনিদ্দেসে নযো.

নিরোধনিদ্দেসকথা

৫৫৪. দুক্খনিরোধনিদ্দেসে যো তস্সাযেৰ তণ্হাযাতিআদিনা নযেন সমুদযনিরোধো ৰুত্তো, সো কস্মাতি চে? সমুদযনিরোধেন দুক্খনিরোধো. সমুদযনিরোধেন হি দুক্খং নিরুজ্ঝতি, ন অঞ্ঞথা. তেনাহ –

‘‘যথাপি মূলে অনুপদ্দৰে দল়্হে,

ছিন্নোপি রুক্খো পুনদেৰ রূহতি;

এৰম্পি তণ্হানুসযে অনূহতে,

নিব্বত্ততী দুক্খমিদং পুনপ্পুন’’ন্তি. (ধ. প. ৩৩৮);

ইতি যস্মা সমুদযনিরোধেনেৰ দুক্খং নিরুজ্ঝতি, তস্মা ভগৰা দুক্খনিরোধং দেসেন্তো সমুদযনিরোধেনেৰ দেসেসি. সীহসমানৰুত্তিনো হি তথাগতা. তে দুক্খং নিরোধেন্তা দুক্খনিরোধঞ্চ দেসেন্তা হেতুম্হি পটিপজ্জন্তি, ন ফলে. সুৰানৰুত্তিনো পন তিত্থিযা. তে দুক্খং নিরোধেন্তা দুক্খনিরোধঞ্চ দেসেন্তা অত্তকিলমথানুযোগদেসনাদীহি ফলে পটিপজ্জন্তি, ন হেতুম্হীতি. এৰং তাৰ দুক্খনিরোধস্স সমুদযনিরোধৰসেন দেসনায পযোজনং ৰেদিতব্বং.

৫৫৫. অযং পনত্থো – তস্সাযেৰ তণ্হাযাতি তস্সা ‘‘পোনোব্ভৰিকা’’তি ৰত্ৰা কামতণ্হাদিৰসেন ৰিভত্ততণ্হায. ৰিরাগো ৰুচ্চতি মগ্গো. ‘‘ৰিরাগা ৰিমুচ্চতী’’তি (ম. নি. ১.২৪৫; সং. নি. ৩.১৪) হি ৰুত্তং. ৰিরাগেন নিরোধো ৰিরাগনিরোধো. অনুসযসমুগ্ঘাততো অসেসো ৰিরাগনিরোধো অসেসৰিরাগনিরোধো. অথ ৰা ৰিরাগোতি পহানং ৰুচ্চতি, তস্মা অসেসো ¶ ৰিরাগো অসেসো নিরোধোতি এৰম্পেত্থ যোজনা দট্ঠব্বা. অত্থতো পন সব্বানেৰ ¶ এতানি নিব্বানস্স ৰেৰচনানি. পরমত্থতো হি দুক্খনিরোধো অরিযসচ্চন্তি নিব্বানং ৰুচ্চতি. যস্মা পন তং আগম্ম তণ্হা ৰিরজ্জতি চেৰ নিরুজ্ঝতি চ, তস্মা ৰিরাগোতি চ নিরোধোতি চ ৰুচ্চতি. যস্মা চ তদেৰ আগম্ম তস্সা চাগাদযো হোন্তি, কামগুণালযেসু চেত্থ একোপি আলযো নত্থি, তস্মা ‘‘চাগো পটিনিস্সগ্গো মুত্তি অনালযো’’তি ৰুচ্চতি.

৫৫৬. তযিদং সন্তিলক্খণং, অচ্চুতিরসং, অস্সাসকরণরসং ৰা, অনিমিত্তপচ্চুপট্ঠানং, নিপ্পপঞ্চপচ্চুপট্ঠানং ৰা.

নিব্বানকথা

৫৫৭. নত্থেৰ নিব্বানং, সসৰিসাণং ৰিয অনুপলব্ভনীযতোতি চে? ন, উপাযেন উপলব্ভনীযতো. উপলব্ভতি হি তং তদনুরূপপটিপত্তিসঙ্খাতেন উপাযেন, চেতোপরিযঞাণেন পরেসং লোকুত্তরচিত্তং ৰিয, তস্মা ‘‘অনুপলব্ভনীযতো নত্থী’’তি ন ৰত্তব্বং. ন হি ‘‘যং বালপুথুজ্জনা ন উপলভন্তি, তং নত্থী’’তি ৰত্তব্বং.

৫৫৮. অপিচ নিব্বানং নত্থীতি ন ৰত্তব্বং, কস্মা? পটিপত্তিযা ৰঞ্ঝভাৰাপজ্জনতো. অসতি হি নিব্বানে সম্মাদিট্ঠিপুরেজৰায সীলাদিখন্ধত্তযসঙ্গহায সম্মাপটিপত্তিযা ৰঞ্ঝভাৰো আপজ্জতি. ন চাযং ৰঞ্ঝা, নিব্বানপাপনতোতি. ন পটিপত্তিযা ৰঞ্ঝভাৰাপত্তি, অভাৰপাপকত্তাতি চে. ন, অতীতানাগতাভাৰেপি নিব্বানপত্তিযা অভাৰতো. ৰত্তমানানম্পি অভাৰো নিব্বানন্তি চে. ন, তেসং অভাৰাসম্ভৰতো, অভাৰে চ অৰত্তমানভাৰাপজ্জনতো, ৰত্তমানক্খন্ধনিস্সিতমগ্গক্খণে চ সোপাদিসেসনিব্বানধাতুপ্পত্তিযা অভাৰদোসতো. তদা কিলেসানং অৰত্তমানত্তা ন দোসোতি চে. ন, অরিযমগ্গস্স নিরত্থকভাৰাপজ্জনতো. এৰঞ্হি সতি অরিযমগ্গক্খণতো পুব্বেপি কিলেসা ন সন্তীতি অরিযমগ্গস্স নিরত্থকভাৰো আপজ্জতি. তস্মা অকারণমেতং.

৫৫৯. ‘‘যো খো, আৰুসো, রাগক্খযো’’তিআদিৰচনতো (সং. নি. ৪.৩১৫) ‘‘খযো নিব্বান’’ন্তি চে. ন, অরহত্তস্সাপি খযমত্তাপজ্জনতো. তম্পি হি ¶ ‘‘যো খো, আৰুসো ¶ , রাগক্খযো’’তিআদিনা (স. নি. ৪.৩১৫) নযেন নিদ্দিট্ঠং. কিঞ্চ ভিয্যো নিব্বানস্স ইত্তরকালাদিপ্পত্তিদোসতো. এৰঞ্হি সতি নিব্বানং ইত্তরকালং, সঙ্খতলক্খণং, সম্মাৰাযামনিরপেক্খাধিগমনীযভাৰঞ্চ আপজ্জতি. সঙ্খতলক্খণত্তাযেৰ চ সঙ্খতপরিযাপন্নং, সঙ্খতপরিযাপন্নত্তা রাগাদীহি অগ্গীহি আদিত্তং, আদিত্তত্তা দুক্খঞ্চাতিপি আপজ্জতি. যস্মা খযা পট্ঠায ন ভিয্যো পৰত্তি নাম হোতি, তস্স নিব্বানভাৰতো ন দোসোতি চে. ন, তাদিসস্স খযস্স অভাৰতো. ভাৰেপি চস্স ৰুত্তপ্পকারদোসানতিৰত্তনতো, অরিযমগ্গস্স চ নিব্বানভাৰাপজ্জনতো. অরিযমগ্গো হি দোসে খীণেতি, তস্মা খযোতি ৰুচ্চতি. ততো চ পট্ঠায ন ভিয্যো দোসানং পৰত্তীতি.

অনুপ্পত্তিনিরোধসঙ্খাতস্স পন খযস্স পরিযাযেন উপনিস্সযত্তা, যস্স উপনিস্সযো হোতি তদুপচারেন ‘‘খযো’’তি ৰুত্তং. সরূপেনেৰ কস্মা ন ৰুত্তন্তি চে. অতিসুখুমত্তা. অতিসুখুমতা চস্স ভগৰতো অপ্পোসুক্কভাৰাৰহনতো, অরিযেন চক্খুনা পস্সিতব্বতো চ সিদ্ধাতি.

৫৬০. তযিদং মগ্গসমঙ্গিনা পত্তব্বতো অসাধারণং, পুরিমকোটিযা অভাৰতো অপ্পভৰং. মগ্গভাৰে ভাৰতো ন অপ্পভৰন্তি চে. ন, মগ্গেন অনুপ্পাদনীযতো. পত্তব্বমেৰ হেতং মগ্গেন, ন উপ্পাদেতব্বং. তস্মা অপ্পভৰমেৰ. অপ্পভৰত্তা অজরামরণং. পভৰজরামরণানং অভাৰতো নিচ্চং.

নিব্বানস্সেৰ অণুআদীনম্পি নিচ্চভাৰাপত্তীতি চে. ন, হেতুনো অভাৰা. নিব্বানস্স নিচ্চত্তা তে নিচ্চাতি চে. ন, হেতুলক্খণস্স অনুপপত্তিতো. নিচ্চা উপ্পাদাদীনং অভাৰতো নিব্বানং ৰিযাতি চে. ন, অণুআদীনং অসিদ্ধত্তা.

৫৬১. যথাৰুত্তযুত্তিসব্ভাৰতো পন ইদমেৰ নিচ্চং, রূপসভাৰাতিক্কমতো অরূপং. বুদ্ধাদীনং নিট্ঠায ৰিসেসাভাৰতো একাৰ নিট্ঠা. যেন ভাৰনায পত্তং, তস্স কিলেসৰূপসমং, উপাদিসেসঞ্চ উপাদায পঞ্ঞাপনীযত্তা সহ উপাদিসেসেন পঞ্ঞাপিযতীতি সউপাদিসেসং. যো চস্স সমুদযপ্পহানেন উপহতাযতিকম্মফলস্স চরিমচিত্ততো চ উদ্ধং পৰত্তিখন্ধানং অনুপ্পাদনতো, উপ্পন্নানঞ্চ অন্তরধানতো উপাদিসেসাভাৰো ¶ , তং উপাদায পঞ্ঞাপনীযতো নত্থি এত্থ উপাদিসেসোতি অনুপাদিসেসং.

অসিথিলপরক্কমসিদ্ধেন ¶ ঞাণৰিসেসেন অধিগমনীযতো, সব্বঞ্ঞুৰচনতো চ পরমত্থেন সভাৰতো নিব্বানং নাৰিজ্জমানং. ৰুত্তঞ্হেতং ‘‘অত্থি, ভিক্খৰে, অজাতং অভূতং অকতং অসঙ্খত’’ন্তি.

ইদং দুক্খনিরোধনিদ্দেসে ৰিনিচ্ছযকথামুখং.

মগ্গনিদ্দেসকথা

৫৬২. দুক্খনিরোধগামিনিপটিপদানিদ্দেসে ৰুত্তা পন অট্ঠ ধম্মা কামং খন্ধনিদ্দেসেপি অত্থতো পকাসিতাযেৰ, ইধ পন নেসং একক্খণে পৰত্তমানানং ৰিসেসাৰবোধনত্থং ৰদাম. সঙ্খেপতো হি চতুসচ্চপটিৰেধায পটিপন্নস্স যোগিনো নিব্বানারম্মণং অৰিজ্জানুসযসমুগ্ঘাতকং পঞ্ঞাচক্খু সম্মাদিট্ঠি. সা সম্মা দস্সনলক্খণা, ধাতুপ্পকাসনরসা, অৰিজ্জন্ধকারৰিদ্ধংসনপচ্চুপট্ঠানা. তথা সম্পন্নদিট্ঠিনো তংসম্পযুত্তং মিচ্ছাসঙ্কপ্পনিঘাতকং চেতসো নিব্বানপদাভিনিরোপনং সম্মাসঙ্কপ্পো. সো সম্মা চিত্তাভিনিরোপনলক্খণো, অপ্পনারসো, মিচ্ছাসঙ্কপ্পপ্পহানপচ্চুপট্ঠানো.

তথা পস্সতো ৰিতক্কযতো চ তংসম্পযুত্তাৰ ৰচীদুচ্চরিতসমুগ্ঘাতিকা মিচ্ছাৰাচায ৰিরতি সম্মাৰাচা নাম. সা পরিগ্গহলক্খণা, ৰিরমণরসা, মিচ্ছাৰাচাপ্পহানপচ্চুপট্ঠানা. তথা ৰিরমতো তংসম্পযুত্তাৰ মিচ্ছাকম্মন্তসমুচ্ছেদিকা পাণাতিপাতাদিৰিরতি সম্মাকম্মন্তো নাম. সো সমুট্ঠাপনলক্খণো, ৰিরমণরসো, মিচ্ছাকম্মন্তপ্পহানপচ্চুপট্ঠানো. যা পনস্স তেসং সম্মাৰাচাকম্মন্তানং ৰিসুদ্ধিভূতা তংসম্পযুত্তাৰ কুহনাদিউপচ্ছেদিকা মিচ্ছাজীৰৰিরতি, সো সম্মাআজীৰো নাম. সো ৰোদানলক্খণো, ঞাযাজীৰপৰত্তিরসো, মিচ্ছাজীৰপ্পহানপচ্চুপট্ঠানো.

অথস্স যো তস্সা সম্মাৰাচাকম্মন্তাজীৰসঙ্খাতায সীলভূমিযং পতিট্ঠিতস্স তদনুরূপো তংসম্পযুত্তোৰ কোসজ্জসমুচ্ছেদকো ৰীরিযারম্ভো, এস সম্মাৰাযামো নাম. সো পগ্গহলক্খণো, অনুপ্পন্নঅকুসলানুপ্পাদনাদিরসো, মিচ্ছাৰাযামপ্পহানপচ্চুপট্ঠানো. তস্সেৰং ৰাযমতো তংসম্পযুত্তোৰ মিচ্ছাসতিৰিনিদ্ধুননো চেতসো অসম্মোসো ¶ সম্মাসতি নাম. সা উপট্ঠানলক্খণা, অসম্মুস্সনরসা, মিচ্ছাসতিপ্পহানপচ্চুপট্ঠানা. এৰং অনুত্তরায সতিযা সংরক্খিযমানচিত্তস্স ¶ তংসম্পযুত্তাৰ মিচ্ছাসমাধিৰিদ্ধংসিকা চিত্তেকগ্গতা সম্মাসমাধি নাম. সো অৰিক্খেপলক্খণো, সমাধানরসো, মিচ্ছাসমাধিপ্পহানপচ্চুপট্ঠানোতি. অযং দুক্খনিরোধগামিনিপটিপদানিদ্দেসে নযো. এৰমেত্থ জাতিআদীনং ৰিনিচ্ছযো ৰেদিতব্বো.

৫৬৩. ঞাণকিচ্চতোতি সচ্চঞাণস্স কিচ্চতোপি ৰিনিচ্ছযো ৰেদিতব্বো. দুৰিধং হি সচ্চঞাণং – অনুবোধঞাণং পটিৰেধঞাণঞ্চ. তত্থ অনুবোধঞাণং লোকিযং অনুস্সৰাদিৰসেন নিরোধে মগ্গে চ পৰত্ততি. পটিৰেধঞাণং লোকুত্তরং নিরোধমারম্মণং কত্ৰা কিচ্চতো চত্তারি সচ্চানি পটিৰিজ্ঝতি. যথাহ – ‘‘যো, ভিক্খৰে, দুক্খং পস্সতি, দুক্খসমুদযম্পি সো পস্সতি, দুক্খনিরোধম্পি পস্সতি, দুক্খনিরোধগামিনিং পটিপদম্পি পস্সতী’’তি (সং. নি. ৫.১১০০) সব্বং ৰত্তব্বং. তং পনস্স কিচ্চং ঞাণদস্সনৰিসুদ্ধিযং আৰিভৰিস্সতি.

যং পনেতং লোকিযং, তত্থ দুক্খঞাণং পরিযুট্ঠানাভিভৰৰসেন পৰত্তমানং সক্কাযদিট্ঠিং নিৰত্তেতি. সমুদযঞাণং উচ্ছেদদিট্ঠিং. নিরোধঞাণং সস্সতদিট্ঠিং. মগ্গঞাণং অকিরিযদিট্ঠিং. দুক্খঞাণং ৰা ধুৰসুভসুখত্তভাৰৰিরহিতেসু খন্ধেসু ধুৰসুভসুখত্তভাৰসঞ্ঞাসঙ্খাতং ফলে ৰিপ্পটিপত্তিং. সমুদযঞাণং ইস্সরপধানকালসভাৰাদীহি লোকো পৰত্ততীতি অকারণে কারণাভিমানপ্পৰত্তং হেতুম্হি ৰিপ্পটিপত্তিং. নিরোধঞাণং অরূপলোকলোকথূপিকাদীসু অপৰগ্গগাহভূতং নিরোধে ৰিপ্পটিপত্তিং. মগ্গঞাণং কামসুখল্লিকঅত্তকিলমথানুযোগপ্পভেদে অৰিসুদ্ধিমগ্গে ৰিসুদ্ধিমগ্গগাহৰসেন পৰত্তং উপাযে ৰিপ্পটিপত্তিং নিৰত্তেতি. তেনেতং ৰুচ্চতি –

‘‘লোকে লোকপ্পভৰে, লোকত্থগমে সিৰে চ তদুপাযে;

সম্মুয্হতি তাৰ নরো, ন ৰিজানাতি যাৰ সচ্চানী’’তি.

এৰমেত্থ ঞাণকিচ্চতোপি ৰিনিচ্ছযো ৰেদিতব্বো.

৫৬৪. অন্তোগধানং পভেদাতি দুক্খসচ্চস্মিং হি ঠপেত্ৰা তণ্হঞ্চেৰ অনাসৰধম্মে চ সেসা সব্বধম্মা অন্তোগধা. সমুদযসচ্চে ছত্তিংস তণ্হাৰিচরিতানি. নিরোধসচ্চং অসম্মিস্সং. মগ্গসচ্চে সম্মাদিট্ঠিমুখেন ৰীমংসিদ্ধিপাদপঞ্ঞিন্দ্রিযপঞ্ঞাবলধম্মৰিচযসম্বোজ্ঝঙ্গানি. সম্মাসঙ্কপ্পাপদেসেন তযো ¶ নেক্খম্মৰিতক্কাদযো. সম্মাৰাচাপদেসেন চত্তারি ৰচীসুচরিতানি ¶ . সম্মাকম্মন্তাপদেসেন তীণি কাযসুচরিতানি. সম্মাজীৰমুখেন অপ্পিচ্ছতা সন্তুট্ঠিতা চ. সব্বেসংযেৰ ৰা এতেসং সম্মাৰাচাকম্মন্তাজীৰানং অরিযকন্তসীলত্তা অরিযকন্তসীলস্স চ সদ্ধাহত্থেন পটিগ্গহেতব্বত্তা তেসং অত্থিতায অত্থিভাৰতো সদ্ধিন্দ্রিযসদ্ধাবলছন্দিদ্ধিপাদা. সম্মাৰাযামাপদেসেন চতুব্বিধসম্মপ্পধানৰীরিযিন্দ্রিযৰীরিযবলৰীরিযসম্বোজ্ঝঙ্গানি. সম্মাসতিঅপদেসেন চতুব্বিধসতিপট্ঠানসতিন্দ্রিযসতিবলসতিসম্বোজ্ঝঙ্গানি. সম্মাসমাধিঅপদেসেন সৰিতক্কসৰিচারাদযো তযো সমাধী চিত্তসমাধি সমাধিন্দ্রিযসমাধিবলপীতিপস্সদ্ধিসমাধিউপেক্খাসম্বোজ্ঝঙ্গানি অন্তোগধানীতি এৰমেত্থ অন্তোগধানং পভেদতোপি ৰিনিচ্ছযো ৰেদিতব্বো.

৫৬৫. উপমাতোতি ভারো ৰিয হি দুক্খসচ্চং দট্ঠব্বং, ভারাদানমিৰ সমুদযসচ্চং, ভারনিক্খেপনমিৰ নিরোধসচ্চং, ভারনিক্খেপনুপাযো ৰিয মগ্গসচ্চং. রোগো ৰিয চ দুক্খসচ্চং, রোগনিদানমিৰ সমুদযসচ্চং, রোগৰূপসমো ৰিয নিরোধসচ্চং, ভেসজ্জমিৰ মগ্গসচ্চং. দুব্ভিক্খমিৰ ৰা দুক্খসচ্চং, দুব্বুট্ঠি ৰিয সমুদযসচ্চং, সুভিক্খমিৰ নিরোধসচ্চং, সুৰুট্ঠি ৰিয মগ্গসচ্চং. অপিচ ৰেরী-ৰেরমূল-ৰেরসমুগ্ঘাত-ৰেরসমুগ্ঘাতুপাযেহি, ৰিসরুক্খ-রুক্খমূল-মূলুপচ্ছেদ-তদুপচ্ছেদুপাযেহি, ভয-ভযমূল-নিব্ভয-তদধিগমুপাযেহি, ওরিমতীর-মহোঘপারিমতীর-তংসম্পাপকৰাযামেহি চ যোজেত্ৰাপেতানি উপমাতো ৰেদিতব্বানীতি এৰমেত্থ উপমাতো ৰিনিচ্ছযো ৰেদিতব্বো.

৫৬৬. চতুক্কতোতি অত্থি চেত্থ দুক্খং ন অরিযসচ্চং, অত্থি অরিযসচ্চং ন দুক্খং, অত্থি দুক্খঞ্চেৰ অরিযসচ্চঞ্চ, অত্থি নেৰ দুক্খং ন অরিযসচ্চং. এস নযো সমুদযাদীসু. তত্থ মগ্গসম্পযুত্তা ধম্মা সামঞ্ঞফলানি চ ‘‘যদনিচ্চং তং দুক্খ’’ন্তি (সং. নি. ৩.১৫) ৰচনতো সঙ্খারদুক্খতায দুক্খং, ন অরিযসচ্চং. নিরোধো অরিযসচ্চং, ন দুক্খং. ইতরং পন অরিযসচ্চদ্ৰযং সিযা দুক্খং অনিচ্চতো, ন পন যস্স পরিঞ্ঞায ভগৰতি ব্রহ্মচরিযং ৰুস্সতি তথত্তেন. সব্বাকারেন পন উপাদানক্খন্ধপঞ্চকং দুক্খঞ্চেৰ অরিযসচ্চঞ্চ অঞ্ঞত্র তণ্হায. মগ্গসম্পযুত্তা ধম্মা সামঞ্ঞফলানি চ যস্স পরিঞ্ঞত্থং ভগৰতি ব্রহ্মচরিযং ৰুস্সতি তথত্তেন নেৰ দুক্খং ন অরিযসচ্চং. এৰং সমুদযাদীসুপি যথাযোগং যোজেত্ৰা চতুক্কতোপেত্থ ৰিনিচ্ছযো ৰেদিতব্বো.

৫৬৭. সুঞ্ঞতেকৰিধাদীহীতিএত্থ ¶ ¶ সুঞ্ঞতো তাৰ পরমত্থেন হি সব্বানেৰ সচ্চানি ৰেদককারকনিব্বুতগমকাভাৰতো সুঞ্ঞানীতি ৰেদিতব্বানি. তেনেতং ৰুচ্চতি –

‘‘দুক্খমেৰ হি, ন কোচি দুক্খিতো;

কারকো ন, কিরিযাৰ ৰিজ্জতি.

অত্থি নিব্বুতি, ন নিব্বুতো পুমা;

মগ্গমত্থি, গমকো ন ৰিজ্জতী’’তি.

অথ ৰা,

ধুৰসুভসুখত্তসুঞ্ঞং, পুরিমদ্ৰযমত্তসুঞ্ঞমমতপদং;

ধুৰসুখঅত্তৰিরহিতো, মগ্গোইতি সুঞ্ঞতা তেসু.

নিরোধসুঞ্ঞানি ৰা তীণি, নিরোধো চ সেসত্তযসুঞ্ঞো. ফলসুঞ্ঞো ৰা এত্থ হেতু সমুদযে দুক্খস্সাভাৰতো, মগ্গে চ নিরোধস্স, ন ফলেন সগব্ভো পকতিৰাদীনং পকতি ৰিয. হেতুসুঞ্ঞঞ্চ ফলং দুক্খসমুদযানং নিরোধমগ্গানঞ্চ অসমৰাযা, ন হেতুসমৰেতং হেতুফলং সমৰাযৰাদীনং দ্ৰিঅণুকাদি ৰিয. তেনেতং ৰুচ্চতি –

‘‘তযমিধ নিরোধসুঞ্ঞং, তযেন তেনাপি নিব্বুতি সুঞ্ঞা;

সুঞ্ঞো ফলেন হেতু, ফলম্পি তংহেতুনা সুঞ্ঞ’’ন্তি.

এৰং তাৰ সুঞ্ঞতো ৰিনিচ্ছযো ৰেদিতব্বো.

একৰিধাদিৰিনিচ্ছযকথা

৫৬৮. একৰিধাদীহীতি সব্বমেৰ চেত্থ দুক্খং একৰিধং পৰত্তিভাৰতো. দুৰিধং নামরূপতো. তিৰিধং কামরূপারূপূপপত্তিভৰভেদতো. চতুব্বিধং চতুআহারভেদতো. পঞ্চৰিধং পঞ্চুপাদানক্খন্ধভেদতো.

সমুদযোপি ¶ একৰিধো পৰত্তকভাৰতো. দুৰিধো দিট্ঠিসম্পযুত্তাসম্পযুত্ততো. তিৰিধো কামভৰৰিভৰতণ্হাভেদতো. চতুব্বিধো চতুমগ্গপ্পহেয্যতো. পঞ্চৰিধো রূপাভিনন্দনাদিভেদতো. ছব্বিধো ছতণ্হাকাযভেদতো.

নিরোধোপি ¶ একৰিধো অসঙ্খতধাতুভাৰতো. পরিযাযেন পন দুৰিধো সউপাদিসেসঅনুপাদিসেসভেদতো. তিৰিধো ভৰত্তযৰূপসমতো. চতুব্বিধো চতুমগ্গাধিগমনীযতো. পঞ্চৰিধো পঞ্চাভিনন্দনৰূপসমতো. ছব্বিধো ছতণ্হাকাযক্খযভেদতো.

মগ্গোপি একৰিধো ভাৰেতব্বতো. দুৰিধো সমথৰিপস্সনাভেদতো, দস্সনভাৰনাভেদতো ৰা. তিৰিধো খন্ধত্তযভেদতো. অযঞ্হি সপ্পদেসত্তা নগরং ৰিয রজ্জেন নিপ্পদেসেহি তীহি খন্ধেহি সঙ্গহিতো. যথাহ –

‘‘ন খো, আৰুসো ৰিসাখ, অরিযেন অট্ঠঙ্গিকেন মগ্গেন তযো খন্ধা সঙ্গহিতা, তীহি চ খো, আৰুসো ৰিসাখ, খন্ধেহি অরিযো অট্ঠঙ্গিকো মগ্গো সঙ্গহিতো. যা চাৰুসো ৰিসাখ, সম্মাৰাচা, যো চ সম্মাকম্মন্তো, যো চ সম্মাআজীৰো, ইমে ধম্মা সীলক্খন্ধে সঙ্গহিতা. যো চ সম্মাৰাযামো, যা চ সম্মাসতি, যো চ সম্মাসমাধি, ইমে ধম্মা সমাধিক্খন্ধে সঙ্গহিতা. যা চ সম্মাদিট্ঠি, যো চ সম্মাসঙ্কপ্পো, ইমে ধম্মা পঞ্ঞাক্খন্ধে সঙ্গহিতা’’তি (ম. নি. ১.৪৬২).

এত্থ হি সম্মাৰাচাদযো তযো সীলমেৰ, তস্মা তে সজাতিতো সীলক্খন্ধেন সঙ্গহিতা. কিঞ্চাপি হি পাল়িযং সীলক্খন্ধেতি ভুম্মেন নিদ্দেসো কতো, অত্থো পন করণৰসেনেৰ ৰেদিতব্বো. সম্মাৰাযামাদীসু পন তীসু সমাধি অত্তনো ধম্মতায আরম্মণে একগ্গভাৰেন অপ্পেতুং ন সক্কোতি, ৰীরিযে পন পগ্গহকিচ্চং সাধেন্তে সতিযা চ অপিলাপনকিচ্চং সাধেন্তিযা লদ্ধুপকারো হুত্ৰা সক্কোতি.

তত্রাযং উপমা – যথা হি নক্খত্তং কীল়িস্সামাতি উয্যানং পৰিট্ঠেসু তীসু সহাযেসু একো সুপুপ্ফিতং চম্পকরুক্খং দিস্ৰা হত্থং উক্খিপিত্ৰা গহেতুম্পি ন সক্কুণেয্য. অথস্স দুতিযো ওনমিত্ৰা ¶ পিট্ঠিং দদেয্য, সো তস্স পিট্ঠিযং ঠত্ৰাপি কম্পমানো গহেতুং ন সক্কুণেয্য. অথস্স ইতরো অংসকূটং উপনামেয্য. সো একস্স পিট্ঠিযং ঠত্ৰা একস্স অংসকূটং ওলুব্ভ যথারুচি পুপ্ফানি ওচিনিত্ৰা পিল়ন্ধিত্ৰা নক্খত্তং কীল়েয্য. এৰংসম্পদমিদং দট্ঠব্বং.

একতো ¶ উয্যানং পৰিট্ঠা তযো সহাযা ৰিয হি একতো জাতা সম্মাৰাযামাদযো তযো ধম্মা. সুপুপ্ফিতচম্পকো ৰিয আরম্মণং. হত্থং উক্খিপিত্ৰাপি গহেতুং অসক্কোন্তো ৰিয অত্তনো ধম্মতায আরম্মণে একগ্গভাৰেন অপ্পেতুং অসক্কোন্তো সমাধি. পিট্ঠিং দত্ৰা ওনতসহাযো ৰিয ৰাযামো. অংসকূটং দত্ৰা ঠিতসহাযো ৰিয সতি. যথা তেসু একস্স পিট্ঠিযং ঠত্ৰা একস্স অংসকূটং ওলুব্ভ ইতরো যথারুচি পুপ্ফং গহেতুং সক্কোতি, এৰমেৰ ৰীরিযে পগ্গহকিচ্চং সাধেন্তে সতিযা চ অপিলাপনকিচ্চং সাধেন্তিযা লদ্ধুপকারো সমাধি সক্কোতি আরম্মণে একগ্গভাৰেন অপ্পেতুং. তস্মা সমাধিযেৰেত্থ সজাতিতো সমাধিক্খন্ধেন সঙ্গহিতো, ৰাযামসতিযো পন কিরিযতো সঙ্গহিতা হোন্তি.

সম্মাদিট্ঠিসম্মাসঙ্কপ্পেসুপি পঞ্ঞা অত্তনো ধম্মতায অনিচ্চং দুক্খমনত্তাতি আরম্মণং নিচ্ছেতুং ন সক্কোতি. ৰিতক্কে পন আকোটেত্ৰা আকোটেত্ৰা দেন্তে সক্কোতি. কথং? যথা হি হেরঞ্ঞিকো কহাপণং হত্থে ঠপেত্ৰা সব্বভাগেসু ওলোকেতুকামো সমানোপি ন চক্খুতলেনেৰ পরিৰত্তেতুং সক্কোতি. অঙ্গুলিপব্বেহি পন পরিৰত্তেত্ৰা পরিৰত্তেত্ৰা ইতো চিতো চ ওলোকেতুং সক্কোতি, এৰমেৰ ন পঞ্ঞা অত্তনো ধম্মতায অনিচ্চাদিৰসেন আরম্মণং নিচ্ছেতুং সক্কোতি. অভিনিরোপনলক্খণেন পন আহননপরিযাহননরসেন ৰিতক্কেন আকোটেন্তেন ৰিয পরিৰত্তেন্তেন ৰিয চ আদাযাদায দিন্নমেৰ নিচ্ছেতুং সক্কোতি. তস্মা ইধাপি সম্মাদিট্ঠিযেৰ সজাতিতো পঞ্ঞাক্খন্ধেন সঙ্গহিতা, সম্মাসঙ্কপ্পো পন কিরিযৰসেন সঙ্গহিতো হোতি.

ইতি ইমেহি তীহি খন্ধেহি মগ্গো সঙ্গহং গচ্ছতি. তেন ৰুত্তং ‘‘তিৰিধো খন্ধত্তযভেদতো’’তি. চতুব্বিধো সোতাপত্তিমগ্গাদিৰসেনেৰ.

অপিচ সব্বানেৰ সচ্চানি একৰিধানি অৰিতথত্তা, অভিঞ্ঞেয্যত্তা ৰা. দুৰিধানি লোকিযলোকুত্তরতো, সঙ্খতাসঙ্খততো ৰা. তিৰিধানি দস্সন-ভাৰনাহি পহাতব্বতো, অপ্পহাতব্বতো চ. চতুব্বিধানি পরিঞ্ঞেয্যাদিভেদতোতি এৰমেত্থ একৰিধাদীহি ৰিনিচ্ছযো ৰেদিতব্বো.

৫৬৯. সভাগৰিসভাগতোতি ¶ ¶ সব্বানেৰ সচ্চানি অঞ্ঞমঞ্ঞং সভাগানি অৰিতথতো অত্তসুঞ্ঞতো দুক্করপটিৰেধতো চ. যথাহ –

‘‘তং কিং মঞ্ঞসি, আনন্দ, কতমং নু খো দুক্করতরং ৰা দুরভিসম্ভৰতরং ৰা, যো ৰা দূরতোৰ সুখুমেন তাল়চ্ছিগ্গল়েন অসনং অতিপাতেয্য পোঙ্খানুপোঙ্খং অৰিরাধিতং, যো ৰা সতধা ভিন্নস্স ৰালস্স কোটিযা কোটিং পটিৰিজ্ঝেয্যাতি? এতদেৰ, ভন্তে, দুক্করতরঞ্চেৰ দুরভিসম্ভৰতরঞ্চ, যো ৰা সতধা ভিন্নস্স ৰালস্স কোটিযা কোটিং পটিৰিজ্ঝেয্যাতি. ততো খো তে, আনন্দ, দুপ্পটিৰিজ্ঝতরং পটিৰিজ্ঝন্তি. যে ইদং দুক্খন্তি যথাভূতং পটিৰিজ্ঝন্তি…পে… অযং দুক্খনিরোধগামিনী পটিপদাতি যথাভূতং পটিৰিজ্ঝন্তী’’তি (সং. নি. ৫.১১১৫).

ৰিসভাগানি সলক্খণৰৰত্থানতো. পুরিমানি চ দ্ৰে সভাগানি দুরৰগাহত্থেন গম্ভীরত্তা লোকিযত্তা সাসৰত্তা চ. ৰিসভাগানি ফলহেতুভেদতো পরিঞ্ঞেয্যপ্পহাতব্বতো চ. পচ্ছিমানিপি দ্ৰে সভাগানি গম্ভীরত্তেন দুরৰগাহত্তা লোকুত্তরত্তা অনাসৰত্তা চ. ৰিসভাগানি ৰিসযৰিসযীভেদতো সচ্ছিকাতব্বভাৰেতব্বতো চ. পঠমততিযানি চাপি সভাগানি ফলাপদেসতো. ৰিসভাগানি সঙ্খতাসঙ্খততো. দুতিযচতুত্থানি চাপি সভাগানি হেতুঅপদেসতো. ৰিসভাগানি একন্তকুসলাকুসলতো. পঠমচতুত্থানি চাপি সভাগানি সঙ্খততো. ৰিসভাগানি লোকিযলোকুত্তরতো. দুতিযততিযানি চাপি সভাগানি নেৰসেক্খানাসেক্খভাৰতো. ৰিসভাগানি সারম্মণানারম্মণতো.

ইতি এৰং পকারেহি, নযেহি চ ৰিচক্খণো;

ৰিজঞ্ঞা অরিযসচ্চানং, সভাগৰিসভাগতন্তি.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

ইন্দ্রিযসচ্চনিদ্দেসো নাম

সোল়সমো পরিচ্ছেদো.

১৭. পঞ্ঞাভূমিনিদ্দেসো

পটিচ্চসমুপ্পাদকথা

৫৭০. ইদানি ¶ ¶ ‘‘খন্ধাযতনধাতুইন্দ্রিযসচ্চপটিচ্চসমুপ্পাদাদিভেদা ধম্মা ভূমী’’তি এৰং ৰুত্তেসু ইমিস্সা পঞ্ঞায ভূমিভূতেসু ধম্মেসু যস্মা পটিচ্চসমুপ্পাদোচেৰ, আদিসদ্দেন সঙ্গহিতা পটিচ্চসমুপ্পন্না ধম্মা চ অৰসেসা হোন্তি, তস্মা তেসং ৰণ্ণনাক্কমো অনুপ্পত্তো.

তত্থ অৰিজ্জাদযো তাৰ ধম্মা পটিচ্চসমুপ্পাদোতি ৰেদিতব্বা. ৰুত্তঞ্হেতং ভগৰতা –

‘‘কতমো চ, ভিক্খৰে, পটিচ্চসমুপ্পাদো? অৰিজ্জাপচ্চযা, ভিক্খৰে, সঙ্খারা, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপং, নামরূপপচ্চযা সল়াযতনং, সল়াযতনপচ্চযা ফস্সো, ফস্সপচ্চযা ৰেদনা, ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৰো, ভৰপচ্চযা জাতি, জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি. অযং ৰুচ্চতি, ভিক্খৰে, পটিচ্চসমুপ্পাদো’’তি (সং. নি. ২.১).

জরামরণাদযো পন পটিচ্চসমুপ্পন্না ধম্মাতি ৰেদিতব্বা. ৰুত্তঞ্হেতং ভগৰতা –

‘‘কতমে চ, ভিক্খৰে, পটিচ্চসমুপ্পন্না ধম্মা? জরামরণং, ভিক্খৰে, অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মং. জাতি, ভিক্খৰে…পে… ভৰো… উপাদানং… তণ্হা… ৰেদনা… ফস্সো… সল়াযতনং… নামরূপং… ৰিঞ্ঞাণং… সঙ্খারা… অৰিজ্জা, ভিক্খৰে, অনিচ্চা সঙ্খতা পটিচ্চসমুপ্পন্না ¶ খযধম্মা ৰযধম্মা ৰিরাগধম্মা নিরোধধম্মা. ইমে ৰুচ্চন্তি, ভিক্খৰে, পটিচ্চসমুপ্পন্না ধম্মা’’তি (সং. নি. ২.২০).

৫৭১. অযং পনেত্থ সঙ্খেপো. পটিচ্চসমুপ্পাদোতি পচ্চযধম্মা ৰেদিতব্বা. পটিচ্চসমুপ্পন্না ধম্মাতি তেহি তেহি পচ্চযেহি নিব্বত্তধম্মা. কথমিদং জানিতব্বন্তি ¶ চে? ভগৰতো ৰচনেন. ভগৰতা হি পটিচ্চসমুপ্পাদপটিচ্চসমুপ্পন্নধম্মদেসনাসুত্তে –

‘‘কতমো চ, ভিক্খৰে, পটিচ্চসমুপ্পাদো? জাতিপচ্চযা, ভিক্খৰে, জরামরণং, উপ্পাদা ৰা তথাগতানং অনুপ্পাদা ৰা তথাগতানং ঠিতাৰ সা ধাতু ধম্মট্ঠিততা ধম্মনিযামতা ইদপ্পচ্চযতা. তং তথাগতো অভিসম্বুজ্ঝতি অভিসমেতি, অভিসম্বুজ্ঝিত্ৰা অভিসমেত্ৰা আচিক্খতি দেসেতি পঞ্ঞপেতি পট্ঠপেতি ৰিৰরতি ৰিভজতি উত্তানীকরোতি, পস্সথাতি চাহ. জাতিপচ্চযা, ভিক্খৰে, জরামরণং. ভৰপচ্চযা, ভিক্খৰে, জাতি…পে… অৰিজ্জাপচ্চযা, ভিক্খৰে, সঙ্খারা উপ্পাদা ৰা তথাগতানং…পে… উত্তানীকরোতি পস্সথাতি চাহ. অৰিজ্জাপচ্চযা, ভিক্খৰে, সঙ্খারা. ইতি খো, ভিক্খৰে, যা তত্র তথতা অৰিতথতা অনঞ্ঞথতা ইদপ্পচ্চযতা. অযং ৰুচ্চতি, ভিক্খৰে, পটিচ্চসমুপ্পাদো’’তি (সং. নি. ২.২০).

৫৭২. এৰং পটিচ্চসমুপ্পাদং দেসেন্তেন তথতাদীহি ৰেৰচনেহি পচ্চযধম্মাৰ পটিচ্চসমুপ্পাদোতি ৰুত্তা. তস্মা জরামরণাদীনং ধম্মানং পচ্চযলক্খণো পটিচ্চসমুপ্পাদো, দুক্খানুবন্ধনরসো, কুম্মগ্গপচ্চুপট্ঠানোতি ৰেদিতব্বো.

সো পনাযং তেহি তেহি পচ্চযেহি অনূনাধিকেহেৰ তস্স তস্স ধম্মস্স সম্ভৰতো তথতাতি, সামগ্গিং উপগতেসু পচ্চযেসু মুহুত্তম্পি ততো নিব্বত্তধম্মানং অসম্ভৰাভাৰতো অৰিতথতাতি, অঞ্ঞধম্মপচ্চযেহি অঞ্ঞধম্মানুপ্পত্তিতো অনঞ্ঞথতাতি, যথাৰুত্তানং এতেসং জরামরণাদীনং পচ্চযতো ৰা পচ্চযসমূহতো ৰা ইদপ্পচ্চযতাতি ৰুত্তো.

৫৭৩. তত্রাযং ৰচনত্থো, ইমেসং পচ্চযা ইদপ্পচ্চযা. ইদপ্পচ্চযা এৰ ইদপ্পচ্চযতা. ইদপ্পচ্চযানং ৰা সমূহো ইদপ্পচ্চযতা. লক্খণং পনেত্থ সদ্দসত্থতো পরিযেসিতব্বং.

৫৭৪. কেচি ¶ পন পটিচ্চ সম্মা চ তিত্থিযপরিকপ্পিতপকতিপুরিসাদিকারণনিরপেক্খো উপ্পাদো পটিচ্চসমুপ্পাদোতি এৰং উপ্পাদমত্তং পটিচ্চসমুপ্পাদোতি ৰদন্তি ¶ , তং ন যুজ্জতি. কস্মা? সুত্তাভাৰতো, সুত্তৰিরোধতো, গম্ভীরনযাসম্ভৰতো, সদ্দভেদতো চ. ‘‘উপ্পাদমত্তং পটিচ্চসমুপ্পাদো’’তি হি সুত্তং নত্থি. তং ‘‘পটিচ্চসমুপ্পাদো’’তি চ ৰদন্তস্স পদেসৰিহারসুত্তৰিরোধো আপজ্জতি. কথং? ভগৰতো হি ‘‘অথ খো ভগৰা রত্তিযা পঠমং যামং পটিচ্চসমুপ্পাদং অনুলোমপটিলোমং মনসাকাসী’’তি (মহাৰ. ১) আদিৰচনতো পটিচ্চসমুপ্পাদমনসিকারো পঠমাভিসম্বুদ্ধৰিহারো, পদেসৰিহারো চ তস্সেকদেসৰিহারো. যথাহ ‘‘যেন স্ৰাহং, ভিক্খৰে, ৰিহারেন পঠমাভিসম্বুদ্ধো ৰিহরামি, তস্স পদেসেন ৰিহাসি’’ন্তি (সং. নি. ৫.১১). তত্র চ পচ্চযাকারদস্সনেন ৰিহাসি, ন উপ্পাদমত্তদস্সনেনাতি. যথাহ ‘‘সো এৰং পজানামি মিচ্ছাদিট্ঠিপচ্চযাপি ৰেদযিতং সম্মাদিট্ঠিপচ্চযাপি ৰেদযিতং মিচ্ছাসঙ্কপ্পপচ্চযাপি ৰেদযিত’’ন্তি (সং. নি. ৫.১১) সব্বং ৰিত্থারেতব্বং. এৰং উপ্পাদমত্তং ‘‘পটিচ্চসমুপ্পাদো’’তি ৰদন্তস্স পদেসৰিহারসুত্তৰিরোধো আপজ্জতি. তথা কচ্চানসুত্তৰিরোধো.

কচ্চানসুত্তেপি হি ‘‘লোকসমুদযং খো, কচ্চান, যথাভূতং সম্মপ্পঞ্ঞায পস্সতো যা লোকে নত্থিতা, সা ন হোতী’’তি (সং. নি. ২.১৫) অনুলোমপটিচ্চসমুপ্পাদো লোকপচ্চযতো ‘‘লোকসমুদযো’’তি উচ্ছেদদিট্ঠিসমুগ্ঘাতত্থং পকাসিতো, ন উপ্পাদমত্তং. ন হি উপ্পাদমত্তদস্সনেন উচ্ছেদদিট্ঠিযা সমুগ্ঘাতো হোতি. পচ্চযানুপরমদস্সনেন পন হোতি. পচ্চযানুপরমে ফলানুপরমতোতি. এৰং উপ্পাদমত্তং ‘‘পটিচ্চসমুপ্পাদো’’তি ৰদন্তস্স কচ্চানসুত্তৰিরোধোপি আপজ্জতি.

গম্ভীরনযাসম্ভৰতোতি ৰুত্তং খো পনেতং ভগৰতা ‘‘গম্ভীরো চাযং, আনন্দ, পটিচ্চসমুপ্পাদো গম্ভীরাৰভাসো চা’’তি (দী. নি. ২.৯৫; সং. নি. ২.৬০). গম্ভীরত্তঞ্চ নাম চতুব্বিধং, তং পরতো ৰণ্ণযিস্সাম. তং উপ্পাদমত্তে নত্থি. চতুব্বিধনযপটিমণ্ডিতঞ্চেতং পটিচ্চসমুপ্পাদং ৰণ্ণযন্তি, তম্পি নযচতুক্কং উপ্পাদমত্তে নত্থীতি গম্ভীরনযাসম্ভৰতোপি ন উপ্পাদমত্তং পটিচ্চসমুপ্পাদো.

৫৭৫. সদ্দভেদতোতি পটিচ্চসদ্দো চ পনাযং সমানে কত্তরি পুব্বকালে পযুজ্জমানো অত্থসিদ্ধিকরো ¶ হোতি. সেয্যথিদং, ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি (সং. নি. ২.৪৩). ইধ পন ভাৰসাধনেন উপ্পাদসদ্দেন ¶ সদ্ধিং পযুজ্জমানো সমানস্স কত্তু অভাৰতো সদ্দভেদং গচ্ছতি, ন চ কিঞ্চি অত্থং সাধেতীতি সদ্দভেদতোপি ন উপ্পাদমত্তং পটিচ্চসমুপ্পাদোতি.

তত্থ সিযা – ‘‘হোতি-সদ্দেন সদ্ধিং যোজযিস্সাম ‘পটিচ্চসমুপ্পাদো হোতী’তি’’, তং ন যুত্তং. কস্মা? যোগাভাৰতো চেৰ, উপ্পাদস্স চ উপ্পাদপত্তিদোসতো. ‘‘পটিচ্চসমুপ্পাদং ৰো, ভিক্খৰে, দেসেস্সামি. কতমো চ, ভিক্খৰে, পটিচ্চসমুপ্পাদো…পে… অযং ৰুচ্চতি, ভিক্খৰে, পটিচ্চসমুপ্পাদো’’তি (সং. নি. ২.১). ইমেসু হি পদেসু একেনপি সদ্ধিং হোতি-সদ্দো যোগং ন গচ্ছতি, ন চ উপ্পাদো হোতি. সচে ভৰেয্য, উপ্পাদস্সাপি উপ্পাদো পাপুণেয্যাতি.

৫৭৬. যেপি মঞ্ঞন্তি ‘‘ইদপ্পচ্চযানং ভাৰো ইদপ্পচ্চযতা, ভাৰো চ নাম যো আকারো অৰিজ্জাদীনং সঙ্খারাদিপাতুভাৰে হেতু, সো. তস্মিঞ্চ সঙ্খারৰিকারে পটিচ্চসমুপ্পাদসঞ্ঞা’’তি, তেসং তং ন যুজ্জতি. কস্মা? অৰিজ্জাদীনং হেতুৰচনতো. ভগৰতা হি ‘‘তস্মাতিহ, আনন্দ, এসেৰ হেতু, এতং নিদানং, এস সমুদযো, এস পচ্চযো জরামরণস্স যদিদং জাতি…পে… সঙ্খারানং, যদিদং অৰিজ্জা’’তি (দী. নি. ২.৯৮ আদযো) এৰং অৰিজ্জাদযোৰ হেতূতি ৰুত্তা, ন তেসং ৰিকারো. তস্মা ‘‘পটিচ্চসমুপ্পাদোতি পচ্চযধম্মা ৰেদিতব্বা’’তি ইতি যং তং ৰুত্তং, তং সম্মা ৰুত্তন্তি ৰেদিতব্বং.

৫৭৭. যা পনেত্থ ‘‘পটিচ্চসমুপ্পাদো’’তি ইমায ব্যঞ্জনচ্ছাযায উপ্পাদোযেৰাযং ৰুত্তোতি সঞ্ঞা উপ্পজ্জতি, সা ইমস্স পদস্স এৰমত্থং গহেত্ৰা ৰূপসমেতব্বা. ভগৰতা হি,

দ্ৰেধা ততো পৰত্তে, ধম্মসমূহে যতো ইদং ৰচনং;

তপ্পচ্চযো ততোযং, ফলোপচারেন ইতি ৰুত্তো.

যো হি অযং পচ্চযতায পৰত্তো ধম্মসমূহো, তত্থ পটিচ্চসমুপ্পাদোতি ইদং ৰচনং দ্ৰিধা ইচ্ছন্তি. সো হি যস্মা পতীযমানো হিতায সুখায চ সংৰত্ততি, তস্মা পচ্চেতুমরহন্তি ¶ নং পণ্ডিতাতি পটিচ্চো. উপ্পজ্জমানো চ সহ সম্মা চ উপ্পজ্জতি, ন একেকতো, নাপি অহেতুতোতি সমুপ্পাদো. এৰং পটিচ্চো চ সো সমুপ্পাদো চাতি পটিচ্চসমুপ্পাদো ¶ . অপিচ সহ উপ্পজ্জতীতি সমুপ্পাদো, পচ্চযসামগ্গিং পন পটিচ্চ অপচ্চক্খাযাতি এৰম্পি পটিচ্চসমুপ্পাদো. তস্স চাযং হেতুসমূহো পচ্চযোতি তপ্পচ্চযত্তা অযম্পি, যথা লোকে সেম্হস্স পচ্চযো গুল়ো সেম্হো গুল়োতি ৰুচ্চতি, যথা চ সাসনে সুখপ্পচ্চযো বুদ্ধানং উপ্পাদো ‘‘সুখো বুদ্ধানং উপ্পাদো’’তি ৰুচ্চতি, তথা পটিচ্চসমুপ্পাদো ইচ্চেৰ ফলৰোহারেন ৰুত্তোতি ৰেদিতব্বো.

৫৭৮. অথ ৰা,

পটিমুখমিতোতি ৰুত্তো, হেতুসমূহো অযং পটিচ্চোতি;

সহিতে উপ্পাদেতি চ, ইতি ৰুত্তো সো সমুপ্পাদো.

যো হি এস সঙ্খারাদীনং পাতুভাৰায অৰিজ্জাদিএকেকহেতুসীসেন নিদ্দিট্ঠো হেতুসমূহো, সো সাধারণফলনিপ্ফাদকট্ঠেন অৰেকল্লট্ঠেন চ সামগ্গিঅঙ্গানং অঞ্ঞমঞ্ঞেন পটিমুখং ইতো গতোতি কত্ৰা পটিচ্চোতি ৰুচ্চতি. স্ৰাযং সহিতেযেৰ অঞ্ঞমঞ্ঞং অৰিনিব্ভোগৰুত্তিধম্মে উপ্পাদেতীতি সমুপ্পাদোতিপি ৰুত্তো. এৰম্পি পটিচ্চো চ সো সমুপ্পাদো চাতি পটিচ্চসমুপ্পাদো.

৫৭৯. অপরো নযো –

পচ্চযতা অঞ্ঞোঞ্ঞং, পটিচ্চ যস্মা সমং সহ চ ধম্মে;

অযমুপ্পাদেতি ততোপি, এৰমিধ ভাসিতা মুনিনা.

অৰিজ্জাদিসীসেন নিদ্দিট্ঠপচ্চযেসু হি যে পচ্চযা যং সঙ্খারাদিকং ধম্মং উপ্পাদেন্তি, ন তে অঞ্ঞমঞ্ঞং অপটিচ্চ অঞ্ঞমঞ্ঞৰেকল্লে সতি উপ্পাদেতুং সমত্থাতি. তস্মা পটিচ্চ সমং সহ চ ন একেকদেসং, নাপি পুব্বাপরভাৰেন অযং পচ্চযতা ধম্মে উপ্পাদেতীতি অত্থানুসারৰোহারকুসলেন মুনিনা এৰমিধ ভাসিতা, পটিচ্চসমুপ্পাদোত্ৰেৰ ভাসিতাতি অত্থো.

৫৮০. এৰং ¶ ভাসমানেন চ,

পুরিমেন সস্সতাদীন, মভাৰো পচ্ছিমেন চ পদেন;

উচ্ছেদাদিৰিঘাতো, দ্ৰযেন পরিদীপিতো ঞাযো.

পুরিমেনাতি ¶ পচ্চযসামগ্গিপরিদীপকেন পটিচ্চপদেন পৰত্তিধম্মানং পচ্চযসামগ্গিযং আযত্তৰুত্তিত্তা সস্সতাহেতুৰিসমহেতুৰসৰত্তিৰাদপ্পভেদানং সস্সতাদীনং অভাৰো পরিদীপিতো হোতি? কিং হি সস্সতানং, অহেতুআদিৰসেন ৰা পৰত্তানং পচ্চযসামগ্গিযাতি? পচ্ছিমেন চ পদেনাতি ধম্মানং উপ্পাদপরিদীপকেন সমুপ্পাদপদেন পচ্চযসামগ্গিযং ধম্মানং উপ্পত্তিতো ৰিহতা উচ্ছেদনত্থিকঅকিরিযৰাদাতি উচ্ছেদাদিৰিঘাতো পরিদীপিতো হোতি. পুরিমপুরিমপচ্চযৰসেন হি পুনপ্পুনং উপ্পজ্জমানেসু ধম্মেসু কুতো উচ্ছেদো, নত্থিকাকিরিযৰাদা চাতি. দ্ৰযেনাতি সকলেন পটিচ্চসমুপ্পাদৰচনেন তস্সা তস্সা পচ্চযসামগ্গিযা সন্ততিং অৰিচ্ছিন্দিত্ৰা তেসং তেসং ধম্মানং সম্ভৰতো মজ্ঝিমা পটিপদা, ‘‘সো করোতি সো পটিসংৰেদেতি, অঞ্ঞো করোতি অঞ্ঞো পটিসংৰেদেতী’’তি ৰাদপ্পহানং, জনপদনিরুত্তিযা অনভিনিৰেসো, সমঞ্ঞায অনতিধাৰনন্তি অযং ঞাযো পরিদীপিতো হোতীতি অযং তাৰ পটিচ্চসমুপ্পাদোতি ৰচনমত্তস্স অত্থো.

৫৮১. যা পনাযং ভগৰতা পটিচ্চসমুপ্পাদং দেসেন্তেন ‘‘অৰিজ্জাপচ্চযা সঙ্খারা’’তিআদিনা নযেন নিক্খিত্তা তন্তি, তস্সা অত্থসংৰণ্ণনং করোন্তেন ৰিভজ্জৰাদিমণ্ডলং ওতরিত্ৰা আচরিযে অনব্ভাচিক্খন্তেন সকসমযং অৰোক্কমন্তেন পরসমযং অনাযূহন্তেন সুত্তং অপ্পটিবাহন্তেন ৰিনযং অনুলোমেন্তেন মহাপদেসে ওলোকেন্তেন ধম্মং দীপেন্তেন অত্থং সঙ্গাহেন্তেন তমেৰত্থং পুনরাৰত্তেত্ৰা অপরেহিপি পরিযাযন্তরেহি নিদ্দিসন্তেন চ যস্মা অত্থসংৰণ্ণনা কাতব্বা হোতি, পকতিযাপি চ দুক্করাৰ পটিচ্চসমুপ্পাদস্স অত্থসংৰণ্ণনা. যথাহু পোরাণা –

‘‘সচ্চং সত্তো পটিসন্ধি, পচ্চযাকারমেৰ চ;

দুদ্দসা চতুরো ধম্মা, দেসেতুং চ সুদুক্করা’’তি.

তস্মা ¶ অঞ্ঞত্র আগমাধিগমপ্পত্তেহি ন সুকরা পটিচ্চসমুপ্পাদস্সত্থৰণ্ণনাতি পরিতুলযিত্ৰা,

ৰত্তুকামো ¶ অহং অজ্জ, পচ্চযাকারৰণ্ণনং;

পতিট্ঠং নাধিগচ্ছামি, অজ্ঝোগাল়্হোৰ সাগরং.

সাসনং পনিদং নানা, দেসনানযমণ্ডিতং;

পুব্বাচরিযমগ্গো চ, অব্বোচ্ছিন্নো পৰত্ততি.

যস্মা তস্মা তদুভযং, সন্নিস্সাযত্থৰণ্ণনং;

আরভিস্সামি এতস্স, তং সুণাথ সমাহিতা.

ৰুত্তঞ্হেতং পুব্বাচরিযেহি –

‘‘যো কোচি মং অট্ঠিকত্ৰা সুণেয্য,

লভেথ পুব্বাপরিযং ৰিসেসং;

লদ্ধান পুব্বাপরিযং ৰিসেসং,

অদস্সনং মচ্চুরাজস্স গচ্ছে’’তি.

৫৮২. ইতি অৰিজ্জাপচ্চযা সঙ্খারাতিআদীসু হি আদিতোযেৰ তাৰ,

দেসনাভেদতো অত্থ, লক্খণেকৰিধাদিতো. অঙ্গানঞ্চ ৰৰত্থানা, ৰিঞ্ঞাতব্বো ৰিনিচ্ছযো.

তত্থ দেসনাভেদতোতি ভগৰতো হি ৰল্লিহারকানং চতুন্নং পুরিসানং ৰল্লিগহণং ৰিয আদিতো ৰা মজ্ঝতো ৰা পট্ঠায যাৰ পরিযোসানং, তথা পরিযোসানতো ৰা মজ্ঝতো ৰা পট্ঠায যাৰ আদীতি চতুব্বিধা পটিচ্চসমুপ্পাদদেসনা.

যথা হি ৰল্লিহারকেসু চতূসু পুরিসেসু একো ৰল্লিযা মূলমেৰ পঠমং পস্সতি, সো তং মূলে ¶ ছেত্ৰা সব্বং আকড্ঢিত্ৰা আদায কম্মে উপনেতি, এৰং ভগৰা ‘‘ইতি খো, ভিক্খৰে, অৰিজ্জাপচ্চযা সঙ্খারা…পে… জাতিপচ্চযা জরামরণ’’ন্তি (ম. নি. ১.৪০২; সং. নি. ২.২) আদিতো পট্ঠায যাৰ পরিযোসানাপি পটিচ্চসমুপ্পাদং দেসেতি.

যথা পন তেসু পুরিসেসু একো ৰল্লিযা মজ্ঝং পঠমং পস্সতি, সো মজ্ঝে ছিন্দিত্ৰা উপরিভাগঞ্ঞেৰ আকড্ঢিত্ৰা আদায কম্মে উপনেতি, এৰং ভগৰা ‘‘তস্স তং ৰেদনং অভিনন্দতো অভিৰদতো অজ্ঝোসায তিট্ঠতো ¶ উপ্পজ্জতি নন্দী. যা ৰেদনাসু নন্দী, তদুপাদানং. তস্সুপাদানপচ্চযা ভৰো, ভৰপচ্চযা জাতী’’তি (ম. নি. ১.৪০৯; সং. নি. ৩.৫) মজ্ঝতো পট্ঠায যাৰ পরিযোসানাপি দেসেতি.

যথা চ তেসু পুরিসেসু একো ৰল্লিযা অগ্গং পঠমং পস্সতি, সো অগ্গে গহেত্ৰা অগ্গানুসারেন যাৰ মূলা সব্বং আদায কম্মে উপনেতি, এৰং ভগৰা ‘‘জাতিপচ্চযা জরামরণন্তি ইতি খো পনেতং ৰুত্তং, জাতিপচ্চযা নু খো, ভিক্খৰে, জরামরণং নো ৰা কথং ৰো এত্থ হোতীতি? জাতিপচ্চযা, ভন্তে, জরামরণং. এৰং নো এত্থ হোতি জাতিপচ্চযা জরামরণন্তি. ভৰপচ্চযা জাতি…পে… অৰিজ্জাপচ্চযা সঙ্খারাতি ইতি খো পনেতং ৰুত্তং, অৰিজ্জাপচ্চযা নু খো, ভিক্খৰে, সঙ্খারা নো ৰা কথং ৰো এত্থ হোতী’’তি (ম. নি. ১.৪০৩) পরিযোসানতো পট্ঠায যাৰ আদিতোপি পটিচ্চসমুপ্পাদং দেসেতি.

যথা পনেতেসু পুরিসেসু একো ৰল্লিযা মজ্ঝমেৰ পঠমং পস্সতি, সো মজ্ঝে ছিন্দিত্ৰা হেট্ঠা ওতরন্তো যাৰ মূলা আদায কম্মে উপনেতি, এৰং ভগৰা ‘‘ইমে চ, ভিক্খৰে, চত্তারো আহারা কিন্নিদানা, কিংসমুদযা, কিংজাতিকা, কিংপভৰা? ইমে চত্তারো আহারা তণ্হানিদানা, তণ্হাসমুদযা, তণ্হাজাতিকা, তণ্হাপভৰা. তণ্হা কিন্নিদানা… ৰেদনা… ফস্সো… সল়াযতনং… নামরূপং… ৰিঞ্ঞাণং… সঙ্খারা কিন্নিদানা…পে… সঙ্খারা অৰিজ্জানিদানা…পে… অৰিজ্জাপভৰা’’তি (সং. নি. ২.১১) মজ্ঝতো পট্ঠায যাৰ আদিতো দেসেতি.

৫৮৩. কস্মা পনেৰং দেসেতীতি? পটিচ্চসমুপ্পাদস্স সমন্তভদ্দকত্তা সযঞ্চ দেসনাৰিলাসপ্পত্তত্তা. সমন্তভদ্দকো হি পটিচ্চসমুপ্পাদো, ততো ততো ঞাযপটিৰেধায সংৰত্ততিযেৰ ¶ . দেসনাৰিলাসপ্পত্তো চ ভগৰা চতুৰেসারজ্জপটিসম্ভিদাযোগেন চতুব্বিধগম্ভীরভাৰপ্পত্তিযা চ. সো দেসনাৰিলাসপ্পত্তত্তা নানানযেহেৰ ধম্মং দেসেতি.

ৰিসেসতো পনস্স যা আদিতো পট্ঠায অনুলোমদেসনা, সা পৰত্তিকারণৰিভাগসংমূল়্হং ৰেনেয্যজনং সমনুপস্সতো যথাসকেহি কারণেহি পৰত্তিসন্দস্সনত্থং উপ্পত্তিক্কমসন্দস্সনত্থঞ্চ পৰত্তাতি ৰিঞ্ঞাতব্বা. যা পরিযোসানতো পট্ঠায পটিলোমদেসনা, সা ‘‘কিচ্ছং ৰতাযং লোকো ¶ আপন্নো জাযতি চ জীযতি চ মীযতি চ চৰতি চ উপপজ্জতি চা’’তিআদিনা (দী. নি. ২.৫৭; সং. নি. ২.৪) নযেন কিচ্ছাপন্নং লোকং অনুৰিলোকযতো পুব্বভাগপটিৰেধানুসারেন তস্স তস্স জরামরণাদিকস্স দুক্খস্স অত্তনা অধিগতকারণসন্দস্সনত্থং. যা মজ্ঝতো পট্ঠায যাৰ আদি পৰত্তা, সা আহারনিদানৰৰত্থাপনানুসারেন যাৰ অতীতং অদ্ধানং অতিহরিত্ৰা পুন অতীতদ্ধতো পভুতি হেতুফলপটিপাটিসন্দস্সনত্থং. যা পন মজ্ঝতো পট্ঠায যাৰ পরিযোসানং পৰত্তা, সা পচ্চুপ্পন্নে অদ্ধানে অনাগতদ্ধহেতুসমুট্ঠানতো পভুতি অনাগতদ্ধসন্দস্সনত্থং. তাসু যা পৰত্তিকারণসম্মূল়্হস্স ৰেনেয্যজনস্স যথাসকেহি কারণেহি পৰত্তিসন্দস্সনত্থং উপ্পত্তিক্কমসন্দস্সনত্থঞ্চ আদিতো পট্ঠায অনুলোমদেসনা ৰুত্তা, সা ইধ নিক্খিত্তাতি ৰেদিতব্বা.

৫৮৪. কস্মা পনেত্থ অৰিজ্জা আদিতো ৰুত্তা, কিং পকতিৰাদীনং পকতি ৰিয অৰিজ্জাপি অকারণং মূলকারণং লোকস্সাতি? ন অকারণং. ‘‘আসৰসমুদযা অৰিজ্জাসমুদযো’’তি (ম. নি. ১.১০৩) হি অৰিজ্জায কারণং ৰুত্তং. অত্থি পন পরিযাযো যেন মূলকারণং সিযা, কো পন সোতি? ৰট্টকথায সীসভাৰো.

ভগৰা হি ৰট্টকথং কথেন্তো দ্ৰে ধম্মে সীসং কত্ৰা কথেতি, অৰিজ্জং ৰা. যথাহ – ‘‘পুরিমা, ভিক্খৰে, কোটি ন পঞ্ঞাযতি অৰিজ্জায ‘ইতো পুব্বে অৰিজ্জা নাহোসি, অথ পচ্ছা সমভৰী’তি, এৰঞ্চেতং, ভিক্খৰে, ৰুচ্চতি, অথ চ পন পঞ্ঞাযতি ইদপ্পচ্চযা অৰিজ্জা’’তি (অ. নি. ১০.৬১). ভৰতণ্হং ৰা. যথাহ – ‘‘পুরিমা, ভিক্খৰে, কোটি ন পঞ্ঞাযতি ভৰতণ্হায ‘ইতো পুব্বে ভৰতণ্হা নাহোসি, অথ পচ্ছা সমভৰী’তি, এৰঞ্চেতং, ভিক্খৰে, ৰুচ্চতি, অথ চ পন পঞ্ঞাযতি ইদপ্পচ্চযা ভৰতণ্হা’’তি (অ. নি. ১০.৬২).

৫৮৫. কস্মা ¶ পন ভগৰা ৰট্টকথং কথেন্তো ইমে দ্ৰে ধম্মে সীসং কত্ৰা কথেতীতি? সুগতিদুগ্গতিগামিনো কম্মস্স ৰিসেসহেতুভূতত্তা. দুগ্গতিগামিনো হি কম্মস্স ৰিসেসহেতু অৰিজ্জা. কস্মা? যস্মা অৰিজ্জাভিভূতো পুথুজ্জনো অগ্গিসন্তাপলগুল়াভিঘাতপরিস্সমাভিভূতা ৰজ্ঝগাৰী তায পরিস্সমাতুরতায নিরস্সাদম্পি অত্তনো অনত্থাৰহম্পি চ উণ্হোদকপানং ¶ ৰিয কিলেসসন্তাপতো নিরস্সাদম্পি দুগ্গতিনিপাতনতো চ অত্তনো অনত্থাৰহম্পি পাণাতিপাতাদিং অনেকপ্পকারং দুগ্গতিগামিকম্মং আরভতি. সুগতিগামিনো পন কম্মস্স ৰিসেসহেতু ভৰতণ্হা. কস্মা? যস্মা ভৰতণ্হাভিভূতো পুথুজ্জনো সা ৰুত্তপ্পকারা গাৰী সীতূদকতণ্হায সঅস্সাদং অত্তনো পরিস্সমৰিনোদনঞ্চ সীতূদকপানং ৰিয কিলেসসন্তাপৰিরহতো সঅস্সাদং সুগতিসম্পাপনেন অত্তনো দুগ্গতিদুক্খপরিস্সমৰিনোদনঞ্চ পাণাতিপাতা ৰেরমণিআদিং অনেকপ্পকারং সুগতিগামিকম্মং আরভতি.

৫৮৬. এতেসু পন ৰট্টকথায সীসভূতেসু ধম্মেসু কত্থচি ভগৰা একধম্মমূলিকং দেসনং দেসেতি. সেয্যথিদং, ‘‘ইতি খো, ভিক্খৰে, অৰিজ্জূপনিসা সঙ্খারা, সঙ্খারূপনিসং ৰিঞ্ঞাণ’’ন্তিআদি (সং. নি. ২.২৩). তথা ‘‘উপাদানিযেসু, ভিক্খৰে, ধম্মেসু অস্সাদানুপস্সিনো ৰিহরতো তণ্হা পৰড্ঢতি, তণ্হাপচ্চযা উপাদান’’ন্তিআদি (সং. নি. ২.৫২). কত্থচি উভযমূলিকম্পি. সেয্যথিদং, ‘‘অৰিজ্জানীৰরণস্স, ভিক্খৰে, বালস্স তণ্হায সম্পযুত্তস্স এৰমযং কাযো সমুদাগতো. ইতি অযঞ্চেৰ কাযো বহিদ্ধা চ নামরূপং ইত্থেতং দ্ৰযং. দ্ৰযং পটিচ্চ ফস্সো সল়েৰাযতনানি, যেহি ফুট্ঠো বালো সুখদুক্খং পটিসংৰেদেতী’’তিআদি (সং. নি. ২.১৯). তাসু দেসনাসু ‘‘অৰিজ্জাপচ্চযা সঙ্খারা’’তি অযমিধ অৰিজ্জাৰসেন একধম্মমূলিকা দেসনাতি ৰেদিতব্বা. এৰং তাৰেত্থ দেসনাভেদতো ৰিঞ্ঞাতব্বো ৰিনিচ্ছযো.

৫৮৭. অত্থতোতি অৰিজ্জাদীনং পদানং অত্থতো. সেয্যথিদং, পূরেতুং অযুত্তট্ঠেন কাযদুচ্চরিতাদি অৰিন্দিযং নাম, অলদ্ধব্বন্তি অত্থো. তং অৰিন্দিযং ৰিন্দতীতি অৰিজ্জা. তব্বিপরীততো কাযসুচরিতাদি ৰিন্দিযং নাম, তং ৰিন্দিযং ন ৰিন্দতীতি অৰিজ্জা. খন্ধানং রাসট্ঠং, আযতনানং আযতনট্ঠং, ধাতূনং সুঞ্ঞট্ঠং, ইন্দ্রিযানং অধিপতিযট্ঠং, সচ্চানং তথট্ঠং অৰিদিতং করোতীতিপি অৰিজ্জা. দুক্খাদীনং পীল়নাদিৰসেন ৰুত্তং চতুব্বিধং অত্থং অৰিদিতং করোতীতিপি অৰিজ্জা. অন্তৰিরহিতে সংসারে সব্বযোনিগতিভৰৰিঞ্ঞাণট্ঠিতিসত্তাৰাসেসু সত্তে জৰাপেতীতি ¶ অৰিজ্জা. পরমত্থতো অৰিজ্জমানেসু ইত্থিপুরিসাদীসু জৰতি, ৰিজ্জমানেসুপি খন্ধাদীসু ন জৰতীতি অৰিজ্জা. অপিচ চক্খুৰিঞ্ঞাণাদীনং ¶ ৰত্থারম্মণানং পটিচ্চসমুপ্পাদপটিচ্চসমুপ্পন্নানঞ্চ ধম্মানং ছাদনতোপি অৰিজ্জা.

যং পটিচ্চ ফলমেতি, সো পচ্চযো. পটিচ্চাতি ন ৰিনা অপচ্চক্খত্ৰাতি অত্থো. এতীতি উপ্পজ্জতি চেৰ পৰত্ততি চাতি অত্থো. অপিচ উপকারকট্ঠো পচ্চযট্ঠো. অৰিজ্জা চ সা পচ্চযো চাতি অৰিজ্জাপচ্চযো. তস্মা অৰিজ্জাপচ্চযা.

সঙ্খতমভিসঙ্খরোন্তীতি সঙ্খারা. অপিচ অৰিজ্জাপচ্চযা সঙ্খারা, সঙ্খারসদ্দেন আগতসঙ্খারাতি দুৰিধা সঙ্খারা. তত্থ পুঞ্ঞাপুঞ্ঞানেঞ্জাভিসঙ্খারা তযো, কাযৰচীচিত্তসঙ্খারা তযোতি ইমে ছ অৰিজ্জাপচ্চযা সঙ্খারা. তে সব্বেপি লোকিযকুসলাকুসলচেতনামত্তমেৰ হোন্তি.

সঙ্খতসঙ্খারো, অভিসঙ্খতসঙ্খারো, অভিসঙ্খরণকসঙ্খারো, পযোগাভিসঙ্খারোতি ইমে পন চত্তারো সঙ্খার-সদ্দেন আগতসঙ্খারা. তত্থ ‘‘অনিচ্চা ৰত সঙ্খারা’’তিআদীসু (দী. নি. ২.২২১, ২৭২; সং. নি. ১.১৮৬) ৰুত্তা সব্বেপি সপ্পচ্চযা ধম্মা সঙ্খতসঙ্খারা নাম. কম্মনিব্বত্তা তেভূমকা রূপারূপধম্মা অভিসঙ্খতসঙ্খারাতি অট্ঠকথাসু ৰুত্তা, তেপি ‘‘অনিচ্চা ৰত সঙ্খারা’’তি (দী. নি. ২.২২১; ২৭২; সং. নি. ১.১৮৬) এত্থেৰ সঙ্গহং গচ্ছন্তি. ৰিসুং পন নেসং আগতট্ঠানং ন পঞ্ঞাযতি. তেভূমিককুসলাকুসলচেতনা পন অভিসঙ্খরণকসঙ্খারোতি ৰুচ্চতি, তস্স ‘‘অৰিজ্জাগতোযং, ভিক্খৰে, পুরিসপুগ্গলো পুঞ্ঞঞ্চেৰ সঙ্খারং অভিসঙ্খরোতী’’তিআদীসু (সং. নি. ২.৫১) আগতট্ঠানং পঞ্ঞাযতি. কাযিকচেতসিকং পন ৰীরিযং পযোগাভিসঙ্খারোতি ৰুচ্চতি, সো ‘‘যাৰতিকা অভিসঙ্খারস্স গতি, তাৰতিকা গন্ত্ৰা অক্খাহতং মঞ্ঞে অট্ঠাসী’’তিআদীসু (অ. নি. ৩.১৫) আগতো.

ন কেৰলঞ্চ এতেযেৰ, অঞ্ঞেপি ‘‘সঞ্ঞাৰেদযিতনিরোধং সমাপজ্জন্তস্স খো, আৰুসো ৰিসাখ, ভিক্খুনো পঠমং নিরুজ্ঝতি ৰচীসঙ্খারো, ততো কাযসঙ্খারো, ততো চিত্তসঙ্খারো’’তিআদিনা (ম. নি. ১.৪৬৪) নযেন সঙ্খার-সদ্দেন আগতা অনেকে সঙ্খারা. তেসু নত্থি সো সঙ্খারো, যো সঙ্খতসঙ্খারেহি সঙ্গহং ন গচ্ছেয্য, ইতো পরং সঙ্খারপচ্চযা ৰিঞ্ঞাণন্তিআদীসু ৰুত্তং ৰুত্তনযেনেৰ ৰেদিতব্বং.

অৰুত্তে ¶ ¶ পন ৰিজানাতীতি ৰিঞ্ঞাণং. নমতীতি নামং. রুপ্পতীতি রূপং. আযে তনোতি আযতঞ্চ নযতীতি আযতনং. ফুসতীতি ফস্সো. ৰেদযতীতি ৰেদনা. পরিতস্সতীতি তণ্হা. উপাদিযতীতি উপাদানং. ভৰতি ভাৰযতি চাতি ভৰো. জননং জাতি. জিরণং জরা. মরন্তি এতেনাতি মরণং. সোচনং সোকো. পরিদেৰনং পরিদেৰো. দুক্খযতীতি দুক্খং. উপ্পাদট্ঠিতিৰসেন ৰা দ্ৰিধা খণতীতিপি দুক্খং. দুম্মনভাৰো দোমনস্সং. ভুসো আযাসো উপাযাসো.

সম্ভৰন্তীতি অভিনিব্বত্তন্তি. ন কেৰলঞ্চ সোকাদীহেৰ, অথ খো সব্বপদেহি সম্ভৰন্তি-সদ্দস্স যোজনা কাতব্বা. ইতরথা হি ‘‘অৰিজ্জাপচ্চযা সঙ্খারা’’তি ৰুত্তে কিং করোন্তীতি ন পঞ্ঞাযেয্য, সম্ভৰন্তীতি পন যোজনায সতি অৰিজ্জা চ সা পচ্চযো চাতি অৰিজ্জাপচ্চযো. তস্মা অৰিজ্জাপচ্চযা সঙ্খারা সম্ভৰন্তীতি পচ্চযপচ্চযুপ্পন্নৰৰত্থানং কতং হোতি. এস নযো সব্বত্থ.

এৰন্তি নিদ্দিট্ঠনযনিদস্সনং. তেন অৰিজ্জাদীহেৰ কারণেহি, ন ইস্সরনিম্মানাদীহীতি দস্সেতি. এতস্সাতি যথাৰুত্তস্স. কেৰলস্সাতি অসম্মিস্সস্স, সকলস্স ৰা. দুক্খক্খন্ধস্সাতি দুক্খসমূহস্স, ন সত্তস্স, ন সুখসুভাদীনং. সমুদযোতি নিব্বত্তি. হোতীতি সম্ভৰতি. এৰমেত্থ অত্থতো ৰিঞ্ঞাতব্বো ৰিনিচ্ছযো.

৫৮৮. লক্খণাদিতোতি অৰিজ্জাদীনং লক্খণাদিতো. সেয্যথিদং – অঞ্ঞাণলক্খণা অৰিজ্জা, সম্মোহনরসা, ছাদনপচ্চুপট্ঠানা, আসৰপদট্ঠানা. অভিসঙ্খরণলক্খণা সঙ্খারা, আযূহনরসা, চেতনাপচ্চুপট্ঠানা, অৰিজ্জাপদট্ঠানা. ৰিজাননলক্খণং ৰিঞ্ঞাণং, পুব্বঙ্গমরসং, পটিসন্ধিপচ্চুপট্ঠানং, সঙ্খারপদট্ঠানং, ৰত্থারম্মণপদট্ঠানং ৰা. নমনলক্খণং নামং, সম্পযোগরসং, অৰিনিব্ভোগপচ্চুপট্ঠানং, ৰিঞ্ঞাণপদট্ঠানং. রুপ্পনলক্খণং রূপং, ৰিকিরণরসং, অব্যাকতপচ্চুপট্ঠানং, ৰিঞ্ঞাণপদট্ঠানং. আযতনলক্খণং সল়াযতনং, দস্সনাদিরসং, ৰত্থুদ্ৰারভাৰপচ্চুপট্ঠানং, নামরূপপদট্ঠানং. ফুসনলক্খণো ফস্সো, সঙ্ঘট্টনরসো, সঙ্গতিপচ্চুপট্ঠানো, সল়াযতনপদট্ঠানো. অনুভৰনলক্খণা ৰেদনা, ৰিসযরসসম্ভোগরসা, সুখদুক্খপচ্চুপট্ঠানা, ফস্সপদট্ঠানা. হেতুলক্খণা তণ্হা, অভিনন্দনরসা, অতিত্তভাৰপচ্চুপট্ঠানা, ৰেদনাপদট্ঠানা. গহণলক্খণং ¶ উপাদানং, অমুঞ্চনরসং, তণ্হাদল়্হত্তদিট্ঠিপচ্চুপট্ঠানং, তণ্হাপদট্ঠানং. কম্মকম্মফললক্খণো ভৰো, ভাৰনভৰনরসো, কুসলাকুসলাব্যাকতপচ্চুপট্ঠানো ¶ , উপাদানপদট্ঠানো. জাতিআদীনং লক্খণাদীনি সচ্চনিদ্দেসে ৰুত্তনযেনেৰ ৰেদিতব্বানি. এৰমেত্থ লক্খণাদিতোপি ৰিঞ্ঞাতব্বো ৰিনিচ্ছযো.

৫৮৯. একৰিধাদিতোতি এত্থ অৰিজ্জা অঞ্ঞাণাদস্সনমোহাদিভাৰতো একৰিধা. অপ্পটিপত্তিমিচ্ছাপটিপত্তিতো দুৰিধা. তথা সসঙ্খারাসঙ্খারতো. ৰেদনত্তযসম্পযোগতো তিৰিধা. চতুসচ্চপটিৰেধতো চতুব্বিধা. গতিপঞ্চকাদীনৰচ্ছাদনতো পঞ্চৰিধা. দ্ৰারারম্মণতো পন সব্বেসুপি অরূপধম্মেসু ছব্বিধতা ৰেদিতব্বা.

সঙ্খারা সাসৰৰিপাকধম্মধম্মাদিভাৰতো একৰিধা. কুসলাকুসলতো দুৰিধা. তথা পরিত্তমহগ্গতহীনমজ্ঝিমমিচ্ছত্তনিযতানিযততো. তিৰিধা পুঞ্ঞাভিসঙ্খারাদিভাৰতো. চতুব্বিধা চতুযোনিসংৰত্তনতো. পঞ্চৰিধা পঞ্চগতিগামিতো.

ৰিঞ্ঞাণং লোকিযৰিপাকাদিভাৰতো একৰিধং. সহেতুকাহেতুকাদিতো দুৰিধং. ভৰত্তযপরিযাপন্নতো, ৰেদনত্তযসম্পযোগতো, অহেতুকদ্ৰিহেতুকতিহেতুকতো চ তিৰিধং. যোনিগতিৰসেন চতুব্বিধং, পঞ্চৰিধঞ্চ.

নামরূপং ৰিঞ্ঞাণসন্নিস্সযতো কম্মপচ্চযতো চ একৰিধং. সারম্মণনারম্মণতো দুৰিধং. অতীতাদিতো তিৰিধং. যোনিগতিৰসেন চতুব্বিধং, পঞ্চৰিধঞ্চ.

সল়াযতনং সঞ্জাতিসমোসরণট্ঠানতো একৰিধং. ভূতপ্পসাদৰিঞ্ঞাণাদিতো দুৰিধং. সম্পত্তাসম্পত্তনোভযগোচরতো তিৰিধং. যোনিগতিপরিযাপন্নতো চতুব্বিধং পঞ্চৰিধঞ্চাতি ইমিনা নযেন ফস্সাদীনম্পি একৰিধাদিভাৰো ৰেদিতব্বোতি এৰমেত্থ একৰিধাদিতোপি ৰিঞ্ঞাতব্বো ৰিনিচ্ছযো.

৫৯০. অঙ্গানঞ্চ ৰৰত্থানাতি সোকাদযো চেত্থ ভৰচক্কস্স অৰিচ্ছেদদস্সনত্থং ৰুত্তা. জরামরণব্ভাহতস্স হি বালস্স তে সম্ভৰন্তি. যথাহ ¶ – ‘‘অস্সুতৰা, ভিক্খৰে, পুথুজ্জনো সারীরিকায দুক্খায ৰেদনায ফুট্ঠো সমানো সোচতি কিলমতি পরিদেৰতি উরত্তাল়িং কন্দতি সম্মোহমাপজ্জতী’’তি (সং. নি. ৪.২৫২). যাৰ চ তেসং পৰত্তি, তাৰ অৰিজ্জাযাতি পুনপি ¶ অৰিজ্জাপচ্চযা সঙ্খারাতি সম্বন্ধমেৰ হোতি ভৰচক্কং. তস্মা তেসং জরামরণেনেৰ একসঙ্খেপং কত্ৰা দ্ৰাদসেৰ পটিচ্চসমুপ্পাদঙ্গানীতি ৰেদিতব্বানি. এৰমেত্থ অঙ্গানং ৰৰত্থানতোপি ৰিঞ্ঞাতব্বো ৰিনিচ্ছযো.

অযং তাৰেত্থ সঙ্খেপকথা.

অৰিজ্জাপচ্চযাসঙ্খারপদকথা

৫৬১. অযং পন ৰিত্থারনযো – অৰিজ্জাতি সুত্তন্তপরিযাযেন দুক্খাদীসু চতূসু ঠানেসু অঞ্ঞাণং, অভিধম্মপরিযাযেন পুব্বন্তাদীহি সদ্ধিং অট্ঠসু. ৰুত্তঞ্হেতং ‘‘তত্থ কতমা অৰিজ্জা, দুক্খে অঞ্ঞাণং…পে… দুক্খনিরোধগামিনিযা পটিপদায অঞ্ঞাণং, পুব্বন্তে অঞ্ঞাণং, অপরন্তে, পুব্বন্তাপরন্তে, ইদপ্পচ্চযতাপটিচ্চসমুপ্পন্নেসু ধম্মেসু অঞ্ঞাণ’’ন্তি (ধ. স. ১১০৬). তত্থ কিঞ্চাপি ঠপেত্ৰা লোকুত্তরং সচ্চদ্ৰযং সেসট্ঠানেসু আরম্মণৰসেন অৰিজ্জা উপ্পজ্জতি, এৰং সন্তেপি পটিচ্ছাদনৰসেনেৰ ইধ অধিপ্পেতা. সা হি উপ্পন্না দুক্খসচ্চং পটিচ্ছাদেত্ৰা তিট্ঠতি, যাথাৰসরসলক্খণং পটিৰিজ্ঝিতুং ন দেতি, তথা সমুদযং, নিরোধং, মগ্গং, পুব্বন্তসঙ্খাতং অতীতং খন্ধপঞ্চকং, অপরন্তসঙ্খাতং অনাগতং খন্ধপঞ্চকং, পুব্বন্তাপরন্তসঙ্খাতং তদুভযং, ইদপ্পচ্চযতাপটিচ্চসমুপ্পন্নধম্মসঙ্খাতং ইদপ্পচ্চযতঞ্চেৰ পটিচ্চসমুপ্পন্নধম্মে চ পটিচ্ছাদেত্ৰা তিট্ঠতি. ‘‘অযং অৰিজ্জা, ইমে সঙ্খারা’’তি এৰং যাথাৰসরসলক্খণমেত্থ পটিৰিজ্ঝিতুং ন দেতি. তস্মা দুক্খে অঞ্ঞাণং…পে… ইদপ্পচ্চযতাপটিচ্চসমুপ্পন্নেসু ধম্মেসু অঞ্ঞাণন্তি ৰুচ্চতি.

৫৯২. সঙ্খারাতি পুঞ্ঞাদযো তযো কাযসঙ্খারাদযো তযোতি এৰং পুব্বে সঙ্খেপতো ৰুত্তা ছ, ৰিত্থারতো পনেত্থ পুঞ্ঞাভিসঙ্খারো দানসীলাদিৰসেন পৰত্তা অট্ঠ কামাৰচরকুসলচেতনা চেৰ ভাৰনাৰসেন পৰত্তা পঞ্চ রূপাৰচরকুসলচেতনা চাতি তেরস চেতনা হোন্তি. অপুঞ্ঞাভিসঙ্খারো পাণাতিপাতাদিৰসেন পৰত্তা দ্ৰাদস অকুসলচেতনা ¶ . আনেঞ্জাভিসঙ্খারো ভাৰনাৰসেনেৰ পৰত্তা চতস্সো অরূপাৰচরকুসলচেতনা চাতি তযোপি সঙ্খারা একূনতিংস চেতনা হোন্তি.

ইতরেসু ¶ পন তীসু কাযসঞ্চেতনা কাযসঙ্খারো, ৰচীসঞ্চেতনা ৰচীসঙ্খারো, মনোসঞ্চেতনা চিত্তসঙ্খারো. অযং তিকো কম্মাযূহনক্খণে পুঞ্ঞাভিসঙ্খারাদীনং দ্ৰারতো পৰত্তিদস্সনত্থং ৰুত্তো. কাযৰিঞ্ঞত্তিং সমুট্ঠাপেত্ৰা হি কাযদ্ৰারতো পৰত্তা অট্ঠ কামাৰচরকুসলচেতনা, দ্ৰাদস অকুসলচেতনাতি সমৰীসতি চেতনা কাযসঙ্খারো নাম. তা এৰ ৰচীৰিঞ্ঞত্তিং সমুট্ঠাপেত্ৰা ৰচীদ্ৰারতো পৰত্তা ৰচীসঙ্খারো নাম. অভিঞ্ঞাচেতনা পনেত্থ পরতো ৰিঞ্ঞাণস্স পচ্চযো ন হোতীতি ন গহিতা. যথা চ অভিঞ্ঞাচেতনা, এৰং উদ্ধচ্চচেতনাপি ন হোতি. তস্মা সাপি ৰিঞ্ঞাণস্স পচ্চযভাৰে অপনেতব্বা, অৰিজ্জাপচ্চযা পন সব্বাপেতা হোন্তি. উভোপি ৰিঞ্ঞত্তিযো অসমুট্ঠাপেত্ৰা মনোদ্ৰারে উপ্পন্না পন সব্বাপি একূনতিংসতি চেতনা চিত্তসঙ্খারোতি. ইতি অযং তিকো পুরিমত্তিকমেৰ পৰিসতীতি অত্থতো পুঞ্ঞাভিসঙ্খারাদীনংযেৰ ৰসেন অৰিজ্জায পচ্চযভাৰো ৰেদিতব্বো.

৫৯৩. তত্থ সিযা – কথং পনেতং জানিতব্বং ‘‘ইমে সঙ্খারা অৰিজ্জা পচ্চযা হোন্তী’’তি? অৰিজ্জাভাৰে ভাৰতো. যস্স হি দুক্খাদীসু অৰিজ্জাসঙ্খাতং অঞ্ঞাণং অপ্পহীনং হোতি, সো দুক্খে তাৰ পুব্বন্তাদীসু চ অঞ্ঞাণেন সংসারদুক্খং সুখসঞ্ঞায গহেত্ৰা তস্সেৰ হেতুভূতে তিৰিধেপি সঙ্খারে আরভতি. সমুদযে অঞ্ঞাণেন দুক্খহেতুভূতেপি তণ্হাপরিক্খারে সঙ্খারে সুখহেতুতো মঞ্ঞমানো আরভতি. নিরোধে পন মগ্গে চ অঞ্ঞাণেন দুক্খস্স অনিরোধভূতেপি গতিৰিসেসে দুক্খনিরোধসঞ্ঞী হুত্ৰা নিরোধস্স চ অমগ্গভূতেসুপি যঞ্ঞামরতপাদীসু নিরোধমগ্গসঞ্ঞী হুত্ৰা দুক্খনিরোধং পত্থযমানো যঞ্ঞামরতপাদিমুখেন তিৰিধেপি সঙ্খারে আরভতি.

অপিচ সো তায চতূসু সচ্চেসু অপ্পহীনাৰিজ্জতায ৰিসেসতো জাতিজরারোগমরণাদিঅনেকাদীনৰৰোকিণ্ণম্পি পুঞ্ঞফলসঙ্খাতং দুক্খং দুক্খতো অজানন্তো তস্স অধিগমায কাযৰচীচিত্তসঙ্খারভেদং পুঞ্ঞাভিসঙ্খারং ¶ আরভতি দেৰচ্ছরকামকো ৰিয মরুপ্পপাতং. সুখসম্মতস্সাপি চ তস্স পুঞ্ঞফলস্স অন্তে মহাপরিল়াহজনিকং ৰিপরিণামদুক্খতং অপ্পস্সাদতঞ্চ অপস্সন্তোপি তপ্পচ্চযং ৰুত্তপ্পকারমেৰ পুঞ্ঞাভিসঙ্খারং আরভতি সলভো ৰিয দীপসিখাভিনিপাতং, মধুবিন্দুগিদ্ধো ৰিয চ মধুলিত্তসত্থধারালেহনং. কামুপসেৰনাদীসু চ সৰিপাকেসু আদীনৰং অপস্সন্তো সুখসঞ্ঞায চেৰ কিলেসাভিভূততায চ দ্ৰারত্তযপ্পৰত্তম্পি অপুঞ্ঞাভিসঙ্খারং আরভতি, বালো ৰিয গূথকীল়নং, মরিতুকামো ৰিয চ ৰিসখাদনং. আরুপ্পৰিপাকেসু ¶ চাপি সঙ্খারৰিপরিণামদুক্খতং অনৰবুজ্ঝমানো সস্সতাদিৰিপল্লাসেন চিত্তসঙ্খারভূতং আনেঞ্জাভিসঙ্খারং আরভতি, দিসামূল়্হো ৰিয পিসাচনগরাভিমুখমগ্গগমনং.

এৰং যস্মা অৰিজ্জাভাৰতোৰ সঙ্খারভাৰো, ন অভাৰতো. তস্মা জানিতব্বমেতং ‘‘ইমে সঙ্খারা অৰিজ্জাপচ্চযা হোন্তী’’তি. ৰুত্তম্পি চেতং ‘‘অৰিদ্ৰা, ভিক্খৰে, অৰিজ্জাগতো পুঞ্ঞাভিসঙ্খারম্পি অভিসঙ্খরোতি, অপুঞ্ঞাভিসঙ্খারম্পি অভিসঙ্খরোতি, আনেঞ্জাভিসঙ্খারম্পি অভিসঙ্খরোতি. যতো চ খো, ভিক্খৰে, ভিক্খুনো অৰিজ্জা পহীনা, ৰিজ্জা উপ্পন্না; সো অৰিজ্জাৰিরাগা ৰিজ্জুপ্পাদা নেৰ পুঞ্ঞাভিসঙ্খারং অভিসঙ্খরোতী’’তি.

পট্ঠানপচ্চযকথা

৫৯৪. এত্থাহ – গণ্হাম তাৰ এতং অৰিজ্জা সঙ্খারানং পচ্চযোতি, ইদং পন ৰত্তব্বং কতমেসং সঙ্খারানং কথং পচ্চযো হোতীতি? তত্রিদং ৰুচ্চতি, ভগৰতা হি ‘‘হেতুপচ্চযো, আরম্মণপচ্চযো, অধিপতিপচ্চযো, অনন্তরপচ্চযো, সমনন্তরপচ্চযো, সহজাতপচ্চযো, অঞ্ঞমঞ্ঞপচ্চযো, নিস্সযপচ্চযো, উপনিস্সযপচ্চযো, পুরেজাতপচ্চযো, পচ্ছাজাতপচ্চযো, আসেৰনপচ্চযো, কম্মপচ্চযো, ৰিপাকপচ্চযো, আহারপচ্চযো, ইন্দ্রিযপচ্চযো, ঝানপচ্চযো, মগ্গপচ্চযো, সম্পযুত্তপচ্চযো, ৰিপ্পযুত্তপচ্চযো, অত্থিপচ্চযো, নত্থিপচ্চযো, ৰিগতপচ্চযো, অৰিগতপচ্চযো’’তি (পট্ঠা. ১.১.পচ্চযুদ্দেস) চতুৰীসতি পচ্চযা ৰুত্তা.

তত্থ ¶ হেতু চ সো পচ্চযো চাতি হেতুপচ্চযো, হেতু হুত্ৰা পচ্চযো, হেতুভাৰেন পচ্চযোতি ৰুত্তং হোতি. আরম্মণপচ্চযাদীসুপি এসেৰ নযো.

