📜

নমো তস্স ভগৰতো অরহতো সম্মাসম্বুদ্ধস্স

ৰিসুদ্ধিমগ্গ-মহাটীকা

(পঠমো ভাগো)

গন্থারম্ভকথা

সদ্ধম্মরংসিমালী যো, ৰিনেয্যকমলাকরে;

ৰিবোধেসি মহামোহ-তমং হন্ত্ৰান সব্বসো.

ঞাণাতিসযবিম্বং তং, ৰিসুদ্ধকরুণারুণং;

ৰন্দিত্ৰা নিরুপক্লেসং, বুদ্ধাদিচ্চং মহোদযং.

লোকালোককরং ধম্মং, গুণরস্মিসমুজ্জলং;

অরিযসঙ্ঘঞ্চ সম্ফুল্লং, ৰিসুদ্ধকমলাকরং.

ৰন্দনাজনিতং পুঞ্ঞং, ইতি যং রতনত্তযে;

হতন্তরাযো সব্বত্থ, হুত্ৰাহং তস্স তেজসা.

সম্পন্নসীলাচারেন, ধীমতা সুচিৰুত্তিনা;

অজ্ঝেসিতো দাঠানাগত্থেরেন থিরচেতসা.

ৰিসুদ্ধচরিতো নাথো, যং ৰিসুদ্ধিমনুত্তরং;

পত্ৰা দেসেসি করুণাসমুস্সাহিতমানসো.

তস্সা অধিগমূপাযো, ৰিসুদ্ধনযমণ্ডিতো;

ৰিসুদ্ধিমগ্গো যো ৰুত্তো, সুৰিসুদ্ধপদক্কমো.

সুৰিসুদ্ধং অসংকিণ্ণং, নিপুণত্থৰিনিচ্ছযং;

মহাৰিহারৰাসীনং, সমযং অৰিলোমযং.

তস্স নিস্সায পোরাণং, কথামগ্গং অনাকুলং;

তন্তিনযানুগং সুদ্ধং, করিস্সামত্থৰণ্ণনং.

ইতি আকঙ্খমানস্স, সদ্ধম্মস্স চিরট্ঠিতিং;

ৰিভজন্তস্স তস্সত্থং, নিসামযথ সাধৰোতি.

নিদানাদিকথাৰণ্ণনা

১. স্ৰাযং ৰিসুদ্ধিমগ্গো যং সুত্তপদং নিস্সায পট্ঠপীযতি, তং তাৰ নিক্খিপিত্ৰা তস্স নিদানাদিনিদ্ধারণমুখেন নানপ্পকারতো অত্থং সংৰণ্ণেতুং ‘‘সীলে পতিট্ঠাযা’’তিআদি আরদ্ধং. ধম্মং সংৰণ্ণেন্তেন হি আদিতো তস্স নিদানং ৰত্তব্বং, ততো পযোজনং পিণ্ডত্থো পদত্থো সম্বন্ধো অধিপ্পাযো চোদনা সোধনং ৰত্তব্বং. তথা চেৰ আচরিযেন পটিপন্নং. এত্থ হি ভগৰন্তং কিরাতিআদি দেসনায নিদানপযোজননিদ্ধারণং, ৰিসুদ্ধিমগ্গং ভাসিস্সন্তিআদি পিণ্ডত্থনিদ্ধারণং, সীলে ঠত্ৰাতিআদি পদত্থসম্বন্ধাধিপ্পাযৰিভাৰনা, কিং সীলন্তিআদি চোদনা, ততো পরং সোধনং, সমাধিপঞ্ঞাকথাসুপি এসেৰ নযো. কস্মা পনেত্থ ৰিস্সজ্জনগাথা আদিম্হি নিক্খিত্তা, ন পুচ্ছাগাথা. পুচ্ছাপুব্বিকা হি ৰিস্সজ্জনাতি? ৰুচ্চতে – তদত্থস্স মঙ্গলভাৰতো, সাসনস্স আদিকল্যাণাদিভাৰৰিভাৰনতো, ভযাদিউপদ্দৰনিৰারণেন অন্তরাযৰিধমনতো, উপরি সংৰণ্ণেতব্বধম্মসঙ্গহতো চাতি ৰেদিতব্বং.

এত্থাহ – কস্মা পনাযং ৰিসুদ্ধিমগ্গকথা ৰত্থুপুব্বিকা আরদ্ধা, ন সত্থুথোমনাপুব্বিকাতি? ৰুচ্চতে – ৰিসুং অসংৰণ্ণনাদিভাৰতো. সুমঙ্গলৰিলাসিনীআদযো ৰিয হি দীঘনিকাযাদীনং নাযং ৰিসুং সংৰণ্ণনা, ন পকরণন্তরং ৰা অভিধম্মাৰতারসুমতাৰতারাদি ৰিয. তাসংযেৰ পন সুমঙ্গলৰিলাসিনীআদীনং ৰিসেসভূতা. তেনেৰাহ ‘‘মজ্ঝে ৰিসুদ্ধিমগ্গো’’তিআদি (দী. নি. অট্ঠ. ১.গন্থারম্ভকথা; ম. নি. অট্ঠ. ১.গন্থারম্ভকথা; সং. নি. অট্ঠ. ১.১.গন্থারম্ভকথা; অ. নি. অট্ঠ. ১.১.গন্থারম্ভকথা). অথ ৰা থোমনাপুব্বিকাপি চাযং কথা ন ৰত্থুপুব্বিকাৰাতি দট্ঠব্বং. সাসনে হি ৰত্থুকিত্তনং ন লোকে ৰিয কেৰলং হোতি, সাসনসম্পত্তিকিত্তনত্তা পন সত্থু অৰিপরীতধম্মদেসনাভাৰৰিভাৰনেন সত্থুগুণসংকিত্তনং উল্লিঙ্গন্তমেৰ পৰত্ততি. তথা হি ৰক্খতি ‘‘এত্তাৰতা তিস্সো সিক্খা’’তিআদি. সোতাপন্নাদিভাৰস্স চ কারণন্তি এত্থ হি আদি-সদ্দেন সব্বসকদাগামিঅনাগামিনো ৰিয সব্বেপি অরহন্তো সঙ্গয্হন্তি ৰিভাগস্স অনুদ্ধটত্তা. তেন তিণ্ণম্পি বোধিসত্তানং নিব্বেধভাগিযা সীলাদযো ইধ ‘‘সীলে পতিট্ঠাযা’’তিআদিৰচনেন সঙ্গহিতাতি দট্ঠব্বং. তিণ্ণম্পি হি নেসং চরিমভৰে ৰিসেসতো সংসারভযিক্খণং, যথাসকং সীলে পতিট্ঠায সমথৰিপস্সনং উস্সুক্কাপেত্ৰা তণ্হাজটাৰিজটনপটিপত্তি চ সমানাতি. অথ ৰা ‘‘সো ইমং ৰিজটযে জট’’ন্তি সাধারণৰচনেন সাতিসযং, নিরতিসযঞ্চ তণ্হাজটাৰিজটনং গহিতং. তত্থ যং নিরতিসযং সৰাসনপ্পহানতায. তেন সত্থু পহানসম্পদা কিত্তিতা হোতি, তন্নিমিত্তা ঞাণসম্পদা চ. তদুভযেন নানন্তরিকতায আনুভাৰসম্পদাদযোপীতি. এৰম্পি থোমনাপুব্বিকাযং কথাতি ৰেদিতব্বং. অথ ৰা থোমনাপুব্বিকা এৰাযং কথাতি দট্ঠব্বং, ‘‘সব্বধম্মেসু অপ্পটিহতঞাণচারো’’তিআদিনা সত্থু থোমনং পুরক্খত্ৰা সংৰণ্ণনায আরদ্ধত্তা. সা পনাযং যস্মা পুচ্ছন্তস্স অজ্ঝাসযানুরূপং ব্যাকরণসমত্থতায ৰিভাৰনৰসেন পৰত্তিতা, আচিণ্ণঞ্চেতং আচরিযস্স যদিদং সংৰণ্ণেতব্বধম্মানুকূলং সংৰণ্ণনারম্ভে সত্থু অভিত্থৰনং. তস্মা ইমিনা কারণেন এৰমেত্থ থোমনা পৰত্তিতাতি. থোমনাকারস্স ৰুচ্চমানস্স কারণং উদ্ধরন্তেন পঠমং ৰিস্সজ্জনগাথং নিক্খিপিত্ৰা তস্সা নিদানচোদনামুখেন পুচ্ছাগাথং সরূপতো চ অত্থতো চ দস্সেত্ৰা তস্সা পুচ্ছায অৰিপরীতব্যাকরণসমত্থভাৰাৰজোতনং ভগৰতো থোমনং পুরক্খত্ৰা যথাধিপ্পেতধম্মসংৰণ্ণনা কতা. তেনাহ ‘‘সীলে পতিট্ঠাযা’’তিআদি. তত্থ গাথায অত্থো পরতো আৰি ভৰিস্সতি.

ইতীতিআদীসু ইতীতি অযং ইতি-সদ্দো হেতু পরিসমাপনাদিপদত্থৰিপরিযাযপকারাৰধারণনিদস্সনাদিঅনেকত্থপ্পভেদো. তথা হেস ‘‘রুপ্পতীতি খো, ভিক্খৰে, তস্মা ‘রূপ’ন্তি ৰুচ্চতী’’তিআদীসু (সং. নি. ৩.৭৯) হেতুম্হি আগতো. ‘‘তস্মাতিহ মে, ভিক্খৰে, ধম্মদাযাদা ভৰথ, মা আমিসদাযাদা. অত্থি মে তুম্হেসু অনুকম্পা ‘কিন্তি মে সাৰকা ধম্মদাযাদা ভৰেয্যুং, নো আমিসদাযাদা’’তিআদীসু (ম. নি. ১.২৯) পরিসমাপনে. ‘‘ইতি ৰা ইতি এৰরূপা নচ্চগীতৰাদিতৰিসূকদস্সনা পটিৰিরতো’’তিআদীসু (দী. নি. ১.১৯৭) আদিঅত্থে. ‘‘মাগণ্ডিযোতি তস্স ব্রাহ্মণস্স সঙ্খা সমঞ্ঞা পঞ্ঞত্তি ৰোহারো নামং নামকম্মং নামধেয্যং নিরুত্তি ব্যঞ্জনং অভিলাপো’’তিআদীসু (মহানি. ৭৩, ৭৫) পদত্থৰিপরিযাযে. ‘‘ইতি খো, ভিক্খৰে, সপ্পটিভযো বালো, অপ্পটিভযো পণ্ডিতো. সউপদ্দৰো বালো, অনুপদ্দৰো পণ্ডিতো. সউপসগ্গো বালো, অনুপসগ্গো পণ্ডিতো’’তিআদীসু (ম. নি. ৩.১২৪) পকারে. ‘‘অত্থি ইদপ্পচ্চযা জরামরণন্তি ইতি পুট্ঠেন সতা, আনন্দ, অত্থীতিস্স ৰচনীযং, কিংপচ্চযা জরামরণন্তি ইতি চে ৰদেয্য, জাতিপচ্চযা জরামরণন্তি ইচ্চস্স ৰচনীয’’ন্তিআদীসু (দী. নি. ২.৯৬) অৰধারণে, সন্নিট্ঠানেতি অত্থো. ‘‘অত্থীতি খো, কচ্চান, অযমেকো অন্তো, নত্থীতি খো, কচ্চান, অযং দুতিযো অন্তো’’তিআদীসু (সং. নি. ২.১৫; ৩.৯০) নিদস্সনে. ইধাপি নিদস্সনে দট্ঠব্বো, পকারেতিপি ৰত্তুং ৰট্টতেৰ. পঠমো পন ইতি-সদ্দো পরিসমাপনে দট্ঠব্বো. হীতি অৰধারণে. ইদন্তি আসন্নপচ্চক্খৰচনং যথাধিগতস্স সুত্তপদস্স অভিমুখীকরণতো.

ৰুত্তন্তি অযং ৰুত্ত-সদ্দো সউপসগ্গো, অনুপসগ্গো চ ৰপ্পনৰাপসমীকরণকেসোহারণজীৰিতৰুত্তিপমুত্তভাৰপাৰচনপৰত্তিতঅজ্ঝেসনকথনাদীসু দিস্সতি. তথা হি অযং –

‘‘গাৰো তস্স পজাযন্তি, খেত্তে ৰুত্তং ৰিরূহতি;

ৰুত্তানং ফলমস্নাতি, যো মিত্তানং ন দুব্ভতী’’তি. –

আদীসু (জা. ২.২২.১৯) ৰপ্পনে আগতো. ‘‘নো চ খো পটিৰুত্ত’’ন্তিআদীসু (পারা. ২৮৯) অট্ঠদন্তকাদীহি ৰাপসমীকরণে. ‘‘কাপটিকো মাণৰো দহরো ৰুত্তসিরো’’তিআদীসু (ম. নি. ২.৪২৬) কেসোহারণে. ‘‘পন্নলোমো পরদত্তৰুত্তো মিগভূতেন চেতসা ৰিহরতী’’তিআদীসু (চূল়ৰ. ৩৩২) জীৰিতৰুত্তিযং. ‘‘সেয্যথাপি নাম পণ্ডুপলাসো বন্ধনা পৰুত্তো অভব্বো হরিতত্থাযা’’তিআদীসু (ম. নি. ৩.৫৯; পারা. ৯২; পাচি. ৬৬৬; মহাৰ. ১২৯) বন্ধনতো পমুত্তভাৰে. ‘‘যেসমিদং এতরহি পোরাণং মন্তপদং গীতং পৰুত্তং সমিহিত’’ন্তিআদীসু (দী. নি. ১.২৮৫; ম. নি. ২.৪২৭; মহাৰ. ৩০০) পাৰচনভাৰেন পৰত্তিতে. লোকে পন ‘‘ৰুত্তো গুণো ৰুত্তো পারাযনো’’তিআদীসু অজ্ঝেসনে. ‘‘ৰুত্তং খো পনেতং ভগৰতা ‘ধম্মদাযাদা মে, ভিক্খৰে, ভৰথ, মা আমিসদাযাদা’তি’’আদীসু (ম. নি. ১.৩০) কথনে. ইধাপি কথনে এৰ দট্ঠব্বো. তস্মা ‘‘ইতি হি এৰমেৰ ইদং সুত্তং দেসিত’’ন্তি যথানিক্খিত্তং গাথং দেসিতভাৰেন নিদস্সেতি. তস্সা ৰা দেসিতাকারং অৰধারেতি.

কস্মাতি হেতুম্হি নিস্সক্কং. পনাতি ৰচনালঙ্কারমত্তং. উভযেনাপি কারণং পুচ্ছতি. এতন্তি যথাৰুত্তং সুত্তপদং পচ্চামসতি. ৰুত্তন্তি পুচ্ছানিমিত্তং. তদত্থস্স অত্তনো বুদ্ধিযং ৰিপরিৰত্তমানতং উপাদায ‘‘ইদ’’ন্তি ৰত্ৰা পুন ভগৰতা ভাসিতাকারং সন্ধায ‘‘এত’’ন্তি ৰুত্তং. সকলেন পনানেন ৰচনেন দেসনায নিদানং জোতিতং হোতি. পরতো তস্সা দেসকদেসকালপটিগ্গাহকে ৰিভাৰেতুং ‘‘ভগৰন্তং কিরা’’তিআদি ৰুত্তং. তত্থ কিরাতি অনুস্সৰনত্থে নিপাতো. তেন ৰুচ্চমানস্সত্থস্স অনু অনু সুয্যমানতং দীপেতি. রত্তিভাগেতি রত্তিযা একস্মিং কোট্ঠাসে, মজ্ঝিমযামেতি অধিপ্পাযো. ৰেস্সৰণাদযো ৰিয অপাকটনামধেয্যত্তা অঞ্ঞতরো. দেৰো এৰ দেৰপুত্তো. সংসযসমুগ্ঘাটত্থন্তি ৰিচিকিচ্ছাসল্লসমুদ্ধরণত্থং পুচ্ছীতি যোজনা. ‘‘সংসযসমুগ্ঘাটত্থ’’ন্তি চ ইমিনা পঞ্চসু পুচ্ছাসু অযং ৰিমতিচ্ছেদনাপুচ্ছাতি দস্সেতি. যেন অত্থেন তণ্হা ‘‘জটা’’তি ৰুত্তা, তমেৰ অত্থং দস্সেতুং ‘‘জালিনিযা’’তিআদি ৰুত্তং. সা হি অট্ঠসততণ্হাৰিচরিতপ্পভেদো অত্তনো অৰযৰভূতো এৰ জালো এতিস্সা অত্থীতি ‘‘জালিনী’’তি ৰুচ্চতি.

ইদানিস্সা জটাকারেন পৰত্তিং দস্সেতুং ‘‘সা হী’’তিআদি ৰুত্তং. তত্থ রূপাদীসু আরম্মণেসূতি তস্সা পৰত্তিট্ঠানমাহ, রূপাদিছল়ারম্মণৰিনিমুত্তস্স তণ্হাৰিসযস্স অভাৰতো. হেট্ঠুপরিযৰসেনাতি কদাচি রূপারম্মণে কদাচি যাৰ ধম্মারম্মণে কদাচি ধম্মারম্মণে কদাচি যাৰ রূপারম্মণেতি এৰং হেট্ঠা, উপরি চ পৰত্তিৰসেন. দেসনাক্কমেন চেত্থ হেট্ঠুপরিযতা দট্ঠব্বা. কদাচি কামভৰে কদাচি রূপভৰে কদাচি অরূপভৰে কদাচি ৰা অরূপভৰে…পে… কদাচি কামভৰেতি এৰমেত্থ হেট্ঠুপরিযৰসেন পৰত্তি ৰেদিতব্বা. সব্বসঙ্খারানং খণে খণে ভিজ্জনসভাৰত্তা অপরাপরুপ্পত্তি এত্থ সংসিব্বনন্তি আহ ‘‘পুনপ্পুনং উপ্পজ্জনতো’’তি. ‘‘সংসিব্বনট্ঠেনা’’তি ইদং যেন সম্বন্ধেন জটা ৰিযাতি জটাতি জটাতণ্হানং উপমূপমেয্যতা, তংদস্সনং. অযং হেত্থ অত্থো – যথা জালিনো ৰেল়ুগুম্বস্স সাখা, কোসসঞ্চযাদযো চ অত্তনা অত্তনো অৰযৰেহি সংসিব্বিতা ৰিনদ্ধা ‘‘জটা’’তি ৰুচ্চন্তি, এৰং তণ্হাপি সংসিব্বনসভাৰেনাতি, ‘‘সংসিব্বিতট্ঠেনা’’তি ৰা পাঠো, অত্তনাৰ অত্তনো সংসিব্বিতভাৰেনাতি অত্থো. অযং হি তণ্হা কোসকারকিমি ৰিয অত্তনাৰ অত্তানম্পি সংসিব্বন্তী পৰত্ততি. তেনাহ ভগৰা ‘‘রূপতণ্হা লোকে পিযরূপং সাতরূপং, এত্থেসা তণ্হা উপ্পজ্জমানা উপ্পজ্জতি, এত্থ নিৰিসমানা নিৰিসতী’’তিআদি (দী. নি. ২.৪০০; ম. নি. ১.৮৬; ৰিভ. ২০৩). ইমে সত্তা ‘‘মম ইদ’’ন্তি পরিগ্গহিতং ৰত্থুং অত্তনিব্বিসেসং মঞ্ঞমানা অব্ভন্তরিমং করোন্তি. অব্ভন্তরত্থো চ অন্তোসদ্দোতি সকপরিক্খারে উপ্পজ্জমানাপি তণ্হা ‘‘অন্তোজটা’’তি ৰুত্তা. পব্বজিতস্স পত্তাদি, গহট্ঠস্স হত্থিআদি সকপরিক্খারো.

‘‘অত্তা’’তি ভৰতি এত্থ অভিমানোতি অত্তভাৰো, উপাদানক্খন্ধপঞ্চকং. সরীরন্তি কেচি. মম অত্তভাৰো সুন্দরো, অসুকস্স ৰিয মম অত্তভাৰো ভৰেয্যাতি ৰা আদিনা সকঅত্তভাৰাদীসু তণ্হায উপ্পজ্জমানাকারো ৰেদিতব্বো. অত্তনো চক্খাদীনি অজ্ঝত্তিকাযতনানি. অত্তনো, পরেসঞ্চ রূপাদীনি বাহিরাযতনানি. পরেসং সব্বানি ৰা, সপরসন্ততিপরিযাপন্নানি ৰা চক্খাদীনি অজ্ঝত্তিকাযতনানি. তথা রূপাদীনি বাহিরাযতনানি. পরিত্তমহগ্গতভৰেসু পৰত্তিযাপি তণ্হায অন্তোজটাবহিজটাভাৰো ৰেদিতব্বো. কামভৰো হি কস্সচিপি কিলেসস্স অৰিক্খম্ভিতত্তা কথঞ্চিপি অৰিমুত্তো অজ্ঝত্তগ্গহণস্স ৰিসেসপচ্চযোতি ‘‘অজ্ঝত্তং, অন্তো’’তি চ ৰুচ্চতি. তব্বিপরিযাযতো রূপারূপভৰো ‘‘বহিদ্ধা, বহী’’তি চ. তেনাহ ভগৰা ‘‘অজ্ঝত্তসংযোজনো পুগ্গলো, বহিদ্ধাসংযোজনো পুগ্গলো’’তি (অ. নি. ২.৩৭). ৰিসযভেদেন, পৰত্তিআকারভেদেন চ অনেকভেদভিন্নম্পি তণ্হং জটাভাৰসামঞ্ঞেন একন্তি গহেত্ৰা ‘‘তায এৰং উপ্পজ্জমানায জটাযা’’তি ৰুত্তং. সা পন ‘‘পজা’’তি ৰুত্তসত্তসন্তানপরিযাপন্না এৰ হুত্ৰা পুনপ্পুনং তং জটেন্তী ৰিনন্ধন্তী পৰত্ততীতি আহ ‘‘জটায জটিতা পজা’’তি. তথা হি পরমত্থতো যদিপি অৰযৰব্যতিরেকেন সমুদাযো নত্থি, একদেসো পন সমুদাযো নাম ন হোতীতি অৰযৰতো সমুদাযং ভিন্নং কত্ৰা উপমূপমেয্যং দস্সেন্তো ‘‘যথা নাম ৰেল়ুজটাদীহি…পে… সংসিব্বিতা’’তি আহ. ইমং জটন্তি সম্বন্ধো. তীসু ধাতূসু একম্পি অসেসেত্ৰা সংসিব্বনেন তেধাতুকং জটেত্ৰা ঠিতং. তেনস্সা মহাৰিসযতং, ৰিজটনস্স চ সুদুক্করভাৰমাহ. ‘‘ৰিজটেতুং কো সমত্থো’’তি ইমিনা ‘‘ৰিজটযে’’তি পদং সত্তিঅত্থং, ন ৰিধিআদিঅত্থন্তি দস্সেতি.

এৰং ‘‘অন্তোজটা’’তিআদিনা পুট্ঠো পন অস্স দেৰপুত্তস্স ইমং গাথমাহাতি সম্বন্ধো. ‘‘এদিসোৰ ইমং পঞ্হং ৰিস্সজ্জেয্যা’’তি সত্থারং গুণতো দস্সেন্তো ‘‘সব্বধম্মেসু অপ্পটিহতঞাণচারো’’তিআদিমাহ. তত্থ সব্বধম্মেসূতি অতীতাদিভেদভিন্নেসু সব্বেসু ঞেয্যধম্মেসু. অপ্পটিহতঞাণচারোতি অনৰসেসঞেয্যাৰরণপ্পহানেন নিস্সঙ্গচারত্তা নৰিহতঞাণপৰত্তিকো. এতেন তীসু কালেসু অপ্পটিহতঞাণতাৰিভাৰনেন আদিতো তিণ্ণং আৰেণিকধম্মানং গহণেনেৰ তদেকলক্খণতায তদৰিনাভাৰতো চ ভগৰতো সেসাৰেণিকধম্মানম্পি গহিতভাৰো ৰেদিতব্বো. দিব্বন্তি কামগুণাদীহি কীল়ন্তি লল়ন্তি, তেসু ৰা ৰিহরন্তি, ৰিজযসমত্থতাযোগেন পচ্চত্থিকে ৰিজেতুং ইচ্ছন্তি, ইস্সরিযধনাদিসক্কারদানগ্গহণং, তংতংঅত্থানুসাসনঞ্চ করোন্তা ৰোহরন্তি, পুঞ্ঞাতিসযযোগানুভাৰপ্পত্তায জুতিযা জোতন্তি, যথাধিপ্পেতঞ্চ ৰিসযং অপ্পটিঘাতেন গচ্ছন্তি, যথিচ্ছিতনিপ্ফাদনে চ সক্কোন্তীতি দেৰা. অথ ৰা দেৰনীযা তংতংব্যসননিত্থরণত্থিকেহি সরণং পরাযণন্তি গমনীযা, অভিত্থৰনীযা ৰা, সোভাৰিসেসযোগেন কমনীযাতি ৰা দেৰা. তে তিৰিধা – সম্মুতিদেৰা উপপত্তিদেৰা ৰিসুদ্ধিদেৰাতি. ভগৰা পন নিরতিসযায অভিঞ্ঞাকীল়ায উত্তমেহি দিব্বব্রহ্মঅরিযৰিহারেহি সপরসন্তানগতপঞ্চৰিধমারৰিজযিচ্ছানিপ্ফত্তিযা চিত্তিস্সরিযসত্তধনাদিসম্মাপটিপত্তি অৰেচ্চপসাদসক্কারদানগ্গহণসঙ্খাতেন, ধম্মসভাৰপুগ্গলজ্ঝাসযানুরূপানুসাসনীসঙ্খাতেন চ ৰোহারাতিসযেন পরমায পঞ্ঞাসরীরপ্পভাসঙ্খাতায জুতিযা, অনঞ্ঞসাধারণায ঞাণসরীরগতিযা, মারৰিজযসব্বসব্বঞ্ঞুগুণপরহিতনিপ্ফাদনেসু অপ্পটিহতায সত্তিযা চ সমন্নাগতত্তা সদেৰকেন লোকেন ‘‘সরণ’’ন্তি গমনীযতো, অভিত্থৰনীযতো, ভত্তিৰসেন কমনীযতো চ সব্বে তে দেৰে তেহি গুণেহি অভিভুয্য ঠিতত্তা তেসং দেৰানং সেট্ঠো উত্তমো দেৰোতি দেৰদেৰো. সব্বদেৰেহি পূজনীযতরো দেৰোতি ৰা, ৰিসুদ্ধিদেৰভাৰস্স ৰা সব্বঞ্ঞুগুণালঙ্কারস্স ৰা অধিগতত্তা অঞ্ঞেসং দেৰানং অতিসযেন দেৰোতি দেৰদেৰো.

অপরিমাণাসু লোকধাতূসু অপরিমাণানং সক্কানং, মহাব্রহ্মানঞ্চ গুণাভিভৰনতো অধিকো অতিসযো অতিরেকতরো ৰা সক্কো ব্রহ্মা চাতি সক্কানং অতিসক্কো ব্রহ্মানং অতিব্রহ্মা. ঞাণপ্পহানদেসনাৰিসেসেসু সদেৰকে লোকে কেনচি অৰিক্খম্ভনীযট্ঠানতায কুতোচিপি উত্রস্তাভাৰতো চতূহি ৰেসারজ্জেহি ৰিসারদোতি চতুৰেসারজ্জৰিসারদো. যং সন্ধায ৰুত্তং ‘‘সম্মাসম্বুদ্ধস্স তে পটিজানতো ইমে ধম্মা অনভিসম্বুদ্ধাতি তত্র ৰত মং সমণো ৰা…পে… ৰেসারজ্জপ্পত্তো ৰিহরামী’’তি (ম. নি. ১.১৫০; অ. নি. ৪.৮). ঠানাঠানঞাণাদীহি দসহি ঞাণবলেহি সমন্নাগতত্তা দসবলধরো. যং সন্ধায ৰুত্তং ‘‘ইধ তথাগতো ঠানঞ্চ ঠানতো, অট্ঠানঞ্চ অট্ঠানতো যথাভূতং পজানাতী’’তিআদি (অ. নি. ১০.২১; ৰিভ. ৮০৯). যং কিঞ্চি ঞেয্যং নাম, তত্থ সব্বত্থেৰ অনাৰটঞাণতায অনাৰরণঞাণো. তঞ্চ সব্বং সমন্ততো সব্বাকারতো হত্থতলে আমলকং ৰিয পচ্চক্খতো দস্সনসমত্থেন ঞাণচক্খুনা সমন্নাগতত্তা সমন্তচক্খু, সব্বঞ্ঞূতি অত্থো. ইমেহি পন দ্ৰীহি পদেহি পচ্ছিমানি দ্ৰে অসাধারণঞাণানি গহিতানি. ভাগ্যৰন্ততাদীহি কারণেহি ভগৰা. যং পনেত্থ ৰত্তব্বং, তং পরতো বুদ্ধানুস্সতিনিদ্দেসে (ৰিসুদ্ধি. ১.১২৩ আদযো) ৰিত্থারতো আগমিস্সতি.

এত্থ চ ‘‘সব্বধম্মেসু অপ্পটিহতঞাণচারো’’তি ইমিনা তিযদ্ধারুল়্হানং পুচ্ছানং ভগৰতো ব্যাকরণসমত্থতায দস্সিতায কিং দেৰতানম্পি পুচ্ছং ব্যাকাতুং সমত্থো ভগৰাতি আসঙ্কায তন্নিৰত্তনত্থং ‘‘দেৰদেৰো’’তি ৰুত্তং. দেৰানং অতিদেৰো সক্কো দেৰানমিন্দো দেৰতানং পঞ্হং ৰিস্সজ্জেতি, ‘‘ততো ইমস্স কো ৰিসেসো’’তি চিন্তেন্তানং তন্নিৰত্তনত্থং ‘‘সক্কানং অতিসক্কো’’তি ৰুত্তং. সক্কেনপি পুচ্ছিতমত্থং সনঙ্কুমারাদযো ব্রহ্মানো ৰিস্সজ্জেন্তি, ‘‘ততো ইমস্স কো অতিসযো’’তি চিন্তেন্তানং তন্নিৰত্তনত্থং ‘‘ব্রহ্মানং অতিব্রহ্মা’’তি ৰুত্তং. অযং চস্স ৰিসেসো চতুৰেসারজ্জদসবলঞাণেহি পাকটো জাতোতি দস্সনত্থং ‘‘চতু…পে… ধরো’’তি ৰুত্তং. ইমানি চ ঞাণানি ইমস্স ঞাণদ্ৰযস্স অধিগমেন সহেৰ সিদ্ধানীতি দস্সনত্থং ‘‘অনাৰরণঞাণো সমন্তচক্খূ’’তি ৰুত্তং. তযিদং ঞাণদ্ৰযং পুঞ্ঞঞাণসম্ভারূপচযসিদ্ধায ভগ্গদোসতায সিদ্ধন্তি দস্সেন্তো ‘‘ভগৰা’’তি অৰোচাতি. এৰমেতেসং পদানং গহণে পযোজনং, অনুপুব্বি চ ৰেদিতব্বা. যং পনেতং পচ্ছিমং অনাৰরণঞাণং সব্বঞ্ঞুতঞ্ঞাণন্তি ঞাণদ্ৰযং, তং অত্থতো অভিন্নং. একমেৰ হি তং ঞাণং ৰিসযপৰত্তিমুখেন অঞ্ঞেহি অসাধারণভাৰদস্সনত্থং দ্ৰিধা কত্ৰা ৰুত্তং. অনৰসেসসঙ্খতাসঙ্খতসম্মুতিধম্মারম্মণতায সব্বঞ্ঞুতঞ্ঞাণং, তত্থাৰরণাভাৰতো নিস্সঙ্গচারমুপাদায ‘‘অনাৰরণঞাণ’’ন্তিপি ৰুত্তং. যং পনেত্থ ৰত্তব্বং, তং পরতো বুদ্ধানুস্সতিনিদ্দেসে (ৰিসুদ্ধি. ১.১২৩ আদযো) ৰক্খাম.

২. মহন্তে সীলক্খন্ধাদিকে এসী গৰেসীতি মহেসি, ভগৰা. তেন মহেসিনা. ৰণ্ণযন্তোতি ৰিৰরন্তো ৰিত্থারেন্তো. যথাভূতন্তি অৰিপরীতং. সীলাদিভেদনন্তি সীলসমাধিপঞ্ঞাদিৰিভাগং. সুদুল্লভন্তি অট্ঠক্খণৰজ্জিতেন নৰমেন খণেন লদ্ধব্বত্তা সুট্ঠু দুল্লভং. সীলাদিসঙ্গহন্তি সীলাদিক্খন্ধত্তযসঙ্গহং. অরিযমগ্গো হি তীহি খন্ধেহি সঙ্গহিতো সপ্পদেসত্তা নগরং ৰিয রজ্জেন, ন তযো খন্ধা অরিযমগ্গেন নিপ্পদেসত্তা. ৰুত্তঞ্হেতং ‘‘ন খো, আৰুসো ৰিসাখ, অরিযেন অট্ঠঙ্গিকেন মগ্গেন তযো খন্ধা সঙ্গহিতা; তীহি চ খো, আৰুসো ৰিসাখ, খন্ধেহি অরিযো অট্ঠঙ্গিকো মগ্গো সঙ্গহিতো’’তি (ম. নি. ১.৪৬২). কিলেসচোরেহি অপরিপন্থনীযতায খেমং. অন্তদ্ৰযপরিৰজ্জনতো, মাযাদিকাযৰঙ্কাদিপ্পহানতো চ উজুং. সব্বেসং সংকিলেসধম্মানং মারণৰসেন গমনতো পৰত্তনতো, নিব্বানস্স মগ্গনতো, নিব্বানত্থিকেহি মগ্গিতব্বতো চ মগ্গং. ৰিসুদ্ধিযাতি নিব্বানায, ৰিসুদ্ধিভাৰায ৰা, অরহত্তাযাতি অত্থো.

যথাভূতং অজানন্তাতি এৰং সীলৰিসুদ্ধিআদিৰিসুদ্ধিপরম্পরায অধিগন্তব্বো এৰরূপো এৰংকিচ্চকো এৰমত্থোতি যাথাৰতো অনৰবুজ্ঝন্তা. সকলসংকিলেসতো, সংসারতো চ সুদ্ধিং ৰিমুত্তিং কামেন্তি পত্থেন্তীতি সুদ্ধিকামা. অপি-সদ্দো সম্ভাৰনে. তেন ন কেৰলং সীলমত্তেন পরিতুট্ঠা, অথ খো ৰিসুদ্ধিকামাপি সমানাতি দস্সেতি. ইধাতি ইমস্মিং সাসনে. ভাৰনায যুত্তপযুত্ততায যোগিনো ৰাযমন্তাপি ৰিসুদ্ধিং উদ্দিস্স পযোগং পরক্কমং করোন্তাপি উপাযস্স অনধিগতত্তা ৰিসুদ্ধিং নাধিগচ্ছন্তীতি যোজনা. তেসন্তি যোগীনং. কামঞ্চাযং ৰিসুদ্ধিমগ্গো সমন্তভদ্দকত্তা সৰনধারণপরিচযাদিপসুতানং সব্বেসম্পি পামোজ্জকরো, যোগীনং পন সাতিসযং পমোদহেতূতি আহ ‘‘তেসং পামোজ্জকরণ’’ন্তি. বাহিরকনিকাযন্তরলদ্ধীহি অসম্মিস্সতায সুট্ঠু ৰিসুদ্ধৰিনিচ্ছযত্তা সুৰিসুদ্ধৰিনিচ্ছযং. মহাৰিহারৰাসীনন্তি অত্তনো অপস্সযভূতং নিকাযং দস্সেতি. দেসনানযনিস্সিতন্তি ধম্মসংৰণ্ণনানযসন্নিস্সিতং. এত্থ চ ‘‘তেসং পামোজ্জকরণ’’ন্তিআদিনা সব্বসংকিলেসমলৰিসুদ্ধতায ৰিসুদ্ধিং নিব্বানং পত্থেন্তানং যোগীনং একংসেন তদাৰহত্তা পামোজ্জকরো ঞাণুত্তরেহি সম্মাপটিপন্নেহি অধিট্ঠিতত্তা সুট্ঠু সম্মা ৰিসুদ্ধৰিনিচ্ছযো মহাৰিহারৰাসীনং কথামগ্গোতি দস্সেতি. সক্কচ্চং মে ভাসতো সক্কচ্চং নিসামযথাতি যোজেতব্বং.

এত্থ চ ‘‘ইমিস্সা দানি গাথাযা’’তি ইমিনা ৰিসুদ্ধিমগ্গভাসনস্স নিস্সযং, ‘‘কথিতায মহেসিনা’’তি ইমিনা তস্স পমাণভাৰং, ‘‘যথাভূতং অত্থং সীলাদিভেদন’’ন্তি ইমিনা অৰিপরীতপিণ্ডত্থং, ‘‘সুদুল্লভং…পে… যোগিনো’’তি ইমিনা নিমিত্তং, ‘‘তেসং পামোজ্জকরণ’’ন্তি ইমিনা পযোজনং, ‘‘ৰণ্ণযন্তো অত্থং, সুৰিসুদ্ধৰিনিচ্ছযং মহাৰিহারৰাসীনং দেসনানযনিস্সিতং, সক্কচ্চ’’ন্তি চ ইমিনা করণপ্পকারং দস্সেত্ৰা ‘‘ৰিসুদ্ধিকামা সব্বেপি, নিসামযথ সাধৰো’’তি ইমিনা তত্থ সক্কচ্চসৰনে সাধুজনে নিযোজেতি. সাধুকং সৰনপটিবদ্ধা হি সাসনসম্পত্তি.

৩. ৰচনত্থৰিভাৰনেন পৰেদিতৰিসুদ্ধিমগ্গসামঞ্ঞত্থস্স ৰিসুদ্ধিমগ্গকথা ৰুচ্চমানা অভিরুচিং উপ্পাদেতীতি পদত্থতো ৰিসুদ্ধিমগ্গং ৰিভাৰেতুং ‘‘তত্থ ৰিসুদ্ধী’’তিআদি আরদ্ধং. তত্থ তত্থাতি যদিদং ‘‘ৰিসুদ্ধিমগ্গং ভাসিস্স’’ন্তি এত্থ ৰিসুদ্ধিমগ্গপদং ৰুত্তং, তত্থ. সব্বমলৰিরহিতন্তি সব্বেহি রাগাদিমলেহি, সব্বেহি সংকিলেসমলেহি চ ৰিরহিতং ৰিৰিত্তং. ততো এৰ অচ্চন্তপরিসুদ্ধং, সব্বদা সব্বথা চ ৰিসুদ্ধন্তি অত্থো. যথাৰুত্তং ৰিসুদ্ধিং মগ্গতি গৰেসতি অধিগচ্ছতি এতেনাতি ৰিসুদ্ধিমগ্গো. তেনাহ ‘‘মগ্গোতি অধিগমূপাযো ৰুচ্চতী’’তি. ৰিসুদ্ধিমগ্গোতি চ নিপ্পরিযাযেন লোকুত্তরমগ্গো ৰেদিতব্বো, তদুপাযত্তা পন পুব্বভাগমগ্গো, তন্নিস্সযো কথাপবন্ধো চ তথা ৰুচ্চতি.

স্ৰাযং ৰিসুদ্ধিমগ্গো সত্থারা দেসনাৰিলাসতো, ৰেনেয্যজ্ঝাসযতো চ নানানযেহি দেসিতো, তেসু অযমেকো নযো গহিতোতি দস্সেতুং ‘‘সো পনায’’ন্তিআদি আরদ্ধং. তত্থ কত্থচীতি কিস্মিঞ্চি সুত্তে. ৰিপস্সনামত্তৰসেনেৰাতি অৰধারণেন সমথং নিৰত্তেতি. সো হি তস্সা পটিযোগী, ন সীলাদি. মত্ত-সদ্দেন চ ৰিসেসনিৰত্তিঅত্থেন সৰিসেসং সমাধিং নিৰত্তেতি. সো উপচারপ্পনাভেদো ৰিপস্সনাযানিকস্স দেসনাতি কত্ৰা ন সমাধিমত্তং. ন হি খণিকসমাধিং ৰিনা ৰিপস্সনা সম্ভৰতি. ৰিপস্সনাতি চ তিৰিধাপি অনুপস্সনা ৰেদিতব্বা, ন অনিচ্চানুপস্সনাৰ. ন হি অনিচ্চদস্সনমত্তেন সচ্চাভিসমযো সম্ভৰতি. যং পন গাথাযং অনিচ্চলক্খণস্সেৰ গহণং কতং, তং যস্স তদেৰ সুট্ঠুতরং পাকটং হুত্ৰা উপট্ঠাতি, তাদিসস্স ৰসেন. সোপি হি ইতরং লক্খণদ্ৰযং ৰিভূততরং কত্ৰা সম্মসিত্ৰা ৰিসেসং অধিগচ্ছতি, ন অনিচ্চলক্খণমেৰ.

সব্বে সঙ্খারাতি সব্বে তেভূমকসঙ্খারা, তে হি সম্মসনীযা. অনিচ্চাতি ন নিচ্চা অদ্ধুৰা ইত্তরা খণভঙ্গুরাতি. পঞ্ঞাযাতি ৰিপস্সনাপঞ্ঞায. পস্সতি সম্মসতি. অথ পচ্ছা উদযব্বযঞাণাদীনং উপ্পত্তিযা উত্তরকালং. নিব্বিন্দতি দুক্খেতি তস্মিংযেৰ অনিচ্চাকারতো দিট্ঠে ‘‘সব্বে সঙ্খারা’’তি ৰুত্তে তেভূমকে খন্ধপঞ্চকসঙ্খাতে দুক্খে নিব্বিন্দতি নিব্বিদাঞাণং পটিলভতি. এস মগ্গো ৰিসুদ্ধিযাতি এস নিব্বিদানুপস্সনাসঙ্খাতো ৰিরাগাদীনং কারণভূতো নিব্বানস্স অধিগমূপাযো.

ঝানপঞ্ঞাৰসেনাতি সমথৰিপস্সনাৰসেন. ঝানন্তি চেত্থ ৰিপস্সনায পাদকভূতং ঝানং অধিপ্পেতং. যম্হীতি যস্মিং পুগ্গলে. ঝানঞ্চ পঞ্ঞা চাতি এত্থাযমত্থো – যো পুগ্গলো ঝানং পাদকং কত্ৰা ৰিপস্সনং পট্ঠপেত্ৰা তং উস্সুক্কাপেতি. স ৰে নিব্বানসন্তিকেতি সো ব্যত্তং নিব্বানস্স সমীপে একন্ততো নিব্বানং অধিগচ্ছতীতি.

কম্মন্তি মগ্গচেতনা. সা হি অপচযগামিতায সত্তানং সুদ্ধিং আৰহতি. ৰিজ্জাতি সম্মাদিট্ঠি. সীলন্তি সম্মাৰাচাকম্মন্তা. জীৰিতমুত্তমন্তি সম্মাআজীৰো. ধম্মোতি অৰসেসা চত্তারো অরিযমগ্গধম্মা. অথ ৰা কম্মন্তি সম্মাকম্মন্তস্স গহণং. ‘‘যা চাৰুসো ৰিসাখ, সম্মাদিট্ঠি, যো চ সম্মাসঙ্কপ্পো, ইমে ধম্মা পঞ্ঞাক্খন্ধে সঙ্গহিতা’’তি (ম. নি. ১.৪৬২) ৰচনতো. ৰিজ্জাতি সম্মাদিট্ঠিসম্মাসঙ্কপ্পানং গহণং. ধম্মোতি সমাধি ‘‘এৰংধম্মা তে ভগৰন্তো অহেসু’’ন্তিআদীসু (সং. নি. ৫.৩৭৮) ৰিয. তগ্গহণেনেৰ ‘‘যো চাৰুসো ৰিসাখ, সম্মাৰাযামো, যা চ সম্মাসতি, যো চ সম্মাসমাধি, ইমে ধম্মা সমাধিক্খন্ধে সঙ্গহিতা’’তি ৰচনতো সম্মাৰাযামসতীনম্পি গহণং দট্ঠব্বং. সীলন্তি সম্মাৰাচাজীৰানং. জীৰিতমুত্তমন্তি এৰরূপস্স অরিযপুগ্গলস্স জীৰিতং উত্তমং জীৰিতন্তি এৰমেত্থ অট্ঠঙ্গিকো অরিযমগ্গো ৰুত্তোতি ৰেদিতব্বো.

সীলাদিৰসেনাতি সীলসমাধিপঞ্ঞাৰীরিযৰসেন. সব্বদাতি সমাদানতো পভুতি সব্বকালং. সীলসম্পন্নোতি চতুপারিসুদ্ধিসীলসম্পদায সম্পন্নো সমন্নাগতো. পঞ্ঞৰাতি লোকিযলোকুত্তরায পঞ্ঞায সমন্নাগতো. সুসমাহিতোতি তংসম্পযুত্তেন সমাধিনা সুট্ঠু সমাহিতো. আরদ্ধৰীরিযোতি অকুসলানং ধম্মানং পহানায, কুসলানং ধম্মানং উপসম্পদায পগ্গহিতৰীরিযো. পহিতত্তোতি নিব্বানং পতিপেসিতত্ততায কাযে চ জীৰিতে চ নিরপেক্খচিত্তো. ওঘন্তি কামোঘাদিচতুব্বিধম্পি ওঘং, সংসারমহোঘমেৰ ৰা.

একাযনোতি একমগ্গো. মগ্গপরিযাযো হি ইধ অযন-সদ্দো, তস্মা একপথভূতো অযং, ভিক্খৰে, মগ্গো, ন দ্ৰেধাপথভূতোতি অত্থো. একং ৰা নিব্বানং অযতি গচ্ছতীতি একাযনো, একেন ৰা গণসঙ্গণিকং পহায ৰিৰেকট্ঠেন অযিতব্বো পটিপজ্জিতব্বোতি একাযনো, অযন্তি তেনাতি ৰা অযনো, একস্স সেট্ঠস্স ভগৰতো অযনোতি একাযনো, তেন উপ্পাদিতত্তা, একস্মিং ৰা ইমস্মিংযেৰ ধম্মৰিনযে অযনোতি একাযনো. সত্তানং ৰিসুদ্ধিযাতি রাগাদিমলেহি, অভিজ্ঝাৰিসমলোভাদিউপক্কিলেসেহি চ সত্তানং ৰিসুদ্ধত্থায ৰিসুজ্ঝনত্থায. যদিদন্তি নিপাতো, যে ইমেতি অত্থো. পুব্বে সরণলক্খণেন মগ্গট্ঠেন চ মগ্গোতি ৰুত্তস্সেৰ কাযাদিৰিসযভেদেন চতুব্বিধত্তা ‘‘চত্তারো সতিপট্ঠানা’’তি ৰুত্তং. সম্মপ্পধানাদীসূতি এত্থ আদি-সদ্দেন অপ্পমাদাভিরতিআদীনং সঙ্গহো ৰেদিতব্বো. অপ্পমাদাভিরতিআদিৰসেনাপি হি কত্থচি ৰিসুদ্ধিমগ্গো দেসিতো. যথাহ –

‘‘অপ্পমাদরতো ভিক্খু, পমাদে ভযদস্সি ৰা;

অভব্বো পরিহানায, নিব্বানস্সেৰ সন্তিকে’’তি. (ধ. প. ৩২);

৪. তত্রাতি তস্সং গাথাযং. উপরি ৰুচ্চমানা গাথায ৰিত্থারসংৰণ্ণনা নিদ্দেসপটিনিদ্দেসট্ঠানিযা, ততো সংখিত্ততরা অত্থৰণ্ণনা উদ্দেসট্ঠানিযাতি আহ ‘‘অযং সঙ্খেপৰণ্ণনা’’তি. যথাউদ্দিট্ঠস্স হি অত্থস্স নিদ্দেসপটিনিদ্দেসা সুকরা, সুবোধা চ হোন্তীতি. সীলে পতিট্ঠাযাতি এত্থ সীলেতি কুসলসীলে. যদিপি ‘‘কতমে চ, থপতি, অকুসলা সীলা’’তিআদীসু অকুসলা ধম্মাপি সীলন্তি আগতা. ৰুচ্চমানায পন চিত্তপঞ্ঞাভাৰনায অধিট্ঠানাযোগ্যতায কিরিযসীলানম্পি অসম্ভৰো, কুতো ইতরেসন্তি কুসলসীলমেৰেত্থ অধিপ্পেতং. সীলং পরিপূরযমানোতিআদীসু পরিপূরযমানোতি পরিপালেন্তো, পরিৰড্ঢেন্তো ৰা, সব্বভাগেহি সংৰরন্তো, অৰীতিক্কমন্তো চাতি অত্থো. তথাভূতো হি তং অৰিজহন্তো তত্থ পতিট্ঠিতো নাম হোতি. ‘‘সীলে’’তি হি ইদং আধারে ভুম্মং. পতিট্ঠাযাতি দুৰিধা পতিট্ঠা নিস্সযূপনিস্সযভেদতো. তত্থ উপনিস্সযপতিট্ঠা লোকিযা, ইতরা লোকুত্তরা অভিন্দিত্ৰা গহণে. ভিন্দিত্ৰা পন গহণে যথা লোকিযচিত্তুপ্পাদেসু সহজাতানং, পুরিমপচ্ছিমানঞ্চ ৰসেন নিস্সযূপনিস্সযপতিট্ঠা সম্ভৰতি, এৰং লোকুত্তরেসু হেট্ঠিমমগ্গফলসীলৰসেন উপনিস্সযপতিট্ঠাপি সম্ভৰতি. ‘‘পতিট্ঠাযা’’তি চ পদস্স যদা উপনিস্সযপতিট্ঠা অধিপ্পেতা, তদা ‘‘সদ্ধং উপনিস্সাযা’’তিআদীসু (পট্ঠা. ১.১.৪২৩) ৰিয পুরিমকালকিরিযাৰসেন অত্থো ৰেদিতব্বো. তেনাহ ‘‘পুব্বেৰ খো পনস্স কাযকম্মং ৰচীকম্মং আজীৰো সুপরিসুদ্ধো হোতী’’তি (ম. নি. ৩.৪৩১). যদা পন নিস্সযপতিট্ঠা অধিপ্পেতা, তদা ‘‘চক্খুঞ্চ পটিচ্চা’’তিআদীসু (ম. নি. ১.২০৪; ৩.৪২১; সং. নি. ৪.৬০) ৰিয সমানকালকিরিযাৰসেন অত্থো ৰেদিতব্বো. সম্মাৰাচাদযো হি অত্তনা সম্পযুত্তানং সম্মাদিট্ঠিআদীনং সহজাতৰসেনেৰ নিস্সযপচ্চযা হোন্তীতি.

নরতি নেতীতি নরো, পুরিসো. যথা হি পঠমপকতিভূতো সত্তো, ইতরায পকতিযা সেট্ঠট্ঠেন পুরি উচ্চে ঠানে সেতি পৰত্ততীতি ‘‘পুরিসো’’তি ৰুচ্চতি, এৰং নযনট্ঠেন ‘‘নরো’’তি ৰুচ্চতি. পুত্তভাতুভূতোপি হি পুগ্গলো মাতুজেট্ঠভগিনীনং নেতুট্ঠানে তিট্ঠতি, পগেৰ ইতরো ইতরাসং. নরেন যোগতো, নরস্স অযন্তি ৰা নারী, ইত্থী. সাপি চেত্থ কামং তণ্হাজটাৰিজটনসমত্থতা অত্থি, পধানমেৰ পন সত্তং দস্সেন্তো ‘‘নরো’’তি আহ যথা ‘‘সত্থা দেৰমনুস্সান’’ন্তি (দী. নি. ১.১৫৭, ২৫৫). অট্ঠকথাযং পন অৰিভাগেন পুগ্গলপরিযাযো অযন্তি দস্সেতুং ‘‘নরোতি সত্তো’’তি ৰুত্তং. সপঞ্ঞোতি ৰিপাকভূতায সহ পঞ্ঞায পৰত্ততীতি সপঞ্ঞো. তায হি আদিতো পট্ঠায সন্তানৰসেন বহুলং পৰত্তমানায অযং সত্তো সৰিসেসং ‘‘সপঞ্ঞো’’তি ৰত্তব্বতং অরহতি. ৰিপাকপঞ্ঞাপি হি সন্তানৰিসেসনেন ভাৰনাপঞ্ঞুপ্পত্তিযা উপনিস্সযো হোতি অহেতুকদ্ৰিহেতুকানং তদভাৰতো. সম্পজঞ্ঞসঙ্খাতায চ তংতংকিচ্চকারিকায পঞ্ঞায ৰসেন ‘‘সপঞ্ঞো’’তি ৰত্তুং ৰট্টতি. অট্ঠকথাযং পন নিপক-সদ্দেন পারিহারিকপঞ্ঞা গয্হতীতি ৰিপাকপঞ্ঞাৰসেনেৰেত্থ অত্থো ৰুত্তো. কম্মজতিহেতুকপটিসন্ধিপঞ্ঞাযাতি কম্মজায তিহেতুকপটিসন্ধিযং পঞ্ঞাযাতি এৰং তিহেতুক-সদ্দো পটিসন্ধি-সদ্দেন সম্বন্ধিতব্বো, ন পঞ্ঞা-সদ্দেন. ন হি পঞ্ঞা তিহেতুকা অত্থি. পটিসন্ধিতো পভুতি পৰত্তমানা পঞ্ঞা ‘‘পটিসন্ধিযং পঞ্ঞা’’তি ৰুত্তা তংমূলকত্তা, ন পটিসন্ধিক্খণে পৰত্তা এৰ.

চিন্তেতি আরম্মণং উপনিজ্ঝাযতীতি চিত্তং, সমাধি. সো হি সাতিসযং উপনিজ্ঝানকিচ্চো. ন হি ৰিতক্কাদযো ৰিনা সমাধিনা তমত্থং সাধেন্তি, সমাধি পন তেহি ৰিনাপি সাধেতীতি. পগুণবলৰভাৰাপাদনেন পচ্চযেহি চিতং, তথা সন্তানং চিনোতীতিপি চিত্তং, সমাধি. পঠমজ্ঝানাদিৰসেন চিত্তৰিচিত্ততায, ইদ্ধিৰিধাদিচিত্তকরণেন চ সমাধি চিত্তন্তি ৰিনাপি পরোপদেসেনস্স চিত্তপরিযাযো লব্ভতেৰ. অট্ঠকথাযং পন চিত্ত-সদ্দো ৰিঞ্ঞাণে নিরুল়্হোতি কত্ৰা ৰুত্তং ‘‘চিত্তসীসেন হেত্থ সমাধি নিদ্দিট্ঠো’’তি. যথাসভাৰং পকারেহি জানাতীতি পঞ্ঞা. সা যদিপি কুসলাদিভেদতো বহুৰিধা. ‘‘ভাৰয’’ন্তি পন ৰচনতো ভাৰেতব্বা ইধাধিপ্পেতাতি তং দস্সেতুং ‘‘ৰিপস্সন’’ন্তি ৰুত্তং. ‘‘ভাৰয’’ন্তি চ ইদং পচ্চেকং যোজেতব্বং ‘‘চিত্তঞ্চ ভাৰযং, পঞ্ঞঞ্চ ভাৰয’’ন্তি. তযিদং দ্ৰযং কিং লোকিযং, উদাহু লোকুত্তরন্তি? লোকুত্তরন্তি দট্ঠব্বং উক্কট্ঠনিদ্দেসতো. তং হি ভাৰযমানো অরিযমগ্গক্খণে তণ্হাজটং সমুচ্ছেদৰসেন ৰিজটেতীতি ৰুচ্চতি, ন লোকিযং. নানন্তরিযভাৰেন পনেত্থ লোকিযাপি গহিতাৰ হোন্তি লোকিযসমথৰিপস্সনায ৰিনা তদভাৰতো. সমথযানিকস্স হি উপচারপ্পনাপ্পভেদং সমাধিং ইতরস্স খণিকসমাধিং, উভযেসম্পি ৰিমোক্খমুখত্তযং ৰিনা ন কদাচিপি লোকুত্তরাধিগমো সম্ভৰতি. তেনাহ ‘‘সমাধিঞ্চেৰ ৰিপস্সনঞ্চ ভাৰযমানো’’তি. তত্থ যদা লোকিযা সমথৰিপস্সনা অধিপ্পেতা, তদা ‘‘ভাৰয’’ন্তি ইদং ভাৰনাকিরিযায হেতুভাৰকথনং, ভাৰনাহেতূতি অত্থো. তংভাৰনাহেতুকা হি ৰিজটনকিরিযাতি. যদা পন লোকুত্তরা অধিপ্পেতা, তদা কেৰলং ৰত্তমানভাৰনিদ্দেসো. তদুভযভাৰনাসমকালমেৰ হি তণ্হাজটাৰিজটনং.

‘‘আতাপী নিপকো’’তি ইদং যথাৰুত্তভাৰনায উপকারকধম্মকিত্তনং. কম্মট্ঠানং অনুযুঞ্জন্তস্স হি ৰীরিযং সতি সম্পজঞ্ঞন্তি ইমে তযো ধম্মা বহূপকারা. ৰীরিযূপত্থদ্ধঞ্হি কম্মট্ঠানং সতিসম্পজঞ্ঞানুপালিতং ন পরিপততি, উপরি চ ৰিসেসং আৰহতি. পতিট্ঠাসিদ্ধিযা চেত্থ সদ্ধাসিদ্ধি, সদ্ধূপনিস্সযত্তা সীলস্স, ৰীরিযাদিসিদ্ধিযা চ. ন হি সদ্ধেয্যৰত্থুং অসদ্দহন্তস্স যথাৰুত্তৰীরিযাদযো সম্ভৰন্তি, তথা সমাধিপি. যথা হি হেতুভাৰতো ৰীরিযাদীহি সদ্ধাসিদ্ধি, এৰং ফলভাৰতো তেহি সমাধিসিদ্ধি. ৰীরিযাদীসু হি সম্পজ্জমানেসু সমাধি সম্পন্নোৰ হোতি অসমাহিতস্স তদভাৰতো. কথং পনেত্থ সতিসিদ্ধি? নিপকগ্গহণতো. তিক্খৰিসদভাৰপ্পত্তা হি সতি ‘‘নেপক্ক’’ন্তি ৰুচ্চতি. যথাহ ‘‘পরমেন সতিনেপক্কেন সমন্নাগতো’’তি. অট্ঠকথাযং পন ‘‘নেপক্কং পঞ্ঞা’’তি অযমত্থো দস্সিতো. তগ্গহণেনেৰ সতিপি গহিতাৰ হোতি. ন হি সতিৰিরহিতা পঞ্ঞা অত্থীতি. অপরে পন ‘‘সপঞ্ঞো’’তি ইমিনাৰ পারিহারিকপঞ্ঞাপি গয্হতীতি ‘‘নিপকো’’তি পদস্স ‘‘সতো’’তি অত্থং ৰদন্তি. যদিপি কিলেসানং পহানং আতাপনং, তং সম্মাদিট্ঠিআদীনম্পি অত্থেৰ. আতপ্পসদ্দো ৰিয পন আতাপসদ্দো ৰীরিযেযেৰ নিরুল়্হোতি আহ ‘‘আতাপীতি ৰীরিযৰা’’তি. অথ ৰা পটিপক্খপ্পহানে সম্পযুত্তধম্মানং অব্ভুস্সহনৰসেন পৰত্তমানস্স ৰীরিযস্স সাতিসযং তদাতাপনন্তি ৰীরিযমেৰ তথা ৰুচ্চতি, ন অঞ্ঞে ধম্মা. আতাপীতি চাযমীকারো পসংসায, অতিসযস্স ৰা দীপকো. ৰীরিযৰাতি ৰা-সদ্দোপি তদত্থো এৰ দট্ঠব্বো. তেন সম্মপ্পধানসমঙ্গিতা ৰুত্তা হোতি. তেনাহ ‘‘কিলেসানং আতাপনপরিতাপনট্ঠেনা’’তি. আতাপনগ্গহণেন চেত্থ আরম্ভ ধাতুমাহ আদিতো ৰীরিযারম্ভোতি কত্ৰা, পরিতাপনগ্গহণেন নিক্কমপরক্কমধাতুযো সব্বসো পটিপক্খতো নিক্খন্ততং, উপরূপরি ৰিসেসপ্পত্তিঞ্চ উপাদায. নিপযতি ৰিসোসেতি পটিপক্খং, ততো ৰা অত্তানং নিপাতি রক্খতীতি নিপকো, সম্পজানো. কম্মট্ঠানস্স পরিহরণে নিযুত্তাতি পারিহারিকা.

অভিক্কমাদীনি সব্বকিচ্চানি সাত্থকসম্পজঞ্ঞাদিৰসেন পরিচ্ছিজ্জ নেতীতি সব্বকিচ্চপরিণাযিকা. কম্মট্ঠানস্স ৰা উগ্গহো পরিপুচ্ছা ভাৰনারম্ভো মনসিকারৰিধি, তত্থ চ সক্কচ্চকারিতা সাতচ্চকারিতা সপ্পাযকারিতা নিমিত্তকুসলতা পহিতত্ততা অন্তরাঅসঙ্কোচো ইন্দ্রিযসমত্তপটিপাদনা ৰীরিযসমতাপাদনং ৰীরিযসমতাযোজনন্তি এৰমাদীনং সব্বেসং কিচ্চানং পরিণাযিকা সব্বকিচ্চপরিণাযিকা. ভযং ইক্খতীতি ভিক্খূতি সাধারণতো ভিক্খুলক্খণকথনেন পটিপত্তিযাৰ ভিক্খুভাৰো, ন ভিক্খকভিন্নপটধরাদিভাৰেনাতি দস্সেতি. এৰং হি কতকিচ্চানং সামণেরাদীনং, পটিপন্নানঞ্চ অপব্বজিতানম্পি সঙ্গহো কতো হোতি. ইধ পন পটিপজ্জনকৰসেন অত্থো ৰেদিতব্বো. ভিন্দতি পাপকে অকুসলে ধম্মেতি ৰা ভিক্খু. সো ইমং ৰিজটযেতি যো নরো সপ্পঞ্ঞো সীলে পতিট্ঠায আতাপী নিপকো চিত্তং পঞ্ঞঞ্চ ভাৰযন্তি ৰুত্তো, সো ভিক্খু ইমং তণ্হাজটং ৰিজটযেতি সম্বন্ধো. ইদানি তম্পি ৰিজটনং ৰেল়ুগুম্বৰিজটনেন উপমেত্ৰা দস্সেতুং গাথায যথাৰুত্তে সীলাদিধম্মে ‘‘ইমিনা চ সীলেনা’’তিআদিনা পচ্চামসতি. তত্থ যস্মা যোগাৰচরসন্তানগতা নানাক্খণিকা মিস্সকা সীলাদিধম্মা গাথায গহিতা, তস্মা তে একচ্চং গণ্হন্তো ‘‘ছহি ধম্মেহি সমন্নাগতো’’তি আহ. ন হি তে ছ ধম্মা একস্মিং সন্তানে একস্মিং খণে লব্ভন্তি. যস্মা চ পুগ্গলাধিট্ঠানেন গাথা ভাসিতা, তস্মা পুগ্গলাধিট্ঠানমেৰ উপমং দস্সেন্তো ‘‘সেয্যথাপি নাম পুরিসো’’তিআদিমাহ. তত্থ সুনিসিতন্তি সুট্ঠু নিসিতং, অতিৰিয তিখিণন্তি অত্থো. সত্থস্স নিসানসিলাযং নিসিততরভাৰকরণং, বাহুবলেন চস্স উক্খিপনন্তি উভযম্পেতং অত্থাপন্নং কত্ৰা উপমা ৰুত্তাতি তদুভযং উপমেয্যে দস্সেন্তো ‘‘সমাধিসিলাযং সুনিসিতং…পে… পঞ্ঞাহত্থেন উক্খিপিত্ৰা’’তি আহ. সমাধিগুণেন হি পঞ্ঞায তিক্খভাৰো. তেনাহ ভগৰা ‘‘সমাহিতো যথাভূতং পজানাতী’’তি (সং. নি. ৩.৫; ৪.৯৯; ৫.১০৭১; নেত্তি. ৪০; মি. প. ২.১.১৪). ৰীরিযঞ্চস্সা উপত্থম্ভকং পগ্গণ্হনতো. ৰিজটেয্যাতি ৰিজটেতুং সক্কুণেয্য. ৰুট্ঠানগামিনিৰিপস্সনায হি ৰত্তমানায যোগাৰচরো তণ্হাজটং ৰিজটেতুং সমত্থো নাম. ৰিজটনং চেত্থ সমুচ্ছেদৰসেন পহানন্তি আহ ‘‘সঞ্ছিন্দেয্য সম্পদালেয্যা’’তি. দক্খিণং অরহতীতি দক্খিণেয্যো, অগ্গো চ সো দক্খিণেয্যো চাতি অগ্গদক্খিণেয্যো, অগ্গা ৰা দক্খিণা অগ্গদক্খিণা, তং অরহতীতি অগ্গদক্খিণেয্যো.

৫. তত্রাতি তস্সং গাথাযং. অযন্তি ‘‘নরো’’তি চ ‘‘ভিক্খূ’’তি চ ৰুত্তো যোগাৰচরো. পুন তত্রাতি তস্সং পঞ্ঞাযং. অস্সাতি ভিক্খুনো. কত্তরি চেতং সামিৰচনং, অনেনাতি অত্থো. করণীযং নত্থি ৰিসেসাধানস্স তিহেতুকপটিসন্ধিপঞ্ঞায অভাৰতো. তেনাহ ‘‘পুরিমকম্মানুভাৰেনেৰ হিস্স সা সিদ্ধা’’তি. তেনাতি যোগিনা. ভাৰনাযং সততপৰত্তিতৰীরিযতায সাতচ্চকারিনা. পঞ্ঞাৰসেনাতি যথাৰুত্তনেপক্কসঙ্খাতপঞ্ঞাৰসেন. যং কিঞ্চি কত্তব্বং, তস্স সব্বস্স সম্পজানৰসেনেৰ করণসীলো, তত্থ ৰা সম্পজানকারো এতস্স অত্থি, সম্পজানস্স ৰা অসম্মোহস্স কারকো উপ্পাদকোতি সম্পজানকারী, তেন সম্পজানকারিনা. অত্রাতি অস্সং গাথাযং. সীলাদিসম্পাদনে ৰীরিযস্স তেসং অঙ্গভাৰতো তং ৰিসুং অগ্গহেত্ৰা ‘‘সীলসমাধিপঞ্ঞামুখেনা’’তি ৰুত্তং.

‘‘ৰিসুদ্ধিমগ্গং দস্সেতী’’তি অৰিভাগতো দেসনায পিণ্ডত্থং ৰত্ৰা পুন তং ৰিভাগতো দস্সেতুং ‘‘এত্তাৰতা’’তিআদি ৰুত্তং. তত্থ এত্তাৰতাতি এত্তকায দেসনায. সিক্খাতি সিক্খিতব্বট্ঠেন সিক্খা. সিক্খনং চেত্থ আসেৰনং দট্ঠব্বং. সীলাদিধম্মেহি সংৰরণাদিৰসেন আসেৰন্তো তে সিক্খতীতি ৰুচ্চতি. সাসনন্তি পটিপত্তিসাসনং. উপনিস্সযো বলৰকারণং. ৰজ্জনং অনুপগমনং. সেৰনা ভাৰনা. পটিপক্খোতি পহাযকপটিপক্খো. যদিপি গাথাযং ‘‘সীলে’’তি সামঞ্ঞতো ৰুত্তং, ন ‘‘অধিসীলে’’তি. তং পন তণ্হাজটাৰিজটনস্স পতিট্ঠাভূতং অধিপ্পেতন্তি আহ ‘‘সীলেন অধিসীলসিক্খা পকাসিতা’’তি. ভৰগামি হি সীলং সীলমেৰ, ৰিভৰগামি সীলং অধিসীলসিক্খা. সামঞ্ঞজোতনা হি ৰিসেসে অৰতিট্ঠতীতি. এস নযো সেসসিক্খাসুপি.

সীলেনাতি অধিসীলসিক্খাভূতেন সীলেন. তং হি অনঞ্ঞসাধারণতায সাসনস্স আদিকল্যাণতং পকাসেতি, ন যমনিযমাদিমত্তং. তেন ৰুত্তং ‘‘সীলঞ্চ সুৰিসুদ্ধং, সব্বপাপস্স অকরণ’’ন্তি চ. কুসলানন্তি মগ্গকুসলানং. কুসলানন্তি ৰা অনৰজ্জানং. তেন অরিযফলধম্মানম্পি সঙ্গহো সিদ্ধো হোতি. সব্বপাপস্স অকরণন্তি সব্বস্সাপি সাৰজ্জস্স অকিরিযা অনজ্ঝাপজ্জনং. এতেন চারিত্তৰারিত্তভেদস্স সব্বস্স সীলস্স গহণং কতং হোতি. কত্তব্বাকরণম্পি হি সাৰজ্জমেৰাতি. আদিৰচনতোতি গাথাযং ৰুত্তসমাধিপঞ্ঞানং আদিম্হি ৰচনতো. আদিভাৰো চস্স তম্মূলকত্তা উত্তরিমনুস্সধম্মানং. আদীনং ৰা ৰচনং আদিৰচনং. আদিসদ্দেন চেত্থ ‘‘সীলং সমাধি পঞ্ঞা চ, ৰিমুত্তি চ অনুত্তরা’’তি (দী. নি. ২.১৮৬) এৰমাদীনং সঙ্গহো দট্ঠব্বো. সীলস্স ৰিসুদ্ধত্তা ৰিপ্পটিসারাদিহেতূনং দূরীকরণতো অৰিপ্পটিসারাদিগুণাৰহং. ‘‘অৰিপ্পটিসারাদিগুণাৰহত্তা’’তি এতেন ন কেৰলং সীলস্স কল্যাণতাৰ ৰিভাৰিতা, অথ খো আদিভাৰোপীতি দট্ঠব্বং. তথা হিস্স সুত্তে (পরি. ৩৬৬) অৰিপ্পটিসারাদীনং ৰিমুত্তিঞাণপরিযোসানানং পরম্পরপচ্চযতা ৰুত্তা. সমাধিনাতি অধিচিত্তসিক্খাভূতেন সমাধিনা. সকলং সাসনং সঙ্গহেত্ৰা পৰত্তায গাথায আদিপদেন আদিম্হি পটিপজ্জিতব্বস্স সীলস্স, ততিযপদেন পরিযোসানে পটিপজ্জিতব্বায পঞ্ঞায গহিতত্তা মজ্ঝে পটিপজ্জিতব্বো সমাধি পারিসেসতো দুতিযপদেন গয্হতীতি ‘‘কুসলস্স উপসম্পদাতিআদিৰচনতো হি সমাধি সাসনস্স মজ্ঝে’’তি ৰুত্তং, ন কুসলসদ্দস্স সমাধিপরিযাযত্তা. পুব্বূপনিস্সযৰতো হি সমাহিততাদিঅট্ঠঙ্গসমন্নাগমেন অভিনীহারক্খমতা সমাধিস্স ইদ্ধিৰিধাদিগুণাৰহত্তং, অগ্গমগ্গপঞ্ঞায অধিগতায যদত্থং পব্বজতি, তং পরিযোসিতন্তি পঞ্ঞা সাসনস্স পরিযোসানং. তেনাহ ভগৰা ‘‘সিক্খানিসংসমিদং, ভিক্খৰে, ব্রহ্মচরিযং ৰুস্সতি সদ্ধাধিপতেয্যং পঞ্ঞুত্তরং ৰিমুত্তিসার’’ন্তি (অ. নি. ৪.২৪৫). সকং চিত্তং সচিত্তং, সচিত্তস্স সব্বসো কিলেসানং সমুচ্ছিন্দনেন ৰিসোধনং সচিত্তপরিযোদাপনং. এৰং পন পঞ্ঞাকিচ্চে মত্থকপ্পত্তে উত্তরি করণীযাভাৰতো সাসনস্স পঞ্ঞুত্তরতা ৰেদিতব্বা. তাদিভাৰাৰহনতোতি যাদিসো ইট্ঠেসু, লাভাদীসু চ অনুনযাভাৰতো, তাদিসো অনিট্ঠেসু, অলাভাদীসু চ পটিঘাভাৰতো. ততো এৰ ৰা যাদিসো অনাপাথগতেসু ইট্ঠানিট্ঠেসু, তাদিসো আপাথগতেসুপীতি তাদী. তস্স ভাৰো তাদিভাৰো, তস্স আৰহনতো. ৰাতেনাতি ৰাতহেতু. ন সমীরতীতি ন চলতি. ন সমিঞ্জন্তীতি ন ফন্দন্তি, কুতো চলনন্তি অধিপ্পাযো.

তথাতি যথা সীলাদযো অধিসীলসিক্খাদীনং পকাসকা, তথা তেৰিজ্জতাদীনং উপনিস্সযস্সাতি তেসং পকাসনাকারূপসংহারত্থো তথা-সদ্দো. যস্মা সীলং ৰিসুজ্ঝমানং সতিসম্পজঞ্ঞবলেন, কম্মস্সকতঞাণবলেন চ সংকিলেসমলতো ৰিসুজ্ঝতি পারিপূরিঞ্চ গচ্ছতি, তস্মা সীলসম্পদা সিজ্ঝমানা উপনিস্সযসম্পত্তিভাৰেন সতিবলং, ঞাণবলঞ্চ পচ্চুপট্ঠপেতীতি তস্সা ৰিজ্জত্তযূপনিস্সযতা ৰেদিতব্বা সভাগহেতুসম্পাদনতো. সতিনেপক্কেন হি পুব্বেনিৰাসৰিজ্জাসিদ্ধি, সম্পজঞ্ঞেন সব্বকিচ্চেসু সুদিট্ঠকারিতাপরিচযেন চুতূপপাতঞাণানুবন্ধায দুতিযৰিজ্জাসিদ্ধি, ৰীতিক্কমাভাৰেন সংকিলেসপ্পহানসব্ভাৰতো ৰিৰট্টূপনিস্সযতাৰসেন অজ্ঝাসযসুদ্ধিযা ততিযৰিজ্জাসিদ্ধি. পুরেতরং সিদ্ধানং সমাধিপঞ্ঞানং পারিপূরিং ৰিনা সীলস্স আসৰক্খযঞাণূপনিস্সযতা সুক্খৰিপস্সকখীণাসৰেহি দীপেতব্বা. সমাধিপঞ্ঞা ৰিয অভিঞ্ঞাপটিসম্ভিদানং সীলং ন সভাগহেতূতি কত্ৰা ৰুত্তং ‘‘ন ততো পর’’ন্তি. ‘‘সমাহিতো যথাভূতং পজানাতী’’তি (সং. নি. ৩.৫; ৪.৯৯; নেত্তি. ৪০; মি. প. ২.১.১৪) ৰচনতো সমাধিসম্পদা ছল়ভিঞ্ঞতায উপনিস্সযো. পঞ্ঞা ৰিয পটিসম্ভিদানং সমাধি ন সভাগহেতূতি ৰুত্তং ‘‘ন ততো পর’’ন্তি. ‘‘যোগা ৰে জাযতে ভূরী’’তি (ধ. প. ২৮২) ৰচনতো পুব্বযোগেন, গরুৰাসদেসভাসাকওসল্লউগ্গহপরিপুচ্ছাদীহি চ পরিভাৰিতা পঞ্ঞাসম্পত্তি পটিসম্ভিদাপভেদস্স উপনিস্সযো পচ্চেকবোধিসম্মাসম্বোধিযোপি পঞ্ঞাসম্পত্তিসন্নিস্সযাতি পঞ্ঞায অনধিগন্তব্বস্স ৰিসেসস্স অভাৰতো, তস্সা চ পটিসম্ভিদাপভেদস্স একন্তিককারণতো হেট্ঠা ৰিয ‘‘ন ততো পর’’ন্তি অৰত্ৰা ‘‘ন অঞ্ঞেন কারণেনা’’তি ৰুত্তং.

এত্থ চ ‘‘সীলসম্পত্তিঞ্হি নিস্সাযা’’তি ৰুত্তত্তা যস্স সমাধিৰিজম্ভনভূতা অনৰসেসা ছ অভিঞ্ঞা ন ইজ্ঝন্তি, তস্স উক্কট্ঠপরিচ্ছেদৰসেন ন সমাধিসম্পদা অত্থীতি. সতিপি ৰিজ্জানং অভিঞ্ঞেকদেসভাৰে সীলসম্পত্তিসমুদাগতা এৰ তিস্সো ৰিজ্জা গহিতা. যথা হি পঞ্ঞাসম্পত্তিসমুদাগতা চতস্সো পটিসম্ভিদা উপনিস্সযসম্পন্নস্স মগ্গেনেৰ ইজ্ঝন্তি, মগ্গক্খণে এৰ তাসং পটিলভিতব্বতো, এৰং সীলসম্পত্তিসমুদাগতা তিস্সো ৰিজ্জা সমাধিসম্পত্তিসমুদাগতা চ ছ অভিঞ্ঞা উপনিস্সযসম্পন্নস্স মগ্গেনেৰ ইজ্ঝন্তীতি মগ্গাধিগমেনেৰ তাসং অধিগমো ৰেদিতব্বো. পচ্চেকবুদ্ধানং, সম্মাসম্বুদ্ধানঞ্চ পচ্চেকবোধিসম্মাসম্বোধিসমধিগমসদিসা হি ইমেসং অরিযানং ইমে ৰিসেসাধিগমাতি. ৰিনযসুত্তাভিধম্মেসু সম্মাপটিপত্তিযা তেৰিজ্জতাদীনং উপনিস্সযতাপি যথাৰুত্তৰিধিনা ৰেদিতব্বা.

সম্পন্নসীলস্স কামসেৰনাভাৰতো সীলেন পঠমন্তৰিৰজ্জনং ৰুত্তং. যেভুয্যেন হি সত্তা কামহেতু পাণাতিপাতাদিৰসেনাপি অসুদ্ধপযোগা হোন্তি. ঝানসুখলাভিনো কাযকিলমথস্স সম্ভৰো এৰ নত্থীতি সমাধিনা দুতিযন্তৰিৰজ্জনং ৰুত্তং ঝানসমুট্ঠানপণীতরূপফুটকাযত্তা. পঞ্ঞাযাতি মগ্গপঞ্ঞায. উক্কট্ঠনিদ্দেসেন হি একংসতো অরিযমগ্গোৰ মজ্ঝিমা পটিপত্তি নাম. এৰং সন্তেপি লোকিযপঞ্ঞাৰসেনপি অন্তদ্ৰযৰিৰজ্জনং ৰিভাৰেতব্বং.

সীলং তংসমঙ্গিনো কামসুগতীসুযেৰ নিব্বত্তাপনতো চতূহি অপাযেহি ৰিমুত্তিযা কারণন্তি আহ ‘‘সীলেন অপাযসমতিক্কমনুপাযো পকাসিতো হোতী’’তি. ন হি পাণাতিপাতাদিপটিৰিরতি দুগ্গতিপরিকিলেসং আৰহতি. সমাধি তংসমঙ্গিনো মহগ্গতভূমিযংযেৰ নিব্বত্তাপনেন সকলকামভৰতো ৰিমোচেতীতি ৰুত্তং ‘‘সমাধিনা কামধাতুসমতিক্কমনুপাযো পকাসিতো হোতী’’তি. ন হি কামাৰচরকম্মস্স অনুবলপ্পদাযীনং কামচ্ছন্দাদীনং ৰিক্খম্ভকং ঝানং কামধাতুপরিকিলেসাৰহং হোতি. ন চেত্থ উপচারজ্ঝানং নিদস্সেতব্বং, অপ্পনাসমাধিস্স অধিপ্পেতত্তা. নাপি ‘‘সীলেনেৰ অতিক্কমিতব্বস্স অপাযভৰস্স সমাধিনা অতিক্কমিতব্বতা’’তি ৰচনোকাসো. সুগতিভৰম্পি অতিক্কমন্তস্স দুগ্গতিসমতিক্কমনে কা কথাতি. সব্বভৰসমতিক্কমনুপাযোতি কামভৰাদীনং নৰন্নম্পি ভৰানং সমতিক্কমনুপাযো সীলসমাধীহি অতিক্কন্তাপি ভৰা অনতিক্কন্তা এৰ, কারণস্স অপহীনত্তা. পঞ্ঞায পনস্স সুপ্পহীনত্তা তে সমতিক্কন্তা এৰ.

তদঙ্গপ্পহানৰসেনাতি দীপালোকেনেৰ তমস্স পুঞ্ঞকিরিযৰত্থুগতেন তেন তেন কুসলঙ্গেন তস্স তস্স অকুসলঙ্গস্স পহানৰসেন. সমাধিনা ৰিক্খম্ভনপ্পহানৰসেনাতি উপচারপ্পনাভেদেন সমাধিনা পৰত্তিনিৰারণেন ঘটপ্পহারেনেৰ জলতলে সেৰালস্স তেসং তেসং নীৰরণাদিধম্মানং পহানৰসেন. পঞ্ঞাযাতি অরিযমগ্গপঞ্ঞায. সমুচ্ছেদপ্পহানৰসেনাতি চতুন্নং অরিযমগ্গানং ভাৰিতত্তা তংতংমগ্গৰতো অত্তনো সন্তানে ‘‘দিট্ঠিগতানং পহানাযা’’তিআদিনা (ধ. স. ২৭৭) ৰুত্তস্স সমুদযপক্খিযস্স কিলেসগণস্স অচ্চন্তং অপ্পৰত্তিসঙ্খাতসমুচ্ছিন্দনপ্পহানৰসেন.

কিলেসানং ৰীতিক্কমপটিপক্খোতি সংকিলেসধম্মানং, কম্মকিলেসানং ৰা যো কাযৰচীদ্ৰারেসু ৰীতিক্কমো অজ্ঝাচারো, তস্স পটিপক্খো সীলেন পকাসিতো হোতি, অৰীতিক্কমসভাৰত্তা সীলস্স. ওকাসাদানৰসেন কিলেসানং চিত্তে কুসলপ্পৰত্তিং পরিযাদিযিত্ৰা উট্ঠানং পরিযুট্ঠানং. তং সমাধি ৰিক্খম্ভেতীতি আহ ‘‘সমাধিনা পরিযুট্ঠানপটিপক্খো পকাসিতো হোতী’’তি, সমাধিস্স পরিযুট্ঠানপ্পহাযকত্তা. অপ্পহীনভাৰেন সন্তানে অনু অনু সযনতো কারণলাভে উপ্পত্তিরহা অনুসযা, তে পন অনুরূপং কারণং লদ্ধা উপ্পজ্জনারহা থামগতা কামরাগাদযো সত্ত কিলেসা ৰেদিতব্বা. তে অরিযমগ্গপঞ্ঞায সব্বসো পহীযন্তীতি আহ ‘‘পঞ্ঞায অনুসযপটিপক্খো পকাসিতো হোতী’’তি.

কাযদুচ্চরিতাদি দুট্ঠু চরিতং, কিলেসেহি ৰা দূসিতং চরিতন্তি দুচ্চরিতং, তমেৰ যত্থ উপ্পন্নং, তং সন্তানং সংকিলেসেতি ৰিবাধতি, উপতাপেতি চাতি সংকিলেসো, তস্স ৰিসোধনং সীলেন তদঙ্গৰসেন পহানং ৰীতিক্কমপটিপক্খত্তা সীলস্স. তণ্হাসংকিলেসস্স ৰিসোধনং ৰিক্খম্ভনৰসেন পহানং পরিযুট্ঠানপটিপক্খত্তা সমাধিস্স, তণ্হায চস্স উজুৰিপচ্চনিকভাৰতো. দিট্ঠিসংকিলেসস্স ৰিসোধনং সমুচ্ছেদৰসেন পহানং অনুসযপটিপক্খত্তা পঞ্ঞায, দিট্ঠিগতানঞ্চ অযাথাৰগাহীনং যাথাৰগাহিনিযা পঞ্ঞায উজুৰিপচ্চনিকভাৰতো.

কারণন্তি উপনিস্সযপচ্চযো. সীলেসু পরিপূরকারীতি মগ্গব্রহ্মচরিযস্স আদিভূতত্তা আদিব্রহ্মচরিযকানং পারাজিকসঙ্ঘাদিসেসসঙ্খাতানং মহাসীলসিক্খাপদানং অৰীতিক্কমনতো খুদ্দানুখুদ্দকানং আপজ্জনে সহসাৰ তেহি ৰুট্ঠানেন সীলেসু যং কত্তব্বং, তং পরিপূরং সমত্থং করোতীতি সীলেসু পরিপূরকারী. তথা সকদাগামীতি ‘‘সীলেসু পরিপূরকারী’’তি এতং উপসংহরতি তথা-সদ্দেন. এতে হি দ্ৰে অরিযা সমাধিপারিপন্থিকানং কামরাগব্যাপাদানং পঞ্ঞাপারিপন্থিকস্স সচ্চপটিচ্ছাদকমোহস্স সব্বসো অসমূহতত্তা সমাধিং, পঞ্ঞঞ্চ ভাৰেন্তাপি সমাধিপঞ্ঞাসু যং কত্তব্বং, তং মত্তসো পমাণেন পদেসমত্তমেৰ করোন্তীতি সমাধিস্মিং, পঞ্ঞায চ মত্তসো কারিনো ‘‘সীলেসু পরিপূরকারিনো’’ইচ্চেৰ ৰুচ্চন্তি. অনাগামী পন কামরাগব্যাপাদানং সমুচ্ছিন্নত্তা সমাধিস্মিং পরিপূরকারী. অরহা সব্বসো সম্মোহস্স সুসমূহতত্তা পঞ্ঞায পরিপূরকারী.

ৰুত্তং হেতং ভগৰতা (অ. নি. ৩.৮৭) –

‘‘ইধ, ভিক্খৰে, ভিক্খু সীলেসু পরিপূরকারী হোতি, সমাধিস্মিং মত্তসো কারী, পঞ্ঞায মত্তসো কারী. সো যানি তানি খুদ্দানুখুদ্দকানি সিক্খাপদানি, তানি আপজ্জতিপি ৰুট্ঠাতিপি. তং কিস্স হেতু? ন হি মেত্থ, ভিক্খৰে, অভব্বতা ৰুত্তা. যানি চ খো তানি সিক্খাপদানি আদিব্রহ্মচরিযকানি ব্রহ্মচরিযসারুপ্পানি, তত্থ ধুৰসীলো চ হোতি ঠিতসীলো চ, সমাদায সিক্খতি সিক্খাপদেসু. সো তিণ্ণং সংযোজনানং পরিক্খযা সোতাপন্নো হোতি অৰিনিপাতধম্মো নিযতো সম্বোধিপরাযণো. ইধ পন, ভিক্খৰে, ভিক্খু সীলেসু…পে… সো তিণ্ণং সংযোজনানং পরিক্খযা রাগদোসমোহানং তনুত্তা সকদাগামী হোতি. সকিদেৰ ইমং লোকং আগন্ত্ৰা দুক্খস্সন্তং করোতি. ইধ পন, ভিক্খৰে, ভিক্খু সীলেসু পরিপূরকারী হোতি, সমাধিস্মিং পরিপূরকারী, পঞ্ঞায মত্তসো কারী. সো যানি তানি…পে… সিক্খতি সিক্খাপদেসু. সো পঞ্চন্নং ওরম্ভাগিযানং…পে… অনাৰত্তিধম্মো তস্মা লোকা. ইধ পন, ভিক্খৰে, ভিক্খু সীলেসু পরিপূরকারী হোতি, সমাধিস্মিং পরিপূরকারী, পঞ্ঞায পরিপূরকারী. সো যানি তানি খুদ্দানুখুদ্দকানি…পে… সিক্খতি সিক্খাপদেসু. সো আসৰানং খযা…পে… উপসম্পজ্জ ৰিহরতী’’তি.

‘‘কথ’’ন্তি পুচ্ছিত্ৰা সিক্খাদিকে ৰিভজিত্ৰা ৰুত্তমেৰত্থং নিগমেতুং ‘‘এৰ’’ন্তিআদি ৰুত্তং. তত্থ অঞ্ঞে চাতি তযো ৰিৰেকা, তীণি কুসলমূলানি, তীণি ৰিমোক্খমুখানি, তীণি ইন্দ্রিযানীতি এৰমাদযো, সিক্খত্তিকাদীহি অঞ্ঞে চ গুণত্তিকা. এৰরূপাতি যাদিসকা সিক্খত্তিকাদযো ইধ সীলাদীহি পকাসিতা হোন্তি, এদিসা.

এত্থ হি ৰিৰট্টসন্নিস্সিতস্স সীলস্স ইধাধিপ্পেতত্তা সীলেন কাযৰিৰেকো পকাসিতো হোতি, সমাধিনা চিত্তৰিৰেকো, পঞ্ঞায উপধিৰিৰেকো. তথা সীলেন অদোসো কুসলমূলং পকাসিতং হোতি, তিতিক্খপ্পধানতায, অপরূপঘাতসভাৰতায চ সীলস্স. সমাধিনা অলোভো কুসলমূলং, লোভপটিপক্খতো, অলোভপধানতায চ সমাধিস্স. পঞ্ঞায পন অমোহোযেৰ. সীলেন চ অনিমিত্তৰিমোক্খমুখং পকাসিতং হোতি. অদোসপ্পধানং হি সীলসম্পদং নিস্সায দোসে আদীনৰদস্সিনো অনিচ্চানুপস্সনা সুখেনেৰ ইজ্ঝতি, অনিচ্চানুপস্সনা চ অনিমিত্তৰিমোক্খমুখং. সমাধিনা অপ্পণিহিতৰিমোক্খমুখং. পঞ্ঞায সুঞ্ঞতৰিমোক্খমুখং. অলোভপ্পধানং হি কামনিস্সরণং সমাধিসম্পদং নিস্সায কামেসু আদীনৰদস্সিনো দুক্খানুপস্সনা সুখেনেৰ ইজ্ঝতি, দুক্খানুপস্সনা চ অপ্পণিহিতৰিমোক্খমুখং. পঞ্ঞাসম্পদং নিস্সায অনত্তানুপস্সনা সুখেনেৰ ইজ্ঝতি, অনত্তানুপস্সনা চ সুঞ্ঞতৰিমোক্খমুখং. তথা সীলেন অনঞ্ঞাতঞ্ঞস্সামীতিন্দ্রিযং পকাসিতং হোতি. তং হি সীলেসু পরিপূরকারিনো অট্ঠমকস্স ইন্দ্রিযং. সমাধিনা অঞ্ঞিন্দ্রিযং. তং হি উক্কংসগতং সমাধিস্মিং পরিপূরকারিনো অনাগামিনো, অগ্গমগ্গট্ঠস্স চ ইন্দ্রিযং. পঞ্ঞায অঞ্ঞাতাৰিন্দ্রিযং পকাসিতং হোতি. তদুপ্পত্তিযা হি অরহা পঞ্ঞায পরিপূরকারীতি. ইমিনা নযেন অঞ্ঞে চ এৰরূপা গুণত্তিকা সীলাদীহি পকাসেতব্বা.

১. সীলনিদ্দেসৰণ্ণনা

সীলসরূপাদিকথাৰণ্ণনা

৬. এৰন্তি ৰুত্তপ্পকারেন. অনেকগুণসঙ্গাহকেনাতি অধিসীলসিক্খাদীনং, অঞ্ঞেসঞ্চ অনেকেসং গুণানং সঙ্গাহকেন. সীলসমাধিপঞ্ঞামুখেনাতি ‘‘সব্বে সঙ্খারা অনিচ্চা’’তিআদীসু (ধ. প. ২৭৭; থেরগা. ৬৭৬; নেত্তি. ৫) ৰিয ৰিপস্সনামত্তাদিমুখেন সঙ্খেপতো অদেসেত্ৰা সীলসমাধিপঞ্ঞামুখেন দেসিতোপি, সত্ততিংসাযপি ৰা বোধিপক্খিযধম্মানং ৰিসুদ্ধিমগ্গন্তোগধত্তা তত্থ সীলসমাধিপঞ্ঞা মুখং পমুখং কত্ৰা দেসিতোপি. এতেন সীলসমাধিপঞ্ঞাসু অৰসেসবোধিপক্খিযধম্মানং সভাৰতো, উপকারতো চ অন্তোগধভাৰো দীপিতোতি ৰেদিতব্বং. অতিসঙ্খেপদেসিতোযেৰ হোতি সভাৰৰিভাগাদিতো অৰিভাৰিতত্তা. নালন্তি ন পরিযত্তং ন সমত্থং. সব্বেসন্তি নাতিসঙ্খেপনাতিৰিত্থাররুচীনম্পি, ৰিপঞ্চিতঞ্ঞুনেয্যানম্পি ৰা. সঙ্খেপদেসনা হি সংখিত্তরুচীনং, উগ্ঘটিতঞ্ঞূনংযেৰ চ উপকারায হোতি, ন পনিতরেসং. অস্স ৰিসুদ্ধিমগ্গস্স. পুচ্ছনট্ঠেন পঞ্হা, কিরিযা করণং কম্মং, পঞ্হাৰ কম্মং পঞ্হাকম্মং, পুচ্ছনপযোগো.

কিং সীলন্তি সরূপপুচ্ছা. কেনট্ঠেন সীলন্তি কেন অত্থেন সীলন্তি ৰুচ্চতি, ‘‘সীল’’ন্তি পদং কং অভিধেয্যং নিস্সায পৰত্তন্তি অত্থো. তযিদং সীলং সভাৰতো, কিচ্চতো, উপট্ঠানাকারতো, আসন্নকারণতো চ কথং জানিতব্বন্তি আহ ‘‘কানস্স লক্খণরসপচ্চুপট্ঠানপদট্ঠানানী’’তি. পটিপত্তি নাম দিট্ঠানিসংসে এৰ হোতীতি আহ ‘‘কিমানিসংস’’ন্তি. কতিৰিধন্তি পভেদপুচ্ছা. ৰিভাগৰন্তানং হি সভাৰৰিভাৰনং ৰিভাগদস্সনমুখেনেৰ হোতীতি. ৰোদানং ৰিসুদ্ধি. সা চ সংকিলেসমলৰিমুত্তি. তং ইচ্ছন্তেন যস্মা উপাযকোসল্লত্থিনা অনুপাযকোসল্লং ৰিয সংকিলেসো জানিতব্বোতি আহ ‘‘কো চস্স সংকিলেসো’’তি.

তত্রাতি তস্মিং, তস্স ৰা পঞ্হাকম্মস্স. ৰিস্সজ্জনন্তি ৰিৰরণং. পুচ্ছিতো হি অত্থো অৰিভাৰিতত্তা নিগূল়্হো মুট্ঠিযং কতো ৰিয তিট্ঠতি. তস্স ৰিৰরণং ৰিস্সজ্জনং ৰিভূতভাৰকারণতো. পাণাতিপাতাদীহীতি এত্থ পাণোতি ৰোহারতো সত্তো, পরমত্থতো জীৰিতিন্দ্রিযং. তস্স সরসেনেৰ পতনসভাৰস্স অন্তরে এৰ অতিৰ পাতনং অতিপাতো, সণিকং পতিতুং অদত্ৰা সীঘং পাতনন্তি অত্থো, অতিক্কম্ম ৰা সত্থাদীহি অভিভৰিত্ৰা পাতনং অতিপাতো, পাণঘাতো. আদিসদ্দেন অদিন্নাদানাদিং সঙ্গণ্হাতি. তেহি পাণাতিপাতাদীহি দুস্সীল্যকম্মেহি. ৰিরমন্তস্সাতি সমাদানৰিরতিৰসেন, সম্পত্তৰিরতিৰসেন চ ওরমন্তস্স. ৰত্তপটিপত্তিন্তি উপজ্ঝাযৰত্তাদিৰত্তকরণং. চেতনাদযো ধম্মাতি সঙ্খেপতো ৰুত্তমত্থং পাল়িৰসেন ৰিভজিত্ৰা দস্সেতুং ‘‘ৰুত্তঞ্হেত’’ন্তিআদি ৰুত্তং. তত্থ চেতযতীতি চেতনা, অত্তনা সম্পযুত্তধম্মেহি সদ্ধিং আরম্মণে অভিসন্দহতীতি অত্থো. চেতনায অনুকূলৰসেনেৰ হি তংসম্পযুত্তা ধম্মা আরম্মণে পৰত্তন্তি. চেতনা কামং কুসলত্তিকসাধারণা, ইধ পন সীলচেতনা অধিপ্পেতাতি কত্ৰা ‘‘কুসলা’’তি ৰেদিতব্বা. চেতসি নিযুত্তং চেতসিকং, চিত্তসম্পযুত্তন্তি অত্থো. চেতনায সতিপি চেতসিকত্তে ‘‘চেতনা সীল’’ন্তি ৰিসুং গহিতত্তা তদঞ্ঞমেৰ ৰিরতিঅনভিজ্ঝাদিকং চেতসিকং সীলং দট্ঠব্বং গোবলীবদ্দঞাযেন. সংৰরণং সংৰরো. যথা অকুসলা ধম্মা চিত্তে ন ওতরন্তি, তথা পিদহনং. অৰীতিক্কমো ৰীতিক্কমস্স পটিপক্খভূতা অৰীতিক্কমৰসেন পৰত্তচিত্তচেতসিকা. তত্থ চেতনা সীলং নামাতিআদি যথাৰুত্তস্স সুত্তপদস্স ৰিৰরণং. ৰিরমন্তস্স চেতনাতি ৰিরতিসম্পযুত্তং পধানভূতং চেতনমাহ. পূরেন্তস্স চেতনাতি ৰত্তপটিপত্তিআযূহিনী. ৰিরমন্তস্স ৰিরতীতি ৰিরতিযা পধানভাৰং গহেত্ৰা ৰুত্তং.

এত্থ হি যদা ‘‘তিৰিধা, ভিক্খৰে, কাযসঞ্চেতনা কুসলং কাযকম্ম’’ন্তিআদি (কথা. ৫৩৯) ৰচনতো পাণাতিপাতাদীনং পটিপক্খভূতা তব্বিরতিৰিসিট্ঠা চেতনা তথাপৰত্তা পধানভাৰেন পাণাতিপাতাদিপটিৰিরতিসাধিকা হোতি, তদা তংসম্পযুত্তা ৰিরতিঅনভিজ্ঝাদযো চ চেতনাপক্খিকা ৰা, অব্বোহারিকা ৰাতি ইমমত্থং সন্ধায চেতনাসীলং ৰুত্তং. যদা পন পাণাতিপাতাদীহি সঙ্কোচং আপজ্জন্তস্স ততো ৰিরমণাকারেন পৰত্তমানা চেতনাৰিসিট্ঠা ৰিরতি, অনভিজ্ঝাদযো চ তত্থ তত্থ পধানভাৰেন কিচ্চসাধিকা হোন্তি, তদা তংসম্পযুত্তা চেতনা ৰিরতিআদিপক্খিকা ৰা হোতি, অব্বোহারিকা ৰাতি ইমমত্থং সন্ধায চেতসিকসীলং ৰুত্তং.

ইদানি সুত্তে আগতনযেন কুসলকম্মপথৰসেন চেতনাচেতসিকসীলানি ৰিভজিত্ৰা দস্সেতুং ‘‘অপিচা’’তিআদি ৰুত্তং. পজহন্তস্সাতি সমাদানৰসেন ‘‘ইতো পট্ঠায ন করিস্সামী’’তি সম্পত্তৰত্থুকানিপি অনজ্ঝাচরণেন পজহন্তস্স. সত্ত কম্মপথচেতনাতি পাণাতিপাতাদিপহানসাধিকা পটিপাটিযা সত্ত কুসলকম্মপথচেতনা. অভিজ্ঝাদিৰসেন যং পরদারগমনাদি করীযতি, তস্স পহাযকা অনভিজ্ঝাদযো সীলন্তি আহ ‘‘চেতসিকং সীলং নাম অনভিজ্ঝা…পে… সম্মাদিট্ঠিধম্মা’’তি. যথা হি অভিজ্ঝাব্যাপাদৰসেন মিচ্ছাচারপাণাতিপাতাদযো করীযন্তি, এৰং মিচ্ছাদিট্ঠিৰসেনাপি তে পুত্তমুখদস্সনাদিঅত্থং করীযন্তি. তেসঞ্চ পজহনকা অনভিজ্ঝাদযোতি. পাতিমোক্খসংৰরো চারিত্তৰারিত্তৰিভাগং ৰিনযপরিযাপন্নং সিক্খাপদসীলং. সতিসংৰরো মনচ্ছট্ঠানং ইন্দ্রিযানং আরক্খা, সা চ তথাপৰত্তা সতিযেৰ. ঞাণসংৰরো পঞ্ঞা. খন্তিসংৰরো অধিৰাসনা, সা চ তথাপৰত্তা অদোসপধানা খন্ধা, অদোসো এৰ ৰা. ৰীরিযসংৰরো কামৰিতক্কাদীনং ৰিনোদনৰসেন পৰত্তং ৰীরিযং. পাতিমোক্খসংৰরসতিসংৰরাদীসু যং ৰত্তব্বং, তং পরতো আৰি ভৰিস্সতি.

সোতানীতি তণ্হাদিট্ঠিঅৰিজ্জাদুচ্চরিতঅৰসিট্ঠকিলেসসোতানি. ‘‘সোতানং সংৰরং ব্রূমী’’তি ৰত্ৰা ‘‘পঞ্ঞাযেতে পিধিয্যরে’’তি ৰচনেন সোতানং সংৰরো পিদহনং সমুচ্ছেদনং ঞাণন্তি ৰিঞ্ঞাযতি.

ইদমত্থিকতং মনসি কত্ৰা যেন ঞাণেন যোনিসো পচ্চৰেক্খিত্ৰা পচ্চযা পটিসেৰীযন্তি. তং পচ্চযপটিসেৰনম্পি ঞাণসভাৰত্তা এত্থেৰ ঞাণসংৰরে এৰ সমোধানং সঙ্গহং গচ্ছতি. খমতি অধিৰাসেতীতি খমো. উপ্পন্নন্তি তস্মিং তস্মিং আরম্মণে জাতং নিব্বত্তং. কামৰিতক্কন্তি কামূপসংহিতং ৰিতক্কং. নাধিৰাসেতীতি চিত্তং আরোপেত্ৰা অব্ভন্তরে ন ৰাসেতি. আজীৰপারিসুদ্ধিপীতি বুদ্ধপটিকুট্ঠং মিচ্ছাজীৰং পহায অনৰজ্জেন পচ্চযপরিযেসনেন সিজ্ঝনকং আজীৰপারিসুদ্ধিসীলম্পি এত্থেৰ ৰীরিযসংৰরে এৰ সমোধানং গচ্ছতি ৰীরিযসাধনত্তা. এত্থ চ যথা ঞাণং তণ্হাদিসোতানং পৰত্তিনিৰারণতো পিদহনট্ঠেন সংৰরণতো সংৰরো চ, পরতো পৰত্তনকগুণানং আধারাদিভাৰতো সীলনট্ঠেন সীলং, এৰং খন্তি অনধিৰাসনেন উপ্পজ্জনককিলেসানং অধিৰাসনেন সংৰরণতো সংৰরো চ, খমনহেতু উপ্পজ্জনকগুণানং আধারাদিভাৰতো সীলনট্ঠেন সীলং, ৰীরিযং ৰিনোদেতব্বানং পাপধম্মানং ৰিনোদনেন সংৰরণতো সংৰরো চ, ৰিনোদনহেতু উপ্পজ্জনকগুণানং আধারাদিভাৰতো সীলনট্ঠেন সীলন্তি ৰেদিতব্বং. যথা পন পাতিমোক্খসীলাদি তস্স তস্স পাপধম্মস্স পৰত্তিতুং অপ্পদানৰসেন সংৰরণং পিদহনং, তং উপাদায সংৰরো, এৰং অসমাদিন্নসীলস্স আগতৰত্থুতো ৰিরমণম্পীতি আহ ‘‘যা চ পাপভীরুকানং…পে… সংৰরসীলন্তি ৰেদিতব্ব’’ন্তি. ন ৰীতিক্কমতি এতেনাতি অৰীতিক্কমো. তথাপৰত্তো কুসলচিত্তুপ্পাদো.

৭. অৰসেসেসু পন পঞ্হেসু. সমাধানং সণ্ঠপনং. দুস্সীল্যৰসেন হি পৰত্তা কাযকম্মাদযো সম্পতি, আযতিঞ্চ অহিতদুক্খাৰহা, ন সম্মা ঠপিতাতি অসণ্ঠপিতা ৰিপ্পকিণ্ণা ৰিসটা চ নাম হোন্তি, সুসীল্যৰসেন পন পৰত্তা তব্বিপরিযাযতো সণ্ঠপিতা অৰিপ্পকিণ্ণা অৰিসটা চ নাম হোন্তি যথা তং ওক্খিত্তচক্খুতা অবাহুপ্পচালনাদি. তেনাহ ‘‘কাযকম্মাদীনং সুসীল্যৰসেন অৰিপ্পকিণ্ণতাতি অত্থো’’তি. এতেন সমাধিকিচ্চতো সীলনং ৰিসেসেতি. তস্স হি সমাধানং সম্পযুত্তধম্মানং অৰিক্খেপহেতুতা. ইদং কাযকম্মাদীনং সণ্ঠপনং সংযমনং. উপধারণং অধিট্ঠানং মূলভাৰো. তথা হিস্স আদিচরণাদিভাৰো ৰুত্তো. তেন পথৰীধাতুকিচ্চতো সীলনং ৰিসেসিতং হোতি. সা হি সহজাতরূপধম্মানং সন্ধারণৰসেন পৰত্ততি. ইদং পন অনৰজ্জধম্মানং মূলাধিট্ঠানভাৰেন. তেনাহ ‘‘কুসলানং ধম্মান’’ন্তিআদি. তত্থ কুসলধম্মা নাম সপুব্বভাগা মহগ্গতানুত্তরা ধম্মা. অঞ্ঞে পন আচরিযা. সিরট্ঠোতি যথা সিরসি ছিন্নে সব্বো অত্তভাৰো ৰিনস্সতি, এৰং সীলে ভিন্নে সব্বং গুণসরীরং ৰিনস্সতি. তস্মা তস্স উত্তমঙ্গট্ঠো সীলট্ঠো. ‘‘সিরো সীস’’ন্তি ৰা ৰত্তব্বে নিরুত্তিনযেন ‘‘সীল’’ন্তি ৰুত্তন্তি অধিপ্পাযো. সীতলট্ঠো পরিল়াহৰূপসমনট্ঠো. তেন ত-কারস্স লোপং কত্ৰা নিরুত্তিনযেনেৰ ‘‘সীল’’ন্তি ৰুত্তন্তি দস্সেতি. তথা হিদং পযোগসম্পাদিতং সব্বকিলেসপরিল়াহৰূপসমকরং হোতি. এৰমাদিনাতি আদি-সদ্দেন সযন্তি অকুসলা এতস্মিং সতি অপৰিট্ঠা হোন্তীতি সীলং, সুপন্তি ৰা তেন ৰিহতুস্সাহানি সব্বদুচ্চরিতানীতি সীলং, সব্বেসং ৰা কুসলধম্মানং পৰেসারহসালাতি সীলন্তি এৰমাদীনং সঙ্গহো দট্ঠব্বো.

৮. ‘‘সীলনট্ঠেন সীল’’ন্তি পুব্বে সদ্দত্থুদ্ধারেন পকাসিতোপি ভাৰত্থো এৰাতি আহ ‘‘সীলনং লক্খণং তস্সা’’তি. ন হি তস্স চেতনাদিভেদভিন্নস্স অনৰসেসতো সঙ্গাহকো ততো অঞ্ঞো অত্থো অত্থি, যো লক্খণভাৰেন ৰুচ্চেয্য. ননু চ অনেকভেদসঙ্গাহকং সামঞ্ঞলক্খণং নাম সিযা, ন ৰিসেসলক্খণন্তি অনুযোগং মনসি কত্ৰা আহ ‘‘সনিদস্সনত্তং রূপস্স, যথা ভিন্নস্সনেকধা’’তি.

যথা হি নীলাদিৰসেন অনেকভেদভিন্নস্সাপি রূপাযতনস্স সনিদস্সনত্তং ৰিসেসলক্খণং তদঞ্ঞধম্মাসাধারণতো. ন অনিচ্চতাদি ৰিয, রুপ্পনং ৰিয ৰা সামঞ্ঞলক্খণং, এৰমিধাপি দট্ঠব্বং. কিং পনেতং সনিদস্সনত্তং নাম? দট্ঠব্বতা চক্খুৰিঞ্ঞাণস্স গোচরভাৰো. তস্স পন রূপাযতনতো অনঞ্ঞত্তেপি অঞ্ঞেহি ধম্মেহি রূপাযতনং ৰিসেসেতুং অঞ্ঞং ৰিয কত্ৰা সহ নিদস্সনেন সনিদস্সনন্তি ৰুচ্চতি. ধম্মসভাৰসামঞ্ঞেন হি একীভূতেসু ধম্মেসু যো নানত্তকরো সভাৰো, সো অঞ্ঞং ৰিয কত্ৰা উপচরিতুং যুত্তো. এৰং হি অত্থৰিসেসাৰবোধো হোতীতি. অথ ৰা ‘‘সহ নিদস্সনেনা’’তি এত্থ তব্ভাৰত্থো সহ-সদ্দো যথা নন্দিরাগসহগতাতি (সং. নি. ৫.১০৮১; মহাৰ. ১৪; পটি. ম. ২.৩০).

দুস্সীল্যৰিদ্ধংসনরসন্তি কাযিকঅসংৰরাদিভেদস্স দুস্সীল্যস্স ৰিধমনকিচ্চং. অনৰজ্জরসন্তি অগারয্হসম্পত্তিকং অগরহিতব্বভাৰেন সম্পজ্জনকং, অৰজ্জপটিপক্খভাৰেন ৰা সম্পজ্জনকং. লক্খণাদীসূতি লক্খণরসাদীসু ৰুচ্চমানেসু কিচ্চমেৰ, সম্পত্তি ৰা রসোতি ৰুচ্চতি, ন রসাযতনরসাদীতি অধিপ্পাযো. কেচি পন ‘‘কিচ্চমেৰা’’তি অৰধারণং তস্স ইতররসতো বলৰভাৰদস্সনত্থন্তি ৰদন্তি, তং তেসং মতিমত্তং, কিচ্চমেৰ, সম্পত্তি এৰ ৰা রসোতি ইমস্স অত্থস্স অধিপ্পেতত্তা.

সোচেয্যপচ্চুপট্ঠানন্তি কাযাদীহি সুচিভাৰেন পচ্চুপট্ঠাতি. গহণভাৰন্তি গহেতব্বভাৰং. তেন উপট্ঠানাকারট্ঠেন পচ্চুপট্ঠানং ৰুত্তং, ফলট্ঠেন পন অৰিপ্পটিসারপচ্চুপট্ঠানং, সমাধিপচ্চুপট্ঠানং ৰা. সীলং হি সম্পতিযেৰ অৰিপ্পটিসারং পচ্চুপট্ঠাপেতি, পরম্পরায সমাধিং. ইমস্স পন আনিসংসফলস্স আনিসংসকথাযং ৰক্খমানত্তা ইধ অগ্গহণং দট্ঠব্বং. কেচি পন ফলস্স অনিচ্ছিতত্তা ইধ অগ্গহণন্তি ৰদন্তি, তদযুত্তং ফলস্স অনেকৰিধত্তা, লোকিযাদিসীলস্সাপি ৰিভজিযমানত্তা. তথা হি ৰক্খতি ‘‘নিস্সিতানিস্সিতৰসেনা’’তিআদি (ৰিসুদ্ধি. ১.১০). যথা পথৰীধাতুযা কম্মাদি দূরকারণং, সেসভূতত্তযং আসন্নকারণং, যথা চ ৰত্থস্স তন্তৰাযতুরিৰেমসলাকাদি দূরকারণং, তন্তৰো আসন্নকারণং, এৰং সীলস্স সদ্ধম্মস্সৰনাদি দূরকারণং, হিরিওত্তপ্পমস্স আসন্নকারণন্তি দস্সেন্তো আহ ‘‘হিরোত্তপ্পঞ্চ পনা’’তিআদি. হিরোত্তপ্পে হীতিআদি তস্স আসন্নকারণভাৰসাধনং. তত্থ উপ্পজ্জতি সমাদানৰসেন, তিট্ঠতি অৰীতিক্কমৰসেনাতি ৰেদিতব্বং.

সীলানিসংসকথাৰণ্ণনা

৯. অৰিপ্পটিসারাদীতি এত্থ ৰিপ্পটিসারপটিপক্খো কুসলচিত্তুপ্পাদো অৰিপ্পটিসারো. সো পন ৰিসেসতো ‘‘লাভা ৰত মে, সুলদ্ধং ৰত মে, যস্স মে সুপরিসুদ্ধং সীল’’ন্তি অত্তনো সীলস্স পচ্চৰেক্খণৰসেন পৰত্তোতি ৰেদিতব্বো. আদি-সদ্দেন পামোজ্জভোগসম্পত্তিকিত্তিসদ্দাদিং সঙ্গণ্হাতি. অৰিপ্পটিসারত্থানীতি অৰিপ্পটিসারপ্পযোজনানি. কুসলানীতি অনৰজ্জানি. অৰিপ্পটিসারানিসংসানীতি অৰিপ্পটিসারুদ্দযানি. এতেন অৰিপ্পটিসারো নাম সীলস্স উদ্দযমত্তং, সংৰড্ঢিতস্স রুক্খস্স ছাযাপুপ্ফসদিসং. অঞ্ঞো এৰ পনানেন নিপ্ফাদেতব্বো সমাধিআদিগুণোতি দস্সেতি.

সীলৰতো সীলসম্পদাযাতি পরিসুদ্ধং পরিপুণ্ণং কত্ৰা সীলস্স সম্পাদনেন সীলৰতো, তায এৰ সীলসম্পদায. অপ্পমাদাধিকরণন্তি অপ্পমাদকারণা. ভোগক্খন্ধন্তি ভোগরাসিং. কল্যাণো কিত্তিসদ্দো অব্ভুগ্গচ্ছতীতি ‘‘ইতিপি সীলৰা, ইতিপি কল্যাণধম্মো’’তি সুন্দরো থুতিঘোসো উট্ঠহতি, লোকং পত্থরতি. ৰিসারদোতি অত্তনি কিঞ্চি গরহিতব্বং উপৰদিতব্বং অপস্সন্তো ৰিগতসারজ্জো নিব্ভযো. অমঙ্কুভূতোতি অৰিলক্খো. অসম্মূল়্হোতি ‘‘অকতং ৰত মে কল্যাণ’’ন্তিআদিনা (ম. নি. ৩.২৪৮) ৰিপ্পটিসারাভাৰতো, কুসলকম্মাদীনংযেৰ চ তদা উপট্ঠানতো অমূল়্হো পসন্নমানসো এৰ কালংকরোতি. কাযস্স ভেদাতি উপাদিন্নক্খন্ধপরিচ্চাগা, জীৰিতিন্দ্রিযস্স উপচ্ছেদা. পরং মরণাতি চুতিতো উদ্ধং. সুগতিন্তি সুন্দরং গতিং. তেন মনুস্সগতিপি সঙ্গয্হতি. সগ্গন্তি দেৰগতিং. সা হি রূপাদীহি ৰিসযেহি সুট্ঠু অগ্গোতি সগ্গো, লোকিযতি এত্থ উল়ারং পুঞ্ঞফলন্তি লোকোতি চ ৰুচ্চতি.

আকঙ্খেয্য চেতি যদি ইচ্ছেয্য. পিযো চ অস্সন্তি পিযাযিতব্বো পিযচক্খূহি পস্সিতব্বো পেমনিযো ভৰেয্যন্তি অত্থো. মনাপোতি সব্রহ্মচারীনং মনৰড্ঢনকো, তেসং ৰা মনেন পত্তব্বো, মেত্তচিত্তেন ফরিতব্বোতি ৰুত্তং হোতি. গরূতি গরুট্ঠানিযো পাসাণছত্তসদিসো. ভাৰনীযোতি ‘‘অদ্ধা অযমাযস্মা জানং জানাতি, পস্সং পস্সতী’’তি সম্ভাৰনীযো. সীলেস্ৰেৰস্স পরিপূরকারীতি চতুপারিসুদ্ধিসীলেসু এৰ পরিপূরকারী অস্স, অনূনকারী পরিপূরণাকারেন সমন্নাগতো ভৰেয্য. ‘‘আদিনা নযেনা’’তি এতেন ‘‘অজ্ঝত্তং চেতোসমথমনুযুত্তো অনিরাকতজ্ঝানো ৰিপস্সনায সমন্নাগতো ব্রূহেতা সুঞ্ঞাগারান’’ন্তি (ম. নি. ১.৬৫) এৰমাদিকে সীলথোমনসুত্তাগতে সত্তরস সীলানিসংসে সঙ্গণ্হাতি.

ইদানি ন কেৰলমিমে এৰ অৰিপ্পটিসারাদযো, অথ খো অঞ্ঞেপি বহূ সীলানিসংসা ৰিজ্জন্তীতি তে দস্সেতুং ‘‘অপিচা’’তিআদি আরদ্ধং. তত্থ সাসনেতি ইমস্মিং সকললোকিযলোকুত্তরগুণাৰহে সত্থুসাসনে. আচারকুলপুত্তানং যং সীলং ৰিনা পতিট্ঠা অৰট্ঠানং নত্থি, তস্স এৰং মহানুভাৰস্স সীলস্স আনিসংসানং পরিচ্ছেদং পরিমাণং কো ৰদে কো ৰত্তুং সক্কুণেয্যাতি অত্থো. এতেন সব্বেসংযেৰ লোকিযলোকুত্তরানং গুণানং সীলমেৰ মূলভূতন্তি দস্সেত্ৰা ততো পরম্পি মলৰিসোধনেন, পরিল়াহৰূপসমনেন, সুচিগন্ধৰাযনেন, সগ্গনিব্বানাধিগমূপাযভাৰেন, সোভালঙ্কারসাধনতায ভযৰিধমনেন, কিত্তিপামোজ্জজনেন চ সীলসদিসং অঞ্ঞং সত্তানং হিতসুখাৰহং নত্থীতি দস্সেন্তো ‘‘ন গঙ্গা’’তিআদিকা গাথা অভাসি.

তত্থ সরভূতি একা নদী, ‘‘যং লোকে সরভূ’’তি ৰদন্তি. নিন্নগা ৰাচিরৰতীতি ‘‘অচিরৰতী’’তি এৰংনামিকা নদী, ৰাতি সব্বত্থ ৰা-সদ্দো অনিযমত্থো. তেন অৰুত্তা গোধাৰরীচন্দভাগাদিকা সঙ্গণ্হাতি. পাণনট্ঠেন পাণীনং সত্তানং যং মলং সীলজলং ৰিসোধযতি, তং মলং ৰিসোধেতুং ন সক্কুণন্তি গঙ্গাদযো নদিযোতি পঠমগাথায ন-কারং আনেত্ৰা সম্বন্ধিতব্বং. হারাতি মুত্তাহারা. মণযোতি ৰেল়ুরিযাদিমণযো. অরিযন্তি ৰিসুদ্ধং. সীলসমুট্ঠানো কিত্তিসদ্দো গন্ধো মনোহরভাৰতো, দিসাসু অভিব্যাপনতো চ ‘‘সীলগন্ধো’’তি ৰুত্তো. সো হি পটিৰাতেপি পৰত্ততি. তেনাহ ভগৰা ‘‘সতঞ্চ গন্ধো পটিৰাতমেতী’’তি (ধ. প. ৫৪; অ. নি. ৩.৮০; মি. প. ৫.৪.১). দোসানং বলং নাম ৰত্থুজ্ঝাচারো, তং তেসং কাতুং অদেন্তং সীলং দোসানং বলং ঘাতেতীতি ৰেদিতব্বং.

সীলপ্পভেদকথাৰণ্ণনা

১০. ‘‘কতিৰিধ’’ন্তি এত্থ ৰিধ-সদ্দো কোট্ঠাসপরিযাযো ‘‘একৰিধেন রূপসঙ্গহো’’তিআদীসু ৰিয, পকারত্থো ৰা, কতিপ্পকারং কিত্তকা সীলস্স পকারভেদাতি অত্থো. সীলনলক্খণেনাতি সীলনসঙ্খাতেন সভাৰেন.

চরন্তি তেন সীলেসু পরিপূরকারিতং উপগচ্ছন্তীতি চরিত্তং, চরিত্তমেৰ চারিত্তং. ৰারিততো তেন অত্তানং তাযন্তি রক্খন্তীতি ৰারিত্তং. অধিকো সমাচারো অভিসমাচারো, তত্থ নিযুত্তং, সো ৰা পযোজনং এতস্সাতি আভিসমাচারিকং. আদি ব্রহ্মচরিযস্সাতি আদিব্রহ্মচরিযং, তদেৰ আদিব্রহ্মচরিযকং. ৰিরমতি এতায, সযং ৰা ৰিরমতি, ৰিরমণং ৰা ৰিরতি, ন ৰিরতীতি অৰিরতি. নিস্সযতীতি নিস্সিতং, ন নিস্সিতন্তি অনিস্সিতং. পরিযন্তো এতস্স অত্থীতি পরিযন্তং, কালেন পরিযন্তং কালপরিযন্তং, যথাপরিচ্ছিন্নো ৰা কালো পরিযন্তো এতস্সাতি কালপরিযন্তং. যাৰ পাণনং জীৰনং কোটি এতস্সাতি আপাণকোটিকং. অত্তনো পচ্চযেহি লোকে নিযুত্তং, তত্থ ৰা ৰিদিতন্তি লোকিযং. লোকং উত্তরতীতি লোকুত্তরং.

পচ্চযতো, ফলতো চ মজ্ঝিমপণীতেহি নিহীনং, তেসং ৰা গুণেহি পরিহীনন্তি হীনং. অত্তনো পচ্চযেহি পধানভাৰং নীতন্তি পণীতং. উভিন্নমেৰ ৰেমজ্ঝে ভৰং মজ্ঝিমং. অত্তাধিপতিতো আগতং অত্তাধিপতেয্যং. সেসপদদ্ৰযেপি এসেৰ নযো. তণ্হায, দিট্ঠিযা ৰা পরামট্ঠং পধংসিতন্তি পরামট্ঠং. তপ্পটিক্খেপতো অপরামট্ঠং. পটিপ্পস্সদ্ধকিলেসং পটিপ্পস্সদ্ধং. সিক্খাসু জাতং, সেক্খস্স ইদন্তি ৰা সেক্খং. পরিনিট্ঠিতসিক্খাকিচ্চতায অসেক্খধম্মপরিযাপন্নং অসেক্খং. তদুভযপটিক্খেপেন নেৰসেক্খনাসেক্খং. হানং ভজতি, হানভাগো ৰা এতস্স অত্থীতি হানভাগিযং. সেসেসুপি এসেৰ নযো. অপ্পপরিমাণত্তা পরিযন্তৰন্তং, পারিসুদ্ধিৰন্তঞ্চ সীলং পরিযন্তপারিসুদ্ধিসীলং. অনপ্পপরিমাণত্তা অপরিযন্তং, পারিসুদ্ধিৰন্তঞ্চ সীলং অপরিযন্তপারিসুদ্ধিসীলং. সব্বসো পুণ্ণং, পারিসুদ্ধিৰন্তঞ্চ সীলং পরিপুণ্ণপারিসুদ্ধিসীলং.

১১. ৰুত্তনযেনাতি ‘‘সীলনট্ঠেন সীল’’ন্তিআদিনা (ৰিসুদ্ধি. ১.৭) হেট্ঠা ৰুত্তেন নযেন. ইদং কত্তব্বন্তি পঞ্ঞত্তসিক্খাপদপূরণন্তি ইদং আভিসমাচারিকং কত্তব্বং পটিপজ্জিতব্বন্তি এৰং পঞ্ঞত্তস্স সিক্খাপদসীলস্স পূরণং. সিক্খাপদসীলং হি পূরেন্তো সিক্খাপদম্পি পূরেতি পালেতি নাম. সিক্খা এৰ ৰা সিক্খিতব্বতো, পটিপজ্জিতব্বতো চ সিক্খাপদং. তস্স পূরণন্তিপি যোজেতব্বং. ইদং ন কত্তব্বন্তি পটিক্খিত্তস্স অকরণন্তি ইদং দুচ্চরিতং ন কত্তব্বন্তি ভগৰতা পটিক্খিত্তস্স অকরণং ৰিরমণং. চরন্তি তস্মিন্তি তস্মিং সীলে তংসমঙ্গিনো চরন্তীতি সীলস্স অধিকরণতং ৰিভাৰেন্তো তেসং পৰত্তিট্ঠানভাৰং দস্সেতি. তেনাহ ‘‘সীলেসু পরিপূরকারিতায পৰত্তন্তী’’তি. ৰারিতন্তি ইদং ন কত্তব্বন্তি পটিক্খিত্তং অকপ্পিযং. তাযন্তীতি অকরণেনেৰ তাযন্তি. তেনাতি ৰারিত্তসীলমাহ. ৰারেতি ৰা সত্থা এত্থ, এতেন ৰাতি ৰারিতং, সিক্খাপদং. তং অৰিকোপেন্তো তাযন্তি তেনাতি ৰারিত্তং. সদ্ধাৰীরিযসাধনন্তি সদ্ধায, উট্ঠানৰীরিযেন চ সাধেতব্বং. ন হি অসদ্ধো, কুসীতো চ ৰত্তপটিপত্তিং পরিপূরেতি, সদ্ধো এৰ সত্থারা পটিক্খিত্তে অণুমত্তেপি ৰজ্জে ভযদস্সাৰী সমাদায সিক্খতি সিক্খাপদেসূতি আহ ‘‘সদ্ধাসাধনং ৰারিত্ত’’ন্তি.

অধিসীলসিক্খাপরিযাপন্নত্তা অভিৰিসিট্ঠো সমাচারোতি অভিসমাচারোতি আহ ‘‘উত্তমসমাচারো’’তি. অভিসমাচারোৰ আভিসমাচারিকং, যথা ৰেনযিকোতি (অ. নি. ৮.১১; পারা. ৮) অধিপ্পাযো. অভিসমাচারো উক্কট্ঠনিদ্দেসতো মগ্গসীলং, ফলসীলঞ্চ, তং আরব্ভ উদ্দিস্স তদত্থং তপ্পযোজনং পঞ্ঞত্তং আভিসমাচারিকং. সুপরিসুদ্ধানি তীণি কাযকম্মানি, চত্তারি ৰচীকম্মানি, সুপরিসুদ্ধো আজীৰোতি ইদং আজীৰট্ঠমকং. তত্থ কামং আজীৰহেতুকতো সত্তৰিধদুচ্চরিততো ৰিরতি সম্মাআজীৰোতি সোপি সত্তৰিধো হোতি, সম্মাজীৰতাসামঞ্ঞেন পন তং একং কত্ৰা ৰুত্তং. অথ ৰা তিৰিধকুহনৰত্থুসন্নিস্সযতো মিচ্ছাজীৰতো ৰিরতিং একজ্ঝং কত্ৰা ৰুত্তো ‘‘আজীৰো সুপরিসুদ্ধো’’তি. সেট্ঠচরিযভাৰতো মগ্গো এৰ ব্রহ্মচরিযন্তি মগ্গব্রহ্মচরিযং, তস্স. আদিভাৰভূতন্তি আদিম্হি ভাৰেতব্বতং নিপ্ফাদেতব্বতং ভূতং পত্তং আদিভাৰভূতং. কিঞ্চাপি দেসনানুক্কমেন সম্মাদিট্ঠি আদি, পটিপত্তিক্কমেন পন আজীৰট্ঠমকসীলং আদীতি. তস্স সম্পত্তিযাতি আভিসমাচারিকস্স সম্পজ্জনেন পরিপূরণেন আদিব্রহ্মচরিযকং সম্পজ্জতি. যো হি লহুকানিপি অপ্পসাৰজ্জানি পরিৰজ্জেতি, সো গরুকানি মহাসাৰজ্জানি বহ্ৰাদীনৰানি পরিৰজ্জেস্সতীতি ৰত্তব্বমেৰ নত্থীতি. সুত্তং পন এতমত্থং ব্যতিরেকৰসেন ৰিভাৰেতি. তত্থ ধম্মন্তি সীলং. তং হি উপরিগুণৰিসেসানং ধারণট্ঠেন ধম্মোতি ৰুচ্চতি.

ৰিরতিসীলস্স ইতরসীলেন সতিপি সম্পযোগাদিকে অসম্মিস্সকতাদস্সনত্থং ‘‘ৰেরমণিমত্ত’’ন্তি ৰুত্তং.

‘‘নিস্সিতানিস্সিতৰসেনা’’তি এত্থ লব্ভমাননিস্সযং তাৰ দস্সেতুং ‘‘নিস্সযো’’তিআদি ৰুত্তং. তত্থ তণ্হাচরিতেন নিস্সযিতব্বতো তণ্হাৰ তণ্হানিস্সযো. তথা দিট্ঠিনিস্সযো. দিট্ঠিচরিতো হি অসতিপি দিট্ঠিযা তণ্হাৰিরহে দিট্ঠিনিস্সিতোৰ পৰত্ততি. দেৰোতি চতুমহারাজসক্কসুযামাদিপাকটদেৰমাহ. দেৰঞ্ঞতরোতি অপাকটং. তণ্হং এৰ নিস্সিতন্তি তণ্হানিস্সিতং. তণ্হায নিস্সিতন্তি চ কেচি ৰদন্তি. তেসং ‘‘দ্ৰে নিস্সযা’’তিআদিনা ৰিরুজ্ঝতি. সুদ্ধিদিট্ঠিযাতি ‘‘ইতি সংসারসুদ্ধি ভৰিস্সতী’’তি এৰং পৰত্তদিট্ঠিযা, লোকুত্তরং সীলন্তি অধিপ্পাযো. তস্সেৰাতি লোকুত্তরস্সেৰ সম্ভারভূতং কারণভূতং, ৰিৰট্টূপনিস্সযন্তি অত্থো.

কালপরিচ্ছেদং কত্ৰাতি ‘‘ইমঞ্চ রত্তিং, ইমঞ্চ দিৰ’’ন্তিআদিনা (অ. নি. ৮.৪১) ৰিয কালৰসেন পরিচ্ছেদং কত্ৰা. কালপরিচ্ছেদং অকত্ৰা সমাদিন্নম্পি অন্তরাৰিচ্ছিন্নং সম্পত্তৰিরতিৰসেন যাৰজীৰং পৰত্তিতম্পি আপাণকোটিকং ন হোতীতি দস্সেতুং ‘‘যাৰজীৰং সমাদিযিত্ৰা তথেৰ পৰত্তিত’’ন্তি ৰুত্তং.

লাভযসঞাতিঅঙ্গজীৰিতৰসেনাতি লাভযসানং অনুপ্পন্নানং উপ্পাদনৰসেন, উপ্পন্নানং রক্খণৰসেন চেৰ ৰড্ঢনৰসেন চ ঞাতিঅঙ্গজীৰিতানং অৰিনাসনৰসেন. কিং সো ৰীতিক্কমিস্সতীতি যো ৰীতিক্কমায চিত্তম্পি ন উপ্পাদেতি, সো কাযৰাচাহি ৰীতিক্কমিস্সতীতি কিং ইদং, নত্থেতন্তি অত্থো. পটিক্খেপে হি অযং কিং-সদ্দো.

আরম্মণভাৰেন ৰণো ৰিয আসৰে কামাসৰাদিকে পগ্ঘরতীতি সম্পযোগভাৰাভাৰেপি সহাসৰেহীতি সাসৰং. তেভূমকধম্মজাতন্তি সীলং তপ্পরিযাপন্নন্তি আহ ‘‘সাসৰং সীলং লোকিয’’ন্তি. ভৰৰিসেসা সম্পত্তিভৰা. ৰিনযোতি ৰিনযপরিযত্তি, তত্থ ৰা আগতসিক্খাপদানি. পামোজ্জং তরুণপীতি. যথাভূতঞাণদস্সনং সপচ্চযনামরূপদস্সনং, তদধিট্ঠানা ৰা তরুণৰিপস্সনা. নিব্বিদাতি নিব্বিদাঞাণং. তেন বলৰৰিপস্সনমাহ. ৰিরাগো মগ্গো. ৰিমুত্তি অরহত্তফলং. ৰিমুত্তিঞাণদস্সনং পচ্চৰেক্খণা. কথাতি ৰিনযকথা. মন্তনাতি ৰিনযৰিচারণা. উপনিসাতি যথাৰুত্তকারণপরম্পরাসঙ্খাতো উপনিস্সযো. লোকুত্তরং মগ্গফলচিত্তসম্পযুত্তং আজীৰট্ঠমকসীলং. তত্থ মগ্গসীলং ভৰনিস্সরণাৰহং হোতি, পচ্চৰেক্খণঞাণস্স চ ভূমি, ফলসীলং পন পচ্চৰেক্খণাঞাণস্সেৰ ভূমি.

১২. হীনাধিমুত্তিৰসেন ছন্দাদীনম্পি হীনতা. পণীতাধিমুত্তিৰসেন পণীততা. তদুভযৰেমজ্ঝতাৰসেন মজ্ঝিমতা. যথেৰ হি কম্মং আযূহনৰসেন হীনাদিভেদভিন্নং হোতি, এৰং ছন্দাদযোপি পৰত্তিআকারৰসেন. সো চ নেসং পৰত্তিআকারো অধিমুত্তিভেদেনাতি দট্ঠব্বং. যসকামতাযাতি কিত্তিসিলোকাভিরতিযা, পরিৰারিচ্ছায ৰা. ‘‘কথং নাম মাদিসো ঈদিসং করেয্যা’’তি পাপজিগুচ্ছায অরিযভাৰং নিস্সায. অনুপক্কিলিট্ঠন্তি অত্তুক্কংসনপরৰম্ভনাহি, অঞ্ঞেহি চ উপক্কিলেসেহি অনুপক্কিলিট্ঠং. ভৰভোগত্থাযাতি ভৰসম্পত্তিঅত্থঞ্চেৰ ভোগসম্পত্তিঅত্থঞ্চ. অত্তনো ৰিমোক্খত্থায পৰত্তিতন্তি সাৰকপচ্চেকবোধিসত্তসীলমাহ. সব্বসত্তানং ৰিমোক্খত্থাযাতি সব্বসত্তানং সংসারবন্ধনতো ৰিমোচনত্থায. পারমিতাসীলং মহাবোধিসত্তসীলং. যা করুণূপাযকোসল্লপরিগ্গহিতা মহাবোধিং আরব্ভ পৰত্তা পরমুক্কংসগতসোচেয্যসল্লেখা দেসকালসত্তাদিৰিকপ্পরহিতা সীলপারমিতা.

অননুরূপন্তি অসারুপ্পং. অত্তা এৰ গরু অধিপতি এতস্সাতি অত্তগরু, লজ্জাধিকো. অত্তাধিপতিতো আগতং অত্তাধিপতেয্যং. লোকো অধিপতি গরু এতস্সাতি লোকাধিপতি, ওত্তপ্পাধিকো. ধম্মো নামাযং মহানুভাৰো একন্তনিয্যানিকো, সো চ পটিপত্তিযাৰ পূজেতব্বো. তস্মা ‘‘নং সীলসম্পদায পূজেস্সামী’’তি এৰং ধম্মমহত্তং পূজেতুকামেন.

পরামট্ঠত্তাতি পরাভৰৰসেন আমট্ঠত্তা. তণ্হাদিট্ঠিযো হি ‘‘ইমিনাহং সীলেন দেৰো ৰা ভৰিস্সামি দেৰঞ্ঞতরো ৰা, ইমিনা মে সীলেন সংসারসুদ্ধি ভৰিস্সতী’’তি পৰত্তস্স সীলং পরামসন্তিযো তং পরাভৰং পাপেন্তি মগ্গস্স অনুপনিস্সযভাৰকরণতো. পুথুজ্জনকল্যাণকস্সাতি পুথুজ্জনেসু কল্যাণকস্স. সো হি পুথুজ্জনোৰ হুত্ৰা কল্যাণেহি সীলাদীহি সমন্নাগতো. পরামসনকিলেসানং ৰিক্খম্ভনতো, সমুচ্ছিন্দনতো চ তেহি ন পরামট্ঠন্তি অপরামট্ঠং. তস্স তস্স কিলেসদরথস্স পটিপ্পস্সম্ভনতো ৰূপসমনতো পটিপ্পস্সদ্ধং.

কতপটিকম্মন্তি ৰুট্ঠানদেসনাহি যথাধম্মং কতপটিকারং. এৰং হি তং সীলং পটিপাকতিকমেৰ হোতি. তেনাহ ‘‘তং ৰিসুদ্ধ’’ন্তি. ‘‘কতপটিকম্ম’’ন্তি ইমিনা চ ‘‘ন পুনেৰং করিস্স’’ন্তি অধিট্ঠানম্পি সঙ্গহিতন্তি দট্ঠব্বং. ‘‘অচ্ছমংসং নু খো, সূকরমংসং নু খো’’তিআদিনা ৰত্থুম্হি ৰা, ‘‘পাচিত্তিযং নু খো, দুক্কটং নু খো’’তিআদিনা আপত্তিযা ৰা, ‘‘মযা তং ৰত্থু ৰীতিক্কন্তং নু খো, ন নু খো ৰীতিক্কন্ত’’ন্তিআদিনা অজ্ঝাচারে ৰা ৰেমতিকস্স সংসযাপন্নস্স. ৰিসোধেতব্বং যথাধম্মং পটিকম্মেন. ৰিমতি এৰ ৰেমতিকং, তস্মিং ৰেমতিকে সতি, ৰিমতিযা উপ্পন্নাযাতি অত্থো. ৰিমতি পটিৰিনেতব্বাতি সযং ৰা তং ৰত্থুং ৰিচারেত্ৰা, ৰিনযধরে ৰা পুচ্ছিত্ৰা কঙ্খা ৰিনোদেতব্বা. নিক্কঙ্খেন পন কপ্পিযং চে কাতব্বং, অকপ্পিযং চে ছড্ডেতব্বং. তেনাহ ‘‘ইচ্চস্স ফাসু ভৰিস্সতী’’তি.

‘‘চতূহি অরিযমগ্গেহী’’তিআদিনা মগ্গফলপরিযাপন্নং সীলং মগ্গফলসম্পযুত্তং ৰুত্তং. সমুদাযেসু পৰত্তৰোহারা অৰযৰেসুপি পৰত্তন্তীতি. সেসন্তি সব্বং লোকিযসীলং.

পকতিপীতি সভাৰোপি. সুখসীলো সখিলো সুখসংৰাসো. তেন পরিযাযেনাতি পকতিঅত্থৰাচকত্থেন. একচ্চং অব্যাকতং সীলং ইধাধিপ্পেতসীলেন একসঙ্গহন্তি অকুসলস্সেৰাযুজ্জমানতং দস্সেতুং ‘‘তত্থ অকুসল’’ন্তিআদি ৰুত্তং. তথা হি সেক্খত্তিকং ইধ গহিতং, ইধ ন উপনীতং কুসলত্তিকন্তি অধিপ্পাযো. ৰুত্তনযেনেৰাতি ৰুত্তেনেৰ নযেন কুসলত্তিকং অগ্গহেত্ৰা হীনত্তিকাদীনং পঞ্চন্নং তিকানং ৰসেন অস্স সীলস্স তিৰিধতা ৰেদিতব্বা.

১৩. যোধাতি যো ইধ. ৰত্থুৰীতিক্কমেতি আপত্তিযা ৰত্থুনো ৰীতিক্কমনে অজ্ঝাচারে. কামসঙ্কপ্পাদযো নৰ মহাৰিতক্কা মিচ্ছাসঙ্কপ্পা. এৰরূপস্সাতি এদিসস্স. তস্স হি সীলৰন্তে অনুপসঙ্কমিত্ৰা দুস্সীলে সেৰন্তস্স ততো এৰ তেসং দিট্ঠানুগতিং আপজ্জনেন পণ্ণত্তিৰীতিক্কমে অদোসদস্সাৰিনো মিচ্ছাসঙ্কপ্পবহুলতায মনচ্ছট্ঠানি ইন্দ্রিযানি অরক্খতো সীলং একংসেনেৰ হানভাগিযং হোতি, ন ঠিতিভাগিযং, কুতো ৰিসেসাদিভাগিযতা. সীলসম্পত্তিযাতি সীলপারিপূরিযা চতুপারিসুদ্ধিসীলেন. অঘটন্তস্স উত্তরীতি উত্তরি ৰিসেসাধিগমায অৰাযমন্তস্স. ঠিতিভাগিযং সীলং ভৰতি অসমাধিসংৰত্তনিযত্তা. সম্পাদিতে হি সমাধিস্মিং সীলস্স সমাধিসংৰত্তনিযতা নিচ্ছিযতি. সমাধত্থাযাতি সমথৰসেন সমাধানত্থায. নিব্বিদন্তি ৰিপস্সনং. বলৰৰিপস্সনাদস্সনত্থং নিব্বিদাগহণং তাৰতাপি সীলস্স নিব্বেধভাগিযভাৰসিদ্ধিতো.

যানি চ সিক্খাপদানি নেসং রক্খিতব্বানীতি সম্বন্ধো, তানি পন অসাধারণপঞ্ঞত্তিতো অঞ্ঞানি. নেসন্তি ‘‘রক্খিতব্বানী’’তি পদং অপেক্খিত্ৰা কত্তরি সামিৰচনং, তেহি ভিক্খূহীতি অত্থো. সতি ৰা উস্সাহেতি উস্সক্কিত্ৰা সীলানি রক্খিতুং উস্সাহে সতি. দসাতি সামণেরেহি রক্খিতব্বসীলমাহ ঘটিকারাদীনং ৰিয. অট্ঠাতি নচ্চাদিমালাদিৰেরমণিং একং কত্ৰা সব্বপচ্ছিমৰজ্জানি অট্ঠ.

অৰীতিক্কমোতি পঞ্চন্নং সীলানং অৰীতিক্কমো. পকতিসীলন্তি সভাৰসীলং. তত্রূপপত্তিনিযতং হি সীলং উত্তরকুরুকানং. মরিযাদাচারিত্তন্তি তস্স তস্স সাৰজ্জস্স অকরণে মরিযাদভূতং, তত্থ তত্থ কুলাদীসু পুব্বপুরিসেহি ঠপিতং চারিত্তং. কুলদেসপাসণ্ডধম্মো হি ‘‘আচারসীল’’ন্তি অধিপ্পেতং. তত্থ কুলধম্মো তাৰ ব্রাহ্মণাদীনং অমজ্জপানাদি, দেসধম্মো একচ্চজনপদৰাসীনং অহিংসনাদি, পাসণ্ডধম্মো তিত্থিযানং যমনিযমাদি. তিত্থিযমতং হি দিট্ঠিপাসেন, তণ্হাপাসেন চ ডেতি পৰত্ততি, পাসং ৰা বাধং অরিযৰিনযস্স ডেতীতি ‘‘পাসণ্ড’’ন্তি ৰুচ্চতি. ‘‘পকতিযা সীলৰতী হোতী’’তি (দী. নি. ২.২০) ৰচনতো বোধিসত্তমাতু পঞ্চসিক্খাপদসীলং পরিপুণ্ণমেৰ. ইদং পন উক্কংসগতং বোধিসত্তপিতরিপি চিত্তুপ্পাদমত্তেনপি অসংকিলিট্ঠং ‘‘ধম্মতাসীল’’ন্তি ৰুত্তং. কামগুণূপসংহিতন্তি কামকোট্ঠাসেসু অস্সাদূপসংহিতং কামস্সাদগধিতং. ধম্মতাসীলন্তি ধম্মতায কারণনিযামেন আগতং সীলং. সীলপারমিং হি পরমুক্কংসং পাপেত্ৰা কুচ্ছিগতস্স মহাবোধিসত্তস্স সীলতেজেন গুণানুভাৰেন বোধিসত্তমাতু সরসেনেৰ পরমসল্লেখপ্পত্তং সীলং হোতি. মহাকস্সপাদীনন্তি আদি-সদ্দেন ভদ্দাদিকে সঙ্গণ্হাতি. তে কির সুচিরং কালং সুপরিসুদ্ধসীলা এৰ হুত্ৰা আগতা. তেনাহ ‘‘সুদ্ধসত্তান’’ন্তি. তাসু তাসু জাতীসূতি সীলৰরাজমহিংসরাজাদিজাতীসু. পুব্বে পুরিমজাতিযং সিদ্ধো হেতু এতস্সাতি পুব্বহেতুকসীলং. ইদং পন পকতিসীলাদিসমাদানেন ৰিনা অৰীতিক্কমলক্খণং সম্পত্তৰিরতিসঙ্গহং দট্ঠব্বং.

যং ভগৰতা এৰং ৰুত্তং সীলন্তি সম্বন্ধো. ইধাতি ৰক্খমানসীলপরিপূরকস্স পুগ্গলস্স সন্নিস্সযভূতসাসনপরিদীপনং, অঞ্ঞসাসনস্স চ তথাভাৰপটিসেধনং. ৰুত্তং হেতং ‘‘ইধেৰ, ভিক্খৰে, সমণো…পে… সুঞ্ঞা পরপ্পৰাদা সমণেভি অঞ্ঞেহী’’তি (দী. নি. ২.২১৪; ম. নি. ১.১৩৯; অ. নি. ৪.২৪১). ভিক্খূতি তস্স সীলস্স পরিপূরকপুগ্গলপরিদীপনং. পাতিমোক্খসংৰরসংৰুতোতি ইদমস্স পাতিমোক্খসীলে পতিট্ঠিতভাৰপরিদীপনং. ৰিহরতীতি ইদমস্স তদনুরূপৰিহারসমঙ্গিভাৰপরিদীপনং. আচারগোচরসম্পন্নোতি ইদং পাতিমোক্খসংৰরস্স, উপরিঅধিগন্তব্বগুণানঞ্চ উপকারকধম্মপরিদীপনং. অণুমত্তেসু ৰজ্জেসু ভযদস্সাৰীতি ইদং পাতিমোক্খতো অচৰনভাৰপরিদীপনং. সমাদাযাতি সিক্খাপদানং অনৰসেসতো আদানপরিদীপনং. সিক্খতীতি সিক্খায সমঙ্গিভাৰপরিদীপনং. সিক্খাপদেসূতি সিক্খিতব্বধম্মপরিদীপনং. যং পনেত্থ ৰত্তব্বং, তং পরতো আৰি ভৰিস্সতি.

সোতি পাতিমোক্খসংৰরসীলে পতিট্ঠিতভিক্খু. তেন যাদিসস্স ইন্দ্রিযসংৰরসীলং ইচ্ছিতব্বং, তং দস্সেতি. চক্খুনাতি যতো সো সংৰরো, তং দস্সেতি. রূপন্তি যত্থ সো সংৰরো, তং দস্সেতি. দিস্ৰা ন নিমিত্তগ্গাহী হোতি নানুব্যঞ্জনগ্গাহীতি সংৰরস্স উপাযং দস্সেতি. যত্ৰাধিকরণ…পে… অন্ৰাস্সৰেয্যুন্তি সংৰরস্স পটিপক্খং তত্থ আদীনৰং দস্সেতি. সংৰরায পটিপজ্জতীতি পগেৰ সতিযা উপট্ঠপেতব্বতং দস্সেতি. রক্খতি চক্খুন্দ্রিযন্তি সতিযা উপট্ঠাপনমেৰ চক্খুন্দ্রিযস্স আরক্খাতি দস্সেতি. চক্খুন্দ্রিযে সংৰরং আপজ্জতীতি তথাভূতা সতিযেৰেত্থ সংৰরোতি দস্সেতি. ৰীতিক্কমস্স ৰসেনাতি সম্বন্ধো. ছন্নং সিক্খাপদানন্তি ‘‘আজীৰহেতু আজীৰকারণা অসন্তং অভূতং উত্তরিমনুস্সধম্মং উল্লপতী’’তিআদিনা আগতানং ছন্নং পারাজিকাদিপটিসংযুত্তানং সিক্খাপদানং. সামন্তজপ্পনাদিনা তিৰিধেন কুহনৰত্থুনা ৰিম্হাপনং কুহনা. অত্তানং, দাযকং ৰা উক্খিপিত্ৰা যথা সো কিঞ্চি দদাতি, এৰং কথনং লপনা. নিমিত্তং ৰুচ্চতি পচ্চযদানসঞ্ঞুপ্পাদকং কাযৰচীকম্মং, তেন নিমিত্তেন চরতি, নিমিত্তং ৰা করোতীতি নেমিত্তিকো, তস্স ভাৰো নেমিত্তিকতা. গন্ধাদযো ৰিয লাভায পরেসং অক্কোসনাদিনা নিপিসতীতি নিপ্পেসো, নিপ্পেসোৰ নিপ্পেসিকো, তস্স ভাৰো নিপ্পেসিকতা. মহিচ্ছতায অত্তনা লদ্ধলাভেন পরতো লাভপরিযেসনা লাভেন লাভং নিজিগীসনতা. এৰমাদীনন্তি আদি-সদ্দেন অনুপ্পিযভাণিতাচাটুকম্যতাদিং সঙ্গণ্হাতি. পটিসঙ্খানেন পচ্চৰেক্খণায পরিসুদ্ধো অসংকিলিট্ঠো পটিসঙ্খানপরিসুদ্ধো. চত্তারো পচ্চযা পরিভুঞ্জীযন্তি এতেনাতি চতুপচ্চযপরিভোগো, তথাপৰত্তা অনৰজ্জচেতনা.

পাতিমোক্খসংৰরসীলৰণ্ণনা

১৪. তত্রাতি তেসু পাতিমোক্খসংৰরাদীসু. আদিতো পট্ঠাযাতি ‘‘ইধ ভিক্খূ’’তিআদিনা (ৰিভ. ৫০৮; দী. নি. ১.১৯৪) আগতদেসনায আদিতো পভুতি. ৰিনিচ্ছযকথাতি তত্থ সংসযৰিধমনেন ৰিনিচ্ছযাৰহা কথা. পঠমস্স অত্থস্স সব্বসাধারণত্তা অসাধারণং পব্বজিতাৰেণিকং পরিযাযং দস্সেন্তো ‘‘ছিন্নভিন্নপটধরাদিতায ৰা’’তি আহ. এৰং হিস্স পরিপুণ্ণপাতিমোক্খসংৰরযোগ্যতা দস্সিতা হোতি. ভিন্নপটধরাদিভাৰো চ নাম দলিদ্দস্সাপি নিগ্গহিতস্স হোতীতি ততো ৰিসেসেতুং ‘‘সদ্ধাপব্বজিতো’’তি ৰত্ৰা পটিপত্তিযা যোগ্যভাৰদস্সনত্থং ‘‘কুলপুত্তো’’তি ৰুত্তং. আচারকুলপুত্তো ৰা হি পটিপজ্জিতুং সক্কোতি জাতিকুলপুত্তো ৰা. সিক্খাপদসীলন্তি চারিত্তৰারিত্তপ্পভেদং সিক্খাপদৰসেন পঞ্ঞত্তং সীলং. যোতি অনিযমনিদ্দেসো যো কোচি পুগ্গলো. নন্তি ৰিনযপরিযাপন্নং সীলং. তন্তি পুগ্গলং. মোক্খেতি সহকারিকারণভাৰতো. অপাযে ভৰানি আপাযিকানি. আদি-সদ্দেন তদঞ্ঞং সব্বসংসারদুক্খং সঙ্গণ্হাতি. সংৰরণং কাযৰচীদ্ৰারানং পিদহনং. যেন তে সংৰুতা পিহিতা হোন্তি, সো সংৰরো. যস্মা পন সো সত্তন্নং আপত্তিক্খন্ধানং অৰীতিক্কমো ৰীতিক্কমপটিপক্খোতি কত্ৰা, তস্মা ৰুত্তং ‘‘কাযিকৰাচসিকস্স অৰীতিক্কমস্সেতং নাম’’ন্তি. পাতিমোক্খসংৰরেন সংৰুতোতি পাতিমোক্খসংৰরেন পিহিতকাযৰচীদ্ৰারো. তথাভূতো চ যস্মা তং উপেতো তেন চ সমঙ্গী নাম হোতি, তস্মা ৰুত্তং ‘‘উপগতো সমন্নাগতোতি অত্থো’’তি.

অপরো নযো – কিলেসানং বলৰভাৰতো, পাপকিরিযায সুকরভাৰতো, পুঞ্ঞকিরিযায চ দুক্করভাৰতো বহুক্খত্তুং অপাযেসু পতনসীলোতি পাতী, পুথুজ্জনো. অনিচ্চতায ৰা ভৰাদীসু কম্মৰেগক্খিত্তো ঘটিযন্তং ৰিয অনৰট্ঠানেন পরিব্ভমনতো গমনসীলোতি পাতী, মরণৰসেন ৰা তম্হি তম্হি সত্তনিকাযে অত্তভাৰস্স পাতনসীলোতি পাতী, সত্তসন্তানো, চিত্তমেৰ ৰা. তং পাতিনং সংসারদুক্খতো মোক্খেতীতি পাতিমোক্খং. চিত্তস্স হি ৰিমোক্খেন সত্তো ‘‘ৰিমুত্তো’’তি ৰুচ্চতি. ৰুত্তং হি ‘‘চিত্তৰোদানা ৰিসুজ্ঝন্তী’’তি, ‘‘অনুপাদায আসৰেহি চিত্তং ৰিমুত্ত’’ন্তি (মহাৰ. ২৮) চ. অথ ৰা অৰিজ্জাদিনা হেতুনা সংসারে পততি গচ্ছতি পৰত্ততীতি পাতী, ‘‘অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরত’’ন্তি (সং. নি. ২.১২৪) হি ৰুত্তং. তস্স পাতিনো সত্তস্স তণ্হাদিসংকিলেসত্তযতো মোক্খো এতেনাতি পাতিমোক্খং. ‘‘কণ্ঠেকাল়ো’’তিআদীনং ৰিযস্স সমাসসিদ্ধি ৰেদিতব্বা. অথ ৰা পাতেতি ৰিনিপাতেতি দুক্খেতি পাতি, চিত্তং. ৰুত্তং হি ‘‘চিত্তেন নীযতি লোকো, চিত্তেন পরিকস্সতী’’তি (সং. নি. ১.৬২). তস্স পাতিনো মোক্খো এতেনাতি পাতিমোক্খং, পততি ৰা এতেন অপাযদুক্খে, সংসারদুক্খে চাতি পাতী, তণ্হাদিসংকিলেসো. ৰুত্তং হি ‘‘তণ্হা জনেতি পুরিসং (সং. নি. ১.৫৫-৫৭), তণ্হাদুতিযো পুরিসো’’তি (ইতিৰু. ১৫, ১০৫; অ. নি. ৪.৯; মহানি. ১৯১; চূল়নি. পারাযনানুগীতিগাথানিদ্দেস) চ আদি. ততো পাতিতো মোক্খোতি পাতিমোক্খং. অথ ৰা পততি এত্থাতি পাতীনি, ছ অজ্ঝত্তিকবাহিরানি আযতনানি. ৰুত্তং হি ‘‘ছসু লোকো সমুপ্পন্নো, ছসু কুব্বতি সন্থৰ’’ন্তি (সং. নি. ১.৭০; সু. নি. ১৭১). ততো ছঅজ্ঝত্তিকবাহিরাযতনসঙ্খাততো পাতিতো মোক্খোতি পাতিমোক্খং. অথ ৰা পাতো ৰিনিপাতো অস্স অত্থীতি পাতী, সংসারো. ততো মোক্খোতি পাতিমোক্খং, অথ ৰা সব্বলোকাধিপতিভাৰতো ধম্মিস্সরো ভগৰা ‘‘পতী’’তি ৰুচ্চতি. মুচ্চতি এতেনাতি মোক্খো, পতিনো মোক্খো তেন পঞ্ঞত্তত্তাতি পতিমোক্খো, পতিমোক্খো এৰ পাতিমোক্খং. সব্বগুণানং ৰা মূলভাৰতো উত্তমট্ঠেন পতি চ সো যথাৰুত্তেনত্থেন মোক্খো চাতি পতিমোক্খো, পতিমোক্খো এৰ পাতিমোক্খং. তথা হি ৰুত্তং ‘‘পাতিমোক্খন্তি মুখমেতং পমুখমেত’’ন্তি (মহাৰ. ১৩৫) ৰিত্থারো.

অথ ৰা প-ইতি পকারে, অতী-তি অচ্চন্তত্থে নিপাতো, তস্মা পকারেহি অচ্চন্তং মোক্খেতীতি পাতিমোক্খং. ইদং হি সীলং সযং তদঙ্গৰসেন, সমাধিসহিতং পঞ্ঞাসহিতঞ্চ ৰিক্খম্ভনৰসেন, সমুচ্ছেদৰসেন চ অচ্চন্তং মোক্খেতি মোচেতীতি পাতিমোক্খং, পতি পতি মোক্খোতি ৰা পতিমোক্খো, তম্হা তম্হা ৰীতিক্কমদোসতো পচ্চেকং মোক্খোতি অত্থো, পতিমোক্খো এৰ পাতিমোক্খং. মোক্খোতি ৰা নিব্বানং, তস্স মোক্খস্স পটিবিম্বভূতোতি পতিমোক্খো. সীলসংৰরো হি সূরিযস্স অরুণুগ্গমনং ৰিয নিব্বানস্স উদযভূতো তপ্পটিভাগো ৰিয যথারহং কিলেসনিব্বাপনতো, পতিমোক্খোযেৰ পাতিমোক্খং. অথ ৰা মোক্খং পতি ৰত্ততি, মোক্খাভিমুখন্তি ৰা পতিমোক্খং, পতিমোক্খমেৰ পাতিমোক্খন্তি এৰমেত্থ পাতিমোক্খ-সদ্দস্স অত্থো ৰেদিতব্বো. ইরিযতীতি অত্তভাৰং পৰত্তেতি. ‘‘ৰিহরতী’’তি ইমিনা পাতিমোক্খসংৰরসীলে ঠিতস্স ভিক্খুনো ইরিযাপথৰিহারো দস্সিতো. পাল়িযন্তি ঝানৰিভঙ্গপাল়িযং (ৰিভ. ৫০৮ আদযো).

তত্থ কামং সমণচারং, সমণগোচরঞ্চ দস্সেতুং ‘‘আচারগোচরসম্পন্নো’’তি ৰুত্তং, যথা পন মগ্গং আচিক্খন্তো ‘‘ৰামং মুঞ্চ, দক্খিণং গণ্হা’’তি ৰজ্জেতব্বপুব্বকং গহেতব্বং ৰদেয্য, যথা ৰা সসীসন্হানেন পহীনসেদমলজল্লিকস্স মালাগন্ধৰিলেপনাদিৰিভূসনসংৰিধানং যুত্তরূপং, এৰং পহীনপাপধম্মস্স কল্যাণধম্মসমাযোগো যুত্তরূপোতি ‘‘অত্থি আচারো, অত্থি অনাচারো’’তি দ্ৰযং উদ্দিসিত্ৰা অনাচারং তাৰ ৰিভজিতুং ‘‘তত্থ কতমো অনাচারো’’তিআদি ৰুত্তং. তত্থ কাযিকো ৰীতিক্কমোতি তিৰিধং কাযদুচ্চরিতং. ৰাচসিকো ৰীতিক্কমোতি চতুব্বিধং ৰচীদুচ্চরিতং. কাযিকৰাচসিকোতি তদুভযং.

এৰং আজীৰট্ঠমকসীলস্স ৰীতিক্কমো দস্সিতো. ইদানি মানসং অনাচারং দস্সেতুং ‘‘সব্বম্পি দুস্সীল্যং অনাচারো’’তি ৰত্ৰা তত্থ একচ্চিযং দস্সেন্তো ‘‘ইধেকচ্চো ৰেল়ুদানেন ৰা’’তিআদিমাহ. তত্থ ৰেল়ুদানেনাতি পচ্চযুপ্পাদনত্থেন ৰেল়ুদানেন. পত্তদানাদীসুপি এসেৰ নযো. ৰেল়ূতি মনুস্সানং পযোজনাৰহো যো কোচি ৰেল়ুদণ্ডো. পত্তং গন্ধিকাদীনং গন্ধপলিৰেঠনাদিঅত্থং ৰা, তালনাল়িকেরাদিপত্তং ৰা. পুপ্ফং যং কিঞ্চি মনুস্সানং পযোজনাৰহং. তথা ফলং. সিনানং সিরীসচুণ্ণাদিন্হানিযচুণ্ণং. মত্তিকাপি এত্থেৰ সঙ্গহং গচ্ছতি. দন্তকট্ঠং যং কিঞ্চি মুখসোধনত্থং দন্তপোনং. চাটুকম্যতা অত্তানং দাসং ৰিয নীচট্ঠানে ঠপেত্ৰা পরস্স খলিতৰচনং সণ্ঠপেত্ৰা পিযকামতায পগ্গয্হৰচনং. মুগ্গসূপ্যতাতি মুগ্গসূপসমতা সচ্চালিকেন জীৰিতকপ্পনং. যথা হি মুগ্গসূপে পচ্চন্তে বহূ মুগ্গা পচ্চন্তি, কতিপযা ন পচ্চন্তি, এৰং সচ্চালিকেন জীৰিতকপ্পনে বহু অলিকং হোতি, অপ্পকং সচ্চন্তি. পরিভটতীতি পরিভটো, পরেসং দারকে পরিহরন্তো. পরিভটস্স কম্মং পারিভট্যং, সা এৰ পারিভট্যতা, অলঙ্করণাদিনা কুলদারকপরিহরণস্সেতং নামং. তেসং তেসং গিহীনং গামন্তরদেসন্তরাদীসু সাসনপটিসাসনহরণং জঙ্ঘপেসনিকং. অঞ্ঞতরঞ্ঞতরেনাতি এতেসং ৰা ৰেল়ুদানাদীনং ৰেজ্জকম্মভণ্ডাগারিককম্মপিণ্ডপটিপিণ্ডকম্মসঙ্ঘুপ্পাদচেতিযুপ্পাদপট্ঠপনাদীনং ৰা মিচ্ছাজীৰেন জীৰিতকপ্পনককম্মানং যেন কেনচি. বুদ্ধপটিকুট্ঠেনাতি বুদ্ধেহি গরহিতেন পটিসিদ্ধেন. মিচ্ছাজীৰেনাতি ন সম্মাআজীৰেন. অযং ৰুচ্চতি অনাচারোতি অযং সব্বোপি ‘‘অনাচারো’’তি কথীযতি. আচারনিদ্দেসো ৰুত্তপটিপক্খনযেনেৰ ৰেদিতব্বো.

গোচরনিদ্দেসেপি পঠমং অগোচরস্স ৰচনে কারণং হেট্ঠা ৰুত্তনযেনেৰ ৰেদিতব্বং. গোচরোতি পিণ্ডপাতাদীনং অত্থায উপসঙ্কমিতুং যুত্তট্ঠানং. অযুত্তট্ঠানং অগোচরো. ৰেসিযা গোচরো অস্সাতি ৰেসিযাগোচরো, মিত্তসন্থৰৰসেন উপসঙ্কমিতব্বট্ঠানন্তি অত্থো. ৰেসিযা নাম রূপূপজীৰিনিযো, তা মিত্তসন্থৰৰসেন ন উপসঙ্কমিতব্বা, সমণভাৰস্স অন্তরাযকরত্তা, পরিসুদ্ধাসযস্সাপি গরহহেতুতো, তস্মা দক্খিণাদানৰসেন সতিং উপট্ঠপেত্ৰাৰ উপসঙ্কমিতব্বা. ৰিধৰা ৰুচ্চন্তি মতপতিকা, পৰুত্থপতিকা ৰা. থুল্লকুমারিকাতি মহল্লিকা অনিৰিট্ঠকুমারিযো, পণ্ডকাতি নপুংসকা. তে হি উস্সন্নকিলেসা অৰূপসন্তপরিল়াহা লোকামিসসন্নিস্সিতকথাবহুলা, তস্মা ন উপসঙ্কমিতব্বা. ভিক্খুনিযো নাম উস্সন্নব্রহ্মচরিযা. তথা ভিক্খূপি. তেসং অঞ্ঞমঞ্ঞং ৰিসভাগৰত্থুভাৰতো সন্থৰৰসেন উপসঙ্কমনে কতিপাহেনেৰ ব্রহ্মচরিযন্তরাযো সিযা, তস্মা ন উপসঙ্কমিতব্বা. গিলানপুচ্ছনাদিৰসেন উপসঙ্কমনে সতোকারিনা ভৰিতব্বং. পানাগারন্তি সুরাপানঘরং. তং সোণ্ডজনেহি অৰিৰিত্তং হোতি. তত্থ তেহি সোণ্ডতাদিৰসেন ন উপসঙ্কমিতব্বং ব্রহ্মচরিযন্তরাযকরত্তা. সংসট্ঠো ৰিহরতি রাজূহীতিআদীসু রাজানো নাম যে রজ্জমনুসাসন্তি. রাজমহামত্তা রাজিস্সরিযসদিসায ইস্সরিযমত্তায সমন্নাগতা. তিত্থিযাতি ৰিপরীতদস্সনা বাহিরকপরিব্বাজকা. তিত্থিযসাৰকাতি তেসু দল়্হভত্তা পচ্চযদাযকা. অননুলোমিকেন সংসগ্গেনাতি তিস্সন্নং সিক্খানং অননুলোমিকেন পচ্চনীকভূতেন সংসগ্গেন সংসট্ঠো ৰিহরতি, যেন ব্রহ্মচরিযন্তরাযং ৰা সল্লেখপরিহানিং ৰা পাপুণাতি.

ইদানি অপরেনপি পরিযাযেন অগোচরং দস্সেতুং ‘‘যানি ৰা পন তানী’’তিআদি ৰুত্তং. তত্থ অস্সদ্ধানীতি বুদ্ধাদীসু সদ্ধাৰিরহিতানি. ততো এৰ অপ্পসন্নানি, কম্মকম্মফলসদ্ধায ৰা অভাৰেন অস্সদ্ধানি. রতনত্তযপ্পসাদাভাৰেন অপ্পসন্নানি. অক্কোসকপরিভাসকানীতি অক্কোসৰত্থূহি অক্কোসকানি চেৰ ভযদস্সনেন সন্তজ্জনকানি চ. অত্থং ন ইচ্ছন্তি অনত্থমেৰ ইচ্ছন্তীতি অনত্থকামানি. হিতং ন ইচ্ছন্তি অহিতমেৰ ইচ্ছন্তীতি অহিতকামানি. ফাসু ন ইচ্ছন্তি অফাসুংযেৰ ইচ্ছন্তীতি অফাসুককামানি. যোগক্খেমং নিব্ভযং ন ইচ্ছন্তি, অযোগক্খেমমেৰ ইচ্ছন্তীতি অযোগক্খেমকামানি. ভিক্খূনন্তি এত্থ সামণেরানম্পি সঙ্গহো. ভিক্খুনীনন্তি এত্থ সিক্খমানসামণেরীনং. সব্বেসং হি সাসনিকানং অনত্থকামতাদীপনপদমিদং ৰচনং. তথারূপানি কুলানীতি তাদিসানি খত্তিযকুলাদীনি. সেৰতীতি নিস্সায জীৰতি. ভজতীতি উপসঙ্কমতি. পযিরুপাসতীতি পুনপ্পুনং উপগচ্ছতি. অযং ৰুচ্চতীতি অযং ৰেসিযাদিকো, রাজাদিকো, অস্সদ্ধকুলাদিকো চ তং তং সেৰন্তস্স তিপ্পকারোপি অযুত্তো গোচরোতি অগোচরো. এত্থ হি ৰেসিযাদিকো পঞ্চকামগুণনিস্সযতো অগোচরো. যথাহ ‘‘কো চ, ভিক্খৰে, ভিক্খুনো অগোচরো পরৰিসযো? যদিদং পঞ্চ কামগুণা’’তি (সং. নি. ৫.৩৭২). রাজাদিকো সমণধম্মস্স অনুপনিস্সযতো, লাভসক্কারাসনিৰিচক্কনিপ্পোথনদিট্ঠিৰিপত্তিহেতুতো চ. অস্সদ্ধকুলাদিকো সদ্ধাহানিচিত্তসন্তাসাৰহতো অগোচরো.

গোচরনিদ্দেসে ‘‘ন ৰেসিযাগোচরো’’তিআদীনি ৰুত্তপটিপক্খৰসেন ৰেদিতব্বানি. ওপানভূতানীতি উদপানভূতানি ভিক্খুসঙ্ঘস্স, ভিক্খুনীসঙ্ঘস্স চ চতুমহাপথে খতপোক্খরণী ৰিয যথাসুখং ওগাহনক্খমানি. কাসাৰপজ্জোতানীতি ভিক্খূনং, ভিক্খুনীনঞ্চ নিৰত্থপারুতকাসাৰানংযেৰ পভাহি একোভাসানি. ইসিৰাতপটিৰাতানীতি গেহং পৰিসন্তানং, নিক্খমন্তানঞ্চ ভিক্খুভিক্খুনীসঙ্খাতানং ইসীনং চীৰরৰাতেন চেৰ সমিঞ্জনপসারণাদিজনিতসরীরৰাতেন চ পটিৰাতানি পৰাযিতানি ৰিনিদ্ধুতকিব্বিসানি ৰা.

ইদানি নিদ্দেসে আগতনযেনাপি আচারগোচরে দস্সেতুং ‘‘অপিচা’’তিআদি আরদ্ধং. এত্থাতি এতস্মিং পাতিমোক্খসীলনিদ্দেসে. ইমিনাপি নযেনাতি ইদানি ৰুচ্চমানৰিধিনাপি. সঙ্ঘগতোতি সঙ্ঘসন্নিপাতং গতো. অচিত্তীকারকতোতি অকতচিত্তীকারো, অকতগারৰোতি অত্থো. ঘট্টযন্তোতি সরীরেন, চীৰরেন ৰা ঘংসন্তো. পুরতোপি তিট্ঠতি অচিত্তীকারকতোতি সম্বন্ধিতব্বং. ঠিতকোপীতি উপরি তিট্ঠন্তো ৰিয আসন্নতরট্ঠানে ঠিতকোপি ভণতি. বাহাৰিক্খেপকোতি বাহুং ৰিক্খিপন্তো. অনুপাহনানন্তি অনাদরে সামিৰচনং. সউপাহনোতি উপাহনারুল়্হো. থেরে ভিক্খূ অনুপখজ্জাতি থেরানং ভিক্খূনং ঠিতট্ঠানং অনুপৰিসিত্ৰা তেসং আসন্নতরট্ঠানং উপগন্ত্ৰা. কট্ঠং পক্খিপতি অগ্গিকুণ্ডে. ৰোক্কম্মাতি পস্সতো অতিক্কমিত্ৰা. গূল়্হানি সভাৰতো পটিচ্ছন্নানি সাণিপাকারাদিনা পটিচ্ছাদিতানি. অনাপুচ্ছাতি অনাপুচ্ছিত্ৰা. অস্সাতি অনাচারস্স.

অপিচ ভিক্খূতিআদি সব্বস্সেৰ ভিক্খুনো আচারদস্সনৰসেন পৰত্তং অট্ঠকথাৰচনং, ন নিদ্দেসপাল়ি. সদ্ধাসীলসুতচাগাদিগুণহেতুকো গরুভাৰো গরুকরণং ৰা গারৰো, সহ গারৰেনাতি সগারৰো. গরুট্ঠানিযেসু গারৰসারজ্জাদিৰসেন পটিস্সাযনা পতিস্সা, সপ্পতিস্সৰপটিপত্তি. সহ পতিস্সাযাতি সপ্পতিস্সো. সৰিসেসং হিরিমনতায, ওত্তপ্পিভাৰেন চ হিরোত্তপ্পসম্পন্নো. সেখিযধম্মপারিপূরিৰসেন সুনিৰত্থো সুপারুতো. পাসাদিকেনাতি পসাদাৰহেন, ইত্থম্ভূতলক্খণে চেতং করণৰচনং. এসেৰ নযো ইতো পরেসুপি ছসু পদেসু. অভিক্কন্তেনাতি অভিক্কমেন. ইরিযাপথসম্পন্নোতি সম্পন্নইরিযাপথো. তেন সেসইরিযাপথানম্পি পাসাদিকতমাহ. ইন্দ্রিযেসু গুত্তদ্ৰারোতি চক্খুন্দ্রিযাদীসু ছসু দ্ৰারেসু সুসংৰিহিতারক্খো. ভোজনে মত্তঞ্ঞূতি পরিভুঞ্জিতব্বতো ভোজনসঞ্ঞিতে চতুব্বিধেপি পচ্চযে পরিযেসনপটিগ্গহণপরিভোগাদিৰসেন সব্বসো পমাণঞ্ঞূ. জাগরিযমনুযুত্তোতি পুব্বরত্তাপররত্তং ভাৰনামনসিকারসঙ্খাতং জাগরিযং সাতচ্চকারিতাৰসেন অনু অনু যুত্তো তত্থ যুত্তপযুত্তো. সতিসম্পজঞ্ঞেন সমন্নাগতোতিআদি যথাৰুত্তস্স আচারস্স সম্ভারদস্সনং. তত্থ অপ্পিচ্ছোতি নিইচ্ছো. সন্তুট্ঠোতি যথালাভাদিৰসেন সন্তোসেন তুট্ঠো. সক্কচ্চকারীতি আদরকারী. গরুচিত্তীকারবহুলোতি গরুট্ঠানিযেসু গরুকরণবহুলো. অযং ৰুচ্চতি আচারোতি অযং সগারৰতাদি অত্থকামেহি আচরিতব্বতো আচারো.

সীলাদীনং গুণানং উপনিস্সযভূতো উপনিস্সযগোচরো. সতিসঙ্খাতো চিত্তস্স আরক্খভূতো এৰ গোচরো আরক্খগোচরো. কম্মট্ঠানসঙ্খাতো চিত্তস্স উপনিবন্ধনট্ঠানভূতো গোচরো উপনিবন্ধগোচরো. অপ্পিচ্ছতাদীহি দসহি ৰিৰট্টনিস্সিতায কথায ৰত্থুভূতেহি গুণেহি সমন্নাগতো দসকথাৰত্থুগুণসমন্নাগতো. ততো এৰ কল্যাণো সুন্দরো মিত্তোতি কল্যাণমিত্তো. তস্স লক্খণং পরতো আগমিস্সতি. অস্সুতং সুত্তগেয্যাদিং. সুণাতীতি সুতমযং ঞাণং উপ্পাদেতি. সুতং পরিযোদাপেতীতি তমেৰ যথাসুতং অৰিসদতায অপরিযোদাতং পুনপ্পুনং পরিপুচ্ছনাদিনা ৰিসোধেতি নিজ্জটং নিগুম্বং করোতি. তত্থ চ যে কঙ্খট্ঠানিযা ধম্মা, তেসু সংসযং ছিন্দন্তো কঙ্খং ৰিতরতি. কম্মকম্মফলেসু, রতনত্তযে চ সম্মাদিট্ঠিযা উজুকরণেন দিট্ঠিং উজুং করোতি. ততো এৰ চ দুৰিধাযপি সদ্ধাসম্পদায চিত্তং পসাদেতি. অথ ৰা যথাসুতং ধম্মং পরিযোদপেত্ৰা তত্থাগতে রূপারূপধম্মে পরিগ্গহেত্ৰা সপচ্চযং নামরূপং পরিগ্গণ্হন্তো সত্তদিট্ঠিৰঙ্কৰিধমনেন দিট্ঠিং উজুং করোতি. ধম্মানং পচ্চযপচ্চযুপ্পন্নতামত্তদস্সনেন তীসুপি অদ্ধাসু কঙ্খং ৰিতরতি. ততো পরং চ উদযব্বযঞাণাদিৰসেন ৰিপস্সনং ৰড্ঢেত্ৰা অরিযভূমিং ওক্কমন্তো অৰেচ্চপসাদেন রতনত্তযে চিত্তং পসাদেতি. তথাভূতোৰ তস্স কল্যাণমিত্তস্স অনুসিক্খনেন সদ্ধাদীহি গুণেহি ন হাযতি, অঞ্ঞদত্থু ৰড্ঢতেৰ. তেনাহ ‘‘যস্স ৰা’’তিআদি.

অন্তরঘরন্তি অন্তরে অন্তরে ঘরানি এত্থ, তং এতস্সাতি ৰা ‘‘অন্তরঘর’’ন্তি লদ্ধনামং গোচরগামং পৰিট্ঠো. তত্থ ঘরে ঘরে ভিক্খাপরিযেসনায ৰীথিং পটিপন্নো. ওক্খিত্তচক্খূতি হেট্ঠাখিত্তচক্খু. কিত্তকেন পন ওক্খিত্তচক্খু হোতীতি আহ ‘‘যুগমত্তদস্সাৰী’’তি. সুসংৰুতোতি সংযতো. যথা পনেত্থ সুসংৰুতো নাম হোতি, তং দস্সেতুং ‘‘ন হত্থিং ওলোকেন্তো’’তিআদি ৰুত্তং.

যত্থাতি যেসু সতিপট্ঠানেসু. চিত্তং ভাৰনাচিত্তং. উপনিবন্ধতীতি উপনেত্ৰা নিবন্ধতি. ৰুত্তঞ্হেতং –

‘‘যথা থম্ভে নিবন্ধেয্য, ৰচ্ছং দমং নরো ইধ;

বন্ধেয্যেৰং সকং চিত্তং, সতিযারম্মণে দল়্হ’’ন্তি. (ৰিসুদ্ধি. ১.২১৭; দী. নি. অট্ঠ. ২.৩৭৪; ম. নি. অট্ঠ. ১.১০৭; পারা. অট্ঠ. ২.১৬৫; পটি. ম. অট্ঠ. ২.১.১৬৩);

সতিপট্ঠানানং উপনিবন্ধগোচরভাৰং দস্সেতুং ‘‘ৰুত্তঞ্হেত’’ন্তিআদি ৰুত্তং. তত্থ সকো পেত্তিকো ৰিসযোতি অত্তনো পিতু সম্মাসম্বুদ্ধস্স সন্তকো, তেন দিট্ঠো দস্সিতো চ ৰিসযো.

অণুপ্পমাণেসূতি পরমাণুপ্পমাণেসু. অসঞ্চিচ্চআপন্নসেখিযঅকুসলচিত্তুপ্পাদাদিভেদেসূতি অসঞ্চিচ্চ আপন্নসেখিযেসু অকুসলচিত্তুপ্পাদাদিভেদেসূতি এৰং অসঞ্চিচ্চগ্গহণং সেখিযৰিসেসনং দট্ঠব্বং. সেখিযগ্গহণেন চেত্থ ৰত্তক্খন্ধকাদীসু (চূল়ৰ. ৩৫৬ আদযো) আগতৰত্তাদীনম্পি গহণং. তেপি হি সিক্খিতব্বট্ঠেন ‘‘সেখিযা’’তি ইচ্ছিতা. তথা হি মাতিকাযং পারাজিকাদীনং ৰিয সেখিযানং পরিচ্ছেদো ন কতো. এৰঞ্চ কত্ৰা ‘‘অসঞ্চিচ্চ আপন্নসেখিযা’’তি অসঞ্চিচ্চগ্গহণং সমত্থিতং হোতি. ন হি মাতিকাযং আগতেসু পঞ্চসত্ততিযা সেখিযেসু নোসঞ্ঞাৰিমোক্খো নাম অত্থি, অসঞ্চিচ্চগ্গহণেনেৰ চেত্থ অসতিঅজাননানম্পি সঙ্গহো কতো. কেচি পনেত্থ অসিঞ্চিচ্চ আপন্নগ্গহণেন অচিত্তকাপত্তিযো গহিতাতি ৰদন্তি, তং তেসং মতিমত্তং, গরুকাপত্তীসুপি কাসঞ্চি অচিত্তকভাৰসব্ভাৰতো, অধিট্ঠানাৰিকম্মস্স, দেসনাৰিকম্মস্সেৰ ৰা সব্বলহুকস্স ৰজ্জস্স ইধাধিপ্পেতত্তা. তেনাহ ‘‘যানি তানি ৰজ্জানি অপ্পমত্তকানি ওরমত্তকানি লহুকানি লহুসম্মতানী’’তিআদি. আদিসদ্দেন পাতিমোক্খসংৰরৰিসুদ্ধত্থং অনতিক্কমনীযানং অনাপত্তিগমনীযানং সঙ্গহো দট্ঠব্বো. ভযদস্সনসীলোতি পরমাণুমত্তং ৰজ্জং অট্ঠসট্ঠিযোজনসতসহস্সুব্বেধসিনেরুপব্বতসদিসং কত্ৰা দস্সনসভাৰো, সব্বলহুকং ৰা দুব্ভাসিতমত্তং পারাজিকসদিসং কত্ৰা দস্সনসভাৰো. যং কিঞ্চীতি মূলপঞ্ঞত্তিঅনুপঞ্ঞত্তিসব্বত্থপঞ্ঞত্তিপদেসপঞ্ঞত্তিআদিভেদং যং কিঞ্চি সিক্খিতব্বং পটিপজ্জিতব্বং পূরেতব্বং সীলং. সম্মা আদাযাতি সম্মদেৰ সক্কচ্চং, সব্বসো চ আদিযিত্ৰা. অযং পন আচারগোচরসম্পদা কিং পাতিমোক্খসীলে পরিযাপন্না, উদাহু অপরিযাপন্নাতি? পরিযাপন্না. যদি এৰং কস্মা পুন ৰুত্তাতি চোদনং সন্ধাযাহ ‘‘এত্থ চা’’তিআদি.

ইন্দ্রিযসংৰরসীলৰণ্ণনা

১৫. ইন্দ্রিযসংৰরসীলং পাতিমোক্খসংৰরসীলস্স সম্ভারভূতং, তস্মিং সতিযেৰ ইচ্ছিতব্বন্তি ৰুত্তং ‘‘সোতি পাতিমোক্খসংৰরসীলে ঠিতো ভিক্খূ’’তি. সম্পাদিতে হি এতস্মিং পাতিমোক্খসংৰরসীলং সুগুত্তং সুরক্খিতমেৰ হোতি, সুসংৰিহিতকণ্টকৰতি ৰিয সস্সন্তি. কারণৰসেনাতি অসাধারণকারণস্স ৰসেন. অসাধারণকারণৰসেন হি ফলং অপদিসীযতি, যথা যৰঙ্কুরো ভেরিসদ্দোতি. নিস্সযৰোহারেন ৰা এতং নিস্সিতৰচনং, যথা মঞ্চা উক্কুট্ঠিং করোন্তীতি. রূপন্তি রূপাযতনং. চক্খুনা রূপং দিস্ৰাতি এত্থ যদি চক্খু রূপং পস্সেয্য, অঞ্ঞৰিঞ্ঞাণসমঙ্গিনোপি পস্সেয্যুং, ন চেতং অত্থি, কস্মা? অচেতনত্তা চক্খুস্স. তেনাহ ‘‘চক্খু রূপং ন পস্সতি অচিত্তকত্তা’’তি. অথ ৰিঞ্ঞাণং রূপং পস্সেয্য, তিরোকুট্টাদিগতম্পি নং পস্সেয্য অপ্পটিঘভাৰতো, ইদম্পি নত্থি সব্বস্স ৰিঞ্ঞাণস্স দস্সনাভাৰতো. তেনাহ ‘‘চিত্তং ন পস্সতি অচক্খুকত্তা’’তি. তত্থ যথা চক্খুসন্নিস্সিতং ৰিঞ্ঞাণং পস্সতি, ন যং কিঞ্চি. তঞ্চ কেনচি কুট্টাদিনা অন্তরিতে ন উপ্পজ্জতি, যত্থ আলোকস্স ৰিবন্ধো. যত্থ পন ন ৰিবন্ধো ফলিকগব্ভপটলাদিকে, তত্থ অন্তরিতেপি উপ্পজ্জতেৰ. এৰং ৰিঞ্ঞাণাধিট্ঠিতং চক্খু পস্সতি, ন যং কিঞ্চীতি ৰিঞ্ঞাণাধিট্ঠিতং চক্খুং সন্ধাযেতং ৰুত্তং ‘‘চক্খুনা রূপং দিস্ৰা’’তি.

দ্ৰারারম্মণসঙ্ঘট্টেতি দ্ৰারস্স আরম্মণেন সঙ্ঘট্টে সতি, চক্খুস্স রূপারম্মণে আপাথগতেতি অধিপ্পাযো. পসাদৰত্থুকেন চিত্তেনাতি চক্খুপসাদৰত্থুকেন তন্নিস্সায পৰত্তেন ৰিঞ্ঞাণেন, যং ‘‘চক্খুৰিঞ্ঞাণ’’ন্তি ৰুচ্চতি. পস্সতীতি ওলোকেতি. চক্খুপসাদসন্নিস্সযে হি ৰিঞ্ঞাণে আলোকানুগ্গহিতং রূপারম্মণং সন্নিস্সযগুণেন ওভাসেন্তে তংসমঙ্গিপুগ্গলো ‘‘রূপং পস্সতী’’তি ৰুচ্চতি. ওভাসনঞ্চেত্থ আরম্মণস্স যথাসভাৰতো ৰিভাৰনং, যং ‘‘পচ্চক্খতো গহণ’’ন্তি ৰুচ্চতি. উসুনা লক্খস্স ৰেধে সিজ্ঝন্তে তস্স সম্ভারভূতেন ধনুনা ৰিজ্ঝতীতি ৰচনং ৰিয ৰিঞ্ঞাণেন রূপদস্সনে সিজ্ঝন্তে চক্খুনা রূপং পস্সতীতি ঈদিসী সসম্ভারকথা নামেসা হোতি. সসম্ভারা কথা সসম্ভারকথা, দস্সনস্স কারণসহিতাতি অত্থো. সসম্ভারস্স ৰা দস্সনস্স কথা সসম্ভারকথা. তস্মাতি যস্মা কেৰলেন চক্খুনা, কেৰলেন ৰা ৰিঞ্ঞাণেন রূপদস্সনং নত্থি, তস্মা.

ইত্থিপুরিসনিমিত্তং ৰাতি এত্থ ইত্থিসন্তাননিস্সিতরূপমুখেন গয্হমানং সণ্ঠানং থনমংসাৰিসদতা নিম্মস্সুমুখতা কেসবন্ধনৰত্থগ্গহণং অৰিসদট্ঠানগমনাদি চ সব্বং ‘‘ইত্থী’’তি সঞ্জাননস্স কারণভাৰতো ইত্থিনিমিত্তং. ৰুত্তৰিপরিযাযতো পুরিসনিমিত্তং ৰেদিতব্বং. সুভনিমিত্তাদিকং ৰাতি এত্থ রাগুপ্পত্তিহেতুভূতো ইট্ঠাকারো সুভনিমিত্তং. আদি-সদ্দেন পটিঘনিমিত্তাদীনং সঙ্গহো. সো পন দোসুপ্পত্তিআদিহেতুভূতো অনিট্ঠাদিআকারো ৰেদিতব্বো. কামঞ্চেত্থ পাল়িযং অভিজ্ঝাদোমনস্সাৰ সরূপতো আগতা, উপেক্খানিমিত্তস্সাপি পন সঙ্গহো ইচ্ছিতব্বো, অসমপেক্খনেন উপ্পজ্জনকমোহস্সাপি অসংৰরভাৰতো. তথা হি ৰক্খতি ‘‘মুট্ঠসচ্চং ৰা অঞ্ঞাণং ৰা’’তি. উপেক্খানিমিত্তন্তি চেত্থ অঞ্ঞাণুপেক্খায ৰত্থুভূতং আরম্মণং, তঞ্চস্স অসমপেক্খনৰসেন ৰেদিতব্বং. এৰং সঙ্খেপতো রাগদোসমোহানং কারণং ‘‘সুভনিমিত্তাদিক’’ন্তি ৰুত্তং. তেনাহ ‘‘কিলেসৰত্থুভূতং নিমিত্ত’’ন্তি. দিট্ঠমত্তেযেৰ সণ্ঠাতীতি ‘‘দিট্ঠে দিট্ঠমত্তং ভৰিস্সতী’’তি (উদা. ১০) সুত্তে ৰুত্তনযেন ৰণ্ণাযতনে চক্খুৰিঞ্ঞাণেন, ৰীথিচিত্তেহি চ গহিতমত্তেযেৰ তিট্ঠতি, ন ততো পরং কিঞ্চি সুভাদিআকারং পরিকপ্পেতি. পাকটভাৰকরণতোতি পরিব্যত্তভাৰকরণতো ৰিভূতভাৰকরণতো. ৰিসভাগৰত্থুনো হি হত্থাদিঅৰযৰেসু সুভাদিতো পরিকপ্পেন্তস্স অপরাপরং তত্থ উপ্পজ্জমানা কিলেসা পরিব্যত্তা হোন্তীতি তে তেসং অনুব্যঞ্জনা নাম. তে পন যস্মা তথা তথা সন্নিৰিট্ঠানং ভূতুপাদাযরূপানং সন্নিৰেসাকারো. ন হি তং মুঞ্চিত্ৰা পরমত্থতো হত্থাদি নাম কোচি অত্থি. তস্মা ৰুত্তং ‘‘হত্থপাদ…পে… আকারং ন গণ্হাতী’’তি. কিং পন গণ্হাতীতি আহ ‘‘যং তত্থ ভূতং, তদেৰ গণ্হাতী’’তি. যং তস্মিং সরীরে ৰিজ্জমানং কেসলোমাদি ভূতুপাদাযমত্তং ৰা, তদেৰ যাথাৰতো গণ্হাতি. তত্থ অসুভাকারগহণস্স নিদস্সনং দস্সেন্তো ‘‘চেতিযপব্বতৰাসী’’তিআদিনা মহাতিস্সত্থেরৰত্থুং আহরি.

তত্থ সুমণ্ডিতপসাধিতাতি সুট্ঠু মণ্ডিতা পসাধিতা চ. আভরণাদীহি আহারিমেহি মণ্ডনং. সরীরস্স উচ্ছাদনাদিৰসেন পটিসঙ্খরণং পসাধনন্তি ৰদন্তি, আভরণেহি, পন ৰত্থালঙ্কারাদীহি চ অলঙ্করণং পসাধনং. ঊনট্ঠানপূরণং মণ্ডনং. ৰিপল্লত্থচিত্তাতি রাগৰসেন ৰিপরীতচিত্তা. ওলোকেন্তোতি থেরো কম্মট্ঠানমনসিকারেনেৰ গচ্ছন্তো সদ্দকণ্টকত্তা পুব্বভাগমনসিকারস্স হসিতসদ্দানুসারেন ‘‘কিমেত’’ন্তি ওলোকেন্তো. অসুভসঞ্ঞন্তি অট্ঠিকসঞ্ঞং. অট্ঠিককম্মট্ঠানং হি থেরো তদা পরিহরতি. অরহত্তং পাপুণীতি থেরো কির তস্সা হসন্তিযা দন্তট্ঠিদস্সনেনেৰ পুব্বভাগভাৰনায সুভাৰিতত্তা পটিভাগনিমিত্তং, সাতিসযঞ্চ উপচারজ্ঝানং লভিত্ৰা যথাঠিতোৰ তত্থ পঠমজ্ঝানং অধিগন্ত্ৰা তং পাদকং কত্ৰা ৰিপস্সনং ৰড্ঢেত্ৰা মগ্গপরম্পরায আসৰক্খযং পাপুণি. পুব্বসঞ্ঞং অনুস্সরীতি পুব্বকং যথারদ্ধং কালেন কালং অনুযুঞ্জিযমানং অট্ঠিককম্মট্ঠানং অনুস্সরি সমন্নাহরি. অনুমগ্গন্তি অনুপথং তস্সা পদানুপদং. থেরস্স কির ভাৰনায পগুণভাৰতো দন্তট্ঠিদস্সনেনেৰ তস্সা সকলসরীরং অট্ঠিকসঙ্ঘাতভাৰেন উপট্ঠাসি. ন তং ‘‘ইত্থী’’তি ৰা ‘‘পুরিসো’’তি ৰা সঞ্জানি. তেনাহ ‘‘নাভিজানামি…পে… মহাপথে’’তি.

‘‘যস্স চক্খুন্দ্রিযাসংৰরস্স হেতূ’’তি ৰত্ৰা পুন ‘‘তস্স চক্খুন্দ্রিযস্স সতিকৰাটেন পিদহনত্থাযা’’তি ৰুত্তং, ন অসংৰরস্সাতি. যদিদং যং চক্খুন্দ্রিযাসংৰরস্স হেতু অভিজ্ঝাদিঅন্ৰাস্সৰনং দস্সিতং, তং অসংৰুতচক্খুন্দ্রিযস্সেৰ হেতু পৰত্তং দস্সিতন্তি কত্ৰা ৰুত্তং. চক্খুদ্ৰারিকস্স হি অভিজ্ঝাদিঅন্ৰাস্সৰনস্স তংদ্ৰারিকৰিঞ্ঞাণস্স ৰিয চক্খুন্দ্রিযং পধানকারণং. চক্খুন্দ্রিযস্স অসংৰুতত্তে সতি তে অন্ৰাস্সৰন্তীতি অসংৰরিযমানচক্খুন্দ্রিযহেতুকো সো অসংৰরো তথা ৰুত্তোতি. যত্ৰাধিকরণন্তি হি যস্স চক্খুন্দ্রিযস্স কারণাতি অত্থো. কীদিসস্স চ কারণাতি? অসংৰুতস্স, কিঞ্চ অসংৰুতং? যস্স চক্খুন্দ্রিযাসংৰরস্স হেতু অভিজ্ঝাদযো অন্ৰাস্সৰন্তি, তস্স সংৰরাযাতি অযমেত্থ যোজনা.