৫৯৫. তত্থ হেতূতি ৰচনাৰযৰকারণমূলানমেতং অধিৰচনং. ‘‘পটিঞ্ঞা, হেতূ’’তিআদীসু হি লোকে ৰচনাৰযৰো হেতূতি ৰুচ্চতি. সাসনে পন ‘‘যে ধম্মা হেতুপ্পভৰা’’তিআদীসু (মহাৰ. ৬০) কারণং. ‘‘তযো কুসলহেতূ, তযো অকুসলহেতূ’’তিআদীসু (ধ. স. ১০৫৯) মূলং হেতূতি ৰুচ্চতি, তং ইধ অধিপ্পেতং. পচ্চযোতি এত্থ পন অযং ৰচনত্থো, পটিচ্চ এতস্মা এতীতি পচ্চযো. অপচ্চক্খায নং ৰত্ততীতি অত্থো. যো হি ধম্মো যং ধম্মং অপচ্চক্খায তিট্ঠতি ৰা উপ্পজ্জতি ৰা, সো তস্স ¶ পচ্চযোতি ৰুত্তং হোতি. লক্খণতো পন উপকারকলক্খণো পচ্চযো. যো হি ধম্মো যস্স ধম্মস্স ঠিতিযা ৰা উপ্পত্তিযা ৰা উপকারকো হোতি, সো তস্স পচ্চযোতি ৰুচ্চতি. পচ্চযো, হেতু, কারণং, নিদানং, সম্ভৰো, পভৰোতিআদি অত্থতো একং, ব্যঞ্জনতো নানং. ইতি মূলট্ঠেন হেতু, উপকারকট্ঠেন পচ্চযোতি সঙ্খেপতো মূলট্ঠেন উপকারকো ধম্মো হেতুপচ্চযো.

সো সালিআদীনং সালিবীজাদীনি ৰিয, মণিপভাদীনং ৰিয চ মণিৰণ্ণাদযো কুসলাদীনং কুসলাদিভাৰসাধকোতি আচরিযানং অধিপ্পাযো. এৰং সন্তে পন তংসমুট্ঠানরূপেসু হেতুপচ্চযতা ন সম্পজ্জতি. ন হি সো তেসং কুসলাদিভাৰং সাধেতি, ন চ পচ্চযো ন হোতি. ৰুত্তঞ্হেতং ‘‘হেতূ হেতুসম্পযুত্তকানং ধম্মানং তংসমুট্ঠানানঞ্চ রূপানং হেতুপচ্চযেন পচ্চযো’’তি (পট্ঠা. ১.১.১). অহেতুকচিত্তানঞ্চ ৰিনা এতেন অব্যাকতভাৰো সিদ্ধো, সহেতুকানম্পি চ যোনিসোমনসিকারাদিপটিবদ্ধো কুসলাদিভাৰো, ন সম্পযুত্তহেতুপটিবদ্ধো. যদি চ সম্পযুত্তহেতূসু সভাৰতোৰ কুসলাদিভাৰো সিযা, সম্পযুত্তেসু হেতুপটিবদ্ধো অলোভো কুসলো ৰা সিযা অব্যাকতো ৰা. যস্মা পন উভযথাপি হোতি, তস্মা যথা সম্পযুত্তেসু, এৰং হেতূসুপি কুসলাদিতা পরিযেসিতব্বা.

কুসলাদিভাৰসাধনৰসেন ¶ পন হেতূনং মূলট্ঠং অগহেত্ৰা সুপ্পতিট্ঠিতভাৰসাধনৰসেন গয্হমানে ন কিঞ্চি ৰিরুজ্ঝতি. লদ্ধহেতুপচ্চযা হি ধম্মা ৰিরূল়্হমূলা ৰিয পাদপা থিরা হোন্তি সুপ্পতিট্ঠিতা, অহেতুকা তিলবীজকাদিসেৰালা ৰিয ন সুপ্পতিট্ঠিতা. ইতি মূলট্ঠেন উপকারকোতি সুপ্পতিট্ঠিতভাৰসাধনেন উপকারকো ধম্মো হেতুপচ্চযোতি ৰেদিতব্বো.

৫৯৬. ততো পরেসু আরম্মণভাৰেন উপকারকো ধম্মো আরম্মণপচ্চযো. সো ‘‘রূপাযতনং চক্খুৰিঞ্ঞাণধাতুযা’’তি (পট্ঠা. ১.১.২) আরভিত্ৰাপি ‘‘যং যং ধম্মং আরব্ভ যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং আরম্মণপচ্চযেন পচ্চযো’’তি (পট্ঠা. ১.১.২) ওসাপিতত্তা ন কোচি ধম্মো ন হোতি. যথা হি দুব্বলো পুরিসো দণ্ডং ৰা রজ্জুং ৰা আলম্বিত্ৰাৰ উট্ঠহতি চেৰ তিট্ঠতি চ, এৰং চিত্তচেতসিকা ধম্মা রূপাদিআরম্মণং আরব্ভেৰ উপ্পজ্জন্তি চেৰ তিট্ঠন্তি চ. তস্মা সব্বেপি চিত্তচেতসিকানং আরম্মণভূতা ধম্মা আরম্মণপচ্চযোতি ৰেদিতব্বা.

৫৯৭. জেট্ঠকট্ঠেন ¶ উপকারকো ধম্মো অধিপতিপচ্চযো, সো সহজাতারম্মণৰসেন দুৰিধো. তত্থ ‘‘ছন্দাধিপতি ছন্দসম্পযুত্তকানং ধম্মানং তংসমুট্ঠানানঞ্চ রূপানং অধিপতিপচ্চযেন পচ্চযো’’তিআদিৰচনতো (পট্ঠা. ১.৩.৩) ছন্দৰীরিযচিত্তৰীমংসাসঙ্খাতা চত্তারো ধম্মা অধিপতিপচ্চযোতি ৰেদিতব্বা, নো চ খো একতো. যদা হি ছন্দং ধুরং ছন্দং জেট্ঠকং কত্ৰা চিত্তং পৰত্ততি, তদা ছন্দোৰ অধিপতি, ন ইতরে. এস নযো সেসেসুপি.

যং পন ধম্মং গরুং কত্ৰা অরূপধম্মা পৰত্তন্তি, সো নেসং আরম্মণাধিপতি. তেন ৰুত্তং ‘‘যং যং ধম্মং গরুং কত্ৰা যে যে ধম্মা উপ্পজ্জন্তি চিত্তচেতসিকা ধম্মা, তে তে ধম্মা তেসং তেসং ধম্মানং অধিপতিপচ্চযেন পচ্চযো’’তি (পট্ঠা. ১.১.৩).

৫৯৮. অনন্তরভাৰেন উপকারকো ধম্মো অনন্তরপচ্চযো. সমনন্তরভাৰেন উপকারকো ধম্মো সমনন্তরপচ্চযো. ইদঞ্চ পচ্চযদ্ৰযং ¶ বহুধা পপঞ্চযন্তি. অযং পনেত্থ সারো, যো হি এস চক্খুৰিঞ্ঞাণানন্তরা মনোধাতু, মনোধাতুঅনন্তরা মনোৰিঞ্ঞাণধাতূতিআদি চিত্তনিযমো, সো যস্মা পুরিমপুরিমচিত্তৰসেনেৰ ইজ্ঝতি, ন অঞ্ঞথা, তস্মা অত্তনো অত্তনো অনন্তরং অনুরূপস্স চিত্তুপ্পাদস্স উপ্পাদনসমত্থো ধম্মো অনন্তরপচ্চযো. তেনেৰাহ – ‘‘অনন্তরপচ্চযোতি চক্খুৰিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং অনন্তরপচ্চযেন পচ্চযো’’তিআদি (পট্ঠা. ১.১.৪). যো অনন্তরপচ্চযো, স্ৰেৰ সমনন্তরপচ্চযো. ব্যঞ্জনমত্তমেৰ হেত্থ নানং, উপচযসন্ততীসু ৰিয অধিৰচননিরুত্তিদুকাদীসু ৰিয চ. অত্থতো পন নানং নত্থি.

যম্পি ‘‘অত্থানন্তরতায অনন্তরপচ্চযো, কালানন্তরতায সমনন্তরপচ্চযো’’তি আচরিযানং মতং, তং ‘‘নিরোধা ৰুট্ঠহন্তস্স নেৰসঞ্ঞানাসঞ্ঞাযতনকুসলং ফলসমাপত্তিযা সমনন্তরপচ্চযেন পচ্চযো’’তিআদীহি (পট্ঠা. ১.১.৪১৮) ৰিরুজ্ঝতি. যম্পি তত্থ ৰদন্তি ‘‘ধম্মানং সমুট্ঠাপনসমত্থতা ন পরিহাযতি, ভাৰনাবলেন পন ৰারিতত্তা ধম্মা সমনন্তরা নুপ্পজ্জন্তী’’তি, তম্পি কালানন্তরতায অভাৰমেৰ সাধেতি. ভাৰনাবলেন হি তত্থ কালানন্তরতা নত্থীতি, মযম্পি এতদেৰ ৰদাম. যস্মা চ কালানন্তরতা নত্থি, তস্মা সমনন্তরপচ্চযতা ন যুজ্জতি. কালানন্তরতায হি তেসং সমনন্তরপচ্চযো হোতীতি লদ্ধি. তস্মা ¶ অভিনিৰেসং অকত্ৰা ব্যঞ্জনমত্ততোৰেত্থ নানাকরণং পচ্চেতব্বং, ন অত্থতো. কথং? নত্থি এতেসং অন্তরন্তি হি অনন্তরা. সণ্ঠানাভাৰতো সুট্ঠু অনন্তরাতি সমনন্তরা.

৫৯৯. উপ্পজ্জমানোৰ সহ উপ্পাদনভাৰেন উপকারকো ধম্মো সহজাতপচ্চযো পকাসস্স পদীপো ৰিয. সো অরূপক্খন্ধাদিৰসেন ছব্বিধো হোতি. যথাহ – ‘‘চত্তারো খন্ধা অরূপিনো অঞ্ঞমঞ্ঞং সহজাতপচ্চযেন পচ্চযো. চত্তারো মহাভূতা অঞ্ঞমঞ্ঞং, ওক্কন্তিক্খণে নামরূপং অঞ্ঞমঞ্ঞং, চিত্তচেতসিকা ধম্মা চিত্তসমুট্ঠানানং রূপানং, মহাভূতা উপাদারূপানং, রূপিনো ধম্মা অরূপীনং ধম্মানং কিঞ্চিকালে সহজাতপচ্চযেন পচ্চযো, কিঞ্চিকালে ন সহজাতপচ্চযেন পচ্চযো’’তি (পট্ঠা. ১.১.৬). ইদং হদযৰত্থুমেৰ সন্ধায ৰুত্তং.

৬০০. অঞ্ঞমঞ্ঞং ¶ উপ্পাদনুপত্থম্ভনভাৰেন উপকারকো ধম্মো অঞ্ঞমঞ্ঞপচ্চযো অঞ্ঞমঞ্ঞূপত্থম্ভকং তিদণ্ডকং ৰিয. সো অরূপক্খন্ধাদিৰসেন তিৰিধো হোতি. যথাহ – ‘‘চত্তারো খন্ধা অরূপিনো অঞ্ঞমঞ্ঞপচ্চযেন পচ্চযো. চত্তারো মহাভূতা ওক্কন্তিক্খণে নামরূপং অঞ্ঞমঞ্ঞপচ্চযেন পচ্চযো’’তি (পট্ঠা. ১.১.৭).

৬০১. অধিট্ঠানাকারেন নিস্সযাকারেন চ উপকারকো ধম্মো নিস্সযপচ্চযো তরুচিত্তকম্মাদীনং পথৰীপটাদযো ৰিয. সো ‘‘চত্তারো খন্ধা অরূপিনো অঞ্ঞমঞ্ঞং নিস্সযপচ্চযেন পচ্চযো’’তি এৰং সহজাতে ৰুত্তনযেনেৰ ৰেদিতব্বো. ছট্ঠো পনেত্থ কোট্ঠাসো ‘‘চক্খাযতনং চক্খুৰিঞ্ঞাণধাতুযা…পে… সোত… ঘান… জিৰ্হা… কাযাযতনং কাযৰিঞ্ঞাণধাতুযা তংসম্পযুত্তকানঞ্চ ধম্মানং নিস্সযপচ্চযেন পচ্চযো. যং রূপং নিস্সায মনোধাতু চ মনোৰিঞ্ঞাণধাতু চ ৰত্তন্তি, তং রূপং মনোধাতুযা চ মনোৰিঞ্ঞাণধাতুযা চ তংসম্পযুত্তকানঞ্চ ধম্মানং নিস্সযপচ্চযেন পচ্চযো’’তি (পট্ঠা. ১.১.৮) এৰং ৰিভত্তো.

৬০২. উপনিস্সযপচ্চযোতি এত্থ পন অযং তাৰ ৰচনত্থো, তদধীনৰুত্তিতায অত্তনো ফলেন নিস্সিতো ন পটিক্খিত্তোতি নিস্সযো. যথা পন ভুসো আযাসো উপাযাসো, এৰং ভুসো নিস্সযো উপনিস্সযো, বলৰকারণস্সেতং অধিৰচনং. তস্মা বলৰকারণভাৰেন উপকারকো ধম্মো উপনিস্সযপচ্চযোতি ৰেদিতব্বো.

সো ¶ আরম্মণূপনিস্সযো অনন্তরূপনিস্সযো পকতূপনিস্সযোতি তিৰিধো হোতি. তত্থ ‘‘দানং দত্ৰা সীলং সমাদিযিত্ৰা উপোসথকম্মং কত্ৰা তং গরুংকত্ৰা পচ্চৰেক্খতি, পুব্বে সুচিণ্ণানি গরুংকত্ৰা পচ্চৰেক্খতি, ঝানা ৰুট্ঠহিত্ৰা ঝানং গরুংকত্ৰা পচ্চৰেক্খতি, সেক্খা গোত্রভুং গরুংকত্ৰা পচ্চৰেক্খন্তি, ৰোদানং গরুংকত্ৰা পচ্চৰেক্খন্তি. সেক্খা মগ্গা ৰুট্ঠহিত্ৰা মগ্গং গরুংকত্ৰা পচ্চৰেক্খন্তী’’তি (পট্ঠা. ১.১.৪২৩) এৰমাদিনা নযেন আরম্মণূপনিস্সযো তাৰ আরম্মণাধিপতিনা সদ্ধিং নানত্তং অকত্ৰাৰ ৰিভত্তো. তত্থ যং আরম্মণং গরুংকত্ৰা চিত্তচেতসিকা উপ্পজ্জন্তি, তং নিযমতো তেসু আরম্মণেসু বলৰারম্মণং হোতি. ইতি গরুকত্তব্বমত্তট্ঠেন ¶ আরম্মণাধিপতি, বলৰকারণট্ঠেন আরম্মণূপনিস্সযোতি এৰমেতেসং নানত্তং ৰেদিতব্বং.

অনন্তরূপনিস্সযোপি ‘‘পুরিমা পুরিমা কুসলা খন্ধা পচ্ছিমানং পচ্ছিমানং কুসলানং খন্ধানং উপনিস্সযপচ্চযেন পচ্চযো’’তিআদিনা (পট্ঠা. ১.১.৯) নযেন অনন্তরপচ্চযেন সদ্ধিং নানত্তং অকত্ৰাৰ ৰিভত্তো. মাতিকানিক্খেপে পন নেসং ‘‘চক্খুৰিঞ্ঞাণধাতু তংসম্পযুত্তকা চ ধম্মা মনোধাতুযা তংসম্পযুত্তকানঞ্চ ধম্মানং অনন্তরপচ্চযেন পচ্চযো’’তিআদিনা (পট্ঠা. ১.১.৪) নযেন অনন্তরস্স, ‘‘পুরিমা পুরিমা কুসলা ধম্মা পচ্ছিমানং পচ্ছিমানং কুসলানং ধম্মানং উপনিস্সযপচ্চযেন পচ্চযো’’তিআদিনা (পট্ঠা. ১.১.৯) নযেন উপনিস্সযস্স আগতত্তা নিক্খেপে ৰিসেসো অত্থি. সোপি অত্থতো একীভাৰমেৰ গচ্ছতি. এৰং সন্তেপি অত্তনো অত্তনো অনন্তরা অনুরূপস্স চিত্তুপ্পাদস্স পৰত্তনসমত্থতায অনন্তরতা, পুরিমচিত্তস্স পচ্ছিমচিত্তুপ্পাদনে বলৰতায অনন্তরূপনিস্সযতা ৰেদিতব্বা. যথা হি হেতুপচ্চযাদীসু কিঞ্চি ধম্মং ৰিনাপি চিত্তং উপ্পজ্জতি, ন এৰং অনন্তরচিত্তং ৰিনা চিত্তস্স উপ্পত্তি নাম অত্থি. তস্মা বলৰপচ্চযো হোতি. ইতি অত্তনো অত্তনো অনন্তরা অনুরূপচিত্তুপ্পাদনৰসেন অনন্তরপচ্চযো, বলৰকারণৰসেন অনন্তরূপনিস্সযোতি এৰমেতেসং নানত্তং ৰেদিতব্বং.

পকতূপনিস্সযো পন পকতো উপনিস্সযো পকতূপনিস্সযো. পকতো নাম অত্তনো সন্তানে নিপ্ফাদিতো ৰা সদ্ধাসীলাদি উপসেৰিতো ৰা উতুভোজনাদি. পকতিযা এৰ ৰা উপনিস্সযো পকতূপনিস্সযো, আরম্মণানন্তরেহি অসম্মিস্সোতি অত্থো. তস্স পকতূপনিস্সযো ‘‘সদ্ধং উপনিস্সায দানং দেতি, সীলং সমাদিযতি, উপোসথকম্মং করোতি, ঝানং উপ্পাদেতি, ৰিপস্সনং ¶ উপ্পাদেতি, মগ্গং উপ্পাদেতি, অভিঞ্ঞং উপ্পাদেতি, সমাপত্তিং উপ্পাদেতি. সীলং, সুতং, চাগং, পঞ্ঞং উপনিস্সায দানং দেতি…পে… সমাপত্তিং উপ্পাদেতি. সদ্ধা, সীলং, সুতং, চাগো, পঞ্ঞা সদ্ধায, সীলস্স, সুতস্স, চাগস্স, পঞ্ঞায, উপনিস্সযপচ্চযেন পচ্চযো’’তিআদিনা (পট্ঠা. ১.১.৪২৩) নযেন অনেকপ্পকারতো পভেদো ৰেদিতব্বো. ইতি ইমে সদ্ধাদযো পকতা চেৰ বলৰকারণট্ঠেন উপনিস্সযা চাতি পকতূপনিস্সযোতি.

৬০৩. পঠমতরং ¶ উপ্পজ্জিত্ৰা ৰত্তমানভাৰেন উপকারকো ধম্মো পুরেজাতপচ্চযো. সো পঞ্চদ্ৰারে ৰত্থারম্মণহদযৰত্থুৰসেন একাদসৰিধো হোতি. যথাহ – ‘‘চক্খাযতনং চক্খুৰিঞ্ঞাণধাতুযা তংসম্পযুত্তকানঞ্চ ধম্মানং পুরেজাতপচ্চযেন পচ্চযো. সোত…পে… ঘান, জিৰ্হা, কাযাযতনং, রূপ, সদ্দ, গন্ধ, রস, ফোট্ঠব্বাযতনং কাযৰিঞ্ঞাণধাতুযা তংসম্পযুত্তকানঞ্চ ধম্মানং পুরেজাতপচ্চযেন পচ্চযো. রূপ, সদ্দ, গন্ধ, রস, ফোট্ঠব্বাযতনং মনোধাতুযা. যং রূপং নিস্সায মনোধাতু চ মনোৰিঞ্ঞাণধাতু চ ৰত্তন্তি, তং রূপং মনোধাতুযা তংসম্পযুত্তকানঞ্চ ধম্মানং পুরেজাতপচ্চযেন পচ্চযো. মনোৰিঞ্ঞাণধাতুযা তংসম্পযুত্তকানঞ্চ ধম্মানং কিঞ্চিকালে পুরেজাতপচ্চযেন পচ্চযো. কিঞ্চিকালে ন পুরেজাতপচ্চযেন পচ্চযো’’তি (পট্ঠা. ১.১.১০).

৬০৪. পুরেজাতানং রূপধম্মানং উপত্থম্ভকত্তেন উপকারকো অরূপধম্মো পচ্ছাজাতপচ্চযো গিজ্ঝপোতকসরীরানং আহারাসাচেতনা ৰিয. তেন ৰুত্তং ‘‘পচ্ছাজাতা চিত্তচেতসিকা ধম্মা পুরেজাতস্স ইমস্স কাযস্স পচ্ছাজাতপচ্চযেন পচ্চযো’’তি (পট্ঠা. ১.১.১১).

৬০৫. আসেৰনট্ঠেন অনন্তরানং পগুণবলৰভাৰায উপকারকো ধম্মো আসেৰনপচ্চযো গন্থাদীসু পুরিমপুরিমাভিযোগো ৰিয. সো কুসলাকুসলকিরিযজৰনৰসেন তিৰিধো হোতি. যথাহ – ‘‘পুরিমা পুরিমা কুসলা ধম্মা পচ্ছিমানং পচ্ছিমানং কুসলানং ধম্মানং আসেৰনপচ্চযেন পচ্চযো. পুরিমা পুরিমা অকুসলা…পে… কিরিযাব্যাকতা ধম্মা পচ্ছিমানং পচ্ছিমানং কিরিযাব্যাকতানং ধম্মানং আসেৰনপচ্চযেন পচ্চযো’’তি (পট্ঠা. ১.১.১২).

৬০৬. চিত্তপযোগসঙ্খাতেন কিরিযভাৰেন উপকারকো ধম্মো কম্মপচ্চযো. সো নানক্খণিকায চেৰ কুসলাকুসলচেতনায সহজাতায চ সব্বাযপি চেতনায ৰসেন দুৰিধো হোতি ¶ . যথাহ – ‘‘কুসলাকুসলং কম্মং ৰিপাকানং খন্ধানং কটত্তা চ রূপানং কম্মপচ্চযেন পচ্চযো. চেতনা সম্পযুত্তকানং ধম্মানং তংসমুট্ঠানানঞ্চ রূপানং কম্মপচ্চযেন পচ্চযো’’তি (পট্ঠা. ১.১.১৩).

৬০৭. নিরুস্সাহসন্তভাৰেন ¶ নিরুস্সাহসন্তভাৰায উপকারকো ৰিপাকধম্মো ৰিপাকপচ্চযো. সো পৰত্তে তংসমুট্ঠানানং, পটিসন্ধিযং কটত্তা চ রূপানং, সব্বত্থ চ সম্পযুত্তধম্মানং পচ্চযো হোতি. যথাহ –‘‘ৰিপাকাব্যাকতো একো খন্ধো তিণ্ণন্নং খন্ধানং চিত্তসমুট্ঠানানঞ্চ রূপানং ৰিপাকপচ্চযেন পচ্চযো…পে… পটিসন্ধিক্খণে ৰিপাকাব্যাকতো একো খন্ধো তিণ্ণন্নং খন্ধানং কটত্তা চ রূপানং. তযো খন্ধা একস্স খন্ধস্স. দ্ৰে খন্ধা দ্ৰিন্নং খন্ধানং কটত্তা চ রূপানং ৰিপাকপচ্চযেন পচ্চযো. খন্ধা ৰত্থুস্স ৰিপাকপচ্চযেন পচ্চযো’’তি.

৬০৮. রূপারূপানং উপত্থম্ভকট্ঠেন উপকারকা চত্তারো আহারা আহারপচ্চযো. যথাহ –‘‘কবল়ীকারো আহারো ইমস্স কাযস্স আহারপচ্চযেন পচ্চযো. অরূপিনো আহারা সম্পযুত্তকানং ধম্মানং তংসমুট্ঠানানঞ্চ রূপানং আহারপচ্চযেন পচ্চযো’’তি (পট্ঠা. ১.১.১৫). পঞ্হাৰারে পন ‘‘পটিসন্ধিক্খণে ৰিপাকাব্যাকতা আহারা সম্পযুত্তকানং খন্ধানং কটত্তা চ রূপানং আহারপচ্চযেন পচ্চযো’’তিপি (পট্ঠা. ১.১.৪২৯) ৰুত্তং.

৬০৯. অধিপতিযট্ঠেন উপকারকা ইত্থিন্দ্রিযপুরিসিন্দ্রিযৰজ্জা ৰীসতিন্দ্রিযা ইন্দ্রিযপচ্চযো. তত্থ চক্খুন্দ্রিযাদযো অরূপধম্মানংযেৰ, সেসা রূপারূপানং পচ্চযা হোন্তি. যথাহ – ‘‘চক্খুন্দ্রিযং চক্খুৰিঞ্ঞাণধাতুযা…পে… সোত… ঘান… জিৰ্হা… কাযিন্দ্রিযং কাযৰিঞ্ঞাণধাতুযা তংসম্পযুত্তকানঞ্চ ধম্মানং ইন্দ্রিযপচ্চযেন পচ্চযো. রূপজীৰিতিন্দ্রিযং কটত্তারূপানং ইন্দ্রিযপচ্চযেন পচ্চযো. অরূপিনো ইন্দ্রিযা সম্পযুত্তকানং ধম্মানং তংসমুট্ঠানানঞ্চ রূপানং ইন্দ্রিযপচ্চযেন পচ্চযো’’তি (পট্ঠা. ১.১.১৬). পঞ্হাৰারে পন ‘‘পটিসন্ধিক্খণে ৰিপাকাব্যাকতা ইন্দ্রিযা সম্পযুত্তকানং খন্ধানং কটত্তা চ রূপানং ইন্দ্রিযপচ্চযেন পচ্চযো’’তিপি (পট্ঠা. ১.১.৪৩০) ৰুত্তং.

৬১০. উপনিজ্ঝাযনট্ঠেন উপকারকানি ঠপেত্ৰা দ্ৰিপঞ্চৰিঞ্ঞাণে সুখদুক্খৰেদনাদ্ৰযং সব্বানিপি ¶ কুসলাদিভেদানি সত্ত ঝানঙ্গানি ঝানপচ্চযো. যথাহ –‘‘ঝানঙ্গানি ঝানসম্পযুত্তকানং ধম্মানং তংসমুট্ঠানানঞ্চ রূপানং ঝানপচ্চযেন ¶ পচ্চযো’’তি (পট্ঠা. ১.১.১৭). পঞ্হাৰারে পন ‘‘পটিসন্ধিক্খণে ৰিপাকাব্যাকতানি ঝানঙ্গানি সম্পযুত্তকানং খন্ধানং কটত্তা চ রূপানং ঝানপচ্চযেন পচ্চযো’’তিপি (পট্ঠা. ১.১.৪৩১) ৰুত্তং.

৬১১. যতো ততো ৰা নিয্যানট্ঠেন উপকারকানি কুসলাদিভেদানি দ্ৰাদস মগ্গঙ্গানি মগ্গপচ্চযো. যথাহ – ‘‘মগ্গঙ্গানি মগ্গসম্পযুত্তকানং ধম্মানং তংসমুট্ঠানানঞ্চ রূপানং মগ্গপচ্চযেন পচ্চযো’’তি (পট্ঠা. ১.১.১৮). পঞ্হাৰারে পন ‘‘পটিসন্ধিক্খণে ৰিপাকাব্যাকতানি মগ্গঙ্গানি সম্পযুত্তকানং খন্ধানং কটত্তা চ রূপানং মগ্গপচ্চযেন পচ্চযো’’তিপি (পট্ঠা. ১.১.৪৩২) ৰুত্তং. এতে পন দ্ৰেপি ঝানমগ্গপচ্চযা দ্ৰিপঞ্চৰিঞ্ঞাণাহেতুকচিত্তেসু ন লব্ভন্তীতি ৰেদিতব্বা.

৬১২. একৰত্থুকএকারম্মণএকুপ্পাদেকনিরোধসঙ্খাতেন সম্পযুত্তভাৰেন উপকারকা অরূপধম্মা সম্পযুত্তপচ্চযো. যথাহ – ‘‘চত্তারো খন্ধা অরূপিনো অঞ্ঞমঞ্ঞং সম্পযুত্তপচ্চযেন পচ্চযো’’তি (পট্ঠা. ১.১.১৯).

৬১৩. একৰত্থুকাদিভাৰানুপগমেন উপকারকা রূপিনো ধম্মা অরূপীনং ধম্মানং, অরূপিনোপি রূপীনং ৰিপ্পযুত্তপচ্চযো. সো সহজাতপচ্ছাজাতপুরেজাতৰসেন তিৰিধো হোতি. ৰুত্তঞ্হেতং ‘‘সহজাতা কুসলা খন্ধা চিত্তসমুট্ঠানানং রূপানং ৰিপ্পযুত্তপচ্চযেন পচ্চযো. পচ্ছাজাতা কুসলা খন্ধা পুরেজাতস্স ইমস্স কাযস্স ৰিপ্পযুত্তপচ্চযেন পচ্চযো’’তি (পট্ঠা. ১.১.৪৩৪). অব্যাকতপদস্স পন সহজাতৰিভঙ্গে ‘‘পটিসন্ধিক্খণে ৰিপাকাব্যাকতা খন্ধা কটত্তারূপানং ৰিপ্পযুত্তপচ্চযেন পচ্চযো. খন্ধা ৰত্থুস্স. ৰত্থু খন্ধানং ৰিপ্পযুত্তপচ্চযেন পচ্চযো’’তিপি (পট্ঠা. ১.১.৪৩৪) ৰুত্তং. পুরেজাতং পন চক্খুন্দ্রিযাদিৰত্থুৰসেনেৰ ৰেদিতব্বং. যথাহ – ‘‘পুরেজাতং চক্খাযতনং চক্খুৰিঞ্ঞাণস্স…পে… কাযাযতনং কাযৰিঞ্ঞাণস্স ৰিপ্পযুত্তপচ্চযেন পচ্চযো. ৰত্থু ৰিপাকাব্যাকতানং কিরিযাব্যাকতানং খন্ধানং…পে… ৰত্থু কুসলানং খন্ধানং…পে… ৰত্থু অকুসলানং খন্ধানং ৰিপ্পযুত্তপচ্চযেন পচ্চযো’’তি (পট্ঠা. ১.১.৪৩৪).

৬১৪. পচ্চুপ্পন্নলক্খণেন ¶ অত্থিভাৰেন তাদিসস্সেৰ ধম্মস্স উপত্থম্ভকত্তেন উপকারকো ধম্মো অত্থিপচ্চযো. তস্স অরূপক্খন্ধমহাভূতনামরূপচিত্তচেতসিকমহাভূতআযতনৰত্থুৰসেন সত্তধা মাতিকা ¶ নিক্খিত্তা. যথাহ –‘‘চত্তারো খন্ধা অরূপিনো অঞ্ঞমঞ্ঞং অত্থিপচ্চযেন পচ্চযো, চত্তারো মহাভূতা, ওক্কন্তিক্খণে নামরূপং অঞ্ঞমঞ্ঞং. চিত্তচেতসিকা ধম্মা চিত্তসমুট্ঠানানং রূপানং. মহাভূতা উপাদারূপানং. চক্খাযতনং চক্খুৰিঞ্ঞাণধাতুযা…পে… কাযাযতনং…পে… রূপাযতনং…পে… ফোট্ঠব্বাযতনং কাযৰিঞ্ঞাণধাতুযা তংসম্পযুত্তকানঞ্চ ধম্মানং অত্থিপচ্চযেন পচ্চযো. রূপাযতনং…পে… ফোট্ঠব্বাযতনং মনোধাতুযা তংসম্পযুত্তকানঞ্চ ধম্মানং. যং রূপং নিস্সায মনোধাতু চ মনোৰিঞ্ঞাণধাতু চ ৰত্তন্তি, তং রূপং মনোধাতুযা চ মনোৰিঞ্ঞাণধাতুযা চ তংসম্পযুত্তকানঞ্চ ধম্মানং অত্থিপচ্চযেন পচ্চযো’’তি (পট্ঠা. ১.১.২১).

পঞ্হাৰারে পন সহজাতং পুরেজাতং পচ্ছাজাতং আহারং ইন্দ্রিযন্তিপি নিক্খিপিত্ৰা সহজাতে তাৰ ‘‘একো খন্ধো তিণ্ণন্নং খন্ধানং তংসমুট্ঠানানঞ্চ রূপানং অত্থিপচ্চযেন পচ্চযো’’তিআদিনা (পট্ঠা. ১.১.৪৩৫) নযেন নিদ্দেসো কতো, পুরেজাতে পুরেজাতানং চক্খাদীনং ৰসেন নিদ্দেসো কতো. পচ্ছাজাতে পুরেজাতস্স ইমস্স কাযস্স পচ্ছাজাতানং চিত্তচেতসিকানং পচ্চযৰসেন নিদ্দেসো কতো. আহারিন্দ্রিযেসু ‘‘কবল়ীকারো আহারো ইমস্স কাযস্স অত্থিপচ্চযেন পচ্চযো. রূপজীৰিতিন্দ্রিযং কটত্তারূপানং অত্থিপচ্চযেন পচ্চযো’’তি (পট্ঠা. ১.১.৪৩৫) এৰং নিদ্দেসো কতোতি.

৬১৫. অত্তনো অনন্তরা উপ্পজ্জমানানং অরূপধম্মানং পৰত্তিওকাসদানেন উপকারকা সমনন্তরনিরুদ্ধা অরূপধম্মা নত্থিপচ্চযো. যথাহ –‘‘সমনন্তরনিরুদ্ধা চিত্তচেতসিকা ধম্মা পটুপ্পন্নানং চিত্তচেতসিকানং ধম্মানং নত্থিপচ্চযেন পচ্চযো’’তি.

তে এৰ ৰিগতভাৰেন উপকারকত্তা ৰিগতপচ্চযো. যথাহ – ‘‘সমনন্তরৰিগতা চিত্তচেতসিকা ধম্মা পটুপ্পন্নানং চিত্তচেতসিকানং ধম্মানং ৰিগতপচ্চযেন পচ্চযো’’তি.

অত্থি পচ্চযধম্মা এৰ চ অৰিগতভাৰেন উপকারকত্তা অৰিগতপচ্চযোতি ৰেদিতব্বা. দেসনাৰিলাসেন ¶ পন তথা ৰিনেতব্বৰেনেয্যৰসেন ৰা অযং দুকো ৰুত্তো, অহেতুকদুকং ৰত্ৰাপি হেতুৰিপ্পযুত্তদুকো ৰিযাতি.

অৰিজ্জাপচ্চযাসঙ্খারপদৰিত্থারকথা

৬১৬. এৰমিমেসু ¶ চতুৰীসতিযা পচ্চযেসু অযং অৰিজ্জা,

পচ্চযো হোতি পুঞ্ঞানং, দুৰিধানেকধা পন;

পরেসং পচ্ছিমানং সা, একধা পচ্চযো মতাতি.

তত্থ পুঞ্ঞানং দুৰিধাতি আরম্মণপচ্চযেন চ উপনিস্সযপচ্চযেন চাতি দ্ৰেধা পচ্চযো হোতি. সা হি অৰিজ্জং খযতো ৰযতো সম্মসনকালে কামাৰচরানং পুঞ্ঞাভিসঙ্খারানং আরম্মণপচ্চযেন পচ্চযো হোতি. অভিঞ্ঞাচিত্তেন সমোহচিত্তং জাননকালে রূপাৰচরানং. অৰিজ্জাসমতিক্কমত্থায পন দানাদীনি চেৰ কামাৰচরপুঞ্ঞকিরিযৰত্থূনি পূরেন্তস্স, রূপাৰচরজ্ঝানানি চ উপ্পাদেন্তস্স দ্ৰিন্নম্পি তেসং উপনিস্সযপচ্চযেন পচ্চযো হোতি. তথা অৰিজ্জাসম্মূল়্হত্তা কামভৰরূপভৰসম্পত্তিযো পত্থেত্ৰা তানেৰ পুঞ্ঞানি করোন্তস্স.

অনেকধা পন পরেসন্তি অপুঞ্ঞাভিসঙ্খারানং অনেকধা পচ্চযো হোতি. কথং? এসা হি অৰিজ্জং আরব্ভ রাগাদীনং উপ্পজ্জনকালে আরম্মণপচ্চযেন, গরুংকত্ৰা অস্সাদনকালে আরম্মণাধিপতিআরম্মণূপনিস্সযেহি, অৰিজ্জাসম্মূল়্হস্স অনাদীনৰদস্সাৰিনো পাণাতিপাতাদীনি করোন্তস্স উপনিস্সযপচ্চযেন, দুতিযজৰনাদীনং অনন্তরসমনন্তরঅনন্তরূপনিস্সযাসেৰননত্থিৰিগতপচ্চযেহি, যংকিঞ্চি অকুসলং করোন্তস্স হেতু সহজাত অঞ্ঞমঞ্ঞ নিস্সয সম্পযুত্ত অত্থি অৰিগতপচ্চযেহীতি অনেকধা পচ্চযো হোতি.

পচ্ছিমানং সা একধা পচ্চযো মতাতি আনেঞ্জাভিসঙ্খারানং উপনিস্সযপচ্চযেনেৰ একধা পচ্চযো মতা. সো পনস্সা উপনিস্সযভাৰো পুঞ্ঞাভিসঙ্খারে ৰুত্তনযেনেৰ ৰেদিতব্বোতি.

৬১৭. এত্থাহ – কিং পনাযমেকাৰ অৰিজ্জা সঙ্খারানং পচ্চযো, উদাহু অঞ্ঞেপি পচ্চযা ¶ সন্তীতি? কিং পনেত্থ, যদি তাৰ একাৰ, এককারণৰাদো আপজ্জতি. অথঞ্ঞেপি সন্তি, ‘‘অৰিজ্জাপচ্চযা সঙ্খারা’’তি এককারণনিদ্দেসো নুপপজ্জতীতি? ন নুপপজ্জতি. কস্মা? যস্মা –

একং ন একতো ইধ, নানেকমনেকতোপি নো একং;

ফলমত্থি অত্থি পন এক-হেতুফলদীপনে অত্থো.

একতো ¶ হি কারণতো ন ইধ কিঞ্চি একং ফলমত্থি, ন অনেকং. নাপি অনেকেহি কারণেহি একং. অনেকেহি পন কারণেহি অনেকমেৰ হোতি. তথা হি অনেকেহি উতুপথৰীবীজসলিলসঙ্খাতেহি কারণেহি অনেকমেৰ রূপগন্ধরসাদিকং অঙ্কুরসঙ্খাতং ফলং উপ্পজ্জমানং দিস্সতি. যং পনেতং ‘‘অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণ’’ন্তি একেকহেতুফলদীপনং কতং, তত্থ অত্থো অত্থি, পযোজনং ৰিজ্জতি.

ভগৰা হি কত্থচি পধানত্তা, কত্থচি পাকটত্তা, কত্থচি অসাধারণত্তা দেসনাৰিলাসস্স চ ৰেনেয্যানঞ্চ অনুরূপতো একমেৰ হেতুং ৰা ফলং ৰা দীপেতি. ‘‘ফস্সপচ্চযা ৰেদনা’’তি হি পধানত্তা একমেৰ হেতুফলমাহ. ফস্সো হি ৰেদনায পধানহেতু যথাফস্সং ৰেদনা ৰৰত্থানতো. ৰেদনা চ ফস্সস্স পধানফলং যথাৰেদনং ফস্সৰৰত্থানতো. ‘‘সেম্হসমুট্ঠানা আবাধা’’তি (অ. নি. ১০.৬০) পাকটত্তা একং হেতুমাহ. পাকটো হি এত্থ সেম্হো, ন কম্মাদযো. ‘‘যে কেচি, ভিক্খৰে, অকুসলা ধম্মা, সব্বে তে অযোনিসোমনসিকারমূলকা’’তি অসাধারণত্তা একং হেতুমাহ. অসাধারণো হি অযোনিসোমনসিকারো অকুসলানং, সাধারণানি ৰত্থারম্মণাদীনীতি. তস্মা অযমিধ অৰিজ্জা ৰিজ্জমানেসুপি অঞ্ঞেসু ৰত্থারম্মণসহজাতধম্মাদীসু সঙ্খারকারণেসু ‘‘অস্সাদানুপস্সিনো তণ্হা পৰড্ঢতী’’তি (সং. নি. ২.৫২) চ ‘‘অৰিজ্জাসমুদযা আসৰসমুদযো’’তি (ম. নি. ১.১০৪) চ ৰচনতো অঞ্ঞেসম্পি তণ্হাদীনং সঙ্খারহেতূনং হেতূতি পধানত্তা, ‘‘অৰিদ্ৰা, ভিক্খৰে, অৰিজ্জাগতো পুঞ্ঞাভিসঙ্খারম্পি অভিসঙ্খরোতী’’তি পাকটত্তা, অসাধারণত্তা চ সঙ্খারানং হেতুভাৰেন দীপিতাতি ৰেদিতব্বা. এতেনেৰ চ একেকহেতুফলদীপনপরিহারৰচনেন সব্বত্থ একেকহেতুফলদীপনে পযোজনং ৰেদিতব্বন্তি.

৬১৮. এত্থাহ ¶ – এৰং সন্তেপি একন্তানিট্ঠফলায সাৰজ্জায অৰিজ্জায কথং পুঞ্ঞানেঞ্জাভিসঙ্খারপচ্চযত্তং যুজ্জতি? ন হি নিম্ববীজতো উচ্ছু উপ্পজ্জতীতি. কথং ন যুজ্জিস্সতি? লোকস্মিঞ্হি –

ৰিরুদ্ধো ¶ চাৰিরুদ্ধো চ, সদিসাসদিসো তথা;

ধম্মানং পচ্চযো সিদ্ধো, ৰিপাকা এৰ তে চ ন.

ধম্মানং হি ঠানসভাৰকিচ্চাদিৰিরুদ্ধো চাৰিরুদ্ধো চ পচ্চযো লোকে সিদ্ধো. পুরিমচিত্তং হি অপরচিত্তস্স ঠানৰিরুদ্ধো পচ্চযো, পুরিমসিপ্পাদিসিক্খা চ পচ্ছা পৰত্তমানানং সিপ্পাদিকিরিযানং. কম্মং রূপস্স সভাৰৰিরুদ্ধো পচ্চযো, খীরাদীনি চ দধিআদীনং. আলোকো চক্খুৰিঞ্ঞাণস্স কিচ্চৰিরুদ্ধো, গুল়াদযো চ আসৰাদীনং. চক্খুরূপাদযো পন চক্খুৰিঞ্ঞাণাদীনং ঠানাৰিরুদ্ধা পচ্চযা. পুরিমজৰনাদযো পচ্ছিমজৰনাদীনং সভাৰাৰিরুদ্ধা কিচ্চাৰিরুদ্ধা চ.

যথা চ ৰিরুদ্ধাৰিরুদ্ধা পচ্চযা সিদ্ধা, এৰং সদিসাসদিসাপি. সদিসমেৰ হি উতুআহারসঙ্খাতং রূপং রূপস্স পচ্চযো, সালিবীজাদীনি চ সালিফলাদীনং. অসদিসম্পি রূপং অরূপস্স, অরূপঞ্চ রূপস্স পচ্চযো হোতি, গোলোমাৰিলোম-ৰিসাণ-দধিতিলপিট্ঠাদীনি চ দুব্বা-সরভূতিণকাদীনং. যেসঞ্চ ধম্মানং তে ৰিরুদ্ধাৰিরুদ্ধসদিসাসদিসপচ্চযা, ন তে ধম্মা তেসং ধম্মানং ৰিপাকা এৰ.

ইতি অযং অৰিজ্জা ৰিপাকৰসেন একন্তানিট্ঠফলা, সভাৰৰসেন চ সাৰজ্জাপি সমানা সব্বেসম্পি এতেসং পুঞ্ঞাভিসঙ্খারাদীনং যথানুরূপং ঠানকিচ্চসভাৰৰিরুদ্ধাৰিরুদ্ধপচ্চযৰসেন, সদিসাসদিসপচ্চযৰসেন চ পচ্চযো হোতীতি ৰেদিতব্বা. সো চস্সা পচ্চযভাৰো ‘‘যস্স হি দুক্খাদীসু অৰিজ্জাসঙ্খাতং অঞ্ঞাণং অপ্পহীনং হোতি, সো দুক্খে তাৰ পুব্বন্তাদীসু চ অঞ্ঞাণেন সংসারদুক্খং সুখসঞ্ঞায গহেত্ৰা তস্স হেতুভূতে তিৰিধেপি সঙ্খারে আরভতী’’তিআদিনা নযেন ৰুত্তো এৰ.

৬১৯. অপিচ অযং অঞ্ঞোপি পরিযাযো –

চুতূপপাতে ¶ সংসারে, সঙ্খারানঞ্চ লক্খণে;

যো পটিচ্চসমুপ্পন্ন-ধম্মেসু চ ৰিমুয্হতি.

অভিসঙ্খরোতি সো এতে, সঙ্খারে তিৰিধে যতো;

অৰিজ্জা পচ্চযো তেসং, তিৰিধানম্পযং ততোতি.

কথং ¶ পন যো এতেসু ৰিমুয্হতি, সো তিৰিধেপেতে সঙ্খারে করোতীতি চে. চুতিযা তাৰ ৰিমূল়্হো ‘‘সব্বত্থ খন্ধানং ভেদো মরণ’’ন্তি চুতিং অগণ্হন্তো ‘‘সত্তো মরতি, সত্তস্স দেহন্তরসঙ্কমন’’ন্তিআদীনি ৰিকপ্পেতি.

উপপাতে ৰিমূল়্হো ‘‘সব্বত্থ খন্ধানং পাতুভাৰো জাতী’’তি উপপাতং অগণ্হন্তো ‘‘সত্তো উপপজ্জতি, সত্তস্স নৰসরীরপাতুভাৰো’’তিআদীনি ৰিকপ্পেতি.

সংসারে ৰিমূল়্হো যো এস,

‘‘খন্ধানঞ্চ পটিপাটি, ধাতুআযতনান চ;

অব্বোচ্ছিন্নং ৰত্তমানা, সংসারোতি পৰুচ্চতী’’তি. –

এৰং ৰণ্ণিতো সংসারো, তং এৰং অগণ্হন্তো ‘‘অযং সত্তো অস্মা লোকা পরং লোকং গচ্ছতি, পরস্মা লোকা ইমং লোকং আগচ্ছতী’’তিআদীনি ৰিকপ্পেতি.

সঙ্খারানং লক্খণে ৰিমূল়্হো সঙ্খারানং সভাৰলক্খণং সামঞ্ঞলক্খণঞ্চ অগণ্হন্তো সঙ্খারে অত্ততো অত্তনিযতো ধুৰতো সুখতো সুভতো ৰিকপ্পেতি.

পটিচ্চসমুপ্পন্নধম্মেসু ৰিমূল়্হো অৰিজ্জাদীহি সঙ্খারাদীনং পৰত্তিং অগণ্হন্তো ‘‘অত্তা জানাতি ৰা ন জানাতি ৰা, সো এৰ করোতি চ কারেতি চ. সো পটিসন্ধিযং উপপজ্জতি, তস্স অণুইস্সরাদযো কললাদিভাৰেন সরীরং সণ্ঠপেন্তো ইন্দ্রিযানি সম্পাদেন্তি. সো ইন্দ্রিযসম্পন্নো ফুসতি, ৰেদিযতি, তণ্হীযতি, উপাদিযতি, ঘটিযতি. সো পুন ভৰন্তরে ভৰতী’’তি ¶ ৰা, ‘‘সব্বে সত্তা নিযতিসঙ্গতিভাৰপরিণতা’’তি (দী. নি. ১.১৬৮) ৰা ৰিকপ্পেতি.

সো অৰিজ্জায অন্ধীকতো এৰং ৰিকপ্পেন্তো যথা নাম অন্ধো পথৰিযং ৰিচরন্তো মগ্গম্পি অমগ্গম্পি থলম্পি নিন্নম্পি সমম্পি ৰিসমম্পি পটিপজ্জতি, এৰং পুঞ্ঞম্পি অপুঞ্ঞম্পি আনেঞ্জাভিসঙ্খারম্পি অভিসঙ্খরোতীতি.

তেনেতং ৰুচ্চতি –

‘‘যথাপি ¶ নাম জচ্চন্ধো, নরো অপরিণাযকো;

একদা যাতি মগ্গেন, উম্মগ্গেনাপি একদা.

‘‘সংসারে সংসরং বালো, তথা অপরিণাযকো;

করোতি একদা পুঞ্ঞং, অপুঞ্ঞমপি একদা.

‘‘যদা চ ঞত্ৰা সো ধম্মং, সচ্চানি অভিসমেস্সতি;

তদা অৰিজ্জূপসমা, উপসন্তো চরিস্সতী’’তি.

অযং ‘‘অৰিজ্জাপচ্চযা সঙ্খারা’’তি পদস্মিং ৰিত্থারকথা.

সঙ্খারপচ্চযাৰিঞ্ঞাণপদৰিত্থারকথা

৬২০. সঙ্খারপচ্চযা ৰিঞ্ঞাণপদে – ৰিঞ্ঞাণন্তি চক্খুৰিঞ্ঞাণাদি ছব্বিধং. তত্থ চক্খুৰিঞ্ঞাণং কুসলৰিপাকং অকুসলৰিপাকন্তি দুৰিধং হোতি. তথা সোতঘানজিৰ্হাকআযৰিঞ্ঞাণানি. মনোৰিঞ্ঞাণং কুসলাকুসলৰিপাকা দ্ৰে মনোধাতুযো, তিস্সো অহেতুকমনোৰিঞ্ঞাণধাতুযো, অট্ঠ সহেতুকানি কামাৰচরৰিপাকচিত্তানি, পঞ্চ রূপাৰচরানি, চত্তারি অরূপাৰচরানীতি বাৰীসতিৰিধং হোতি. ইতি ইমেহি ছহি ৰিঞ্ঞাণেহি সব্বানিপি বাত্তিংস লোকিযৰিপাকৰিঞ্ঞাণানি ¶ সঙ্গহিতানি হোন্তি. লোকুত্তরানি পন ৰট্টকথায ন যুজ্জন্তীতি ন গহিতানি.

তত্থ সিযা ‘‘কথং পনেতং জানিতব্বং ইদং ৰুত্তপ্পকারং ৰিঞ্ঞাণং সঙ্খারপচ্চযা হোতী’’তি? উপচিতকম্মাভাৰে ৰিপাকাভাৰতো. ৰিপাকং হেতং, ৰিপাকঞ্চ ন উপচিতকম্মাভাৰে উপ্পজ্জতি. যদি উপ্পজ্জেয্য সব্বেসং সব্বৰিপাকানি উপ্পজ্জেয্যুং, ন চ উপ্পজ্জন্তীতি জানিতব্বমেতং সঙ্খারপচ্চযা ইদং ৰিঞ্ঞাণং হোতীতি.

কতরসঙ্খারপচ্চযা কতরং ৰিঞ্ঞাণন্তি চে. কামাৰচরপুঞ্ঞাভিসঙ্খারপচ্চযা তাৰ কুসলৰিপাকানি পঞ্চ চক্খুৰিঞ্ঞাণাদীনি, মনোৰিঞ্ঞাণে একা মনোধাতু, দ্ৰে মনোৰিঞ্ঞাণধাতুযো, অট্ঠ কামাৰচরমহাৰিপাকানীতি সোল়স. যথাহ –

‘‘কামাৰচরস্স কুসলস্স কম্মস্স কটত্তা উপচিতত্তা ৰিপাকং চক্খুৰিঞ্ঞাণং উপ্পন্নং হোতি… সোত… ঘান… জিৰ্হা… কাযৰিঞ্ঞাণং ¶ … ৰিপাকা মনোধাতু উপ্পন্না হোতি. সোমনস্সসহগতা মনোৰিঞ্ঞাণধাতু উপ্পন্না হোতি. উপেক্খাসহগতা মনোৰিঞ্ঞাণধাতু উপ্পন্না হোতি. সোমনস্সসহগতা ঞাণসম্পযুত্তা. সোমনস্সসহগতা ঞাণসম্পযুত্তা সসঙ্খারেন. সোমনস্সসহগতা ঞাণৰিপ্পযুত্তা. সোমনস্সসহগতা ঞাণৰিপ্পযুত্তা সসঙ্খারেন. উপেক্খাসহগতা ঞাণসম্পযুত্তা. উপেক্খাসহগতা ঞাণসম্পযুত্তা সসঙ্খারেন. উপেক্খাসহগতা ঞাণৰিপ্পযুত্তা. উপেক্খাসহগতা ঞাণৰিপ্পযুত্তা সসঙ্খারেনা’’তি (ধ. স. ৪৩১, ৪৯৮).

রূপাৰচরপুঞ্ঞাভিসঙ্খারপচ্চযা পন পঞ্চ রূপাৰচরৰিপাকানি. যথাহ –

‘‘তস্সেৰ রূপাৰচরস্স কুসলস্স কম্মস্স কটত্তা উপচিতত্তা ৰিপাকং ৰিৰিচ্চেৰ কামেহি পঠমং ঝানং…পে… পঞ্চমং ঝানং উপসম্পজ্জ ৰিহরতী’’তি (ধ. স. ৪৯৯). এৰং পুঞ্ঞাভিসঙ্খারপচ্চযা একৰীসতিৰিধং ৰিঞ্ঞাণং হোতি.

অপুঞ্ঞাভিসঙ্খারপচ্চযা ¶ পন অকুসলৰিপাকানি পঞ্চ চক্খুৰিঞ্ঞাণাদীনি, একা মনোধাতু, একা মনোৰিঞ্ঞাণধাতূতি এৰং সত্তৰিধং ৰিঞ্ঞাণং হোতি. যথাহ –

‘‘অকুসলস্স কম্মস্স কটত্তা উপচিতত্তা ৰিপাকং চক্খুৰিঞ্ঞাণং উপ্পন্নং হোতি… সোত… ঘান… জিৰ্হা… কাযৰিঞ্ঞাণং… ৰিপাকা মনোধাতু ৰিপাকা মনোৰিঞ্ঞাণধাতু উপ্পন্না হোতী’’তি (ধ. স. ৫৫৬).

আনেঞ্জাভিসঙ্খারপচ্চযা পন চত্তারি অরূপৰিপাকানীতি এৰং চতুব্বিধং ৰিঞ্ঞাণং হোতি. যথাহ –

‘‘তস্সেৰ অরূপাৰচরস্স কুসলস্স কম্মস্স কটত্তা উপচিতত্তা ৰিপাকং সব্বসো রূপসঞ্ঞানং সমতিক্কমা আকাসানঞ্চাযতনসঞ্ঞাসহগতং…পে… ৰিঞ্ঞাণঞ্চা…পে… আকিঞ্চঞ্ঞা…পে… নেৰসঞ্ঞানাসঞ্ঞাযতনসহগতং সুখস্স চ দুক্খস্স চ পহানা চতুত্থং ঝানং উপসম্পজ্জ ৰিহরতী’’তি (ধ. স. ৫০১).

৬২১. এৰং ¶ যং সঙ্খারপচ্চযা যং ৰিঞ্ঞাণং হোতি, তং ঞত্ৰা ইদানিস্স এৰং পৰত্তি ৰেদিতব্বা – সব্বমেৰ হি ইদং পৰত্তিপটিসন্ধিৰসেন দ্ৰেধা পৰত্ততি. তত্থ দ্ৰে পঞ্চৰিঞ্ঞাণানি, দ্ৰে মনোধাতুযো, সোমনস্সসহগতা অহেতুকমনোৰিঞ্ঞাণধাতূতি ইমানি তেরস পঞ্চৰোকারভৰে পৰত্তিযঞ্ঞেৰ পৰত্তন্তি. সেসানি একূনৰীসতি তীসু ভৰেসু যথানুরূপং পৰত্তিযম্পি পটিসন্ধিযম্পি পৰত্তন্তি.

কথং? কুসলৰিপাকানি তাৰ চক্খুৰিঞ্ঞাণাদীনি পঞ্চ কুসলৰিপাকেন অকুসলৰিপাকেন ৰা নিব্বত্তস্স যথাক্কমং পরিপাকং উপগতিন্দ্রিযস্স চক্খাদীনং আপাথগতং ইট্ঠং ইট্ঠমজ্ঝত্তং ৰা রূপাদিআরম্মণং আরব্ভ চক্খাদিপসাদং নিস্সায দস্সনসৰনঘাযনসাযনফুসনকিচ্চং সাধযমানানি পৰত্তন্তি. তথা অকুসলৰিপাকানি পঞ্চ. কেৰলঞ্হি তেসং অনিট্ঠং অনিট্ঠমজ্ঝত্তং ৰা আরম্মণং হোতি. অযমেৰ ৰিসেসো. দসপি চেতানি নিযতদ্ৰারারম্মণৰত্থুট্ঠানানি নিযতকিচ্চানেৰ চ ভৰন্তি.

ততো ¶ কুসলৰিপাকানং চক্খুৰিঞ্ঞাণাদীনং অনন্তরা কুসলৰিপাকা মনোধাতু তেসংযেৰ আরম্মণং আরব্ভ হদযৰত্থুং নিস্সায সম্পটিচ্ছনকিচ্চং সাধযমানা পৰত্ততি. তথা অকুসলৰিপাকানং অনন্তরা অকুসলৰিপাকা. ইদঞ্চ পন দ্ৰযং অনিযতদ্ৰারারম্মণং নিযতৰত্থুট্ঠানং নিযতকিচ্চঞ্চ হোতি.

সোমনস্সসহগতা পন অহেতুকমনোৰিঞ্ঞাণধাতু কুসলৰিপাকমনোধাতুযা অনন্তরা তস্সা এৰ আরম্মণং আরব্ভ হদযৰত্থুং নিস্সায সন্তীরণকিচ্চং সাধযমানা ছসু দ্ৰারেসু বলৰারম্মণে কামাৰচরসত্তানং যেভুয্যেন লোভসম্পযুত্তজৰনাৰসানে ভৰঙ্গৰীথিং পচ্ছিন্দিত্ৰা জৰনেন গহিতারম্মণে তদারম্মণৰসেন চ সকিং ৰা দ্ৰিক্খত্তুং ৰা পৰত্ততীতি মজ্ঝিমট্ঠকথাযং ৰুত্তং. অভিধম্মট্ঠকথাযং পন তদারম্মণে দ্ৰে চিত্তৰারা আগতা. ইদং পন চিত্তং তদারম্মণন্তি চ পিট্ঠিভৰঙ্গন্তি চাতি দ্ৰে নামানি লভতি. অনিযতদ্ৰারারম্মণং নিযতৰত্থুকং অনিযতট্ঠানকিচ্চঞ্চ হোতীতি. এৰং তাৰ তেরস পঞ্চৰোকারভৰে পৰত্তিযঞ্ঞেৰ পৰত্তন্তীতি ৰেদিতব্বানি.

সেসেসু ¶ একূনৰীসতিযা ন কিঞ্চি অত্তনো অনুরূপায পটিসন্ধিযা ন পৰত্ততি. পৰত্তিযং পন কুসলাকুসলৰিপাকা তাৰ দ্ৰে অহেতুকমনোৰিঞ্ঞাণধাতুযো পঞ্চদ্ৰারে কুসলাকুসলৰিপাকমনোধাতূনং অনন্তরা সন্তীরণকিচ্চং, ছসু দ্ৰারেসু পুব্বে ৰুত্তনযেনেৰ তদারম্মণকিচ্চং, অত্তনা দিন্নপটিসন্ধিতো উদ্ধং অসতি ভৰঙ্গুপচ্ছেদকে চিত্তুপ্পাদে ভৰঙ্গকিচ্চং, অন্তে চুতিকিচ্চঞ্চাতি চত্তারি কিচ্চানি সাধযমানা নিযতৰত্থুকা অনিযতদ্ৰারারম্মণট্ঠানকিচ্চা হুত্ৰা পৰত্তন্তি.

অট্ঠ কামাৰচরসহেতুকচিত্তানি ৰুত্তনযেনেৰ ছসু দ্ৰারেসু তদারম্মণকিচ্চং, অত্তনা দিন্নপটিসন্ধিতো উদ্ধং অসতি ভৰঙ্গুপচ্ছেদকে চিত্তুপ্পাদে ভৰঙ্গকিচ্চং, অন্তে চুতিকিচ্চঞ্চাতি তীণি কিচ্চানি সাধযমানানি নিযতৰত্থুকানি অনিযতদ্ৰারারম্মণট্ঠানকিচ্চানি হুত্ৰা পৰত্তন্তি.

পঞ্চ রূপাৰচরানি চত্তারি চ আরুপ্পানি অত্তনা দিন্নপটিসন্ধিতো উদ্ধং অসতি ভৰঙ্গুপচ্ছেদকে চিত্তুপ্পাদে ভৰঙ্গকিচ্চং, অন্তে চুতিকিচ্চঞ্চাতি কিচ্চদ্ৰযং সাধযমানানি পৰত্তন্তি ¶ . তেসু রূপাৰচরানি নিযতৰত্থারম্মণানি অনিযতট্ঠানকিচ্চানি, ইতরানি নিযতৰত্থুকানি নিযতারম্মণানি অনিযতট্ঠানকিচ্চানি হুত্ৰা পৰত্তন্তীতি এৰং তাৰ বাত্তিংসৰিধম্পি ৰিঞ্ঞাণং পৰত্তিযং সঙ্খারপচ্চযা পৰত্ততি. তত্রাস্স তে তে সঙ্খারা কম্মপচ্চযেন চ উপনিস্সযপচ্চযেন চ পচ্চযা হোন্তি.

৬২২. যং পন ৰুত্তং ‘‘সেসেসু একূনৰীসতিযা ন কিঞ্চি অত্তনো অনুরূপায পটিসন্ধিযা ন পৰত্ততী’’তি, তং অতিসংখিত্তত্তা দুব্বিজানং. তেনস্স ৰিত্থারনযদস্সনত্থং ৰুচ্চতি – কতি পটিসন্ধিযো, কতি পটিসন্ধিচিত্তানি, কেন কত্থ পটিসন্ধি হোতি, কিং পটিসন্ধিযা আরম্মণন্তি?

অসঞ্ঞপটিসন্ধিযা সদ্ধিং ৰীসতি পটিসন্ধিযো. ৰুত্তপ্পকারানেৰ একূনৰীসতি পটিসন্ধিচিত্তানি. তত্থ অকুসলৰিপাকায অহেতুকমনোৰিঞ্ঞাণধাতুযা অপাযেসু পটিসন্ধি হোতি. কুসলৰিপাকায মনুস্সলোকে জচ্চন্ধজাতিবধিরজাতিউম্মত্তকজাতিএল়মূগনপুংসকাদীনং. অট্ঠহি সহেতুককামাৰচরৰিপাকেহি কামাৰচরদেৰেসু চেৰ মনুস্সেসু চ পুঞ্ঞৰন্তানং পটিসন্ধি হোতি. পঞ্চহি রূপাৰচরৰিপাকেহি রূপীব্রহ্মলোকে. চতূহি অরূপাৰচরৰিপাকেহি অরূপলোকেতি. যেন চ যত্থ পটিসন্ধি হোতি ¶ , সা এৰ তস্স অনুরূপা পটিসন্ধি নাম. সঙ্খেপতো পন পটিসন্ধিযা তীণি আরম্মণানি হোন্তি অতীতং পচ্চুপ্পন্নং নৰত্তব্বঞ্চ. অসঞ্ঞা পটিসন্ধি অনারম্মণাতি.

তত্থ ৰিঞ্ঞাণঞ্চাযতননেৰসঞ্ঞানাসঞ্ঞাযতনপটিসন্ধীনং অতীতমেৰ আরম্মণং. দসন্নং কামাৰচরানং অতীতং ৰা পচ্চুপ্পন্নং ৰা. সেসানং নৰত্তব্বমেৰ. এৰং তীসু আরম্মণেসু পৰত্তমানা পন পটিসন্ধি যস্মা অতীতারম্মণস্স ৰা নৰত্তব্বারম্মণস্স ৰা চুতিচিত্তস্স অনন্তরমেৰ পৰত্ততি. পচ্চুপ্পন্নারম্মণং পন চুতিচিত্তং নাম নত্থি. তস্মা দ্ৰীসু আরম্মণেসু অঞ্ঞতরারম্মণায চুতিযা অনন্তরা তীসু আরম্মণেসু অঞ্ঞতরারম্মণায পটিসন্ধিযা সুগতিদুগ্গতিৰসেন পৰত্তনাকারো ৰেদিতব্বো.

৬২৩. সেয্যথিদং – কামাৰচরসুগতিযং তাৰ ঠিতস্স পাপকম্মিনো পুগ্গলস্স ‘‘তানিস্স তস্মিং সমযে ওলম্বন্তী’’তিআদিৰচনতো (ম. নি. ৩.২৪৮) মরণমঞ্চে নিপন্নস্স ¶ যথূপচিতং পাপকম্মং ৰা কম্মনিমিত্তং ৰা মনোদ্ৰারে আপাথমাগচ্ছতি. তং আরব্ভ উপ্পন্নায তদারম্মণপরিযোসানায জৰনৰীথিযা অনন্তরং ভৰঙ্গৰিসযং আরম্মণং কত্ৰা চুতিচিত্তং উপ্পজ্জতি. তস্মিং নিরুদ্ধে তদেৰ আপাথগতং কম্মং ৰা কম্মনিমিত্তং ৰা আরব্ভ অনুপচ্ছিন্নকিলেসবলৰিনামিতং দুগ্গতিপরিযাপন্নং পটিসন্ধিচিত্তং উপ্পজ্জতি. অযং অতীতারম্মণায চুতিযা অনন্তরা অতীতারম্মণা পটিসন্ধি.

অপরস্স মরণসমযে ৰুত্তপ্পকারকম্মৰসেন নরকাদীসু অগ্গিজালৰণ্ণাদিকং দুগ্গতিনিমিত্তং মনোদ্ৰারে আপাথমাগচ্ছতি, তস্স দ্ৰিক্খত্তুং ভৰঙ্গে উপ্পজ্জিত্ৰা নিরুদ্ধে তং আরম্মণং আরব্ভ একং আৰজ্জনং, মরণস্স আসন্নভাৰেন মন্দীভূতৰেগত্তা পঞ্চ জৰনানি, দ্ৰে তদারম্মণানীতি তীণি ৰীথিচিত্তানি উপ্পজ্জন্তি. ততো ভৰঙ্গৰিসযং আরম্মণং কত্ৰা একং চুতিচিত্তং. এত্তাৰতা একাদস চিত্তক্খণা অতীতা হোন্তি. অথস্স অৰসেসপঞ্চচিত্তক্খণাযুকে তস্মিঞ্ঞেৰ আরম্মণে পটিসন্ধিচিত্তং উপ্পজ্জতি. অযং অতীতারম্মণায চুতিযা অনন্তরা পচ্চুপ্পন্নারম্মণা পটিসন্ধি.

অপরস্স ¶ মরণসমযে পঞ্চন্নং দ্ৰারানং অঞ্ঞতরস্মিং রাগাদিহেতুভূতং হীনমারম্মণং আপাথমাগচ্ছতি. তস্স যথাক্কমেন উপ্পন্নে ৰোট্ঠব্বনাৰসানে মরণস্স আসন্নভাৰেন মন্দীভূতৰেগত্তা পঞ্চ জৰনানি, দ্ৰে তদারম্মণানি চ উপ্পজ্জন্তি. ততো ভৰঙ্গৰিসযং আরম্মণং কত্ৰা একং চুতিচিত্তং. এত্তাৰতা চ দ্ৰে ভৰঙ্গানি, আৰজ্জনং, দস্সনং, সম্পটিচ্ছনং, সন্তীরণং, ৰোট্ঠব্বনং, পঞ্চ জৰনানি, দ্ৰে তদারম্মণানি, একং চুতিচিত্তন্তি পঞ্চদস চিত্তক্খণা অতীতা হোন্তি. অথাৰসেসএকচিত্তক্খণাযুকে তস্মিঞ্ঞেৰ আরম্মণে পটিসন্ধিচিত্তং উপ্পজ্জতি. অযম্পি অতীতারম্মণায চুতিযা অনন্তরা পচ্চুপ্পন্নারম্মণা পটিসন্ধি. এস তাৰ অতীতারম্মণায সুগতিচুতিযা অনন্তরা অতীতপচ্চুপ্পন্নারম্মণায দুগ্গতিপটিসন্ধিযা পৰত্তনাকারো.

৬২৪. দুগ্গতিযং ঠিতস্স পন উপচিতানৰজ্জকম্মস্স ৰুত্তনযেনেৰ তং অনৰজ্জকম্মং ৰা কম্মনিমিত্তং ৰা মনোদ্ৰারে আপাথমাগচ্ছতীতি কণ্হপক্খে সুক্কপক্খং ঠপেত্ৰা সব্বং পুরিমনযেনেৰ ৰেদিতব্বং. অযং অতীতারম্মণায দুগ্গতিচুতিযা অনন্তরা অতীতপচ্চুপ্পন্নারম্মণায সুগতিপটিসন্ধিযা পৰত্তনাকারো.

৬২৫. সুগতিযং ¶ ঠিতস্স পন উপচিতানৰজ্জকম্মস্স ‘‘তানিস্স তস্মিং সমযে ওলম্বন্তী’’তিআদিৰচনতো মরণমঞ্চে নিপন্নস্স যথূপচিতং অনৰজ্জকম্মং ৰা কম্মনিমিত্তং ৰা মনোদ্ৰারে আপাথমাগচ্ছতি. তঞ্চ খো উপচিতকামাৰচরানৰজ্জকম্মস্সেৰ. উপচিতমহগ্গতকম্মস্স পন কম্মনিমিত্তমেৰ আপাথমাগচ্ছতি. তং আরব্ভ উপ্পন্নায তদারম্মণপরিযোসানায সুদ্ধায ৰা জৰনৰীথিযা অনন্তরং ভৰঙ্গৰিসযং আরম্মণং কত্ৰা চুতিচিত্তং উপ্পজ্জতি. তস্মিং নিরুদ্ধে তমেৰ আপাথগতং কম্মং ৰা কম্মনিমিত্তং ৰা আরব্ভ অনুপচ্ছিন্নকিলেসবলৰিনামিতং সুগতিপরিযাপন্নং পটিসন্ধিচিত্তং উপ্পজ্জতি. অযং অতীতারম্মণায চুতিযা অনন্তরা অতীতারম্মণা ৰা নৰত্তব্বারম্মণা ৰা পটিসন্ধি.

অপরস্স মরণসমযে কামাৰচরঅনৰজ্জকম্মৰসেন মনুস্সলোকে মাতুকুচ্ছিৰণ্ণসঙ্খাতং ৰা দেৰলোকে উয্যানৰিমানকপ্পরুক্খাদিৰণ্ণসঙ্খাতং ৰা সুগতিনিমিত্তং মনোদ্ৰারে আপাথমাগচ্ছতি, তস্স দুগ্গতিনিমিত্তে ¶ দস্সিতানুক্কমেনেৰ চুতিচিত্তানন্তরং পটিসন্ধিচিত্তং উপ্পজ্জতি. অযং অতীতারম্মণায চুতিযা অনন্তরা পচ্চুপ্পন্নারম্মণা পটিসন্ধি.

অপরস্স মরণসমযে ঞাতকা ‘‘অযং তাত তৰত্থায বুদ্ধপূজা করীযতি চিত্তং পসাদেহী’’তি ৰত্ৰা পুপ্ফদামপটাকাদিৰসেন রূপারম্মণং ৰা, ধম্মস্সৰনতূরিযপূজাদিৰসেন সদ্দারম্মণং ৰা, ধূমৰাসগন্ধাদিৰসেন গন্ধারম্মণং ৰা, ‘‘ইদং তাত সাযস্সু তৰত্থায দাতব্বদেয্যধম্ম’’ন্তি ৰত্ৰা মধুফাণিতাদিৰসেন রসারম্মণং ৰা, ‘‘ইদং তাত ফুসস্সু তৰত্থায দাতব্বদেয্যধম্ম’’ন্তি ৰত্ৰা চীনপট্টসোমারপট্টাদিৰসেন ফোট্ঠব্বারম্মণং ৰা পঞ্চদ্ৰারে উপসংহরন্তি, তস্স তস্মিং আপাথগতে রূপাদিআরম্মণে যথাক্কমেন উপ্পন্নৰোট্ঠব্বনাৰসানে মরণস্স আসন্নভাৰেন মন্দীভূতৰেগত্তা পঞ্চ জৰনানি, দ্ৰে তদারম্মণানি চ উপ্পজ্জন্তি. ততো ভৰঙ্গৰিসযং আরম্মণং কত্ৰা একং চুতিচিত্তং, তদৰসানে তস্মিঞ্ঞেৰ একচিত্তক্খণট্ঠিতিকে আরম্মণে পটিসন্ধিচিত্তং উপ্পজ্জতি. অযম্পি অতীতারম্মণায চুতিযা অনন্তরা পচ্চুপ্পন্নারম্মণা পটিসন্ধি.

৬২৬. অপরস্স পন পথৰীকসিণজ্ঝানাদিৰসেন পটিলদ্ধমহগ্গতস্স সুগতিযং ঠিতস্স মরণসমযে কামাৰচরকুসলকম্ম-কম্মনিমিত্ত-গতিনিমিত্তানং ৰা অঞ্ঞতরং, পথৰীকসিণাদিকং ৰা নিমিত্তং, মহগ্গতচিত্তং ৰা মনোদ্ৰারে আপাথমাগচ্ছতি, চক্খুসোতানং ৰা অঞ্ঞতরস্মিং কুসলুপ্পত্তিহেতুভূতং ¶ পণীতমারম্মণং আপাথমাগচ্ছতি, তস্স যথাক্কমেন উপ্পন্নৰোট্ঠব্বনাৰসানে মরণস্স আসন্নভাৰেন মন্দীভূতৰেগত্তা পঞ্চ জৰনানি উপ্পজ্জন্তি. মহগ্গতগতিকানং পন তদারম্মণং নত্থি, তস্মা জৰনানন্তরংযেৰ ভৰঙ্গৰিসযং আরম্মণং কত্ৰা একং চুতিচিত্তং উপ্পজ্জতি. তস্সাৰসানে কামাৰচরমহগ্গতসুগতীনং অঞ্ঞতরসুগতিপরিযাপন্নং যথূপট্ঠিতেসু আরম্মণেসু অঞ্ঞতরারম্মণং পটিসন্ধিচিত্তং উপ্পজ্জতি. অযং নৰত্তব্বারম্মণায সুগতিচুতিযা অনন্তরা অতীতপচ্চুপ্পন্ননৰত্তব্বারম্মণানং অঞ্ঞতরারম্মণা পটিসন্ধি.

এতেনানুসারেন আরুপ্পচুতিযাপি অনন্তরা পটিসন্ধি ৰেদিতব্বা. অযং অতীতনৰত্তব্বারম্মণায সুগতিচুতিযা অনন্তরা অতীতনৰত্তব্বপচ্চুপ্পন্নারম্মণায পটিসন্ধিযা পৰত্তনাকারো.

৬২৭. দুগ্গতিযং ¶ ঠিতস্স পন পাপকম্মিনো ৰুত্তনযেনেৰ তং কম্মং কম্মনিমিত্তং গতিনিমিত্তং ৰা মনোদ্ৰারে. পঞ্চদ্ৰারে ৰা পন অকুসলুপ্পত্তি হেতুভূতং আরম্মণং আপাথমাগচ্ছতি, অথস্স যথাক্কমেন চুতিচিত্তাৰসানে দুগ্গতিপরিযাপন্নং তেসু আরম্মণেসু অঞ্ঞতরারম্মণং পটিসন্ধিচিত্তং উপ্পজ্জতি. অযং অতীতারম্মণায দুগ্গতিচুতিযা অনন্তরা অতীতপচ্চুপ্পন্নারম্মণায পটিসন্ধিযা পৰত্তনাকারোতি. এত্তাৰতা একূনৰীসতিৰিধস্সাপি ৰিঞ্ঞাণস্স পটিসন্ধিৰসেন পৰত্তি দীপিতা হোতি.

৬২৮. তযিদং সব্বম্পি এৰং,

পৰত্তমানং সন্ধিম্হি, দ্ৰেধা কম্মেন ৰত্ততি;

মিস্সাদীহি চ ভেদেহি, ভেদস্স দুৰিধাদিকো.

ইদঞ্হি একূনৰীসতিৰিধম্পি ৰিপাকৰিঞ্ঞাণং পটিসন্ধিম্হি পৰত্তমানা দ্ৰেধা কম্মেন ৰত্ততি. যথাসকঞ্হি একস্স জনককম্মং নানাক্খণিককম্মপচ্চযেন চেৰ উপনিস্সযপচ্চযেন চ পচ্চযো হোতি. ৰুত্তঞ্হেতং ‘‘কুসলাকুসলং কম্মং ৰিপাকস্স উপনিস্সযপচ্চযেন পচ্চযো’’তি (পট্ঠা. ১.১.৪২৩). এৰং ৰত্তমানস্স পনস্স মিস্সাদীহি ভেদেহি দুৰিধাদিকোপি ভেদো ৰেদিতব্বো.

সেয্যথিদং ¶ – ইদঞ্হি পটিসন্ধিৰসেন একধা পৰত্তমানম্পি রূপেন সহ মিস্সামিস্সভেদতো দুৰিধং. কামরূপারূপভৰভেদতো তিৰিধং. অণ্ডজজলাবুজ-সংসেদজ-ওপপাতিকযোনিৰসেন চতুব্বিধং. গতিৰসেন পঞ্চৰিধং. ৰিঞ্ঞাণট্ঠিতিৰসেন সত্তৰিধং. সত্তাৰাসৰসেন অট্ঠৰিধং হোতি.

৬২৯. তত্থ,

মিস্সং দ্ৰিধা ভাৰভেদা, সভাৰং তত্থ চ দ্ৰিধা;

দ্ৰে ৰা তযো ৰা দসকা, ওমতো আদিনা সহ.

মিস্সং দ্ৰিধা ভাৰভেদাতি যং হেতং এত্থ অঞ্ঞত্র অরূপভৰা রূপমিস্সং পটিসন্ধিৰিঞ্ঞাণং উপ্পজ্জতি, তং রূপভৰে ইত্থিন্দ্রিযপুরিসিন্দ্রিযসঙ্খাতেন ভাৰেন ৰিনা উপ্পত্তিতো. কামভৰে অঞ্ঞত্র জাতিপণ্ডকপটিসন্ধিযা ভাৰেন সহ উপ্পত্তিতো স-ভাৰং, অ-ভাৰন্তি দুৰিধং হোতি.

সভাৰং ¶ তত্থ চ দ্ৰিধাতি তত্থাপি চ যং স-ভাৰং, তং ইত্থিপুরিসভাৰানং অঞ্ঞতরেন সহ উপ্পত্তিতো দুৰিধমেৰ হোতি.

দ্ৰে ৰা তযো ৰা দসকা ওমতো আদিনা সহাতি যং হেতমেত্থ ‘‘মিস্সং অমিস্স’’ন্তি দুকে আদিভূতং রূপমিস্সং পটিসন্ধিৰিঞ্ঞাণং, তেন সহ ৰত্থুকাযদসকৰসেন দ্ৰে ৰা, ৰত্থুকাযভাৰদসকৰসেন তযো ৰা দসকা ওমতো উপ্পজ্জন্তি, নত্থি ইতো পরং রূপপরিহানীতি. তং পনেতং এৰং ওমকপরিমাণং উপ্পজ্জমানং অণ্ডজজলাবুজনামিকাসু দ্ৰীসু যোনীসু জাতিউণ্ণায একেন অংসুনা উদ্ধটসপ্পিমণ্ডপ্পমাণং কললন্তি লদ্ধসঙ্খং হুত্ৰা উপ্পজ্জতি. তত্থ যোনীনং গতিৰসেন সম্ভৰভেদো ৰেদিতব্বো.

৬৩০. এতাসু হি,

নিরযে ভুম্মৰজ্জেসু, দেৰেসু চ ন যোনিযো;

তিস্সো পুরিমিকা হোন্তি, চতস্সোপি গতিত্তযে.

তত্থ ¶ দেৰেসু চাতি চসদ্দেন যথা নিরযে চ ভুম্মৰজ্জেসু চ দেৰেসু, এৰং নিজ্ঝামতণ্হিকপেতেসু চ পুরিমিকা তিস্সো যোনিযো ন সন্তীতি ৰেদিতব্বা. ওপপাতিকা এৰ হি তে হোন্তি. সেসে পন তিরচ্ছানপেত্তিৰিসযমনুস্সসঙ্খাতে গতিত্তযে পুব্বে ৰজ্জিতভুম্মদেৰেসু চ চতস্সোপি যোনিযো হোন্তি. তত্থ,

তিংস নৰ চেৰ রূপীসু, সত্ততি উক্কংসতোথ রূপানি;

সংসেদুপপাতযোনিসু, অথ ৰা অৰকংসতো তিংস.

রূপীব্রহ্মেসু তাৰ ওপপাতিকযোনিকেসু চক্খুসোতৰত্থুদসকানং জীৰিতনৰকস্স চাতি চতুন্নং কলাপানং ৰসেন তিংস চ নৰ চ পটিসন্ধিৰিঞ্ঞাণেন সহ রূপানি উপ্পজ্জন্তি. রূপী ব্রহ্মে পন ঠপেত্ৰা অঞ্ঞেসু সংসেদজওপপাতিকযোনিকেসু উক্কংসতো চক্খুসোতঘানজিৰ্হাকাযৰত্থুভাৰদসকানং ৰসেন সত্ততি, তানি চ নিচ্চং দেৰেসু. তত্থ ৰণ্ণো গন্ধো রসো ওজা চতস্সো চাপি ধাতুযো চক্খুপসাদো জীৰিতন্তি অযং দসরূপপরিমাণো রূপপুঞ্জো চক্খুদসকো নাম. এৰং সেসা ৰেদিতব্বা ¶ . অৰকংসতো পন জচ্চন্ধবধিরঅঘানকনপুংসকস্স জিৰ্হাকাযৰত্থুদসকানং ৰসেন তিংস রূপানি উপ্পজ্জন্তি. উক্কংসাৰকংসানং পন অন্তরে অনুরূপতো ৰিকপ্পো ৰেদিতব্বো.

৬৩১. এৰং ৰিদিত্ৰা পুন,

খন্ধারম্মণগতিহেতু-ৰেদনাপীতিৰিতক্কৰিচারেহি;

ভেদাভেদৰিসেসো, চুতিসন্ধীনং পরিঞ্ঞেয্যো.

যা হেসা মিস্সামিস্সতো দুৰিধা পটিসন্ধি, যা চস্সা অতীতানন্তরা চুতি, তাসং ইমেহি খন্ধাদীহি ভেদাভেদৰিসেসো ঞাতব্বোতি অত্থো.

কথং? কদাচি হি চতুক্খন্ধায আরুপ্পচুতিযা অনন্তরা চতুক্খন্ধাৰ আরম্মণতোপি অভিন্না পটিসন্ধি হোতি. কদাচি অমহগ্গতবহিদ্ধারম্মণায মহগ্গতঅজ্ঝত্তারম্মণা. অযং তাৰ অরূপভূমীসুযেৰ নযো. কদাচি পন চতুক্খন্ধায অরূপচুতিযা অনন্তরা পঞ্চক্খন্ধা কামাৰচরপটিসন্ধি ¶ . কদাচি পঞ্চক্খন্ধায কামাৰচরচুতিযা রূপাৰচরচুতিযা ৰা অনন্তরা চতুক্খন্ধা অরূপপটিসন্ধি. এৰং অতীতারম্মণায চুতিযা পচ্চুপ্পন্নারম্মণা পটিসন্ধি. একচ্চসুগতিচুতিযা একচ্চদুগ্গতিপটিসন্ধি. অহেতুকচুতিযা সহেতুকপটিসন্ধি. দুহেতুকচুতিযা তিহেতুকপটিসন্ধি. উপেক্খাসহগতচুতিযা সোমনস্সসহগতপটিসন্ধি. অপ্পীতিকচুতিযা সপ্পীতিকপটিসন্ধি. অৰিতক্কচুতিযা সৰিতক্কপটিসন্ধি. অৰিচারচুতিযা সৰিচারপটিসন্ধি. অৰিতক্কাৰিচারচুতিযা সৰিতক্কসৰিচারপটিসন্ধীতি তস্স তস্স ৰিপরীততো চ যথাযোগং যোজেতব্বং.

৬৩২.

লদ্ধপচ্চযমিতি ধম্মমত্তমেতং ভৰন্তরমুপেতি;

নাস্স ততো সঙ্কন্তি, ন ততো হেতুং ৰিনা হোতি.

ইতি হেতং লদ্ধপচ্চযং রূপারূপধম্মমত্তং উপ্পজ্জমানং ভৰন্তরমুপেতীতি ৰুচ্চতি, ন সত্তো, ন জীৰো. তস্স চ নাপি অতীতভৰতো ইধ সঙ্কন্তি অত্থি. নাপি ততো হেতুং ৰিনা ইধ পাতুভাৰো. তযিদং পাকটেন মনুস্সচুতিপটিসন্ধিক্কমেন পকাসযিস্সাম.

অতীতভৰস্মিং ¶ হি সরসেন উপক্কমেন ৰা সমাসন্নমরণস্স অসয্হানং সব্বঙ্গপচ্চঙ্গসন্ধিবন্ধনচ্ছেদকানং মারণন্তিকৰেদনাসত্থানং সন্নিপাতং অসহন্তস্স আতপে পক্খিত্তহরিততালপণ্ণমিৰ কমেন উপসুস্সমানে সরীরে নিরুদ্ধেসু চক্খাদীসু ইন্দ্রিযেসু হদযৰত্থুমত্তে পতিট্ঠিতেসু কাযিন্দ্রিযমনিন্দ্রিযজীৰিতিন্দ্রিযেসু তঙ্খণাৰসেসহদযৰত্থুসন্নিস্সিতং ৰিঞ্ঞাণং গরুকসমাসেৰিতাসন্নপুব্বকতানং অঞ্ঞতরং লদ্ধাৰসেসপচ্চযসঙ্খারসঙ্খাতং কম্মং, তদুপট্ঠাপিতং ৰা কম্মনিমিত্তগতিনিমিত্তসঙ্খাতং ৰিসযং আরব্ভ পৰত্ততি. তদেৰং পৰত্তমানং তণ্হাৰিজ্জানং অপ্পহীনত্তা অৰিজ্জাপটিচ্ছাদিতাদীনৰে তস্মিং ৰিসযে তণ্হা নামেতি, সহজাতসঙ্খারা খিপন্তি. তং সন্ততিৰসেন তণ্হায নামিযমানং সঙ্খারেহি খিপ্পমানং ওরিমতীররুক্খৰিনিবদ্ধরজ্জুমালম্বিত্ৰা মাতিকাতিক্কমকো ৰিয পুরিমঞ্চ নিস্সযং জহতি, অপরঞ্চ কম্মসমুট্ঠাপিতং নিস্সযং অস্সাদযমানং ৰা অনস্সাদযমানং ৰা আরম্মণাদীহিযেৰ পচ্চযেহি পৰত্ততীতি.

এত্থ চ পুরিমং চৰনতো চুতি. পচ্ছিমং ভৰন্তরাদিপটিসন্ধানতো পটিসন্ধীতি ৰুচ্চতি ¶ . তদেতং নাপি পুরিমভৰা ইধাগতং, নাপি ততো কম্মসঙ্খারনতিৰিসযাদিহেতুং ৰিনা পাতুভূতন্তি ৰেদিতব্বং.

৬৩৩.

সিযুং নিদস্সনানেত্থ, পটিঘোসাদিকা অথ;

সন্তানবন্ধতো নত্থি, একতা নাপি নানতা.

এত্থ চেতস্স ৰিঞ্ঞাণস্স পুরিমভৰতো ইধ অনাগমনে, অতীতভৰপরিযাপন্নহেতূতি চ উপ্পাদে পটিঘোস-পদীপ-মুদ্দা-পটিবিম্বপ্পকারা ধম্মা নিদস্সনানি সিযুং. যথা হি পটিঘোস-পদীপ-মুদ্দা-ছাযা সদ্দাদিহেতুকা হোন্তি অঞ্ঞত্র অগন্ত্ৰা এৰমেৰং ইদং চিত্তং.

এত্থ চ সন্তানবন্ধতো নত্থি একতা নাপি নানতা. যদি হি সন্তানবন্ধে সতি একন্তমেকতা ভৰেয্য, ন খীরতো দধি সম্ভূতং সিযা. অথাপি একন্তনানতা ভৰেয্য, ন খীরস্সাধীনো দধি সিযা. এস নযো সব্বহেতুহেতুসমুপ্পন্নেসু. এৰঞ্চ সতি সব্বলোকৰোহারলোপো ¶ সিযা, সো চ অনিট্ঠো. তস্মা এত্থ ন একন্তমেকতা ৰা নানতা ৰা উপগন্তব্বাতি.

৬৩৪. এত্থাহ – ননু এৰং অসঙ্কন্তিপাতুভাৰে সতি যে ইমস্মিং মনুস্সত্তভাৰে খন্ধা, তেসং নিরুদ্ধত্তা, ফলপচ্চযস্স চ কম্মস্স তত্থ অগমনতো অঞ্ঞস্স অঞ্ঞতো চ তং ফলং সিযা, উপভুঞ্জকে চ অসতি কস্স তং ফলং সিযা, তস্মা ন সুন্দরমিদং ৰিধানন্তি. তত্রিদং ৰুচ্চতি –

সন্তানে যং ফলং এতং, নাঞ্ঞস্স ন চ অঞ্ঞতো;

বীজানং অভিসঙ্খারো, এতস্সত্থস্স সাধকো.

একসন্তানস্মিং হি ফলং উপ্পজ্জমানং তত্থ একন্তএকত্তনানত্তানং পটিসিদ্ধত্তা অঞ্ঞস্সাতি ৰা অঞ্ঞতোতি ৰা ন হোতি. এতস্স চ পনত্থস্স বীজানং অভিসঙ্খারো সাধকো. অম্ববীজাদীনং হি অভিসঙ্খারেসু কতেসু তস্স বীজস্স সন্তানে লদ্ধপচ্চযো কালন্তরে ফলৰিসেসো উপ্পজ্জমানো ন অঞ্ঞবীজানং, নাপি অঞ্ঞাভিসঙ্খারপচ্চযা উপ্পজ্জতি ¶ , ন চ তানি বীজানি, তে অভিসঙ্খারা ৰা ফলট্ঠানং পাপুণন্তি, এৰং সম্পদমিদং ৰেদিতব্বং. ৰিজ্জাসিপ্পোসধাদীহি চাপি বালসরীরে উপযুত্তেহি কালন্তরে ৰুড্ঢসরীরাদীসু ফলদেহি অযমত্থো ৰেদিতব্বো.

যম্পি ৰুত্তং ‘‘উপভুঞ্জকে চ অসতি কস্স তং ফলং সিযা’’তি, তত্থ,

ফলস্সুপ্পত্তিযা এৰ, সিদ্ধা ভুঞ্জকসম্মুতি;

ফলুপ্পাদেন রুক্খস্স, যথা ফলতি সম্মুতি.

যথা হি রুক্খসঙ্খাতানং ধম্মানং একদেসভূতস্স রুক্খফলস্স উপ্পত্তিযা এৰ রুক্খো ফলতীতি ৰা ফলিতোতি ৰা ৰুচ্চতি, তথা দেৰমনুস্সসঙ্খাতানং খন্ধানং একদেসভূতস্স উপভোগসঙ্খাতস্স সুখদুক্খফলস্স উপ্পাদেনেৰ দেৰো, মনুস্সো ৰা উপভুঞ্জতীতি ৰা, সুখিতো, দুক্খিতোতি ৰা ৰুচ্চতি. তস্মা ন এত্থ অঞ্ঞেন উপভুঞ্জকেন নাম কোচি অত্থো অত্থীতি.

৬৩৫. যোপি ¶ ৰদেয্য ‘‘এৰং সন্তেপি এতে সঙ্খারা ৰিজ্জমানা ৰা ফলস্স পচ্চযা সিযুং, অৰিজ্জমানা ৰা, যদি চ ৰিজ্জমানা পৰত্তিক্খণেযেৰ নেসং ৰিপাকেন ভৰিতব্বং, অথ অৰিজ্জমানা পৰত্তিতো পুব্বে পচ্ছা চ নিচ্চং ফলাৰহা সিযু’’ন্তি, সো এৰং ৰত্তব্বো –

কতত্তা পচ্চযা এতে, ন চ নিচ্চং ফলাৰহা;

পাটিভোগাদিকং তত্থ, ৰেদিতব্বং নিদস্সনং.

কতত্তাযেৰ হি সঙ্খারা অত্তনো ফলস্স পচ্চযা হোন্তি, ন ৰিজ্জমানত্তা, অৰিজ্জমানত্তা ৰা. যথাহ – ‘‘কামাৰচরস্স কুসলস্স কম্মস্স কতত্তা উপচিতত্তা ৰিপাকং চক্খুৰিঞ্ঞাণং উপ্পন্নং হোতী’’তিআদি (ধ. স. ৪৩১). যথারহস্স চ অত্তনো ফলস্স পচ্চযা হুত্ৰা ন পুন ফলাৰহা হোন্তি ৰিপাকত্তা. এতস্স চত্থস্স ৰিভাৰনে ইদং পাটিভোগাদিকং নিদস্সনং ৰেদিতব্বং. যথা হি লোকে যো কস্সচি অত্থস্স নিয্যাতনত্থং পাটিভোগো হোতি, ভণ্ডং ৰা কিণাতি, ইণং ৰা গণ্হাতি, তস্স তং কিরিযাকরণমত্তমেৰ তদত্থনিয্যাতনাদিম্হি ¶ পচ্চযো হোতি, ন কিরিযায ৰিজ্জমানত্তং, অৰিজ্জমানত্তং ৰা, ন চ তদত্থনিয্যাতনাদিতো পরম্পি ধারকোৰ হোতি. কস্মা? নিয্যাতনাদীনং কতত্তা. এৰং কতত্তাৰ সঙ্খারাপি অত্তনো ফলস্স পচ্চযা হোন্তি, ন চ যথারহং ফলদানতো পরম্পি ফলাৰহা হোন্তীতি. এত্তাৰতা মিস্সামিস্সৰসেন দ্ৰেধাপি ৰত্তমানস্স পটিসন্ধিৰিঞ্ঞাণস্স সঙ্খারপচ্চযা পৰত্তি দীপিতা হোতি.

৬৩৬. ইদানি সব্বেস্ৰেৰ তেসু বাত্তিংসৰিপাকৰিঞ্ঞাণেসু সম্মোহৰিঘাতত্থং,

পটিসন্ধিপৰত্তীনং, ৰসেনেতে ভৰাদিসু;

ৰিজানিতব্বা সঙ্খারা, যথা যেসঞ্চ পচ্চযা.

তত্থ তযো ভৰা, চতস্সো যোনিযো, পঞ্চ গতিযো, সত্ত ৰিঞ্ঞাণট্ঠিতিযো, নৰ সত্তাৰাসাতি এতে ভৰাদযো নাম. এতেসু ভৰাদীসু পটিসন্ধিযং পৰত্তে চ এতে যেসং ৰিপাকৰিঞ্ঞাণানং পচ্চযা, যথা চ পচ্চযা হোন্তি, তথা ৰিজানিতব্বাতি অত্থো.

তত্থ ¶ পুঞ্ঞাভিসঙ্খারে তাৰ কামাৰচরঅট্ঠচেতনাভেদো পুঞ্ঞাভিসঙ্খারো অৰিসেসেন কামভৰে সুগতিযং নৰন্নং ৰিপাকৰিঞ্ঞাণানং পটিসন্ধিযং নানক্খণিককম্মপচ্চযেন চেৰ উপনিস্সযপচ্চযেন চাতি দ্ৰেধা পচ্চযো. রূপাৰচরপঞ্চকুসলচেতনাভেদো পুঞ্ঞাভিসঙ্খারো রূপভৰে পটিসন্ধিযং এৰ পঞ্চন্নং.

ৰুত্তপ্পভেদকামাৰচরো পন কামভৰে সুগতিযং উপেক্খাসহগতাহেতুমনোৰিঞ্ঞাণধাতুৰজ্জানং সত্তন্নং পরিত্তৰিপাকৰিঞ্ঞাণানং ৰুত্তনযেনেৰ দ্ৰেধা পচ্চযো পৰত্তে, নো পটিসন্ধিযং. স্ৰেৰ রূপভৰে পঞ্চন্নং ৰিপাকৰিঞ্ঞাণানং তথেৰ পচ্চযো পৰত্তে, নো পটিসন্ধিযং. কামভৰে পন দুগ্গতিযং অট্ঠন্নম্পি পরিত্তৰিপাকৰিঞ্ঞাণানং তথেৰ পচ্চযো পৰত্তে, নো পটিসন্ধিযং. তত্থ নিরযে মহামোগ্গল্লানত্থেরস্স নরকচারিকাদীসু ইট্ঠারম্মণসমাযোগে সো পচ্চযো হোতি, তিরচ্ছানেসু পন পেতমহিদ্ধিকেসু চ ইট্ঠারম্মণং লব্ভতিযেৰ.