জৰনক্খণে পন সচে দুস্সীল্যং ৰাতিআদি পুন অৰচনত্থং ইধেৰ সব্বং ৰুত্তন্তি ছসু দ্ৰারেসু যথাসম্ভৰং ৰেদিতব্বং. ন হি পঞ্চদ্ৰারে কাযৰচীদুচ্চরিতসঙ্খাতং দুস্সীল্যং অত্থি, তস্মা দুস্সীল্যাসংৰরো মনোদ্ৰারৰসেন, সেসাসংৰরো ছদ্ৰারৰসেন যোজেতব্বো. মুট্ঠসচ্চাদীনং হি সতিপটিপক্খাকুসলধম্মাদিভাৰতো সিযা পঞ্চদ্ৰারে উপ্পত্তি, ন ত্ৰেৰ কাযিকৰাচসিকৰীতিক্কমভূতস্স দুস্সীল্যস্স তত্থ উপ্পত্তি, পঞ্চদ্ৰারিকজৰনানং অৰিঞ্ঞত্তিজনকত্তা. দুস্সীল্যাদযো চেত্থ পঞ্চ অসংৰরা সীলসংৰরাদীনং পঞ্চন্নং সংৰরানং পটিপক্খভাৰেন ৰুত্তা. তস্মিং সতীতি তস্মিং অসংৰরে সতি.

যথা কিন্তি যেন পকারেন জৰনে উপ্পজ্জমানো অসংৰরো ‘‘চক্খুন্দ্রিযে অসংৰরো’’তি ৰুচ্চতি, তং নিদস্সনং কিন্তি অত্থো. যথাতিআদিনা নগরদ্ৰারে অসংৰরে সতি তংসম্বন্ধানং ঘরাদীনং অসংৰুততা ৰিয জৰনে অসংৰরে সতি তংসম্বন্ধানং দ্ৰারাদীনং অসংৰুততাতি এৰং অঞ্ঞাসংৰরে অঞ্ঞাসংৰুততা সামঞ্ঞমেৰ নিদস্সেতি, ন পুব্বাপরসামঞ্ঞং, অন্তোবহিসামঞ্ঞং ৰা. সতি ৰা দ্ৰারভৰঙ্গাদিকে পুন উপ্পজ্জমানং জৰনং বাহিরং ৰিয কত্ৰা নগরদ্ৰারসমানং ৰুত্তং, ইতরঞ্চ অন্তোনগরে ঘরাদিসমানং. পচ্চযভাৰেন হি পুরিমনিপ্ফন্নং জৰনকালে অসন্তম্পি ভৰঙ্গাদি চক্খাদি ৰিয ফলনিপ্ফত্তিযা সন্তংযেৰ নাম হোতি. ন হি ধরমানংযেৰ ‘‘সন্ত’’ন্তি ৰুচ্চতি. ‘‘বাহিরং ৰিয কত্ৰা’’তি চ পরমত্থতো জৰনস্স বাহিরভাৰে, ইতরস্স চ অব্ভন্তরভাৰে অসতিপি ‘‘পভস্সরমিদং, ভিক্খৰে, চিত্তং, তঞ্চ খো আগন্তুকেহি উপক্কিলিট্ঠ’’ন্তিআদি (অ. নি. ১.৪৯) ৰচনতো আগন্তুকভূতস্স কদাচি কদাচি উপ্পজ্জমানস্স জৰনস্স বাহিরভাৰো, তব্বিধুরসভাৰস্স ইতরস্স অব্ভন্তরভাৰো একেন পরিযাযেন হোতীতি কত্ৰা ৰুত্তং. জৰনে ৰা অসংৰরে উপ্পন্নে ততো পরং দ্ৰারভৰঙ্গাদীনং অসংৰরহেতুভাৰাপত্তিতো. অসংৰরস্স হি উপ্পত্তিযা দ্ৰারভৰঙ্গাদীনং তস্স হেতুভাৰো পঞ্ঞাযতীতি. নগরদ্ৰারসদিসেন জৰনেন পৰিসিত্ৰা দুস্সীল্যাদিচোরানং দ্ৰারভৰঙ্গাদীসু মুসনং কুসলভণ্ডৰিনাসনং কথিতং. যস্মিং হি দ্ৰারে অসংৰরো উপ্পজ্জতি, সো তত্থ দ্ৰারাদীনং সংৰরূপনিস্সযভাৰং উপচ্ছিন্দন্তোযেৰ পৰত্ততীতি. দ্ৰারভৰঙ্গাদীনং জৰনেন সহ সম্বন্ধো একসন্ততিপরিযাপন্নতো দট্ঠব্বো.

এত্থ চ চক্খুদ্ৰারে রূপারম্মণে আপাথগতে নিযমিতাদিৰসেন কুসলাকুসলজৰনে সত্তক্খত্তুং উপ্পজ্জিত্ৰা ভৰঙ্গং ওতিণ্ণে তদনুরূপমেৰ মনোদ্ৰারিকজৰনে তস্মিংযেৰারম্মণে সত্তক্খত্তুংযেৰ উপ্পজ্জিত্ৰা ভৰঙ্গং ওতিণ্ণে পুন তস্মিংযেৰ দ্ৰারে তদেৰারম্মণং নিস্সায ‘‘ইত্থী পুরিসো’’তিআদিনা ৰৰত্থপেন্তং পসাদরজ্জনাদিৰসেন সত্তক্খত্তুং জৰনং জৰতি. এৰং পৰত্তমানং জৰনং সন্ধায ‘‘জৰনে দুস্সীল্যাদীসু উপ্পন্নেসু তস্মিং অসংৰরে সতি দ্ৰারম্পি অগুত্ত’’ন্তিআদি ৰুত্তং.

তস্মিং পন জৰনে. সীলাদীসূতি সীলসংৰরসতিসংৰরঞাণসংৰরখন্তিসংৰরৰীরিযসংৰরেসু উপ্পন্নেসু. যথা হি পগেৰ সতিআরক্খং অনুপট্ঠপেন্তস্স দুস্সীল্যাদীনং উপ্পত্তি, এৰং পগেৰ সতিআরক্খং উপট্ঠপেন্তস্স সীলাদীনং উপ্পত্তি ৰেদিতব্বা. সদ্দাদীসুপি যথারহং নিমিত্তানুব্যঞ্জনানি ৰেদিতব্বানি. সোতৰিঞ্ঞাণেন হি সদ্দং সুত্ৰা ‘‘ইত্থিসদ্দো’’তি ৰা ‘‘পুরিসসদ্দো’’তি ৰা ইট্ঠানিট্ঠাদিকং ৰা কিলেসৰত্থুভূতং নিমিত্তং ন গণ্হাতি, সুতমত্তে এৰ সণ্ঠাতি. যো চ গীতসদ্দাদিকস্স কিলেসানং অনু অনু ব্যঞ্জনতো ‘‘অনুব্যঞ্জন’’ন্তি লদ্ধৰোহারো মন্দতারাদিৰসেন ৰৰত্থিতো ছজ্জাদিভেদভিন্নো আকারো, তম্পি ন গণ্হাতীতি. এৰং গন্ধাদীসুপি যথারহং ৰত্তব্বং. মনোদ্ৰারে পন সাৰজ্জনভৰঙ্গং মনোদ্ৰারং তস্মিং দ্ৰারে ধম্মারম্মণে আপাথগতে তং জৰনমনসাৰ ৰিঞ্ঞায ৰিজানিত্ৰাতিআদিনা যোজেতব্বং. কিলেসো অনুবন্ধো এতস্সাতি কিলেসানুবন্ধো, সো এৰ নিমিত্তাদিগাহো, ততো পরিৰজ্জনলক্খণং কিলেসানুবন্ধনিমিত্তাদিগ্গাহপরিৰজ্জনলক্খণং. আদি-সদ্দেন অনুব্যঞ্জনং সঙ্গণ্হাতি.

আজীৰপারিসুদ্ধিসীলৰণ্ণনা

১৬. ৰুত্তেতি ইধেৰ উদ্দেসৰসেন পুব্বে ৰুত্তে. তথা হি ‘‘আজীৰহেতু পঞ্ঞত্তানং ছন্নং সিক্খাপদান’’ন্তি পদুদ্ধারং কত্ৰা তানি পাল়িৰসেনেৰ দস্সেতুং ‘‘যানি তানী’’তিআদি আরদ্ধং. তত্থ যানি তানি এৰং পঞ্ঞত্তানি ছ সিক্খাপদানীতি সম্বন্ধো. আজীৰহেতূতি জীৰিকনিমিত্তং, ‘‘এৰাহং পচ্চযেহি অকিলমন্তো জীৰিস্সামী’’তি অধিপ্পাযেন. আজীৰকারণাতি তস্সেৰ ৰেৰচনং. পাপিচ্ছোতি পাপিকায অসন্তগুণসম্ভাৰনিচ্ছায সমন্নাগতো. ইচ্ছাপকতোতি ইচ্ছায অপকতো উপদ্দুতো, অভিভূতো ৰা. অসন্তন্তি অৰিজ্জমানং. অভূতন্তি অনুপ্পন্নং. অনুপ্পন্নত্তা হি তস্স তং অসন্তন্তি পুরিমস্স পচ্ছিমং কারণৰচনং. উত্তরিমনুস্সধম্মন্তি উত্তরিমনুস্সানং উক্কট্ঠপুরিসানং ধম্মং, মনুস্সধম্মতো ৰা উত্তরি উক্কট্ঠং. উল্লপতীতি উগ্গতাযুকো লপতি. সীলং হি ভিক্খুনো আযু, তং তস্স তথালপনসমকালমেৰ ৰিগচ্ছতি. তেনাহ ‘‘আপত্তি পারাজিকস্সা’’তি পারাজিকসঙ্খাতা আপত্তি অস্স, পারাজিকসঞ্ঞিতস্স ৰা ৰীতিক্কমস্স আপজ্জনং উল্লপনন্তি অত্থো. সঞ্চরিত্তং সমাপজ্জতীতি সঞ্চরণভাৰং আপজ্জতি, ইত্থিযা ৰা পুরিসমতিং, পুরিসস্স ৰা ইত্থিমতিং আরোচেতীতি অধিপ্পাযো. ‘‘ইমেসং ছন্নং সিক্খাপদানং ৰীতিক্কমস্স ৰসেনা’’তি সম্বন্ধো হেট্ঠা দস্সিতো এৰ.

কুহনাতিআদীসূতি হেট্ঠা উদ্দিট্ঠপাল়িযাৰ পদুদ্ধারো. অযং পাল়ীতি অযং ৰিভঙ্গে (ৰিভ. ৮৬১) আগতা নিদ্দেসপাল়ি.

১৭. চীৰরাদিপচ্চযা লব্ভন্তীতি লাভা. তে এৰ সক্কচ্চং আদরৰসেন দিয্যমানা সক্কারা. পত্থটযসতা কিত্তিসদ্দো. তং লাভঞ্চ সক্কারঞ্চ কিত্তিসদ্দঞ্চ. সন্নিস্সিতস্সাতি এত্থ তণ্হানিস্সযো অধিপ্পেতোতি আহ ‘‘পত্থযন্তস্সা’’তি. অসন্তগুণদীপনকামস্সাতি অসন্তে অত্তনি অৰিজ্জমানে সদ্ধাদিগুণে সম্ভাৰেতুকামস্স. অসন্তগুণসম্ভাৰনতালক্খণা, পটিগ্গহণে চ অমত্তঞ্ঞুতালক্খণা হি পাপিচ্ছতা. ইচ্ছায অপকতস্সাতি পাপিকায ইচ্ছায সম্মাআজীৰতো অপেতো কতোতি অপকতো. তথাভূতো চ আজীৰূপদ্দৰেন উপদ্দুতোতি কত্ৰা আহ ‘‘উপদ্দুতস্সাতি অত্থো’’তি.

কুহনমেৰ পচ্চযুপ্পাদনস্স ৰত্থূতি কুহনৰত্থু. তিৰিধম্পেতং তত্থ আগতং তস্স নিস্সযভূতায ইমায পাল়িযা দস্সেতুন্তি এৰমত্থো দট্ঠব্বো. তদত্থিকস্সেৰাতি তেহি চীৰরাদীহি অত্থিকস্সেৰ. পটিক্খিপনেনাতি চীৰরাদীনং পটিক্খিপনহেতু. অস্সাতি ভৰেয্য. পটিগ্গহণেন চাতি চ-সদ্দেন পুব্বে ৰুত্তং পটিক্খিপনং সমুচ্চিনোতি.

ভিয্যোকম্যতন্তি বহুকামতং. যন্তি কিরিযাপরামসনং, তস্মা ‘‘ধারেয্যা’’তি এত্থ যদেতং সঙ্ঘাটিং কত্ৰা ধারণং, এতং সমণস্স সারুপ্পন্তি যোজনা. পাপণিকানীতি আপণতো ছড্ডিতানি. নন্তকানীতি অন্তরহিতানি চোল়খণ্ডানি. উচ্চিনিত্ৰাতি উঞ্ছনেন চিনিত্ৰা সঙ্গহেত্ৰা. উঞ্ছাচরিযাযাতি উঞ্ছাচরিযায লদ্ধেন. গিলানস্স পচ্চযভূতা ভেসজ্জসঙ্খাতা জীৰিতপরিক্খারা গিলানপচ্চযভেসজ্জপরিক্খারা. পূতিমুত্তন্তি পুরাণস্স, অপুরাণস্স চ সব্বস্স গোমুত্তস্সেতং নামং. পূতিমুত্তেনাতি পূতিভাৰেন মুত্তেন পরেহি ছড্ডিতেন, পূতিভূতেন ৰা গোমুত্তেন. ধুতৰাদোতি পরেসম্পি ধুতগুণৰাদী. সম্মুখীভাৰাতি সম্মুখতো ৰিজ্জমানত্তা, লব্ভমানতাযাতি অত্থো.

অত্তানং উত্তরিমনুস্সধম্মাধিগমস্স সামন্তে কত্ৰা জপ্পনং সামন্তজপ্পনং. মহেসক্খোতি মহানুভাৰো, উত্তরিমনুস্সধম্মাধিগমেনাতি অধিপ্পাযো. ‘‘মিত্তো’’তি সামঞ্ঞতো ৰত্ৰা পুন তং ৰিসেসেতি ‘‘সন্দিট্ঠো সম্ভত্তো’’তি. দিট্ঠমত্তো হি মিত্তো সন্দিট্ঠো. দল়্হভত্তিকো সম্ভত্তো. সহাযোতি সহ আযনকো, সখাতি অত্থো. সত্তপদিনো হি ‘‘সখা’’তি ৰুচ্চন্তি. ৰিহারো পাকারপরিচ্ছিন্নো সকলো আৰাসো. অড্ঢযোগো দীঘপাসাদো, গরুল়সণ্ঠানপাসাদোতিপি ৰদন্তি. পাসাদো চতুরস্সপাসাদো. হম্মিযং মুণ্ডচ্ছদনপাসাদো. কূটাগারং দ্ৰীহি কণ্ণিকাহি কত্তব্বপাসাদো. অট্টো পটিরাজূনম্পি পটিবাহনযোগ্যো চতুপঞ্চভূমকো পটিস্সযৰিসেসো. মাল়ো এককূটসঙ্গহিতো অনেককোণৰন্তো পটিস্সযৰিসেসো. উদ্দণ্ডো অগব্ভিকা একদ্ৰারা দীঘসালাতি ৰদন্তি. অপরে পন ভণন্তি – ৰিহারো নাম দীঘমুখপাসাদো. অড্ঢযোগো একপস্সেন ছদনকসেনাসনং. তস্স কির একপস্সে ভিত্তি উচ্চতরা হোতি, ইতরপস্সে নীচা, তেন তং একপস্সছদনকং হোতি. পাসাদো আযতচতুরস্সপাসাদো. হম্মিযং মুণ্ডচ্ছদনং চন্দিকঙ্গণযুত্তং. গুহা কেৰলা পব্বতগুহা. লেণং দ্ৰারবদ্ধং. কূটাগারং যো কোচি কণ্ণিকাবদ্ধপাসাদো. অট্টো বহলভিত্তিগেহং. যস্স গোপানসিযো অগ্গহেত্ৰা ইট্ঠকাহি এৰ ছদনং হোতি. অট্টালকাকারেন করীযতীতিপি ৰদন্তি. মাল়ো ৰট্টাকারেন কতসেনাসনং. উদ্দণ্ডো একো পটিস্সযৰিসেসো. যো ‘‘ভণ্ডসালা, উদোসিত’’ন্তিপি ৰুচ্চতি. উপট্ঠানসালা সন্নিপতনট্ঠানং.

কুচ্ছিতরজভূতায পাপিচ্ছতায নিরত্থকং কাযৰচীৰিপ্ফন্দনিগ্গণ্হনং কোরজং, তং এতস্স অত্থীতি কোরজিকো, কোহঞ্ঞেন সংযতকাযো, অতিৰিয, অভিণ্হং ৰা কোরজিকো কোরজিককোরজিকো. অতিপরিসঙ্কিতোতি কেচি. অতিৰিয কুহো কুহককুহকো, সাতিসযৰিম্হাপকোতি অত্থো. অতিৰিয লপো লপনকো লপকলপকো. মুখসম্ভাৰিকোতি কোরজিককোরজিকাদিভাৰেন পৰত্তৰচনেহি অত্তনো মুখমত্তেন অঞ্ঞেহি সম্ভাৰিকো. সো এৰরূপো এৰরূপতায এৰ অত্তানং পরং ৰিয কত্ৰা ‘‘অযং সমণো’’তিআদীনি কথেতি. গম্ভীরন্তিআদি তস্সা কথায উত্তরিমনুস্সধম্মপটিবদ্ধতায ৰুত্তং.

সম্ভাৰনাধিপ্পাযকতেনাতি ‘‘কথং নু খো মং জনো ‘অরিযো’তি ৰা ‘ৰিসেসলাভী’তি ৰা সম্ভাৰেয্যা’’তি ইমিনা অধিপ্পাযেন কতেন. গমনং সণ্ঠপেতীতি ৰিসেসলাভীনং গমনং ৰিয অত্তনো গমনং সক্কচ্চং ঠপেতি, সতো সম্পজানোৰ গচ্ছন্তো ৰিয হোতি. পণিধাযাতি ‘‘অরহাতি মং জানন্তূ’’তি চিত্তং সণ্ঠপেত্ৰা, পত্থেত্ৰা ৰা. সমাহিতো ৰিযাতি ঝানসমাধিনা সমাহিতো ৰিয. আপাথকজ্ঝাযীতি মনুস্সানং আপাথট্ঠানে সমাধিসমাপন্নো ৰিয নিসীদন্তো আপাথকে জনস্স পাকটট্ঠানে ঝাযী. ইরিযাপথসঙ্খাতন্তি ইরিযাপথসণ্ঠপনসঙ্খাতং.

পচ্চযপটিসেৰনসঙ্খাতেনাতি অযোনিসো উপ্পাদিতানং পচ্চযানং পটিসেৰনন্তি এৰং কথিতেন, তেন ৰা পচ্চযপটিসেৰনেন সঙ্খাতব্বেন কথিতব্বেন. অঞ্ঞং ৰিয কত্ৰা অত্তনো সমীপে ভণনং সামন্তজপ্পিতং. আ-কারস্স রস্সত্তং কত্ৰা ‘‘অট্ঠপনা’’তি ৰুত্তং. কুহনং কুহো, তস্স অযনা পৰত্তি কুহাযনা, কুহস্স ৰা পুগ্গলস্স অযনা গতি কিরিযা কুহাযনা. কুহেতি, কুহেন ৰা ইতোতি কুহিতো, কুহকো.

পুট্ঠস্সাতি ‘‘কো তিস্সো, কো রাজপূজিতো’’তি পুট্ঠস্স. উদ্ধং কত্ৰাতি উক্খিপিত্ৰা ৰিভৰসম্পত্তিআদিনা পগ্গহেত্ৰা.

উন্নহনাতি উদ্ধং উদ্ধং বন্ধনা পলিৰেঠনা. দ্ৰে কির ভিক্খূ একং গামং পৰিসিত্ৰা আসনসালায নিসীদিত্ৰা একং কুমারিকং পক্কোসিংসু. তায আগতায তত্রেকো একং পুচ্ছি ‘‘অযং, ভন্তে, কস্স কুমারিকা’’তি? ‘‘অম্হাকং উপট্ঠাযিকায তেলকন্দরিকায ধীতা, ইমিস্সা মাতা মযি গেহং গতে সপ্পিং দদমানা ঘটেনেৰ দেতি, অযম্পি মাতা ৰিয ঘটেন দেতী’’তি (ৰিভ. অট্ঠ. ৮৬২) উক্কাচেসি. ইমং সন্ধায ৰুত্তং ‘‘তেলকন্দরিকৰত্থু চেত্থ ৰত্তব্ব’’ন্তি.

ধম্মানুরূপা ৰাতি মত্তাৰচনানুরূপং ৰা. মত্তাৰচনং হি ‘‘ধম্মো’’তি ৰুচ্চতি. যথাহ ‘‘সুভাসিতং উত্তমমাহু সন্তো, ধম্মং ভণে নাধম্মং তং দুতিয’’ন্তি (সং. নি. ১.২১৩; সু. নি. ৪৫২). তেন বহুং ৰিপ্পলপনমাহ, সচ্চতো ৰা অঞ্ঞা সুভাসিতা ৰাচা ‘‘ধম্মো’’তি ৰেদিতব্বো. মুগ্গসূপসদিসকম্মো পুগ্গলো মুগ্গসূপ্যো. তেনাহ ‘‘অযং পুগ্গলো মুগ্গসূপ্যোতি ৰুচ্চতী’’তি. পরিভটস্স কম্মং পারিভট্যং, তদেৰ পারিভট্যতা.

নিমিত্তেন চরন্তো, জীৰন্তো ৰা নিমিত্তকো, তস্স ভাৰো নেমিত্তিকতা. অত্তনো ইচ্ছায পকাসনং ওভাসো. কো পন সোতি? ‘‘অজ্জ ভিক্খূনং পচ্চযা দুল্লভা জাতা’’তিআদিকা পচ্চযপটিসংযুত্তকথা. ইচ্ছিতৰত্থুস্স সমীপে কথনং সামন্তজপ্পা.

অক্কোসনভযেনাপি দদেয্যাতি দসহি অক্কোসৰত্থূহি অক্কোসনং. তথা ৰম্ভনাদযো. উপেক্খনা উপাসকানং দাযকাদিভাৰতো বহি ছড্ডনা. খিপনাতি খেপৰচনং. তং পন অৰহসিত্ৰা ৰচনং হোতীতি আহ ‘‘উপ্পণ্ডনা’’তি. পাপনাতি অদাযকত্তস্স, অৰণ্ণস্স ৰা পতিট্ঠাপনং. পরেসং পিট্ঠিমংসখাদনসীলো পরপিট্ঠিমংসিকো, তস্স ভাৰো পরপিট্ঠিমংসিকতা. অব্ভঙ্গন্তি অব্ভঞ্জনং. নিপিসিত্ৰা গন্ধমগ্গনা ৰিযাতি অনিপ্পিসিতে অলব্ভমানস্স গন্ধস্স নিপিসনে লাভো ৰিয পরগুণে অনিপ্পিসিতে অলব্ভমানানং পচ্চযানং নিপিসনেন লাভো দট্ঠব্বোতি.

নিকত্তুং অপ্পেন লাভেন বহুকং ৰঞ্চেত্ৰা গহেতুং ইচ্ছনং নিজিগীসনং, তস্স ভাৰো নিজিগীসনতা. তস্সেৰ ইচ্ছনস্স পৰত্তিআকারো, তংসহজাতং ৰা গৰেসনকম্মং.

অঙ্গন্তি হত্থপাদাদিঅঙ্গানি উদ্দিস্স পৰত্তং ৰিজ্জং. নিমিত্তন্তি নিমিত্তসত্থং. উপ্পাতন্তি উক্কাপাতদিসাডাহ-ভূমিচালাদিউপ্পাতপটিবদ্ধৰিজ্জং. সুপিনন্তি সুপিনসত্থং. লক্খণন্তি ইত্থিপুরিসানং লক্খণজাননসত্থং. মূসিকচ্ছিন্নন্তি ৰত্থাদীনং অসুকভাগে মূসিকচ্ছেদে সতি ইদং নাম ফলং হোতীতি জাননকসত্থং. পলাসগ্গিআদীসু ইমিনা নাম অগ্গিনা হুতে ইদং নাম হোতীতি অগ্গিৰসেন হোমৰিধানং অগ্গিহোমং. ইমিনা নযেন দব্বিহোমং ৰেদিতব্বং. আদি-সদ্দেন থুসহোমাদীনং, অঞ্ঞেসঞ্চ সুত্তে আগতানং মিচ্ছাজীৰানং সঙ্গহো দট্ঠব্বো. ৰীরিযসাধনত্তা আজীৰপারিসুদ্ধিসীলস্স ‘‘পচ্চযপরিযেসনৰাযামো’’তি ৰুত্তং. তস্স পারিসুদ্ধি অনৰজ্জভাৰো, যেন ধম্মেন সমেন পচ্চযলাভো হোতি. ন হি অলসো ঞাযেন পচ্চযে পরিযেসিতুং সক্কোতীতি.

পচ্চযসন্নিস্সিতসীলৰণ্ণনা

১৮. পটিসঙ্খাতি অযং ‘‘সযং অভিঞ্ঞা’’তিআদীসু (মহাৰ. ১১) ৰিয য-কারলোপেন নিদ্দেসো. যোনিসোতি চেত্থ উপাযত্থো যোনিসো-সদ্দোতি দস্সেন্তো আহ ‘‘উপাযেন পথেনা’’তি. ‘‘পটিসঙ্খায ঞত্ৰা’’তি ৰত্ৰা তযিদং পটিসঙ্খানং পচ্চৰেক্খণন্তি দস্সেতুং ‘‘পচ্চৰেক্খিত্ৰাতি অত্থো’’তিআদি ৰুত্তং. যথা হি পচ্চৰেক্খিত্ৰাতি সীতপটিঘাতাদিকং তং তং পযোজনং পতি পতি অৰেক্খিত্ৰা, ঞাণেন পস্সিত্ৰাতি অত্থো, এৰং পটিসঙ্খাযাতি তদেৰ পযোজনং পতি পতি সঙ্খায, জানিত্ৰাতি অত্থো. ঞাণপরিযাযো হি ইধ সঙ্খা-সদ্দোতি. এত্থ চ ‘‘পটিসঙ্খা যোনিসো’’তিআদি কামং পচ্চযপরিভোগকালেন ৰুচ্চতি, ধাতুৰসেন পন পটিকূলৰসেন ৰা পচ্চৰেক্খণায পচ্চযসন্নিস্সিতসীলং সুজ্ঝতীতি অপরে. ভিজ্জতীতি কেচি. একে পন পঠমং এৰ পরিযত্তন্তি ৰদন্তি, ৰীমংসিতব্বং. ‘‘চীৰর’’ন্তি একৰচনং একত্তমত্তং ৰাচকন্তি অধিপ্পাযেন ‘‘অন্তরৰাসকাদীসু যং কিঞ্চী’’তি ৰুত্তং, জাতিসদ্দতায পন তস্স পাল়িযং একৰচনন্তি যত্তকানি চীৰরানি যোগিনা পরিহরিতব্বানি, তেসং সব্বেসং একজ্ঝং গহণন্তি সক্কা ৰিঞ্ঞাতুং, যং কিঞ্চীতি ৰা অনৰসেসপরিযাদানমেতং, ন অনিযমৰচনং. ‘‘নিৰাসেতি ৰা পারুপতি ৰা’’তি ৰিকপ্পনং পন পটিসেৰনপরিযাযস্স পরিভোগস্স ৰিভাগদস্সনন্তি তং পঞ্ঞপেত্ৰা সযননিসীদন-চীৰরকুটিকরণাদিৰসেনাপি পরিভোগস্স সঙ্গহো দট্ঠব্বো.

পযোজনানং মরিযাদা পযোজনাৰধি, তস্স পরিচ্ছিন্দনৰসেন যো নিযমো, তস্স ৰচনং পযোজনা…পে… ৰচনং. ইদানি তং নিযমং ৰিৰরিত্ৰা দস্সেতুং ‘‘এত্তকমেৰ হী’’তিআদি ৰুত্তং. তত্থ অৰধারণেন লীল়াৰিভূসাৰিলম্বনানটম্বরাদিৰসেন ৰত্থপরিভোগং নিসেধেতি. তেনাহ ‘‘ন ইতো ভিয্যো’’তি. লীল়াৰসেন হি একচ্চে সত্তা ৰত্থানি পরিদহন্তি চেৰ উপসংৰিযন্তি চ. যথা তং যোব্বনে ঠিতা নাগরিকমনুস্সা. একচ্চে ৰিভূসনৰসেন, যথা তং রূপূপজীৰিনিআদযো. ৰিলম্বনৰসেন ৰিলম্বকা. নটম্বরৰসেন ভোজাদযো. অজ্ঝত্তধাতুক্খোভো সীতরোগাদিউপ্পাদকো. উতুপরিণামনৰসেনাতি উতুনো পরিৰত্তনৰসেন ৰিসভাগসীতউতুসমুট্ঠানেন. ৰা-সদ্দেন হেমন্তাদীসু হিমপাতাদিৰসেন পৰত্তস্স সঙ্গহো দট্ঠব্বো, ন উপ্পাদেতি সীতন্তি অধিপ্পাযো. যদত্থং পন তং ৰিনোদনং, তং মত্থকপ্পত্তং দস্সেতুং ‘‘সীতব্ভাহতে’’তিআদি ৰুত্তং. সব্বত্থাতি ‘‘উণ্হস্স পটিঘাতাযা’’তিআদীসু সব্বেসু সেসপযোজনেসু. যদিপি সূরিযসন্তাপোপি উণ্হোৰ, তস্স পন আতপগ্গহণেন গহিতত্তা ‘‘অগ্গিসন্তাপস্সা’’তি ৰুত্তং. একচ্চো দাৰগ্গিসন্তাপো কাযং চীৰরেন পটিচ্ছাদেত্ৰা সক্কা ৰিনোদেতুন্তি আহ ‘‘তস্স ৰনদাহাদীসু সম্ভৰো ৰেদিতব্বো’’তি. ডংসাতি পিঙ্গলমক্খিকা. তে পন যস্মা ডংসনসীলা, তস্মা ৰুত্তং ‘‘ডংসনমক্খিকা’’তি. সপ্পাদযোতি সপ্পসতপদিউণ্ণনাভিসরবূৰিচ্ছিকাদযো. ফুট্ঠসম্ফস্সোতি ফুট্ঠৰিসমাহ. তিৰিধা হি সপ্পা – দট্ঠৰিসা ফুট্ঠৰিসা দিট্ঠৰিসা. তেসু পুরিমকা দ্ৰে এৰ গহিতা. সতপদিআদীনম্পি তাদিসানং সঙ্গণ্হনত্থং. নিযতপযোজনং একন্তিকং, সব্বকালিকঞ্চ পযোজনং. হিরী কুপ্পতি নিল্লজ্জতা সণ্ঠাতি. তেনাহ ‘‘ৰিনস্সতী’’তি. কূপাৰতরণং ৰা পটিচ্ছাদনং অরহতীতি কোপিনং. হিরিযিতব্বট্ঠেন হিরী চ তং কোপিনঞ্চাতি হিরিকোপিনন্তি এৰমেত্থ অত্থো দট্ঠব্বো. তস্স চাতি চ-সদ্দো পুব্বে ৰুত্তপযোজনানং সম্পিণ্ডনত্থো.

যং কিঞ্চি আহারন্তি খাদনীযভোজনীযাদিভেদং যং কিঞ্চি আহরিতব্বৰত্থুং. পিণ্ডায ভিক্খায উলতীতি পিণ্ডোলো, তস্স কম্মং পিণ্ডোল্যং. তেন পিণ্ডোল্যেন ভিক্খাচরিযায. পতিতত্তাতি পক্খিপিতত্তা. পিণ্ডপাতো পত্তে পক্খিত্তভিক্খাহারো. পিণ্ডানং ৰা পাতোতি ঘরে ঘরে লদ্ধভিক্খানং সন্নিপাতো. ‘‘নত্থি দৰা’’তিআদীসু (দী. নি. অট্ঠ. ৩.৩০৫) সহসা কিরিযাপি ‘‘দৰা’’তি ৰুচ্চতি, ততো ৰিসেসনত্থং ‘‘দৰত্থং, কীল়ানিমিত্তন্তি ৰুত্তং হোতী’’তি আহ. মুট্ঠিকমল্লা মুট্ঠিযুদ্ধযুজ্ঝনকা. আদি-সদ্দেন নিবুদ্ধযুজ্ঝনকাদীনং গহণং. বলমদনিমিত্তন্তি বলং নিস্সায উপ্পজ্জনকমদো বলমদো. তং নিমিত্তং, বলস্স উপ্পাদনত্থন্তি অত্থো. পোরিসমদনিমিত্তন্তি পোরিসমদো ৰুচ্চতি পুরিসমানো ‘‘অহং পুরিসো’’তি উপ্পজ্জনকমানো. অসদ্ধম্মসেৰনাসমত্থতং নিস্সায পৰত্তো মানো, রাগো এৰ ৰা পোরিসমদোতি কেচি. তং নিমিত্তং. অন্তেপুরিকা রাজোরোধা. সব্বেসং সন্নিৰেসযোগ্যতায ৰেসিযো রূপূপজীৰিনিযো. মণ্ডনং নাম ইধাৰযৰপারিপূরীতি আহ ‘‘অঙ্গপচ্চঙ্গানং পীণভাৰনিমিত্ত’’ন্তি, পরিব্রূহনহেতূতি অত্থো. নটা নাম রঙ্গনটা. নচ্চকা লঙ্ঘকাদযো. ৰিভূসনং সোভাসমুপ্পাদনন্তি আহ ‘‘পসন্নচ্ছৰিৰণ্ণতানিমিত্ত’’ন্তি.

এতং পদং. মোহূপনিস্সযপ্পহানত্থন্তি মোহস্স উপনিস্সযতাপহানায. দৰা হি মোহেন হোতি, মোহঞ্চ ৰড্ঢেতীতি তস্সা ৰজ্জনেন মোহস্স অনুপনিস্সযতা. দোসূপনিস্সযপ্পহানত্থন্তি ইদং বলমদস্স, পুরিসমদস্স চ দোসহেতুনো ৰসেন ৰুত্তং, ইতরস্স পন ৰসেন ‘‘রাগূপনিস্সযপ্পহানত্থ’’ন্তি ৰত্তব্বং. মণ্ডনৰিভূসনপটিক্খেপো সিযা মোহূপনিস্সযপ্পহানাযপি, রাগূপনিস্সযতায পন উজুপটিপক্খোতি ৰুত্তং ‘‘রাগূপনিস্সযপ্পহানত্থ’’ন্তি. যদিপি একচ্চস্স দৰমদে আরব্ভ পরস্স পটিঘসংযোজনাদীনং উপ্পত্তি হোতিযেৰ মনোপদোসিকদেৰাদীনং ৰিয, অত্তনো পন দৰমদে আরব্ভ যেসং সৰিসেসং রাগমোহমানাদযো পাপধম্মা উপ্পজ্জন্তি. তে সন্ধায ‘‘অত্তনো সংযোজনুপ্পত্তিপটিসেধনত্থ’’ন্তি ৰত্ৰা মণ্ডনৰিভূসনানি পটিচ্চ সৰিসেসং পরস্সপি রাগমোহাদযো পৰত্তন্তীতি ‘‘পরস্সপি সংযোজনুপ্পত্তিপটিসেধনত্থ’’ন্তি ৰুত্তং. অযোনিসো পটিপত্তিযাতি এত্থ কামসুখল্লিকানুযোগং মুঞ্চিত্ৰা সব্বাপি মিচ্ছাপটিপত্তি অযোনিসো পটিপত্তি. পুরিমেহি দ্ৰীহি পদেহি অযোনিসো পটিপত্তিযা, পচ্ছিমেহি দ্ৰীহি কামসুখল্লিকানুযোগস্স পহানং ৰুত্তন্তি ৰদন্তি. ‘‘চতূহিপি চেতেহী’’তি পন ৰচনতো সব্বেহি উভিন্নম্পি পহানং ৰুত্তন্তি ৰেদিতব্বং. কামকীল়াপি দৰন্তোগধা হোতিযেৰ, পুরিসমদোপি কামসুখল্লিকানুযোগস্স হেতুযেৰাতি.

চাতুমহাভূতিকস্সাতি চতুমহাভূতে সন্নিস্সিতস্স. রূপকাযস্সাতি চতুসন্ততিরূপসমূহস্স. ঠিতিযাতি ঠিতত্থং. সা পনস্স ঠিতি পবন্ধৰসেন ইচ্ছিতাতি আহ ‘‘পবন্ধট্ঠিতত্থ’’ন্তি. পৰত্তিযাতি জীৰিতিন্দ্রিযপ্পৰত্তিযা. তথা হি জীৰিতিন্দ্রিযং ‘‘যাপনা ৰত্তনা’’তি (ধ. স. ১৯, ৬৩৪) চ নিদ্দিট্ঠং. তস্সা চ অৰিচ্ছেদো আহারূপযোগেন হোতি. কাযস্স চিরতরং যাৰ আযুকপ্পো, তাৰ অৰত্থানং যাপনাতি দস্সেন্তো ‘‘চিরকালট্ঠিতত্থং ৰা’’তি আহ. ইদানি ৰুত্তমেৰত্থং পাকটতরং কাতুং ‘‘ঘরূপত্থম্ভমিৰা’’তিআদি ৰুত্তং. তত্থাযং যোজনা – যথা জিণ্ণঘরসামিকো ঘরস্স উপত্থম্ভনং করোতি তস্স অপতনত্থং, যথা চ সাকটিকো অক্খব্ভঞ্জনং করোতি তস্স সম্পৰত্তনত্থং, এৰমেস যোগী কাযস্স ঠিতত্থং, যাপনত্থঞ্চ পিণ্ডপাতং পটিসেৰতি পরিভুঞ্জতীতি. এতেন ঠিতি নাম অপতনং যাপনা পৰত্তীতি দস্সেতি. ন দৰমদমণ্ডনৰিভূসনত্থন্তি ইদং ‘‘যাৰদেৰা’’তি অৰধারণেন নিৰত্তিতত্থদস্সনং. তিট্ঠন্তি উপাদিন্নধম্মা এতাযাতি ঠিতি, আযূতি আহ ‘‘ঠিতীতি জীৰিতিন্দ্রিযস্সেতং অধিৰচন’’ন্তি. তথা হি তং আযু ‘‘ঠিতী’’তি নিদ্দিট্ঠং, ঠিতিযা যাপনাযাতি কাযস্স ঠিতিহেতুতায ‘‘ঠিতী’’তি লদ্ধৰোহারস্স জীৰিতিন্দ্রিযস্স পৰত্তনত্থন্তি অত্থো. তেনাহ ‘‘জীৰিতিন্দ্রিযপৰত্তাপনত্থ’’ন্তি. আবাধট্ঠেনাতি ৰিবাধনট্ঠেন, রোগট্ঠেন ৰা. জিঘচ্ছাপরমা হি রোগা. উপরমত্থন্তি ৰূপসমত্থং. ৰণালেপনমিৰ ৰণিকো. উণ্হসীতাদীসু অভিভৰন্তেসু তপ্পটিকারং সীতুণ্হং ৰিয পটিসেৰতীতি সম্বন্ধো. মগ্গব্রহ্মচরিযং ঠপেত্ৰা সিক্খত্তযসঙ্গহা সাসনাৰচরিতব্বা অনুসাসনী সাসনব্রহ্মচরিযন্তি আহ ‘‘সকলসাসনব্রহ্মচরিযস্স চ মগ্গব্রহ্মচরিযস্স চা’’তি. অনুগ্গহণত্থন্তি অনু অনু গণ্হনত্থং সম্পাদনত্থং. কাযবলং নিস্সাযাতি যথাসমারদ্ধং গুণৰিসেসপারিপূরিহেতুভূতং কাযবলমত্তং নিস্সায. তেনাহ ‘‘সিক্খত্তযানুযোগৰসেনা’’তিআদি. কন্তারনিত্থরণত্থিকা জাযম্পতিকা, নদীসমুদ্দনিত্থরণত্থিকা চ পুত্তমংসাদীনি যথা অগিদ্ধা অমুচ্ছিতা কেৰলং তং তং অত্থসিদ্ধিমেৰ অৰেক্খন্তা পটিসেৰন্তি তেহি ৰিনা অসিজ্ঝনতো, এৰমযম্পি কেৰলং ভৰকন্তারনিত্থরণত্থিকো অগিদ্ধো অমুচ্ছিতো তেন ৰিনা অসিজ্ঝনতো পিণ্ডপাতং পটিসেৰতীতি উপমাসংসন্দনং.

ইতীতি পকারত্থে নিপাতপদং. তেন পটিসেৰিযমানস্স পিণ্ডপাতস্স পটিসেৰনাকারো গয্হতীতি আহ ‘‘এৰং ইমিনা পিণ্ডপাতপটিসেৰনেনা’’তি. পুরাণন্তি ভোজনতো পুরিমকালিকত্তা পুরাতনং. পটিহঙ্খামীতি পটিহনিস্সামি. নৰঞ্চ ৰেদনং ন উপ্পাদেস্সামীতি পটিসেৰতীতি যোজনা. কীদিসং, কথঞ্চাতি আহ ‘‘অপরিমিত…পে… অঞ্ঞতরো ৰিযা’’তি. অপরিমিতং অপরিমাণং ভোজনং পচ্চযো এতিস্সাতি অপরিমিতভোজনপচ্চযা, তং অপরিমিতভোজনপচ্চযং অত্তনো গহণীতেজপমাণতো অতিক্কন্তপমাণভোজনহেতুকন্তি অত্থো. যো বহুং ভুঞ্জিত্ৰা অত্তনো ধম্মতায উট্ঠাতুং অসক্কোন্তো ‘‘আহর হত্থ’’ন্তি ৰদতি, অযং আহরহত্থকো. যো ভুঞ্জিত্ৰা অচ্চুদ্ধুমাতকুচ্ছিতায উট্ঠিতোপি সাটকং নিৰাসেতুং ন সক্কোতি, অযং অলংসাটকো. যো ভুঞ্জিত্ৰা উট্ঠাতুং অসক্কোন্তো তত্থেৰ পরিৰত্ততি, অযং তত্রৰট্টকো. যো যথা কাকেহি আমসিতুং সক্কা, এৰং যাৰ মুখদ্ৰারং আহারেতি, অযং কাকমাসকো. যো ভুঞ্জিত্ৰা মুখে সন্ধারেতুং অসক্কোন্তো তত্থেৰ ৰমতি, অযং ভুত্তৰমিতকো. এতেসং অঞ্ঞতরো ৰিয. অথ ৰা পুরাণৰেদনা নাম অভুত্তপচ্চযা উপ্পজ্জনকৰেদনা. তং ‘‘পটিহনিস্সামী’’তি পটিসেৰতি. নৰৰেদনা নাম অতিভুত্তপচ্চযেন উপ্পজ্জনকৰেদনা. তং ‘‘ন উপ্পাদেস্সামী’’তি পটিসেৰতি. অথ ৰা নৰৰেদনা নাম অভুত্তপচ্চযেন উপ্পজ্জনকৰেদনা, তস্সা অনুপ্পন্নায অনুপ্পজ্জনত্থমেৰ পটিসেৰতি. অভুত্তপচ্চযা উপ্পজ্জনকাতি চেতং খুদ্দায ৰিসেসনং. যস্সা অপ্পৰত্তি ভোজনেন কাতব্বা, তস্সা দস্সনত্থং. অভুত্তপচ্চযেন, ভুত্তপচ্চযেন চ উপ্পজ্জনকানুপ্পজ্জনকৰেদনাসু পুরিমা যথাপৰত্তা জিঘচ্ছানিমিত্তা ৰেদনা. সা হি অভুঞ্জন্তস্স ভিয্যোপৰড্ঢনৰসেন উপ্পজ্জতি. পচ্ছিমাপি খুদ্দানিমিত্তাৰ অঙ্গদাহসূলাদিৰেদনা পৰত্তা. সা হি ভুত্তপচ্চযা পুব্বে অনুপ্পন্নাৰ নুপ্পজ্জিস্সতীতি অযমেতাসং ৰিসেসো. ৰিহিংসানিমিত্ততা চেতাসং ৰিহিংসায ৰিসেসো.

যা ৰেদনা. অধুনাতি এতরহি. অসপ্পাযাপরিমিতভোজনং নিস্সাযাতি অসপ্পাযাপরিমিতস্স আহারস্স ভুঞ্জনপযোগং আগম্ম উপ্পজ্জতীতি অত্থো. পুরাণকম্মপচ্চযৰসেনাতি পুব্বে পুরিমজাতিযং কতত্তা পুরাণস্স কম্মস্স পচ্চযতাৰসেন পযোগৰিপত্তিং আগম্ম উপ্পজ্জনারহতায তং ৰজ্জেত্ৰা পযোগসম্পত্তিযা উপট্ঠাপনং দুক্খৰেদনাপচ্চযঘাতো, পটিহননঞ্চ হোতীতি আহ ‘‘তস্সা পচ্চযং ৰিনাসেন্তো তং পুরাণঞ্চ ৰেদনং পটিহঙ্খামী’’তি. অযুত্তপরিভোগো পচ্চযে অপচ্চৰেক্খিত্ৰা পরিভোগো. সো এৰ কতূপচিতকম্মতায কম্মূপচযো. তং নিস্সায পটিচ্চ আযতিং অনাগতে কালে উপ্পজ্জনতো যা চাযং ‘‘নৰৰেদনা’’তি ৰুচ্চতীতি যোজনা. যুত্তপরিভোগৰসেনাতি পচ্চৰেক্খিত্ৰা পচ্চযানং পরিভোগৰসেন, তস্সা নৰৰেদনায মূলং অযুত্তপরিভোগকম্মং অনিব্বত্তেন্তো সব্বেন সব্বং অনুপ্পাদেন্তো. এত্তাৰতাতি ‘‘ইতি পুরাণ’’ন্তিআদিনা ৰুত্তেন পদদ্ৰযেন. ‘‘ৰিহিংসূপরতিযা’’তিআদিনা ৰা পদচতুক্কেন যুত্তপরিভোগসঙ্গহো পব্বজিতানুচ্ছৰিকস্স পচ্চযপরিভোগস্স ৰুত্তত্তা. অত্তকিলমথানুযোগপ্পহানং জিঘচ্ছাদিদুক্খপটিঘাতস্স ভাসিতত্তা. ঝানসুখাদীনং পচ্চযভূতস্স কাযসুখস্স অৰিস্সজ্জনতো ধম্মিকসুখাপরিচ্চাগো চ দীপিতো হোতি.

অসপ্পাযাপরিমিতূপযোগেন জীৰিতিন্দ্রিযুপচ্ছেদকো, ইরিযাপথভঞ্জনকো ৰা সিযা পরিস্সযো, সপ্পাযপরিমিতূপযোগেন পন সো ন হোতি. তথা সতি চিরকালপ্পৰত্তিসঙ্খাতা সরীরস্স যাত্রা যাপনা ভৰিস্সতীতি ইমমত্থং দস্সেন্তো ‘‘পরিমিতপরিভোগেন…পে… ভৰিস্সতী’’তি আহ. যো রোগো সাদ্ধো অসাদ্ধো চ ন হোতি, সো যাপ্যরোগো, সো এতস্স অত্থীতি যাপ্যরোগী. সো হি নিচ্চকালং ভেসজ্জং উপসেৰতি, তথা অযম্পীতি. যদি যাত্রাপি যাপনা, পুব্বেপি ‘‘যাপনাযা’’তি ৰুত্তং, কো এত্থ ৰিসেসোতি? পুব্বে ‘‘যাপনাযা’’তি জীৰিতিন্দ্রিযযাপনা অধিপ্পেতা, ইধ পন চতুন্নম্পি ইরিযাপথানং অৰিচ্ছেদসঙ্খাতা যাপনা যাত্রাতি অযমেত্থ ৰিসেসো. বুদ্ধপটিকুট্ঠেন মিচ্ছাজীৰেন পচ্চযপরিযেসনা অযুত্তপরিযেসনা. দাযকদেয্যধম্মানং, অত্তনো চ পমাণং অজানিত্ৰা পটিগ্গহণং, সদ্ধাদেয্যৰিনিপাতনত্থং ৰা পটিগ্গহণং অযুত্তপটিগ্গহণং, যেন ৰা আপত্তিং আপজ্জতি. অপচ্চৰেক্খিত্ৰা পরিভোগো অযুত্তপরিভোগো. তেসং পরিৰজ্জনং ধম্মেন সমেন পচ্চযুপ্পাদনাদিৰসেন ৰেদিতব্বং. ধম্মেন হি পচ্চযে পরিযেসিত্ৰা ধম্মেন পটিগ্গহেত্ৰা পচ্চৰেক্খিত্ৰা পরিভুঞ্জনং অনৰজ্জতা নাম.

অরতীতি উক্কণ্ঠা. পন্তসেনাসনেসু, অধিকুসলধম্মেসু চ অনভিরতি. তন্দীতি পচলাযিকা নিদ্দা. ৰিজম্ভিতাতি থিনমিদ্ধাভিভৰেন কাযস্স ৰিজম্ভনা. ৰিঞ্ঞূহি গরহা ৰিঞ্ঞূগরহা. একচ্চো হি অনৰজ্জংযেৰ সাৰজ্জং করোতি, ‘‘লদ্ধং মে’’তি পমাণাধিকং ভুঞ্জিত্ৰা তং জীরাপেতুং অসক্কোন্তো উদ্ধংৰিরেচনঅধোৰিরেচনাদীহি কিলমতি, সকলৰিহারে ভিক্খূ তস্স সরীরপটিজগ্গনভেসজ্জপরিযেসনাপসুতা হোন্তি. অঞ্ঞে তে ‘‘কিং ইদ’’ন্তি পুচ্ছিত্ৰা ‘‘অসুকস্স উদরং উদ্ধুমাত’’ন্তিআদীনি সুত্ৰা ‘‘নিচ্চকালমেস এৰংপকতিকো অত্তনো কুচ্ছিপমাণং নাম ন জানাতী’’তি নিন্দন্তি, এৰং অনৰজ্জংযেৰ সাৰজ্জং করোতি. এৰং অকত্ৰা ‘‘অনৰজ্জতা চ ভৰিস্সতী’’তি পটিসেৰতি. অত্তনো হি পকতিঅগ্গিবলাদিং জানিত্ৰা ‘‘এৰং মে অরতিআদীনং অভাৰেন কাযসুখতা, অগরহিতব্বতা চ ভৰিস্সতী’’তি পমাণযুত্তমেৰ পটিসেৰতি. যাৰতকো ভোজনেন অত্থো, তস্স সাধনেন যাৰদত্থং উদরস্স পরিপূরণেন উদরাৰদেহকং ভোজনং যাৰদত্থউদরাৰদেহকভোজনং, তস্স পরিৰজ্জনেন. সেয্যায সযনেন লদ্ধব্বসুখং সেয্যসুখং, উভোহি পস্সেহি সম্পরিৰত্তনকং সযন্তস্স উপ্পজ্জনসুখং পস্সসুখং, মিদ্ধেন নিদ্দাযনেন উপ্পজ্জনসুখং মিদ্ধসুখং, তেসং সেয্য…পে… সুখানং পহানতো চতুন্নং ইরিযাপথানং যোগ্যভাৰস্স পটিপাদনং কাযস্স চতুইরিযাপথযোগ্যভাৰপটিপাদনং, ততো. সুখো ইরিযাপথৰিহারো ফাসুৰিহারো. পচ্ছিমে ৰিকপ্পে, সব্বৰিকপ্পেসু ৰা ৰুত্তং ফাসুৰিহারলক্খণং আগমেন সমত্থেতুং ‘‘ৰুত্তম্পি হেত’’ন্তিআদি ৰুত্তং. তীসুপি ৰিকপ্পেসু আহারস্স ঊনপরিভোগৰসেনেৰ হি ফাসুৰিহারো ৰুত্তোতি.

এত্তাৰতাতি ‘‘যাত্রা’’তিআদিনা ৰুত্তেন পদত্তযেন. ‘‘যাত্রা চ মে ভৰিস্সতী’’তি পযোজনপরিগ্গহদীপনা. যাত্রা হি নং আহারূপযোগং পযোজেতীতি. ধম্মিকসুখাপরিচ্চাগহেতুকো ফাসুৰিহারো মজ্ঝিমা পটিপদা অন্তদ্ৰযপরিৰজ্জনতো. ইমস্মিং পন ঠানে অট্ঠ অঙ্গানি সমোধানেতব্বানি – ‘‘নেৰ দৰাযা’’তি একং অঙ্গং, ‘‘ন মদাযা’’তি একং, ‘‘ন মণ্ডনাযা’’তি একং, ‘‘ন ৰিভূসনাযা’’তি একং, ‘‘যাৰদেৰ ইমস্স কাযস্স ঠিতিযা যাপনাযা’’তি একং, ‘‘ৰিহিংসূপরতিযা ব্রহ্মচরিযানুগ্গহাযা’’তি একং, ‘‘ইতি পুরাণঞ্চ ৰেদনং পটিহঙ্খামি, নৰঞ্চ ৰেদনং ন উপ্পাদেস্সামী’’তি একং, ‘‘যাত্রা চ মে ভৰিস্সতী’’তি একং. ‘‘অনৰজ্জতা চ ফাসুৰিহারো চা’’তি অযমেত্থ ভোজনানিসংসো. মহাসিৰত্থেরো পনাহ ‘‘হেট্ঠা চত্তারি অঙ্গানি পটিক্খেপো নাম, উপরি পন অট্ঠঙ্গানি সমোধানেতব্বানী’’তি. তত্থ ‘‘যাৰদেৰ ইমস্স কাযস্স ঠিতিযা’’তি একং অঙ্গং, ‘‘যাপনাযা’’তি একং, ‘‘ৰিহিংসূপরতিযা’’তি একং, ‘‘ব্রহ্মচরিযানুগ্গহাযা’’তি একং, ‘‘ইতি পুরাণঞ্চ ৰেদনং পটিহঙ্খামী’’তি একং, ‘‘নৰঞ্চ ৰেদনং ন উপ্পাদেস্সামী’’তি একং, ‘‘যাত্রা চ মে ভৰিস্সতী’’তি একং, ‘‘অনৰজ্জতা চা’’তি একং. ফাসুৰিহারো পন ভোজনানিসংসোতি. এৰং অট্ঠঙ্গসমন্নাগতং আহারং আহারেন্তো পটিসঙ্খা যোনিসো পিণ্ডপাতং পটিসেৰতি নাম.

যত্থ যত্থাতি ভুম্মনিদ্দেসেন সেন-সদ্দস্স অধিকরণত্থৰুত্তিমাহ. তথা আসন-সদ্দস্সাতি. অড্ঢযোগাদিম্হীতি আদি-সদ্দেন পাসাদাদিং, মঞ্চাদিঞ্চ সঙ্গণ্হাতি. যত্থ যত্থ ৰিহারে ৰা অড্ঢযোগাদিম্হি ৰা আসতীতি ৰিহারঅড্ঢযোগাদিকে আনেত্ৰা সম্বন্ধিতব্বং. ইধ আদি-সদ্দেন পীঠসন্থতাদীনম্পি সঙ্গহো ৰেদিতব্বো. পরিসহনট্ঠেনাতি অভিভৰনট্ঠেন, ৰিবাধনট্ঠেনাতি অত্থো. উতুযেৰ উতুপরিস্সযোতি সীতুণ্হাদিউতুযেৰ অসপ্পাযো ৰুত্তনযেন উতুপরিস্সযো. তস্স উতুপরিস্সযস্স ৰিনোদনত্থং, অনুপ্পন্নস্স অনুপ্পাদনত্থং, উপ্পন্নস্স ৰূপসমনত্থঞ্চাতি অত্থো. নানারম্মণতো পটিসংহরিত্ৰা কম্মট্ঠানভূতে একস্মিংযেৰ আরম্মণে চিত্তস্স সম্মদেৰ লযনং পটিসল্লানং, তত্থ আরামো অভিরতি পটিসল্লানারামো, তদত্থং. সেনাসনং হি ৰিৰিত্তং যোগিনো ভাৰনানুকূলং সুঞ্ঞাগারভাৰতো. তং পনেতং অত্থদ্ৰযং ৰিভাৰেতুং ‘‘যো সরীরাবাধচিত্তৰিক্খেপকরো’’তিআদি ৰুত্তং. তত্থ একীভাৰসুখত্থন্তি একীভাৰহেতুকং সুখং একীভাৰসুখং, তদত্থং. গণসঙ্গণিককিলেসসঙ্গণিকাভাৰেন উপ্পজ্জনকসুখং.

যদি উতুযেৰ উতুপরিস্সযো, ‘‘উতু চ সীতুণ্হ’’ন্তি সীতুণ্হপটিঘাতং ৰত্ৰা উতুপরিস্সযৰিনোদনং কস্মা ৰুত্তন্তি চোদনং সন্ধাযাহ ‘‘কামঞ্চা’’তিআদি. তত্থ ‘‘নিযতং উতুপরিস্সযৰিনোদন’’ন্তি এতেন ‘‘সীতস্স পটিঘাতায উণ্হস্স পটিঘাতাযা’’তি এত্থ ৰুত্তং সীতুণ্হং অনিযতং কদাচি কদাচি উপ্পজ্জনকং, উতুপরিস্সযো পন সব্বদাভাৰী অধিপ্পেতোতি দস্সেতি. ৰুত্তপ্পকারোতি ‘‘সীতাদিকো, অসপ্পাযো’’তি চ এৰং ৰুত্তপ্পকারো ৰিৰটঙ্গণরুক্খমূলাদীসু নিসিন্নস্স অপরিগুত্তিযা অসংৰুতদ্ৰারাদিতায পাকটপরিস্সযা, অসপ্পাযরূপদস্সনাদিনা অপাকটপরিস্সযা চ ভিক্খুস্স কাযচিত্তানং আবাধং করেয্যুং. যত্থ গুত্তে সেনাসনে আবাধং ন করোন্তি. এৰং জানিত্ৰাতি উভযপরিস্সযরহিতন্তি এৰং ঞত্ৰা পটিসেৰন্তো ভিক্খু ৰেদিতব্বোতি সম্বন্ধো.

ধাতুক্খোভলক্খণস্স, তংহেতুকদুক্খৰেদনালক্খণস্স ৰা রোগস্স পটিপক্খভাৰো পটিঅযনট্ঠো. তেনাহ ‘‘পচ্চনীকগমনট্ঠেনাতি অত্থো’’তি, ৰূপসমনট্ঠেনাতি ৰুত্তং হোতি. যস্স কস্সচীতি সপ্পিআদীসু যস্স কস্সচি. সপ্পাযস্সাতি হি তস্স ৰিকারৰূপসমেনাতি অধিপ্পাযো. ভিসক্কস্স কম্মং তেন ৰিধাতব্বতো. তেনাহ ‘‘তেন অনুঞ্ঞাতত্তা’’তি. নগরপরিক্খারেহীতি নগরং পরিৰারেত্ৰা রক্খণকেহি. ৰিৰটপরিক্খেপো পরিক্খা উড্ডাপো পাকারো এসিকা পলিঘো পাকারপত্থণ্ডিলন্তি সত্ত ‘‘নগরপরিক্খারা’’তি ৰদন্তি. সীলপরিক্খারোতি সুৰিসুদ্ধসীলালঙ্কারো. অরিযমগ্গো হি ইধ ‘‘রথো’’তি অধিপ্পেতো. তস্স চ সম্মাৰাচাদযো অলঙ্কারট্ঠেন ‘‘পরিক্খারো’’তি ৰুত্তা. জীৰিতপরিক্খারাতি জীৰিতস্স পৰত্তিকারণানি. সমুদানেতব্বাতি সম্মা উদ্ধং উদ্ধং আনেতব্বা পরিযেসিতব্বা. পরিৰারোপি হোতি অন্তরাযানং পরিতো ৰারণতো. তেনাহ ‘‘জীৰিত…পে… রক্খণতো’’তি.

তত্থ অন্তরন্তি ৰিৰরং, ওকাসোতি অত্থো. ৰেরিকানং অন্তরং অদত্ৰা অত্তনো সামিকানং পরিৰারেত্ৰা ঠিতসেৰকা ৰিয রক্খণতো. অস্সাতি জীৰিতস্স. কারণভাৰতোতি চিরপ্পৰত্তিযা কারণভাৰতো. রসাযনভূতং হি ভেসজ্জং সুচিরম্পি কালং জীৰিতং পৰত্তেতিযেৰ. যদিপি অনুপ্পন্না এৰ দুক্খৰেদনা ভেসজ্জপরিভোগেন পটিহঞ্ঞন্তি, ন উপ্পন্না তাসং সরসেনেৰ ভিজ্জনতো, উপ্পন্নসদিসা পন ‘‘উপ্পন্না’’তি ৰুচ্চন্তি. ভৰতি হি তংসদিসেসু তব্বোহারো, যথা সা এৰ তিত্তিরি, তানিযেৰ ওসধানীতি. তস্মা ৰুত্তং ‘‘উপ্পন্নানন্তি জাতানং ভূতানং নিব্বত্তান’’ন্তি. সঞ্চযতো পট্ঠায সো ধাতুক্খোভো সমুট্ঠানং এতেসন্তি তংসমুট্ঠানা. ‘‘দুক্খৰেদনা’’তি ৰত্ৰা সা অকুসলসভাৰাপি অত্থীতি ততো ৰিসেসেতুং ‘‘অকুসলৰিপাকৰেদনা’’তি ৰুত্তং. ব্যাবাধনট্ঠেন ব্যাবাধো, ব্যাবাধোৰ ব্যাবজ্ঝং, দুক্খন্তি অত্থো. নত্থি এত্থ ব্যাবজ্ঝন্তি অব্যাবজ্ঝং, নিদ্দুক্খতা. তেনাহ ‘‘অব্যাবজ্ঝপরমতাযা’’তি নিদ্দুক্খপরমতাযাতি. তং দুক্খন্তি রোগনিমিত্তকং দুক্খং.

চীৰরাদীনং পচ্চযানং নিস্সযনং পরিভোগো এৰাতি দস্সেতুং ‘‘তে পটিচ্চ নিস্সাযা’’তি ৰত্ৰা ‘‘পরিভুঞ্জমানা’’তি ৰুত্তং. পৰত্তন্তীতি জীৰন্তি. জীৰনম্পি হি পৰত্তনং, যতো জীৰিতিন্দ্রিযং ‘‘পৰত্তনরস’’ন্তি ৰুচ্চতি.

চতুপারিসুদ্ধিসম্পাদনৰিধিৰণ্ণনা

১৯. এৰং পাতিমোক্খসংৰরাদিভেদেন নিদ্দিট্ঠং সীলং পুন সাধনৰিভাগেন দস্সেতুং ‘‘এৰমেতস্মি’’ন্তিআদিমারদ্ধং. তত্থ সাধীযতি সম্পাদিযতি এতেনাতি সাধনং, সদ্ধা সাধনং এতস্সাতি সদ্ধাসাধনো. ননু চ ৰীরিযসতিপঞ্ঞাহিপি ৰিনা পাতিমোক্খসংৰরো ন সিজ্ঝতীতি? সচ্চং ন সিজ্ঝতি, সদ্ধায পন ৰিসেসহেতুভাৰং সন্ধায এৰং ৰুত্তন্তি দস্সেন্তো আহ

‘‘সাৰকৰিসযাতীতত্তা সিক্খাপদপঞ্ঞত্তিযা’’তি. গরুকলহুকাদিভেদে ওতিণ্ণে ৰত্থুস্মিং তস্স তস্স অপরাধস্স অনুরূপং সিক্খাপদপঞ্ঞাপনং নাম সাৰকানং অৰিসযো, বুদ্ধানং এৰ ৰিসযো. সিক্খাপদপঞ্ঞাপনং তাৰ তিট্ঠতু, তস্স কালোপি নাম সাৰকানং অৰিসযো, বুদ্ধানং এৰ ৰিসযোতি দস্সেন্তো ‘‘সিক্খাপদপঞ্ঞত্তিযাচনপটিক্খেপো চেত্থ নিদস্সন’’ন্তি আহ. তথা হি ৰুত্তং ‘‘আগমেহি ত্ৰং সারিপুত্ত, আগমেহি ত্ৰং সারিপুত্ত, তথাগতোৰ তত্থ কালং জানিস্সতী’’তি (পারা. ২১). তত্থ চ-সদ্দো সমুচ্চযত্থো. তেন ‘‘অপঞ্ঞত্তং ন পঞ্ঞপেম, পঞ্ঞত্তং ন সমুচ্ছিন্দাম, যথাপঞ্ঞত্তেসু সিক্খাপদেসু সমাদায ৰত্তামা’’তি (পারা. ৫৬৫) এৰমাদীনং সঙ্গহো দট্ঠব্বো. সদ্ধাযাতি সদ্দহনেন সত্থরি, ধম্মে চ সদ্ধায পচ্চুপট্ঠাপনেন. জীৰিতেপি পগেৰ জীৰিতপরিক্খারেতি অধিপ্পাযো.

কিকীৰ অণ্ডন্তি কিকীসকুণিকা ৰিয অত্তনো অণ্ডং. সা কির জীৰিতম্পি পরিচ্চজিত্ৰা অণ্ডমেৰ রক্খতি. চমরীৰ ৰালধিন্তি চমরীমিগো ৰিয অত্তনো ৰালধিং. চমরীমিগা কির ব্যাধেন পরিপাতিযমানা জীৰিতম্পি পরিচ্চজিত্ৰা কণ্ডকগুম্বাদীসু লগ্গং অত্তনো ৰালমেৰ রক্খন্তি. পিযংৰ পুত্তং এককন্তি আনেত্ৰা সম্বন্ধিতব্বং. যথা হি একপুত্তকো কুটুম্বিকো তং একপুত্তং, একনযনো চ তং একনযনং সুট্ঠুতরং রক্খতি. তথেৰ সীলং অনুরক্খমানকাতি অনুকম্পনৰসেন ৰুত্তং. সুপেসলাতি সুট্ঠু পিযসীলা. সদা সব্বকালং দহরমজ্ঝিমথেরকালেসু. ছন্নম্পি গারৰানং ৰসেন সগারৰা, গরুকারৰন্তোতি অত্থো.

এৰমেৰ খোতি যথা মহাসমুদ্দো ঠিতধম্মো ৰেলং নাতিক্কমতি, এৰমেৰ. মম সাৰকাতি অরিযসাৰকে সন্ধাযাহ. তে হি ধুৰসীলা. ইমস্মিং অত্থেতি জীৰিতহেতুপি সীলস্স অৰীতিক্কমনে.

মহাৰত্তনিঅটৰী নাম ৰিঞ্ঝাটৰী. হিমৰন্তপস্সে অটৰীতি কেচি. থেরন্তি নামগোত্তৰসেন অপঞ্ঞাতং একং থেরং. নিপজ্জাপেসুং গন্ত্ৰা কস্সচি মা আরোচেয্যাতি.

পূতিলতাযাতি গল়োচিলতায. সমসীসীতি জীৰিতসমসীসী. যস্স হি কিলেসসীসং অৰিজ্জং মগ্গপটিপাটিযা অরহত্তমগ্গো পরিযাদিযতি, ততো একূনৰীসতিমে পচ্চৰেক্খণঞাণে পতিট্ঠায ভৰঙ্গোত্তরণে ৰট্টসীসং জীৰিতিন্দ্রিযং চুতিচিত্তং পরিযাদিযতি, সো ইমায ৰারসমতায ‘‘জীৰিতসমসীসী’’তি ৰুচ্চতি. সো চ থেরো তথা পরিনিব্বাযি. তেন ৰুত্তং ‘‘সমসীসী হুত্ৰা পরিনিব্বাযী’’তি. অভযত্থেরো কির মহাভিঞ্ঞো. তস্মা চেতিযং কারাপেসীতি ৰদন্তি. অপ্পেৰাতি অপ্পেৰ নাম অত্তনো জীৰিতম্পি জহেয্য, ন ভিন্দেতি ন ভিন্দেয্য, ন ৰীতিক্কমেয্য.

সতিযা অধিট্ঠিতানন্তি পগেৰ উপট্ঠিতায সতিযা আরক্খৰসেন অধিট্ঠিতানং ইন্দ্রিযানং. অনন্ৰাস্সৰনীযতোতি দ্ৰারভাৰেন অভিজ্ঝাদীহি অননুবন্ধিতব্বতো. ৰরন্তি সেট্ঠং. তত্তাযাতি উণ্হায. আদিত্তাযাতি আদিতো পট্ঠায দিত্তায. সম্পজ্জলিতাযাতি সমন্ততো জলন্তিযা. সজোতিভূতাযাতি একজালীভূতায. সম্পলিমট্ঠন্তি সব্বসো আমট্ঠং, অঞ্চিতন্তি অত্থো. ন ত্ৰেৰ ৰরন্তি আনেত্ৰা সম্বন্ধিতব্বং. রূপেসূতি রূপারম্মণেসু. অনুব্যঞ্জনসো নিমিত্তগ্গাহোতি কিলেসানং অনু অনু ব্যঞ্জনৰসেন উপ্পাদনেন পাকটীকরণৰসেন সুভাদিনিমিত্তগ্গাহো, অথ ৰা অনুব্যঞ্জনসোতি হত্থপাদাদিঅনুব্যঞ্জনতো, নিমিত্তগ্গাহোতি ইত্থিপুরিসাদিসুভাদিনিমিত্তগ্গহণং. চক্খুদ্ৰারাদিপৰত্তস্সাতি চক্খুদ্ৰারাদীহি পৰত্তস্স. ৰিঞ্ঞাণস্সাতি জৰনৰিঞ্ঞাণস্স. নিমিত্তাদিগ্গাহং নিসেধেন্তেন সম্পাদেতব্বোতি সম্বন্ধো. অসংৰিহিতসাখাপরিৰারন্তি সম্মা অৰিহিতৰতিপরিক্খেপং. পরস্সহারীহীতি পরসন্তকাৰহারকেহি চোরেহি. সমতিৰিজ্ঝতীতি সব্বসো অতিৰিজ্ঝতি অনুপৰিসতি.

রূপেসূতি রূপহেতু রূপনিমিত্তং. উপ্পজ্জনকঅনত্থতো রক্খ ইন্দ্রিযন্তি সম্বন্ধো. এৰং সেসেসু. এতে হি দ্ৰারাতি এতে চক্খাদিদ্ৰারা. সতিকৰাটেন অসংৰুতত্তা ৰিৰটা. ততো এৰ অরক্খিতা. কিলেসুপ্পত্তিযা হেতুভাৰেন তংসমঙ্গিনং হনন্তীতি কারণূপচারেনেৰ ৰুত্তং. এতে ৰা রূপাদযো. কিলেসানং আরম্মণভূতা দ্ৰারা চক্খাদিদ্ৰারা. তে কীদিসা ৰিৰটা অরক্খিতা অসংৰুতচক্খাদিহেতুং তংসমঙ্গিনং হনন্তীতি কারণূপচারেনেৰ ৰুত্তং. অগারন্তি গেহং. দুচ্ছন্নন্তি ন সম্মা ছাদিতং. অভাৰিতন্তি লোকুত্তরভাৰনারহিতং.

সম্পাদিতেতিআদিস্স ৰোদানপক্খস্স অত্থো ৰুত্তৰিপরিযাযেন ৰেদিতব্বো. অযং পন সব্বসো কিলেসানং অনুপ্পাদো অতিউক্কট্ঠদেসনা মগ্গেনাগতসদিসত্তা. সম্পাদেতব্বোতি ‘‘ন পুনেৰং করিস্স’’ন্তি অধিট্ঠানসুদ্ধিযা সম্পাদেতব্বো.

অধুনাপব্বজিতেনাতি ন চিরপব্বজিতেন, নৰপব্বজিতেনাতি অত্থো. কামরাগেন ডয্হামীতি কামরাগগ্গিনা পরিডয্হামি. সো চ পন দাহো ইদানি চিত্তগতোতি দস্সেন্তো আহ ‘‘চিত্তং মে পরিডয্হতী’’তি. সাধূতি আযাচনা. নিব্বাপনন্তি তস্স নিব্বাপনুপাযং. গোতমাতি থেরং গোত্তেন আলপতি.

সঞ্ঞায ৰিপরিযেসাতি ‘‘অসুভে সুভ’’ন্তি পৰত্তসঞ্ঞাৰিপরিযেসহেতু ৰিপরীতসঞ্ঞানিমিত্তং. নিমিত্তং পরিৰজ্জেহি কীদিসং? রাগূপসঞ্হিতং রাগুপ্পত্তিহেতুভূতং সুভনিমিত্তং পরিৰজ্জেহি ন মনসি করোহি. ন কেৰলং সুভনিমিত্তস্সামনসিকারো এৰ, অথ খো অসুভভাৰনায অত্তনো চিত্তং ভাৰেহি. কথং? একগ্গং সুসমাহিতং যথা তং অসুভারম্মণে ৰিক্খেপাভাৰেন একগ্গং, সুট্ঠু অপ্পিতভাৰেন সুসমাহিতঞ্চ হোতি, এৰং ভাৰেহীতি. এৰং সমথভাৰনায কামরাগস্স ৰিক্খম্ভনং দস্সেত্ৰা ইদানি সমুচ্ছেদনৰিধিং দস্সেতুং ‘‘সঙ্খারে’’তিআদি ৰুত্তং. তত্থ সঙ্খারে পরতো পস্সাতি সব্বেপি সঙ্খারে অৰিধেয্যকতায ‘‘পরে’’তি পস্স. অনিচ্চতায পন উদযব্বযপটিপীল়িতত্তা দুক্খতো, অনত্তসভাৰত্তা, অত্তৰিরহতো চ নো অত্ততো পস্স. এৰং লক্খণত্তযং আরোপেত্ৰা ৰিপস্সনং ৰড্ঢেন্তো মগ্গপটিপাটিযা চতুত্থমগ্গেন সব্বসো নিব্বাপেহি মহারাগং তেভূমকস্স অভিভৰনতো মহাৰিসযতায মহারাগং ৰূপসমেহি. যথা এতরহি, এৰং মা ডয্হিত্থো পুনপ্পুনন্তি দল়্হতরং রাগৰিনোদনে নিযোজেসি.

এৰং ইন্দ্রিযসংৰরসীলস্স সম্পাদনে ৰিধিং দস্সেত্ৰা এৰং তং সুসম্পাদিতং হোতীতি নযং দস্সেতুং ‘‘অপিচা’’তিআদিনা তত্থ পরিপূরকারিনো থেরে নিদস্সেতি. তত্থ ‘‘লেণং ন উল্লোকিতপুব্ব’’ন্তি ইদং সব্বত্থেৰ থেরস্স যুগমত্তদস্সিতায ৰুত্তং. কিং পন থেরো সেনাসনং ন সোধেতি? ‘‘উল্লোকা পঠমং ওহারেতব্ব’’ন্তি হি ৰুত্তং, অন্তেৰাসিকাদযো এৰ কিরস্স সেনাসনং সোধেন্তি. অস্স নাগরুক্খস্স.

তস্মিং গামেতি মহাগামে. তরুণা থঞ্ঞপিৰনকা পুত্তধীতরো যাসং তা তরুণপুত্তা, তাসং. লঞ্জাপেসীতি থনপট্টিকায থনে বন্ধাপেত্ৰা রাজমুদ্দিকায লঞ্জাপেসি. রাজা থেরং চিরতরং দট্ঠুং কালৰিক্খেপং করোন্তো ‘‘স্ৰে সীলানি গণ্হিস্সামী’’তি আহ. থেরো রঞ্ঞো চ দেৰিযা চ ৰন্দনকালে সত্তাকারমত্তং গণ্হাতি. ইত্থী পুরিসোতি পন ৰিৰেকং ন করোতি. তেনাহ ‘‘ৰৰত্থানং ন করোমী’’তি. ‘‘অহো সুপরিসুদ্ধসীলো ৰতাযং অয্যো’’তি দণ্ডদীপিকং গহেত্ৰা অট্ঠাসি. অতিপরিসুদ্ধং পাকটন্তি সপ্পাযলাভেন কম্মট্ঠানং অতিৰিয পরিসুদ্ধং ৰিভূতং অহোসি. সকলং পব্বতং উন্নাদযন্তোতি পথৰিকম্পনেন সকলং পব্বতং একং নিন্নাদং করোন্তো. তন্নিৰাসিদেৰতানং সাধুকারদানেনাতি কেচি. ভন্তোতি অনৰট্ঠিতো. বালোতি তরুণদারকো. উত্রস্তোতি ঞাতকেহি ৰিনাভাৰেন সন্ত্রস্তো.

ৰিসগণ্ডকরোগোতি থনকন্দল়রোগমাহ. মাসরোগাদিকোপি ৰিসগণ্ডকরোগোতি ৰদন্তি. যতো পব্বজিতো, ততো পট্ঠায পব্বজিতকালতো পভুতীতি অত্থো. ইন্দ্রিযানীতি ইন্দ্রিযসংৰরসীলানি. তেসু হি ভিন্নেসু ইন্দ্রিযানিপি ভিন্নানীতি ৰুচ্চন্তি আরক্খাভাৰতো, ইন্দ্রিযানেৰ ৰা নিমিত্তানুব্যঞ্জনগ্গাহস্স দ্ৰারভূতানি ভিন্নানি নাম তংসমঙ্গিনো অনত্থুপ্পত্তিতো, ৰিপরিযাযতো অভিন্নানীতি ৰেদিতব্বানি. ইন্দ্রিযানং ৰা অযোনিসো উপসংহারো ভেদনং, যোনিসো উপসংহারো অভেদনন্তি অপরে. মিত্তত্থেরোৰাতি মহামিত্তত্থেরো ৰিয. ৰরেতি সেট্ঠে.

তথা ৰীরিযেনাতি তথা-সদ্দেন ৰীরিযং ৰিসেসেতি. যথা সতি অনৰজ্জলক্খণাৰ ইন্দ্রিযসংৰরসাধনং, তথা ৰীরিযং অনৰজ্জলক্খণং আজীৰপারিসুদ্ধিসাধনন্তি. ৰীরিযাপেক্খমেৰ ৰিসেসনং দট্ঠব্বং. তেনেৰাহ ‘‘সম্মাআরদ্ধৰীরিযস্সা’’তি. অযুত্তা এসনা অনেসনা, যথাৰুত্তমিচ্ছাজীৰসঙ্গহা. সা এৰ সত্থুসাসনস্স ন পতিরূপাতি অপ্পতিরূপং, তং অনেসনং অপ্পতিরূপং. অথ ৰা পতিরূপৰিরোধিনী অপ্পতিরূপা, পরিগ্গহিতধুতঙ্গস্স ধুতঙ্গনিযমৰিরোধিনী যস্স কস্সচি সল্লেখৰিকোপিনী পটিপত্তি. ইমস্মিং পক্খে চ-সদ্দো লুত্তনিদ্দিট্ঠো, অনেসনং, অপ্পতিরূপঞ্চ পহাযাতি. পটিসেৰমানেন পরিৰজ্জযতা সম্পাদেতব্বাতি সম্বন্ধো. ‘‘পরিসুদ্ধুপ্পাদে’’তি ইমিনাৰ ধম্মদেসনাদীনং পরিসুদ্ধায সমুট্ঠানতা দীপিতা হোতীতি ‘‘ধম্মদেসনাদীহি চস্স গুণেহি পসন্নান’’ন্তি ৰুত্তং. আদি-সদ্দেন বাহুসচ্চৰত্তপরিপূরণইরিযাপথসম্পত্তিআদীনং গহণং ৰেদিতব্বং. ধুতগুণে চস্স পসন্নানন্তি এত্থাপি এসেৰ নযো. পিণ্ডপাতচরিযাদীহীতি আদি-সদ্দেন মিত্তসুহজ্জপংসুকূলচরিযাদীনং সঙ্গহো দট্ঠব্বো. ধুতঙ্গনিযমানুলোমেনাতি তংতংধুতঙ্গনিযতায পটিপত্তিযা অনুলোমৰসেন, অৰিকোপনৰসেনাতি অত্থো. মহিচ্ছস্সেৰ মিচ্ছাজীৰেন জীৰিকা, ন অপ্পিচ্ছস্স. অপ্পিচ্ছতায উক্কংসগতায মিচ্ছাজীৰস্স অসম্ভৰো এৰাতি দস্সেতুং ‘‘একব্যাধিৰূপসমত্থ’’ন্তিআদি ৰুত্তং. তত্থ পূতিহরিতকীতি পূতিমুত্তপরিভাৰিতং, পূতিভাৰেন ৰা ছড্ডিতং হরিতকং. অরিযৰংসো এতস্স অত্থীতি, অরিযৰংসে ৰা নিযুত্তোতি অরিযৰংসিকো, পচ্চযগেধস্স দূরসমুস্সারিতত্তা উত্তমো চ সো অরিযৰংসিকো চাতি উত্তমঅরিযৰংসিকো. যস্স কস্সচীতি পরিগ্গহিতাপরিগ্গহিতধুতঙ্গেসু যস্স কস্সচি.

নিমিত্তং নাম পচ্চযে উদ্দিস্স যথা অধিপ্পাযো ঞাযতি এৰং নিমিত্তকম্মং. ওভাসো নাম উজুকমেৰ অকথেত্ৰা যথা অধিপ্পাযো ৰিভূতো হোতি, এৰং ওভাসনং. পরিকথা নাম পরিযাযেন কথনং. তথা উপ্পন্নন্তি নিমিত্তাদিৰসেন উপ্পন্নং.

দ্ৰারং দিন্নন্তি রোগসীসেন পরিভোগস্স দ্ৰারং দিন্নং. তস্মা অরোগকালেপি পরিভুঞ্জিতুং ৰট্টতি, আপত্তি ন হোতীতি অত্থো. তেনাহ ‘‘কিঞ্চাপি আপত্তি ন হোতী’’তিআদি. ন ৰট্টতীতি সল্লেখপটিপত্তিযং ঠিতস্স ন ৰট্টতি, সল্লেখং কোপেতীতি অধিপ্পাযো. ‘‘আজীৰং পন কোপেতী’’তি ইমিনাৰ সেনাসনপটিসংযুত্তধুতঙ্গধরস্স নিমিত্তাদযো ন ৰট্টন্তীতি ৰদন্তি. তদঞ্ঞধুতঙ্গধরস্সাপি ন ৰট্টন্তিযেৰাতি অপরে. অকরোন্তোতি যথাসকং অনুঞ্ঞাতৰিসযেপি অকরোন্তো. অঞ্ঞত্রেৰাতি ঠপেত্ৰা এৰ.

গণৰাসং পহায অরঞ্ঞাযতনে পটিপ্পস্সদ্ধিৰিৰেকস্স মুদ্ধভূতায অগ্গফলসমাপত্তিযা ৰিহরন্তো মহাথেরো ‘‘পৰিৰেকং ব্রূহযমানো’’তি ৰুত্তো. উদরসন্নিস্সিতো ৰাতাবাধো উদরৰাতাবাধো. অসম্ভিন্নং খীরং এতস্সাতি অসম্ভিন্নখীরং, তদেৰ পাযাসন্তি অসম্ভিন্নখীরপাযাসং, উদকেন অসম্মিস্সখীরেন পক্কপাযাসন্তি অত্থো. তস্সাতি পাযাসস্স. উপ্পত্তিমূলন্তি ‘‘গিহিকালে মে, আৰুসো, মাতা সপ্পিমধুসক্করাদীহি যোজেত্ৰা অসম্ভিন্নখীরপাযাসং অদাসি, তেন মে ফাসু অহোসী’’তি অত্তনো ৰচীনিচ্ছারণসঙ্খাতং উপ্পত্তিহেতুং. ‘‘অপরিভোগারহো পিণ্ডপাতো’’তি কস্মা ৰুত্তং, ননু থেরস্স ওভাসনাদিচিত্তুপ্পত্তিযেৰ নত্থীতি? সচ্চং নত্থি, অজ্ঝাসযং পন অজানন্তা একচ্চে পুথুজ্জনা তথা মঞ্ঞেয্যুং, অনাগতে চ সব্রহ্মচারিনো এৰং মম দিট্ঠানুগতিং আপজ্জেয্যুন্তি পটিক্খিপি. অপিচ মহাথেরস্স পরমুক্কংসগতা সল্লেখপটিপত্তি. তথা হি দহরভিক্খুনো ‘‘কস্স সম্পন্নং ন মনাপ’’ন্তি (পাচি. ২০৯, ২৫৭, ৬১২, ১২২৮, ১২৩৪; চূল়ৰ. ৩৪৩) ৰচনং নিস্সায যাৰ পরিনিব্বানা পিট্ঠখাদনীযং ন খাদতি.

ৰচীৰিঞ্ঞত্তিৰিপ্ফারাতি ৰচীনিচ্ছারণহেতু. অত্থৰিঞ্ঞাপনৰসেন পৰত্তমানো হি সদ্দো অসতিপি ৰিঞ্ঞত্তিযা তস্স কেনচি পচ্চযেন পচ্চযভাৰে ৰচীৰিঞ্ঞত্তিৰসেনেৰ পৰত্ততীতি ‘‘ৰচীৰিঞ্ঞত্তিৰিপ্ফারো’’তি ৰুচ্চতি. ভুত্তোতি ভুত্তৰা সচে ভৰেয্যং অহং. সাতি অস্স. অকারলোপেন হি নিদ্দেসো ‘‘এৰংস তে’’তিআদীসু (ম. নি. ১.২৩; অ. নি. ৬.৫৮; ৮.৭) ৰিয. অন্তগুণন্তি অন্তভোগো. বহি চরেতি আসযতো নিক্খমিত্ৰা গোচরগ্গহণৰসেন বহি যদি ৰিচরেয্য. পরমপ্পিচ্ছং দস্সেতুং লোকৰোহারেনেৰমাহ. লোকে হি অযুত্তভোজনং ওদরিযং গরহন্তা এৰং ৰদন্তি ‘‘কিংসু নাম তস্স অন্তানি বহি চরন্তী’’তি. আরাধেমীতি আদিতো পট্ঠায রাধেমি, ৰসে ৰত্তেমীতি অত্থো.

মহাতিস্সত্থেরো কির দুব্ভিক্খকালে মগ্গং গচ্ছন্তো ভত্তচ্ছেদেন, মগ্গকিলমথেন চ কিলন্তকাযো দুব্বলো অঞ্ঞতরস্স ফলিতস্স অম্বস্স মূলে নিপজ্জি, বহূনি অম্বফলানি তহং তহং পতিতানি হোন্তি. তত্থেকো ৰুড্ঢতরো উপাসকো থেরস্স সন্তিকং উপগন্ত্ৰা পরিস্সমং ঞত্ৰা অম্বপানং পাযেত্ৰা অত্তনো পিট্ঠিং আরোপেত্ৰা ৰসনট্ঠানং নেতি. থেরো –

‘‘ন পিতা নপি তে মাতা, ন ঞাতি নপি বন্ধৰো;

করোতেতাদিসং কিচ্চং, সীলৰন্তস্স কারণা’’তি. (ৰিসুদ্ধি. ১.২০) –

অত্তানং ওৰদিত্ৰা সম্মসনং আরভিত্ৰা ৰিপস্সনং ৰড্ঢেত্ৰা তস্স পিট্ঠিগতো এৰ মগ্গপটিপাটিযা অরহত্তং সচ্ছাকাসি. ইমং সন্ধায ৰুত্তং ‘‘অম্বখাদকমহাতিস্সত্থেরৰত্থুপি চেত্থ কথেতব্ব’’ন্তি. সব্বথাপীতি সব্বপ্পকারেনপি অনেসনৰসেন, চিত্তুপ্পত্তিৰসেনপি, পগেৰ কাযৰচীৰিপ্ফন্দিতৰসেনাতি অধিপ্পাযো. তেনাহ ‘‘অনেসনাযা’’তিআদি.

অপচ্চৰেক্খিতপরিভোগে ইণপরিভোগআপত্তিআদীনৰস্স, তব্বিপরিযাযতো পচ্চৰেক্খিতপরিভোগে আনিসংসস্স চ দস্সনং আদীনৰানিসংসদস্সনং. তস্স পন পচ্চযাধিকারত্তা ৰুত্তং ‘‘পচ্চযেসূ’’তি. কারণকারণম্পি হি কারণভাৰেন ৰুচ্চতি যথা তিণেহি ভত্তং সিদ্ধন্তি. যেন কারণেন ভিক্খুনো অপচ্চৰেক্খিতপরিভোগো নাম সিযা, তস্মিং ৰজ্জিতে পচ্চযসন্নিস্সিতসীলং সিজ্ঝতি, ৰিসুজ্ঝতি চাতি দস্সেতুং ‘‘তস্মা’’তিআদি ৰুত্তং. তত্থ পচ্চযগেধন্তি গেধগ্গহণেনেৰ সম্মোহোপি গহিতোতি দট্ঠব্বো তেন সহ পৰত্তনতো, তদুপনিস্সযতো চ. ধম্মেন সমেন উপ্পন্নেতি ইদং পচ্চযানং আগমনসুদ্ধিদস্সনং, ন পচ্চযসন্নিস্সিতসীলৰিসুদ্ধিদস্সনং. পচ্চযানং হি ইদমত্থিতং উপধারেত্ৰা পরিভুঞ্জনং পচ্চযসন্নিস্সিতসীলং. যস্মা পন তে পচ্চযা ঞাযাধিগতা এৰ ভিক্খুনা পরিভুঞ্জিতব্বা, তস্মা ৰুত্তং ‘‘ধম্মেন সমেন উপ্পন্নে পচ্চযে’’তি. যথাৰুত্তেন ৰিধিনাতি ‘‘সীতস্স পটিঘাতাযা’’তিআদিনা (ম. নি. ১.২৩; অ. নি. ৬.৫৮; মহানি. ২০৬) ৰুত্তৰিধিনা.

ধাতুৰসেন ৰাতি ‘‘যথাপচ্চযং ৰত্তমানং ধাতুমত্তমেৰেতং, যদিদং চীৰরাদি, তদুপভুঞ্জকো চ পুগ্গলো’’তি এৰং ধাতুমনসিকারৰসেন ৰা. পটিকূলৰসেন ৰাতি পিণ্ডপাতে তাৰ আহারে পটিকূলসঞ্ঞাৰসেন, ‘‘সব্বানি পন ইমানি চীৰরাদীনি অজিগুচ্ছনীযানি, ইমং পূতিকাযং পত্ৰা অতিৰিয জিগুচ্ছনীযানি জাযন্তী’’তি এৰং পটিকূলমনসিকারৰসেন ৰা. ততো উত্তরীতি পটিলাভকালতো উপরি. অনৰজ্জোৰ পরিভোগো আদিতোৰ পঞ্ঞায পরিসোধিতত্তা অধিট্ঠহিত্ৰা ঠপিতপত্তচীৰরানং ৰিযাতি. পচ্চৰেক্খণায আদিসুদ্ধিদস্সনপরমেতং, ন পরিভোগকালে পচ্চৰেক্খণপটিক্খেপপরং. তেনাহ ‘‘পরিভোগকালেপী’’তিআদি. তত্রাতি তস্মিং পরিভোগকালে পচ্চৰেক্খণে. সন্নিট্ঠানকরোতি অসন্দেহকরো একন্তিকো.

থেয্যপরিভোগো নাম অনরহস্স পরিভোগো. ভগৰতাপি অত্তনো সাসনে সীলৰতো পচ্চযা অনুঞ্ঞাতা, ন দুস্সীলস্স. দাযকানম্পি সীলৰতো এৰ পরিচ্চাগো, ন দুস্সীলস্স. অত্তনো কারানং মহপ্ফলভাৰস্স পচ্চাসীসনতো. ইতি সত্থারা অননুঞ্ঞাতত্তা, দাযকেহি চ অপরিচ্চত্তত্তা দুস্সীলস্স পরিভোগো থেয্যায পরিভোগো থেয্যপরিভোগো. ইণৰসেন পরিভোগো ইণপরিভোগো, পটিগ্গাহকতো দক্খিণাৰিসুদ্ধিযা অভাৰতো ইণং গহেত্ৰা পরিভোগো ৰিযাতি অত্থো. তস্মাতি ‘‘সীলৰতো’’তিআদিনা ৰুত্তমেৰত্থং কারণভাৰেন পচ্চামসতি. চীৰরং কাযতো মোচেত্ৰা পরিভোগে পরিভোগে পুরেভত্ত…পে… পচ্ছিমযামেসু পচ্চৰেক্খিতব্বন্তি সম্বন্ধো. তথা অসক্কোন্তেন যথাৰুত্তকালৰিসেসৰসেন একদিৰসে চতুক্খত্তুং তিক্খত্তুং দ্ৰিক্খত্তুং সকিংযেৰ ৰা পচ্চৰেক্খিতব্বং. সচে অরুণং উগ্গচ্ছতি, ইণপরিভোগট্ঠানে তিট্ঠতি. হিয্যো যং মযা চীৰরং পরিভুত্তং, তং যাৰদেৰ সীতস্স পটিঘাতায…পে… হিরিকোপীনপটিচ্ছাদনত্থং. হিয্যো যো মযা পিণ্ডপাতো পরিভুত্তো, সো ‘‘নেৰ দৰাযা’’তিআদিনা সচে অতীতপরিভোগপচ্চৰেক্খণং ন করেয্যাতি ৰদন্তি, তং ৰীমংসিতব্বং. সেনাসনম্পি পরিভোগে পরিভোগেতি পৰেসে পৰেসে. সতিপচ্চযতাতি সতিযা পচ্চযভাৰো পটিগ্গহণস্স, পরিভোগস্স চ পচ্চৰেক্খণসতিযা পচ্চযভাৰো যুজ্জতি, পচ্চৰেক্খিত্ৰাৰ পটিগ্গহেতব্বং, পরিভুঞ্জিতব্বঞ্চাতি অত্থো. তেনেৰাহ ‘‘সতিং কত্ৰা’’তিআদি. এৰং সন্তেপীতি যদিপি দ্ৰীসুপি ঠানেসু পচ্চৰেক্খণা যুত্তা, এৰং সন্তেপি. অপরে পনাহু – সতি পচ্চযতাতি সতি ভেসজ্জপরিভোগস্স পচ্চযভাৰে, সতি পচ্চযেতি অত্থো. এৰং সন্তেপীতি পচ্চযে সতিপীতি. তং তেসং মতিমত্তং. তথা হি পচ্চযসন্নিস্সিতসীলং পচ্চৰেক্খণায ৰিসুজ্ঝতি, ন পচ্চযস্স ভাৰমত্তেন.

এৰং পচ্চযসন্নিস্সিতসীলস্স ৰিসুদ্ধিং দস্সেত্ৰা তেনেৰ পসঙ্গেন সব্বাপি ৰিসুদ্ধিযো দস্সেতুং ‘‘চতুব্বিধা হি সুদ্ধী’’তিআদিমাহ. তত্থ সুজ্ঝতি এতাযাতি সুদ্ধি, যথাধম্মং দেসনাৰ সুদ্ধি দেসনাসুদ্ধি. ৰুট্ঠানস্সাপি চেত্থ দেসনায এৰ সঙ্গহো দট্ঠব্বো. ছিন্নমূলাপত্তীনং পন অভিক্খুতাপটিঞ্ঞাৰ দেসনা. অধিট্ঠানৰিসিট্ঠো সংৰরোৰ সুদ্ধি সংৰরসুদ্ধি. ধম্মেন সমেন পচ্চযানং পরিযেট্ঠি এৰ সুদ্ধি পরিযেট্ঠিসুদ্ধি. চতূসুপি পচ্চযেসু ৰুত্তৰিধিনা পচ্চৰেক্খণাৰ সুদ্ধি পচ্চৰেক্খণসুদ্ধি. এস তাৰ সুদ্ধীসু সমাসনযো. সুদ্ধিমন্তেসু পন দেসনা সুদ্ধি এতস্সাতি দেসনাসুদ্ধি. সেসেসুপি এসেৰ নযো. সুদ্ধি-সদ্দো পন ৰুত্তনযোৰ. এৰন্তি সংৰরভেদং সন্ধাযাহ. পহাযাতি ৰজ্জেত্ৰা, অকত্ৰাতি অত্থো.

দাতব্বট্ঠেন দাযং, তং আদিযন্তীতি দাযাদা. অননুঞ্ঞাতেসু সব্বেন সব্বং পরিভোগাভাৰতো, অনুঞ্ঞাতেসু এৰ চ পরিভোগসম্ভৰতো ভিক্খূহি পরিভুঞ্জিতব্বপচ্চযা ভগৰতো সন্তকা. ‘‘ধম্মদাযাদা মে, ভিক্খৰে, ভৰথ মা আমিসদাযাদা. অত্থি মে তুম্হেসু অনুকম্পা ‘কিন্তি মে সাৰকা ধম্মদাযাদা ভৰেয্যুং নো আমিসদাযাদা’’’তি (ম. নি. ১.২৯) এৰং পৰত্তং ধম্মদাযাদসুত্তঞ্চ এত্থ এতস্মিং অত্থে সাধকং.

অৰীতরাগানং তণ্হাপরৰসতায পচ্চযপরিভোগে সামিভাৰো নত্থি, তদভাৰেন ৰীতরাগানং তত্থ সামিভাৰো যথারুচিপরিভোগসম্ভৰতো. তথা হি তে পটিকূলম্পি অপ্পটিকূলাকারেন, অপ্পটিকূলম্পি পটিকূলাকারেন, তদুভযম্পি ৰজ্জেত্ৰা অজ্ঝুপেক্খনাকারেন পচ্চযে পরিভুঞ্জন্তি, দাযকানঞ্চ মনোরথং পরিপূরেন্তি. তেনাহ ‘‘তে হি তণ্হায দাসব্যং অতীতত্তা সামিনো হুত্ৰা পরিভুঞ্জন্তী’’তি.

সব্বেসন্তি অরিযানং, পুথুজ্জনানঞ্চ. কথং পুথুজ্জনানং ইমে পরিভোগা সম্ভৰন্তি? উপচারৰসেন. যো হি পুথুজ্জনস্সাপি সল্লেখপটিপত্তিযং ঠিতস্স পচ্চযগেধং পহায তত্থ তত্থ অনুপলিত্তেন চিত্তেন পরিভোগো, সো সামিপরিভোগো ৰিয হোতি. সীলৰতো পন পচ্চৰেক্খিতপরিভোগো দাযজ্জপরিভোগো ৰিয হোতি, দাযকানং মনোরথস্স অৰিরাধনতো. তথা হি ৰুত্তং ‘‘দাযজ্জপরিভোগেযেৰ ৰা সঙ্গহং গচ্ছতী’’তি. কল্যাণপুথুজ্জনস্স পরিভোগে ৰত্তব্বমেৰ নত্থি, তস্স সেক্খসঙ্গহতো. সেক্খসুত্তং (সং. নি. ৫.১৩) হেতস্সত্থস্স সাধকং. তেনাহ ‘‘সীলৰাপি হী’’তিআদি. পচ্চনীকত্তাতি যথা ইণাযিকো অত্তনো রুচিযা ইচ্ছিতদেসং গন্তুং ন লভতি, এৰং ইণপরিভোগযুত্তো লোকতো নিস্সরিতুং ন লভতীতি তপ্পটিপক্খত্তা সীলৰতো পচ্চৰেক্খিতপরিভোগো আণণ্যপরিভোগোতি আহ ‘‘আণণ্যপরিভোগো ৰা’’তি. এতেন নিপ্পরিযাযতো চতুপরিভোগৰিনিমুত্তো ৰিসুংযেৰাযং পরিভোগোতি দস্সেতি. ইমায সিক্খাযাতি সীলসঙ্খাতায সিক্খায. কিচ্চকারীতি পটিঞ্ঞানুরূপং পটিপজ্জনতো যুত্তপত্তকারী.

ইদানি তমেৰ কিচ্চকারিতং সুত্তপদেন ৰিভাৰেতুং ‘‘ৰুত্তম্পি চেত’’ন্তিআদি ৰুত্তং. তত্থ ৰিহারন্তি পতিস্সযং. সযনাসনন্তি মঞ্চাদিং. উভযেনপি সেনাসনমেৰ ৰুত্তং. আপন্তি উদকং. সঙ্ঘাটিরজূপৰাহনন্তি পংসুমলাদিনো সঙ্ঘাটিগতরজস্স ধোৰনং. সুত্ৰান ধম্মং সুগতেন দেসিতন্তি চীৰরাদীসু ‘‘পটিসঙ্খা যোনিসো চীৰরং পটিসেৰতি সীতস্স পটিঘাতাযা’’তিআদিনা (ম. নি. ১.২৩; অ. নি. ৬.৫৮; মহানি. ২০৬) নযেন ভগৰতা দেসিতং ধম্মং সুত্ৰা. সঙ্খায সেৰে ৰরপঞ্ঞসাৰকোতি ‘‘পিণ্ড’’ন্তি ৰুত্তং পিণ্ডপাতং, ৰিহারাদিপদেহি ৰুত্তং সেনাসনং, ‘‘পিপাসাগেলঞ্ঞস্স ৰূপসমনতো পানীযম্পি গিলানপচ্চযো’’তি আপমুখেন দস্সিতং গিলানপচ্চযং, সঙ্ঘাটিযাদিচীৰরন্তি চতুব্বিধং পচ্চযং সঙ্খায ‘‘যাৰদেৰ ইমস্স কাযস্স ঠিতিযা’’তিআদিনা (ম. নি. ১.২৩; ২.২৪; ৩.৭৫; সং. নি. ৪.১২০; অ. নি. ৬.৫৮; ৮.৯; ধ. স. ১৩৫৫) নযেন পচ্চৰেক্খিত্ৰা. সেৰে সেৰিতুং সক্কুণেয্য উত্তমপঞ্ঞস্স ভগৰতো সাৰকো সেখো ৰা পুথুজ্জনো ৰা.

যস্মা চ সঙ্খায সেৰী ৰরপঞ্ঞসাৰকো, তস্মা হি পিণ্ডে…পে… পোক্খরে ৰারিবিন্দু, তথা হোতি. কালেনাতি অরিযানং ভোজনকালে. লদ্ধাতি লভিত্ৰা. পরতোতি অঞ্ঞতো দাযকতো. অনুগ্গহাতি অনুকম্পায বহুম্হি উপনীতে মত্তং সো জঞ্ঞা জানেয্য সততং সব্বকালং উপট্ঠিতো উপট্ঠিতস্সতি. আলেপনরূহনে যথাতি ভেসজ্জলেপনেন ৰণস্স রুহনে ৰিয, মত্তং জানেয্যাতি যোজনা. আহরেতি আহরেয্য. ‘‘আহরেয্যাহার’’ন্তি ৰা পাঠো. যাপনত্থন্তি সরীরস্স যাপনায. অমুচ্ছিতোতি তণ্হামুচ্ছায অমুচ্ছিতো গেধং তণ্হং অনাপন্নো.

অত্তনো মাতুলস্স সঙ্ঘরক্খিতত্থেরস্সেৰ নামস্স গহিতত্তা ভাগিনেয্যসঙ্ঘরক্খিতসামণেরো. সালিকূরন্তি সালিভত্তং. সুনিব্বুতন্তি সুসীতলং. অসঞ্ঞতোতি অপচ্চৰেক্খণং সন্ধাযাহ. সব্বাসৰপরিক্খীণোতি পরিক্খীণসব্বাসৰো.

পঠমসীলপঞ্চকৰণ্ণনা

২০. পরিযন্তো এতেসং অত্থীতি পরিযন্তানি, পরিযন্তানি সিক্খাপদানি যেসং তে পরিযন্তসিক্খাপদা, তেসং পরিযন্তসিক্খাপদানং. উপসম্পন্নানন্তি ঠপেত্ৰা কল্যাণপুথুজ্জনসেক্খাসেক্খে তদঞ্ঞেসং উপসম্পন্নানং. সামঞ্ঞজোতনাপি হি ৰিসেসে তিট্ঠতি. কুসলধম্মে যুত্তানন্তি ৰিপস্সনাচারে যুত্তপযুত্তানং. সেক্খধম্মা পরিযন্তা পরমা মরিযাদা এতস্সাতি সেক্খপরিযন্তো. নামরূপপরিচ্ছেদতো, কুসলধম্মসমাদানতো ৰা পন পট্ঠায যাৰ গোত্রভূ, তাৰ পৰত্তকুসলধম্মপ্পবন্ধো সেক্খধম্মে আহচ্চ ঠিতো সেক্খপরিযন্তো. সেক্খধম্মানং ৰা হেট্ঠিমন্তভূতা সিক্খিতব্বা লোকিযা তিস্সো সিক্খা সেক্খপরিযন্তো, তস্মিং সেক্খপরিযন্তে. পরিপূরকারীনন্তি কিঞ্চিপি সিক্খং অহাপেত্ৰা পূরেন্তানং. উপরিৰিসেসাধিগমত্থং কাযে চ জীৰিতে চ অনপেক্খানং. ততো এৰ সীলপারিপূরিঅত্থং পরিচ্চত্তজীৰিতানং. দিট্ঠিসংকিলেসেন অপরামসনীযতো পারিসুদ্ধিৰন্তং সীলং অপরামট্ঠপারিসুদ্ধিসীলং. কিলেসানং সব্বসো পটিপ্পস্সদ্ধিযা পারিসুদ্ধিৰন্তং সীলং পটিপ্পস্সদ্ধিপারিসুদ্ধিসীলং.

অনুপসম্পন্নানং অসেক্খানং, সেক্খানং, কল্যাণপুথুজ্জনানঞ্চ সীলং মহানুভাৰতায আনুভাৰতো অপরিযন্তমেৰাতি আহ ‘‘গণনৰসেন সপরিযন্তত্তা’’তি. কাযৰাচানং সংৰরণতো, ৰিনযনতো চ সংৰরৰিনযা. পেয্যালমুখেন নিদ্দিট্ঠাতি তত্থ তত্থ সত্থারা দেসিতৰিত্থারনযেন যথাৰুত্তগণনতো নিদ্দিট্ঠা. সিক্খাতি সীলসঙ্খাতা সিক্খা. ৰিনযসংৰরেতি ৰিনযপিটকে. গণনৰসেন সপরিযন্তম্পি উপসম্পন্নানং সীলন্তি হেট্ঠা ৰুত্তং আনেত্ৰা সম্বন্ধিতব্বং. যং কিঞ্চি হি উপসম্পন্নেন সিক্খিতব্বং সীলং নাম, তত্থ কস্সচিপি অনৰসেসতো অনৰসেসৰসেন. সমাদানভাৰন্তি সমাদানসব্ভাৰং. লাভ…পে… ৰসেন অদিট্ঠপরিযন্তভাৰো লাভাদিহেতু সীলস্স অৰীতিক্কমো.

ধনং চজে অঙ্গৰরস্স হেতু পারিপন্থিকচোরাদীহি উপদ্দুতো. অঙ্গং চজে জীৰিতং রক্খমানো সপ্পদট্ঠাদিকালে. অঙ্গং ধনং জীৰিতঞ্চাপি সব্বং, চজে নরো ধম্মমনুস্সরন্তো সুতসোমমহাবোধিসত্তাদযো ৰিয. তেনাহ ‘‘ইমং সপ্পুরিসানুস্সতিং অৰিজহন্তো’’তি. জিঘচ্ছাপরিস্সমেন জীৰিতসংসযে সতিপি. সিক্খাপদং অৰীতিক্কম্মাতি অস্সামিকেসু অম্বফলেসু ভূমিযং পতিতেসু সমীপেযেৰ সন্তেসুপি পটিগ্গাহকাভাৰেন অপরিভুঞ্জন্তো পটিগ্গহণসিক্খাপদং অৰীতিক্কমিত্ৰা.

সীলৰন্তস্সাতি সীলৰন্তভাৰস্স কারণা, সীলৰন্তস্স ৰা তুয্হং এতাদিসং অংসেন ৰাহণাদিকং কিচ্চং করোতি, কারণা সীলস্সাতি অধিপ্পাযো. সুধোতজাতিমণি ৰিযাতি চতূসু পাসাণেসু সম্মদেৰ ধোতজাতিমণি ৰিয. মহাসঙ্ঘরক্খিতভাগিনেয্যসঙ্ঘরক্খিতত্থেরানং ৰিযাতি মহাসঙ্ঘরক্খিতত্থেরস্স, তস্সেৰ ভাগিনেয্যসঙ্ঘরক্খিতত্থেরস্স ৰিয চ. ‘‘কিমত্থং মযং ইধাগতা’’তি মহাজনস্স ৰিপ্পটিসারো ভৰিস্সতীতি অধিপ্পাযো. অচ্ছরিকাযাতি অঙ্গুলিফোটনেন. অসতিযাতি সতিসম্মোসেন. অঞ্ঞাণপকতন্তি অঞ্ঞাণেন অপরজ্ঝিত্ৰা কতং, অজানিত্ৰা কতন্তি অত্থো.

অপ্পস্সুতোপি চে হোতীতি সুত্তগেয্যাদিসুতরহিতো হোতি চে. সীলেসু অসমাহিতোতি পাতিমোক্খসংৰরাদিসীলেসুপি ন সম্মা পতিট্ঠিতো হোতি চে. নাস্স সম্পজ্জতে সুতন্তি অস্স সীলরহিতস্স পুগ্গলস্স সুতং অত্তনো, পরেসঞ্চ কত্থচি ভৰসম্পত্তিআৰহং ন হোতি. ‘‘দুস্সীলোযং পুরিসপুগ্গলো’’তি হি সিক্খাকামা ন তস্স সন্তিকং উপসঙ্কমন্তি. বহুস্সুতোপি চেতি এত্থ চে-তি নিপাতমত্তং. পসংসিতোতি পসংসিতো এৰ নাম.

রাগৰসেন অপরামট্ঠগহণেন তণ্হাপরামাসাভাৰমাহ. তথারূপন্তি রাগৰসেন অপরামট্ঠং. ভিন্দিত্ৰাতি হনিত্ৰা. সঞ্ঞপেস্সামীতি সঞ্ঞত্তিং করিস্সামি, অপ্পকং ৰেলং মং ৰিস্সেজ্জেতুন্তি অধিপ্পাযো. অট্টিযামীতি জিগুচ্ছামি. হরাযামীতি লজ্জামি.

পলিপন্নোতি সীদন্তো, সম্মক্খিতো ৰা. সীলেনেৰ সদ্ধিং মরিস্সামীতি সীলং অৰিনাসেন্তো তেন সহেৰ মরিস্সামি, ন ইদানি কদাচিপি তং পরিচ্চজিস্সামি. সতি হি ভৰাদানে সীলেন ৰিযোগো সিযা, ভৰমেৰ নাদিযিস্সামীতি অধিপ্পাযো. রোগং সম্মসন্তোতি রোগভূতং ৰেদনং ৰেদনামুখেন সেসারূপধম্মে, রূপধম্মে চ পরিগ্গহেত্ৰা ৰিপস্সন্তো.

রুপ্পতোতি ৰিকারং আপাদিযমানসরীরস্স. পরিসুস্সতীতি সমন্ততো সুস্সতি. যথা কিং? পুপ্ফং যথা পংসুনি আতপে কতং সূরিযাতপসন্তত্তে পংসুনি ঠপিতং সিরীসাদিপুপ্ফং ৰিযাতি অত্থো. অজঞ্ঞন্তি অমনুঞ্ঞং জিগুচ্ছনীযং. জঞ্ঞসঙ্খাতন্তি বালেহি ‘‘জঞ্ঞ’’ন্তি এৰং কিত্তিতং. জঞ্ঞরূপং অপস্সতোতি যথাভূতং অপ্পস্সতো অৰিদ্দসুনো ‘‘জঞ্ঞ’’ন্তি পসংসিতং. ধিরত্থুমন্তি ধি অত্থু ইমং, ধি-সদ্দযোগেন সব্বত্থ উপযোগৰচনং, ইমস্স পূতিকাযস্স ধিকারো হোতূতি অত্থো. দুগ্গন্ধিযন্তি দুগ্গন্ধিকং দুগ্গন্ধৰন্তং. যত্থ যথাৰুত্তে পূতিকাযে রাগহেতু পমত্তা পমাদং আপন্না. পজাতি সত্তা. হাপেন্তি মগ্গং সুগতূপপত্তিযাতি সুগতূপপত্তিযা মগ্গং, সীলম্পি হাপেন্তি, পগেৰ ঝানাদিন্তি অধিপ্পাযো. কেৰলং ‘‘অরহন্তো’’তি ৰত্তব্বা সাৰকখীণাসৰা, ইতরে পন পচ্চেকবুদ্ধা সম্মাসম্বুদ্ধাতি সহ ৰিসেসনেনাতি আহ ‘‘অরহন্তাদীন’’ন্তি. সব্বদরথপ্পটিপ্পস্সদ্ধিযাতি সব্বকিলেসদরথপ্পটিপ্পস্সদ্ধিযা.

দুতিযসীলপঞ্চকৰণ্ণনা

পাণাতিপাতাদীনন্তি আদি-সদ্দেন অদিন্নাদানাদীনং অগ্গমগ্গৰজ্ঝকিলেসপরিযোসানানং সঙ্গহো দট্ঠব্বো. পহানাদীতি আদি-সদ্দেন ৰেরমণিআদীনং চতুন্নং. কেসুচি পোত্থকেসু ‘‘পহানৰসেনা’’তি লিখন্তি, সা পমাদলেখা. পাণাতিপাতস্স পহানং সীলন্তি হিরোত্তপ্পকরুণালোভাদিপমুখেন যেন কুসলচিত্তুপ্পাদেন পাণাতিপাতো পহীযতি, তং পাণাতিপাতস্স পহানং সীলনট্ঠেন সীলং. তথা পাণাতিপাতা ৰিরতি ৰেরমণী সীলং. পাণাতিপাতস্স পটিপক্খচেতনা চেতনা সীলং. পাণাতিপাতস্স সংৰরণং পৰেসদ্ৰারপিধানং সংৰরো সীলং. পাণাতিপাতস্স অৰীতিক্কমনং অৰীতিক্কমো সীলং. অদিন্নাদানস্সাতিআদীসুপি এসেৰ নযো. অভিজ্ঝাদীনং পন অনভিজ্ঝাদিৰসেন পহানং ৰেদিতব্বং. ৰেরমণী চেতনা তংসম্পযুত্তা সংৰরাৰীতিক্কমা তপ্পমুখা ধম্মা.

এৰং দসকুসলকম্মপথৰসেন পহানসীলাদীনি দস্সেত্ৰা ইদানি সউপাযানং অট্ঠন্নং সমাপত্তীনং, অট্ঠারসন্নং মহাৰিপস্সনানং, অরিযমগ্গানঞ্চ ৰসেন তানি দস্সেতুং ‘‘নেক্খম্মেনা’’তিআদি আরদ্ধং. তত্থ নেক্খম্মেনাতি অলোভপ্পধানেন কুসলচিত্তুপ্পাদেন. কুসলা হি ধম্মা কামপটিপক্খা ইধ ‘‘নেক্খম্ম’’ন্তি অধিপ্পেতা. তেনাহ ‘‘কামচ্ছন্দস্স পহানং সীল’’ন্তিআদি. তত্থ পহানসীলাদীনি হেট্ঠা ৰুত্তনযেনেৰ ৰেদিতব্বানি. ৰিসেসমেৰ ৰক্খাম. অব্যাপাদেনাতি মেত্তায. আলোকসঞ্ঞাযাতি ৰিভূতং কত্ৰা মনসিকরণেন উপট্ঠিতআলোকসঞ্জাননেন. অৰিক্খেপেনাতি সমাধিনা. ধম্মৰৰত্থানেনাতি কুসলাদিধম্মানং যাথাৰনিচ্ছযেন. সপচ্চযনামরূপৰৰত্থানেনাতিপি ৰদন্তি.

এৰং কামচ্ছন্দাদিনীৰরণপ্পহানেন ‘‘অভিজ্ঝং লোকে পহাযা’’তিআদিনা (ৰিভ. ৫৩৮) ৰুত্তায পঠমজ্ঝানাধিগমস্স উপাযভূতায পুব্বভাগপটিপদায ৰসেন পহানসীলাদীনি দস্সেত্ৰা ইদানি সউপাযানং অট্ঠসমাপত্তিআদীনং ৰসেন দস্সেতুং ‘‘ঞাণেনা’’তিআদি ৰুত্তং. নামরূপপরিগ্গহকঙ্খাৰিতরণানং হি ৰিবন্ধভূতস্স মোহস্স দূরীকরণেন ঞাতপরিঞ্ঞায ঠিতস্স অনিচ্চসঞ্ঞাদযো সিজ্ঝন্তি. তথা ঝানসমাপত্তীসু অভিরতিনিমিত্তেন পামোজ্জেন. তত্থ অনভিরতিযা ৰিনোদিতায ঝানাদীনং সমধিগমোতি সমাপত্তিৰিপস্সনানং অরতিৰিনোদনঅৰিজ্জাপদালনাদিনা উপাযোতি ৰুত্তং ‘‘ঞাণেন অৰিজ্জায, পামোজ্জেন অরতিযা’’তি. উপ্পটিপাটিনিদ্দেসো পন নীৰরণসভাৰায অৰিজ্জায হেট্ঠানীৰরণেসুপি সঙ্গহদস্সনত্থন্তি দট্ঠব্বং.

‘‘পঠমেন ঝানেন নীৰরণান’’ন্তিআদীসু কথং ঝানানং সীলভাৰো, কথং ৰা তত্থ ৰিরতিযা সম্ভৰো. সুৰিসুদ্ধকাযকম্মাদিকস্স হি চিত্তসমাদানৰসেন ইমানি ঝানানি পৰত্তন্তি, ন পরিত্তকুসলানি ৰিয কাযকম্মাদিৰিসোধনৰসেন, নাপি মগ্গফলধম্মা ৰিয দুচ্চরিতদুরাজীৰসমুচ্ছেদপটিপ্পস্সম্ভনৰসেনাতি? সচ্চমেতং. মহগ্গতধম্মেসু নিপ্পরিযাযেন নত্থি সীলনট্ঠো, কুতো ৰিরমণট্ঠো. পরিযাযেন পনেতং ৰুত্তন্তি দট্ঠব্বং. কো পন সো পরিযাযো? যদগ্গেন মহগ্গতা কুসলধম্মা পটিপক্খে পজহন্তি, তদগ্গেন ততো ওরতা. তে চ যথা চিত্তং নারোহন্তি, এৰং সংৰুতা নাম হোন্তি. পরিযুট্ঠানসঙ্খাতো মনোদ্ৰারে ৰীতিক্কমো নত্থি এতেসূতি অৰীতিক্কমাতি চ ৰুচ্চন্তি, চেতনা পন তংসম্পযুত্তাতি. সোযমত্থো পরতো আগমিস্সতি. এৰঞ্চ কত্ৰা ৰিতক্কাদিপহানৰচনম্পি সমত্থিতং হোতি. ন হি নিপ্পরিযাযতো সীলং কুসলধম্মানং পহাযকং যুজ্জতি, ন চেত্থ অকুসলৰিতক্কাদযো অধিপ্পেতা. কিঞ্চাপি পঠমজ্ঝানূপচারেযেৰ দুক্খস্স, চতুত্থজ্ঝানূপচারে চ সুখস্স পহানং হোতি, অতিসযপহানং পন সন্ধায ৰুত্তং ‘‘চতুত্থেন ঝানেন সুখদুক্খানং পহান’’ন্তি. ‘‘আকাসানঞ্চাযতনসমাপত্তিযা’’তিআদীসু যং ৰত্তব্বং, তং আরুপ্পকথাযং (ৰিসুদ্ধি. ১.২৭৫ আদযো) আগমিস্সতি.

অনিচ্চস্স, অনিচ্চন্তি ৰা অনুপস্সনা অনিচ্চানুপস্সনা. তেভূমিকধম্মানং অনিচ্চতং গহেত্ৰা পৰত্তায ৰিপস্সনাযেতং নামং. নিচ্চসঞ্ঞাযাতি ‘‘সঙ্খতধম্মা নিচ্চা সস্সতা’’তি এৰং পৰত্তায মিচ্ছাসঞ্ঞায, সঞ্ঞাগ্গহণেনেৰ দিট্ঠিচিত্তানম্পি গহণং দট্ঠব্বং. এস নযো ইতো পরাসুপি. নিব্বিদানুপস্সনাযাতি সঙ্খারেসু নিব্বিন্দনাকারেন পৰত্তায অনুপস্সনায. নন্দিযাতি সপ্পীতিকতণ্হায. ৰিরাগানুপস্সনাযাতি ৰিরজ্জনাকারেন পৰত্তায অনুপস্সনায. রাগস্সাতি সঙ্খারেসু রাগস্স. নিরোধানুপস্সনাযাতি সঙ্খারানং নিরোধস্স অনুপস্সনায. যথা ৰা সঙ্খারা নিরুজ্ঝন্তিযেৰ, আযতিং পুনব্ভৰৰসেন ন উপ্পজ্জন্তি, এৰং অনুপস্সনা নিরোধানুপস্সনা. তেনেৰাহ ‘‘নিরোধানুপস্সনায নিরোধেতি নো সমুদেতী’’তি (পটি. ম. ১.৮৩). মুঞ্চিতুকামতায হি অযং বলপ্পত্তা. সঙ্খারানং পটিনিস্সজ্জনাকারেন পৰত্তা অনুপস্সনা পটিনিস্সগ্গানুপস্সনা. পটিসঙ্খা সন্তিট্ঠনা হি অযং. আদানস্সাতি নিচ্চাদিৰসেন গহণস্স. সন্ততিসমূহকিচ্চারম্মণৰসেন একত্তগহণং ঘনসঞ্ঞা, তস্সা ঘনসঞ্ঞায. আযূহনস্সাতি অভিসঙ্খরণস্স. সঙ্খারানং অৰত্থাদিৰিসেসাপত্তি ৰিপরিণামো. ধুৰসঞ্ঞাযাতি থিরভাৰগহণস্স. নিমিত্তস্সাতি সমূহাদিঘনৰসেন সকিচ্চপরিচ্ছেদতায চ সঙ্খারানং সৰিগ্গহতায. পণিধিযাতি রাগাদিপণিধিযা, তণ্হাৰসেন সঙ্খারেসু নিন্নতাযাতি অত্থো. অভিনিৰেসস্সাতি অত্তানুদিট্ঠিযা. অনিচ্চদুক্খাদিৰসেন সব্বতেভূমকধম্মতিরণা অধিপঞ্ঞাধম্মৰিপস্সনা. সারাদানাভিনিৰেসস্সাতি অসারেসু সারগহণৰিপল্লাসস্স. যথাভূতঞাণদস্সনং থিরভাৰপত্তা অনিচ্চাদিঅনুপস্সনাৰ. উদযব্বযঞাণন্তি কেচি. সপ্পচ্চযনামরূপদস্সনন্তি অপরে. ‘‘ইস্সরকুত্তাদিৰসেন লোকো সমুপ্পন্নো’’তি অভিনিৰেসো সম্মোহাভিনিৰেসো. উচ্ছেদসস্সতাভিনিৰেসোতি কেচি. ‘‘অহোসিং নু খো অহমতীতমদ্ধান’’ন্তিআদিনযপ্পৰত্তা (ম. নি. ১.১৮; সং. নি. ২.২০; মহানি. ১৭৪) সংসযাপত্তি সম্মোহাভিনিৰেসোতি অপরে. সঙ্খারেসু তাণলেণভাৰগহণং আলযাভিনিৰেসো. ‘‘আলযরতা আলযসম্মুদিতা’’তি (দী. নি. ২.৬৭; ম. নি. ১.২৮১; ২.৩৩৭; সং. নি. ১.১৭২; মহাৰ. ৭-৮) ৰচনতো আলযো তণ্হা. সা এৰ চক্খাদীসু, রূপাদীসু চ অভিনিৰিসনৰসেন পৰত্তিযা আলযাভিনিৰেসোতি অপরে. ‘‘এৰং ঠিতা তে সঙ্খারা পটিনিস্সজ্জীযন্তী’’তি পৰত্তং ঞাণং পটিসঙ্খানুপস্সনা. অপ্পটিসঙ্খা পটিসঙ্খায পটিপক্খভূতা মোহপ্পধানা অকুসলধম্মা. ৰট্টতো ৰিগতত্তা ৰিৰট্টং নিব্বানং, তত্থ নিন্নভাৰসঙ্খাতেন অনুপস্সনেন পৰত্তি ৰিৰট্টানুপস্সনা, সঙ্খারুপেক্খা চেৰ অনুলোমঞাণঞ্চ. সঞ্ঞোগাভিনিৰেসো সংযুজ্জনৰসেন সঙ্খারেসু অভিনিৰিসনং.

দিট্ঠেকট্ঠানন্তি দিট্ঠিযা সহজেকট্ঠানঞ্চ পহানেকট্ঠানঞ্চ. ওল়ারিকানন্তি উপরিমগ্গৰজ্ঝে কিলেসে উপাদায ৰুত্তং. অঞ্ঞথা দস্সনেন পহাতব্বাপি দুতিযমগ্গৰজ্ঝেহি ওল়ারিকা. অণুসহগতানন্তি অণুভূতানং, ইদং হেট্ঠিমমগ্গৰজ্ঝে উপাদায ৰুত্তং. সব্বকিলেসানন্তি অৰসিট্ঠসব্বকিলেসানং. ন হি পঠমমগ্গাদীহি পহীনা কিলেসা পুন পহীযন্তি.

‘‘চিত্তস্স অৰিপ্পটিসারায সংৰত্তন্তী’’তিআদীসু সংৰরো অৰিপ্পটিসারত্থায. ‘‘অৰিপ্পটিসারত্থানি খো, আনন্দ, কুসলানি সীলানী’’তি (অ. নি. ১০.১) ৰচনতো চেতসো অৰিপ্পটিসারত্থায ভৰন্তি. অৰিপ্পটিসারো পামোজ্জত্থায. ‘‘যোনিসো মনসি করোতো পামোজ্জং জাযতী’’তি (দী. নি. ৩.৩৫৯) ৰচনতো পামোজ্জায সংৰত্তন্তি. পামোজ্জং পীতিযা. ‘‘পমুদিতস্স পীতি জাযতী’’তি (দী. নি. ১.৪৬৬; ৩.৩৫৯; অ. নি. ৩.৯৬; ৬.১০; ১১.১২) ৰচনতো পীতিযা সংৰত্তন্তি. পীতি পস্সদ্ধত্থায. ‘‘পীতিমনস্স কাযো পস্সম্ভতী’’তি (দী. নি. ১.৪৬৬; ৩.৩৫৯; অ. নি. ৩.৯৬; ৬.১০; ১১.১২) ৰচনতো পস্সদ্ধিযা সংৰত্তন্তি. পস্সদ্ধি সুখত্থায. ‘‘পস্সদ্ধকাযো সুখং ৰেদেতী’’তি (দী. নি. ১.৪৬৬; ৩.৩৫৯; অ. নি. ৩.৯৬; ৬.১০; ১১.১২) ৰচনতো সোমনস্সায সংৰত্তন্তীতি. ‘‘সুখত্থায সুখং ৰেদেতী’’তি চেত্থ সোমনস্সং ‘‘সুখ’’ন্তি ৰুত্তং. আসেৰনাযাতি সমাধিস্স আসেৰনায. নিরামিসে হি সুখে সিদ্ধে ‘‘সুখিনো চিত্তং সমাধিযতী’’তি (দী. নি. ১.৪৬৬; ৩.৩৫৯; অ. নি. ৩.৯৬; ৬.১০; ১১.১২) ৰচনতো সমাধি সিদ্ধোযেৰ হোতি, তস্মা সমাধিস্স আসেৰনায পগুণবলৰভাৰায সংৰত্তন্তীতি অত্থো. ভাৰনাযাতি তস্সেৰ সমাধিস্স ৰড্ঢিযা. বহুলীকম্মাযাতি পুনপ্পুনং কিরিযায. অলঙ্কারাযাতি তস্সেৰ সমাধিস্স পসাধনভূতসদ্ধিন্দ্রিযাদিনিপ্ফত্তিযা অলঙ্কারায সংৰত্তন্তি. পরিক্খারাযাতি অৰিপ্পটিসারাদিকস্স সমাধিসম্ভারস্স সিদ্ধিযা তস্সেৰ সমাধিস্স পরিক্খারায সংৰত্তন্তি. সম্ভারত্থো হি ইধ পরিক্খার-সদ্দো. ‘‘যে চ খো ইমে পব্বজিতেন জীৰিতপরিক্খারা সমুদানেতব্বা’’তিআদীসু (ম. নি. ১.১৯১) ৰিয সম্ভারোতি চ পচ্চযো ৰেদিতব্বো. কামঞ্চাযং পরিক্খার-সদ্দো ‘‘রথো সীলপরিক্খারো’’তিআদীসু (সং. নি. ৫.৪) অলঙ্কারত্থো. ‘‘সত্তহি নগরপরিক্খারেহি সুপরিক্খত্তং হোতী’’তিআদীসু (অ. নি. ৭.৬৭) পরিৰারত্থো ৰুত্তো. ইধ পন অলঙ্কারপরিৰারানং ৰিসুং গহিতত্তা ‘‘সম্ভারত্থো’’তি ৰুত্তং. পরিৰারাযাতি মূলকারণভাৰেনেৰ সমাধিস্স পরিৰারভূতসতিৰীরিযাদিধম্মৰিসেসসাধনেন পরিৰারসম্পত্তিযা সংৰত্তন্তি. পারিপূরিযাতি ৰসীভাৰসম্পাপনেন, ৰিপস্সনায পদট্ঠানভাৰাপাদনেন চ পরিপুণ্ণভাৰসাধনতো সমাধিস্স পারিপূরিযা সংৰত্তন্তি.

এৰং সুপরিসুদ্ধসীলমূলকং সব্বাকারপরিপূরং সমাধিং দস্সেত্ৰা ইদানি ‘‘সমাহিতো পজানাতি পস্সতি, যথাভূতং জানং পস্সং নিব্বিন্দতি, নিব্বিন্দং ৰিরজ্জতি, ৰিরাগা ৰিমুচ্চতী’’তি (অ. নি. ১০.২; স. নি. ৩.১৪) ৰচনতো সীলমূলকানি সমাধিপদট্ঠানানি পযোজনানি দস্সেতুং ‘‘একন্তনিব্বিদাযা’’তিআদি ৰুত্তং. নিব্বিদায হি দস্সিতায তস্সা পদট্ঠানভূতং যথাভূতঞাণদস্সনং দস্সিতমেৰ হোতি, তস্মিং অসতি নিব্বিদায অসিজ্ঝনতো. নিব্বিদাদযো অত্থতো ৰিভত্তা এৰ. যথাভূতঞাণদস্সনন্তি পনেত্থ সপ্পচ্চযনামরূপদস্সনং অধিপ্পেতং. এৰমেত্থ অমতমহানিব্বানপরিযোসানং সীলস্স পযোজনং দস্সিতন্তি ৰেদিতব্বং.

ইদানি পহানাদীসু সীলত্থং দস্সেতুং ‘‘এত্থ চা’’তিআদি আরদ্ধং. তত্থ পজহনং অনুপ্পাদনিরোধো পহানন্তি তস্স ভাৰসাধনতং সন্ধায ‘‘পহানন্তি কোচি ধম্মো নাম নত্থী’’তি ৰুত্তং. যথা পনস্স ধম্মভাৰো সম্ভৰতি, তথা হেট্ঠা সংৰণ্ণিতমেৰ. এৰং হিস্স সীলভাৰো সুট্ঠু যুজ্জতি. তং তং পহানন্তি ‘‘পাণাতিপাতস্স পহানং, অদিন্নাদানস্স পহান’’ন্তি এৰং ৰুত্তং তং তং পহানং. তস্স তস্স কুসলধম্মস্সাতি পাণাতিপাতস্স পহানং মেত্তাদিকুসলধম্মস্স, অদিন্নাদানস্স পহানং চাগাদিকুসলধম্মস্সাতি এৰং তস্স তস্স কুসলধম্মস্স. পতিট্ঠানট্ঠেনাতি পতিট্ঠানভাৰেন. পহানং হি তস্মিং সতি হোতি, অসতি ন হোতি, তস্স ‘‘পতিট্ঠান’’ন্তি ৰত্তব্বতং লভতীতি কত্ৰা যস্মিং সন্তানে পাণাতিপাতাদযো তস্স পকম্পহেতৰোতি তপ্পহানং ৰিকম্পাভাৰকরণেন চ সমাধানং ৰুত্তং. এৰং সেসপহানেসুপি ৰত্তব্বং. সমাধানং সণ্ঠপনং, সংযমনং ৰা. ইতরে চত্তারোতি ৰেরমণিআদযো চত্তারো ধম্মা ন পহানং ৰিয ৰোহারমত্তন্তি অধিপ্পাযো. ততো ততোতি তম্হা তম্হা পাণাতিপাতাদিতো. তস্স তস্সাতি পাণাতিপাতাদিকস্স সংৰরণৰসেন, তস্স তস্স ৰা সংৰরস্স ৰসেন. তদুভযসম্পযুত্তচেতনাৰসেনাতি ৰেরমণীহি, সংৰরধম্মেহি চ সম্পযুত্তায চেতনায ৰসেন. তং তং অৰীতিক্কমন্তস্সাতি তং তং পাণাতিপাতাদিং অৰীতিক্কমন্তস্স পুগ্গলস্স, ধম্মসমূহস্স ৰা ৰসেন চেতসো পৰত্তিসব্ভাৰং সন্ধায ৰুত্তা. তস্মা একক্খণেপি লব্ভন্তীতি অধিপ্পাযো.

সীলসংকিলেসৰোদানৰণ্ণনা

২১. সংকিলিস্সতি তেনাতি সংকিলেসো. কো পন সোতি আহ ‘‘খণ্ডাদিভাৰো সীলস্স সংকিলেসো’’তি. ৰোদাযতি ৰিসুজ্ঝতি এতেনাতি ৰোদানং, অখণ্ডাদিভাৰো. লাভযসাদীতি আদি-সদ্দেন ঞাতিঅঙ্গজীৰিতাদীনং সঙ্গহো. সত্তসু আপত্তিক্খন্ধেসু আদিম্হি ৰা অন্তে ৰা ৰেমজ্ঝেতি চ ইদং তেসং উদ্দেসাদিপাল়িৰসেন ৰুত্তং. ন হি অঞ্ঞো কোচি আপত্তিক্খন্ধানং অনুক্কমো অত্থি. খণ্ডন্তি খণ্ডৰন্তং, খণ্ডিতং ৰা. ছিদ্দন্তি এত্থাপি এসেৰ নযো. পরিযন্তে ছিন্নসাটকো ৰিযাতি ৰত্থন্তে, দসন্তে ৰা ছিন্নৰত্থং ৰিয.

এৰন্তি ইদানি ৰুচ্চমানাকারেন. মেথুনসংযোগৰসেনাতি রাগপরিযুট্ঠানেন সদিসভাৰাপত্তিযা মিথুনানং ইদন্তি মেথুনং, নিবন্ধনং. মেথুনৰসেন সমাযোগো মেথুনসংযোগো. ইধ পন মেথুনসংযোগো ৰিযাতি মেথুনসংযোগো, তস্স ৰসেন. ইধাতি ইমস্মিং লোকে. একচ্চোতি একো. সমণো ৰা ব্রাহ্মণো ৰাতি পব্বজ্জামত্তেন সমণো ৰা জাতিমত্তেন ব্রাহ্মণো ৰা. দ্ৰযংদ্ৰযসমাপত্তিন্তি দ্ৰীহি দ্ৰীহি সমাপজ্জিতব্বং, মেথুনন্তি অত্থো. ন হেৰ খো সমাপজ্জতীতি সম্বন্ধো. উচ্ছাদনং উব্বত্তনং. সম্বাহনং পরিমদ্দনং. সাদিযতীতি অধিৰাসেতি. তদস্সাদেতীতি তং উচ্ছাদনাদিং অভিরমতি. নিকামেতীতি ইচ্ছতি. ৰিত্তিন্তি তুট্ঠিং. ইদম্পি খোতি এত্থ ইদন্তি যথাৰুত্তং সাদিযনাদিং খণ্ডভাৰাদিৰসেন একং কত্ৰা ৰুত্তং. পি-সদ্দো ৰক্খমানং উপাদায সমুচ্চযত্থো. খো-সদ্দো অৰধারণত্থো. ইদং ৰুত্তং হোতি – যদেতং ব্রহ্মচারীপটিঞ্ঞস্স অসতিপি দ্ৰযংদ্ৰযসমাপত্তিযং মাতুগামস্স উচ্ছাদনন্হাপনসম্বাহনসাদিযনাদি, ইদম্পি একংসেন তস্স ব্রহ্মচরিযস্স খণ্ডাদিভাৰাপাদনতো খণ্ডম্পি ছিদ্দম্পি সবলম্পি কম্মাসম্পীতি. এৰং পন খণ্ডাদিভাৰাপত্তিযা সো অপরিসুদ্ধং ব্রহ্মচরিযং চরতি, ন পরিসুদ্ধং, সংযুত্তো মেথুনসংযোগেন, ন ৰিসংযুত্তো. ততো চস্স ন জাতিআদীহি পরিমুত্তীতি দস্সেন্তো ‘‘অযং ৰুচ্চতী’’তিআদিমাহ.

সঞ্জগ্ঘতীতি কিলেসৰসেন মহাহসিতং হসতি. সংকীল়তীতি কাযসংসগ্গৰসেন কীল়তি. সংকেলাযতীতি সব্বসো মাতুগামং কেলাযন্তো ৰিহরতি. চক্খুনাতি অত্তনো চক্খুনা. চক্খুন্তি মাতুগামস্স চক্খুং. উপনিজ্ঝাযতীতি উপেচ্চ নিজ্ঝাযতি ওলোকেতি. তিরোকুট্টাতি কুট্টস্স পরতো. তথা তিরোপাকারা. মত্তিকামযা ভিত্তি কুট্টং, ইট্ঠকামযা পাকারোতি ৰদন্তি. যা কাচি ৰা ভিত্তি পোরিসতো দিযড্ঢরতনুচ্চপ্পমাণা কুট্টং, কুট্টতো অধিকো পাকারো.

অস্সাতি ব্রহ্মচারীপটিঞ্ঞস্স. পুব্বেতি ৰতসমাদানতো পুব্বে. কামগুণেহীতি কামকোট্ঠাসেহি. সমপ্পিতন্তি সুট্ঠু অপ্পিতং সহিতং. সমঙ্গীভূতন্তি সমন্নাগতং. পরিচারযমানন্তি কীল়ন্তং, উপট্ঠহিযমানং ৰা. পণিধাযাতি পত্থেত্ৰা. সীলেনাতিআদীসু যমনিযমাদিসমাদানৰসেন সীলং. অৰীতিক্কমৰসেন ৰতং. উভযম্পি সীলং. দুক্করচরিযৰসেন পৰত্তিতং ৰতং. তংতংঅকিচ্চসম্মততো ৰা নিৰত্তিলক্খণং সীলং. তংতংসমাদানৰতো ৰেসভোজনকিচ্চকরণাদিৰিসেসপটিপত্তি ৰতং. সব্বথাপি দুক্করচরিযা তপো. মেথুনৰিরতি ব্রহ্মচরিযং.

সব্বসোতি অনৰসেসতো, সব্বেসং ৰা. অভেদেনাতি অৰীতিক্কমেন. অপরায চ পাপধম্মানং অনুপ্পত্তিযা, গুণানং উপ্পত্তিযা সঙ্গহিতোতি যোজনা. তত্থ কুজ্ঝনলক্খণো কোধো. উপনন্ধনলক্খণো উপনাহো. পরেসং গুণমক্খনলক্খণো মক্খো. যুগগ্গাহলক্খণো পল়াসো. পরসম্পত্তিউসূযনলক্খণা ইস্সা. অত্তসম্পত্তিনিগূহনলক্খণং মচ্ছরিযং. সন্তদোসপটিচ্ছাদনলক্খণা মাযা. অসন্তগুণসম্ভাৰনলক্খণং সাঠেয্যং. চিত্তস্স থদ্ধভাৰলক্খণো থম্ভো. করণুত্তরিযলক্খণো সারম্ভো. উন্নতিলক্খণো মানো. অব্ভুন্নতিলক্খণো অতিমানো. মজ্জনলক্খণো মদো. চিত্তৰোসগ্গলক্খণো পমাদো. আদি-সদ্দেন লোভমোহৰিপরীতমনসিকারাদীনং সঙ্গহো.

ইদানি ‘‘অখণ্ডাদিভাৰো পনা’’তিআদিনা ৰুত্তমেৰত্থং পাকটতরং কাতুং ‘‘যানি হী’’তিআদিমাহ. তত্থ অনুপহতানীতি অনুপদ্দুতানি. ৰিৰট্টূপনিস্সযতায তণ্হাদাসব্যতো মোচনেন ভুজিস্সভাৰকরণং. অৰিঞ্ঞূনং অপ্পমাণত্তা ৰুত্তং ‘‘ৰিঞ্ঞূহি পসত্থত্তা’’তি. সমাধিসংৰত্তনং ৰা এতেসং পযোজনং, সমাধিসংৰত্তনে ৰা নিযুত্তানীতি সমাধিসংৰত্তনিকানি. নিদ্দানেন সস্সসম্পত্তি ৰিয পটিপক্খৰিগমেন সীলসম্পদা, সা চ তত্থ সতি দোসদস্সনেতি আহ ‘‘সীলৰিপত্তিযা চ আদীনৰদস্সনেনা’’তি. নিসম্মকারীনং পযোজনগরুকতায দিট্ঠগুণেযেৰ সম্মাপটিপত্তীতি ৰুত্তং ‘‘সীলসম্পত্তিযা চ আনিসংসদস্সনেনা’’তি.

তত্থ সীলৰিপত্তিযা আদীনৰো সীলসম্পদায হেট্ঠা দস্সিতআনিসংসপটিপক্খতো ৰেদিতব্বো, তং সুৰিঞ্ঞেয্যন্তি অৰিত্থারেত্ৰা পকারন্তরেহি দস্সেতুং ‘‘অপিচা’’তি আরদ্ধং. তত্থ যথা সীলসম্পদা সত্তানং মনুঞ্ঞভাৰকারণং, এৰং সীলৰিপত্তি অমনুঞ্ঞভাৰকারণন্তি আহ ‘‘দুস্সীলো…পে… দেৰমনুস্সান’’ন্তি. অননুসাসনীযো জিগুচ্ছিতব্বতো. দুক্খিতোতি সঞ্জাতদুক্খো. ৰিপ্পটিসারীতি ‘‘অকতং ৰত মে কল্যাণ’’ন্তিআদিনা পচ্চানুতাপী. দুব্বণ্ণোতি গুণৰণ্ণেন, কাযৰণ্ণেন চ ৰিরহিতো. অস্সাতি দুস্সীলস্স. সম্ফস্সিতানং দুক্খো দুক্খাৰহো সম্ফস্সো এতস্সাতি দুক্খসম্ফস্সো. গুণানুভাৰাভাৰতো অপ্পং অগ্ঘতীতি অপ্পগ্ঘো. অনেকৰস্সগণিকগূথকূপো ৰিযাতি অনেকৰস্সসমূহে সঞ্চিতুক্কারাৰাটো ৰিয. দুব্বিসোধনো সোধেতুং অসক্কুণেয্যো. ছৰালাতং ছৰডাহে সন্তজ্জনুম্মুক্কং. উভতো পরিবাহিরোতি সামঞ্ঞতো, গিহিভোগতো চ পরিহীনো. সব্বেসং ৰেরী, সব্বে ৰা ৰেরী এতস্সাতি সব্বৰেরী, সো এৰ সব্বৰেরিকো, পুরিসো. সংৰাসং নারহতীতি অসংৰাসারহো. সদ্ধম্মেতি পটিপত্তিসদ্ধম্মে, পটিৰেধসদ্ধম্মে চ.

‘‘অগ্গিক্খন্ধপরিযাযে ৰুত্তদুক্খভাগিতাযা’’তি সঙ্খেপেন ৰুত্তমত্থং ৰিত্থারতো দস্সেতুং ‘‘দুস্সীলানঞ্হী’’তিআদি আরদ্ধং. পঞ্চকামগুণপরিভোগসুখে, পরেহি কযিরমানৰন্দনমাননাদিসুখে চ অস্সাদেন গধিতচিত্তা পঞ্চকাম…পে… গধিতচিত্তা, তেসং. তে যথাৰুত্তসুখস্সাদা পচ্চযা এতস্সাতি তপ্পচ্চযং. দুক্খন্তি সম্বন্ধো.

পস্সথ নোতি পস্সথ নু, অপি পস্সথ. মহন্তন্তি ৰিপুলং. অগ্গিক্খন্ধন্তি অগ্গিসমূহং. আদিত্তন্তি পদিত্তং. সম্পজ্জলিতন্তি সমন্ততো পজ্জলিতং অচ্ছিৰিপ্ফুলিঙ্গানি মুচ্চন্তং. সজোতিভূতন্তি সপভং সমন্ততো উট্ঠিতাহি জালাহি একপ্পভাসমুদযভূতং. তং কিং মঞ্ঞথাতি তং ইদানি মযা ৰুচ্চমানমত্থং কিং মঞ্ঞথাতি অনুমতিগহণত্থং পুচ্ছতি. আলিঙ্গেত্ৰাতি উপগূহিত্ৰা. উপনিসীদেয্যাতি তেনেৰ আলিঙ্গনেন উপেচ্চ নিসীদেয্য. যদত্থমেত্থ সত্থা অগ্গিক্খন্ধালিঙ্গনং, কঞ্ঞালিঙ্গনঞ্চ আনেসি, তমত্থং ৰিভাৰেতুং ‘‘আরোচযামী’’তিআদিমাহ. তত্থ আরোচযামীতি আমন্তেমি. ৰোতি তুম্হে. পটিৰেদযামীতি পবোধেমি. দুস্সীলস্সাতি নিস্সীলস্স সীলৰিরহিতস্স. পাপধম্মস্সাতি দুস্সীলত্তা এৰ হীনজ্ঝাসযতায লামকসভাৰস্স. অসুচিসঙ্কস্সরসমাচারস্সাতি অপরিসুদ্ধকাযসমাচারাদিতায অসুচিস্স হুত্ৰা সঙ্কায সরিতব্বসমাচারস্স. দুস্সীলো হি কিঞ্চিদেৰ অসারুপ্পং দিস্ৰা ‘‘ইদং অসুকেন কতং ভৰিস্সতী’’তি পরেসং আসঙ্কনীযোৰ হোতি, কেনচিদেৰ ৰা করণীযেন মন্তযন্তে ভিক্খূ দিস্ৰা ‘‘কচ্চি নু খো ইমে মযা কতং কম্মং জানিত্ৰা মন্তেন্তী’’তি অত্তনোযেৰ সঙ্কায সরিতব্বসমাচারোতি. পটিচ্ছন্নকম্মন্তস্সাতি লজ্জিতব্বতায পটিচ্ছাদেতব্বকম্মন্তস্স. অস্সমণস্সাতি ন সমণস্স. সলাকগ্গহণাদীসু ‘‘অহম্পি সমণো’’তি মিচ্ছাপটিঞ্ঞায সমণপটিঞ্ঞস্স. অসেট্ঠচারিতায অব্রহ্মচারিস্স. উপোসথাদীসু ‘‘অহম্পি ব্রহ্মচারী’’তি মিচ্ছাপটিঞ্ঞায ব্রহ্মচারিপটিঞ্ঞস্স. পূতিনা কম্মেন সীলৰিপত্তিযা অন্তো অনুপৰিট্ঠত্তা অন্তোপূতিকস্স. ছহি দ্ৰারেহি রাগাদিকিলেসানুৰস্সনেন তিন্তত্তা অৰস্সুতস্স. সঞ্জাতরাগাদিকচৰরত্তা, সীলৰন্তেহি ছড্ডেতব্বত্তা চ কসম্বুজাতস্স. অগ্গিক্খন্ধূপমায হীনূপমভূতাযাতি অত্থো. তেনাহ ভগৰা – ‘‘এতদেৰ তস্স ৰর’’ন্তি. ভগৰা দুক্খং দস্সেত্ৰা দুক্খং দস্সেতীতি সম্বন্ধো.

ৰাল়রজ্জুযাতি ৰাল়েহি কতরজ্জুযা. সা হি খরতরা হোতি. ঘংসেয্যাতি পধংসনৰসেন ঘংসেয্য. তেলধোতাযাতি তেলেন নিসিতায. পচ্চোরস্মিন্তি পতিউরস্মিং উরাভিমুখং, উরমজ্ঝেতি অধিপ্পাযো. অযোসঙ্কুনাতি সণ্ডাসেন. ফেণুদ্দেহকন্তি ফেণং উদ্দেহেত্ৰা, অনেকৰারং ফেণং উট্ঠপেত্ৰাতি অত্থো.

অগ্গিক্খন্ধালিঙ্গনদুক্খতোপি অধিমত্তদুক্খতায কটুকভূতং দুক্খং ফলং এতস্সাতি অগ্গিক্খন্ধালিঙ্গনদুক্খাধিকদুক্খকটুকফলং. কামসুখং অৰিজহতো ভিন্নসীলস্স দুস্সীলস্স কুতো তস্স সুখং নত্থেৰাতি অধিপ্পাযো. সাদনেতি সাদিযনে. যন্তি অঞ্জলিকম্মসাদনং. অসীলিনোতি দুস্সীলস্স. উপহতন্তি সীলব্যসনেন উপদ্দুতং. খতন্তি কুসলমূলানং খণনেন খতং, খণিতং ৰা গুণং সরীরেতি অধিপ্পাযো. সব্বভযেহীতি অত্তানুৰাদাদিসব্বভযেহি. উপচারজ্ঝানং উপাদায সব্বেহি অধিগমসুখেহি.

ৰুত্তপ্পকারৰিপরীততোতি সীলৰিপত্তিযং ৰুত্তাকারপটিপক্খতো ‘‘মনাপো হোতি দেৰমনুস্সান’’ন্তিআদিনা. কাযগন্ধোপি পামোজ্জং, সীলৰন্তস্স ভিক্খুনো. করোতি অপি দেৰানন্তি এত্থ ‘‘গন্ধো ইসীনং চিরদিক্খিতান’’ন্তিআদিকা (জা. ২.১৭.৫৫) গাথা ৰিত্থারেতব্বা. অৰিঘাতীতি অপ্পটিঘাতী. ৰধবন্ধাদিপরিকিলেসা দিট্ঠধম্মিকা আসৰা উপদ্দৰা. সম্পরাযিকদুক্খানং মূলং নাম দুস্সীল্যং. অন্তমতিক্কন্তং অচ্চন্তং, অচ্চন্তং সন্তা অচ্চন্তসন্তা কিলেসপরিল়াহসঙ্খাতদরথানং অভাৰেন সব্বদা সন্তা. উব্বিজ্জিত্ৰাতি ঞাণুত্রাসেন উত্তসিত্ৰা. ৰোদাপেতব্বন্তি ৰিসোধেতব্বং.

সীলনিদ্দেসৰণ্ণনা নিট্ঠিতা.

ইতি পঠমপরিচ্ছেদৰণ্ণনা.

২. ধুতঙ্গনিদ্দেসৰণ্ণনা

২২. অপ্পা ইচ্ছা এতস্সাতি অপ্পিচ্ছো, পচ্চযগেধরহিতো. তস্স ভাৰো অপ্পিচ্ছতা, অলোভজ্ঝাসযতাতি অত্থো. সমং তুট্ঠি, সন্তেন, সকেন ৰা তুট্ঠি সন্তুট্ঠি, সন্তুট্ঠি এৰ সন্তুট্ঠিতা, অঞ্ঞং অপত্থেত্ৰা যথালদ্ধেহি ইতরীতরেহি পচ্চযেহি পরিতুস্সনা. সন্তুট্ঠিতাদীহীতি ত-কারো ৰা পদসন্ধিকরো. ‘‘সন্তুট্ঠিআদীহী’’তি ৰা পাঠো. তে গুণেতি তে সীলৰোদানস্স হেতুভূতে অপ্পিচ্ছতাদিগুণে. সম্পাদেতুন্তি সম্পন্নে কাতুং. তে হি সীলৰিসুদ্ধিযা পটিলদ্ধমত্তা হুত্ৰা ধুতধম্মেহি সম্পন্নতরা হোন্তি. ধুতঙ্গসমাদানন্তি কিলেসানং ধুননকঅঙ্গানং ৰিদ্ধংসনকারণানং সম্মদেৰ আদানং. এৰন্তি এৰং সন্তে, ধুতঙ্গসমাদানে কতেতি অত্থো. অস্স যোগিনো. সল্লেখো কিলেসানং সম্মদেৰ লিখনা ছেদনা তনুকরণং. পৰিৰেকো চিত্তৰিৰেকস্স উপাযভূতা ৰিৰেকট্ঠকাযতা. অপচযো যথা পটিপজ্জনতো কিলেসা নং অপচিনন্তি ন আচিনন্তি, তথা পটিপজ্জনা. ৰীরিযারম্ভো অনুপ্পন্নানং পাপধম্মানং অনুপ্পাদনাদিৰসেন আরদ্ধৰীরিযতা. সুভরতা যথাৰুত্তঅপ্পিচ্ছভাৰাদিসিদ্ধা উপট্ঠকানং সুখভরণীযতা সুপোসতা. আদি-সদ্দেন অপ্পকিচ্চতাসল্লহুকৰুত্তিআদিকে সঙ্গণ্হাতি. সীলঞ্চেৰ যথাসমাদিন্নং পটিপক্খধম্মানং দূরীভাৰেন সুপরিসুদ্ধং ভৰিস্সতি. ৰতানি চ ধুতধম্মা চ সম্পজ্জিস্সন্তি সম্পন্না ভৰিস্সন্তি, নিপ্ফজ্জিস্সন্তি ৰা. যা থিরভূতা ইতরীতরচীৰরপিণ্ডপাতসেনাসনসন্তুট্ঠি পোরাণানং বুদ্ধাদীনং অরিযানং পৰেণিভাৰেন ঠিতা, তত্থ পতিট্ঠিতভাৰং সন্ধাযাহ ‘‘পোরাণে অরিযৰংসত্তযে পতিট্ঠাযা’’তি. ভাৰনা আরমিতব্বট্ঠেন আরামো এতস্সাতি ভাৰনারামো, তব্ভাৰো ভাৰনারামতা, সমথৰিপস্সনাভাৰনাসু যুত্তপ্পযুত্ততা. যস্মা অধিগমারহো ভৰিস্সতি, তস্মাতি সম্বন্ধো.

লাভসক্কারাদি তণ্হায আমসিতব্বতো, লোকপরিযাপন্নতায চ লোকামিসং. নিব্বানাধিগমস্স অনুলোমতো অনুলোমপটিপদা ৰিপস্সনাভাৰনা. অত্থতোতি ৰচনত্থতো. পভেদতোতি ৰিভাগতো. ভেদতোতি ৰিনাসতো. ধুতাদীনন্তি ধুতধুতৰাদধুতধম্মধুতঙ্গানং. সমাসব্যাসতোতি সঙ্খেপৰিত্থারতো.

২৩. রথিকাতি রচ্ছা. সঙ্কারকূটাদীনন্তি নিদ্ধারণে সামিৰচনং. অব্ভুগ্গতট্ঠেনাতি উস্সিতট্ঠেন. ‘‘নদিযা কূল’’ন্তিআদীসু ৰিয সমুস্সযত্থো কূল-সদ্দোতি আহ ‘‘পংসুকূলমিৰ পংসুকূল’’ন্তি. কু-সদ্দো কুচ্ছাযং উল-সদ্দো গতিঅত্থোতি আহ ‘‘কুচ্ছিতভাৰং গচ্ছতীতি ৰুত্তং হোতী’’তি, পংসু ৰিয কুচ্ছিতং উলতি পৰত্ততীতি ৰা পংসুকূলং. পংসুকূলস্স ধারণং পংসুকূলং উত্তরপদলোপেন, তং সীলমস্সাতি পংসুকূলিকো, যথা ‘‘আপূপিকো’’তি. অঙ্গতি অত্তনো ফলং পটিচ্চ হেতুভাৰং গচ্ছতীতি অঙ্গং, কারণং. যেন পুগ্গলো ‘‘পংসুকূলিকো’’তি ৰুচ্চতি, সো সমাদানচেতনাসঙ্খাতো ধম্মো পংসুকূলিকস্স অঙ্গন্তি পংসুকূলিকঙ্গং. তেনাহ ‘‘পংসুকূলিকস্সা’’তিআদি. তস্সাতি সমাদানস্স. সমাদিযতি এতেনাতি সমাদানং, চেতনা.

এতেনেৰ নযেনাতি যথা পংসুকূলধারণং পংসুকূলং, তংসীলো পংসুকূলিকো, তস্স অঙ্গং সমাদানচেতনা ‘‘পংসুকূলিকঙ্গ’’ন্তি ৰুত্তং, এৰং এতেনেৰ ৰচনত্থনযেন তিচীৰরধারণং তিচীৰরং, তংসীলো তেচীৰরিকো, তস্স অঙ্গং সমাদানচেতনা ‘‘তেচীৰরিকঙ্গ’’ন্তি ৰেদিতব্বং. সঙ্ঘাটিআদীসু এৰ তীসু চীৰরেসু তিচীৰরসমঞ্ঞা, ন কণ্ডুপটিচ্ছাদিৰস্সিকসাটিকাদীসূতি তানি সরূপতো দস্সেন্তো ‘‘সঙ্ঘাটিউত্তরাসঙ্গঅন্তরৰাসকসঙ্খাত’’ন্তি আহ.

তং পিণ্ডপাতন্তি পরেহি দিয্যমানানং পিণ্ডানং পত্তে পতনসঙ্খাতং পিণ্ডপাতং, তং উঞ্ছতীতি পিণ্ডপাতিকো, যথা বাদরিকো সামাকিকো. পিণ্ডপাতি এৰ পিণ্ডপাতিকো, যথা ভদ্দো এৰ ভদ্দকো. অৰখণ্ডনং ৰিচ্ছিন্দনং নিরন্তরমপ্পৰত্তি. তপ্পটিক্খেপতো অনৰখণ্ডনং অৰিচ্ছিন্দনং নিরন্তরপ্পৰত্তি. সহ অপদানেনাতি সহ অনৰখণ্ডনেন. সপদানন্তি পদস্স কিরিযাৰিসেসনভাৰং, যত্থ চ তং অনৰখণ্ডনং, তঞ্চ দস্সেতুং ‘‘অৰখণ্ডনরহিতং অনুঘরন্তি ৰুত্তং হোতী’’তি ৰুত্তং. একাসনেতি ইরিযাপথন্তরেন অনন্তরিতায একাযযেৰ নিসজ্জায. পত্তে পিণ্ডোতি এত্থ ৰত্থুভেদো ইধাধিপ্পেতো, ন সামঞ্ঞং. এৰ-কারো চ লুত্তনিদ্দিট্ঠোতি দস্সেন্তো ‘‘কেৰলং একস্মিংযেৰ পত্তে’’তি আহ. উত্তরপদলোপং কত্ৰা অযং নিদ্দেসোতি দস্সেন্তো ‘‘পত্তপিণ্ডগহণে পত্তপিণ্ডসঞ্ঞং কত্ৰা’’তি আহ. এস নযো ইতো পরেসুপি.

পচ্ছাভত্তং নাম পৰারণতো পচ্ছা লদ্ধভত্তং এৰ. খলু-সদ্দস্স পটিসেধত্থৰাচকত্তা তেন সমানত্থং ন-কারং গহেত্ৰা আহ ‘‘ন পচ্ছাভত্তিকো’’তি. সিক্খাপদস্স ৰিসযো সিক্খাপদেনেৰ পটিক্খিত্তো. যো তস্স অৰিসযো, সো এৰ সমাদানস্স ৰিসযোতি আহ ‘‘সমাদানৰসেন পটিক্খিত্তাতিরিত্তভোজনস্সা’’তি. অব্ভোকাসে নিৰাসো অব্ভোকাসো. সুসানে নিৰাসো সুসানং, তং সীলং অস্সাতিআদিনা সব্বং ৰত্তব্বন্তি আহ ‘‘এসেৰ নযো’’তি. যথাসন্থতং ৰিয যথাসন্থতং, আদিতো যথাউদ্দিট্ঠং. তং হেস ‘‘ইদং বহুমঙ্কুণং দুগ্গন্ধপৰাত’’ন্তিআদিৰসেন অপ্পটিক্খিপিত্ৰাৰ সম্পটিচ্ছতি. তেনেৰাহ ‘‘ইদং তুয্হ’’ন্তিআদি. সযনন্তি নিপজ্জনমাহ. তেন তেন সমাদানেনাতি তেন তেন পংসুকূলিকঙ্গাদিকস্স সমাদানেন ধুতকিলেসত্তাতি ৰিদ্ধংসিতকিলেসত্তা, তদঙ্গৰসেন পহীনতণ্হুপাদানাদিপাপধম্মত্তাতি অত্থো. যেহি তং কিলেসধুননং, তানিযেৰ ইধ ধুতস্স ভিক্খুনো অঙ্গানীতি অধিপ্পেতানি, ন অঞ্ঞানি যানি কানিচি, অঞ্ঞেন ৰা ধুতস্সাতি অযমত্থো অত্থতো আপন্নো. ‘‘ঞাণং অঙ্গং এতেস’’ন্তি ইমিনা ঞাণপুব্বকতং তেসং সমাদানস্স ৰিভাৰেতি. পটিপত্তিযাতি সীলাদিসম্মাপটিপত্তিযা. সমাদিযতি এতেনাতি সমাদানং, সমাদানৰসেন পৰত্তা চেতনা, তং লক্খণং এতেসন্তি সমাদানচেতনালক্খণানি. ৰুত্তম্পি চেতং অট্ঠকথাযং –

‘‘সমাদানকিরিযায, সাধকতমভাৰতো;

সম্পযুত্তধম্মা যেনাতি, করণভাৰেন দস্সিতা’’তি.

সমাদানচেতনায গহণং তংমূলকত্তা পরিহরণচেতনাপি ধুতঙ্গমেৰ. অত্তনা, পরম্মুখেন চ কুসলভণ্ডস্স ভুসং ৰিলুপ্পনট্ঠেন লোলুপ্পং তণ্হাচারো, তস্স ৰিদ্ধংসনকিচ্চত্তা লোলুপ্পৰিদ্ধংসনরসানি. ততো এৰ নিল্লোলুপ্পভাৰেন পচ্চুপতিট্ঠন্তি, তং ৰা পচ্চুপট্ঠাপেন্তীতি নিল্লোলুপ্পভাৰপচ্চুপট্ঠানানি. অরিযধম্মপদট্ঠানানীতি পরিসুদ্ধসীলাদিসদ্ধম্মপদট্ঠানানি.

ভগৰতোৰ সন্তিকে সমাদাতব্বানীতি ইদং অন্তরা অৰিচ্ছেদনত্থং ৰুত্তং, রঞ্ঞো সন্তিকে পটিঞ্ঞাতারহস্স অত্থস্স তদুপজীৰিনো একংসতো অৰিসংৰাদনং ৰিয. সেসানং সন্তিকে সমাদানেপি এসেৰ নযো. একসঙ্গীতিকস্সাতি পঞ্চসু দীঘনিকাযাদীসু নিকাযেসু একনিকাযিকস্স. অট্ঠকথাচরিযস্সাতি যস্স অট্ঠকথাতন্তিযেৰ ৰিসেসতো পগুণা, তস্স. এত্থাতি অত্তনাপি সমাদানস্স রুহনে. জেট্ঠকভাতু ধুতঙ্গপ্পিচ্ছতায ৰত্থূতি সো কির থেরো নেসজ্জিকো, তস্স তং ন কোচি জানাতি. অথেকদিৰসং রত্তিযা সযনপিট্ঠে নিসিন্নং ৰিজ্জুলতোভাসেন দিস্ৰা ইতরো পুচ্ছি ‘‘কিং, ভন্তে, তুম্হে নেসজ্জিকা’’তি. থেরো ধুতঙ্গপ্পিচ্ছতায তাৰদেৰ নিপজ্জিত্ৰা পচ্ছা সমাদিযীতি এৰমাগতং ৰত্থু.

১. পংসুকূলিকঙ্গকথাৰণ্ণনা

২৪. গহপতিদানচীৰরন্তি এত্থ দাযকভাৰেন সমণাপি উক্কট্ঠস্স গহপতিপক্খংযেৰ পৰিট্ঠাতি দট্ঠব্বং. ‘‘পব্বজিতো গণ্হিস্সতী’’তি ঠপিতকং সিযা গহপতিচীৰরং, ন পন গহপতিদানচীৰরন্তি তাদিসং নিৰত্তেতুং দানগ্গহণং. অঞ্ঞতরেনাতি এত্থ সমাদানৰচনেন তাৰ সমাদিন্নং হোতু, পটিক্খেপৰচনেন পন কথন্তি? অত্থতো আপন্নত্তা. যথা ‘‘দেৰদত্তো দিৰা ন ভুঞ্জতী’’তি ৰুত্তে ‘‘রত্তিযং ভুঞ্জতী’’তি অত্থতো আপন্নমেৰ হোতি, তস্স আহারেন ৰিনা সরীরট্ঠিতি নত্থীতি, এৰমিধাপি ভিক্খুনো গহপতিদানচীৰরে পটিক্খিত্তে তদঞ্ঞচীৰরপ্পটিগ্গহো অত্থতো আপন্নো এৰ হোতি, চীৰরেন ৰিনা সাসনে ঠিতি নত্থীতি.

এৰং সমাদিন্নধুতঙ্গেনাতিআদিৰিধানং পংসুকূলিকঙ্গে পটিপজ্জনৰিধি. সুসানে লদ্ধং সোসানিকং. তং পন যস্মা তত্থ কেনচি ছড্ডিতত্তা পতিতং হোতি, তস্মা ৰুত্তং ‘‘সুসানে পতিতক’’ন্তি. এৰং পাপণিকম্পি দট্ঠব্বং. তালৰেল়িমগ্গো নাম মহাগামে একা ৰীথি. অনুরাধপুরেতি চ ৰদন্তি. ডড্ঢো পদেসো এতস্সাতি ডড্ঢপ্পদেসং, ৰত্থং. মগ্গে পতিতকং বহুদিৰসাতিক্কন্তং গহেতব্বন্তি ৰদন্তি. ‘‘দ্ৰত্তিদিৰসাতিক্কন্ত’’ন্তি অপরে. থোকং রক্খিত্ৰাতি কতিপযং কালং আগমেত্ৰা. ৰাতাহতম্পি সামিকানং সতিসম্মোসেন পতিতসদিসন্তি ‘‘সামিকে অপস্সন্তেন গহেতুং ৰট্টতী’’তি ৰুত্তং. তস্মা থোকং আগমেত্ৰা গহেতব্বং.

‘‘সঙ্ঘস্স দেমা’’তি দিন্নং, চোল়কভিক্খাৰসেন লদ্ধঞ্চ লদ্ধকালতো পট্ঠায ‘‘সমণচীৰরং সিযা নু খো, নো’’তি আসঙ্কং নিৰত্তেতুং ‘‘ন তং পংসুকূল’’ন্তি ৰুত্তং. ন হি তং তেৰীসতিযা উপ্পত্তিট্ঠানেসু কত্থচি পরিযাপন্নং. ইদানি ইমিনাৰ পসঙ্গেন যং ভিক্খুদত্তিযে লক্খণপত্তং পংসুকূলং, তস্স চ উক্কট্ঠানুক্কট্ঠৰিভাগং দস্সেতুং ‘‘ভিক্খুদত্তিযেপী’’তিআদি ৰুত্তং. তত্থ গাহেত্ৰা ৰা দীযতীতি সঙ্ঘস্স ৰা গণস্স ৰা দেন্তেহি যং চীৰরং ৰস্সগ্গেন পাপেত্ৰা ভিক্খূনং দীযতি. সেনাসনচীৰরন্তি সেনাসনং কারেত্ৰা ‘‘এতস্মিং সেনাসনে ৰসন্তা পরিভুঞ্জন্তূ’’তি দিন্নচীৰরং. ন তং পংসুকূলন্তি অপংসুকূলভাৰো পুব্বে ৰুত্তকারণতো, গাহেত্ৰা দিন্নত্তা চ. তেনাহ ‘‘নো গাহাপেত্ৰা দিন্নমেৰ পংসুকূল’’ন্তি. তত্রপীতি যং গাহেত্ৰা ন দিন্নং ভিক্খুদত্তিযং, তত্রপি যেন ভিক্খুনা চীৰরং দীযতি, তস্স লাভে, দানে চ ৰিসুং ৰিসুং উভযত্থ আদরগারৰানং সব্ভাৰতো, তদভাৰতো চ ভিক্খুদত্তিযস্স একতোসুদ্ধি উভতোসুদ্ধি অনুক্কট্ঠতা হোন্তীতি ইমমত্থং দস্সেতুং ‘‘যং দাযকেহী’’তিআদি ৰুত্তং, পাদমূলে ঠপেত্ৰা দিন্নকং সমণেনাতি অধিপ্পাযো. যস্স কস্সচীতি উক্কট্ঠাদীসু যস্স কস্সচি. রুচিযাতি ছন্দেন. খন্তিযাতি নিজ্ঝানক্খন্তিযা.

নিস্সযানুরূপপটিপত্তিসব্ভাৰোতি উপসম্পন্নসমনন্তরং আচরিযেন ৰুত্তেসু চতূসু নিস্সযেসু অত্তনা যথাপটিঞ্ঞাতদুতিযনিস্সযানুরূপায পটিপত্তিযা ৰিজ্জমানতা. আরক্খদুক্খাভাৰোতি চীৰরারক্খনদুক্খস্স অভাৰো পংসুকূলচীৰরস্স অলোভনীযত্তা. পরিভোগতণ্হায অভাৰো সৰিসেসলূখসভাৰত্তা. পাসাদিকতাতি পরেসং পসাদাৰহতা. অপ্পিচ্ছতাদীনং ফলনিপ্ফত্তি ধুতঙ্গপরিহরণস্স অপ্পিচ্ছতাদীহিযেৰ নিপ্ফাদেতব্বতো. ধুতধম্মে সমাদায ৰত্তনং যাৰদেৰ উপরি সম্মাপটিপত্তিসম্পাদনাযাতি ৰুত্তং ‘‘সম্মাপটিপত্তিযা অনুব্রূহন’’ন্তি. মারসেনৰিঘাতাযাতি মারস্স, মারসেনায চ ৰিহননায ৰিদ্ধংসনায. কাযৰাচাচিত্তেহি যতো সংযতোতি যতি, ভিক্খু. ধারিতং যং লোকগরুনা পংসুকূলং, তং কো ন ধারযে, যস্মা ৰা লোকগরুনা পংসুকূলং ধারিতং, তস্মা কো তং ন ধারযেতি যোজনা যংতংসদ্দানং একন্তসম্বন্ধিভাৰতো. পটিঞ্ঞং সমনুস্সরন্তি উপসম্পদমাল়ে ‘‘আম ভন্তে’’তি আচরিযপমুখস্স সঙ্ঘস্স সম্মুখা দিন্নং পটিঞ্ঞং সমনুস্সরন্তো.

ইতি পংসুকূলিকঙ্গকথাৰণ্ণনা.

২. তেচীৰরিকঙ্গকথাৰণ্ণনা

২৫. চতুত্থকচীৰরন্তি নিৰাসনপারুপনযোগ্যং চতুত্থকচীৰরন্তি অধিপ্পাযো, অংসকাসাৰস্স অপ্পটিক্খিপিতব্বতো. অঞ্ঞতরৰচনেনাতি এত্থ যং ৰত্তব্বং, তং হেট্ঠা ৰুত্তনযমেৰ. যাৰ ন সক্কোতি, যাৰ ন লভতি, যাৰ ন সম্পজ্জতীতি পচ্চেকং যাৰ-সদ্দো সম্বন্ধিতব্বো. ন সম্পজ্জতীতি ন সিজ্ঝতি. নিক্খিত্তপচ্চযা দোসো নত্থীতি নিচযসন্নিধিধুতঙ্গসংকিলেসদোসো নত্থি. আসন্নেতি চীৰরস্স আসন্নে ঠানে. রজনক্খণে পরিভুঞ্জনকাসাৰং রজনকাসাৰং. তত্রট্ঠকপচ্চত্থরণং নাম অত্তনো, পরস্স ৰা সন্তকং সেনাসনে পচ্চত্থরণৰসেন অধিট্ঠিতং. ‘‘অংসকাসাৰং পরিক্খারচোল়ং হোতি, ইতি পচ্চত্থরণং, অংসকাসাৰন্তি ইমানি দ্ৰেপি অতিরেকচীৰরট্ঠানে ঠিতানিপি ধুতঙ্গভেদং ন করোন্তী’’তি অট্ঠকথাযং ৰুত্তন্তি ৰদন্তি. পরিহরিতুং পন ন ৰট্টতীতি রজনকালে এৰ অনুঞ্ঞাতত্তা নিচ্চপরিভোগৰসেন ন ৰট্টতি তেচীৰরিকস্স. অংসকাসাৰন্তি খন্ধে ঠপেতব্বকাসাৰং. কাযপরিহারিকেনাতি ৰাতাতপাদিপরিস্সযতো কাযস্স পরিহরণমত্তেন. সমাদাযেৰাতি গহেত্ৰা এৰ. অপ্পসমারম্ভতাতি অপ্পকিচ্চতা. কপ্পিযে মত্তকারিতাযাতি নিসীদনাদিৰসেন, পরিক্খারচোল়ৰসেন চ বহূসু চীৰরেসু অনুঞ্ঞাতেসুপি তিচীৰরমত্তে ঠিতত্তা. সহ পত্তচরণাযাতি সপত্তচরণো. পক্খী সপক্খকো.

ইতি তেচীৰরিকঙ্গকথাৰণ্ণনা.

৩. পিণ্ডপাতিকঙ্গকথাৰণ্ণনা

২৬. অতিরেকলাভন্তি ‘‘পিণ্ডিযালোপভোজনং নিস্সাযা’’তি (মহাৰ. ৭৩, ১২৮) এৰং ৰুত্তভিক্খাহারলাভতো অতিরেকলাভং, সঙ্ঘভত্তাদিন্তি অত্থো. সকলস্স সঙ্ঘস্স দাতব্বভত্তং সঙ্ঘভত্তং. কতিপযে ভিক্খূ উদ্দিসিত্ৰা দাতব্বভত্তং উদ্দেসভত্তং. একস্মিং পক্খে একদিৰসং দাতব্বভত্তং পক্খিকং. উপোসথে উপোসথে দাতব্বভত্তং উপোসথিকং. পটিপদদিৰসে দাতব্বভত্তং পাটিপদিকং. ৰিহারং উদ্দিস্স দাতব্বভত্তং ৰিহারভত্তং. ধুরগেহে এৰ ঠপেত্ৰা দাতব্বভত্তং ধুরভত্তং. গামৰাসীআদীহি ৰারেন দাতব্বভত্তং ৰারকভত্তং. ‘‘সঙ্ঘভত্তং গণ্হথাতিআদিনা’’তি আদি-সদ্দেন উদ্দেসভত্তাদিং সঙ্গণ্হাতি. সাদিতুং ৰট্টন্তীতি ভিক্খাপরিযাযেন ৰুত্তত্তা. ভেসজ্জাদিপটিসংযুত্তা নিরামিসসলাকা. যাৰকালিকৰজ্জাতি চ ৰদন্তি. ৰিহারে পক্কভত্তম্পীতি উপাসকা ইধেৰ ভত্তং পচিত্ৰা ‘‘সব্বেসং অয্যানং দস্সামা’’তি ৰিহারেযেৰ ভত্তং সম্পাদেন্তি, তং পিণ্ডপাতিকানম্পি ৰট্টতি. আহরিত্ৰাতি পত্তং গহেত্ৰা গেহতো আনেত্ৰা. তং দিৰসং নিসীদিত্ৰাতি ‘‘মা, ভন্তে, পিণ্ডায চরিত্থ, ৰিহারেযেৰ ভিক্খা আনীযতী’’তি ৰদন্তানং সম্পটিচ্ছনেন তং দিৰসং নিসীদিত্ৰা. সেরিৰিহারসুখন্তি অপরাযত্তৰিহারিতাসুখং. অরিযৰংসোতি অরিযৰংসসুত্তপটিসংযুত্তা (দী. নি. ৩.৩০৯; অ. নি. ৪.২৮) ধম্মকথা. ধম্মরসন্তি ধম্মূপসঞ্হিতং পামোজ্জাদিরসং.

জঙ্ঘবলং নিস্সায পিণ্ডপরিযেসনতো কোসজ্জনিম্মদ্দনতা. ‘‘যথাপি ভমরো পুপ্ফ’’ন্তিআদিনা (ধ. প. ৪৯; নেত্তি. ১২৩) ৰুত্তৰিধিনা আহারপরিযেসনতো পরিসুদ্ধাজীৰতা. নিচ্চং অন্তরঘরং পৰিসন্তস্সেৰ সুপ্পটিচ্ছন্নগমনাদযো সেখিযধম্মা সম্পজ্জন্তীতি সেখিযপটিপত্তিপূরণং. পটিগ্গহণে মত্তঞ্ঞুতায, সংসট্ঠৰিহারাভাৰতো চ অপরপোসিতা. কুলে কুলে অপ্পকঅপ্পকপিণ্ডগহণেন পরানুগ্গহকিরিযা. অন্তিমায জীৰিকায অৰট্ঠানেন মানপ্পহানং. ৰুত্তঞ্হেতং ‘‘অন্তমিদং, ভিক্খৰে, জীৰিকানং, যদিদং পিণ্ডোল্য’’ন্তিআদি (ইতিৰু. ৯১; সং. নি. ৩.৮০). মিস্সকভত্তেন যাপনতো রসতণ্হানিৰারণং. নিমন্তনাসম্পটিচ্ছনতো গণভোজনাদিসিক্খাপদেহি অনাপত্তিতা.

অপ্পটিহতৰুত্তিতায চতূসুপি দিসাসু ৰত্তনট্ঠেন চাতুদ্দিসো. আজীৰস্স ৰিসুজ্ঝতীতি আজীৰো অস্স ৰিসুজ্ঝতি. অত্তভরস্সাতি অপ্পানৰজ্জসুলভরূপেহি পচ্চযেহি অত্তনো ভরণতো অত্তভরস্স. ততো এৰ একৰিহারিতায সদ্ধিৰিহারিকাদীনম্পি অঞ্ঞেসং অপোসনতো অনঞ্ঞপোসিনো. পদদ্ৰযেনাপি কাযপরিহারিকেন চীৰরেন কুচ্ছিপরিহারিকেন পিণ্ডপাতেন ৰিচরণতো সল্লহুকৰুত্তিতং, সুভরতং, পরমঅপ্পিচ্ছতং, সন্তুট্ঠিঞ্চ দস্সেতি. দেৰাপি পিহযন্তি তাদিনোতি তাদিসস্স ভুসং অতিৰিয সন্তকাযৰচীমনোকম্মতায উপসন্তস্স পরমেন সতিনেপক্কেন সমন্নাগমতো সব্বকালং সতিমতো পিণ্ডপাতিকস্স ভিক্খুস্স সক্কাদযো দেৰাপি পিহযন্তি পত্থেন্তি. তস্স সীলাদিগুণেসু বহুমানং উপ্পাদেন্তা আদরং জনেন্তি, পগেৰ মনুস্সা. সচে সো লাভসক্কারসিলোকসন্নিস্সিতো ন হোতি, তদভিকঙ্খী ন হোতীতি অত্থো.

ইতি পিণ্ডপাতিকঙ্গকথাৰণ্ণনা.

৪. সপদানচারিকঙ্গকথাৰণ্ণনা

২৭. ইমিনাতি সপদানচারিকেন. কালতরন্তি কালস্সেৰ. অফাসুকট্ঠানন্তি সপরিস্সযাদিৰসেন দুপ্পৰেসনট্ঠানং. পুরতোতি ৰীথিযং গচ্ছন্তস্স পুরতো ঘরং অপৰিট্ঠস্সেৰ. পত্তৰিস্সট্ঠট্ঠানন্তি পেসকারৰীথিযং পেসকারভাৰং নিম্মিনিত্ৰা ঠিতস্স সক্কস্স ঘরদ্ৰারে পত্তৰিস্সট্ঠট্ঠানং. উক্কট্ঠপিণ্ডপাতিকো তং দিৰসং ন ভিক্খং আগমযমানো নিসীদতি, তস্মা তং অনুলোমেতি. কত্থচিপি কুলে নিবদ্ধং উপসঙ্কমনাভাৰতো পরিচযাভাৰেন কুলেসু নিচ্চনৰকতা. সব্বত্থ অলগ্গমানসতায চ সোম্মভাৰেন চ চন্দূপমতা. কুলেসু পরিগ্গহচিত্তাভাৰেন তত্থ মচ্ছেরপ্পহানং. হিতেসিতায ৰিভাগাভাৰতো সমানুকম্পিতা. কুলানং সঙ্গণ্হনসংসট্ঠতাদযো কুলূপকাদীনৰা. অৰ্হানানভিনন্দনাতি নিমন্তনৰসেন অৰ্হানস্স অসম্পটিচ্ছনা. অভিহারেনাতি ভিক্খাভিহারেন. সেরিচারন্তি যথারুচি ৰিচরণং.

ইতি সপদানচারিকঙ্গকথাৰণ্ণনা.

৫. একাসনিকঙ্গকথাৰণ্ণনা

২৮. নানাসনভোজনন্তি অনেকস্মিং আসনে ভোজনং, একনিসজ্জায এৰ অভুঞ্জিত্ৰা ৰিসুং ৰিসুং নিসজ্জাসু আহারপরিভোগন্তি অত্থো. পতিরূপন্তি যুত্তরূপং অনুট্ঠাপনীযং. ৰত্তং কাতুং ৰট্টতীতি ৰত্তং কাতুং যুজ্জতি. ৰত্তং নাম গরুট্ঠানীযে কত্তব্বমেৰ. তত্থ পন পটিপজ্জনৰিধিং দস্সেতুং যং থেরৰাদং আহ ‘‘আসনং ৰা রক্খেয্য ভোজনং ৰা’’তিআদি. তস্সত্থো – একাসনিকং ভিক্খুং ভুঞ্জন্তং আসনং ৰা রক্খেয্য, ধুতঙ্গভেদতো যাৰ ভোজনপরিযোসানা ন ৰুট্ঠাতব্বন্তি ৰুত্তং হোতি. ভোজনং ৰা রক্খেয্য ধুতঙ্গভেদতো, অভুঞ্জিযমানং যাৰ ভুঞ্জিতুং নারভতি, তাৰ ৰুট্ঠাতব্বন্তি অত্থো. যস্মা তযিদং দ্ৰযং ইধ নত্থি, তস্মা ৰত্তকরণং ধুতঙ্গং ন রক্খতীতি অধিপ্পাযো. তেনাহ ‘‘অযঞ্চা’’তিআদি. ‘‘ভেসজ্জত্থমেৰা’’তি ইমিনা ভেসজ্জপরিভোগৰসেনেৰ সপ্পিআদীনিপি ৰট্টন্তীতি দস্সেতি. অপ্পাবাধতাতি অরোগতা. অপ্পাতঙ্কতাতি অকিচ্ছজীৰিতা সরীরদুক্খাভাৰো. লহুট্ঠানন্তি কাযস্স লহুপরিৰত্তিতা. বলন্তি সরীরবলং. ফাসুৰিহারোতি সুখৰিহারো. সব্বমেতং বহুক্খত্তুং ভুঞ্জনপচ্চযা উপ্পজ্জনৰিকারপটিক্খেপপদং. রুজাতি রোগা. ন কম্মমত্তনোতি অত্তনো যোগকম্মং পুরেভত্তং, পচ্ছাভত্তঞ্চ ন পরিহাপেতি, বহুসো ভোজনে অব্যাৰটভাৰতো, অরোগভাৰতো চাতি অধিপ্পাযো.

ইতি একাসনিকঙ্গকথাৰণ্ণনা.

৬. পত্তপিণ্ডিকঙ্গকথাৰণ্ণনা

২৯. অপ্পটিকূলং কত্ৰা ভুঞ্জিতুং ৰট্টতি পটিকূলস্স ভুত্তস্স অগণ্হনম্পি সিযাতি অধিপ্পাযো. পমাণযুত্তমেৰ গণ্হিতব্বন্তি ‘‘একভাজনমেৰ গণ্হামী’’তি বহুং গহেত্ৰা ন ছড্ডেতব্বং. নানারসতণ্হাৰিনোদনন্তি নানারসভোজনে তণ্হায ৰিনোদনং. অত্র অত্র নানাভাজনে ঠিতে নানারসে ইচ্ছা এতস্সাতি অত্রিচ্ছো, তস্স ভাৰো অত্রিচ্ছতা, তস্সা অত্রিচ্ছতায পহানং. আহারে পযোজনমত্তদস্সিতাতি অসম্ভিন্ননানারসে গেধং অকত্ৰা আহারে সত্থারা অনুঞ্ঞাতপযোজনমত্তদস্সিতা. ৰিসুং ৰিসুং ভাজনেসু ঠিতানি ব্যঞ্জনানি গণ্হতো তত্থ তত্থ সাভোগতায সিযা ৰিক্খিত্তভোজিতা, ন তথা ইমস্স একপত্তগতসঞ্ঞিনোতি ৰুত্তং ‘‘অৰিক্খিত্তভোজিতা’’তি. ওক্খিত্তলোচনোতি পত্তসঞ্ঞিতায হেট্ঠাখিত্তচক্খু. পরিভুঞ্জেয্যাতি পরিভুঞ্জিতুং সক্কুণেয্য.

ইতি পত্তপিণ্ডিকঙ্গকথাৰণ্ণনা.

৭. খলুপচ্ছাভত্তিকঙ্গকথাৰণ্ণনা

৩০. ভুঞ্জন্তস্স যং উপনীতং, তস্স পটিক্খেপেন তং অতিরিত্তং ভোজনন্তি অতিরিত্তভোজনং. পুন ভোজনং কপ্পিযং কারেত্ৰা ন ভুঞ্জিতব্বং, তব্বিসযত্তা ইমস্স ধুতঙ্গস্স. তেনাহ ‘‘ইদমস্স ৰিধান’’ন্তি. যস্মিং ভোজনেতি যস্মিং ভুঞ্জিযমানে ভোজনে. তদেৰ ভুঞ্জতি, ন অঞ্ঞং. অনতিরিত্তভোজনপচ্চযা আপত্তি অনতিরিত্তভোজনাপত্তি, ততো দূরীভাৰো অনাপজ্জনং. ওদরিকত্তং ঘস্মরভাৰো কুচ্ছিপূরকতা, তস্স অভাৰো একপিণ্ডেনাপি যাপনতো. নিরামিসসন্নিধিতা নিহিতস্স অভুঞ্জনতো. পুন পরিযেসনৰসেন পরিযেসনায খেদং ন যাতি. অভিসল্লেখকানং সন্তোসগুণাদীনং ৰুদ্ধিযা সঞ্জননং সন্তোসগুণাদিৰুড্ঢিসঞ্জননং. ইদন্তি খলুপচ্ছাভত্তিকঙ্গং.

ইতি খলুপচ্ছাভত্তিকঙ্গকথাৰণ্ণনা.

৮. আরঞ্ঞিকঙ্গকথাৰণ্ণনা

৩১. গামন্তসেনাসনং পহায অরঞ্ঞে অরুণং উট্ঠাপেতব্বন্তি এত্থ গামন্তং, অরঞ্ঞঞ্চ সরূপতো দস্সেতুং ‘‘তত্থ সদ্ধিং উপচারেনা’’তিআদি আরদ্ধং. তত্থ গামপরিযাপন্নত্তা গামন্তসেনাসনস্স ‘‘গামোযেৰ গামন্তসেনাসন’’ন্তি ৰুত্তং. যো কোচি সত্থোপি গামো নামাতি সম্বন্ধো. ইন্দখীলাতি উম্মারা. তস্সাতি লেড্ডুপাতস্স. ৰিনযপরিযাযেন অরঞ্ঞলক্খণং অদিন্নাদানপারাজিকে (পারা. ৯২) আগতং. তত্থ হি ‘‘গামা ৰা অরঞ্ঞা ৰা’’তি অনৰসেসতো অৰহারট্ঠানপরিগ্গহে তদুভযং অসঙ্করতো দস্সেতুং ‘‘ঠপেত্ৰা গামঞ্চা’’তিআদি ৰুত্তং. গামূপচারো হি লোকে গামসঙ্খমেৰ গচ্ছতীতি. নিপ্পরিযাযতো পন গামৰিনিমুত্তং ঠানং অরঞ্ঞমেৰ হোতীতি অভিধম্মে (ৰিভ. ৫২৯) গামা ‘‘নিক্খমিত্ৰা বহি ইন্দখীলা, সব্বমেতং অরঞ্ঞ’’ন্তি ৰুত্তং. সুত্তন্তিকপরিযাযেন আরঞ্ঞকসিক্খাপদে (পারা. ৬৫৪) ‘‘পঞ্চধনুসতিকং পচ্ছিম’’ন্তি আগতং আরঞ্ঞিকং ভিক্খুং সন্ধায. ন হি সো ৰিনযপরিযাযিকে ‘‘অরঞ্ঞে ৰসনতো আরঞ্ঞিকো পন্তসেনাসনো’’তি সুত্তে ৰুত্তো. অযঞ্চ সুত্তসংৰণ্ণনাতি ইধ সব্বত্থ সুত্তন্তকথাৰ পমাণং. তস্মা তত্থ আগতমেৰ লক্খণং গহেতব্বন্তি দস্সেন্তো ‘‘তং আরোপিতেন আচরিযধনুনা’’তিআদিনা মিননৰিধিং আহ. তেনেৰ হি মজ্ঝিমট্ঠকথানযোৰ (ম. নি. অট্ঠ. ১.২৯৬) ইদমেত্থ পমাণন্তি চ ৰুত্তো.

ততো ততো মগ্গন্তি তত্থ তত্থ খুদ্দকমগ্গং পিদহতি. ধুতঙ্গসুদ্ধিকেন ধুতঙ্গসোধনপসুতেন. যথাপরিচ্ছিন্নে কালেতি উক্কট্ঠস্স তযোপি উতূ, মজ্ঝিমস্স দ্ৰে, মুদুকস্স একো উতু. তত্থপি ধুতঙ্গং ন ভিজ্জতি সউস্সাহত্তা. নিপজ্জিত্ৰা গমিস্সামাতি চিত্তস্স সিথিলভাৰেন ধুতঙ্গং ভিজ্জতীতি ৰুত্তং. অরঞ্ঞসঞ্ঞং মনসি করোন্তোতি ‘‘অহং ৰিৰেকৰাসং ৰসিস্সামি, যথালদ্ধোৰ কাযৰিৰেকো সাত্থকো কাতব্বো’’তি মনসিকারসব্ভাৰতো ‘‘ভব্বো…পে… রক্খিতু’’ন্তি ৰুত্তং. অস্স আরঞ্ঞিকস্স চিত্তং ন ৰিক্খিপন্তি আপাথমনুপগমনতো. ৰিগতসন্তাসো হোতি ৰিৰেকপরিচযতো. জীৰিতনিকন্তিং জহতি বহুপরিস্সযে অরঞ্ঞে নিৰাসেনেৰ মরণভযস্স দূরীকরণতো. পৰিৰেকসুখরসং অস্সাদেতি অনুভৰতি জনসংসগ্গাভাৰতো. আরাধযন্তোতি অনুনযন্তো. যথানুসিট্ঠং পটিপত্তিযা ৰিৰেকস্স অধিট্ঠানভাৰতো আরঞ্ঞিকঙ্গযোগিনো ৰাহনসদিসন্তি কত্ৰা ৰুত্তং ‘‘অৰসেসধুতাযুধো’’তি, অৰসিট্ঠধুতধম্মাযুধোতি অত্থো.

ইতি আরঞ্ঞিকঙ্গকথাৰণ্ণনা.

৯. রুক্খমূলিকঙ্গকথাৰণ্ণনা

৩২. ছন্নন্তি ইট্ঠকাছদনাদীহি ছাদিতং, আৰসথন্তি অত্থো. সীমন্তরিকরুক্খোতি দ্ৰিন্নং রাজূনং রজ্জসীমায ঠিতরুক্খো. তত্থ হি তেসং রাজূনং বলকাযো উপগন্ত্ৰা অন্তরন্তরা যুদ্ধং করেয্য, চোরাপি পারিপন্থিকা সমোসরন্তা ভিক্খুস্স সুখেন নিসীদিতুং ন দেন্তি. চেতিযরুক্খো ‘‘দেৰতাধিট্ঠিতো’’তি মনুস্সেহি সম্মতরুক্খো পূজেতুং উপগতেহি মনুস্সেহি অৰিৰিত্তো হোতি. নিয্যাসরুক্খো সজ্জরুক্খাদি. ৰগ্গুলিরুক্খো ৰগ্গুলিনিসেৰিতো. সীমন্তরিকরুক্খাদযো সপরিস্সযা, দুল্লভৰিৰেকা চাতি আহ ‘‘ইমে রুক্খে ৰিৰজ্জেত্ৰা’’তি. পণ্ণসটন্তি রুক্খতো পতিতপণ্ণং. পটিচ্ছন্নে ঠানে নিসীদিতব্বং রুক্খমূলিকভাৰস্স পটিচ্ছাদনত্থং. ছন্নে ৰাসকপ্পনা ধম্মস্সৰনাদীনমত্থাযপি হোতি. তস্মা ‘‘জানিত্ৰা অরুণং উট্ঠাপিতমত্তে’’তি ৰুত্তং.