স্ৰেৰ কামভৰে সুগতিযং সোল়সন্নম্পি কুসলৰিপাকৰিঞ্ঞাণানং তথেৰ পচ্চযো পৰত্তে চ ¶ পটিসন্ধিযঞ্চ. অৰিসেসেন পন পুঞ্ঞাভিসঙ্খারো রূপভৰে দসন্নং ৰিপাকৰিঞ্ঞাণানং তথেৰ পচ্চযো পৰত্তে চ পটিসন্ধিযঞ্চ.

দ্ৰাদসাকুসলচেতনাভেদো অপুঞ্ঞাভিসঙ্খারো কামভৰে দুগ্গতিযং একস্স ৰিঞ্ঞাণস্স তথেৰ পচ্চযো পটিসন্ধিযং, নো পৰত্তে. ছন্নং পৰত্তে, নো পটিসন্ধিযং. সত্তন্নম্পি অকুসলৰিপাকৰিঞ্ঞাণানং পৰত্তে চ পটিসন্ধিযঞ্চ.

কামভৰে পন সুগতিযং তেসংযেৰ সত্তন্নং তথেৰ পচ্চযো পৰত্তে, নো পটিসন্ধিযং. রূপভৰে চতুন্নং ৰিপাকৰিঞ্ঞাণানং তথেৰ পচ্চযো পৰত্তে, নো পটিসন্ধিযং. সো চ খো কামাৰচরে অনিট্ঠরূপদস্সনসদ্দসৰনৰসেন, ব্রহ্মলোকে পন অনিট্ঠরূপাদযো নাম নত্থি. তথা কামাৰচরদেৰলোকেপি.

আনেঞ্জাভিসঙ্খারো অরূপভৰে চতুন্নং ৰিপাকৰিঞ্ঞাণানং তথেৰ পচ্চযো পৰত্তে চ পটিসন্ধিযঞ্চ.

এৰং ¶ তাৰ ভৰেসু পটিসন্ধিপৰত্তীনং ৰসেন এতে সঙ্খারা যেসং পচ্চযা, যথা চ পচ্চযা হোন্তি, তথা ৰিজানিতব্বা. এতেনেৰ নযেন যোনিআদীসুপি ৰেদিতব্বা.

৬৩৭. তত্রিদং আদিতো পট্ঠায মুখমত্তপকাসনং – ইমেসু হি সঙ্খারেসু যস্মা পুঞ্ঞাভিসঙ্খারো তাৰ দ্ৰীসু ভৰেসু পটিসন্ধিং দত্ৰা সব্বমত্তনো ৰিপাকং জনেতি. তথা অণ্ডজাদীসু চতূসু যোনীসু, দেৰমনুস্সসঙ্খাতাসু দ্ৰীসু গতীসু, নানত্তকাযনানত্তসঞ্ঞীনানত্তকাযএকত্তসঞ্ঞী-একত্তকাযনানত্তসঞ্ঞী-একত্তকাযএকত্তসঞ্ঞীসঙ্খাতাসু চতূসু ৰিঞ্ঞাণট্ঠিতীসু. অসঞ্ঞসত্তাৰাসে পনেস রূপমত্তমেৰাভিসঙ্খরোতীতি চতূসুযেৰ সত্তাৰাসেসু চ পটিসন্ধিং দত্ৰা সব্বমত্তনো ৰিপাকং জনেতি. তস্মা এস এতেসু দ্ৰীসু ভৰেসু, চতূসু যোনীসু, দ্ৰীসু গতীসু, চতূসু ৰিঞ্ঞাণট্ঠিতীসু, চতূসু সত্তাৰাসেসু চ একৰীসতিযা ৰিপাকৰিঞ্ঞাণানং ৰুত্তনযেনেৰ পচ্চযো হোতি যথাসম্ভৰং পটিসন্ধিযং পৰত্তে চ.

অপুঞ্ঞাভিসঙ্খারো পন যস্মা একস্মিংযেৰ কামভৰে চতূসু যোনীসু, অৰসেসাসু তীসু গতীসু ¶ , নানত্তকাযএকত্তসঞ্ঞীসঙ্খাতায একিস্সা ৰিঞ্ঞাণট্ঠিতিযা, তাদিসেযেৰ চ একস্মিং সত্তাৰাসে পটিসন্ধিৰসেন ৰিপচ্চতি, তস্মা এস একস্মিং ভৰে, চতূসু যোনীসু, তীসু গতীসু, একিস্সা ৰিঞ্ঞাণট্ঠিতিযা, একম্হি চ সত্তাৰাসে সত্তন্নং ৰিপাকৰিঞ্ঞাণানং ৰুত্তনযেনেৰ পচ্চযো পটিসন্ধিযং পৰত্তে চ.

আনেঞ্জাভিসঙ্খারো পন যস্মা একস্মিংযেৰ অরূপভৰে, একিস্সা ওপপাতিকযোনিযা, একিস্সা দেৰগতিযা, আকাসানঞ্চাযতনাদিকাসু তীসু ৰিঞ্ঞাণট্ঠিতীসু, আকাসানঞ্চাযতনাদিকেসু চ চতূসু সত্তাৰাসেসু পটিসন্ধিৰসেন ৰিপচ্চতি, তস্মা এস একস্মিং ভৰে, একিস্সা যোনিযা, একিস্সা গতিযা, তীসু ৰিঞ্ঞাণট্ঠিতীসু, চতূসু সত্তাৰাসেসু চতুন্নং ৰিঞ্ঞাণানং ৰুত্তনযেনেৰ পচ্চযো হোতি পটিসন্ধিযং পৰত্তে চাতি. এৰং,

পটিসন্ধিপৰত্তীনং ¶ , ৰসেনেতে ভৰাদিসু;

ৰিজানিতব্বা সঙ্খারা, যথা যেসঞ্চ পচ্চযাতি.

অযং ‘‘সঙ্খারপচ্চযা ৰিঞ্ঞাণ’’ন্তি পদস্মিং ৰিত্থারকথা.

ৰিঞ্ঞাণপচ্চযানামরূপপদৰিত্থারকথা

৬৩৮. ৰিঞ্ঞাণপচ্চযা নামরূপপদে –

ৰিভাগা নামরূপানং, ভৰাদীসু পৰত্তিতো;

সঙ্গহা পচ্চযনযা, ৰিঞ্ঞাতব্বো ৰিনিচ্ছযো.

ৰিভাগা নামরূপানন্তি এত্থ হি নামন্তি আরম্মণাভিমুখং নমনতো ৰেদনাদযো তযো খন্ধা, রূপন্তি চত্তারি মহাভূতানি চতুন্নঞ্চ মহাভূতানং উপাদাযরূপং. তেসং ৰিভাগো খন্ধনিদ্দেসে ৰুত্তোযেৰাতি. এৰং তাৰেত্থ ৰিভাগা নামরূপানং ৰিঞ্ঞাতব্বো ৰিনিচ্ছযো.

ভৰাদীসু পৰত্তিতোতি এত্থ চ নামং একং সত্তাৰাসং ঠপেত্ৰা সব্বভৰযোনিগতিৰিঞ্ঞাণট্ঠিতিসেসসত্তাৰাসেসু ¶ পৰত্ততি, রূপং দ্ৰীসু ভৰেসু, চতূসু যোনীসু, পঞ্চসু গতীসু, পুরিমাসু চতূসু ৰিঞ্ঞাণট্ঠিতীসু, পঞ্চসু সত্তাৰাসেসু পৰত্ততি.

এৰং পৰত্তমানে চ এতস্মিং নামরূপে যস্মা অভাৰকগব্ভসেয্যকানং অণ্ডজানঞ্চ পটিসন্ধিক্খণে ৰত্থুকাযদসকৰসেন রূপতো দ্ৰেসন্ততিসীসানি, তযো চ অরূপিনো খন্ধা পাতুভৰন্তি, তস্মা তেসং ৰিত্থারেন রূপরূপতো ৰীসতি ধম্মা, তযো চ অরূপিনো খন্ধাতি এতে তেৰীসতি ধম্মা ৰিঞ্ঞাণপচ্চযা নামরূপন্তি ৰেদিতব্বা. অগ্গহিতগ্গহণেন পন একসন্ততিসীসতো নৰ রূপধম্মে অপনেত্ৰা চুদ্দস. সভাৰকানং ভাৰদসকং পক্খিপিত্ৰা তেত্তিংস, তেসম্পি অগ্গহিতগ্গহণেন সন্ততিসীসদ্ৰযতো অট্ঠারস রূপধম্মে অপনেত্ৰা পন্নরস.

যস্মা চ ওপপাতিকসত্তেসু ব্রহ্মকাযিকাদীনং পটিসন্ধিক্খণে চক্খুসোতৰত্থুদসকানং, জীৰিতিন্দ্রিযনৰকস্স চ ৰসেন রূপতো চত্তারি সন্ততিসীসানি, তযো চ অরূপিনো খন্ধা পাতুভৰন্তি, তস্মা তেসং ৰিত্থারেন রূপরূপতো একূনচত্তালীস ধম্মা, তযো চ অরূপিনো খন্ধাতি ¶ এতে বাচত্তালীস ধম্মা ৰিঞ্ঞাণপচ্চযা নামরূপন্তি ৰেদিতব্বা. অগ্গহিতগ্গহণেন পন সন্ততিসীসত্তযতো সত্তৰীসতি ধম্মে অপনেত্ৰা পন্নরস.

কামভৰে পন যস্মা সেসওপপাতিকানং, সংসেদজানং ৰা সভাৰকপরিপুণ্ণাযতনানং পটিসন্ধিক্খণে রূপতো সত্ত সন্ততিসীসানি, তযো চ অরূপিনো খন্ধা পাতুভৰন্তি, তস্মা তেসং ৰিত্থারেন রূপরূপতো সত্ততি ধম্মা, তযো চ অরূপিনো খন্ধাতি এতে তেসত্ততি ধম্মা ৰিঞ্ঞাণপচ্চযা নামরূপন্তি ৰেদিতব্বা. অগ্গহিতগ্গহণেন পন রূপসন্ততিসীসছক্কতো চতুপঞ্ঞাস ধম্মে অপনেত্ৰা একূনৰীসতি. এস উক্কংসো. অৰকংসেন পন তংতংরূপসন্ততিসীসৰিকলানং তস্স তস্স ৰসেন হাপেত্ৰা হাপেত্ৰা সঙ্খেপতো ৰিত্থারতো চ পটিসন্ধিযং ৰিঞ্ঞাণপচ্চযা নামরূপসঙ্খা ৰেদিতব্বা.

অরূপীনং পন তযোৰ অরূপিনো খন্ধা. অসঞ্ঞীনং রূপতো জীৰিতিন্দ্রিযনৰকমেৰাতি. এস তাৰ পটিসন্ধিযং নযো.

পৰত্তে পন সব্বত্থ রূপপ্পৰত্তিদেসে পটিসন্ধিচিত্তস্স ঠিতিক্খণে পটিসন্ধিচিত্তেন সহ পৰত্তউতুতো ¶ উতুসমুট্ঠানং সুদ্ধট্ঠকং পাতুভৰতি. পটিসন্ধিচিত্তং পন রূপং ন সমুট্ঠাপেতি. তঞ্হি যথা পপাতে পতিতপুরিসো পরস্স পচ্চযো হোতুং ন সক্কোতি, এৰং ৰত্থুদুব্বলতায দুব্বলত্তা রূপং সমুট্ঠাপেতুং ন সক্কোতি. পটিসন্ধিচিত্ততো পন উদ্ধং পঠমভৰঙ্গতো পভুতি চিত্তসমুট্ঠানং সুদ্ধট্ঠকং, সদ্দপাতুভাৰকালে পটিসন্ধিক্খণতো উদ্ধং পৰত্তউতুতো চেৰ চিত্ততো চ সদ্দনৰকং, যে পন কবল়ীকারাহারূপজীৰিনো গব্ভসেয্যকসত্তা, তেসং,

‘‘যঞ্চস্স ভুঞ্জতি মাতা, অন্নং পানঞ্চ ভোজনং;

তেন সো তত্থ যাপেতি, মাতুকুচ্ছিগতো নরো’’তি. –

ৰচনতো মাতরা অজ্ঝোহরিতাহারেন অনুগতে সরীরে, ওপপাতিকানং সব্বপঠমং অত্তনো মুখগতং খেল়ং অজ্ঝোহরণকালে আহারসমুট্ঠানং সুদ্ধট্ঠকন্তি ইদং আহারসমুট্ঠানস্স সুদ্ধট্ঠকস্স, উতুচিত্তসমুট্ঠানানঞ্চ উক্কংসতো দ্ৰিন্নং নৰকানং ৰসেন ছব্বীসতিৰিধং, পুব্বে একেকচিত্তক্খণে ¶ তিক্খত্তুং উপ্পজ্জমানং ৰুত্তং কম্মসমুট্ঠানঞ্চ সত্ততিৰিধন্তি ছন্নৰুতিৰিধং রূপং, তযো চ অরূপিনো খন্ধাতি সমাসতো নৰনৰুতি ধম্মা. যস্মা ৰা সদ্দো অনিযতো কদাচিদেৰ পাতুভাৰতো, তস্মা দুৰিধম্পি তং অপনেত্ৰা ইমে সত্তনৰুতি ধম্মা যথাসম্ভৰং সব্বসত্তানং ৰিঞ্ঞাণপচ্চযা নামরূপন্তি ৰেদিতব্বং. তেসং হি সুত্তানম্পি পমত্তানম্পি খাদন্তানম্পি পিৰন্তানম্পি দিৰা চ রত্তিঞ্চ এতে ৰিঞ্ঞাণপচ্চযা পৰত্তন্তি. তঞ্চ নেসং ৰিঞ্ঞাণপচ্চযভাৰং পরতো ৰণ্ণযিস্সাম.

যম্পনেতমেত্থ কম্মজরূপং, তং ভৰযোনিগতিঠিতিসত্তাৰাসেসু সব্বপঠমং পতিট্ঠহন্তম্পি তিসমুট্ঠানিকরূপেন অনুপত্থদ্ধং ন সক্কোতি সণ্ঠাতুং, নাপি তিসমুট্ঠানিকং তেন অনুপত্থদ্ধং. অথ খো ৰাতব্ভাহতাপি চতুদ্দিসা ৰৰত্থাপিতা নল়কলাপিযো ৰিয, ঊমিৰেগব্ভাহতাপি মহাসমুদ্দে কত্থচি লদ্ধপতিট্ঠা ভিন্নৰাহনিকা ৰিয চ অঞ্ঞমঞ্ঞুপত্থদ্ধানেৰেতানি অপতমানানি সণ্ঠহিত্ৰা একম্পি ৰস্সং দ্ৰেপি ৰস্সানি…পে… ৰস্সসতম্পি যাৰ তেসং সত্তানং আযুক্খযো ৰা পুঞ্ঞক্খযো ৰা, তাৰ পৰত্তন্তীতি. এৰং ভৰাদীসু পৰত্তিতোপেত্থ ৰিঞ্ঞাতব্বো ৰিনিচ্ছযো.

৬৩৯. সঙ্গহাতি এত্থ চ যং আরুপ্পে পৰত্তিপটিসন্ধীসু, পঞ্চৰোকারভৰে চ পৰত্তিযং ৰিঞ্ঞাণপচ্চযা ¶ নামমেৰ, যঞ্চ অসঞ্ঞেসু সব্বত্থ, পঞ্চৰোকারভৰে চ পৰত্তিযং ৰিঞ্ঞাণপচ্চযা রূপমেৰ, যঞ্চ পঞ্চৰোকারভৰে সব্বত্থ ৰিঞ্ঞাণপচ্চযা নামরূপং, তং সব্বং নামঞ্চ রূপঞ্চ নামরূপঞ্চ নামরূপন্তি এৰং একদেসসরূপেকসেসনযেন সঙ্গহেত্ৰা ৰিঞ্ঞাণপচ্চযা নামরূপন্তি ৰেদিতব্বং.

অসঞ্ঞেসু ৰিঞ্ঞাণাভাৰা অযুত্তন্তি চে, নাযুত্তং. ইদম্পি,

নামরূপস্স যং হেতু, ৰিঞ্ঞাণং তং দ্ৰিধা মতং;

ৰিপাকমৰিপাকঞ্চ, যুত্তমেৰ যতো ইদং.

যঞ্হি নামরূপস্স হেতু ৰিঞ্ঞাণং, তং ৰিপাকাৰিপাকভেদতো দ্ৰেধা মতং. ইদঞ্চ অসঞ্ঞসত্তেসু কম্মসমুট্ঠানত্তা পঞ্চৰোকারভৰে পৰত্তঅভিসঙ্খারৰিঞ্ঞাণপচ্চযা রূপং. তথা পঞ্চৰোকারে পৰত্তিযং কুসলাদিচিত্তক্খণে কম্মসমুট্ঠানন্তি যুত্তমেৰ ইদং. এৰং সঙ্গহতোপেত্থ ৰিঞ্ঞাতব্বো ৰিনিচ্ছযো.

৬৪০. পচ্চযনযাতি ¶ এত্থ হি,

নামস্স পাকৰিঞ্ঞাণং, নৰধা হোতি পচ্চযো;

ৰত্থুরূপস্স নৰধা, সেসরূপস্স অট্ঠধা.

অভিসঙ্খারৰিঞ্ঞাণং, হোতি রূপস্স একধা;

তদঞ্ঞং পন ৰিঞ্ঞাণং, তস্স তস্স যথারহং.

যঞ্হেতং পটিসন্ধিযং পৰত্তিযং ৰা ৰিপাকসঙ্খাতং নামং, তস্স রূপমিস্সস্স ৰা অমিস্সস্স ৰা পটিসন্ধিকং ৰা অঞ্ঞং ৰা ৰিপাকৰিঞ্ঞাণং সহজাতঅঞ্ঞমঞ্ঞনিস্সযসম্পযুত্তৰিপাকাহারিন্দ্রিযঅত্থিঅৰিগতপচ্চযেহি নৰধা পচ্চযো হোতি.

ৰত্থুরূপস্স পটিসন্ধিযং সহজাতঅঞ্ঞমঞ্ঞনিস্সযৰিপাকাহারিন্দ্রিযৰিপ্পযুত্তঅত্থিঅৰিগতপচ্চযেহি ¶ নৰধা পচ্চযো হোতি. ঠপেত্ৰা পন ৰত্থুরূপং সেসরূপস্স ইমেসু নৰসু অঞ্ঞমঞ্ঞপচ্চযং অপনেত্ৰা সেসেহি অট্ঠহি পচ্চযেহি পচ্চযো হোতি.

অভিসঙ্খারৰিঞ্ঞাণং পন অসঞ্ঞসত্তরূপস্স ৰা পঞ্চৰোকারভৰে ৰা কম্মজস্স রূপস্স সুত্তন্তিকপরিযাযতো উপনিস্সযৰসেন একধাৰ পচ্চযো হোতি. অৰসেসং পঠমভৰঙ্গতো পভুতি সব্বম্পি ৰিঞ্ঞাণং তস্স তস্স নামরূপস্স যথারহং পচ্চযো হোতীতি ৰেদিতব্বং. ৰিত্থারতো পন তস্স পচ্চযনযে দস্সিযমানে সব্বাপি পট্ঠানকথা ৰিত্থারেতব্বা হোতীতি ন নং আরভাম.

তত্থ সিযা – কথং পনেতং জানিতব্বং ‘‘পটিসন্ধিনামরূপং ৰিঞ্ঞাণপচ্চযা হোতী’’তি? সুত্ততো যুত্তিতো চ. সুত্তে হি ‘‘চিত্তানুপরিৰত্তিনো ধম্মা’’তিআদিনা (ধ. স. দুকমাতিকা ৬২) নযেন বহুধা ৰেদনাদীনং ৰিঞ্ঞাণপচ্চযতা সিদ্ধা. যুত্তিতো পন,

চিত্তজেন হি রূপেন, ইধ দিট্ঠেন সিজ্ঝতি;

অদিট্ঠস্সাপি রূপস্স, ৰিঞ্ঞাণং পচ্চযো ইতি.

চিত্তে হি পসন্নে অপ্পসন্নে ৰা তদনুরূপানি রূপানি উপ্পজ্জমানানি দিট্ঠানি. দিট্ঠেন চ অদিট্ঠস্স অনুমানং হোতীতি ইমিনা ইধ দিট্ঠেন চিত্তজরূপেন অদিট্ঠস্সাপি পটিসন্ধিরূপস্স ৰিঞ্ঞাণং পচ্চযো হোতীতি জানিতব্বমেতং. কম্মসমুট্ঠানস্সাপি ¶ হি তস্স চিত্তসমুট্ঠানস্সেৰ ৰিঞ্ঞাণপচ্চযতা পট্ঠানে আগতাতি. এৰং পচ্চযনযতোপেত্থ ৰিঞ্ঞাতব্বো ৰিনিচ্ছযোতি.

অযং ‘‘ৰিঞ্ঞাণপচ্চযা নামরূপ’’ন্তি পদস্মিং ৰিত্থারকথা.

নামরূপপচ্চযাসল়াযতনপদৰিত্থারকথা

৬৪১. নামরূপপচ্চযা সল়াযতনপদে –

নামং খন্ধত্তযং রূপং, ভূতৰত্থাদিকং মতং;

কতেকসেসং তং তস্স, তাদিসস্সেৰ পচ্চযো.

যঞ্হেতং ¶ সল়াযতনস্সেৰ পচ্চযভূতং নামরূপং, তত্থ নামন্তি ৰেদনাদিক্খন্ধত্তযং, রূপং পন সসন্ততিপরিযাপন্নং নিযমতো চত্তারি ভূতানি ছ ৰত্থূনি জীৰিতিন্দ্রিযন্তি এৰং ভূতৰত্থাদিকং মতন্তি ৰেদিতব্বং. তং পন নামঞ্চ রূপঞ্চ নামরূপঞ্চ নামরূপন্তি এৰং কতেকসেসং ছট্ঠাযতনঞ্চ সল়াযতনঞ্চ সল়াযতনন্তি এৰং কতেকসেসস্সেৰ সল়াযতনস্স পচ্চযোতি ৰেদিতব্বং. কস্মা? যস্মা আরুপ্পে নামমেৰ পচ্চযো, তঞ্চ ছট্ঠাযতনস্সেৰ ন অঞ্ঞস্স. ‘‘নামপচ্চযা ছট্ঠাযতন’’ন্তি (ৰিভ. ৩২২) হি ৰিভঙ্গে ৰুত্তং.

তত্থ সিযা – কথং পনেতং জানিতব্বং ‘‘নামরূপং সল়াযতনস্স পচ্চযো’’তি? নামরূপভাৰে ভাৰতো. তস্স তস্স হি নামস্স রূপস্স চ ভাৰে তং তং আযতনং হোতি, ন অঞ্ঞথা. সা পনস্স তব্ভাৰভাৰিতা পচ্চযনযস্মিং যেৰ আৰিভৰিস্সতি. তস্মা,

পটিসন্ধিযা পৰত্তে ৰা, হোতি যং যস্স পচ্চযো;

যথা চ পচ্চযো হোতি, তথা নেয্যং ৰিভাৰিনা.

তত্রাযমত্থদীপনা –

নামমেৰ হি আরুপ্পে, পটিসন্ধিপৰত্তিসু;

পচ্চযো সত্তধা ছধা, হোতি তং অৰকংসতো.

কথং? পটিসন্ধিযং তাৰ অৰকংসতো সহজাতঅঞ্ঞমঞ্ঞনিস্সযসম্পযুত্তৰিপাকঅত্থিঅৰিগতপচ্চযেহি সত্তধা নামং ছট্ঠাযতনস্স পচ্চযো হোতি. কিঞ্চি পনেত্থ হেতুপচ্চযেন, কিঞ্চি আহারপচ্চযেনাতি এৰং ¶ অঞ্ঞথাপি পচ্চযো হোতি, তস্স ৰসেন উক্কংসাৰকংসো ৰেদিতব্বো.

পৰত্তেপি ৰিপাকং ৰুত্তনযেনেৰ পচ্চযো হোতি, ইতরং পন অৰকংসতো ৰুত্তপ্পকারেসু পচ্চযেসু ৰিপাকপচ্চযৰজ্জেহি ছহি পচ্চযেহি পচ্চযো হোতি. কিঞ্চি পনেত্থ হেতুপচ্চযেন, কিঞ্চি আহারপচ্চযেনাতি এৰং অঞ্ঞথাপি পচ্চযো হোতি, তস্স ৰসেন উক্কংসাৰকংসো ৰেদিতব্বো.

অঞ্ঞস্মিম্পি ¶ ভৰে নামং, তথেৰ পটিসন্ধিযং;

ছট্ঠস্স ইতরেসং তং, ছহাকারেহি পচ্চযো.

আরুপ্পতো হি অঞ্ঞস্মিম্পি পঞ্চৰোকারভৰে তং ৰিপাকনামং হদযৰত্থুনো সহাযং হুত্ৰা ছট্ঠস্স মনাযতনস্স যথা আরুপ্পে ৰুত্তং, তথেৰ অৰকংসতো সত্তধা পচ্চযো হোতি. ইতরেসং পন তং পঞ্চন্নং চক্খাযতনাদীনং চতুমহাভূতসহাযং হুত্ৰা সহজাতনিস্সযৰিপাকৰিপ্পযুত্তঅত্থিঅৰিগতৰসেন ছহাকারেহি পচ্চযো হোতি. কিঞ্চি পনেত্থ হেতুপচ্চযেন, কিঞ্চি আহারপচ্চযেনাতি এৰং অঞ্ঞথাপি পচ্চযো হোতি, তস্স ৰসেন উক্কংসাৰকংসো ৰেদিতব্বো.

পৰত্তেপি তথা হোতি, পাকং পাকস্স পচ্চযো;

অপাকং অৰিপাকস্স, ছধা ছট্ঠস্স পচ্চযো.

পৰত্তেপি হি পঞ্চৰোকারভৰে যথা পটিসন্ধিযং, তথেৰ ৰিপাকনামং ৰিপাকস্স ছট্ঠাযতনস্স অৰকংসতো সত্তধা পচ্চযো হোতি. অৰিপাকং পন অৰিপাকস্স ছট্ঠস্স অৰকংসতোৰ ততো ৰিপাকপচ্চযং অপনেত্ৰা ছধা পচ্চযো হোতি. ৰুত্তনযেনেৰ পনেত্থ উক্কংসাৰকংসো ৰেদিতব্বো.

তত্থেৰ সেসপঞ্চন্নং, ৰিপাকং পচ্চযো ভৰে;

চতুধা অৰিপাকম্পি, এৰমেৰ পকাসিতং.

তত্থেৰ হি পৰত্তে সেসানং চক্খাযতনাদীনং পঞ্চন্নং চক্খুপসাদাদিৰত্থুকং ইতরম্পি ৰিপাকনামং পচ্ছাজাতৰিপ্পযুত্তঅত্থিঅৰিগতপচ্চযেহি চতুধা পচ্চযো হোতি. যথা চ ৰিপাকং, অৰিপাকম্পি এৰমেৰ পকাসিতং. তস্মা কুসলাদিভেদম্পি তেসং চতুধা পচ্চযো হোতীতি ৰেদিতব্বং. এৰং ¶ তাৰ নামমেৰ পটিসন্ধিযং পৰত্তে ৰা যস্স যস্স আযতনস্স পচ্চযো হোতি, যথা চ পচ্চযো হোতি, তথা ৰেদিতব্বং.

রূপং পনেত্থ আরুপ্পে, ভৰে ভৰতি পচ্চযো;

ন একাযতনস্সাপি, পঞ্চক্খন্ধভৰে পন.

রূপতো ¶ সন্ধিযং ৰত্থু, ছধা ছট্ঠস্স পচ্চযো;

ভূতানি চতুধা হোন্তি, পঞ্চন্নং অৰিসেসতো.

রূপতো হি পটিসন্ধিযং ৰত্থুরূপং ছট্ঠস্স মনাযতনস্স সহজাতঅঞ্ঞমঞ্ঞনিস্সযৰিপ্পযুত্তঅত্থিঅৰিগতপচ্চযেহি ছধা পচ্চযো হোতি. চত্তারি পন ভূতানি অৰিসেসতো পটিসন্ধিযং পৰত্তে চ যং যং আযতনং উপ্পজ্জতি, তস্স তস্স ৰসেন পঞ্চন্নম্পি চক্খাযতনাদীনং সহজাতনিস্সযঅত্থিঅৰিগতপচ্চযেহি চতুধা পচ্চযা হোন্তি.

তিধা জীৰিতমেতেসং, আহারো চ পৰত্তিযং;

তানেৰ ছধা ছট্ঠস্স, ৰত্থু তস্সেৰ পঞ্চধা.

এতেসং পন চক্খাদীনং পঞ্চন্নং পটিসন্ধিযং পৰত্তে চ অত্থি অৰিগতইন্দ্রিযৰসেন রূপজীৰিতং তিধা পচ্চযো হোতি. আহারো চ অত্থিঅৰিগতাহারৰসেন তিৰিধা পচ্চযো হোতি, সো চ খো যে সত্তা আহারূপজীৰিনো, তেসং আহারানুগতে কাযে পৰত্তিযংযেৰ, নো পটিসন্ধিযং. তানি পন পঞ্চ চক্খাযতনাদীনি ছট্ঠস্স চক্খু সোতঘানজিৰ্হাকাযৰিঞ্ঞাণসঙ্খাতস্স মনাযতনস্স নিস্সযপুরেজাতইন্দ্রিযৰিপ্পযুত্তঅত্থিঅৰিগতৰসেন ছহাকারেহি পচ্চযা হোন্তি পৰত্তে, নো পটিসন্ধিযং. ঠপেত্ৰা পন পঞ্চৰিঞ্ঞাণানি তস্সেৰ অৰসেসমনাযতনস্স ৰত্থুরূপং নিস্সযপুরেজাতৰিপ্পযুত্তঅত্থিঅৰিগতৰসেন পঞ্চধা পচ্চযো হোতি পৰত্তেযেৰ, নো পটিসন্ধিযং. এৰং রূপমেৰ পটিসন্ধিযং পৰত্তে ৰা যস্স যস্স আযতনস্স পচ্চযো হোতি, যথা চ পচ্চযো হোতি, তথা ৰেদিতব্বং.

নামরূপং পনুভযং, হোতি যং যস্স পচ্চযো;

যথা চ তম্পি সব্বত্থ, ৰিঞ্ঞাতব্বং ৰিভাৰিনা.

সেয্যথিদং ¶ . পটিসন্ধিযং তাৰ পঞ্চৰোকারভৰে খন্ধত্তযৰত্থুরূপসঙ্খাতং নামরূপং ছট্ঠাযতনস্স সহজাতঅঞ্ঞমঞ্ঞনিস্সযৰিপাকসম্পযুত্তৰিপ্পযুত্তঅত্থিঅৰিগতপচ্চযাদীহি পচ্চযো হোতীতি. ইদমেত্থ মুখমত্তং. ৰুত্তনযানুসারেন পন সক্কা সব্বং যোজেতুন্তি ন এত্থ ৰিত্থারো দস্সিতোতি.

অযং ‘‘নামরূপপচ্চযা সল়াযতন’’ন্তি পদস্মিং ৰিত্থারকথা.

সল়াযতনপচ্চযাফস্সপদৰিত্থারকথা

৬৪২. সল়াযতনপচ্চযা ¶ ফস্সপদে –

সল়েৰ ফস্সা সঙ্খেপা, চক্খুসম্ফস্সআদযো;

ৰিঞ্ঞাণমিৰ বাত্তিংস, ৰিত্থারেন ভৰন্তি তে.

সঙ্খেপেন হি সল়াযতনপচ্চযা ফস্সোতি চক্খুসম্ফস্সো, সোতসম্ফস্সো, ঘানসম্ফস্সো, জিৰ্হাসম্ফস্সো, কাযসম্ফস্সো, মনোসম্ফস্সোতি ইমে চক্খুসম্ফস্সাদযো ছ এৰ ফস্সা ভৰন্তি. ৰিত্থারেন পন চক্খুসম্ফস্সাদযো পঞ্চ কুসলৰিপাকা, পঞ্চ অকুসলৰিপাকাতি দস, সেসা বাৰীসতি-লোকিযৰিপাকৰিঞ্ঞাণসম্পযুত্তা চ বাৰীসতীতি এৰং সব্বেপি সঙ্খারপচ্চযা ৰুত্তৰিঞ্ঞাণমিৰ বাত্তিংস হোন্তি.

যং পনেতস্স বাত্তিংসৰিধস্সাপি ফস্সস্স পচ্চযো সল়াযতনং, তত্থ,

ছট্ঠেন সহ অজ্ঝত্তং, চক্খাদিং বাহিরেহিপি;

সল়াযতনমিচ্ছন্তি, ছহি সদ্ধিং ৰিচক্খণা.

তত্থ যে তাৰ ‘‘উপাদিণ্ণকপৰত্তিকথা অয’’ন্তি সকসন্ততিপরিযাপন্নমেৰ পচ্চযং পচ্চযুপ্পন্নঞ্চ দীপেন্তি, তে ‘‘ছট্ঠাযতনপচ্চযা ফস্সো’’তি (ৰিভ. ৩২২) পাল়িঅনুসারতো আরুপ্পে ছট্ঠাযতনঞ্চ, অঞ্ঞত্থ সব্বসঙ্গহতো সল়াযতনঞ্চ ফস্সস্স পচ্চযোতি একদেসসরূপেকসেসং কত্ৰা ছট্ঠেন সহ অজ্ঝত্তং চক্খাদিং সল়াযতনন্তি ইচ্ছন্তি. তঞ্হি ছট্ঠাযতনঞ্চ সল়াযতনঞ্চ সল়াযতনন্ত্ৰেৰ সঙ্খং গচ্ছতি.

যে পন পচ্চযুপ্পন্নমেৰ একসন্ততিপরিযাপন্নং দীপেন্তি, পচ্চযং পন ভিন্নসন্তানম্পি, তে যং যং আযতনং ফস্সস্স পচ্চযো হোতি, তং সব্বম্পি ¶ দীপেন্তা বাহিরম্পি পরিগ্গহেত্ৰা তদেৰ ছট্ঠেন সহ অজ্ঝত্তং বাহিরেহিপি রূপাযতনাদীহি সদ্ধিং সল়াযতনন্তি ইচ্ছন্তি. তম্পি হি ছট্ঠাযতনঞ্চ সল়াযতনঞ্চ সল়াযতনন্তি এতেসং একসেসে কতে সল়াযতনন্ত্ৰেৰ সঙ্খং গচ্ছতি.

এত্থাহ ¶ – ন সব্বাযতনেহি একো ফস্সো সম্ভোতি, নাপি একম্হা আযতনা সব্বে ফস্সা, অযঞ্চ সল়াযতনপচ্চযা ফস্সোতি একোৰ ৰুত্তো, সো কস্মাতি. তত্রিদং ৰিস্সজ্জনং – সচ্চমেতং, সব্বেহি একো, একম্হা ৰা সব্বে ন সম্ভোন্তি, সম্ভোতি পন অনেকেহি একো. যথা চক্খুসম্ফস্সো চক্খাযতনা রূপাযতনা চক্খুৰিঞ্ঞাণসঙ্খাতা মনাযতনা অৰসেসসম্পযুত্তধম্মাযতনা চাতি এৰং সব্বত্থ যথানুরূপং যোজেতব্বং. তস্মা এৰ হি,

একোপনেকাযতনপ্পভৰো ইতি দীপিতো;

ফস্সোযং একৰচননিদ্দেসেনীধ তাদিনা.

একৰচননিদ্দেসেনাতি সল়াযতনপচ্চযা ফস্সোতি ইমিনা একৰচননিদ্দেসেন অনেকেহি আযতনেহি একো ফস্সো হোতীতি তাদিনা দীপিতোতি অত্থো. আযতনেসু পন,

ছধা পঞ্চ ততো একং, নৰধা বাহিরানি ছ;

যথাসম্ভৰমেতস্স, পচ্চযত্তে ৰিভাৰযে.

তত্রাযং ৰিভাৰনা – চক্খাযতনাদীনি তাৰ পঞ্চ চক্খুসম্ফস্সাদিভেদতো পঞ্চৰিধস্স ফস্সস্স নিস্সযপুরেজাতিন্দ্রিযৰিপ্পযুত্তঅত্থিঅৰিগতৰসেন ছধা পচ্চযা হোন্তি. ততো পরং একং ৰিপাকমনাযতনং অনেকভেদস্স ৰিপাকমনোসম্ফস্সস্স সহজাতঅঞ্ঞমঞ্ঞনিস্সযৰিপাকাহারইন্দ্রিযসম্পযুত্তঅত্থিঅৰিগতৰসেন নৰধা পচ্চযো হোতি. বাহিরেসু পন রূপাযতনং চক্খুসম্ফস্সস্স আরম্মণপুরেজাতঅত্থিঅৰিগতৰসেন চতুধা পচ্চযো হোতি. তথা সদ্দাযতনাদীনি সোতসম্ফস্সাদীনং. মনোসম্ফস্সস্স পন তানি চ ধম্মাযতনঞ্চ তথা চ ¶ আরম্মণপচ্চযমত্তেনেৰ চাতি এৰং বাহিরানি ছ যথাসম্ভৰমেতস্স পচ্চযত্তে ৰিভাৰযেতি.

অযং ‘‘সল়াযতনপচ্চযা ফস্সো’’তি পদস্মিং ৰিত্থারকথা.

ফস্সপচ্চযাৰেদনাপদৰিত্থারকথা

৬৪৩. ফস্সপচ্চযা ৰেদনাপদে –

দ্ৰারতো ¶ ৰেদনা ৰুত্তা, চক্খুসম্ফস্সজাদিকা;

সল়েৰ তা পভেদেন, একূননৰুতী মতা.

এতস্সপি পদস্স ৰিভঙ্গে ‘‘চক্খুসম্ফস্সজা ৰেদনা. সোত… ঘান… জিৰ্হা… কায… মনোসম্ফস্সজা ৰেদনা’’তি (ৰিভ. ২৩১) এৰং দ্ৰারতো সল়েৰ ৰেদনা ৰুত্তা, তা পন পভেদেন একূননৰুতিযা চিত্তেহি সম্পযুত্তত্তা একূননৰুতি মতা.

ৰেদনাসু পনেতাসু, ইধ বাত্তিংস ৰেদনা;

ৰিপাকচিত্তযুত্তাৰ, অধিপ্পেতাতি ভাসিতা.

অট্ঠধা তত্থ পঞ্চন্নং, পঞ্চদ্ৰারম্হি পচ্চযো;

সেসানং একধা ফস্সো, মনোদ্ৰারেপি সো তথা.

তত্থ হি পঞ্চদ্ৰারে চক্খুপসাদাদিৰত্থুকানং পঞ্চন্নং ৰেদনানং চক্খুসম্ফস্সাদিকো ফস্সো সহজাতঅঞ্ঞমঞ্ঞনিস্সযৰিপাকআহারসম্পযুত্তঅত্থিঅৰিগতৰসেন অট্ঠধা পচ্চযো হোতি. সেসানং পন একেকস্মিং দ্ৰারে সম্পটিচ্ছনসন্তীরণতদারম্মণৰসেন পৰত্তানং কামাৰচরৰিপাকৰেদনানং সো চক্খুসম্ফস্সাদিকো ফস্সো উপনিস্সযৰসেন একধাৰ পচ্চযো হোতি.

মনোদ্ৰারেপি সো তথাতি মনোদ্ৰারেপি হি তদারম্মণৰসেন পৰত্তানং কামাৰচরৰিপাকৰেদনানং সো সহজাতমনোসম্ফস্সসঙ্খাতো ফস্সো তথেৰ অট্ঠধা পচ্চযো হোতি, পটিসন্ধিভৰঙ্গচুতিৰসেন পৰত্তানং তেভূমকৰিপাকৰেদনানম্পি. যা পন তা মনোদ্ৰারে তদারম্মণৰসেন ¶ পৰত্তা কামাৰচরৰেদনা, তাসং মনোদ্ৰারাৰজ্জনসম্পযুত্তো মনোসম্ফস্সো উপনিস্সযৰসেন একধাৰ পচ্চযো হোতীতি.

অযং ‘‘ফস্সপচ্চযা ৰেদনা’’তি পদস্মিং ৰিত্থারকথা.

ৰেদনাপচ্চযাতণ্হাপদৰিত্থারকথা

৬৪৪. ৰেদনাপচ্চযা ¶ তণ্হাপদে –

রূপতণ্হাদিভেদেন, ছ তণ্হা ইধ দীপিতা;

একেকা তিৰিধা তত্থ, পৰত্তাকারতো মতা.

ইমস্মিং হি পদে সেট্ঠিপুত্তো ব্রাহ্মণপুত্তোতি পিতিতো নামৰসেন পুত্তো ৰিয ‘‘রূপতণ্হা. সদ্দ… গন্ধ… রস… ফোট্ঠব্ব… ধম্মতণ্হা’’তি (ৰিভ. ২৩২) আরম্মণতো নামৰসেন ৰিভঙ্গে ছ তণ্হা দীপিতা.

তাসু পন তণ্হাসু একেকা তণ্হা পৰত্তিআকারতো কামতণ্হা, ভৰতণ্হা, ৰিভৰতণ্হাতি এৰং তিৰিধা মতা. রূপতণ্হাযেৰ হি যদা চক্খুস্স আপাথমাগতং রূপারম্মণং কামস্সাদৰসেন অস্সাদযমানা পৰত্ততি, তদা কামতণ্হা নাম হোতি. যদা তদেৰারম্মণং ‘‘ধুৰং সস্সত’’ন্তি পৰত্তায সস্সতদিট্ঠিযা সদ্ধিং পৰত্ততি, তদা ভৰতণ্হা নাম হোতি. সস্সতদিট্ঠিসহগতো হি রাগো ভৰতণ্হাতি ৰুচ্চতি. যদা পন তদেৰারম্মণং ‘‘উচ্ছিজ্জতি ৰিনস্সতী’’তি পৰত্তায উচ্ছেদদিট্ঠিযা সদ্ধিং পৰত্ততি, তদা ৰিভৰতণ্হা নাম হোতি. উচ্ছেদদিট্ঠিসহগতো হি রাগো ৰিভৰতণ্হাতি ৰুচ্চতি. এস নযো সদ্দতণ্হাদীসুপীতি. এতা অট্ঠারস তণ্হা হোন্তি.

তা অজ্ঝত্তরূপাদীসু অট্ঠারস, বহিদ্ধা অট্ঠারসাতি ছত্তিংস. ইতি অতীতা ছত্তিংস, অনাগতা ছত্তিংস, পচ্চুপ্পন্না ছত্তিংসাতি অট্ঠসতং তণ্হা হোন্তি. তা পুন সঙ্খেপ্পমাণা রূপাদিআরম্মণৰসেন ছ, কামতণ্হাদিৰসেন ৰা তিস্সোৰ তণ্হা হোন্তীতি ৰেদিতব্বা.

যস্মা পনিমে সত্তা পুত্তং অস্সাদেত্ৰা পুত্তে মমত্তেন ধাতিযা ৰিয রূপাদিআরম্মণৰসেন উপ্পজ্জমানং ৰেদনং অস্সাদেত্ৰা ৰেদনায মমত্তেন ¶ রূপাদিআরম্মণদাযকানং চিত্তকার-গন্ধব্ব-গন্ধিক-সূদ-তন্তৰাযরসাযনৰিধাযকৰেজ্জাদীনং মহাসক্কারং করোন্তি. তস্মা সব্বাপেসা ৰেদনাপচ্চযা তণ্হা হোতীতি ৰেদিতব্বা.

যস্মা ¶ চেত্থ অধিপ্পেতা, ৰিপাকসুখৰেদনা;

একাৰ একধাৰেসা, তস্মা তণ্হায পচ্চযো.

একধাতি উপনিস্সযপচ্চযেনেৰ পচ্চযো হোতি. যস্মা ৰা,

দুক্খী সুখং পত্থযতি, সুখী ভিয্যোপি ইচ্ছতি;

উপেক্খা পন সন্তত্তা, সুখমিচ্চেৰ ভাসিতা.

তণ্হায পচ্চযা তস্মা, হোন্তি তিস্সোপি ৰেদনা;

ৰেদনাপচ্চযা তণ্হা, ইতি ৰুত্তা মহেসিনা.

ৰেদনাপচ্চযা চাপি, যস্মা নানুসযং ৰিনা;

হোতি তস্মা ন সা হোতি, ব্রাহ্মণস্স ৰুসীমতোতি.

অযং ‘‘ৰেদনাপচ্চযা তণ্হা’’তি পদস্মিং ৰিত্থারকথা.

তণ্হাপচ্চযাউপাদানপদৰিত্থারকথা

৬৪৫. তণ্হাপচ্চযা উপাদানপদে –

উপাদানানি চত্তারি, তানি অত্থৰিভাগতো;

ধম্মসঙ্খেপৰিত্থারা, কমতো চ ৰিভাৰযে.

তত্রাযং ৰিভাৰনা – কামুপাদানং, দিট্ঠুপাদানং, সীলব্বতুপাদানং, অত্তৰাদুপাদানন্তি ইমানি তাৰেত্থ চত্তারি উপাদানানি. তেসং অযং অত্থৰিভাগো – ৰত্থুসঙ্খাতং কামং উপাদিযতীতি কামুপাদানং, কামো চ সো উপাদানঞ্চাতিপি কামুপাদানং. উপাদানন্তি দল়্হগ্গহণং. দল়্হত্থো হেত্থ উপসদ্দো উপাযাসউপকট্ঠাদীসু ৰিয. তথা দিট্ঠি চ সা উপাদানঞ্চাতি দিট্ঠুপাদানং. দিট্ঠিং উপাদিযতীতি ৰা দিট্ঠুপাদানং. ‘‘সস্সতো অত্তা চ লোকো চা’’তিআদীসু ¶ (দী. নি. ১.৩১) হি পুরিমদিট্ঠিং উত্তরদিট্ঠি উপাদিযতি. তথা সীলব্বতং উপাদিযতীতি সীলব্বতুপাদানং. সীলব্বতঞ্চ তং উপাদানঞ্চাতিপি সীলব্বতুপাদানং. গোসীলগোৰতাদীনি হি ‘‘এৰং সুদ্ধী’’তি অভিনিৰেসতো সযমেৰ উপাদানানি. তথা ৰদন্তি এতেনাতি ৰাদো. উপাদিযন্তি ¶ এতেনাতি উপাদানং. কিং ৰদন্তি, উপাদিযন্তি ৰা? অত্তানং. অত্তনো ৰাদুপাদানং অত্তৰাদুপাদানং. অত্তৰাদমত্তমেৰ ৰা অত্তাতি উপাদিযন্তি এতেনাতি অত্তৰাদুপাদানং. অযং তাৰ তেসং অত্থৰিভাগো.

ধম্মসঙ্খেপৰিত্থারে পন কামুপাদানং তাৰ ‘‘তত্থ কতমং কামুপাদানং? যো কামেসু কামচ্ছন্দো কামরাগো কামনন্দী কামতণ্হা কামস্নেহো কামপরিল়াহো কামমুচ্ছা কামজ্ঝোসানং, ইদং ৰুচ্চতি কামুপাদান’’ন্তি (ধ. স. ১২২০; ৰিভ. ৯৩৮) আগতত্তা সঙ্খেপতো তণ্হাদল়্হত্তং ৰুচ্চতি. তণ্হাদল়্হত্তং নাম পুরিমতণ্হাউপনিস্সযপচ্চযেন দল়্হসম্ভূতা উত্তরতণ্হাৰ. কেচি পনাহু ‘‘অপ্পত্তৰিসযপত্থনা তণ্হা অন্ধকারে চোরস্স হত্থপ্পসারণং ৰিয, সম্পত্তৰিসযগ্গহণং উপাদানং তস্সেৰ ভণ্ডগ্গহণং ৰিয. অপ্পিচ্ছতাসন্তুট্ঠিতাপটিপক্খা চ তে ধম্মা. তথা পরিযেসনারক্খদুক্খমূলা’’তি. সেসুপাদানত্তযং পন সঙ্খেপতো দিট্ঠিমত্তমেৰ.

ৰিত্থারতো পন পুব্বে রূপাদীসু ৰুত্তঅট্ঠসতপ্পভেদাযপি তণ্হায দল়্হভাৰো কামুপাদানং. দসৰত্থুকা মিচ্ছাদিট্ঠি দিট্ঠুপাদানং. যথাহ – ‘‘তত্থ কতমং দিট্ঠুপাদানং? নত্থি দিন্নং, নত্থি যিট্ঠং…পে… সচ্ছিকত্ৰা পৰেদেন্তীতি যা এৰরূপা দিট্ঠি…পে… ৰিপরিযেসগ্গাহো. ইদং ৰুচ্চতি দিট্ঠুপাদান’’ন্তি (ধ. স. ১২২১; ৰিভ. ৯৩৮). সীলব্বতেহি সুদ্ধীতি পরামসনং পন সীলব্বতুপাদানং. যথাহ – ‘‘তত্থ কতমং সীলব্বতুপাদানং? সীলেন সুদ্ধি, ৰতেন সুদ্ধি, সীলব্বতেন সুদ্ধীতি যা এৰরূপা দিট্ঠি…পে… ৰিপরিযেসগ্গাহো. ইদং ৰুচ্চতি সীলব্বতুপাদান’’ন্তি (ধ. স. ১২২২; ৰিভ. ৯৩৮). ৰীসতিৰত্থুকা সক্কাযদিট্ঠি অত্তৰাদুপাদানং. যথাহ – ‘‘তত্থ কতমং অত্তৰাদুপাদানং? ইধ অস্সুতৰা পুথুজ্জনো…পে… সপ্পুরিসধম্মে অৰিনীতো রূপং অত্ততো সমনুপস্সতি…পে… ৰিপরিযেসগ্গাহো, ইদং ৰুচ্চতি অত্তৰাদুপাদান’’ন্তি (ধ. স. ১২২৩; ৰিভ. ৯৩৮). অযমেত্থ ধম্মসঙ্খেপৰিত্থারো.

কমতোতি এত্থ পন তিৰিধো কমো উপ্পত্তিক্কমো পহানক্কমো দেসনাক্কমো চ. তত্থ অনমতগ্গে ¶ সংসারে ইমস্স পঠমং উপ্পত্তীতি অভাৰতো কিলেসানং নিপ্পরিযাযেন উপ্পত্তিক্কমো ন ৰুচ্চতি. পরিযাযেন পন যেভুয্যেন একস্মিং ভৰে অত্তগ্গাহপুব্বঙ্গমো সস্সতুচ্ছেদাভিনিৰেসো, ততো ‘‘সস্সতো অযং অত্তা’’তি গণ্হতো অত্তৰিসুদ্ধত্থং সীলব্বতুপাদানং, ‘‘উচ্ছিজ্জতী’’তি গণ্হতো পরলোকনিরপেক্খস্স কামুপাদানন্তি ¶ এৰং পঠমং অত্তৰাদুপাদানং, ততো দিট্ঠিসীলব্বতকামুপাদানানীতি অযমেতেসং একস্মিং ভৰে উপ্পত্তিক্কমো.

দিট্ঠুপাদানাদীনি চেত্থ পঠমং পহীযন্তি সোতাপত্তিমগ্গৰজ্ঝত্তা. কামুপাদানং পচ্ছা, অরহত্তমগ্গৰজ্ঝত্তাতি অযমেতেসং পহানক্কমো.

মহাৰিসযত্তা পন পাকটত্তা চ এতেসু কামুপাদানং পঠমং দেসিতং. মহাৰিসযং হি তং অট্ঠচিত্তসম্পযোগা, অপ্পৰিসযানি ইতরানি চতুচিত্তসম্পযোগা, যেভুয্যেন চ আলযরামত্তা পজায পাকটং কামুপাদানং, ন ইতরানি. কামুপাদান ৰা কামানং সমধিগমত্থং কোতূহলমঙ্গলাদিবহুলো হোতি, সাস্স দিট্ঠীতি তদনন্তরং দিট্ঠুপাদানং, তং পভিজ্জমানং সীলব্বতঅত্তৰাদুপাদানৰসেন দুৰিধং হোতি. তস্মিং দ্ৰযে গোকিরিযং কুক্কুরকিরিযং ৰা দিস্ৰাপি ৰেদিতব্বতো ওল়ারিকন্তি সীলব্বতুপাদানং পঠমং দেসিতং. সুখুমত্তা অন্তে অত্তৰাদুপাদানন্তি অযমেতেসং দেসনাক্কমো.

তণ্হা চ পুরিমস্সেত্থ, একধা হোতি পচ্চযো;

সত্তধা অট্ঠধা ৰাপি, হোতি সেসত্তযস্স সা.

এত্থ চ এৰং দেসিতে উপাদানচতুক্কে পুরিমস্স কামুপাদানস্স কামতণ্হা উপনিস্সযৰসেন একধাৰ পচ্চযো হোতি, তণ্হাভিনন্দিতেসু ৰিসযেসু উপ্পত্তিতো. সেসত্তযস্স পন সহজাতঅঞ্ঞমঞ্ঞনিস্সযসম্পযুত্তঅত্থিঅৰিগতহেতুৰসেন সত্তধা ৰা, উপনিস্সযেন সহ অট্ঠধা ৰাপি পচ্চযো হোতি. যদা চ সা উপনিস্সযৰসেন পচ্চযো হোতি, তদা অসহজাতাৰ হোতীতি.

অযং ‘‘তণ্হাপচ্চযা উপাদান’’ন্তি পদস্মিং ৰিত্থারকথা.

উপাদানপচ্চযাভৰপদৰিত্থারকথা

৬৪৬. উপাদানপচ্চযা ¶ ভৰপদে –

অত্থতো ধম্মতো চেৰ, সাত্থতো ভেদসঙ্গহা;

যং যস্স পচ্চযো চেৰ, ৰিঞ্ঞাতব্বো ৰিনিচ্ছযো.

তত্থ ¶ ভৰতীতি ভৰো. সো কম্মভৰো উপপত্তিভৰো চাতি দুৰিধো হোতি. যথাহ – ‘‘ভৰো দুৰিধেন অত্থি কম্মভৰো, অত্থি উপপত্তিভৰো’’তি (ৰিভ. ২৩৪). তত্থ কম্মমেৰ ভৰো কম্মভৰো, তথা উপপত্তিযেৰ ভৰো উপপত্তিভৰো. এত্থ চ উপপত্তি ভৰতীতি ভৰো. কম্মং পন যথা সুখকারণত্তা ‘‘সুখো বুদ্ধানং উপ্পাদো’’তি (ধ. প. ১৯৪) ৰুত্তো, এৰং ভৰকারণত্তা ফলৰোহারেন ভৰোতি ৰেদিতব্বন্তি. এৰং তাৰেত্থ অত্থতো ৰিঞ্ঞাতব্বো ৰিনিচ্ছযো.

৬৪৭. ধম্মতো পন কম্মভৰো তাৰ সঙ্খেপতো চেতনা চেৰ চেতনাসম্পযুত্তা চ অভিজ্ঝাদযো কম্মসঙ্খাতা ধম্মা. যথাহ – ‘‘তত্থ কতমো কম্মভৰো? পুঞ্ঞাভিসঙ্খারো অপুঞ্ঞাভিসঙ্খারো আনেঞ্জাভিসঙ্খারো (ৰিভ. ২৩৪) পরিত্তভূমকো ৰা মহাভূমকো ৰা, অযং ৰুচ্চতি কম্মভৰো. সব্বম্পি ভৰগামিকম্মং কম্মভৰো’’তি (ৰিভ. ২৩৪). এত্থ হি পুঞ্ঞাভিসঙ্খারোতি তেরস চেতনা. অপুঞ্ঞাভিসঙ্খারোতি দ্ৰাদস. আনেঞ্জাভিসঙ্খারোতি চতস্সো চেতনা. এৰং পরিত্তভূমকো ৰা মহাভূমকো ৰাতি এতেন তাসংযেৰ চেতনানং মন্দবহুৰিপাকতা ৰুত্তা. সব্বম্পি ভৰগামিকম্মন্তি ইমিনা পন চেতনাসম্পযুত্তা অভিজ্ঝাদযো ৰুত্তা.

উপপত্তিভৰো পন সঙ্খেপতো কম্মাভিনিব্বত্তা খন্ধা, পভেদতো নৰৰিধো হোতি. যথাহ – ‘‘তত্থ কতমো উপপত্তিভৰো? কামভৰো রূপভৰো অরূপভৰো সঞ্ঞাভৰো অসঞ্ঞাভৰো নেৰসঞ্ঞানাসঞ্ঞাভৰো, একৰোকারভৰো চতুৰোকারভৰো পঞ্চৰোকারভৰো, অযং ৰুচ্চতি উপপত্তিভৰো’’তি (ৰিভ. ২৩৪). তত্থ কামসঙ্খাতো ভৰো কামভৰো. এস নযো রূপারূপভৰেসু. সঞ্ঞাৰতং ভৰো, সঞ্ঞা ৰা এত্থ ভৰে অত্থীতি সঞ্ঞাভৰো. ৰিপরিযাযেন অসঞ্ঞাভৰো. ওল়ারিকায সঞ্ঞায অভাৰা সুখুমায চ ভাৰা নেৰসঞ্ঞা, নাসঞ্ঞা অস্মিং ¶ ভৰেতি নেৰসঞ্ঞানাসঞ্ঞাভৰো. একেন রূপক্খন্ধেন ৰোকিণ্ণো ভৰো একৰোকারভৰো. একো ৰা ৰোকারো অস্স ভৰস্সাতি একৰোকারভৰো. এস নযো চতুৰোকারপঞ্চৰোকারভৰেসু. তত্থ কামভৰো পঞ্চ উপাদিণ্ণক্খন্ধা. তথা রূপভৰো. অরূপভৰো চত্তারো ¶ , সঞ্ঞাভৰো পঞ্চ. অসঞ্ঞাভৰো একো উপাদিণ্ণক্খন্ধো. নেৰসঞ্ঞানাসঞ্ঞাভৰো চত্তারো. একৰোকারভৰাদযো একচতুপঞ্চক্খন্ধা উপাদিণ্ণক্খন্ধেহীতি এৰমেত্থ ধম্মতোপি ৰিঞ্ঞাতব্বো ৰিনিচ্ছযো.

৬৪৮. সাত্থতোতি যথা চ ভৰনিদ্দেসে, তথেৰ কামং সঙ্খারনিদ্দেসেপি পুঞ্ঞাভিসঙ্খারাদযোৰ ৰুত্তা, এৰং সন্তেপি পুরিমে অতীতকম্মৰসেন ইধ পটিসন্ধিযা পচ্চযত্তা, ইমে পচ্চুপ্পন্নকম্মৰসেন আযতিং পটিসন্ধিযা পচ্চযত্তাতি পুনৰচনং সাত্থকমেৰ, পুব্বে ৰা ‘‘তত্থ কতমো পুঞ্ঞাভিসঙ্খারো? কুসলা চেতনা কামাৰচরা’’তি (ৰিভ. ২২৬) এৰমাদিনা নযেন চেতনাৰ সঙ্খারাতি ৰুত্তা. ইধ পন ‘‘সব্বম্পি ভৰগামিকম্ম’’ন্তি (ৰিভ. ২৩৪) ৰচনতো চেতনাসম্পযুত্তাপি. পুব্বে চ ৰিঞ্ঞাণপচ্চযমেৰ কম্মং ‘‘সঙ্খারা’’তি ৰুত্তং. ইদানি অসঞ্ঞাভৰনিব্বত্তকম্পি. কিং ৰা বহুনা, ‘‘অৰিজ্জাপচ্চযা সঙ্খারা’’তি এত্থ পুঞ্ঞাভিসঙ্খারাদযোৰ কুসলাকুসলা ধম্মা ৰুত্তা. ‘‘উপাদানপচ্চযা ভৰো’’তি ইধ পন উপপত্তিভৰস্সাপি সঙ্গহিতত্তা কুসলাকুসলাব্যাকতা ধম্মা ৰুত্তা. তস্মা সব্বথাপি সাত্থকমেৰিদং পুনৰচনন্তি এৰমেত্থ সাত্থতোপি ৰিঞ্ঞাতব্বো ৰিনিচ্ছযো.

৬৪৯. ভেদসঙ্গহাতি উপাদানপচ্চযা ভৰস্স ভেদতো চেৰ সঙ্গহতো চ. যঞ্হি কামুপাদানপচ্চযা কামভৰনিব্বত্তকং কম্মং করীযতি, সো কম্মভৰো. তদভিনিব্বত্তা খন্ধা উপপত্তিভৰো. এস নযো রূপারূপভৰেসু. এৰং কামুপাদানপচ্চযা দ্ৰে কামভৰা, তদন্তোগধা চ সঞ্ঞাভৰপঞ্চৰোকারভৰা, দ্ৰে রূপভৰা, তদন্তোগধা চ সঞ্ঞাভৰঅসঞ্ঞাভৰএকৰোকারভৰপঞ্চৰোকারভৰা, দ্ৰে অরূপভৰা, তদন্তোগধা চ সঞ্ঞাভৰনেৰসঞ্ঞানাসঞ্ঞাভৰচতুৰোকারভৰাতি সদ্ধিং অন্তোগধেহি ছ ভৰা. যথা চ কামুপাদানপচ্চযা সদ্ধিং অন্তোগধেহি ছ ভৰা. তথা সেসুপাদানপচ্চযাপীতি এৰং উপাদানপচ্চযা ভেদতো সদ্ধিং অন্তোগধেহি চতুৰীসতি ভৰা.

সঙ্গহতো পন কম্মভৰং উপপত্তিভৰঞ্চ একতো কত্ৰা কামুপাদানপচ্চযা সদ্ধিং অন্তোগধেহি ¶ একো কামভৰো. তথা রূপারূপভৰাতি তযো ভৰা. তথা সেসুপাদানপচ্চযা পীতি. এৰং উপাদানপচ্চযা সঙ্গহতো সদ্ধিং অন্তোগধেহি দ্ৰাদস ভৰা. অপিচ ¶ অৰিসেসেন উপাদানপচ্চযা কামভৰূপগং কম্মং কম্মভৰো. তদভিনিব্বত্তা খন্ধা উপপত্তিভৰো. এস নযো রূপারূপভৰেসু. এৰং উপাদানপচ্চযা সদ্ধিং অন্তোগধেহি দ্ৰে কামভৰা, দ্ৰে রূপভৰা, দ্ৰে অরূপভৰাতি অপরেন পরিযাযেন সঙ্গহতো ছ ভৰা. কম্মভৰউপপত্তিভৰভেদং ৰা অনুপগম্ম সদ্ধিং অন্তোগধেহি কামভৰাদিৰসেন তযো ভৰা হোন্তি. কামভৰাদিভেদম্পি অনুপগম্ম কম্মভৰউপপত্তিভৰৰসেন দ্ৰে ভৰা হোন্তি. কম্মুপপত্তিভেদঞ্চাপি অনুপগম্ম উপাদানপচ্চযা ভৰোতি ভৰৰসেন একোৰ ভৰো হোতীতি এৰমেত্থ উপাদানপচ্চযস্স ভৰস্স ভেদসঙ্গহাপি ৰিঞ্ঞাতব্বো ৰিনিচ্ছযো.

৬৫০. যং যস্স পচ্চযো চেৰাতি যঞ্চেত্থ উপাদানং যস্স পচ্চযো হোতি, ততোপি ৰিঞ্ঞাতব্বো ৰিনিচ্ছযোতি অত্থো. কিং পনেত্থ কস্স পচ্চযো হোতি? যংকিঞ্চি যস্স কস্সচি পচ্চযো হোতিযেৰ. উম্মত্তকো ৰিয হি পুথুজ্জনো. সো ইদং যুত্তং ইদং অযুত্তন্তি অৰিচারেত্ৰা যস্স কস্সচি উপাদানস্স ৰসেন যংকিঞ্চি ভৰং পত্থেত্ৰা যংকিঞ্চি কম্মং করোতিযেৰ. তস্মা যদেকচ্চে সীলব্বতুপাদানেন রূপারূপভৰা ন হোন্তীতি ৰদন্তি, তং ন গহেতব্বং. সব্বেন পন সব্বো হোতীতি গহেতব্বং.

সেয্যথিদং – ইধেকচ্চো অনুস্সৰৰসেন ৰা দিট্ঠানুসারেন ৰা ‘‘কামা নামেতে মনুস্সলোকে চেৰ খত্তিযমহাসালকুলাদীসু, ছ কামাৰচরদেৰলোকে চ সমিদ্ধা’’তি চিন্তেত্ৰা তেসং অধিগমত্থং অসদ্ধম্মস্সৰনাদীহি ৰঞ্চিতো ‘‘ইমিনা কম্মেন কামা সম্পজ্জন্তী’’তি মঞ্ঞমানো কামুপাদানৰসেন কাযদুচ্চরিতাদীনিপি করোতি, সো দুচ্চরিতপারিপূরিযা অপাযে উপপজ্জতি. সন্দিট্ঠিকে ৰা পন কামে পত্থযমানো পটিলদ্ধে চ গোপযমানো কামুপাদানৰসেন কাযদুচ্চরিতাদীনি করোতি, সো দুচ্চরিতপারিপূরিযা অপাযে উপপজ্জতি. তত্রাস্স উপপত্তিহেতুভূতং কম্মং কম্মভৰো. কম্মাভিনিব্বত্তা খন্ধা উপপত্তিভৰো. সঞ্ঞাভৰপঞ্চৰোকারভৰা পন তদন্তোগধা এৰ.

অপরো ¶ পন সদ্ধম্মস্সৰনাদীহি উপব্রূহিতঞাণো ‘‘ইমিনা কম্মেন কামা সম্পজ্জন্তী’’তি মঞ্ঞমানো কামুপাদানৰসেন কাযসুচরিতাদীনি করোতি. সো সুচরিতপারিপূরিযা ¶ দেৰেসু ৰা মনুস্সেসু ৰা উপপজ্জতি. তত্রাস্স উপপত্তিহেতুভূতং কম্মং কম্মভৰো. কম্মাভিনিব্বত্তা খন্ধা উপপত্তিভৰো. সঞ্ঞাভৰপঞ্চৰোকারভৰা পন তদন্তোগধা এৰ. ইতি কামুপাদানং সপ্পভেদস্স সান্তোগধস্স কামভৰস্স পচ্চযো হোতি.

অপরো ‘‘রূপারূপভৰেসু ততো সমিদ্ধতরা কামা’’তি সুত্ৰা পরিকপ্পেত্ৰা ৰা কামুপাদানৰসেনেৰ রূপারূপসমাপত্তিযো নিব্বত্তেত্ৰা সমাপত্তিবলেন রূপারূপব্রহ্মলোকে উপপজ্জতি. তত্রাস্স উপপত্তিহেতুভূতং কম্মং কম্মভৰো. কম্মাভিনিব্বত্তা খন্ধা উপপত্তিভৰো. সঞ্ঞা-অসঞ্ঞা-নেৰসঞ্ঞানাসঞ্ঞা-এক-চতু-পঞ্চৰোকারভৰা পন তদন্তোগধা এৰ. ইতি কামুপাদানং সপ্পভেদানং সান্তোগধানং রূপারূপভৰানম্পি পচ্চযো হোতি.

অপরো ‘‘অযং অত্তা নাম কামাৰচরসম্পত্তিভৰে ৰা রূপারূপভৰানং ৰা অঞ্ঞতরস্মিং উচ্ছিন্নে সুউচ্ছিন্নো হোতী’’তি উচ্ছেদদিট্ঠিং উপাদায তদুপগং কম্মং করোতি, তস্স তং কম্মং কম্মভৰো. কম্মাভিনিব্বত্তা খন্ধা উপপত্তিভৰো. সঞ্ঞাভৰাদযো পন তদন্তোগধা এৰ. ইতি দিট্ঠুপাদানং সপ্পভেদানং সান্তোগধানং তিণ্ণম্পি কামরূপারূপভৰানং পচ্চযো হোতি.

অপরো ‘‘অযং অত্তা নাম কামাৰচরসম্পত্তিভৰে ৰা রূপারূপভৰানং ৰা অঞ্ঞতরস্মিং সুখী হোতি ৰিগতপরিল়াহো’’তি অত্তৰাদুপাদানেন তদুপগং কম্মং করোতি, তস্স তং কম্মং কম্মভৰো. তদভিনিব্বত্তা খন্ধা উপপত্তিভৰো. সঞ্ঞাভৰাদযো পন তদন্তোগধা এৰ. ইতি অত্তৰাদুপাদানং সপ্পভেদানং সান্তোগধানং তিণ্ণং ভৰানং পচ্চযো হোতি.

অপরো ‘‘ইদং সীলব্বতং নাম কামাৰচরসম্পত্তিভৰে ৰা রূপারূপভৰানং ৰা অঞ্ঞতরস্মিং পরিপূরেন্তস্স সুখং পারিপূরিং গচ্ছতী’’তি সীলব্বতুপাদানৰসেন তদুপগং কম্মং করোতি, তস্স তং কম্মং কম্মভৰো. তদভিনিব্বত্তা খন্ধা উপপত্তিভৰো. সঞ্ঞাভৰাদযো পন তদন্তোগধা এৰ. ইতি সীলব্বতুপাদানং সপ্পভেদানং সান্তোগধানং তিণ্ণং ভৰানং পচ্চযো হোতি. এৰমেত্থ যং যস্স পচ্চযো হোতি, ততোপি ৰিঞ্ঞাতব্বো ৰিনিচ্ছযো.

কিং পনেত্থ ¶ কস্স ভৰস্স কথং পচ্চযো হোতীতি চে?

রূপারূপভৰানং ¶ , উপনিস্সযপচ্চযো উপাদানং;

সহজাতাদীহিপি তং, কামভৰস্সাতি ৰিঞ্ঞেয্যং.

রূপারূপভৰানং হি, কামভৰপরিযাপন্নস্স চ কম্মভৰে কুসলকম্মস্সেৰ, উপপত্তিভৰস্স চেতং চতুব্বিধম্পি উপাদানং উপনিস্সযপচ্চযৰসেন একধাৰ পচ্চযো হোতি. কামভৰে অত্তনা সম্পযুত্তাকুসলকম্মভৰস্স সহজাতঅঞ্ঞমঞ্ঞনিস্সযসম্পযুত্তঅত্থিঅৰিগতহেতুপচ্চযপ্পভেদেহি সহজাতাদীহি পচ্চযো হোতি. ৰিপ্পযুত্তস্স পন উপনিস্সযপচ্চযেনেৰাতি.

অযং ‘‘উপাদানপচ্চযা ভৰো’’তি পদস্মিং ৰিত্থারকথা.

ভৰপচ্চযাজাতিআদিৰিত্থারকথা

৬৫১. ভৰপচ্চযা জাতীতিআদীসু জাতিআদীনং ৰিনিচ্ছযো সচ্চনিদ্দেসে ৰুত্তনযেনেৰ ৰেদিতব্বো. ভৰোতি পনেত্থ কম্মভৰোৰ অধিপ্পেতো. সো হি জাতিযা পচ্চযো, ন উপপত্তিভৰো. সো চ পন কম্মপচ্চযউপনিস্সযপচ্চযৰসেন দ্ৰেধা পচ্চযো হোতীতি.

তত্থ সিযা – কথং পনেতং জানিতব্বং ভৰো জাতিযা পচ্চযোতি চে? বাহিরপচ্চযসমত্তেপি হীনপণীততাদিৰিসেসদস্সনতো. বাহিরানং হি জনকজননীসুক্কসোণিতাহারাদীনং পচ্চযানং সমত্তেপি সত্তানং যমকানম্পি সতং হীনপণীততাদিৰিসেসো দিস্সতি. সো চ ন অহেতুকো সব্বদা চ সব্বেসঞ্চ অভাৰতো, ন কম্মভৰতো অঞ্ঞহেতুকো তদভিনিব্বত্তকসত্তানং অজ্ঝত্তসন্তানে অঞ্ঞস্স কারণস্স অভাৰতোতি কম্মভৰহেতুকোৰ. কম্মং হি সত্তানং হীনপণীততাদিৰিসেসস্স হেতু. তেনাহ ভগৰা ‘‘কম্মং সত্তে ৰিভজতি যদিদং হীনপ্পণীততাযা’’তি (ম. নি. ৩.২৮৯). তস্মা জানিতব্বমেতং ‘‘ভৰো জাতিযা পচ্চযো’’তি.

যস্মা চ অসতি জাতিযা জরামরণং নাম, সোকাদযো ৰা ধম্মা ন হোন্তি. জাতিযা পন সতি জরামরণঞ্চেৰ, জরামরণসঙ্খাতদুক্খধম্মফুট্ঠস্স চ বালজনস্স জরামরণাভিসম্বন্ধা ¶ ৰা তেন তেন দুক্খধম্মেন ফুট্ঠস্স ¶ অনভিসম্বন্ধা ৰা সোকাদযো চ ধম্মা হোন্তি. তস্মা অযম্পি জাতি জরামরণস্স চেৰ সোকাদীনঞ্চ পচ্চযো হোতীতি ৰেদিতব্বা. সা পন উপনিস্সযকোটিযা একধাৰ পচ্চযো হোতীতি.

অযং ‘‘ভৰপচ্চযা জাতী’’তিআদীসু ৰিত্থারকথা.

ভৰচক্ককথা

৬৫২. যস্মা পনেত্থ সোকাদযো অৰসানে ৰুত্তা, তস্মা যা সা অৰিজ্জাপচ্চযা সঙ্খারাতি এৰমেতস্স ভৰচক্কস্স আদিম্হি ৰুত্তা, সা,

সোকাদীহি অৰিজ্জা, সিদ্ধা ভৰচক্কমৰিদিতাদিমিদং;

কারকৰেদকরহিতং, দ্ৰাদসৰিধসুঞ্ঞতাসুঞ্ঞং.

সততং সমিতং পৰত্ততীতি ৰেদিতব্বং.

কথং পনেত্থ সোকাদীহি অৰিজ্জা সিদ্ধা, কথমিদং ভৰচক্কং অৰিদিতাদি, কথং কারকৰেদকরহিতং, কথং দ্ৰাদসৰিধসুঞ্ঞতাসুঞ্ঞন্তি চে? এত্থ হি সোকদোমনস্সুপাযাসা অৰিজ্জায অৰিযোগিনো, পরিদেৰো চ নাম মূল়্হস্সাতি তেসু তাৰ সিদ্ধেসু সিদ্ধা হোতি অৰিজ্জা. অপিচ ‘‘আসৰসমুদযা অৰিজ্জাসমুদযো’’তি (ম. নি. ১.১০৩) ৰুত্তং. আসৰসমুদযা চেতে সোকাদযো হোন্তি.

কথং? ৰত্থুকামৰিযোগে তাৰ সোকো কামাসৰসমুদযা হোতি. যথাহ –

‘‘তস্স চে কামযানস্স, ছন্দজাতস্স জন্তুনো;

তে কামা পরিহাযন্তি, সল্লৰিদ্ধোৰ রুপ্পতী’’তি. (সু. নি. ৭৭৩);

যথা চাহ – ‘‘কামতো জাযতি সোকো’’তি. (ধ. প. ২১৫).

সব্বেপি ¶ চেতে দিট্ঠাসৰসমুদযা হোন্তি. যথাহ –

‘‘তস্স ‘অহং রূপং মম রূপ’ন্তি পরিযুট্ঠট্ঠাযিনো রূপৰিপরিণামঞ্ঞথাভাৰা উপ্পজ্জন্তি সোকপরিদেৰদুক্খদোমনস্সুপাযাসা’’তি (সং. নি. ৩.১).

যথা চ দিট্ঠাসৰসমুদযা, এৰং ভৰাসৰসমুদযাপি. যথাহ –

‘‘যেপি ¶ তে দেৰা দীঘাযুকা ৰণ্ণৰন্তো সুখবহুলা উচ্চেসু ৰিমানেসু চিরট্ঠিতিকা, তেপি তথাগতস্স ধম্মদেসনং সুত্ৰা ভযং সন্তাসং সংৰেগমাপজ্জন্তী’’তি (সং. নি. ৩.৭৮). পঞ্চ পুব্বনিমিত্তানি দিস্ৰা মরণভযেন সন্তজ্জিতানং দেৰানং ৰিয.

যথা চ ভৰাসৰসমুদযা, এৰং অৰিজ্জাসৰসমুদযাপি. যথাহ –

‘‘স খো সো, ভিক্খৰে, বালো তিৰিধং দিট্ঠেৰ ধম্মে দুক্খং দোমনস্সং পটিসংৰেদেতী’’তি (ম. নি. ৩.২৪৬).

ইতি যস্মা আসৰসমুদযা এতে ধম্মা হোন্তি, তস্মা এতে সিজ্ঝমানা অৰিজ্জায হেতুভূতে আসৰে সাধেন্তি. আসৰেসু চ সিদ্ধেসু পচ্চযভাৰে ভাৰতো অৰিজ্জাপি সিদ্ধাৰ হোতীতি. এৰং তাৰেত্থ সোকাদীহি অৰিজ্জা সিদ্ধা হোতীতি ৰেদিতব্বা.

যস্মা পন এৰং পচ্চযভাৰে ভাৰতো অৰিজ্জায সিদ্ধায পুন অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণন্তি এৰং হেতুফলপরম্পরায পরিযোসানং নত্থি. তস্মা তং হেতুফলসম্বন্ধৰসেন পৰত্তং দ্ৰাদসঙ্গং ভৰচক্কং অৰিদিতাদীতি সিদ্ধং হোতি.

এৰং সতি অৰিজ্জাপচ্চযা সঙ্খারাতি ইদং আদিমত্তকথনং ৰিরুজ্ঝতীতি চে. নযিদং আদিমত্তকথনং. পধানধম্মকথনং পনেতং. তিণ্ণন্নং হি ৰট্টানং অৰিজ্জা পধানা. অৰিজ্জাগ্গহণেন হি অৰসেসকিলেসৰট্টঞ্চ কম্মাদীনি চ বালং পলিবোধেন্তি. সপ্পসিরগ্গহণেন সেসসপ্পসরীরং ৰিয বাহং. অৰিজ্জাসমুচ্ছেদে পন কতে তেহি ৰিমোক্খো হোতি ¶ . সপ্পসিরচ্ছেদে কতে পলিবোধিতবাহাৰিমোক্খো ৰিয. যথাহ – ‘‘অৰিজ্জাযত্ৰেৰ অসেসৰিরাগনিরোধা সঙ্খারনিরোধো’’তিআদি (সং. নি. ২.১; মহাৰ. ১). ইতি যং গণ্হতো বন্ধো, মুচ্চতো চ মোক্খো হোতি, তস্স পধানধম্মস্স কথনমিদং, ন আদিমত্তকথনন্তি. এৰমিদং ভৰচক্কং অৰিদিতাদীতি ৰেদিতব্বং.

তযিদং ¶ যস্মা অৰিজ্জাদীহি কারণেহি সঙ্খারাদীনং পৰত্তি, তস্মা ততো অঞ্ঞেন ‘‘ব্রহ্মা মহাব্রহ্মা সেট্ঠো সজিতা’’তি (দী. নি. ১.৪২) এৰং পরিকপ্পিতেন ব্রহ্মাদিনা ৰা সংসারস্স কারকেন, ‘‘সো খো পন মে অযং অত্তা ৰদো ৰেদেয্যো’’তি এৰং পরিকপ্পিতেন অত্তনা ৰা সুখদুক্খানং ৰেদকেন রহিতং. ইতি কারকৰেদকরহিতন্তি ৰেদিতব্বং.

যস্মা পনেত্থ অৰিজ্জা উদযব্বযধম্মকত্তা ধুৰভাৰেন, সংকিলিট্ঠত্তা সংকিলেসিকত্তা চ সুভভাৰেন, উদযব্বযপটিপীল়িতত্তা সুখভাৰেন, পচ্চযাযত্তৰুত্তিত্তা ৰসৰত্তনভূতেন অত্তভাৰেন চ সুঞ্ঞা. তথা সঙ্খারাদীনিপি অঙ্গানি. যস্মা ৰা অৰিজ্জা ন অত্তা, ন অত্তনো, ন অত্তনি, ন অত্তৰতী. তথা সঙ্খারাদীনিপি অঙ্গানি. তস্মা দ্ৰাদসৰিধসুঞ্ঞতাসুঞ্ঞমেতং ভৰচক্কন্তি ৰেদিতব্বং.

৬৫৩. এৰঞ্চ ৰিদিত্ৰা পুন,

তস্সাৰিজ্জাতণ্হা, মূলমতীতাদযো তযো কালা;

দ্ৰে অট্ঠ দ্ৰে এৰ চ, সরূপতো তেসু অঙ্গানি.

তস্স খো পনেতস্স ভৰচক্কস্স অৰিজ্জা তণ্হা চাতি দ্ৰে ধম্মা মূলন্তি ৰেদিতব্বা. তদেতং পুব্বন্তাহরণতো অৰিজ্জামূলং ৰেদনাৰসানং, অপরন্তসন্তানতো তণ্হামূলং জরামরণাৰসানন্তি দুৰিধং হোতি. তত্থ পুরিমং দিট্ঠিচরিতৰসেন ৰুত্তং, পচ্ছিমং তণ্হাচরিতৰসেন. দিট্ঠিচরিতানং হি অৰিজ্জা, তণ্হাচরিতানঞ্চ তণ্হা সংসারনাযিকা. উচ্ছেদদিট্ঠিসমুগ্ঘাতায ৰা পঠমং, ফলুপ্পত্তিযা হেতূনং অনুপচ্ছেদপ্পকাসনতো, সস্সতদিট্ঠিসমুগ্ঘাতায দুতিযং, উপ্পন্নানং জরামরণপ্পকাসনতো. গব্ভসেয্যকৰসেন ৰা পুরিমং, অনুপুব্বপৰত্তিদীপনতো, ওপপাতিকৰসেন পচ্ছিমং, সহুপ্পত্তিদীপনতো.

অতীতপচ্চুপ্পন্নানাগতা ¶ চস্স তযো কালা. তেসু পাল়িযং সরূপতো আগতৰসেন ‘‘অৰিজ্জা, সঙ্খারা চা’’তি দ্ৰে অঙ্গানি অতীতকালানি. ৰিঞ্ঞাণাদীনি ভৰাৰসানানি অট্ঠ পচ্চুপ্পন্নকালানি. জাতি চেৰ জরামরণঞ্চ দ্ৰে অনাগতকালানীতি ৰেদিতব্বানি.

৬৫৪. পুন ¶ ,

‘‘হেতুফলহেতুপুব্বক-তিসন্ধিচতুভেদসঙ্গহঞ্চেতং;

ৰীসতি আকারারং, তিৰট্টমনৰট্ঠিতং ভমতি’’.

ইতিপি ৰেদিতব্বং.

তত্থ সঙ্খারানঞ্চ পটিসন্ধিৰিঞ্ঞাণস্স চ অন্তরা একো হেতুফলসন্ধি নাম. ৰেদনায চ তণ্হায চ অন্তরা একো ফলহেতুসন্ধি নাম. ভৰস্স চ জাতিযা চ অন্তরা একো হেতুফলসন্ধীতি এৰমিদং হেতুফলহেতুপুব্বকতিসন্ধীতি ৰেদিতব্বং.

সন্ধীনং আদিপরিযোসানৰৰত্থিতা পনস্স চত্তারো সঙ্গহা হোন্তি. সেয্যথিদং – অৰিজ্জাসঙ্খারা একো সঙ্গহো. ৰিঞ্ঞাণনামরূপসল়াযতনফস্সৰেদনা দুতিযো. তণ্হুপাদানভৰা ততিযো. জাতিজরামরণং চতুত্থোতি. এৰমিদং চতুভেদসঙ্গহন্তি ৰেদিতব্বং.

অতীতে হেতৰো পঞ্চ, ইদানি ফলপঞ্চকং;

ইদানি হেতৰো পঞ্চ, আযতিং ফলপঞ্চকন্তি.

এতেহি পন ৰীসতিযা আকারসঙ্খাতেহি অরেহি ৰীসতিআকারারন্তি ৰেদিতব্বং. তত্থ অতীতে হেতৰো পঞ্চাতি অৰিজ্জা সঙ্খারা চাতি ইমে তাৰ দ্ৰে ৰুত্তা এৰ. যস্মা পন অৰিদ্ৰা পরিতস্সতি, পরিতস্সিতো উপাদিযতি, তস্সুপাদানপচ্চযা ভৰো. তস্মা তণ্হুপাদানভৰাপি গহিতা হোন্তি. তেনাহ ‘‘পুরিমকম্মভৰস্মিং মোহো অৰিজ্জা, আযূহনা সঙ্খারা, নিকন্তি তণ্হা, উপগমনং উপাদানং, চেতনা ভৰোতি ইমে পঞ্চ ধম্মা পুরিমকম্মভৰস্মিং ইধ পটিসন্ধিযা পচ্চযা’’তি (পটি. ম. ১.৪৭).

তত্থ ¶ পুরিমকম্মভৰস্মিন্তি পুরিমে কম্মভৰে, অতীতজাতিযং কম্মভৰে করিযমানেতি অত্থো. মোহো অৰিজ্জাতি যো তদা দুক্খাদীসু মোহো, যেন মূল়্হো কম্মং করোতি, সা অৰিজ্জা. আযূহনা সঙ্খারাতি তং কম্মং করোতো যা পুরিমচেতনাযো, যথা ‘‘দানং দস্সামী’’তি চিত্তং উপ্পাদেত্ৰা মাসম্পি সংৰচ্ছরম্পি দানুপকরণানি সজ্জেন্তস্স উপ্পন্না পুরিমচেতনাযো. পটিগ্গাহকানং পন হত্থে দক্খিণং পতিট্ঠাপযতো চেতনা ভৰোতি ৰুচ্চতি. একাৰজ্জনেসু ৰা ছসু জৰনেসু চেতনা আযূহনা সঙ্খারা নাম ¶ . সত্তমে ভৰো. যা কাচি ৰা পন চেতনা ভৰো. সম্পযুত্তা আযূহনা সঙ্খারা নাম. নিকন্তি তণ্হাতি যা কম্মং করোন্তস্স ফলে উপপত্তিভৰে নিকামনা পত্থনা, সা তণ্হা নাম. উপগমনং উপাদানন্তি যং কম্মভৰস্স পচ্চযভূতং ‘‘ইদং কত্ৰা অসুকস্মিং নাম ঠানে কামে সেৰিস্সামি উচ্ছিজ্জিস্সামী’’তিআদিনা নযেন পৰত্তং উপগমনং গহণং পরামসনং, ইদং উপাদানং নাম. চেতনা ভৰোতি আযূহনাৰসানে ৰুত্তা চেতনা ভৰোতি এৰমত্থো ৰেদিতব্বো.

ইদানি ফলপঞ্চকন্তি ৰিঞ্ঞাণাদিৰেদনাৰসানং পাল়িযং আগতমেৰ. যথাহ – ‘‘ইধ পটিসন্ধি ৰিঞ্ঞাণং, ওক্কন্তি নামরূপং, পসাদো আযতনং, ফুট্ঠো ফস্সো, ৰেদযিতং ৰেদনা, ইমে পঞ্চ ধম্মা ইধূপপত্তিভৰস্মিং পুরেকতস্স কম্মস্স পচ্চযা’’তি (পটি. ১.৪৭). তত্থ পটিসন্ধি ৰিঞ্ঞাণন্তি যং ভৰন্তরপটিসন্ধানৰসেন উপ্পন্নত্তা পটিসন্ধীতি ৰুচ্চতি, তং ৰিঞ্ঞাণং. ওক্কন্তি নামরূপন্তি যা গব্ভে রূপারূপধম্মানং ওক্কন্তি আগন্ত্ৰা পৰিসনং ৰিয, ইদং নামরূপং. পসাদো আযতনন্তি ইদং চক্খাদিপঞ্চাযতনৰসেন ৰুত্তং. ফুট্ঠো ফস্সোতি যো আরম্মণং ফুট্ঠো ফুসন্তো উপ্পন্নো, অযং ফস্সো. ৰেদযিতং ৰেদনাতি যং পটিসন্ধিৰিঞ্ঞাণেন ৰা সল়াযতনপচ্চযেন ৰা ফস্সেন সহ উপ্পন্নং ৰিপাকৰেদযিতং, সা ৰেদনাতি এৰমত্থো ৰেদিতব্বো.

ইদানি হেতৰো পঞ্চাতি তণ্হাদযো পাল়িযং আগতা তণ্হুপাদানভৰা. ভৰে পন গহিতে তস্স পুব্বভাগা তংসম্পযুত্তা ৰা সঙ্খারা গহিতাৰ হোন্তি. তণ্হুপাদানগ্গহণেন চ তংসম্পযুত্তা, যায ৰা মূল়্হো কম্মং করোতি, সা অৰিজ্জা গহিতাৰ হোতীতি. এৰং পঞ্চ. তেনাহ ‘‘ইধ পরিপক্কত্তা আযতনানং মোহো অৰিজ্জা, আযূহনা সঙ্খারা, নিকন্তি তণ্হা, উপগমনং উপাদানং, চেতনা ভৰোতি ইমে পঞ্চ ধম্মা ইধ কম্মভৰস্মিং আযতিং পটিসন্ধিযা পচ্চযা’’তি ¶ (পটি. ম. ১.৪৭). তত্থ ইধ পরিপক্কত্তা আযতনানন্তি পরিপক্কাযতনস্স কম্মকরণকালে সম্মোহো দস্সিতো. সেসং উত্তানত্থমেৰ.

আযতিং ফলপঞ্চকন্তি ৰিঞ্ঞাণাদীনি পঞ্চ. তানি জাতিগ্গহণেন ৰুত্তানি. জরামরণং পন তেসংযেৰ জরামরণং. তেনাহ – ‘‘আযতিং পটিসন্ধি ৰিঞ্ঞাণং ¶ , ওক্কন্তি নামরূপং, পসাদো আযতনং, ফুট্ঠো ফস্সো, ৰেদযিতং ৰেদনা, ইমে পঞ্চ ধম্মা আযতিং উপপত্তিভৰস্মিং ইধ কতস্স কম্মস্স পচ্চযা’’তি (পটি. ম. ১.৪৭). এৰমিদং ৰীসতি আকারারং হোতি.

তিৰট্টমনৰট্ঠিতং ভমতীতি এত্থ পন সঙ্খারভৰা কম্মৰট্টং, অৰিজ্জাতণ্হুপাদানানি কিলেসৰট্টং, ৰিঞ্ঞাণনামরূপসল়াযতনফস্সৰেদনা ৰিপাকৰট্টন্তি ইমেহি তীহি ৰট্টেহি তিৰট্টমিদং ভৰচক্কং যাৰ কিলেসৰট্টং ন উপচ্ছিজ্জতি, তাৰ অনুপচ্ছিন্নপচ্চযত্তা অনৰট্ঠিতং পুনপ্পুনং পরিৰত্তনতো ভমতিযেৰাতি ৰেদিতব্বং.

৬৫৫. তযিদমেৰং ভমমানং,

সচ্চপ্পভৰতো কিচ্চা, ৰারণা উপমাহি চ;

গম্ভীরনযভেদা চ, ৰিঞ্ঞাতব্বং যথারহং.

তত্থ যস্মা কুসলাকুসলং কম্মং অৰিসেসেন সমুদযসচ্চন্তি সচ্চৰিভঙ্গে ৰুত্তং, তস্মা অৰিজ্জাপচ্চযা সঙ্খারাতি অৰিজ্জায সঙ্খারা দুতিযসচ্চপ্পভৰং দুতিযসচ্চং. সঙ্খারেহি ৰিঞ্ঞাণং দুতিযসচ্চপ্পভৰং পঠমসচ্চং. ৰিঞ্ঞাণাদীহি ¶ নামরূপাদীনি ৰিপাকৰেদনাপরিযোসানানি পঠমসচ্চপ্পভৰং পঠমসচ্চং. ৰেদনায তণ্হা পঠমসচ্চপ্পভৰং দুতিযসচ্চং. তণ্হায উপাদানং দুতিযসচ্চপ্পভৰং দুতিযসচ্চং. উপাদানতো ভৰো দুতিযসচ্চপ্পভৰং পঠমদুতিযসচ্চদ্ৰযং. ভৰতো জাতি দুতিযসচ্চপ্পভৰং পঠমসচ্চং. জাতিযা জরামরণং পঠমসচ্চপ্পভৰং পঠমসচ্চন্তি এৰং তাৰিদং সচ্চপ্পভৰতো ৰিঞ্ঞাতব্বং যথারহং.

৬৫৬. যস্মা পনেত্থ অৰিজ্জা ৰত্থূসু চ সত্তে সম্মোহেতি, পচ্চযো চ হোতি সঙ্খারানং ¶ পাতুভাৰায. তথা সঙ্খারা সঙ্খতঞ্চ অভিসঙ্খরোন্তি, পচ্চযা চ হোন্তি ৰিঞ্ঞাণস্স. ৰিঞ্ঞাণম্পি ৰত্থুঞ্চ পটিৰিজানাতি, পচ্চযো চ হোতি নামরূপস্স. নামরূপম্পি অঞ্ঞমঞ্ঞঞ্চ উপত্থম্ভেতি, পচ্চযো চ হোতি সল়াযতনস্স. সল়াযতনম্পি সৰিসযে চ পৰত্ততি, পচ্চযো চ হোতি ফস্সস্স. ফস্সোপি আরম্মণঞ্চ ফুসতি, পচ্চযো চ হোতি ৰেদনায. ৰেদনাপি আরম্মণরসঞ্চ অনুভৰতি, পচ্চযো চ হোতি তণ্হায. তণ্হাপি রজ্জনীযে চ ধম্মে রজ্জতি, পচ্চযো চ হোতি উপাদানস্স. উপাদানম্পি উপাদানিযে চ ধম্মে উপাদিযতি, পচ্চযো চ হোতি ভৰস্স. ভৰোপি নানাগতীসু চ ৰিক্খিপতি, পচ্চযো চ হোতি জাতিযা. জাতিপি খন্ধে চ জনেতি তেসং অভিনিব্বত্তিভাৰেন পৰত্তত্তা, পচ্চযো চ হোতি জরামরণস্স. জরামরণম্পি খন্ধানং পাকভেদভাৰঞ্চ অধিতিট্ঠতি, পচ্চযো চ হোতি ভৰন্তরপাতুভাৰায সোকাদীনং অধিট্ঠানত্তা. তস্মা সব্বপদেসু দ্ৰেধা পৰত্তিকিচ্চতোপি ইদং ৰিঞ্ঞাতব্বং যথারহং.

৬৫৭. যস্মা চেত্থ অৰিজ্জাপচ্চযা সঙ্খারাতি ইদং কারকদস্সননিৰারণং. সঙ্খারপচ্চযা ৰিঞ্ঞাণন্তি অত্তসঙ্কন্তিদস্সননিৰারণং. ৰিঞ্ঞাণপচ্চযা নামরূপন্তি ‘‘অত্তা’’তিপরিকপ্পিতৰত্থুভেদদস্সনতো ঘনসঞ্ঞানিৰারণং. নামরূপপচ্চযা সল়াযতনন্তিআদি অত্তা পস্সতি…পে… ৰিজানাতি, ফুসতি, ৰেদযতি, তণ্হিযতি, উপাদিযতি, ভৰতি, জাযতি, জীযতি, মীযতীতিএৰমাদিদস্সননিৰারণং. তস্মা মিচ্ছাদস্সননিৰারণতোপেতং ভৰচক্কং ৰিঞ্ঞাতব্বং যথারহং.