অভিণ্হং তরুপণ্ণৰিকারদস্সনেনাতি অভিক্খণং তরূসু, তরূনং ৰা পণ্ণেসু ৰিকারস্স খণভঙ্গস্স দস্সনেন. সেনাসনমচ্ছেরকম্মারামতানন্তি আৰাসমচ্ছরিযনৰকম্মরতভাৰানং. দেৰতাহীতি রুক্খদেৰতাহি. তাপি হি রুক্খট্ঠৰিমানেসু ৰসন্তিযো রুক্খেসু ৰসন্তি. অযম্পি রুক্খেতি সহৰাসিতা. ৰণ্ণিতোতি ‘‘অপ্পানি চেৰা’’তিআদিনা পসংসিতো. ‘‘রুক্খমূলসেনাসনং নিস্সায পব্বজ্জা’’তি (মহাৰ. ৭৩, ১২৮) এৰং নিস্সযোতি চ ভাসিতো. অভিরত্তানি তরুণকালে, নীলানি মজ্ঝিমকালে, পণ্ডূনি জিণ্ণকালে. পতিতানি মিলাযনৰসেন. এৰং পস্সন্তো তরুপণ্ণানি পচ্চক্খতো এৰ নিচ্চসঞ্ঞং পনূদতি পজহতি, অনিচ্চসঞ্ঞা এৰস্স সণ্ঠাতি. যস্মা ভগৰতো জাতিবোধিধম্মচক্কপৰত্তনপরিনিব্বানানি রুক্খমূলেযেৰ জাতানি, তস্মা ৰুত্তং ‘‘বুদ্ধদাযজ্জং রুক্খমূল’’ন্তি.

ইতি রুক্খমূলিকঙ্গকথাৰণ্ণনা.

১০. অব্ভোকাসিকঙ্গকথাৰণ্ণনা

৩৩. ‘‘রুক্খমূলং পটিক্খিপামী’’তি এত্তকে ৰুত্তে ছন্নং অপ্পটিক্খিত্তমেৰ হোতীতি ‘‘ছন্নঞ্চ রুক্খমূলঞ্চ পটিক্খিপামী’’তি ৰুত্তং. ধুতঙ্গস্স সব্বসো পটিযোগিপটিক্খেপেন হি সমাদানং ইজ্ঝতি, নো অঞ্ঞথাতি. ‘‘ধম্মস্সৰনাযা’’তি ইমিনাৰ ধম্মং কথেন্তেনাপি উপোসথদিৰসাদীসু সুণন্তানং চিত্তানুরক্খণত্থং তেহি যাচিতেন ছন্নং পৰিসিতুং ৰট্টতি, ধম্মং পন কথেত্ৰা অব্ভোকাসোৰ গন্তব্বো. রুক্খমূলিকস্সাপি এসেৰ নযো. উপোসথত্থাযাতি উপোসথকম্মায. উদ্দিসন্তেনাতি পরেসং উদ্দেসং দেন্তেন. উদ্দিসাপেন্তেনাতি সযং উদ্দেসং গণ্হন্তেন. মগ্গমজ্ঝে ঠিতং সালন্তি সীহল়দীপে ৰিয মগ্গা অনোক্কম্ম উজুকমেৰ পৰিসিতব্বসালং. ৰেগেন গন্তুং ন ৰট্টতি অসারুপ্পত্তা. যাৰ ৰস্সূপরমা ঠত্ৰা গন্তব্বং, ন তাৰ ধুতঙ্গভেদো হোতীতি অধিপ্পাযো.

রুক্খস্স অন্তো নাম রুক্খমূলং. পব্বতস্স পন পব্ভারসদিসো পব্বতপদেসো. অচ্ছন্নমরিযাদন্তি যথা ৰস্সোদকং অন্তো ন পৰিসতি, এৰং ছদনসঙ্খেপেন উপরি অকতমরিযাদং. অন্তো পন পব্ভারস্স ৰস্সোদকং পৰিসতি চে, অব্ভোকাসসঙ্খেপমেৰাতি তত্থ পৰিসিতুং ৰট্টতি. সাখামণ্ডপোতি রুক্খসাখাহি ৰিরল়চ্ছন্নমণ্ডপো. পীঠপটো খলিত্থদ্ধসাটকো.

পৰিট্ঠক্খণে ধুতঙ্গং ভিজ্জতি যথাৰুত্তপব্ভারাদিকে ঠপেত্ৰাতি অধিপ্পাযো. জানিত্ৰাতি ধম্মস্সৰনাদিঅত্থং ছন্নং রুক্খমূলং পৰিসিত্ৰা নিসিন্নো ‘‘ইদানি অরুণো উট্ঠহতী’’তি জানিত্ৰা. রুক্খমূলেপি কত্থচি অত্থেৰ নিৰাসফাসুকতাতি সিযা তত্থ আসঙ্গপুব্বকো আৰাসপলিবোধো, ন পন অব্ভোকাসেতি ইধেৰ আৰাসপলিবোধুপচ্ছেদো আনিসংসো ৰুত্তো. পসংসাযানুরূপতাতি অনিকেতাতি ৰুত্তপসংসায অনালযভাৰেন অনুচ্ছৰিকতা. নিস্সঙ্গতাতি আৰাসপরিগ্গহাভাৰেনেৰ তত্থ নিস্সঙ্গতা. অসুকদিসায ৰসনট্ঠানং নত্থি, তস্মা তত্থ গন্তুং নেৰ সক্কাতি এদিসস্স পরিৰিতক্কস্স অভাৰতো চাতুদ্দিসো. মিগভূতেনাতি পরিগ্গহাভাৰেন মিগস্স ৰিয ভূতেন. সিতোতি নিস্সিতো. ৰিন্দতীতি লভতি.

ইতি অব্ভোকাসিকঙ্গকথাৰণ্ণনা.

১১. সোসানিকঙ্গকথাৰণ্ণনা

৩৪. ন সুসানন্তি অসুসানং. অঞ্ঞত্থো ন-কারো, সুসানলক্খণরহিতং ৰসনট্ঠানন্তি অধিপ্পাযো. ন তত্থাতি ‘‘সুসান’’ন্তি ৰৰত্থপিতমত্তে ঠানে ন ৰসিতব্বং. ন হি নামমত্তেন সুসানলক্খণং সিজ্ঝতি. তেনাহ ‘‘ন হী’’তিআদি. ঝাপিতকালতো পন পট্ঠায…পে… সুসানমেৰ ছৰেন সযিতমত্তায সুসানলক্খণপ্পত্তিতো. ছৰসযনং হি ‘‘সুসান’’ন্তি ৰুচ্চতি.

সোসানিকেন নাম অপ্পকিচ্চেন সল্লহুকৰুত্তিনা ভৰিতব্বন্তি দস্সেতুং ‘‘তস্মিং পন ৰসন্তেনা’’তিআদি ৰুত্তং. গরুকন্তি দুপ্পরিহারং. তমেৰ হি দুপ্পরিহারভাৰং দস্সেতুং ‘‘তস্মা’’তিআদি ৰুত্তং. তত্থ উপ্পন্নপরিস্সযৰিঘাতত্থাযাতি ‘‘সুসানং নাম মনুস্সরাহস্সেয্যক’’ন্তি চোরা কতকম্মাপি অকতকম্মাপি ওসরন্তি, তত্থ চোরেসু ভণ্ডসামিকে দিস্ৰা ভিক্খুসমীপে ভণ্ডং ছড্ডেত্ৰা পলাতেসু মনুস্সা ভিক্খুং ‘‘চোরো’’তি গহেত্ৰা পোথেয্যুং, তস্মা ৰিহারে সঙ্ঘত্থেরং ৰা গোচরগামে রঞ্ঞা নিযুত্তং রাজযুত্তকং ৰা অত্তনো সোসানিকভাৰং জানাপেত্ৰা যথা তাদিসো, অঞ্ঞো ৰা পরিস্সযো ন হোতি, তথা অপ্পমত্তেন ৰসিতব্বং. চঙ্কমন্তস্স যদা আল়হনং অভিমুখং ন হোতি, তদাপি সংৰেগজননত্থং তত্থ দিট্ঠি ৰিস্সজ্জেতব্বাতি দস্সেতুং ‘‘অদ্ধক্খিকেন আল়হনং ওলোকেন্তেনা’’তি ৰুত্তং.

উপ্পথমগ্গেন গন্তব্বং অত্তনো সোসানিকভাৰস্স অপাকটভাৰত্থং. আরম্মণন্তি তস্মিং সুসানে ‘‘অযং ৰম্মিকো, অযং রুক্খো, অযং খাণুকো’’তিআদিনা দিৰাযেৰ আরম্মণং ৰৰত্থপেতব্বং. ভযানকন্তি ভযজনকং ৰম্মিকাদিং. কেনচি লেড্ডুপাসাণাদিনা আসন্নে ৰিচরন্তীতি ন পহরিতব্বা. তিলপিট্ঠং ৰুচ্চতি পললং. মাসমিস্সং ভত্তং মাসভত্তং. গুল়াদীতি আদি-সদ্দেন তিলসংগুল়িকাদিঘনপূৰঞ্চ সঙ্গণ্হাতি. কুলগেহং ন পৰিসিতব্বন্তি পেতধূমেন ৰাসিতত্তা, পিসাচানুবন্ধত্তা চ কুলগেহস্স অব্ভন্তরং ন পৰিসিতব্বং. দেৰসিকং ছৰডাহো ধুৰডাহো. মতঞাতকানং তত্থ গন্ত্ৰা দেৰসিকং রোদনং ধুৰরোদনং. ৰুত্তনযেনাতি ‘‘ঝাপিতকালতো পন পট্ঠাযা’’তি ৰুত্তনযেন. ‘‘পচ্ছিমযামে পটিক্কমিতুং ৰট্টতী’’তি ইচ্ছিতত্তা ‘‘সুসানং অগতদিৰসে’’তি অঙ্গুত্তরভাণকা.

সুসানে নিচ্চকালং সিৰথিকদস্সনেন মরণস্সতিপটিলাভো. ততো এৰ অপ্পমাদৰিহারিতা. তত্থ ছড্ডিতস্স মতকল়েৰরস্স দস্সনেন অসুভনিমিত্তাধিগমো. ততো এৰ কামরাগৰিনোদনং. বহুলং সরীরস্স অসুচিদুগ্গন্ধজেগুচ্ছভাৰসল্লক্খণতো অভিণ্হং কাযসভাৰদস্সনং. ততো মরণস্সতিপটিলাভতো চ সংৰেগবহুলতা. ব্যাধিকানং, জরাজিণ্ণানঞ্চ মতানং তত্থ দস্সনেন আরোগ্যযোব্বনজীৰিতমদপ্পহানং. খুদ্দকস্স, মহতো চ ভযস্স অভিভৰনতো ভযভেরৰসহনতা. সংৰিগ্গস্স যোনিসো পদহনং সম্ভৰতীতি অমনুস্সানং গরুভাৰনীযতা. নিদ্দাগতম্পীতি সুত্তম্পি, সুপিনন্তেপীতি অধিপ্পাযো.

ইতি সোসানিকঙ্গকথাৰণ্ণনা.

১২. যথাসন্থতিকঙ্গকথাৰণ্ণনা

৩৫. সেনাসনগাহণে পরে উট্ঠাপেত্ৰা গহণং, ‘‘ইদং সুন্দরং, ইদং ন সুন্দর’’ন্তি পরিতুলযিত্ৰা পুচ্ছনা, ওলোকনা চ সেনাসনলোলুপ্পং. তুট্ঠব্বন্তি তুস্সিতব্বং. ৰিহারস্স পরিযন্তভাৰেন দূরেতি ৰা বহূনং সন্নিপাতট্ঠানাদীনং অচ্চাসন্নেতি ৰা পুচ্ছিতুং ন লভতি, পুচ্ছনেনপিস্স ধুতঙ্গস্স সংকিলিস্সনতো. ওলোকেতুন্তি লোলুপ্পৰসেন পস্সিতুং. সচস্স তং ন রুচ্চতীতি অস্স যথাসন্থতিকস্স তং যথাগাহিতং সেনাসনং অফাসুকভাৰেন সচে ন রুচ্চতি, মুদুকস্স অসতি রোগে যথাগাহিতং পহায অঞ্ঞস্স সেনাসনস্স গহণং লোলুপ্পং, মজ্ঝিমস্স গন্ত্ৰা ওলোকনা, উক্কট্ঠস্স পুচ্ছনা. সব্বেসম্পি উট্ঠাপেত্ৰা গহণে ৰত্তব্বমেৰ নত্থি.

উপট্ঠাপনীযানম্পি অনুট্ঠাপনেন সব্রহ্মচারীনং হিতেসিতা. তায করুণাৰিহারানুগুণতা. সুন্দরাসুন্দরৰিভাগাকরণতো হীনপণীতৰিকপ্পপরিচ্চাগো. তেন তাদিলক্খণানুগুণতা. ততো এৰ অনুরোধৰিরোধপ্পহানং. দ্ৰারপিদহনং ওকাসাদানতো. যথাসন্থতরামতন্তি যথাগাহিতে যথানিদ্দিট্ঠে সেনাসনে অভিরতভাৰং.

ইতি যথাসন্থতিকঙ্গকথাৰণ্ণনা.

১৩. নেসজ্জিকঙ্গকথাৰণ্ণনা

৩৬. সেয্যন্তি ইরিযাপথলক্খণং সেয্যং. তপ্পটিক্খেপেনেৰ হি তদত্থা ‘‘মঞ্চো ভিসী’’তি এৰমাদিকা (চূল়ৰ. ৩২১, ৩২২) সেয্যা পটিক্খিত্তা এৰ হোন্তি. ‘‘নেসজ্জিকো’’তি চ সযনং পটিক্খিপিত্ৰা নিসজ্জায এৰ ৰিহরিতুং সীলমস্সাতি ইমস্স অত্থস্স ইধ অধিপ্পেতত্তা সেয্যা এৰেত্থ পটিযোগিনী, ন ইতরে তথা অনিট্ঠত্তা, অসম্ভৰতো চ. কোসজ্জপক্খিযো হি ইরিযাপথো ইধ পটিযোগিভাৰেন ইচ্ছিতো, ন ইতরে. ন চ সক্কা ঠানগমনেহি ৰিনা নিসজ্জায এৰ যাপেতুং তথা পৰত্তেতুন্তি সেয্যাৰেত্থ পটিযোগিনী. তেনাহ ‘‘তেন পনা’’তিআদি. চঙ্কমিতব্বং ন ‘‘নেসজ্জিকো অহ’’ন্তি সব্বরত্তিং নিসীদিতব্বং. ইরিযাপথন্তরানুগ্গহিতো হি কাযো মনসিকারক্খমো হোতি.

চত্তারো পাদা, পিট্ঠিঅপস্সযো চাতি ইমেহি পঞ্চহি অঙ্গেহি পঞ্চঙ্গো. চতূহি অট্টনীহি, পিট্ঠিঅপস্সযেন চ পঞ্চঙ্গোতি অপরে. উভোসু পস্সেসু পিট্ঠিপস্সে চ যথাসুখং অপস্সায ৰিহরতো নেসজ্জিকস্স ‘‘অনেসজ্জিকতো কো ৰিসেসো’’তি গাহং নিৰারেতুং অভযত্থেরো নিদস্সিতো ‘‘থেরো অনাগামী হুত্ৰা পরিনিব্বাযী’’তি.

উপচ্ছেদীযতি এতেনাতি উপচ্ছেদনন্তি ৰিনিবন্ধুপচ্ছেদস্স সাধকতমভাৰো দট্ঠব্বো. সব্বকম্মট্ঠানানুযোগসপ্পাযতা অলীনানুদ্ধচ্চপক্খিকত্তা নিসজ্জায. ততো এৰ পাসাদিকইরিযাপথতা. ৰীরিযারম্ভানুকূলতা ৰীরিযসমতাযোজনস্স অনুচ্ছৰিকতা. ততো এৰ সম্মাপটিপত্তিযা অনুব্রূহনতা. পণিধাযাতি ঠপেত্ৰা. তনুন্তি উপরিমকাযং. ৰিকম্পেতীতি চালেতি, ইচ্ছাৰিঘাতং করোতীতি অধিপ্পাযো. ৰতন্তি ধুতঙ্গং.

ইতি নেসজ্জিকঙ্গকথাৰণ্ণনা.

ধুতঙ্গপকিণ্ণককথাৰণ্ণনা

৩৭. সেক্খপুথুজ্জনানং ৰসেন সিযা কুসলানি, খীণাসৰানং ৰসেন সিযা অব্যাকতানি. তত্থ সেক্খপুথুজ্জনা পটিপত্তিপূরণত্থং, খীণাসৰা ফাসুৰিহারত্থং ধুতঙ্গানি পরিহরন্তি. অকুসলম্পি ধুতঙ্গন্তি অকুসলচিত্তেনাপি ধুতঙ্গসেৰনা অত্থীতি অধিপ্পাযো. তং ন যুত্তং, যেন অকুসলচিত্তেন পব্বজিতস্স আরঞ্ঞিকত্তং, তং ধুতঙ্গং নাম ন হোতি. কস্মা? লক্খণাভাৰতো. যং হিদং কিলেসানং ধুননতো ধুতস্স পুগ্গলস্স, ঞাণস্স, চেতনায ৰা অঙ্গত্তং, ন তং অকুসলধম্মেসু সম্ভৰতি. তস্মা অরঞ্ঞৰাসাদিমত্তেন আরঞ্ঞিকাদযো তাৰ হোন্তু, আরঞ্ঞিকঙ্গাদীনি পন ন হোন্তীতি ইমমত্থং দস্সেতুং ‘‘ন ময’’ন্তিআদি ৰুত্তং. তত্থ ইমানীতি ধুতঙ্গানি. ৰুত্তং হেট্ঠা ৰচনত্থনিদ্দেসে. ন চ অকুসলেন কোচি ধুতো নাম হোতি, কিলেসানং ধুননট্ঠেনাতি অধিপ্পাযো. যস্স ভিক্খুনো এতানি সমাদানানি অঙ্গানি, এতেন পঠমেনাপি অত্থৰিকপ্পেন ‘‘নত্থি অকুসলং ধুতঙ্গ’’ন্তি দস্সেতি. ন চ অকুসলং কিঞ্চি ধুনাতীতি অকুসলং কিঞ্চি পাপং ন চ ধুনাতি এৰ অপ্পটিপক্খতো. যেসং সমাদানানং তং অকুসলং ঞাণং ৰিয অঙ্গন্তি কত্ৰা তানি ধুতঙ্গানীতি ৰুচ্চেয্যুং. ইমিনা দুতিযেনাপি অত্থৰিকপ্পেন ‘‘নত্থি অকুসলং ধুতঙ্গ’’ন্তি দস্সেতি. নাপি অকুসলন্তিআদি ততিযঅত্থৰিকপ্পৰসেন যোজনা. তস্মাতিআদি ৰুত্তস্সেৰত্থস্স নিগমনং.

যেসন্তি অভযগিরিৰাসিকে সন্ধাযাহ. তে হি ধুতঙ্গং নাম পঞ্ঞত্তীতি ৰদন্তি. তথা সতি তস্স পরমত্থতো অৰিজ্জমানত্তা কিলেসানং ধুননট্ঠোপি ন সিযা, সমাদাতব্বতা চাতি তেসং ৰচনং পাল়িযা ৰিরুজ্ঝতীতি দস্সেতুং ‘‘কুসলত্তিকৰিনিমুত্ত’’ন্তিআদি ৰুত্তং. তস্মাতি যস্মা পঞ্ঞত্তিপক্খে এতে দোসা দুন্নিৰারা, তস্মা তং তেসং ৰচনং ন গহেতব্বং, ৰুত্তনযো চেতনাপক্খোযেৰ গহেতব্বোতি অত্থো. যস্মা এতে ধুতগুণা কুসলত্তিকে পঠমততিযপদসঙ্গহিতা, তস্মা সিযা সুখায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা, সিযা অনুপাদিন্নুপাদানিযা, সিযা অসংকিলিট্ঠসংকিলেসিকাতি এৰং সেসতিকদুকপদেহিপি নেসং যথারহং সঙ্গহো ৰিভাৰেতব্বো.

কামং সব্বোপি অরহা ধুতকিলেসো, ইধ পন ধুতঙ্গসেৰনামুখেন কিলেসে ৰিধুনিত্ৰা ঠিতো খীণাসৰো ‘‘ধুতকিলেসো পুগ্গলো’’তি অধিপ্পেতো. তথা সব্বোপি অরিযমগ্গো নিপ্পরিযাযেন কিলেসধুননো ধম্মো, ৰিসেসতো অগ্গমগ্গো. পরিযাযেন পন ৰিপস্সনাঞাণাদি. হেট্ঠিমপরিচ্ছেদেন ধুতঙ্গচেতনাসম্পযুত্তঞাণং দট্ঠব্বং. এৰং ধুতং দস্সেত্ৰা ধুতৰাদে দস্সেতব্বে যস্মা ধুতৰাদভেদেন ধুতো ৰিয ধুতভেদেন ধুতৰাদোপি দুৰিধো, তস্মা তেসং, তদুভযপটিক্খেপস্স চ ৰসেন চতুক্কমেত্থ সম্ভৰতীতি তং দস্সেতুং ‘‘অত্থি ধুতো’’তিআদি ৰুত্তং.

তযিদন্তি নিপাতো, তস্স ‘‘সো অয’’ন্তি অত্থো. ধুতধম্মা নামাতি ধুতঙ্গসেৰনায পটিপক্খভূতানং পাপধম্মানং ধুননৰসেন পৰত্তিযা ‘‘ধুতো’’তি লদ্ধনামায ধুতঙ্গচেতনায উপকারকা ধম্মাতি কত্ৰা ধুতধম্মা নাম. অসম্পত্তসম্পত্তেসু পচ্চযেসু অলুব্ভনাকারেন পৰত্তনতো অপ্পিচ্ছতা সন্তুট্ঠিতা চ অত্থতো অলোভো. পচ্চযগেধাদিহেতুকানং লোলতাদীনং সংকিলেসানং সম্মদেৰ লিখনতো ছেদনতো গণসঙ্গণিকাদিভেদতো সংসগ্গতো চিত্তস্স ৰিৰেচনতো সল্লেখতা পৰিৰেকতা চ অলোভো অমোহোতি ইমেসু দ্ৰীসু ধম্মেসু অনুপতন্তি তদন্তোগধা তপ্পরিযাপন্না হোন্তি, তদুভযস্সেৰ পৰত্তিৰিসেসভাৰতো. ইমেহি কুসলধম্মেহি অত্থী ইদমত্থী, যেন ঞাণেন পব্বজিতেন নাম পংসুকূলিকঙ্গাদীসু পতিট্ঠিতেন ভৰিতব্বন্তি যথানুসিট্ঠং ধুতগুণে সমাদিযতি চেৰ পরিহরতি চ, তং ঞাণং ইদমত্থিতা. তেনাহ ‘‘ইদমত্থিতা ঞাণমেৰা’’তি. পটিক্খেপৰত্থূসূতি গহপতিচীৰরাদীসু তেহি তেহি ধুতঙ্গেহি পটিক্খিপিতব্বৰত্থূসু. লোভন্তি তণ্হং. তেস্ৰেৰ ৰাতি পটিক্খেপৰত্থূসু এৰ. আদীনৰপটিচ্ছাদকন্তি আরক্খদুক্খপরাধীনৰুত্তিচোরভযাদিআদীনৰপটিচ্ছাদকং. অনুঞ্ঞাতানন্তি সত্থারা নিচ্ছন্দরাগপরিভোগৰসেন অনুঞ্ঞাতানং সুখসম্ফস্সঅত্থরণপাৰুরণাদীনং. পটিসেৰনমুখেনাতি পটিসেৰনদ্ৰারেন, তেন লেসেনাতি অত্থো. অতিসল্লেখমুখেনাতি অতিৰিয সল্লেখপটিপত্তিমুখেন, উক্কট্ঠস্স ৰত্তনকানম্পি পটিক্খিপনৰসেনাতি অত্থো.

সুখুমকরণসন্নিস্সযো রাগো দুক্খায পটিপত্তিযা পতিট্ঠং ন লভতীতি আহ ‘‘দুক্খাপটিপদঞ্চ নিস্সায রাগো ৰূপসম্মতী’’তি. সল্লেখো নাম সম্পজানস্স হোতি, সতিসম্পজঞ্ঞে মোহো অপতিট্ঠোৰ অপ্পমাদসম্ভৰতোতি ৰুত্তং ‘‘সল্লেখং নিস্সায অপ্পমত্তস্স মোহো পহীযতী’’তি. এত্থাতি এতেসু ধুতঙ্গেসু. তত্থাতি অরঞ্ঞরুক্খমূলেসু.

সীসঙ্গানীতি সীসভূতানি অঙ্গানি, পরেসম্পি কেসঞ্চি নানন্তরিকতায, সুকরতায চ সঙ্গণ্হনতো উত্তমঙ্গানীতি অত্থো. অসম্ভিন্নঙ্গানীতি কেহিচি সম্ভেদরহিতানি, ৰিসুংযেৰ অঙ্গানীতি ৰুত্তং হোতি. কম্মট্ঠানং ৰড্ঢতি রাগচরিতস্স মোহচরিতস্স দোসচরিতস্সাপি, তং একচ্চং ধুতঙ্গং সেৰন্তস্সাতি অধিপ্পাযো. হাযতি কম্মট্ঠানং সুকুমারভাৰেনলূখপটিপত্তিং অসহন্তস্স. ৰড্ঢতেৰ মহাপুরিসজাতিকস্সাতি অধিপ্পাযো. ন ৰড্ঢতি কম্মট্ঠানং উপনিস্সযরহিতস্স. একমেৰ হি ধুতঙ্গং যথা কিলেসধুননট্ঠেন, এৰং চেতনাসভাৰত্তা. তেনাহ ‘‘সমাদানচেতনা’’তি.

তেরসাপি ধুতঙ্গানি সমাদায পরিহরন্তানং পুগ্গলানং ৰসেন ‘‘দ্ৰাচত্তালীস হোন্তী’’তি ৰত্ৰা ভিক্খূনং তেরসন্নম্পি পরিহরণস্স একজ্ঝংযেৰ সম্ভৰং দস্সেতুং ‘‘সচে হী’’তিআদি ৰুত্তং. তত্থ ‘‘একপ্পহারেন সব্বধুতঙ্গানি পরিভুঞ্জিতুং সক্কোতী’’তি ৰুত্তং. কথং অব্ভোকাসে ৰিহরন্তস্স রুক্খমূলিকঙ্গং? ‘‘ছন্নং পটিক্খিপামি, রুক্খমূলিকঙ্গং সমাদিযামী’’তি (ৰিসুদ্ধি. ১.৩২) ৰচনতো ছন্নে অরুণং উট্ঠাপিতমত্তে ধুতঙ্গং ভিজ্জতি, ন অব্ভোকাসে, তস্মা ভেদহেতুনো অভাৰেন তম্পি অরোগমেৰ. তথা সেনাসনলোলুপ্পস্স অভাৰেন যথাসন্থতিকঙ্গন্তি দট্ঠব্বং. আরঞ্ঞিকঙ্গং গণম্হা ওহীযনসিক্খাপদেন (পাচি. ৬৯১-৬৯২) পটিক্খিত্তং, খলুপচ্ছাভত্তিকঙ্গং অনতিরিত্তভোজনসিক্খাপদেন (পাচি. ২৩৮-২৪০). পৰারিতায হি ভিক্খুনিযা অতিরিত্তং কত্ৰা ভুঞ্জিতুং ন লব্ভতি. কপ্পিযে চ ৰত্থুস্মিং লোলতাপহানায ধুতঙ্গসমাদানং, ন অকপ্পিযে, সিক্খাপদেনেৰ পটিক্খিত্তত্তা. অট্ঠেৰ হোন্তি ভিক্খুনিযা সংকচ্চিকচীৰরাদীহি সদ্ধিং পঞ্চপি তিচীৰরসঙ্খমেৰ গচ্ছন্তীতি কত্ৰা. যথাৰুত্তেসূতি ভিক্খূনং ৰুত্তেসু তেরসসু তিচীৰরাধিট্ঠানৰিনযকম্মাভাৰতো ঠপেত্ৰা তেচীৰরিকঙ্গং দ্ৰাদস সামণেরানং. সত্তাতি ভিক্খুনীনং ৰুত্তেসু অট্ঠসু একং পহায সত্ত তিচীৰরাধিট্ঠানৰিনযকম্মাভাৰতো. ‘‘ঠপেত্ৰা তেচীৰরিকঙ্গ’’ন্তি হি ইমং অনুৰত্তমানমেৰ কত্ৰা ‘‘সত্ত সিক্খমানসামণেরীন’’ন্তি ৰুত্তং. পতিরূপানীতি উপাসকভাৰস্স অনুচ্ছৰিকানি.

ধুতঙ্গনিদ্দেসৰণ্ণনা নিট্ঠিতা.

ইতি দুতিযপরিচ্ছেদৰণ্ণনা.

৩. কম্মট্ঠানগ্গহণনিদ্দেসৰণ্ণনা

৩৮. অপ্পিচ্ছতাদীহীতি অপ্পিচ্ছতাসন্তুট্ঠিসল্লেখপৰিৰেকাপচযৰীরিযারম্ভাদীহি. পরিযোদাতেতি সুৰিসুদ্ধে নিরুপক্কিলেসে. ইমস্মিং সীলেতি যথাৰুত্তে চতুপারিসুদ্ধিসীলে. ‘‘চিত্তং ভাৰয’’ন্তি ইমমেৰ দেসনং সন্ধাযাহ ‘‘অতিসঙ্খেপদেসিতত্তা’’তি. কো সমাধীতি সরূপপুচ্ছা. কেনট্ঠেন সমাধীতি কেন অত্থেন সমাধীতি ৰুচ্চতি, ‘‘সমাধী’’তি পদং কং অভিধেয্যত্থং নিস্সায পৰত্তন্তি অত্থো. কতিৰিধোতি পভেদপুচ্ছা.

‘‘কো সমাধী’’তি কামঞ্চাযং সরূপপুচ্ছা, ৰিভাগৰন্তানং পন সরূপৰিভাৰনং ৰিভাগদস্সনমুখেনেৰ হোতীতি ৰিভাগো তাৰ অনৰসেসতো দস্সেতব্বো. তংদস্সনে চ অযমাদীনৰোতি দস্সেতুং ‘‘সমাধি বহুৰিধো’’তিআদি ৰুত্তং. তত্থ বহুৰিধোতি কুসলাদিৰসেন অনেকৰিধো. নানপ্পকারকোতি আলম্বনমনসিকারছন্দপণিধিঅধিমোক্খঅভিনীহারসঞ্ঞানানত্তাদিনানপ্পকারো. ন সাধেয্যাতি লোকিযসমাধিস্স ভাৰনা ইধ অধিপ্পেতত্থো, তঞ্চ ন সাধেয্য. ঝানৰিমোক্খাদীসু হি সমাধিং উদ্ধরিত্ৰা তস্স লব্ভমানেহি ৰিভাগেহি ৰিস্সজ্জনে করিযমানে ঝানৰিভঙ্গাদীসু (ৰিভ. ৫০৮ আদযো) আগতো সব্বো সমাধিপভেদো ৰিস্সজ্জেতব্বো সিযা. তথা চ সতি য্ৰাযং লোকিযসমাধিস্স ভাৰনাৰিধি অধিপ্পেতো, তস্স ৰিস্সজ্জনায ওকাসোৰ ন ভৰেয্য. কিঞ্চ যেনস্স তিকচতুক্কঝানিকেন হীনাদিভেদভিন্নেন পৰত্তিৰিভাগেন ব্রহ্মপারিসজ্জাদিৰসেন নৰৰিধো, পঞ্চমজ্ঝানিকেন ৰেহপ্ফলাদিৰসেন দসৰিধো ৰা একাদসৰিধো ৰা ভৰপ্পভেদো নিপ্পজ্জতি. স্ৰাস্স পৰত্তিৰিভাগো অযং সোতি নিদ্ধারেত্ৰা ৰুচ্চমানো ৰিক্খেপায সিযা, যথা তং অৰিসযে. তেনাহ ‘‘উত্তরি চ ৰিক্খেপায সংৰত্তেয্যা’’তি. কুসলচিত্তেকগ্গতাতি কুসলা অনৰজ্জসুখৰিপাকলক্খণা চিত্তেকগ্গতা.

চিত্তচেতসিকানং সমং অৰিসারৰসেন সম্পিণ্ডেন্তস্স ৰিয আধানং সমাধানং. অৰিসারলক্খণো হি সমাধি, সম্পিণ্ডনরসো চ. সম্মা অৰিক্খিপনৰসেন আধানং সমাধানং. অৰিক্খেপলক্খণো ৰা হি সমাধি, ৰিক্খেপৰিদ্ধংসনরসো চাতি. স্ৰাযং যস্মা একারম্মণে চিত্তস্স ঠিতিহেতু, তস্মা ‘‘ঠপনন্তি ৰুত্তং হোতী’’তি আহ. তথা হেস ‘‘চিত্তস্স ঠিতি সণ্ঠিতি অৰট্ঠিতী’’তি (ধ. স. ১৫) নিদ্দিট্ঠো. একারম্মণগ্গহণঞ্চেত্থ সমাধিস্স সন্তানট্ঠিতিভাৰদস্সনত্থং. তথা হিস্স অট্ঠকথাযং দীপচ্চিট্ঠিতি নিদস্সিতা. আনুভাৰেনাতি বলেন, পচ্চযভাৰেনাতি অত্থো. অৰিক্খিপমানাতি ন ৰিক্খিপমানা ৰূপসমমানা. উপসমপচ্চুপট্ঠানো হি সমাধি. এতেনস্স ৰিক্খেপপটিপক্খতং দস্সেতি. অৰিপ্পকিণ্ণাতি অৰিসটা. এতেন অৰিসারলক্খণতং.

সযং ন ৰিক্খিপতি, সম্পযুত্তা ৰা ন ৰিক্খিপন্তি এতেনাতি অৰিক্খেপো, সো লক্খণং এতস্সাতি অৰিক্খেপলক্খণো. ৰিক্খেপং ৰিদ্ধংসেতি, তথা ৰা সম্পজ্জতীতি ৰিক্খেপৰিদ্ধংসনরসো. উদ্ধচ্চে অৰিকম্পনৰসেন পচ্চুপতিট্ঠতি, সম্পযুত্তানং ৰা তং পচ্চুপট্ঠপেতীতি অৰিকম্পনপচ্চুপট্ঠানো. সুখন্তি নিরামিসং সুখং দট্ঠব্বং.

৩৯. অৰিক্খেপলক্খণং নাম সমাধিস্স আৰেণিকো সভাৰো, ন তেনস্স কোচি ৰিভাগো লব্ভতীতি আহ ‘‘অৰিক্খেপলক্খণেন তাৰ একৰিধো’’তি. সম্পযুত্তধম্মে আরম্মণে অপ্পেন্তো ৰিয পৰত্ততীতি ৰিতক্কো অপ্পনা. তথা হি সো ‘‘অপ্পনা ব্যপ্পনা’’তি (ধ. স. ৭) নিদ্দিট্ঠো. তপ্পমুখতাৰসেন পন সব্বস্মিং মহগ্গতানুত্তরে ঝানধম্মে ‘‘অপ্পনা’’তি অট্ঠকথাৰোহারো. তথা তস্স অনুপ্পত্তিট্ঠানভূতে পরিত্তঝানে উপচারৰোহারো. গামাদীনং সমীপট্ঠানে গামূপচারাদিসমঞ্ঞা ৰিযাতি আহ ‘‘উপচারপ্পনাৰসেন দুৰিধো’’তি. ইধ পন সমাধিৰসেন ৰেদিতব্বং. লুজ্জনপলুজ্জনট্ঠেন লোকোতি ৰুচ্চতি ৰট্টং, তপ্পরিযাপন্নতায লোকে নিযুত্তো, তত্থ ৰা ৰিদিতোতি লোকিযো. তত্থ অপরিযাপন্নতায লোকতো উত্তরো উত্তিণ্ণোতি লোকুত্তরো. কামঞ্চেত্থ লোকিযসমাধি ভাৰেতব্বভাৰেন গয্হতি, উভযং পন একজ্ঝং গহেত্ৰা ততো ইতরং নিদ্ধারেতুং ‘‘লোকিযলোকুত্তরৰসেন দুৰিধো’’তি ৰুত্তং. সপ্পীতিকনিপ্পীতিকৰসেনাতি সহ পীতিযা ৰত্ততীতি সপ্পীতিকো, পীতিসম্পযুত্তো. নত্থি এতস্স পীতীতি নিপ্পীতিকো, পীতিৰিপ্পযুত্তো. তেসং ৰসেন. সুখেন সহ একুপ্পাদাদিভাৰং গতোতি সুখসহগতো, সুখসম্পযুত্তোতি অত্থো. উপেক্খাসহগতেপি এসেৰ নযো. উপেক্খাতি চেত্থ অদুক্খমসুখৰেদনা অধিপ্পেতা. সা হি সুখদুক্খাকারপৰত্তিং উপেক্খতি মজ্ঝত্তাকারসণ্ঠিতত্তা. সুখসহগত-পদেন চেত্থ সপ্পীতিকো, নিপ্পীতিকেকদেসো চ সঙ্গহিতো, উপেক্খাসহগত-পদেন পন নিপ্পীতিকেকদেসোৰাতি অযমেতেসং পদানং ৰিসেসো.

সভাৰতো, পচ্চযতো, ফলতো চ মজ্ঝিমপণীতেহি নিহীনো, তেসং ৰা গুণেহি পরিহীনোতি হীনো, অত্তনো পচ্চযেহি পধানভাৰং নীতো পণীতো, উভিন্নং মজ্ঝে ভৰো মজ্ঝিমো. সম্পযোগৰসেন পৰত্তমানেন সহ ৰিতক্কেন সৰিতক্কো, সহ ৰিচারেন সৰিচারো, সৰিতক্কো চ সো সৰিচারো চাতি সৰিতক্কসৰিচারো. আদি-সদ্দেন অৰিতক্কৰিচারমত্তো, অৰিতক্কাৰিচারো চ গহিতো. তত্থ ৰিচারতো উত্তরি ৰিতক্কেন সম্পযোগাভাৰতো অৰিতক্কো চ সো ৰিচারমত্তো চাতি অৰিতক্কৰিচারমত্তো. ৰিসেসনিৰত্তিঅত্থো ৰা মত্ত-সদ্দো. সৰিতক্কসৰিচারো হি সমাধি ৰিতক্কৰিসিট্ঠেন ৰিচারেন সৰিচারো, অযং পন ৰিচারমত্তেন ৰিতক্কসঙ্খাতৰিসেসরহিতেন, তস্মা অৰিতক্কৰিচারমত্তো. অথ ৰা ভাৰনায পহীনত্তা ৰিতক্কাভাৰেনাযং ৰিচারমত্তো, ন ৰিচারতো অঞ্ঞস্স অত্তনো সম্পযুত্তধম্মস্স কস্সচি অভাৰাতি দস্সেতুং অৰিতক্ক-ৰচনেন ৰিচারমত্ত-পদং ৰিসেসেত্ৰা ৰুত্তং. উভযরহিতো অৰিতক্কাৰিচারো. পীতিসহগতাদিৰসেনাতি পীতিসহগতসুখসহগতউপেক্খাসহগতৰসেন. যদেত্থ ৰত্তব্বং, তং সুখসহগতদুকে ৰুত্তনযমেৰ. পটিপক্খেহি সমন্ততো খণ্ডিতত্তা পরিত্তো. পরিত্তন্তি ৰা অপ্পমত্তকং ৰুচ্চতি, অযম্পি অপ্পানুভাৰতায পরিত্তো ৰিযাতি পরিত্তো. কিলেসৰিক্খম্ভনতো, ৰিপুলফলতো, দীঘসন্তানতো চ মহন্তভাৰং গতো, মহন্তেহি ৰা উল়ারচ্ছন্দাদীহি গতো পটিপন্নোতি মহগ্গতো. আরম্মণকরণৰসেনাপি নত্থি এতস্স পমাণকরধম্মা, তেসং ৰা পটিপক্খোতি অপ্পমাণো.

পটিপজ্জতি ঝানং এতাযাতি পটিপদা, পুব্বভাগভাৰনা. দুক্খা কিচ্ছা পটিপদা এতস্সাতি দুক্খাপটিপদো. পকতিপঞ্ঞায অভিৰিসিট্ঠত্তা অভিঞ্ঞা নাম অপ্পনাৰহা ভাৰনাপঞ্ঞা, দন্ধা মন্দা অভিঞ্ঞা এতস্সাতি দন্ধাভিঞ্ঞো. দুক্খাপটিপদো চ সো দন্ধাভিঞ্ঞো চাতি দুক্খাপটিপদাদন্ধাভিঞ্ঞো, সমাধি. তদাদিৰসেন. চতুঝানঙ্গৰসেনাতি চতুন্নং ঝানানং অঙ্গভাৰৰসেন, চতুক্কনযৰসেন চেতং ৰুত্তং. হানভাগিযাদিৰসেনাতি হানকোট্ঠাসিকাদিৰসেন.

সমাধিএককদুকৰণ্ণনা

ছন্নং অনুস্সতিট্ঠানানন্তি বুদ্ধানুস্সতিআদীনং ছন্নং অনুস্সতিকম্মট্ঠানানং. ইমেসং ৰসেনাতি ইমেসং দসন্নং কম্মট্ঠানানং ৰসেন. ‘‘পুব্বভাগে একগ্গতা’’তি ইমিনা অপ্পনায উপকারকনানাৰজ্জনুপচারস্সপি সঙ্গহো দট্ঠব্বো, ন একাৰজ্জনস্সেৰ. অপ্পনাসমাধীনন্তি উপকত্তব্বউপকারকসম্বন্ধে সামিৰচনং ‘‘পুরিসস্স অত্থো’’তিআদীসু ৰিয. পরিকম্মন্তি গোত্রভু. অপরিত্তো সমাধীতি দস্সেতুং ‘‘পঠমস্স ঝানস্সা’’তিআদি ৰুত্তং.

তীসু ভূমীসূতি কামরূপারূপভূমীসু. কুসলচিত্তেকগ্গতায অধিপ্পেতত্তা ‘‘অরিযমগ্গসম্পযুত্তা’’তি ৰুত্তং. সিযা সপ্পীতিকো, সিযা নিপ্পীতিকোতি অনিযমৰচনং উপচারসমাধিসামঞ্ঞেন সব্বেসম্পি ৰা ঝানানং নানাৰজ্জনৰীথিযং উপচারসমাধি সিযা সপ্পীতিকো, সিযা নিপ্পীতিকো. একাৰজ্জনৰীথিযং পন আদিতো দুকতিকজ্ঝানানং উপচারসমাধি সপ্পীতিকোৰ, ইতরেসং নিপ্পীতিকোৰ, ৰিসভাগৰেদনস্স চিত্তস্স আসেৰনপচ্চযতাভাৰতো, একৰীথিযং ৰেদনাপরিৰত্তনাভাৰতো চ. সিযা সুখসহগতো, সিযা উপেক্খাসহগতোতি এত্থাপি ৰুত্তনযেনেৰ অত্থো ৰেদিতব্বো. তত্থ পন ‘‘দুকতিকজ্ঝানান’’ন্তি ৰুত্তং, ইধ ‘‘তিকচতুক্কজ্ঝানান’’ন্তি ৰত্তব্বং.

সমাধিতিকৰণ্ণনা

পটিলদ্ধমত্তোতি অধিগতমত্তো অনাসেৰিতো অবহুলীকতো. সো হি পরিদুব্বলভাৰেন হীনো হোতি. নাতিসুভাৰিতোতি অতিৰিয পগুণভাৰং অপাপিতো. সুভাৰিতোতি সুট্ঠু ভাৰিতো সম্মদেৰ পগুণতং উপনীতো. তেনাহ ‘‘ৰসিপ্পত্তো’’তি. ছন্দাদীনং হীনতাদিৰসেনাপি ইমেসং হীনাদিতা ৰেদিতব্বা. তথা হি উল়ারপুঞ্ঞফলকামতাৰসেন পৰত্তিতো হীনো, লোকিযাভিঞ্ঞাসম্পাদনায পৰত্তিতো মজ্ঝিমো, ৰিৰেককামতায অরিযভাৰে ঠিতেন পৰত্তিতো পণীতো. অত্তহিতায ভৰসম্পত্তিঅত্থং পৰত্তিতো ৰা হীনো, কেৰলং অলোভজ্ঝাসযেন পৰত্তিতো মজ্ঝিমো, পরহিতায পৰত্তিতো পণীতো. ৰট্টজ্ঝাসযেন ৰা পৰত্তিতো হীনো, ৰিৰেকজ্ঝাসযেন পৰত্তিতো মজ্ঝিমো, ৰিৰট্টজ্ঝাসযেন লোকুত্তরপাদকত্থং পৰত্তিতো পণীতো.

সদ্ধিং উপচারসমাধিনাতি সব্বেসম্পি ঝানানং উপচারসমাধিনা সহ. ৰিতক্কমত্তেযেৰ আদীনৰং দিস্ৰাতি ৰিতক্কেযেৰ ওল়ারিকতো উপট্ঠহন্তে ‘‘চিত্তস্স খোভকরধম্মো অয’’ন্তি আদীনৰং দিস্ৰা ৰিচারঞ্চ সন্ততো মনসি করিত্ৰা. তেনাহ ‘‘ৰিচারে অদিস্ৰা’’তি. তং সন্ধাযাতি তং এৰং পটিলদ্ধং সমাধিং সন্ধায. এতং ‘‘অৰিতক্কৰিচারমত্তো সমাধী’’তি দুতিযপদং ৰুত্তং. তীসূতি আদিতো তীসু.

তেস্ৰেৰাতি তেসু এৰ চতুক্কপঞ্চকনযেসু. ততিযে চতুত্থেতি চতুক্কনযে ততিযে, পঞ্চকনযে চতুত্থেতি যোজেতব্বং. অৰসানেতি দ্ৰীসুপি নযেসু পরিযোসানজ্ঝানে. যথাক্কমং চতুত্থে, পঞ্চমে ৰা. পীতিসুখসহগতো ৰাতি এত্থাপি হেট্ঠা ৰুত্তনযেনেৰ অত্থো ৰেদিতব্বো. এত্থ চ সতিপি পীতিসহগতস্সাপি সমাধিস্স সুখসহগতত্তে তীণিপি পদানি অসঙ্করতো দস্সেতুং নিপ্পীতিকসুখতো সপ্পীতিকসুখস্স ৰিসেসদস্সনত্থং সত্থু পীতিতিকদেসনাতি নিপ্পীতিকস্সেৰ সুখস্স ৰসেন সুখসহগতো সমাধি গহিতোতি দট্ঠব্বো.

উপচারভূমিযন্তি উপচারজ্ঝানসম্পযুত্তচিত্তুপ্পাদে. চিত্তুপ্পাদো হি সহজাতধম্মানং উপ্পত্তিট্ঠানতায ‘‘ভূমী’’তি ৰুচ্চতি ‘‘সুখভূমিযং কামাৰচরে’’তিআদীসু (ধ. স. ৯৮৮) ৰিয. পরিত্তো সমাধি কামাৰচরভাৰতো.

সমাধিচতুক্কৰণ্ণনা

পঠমসমন্নাহারো ভাৰনং আরভন্তস্স ‘‘পথৰী পথৰী’’তিআদিনা কম্মট্ঠানে পঠমাভিনিৰেসো. তস্স তস্স ঝানস্স উপচারন্তি নীৰরণৰিতক্কৰিচারনিকন্তিআদীনং ৰূপসমে থিরভূতং কামাৰচরজ্ঝানং. ‘‘যাৰ অপ্পনা’’তি ইমিনা পুব্বভাগপঞ্ঞায এৰ অভিঞ্ঞাভাৰো ৰুত্তো ৰিয দিস্সতীতি ৰদন্তি. অপ্পনাপঞ্ঞা পন অভিঞ্ঞাৰ. যদগ্গেন হি পুব্বভাগপঞ্ঞায দন্ধসীঘতা, তদগ্গেন অপ্পনাপঞ্ঞাযপীতি. সমুদাচারগহণতাযাতি সমুদাচারস্স গহণভাৰেন, পৰত্তিবাহুল্লতোতি অত্থো. অসুখাসেৰনাতি কসিরভাৰনা.

পলিবোধুপচ্ছেদাদীনীতি আদি-সদ্দেন ভাৰনাৰিধানাপরিহাপনাদিং সঙ্গণ্হাতি. অসপ্পাযসেৰীতি উপচারাধিগমতো পুব্বে অসপ্পাযসেৰিতায দুক্খা পটিপদা. পচ্ছা অসপ্পাযসেৰিতায দন্ধা অভিঞ্ঞা হোতি. সপ্পাযসেৰিনোতি এত্থাপি এসেৰ নযো. পুব্বভাগেতি উপচারজ্ঝানাধিগমতো ওরভাগে. অপরভাগেতি ততো উদ্ধং. তস্স ৰোমিস্সকতাতি যো পুব্বভাগে অসপ্পাযং সেৰিত্ৰা অপরভাগে সপ্পাযসেৰী, তস্স দুক্খা পটিপদা খিপ্পাভিঞ্ঞা. ইতরস্স সুখা পটিপদা দন্ধাভিঞ্ঞা হোতি. এৰং পঠমচতুত্থানং ৰোমিস্সকতায দুতিযততিযাতি অত্থো. অকতপলিবোধুপচ্ছেদস্স সপরিপন্থতায পটিপদা দুক্খা হোতি, ইতরস্স সুখা. অসম্পাদিতঅপ্পনাকোসল্লস্স ঞাণস্স অৰিসদতায দন্ধা অভিঞ্ঞা হোতি, ৰিসদতায খিপ্পা অভিঞ্ঞা.

তণ্হাঅৰিজ্জাৰসেনাতি তণ্হাঅৰিজ্জানং অভিভৰানভিভৰৰসেন. সমথৰিপস্সনাধিকারৰসেনাতি সমথৰিপস্সনাসু অসতো, সতো চ অধিকারস্স ৰসেন. তণ্হায সমাধিস্স উজুপটিপক্খত্তা সা সমথপটিপদায পরিপন্থিনীতি আহ ‘‘তণ্হাভিভূতস্স হি দুক্খা পটিপদা হোতী’’তি. অভিভৰো চস্সা ইতরকিলেসেহি অধিকতায অনভিভূতস্স তণ্হাযাতি অধিকারতো ৰেদিতব্বং. তথা অৰিজ্জা পঞ্ঞায উজুপটিপক্খাতি তদভিভূতস্স দন্ধাভিঞ্ঞতা ৰুত্তা. অকতাধিকারোতি ভৰন্তরে অকতপরিচযো যথা পগুণং কত্ৰা ৰিস্সট্ঠগন্থো অপ্পমত্তকেন পযোগেন সুপ্পৰত্তি ৰাচুগ্গতোৰ হোতি, এৰং পুব্বে কতপরিচযস্স ভাৰনা অপ্পকসিরেনেৰ ইজ্ঝতীতি আহ ‘‘কতাধিকারস্স সুখা’’তি. স্ৰাযং অকতো, কতো চ অধিকারো সমথনিস্সিতো পটিপদাযং ৰুত্তো সমাধিপ্পধানত্তা পটিপদায. ৰিপস্সনানিস্সিতো অভিঞ্ঞাযং ঞাণপ্পধানত্তা অপ্পনায. কিলেসিন্দ্রিযৰসেনাতি তিক্খাতিক্খানং কিলেসিন্দ্রিযানং ৰসেন. তেনাহ ‘‘তিব্বকিলেসস্সা’’তিআদি. তত্থ কিলেসা কামচ্ছন্দাদযো, ইন্দ্রিযানি সদ্ধাদীনি.

যথাৰুত্তা পটিপদাভিঞ্ঞা পুগ্গলাধিট্ঠানাতি ধম্মনিদ্দেসম্পি পুগ্গলাধিট্ঠানমুখেন দস্সেতুং ‘‘যো পুগ্গলো’’তিআদি ৰুত্তং. অপ্পগুণোতি ন সুভাৰিতো ৰসীভাৰং অপাপিতো. তেনাহ ‘‘উপরিঝানস্স পচ্চযো ভৰিতুং ন সক্কোতী’’তি. অযং পরিত্তোতি অযং সমাধি অপ্পানুভাৰতায পরিত্তো. অৰড্ঢিতেতি একঙ্গুলদ্ৰঙ্গুলমত্তম্পি ন ৰড্ঢিতে যথাউপট্ঠিতে আরম্মণে. একঙ্গুলমত্তম্পি হি ৰড্ঢিতং অপ্পমাণমেৰাতি ৰদন্তি. ‘‘পগুণো সুভাৰিতো’’তি ৰত্ৰা ‘‘উপরিঝানস্স পচ্চযো ভৰিতুং সক্কোতী’’তি ইমিনা যথা পগুণোপি উপরিঝানস্স পচ্চযো ভৰিতুং অসক্কোন্তো সমাধি পরিত্তোযেৰ হোতি, ন অপ্পমাণো, এৰং ঞাণুত্তরস্স একাসনেনেৰ উপরিঝাননিব্বত্তনেনাতি সুভাৰিতোপি উপরিঝানস্স পচ্চযভাৰসঙ্খাতায সুভাৰিতকিচ্চসিদ্ধিযা ‘‘অপ্পমাণো’’ত্ৰেৰ ৰুচ্চতি. অপরে পন সচে সুভাৰিতো পগুণো ৰসীভাৰং পত্তো উপরিঝানস্স পচ্চযো অহোন্তোপি অপ্পমাণো এৰ, পমাণকরানং রাগাদিপটিপক্খানং সুৰিদূরভাৰতোতি ৰদন্তি. ৰুত্তলক্খণৰোমিস্সতাযাতি যো অপ্পগুণো উপরিঝানস্স পচ্চযো ভৰিতুং ন সক্কোতি, ৰড্ঢিতে আরম্মণে পৰত্তো, অযং পরিত্তো অপ্পমাণারম্মণো. যো পন পগুণো উপরিঝানস্স পচ্চযো ভৰিতুং সক্কোতি, অৰড্ঢিতে আরম্মণে পৰত্তো, অযং অপ্পমাণো পরিত্তারম্মণোতি এৰং পঠমচতুত্থসমাধীনং ৰুত্তলক্খণস্স ৰোমিস্সকভাৰেন দুতিযততিযসমাধিসঙ্গাহকো ৰোমিস্সকনযো ৰেদিতব্বো.

ততোতি ততো পঠমজ্ঝানতো উদ্ধং. ৰিরত্তপীতিকন্তি অতিক্কন্তপীতিকং ৰা জিগুচ্ছিতপীতিকং ৰা. অৰযৰো সমুদাযস্স অঙ্গন্তি ৰুচ্চতি, ‘‘সেনঙ্গং রথঙ্গ’’ন্তিআদীসু ৰিযাতি আহ ‘‘চতুন্নং ঝানানং অঙ্গভূতা চত্তারো সমাধী’’তি.

হানং ভজতীতি হানভাগিযো, হানভাগো ৰা এতস্স অত্থীতি হানভাগিযো, পরিহানকোট্ঠাসিকোতি অত্থো. আলযস্স অপেক্খায অপরিচ্চজনতো ঠিতিং ভজতীতি ঠিতিভাগিযো. ৰিসেসং ভজতীতি ৰিসেসভাগিযো. পচ্চনীকসমুদাচারৰসেনাতি তস্স তস্স ঝানস্স পচ্চনীকানং নীৰরণৰিতক্কৰিচারাদীনং পৰত্তিৰসেন. তদনুধম্মতাযাতি তদনুরূপভূতায সতিযা. সণ্ঠানৰসেনাতি সণ্ঠহনৰসেন পতিট্ঠানৰসেন. ‘‘সা পন তদস্সাদসঙ্খাতা, তদস্সাদসম্পযুত্তক্খন্ধসঙ্খাতা ৰা মিচ্ছাসতী’’তি সম্মোহৰিনোদনিযং (ৰিভ. অট্ঠ. ৭৯৯) ৰুত্তং. তত্থ সাপেক্খস্স উপরি ৰিসেসং নিব্বত্তেতুং অসক্কুণেয্যত্তা অৰিগতনিকন্তিকা তংতংপরিহরণসতীতিপি ৰত্তুং ৰট্টতি. এৰঞ্চ কত্ৰা ‘‘সতিযা ৰা নিকন্তিযা ৰা’’তি ৰিকপ্পৰচনঞ্চ যুত্তং হোতি. ৰিসেসাধিগমৰসেনাতি ৰিসেসাধিগমস্স পচ্চযভাৰৰসেন, ৰিসেসং ৰা অধিগচ্ছতি এতেনাতি ৰিসেসাধিগমো, তস্স ৰসেন. নিব্বিদাসহগতসঞ্ঞামনসিকারসমুদাচারৰসেনাতি আদীনৰদস্সনপুব্বঙ্গমনিব্বিন্দনঞাণসম্পযুত্তসঞ্ঞায চ আভোগস্স চ পৰত্তিৰসেন. নিব্বেধভাগিযতাতি সচ্চানং নিব্বিজ্ঝনপক্খিকতা ৰিপস্সনায সংৰত্ততীতি অত্থো.

কামসহগতাতি কামারম্মণা, কামসঞ্ঞাহি ৰা ৰোকিণ্ণা. অৰিতক্কসহগতাতি ‘‘কথং নু খো মে অৰিতক্কং ঝানং ভৰেয্যা’’তি এৰং অৰিতক্কারম্মণা অৰিতক্কৰিসযা. কামঞ্চাযং ‘‘পঠমস্স ঝানস্সা’’তিআদিকো পাঠো পঞ্ঞাৰসেন আগতো, সমাধিস্সাপি পনেত্থ সঙ্গহো অত্থেৰাতি উদাহরণস্স সাত্থকতং দস্সেতুং ‘‘তায পন পঞ্ঞায সম্পযুত্তা সমাধীপি চত্তারো হোন্তী’’তি তেসং ৰসেন এৰং ৰুত্তন্তি অত্থো.

ভাৰনামযস্স সমাধিস্স ইধাধিপ্পেতত্তা উপচারেকগ্গতা ‘‘কামাৰচরো সমাধী’’তি ৰুত্তং. অধিপতিং করিত্ৰাতি ‘‘ছন্দৰতো চে সমাধি হোতি, ময্হম্পি এৰং হোতী’’তি ছন্দং অধিপতিং, ছন্দং ধুরং জেট্ঠকং পুব্বঙ্গমং কত্ৰা. লভতি সমাধিন্তি এৰং যং সমাধিং লভতি, অযং ৰুচ্চতি ছন্দসমাধি, ছন্দাধিপতিসমাধীতি অত্থো. এৰং ৰীরিযসমাধিআদযোপি ৰেদিতব্বা.

চতুক্কভেদেতি চতুক্কৰসেন সমাধিপ্পভেদনিদ্দেসে. অঞ্ঞত্থ সম্পযোগৰসেন ৰিচারেন সহ ৰত্তমানো ৰিতক্কো পঞ্চকনযে দুতিযজ্ঝানে ৰিযোজিতোপি ন সুট্ঠু ৰিযোজিতোতি, তেন সদ্ধিংযেৰ ৰিচারসমতিক্কমং দস্সেতুং ৰুত্তং ‘‘ৰিতক্কৰিচারাতিক্কমেন ততিয’’ন্তি. দ্ৰিধা ভিন্দিত্ৰা চতুক্কভেদে ৰুত্তং দুতিযং ঝানন্তি যোজনা. পঞ্চঝানঙ্গৰসেনাতি পঞ্চন্নং ঝানানং অঙ্গভাৰৰসেন সমাধিস্স পঞ্চৰিধতা ৰেদিতব্বা.

৪০. ৰিভঙ্গেতি ঞাণৰিভঙ্গে. তত্থ হি ‘‘ঝানৰিমোক্খসমাধিসমাপত্তীনং সংকিলেসৰোদান’’ন্তি, এত্থ ‘‘সংকিলেস’’ন্তিআদি ৰুত্তং. তত্থ হানভাগিযো ধম্মোতি অপগুণেহি পঠমজ্ঝানাদীহি ৰুট্ঠিতস্স সঞ্ঞামনসিকারানং কামাদিঅনুপক্খন্দনং. ৰিসেসভাগিযো ধম্মোতি পগুণেহি পঠমজ্ঝানাদীহি ৰুট্ঠিতস্স সঞ্ঞামনসিকারানং দুতিযজ্ঝানাদিঅনুপক্খন্দনং. তেনাহ ‘‘পঠমস্স ঝানস্স লাভি’’ন্তিআদি. তস্সত্থো (ৰিভ. অট্ঠ. ৮২৮) – অপগুণস্স পঠমস্স ঝানস্স লাভীনং ততো ৰুট্ঠিতং আরম্মণৰসেন কামসহগতা হুত্ৰা সঞ্ঞামনসিকারা সমুদাচরন্তি চোদেন্তি তুদন্তি, তস্স কামানুপক্খন্দানং সঞ্ঞামনসিকারানং ৰসেন সা পঠমজ্ঝানপঞ্ঞা হাযতি, তস্মা হানভাগিনী পঞ্ঞা. অৰিতক্কসহগতাতি অৰিতক্কং দুতিযং ঝানং সন্ততো পণীততো মনসি করোতো আরম্মণৰসেন অৰিতক্কসহগতা সমুদাচরন্তি পগুণপঠমজ্ঝানতো ৰুট্ঠিতং দুতিযজ্ঝানাধিগমত্থায চোদেন্তি তুদন্তি, তস্স দুতিযজ্ঝানানুপক্খন্দানং সঞ্ঞামনসিকারানং ৰসেন পঠমজ্ঝানপঞ্ঞা ৰিসেসভূতস্স দুতিযজ্ঝানস্স উপ্পত্তিযা পদট্ঠানতায ৰিসেসভাগিনী পঞ্ঞা. তংসম্পযুত্তো সমাধি ইধাধিপ্পেতো. ইমিনা নযেনাতি ইমিনা পঠমজ্ঝানে ৰুত্তেন ৰিধিনা দুতিযজ্ঝানাদীসুপি হানভাগিযধম্মো, ৰিসেসভাগিযধম্মো চ ৰেদিতব্বো.

দসপলিবোধৰণ্ণনা

৪১. অরিযমগ্গসম্পযুত্তোতি লোকুত্তরঅপ্পমাণঅপরিযাপন্নগ্গহণেন লোকিযেহি অসাধারণতো, সপ্পীতিকাদিগ্গহণেন সাধারণতো চ অরিযমগ্গসম্পযুত্তো সমাধি ৰুত্তো. ভাৰিতো হোতি সঞ্ঞায সম্পযুত্তত্তা. তন্তি অরিযমগ্গসমাধিং. ৰিসুন্তি পঞ্ঞাভাৰনায ৰিসুং কত্ৰা ন ৰদাম.

কম্মট্ঠানভাৰনং পরিবুন্ধেতি উপরোধেতি পৰত্তিতুং ন দেতীতি পলিবোধো র-কারস্স ল-কারং কত্ৰা, পরিপন্থোতি অত্থো. উপচ্ছিন্দিত্ৰাতি সমাপনেন, সঙ্গহণেন ৰা উপরুন্ধিত্ৰা, অপলিবোধং কত্ৰাতি অত্থো.

আৰসন্তি এত্থাতি আৰাসো. পরিচ্ছেদৰসেন ৰেণিযতি দিস্সতীতি পরিৰেণং. ৰিহারে ভিক্খূনং তং তং ৰসনট্ঠানং. স্ৰাযং আৰাসো. নৰকম্মাদীসূতি আদি-সদ্দেন আৰাসস্স তদঞ্ঞং অভিৰুদ্ধিকারণং সঙ্গণ্হাতি. কারণেনাতি ‘‘ছাযূদকসম্পন্নং সুলভভিক্খ’’ন্তিআদিনা কারণেন. অপেক্খৰাতি সালযো.

তত্রাতি তস্মিং পলিবোধাভাৰে. পাচীনখণ্ডরাজিন্তি পুরত্থিমদিসাযং পব্বতখণ্ডানং অন্তরে ৰনরাজিট্ঠানং. ‘‘নামা’’তি ইমিনা তস্স পদেসস্স অযং সমঞ্ঞাতি দস্সেতি. পটিসামিতমেৰাতি নিচ্চকালং পটিসামেত্ৰাৰ ৰিহারতো নিক্খমামীতি দস্সেতি. ধাতুনিধানট্ঠানন্তি কাযবন্ধনধম্মকরণন্হানসাটিকঅক্খকধাতুসঙ্খাতানং পরিভোগসরীরধাতূনং নিদহিতট্ঠানং. ঈদিসস্স অযং থেরো ৰিয অলগ্গচিত্তস্স. এতেন ‘‘ভিক্খুনা নাম আৰাসে এৰরূপেন ভৰিতব্ব’’ন্তি ওৰাদো দিন্নো হোতি. ইতো পরেসুপি ৰত্থূসু এসেৰ নযো.

কুলন্তি কুলগ্গহণেন কুলমনুস্সানং গহণং গামগ্গহণেন গামৰাসীনং ৰিয. উপট্ঠাককুলম্পীতি পি-সদ্দেন পগেৰ ঞাতিকুলন্তি দস্সেতি. উদ্দেসত্থন্তি উদ্দিসাপনত্থং, পাঠং উদ্দিসাপেত্ৰা সজ্ঝাযিতুন্তি অত্থো. ইধেৰাতি ইমস্মিংযেৰ পদেসে, যত্থ কত্থচি ৰিহারেতি অত্থো. তং ৰিহারন্তি তং কোরণ্ডকৰিহারং.

উপগতোতি ৰস্সং উপগতো. সদাতি গতকালতো পভুতি ৰিসেসতো পৰারিতদিৰসতো পট্ঠায সব্বদা দিৰসে দিৰসে. পরিদেৰমানাতি তংতংৰিলপনৰসেন ৰিৰিধং পরিদেৰন্তী. সব্বং পৰত্তিন্তি অত্তনা তত্থ দিট্ঠকালতো পট্ঠায পচ্ছা সমাগমপরিযোসানং দহরস্স সব্বং পৰত্তিং.

কাযসক্খিন্তি ‘‘পস্স ইম’’ন্তি মুখপটিগ্গাহকং কত্ৰা. রথৰিনীতপটিপদন্তি দসকথাৰত্থুকিত্তনপুব্বিকং রথৰিনীতূপমাহি ৰিভাৰিতং রথৰিনীতসুত্তে (ম. নি. ১.২৫২) আগতং সত্তৰিসুদ্ধিপটিপদং. নালকপটিপদন্তি ‘‘মোনেয্যং তে উপঞ্ঞিস্স’’ন্তিআদিনা (সু. নি. ৭০৬) সত্থারা নালকত্থেরস্স দেসিতপটিপদং. তুৰটকপটিপদন্তি ‘‘মূলং পপঞ্চসঙ্খাযা’’তিআদিনা (সু. নি. ৯২২) ভগৰতা দেসিতপটিপদং. তত্থ হি যথাক্কমং –

‘‘ন মুনী গামমাগম্ম, কুলেসু সহসা চরে;

ঘাসেসনং ছিন্নকথো, ন ৰাচং পযুতং ভণে’’. (সু. নি. ৭১৬);

‘‘গামে চ নাভিসজ্জেয্য, লাভকম্যা জনং ন লপযেয্যা’’তি. (সু. নি. ৯৩৫) –

এৰমাদিকা পরমপ্পিচ্ছকথা আগতা. চতুপচ্চযসন্তোসভাৰনারামতাদীপকন্তি চীৰরাদীসু চতূসু পচ্চযেসু সন্তোসস্স, ভাৰনারামতায চ পকাসকং.

লব্ভতীতি লাভো. তেনাহ ‘‘চত্তারো পচ্চযা’’তি. মহাপরিৰারেতি ৰিপুলপরিৰারে. পিণ্ডপাতং তাৰ দেন্তা বুদ্ধপূজাপত্তচীৰরাদীনি তস্স পরিৰারানি কত্ৰা দেন্তি, তথা চীৰরাদিদানেপি. বাহুল্লিকপিণ্ডপাতিকাতি পিণ্ডপাতিকা হুত্ৰা পচ্চযবাহুল্লিকা. ৰদন্তীতি পুরিমদিৰসে ভিক্খায আহিণ্ডনকালে যথাসুতং ৰদন্তি. নিচ্চব্যাৰটো উপাসকাদীনং সঙ্গণ্হনে.

তস্সাতি গণস্স. সোতি গণপলিবোধো. এৰন্তি ইদানি ৰুচ্চমানাকারেন গণৰাচকস্স পরিযেসনম্পি লহুকমেৰ ইচ্ছিতব্বন্তি আহ ‘‘যোজনতো পরং অগন্ত্ৰা’’তি. অত্তনো কম্মন্তি সমণধম্মমাহ.

কতাকতেতি কতে চ অকতে চ কম্মে জাননৰসেন উস্সুক্কং আপজ্জিতব্বং, কতাকতেতি ৰা অপ্পকে চ মহন্তে চ কতে, যথা ‘‘ফলাফলে’’তি. সচে বহুং অৰসিট্ঠন্তি সম্বন্ধো. ভারহারা সঙ্ঘকিচ্চপরিণাযকা.

পব্বজ্জাপেক্খোতি সীহল়দীপে কির কুলদারকানং পব্বজ্জা আৰাহৰিৰাহসদিসা, তস্মা তং পরিচ্ছিন্নদিৰসং অতিক্কমেতুং ন সক্কা. ‘‘সচে তং অলভন্তো ন সক্কোতি অধিৰাসেতু’’ন্তিআদিনা সমাপনেন পলিবোধুপচ্ছেদো ৰুত্তো, ব্যতিরেকতো পন ‘‘সচে তং অলভন্তো সক্কোতি অধিৰাসেতুং, অরঞ্ঞং পৰিসিত্ৰা সমণধম্মোৰ কাতব্বো’’তি অযমত্থো দস্সিতোতি সঙ্গহণেন পলিবোধুপচ্ছেদো ৰেদিতব্বো. এস নযো সেসেসুপি.

তথাতি যথা উপজ্ঝাযো গিলানো যাৰজীৰং উপট্ঠাতব্বো, তথা উপসম্পাদিতঅন্তেৰাসিকো অত্তনো কম্মৰাচং ৰত্ৰা উপসম্পাদিতো.

যো কোচি রোগোতি মূলভূতো, অনুবন্ধো ৰা অত্তনো উপ্পন্নো. অনমতগ্গেতি অনু অনু অমতগ্গে অনাদিমতি.

‘‘গন্থো’’তি ইমিনা গন্থপলিবোধো ইধ ৰুত্তোতি আহ ‘‘পরিযত্তিহরণ’’ন্তি. সজ্ঝাযাদীহীতি সজ্ঝাযধারণপরিচযপুচ্ছাদীহি. ইতরস্সাতি অব্যাৰটস্স. যস্স গন্থধুরং ৰিস্সজ্জেত্ৰা ঠিতস্সাপি গন্থো ৰত্ততেৰ, ন তস্স গন্থো পলিবোধো. যথা তম্হি তম্হি ৰত্থুম্হি আগতত্থেরানং, নাপি সব্বেন সব্বং অগন্থপসুতস্স. মজ্ঝিমপণ্ণাসকো আগচ্ছতি, সুত্তপদেসানং ৰারানঞ্চ সদিসতায ব্যামুয্হনতো. পুন ন ওলোকেস্সামীতি কম্মট্ঠানং গহেত্ৰা গন্থধুরং ৰিস্সজ্জেমীতি অত্থো.

গামৰাসিকত্থেরেহীতি অনুরাধপুরৰাসীহি. অনুগ্গহেত্ৰাতি অগ্গহেত্ৰা তত্থ পরিচযং অকত্ৰা. পঞ্চনিকাযমণ্ডলেতি দীঘাগমাদিকে পঞ্চপি নিকাযে সিক্খিতপরিসায. পরিৰত্তেস্সামীতি ৰণ্ণযিস্সামি. সুৰণ্ণভেরিন্তি সেট্ঠভেরিং. কতমাচরিযানং উগ্গহোতি কতমেসং আচরিযানং উগ্গহো, কেন পরিৰত্তীযতীতি অধিপ্পাযো. আচরিযমগ্গোতি আচরিযানং কথামগ্গো. অত্তনো আচরিযানন্তি অত্তনো কথেতুং যুত্তানং আচরিযানং. সুৰিনিচ্ছিতা সব্বা তিপিটকপরিযত্তি এতস্মিং অত্থীতি সব্বপরিযত্তিকো, তেপিটকোতি অত্থো. পীঠে নিসিন্নো ততো ওতরিত্ৰা ভূমিযং তট্টিকায নিসীদিত্ৰা. গতকস্সাতি পটিপত্তিগমনেন গতস্স দিট্ঠসচ্চস্স. চীৰরং পারুপিত্ৰাতি আচরিযস্স অপচিতিদস্সনত্থং পরিমণ্ডলং চীৰরং পারুপিত্ৰা. সাঠেয্যাভাৰতো উজু. কারণাকারণস্স আজাননতো আজানীযো.

পোথুজ্জনিকাতি পুথুজ্জনে ভৰা. দুপ্পরিহারা বহুপরিস্সযতায. তথা হিস্সা উত্তানসেয্যকদারকো, তরুণসস্সঞ্চ নিদস্সিতং. ৰিপস্সনায পলিবোধো সমথযানিকস্স, ন ৰিপস্সনাযানিকস্স. যেভুয্যেন হি ঝানলাভী সমথযানিকোৰ হোতি ৰিপস্সনাসুখতো. ইতরেনাতি সমথত্থিকেন. অৰসেসা নৰ পলিবোধা.

কম্মট্ঠানদাযকৰণ্ণনা

৪২. কম্মট্ঠানে নিযুত্তো কম্মট্ঠানিকো, ভাৰনমনুযুঞ্জন্তো. তেন কম্মট্ঠানিকেন. পরিচ্ছিন্দিত্ৰাতি ‘‘ইমস্মিং ৰিহারে সব্বে ভিক্খূ’’তি এৰং পরিচ্ছিন্দিত্ৰা. সহৰাসীনং ভিক্খূনং. মুদুচিত্ততন্তি অত্তনি মুদুচিত্ততং জনেতি, অযঞ্চ সহৰাসীনং চিত্তমদ্দৰজননাদিঅত্থো ‘‘মনুস্সানং পিযো হোতী’’তিআদিনযপ্পৰত্তেন মেত্তানিসংসসুত্তেন (অ. নি. ১১.১৫; পটি. ম. ২.২২; মি. প. ৪.৪.৬) দীপেতব্বো. অনোলীনৰুত্তিকো হোতি সম্মাপটিপত্তিযং. দিব্বানিপি আরম্মণানি পগেৰ ইতরানি. সব্বত্থ সব্বস্মিং সমণকরণীযে, সব্বস্মিং ৰা কম্মট্ঠানানুযোগে. পুব্বাসেৰনৰসেন অত্থযিতব্বং. যোগস্স ভাৰনায অনুযুঞ্জনং যোগানুযোগো, তদেৰ করণীযট্ঠেন কম্মং, তস্স যোগানুযোগকম্মস্স ঠানং নিপ্ফত্তিহেতু.

নিচ্চং পরিহরিতব্বত্তাতি সব্বত্থককম্মট্ঠানং ৰিয একদাৰ অননুযুঞ্জিত্ৰা সব্বকালং পরিহরণীযত্তা অনুযুঞ্জিতব্বত্তা. এৰমাদিগুণসমন্নাগতন্তি পিযভাৰাদীহি গুণেহি সম্পন্নং. কল্যাণমিত্তো হি সদ্ধাসম্পন্নো হোতি সীলসম্পন্নো সুতসম্পন্নো চাগসম্পন্নো ৰীরিযসম্পন্নো সতিসম্পন্নো সমাধিসম্পন্নো পঞ্ঞাসম্পন্নো. তত্থ সদ্ধাসম্পত্তিযা সদ্দহতি তথাগতস্স বোধিং, কম্মফলঞ্চ, তেন সম্মাসম্বোধিযা হেতুভূতং সত্তেসু হিতেসিতং ন পরিচ্চজতি. সীলসম্পত্তিযা সত্তানং পিযো হোতি গরু ভাৰনীযো চোদকো পাপগরহী ৰত্তা ৰচনক্খমো, সুতসম্পত্তিযা সচ্চপটিচ্চসমুপ্পাদাদিপটিসংযুত্তানং গম্ভীরানং কথানং কত্তা হোতি, চাগসম্পত্তিযা অপ্পিচ্ছো হোতি সন্তুট্ঠো পৰিৰিত্তো অসংসট্ঠো, ৰীরিযসম্পত্তিযা আরদ্ধৰীরিযো হোতি অত্তহিতপরহিতপটিপত্তিযং, সতিসম্পত্তিযা উপট্ঠিতস্সতি হোতি, সমাধিসম্পত্তিযা অৰিক্খিত্তো সমাহিতচিত্তো, পঞ্ঞাসম্পত্তিযা অৰিপরীতং পজানাতি. সো সতিযা কুসলাকুসলানং ধম্মানং গতিযো সমন্নেসমানো পঞ্ঞায সত্তানং হিতাহিতং যথাভূতং জানিত্ৰা সমাধিনা তত্থ একগ্গচিত্তো হুত্ৰা ৰীরিযেন সত্তে অহিতং নিসেধেত্ৰা হিতে নিযোজেতি. তেন ৰুত্তং ‘‘পিযো…পে… নিযোজকোতি এৰমাদিগুণসমন্নাগত’’ন্তি.

তং পন কল্যাণমিত্তং পরমুক্কংসগতং দস্সেতুং ‘‘মমং হী’’তিআদি ৰুত্তং. কারকভাৰং যোগকম্মস্স. পকাসেতি অত্তানং পটিপত্তিযা অমোঘভাৰদস্সনেন সমুত্তেজনায, সম্পহংসনায চ, ননু কথেসি পৰেণিপালনত্থন্তি অধিপ্পাযো. এৰরূপোতি পেসলো হুত্ৰা বহুস্সুতো. তন্তিধরোতি সুত্তধরো তত্থ কেহিচিপি অসংহীরো. ৰংসানুরক্খকোতি বুদ্ধানুবুদ্ধৰংসস্স অনুরক্খকো. পৰেণিপালকোতি পৰেণিযা আচরিযুগ্গহণস্স অনুপালকো. আচরিযমতিকোতি আচরিযমতিযং নিযুত্তো তস্সা অনতিৰত্তনতো. ন অত্তনোমতিং পকাসেতি কথেতীতি ন অত্তনোমতিকো, অত্তনো মতিং পগ্গয্হ ৰত্তা ন হোতীতি অত্থো.

‘‘পুব্বে ৰুত্তখীণাসৰাদযো’’তিআদি একচ্চখীণাসৰতো বহুস্সুতোৰ কম্মট্ঠানদানে সেয্যোতি দস্সনত্থং আরদ্ধং. তত্থ পুব্বে ৰুত্তখীণাসৰাদযোতি ‘‘যং কম্মট্ঠানং গহেতুকামো’’তিআদিনা ৰুত্তখীণাসৰাদিকা. উগ্গহপরিপুচ্ছানং ৰিসোধিতত্তাতি উগ্গহেতব্বতো ‘‘উগ্গহো’’তি লদ্ধনামায কম্মট্ঠানুপকারায পাল়িযা, তদত্থং পরিপুচ্ছনতো ‘‘পরিপুচ্ছা’’তি লদ্ধসমঞ্ঞায অত্থসংৰণ্ণনায চ ৰিসেসতো সোধিতত্তা নিগ্গুম্বং নিজ্জটং কত্ৰা গহিতত্তা. ইতো চিতো চ সুত্তঞ্চ কারণঞ্চ সল্লক্খেত্ৰাতি পঞ্চসুপি নিকাযেসু ইতো চিতো চ তস্স তস্স কম্মট্ঠানস্স অনুরূপং সুত্তপদঞ্চেৰ সুত্তানুগতং যুত্তিঞ্চ সুট্ঠু উপলক্খেত্ৰা. সপ্পাযাসপ্পাযং যোজেত্ৰাতি যস্স কম্মট্ঠানং আচিক্খতি, তস্স উপকারানুপকারং যুত্তিং মগ্গনেন যোজেত্ৰা, সমাদায ৰা সম্মদেৰ হদযে ঠপেত্ৰাতি অত্থো. মহামগ্গং দস্সেন্তোতি কম্মট্ঠানৰিধিং মহামগ্গং কত্ৰা দস্সেন্তো.

সব্বত্থাতি তত্থ তত্থ ৰিহারে. ৰত্তপটিপত্তিং কুরুমানেনাতি পৰিট্ঠকালে আগন্তুকৰত্তং, নিক্খমনকালে গমিকৰত্তন্তি যথারহং তং তং ৰত্তং পূরেন্তেন. সব্বপারিহারিযতেলন্তি সব্বেসং অঙ্গানং, সব্বেসং ৰা ভিক্খূনং অত্থায পরিহরিতব্বতেলং. ঠপেমীতি অনুজানাপনং. যং তং সম্মাৰত্তং পঞ্ঞত্তন্তি সম্বন্ধো. একদিৰসং সাযং ৰিস্সজ্জিতেনাপীতি যোজনা. আরোচেতব্বং আগমনকারণং. সপ্পাযৰেলা সরীরচিত্তানং কল্লসমযো.

চরিযাৰণ্ণনা

৪৩. সন্তানে রাগস্স উস্সন্নভাৰেন চরণং পৰত্তি রাগচরিযা, সা সস্সতাসযাদযো ৰিয দট্ঠব্বা. তথা দোসচরিযাদযো. সংসগ্গো সম্পযোগারহৰসেন ৰেদিতব্বো, যথা ‘‘রাগমোহচরিযা দোসমোহচরিযা’’তিআদি. সন্নিপাতো একসন্ততিপরিযাপন্নতাৰসেন, যথা ‘‘রাগদোসচরিযা রাগদোসমোহচরিযা’’তিআদি. ইমা এৰ হি সন্ধায ‘‘অপরাপি চতস্সো’’তি ৰুত্তং. তথাতি যথা রাগাদীনং, তথা সদ্ধাদীনং সংসগ্গসন্নিপাতৰসেন সদ্ধাবুদ্ধিচরিযা সদ্ধাৰিতক্কচরিযা বুদ্ধিৰিতক্কচরিযা সদ্ধাবুদ্ধিৰিতক্কচরিযাতি. ইমা অপরাপি চতস্সো. এৰন্তি সংসগ্গসন্নিপাতৰসেন. সংসগ্গন্তি সংসজ্জনং মিস্সীকরণং ‘‘রাগসদ্ধাচরিযা দোসসদ্ধাচরিযা’’তিআদিনা. অনেকাতি তেসট্ঠি, ততো অতিরেকাপি ৰা, তা পন অসম্মোহন্তেন সংযুত্তসুত্তটীকাযং ৰিত্থারতো দস্সিতাতি তত্থ ৰুত্তনযেন ৰেদিতব্বা. ‘‘পকতী’’তি ইমিনা অসতি পটিপক্খভাৰনাযং তত্থ তত্থ সন্তানে চরিযায সভাৰভূততং দস্সেতি. উস্সন্নতা অঞ্ঞধম্মেহি রাগাদীনং অধিকতা, যতো রাগচরিযাদীনং পচ্চযসমৰাযে রাগাদযো বলৰন্তো হোন্তি, অভিণ্হঞ্চ পৰত্তন্তি. তাসং ৰসেনাতি ছন্নং মূলচরিযানং ৰসেন ছল়েৰ পুগ্গলা হোন্তি. অঞ্ঞথা অনেকপুগ্গলা সিযুং, তথা চ সতি অধিপ্পেতত্থসিদ্ধি চ ন সিযাতি অধিপ্পাযো.

সদ্ধা বলৰতী হোতি রাগুস্সন্নে সন্তানে তদনুগুণস্স ধম্মস্স নিযোগতো অধিকভাৰসম্ভৰতো. তেনাহ ‘‘রাগস্স আসন্নগুণত্তা’’তি, সিনেহপরিযেসনাপরিচ্চজনেহি সভাগধম্মত্তাতি অত্থো. সভাগো হি দূরেপি আসন্নেযেৰাতি সভাগতালক্খণমিধ আসন্নগ্গহণং. তত্থ সদ্ধায সিনিয্হনং পসাদৰসেন অকালুস্সিযং অলূখতা, রাগস্স পন রঞ্জনৰসেন. সদ্ধায পরিযেসনং অধিমুচ্চনৰসেন তন্নিন্নতা, রাগস্স তণ্হাযনৰসেন. সদ্ধায অপরিচ্চজনং ওকপ্পনৰসেন অনুপক্খন্দনং, রাগস্স অভিসঙ্গৰসেনাতি এৰং ভিন্নসভাৰানম্পি তেসং যথা অলূখতাদিসামঞ্ঞেন সভাগতা, এৰং তংসমঙ্গীনম্পি পুগ্গলানন্তি আহ ‘‘রাগচরিতস্স সদ্ধাচরিতো সভাগো’’তি.

পঞ্ঞা বলৰতী হোতি দোসুস্সন্নে সন্তানে তদনুগুণস্স ধম্মস্স নিযোগতো অধিকভাৰসম্ভৰতো. তেনাহ ‘‘দোসস্স আসন্নগুণত্তা’’তি, অনল্লীযনপরিযেসনপরিৰজ্জনেহি সভাগধম্মত্তাতি অত্থো. তত্থ পঞ্ঞায আরম্মণস্স অনল্লীযনং তস্স যথাসভাৰাৰবোধৰসেন ৰিসংসট্ঠতা, দোসস্স পন ব্যাপজ্জনৰসেন. পঞ্ঞায পরিযেসনং যথাভূতদোসপৰিচযো, দোসস্স অভূতদোসনিজিগীসা. পঞ্ঞায পরিৰজ্জনং নিব্বিন্দনাদিৰসেন ঞাণুত্রাসো, দোসস্স অহিতাধানৰসেন ছড্ডনন্তি এৰং ভিন্নসভাৰানম্পি তেসং যথা অনল্লীযনাদিসামঞ্ঞেন সভাগতা, এৰং তংসমঙ্গীনম্পি পুগ্গলানন্তি আহ ‘‘দোসচরিতস্স বুদ্ধিচরিতো সভাগো’’তি.

অন্তরাযকরা ৰিতক্কাতি মিচ্ছাৰিতক্কা মিচ্ছাসঙ্কপ্পা উপ্পজ্জন্তি মোহুস্সন্নে সন্তানে তদনুগুণস্স ধম্মস্স যেভুয্যেন পৰত্তিসব্ভাৰতো. তেনাহ ‘‘মোহস্স আসন্নলক্খণত্তা’’তি, অনৰট্ঠানচঞ্চলভাৰেহি সভাগধম্মত্তাতি অত্থো. তত্থ ৰিতক্কস্স অনৰট্ঠানং পরিকপ্পৰসেন সৰিপ্ফারতায, মোহস্স সম্মূল়্হতাৰসেন ব্যাকুলতায. তথা ৰিতক্কস্স লহুপরিৰিতক্কনেন তদঙ্গচলতায চঞ্চলতা, মোহস্স অনোগাল়্হতাযাতি এৰং ভিন্নসভাৰানম্পি তেসং যথা অনৰট্ঠানাদিসামঞ্ঞেন সভাগতা, এৰং তংসমঙ্গীনম্পি পুগ্গলানন্তি আহ ‘‘মোহচরিতস্স ৰিতক্কচরিতো সভাগো’’তি.

তণ্হা রাগোযেৰ সভাৰতো, তস্মা রাগচরিযাৰিনিমুত্তা তণ্হাচরিযা নত্থীতি অত্থো. তংসম্পযুত্তোতি তেন রাগেন সম্পযুত্তো, দোসাদযো ৰিয তেন ৰিপ্পযুত্তো নত্থীতি অধিপ্পাযো. তদুভযন্তি তণ্হামানদ্ৰযং. নাতিৰত্ততীতি সভাৰতো, সম্পযোগৰসেন চ ন অতিক্কমিত্ৰা ৰট্টতি. কামঞ্চেত্থ যথা রাগদোসেহি সম্পযোগৰসেন সহ ৰত্তমানস্সপি মোহস্স উস্সন্নতাৰসেন ৰিসুং চরিযাভাৰো, ন কেৰলং মোহস্সেৰ, তথা সদ্ধাবুদ্ধিৰিতক্কানং. এৰং রাগেন সতিপি সম্পযোগে মানস্সাপি ৰিসুং চরিযাভাৰো যুত্তো সিযা, এৰং সন্তেপি রাগপটিঘমানদিট্ঠিৰিচিকিচ্ছাৰিজ্জানং ৰিয অনুসযট্ঠো ইমেসং রাগাদীনংযেৰ আৰেণিকো চরিযট্ঠোতি, নত্থেৰ মানচরিযা. যতো চরিযা ‘‘পকতী’’তি ৰুত্তা. পকতি চ সভাৰোতি. এতেনেৰ দিট্ঠিযাপি ৰিসুং চরিযাভাৰাভাৰো সংৰণ্ণিতোতি দট্ঠব্বো. অট্ঠকথাযং পন মোহচরিযন্তোগধাৰ দিট্ঠিচরিযাতি দস্সেতুং ‘‘মোহনিদানত্তা চা’’তিআদি ৰুত্তং. তত্থ চ-সদ্দেন সম্পযোগং সমুচ্চিনোতি মোহনিদানত্তা, মোহসম্পযুত্তত্তা চাতি.

৪৪. কিং সপ্পাযন্তি কীদিসং সেনাসনাদিসপ্পাযং. পুব্বাচিণ্ণং পুরিমজাতীসু আচরিতং. একচ্চেতি উপতিস্সত্থেরং সন্ধাযাহ. তেন হি ৰিমুত্তিমগ্গে তথা ৰুত্তং. পুব্বে কিরাতি কির-সদ্দো অরুচিসূচনত্থো. ইট্ঠপ্পযোগো মনাপকিরিযা. সুভকম্মবহুলো যেভুয্যেন সোভনকম্মকারী. ন সব্বে রাগচরিতা এৰ হোন্তি, অলুদ্ধানম্পি পুব্বে ইট্ঠপ্পযোগসুভকম্মবহুলতাসম্ভৰতো, সগ্গা চৰিত্ৰা ইধূপপত্তিসম্ভৰতো চ. এতেন অসতি পুব্বহেতুনিযামে যথাৰুত্তকারণমত্তেন ন তেসং লুদ্ধতা, লুদ্ধভাৰহেতুকা চ রাগচরিযাতি ইমমত্থং দস্সেতি.

ইতরেতি ছেদনাদিকম্মবহুলা নিরযাদিতো ইধূপপন্না চ ন সব্বে দোসমোহচরিতা এৰ হোন্তীতি যোজনা. ইধাপি যথাৰুত্তকারণস্স কোধনভাৰে, মূল়্হভাৰে চ অনেকন্তিকত্তা দোসমোহচরিততাযপি অনেকংসিকতা ৰেদিতব্বা. ধাতূনং উস্সদনিযমো যদি পমাণতো, সো নত্থি, অথ সামত্থিযতো, সোপি একংসিকো ন উপলব্ভতীতি দস্সেন্তো আহ ‘‘যথাৰুত্তেনেৰ নযেন উস্সদনিযমো নাম নত্থী’’তি. তত্থ যথাৰুত্তেনেৰাতি ‘‘দ্ৰিন্নং পন ধাতূন’’ন্তিআদিনা ৰুত্তপ্পকারেনেৰ. দোসনিযমেতি সেম্হাদিদোসাধিকতায রাগাদিচরিতো হোতীতি দোসৰসেন চরিযানিযমে ‘‘সেম্হাধিকো রাগচরিতো’’তি ৰত্ৰা পুন ‘‘সেম্হাধিকো মোহচরিতো’’তি, ‘‘ৰাতাধিকো মোহচরিতো’’তি ৰত্ৰা পুন ‘‘ৰাতাধিকো রাগচরিতো’’তি চ ৰুত্তত্তা তম্পি দোসৰসেন নিযমৰচনং পুব্বাপরৰিরুদ্ধমেৰ. অপরিচ্ছিন্নৰচনন্তি পরিচ্ছেদকারিকায পঞ্ঞায ন পরিচ্ছিন্দিত্ৰা ৰুত্তৰচনং, অনুপপরিক্খিতৰচনন্তি অত্থো.

উস্সদকিত্তনেতি ৰিপাককথাযং গহিতউস্সদকিত্তনে. পুব্বহেতুনিযামেনাতি পুরিমভৰে পৰত্তলোভাদিহেতুনিযামেন. নিযামোতি চ তেসংযেৰ লোভাদীনং পটিনিযতো লুব্ভনাদিসভাৰো দট্ঠব্বো. লোভো উস্সদো এতেসন্তি লোভুস্সদা, উস্সন্নলোভা, লোভাধিকাতি অত্থো. অমোহুস্সদা চাতি এত্থ চ-সদ্দো সম্পিণ্ডনত্থো. তেন যে ইমে লোভুস্সদতাদীনং পচ্চেকং ৰোমিস্সতো চ চুদ্দস পভেদা ইচ্ছিতা, তে অনৰসেসতো সম্পিণ্ডেতি যথাৰুত্তেসু ছস্ৰেৰ তেসং অন্তোগধত্তা. ফলভূতা চেত্থ লোভুস্সদতাদযো দট্ঠব্বা.

ইদানি তং নেসং লোভুস্সদতাদীনং পচ্চেকং ৰোমিস্সকতাদিং ৰিভাগেন দস্সেতুং ‘‘যস্স হী’’তিআদি আরদ্ধং. কম্মাযূহনক্খণেতি কম্মকরণৰেলাযং. লোভো বলৰাতি লোভো তজ্জায পচ্চযসামগ্গিযা সামত্থিযতো অধিকো হোতি. অলোভো মন্দোতি তপ্পটিপক্খো অলোভো দুব্বলো. কথং পনেতে লোভালোভা অঞ্ঞমঞ্ঞং উজুৰিপচ্চনীকভূতা একক্খণে পৰত্তন্তীতি? ন খো পনেতং এৰং দট্ঠব্বং ‘‘একক্খণে পৰত্তন্তী’’তি. নিকন্তিক্খণং পন আযূহনপক্খিযমেৰ কত্ৰা এৰং ৰুত্তং. এসেৰ নযো সেসেসুপি. পরিযাদাতুন্তি অভিভৰিতুং ন সক্কোতি. যো হি ‘‘এৰংসুন্দরং এৰংৰিপুলং এৰংমহগ্ঘঞ্চ ন সক্কা দাতু’’ন্তিআদিনা অমুত্তচাগতাদিৰসেন পৰত্তায চেতনায সম্পযুত্তো অলোভো, সো সম্মদেৰ লোভং পরিযাদাতুং ন সক্কোতি. দোসমোহানং অনুপ্পত্তিযা, তাদিসপচ্চযলাভেন চ অদোসামোহা বলৰন্তো. তস্মাতি লোভাদোসামোহানং বলৰভাৰতো, অলোভদোসমোহানঞ্চ দুব্বলভাৰতোতি ৰুত্তমেৰ কারণং পচ্চামসতি. সোতি তংসমঙ্গীপুগ্গলো. তেন কম্মেনাতি তেন লোভাদিউপনিস্সযৰতা কুসলকম্মুনা. সুখসীলোতি সখিলো. তমেৰত্থং ‘‘অক্কোধনো’’তি পরিযাযেন ৰদতি.

পুরিমনযেনেৰাতি পুব্বে ৰুত্তনযানুসারেন মন্দা অলোভাদোসা লোভদোসে পরিযাদাতুং ন সক্কোন্তি, অমোহো পন বলৰা মোহং পরিযাদাতুং সক্কোতীতি এৰং তত্থ তত্থ ৰারে যথারহং অতিদেসত্থো ৰেদিতব্বো. দুট্ঠোতি কোধনো. দন্ধোতি মন্দপঞ্ঞো. সীলকোতি সুখসীলো.