৬৫৮. যস্মা ¶ পনেত্থ সলক্খণসামঞ্ঞলক্খণৰসেন ধম্মানং অদস্সনতো অন্ধো ৰিয অৰিজ্জা. অন্ধস্স উপক্খলনং ৰিয অৰিজ্জাপচ্চযা সঙ্খারা. উপক্খলিতস্স পতনং ৰিয সঙ্খারপচ্চযা ৰিঞ্ঞাণং. পতিতস্স গণ্ডপাতুভাৰো ৰিয ৰিঞ্ঞাণপচ্চযা নামরূপং. গণ্ডভেদপীল়কা ৰিয নামরূপপচ্চযা সল়াযতনং. গণ্ডপীল়কাঘট্টনং ৰিয সল়াযতনপচ্চযা ফস্সো. ঘট্টনদুক্খং ৰিয ফস্সপচ্চযা ৰেদনা, দুক্খস্স পটিকারাভিলাসো ৰিয ৰেদনাপচ্চযা তণ্হা. পটিকারাভিলাসেন অসপ্পাযগ্গহণং ৰিয তণ্হাপচ্চযা উপাদানং. উপাদিণ্ণঅসপ্পাযালেপনং ৰিয উপাদানপচ্চযা ভৰো. অসপ্পাযালেপনেন গণ্ডৰিকারপাতুভাৰো ৰিয ভৰপচ্চযা জাতি. গণ্ডৰিকারতো গণ্ডভেদো ৰিয জাতিপচ্চযা জরামরণং. যস্মা ৰা পনেত্থ অৰিজ্জা অপ্পটিপত্তিমিচ্ছাপটিপত্তিভাৰেন সত্তে অভিভৰতি পটলং ৰিয অক্খীনি ¶ . তদভিভূতো চ বালো পুনব্ভৰিকেহি সঙ্খারেহি অত্তানং ৰেঠেতি কোসকারকিমি ৰিয কোসপ্পদেসেহি. সঙ্খারপরিগ্গহিতং ৰিঞ্ঞাণং গতীসু পতিট্ঠং লভতি পরিণাযকপরিগ্গহিতো ৰিয রাজকুমারো রজ্জে. উপপত্তিনিমিত্তপরিকপ্পনতো ৰিঞ্ঞাণং পটিসন্ধিযং অনেকপ্পকারং নামরূপং অভিনিব্বত্তেতি মাযাকারো ৰিয মাযং. নামরূপে পতিট্ঠিতং সল়াযতনং ৰুদ্ধিং ৰিরূল়্হিং ৰেপুল্লং পাপুণাতি সুভূমিযং পতিট্ঠিতো ৰনপ্পগুম্বো ৰিয. আযতনঘট্টনতো ফস্সো জাযতি অরণিসহিতাভিমন্থনতো অগ্গি ৰিয. ফস্সেন ফুট্ঠস্স ৰেদনা পাতুভৰতি অগ্গিনা ফুট্ঠস্স দাহো ৰিয. ৰেদযমানস্স তণ্হা পৰড্ঢতি লোণূদকং পিৰতো পিপাসা ৰিয. তসিতো ভৰেসু অভিলাসং করোতি পিপাসিতো ৰিয পানীযে. তদস্সুপাদানং, উপাদানেন ভৰং উপাদিযতি আমিসলোভেন মচ্ছো বল়িসং ৰিয. ভৰে সতি জাতি হোতি বীজে সতি অঙ্কুরো ৰিয. জাতস্স অৰস্সং জরামরণং উপ্পন্নস্স রুক্খস্স পতনং ৰিয. তস্মা এৰং উপমাহিপেতং ভৰচক্কং ৰিঞ্ঞাতব্বং যথারহং.

৬৫৯. যস্মা চ ভগৰতা অত্থতোপি ধম্মতোপি দেসনতোপি পটিৰেধতোপি গম্ভীরভাৰং সন্ধায ‘‘গম্ভীরো চাযং, আনন্দ, পটিচ্চসমুপ্পাদো গম্ভীরাৰভাসো চা’’তি (দী. নি. ২.৯৫; সং. নি. ২.৬০) ৰুত্তং, তস্মা গম্ভীরভেদতোপেতং ভৰচক্কং ৰিঞ্ঞাতব্বং যথারহং.

তত্থ ¶ যস্মা ন জাতিতো জরামরণং ন হোতি, ন চ জাতিং ৰিনা অঞ্ঞতো হোতি, ইত্থঞ্চ জাতিতো সমুদাগচ্ছতীতি এৰং জাতিপচ্চযসমুদাগতট্ঠস্স দুরৰবোধনীযতো জরামরণস্স জাতিপচ্চযসম্ভূতসমুদাগতট্ঠো গম্ভীরো. তথা জাতিযা ভৰপচ্চয…পে… সঙ্খারানং অৰিজ্জাপচ্চযসম্ভূতসমুদাগতট্ঠো গম্ভীরো. তস্মা ইদং ভৰচক্কং অত্থগম্ভীরন্তি অযং তাৰেত্থ অত্থগম্ভীরতা. হেতুফলঞ্হি অত্থোতি ৰুচ্চতি. যথাহ – ‘‘হেতুফলে ঞাণং অত্থপটিসম্ভিদা’’তি (ৰিভ. ৭২০).

যস্মা পন যেনাকারেন যদৰত্থা চ অৰিজ্জা তেসং তেসং সঙ্খারানং পচ্চযো হোতি, তস্স দুরৰবোধনীযতো অৰিজ্জায সঙ্খারানং পচ্চযট্ঠো গম্ভীরো. তথা সঙ্খারানং…পে… জাতিযা জরামরণস্স পচ্চযট্ঠো গম্ভীরো, তস্মা ইদং ভৰচক্কং ধম্মগম্ভীরন্তি অযমেত্থ ধম্মগম্ভীরতা. হেতুনো হি ধম্মোতি নামং. যথাহ – ‘‘হেতুম্হি ঞাণং ধম্মপটিসম্ভিদা’’তি (ৰিভ. ৭২০).

যস্মা ¶ চস্স তেন তেন কারণেন তথা তথা পৰত্তেতব্বত্তা দেসনাপি গম্ভীরা, ন তত্থ সব্বঞ্ঞুতঞ্ঞাণতো অঞ্ঞং ঞাণং পতিট্ঠং লভতি. তথাহেতং কত্থচি সুত্তে অনুলোমতো, কত্থচি পটিলোমতো, কত্থচি অনুলোমপটিলোমতো, কত্থচি ৰেমজ্ঝতো পট্ঠায অনুলোমতো ৰা পটিলোমতো ৰা, কত্থচি তিসন্ধিচতুসঙ্খেপং, কত্থচি দ্ৰিসন্ধিতিসঙ্খেপং, কত্থচি একসন্ধিদ্ৰিসঙ্খেপং দেসিতং, তস্মা ইদং ভৰচক্কং দেসনাগম্ভীরন্তি অযং দেসনাগম্ভীরতা.

যস্মা চেত্থ যো সো অৰিজ্জাদীনং সভাৰো, যেন পটিৰিদ্ধেন অৰিজ্জাদযো সম্মা সলক্খণতো পটিৰিদ্ধা হোন্তি, সো দুপ্পরিযোগাহত্তা গম্ভীরো, তস্মা ইদং ভৰচক্কং পটিৰেধগম্ভীরং. তথা হেত্থ অৰিজ্জায অঞ্ঞাণাদস্সনসচ্চাসম্পটিৰেধট্ঠো গম্ভীরো, সঙ্খারানং অভিসঙ্খরণাযূহনসরাগৰিরাগট্ঠো, ৰিঞ্ঞাণস্স সুঞ্ঞতঅব্যাপারঅসঙ্কন্তিপটিসন্ধিপাতুভাৰট্ঠো, নামরূপস্স একুপ্পাদৰিনিব্ভোগাৰিনিব্ভোগনমনরুপ্পনট্ঠো, সল়াযতনস্স অধিপতিলোকদ্ৰারখেত্তৰিসযিভাৰট্ঠো, ফস্সস্স ফুসনসঙ্ঘট্টনসঙ্গতিসন্নিপাতট্ঠো ¶ , ৰেদনায আরম্মণরসানুভৰনসুখদুক্খমজ্ঝত্তভাৰনিজ্জীৰৰেদযিতট্ঠো. তণ্হায অভিনন্দিতজ্ঝোসানসরিতালতানদীতণ্হাসমুদ্দদুপ্পূরট্ঠো, উপাদানস্স আদানগ্গহণাভিনিৰেসপরামাসদুরতিক্কমট্ঠো, ভৰস্স আযূহনাভিসঙ্খরণযোনিগতিঠিতিনিৰাসেসুখিপনট্ঠো, জাতিযা জাতি সঞ্জাতি ওক্কন্তি নিব্বত্তি পাতুভাৰট্ঠো, জরামরণস্স খযৰযভেদৰিপরিণামট্ঠো গম্ভীরোতি অযমেত্থ পটিৰেধগম্ভীরতা.

৬৬০. যস্মা পনেত্থ একত্তনযো, নানত্তনযো, অব্যাপারনযো, এৰংধম্মতানযোতি চত্তারো অত্থনযা হোন্তি, তস্মা নযভেদতোপেতং ভৰচক্কং ৰিঞ্ঞাতব্বং যথারহং.

তত্থ অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণন্তি এৰং বীজস্স অঙ্কুরাদিভাৰেন রুক্খভাৰপ্পত্তি ৰিয সন্তানানুপচ্ছেদো একত্তনযো নাম. যং সম্মা পস্সন্তো হেতুফলসম্বন্ধেন সন্তানস্স অনুপচ্ছেদাৰবোধতো উচ্ছেদদিট্ঠিং পজহতি. মিচ্ছা পস্সন্তো হেতুফলসম্বন্ধেন পৰত্তমানস্স সন্তানানুপচ্ছেদস্স একত্তগহণতো সস্সতদিট্ঠিং উপাদিযতি.

অৰিজ্জাদীনং পন যথাসকংলক্খণৰৰত্থানং নানত্তনযো নাম. যং সম্মা পস্সন্তো নৰনৰানং ¶ উপ্পাদদস্সনতো সস্সতদিট্ঠিং পজহতি. মিচ্ছা পস্সন্তো একসন্তানপতিতস্স ভিন্নসন্তানস্সেৰ নানত্তগ্গহণতো উচ্ছেদদিট্ঠিং উপাদিযতি.

অৰিজ্জায সঙ্খারা মযা উপ্পাদেতব্বা, সঙ্খারানং ৰা ৰিঞ্ঞাণং অম্হেহীতি এৰমাদিব্যাপারাভাৰো অব্যাপারনযো নাম. যং সম্মা পস্সন্তো কারকস্স অভাৰাৰবোধতো অত্তদিট্ঠিং পজহতি. মিচ্ছা পস্সন্তো যো অসতিপি ব্যাপারে অৰিজ্জাদীনং সভাৰনিযমসিদ্ধো হেতুভাৰো, তস্স অগ্গহণতো অকিরিযদিট্ঠিং উপাদিযতি.

অৰিজ্জাদীহি পন কারণেহি সঙ্খারাদীনংযেৰ সম্ভৰো খীরাদীহি দধিআদীনং ৰিয, ন অঞ্ঞেসন্তি অযং এৰংধম্মতানযো নাম. যং সম্মা পস্সন্তো পচ্চযানুরূপতো ফলাৰবোধা অহেতুকদিট্ঠিং অকিরিযদিট্ঠিঞ্চ পজহতি. মিচ্ছা পস্সন্তো পচ্চযানুরূপং ফলপ্পৰত্তিং অগ্গহেত্ৰা যতো কুতোচি ¶ যস্স কস্সচি অসম্ভৰগ্গহণতো অহেতুকদিট্ঠিঞ্চেৰ নিযতৰাদঞ্চ উপাদিযতীতি এৰমিদং ভৰচক্কং,

সচ্চপ্পভৰতো কিচ্চা, ৰারণাউপমাহি চ;

গম্ভীরনযভেদা চ, ৰিঞ্ঞাতব্বং যথারহং.

৬৬১. ইদঞ্হি অতিগম্ভীরতো অগাধং. নানানযগহনতো দুরতিযানং. ঞাণাসিনা সমাধিপৰরসিলাযং সুনিসিতেন,

ভৰচক্কমপদালেত্ৰা, অসনিৰিচক্কমিৰ নিচ্চনিম্মথনং;

সংসারভযমতীতো, ন কোচি সুপিনন্তরেপ্যত্থি.

ৰুত্তম্পি হেতং ভগৰতা – ‘‘গম্ভীরো চাযং, আনন্দ, পটিচ্চসমুপ্পাদো গম্ভীরাৰভাসো চ. এতস্স চানন্দ, ধম্মস্স অননুবোধা অপ্পটিৰেধা এৰমযং পজা তন্তাকুলকজাতা কুলাগণ্ঠিকজাতা মুঞ্জপব্বজভূতা অপাযং দুগ্গতিং ৰিনিপাতং সংসারং নাতিৰত্ততী’’তি (মহাৰ. ৯৫; সং. নি. ২.৬০). তস্মা অত্তনো ৰা পরেসং ৰা হিতায চ সুখায চ পটিপন্নো অৰসেসকিচ্চানি পহায,

গম্ভীরে ¶ পচ্চযাকারপ্পভেদে ইধ পণ্ডিতো;

যথা গাধং লভেথেৰমনুযুঞ্জে সদা সতোতি.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

পঞ্ঞাভূমিনিদ্দেসো নাম

সত্তরসমো পরিচ্ছেদো.

১৮. দিট্ঠিৰিসুদ্ধিনিদ্দেসো

নামরূপপরিগ্গহকথা

৬৬২. ইদানি ¶ ¶ যা ‘‘ইমেসু ভূমিভূতেসু ধম্মেসু উগ্গহপরিপুচ্ছাৰসেন ঞাণপরিচযং কত্ৰা ‘সীলৰিসুদ্ধি চেৰ চিত্তৰিসুদ্ধি চা’তি দ্ৰে মূলভূতা ৰিসুদ্ধিযো সম্পাদেতব্বা’’তি ৰুত্তা. তত্থ সীলৰিসুদ্ধি নাম সুপরিসুদ্ধং পাতিমোক্খসংৰরাদিচতুব্বিধং সীলং, তঞ্চ সীলনিদ্দেসে ৰিত্থারিতমেৰ. চিত্তৰিসুদ্ধি নাম সউপচারা অট্ঠ সমাপত্তিযো, তাপি চিত্তসীসেন ৰুত্তসমাধিনিদ্দেসে সব্বাকারেন ৰিত্থারিতা এৰ. তস্মা তা তত্থ ৰিত্থারিতনযেনেৰ ৰেদিতব্বা.

যং পন ৰুত্তং ‘‘দিট্ঠিৰিসুদ্ধি, কঙ্খাৰিতরণৰিসুদ্ধি, মগ্গামগ্গঞাণদস্সনৰিসুদ্ধি, পটিপদাঞাণদস্সনৰিসুদ্ধি, ঞাণদস্সনৰিসুদ্ধীতি ইমা পন পঞ্চ ৰিসুদ্ধিযো সরীর’’ন্তি, তত্থ নামরূপানং যাথাৰদস্সনং দিট্ঠিৰিসুদ্ধি নাম.

৬৬৩. তং সম্পাদেতুকামেন সমথযানিকেন তাৰ ঠপেত্ৰা নেৰসঞ্ঞানাসঞ্ঞাযতনং অৰসেসরূপারূপাৰচরজ্ঝানানং অঞ্ঞতরতো ৰুট্ঠায ৰিতক্কাদীনি ঝানঙ্গানি, তংসম্পযুত্তা চ ধম্মা লক্খণরসাদিৰসেন পরিগ্গহেতব্বা. পরিগ্গহেত্ৰা সব্বম্পেতং আরম্মণাভিমুখং নমনতো নমনট্ঠেন নামন্তি ৰৰত্থপেতব্বং.

ততো যথা নাম পুরিসো অন্তোগেহে সপ্পং দিস্ৰা তং অনুবন্ধমানো তস্স আসযং পস্সতি, এৰমেৰ অযম্পি যোগাৰচরো তং নামং উপপরিক্খন্তো ‘‘ইদং নামং কিং নিস্সায পৰত্ততী’’তি পরিযেসমানো তস্স নিস্সযং হদযরূপং পস্সতি. ততো হদযরূপস্স নিস্সযভূতানি, ভূতনিস্সিতানি চ সেসুপাদাযরূপানীতি রূপং পরিগ্গণ্হাতি. সো সব্বম্পেতং রুপ্পনতো ¶ রূপন্তি ৰৰত্থপেতি. ততো নমনলক্খণং নামং, রুপ্পনলক্খণং রূপন্তি সঙ্খেপতো নামরূপং ৰৰত্থপেতি.

৬৬৪. সুদ্ধৰিপস্সনাযানিকো পন অযমেৰ ৰা সমথযানিকো চতুধাতুৰৰত্থানে ৰুত্তানং তেসং তেসং ধাতুপরিগ্গহমুখানং অঞ্ঞতরমুখৰসেন সঙ্খেপতো ৰা ৰিত্থারতো ৰা চতস্সো ধাতুযো পরিগ্গণ্হাতি. অথস্স যাথাৰসরসলক্খণতো আৰিভূতাসু ধাতূসু কম্মসমুট্ঠানম্হি ¶ তাৰ কেসে ‘‘চতস্সো ধাতুযো, ৰণ্ণো, গন্ধো, রসো, ওজা, জীৰিতং, কাযপ্পসাদো’’তি এৰং কাযদসকৰসেন দস রূপানি, তত্থেৰ ভাৰস্স অত্থিতায ভাৰদসকৰসেন দস, তত্থেৰ আহারসমুট্ঠানং ওজট্ঠমকং, উতুসমুট্ঠানং, চিত্তসমুট্ঠানন্তি অপরানিপি চতুৰীসতীতি এৰং চতুসমুট্ঠানেসু চতুৰীসতিকোট্ঠাসেসু চতুচত্তালীস চতুচত্তালীস রূপানি, সেদো, অস্সু, খেল়ো, সিঙ্ঘাণিকাতি ইমেসু পন চতূসু উতুচিত্তসমুট্ঠানেসু দ্ৰিন্নং ওজট্ঠমকানং ৰসেন সোল়স সোল়স রূপানি, উদরিযং, করীসং, পুব্বো, মুত্তন্তি ইমেসু চতূসু উতুসমুট্ঠানেসু উতুসমুট্ঠানস্সেৰ ওজট্ঠমকস্স ৰসেন অট্ঠ অট্ঠ রূপানি পাকটানি হোন্তীতি. এস তাৰ দ্ৰত্তিংসাকারে নযো.

যে পন ইমস্মিং দ্ৰত্তিংসাকারে আৰিভূতে অপরে দস আকারা আৰিভৰন্তি. তত্থ অসিতাদিপরিপাচকে তাৰ কম্মজে তেজোকোট্ঠাসম্হি ওজট্ঠমকঞ্চেৰ জীৰিতঞ্চাতি নৰ রূপানি, তথা চিত্তজে অস্সাসপস্সাসকোট্ঠাসেপি ওজট্ঠমকঞ্চেৰ সদ্দো চাতি নৰ, সেসেসু চতুসমুট্ঠানেসু অট্ঠসু জীৰিতনৰকঞ্চেৰ তীণি চ ওজট্ঠমকানীতি তেত্তিংস রূপানি পাকটানি হোন্তি.

তস্সেৰং ৰিত্থারতো দ্ৰাচত্তালীসাকারৰসেন ইমেসু ভূতুপাদাযরূপেসু পাকটেসু জাতেসু ৰত্থুদ্ৰারৰসেন পঞ্চ চক্খুদসকাদযো, হদযৰত্থুদসকঞ্চাতি অপরানিপি সট্ঠিরূপানি পাকটানি হোন্তি. সো সব্বানিপি তানি রুপ্পনলক্খণেন একতো কত্ৰা ‘‘এতং রূপ’’ন্তি পস্সতি.

তস্সেৰং পরিগ্গহিতরূপস্স দ্ৰারৰসেন অরূপধম্মা পাকটা হোন্তি. সেয্যথিদং – দ্ৰেপঞ্চৰিঞ্ঞাণানি, তিস্সো মনোধাতুযো, অট্ঠসট্ঠি মনোৰিঞ্ঞাণধাতুযোতি একাসীতি লোকিযচিত্তানি, অৰিসেসেন চ তেহি চিত্তেহি সহজাতো ফস্সো, ৰেদনা, সঞ্ঞা, চেতনা, জীৰিতং, চিত্তট্ঠিতি, মনসিকারোতি ইমে সত্ত সত্ত চেতসিকাতি. লোকুত্তরচিত্তানি পন নেৰ সুদ্ধৰিপস্সকস্স ¶ , ন সমথযানিকস্স পরিগ্গহং গচ্ছন্তি অনধিগতত্তাতি. সো সব্বেপি তে অরূপধম্মে নমনলক্খণেন একতো কত্ৰা ‘‘এতং নাম’’ন্তি পস্সতি. এৰমেকো চতুধাতুৰৰত্থানমুখেন ৰিত্থারতো নামরূপং ৰৰত্থপেতি.

৬৬৫. অপরো ¶ অট্ঠারসধাতুৰসেন. কথং? ইধ ভিক্খু অত্থি ইমস্মিং অত্তভাৰে চক্খুধাতু…পে… মনোৰিঞ্ঞাণধাতূতি ধাতুযো আৰজ্জিত্ৰা যং লোকো সেতকণ্হমণ্ডলৰিচিত্তং আযতৰিত্থতং অক্খিকূপকে ন্হারুসুত্তকেন আবদ্ধং মংসপিণ্ডং ‘‘চক্খূ’’তি সঞ্জানাতি, তং অগ্গহেত্ৰা খন্ধনিদ্দেসে উপাদারূপেসু ৰুত্তপ্পকারং চক্খুপসাদং ‘‘চক্খুধাতূ’’তি ৰৰত্থপেতি.

যানি পনস্স নিস্সযভূতা চতস্সো ধাতুযো, পরিৰারকানি চত্তারি ৰণ্ণ-গন্ধ-রস-ওজা-রূপানি, অনুপালকং জীৰিতিন্দ্রিযন্তি নৰ সহজাতরূপানি, তত্থেৰ ঠিতানি কাযদসকভাৰদসকৰসেন ৰীসতি কম্মজরূপানি, আহারসমুট্ঠানাদীনং তিণ্ণং ওজট্ঠমকানং ৰসেন চতুৰীসতি অনুপাদিন্নরূপানীতি এৰং সেসানি তেপণ্ণাস রূপানি হোন্তি, ন তানি চ ‘‘চক্খুধাতূ’’তি ৰৰত্থপেতি. এস নযো সোতধাতুআদীসুপি. কাযধাতুযং পন অৰসেসানি তেচত্তালীস রূপানি হোন্তি. কেচি পন উতুচিত্তসমুট্ঠানানি সদ্দেন সহ নৰ নৰ কত্ৰা পঞ্চচত্তালীসাতি ৰদন্তি.

ইতি ইমে পঞ্চ পসাদা, তেসঞ্চ ৰিসযা রূপসদ্দগন্ধরসফোট্ঠব্বা পঞ্চাতি দস রূপানি দস ধাতুযো হোন্তি. অৰসেসরূপানি ধম্মধাতুযেৰ হোন্তি. চক্খুং পন নিস্সায রূপং আরব্ভ পৰত্তং চিত্তং চক্খুৰিঞ্ঞাণধাতু নামাতি এৰং দ্ৰেপঞ্চৰিঞ্ঞাণানি পঞ্চ ৰিঞ্ঞাণধাতুযো হোন্তি. তীণি মনোধাতুচিত্তানি একা মনোধাতু, অট্ঠসট্ঠি মনোৰিঞ্ঞাণধাতুচিত্তানি মনোৰিঞ্ঞাণধাতূতি সব্বানিপি একাসীতি লোকিযচিত্তানি সত্ত ৰিঞ্ঞাণধাতুযো. তংসম্পযুত্তা ফস্সাদযো ধম্মধাতূতি এৰমেত্থ অড্ঢেকাদস ধাতুযো রূপং, অড্ঢট্ঠমা ধাতুযো নামন্তি এৰমেকো অট্ঠারসধাতুৰসেন নামরূপং ৰৰত্থপেতি.

৬৬৬. অপরো দ্ৰাদসাযতনৰসেন. কথং? চক্খুধাতুযং ৰুত্তনযেনেৰ ঠপেত্ৰা তেপণ্ণাস রূপানি চক্খুপসাদমত্তং ‘‘চক্খাযতন’’ন্তি ৰৰত্থপেতি. তত্থ ৰুত্তনযেনেৰ চ সোতঘানজিৰ্হাকাযধাতুযো ‘‘সোতঘানজিৰ্হাকাযাযতনানী’’তি, তেসং ৰিসযভূতে পঞ্চধম্মে ‘‘রূপসদ্দগন্ধরসফোট্ঠব্বাযতনানী’’তি ¶ , লোকিযসত্তৰিঞ্ঞাণধাতুযো ‘‘মনাযতন’’ন্তি, তংসম্পযুত্তা ফস্সাদযো সেসরূপঞ্চ ‘‘ধম্মাযতন’’ন্তি এৰমেত্থ ¶ অড্ঢেকাদস আযতনানি রূপং, দিযড্ঢআযতনানি নামন্তি এৰমেকো দ্ৰাদসাযতনৰসেন নামরূপং ৰৰত্থপেতি.

৬৬৭. অপরো ততো সংখিত্ততরং খন্ধৰসেন ৰৰত্থপেতি. কথং? ইধ ভিক্খু ইমস্মিং সরীরে চতুসমুট্ঠানা চতস্সো ধাতুযো, তংনিস্সিতো ৰণ্ণো, গন্ধো, রসো, ওজা, চক্খুপসাদাদযো পঞ্চ পসাদা, ৰত্থুরূপং, ভাৰো, জীৰিতিন্দ্রিযং, দ্ৰিসমুট্ঠানো সদ্দোতি ইমানি সত্তরস রূপানি সম্মসনুপগানি নিপ্ফন্নানি রূপরূপানি. কাযৰিঞ্ঞত্তি, ৰচীৰিঞ্ঞত্তি, আকাসধাতু, রূপস্স লহুতা, মুদুতা, কম্মঞ্ঞতা, উপচযো, সন্ততি, জরতা, অনিচ্চতাতি ইমানি পন দস রূপানি ন সম্মসনুপগানি, আকারৰিকারঅন্তরপরিচ্ছেদমত্তকানি, ন নিপ্ফন্নরূপানি, ন রূপরূপানি. অপিচ খো রূপানং আকারৰিকারঅন্তরপরিচ্ছেদমত্ততো রূপন্তি সঙ্খং গতানি. ইতি সব্বানি পেতানি সত্তৰীসতি রূপানি রূপক্খন্ধো, একাসীতিযা লোকিযচিত্তেহি সদ্ধিং উপ্পন্না ৰেদনা ৰেদনাক্খন্ধো, তংসম্পযুত্তা সঞ্ঞা সঞ্ঞাক্খন্ধো, সঙ্খারা সঙ্খারক্খন্ধো, ৰিঞ্ঞাণং ৰিঞ্ঞাণক্খন্ধোতি. ইতি রূপক্খন্ধো রূপং, চত্তারো অরূপিনো খন্ধা নামন্তি এৰমেকো পঞ্চক্খন্ধৰসেন নামরূপং ৰৰত্থপেতি.

৬৬৮. অপরো ‘‘যংকিঞ্চি রূপং সব্বং রূপং চত্তারি মহাভূতানি চতুন্নঞ্চ মহাভূতানং উপাদাযরূপ’’ন্তি (ম. নি. ১.৩৪৭; অ. নি. ১১.১৭) এৰং সংখিত্তেনেৰ ইমস্মিং অত্তভাৰে রূপং পরিগ্গহেত্ৰা, তথা মনাযতনঞ্চেৰ ধম্মাযতনেকদেসঞ্চ নামন্তি পরিগ্গহেত্ৰা ‘‘ইতি ইদঞ্চ নামং ইদঞ্চ রূপং, ইদং ৰুচ্চতি নামরূপ’’ন্তি সঙ্খেপতো নামরূপং ৰৰত্থপেতি.

৬৬৯. সচে পনস্স তেন তেন মুখেন রূপং পরিগ্গহেত্ৰা অরূপং পরিগ্গণ্হতো সুখুমত্তা অরূপং ন উপট্ঠাতি, তেন ধুরনিক্খেপং অকত্ৰা রূপমেৰ পুনপ্পুনং সম্মসিতব্বং মনসিকাতব্বং পরিগ্গহেতব্বং ৰৰত্থপেতব্বং. যথা যথা হিস্স রূপং সুৰিক্খালিতং হোতি নিজ্জটং সুপরিসুদ্ধং, তথা তথা তদারম্মণা অরূপধম্মা সযমেৰ পাকটা হোন্তি.

যথা হি চক্খুমতো পুরিসস্স অপরিসুদ্ধে আদাসে মুখনিমিত্তং ওলোকেন্তস্স নিমিত্তং ন পঞ্ঞাযতি, সো ‘‘নিমিত্তং ন পঞ্ঞাযতী’’তি ন আদাসং ¶ ছড্ডেতি, অথ খো নং পুনপ্পুনং পরিমজ্জতি ¶ . তস্স পরিসুদ্ধে আদাসে নিমিত্তং সযমেৰ পাকটং হোতি. যথা চ তেলত্থিকো তিলপিট্ঠং দোণিযং আকিরিত্ৰা উদকেন পরিপ্ফোসেত্ৰা একৰারং দ্ৰেৰারং পীল়নমত্তেন তেলে অনিক্খমন্তে ন তিলপিট্ঠং ছড্ডেতি, অথ খো নং পুনপ্পুনং উণ্হোদকেন পরিপ্ফোসেত্ৰা মদ্দিত্ৰা পীল়েতি. তস্সেৰং করোতো ৰিপ্পসন্নং তিলতেলং নিক্খমতি. যথা ৰা পন উদকং পসাদেতুকামো কতকট্ঠিং গহেত্ৰা অন্তোঘটে হত্থং ওতারেত্ৰা একদ্ৰেৰারে ঘংসনমত্তেন উদকে অৰিপ্পসীদন্তে ন কতকট্ঠিং ছড্ডেতি, অথ খো নং পুনপ্পুনং ঘংসতি. তস্সেৰং করোন্তস্স কললকদ্দমং সন্নিসীদতি. উদকং অচ্ছং হোতি ৰিপ্পসন্নং, এৰমেৰং তেন ভিক্খুনা ধুরনিক্খেপং অকত্ৰা রূপমেৰ পুনপ্পুনং সম্মসিতব্বং মনসিকাতব্বং পরিগ্গহেতব্বং ৰৰত্থপেতব্বং.

যথা যথা হিস্স রূপং সুৰিক্খালিতং হোতি নিজ্জটং সুপরিসুদ্ধং, তথা তথা তপ্পচ্চনীককিলেসা সন্নিসীদন্তি, কদ্দমুপরি উদকং ৰিয চিত্তং পসন্নং হোতি. তদারম্মণা অরূপধম্মা সযমেৰ পাকটা হোন্তি. এৰং অঞ্ঞাহিপি উচ্ছুচোরগোণদধিমচ্ছাদীহি উপমাহি অযমত্থো পকাসেতব্বো.

অরূপধম্মানং উপট্ঠানাকারকথা

৬৭০. এৰং সুৰিসুদ্ধরূপপরিগ্গহস্স পনস্স অরূপধম্মা তীহি আকারেহি উপট্ঠহন্তি ফস্সৰসেন ৰা ৰেদনাৰসেন ৰা ৰিঞ্ঞাণৰসেন ৰা. কথং? একস্স তাৰ ‘‘পথৰীধাতু কক্খল়লক্খণা’’তিআদিনা নযেন ধাতুযো পরিগ্গণ্হন্তস্স পঠমাভিনিপাতো ফস্সো, তংসম্পযুত্তা ৰেদনা ৰেদনাক্খন্ধো, সঞ্ঞা সঞ্ঞাক্খন্ধো, সদ্ধিং ফস্সেন চেতনা সঙ্খারক্খন্ধো, চিত্তং ৰিঞ্ঞাণক্খন্ধোতি উপট্ঠাতি. তথা ‘‘কেসে পথৰীধাতু কক্খল়লক্খণা…পে… অস্সাসপস্সাসে পথৰীধাতু কক্খল়লক্খণা’’তি (ৰিসুদ্ধি. ১.৩০৭) পঠমাভিনিপাতো ফস্সো, তংসম্পযুত্তা ৰেদনা ৰেদনাক্খন্ধো…পে… চিত্তং ৰিঞ্ঞাণক্খন্ধোতি উপট্ঠাতি. এৰং অরূপধম্মা ফস্সৰসেন উপট্ঠহন্তি.

একস্স ‘‘পথৰীধাতু কক্খল়লক্খণা’’তি তদারম্মণরসানুভৰনকৰেদনা ৰেদনাক্খন্ধো, তংসম্পযুত্তা সঞ্ঞা সঞ্ঞাক্খন্ধো, তংসম্পযুত্তো ফস্সো ¶ চ চেতনা চ সঙ্খারক্খন্ধো, তংসম্পযুত্তং চিত্তং ৰিঞ্ঞাণক্খন্ধোতি উপট্ঠাতি. তথা ‘‘কেসে পথৰীধাতু কক্খল়লক্খণা ¶ …পে… অস্সাসপস্সাসে পথৰীধাতু কক্খল়লক্খণা’’তি তদারম্মণরসানুভৰনকৰেদনা ৰেদনাক্খন্ধো…পে… তংসম্পযুত্তং চিত্তং ৰিঞ্ঞাণক্খন্ধোতি উপট্ঠাতি. এৰং ৰেদনাৰসেন অরূপধম্মা উপট্ঠহন্তি.

অপরস্স ‘‘পথৰীধাতু কক্খল়লক্খণা’’তি আরম্মণপটিৰিজাননং ৰিঞ্ঞাণং ৰিঞ্ঞাণক্খন্ধো, তংসম্পযুত্তা ৰেদনা ৰেদনাক্খন্ধো, সঞ্ঞা সঞ্ঞাক্খন্ধো, ফস্সো চ চেতনা চ সঙ্খারক্খন্ধোতি উপট্ঠাতি. তথা ‘‘কেসে পথৰীধাতু কক্খল়লক্খণা…পে… অস্সাসপস্সাসে পথৰীধাতু কক্খল়লক্খণা’’তি আরম্মণপটিৰিজাননং ৰিঞ্ঞাণং ৰিঞ্ঞাণক্খন্ধো, তংসম্পযুত্তা ৰেদনা ৰেদনাক্খন্ধো, সঞ্ঞা সঞ্ঞাক্খন্ধো, ফস্সো চ চেতনা চ সঙ্খারক্খন্ধোতি উপট্ঠাতি. এৰং ৰিঞ্ঞাণৰসেন অরূপধম্মা উপট্ঠহন্তি.

এতেনেৰ উপাযেন ‘‘কম্মসমুট্ঠানে কেসে পথৰীধাতু কক্খল়লক্খণা’’তিআদিনা নযেন দ্ৰাচত্তালীসায ধাতুকোট্ঠাসেসু চতুন্নং চতুন্নং ধাতূনং ৰসেন, সেসেসু চ চক্খুধাতুআদীসু রূপপরিগ্গহমুখেসু সব্বং নযভেদং অনুগন্ত্ৰা যোজনা কাতব্বা.

৬৭১. যস্মা চ এৰং সুৰিসুদ্ধরূপপরিগ্গহস্সেৰ তস্স অরূপধম্মা তীহাকারেহি পাকটা হোন্তি. তস্মা সুৰিসুদ্ধরূপপরিগ্গহেনেৰ অরূপপরিগ্গহায যোগো কাতব্বো, ন ইতরেন. সচে হি একস্মিং ৰা রূপধম্মে উপট্ঠিতে দ্ৰীসু ৰা রূপং পহায অরূপপরিগ্গহং আরভতি কম্মট্ঠানতো পরিহাযতি, পথৰীকসিণভাৰনায ৰুত্তপ্পকারা পব্বতেয্যা গাৰী ৰিয. সুৰিসুদ্ধরূপপরিগ্গহস্স পন অরূপপরিগ্গহায যোগং করোতো কম্মট্ঠানং ৰুদ্ধিং ৰিরূল়্হিং ৰেপুল্লং পাপুণাতি.

সো এৰং ফস্সাদীনং ৰসেন উপট্ঠিতে চত্তারো অরূপিনো খন্ধে নামন্তি, তেসং আরম্মণভূতানি চত্তারি মহাভূতানি, চতুন্নঞ্চ মহাভূতানং উপাদাযরূপং রূপন্তি ৰৰত্থপেতি. ইতি অট্ঠারস ধাতুযো দ্ৰাদসাযতনানি পঞ্চক্খন্ধাতি সব্বেপি তেভূমকে ধম্মে খগ্গেন সমুগ্গং ৰিৰরমানো ¶ ৰিয যমকতালকন্দং ফালযমানো ৰিয চ নামঞ্চ রূপঞ্চাতি দ্ৰেধা ৰৰত্থপেতি. নামরূপমত্ততো উদ্ধং অঞ্ঞো সত্তো ৰা পুগ্গলো ৰা দেৰো ৰা ব্রহ্মা ৰা নত্থীতি নিট্ঠং গচ্ছতি.

সম্বহুলসুত্তন্তসংসন্দনা

৬৭২. সো ¶ এৰং যাথাৰসরসতো নামরূপং ৰৰত্থপেত্ৰা সুট্ঠুতরং ‘‘সত্তো পুগ্গলো’’তি ইমিস্সা লোকসমঞ্ঞায পহানত্থায সত্তসম্মোহস্স সমতিক্কমত্থায অসম্মোহভূমিযং চিত্তং ঠপনত্থায সম্বহুলসুত্তন্তৰসেন ‘‘নামরূপমত্তমেৰিদং, ন সত্তো, ন পুগ্গলো অত্থী’’তি এতমত্থং সংসন্দেত্ৰা ৰৰত্থপেতি. ৰুত্তঞ্হেতং –

‘‘যথাপি অঙ্গসম্ভারা, হোতি সদ্দো রথো ইতি;

এৰং খন্ধেসু সন্তেসু, হোতি সত্তোতি সম্মুতী’’তি. (সং. নি. ১.১৭১);

অপরম্পি ৰুত্তং, ‘‘সেয্যথাপি, আৰুসো, কট্ঠঞ্চ পটিচ্চ ৰল্লিঞ্চ পটিচ্চ মত্তিকঞ্চ পটিচ্চ তিণঞ্চ পটিচ্চ আকাসো পরিৰারিতো অগারন্ত্ৰেৰ সঙ্খং গচ্ছতি, এৰমেৰ খো, আৰুসো, অট্ঠিঞ্চ পটিচ্চ ন্হারুঞ্চ পটিচ্চ মংসঞ্চ পটিচ্চ চম্মঞ্চ পটিচ্চ আকাসো পরিৰারিতো রূপন্ত্ৰেৰ সঙ্খং গচ্ছতী’’তি (ম. নি. ১.৩০৬).

অপরম্পি ৰুত্তং –

‘‘দুক্খমেৰ হি সম্ভোতি, দুক্খং তিট্ঠতি ৰেতি চ;

নাঞ্ঞত্র দুক্খা সম্ভোতি, নাঞ্ঞং দুক্খা নিরুজ্ঝতী’’তি. (সং. নি. ১.১৭১);

উপমাহি নামরূপৰিভাৰনা

৬৭৩. এৰং অনেকসতেহি সুত্তন্তেহি নামরূপমেৰ দীপিতং, ন সত্তো ন পুগ্গলো. তস্মা যথা অক্খচক্কপঞ্জরঈসাদীসু অঙ্গসম্ভারেসু একেনাকারেন সণ্ঠিতেসু রথোতি ৰোহারমত্তং হোতি, পরমত্থতো একেকস্মিং অঙ্গে উপপরিক্খিযমানে রথো নাম নত্থি. যথা চ কট্ঠাদীসু গেহসম্ভারেসু একেনাকারেন আকাসং পরিৰারেত্ৰা ঠিতেসু গেহন্তি ৰোহারমত্তং হোতি, পরমত্থতো গেহং নাম নত্থি. যথা চ অঙ্গুলিঅঙ্গুট্ঠাদীসু একেনাকারেন ঠিতেসু মুট্ঠীতি ৰোহারমত্তং ¶ হোতি. দোণিতন্তিআদীসু ৰীণাতি. হত্থিঅস্সাদীসু সেনাতি. পাকারগেহগোপুরাদীসু ¶ নগরন্তি. খন্ধসাখাপলাসাদীসু একেনাকারেন ঠিতেসু রুক্খোতি ৰোহারমত্তং হোতি, পরমত্থতো একেকস্মিং অৰযৰে উপপরিক্খিযমানে রুক্খো নাম নত্থি. এৰমেৰং পঞ্চসু উপাদানক্খন্ধেসু সতি ‘‘সত্তো, পুগ্গলো’’তি ৰোহারমত্তং হোতি, পরমত্থতো একেকস্মিং ধম্মে উপপরিক্খিযমানে ‘‘অস্মীতি ৰা অহন্তি ৰা’’তি গাহস্স ৰত্থুভূতো সত্তো নাম নত্থি. পরমত্থতো পন নামরূপমত্তমেৰ অত্থীতি. এৰং পস্সতো হি দস্সনং যথাভূতদস্সনং নাম হোতি.

৬৭৪. যো পনেতং যথাভূতদস্সনং পহায ‘‘সত্তো অত্থী’’তি গণ্হাতি. সো তস্স ৰিনাসং অনুজানেয্য অৰিনাসং ৰা. অৰিনাসং অনুজানন্তো সস্সতে পততি. ৰিনাসং অনুজানন্তো উচ্ছেদে পততি. কস্মা? খীরন্ৰযস্স দধিনো ৰিয তদন্ৰযস্স অঞ্ঞস্স অভাৰতো. সো ‘‘সস্সতো সত্তো’’তি গণ্হন্তো ওলীযতি নাম. ‘‘উচ্ছিজ্জতী’’তি গণ্হন্তো অতিধাৰতি নাম. তেনাহ ভগৰা –

‘‘দ্ৰীহি, ভিক্খৰে, দিট্ঠিগতেহি পরিযুট্ঠিতা দেৰমনুস্সা ওলীযন্তি একে, অতিধাৰন্তি একে, চক্খুমন্তো চ পস্সন্তি.

‘‘কথঞ্চ, ভিক্খৰে, ওলীযন্তি একে? ভৰারামা, ভিক্খৰে, দেৰমনুস্সা ভৰরতা ভৰসমুদিতা. তেসং ভৰনিরোধায ধম্মে দেসিযমানে চিত্তং ন পক্খন্দতি নপ্পসীদতি ন সন্তিট্ঠতি নাধিমুচ্চতি. এৰং খো, ভিক্খৰে, ওলীযন্তি একে.

‘‘কথঞ্চ, ভিক্খৰে, অতিধাৰন্তি একে? ভৰেনেৰ খো পনেকে অট্টীযমানা হরাযমানা জিগুচ্ছমানা ৰিভৰং অভিনন্দন্তি, যতো কির ভো অযং অত্তা কাযস্স ভেদা উচ্ছিজ্জতি ৰিনস্সতি, ন হোতি পরংমরণা, এতং সন্তং, এতং পণীতং, এতং যাথাৰন্তি. এৰং খো, ভিক্খৰে, অতিধাৰন্তি একে.

‘‘কথঞ্চ, ভিক্খৰে, চক্খুমন্তো পস্সন্তি? ইধ, ভিক্খৰে, ভিক্খু ভূতং ভূততো ¶ পস্সতি, ভূতং ভূততো দিস্ৰা ভূতস্স নিব্বিদায ৰিরাগায নিরোধায পটিপন্নো হোতি. এৰং খো, ভিক্খৰে, চক্খুমন্তো পস্সন্তী’’তি (ইতিৰু. ৪৯).

৬৭৫. তস্মা ¶ যথা দারুযন্তং সুঞ্ঞং নিজ্জীৰং নিরীহকং, অথ চ পন দারুরজ্জুকসমাযোগৰসেন গচ্ছতিপি তিট্ঠতিপি. সঈহকং সব্যাপারং ৰিয খাযতি, এৰমিদং নামরূপম্পি সুঞ্ঞং নিজ্জীৰং নিরীহকং, অথ চ পন অঞ্ঞমঞ্ঞসমাযোগৰসেন গচ্ছতিপি তিট্ঠতিপি. সঈহকং সব্যাপারং ৰিয খাযতীতি দট্ঠব্বং. তেনাহু পোরাণা –

‘‘নামঞ্চ রূপঞ্চ ইধত্থি সচ্চতো,

ন হেত্থ সত্তো মনুজো চ ৰিজ্জতি;

সুঞ্ঞং ইদং যন্তমিৰাভিসঙ্খতং,

দুক্খস্স পুঞ্জো তিণকট্ঠসাদিসো’’তি.

ন কেৰলঞ্চেতং দারুযন্তুপমায, অঞ্ঞাহিপি নল়কলাপীআদীহি উপমাহি ৰিভাৰেতব্বং – যথা হি দ্ৰীসু নল়কলাপীসু অঞ্ঞমঞ্ঞং নিস্সায ঠপিতাসু একা একিস্সা উপত্থম্ভো হোতি, একিস্সা পতমানায ইতরাপি পততি, এৰমেৰং পঞ্চৰোকারভৰে নামরূপং অঞ্ঞমঞ্ঞং নিস্সায পৰত্ততি, একং একস্স উপত্থম্ভো হোতি. মরণৰসেন একস্মিং পতমানে ইতরম্পি পততি. তেনাহু পোরাণা –

‘‘যমকং নামরূপঞ্চ, উভো অঞ্ঞোঞ্ঞনিস্সিতা;

একস্মিং ভিজ্জমানস্মিং, উভো ভিজ্জন্তি পচ্চযা’’তি.

৬৭৬. যথা চ দণ্ডাভিহতং ভেরিং নিস্সায সদ্দে পৰত্তমানে অঞ্ঞা ভেরী, অঞ্ঞো সদ্দো, ভেরিসদ্দা অসম্মিস্সা, ভেরী সদ্দেন সুঞ্ঞা, সদ্দো ভেরিযা সুঞ্ঞো, এৰমেৰং ৰত্থুদ্ৰারারম্মণসঙ্খাতং রূপং নিস্সায নামে পৰত্তমানে অঞ্ঞং রূপং, অঞ্ঞং নামং, নামরূপা অসম্মিস্সা, নামং রূপেন সুঞ্ঞং, রূপং নামেন সুঞ্ঞং, অপিচ খো ভেরিং পটিচ্চ সদ্দো ৰিয রূপং পটিচ্চ নামং পৰত্ততি. তেনাহু পোরাণা –

‘‘ন ¶ চক্খুতো জাযরে ফস্সপঞ্চমা,

ন রূপতো নো চ উভিন্নমন্তরা;

হেতুং পটিচ্চপ্পভৰন্তি সঙ্খতা,

যথাপি সদ্দো পহটায ভেরিযা.

‘‘ন ¶ সোততো জাযরে ফস্সপঞ্চমা,

ন সদ্দতো নো চ উভিন্নমন্তরা…পে….

‘‘ন ঘানতো জাযরে ফস্সপঞ্চমা,

ন গন্ধতো নো চ উভিন্নমন্তরা…পে….

‘‘ন জিৰ্হাতো জাযরে ফস্সপঞ্চমা,

ন রসতো নো চ উভিন্নমন্তরা…পে….

‘‘ন কাযতো জাযরে ফস্সপঞ্চমা,

ন ফস্সতো নো চ উভিন্নমন্তরা…পে….

‘‘ন ৰত্থুরূপা পভৰন্তি সঙ্খতা,

ন চাপি ধম্মাযতনেহি নিগ্গতা;

হেতুং পটিচ্চপ্পভৰন্তি সঙ্খতা,

যথাপি সদ্দো পহটায ভেরিযা’’তি.

৬৭৭. অপিচেত্থ নামং নিত্তেজং ন সকেন তেজেন পৰত্তিতুং সক্কোতি, ন খাদতি, ন পিৰতি, ন ব্যাহরতি, ন ইরিযাপথং কপ্পেতি. রূপম্পি নিত্তেজং ন সকেন তেজেন পৰত্তিতুং সক্কোতি. ন হি তস্সা খাদিতুকামতা, নাপি পিৰিতুকামতা, ন ব্যাহরিতুকামতা, ন ইরিযাপথং কপ্পেতুকামতা, অথ খো নামং নিস্সায রূপং পৰত্ততি, রূপং নিস্সায নামং পৰত্ততি, নামস্স খাদিতুকামতায পিৰিতুকামতায ব্যাহরিতুকামতায ইরিযাপথং কপ্পেতুকামতায সতি রূপং খাদতি, পিৰতি, ব্যাহরতি, ইরিযাপথং কপ্পেতি.

ইমস্স ¶ পনত্থস্স ৰিভাৰনত্থায ইমং উপমং উদাহরন্তি – যথা জচ্চন্ধো চ পীঠসপ্পী চ দিসাপক্কমিতুকামা অস্সু, জচ্চন্ধো পীঠসপ্পিং এৰমাহ ‘‘অহং খো ভণে, সক্কোমি পাদেহি পাদকরণীযং কাতুং, নত্থি চ মে চক্খূনি যেহি সমৰিসমং পস্সেয্য’’ন্তি. পীঠসপ্পীপি জচ্চন্ধং এৰমাহ ‘‘অহং খো ভণে, সক্কোমি চক্খুনা চক্খুকরণীযং কাতুং, নত্থি চ মে পাদানি যেহি অভিক্কমেয্যং ৰা পটিক্কমেয্যং ৰা’’তি. সো তুট্ঠহট্ঠো জচ্চন্ধো পীঠসপ্পিং অংসকূটং আরোপেসি. পীঠসপ্পী জচ্চন্ধস্স অংসকূটে নিসীদিত্ৰা এৰমাহ ‘‘ৰামং মুঞ্চ দক্খিণং গণ্হ, দক্খিণং মুঞ্চ ৰামং গণ্হা’’তি. তত্থ জচ্চন্ধোপি নিত্তেজো ¶ দুব্বলো ন সকেন তেজেন সকেন বলেন গচ্ছতি, পীঠসপ্পীপি নিত্তেজো দুব্বলো ন সকেন তেজেন সকেন বলেন গচ্ছতি, ন চ তেসং অঞ্ঞমঞ্ঞং নিস্সায গমনং নপ্পৰত্ততি, এৰমেৰং নামম্পি নিত্তেজং ন সকেন তেজেন উপ্পজ্জতি, ন তাসু তাসু কিরিযাসু পৰত্ততি. রূপম্পি নিত্তেজং ন সকেন তেজেন উপ্পজ্জতি, ন তাসু তাসু কিরিযাসু পৰত্ততি, ন চ তেসং অঞ্ঞমঞ্ঞং নিস্সায উপ্পত্তি ৰা পৰত্তি ৰা ন হোতি. তেনেতং ৰুচ্চতি –

‘‘ন সকেন বলেন জাযরে,

নোপি সকেন বলেন তিট্ঠরে;

পরধম্মৰসানুৰত্তিনো,

জাযরে সঙ্খতা অত্তদুব্বলা.

‘‘পরপচ্চযতো চ জাযরে,

পরআরম্মণতো সমুট্ঠিতা;

আরম্মণপচ্চযেহি চ,

পরধম্মেহি চিমে পভাৰিতা.

‘‘যথাপি নাৰং নিস্সায, মনুস্সা যন্তি অণ্ণৰে;

এৰমেৰ রূপং নিস্সায, নামকাযো পৰত্ততি.

‘‘যথা চ মনুস্সে নিস্সায, নাৰা গচ্ছতি অণ্ণৰে;

এৰমেৰ নামং নিস্সায, রূপকাযো পৰত্ততি.

‘‘উভো ¶ নিস্সায গচ্ছন্তি, মনুস্সা নাৰা চ অণ্ণৰে;

এৰং নামঞ্চ রূপঞ্চ, উভো অঞ্ঞোঞ্ঞনিস্সিতা’’তি.

এৰং নানানযেহি নামরূপং ৰৰত্থাপযতো সত্তসঞ্ঞং অভিভৰিত্ৰা অসম্মোহভূমিযং ঠিতং নামরূপানং যাথাৰদস্সনং দিট্ঠিৰিসুদ্ধীতি ৰেদিতব্বং. নামরূপৰৰত্থানন্তিপি সঙ্খারপরিচ্ছেদোতিপি এতস্সেৰ অধিৰচনং.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

দিট্ঠিৰিসুদ্ধিনিদ্দেসো নাম

অট্ঠারসমো পরিচ্ছেদো.

১৯. কঙ্খাৰিতরণৰিসুদ্ধিনিদ্দেসো

পচ্চযপরিগ্গহকথা

৬৭৮. এতস্সেৰ ¶ ¶ পন নামরূপস্স পচ্চযপরিগ্গহণেন তীসু অদ্ধাসু কঙ্খং ৰিতরিত্ৰা ঠিতং ঞাণং কঙ্খাৰিতরণৰিসুদ্ধি নাম.

তং সম্পাদেতুকামো ভিক্খু যথা নাম কুসলো ভিসক্কো রোগং দিস্ৰা তস্স সমুট্ঠানং পরিযেসতি. যথা ৰা পন অনুকম্পকো পুরিসো দহরং কুমারং মন্দং উত্তানসেয্যকং রথিকায নিপন্নং দিস্ৰা ‘‘কস্স নু খো অযং পুত্তকো’’তি তস্স মাতাপিতরো আৰজ্জতি, এৰমেৰ তস্স নামরূপস্স হেতুপচ্চযপরিযেসনং আপজ্জতি.

সো আদিতোৰ ইতি পটিসঞ্চিক্খতি ‘‘ন তাৰিধং নামরূপং অহেতুকং, সব্বত্থ সব্বদা সব্বেসঞ্চ একসদিসভাৰাপত্তিতো, ন ইস্সরাদিহেতুকং, নামরূপতো উদ্ধং ইস্সরাদীনং অভাৰতো. যেপি নামরূপমত্তমেৰ ইস্সরাদযোতি ৰদন্তি, তেসং ইস্সরাদিসঙ্খাতনামরূপস্স অহেতুকভাৰপ্পত্তিতো. তস্মা ভৰিতব্বমস্স হেতুপচ্চযেহি, কে নু খো তে’’তি.

৬৭৯. সো এৰং নামরূপস্স হেতুপচ্চযে আৰজ্জেত্ৰা ইমস্স তাৰ রূপকাযস্স এৰং হেতুপচ্চযে পরিগ্গণ্হাতি – ‘‘অযং কাযো নিব্বত্তমানো নেৰ উপ্পলপদুমপুণ্ডরীকসোগন্ধিকাদীনং অব্ভন্তরে নিব্বত্ততি, ন মণিমুত্তাহারাদীনং, অথ খো আমাসযপক্কাসযানং অন্তরে উদরপটলং পচ্ছতো পিট্ঠিকণ্টকং পুরতো কত্ৰা অন্তঅন্তগুণপরিৰারিতো সযম্পি দুগ্গন্ধজেগুচ্ছপটিক্কূলো দুগ্গন্ধজেগুচ্ছপটিক্কূলে পরমসম্বাধে ওকাসে পূতিমচ্ছপূতিকুম্মাসওল়িগল্লচন্দনিকাদীসু কিমিৰ নিব্বত্ততি. তস্সেৰং নিব্বত্তমানস্স ‘অৰিজ্জা তণ্হা উপাদানং কম্ম’ন্তি ইমে চত্তারো ধম্মা নিব্বত্তকত্তা হেতু, আহারো উপত্থম্ভকত্তা পচ্চযোতি পঞ্চ ¶ ধম্মা হেতুপচ্চযা হোন্তি. তেসুপি অৰিজ্জাদযো তযো ইমস্স কাযস্স মাতা ৰিয দারকস্স উপনিস্সযা হোন্তি. কম্মং পিতা ৰিয পুত্তস্স জনকং ¶ . আহারো ধাতি ৰিয দারকস্স সন্ধারকো’’তি. এৰং রূপকাযস্স পচ্চযপরিগ্গহং কত্ৰা, পুন ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তিআদিনা (সং. নি. ২.৪৩) নযেন নামকাযস্স পচ্চযপরিগ্গহং করোতি.

সো এৰং পচ্চযতো নামরূপস্স পৰত্তিং দিস্ৰা যথা ইদং এতরহি, এৰং অতীতেপি অদ্ধানে পচ্চযতো পৰত্তিত্থ, অনাগতেপি পচ্চযতো পৰত্তিস্সতীতি সমনুপস্সতি.

৬৮০. তস্সেৰং সমনুপস্সতো যা সা পুব্বন্তং আরব্ভ ‘‘অহোসিং নু খো অহং অতীতমদ্ধানং, ন নু খো অহোসিং অতীতমদ্ধানং, কিং নু খো অহোসিং অতীতমদ্ধানং, কথং নু খো অহোসিং অতীতমদ্ধানং, কিং হুত্ৰা কিং অহোসিং নু খো অহং অতীতমদ্ধান’’ন্তি (ম. নি. ১.১৮; সং. নি. ২.২০) পঞ্চৰিধা ৰিচিকিচ্ছা ৰুত্তা, যাপি অপরন্তং আরব্ভ ‘‘ভৰিস্সামি নু খো অহং অনাগতমদ্ধানং, ন নু খো ভৰিস্সামি অনাগতমদ্ধানং, কিং নু খো ভৰিস্সামি অনাগতমদ্ধানং, কথং নু খো ভৰিস্সামি অনাগতমদ্ধানং, কিং হুত্ৰা কিং ভৰিস্সামি নু খো অহং অনাগতমদ্ধান’’ন্তি পঞ্চৰিধা ৰিচিকিচ্ছা ৰুত্তা, যাপি পচ্চুপ্পন্নং আরব্ভ ‘‘এতরহি ৰা পন পচ্চুপ্পন্নং অদ্ধানং অজ্ঝত্তং কথংকথী হোতি – অহং নু খোস্মি, নো নু খোস্মি, কিং নু খোস্মি, কথং নু খোস্মি, অযং নু খো সত্তো কুতো আগতো, সো কুহিং গামী ভৰিস্সতী’’তি (ম. নি. ১.১৮) ছব্বিধা ৰিচিকিচ্ছা ৰুত্তা, সা সব্বাপি পহীযতি.

৬৮১. অপরো সাধারণাসাধারণৰসেন দুৰিধং নামস্স পচ্চযং পস্সতি, কম্মাদিৰসেন চতুব্বিধং রূপস্স. দুৰিধো হি নামস্স পচ্চযো সাধারণো অসাধারণো চ. তত্থ চক্খাদীনি ছ দ্ৰারানি, রূপাদীনি ছ আরম্মণানি নামস্স সাধারণো পচ্চযো, কুসলাদিভেদতো সব্বপ্পকারস্সাপি ততো পৰত্তিতো. মনসিকারাদিকো অসাধারণো. যোনিসো মনসিকারসদ্ধম্মস্সৰনাদিকো হি কুসলস্সেৰ হোতি, ৰিপরীতো অকুসলস্স, কম্মাদিকো ৰিপাকস্স, ভৰঙ্গাদিকো কিরিযস্সাতি.

রূপস্স ¶ পন কম্মং চিত্তং উতু আহারোতি অযং কম্মাদিকো চতুব্বিধো পচ্চযো. তত্থ কম্মং অতীতমেৰ কম্মসমুট্ঠানস্স রূপস্স পচ্চযো হোতি ¶ . চিত্তং চিত্তসমুট্ঠানস্স উপ্পজ্জমানং. উতুআহারা উতুআহারসমুট্ঠানস্স ঠিতিক্খণে পচ্চযা হোন্তীতি. এৰমেৰেকো নামরূপস্স পচ্চযপরিগ্গহং করোতি.

সো এৰং পচ্চযতো নামরূপস্স পৰত্তিং দিস্ৰা যথা ইদং এতরহি, এৰং অতীতেপি অদ্ধানে পচ্চযতো পৰত্তিত্থ, অনাগতেপি পচ্চযতো পৰত্তিস্সতীতি সমনুপস্সতি. তস্সেৰং সমনুপস্সতো ৰুত্তনযেনেৰ তীসুপি অদ্ধাসু ৰিচিকিচ্ছা পহীযতি.

৬৮২. অপরো তেসংযেৰ নামরূপসঙ্খাতানং সঙ্খারানং জরাপত্তিং জিণ্ণানঞ্চ ভঙ্গং দিস্ৰা ইদং সঙ্খারানং জরামরণং নাম জাতিযা সতি হোতি, জাতি ভৰে সতি, ভৰো উপাদানে সতি, উপাদানং তণ্হায সতি, তণ্হা ৰেদনায সতি, ৰেদনা ফস্সে সতি, ফস্সো সল়াযতনে সতি, সল়াযতনং নামরূপে সতি, নামরূপং ৰিঞ্ঞাণে সতি, ৰিঞ্ঞাণং সঙ্খারেসু সতি, সঙ্খারা অৰিজ্জায সতীতি এৰং পটিলোমপটিচ্চসমুপ্পাদৰসেন নামরূপস্স পচ্চযপরিগ্গহং করোতি. অথস্স ৰুত্তনযেনেৰ ৰিচিকিচ্ছা পহীযতি.

৬৮৩. অপরো ‘‘ইতি খো অৰিজ্জাপচ্চযা সঙ্খারা’’তি (সং. নি. ২.২) পুব্বে ৰিত্থারেত্ৰা দস্সিতঅনুলোমপটিচ্চসমুপ্পাদৰসেনেৰ নামরূপস্স পচ্চযপরিগ্গহং করোতি. অথস্স ৰুত্তনযেনেৰ কঙ্খা পহীযতি.

৬৮৪. অপরো ‘‘পুরিমকম্মভৰস্মিং মোহো অৰিজ্জা, আযূহনা সঙ্খারা, নিকন্তি তণ্হা, উপগমনং উপাদানং, চেতনা ভৰোতি ইমে পঞ্চ ধম্মা পুরিমকম্মভৰস্মিং ইধ পটিসন্ধিযা পচ্চযা, ইধ পটিসন্ধি ৰিঞ্ঞাণং, ওক্কন্তি নামরূপং, পসাদো আযতনং, ফুট্ঠো ফস্সো, ৰেদযিতং ৰেদনাতি ইমে পঞ্চ ধম্মা ইধূপপত্তিভৰস্মিং পুরেকতস্স কম্মস্স পচ্চযা. ইধ পরিপক্কত্তা আযতনানং মোহো অৰিজ্জা…পে… চেতনা ভৰোতি ইমে পঞ্চ ধম্মা ইধ কম্মভৰস্মিং আযতিং পটিসন্ধিযা পচ্চযা’’তি (পটি. ম. ১.৪৭) এৰং কম্মৰট্টৰিপাকৰট্টৰসেন নামরূপস্স পচ্চযপরিগ্গহং করোতি.

৬৮৫. তত্থ ¶ চতুব্বিধং কম্মং – দিট্ঠধম্মৰেদনীযং, উপপজ্জৰেদনীযং, অপরাপরিযৰেদনীযং, অহোসিকম্মন্তি. তেসু একজৰনৰীথিযং সত্তসু চিত্তেসু কুসলা ¶ ৰা অকুসলা ৰা পঠমজৰনচেতনা দিট্ঠিধম্মৰেদনীযকম্মং নাম. তং ইমস্মিঞ্ঞেৰ অত্তভাৰে ৰিপাকং দেতি. তথা অসক্কোন্তং পন ‘‘অহোসিকম্মং নাহোসি কম্মৰিপাকো, ন ভৰিস্সতি কম্মৰিপাকো, নত্থি কম্মৰিপাকো’’তি (পটি. ম. ১.২৩৪) ইমস্স তিকস্স ৰসেন অহোসিকম্মং নাম হোতি. অত্থসাধিকা পন সত্তমজৰনচেতনা উপপজ্জৰেদনীযকম্মং নাম. তং অনন্তরে অত্তভাৰে ৰিপাকং দেতি. তথা অসক্কোন্তং ৰুত্তনযেনেৰ অহোসিকম্মং নাম হোতি. উভিন্নং অন্তরে পঞ্চ জৰনচেতনা অপরাপরিযৰেদনীযকম্মং নাম. তং অনাগতে যদা ওকাসং লভতি, তদা ৰিপাকং দেতি. সতি সংসারপ্পৰত্তিযা অহোসিকম্মং নাম ন হোতি.

৬৮৬. অপরম্পি চতুব্বিধং কম্মং – যং গরুকং, যং বহুলং, যদাসন্নং, কটত্তা ৰা পন কম্মন্তি. তত্থ কুসলং ৰা হোতু অকুসলং ৰা, গরুকাগরুকেসু যং গরুকং মাতুঘাতাদিকম্মং ৰা মহগ্গতকম্মং ৰা, তদেৰ পঠমং ৰিপচ্চতি. তথা বহুলাবহুলেসুপি যং বহুলং হোতি সুসীল্যং ৰা দুস্সীল্যং ৰা, তদেৰ পঠমং ৰিপচ্চতি. যদাসন্নং নাম মরণকালে অনুস্সরিতকম্মং. যঞ্হি আসন্নমরণো অনুস্সরিতুং সক্কোতি, তেনেৰ উপপজ্জতি. এতেহি পন তীহি মুত্তং পুনপ্পুনং লদ্ধাসেৰনং কটত্তা ৰা পন কম্মং নাম হোতি, তেসং অভাৰে তং পটিসন্ধিং আকড্ঢতি.

৬৮৭. অপরম্পি চতুব্বিধং কম্মং – জনকং, উপত্থম্ভকং, উপপীল়কং, উপঘাতকন্তি. তত্থ জনকং নাম কুসলম্পি হোতি অকুসলম্পি. তং পটিসন্ধিযম্পি পৰত্তেপি রূপারূপৰিপাকক্খন্ধে জনেতি. উপত্থম্ভকং পন ৰিপাকং জনেতুং ন সক্কোতি, অঞ্ঞেন কম্মেন দিন্নায পটিসন্ধিযা জনিতে ৰিপাকে উপ্পজ্জমানকসুখদুক্খং উপত্থম্ভেতি, অদ্ধানং পৰত্তেতি. উপপীল়কং অঞ্ঞেন কম্মেন দিন্নায পটিসন্ধিযা জনিতে ৰিপাকে উপ্পজ্জমানকসুখদুক্খং পীল়েতি বাধতি, অদ্ধানং পৰত্তিতুং ন দেতি. উপঘাতকং পন সযং কুসলম্পি অকুসলম্পি সমানং অঞ্ঞং দুব্বলকম্মং ঘাতেত্ৰা তস্স ৰিপাকং পটিবাহিত্ৰা অত্তনো ৰিপাকস্স ওকাসং করোতি. এৰং পন কম্মেন কতে ওকাসে তং ৰিপাকং উপ্পন্নং নাম ৰুচ্চতি.

ইতি ¶ ইমেসং দ্ৰাদসন্নং কম্মানং কম্মন্তরঞ্চেৰ ৰিপাকন্তরঞ্চ বুদ্ধানং কম্মৰিপাকঞাণস্সেৰ ¶ যাথাৰসরসতো পাকটং হোতি, অসাধারণং সাৰকেহি. ৰিপস্সকেন পন কম্মন্তরঞ্চ ৰিপাকন্তরঞ্চ একদেসতো জানিতব্বং. তস্মা অযং মুখমত্তদস্সনেন কম্মৰিসেসো পকাসিতোতি.

৬৮৮. ইতি ইমং দ্ৰাদসৰিধং কম্মং কম্মৰট্টে পক্খিপিত্ৰা এৰং একো কম্মৰট্টৰিপাকৰট্টৰসেন নামরূপস্স পচ্চযপরিগ্গহং করোতি. সো এৰং কম্মৰট্টৰিপাকৰট্টৰসেন পচ্চযতো নামরূপস্স পৰত্তিং দিস্ৰা ‘‘যথা ইদং এতরহি, এৰং অতীতেপি অদ্ধানে কম্মৰট্টৰিপাকৰট্টৰসেন পচ্চযতো পৰত্তিত্থ, অনাগতেপি কম্মৰট্টৰিপাকৰট্টৰসেনেৰ পচ্চযতো পৰত্তিস্সতী’’তি. ইতি কম্মঞ্চেৰ কম্মৰিপাকো চ, কম্মৰট্টঞ্চ ৰিপাকৰট্টঞ্চ, কম্মপৰত্তঞ্চ ৰিপাকপৰত্তঞ্চ, কম্মসন্ততি চ ৰিপাকসন্ততি চ, কিরিযা চ কিরিযাফলঞ্চ.

কম্মা ৰিপাকা ৰত্তন্তি, ৰিপাকো কম্মসম্ভৰো;

কম্মা পুনব্ভৰো হোতি, এৰং লোকো পৰত্ততীতি. –

সমনুপস্সতি. তস্সেৰং সমনুপস্সতো যা সা পুব্বন্তাদযো আরব্ভ ‘‘অহোসিং নু খো অহ’’ন্তিআদিনা নযেন ৰুত্তা সোল়সৰিধা ৰিচিকিচ্ছা, সা সব্বা পহীযতি. সব্বভৰযোনিগতিট্ঠিতিনিৰাসেসু হেতুফলসম্বন্ধৰসেন পৰত্তমানং নামরূপমত্তমেৰ খাযতি. সো নেৰ কারণতো উদ্ধং কারকং পস্সতি, ন ৰিপাকপ্পৰত্তিতো উদ্ধং ৰিপাকপটিসংৰেদকং. কারণে পন সতি ‘‘কারকো’’তি, ৰিপাকপ্পৰত্তিযা সতি ‘‘পটিসংৰেদকো’’তি সমঞ্ঞামত্তেন পণ্ডিতা ৰোহরন্তিচ্চেৰস্স সম্মপ্পঞ্ঞায সুদিট্ঠং হোতি.

৬৮৯. তেনাহু পোরাণা –

‘‘কম্মস্স কারকো নত্থি, ৰিপাকস্স চ ৰেদকো;

সুদ্ধধম্মা পৰত্তন্তি, এৰেতং সম্মদস্সনং.

‘‘এৰং কম্মে ৰিপাকে চ, ৰত্তমানে সহেতুকে;

বীজরুক্খাদিকানংৰ, পুব্বা কোটি ন নাযতি;

অনাগতেপি সংসারে, অপ্পৰত্তং ন দিস্সতি.

‘‘এতমত্থং ¶ ¶ অনঞ্ঞায, তিত্থিযা অসযংৰসী;

সত্তসঞ্ঞং গহেত্ৰান, সস্সতুচ্ছেদদস্সিনো;

দ্ৰাসট্ঠিদিট্ঠিং গণ্হন্তি, অঞ্ঞমঞ্ঞৰিরোধিতা.

‘‘দিট্ঠিবন্ধনবদ্ধা তে, তণ্হাসোতেন ৰুয্হরে;

তণ্হাসোতেন ৰুয্হন্তা, ন তে দুক্খা পমুচ্চরে.

‘‘এৰমেতং অভিঞ্ঞায, ভিক্খু বুদ্ধস্স সাৰকো;

গম্ভীরং নিপুণং সুঞ্ঞং, পচ্চযং পটিৰিজ্ঝতি.

‘‘কম্মং নত্থি ৰিপাকম্হি, পাকো কম্মে ন ৰিজ্জতি;

অঞ্ঞমঞ্ঞং উভো সুঞ্ঞা, ন চ কম্মং ৰিনা ফলং.

‘‘যথা ন সূরিযে অগ্গি, ন মণিম্হি ন গোমযে;

ন তেসং বহি সো অত্থি, সম্ভারেহি চ জাযতি.

‘‘তথা ন অন্তো কম্মস্স, ৰিপাকো উপলব্ভতি;

বহিদ্ধাপি ন কম্মস্স, ন কম্মং তত্থ ৰিজ্জতি.

‘‘ফলেন সুঞ্ঞং তং কম্মং, ফলং কম্মে ন ৰিজ্জতি;

কম্মঞ্চ খো উপাদায, ততো নিব্বত্ততে ফলং.

‘‘ন হেত্থ দেৰো ব্রহ্মা ৰা, সংসারস্সত্থিকারকো;

সুদ্ধধম্মা পৰত্তন্তি, হেতুসম্ভারপচ্চযা’’তি.

৬৯০. তস্সেৰং কম্মৰট্টৰিপাকৰট্টৰসেন নামরূপস্স পচ্চযপরিগ্গহং কত্ৰা তীসু অদ্ধাসু পহীনৰিচিকিচ্ছস্স সব্বে অতীতানাগতপচ্চুপ্পন্নধম্মা চুতিপটিসন্ধিৰসেন ৰিদিতা হোন্তি, সাস্স হোতি ঞাতপরিঞ্ঞা.

সো ¶ এৰং পজানাতি – যে অতীতে কম্মপচ্চযা নিব্বত্তা খন্ধা, তে তত্থেৰ নিরুদ্ধা, অতীতকম্মপচ্চযা পন ইমস্মিং ভৰে অঞ্ঞে নিব্বত্তা, অতীতভৰতো ইমং ভৰং আগতো একধম্মোপি নত্থি, ইমস্মিম্পি ভৰে কম্মপচ্চযেন নিব্বত্তা খন্ধা নিরুজ্ঝিস্সন্তি, পুনব্ভৰে অঞ্ঞে নিব্বত্তিস্সন্তি, ইমম্হা ভৰা পুনব্ভৰং একধম্মোপি ন গমিস্সতি. অপিচ খো যথা ন আচরিযমুখতো সজ্ঝাযো অন্তেৰাসিকস্স মুখং পৰিসতি, ন চ তপ্পচ্চযা তস্স ¶ মুখে সজ্ঝাযো ন ৰত্ততি, ন দূতেন মন্তোদকং পীতং রোগিনো উদরং পৰিসতি, ন চ তস্স তপ্পচ্চযা রোগো ন ৰূপসম্মতি, ন মুখে মণ্ডনৰিধানং আদাসতলাদীসু মুখনিমিত্তং গচ্ছতি, ন চ তত্থ তপ্পচ্চযা মণ্ডনৰিধানং ন পঞ্ঞাযতি, ন একিস্সা ৰট্টিযা দীপসিখা অঞ্ঞং ৰট্টিং সঙ্কমতি, ন চ তত্থ তপ্পচ্চযা দীপসিখা ন নিব্বত্ততি, এৰমেৰ ন অতীতভৰতো ইমং ভৰং, ইতো ৰা পুনব্ভৰং কোচি ধম্মো সঙ্কমতি, ন চ অতীতভৰে খন্ধাযতনধাতুপচ্চযা ইধ, ইধ ৰা খন্ধাযতনধাতুপচ্চযা পুনব্ভৰে খন্ধাযতনধাতুযো ন নিব্বত্তন্তীতি.

যথেৰ চক্খুৰিঞ্ঞাণং, মনোধাতুঅনন্তরং;

ন চেৰ আগতং নাপি, ন নিব্বত্তং অনন্তরং.

তথেৰ পটিসন্ধিম্হি, ৰত্ততে চিত্তসন্ততি;

পুরিমং ভিজ্জতে চিত্তং, পচ্ছিমং জাযতে ততো.

তেসং অন্তরিকা নত্থি, ৰীচি তেসং ন ৰিজ্জতি;

ন চিতো গচ্ছতি কিঞ্চি, পটিসন্ধি চ জাযতীতি.

৬৯১. এৰং চুতিপটিসন্ধিৰসেন ৰিদিতসব্বধম্মস্স সব্বাকারেন নামরূপস্স পচ্চযপরিগ্গহঞাণং থামগতং হোতি, সোল়সৰিধা কঙ্খা সুট্ঠুতরং পহীযতি. ন কেৰলঞ্চ সা এৰ, ‘‘সত্থরি কঙ্খতী’’তি (ধ. স. ১০০৮) আদিনযপ্পৰত্তা অট্ঠৰিধাপি কঙ্খা পহীযতিযেৰ, দ্ৰাসট্ঠি দিট্ঠিগতানি ৰিক্খম্ভন্তি. এৰং নানানযেহি নামরূপপচ্চযপরিগ্গহণেন তীসু অদ্ধাসু কঙ্খং ৰিতরিত্ৰা ঠিতং ঞাণং কঙ্খাৰিতরণৰিসুদ্ধীতি ৰেদিতব্বং. ধম্মট্ঠিতিঞাণন্তিপি যথাভূতঞাণন্তিপি সম্মাদস্সনন্তিপি এতস্সেৰাধিৰচনং. ৰুত্তঞ্হেতং –

‘‘অৰিজ্জা ¶ পচ্চযো, সঙ্খারা পচ্চযসমুপ্পন্না. উভোপেতে ধম্মা পচ্চযসমুপ্পন্নাতি পচ্চযপরিগ্গহে পঞ্ঞা ধম্মট্ঠিতিঞাণ’’ন্তি (পটি. ম. ১.৪৬).

‘‘অনিচ্চতো মনসিকরোন্তো কতমে ধম্মে যথাভূতং জানাতি পস্সতি, কথং সম্মাদস্সনং হোতি, কথং তদন্ৰযেন সব্বে সঙ্খারা অনিচ্চতো সুদিট্ঠা হোন্তি, কত্থ কঙ্খা পহীযতি? দুক্খতো…পে… অনত্ততো মনসিকরোন্তো কতমে ধম্মে যথাভূতং জানাতি পস্সতি…পে… কত্থ কঙ্খা পহীযতীতি?

‘‘অনিচ্চতো ¶ মনসিকরোন্তো নিমিত্তং যথাভূতং জানাতি পস্সতি, তেন ৰুচ্চতি সম্মাদস্সনং. এৰং তদন্ৰযেন সব্বে সঙ্খারা অনিচ্চতো সুদিট্ঠা হোন্তি. এত্থ কঙ্খা পহীযতি. দুক্খতো মনসিকরোন্তো পৰত্তং যথাভূতং জানাতি পস্সতি…পে… অনত্ততো মনসিকরোন্তো নিমিত্তঞ্চ পৰত্তঞ্চ যথাভূতং জানাতি পস্সতি, তেন ৰুচ্চতি সম্মাদস্সনং. এৰং তদন্ৰযেন সব্বে ধম্মা অনত্ততো সুদিট্ঠা হোন্তি. এত্থ কঙ্খা পহীযতি.

‘‘যঞ্চ যথাভূতঞাণং যঞ্চ সম্মাদস্সনং যা চ কঙ্খাৰিতরণা, ইমে ধম্মা নানত্থা চেৰ নানাব্যঞ্জনা চ, উদাহু একত্থা ব্যঞ্জনমেৰ নানন্তি? যঞ্চ যথাভূতঞাণং যঞ্চ সম্মাদস্সনং যা চ কঙ্খাৰিতরণা, ইমে ধম্মা একত্থা, ব্যঞ্জনমেৰ নান’’ন্তি (পটি. ম. ১.২২৭).

ইমিনা পন ঞাণেন সমন্নাগতো ৰিপস্সকো বুদ্ধসাসনে লদ্ধস্সাসো লদ্ধপতিট্ঠো নিযতগতিকো চূল়সোতাপন্নো নাম হোতি.

তস্মা ভিক্খু সদা সতো, নামরূপস্স সব্বসো;

পচ্চযে পরিগ্গণ্হেয্য, কঙ্খাৰিতরণত্থিকোতি.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

কঙ্খাৰিতরণৰিসুদ্ধিনিদ্দেসো নাম

একূনৰীসতিমো পরিচ্ছেদো.

২০. মগ্গামগ্গঞাণদস্সনৰিসুদ্ধিনিদ্দেসো

সম্মসনঞাণকথা

৬৯২. অযং ¶ ¶ মগ্গো, অযং ন মগ্গোতি এৰং মগ্গঞ্চ অমগ্গঞ্চ ঞত্ৰা ঠিতং ঞাণং পন মগ্গামগ্গঞাণদস্সনৰিসুদ্ধি নাম.

তং সম্পাদেতুকামেন কলাপসম্মসনসঙ্খাতায নযৰিপস্সনায তাৰ যোগো করণীযো. কস্মা? আরদ্ধৰিপস্সকস্স ওভাসাদিসম্ভৰে মগ্গামগ্গঞাণসম্ভৰতো. আরদ্ধৰিপস্সকস্স হি ওভাসাদীসু সম্ভূতেসু মগ্গামগ্গঞাণং হোতি, ৰিপস্সনায চ কলাপসম্মসনং আদি. তস্মা এতং কঙ্খাৰিতরণানন্তরং উদ্দিট্ঠং. অপিচ যস্মা তীরণপরিঞ্ঞায ৰত্তমানায মগ্গামগ্গঞাণং উপ্পজ্জতি, তীরণপরিঞ্ঞা চ ঞাতপরিঞ্ঞানন্তরা, তস্মাপি তং মগ্গামগ্গঞাণদস্সনৰিসুদ্ধিং সম্পাদেতুকামেন কলাপসম্মসনে তাৰ যোগো কাতব্বো.

৬৯৩. তত্রাযং ৰিনিচ্ছযো – তিস্সো হি লোকিযপরিঞ্ঞা ঞাতপরিঞ্ঞা তীরণপরিঞ্ঞা পহানপরিঞ্ঞা চ. যা সন্ধায ৰুত্তং ‘‘অভিঞ্ঞাপঞ্ঞা ঞাতট্ঠে ঞাণং. পরিঞ্ঞাপঞ্ঞা তীরণট্ঠে ঞাণং. পহানপঞ্ঞা পরিচ্চাগট্ঠে ঞাণ’’ন্তি (পটি. ম. ১.৭৫). তত্থ ‘‘রুপ্পনলক্খণং রূপং, ৰেদযিতলক্খণা ৰেদনা’’তি এৰং তেসং তেসং ধম্মানং পচ্চত্তলক্খণসল্লক্খণৰসেন পৰত্তা পঞ্ঞা ঞাতপরিঞ্ঞা নাম. ‘‘রূপং অনিচ্চং, ৰেদনা অনিচ্চা’’তিআদিনা নযেন তেসংযেৰ ধম্মানং সামঞ্ঞলক্খণং আরোপেত্ৰা পৰত্তা লক্খণারম্মণিকৰিপস্সনা পঞ্ঞা তীরণপরিঞ্ঞা নাম. তেসুযেৰ পন ধম্মেসু নিচ্চসঞ্ঞাদিপজহনৰসেন পৰত্তা লক্খণারম্মণিকৰিপস্সনা পঞ্ঞা পহানপরিঞ্ঞা নাম.

তত্থ সঙ্খারপরিচ্ছেদতো পট্ঠায যাৰ পচ্চযপরিগ্গহা ঞাতপরিঞ্ঞায ভূমি. এতস্মিং হি অন্তরে ¶ ধম্মানং পচ্চত্তলক্খণপটিৰেধস্সেৰ আধিপচ্চং হোতি. কলাপসম্মসনতো পন পট্ঠায যাৰ উদযব্বযানুপস্সনা তীরণপরিঞ্ঞায ভূমি. এতস্মিং হি অন্তরে সামঞ্ঞলক্খণপটিৰেধস্সেৰ আধিপচ্চং হোতি. ভঙ্গানুপস্সনং আদিং কত্ৰা উপরি পহানপরিঞ্ঞায ভূমি ¶ . ততো পট্ঠায হি অনিচ্চতো অনুপস্সন্তো নিচ্চসঞ্ঞং পজহতি, দুক্খতো অনুপস্সন্তো সুখসঞ্ঞং, অনত্ততো অনুপস্সন্তো অত্তসঞ্ঞং, নিব্বিন্দন্তো নন্দিং, ৰিরজ্জন্তো রাগং, নিরোধেন্তো সমুদযং, পটিনিস্সজ্জন্তো আদানং পজহতীতি (পটি. ম. ১.৫২) এৰং নিচ্চসঞ্ঞাদিপহানসাধিকানং সত্তন্নং অনুপস্সনানং আধিপচ্চং. ইতি ইমাসু তীসু পরিঞ্ঞাসু সঙ্খারপরিচ্ছেদস্স চেৰ পচ্চযপরিগ্গহস্স চ সাধিতত্তা ইমিনা যোগিনা ঞাতপরিঞ্ঞাৰ অধিগতা হোতি, ইতরা চ অধিগন্তব্বা. তেন ৰুত্তং ‘‘যস্মা তীরণপরিঞ্ঞায ৰত্তমানায মগ্গামগ্গঞাণং উপ্পজ্জতি, তীরণপরিঞ্ঞা চ ঞাতপরিঞ্ঞানন্তরা, তস্মাপি তং মগ্গামগ্গঞাণদস্সনৰিসুদ্ধিং সম্পাদেতুকামেন কলাপসম্মসনে তাৰ যোগো কাতব্বো’’তি.

৬৯৪. তত্রাযং পাল়ি –

‘‘কথং অতীতানাগতপচ্চুপ্পন্নানং ধম্মানং সঙ্খিপিত্ৰা ৰৰত্থানে পঞ্ঞা সম্মসনে ঞাণং? যংকিঞ্চি রূপং অতীতানাগতপচ্চুপ্পন্নং অজ্ঝত্তং ৰা…পে… যং দূরে সন্তিকে ৰা, সব্বং রূপং অনিচ্চতো ৰৰত্থপেতি, একং সম্মসনং. দুক্খতো ৰৰত্থপেতি, একং সম্মসনং. অনত্ততো ৰৰত্থপেতি, একং সম্মসনং. যা কাচি ৰেদনা…পে… যংকিঞ্চি ৰিঞ্ঞাণং…পে… অনত্ততো ৰৰত্থপেতি, একং সম্মসনং.

‘‘চক্খুং…পে… জরামরণং অতীতানাগতপচ্চুপ্পন্নং অনিচ্চতো ৰৰত্থপেতি, একং সম্মসনং. দুক্খতো অনত্ততো ৰৰত্থপেতি, একং সম্মসনং.

‘‘রূপং অতীতানাগতপচ্চুপ্পন্নং অনিচ্চং খযট্ঠেন, দুক্খং ভযট্ঠেন, অনত্তা অসারকট্ঠেনাতি সঙ্খিপিত্ৰা ৰৰত্থানে পঞ্ঞা সম্মসনে ঞাণং. ৰেদনং… ৰিঞ্ঞাণং… চক্খুং…পে… জরামরণং…পে… সম্মসনে ঞাণং.

‘‘রূপং অতীতানাগতপচ্চুপ্পন্নং অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং ¶ নিরোধধম্মন্তি সঙ্খিপিত্ৰা ৰৰত্থানে পঞ্ঞা সম্মসনে ঞাণং. ৰেদনং… ৰিঞ্ঞাণং… চক্খুং… জরামরণং অতীতানাগতপচ্চুপ্পন্নং অনিচ্চং সঙ্খতং…পে… নিরোধধম্মন্তি সঙ্খিপিত্ৰা ৰৰত্থানে পঞ্ঞা সম্মসনে ঞাণং.

‘‘জাতিপচ্চযা ¶ জরামরণং, অসতি জাতিযা নত্থি জরামরণন্তি সঙ্খিপিত্ৰা ৰৰত্থানে পঞ্ঞা সম্মসনে ঞাণং. অতীতম্পি অদ্ধানং, অনাগতম্পি অদ্ধানং জাতিপচ্চযা জরামরণং, অসতি জাতিযা নত্থি জরামরণন্তি সঙ্খিপিত্ৰা ৰৰত্থানে পঞ্ঞা সম্মসনে ঞাণং. ভৰপচ্চযা জাতি…পে… অৰিজ্জাপচ্চযা সঙ্খারা, অসতি অৰিজ্জায নত্থি সঙ্খারাতি সঙ্খিপিত্ৰা ৰৰত্থানে পঞ্ঞা সম্মসনে ঞাণং. অতীতম্পি অদ্ধানং, অনাগতম্পি অদ্ধানং অৰিজ্জাপচ্চযা সঙ্খারা, অসতি অৰিজ্জায নত্থি সঙ্খারাতি সঙ্খিপিত্ৰা ৰৰত্থানে পঞ্ঞা সম্মসনে ঞাণং.

‘‘তং ঞাতট্ঠেন ঞাণং. পজাননট্ঠেন পঞ্ঞা. তেন ৰুচ্চতি অতীতানাগতপচ্চুপ্পন্নানং ধম্মানং সঙ্খিপিত্ৰা ৰৰত্থানে পঞ্ঞা সম্মসনে ঞাণ’’ন্তি (পটি. ম. ১.৪৮).

এত্থ চ চক্খুং…পে… জরামরণন্তি ইমিনা পেয্যালেন দ্ৰারারম্মণেহি সদ্ধিং দ্ৰারপ্পৰত্তা ধম্মা, পঞ্চক্খন্ধা, ছ দ্ৰারানি, ছ আরম্মণানি, ছ ৰিঞ্ঞাণানি, ছ ফস্সা, ছ ৰেদনা, ছ সঞ্ঞা, ছ চেতনা, ছ তণ্হা, ছ ৰিতক্কা, ছ ৰিচারা, ছ ধাতুযো, দস কসিণানি, দ্ৰত্তিংসকোট্ঠাসা, দ্ৰাদসাযতনানি, অট্ঠারস ধাতুযো, বাৰীসতি ইন্দ্রিযানি, তিস্সো ধাতুযো, নৰ ভৰা, চত্তারি ঝানানি, চতস্সো অপ্পমঞ্ঞা, চতস্সো সমাপত্তিযো, দ্ৰাদস পটিচ্চসমুপ্পাদঙ্গানীতি ইমে ধম্মরাসযো সংখিত্তাতি ৰেদিতব্বা.

ৰুত্তং হেতং অভিঞ্ঞেয্যনিদ্দেসে –

‘‘সব্বং, ভিক্খৰে, অভিঞ্ঞেয্যং. কিঞ্চ, ভিক্খৰে, সব্বং অভিঞ্ঞেয্যং? চক্খু, ভিক্খৰে, অভিঞ্ঞেয্যং. রূপা… চক্খুৰিঞ্ঞাণং… চক্খুসম্ফস্সো… যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা, তম্পি ¶ অভিঞ্ঞেয্যং. সোতং…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা, তম্পি অভিঞ্ঞেয্যং.

‘‘রূপং…পে… ৰিঞ্ঞাণং… চক্খু…পে… মনো… রূপা…পে… ধম্মা… চক্খুৰিঞ্ঞাণং…পে… মনোৰিঞ্ঞাণং… চক্খুসম্ফস্সো…পে… মনোসম্ফস্সো….

‘‘চক্খুসম্ফস্সজা ¶ ৰেদনা…পে… মনোসম্ফস্সজা ৰেদনা… রূপসঞ্ঞা…পে… ধম্মসঞ্ঞা… রূপসঞ্চেতনা…পে… ধম্মসঞ্চেতনা… রূপতণ্হা…পে… ধম্মতণ্হা… রূপৰিতক্কো…পে… ধম্মৰিতক্কো… রূপৰিচারো…পে… ধম্মৰিচারো….

‘‘পথৰীধাতু…পে… ৰিঞ্ঞাণধাতু… পথৰীকসিণং…পে… ৰিঞ্ঞাণকসিণং… কেসা…পে… মুত্তং… মত্থলুঙ্গং….

‘‘চক্খাযতনং…পে… ধম্মাযতনং… চক্খুধাতু…পে… মনোধাতু… মনোৰিঞ্ঞাণধাতু… চক্খুন্দ্রিযং…পে… অঞ্ঞাতাৰিন্দ্রিযং….

‘‘কামধাতু… রূপধাতু… অরূপধাতু… কামভৰো… রূপভৰো… অরূপভৰো… সঞ্ঞাভৰো… অসঞ্ঞাভৰো… নেৰসঞ্ঞানাসঞ্ঞাভৰো… একৰোকারভৰো… চতুৰোকারভৰো… পঞ্চৰোকারভৰো….

‘‘পঠমং ঝানং…পে… চতুত্থং ঝানং… মেত্তাচেতোৰিমুত্তি…পে… উপেক্খাচেতোৰিমুত্তি… আকাসানঞ্চাযতনসমাপত্তি…পে… নেৰসঞ্ঞানাসঞ্ঞাযতনসমাপত্তি… অৰিজ্জা অভিঞ্ঞেয্যা…পে… জরামরণং অভিঞ্ঞেয্য’’ন্তি (পটি. ম. ১.৩; সং. নি. ৪.৪৬).

তং তত্থ এৰং ৰিত্থারেন ৰুত্তত্তা ইধ সব্বং পেয্যালেন সংখিত্তং. এৰং সংখিত্তে পনেত্থ যে লোকুত্তরা ধম্মা আগতা, তে অসম্মসনুপগত্তা ইমস্মিং অধিকারে ন গহেতব্বা. যেপি চ সম্মসনুপগা ¶ , তেসু যে যস্স পাকটা হোন্তি সুখেন পরিগ্গহং গচ্ছন্তি, তেসু তেন সম্মসনং আরভিতব্বং.

৬৯৫. তত্রাযং খন্ধৰসেন আরব্ভৰিধানযোজনা – যংকিঞ্চি রূপং…পে… সব্বং রূপং অনিচ্চতো ৰৰত্থপেতি, একং সম্মসনং. দুক্খতো অনত্ততো ৰৰত্থপেতি, একং সম্মসনন্তি. এত্তাৰতা অযং ভিক্খু ‘‘যংকিঞ্চি রূপ’’ন্তি এৰং অনিযমনিদ্দিট্ঠং সব্বম্পি রূপং অতীতত্তিকেন চেৰ চতূহি চ অজ্ঝত্তাদিদুকেহীতি একাদসহি ওকাসেহি পরিচ্ছিন্দিত্ৰা সব্বং রূপং অনিচ্চতো ৰৰত্থপেতি, অনিচ্চন্তি সম্মসতি.

কথং ¶ ? পরতো ৰুত্তনযেন. ৰুত্তঞ্হেতং – ‘‘রূপং অতীতানাগতপচ্চুপ্পন্নং অনিচ্চং খযট্ঠেনা’’তি (পটি. ম. ১.৪৮).

তস্মা এস যং অতীতং রূপং, তং যস্মা অতীতেযেৰ খীণং, নযিমং ভৰং সম্পত্তন্তি অনিচ্চং খযট্ঠেন.

যং অনাগতং অনন্তরভৰে নিব্বত্তিস্সতি, তম্পি তত্থেৰ খীযিস্সতি, ন ততো পরং ভৰং গমিস্সতীতি অনিচ্চং খযট্ঠেন.

যং পচ্চুপ্পন্নং রূপং, তম্পি ইধেৰ খীযতি, ন ইতো গচ্ছতীতি অনিচ্চং খযট্ঠেন.

যং অজ্ঝত্তং, তম্পি অজ্ঝত্তমেৰ খীযতি, ন বহিদ্ধাভাৰং গচ্ছতীতি অনিচ্চং খযট্ঠেন.

যং বহিদ্ধা…পে… ওল়ারিকং…পে… সুখুমং…পে… হীনং…পে… পণীতং…পে… দূরে…পে… সন্তিকে, তম্পি তত্থেৰ খীযতি, ন দূরভাৰং গচ্ছতীতি অনিচ্চং খযট্ঠেনাতি সম্মসতি.

ইদং সব্বম্পি ‘‘অনিচ্চং খযট্ঠেনা’’তি এতস্স ৰসেন একং সম্মসনং. ভেদতো পন একাদসৰিধং হোতি.

সব্বমেৰ চ তং দুক্খং ভযট্ঠেন. ভযট্ঠেনাতি সপ্পটিভযতায. যঞ্হি অনিচ্চং, তং ভযাৰহং হোতি সীহোপমসুত্তে (সং. নি. ৩.৭৮; অ. নি. ৪.৩৩) দেৰানং ৰিয. ইতি ¶ ইদম্পি ‘‘দুক্খং ভযট্ঠেনা’’তি এতস্স ৰসেন একং সম্মসনং. ভেদতো পন একাদসৰিধং হোতি.

যথা চ দুক্খং, এৰং সব্বম্পি তং অনত্তা অসারকট্ঠেন. অসারকট্ঠেনাতি ‘‘অত্তা নিৰাসী কারকো ৰেদকো সযংৰসী’’তি এৰং পরিকপ্পিতস্স অত্তসারস্স অভাৰেন. যঞ্হি অনিচ্চং, দুক্খং, তং অত্তনোপি অনিচ্চতং ৰা উদযব্বযপীল়নং ৰা ৰারেতুং ন সক্কোতি, কুতো তস্স কারকাদিভাৰো. তেনাহ – ‘‘রূপঞ্চ হিদং, ভিক্খৰে, অত্তা অভৰিস্স. নযিদং রূপং আবাধায সংৰত্তেয্যা’’তিআদি (সং. নি. ৩.৫৯). ইতি ইদম্পি ‘‘অনত্তা অসারকট্ঠেনা’’তি ¶ এতস্স ৰসেন একং সম্মসনং. ভেদতো পন একাদসৰিধং হোতি. এস নযো ৰেদনাদীসু.

৬৯৬. যং পন অনিচ্চং, তং যস্মা নিযমতো সঙ্খতাদিভেদং হোতি. তেনস্স পরিযাযদস্সনত্থং, নানাকারেহি ৰা মনসিকারপ্পৰত্তিদস্সনত্থং ‘‘রূপং অতীতানাগতপচ্চুপ্পন্নং অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্ম’’ন্তি পুন পাল়ি ৰুত্তা. এস নযো ৰেদনাদীসূতি.

চত্তারীসাকারঅনুপস্সনাকথা

৬৯৭. সো তস্সেৰ পঞ্চসু খন্ধেসু অনিচ্চদুক্খানত্তসম্মসনস্স থিরভাৰত্থায, যং তং ভগৰতা ‘‘কতমেহি চত্তারীসায আকারেহি অনুলোমিকং খন্তিং পটিলভতি, কতমেহি চত্তারীসায আকারেহি সম্মত্তনিযামং ওক্কমতী’’তি এতস্স ৰিভঙ্গে –

‘‘পঞ্চক্খন্ধে অনিচ্চতো, দুক্খতো, রোগতো, গণ্ডতো, সল্লতো, অঘতো, আবাধতো, পরতো, পলোকতো, ঈতিতো, উপদ্দৰতো, ভযতো, উপসগ্গতো, চলতো, পভঙ্গুতো, অদ্ধুৰতো, অতাণতো, অলেণতো, অসরণতো, রিত্ততো, তুচ্ছতো, সুঞ্ঞতো, অনত্ততো, আদীনৰতো, ৰিপরিণামধম্মতো, অসারকতো, অঘমূলতো, ৰধকতো, ৰিভৰতো, সাসৰতো, সঙ্খততো, মারামিসতো, জাতিধম্মতো, জরাধম্মতো, ব্যাধিধম্মতো, মরণধম্মতো ¶ , সোকধম্মতো, পরিদেৰধম্মতো, উপাযাসধম্মতো, সংকিলেসিকধম্মতো’’তি (পটি. ম. ৩.৩৭) –

চত্তারীসায আকারেহি,

‘‘পঞ্চক্খন্ধে অনিচ্চতো পস্সন্তো অনুলোমিকং খন্তিং পটিলভতি. পঞ্চন্নং খন্ধানং নিরোধো নিচ্চং নিব্বানন্তি পস্সন্তো সম্মত্তনিযামং ওক্কমতী’’তিআদিনা (পটি. ম. ৩.৩৮) নযেন,

অনুলোমঞাণং ৰিভজন্তেন পভেদতো অনিচ্চাদিসম্মসনং ৰুত্তং. তস্সাপি ৰসেন ইমে পঞ্চক্খন্ধে সম্মসতি.

৬৯৮. কথং ¶ ? সো হি একেকং খন্ধং অনচ্চন্তিকতায, আদিঅন্তৰন্ততায চ অনিচ্চতো. উপ্পাদৰযপটিপীল়নতায, দুক্খৰত্থুতায চ দুক্খতো. পচ্চযযাপনীযতায, রোগমূলতায চ রোগতো. দুক্খতাসূলযোগিতায, কিলেসাসুচিপগ্ঘরণতায, উপ্পাদজরাভঙ্গেহি উদ্ধুমাতপরিপক্কপভিন্নতায চ গণ্ডতো. পীল়াজনকতায, অন্তোতুদনতায, দুন্নীহরণীযতায চ সল্লতো. ৰিগরহণীযতায, অৰড্ঢিআৰহনতায, অঘৰত্থুতায চ অঘতো. অসেরিভাৰজনকতায, আবাধপদট্ঠানতায চ আবাধতো. অৰসতায, অৰিধেয্যতায চ পরতো. ব্যাধিজরামরণেহি পলুজ্জনতায পলোকতো. অনেকব্যসনাৰহনতায ঈতিতো. অৰিদিতানংযেৰ ৰিপুলানং অনত্থানং আৰহনতো, সব্বুপদ্দৰৰত্থুতায চ উপদ্দৰতো. সব্বভযানং আকরতায, দুক্খৰূপসমসঙ্খাতস্স পরমস্সাসস্স পটিপক্খভূততায চ ভযতো. অনেকেহি অনত্থেহি অনুবদ্ধতায, দোসূপসট্ঠতায, উপসগ্গো ৰিয অনধিৰাসনারহতায চ উপসগ্গতো. ব্যাধিজরামরণেহি চেৰ লাভালাভাদীহি চ লোকধম্মেহি পচলিততায চলতো. উপক্কমেন চেৰ সরসেন চ পভঙ্গুপগমনসীলতায পভঙ্গুতো. সব্বাৰত্থনিপাতিতায, থিরভাৰস্স চ অভাৰতায অদ্ধুৰতো. অতাযনতায চেৰ, অলব্ভনেয্যখেমতায চ অতাণতো. অল্লীযিতুং অনরহতায, অল্লীনানম্পি চ লেণকিচ্চাকারিতায অলেণতো. নিস্সিতানং ভযসারকত্তাভাৰেন অসরণতো. যথাপরিকপ্পিতেহি ধুৰসুভসুখত্তভাৰেহি রিত্ততায রিত্ততো. রিত্ততাযেৰ তুচ্ছতো অপ্পকত্তা ৰা, অপ্পকম্পি হি লোকে তুচ্ছন্তি ৰুচ্চতি. সামি-নিৰাসি-কারক-ৰেদকাধিট্ঠাযকৰিরহিততায ¶ সুঞ্ঞতো. সযঞ্চ অস্সামিকভাৰাদিতায অনত্ততো. পৰত্তিদুক্খতায, দুক্খস্স চ আদীনৰতায আদীনৰতো, অথ ৰা আদীনং ৰাতি গচ্ছতি পৰত্ততীতি আদীনৰো, কপণমনুস্সস্সেতং অধিৰচনং, খন্ধাপি চ কপণাযেৰাতি আদীনৰসদিসতায আদীনৰতো. জরায চেৰ মরণেন চাতি দ্ৰেধা পরিণামপকতিতায ৰিপরিণামধম্মতো. দুব্বলতায, ফেগ্গু ৰিয সুখভঞ্জনীযতায চ অসারকতো. অঘহেতুতায অঘমূলতো. মিত্তমুখসপত্তো ¶ ৰিয ৰিস্সাসঘাতিতায ৰধকতো. ৰিগতভৰতায, ৰিভৰসম্ভূততায চ ৰিভৰতো. আসৰপদট্ঠানতায সাসৰতো. হেতুপচ্চযেহি অভিসঙ্খততায সঙ্খততো. মচ্চুমারকিলেসমারানং আমিসভূততায মারামিসতো. জাতি-জরা-ব্যাধিমরণপকতিতায জাতি-জরা-ব্যাধি-মরণধম্মতো. সোক-পরিদেৰ-উপাযাসহেতুতায সোক-পরিদেৰউপাযাসধম্মতো. তণ্হাদিট্ঠিদুচ্চরিতসংকিলেসানং ৰিসযধম্মতায সংকিলেসিকধম্মতোতি এৰং পভেদতো ৰুত্তস্স অনিচ্চাদিসম্মসনস্স ৰসেন সম্মসতি.

এত্থ হি অনিচ্চতো, পলোকতো, চলতো, পভঙ্গুতো, অদ্ধুৰতো, ৰিপরিণামধম্মতো, অসারকতো, ৰিভৰতো, সঙ্খততো, মরণধম্মতোতি একেকস্মিং খন্ধে দস দস কত্ৰা পঞ্ঞাস অনিচ্চানুপস্সনানি. পরতো, রিত্ততো, তুচ্ছতো, সুঞ্ঞতো, অনত্ততোতি একেকস্মিং খন্ধে পঞ্চ পঞ্চ কত্ৰা পঞ্চৰীসতি অনত্তানুপস্সনানি. সেসানি দুক্খতো, রোগতোতিআদীনি একেকস্মিং খন্ধে পঞ্চৰীসতি পঞ্চৰীসতি কত্ৰা পঞ্চৰীসতিসতং দুক্খানুপস্সনানীতি.

ইচ্চস্স ইমিনা দ্ৰিসতভেদেন অনিচ্চাদিসম্মসনেন পঞ্চক্খন্ধে সম্মসতো তং নযৰিপস্সনাসঙ্খাতং অনিচ্চদুক্খানত্তসম্মসনং থিরং হোতি. ইদং তাৰেত্থ পাল়িনযানুসারেন সম্মসনারম্ভৰিধানং.

ইন্দ্রিযতিক্খকারণনৰককথা

৬৯৯. যস্স পন এৰং নযৰিপস্সনায যোগং করোতোপি নযৰিপস্সনা ন সম্পজ্জতি, তেন ‘‘নৰহাকারেহি ইন্দ্রিযানি তিক্খানি ভৰন্তি – উপ্পন্নুপ্পন্নানং সঙ্খারানং খযমেৰ পস্সতি, তত্থ চ সক্কচ্চকিরিযায সম্পাদেতি, সাতচ্চকিরিযায সম্পাদেতি, সপ্পাযকিরিযায সম্পাদেতি, সমাধিস্স চ নিমিত্তগ্গাহেন, বোজ্ঝঙ্গানঞ্চ অনুপৰত্তনতায, কাযে চ জীৰিতে চ ¶ অনপেক্খতং উপট্ঠাপেতি, তত্থ চ অভিভুয্য নেক্খম্মেন, অন্তরা চ অব্যোসানেনা’’তি এৰং ৰুত্তানং নৰন্নং আকারানং ৰসেন ইন্দ্রিযানি তিক্খানি কত্ৰা পথৰীকসিণনিদ্দেসে ৰুত্তনযেন সত্ত অসপ্পাযানি ৰজ্জেত্ৰা সত্ত সপ্পাযানি সেৰমানেন কালেন রূপং সম্মসিতব্বং, কালেন অরূপং. রূপং সম্মসন্তেন রূপস্স নিব্বত্তি পস্সিতব্বা.

রূপনিব্বত্তিপস্সনাকারকথা

৭০০. সেয্যথিদং ¶ – ইদং রূপং নাম কম্মাদিৰসেন চতূহি কারণেহি নিব্বত্ততি. তত্থ সব্বেসং সত্তানং রূপং নিব্বত্তমানং পঠমং কম্মতো নিব্বত্ততি. পটিসন্ধিক্খণেযেৰ হি গব্ভসেয্যকানং তাৰ তিসন্ততিৰসেন ৰত্থু-কায-ভাৰদসকসঙ্খাতানি তিংস রূপানি নিব্বত্তন্তি, তানি চ খো পটিসন্ধিচিত্তস্স উপ্পাদক্খণেযেৰ. যথা চ উপ্পাদক্খণে, তথা ঠিতিক্খণেপি ভঙ্গক্খণেপি.

তত্থ রূপং দন্ধনিরোধং গরুপরিৰত্তি, চিত্তং খিপ্পনিরোধং লহুপরিৰত্তি. তেনাহ – ‘‘নাহং, ভিক্খৰে, অঞ্ঞং একধম্মম্পি সমনুপস্সামি, যং এৰং লহুপরিৰত্তং যথযিদং, ভিক্খৰে, চিত্ত’’ন্তি (অ. নি. ১.৪৮). রূপে ধরন্তেযেৰ হি সোল়সৰারে ভৰঙ্গচিত্তং উপ্পজ্জিত্ৰা নিরুজ্ঝতি. চিত্তস্স উপ্পাদক্খণোপি ঠিতিক্খণোপি ভঙ্গক্খণোপি একসদিসা. রূপস্স পন উপ্পাদভঙ্গক্খণাযেৰ লহুকা, তেহি সদিসা. ঠিতিক্খণো পন মহা, যাৰ সোল়স চিত্তানি উপ্পজ্জিত্ৰা নিরুজ্ঝন্তি, তাৰ ৰত্ততি. পটিসন্ধিচিত্তস্স উপ্পাদক্খণে উপ্পন্নং ঠানপ্পত্তং পুরেজাতং ৰত্থুং নিস্সায দুতিযং ভৰঙ্গং উপ্পজ্জতি. তেন সদ্ধিং উপ্পন্নং ঠানপ্পত্তং পুরেজাতং ৰত্থুং নিস্সায ততিযং ভৰঙ্গং উপ্পজ্জতি. ইমিনা নযেন যাৰতাযুকং চিত্তপ্পৰত্তি ৰেদিতব্বা. আসন্নমরণস্স পন একমেৰ ঠানপ্পত্তং পুরেজাতং ৰত্থুং নিস্সায সোল়স চিত্তানি উপ্পজ্জন্তি.

পটিসন্ধিচিত্তস্স উপ্পাদক্খণে উপ্পন্নং রূপং পটিসন্ধিচিত্ততো উদ্ধং সোল়সমেন চিত্তেন সদ্ধিং নিরুজ্ঝতি. ঠানক্খণে উপ্পন্নং সত্তরসমস্স উপ্পাদক্খণেন সদ্ধিং নিরুজ্ঝতি. ভঙ্গক্খণে উপ্পন্নং সত্তরসমস্স ঠানক্খণং পত্ৰা নিরুজ্ঝতি. যাৰ পৰত্তি নাম অত্থি, এৰমেৰ পৰত্ততি. ওপপাতিকানম্পি সত্তসন্ততিৰসেন সত্ততি রূপানি এৰমেৰ পৰত্তন্তি.

৭০১. তত্থ ¶ কম্মং, কম্মসমুট্ঠানং, কম্মপচ্চযং, কম্মপচ্চযচিত্তসমুট্ঠানং, কম্মপচ্চযআহারসমুট্ঠানং, কম্মপচ্চযউতুসমুট্ঠানন্তি এস ৰিভাগো ৰেদিতব্বো. তত্থ কম্মং নাম কুসলাকুসলচেতনা. কম্মসমুট্ঠানং নাম ৰিপাকক্খন্ধা চ, চক্খুদসকাদি সমসত্ততিরূপঞ্চ. কম্মপচ্চযং নাম তদেৰ, কম্মং হি কম্মসমুট্ঠানস্স উপত্থম্ভকপচ্চযোপি হোতি. কম্মপচ্চযচিত্তসমুট্ঠানং নাম ৰিপাকচিত্তসমুট্ঠানং রূপং. কম্মপচ্চযআহারসমুট্ঠানং নাম কম্মসমুট্ঠানরূপেসু ¶ ঠানপ্পত্তা ওজা অঞ্ঞং ওজট্ঠমকং সমুট্ঠাপেতি, তত্রাপি ওজা ঠানং পত্ৰা অঞ্ঞন্তি এৰং চতস্সো ৰা পঞ্চ ৰা পৰত্তিযো ঘটেতি. কম্মপচ্চযউতুসমুট্ঠানং নাম কম্মজতেজোধাতু ঠানপ্পত্তা উতুসমুট্ঠানং ওজট্ঠমকং সমুট্ঠাপেতি, তত্রাপি উতু অঞ্ঞং ওজট্ঠমকন্তি এৰং চতস্সো ৰা পঞ্চ ৰা পৰত্তিযো ঘটেতি. এৰং তাৰ কম্মজরূপস্স নিব্বত্তি পস্সিতব্বা.

৭০২. চিত্তজেসুপি চিত্তং, চিত্তসমুট্ঠানং, চিত্তপচ্চযং, চিত্তপচ্চযআহারসমুট্ঠানং, চিত্তপচ্চযউতুসমুট্ঠানন্তি এস ৰিভাগো ৰেদিতব্বো. তত্থ চিত্তং নাম একূননৰুতিচিত্তানি.

তেসু দ্ৰত্তিংস চিত্তানি, ছব্বীসেকূনৰীসতি;

সোল়স রূপিরিযাপথৰিঞ্ঞত্তিজনকা মতা.

কামাৰচরতো হি অট্ঠ কুসলানি, দ্ৰাদসাকুসলানি, মনোধাতুৰজ্জা দস কিরিযা, কুসলকিরিযতো দ্ৰে অভিঞ্ঞাচিত্তানীতি দ্ৰত্তিংস চিত্তানি রূপং, ইরিযাপথং, ৰিঞ্ঞত্তিঞ্চ জনেন্তি. ৰিপাকৰজ্জানি সেসদসরূপাৰচরানি, অট্ঠ অরূপাৰচরানি, অট্ঠ লোকুত্তরচিত্তানীতি ছব্বীসতি চিত্তানি রূপং, ইরিযাপথঞ্চ জনযন্তি, ন ৰিঞ্ঞত্তিং. কামাৰচরে দস ভৰঙ্গচিত্তানি, রূপাৰচরে পঞ্চ, তিস্সো মনোধাতুযো, একা ৰিপাকাহেতুকমনোৰিঞ্ঞাণধাতুসোমনস্সসহগতাতি একূনৰীসতি চিত্তানি রূপমেৰ জনযন্তি, ন ইরিযাপথং, ন ৰিঞ্ঞত্তিং. দ্ৰেপঞ্চৰিঞ্ঞাণানি, সব্বসত্তানং পটিসন্ধিচিত্তং, খীণাসৰানং চুতিচিত্তং, চত্তারি আরুপ্পৰিপাকানীতি সোল়স চিত্তানি নেৰ রূপং জনযন্তি, ন ইরিযাপথং, ন ৰিঞ্ঞত্তিং. যানি চেত্থ রূপং জনেন্তি, তানি ন ঠিতিক্খণে, ভঙ্গক্খণে ৰা, তদা হি চিত্তং দুব্বলং হোতি. উপ্পাদক্খণে পন বলৰং, তস্মা তং তদা পুরেজাতং ৰত্থুং নিস্সায রূপং সমুট্ঠাপেতি.

চিত্তসমুট্ঠানং ¶ নাম তযো অরূপিনো খন্ধা, ‘‘সদ্দনৰকং, কাযৰিঞ্ঞত্তি, ৰচীৰিঞ্ঞত্তি, আকাসধাতু, লহুতা, মুদুতা, কম্মঞ্ঞতা, উপচযো, সন্ততী’’তি সত্তরসৰিধং রূপঞ্চ. চিত্তপচ্চযং নাম ‘‘পচ্ছাজাতা চিত্তচেতসিকা ধম্মা পুরেজাতস্স ইমস্স কাযস্সা’’তি (পট্ঠা. ১.১.১১) এৰং ৰুত্তং চতুসমুট্ঠানরূপং. চিত্তপচ্চযআহারসমুট্ঠানং নাম চিত্তসমুট্ঠানরূপেসু ঠানপ্পত্তা ¶ ওজা অঞ্ঞং ওজট্ঠমকং সমুট্ঠাপেতি, এৰং দ্ৰে তিস্সো পৰত্তিযো ঘটেতি. চিত্তপচ্চযউতুসমুট্ঠানং নাম চিত্তসমুট্ঠানো উতু ঠানপ্পত্তো অঞ্ঞং ওজট্ঠমকং সমুট্ঠাপেতি, এৰং দ্ৰে তিস্সো পৰত্তিযো ঘটেতি. এৰং চিত্তজরূপস্স নিব্বত্তি পস্সিতব্বা.

৭০৩. আহারজেসুপি আহারো, আহারসমুট্ঠানং, আহারপচ্চযং, আহারপচ্চযআহারসমুট্ঠানং, আহারপচ্চযউতুসমুট্ঠানন্তি এস ৰিভাগো ৰেদিতব্বো. তত্থ আহারো নাম কবল়ীকারো আহারো. আহারসমুট্ঠানং নাম উপাদিণ্ণং কম্মজরূপং পচ্চযং লভিত্ৰা তত্থ পতিট্ঠায ঠানপ্পত্তায ওজায সমুট্ঠাপিতং ওজট্ঠমকং, আকাসধাতু, লহুতা, মুদুতা, কম্মঞ্ঞতা, উপচযো, সন্ততীতি চুদ্দসৰিধং রূপং. আহারপচ্চযং নাম ‘‘কবল়ীকারো আহারো ইমস্স কাযস্স আহারপচ্চযেন পচ্চযো’’তি (পট্ঠা. ১.১.১৫) এৰং ৰুত্তং চতুসমুট্ঠানরূপং. আহারপচ্চযআহারসমুট্ঠানং নাম আহারসমুট্ঠানেসু রূপেসু ঠানপ্পত্তা ওজা অঞ্ঞং ওজট্ঠমকং সমুট্ঠাপেতি, তত্রাপি ওজা অঞ্ঞন্তি এৰং দসদ্ৰাদসৰারে পৰত্তিং ঘটেতি. একদিৰসং পরিভুত্তাহারো সত্তাহম্পি উপত্থম্ভেতি. দিব্বা পন ওজা একমাসং দ্ৰেমাসম্পি উপত্থম্ভেতি. মাতরা পরিভুত্তাহারোপি দারকস্স সরীরং ফরিত্ৰা রূপং সমুট্ঠাপেতি. সরীরে মক্খিতাহারোপি রূপং সমুট্ঠাপেতি. কম্মজাহারো উপাদিণ্ণকাহারো নাম. সোপি ঠানপ্পত্তো রূপং সমুট্ঠাপেতি, তত্রাপি ওজা অঞ্ঞং সমুট্ঠাপেতীতি এৰং চতস্সো ৰা পঞ্চ ৰা পৰত্তিযো ঘটেতি. আহারপচ্চযউতুসমুট্ঠানং নাম আহারসমুট্ঠানা তেজোধাতু ঠানপ্পত্তা উতুসমুট্ঠানং ওজট্ঠমকং সমুট্ঠাপেতি. তত্রাযং আহারো আহারসমুট্ঠানানং জনকো হুত্ৰা পচ্চযো হোতি, সেসানং নিস্সযাহারঅত্থিঅৰিগতৰসেনাতি এৰং আহারজরূপস্স নিব্বত্তি পস্সিতব্বা.

৭০৪. উতুজেসুপি উতু, উতুসমুট্ঠানং, উতুপচ্চযং, উতুপচ্চযউতুসমুট্ঠানং, উতুপচ্চযআহারসমুট্ঠানন্তি এস ৰিভাগো ৰেদিতব্বো. তত্থ উতু নাম চতুসমুট্ঠানা তেজোধাতু, উণ্হউতু সীতউতূতি এৰং পনেস দুৰিধো হোতি. উতুসমুট্ঠানং নাম চতুসমুট্ঠানো উতু উপাদিণ্ণকং পচ্চযং লভিত্ৰা ঠানপ্পত্তো সরীরে রূপং সমুট্ঠাপেতি. তং সদ্দনৰকং, আকাসধাতু ¶ ¶ , লহুতা, মুদুতা, কম্মঞ্ঞতা, উপচযো, সন্ততীতি পন্নরসৰিধং হোতি. উতুপচ্চযং নাম উতু চতুসমুট্ঠানিকরূপানং পৰত্তিযা চ ৰিনাসস্স চ পচ্চযো হোতি. উতুপচ্চযউতুসমুট্ঠানং নাম উতুসমুট্ঠানা তেজোধাতু ঠানপ্পত্তা অঞ্ঞং ওজট্ঠমকং সমুট্ঠাপেতি, তত্রাপি উতু অঞ্ঞন্তি এৰং দীঘম্পি অদ্ধানং অনুপাদিণ্ণপক্খে ঠত্ৰাপি উতুসমুট্ঠানং পৰত্ততিযেৰ. উতুপচ্চযআহারসমুট্ঠানং নাম উতুসমুট্ঠানা ঠানপ্পত্তা ওজা অঞ্ঞং ওজট্ঠমকং সমুট্ঠাপেতি, তত্রাপি ওজা অঞ্ঞন্তি এৰং দসদ্ৰাদসৰারে পৰত্তিং ঘটেতি. তত্রাযং উতু উতুসমুট্ঠানানং জনকো হুত্ৰা পচ্চযো হোতি, সেসানং নিস্সযঅত্থিঅৰিগতৰসেনাতি এৰং উতুজরূপস্স নিব্বত্তি পস্সিতব্বা. এৰঞ্হি রূপস্স নিব্বত্তিং পস্সন্তো কালেন রূপং সম্মসতি নাম.

অরূপনিব্বত্তিপস্সনাকারকথা

৭০৫. যথা চ রূপং সম্মসন্তেন রূপস্স, এৰং অরূপং সম্মসন্তেনপি অরূপস্স নিব্বত্তি পস্সিতব্বা. সা চ খো একাসীতি লোকিযচিত্তুপ্পাদৰসেনেৰ.

সেয্যথিদং – ইদঞ্হি অরূপং নাম পুরিমভৰে আযূহিতকম্মৰসেন পটিসন্ধিযং তাৰ একূনৰীসতিচিত্তুপ্পাদপ্পভেদং নিব্বত্ততি. নিব্বত্তনাকারো পনস্স পটিচ্চসমুপ্পাদনিদ্দেসে ৰুত্তনযেনেৰ ৰেদিতব্বো. তদেৰ পটিসন্ধিচিত্তস্স অনন্তরচিত্ততো পট্ঠায ভৰঙ্গৰসেন, আযুপরিযোসানে চুতিৰসেন. যং তত্থ কামাৰচরং, তং ছসু দ্ৰারেসু বলৰারম্মণে তদারম্মণৰসেন.

পৰত্তে পন অসম্ভিন্নত্তা চক্খুস্স আপাথগতত্তা রূপানং আলোকসন্নিস্সিতং মনসিকারহেতুকং চক্খুৰিঞ্ঞাণং নিব্বত্ততি সদ্ধিং সম্পযুত্তধম্মেহি. চক্খুপসাদস্স হি ঠিতিক্খণে ঠিতিপ্পত্তমেৰ রূপং চক্খুং ঘট্টেতি. তস্মিং ঘট্টিতে দ্ৰিক্খত্তুং ভৰঙ্গং উপ্পজ্জিত্ৰা নিরুজ্ঝতি. ততো তস্মিংযেৰ আরম্মণে কিরিযমনোধাতু আৰজ্জনকিচ্চং সাধযমানা উপ্পজ্জতি. তদনন্তরং তদেৰ রূপং পস্সমানং কুসলৰিপাকং অকুসলৰিপাকং ৰা চক্খুৰিঞ্ঞাণং. ততো তদেৰ রূপং সম্পটিচ্ছমানা ৰিপাকমনোধাতু. ততো তদেৰ রূপং সন্তীরযমানা ৰিপাকাহেতুকমনোৰিঞ্ঞাণধাতু. ততো তদেৰ রূপং ৰৰত্থাপযমানা কিরিযাহেতুকমনোৰিঞ্ঞাণধাতু ¶ উপেক্খাসহগতা ¶ . ততো পরং কামাৰচরকুসলাকুসলকিরিযচিত্তেসু একং ৰা উপেক্খাসহগতাহেতুকং চিত্তং পঞ্চ সত্ত ৰা জৰনানি. ততো কামাৰচরসত্তানং একাদসসু তদারম্মণচিত্তেসু জৰনানুরূপং যংকিঞ্চি তদারম্মণন্তি. এস নযো সেসদ্ৰারেসুপি. মনোদ্ৰারে পন মহগ্গতচিত্তানিপি উপ্পজ্জন্তীতি. এৰং ছসু দ্ৰারেসু অরূপস্স নিব্বত্তি পস্সিতব্বা. এৰঞ্হি অরূপস্স নিব্বত্তিং পস্সন্তো কালেন অরূপং সম্মসতি নাম.

এৰং কালেন রূপং কালেন অরূপং সম্মসিত্ৰাপি তিলক্খণং আরোপেত্ৰা অনুক্কমেন পটিপজ্জমানো একো পঞ্ঞাভাৰনং সম্পাদেতি.

রূপসত্তকসম্মসনকথা

৭০৬. অপরো রূপসত্তকঅরূপসত্তকৰসেন তিলক্খণং আরোপেত্ৰা সঙ্খারে সম্মসতি. তত্থ আদাননিক্খেপনতো, ৰযোৰুড্ঢত্থঙ্গমতো, আহারমযতো, উতুমযতো, কম্মজতো, চিত্তসমুট্ঠানতো, ধম্মতারূপতোতি ইমেহি আকারেহি আরোপেত্ৰা সম্মসন্তো রূপসত্তকৰসেন আরোপেত্ৰা সম্মসতি নাম. তেনাহু পোরাণা –

‘‘আদাননিক্খেপনতো, ৰযোৰুড্ঢত্থগামিতো;

আহারতো চ উতুতো, কম্মতো চাপি চিত্ততো;

ধম্মতারূপতো সত্ত, ৰিত্থারেন ৰিপস্সতী’’তি.

তত্থ আদানন্তি পটিসন্ধি. নিক্খেপনন্তি চুতি. ইতি যোগাৰচরো ইমেহি আদাননিক্খেপেহি একং ৰস্সসতং পরিচ্ছিন্দিত্ৰা সঙ্খারেসু তিলক্খণং আরোপেতি. কথং? এত্থন্তরে সব্বে সঙ্খারা অনিচ্চা. কস্মা? উপ্পাদৰযৰত্তিতো, ৰিপরিণামতো, তাৰকালিকতো, নিচ্চপটিক্খেপতো চ. যস্মা পন উপ্পন্না সঙ্খারা ঠিতিং পাপুণন্তি, ঠিতিযং জরায কিলমন্তি, জরং পত্ৰা অৰস্সং ভিজ্জন্তি, তস্মা অভিণ্হসম্পটিপীল়নতো, দুক্খমতো দুক্খৰত্থুতো, সুখপটিক্খেপতো চ দুক্খা. যস্মা চ ‘‘উপ্পন্না সঙ্খারা ঠিতিং মা পাপুণন্তু, ঠানপ্পত্তা মা জীরন্তু, জরপ্পত্তা মা ভিজ্জন্তূ’’তি ইমেসু তীসু ¶ ঠানেসু কস্সচি ৰসৰত্তিভাৰো ¶ নত্থি, সুঞ্ঞা তেন ৰসৰত্তনাকারেন, তস্মা সুঞ্ঞতো, অস্সামিকতো, অৰসৰত্তিতো, অত্তপটিক্খেপতো চ অনত্তাতি.

৭০৭. এৰং আদাননিক্খেপনৰসেন ৰস্সসতপরিচ্ছিন্নে রূপে তিলক্খণং আরোপেত্ৰা ততো পরং ৰযোৰুড্ঢত্থঙ্গমতো আরোপেতি. তত্থ ৰযোৰুড্ঢত্থঙ্গমো নাম ৰযৰসেন ৰুড্ঢস্স ৰড্ঢিতস্স রূপস্স অত্থঙ্গমো. তস্স ৰসেন তিলক্খণং আরোপেতীতি অত্থো.

কথং? সো তমেৰ ৰস্সসতং পঠমৰযেন মজ্ঝিমৰযেন পচ্ছিমৰযেনাতি তীহি ৰযেহি পরিচ্ছিন্দতি. তত্থ আদিতো তেত্তিংস ৰস্সানি পঠমৰযো নাম. ততো চতুত্তিংস মজ্ঝিমৰযো নাম. ততো তেত্তিংস পচ্ছিমৰযো নামাতি. ইতি ইমেহি তীহি ৰযেহি পরিচ্ছিন্দিত্ৰা, ‘‘পঠমৰযে পৰত্তং রূপং মজ্ঝিমৰযং অপ্পত্ৰা তত্থেৰ নিরুজ্ঝতি, তস্মা তং অনিচ্চং. যদনিচ্চং, তং দুক্খং. যং দুক্খং, তদনত্তা. মজ্ঝিমৰযে পৰত্তরূপম্পি পচ্ছিমৰযং অপ্পত্ৰা তত্থেৰ নিরুজ্ঝতি, তস্মা তম্পি অনিচ্চং দুক্খমনত্তা. পচ্ছিমৰযে তেত্তিংস ৰস্সানি পৰত্তরূপম্পি মরণতো পরং গমনসমত্থং নাম নত্থি, তস্মা তম্পি অনিচ্চং দুক্খমনত্তা’’তি তিলক্খণং আরোপেতি.

৭০৮. এৰং পঠমৰযাদিৰসেন ৰযোৰুড্ঢত্থঙ্গমতো তিলক্খণং আরোপেত্ৰা পুন ‘‘মন্দদসকং, খিড্ডাদসকং, ৰণ্ণদসকং, বলদসকং, পঞ্ঞাদসকং, হানিদসকং, পব্ভারদসকং, ৰঙ্কদসকং, মোমূহদসকং, সযনদসক’’ন্তি ইমেসং দসন্নং দসকানং ৰসেন ৰযোৰুড্ঢত্থঙ্গমতো তিলক্খণং আরোপেতি.

তত্থ দসকেসু তাৰ ৰস্সসতজীৰিনো পুগ্গলস্স পঠমানি দস ৰস্সানি মন্দদসকং নাম, তদা হি সো মন্দো হোতি চপলো কুমারকো. ততো পরানি দস খিড্ডাদসকং নাম, তদা হি সো খিড্ডারতিবহুলো হোতি. ততো পরানি দস ৰণ্ণদসকং নাম, তদা হিস্স ৰণ্ণাযতনং ৰেপুল্লং পাপুণাতি. ততো পরানি দস বলদসকং নাম, তদা হিস্স বলঞ্চ থামো চ ৰেপুল্লং পাপুণাতি. ততো পরানি দস পঞ্ঞাদসকং নাম, তদা হিস্স পঞ্ঞা সুপ্পতিট্ঠিতা হোতি, পকতিযা কির দুব্বলপঞ্ঞস্সাপি ¶ তস্মিং কালে অপ্পমত্তকা পঞ্ঞা উপ্পজ্জতিযেৰ. ততো পরানি দস হানিদসকং নাম, তদা হিস্স খিড্ডারতিৰণ্ণবলপঞ্ঞা পরিহাযন্তি. ততো পরানি ¶ দস পব্ভারদসকং নাম, তদা হিস্স অত্তভাৰো পুরতো পব্ভারো হোতি. ততো পরানি দস ৰঙ্কদসকং নাম, তদা হিস্স অত্তভাৰো নঙ্গলকোটি ৰিয ৰঙ্কো হোতি. ততো পরানি দস মোমূহদসকং নাম. তদা হি সো মোমূহো হোতি, কতং কতং পমুস্সতি. ততো পরানি দস সযনদসকং নাম, ৰস্সসতিকো হি সযনবহুলোৰ হোতি.

তত্রাযং যোগী এতেসং দসকানং ৰসেন ৰযোৰুড্ঢত্থঙ্গমতো তিলক্খণং আরোপেতুং ইতি পটিসঞ্চিক্খতি – ‘‘পঠমদসকে পৰত্তরূপং দুতিযদসকং অপ্পত্ৰা তত্থেৰ নিরুজ্ঝতি, তস্মা তং অনিচ্চং দুক্খমনত্তা. দুতিযদসকে…পে… নৰমদসকে পৰত্তরূপং দসমদসকং অপ্পত্ৰা তত্থেৰ নিরুজ্ঝতি. দসমদসকে পৰত্তরূপং পুনব্ভৰং অপ্পত্ৰা ইধেৰ নিরুজ্ঝতি, তস্মা তম্পি অনিচ্চং দুক্খমনত্তা’’তি তিলক্খণং আরোপেতি.

৭০৯. এৰং দসকৰসেন ৰযোৰুড্ঢত্থঙ্গমতো তিলক্খণং আরোপেত্ৰা পুন তদেৰ ৰস্সসতং পঞ্চপঞ্চৰস্সৰসেন ৰীসতিকোট্ঠাসে কত্ৰা ৰযোৰুড্ঢত্থঙ্গমতো তিলক্খণং আরোপেতি. কথং? সো হি ইতি পটিসঞ্চিক্খতি – ‘‘পঠমে ৰস্সপঞ্চকে পৰত্তরূপং দুতিযং ৰস্সপঞ্চকং অপ্পত্ৰা তত্থেৰ নিরুজ্ঝতি, তস্মা তং অনিচ্চং দুক্খমনত্তা. দুতিযে ৰস্সপঞ্চকে পৰত্তরূপং ততিযং…পে… একূনৰীসতিমে ৰস্সপঞ্চকে পৰত্তরূপং ৰীসতিমং ৰস্সপঞ্চকং অপ্পত্ৰা তত্থেৰ নিরুজ্ঝতি. ৰীসতিমে ৰস্সপঞ্চকে পৰত্তরূপং মরণতো পরং গমনসমত্থং নাম নত্থি, তস্মা তম্পি অনিচ্চং দুক্খমনত্তা’’তি.

এৰং ৰীসতিকোট্ঠাসৰসেন ৰযোৰুড্ঢত্থঙ্গমতো তিলক্খণং আরোপেত্ৰা পুন পঞ্চৰীসতি কোট্ঠাসে কত্ৰা চতুন্নং চতুন্নং ৰস্সানং ৰসেন আরোপেতি. ততো তেত্তিংস কোট্ঠাসে কত্ৰা তিণ্ণং তিণ্ণং ৰস্সানং ৰসেন, পঞ্ঞাস কোট্ঠাসে কত্ৰা দ্ৰিন্নং দ্ৰিন্নং ৰস্সানং ৰসেন, সতং কোট্ঠাসে কত্ৰা একেকৰস্সৰসেন. ততো একং ৰস্সং তযো ¶ কোট্ঠাসে কত্ৰা ৰস্সানহেমন্তগিম্হেসু তীসু উতূসু একেকউতুৰসেন তস্মিং ৰযোৰুড্ঢত্থঙ্গমরূপে তিলক্খণং আরোপেতি.

কথং? ‘‘ৰস্সানে চতুমাসং পৰত্তরূপং হেমন্তং অপ্পত্ৰা তত্থেৰ নিরুদ্ধং. হেমন্তে পৰত্তরূপং গিম্হং অপ্পত্ৰা তত্থেৰ নিরুদ্ধং. গিম্হে পৰত্তরূপং পুন ৰস্সানং অপ্পত্ৰা তত্থেৰ নিরুদ্ধং, তস্মা তং অনিচ্চং দুক্খমনত্তা’’তি. এৰং আরোপেত্ৰা পুন একং ৰস্সং ছ কোট্ঠাসে কত্ৰা – ‘‘ৰস্সানে ¶ দ্ৰেমাসং পৰত্তরূপং সরদং অপ্পত্ৰা তত্থেৰ নিরুদ্ধং. সরদে পৰত্তরূপং হেমন্তং. হেমন্তে পৰত্তরূপং সিসিরং. সিসিরে পৰত্তরূপং ৰসন্তং. ৰসন্তে পৰত্তরূপং গিম্হং. গিম্হে পৰত্তরূপং পুন ৰস্সানং অপ্পত্ৰা তত্থেৰ নিরুদ্ধং, তস্মা অনিচ্চং দুক্খমনত্তা’’তি এৰং তস্মিং ৰযোৰুড্ঢত্থঙ্গমরূপে তিলক্খণং আরোপেতি.

এৰং আরোপেত্ৰা ততো কাল়জুণ্হৰসেন – ‘‘কাল়ে পৰত্তরূপং জুণ্হং অপ্পত্ৰা. জুণ্হে পৰত্তরূপং কাল়ং অপ্পত্ৰা তত্থেৰ নিরুদ্ধং, তস্মা অনিচ্চং দুক্খমনত্তা’’তি তিলক্খণং আরোপেতি. ততো রত্তিন্দিৰৰসেন – ‘‘রত্তিং পৰত্তরূপং দিৰসং অপ্পত্ৰা তত্থেৰ নিরুদ্ধং. দিৰসং পৰত্তরূপম্পি রত্তিং অপ্পত্ৰা তত্থেৰ নিরুদ্ধং, তস্মা অনিচ্চং দুক্খমনত্তা’’তি তিলক্খণং আরোপেতি. ততো তদেৰ রত্তিন্দিৰং পুব্বণ্হাদিৰসেন ছ কোট্ঠাসে কত্ৰা – ‘‘পুব্বণ্হে পৰত্তরূপং মজ্ঝন্হং অপ্পত্ৰা. মজ্ঝন্হে পৰত্তরূপং সাযন্হং. সাযন্হে পৰত্তরূপং পঠমযামং. পঠমযামে পৰত্তরূপং মজ্ঝিমযামং. মজ্ঝিমযামে পৰত্তরূপং পচ্ছিমযামং অপ্পত্ৰা তত্থেৰ নিরুদ্ধং. পচ্ছিমযামে পৰত্তরূপং পুন পুব্বণ্হং অপ্পত্ৰা তত্থেৰ নিরুদ্ধং, তস্মা অনিচ্চং দুক্খমনত্তা’’তি তিলক্খণং আরোপেতি.

৭১০. এৰং আরোপেত্ৰা পুন তস্মিংযেৰ রূপে অভিক্কমপটিক্কমআলোকনৰিলোকনসমিঞ্জনপসারণৰসেন – ‘‘অভিক্কমে পৰত্তরূপং পটিক্কমং অপ্পত্ৰা তত্থেৰ নিরুজ্ঝতি. পটিক্কমে পৰত্তরূপং আলোকনং. আলোকনে পৰত্তরূপং ৰিলোকনং. ৰিলোকনে পৰত্তরূপং সমিঞ্জনং. সমিঞ্জনে পৰত্তরূপং পসারণং অপ্পত্ৰা তত্থেৰ নিরুজ্ঝতি. তস্মা অনিচ্চং দুক্খমনত্তা’’তি তিলক্খণং আরোপেতি.

ততো একপদৰারং উদ্ধরণ অতিহরণৰীতিহরণৰোস্সজ্জনসন্নিক্খেপনসন্নিরুম্ভনৰসেন ছ কোট্ঠাসে করোতি.

তত্থ ¶ উদ্ধরণং নাম পাদস্স ভূমিতো উক্খিপনং. অতিহরণং নাম পুরতো হরণং. ৰীতিহরণং নাম খাণুকণ্টকদীঘজাতিআদীসু কিঞ্চিদেৰ দিস্ৰা ইতো চিতো চ পাদসঞ্চারণং. ৰোস্সজ্জনং নাম পাদস্স হেট্ঠা ওরোপনং. সন্নিক্খেপনং নাম পথৰীতলে ঠপনং. সন্নিরুম্ভনং নাম পুন পাদুদ্ধরণকালে পাদস্স পথৰিযা সদ্ধিং অভিনিপ্পীল়নং. তত্থ উদ্ধরণে পথৰীধাতু ¶ আপোধাতূতি দ্ৰে ধাতুযো ওমত্তা হোন্তি মন্দা, ইতরা দ্ৰে অধিমত্তা হোন্তি বলৰতিযো. তথা অতিহরণৰীতিহরণেসু. ৰোস্সজ্জনে তেজোধাতু ৰাযোধাতূতি দ্ৰে ধাতুযো ওমত্তা হোন্তি মন্দা, ইতরা দ্ৰে অধিমত্তা হোন্তি বলৰতিযো. তথা সন্নিক্খেপনসন্নিরুম্ভনেসু. এৰং ছ কোট্ঠাসে কত্ৰা তেসং ৰসেন তস্মিং ৰযোৰুড্ঢত্থঙ্গমরূপে তিলক্খণং আরোপেতি.

কথং? সো ইতি পটিসঞ্চিক্খতি – ‘‘যা উদ্ধরণে পৰত্তা ধাতুযো, যানি চ তদুপাদাযরূপানি, সব্বে তে ধম্মা অতিহরণং অপ্পত্ৰা এত্থেৰ নিরুজ্ঝন্তি, তস্মা অনিচ্চা দুক্খা অনত্তা. তথা অতিহরণে পৰত্তা ৰীতিহরণং. ৰীতিহরণে পৰত্তা ৰোস্সজ্জনং. ৰোস্সজ্জনে পৰত্তা সন্নিক্খেপনং. সন্নিক্খেপনে পৰত্তা সন্নিরুম্ভনং অপ্পত্ৰা এত্থেৰ নিরুজ্ঝন্তি. ইতি তত্থ তত্থ উপ্পন্না ইতরং ইতরং কোট্ঠাসং অপ্পত্ৰা তত্থ তত্থেৰ পব্বং পব্বং সন্ধি সন্ধি ওধি ওধি হুত্ৰা তত্তকপালে পক্খিত্ততিলা ৰিয তটতটাযন্তা সঙ্খারা ভিজ্জন্তি. তস্মা অনিচ্চা দুক্খা অনত্তা’’তি. তস্সেৰং পব্বপব্বগতে সঙ্খারে ৰিপস্সতো রূপসম্মসনং সুখুমং হোতি.

৭১১. সুখুমত্তে চ পনস্স ইদং ওপম্মং. একো কির দারুতিণুক্কাদীসু কতপরিচযো অদিট্ঠপুব্বপদীপো পচ্চন্তৰাসিকো নগরমাগম্ম অন্তরাপণে জলমানং পদীপং দিস্ৰা একং পুরিসং পুচ্ছি অম্ভো ‘‘কিং নামেতং এৰং মনাপ’’ন্তি? তমেনং সো আহ ‘‘কিমেত্থ মনাপং, পদীপো নামেস তেলক্খযেন ৰট্টিক্খযেন চ গতমগ্গোপিস্স ন পঞ্ঞাযিস্সতী’’তি. তমঞ্ঞো এৰমাহ ‘‘ইদং ওল়ারিকং, ইমিস্সা হি ৰট্টিযা অনুপুব্বেন ডয্হমানায ততিযভাগে ততিযভাগে জালা ইতরীতরং পদেসং অপ্পত্ৰাৰ নিরুজ্ঝিস্সতী’’তি. তমঞ্ঞো এৰমাহ ‘‘ইদম্পি ওল়ারিকং, ইমিস্সা হি অঙ্গুলঙ্গুলন্তরে অড্ঢঙ্গুলড্ঢঙ্গুলন্তরে ¶ তন্তুম্হি তন্তুম্হি অংসুম্হি অংসুম্হি জালা ইতরীতরং অংসুং অপ্পত্ৰাৰ নিরুজ্ঝিস্সতি. অংসুং পন মুঞ্চিত্ৰা ন সক্কা জালং পঞ্ঞাপেতু’’ন্তি.

তত্থ ‘‘তেলক্খযেন ৰট্টিক্খযেন চ পদীপস্স গতমগ্গোপি ন পঞ্ঞাযিস্সতী’’তি পুরিসস্স ঞাণং ৰিয যোগিনো আদাননিক্খেপনতো ৰস্সসতেন পরিচ্ছিন্নরূপে তিলক্খণারোপনং. ‘‘ৰট্টিযা ততিযভাগে ততিযভাগে জালা ইতরীতরং পদেসং অপ্পত্ৰাৰ নিরুজ্ঝিস্সতী’’তি ¶ পুরিসস্স ঞাণং ৰিয যোগিনো ৰস্সসতস্স ততিযকোট্ঠাসপরিচ্ছিন্নে ৰযোৰুড্ঢত্থঙ্গমরূপে তিলক্খণারোপনং. ‘‘অঙ্গুলঙ্গুলন্তরে জালা ইতরীতরং অপ্পত্ৰাৰ নিরুজ্ঝিস্সতী’’তি পুরিসস্স ঞাণং ৰিয যোগিনো দসৰস্স পঞ্চৰস্স চতুৰস্স তিৰস্স দ্ৰিৰস্স একৰস্স পরিচ্ছিন্নে রূপে তিলক্খণারোপনং. ‘‘অড্ঢঙ্গুলড্ঢঙ্গুলন্তরে জালা ইতরীতরং অপ্পত্ৰাৰ নিরুজ্ঝিস্সতী’’তি পুরিসস্স ঞাণং ৰিয যোগিনো একেকউতুৰসেন একং ৰস্সং তিধা, ছধা চ ৰিভজিত্ৰা চতুমাস-দ্ৰিমাসপরিচ্ছিন্নে রূপে তিলক্খণারোপনং. ‘‘তন্তুম্হি তন্তুম্হি জালা ইতরীতরং অপ্পত্ৰাৰ নিরুজ্ঝিস্সতী’’তি পুরিসস্স ঞাণং ৰিয যোগিনো কাল়জুণ্হৰসেন, রত্তিন্দিৰৰসেন, একরত্তিন্দিৰং ছ কোট্ঠাসে কত্ৰা পুব্বণ্হাদিৰসেন চ পরিচ্ছিন্নে রূপে তিলক্খণারোপনং. ‘‘অংসুম্হি অংসুম্হি জালা ইতরীতরং অপ্পত্ৰাৰ নিরুজ্ঝিস্সতী’’তি পুরিসস্স ঞাণং ৰিয যোগিনো অভিক্কমাদিৰসেন চেৰ উদ্ধরণাদীসু চ একেককোট্ঠাসৰসেন পরিচ্ছিন্নে রূপে তিলক্খণারোপনন্তি.

৭১২. সো এৰং নানাকারেহি ৰযোৰুড্ঢত্থঙ্গমরূপে তিলক্খণং আরোপেত্ৰা পুন তদেৰ রূপং ৰিসঙ্খরিত্ৰা আহারমযাদিৰসেন চত্তারো কোট্ঠাসে কত্ৰা একেককোট্ঠাসে তিলক্খণং আরোপেতি. তত্রাস্স আহারমযং রূপং ছাতসুহিতৰসেন পাকটং হোতি. ছাতকালে সমুট্ঠিতং রূপং হি ঝত্তং হোতি কিলন্তং, ঝামখাণুকো ৰিয, অঙ্গারপচ্ছিযং নিলীনকাকো ৰিয চ দুব্বণ্ণং দুস্সণ্ঠিতং. সুহিতকালে সমুট্ঠিতং ধাতং পীণিতং মুদু সিনিদ্ধং ফস্সৰন্তং হোতি. সো তং পরিগ্গহেত্ৰা ‘‘ছাতকালে ¶ পৰত্তরূপং সুহিতকালং অপ্পত্ৰা এত্থেৰ নিরুজ্ঝতি. সুহিতকালে সমুট্ঠিতম্পি ছাতকালং অপ্পত্ৰা এত্থেৰ নিরুজ্ঝতি, তস্মা তং অনিচ্চং দুক্খমনত্তা’’তি এৰং তত্থ তিলক্খণং আরোপেতি.

৭১৩. উতুমযং সীতুণ্হৰসেন পাকটং হোতি. উণ্হকালে সমুট্ঠিতং রূপং হি ঝত্তং হোতি কিলন্তং দুব্বণ্ণং. সীতউতুনা সমুট্ঠিতং রূপং ধাতং পীণিতং সিনিদ্ধং হোতি. সো তং পরিগ্গহেত্ৰা ‘‘উণ্হকালে পৰত্তরূপং সীতকালং অপ্পত্ৰা এত্থেৰ নিরুজ্ঝতি. সীতকালে পৰত্তরূপং উণ্হকালং অপ্পত্ৰা এত্থেৰ নিরুজ্ঝতি, তস্মা তং অনিচ্চং দুক্খমনত্তা’’তি এৰং তত্থ তিলক্খণং আরোপেতি.

৭১৪. কম্মজং আযতনদ্ৰারৰসেন পাকটং হোতি. চক্খুদ্ৰারস্মিং হি চক্খুকাযভাৰদসকৰসেন ¶ তিংস কম্মজরূপানি, উপত্থম্ভকানি পন তেসং উতুচিত্তাহারসমুট্ঠানানি চতুৰীসতীতি চতুপণ্ণাস হোন্তি. তথা সোতঘানজিৰ্হাদ্ৰারেসু. কাযদ্ৰারে কাযভাৰদসকৰসেন চেৰ উতুসমুট্ঠানাদিৰসেন চ চতুচত্তালীস. মনোদ্ৰারে হদযৰত্থুকাযভাৰদসকৰসেন চেৰ উতুসমুট্ঠানাদিৰসেন চ চতুপণ্ণাসমেৰ.

সো সব্বম্পি তং রূপং পরিগ্গহেত্ৰা ‘‘চক্খুদ্ৰারে পৰত্তরূপং সোতদ্ৰারং অপ্পত্ৰা এত্থেৰ নিরুজ্ঝতি. সোতদ্ৰারে পৰত্তরূপং ঘানদ্ৰারং. ঘানদ্ৰারে পৰত্তরূপং জিৰ্হাদ্ৰারং. জিৰ্হাদ্ৰারে পৰত্তরূপং কাযদ্ৰারং. কাযদ্ৰারে পৰত্তরূপং মনোদ্ৰারং অপ্পত্ৰা এত্থেৰ নিরুজ্ঝতি, তস্মা তং অনিচ্চং দুক্খমনত্তা’’তি এৰং তত্থ তিলক্খণং আরোপেতি.

৭১৫. চিত্তসমুট্ঠানং সোমনস্সিতদোমনস্সিতৰসেন পাকটং হোতি, সোমনস্সিতকালে উপ্পন্নং হি রূপং সিনিদ্ধং মুদু পীণিতং ফস্সৰন্তং হোতি. দোমনস্সিতকালে উপ্পন্নং ঝত্তং কিলন্তং দুব্বণ্ণং হোতি. সো তং পরিগ্গহেত্ৰা ‘‘সোমনস্সিতকালে পৰত্তরূপং দোমনস্সিতকালং অপ্পত্ৰা এত্থেৰ নিরুজ্ঝতি. দোমনস্সিতকালে পৰত্তরূপং সোমনস্সিতকালং অপ্পত্ৰা এত্থেৰ নিরুজ্ঝতি, তস্মা তং অনিচ্চং দুক্খমনত্তা’’তি এৰং তত্থ তিলক্খণং আরোপেতি.

তস্সেৰং ¶ চিত্তসমুট্ঠানরূপং পরিগ্গহেত্ৰা তত্থ তিলক্খণং আরোপযতো অযমত্থো পাকটো হোতি –

জীৰিতং অত্তভাৰো চ, সুখদুক্খা চ কেৰলা;

একচিত্তসমাযুত্তা, লহুসো ৰত্ততে খণো.

চুল্লাসীতি সহস্সানি, কপ্পং তিট্ঠন্তি যে মরূ;

ন ত্ৰেৰ তেপি তিট্ঠন্তি, দ্ৰীহি চিত্তেহি সমোহিতা.

যে নিরুদ্ধা মরন্তস্স, তিট্ঠমানস্স ৰা ইধ;

সব্বেৰ সদিসা খন্ধা, গতা অপ্পটিসন্ধিকা.

অনন্তরা ¶ চ যে ভগ্গা, যে চ ভগ্গা অনাগতে;

তদন্তরা নিরুদ্ধানং, ৰেসমং নত্থি লক্খণে.

অনিব্বত্তেন ন জাতো, পচ্চুপ্পন্নেন জীৰতি;

চিত্তভঙ্গা মতো লোকো, পঞ্ঞত্তি পরমত্থিযা.

অনিধানগতা ভগ্গা, পুঞ্জো নত্থি অনাগতে;

নিব্বত্তা যেপি তিট্ঠন্তি, আরগ্গে সাসপূপমা.

নিব্বত্তানঞ্চ ধম্মানং, ভঙ্গো নেসং পুরক্খতো;

পলোকধম্মা তিট্ঠন্তি, পুরাণেহি অমিস্সিতা.

অদস্সনতো আযন্তি, ভগ্গা গচ্ছন্তুদস্সনং;

ৰিজ্জুপ্পাদোৰ আকাসে, উপ্পজ্জন্তি ৰযন্তি চাতি. (মহানি. ১০);

৭১৬. এৰং আহারমযাদীসু তিলক্খণং আরোপেত্ৰা পুন ধম্মতারূপে তিলক্খণং আরোপেতি. ধম্মতারূপং নাম বহিদ্ধা অনিন্দ্রিযবদ্ধং অযলোহতিপুসীসসুৰণ্ণরজতমুত্তামণিৰেল়ুরিযসঙ্খসিলাপৰাল়লোহিতঙ্গমসারগল্লভূমিপাসাণপব্বততিণরুক্খলতাদিভেদং ৰিৰট্টকপ্পতো পট্ঠায উপ্পজ্জনকরূপং. তদস্স অসোকঙ্কুরাদিৰসেন পাকটং হোতি.

অসোকঙ্কুরং হি আদিতোৰ তনুরত্তং হোতি, ততো দ্ৰীহতীহচ্চযেন ঘনরত্তং, পুন দ্ৰীহতীহচ্চযেন মন্দরত্তং, ততো তরুণপল্লৰৰণ্ণং, ততো ¶ পরিণতপল্লৰৰণ্ণং, ততো হরিতপণ্ণৰণ্ণং. ততো নীলপণ্ণৰণ্ণং. ততো নীলপণ্ণৰণ্ণকালতো পট্ঠায সভাগরূপসন্ততিমনুপ্পবন্ধাপযমানং সংৰচ্ছরমত্তেন পণ্ডুপলাসং হুত্ৰা ৰণ্টতো ছিজ্জিত্ৰা পততি.

সো তং পরিগ্গহেত্ৰা ‘‘তনুরত্তকালে পৰত্তরূপং ঘনরত্তকালং অপ্পত্ৰা নিরুজ্ঝতি. ঘনরত্তকালে পৰত্তরূপং মন্দরত্তকালং. মন্দরত্তকালে পৰত্তরূপং তরুণপল্লৰৰণ্ণকালং. তরুণপল্লৰৰণ্ণকালে পৰত্তং পরিণতপল্লৰৰণ্ণকালং. পরিণতপল্লৰৰণ্ণকালে পৰত্তং হরিতপণ্ণৰণ্ণকালং ¶ . হরিতপণ্ণকালে পৰত্তং নীলপণ্ণৰণ্ণকালং. নীলপণ্ণৰণ্ণকালে পৰত্তং পণ্ডুপলাসকালং. পণ্ডুপলাসকালে পৰত্তং ৰণ্টতো ছিজ্জিত্ৰা পতনকালং অপ্পত্ৰাৰ নিরুজ্ঝতি, তস্মা তং অনিচ্চং দুক্খমনত্তা’’তি তিলক্খণং আরোপেতি, এৰং তত্থ তিলক্খণং আরোপেত্ৰা ইমিনা নযেন সব্বম্পি ধম্মতারূপং সম্মসতি.

এৰং তাৰ রূপসত্তকৰসেন তিলক্খণং আরোপেত্ৰা সঙ্খারে সম্মসতি.

অরূপসত্তকসম্মসনকথা

৭১৭. যং পন ৰুত্তং ‘‘অরূপসত্তকৰসেনা’’তি, তত্থ অযং মাতিকা – কলাপতো, যমকতো, খণিকতো, পটিপাটিতো, দিট্ঠিউগ্ঘাটনতো, মানসমুগ্ঘাটনতো, নিকন্তিপরিযাদানতোতি.

তত্থ কলাপতোতি ফস্সপঞ্চমকা ধম্মা. কথং কলাপতো সম্মসতীতি? ইধ ভিক্খু ইতি পটিসঞ্চিক্খতি – ‘‘যে ইমে ‘কেসা অনিচ্চা দুক্খা অনত্তা’তি সম্মসনে উপ্পন্না ফস্সপঞ্চমকা ধম্মা, যে চ ‘লোমা…পে… মত্থলুঙ্গং অনিচ্চং দুক্খমনত্তা’তি সম্মসনে উপ্পন্না ফস্সপঞ্চমকা ধম্মা, সব্বে তে ইতরীতরং অপ্পত্ৰা পব্বংপব্বং ওধিওধি হুত্ৰা তত্তকপালে পক্খিত্ততিলা ৰিয তটতটাযন্তা ৰিনট্ঠা, তস্মা অনিচ্চা দুক্খা অনত্তা’’তি. অযং তাৰ ৰিসুদ্ধিকথাযং নযো.

অরিযৰংসকথাযং পন ‘‘হেট্ঠা রূপসত্তকে সত্তসু ঠানেসু ‘রূপং অনিচ্চং দুক্খমনত্তা’তি পৰত্তং চিত্তং অপরেন চিত্তেন ‘অনিচ্চং দুক্খমনত্তা’তি সম্মসন্তো ‘কলাপতো ¶ সম্মসতী’তি’’ ৰুত্তং, তং যুত্ততরং. তস্মা সেসানিপি তেনেৰ নযেন ৰিভজিস্সাম.

৭১৮. যমকতোতি ইধ ভিক্খু আদাননিক্খেপরূপং ‘‘অনিচ্চং দুক্খমনত্তা’’তি সম্মসিত্ৰা তম্পি চিত্তং অপরেন চিত্তেন ‘‘অনিচ্চং দুক্খমনত্তা’’তি সম্মসতি. ৰযোৰুড্ঢত্থঙ্গমরূপং, আহারমযং, উতুমযং, কম্মজং, চিত্তসমুট্ঠানং, ধম্মতারূপং ‘‘অনিচ্চং দুক্খমনত্তা’’তি ¶ সম্মসিত্ৰা তম্পি চিত্তং অপরেন চিত্তেন ‘‘অনিচ্চং দুক্খমনত্তা’’তি সম্মসতি. এৰং যমকতো সম্মসতি নাম.

৭১৯. খণিকতোতি ইধ ভিক্খু আদাননিক্খেপরূপং ‘‘অনিচ্চং দুক্খমনত্তা’’তি সম্মসিত্ৰা তং পঠমচিত্তং দুতিযচিত্তেন, দুতিযং ততিযেন, ততিযং চতুত্থেন, চতুত্থং পঞ্চমেন ‘‘এতম্পি অনিচ্চং দুক্খমনত্তা’’তি সম্মসতি. ৰযোৰুড্ঢত্থঙ্গমরূপং, আহারমযং, উতুমযং, কম্মজং, চিত্তসমুট্ঠানং, ধম্মতারূপং ‘‘অনিচ্চং দুক্খমনত্তা’’তি সম্মসিত্ৰা তং পঠমচিত্তং দুতিযচিত্তেন, দুতিযং ততিযেন, ততিযং চতুত্থেন, চতুত্থং পঞ্চমেন ‘‘এতম্পি অনিচ্চং দুক্খমনত্তা’’তি সম্মসতি. এৰং রূপপরিগ্গাহকচিত্ততো পট্ঠায চত্তারি চত্তারি চিত্তানি সম্মসন্তো খণিকতো সম্মসতি নাম.

৭২০. পটিপাটিতোতি আদাননিক্খেপরূপং ‘‘অনিচ্চং দুক্খমনত্তা’’তি সম্মসিত্ৰা তং পঠমচিত্তং দুতিযচিত্তেন, দুতিযং ততিযেন, ততিযং চতুত্থেন…পে… দসমং একাদসমেন ‘‘এতম্পি অনিচ্চং দুক্খমনত্তা’’তি সম্মসতি. ৰযোৰুড্ঢত্থঙ্গমরূপং, আহারমযং, উতুমযং, কম্মজং, চিত্তসমুট্ঠানং, ধম্মতারূপং ‘‘অনিচ্চং দুক্খমনত্তা’’তি সম্মসিত্ৰা তং পঠমচিত্তং দুতিযচিত্তেন, দুতিযং ততিযেন, ততিযং চতুত্থেন…পে… দসমং একাদসমেন ‘‘এতম্পি অনিচ্চং দুক্খমনত্তা’’তি এৰং ৰিপস্সনা পটিপাটিযা সকলম্পি দিৰসভাগং সম্মসিতুং ৰট্টেয্য. যাৰ দসমচিত্তসম্মসনা পন রূপকম্মট্ঠানম্পি অরূপকম্মট্ঠানম্পি পগুণং হোতি. তস্মা দসমেযেৰ ঠপেতব্বন্তি ৰুত্তং. এৰং সম্মসন্তো পটিপাটিতো সম্মসতি নাম.

৭২১. দিট্ঠিউগ্ঘাটনতো মানউগ্ঘাটনতো নিকন্তিপরিযাদানতোতি ইমেসু তীসু ৰিসুং সম্মসননযো নাম নত্থি. যং পনেতং হেট্ঠা ¶ রূপং, ইধ চ অরূপং পরিগ্গহিতং, তং পস্সন্তো রূপারূপতো উদ্ধং অঞ্ঞং সত্তং নাম ন পস্সতি. সত্তস্স অদস্সনতো পট্ঠায সত্তসঞ্ঞা উগ্ঘাটিতা হোতি. সত্তসঞ্ঞং উগ্ঘাটিতচিত্তেন সঙ্খারে পরিগ্গণ্হতো দিট্ঠি নুপ্পজ্জতি. দিট্ঠিযা অনুপ্পজ্জমানায দিট্ঠি উগ্ঘাটিতা নাম হোতি. দিট্ঠিউগ্ঘাটিতচিত্তেন সঙ্খারে পরিগ্গণ্হতো মানো নুপ্পজ্জতি. মানে অনুপ্পজ্জন্তে মানো সমুগ্ঘাটিতো নাম হোতি. মানসমুগ্ঘাটিতচিত্তেন সঙ্খারে পরিগ্গণ্হতো তণ্হা নুপ্পজ্জতি. তণ্হায অনুপ্পজ্জন্তিযা নিকন্তি পরিযাদিণ্ণা নাম হোতীতি ইদং তাৰ ৰিসুদ্ধিকথাযং ৰুত্তং.

অরিযৰংসকথাযং ¶ পন ‘‘দিট্ঠিউগ্ঘাটনতো মানসমুগ্ঘাটনতো নিকন্তিপরিযাদানতো’’তি মাতিকং ঠপেত্ৰা অযং নযো দস্সিতো.

‘‘অহং ৰিপস্সামি, মম ৰিপস্সনা’’তি গণ্হতো হি দিট্ঠিসমুগ্ঘাটনং নাম ন হোতি. ‘‘সঙ্খারাৰ সঙ্খারে ৰিপস্সন্তি সম্মসন্তি ৰৰত্থপেন্তি পরিগ্গণ্হন্তি পরিচ্ছিন্দন্তী’’তি গণ্হতো পন দিট্ঠিউগ্ঘাটনং নাম হোতি.

‘‘সুট্ঠু ৰিপস্সামি, মনাপং ৰিপস্সামী’’তি গণ্হতো মানসমুগ্ঘাটো নাম ন হোতি. ‘‘সঙ্খারাৰ সঙ্খারে ৰিপস্সন্তি সম্মসন্তি ৰৰত্থপেন্তি পরিগ্গণ্হন্তি পরিচ্ছিন্দন্তী’’তি গণ্হতো পন মানসমুগ্ঘাটো নাম হোতি.

‘‘ৰিপস্সিতুং সক্কোমী’’তি ৰিপস্সনং অস্সাদেন্তস্স নিকন্তিপরিযাদানং নাম ন হোতি. ‘‘সঙ্খারাৰ সঙ্খারে ৰিপস্সন্তি সম্মসন্তি ৰৰত্থপেন্তি পরিগ্গণ্হন্তি পরিচ্ছিন্দন্তী’’তি গণ্হতো পন নিকন্তিপরিযাদানং নাম হোতি.

সচে সঙ্খারা অত্তা ভৰেয্যুং, অত্তাতি গহেতুং ৰট্টেয্যুং, অনত্তা চ পন অত্তাতি গহিতা, তস্মা তে অৰসৰত্তনট্ঠেন অনত্তা, হুত্ৰা অভাৰট্ঠেন অনিচ্চা, উপ্পাদৰযপটিপীল়নট্ঠেন দুক্খাতি পস্সতো দিট্ঠিউগ্ঘাটনং নাম হোতি.

সচে সঙ্খারা নিচ্চা ভৰেয্যুং, নিচ্চাতি গহেতুং ৰট্টেয্যুং, অনিচ্চা চ পন নিচ্চাতি গহিতা, তস্মা তে হুত্ৰা অভাৰট্ঠেন অনিচ্চা, উপ্পাদৰযপটিপীল়নট্ঠেন দুক্খা, অৰসৰত্তনট্ঠেন অনত্তাতি পস্সতো মানসমুগ্ঘাটো নাম হোতি.

সচে ¶ সঙ্খারা সুখা ভৰেয্যুং, সুখাতি গহেতুং ৰট্টেয্যুং, দুক্খা চ পন সুখাতি গহিতা, তস্মা তে উপ্পাদৰযপটিপীল়নট্ঠেন দুক্খা, হুত্ৰা অভাৰট্ঠেন অনিচ্চা, অৰসৰত্তনট্ঠেন অনত্তাতি পস্সতো নিকন্তিপরিযাদানং নাম হোতি.

এৰং সঙ্খারে অনত্ততো পস্সন্তস্স দিট্ঠিসমুগ্ঘাটনং নাম হোতি. অনিচ্চতো পস্সন্তস্স মানসমুগ্ঘাটনং ¶ নাম হোতি. দুক্খতো পস্সন্তস্স নিকন্তিপরিযাদানং নাম হোতি. ইতি অযং ৰিপস্সনা অত্তনো অত্তনো ঠানেযেৰ তিট্ঠতীতি.

এৰং অরূপসত্তকৰসেনাপি তিলক্খণং আরোপেত্ৰা সঙ্খারে সম্মসতি. এত্তাৰতা পনস্স রূপকম্মট্ঠানম্পি অরূপকম্মট্ঠানম্পি পগুণং হোতি.

৭২২. সো এৰং পগুণরূপারূপকম্মট্ঠানো যা উপরি ভঙ্গানুপস্সনতো পট্ঠায পহানপরিঞ্ঞাৰসেন সব্বাকারতো পত্তব্বা অট্ঠারস মহাৰিপস্সনা, তাসং ইধেৰ তাৰ একদেসং পটিৰিজ্ঝন্তো তপ্পটিপক্খে ধম্মে পজহতি.

অট্ঠারস মহাৰিপস্সনা নাম অনিচ্চানুপস্সনাদিকা পঞ্ঞা. যাসু অনিচ্চানুপস্সনং ভাৰেন্তো নিচ্চসঞ্ঞং পজহতি, দুক্খানুপস্সনং ভাৰেন্তো সুখসঞ্ঞং পজহতি, অনত্তানুপস্সনং ভাৰেন্তো অত্তসঞ্ঞং পজহতি, নিব্বিদানুপস্সনং ভাৰেন্তো নন্দিং পজহতি, ৰিরাগানুপস্সনং ভাৰেন্তো রাগং পজহতি, নিরোধানুপস্সনং ভাৰেন্তো সমুদযং পজহতি, পটিনিস্সগ্গানুপস্সনং ভাৰেন্তো আদানং পজহতি, খযানুপস্সনং ভাৰেন্তো ঘনসঞ্ঞং পজহতি, ৰযানুপস্সনং ভাৰেন্তো আযূহনং পজহতি, ৰিপরিণামানুপস্সনং ভাৰেন্তো ধুৰসঞ্ঞং পজহতি, অনিমিত্তানুপস্সনং ভাৰেন্তো নিমিত্তং পজহতি, অপ্পণিহিতানুপস্সনং ভাৰেন্তো পণিধিং পজহতি, সুঞ্ঞতানুপস্সনং ভাৰেন্তো অভিনিৰেসং পজহতি, অধিপঞ্ঞাধম্মৰিপস্সনং ভাৰেন্তো সারাদানাভিনিৰেসং পজহতি, যথাভূতঞাণদস্সনং ভাৰেন্তো সম্মোহাভিনিৰেসং পজহতি, আদীনৰানুপস্সনং ভাৰেন্তো আলযাভিনিৰেসং পজহতি, পটিসঙ্খানুপস্সনং ভাৰেন্তো অপ্পটিসঙ্খং পজহতি, ৰিৰট্টানুপস্সনং ভাৰেন্তো সংযোগাভিনিৰেসং পজহতি.

তাসু ¶ যস্মা ইমিনা অনিচ্চাদিলক্খণত্তযৰসেন সঙ্খারা দিট্ঠা, তস্মা অনিচ্চ-দুক্খ-অনত্তানুপস্সনা পটিৰিদ্ধা হোন্তি. যস্মা চ ‘‘যা চ অনিচ্চানুপস্সনা যা চ অনিমিত্তানুপস্সনা, ইমে ধম্মা একত্থা, ব্যঞ্জনমেৰ নানং’’. তথা ‘‘যা চ দুক্খানুপস্সনা যা চ অপ্পণিহিতানুপস্সনা, ইমে ধম্মা একত্থা, ব্যঞ্জনমেৰ নানং’’. ‘‘যা চ অনত্তানুপস্সনা যা চ সুঞ্ঞতানুপস্সনা, ইমে ধম্মা একত্থা, ব্যঞ্জনমেৰ নান’’ন্তি (পটি. ম. ১.২২৭) ৰুত্তং. তস্মা তাপি পটিৰিদ্ধা হোন্তি.

অধিপঞ্ঞাধম্মৰিপস্সনা ¶ পন সব্বাপি ৰিপস্সনা. যথাভূতঞাণদস্সনং কঙ্খাৰিতরণৰিসুদ্ধিযা এৰ সঙ্গহিতং. ইতি ইদম্পি দ্ৰযং পটিৰিদ্ধমেৰ হোতি. সেসেসু ৰিপস্সনাঞাণেসু কিঞ্চি পটিৰিদ্ধং, কিঞ্চি অপ্পটিৰিদ্ধং, তেসং ৰিভাগং পরতো আৰিকরিস্সাম.

যদেৰ হি পটিৰিদ্ধং, তং সন্ধায ইদং ৰুত্তং ‘‘এৰং পগুণরূপারূপকম্মট্ঠানো যা উপরি ভঙ্গানুপস্সনতো পট্ঠায পহানপরিঞ্ঞাৰসেন সব্বাকারতো পত্তব্বা অট্ঠারস মহাৰিপস্সনা. তাসং ইধেৰ তাৰ একদেসং পটিৰিজ্ঝন্তো তপ্পটিপক্খে ধম্মে পজহতী’’তি.

উদযব্বযঞাণকথা

৭২৩. সো এৰং অনিচ্চানুপস্সনাদিপটিপক্খানং নিচ্চসঞ্ঞাদীনং পহানেন ৰিসুদ্ধঞাণো সম্মসনঞাণস্স পারং গন্ত্ৰা, যং তং সম্মসনঞাণানন্তরং ‘‘পচ্চুপ্পন্নানং ধম্মানং ৰিপরিণামানুপস্সনে পঞ্ঞা উদযব্বযানুপস্সনে ঞাণ’’ন্তি (পটি. ম. মাতিকা ১.৬) উদযব্বযানুপস্সনং ৰুত্তং, তস্স অধিগমায যোগং আরভতি. আরভমানো চ সঙ্খেপতো তাৰ আরভতি. তত্রাযং পাল়ি –

‘‘কথং পচ্চুপ্পন্নানং ধম্মানং ৰিপরিণামানুপস্সনে পঞ্ঞা উদযব্বযানুপস্সনে ঞাণং? জাতং রূপং পচ্চুপ্পন্নং, তস্স নিব্বত্তিলক্খণং উদযো, ৰিপরিণামলক্খণং ৰযো, অনুপস্সনা ঞাণং. জাতা ৰেদনা… সঞ্ঞা… সঙ্খারা… ৰিঞ্ঞাণং… জাতং চক্খু…পে… জাতো ভৰো পচ্চুপ্পন্নো, তস্স নিব্বত্তিলক্খণং উদযো, ৰিপরিণামলক্খণং ৰযো, অনুপস্সনা ঞাণ’’ন্তি (পটি. ম. ১.৪৯).

সো ¶ ইমিনা পাল়িনযেন জাতস্স নামরূপস্স নিব্বত্তিলক্খণং জাতিং উপ্পাদং অভিনৰাকারং ‘‘উদযো’’তি, ৰিপরিণামলক্খণং খযং ভঙ্গং ‘‘ৰযো’’তি সমনুপস্সতি. সো এৰং পজানাতি ‘‘ইমস্স নামরূপস্স উপ্পত্তিতো পুব্বে অনুপ্পন্নস্স রাসি ৰা নিচযো ৰা নত্থি, উপ্পজ্জমানস্সাপি রাসিতো ৰা নিচযতো ৰা আগমনং নাম নত্থি, নিরুজ্ঝমানস্সাপি দিসাৰিদিসাগমনং নাম নত্থি, নিরুদ্ধস্সাপি একস্মিং ঠানে রাসিতো নিচযতো নিধানতো অৰট্ঠানং ¶ নাম নত্থি. যথা পন ৰীণায ৰাদিযমানায উপ্পন্নসদ্দস্স নেৰ উপ্পত্তিতো পুব্বে সন্নিচযো অত্থি, ন উপ্পজ্জমানো সন্নিচযতো আগতো, ন নিরুজ্ঝমানস্স দিসাৰিদিসাগমনং অত্থি, ন নিরুদ্ধো কত্থচি সন্নিচিতো তিট্ঠতি, অথ খো ৰীণঞ্চ উপৰীণঞ্চ পুরিসস্স চ তজ্জং ৰাযামং পটিচ্চ অহুত্ৰা সম্ভোতি, হুত্ৰা পটিৰেতি. এৰং সব্বেপি রূপারূপিনো ধম্মা অহুত্ৰা সম্ভোন্তি, হুত্ৰা পটিৰেন্তী’’তি.

৭২৪. এৰং সঙ্খেপতো উদযব্বযমনসিকারং কত্ৰা পুন যানি এতস্সেৰ উদযব্বযঞাণস্স ৰিভঙ্গে –

‘‘অৰিজ্জাসমুদযা রূপসমুদযোতি পচ্চযসমুদযট্ঠেন রূপক্খন্ধস্স উদযং পস্সতি. তণ্হাসমুদযা… কম্মসমুদযা… আহারসমুদযা রূপসমুদযোতি পচ্চযসমুদযট্ঠেন রূপক্খন্ধস্স উদযং পস্সতি. নিব্বত্তিলক্খণং পস্সন্তোপি রূপক্খন্ধস্স উদযং পস্সতি. রূপক্খন্ধস্স উদযং পস্সন্তো ইমানি পঞ্চ লক্খণানি পস্সতি.

‘‘অৰিজ্জানিরোধা রূপনিরোধোতি পচ্চযনিরোধট্ঠেন রূপক্খন্ধস্স ৰযং পস্সতি. তণ্হানিরোধা… কম্মনিরোধা… আহারনিরোধা রূপনিরোধোতি পচ্চযনিরোধট্ঠেন রূপক্খন্ধস্স ৰযং পস্সতি. ৰিপরিণামলক্খণং পস্সন্তোপি রূপক্খন্ধস্স ৰযং পস্সতি. রূপক্খন্ধস্স ৰযং পস্সন্তোপি ইমানি পঞ্চ লক্খণানি পস্সতি’’ (পটি. ম. ১.৫০).

তথা ‘‘অৰিজ্জাসমুদযা ৰেদনাসমুদযোতি পচ্চযসমুদযট্ঠেন ৰেদনাক্খন্ধস্স উদযং পস্সতি. তণ্হাসমুদযা… কম্মসমুদযা… ফস্সসমুদযা ৰেদনাসমুদযোতি পচ্চযসমুদযট্ঠেন ৰেদনাক্খন্ধস্স উদযং পস্সতি. নিব্বত্তিলক্খণং পস্সন্তোপি ৰেদনাক্খন্ধস্স ¶ উদযং পস্সতি. ৰেদনাক্খন্ধস্স উদযং পস্সন্তো ইমানি পঞ্চ লক্খণানি পস্সতি. অৰিজ্জানিরোধা… তণ্হানিরোধা… কম্মনিরোধা… ফস্সনিরোধা ৰেদনানিরোধোতি পচ্চযনিরোধট্ঠেন ৰেদনাক্খন্ধস্স ৰযং পস্সতি. ৰিপরিণামলক্খণং পস্সন্তোপি ৰেদনাক্খন্ধস্স ৰযং পস্সতি. ৰেদনাক্খন্ধস্স ৰযং পস্সন্তো ইমানি পঞ্চ লক্খণানি পস্সতি’’ (পটি. ম. ১.৫০).

ৰেদনাক্খন্ধস্স ¶ ৰিয চ সঞ্ঞাসঙ্খারৰিঞ্ঞাণক্খন্ধানং. অযং পন ৰিসেসো, ৰিঞ্ঞাণক্খন্ধস্স ফস্সট্ঠানে ‘‘নামরূপসমুদযা, নামরূপনিরোধা’’তি –

এৰং একেকস্স খন্ধস্স উদযব্বযদস্সনে দস দস কত্ৰা পঞ্ঞাস লক্খণানি ৰুত্তানি. তেসং ৰসেন এৰম্পি রূপস্স উদযো এৰম্পি রূপস্স ৰযো, এৰম্পি রূপং উদেতি, এৰম্পি রূপং ৰেতীতি পচ্চযতো চেৰ খণতো চ ৰিত্থারেন মনসিকারং করোতি.

৭২৫. তস্সেৰং মনসিকরোতো ‘‘ইতি কিরিমে ধম্মা অহুত্ৰা সম্ভোন্তি, হুত্ৰা পটিৰেন্তী’’তি ঞাণং ৰিসদতরং হোতি. তস্সেৰং পচ্চযতো চেৰ খণতো চ দ্ৰেধা উদযব্বযং পস্সতো সচ্চপটিচ্চসমুপ্পাদনযলক্খণভেদা পাকটা হোন্তি.

৭২৬. যঞ্হি সো অৰিজ্জাদিসমুদযা খন্ধানং সমুদযং, অৰিজ্জাদিনিরোধা চ খন্ধানং নিরোধং পস্সতি, ইদমস্স পচ্চযতো উদযব্বযদস্সনং. যং পন নিব্বত্তিলক্খণৰিপরিণামলক্খণানি পস্সন্তো খন্ধানং উদযব্বযং পস্সতি, ইদমস্স খণতো উদযব্বযদস্সনং, উপ্পত্তিক্খণেযেৰ হি নিব্বত্তিলক্খণং. ভঙ্গক্খণে চ ৰিপরিণামলক্খণং.

৭২৭. ইচ্চস্সেৰং পচ্চযতো চেৰ খণতো চ দ্ৰেধা উদযব্বযং পস্সতো পচ্চযতো উদযদস্সনেন সমুদযসচ্চং পাকটং হোতি জনকাৰবোধতো. খণতো উদযদস্সনেন দুক্খসচ্চং পাকটং হোতি জাতিদুক্খাৰবোধতো. পচ্চযতো ৰযদস্সনেন নিরোধসচ্চং পাকটং হোতি পচ্চযানুপ্পাদেন পচ্চযৰতং অনুপ্পাদাৰবোধতো. খণতো ৰযদস্সনেন দুক্খসচ্চমেৰ পাকটং হোতি মরণদুক্খাৰবোধতো. যঞ্চস্স ¶ উদযব্বযদস্সনং, মগ্গোৰাযং লোকিকোতি মগ্গসচ্চং পাকটং হোতি তত্র সম্মোহৰিঘাততো.

৭২৮. পচ্চযতো চস্স উদযদস্সনেন অনুলোমো পটিচ্চসমুপ্পাদো পাকটো হোতি, ‘‘ইমস্মিং সতি ইদং হোতী’’তি (ম. নি. ১.৪০৪; সং. নি. ২.২১; উদা. ১) অৰবোধতো. পচ্চযতো ৰযদস্সনেন পটিলোমো পটিচ্চসমুপ্পাদো পাকটো হোতি, ‘‘ইমস্স নিরোধা ইদং নিরুজ্ঝতী’’তি (ম. নি. ১.৪০৬; সং. নি. ২.২১; উদা. ২) অৰবোধতো ¶ . খণতো পন উদযব্বযদস্সনেন পটিচ্চসমুপ্পন্না ধম্মা পাকটা হোন্তি সঙ্খতলক্খণাৰবোধতো. উদযব্বযৰন্তো হি সঙ্খতা, তে চ পটিচ্চসমুপ্পন্নাতি.

৭২৯. পচ্চযতো চস্স উদযদস্সনেন একত্তনযো পাকটো হোতি হেতুফলসম্বন্ধেন সন্তানস্স অনুপচ্ছেদাৰবোধতো. অথ সুট্ঠুতরং উচ্ছেদদিট্ঠিং পজহতি. খণতো উদযদস্সনেন নানত্তনযো পাকটো হোতি নৰনৰানং উপ্পাদাৰবোধতো. অথ সুট্ঠুতরং সস্সতদিট্ঠিং পজহতি. পচ্চযতো চস্স উদযব্বযদস্সনেন অব্যাপারনযো পাকটো হোতি ধম্মানং অৰসৰত্তিভাৰাৰবোধতো. অথ সুট্ঠুতরং অত্তদিট্ঠিং পজহতি. পচ্চযতো পন উদযদস্সনেন এৰংধম্মতানযো পাকটো হোতি পচ্চযানুরূপেন ফলস্স উপ্পাদাৰবোধতো. অথ সুট্ঠুতরং অকিরিযদিট্ঠিং পজহতি.

৭৩০. পচ্চযতো চস্স উদযদস্সনেন অনত্তলক্খণং পাকটং হোতি ধম্মানং নিরীহকত্তপচ্চযপটিবদ্ধৰুত্তিতাৰবোধতো. খণতো উদযব্বযদস্সনেন অনিচ্চলক্খণং পাকটং হোতি হুত্ৰা অভাৰাৰবোধতো, পুব্বন্তাপরন্তৰিৰেকাৰবোধতো চ. দুক্খলক্খণম্পি পাকটং হোতি উদযব্বযেহি পটিপীল়নাৰবোধতো. সভাৰলক্খণম্পি পাকটং হোতি উদযব্বযপরিচ্ছিন্নাৰবোধতো. সভাৰলক্খণে সঙ্খতলক্খণস্স তাৰকালিকত্তম্পি পাকটং হোতি উদযক্খণে ৰযস্স, ৰযক্খণে চ উদযস্স অভাৰাৰবোধতোতি.

৭৩১. তস্সেৰং পাকটীভূতসচ্চপটিচ্চসমুপ্পাদনযলক্খণভেদস্স ‘‘এৰং কির নামিমে ধম্মা অনুপ্পন্নপুব্বা উপ্পজ্জন্তি, উপ্পন্না নিরুজ্ঝন্তী’’তি নিচ্চনৰাৰ হুত্ৰা সঙ্খারা ¶ উপট্ঠহন্তি. ন কেৰলঞ্চ নিচ্চনৰা, সূরিযুগ্গমনে উস্সাৰবিন্দু ৰিয উদকবুব্বুল়ো ৰিয উদকে দণ্ডরাজি ৰিয আরগ্গে সাসপো ৰিয ৰিজ্জুপ্পাদো ৰিয চ পরিত্তট্ঠাযিনো. মাযামরীচিসুপিনন্তঅলাতচক্কগন্ধব্বনগরফেণকদলিআদযো ৰিয অস্সারা নিস্সারাতি চাপি উপট্ঠহন্তি.

এত্তাৰতানেন ‘‘ৰযধম্মমেৰ উপ্পজ্জতি, উপ্পন্নঞ্চ ৰযং উপেতী’’তি ইমিনা আকারেন সমপঞ্ঞাস লক্খণানি পটিৰিজ্ঝিত্ৰা ঠিতং উদযব্বযানুপস্সনং নাম তরুণৰিপস্সনাঞাণং অধিগতং হোতি, যস্সাধিগমা আরদ্ধৰিপস্সকোতি সঙ্খং গচ্ছতি.

ৰিপস্সনুপক্কিলেসকথা

৭৩২. অথস্স ¶ ইমায তরুণৰিপস্সনায আরদ্ধৰিপস্সকস্স দস ৰিপস্সনুপক্কিলেসা উপ্পজ্জন্তি. ৰিপস্সনুপক্কিলেসা হি পটিৰেধপ্পত্তস্স অরিযসাৰকস্স চেৰ ৰিপ্পটিপন্নকস্স চ নিক্খিত্তকম্মট্ঠানস্স কুসীতপুগ্গলস্স নুপ্পজ্জন্তি. সম্মাপটিপন্নকস্স পন যুত্তপযুত্তস্স আরদ্ধৰিপস্সকস্স কুলপুত্তস্স উপ্পজ্জন্তিযেৰ.

কতমে পন তে দস উপক্কিলেসাতি? ওভাসো, ঞাণং, পীতি, পস্সদ্ধি, সুখং, অধিমোক্খো, পগ্গহো, উপট্ঠানং, উপেক্খা, নিকন্তীতি. ৰুত্তঞ্হেতং –

‘‘কথং ধম্মুদ্ধচ্চৰিগ্গহিতমানসং হোতি? অনিচ্চতো মনসিকরোতো ওভাসো উপ্পজ্জতি, ‘ওভাসো ধম্মো’তি ওভাসং আৰজ্জতি, ততো ৰিক্খেপো উদ্ধচ্চং. তেন উদ্ধচ্চেন ৰিগ্গহিতমানসো অনিচ্চতো উপট্ঠানং যথাভূতং নপ্পজানাতি. দুক্খতো… অনত্ততো উপট্ঠানং যথাভূতং নপ্পজানাতি’’.

তথা ‘‘অনিচ্চতো মনসিকরোতো ঞাণং উপ্পজ্জতি…পে… পীতি… পস্সদ্ধি… সুখং… অধিমোক্খো… পগ্গহো… উপট্ঠানং… উপেক্খা… নিকন্তি উপ্পজ্জতি, ‘নিকন্তি ধম্মো’তি নিকন্তিং আৰজ্জতি, ততো ৰিক্খেপো উদ্ধচ্চং. তেন উদ্ধচ্চেন ৰিগ্গহিতমানসো অনিচ্চতো উপট্ঠানং যথাভূতং নপ্পজানাতি. দুক্খতো… অনত্ততো উপট্ঠানং যথাভূতং নপ্পজানাতী’’তি (পটি. ম. ২.৬).

৭৩৩. তত্থ ¶ ওভাসোতি ৰিপস্সনোভাসো. তস্মিং উপ্পন্নে যোগাৰচরো ‘‘ন ৰত মে ইতো পুব্বে এৰরূপো ওভাসো উপ্পন্নপুব্বো, অদ্ধা মগ্গপ্পত্তোস্মি ফলপত্তোস্মী’’তি অমগ্গমেৰ ‘‘মগ্গো’’তি, অফলমেৰ চ ‘‘ফল’’ন্তি গণ্হাতি. তস্স অমগ্গং ‘‘মগ্গো’’তি অফলং ‘‘ফল’’ন্তি গণ্হতো ৰিপস্সনাৰীথি উক্কন্তা নাম হোতি. সো অত্তনো মূলকম্মট্ঠানং ৰিস্সজ্জেত্ৰা ওভাসমেৰ অস্সাদেন্তো নিসীদতি.

সো খো পনাযং ওভাসো কস্সচি ভিক্খুনো পল্লঙ্কট্ঠানমত্তমেৰ ওভাসেন্তো উপ্পজ্জতি. কস্সচি ¶ অন্তোগব্ভং. কস্সচি বহিগব্ভম্পি. কস্সচি সকলৰিহারং, গাৰুতং, অড্ঢযোজনং, যোজনং, দ্ৰিযোজনং, তিযোজনং…পে… কস্সচি পথৰীতলতো যাৰ অকনিট্ঠব্রহ্মলোকা একালোকং কুরুমানো. ভগৰতো পন দসসহস্সিলোকধাতুং ওভাসেন্তো উদপাদি.

এৰং ৰেমত্ততায চস্স ইদং ৰত্থু – চিত্তলপব্বতে কির দ্ৰিকুট্টগেহস্স অন্তো দ্ৰে থেরা নিসীদিংসু. তংদিৰসঞ্চ কাল়পক্খুপোসথো হোতি, মেঘপটলচ্ছন্না দিসা, রত্তিভাগে চতুরঙ্গসমন্নাগতং তমং পৰত্ততি. অথেকো থেরো আহ – ‘‘ভন্তে, ময্হং ইদানি চেতিযঙ্গণম্হি সীহাসনে পঞ্চৰণ্ণানি কুসুমানি পঞ্ঞাযন্তী’’তি. তং ইতরো আহ – ‘‘অনচ্ছরিযং, আৰুসো, কথেসি, ময্হং পনেতরহি মহাসমুদ্দম্হি যোজনট্ঠানে মচ্ছকচ্ছপা পঞ্ঞাযন্তী’’তি.

অযং পন ৰিপস্সনুপক্কিলেসো যেভুয্যেন সমথৰিপস্সনালাভিনো উপ্পজ্জতি. সো সমাপত্তিৰিক্খম্ভিতানং কিলেসানং অসমুদাচারতো ‘‘অরহা অহ’’ন্তি চিত্তং উপ্পাদেতি উচ্চৰালিকৰাসী মহানাগত্থেরো ৰিয হংকনকৰাসী মহাদত্তত্থেরো ৰিয চিত্তলপব্বতে নিঙ্কপেণ্ণকপধানঘরৰাসী চূল়সুমনত্থেরো ৰিয চ.

তত্রিদং একৰত্থুপরিদীপনং – তলঙ্গরৰাসী ধম্মদিন্নত্থেরো কির নাম একো পভিন্নপটিসম্ভিদো মহাখীণাসৰো মহতো ভিক্খুসঙ্ঘস্স ওৰাদদাযকো ¶ অহোসি. সো একদিৰসং অত্তনো দিৰাট্ঠানে নিসীদিত্ৰা ‘‘কিন্নু খো অম্হাকং আচরিযস্স উচ্চৰালিকৰাসীমহানাগত্থেরস্স সমণভাৰকিচ্চং মত্থকং পত্তং, নো’’তি আৰজ্জন্তো পুথুজ্জনভাৰমেৰস্স দিস্ৰা ‘‘মযি অগচ্ছন্তে পুথুজ্জনকালকিরিযমেৰ করিস্সতী’’তি চ ঞত্ৰা ইদ্ধিযা ৰেহাসং উপ্পতিত্ৰা দিৰাট্ঠানে নিসিন্নস্স থেরস্স সমীপে ওরোহিত্ৰা ৰন্দিত্ৰা ৰত্তং দস্সেত্ৰা একমন্তং নিসীদি. ‘‘কিং, আৰুসো ধম্মদিন্ন, অকালে আগতোসী’’তি চ ৰুত্তে ‘‘পঞ্হং, ভন্তে, পুচ্ছিতুং আগতোম্হী’’তি আহ. ততো ‘‘পুচ্ছাৰুসো, জানমানা কথযিস্সামা’’তি ৰুত্তে পঞ্হসহস্সং পুচ্ছি.

থেরো পুচ্ছিতপুচ্ছিতং অসজ্জমানোৰ কথেসি. ততো ‘‘অতিতিক্খং ৰো, ভন্তে, ঞাণং, কদা তুম্হেহি অযং ধম্মো অধিগতো’’তি ৰুত্তে ‘‘ইতো সট্ঠিৰস্সকালে, আৰুসো’’তি আহ. সমাধিম্পি, ভন্তে, ৰল়ঞ্জেথাতি, ন যিদং, আৰুসো, ভারিযন্তি. তেন হি, ভন্তে, একং হত্থিং মাপেথাতি ¶ . থেরো সব্বসেতং হত্থিং মাপেসি. ইদানি, ভন্তে, যথা অযং হত্থী অঞ্চিতকণ্ণো পসারিতনঙ্গুট্ঠো সোণ্ডং মুখে পক্খিপিত্ৰা ভেরৰং কোঞ্চনাদং করোন্তো তুম্হাকং অভিমুখো আগচ্ছতি, তথা নং করোথাতি. থেরো তথা কত্ৰা ৰেগেন আগচ্ছতো হত্থিস্স ভেরৰং আকারং দিস্ৰা উট্ঠায পলাযিতুং আরদ্ধো. তমেনং খীণাসৰত্থেরো হত্থং পসারেত্ৰা চীৰরকণ্ণে গহেত্ৰা ‘‘ভন্তে, খীণাসৰস্স সারজ্জং নাম হোতী’’তি আহ.

সো তম্হি কালে অত্তনো পুথুজ্জনভাৰং ঞত্ৰা ‘‘অৰস্সযো মে, আৰুসো, ধম্মদিন্ন হোহী’’তি ৰত্ৰা পাদমূলে উক্কুটিকং নিসীদি. ‘‘ভন্তে, তুম্হাকং অৰস্সযো ভৰিস্সামিচ্চেৰাহং আগতো, মা চিন্তযিত্থা’’তি কম্মট্ঠানং কথেসি. থেরো কম্মট্ঠানং গহেত্ৰা চঙ্কমং আরুয্হ ততিযে পদৰারে অগ্গফলং অরহত্তং পাপুণি. থেরো কির দোসচরিতো অহোসি. এৰরূপা ভিক্খূ ওভাসে কম্পন্তি.

৭৩৪. ঞাণন্তি ৰিপস্সনাঞাণং. তস্স কির রূপারূপধম্মে তুলযন্তস্স তীরেন্তস্স ৰিস্সট্ঠইন্দৰজিরমিৰ অৰিহতৰেগং তিখিণং সূরং অতিৰিসদং ঞাণং উপ্পজ্জতি.

পীতীতি ¶ ৰিপস্সনাপীতি. তস্স কির তস্মিং সমযে খুদ্দকাপীতি, খণিকাপীতি, ওক্কন্তিকাপীতি, উব্বেগাপীতি, ফরণাপীতীতি অযং পঞ্চৰিধা পীতি সকলসরীরং পূরযমানা উপ্পজ্জতি.