এত্থ চ লোভৰসেন, দোসমোহলোভদোসলোভমোহদোসমোহলোভদোসমোহৰসেনাতি তযো এককা, তযো দুকা, একো তিকোতি লোভাদিউস্সদৰসেন অকুসলপক্খেযেৰ সত্ত ৰারা, তথা কুসলপক্খে অলোভাদিউস্সদৰসেনাতি চুদ্দস ৰারা লব্ভন্তি. তত্থ অলোভদোসামোহা, অলোভাদোসমোহা, অলোভদোসমোহা বলৰন্তোতি আগতেহি কুসলপক্খে ততিযদুতিযপঠমৰারেহি দোসুস্সদমোহুস্সদদোসমোহুস্সদৰারা গহিতা এৰ হোন্তি, তথা অকুসলপক্খে লোভাদোসমোহা, লোভদোসামোহা, লোভাদোসামোহা বলৰন্তোতি আগতেহি ততিযদুতিযপঠমৰারেহি অদোসুস্সদঅমোহুস্সদঅদোসামোহুস্সদৰারা গহিতা এৰাতি অকুসলকুসলপক্খেসু তযো তযো ৰারে অন্তোগধে কত্ৰা অট্ঠেৰ ৰারা দস্সিতা. যে পন উভযেসং মিস্সতাৰসেন লোভালোভুস্সদৰারাদযো অপরে একূনপঞ্ঞাস ৰারা দস্সেতব্বা, তে অলব্ভনতো এৰ ন দস্সিতা. ন হি একস্মিং সন্তানে অন্তরেন অৰত্থন্তরং ‘‘লোভো চ বলৰা, অলোভো চা’’তিআদি যুজ্জতীতি, পটিপক্খৰসেন ৰা হি এতেসং বলৰদুব্বলভাৰো, সহজাতধম্মৰসেন ৰা. তত্থ লোভস্স তাৰ পটিপক্খৰসেন অলোভেন অনধিভূততায বলৰভাৰো, তথা দোসমোহানং অদোসামোহেহি. অলোভাদীনং পন লোভাদিঅভিভৰনতো, সব্বেসঞ্চ সমানজাতিযমভিভুয্য পৰত্তিৰসেন সহজাতধম্মতো বলৰভাৰো. তেন ৰুত্তং অট্ঠকথাযং ‘‘লোভো বলৰা অলোভো মন্দো, অদোসামোহা বলৰন্তো দোসমোহা মন্দা’’তি. সো চ নেসং মন্দবলৰভাৰো পুরিমূপনিস্সযতো তথা আসযস্স পরিভাৰিততায ৰেদিতব্বো.

যো লুদ্ধোতি ৰুত্তোতি যো উস্সদকিত্তনে ‘‘লুদ্ধো’’তি ৰুত্তো, অযং ইধ চরিযাৰিচারে ‘‘রাগচরিতো’’তি ৰেদিতব্বো. দুট্ঠদন্ধাতি ‘‘দুট্ঠো, দন্ধো’’তি চ ৰুত্তা যথাক্কমং দোসমোহচরিতা. পঞ্ঞৰাতি সাতিসযং সপ্পঞ্ঞো. যতো সদ্ধাৰিতক্কেসু ৰিজ্জমানেসুপি বুদ্ধিচরিতোতি ৰুচ্চতি. অলোভাদোসানং বলৰভাৰো সদ্ধূপনিস্সযতায ৰিনা ন হোতীতি আহ ‘‘অলুদ্ধঅদুট্ঠা পসন্নপকতিতায সদ্ধাচরিতা’’তি.

অযঞ্চ নযো সাধারণতো ৰুত্তোতি নিব্বত্তিতপুব্বহেতুনিযামৰসেনেৰ বুদ্ধিচরিতাদিকেপি দস্সেতুং ‘‘যথা ৰা’’তিআদি ৰুত্তং. তত্থ অমোহপরিৰারেনাতি অমোহপরিক্খিত্তেন, উপনিস্সযতো সম্পযোগতো চ পঞ্ঞায অভিসঙ্খতেনাতি অত্থো. সেসপদত্তযেপি এসেৰ নযো. লোভাদিনা ৰোমিস্সপরিৰারেনাতি এত্থ লোভমোহাদিনা অঞ্ঞমঞ্ঞঅৰিরুদ্ধৰোমিস্সপরিৰারেনাতি অত্থো. অৰিরোধো চ যুগগ্গাহৰসেন অপ্পৰত্তিযা ৰেদিতব্বো. তথা হি সদ্ধানুসারিধম্মানুসারিগোত্তানি অঞ্ঞমঞ্ঞম্পি ভিন্নসভাৰানেৰ. একংসেন চ মিস্সকচরিযাপি সম্পটিচ্ছিতব্বা পুব্বহেতুনিযামেন চরিযাসিদ্ধিতো. তথা চেৰ উস্সদকিত্তনং পৰত্তং যথারহং লোভালোভাদীনং ৰিপাকস্স পচ্চযভাৰতো. তেনাহ পটিসম্ভিদামগ্গে (পটি. ম. ১.২৩২) –

‘‘গতিসম্পত্তিযা ঞাণসম্পযুত্তে কতমেসং অট্ঠন্নং হেতূনং পচ্চযা উপপত্তি হোতি? কুসলকম্মস্স জৰনক্খণে তযো হেতূ কুসলা তস্মিং খণে জাতচেতনায সহজাতপচ্চযা হোন্তি, তেন ৰুচ্চতি কুসলমূলপচ্চযাপি সঙ্খারা. নিকন্তিক্খণে দ্ৰে হেতূ অকুসলা তস্মিং খণে জাতচেতনায সহজাতপচ্চযা হোন্তি, তেন ৰুচ্চতি অকুসলমূলপচ্চযাপি সঙ্খারা. পটিসন্ধিক্খণে তযো হেতূ অব্যাকতা তস্মিং খণে জাতচেতনায সহজাতপচ্চযা হোন্তি, তেন ৰুচ্চতি নামরূপপচ্চযাপি ৰিঞ্ঞাণং, ৰিঞ্ঞাণপচ্চযাপি নামরূপ’’ন্তি –

আদি. পুব্বহেতুনিযামেন চ যথা তিহেতুকস্স পঞ্ঞাৰেয্যত্তিযং, ন তথা দুহেতুকস্স. যথা চ দুহেতুকস্স ইতিকত্তব্বতা নেপক্কং, ন তথা অহেতুকস্স. এৰং লোভুস্সদাদযো পুগ্গলা রাগচরিতাদযো হোন্তীতি নিট্ঠমেত্থ গন্তব্বন্তি. যথাৰুত্তমত্থং নিগমৰসেন দস্সেতুং ‘‘এৰং লোভাদীসূ’’তিআদি ৰুত্তং.

৪৫. তত্রাতি তস্মিং পুচ্ছাৰচনে. নযোতি জানননযো. পুগ্গলাধিট্ঠানেন ৰুত্তোপি অত্থো ধম্মমুখেনেৰ পঞ্ঞাযতীতি ধম্মাধিট্ঠানেনাহ ‘‘চরিযাযো ৰিভাৰযে’’তি. পকতিগমনেনাতি অকিত্তিমেন সভাৰগমনেন. চাতুরিযেনাতি চাতুরভাৰেন সিঙ্গারেন. উক্কুটিকন্তি অসম্ফুট্ঠমজ্ঝং. খণন্তো ৰিযাতি ভূমিং খণন্তো ৰিয. অনুকড্ঢিতন্তি পাদনিক্খেপসমযে কড্ঢন্তো ৰিয পাদং নিক্খিপতি. তেনস্স পদং অনুকড্ঢিতং পচ্ছতো অঞ্ছিতং হোতি. পরিব্যাকুলাযাতি পরিতো আলুল়িতায. ছম্ভিতো ৰিযাতি ৰিত্থাযন্তো ৰিয. ভীতো ৰিযাতি কেচি. সহসানুপীল়িতন্তি অগ্গপাদেন, পণ্হিযা চ সহসাৰ সন্নিরুজ্ঝিতং. ৰিৰট্টচ্ছদস্সাতি ৰিনিৰট্টচ্ছদনস্স পহীনকিলেসস্স. ইদমীদিসং পদন্তি ভগৰতো পদং দিস্ৰা ৰদতি.

পাসাদিকন্তি পসাদাৰহং. মধুরাকারন্তি ইট্ঠাকারং. থদ্ধাকারন্তি থম্ভিতাকারং. অতরমানোতি নতরমানো, সণিকন্তি অত্থো. সমোধাযাতি সম্মদেৰ ওধায অৰিক্খিপিত্ৰা. নিপজ্জিত্ৰাতি কাযপসারণলক্খণায নিপজ্জায সেয্যায নিপজ্জিত্ৰা সযতি নিদ্দাযতি. পক্খিত্তকাযোতি অৰক্খিত্তকাযো অৰসো ৰিয সহসা পতিতকাযো. দুস্সণ্ঠানন্তি ৰিরূপসন্নিৰেসং. ৰিক্খিত্তকাযোতি ইতো চিতো চ খিত্তঅঙ্গপচ্চঙ্গো.

সম্পরিৰত্তকন্তি সম্পরিৰত্তিত্ৰা. আলোল়যমানো ৰালিকাকচৰরানি আকুলযন্তো.

নিপুণমধুরসমসক্কচ্চকারীতি সুকোসল্লং সুন্দরং অৰিসমং সাভিসঙ্খারঞ্চ করণসীলো. গাল়্হথদ্ধৰিসমকারীতি থিরং অসিথিলং ৰিসমঞ্চ করণসীলো. অপরিচ্ছিন্নং অপরিনিট্ঠিতং.

মুখপূরকন্তি মুখস্স পূরণং মহন্তং. অরসপটিসংৰেদীতি নরসপটিসংৰেদী. ভাজনে ছড্ডেন্তোতি ভোজনভাজনে সিত্থানি ছড্ডেন্তো. মুখং মক্খেন্তোতি বহিমুখং মক্খেন্তো.

কিলন্তরূপো ৰিযাতি তস্স অসহনেন খেদপ্পত্তো ৰিয. অঞ্ঞাণুপেক্খাযাতি অঞ্ঞাণভূতায উপেক্খায. অঞ্ঞাণসঙ্খাতায উপেক্খাযাতি কেচি.

মাযাদীসু সন্তদোসপটিচ্ছদনলক্খণা মাযা. অসন্তগুণপকাসনলক্খণং সাঠেয্যং. উন্নতিলক্খণো মানো. অসন্তগুণসম্ভাৰনামুখেন পটিগ্গহণে অমত্তঞ্ঞুতালক্খণা পাপিচ্ছতা. সন্তগুণসম্ভাৰনামুখেন পটিগ্গহণে অমত্তঞ্ঞুতালক্খণা মহিচ্ছতা. সকলাভেন অসন্তুস্সনলক্খণা অসন্তুট্ঠিতা. ৰিজ্ঝনট্ঠেন সিঙ্গং, সিঙ্গারতানাগরিকভাৰসঙ্খাতং কিলেসসিঙ্গং. অত্তনো সরীরস্স, চীৰরাদিপরিক্খারস্স চ মণ্ডনৰসেন পৰত্তং লোলুপ্পং চাপল্যং. এৰমাদযোতি এত্থ আদি-সদ্দেন অহিরিকানোত্তপ্পমদপ্পমাদাদযো সঙ্গয্হন্তি.

পরাপরাধস্স উপনয্হনলক্খণো উপনাহো. পরেসং গুণমক্খণলক্খণো মক্খো. পরস্স গুণে ডংসিত্ৰা অপনেন্তো ৰিয যুগগ্গাহলক্খণো পল়াসো. পরসম্পত্তিউসূযনলক্খণা ইস্সা. অত্তসম্পত্তিনিগূহনলক্খণং মচ্ছরিযং. ইধ আদি-সদ্দেন দোৰচস্সতাপাপমিত্ততাদীনং সঙ্গহো দট্ঠব্বো.

অনুস্সাহনং থিনং. অসত্তিৰিঘাতো মিদ্ধং. চেতসো অৰূপসমো উদ্ধচ্চং. ৰিপ্পটিসারো কুক্কুচ্চং. সংসযো ৰিচিকিচ্ছা. অযোনিসো দল়্হগ্গাহো আধানগ্গাহিতা. যথাগহিতস্স মিচ্ছাগাহস্স দুব্বিৰেঠিযতা দুপ্পটিনিস্সগ্গিযতা. ইধ আদি-সদ্দেন মুট্ঠসচ্চঅসম্পজঞ্ঞাদীনং সঙ্গহো দট্ঠব্বো.

মুত্তচাগতাতি ৰিস্সট্ঠচাগতা নিস্সঙ্গপরিচ্চাগো. যথা মাযাদযো, তথা পৰত্তা অকুসলক্খন্ধা, যথা অরিযানং দস্সনকামতাদযো, তথা পৰত্তা কুসলক্খন্ধা ৰেদিতব্বা.

পসাদনীযট্ঠানং নাম ৰত্থুত্তযং. সংৰেজনীযট্ঠানানি জাতিআদীনি. কুসলানুযোগেতি কুসলধম্মভাৰনাযং. ‘‘এৰঞ্চ এৰঞ্চ করিস্সামী’’তি কিচ্চানং রত্তিভাগে পরিৰিতক্কনং রত্তিং ধূমাযনা. তথাৰিতক্কিতানং তেসং দিৰসভাগে অনুট্ঠানং দিৰা পজ্জলনা. হুরাহুরং ধাৰনাতি ইতো চিতো চ তত্থ তত্থ আরম্মণে চিত্তৰোসগ্গো. তেনেৰাহ ‘‘ইদং পুরে চিত্তমচারি চারিকং, যেনিচ্ছকং যত্থকামং যথাসুখ’’ন্তি (ধ. প. ৩২৬), ‘‘চিত্তমস্স ৰিধাৰতী’’তি (সং. নি. ১.৫৫) চ.

ধম্মপ্পৰত্তিদস্সনাদি চ পাল়িযং, অট্ঠকথাযঞ্চ অনাগতমেৰাতি ন সক্কা ৰত্তুন্তি ‘‘সব্বাকারেনা’’তি ৰুত্তং. কিঞ্চি কিঞ্চি আগতম্পি অত্থেৰাতি হি অধিপ্পাযো. ‘‘ন সারতো পচ্চেতব্ব’’ন্তি ৰত্ৰা তত্থ কারণং দস্সেন্তো ‘‘রাগচরিতস্স হী’’তিআদিমাহ. অপ্পমাদৰিহারিনোতি তত্থ ৰিনিধায ভাৰং পটিপজ্জনেন অপ্পমাদকারিনো. ভিন্নলক্খণা ইরিযাপথাদযোতি চাতুরিযেন অচাতুরিযেন সণিকং, সহসা চ গমনাদযো. ন উপপজ্জন্তীতি ন যুজ্জন্তি. পুচ্ছিত্ৰা জানিতব্বন্তি ধম্মপ্পৰত্তিআদিং পুচ্ছিত্ৰা জানিতব্বং.

৪৬. সপ্পাযং হিতং, কিলেসৰিঘাতীতি অত্থো. অধোতৰেদিকন্তি অপরিসুদ্ধপরিক্খেপৰেদিকং. ভূমট্ঠকন্তি ভূমিতলেযেৰ উট্ঠাপিতং উপরিমতলরহিতং. একতো ওনতস্স পব্বতপাদস্স হেট্ঠাভাগো অকতভিত্তিভূমিপরিকম্মো অকতপব্ভারো. জতুকাভরিতন্তি অধোমুখাহি ওলম্বমানমুখাহি খুদ্দকৰগ্গুলীহি পরিপুণ্ণং. ওলুগ্গৰিলুগ্গন্তি ছিন্নভিন্নং. উজ্জঙ্গলং লূখধূসরং ছাযূদকরহিতং. সীহব্যগ্ঘাদিভযেন সাসঙ্কং. দুরূপন্তি ৰিরূপং. দুব্বণ্ণন্তি অসুন্দরৰণ্ণং, দুস্সণ্ঠানং ৰা. জালাকারেন কতপূৰং জালপূৰং. সাণি ৰিয খরসম্ফস্সন্তি সাণিফলকো ৰিয দুক্খসম্ফস্সং. ভারিকভাৰেন, অন্তরন্তরা তুন্নকরণেন চ কিচ্ছপরিহরণং. আণিগণ্ঠিকাহতোতি আণিনা, গণ্ঠিযা চ হতসোভো. ইদং রাগচরিতস্স সপ্পাযং, এৰমস্স কিলেসসমুদাচারো ন হোতীতি অধিপ্পাযো. এসেৰ নযো সেসেসুপি.

দিসামুখন্তি দিসাভিমুখং, অব্ভোকাসাভিমুখন্তি অধিপ্পাযো. মহাকসিণন্তি মহন্তং কসিণমণ্ডলং. সেসং সেনাসনাদীসু যং ৰত্তব্বং মোহচরিতস্স, তং দোসচরিতস্স ৰুত্তসদিসমেৰ.

ৰিতক্কৰিধাৰনস্সেৰ পচ্চযো হোতি যথা তং আযস্মতো মেঘিযত্থেরস্স. দরীমুখেতি পব্বতৰিৰরে. পরিত্তন্তি সুপ্পসরাৰমত্তং.

পভেদপরিচ্ছেদতো নিদানপরিচ্ছেদতো ৰিভাৰনপরিচ্ছেদতো সপ্পাযপরিচ্ছেদতোতি পচ্চেকং পরিচ্ছেদ-সদ্দো যোজেতব্বো. ৰিভাৰনাতি ‘‘অযং রাগচরিতো’’তিআদিনা জাননৰিভাৰনা. একচ্চকসিণানুস্সতিট্ঠানমত্তস্স পসঙ্গেন কথিতত্তা ৰুত্তং ‘‘ন চ তাৰ চরিযানুকূলং কম্মট্ঠানং সব্বাকারেন আৰিকত’’ন্তি.

চত্তালীসকম্মট্ঠানৰণ্ণনা

৪৭. সঙ্খাতনিদ্দেসতোতি সঙ্খাতানং ‘‘চত্তালীসাযা’’তি সঙ্খ্যাৰসেন গহিতানং উদ্দিট্ঠানং নিদ্দেসতো. ‘‘এত্থ এত্তকানি উপচারজ্ঝানাৰহানি, এত্তকানি অপ্পনাজ্ঝানাৰহানী’’তি উপচারপ্পনাৰহতো. ‘‘এত্তকানি একজ্ঝানিকানি, এত্তকানি দুকতিকজ্ঝানিকানি, এত্তকানি সকলজ্ঝানিকানী’’তি ঝানপ্পভেদতো. ‘‘এতেসু অঙ্গসমতিক্কমো, এতেসু আরম্মণসমতিক্কমো’’তি এৰং সমতিক্কমতো. ‘‘এত্তকানেত্থ ৰড্ঢেতব্বানি, এত্তকানি ন ৰড্ঢেতব্বানী’’তি ৰড্ঢনাৰড্ঢনতো. আরম্মণতোতি সভাৰধম্মনিমিত্তনৰত্তব্বৰসেন, চলিতাচলিতৰসেন চ আরম্মণৰিভাগতো. ভূমিতোতি কামাৰচরাদিভূমিৰিভাগতো. গহণতোতি দিট্ঠাদিৰসেন গহণৰিভাগতো. পচ্চযতোতি আরুপ্পাদীনং যথারহং পচ্চযভাৰতো. চরিযানুকূলতোতি রাগচরিযাদীনং অনুকূলভাৰতো.

কম্মট্ঠানানীতি আরম্মণভাৰেন যোগকম্মস্স পৰত্তিট্ঠানানি. চতুক্কজ্ঝানিকাতি চতুব্বিধরূপাৰচরজ্ঝানৰন্তো, তেসং আরম্মণভূতাতি অত্থো. চতুক্কনযৰসেন চেতং ৰুত্তং. তিকচতুক্কজ্ঝানিকেসূতি তিকজ্ঝানিকেসু পুরিমেসু ব্রহ্মৰিহারেসু, চতুক্কজ্ঝানিকেসু আনাপানকসিণেসু. সেসেসূতি ৰুত্তাৰসেসেসু একৰীসতিযা কম্মট্ঠানেসু.

দিব্বচক্খুনা দিট্ঠহদযরূপস্স সত্তস্স চিত্তং আদিকম্মিকো চেতোপরিযঞাণেন পরিচ্ছিন্দিতুং সক্কোতি, ন ইতরস্সাতি কসিণফরণং চেতোপরিযঞাণস্স পচ্চযো হোতি. তেন ৰুত্তং ‘‘পরসত্তানঞ্চ চেতসা চিত্তমঞ্ঞাতুং সমত্থো হোতী’’তি. ওকাসেন পরিচ্ছিন্নত্তাতি অত্তনো ঠিতোকাসেন পরিচ্ছিন্নত্তা. তথা উগ্গহকোসল্লস্স সম্পাদিতত্তা পরিচ্ছিন্নাকারেনেৰ তানি উপতিট্ঠন্তি, তস্মা ন তত্থ ৰড্ঢনাতি অধিপ্পাযো. সচে পন কোচি ৰড্ঢেয্য, ন তেন কোচি গুণোতি দস্সেন্তো আহ ‘‘আনিসংসাভাৰা চা’’তি. ‘‘তেসু পনা’’তিআদিনা তমেৰ আনিসংসাভাৰং ৰিৰরতি. যস্মা ৰড্ঢিতেসু কুণপরাসিযেৰ ৰড্ঢতি, অৰড্ঢিতেপি কামরাগৰিক্খম্ভনা হোতিযেৰ, তস্মা আনিসংসাভাৰো. ৰিভূতাতি ৰিপুলারম্মণতায সুপাকটা, ৰড্ঢিতনিমিত্ততায অপ্পমাণারম্মণভাৰেন পরিব্যত্তাতি অত্থো.

কেৰলন্তি সকলং অনৰসেসং. ‘‘পথৰিং ইম’’ন্তি ৰচনং উপট্ঠানাকারেন ৰুত্তং, ন নিমিত্তস্স ৰড্ঢনেনাতি অধিপ্পাযো. লাভিত্তাতি সাতিসযং লাভিতায, উক্কংসগতৰসিভাৰতোতি অত্থো. থেরো হি পরমায ৰসিপত্তিযা অস্সমণ্ডলে অস্সং সারেন্তো ৰিয যত্থ তত্থ নিসিন্নোপি ঠিতোপি তং ঝানং সমাপজ্জতেৰ. তেনস্স সমন্ততো নিমিত্তং ৰড্ঢিতং ৰিয উপট্ঠাসি. তেন ৰুত্তং ‘‘সব্বদিসাসূ’’তিআদি.

ৰুত্তাতি ধম্মসঙ্গহে ৰুত্তা. মহন্তেতি ৰিপুলে. নিন্নথলাদিৰসেন হি একদেসে অট্ঠত্ৰা সমন্ততো গহণৰসেন সকলসরীরে নিমিত্তং গণ্হন্তস্স তং মহন্তং হোতি. মহন্তে ৰা সরীরে. অপ্পকেতি সরীরস্স একদেসে নিমিত্তং গণ্হাতীতি যোজনা. অপ্পকে ৰা খুদ্দকে দারকসরীরে. এতন্তি অসুভনিমিত্তং. আদীনৰন্তি ‘‘অসুভরাসি এৰ ৰড্ঢতি, ন চ কোচি আনিসংসো’’তি ৰুত্তং আদীনৰং.

সেসানিপি ন ৰড্ঢেতব্বানীতি সঙ্খেপতো ৰুত্তমত্থং উপপত্তিতো ৰিৰরিতুং ‘‘কস্মা’’তিআদি ৰুত্তং. পিচুপিণ্ডাদিৰসেন উপট্ঠহন্তম্পি নিমিত্তং ৰাতসঙ্ঘাতসন্নিস্সযন্তি কত্ৰা ৰুত্তং ‘‘ৰাতরাসিযেৰ ৰড্ঢতী’’তি. ওকাসেন পরিচ্ছিন্নন্তি নাসিকগ্গমুখনিমিত্তাদিওকাসেন সপরিচ্ছেদং. ৰাযোকসিণৰড্ঢনে ৰিয ন এত্থ কোচি গুণো, কেৰলং ৰাতৰড্ঢনমেৰাতি আহ ‘‘সাদীনৰত্তা’’তি. তেসন্তি ব্রহ্মৰিহারানং. নিমিত্তন্তি আরম্মণং. ন চ তেন অত্থো অত্থীতি তেন সত্তরাসিৰড্ঢনেন পথৰীকসিণাদিৰড্ঢনে ৰিয কিঞ্চি পযোজনং নত্থি. পরিগ্গহৰসেনাতি অপরিগ্গহিতস্স ভাৰনাৰিসযস্স পরিগ্গহৰসেন, ন নিমিত্তৰড্ঢনৰসেন. তেনাহ ‘‘একাৰাসদ্ৰিআৰাসাদিনা’’তিআদি. এত্থাতি ব্রহ্মৰিহারভাৰনাযং. যদযন্তি যং পটিভাগনিমিত্তং অযং যোগী. সীমাসম্ভেদেনেৰ হেত্থ উপচারজ্ঝানুপ্পত্তি, ন নিমিত্তুপ্পত্তিযা. যদি এৰং কথং পরিত্তাদিআরম্মণতা ঝানস্সাতি আহ ‘‘পরিত্তঅপ্পমাণারম্মণতাপেত্থ পরিগ্গহৰসেনা’’তি, কতিপযে সত্তে পরিগ্গহেত্ৰা পৰত্তা মেত্তাদযো পরিত্তারম্মণা, বহুকে অপ্পমাণারম্মণাতি অত্থো. আকাসং কসিণুগ্ঘাটিমত্তা ন ৰড্ঢেতব্বন্তি যোজনা. ৰক্খতি ৰা যং তেন সম্বন্ধিতব্বং. পরিকপ্পজমেৰ আরম্মণং ৰড্ঢেতুং সক্কা, ন ইতরন্তি আহ ‘‘ন হি সক্কা সভাৰধম্মং ৰড্ঢেতু’’ন্তি. আরুপ্পানং পরিত্তঅপ্পমাণারম্মণতা পরিত্তকসিণুগ্ঘাটিমাকাসে, ৰিপুলকসিণুগ্ঘাটিমাকাসে চ পৰত্তিযা ৰেদিতব্বা. সেসানি বুদ্ধানুস্সতিআদীনি দস কম্মট্ঠানানি. অনিমিত্তত্তাতি পটিভাগনিমিত্তাভাৰা.

পটিভাগনিমিত্তারম্মণানীতি পটিভাগনিমিত্তভূতানি আরম্মণানি. সেসানি অট্ঠারস. সেসানি ছাতি চত্তারো ব্রহ্মৰিহারা, আকাসানঞ্চাযতনং, আকিঞ্চঞ্ঞাযতনন্তি ইমানি সেসানি ছ. ৰিস্সন্দমানপুব্বতায ৰিপুব্বকং. পগ্ঘরমানলোহিততায লোহিতকং. কিমীনং পচলনেন পুল়ুৰকং, চলিতারম্মণং ৰুত্তং. ৰাতপানৰিৰরাদীহি অন্তোপৰিট্ঠস্স সূরিযালোকাদিকস্স চলনাকারো পঞ্ঞাযতীতি ওভাসমণ্ডলারম্মণম্পি চলিতারম্মণং ৰুত্তং. পুব্বভাগেতি পটিভাগনিমিত্তপ্পৰত্তিযা পুব্বভাগে. সন্নিসিন্নমেৰাতি সন্তং নিচ্চলমেৰ.

দেৰেসূতি কামাৰচরদেৰেসু, তত্থ অসুভানং পটিকূলস্স চ আহারস্স অভাৰতো. অস্সাসপস্সাসানং ব্রহ্মলোকে অভাৰতো ‘‘আনাপানস্সতি চা’’তি ৰুত্তং.

দিট্ঠেনাতি দিট্ঠেন ৰত্থুনা কারণভূতেন. গহেতব্বানীতি উগ্গহেতব্বানি, উপ্পাদেতব্বউগ্গহনিমিত্তানীতি অত্থো. তেনাহ ‘‘পুব্বভাগে’’তিআদি. তস্সাতি কাযগতাসতিযা. উচ্ছুসস্সাদীনং পত্তেসু পচলমানৰণ্ণগ্গহণমুখেন ৰা তস্স গহেতব্বত্তা ৰুত্তং ‘‘ৰাযোকসিণং দিট্ঠফুট্ঠেনা’’তি. ন আদিকম্মিকেন গহেতব্বানীতি আদিকম্মিকেন ন গহেতব্বানি, ভাৰনারম্ভৰসেন ন পট্ঠপেতব্বানি, হেট্ঠিমে তযো ব্রহ্মৰিহারে, কসিণেসু রূপাৰচরচতুত্থজ্ঝানঞ্চ অনধিগন্ত্ৰা সম্পাদেতুং অসক্কুণেয্যত্তা.

ইমেসু পন কম্মট্ঠানেসূতি এত্থ কম্মট্ঠানগ্গহণেন যথারহং আরম্মণানং, ঝানানঞ্চ গহণং ৰেদিতব্বং. সুখৰিহারস্সাতি দিট্ঠধম্মসুখৰিহারস্স.

‘‘একাদস কম্মট্ঠানানি অনুকূলানী’’তি উজুৰিপচ্চনীকৰসেন চেতং ৰুত্তং. এৰং সেসেসুপি. ৰক্খতি হি ‘‘সব্বঞ্চেত’’ন্তিআদি. অনুকূলানি রাগৰিক্খম্ভনস্স উপাযভাৰতো. অট্ঠ অনুকূলানীতি যোজনা. এৰং সেসেসু. একন্তি ইদং অনুস্সতিঅপেক্খং অনুস্সতীসু একন্তি, ন মোহচরিতৰিতক্কচরিতাপেক্খং তেসং অঞ্ঞস্সাপি অনুকূলস্স অলব্ভনতো. ‘‘সদ্ধাচরিতস্স পুরিমা ছ অনুস্সতিযো’’তি ইদং অতিসপ্পাযৰসেন ৰুত্তং. ইমস্সেৰ উজুৰিপচ্চনীকং ইমস্স অতিসপ্পাযন্তি গহেতব্বস্স ৰিসেসস্স অভাৰতো সব্বচরিতানং অনুকূলানি. পরিত্তন্তি সরাৰমত্তং, অপ্পমাণন্তি ততো অধিকপমাণং. পরিত্তং ৰা সুপ্পসরাৰমত্তং, অপ্পমাণং অধিকপমাণং খলমণ্ডলাদিকসিণভাৰেন পরিগ্গহিতং.

চত্তারো ধম্মাতি চত্তারো মনসিকরণীযা ধম্মা. উত্তরীতি সীলসম্পদা, কল্যাণমিত্ততা, সপ্পাযধম্মস্সৰনং, ৰীরিযং; পঞ্ঞাতি ইমেসু পঞ্চসু ধম্মেসু পতিট্ঠানতো উপরি. অসুভাতি অসুভভাৰনা একাদসসু অসুভকম্মট্ঠানেসু ভাৰনানুযোগা. মেত্তাতি অনোধিসো, ওধিসো ৰা পৰত্তা মেত্তাভাৰনা. আনাপানস্সতীতি সোল়সৰত্থুকা আনাপানস্সতিসমাধিভাৰনা. ৰিতক্কুপচ্ছেদাযাতি মিচ্ছাৰিতক্কানং উপচ্ছিন্দনত্থায. অনিচ্চসঞ্ঞাতি ‘‘সব্বে সঙ্খারা অনিচ্চা’’তি (অ. নি. ৩.১৩৭; ধ. প. ২৭৭; মহানি. ২৭) এৰং পৰত্তা অনিচ্চানুপস্সনা. অস্মিমানসমুগ্ঘাতাযাতি ‘‘অস্মী’’তি উপ্পজ্জনকস্স নৰৰিধস্সাপি মানস্স সমুচ্ছিন্দনায. এত্থ হি একস্সেৰ চত্তারো ধম্মা ভাৰেতব্বা ৰুত্তা, ন একস্স চতুচরিযতায. তেন ৰিঞ্ঞাযতি ‘‘সব্বানিপি কম্মট্ঠানানি সব্বাকুসলৰিক্খম্ভনানি সব্বকুসলপরিব্রূহনানী’’তি.

একস্সেৰ সত্ত কম্মট্ঠানানি ৰুত্তানি, ন চাযস্মা রাহুলো সব্বচরিতোতি অধিপ্পাযো. ৰচনমত্তেতি ‘‘অসুককম্মট্ঠানং অসুকচরিতস্স অনুকূল’’ন্তি এৰং ৰুত্তৰচনমত্তে. অধিপ্পাযোতি তথাৰচনস্স অধিপ্পাযো. সো পন ‘‘সব্বঞ্চেত’’ন্তিআদিনা ৰিভাৰিতো এৰ.

৪৮. ‘‘পিযো গরূ’’তিআদিনা (অ. নি. ৭.৩৭) ৰুত্তপ্পকারং কল্যাণমিত্তং. ‘‘অত্তনো পত্তচীৰরং সযমেৰ গহেত্ৰা’’তিআদিনা ৰুত্তনযেন উপসঙ্কমিত্ৰা. সোমনস্সমেৰ উপ্পজ্জতি ‘‘এৰং বহুপরিস্সযোযং অত্তভাৰো ঠানেযেৰ মযা নিয্যাতিতো’’তি. তেনাহ ‘‘যথা হী’’তিআদি.

অতজ্জনীযোতি ন তজ্জেতব্বো ন নিগ্গহেতব্বো. স্ৰাযং অতজ্জনীযভাৰো দোৰচস্সতায ৰা সিযা, আচরিযে অনিৰিট্ঠপেমতায ৰাতি তদুভযং দস্সেতুং ‘‘দুব্বচো ৰা’’তিআদি ৰুত্তং. যো হি আচরিযেন তজ্জিযমানো কোপঞ্চ দোসঞ্চ অপচ্চযঞ্চ পাতুকরোতি, যো ৰা ‘‘কিমস্স সন্তিকে ৰাসেনা’’তি পক্কমতি, অযং দুৰিধোপি অতজ্জনীযো. ধম্মেনাতি ওৰাদানুসাসনিধম্মেন. গূল়্হং গন্থন্তি কম্মট্ঠানগন্থং, সচ্চপটিচ্চসমুপ্পাদাদিসহিতং গম্ভীরং সুঞ্ঞতাপটিসংযুত্তঞ্চ.

তুম্হাকমত্থাযাতি ৰুত্তেতি ‘‘সতপোরিসে পপাতে পতনেন তুম্হাকং কোচি অত্থো হোতী’’তি কেনচি ৰুত্তে. ঘংসেন্তোতি ‘‘মনুস্সকক্কেন তুম্হাকং কোচি অত্থো’’তি ৰুত্তে ঘংসেন্তো নিরৰসেসং অত্তভাৰং খেপেতুং উস্সহেয্যং. ‘‘মম অস্সাসপস্সাসনিরুন্ধনেন তুম্হাকং কোচি রোগৰূপসমাদিকো অত্থো অত্থী’’তি কেনচি ৰুত্তে. তীহিপি ভিক্খূহি আচরিযে ভত্তিপৰেদনমুখেন ৰীরিযারম্ভো এৰ পৰেদিতো.

৪৯. অঞ্ঞত্থ পৰত্তিত্ৰাপি চিত্তং আগম্ম যত্থ সেতি, সো তস্স আসযো ‘‘মিগাসযো’’ ৰিয, আসযো এৰ অজ্ঝাসযো. সো দুৰিধো ৰিপন্নো, সম্পন্নোতি. তত্থ ৰিপন্নো সস্সতাদিমিচ্ছাভিনিৰেসনিস্সিতো. সম্পন্নো দুৰিধো ৰট্টনিস্সিতো, ৰিৰট্টনিস্সিতোতি. তেসু ৰিৰট্টনিস্সিতো অজ্ঝাসযো ‘‘সম্পন্নজ্ঝাসযেনা’’তি ইধাধিপ্পেতো. ইদানি নং ৰিভাগেন দস্সেতুং ‘‘অলোভাদীনং ৰসেনা’’তিআদি ৰুত্তং. তত্থ ছহাকারেহীতি অলুব্ভনাদীহি ছহি আকারেহি. সম্পন্নজ্ঝাসযেনাতি পুব্বভাগিযানং সীলসম্পদাদীনং সাধনৰসেন, লোকুত্তরানং উপনিস্সযভাৰেন চ সম্পন্নো অজ্ঝাসযো এতস্সাতি সম্পন্নজ্ঝাসযো, তেন. অলোভাদযো হি অনেকদোসৰিধমনতো, অনেকগুণাৰহতো চ সত্তানং বহুকারা ৰিসেসতো যোগিনো. তথা হি অলোভাদযো মচ্ছেরমলাদীনং পটিপক্খভাৰেন পৰত্তন্তি. ৰুত্তং হেতং (ধ. স. অট্ঠ. ১ মূলরাসীৰণ্ণনা) –

‘‘অলোভো মচ্ছেরমলস্স পটিপক্খো, অদোসো দুস্সীল্যমলস্স, অমোহো কুসলেসু ধম্মেসু অভাৰনায. অলোভো চেত্থ দানহেতু, অদোসো সীলহেতু, অমোহো ভাৰনাহেতু. তেসু চ অলোভেন অনধিকং গণ্হাতি লুদ্ধস্স অধিকগ্গহণতো, অদোসেন অনূনং দুট্ঠস্স ঊনগ্গহণতো, অমোহেন অৰিপরীতং মূল়্হস্স ৰিপরীতগ্গহণতো.

‘‘অলোভেন চেত্থ ৰিজ্জমানং দোসং দোসতো ধারেন্তো দোসে পৰত্ততি, লুদ্ধো হি দোসং পটিচ্ছাদেতি. অদোসেন ৰিজ্জমানং গুণং গুণতো ধারেন্তো গুণে পৰত্ততি, দুট্ঠো হি গুণং মক্খেতি. অমোহেন যাথাৰসভাৰং যাথাৰসভাৰতো ধারেন্তো যাথাৰসভাৰে পৰত্ততি, মূল়্হো হি তচ্ছং ‘অতচ্ছ’ন্তি, অতচ্ছঞ্চ ‘তচ্ছ’ন্তি গণ্হাতি. অলোভেন চ পিযৰিপ্পযোগদুক্খং ন হোতি লুদ্ধস্স পিযসব্ভাৰতো, পিযৰিপ্পযোগাসহনতো চ, অদোসেন অপ্পিযসম্পযোগদুক্খং ন হোতি দুট্ঠস্স অপ্পিযসব্ভাৰতো, অপ্পিযসম্পযোগাসহনতো চ, অমোহেন ইচ্ছিতালাভদুক্খং ন হোতি, অমূল়্হস্স হি ‘তং কুতেত্থ লব্ভা’তি এৰমাদিপচ্চৰেক্খণসব্ভাৰতো.

‘‘অলোভেন চেত্থ জাতিদুক্খং ন হোতি অলোভস্স তণ্হাপটিপক্খতো, তণ্হামূলকত্তা চ জাতিদুক্খস্স, অদোসেন জরাদুক্খং ন হোতি তিক্খদোসস্স খিপ্পং জরাসম্ভৰতো, অমোহেন মরণদুক্খং ন হোতি, সম্মোহমরণঞ্হি দুক্খং, ন চ তং অমূল়্হস্স হোতি. অলোভেন চ গহট্ঠানং, অমোহেন পব্বজিতানং, অদোসেন পন সব্বেসম্পি সুখসংৰাসতা হোতি.

‘‘ৰিসেসতো চেত্থ অলোভেন পেত্তিৰিসযে উপপত্তি ন হোতি, যেভুয্যেন হি সত্তা তণ্হায পেত্তিৰিসযং উপপজ্জন্তি, তণ্হায চ পটিপক্খো অলোভো. অদোসেন নিরযে উপপত্তি ন হোতি, দোসেন হি চণ্ডজাতিতায দোসসদিসং নিরযং উপপজ্জন্তি, দোসস্স চ পটিপক্খো অদোসো. অমোহেন তিরচ্ছানযোনিযং নিব্বত্তি ন হোতি, মোহেন হি নিচ্চসম্মূল়্হং তিরচ্ছানযোনিং উপপজ্জন্তি, মোহপটিপক্খো চ অমোহো. এতেসু চ অলোভো রাগৰসেন উপগমনস্স অভাৰকরো, অদোসো দোসৰসেন অপগমনস্স, অমোহো মোহৰসেন অমজ্ঝত্তভাৰস্স.

‘‘তীহিপি চেতেহি যথাপটিপাটিযা নেক্খম্মসঞ্ঞা অব্যাপাদসঞ্ঞা অৰিহিংসাসঞ্ঞাতি ইমা তিস্সো, অসুভসঞ্ঞা অপ্পমাণসঞ্ঞা ধাতুসঞ্ঞাতি ইমা চ তিস্সো সঞ্ঞাযো হোন্তি. অলোভেন পন কামসুখল্লিকানুযোগঅন্তস্স, অদোসেন অত্তকিলমথানুযোগঅন্তস্স পরিৰজ্জনং হোতি, অমোহেন মজ্ঝিমায পটিপত্তিযা পটিপজ্জনং. তথা অলোভেন অভিজ্ঝাকাযগন্থস্স পভেদনং হোতি, অদোসেন ব্যাপাদকাযগন্থস্স, অমোহেন সেসগন্থদ্ৰযস্স. পুরিমানি চ দ্ৰে সতিপট্ঠানানি পুরিমানং দ্ৰিন্নং আনুভাৰেন, পচ্ছিমানি পচ্ছিমস্সেৰ আনুভাৰেন ইজ্ঝন্তি.

‘‘অলোভো চেত্থ আরোগ্যস্স পচ্চযো হোতি, অলুদ্ধো হি লোভনীযম্পি অসপ্পাযং ন সেৰতি, তেন অরোগো হোতি. অদোসো যোব্বনস্স, অদুট্ঠো হি ৰলিতপলিতাৰহেন দোসগ্গিনা অডয্হমানো দীঘরত্তং যুৰা হোতি. অমোহো দীঘাযুকতায, অমূল়্হো হি হিতাহিতং ঞত্ৰা অহিতং পরিৰজ্জেন্তো, হিতঞ্চ পটিসেৰমানো দীঘাযুকো হোতি.

‘‘অলোভো চেত্থ ভোগসম্পত্তিযা পচ্চযো চাগেন ভোগপটিলাভতো, অদোসো মিত্তসম্পত্তিযা মেত্তায মিত্তানং পটিলাভতো, অপরিহানতো চ, অমোহো অত্তসম্পত্তিযা, অমূল়্হো হি অত্তনো হিতমেৰ করোন্তো অত্তানং সম্পাদেতি. অলোভো চ দিব্বৰিহারস্স পচ্চযো হোতি, অদোসো ব্রহ্মৰিহারস্স, অমোহো অরিযৰিহারস্স.

‘‘অলোভেন চেত্থ সকপক্খেসু সত্তসঙ্খারেসু নিব্বুতো হোতি তেসং ৰিনাসেন অভিসঙ্গহেতুকস্স দুক্খস্স অভাৰা, অদোসেন পরপক্খেসু, অদুট্ঠস্স হি ৰেরীসুপি ৰেরিসঞ্ঞায অভাৰতো, অমোহেন উদাসীনপক্খেসু অমূল়্হস্স সব্বাভিসঙ্গতায অভাৰতো.

‘‘অলোভেন চ অনিচ্চদস্সনং হোতি, লুদ্ধো হি উপভোগাসায অনিচ্চেপি সঙ্খারে অনিচ্চতো ন পস্সতি. অদোসেন দুক্খদস্সনং, অদোসজ্ঝাসযো হি পরিচ্চত্তআঘাতৰত্থুপরিগ্গহো সঙ্খারেযেৰ দুক্খতো পস্সতি. অমোহেন অনত্তদস্সনং, অমূল়্হো হি যাথাৰগহণকুসলো অপরিণাযকং খন্ধপঞ্চকং অপরিণাযকতো বুজ্ঝতি. যথা চ এতেহি অনিচ্চদস্সনাদীনি, এৰং এতেপি অনিচ্চদস্সনাদীহি হোন্তি. অনিচ্চদস্সনেন হি অলোভো হোতি, দুক্খদস্সনেন অদোসো, অনত্তদস্সনেন অমোহো. কো হি নাম ‘অনিচ্চমিদ’ন্তি সম্মা ঞত্ৰা তস্সত্থায পিহং উপ্পাদেয্য, সঙ্খারে ৰা ‘দুক্খ’ন্তি জানন্তো অপরম্পি অচ্চন্ততিখিণং কোধদুক্খং উপ্পাদেয্য, অত্তসুঞ্ঞতঞ্চ বুজ্ঝিত্ৰা পুন সম্মোহং আপজ্জেয্যা’’তি.

তেন ৰুত্তং ‘‘পুব্বভাগিযানং সীলসম্পদাদীনং সাধনৰসেন লোকুত্তরানং, উপনিস্সযভাৰেন চ সম্পন্নো অজ্ঝাসযো এতস্সাতি সম্পন্নজ্ঝাসযো’’তি. তেনাহ ‘‘এৰং তিস্সন্নং বোধীনং অঞ্ঞতরং পাপুণাতী’’তি.

ইদানি তে অজ্ঝাসযে পাল়িযাৰ ৰিভাৰেতুং ‘‘যথাহা’’তিআদি ৰুত্তং. তত্থ ছাতি গণনপরিচ্ছেদো. অজ্ঝাসযাতি পরিচ্ছিন্নধম্মনিদস্সনং. উভযং পন একজ্ঝং কত্ৰা ছব্বিধা অজ্ঝাসযাতি অত্থো. বোধিসত্তাতি বুজ্ঝনকসত্তা, বোধিযা ৰা নিযতভাৰেন সত্তা লগ্গা, অধিমুত্তা তন্নিন্না তপ্পোণাতি অত্থো. বোধিপরিপাকায সংৰত্তন্তীতি যথাভিনীহারং অত্তনা পত্তব্ববোধিযা পরিপাচনায ভৰন্তি. অলোভজ্ঝাসযাতি অলুব্ভনাকারেন পৰত্তঅজ্ঝাসযা, আদিতো ‘‘কথং নু খো মযং সব্বত্থ, সব্বদা চ অলুদ্ধা এৰ হেস্সামা’’তি, মজ্ঝে চ অলুব্ভনৰসেনেৰ, পচ্ছা চ তস্সেৰ রোচনৰসেন পৰত্তঅজ্ঝাসযা. লোভে দোসদস্সাৰিনোতি লুব্ভনলক্খণে লোভে সব্বপ্পকারেন আদীনৰদস্সাৰিনো. ইদং তস্স অজ্ঝাসযস্স একদেসতো ব্রূহনাকারদস্সনং. লোভে হি আদীনৰং, অলোভে চ আনিসংসং পস্সন্তস্স অলোভজ্ঝাসযো পরিৰড্ঢতি, স্ৰাযং তত্থ আদীনৰানিসংসদস্সনৰিধি ৰিভাৰিতোযেৰ. সেসপদেসুপি ইমিনা নযেন অত্থো ৰেদিতব্বো. অযং পন ৰিসেসো – নেক্খম্মন্তি ইধ পব্বজ্জা. পৰিৰেকো তদঙ্গৰিৰেকো, ৰিক্খম্ভনৰিৰেকো, কাযৰিৰেকো, চিত্তৰিৰেকো চ. নিস্সরণং নিব্বানং. সব্বভৰগতীসূতি সব্বেসু ভৰেসু, সব্বাসু চ গতীসু. তদধিমুত্ততাযাতি যদত্থং ভাৰনানুযোগো, যদত্থা চ পব্বজ্জা, তদধিমুত্তেন. তেনেৰাহ ‘‘সমাধাধিমুত্তেনা’’তিআদি.

৫০. ‘‘কিং চরিতোসী’’তি পুচ্ছিতো সচে ‘‘ন জানামী’’তি ৰদেয্য, ‘‘কে ৰা তে ধম্মা বহুলং সমুদাচরন্তী’’তি পুচ্ছিতব্বো. কিং ৰাতি কিং অসুভং ৰা অনুস্সতিট্ঠানং ৰা অঞ্ঞং ৰা. কিং তে মনসি করোতো ফাসু হোতীতি চিত্তস্স একগ্গভাৰেন সুখং হোতি. চিত্তং নমতীতি পকতিযাৰ অভিরতিৰসেন নমতি. এৰমাদীহীতি আদি-সদ্দেন ইরিযাপথাদীনং সঙ্গহো দট্ঠব্বো. তেপি হি ন সব্বস্স একংসতো ব্যভিচারিনো এৰ. তথা হি সমুদাচারো পুচ্ছিতব্বো ৰুত্তো. ‘‘অসুকঞ্চ অসুকঞ্চ মনসিকারৰিধিং কতিপযদিৰসং অনুযুঞ্জাহী’’তি চ ৰত্তব্বো.

‘‘পকতিযা উগ্গহিতকম্মট্ঠানস্সা’’তি ইদং যং কম্মট্ঠানং গহেতুকামো, তত্থ সজ্ঝাযৰসেন ৰা মনসিকারৰসেন ৰা কতপরিচযং সন্ধায ৰুত্তং. একং দ্ৰে নিসজ্জানীতি একং ৰা দ্ৰে ৰা উণ্হাসনানি. সজ্ঝাযং কারেত্ৰা অত্তনো সম্মুখাৰ অধীযাপেত্ৰা দাতব্বং, সো চে অঞ্ঞত্থ গন্তুকামোতি অধিপ্পাযো. তেনাহ ‘‘সন্তিকে ৰসন্তস্সা’’তি. আগতাগতক্খণে কথেতব্বং, পৰত্তিং সুত্ৰাতি অধিপ্পাযো.

পথৰীকসিণন্তি পথৰীকসিণকম্মট্ঠানং. কতস্সাতি কতস্স কসিণস্স. তং তং আকারন্তি আচরিযেন কম্মট্ঠানে ৰুচ্চমানে পদপদত্থাধিপ্পাযওপম্মাদিকং অত্তনো ঞাণস্স পচ্চুপট্ঠিতং তং তং আকারং, যং যং নিমিত্তন্তি ৰুত্তং. উপনিবন্ধিত্ৰাতি উপনেত্ৰা নিবদ্ধং ৰিয কত্ৰা, হদযে ঠপেত্ৰা অপমুস্সন্তং কত্ৰাতি অত্থো. এৰং সুট্ঠু উপট্ঠিতস্সতিতায নিমিত্তং গহেত্ৰা তত্থ সম্পজানকারিতায সক্কচ্চং সুণন্তেন. তন্তি তং যথাৰুত্তং সুগ্গহিতং নিস্সায. ইতরস্সাতি তথা অগণ্হন্তস্স. সব্বাকারেনাতি কস্সচিপি পকারস্স তত্থ অসেসিতত্তা ৰুত্তং.

কম্মট্ঠানগ্গহণনিদ্দেসৰণ্ণনা নিট্ঠিতা.

ইতি ততিযপরিচ্ছেদৰণ্ণনা.

৪. পথৰীকসিণনিদ্দেসৰণ্ণনা

৫১. ফাসু হোতীতি আৰাসসপ্পাযাদিলাভেন মনসিকারফাসুতা ভাৰনানুকূলতা হোতি. পরিসোধেন্তেনাতি তেসং তেসং গণ্ঠিট্ঠানানং ছিন্দনৰসেন ৰিসোধেন্তেন. অকিলমন্তোযেৰাতি অকিলন্তকাযো এৰ. সতি হি কাযকিলমথে সিযা কম্মট্ঠানমনসিকারস্স অন্তরাযোতি অধিপ্পাযো. গণ্ঠিট্ঠানন্তি অত্থতো, অধিপ্পাযতো চ দুব্বিনিৰেধতায গণ্ঠিভূতং ঠানং. ছিন্দিত্ৰাতি যাথাৰতো অত্থস্স, অধিপ্পাযস্স চ ৰিভাৰনেন ছিন্দিত্ৰা, ৰিভূতং সুপাকটং কত্ৰাতি অধিপ্পাযো. সুৰিসুদ্ধন্তি সুট্ঠু ৰিসুদ্ধং, নিগুম্বং নিজ্জটন্তি অত্থো.

অননুরূপৰিহারৰণ্ণনা

৫২. অঞ্ঞতরেনাতি অঞ্ঞতরেনাপি, পগেৰ অনেকেহীতি অধিপ্পাযো. মহন্তভাৰো মহত্তং. তথা সেসেসু. সোণ্ডৰা সোণ্ডী. তথা পণ্ণন্তিআদীসু. বোধিঅঙ্গণাদীসু কাতব্বং ইধ ‘‘ৰত্ত’’ন্তি অধিপ্পেতন্তি আহ ‘‘পানীযঘটং ৰা রিত্ত’’ন্তি. নিট্ঠিতাযাতি পৰিট্ঠপৰিট্ঠানং দানেন পরিক্খীণায. জিণ্ণৰিহারেপি যত্র ভিক্খূ এৰং ৰদন্তি ‘‘আযস্মা, যথাসুখং সমণধম্মং করোতু, মযং পটিজগ্গিস্সামা’’তি. এৰরূপে ৰিহাতব্বন্তি অযম্পি নযো লব্ভতি, ৰুত্তনযত্তা পন ন ৰুত্তো.

মহাপথৰিহারেতি মহাপথসমীপে ৰিহারে. ভাজনদারুদোণিকাদীনীতি রজনভাজনানি, রজনত্থায দারু, দারুমযদোণিকা, রজনপচনট্ঠানং, ধোৰনফলকন্তি এৰমাদীনি. সাকহারিকাতি সাকহারিনিযো ইত্থিযো. ৰিসভাগসদ্দো কামগুণূপসংহিতো গীতসদ্দোতি ৰদন্তি, কেৰলোপি ইত্থিসদ্দো ৰিসভাগসদ্দো এৰ. তত্রাতি পুপ্ফৰন্তে ৰিহারে. তাদিসোযেৰাতি ‘‘তত্থস্স কম্মট্ঠানং গহেত্ৰা’’তিআদিনা যাদিসো পণ্ণৰন্তে ৰিহারে উপদ্দৰো ৰুত্তো, তাদিসোযেৰ. ‘‘পুপ্ফহারিকাযো পুপ্ফং ওচিনন্তিযো’’তি পন ৰত্তব্বং. অযমিধ ৰিসেসো.

পত্থনীযেতি তত্থ ৰসন্তেসু সম্ভাৰনাৰসেন উপসঙ্কমনাদিনা পত্থেতব্বে. তেনাহ ‘‘লেণসম্মতে’’তি. দক্খিণাগিরীতি মগধৰিসযে দক্খিণাগিরীতি ৰদন্তি.

ৰিসভাগারম্মণানি ইট্ঠানি, অনিট্ঠানি চ. অনিট্ঠানং হি দস্সনত্থং ‘‘ঘটেহি নিঘংসন্তিযো’’তিআদি ৰুত্তং. দব্বূপকরণযোগ্গা রুক্খা দব্বূপকরণরুক্খা.

যো পন ৰিহারো. খলন্তি ধঞ্ঞকরণট্ঠানং. গাৰো রুন্ধন্তি ‘‘সস্সং খাদিংসূ’’তি. উদকৰারন্তি কেদারেসু সস্সানং দাতব্বউদকৰারং. অযম্পীতি মহাসঙ্ঘভোগোপি ৰিহারো. ৰারিযমানা কম্মট্ঠানিকেন ভিক্খুনা.

সমুদ্দসামুদ্দিকনদীনিস্সিতং উদকপট্টনং. মহানগরানং আযদ্ৰারভূতং অটৰিমুখাদিনিস্সিতং থলপট্টনং. অপ্পসন্না হোন্তি. তেনস্স তত্থ ফাসুৰিহারো ন হোতীতি অধিপ্পাযো. মঞ্ঞমানা রাজমনুস্সা.

সমোসরণেনাতি ইতো চিতো সঞ্চরণেন. পপাতেতি পপাতসীসে ঠত্ৰা গাযি ‘‘গীতসদ্দেন ইধাগতং পপাতে পাতেত্ৰা খাদিস্সামী’’তি. ৰেগেন গহেত্ৰাতি ৰেগেনাগন্ত্ৰা ‘‘কুহিং যাসী’’তি খন্ধে গহেত্ৰা.

যত্থাতি যস্মিং ৰিহারে, ৰিহারসামন্তা ৰা ন সক্কা হোতি কল্যাণমিত্তং লদ্ধুং, তত্থ ৰিহারে সো অলাভো মহাদোসোতি যোজনা.

পন্থনিন্তি পন্থে নীতো পৰত্তিতোতি পন্থনী, মগ্গনিস্সিতো ৰিহারো. তং পন্থনিং. সোণ্ডিন্তি সোণ্ডিসহিতো ৰিহারো সোণ্ডী, তং সোণ্ডিং. তথা পণ্ণন্তিআদীসু. নগরনিস্সিতং নগরন্তি ৰুত্তং উত্তরপদলোপেন যথা ‘‘ভীমসেনো ভীমো’’তি. দারুনাতি দারুনিস্সিতেন সহ. ৰিসভাগেনাতি যো ৰিসভাগেহি ৰুসীযতি, ৰিসভাগানং ৰা নিৰাসো, সো ৰিহারো ৰিসভাগো. তেন ৰিসভাগেন সদ্ধিং. পচ্চন্তনিস্সিতঞ্চ সীমানিস্সিতঞ্চ অসপ্পাযঞ্চ পচ্চন্তসীমাসপ্পাযং. যত্থ মিত্তো ন লব্ভতি, তম্পীতি সব্বত্থ ঠান-সদ্দাপেক্খায নপুংসকনিদ্দেসো. ইতি ৰিঞ্ঞাযাতি ‘‘ভাৰনায অননুরূপানী’’তি এৰং ৰিজানিত্ৰা.

অনুরূপৰিহারৰণ্ণনা

৫৩. অযং অনুরূপো নামাতি অযং ৰিহারো ভাৰনায অনুরূপো নাম. নাতিদূরন্তি গোচরট্ঠানতো অড্ঢগাৰুততো ওরভাগতায ন অতিদূরং. নাচ্চাসন্নন্তি পচ্ছিমেন পমাণেন গোচরট্ঠানতো পঞ্চধনুসতিকতায ন অতিআসন্নং. তায চ পন নাতিদূরনাচ্চাসন্নতায, গোচরট্ঠানং পরিস্সযাদিরহিতমগ্গতায চ গমনস্স চ আগমনস্স চ যুত্তরূপত্তা গমনাগমনসম্পন্নং. দিৰসভাগে মহাজনসংকিণ্ণতাভাৰেন দিৰা অপ্পাকিণ্ণং. অভাৰত্থো হি অযং অপ্প-সদ্দো ‘‘অপ্পিচ্ছো’’তিআদীসু (ম. নি. ১.৩৩৬) ৰিয. রত্তিযং জনালাপসদ্দাভাৰেন রত্তিং অপ্পসদ্দং. সব্বদাপি জনসন্নিপাতনিগ্ঘোসাভাৰেন অপ্পনিগ্ঘোসং. অপ্পকসিরেনাতি অকসিরেন সুখেনেৰ. সীলাদিগুণানং থিরভাৰপ্পত্তিযা থেরা. সুত্তগেয্যাদি বহু সুতং এতেসন্তি বহুস্সুতা. ৰাচুগ্গতকরণেন, সম্মদেৰ গরূনং সন্তিকে আগমিতভাৰেন চ আগতো পরিযত্তিধম্মসঙ্খাতো আগমো এতেসন্তি আগতাগমা. সুত্তাভিধম্মসঙ্খাতস্স ধম্মস্স ধারণেন ধম্মধরা. ৰিনযস্স ধারণেন ৰিনযধরা. তেসংযেৰ ধম্মৰিনযানং মাতিকায ধারণেন মাতিকাধরা. তত্থ তত্থ ধম্মপরিপুচ্ছায পরিপুচ্ছতি. অত্থপরিপুচ্ছায পরিপঞ্হতি ৰীমংসতি ৰিচারেতি. ইদং, ভন্তে, কথং ইমস্স কো অত্থোতি পরিপুচ্ছনপরিপঞ্হাকারদস্সনং. অৰিৰটঞ্চেৰ পাল়িযা অত্থং পদেসন্তরপাল়িদস্সনেন আগমতো ৰিৰরন্তি. অনুত্তানীকতঞ্চ যুত্তিৰিভাৰনেন উত্তানীকরোন্তি. কঙ্খট্ঠানিযেসু ধম্মেসু সংসযুপ্পত্তিযা হেতুতায গণ্ঠিট্ঠানভূতেসু পাল়িপদেসেসু যাথাৰতো ৰিনিচ্ছযদানেন কঙ্খং পটিৰিনোদেন্তি. এত্থ চ ‘‘নাতিদূরং, নাচ্চাসন্নং, গমনাগমনসম্পন্ন’’ন্তি একং অঙ্গং, ‘‘দিৰা অপ্পাকিণ্ণং, রত্তিং অপ্পসদ্দং অপ্পনিগ্ঘোস’’ন্তি একং, ‘‘অপ্পডংসমকসৰাতাতপসরীসপসম্ফস্স’’ন্তি একং, ‘‘তস্মিং খো পন সেনাসনে ৰিহরন্তস্স…পে… পরিক্খারা’’তি একং, ‘‘তস্মিং খো পন সেনাসনে থেরা…পে… কঙ্খং পটিৰিনোদেন্তী’’তি একং. এৰং পঞ্চ অঙ্গানি ৰেদিতব্বানি.

খুদ্দকপলিবোধৰণ্ণনা

৫৪. খুদ্দকপলিবোধুপচ্ছেদে পযোজনং পরতো আগমিস্সতি. অগ্গল়অনুৰাতপরিভণ্ডদানাদিনা দল়্হীকম্মং ৰা. তন্তচ্ছেদাদীসু তুন্নকম্মং ৰা কাতব্বং.

ভাৰনাৰিধানৰণ্ণনা

৫৫. সব্বকম্মট্ঠানৰসেনাতি অনুক্কমেন নিদ্দিসিযমানস্স চত্তালীসৰিধস্স সব্বস্স কম্মট্ঠানস্স ৰসেন. পিণ্ডপাতপটিক্কন্তেনাতি পিণ্ডপাতপরিভোগতো পটিনিৰত্তেন, পিণ্ডপাতভুত্তাৰিনা ওনীতপত্তপাণিনাতি অত্থো. ভত্তসম্মদং পটিৰিনোদেত্ৰাতি ভোজননিমিত্তং পরিস্সমং ৰিনোদেত্ৰা. আহারে হি আসযং পৰিট্ঠমত্তে তস্স আগন্তুকতায যেভুয্যেন সিযা সরীরস্স কোচি পরিস্সমো, তং ৰূপসমেত্ৰা. তস্মিং হি অৰূপসন্তে সরীরখেদেন চিত্তং একগ্গতং ন লভেয্যাতি. পৰিৰিত্তেতি জনৰিৰিত্তে. সুখনিসিন্নেনাতি পল্লঙ্কং আভুজিত্ৰা উজুং কাযং পণিধায নিসজ্জায সুখনিসিন্নেন. ৰুত্তঞ্হেতন্তি যং ‘‘কতায ৰা’’তিআদিনা পথৰিযা নিমিত্তগ্গহণং ইধ ৰুচ্চতি, ৰুত্তং হেতং পোরাণট্ঠকথাযং.

ইদানি তং অট্ঠকথাপাল়িং দস্সেন্তো ‘‘পথৰীকসিণং উগ্গণ্হন্তো’’তিআদিমাহ. তত্থাযং সঙ্খেপত্থো – পথৰীকসিণং উগ্গণ্হন্তোতি উগ্গহনিমিত্তভাৰেন পথৰীকসিণং গণ্হন্তো আদিযন্তো, উগ্গহনিমিত্তভূতং পথৰীকসিণং উপ্পাদেন্তোতি অত্থো. উপ্পাদনঞ্চেত্থ তথানিমিত্তস্স উপট্ঠাপনং দট্ঠব্বং. পথৰিযন্তি ৰক্খমানৰিসেসে পথৰীমণ্ডলে. নিমিত্তং গণ্হাতীতি তত্থ চক্খুনা আদাসতলে মুখনিমিত্তং ৰিয ভাৰনাঞাণেন ৰক্খমানৰিসেসং পথৰীনিমিত্তং গণ্হাতি. ‘‘পথৰিয’’ন্তি ৰত্ৰাপি মণ্ডলাপেক্খায নপুংসকনিদ্দেসো. কতেতি ৰক্খমানৰিধিনা অভিসঙ্খতেতি অত্থো. ৰা-সদ্দো অনিযমত্থো. অকতেতি পাকতিকে খলমণ্ডলাদিকে পথৰীমণ্ডলে. সান্তকেতি সঅন্তকে এৰ, সপরিচ্ছেদে এৰাতি অত্থো. সাৰধারণঞ্হেতং ৰচনং. তথা হি তেন নিৰত্তিতং দস্সেতুং ‘‘নো অনন্তকে’’তি ৰুত্তং. সকোটিযেতিআদীনিপি তস্সেৰ ৰেৰচনানি. সুপ্পমত্তে ৰাতিআদীসু সুপ্পসরাৰানি সমপ্পমাণানি ইচ্ছিতানি. কেচি পন ৰদন্তি ‘‘সরাৰমত্তং ৰিদত্থিচতুরঙ্গুলং হোতি, সুপ্পমত্তং ততো অধিকপ্পমাণন্তি. কিত্তিমং কসিণমণ্ডলং হেট্ঠিমপরিচ্ছেদেন সরাৰমত্তং, উপরিমপরিচ্ছেদেন সুপ্পমত্তং, ন ততো অধো, উদ্ধং ৰাতি পরিত্তপ্পমাণভেদসঙ্গণ্হনত্থং ‘সুপ্পমত্তে ৰা সরাৰমত্তে ৰা’তি ৰুত্ত’’ন্তি. যথাউপট্ঠিতে আরম্মণে একঙ্গুলমত্তম্পি ৰড্ঢিতং অপ্পমাণমেৰাতি ৰুত্তোৰাযমত্থো. কেচি পন ‘‘ছত্তমত্তম্পি কসিণমণ্ডলং কাতব্ব’’ন্তি ৰদন্তি.

সো তং নিমিত্তং সুগ্গহিতং করোতীতি সো যোগাৰচরো তং পথৰীমণ্ডলং সুগ্গহিতং নিমিত্তং করোতি. যদা চক্খুং উম্মীলেত্ৰা ওলোকেত্ৰা তত্থ নিমিত্তং গহেত্ৰা নিম্মীলেত্ৰা আৰজ্জেন্তস্স উম্মীলেত্ৰা ওলোকিতক্খণে ৰিয উপট্ঠাতি, তদা সুগ্গহিতং করোতি নাম. অথেত্থ সতিং সূপট্ঠিতং কত্ৰা অবহিগতেন মানসেন পুনপ্পুনং সল্লক্খেন্তো সূপধারিতং উপধারেতি নাম. এৰং উপধারিতং পন নং পুনপ্পুনং আৰজ্জেন্তো মনসি করোন্তো তমেৰারব্ভ আসেৰনং ভাৰনং বহুলং পৰত্তেন্তো সুৰৰত্থিতং ৰৰত্থপেতি নাম. তস্মিং আরম্মণেতি এৰং সুগ্গহিতকরণাদিনা সম্মদেৰ উপট্ঠিতে তস্মিং পথৰীকসিণসঞ্ঞিতে আরম্মণে. চিত্তং উপনিবন্ধতীতি অত্তনো চিত্তং উপচারজ্ঝানং উপনেত্ৰা নিবন্ধতি অঞ্ঞারম্মণতো ৰিনিৰত্তং করোতি. অদ্ধা ইমাযাতিআদি আনিসংসদস্সাৰিতাদস্সনং.

ইদানি যথাদস্সিতস্স অট্ঠকথাপাঠস্স অত্থপ্পকাসনেন সদ্ধিং ভাৰনাৰিধিং ৰিভাৰেতুকামো অকতে তাৰ নিমিত্তগ্গহণং দস্সেন্তো ‘‘তত্থ যেন অতীতভৰেপী’’তিআদিমাহ. তত্থ তত্থাতি তস্মিং অট্ঠকথাপাঠে. চতুক্কপঞ্চকজ্ঝানানীতি চতুক্কপঞ্চকনযৰসেন ৰদতি. পুঞ্ঞৰতোতি ভাৰনামযপুঞ্ঞৰতো. উপনিস্সযসম্পন্নস্সাতি তাদিসেনেৰ উপনিস্সযেন সমন্নাগতস্স. খলমণ্ডলেতি মণ্ডলাকারে ধঞ্ঞকরণট্ঠানে. তংঠানপ্পমাণমেৰাতি ওলোকিতট্ঠানপ্পমাণমেৰ.

অৰিরাধেত্ৰাতি অৰিরজ্ঝিত্ৰা ৰুত্তৰিধিনা এৰ. নীলপীতলোহিতওদাতসম্ভেদৰসেনাতি নীলাদিৰণ্ণাহি মত্তিকাহি পচ্চেকং, একজ্ঝঞ্চ সংসগ্গৰসেন. গঙ্গাৰহেতি গঙ্গাসোতে. সীহল়দীপে কির রাৰণগঙ্গা নাম নদী, তস্সা সোতেন ছিন্নতটট্ঠানে মত্তিকা অরুণৰণ্ণা. তং সন্ধায ৰুত্তং ‘‘গঙ্গাৰহে মত্তিকাসদিসায অরুণৰণ্ণাযা’’তি. অরুণৰণ্ণায অরুণনিভায, অরুণপ্পভাৰণ্ণাযাতি অত্থো.

এৰং কসিণদোসে দস্সেত্ৰা ইদানি কসিণকরণাদিকে সেসাকারে দস্সেতুং ‘‘তঞ্চ খো’’তিআদি ৰুত্তং. সংহারিমন্তি সংহরিতব্বং গহেত্ৰা চরণযোগ্গং. তত্রট্ঠকন্তি যত্র কতং, তত্থেৰ তিট্ঠনকং. ৰুত্তপ্পমাণন্তি ‘‘সুপ্পমত্তে ৰা সরাৰমত্তে ৰা’’তি ৰুত্তপ্পমাণং. ৰট্টন্তি মণ্ডলসণ্ঠানং. পরিকম্মকালেতি নিমিত্তুগ্গহণায ভাৰনাকালে. এতদেৰাতি যং ৰিদত্থিচতুরঙ্গুলৰিত্থারং, এতদেৰ পমাণং সন্ধায ‘‘সুপ্পমত্তং ৰা সরাৰমত্তং ৰা’’তি ৰুত্তং. সুপ্পং হি নাতিমহন্তং, সরাৰঞ্চ মহন্তং চাটিপিধানপ্পহোনকন্তি সমপ্পমাণং হোতি.

৫৬. তস্মাতি পরিচ্ছেদত্থায ৰুত্তত্তা. এৰং ৰুত্তপমাণং পরিচ্ছেদন্তি যথাৰুত্তপ্পমাণং ৰিদত্থিচতুরঙ্গুলৰিত্থারং পরিচ্ছেদং কত্ৰা, এৰং ৰুত্তপ্পমাণং ৰা কসিণমণ্ডলং ৰিসভাগৰণ্ণেন পরিচ্ছেদং কত্ৰা. রুক্খপাণিকাতি কুচন্দনাদিরুক্খপাণিকা অরুণৰণ্ণস্স ৰিসভাগৰণ্ণং সমুট্ঠপেতি. তস্মা তং অগ্গহেত্ৰাতি ৰুত্তং. পকতিরুক্খপাণিকা পন পাসাণপাণিকাগতিকাৰ. নিন্নুন্নতট্ঠানাভাৰেন ভেরীতলসদিসং কত্ৰা. ততো দূরতরেতিআদি যথাৰুত্ততো পদেসতো, পীঠতো চ অঞ্ঞস্মিং আদীনৰদস্সনং. কসিণদোসাতি হত্থপাণিপদাদযো ইধ কসিণদোসা.

ৰুত্তনযেনেৰাতি ‘‘অড্ঢতেয্যহত্থন্তরে পদেসে, ৰিদত্থিচতুরঙ্গুলপাদকে পীঠে’’তি চ ৰুত্তৰিধিনাৰ. কামেসু আদীনৰন্তি ‘‘কামা নামেতে অট্ঠিকঙ্কলূপমা নিরস্সাদট্ঠেন, তিণুক্কূপমা অনুদহনট্ঠেন, অঙ্গারকাসূপমা মহাভিতাপট্ঠেন, সুপিনকূপমা ইত্তরপচ্চুপট্ঠানট্ঠেন, যাচিতকূপমা তাৰকালিকট্ঠেন, রুক্খফলূপমা সব্বঙ্গপচ্চঙ্গপলিভঞ্জনট্ঠেন, অসিসূনূপমা অধিকুট্টনট্ঠেন, সত্তিসূলূপমা ৰিনিৰিজ্ঝনট্ঠেন, সপ্পসিরূপমা সপটিভযট্ঠেনা’’তিআদিনা (পাচি. অট্ঠ. ৪১৭; ম. নি. অট্ঠ. ১.২৩৪) ‘‘অপ্পস্সাদা কামা বহুদুক্খা বহুপাযাসা’’তিআদিনা (পাচি. ৪১৭; ম. নি. ১.২৩৪; ২.৪২) ‘‘কামসুখঞ্চ নামেতং বহুপরিস্সযং, সাসঙ্কং, সভযং, সংকিলিট্ঠং, মীল়্হপরিভোগসদিসং, হীনং, গম্মং, পোথুজ্জনিকং, অনরিযং, অনত্থসংহিত’’ন্তিআদিনা চ অনেকাকারৰোকারং ৰত্থুকামকিলেসকামেসু আদীনৰং দোসং পচ্চৰেক্খিত্ৰা. কামনিস্সরণেতি কামানং নিস্সরণভূতে, তেহি ৰা নিস্সটে. অগ্গমগ্গস্স পাদকভাৰেন সব্বদুক্খসমতিক্কমস্স উপাযভূতে. নেক্খম্মেতি ঝানে. জাতাভিলাসেন সঞ্জাতচ্ছন্দেন. ‘‘সম্মাসম্বুদ্ধো ৰত ভগৰা অৰিপরীতধম্মদেসনত্তা, স্ৰাক্খাতো ধম্মো একন্তনিয্যানিকত্তা, সুপ্পটিপন্নো সঙ্ঘো যথানুসিট্ঠং পটিপজ্জনতো’’তি এৰং বুদ্ধধম্মসঙ্ঘগুণানুস্সরণেন রতনত্তযৰিসযং পীতিপামোজ্জং জনযিত্ৰা. নেক্খম্মং পটিপজ্জতি এতাযাতি নেক্খম্মপটিপদা, সউপচারস্স ঝানস্স, ৰিপস্সনায, মগ্গস্স, নিব্বানস্স চ অধিগমকারণন্তি অত্থো. পুব্বে পন পঠমজ্ঝানমেৰ নেক্খম্মন্তি ৰুত্তত্তা ৰুত্তাৰসেসা সব্বেপি নেক্খম্মধম্মা. যথাহ –

‘‘পব্বজ্জা পঠমং ঝানং, নিব্বানং চ ৰিপস্সনা;

সব্বেপি কুসলা ধম্মা, ‘নেক্খম্ম’ন্তি পৰুচ্চরে’’তি. (ইতিৰু. অট্ঠ. ১০৯);

পৰিৰেকসুখরসস্সাতি চিত্তৰিৰেকাদিৰিৰেকজস্স সুখরসস্স. এৰমেতেহি পঞ্চহি পদেহি ‘‘আনিসংসদস্সাৰী’’তিআদীনং পদানং অত্থো দস্সিতোতি দট্ঠব্বং. সমেন আকারেনাতি অতিউম্মীলনঅতিমন্দালোচনানি ৰজ্জেত্ৰা নাতিউম্মীলননাতিমন্দালোচনসঙ্খাতেন সমেন আলোচনাকারেন. নিমিত্তং গণ্হন্তেনাতি পথৰীকসিণে চক্খুনা গহিতনিমিত্তং মনসা গণ্হন্তেন. ভাৰেতব্বন্তি তথাপৰত্তং নিমিত্তগ্গহণং ৰড্ঢেতব্বং আসেৰিতব্বং বহুলীকাতব্বং.

চক্খু কিলমতি অতিসুখুমং, অতিভাসুরঞ্চ রূপগতং উপনিজ্ঝাযতো ৰিয. অতিৰিভূতং হোতি অত্তনো সভাৰাৰিভাৰতো. তথা চ ৰণ্ণতো ৰা লক্খণতো ৰা উপতিট্ঠেয্য. তেন ৰুত্তং ‘‘তেনস্স নিমিত্তং নুপ্পজ্জতী’’তি. অৰিভূতং হোতি গজনিম্মীলনেন পেক্খন্তস্স রূপগতং ৰিয. চিত্তঞ্চ লীনং হোতি দস্সনে মন্দব্যাপারতায কোসজ্জপাততো. তেনাহ ‘‘এৰম্পি নিমিত্তং নুপ্পজ্জতী’’তি. আদাসতলে মুখনিমিত্তদস্সিনা ৰিযাতি যথা আদাসতলে মুখনিমিত্তদস্সী পুরিসো ন তত্থ অতিগাল়্হং উম্মীলতি, নাপি অতিমন্দং, ন আদাসতলস্স ৰণ্ণং পচ্চৰেক্খতি, নাপি লক্খণং মনসি করোতি. অথ খো সমেন আকারেন ওলোকেন্তো অত্তনো মুখনিমিত্তমেৰ পস্সতি, এৰমেৰ অযম্পি পথৰীকসিণং সমেন আকারেন ওলোকেন্তো নিমিত্তগ্গহণপ্পসুতোযেৰ হোতি, তেন ৰুত্তং ‘‘সমেন আকারেনা’’তিআদি. ন ৰণ্ণো পচ্চৰেক্খিতব্বোতি যো তত্থ পথৰীকসিণে অরুণৰণ্ণো, সো ন চিন্তেতব্বো. চক্খুৰিঞ্ঞাণেন পন গহণং ন সক্কা নিৰারেতুং. তেনেৰেত্থ ‘‘ন ওলোকেতব্বো’’তি অৰত্ৰা পচ্চৰেক্খণগ্গহণং কতং. ন লক্খণং মনসি কাতব্বন্তি যং তত্থ পথৰীধাতুযা থদ্ধলক্খণং, তং ন মনসি কাতব্বং.

দিস্ৰা গহেতব্বত্তা ‘‘ৰণ্ণং অমুঞ্চিত্ৰা’’তি ৰত্ৰাপি ৰণ্ণৰসেনেত্থ আভোগো ন কাতব্বো, সো পন ৰণ্ণো নিস্সযগতিকো কাতব্বোতি দস্সেন্তো আহ ‘‘নিস্সযসৰণ্ণং কত্ৰা’’তি. নিস্সযেন সমানাকারসন্নিস্সিতো সো ৰণ্ণো তায পথৰিযা সমানগতিকং কত্ৰা, ৰণ্ণেন সহেৰ ‘‘পথৰী’’তি মনসি কাতব্বন্তি অত্থো. উস্সদৰসেন পণ্ণত্তিধম্মেতি পথৰীধাতুযা উস্সন্নভাৰেন সত্তিতো অধিকভাৰেন সসম্ভারপথৰিযং ‘‘পথৰী’’তি যো লোকৰোহারো, তস্মিং পণ্ণত্তিধম্মে চিত্তং পট্ঠপেত্ৰা ‘‘পথৰী, পথৰী’’তি মনসি কাতব্বং. যদি লোকৰোহারেন পণ্ণত্তিমত্তে চিত্তং ঠপেতব্বং, নামন্তরৰসেনপি পথৰী মনসি কাতব্বা ভৰেয্যাতি, হোতু, কো দোসোতি দস্সেন্তো ‘‘মহী মেদিনী’’তিআদিমাহ. তত্থ যমিচ্ছতীতি যং নামং ৰত্তুং ইচ্ছতি, তং ৰত্তব্বং. তঞ্চ খো যদস্স সঞ্ঞানুকূলং হোতি যং নামং অস্স যোগিনো পুব্বে তত্থ গহিতসঞ্ঞাৰসেন অনুকূলং পচুরতায, পগুণতায ৰা আগচ্ছতি, তং ৰত্তব্বং. ৰত্তব্বন্তি চ পঠমসমন্নাহারে কস্সচি ৰচীভেদোপি হোতীতি কত্ৰা ৰুত্তং, আচরিযেন ৰা ৰত্তব্বতং সন্ধায. কিং ৰা বহুনা, পাকটভাৰোযেৰেত্থ পমাণন্তি দস্সেতুং ‘‘অপিচা’’তিআদি ৰুত্তং. কালেন উম্মীলেত্ৰা কালেন নিম্মীলেত্ৰাতি কিঞ্চি কালং চক্খুং উম্মীলেত্ৰা নিমিত্তগ্গহণৰসেন পথৰীমণ্ডলং ওলোকেত্ৰা পুন কিঞ্চি কালং চক্খুং নিম্মীলেত্ৰা আৰজ্জিতব্বং. যেনাকারেন ওলোকেত্ৰা গহিতং, তেনাকারেন পুন তং সমন্নাহরিতব্বং.

৫৭. আপাথমাগচ্ছতীতি মনোদ্ৰারিকজৰনানং গোচরভাৰং উপগচ্ছতি. তস্স উগ্গহনিমিত্তস্স. ন তস্মিং ঠানে নিসীদিতব্বং. কস্মা? যদি উগ্গহনিমিত্তে জাতেপি পথৰীমণ্ডলং ওলোকেত্ৰা ভাৰেতি, পটিভাগনিমিত্তুপ্পত্তি ন সিযা. সমীপট্ঠেন চ ন ওলোকেতুং ন সক্কা. তেন ৰুত্তং ‘‘অত্তনো ৰসনট্ঠানং পৰিসিত্ৰা’’তিআদি. নিস্সদ্দভাৰায একপটলিকূপাহনাগহণং, পরিস্সযৰিনোদনত্থং কত্তরদণ্ডগ্গহণং. সচে নস্সতি, অথানেন ভাৰেতব্বন্তি সম্বন্ধো. ৰক্খমানেসু অসপ্পাযেসু কেনচিদেৰ অসপ্পাযেন কারণভূতেন. নিমিত্তং আদাযাতি যথাজাতং উগ্গহনিমিত্তং গহেত্ৰা. সমন্নাহরিতব্বন্তি আৰজ্জিতব্বং নিমিত্তন্তি অধিপ্পাযো, সম্মা ৰা অনু অনু আহরিতব্বং কম্মট্ঠানন্তি অত্থো. তক্কাহতং ৰিতক্কাহতন্তি তক্কনতো, সৰিসেসং তক্কনতো চ ‘‘তক্কো, ৰিতক্কো’’তি চ এৰং লদ্ধনামেন ভাৰনাচিত্তসম্পযুত্তেন সম্মাসঙ্কপ্পেন আহননপরিযাহননকিচ্চেন অপরাপরং ৰত্তমানেন কম্মট্ঠানং আহতং, পরিযাহতঞ্চ কাতব্বং, বলপ্পত্তৰিতক্কো মনসিকারো বহুলং পৰত্তেতব্বোতি অত্থো. এৰং করোন্তস্সাতি এৰং কম্মট্ঠানং তক্কাহতং ৰিতক্কাহতং করোন্তস্স. যথা ভাৰনা পুব্বেনাপরং ৰিসেসং আৰহতি, এৰং অনুযুঞ্জন্তস্স. অনুক্কমেনাতি ভাৰনানুক্কমেন. যদা সদ্ধাদীনি ইন্দ্রিযানি সুৰিসদানি তিক্খানি পৰত্তন্তি, তদা অস্সদ্ধিযাদীনং দূরীভাৰেন সাতিসযথামপ্পত্তেহি সত্তহি বলেহি লদ্ধূপত্থম্ভানি ৰিতক্কাদীনি কামাৰচরানেৰ ঝানঙ্গানি বহূনি হুত্ৰা পাতুভৰন্তি. ততো এৰ তেসং উজুৰিপচ্চনীকভূতা কামচ্ছন্দাদযো সদ্ধিং তদেকট্ঠেহি পাপধম্মেহি ৰিদূরী ভৰন্তি, পটিভাগনিমিত্তুপ্পত্তিযা সদ্ধিং তং আরব্ভ উপচারজ্ঝানং উপ্পজ্জতি. তেন ৰুত্তং ‘‘নীৰরণানি ৰিক্খম্ভন্তী’’তিআদি. তত্থ সন্নিসীদন্তীতি সম্মদেৰ সীদন্তি, উপসমন্তীতি অত্থো.

ইমস্সাতি পটিভাগনিমিত্তস্স. অঙ্গুলিপদপাণিপদাদিকো কসিণদোসো. আদাসমণ্ডলূপমাদীহি উগ্গহনিমিত্ততো পটিভাগনিমিত্তস্স সুপরিসুদ্ধতং, সণ্হসুখুমতঞ্চ দস্সেতি. তঞ্চ খো পটিভাগনিমিত্তং নেৰ ৰণ্ণৰন্তং ন সণ্ঠানৰন্তং অপরমত্থসভাৰত্তা. ঈদিসন্তি ৰণ্ণসণ্ঠানৰন্তং. তিলক্খণব্ভাহতন্তি উপ্পাদাদিলক্খণত্তযানুপৰিট্ঠং, অনিচ্চতাদিলক্খণত্তযঙ্কিতং ৰা. যদি ন পনেতং তাদিসং ৰণ্ণাদিৰন্তং, কথং ঝানস্স আরম্মণভাৰোতি আহ ‘‘কেৰলঞ্হী’’তিআদি. সঞ্ঞজন্তি ভাৰনাসঞ্ঞাজনিতং, ভাৰনাসঞ্ঞায সঞ্জাতমত্তং. ন হি অসভাৰস্স কুতোচি সমুট্ঠানং অত্থি. তেনাহ ‘‘উপট্ঠানাকারমত্ত’’ন্তি.

৫৮. ৰিক্খম্ভিতানেৰ সন্নিসিন্নাৰ, ন পন তদত্থং উস্সাহো কাতব্বোতি অধিপ্পাযো. ‘‘উপচারসমাধিনা’’তি ৰুত্তে ইতরোপি সমাধি অত্থীতি অত্থতো আপন্নন্তি তম্পি দস্সেতুং ‘‘দুৰিধো হি সমাধী’’তিআদি আরদ্ধং. দ্ৰীহাকারেহীতি ঝানধম্মানং পটিপক্খদূরীভাৰো, থিরভাৰপ্পত্তি চাতি ইমেহি দ্ৰীহি কারণেহি. ইদানি তানি কারণানি অৰত্থামুখেন দস্সেতুং ‘‘উপচারভূমিযং ৰা’’তিআদি ৰুত্তং. উপচারভূমিযন্তি উপচারাৰত্থাযং. যদিপি তদা ঝানঙ্গানি পটুতরানি মহগ্গতভাৰপ্পত্তানি ন উপ্পজ্জন্তি, তেসং পন পটিপক্খধম্মানং ৰিক্খম্ভনেন চিত্তং সমাধিযতি. তেনাহ ‘‘নীৰরণপ্পহানেন চিত্তং সমাহিতং হোতী’’তি. পটিলাভভূমিযন্তি ঝানস্স অধিগমাৰত্থাযং. তদা হি অপ্পনাপত্তানং ঝানধম্মানং উপ্পত্তিযা চিত্তং সমাধিযতি. তেনাহ ‘‘অঙ্গপাতুভাৰেনা’’তি. চিত্তং সমাহিতং হোতীতি সম্বন্ধো.

ন থামজাতানীতি ন জাতথামানি, ন ভাৰনাবলং পত্তানীতি অত্থো. চিত্তন্তি ঝানচিত্তং. কেৰলম্পি রত্তিং কেৰলম্পি দিৰসং তিট্ঠতীতি সমাপত্তিৰেলং সন্ধাযাহ. উপচারভূমিযং নিমিত্তৰড্ঢনং যুত্তন্তি কত্ৰা ৰুত্তং ‘‘নিমিত্তং ৰড্ঢেত্ৰা’’তি. লদ্ধপরিহানীতি লদ্ধউপচারজ্ঝানপরিহানি. নিমিত্তে অৰিনস্সন্তে তদারম্মণঝানম্পি অপরিহীনমেৰ হোতি, নিমিত্তে পন আরক্খাভাৰেন ৰিনট্ঠে লদ্ধং লদ্ধং ঝানম্পি ৰিনস্সতি তদাযত্তৰুত্তিতো. তেনাহ ‘‘আরক্খম্হী’’তিআদি.

সত্তসপ্পাযৰণ্ণনা

৫৯. ‘‘থাৰরঞ্চ হোতী’’তি ৰত্ৰা যথা থাৰরং হোতি, তং দস্সেতুং ‘‘সতি উপট্ঠাতি, চিত্তং সমাধিযতী’’তি ৰুত্তং. যথালদ্ধঞ্হি নিমিত্তং তত্থ সতিং সূপট্ঠিতং কত্ৰা একগ্গতং ৰিন্দন্তস্স থিরং নাম হোতি, সুরক্খিতঞ্চ. সতি-গ্গহণেন চেত্থ সম্পজঞ্ঞং, সমাধিগ্গহণেন ৰীরিযঞ্চ সঙ্গহিতং হোতি নানন্তরিযভাৰতো. তত্থাতি তেসু আৰাসেসু. তীণি তীণীতি একেকস্মিং আৰাসে অৰুত্থঅৰুত্থট্ঠানে ৰসননিযামেন তযো তযো দিৰসে ৰসিত্ৰা.

উত্তরেন ৰা দক্খিণেন ৰাতি ৰুত্তং গমনাগমনে সূরিযাভিমুখভাৰনিৰারণত্থন্তি. সহস্সধনুপ্পমাণং দিযড্ঢকোসং.

দ্ৰত্তিংস তিরচ্ছানকথাতি রাজকথাদিকে (দী. নি. ১.১৭; ম. নি. ২.২২৩; সং. নি. ৫.১০৮০; অ. নি. ১০.৬৯; পাচি. ৫০৮) সন্ধাযাহ. তা হি পাল়িযং সরূপতো অনাগতাপি অরঞ্ঞপব্বতনদীদীপকথা ইতি-সদ্দেন সঙ্গহেত্ৰা সগ্গমোক্খানং তিরচ্ছানভাৰতো ‘‘দ্ৰত্তিংস তিরচ্ছানকথা’’তি ৰুত্তা. দসকথাৰত্থুনিস্সিতন্তি ‘‘অপ্পিচ্ছতা, সন্তুট্ঠি, পৰিৰেকো, অসংসগ্গো, ৰীরিযারম্ভো, সীল, সমাধি, পঞ্ঞা, ৰিমুত্তি, ৰিমুত্তিঞাণদস্সন’’ন্তি ইমানি অপ্পিচ্ছকথাদীনং ৰত্থূনি, তন্নিস্সিতং ভস্সং সপ্পাযং.

অতিরচ্ছানকথিকোতি নতিরচ্ছানকথিকো, তিরচ্ছানকথা ৰিধুরং ধম্মিকং কম্মট্ঠানপটিসংযুত্তমেৰ কথং কথেতীতি অধিপ্পাযো. সীলাদিগুণসম্পন্নোতি সীলসমাধিআদিগুণসম্পন্নো. যো হি সমাধিকম্মট্ঠানিকো, সমাধিকম্মট্ঠানস্স ৰা পারং পত্তো, সো ইমস্স যোগিনো সপ্পাযো. তেনাহ ‘‘যং নিস্সাযা’’তিআদি. কাযদল়্হীবহুলোতি কাযস্স সন্তপ্পনপোসনপ্পসুতো. যং সন্ধায ৰুত্তং ‘‘যাৰদত্থং উদরাৰদেহকং ভুঞ্জিত্ৰা সেয্যসুখং পস্সসুখং মিদ্ধসুখং অনুযুত্তো ৰিহরতী’’তি (দী. নি. ৩.৩২০; ম. নি. ১.১৮৬; অ. নি. ৫.২০৬).

ভোজনং যেভুয্যেন মধুরম্বিলরসৰসেন সত্তানং উপযোগং গচ্ছতি দধিআদীসু তথা দস্সনতো. কটুকাদিরসা পন কেৰলং অভিসঙ্খারকা এৰাতি আহ ‘‘কস্সচি মধুরং, কস্সচি অম্বিলং সপ্পাযং হোতী’’তি.

যস্মিং ইরিযাপথে আধারভূতে, ৰত্তমানে ৰা, যস্মিং ৰা ইরিযাপথে পৰত্তমানস্স. নিমিত্তাসেৰনবহুলস্সাতি নিমিত্তে আসেৰনাবহুলস্স পটিভাগনিমিত্তে ৰিসযভূতে ভাৰনামনসিকারং বহুলং আসেৰন্তস্স, নিমিত্তস্স ৰা গোচরাসেৰনৰসেন আসেৰনাবহুলস্স. যেন হি ভাৰেন্তস্স ভাৰনাসেৰনা, তেন গোচরাসেৰনাপি ইচ্ছিতব্বাতি.

দসৰিধঅপ্পনাকোসল্লৰণ্ণনা

৬০. ন হোতি অপ্পনা. যেন ৰিধিনা অপ্পনাযং কুসলো হোতি, সো দসৰিধো ৰিধি অপ্পনাকোসল্লং, তন্নিব্বত্তং ৰা ঞাণং. ৰত্থুৰিসদকিরিযতোতি ৰত্থূনং ৰিসদভাৰকরণতো অপ্পনাকোসল্লং ইচ্ছিতব্বন্তি সম্বন্ধো. এৰং সেসেসুপি.

৬১. চিত্তচেতসিকানং হি পৰত্তিট্ঠানভাৰতো সরীরং, তপ্পটিবদ্ধানি চীৰরাদীনি চ ইধ ‘‘ৰত্থূনী’’তি অধিপ্পেতানি. তানি যথা চিত্তস্স সুখাৰহানি হোন্তি, তথা করণং তেসং ৰিসদভাৰকরণং. তেন ৰুত্তং ‘‘অজ্ঝত্তিকবাহিরান’’ন্তিআদি. সরীরং ৰাতি ৰা-সদ্দো অট্ঠানপ্পযুত্তো, সরীরং সেদমলগ্গহিতং ৰা অঞ্ঞেন ৰা অৰস্সুতকিচ্চেন ৰিবাধিতন্তি অধিপ্পাযো. সেনাসনং ৰাতি ৰা-সদ্দেন পত্তাদীনম্পি সঙ্গহো দট্ঠব্বো. ননু চাযং নযো খুদ্দকপলিবোধুপচ্ছেদেন সঙ্গহিতো, পুন কস্মা ৰুত্তোতি? সচ্চং সঙ্গহিতো, সো চ খো ভাৰনায আরম্ভকালে. ইধ পন আরদ্ধকম্মট্ঠানস্স উপচারজ্ঝানে ঠত্ৰা অপ্পনাপরিৰাসং ৰসন্তস্স কালন্তরে জাতে তথাপটিপত্তি অপ্পনাকোসল্লায ৰুত্তা. অৰিসদে সতি, ৰিসযভূতে ৰা. কথং ভাৰনমনুযুঞ্জন্তস্স তানি ৰিসযো? অন্তরন্তরা পৰত্তনকচিত্তুপ্পাদৰসেনেৰং ৰুত্তং. তে হি চিত্তুপ্পাদা চিত্তেকগ্গতায অপরিসুদ্ধভাৰায সংৰত্তন্তি. চিত্তচেতসিকেসু নিস্সযাদিপচ্চযভূতেসু. ঞাণম্পীতি পি-সদ্দো সম্পিণ্ডনে. তেন ‘‘ন কেৰলং তং ৰত্থুযেৰ, অথ খো তস্মিং অপরিসুদ্ধে ঞাণম্পি অপরিসুদ্ধং হোতী’’তি দস্সিতং. তংসম্পযুত্তানং পন অপরিসুদ্ধতা অৰুত্তসিদ্ধা, ঞাণস্স চ ৰিসুং গহণং অপ্পনায বহুকারত্তা. তথা হি ঝানং ‘‘দন্ধাভিঞ্ঞং, খিপ্পাভিঞ্ঞ’’ন্তি ঞাণমুখেন নিদ্দিট্ঠং. নিস্সযনিস্সযোপি নিস্সযোত্ৰেৰ ৰুচ্চতীতি আহ ‘‘দীপকপল্লিকৰট্টিতেলানি নিস্সাযা’’তি. ঞাণে অৰিসদে ৰিপস্সনাভাৰনা ৰিয সমাধিভাৰনাপি পরিদুব্বলা হোতীতি দস্সেতুং ‘‘অপরিসুদ্ধেন ঞাণেনা’’তিআদি ৰুত্তং. তত্থ কম্মট্ঠানন্তি সমথকম্মট্ঠানং আহ. ৰুড্ঢিং অঙ্গপাতুভাৰেন, ৰিরূল়্হিং গুণভাৰেন, ৰেপুল্লং সব্বসো ৰসিভাৰপ্পত্তিযা ৰেদিতব্বং. ৰিসদে পনাতি সুক্কপক্খো, তস্স ৰুত্তৰিপরিযাযেন অত্থো ৰেদিতব্বো.