পস্সদ্ধীতি ৰিপস্সনাপস্সদ্ধি. তস্স কির তস্মিং সমযে রত্তিট্ঠানে ৰা দিৰাট্ঠানে ৰা নিসিন্নস্স কাযচিত্তানং নেৰ দরথো, ন গারৰং, ন কক্খল়তা, ন অকম্মঞ্ঞতা, ন গেলঞ্ঞং, ন ৰঙ্কতা হোতি, অথ খো পনস্স কাযচিত্তানি পস্সদ্ধানি লহূনি মুদূনি কম্মঞ্ঞানি সুৰিসদানি উজুকানিযেৰ হোন্তি. সো ইমেহি পস্সদ্ধাদীহি অনুগ্গহিতকাযচিত্তো তস্মিং সমযে অমানুসিং নাম রতিং অনুভৰতি. যং সন্ধায ৰুত্তং –

‘‘সুঞ্ঞাগারং পৰিট্ঠস্স, সন্তচিত্তস্স ভিক্খুনো;

অমানুসী রতি হোতি, সম্মা ধম্মং ৰিপস্সতো.

‘‘যতো ¶ যতো সম্মসতি, খন্ধানং উদযব্বযং;

লভতী পীতিপামোজ্জং, অমতং তং ৰিজানত’’ন্তি. (ধ. প. ৩৭৩-৩৭৪);

এৰমস্স ইমং অমানুসিং রতিং সাধযমানা লহুতাদিসম্পযুত্তা পস্সদ্ধি উপ্পজ্জতি.

সুখন্তি ৰিপস্সনাসুখং. তস্স কির তস্মিং সমযে সকলসরীরং অভিসন্দযমানং অতিপণীতং সুখং উপ্পজ্জতি.

অধিমোক্খোতি সদ্ধা. ৰিপস্সনাসম্পযুত্তাযেৰ হিস্স চিত্তচেতসিকানং অতিসযপসাদভূতা বলৰতী সদ্ধা উপ্পজ্জতি.

পগ্গহোতি ৰীরিযং. ৰিপস্সনাসম্পযুত্তমেৰ হিস্স অসিথিলং অনচ্চারদ্ধং সুপগ্গহিতং ৰীরিযং উপ্পজ্জতি.

উপট্ঠানন্তি সতি. ৰিপস্সনাসম্পযুত্তাযেৰ হিস্স সুপট্ঠিতা সুপতিট্ঠিতা নিখাতা অচলা পব্বতরাজসদিসা সতি উপ্পজ্জতি. সো যং যং ঠানং আৰজ্জতি সমন্নাহরতি মনসিকরোতি পচ্চৰেক্খতি, তং তং ঠানমস্স ওক্খন্দিত্ৰা পক্খন্দিত্ৰা দিব্বচক্খুনো পরলোকো ৰিয সতিযা উপট্ঠাতি.

উপেক্খাতি ¶ ৰিপস্সনুপেক্খা চেৰ আৰজ্জনুপেক্খা চ. তস্মিং হিস্স সমযে সব্বসঙ্খারেসু মজ্ঝত্তভূতা ৰিপস্সনুপেক্খাপি বলৰতী উপ্পজ্জতি. মনোদ্ৰারে আৰজ্জনুপেক্খাপি. সা হিস্স তং তং ঠানং আৰজ্জন্তস্স ৰিস্সট্ঠইন্দৰজিরমিৰ পত্তপুটে পক্খিত্ত তত্তনারাচো ৰিয চ সূরা তিখিণা হুত্ৰা ৰহতি.

নিকন্তীতি ৰিপস্সনানিকন্তি. এৰং ওভাসাদিপটিমণ্ডিতায হিস্স ৰিপস্সনায আলযং কুরুমানা সুখুমা সন্তাকারা নিকন্তি উপ্পজ্জতি. যা নিকন্তি কিলেসোতি পরিগ্গহেতুম্পি ন সক্কা হোতি.

যথা ¶ চ ওভাসে, এৰং এতেসুপি অঞ্ঞতরস্মিং উপ্পন্নে যোগাৰচরো ‘‘ন ৰত মে ইতো পুব্বে এৰরূপং ঞাণং উপ্পন্নপুব্বং, এৰরূপা পীতি, পস্সদ্ধি, সুখং, অধিমোক্খো, পগ্গহো, উপট্ঠানং, উপেক্খা, নিকন্তি উপ্পন্নপুব্বা, অদ্ধা মগ্গপ্পত্তোস্মি ফলপ্পত্তোস্মী’’তি অমগ্গমেৰ ‘‘মগ্গো’’তি অফলমেৰ চ ‘‘ফল’’ন্তি গণ্হাতি. তস্স অমগ্গং ‘‘মগ্গো’’তি অফলং ‘‘ফল’’ন্তি গণ্হতো ৰিপস্সনাৰীথি উক্কন্তা নাম হোতি. সো অত্তনো মূলকম্মট্ঠানং ৰিস্সজ্জেত্ৰা নিকন্তিমেৰ অস্সাদেন্তো নিসীদতীতি.

৭৩৫. এত্থ চ ওভাসাদযো উপক্কিলেসৰত্থুতায উপক্কিলেসাতি ৰুত্তা, ন অকুসলত্তা. নিকন্তি পন উপক্কিলেসো চেৰ উপক্কিলেসৰত্থু চ. ৰত্থুৰসেনেৰ চেতে দস. গাহৰসেন পন সমতিংস হোন্তি. কথং? ‘‘মম ওভাসো উপ্পন্নো’’তি গণ্হতো হি দিট্ঠিগাহো হোতি, ‘‘মনাপো ৰত ওভাসো উপ্পন্নো’’তি গণ্হতো মানগাহো, ওভাসং অস্সাদযতো তণ্হাগাহো, ইতি ওভাসে দিট্ঠিমানতণ্হাৰসেন তযো গাহা. তথা সেসেসুপীতি এৰং গাহৰসেন সমতিংস উপক্কিলেসা হোন্তি. তেসং ৰসেন অকুসলো অব্যত্তো যোগাৰচরো ওভাসাদীসু কম্পতি ৰিক্খিপতি. ওভাসাদীসু একেকং ‘‘এতং মম, এসোহমস্মি, এসো মে অত্তা’’তি (ম. নি. ১.২৪১) সমনুপস্সতি. তেনাহু পোরাণা –

‘‘ওভাসে চেৰ ঞাণে চ, পীতিযা চ ৰিকম্পতি;

পস্সদ্ধিযা সুখে চেৰ, যেহি চিত্তং পৰেধতি.

‘‘অধিমোক্খে ¶ চ পগ্গাহে, উপট্ঠানে চ কম্পতি;

উপেক্খাৰজ্জনাযঞ্চ, উপেক্খায নিকন্তিযা’’তি. (পটি. ম. ২.৭);

মগ্গামগ্গৰৰত্থানকথা

৭৩৬. কুসলো পন পণ্ডিতো ব্যত্তো বুদ্ধিসম্পন্নো যোগাৰচরো ওভাসাদীসু উপ্পন্নেসু ‘‘অযং খো মে ওভাসো উপ্পন্নো, সো খো পনাযং অনিচ্চো সঙ্খতো পটিচ্চসমুপ্পন্নো খযধম্মো ৰযধম্মো ৰিরাগধম্মো নিরোধধম্মো’’তি ইতি ৰা তং পঞ্ঞায পরিচ্ছিন্দতি উপপরিক্খতি. অথ ৰা পনস্স এৰং হোতি, ‘‘সচে ওভাসো অত্তা ভৰেয্য, ‘অত্তা’তি গহেতুং ¶ ৰট্টেয্য. অনত্তা চ পনাযং ‘অত্তা’তি গহিতো. তস্মা সো অৰসৰত্তনট্ঠেন অনত্তা, হুত্ৰা অভাৰট্ঠেন অনিচ্চো, উপ্পাদৰযপটিপীল়নট্ঠেন দুক্খো’’তি সব্বং অরূপসত্তকে ৰুত্তনযেন ৰিত্থারেতব্বং. যথা চ ওভাসে, এৰং সেসেসুপি.

সো এৰং উপপরিক্খিত্ৰা ওভাসং ‘‘নেতং মম, নেসোহমস্মি, ন মেসো অত্তা’’তি (ম. নি. ১.২৪১) সমনুপস্সতি. ঞাণং…পে… নিকন্তিং ‘‘নেতং মম, নেসোহমস্মি, ন মেসো অত্তা’’তি (ম. নি. ১.২৪১) সমনুপস্সতি. এৰং সমনুপস্সন্তো ওভাসাদীসু ন কম্পতি ন ৰেধতি. তেনাহু পোরাণা –

‘‘ইমানি দস ঠানানি, পঞ্ঞাযস্স পরিচ্চিতা;

ধম্মুদ্ধচ্চকুসলো হোতি, ন চ ৰিক্খেপং গচ্ছতী’’তি. (পটি. ম. ২.৭);

সো এৰং ৰিক্খেপং অগচ্ছন্তো তং সমতিংসৰিধং উপক্কিলেসজটং ৰিজটেত্ৰা ওভাসাদযো ধম্মা ন মগ্গো. উপক্কিলেসৰিমুত্তং পন ৰীথিপটিপন্নং ৰিপস্সনাঞাণং মগ্গোতি মগ্গঞ্চ অমগ্গঞ্চ ৰৰত্থপেতি. তস্সেৰং ‘‘অযং মগ্গো, অযং ন মগ্গো’’তি মগ্গঞ্চ অমগ্গঞ্চ ঞত্ৰা ঠিতং ঞাণং মগ্গামগ্গঞাণদস্সনৰিসুদ্ধীতি ৰেদিতব্বং.

এত্তাৰতা চ পন তেন তিণ্ণং সচ্চানং ৰৰত্থানং কতং হোতি. কথং? দিট্ঠিৰিসুদ্ধিযং তাৰ নামরূপস্স ৰৰত্থাপনেন দুক্খসচ্চস্স ৰৰত্থানং কতং. কঙ্খাৰিতরণৰিসুদ্ধিযং পচ্চযপরিগ্গহণেন সমুদযসচ্চস্স ৰৰত্থানং. ইমিস্সং মগ্গামগ্গঞাণদস্সনৰিসুদ্ধিযং সম্মামগ্গস্স অৰধারণেন মগ্গসচ্চস্স ৰৰত্থানং ¶ কতন্তি, এৰং লোকিযেনেৰ তাৰ ঞাণেন তিণ্ণং সচ্চানং ৰৰত্থানং কতং হোতি.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

মগ্গামগ্গঞাণদস্সনৰিসুদ্ধিনিদ্দেসো নাম

ৰীসতিমো পরিচ্ছেদো.

২১. পটিপদাঞাণদস্সনৰিসুদ্ধিনিদ্দেসো

উপক্কিলেসৰিমুত্তউদযব্বযঞাণকথা

৭৩৭. অট্ঠন্নং ¶ ¶ পন ঞাণানং ৰসেন সিখাপ্পত্তা ৰিপস্সনা, নৰমঞ্চ সচ্চানুলোমিকঞাণন্তি অযং পটিপদাঞাণদস্সনৰিসুদ্ধি নাম. অট্ঠন্নন্তি চেত্থ উপক্কিলেসৰিমুত্তং ৰীথিপটিপন্নৰিপস্সনাসঙ্খাতং উদযব্বযানুপস্সনাঞাণং, ভঙ্গানুপস্সনাঞাণং, ভযতুপট্ঠানঞাণং, আদীনৰানুপস্সনাঞাণং, নিব্বিদানুপস্সনাঞাণং, মুঞ্চিতুকম্যতাঞাণং, পটিসঙ্খানুপস্সনাঞাণং, সঙ্খারুপেক্খাঞাণন্তি ইমানি অট্ঠ ঞাণানি ৰেদিতব্বানি. নৰমং সচ্চানুলোমিকঞাণন্তি অনুলোমস্সেতং অধিৰচনং. তস্মা তং সম্পাদেতুকামেন উপক্কিলেসৰিমুত্তং উদযব্বযঞাণং আদিং কত্ৰা এতেসু ঞাণেসু যোগো করণীযো.

৭৩৮. পুন উদযব্বযঞাণে যোগো কিমত্থিযোতি চে? লক্খণসল্লক্খণত্থো. উদযব্বযঞাণং হি হেট্ঠা দসহি উপক্কিলেসেহি উপক্কিলিট্ঠং হুত্ৰা যাথাৰসরসতো তিলক্খণং সল্লক্খেতুং নাসক্খি. উপক্কিলেসৰিমুত্তং পন সক্কোতি. তস্মা লক্খণসল্লক্খণত্থমেত্থ পুন যোগো করণীযো.

৭৩৯. লক্খণানি পন কিস্স অমনসিকারা কেন পটিচ্ছন্নত্তা ন উপট্ঠহন্তি? অনিচ্চলক্খণং তাৰ উদযব্বযানং অমনসিকারা সন্ততিযা পটিচ্ছন্নত্তা ন উপট্ঠাতি. দুক্খলক্খণং অভিণ্হসম্পটিপীল়নস্স অমনসিকারা ইরিযাপথেহি পটিচ্ছন্নত্তা ন উপট্ঠাতি. অনত্তলক্খণং নানাধাতুৰিনিব্ভোগস্স অমনসিকারা ঘনেন পটিচ্ছন্নত্তা ন উপট্ঠাতি. উদযব্বযম্পন পরিগ্গহেত্ৰা সন্ততিযা ৰিকোপিতায অনিচ্চলক্খণং যাথাৰসরসতো উপট্ঠাতি. অভিণ্হসম্পটিপীল়নং মনসিকত্ৰা ইরিযাপথে উগ্ঘাটিতে দুক্খলক্খণং যাথাৰসরসতো উপট্ঠাতি. নানাধাতুযো ৰিনিব্ভুজিত্ৰা ঘনৰিনিব্ভোগে কতে অনত্তলক্খণং যাথাৰসরসতো উপট্ঠাতি.

৭৪০. এত্থ ¶ চ অনিচ্চং, অনিচ্চলক্খণং, দুক্খং, দুক্খলক্খণং, অনত্তা, অনত্তলক্খণন্তি অযং ৰিভাগো ৰেদিতব্বো. তত্থ অনিচ্চন্তি খন্ধপঞ্চকং. কস্মা? উপ্পাদৰযঞ্ঞথত্তভাৰা ¶ , হুত্ৰা অভাৰতো ৰা. উপ্পাদৰযঞ্ঞথত্তং অনিচ্চলক্খণং হুত্ৰা অভাৰসঙ্খাতো ৰা আকারৰিকারো.

‘‘যদনিচ্চং তং দুক্খ’’ন্তি (সং. নি. ৩.১৫) ৰচনতো পন তদেৰ খন্ধপঞ্চকং দুক্খং. কস্মা? অভিণ্হপটিপীল়না, অভিণ্হপটিপীল়নাকারো দুক্খলক্খণং.

‘‘যং দুক্খং তদনত্তা’’তি (সং. নি. ৩.১৫) পন ৰচনতো তদেৰ খন্ধপঞ্চকং অনত্তা. কস্মা? অৰসৰত্তনতো, অৰসৰত্তনাকারো অনত্তলক্খণং.

তযিদং সব্বম্পি অযং যোগাৰচরো উপক্কিলেসৰিমুত্তেন ৰীথিপটিপন্নৰিপস্সনাসঙ্খাতেন উদযব্বযানুপস্সনাঞাণেন যাথাৰসরসতো সল্লক্খেতি.

উপক্কিলেসৰিমুত্তউদযব্বযঞাণং নিট্ঠিতং.

ভঙ্গানুপস্সনাঞাণকথা

৭৪১. তস্সেৰং সল্লক্খেত্ৰা পুনপ্পুনং ‘‘অনিচ্চং দুক্খমনত্তা’’তি রূপারূপধম্মে তুলযতো তীরযতো তং ঞাণং তিক্খং হুত্ৰা ৰহতি, সঙ্খারা লহুং উপট্ঠহন্তি, ঞাণে তিক্খে ৰহন্তে সঙ্খারেসু লহুং উপট্ঠহন্তেসু উপ্পাদং ৰা ঠিতিং ৰা পৰত্তং ৰা নিমিত্তং ৰা ন সম্পাপুণাতি. খযৰযভেদনিরোধেযেৰ সতি সন্তিট্ঠতি. তস্স ‘‘এৰং উপ্পজ্জিত্ৰা এৰং নাম সঙ্খারগতং নিরুজ্ঝতী’’তি পস্সতো এতস্মিং ঠানে ভঙ্গানুপস্সনং নাম ৰিপস্সনাঞাণং উপ্পজ্জতি. যং সন্ধায ৰুত্তং –

‘‘কথং আরম্মণপটিসঙ্খা ভঙ্গানুপস্সনে পঞ্ঞা ৰিপস্সনে ঞাণং? রূপারম্মণতা চিত্তং উপ্পজ্জিত্ৰা ভিজ্জতি, তং আরম্মণং পটিসঙ্খা তস্স চিত্তস্স ভঙ্গং অনুপস্সতি ¶ . অনুপস্সতীতি কথং অনুপস্সতি? অনিচ্চতো অনুপস্সতি নো নিচ্চতো, দুক্খতো অনুপস্সতি নো সুখতো, অনত্ততো অনুপস্সতি নো অত্ততো, নিব্বিন্দতি নো নন্দতি, ৰিরজ্জতি নো রজ্জতি, নিরোধেতি নো সমুদেতি, পটিনিস্সজ্জতি নো আদিযতি.

‘‘অনিচ্চতো অনুপস্সন্তো নিচ্চসঞ্ঞং পজহতি. দুক্খতো অনুপস্সন্তো সুখসঞ্ঞং, অনত্ততো অনুপস্সন্তো অত্তসঞ্ঞং, নিব্বিন্দন্তো ¶ নন্দিং, ৰিরজ্জন্তো রাগং, নিরোধেন্তো সমুদযং পটিনিস্সজ্জন্তো আদানং পজহতি.

‘‘ৰেদনারম্মণতা…পে… সঞ্ঞারম্মণতা… সঙ্খারারম্মণতা… ৰিঞ্ঞাণারম্মণতা… চক্খারম্মণতা…পে… জরামরণারম্মণতা চিত্তং উপ্পজ্জিত্ৰা ভিজ্জতি…পে… পটিনিস্সজ্জন্তো আদানং পজহতি.

‘‘ৰত্থুসঙ্কমনা চেৰ, পঞ্ঞায চ ৰিৰট্টনা;

আৰজ্জনাবলঞ্চেৰ, পটিসঙ্খাৰিপস্সনা.

‘‘আরম্মণঅন্ৰযেন, উভো একৰৰত্থনা;

নিরোধে অধিমুত্ততা, ৰযলক্খণৰিপস্সনা.

‘‘আরম্মণঞ্চ পটিসঙ্খা, ভঙ্গঞ্চ অনুপস্সতি;

সুঞ্ঞতো চ উপট্ঠানং, অধিপঞ্ঞাৰিপস্সনা.

‘‘কুসলো তীসু অনুপস্সনাসু, চতস্সো চ ৰিপস্সনাসু;

তযো উপট্ঠানে কুসলতা, নানাদিট্ঠীসু ন কম্পতী’’তি.

‘‘তং ঞাতট্ঠেন ঞাণং, পজাননট্ঠেন পঞ্ঞা, তেন ৰুচ্চতি ‘আরম্মণপটিসঙ্খা ভঙ্গানুপস্সনে পঞ্ঞা ৰিপস্সনে ঞাণ’’’ন্তি (পটি. ম. ১.৫১-৫২).

৭৪২. তত্থ ¶ আরম্মণপটিসঙ্খাতি যংকিঞ্চি আরম্মণং পটিসঙ্খায জানিত্ৰা, খযতো ৰযতো দিস্ৰাতি অত্থো. ভঙ্গানুপস্সনে পঞ্ঞাতি তস্স, আরম্মণং খযতো ৰযতো পটিসঙ্খায উপ্পন্নস্স ঞাণস্স ভঙ্গং অনুপস্সনে যা পঞ্ঞা, ইদং ৰিপস্সনে ঞাণন্তি ৰুত্তং. তং কথং হোতীতি অযং তাৰ কথেতুকম্যতাপুচ্ছায অত্থো. ততো যথা তং হোতি, তং দস্সেতুং ‘‘রূপারম্মণতা’’তিআদি ৰুত্তং.

তত্থ রূপারম্মণতা চিত্তং উপ্পজ্জিত্ৰা ভিজ্জতীতি রূপারম্মণং চিত্তং উপ্পজ্জিত্ৰা ভিজ্জতি. অথ ৰা রূপারম্মণভাৰে চিত্তং উপ্পজ্জিত্ৰা ভিজ্জতীতি অত্থো. তং আরম্মণং পটিসঙ্খাতি তং রূপারম্মণং পটিসঙ্খায জানিত্ৰা, খযতো ৰযতো দিস্ৰাতি অত্থো. তস্স চিত্তস্স ভঙ্গং অনুপস্সতীতি যেন চিত্তেন তং রূপারম্মণং খযতো ৰযতো দিট্ঠং, তস্স চিত্তস্স অপরেন চিত্তেন ভঙ্গং অনুপস্সতীতি অত্থো. তেনাহু পোরাণা ‘‘ঞাতঞ্চ ঞাণঞ্চ উভোপি ৰিপস্সতী’’তি.

এত্থ ¶ চ অনুপস্সতীতি অনু অনু পস্সতি, অনেকেহি আকারেহি পুনপ্পুনং পস্সতীতি অত্থো. তেনাহ – ‘‘অনুপস্সতীতি কথং অনুপস্সতি. অনিচ্চতো অনুপস্সতী’’তিআদি.

তত্থ যস্মা ভঙ্গো নাম অনিচ্চতায পরমা কোটি, তস্মা সো ভঙ্গানুপস্সকো যোগাৰচরো সব্বং সঙ্খারগতং অনিচ্চতো অনুপস্সতি, নো নিচ্চতো. ততো অনিচ্চস্স দুক্খত্তা, দুক্খস্স চ অনত্তত্তা তদেৰ দুক্খতো অনুপস্সতি, নো সুখতো. অনত্ততো অনুপস্সতি নো অত্ততো.

যস্মা পন যং অনিচ্চং দুক্খমনত্তা, ন তং অভিনন্দিতব্বং. যঞ্চ অনভিনন্দিতব্বং, ন তত্থ রজ্জিতব্বং. তস্মা এতস্মিং ভঙ্গানুপস্সনানুসারেন ‘‘অনিচ্চং দুক্খমনত্তা’’তি দিট্ঠে সঙ্খারগতে নিব্বিন্দতি, নো নন্দতি. ৰিরজ্জতি, নো রজ্জতি. সো এৰং অরজ্জন্তো লোকিকেনেৰ তাৰ ঞাণেন রাগং নিরোধেতি, নো সমুদেতি. সমুদযং ন করোতীতি অত্থো.

অথ ৰা সো এৰং ৰিরত্তো যথা দিট্ঠং সঙ্খারগতং, তথা অদিট্ঠম্পি অন্ৰযঞাণৰসেন নিরোধেতি ¶ , নো সমুদেতি. নিরোধতোৰ মনসিকরোতি. নিরোধমেৰস্স পস্সতি, নো সমুদযন্তি অত্থো.

সো এৰং পটিপন্নো পটিনিস্সজ্জতি, নো আদিযতি. কিং ৰুত্তং হোতি? অযম্পি অনিচ্চাদিঅনুপস্সনা তদঙ্গৰসেন সদ্ধিং খন্ধাভিসঙ্খারেহি কিলেসানং পরিচ্চজনতো, সঙ্খতদোসদস্সনেন চ তব্বিপরীতে নিব্বানে তন্নিন্নতায পক্খন্দনতো পরিচ্চাগপটিনিস্সগ্গো চেৰ পক্খন্দনপটিনিস্সগ্গো চাতি ৰুচ্চতি. তস্মা তায সমন্নাগতো ভিক্খু যথাৰুত্তেন নযেন কিলেসে পরিচ্চজতি, নিব্বানে চ পক্খন্দতি. নাপি নিব্বত্তনৰসেন কিলেসে আদিযতি, ন অদোসদস্সিতাৰসেন সঙ্খতারম্মণং. তেন ৰুচ্চতি ‘‘পটিনিস্সজ্জতি নো আদিযতী’’তি.

৭৪৩. ইদানিস্স তেহি ঞাণেহি যেসং ধম্মানং পহানং হোতি, তং দস্সেতুং ‘‘অনিচ্চতো অনুপস্সন্তো নিচ্চসঞ্ঞং পজহতী’’তিআদি ৰুত্তং. তত্থ নন্দিন্তি সপ্পীতিকং তণ্হং. সেসং ৰুত্তনযমেৰ.

৭৪৪. গাথাসু ¶ পন ৰত্থুসঙ্কমনাতি রূপস্স ভঙ্গং দিস্ৰা পুন যেন চিত্তেন ভঙ্গো দিট্ঠো, তস্সাপি ভঙ্গদস্সনৰসেন পুরিমৰত্থুতো অঞ্ঞৰত্থুসঙ্কমনা. পঞ্ঞায চ ৰিৰট্টনাতি উদযং পহায ৰযে সন্তিট্ঠনা. আৰজ্জনাবলঞ্চেৰাতি রূপস্স ভঙ্গং দিস্ৰা পুন ভঙ্গারম্মণস্স চিত্তস্স ভঙ্গদস্সনত্থং অনন্তরমেৰ আৰজ্জনসমত্থতা. পটিসঙ্খাৰিপস্সনাতি এসা আরম্মণপটিসঙ্খাভঙ্গানুপস্সনা নাম.

৭৪৫. আরম্মণঅন্ৰযেন উভো একৰৰত্থনাতি পচ্চক্খতো দিট্ঠস্স আরম্মণস্স অন্ৰযেন অনুগমনেন যথা ইদং, তথা অতীতেপি সঙ্খারগতং ভিজ্জিত্থ, অনাগতেপি ভিজ্জিস্সতীতি এৰং উভিন্নং একসভাৰেনেৰ ৰৰত্থাপনন্তি অত্থো.

ৰুত্তম্পি চেতং পোরাণেহি –

‘‘সংৰিজ্জমানম্হি ৰিসুদ্ধদস্সনো,

তদন্ৰযং নেতি অতীতনাগতে;

সব্বেপি ¶ সঙ্খারগতা পলোকিনো,

উস্সাৰবিন্দূ সূরিযেৰ উগ্গতে’’তি.

নিরোধে অধিমুত্ততাতি এৰং উভিন্নং ভঙ্গৰসেন একৰৰত্থানং কত্ৰা তস্মিঞ্ঞেৰ ভঙ্গসঙ্খাতে নিরোধে অধিমুত্ততা তগ্গরুতা তন্নিন্নতা তপ্পোণতা তপ্পব্ভারতাতি অত্থো. ৰযলক্খণৰিপস্সনাতি এসা ৰযলক্খণৰিপস্সনা নামাতি ৰুত্তং হোতি.

৭৪৬. আরম্মণঞ্চ পটিসঙ্খাতি পুরিমঞ্চ রূপাদিআরম্মণং জানিত্ৰা. ভঙ্গঞ্চ অনুপস্সতীতি তস্সারম্মণস্স ভঙ্গং দিস্ৰা তদারম্মণস্স চিত্তস্স ভঙ্গং অনুপস্সতি. সুঞ্ঞতো চ উপট্ঠানন্তি তস্সেৰং ভঙ্গং অনুপস্সতো ‘‘সঙ্খারাৰ ভিজ্জন্তি, তেসং ভেদো মরণং, ন অঞ্ঞো কোচি অত্থী’’তি সুঞ্ঞতো উপট্ঠানং ইজ্ঝতি.

তেনাহু ¶ পোরাণা –

‘‘খন্ধা নিরুজ্ঝন্তি ন চত্থি অঞ্ঞো,

খন্ধান ভেদো মরণন্তি ৰুচ্চতি;

তেসং খযং পস্সতি অপ্পমত্তো,

মণিংৰ ৰিজ্ঝং ৰজিরেন যোনিসো’’তি.

অধিপঞ্ঞাৰিপস্সনাতি যা চ আরম্মণপটিসঙ্খা যা চ ভঙ্গানুপস্সনা যঞ্চ সুঞ্ঞতো উপট্ঠানং, অযং অধিপঞ্ঞাৰিপস্সনা নামাতি ৰুত্তং হোতি.

৭৪৭. কুসলো তীসু অনুপস্সনাসূতি অনিচ্চানুপস্সনাদীসু তীসু ছেকো ভিক্খু. চতস্সো চ ৰিপস্সনাসূতি নিব্বিদাদীসু চ চতূসু ৰিপস্সনাসু. তযো উপট্ঠানে কুসলতাতি খযতো ৰযতো সুঞ্ঞতোতি ইমস্মিঞ্চ তিৰিধে উপট্ঠানে কুসলতায. নানাদিট্ঠীসু ন কম্পতীতি সস্সতদিট্ঠিআদীসু নানপ্পকারাসু দিট্ঠীসু ন ৰেধতি.

৭৪৮. সো এৰং অৰেধমানো ‘‘অনিরুদ্ধমেৰ নিরুজ্ঝতি, অভিন্নমেৰ ভিজ্জতী’’তি পৰত্তমনসিকারো ¶ দুব্বলভাজনস্স ৰিয ভিজ্জমানস্স, সুখুমরজস্সেৰ ৰিপ্পকিরিযমানস্স, তিলানং ৰিয ভজ্জিযমানানং সব্বসঙ্খারানং উপ্পাদট্ঠিতিপৰত্তনিমিত্তং ৰিস্সজ্জেত্ৰা ভেদমেৰ পস্সতি. সো যথা নাম চক্খুমা পুরিসো পোক্খরণীতীরে ৰা নদীতীরে ৰা ঠিতো থূলফুসিতকে দেৰে ৰস্সন্তে উদকপিট্ঠে মহন্তমহন্তানি উদকবুব্বুল়কানি উপ্পজ্জিত্ৰা উপ্পজ্জিত্ৰা সীঘং সীঘং ভিজ্জমানানি পস্সেয্য, এৰমেৰ সব্বে সঙ্খারা ভিজ্জন্তি ভিজ্জন্তীতি পস্সতি. এৰরূপং হি যোগাৰচরং সন্ধায ৰুত্তং ভগৰতা –

‘‘যথা বুব্বুল়কং পস্সে, যথা পস্সে মরীচিকং;

এৰং লোকং অৰেক্খন্তং, মচ্চুরাজা ন পস্সতী’’তি. (ধ. প. ১৭০);

৭৪৯. তস্সেৰং ‘‘সব্বে সঙ্খারা ভিজ্জন্তি ভিজ্জন্তী’’তি অভিণ্হং পস্সতো অট্ঠানিসংসপরিৰারং ভঙ্গানুপস্সনাঞাণং বলপ্পত্তং হোতি. তত্রিমে অট্ঠানিসংসা – ভৰদিট্ঠিপ্পহানং, জীৰিতনিকন্তিপরিচ্চাগো, সদাযুত্তপযুত্ততা, ৰিসুদ্ধাজীৰিতা, উস্সুক্কপ্পহানং, ৰিগতভযতা, খন্তিসোরচ্চপটিলাভো, অরতিরতিসহনতাতি.

তেনাহু ¶ পোরাণা –

‘‘ইমানি অট্ঠগ্গুণমুত্তমানি,

দিস্ৰা তহিং সম্মসতে পুনপ্পুনং;

আদিত্তচেলস্সিরসূপমো মুনি,

ভঙ্গানুপস্সী অমতস্স পত্তিযা’’তি.

ভঙ্গানুপস্সনাঞাণং নিট্ঠিতং.

ভযতুপট্ঠানঞাণকথা

৭৫০. তস্সেৰং সব্বসঙ্খারানং খযৰযভেদনিরোধারম্মণং ভঙ্গানুপস্সনং আসেৰন্তস্স ভাৰেন্তস্স ¶ বহুলীকরোন্তস্স সব্বভৰযোনিগতিঠিতিসত্তাৰাসেসু পভেদকা সঙ্খারা সুখেন জীৰিতুকামস্স ভীরুকপুরিসস্স সীহব্যগ্ঘদীপিঅচ্ছতরচ্ছযক্খরক্খসচণ্ডগোণচণ্ডকুক্কুরপভিন্নমদচণ্ডহত্থিঘোরআসীৰিসঅসনিৰিচক্কসুসানরণভূমিজলিতঅঙ্গারকাসুআদযো ৰিয মহাভযং হুত্ৰা উপট্ঠহন্তি. তস্স ‘‘অতীতা সঙ্খারা নিরুদ্ধা, পচ্চুপ্পন্না নিরুজ্ঝন্তি, অনাগতে নিব্বত্তনকসঙ্খারাপি এৰমেৰ নিরুজ্ঝিস্সন্তী’’তি পস্সতো এতস্মিং ঠানে ভযতুপট্ঠানঞাণং নাম উপ্পজ্জতি.

তত্রাযং উপমা – একিস্সা কির ইত্থিযা তযো পুত্তা রাজপরাধিকা, তেসং রাজা সীসচ্ছেদং আণাপেসি. সা পুত্তেহি সদ্ধিং আঘাতনং অগমাসি. অথস্সা জেট্ঠপুত্তস্স সীসং ছিন্দিত্ৰা মজ্ঝিমস্স ছিন্দিতুং আরভিংসু. সা জেট্ঠস্স সীসং ছিন্নং মজ্ঝিমস্স চ ছিজ্জমানং দিস্ৰা কনিট্ঠম্হি আলযং ৰিস্সজ্জি ‘‘অযম্পি এতেসঞ্ঞেৰ সদিসো ভৰিস্সতী’’তি. তত্থ তস্সা ইত্থিযা জেট্ঠপুত্তস্স ছিন্নসীসদস্সনং ৰিয যোগিনো অতীতসঙ্খারানং নিরোধদস্সনং, মজ্ঝিমস্স ছিজ্জমানসীসদস্সনং ৰিয পচ্চুপ্পন্নানং নিরোধদস্সনং, ‘‘অযম্পি এতেসঞ্ঞেৰ সদিসো ভৰিস্সতী’’তি কনিট্ঠপুত্তম্হি আলযৰিস্সজ্জনং ৰিয ‘‘অনাগতেপি নিব্বত্তনকসঙ্খারা ভিজ্জিস্সন্তী’’তি অনাগতানং নিরোধদস্সনং. তস্সেৰং পস্সতো এতস্মিং ঠানে উপ্পজ্জতি ভযতুপট্ঠানঞাণং.

অপরাপি উপমা – একা কির পূতিপজা ইত্থী দস দারকে ৰিজাযি. তেসু নৰ মতা, একো হত্থগতো মরতি, অপরো কুচ্ছিযং. সা নৰ দারকে ¶ মতে দসমঞ্চ মীযমানং দিস্ৰা কুচ্ছিগতে আলযং ৰিস্সজ্জি ‘‘অযম্পি এতেসঞ্ঞেৰ সদিসো ভৰিস্সতী’’তি. তত্থ তস্সা ইত্থিযা নৰন্নং দারকানং মরণানুস্সরণং ৰিয যোগিনো অতীতসঙ্খারানং নিরোধদস্সনং, হত্থগতস্স মীযমানভাৰদস্সনং ৰিয যোগিনো পচ্চুপ্পন্নানং নিরোধদস্সনং, কুচ্ছিগতে আলযৰিস্সজ্জনং ৰিয অনাগতানং নিরোধদস্সনং. তস্সেৰং পস্সতো এতস্মিং খণে উপ্পজ্জতি ভযতুপট্ঠানঞাণং.

৭৫১. ভযতুপট্ঠানঞাণং পন ভাযতি ন ভাযতীতি? ন ভাযতি. তঞ্হি অতীতা সঙ্খারা নিরুদ্ধা, পচ্চুপ্পন্না নিরুজ্ঝন্তি, অনাগতা নিরুজ্ঝিস্সন্তীতি তীরণমত্তমেৰ হোতি. তস্মা যথা নাম চক্খুমা পুরিসো নগরদ্ৰারে তিস্সো অঙ্গারকাসুযো ওলোকযমানো সযং ন ভাযতি, কেৰলং হিস্স ‘‘যে যে এত্থ নিপতিস্সন্তি, সব্বে অনপ্পকং দুক্খমনুভৰিস্সন্তী’’তি তীরণমত্তমেৰ হোতি. যথা ৰা পন চক্খুমা পুরিসো খদিরসূলং অযোসূলং সুৰণ্ণসূলন্তি পটিপাটিযা ¶ ঠপিতং সূলত্তযং ওলোকযমানো সযং ন ভাযতি, কেৰলং হিস্স ‘‘যে যে ইমেসু সূলেসু নিপতিস্সন্তি, সব্বে অনপ্পকং দুক্খমনুভৰিস্সন্তী’’তি তীরণমত্তমেৰ হোতি, এৰমেৰ ভযতুপট্ঠানঞাণং সযং ন ভাযতি, কেৰলং হিস্স অঙ্গারকাসুত্তযসদিসেসু, সূলত্তযসদিসেসু চ তীসু ভৰেসু ‘‘অতীতা সঙ্খারা নিরুদ্ধা, পচ্চুপ্পন্না নিরুজ্ঝন্তি, অনাগতা নিরুজ্ঝিস্সন্তী’’তি তীরণমত্তমেৰ হোতি. যস্মা পনস্স কেৰলং সব্বভৰযোনিগতিঠিতিনিৰাসগতা সঙ্খারা ব্যসনাপন্না সপ্পটিভযা হুত্ৰা ভযতো উপট্ঠহন্তি, তস্মা ভযতুপট্ঠানন্তি ৰুচ্চতি.

এৰং ভযতো উপট্ঠানে পনস্স অযং পাল়ি –

‘‘অনিচ্চতো মনসিকরোতো কিং ভযতো উপট্ঠাতি? দুক্খতো. অনত্ততো মনসিকরোতো কিং ভযতো উপট্ঠাতীতি? অনিচ্চতো মনসিকরোতো নিমিত্তং ভযতো উপট্ঠাতি. দুক্খতো মনসিকরোতো পৰত্তং ভযতো উপট্ঠাতি. অনত্ততো মনসিকরোতো নিমিত্তঞ্চ পৰত্তঞ্চ ভযতো উপট্ঠাতী’’তি (পটি. ম. ১.২২৭).

তত্থ ¶ নিমিত্তন্তি সঙ্খারনিমিত্তং. অতীতানাগতপচ্চুপ্পন্নানং সঙ্খারানমেৰেতং অধিৰচনং. অনিচ্চতো মনসিকরোন্তো হি সঙ্খারানং মরণমেৰ পস্সতি, তেনস্স নিমিত্তং ভযতো উপট্ঠাতি. পৰত্তন্তি রূপারূপভৰপৰত্তি. দুক্খতো মনসিকরোন্তো হি সুখসম্মতাযপি পৰত্তিযা অভিণ্হপটিপীল়নভাৰমেৰ পস্সতি, তেনস্স পৰত্তং ভযতো উপট্ঠাতি. অনত্ততো মনসিকরোন্তো পন উভযম্পেতং সুঞ্ঞগামং ৰিয মরীচিগন্ধব্বনগরাদীনি ৰিয চ রিত্তং তুচ্ছং সুঞ্ঞং অস্সামিকং অপরিণাযকং পস্সতি. তেনস্স নিমিত্তঞ্চ পৰত্তঞ্চ উভযং ভযতো উপট্ঠাতীতি.

ভযতুপট্ঠানঞাণং নিট্ঠিতং.

আদীনৰানুপস্সনাঞাণকথা

৭৫২. তস্স তং ভযতুপট্ঠানঞাণং আসেৰন্তস্স ভাৰেন্তস্স বহুলীকরোন্তস্স সব্বভৰযোনিগতিঠিতিসত্তাৰাসেসু ¶ নেৰ তাণং, ন লেণং, ন গতি, নপ্পটিসরণং পঞ্ঞাযতি. সব্বভৰযোনিগতিঠিতিনিৰাসগতেসু সঙ্খারেসু একসঙ্খারেপি পত্থনা ৰা পরামাসো ৰা ন হোতি. তযো ভৰা ৰীতচ্চিকঙ্গারপুণ্ণঅঙ্গারকাসুযো ৰিয, চত্তারো মহাভূতা ঘোরৰিসআসীৰিসা ৰিয, পঞ্চক্খন্ধা উক্খিত্তাসিকৰধকা ৰিয, ছ অজ্ঝত্তিকাযতনানি সুঞ্ঞগামো ৰিয, ছ বাহিরাযতনানি গামঘাতকচোরা ৰিয, সত্ত ৰিঞ্ঞাণট্ঠিতিযো, নৰ চ সত্তাৰাসা একাদসহি অগ্গীহি আদিত্তা সম্পজ্জলিতা সজোতিভূতা ৰিয চ, সব্বে সঙ্খারা গণ্ডভূতা রোগভূতা সল্লভূতা অঘভূতা আবাধভূতা ৰিয চ নিরস্সাদা নিরসা মহাআদীনৰরাসিভূতা হুত্ৰা উপট্ঠহন্তি.

কথং? সুখেন জীৰিতুকামস্স ভীরুকপুরিসস্স রমণীযাকারসণ্ঠিতম্পি সৰাল়কমিৰ ৰনগহনং, সসদ্দূলা ৰিয গুহা, সগাহরক্খসং ৰিয উদকং, সমুস্সিতখগ্গা ৰিয পচ্চত্থিকা, সৰিসং ৰিয ভোজনং, সচোরো ৰিয মগ্গো, আদিত্তমিৰ অগারং, উয্যুত্তসেনা ৰিয রণভূমি. যথা হি সো পুরিসো এতানি সৰাল়কৰনগহনাদীনি আগম্ম ভীতো সংৰিগ্গো লোমহট্ঠজাতো সমন্ততো আদীনৰমেৰ পস্সতি, এৰমেৰাযং যোগাৰচরো ¶ ভঙ্গানুপস্সনাৰসেন সব্বসঙ্খারেসু ভযতো উপট্ঠিতেসু সমন্ততো নিরসং নিরস্সাদং আদীনৰমেৰ পস্সতি. তস্সেৰং পস্সতো আদীনৰঞাণং নাম উপ্পন্নং হোতি. যং সন্ধায ইদং ৰুত্তং –

‘‘কথং ভযতুপট্ঠানে পঞ্ঞা আদীনৰে ঞাণং? উপ্পাদো ভযন্তি ভযতুপট্ঠানে পঞ্ঞা আদীনৰে ঞাণং. পৰত্তং ভযন্তি… নিমিত্তং ভযন্তি… আযূহনা ভযন্তি… পটিসন্ধি ভযন্তি… গতি ভযন্তি… নিব্বত্তি ভযন্তি… উপপত্তি ভযন্তি… জাতি ভযন্তি… জরা ভযন্তি… ব্যাধি ভযন্তি… মরণং ভযন্তি… সোকো ভযন্তি… পরিদেৰো ভযন্তি… উপাযাসো ভযন্তি ভযতুপট্ঠানে পঞ্ঞা আদীনৰে ঞাণং. অনুপ্পাদো খেমন্তি সন্তিপদে ঞাণং. অপ্পৰত্তং…পে… অনুপাযাসো খেমন্তি সন্তিপদে ঞাণং. উপ্পাদো ভযং, অনুপ্পাদো খেমন্তি সন্তিপদে ঞাণং. পৰত্তং…পে… উপাযাসো ভযং, অনুপাযাসো খেমন্তি সন্তিপদে ঞাণং.

‘‘উপ্পাদো দুক্খন্তি ভযতুপট্ঠানে পঞ্ঞা আদীনৰে ঞাণং. পৰত্তং…পে… উপাযাসো দুক্খন্তি ভযতুপট্ঠানে পঞ্ঞা আদীনৰে ঞাণং. অনুপ্পাদো সুখন্তি সন্তিপদে ¶ ঞাণং. অপ্পৰত্তং…পে… অনুপাযাসো সুখন্তি সন্তিপদে ঞাণং. উপ্পাদো দুক্খং, অনুপ্পাদো সুখন্তি সন্তিপদে ঞাণং. পৰত্তং…পে… উপাযাসো দুক্খং, অনুপাযাসো সুখন্তি সন্তিপদে ঞাণং.

‘‘উপ্পাদো সামিসন্তি ভযতুপট্ঠানে পঞ্ঞা আদীনৰে ঞাণং. পৰত্তং…পে… উপাযাসো সামিসন্তি ভযতুপট্ঠানে পঞ্ঞা আদীনৰে ঞাণং. অনুপ্পাদো নিরামিসন্তি সন্তিপদে ঞাণং. অপ্পৰত্তং…পে… অনুপাযাসো নিরামিসন্তি সন্তিপদে ঞাণং. উপ্পাদো সামিসং, অনুপ্পাদো নিরামিসন্তি সন্তিপদে ঞাণং. পৰত্তং…পে… উপাযাসো সামিসং, অনুপাযাসো নিরামিসন্তি সন্তিপদে ঞাণং.

উপ্পাদো ¶ ‘‘সঙ্খারাতি ভযতুপট্ঠানে পঞ্ঞা আদীনৰে ঞাণং. পৰত্তং…পে… উপাযাসো সঙ্খারাতি ভযতুপট্ঠানে পঞ্ঞা আদীনৰে ঞাণং. অনুপ্পাদো নিব্বানন্তি সন্তিপদে ঞাণং. অপ্পৰত্তং…পে… অনুপাযাসো নিব্বানন্তি সন্তিপদে ঞাণং. উপ্পাদো সঙ্খারা, অনুপ্পাদো নিব্বানন্তি সন্তিপদে ঞাণং. পৰত্তং…পে… উপাযাসো সঙ্খারা, অনুপাযাসো নিব্বানন্তি সন্তিপদে ঞাণং.

‘‘উপ্পাদঞ্চ পৰত্তঞ্চ, নিমিত্তং দুক্খন্তি পস্সতি;

আযূহনং পটিসন্ধিং, ঞাণং আদীনৰে ইদং.

‘‘অনুপ্পাদং অপ্পৰত্তং, অনিমিত্তং সুখন্তি চ;

অনাযূহনা অপ্পটিসন্ধি, ঞাণং সন্তিপদে ইদং.

‘‘ইদং আদীনৰে ঞাণং, পঞ্চঠানেসু জাযতি;

পঞ্চঠানে সন্তিপদে, দস ঞাণে পজানাতি;

দ্ৰিন্নং ঞাণানং কুসলতা, নানাদিট্ঠীসু ন কম্পতী’’তি.

‘‘তং ঞাতট্ঠেন ঞাণং. পজাননট্ঠেন পঞ্ঞা. তেন ৰুচ্চতি ‘‘ভযতুপট্ঠানে পঞ্ঞা আদীনৰে ঞাণ’’ন্তি (পটি. ম. ১.৫৩).

৭৫৩. তত্থ ¶ উপ্পাদোতি পুরিমকম্মপচ্চযা ইধ উপ্পত্তি. পৰত্তন্তি তথা উপ্পন্নস্স পৰত্তি. নিমিত্তন্তি সব্বম্পি সঙ্খারনিমিত্তং. আযূহনাতি আযতিং পটিসন্ধিহেতুভূতং কম্মং. পটিসন্ধীতি আযতিং উপ্পত্তি. গতীতি যায গতিযা সা পটিসন্ধি হোতি. নিব্বত্তীতি খন্ধানং নিব্বত্তনং. উপপত্তীতি ‘‘সমাপন্নস্স ৰা উপপন্নস্স ৰা’’তি (ধ. স. ১২৮৯, ১২৯১) এৰং ৰুত্তা ৰিপাকপ্পৰত্তি. জাতীতি জরাদীনং পচ্চযভূতা ভৰপচ্চযা জাতি. জরামরণাদযো পাকটা এৰ. এত্থ চ উপ্পাদাদযো পঞ্চেৰ আদীনৰঞাণস্স ৰত্থুৰসেন ৰুত্তা. সেসা তেসং ৰেৰচনৰসেন. নিব্বত্তি জাতীতি ইদঞ্হি দ্ৰযং উপ্পাদস্স চেৰ পটিসন্ধিযা চ ৰেৰচনং. গতি উপপত্তীতি ইদং দ্ৰযং পৰত্তস্স. জরাদযো নিমিত্তস্সাতি. তেনাহ –

‘‘উপ্পাদঞ্চ পৰত্তঞ্চ, নিমিত্তং দুক্খন্তি পস্সতি;

আযূহনং পটিসন্ধিং, ঞাণং আদীনৰে ইদ’’ন্তি চ.

‘‘ইদং আদীনৰে ঞাণং, পঞ্চঠানেসু জাযতী’’তি চ.

অনুপ্পাদো ¶ খেমন্তি সন্তিপদে ঞাণন্তিআদি পন আদীনৰঞাণস্স পটিপক্খঞাণদস্সনত্থং ৰুত্তং. ভযতুপট্ঠানেন ৰা আদীনৰং দিস্ৰা উব্বিগ্গহদযানং অভযম্পি অত্থি খেমং নিরাদীনৰন্তি অস্সাসজননত্থম্পি এতং ৰুত্তং. যস্মা ৰা পনস্স উপ্পাদাদযো ভযতো সূপট্ঠিতা হোন্তি, তস্স তপ্পটিপক্খনিন্নং চিত্তং হোতি, তস্মা ভযতুপট্ঠানৰসেন সিদ্ধস্স আদীনৰঞাণস্স আনিসংসদস্সনত্থম্পেতং ৰুত্তন্তি ৰেদিতব্বং.

এত্থ চ যং ভযং, তং যস্মা নিযমতো দুক্খং. তং ৰট্টামিসলোকামিসকিলেসামিসেহি অৰিপ্পমুত্তত্তা সামিসমেৰ. যঞ্চ সামিসং, তং সঙ্খারমত্তমেৰ. তস্মা ‘‘উপ্পাদো দুক্খন্তি ভযতুপট্ঠানে পঞ্ঞা আদীনৰে ঞাণ’’ন্তিআদি ৰুত্তং. এৰং সন্তেপি ভযাকারেন দুক্খাকারেন সামিসাকারেনাতি এৰং আকারনানত্ততো পৰত্তিৰসেনেৰেত্থ নানত্তং ৰেদিতব্বং.

দসঞাণে পজানাতীতি আদীনৰঞাণং পজানন্তো উপ্পাদাদিৰত্থুকানি পঞ্চ, অনুপ্পাদাদিৰত্থুকানি পঞ্চাতি দস ঞাণানি পজানাতি পটিৰিজ্ঝতি সচ্ছিকরোতি. দ্ৰিন্নং ঞাণানং কুসলতাতি আদীনৰঞাণস্স চেৰ সন্তিপদঞাণস্স চাতি ইমেসং দ্ৰিন্নং কুসলতায. নানাদিট্ঠীসু ¶ ন কম্পতীতি পরমদিট্ঠধম্মনিব্বানাদিৰসেন পৰত্তাসু দিট্ঠীসু ন ৰেধতি. সেসমেত্থ উত্তানমেৰাতি.

আদীনৰানুপস্সনাঞাণং নিট্ঠিতং.

নিব্বিদানুপস্সনাঞাণকথা

৭৫৪. সো এৰং সব্বসঙ্খারে আদীনৰতো পস্সন্তো সব্বভৰযোনিগতিৰিঞ্ঞাণট্ঠিতিসত্তাৰাসগতে সভেদকে সঙ্খারগতে নিব্বিন্দতি উক্কণ্ঠতি নাভিরমতি.

সেয্যথাপি নাম, চিত্তকূটপব্বতপাদাভিরতো সুৰণ্ণরাজহংসো অসুচিম্হি চণ্ডালগামদ্ৰারআৰাটে নাভিরমতি, সত্তসু মহাসরেসুযেৰ অভিরমতি, এৰমেৰ অযম্পি যোগীরাজহংসো সুপরিদিট্ঠাদীনৰে সভেদকে সঙ্খারগতে নাভিরমতি. ভাৰনারামতায পন ভাৰনারতিযা সমন্নাগতত্তা সত্তসু অনুপস্সনাসুযেৰ রমতি.

যথা ¶ চ সুৰণ্ণপঞ্জরে পক্খিত্তো সীহো মিগরাজা নাভিরমতি, তিযোজনসহস্সৰিত্থতে পন হিমৰন্তেযেৰ রমতি, এৰমযং যোগীসীহো তিৰিধে সুগতিভৰেপি নাভিরমতি, তীসু পন অনুপস্সনাসুযেৰ রমতি.

যথা চ সব্বসেতো সত্তপতিট্ঠো ইদ্ধিমা ৰেহাসঙ্গমো ছদ্দন্তো নাগরাজা নগরমজ্ঝে নাভিরমতি, হিমৰতি ছদ্দন্তদহগহনেযেৰ অভিরমতি, এৰমযং যোগীৰরৰারণো সব্বস্মিম্পি সঙ্খারগতে নাভিরমতি, অনুপ্পাদো খেমন্তিআদিনা নযেন দিট্ঠে সন্তিপদেযেৰ অভিরমতি, তন্নিন্নতপ্পোণতপ্পব্ভারমানসো হোতীতি.

নিব্বিদানুপস্সনাঞাণং নিট্ঠিতং.

৭৫৫. তং পনেতং পুরিমেন ঞাণদ্ৰযেন অত্থতো একং. তেনাহু পোরাণা –

‘‘ভযতুপট্ঠানং ¶ একমেৰ তীণি নামানি লভতি, সব্বসঙ্খারে ভযতো অদ্দসাতি ভযতুপট্ঠানং নাম জাতং. তেসুযেৰ সঙ্খারেসু আদীনৰং উপ্পাদেতীতি আদীনৰানুপস্সনা নাম জাতং. তেসুযেৰ সঙ্খারেসু নিব্বিন্দমানং উপ্পন্নন্তি নিব্বিদানুপস্সনা নাম জাত’’ন্তি.

পাল়িযম্পি ৰুত্তং – ‘‘যা চ ভযতুপট্ঠানে পঞ্ঞা, যঞ্চ আদীনৰে ঞাণং, যা চ নিব্বিদা, ইমে ধম্মা একত্থা, ব্যঞ্জনমেৰ নান’’ন্তি (পটি. ম. ১.২২৭).

মুঞ্চিতুকম্যতাঞাণকথা

৭৫৬. ইমিনা পন নিব্বিদাঞাণেন ইমস্স কুলপুত্তস্স নিব্বিন্দন্তস্স উক্কণ্ঠন্তস্স অনভিরমন্তস্স সব্বভৰযোনিগতিৰিঞ্ঞাণট্ঠিতিসত্তাৰাসগতেসু সভেদকেসু সঙ্খারেসু একসঙ্খারেপি চিত্তং ন সজ্জতি, ন লগ্গতি, ন বজ্ঝতি, সব্বস্মা সঙ্খারগতা মুচ্চিতুকামং নিস্সরিতুকামং হোতি. যথা কিং? যথা নাম জালব্ভন্তরগতো মচ্ছো, সপ্পমুখগতো মণ্ডূকো, পঞ্জরপক্খিত্তো ৰনকুক্কুটো, দল়্হপাসৰসগতো মিগো, অহিতুণ্ডিকহত্থগতো সপ্পো, মহাপঙ্কপক্খন্দো কুঞ্জরো, সুপণ্ণমুখগতো ¶ নাগরাজা, রাহুমুখপ্পৰিট্ঠো চন্দো, সপত্তপরিৰারিতো পুরিসোতি এৰমাদযো ততো ততো মুচ্চিতুকামা নিস্সরিতুকামাৰ হোন্তি, এৰং তস্স যোগিনো চিত্তং সব্বস্মা সঙ্খারগতা মুচ্চিতুকামং নিস্সরিতুকামং হোতি. অথস্স এৰং সব্বসঙ্খারেসু ৰিগতালযস্স সব্বস্মা সঙ্খারগতা মুচ্চিতুকামস্স উপ্পজ্জতি মুঞ্চিতুকম্যতা ঞাণন্তি.

মুঞ্চিতুকম্যতাঞাণং নিট্ঠিতং.

পটিসঙ্খানুপস্সনাঞাণকথা

৭৫৭. সো এৰং সব্বভৰযোনিগতিট্ঠিতিনিৰাসগতেহি সভেদকেহি সঙ্খারেহি মুচ্চিতুকামো সব্বস্মা সঙ্খারগতা মুচ্চিতুং পুন তে এৰং সঙ্খারে পটিসঙ্খানুপস্সনাঞাণেন তিলক্খণং আরোপেত্ৰা পরিগ্গণ্হাতি.

সো ¶ সব্বসঙ্খারে অনচ্চন্তিকতো, তাৰকালিকতো, উপ্পাদৰযপরিচ্ছিন্নতো, পলোকতো, চলতো, পভঙ্গুতো, অদ্ধুৰতো, ৰিপরিণামধম্মতো, অস্সারকতো, ৰিভৰতো, সঙ্খততো, মরণধম্মতোতিআদীহি কারণেহি অনিচ্চাতি পস্সতি.

অভিণ্হপটিপীল়নতো, দুক্খমতো, দুক্খৰত্থুতো, রোগতো, গণ্ডতো, সল্লতো, অঘতো, আবাধতো, ঈতিতো, উপদ্দৰতো, ভযতো, উপসগ্গতো, অতাণতো, অলেণতো, অসরণতো, আদীনৰতো, অঘমূলতো, ৰধকতো, সাসৰতো, মারামিসতো, জাতিধম্মতো, জরাধম্মতো, ব্যাধিধম্মতো, সোকধম্মতো, পরিদেৰধম্মতো, উপাযাসধম্মতো, সংকিলেসিকধম্মতোতিআদীহি কারণেহি দুক্খাতি পস্সতি.

অজঞ্ঞতো, দুগ্গন্ধতো, জেগুচ্ছতো, পটিক্কূলতো, অমণ্ডনারহতো, ৰিরূপতো, বীভচ্ছতোতিআদীহি কারণেহি দুক্খলক্খণস্স পরিৰারভূততো অসুভতো পস্সতি.

পরতো, রিত্ততো, তুচ্ছতো, সুঞ্ঞতো, অস্সামিকতো, অনিস্সরতো, অৰসৰত্তিতোতিআদীহি কারণেহি অনত্ততো পস্সতি.

৭৫৮. এৰঞ্হি ¶ পস্সতানেন তিলক্খণং আরোপেত্ৰা সঙ্খারা পরিগ্গহিতা নাম হোন্তি. কস্মা পনাযমেতে এৰং পরিগ্গণ্হাতীতি? মুঞ্চনস্স উপাযসম্পাদনত্থং.

তত্রাযং উপমা – একো কির পুরিসো ‘‘মচ্ছে গহেস্সামী’’তি মচ্ছখিপ্পং গহেত্ৰা উদকে ওড্ডাপেসি সো খিপ্পমুখেন হত্থং ওতারেত্ৰা অন্তোউদকে সপ্পং গীৰায গহেত্ৰা ‘‘মচ্ছো মে গহিতো’’তি অত্তমনো অহোসি. সো ‘‘মহা ৰত মযা মচ্ছো লদ্ধো’’তি উক্খিপিত্ৰা পস্সন্তো সোৰত্থিকত্তযদস্সনেন সপ্পোতি সঞ্জানিত্ৰা ভীতো আদীনৰং দিস্ৰা গহণে নিব্বিন্নো মুঞ্চিতুকামো হুত্ৰা মুঞ্চনস্স উপাযং করোন্তো অগ্গনঙ্গুট্ঠতো পট্ঠায হত্থং নিব্বেঠেত্ৰা বাহুং উক্খিপিত্ৰা উপরিসীসে দ্ৰে তযো ৰারে আৰিজ্ঝিত্ৰা সপ্পং দুব্বলং কত্ৰা ‘‘গচ্ছ দুট্ঠ সপ্পা’’তি নিস্সজ্জিত্ৰা ৰেগেন তল়াকপাল়িং আরুয্হ ‘‘মহন্তস্স ৰত ভো সপ্পস্স মুখতো মুত্তোম্হী’’তি আগতমগ্গং ওলোকযমানো অট্ঠাসি.

তত্থ ¶ তস্স পুরিসস্স ‘‘মচ্ছো’’তি সপ্পং গীৰায গহেত্ৰা তুট্ঠকালো ৰিয ইমস্সাপি যোগিনো আদিতোৰ অত্তভাৰং পটিলভিত্ৰা তুট্ঠকালো, তস্স খিপ্পমুখতো সীসং নীহরিত্ৰা সোৰত্থিকত্তযদস্সনং ৰিয ইমস্স ঘনৰিনিব্ভোগং কত্ৰা সঙ্খারেসু তিলক্খণদস্সনং, তস্স ভীতকালো ৰিয ইমস্স ভযতুপট্ঠানঞাণং. ততো আদীনৰদস্সনং ৰিয আদীনৰানুপস্সনাঞাণং, গহণে নিব্বিন্দনং ৰিয নিব্বিদানুপস্সনাঞাণং. সপ্পং মুঞ্চিতুকামতা ৰিয মুঞ্চিতুকম্যতাঞাণং, মুঞ্চনস্স উপাযকরণং ৰিয পটিসঙ্খানুপস্সনাঞাণেন সঙ্খারেসু তিলক্খণারোপনং. যথা হি সো পুরিসো সপ্পং আৰিজ্ঝিত্ৰা দুব্বলং কত্ৰা নিৰত্তেত্ৰা ডংসিতুং অসমত্থভাৰং পাপেত্ৰা সুমুত্তং মুঞ্চতি, এৰমযং যোগাৰচরো তিলক্খণারোপনেন সঙ্খারে আৰিজ্ঝিত্ৰা দুব্বলে কত্ৰা পুন নিচ্চসুখসুভঅত্তাকারেন উপট্ঠাতুং অসমত্থতং পাপেত্ৰা সুমুত্তং মুঞ্চতি. তেন ৰুত্তং ‘‘মুঞ্চনস্স উপাযসম্পাদনত্থং এৰং পরিগ্গণ্হাতী’’তি.

৭৫৯. এত্তাৰতা তস্স উপ্পন্নং হোতি পটিসঙ্খাঞাণং. যং সন্ধায ৰুত্তং –

‘‘অনিচ্চতো ¶ মনসিকরোতো কিং পটিসঙ্খা ঞাণং উপ্পজ্জতি? দুক্খতো. অনত্ততো মনসিকরোতো কিং পটিসঙ্খা ঞাণং উপ্পজ্জতি? অনিচ্চতো মনসিকরোতো নিমিত্তং পটিসঙ্খা ঞাণং উপ্পজ্জতি. দুক্খতো মনসিকরোতো পৰত্তং পটিসঙ্খা ঞাণং উপ্পজ্জতি. অনত্ততো মনসিকরোতো নিমিত্তঞ্চ পৰত্তঞ্চ পটিসঙ্খা ঞাণং উপ্পজ্জতী’’তি (পটি. ম. ১.২২৭).

এত্থ চ নিমিত্তং পটিসঙ্খাতি সঙ্খারনিমিত্তং ‘‘অদ্ধুৰং তাৰকালিক’’ন্তি অনিচ্চলক্খণৰসেন জানিত্ৰা. কামঞ্চ ন পঠমং জানিত্ৰা পচ্ছা ঞাণং উপ্পজ্জতি, ৰোহারৰসেন পন ‘‘মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণ’’ন্তিআদীনি (ম. নি. ৩.৪২১) ৰিয এৰং ৰুচ্চতি. একত্তনযেন ৰা পুরিমঞ্চ পচ্ছিমঞ্চ একং কত্ৰা এৰং ৰুত্তন্তি ৰেদিতব্বং. ইমিনা নযেন ইতরস্মিম্পি পদদ্ৰযে অত্থো ৰেদিতব্বোতি.

পটিসঙ্খানুপস্সনাঞাণং নিট্ঠিতং.

সঙ্খারুপেক্খাঞাণকথা

৭৬০. সো ¶ এৰং পটিসঙ্খানুপস্সনাঞাণেন ‘‘সব্বে সঙ্খারা সুঞ্ঞা’’তি পরিগ্গহেত্ৰা পুন ‘‘সুঞ্ঞমিদং অত্তেন ৰা অত্তনিযেন ৰা’’তি (ম. নি. ৩.৬৯) দ্ৰিকোটিকং সুঞ্ঞতং পরিগ্গণ্হাতি. সো এৰং নেৰ অত্তানং, ন পরং কিঞ্চি অত্তনো পরিক্খারভাৰে ঠিতং দিস্ৰা পুন ‘‘নাহং ক্ৰচনি, কস্সচি কিঞ্চনতস্মিং, ন চ মম ক্ৰচনি, কিস্মিঞ্চি কিঞ্চনতত্থী’’তি যা এত্থ চতুকোটিকা সুঞ্ঞতা কথিতা, তং পরিগ্গণ্হাতি.

কথং? অযঞ্হি নাহং ক্ৰচনীতি ক্ৰচি অত্তানং ন পস্সতি. কস্সচি কিঞ্চনতস্মিন্তি অত্তনো অত্তানং কস্সচি পরস্স কিঞ্চনভাৰে উপনেতব্বং ন পস্সতি. ভাতিট্ঠানেৰা ভাতরং, সহাযট্ঠানে ৰা সহাযং, পরিক্খারট্ঠানে ৰা পরিক্খারং মঞ্ঞিত্ৰা উপনেতব্বং ন পস্সতীতি অত্থো. ন চ মম ক্ৰচনীতি এত্থ মম-সদ্দং তাৰ ঠপেত্ৰা ন চ ক্ৰচনীতি পরস্স চ অত্তানং ক্ৰচি নপস্সতীতি ¶ অযমত্থো. ইদানি মম-সদ্দং আহরিত্ৰা মম কিস্মিঞ্চি কিঞ্চনতত্থীতি সো পরস্স অত্তা মম কিস্মিঞ্চি কিঞ্চনভাৰে অত্থীতি ন পস্সতীতি. অত্তনো ভাতিট্ঠানে ৰা ভাতরং, সহাযট্ঠানে ৰা সহাযং পরিক্খারট্ঠানে ৰা পরিক্খারন্তি কিস্মিঞ্চি ঠানে পরস্স অত্তানং ইমিনা কিঞ্চনভাৰেন উপনেতব্বং ন পস্সতীতি অত্থো. এৰমযং যস্মা নেৰ কত্থচি অত্তানং পস্সতি, ন তং পরস্স কিঞ্চনভাৰে উপনেতব্বং পস্সতি, ন পরস্স অত্তানং পস্সতি, ন পরস্স অত্তানং অত্তনো কিঞ্চনভাৰে উপনেতব্বং পস্সতি. তস্মানেন চতুকোটিকা সুঞ্ঞতা পরিগ্গহিতা হোতীতি.

৭৬১. এৰং চতুকোটিকং সুঞ্ঞতং পরিগ্গহেত্ৰা পুন ছহাকারেহি সুঞ্ঞতং পরিগ্গণ্হাতি. কথং? চক্খু সুঞ্ঞং অত্তেন ৰা অত্তনিযেন ৰা নিচ্চেন ৰা ধুৰেন ৰা সস্সতেন ৰা অৰিপরিণামধম্মেন ৰা…পে… মনো সুঞ্ঞো. রূপা সুঞ্ঞা…পে… ধম্মা সুঞ্ঞা. চক্খুৰিঞ্ঞাণং…পে… মনোৰিঞ্ঞাণং. চক্খুসম্ফস্সোতি এৰং যাৰ জরামরণা নযো নেতব্বো.

৭৬২. এৰং ছহাকারেহি সুঞ্ঞতং পরিগ্গহেত্ৰা পুন অট্ঠহাকারেহি পরিগ্গণ্হাতি. সেয্যথিদং – রূপং অসারং নিস্সারং সারাপগতং নিচ্চসারসারেন ৰা ধুৰসারসারেন ৰা সুখসারসারেন ¶ ৰা অত্তসারসারেন ৰা নিচ্চেন ৰা ধুৰেন ৰা সস্সতেন ৰা অৰিপরিণামধম্মেন ৰা. ৰেদনা… সঞ্ঞা… সঙ্খারা… ৰিঞ্ঞাণং… চক্খু…পে… জরামরণং অসারং নিস্সারং সারাপগতং নিচ্চসারসারেন ৰা ধুৰসারসারেন ৰা সুখসারসারেন ৰা অত্তসারসারেন ৰা নিচ্চেন ৰা ধুৰেন ৰা সস্সতেন ৰা অৰিপরিণামধম্মেন ৰা. যথা নল়ো অসারো নিস্সারো সারাপগতো. যথা এরণ্ডো… যথা উদুম্বরো… যথা সেতৰচ্ছো… যথা পাল়িভদ্দকো… যথা ফেণপিণ্ডো… যথা উদকবুব্বুল়ং… যথা মরীচি… যথা কদলিক্খন্ধো… যথা মাযা অসারা নিস্সারা সারাপগতা, এৰমেৰ রূপং…পে… জরামরণং অসারং নিস্সারং সারাপগতং নিচ্চসারসারেন ৰা…পে… অৰিপরিণামধম্মেন ৰাতি (চূল়নি. মোঘরাজমাণৰপুচ্ছানিদ্দেস ৮৮).

৭৬৩. সো ¶ এৰং অট্ঠহাকারেহি সুঞ্ঞতং পরিগ্গহেত্ৰা পুন দসহাকারেহি পরিগ্গণ্হাতি, রূপং রিত্ততো পস্সতি. তুচ্ছতো… সুঞ্ঞতো… অনত্ততো… অনিস্সরিযতো… অকামকারিযতো… অলব্ভনীযতো… অৰসৰত্তকতো… পরতো… ৰিৰিত্ততো পস্সতি. ৰেদনং…পে… ৰিঞ্ঞাণং রিত্ততো…পে… ৰিৰিত্ততো পস্সতীতি.

৭৬৪. এৰং দসহাকারেহি সুঞ্ঞতং পরিগ্গহেত্ৰা পুন দ্ৰাদসহাকারেহি পরিগ্গণ্হাতি. সেয্যথিদং – রূপং ন সত্তো, ন জীৰো, ন নরো, ন মাণৰো, ন ইত্থী, ন পুরিসো, ন অত্তা, ন অত্তনিযং. নাহং, ন মম, ন অঞ্ঞস্স, ন কস্সচি. ৰেদনা…পে… ৰিঞ্ঞাণং ন কস্সচীতি (চূল়নি. মোঘরাজমাণৰপুচ্ছানিদ্দেস ৮৮).

৭৬৫. এৰং দ্ৰাদসহাকারেহি সুঞ্ঞতং পরিগ্গণ্হিত্ৰা পুন তীরণপরিঞ্ঞাৰসেন দ্ৰাচত্তালীসায আকারেহি সুঞ্ঞতং পরিগ্গণ্হাতি, রূপং অনিচ্চতো… দুক্খতো… রোগতো… গণ্ডতো… সল্লতো… অঘতো… আবাধতো… পরতো… পলোকতো… ঈতিতো… উপদ্দৰতো… ভযতো… উপসগ্গতো… চলতো… পভঙ্গুতো… অদ্ধুৰতো… অতাণতো… অলেণতো… অসরণতো… অসরণীভূততো… রিত্ততো… তুচ্ছতো… সুঞ্ঞতো… অনত্ততো… অনস্সাদতো… আদীনৰতো… ৰিপরিণামধম্মতো… অস্সারকতো… অঘমূলতো… ৰধকতো… ৰিভৰতো… সাসৰতো… সঙ্খততো… মারামিসতো… জাতিধম্মতো… জরাধম্মতো… ব্যাধিধম্মতো… মরণধম্মতো… সোকপরিদেৰদুক্খদোমনস্সউপাযাসধম্মতো… সমুদযতো… অত্থঙ্গমতো… অনস্সাদতো ¶ … আদীনৰতো… নিস্সরণতো পস্সতি. ৰেদনং…পে… ৰিঞ্ঞাণং অনিচ্চতো…পে… নিস্সরণতো পস্সতি.

ৰুত্তম্পি চেতং – ‘‘রূপং অনিচ্চতো…পে… নিস্সরণতো পস্সন্তো সুঞ্ঞতো লোকং অৰেক্খতি. ৰেদনং…পে… ৰিঞ্ঞাণং অনিচ্চতো…পে… নিস্সরণতো পস্সন্তো সুঞ্ঞতো লোকং অৰেক্খতি’’.

‘‘সুঞ্ঞতো লোকং অৰেক্খস্সু, মোঘরাজ সদা সতো;

অত্তানুদিট্ঠিং ঊহচ্চ, এৰং মচ্চুতরো সিযা;

এৰং লোকং অৰেক্খন্তং, মচ্চুরাজা ন পস্সতী’’তি. (সু. নি. ১১২৫; চূল়নি. মোঘরাজমাণৰপুচ্ছানিদ্দেস ৮৮);

৭৬৬. এৰং ¶ সুঞ্ঞতো দিস্ৰা তিলক্খণং আরোপেত্ৰা সঙ্খারে পরিগ্গণ্হন্তো ভযঞ্চ নন্দিঞ্চ ৰিপ্পহায সঙ্খারেসু উদাসীনো অহোসি মজ্ঝত্তো, অহন্তি ৰা মমন্তি ৰা ন গণ্হাতি ৰিস্সট্ঠভরিযো ৰিয পুরিসো.

যথা নাম পুরিসস্স ভরিযা ভৰেয্য ইট্ঠা কন্তা মনাপা, সো তায ৰিনা মুহুত্তম্পি অধিৰাসেতুং ন সক্কুণেয্য, অতিৰিয নং মমাযেয্য, সো তং ইত্থিং অঞ্ঞেন পুরিসেন সদ্ধিং ঠিতং ৰা নিসিন্নং ৰা কথেন্তিং ৰা হসন্তিং ৰা দিস্ৰা কুপিতো অস্স অনত্তমনো, অধিমত্তং দোমনস্সং পটিসংৰেদেয্য. সো অপরেন সমযেন তস্সা ইত্থিযা দোসং দিস্ৰা মুঞ্চিতুকামো হুত্ৰা তং ৰিস্সজ্জেয্য, ন নং মমাতি গণ্হেয্য. ততো পট্ঠায তং যেনকেনচি সদ্ধিং যংকিঞ্চি কুরুমানং দিস্ৰাপি নেৰ কুপ্পেয্য, ন দোমনস্সং আপজ্জেয্য, অঞ্ঞদত্থু উদাসীনোৰ ভৰেয্য মজ্ঝত্তো. এৰমেৰাযং সব্বসঙ্খারেহি মুঞ্চিতুকামো হুত্ৰা পটিসঙ্খানুপস্সনায সঙ্খারে পরিগ্গণ্হন্তো অহং মমাতি গহেতব্বং অদিস্ৰা ভযঞ্চ নন্দিঞ্চ ৰিপ্পহায সব্বসঙ্খারেসু উদাসীনো হোতি মজ্ঝত্তো.

তস্স এৰং জানতো এৰং পস্সতো তীসু ভৰেসু চতূসু যোনীসু পঞ্চসু গতীসু সত্তসু ৰিঞ্ঞাণট্ঠিতীসু ¶ নৰসু সত্তাৰাসেসু চিত্তং পতিলীযতি পতিকুটতি পতিৰত্ততি ন সম্পসারিযতি, উপেক্খা ৰা পাটিকুল্যতা ৰা সণ্ঠাতি.

সেয্যথাপি নাম পদুমপলাসে ঈসকপোণে উদকফুসিতানি পতিলীযন্তি পতিকুটন্তি পতিৰত্তন্তি ন সম্পসারিযন্তি, এৰমেৰ…পে… সেয্যথাপি নাম কুক্কুটপত্তং ৰা নহারুদদ্দুলং ৰা অগ্গিম্হি পক্খিত্তং পতিলীযতি পতিকুটতি পতিৰত্ততি ন সম্পসারিযতি (অ. নি. ৭.৪৯), এৰমেৰ তস্স তীসু ভৰেসু চিত্তং…পে… উপেক্খা ৰা পাটিকুল্যতা ৰা সণ্ঠাতি. ইচ্চস্স সঙ্খারুপেক্খাঞাণং নাম উপ্পন্নং হোতি.

৭৬৭. তং পনেতং সচে সন্তিপদং নিব্বানং সন্ততো পস্সতি, সব্বং সঙ্খারপ্পৰত্তং ৰিস্সজ্জেত্ৰা নিব্বানমেৰ পক্খন্দতি. নো চে নিব্বানং সন্ততো ¶ পস্সতি, পুনপ্পুনং সঙ্খারারম্মণমেৰ হুত্ৰা পৰত্ততি সামুদ্দিকানং দিসাকাকো ৰিয. সামুদ্দিকা কির ৰাণিজকা নাৰং আরোহন্তা দিসাকাকং নাম গণ্হন্তি, তে যদা নাৰা ৰাতক্খিত্তা ৰিদেসং পক্খন্দতি, তীরং ন পঞ্ঞাযতি, তদা দিসাকাকং ৰিস্সজ্জেন্তি. সো কূপকযট্ঠিতো আকাসং লঙ্ঘিত্ৰা সব্বা দিসা চ ৰিদিসা চ অনুগন্ত্ৰা সচে তীরং পস্সতি, তদভিমুখোৰ গচ্ছতি. নো চে পস্সতি, পুনপ্পুনং আগন্ত্ৰা কূপকযট্ঠিংযেৰ অল্লীযতি. এৰমেৰ সচে সঙ্খারুপেক্খাঞাণং সন্তিপদং নিব্বানং সন্ততো পস্সতি, সব্বং সঙ্খারপ্পৰত্তং ৰিস্সজ্জেত্ৰা নিব্বানমেৰ পক্খন্দতি. নো চে পস্সতি, পুনপ্পুনং সঙ্খারারম্মণমেৰ হুত্ৰা পৰত্ততি.

তদিদং সুপ্পগ্গে পিট্ঠং ৰট্টযমানং ৰিয. নিব্বট্টিতকপ্পাসং ৰিহনমানং ৰিয নানপ্পকারতো সঙ্খারে পরিগ্গহেত্ৰা ভযঞ্চ নন্দিঞ্চ পহায সঙ্খারৰিচিননে মজ্ঝত্তং হুত্ৰা তিৰিধানুপস্সনাৰসেন তিট্ঠতি. এৰং তিট্ঠমানং তিৰিধৰিমোক্খমুখভাৰং আপজ্জিত্ৰা সত্তঅরিযপুগ্গলৰিভাগায পচ্চযো হোতি.

৭৬৮. তত্রিদং তিৰিধানুপস্সনাৰসেন পৰত্তনতো তিণ্ণং ইন্দ্রিযানং আধিপতেয্যৰসেন তিৰিধৰিমোক্খমুখভাৰং আপজ্জতি নাম. তিস্সো হি অনুপস্সনা তীণি ৰিমোক্খমুখানীতি ৰুচ্চন্তি. যথাহ –

‘‘তীণি ¶ খো পনিমানি ৰিমোক্খমুখানি লোকনিয্যানায সংৰত্তন্তি, সব্বসঙ্খারে পরিচ্ছেদপরিৰটুমতো সমনুপস্সনতায, অনিমিত্তায চ ধাতুযা চিত্তসম্পক্খন্দনতায, সব্বসঙ্খারেসু মনোসমুত্তেজনতায, অপ্পণিহিতায চ ধাতুযা চিত্তসম্পক্খন্দনতায, সব্বধম্মে পরতো সমনুপস্সনতায, সুঞ্ঞতায চ ধাতুযা চিত্তসম্পক্খন্দনতায, ইমানি তীণি ৰিমোক্খমুখানি লোকনিয্যানায সংৰত্তন্তী’’তি (পটি. ম. ১.২১৯).

তত্থ পরিচ্ছেদপরিৰটুমতোতি উদযব্বযৰসেন পরিচ্ছেদতো চেৰ পরিৰটুমতো চ. অনিচ্চানুপস্সনং হি ‘‘উদযতো পুব্বে সঙ্খারা নত্থী’’তি পরিচ্ছিন্দিত্ৰা তেসং গতিং সমন্নেসমানং ‘‘ৰযতো পরং ন গচ্ছন্তি, এত্থেৰ অন্তরধাযন্তী’’তি পরিৰটুমতো সমনুপস্সতি. মনোসমুত্তেজনতাযাতি চিত্তসংৰেজনতায ¶ . দুক্খানুপস্সনেন হি সঙ্খারেসু চিত্তং সংৰেজেতি. পরতো সমনুপস্সনতাযাতি ‘‘নাহং, ন মমা’’তি এৰং অনত্ততো সমনুপস্সনতায. ইতি ইমানি তীণি পদানি অনিচ্চানুপস্সনাদীনং ৰসেন ৰুত্তানীতি ৰেদিতব্বানি. তেনেৰ তদনন্তরে পঞ্হৰিস্সজ্জনে ৰুত্তং – ‘‘অনিচ্চতো মনসিকরোতো খযতো সঙ্খারা উপট্ঠহন্তি. দুক্খতো মনসিকরোতো ভযতো সঙ্খারা উপট্ঠহন্তি. অনত্ততো মনসিকরোতো সুঞ্ঞতো সঙ্খারা উপট্ঠহন্তী’’তি (পটি. ম. ১.২১৯).

৭৬৯. কতমে পন তে ৰিমোক্খা, যেসং ইমানি অনুপস্সনানি মুখানীতি? অনিমিত্তো, অপ্পণিহিতো, সুঞ্ঞতোতি এতে তযো. ৰুত্তং হেতং ‘‘অনিচ্চতো মনসিকরোন্তো অধিমোক্খবহুলো অনিমিত্তং ৰিমোক্খং পটিলভতি. দুক্খতো মনসিকরোন্তো পস্সদ্ধিবহুলো অপ্পণিহিতং ৰিমোক্খং পটিলভতি. অনত্ততো মনসিকরোন্তো ৰেদবহুলো সুঞ্ঞতৰিমোক্খং পটিলভতী’’তি (পটি. ম. ১.২২৩).

এত্থ চ অনিমিত্তো ৰিমোক্খোতি অনিমিত্তাকারেন নিব্বানং আরম্মণং কত্ৰা পৰত্তো অরিযমগ্গো. সো হি অনিমিত্তায ধাতুযা উপ্পন্নত্তা অনিমিত্তো. কিলেসেহি চ ৰিমুত্তত্তা ৰিমোক্খো. এতেনেৰ নযেন অপ্পণিহিতাকারেন নিব্বানং আরম্মণং কত্ৰা পৰত্তো অপ্পণিহিতো. সুঞ্ঞতাকারেন নিব্বানং আরম্মণং কত্ৰা পৰত্তো সুঞ্ঞতোতি ৰেদিতব্বো.

৭৭০. যং পন অভিধম্মে ‘‘যস্মিং সমযে লোকুত্তরং ঝানং ভাৰেতি নিয্যানিকং অপচযগামিং ¶ দিট্ঠিগতানং পহানায পঠমায ভূমিযা পত্তিযা ৰিৰিচ্চেৰ কামেহি পঠমং ঝানং উপসম্পজ্জ ৰিহরতি অপ্পণিহিতং সুঞ্ঞত’’ন্তি (ধ. স. ৩৪৩ আদযো) এৰং ৰিমোক্খদ্ৰযমেৰ ৰুত্তং, তং নিপ্পরিযাযতো ৰিপস্সনাগমনং সন্ধায. ৰিপস্সনাঞাণং হি কিঞ্চাপি পটিসম্ভিদামগ্গে –

‘‘অনিচ্চানুপস্সনাঞাণং নিচ্চতো অভিনিৰেসং মুঞ্চতীতি সুঞ্ঞতো ৰিমোক্খো. দুক্খানুপস্সনাঞাণং সুখতো অভিনিৰেসং. অনত্তানুপস্সনাঞাণং অত্ততো অভিনিৰেসং মুঞ্চতীতি ¶ সুঞ্ঞতো ৰিমোক্খো’’তি (পটি. ম. ১.২২৯) এৰং অভিনিৰেসং মুঞ্চনৰসেন সুঞ্ঞতো ৰিমোক্খোতি চ,

‘‘অনিচ্চানুপস্সনাঞাণং নিচ্চতো নিমিত্তং মুঞ্চতীতি অনিমিত্তো ৰিমোক্খো. দুক্খানুপস্সনাঞাণং সুখতো নিমিত্তং, অনত্তানুপস্সনাঞাণং অত্ততো নিমিত্তং মুঞ্চতীতি অনিমিত্তো ৰিমোক্খো’’তি (পটি. ম. ১.২২৯) এৰং নিমিত্তং মুঞ্চনৰসেন অনিমিত্তো ৰিমোক্খোতি চ,

‘‘অনিচ্চানুপস্সনাঞাণং নিচ্চতো পণিধিং মুঞ্চতীতি অপ্পণিহিতো ৰিমোক্খো. দুক্খানুপস্সনাঞাণং সুখতো পণিধিং. অনত্তানুপস্সনাঞাণং অত্ততো পণিধিং মুঞ্চতীতি অপ্পণিহিতো ৰিমোক্খো’’তি (পটি. ম. ১.২২৯) এৰং পণিধিং মুঞ্চনৰসেন অপ্পণিহিতো ৰিমোক্খোতি চ –

ৰুত্তং. তথাপি তং সঙ্খারনিমিত্তস্স অৰিজহনতো ন নিপ্পরিযাযেন অনিমিত্তং. নিপ্পরিযাযেন পন সুঞ্ঞতঞ্চেৰ অপ্পণিহিতঞ্চ. তস্স চ আগমনৰসেন অরিযমগ্গক্খণে ৰিমোক্খো উদ্ধটো. তস্মা অপ্পণিহিতং সুঞ্ঞতন্তি ৰিমোক্খদ্ৰযমেৰ ৰুত্তন্তি ৰেদিতব্বং. অযং তাৰেত্থ ৰিমোক্খকথা.

৭৭১. যং পন ৰুত্তং ‘‘সত্তঅরিযপুগ্গলৰিভাগায পচ্চযো হোতী’’তি, তত্থ সদ্ধানুসারী, সদ্ধাৰিমুত্তো, কাযসক্খি, উভতোভাগৰিমুত্তো, ধম্মানুসারী, দিট্ঠিপ্পত্তো, পঞ্ঞাৰিমুত্তোতি ¶ ইমে তাৰ সত্ত অরিযপুগ্গলা, তেসং ৰিভাগায ইদং সঙ্খারুপেক্খাঞাণং পচ্চযো হোতি.

৭৭২. যো হি অনিচ্চতো মনসিকরোন্তো অধিমোক্খবহুলো সদ্ধিন্দ্রিযং পটিলভতি, সো সোতাপত্তিমগ্গক্খণে সদ্ধানুসারী হোতি. সেসেসু সত্তসু ঠানেসু সদ্ধাৰিমুত্তো.

৭৭৩. যো পন দুক্খতো মনসিকরোন্তো পস্সদ্ধিবহুলো সমাধিন্দ্রিযং পটিলভতি, সো সব্বত্থ কাযসক্খি নাম হোতি. অরূপজ্ঝানং পন পত্ৰা অগ্গফলপ্পত্তো উভতোভাগৰিমুত্তো নাম হোতি.

৭৭৪. যো ¶ পন অনত্ততো মনসিকরোন্তো ৰেদবহুলো পঞ্ঞিন্দ্রিযং পটিলভতি, সো সোতাপত্তিমগ্গক্খণে ধম্মানুসারী হোতি. ছসু ঠানেসু দিট্ঠিপ্পত্তো অগ্গফলে পঞ্ঞাৰিমুত্তোতি.

৭৭৫. ৰুত্তং হেতং –

‘‘অনিচ্চতো মনসিকরোতো সদ্ধিন্দ্রিযং অধিমত্তং হোতি. সদ্ধিন্দ্রিযস্স অধিমত্তত্তা সোতাপত্তিমগ্গং পটিলভতি, তেন ৰুচ্চতি সদ্ধানুসারী’’তি.

তথা ‘‘অনিচ্চতো মনসিকরোতো সদ্ধিন্দ্রিযং অধিমত্তং হোতি, সদ্ধিন্দ্রিযস্স অধিমত্তত্তা সোতাপত্তিফলং সচ্ছিকতং হোতি, তেন ৰুচ্চতি সদ্ধাৰিমুত্তো’’তিআদি (পটি. ম. ১.২২১).

৭৭৬. অপরম্পি ৰুত্তং –

‘‘সদ্দহন্তো ৰিমুত্তোতি সদ্ধাৰিমুত্তো. ফুট্ঠন্তং সচ্ছিকতোতি কাযসক্খি. দিট্ঠন্তং পত্তোতি দিট্ঠিপ্পত্তো. সদ্দহন্তো ৰিমুচ্চতীতি সদ্ধাৰিমুত্তো. ঝানফস্সং পঠমং ফুসতি পচ্ছা নিরোধং নিব্বানং সচ্ছিকরোতীতি কাযসক্খি. ‘দুক্খা সঙ্খারা, সুখো নিরোধো’তি ঞাতং হোতি দিট্ঠং ৰিদিতং সচ্ছিকতং ফুসিতং পঞ্ঞাযাতি দিট্ঠিপ্পত্তো’’তি (পটি. ম. ১.২২১).

৭৭৭. ইতরেসু ¶ পন চতূসু সদ্ধং অনুসরতি, সদ্ধায ৰা অনুসরতি গচ্ছতীতি সদ্ধানুসারী. তথা পঞ্ঞাসঙ্খাতং ধম্মং অনুসরতি, ধম্মেন ৰা অনুসরতীতি ধম্মানুসারী. অরূপজ্ঝানেন চেৰ অরিযমগ্গেন চাতি উভতোভাগেন ৰিমুত্তোতি উভতোভাগৰিমুত্তো. পজানন্তো ৰিমুত্তোতি পঞ্ঞাৰিমুত্তোতি এৰং ৰচনত্থো ৰেদিতব্বোতি.

সঙ্খারুপেক্খাঞাণং.

৭৭৮. তং পনেতং পুরিমেন ঞাণদ্ৰযেন অত্থতো একং. তেনাহু পোরাণা – ‘‘ইদং সঙ্খারুপেক্খাঞাণং একমেৰ তীণি নামানি লভতি, হেট্ঠা ¶ মুঞ্চিতুকম্যতাঞাণং নাম জাতং, মজ্ঝে পটিসঙ্খানুপস্সনাঞাণং নাম, অন্তে চ সিখাপ্পত্তং সঙ্খারুপেক্খাঞাণং নাম’’.

৭৭৯. পাল়িযম্পি ৰুত্তং –

‘‘কথং মুঞ্চিতুকম্যতা-পটিসঙ্খা-সন্তিট্ঠনা পঞ্ঞা সঙ্খারুপেক্খাসু ঞাণং? উপ্পাদং মুঞ্চিতুকম্যতা-পটিসঙ্খা-সন্তিট্ঠনা পঞ্ঞা সঙ্খারুপেক্খাসু ঞাণং. পৰত্তং…পে… নিমিত্তং…পে… উপাযাসং মুঞ্চিতুকম্যতাপটিসঙ্খা-সন্তিট্ঠনা পঞ্ঞা সঙ্খারুপেক্খাসু ঞাণং. উপ্পাদো দুক্খন্তি…পে… ভযন্তি…পে… সামিসন্তি…পে… উপ্পাদো সঙ্খারাতি…পে… উপাযাসো সঙ্খারাতি মুঞ্চিতুকম্যতা-পটিসঙ্খা-সন্তিট্ঠনা পঞ্ঞা সঙ্খারুপেক্খাসু ঞাণ’’ন্তি (পটি. ম. ১.৫৪).

৭৮০. তত্থ মুঞ্চিতুকম্যতা চ সা পটিসঙ্খা চ সন্তিট্ঠনা চাতি মুঞ্চিতুকম্যতা-পটিসঙ্খা-সন্তিট্ঠনা. ইতি পুব্বভাগে নিব্বিদাঞাণেন নিব্বিন্নস্স উপ্পাদাদীনি পরিচ্চজিতুকামতা মুঞ্চিতুকামতা. মুঞ্চনস্স উপাযকরণত্থং মজ্ঝে পটিসঙ্খানং পটিসঙ্খা. মুঞ্চিত্ৰা অৰসানে অজ্ঝুপেক্খনং সন্তিট্ঠনা. যং সন্ধায ‘‘উপ্পাদো সঙ্খারা, তে সঙ্খারে অজ্ঝুপেক্খতীতি সঙ্খারুপেক্খা’’তিআদি (পটি. ম. ১.৫৪) ৰুত্তং. এৰং একমেৰিদং ঞাণং.

৭৮১. অপিচ ইমাযপি পাল়িযা ইদং একমেৰাতি ৰেদিতব্বং. ৰুত্তং হেতং – ‘‘যা চ মুঞ্চিতুকম্যতা, যা চ পটিসঙ্খানুপস্সনা, যা চ সঙ্খারুপেক্খা, ইমে ধম্মা একত্থা, ব্যঞ্জনমেৰ নান’’ন্তি (পটি. ম. ১.২২৭).

৭৮২. এৰং ¶ অধিগতসঙ্খারুপেক্খস্স পন ইমস্স কুলপুত্তস্স ৰিপস্সনা সিখাপ্পত্তা ৰুট্ঠানগামিনী হোতি. সিখাপ্পত্তা ৰিপস্সনাতি ৰা ৰুট্ঠানগামিনীতি ৰা সঙ্খারুপেক্খাদিঞাণত্তযস্সেৰ এতং নামং. সা হি সিখং উত্তমভাৰং পত্তত্তা সিখাপ্পত্তা. ৰুট্ঠানং গচ্ছতীতি ৰুট্ঠানগামিনী. ৰুট্ঠানং ৰুচ্চতি বহিদ্ধানিমিত্তভূততো অভিনিৰিট্ঠৰত্থুতো চেৰ অজ্ঝত্তপৰত্ততো চ ৰুট্ঠহনতো মগ্গো, তং গচ্ছতীতি ৰুট্ঠানগামিনী, মগ্গেন সদ্ধিং ঘটিযতীতি অত্থো.

৭৮৩. তত্রাযং অভিনিৰেসৰুট্ঠানানং আৰিভাৰত্থায মাতিকা – অজ্ঝত্তং অভিনিৰিসিত্ৰা অজ্ঝত্তা ৰুট্ঠাতি, অজ্ঝত্তং অভিনিৰিসিত্ৰা বহিদ্ধা ৰুট্ঠাতি ¶ , বহিদ্ধা অভিনিৰিসিত্ৰা বহিদ্ধা ৰুট্ঠাতি, বহিদ্ধা অভিনিৰিসিত্ৰা অজ্ঝত্তা ৰুট্ঠাতি, রূপে অভিনিৰিসিত্ৰা রূপা ৰুট্ঠাতি, রূপে অভিনিৰিসিত্ৰা অরূপা ৰুট্ঠাতি, অরূপে অভিনিৰিসিত্ৰা অরূপা ৰুট্ঠাতি, অরূপে অভিনিৰিসিত্ৰা রূপা ৰুট্ঠাতি, একপ্পহারেন পঞ্চহি খন্ধেহি ৰুট্ঠাতি, অনিচ্চতো অভিনিৰিসিত্ৰা অনিচ্চতো ৰুট্ঠাতি, অনিচ্চতো অভিনিৰিসিত্ৰা দুক্খতো, অনত্ততো ৰুট্ঠাতি, দুক্খতো অভিনিৰিসিত্ৰা দুক্খতো, অনিচ্চতো, অনত্ততো ৰুট্ঠাতি, অনত্ততো অভিনিৰিসিত্ৰা অনত্ততো, অনিচ্চতো, দুক্খতো ৰুট্ঠাতি.

৭৮৪. কথং? ইধেকচ্চো আদিতোৰ অজ্ঝত্তসঙ্খারেসু অভিনিৰিসতি, অভিনিৰিসিত্ৰা তে পস্সতি. যস্মা পন ন সুদ্ধঅজ্ঝত্তদস্সনমত্তেনেৰ মগ্গৰুট্ঠানং হোতি, বহিদ্ধাপি দট্ঠব্বমেৰ, তস্মা পরস্স খন্ধেপি অনুপাদিণ্ণসঙ্খারেপি অনিচ্চং দুক্খমনত্তাতি পস্সতি. সো কালেন অজ্ঝত্তং সম্মসতি, কালেন বহিদ্ধা. তস্সেৰং সম্মসতো অজ্ঝত্তং সম্মসনকালে ৰিপস্সনা মগ্গেন সদ্ধিং ঘটিযতি. অযং অজ্ঝত্তং অভিনিৰিসিত্ৰা অজ্ঝত্তা ৰুট্ঠাতি নাম.

সচে পনস্স বহিদ্ধা সম্মসনকালে ৰিপস্সনা মগ্গেন সদ্ধিং ঘটিযতি, অযং অজ্ঝত্তং অভিনিৰিসিত্ৰা বহিদ্ধা ৰুট্ঠাতি নাম. এস নযো বহিদ্ধা অভিনিৰিসিত্ৰা বহিদ্ধা চ অজ্ঝত্তা চ ৰুট্ঠানেপি.

৭৮৫. অপরো আদিতোৰ রূপে অভিনিৰিসতি, অভিনিৰিসিত্ৰা ভূতরূপঞ্চ উপাদারূপঞ্চ রাসিং কত্ৰা পস্সতি. যস্মা পন ন সুদ্ধরূপদস্সনমত্তেনেৰ ৰুট্ঠানং হোতি, অরূপম্পি দট্ঠব্বমেৰ. তস্মা তং রূপং আরম্মণং কত্ৰা উপ্পন্নং ৰেদনং সঞ্ঞং সঙ্খারে ৰিঞ্ঞাণঞ্চ ‘‘ইদং অরূপ’’ন্তি অরূপং পস্সতি. সো কালেন রূপং সম্মসতি, কালেন অরূপং ¶ . তস্সেৰং সম্মসতো রূপসম্মসনকালে ৰিপস্সনা মগ্গেন সদ্ধিং ঘটিযতি, অযং রূপে অভিনিৰিসিত্ৰা রূপা ৰুট্ঠাতি নাম.

সচে পনস্স অরূপসম্মসনকালে ৰিপস্সনা মগ্গেন সদ্ধিং ঘটিযতি, অযং অরূপে অভিনিৰিসিত্ৰা অরূপা ৰুট্ঠাতি নাম. এস নযো অরূপে অভিনিৰিসিত্ৰা অরূপা চ রূপা চ ৰুট্ঠানেপি.

৭৮৬. ‘‘যংকিঞ্চি সমুদযধম্মং, সব্বং তং নিরোধধম্ম’’ন্তি (দী. নি. ১.২৯৮) এৰং অভিনিৰিসিত্ৰা এৰমেৰ ৰুট্ঠানকালে পন একপ্পহারেন পঞ্চহি খন্ধেহি ৰুট্ঠাতি নাম.

৭৮৭. একো ¶ আদিতোৰ অনিচ্চতো সঙ্খারে সম্মসতি. যস্মা পন ন অনিচ্চতো সম্মসনমত্তেনেৰ ৰুট্ঠানং হোতি, দুক্খতোপি অনত্ততোপি সম্মসিতব্বমেৰ, তস্মা দুক্খতোপি অনত্ততোপি সম্মসতি. তস্সেৰং পটিপন্নস্স অনিচ্চতো সম্মসনকালে ৰুট্ঠানং হোতি, অযং অনিচ্চতো অভিনিৰিসিত্ৰা অনিচ্চতো ৰুট্ঠাতি নাম.

সচে পনস্স দুক্খতো অনত্ততো সম্মসনকালে ৰুট্ঠানং হোতি, অযং অনিচ্চতো অভিনিৰিসিত্ৰা দুক্খতো, অনত্ততো ৰুট্ঠাতি নাম. এস নযো দুক্খতো অনত্ততো অভিনিৰিসিত্ৰা সেসৰুট্ঠানেসুপি.

৭৮৮. এত্থ চ যোপি অনিচ্চতো অভিনিৰিট্ঠো, যোপি দুক্খতো, যোপি অনত্ততো, ৰুট্ঠানকালে চ অনিচ্চতো ৰুট্ঠানং হোতি. তযোপি জনা অধিমোক্খবহুলা হোন্তি, সদ্ধিন্দ্রিযং পটিলভন্তি, অনিমিত্তৰিমোক্খেন ৰিমুচ্চন্তি, পঠমমগ্গক্খণে সদ্ধানুসারিনো হোন্তি, সত্তসু ঠানেসু সদ্ধাৰিমুত্তা. সচে পন দুক্খতো ৰুট্ঠানং হোতি, তযোপি জনা পস্সদ্ধিবহুলা হোন্তি, সমাধিন্দ্রিযং পটিলভন্তি, অপ্পণিহিতৰিমোক্খেন ৰিমুচ্চন্তি, সব্বত্থ কাযসক্খিনো হোন্তি. যস্স পনেত্থ অরূপজ্ঝানং পাদকং, সো অগ্গফলে উভতোভাগৰিমুত্তো হোতি. অথ নেসং অনত্ততো ৰুট্ঠানং হোতি, তযোপি জনা ৰেদবহুলা হোন্তি, পঞ্ঞিন্দ্রিযং পটিলভন্তি, সুঞ্ঞতৰিমোক্খেন ৰিমুচ্চন্তি, পঠমমগ্গক্খণে ধম্মানুসারিনো হোন্তি, ছসু ঠানেসু দিট্ঠিপ্পত্তা অগ্গফলে পঞ্ঞাৰিমুত্তাতি.

৭৮৯. ইদানি ¶ সদ্ধিং পুরিমপচ্ছিমঞাণেহি ইমিস্সা ৰুট্ঠানগামিনিযা ৰিপস্সনায আৰিভাৰত্থং দ্ৰাদস উপমা ৰেদিতব্বা. তাসং ইদং উদ্দানং –

‘‘ৰগ্গুলী কণ্হসপ্পো চ, ঘরং গো যক্খি দারকো;

খুদ্দং পিপাসং সীতুণ্হং, অন্ধকারং ৰিসেন চা’’তি.

ইমা চ উপমা ভযতুপট্ঠানতো পভুতি যত্থ কত্থচি ঞাণে ঠত্ৰা আহরিতুং ৰট্টেয্যুং. ইমস্মিং পন ঠানে আহরিযমানাসু ভযতুপট্ঠানতো যাৰ ফলঞাণং সব্বং পাকটং হোতি, তস্মা ইধেৰ আহরিতব্বাতি ৰুত্তা.

৭৯০. ৰগ্গুলীতি ¶ একা কির ৰগ্গুলী ‘‘এত্থ পুপ্ফং ৰা ফলং ৰা লভিস্সামী’’তি পঞ্চসাখে মধুকরুক্খে নিলীযিত্ৰা একং সাখং পরামসিত্ৰা ন তত্থ কিঞ্চি পুপ্ফং ফলং ৰা গয্হুপগং অদ্দস. যথা চ একং, এৰং দুতিযং, ততিযং, চতুত্থং. পঞ্চমম্পি সাখং পরামসিত্ৰা নাদ্দস. সা ‘‘অফলো ৰতাযং রুক্খো, নত্থেত্থ কিঞ্চি গয্হুপগ’’ন্তি তস্মিং রুক্খে আলযং ৰিস্সজ্জেত্ৰা উজুকায সাখায আরুয্হ ৰিটপন্তরেন সীসং নীহরিত্ৰা উদ্ধং উল্লোকেত্ৰা আকাসে উপ্পতিত্ৰা অঞ্ঞস্মিং ফলরুক্খে নিলীযতি.

তত্থ ৰগ্গুলি ৰিয যোগাৰচরো দট্ঠব্বো, পঞ্চসাখো মধুকরুক্খো ৰিয পঞ্চুপাদানক্খন্ধা, তত্থ ৰগ্গুলিযা নিলীযনং ৰিয যোগিনো খন্ধপঞ্চকে অভিনিৰেসো, তস্সা একেকং সাখং পরামসিত্ৰা কিঞ্চি গয্হুপগং অদিস্ৰা অৰসেসসাখাপরামসনং ৰিয যোগিনো রূপক্খন্ধং সম্মসিত্ৰা তত্থ কিঞ্চি গয্হুপগং অদিস্ৰা অৰসেসক্খন্ধসম্মসনং, তস্সা ‘‘অফলো ৰতাযং রুক্খো’’তি রুক্খে আলযৰিস্সজ্জনং ৰিয যোগিনো পঞ্চসুপি খন্ধেসু অনিচ্চলক্খণাদিদস্সনৰসেন নিব্বিন্নস্স মুঞ্চিতুকম্যতাদিঞাণত্তযং, তস্সা উজুকায সাখায উপরি আরোহনং ৰিয যোগিনো অনুলোমং, সীসং নীহরিত্ৰা উদ্ধং উল্লোকনং ৰিয গোত্রভুঞাণং, আকাসে উপ্পতনং ৰিয মগ্গঞাণং, অঞ্ঞস্মিং ফলরুক্খে নিলীযনং ৰিয ফলঞাণং.

৭৯১. কণ্হসপ্পুপমা পটিসঙ্খাঞাণে ৰুত্তাৰ. উপমাসংসন্দনে পনেত্থ সপ্পৰিস্সজ্জনং ৰিয ¶ গোত্রভুঞাণং, মুঞ্চিত্ৰা আগতমগ্গং ওলোকেন্তস্স ঠানং ৰিয মগ্গঞাণং, গন্ত্ৰা অভযট্ঠানে ঠানং ৰিয ফলঞাণন্তি অযং ৰিসেসো.

৭৯২. ঘরন্তি ঘরসামিকে কির সাযং ভুঞ্জিত্ৰা সযনং আরুয্হ নিদ্দং ওক্কন্তে ঘরং আদিত্তং, সো পবুজ্ঝিত্ৰা অগ্গিং দিস্ৰা ‘‘ভীতো সাধু ৰতস্স সচে অডয্হমানো নিক্খমেয্য’’ন্তি ওলোকযমানো মগ্গং দিস্ৰা নিক্খমিত্ৰা ৰেগেন খেমট্ঠানং গন্ত্ৰা ঠিতো. তত্থ ঘরসামিকস্স ভুঞ্জিত্ৰা সযনং আরুয্হ নিদ্দোক্কমনং ৰিয বালপুথুজ্জনস্স খন্ধপঞ্চকে ‘‘অহং মমা’’তি গহণং. পবুজ্ঝিত্ৰা অগ্গিং দিস্ৰা ভীতকালো ৰিয সম্মাপটিপদং পটিপজ্জিত্ৰা লক্খণং দিস্ৰা ভযতুপট্ঠানঞাণং, নিক্খমনমগ্গং ওলোকনং ৰিয মুঞ্চিতুকম্যতাঞাণং ¶ , মগ্গদস্সনং ৰিয অনুলোমং, নিক্খমনং ৰিয গোত্রভুঞাণং, ৰেগেন গমনং ৰিয মগ্গঞাণং, খেমট্ঠানে ঠানং ৰিয ফলঞাণং.

৭৯৩. গোতি একস্স কির কস্সকস্স রত্তিভাগে নিদ্দং ওক্কন্তস্স ৰজং ভিন্দিত্ৰা গোণা পলাতা, সো পচ্চূসসমযে তত্থ গন্ত্ৰা ওলোকেন্তো তেসং পলাতভাৰং ঞত্ৰা অনুপদং গন্ত্ৰা রঞ্ঞো গোণে অদ্দস. তে ‘‘ময্হং গোণা’’তি সল্লক্খেত্ৰা আহরন্তো পভাতকালে ‘‘ন ইমে ময্হং গোণা, রঞ্ঞো গোণা’’তি সঞ্জানিত্ৰা ‘‘যাৰ মং ‘চোরো অয’ন্তি গহেত্ৰা রাজপুরিসা ন অনযব্যসনং পাপেন্তি, তাৰদেৰ পলাযিস্সামী’’তি ভীতো গোণে পহায ৰেগেন পলাযিত্ৰা নিব্ভযট্ঠানে অট্ঠাসি. তত্থ ‘‘ময্হং গোণা’’তি রাজগোণানং গহণং ৰিয বালপুথুজ্জনস্স ‘‘অহং মমা’’তি খন্ধানং গহণং, পভাতে ‘‘রাজগোণা’’তি সঞ্জাননং ৰিয যোগিনো তিলক্খণৰসেন খন্ধানং ‘‘অনিচ্চা দুক্খা অনত্তা’’তি সঞ্জাননং, ভীতকালো ৰিয ভযতুপট্ঠানঞাণং, ৰিস্সজ্জিত্ৰা গন্তুকামতা ৰিয মুঞ্চিতুকম্যতা, ৰিস্সজ্জনং ৰিয গোত্রভু, পলাযনং ৰিয মগ্গো, পলাযিত্ৰা অভযদেসে ঠানং ৰিয ফলং.

৭৯৪. যক্খীতি একো কির পুরিসো যক্খিনিযা সদ্ধিং সংৰাসং কপ্পেসি, সা রত্তিভাগে ‘‘সুত্তো অয’’ন্তি মন্ত্ৰা আমকসুসানং গন্ত্ৰা মনুস্সমংসং খাদতি. সো ‘‘কুহিং এসা গচ্ছতী’’তি অনুবন্ধিত্ৰা মনুস্সমংসং খাদমানং দিস্ৰা তস্সা অমনুস্সিভাৰং ঞত্ৰা ‘‘যাৰ মং ন খাদতি, তাৰ পলাযিস্সামী’’তি ভীতো ৰেগেন পলাযিত্ৰা খেমট্ঠানে অট্ঠাসি. তত্থ যক্খিনিযা সদ্ধিং সংৰাসো ৰিয খন্ধানং ‘‘অহং মমা’’তি গহণং, সুসানে মনুস্সমংসং খাদমানং ¶ দিস্ৰা ‘‘যক্খিনী অয’’ন্তি জাননং ৰিয খন্ধানং তিলক্খণং দিস্ৰা অনিচ্চাদিভাৰজাননং, ভীতকালো ৰিয ভযতুপট্ঠানং, পলাযিতুকামতা ৰিয মুঞ্চিতুকম্যতা, সুসানৰিজহনং ৰিয গোত্রভু, ৰেগেন পলাযনং ৰিয মগ্গো, অভযদেসে ঠানং ৰিয ফলং.

৭৯৫. দারকোতি একা কির পুত্তগিদ্ধিনী ইত্থী, সা উপরিপাসাদে নিসিন্নাৰ অন্তরৰীথিযং দারকসদ্দং সুত্ৰা ‘‘পুত্তো নু খো মে কেনচি ৰিহেঠিযতী’’তি ৰেগসা গন্ত্ৰা ‘‘অত্তনো পুত্তো’’তি সঞ্ঞায পরপুত্তং অগ্গহেসি. সা ‘‘পরপুত্তো অয’’ন্তি সঞ্জানিত্ৰা ওত্তপ্পমানা ইতো চিতো ¶ চ ওলোকেত্ৰা ‘‘মা হেৰ মং কোচি ‘দারকচোরী অয’ন্তি ৰদেয্যা’’তি দারকং তত্থেৰ ওরোপেত্ৰা পুন ৰেগসা পাসাদং আরুয্হ নিসীদি. তত্থ অত্তনো পুত্তসঞ্ঞায পরপুত্তস্স গহণং ৰিয ‘‘অহং মমা’’তি পঞ্চক্খন্ধগহণং, ‘‘পরপুত্তো অয’’ন্তি সঞ্জাননং ৰিয তিলক্খণৰসেন ‘‘নাহং, ন মমা’’তি সঞ্জাননং, ওত্তপ্পনং ৰিয ভযতুপট্ঠানং, ইতো চিতো চ ওলোকনং ৰিয মুঞ্চিতুকম্যতাঞাণং, তত্থেৰ দারকস্স ওরোপনং ৰিয অনুলোমং, ওরোপেত্ৰা অন্তরৰীথিযং ঠিতকালো ৰিয গোত্রভু, পাসাদারূহনং ৰিয মগ্গো, আরুয্হ নিসীদনং ৰিয ফলং.

৭৯৬. খুদ্দং পিপাসং সীতুণ্হং, অন্ধকারং ৰিসেন চাতি ইমা পন ছ উপমা ৰুট্ঠানগামিনিযা ৰিপস্সনায ঠিতস্স লোকুত্তরধম্মাভিমুখনিন্নপোণপব্ভারভাৰদস্সনত্থং ৰুত্তা. যথা হি খুদ্দায অভিভূতো সুজিঘচ্ছিতো পুরিসো সাদুরসং ভোজনং পত্থেতি, এৰমেৰাযং সংসারৰট্টজিঘচ্ছায ফুট্ঠো যোগাৰচরো অমতরসং কাযগতাসতিভোজনং পত্থেতি.

যথা চ পিপাসিতো পুরিসো পরিসুস্সমানকণ্ঠমুখো অনেকঙ্গসম্ভারং পানকং পত্থেতি, এৰমেৰাযং সংসারৰট্টপিপাসায ফুট্ঠো যোগাৰচরো অরিযং অট্ঠঙ্গিকমগ্গপানকং পত্থেতি.

যথা পন সীতসম্ফুট্ঠো পুরিসো উণ্হং পত্থেতি, এৰমেৰাযং সংসারৰট্টে তণ্হাসিনেহসীতেন ফুট্ঠো যোগাৰচরো কিলেসসন্তাপকং মগ্গতেজং পত্থেতি.

যথা চ উণ্হসম্ফুট্ঠো পুরিসো সীতং পত্থেতি, এৰমেৰাযং সংসারৰট্টে একাদসগ্গিসন্তাপসন্তত্তো যোগাৰচরো একাদসগ্গিৰূপসমং নিব্বানং পত্থেতি.

যথা ¶ পন অন্ধকারপরেতো পুরিসো আলোকং পত্থেতি, এৰমেৰাযং অৰিজ্জন্ধকারেন ওনদ্ধপরিযোনদ্ধো যোগাৰচরো ঞাণালোকং মগ্গভাৰনং পত্থেতি.

যথা চ ৰিসসম্ফুট্ঠো পুরিসো ৰিসঘাতনং ভেসজ্জং পত্থেতি, এৰমেৰাযং কিলেসৰিসসম্ফুট্ঠো যোগাৰচরো কিলেসৰিসনিম্মথনং অমতোসধং নিব্বানং পত্থেতি. তেন ৰুত্তং – ‘‘তস্সেৰং জানতো এৰং পস্সতো ¶ তীসু ভৰেসু…পে… নৰসু সত্তাৰাসেসু চিত্তং পতিলীযতি পতিকুটতি পতিৰত্ততি ন সম্পসারিযতি. উপেক্খা ৰা পাটিকুল্যতা ৰা সণ্ঠাতি. সেয্যথাপি নাম পদুমপলাসে ঈসকপোণে’’তি সব্বং পুব্বে ৰুত্তনযেনেৰ ৰেদিতব্বং.

৭৯৭. এত্তাৰতা চ পনেস পতিলীনচরো নাম হোতি, যং সন্ধায ৰুত্তং –

‘‘পতিলীনচরস্স ভিক্খুনো,

ভজমানস্স ৰিৰিত্তমাসনং;

সামগ্গিযমাহু তস্স তং,

যো অত্তানং ভৰনে ন দস্সযে’’তি. (সু. নি. ৮১৬; মহানি. ৪৫);

এৰমিদং সঙ্খারুপেক্খাঞাণং যোগিনো পতিলীনচরভাৰং নিযমেত্ৰা উত্তরি অরিযমগ্গস্সাপি বোজ্ঝঙ্গমগ্গঙ্গঝানঙ্গপটিপদাৰিমোক্খৰিসেসং নিযমেতি. কেচি হি থেরা বোজ্ঝঙ্গমগ্গঙ্গঝানঙ্গানং ৰিসেসং পাদকজ্ঝানং নিযমেতীতি ৰদন্তি. কেচি ৰিপস্সনায আরম্মণভূতা খন্ধা নিযমেন্তীতি ৰদন্তি. কেচি পুগ্গলজ্ঝাসযো নিযমেতীতি ৰদন্তি. তেসম্পি ৰাদেসু অযং পুব্বভাগৰুট্ঠানগামিনিৰিপস্সনাৰ নিযমেতীতি ৰেদিতব্বা.

৭৯৮. তত্রাযং অনুপুব্বিকথা – ৰিপস্সনানিযমেন হি সুক্খৰিপস্সকস্স উপ্পন্নমগ্গোপি, সমাপত্তিলাভিনো ঝানং পাদকং অকত্ৰা উপ্পন্নমগ্গোপি, পঠমজ্ঝানং পাদকং কত্ৰা পকিণ্ণকসঙ্খারে সম্মসিত্ৰা উপ্পাদিতমগ্গোপি পঠমজ্ঝানিকাৰ হোন্তি. সব্বেসু সত্ত বোজ্ঝঙ্গানি অট্ঠ মগ্গঙ্গানি পঞ্চ ঝানঙ্গানি হোন্তি. তেসং হি পুব্বভাগৰিপস্সনা সোমনস্সসহগতাপি উপেক্খাসহগতাপি হুত্ৰা ৰুট্ঠানকালে সঙ্খারুপেক্খাভাৰং পত্ৰা সোমনস্সসহগতা ¶ হোতি. পঞ্চকনযে দুতিযততিযচতুত্থজ্ঝানানি পাদকানি কত্ৰা উপ্পাদিতমগ্গেসু যথাক্কমেনেৰ ঝানং চতুরঙ্গিকং তিৰঙ্গিকং দুৰঙ্গিকঞ্চ হোতি. সব্বেসু পন সত্ত মগ্গঙ্গানি হোন্তি. চতুত্থে ছ বোজ্ঝঙ্গানি. অযং ৰিসেসো পাদকজ্ঝাননিযমেন চেৰ ৰিপস্সনানিযমেন চ হোতি. তেসম্পি হি পুব্বভাগৰিপস্সনা সোমনস্সসহগতাপি উপেক্খাসহগতাপি হোতি. ৰুট্ঠানগামিনী সোমনস্সসহগতাৰ. পঞ্চমজ্ঝানং ¶ পাদকং কত্ৰা নিব্বত্তিতমগ্গে পন উপেক্খাচিত্তেকগ্গতাৰসেন দ্ৰে ঝানঙ্গানি বোজ্ঝঙ্গমগ্গঙ্গানি ছ সত্ত চেৰ. অযম্পি ৰিসেসো উভযনিযমৰসেন হোতি. ইমস্মিং হি নযে পুব্বভাগৰিপস্সনা সোমনস্সসহগতা ৰা উপেক্খাসহগতা ৰা হোতি. ৰুট্ঠানগামিনী উপেক্খাসহগতাৰ. অরূপজ্ঝানানি পাদকং কত্ৰা উপ্পাদিতমগ্গেপি এসেৰ নযো. এৰং পাদকজ্ঝানতো ৰুট্ঠায যেকেচি সঙ্খারে সম্মসিত্ৰা নিব্বত্তিতমগ্গস্স আসন্নপদেসে ৰুট্ঠিতসমাপত্তি অত্তনো সদিসভাৰং করোতি ভূমিৰণ্ণো ৰিয গোধাৰণ্ণস্স.

৭৯৯. দুতিযত্থেরৰাদে পন যতো যতো সমাপত্তিতো ৰুট্ঠায যে যে সমাপত্তিধম্মে সম্মসিত্ৰা মগ্গো নিব্বত্তিতো হোতি, তংতংসমাপত্তিসদিসোৰ হোতি. তত্রাপি চ ৰিপস্সনানিযমো ৰুত্তনযেনেৰ ৰেদিতব্বো.

৮০০. ততিযত্থেরৰাদে অত্তনো অত্তনো অজ্ঝাসযানুরূপেন যং যং ঝানং পাদকং কত্ৰা যে যে ঝানধম্মে সম্মসিত্ৰা মগ্গো নিব্বত্তিতো, তংতংঝানসদিসোৰ হোতি. পাদকজ্ঝানং পন সম্মসিতজ্ঝানং ৰা ৰিনা অজ্ঝাসযমত্তেনেৰ তং ন ইজ্ঝতি. স্ৰাযমত্থো নন্দকোৰাদসুত্তেন (ম. নি. ৩.৩৯৮ আদযো) দীপেতব্বো. এত্থাপি চ ৰিপস্সনানিযমো ৰুত্তনযেনেৰ ৰেদিতব্বো. এৰং তাৰ সঙ্খারুপেক্খা বোজ্ঝঙ্গমগ্গঙ্গঝানঙ্গানি নিযমেতীতি ৰেদিতব্বা.

৮০১. সচে পনাযং আদিতো কিলেসে ৰিক্খম্ভযমানা দুক্খেন সপ্পযোগেন সসঙ্খারেন ৰিক্খম্ভেতুং অসক্খি, দুক্খাপটিপদা নাম হোতি. ৰিপরিযাযেন সুখাপটিপদা. কিলেসে পন ৰিক্খম্ভেত্ৰা ৰিপস্সনাপরিৰাসং মগ্গপাতুভাৰং সণিকং কুরুমানা দন্ধাভিঞ্ঞা নাম হোতি. ৰিপরিযাযেন খিপ্পাভিঞ্ঞা. ইতি অযং সঙ্খারুপেক্খা আগমনীযট্ঠানে ঠত্ৰা অত্তনো অত্তনো মগ্গস্স নামং দেতি. তেন মগ্গো চত্তারি নামানি লভতি.

সা ¶ ¶ পনাযং পটিপদা কস্সচি ভিক্খুনো নানা হোতি, কস্সচি চতূসুপি মগ্গেসু একাৰ. বুদ্ধানং পন চত্তারোপি মগ্গা সুখাপটিপদা খিপ্পাভিঞ্ঞাৰ অহেসুং. তথা ধম্মসেনাপতিস্স. মহামোগ্গল্লানত্থেরস্স পন পঠমমগ্গো সুখাপটিপদো খিপ্পাভিঞ্ঞো অহোসি. উপরি তযো দুক্খাপটিপদা দন্ধাভিঞ্ঞা. যথা চ পটিপদা, এৰং অধিপতযোপি কস্সচি ভিক্খুনো চতূসু মগ্গেসু নানা হোন্তি. কস্সচি চতূসুপি একাৰ. এৰং সঙ্খারুপেক্খা পটিপদাৰিসেসং নিযমেতি. যথা পন ৰিমোক্খৰিসেসং নিযমেতি, তং পুব্বে ৰুত্তমেৰ.

৮০২. অপিচ মগ্গো নাম পঞ্চহি কারণেহি নামং লভতি সরসেন ৰা পচ্চনীকেন ৰা সগুণেন ৰা আরম্মণেন ৰা আগমনেন ৰা. সচে হি সঙ্খারুপেক্খা অনিচ্চতো সঙ্খারে সম্মসিত্ৰা ৰুট্ঠাতি, অনিমিত্তৰিমোক্খেন ৰিমুচ্চতি. সচে দুক্খতো সম্মসিত্ৰা ৰুট্ঠাতি, অপ্পণিহিতৰিমোক্খেন ৰিমুচ্চতি. সচে অনত্ততো সম্মসিত্ৰা ৰুট্ঠাতি, সুঞ্ঞতৰিমোক্খেন ৰিমুচ্চতি. ইদং সরসতো নামং নাম.

যস্মা পনেস অনিচ্চানুপস্সনায সঙ্খারানং ঘনৰিনিব্ভোগং কত্ৰা নিচ্চনিমিত্তধুৰনিমিত্তসস্সতনিমিত্তানি পজহন্তো আগতো, তস্মা অনিমিত্তো. দুক্খানুপস্সনায পন সুখসঞ্ঞং পহায পণিধিং পত্থনং সুক্খাপেত্ৰা আগতত্তা অপ্পণিহিতো. অনত্তানুপস্সনায অত্তসত্তপুগ্গলসঞ্ঞং পহায সঙ্খারানং সুঞ্ঞতো দিট্ঠত্তা সুঞ্ঞতোতি ইদং পচ্চনীকতো নামং নাম.

রাগাদীহি পনেস সুঞ্ঞত্তা সুঞ্ঞতো, রূপনিমিত্তাদীনং রাগনিমিত্তাদীনঞ্ঞেৰ ৰা অভাৰেন অনিমিত্তো, রাগপণিধিআদীনং অভাৰতো অপ্পণিহিতোতি ইদমস্স সগুণতো নামং.

স্ৰাযং সুঞ্ঞং অনিমিত্তং অপ্পণিহিতঞ্চ নিব্বানং আরম্মণং করোতীতিপি সুঞ্ঞতো অনিমিত্তো অপ্পণিহিতোতি ৰুচ্চতি. ইদমস্স আরম্মণতো নামং.

৮০৩. আগমনং পন দুৰিধং ৰিপস্সনাগমনং মগ্গাগমনঞ্চ. তত্থ মগ্গে ৰিপস্সনাগমনং লভতি, ফলে মগ্গাগমনং. অনত্তানুপস্সনা হি সুঞ্ঞতা নাম, সুঞ্ঞতৰিপস্সনায মগ্গো সুঞ্ঞতো, অনিচ্চানুপস্সনা অনিমিত্তা নাম ¶ , অনিমিত্তৰিপস্সনায ¶ মগ্গো অনিমিত্তো. ইদং পন নামং ন অভিধম্মপরিযাযেন লব্ভতি, সুত্তন্তপরিযাযেন লব্ভতি. তত্র হি গোত্রভুঞাণং অনিমিত্তং নিব্বানং আরম্মণং কত্ৰা অনিমিত্তনামকং হুত্ৰা সযং আগমনীযট্ঠানে ঠত্ৰা মগ্গস্স নামং দেতীতি ৰদন্তি. তেন মগ্গো অনিমিত্তোতি ৰুত্তো. মগ্গাগমনেন পন ফলং অনিমিত্তন্তি যুজ্জতিযেৰ. দুক্খানুপস্সনা সঙ্খারেসু পণিধিং সুক্খাপেত্ৰা আগতত্তা অপ্পণিহিতা নাম, অপ্পণিহিতৰিপস্সনায মগ্গো অপ্পণিহিতো, অপ্পণিহিতমগ্গস্স ফলং অপ্পণিহিতং. এৰং ৰিপস্সনা অত্তনো নামং মগ্গস্স দেতি, মগ্গো ফলস্সাতি ইদং আগমনতো নামং. এৰমযং সঙ্খারুপেক্খা ৰিমোক্খৰিসেসং নিযমেতীতি.

সঙ্খারুপেক্খাঞাণং নিট্ঠিতং.

অনুলোমঞাণকথা

৮০৪. তস্স তং সঙ্খারুপেক্খাঞাণং আসেৰন্তস্স ভাৰেন্তস্স বহুলীকরোন্তস্স অধিমোক্খসদ্ধা বলৰতরা নিব্বত্ততি, ৰীরিযং সুপগ্গহিতং হোতি, সতি সূপট্ঠিতা, চিত্তং সুসমাহিতং, তিক্খতরা সঙ্খারুপেক্খা উপ্পজ্জতি. তস্স ‘‘দানি মগ্গো উপ্পজ্জিস্সতী’’তি সঙ্খারুপেক্খা সঙ্খারে অনিচ্চাতি ৰা দুক্খাতি ৰা অনত্তাতি ৰা সম্মসিত্ৰা ভৰঙ্গং ওতরতি. ভৰঙ্গানন্তরং সঙ্খারুপেক্খায কতনযেনেৰ সঙ্খারে অনিচ্চাতি ৰা দুক্খাতি ৰা অনত্তাতি ৰা আরম্মণং কুরুমানং উপ্পজ্জতি মনোদ্ৰারাৰজ্জনং. ততো ভৰঙ্গং আৰট্টেত্ৰা উপ্পন্নস্স তস্স কিরিযচিত্তস্সানন্তরং অৰীচিকং চিত্তসন্ততিং অনুপ্পবন্ধমানং তথেৰ সঙ্খারে আরম্মণং কত্ৰা উপ্পজ্জতি পঠমং জৰনচিত্তং, যং পরিকম্মন্তি ৰুচ্চতি. তদনন্তরং তথেৰ সঙ্খারে আরম্মণং কত্ৰা উপ্পজ্জতি দুতিযং জৰনচিত্তং, যং উপচারন্তি ৰুচ্চতি. তদনন্তরম্পি তথেৰ সঙ্খারে আরম্মণং কত্ৰা উপ্পজ্জতি ততিযং জৰনচিত্তং, যং অনুলোমন্তি ৰুচ্চতি. ইদং নেসং পাটিযেক্কং নামং.

অৰিসেসেন পন তিৰিধম্পেতং আসেৰনন্তিপি পরিকম্মন্তিপি উপচারন্তিপি অনুলোমন্তিপি ৰত্তুং ৰট্টতি. কিস্সানুলোমং? পুরিমভাগপচ্ছিমভাগানং. তঞ্হি পুরিমানং অট্ঠন্নং ¶ ৰিপস্সনাঞাণানং তথকিচ্চতায চ অনুলোমেতি, উপরি চ সত্ততিংসায বোধিপক্খিযধম্মানং. তঞ্হি অনিচ্চলক্খণাদিৰসেন সঙ্খারে আরব্ভ ¶ পৰত্তত্তা, ‘‘উদযব্বযৰন্তানংযেৰ ৰত ধম্মানং উদযব্বযঞাণং উপ্পাদৰযে অদ্দসা’’তি চ, ‘‘ভঙ্গৰন্তানংযেৰ ৰত ভঙ্গানুপস্সনং ভঙ্গং অদ্দসা’’তি চ, ‘‘সভযংযেৰ ৰত ভযতুপট্ঠানস্স ভযতো উপট্ঠিত’’ন্তি চ, ‘‘সাদীনৰেযেৰ ৰত আদীনৰানুপস্সনং আদীনৰং অদ্দসা’’তি চ, ‘‘নিব্বিন্দিতব্বেযেৰ ৰত নিব্বিদাঞাণং নিব্বিন্ন’’ন্তি চ, ‘‘মুঞ্চিতব্বম্হিযেৰ ৰত মুঞ্চিতুকম্যতাঞাণং মুঞ্চিতুকামং জাত’’ন্তি চ, ‘‘পটিসঙ্খাতব্বংযেৰ ৰত পটিসঙ্খাঞাণেন পটিসঙ্খাত’’ন্তি চ, ‘‘উপেক্খিতব্বংযেৰ ৰত সঙ্খারুপেক্খায উপেক্খিত’’ন্তি চ অত্থতো ৰদমানং ৰিয ইমেসঞ্চ অট্ঠন্নং ঞাণানং তথকিচ্চতায অনুলোমেতি, উপরি চ সত্ততিংসায বোধিপক্খিযধম্মানং তায পটিপত্তিযা পত্তব্বত্তা.

যথা হি ধম্মিকো রাজা ৰিনিচ্ছযট্ঠানে নিসিন্নো ৰোহারিকমহামত্তানং ৰিনিচ্ছযং সুত্ৰা অগতিগমনং পহায মজ্ঝত্তো হুত্ৰা ‘‘এৰং হোতূ’’তি অনুমোদমানো তেসঞ্চ ৰিনিচ্ছযস্স অনুলোমেতি, পোরাণস্স চ রাজধম্মস্স, এৰংসম্পদমিদং ৰেদিতব্বং. রাজা ৰিয হি অনুলোমঞাণং, অট্ঠ ৰোহারিকমহামত্তা ৰিয অট্ঠ ঞাণানি, পোরাণো রাজধম্মো ৰিয সত্ততিংস বোধিপক্খিযা. তত্থ যথা রাজা ‘‘এৰং হোতূ’’তি ৰদমানো ৰোহারিকানঞ্চ ৰিনিচ্ছযস্স, রাজধম্মস্স চ অনুলোমেতি, এৰমিদং অনিচ্চাদিৰসেন সঙ্খারে আরব্ভ উপ্পজ্জমানং অট্ঠন্নঞ্চ ঞাণানং তথকিচ্চতায অনুলোমেতি, উপরি চ সত্ততিংসায বোধিপক্খিযধম্মানং. তেনেৰ সচ্চানুলোমিকঞাণন্তি ৰুচ্চতীতি.

অনুলোমঞাণং নিট্ঠিতং.

ৰুট্ঠানগামিনীৰিপস্সনাকথা

৮০৫. ইদঞ্চ পন অনুলোমঞাণং সঙ্খারারম্মণায ৰুট্ঠানগামিনিযা ৰিপস্সনায পরিযোসানং হোতি. সব্বেন সব্বং পন গোত্রভুঞাণং ৰুট্ঠানগামিনিযা ৰিপস্সনায পরিযোসানং. ইদানি তস্সাযেৰ ৰুট্ঠানগামিনিযা ৰিপস্সনায অসম্মোহত্থং অযং সুত্তসংসন্দনা ৰেদিতব্বা.

সেয্যথিদং ¶ ¶ –

অযঞ্হি ৰুট্ঠানগামিনী ৰিপস্সনা সল়াযতনৰিভঙ্গসুত্তে ‘‘অতম্মযতং, ভিক্খৰে, নিস্সায অতম্মযতং আগম্ম যাযং উপেক্খা একত্তা একত্তসিতা, তং পজহথ তং সমতিক্কমথা’’তি (ম. নি. ৩.৩১০) এৰং অতম্মযতাতি ৰুত্তা.

অলগদ্দসুত্তন্তে ‘‘নিব্বিন্দং ৰিরজ্জতি, ৰিরাগা ৰিমুচ্চতী’’তি (ম. নি. ১.২৪৫) এৰং নিব্বিদাতি ৰুত্তা.

সুসিমসুত্তন্তে ‘‘পুব্বে খো, সুসিম, ধম্মট্ঠিতিঞাণং, পচ্ছা নিব্বানে ঞাণ’’ন্তি (সং. নি. ২.৭০) এৰং ধম্মট্ঠিতিঞাণন্তি ৰুত্তা.

পোট্ঠপাদসুত্তন্তে ‘‘সঞ্ঞা খো, পোট্ঠপাদ, পঠমং উপ্পজ্জতি, পচ্ছা ঞাণ’’ন্তি (দী. নি. ১.৪১৬) এৰং সঞ্ঞগ্গন্তি ৰুত্তা.

দসুত্তরসুত্তন্তে ‘‘পটিপদাঞাণদস্সনৰিসুদ্ধি পারিসুদ্ধিপধানিযঙ্গ’’ন্তি (দী. নি. ৩.৩৫৯) এৰং পারিসুদ্ধিপধানিযঙ্গন্তি ৰুত্তা.

পটিসম্ভিদামগ্গে ‘‘যা চ মুঞ্চিতুকম্যতা যা চ পটিসঙ্খানুপস্সনা যা চ সঙ্খারুপেক্খা, ইমে ধম্মা একত্থা ব্যঞ্জনমেৰ নান’’ন্তি (পটি. ম. ১.২২৭) এৰং তীহি নামেহি ৰুত্তা.

পট্ঠানে ‘‘অনুলোমং গোত্রভুস্স, অনুলোমং ৰোদানস্সা’’তি (পট্ঠা. ১.১.৪১৭) এৰং তীহি নামেহি ৰুত্তা.

রথৰিনীতসুত্তন্তে ‘‘কিং পনাৰুসো, পটিপদাঞাণদস্সনৰিসুদ্ধত্থং ভগৰতি ব্রহ্মচরিযং ৰুস্সতী’’তি (ম. নি. ১.২৫৭) এৰং পটিপদাঞাণদস্সনৰিসুদ্ধীতি ৰুত্তা.

ইতিনেকেহি ¶ ¶ নামেহি, কিত্তিতা যা মহেসিনা;

ৰুট্ঠানগামিনী সন্তা, পরিসুদ্ধা ৰিপস্সনা.

ৰুট্ঠাতুকামো সংসার-দুক্খপঙ্কা মহব্ভযা;

করেয্য সততং তত্থ, যোগং পণ্ডিতজাতিকোতি.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

পটিপদাঞাণদস্সনৰিসুদ্ধিনিদ্দেসো নাম

একৰীসতিমো পরিচ্ছেদো.

২২. ঞাণদস্সনৰিসুদ্ধিনিদ্দেসো

পঠমমগ্গঞাণকথা

৮০৬. ইতো ¶ ¶ পরং গোত্রভুঞাণং হোতি, তং মগ্গস্স আৰজ্জনট্ঠানিযত্তা নেৰ পটিপদাঞাণদস্সনৰিসুদ্ধিং ন ঞাণদস্সনৰিসুদ্ধিং ভজতি, অন্তরা অব্বোহারিকমেৰ হোতি. ৰিপস্সনাসোতে পতিতত্তা পন ৰিপস্সনাতি সঙ্খং গচ্ছতি. সোতাপত্তিমগ্গো সকদাগামিমগ্গো অনাগামিমগ্গো অরহত্তমগ্গোতি ইমেসু পন চতূসু মগ্গেসু ঞাণং ঞাণদস্সনৰিসুদ্ধি নাম.

তত্থ পঠমমগ্গঞাণং তাৰ সম্পাদেতুকামেন অঞ্ঞং কিঞ্চি কাতব্বং নাম নত্থি. যঞ্হি অনেন কাতব্বং সিযা, তং অনুলোমাৰসানং ৰিপস্সনং উপ্পাদেন্তেন কতমেৰ. এৰং উপ্পন্নঅনুলোমঞাণস্স পনস্স তেহি তীহিপি অনুলোমঞাণেহি অত্তনো বলানুরূপেন থূলথূলে সচ্চপটিচ্ছাদকে তমম্হি অন্তরধাপিতে সব্বসঙ্খারগতেসু চিত্তং ন পক্খন্দতি, ন সন্তিট্ঠতি, নাধিমুচ্চতি, ন সজ্জতি, ন লগ্গতি, ন বজ্ঝতি. পদুমপলাসতো উদকং ৰিয পতিলীযতি পতিকুটতি পতিৰত্ততি. সব্বং নিমিত্তারম্মণম্পি সব্বং পৰত্তারম্মণম্পি পলিবোধতো উপট্ঠাতি. অথস্স সব্বস্মিং নিমিত্তপৰত্তারম্মণে পলিবোধতো উপট্ঠিতে অনুলোমঞাণস্স আসেৰনন্তে অনিমিত্তং অপ্পৰত্তং ৰিসঙ্খারং নিরোধং নিব্বানং আরম্মণং কুরুমানং পুথুজ্জনগোত্তং পুথুজ্জনসঙ্খং পুথুজ্জনভূমিং অতিক্কমমানং অরিযগোত্তং অরিযসঙ্খং অরিযভূমিং ওক্কমমানং নিব্বানারম্মণে পঠমাৰট্টনপঠমাভোগপঠমসমন্নাহারভূতং মগ্গস্স অনন্তরসমনন্তরাসেৰনউপনিস্সযনত্থিৰিগতৰসেন ছহি আকারেহি পচ্চযভাৰং সাধযমানং সিখাপ্পত্তং ৰিপস্সনায মুদ্ধভূতং অপুনরাৰট্টকং উপ্পজ্জতি গোত্রভুঞাণং.

যং সন্ধায ৰুত্তং –

‘‘কথং ¶ বহিদ্ধা ৰুট্ঠানৰিৰট্টনে পঞ্ঞা গোত্রভুঞাণং? উপ্পাদং অভিভুয্যতীতি গোত্রভু. পৰত্তং…পে… উপাযাসং অভিভুয্যতীতি গোত্রভু. বহিদ্ধা সঙ্খারনিমিত্তং অভিভুয্যতীতি গোত্রভু. অনুপ্পাদং পক্খন্দতীতি গোত্রভু. অপ্পৰত্তং…পে… অনুপাযাসং নিরোধং নিব্বানং পক্খন্দতীতি ¶ গোত্রভু. উপ্পাদং অভিভুয্যিত্ৰা অনুপ্পাদং পক্খন্দতীতি গোত্রভূ’’তি (পটি. ম. ১.৫৯) সব্বং ৰিত্থারেতব্বং.

৮০৭. তত্রাযং একাৰজ্জনেন একৰীথিযং পৰত্তমানানম্পি অনুলোমগোত্রভূনং নানারম্মণে পৰত্তনাকারদীপিকা উপমা – যথা হি মহামাতিকং লঙ্ঘিত্ৰা পরতীরে পতিট্ঠাতুকামো পুরিসো ৰেগেন ধাৰিত্ৰা মাতিকায ওরিমতীরে রুক্খসাখায বন্ধিত্ৰা ওলম্বিতং রজ্জুং ৰা যট্ঠিং ৰা গহেত্ৰা উল্লঙ্ঘিত্ৰা পরতীরনিন্নপোণপব্ভারকাযো হুত্ৰা পরতীরস্স উপরিভাগং পত্তো তং মুঞ্চিত্ৰা ৰেধমানো পরতীরে পতিত্ৰা সণিকং পতিট্ঠাতি, এৰমেৰাযং যোগাৰচরোপি ভৰযোনিগতিট্ঠিতিনিৰাসানং পরতীরভূতে নিব্বানে পতিট্ঠাতুকামো উদযব্বযানুপস্সনাদিনা ৰেগেন ধাৰিত্ৰা অত্তভাৰরুক্খসাখায বন্ধিত্ৰা ওলম্বিতং রূপরজ্জুং ৰা ৰেদনাদীসু অঞ্ঞতরদণ্ডং ৰা অনিচ্চন্তি ৰা দুক্খন্তি ৰা অনত্তাতি ৰাতি অনুলোমাৰজ্জনেন গহেত্ৰা তং অমুঞ্চমানোৰ পঠমেন অনুলোমচিত্তেন উল্লঙ্ঘিত্ৰা দুতিযেন পরতীরনিন্নপোণপব্ভারকাযো ৰিয নিব্বাননিন্নপোণপব্ভারমানসো হুত্ৰা ততিযেন পরতীরস্স উপরিভাগং পত্তো ৰিয ইদানি পত্তব্বস্স নিব্বানস্স আসন্নো হুত্ৰা তস্স চিত্তস্স নিরোধেন তং সঙ্খারারম্মণং মুঞ্চিত্ৰা গোত্রভুচিত্তেন ৰিসঙ্খারে পরতীরভূতে নিব্বানে পততি. একারম্মণে পন অলদ্ধাসেৰনতায ৰেধমানো সো পুরিসো ৰিয ন তাৰ সুপ্পতিট্ঠিতো হোতি, ততো মগ্গঞাণেন পতিট্ঠাতীতি.

৮০৮. তত্থ অনুলোমং সচ্চপটিচ্ছাদকং কিলেসতমং ৰিনোদেতুং সক্কোতি, ন নিব্বানমারম্মণং কাতুং. গোত্রভু নিব্বানমেৰ আরম্মণং কাতুং সক্কোতি, ন সচ্চপটিচ্ছাদকং তমং ৰিনোদেতুং. তত্রাযং উপমা – একো কির চক্খুমা পুরিসো ‘‘নক্খত্তযোগং জানিস্সামী’’তি রত্তিভাগে নিক্খমিত্ৰা চন্দং পস্সিতুং উদ্ধং উল্লোকেসি, তস্স ৰলাহকেহি পটিচ্ছন্নত্তা চন্দো ন পঞ্ঞাযিত্থ. অথেকো ৰাতো উট্ঠহিত্ৰা থূলথূলে ৰলাহকে ৰিদ্ধংসেতি. অপরো মজ্ঝিমে, অপরো সুখুমেতি. ততো সো পুরিসো ৰিগতৰলাহকে নভে চন্দং দিস্ৰা নক্খত্তযোগং অঞ্ঞাসি.

তত্থ ¶ ¶ তযো ৰলাহকা ৰিয সচ্চপটিচ্ছাদকথূলমজ্ঝিমসুখুমং কিলেসন্ধকারং, তযো ৰাতা ৰিয তীণি অনুলোমচিত্তানি, চক্খুমা পুরিসো ৰিয গোত্রভুঞাণং, চন্দো ৰিয নিব্বানং, একেকস্স ৰাতস্স যথাক্কমেন ৰলাহকৰিদ্ধংসনং ৰিয একেকস্স অনুলোমচিত্তস্স সচ্চপটিচ্ছাদকতমৰিনোদনং, ৰিগতৰলাহকে নভে তস্স পুরিসস্স ৰিসুদ্ধচন্দদস্সনং ৰিয ৰিগতে সচ্চপটিচ্ছাদকে তমে গোত্রভুঞাণস্স ৰিসুদ্ধনিব্বানদস্সনং.

যথেৰ হি তযো ৰাতা চন্দপটিচ্ছাদকে ৰলাহকেযেৰ ৰিদ্ধংসেতুং সক্কোন্তি, ন চন্দং দট্ঠুং, এৰং অনুলোমানি সচ্চপটিচ্ছাদকং তমঞ্ঞেৰ ৰিনোদেতুং সক্কোন্তি, ন নিব্বানং দট্ঠুং. যথা সো পুরিসো চন্দমেৰ দট্ঠুং সক্কোতি, ন ৰলাহকে ৰিদ্ধংসেতুং, এৰং গোত্রভুঞাণং নিব্বানমেৰ দট্ঠুং সক্কোতি, ন কিলেসতমং ৰিনোদেতুং. তেনেৰ চেতং মগ্গস্স আৰজ্জনন্তি ৰুচ্চতি. তঞ্হি অনাৰজ্জনম্পি সমানং আৰজ্জনট্ঠানে ঠত্ৰা ‘‘এৰং নিব্বত্তাহী’’তি মগ্গস্স সঞ্ঞং দত্ৰা ৰিয নিরুজ্ঝতি. মগ্গোপি তেন দিন্নসঞ্ঞং অমুঞ্চিত্ৰাৰ অৰীচিসন্ততিৰসেন তং ঞাণং অনুপ্পবন্ধমানো অনিব্বিদ্ধপুব্বং অপদালিতপুব্বং লোভক্খন্ধং দোসক্খন্ধং মোহক্খন্ধং নিব্বিজ্ঝমানোৰ পদালযমানোৰ নিব্বত্ততি.

৮০৯. তত্রাযং উপমা – একো কির ইস্সাসো অট্ঠউসভমত্তে পদেসে ফলকসতং ঠপাপেত্ৰা ৰত্থেন মুখং ৰেঠেত্ৰা সরং সন্নহিত্ৰা চক্কযন্তে অট্ঠাসি. অঞ্ঞো পুরিসো চক্কযন্তং আৰিজ্ঝিত্ৰা যদা ইস্সাসস্স ফলকং অভিমুখং হোতি, তদা তত্থ দণ্ডকেন সঞ্ঞং দেতি. ইস্সাসো দণ্ডকসঞ্ঞং অমুঞ্চিত্ৰাৰ সরং খিপিত্ৰা ফলকসতং নিব্বিজ্ঝতি. তত্থ দণ্ডকসঞ্ঞং ৰিয গোত্রভুঞাণং, ইস্সাসো ৰিয মগ্গঞাণং. ইস্সাসস্স দণ্ডকসঞ্ঞং অমুঞ্চিত্ৰাৰ ফলকসতনিব্বিজ্ঝনং ৰিয মগ্গঞাণস্স গোত্রভুঞাণেন দিন্নসঞ্ঞং অমুঞ্চিত্ৰাৰ নিব্বানং আরম্মণং কত্ৰা অনিব্বিদ্ধপুব্বানং অপদালিতপুব্বানং লোভদোসমোহক্খন্ধানং নিব্বিজ্ঝনপদালনং.

৮১০. ন কেৰলঞ্চেস মগ্গো লোভক্খন্ধাদীনং নিব্বিজ্ঝনমেৰ করোতি, অপিচ খো অনমতগ্গসংসারৰট্টদুক্খসমুদ্দং সোসেতি, সব্বঅপাযদ্ৰারানি পিদহতি, সত্তন্নং অরিযধনানং সম্মুখীভাৰং করোতি, অট্ঠঙ্গিকং মিচ্ছামগ্গং পজহতি, সব্বৰেরভযানি ৰূপসমেতি, সম্মাসম্বুদ্ধস্স ওরসপুত্তভাৰং উপনেতি ¶ ¶ , অঞ্ঞেসঞ্চ অনেকসতানং আনিসংসানং পটিলাভায সংৰত্ততীতি এৰং অনেকানিসংসদাযকেন সোতাপত্তিমগ্গেন সম্পযুত্তং ঞাণং সোতাপত্তিমগ্গে ঞাণন্তি.

পঠমমগ্গঞাণং নিট্ঠিতং.

সোতাপন্নপুগ্গলকথা

৮১১. ইমস্স পন ঞাণস্স অনন্তরং তস্সেৰ ৰিপাকভূতানি দ্ৰে তীণি ৰা ফলচিত্তানি উপ্পজ্জন্তি. অনন্তরৰিপাকত্তাযেৰ হি লোকুত্তরকুসলানং ‘‘সমাধিমানন্তরিকঞ্ঞমাহূ’’তি (খু. পা. ৬.৫) চ ‘‘দন্ধং আনন্তরিকং পাপুণাতি আসৰানং খযাযা’’তি (অ. নি. ৪.১৬২) চ আদি ৰুত্তং. কেচি পন একং দ্ৰে তীণি চত্তারি ৰা ফলচিত্তানীতি ৰদন্তি, তং ন গহেতব্বং.

অনুলোমস্স হি আসেৰনন্তে গোত্রভুঞাণং উপ্পজ্জতি. তস্মা সব্বন্তিমেন পরিচ্ছেদেন দ্ৰীহি অনুলোমচিত্তেহি ভৰিতব্বং. ন হি একং আসেৰনপচ্চযং লভতি, সত্তচিত্তপরমা চ একাৰজ্জনৰীথি. তস্মা যস্স দ্ৰে অনুলোমানি, তস্স ততিযং গোত্রভু চতুত্থং মগ্গচিত্তং তীণি ফলচিত্তানি হোন্তি. যস্স তীণি অনুলোমানি, তস্স চতুত্থং গোত্রভু পঞ্চমং মগ্গচিত্তং দ্ৰে ফলচিত্তানি হোন্তি. তেন ৰুত্তং ‘‘দ্ৰে তীণি ৰা ফলচিত্তানি উপ্পজ্জন্তী’’তি.

কেচি পন যস্স চত্তারি অনুলোমানি, তস্স পঞ্চমং গোত্রভু ছট্ঠং মগ্গচিত্তং একং ফলচিত্তন্তি ৰদন্তি, তং পন যস্মা চতুত্থং পঞ্চমং ৰা অপ্পেতি, ন ততো পরং আসন্নভৰঙ্গত্তাতি পটিক্খিত্তং. তস্মা ন সারতো পচ্চেতব্বং.

৮১২. এত্তাৰতা চ পনেস সোতাপন্নো নাম দুতিযো অরিযপুগ্গলো হোতি. ভুসং পমত্তোপি হুত্ৰা সত্তক্খত্তুং দেৰেসু চ মনুস্সেসু চ সন্ধাৰিত্ৰা সংসরিত্ৰা দুক্খস্সন্তস্স করণসমত্থো হোতি. ফলপরিযোসানে পনস্স চিত্তং ভৰঙ্গং ওতরতি, ততো ভৰঙ্গং উপচ্ছিন্দিত্ৰা মগ্গপচ্চৰেক্খণত্থায উপ্পজ্জতি মনোদ্ৰারাৰজ্জনং, তস্মিং নিরুদ্ধে পটিপাটিযা সত্ত মগ্গপচ্চৰেক্খণজৰনানীতি. পুন ভৰঙ্গং ওতরিত্ৰা তেনেৰ নযেন ¶ ফলাদীনং পচ্চৰেক্খণত্থায আৰজ্জনাদীনি ¶ উপ্পজ্জন্তি. যেসং উপ্পত্তিযা এস মগ্গং পচ্চৰেক্খতি, ফলং পচ্চৰেক্খতি, পহীনকিলেসে পচ্চৰেক্খতি, অৰসিট্ঠকিলেসে পচ্চৰেক্খতি, নিব্বানং পচ্চৰেক্খতি.

সো হি ‘‘ইমিনা ৰতাহং মগ্গেন আগতো’’তি মগ্গং পচ্চৰেক্খতি, ততো ‘‘অযং মে আনিসংসো লদ্ধো’’তি ফলং পচ্চৰেক্খতি. ততো ‘‘ইমে নাম মে কিলেসা পহীনা’’তি পহীনকিলেসে পচ্চৰেক্খতি. ততো ‘‘ইমে নাম মে কিলেসা অৰসিট্ঠা’’তি উপরিমগ্গত্তযৰজ্ঝে কিলেসে পচ্চৰেক্খতি. অৰসানে চ ‘‘অযং মে ধম্মো আরম্মণতো পটিৰিদ্ধো’’তি অমতং নিব্বানং পচ্চৰেক্খতি. ইতি সোতাপন্নস্স অরিযসাৰকস্স পঞ্চ পচ্চৰেক্খণানি হোন্তি. যথা চ সোতাপন্নস্স, এৰং সকদাগামিঅনাগামীনম্পি. অরহতো পন অৰসিট্ঠকিলেসপচ্চৰেক্খণং নাম নত্থীতি. এৰং সব্বানিপি একূনৰীসতি পচ্চৰেক্খণানি নাম.

উক্কট্ঠপরিচ্ছেদোযেৰ চেসো. পহীনাৰসিট্ঠকিলেসপচ্চৰেক্খণঞ্হি সেক্খানম্পি হোতি ৰা ন ৰা. তস্স হি পচ্চৰেক্খণস্স অভাৰেনেৰ মহানামো ভগৰন্তং পুচ্ছি ‘‘কোসু নাম মে ধম্মো অজ্ঝত্তং অপ্পহীনো, যেন মে একদা লোভধম্মাপি চিত্তং পরিযাদায তিট্ঠন্তী’’তি (ম. নি. ১.১৭৫) সব্বং ৰিত্থারতো ৰেদিতব্বং.

দুতিযমগ্গঞাণকথা

৮১৩. এৰং পচ্চৰেক্খিত্ৰা পন সো সোতাপন্নো অরিযসাৰকো তস্মিঞ্ঞেৰ ৰা আসনে নিসিন্নো, অপরেন ৰা সমযেন কামরাগব্যাপাদানং তনুভাৰায দুতিযায ভূমিযা পত্তিযা যোগং করোতি. সো ইন্দ্রিযবলবোজ্ঝঙ্গানি সমোধানেত্ৰা তদেৰ রূপৰেদনাসঞ্ঞাসঙ্খারৰিঞ্ঞাণভেদং সঙ্খারগতং অনিচ্চং দুক্খমনত্তাতি ঞাণেন পরিমদ্দতি, পরিৰত্তেতি, ৰিপস্সনাৰীথিং ওগাহতি. তস্সেৰং পটিপন্নস্স ৰুত্তনযেনেৰ সঙ্খারুপেক্খাৰসানে একাৰজ্জনেন অনুলোমগোত্রভুঞাণেসু উপ্পন্নেসু গোত্রভুঅনন্তরং সকদাগামিমগ্গো উপ্পজ্জতি. তেন সম্পযুত্তং ঞাণং সকদাগামিমগ্গে ঞাণন্তি.

দুতিযঞাণং নিট্ঠিতং.

ততিযমগ্গঞাণকথা

৮১৪. ইমস্সাপি ¶ ¶ ঞাণস্স অনন্তরং ৰুত্তনযেনেৰ ফলচিত্তানি ৰেদিতব্বানি. এত্তাৰতা চেস সকদাগামী নাম চতুত্থো অরিযপুগ্গলো হোতি সকিংদেৰ ইমং লোকং আগন্ত্ৰা দুক্খস্সন্তকরণসমত্থো. ততো পরং পচ্চৰেক্খণং ৰুত্তনযমেৰ.

এৰং পচ্চৰেক্খিত্ৰা চ সো সকদাগামী অরিযসাৰকো তস্মিঞ্ঞেৰ ৰা আসনে নিসিন্নো অপরেন ৰা সমযেন কামরাগব্যাপাদানং অনৰসেসপ্পহানায ততিযায ভূমিযা পত্তিযা যোগং করোতি, সো ইন্দ্রিযবলবোজ্ঝঙ্গানি সমোধানেত্ৰা তদেৰ সঙ্খারগতং অনিচ্চং দুক্খমনত্তাতি ঞাণেন পরিমদ্দতি, পরিৰত্তেতি, ৰিপস্সনাৰীথিং ওগাহতি. তস্সেৰং পটিপন্নস্স ৰুত্তনযেনেৰ সঙ্খারুপেক্খাৰসানে একাৰজ্জনেন অনুলোমগোত্রভুঞাণেসু উপ্পন্নেসু গোত্রভুঅনন্তরং অনাগামিমগ্গো উপ্পজ্জতি, তেন সম্পযুত্তং ঞাণং অনাগামিমগ্গে ঞাণন্তি.

ততিযঞাণং নিট্ঠিতং.

চতুত্থমগ্গঞাণকথা

৮১৫. ইমস্সপি ঞাণস্স অনন্তরং ৰুত্তনযেনেৰ ফলচিত্তানি ৰেদিতব্বানি. এত্তাৰতা চেস অনাগামী নাম ছট্ঠো অরিযপুগ্গলো হোতি ওপপাতিকো তত্থপরিনিব্বাযী অনাৰত্তিধম্মো পটিসন্ধিৰসেন ইমং লোকং পুন অনাগন্তা. ততো পরং পচ্চৰেক্খণং ৰুত্তনযমেৰ.

এৰং পচ্চৰেক্খিত্ৰা চ সো অনাগামী অরিযসাৰকো তস্মিঞ্ঞেৰ ৰা আসনে নিসিন্নো, অপরেন ৰা সমযেন রূপারূপরাগমানউদ্ধচ্চঅৰিজ্জানং অনৰসেসপ্পহানায চতুত্থায ভূমিযা পত্তিযা যোগং করোতি, সো ইন্দ্রিযবলবোজ্ঝঙ্গানি সমোধানেত্ৰা তদেৰ সঙ্খারগতং অনিচ্চং দুক্খমনত্তাতি ঞাণেন পরিমদ্দতি, পরিৰত্তেতি, ৰিপস্সনাৰীথিং ওগাহতি. তস্সেৰং পটিপন্নস্স ৰুত্তনযেনেৰ সঙ্খারুপেক্খাৰসানে একাৰজ্জনেন অনুলোমগোত্রভুঞাণেসু ¶ উপ্পন্নেসু গোত্রভুঅনন্তরং অরহত্তমগ্গো উপ্পজ্জতি, তেন সম্পযুত্তং ঞাণং অরহত্তমগ্গে ঞাণন্তি.

চতুত্থঞাণং নিট্ঠিতং.

অরহন্তপুগ্গলকথা

৮১৬. ইমস্সপি ¶ ঞাণস্স অনন্তরং ৰুত্তনযেনেৰ ফলচিত্তানি ৰেদিতব্বানি. এত্তাৰতা চেস অরহা নাম অট্ঠমো অরিযপুগ্গলো হোতি মহাখীণাসৰো অন্তিমদেহধারী ওহিতভারো অনুপ্পত্তসদত্থো পরিক্খীণভৰসংযোজনো সম্মাদঞ্ঞা ৰিমুত্তো সদেৰকস্স লোকস্স অগ্গদক্খিণেয্যোতি.

ইতি যং তং ৰুত্তং ‘‘সোতাপত্তিমগ্গো সকদাগামিমগ্গো অনাগামিমগ্গো অরহত্তমগ্গোতি ইমেসু পন চতূসু মগ্গেসু ঞাণং ঞাণদস্সনৰিসুদ্ধি নামা’’তি, তং ইমানি ইমিনা অনুক্কমেন পত্তব্বানি চত্তারি ঞাণানি সন্ধায ৰুত্তং.

বোধিপক্খিযকথা

৮১৭. ইদানি ইমিস্সাযেৰ চতুঞাণায ঞাণদস্সনৰিসুদ্ধিযা আনুভাৰৰিজাননত্থং –

পরিপুণ্ণবোধিপক্খিয, ভাৰো ৰুট্ঠানবলসমাযোগো;

যে যেন পহাতব্বা, ধম্মা তেসং পহানঞ্চ.

কিচ্চানি পরিঞ্ঞাদীনি, যানি ৰুত্তানি অভিসমযকালে;

তানি চ যথাসভাৰেন, জানিতব্বানি সব্বানীতি.

৮১৮. তত্থ পরিপুণ্ণবোধিপক্খিয, ভাৰোতি বোধিপক্খিযানং পরিপুণ্ণভাৰো. চত্তারো সতিপট্ঠানা, চত্তারো সম্মপ্পধানা, চত্তারো ইদ্ধিপাদা, পঞ্চিন্দ্রিযানি, পঞ্চ বলানি, সত্ত বোজ্ঝঙ্গা, অরিযো অট্ঠঙ্গিকো মগ্গোতি হি ইমে সত্ততিংস ধম্মা বুজ্ঝনট্ঠেন বোধোতি লদ্ধনামস্স অরিযমগ্গস্স পক্খে ভৰত্তা বোধিপক্খিযা নাম. পক্খে ভৰত্তাতি উপকারভাৰে ঠিতত্তা.

৮১৯. তেসু ¶ তেসু আরম্মণেসু ওক্খন্দিত্ৰা পক্খন্দিত্ৰা উপট্ঠানতো পট্ঠানং. সতিযেৰ পট্ঠানং সতিপট্ঠানং. কাযৰেদনাচিত্তধম্মেসু পনস্সা অসুভ-দুক্খ-অনিচ্চ-অনত্তাকারগহণৰসেন ¶ সুভ-সুখ-নিচ্চ-অত্ত-সঞ্ঞাপহানকিচ্চসাধনৰসেন চ পৰত্তিতো চতুধা ভেদো হোতি. তস্মা চত্তারো সতিপট্ঠানাতি ৰুচ্চন্তি.

৮২০. পদহন্তি এতেনাতি পধানং. সোভনং পধানং সম্মপ্পধানং. সম্মা ৰা পদহন্তি এতেনাতি সম্মপ্পধানং. সোভনং ৰা তং কিলেসৰিরূপত্তৰিরহতো পধানঞ্চ হিতসুখনিপ্ফাদকত্তেন সেট্ঠভাৰাৰহনতো পধানভাৰকারণতো চাতি সম্মপ্পধানং. ৰীরিযস্সেতং অধিৰচনং. তযিদং উপ্পন্নানুপ্পন্নানং অকুসলানং পহানানুপ্পত্তিকিচ্চং অনুপ্পন্নুপ্পন্নানঞ্চ কুসলানং উপ্পত্তিট্ঠিতিকিচ্চং সাধযতীতি চতুব্বিধং হোতি, তস্মা চত্তারো সম্মপ্পধানাতি ৰুচ্চন্তি.

৮২১. পুব্বে ৰুত্তেন ইজ্ঝনট্ঠেন ইদ্ধি. তস্সা সম্পযুত্তায পুব্বঙ্গমট্ঠেন ফলভূতায পুব্বভাগকারণট্ঠেন চ ইদ্ধিযা পাদোতি ইদ্ধিপাদো. সো ছন্দাদিৰসেন চতুব্বিধো হোতি, তস্মা চত্তারো ইদ্ধিপাদাতি ৰুচ্চন্তি. যথাহ – ‘‘চত্তারো ইদ্ধিপাদা ছন্দিদ্ধিপাদো চিত্তিদ্ধিপাদো ৰীরিযিদ্ধিপাদো ৰীমংসিদ্ধিপাদো’’তি (ৰিভ. ৪৫৭). ইমে লোকুত্তরাৰ. লোকিযা পন ‘‘ছন্দঞ্চে ভিক্খু অধিপতিং করিত্ৰা লভতি সমাধিং, লভতি চিত্তস্স একগ্গতং. অযং ৰুচ্চতি ছন্দসমাধী’’তিআদিৰচনতো (ৰিভ. ৪৩২) ছন্দাদিঅধিপতিৰসেন পটিলদ্ধধম্মাপি হোন্তি.

৮২২. অস্সদ্ধিযকোসজ্জপমাদৰিক্খেপসম্মোহানং অভিভৰনতো অভিভৰনসঙ্খাতেন অধিপতিযট্ঠেন ইন্দ্রিযং. অস্সদ্ধিযাদীহি চ অনভিভৰনীযতো অকম্পিযট্ঠেন বলং. তদুভযম্পি সদ্ধাদিৰসেন পঞ্চৰিধং হোতি, তস্মা পঞ্চিন্দ্রিযানি পঞ্চ বলানীতি ৰুচ্চন্তি.

৮২৩. বুজ্ঝনকসত্তস্স পন অঙ্গভাৰেন সতিআদযো সত্ত বোজ্ঝঙ্গা. নিয্যানিকট্ঠেন চ সম্মাদিট্ঠিআদযো অট্ঠ মগ্গঙ্গা হোন্তি. তেন ৰুত্তং ‘‘সত্ত বোজ্ঝঙ্গা অরিযো অট্ঠঙ্গিকো মগ্গো’’তি.

৮২৪. ইতি ¶ ইমে সত্ততিংস বোধিপক্খিযধম্মা পুব্বভাগে লোকিযৰিপস্সনায ৰত্তমানায চুদ্দসৰিধেন কাযং পরিগ্গণ্হতো চ কাযানুপস্সনাসতিপট্ঠানং, নৰৰিধেন ৰেদনং পরিগ্গণ্হতো চ ৰেদনানুপস্সনাসতিপট্ঠানং, সোল়সৰিধেন চিত্তং পরিগ্গণ্হতো চ চিত্তানুপস্সনাসতিপট্ঠানং, পঞ্চৰিধেন ধম্মে পরিগ্গণ্হতো চ ধম্মানুপস্সনাসতিপট্ঠানং. ইমস্মিং অত্তভাৰে ¶ অনুপ্পন্নপুব্বং পরস্স উপ্পন্নং অকুসলং দিস্ৰা ‘‘যথা পটিপন্নস্সেতং উপ্পন্নং, ন তথা পটিপজ্জিস্সামি এৰং মে এতং নুপ্পজ্জিস্সতী’’তি, তস্স অনুপ্পাদায ৰাযমনকালে পঠমং সম্মপ্পধানং. অত্তনো সমুদাচারপ্পত্তং অকুসলং দিস্ৰা তস্স পহানায ৰাযমনকালে দুতিযং. ইমস্মিং অত্তভাৰে অনুপ্পন্নপুব্বং ঝানং ৰা ৰিপস্সনং ৰা উপ্পাদেতুং ৰাযমন্তস্স ততিযং. উপ্পন্নং যথা ন পরিহাযতি, এৰং পুনপ্পুনং উপ্পাদেন্তস্স চতুত্থং সম্মপ্পধানং. ছন্দং ধুরং কত্ৰা কুসলুপ্পাদনকালে ছন্দিদ্ধিপাদো. মিচ্ছাৰাচায ৰিরমণকালে সম্মাৰাচাতি এৰং নানাচিত্তেসু লব্ভন্তি. ইমেসং পন চতুন্নং ঞাণানং উপ্পত্তিকালে একচিত্তে লব্ভন্তি. ফলক্খণে ঠপেত্ৰা চত্তারো সম্মপ্পধানে অৰসেসা তেত্তিংস লব্ভন্তি.

৮২৫. এৰং একচিত্তে লব্ভমানেসু চেতেসু একাৰ নিব্বানারম্মণা সতি কাযাদীসু সুভসঞ্ঞাদিপ্পহানকিচ্চসাধনৰসেন চত্তারো সতিপট্ঠানাতি ৰুচ্চতি. একমেৰ চ ৰীরিযং অনুপ্পন্নানং অনুপ্পাদাদিকিচ্চসাধনৰসেন চত্তারো সম্মপ্পধানাতি ৰুচ্চতি. সেসেসু পন হাপনৰড্ঢনং নত্থি.

৮২৬. অপিচ তেসু –

নৰ একৰিধা একো, দ্ৰেধাথ চতু পঞ্চধা;

অট্ঠধা নৰধা চেৰ, ইতি ছদ্ধা ভৰন্তি তে.

নৰ একৰিধাতি ছন্দো, চিত্তং, পীতি, পস্সদ্ধি, উপেক্খা, সঙ্কপ্পো, ৰাচা, কম্মন্তো, আজীৰোতি ইমে নৰ ছন্দিদ্ধিপাদাদিৰসেন একৰিধাৰ হোন্তি, ন অঞ্ঞং কোট্ঠাসং ভজন্তি. একো দ্ৰেধাতি সদ্ধা ইন্দ্রিয, বলৰসেন দ্ৰেধা ঠিতা. অথ চতু পঞ্চধাতি অথঞ্ঞো একো চতুধা, অঞ্ঞো পঞ্চধা ঠিতোতি অত্থো. তত্থ সমাধি একো ইন্দ্রিয, বল, বোজ্ঝঙ্গ, মগ্গঙ্গৰসেন চতুধা ঠিতো. পঞ্ঞা তেসঞ্চ চতুন্নং ইদ্ধিপাদকোট্ঠাসস্স চ ¶ ৰসেন পঞ্চধা. অট্ঠধা নৰধা চেৰাতি অপরো একো অট্ঠধা, একো নৰধা ঠিতোতি অত্থো. চতুসতিপট্ঠান, ইন্দ্রিয, বল, বোজ্ঝঙ্গ, মগ্গঙ্গৰসেন সতি অট্ঠধা ঠিতা. চতুসম্মপ্পধান, ইদ্ধিপাদ, ইন্দ্রিয, বল, বোজ্ঝঙ্গ, মগ্গঙ্গৰসেন ৰীরিযং নৰধাতি. এৰং –

চুদ্দসেৰ ¶ অসম্ভিন্না, হোন্তেতে বোধিপক্খিযা;

কোট্ঠাসতো সত্তৰিধা, সত্ততিংসপ্পভেদতো.

সকিচ্চনিপ্ফাদনতো, সরূপেন চ ৰুত্তিতো;

সব্বেৰ অরিযমগ্গস্স, সম্ভৰে সম্ভৰন্তি তেতি.

এৰং তাৰেত্থ পরিপুণ্ণবোধিপক্খিযভাৰো জানিতব্বো.

ৰুট্ঠানবলসমাযোগকথা

৮২৭. ৰুট্ঠানবলসমাযোগোতি ৰুট্ঠানঞ্চেৰ বলসমাযোগো চ. লোকিযৰিপস্সনা হি নিমিত্তারম্মণত্তা চেৰ পৰত্তিকারণস্স চ সমুদযস্স অসমুচ্ছিন্দনতো নেৰ নিমিত্তা ন পৰত্তা ৰুট্ঠাতি. গোত্রভুঞাণং সমুদযস্স অসমুচ্ছিন্দনতো পৰত্তা ন ৰুট্ঠাতি. নিব্বানারম্মণতো পন নিমিত্তা ৰুট্ঠাতীতি একতো ৰুট্ঠানং হোতি. তেনাহ ‘‘বহিদ্ধাৰুট্ঠানৰিৰট্টনে পঞ্ঞা গোত্রভুঞাণ’’ন্তি (পটি. ম. মাতিকা ১.১০). তথা ‘‘উপ্পাদা ৰিৰট্টিত্ৰা অনুপ্পাদং পক্খন্দতীতি গোত্রভু, পৰত্তা ৰিৰট্টিত্ৰা’’তি (পটি. ম. ১.৫৯) সব্বং ৰেদিতব্বং. ইমানি পন চত্তারিপি ঞাণানি অনিমিত্তারম্মণত্তা নিমিত্ততো ৰুট্ঠহন্তি, সমুদযস্স সমুচ্ছিন্দনতো পৰত্তা ৰুট্ঠহন্তীতি দুভতো ৰুট্ঠানানি হোন্তি.

তেন ৰুত্তং –

‘‘কথং দুভতো ৰুট্ঠানৰিৰট্টনে পঞ্ঞা মগ্গে ঞাণং?

‘‘সোতাপত্তিমগ্গক্খণে দস্সনট্ঠেন সম্মাদিট্ঠি মিচ্ছাদিট্ঠিযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি দুভতো ৰুট্ঠানৰিৰট্টনে পঞ্ঞা মগ্গে ঞাণং. অভিনিরোপনট্ঠেন সম্মাসঙ্কপ্পো মিচ্ছাসঙ্কপ্পা…পে… পরিগ্গহট্ঠেন সম্মাৰাচা মিচ্ছাৰাচায. সমুট্ঠানট্ঠেন সম্মাকম্মন্তো. ৰোদানট্ঠেন সম্মাআজীৰো. পগ্গহট্ঠেন সম্মাৰাযামো ¶ . উপট্ঠানট্ঠেন সম্মাসতি. অৰিক্খেপট্ঠেন সম্মাসমাধি মিচ্ছাসমাধিতো ৰুট্ঠাতি, তদনুৰত্তককিলেসেহি চ ¶ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি ‘দুভতো ৰুট্ঠানৰিৰট্টনে পঞ্ঞা মগ্গে ঞাণ’ন্তি.

‘‘সকদাগামিমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি ওল়ারিকা কামরাগসংযোজনা পটিঘসংযোজনা ওল়ারিকা কামরাগানুসযা পটিঘানুসযা ৰুট্ঠাতি…পে….

‘‘অনাগামিমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি অনুসহগতা কামরাগসংযোজনা পটিঘসংযোজনা অনুসহগতা কামরাগানুসযা পটিঘানুসযা ৰুট্ঠাতি…পে….

‘‘অরহত্তমগ্গক্খণে দস্সনট্ঠেন সম্মাদিট্ঠি…পে… অৰিক্খেপট্ঠেন সম্মাসমাধি রূপরাগা অরূপরাগা মানা উদ্ধচ্চা অৰিজ্জায মানানুসযা ভৰরাগানুসযা অৰিজ্জানুসযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তেন ৰুচ্চতি ‘দুভতো ৰুট্ঠানৰিৰট্টনে পঞ্ঞা মগ্গে ঞাণ’’’ন্তি (পটি. ম. ১.৬১).

৮২৮. লোকিযানঞ্চ অট্ঠন্নং সমাপত্তীনং ভাৰনাকালে সমথবলং অধিকং হোতি. অনিচ্চানুপস্সনাদীনং ভাৰনাকালে ৰিপস্সনাবলং. অরিযমগ্গক্খণে পন যুগনদ্ধা তে ধম্মা পৰত্তন্তি অঞ্ঞমঞ্ঞং অনতিৰত্তনট্ঠেন. তস্মা ইমেসু চতূসুপি ঞাণেসু উভযবলসমাযোগো হোতি. যথাহ –

‘‘উদ্ধচ্চসহগতকিলেসেহি চ খন্ধেহি চ ৰুট্ঠহতো চিত্তস্স একগ্গতা অৰিক্খেপো সমাধি নিরোধগোচরো, অৰিজ্জাসহগতকিলেসেহি চ খন্ধেহি চ ৰুট্ঠহতো অনুপস্সনট্ঠেন ৰিপস্সনা নিরোধগোচরা. ইতি ৰুট্ঠানট্ঠেন সমথৰিপস্সনা একরসা ¶ হোন্তি, যুগনদ্ধা হোন্তি, অঞ্ঞমঞ্ঞং নাতিৰত্তন্তীতি. তেন ৰুচ্চতি ৰুট্ঠানট্ঠেন সমথৰিপস্সনং যুগনদ্ধং ভাৰেতী’’তি (পটি. ম. ২.৫).

এৰমেত্থ ৰুট্ঠানবলসমাযোগো ৰেদিতব্বো.

পহাতব্বধম্মপহানকথা

৮২৯. যে ¶ যেন পহাতব্বা ধম্মা, তেসং পহানঞ্চাতি ইমেসু পন চতূসু ঞাণেসু যে ধম্মা যেন ঞাণেন পহাতব্বা, তেসং পহানঞ্চ জানিতব্বং. এতানি হি যথাযোগং সংযোজনকিলেসমিচ্ছত্তলোকধম্মমচ্ছরিযৰিপল্লাসগন্থঅগতিআসৰওঘযোগনীৰরণপরামাসউপাদানঅনুসযমলঅকুসলকম্মপথচিত্তুপ্পাদসঙ্খাতানং ধম্মানং পহানকরানি.

তত্থ সংযোজনানীতি খন্ধেহি খন্ধানং ফলেন কম্মস্স দুক্খেন ৰা সত্তানং সংযোজকত্তা রূপরাগাদযো দস ধম্মা ৰুচ্চন্তি. যাৰঞ্হি তে, তাৰ এতেসং অনুপরমোতি. তত্রাপি রূপরাগো অরূপরাগো মানো উদ্ধচ্চং অৰিজ্জাতি ইমে পঞ্চ উদ্ধংনিব্বত্তনকখন্ধাদিসংযোজকত্তা উদ্ধংভাগিযসংযোজনানি নাম. সক্কাযদিট্ঠি ৰিচিকিচ্ছা সীলব্বতপরামাসো কামরাগো পটিঘোতি ইমে পঞ্চ অধোনিব্বত্তনকখন্ধাদিসংযোজকত্তা অধোভাগিযসংযোজনানি নাম.

কিলেসাতি সযং সংকিলিট্ঠত্তা সম্পযুত্তধম্মানঞ্চ সংকিলেসিকত্তা লোভো দোসো মোহো মানো দিট্ঠি ৰিচিকিচ্ছা থিনং উদ্ধচ্চং অহিরিকং অনোত্তপ্পন্তি ইমে দস ধম্মা.

মিচ্ছত্তাতি মিচ্ছাপৰত্তনতো মিচ্ছাদিট্ঠি মিচ্ছাসঙ্কপ্পো মিচ্ছাৰাচা মিচ্ছাকম্মন্তো মিচ্ছাআজীৰো মিচ্ছাৰাযামো মিচ্ছাসতি মিচ্ছাসমাধীতি ইমে অট্ঠ ধম্মা. মিচ্ছাৰিমুত্তিমিচ্ছাঞাণেহি ৰা সদ্ধিং দস.

লোকধম্মাতি লোকপ্পৰত্তিযা সতি অনুপরমধম্মকত্তা লাভো অলাভো যসো অযসো সুখং দুক্খং নিন্দা পসংসাতি ইমে অট্ঠ. ইধ পন কারণোপচারেন লাভাদিৰত্থুকস্স অনুনযস্স অলাভাদিৰত্থুকস্স পটিঘস্স চেতং লোকধম্মগ্গহণেন গহণং কতন্তি ৰেদিতব্বং.

মচ্ছরিযানীতি ¶ আৰাসমচ্ছরিযং কুলমচ্ছরিযং লাভমচ্ছরিযং ধম্মমচ্ছরিযং ৰণ্ণমচ্ছরিযন্তি ইমাসু আৰাসাদীসু অঞ্ঞেসং সাধারণভাৰং অসহনাকারেন পৰত্তানি পঞ্চ মচ্ছরিযানি.

ৰিপল্লাসাতি ¶ অনিচ্চদুক্খঅনত্তঅসুভেসুযেৰ ৰত্থূসু ‘‘নিচ্চং সুখং অত্তা সুভ’’ন্তি এৰং পৰত্তো সঞ্ঞাৰিপল্লাসো চিত্তৰিপল্লাসো দিট্ঠিৰিপল্লাসোতি ইমে তযো.

গন্থাতি নামকাযস্স চেৰ রূপকাযস্স চ গন্থনতো অভিজ্ঝাদযো চত্তারো. তথা হি তে অভিজ্ঝা কাযগন্থো, ব্যাপাদো কাযগন্থো, সীলব্বতপরামাসো কাযগন্থো, ইদংসচ্চাভিনিৰেসো কাযগন্থো ইচ্চেৰ ৰুত্তা.

অগতীতি ছন্দদোসমোহভযেহি অকত্তব্বকরণস্স, কত্তব্বাকরণস্স চ অধিৰচনং. তঞ্হি অরিযেহি অগন্তব্বত্তা অগতীতি ৰুচ্চতি.

আসৰাতি আরম্মণৰসেন আগোত্রভুতো, আভৰগ্গতো চ সৰনা, অসংৰুতেহি ৰা দ্ৰারেহি ঘটছিদ্দেহি উদকং ৰিয সৰনতো নিচ্চপগ্ঘরণট্ঠেন সংসারদুক্খস্স ৰা সৰনতো কামরাগভৰরাগমিচ্ছাদিট্ঠিঅৰিজ্জানমেতং অধিৰচনং.

ভৰসাগরে আকড্ঢনট্ঠেন দুরুত্তরণট্ঠেন চ ওঘাতিপি, আরম্মণৰিযোগস্স চেৰ দুক্খৰিযোগস্স চ অপ্পদানতো যোগাতিপি তেসঞ্ঞেৰ অধিৰচনং.

নীৰরণানীতি চিত্তস্স আৰরণনীৰরণপটিচ্ছাদনট্ঠেন কামচ্ছন্দাদযো পঞ্চ.

পরামাসোতি তস্স তস্স ধম্মস্স সভাৰং অতিক্কম্ম পরতো অভূতং সভাৰং আমসনাকারেন পৰত্তনতো মিচ্ছাদিট্ঠিযা এতং অধিৰচনং.

উপাদানানীতি সব্বাকারেন পটিচ্চসমুপ্পাদনিদ্দেসে ৰুত্তানি কামুপাদানাদীনি চত্তারি.

অনুসযাতি থামগতট্ঠেন কামরাগানুসযো, পটিঘ, মান, দিট্ঠি, ৰিচিকিচ্ছা, ভৰরাগ, অৰিজ্জানুসযোতি এৰং ৰুত্তা কামরাগাদযো সত্ত ¶ . তে হি থামগতত্তা পুনপ্পুনং কামরাগাদীনং উপ্পত্তিহেতুভাৰেন অনুসেন্তিযেৰাতি অনুসযা.

মলাতি ¶ তেলঞ্জনকললং ৰিয সযঞ্চ অসুদ্ধত্তা, অঞ্ঞেসঞ্চ অসুদ্ধভাৰকরণতো লোভদোসমোহা তযো.

অকুসলকম্মপথাতি অকুসলকম্মভাৰেন চেৰ দুগ্গতীনঞ্চ পথভাৰেন পাণাতিপাতো অদিন্নাদানং কামেসুমিচ্ছাচারো মুসাৰাদো পিসুণৰাচা ফরুসৰাচা সম্ফপ্পলাপো অভিজ্ঝা ব্যাপাদো মিচ্ছাদিট্ঠীতি ইমে দস.

অকুসলচিত্তুপ্পাদাতি লোভমূলা অট্ঠ দোসমূলা দ্ৰে মোহমূলা দ্ৰেতি ইমে দ্ৰাদস.

৮৩০. ইতি এতেসং সংযোজনাদীনং ধম্মানং এতানি যথাযোগং পহানকরানি. কথং? সংযোজনেসু তাৰ সক্কাযদিট্ঠি ৰিচিকিচ্ছা সীলব্বতপরামাসো অপাযগমনীযা চ কামরাগপটিঘাতি এতে পঞ্চ ধম্মা পঠমঞাণৰজ্ঝা, সেসা কামরাগপটিঘা ওল়ারিকা দুতিযঞাণৰজ্ঝা, সুখুমা ততিযঞাণৰজ্ঝা, রূপরাগাদযো পঞ্চপি চতুত্থঞাণৰজ্ঝা এৰ. পরতোপি চ যত্থ যত্থ এৰসদ্দেন নিযমং ন করিস্সাম. তত্থ তত্থ যং যং ‘‘উপরিঞাণৰজ্ঝো’’তি ৰক্খাম, সো সো পুরিমঞাণেহি হতাপাযগমনীযাদিভাৰোৰ হুত্ৰা উপরিঞাণৰজ্ঝো হোতীতি ৰেদিতব্বো.

কিলেসেসু দিট্ঠিৰিচিকিচ্ছা পঠমঞাণৰজ্ঝা, দোসো ততিযঞাণৰজ্ঝো, লোভমোহমানথিনউদ্ধচ্চঅহিরিকঅনোত্তপ্পানি চতুত্থঞাণৰজ্ঝানি.

মিচ্ছত্তেসু মিচ্ছাদিট্ঠি মুসাৰাদো মিচ্ছাকম্মন্তো মিচ্ছাআজীৰোতি ইমে পঠমঞাণৰজ্ঝা, মিচ্ছাসঙ্কপ্পো পিসুণৰাচা ফরুসৰাচাতি ইমে ততিযঞাণৰজ্ঝা, চেতনাযেৰ চেত্থ ৰাচাতি ৰেদিতব্বা. সম্ফপ্পলাপমিচ্ছাৰাযামসতিসমাধিৰিমুত্তিঞাণানি চতুত্থঞাণৰজ্ঝানি.

লোকধম্মেসু পটিঘো ততিযঞাণৰজ্ঝো, অনুনযো চতুত্থঞাণৰজ্ঝো, যসে চ পসংসায চ অনুনযো চতুত্থঞাণৰজ্ঝোতি একে. মচ্ছরিযানি পঠমঞাণৰজ্ঝানেৰ.

ৰিপল্লাসেসু ¶ ¶ অনিচ্চে নিচ্চং, অনত্তনি অত্তাতি চ সঞ্ঞাচিত্তদিট্ঠিৰিপল্লাসা, দুক্খে সুখং, অসুভে সুভন্তি দিট্ঠিৰিপল্লাসো চাতি ইমে পঠমঞাণৰজ্ঝা, অসুভে সুভন্তি সঞ্ঞাচিত্তৰিপল্লাসা ততিযঞাণৰজ্ঝা, দুক্খে সুখন্তি সঞ্ঞাচিত্তৰিপল্লাসা চতুত্থঞাণৰজ্ঝা.

গন্থেসু সীলব্বতপরামসইদংসচ্চাভিনিৰেসকাযগন্থা পঠমঞাণৰজ্ঝা, ব্যাপাদকাযগন্থো ততিযঞাণৰজ্ঝো, ইতরো চতুত্থঞাণৰজ্ঝো.

অগতি পঠমঞাণৰজ্ঝাৰ.

আসৰেসু দিট্ঠাসৰো পঠমঞাণৰজ্ঝো, কামাসৰো ততিযঞাণৰজ্ঝো, ইতরে দ্ৰে চতুত্থঞাণৰজ্ঝা. ওঘযোগেসুপি এসেৰ নযো.

নীৰরণেসু ৰিচিকিচ্ছানীৰরণং পঠমঞাণৰজ্ঝং, কামচ্ছন্দো ব্যাপাদো কুক্কুচ্চন্তি তীণি ততিযঞাণৰজ্ঝানি, থিনমিদ্ধউদ্ধচ্চানি চতুত্থঞাণৰজ্ঝানি.

পরামাসো পঠমঞাণৰজ্ঝোৰ.

উপাদানেসু সব্বেসম্পি লোকিযধম্মানং ৰত্থুকামৰসেন কামাতি আগতত্তা রূপারূপরাগোপি কামুপাদানে পততি, তস্মা তং চতুত্থঞাণৰজ্ঝং, সেসানি পঠমঞাণৰজ্ঝানি.

অনুসযেসু দিট্ঠিৰিচিকিচ্ছানুসযা পঠমঞাণৰজ্ঝাৰ, কামরাগপটিঘানুসযা ততিযঞাণৰজ্ঝা, মানভৰরাগাৰিজ্জানুসযা চতুত্থঞাণৰজ্ঝা.

মলেসু দোসমলং ততিযঞাণৰজ্ঝং, ইতরানি চতুত্থঞাণৰজ্ঝানি.

অকুসলকম্মপথেসু পাণাতিপাতো অদিন্নাদানং মিচ্ছাচারো মুসাৰাদো মিচ্ছাদিট্ঠীতি ইমে পঠমঞাণৰজ্ঝা ¶ , পিসুণৰাচা ফরুসৰাচা ব্যাপাদোতি তযো ততিযঞাণৰজ্ঝা, সম্ফপ্পলাপাভিজ্ঝা চতুত্থঞাণৰজ্ঝা.

অকুসলচিত্তুপ্পাদেসু চত্তারো দিট্ঠিগতসম্পযুত্তা ৰিচিকিচ্ছাসম্পযুত্তো চাতি পঞ্চ পঠমঞাণৰজ্ঝাৰ, দ্ৰে পটিঘসম্পযুত্তা ততিযঞাণৰজ্ঝা, সেসা চতুত্থঞাণৰজ্ঝাতি.

যঞ্চ যেন ৰজ্ঝং, তং তেন পহাতব্বং নাম. তেন ৰুত্তং ‘‘ইতি এতেসং সংযোজনাদীনং ধম্মানং এতানি যথাযোগং পহানকরানী’’তি.

৮৩১. কিং ¶ পনেতানি এতে ধম্মে অতীতানাগতে পজহন্তি উদাহু পচ্চুপ্পন্নেতি. কিং পনেত্থ যদি তাৰ অতীতানাগতে, অফলো ৰাযামো আপজ্জতি. কস্মা? পহাতব্বানং নত্থিতায. অথ পচ্চুপ্পন্নে, তথাপি অফলো, ৰাযামেন সদ্ধিং পহাতব্বানং অত্থিতায, সংকিলেসিকা চ মগ্গভাৰনা আপজ্জতি, ৰিপ্পযুত্ততা ৰা কিলেসানং, ন চ পচ্চুপ্পন্নকিলেসো চিত্তৰিপ্পযুত্তো নাম অত্থীতি. নাযং আৰেণিকা চোদনা. পাল়িযংযেৰ হি ‘‘স্ৰাযং কিলেসে পজহতি, অতীতে কিলেসে পজহতি, অনাগতে কিলেসে পজহতি, পচ্চুপ্পন্নে কিলেসে পজহতী’’তি ৰত্ৰা, পুন ‘‘হঞ্চি অতীতে কিলেসে পজহতি, তেনহি খীণং খেপেতি, নিরুদ্ধং নিরোধেতি, ৰিগতং ৰিগমেতি, অত্থঙ্গতং অত্থঙ্গমেতি. অতীতং যং নত্থি, তং পজহতী’’তি (পটি. ম. ৩.২১) চ ৰত্ৰা, ‘‘ন অতীতে কিলেসে পজহতী’’তি পটিক্খিত্তং.

তথা ‘‘হঞ্চি অনাগতে কিলেসে পজহতি, তেনহি অজাতং পজহতি, অনিব্বত্তং পজহতি, অনুপ্পন্নং পজহতি, অপাতুভূতং পজহতি. অনাগতং যং নত্থি, তং পজহতী’’তি চ ৰত্ৰা, ‘‘ন অনাগতে কিলেসে পজহতী’’তি পটিক্খিত্তং.

তথা ‘‘হঞ্চি পচ্চুপ্পন্নে কিলেসে পজহতি, তেনহি রত্তো রাগং পজহতি. দুট্ঠো দোসং, মূল়্হো মোহং, ৰিনিবদ্ধো মানং, পরামট্ঠো দিট্ঠিং, ৰিক্খেপগতো উদ্ধচ্চং, অনিট্ঠঙ্গতো ৰিচিকিচ্ছং, থামগতো অনুসযং পজহতি. কণ্হসুক্কা ধম্মা যুগনদ্ধাৰ ৰত্তন্তি. সংকিলেসিকা মগ্গভাৰনা হোতী’’তি চ ৰত্ৰা, ‘‘ন অতীতে কিলেসে পজহতি, ন অনাগতে, ন পচ্চুপ্পন্নে কিলেসে পজহতী’’তি সব্বং পটিক্খিপিত্ৰা, ‘‘তেনহি নত্থি মগ্গভাৰনা, নত্থি ফলসচ্ছিকিরিযা ¶ , নত্থি কিলেসপ্পহানং, নত্থি ধম্মাভিসমযো’’তি পঞ্হাপরিযোসানে ‘‘ন হি নত্থি মগ্গভাৰনা…পে… নত্থি ধম্মাভিসমযো’’তি পটিজানিত্ৰা ‘‘যথা কথং ৰিযা’’তি ৰুত্তে ইদং ৰুত্তং –

‘‘সেয্যথাপি তরুণো রুক্খো অজাতফলো, তমেনং পুরিসো মূলে ছিন্দেয্য, যে তস্স রুক্খস্স অজাতফলা, তে অজাতাযেৰ ন জাযন্তি, অনিব্বত্তাযেৰ ন নিব্বত্তন্তি, অনুপ্পন্নাযেৰ ন উপ্পজ্জন্তি, অপাতুভূতাযেৰ ন পাতুভৰন্তি, এৰমেৰ ¶ উপ্পাদো হেতু উপ্পাদো পচ্চযো কিলেসানং নিব্বত্তিযাতি উপ্পাদে আদীনৰং দিস্ৰা অনুপ্পাদে চিত্তং পক্খন্দতি, অনুপ্পাদে চিত্তস্স পক্খন্দত্তা যে আযূহনপচ্চযা কিলেসা নিব্বত্তেয্যুং, তে অজাতাযেৰ ন জাযন্তি…পে… অপাতুভূতাযেৰ ন পাতুভৰন্তি, এৰং হেতুনিরোধা দুক্খনিরোধো. পৰত্তং হেতু…পে… নিমিত্তং হেতু…পে… আযূহনা হেতু…পে… অনাযূহনে চিত্তস্স পক্খন্দত্তা যে আযূহনপচ্চযা কিলেসা নিব্বত্তেয্যুং, তে অজাতাযেৰ…পে… অপাতুভূতাযেৰ ন পাতুভৰন্তি, এৰং হেতুনিরোধা দুক্খনিরোধো. এৰং অত্থি মগ্গভাৰনা, অত্থি ফলসচ্ছিকিরিযা, অত্থি কিলেসপ্পহানং, অত্থি ধম্মাভিসমযো’’তি (পটি. ম. ৩.২১).

৮৩২. এতেন কিং দীপিতং হোতি? ভূমিলদ্ধানং কিলেসানং পহানং দীপিতং হোতি. ভূমিলদ্ধা পন কিং অতীতানাগতা উদাহু পচ্চুপ্পন্নাতি. ভূমিলদ্ধুপ্পন্না এৰ নাম তে.