৬২. সমভাৰকরণন্তি কিচ্চতো অনূনাধিকভাৰকরণং. যথাপচ্চযং সদ্ধেয্যৰত্থুস্মিং অধিমোক্খকিচ্চস্স পটুতরভাৰেন, পঞ্ঞায অৰিসদতায, ৰীরিযাদীনং চ সিথিলতাদিনা সদ্ধিন্দ্রিযং বলৰং হোতি. তেনাহ ‘‘ইতরানি মন্দানী’’তি. ততোতি তস্মা সদ্ধিন্দ্রিযস্স বলৰভাৰতো, ইতরেসঞ্চ মন্দত্তা. কোসজ্জপক্খে পতিতুং অদত্ৰা সম্পযুত্তধম্মানং পগ্গণ্হনং অনুবলপ্পদানং পগ্গহো, পগ্গহোৰ কিচ্চং, পগ্গহকিচ্চং কাতুং ন সক্কোতীতি সম্বন্ধিতব্বং. আরম্মণং উপগন্ত্ৰা ঠানং, অনিস্সজ্জনং ৰা উপট্ঠানং, ৰিক্খেপপটিপক্খো. যেন ৰা সম্পযুত্তা অৰিক্খিত্তা হোন্তি, সো অৰিক্খেপো. রূপগতং ৰিয চক্খুনা যেন যাথাৰতো ৰিসযসভাৰং পস্সতি, তং দস্সনকিচ্চং কাতুং ন সক্কোতি বলৰতা সদ্ধিন্দ্রিযেন অভিভূতত্তা. সহজাতধম্মেসু হি ইন্দট্ঠং কারেন্তানং সহপৰত্তমানানং ধম্মানং একরসতাৰসেনেৰ অত্থসিদ্ধি, ন অঞ্ঞথা. তস্মাতি ৰুত্তমেৰত্থং কারণভাৰেন পচ্চামসতি. তন্তি সদ্ধিন্দ্রিযং. ধম্মসভাৰপচ্চৰেক্খণেনাতি যস্স সদ্ধেয্যৰত্থুনো উল়ারতাদিগুণে অধিমুচ্চনস্স সাতিসযপ্পৰত্তিযা সদ্ধিন্দ্রিযং বলৰং জাতং, তস্স পচ্চযপচ্চযুপ্পন্নাদিৰিভাগতো যাথাৰতো ৰীমংসনেন. এৰঞ্হি এৰংধম্মতানযেন সভাৰরসতো পরিগ্গয্হমানে সৰিপ্ফারো অধিমোক্খো ন হোতি, ‘‘অযং ইমেসং ধম্মানং সভাৰো’’তি পরিজাননৰসেন পঞ্ঞাব্যাপারস্স সাতিসযত্তা. ধুরিযধম্মেসু হি যথা সদ্ধায বলৰভাৰে পঞ্ঞায মন্দভাৰো হোতি, এৰং পঞ্ঞায বলৰভাৰে সদ্ধায মন্দভাৰো হোতীতি. তেন ৰুত্তং ‘‘তং ধম্মসভাৰপচ্চৰেক্খণেন হাপেতব্ব’’ন্তি.

তথা অমনসিকারেনাতি যেনাকারেন ভাৰনমনুযুঞ্জন্তস্স সদ্ধিন্দ্রিযং বলৰং হোতি, তেনাকারেন ভাৰনায অননুযুঞ্জনতোতি ৰুত্তং হোতি. ইধ দুৰিধেন সদ্ধিন্দ্রিযস্স বলৰভাৰো, অত্তনো ৰা পচ্চযৰিসেসতো কিচ্চুত্তরিযেন, ৰীরিযাদীনং ৰা মন্দকিচ্চতায. তত্থ পঠমৰিকপ্পে হাপনৰিধি দস্সিতো, দুতিযৰিকপ্পে পন যথা মনসি করোতো ৰীরিযাদীনং মন্দকিচ্চতায সদ্ধিন্দ্রিযং বলৰং জাতং, তথা অমনসিকারেন ৰীরিযাদীনং পটুকিচ্চভাৰাৰহেন মনসিকারেন সদ্ধিন্দ্রিযং তেহি সমরসং করোন্তেন হাপেতব্বং. ইমিনা নযেন সেসিন্দ্রিযেসুপি হাপনৰিধি ৰেদিতব্বো.

ৰক্কলিত্থেরৰত্থূতি সো হি আযস্মা সদ্ধাধিমুত্ততায কতাধিকারো সত্থু রূপকাযদস্সনপ্পসুতো এৰ হুত্ৰা ৰিহরন্তো সত্থারা ‘‘কিং তে, ৰক্কলি, ইমিনা পূতিকাযেন দিট্ঠেন? যো খো, ৰক্কলি, ধম্মং পস্সতি, সো মং পস্সতী’’তিআদিনা (সং. নি. ৩.৮৭) ওৰদিত্ৰা কম্মট্ঠানে নিযোজিতোপি তং অননুযুঞ্জন্তো পণামিতো অত্তানং ৰিনিপাতেতুং পপাতট্ঠানং অভিরুহি. অথ নং সত্থা যথানিসিন্নোৰ ওভাসং ৰিসজ্জেন্তো অত্তানং দস্সেত্ৰা –

‘‘পামোজ্জবহুলো ভিক্খু, পসন্নো বুদ্ধসাসনে;

অধিগচ্ছে পদং সন্তং, সঙ্খারূপসমং সুখ’’ন্তি. (ধ. প. ৩৮১) –

গাথং ৰত্ৰা ‘‘এহি ৰক্কলী’’তি আহ. সো তেন অমতেনেৰ অভিসিত্তো হট্ঠতুট্ঠো হুত্ৰা ৰিপস্সনং পট্ঠপেসি. সদ্ধায পন বলৰভাৰতো ৰিপস্সনাৰীথিং ন ওতরি. তং ঞত্ৰা ভগৰা ইন্দ্রিযসমতং পটিপাদেন্তো কম্মট্ঠানং সোধেত্ৰা অদাসি. সো সত্থারা দিন্ননযেন ৰিপস্সনং উস্সুক্কাপেত্ৰা মগ্গপটিপাটিযা অরহত্তং পাপুণি. তেন ৰুত্তং ‘‘ৰক্কলিত্থেরৰত্থু চেত্থ নিদস্সন’’ন্তি.

ইতরকিচ্চভেদন্তি উপট্ঠানাদিকিচ্চৰিসেসং. পস্সদ্ধাদীতি আদি-সদ্দেন সমাধিউপেক্খাসম্বোজ্ঝঙ্গানং সঙ্গহো দট্ঠব্বো. হাপেতব্বন্তি যথা সদ্ধিন্দ্রিযস্স বলৰভাৰো ধম্মসভাৰপচ্চৰেক্খণেন হাযতি, এৰং ৰীরিযিন্দ্রিযস্স অধিমত্ততা পস্সদ্ধিআদিভাৰনায হাযতি, সমাধিপক্খিযত্তা তস্সা. তথা হি সা সমাধিন্দ্রিযস্স অধিমত্ততং কোসজ্জপাততো রক্খন্তী ৰীরিযাদিভাৰনা ৰিয ৰীরিযিন্দ্রিযস্স অধিমত্ততং উদ্ধচ্চপাততো রক্খন্তী একংসতো হাপেতি. তেন ৰুত্তং ‘‘পস্সদ্ধাদিভাৰনায হাপেতব্ব’’ন্তি.

সোণত্থেরস্স ৰত্থূতি (মহাৰ. ২৪৩) সুকুমারস্স সোণত্থেরস্স ৰত্থু. সো হি আযস্মা সত্থু সন্তিকে কম্মট্ঠানং গহেত্ৰা সীতৰনে ৰিহরন্তো ‘‘মম সরীরং সুখুমালং, ন চ সক্কা সুখেনেৰ সুখং অধিগন্তুং, কাযং কিলমেত্ৰাপি সমণধম্মো কাতব্বো’’তি ঠানচঙ্কমমেৰ অধিট্ঠায পধানমনুযুঞ্জন্তো পাদতলেসু ফোটেসু উট্ঠিতেসুপি ৰেদনং অজ্ঝুপেক্খিত্ৰা দল়্হং ৰীরিযং করোন্তো অচ্চারদ্ধৰীরিযতায ৰিসেসং নিব্বত্তেতুং নাসক্খি. সত্থা তত্থ গন্ত্ৰা ৰীণোৰাদেন ওৰদিত্ৰা ৰীরিযসমতাযোজনৰিধিং দস্সেন্তো কম্মট্ঠানং সোধেত্ৰা গিজ্ঝকূটং গতো. থেরোপি সত্থারা দিন্ননযেন ৰীরিযসমতং যোজেন্তো ৰিপস্সনং উস্সুক্কাপেত্ৰা অরহত্তে পতিট্ঠাসি. তেন ৰুত্তং ‘‘সোণত্থেরস্স ৰত্থু দস্সেতব্ব’’ন্তি.

সেসেসুপীতি সতিসমাধিপঞ্ঞিন্দ্রিযেসুপি. একস্সাতি একেকস্স. সামঞ্ঞনিদ্দেসোৰাযং দট্ঠব্বো. এৰং পঞ্চন্নং ইন্দ্রিযানং পচ্চেকং অধিমত্ততায পন হাপনৰসেন সমতং দস্সেত্ৰা ইদানি তত্থ যেসং ৰিসেসতো অসাধারণতো, সাধারণতো চ সমতা ইচ্ছিতব্বা, তং দস্সেতুং ‘‘ৰিসেসতো পনা’’তিআদি ৰুত্তং. এত্থাতি এতেসু পঞ্চসু ইন্দ্রিযেসু. সমতন্তি সদ্ধাপঞ্ঞানং অঞ্ঞমঞ্ঞং অনূনানধিকভাৰং. তথা সমাধিৰীরিযানং. যথা হি সদ্ধাপঞ্ঞানং ৰিসুং ৰিসুং ধুরিযধম্মভূতানং কিচ্চতো অঞ্ঞমঞ্ঞানতিৰত্তনং ৰিসেসতো ইচ্ছিতব্বমেৰ, যতো নেসং সমধুরতায অপ্পনা সম্পজ্জতীতি, এৰং সমাধিৰীরিযানং কোসজ্জউদ্ধচ্চপক্খিকানং সমরসতায সতি অঞ্ঞমঞ্ঞূপত্থম্ভনতো সম্পযুত্তধম্মানং অন্তদ্ৰযপাতাভাৰেন সম্মদেৰ অপ্পনা ইজ্ঝতি.

‘‘বলৰসদ্ধো হী’’তিআদি নিদস্সনৰসেন ৰুত্তং. তস্সত্থো – যো বলৰতিযা সদ্ধায সমন্নাগতো অৰিসদঞাণো, সো মুদ্ধপ্পসন্নো হোতি, ন অৰেচ্চপ্পসন্নো. তথা হি সো অৰত্থুস্মিং পসীদতি সেয্যথাপি তিত্থিযসাৰকা. কেরাটিকপক্খন্তি সাঠেয্যপক্খং ভজতি. সদ্ধাহীনায পঞ্ঞায অতিধাৰন্তো ‘‘দেয্যৰত্থুপরিচ্চাগেন ৰিনা চিত্তুপ্পাদমত্তেনপি দানমযং পুঞ্ঞং হোতী’’তিআদীনি পরিকপ্পেতি হেতুপটিরূপকেহি ৰঞ্চিতো. এৰংভূতো পন সুক্খতক্কৰিলুত্তচিত্তো পণ্ডিতানং ৰচনং নাদিযতি, সঞ্ঞত্তিং ন গচ্ছতি. তেনাহ ‘‘ভেসজ্জসমুট্ঠিতো ৰিয রোগো অতেকিচ্ছো হোতী’’তি. যথা চেত্থ সদ্ধাপঞ্ঞানং অঞ্ঞমঞ্ঞৰিরহো ন অত্থাৰহো অনত্থাৰহো চ, এৰমিধাপি সমাধিৰীরিযানং অঞ্ঞমঞ্ঞৰিরহো ন অৰিক্খেপাৰহো ৰিক্খেপাৰহো চাতি ৰেদিতব্বং. কোসজ্জং অভিভৰতি, তেন অপ্পনং ন পাপুণাতীতি অধিপ্পাযো. উদ্ধচ্চং অভিভৰতীতি এত্থাপি এসেৰ নযো. তদুভযন্তি তং সদ্ধাপঞ্ঞাদ্ৰযং, সমাধিৰীরিযদ্ৰযঞ্চ. সমং কাতব্বন্তি সমরসং কাতব্বং.

সমাধিকম্মিকস্সাতি সমথকম্মট্ঠানিকস্স. এৰন্তি এৰং সন্তে, সদ্ধায তেসং বলৰভাৰে সতীতি অত্থো. সদ্দহন্তোতি ‘‘পথৰী পথৰী’’তি মনসিকরণমত্তেন কথং ঝানুপ্পত্তীতি অচিন্তেত্ৰা ‘‘অদ্ধা সম্মাসম্বুদ্ধেন ৰুত্তৰিধি ইজ্ঝিস্সতী’’তি সদ্দহন্তো সদ্ধং জনেন্তো. ওকপ্পেন্তোতি আরম্মণং অনুপৰিসিত্ৰা ৰিয অধিমুচ্চনৰসেন ওকপ্পেন্তো পক্খন্দন্তো. একগ্গতা বলৰতী ৰট্টতি সমাধিপধানত্তা ঝানস্স. উভিন্নন্তি সমাধিপঞ্ঞানং, সমাধিকম্মিকস্স সমাধিনো অধিমত্ততাপি ইচ্ছিতব্বাতি আহ ‘‘সমতাযপী’’তি, সমভাৰেনাপীতি অত্থো. অপ্পনাতি ইধাধিপ্পেতঅপ্পনা. তথা হি ‘‘হোতিযেৰা’’তি সাসঙ্কং ৰদতি, লোকুত্তরপ্পনা পন তেসং সমভাৰেনেৰ ইচ্ছিতা. যথাহ – ‘‘সমথৰিপস্সনং যুগনদ্ধং ভাৰেতী’’তি (পটি. ম. ২.১, ৫).

যদি ৰিসেসতো সদ্ধাপঞ্ঞানং, সমাধিৰীরিযানঞ্চ সমতা ইচ্ছিতা, কথং সতীতি আহ ‘‘সতি পন সব্বত্থ বলৰতী ৰট্টতী’’তি. সব্বত্থাতি লীনুদ্ধচ্চপক্খেসু পঞ্চসু ইন্দ্রিযেসু. উদ্ধচ্চপক্খিযে গণ্হন্তো ‘‘সদ্ধাৰীরিযপঞ্ঞান’’ন্তি আহ. অঞ্ঞথাপীতি চ গহেতব্বা সিযা. তথা হি ‘‘কোসজ্জপক্খেন সমাধিনা’’ ইচ্চেৰ ৰুত্তং, ন ‘‘পস্সদ্ধিসমাধিউপেক্খাহী’’তি. সা সতি. সব্বেসু রাজকম্মেসু নিযুত্তো সব্বকম্মিকো. তেন কারণেন সব্বত্থ ইচ্ছিতব্বত্থেন. আহ অট্ঠকথাযং. সব্বত্থ নিযুত্তা সব্বত্থিকা, সব্বেন ৰা লীনুদ্ধচ্চপক্খিযেন বোজ্ঝঙ্গগ্গহণেন অত্থেতব্বা সব্বত্থিযা, সব্বত্থিযাৰ সব্বত্থিকা. চিত্তন্তি কুসলচিত্তং. তস্স হি সতি পটিসরণং পরাযণং অপ্পত্তস্স পত্তিযা অনধিগতস্স অধিগমায. তেনাহ ‘‘আরক্খপচ্চুপট্ঠানা’’তিআদি.

৬৩. চিত্তেকগ্গতানিমিত্তস্সাতি চিত্তেকগ্গতায নিমিত্তস্স, চিত্তেকগ্গতাসঙ্খাতস্স চ নিমিত্তস্স. চিত্তস্স হি সমাহিতাকারং সল্লক্খেত্ৰা সমথনিমিত্তং রক্খন্তোযেৰ কসিণনিমিত্তং রক্খতি. তস্মা পথৰীকসিণাদিকস্সাতি আদি-সদ্দেন ন কেৰলং পটিভাগনিমিত্তস্সেৰ, অথ খো সমথনিমিত্তস্সাপি গহণং দট্ঠব্বং. তন্তি রক্খণকোসল্লং. ইধ অপ্পনাকোসল্লকথাযং ‘‘নিমিত্তকোসল্ল’’ন্তি অধিপ্পেতং, করণভাৰনাকোসল্লানং পগেৰ সিদ্ধত্তাতি অধিপ্পাযো.

৬৪. অতিসিথিলৰীরিযতাদীহীতি আদি-সদ্দেন পমোদনসংৰেজনৰিপরিযাযে সঙ্গণ্হাতি. লীনন্তি সঙ্কুচিতং কোসজ্জপক্খপতিতং. চিত্তন্তি ভাৰনাচিত্তং. ধম্মৰিচযসম্বোজ্ঝঙ্গাদযো ভাৰেতীতি এত্থ ‘‘তযো’’তি পদং আনেত্ৰা সম্বন্ধিতব্বং. যথা পন তে ভাৰেতব্বা, তং সযমেৰ ৰক্খতি.

পরিত্তন্তি অপ্পকং. উজ্জালেতুকামোতি পদীপেতুকামো. উদকৰাতং দদেয্যাতি উদকমিস্সং ৰাতং উপনেয্য. অকালোতি নকালো, অযুত্তকালো ৰা. সতিআদিধম্মসামগ্গিসঙ্খাতায বোধিযা বুজ্ঝতি এতাযাতি কত্ৰা, তংসমঙ্গিনো ৰা বুজ্ঝতীতি বোধিনো যোগিনো অঙ্গন্তি বোজ্ঝঙ্গো, পসত্থো, সুন্দরো ৰা বোজ্ঝঙ্গো সম্বোজ্ঝঙ্গো. কাযচিত্তদরথৰূপসমলক্খণা পস্সদ্ধিযেৰ সম্বোজ্ঝঙ্গো পস্সদ্ধিসম্বোজ্ঝঙ্গো, তস্স পস্সদ্ধিসম্বোজ্ঝঙ্গস্স. সমাধিসম্বোজ্ঝঙ্গাদীসুপি এসেৰ নযো. অযং পন ৰিসেসো – সমাধিস্স তাৰ পদত্থলক্খণানি হেট্ঠা আগতানেৰ. উপপত্তিতো ইক্খতীতি উপেক্খা. সা পনাযং অত্থতো তত্রমজ্ঝত্তুপেক্খাৰ ইধ বোজ্ঝঙ্গুপেক্খা ৰেদিতব্বা. দুসমুট্ঠাপযন্তি সমুট্ঠাপেতুং উপ্পাদেতুং অসক্কুণেয্যং. ধম্মানং, ধম্মেসু ৰা ৰিচযো ধম্মৰিচযো, পঞ্ঞাতি অত্থো. ৰীরস্স ভাৰো, কম্মং ৰা, ৰিধিনা ৰা ঈরেতব্বং পৰত্তেতব্বন্তি ৰীরিযং, উস্সাহো. পীণেতি কাযং, চিত্তং চ সন্তপ্পেতীতি পীতি.

যং যং সকং যথাসকং, অত্তনো অত্তনোতি অত্থো. আহারৰসেনাতি পচ্চযৰসেন. ভাৰনাতি উপ্পাদনা, ৰড্ঢনা চ. কুসলাকুসলাতি কোসল্লসম্ভূতট্ঠেন কুসলা, তপ্পটিপক্খতো অকুসলা. যে অকুসলা, তে সাৰজ্জা. যে কুসলা, তে অনৰজ্জা. অকুসলা হীনা, ইতরে পণীতা. কুসলাপি ৰা হীনেহি ছন্দাদীহি আরদ্ধা হীনা, ইতরে পণীতা. কণ্হাতি কাল়কা চিত্তস্স অপভস্সরভাৰকরণা, সুক্কাতি ওদাতা চিত্তস্স পভস্সরভাৰকরণা. কণ্হাভিজাতিহেতুতো ৰা কণ্হা, সুক্কাভিজাতিহেতুতো সুক্কা. তে এৰ সপ্পটিভাগা. কণ্হা হি উজুৰিপচ্চনীকতায সুক্কেহি সপ্পটিভাগা. তথা সুক্কাপি ইতরেহি. অথ ৰা কণ্হা চ সুক্কা চ সপ্পটিভাগা চ কণ্হসুক্কসপ্পটিভাগা. সুখা হি ৰেদনা দুক্খায ৰেদনায সপ্পটিভাগা, দুক্খা চ ৰেদনা সুখায সপ্পটিভাগাতি. অনুপ্পন্নস্সাতি অনিব্বত্তস্স. উপ্পাদাযাতি উপ্পাদনত্থায. উপ্পন্নস্সাতি নিব্বত্তস্স. ভিয্যোভাৰাযাতি পুনপ্পুনভাৰায. ৰেপুল্লাযাতি ৰিপুলভাৰায. ভাৰনাযাতি ৰড্ঢিযা. পারিপূরিযাতি পরিপূরণত্থায.

তত্থাতি ‘‘অত্থি ভিক্খৰে’’তিআদিনা দস্সিতপাঠে. সভাৰসামঞ্ঞলক্খণপটিৰেধৰসেনাতি একজ্ঝং কত্ৰা গহণে অনৰজ্জসুখৰিপাকাদিকস্স ৰিসুং ৰিসুং পন ফুসনাদিকস্স সভাৰলক্খণস্স, অনিচ্চাদিকস্স সামঞ্ঞলক্খণস্স চ পটিৰিজ্ঝনৰসেন. পৰত্তমনসিকারোতি কুসলাদীনং তংতংসভাৰলক্খণাদিকস্স যাথাৰতো অৰবুজ্ঝনৰসেন উপ্পন্নজৰনচিত্তুপ্পাদো. সো হি অৰিপরীতমনসিকারতায ‘‘যোনিসোমনসিকারো’’তি ৰুত্তো. তদাভোগতায আৰজ্জনাপি তগ্গতিকাৰ. রুপ্পনলক্খণাদিকম্পি ইধ সামঞ্ঞলক্খণেনেৰ সঙ্গহিতন্তি দট্ঠব্বং. কুসলকিরিযায আদিআরম্ভৰসেন পৰত্তৰীরিযং ধিতিসভাৰতায ‘‘ধাতূ’’তি ৰুত্তন্তি আহ ‘‘আরম্ভধাতূতি পঠমৰীরিযং ৰুচ্চতী’’তি. লদ্ধাসেৰনং ৰীরিযং বলপ্পত্তং হুত্ৰা পটিপক্খং ৰিধমতীতি আহ ‘‘কোসজ্জতো নিক্খন্তত্তা ততো বলৰতর’’ন্তি. অধিমত্তাধিমত্ততরানং পটিপক্খধম্মানং ৰিধমনসমত্থং পটুপটুতরাদিভাৰপ্পত্তং হোতীতি ৰুত্তং ‘‘পরং পরং ঠানং অক্কমনতো ততোপি বলৰতর’’ন্তি. তিট্ঠতি পৰত্ততি এত্থাতি ঠানিযা, পীতিসম্বোজ্ঝঙ্গস্স ঠানিযা পীতিসম্বোজ্ঝঙ্গট্ঠানিযা. ঠাতব্বো ৰা ঠানিযো, পীতিসম্বোজ্ঝঙ্গো ঠানিযো এতেসূতি পীতিসম্বোজ্ঝঙ্গট্ঠানিযা, অপরাপরং ৰত্তমানা পীতিসম্বোজ্ঝঙ্গসম্পযুত্তা ধম্মা. যস্মা পন তেসু পীতিযেৰ পীতিসম্বোজ্ঝঙ্গস্স ৰিসেসকারণং, তস্মা ৰুত্তং ‘‘পীতিযা এৰ এতং নাম’’ন্তি. উপ্পাদকমনসিকারোতি যথা মনসি করোতো অনুপ্পন্নো পীতিসম্বোজ্ঝঙ্গো উপ্পজ্জতি, উপ্পন্নো চ ৰড্ঢতি, তথা পৰত্তমনসিকারো.

পরিপুচ্ছকতাতি পরিযোগাহেত্ৰা পুচ্ছকভাৰো. পঞ্চপি হি নিকাযে উগ্গহেত্ৰা আচরিযে পরিযুপাসিত্ৰা তস্স তস্স অত্থং পরিপুচ্ছন্তস্স, তে ৰা সহ অট্ঠকথায পরিযোগাহেত্ৰা যং যং তত্থ গণ্ঠিট্ঠানং, তং তং ‘‘ইদং, ভন্তে, কথং, ইমস্স কো অত্থো’’তি পুচ্ছন্তস্স ধম্মৰিচযসম্বোজ্ঝঙ্গো উপ্পজ্জতীতি. ৰত্থুৰিসদকিরিযা ইন্দ্রিযসমত্তপটিপাদনা সঙ্খেপতো, ৰিত্থারতো চ পকাসিতা এৰ. তত্থ পন সমাধিসংৰত্তনিযভাৰেন আগতা, ইধ পঞ্ঞাসংৰত্তনিযভাৰেন. যদগ্গেন হি সমাধিসংৰত্তনিকা, তদগ্গেন পঞ্ঞাসংৰত্তনিকা সমাধিস্স ঞাণপচ্চুপট্ঠানতো. ‘‘সমাহিতো যথাভূতং পজানাতী’’তি (সং. নি. ৪.৯৯; ৫.১০৭১) ৰুত্তং. দুপ্পঞ্ঞপুগ্গলপরিৰজ্জনা নাম দুপ্পঞ্ঞানং মন্দবুদ্ধীনং ভত্তনিক্খিত্তকাকমংসনিক্খিত্তসুনখসদিসানং মোমূহপুগ্গলানং দূরতো পরিচ্চজনা. পঞ্ঞৰন্তপুগ্গলসেৰনা নাম পঞ্ঞায কতাধিকারানং সচ্চপটিচ্চসমুপ্পাদাদীসু কুসলানং অরিযানং, ৰিপস্সনাকম্মিকানং ৰা মহাপঞ্ঞানং কালেন কালং উপসঙ্কমনং. গম্ভীরঞাণচরিযপচ্চৰেক্খণাতি গম্ভীরঞাণেহি চরিতব্বানং খন্ধাযতনধাতাদীনং, সচ্চপচ্চযাকারাদিদীপনানং ৰা সুঞ্ঞতাপটিসংযুত্তানং সুত্তন্তানং পচ্চৰেক্খণা. তদধিমুত্ততাতি পঞ্ঞাধিমুত্ততা, পঞ্ঞায নিন্নপোণপব্ভারতাতি অত্থো.

অপাযাদীতি আদি-সদ্দেন জাতিআদিং অতীতে ৰট্টমূলকং দুক্খং, অনাগতে ৰট্টমূলকং দুক্খং, পচ্চুপ্পন্নে আহারপরিযেট্ঠিমূলকঞ্চ দুক্খং সঙ্গণ্হাতি. ৰীরিযাযত্তস্স লোকিযলোকুত্তরৰিসেসস্স অধিগমো এৰ আনিসংসো, তস্স দস্সনসীলতা ৰীরিযাযত্ত…পে… দস্সিতা. সপুব্বভাগো নিব্বানগামিমগ্গো গমনৰীথি গন্তব্বা পটিপজ্জিতব্বা পটিপদাতি কত্ৰা. দাযকানং মহপ্ফলভাৰকরণেন পিণ্ডাপচাযনতাতি পচ্চযদাযকানং অত্তনি কারস্স অত্তনো সম্মাপটিপত্তিযা মহপ্ফলকারভাৰস্স করণেন পিণ্ডস্স ভিক্খায পটিপূজনা. ইতরথাতি আমিসপূজায. কুসীতপুগ্গলপরিৰজ্জনতাতি অলসানং ভাৰনায নামমত্তম্পি অজানন্তানং কাযদল়্হীবহুলানং যাৰদত্থং ভুঞ্জিত্ৰা সেয্যসুখাদিঅনুযুঞ্জনকানং তিরচ্ছানকথিকানং পুগ্গলানং দূরতো পরিচ্চজনা. আরদ্ধৰীরিযপুগ্গলসেৰনতাতি ‘‘দিৰসং চঙ্কমেন নিসজ্জাযা’’তিআদিনা (ৰিভ. ৫১৯; অ. নি. ৩.১৬) ভাৰনারম্ভৰসেন আরদ্ধৰীরিযানং দল়্হপরক্কমানং পুগ্গলানং কালেন কালং উপসঙ্কমনা. সম্মপ্পধানপচ্চৰেক্খণতাতি চতুব্বিধসম্মপ্পধানানুভাৰস্স পচ্চৰেক্খণতা. তদধিমুত্ততাতি তস্মিং ৰীরিযসম্বোজ্ঝঙ্গে অধিমুত্তি সব্বিরিযাপথেসু নিন্নপোণপব্ভারতা. এত্থ চ থিনমিদ্ধৰিনোদনকুসীতপুগ্গলপরিৰজ্জনআরদ্ধৰীরিযপুগ্গলসেৰনতদধিমুত্ততা পটিপক্খৰিধমনপচ্চযূপসংহারৰসেন, অপাযাদিভযপচ্চৰেক্খণাদযো সমুত্তেজনৰসেন ৰীরিযসম্বোজ্ঝঙ্গস্স উপ্পাদকা দট্ঠব্বা.

বুদ্ধাদীসু পসাদসিনেহাভাৰেন থুসখরহদযা লূখপুগ্গলা, তব্বিপরিযাযেন সিনিদ্ধপুগ্গলা ৰেদিতব্বা. বুদ্ধাদীনং গুণপরিদীপনা সম্পসাদনীযসুত্তাদযো (দী. নি. ৩.১৪১ আদযো) পসাদনীযসুত্তন্তা. ইমেহি আকারেহীতি যথাৰুত্তেহি কুসলাদীনং সভাৰসামঞ্ঞলক্খণপটিৰিজ্ঝনাদিআকারেহি চেৰ পরিপুচ্ছকতাদিআকারেহি চ. এতে ধম্মেতি এতে কুসলাদীসু যোনিসোমনসিকারাদিকে চেৰ ধম্মত্থঞ্ঞুতাদিকে চ.

৬৫. অচ্চারদ্ধৰীরিযতাদীহীতি অতিৰিয পগ্গহিতৰীরিযতাদীহি. আদি-সদ্দেন সংৰেজনপমোদনাদিং সঙ্গণ্হাতি. উদ্ধতন্তি সমাধিআদীনং মন্দতায অৰূপসন্তং. দুৰূপসমযন্তি ৰূপসমেতুং সমাধাতুং অসক্কুণেয্যং.

তং আকারং সল্লক্খেত্ৰাতি যেনাকারেন অস্স যোগিনো পস্সদ্ধি সমাধি উপেক্খাতি ইমে পস্সদ্ধিআদযো ধম্মা পুব্বে যথারহং তস্মিং তস্মিং কালে উপ্পন্নপুব্বা, তং চিত্ততংসম্পযুত্তধম্মানং পস্সদ্ধাকারং, সমাহিতাকারং, অজ্ঝুপেক্খিতাকারঞ্চ উপলক্খেত্ৰা উপধারেত্ৰা. তীসুপি পদেসূতি ‘‘অত্থি, ভিক্খৰে, কাযপ্পস্সদ্ধী’’তিআদিনা আগতেসু তীসুপি ৰাক্যেসু, তেহি ৰা পকাসিতেসু তীসু ধম্মকোট্ঠাসেসু. যথাসমাহিতাকারং সল্লক্খেত্ৰা গয্হমানো সমথো এৰ সমথনিমিত্তন্তি আহ ‘‘সমথনিমিত্তন্তি চ সমথস্সেৰেতমধিৰচন’’ন্তি. নানারম্মণে পরিব্ভমনেন ৰিৰিধং অগ্গং এতস্সাতি ব্যগ্গো, ৰিক্খেপো. তথা হি সো অনৰট্ঠানরসো, ভন্ততাপচ্চুপট্ঠানো চ ৰুত্তো. একগ্গতাভাৰতো ব্যগ্গপটিপক্খোতি অব্যগ্গো, সমাধি. সো এৰ নিমিত্তন্তি পুব্বে ৰিয ৰত্তব্বং. তেনাহ ‘‘অৰিক্খেপট্ঠেন চ তস্সেৰ অব্যগ্গনিমিত্তন্তি অধিৰচন’’ন্তি.

সরীরাৰত্থং ঞত্ৰা মত্তসো পরিভুত্তো পণীতাহারো কাযলহুতাদীনং সমুট্ঠাপনেন পস্সদ্ধিযা পচ্চযো হোতি, তথা উতুসপ্পাযং, ইরিযাপথসপ্পাযঞ্চ সেৰিতং, পযোগো চ কাযিকো পৰত্তিতোতি আহ ‘‘পণীতভোজনসেৰনতা’’তিআদি. পযোগসমতাদীনং অভাৰেন সদরথকাযচিত্তা পুগ্গলা সারদ্ধপুগ্গলা. ৰুত্তৰিপরিযাযেন পস্সদ্ধকাযা পুগ্গলা ৰেদিতব্বা.

নিরস্সাদস্সাতি ভাৰনস্সাদরহিতস্স. ভাৰনা হি ৰীথিপটিপন্না পুব্বেনাপরং ৰিসেসৰতী পৰত্তমানা চিত্তস্স অস্সাদং উপসমসুখং আৰহতি, তদভাৰতো নিরস্সাদং চিত্তং হোতি. সদ্ধাসংৰেগৰসেনাতি সদ্ধাৰসেন, সংৰেগৰসেন চ. সম্পহংসনতাতি সম্মদেৰ পহংসনতা সংৰেজনপুব্বকপসাদুপ্পাদনেন ভাৰনা চিত্তস্স তোসনা. সম্মাপৰত্তস্সাতি লীনুদ্ধচ্চৰিরহেন, সমথৰীথিপটিপত্তিযা চ সমং, সৰিসেসঞ্চ পৰত্তিযা সম্মদেৰ পৰত্তস্স ভাৰনাচিত্তস্স. অজ্ঝুপেক্খনতাতি পগ্গহনিগ্গহসম্পহংসনেসু অব্যাৰটতা. ঝানৰিমোক্খপচ্চৰেক্খণতাতি পঠমাদীনি ঝানানি পচ্চনীকধম্মেহি সুট্ঠু ৰিমুত্ততাদিনা তেযেৰ ৰিমোক্খা তেসং ‘‘এৰং ভাৰনা, এৰং সমাপজ্জনা, এৰং অধিট্ঠানং, এৰং ৰুট্ঠানং, এৰং সংকিলেসো, এৰং ৰোদান’’ন্তি পতি পতি অৰেক্খণা.

সত্তমজ্ঝত্ততাতি সত্তেসু পিযট্ঠানিযেসুপি গহট্ঠপব্বজিতেসু মজ্ঝত্তাকারো অজ্ঝুপেক্খনা. সঙ্খারমজ্ঝত্ততাতি অজ্ঝত্তিকেসু চক্খাদীসু, বাহিরেসু পত্তচীৰরাদীসু মজ্ঝত্তাকারো অজ্ঝুপেক্খনা. সত্তসঙ্খারানং মমাযনং সত্তসঙ্খারকেলাযনং. ইমেহাকারেহীতি ইমেহি যথাৰুত্তেহি কাযচিত্তানং পস্সদ্ধাকারসল্লক্খণাদিআকারেহি চেৰ সপ্পাযাহারসেৰনাদিআকারেহি চ. এতে ধম্মেতি এতে পস্সদ্ধিআদিধম্মে.

৬৬. পঞ্ঞাপযোগমন্দতাযাতি পঞ্ঞাব্যাপারস্স অপ্পভাৰেন. যথা হি দানসীলানি অলোভাদোসপ্পধানানি, এৰং ভাৰনা অমোহপ্পধানা ৰিসেসতো অপ্পনাৰহা. তত্থ যদা পঞ্ঞা ন বলৰতী হোতি, তদা ভাৰনাচিত্তস্স অনভিসঙ্খতো ৰিয আহারো পুরিসস্স অভিরুচিং ন জনেতি, তেন তং নিরস্সাদং হোতি. যদা চ ভাৰনা পুব্বেনাপরং ৰিসেসাৰহা ন হোতি সম্মদেৰ অৰীথিপটিপত্তিযা, তদা উপসমসুখস্স অলাভেন চিত্তং নিরস্সাদং হোতি. তদুভযং সন্ধাযাহ ‘‘পঞ্ঞাপযোগমন্দতাযা’’তিআদি. নন্তি চিত্তং. জাতিজরাব্যাধিমরণানি যথারহং সুগতিযং, দুগ্গতিযঞ্চ হোন্তীতি তদঞ্ঞমেৰ পঞ্চৰিধবন্ধনাদিখুপ্পিপাসাদিঅঞ্ঞমঞ্ঞৰিবাধনাদিহেতুকং অপাযদুক্খং দট্ঠব্বং. তযিদং সব্বং তেসং তেসং সত্তানং পচ্চুপ্পন্নভৰনিস্সিতং গহিতন্তি অতীতে, অনাগতে চ কালে ৰট্টমূলকদুক্খানি ৰিসুং গহিতানি. যে পন সত্তা আহারূপজীৰিনো, তত্থ চ উট্ঠানফলূপজীৰিনো, তেসং অঞ্ঞেহি অসাধারণং জীৰিতদুক্খং অট্ঠমং সংৰেগৰত্থু ৰুত্তন্তি দট্ঠব্বং.

অস্সাতি চিত্তস্স. অলীনন্তিআদীসু কোসজ্জপক্খিযানং ধম্মানং অনধিমত্ততায অলীনং. উদ্ধচ্চপক্খিকানং ধম্মানং অনধিমত্ততায অনুদ্ধতং. পঞ্ঞাপযোগসম্পত্তিযা, উপসমসুখাধিগমেন চ অনিরস্সাদং. পুব্বেনাপরং সৰিসেসং ততো এৰ আরম্মণে সমপ্পৰত্তং, সমথৰীথিপটিপন্নঞ্চ. তত্থ অলীনতায পগ্গহে, অনুদ্ধততায নিগ্গহে, অনিরস্সাদতায সম্পহংসনে ন ব্যাপারং আপজ্জতি. অলীনানুদ্ধততায হি আরম্মণে সমপ্পৰত্তং অনিরস্সাদতায সমথৰীথিপটিপন্নং. সমপ্পৰত্তিযা ৰা অলীনং অনুদ্ধতং, সমথৰীথিপটিপত্তিযা অনিরস্সাদন্তি দট্ঠব্বং.

নেক্খম্মপটিপদন্তি ঝানপটিপত্তিং. সমাধিঅধিমুত্ততাতি সমাধিনিব্বত্তনে ঝানাধিগমে যুত্তপ্পযুত্ততা. সা পন যস্মা সমাধিং গরুং কত্ৰা তত্থ নিন্নপোণপব্ভারভাৰেন পৰত্তিযা হোতি, তস্মা ‘‘সমাধিগরূ’’তিআদি ৰুত্তং.

৬৭. পটিলদ্ধে নিমিত্তস্মিং এৰং হি সম্পাদযতো অপ্পনাকোসল্লং ইমং অপ্পনা সম্পৰত্ততীতি সম্বন্ধো. সাতি অপ্পনা. হিত্ৰা হীতি হি-সদ্দো হেতুঅত্থো. যস্মা ঠানমেতং ন ৰিজ্জতি, তস্মা চিত্তপ্পৰত্তিআকারং ভাৰনাচিত্তস্স লীনুদ্ধতাদিৰসেন পৰত্তিআকারং সল্লক্খযং উপধারেন্তো. সমতং ৰীরিযস্সেৰ ৰীরিযস্স সমাধিনা সমরসতংযেৰ যোজযেথ. কথং পন যোজযেথাতি আহ ‘‘ঈসকম্পী’’তিআদি. তত্থ লযন্তি লীনভাৰং, সঙ্কোচন্তি অত্থো. যন্তন্তি গচ্ছন্তং, পগ্গণ্হেথেৰ সমভাৰাযাতি অধিপ্পাযো. তেনাহ ‘‘অচ্চারদ্ধং নিসেধেত্ৰা সমমেৰ পৰত্তযে’’তি. কথং পন সমমেৰ পৰত্তযেতি আহ ‘‘রেণুম্হী’’তিআদি. যথাতি রেণুআদীসু যথা মধুকরাদীনং পৰত্তি উপমাভাৰেন অট্ঠকথাযং সম্মৰণ্ণিতা, এৰং লীনুদ্ধতভাৰেহি মোচযিত্ৰা ৰীরিযসমতাযোজনেন নিমিত্তাভিমুখং মানসং পটিপাদযে পটিভাগনিমিত্তাভিমুখং ভাৰনাচিত্তং সম্পাদেয্যাতি অত্থো.

নিমিত্তাভিমুখপটিপাদনৰণ্ণনা

৬৮. তত্রাতি তস্মিং ‘‘রেণুম্হী’’তিআদিনা ৰুত্তগাথাদ্ৰযে. অত্থদীপনা উপমূপমেয্যত্থৰিভাৰনা. অছেকোতি অকুসলো. পক্খন্দোতি ধাৰিতুং আরদ্ধো. ৰিকসনক্খণেযেৰ সরসং কুসুমপরাগং হোতি, পচ্ছা ৰাতাদীহি পরিপততি, ৰিরসং ৰা হোতি. তস্মা নিৰত্তনে রেণু খীযতীতি আহ ‘‘খীণে রেণুম্হি সম্পাপুণাতী’’তি. পুপ্ফরাসিন্তি রুক্খসাখাসু নিস্সিতং পুপ্ফসঞ্চযং.

সল্লকত্তঅন্তেৰাসিকেসূতি সল্লকত্তআচরিযস্স অন্তেৰাসিকেসু. উদকথালগতেতি উদকথালিযং ঠপিতে. সত্থকম্মন্তি সিরাৰেধনাদিসত্থকম্মং. ফুসিতুম্পি উপ্পলপত্তন্তি সম্বন্ধো. সমেনাতি পুরিমকা ৰিয গরুং, মন্দঞ্চ পযোগং অকত্ৰা সমপ্পমাণেন পযোগেন. তত্থাতি উপ্পলপত্তে. পরিযোদাতসিপ্পোতি সুৰিসুদ্ধসিপ্পো নিপ্ফন্নসিপ্পো.

মক্কটকসুত্তন্তি লূতসুত্তং. নিযামকো নাৰাসারথী. লঙ্কারন্তি কিলঞ্জাদিমযং নাৰাকটসারকং. তেলেন অছড্ডেন্তো নাল়িং পূরেতীতি সরাৰাদিগতেন তেলেন অছড্ডেন্তো সুখুমচ্ছিদ্দকং তেলনাল়িং পূরেতি. এৰমেৰাতি যথা তে আদিতো ৰুত্তমধুকরসল্লকত্তঅন্তেৰাসিসুত্তাকড্ঢকনিযামকতেলপূরকা ৰেগেন পযোগং করোন্তি, এৰমেৰ যো ভিক্খু ‘‘সীঘং অপ্পনং পাপুণিস্সামী’’তি গাল়্হং ৰীরিযং করোতি, যো মজ্ঝে ৰুত্তমধুকরাদযো ৰিয ৰীরিযং ন করোতি, ইমে দ্ৰেপি ৰীরিযসমতাভাৰেন অপ্পনং পাপুণিতুং ন সক্কোন্তি. যো পন অৰসানে ৰুত্তমধুকরাদযো ৰিয সমপ্পযোগো, অযং অপ্পনং পাপুণিতুং সক্কোতি ৰীরিযসমতাযোগতোতি উপমাসংসন্দনং ৰেদিতব্বং. তেন ৰুত্তং ‘‘একো ভিক্খূ’’তিআদি. লীনং ভাৰনাচিত্তন্তি অধিপ্পাযো.

পঠমজ্ঝানকথাৰণ্ণনা

৬৯. এৰন্তি ৰুত্তপ্পকারেন. ৰীরিযসমতাযোজনৰসেন ৰীথিপটিপন্নং ভাৰনামানসং পটিভাগনিমিত্তেযেৰ ঠপনৰসেন নিমিত্তাভিমুখং পটিপাদযতো অস্স যোগিনো. ইজ্ঝিস্সতীতি সমিজ্ঝিস্সতি, উপ্পজ্জিস্সতীতি অত্থো. অনুযোগৰসেনাতি ভাৰনাৰসেন. সেসানীতি সেসানি তীণি, চত্তারি ৰা. পকতিচিত্তেহীতি পাকতিকেহি কামাৰচরচিত্তেহি. বলৰ…পে… চিত্তেকগ্গতানি ভাৰনাবলেন পটুতরসভাৰপ্পত্তিযা. পরিকম্মত্তাতি পটিসঙ্খারকত্তা. যদি আসন্নত্তা উপচারতা, গোত্রভুনো এৰ উপচারসমঞ্ঞা সিযাতি আহ ‘‘সমীপচারিত্তা ৰা’’তি. অনচ্চাসন্নোপি হি নাতিদূরপৰত্তী সমীপচারী নাম হোতি. অপ্পনং উপেচ্চ চরন্তীতি উপচারানি. ইতো পুব্বে পরিকম্মানন্তি নানাৰজ্জনৰীথিযং পরিকম্মানং. এত্থাতি এতেসু পরিকম্মুপচারানুলোমসঞ্ঞিতেসু. সব্বন্তিমন্তি ততিযং, চতুত্থং ৰা. পরিত্তগোত্তাভিভৰনতোতি পরিত্তস্স গোত্তস্স অভিভৰনতো. গংতাযতীতি হি গোত্তং, ‘‘পরিত্ত’’ন্তি পৰত্তমানং অভিধানং, বুদ্ধিঞ্চ একংসিকৰিসযতায রক্খতীতি পরিত্তগোত্তং. যথা হি বুদ্ধি আরম্মণভূতেন অত্থেন ৰিনা ন পৰত্ততি, এৰং অভিধানং অভিধেয্যভূতেন. তস্মা সো তানি তাযতি রক্খতীতি ৰুচ্চতি. তং পন মহগ্গতানুত্তরৰিধুরং কামতণ্হায গোচরভূতং কামাৰচরধম্মানং আৰেণিকরূপং দট্ঠব্বং. মহগ্গতগোত্তেপি ইমিনা নযেন অত্থো ৰেদিতব্বো. ভাৰনতোতি উপ্পাদনতো.

অৰিসেসেন সব্বেসং সব্বা সমঞ্ঞাতি পঠমনযো গহিতগ্গহণং হোতীতি আহ ‘‘অগ্গহিতগ্গহণেনা’’তিআদি. নানাৰজ্জনপরিকম্মমেৰ পরিকম্মন্তি অধিপ্পাযেন ‘‘পঠমং ৰা উপচার’’ন্তিআদি ৰুত্তং. চতুত্থং অপ্পনাচিত্তং, পঞ্চমং ৰা অপ্পনাচিত্তং পুব্বে ৰুত্তনযেন সচে চতুত্থং গোত্রভু হোতীতি অত্থো. পঞ্চমং ৰাতি ৰা-সদ্দো অনিযমে. স্ৰাযং অনিযমো ইমিনা কারণেনাতি দস্সেতুং ‘‘তঞ্চ খো খিপ্পাভিঞ্ঞদন্ধাভিঞ্ঞৰসেনা’’তি ৰুত্তং. তত্থ খিপ্পাভিঞ্ঞস্স চতুত্থং অপ্পেতি, দন্ধাভিঞ্ঞস্স পঞ্চমং. কস্মা পন চতুত্থং, পঞ্চমং ৰা অপ্পেতি, ন ততো পরন্তি আহ ‘‘ততো পরং জৰনং পততী’’তি. ততো পঞ্চমতো পরং ছট্ঠং, সত্তমঞ্চ জৰনং পতন্তং ৰিয হোতি পরিক্খীণজৰত্তাতি অধিপ্পাযো.

যথা অলদ্ধাসেৰনং পঠমজৰনং দুব্বলত্তা গোত্রভুং ন উপ্পাদেতি, লদ্ধাসেৰনং পন বলৰভাৰতো দুতিযং, ততিযং ৰা গোত্রভুং উপ্পাদেতি, এৰং লদ্ধাসেৰনতায বলৰভাৰতো ছট্ঠং, সত্তমম্পি অপ্পেতীতি থেরস্স অধিপ্পাযো. তেনাহ ‘‘তস্মা ছট্ঠেপি সত্তমেপি অপ্পনা হোতী’’তি. তন্তি থেরস্স ৰচনং. সুত্তসুত্তানুলোমআচরিযৰাদেহি অনুপত্থম্ভিতত্তা ৰুত্তং ‘‘অত্তনোমতিমত্ত’’ন্তি. ‘‘পুরিমা পুরিমা কুসলা ধম্মা’’তি (পট্ঠা. ১.১.১২) পন সুত্তপদমকারণং আসেৰনপচ্চযলাভস্স বলৰভাৰে অনেকন্তিকত্তা. তথা হি অলদ্ধাসেৰনাপি পঠমচেতনা দিট্ঠধম্মৰেদনীযা হোতি, লদ্ধাসেৰনা দুতিযচেতনা যাৰ ছট্ঠচেতনা অপরাপরিযৰেদনীযা. চতুত্থপঞ্চমেসুযেৰাতিআদি ৰুত্তস্সেৰত্থস্স যুত্তিদস্সনমুখেন নিগমনত্থং ৰুত্তং. তত্থ যদি ছট্ঠসত্তমং জৰনং পতিতং নাম হোতি পরিক্খীণজৰত্তা, কথং সত্তমজৰনচেতনা উপপজ্জৰেদনীযা, আনন্তরিযা চ হোতীতি? নাযং ৰিসেসো আসেৰনপচ্চযলাভেন বলপ্পত্তিযা. কিঞ্চরহি কিরিযাৰত্থাৰিসেসতো. কিরিযাৰত্থা হি আরম্ভমজ্ঝপরিযোসানৰসেন তিৰিধা. তত্থ চ পরিযোসানাৰত্থায সন্নিট্ঠাপকচেতনাভাৰেন উপপজ্জৰেদনীযাদিতা হোতি, ন বলৰভাৰেনাতি দট্ঠব্বং. পটিসন্ধিযা অনন্তরপচ্চযভাৰিনো ৰিপাকসন্তানস্স অনন্তরপচ্চযভাৰেন তথা অভিসঙ্খতত্তাতি চ ৰদন্তি. তস্মা ছট্ঠসত্তমানং পপাতাভিমুখতায পরিক্খীণজৰতা ন সক্কা নিৰারেতুং. তথা হি ‘‘যথা হি পুরিসো’’তিআদি ৰুত্তং.

সা চ পন অপ্পনা. অদ্ধানপরিচ্ছেদোতি কালপরিচ্ছেদো. সো পনেত্থ সত্তসু ঠানেসু কত্থচি অপরিমাণচিত্তক্খণতায, কত্থচি অতিইত্তরখণতায নত্থীতি ৰুত্তো. ন হেত্থ সম্পুণ্ণজৰনৰীথি অদ্ধা লব্ভতি. তেনেৰাহ ‘‘এত্থ মগ্গানন্তরফল’’ন্তিআদি. সেসট্ঠানেসূতি পঠমপ্পনা, লোকিযাভিঞ্ঞা, মগ্গক্খণো, নিরোধা ৰুট্ঠহন্তস্স ফলক্খণোতি এতেসু চতূসু ঠানেসু.

এত্তাৰতাতি এত্তকেন ভাৰনাক্কমেন এস যোগাৰচরো পঠমং ঝানং উপসম্পজ্জ ৰিহরতি. এৰং ৰিহরতা চ অনেন তদেৰ পঠমং ঝানং অধিগতং হোতি পথৰীকসিণন্তি সম্বন্ধো.

৭০. তত্থাতি তস্মিং ঝানপাঠে. ৰিৰিচ্চিত্ৰাতি ৰিসুং হুত্ৰা. তেনাহ ‘‘ৰিনা হুত্ৰা অপক্কমিত্ৰা’’তি, পজহনৰসেন অপসক্কিত্ৰাতি অত্থো. ৰিৰিচ্চেৰ কামেহীতি এত্থ ‘‘ৰিৰিচ্চা’’তি ইমিনা ৰিৰেচনং ঝানক্খণে কামানং অভাৰমত্তং ৰুত্তং. ‘‘ৰিৰিচ্চেৰা’’তি পন ইমিনা একংসতো কামানং ৰিৰেচেতব্বতাদীপনেন তপ্পটিপক্খতা ঝানস্স, কামৰিৰেকস্স চ ঝানাধিগমূপাযতা দস্সিতা হোতীতি ইমমত্থং দস্সেতুং ‘‘পঠমং ঝান’’ন্তিআদিং ৰত্ৰা তমেৰত্থং পাকটতরং কাতুং ‘‘কথ’’ন্তিআদি ৰুত্তং. ‘‘অন্ধকারে সতি পদীপোভাসো ৰিযা’’তি এতেন যথা পদীপোভাসাভাৰেন রত্তিযং অন্ধকারাভিভৰো, এৰং ঝানাভাৰেন সত্তসন্ততিযং কামাভিভৰোতি দস্সেতি.

এতন্তি পুব্বপদেযেৰ অৰধারণৰচনং. ন খো পন এৰং দট্ঠব্বং ‘‘কামেহি এৰা’’তি অৰধারণস্স অকতত্তা. নিস্সরন্তি নিগ্গচ্ছন্তি এতেন, এত্থ ৰাতি নিস্সরণং. কে নিগ্গচ্ছন্তি? কামা, তেসং কামানং নিস্সরণং পহানং তন্নিস্সরণং, ততো. কথং পন সমানে ৰিক্খম্ভনে কামানমেৰেতং নিস্সরণং, ন ব্যাপাদাদীনন্তি চোদনং যুত্তিতো, আগমতো চ সোধেতুং ‘‘কামধাতূ’’তিআদি ৰুত্তং. তত্থ কামধাতুসমতিক্কমনতোতি সকলস্সপি কামভৰস্স সমতিক্কমপটিপদাভাৰতো. তেন ইমস্স ঝানস্স কামপরিঞ্ঞাভাৰমাহ. কামরাগপটিপক্খতোতি ৰক্খমানৰিভাগস্স কিলেসকামস্স পচ্চত্থিকভাৰতো. তেন যথা মেত্তা ব্যাপাদস্স, করুণা ৰিহিংসায, এৰমিদং ঝানং কামরাগস্স উজুৰিপচ্চনীকভূতন্তি দস্সেতি. এৰমত্তনো পৰত্তিযা, ৰিপাকপ্পৰত্তিযা চ কামরাগতো, কামধাতুতো চ ৰিনিৰত্তসভাৰত্তা ইদং ঝানং ৰিসেসতো কামানমেৰ নিস্সরণং. স্ৰাযমত্থো পাঠগতো এৰাতি আহ ‘‘যথাহা’’তিআদি. কামঞ্চেতমত্থং দীপেতুং পুরিমপদেযেৰ অৰধারণং গহিতং, উত্তরপদেপি পন তং গহেতব্বমেৰ তথা অত্থসম্ভৰতোতি দস্সেতুং ‘‘উত্তরপদেপী’’তিআদি ৰুত্তং. ইতোতি কামচ্ছন্দতো. এস নিযমো. সাধারণৰচনেনাতি অৰিসেসৰচনেন. তদঙ্গৰিক্খম্ভনসমুচ্ছেদপ্পটিপস্সদ্ধিনিস্সরণৰিৰেকা তদঙ্গৰিৰেকাদযো. চিত্তকাযউপধিৰিৰেকা চিত্তৰিৰেকাদযো. তযো এৰ ইধ ঝানকথাযং দট্ঠব্বা সমুচ্ছেদৰিৰেকাদীনং অসম্ভৰতো.

নিদ্দেসেতি মহানিদ্দেসে (মহানি. ১, ৭). তত্থ হি ‘‘উদ্দানতো দ্ৰে কামা – ৰত্থুকামা কিলেসকামা চা’’তি উদ্দিসিত্ৰা ‘‘তত্থ কতমে ৰত্থুকামা? মনাপিযা রূপা…পে… মনাপিযা ফোট্ঠব্বা’’তিআদিনা ৰত্থুকামা নিদ্দিট্ঠা. তে পন কামীযন্তীতি কামাতি ৰেদিতব্বা. তত্থেৰাতি নিদ্দেসে এৰ. ৰিভঙ্গেতি ঝানৰিভঙ্গে (ৰিভ. ৫৬৪). পত্থনাকারেন পৰত্তো দুব্বলো লোভো ছন্দনট্ঠেন ছন্দো, ততো বলৰা রঞ্জনট্ঠেন রাগো, ততোপি বলৰতরো বহলরাগো ছন্দরাগো. নিমিত্তানুব্যঞ্জনানি সঙ্কপ্পেতি এতেনাতি সঙ্কপ্পো, তথাপৰত্তো লোভো, ততো বলৰা রঞ্জনট্ঠেন রাগো, সঙ্কপ্পনৰসেনেৰ পৰত্তো ততোপি বলৰতরো সঙ্কপ্পরাগোতি. স্ৰাযং পভেদো একস্সেৰ লোভস্স পৰত্তিআকারৰসেন, অৰত্থাভেদৰসেন চ ৰেদিতব্বো যথা ‘‘ৰচ্ছো দম্মো বলীবদ্দো’’তি. ইমে কিলেসকামা. কামেন্তীতি কামা, কামেন্তি এতেহীতি ৰা.

এৰঞ্হি সতীতি এৰং উভযেসম্পি কামানং সঙ্গহে সতি. ৰত্থুকামেহিপীতি ‘‘ৰত্থুকামেহি ৰিৰিচ্চেৰা’’তিপি অত্থো যুজ্জতীতি এৰং যুজ্জমানত্থন্তরসমুচ্চযত্থো পি-সদ্দো, ন কিলেসকামসমুচ্চযত্থো. কস্মা? ইমস্মিং অত্থে কিলেসকামেহি ৰিৰেকস্স দুতিযপদেন ৰুত্তত্তা. তেনাতি ৰত্থুকামৰিৰেকেন. কাযৰিৰেকো ৰুত্তো হোতি পুত্তদারাদিপরিগ্গহৰিৰেকদীপনতো. পুরিমেনাতি কাযৰিৰেকেন. এত্থাতি ‘‘ৰিৰিচ্চেৰ কামেহি, ৰিৰিচ্চ অকুসলেহি ধম্মেহী’’তি এতস্মিং পদদ্ৰযে, ইতো ৰা নিদ্ধারিতে ৰিৰেকদ্ৰযে. অকুসল-সদ্দেন যদিপি কিলেসকামা, সব্বাকুসলাপি ৰা গহিতা, সব্বথা পন কিলেসকামেহি ৰিৰেকো ৰুত্তোতি আহ ‘‘দুতিযেন কিলেসকামেহি ৰিৰেকৰচনতো’’তি. দুতিযেনাতি চ চিত্তৰিৰেকেনাতি অত্থো. এতেসন্তি যথাৰুত্তানং দ্ৰিন্নং পদানং, নিদ্ধারণে চেতং সামিৰচনং. তণ্হাদিসংকিলেসানং ৰত্থুনো পহানং সংকিলেসৰত্থুপ্পহানং. লোলভাৰো নাম তত্থ তত্থ রূপাদীসু তণ্হুপ্পাদো, তস্স হেতু ৰত্থুকামা এৰ ৰেদিতব্বা. বালভাৰো অৰিজ্জা, দুচ্চিন্তিতচিন্তিতাদি ৰা, তস্স অযোনিসোমনসিকারো, সব্বেপি ৰা অকুসলা ধম্মা হেতু. কামগুণাধিগমহেতুপি পাণাতিপাতাদিঅসুদ্ধপযোগো হোতীতি তব্বিৰেকেন পযোগসুদ্ধি ৰিভাৰিতা. তণ্হাসংকিলেসসোধনেন, ৰিৰট্টূপনিস্সযসংৰড্ঢনেন চ অজ্ঝাসযৰিসোধনং আসযপোসনং. কামেসূতি নিদ্ধারণে ভুম্মং.

অনেকভেদোতি কামাসৰকামরাগসংযোজনাদিৰসেন, রূপতণ্হাদিৰসেন চ অনেকপ্পভেদো. কামচ্ছন্দোযেৰাতি কামসভাৰোযেৰ ছন্দো, ন কত্তুকম্যতাছন্দো, নাপি কুসলচ্ছন্দোতি অধিপ্পাযো. ঝানপটিপক্খতোতি ঝানস্স পটিপক্খভাৰতো তংহেতু তন্নিমিত্তং ৰিসুং ৰুত্তো. অকুসলভাৰসামঞ্ঞেন অগ্গহেত্ৰা ৰিসুং সরূপেন গহিতো. যদি কিলেসকামোৰ পুরিমপদে ৰুত্তো, কথং বহুৰচনন্তি আহ ‘‘অনেকভেদতো’’তিআদি.

অঞ্ঞেসম্পি দিট্ঠিমানঅহিরিকানোত্তপ্পাদীনং, তংসহিতফস্সাদীনঞ্চ. উপরি ৰুচ্চমানানি ঝানঙ্গানি উপরিঝানঙ্গানি, তেসং অত্তনো পচ্চনীকানং পটিপক্খভাৰদস্সনতো তপ্পচ্চনীকনীৰরণৰচনং. নীৰরণানি হি ঝানঙ্গপচ্চনীকানি তেসং পৰত্তিনিৰারণতো. সমাধি কামচ্ছন্দস্স পটিপক্খো রাগপ্পণিধিযা উজুৰিপচ্চনীকভাৰতো, নানারম্মণেহি পলোভিতস্স পরিব্ভমন্তস্স চিত্তস্স সমাধানতো চ. পীতি ব্যাপাদস্স পটিপক্খা পামোজ্জেন সমানযোগক্খেমত্তা. ৰিতক্কো থিনমিদ্ধস্স পটিপক্খো যোনিসো সঙ্কপ্পনৰসেন সৰিপ্ফারপৰত্তিতো. সুখং অৰূপসমানুতাপসভাৰস্স উদ্ধচ্চকুক্কুচ্চস্স পটিপক্খং ৰূপসন্তসীতলসভাৰত্তা. ৰিচারো ৰিচিকিচ্ছায পটিপক্খো আরম্মণে অনুমজ্জনৰসেন পঞ্ঞাপটিরূপসভাৰত্তা. মহাকচ্চানত্থেরেন দেসিতং পিটকানং সংৰণ্ণনা পেটকং, তস্মিং পেটকে.

পঞ্চকামগুণভেদৰিসযস্সাতি রূপাদিপঞ্চকামগুণৰিসেসৰিসযস্স. আঘাতৰত্থুভেদাদিৰিসযানন্তি ব্যাপাদৰিৰেকৰচনেন ‘‘অনত্থং মে অচরী’’তি (দী. নি. ৩.৩৪০; অ. নি. ৯.২৯; ৰিভ. ৯৬০) আদিআঘাতৰত্থুভেদৰিসযস্স দোসস্স, মোহাধিকেহি থিনমিদ্ধাদীহি ৰিৰেকৰচনেন পটিচ্ছাদনৰসেন দুক্খাদিপুব্বন্তাদিভেদৰিসযস্স মোহস্স ৰিক্খম্ভনৰিৰেকো ৰুত্তো. কামরাগব্যাপাদতদেকট্ঠথিনমিদ্ধাদিৰিক্খম্ভকঞ্চেতং সব্বাকুসলপটিপক্খসভাৰত্তা. সব্বকুসলানং তেন সভাৰেন সব্বাকুসলপ্পহাযকং হোতি, হোন্তম্পি কামরাগাদিৰিক্খম্ভনসভাৰমেৰ হোতি তংসভাৰত্তাতি অৰিসেসেত্ৰা নীৰরণাকুসলমূলাদীনং ‘‘ৰিক্খম্ভনৰিৰেকো ৰুত্তো হোতী’’তি আহ.

৭১. যথাপচ্চযং পৰত্তমানানং সভাৰধম্মানং নত্থি কাচি ৰসৰত্তিতাতি ৰসৰত্তিভাৰনিৰারণত্থং ‘‘ৰিতক্কনং ৰিতক্কো’’তি ৰুত্তং. তযিদং ‘‘ৰিতক্কনং ঈদিসমিদ’’ন্তি আরম্মণস্স পরিকপ্পনন্তি আহ ‘‘ঊহনন্তি ৰুত্তং হোতী’’তি. যস্মা চিত্তং ৰিতক্কবলেন আরম্মণং অভিনিরুল়্হং ৰিয হোতি, তস্মা সো আরম্মণাভিনিরোপনলক্খণো ৰুত্তো. যথা হি কোচি রাজৰল্লভং, তংসম্বন্ধিনং মিত্তং ৰা নিস্সায রাজগেহং আরোহতি অনুপৰিসতি, এৰং ৰিতক্কং নিস্সায চিত্তং আরম্মণং আরোহতি. যদি এৰং, কথং অৰিতক্কং চিত্তং আরম্মণং আরোহতীতি? ৰিতক্কবলেনেৰ. যথা হি সো পুরিসো পরিচযেন তেন ৰিনাপি নিরাসঙ্কো রাজগেহং পৰিসতি, এৰং পরিচযেন ৰিতক্কেন ৰিনাপি অৰিতক্কং চিত্তং আরম্মণং আরোহতি. পরিচযেনাতি চ সন্তানে পৰত্তৰিতক্কভাৰনাসঙ্খাতেন পরিচযেন. ৰিতক্কস্স হি সন্তানে অভিণ্হং পৰত্তস্স ৰসেন চিত্তস্স আরম্মণাভিরুহণং চিরপরিচিতং. তেন তং কদাচি ৰিতক্কেন ৰিনাপি তত্থ পৰত্ততেৰ. যথা তং ঞাণসহিতং হুত্ৰা সম্মসনৰসেন চিরপরিচিতং কদাচি ঞাণৰিরহিতম্পি সম্মসনৰসেন পৰত্ততি, যথা ৰা কিলেসসহিতং হুত্ৰা পৰত্তং সব্বসো কিলেসরহিতম্পি পরিচযেন কিলেসৰাসনাৰসেন পৰত্ততি, এৰংসম্পদমিদং দট্ঠব্বং. আদিতো, অভিমুখং ৰা হননং আহননং. পরিতো, পরিৰত্তেত্ৰা ৰা আহননং পরিযাহননং. ‘‘রূপং রূপং, পথৰী পথৰী’’তি আকোটেন্তস্স ৰিয পৰত্তি ‘‘আহননং, পরিযাহনন’’ন্তি চ ৰেদিতব্বং. আনযনং চিত্তস্স আরম্মণে উপনযনং, আকড্ঢনং ৰা.

অনুসঞ্চরণং অনুপরিব্ভমনং. স্ৰাযং ৰিসেসো সন্তানম্হি লব্ভমানো এৰ সন্তানে পাকটো হোতীতি দট্ঠব্বো. সেসেসুপি এসেৰ নযো. অনুমজ্জনং আরম্মণে চিত্তস্স অনুমসনং, পরিমজ্জনন্তি অত্থো. তথা হি ৰিচারো ‘‘পরিমজ্জনহত্থো ৰিয, সঞ্চরণহত্থো ৰিযা’’তি চ ৰুত্তো. তত্থাতি আরম্মণে. সহজাতানং অনুযোজনং আরম্মণে অনুৰিচারণসঙ্খাতঅনুমজ্জনৰসেনেৰ ৰেদিতব্বং. অনুপ্পবন্ধনং আরম্মণে চিত্তস্স অৰিচ্ছিন্নস্স ৰিয পৰত্তি. তথা হি সো ‘‘অনুসন্ধানতা’’তি (ধ. স. ৮) নিদ্দিট্ঠো. তেনেৰ চ ‘‘ঘণ্ডানুরৰো ৰিয, পরিব্ভমনং ৰিযা’’তি চ ৰুত্তো.

কত্থচীতি পঠমজ্ঝানে, পরিত্তচিত্তুপ্পাদেসু চ. ৰিচারতো ওল়ারিকট্ঠেন, ৰিচারস্সেৰ চ পুব্বঙ্গমট্ঠেন অনুরৰতো ওল়ারিকো, তস্স চ পুব্বঙ্গমো ঘণ্ডাভিঘাতো ৰিয ৰিতক্কো. যথা হি ঘণ্ডাভিঘাতো পঠমাভিনিপাতো হোতি, এৰং আরম্মণাভিমুখনিরোপনট্ঠেন ৰিতক্কো চেতসো পঠমাভিনিপাতো হোতি. অভিঘাত-গ্গহণেন চেত্থ অভিঘাতজো সদ্দো গহিতোতি ৰেদিতব্বো. ৰিপ্ফারৰাতি ৰিচলনযুত্তো সপরিপ্ফন্দো. পরিব্ভমনং ৰিয পরিস্সযাভাৰৰীমংসনত্থং. অনুপ্পবন্ধেন পৰত্তিযন্তি উপচারে ৰা অপ্পনাযং ৰা সন্তানেন পৰত্তিযং. তত্থ হি ৰিতক্কো নিচ্চলো হুত্ৰা আরম্মণং অনুপৰিসিত্ৰা ৰিয পৰত্ততি, ন পঠমাভিনিপাতে. পাকটো হোতীতি ৰিতক্কস্স ৰিসেসো অভিনিরোপনাকারো ওল়ারিকত্তা পঠমজ্ঝানে পাকটো হোতি, তদভাৰতো পঞ্চকনযে দুতিযজ্ঝানে ৰিচারস্স ৰিসেসো অনুমজ্জনাকারো পাকটো হোতি.

ৰালণ্ডুপকং এল়কলোমাদীহি কতচুম্বটকং. উপ্পীল়নহত্থোতি পিণ্ডস্স উপ্পীল়নহত্থো. তস্সেৰ ইতো চিতো চ সঞ্চরণহত্থো. মণ্ডলন্তি কংসভাজনাদীসু কিঞ্চি মণ্ডলং ৰট্টলেখং করোন্তস্স. যথা পুপ্ফফলসাখাদিঅৰযৰৰিনিমুত্তো অৰিজ্জমানোপি রুক্খো ‘‘সপুপ্ফো সফলো’’তি ৰোহরীযতি, এৰং ৰিতক্কাদিঅঙ্গৰিনিমুত্তং অৰিজ্জমানম্পি ঝানং ‘‘সৰিতক্কং সৰিচার’’ন্তি ৰোহরীযতীতি দস্সেতুং ‘‘রুক্খো ৰিযা’’তিআদি ৰুত্তং. ঝানভাৰনায পুগ্গলৰসেন দেসেতব্বত্তা ‘‘ইধ ভিক্খু ৰিৰিচ্চেৰ কামেহী’’তিআদিনা পুগ্গলাধিট্ঠানেন ঝানানি উদ্দিট্ঠানীতি. যদিপি ৰিভঙ্গে পুগ্গলাধিট্ঠানা দেসনা কতা, অত্থো পন তত্রাপি ৰিভঙ্গেপি যথা ইধ ‘‘ইমিনা চ ৰিতক্কেনা’’তিআদিনা ধম্মৰসেন ৰুত্তো, এৰমেৰ দট্ঠব্বো, পরমত্থতো পুগ্গলস্সেৰ অভাৰতোতি অধিপ্পাযো. অত্থো…পে… দট্ঠব্বো ঝানসমঙ্গিনো ৰিতক্কৰিচারসমঙ্গিতাদস্সনেন, ঝানস্সেৰ চ সৰিতক্কসৰিচারতায ৰুত্তত্তাতি এৰং ৰা এত্থ অত্থো দট্ঠব্বো.

ৰিৰেকাতি ৰিৰেকা হেতুভূতাতি ৰিৰেক-সদ্দস্স ভাৰসাধনতং সন্ধাযাহ. ৰিৰেকেতি কত্তুসাধনতং, কম্মসাধনতং ৰা. ‘‘ৰিৰিত্তো’’তি হি ইমিনা নীৰরণেহি ৰিনাভূতো তেহি ৰিৰেচিতোতি চ সাধনদ্ৰযম্পি সঙ্গহিতমেৰাতি.

৭২. পীণযতীতি তপ্পেতি, ৰড্ঢেতি ৰা. সম্পিযাযনলক্খণাতি পরিতুস্সনলক্খণা. পীণনরসাতি পরিব্রূহনরসা. ফরণরসাতি পণীতরূপেহি কাযস্স ব্যাপনরসা. উদগ্গভাৰো ওদগ্যং. খুদ্দিকা লহুং লোমহংসনমত্তং কত্ৰা ভিন্না ন পুন উপ্পজ্জতি. খণিকা বহুলং উপ্পজ্জতি. উব্বেগতো ফরণা নিচ্চলত্তা, চিরট্ঠিতিকত্তা চ পণীততরা. চেতিযঙ্গণং গন্ত্ৰাতি পুণ্ণৰল্লিকৰিহারে চেতিযঙ্গণং গন্ত্ৰা. পকতিযা দিট্ঠারম্মণৰসেনাতি পুব্বে মহাচেতিযং গহিতারম্মণৰসেন. চিত্রগেণ্ডুকো ৰিচিত্রাকারেন কতগেণ্ডুকো. উপনিস্সযেতি সমীপে, তস্স ৰা ৰিহারস্স নিস্সযভূতে, গোচরট্ঠানভূতেতি অত্থো.

ঘরাজিরেতি গেহঙ্গণে. পব্বতসিখরে কতচেতিযং ‘‘আকাসচেতিয’’ন্তি ৰুত্তং. গহিতনিমিত্তেনেৰাতি চেতিযৰন্দনং, ধম্মস্সৰনঞ্চ উদ্দিস্স ‘‘ধঞ্ঞা ৰতিমে’’তিআদিনা গহিতকুসলনিমিত্তেনেৰ কারণভূতেন. গহিতং ৰা নিমিত্তং এতেনাতি গহিতনিমিত্তং, ৰুত্তাকারেন পৰত্তচিত্তং, তেন গহিতনিমিত্তেনেৰ চিত্তেন সহ. পক্খন্দন্তি অনুপৰিট্ঠং. অনুপরিপ্ফুটন্তি অনু অনু সমন্ততো ফুটং, সব্বসো অনুৰিসটন্তি অত্থো.

পস্সদ্ধিযা নিমিত্তভাৰেন গব্ভং গণ্হন্তী. পরিপাচনৰসেন পরিপাকং গচ্ছন্তী. অপ্পনাসম্পযুত্তাৰ পীতি অপ্পনাসমাধিপূরিকা. খণিকসমাধিপূরিকা চ উপচারসমাধিপূরিকা চ অপ্পনাসমাধিস্স ৰিদূরতরাতি তদুভযং অনামসন্তো ‘‘তাসু যা অপ্পনাসমাধিস্সা’’তিআদিমাহ. সমাধিসম্পযোগং গতাতি পুব্বে উপচারসমাধিনা সম্পযুত্তা হুত্ৰা অনুক্কমেন ৰড্ঢিত্ৰা অপ্পনাসমাধিনা সম্পযোগং গতা.

৭৩. সুখযতীতি সুখং, অত্তনা সম্পযুত্তধম্মে লদ্ধস্সাদে করোতীতি অত্থো. স্ৰাযং কত্তুনিদ্দেসো পরিযাযলদ্ধো ধম্মতো অঞ্ঞস্স কত্তু নিৰত্তনত্থো, নিপ্পরিযাযেন পন ভাৰসাধনমেৰ লব্ভতীতি ‘‘সুখনং সুখ’’ন্তি ৰুত্তং. ইট্ঠসভাৰত্তা তংসমঙ্গীপুগ্গলং, সম্পযুত্তধম্মে ৰা অত্তনি সাদযতীতি সাতং দ-কারস্স ত-কারং কত্ৰা. সাতং ‘‘মধুর’’ন্তি ৰদন্তি. সাতং লক্খণং এতস্সাতি সাতলক্খণং. উপব্রূহনং সম্পযুত্তধম্মানং সংৰড্ঢনং. দুক্খং ৰিয অৰিস্সজ্জেত্ৰা অদুক্খমসুখা ৰিয অনজ্ঝুপেক্খিত্ৰা অনু অনু গণ্হনং, উপকারিতা ৰা অনুগ্গহো. কত্থচি পঠমজ্ঝানাদিকে. পটিলাভতুট্ঠীতি পটিলাভৰসেন উপ্পজ্জনকতুট্ঠি. পটিলদ্ধরসানুভৰনন্তি পটিলদ্ধস্স আরম্মণরসস্স অনুভৰনন্তি সভাৰতো পীতিসুখানি ৰিভজিত্ৰা দস্সেতি. যত্থ পীতি, তত্থ সুখন্তি ৰিতক্কস্স ৰিয ইতরেন পীতিযা সুখেন অচ্চন্তসংযোগমাহ. ‘‘যত্থ সুখং, তত্থ ন নিযমতো পীতী’’তি ৰিচারস্স ৰিয ৰিতক্কেন সুখস্স পীতিযা অনচ্চন্তসংযোগং. তেন অচ্চন্তানচ্চন্তসংযোগিতায পীতিসুখানং ৰিসেসং দস্সেতি. কং তারেন্তি এত্থাতি কন্তারং, নিরুদকমরুট্ঠানং. ৰনমেৰ ৰনন্তং. তস্মিং তস্মিং সমযেতি ইট্ঠারম্মণস্স পটিলাভসমযে, পটিলদ্ধস্স রসানুভৰনসমযে, ৰনচ্ছাযাদীনং সৰনদস্সনসমযে, পৰেসপরিভোগসমযে চ. পাকটভাৰতোতি যথাক্কমং পীতিসুখানং ৰিভূতভাৰতো.

ৰিৰেকজং পীতিসুখন্তি এত্থ পুরিমস্মিং অত্থে ৰিৰেকজন্তি ঝানং ৰুত্তং. পীতিসুখসদ্দতো চ অত্থিঅত্থৰিসেসতো ‘‘অস্স ঝানস্স, অস্মিং ৰা ঝানে’’তি এত্থ অ-কারো দট্ঠব্বো. দুতিযে পীতিসুখমেৰ ৰিৰেকজং. ‘‘ৰিৰেকজংপীতিসুখ’’ন্তি চ অঞ্ঞপদত্থসমাসো, পচ্চত্তনিদ্দেসস্স চ অলোপো কতো. লোপে ৰা সতি ‘‘ৰিৰেকজপীতিসুখ’’ন্তি পাঠোতি অযং ৰিসেসো.

উপসম্পজ্জাতি এত্থ উপ-সং-সদ্দা ‘‘উপলব্ভতি, সংভুঞ্জতী’’তিআদীসু ৰিয নিরত্থকাতি দস্সেতুং ‘‘উপগন্ত্ৰা’’তিআদিং ৰত্ৰা পুন তেসং সাত্থকভাৰং দস্সেতুং ‘‘উপসম্পাদযিত্ৰা’’তিআদি ৰুত্তং, তস্মা পত্ৰা, সাধেত্ৰাতি ৰা অত্থো. ইরিযন্তি কিরিযং. ৰুত্তিআদীনি তস্সেৰ ৰেৰচনানি. পালনাতি হি একং ইরিযাপথবাধনং ইরিযাপথন্তরেহি রক্খণা.

পঞ্চঙ্গৰিপ্পহীনাদিৰণ্ণনা

৭৪. পঞ্চ অঙ্গানি ৰিক্খম্ভনৰসেন পহীনানি এতস্সাতি পঞ্চঙ্গৰিপ্পহীনং. ‘‘অগ্যাহিতো’’তি এত্থ আহিত-সদ্দস্স ৰিয ৰিপ্পহীন-সদ্দস্সেত্থ পরৰচনং দট্ঠব্বং, পঞ্চহি অঙ্গেহি ৰিপ্পহীনন্তি ৰা পঞ্চঙ্গৰিপ্পহীনং. ননু অঞ্ঞেপি অকুসলা ধম্মা ইমিনা ঝানেন পহীযন্তি, অথ কস্মা পঞ্চঙ্গৰিপ্পহীনতাৰ ৰুচ্চতীতি আহ ‘‘কিঞ্চাপী’’তিআদি. ঝানলাভিনোপি অঝানসমঙ্গিকালে ঝানপটিপক্খলোভচিত্তাদীনং পৰত্তিসব্ভাৰতো ‘‘ঝানক্খণে’’তি ৰুত্তং. পহীযন্তীতি ৰিগচ্ছন্তি, নপ্পৰত্তন্তীতি অত্থো. একত্তারম্মণেতি পথৰীকসিণাদিৰসেন একসভাৰে, একগ্গতাসঙ্খাতে একত্তাৰহে ৰা আরম্মণে. তন্তি তং নানাৰিসযপলোভিতং চিত্তং. কামধাতুপ্পহানাযাতি নানাৰিসযসমূপব্যূল়্হায কামধাতুযা পহানায সমতিক্কমায পটিপদং ঝানং নপ্পটিপজ্জতি. নিরন্তরন্তি ৰিক্খেপেন অনন্তরিতং, সহিতন্তি অত্থো. অকম্মঞ্ঞন্তি অকম্মনীযং, ভাৰনাকম্মস্স অযোগ্যন্তি অত্থো. উদ্ধচ্চকুক্কুচ্চপরেতন্তি উদ্ধচ্চকুক্কুচ্চেন অভিভূতং. পরিব্ভমতি অনৰট্ঠানতো, অৰট্ঠানস্স সমাধানস্স অভাৰতোতি অত্থো. ৰিচিকিচ্ছায উপহতন্তি সাতিসযস্স ৰিচারস্স অভাৰতো ‘‘সম্মাসম্বুদ্ধো নু খো ভগৰা, ন নু খো’’তি, ‘‘পথৰী পথৰী’’তিআদিনা মনসিকারেন, ‘‘ঝানং সিযা নু খো, ন নু খো’’তিআদিনা চ পৰত্তায ৰিচিকিচ্ছায উপহতং. নারোহতি অপ্পটিপত্তিনিমিত্তত্তা. ৰিসেসেন ঝানন্তরাযকরত্তাতি সমাধিআদীনং উজুৰিপচ্চনীকভাৰেন ঝানাধিগমস্স অন্তরাযকরণতো.

তেহীতি ঝানাধিগমস্স পচ্চযভূতেহি ৰিতক্কৰিচারেহি. অৰিক্খেপায সম্পাদিতপ্পযোগস্সাতি ততো এৰং সমাধানায নিপ্ফাদিতভাৰনাপযোগস্স. চেতসো পযোগসম্পত্তিসম্ভৰাতি যথাৰুত্তভাৰনাপযোগসম্পত্তিসমুট্ঠানা. পীতি পীণনং ভাৰনাৰসেন তপ্পনং. উপব্রূহনং ভাৰনাৰসেন পরিৰুদ্ধিং চেতসো করোতীতি সম্বন্ধো. নন্তি চিত্তং. সসেসসম্পযুত্তধম্মন্তি অৰসিট্ঠফস্সাদিধম্মসহিতং, সমং সম্মা চ আধিযতীতি সম্বন্ধো. ইন্দ্রিযসমতাৰসেন সমং, পটিপক্খধম্মানং. দূরীভাৰে লীনুদ্ধচ্চাভাৰেন সম্মা চ ঠপেতীতি অত্থো. একগ্গতা হি সমাধানকিচ্চেন চিত্তং, সম্পযুত্তধম্মে চ অত্তানং অনুৰত্তাপেন্তী ঝানক্খণে সাতিসযং সমাহিতে করোতীতি. উপ্পত্তিৰসেনাতি যথাপচ্চযং উপ্পজ্জনৰসেন. এতেসু ৰিতক্কাদীসু ঝানং উপ্পন্নং নাম হোতি তত্থেৰ ঝানৰোহারতো. তেনাহ ‘‘তস্মা’’তিআদি. ‘‘যথা পনা’’তিআদিনাপি উপমাৰসেন তমেৰত্থং পাকটতরং করোতি.

পকতিচিত্ততোতি পাকতিককামাৰচরচিত্ততো. সুৰিসদেনাতি সুট্ঠু ৰিসদেন, পটুতরেনাতি অত্থো. সব্বাৰন্তন্তি সব্বাৰযৰৰন্তং, অনৰসেসন্তি অত্থো. অপ্ফুটন্তি অসম্ফুট্ঠং. আরম্মণেসু ফুসিতাতি অপ্পনাৰসেন পৰত্তমানা চিত্তেকগ্গতা সমন্ততো আরম্মণং ফরন্তী ৰিয হোতীতি কত্ৰা ৰুত্তং. কস্মা পনেত্থ ঝানপাঠে অগ্গহিতা চিত্তেকগ্গতা গহিতাতি অনুযোগং সন্ধায ‘‘তত্থ চিত্তেকগ্গতা’’তিআদি ৰুত্তং. তত্থাতি তেসু ঝানঙ্গেসু. ন নিদ্দিট্ঠাতি সরূপতো ন নিদ্দিট্ঠা, সামঞ্ঞতো পন ঝানগ্গহণেন গহিতা. এৰং ৰুত্তত্তাতি সরূপেনেৰ ৰুত্তত্তা, অঙ্গমেৰ চিত্তেকগ্গতাতি সম্বন্ধো. যেন অধিপ্পাযেনাতি যেন ৰিতক্কাদীহি সহ ৰত্তন্তং ধম্মং দীপেতুং তস্স পকাসনাধিপ্পাযেন ‘‘সৰিতক্কং সৰিচার’’ন্তিআদিনা উদ্দেসো কতো. সো এৰ অধিপ্পাযো তেন ভগৰতা ৰিভঙ্গে ‘‘চিত্তেকগ্গতা’’তি নিদ্দিসন্তেন পকাসিতো. তস্মা সা ঝানপাঠে অগ্গহিতাতি ন চিন্তেতব্বং.

তিৰিধকল্যাণৰণ্ণনা

৭৫. আদিমজ্ঝপরিযোসানৰসেনাতি ঝানস্স আদিমজ্ঝপরিযোসানৰসেন. লক্খণৰসেনাতি তেসংযেৰ অপ্পনাযং লক্খিতব্বভাৰৰসেন.

তত্রাতি তস্মিং কল্যাণতালক্খণানং ৰিভাৰনে. পটিপদাৰিসুদ্ধীতি পটিপজ্জতি ঝানং এতাযাতি পটিপদা, গোত্রভুপরিযোসানো পুব্বভাগিযো ভাৰনানযো. পরিপন্থতো ৰিসুজ্ঝনং ৰিসুদ্ধি, পটিপদায ৰিসুদ্ধি পটিপদাৰিসুদ্ধি. সা পনাযং যস্মা ঝানস্স উপ্পাদক্খণে লব্ভতি, তস্মা ৰুত্তং ‘‘পটিপদাৰিসুদ্ধি আদী’’তি. উপেক্খানুব্রূহনাতি ৰিসোধেতব্বতাদীনং অভাৰতো ঝানপরিযাপন্নায তত্রমজ্ঝত্তুপেক্খায কিচ্চনিপ্ফত্তিযা অনুব্রূহনা. সা পনাযং ৰিসেসতো ঝানস্স ঠিতিক্খণে লব্ভতি. তেন ৰুত্তং ‘‘উপেক্খানুব্রূহনা মজ্ঝে’’তি. সম্পহংসনাতি তত্থ ধম্মানং অনতিৰত্তনাদিসাধকস্স ঞাণস্স কিচ্চনিপ্ফত্তিৰসেন পরিযোদপনা. সা পন যস্মা ঝানস্স ওসানক্খণে পাকটা হোতি, তস্মা ৰুত্তং ‘‘সম্পহংসনা পরিযোসান’’ন্তি. ইমানি তীণি লক্খণানীতি পরিপন্থতো চিত্তস্স ৰিসুজ্ঝনাকারো, মজ্ঝিমস্স সমথনিমিত্তস্স পটিপজ্জনাকারো, তত্থ পক্খন্দনাকারোতি ইমানি তীণি ঝানস্স আদিতো উপ্পাদক্খণে অপ্পনাপত্তিলক্খণানি তেহি আকারেহি ৰিনা অপ্পনাপত্তিযা অভাৰতো, অসতি চ অপ্পনায তদভাৰতো. আদিকল্যাণঞ্চেৰ ৰিসুদ্ধিপটিপদত্তা. যথাৰুত্তেহি লক্খণেহি সমন্নাগতত্তা, সম্পন্নলক্খণত্তা চ তিলক্খণসম্পন্নঞ্চ. ইমিনা নযেন মজ্ঝপরিযোসানলক্খণানঞ্চ যোজনা ৰেদিতব্বা.

সম্ভরীযতি ঝানং এতেনাতি সম্ভারো, নানাৰজ্জনপরিকম্মং. সহ সম্ভারেনাতি সসম্ভারো, সো এৰ সসম্ভারিকো. উপচারোতি একাৰজ্জনূপচারমাহ. পগ্গহাদিকিচ্চস্স পুব্বভাগে ভাৰনায এৰ সাধিতত্তা যা তত্থ একাৰজ্জনূপচারে সিদ্ধা অজ্ঝুপেক্খনা, সা ঝানক্খণে পরিব্রূহিতা নাম হোতীতি ৰুত্তং ‘‘উপেক্খানুব্রূহনা নাম অপ্পনা’’তি. যথাধিগতং ঝানং নিস্সায যো পহট্ঠাকারো চিত্তস্স পরিতোসো, তং পচ্চৰেক্খণাৰসেন পৰত্তং সন্ধাযাহ ‘‘সম্পহংসনা নাম পচ্চৰেক্খণা’’তি. একেতি অভযগিরিৰাসিনো. তে হি এৰং পটিপদাৰিসুদ্ধিআদিকে ৰণ্ণযন্তি, তদযুত্তং. তথা হি সতি অজ্ঝানধম্মেহি ঝানস্স গুণসংকিত্তনং নাম কতং হোতি. ন হি ভূমন্তরং ভূমন্তরপরিযাপন্নং হোতি. পাল়িযা চেতং ৰিরুদ্ধন্তি দস্সেতুং ‘‘যস্মা পনা’’তিআদি ৰুত্তং. তত্থ একত্তগতং চিত্তন্তি ইন্দ্রিযানং একরসভাৰেন, একগ্গতায চ সিখাপ্পত্তিযা তদনুগুণং একত্তং গতন্তি একত্তগতং, সসম্পযুত্তং অপ্পনাপত্তচিত্তং. তস্সেৰ পটিপদাৰিসুদ্ধিপক্খন্দতাদি অনন্তরমেৰ ৰুচ্চতি. তস্মাতি যস্মা একস্মিংযেৰ অপ্পনাচিত্তক্খণে পটিপদাৰিসুদ্ধিআদি পাল়িযং ৰুত্তং, তস্মা আগমনৰসেনাতি পরিকম্মাগমনৰসেন. অনতিৰত্তনাদীতি আদি-সদ্দেন ইন্দ্রিযেকরসতাতদুপগৰীরিযৰাহনাসেৰনানি সঙ্গণ্হাতি. পরিযোদাপকস্সাতি পরিসোধকস্স পভস্সরভাৰকরস্স. অনতিৰত্তনাদিভাৰসাধনমেৰ চেত্থ ঞাণস্স কিচ্চনিপ্ফত্তি ৰেদিতব্বা.

তস্মিন্তি তস্মিং ৰারে, চতুপঞ্চচিত্তপরিমাণায অপ্পনাৰীথিযন্তি অত্থো. ততো পরিপন্থতো. চিত্তং ৰিসুজ্ঝতীতি যদিপি আগমনং গহেতুং অৰিসেসেন ৰিয ৰুত্তং, পরিকম্মৰিসুদ্ধিতো পন অপ্পনাৰিসুদ্ধি সাতিসযাৰ. তেনাহ ‘‘ৰিসুদ্ধত্তা’’তিআদি. আৰরণৰিরহিতং হুত্ৰাতি যেনাৰরণেন আৰটত্তা চিত্তং ততো পুব্বে মজ্ঝিমং সমথনিমিত্তং পটিপজ্জিতুং ন সক্কোতি, তেন ৰিৰিত্তং হুত্ৰা, তং ৰিক্খম্ভেত্ৰাতি অত্থো. লীনুদ্ধচ্চসঙ্খাতানং উভিন্নং অন্তানং অনুপগমনেন মজ্ঝিমো, সৰিসেসং পচ্চনীকধম্মানং ৰূপসমনতো সমথো, যোগিনো সুখৰিসেসানং কারণভাৰতো নিমিত্তঞ্চাতি মজ্ঝিমং সমথনিমিত্তং. তেনাহ ‘‘সমপ্পৰত্তো অপ্পনাসমাধিযেৰা’’তি. তদনন্তরং পন পুরিমচিত্তন্তি তস্স অপ্পনাচিত্তস্স অনন্তরপচ্চযভূতং পুরিমং চিত্তং, গোত্রভুচিত্তন্তি অত্থো. একসন্ততিপরিণামনযেনাতি যথা ‘‘তদেৰ খীরং দধিসম্পন্ন’’ন্তি, এৰং সতিপি পরিত্তমহগ্গতভাৰভেদে, পচ্চযপচ্চযুপ্পন্নভাৰভেদে চ একিস্সা এৰ সন্ততিযা পরিণামূপগমননযেন একত্তনযৰসেন. তথত্তন্তি তথভাৰং অপ্পনাসমাধিৰসেন সমাহিতভাৰং. এৰং পটিপন্নত্তাতি ৰুত্তাকারেন পটিপজ্জমানত্তা. যস্মিঞ্হি খণে তথত্তং মজ্ঝিমং সমথনিমিত্তং পটিপজ্জতি, তস্মিংযেৰ খণে তথত্তুপগমনেন অপ্পনাসমাধিনা সমাহিতভাৰূপগমনেন তত্থ পক্খন্দতি নাম. পুরিমচিত্তেতি অপ্পনাচিত্তস্স পুরিমস্মিং চিত্তে গোত্রভুচিত্তে. ৰিজ্জমানাকারনিপ্ফাদিকাতি তস্মিং চিত্তে ৰিজ্জমানানং পরিপন্থৰিসুদ্ধিমজ্ঝিমসমথপটিপত্তিপক্খন্দনাকারানং নিপ্ফাদিকা, তেনাকারেন নিপ্ফজ্জমানাতি অত্থো. তেযেৰ হি আকারা পচ্চযৰিসেসতো ঝানক্খণে নিপ্ফজ্জমানা ‘‘পটিপদাৰিসুদ্ধী’’তি লদ্ধসমঞ্ঞা ঝানস্স তং ৰিসেসং নিপ্ফাদেন্তা ৰিয ৰুত্তা. উপ্পাদক্খণেযেৰাতি অত্তলাভৰেলাযমেৰ. যদি এৰং, কথং তে আকারা নিপ্ফজ্জন্তীতি আহ ‘‘আগমনৰসেনা’’তি.

তস্সাতি চিত্তস্স. ‘‘ৰিসুদ্ধং চিত্তং অজ্ঝুপেক্খতী’’তি পাল়িযং (পটি. ম. ১.১৫৮) পুগ্গলাধিট্ঠানেন আগতাতি ‘‘ব্যাপারং অকরোন্তো’’তি আহ. সমথপটিপত্তিতথত্তুপগমনঞ্চ ইধ সমথভাৰাপত্তিযেৰাতি আহ ‘‘সমথভাৰূপগমনেনা’’তি. কিলেসসংসগ্গং পহায একত্তেন উপট্ঠিতস্সাতি পুব্বে ‘‘কথং নু খো কিলেসসংসগ্গং পজহেয্য’’ন্তি পটিপন্নস্স ইদানি সমথপটিপত্তিযা তস্স পহীনত্তা কিলেসসঙ্গণিকাভাৰেন একত্তেন উপট্ঠিতস্স ঝানচিত্তস্স. পরিপন্থৰিসুদ্ধিমজ্ঝিমসমথপটিপত্তিপক্খন্দনেহি ৰুদ্ধিপ্পত্তিযা অনুব্রূহিতে ঝানচিত্তে লদ্ধোকাসা তত্রমজ্ঝত্তুপেক্খা সম্পযুত্তেসু সমৰাহিতভাৰেন পৰত্তমানা তে অনুব্রূহেন্তী ৰিয হোতীতি আহ ‘‘তত্রমজ্ঝত্তুপেক্খায কিচ্চৰসেন উপেক্খানুব্রূহনা ৰেদিতব্বা’’তি.

যে পনেতে যুগনদ্ধধম্মাতি সম্বন্ধো. তত্থাতি তস্মিং ঝানচিত্তে. অঞ্ঞমঞ্ঞানতিৰত্তনৰসেন কিচ্চকরণতো যুগে নদ্ধা বদ্ধা ৰিয যুগনদ্ধা. ৰিমুত্তিরসেনাতি ৰিমুচ্চনকিচ্চেন, ৰিমুচ্চনসম্পত্তিযা ৰা. এস যোগী. ৰাহযতীতি পৰত্তেতি. অস্সাতি ঝানচিত্তস্স. তস্মিং খণেতি ভঙ্গক্খণে. উপ্পাদক্খণে অতীতে হি ঠিতিক্খণতো পট্ঠায আসেৰনা পৰত্ততি নাম. তে আকারাতি অঞ্ঞমঞ্ঞানতিৰত্তনাদযো তত্থ ধম্মানং পৰত্তিআকারা. আসেৰনাপি হি আসেৰনপচ্চযভাৰীনং ধম্মানং পৰত্তিআকারোযেৰ. সংকিলেসৰোদানেসূতি সমাধিপঞ্ঞানং সমরসতায অকরণং ভাৰনায সংকিলেসো, করণং ৰোদানং. তথা সেসেসুপি. এৰমেতেসু সংকিলেসৰোদানেসু তং তং আদীনৰং দোসং আনিসংসং গুণং পুরেতরং পাটিহারিযঞাণেন দিস্ৰা যথা অঞ্ঞমঞ্ঞানতিৰত্তনাদযো হোন্তি, তথা ভাৰনায সম্পহংসিতত্তা তেনেৰ ঞাণেন ৰিসোধিতত্তা. ৰিসোধনং হেত্থ সম্পহংসনং. তে আকারা যস্মা নিপ্ফন্না, তস্মা ‘‘ধম্মানং…পে… ৰেদিতব্বাতি ৰুত্ত’’ন্তি লক্খণসংৰণ্ণনায আদিম্হি ৰুত্তং নিগমনৰসেন দস্সেতি.