৮৩৩. উপ্পন্নং হি ৰত্তমানভূতাপগতোকাসকতভূমিলদ্ধৰসেন অনেকপ্পভেদং. তত্থ সব্বম্পি উপ্পাদজরাভঙ্গসমঙ্গিসঙ্খাতং ৰত্তমানুপ্পন্নং নাম. আরম্মণরসং অনুভৰিত্ৰা নিরুদ্ধং অনুভূতাপগতসঙ্খাতং কুসলাকুসলং উপ্পাদাদিত্তযং অনুপ্পত্ৰা নিরুদ্ধং ভূতাপগতসঙ্খাতং সেসসঙ্খতঞ্চ ভূতাপগতুপ্পন্নং নাম. ‘‘যানিস্স তানি পুব্বেকতানি কম্মানী’’তি (ম. নি. ৩.২৪৮) এৰমাদিনা নযেন ৰুত্তং কম্মং অতীতম্পি সমানং অঞ্ঞং ৰিপাকং পটিবাহিত্ৰা অত্তনো ৰিপাকস্সোকাসং কত্ৰা ঠিতত্তা তথা কতোকাসঞ্চ ৰিপাকং অনুপ্পন্নম্পি সমানং এৰং কতে ওকাসে একন্তেন উপ্পজ্জনতো ওকাসকতুপ্পন্নং নাম. তাসু তাসু ভূমীসু অসমূহতং অকুসলং ভূমিলদ্ধুপ্পন্নং নাম.

৮৩৪. এত্থ ¶ চ ভূমিযা ভূমিলদ্ধস্স চ নানত্তং ৰেদিতব্বং. ভূমীতি হি ৰিপস্সনায আরম্মণভূতা তেভূমকা পঞ্চক্খন্ধা. ভূমিলদ্ধং নাম তেসু খন্ধেসু উপ্পত্তিরহং কিলেসজাতং. তেনহি সা ভূমি লদ্ধা নাম হোতীতি তস্মা ভূমিলদ্ধন্তি ৰুচ্চতি, সা চ খো ন আরম্মণৰসেন. আরম্মণৰসেন ¶ হি সব্বেপি অতীতানাগতে পরিঞ্ঞাতেপি চ খীণাসৰানং খন্ধে আরব্ভ কিলেসা উপ্পজ্জন্তি মহাকচ্চানউপ্পলৰণ্ণাদীনং খন্ধে আরব্ভ সোরেয্যসেট্ঠি নন্দমাণৰকাদীনং ৰিয. যদি চ তং ভূমিলদ্ধং নাম সিযা, তস্স অপ্পহেয্যতো ন কোচি ভৰমূলং পজহেয্য. ৰত্থুৰসেন পন ভূমিলদ্ধং ৰেদিতব্বং. যত্থ যত্থ হি ৰিপস্সনায অপরিঞ্ঞাতা খন্ধা উপ্পজ্জন্তি, তত্থ তত্থ উপ্পাদতো পভুতি তেসু ৰট্টমূলং কিলেসজাতং অনুসেতি. তং অপ্পহীনট্ঠেন ভূমিলদ্ধন্তি ৰেদিতব্বং.

৮৩৫. তত্থ চ যস্স যেসু খন্ধেসু অপ্পহীনট্ঠেন অনুসযিতা কিলেসা, তস্স তে এৰ খন্ধা তেসং কিলেসানং ৰত্থু, ন অঞ্ঞেসং সন্তকা খন্ধা. অতীতক্খন্ধেসু চ অপ্পহীনানুসযিতানং কিলেসানং অতীতক্খন্ধাৰ ৰত্থু, ন ইতরে. এস নযো অনাগতাদীসু. তথা কামাৰচরক্খন্ধেসু অপ্পহীনানুসযিতানং কিলেসানং কামাৰচরক্খন্ধাৰ ৰত্থু, ন ইতরে. এস নযো রূপারূপাৰচরেসু. সোতাপন্নাদীসু পন যস্স যস্স অরিযপুগ্গলস্স খন্ধেসু তং তং ৰট্টমূলং কিলেসজাতং তেন তেন মগ্গেন পহীনং, তস্স তস্স তে তে খন্ধা পহীনানং তেসং তেসং ৰট্টমূলকিলেসানং অৰত্থুতো ভূমীতি সঙ্খং ন লভন্তি. পুথুজ্জনস্স সব্বসোৰ ৰট্টমূলকিলেসানং অপ্পহীনত্তা যংকিঞ্চি করিযমানং কম্মং কুসলং অকুসলং ৰা হোতি. ইচ্চস্স কম্মকিলেসপচ্চযা ৰট্টং ৰট্টতি. তস্সেতং ৰট্টমূলং রূপক্খন্ধেযেৰ, ন ৰেদনাক্খন্ধাদীসু. ৰিঞ্ঞাণক্খন্ধেযেৰ ৰা, ন রূপক্খন্ধাদীসূতি ন ৰত্তব্বং. কস্মা? অৰিসেসেন পঞ্চসুপি খন্ধেসু অনুসযিতত্তা.

৮৩৬. কথং? পথৰীরসাদি ৰিয রুক্খে. যথা হি মহারুক্খে পথৰীতলং অধিট্ঠায পথৰীরসঞ্চ আপোরসঞ্চ নিস্সায তপ্পচ্চযা মূলখন্ধসাখপসাখপল্লৰপলাসপুপ্ফফলেহি ৰড্ঢিত্ৰা নভং পূরেত্ৰা যাৰ কপ্পাৰসানা বীজপরম্পরায রুক্খপৰেণিং সন্তানযমানে ঠিতে তং পথৰীরসাদি মূলেযেৰ, ন খন্ধাদীসু…পে… ফলেযেৰ ৰা, ন মূলাদীসূতি ন ৰত্তব্বং. কস্মা? অৰিসেসেন সব্বেসু মূলাদীসু অনুগতত্তাতি.

যথা ¶ পন তস্সেৰ রুক্খস্স পুপ্ফফলাদীসু নিব্বিন্নো কোচি পুরিসো চতূসু দিসাসু মণ্ডূককণ্টকং নাম ৰিসকণ্টকং আকোটেয্য, অথ সো ¶ রুক্খো তেন ৰিসসম্ফস্সেন ফুট্ঠো পথৰীরসআপোরসানং পরিযাদিণ্ণত্তা অপ্পসৰনধম্মতং আগম্ম পুন সন্তানং নিব্বত্তেতুং ন সক্কুণেয্য, এৰমেৰ খন্ধপৰত্তিযং নিব্বিন্নো কুলপুত্তো তস্স পুরিসস্স চতূসু দিসাসু রুক্খে ৰিসযোজনং ৰিয অত্তনো সন্তানে চতুমগ্গভাৰনং আরভতি. অথস্স সো খন্ধসন্তানো তেন চতুমগ্গৰিসসম্ফস্সেন সব্বসো ৰট্টমূলককিলেসানং পরিযাদিণ্ণত্তা কিরিযভাৰমত্তউপগতকাযকম্মাদিসব্বকম্মপ্পভেদো হুত্ৰা আযতিং পুনব্ভৰানভিনিব্বত্তনধম্মতং আগম্ম ভৰন্তরসন্তানং নিব্বত্তেতুং ন সক্কোতি. কেৰলং চরিমৰিঞ্ঞাণনিরোধেন নিরিন্ধনো ৰিয জাতৰেদো অনুপাদানো পরিনিব্বাযতি, এৰং ভূমিযা ভূমিলদ্ধস্স চ নানত্তং ৰেদিতব্বং.

৮৩৭. অপিচ অপরম্পি সমুদাচারআরম্মণাধিগ্গহিতঅৰিক্খম্ভিতঅসমূহতৰসেন চতুব্বিধং উপ্পন্নং. তত্থ ৰত্তমানুপ্পন্নমেৰ সমুদাচারুপ্পন্নং. চক্খাদীনং পন আপাথগতে আরম্মণে পুব্বভাগে অনুপ্পজ্জমানম্পি কিলেসজাতং আরম্মণস্স অধিগ্গহিতত্তা এৰ অপরভাগে একন্তেন উপ্পত্তিতো আরম্মণাধিগ্গহিতুপ্পন্নন্তি ৰুচ্চতি, কল্যাণিগামে পিণ্ডায চরতো মহাতিস্সত্থেরস্স ৰিসভাগরূপদস্সনেন উপ্পন্নকিলেসজাতং ৰিয. সমথৰিপস্সনানং অঞ্ঞতরৰসেন অৰিক্খম্ভিতং কিলেসজাতং চিত্তসন্ততিমনারূল়্হম্পি উপ্পত্তিনিৰারকস্স হেতুনো অভাৰা অৰিক্খম্ভিতুপ্পন্নং নাম. সমথৰিপস্সনাৰসেন পন ৰিক্খম্ভিতম্পি অরিযমগ্গেন অসমূহতত্তা উপ্পত্তিধম্মতং অনতীততায অসমূহতুপ্পন্নন্তি ৰুচ্চতি, আকাসেন গচ্ছন্তস্স অট্ঠসমাপত্তিলাভিনো থেরস্স কুসুমিতরুক্খে উপৰনে পুপ্ফানি উচ্চিনন্তস্স মধুরেন সরেন গাযতো মাতুগামস্স গীতসৰনেন উপ্পন্নকিলেসজাতং ৰিয. তিৰিধম্পি চেতং আরম্মণাধিগ্গহিতাৰিক্খম্ভিতঅসমূহতুপ্পন্নং ভূমিলদ্ধেনেৰ সঙ্গহং গচ্ছতীতি ৰেদিতব্বং.

৮৩৮. ইচ্চেতস্মিং ৰুত্তপ্পভেদে উপ্পন্নে যদেতং ৰত্তমানভূতাপগতোকাসকতসমুদাচারসঙ্খাতং চতুব্বিধং উপ্পন্নং, তং অমগ্গৰজ্ঝত্তা কেনচিপি ঞাণেন পহাতব্বং ন হোতি. যং পনেতং ভূমিলদ্ধারম্মণাধিগ্গহিতঅৰিক্খম্ভিতঅসমূহতসঙ্খাতং উপ্পন্নং, তস্স তং উপ্পন্নভাৰং ৰিনাসযমানং যস্মা তং তং লোকিযলোকুত্তরঞাণং উপ্পজ্জতি, তস্মা তং সব্বম্পি পহাতব্বং হোতীতি. এৰমেত্থ যে যেন পহাতব্বা ধম্মা, তেসং পহানঞ্চ জানিতব্বং.

পরিঞ্ঞাদিকিচ্চকথা

৮৩৯.

কিচ্চানি ¶ ¶ পরিঞ্ঞাদীনি, যানি ৰুত্তানি অভিসমযকালে;

তানি চ যথাসভাৰেন, জানিতব্বানি সব্বানীতি.

সচ্চাভিসমযকালং হি এতেসু চতূসু ঞাণেসু একেকস্স একক্খণে পরিঞ্ঞা পহানং সচ্ছিকিরিযা ভাৰনাতি এতানি পরিঞ্ঞাদীনি চত্তারি কিচ্চানি ৰুত্তানি, তানি যথাসভাৰেন জানিতব্বানি. ৰুত্তং হেতং পোরাণেহি –

‘‘যথা পদীপো অপুব্বং অচরিমং একক্খণে চত্তারি কিচ্চানি করোতি, ৰট্টিং ঝাপেতি, অন্ধকারং ৰিধমতি, আলোকং পরিৰিদংসেতি, সিনেহং পরিযাদিযতি, এৰমেৰ মগ্গঞাণং অপুব্বং অচরিমং একক্খণে চত্তারি সচ্চানি অভিসমেতি, দুক্খং পরিঞ্ঞাভিসমযেন অভিসমেতি, সমুদযং পহানাভিসমযেন অভিসমেতি, মগ্গং ভাৰনাভিসমযেন অভিসমেতি, নিরোধং সচ্ছিকিরিযাভিসমযেন অভিসমেতি. কিং ৰুত্তং হোতি? নিরোধং আরম্মণং করিত্ৰা চত্তারিপি সচ্চানি পাপুণাতি পস্সতি পটিৰিজ্ঝতী’’তি.

ৰুত্তম্পি চেতং ‘‘যো, ভিক্খৰে, দুক্খং পস্সতি, দুক্খসমুদযম্পি সো পস্সতি, দুক্খনিরোধম্পি পস্সতি, দুক্খনিরোধগামিনিং পটিপদম্পি পস্সতী’’তি (সং. নি. ৫.১১০০) সব্বং ৰেদিতব্বং.

অপরম্পি ৰুত্তং ‘‘মগ্গসমঙ্গিস্স ঞাণং, দুক্খেপেতং ঞাণং, দুক্খসমুদযেপেতং ঞাণং, দুক্খনিরোধেপেতং ঞাণং, দুক্খনিরোধগামিনিযা পটিপদাযপেতং ঞাণ’’ন্তি (ৰিভ. ৭৯৪; পটি. ম. ১.১০৯).

তত্থ যথা পদীপো ৰট্টিং ঝাপেতি, এৰং মগ্গঞাণং দুক্খং পরিজানাতি. যথা অন্ধকারং ৰিধমতি, এৰং সমুদযং পজহতি. যথা আলোকং পরিৰিদংসেতি, এৰং সহজাতাদিপচ্চযতায সম্মাসঙ্কপ্পাদিধম্মসঙ্খাতং মগ্গং ভাৰেতি. যথা সিনেহং পরিযাদিযতি, এৰং কিলেসপরিযাদানং নিরোধং সচ্ছিকরোতীতি এৰং উপমাসংসন্দনং ৰেদিতব্বং.

৮৪০. অপরো ¶ নযো – যথা সূরিযো উদযন্তো অপুব্বং অচরিমং সহ পাতুভাৰা চত্তারি কিচ্চানি করোতি, রূপগতানি ওভাসেতি, অন্ধকারং ¶ ৰিধমতি, আলোকং দস্সেতি, সীতং পটিপ্পস্সম্ভেতি, এৰমেৰ মগ্গঞাণং…পে… নিরোধং সচ্ছিকিরিযাভিসমযেন অভিসমেতি. ইধাপি যথা সূরিযো রূপগতানি ওভাসেতি, এৰং মগ্গঞাণং দুক্খং পরিজানাতি. যথা অন্ধকারং ৰিধমতি, এৰং সমুদযং পজহতি. যথা আলোকং দস্সেতি, এৰং সহজাতাদিপচ্চযতায মগ্গং ভাৰেতি. যথা সীতং পটিপ্পস্সম্ভেতি, এৰং কিলেসপটিপ্পস্সদ্ধিং নিরোধং সচ্ছিকরোতীতি এৰং উপমাসংসন্দনং ৰেদিতব্বং.

৮৪১. অপরো নযো – যথা নাৰা অপুব্বং অচরিমং একক্খণে চত্তারি কিচ্চানি করোতি, ওরিমতীরং পজহতি, সোতং ছিন্দতি, ভণ্ডং ৰহতি, পারিমতীরং অপ্পেতি, এৰমেৰ মগ্গঞাণং…পে… নিরোধং সচ্ছিকিরিযাভিসমযেন অভিসমেতি. এত্থাপি যথা নাৰা ওরিমতীরং পজহতি, এৰং মগ্গঞাণং দুক্খং পরিজানাতি. যথা সোতং ছিন্দতি, এৰং সমুদযং পজহতি. যথা ভণ্ডং ৰহতি, এৰং সহজাতাদিপচ্চযতায মগ্গং ভাৰেতি. যথা পারিমতীরং অপ্পেতি, এৰং পারিমতীরভূতং নিরোধং সচ্ছিকরোতীতি এৰং উপমাসংসন্দনং ৰেদিতব্বং.

৮৪২. এৰং সচ্চাভিসমযকালস্মিং একক্খণে চতুন্নং কিচ্চানং ৰসেন পৰত্তঞাণস্স পনস্স সোল়সহাকারেহি তথট্ঠেন চত্তারি কিচ্চানি একপটিৰেধানি হোন্তি. যথাহ –

‘‘কথং তথট্ঠেন চত্তারি কিচ্চানি একপটিৰেধানি? সোল়সহি আকারেহি তথট্ঠেন চত্তারি কিচ্চানি একপটিৰেধানি. দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো, তথট্ঠো. সমুদযস্স আযূহনট্ঠো, নিদানট্ঠো, সংযোগট্ঠো, পলিবোধট্ঠো, তথট্ঠো. নিরোধস্স নিস্সরণট্ঠো, ৰিৰেকট্ঠো, অসঙ্খতট্ঠো, অমতট্ঠো, তথট্ঠো. মগ্গস্স নিয্যানট্ঠো, হেতুট্ঠো, দস্সনট্ঠো, অধিপতেয্যট্ঠো, তথট্ঠো. ইমেহি সোল়সহি আকারেহি তথট্ঠেন চত্তারি সচ্চানি একসঙ্গহিতানি. যং একসঙ্গহিতং, তং একত্তং. যং একত্তং, তং একেন ঞাণেন পটিৰিজ্ঝতীতি চত্তারি সচ্চানি একপটিৰেধানী’’তি (পটি. ম. ২.১১).

৮৪৩. তত্থ ¶ সিযা যদা দুক্খাদীনং অঞ্ঞেপি রোগগণ্ডাদযো অত্থা অত্থি, অথ কস্মা চত্তারোযেৰ ৰুত্তাতি. এত্থ ৰদাম, অঞ্ঞসচ্চদস্সনৰসেন আৰিভাৰতো. ‘‘তত্থ কতমং ¶ দুক্খে ঞাণং? দুক্খং আরব্ভ যা উপ্পজ্জতি পঞ্ঞা পজাননা’’তিআদিনা (ৰিভ. ৭৯৪; পটি. ম. ১.১০৯) হি নযেন একেকসচ্চারম্মণৰসেনাপি সচ্চঞাণং ৰুত্তং. ‘‘যো, ভিক্খৰে, দুক্খং পস্সতি, সমুদযম্পি সো পস্সতী’’তিআদিনা (সং. নি. ৫.১১০০) নযেন একং সচ্চং আরম্মণং কত্ৰা সেসেসুপি কিচ্চনিপ্ফত্তিৰসেনাপি ৰুত্তং.

তত্থ যদা একেকং সচ্চং আরম্মণং করোতি, তদা সমুদযদস্সনেন তাৰ সভাৰতো পীল়নলক্খণস্সাপি দুক্খস্স, যস্মা তং আযূহনলক্খণেন সমুদযেন আযূহিতং সঙ্খতং রাসিকতং, তস্মাস্স সো সঙ্খতট্ঠো আৰিভৰতি. যস্মা পন মগ্গো কিলেসসন্তাপহরো সুসীতলো, তস্মাস্স মগ্গস্স দস্সনেন সন্তাপট্ঠো আৰিভৰতি আযস্মতো নন্দস্স অচ্ছরাদস্সনেন সুন্দরিযা অনভিরূপভাৰো ৰিয. অৰিপরিণামধম্মস্স পন নিরোধস্স দস্সনেনস্স ৰিপরিণামট্ঠো আৰিভৰতীতি ৰত্তব্বমেৰেত্থ নত্থি.

তথা সভাৰতো আযূহনলক্খণস্সাপি সমুদযস্স, দুক্খদস্সনেন নিদানট্ঠো আৰিভৰতি অসপ্পাযভোজনতো উপ্পন্নব্যাধিদস্সনেন ভোজনস্স ব্যাধিনিদানভাৰো ৰিয. ৰিসংযোগভূতস্স নিরোধস্স দস্সনেন সংযোগট্ঠো. নিয্যানভূতস্স চ মগ্গস্স দস্সনেন পলিবোধট্ঠোতি.

তথা নিস্সরণলক্খণস্সাপি নিরোধস্স, অৰিৰেকভূতস্স সমুদযস্স দস্সনেন ৰিৰেকট্ঠো আৰিভৰতি. মগ্গদস্সনেন অসঙ্খতট্ঠো, ইমিনা হি অনমতগ্গসংসারে মগ্গো নদিট্ঠপুব্বো, সোপি চ সপ্পচ্চযত্তা সঙ্খতোযেৰাতি অপ্পচ্চযধম্মস্স অসঙ্খতভাৰো অতিৰিয পাকটো হোতি. দুক্খদস্সনেন পনস্স অমতট্ঠো আৰিভৰতি, দুক্খং হি ৰিসং, অমতং নিব্বানন্তি.

তথা নিয্যানলক্খণস্সাপি মগ্গস্স, সমুদযদস্সনেন ‘‘নাযং হেতু নিব্বানস্স পত্তিযা, অযং হেতূ’’তি হেতুট্ঠো আৰিভৰতি. নিরোধদস্সনেন দস্সনট্ঠো, পরমসুখুমানি রূপানি পস্সতো ‘‘ৰিপ্পসন্নং ৰত মে ¶ চক্খূ’’ন্তি চক্খুস্স ৰিপ্পসন্নভাৰো ৰিয. দুক্খদস্সনেন অধিপতেয্যট্ঠো, অনেকরোগাতুরকপণজনদস্সনেন ইস্সরজনস্স উল়ারভাৰো ৰিযাতি এৰমেত্থ সলক্খণৰসেন একেকস্স, অঞ্ঞসচ্চদস্সনৰসেন চ ইতরেসং তিণ্ণং তিণ্ণং আৰিভাৰতো একেকস্স চত্তারো চত্তারো অত্থা ৰুত্তা. মগ্গক্খণে পন সব্বে চেতে অত্থা একেনেৰ দুক্খাদীসু ¶ চতুকিচ্চেন ঞাণেন পটিৰেধং গচ্ছন্তীতি. যে পন নানাভিসমযং ইচ্ছন্তি, তেসং উত্তরং অভিধম্মে কথাৰত্থুস্মিং ৰুত্তমেৰ.

পরিঞ্ঞাদিপ্পভেদকথা

৮৪৪. ইদানি যানি তানি পরিঞ্ঞাদীনি চত্তারি কিচ্চানি ৰুত্তানি, তেসু –

তিৰিধা হোতি পরিঞ্ঞা, তথা পহানম্পি সচ্ছিকিরিযাপি;

দ্ৰে ভাৰনা অভিমতা, ৰিনিচ্ছযো তত্থ ঞাতব্বো.

৮৪৫. তিৰিধা হোতি পরিঞ্ঞাতি ঞাতপরিঞ্ঞা তীরণপরিঞ্ঞা পহানপরিঞ্ঞাতি এৰং পরিঞ্ঞা তিৰিধা হোতি. তত্থ ‘‘অভিঞ্ঞাপঞ্ঞা ঞাতট্ঠেন ঞাণ’’ন্তি (পটি. ম. মাতিকা ১.২০) এৰং উদ্দিসিত্ৰা ‘‘যে যে ধম্মা অভিঞ্ঞাতা হোন্তি, তে তে ধম্মা ঞাতা হোন্তী’’তি (পটি. ম. ১.৭৫) এৰং সঙ্খেপতো, ‘‘সব্বং, ভিক্খৰে, অভিঞ্ঞেয্যং. কিঞ্চ, ভিক্খৰে, সব্বং অভিঞ্ঞেয্যং? চক্খুং, ভিক্খৰে, অভিঞ্ঞেয্য’’ন্তিআদিনা (পটি. ম. ১.২) নযেন ৰিত্থারতো ৰুত্তা ঞাতপরিঞ্ঞা নাম. তস্সা সপ্পচ্চযনামরূপাভিজাননা আৰেণিকা ভূমি.

৮৪৬. ‘‘পরিঞ্ঞাপঞ্ঞা তীরণট্ঠেন ঞাণ’’ন্তি (পটি. ম. মাতিকা ১.২১) এৰং উদ্দিসিত্ৰা পন ‘‘যে যে ধম্মা পরিঞ্ঞাতা হোন্তি, তে তে ধম্মা তীরিতা হোন্তী’’তি (পটি. ম. ১.৭৫) এৰং সঙ্খেপতো, ‘‘সব্বং, ভিক্খৰে, পরিঞ্ঞেয্যং. কিঞ্চ, ভিক্খৰে, সব্বং পরিঞ্ঞেয্যং? চক্খুং, ভিক্খৰে, পরিঞ্ঞেয্য’’ন্তিআদিনা (পটি. ম. ১.২১) নযেন ৰিত্থারতো ৰুত্তা তীরণপরিঞ্ঞা নাম. তস্সা কলাপসম্মসনতো পট্ঠায অনিচ্চং দুক্খমনত্তাতি তীরণৰসেন পৰত্তমানায যাৰ অনুলোমা আৰেণিকা ভূমি.

৮৪৭. ‘‘পহানপঞ্ঞা পরিচ্চাগট্ঠেন ঞাণ’’ন্তি (পটি. ম. মাতিকা ১.২২) এৰং পন উদ্দিসিত্ৰা ‘‘যে যে ধম্মা পহীনা হোন্তি, তে তে ধম্মা পরিচ্চত্তা হোন্তী’’তি (পটি. ম. ১.৭৫) এৰং ৰিত্থারতো ¶ ৰুত্তা ‘‘অনিচ্চানুপস্সনায নিচ্চসঞ্ঞং পজহতী’’তিআদিনযপ্পৰত্তা ¶ পহানপরিঞ্ঞা. তস্সা ভঙ্গানুপস্সনতো পট্ঠায যাৰ মগ্গঞাণা ভূমি, অযং ইধ অধিপ্পেতা.

যস্মা ৰা ঞাততীরণপরিঞ্ঞাযোপি তদত্থাযেৰ, যস্মা চ যে ধম্মে পজহতি, তে নিযমতো ঞাতা চেৰ তীরিতা চ হোন্তি, তস্মা পরিঞ্ঞাত্তযম্পি ইমিনা পরিযাযেন মগ্গঞাণস্স কিচ্চন্তি ৰেদিতব্বং.

৮৪৮. তথা পহানম্পীতি পহানম্পি হি ৰিক্খম্ভনপ্পহানং তদঙ্গপ্পহানং সমুচ্ছেদপ্পহানন্তি পরিঞ্ঞা ৰিয তিৰিধমেৰ হোতি. তত্থ যং সসেৰালে উদকে পক্খিত্তেন ঘটেন সেৰালস্স ৰিয তেন তেন লোকিযসমাধিনা নীৰরণাদীনং পচ্চনীকধম্মানং ৰিক্খম্ভনং, ইদং ৰিক্খম্ভনপ্পহানং নাম. পাল়িযং পন ‘‘ৰিক্খম্ভনপ্পহানঞ্চ নীৰরণানং পঠমং ঝানং ভাৰযতো’’তি (পটি. ম. ১.২৪) নীৰরণানঞ্ঞেৰ ৰিক্খম্ভনং ৰুত্তং, তং পাকটত্তা ৰুত্তন্তি ৰেদিতব্বং. নীৰরণানি হি ঝানস্স পুব্বভাগেপি পচ্ছাভাগেপি ন সহসা চিত্তং অজ্ঝোত্থরন্তি, ৰিতক্কাদযো অপ্পিতক্খণেযেৰ. তস্মা নীৰরণানং ৰিক্খম্ভনং পাকটং.

৮৪৯. যং পন রত্তিভাগে সমুজ্জলিতেন পদীপেন অন্ধকারস্স ৰিয তেন তেন ৰিপস্সনায অৰযৰভূতেন ঞাণঙ্গেন পটিপক্খৰসেনেৰ তস্স তস্স পহাতব্বধম্মস্স পহানং, ইদং তদঙ্গপ্পহানং নাম. সেয্যথিদং – নামরূপপরিচ্ছেদেন তাৰ সক্কাযদিট্ঠিযা. পচ্চযপরিগ্গহেন অহেতুৰিসমহেতুদিট্ঠিযা চেৰ কঙ্খামলস্স চ. কলাপসম্মসনেন ‘‘অহং মমা’’তি সমূহগাহস্স. মগ্গামগ্গৰৰত্থানেন অমগ্গে মগ্গসঞ্ঞায. উদযদস্সনেন উচ্ছেদদিট্ঠিযা. ৰযদস্সনেন সস্সতদিট্ঠিযা. ভযতুপট্ঠানেন সভযে অভযসঞ্ঞায. আদীনৰদস্সনেন অস্সাদসঞ্ঞায. নিব্বিদানুপস্সনেন অভিরতিসঞ্ঞায. মুঞ্চিতুকম্যতায অমুঞ্চিতুকামভাৰস্স. পটিসঙ্খানেন অপ্পটিসঙ্খানস্স. উপেক্খায অনুপেক্খনস্স. অনুলোমেন সচ্চপটিলোমগাহস্স পহানং.

যং ৰা পন অট্ঠারসসু মহাৰিপস্সনাসু অনিচ্চানুপস্সনায নিচ্চসঞ্ঞায. দুক্খানুপস্সনায সুখসঞ্ঞায. অনত্তানুপস্সনায অত্তসঞ্ঞায. নিব্বিদানুপস্সনায নন্দিযা. ৰিরাগানুপস্সনায রাগস্স. নিরোধানুপস্সনায ¶ সমুদযস্স. পটিনিস্সগ্গানুপস্সনায ¶ আদানস্স. খযানুপস্সনায ঘনসঞ্ঞায. ৰযানুপস্সনায আযূহনস্স. ৰিপরিণামানুপস্সনায ধুৰসঞ্ঞায. অনিমিত্তানুপস্সনায নিমিত্তস্স. অপ্পণিহিতানুপস্সনায পণিধিযা. সুঞ্ঞতানুপস্সনায অভিনিৰেসস্স. অধিপঞ্ঞাধম্মৰিপস্সনায সারাদানাভিনিৰেসস্স. যথাভূতঞাণদস্সনেন সম্মোহাভিনিৰেসস্স. আদীনৰানুপস্সনায আলযাভিনিৰেসস্স. পটিসঙ্খানুপস্সনায অপ্পটিসঙ্খায. ৰিৰট্টানুপস্সনায সংযোগাভিনিৰেসস্স পহানং. ইদম্পি তদঙ্গপ্পহানমেৰ.

৮৫০. তত্থ যথা অনিচ্চানুপস্সনাদীহি সত্তহি নিচ্চসঞ্ঞাদীনং পহানং হোতি, তং ভঙ্গানুপস্সনে ৰুত্তমেৰ.

খযানুপস্সনাতি পন ঘনৰিনিব্ভোগং কত্ৰা অনিচ্চং খযট্ঠেনাতি এৰং খযং পস্সতো ঞাণং. তেন ঘনসঞ্ঞায পহানং হোতি.

ৰযানুপস্সনাতি –

আরম্মণান্ৰযেন, উভো একৰৰত্থানা;

নিরোধে অধিমুত্ততা, ৰযলক্খণৰিপস্সনাতি. –

এৰং ৰুত্তা পচ্চক্খতো চেৰ অন্ৰযতো চ সঙ্খারানং ভঙ্গং দিস্ৰা তস্মিঞ্ঞেৰ ভঙ্গসঙ্খাতে নিরোধে অধিমুত্ততা, তায আযূহনস্স পহানং হোতি. যেসং হি অত্থায আযূহেয্য, ‘‘তে এৰং ৰযধম্মা’’তি ৰিপস্সতো আযূহনে চিত্তং ন নমতি.

ৰিপরিণামানুপস্সনাতি রূপসত্তকাদিৰসেন তং তং পরিচ্ছেদং অতিক্কম্ম অঞ্ঞথাপৰত্তিদস্সনং. উপ্পন্নস্স ৰা জরায চেৰ মরণেন চ দ্ৰীহাকারেহি ৰিপরিণামদস্সনং, তায ধুৰসঞ্ঞায পহানং হোতি.

অনিমিত্তানুপস্সনাতি অনিচ্চানুপস্সনাৰ, তায নিচ্চনিমিত্তস্স পহানং হোতি.

অপ্পণিহিতানুপস্সনাতি দুক্খানুপস্সনাৰ, তায সুখপণিধিসুখপত্থনাপহানং হোতি.

সুঞ্ঞতানুপস্সনাতি অনত্তানুপস্সনাৰ, তায ‘‘অত্থি অত্তা’’তি অভিনিৰেসস্স পহানং হোতি.

অধিপঞ্ঞাধম্মৰিপস্সনাতি ¶ ¶ –

‘‘আরম্মণঞ্চ পটিসঙ্খা, ভঙ্গঞ্চ অনুপস্সতি;

সুঞ্ঞতো চ উপট্ঠানং, অধিপঞ্ঞা ৰিপস্সনা’’তি. –

এৰং ৰুত্তা রূপাদিআরম্মণং জানিত্ৰা তস্স চ আরম্মণস্স তদারম্মণস্স চ চিত্তস্স ভঙ্গং দিস্ৰা ‘‘সঙ্খারাৰ ভিজ্জন্তি, সঙ্খারানং মরণং, ন অঞ্ঞো কোচি অত্থী’’তি ভঙ্গৰসেন সুঞ্ঞতং গহেত্ৰা পৰত্তা ৰিপস্সনা. সা অধিপঞ্ঞা চ ধম্মেসু চ ৰিপস্সনাতি কত্ৰা অধিপঞ্ঞাধম্মৰিপস্সনাতি ৰুচ্চতি, তায নিচ্চসারাভাৰস্স চ অত্তসারাভাৰস্স চ সুট্ঠু দিট্ঠত্তা সারাদানাভিনিৰেসস্স পহানং হোতি.

যথাভূতঞাণদস্সনন্তি সপ্পচ্চযনামরূপপরিগ্গহো, তেন ‘‘অহোসিং নু খো অহং অতীতমদ্ধান’’ন্তিআদিৰসেন চেৰ, ‘‘ইস্সরতো লোকো সম্ভোতী’’তিআদিৰসেন চ পৰত্তস্স সম্মোহাভিনিৰেসস্স পহানং হোতি.

আদীনৰানুপস্সনাতি ভযতুপট্ঠানৰসেন উপ্পন্নং সব্বভৰাদীসু আদীনৰদস্সনঞাণং, তেন ‘‘কিঞ্চি অল্লীযিতব্বং ন দিস্সতী’’তি আলযাভিনিৰেসস্স পহানং হোতি.

পটিসঙ্খানুপস্সনাতি মুঞ্চনস্স উপাযকরণং পটিসঙ্খাঞাণং, তেন অপ্পটিসঙ্খায পহানং হোতি.

ৰিৰট্টানুপস্সনাতি সঙ্খারুপেক্খা চেৰ অনুলোমঞ্চ. তদা হিস্স চিত্তং ঈসকপোণে পদুমপলাসে উদকবিন্দু ৰিয সব্বস্মা সঙ্খারগতা পতিলীযতি, পতিকুটতি, পতিৰত্ততীতি ৰুত্তং. তস্মা তায সংযোগাভিনিৰেসস্স পহানং হোতি, কামসংযোগাদিকস্স কিলেসাভিনিৰেসস্স কিলেসপ্পৰত্তিযা পহানং হোতীতি অত্থো. এৰং ৰিত্থারতো তদঙ্গপ্পহানং ৰেদিতব্বং. পাল়িযং পন ‘‘তদঙ্গপ্পহানঞ্চ দিট্ঠিগতানং নিব্বেধভাগিযং সমাধিং ভাৰযতো’’তি (পটি. ম. ১.২৪) সঙ্খেপেনেৰ ৰুত্তং.

৮৫১. যং ¶ পন অসনিৰিচক্কাভিহতস্স রুক্খস্স ৰিয অরিযমগ্গঞাণেন সংযোজনাদীনং ধম্মানং যথা ন পুন পৰত্তি, এৰং পহানং, ইদং সমুচ্ছেদপ্পহানং নাম. যং সন্ধায ৰুত্তং ‘‘সমুচ্ছেদপ্পহানঞ্চ লোকুত্তরং খযগামিমগ্গং ভাৰযতো’’তি (পটি. ম. ১.২৪) ¶ . ইতি ইমেসু তীসু পহানেসু সমুচ্ছেদপ্পহানমেৰ ইধ অধিপ্পেতং. যস্মা পন তস্স যোগিনো পুব্বভাগে ৰিক্খম্ভনতদঙ্গপ্পহানানিপি তদত্থানেৰ, তস্মা পহানত্তযম্পি ইমিনা পরিযাযেন মগ্গঞাণস্স কিচ্চন্তি ৰেদিতব্বং. পটিরাজানং ৰধিত্ৰা রজ্জং পত্তেন হি যম্পি ততো পুব্বে কতং, সব্বং ‘‘ইদঞ্চিদঞ্চ রঞ্ঞা কত’’ন্তিযেৰ ৰুচ্চতি.

৮৫২. সচ্ছিকিরিযাপীতি লোকিযসচ্ছিকিরিযা লোকুত্তরসচ্ছিকিরিযাতি দ্ৰেধা ভিন্নাপি লোকুত্তরায দস্সনভাৰনাৰসেন ভেদতো তিৰিধা হোতি. তত্থ ‘‘পঠমস্স ঝানস্স লাভীম্হি, ৰসীম্হি, পঠমজ্ঝানং সচ্ছিকতং মযা’’তিআদিনা (পারা. ২০৩-২০৪) নযেন আগতা পঠমজ্ঝানাদীনং ফস্সনা লোকিযসচ্ছিকিরিযা নাম. ফস্সনাতি অধিগন্ত্ৰা ‘‘ইদং মযা অধিগত’’ন্তি পচ্চক্খতো ঞাণফস্সেন ফুসনা. ইমমেৰ হি অত্থং সন্ধায ‘‘সচ্ছিকিরিযা পঞ্ঞা ফস্সনট্ঠে ঞাণ’’ন্তি (পটি. ম. মাতিকা ১.২৪) উদ্দিসিত্ৰা ‘‘যে যে ধম্মা সচ্ছিকতা হোন্তি, তে তে ধম্মা ফস্সিতা হোন্তী’’তি (পটি. ম. ১.৭৫) সচ্ছিকিরিযনিদ্দেসো ৰুত্তো.

অপিচ অত্তনো সন্তানে অনুপ্পাদেত্ৰাপি যে ধম্মা কেৰলং অপরপ্পচ্চযেন ঞাণেন ঞাতা, তে সচ্ছিকতা হোন্তি. তেনেৰ হি ‘‘সব্বং, ভিক্খৰে, সচ্ছিকাতব্বং. কিঞ্চ, ভিক্খৰে, সব্বং সচ্ছিকাতব্বং? চক্খু, ভিক্খৰে, সচ্ছিকাতব্ব’’ন্তিআদি (পটি. ম. ১.২৯) ৰুত্তং.

অপরম্পি ৰুত্তং ‘‘রূপং পস্সন্তো সচ্ছিকরোতি. ৰেদনং…পে… ৰিঞ্ঞাণং পস্সন্তো সচ্ছিকরোতি. চক্খুং…পে… জরামরণং…পে… অমতোগধং নিব্বানং পস্সন্তো সচ্ছিকরোতীতি. যে যে ধম্মা সচ্ছিকতা হোন্তি, তে তে ধম্মা ফস্সিতা হোন্তী’’তি (পটি. ম. ১.২৯).

পঠমমগ্গক্খণে পন নিব্বানদস্সনং দস্সনসচ্ছিকিরিযা. সেসমগ্গক্খণেসু ভাৰনাসচ্ছিকিরিযাতি. সা দুৰিধাপি ইধ অধিপ্পেতা. তস্মা দস্সনভাৰনাৰসেন নিব্বানস্স সচ্ছিকিরিযা ইমস্স ঞাণস্স কিচ্চন্তি ৰেদিতব্বং.

৮৫৩. দ্ৰে ¶ ¶ ভাৰনা অভিমতাতি ভাৰনা পন লোকিযভাৰনা লোকুত্তরভাৰনাতি দ্ৰেযেৰ অভিমতা. তত্থ লোকিযানং সীলসমাধিপঞ্ঞানং উপ্পাদনং, তাহি চ সন্তানৰাসনং লোকিযভাৰনা. লোকুত্তরানং উপ্পাদনং, তাহি চ সন্তানৰাসনং লোকুত্তরভাৰনা. তাসু ইধ লোকুত্তরা অধিপ্পেতা. লোকুত্তরানি হি সীলাদীনি চতুব্বিধম্পেতং ঞাণং উপ্পাদেতি. তেসং সহজাতপচ্চযাদিতায তেহি চ সন্তানং ৰাসেতীতি লোকুত্তরভাৰনাৰস্স কিচ্চন্তি.

এৰং –

কিচ্চানি পরিঞ্ঞাদীনি, যানি ৰুত্তানি অভিসমযকালে;

তানি চ যথাসভাৰেন, জানিতব্বানি সব্বানীতি.

এত্তাৰতা চ –

‘‘সীলে পতিট্ঠায নরো সপঞ্ঞো, চিত্তং পঞ্ঞঞ্চ ভাৰয’’ন্তি. –

এৰং সরূপেনেৰ আভতায পঞ্ঞাভাৰনায ৰিধানদস্সনত্থং যং ৰুত্তং ‘‘মূলভূতা দ্ৰে ৰিসুদ্ধিযো সম্পাদেত্ৰা সরীরভূতা পঞ্চ ৰিসুদ্ধিযো সম্পাদেন্তেন ভাৰেতব্বা’’তি, তং ৰিত্থারিতং হোতি. কথং ভাৰেতব্বাতি অযঞ্চ পঞ্হো ৰিস্সজ্জিতোতি.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

ঞাণদস্সনৰিসুদ্ধিনিদ্দেসো নাম

বাৰীসতিমো পরিচ্ছেদো.

২৩. পঞ্ঞাভাৰনানিসংসনিদ্দেসো

আনিসংসপকাসনা

৮৫৪. যং ¶ ¶ পন ৰুত্তং ‘‘পঞ্ঞাভাৰনায কো আনিসংসো’’তি, তত্থ ৰদাম. অযঞ্হি পঞ্ঞাভাৰনা নাম অনেকসতানিসংসা. তস্সা দীঘেনাপি অদ্ধুনা ন সুকরং ৰিত্থারতো আনিসংসং পকাসেতুং. সঙ্খেপতো পনস্সা নানাকিলেসৰিদ্ধংসনং, অরিযফলরসানুভৰনং, নিরোধসমাপত্তিসমাপজ্জনসমত্থতা, আহুনেয্যভাৰাদিসিদ্ধীতি অযমানিসংসো ৰেদিতব্বো.

নানাকিলেসৰিদ্ধংসনকথা

৮৫৫. তত্থ যং নামরূপপরিচ্ছেদতো পট্ঠায সক্কাযদিট্ঠাদীনং ৰসেন নানাকিলেসৰিদ্ধংসনং ৰুত্তং, অযং লোকিকায পঞ্ঞাভাৰনায আনিসংসো. যং অরিযমগ্গক্খণে সংযোজনাদীনং ৰসেন নানাকিলেসৰিদ্ধংসনং ৰুত্তং, অযং লোকুত্তরায পঞ্ঞাভাৰনায আনিসংসোতি ৰেদিতব্বো.

ভীমৰেগানুপতিতা, অসনীৰ সিলুচ্চযে;

ৰাযুৰেগসমুট্ঠিতো, অরঞ্ঞমিৰ পাৰকো.

অন্ধকারং ৰিয রৰি, সতেজুজ্জলমণ্ডলো;

দীঘরত্তানুপতিতং, সব্বানত্থৰিধাযকং.

কিলেসজালং পঞ্ঞা হি, ৰিদ্ধংসযতি ভাৰিতা;

সন্দিট্ঠিকমতো জঞ্ঞা, আনিসংসমিমং ইধ.

ফলসমাপত্তিকথা

৮৫৬. অরিযফলরসানুভৰনন্তি ¶ ন কেৰলঞ্চ কিলেসৰিদ্ধংসনঞ্ঞেৰ, অরিযফলরসানুভৰনম্পি পঞ্ঞাভাৰনায আনিসংসো. অরিযফলন্তি হি সোতাপত্তিফলাদি সামঞ্ঞফলং ৰুচ্চতি. তস্স দ্ৰীহাকারেহি রসানুভৰনং হোতি. মগ্গৰীথিযঞ্চ ফলসমাপত্তিৰসেন চ পৰত্তিযং. তত্রাস্স মগ্গৰীথিযং পৰত্তি দস্সিতাযেৰ.

৮৫৭. অপিচ ¶ যে ‘‘সংযোজনপ্পহানমত্তমেৰ ফলং নাম, ন কোচি অঞ্ঞো ধম্মো অত্থী’’তি ৰদন্তি, তেসং অনুনযত্থং ইদং সুত্তম্পি দস্সেতব্বং – ‘‘কথং পযোগপটিপ্পস্সদ্ধিপঞ্ঞা ফলে ঞাণং? সোতাপত্তিমগ্গক্খণে দস্সনট্ঠেন সম্মাদিট্ঠি মিচ্ছাদিট্ঠিযা ৰুট্ঠাতি, তদনুৰত্তককিলেসেহি চ খন্ধেহি চ ৰুট্ঠাতি, বহিদ্ধা চ সব্বনিমিত্তেহি ৰুট্ঠাতি. তম্পযোগপটিপ্পস্সদ্ধত্তা উপ্পজ্জতি সম্মাদিট্ঠি, মগ্গস্সেতং ফল’’ন্তি (পটি. ম. ১.৬৩) ৰিত্থারেতব্বং.

‘‘চত্তারো মগ্গা অপরিযাপন্না, চত্তারি চ সামঞ্ঞফলানি, ইমে ধম্মা অপ্পমাণারম্মণা’’ (ধ. স. ১৪২২). ‘‘মহগ্গতো ধম্মো অপ্পমাণস্স ধম্মস্স অনন্তরপচ্চযেন পচ্চযো’’তি (পট্ঠা. ২.১২.৬২) এৰমাদীনিপি চেত্থ সাধকানি.

৮৫৮. ফলসমাপত্তিযং পৰত্তিদস্সনত্থং পনস্স ইদং পঞ্হাকম্মং – কা ফলসমাপত্তি, কে তং সমাপজ্জন্তি, কে ন সমাপজ্জন্তি, কস্মা সমাপজ্জন্তি, কথঞ্চস্সা সমাপজ্জনং হোতি, কথং ঠানং, কথং ৰুট্ঠানং, কিং ফলস্স অনন্তরং, কস্স চ ফলং অনন্তরন্তি?

৮৫৯. তত্থ কা ফলসমাপত্তীতি যা অরিযফলস্স নিরোধে অপ্পনা.

৮৬০. কে তং সমাপজ্জন্তি, কে ন সমাপজ্জন্তীতি সব্বেপি পুথুজ্জনা ন সমাপজ্জন্তি. কস্মা? অনধিগতত্তা. অরিযা পন সব্বেপি সমাপজ্জন্তি. কস্মা? অধিগতত্তা. উপরিমা পন হেট্ঠিমং ন সমাপজ্জন্তি, পুগ্গলন্তরভাৰুপগমনেন পটিপ্পস্সদ্ধত্তা. হেট্ঠিমা চ উপরিমং, অনধিগতত্তা. অত্তনো অত্তনোযেৰ পন ফলং সমাপজ্জন্তীতি ইদমেত্থ সন্নিট্ঠানং.

কেচি পন ‘‘সোতাপন্নসকদাগামিনোপি ন সমাপজ্জন্তি. উপরিমা দ্ৰেযেৰ সমাপজ্জন্তী’’তি ¶ ৰদন্তি. ইদঞ্চ তেসং কারণং, এতে হি সমাধিস্মিং পরিপূরকারিনোতি. তং পুথুজ্জনস্সাপি অত্তনা পটিলদ্ধলোকিযসমাধিসমাপজ্জনতো অকারণমেৰ. কিঞ্চেত্থ কারণাকারণচিন্তায. ননু পাল়িযংযেৰ ৰুত্তং – ‘‘কতমে দস গোত্রভুধম্মা ৰিপস্সনাৰসেন উপ্পজ্জন্তি? সোতাপত্তিমগ্গপটিলাভত্থায উপ্পাদং পৰত্তং…পে… উপাযাসং বহিদ্ধা সঙ্খারনিমিত্তং অভিভুয্যতীতি গোত্রভু. সোতাপত্তিফলসমাপত্তত্থায সকদাগামিমগ্গং ¶ …পে… অরহত্তফলসমাপত্তত্থায… সুঞ্ঞতৰিহারসমাপত্তত্থায… অনিমিত্তৰিহারসমাপত্তত্থায উপ্পাদং…পে… বহিদ্ধা সঙ্খারনিমিত্তং অভিভুয্যতীতি গোত্রভূ’’তি (পটি. ম. ১.৬০). তস্মা সব্বেপি অরিযা অত্তনো অত্তনো ফলং সমাপজ্জন্তীতি নিট্ঠমেত্থ গন্তব্বং.

৮৬১. কস্মা সমাপজ্জন্তীতি দিট্ঠধম্মসুখৰিহারত্থং. যথা হি রাজা রজ্জসুখং, দেৰতা দিব্বসুখং অনুভৰন্তি, এৰং অরিযা ‘‘অরিযং লোকুত্তরসুখং অনুভৰিস্সামা’’তি অদ্ধানপ্পরিচ্ছেদং কত্ৰা ইচ্ছিতিচ্ছিতক্খণে ফলসমাপত্তিং সমাপজ্জন্তি.

৮৬২. কথঞ্চস্সা সমাপজ্জনং হোতি, কথং ঠানং, কথং ৰুট্ঠানন্তি দ্ৰীহি তাৰ আকারেহি অস্সা সমাপজ্জনং হোতি – নিব্বানতো অঞ্ঞস্স আরম্মণস্স অমনসিকারা নিব্বানস্স চ মনসিকারা. যথাহ – ‘‘দ্ৰে খো, আৰুসো, পচ্চযা অনিমিত্তায চেতোৰিমুত্তিযা সমাপত্তিযা সব্বনিমিত্তানঞ্চ অমনসিকারো, অনিমিত্তায চ ধাতুযা মনসিকারো’’তি (ম. নি. ১.৪৫৮).

৮৬৩. অযম্পনেত্থ সমাপজ্জনক্কমো. ফলসমাপত্তত্থিকেন হি অরিযসাৰকেন রহোগতেন পটিসল্লীনেন উদযব্বযাদিৰসেন সঙ্খারা ৰিপস্সিতব্বা. তস্স পৰত্তানুপুব্বৰিপস্সনস্স সঙ্খারারম্মণগোত্রভুঞাণানন্তরা ফলসমাপত্তিৰসেন নিরোধে চিত্তং অপ্পেতি. ফলসমাপত্তিনিন্নতায চেত্থ সেক্খস্সাপি ফলমেৰ উপ্পজ্জতি, ন মগ্গো.

যে পন ৰদন্তি ‘‘সোতাপন্নো ‘ফলসমাপত্তিং সমাপজ্জিস্সামী’তি ৰিপস্সনং পট্ঠপেত্ৰা সকদাগামী হোতি. সকদাগামী চ অনাগামী’’তি, তে ৰত্তব্বা ‘‘এৰং সতি অনাগামী অরহা ভৰিস্সতি, অরহা পচ্চেকবুদ্ধো, পচ্চেকবুদ্ধো চ বুদ্ধো. তস্মা ন কিঞ্চি এতং, পাল়িৰসেনেৰ চ পটিক্খিত্ত’’ন্তিপি ন গহেতব্বং. ইদমেৰ পন গহেতব্বং – সেক্খস্সাপি ফলমেৰ ¶ উপ্পজ্জতি, ন মগ্গো. ফলঞ্চস্স সচে অনেন পঠমজ্ঝানিকো মগ্গো অধিগতো হোতি. পঠমজ্ঝানিকমেৰ উপ্পজ্জতি. সচে দুতিযাদীসু অঞ্ঞতরজ্ঝানিকো, দুতিযাদীসু অঞ্ঞতরজ্ঝানিকমেৰাতি. এৰং তাৰস্সা সমাপজ্জনং হোতি.

৮৬৪. ‘‘তযো ¶ খো, আৰুসো, পচ্চযা অনিমিত্তায চেতোৰিমুত্তিযা ঠিতিযা সব্বনিমিত্তানঞ্চ অমনসিকারো, অনিমিত্তায চ ধাতুযা মনসিকারো, পুব্বে চ অভিসঙ্খারো’’তি (ম. নি. ১.৪৫৮) ৰচনতো পনস্সা তীহাকারেহি ঠানং হোতি. তত্থ পুব্বে চ অভিসঙ্খারোতি সমাপত্তিতো পুব্বে কালপরিচ্ছেদো. ‘‘অসুকস্মিং নাম কালে ৰুট্ঠহিস্সামী’’তি পরিচ্ছিন্নত্তা হিস্সা যাৰ সো কালো নাগচ্ছতি, তাৰ ঠানং হোতি. এৰমস্সা ঠানং হোতীতি.

৮৬৫. ‘‘দ্ৰে খো, আৰুসো, পচ্চযা অনিমিত্তায চেতোৰিমুত্তিযা ৰুট্ঠানায সব্বনিমিত্তানঞ্চ মনসিকারো, অনিমিত্তায চ ধাতুযা অমনসিকারো’’তি (ম. নি. ১.৪৫৮) ৰচনতো পনস্সা দ্ৰীহাকারেহি ৰুট্ঠানং হোতি. তত্থ সব্বনিমিত্তানন্তি রূপনিমিত্তৰেদনাসঞ্ঞাসঙ্খারৰিঞ্ঞাণনিমিত্তানং. কামঞ্চ ন সব্বানেৰেতানি একতো মনসিকরোতি সব্বসঙ্গাহিকৰসেন পনেতং ৰুত্তং. তস্মা যং ভৰঙ্গস্স আরম্মণং হোতি, তং মনসিকরোতো ফলসমাপত্তিৰুট্ঠানং হোতীতি এৰমস্সা ৰুট্ঠানং ৰেদিতব্বং.

৮৬৬. কিং ফলস্স অনন্তরং, কস্স চ ফলং অনন্তরন্তি ফলস্স তাৰ ফলমেৰ ৰা অনন্তরং হোতি, ভৰঙ্গং ৰা. ফলং পন অত্থি মগ্গানন্তরং, অত্থি ফলানন্তরং, অত্থি গোত্রভুঅনন্তরং, অত্থি নেৰসঞ্ঞানাসঞ্ঞাযতনানন্তরং. তত্থ মগ্গৰীথিযং মগ্গানন্তরং, পুরিমস্স পুরিমস্স পচ্ছিমং পচ্ছিমং ফলানন্তরং. ফলসমাপত্তীসু পুরিমং পুরিমং গোত্রভুঅনন্তরং. গোত্রভূতি চেত্থ অনুলোমং ৰেদিতব্বং. ৰুত্তঞ্হেতং পট্ঠানে – ‘‘অরহতো অনুলোমং ফলসমাপত্তিযা অনন্তরপচ্চযেন পচ্চযো. সেক্খানং অনুলোমং ফলসমাপত্তিযা অনন্তরপচ্চযেন পচ্চযো’’তি (পট্ঠা. ১.১.৪১৭). যেন ফলেন নিরোধা ৰুট্ঠানং হোতি, তং নেৰসঞ্ঞানাসঞ্ঞাযতনানন্তরন্তি. তত্থ ঠপেত্ৰা মগ্গৰীথিযং উপ্পন্নং ফলং অৰসেসং সব্বং ফলসমাপত্তিৰসেন পৰত্তং নাম. এৰমেতং মগ্গৰীথিযং ফলসমাপত্তিযং ৰা উপ্পজ্জনৰসেন,

পটিপ্পস্সদ্ধদরথং ¶ , অমতারম্মণং সুভং;

ৰন্তলোকামিসং সন্তং, সামঞ্ঞফলমুত্তমং.

ওজৰন্তেন সুচিনা, সুখেন অভিসন্দিতং;

যেন সাতাতিসাতেন, অমতেন মধুং ৰিয.

তং ¶ সুখং তস্স অরিযস্স, রসভূতমনুত্তরং;

ফলস্স পঞ্ঞং ভাৰেত্ৰা, যস্মা ৰিন্দতি পণ্ডিতো.

তস্মা অরিযফলস্সেতং, রসানুভৰনং ইধ;

ৰিপস্সনাভাৰনায, আনিসংসোতি ৰুচ্চতি.

নিরোধসমাপত্তিকথা

৮৬৭. নিরোধসমাপত্তিসমাপজ্জনসমত্থতাতি ন কেৰলঞ্চ অরিযফলরসানুভৰনংযেৰ, অযং পন নিরোধসমাপত্তিযা সমাপজ্জনসমত্থতাপি ইমিস্সা পঞ্ঞাভাৰনায আনিসংসোতি ৰেদিতব্বো.

তত্রিদং নিরোধসমাপত্তিযা ৰিভাৰনত্থং পঞ্হাকম্মং – কা নিরোধসমাপত্তি, কে তং সমাপজ্জন্তি, কে ন সমাপজ্জন্তি, কত্থ সমাপজ্জন্তি, কস্মা সমাপজ্জন্তি, কথঞ্চস্সা সমাপজ্জনং হোতি, কথং ঠানং, কথং ৰুট্ঠানং, ৰুট্ঠিতস্স কিংনিন্নং চিত্তং হোতি, মতস্স চ সমাপন্নস্স চ কো ৰিসেসো, নিরোধসমাপত্তি কিং সঙ্খতা অসঙ্খতা লোকিযা লোকুত্তরা নিপ্ফন্না অনিপ্ফন্নাতি?

৮৬৮. তত্থ কা নিরোধসমাপত্তীতি যা অনুপুব্বনিরোধৰসেন চিত্তচেতসিকানং ধম্মানং অপ্পৰত্তি. কে তং সমাপজ্জন্তি, কে ন সমাপজ্জন্তীতি সব্বেপি পুথুজ্জনা, সোতাপন্না, সকদাগামিনো, সুক্খৰিপস্সকা চ অনাগামিনো, অরহন্তো ন সমাপজ্জন্তি. অট্ঠসমাপত্তিলাভিনো পন অনাগামিনো, খীণাসৰা চ সমাপজ্জন্তি. ‘‘দ্ৰীহি বলেহি সমন্নাগতত্তা ¶ , তযো চ সঙ্খারানং পটিপ্পস্সদ্ধিযা, সোল়সহি ঞাণচরিযাহি, নৰহি সমাধিচরিযাহি ৰসীভাৰতা পঞ্ঞা নিরোধসমাপত্তিযা ঞাণ’’ন্তি (পটি. ম. মাতিকা ১.৩৪) হি ৰুত্তং. অযঞ্চ সম্পদা ঠপেত্ৰা অট্ঠসমাপত্তিলাভিনো অনাগামিখীণাসৰে অঞ্ঞেসং নত্থি. তস্মা তেযেৰ সমাপজ্জন্তি, ন অঞ্ঞে.

৮৬৯. কতমানি পনেত্থ দ্ৰে বলানি…পে… কতমা ৰসীভাৰতাতি? ন এত্থ কিঞ্চি অম্হেহি ৰত্তব্বং অত্থি. সব্বমিদং এতস্স উদ্দেসস্স নিদ্দেসে ৰুত্তমেৰ. যথাহ –

‘‘দ্ৰীহি ¶ বলেহীতি দ্ৰে বলানি সমথবলং ৰিপস্সনাবলং. কতমং সমথবলং? নেক্খম্মৰসেন চিত্তস্স একগ্গতা অৰিক্খেপো সমথবলং. অব্যাপাদৰসেন… আলোকসঞ্ঞাৰসেন… অৰিক্খেপৰসেন…পে… পটিনিস্সগ্গানুপস্সিঅস্সাসৰসেন… পটিনিস্সগ্গানুপস্সিপস্সাসৰসেন চিত্তস্স একগ্গতা অৰিক্খেপো সমথবলন্তি. কেনট্ঠেন সমথবলং? পঠমজ্ঝানেন নীৰরণে ন কম্পতীতি সমথবলং. দুতিযজ্ঝানেন ৰিতক্কৰিচারে…পে… নেৰসঞ্ঞানাসঞ্ঞাযতনসমাপত্তিযা আকিঞ্চঞ্ঞাযতনসঞ্ঞায ন কম্পতীতি সমথবলং. উদ্ধচ্চে চ উদ্ধচ্চসহগতকিলেসে চ খন্ধে চ ন কম্পতি ন চলতি ন ৰেধতীতি সমথবলং. ইদং সমথবলং.

‘‘কতমং ৰিপস্সনাবলং? অনিচ্চানুপস্সনা ৰিপস্সনাবলং. দুক্খানুপস্সনা… অনত্তানুপস্সনা… নিব্বিদানুপস্সনা… ৰিরাগানুপস্সনা… নিরোধানুপস্সনা… পটিনিস্সগ্গানুপস্সনা ৰিপস্সনাবলং. রূপে অনিচ্চানুপস্সনা…পে… রূপে পটিনিস্সগ্গানুপস্সনা ৰিপস্সনাবলং. ৰেদনায… সঞ্ঞায… সঙ্খারেসু… ৰিঞ্ঞাণে… চক্খুস্মিং…পে… জরামরণে অনিচ্চানুপস্সনা. জরামরণে পটিনিস্সগ্গানুপস্সনা ৰিপস্সনাবলন্তি. কেনট্ঠেন ৰিপস্সনাবলং? অনিচ্চানুপস্সনায নিচ্চসঞ্ঞায ন কম্পতীতি ৰিপস্সনাবলং. দুক্খানুপস্সনায সুখসঞ্ঞায ন কম্পতীতি… অনত্তানুপস্সনায অত্তসঞ্ঞায ন কম্পতীতি… নিব্বিদানুপস্সনায নন্দিযা ন কম্পতীতি… ৰিরাগানুপস্সনায রাগে ন কম্পতীতি… নিরোধানুপস্সনায সমুদযে ন কম্পতীতি… পটিনিস্সগ্গানুপস্সনায আদানে ন কম্পতীতি ৰিপস্সনাবলং. অৰিজ্জায ¶ চ অৰিজ্জাসহগতকিলেসে চ খন্ধে চ ন কম্পতি ন চলতি ন ৰেধতীতি ৰিপস্সনাবলং. ইদং ৰিপস্সনাবলং.

‘‘তযো চ সঙ্খারানং পটিপ্পস্সদ্ধিযাতি কতমেসং তিণ্ণন্নং সঙ্খারানং পটিপ্পস্সদ্ধিযা? দুতিযজ্ঝানং সমাপন্নস্স ৰিতক্কৰিচারা ৰচীসঙ্খারা পটিপ্পস্সদ্ধা হোন্তি. চতুত্থং ঝানং সমাপন্নস্স অস্সাসপস্সাসা কাযসঙ্খারা পটিপ্পস্সদ্ধা হোন্তি. সঞ্ঞাৰেদযিতনিরোধং সমাপন্নস্স সঞ্ঞা চ ৰেদনা চ চিত্তসঙ্খারা পটিপ্পস্সদ্ধা হোন্তি. ইমেসং তিণ্ণন্নং সঙ্খারানং পটিপ্পস্সদ্ধিযা.

‘‘সোল়সহি ¶ ঞাণচরিযাহীতি কতমাহি সোল়সহি ঞাণচরিযাহি? অনিচ্চানুপস্সনা ঞাণচরিযা. দুক্খা… অনত্তা… নিব্বিদা… ৰিরাগা… নিরোধা… পটিনিস্সগ্গা… ৰিৰট্টানুপস্সনা ঞাণচরিযা. সোতাপত্তিমগ্গো ঞাণচরিযা. সোতাপত্তিফলসমাপত্তি ঞাণচরিযা. সকদাগামিমগ্গো…পে… অরহত্তফলসমাপত্তি ঞাণচরিযা. ইমাহি সোল়সহি ঞাণচরিযাহি.

‘‘নৰহি সমাধিচরিযাহীতি কতমাহি নৰহি সমাধিচরিযাহি? পঠমজ্ঝানং সমাধিচরিযা. দুতিযজ্ঝানং…পে… নেৰসঞ্ঞানাসঞ্ঞাযতনসমাপত্তি সমাধিচরিযা. পঠমজ্ঝানপটিলাভত্থায ৰিতক্কো চ ৰিচারো চ পীতি চ সুখঞ্চ চিত্তেকগ্গতা চ…পে… নেৰসঞ্ঞানাসঞ্ঞাযতনসমাপত্তিং পটিলাভত্থায ৰিতক্কো চ ৰিচারো চ পীতি চ সুখঞ্চ চিত্তেকগ্গতা চ. ইমাহি নৰহি সমাধিচরিযাহি.

‘‘ৰসীতি পঞ্চ ৰসিযো – আৰজ্জনৰসী, সমাপজ্জনৰসী, অধিট্ঠানৰসী, ৰুট্ঠানৰসী, পচ্চৰেক্খণৰসী. পঠমজ্ঝানং যত্থিচ্ছকং যদিচ্ছকং যাৰতিচ্ছকং আৰজ্জতি, আৰজ্জনায দন্ধাযিতত্তং নত্থীতি আৰজ্জনৰসী. পঠমজ্ঝানং যত্থিচ্ছকং যদিচ্ছকং যাৰতিচ্ছকং সমাপজ্জতি, সমাপজ্জনায দন্ধাযিতত্তং নত্থীতি সমাপজ্জনৰসী…পে… অধিট্ঠাতি অধিট্ঠানে…পে… ৰুট্ঠাতি ৰুট্ঠানে…পে… পচ্চৰেক্খতি পচ্চৰেক্খণায দন্ধাযিতত্তং নত্থীতি পচ্চৰেক্খণৰসী. দুতিযং…পে… নেৰসঞ্ঞানাসঞ্ঞাযতনসমাপত্তিং যত্থিচ্ছকং যদিচ্ছকং যাৰতিচ্ছকং আৰজ্জতি ¶ …পে… পচ্চৰেক্খতি. পচ্চৰেক্খণায দন্ধাযিতত্তং নত্থীতি পচ্চৰেক্খণৰসী. ইমা পঞ্চ ৰসিযো’’তি (পটি. ম. ১.৮৩).

৮৭০. এত্থ চ ‘‘সোল়সহি ঞাণচরিযাহী’’তি উক্কট্ঠনিদ্দেসো এস. অনাগামিনো পন চুদ্দসহি ঞাণচরিযাহি হোতি. যদি এৰং সকদাগামিনো দ্ৰাদসহি সোতাপন্নস্স চ দসহি কিং ন হোতীতি? ন হোতি, সমাধিপারিবন্ধিকস্স পঞ্চ কামগুণিকরাগস্স অপ্পহীনত্তা. তেসং হি সো অপ্পহীনো. তস্মা সমথবলং ন পরিপুণ্ণং হোতি, তস্মিং অপরিপূরে দ্ৰীহি বলেহি সমাপজ্জিতব্বং নিরোধসমাপত্তিং বলৰেকল্লেন সমাপজ্জিতুং ন সক্কোন্তি. অনাগামিস্স পন সো পহীনো, তস্মা এস পরিপুণ্ণবলো ¶ হোতি. পরিপুণ্ণবলত্তা সক্কোতি. তেনাহ ভগৰা – ‘‘নিরোধা ৰুট্ঠহন্তস্স নেৰসঞ্ঞানাসঞ্ঞাযতনকুসলং ফলসমাপত্তিযা অনন্তরপচ্চযেন পচ্চযো’’তি (পট্ঠা. ১.১.৪১৭). ইদঞ্হি পট্ঠানে মহাপকরণে অনাগামিনোৰ নিরোধা ৰুট্ঠানং সন্ধায ৰুত্তন্তি.

৮৭১. কত্থ সমাপজ্জন্তীতি পঞ্চৰোকারভৰে. কস্মা? অনুপুব্বসমাপত্তিসব্ভাৰতো. চতুৰোকারভৰে পন পঠমজ্ঝানাদীনং উপ্পত্তি নত্থি. তস্মা ন সক্কা তত্থ সমাপজ্জিতুন্তি. কেচি পন ‘‘ৰত্থুস্স অভাৰা’’তি ৰদন্তি.

৮৭২. কস্মা সমাপজ্জন্তীতি সঙ্খারানং পৰত্তিভেদে উক্কণ্ঠিত্ৰা দিট্ঠেৰ ধম্মে অচিত্তকা হুত্ৰা ‘‘নিরোধং নিব্বানং পত্ৰা সুখং ৰিহরিস্সামা’’তি সমাপজ্জন্তি.

৮৭৩. কথঞ্চস্সা সমাপজ্জনং হোতীতি সমথৰিপস্সনাৰসেন উস্সক্কিত্ৰা কতপুব্বকিচ্চস্স নেৰসঞ্ঞানাসঞ্ঞাযতনং নিরোধযতো, এৰমস্স সমাপজ্জনং হোতি. যো হি সমথৰসেনেৰ উস্সক্কতি, সো নেৰসঞ্ঞানাসঞ্ঞাযতনসমাপত্তিং পত্ৰা তিট্ঠতি. যো পন ৰিপস্সনাৰসেনেৰ উস্সক্কতি, সো ফলসমাপত্তিং পত্ৰা তিট্ঠতি. যো পন উভযৰসেনেৰ উস্সক্কিত্ৰা পুব্বকিচ্চং কত্ৰা নেৰসঞ্ঞানাসঞ্ঞাযতনং নিরোধেতি, সো তং সমাপজ্জতীতি অযমেত্থ সঙ্খেপো.

৮৭৪. অযং পন ৰিত্থারো – ইধ ভিক্খু নিরোধং সমাপজ্জিতুকামো কতভত্তকিচ্চো সুধোতহত্থপাদো ¶ ৰিৰিত্তে ওকাসে সুপঞ্ঞত্তম্হি আসনে নিসীদতি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা, সো পঠমং ঝানং সমাপজ্জিত্ৰা ৰুট্ঠায তত্থ সঙ্খারে অনিচ্চতো দুক্খতো অনত্ততো ৰিপস্সতি.

ৰিপস্সনা পনেসা তিৰিধা হোতি – সঙ্খারপরিগণ্হনকৰিপস্সনা, ফলসমাপত্তিৰিপস্সনা, নিরোধসমাপত্তিৰিপস্সনাতি. তত্থ সঙ্খারপরিগণ্হনকৰিপস্সনা মন্দা ৰা হোতু তিক্খা ৰা, মগ্গস্স পদট্ঠানং হোতিযেৰ. ফলসমাপত্তিৰিপস্সনা ¶ তিক্খাৰ ৰট্টতি মগ্গভাৰনাসদিসা. নিরোধসমাপত্তিৰিপস্সনা পন নাতিমন্দনাতিতিক্খা ৰট্টতি. তস্মা এস নাতিমন্দায নাতিতিক্খায ৰিপস্সনায তে সঙ্খারে ৰিপস্সতি.

ততো দুতিযং ঝানং সমাপজ্জিত্ৰা ৰুট্ঠায তত্থ সঙ্খারে তথেৰ ৰিপস্সতি. ততো ততিযং ঝানং…পে… ততো ৰিঞ্ঞাণঞ্চাযতনং সমাপজ্জিত্ৰা ৰুট্ঠায তত্থ সঙ্খারে তথেৰ ৰিপস্সতি. তথা আকিঞ্চঞ্ঞাযতনং সমাপজ্জিত্ৰা ৰুট্ঠায চতুব্বিধং পুব্বকিচ্চং করোতি – নানাবদ্ধঅৰিকোপনং, সঙ্ঘপটিমাননং, সত্থুপক্কোসনং, অদ্ধানপরিচ্ছেদন্তি.

৮৭৫. তত্থ নানাবদ্ধঅৰিকোপনন্তি যং ইমিনা ভিক্খুনা সদ্ধিং একাবদ্ধং ন হোতি, নানাবদ্ধং হুত্ৰা ঠিতং পত্তচীৰরং ৰা মঞ্চপীঠং ৰা নিৰাসগেহং ৰা অঞ্ঞং ৰা পন কিঞ্চি পরিক্খারজাতং, তং যথা ন ৰিকুপ্পতি, অগ্গিউদকৰাতচোরউন্দূরাদীনং ৰসেন ন ৰিনস্সতি, এৰং অধিট্ঠাতব্বং.

তত্রিদং অধিট্ঠানৰিধানং ‘‘ইদঞ্চ ইদঞ্চ ইমস্মিং সত্তাহব্ভন্তরে মা অগ্গিনা ঝাযতু, মা উদকেন ৰুয্হতু, মা ৰাতেন ৰিদ্ধংসতু, মা চোরেহি হরিযতু, মা উন্দূরাদীহি খজ্জতূ’’তি. এৰং অধিট্ঠিতে তং সত্তাহং তস্স ন কোচি পরিস্সযো হোতি.

অনধিট্ঠহতো পন অগ্গিআদীহি ৰিনস্সতি মহানাগত্থেরস্স ৰিয. থেরো কির মাতুউপাসিকায গামং পিণ্ডায পাৰিসি. উপাসিকা যাগুং দত্ৰা আসনসালায নিসীদাপেসি. থেরো নিরোধং সমাপজ্জিত্ৰা নিসীদি. তস্মিং নিসিন্নে আসনসালায অগ্গিনা গহিতায সেসভিক্খূ অত্তনো অত্তনো নিসিন্নাসনং গহেত্ৰা পলাযিংসু. গামৰাসিকা সন্নিপতিত্ৰা ¶ থেরং দিস্ৰা ‘‘অলসসমণো’’তি আহংসু. অগ্গি তিণৰেণুকট্ঠানি ঝাপেত্ৰা থেরং পরিক্খিপিত্ৰা অট্ঠাসি. মনুস্সা ঘটেহি উদকং আহরিত্ৰা নিব্বাপেত্ৰা ছারিকং অপনেত্ৰা পরিভণ্ডং কত্ৰা পুপ্ফানি ৰিকিরিত্ৰা নমস্সমানা অট্ঠংসু. থেরো পরিচ্ছিন্নকালৰসেন ৰুট্ঠায তে দিস্ৰা ‘‘পাকটোম্হি জাতো’’তি ৰেহাসং উপ্পতিত্ৰা পিযঙ্গুদীপং অগমাসি. ইদং নানাবদ্ধঅৰিকোপনং নাম.

যং একাবদ্ধং হোতি নিৰাসনপাৰুরণং ৰা নিসিন্নাসনং ৰা, তত্থ ৰিসুং অধিট্ঠানকিচ্চং নত্থি. সমাপত্তিৰসেনেৰ নং রক্খতি আযস্মতো সঞ্জীৰস্স ৰিয ¶ . ৰুত্তম্পি চেতং ‘‘আযস্মতো সঞ্জীৰস্স সমাধিৰিপ্ফারা ইদ্ধি, আযস্মতো সারিপুত্তস্স সমাধিৰিপ্ফারা ইদ্ধী’’তি.

৮৭৬. সঙ্ঘপটিমাননন্তি সঙ্ঘস্স পটিমাননং উদিক্খনং. যাৰ এসো ভিক্খু আগচ্ছতি, তাৰ সঙ্ঘকম্মস্স অকরণন্তি অত্থো. এত্থ চ ন পটিমাননং এতস্স পুব্বকিচ্চং, পটিমাননাৰজ্জনং পন পুব্বকিচ্চং. তস্মা এৰং আৰজ্জিতব্বং ‘‘সচে মযি সত্তাহং নিরোধং সমাপজ্জিত্ৰা নিসিন্নে সঙ্ঘো উত্তিকম্মাদীসু কিঞ্চিদেৰ কম্মং কত্তুকামো হোতি, যাৰ মং কোচি ভিক্খু আগন্ত্ৰা ন পক্কোসতি, তাৰদেৰ ৰুট্ঠহিস্সামী’’তি. এৰং কত্ৰা সমাপন্নো হি তস্মিং সমযে ৰুট্ঠাতিযেৰ.

যো পন এৰং ন করোতি, সঙ্ঘো চ সন্নিপতিত্ৰা তং অপস্সন্তো ‘‘অসুকো ভিক্খু কুহি’’ন্তি ‘‘নিরোধসমাপন্নো’’তি ৰুত্তে সঙ্ঘো কঞ্চি ভিক্খুং পেসেতি ‘‘গচ্ছ নং সঙ্ঘস্স ৰচনেন পক্কোসাহী’’তি. অথস্স তেন ভিক্খুনা সৰনূপচারে ঠত্ৰা ‘‘সঙ্ঘো তং আৰুসো পটিমানেতী’’তি ৰুত্তমত্তেৰ ৰুট্ঠানং হোতি. এৰং গরুকা হি সঙ্ঘস্স আণা নাম. তস্মা তং আৰজ্জিত্ৰা যথা সযমেৰ ৰুট্ঠাতি, এৰং সমাপজ্জিতব্বং.

৮৭৭. সত্থুপক্কোসনন্তি ইধাপি সত্থুপক্কোসনাৰজ্জনমেৰ ইমস্স কিচ্চং. তস্মা তম্পি এৰং আৰজ্জিতব্বং ‘‘সচে মযি সত্তাহং নিরোধং সমাপজ্জিত্ৰা নিসিন্নে সত্থা ওতিণ্ণৰত্থুস্মিং সিক্খাপদং ৰা পঞ্ঞপেতি, তথারূপায ৰা অত্থুপ্পত্তিযা ধম্মং দেসেতি, যাৰ মং ¶ কোচি আগন্ত্ৰা ন পক্কোসতি, তাৰদেৰ ৰুট্ঠহিস্সামী’’তি. এৰং কত্ৰা নিসিন্নো হি তস্মিং সমযে ৰুট্ঠাতিযেৰ.

যো পন এৰং ন করোতি, সত্থা চ সঙ্ঘে সন্নিপতিতে তং অপস্সন্তো ‘‘অসুকো ভিক্খু কুহি’’ন্তি ‘‘নিরোধসমাপন্নো’’তি ৰুত্তে কঞ্চি ভিক্খুং পেসেতি ‘‘গচ্ছ নং মম ৰচনেন পক্কোসা’’তি. অথস্স তেন ভিক্খুনা সৰনূপচারে ঠত্ৰা ‘‘সত্থা আযস্মন্তং আমন্তেতী’’তি ৰুত্তমত্তেৰ ৰুট্ঠানং হোতি. এৰং গরুকং হি সত্থুপক্কোসনং, তস্মা তং আৰজ্জিত্ৰা যথা সযমেৰ ৰুট্ঠাতি, এৰং সমাপজ্জিতব্বং.

৮৭৮. অদ্ধানপরিচ্ছেদোতি জীৰিতদ্ধানস্স পরিচ্ছেদো. ইমিনা ভিক্খুনা অদ্ধানপরিচ্ছেদে সুকুসলেন ভৰিতব্বং. অত্তনো ‘‘আযুসঙ্খারা সত্তাহং ¶ পৰত্তিস্সন্তি ন পৰত্তিস্সন্তী’’তি আৰজ্জিত্ৰাৰ সমাপজ্জিতব্বং. সচে হি সত্তাহব্ভন্তরে নিরুজ্ঝনকে আযুসঙ্খারে অনাৰজ্জিত্ৰাৰ সমাপজ্জতি, নাস্স নিরোধসমাপত্তি মরণং পটিবাহিতুং সক্কোতি. অন্তোনিরোধে মরণস্স নত্থিতায অন্তরাৰ সমাপত্তিতো ৰুট্ঠাতি. তস্মা এতং আৰজ্জিত্ৰাৰ সমাপজ্জিতব্বং. অৰসেসং হি অনাৰজ্জিতুম্পি ৰট্টতি. ইদং পন আৰজ্জিতব্বমেৰাতি ৰুত্তং.

৮৭৯. সো এৰং আকিঞ্চঞ্ঞাযতনং সমাপজ্জিত্ৰা ৰুট্ঠায ইমং পুব্বকিচ্চং কত্ৰা নেৰসঞ্ঞানাসঞ্ঞাযতনং সমাপজ্জতি. অথেকং ৰা দ্ৰে ৰা চিত্তৰারে অতিক্কমিত্ৰা অচিত্তকো হোতি, নিরোধং ফুসতি. কস্মা পনস্স দ্ৰিন্নং চিত্তানং উপরিচিত্তানি ন পৰত্তন্তীতি? নিরোধস্স পযোগত্তা. ইদঞ্হি ইমস্স ভিক্খুনো দ্ৰে সমথৰিপস্সনাধম্মে যুগনদ্ধে কত্ৰা অট্ঠ সমাপত্তিআরোহনং অনুপুব্বনিরোধস্স পযোগো, ন নেৰসঞ্ঞানাসঞ্ঞাযতনসমাপত্তিযাতি নিরোধস্স পযোগত্তা দ্ৰিন্নং চিত্তানং উপরি ন পৰত্তন্তি.

যো পন ভিক্খু আকিঞ্চঞ্ঞাযতনতো ৰুট্ঠায ইদং পুব্বকিচ্চং অকত্ৰা নেৰসঞ্ঞানাসঞ্ঞাযতনং সমাপজ্জতি, সো পরতো অচিত্তকো ভৰিতুং ন সক্কোতি, পটিনিৰত্তিত্ৰা পুন আকিঞ্চঞ্ঞাযতনেযেৰ পতিট্ঠাতি. মগ্গং অগতপুব্বপুরিসূপমা চেত্থ ৰত্তব্বা –

একো ¶ কির পুরিসো একং মগ্গং অগতপুব্বো অন্তরা উদককন্দরং ৰা গম্ভীরং উদকচিক্খল্লং অতিক্কমিত্ৰা ঠপিতং চণ্ডাতপসন্তত্তপাসাণং ৰা আগম্ম তং নিৰাসনপাৰুরণং অসণ্ঠপেত্ৰাৰ কন্দরং ওরূল়্হো পরিক্খারতেমনভযেন পুনদেৰ তীরে পতিট্ঠাতি. পাসাণং অক্কমিত্ৰাপি সন্তত্তপাদো পুনদেৰ ওরভাগে পতিট্ঠাতি. তত্থ যথা সো পুরিসো অসণ্ঠপিতনিৰাসনপাৰুরণত্তা কন্দরং ওতিণ্ণমত্তোৰ, তত্তপাসাণং অক্কন্তমত্তো এৰ চ পটিনিৰত্তিত্ৰা ওরতোৰ পতিট্ঠাতি, এৰং যোগাৰচরোপি পুব্বকিচ্চস্স অকতত্তা নেৰসঞ্ঞানাসঞ্ঞাযতনং সমাপন্নমত্তোৰ পটিনিৰত্তিত্ৰা আকিঞ্চঞ্ঞাযতনে পতিট্ঠাতি.

যথা পন পুব্বেপি তং মগ্গং গতপুব্বপুরিসো তং ঠানং আগম্ম একং সাটকং দল়্হং নিৰাসেত্ৰা অপরং হত্থেন গহেত্ৰা কন্দরং উত্তরিত্ৰা তত্তপাসাণং ¶ ৰা অক্কন্তমত্তকমেৰ করিত্ৰা পরতো গচ্ছতি, এৰমেৰং কতপুব্বকিচ্চো ভিক্খু নেৰসঞ্ঞানাসঞ্ঞাযতনং সমাপজ্জিত্ৰাৰ পরতো অচিত্তকো হুত্ৰা নিরোধং ফুসিত্ৰা ৰিহরতি.

৮৮০. কথং ঠানন্তি এৰং সমাপন্নায পনস্সা কালপরিচ্ছেদৰসেন চেৰ অন্তরাআযুক্খযসঙ্ঘপটিমাননসত্থুপক্কোসনাভাৰেন চ ঠানং হোতি.

৮৮১. কথং ৰুট্ঠানন্তি অনাগামিস্স অনাগামিফলুপ্পত্তিযা, অরহতো অরহত্তফলুপ্পত্তিযাতি এৰং দ্ৰেধা ৰুট্ঠানং হোতি.

৮৮২. ৰুট্ঠিতস্স কিংনিন্নং চিত্তং হোতীতি নিব্বাননিন্নং. ৰুত্তং হেতং ‘‘সঞ্ঞাৰেদযিতনিরোধসমাপত্তিযা ৰুট্ঠিতস্স খো, আৰুসো ৰিসাখ, ভিক্খুনো ৰিৰেকনিন্নং চিত্তং হোতি ৰিৰেকপোণং ৰিৰেকপব্ভার’’ন্তি (ম. নি. ১.৪৬৪).

৮৮৩. মতস্স চ সমাপন্নস্স চ কো ৰিসেসোতি অযম্পি অত্থো সুত্তে ৰুত্তোযেৰ. যথাহ – ‘‘য্ৰাযং, আৰুসো, মতো কালঙ্কতো, তস্স কাযসঙ্খারা নিরুদ্ধা পটিপ্পস্সদ্ধা, ৰচীসঙ্খারা… চিত্তসঙ্খারা নিরুদ্ধা পটিপ্পস্সদ্ধা, আযু পরিক্খীণো, উস্মা ৰূপসন্তা, ইন্দ্রিযানি পরিভিন্নানি. যো চাযং ভিক্খু সঞ্ঞাৰেদযিতনিরোধং সমাপন্নো, তস্সপি কাযসঙ্খারা ¶ নিরুদ্ধা পটিপ্পস্সদ্ধা, ৰচীসঙ্খারা… চিত্তসঙ্খারা নিরুদ্ধা পটিপ্পস্সদ্ধা, আযু অপরিক্খীণো, উস্মা অৰূপসন্তা, ইন্দ্রিযানি অপরিভিন্নানী’’তি (ম. নি. ১.৪৫৭).

৮৮৪. নিরোধসমাপত্তি সঙ্খতাতিআদিপুচ্ছাযং পন সঙ্খতাতিপি অসঙ্খতাতিপি লোকিযাতিপি লোকুত্তরাতিপি ন ৰত্তব্বা. কস্মা? সভাৰতো নত্থিতায. যস্মা পনস্সা সমাপজ্জন্তস্স ৰসেন সমাপন্না নাম হোতি, তস্মা নিপ্ফন্নাতি ৰত্তুং ৰট্টতি, নো অনিপ্ফন্না.

ইতি সন্তং সমাপত্তিং, ইমং অরিযনিসেৰিতং;

দিট্ঠেৰ ধম্মে নিব্বানমিতিসঙ্খং উপাগতং;

ভাৰেত্ৰা অরিযং পঞ্ঞং, সমাপজ্জন্তি পণ্ডিতা.

যস্মা তস্মা ইমিস্সাপি, সমাপত্তিসমত্থতা;

অরিযমগ্গেসু পঞ্ঞায, আনিসংসোতি ৰুচ্চতীতি.

আহুনেয্যভাৰাদিসিদ্ধিকথা

৮৮৫. আহুনেয্যভাৰাদিসিদ্ধীতি ¶ ন কেৰলঞ্চ নিরোধসমাপত্তিযা সমাপজ্জনসমত্থতাৰ, অযং পন আহুনেয্যভাৰাদিসিদ্ধিপি ইমিস্সা লোকুত্তরপঞ্ঞাভাৰনায আনিসংসোতি ৰেদিতব্বো. অৰিসেসেন হি চতুব্বিধাযপি এতিস্সা ভাৰিতত্তা ভাৰিতপঞ্ঞো পুগ্গলো সদেৰকস্স লোকস্স আহুনেয্যো হোতি পাহুনেয্যো দক্খিণেয্যো অঞ্জলীকরণীযো অনুত্তরং পুঞ্ঞক্খেত্তং লোকস্স.

৮৮৬. ৰিসেসতো পনেত্থ পঠমমগ্গপঞ্ঞং তাৰ ভাৰেত্ৰা মন্দায ৰিপস্সনায আগতো মুদিন্দ্রিযোপি সত্তক্খত্তুপরমো নাম হোতি, সত্তসুগতিভৰে সংসরিত্ৰা দুক্খস্সন্তং করোতি. মজ্ঝিমায ৰিপস্সনায আগতো মজ্ঝিমিন্দ্রিযো কোলংকোলো নাম হোতি, দ্ৰে ৰা তীণি ৰা কুলানি ¶ সন্ধাৰিত্ৰা সংসরিত্ৰা দুক্খস্সন্তং করোতি. তিক্খায ৰিপস্সনায আগতো তিক্খিন্দ্রিযো একবীজী নাম হোতি, একঞ্ঞেৰ মানুসকং ভৰং নিব্বত্তেত্ৰা দুক্খস্সন্তং করোতি.

৮৮৭. দুতিযমগ্গপঞ্ঞং ভাৰেত্ৰা সকদাগামী নাম হোতি, সকিদেৰ ইমং লোকং আগন্ত্ৰা দুক্খস্সন্তং করোতি.

৮৮৮. ততিযমগ্গপঞ্ঞং ভাৰেত্ৰা অনাগামী নাম হোতি. সো ইন্দ্রিযৰেমত্ততাৰসেন অন্তরাপরিনিব্বাযী, উপহচ্চপরিনিব্বাযী, অসঙ্খারপরিনিব্বাযী, সসঙ্খারপরিনিব্বাযী, উদ্ধংসোতো অকনিট্ঠগামীতি পঞ্চধা. ইধ ৰিহাযনিট্ঠো হোতি. তত্থ অন্তরাপরিনিব্বাযীতি যত্থ কত্থচি সুদ্ধাৰাসভৰে উপপজ্জিত্ৰা আযুৰেমজ্ঝং অপ্পত্ৰাৰ পরিনিব্বাযতি. উপহচ্চপরিনিব্বাযীতি আযুৰেমজ্ঝং অতিক্কমিত্ৰা পরিনিব্বাযতি. অসঙ্খারপরিনিব্বাযীতি অসঙ্খারেন অপ্পযোগেন উপরিমগ্গং নিব্বত্তেতি. সসঙ্খারপরিনিব্বাযীতি সসঙ্খারেন সপ্পযোগেন উপরিমগ্গং নিব্বত্তেতি. উদ্ধংসোতো অকনিট্ঠগামীতি যত্থুপপন্নো, ততো উদ্ধং যাৰ অকনিট্ঠভৰা আরুয্হ তত্থ পরিনিব্বাযতি.

৮৮৯. চতুত্থমগ্গপঞ্ঞং ভাৰেত্ৰা কোচি সদ্ধাৰিমুত্তো হোতি, কোচি পঞ্ঞাৰিমুত্তো হোতি, কোচি উভতোভাগৰিমুত্তো হোতি, কোচি তেৰিজ্জো, কোচি ছল়ভিঞ্ঞো, কোচি পটিসম্ভিদপ্পভেদপ্পত্তো মহাখীণাসৰো. যং সন্ধায ৰুত্তং ‘‘মগ্গক্খণে পনেস তং জটং ৰিজটেতি নাম ¶ . ফলক্খণে ৰিজটিতজটো সদেৰকস্স লোকস্স অগ্গদক্খিণেয্যো হোতী’’তি.

এৰং অনেকানিসংসা, অরিযপঞ্ঞায ভাৰনা;

যস্মা তস্মা করেয্যাথ, রতিং তত্থ ৰিচক্খণো.

৮৯০. এত্তাৰতা চ –

সীলে পতিট্ঠায নরো সপঞ্ঞো, চিত্তং পঞ্ঞঞ্চ ভাৰযং;

আতাপী নিপকো ভিক্খু, সো ইমং ৰিজটযে জটন্তি. –

ইমিস্সা ¶ গাথায সীলসমাধিপঞ্ঞামুখেন দেসিতে ৰিসুদ্ধিমগ্গে সানিসংসা পঞ্ঞাভাৰনা পরিদীপিতা হোতীতি.

ইতি সাধুজনপামোজ্জত্থায কতে ৰিসুদ্ধিমগ্গে

পঞ্ঞাভাৰনাধিকারে

পঞ্ঞাভাৰনানিসংসনিদ্দেসো নাম

তেৰীসতিমো পরিচ্ছেদো.

নিগমনকথা

৮৯১. এত্তাৰতা ¶ চ –

‘‘সীলে পতিট্ঠায নরো সপঞ্ঞো, চিত্তং পঞ্ঞঞ্চ ভাৰযং;

আতাপী নিপকো ভিক্খু, সো ইমং ৰিজটযে জট’’ন্তি. –

ইমং গাথং নিক্খিপিত্ৰা যদৰোচুম্হ –

‘‘ইমিস্সা দানি গাথায, কথিতায মহেসিনা;

ৰণ্ণযন্তো যথাভূতং, অত্থং সীলাদিভেদনং.

‘‘সুদুল্লভং লভিত্ৰান, পব্বজ্জং জিনসাসনে;

সীলাদিসঙ্গহং খেমং, উজুং মগ্গং ৰিসুদ্ধিযা.

‘‘যথাভূতং অজানন্তা, সুদ্ধিকামাপি যে ইধ;

ৰিসুদ্ধিং নাধিগচ্ছন্তি, ৰাযমন্তাপি যোগিনো.

‘‘তেসং ¶ পামোজ্জকরণং, সুৰিসুদ্ধৰিনিচ্ছযং;

মহাৰিহারৰাসীনং, দেসনানযনিস্সিতং.

‘‘ৰিসুদ্ধিমগ্গং ভাসিস্সং, তং মে সক্কচ্চ ভাসতো;

ৰিসুদ্ধিকামা সব্বেপি, নিসামযথ সাধৰো’’তি.

স্ৰাযং ভাসিতো হোতি.

৮৯২. তত্থ চ –

তেসং সীলাদিভেদানং, অত্থানং যো ৰিনিচ্ছযো;

পঞ্চন্নম্পি নিকাযানং, ৰুত্তো অট্ঠকথানযে.

সমাহরিত্ৰা তং সব্বং, যেভুয্যেন সনিচ্ছযো;

সব্বসঙ্করদোসেহি, মুত্তো যস্মা পকাসিতো.

তস্মা ৰিসুদ্ধিকামেহি, সুদ্ধপঞ্ঞেহি যোগিহি;

ৰিসুদ্ধিমগ্গে এতস্মিং, করণীযোৰ আদরোতি.

৮৯৩.

ৰিভজ্জৰাদিসেট্ঠানং ¶ , থেরিযানং যসস্সিনং;

মহাৰিহারৰাসীনং, ৰংসজস্স ৰিভাৰিনো.

ভদন্তসঙ্ঘপালস্স, সুচিসল্লেখৰুত্তিনো;

ৰিনযাচারযুত্তস্স, যুত্তস্স পটিপত্তিযং.

খন্তিসোরচ্চমেত্তাদি-গুণভূসিতচেতসো;

অজ্ঝেসনং গহেত্ৰান, করোন্তেন ইমং মযা.

সদ্ধম্মট্ঠিতিকামেন ¶ , যো পত্তো পুঞ্ঞসঞ্চযো;

তস্স তেজেন সব্বেপি, সুখমেধন্তু পাণিনো.

৮৯৪.

ৰিসুদ্ধিমগ্গো এসো চ, অন্তরাযং ৰিনা ইধ;

নিট্ঠিতো অট্ঠপঞ্ঞাস-ভাণৰারায পাল়িযা.

যথা তথেৰ লোকস্স, সব্বে কল্যাণনিস্সিতা;

অনন্তরাযা ইজ্ঝন্তু, সীঘং সীঘং মনোরথাতি.

৮৯৫. পরম ৰিসুদ্ধ সদ্ধা বুদ্ধি ৰীরিয পটিমণ্ডিতেন সীলাচারজ্জৰ মদ্দৰাদিগুণসমুদযসমুদিতেন সকসময সমযন্তরগহনজ্ঝোগাহণসমত্থেন পঞ্ঞাৰেয্যত্তিযসমন্নাগতেন তিপিটকপরিযত্তিভেদে সাট্ঠকথে সত্থুসাসনে অপ্পটিহতঞাণপ্পভাৰেন মহাৰেয্যাকরণেন করণসম্পত্তিজনিতসুখৰিনিগ্গতমধুরোদারৰচনলাৰণ্ণযুত্তেন যুত্তমুত্তৰাদিনা ৰাদীৰরেন মহাকৰিনা ছল়ভিঞ্ঞাপটিসম্ভিদাদি ভেদগুণপটিমণ্ডিতে উত্তরিমনুস্সধম্মে অপ্পটিহতবুদ্ধীনং থেরৰংসপ্পদীপানং থেরানং মহাৰিহারৰাসীনং ৰংসালঙ্কারভূতেন ৰিপুলৰিসুদ্ধবুদ্ধিনা বুদ্ধঘোসোতি গরূহি গহিতনামধেয্যেন থেরেন মুদন্তখেদকৰত্তব্বেন কতো ৰিসুদ্ধিমগ্গো নাম.

৮৯৬.

তাৰ তিট্ঠতু লোকস্মিং, লোকনিত্থরণেসিনং;

দস্সেন্তো কুলপুত্তানং, নযং সীলাদিসুদ্ধিযা.

যাৰ ¶ বুদ্ধোতি নামম্পি, সুদ্ধচিত্তস্স তাদিনো;

লোকম্হি লোকজেট্ঠস্স, পৰত্ততি মহেসিনোতি.

ইতি সাধুজনপামোজ্জত্থায কতা ৰিসুদ্ধিমগ্গকথা,

পাল়িগণনায পন সা অট্ঠপঞ্ঞাসভাণৰারা হোতীতি.

ৰিসুদ্ধিমগ্গপকরণং নিট্ঠিতং.