‘‘যস্মা উপেক্খাৰসেন ঞাণং পাকটং হোতী’’তি কো সম্বন্ধো. কস্মা সম্পহংসনাৰ পরিযোসানন্তি ৰুত্তা, ন উপেক্খানুব্রূহনাতি চোদনং সন্ধায ‘‘তত্থ যস্মা উপেক্খাৰসেন ঞাণং পাকটং হোতী’’তি ৰুত্তং. তত্থাতি তস্মিং ভাৰনাচিত্তে. উপেক্খাৰসেন ঞাণং পাকটং হোতীতি অপ্পনাকালে ভাৰনায সমপ্পৰত্তিযা, পটিপক্খস্স চ পহানতো পগ্গহাদীসু ব্যাপারস্স অকাতব্বতো অজ্ঝুপেক্খনাৰ হোতি. যং সন্ধায ৰুত্তং ‘‘সমযে চিত্তস্স অজ্ঝুপেক্খনা, ৰিসুদ্ধং চিত্তং অজ্ঝুপেক্খতী’’তি চ আদি. সা পনাযং অজ্ঝুপেক্খনা ঞাণস্স কিচ্চসিদ্ধিযা হোতি, ৰিসেসতো ঞাণসাধনত্তা অপ্পনাব্যাপারস্সাতি ফলেন কারণানুমানঞাযেন. যস্মা উপেক্খাৰসেন ঞাণং পাকটং হোতি, তস্মা ঞাণকিচ্চভূতা সম্পহংসনা পরিযোসানন্তি ৰুত্তাতি সম্বন্ধো.

ইদানি যথাৰুত্তমত্থং পাল়িযা সমত্থেতুং ‘‘যথাহা’’তিআদি ৰুত্তং. তথাপগ্গহিতং চিত্তন্তি যথা ভাৰনাচিত্তং কোসজ্জপক্খে ন পততি, তথা ৰীরিযসম্বোজ্ঝঙ্গট্ঠানিযানং ধম্মানং বহুলীকারৰসেন পগ্গহিতং. সাধুকং অজ্ঝুপেক্খতীতি পগ্গণ্হন্তেনাপি সমাধিস্স ৰীরিযসমতাযোজনৰসেন পগ্গহিতত্তা সক্কচ্চং অজ্ঝুপেক্খতি, তত্রমজ্ঝত্তুপেক্খা ওকাসং লভতি. তং পন অজ্ঝুপেক্খনং উপেক্খাৰসেন পুব্বে পৰত্তপারিহারিযপঞ্ঞাৰসেন অপ্পনাপঞ্ঞায কিচ্চাধিকতাতি আহ ‘‘পঞ্ঞাৰসেন পঞ্ঞিন্দ্রিযং অধিমত্তং হোতী’’তি. তস্স অধিমত্তত্তা এৰ অজ্ঝুপেক্খন্তস্সেৰ নানাসভাৰেহি নীৰরণপমুখেহি কিলেসেহি অপ্পনাচিত্তং ৰিমুচ্চতি. ৰিমোক্খৰসেন ৰিমুচ্চনৰসেন. পঞ্ঞাৰসেনাতি পুব্বে পৰত্তপারিহারিযপঞ্ঞাৰসেন. ৰিমুত্তত্তাতি নানাকিলেসেহি ৰিমুত্তত্তা এৰ. তে ধম্মা সদ্ধাদযো, ৰিসেসতো সদ্ধাপঞ্ঞাৰীরিযসমাধযো চ একরসা সমানকিচ্চা হোন্তি. এৰমযং ইন্দ্রিযানং একরসট্ঠেন ভাৰনা নিপ্ফজ্জমানা ঞাণব্যাপারোতি আহ ‘‘ঞাণকিচ্চভূতা সম্পহংসনা পরিযোসান’’ন্তি. এৰং তিৰিধায পটিপদাৰিসুদ্ধিযা লদ্ধৰিসেসায তিৰিধায উপেক্খানুব্রূহনায সাতিসযং পঞ্ঞিন্দ্রিযস্স অধিমুত্তভাৰেন চতুব্বিধাপি সম্পহংসনা সিজ্ঝতীতি আগমনুপেক্খা ঞাণকিচ্চৰসেন দসপি আকারা ঝানে এৰ ৰেদিতব্বা.

গণনানুপুব্বতাতি গণনানুপুব্বতায, গণনানুপুব্বতামত্তং ৰা পঠমন্তি ইদন্তি অত্থো. তেন দেসনাক্কমং উল্লিঙ্গেতি. ‘‘পঠমং উপ্পন্নন্তি পঠম’’ন্তি ইমিনা পটিপত্তিক্কমং, উপ্পন্নন্তি হি অধিগতন্তি অত্থো. ‘‘পঠমং সমাপজ্জিতব্বন্তি পঠম’’ন্তি ইদং পন ন একন্তলক্খণন্তি অট্ঠকথাযং (ধ. স. অট্ঠ. ১৬০) পটিসিদ্ধত্তা ইধ ন গহিতং. আরম্মণূপনিজ্ঝানং লক্খণূপনিজ্ঝানন্তি দুৰিধে ঝানে ইধাধিপ্পেতজ্ঝানমেৰ দস্সেতুং ‘‘আরম্মণূপনিজ্ঝানতো’’তি ৰুত্তং. পথৰীকসিণসঙ্খাতস্স অত্তনো অত্তনো আরম্মণস্স রূপং ৰিয চক্খুনা উপনিজ্ঝাযনতো. পচ্চনীকঝাপনতোতি নীৰরণাদীনং পচ্চনীকধম্মানং দহনতো ৰিক্খম্ভনৰসেন পজহনতো. সকলট্ঠেনাতি হেট্ঠা ৰুত্তনযেন কতে ৰা অকতে ৰা পরিচ্ছিজ্জ গহিতে পথৰীভাগে পথৰীমণ্ডলে সকলারম্মণকরণট্ঠেন. ন হি তস্স একদেসমারম্মণং করীযতি. পথৰীকসিণসন্নিস্সযতায নিমিত্তং পথৰীকসিণং যথা ‘‘মঞ্চা উক্কুট্ঠিং করোন্তী’’তি. তংসহচরণতো ঝানং পথৰীকসিণং যথা ‘‘কুন্তা পচরন্তী’’তি.

চিরট্ঠিতিসম্পাদনৰণ্ণনা

৭৬. লক্খট্ঠানে ঠিতং সরেন ৰালং ৰিজ্ঝতীতি ৰালৰেধী. ইধ পন অনেকধা ভিন্নস্স ৰালস্স অংসুং ৰিজ্ঝন্তো ‘‘ৰালৰেধী’’তি অধিপ্পেতো. তেন ৰালৰেধিনা. সূদেনাতি ভত্তকারেন. ‘‘আকারা পরিগ্গহেতব্বা’’তি সঙ্খেপতো ৰুত্তমত্থং ৰিৰরিতুং ‘‘যথা হী’’তিআদি ৰুত্তং. তত্থ সুকুসলোতি সুট্ঠু ছেকো. ধনুগ্গহোতি ইস্সাসো. কম্মন্তি যোগ্যং. অক্কন্তপদানন্তি ৰিজ্ঝনকালে অক্কমনৰসেন পৰত্তপদানং. আকারন্তি ধনুজিযাসরানং গহিতাকারং. পরিগ্গণ্হেয্যাতি উপধারেয্য. ভোজনসপ্পাযাদযোতি আদি-সদ্দো অৰুত্তাকারানম্পি সঙ্গাহকো দট্ঠব্বো. তেন উতুভাৰনানিমিত্তাদীনম্পি পরিগ্গণ্হনং ৰুত্তং হোতি. তস্মিন্তি তস্মিং তরুণসমাধিম্হি.

ভত্তারন্তি সামিনং, ভত্তৰেতনাদীহি পোসকন্তি অত্থো. পরিৰিসন্তোতি ভোজেন্তো. তস্স রুচ্চিত্ৰা ভুঞ্জনাকারং সল্লক্খেত্ৰা তস্স উপনামেন্তোতি যোজনা. অযম্পি যোগী. অধিগতক্খণে ভোজনাদযো আকারেতি পুব্বে ঝানস্স অধিগতক্খণে কিচ্চসাধকে ভোজনাদিগতে আকারে. গহেত্ৰাতি পরিগ্গহেত্ৰা সল্লক্খেত্ৰা. নট্ঠে নট্ঠে সমাধিম্হি পুনপ্পুনং অপ্পনায.

মহানসৰিজ্জাপরিচযেন পণ্ডিতো. তত্থ ৰিসদঞাণতায ব্যত্তো. ঠানুপ্পত্তিককওসল্লযোগেন কুসলো. নানচ্চযেহীতি নানচ্চযেহি নানাসভাৰেহি, নানারসেহীতি অত্থো. তেনাহ ‘‘অম্বিলগ্গেহী’’তিআদি. সূপেহীতি ব্যঞ্জনেহি. অম্বিলগ্গেহীতি অম্বিলকোট্ঠাসেহি, যে ৰা অম্বিলরসা হুত্ৰা অগ্গভূতা, তেহি চতুরম্বিলাদিমিস্সেহি. এস নযো তিত্তকগ্গাদীসুপি. খারিকেহীতি ৰাতিঙ্গণকল়ীরাদিমিস্সেহি. নিমিত্তন্তি আকারং রুচ্চনৰসেন ভুঞ্জনাকারং. উগ্গণ্হাতীতি উপরূপরি গণ্হাতি উপধারেতি. ইমস্স ৰা সূপেয্যস্স অত্থায হত্থং অভিহরতি. অভিহারানন্তি অভিমুখেন হরিতব্বানং পণ্ণাকারানং, পূজাভিহারানং ৰা. নিমিত্তং উগ্গণ্হাতীতি ‘‘এৰং মে চিত্তং সমাহিতং অহোসী’’তি নিমিত্তং গণ্হাতি সল্লক্খেতি.

সমাধিপরিপন্থানন্তি সমাধিস্স পরিপন্থভূতানং. ধম্মানন্তি কামচ্ছন্দাদিনীৰরণধম্মানং. সুৰিসোধিতত্তাতি সুট্ঠু ৰিসোধিতত্তা, ৰিক্খম্ভনৰসেনেৰ সম্মদেৰ পহীনত্তাতি অত্থো. কামাদীনৰপচ্চৰেক্খণাদীহীতি আদি-সদ্দেন অসুভমনসিকারনেক্খম্মানিসংসপচ্চৰেক্খণাদীনি সঙ্গণ্হাতি. নেক্খম্মগুণদস্সনেনাপি হি তস্স ৰিবন্ধভূতে কামচ্ছন্দে আদীনৰো ৰিসেসতো পাকটো হোতীতি. কাযদুট্ঠুল্লন্তি কাযদরথং সারদ্ধকাযতং. তেন কাযচিত্তানং সারম্ভনিমিত্তস্স ব্যাপাদনীৰরণস্স ন ৰিসোধনমাহ. আরম্ভধাতুমনসিকারাদীতি আদি-সদ্দেন ৰীরিযসম্বোজ্ঝঙ্গনিমিত্তানং, আলোকসঞ্ঞাদীনঞ্চ সঙ্গহো দট্ঠব্বো. সমথনিমিত্তমনসিকারাদীতি আদি-সদ্দেন সমাধিসম্বোজ্ঝঙ্গট্ঠানিযানং ধম্মানং সঙ্গহো দট্ঠব্বো. অঞ্ঞেপি সমাধিপরিপন্থেতি ৰিচিকিচ্ছাট্ঠানিযে, মদমানাদিকে চ সন্ধাযাহ. আসযন্তি ৰসনকসুসিরং. সুপরিসুদ্ধন্তি আসঙ্কনীযত্তাভাৰেন সুট্ঠু পরিসুদ্ধং. এত্থাহ – ননু চাযং পগেৰ কামাদীনৰং পচ্চৰেক্খিত্ৰা সমথপটিপদং পটিপন্নো উপচারক্খণেযেৰ ঝানেন নীৰরণানি ৰিক্খম্ভিতানি, অথ কস্মা পুন কামাদীনৰপচ্চৰেক্খণাদি গহিতন্তি? সচ্চমেতং. তং পন পহানমত্তন্তি ঝানস্স চিরট্ঠিতিযা অতিসযপহানত্থং পুন গহিতং.

উদ্ধচ্চ মিদ্ধন্তি কুক্কুচ্চং, থিনঞ্চ তদেকট্ঠতায গহিতমেৰাতি কত্ৰা ৰুত্তং. সুদ্ধন্তগতোতি সুপরিসুদ্ধপরিযন্তং সব্বসো ৰিসোধিতকোণপরিযন্তং উয্যানং গতো. তহিং রমেতি তস্মিং ঝানে রমেয্য দিৰসভাগম্পি ঝানসমঙ্গী এৰ ভৰেয্য.

চিত্তভাৰনাৰেপুল্লত্থন্তি সমাধিভাৰনায ৰিপুলভাৰায. যথা হি ভাৰনাৰসেন নিমিত্তস্স উপ্পত্তি, এৰমস্স ভাৰনাৰসেনেৰ ৰড্ঢনম্পি. তস্মা একঙ্গুলাদিৰসেন নিমিত্তং ৰড্ঢেন্তস্স পুনপ্পুনং বহুলীকারেন ঝানং ভাৰনাপি ৰুদ্ধিং ৰিরুল়্হিং ৰেপুল্লং আপজ্জতি. তেন ৰুত্তং ‘‘চিত্তভাৰনাৰেপুল্লত্থঞ্চ যথালদ্ধং পটিভাগনিমিত্তং ৰড্ঢেতব্ব’’ন্তি. তস্সাতি পটিভাগনিমিত্তস্স.

নিমিত্তৰড্ঢননযৰণ্ণনা

৭৭. তত্রাতি সামিঅত্থে ভুম্মৰচনং, তস্সাতি অত্থো. অৰড্ঢেত্ৰাতি যথা কুম্ভকারো মত্তিকায পত্তং করোন্তো পঠমং অপরিচ্ছিন্দিত্ৰাৰ পত্তং ৰড্ঢেতি, এৰং পত্তৰড্ঢনযোগেন পত্তৰড্ঢনযুত্তিযা অৰড্ঢেত্ৰা পূৰিকস্স পূৰৰড্ঢনং. ভত্তস্স উপরি ভত্তপক্খিপনং ভত্তৰড্ঢনং. ৰত্থস্স তিন্তস্স অঞ্ছনাদি দুস্সৰড্ঢনং. পচ্চেকং যোগ-সদ্দো যোজেতব্বো. অপরিচ্ছিন্দিত্ৰা ন ৰড্ঢেতব্বং সপরিচ্ছেদে এৰ ভাৰনাপৰত্তিতো. তথা হি ৰুত্তং ‘‘সান্তকে নো অনন্তকে’’তি (ৰিসুদ্ধি. ১.৫৫).

হংসপোতকাতি জৰনহংসপোতকা. উক্কূলং উন্নতট্ঠানং. ৰিকূলং নিন্নট্ঠানং. নদীসোতেন কতং ৰিদুগ্গং নদীৰিদুগ্গং. ৰিসমাকারেন ঠিতো পব্বতপদেসো পব্বতৰিসমো.

থূলানি হুত্ৰা উপট্ঠহন্তি পচ্চৰেক্খণাবাহুল্লেন ৰিভূতভাৰতো. দুব্বলানি হুত্ৰা উপট্ঠহন্তি পগুণবলৰভাৰস্স অনাপাদিকত্তা. উপরি উস্সুক্কনাযাতি ভাৰনায উপরি আরোহনায, দুতিযজ্ঝানাধিগমাযাতি অত্থো.

পব্বতেয্যাতি পব্বতে বহুলচারিনী. অখেত্তঞ্ঞূতি অগোচরঞ্ঞূ. সমাধিপরিপন্থানং ৰিসোধনানভিঞ্ঞাতায বালো. ঝানস্স পগুণভাৰাপাদনৰেয্যত্তিযস্স অভাৰেন অব্যত্তো. উপরিঝানস্স পদট্ঠানভাৰানৰবোধেন অখেত্তঞ্ঞূ. সব্বথাপি সমাপত্তিকোসল্লাভাৰেন অকুসলো. সমাধিনিমিত্তস্স ৰা অনাসেৰনায বালো. অভাৰনায অব্যত্তো. অবহুলীকারেন অখেত্তঞ্ঞূ. সম্মদেৰ অনধিট্ঠানতো অকুসলোতি যোজেতব্বং. উভতো ভট্ঠোতি উভযতো ঝানতো ভট্ঠো. সো হি অপ্পগুণতায ন সুপ্পতিট্ঠিততায সউস্সাহোপি ৰিনাসতো, অসামত্থিযতো চ ঝানদ্ৰযতো পরিহীনো. চিণ্ণৰসিনাতি আসেৰিতৰসিনা.

পঞ্চৰসীকথাৰণ্ণনা

৭৮. ৰসনং ৰসীতি ধাতুনিদ্দেসতায কিরিযানিদ্দেসোতি অধিপ্পাযেনাহ ‘‘ৰসিযো’’তি, যথারুচি পৰত্তিযোতি অত্থো. আৰজ্জনায ৰসী, আৰজ্জনাৰসেন ৰা ৰসী আৰজ্জনৰসী. ঝানং আৰজ্জিতুং যত্থ যত্থ পদেসে ইচ্ছা যত্থিচ্ছকং. যদা যদা, যস্মিং যস্মিং ৰা ঝানঙ্গে ইচ্ছা যদিচ্ছকং. যাৰ যাৰ ইচ্ছা যাৰদিচ্ছকং, দ-কারো পদসন্ধিকরো. ‘‘যাৰা’’তি চ ইদং বহূনং জৰনৰারানং নিরন্তরং ৰিয তথাপৰত্তনং সন্ধায ৰুত্তং, ন একমেৰ. সো হি পরিচ্ছিন্নচিত্তক্খণোতি. আৰজ্জনায দন্ধাযিতত্তং নত্থীতি ৰুত্তনযেন যত্থ কত্থচি ঠানে যদা যদা যং কিঞ্চি ঝানঙ্গং আৰজ্জেন্তস্স যথিচ্ছিতং কালং আৰজ্জনায আৰজ্জনপ্পৰত্তিযা দন্ধাযিতত্তং ৰিত্থাযিতত্তং, চিরাযিতত্তং ৰা নত্থি. এৰং আৰজ্জনৰসী সিদ্ধা নাম হোতীতি অত্থো. সেসাতি ৰুট্ঠানঅধিট্ঠানপচ্চৰেক্খণাৰসিযো.

অঙ্গসমুদাযভাৰতো ঝানস্স ঝানে আৰজ্জনৰসিং নিপ্ফাদেতুকামেন পটিপাটিযা ঝানঙ্গানি আৰজ্জেতব্বানীতি আহ ‘‘পঠমং ৰিতক্কং আৰজ্জযতো’’তি. যদিপি আৰজ্জনমেৰেত্থ ইচ্ছিতং আৰজ্জনৰসিযা অধিপ্পেতত্তা, আৰজ্জনায পন উপ্পন্নায জৰনেহি ভৰিতব্বং. তানি চ খো আৰজ্জনতপ্পরতায চিত্তাভিনীহারস্স যথাৰজ্জিতঝানঙ্গারম্মণানি কতিপযানেৰ হোন্তি, ন পরিপুণ্ণানীতি ৰুত্তং ‘‘ৰিতক্কারম্মণানেৰ চত্তারি পঞ্চ ৰা জৰনানি জৰন্তী’’তি. চত্তারি তিক্খিন্দ্রিযস্স. পঞ্চ নাতিতিক্খিন্দ্রিযস্সাতি দট্ঠব্বং. নিরন্তরন্তি ৰিসভাগেহি নিরন্তরং. অযং পনাতি ভৰঙ্গদ্ৰযন্তরিতা চতুজৰনচিত্তা যথাৰুত্তা আৰজ্জনৰসী. অঞ্ঞেসং ৰা ধম্মসেনাপতিআদীনং. এৰরূপে কালেতি উট্ঠায সমুট্ঠায লহুতরং আৰজ্জনৰসীনিব্বত্তনকালে. সা চ খো ইত্তরা পরিত্তকালা, ন সত্থু যমকমহাপাটিহারিযে ৰিয চিরতরপ্পবন্ধৰতী. তথা হি তং সাৰকেহি অসাধারণং ৰুত্তং. অধিগমেন সমং সসম্পযুত্তস্স ঝানস্স সম্মা আপজ্জনং পটিপজ্জনং সমাপজ্জনং, ঝানসমঙ্গিতা.

সীঘন্তি এত্থ সমাপজ্জিতুকামতানন্তরং দ্ৰীসু ভৰঙ্গেসু উপ্পন্নেসু ভৰঙ্গং উপচ্ছিন্দিত্ৰা উপ্পন্নাৰজ্জনানন্তরং সমাপজ্জনং সীঘং সমাপজ্জনসমত্থতা. অযঞ্চ মত্থকপ্পত্তা সমাপজ্জনৰসী সত্থু ধম্মদেসনাযং লব্ভতি. যং সন্ধায ৰুত্তং ‘‘সো খো অহং, অগ্গিৰেস্সন, তস্সা এৰ কথায পরিযোসানে তস্মিংযেৰ পুরিমস্মিং সমাধিনিমিত্তে অজ্ঝত্তমেৰ চিত্তং সণ্ঠপেমি সন্নিসাদেমি একোদিং করোমি সমাদহামি যেনস্সুদং নিচ্চকপ্পং ৰিহরামী’’তি (ম. নি. ১.৩৮৭). ইতো সীঘতরা হি সমাপজ্জনৰসী নাম নত্থি. জুণ্হায রত্তিযা নৰোরোপিতেহি কেসেহি কপোতকন্দরাযং ৰিহরন্তস্স আযস্মতো সারিপুত্তস্স যক্খেন মহন্তম্পি পব্বতকূটং পদালেতুং সমত্থে পহারে সীসে দিন্নে সমাপজ্জনম্পেত্থ নিদস্সেতব্বং. তথা হি ৰক্খতি ‘‘তদা থেরো তস্স পহরণসমযে সমাপত্তিং অপ্পেসী’’তি (ৰিসুদ্ধি. ২.৩৭৪). পাল়িযং পন ‘‘অঞ্ঞতরং সমাধিং সমাপজ্জিত্ৰা নিসিন্নো’’তি (উদা. ৩৪) ৰুত্তং. ইমে পন থেরা ‘‘সমাপত্তিতো ৰুট্ঠানসমকালং তেন পহারো দিন্নো’’তি ৰদন্তি.

অচ্ছরামত্তন্তি অঙ্গুলিফোটমত্তং খণং. ঠপেতুন্তি সেতু ৰিয সীঘসোতায নদিযা ওঘং ৰেগেন পৰত্তিতুং অদত্ৰা যথাৰুত্তক্খণং ঝানং ঠপেতুং সমত্থতা. অভিভুয্য ঠপনং, অধিট্ঠানং ৰিযাতি ৰা অধিট্ঠানং. তত্থ ৰসী অধিট্ঠানৰসী. তথেৰ লহুং ৰুট্ঠাতুন্তি অচ্ছরামত্তং ৰা দসচ্ছরামত্তং ৰা লহুং খণং ঝানসমঙ্গী হুত্ৰা ঝানতো ৰুট্ঠাতুং সমত্থতা. ভৰঙ্গচিত্তুপ্পত্তিযেৰ হেত্থ ঝানতো ৰুট্ঠানং নাম. এত্থ চ যথা ‘‘এত্তকমেৰ খণং ঝানং ঠপেস্সামী’’তি পুব্বপরিকম্মৰসেন অধিট্ঠানসমত্থতা অধিট্ঠানৰসী, এৰং ‘‘এত্তকমেৰ খণং ঝানসমঙ্গী হুত্ৰা ঝানতো ৰুট্ঠহিস্সামী’’তি পুব্বপরিকম্মৰসেন ৰুট্ঠানসমত্থতা ৰুট্ঠানৰসী ৰেদিতব্বা, যা সমাপত্তি ‘‘ৰুট্ঠানকুসলতা’’তি ৰুচ্চতি. তদুভযদস্সনত্থন্তি অধিট্ঠানৰুট্ঠানৰসীদস্সনত্থং.

তত্থাতি তস্মিং নিম্মিতপব্বতে তস্স ৰিৰরে. কিঞ্চাপি একংযেৰ তং অভিঞ্ঞাচিত্তং যেন পব্বতং নিম্মিনেয্য, অভিঞ্ঞাপাদকস্স পন ঝানস্স লহুতরং ঠপনং, ৰুট্ঠানঞ্চ ইধ নিদস্সিতন্তি দট্ঠব্বং. ‘‘এত্তকা ইদ্ধিমন্তা একং উপট্ঠাকং গরুল়তো রক্খিতুং ন সক্খিংসূ’’তি গারয্হা অস্সাম.

আৰজ্জনানন্তরানীতি আৰজ্জনৰসীভাৰায যথাক্কমং ৰিতক্কাদীনং ঝানঙ্গানং আৰজ্জনায পরতো যানি জৰনানি পৰত্তানি, তানি তেসং পচ্চৰেক্খণানি. যদগ্গেন আৰজ্জনৰসীসিদ্ধি, তদগ্গেন পচ্চৰেক্খণাৰসীসিদ্ধি ৰেদিতব্বা.

দুতিযজ্ঝানকথাৰণ্ণনা

৭৯. নীৰরণপ্পহানস্স তপ্পঠমতায আসন্ননীৰরণপচ্চত্থিকা. থূলং নাম ৰিপুলম্পি ফেগ্গু ৰিয সুখভঞ্জনীযন্তি আহ ‘‘ওল়ারিকত্তা অঙ্গদুব্বলা’’তি. সন্ততো মনসি করিত্ৰাতি পঠমজ্ঝানং ৰিয অনোল়ারিকঙ্গত্তা, সন্তধম্মসমঙ্গিতায চ ‘‘সন্ত’’ন্তি মনসি কত্ৰা. যে হি ধম্মা দুতিযজ্ঝানে পীতিসুখাদযো, কামং তে পঠমজ্ঝানেপি সন্তি, তেহি পন তে সন্ততরা চেৰ পণীততরা চ ভৰন্তীতি. নিকন্তিন্তি নিকামনং, অপেক্খন্তি অত্থো. পরিযাদাযাতি খেপেত্ৰা. চত্তারি পঞ্চাতি ৰা-সদ্দো লুত্তনিদ্দিট্ঠো. দুতিযজ্ঝানং এতস্স অত্থীতি দুতিযজ্ঝানিকং. ৰুত্তপ্পকারানেৰাতি পঠমজ্ঝানে ৰুত্তপ্পকারানিযেৰ, পরিকম্মাদিনামকানীতি অত্থো.

৮০. ৰূপসমাতি ৰূপসমহেতু, ৰূপসমোতি চেত্থ পহানং অধিপ্পেতং, তঞ্চ ৰিতক্কৰিচারানং. অতিক্কমো অত্থতো দুতিযজ্ঝানক্খণে অনুপ্পাদোতি আহ ‘‘সমতিক্কমা’’তিআদি. কতমেসং পনেত্থ ৰিতক্কৰিচারানং ৰূপসমো অধিপ্পেতো, কিং পঠমজ্ঝানিকানং, উদাহু দুতিযজ্ঝানিকানন্তি. কিঞ্চেত্থ যদি পঠমজ্ঝানিকানং, নত্থি তেসং ৰূপসমো. ন হি কদাচি পঠমজ্ঝানং ৰিতক্কৰিচাররহিতং অত্থি. অথ দুতিযজ্ঝানিকানং, এৰম্পি নত্থেৰ ৰূপসমো, সব্বেন সব্বং তেসং তত্থ অভাৰতোতি? ৰুচ্চতে – যেহি ৰিতক্কৰিচারেহি পঠমজ্ঝানস্স ওল়ারিকতা, তেসং সমতিক্কমা দুতিযস্স ঝানস্স সমধিগমো, ন সভাৰতো অনোল়ারিকানং ফস্সাদীনং সমতিক্কমাতি অযমত্থো ‘‘ৰিতক্কৰিচারানং ৰূপসমা’’তি এতেন দীপিতো. তস্মা ‘‘কিং পঠমজ্ঝানিকানং ৰিতক্কৰিচারানং ৰূপসমো ইধাধিপ্পেতো, উদাহু দুতিযজ্ঝানিকান’’ন্তি এদিসী চোদনা অনোকাসাৰ. যস্মা দিট্ঠাদীনৰস্স তংতংঝানক্খণে অনুপ্পত্তিধম্মতাপাদনং ৰূপসমনং অধিপ্পেতং. ৰিতক্কাদযো এৰ ঝানঙ্গভূতা তথা করীযন্তি, ন তংসম্পযুত্তা ফস্সাদযো, তস্মা ৰিতক্কাদীনংযেৰ ৰূপসমাদিৰচনং ঞাযাগতং. যস্মা পন ৰিতক্কাদীনং ৰিয তংসম্পযুত্তধম্মানম্পি এতেন ‘‘এতং ওল়ারিক’’ন্তি আদীনৰদস্সনং সুত্তে আগতং, তস্মা অৰিসেসেন ৰিতক্কাদীনং, তংসহগতানঞ্চ ৰূপসমাদিকে ৰত্তব্বে ৰিতক্কাদীনংযেৰ ৰূপসমো ৰুচ্চমানো অধিকৰচনং অঞ্ঞং অত্থং বোধেতীতি কত্ৰা কিঞ্চি ৰিসেসং দীপেতীতি দস্সেতুং অট্ঠকথাযং ‘‘ওল়ারিকস্স পনা’’তিআদি গহিতন্তি ইধ ‘‘যেহি ৰিতক্কৰিচারেহী’’তিআদি ৰুত্তন্তি দট্ঠব্বং. ‘‘পীতিযা চ ৰিরাগা’’তিআদীসুপি এসেৰ নযো. তস্মা ৰিতক্কৰিচারপীতিসুখসমতিক্কমৰচনানি ওল়ারিকোল়ারিকঙ্গসমতিক্কমা দুতিযাদিঅধিগমদীপকানীতি তেসং একদেসভূতং ৰিতক্কৰিচারসমতিক্কমৰচনং তংদীপকং ৰুত্তং. ৰিসুং ৰিসুং ঠিতেপি হি ৰিতক্কৰিচারসমতিক্কমৰচনাদিকে পহেয্যঙ্গনিদ্দেসতাসামঞ্ঞেন চিত্তেন সমূহতো গহিতে ৰিতক্কৰিচারৰূপসমৰচনস্স তদেকদেসতা দট্ঠব্বা. অযঞ্চ অত্থো অৰযৰেন সমুদাযোপলক্খণনযেন ৰুত্তো. অথ ৰা ৰিতক্কৰিচারৰূপসমৰচনেনেৰ তংসমতিক্কমা দুতিযাধিগমদীপকেন পীতিৰিরাগাদিৰচনানং পীতিআদিসমতিক্কমা ততিযাদিঅধিগমদীপকতা দীপিতা হোতীতি তস্স তংদীপকতা ৰুত্তা.

নিযকজ্ঝত্তমধিপ্পেতং ন অজ্ঝত্তজ্ঝত্তাদি. তত্থ কারণমাহ ‘‘ৰিভঙ্গে পনা’’তিআদি. নীলৰণ্ণযোগতো নীলৰত্থং ৰিযাতি নীলযোগতো ৰত্থং নীলং ৰিযাতি অধিপ্পাযো. যেন সম্পসাদনেন যোগা ঝানং সম্পসাদনং. তস্মিং দস্সিতে ‘‘সম্পসাদনং ঝান’’ন্তি সমানাধিকরণনিদ্দেসেনেৰ তংযোগা ঝানে তংসদ্দপ্পৰত্তি দস্সিতাতি অৰিরোধো যুত্তো. একোদিভাৰে কথন্তি একোদিম্হি দস্সিতে একোদিভাৰং ঝানন্তি সমানাধিকরণনিদ্দেসেনেৰ ঝানস্স একোদিৰড্ঢনতা ৰুত্তা হোতীতি চে? ‘‘একোদিভাৰ’’ন্তি পদং উদ্ধরিত্ৰা একোদিস্স নিদ্দেসো ন কাতব্বো সিযাতি একোদিভাৰসদ্দো এৰ সমাধিম্হি পৰত্তো সম্পসাদনসদ্দো ৰিয ঝানে পৰত্ততীতি যুত্তং. ইমস্মিঞ্চ অত্থৰিকপ্পেতি ‘‘চেতসো সম্পসাদযতী’’তি এতস্মিং পক্খে ‘‘চেতসো’’তি চ উপযোগত্থে সামিৰচনং. পুরিমস্মিন্তি ‘‘সম্পসাদনযোগতো ঝানং সম্পসাদন’’ন্তি ৰুত্তপক্খে. চেতসোতি সম্বন্ধে সামিৰচনং.

সেট্ঠোপি লোকে ‘‘একো’’তি ৰুচ্চতি ‘‘যাৰ পরে একাহং তে করোমী’’তিআদীসু. একো অদুতিযো ‘‘একাকীভি খুদ্দকেহি জিত’’ন্তিআদীসু অসহাযত্থোপি এক-সদ্দো দিট্ঠোতি আহ ‘‘একো অসহাযো হুত্ৰা’’তি. সদ্ধাদযোপি কামং সম্পযুত্তধম্মানং সাধারণতো, অসাধারণতো চ পচ্চযা হোন্তিযেৰ, সমাধি পন ঝানক্খণে সম্পযুত্তধম্মানং অৰিক্খেপলক্খণে ইন্দট্ঠকরণেন সাতিসযং পচ্চযো হোতীতি দস্সেন্তো ‘‘সম্পযুত্তধম্মে…পে… অধিৰচন’’ন্তি আহ.

‘‘সম্পসাদনং, চেতসো একোদিভাৰ’’ন্তি ৰিসেসনদ্ৰযং ঝানস্স অতিসযৰচনিচ্ছাৰসেন গহিতং. স্ৰাযমতিসযো যথা ইমস্মিং ঝানে লব্ভতি, ন তথা পঠমজ্ঝানেতি ইমং ৰিসেসং দস্সেতুং ‘‘ননু চা’’তিআদি ৰুত্তং. আরম্মণে আহননপরিযাহননৰসেন, অনুমজ্জনঅনুযোজনৰসেন চ পৰত্তমানা ধম্মা সতিপি নীৰরণপ্পহানেন কিলেসকালুস্সিযাপগমে সম্পযুত্তানং কঞ্চি খোভং করোন্তা ৰিয তেহি চ তে ন সন্নিসিন্না হোন্তীতি ৰুত্তং ‘‘ৰিতক্কৰিচারক্খোভেন ন সুপ্পসন্ন’’ন্তি. খুদ্দিকা ঊমিযো ৰীচিযো. মহতিযো তরঙ্গা. সতিপি ইন্দ্রিযসমত্তে, ৰীরিযসমতায চ তেনেৰ খোভেন, সম্পসাদাভাৰেন চ সমাধিপি ন সুট্ঠু পাকটো বহলে ৰিয জলে মচ্ছো. যথাৰুত্তক্খোভো এৰ পলিবোধো. এৰং ৰুত্তেনাতি যস্সা সদ্ধায ৰসেন সম্পসাদনং, যস্সা চ চিত্তেকগ্গতায ৰসেন একোদিভাৰন্তি চ ঝানং ৰুত্তং. তাসং এৰ ‘‘সদ্দহনা’’তিআদিনা পৰত্তিআকারস্স ৰিসেসৰিভাৰনাৰসেন ৰুত্তেন. তেন ৰিভঙ্গপাঠেন. ‘‘সম্পসাদনযোগতো, সম্পসাদনতো ৰা সম্পসাদনং, একোদিং ভাৰেতীতি একোদিভাৰন্তি ঝানং ৰুত্ত’’ন্তি এৰং পৰত্তা অযং অত্থৰণ্ণনা ন ৰিরুজ্ঝতি. যথা পন অৰিরোধো, সো ৰুত্তো এৰ.

৮১. সন্তাতি সমং নিরোধং গতা. সমিতাতি ভাৰনায সমং গমিতা নিরোধিতা. ৰূপসন্তাতি ততো এৰ সুট্ঠু উপসন্তা. অত্থঙ্গতাতি অত্থং ৰিনাসং গতা. অব্ভত্থঙ্গতাতি উপসগ্গেন পদং ৰড্ঢেত্ৰা ৰুত্তং. অপ্পিতাতি ৰিনাসং গমিতা. সোসিতাতি পৰত্তিসঙ্খাতস্স সন্তানস্স অভাৰেন সোসং সুক্খভাৰং ইতা. ব্যন্তিকতাতি ৰিগতন্তকতা.

অযমত্থোতি ভাৰনায পহীনত্তা ৰিতক্কৰিচারানং অভাৰো. চোদকেন ৰুত্তমত্থং সম্পটিচ্ছিত্ৰা পরিহরিতুং ‘‘এৰমেতং সিদ্ধোৰাযমত্থো’’তি ৰত্ৰা ‘‘ন পনেত’’ন্তিআদি ৰুত্তং. তত্থ এতন্তি ‘‘ৰিতক্কৰিচারানং ৰূপসমা’’তি এতং ৰচনং. তদত্থদীপকন্তি তস্স ৰিতক্কৰিচারাভাৰমত্তসঙ্খাতস্স অত্থস্স দীপকং. অযঞ্হেত্থ অত্থো – দুতিযজ্ঝানাদিঅধিগমূপাযদীপকেন অজ্ঝত্তসম্পসাদনতায, চেতসো একোদিভাৰতায চ হেতুদীপকেন, অৰিতক্কঅৰিচারভাৰহেতুদীপকেন চ ৰিতক্কৰিচারৰূপসমৰচনেনেৰ ৰিতক্কৰিচারাভাৰো দীপিতোতি কিং পুন অৰিতক্কঅৰিচারৰচনেন কতেনাতি? ন, অদীপিতত্তা. ন হি ৰিতক্কৰিচারৰূপসমৰচনেন ৰিতক্কৰিচারানং অপ্পৰত্তি ৰুত্তা হোতি. ৰিতক্কৰিচারেসু হি তণ্হাপ্পহানং এতেসং ৰূপসমনং, যে চ সঙ্খারেসু তণ্হাপ্পহানং করোন্তি, তেসু মগ্গেসু, পহীনতণ্হেসু চ ফলেসু সঙ্খারপৰত্তি হোতি এৰ, এৰমেৰিধাপি ৰিক্খম্ভিতৰিতক্কৰিচারতণ্হস্স দুতিযজ্ঝানস্স ৰিতক্কৰিচারসম্পযোগো পুরিমেন ন নিৰারিতো সিযাতি তংনিৰারণত্থং, আৰজ্জিতুকামতাদিঅতিক্কমোৰ তেসং ৰূপসমোতি দস্সনত্থঞ্চ ‘‘অৰিতক্কং অৰিচার’’ন্তি ৰুত্তং. পঠমম্পীতি পঠমং ঝানম্পি.

‘‘দুতিযং উপ্পন্নন্তিপি দুতিয’’ন্তি ৰত্তুং ৰট্টতিযেৰ. ন তথা ইমস্স ৰিতক্কৰিচারাতি যথা পঠমজ্ঝানস্স উপচারক্খণে নীৰরণানি পহীযন্তি, তথা ইমস্স দুতিযজ্ঝানস্স উপচারক্খণে ৰিতক্কৰিচারা ন পহীযন্তি অসংকিলিট্ঠসভাৰত্তা, উপচারভাৰনায চ তে পহাতুং অসমত্থভাৰতো. যদিপি তায তেসু তণ্হা পহীযতি, ন পন সৰিসেসং. সৰিসেসঞ্হি তত্থ তণ্হাপ্পহানং অপ্পনায এৰ হোতি. তেন ৰুত্তং ‘‘অপ্পনাক্খণেযেৰা’’তিআদি. পহানঙ্গতাপি অতিসযপ্পহানৰসেনেৰ ৰেদিতব্বা যথা নীৰরণানং পঠমজ্ঝানস্স. তস্মাতি যস্মা তিৰঙ্গমেৰেতং ঝানং, তস্মা. তন্তি ৰিভঙ্গে ৰচনং. রথস্স পণ্ডুকম্বলং ৰিয সম্পসাদো ঝানস্স পরিক্খারো, ন ঝানঙ্গন্তি আহ ‘‘সপরিক্খারং ঝানং দস্সেতু’’ন্তি.

ততিযজ্ঝানকথাৰণ্ণনা

৮২. উপ্পিলাৰিতন্তি কামঞ্চাযং পরিগ্গহেসু অপরিচ্চত্তপেমস্স অনাদীনৰদস্সিনো তণ্হাসহগতায পীতিযা পৰত্তিআকারো, ইধ পন দুতিযজ্ঝানপীতি অধিপ্পেতা. তথাপি সব্বসো পীতিযং অৰিরত্তং, সাপি অনুবন্ধেয্যাতি ৰুত্তং. উপ্পিলাৰিতং ৰিযাতি ৰা উপ্পিলাৰিতং. আদীনৰং হি তত্থ পাকটতরং কত্ৰা দস্সেতুং এৰং ৰুত্তন্তি দট্ঠব্বং.

৮৩. ৰিরজ্জনং ৰিরাগো. তং পন ৰিরজ্জনং নিব্বিন্দনমুখেন হীল়নং ৰা তপ্পটিবদ্ধরাগপ্পহানং ৰাতি তদুভযং দস্সেতুং ‘‘ৰুত্তপ্পকারায পীতিযা জিগুচ্ছনং ৰা সমতিক্কমো ৰা’’তি আহ. ৰুত্তপ্পকারাযাতি ‘‘যদেৰ তত্থ পীতী’’তিআদিনা ৰুত্তপ্পকারায. সম্পিণ্ডনং সমুচ্চযো.

মগ্গোতি উপাযো. তদধিগমাযাতি ততিযমগ্গাধিগমায.

৮৪. উপপত্তিতোতি সমৰাহিতভাৰেন পতিরূপতো. ঝানুপেক্খাপি সমৰাহিতমেৰ অন্তোনীতং কত্ৰা পৰত্ততীতি আহ ‘‘সমং পস্সতী’’তি. ৰিসদাযাতি পরিব্যত্তায সংকিলেসৰিগমেন. ৰিপুলাযাতি মহতিযা সাতিসযং মহগ্গতভাৰপ্পত্তিযা. থামগতাযাতি পীতিৰিগমেন থিরভাৰপ্পত্তায.

পরিসুদ্ধপকতি খীণাসৰপকতি নিক্কিলেসতা. সত্তেসু কম্মস্সকতাদস্সনহেতুকো সমভাৰদস্সনাকারো মজ্ঝত্তাকারো ব্রহ্মৰিহারুপেক্খা.

সহজাতধম্মানন্তি নিদ্ধারণে সামিৰচনং. সমপ্পৰত্তিযা ভাৰনায ৰীথিপটিপন্নায অলীনানুদ্ধতা নিরস্সাদতায পগ্গহনিগ্গহসম্পহংসনেসু ব্যাপারাভাৰতো সম্পযুত্তধম্মেসু মজ্ঝত্তাকারভূতা বোজ্ঝঙ্গুপেক্খা.

উপেক্খানিমিত্তন্তি এত্থ লীনুদ্ধচ্চপক্খপাতরহিতং মজ্ঝত্তং ৰীরিযং উপেক্খা. তদেৰ তং আকারং গহেত্ৰা পৰত্তেতব্বস্স তাদিসস্স ৰীরিযস্স নিমিত্তভাৰতো উপেক্খানিমিত্তং ভাৰনায সমপ্পৰত্তিকালে উপেক্খীযতীতি উপেক্খা, ৰীরিযমেৰ উপেক্খা ৰীরিযুপেক্খা.

‘‘পঠমং ঝানং পটিলাভত্থায নীৰরণে…পে… নেৰসঞ্ঞানাসঞ্ঞাযতনসমাপত্তিং পটিলাভত্থায আকিঞ্চঞ্ঞাযতনসঞ্ঞং পটিসঙ্খা সন্তিট্ঠনা পঞ্ঞা সঙ্খারুপেক্খাসু ঞাণ’’ন্তি (পটি. ম. ১.৫৭) এৰমাগতা ইমা অট্ঠ সমাধিৰসেন উপ্পজ্জন্তি. ‘‘সোতাপত্তিমগ্গং পটিলাভত্থায উপ্পাদং পৰত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জরং ব্যাধিং মরণং সোকং পরিদেৰং উপাযাসং. সোতাপত্তিফলসমাপত্তত্থায উপ্পাদং পৰত্তং…পে… অরহত্তমগ্গং পটিলাভত্থায উপ্পাদং…পে… উপাযাসং…পে… অরহত্তফলসমাপত্তত্থায সুঞ্ঞতাৰিহারসমাপত্তত্থায অনিমিত্তৰিহারসমাপত্তত্থায উপ্পাদং পৰত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জরং ব্যাধিং মরণং সোকং পরিদেৰং উপাযাসং পটিসঙ্খা সন্তিট্ঠনা পঞ্ঞা সঙ্খারুপেক্খাসু ঞাণ’’ন্তি এৰমাগতা ইমা দস ৰিপস্সনাৰসেন উপ্পজ্জন্তি. এত্থ চ পঠমজ্ঝানাদীহি ৰিক্খম্ভিতানি নীৰরণৰিতক্কৰিচারাদীনি পটিসঙ্খায সভাৰতো উপপরিক্খিত্ৰা সন্নিট্ঠানৰসেন তিট্ঠমানা নীৰরণাদিপটিসঙ্খাসন্তিট্ঠনা দিট্ঠাদীনৰত্তা তেসং গহণে উপ্পাদনে অজ্ঝুপেক্খন্তী ৰিপস্সনাপঞ্ঞা গহণে মজ্ঝত্তভূতা উপেক্খা.

তত্থ উপ্পাদন্তি পুরিমকম্মপচ্চযা খন্ধানং ইধ উপ্পত্তিমাহ. পৰত্তন্তি তথাউপ্পন্নস্স পৰত্তিং. নিমিত্তন্তি সব্বম্পি তেভূমকসঙ্খারগতং নিমিত্তভাৰেন উপট্ঠানতো. আযূহনন্তি আযতিং পটিসন্ধিহেতুভূতং কম্মং. পটিসন্ধিন্তি আযতিং উপ্পত্তিং. গতিন্তি যায গতিযা সা পটিসন্ধি হোতি. নিব্বত্তিন্তি খন্ধানং নিব্বত্তনং. উপপত্তিন্তি ‘‘সমাপন্নস্স ৰা উপপন্নস্স ৰা’’তি (পটি. ম. ১.৭২) এত্থ ‘‘উপপন্নস্সা’’তি ৰুত্তৰিপাকপ্পৰত্তিং. জাতিন্তি জরাদীনং পচ্চযভূতং ভৰপচ্চযা জাতিং. জরাব্যাধিমরণাদযো পাকটা এৰ. এত্থ চ উপ্পাদাদযো পঞ্চেৰ সঙ্খারুপেক্খাঞাণস্স ৰিসযৰসেন ৰুত্তা, সেসা তেসং ৰেৰচনৰসেন. ‘‘নিব্বত্তি, জাতী’’তি ইদঞ্হি দ্ৰযং উপ্পাদস্স চেৰ পটিসন্ধিযা চ ৰেৰচনং, ‘‘গতি, উপপত্তি চা’’তি ইদং দ্ৰযং পৰত্তস্স, জরাদযো নিমিত্তস্সাতি ৰেদিতব্বং. অপ্পণিহিতৰিমোক্খৰসেন মগ্গুপ্পত্তিহেতুভূতা চতস্সো, তথা ফলসমাপত্তিযা চতস্সো, সুঞ্ঞতৰিহারঅনিমিত্তৰিহারৰসেন দ্ৰেতি দস সঙ্খারুপেক্খা.

যাতি ৰিপস্সনাপঞ্ঞা. যদত্থীতি যং অনিচ্চাদিলক্খণত্তযং উপলব্ভতি. যং ভূতন্তি যং পচ্চযনিব্বত্তত্তা ভূতং খন্ধপঞ্চকং. তং পজহতীতি অনিচ্চানুপস্সনাদীহি নিচ্চসঞ্ঞাদযো পজহন্তো সম্মদেৰ দিট্ঠাদীনৰত্তা তপ্পটিবদ্ধচ্ছন্দরাগপ্পহানেন পজহতি, যথা আযতিং আদানং ন হোতি, তথা পটিপত্তিযা পজহতি. তথাভূতো চ তত্থ উপেক্খং পটিলভতি. ৰিচিননেতি অনিচ্চাদিৰসেন সম্মসনেপি.

সম্পযুত্তধম্মানং সমপ্পৰত্তিহেতুতায সমৰাহিতভূতা. নীৰরণৰিতক্কৰিচারাদিসব্বপচ্চনীকেহি ৰিমুত্তত্তা সব্বপচ্চনীকপরিসুদ্ধা. তেসং ৰূপসন্তত্তা পচ্চনীকৰূপসমনেপি অব্যাপারভূতা অব্যাপারভাৰেন পৰত্তা, অব্যাপারতং ৰা পত্তা.

যদি অত্থতো একা, কথমযং ভেদোতি আহ ‘‘তেন তেনা’’তিআদি. তস্মাতি যস্মা সতিপি সভাৰতো অভেদে যেহি পন পচ্চযৰিসেসেহি স্ৰাযমিমাসং অৰত্থাভেদো, তেসং একজ্ঝং অপ্পৰত্তিতো ন তাসং অভেদো, একজ্ঝং ৰা পৰত্তি, তস্মা. তেনাহ ‘‘যত্থ ছল়ঙ্গুপেক্খা’’তিআদি.

একীভাৰোতি একতা. সতিপি মজ্ঝত্তাভাৰসামঞ্ঞে ৰিসযভেদেন পনস্সা ভেদো. যমত্থং সন্ধায ‘‘কিচ্চৰসেন দ্ৰিধা ভিন্না’’তি ৰুত্তং, তং ৰিত্থারতো দস্সেন্তো ‘‘যথা হী’’তিআদিমাহ. অযং ৰিপস্সনুপেক্খা. যং সন্ধায ৰুত্তং পাল়িযং ‘‘যদত্থি যং ভূতং, তং পজহতি, উপেক্খং পটিলভতী’’তি (ম. নি. ৩.৭১; অ. নি. ৭.৫৫). তত্থ যদত্থি যং ভূতন্তি খন্ধপঞ্চকং, তং মুঞ্চিতুকম্যতাঞাণেন পজহতি. দিট্ঠসোৰত্তিকত্তযস্স সব্বলক্খণৰিচিননে ৰিয দিট্ঠলক্খণত্তযস্স ভূতস্স সঙ্খারলক্খণৰিচিননে উপেক্খং পটিলভতি. সঙ্খারানং অনিচ্চাদিলক্খণস্স সুদিট্ঠত্তা তেসং ৰিচিননে মজ্ঝত্তভূতায ৰিপস্সনুপেক্খায সিদ্ধায তথা দিট্ঠাদীনৰানং তেসং গহণেপি অজ্ঝুপেক্খনা সিদ্ধাৰ হোতি, সব্বসো ৰিসঙ্খারনিন্নত্তা অজ্ঝাসযস্স.

অনাভোগরসাতি পণীতসুখেপি তস্মিং অৰনতিপটিপক্খকিচ্চাতি অত্থো. অব্যাপারপচ্চুপট্ঠানাতি সতিপি সুখপারমিপ্পত্তিযং তস্মিং সুখে অব্যাৰটা হুত্ৰা পচ্চুপতিট্ঠতি, সম্পযুত্তানং ৰা তত্থ অব্যাপারং পচ্চুপট্ঠপেতীতি অত্থো. সম্পযুত্তধম্মানং খোভং, উপ্পিলৰঞ্চ আৰহন্তেহি ৰিতক্কাদীহি অভিভূতত্তা অপরিব্যত্তং. তত্থ তত্রমজ্ঝত্ততায কিচ্চং. তদভাৰতো ইধ পরিব্যত্তং.

নিট্ঠিতা ‘‘উপেক্খকো চ ৰিহরতী’’তি এতস্স

সব্বসো অত্থৰণ্ণনা.

৮৫. ‘‘সরতীতি সতো’’তি পদস্স কত্তুসাধনতমাহ. সম্পজানাতীতি সম্মদেৰ পজানাতি. সরণং চিন্তনং উপট্ঠানং লক্খণমেতিস্সাতি সরণলক্খণা. সম্মুস্সনপটিপক্খো অসম্মুস্সনং, তং কিচ্চং এতিস্সাতি অসম্মুস্সনরসা. কিলেসেহি আরক্খা হুত্ৰা পচ্চুপতিট্ঠতি, ততো ৰা আরক্খং পচ্চুপট্ঠপেতীতি আরক্খপচ্চুপট্ঠানা. অসম্মুয্হনং সম্মদেৰ পজাননং, সম্মোহপটিপক্খো ৰা অসম্মোহো. তীরণং কিচ্চস্স পারগমনং. পৰিচযো ৰীমংসা.

কামং উপচারজ্ঝানাদীনি উপাদায পঠমদুতিযজ্ঝানানিপি সুখুমানেৰ, ইমং পন উপরিঝানং উপাদায ‘‘ওল়ারিকত্তা’’তি ৰুত্তং. সা চ ওল়ারিকতা ৰিতক্কাদিথূলঙ্গতায ৰেদিতব্বা. কেচি ‘‘বহুচেতসিকতাযা’’তি চ ৰদন্তি. গতি সুখা হোতি তত্থ ঝানেসূতি অধিপ্পাযো. অব্যত্তং তত্থ সতিসম্পজঞ্ঞকিচ্চং ‘‘ইদং নাম দুক্করং করীযতী’’তি ৰত্তব্বস্স অভাৰতো. ওল়ারিকঙ্গপ্পহানেন সুখুমত্তাতি অযমত্থো কামং দুতিযজ্ঝানেপি সম্ভৰতি, তথাপি যেভুয্যেন অৰিপ্পযোগীভাৰেন ৰত্তমানেসু পীতিসুখেসু পীতিসঙ্খাতস্স ওল়ারিকঙ্গস্স পহানেন সুখুমতায ইধ সাতিসযো সতিসম্পজঞ্ঞব্যাপারোতি ৰুত্তং ‘‘পুরিসস্সা’’তিআদি. পুনদেৰ পীতিং উপগচ্ছেয্যাতি হানভাগিযং ঝানং সিযা দুতিযজ্ঝানমেৰ সম্পজ্জেয্যাতি অত্থো. তেনাহ ‘‘পীতিসম্পযুত্তমেৰ সিযা’’তি. ‘‘ইদঞ্চ অতিমধুরং সুখ’’ন্তি ততিযজ্ঝানসুখং সন্ধাযাহ. অতিমধুরতা চস্স পহাসোদগ্যসভাৰায পীতিযা অভাৰেনেৰ ৰেদিতব্বা. ইদন্তি ‘‘সতো, সম্পজানো’’তি পদদ্ৰযং.

তস্মা এতমত্থং দস্সেন্তোতি যস্মা তস্স ঝানসমঙ্গিনো যং নামকাযেন সম্পযুত্তং সুখং, তং সো পটিসংৰেদেয্য. যং ৰা তন্তি অথ ৰা যং তং যথাৰুত্তং নামকাযসম্পযুত্তং সুখং. তংসমুট্ঠানেন ততো সমুট্ঠিতেন অতিপণীতেন রূপেন অস্স ঝানসমঙ্গিনো রূপকাযো যস্মা ফুটো. যস্স রূপকাযস্স ফুটত্তা ঝানা ৰুট্ঠিতোপি ঝানসমঙ্গী কাযিকং সুখং পটিসংৰেদেয্য. তস্মা এতং চেতসিককাযিকসুখপটিসংৰেদনসঙ্খাতং অত্থং দস্সেন্তো ‘‘সুখঞ্চ কাযেন পটিসংৰেদেতীতি আহা’’তি যোজনা. অযঞ্হেত্থ সঙ্খেপত্থো – নামকাযেন চেতসিকসুখং, কাযিকসুখহেতুরূপসমুট্ঠাপনেন কাযিকসুখঞ্চ ঝানসমঙ্গী পটিসংৰেদেতীতি ৰুচ্চতি. ফুটত্তাতি ব্যাপিতত্তাতি অত্থো. যথা হি উদকেন ফুটসরীরস্স তাদিসে নাতিপচ্চনীকে ৰাতাদিফোট্ঠব্বে ফুটে সুখং উপ্পজ্জতি, এৰমেতেহি ফুটসরীরস্সাতি. অপরো নযো – সুখঞ্চ কাযেন পটিসংৰেদেতীতি এত্থ কথমাভোগেন ৰিনা সুখপটিসংৰেদনাতি চোদনাযং ‘‘কিঞ্চাপি…পে… এৰং সন্তেপী’’তি. যস্মা তস্স নামকাযেন সম্পযুত্তং সুখং, তস্মা সুখঞ্চ কাযেন পটিসংৰেদেতীতি যোজনা. ইদানি সহাপি আভোগেন সুখপটিসংৰেদনং দস্সেতুং ‘‘যং ৰা ত’’ন্তিআদি ৰুত্তং.

৮৬. যন্তি হেতুঅত্থে নিপাতো, যস্মাতি অত্থো. তেনাহ ‘‘যংঝানহেতূ’’তি. ‘‘আচিক্খন্তী’’তিআদীনি পদানি কিত্তনত্থানীতি অধিপ্পাযেনাহ ‘‘পসংসন্তীতি অধিপ্পাযো’’তি. কিন্তীতি পসংসনাকারপুচ্ছা. এদিসেসু ঠানেসু সতিগ্গহণেনেৰ সম্পজঞ্ঞম্পি গহিতং হোতীতি ইধ পাল়িযং সতিযা এৰ গহিতত্তা এৰং উপট্ঠিতসতিতায ‘‘সতিমা’’ ইচ্চেৰ ৰুত্তং, ‘‘সম্পজানো’’তি হেট্ঠা ৰুত্তত্তা ৰা.

ঝানক্খণে চেতসিকসুখমেৰ লব্ভতীতি ‘‘সুখং নামকাযেন পটিসংৰেদেতী’’তি চ ৰুত্তং. ততিযন্তি গণনানুপুব্বতাতি ইতো পট্ঠায দুতিযততিযজ্ঝানকথাহি অৰিসেসো, ৰিসেসো চ ৰুত্তোতি.

চতুত্থজ্ঝানকথাৰণ্ণনা

৮৭. ইদানি নিব্বত্তিতৰিসেসং দস্সেন্তো ‘‘অযং পন ৰিসেসো’’তি ৰত্ৰা ‘‘যস্মা’’তিআদিমাহ. আসেৰনপচ্চযেন পচ্চযো ন হোতি, অনিট্ঠে ঠানে পদন্তরসঙ্গহিতস্স আসেৰনপচ্চযত্তাভাৰতো. অদুক্খমসুখায ৰেদনায উপ্পজ্জিতব্বং সাতিসযং সুখৰিরাগভাৰনাভাৰতো. তানীতি অপ্পনাৰীথিযং জৰনানি সন্ধাযাহ.

৮৮. ‘‘পুব্বেৰা’’তি ৰুত্তত্তা কদা পন তেসং পহানং হোতীতি চোদনাযং আহ ‘‘চতুন্নং ঝানানং উপচারক্খণে’’তি. এৰং ৰেদিতব্বন্তি সম্বন্ধো. পহানক্কমো নাম পহাযকধম্মানং উপ্পত্তিপটিপাটি. তেন পন ৰুচ্চমানে ‘‘দুক্খং দোমনস্সং সুখং সোমনস্স’’ন্তি ৰত্তব্বং সিযা. কস্মা ইতো অঞ্ঞথা ৰচনন্তি আহ ‘‘ইন্দ্রিযৰিভঙ্গে’’তিআদি. অথ কস্মা ঝানেস্ৰেৰ নিরোধো ৰুত্তোতি সম্বন্ধো.

কত্থ চুপ্পন্নং দুক্খিন্দ্রিযন্তি অত্তনো পচ্চযেহি উপ্পন্নং দুক্খিন্দ্রিযং. কত্থ চ অপরিসেসং নিরুজ্ঝতীতি নিরোধট্ঠানং পুচ্ছতি. তেন ‘‘কত্থা’’তি পুচ্ছাযং, ‘‘এত্থা’’তি ৰিস্সজ্জনেপি হেতুম্হি ভুম্মৰচনং দট্ঠব্বং. ঝানানুভাৰনিমিত্তং হি অনুপ্পজ্জন্তং ‘‘দুক্খিন্দ্রিযং অপরিসেসং নিরুজ্ঝতী’’তি ৰুত্তং. অতিসযনিরোধো সুট্ঠু পহানং উজুপটিপক্খেন ৰূপসমো.

নানাৰজ্জনেতি যেন আৰজ্জনেন অপ্পনাৰীথি, ততো ভিন্নাৰজ্জনে, অনেকাৰজ্জনে ৰা. অপ্পনাৰীথিযঞ্হি উপচারো একাৰজ্জনো, ইতরো অনেকাৰজ্জনো অনেকক্খত্তুং পৰত্তনতো. ৰিসমনিসজ্জায উপ্পন্নকিলমথো ৰিসমাসনুপতাপো. পীতিফরণেনাতি পীতিযা ফরণরসত্তা, পীতিসমুট্ঠানানং ৰা পণীতরূপানং কাযস্স ব্যাপনতো ৰুত্তং. তেনাহ ‘‘সব্বো কাযো সুখোক্কন্তো হোতী’’তি. ৰিতক্কৰিচারপচ্চযেপীতি পি-সদ্দো অট্ঠানপ্পযুত্তো, সো ‘‘পহীনস্সা’’তি এত্থ আনেত্ৰা সম্বন্ধিতব্বো ‘‘পহীনস্সাপি দোমনস্সিন্দ্রিযস্সা’’তি. এতং দোমনস্সিন্দ্রিযং উপ্পজ্জতীতি সম্বন্ধো. ‘‘তস্স ময্হং অতিচিরং ৰিতক্কযতো ৰিচারযতো কাযোপি কিলমিচিত্তম্পি উহঞ্ঞী’’তি ৰচনতো কাযচিত্তখেদানং ৰিতক্কৰিচারপ্পচ্চযতা ৰেদিতব্বা. ‘‘ৰিতক্কৰিচারভাৰে উপ্পজ্জতি দোমনস্সিন্দ্রিয’’ন্তি আনেত্ৰা সম্বন্ধিতব্বং. তত্থস্স সিযা উপ্পত্তীতি তত্থ দুতিযজ্ঝানূপচারে অস্স দোমনস্সস্স উপ্পত্তি ভৰেয্য.

এত্থ চ যদেকে ‘‘তত্থস্স সিযা উপ্পত্তী’’তি ৰদন্তেন ঝানলাভীনম্পি দোমনুস্সুপ্পত্তি অত্থীতি দস্সিতং হোতি. তেন চ অনীৰরণসভাৰো লোভো ৰিয দোসোপি অত্থীতি দীপেতি. ন হি দোসেন ৰিনা দোমনস্সং পৰত্ততি. ন চেত্থ পট্ঠানপাল়িযা ৰিরোধো চিন্তেতব্বো. যস্মা তত্থ পরিহীনং ঝানং আরম্মণং কত্ৰা পৰত্তমানং দোমনস্সং দস্সিতং, অপরিহীনজ্ঝানমারম্মণং কত্ৰা উপ্পজ্জমানস্স দোমনস্সস্স অসম্ভৰতো. ঝানলাভীনং সব্বসো দোমনস্সং নুপ্পজ্জতীতি চ ন সক্কা ৰত্তুং, অট্ঠসমাপত্তিলাভিনো অপি তস্স উপ্পন্নত্তা. ন হেৰ খো সো পহীনজ্ঝানো অহোসীতি ৰদন্তি, তং অযুত্তং অনীৰরণসভাৰস্স দোসস্স অভাৰতো. যদি সিযা, রূপারূপাৰচরসত্তানম্পি উপ্পজ্জেয্য, ন চ উপ্পজ্জতি. তথা হি ‘‘অরূপে কামচ্ছন্দনীৰরণং পটিচ্চ থিনমিদ্ধনীৰরণং উদ্ধচ্চনীৰরণং অৰিজ্জানীৰরণ’’ন্তিআদীসু ব্যাপাদকুক্কুচ্চনীৰরণানি অনুদ্ধটানি. ন চেত্থ নীৰরণত্তা পরিহারো, কামচ্ছন্দাদীনম্পি অনীৰরণানংযেৰ নীৰরণসদিসতায নীৰরণপরিযাযস্স ৰুত্তত্তা. যং পন ৰুত্তং ‘‘অট্ঠসমাপত্তিলাভিনো অপি তস্স উপ্পন্নত্তা’’তি, তম্পি অকারণং উপ্পজ্জমানেন চ দোমনস্সেন ঝানতো পরিহাযনতো. লহুকেন পন পচ্চযেন পরিহীনং তাদিসা অপ্পকসিরেনেৰ পটিপাকতিকং করোন্তীতি দট্ঠব্বং. ‘‘তত্থস্স সিযা উপ্পত্তী’’তি ইদং পন পরিকপ্পৰচনং উপচারক্খণে দোমনস্সস্স অপ্পহীনভাৰদস্সনত্থং. তথা হি ৰুত্তং ‘‘ন ত্ৰেৰ অন্তোঅপ্পনায’’ন্তি. যদি পন তদা দোমনস্সং উপ্পজ্জেয্য, পঠমজ্ঝানম্পিস্স পরিহীনমেৰাতি দট্ঠব্বং. পহীনম্পি সোমনস্সিন্দ্রিযং পীতি ৰিয ন দূরেতি কত্ৰা ‘‘আসন্নত্তা’’তি ৰুত্তং. নানাৰজ্জনূপচারে পহীনম্পি পহানঙ্গং পটিপক্খেন অৰিহতত্তা অন্তরন্তরা উপ্পজ্জেয্য ৰাতি ইমমত্থং দস্সেন্তো ‘‘অপ্পনাপ্পত্তাযা’’তিআদিমাহ. তাদিসায আসেৰনায ইচ্ছিতব্বত্তা যথা মগ্গৰীথিতো পুব্বে দ্ৰে তযো জৰনৰারা সদিসানুপস্সনাৰ পৰত্তন্তি, এৰমিধাপি অপ্পনাৰারতো পুব্বে দ্ৰে তযো জৰনৰারা উপেক্খাসহগতাৰ পৰত্তন্তীতি ৰদন্তি.

সমাহটাতি সমানীতা, সঙ্গহেত্ৰা ৰুত্তাতি অত্থো. সুখদুক্খানি ৰিয অনোল়ারিকত্তা অৰিভূততায সুখুমা. ততো এৰ অনুমিনিতব্বসভাৰত্তা দুৰিঞ্ঞেয্যা. দুট্ঠস্সাতি দুট্ঠপযোগস্স, দুদ্দম্মস্সাতি অত্থো. সক্কা হোতি এসা গাহযিতুং অঞ্ঞাপোহননযেনাতি অধিপ্পাযো.

অদুক্খমসুখায চেতোৰিমুত্তিযাতি ইদমেৰ চতুত্থজ্ঝানং দট্ঠব্বং. পচ্চযদস্সনত্থন্তি অধিগমস্স উপাযভূতপচ্চযদস্সনত্থং. তেনাহ ‘‘দুক্খপ্পহানাদযো হি তস্সা পচ্চযা’’তি. দুক্খপ্পহানাদযোতি চ সোপচারা পঠমজ্ঝানাদযোৰেত্থ অধিপ্পেতা.

পহীনাতি ৰুত্তা ‘‘পঞ্চন্নং ওরম্ভাগিযানং সংযোজনানং পরিক্খযা’’তি. এতাতি সুখাদযো ৰেদনা.

সোমনস্সং রাগস্স পচ্চযো. ৰুত্তঞ্হি ‘‘সুখায খো, আৰুসো ৰিসাখ, ৰেদনায রাগানুসযো অনুসেতী’’তি (ম. নি. ১.৪৬৫). দোমনস্সং দোসস্স পচ্চযো. ৰুত্তম্পি চেতং ‘‘দুক্খায খো, আৰুসো ৰিসাখ, ৰেদনায পটিঘানুসযো অনুসেতী’’তি. সুখাদিঘাতেনাতি সুখাদীনং পহানেন. অস্স ঝানস্স.

ন দুক্খন্তি অদুক্খং, দুক্খৰিধুরং. যস্মা তত্থ দুক্খং নত্থি, তস্মা ৰুত্তং ‘‘দুক্খাভাৰেনা’’তি. অসুখন্তি এত্থপি এসেৰ নযো. এতেনাতি দুক্খসুখপটিক্খেপৰচনেন. ‘‘পটিপক্খভূত’’ন্তি ইদং ইধ ততিযৰেদনায দুক্খাদীনং সমতিক্কমৰসেন পত্তব্বত্তা ৰুত্তং, ন কুসলাকুসলানং ৰিয উজুৰিপচ্চনীকতায. ইট্ঠানিট্ঠৰিপরীতস্স মজ্ঝত্তারম্মণস্স, ইট্ঠানিট্ঠৰিপরীতং ৰা মজ্ঝত্তাকারেন অনুভৰনলক্খণা ইট্ঠানিট্ঠৰিপরীতানুভৰনলক্খণা. ততো এৰ মজ্ঝত্তরসা. অৰিভূতপচ্চুপট্ঠানাতি সুখদুক্খানি ৰিয ন ৰিভূতাকারা, পিট্ঠিপাসাণে মিগগতমগ্গো ৰিয তেহি অনুমাতব্বা অৰিভূতাকারোপট্ঠানা. সুখনিরোধো নাম ইধ চতুত্থজ্ঝানূপচারো, সো পদট্ঠানং এতিস্সাতি সুখনিরোধপদট্ঠানা.

৮৯. ‘‘উপেক্খাসতিপারিসুদ্ধি’’ন্তি পুরিমপদে উত্তরপদলোপেনেতং সমাসপদন্তি আহ ‘‘উপেক্খায জনিতসতিপারিসুদ্ধি’’ন্তি. সব্বপচ্চনীকধম্মপরিসুদ্ধায পচ্চনীকসমনেপি অব্যাৰটায পারিসুদ্ধিউপেক্খায ৰত্তমানায চতুত্থজ্ঝানে সতি সম্পহংসনপঞ্ঞা ৰিয সুপরিসুদ্ধা, সুৰিসদা চ হোতীতি আহ ‘‘যা চ তস্সা সতিযা পারিসুদ্ধি, সা উপেক্খায কতা, ন অঞ্ঞেনা’’তি. যদি তত্রমজ্ঝত্ততা ইধ ‘‘উপেক্খা’’তি অধিপ্পেতা, কথং সতিযেৰ ‘‘পরিসুদ্ধা’’তি ৰুত্তাতি আহ ‘‘ন কেৰল’’ন্তিআদি.

এৰম্পি কস্মা অযমেৰ সতি ‘‘উপেক্খাসতিপারিসুদ্ধী’’তি ৰুত্তাতি অনুযোগং সন্ধায ‘‘তত্থ কিঞ্চাপী’’তিআদি ৰুত্তং. তত্থ হেট্ঠা তীসু ঝানেসু ৰিজ্জমানাযপি তত্রমজ্ঝত্ততায পচ্চনীকাভিভৰতো, সহাযপচ্চযৰেকল্লতো চ অপারিসুদ্ধি, তথা তংসম্পযুত্তানং. তদভাৰতো ইধ পারিসুদ্ধীতি ইমমত্থং রূপকৰসেন দস্সেতুং ‘‘যথা পনা’’তিআদি ৰুত্তং. সূরিযপ্পভাভিভৰাতি সূরিযপ্পভায অভিভুয্যমানত্তা. অতিক্খতায চন্দলেখা ৰিয রত্তিপি সোম্মসভাৰা সভাগায রত্তিযমেৰ চ চন্দলেখা সমুজ্জলতীতি সা তস্সা সভাগাতি দস্সেন্তো ‘‘সোম্মভাৰেন চ অত্তনো উপকারকত্তেন ৰা সভাগায রত্তিযা’’তি আহ.

‘‘একৰীথিয’’ন্তি ইদং তত্থ সোমনস্সস্স একংসেন অভাৰতো ৰুত্তং, ন ততো পুরিমতরেসু একংসেন ভাৰতো. যথা পন ৰিতক্কাদযো দুতিযাদিজ্ঝানক্খণেযেৰ পহীযন্তি, ন তেসং একৰীথিযং পুরিমজৰনেসু, ন এৰমেতন্তি দস্সেতুং ৰুত্তং. চতুক্কজ্ঝানেতি চতুক্কনযৰসেন নিব্বত্তিতজ্ঝানচতুক্কে.

পঞ্চকজ্ঝানকথাৰণ্ণনা

৯০. তত্থাতি পঠমজ্ঝানে. চতুক্কনযস্স দুতিযজ্ঝানে ৰিযাতি চতুক্কনযসম্বন্ধিনি দুতিযজ্ঝানে ৰিয. তং দ্ৰিধা ভিন্দিত্ৰাতি চতুক্কনযে দুতিযং ‘‘অৰিতক্কং ৰিচারমত্তং, অৰিতক্কং অৰিচার’’ন্তি চ এৰং দ্ৰিধা ভিন্দিত্ৰা পঞ্চকনযে দুতিযঞ্চেৰ ততিযঞ্চ হোতি অভিধম্মেতি (ধ. স. ১৬৮) অধিপ্পাযো. সুত্তন্তেসু পন সরূপতো পঞ্চকনযো ন গহিতো.

কস্মা পনেত্থ নযদ্ৰযৰিভাগো গহিতোতি? অভিধম্মে নযদ্ৰযৰসেন ঝানানং দেসিতত্তা. কস্মা চ তত্থ তথা তানি দেসিতানি? পুগ্গলজ্ঝাসযতো, দেসনাৰিলাসতো চ. সন্নিপতিতদেৰপরিসায কির যেসং যথাদেসিতে পঠমজ্ঝানে ৰিতক্কো এৰ ওল়ারিকতো উপট্ঠাসি, ইতরে সন্ততো. তেসং অজ্ঝাসযৰসেন চ চতুরঙ্গিকং অৰিতক্কং ৰিচারমত্তং ঝানং দেসিতং. যেসং ৰিচারো, যেসং পীতি, যেসং সুখং ওল়ারিকতো উপট্ঠাসি, ইতরে সন্ততো. তেসং তেসং অজ্ঝাসযৰসেন ততিযাদীনি ঝানানি দেসিতানি. অযং তাৰ পুগ্গলজ্ঝাসযো.

যস্সা পন ধম্মধাতুযা সুপ্পটিৰিদ্ধত্তা ভগৰা যস্মা দেসনাৰিলাসপ্পত্তো, তস্মা ঞাণমহন্ততায দেসনায সুকুসলো যং যং অঙ্গং লব্ভতি, তস্স তস্স ৰসেন যথারুচিং দেসনং নিযামেন্তো চতুক্কনযৰসেন, পঞ্চকনযৰসেন চ. তত্থ চ পঞ্চঙ্গিকং পঠমং, চতুরঙ্গিকং দুতিযং, তিৰঙ্গিকং ততিযং, দুৰঙ্গিকং চতুত্থং, দুৰঙ্গিকমেৰ পঞ্চমং ঝানং দেসেসীতি অযং দেসনাৰিলাসো. এত্থ চ পঞ্চকনযে দুতিযজ্ঝানং চতুক্কনযে দুতিযজ্ঝানপক্খিকং কত্ৰা ৰিভত্তং ‘‘যস্মিং সমযে রূপূপপত্তিযা মগ্গং ভাৰেতি অৰিতক্কং ৰিচারমত্তং সমাধিজং পীতিসুখং দুতিযং ঝানং উপসম্পজ্জ ৰিহরতী’’তি (ধ. স. ১৬৮). কস্মা? একত্তকাযনানত্তসঞ্ঞীসত্তাৰাসফলতায দুতিযজ্ঝানেন সমানফলত্তা, পঠমজ্ঝানসমাধিতো জাতত্তা চ. পঠমজ্ঝানমেৰ হি ‘‘কামেহি অকুসলেহি চ ৰিৰিত্ত’’ন্তি তদভাৰা ন ইধ ‘‘ৰিৰিচ্চেৰ কামেহি ৰিৰিচ্চ অকুসলেহী’’তি সক্কা ৰত্তুং, নাপি ‘‘ৰিৰেকজ’’ন্তি. সুত্তন্তদেসনাসু চ পঞ্চকনযে দুতিযততিযজ্ঝানানি দুতিযজ্ঝানমেৰ ভজন্তি ৰিতক্কৰূপসমা ৰিচারৰূপসমা অৰিতক্কত্তা, অৰিচারত্তা চ. এৰঞ্চ কত্ৰা সুত্তন্তদেসনাযপি পঞ্চকনযো লব্ভতেৰাতি সিদ্ধং হোতি. ননু সুত্তন্তে চত্তারিযেৰ ঝানানি ৰিভত্তানীতি পঞ্চকনযো ন লব্ভতীতি? ন, ‘‘সৰিতক্কসৰিচারো সমাধী’’তিআদিনা (দী. নি. ৩.৩০৫) সমাধিত্তযাপদেসেন পঞ্চকনযস্স লব্ভমানত্তা. চতুক্কনযনিস্সিতো পন কত্ৰা পঞ্চকনযো ৰিভত্তোতি সুত্তন্তদেসনাযপি পঞ্চকনযো নিদ্ধারেতব্বো. ‘‘ৰিতক্কৰিচারানং ৰূপসমা’’তি হি ৰিতক্কস্স, ৰিচারস্স, ৰিতক্কৰিচারানঞ্চ ‘‘ৰিতক্কৰিচারান’’ন্তি সক্কা ৰত্তুং. তথা ‘‘অৰিতক্কং, অৰিচার’’ন্তি চ ৰিনা, সহ চ ৰিচারেন ৰিতক্কপ্পহানেন অৰিতক্কং, সহ, ৰিনা চ ৰিতক্কেন ৰিচারপ্পহানেন অৰিচারন্তি অৰিতক্কং, অৰিচারং, অৰিতক্কঞ্চ অৰিচারঞ্চাতি ৰা তিৰিধম্পি সক্কা সঙ্গহেতুং.

দুতিযন্তি চ ৰিতক্করহিতে, ৰিতক্কৰিচারদ্ৰযরহিতে চ ঞাযাগতা দেসনা দুতিযং অধিগন্তব্বত্তা, ৰিচারমত্তরহিতেপি দ্ৰযপ্পহানাধিগতসমানধম্মত্তা. এৰঞ্চ কত্ৰা পঞ্চকনযনিদ্দেসে দুতিযে ৰূপসন্তোপি ৰিতক্কো সহাযভূতৰিচারাৰূপসমেন ন সম্মা ৰূপসন্তোতি ৰিতক্কৰিচারদ্ৰযরহিতে ৰিয ৰিচারৰূপসমেনেৰ তদুপসমং, সেসধম্মানং সমানতঞ্চ দস্সেন্তেন ‘‘ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং ততিযং ঝানং উপসম্পজ্জ ৰিহরতী’’তি ততিযং চতুক্কনযে দুতিযেন নিব্বিসেসং ৰিভত্তং. দুৰিধস্সাপি সহাযৰিরহেন, অঞ্ঞথা চ ৰিতক্কপ্পহানেন অৰিতক্কত্তং, সমাধিজং পীতিসুখত্তঞ্চ সমানন্তি সমানধম্মত্তাপি দুতিযন্তি নিদ্দেসো. ৰিচারমত্তম্পি হি ৰিতক্কৰিচারদ্ৰযরহিতং ৰিয ‘‘যস্মিং সমযে রূপূপপত্তিযা মগ্গং ভাৰেতি অৰিতক্কং ৰিচারমত্তং সমাধিজং পীতিসুখং দুতিযং ঝানং উপসম্পজ্জ ৰিহরতী’’তি (ধ. স. ১৬৮) অৰিতক্কং সমাধিজং পীতিসুখন্তি ৰিভত্তং. পঠমজ্ঝানে ৰা সহচারীসু ৰিতক্কৰিচারেসু একং অতিক্কমিত্ৰা দুতিযম্পি তত্রট্ঠমেৰ দোসতো দিস্ৰা উভযম্পি সহাতিক্কমন্তস্স পঞ্চকনযে ততিযং ৰুত্তং, ততিযং অধিগন্তব্বত্তা. পঠমতো অনন্তরভাৰেন পনস্স দুতিযভাৰো চ উপ্পজ্জতীতি. কস্মা পনেৰং সরূপতো পঞ্চকনযো ন ৰিভত্তোতি? ৰিনেয্যজ্ঝাসযতো. যথানুলোমদেসনা হি সুত্তন্তদেসনাতি.

পথৰীকসিণনিদ্দেসৰণ্ণনা নিট্ঠিতা.

ইতি চতুত্থপরিচ্ছেদৰণ্ণনা.

৫. সেসকসিণনিদ্দেসৰণ্ণনা

আপোকসিণকথাৰণ্ণনা

৯১. যথাৰিত্থারিতস্স অত্থস্স অতিদেসোপি ৰিত্থারট্ঠানেযেৰ তিট্ঠতীতি আহ ‘‘ৰিত্থারকথা হোতী’’তি. আপোকসিণন্তি আপোকসিণজ্ঝানং, আপোকসিণকম্মট্ঠানং ৰা. সব্বং ৰিত্থারেতব্বন্তি পথৰীকসিণকম্মট্ঠানে ৰুত্তনযেন ৰিত্থারেতব্বং. এত্তকম্পীতি ‘‘কতে ৰা অকতে ৰাতি সব্বং ৰিত্থারেতব্ব’’ন্তি এত্তকম্পি অৰত্ৰা. সামুদ্দিকেন লোণুদকেন ভরিতো জলাসযো লোণী. নীলাদিৰণ্ণসঙ্করপরিহরণত্থং ‘‘সুদ্ধৰত্থেন গহিত’’ন্তি ৰুত্তং. অঞ্ঞন্তি ভূমিং সম্পত্তং. তথারূপন্তি যাদিসং আকাসজং উদকং, তাদিসং. তেনাহ ‘‘ৰিপ্পসন্নং অনাৰিল’’ন্তি, যং পন উদকন্তি সম্বন্ধো. ‘‘ন ৰণ্ণো পচ্চৰেক্খিতব্বো’’তিআদীসু যং ৰত্তব্বং, তং পথৰীকসিণকথাযং ৰুত্তমেৰ. লক্খণং পন ইধ পগ্ঘরণলক্খণং ৰেদিতব্বং.

ৰুত্তনযেনেৰাতি পথৰীকসিণভাৰনাযং ৰুত্তনযেনেৰ. তরঙ্গুট্ঠানাদি, ফেণমিস্সতাদি চ ইধ কসিণদোসো. সোতি যোগাৰচরো. তস্সাতি পটিভাগনিমিত্তস্স.

তেজোকসিণকথাৰণ্ণনা

৯২. সিনিদ্ধানি সিনেহৰন্তানি. সারদারূনি ন ফেগ্গুদারূনি. জালায চিরট্ঠিতত্থং সিনিদ্ধসারদারুগ্গহণং. ঘটিকং ঘটিকং কত্ৰাতি খন্ধসো করিত্ৰা. আলিম্পেত্ৰাতি জালেত্ৰা. ঘনজালাযাতি অৰিরল়ৰসেন পৰত্তঅগ্গিজালাযং.

পতনসদিসন্তি পতমানসদিসং. অকতে গণ্হন্তস্সাতি ৰুত্তনযেন যথা কসিণমণ্ডলং পঞ্ঞাযতি, এৰং অনভিসঙ্খতে কেৰলে তেজস্মিং নিমিত্তং গণ্হন্তস্স.

ৰাযোকসিণকথাৰণ্ণনা

৯৩. ৰুত্তঞ্হেতন্তি এত্থ হি-সদ্দো হেতুঅত্থো, যস্মাতি অত্থো. তস্স ‘‘তস্মা’’তি ইমিনা সম্বন্ধো. উচ্ছগ্গন্তি উচ্ছুখেত্তে যথাঠিতানং অগ্গং. এরিতন্তি ৰাতেন চলিতং. সমেরিতন্তি সব্বসো চলিতং. তস্মাতি যস্মা ‘‘ৰাযোকসিণং…পে… উপলক্খেতী’’তি এৰং ৰুত্তং অট্ঠকথাযং, তস্মা. সমসীসট্ঠিতন্তি উপরি পত্তানং ৰসেন সমসীসং হুত্ৰা ঠিতং. ৰেল়ুং ৰা রুক্খং ৰাতি এত্থাপি ‘‘সমসীসং ঠিতং ঘনপত্তৰেল়ুং ৰা ঘনপত্তরুক্খং ৰা’’তি আনেত্ৰা যোজেতব্বং. একঙ্গুলাদিপ্পমাণেসু কেসেসু রস্সভাৰতো, দীঘতরেসু ওলম্বনতো, ৰিরল়েসু অনুপ্পৰেসতো ৰাতপ্পহারো ন পঞ্ঞাযতীতি চতুরঙ্গুলপ্পমাণগ্গহণং, ঘনগ্গহণঞ্চ কতং. এতস্মিং ঠানে পহরতীতি সতিং ঠপেত্ৰাতি উচ্ছগ্গাদীনং পচলনাকারগ্গহণমুখেন তেসং পহারকে ৰাতসঙ্ঘাতে সতিং উপট্ঠপেত্ৰা. তত্থ সতিং ঠপেত্ৰাতি তস্মিং কাযপদেসস্স সঙ্ঘট্টনৰসেন পৰত্তে ৰাযুপিণ্ডে সঙ্ঘট্টনাকারগ্গহণমুখেন সতিং উপট্ঠপেত্ৰা. ‘‘উসুমৰট্টিসদিস’’ন্তি এতেন পুরিমকসিণস্স ৰিয ইমস্সাপি নিমিত্তস্স সংৰিগ্গহতং দস্সেতি. ‘‘নিচ্চল’’ন্তি ইমিনা নিচ্চলভাৰোযেৰ উগ্গহনিমিত্ততো ইমস্স ৰিসেসোতি পটিভাগনিমিত্তস্সাপি উসুমৰট্টিসদিসতাৰ ৰিভাৰিতা হোতি.

নীলকসিণকথাৰণ্ণনা

৯৪. অঞ্জনরাজিৰট্টাদি ৰণ্ণধাতুযা ৰা. তথারূপং মালাগচ্ছন্তি অৰিরল়ৰিকসিতনীলৰণ্ণপুপ্ফসঞ্ছন্নং পুপ্ফগচ্ছং. ইতরেনাতি অকতাধিকারেন. গিরিকণ্ণিকগ্গহনেন নীলং গিরিকণ্ণিকমাহ. করণ্ডপটলং সমুগ্গপিধানং. পত্তেহিযেৰাতি নীলুপ্পলাদীনং কেসরৰণ্টানি অপনেত্ৰা কেৰলেহি পত্তেহিযেৰ. পূরেতব্বন্তি নীলৰণ্ণং ৰত্থং গহেত্ৰা ভণ্ডিকং ৰিয বন্ধিত্ৰা যথা নীলমণ্ডলং হুত্ৰা পঞ্ঞাযতি, তথা চঙ্কোটকং ৰা করণ্ডপটলং ৰা পূরেতব্বং. মুখৰট্টিযং ৰা অস্সাতি অস্স চঙ্কোটকস্স, করণ্ডপটলস্স ৰা মুখৰট্টিযং বন্ধিতব্বং. মণিতালৰণ্টং ইন্দনীলমণিমযং তালৰণ্টং.

পীতকসিণকথাৰণ্ণনা

৯৫. পীতকসিণে মালাগচ্ছন্তি ইক্কটাদিমালাগচ্ছং. হরিতালং, মনোসিলা ৰা ধাতু. পত্তঙ্গপুপ্ফেহীতি পত্তঙ্গনামিকা পীতৰণ্ণপুপ্ফা একা গচ্ছজাতি, তস্স পুপ্ফেহি. আসনপূজন্তি চেতিযঙ্গণে কতং আসনপূজং. কণিকারপুপ্ফাদিনাতি আদি-সদ্দেন আকুলিকিঙ্কিরাতপুপ্ফাদীনং সঙ্গহো দট্ঠব্বো.

লোহিতকসিণকথাৰণ্ণনা

৯৬. লোহিতমণি লোহিতঙ্গমণিআদি. লোহিতধাতু গেরুকজাতিহিঙ্গুলিকাদি.

ওদাতকসিণকথাৰণ্ণনা

৯৭. ওদাতকসিণে মালাগচ্ছন্তি নন্দিযাৰত্তাদিমালাগচ্ছং. ধাতু কক্কটিমুত্তসেতিকাদি.

আলোককসিণকথাৰণ্ণনা

৯৮. তথা অসক্কোন্তেনাতি যথা সূরিযালোকাদিৰসেন ওভাসনিমিত্তুপ্পাদনং ৰুত্তং, তস্স ওভাসমণ্ডলস্স ন চিরট্ঠিতিতায তথা নিমিত্তুপ্পাদনং কাতুং অসক্কোন্তেন. ঘটমুখেন নিগ্গচ্ছনকওভাসস্স মহন্তভাৰতো ‘‘ঘটমুখং পিদহিত্ৰা’’তি ৰুত্তং. ভিত্তিমুখন্তি ভিত্তিঅভিমুখং. উট্ঠিতমণ্ডলসদিসন্তি ভিত্তিআদীসু উট্ঠিতপাকতিকআলোকমণ্ডলসদিসং. ঘনৰিপ্পসন্নং আলোকপুঞ্জসদিসন্তি ভগৰতো ব্যামপ্পভা ৰিয বহলো, ৰিপ্পসন্নো চ হুত্ৰা পুঞ্জভূতো আলোকো অত্থি চে, তংসদিসোতি অত্থো.

পরিচ্ছিন্নাকাসকসিণকথাৰণ্ণনা

৯৯. ছিদ্দসদিসমেৰ হোতীতি যেহি ভিত্তিপরিযন্তাদীহি পরিচ্ছিন্নং, তং ছিদ্দং, তংসদিসং, তেনৰাকারেন উগ্গহনিমিত্তং উপট্ঠাতীতি অত্থো. ‘‘ৰড্ঢিযমানম্পি ন ৰড্ঢতী’’তি উগ্গহনিমিত্তস্স অৰড্ঢনীযতং দস্সেতুং ৰুত্তং. সব্বম্পি হি উগ্গহনিমিত্তং ৰড্ঢিযমানং ন ৰড্ঢতিযেৰ. সতিপি চ ৰড্ঢেতুকামতাযং ৰড্ঢনা ন সম্ভৰতি ভাৰনায পরিদুব্বলত্তা. ভাৰনাৰসেন হি নিমিত্তৰড্ঢনা. পটিভাগনিমিত্তং পন তস্মিং উপ্পন্নে ভাৰনা থিরাতি কত্ৰা ‘‘ৰড্ঢিযমানং ৰড্ঢতী’’তি ৰুত্তং.

কিঞ্চাপি পাল়িযং ‘‘পথৰীকসিণাদীনি রূপঝানারম্মণানি অট্ঠেৰ কসিণানি সরূপতো আগতানি, ওদাতকসিণে পন আলোককসিণং, আকাসকসিণে চ পরিচ্ছিন্নাকাসকসিণং অন্তোগধং কত্ৰা দেসনা কতা’’তি অধিপ্পাযেনাহ ‘‘ইতি কসিণানি দসবলো, দস যানি অৰোচা’’তি. পকিণ্ণককথাপি ৰিঞ্ঞেয্যাতি পুব্বে ৰিয অসাধারণং তস্মিং তস্মিং কসিণে পটিনিযতমেৰ অত্থং অগ্গহেত্ৰা অসাধারণতো, সাধারণতো চ তত্থ তত্থ পকিণ্ণকং ৰিসটং অত্থং গহেত্ৰা পৰত্তা পকিণ্ণককথাপি ৰিজানিতব্বা.

পকিণ্ণককথাৰণ্ণনা

১০০. আদিভাৰোতি এত্থ আদি-সদ্দেন যস্স কস্সচি পথৰীপক্খিযস্স ৰত্থুনো নিম্মানাদিং সঙ্গণ্হাতি. ঠাননিসজ্জাদিকপ্পনং ৰাতি এত্থাপি ‘‘আকাসে ৰা উদকে ৰা’’তি আনেত্ৰা সম্বন্ধিতব্বং. পরিত্তঅপ্পমাণনযেনাতি নীলাদিৰণ্ণং অনামসিত্ৰা পরিত্তঅপ্পমাণনযেনেৰ. এৰমাদীনীতি আদি-সদ্দেন সরীরতো উদকধারানিম্মানাদিং সঙ্গণ্হাতি.

যদেৰ সো ইচ্ছতি তস্স ডহনসমত্থতাতি বহূসু কপ্পাসপিচুসারদারুআদীসু একজ্ঝং রাসিভূতেসু ঠিতেসু যং যদেৰ ইচ্ছতি, তস্স তস্সেৰ ডহনসমত্থতা. ইধ আদি-সদ্দেন অন্ধকারৰিধমনাদিং সঙ্গণ্হাতি.

ৰাযুগতিযা গমনং ৰাযুগতিগমনং, অতিসীঘগমনং. ইধ আদি-সদ্দেন যদিচ্ছিতদেসন্তরং পাপুণনাদিং সঙ্গণ্হাতি.

সুৰণ্ণন্তি অধিমুচ্চনা সুৰণ্ণভাৰাধিট্ঠানং সেয্যথাপি আযস্মা পিলিন্দৰচ্ছো (পারা. ৬১৯-৬২০) তিণণ্ডুপগপাসাদাদীনং. ৰুত্তনযেনাতি সুৰণ্ণদুব্বণ্ণনযেন.

ৰণ্ণকসিণেসু তত্থ তত্থ আদি-সদ্দেন নীলোভাসনিম্মানাদীনং সঙ্গহো দট্ঠব্বো. পথৰীপব্বতাদীতি আদি-সদ্দেন সমুদ্দাদীনং সঙ্গহো দট্ঠব্বো.

সব্বানেৰ দসপি কসিণানি. ইমং পভেদং লভন্তীতি ইমং ৰড্ঢনাদিৰিসেসং পাপুণন্তি. একোতি একচ্চো. সঞ্জানাতীতি ভাৰনাপঞ্ঞায সঞ্জানাতি. আদি-সদ্দেন ‘‘আপোকসিণ’’ন্তিআদিপাল়িং সঙ্গণ্হাতি.

উপরিগগনতলাভিমুখং ‘‘পথৰীকসিণমেকো সঞ্জানাতী’’তি পাল়িপদানি আনেত্ৰা সম্বন্ধিতব্বং. তঞ্চ খো ৰড্ঢনৰসেন. তেনাহ ‘‘একচ্চো হি উদ্ধমেৰ কসিণং ৰড্ঢেতী’’তি. হেট্ঠাভূমিতলাভিমুখন্তিআদীসুপি এসেৰ নযো. পুব্বে ৰড্ঢনকালে পযোজনং অনপেক্খিত্ৰা ৰড্ঢেন্তানং ৰসেন ৰুত্তত্তা ইদানি ‘‘তেন তেন ৰা কারণেন এৰং পসারেতী’’তি আহ, কসিণং ৰড্ঢেতীতি অত্থো. যথা কিন্তি আহ ‘‘আলোকমিৰ দিব্বচক্খুনা রূপদস্সনকামো’’তি. উদ্ধঞ্চে রূপং দট্ঠুকামো উদ্ধং আলোকং পসারেতি, অধো চে রূপং দট্ঠুকামো অধো আলোকং পসারেতি, সমন্ততো চে রূপং দট্ঠুকামো সমন্ততো আলোকং পসারেতি, এৰমযং কসিণন্তি অত্থো.

একস্সাতি পথৰীকসিণাদীসু একেকস্স. অঞ্ঞভাৰানুপগমনত্থন্তি অঞ্ঞকসিণভাৰানুপগমনদীপনত্থং, ন অঞ্ঞং পথৰীআদি. ন হি উদকেন ঠিতট্ঠানে সসম্ভারপথৰী অত্থি. অঞ্ঞো কসিণসম্ভেদোতি আপোকসিণাদিনা সঙ্করো. সব্বত্থাতি সব্বেসু আপোকসিণাদীসু সেসকসিণেসু. একদেসে অট্ঠত্ৰা অনৰসেসেন ফরণপ্পমাণস্স অগ্গহণতো ফরণং অপ্পমাণং. তেনেৰ হি নেসং কসিণসমঞ্ঞা. তথা চাহ ‘‘তঞ্হী’’তিআদি. তত্থ চেতসা ফরন্তোতি ভাৰনাচিত্তেন আলম্বনং করোন্তো. ভাৰনাচিত্তঞ্হি কসিণং পরিত্তং ৰা ৰিপুলং ৰা একক্খণে সকলমেৰ মনসি করোতি, ন একদেসন্তি.

১০১. আনন্তরিযকম্মসমঙ্গিনোতি পঞ্চসু আনন্তরিযকম্মেসু যেন কেনচি সমন্নাগতা. নিযতমিচ্ছাদিট্ঠিকাতি অহেতুকদিট্ঠি অকিরিযদিট্ঠি নত্থিকদিট্ঠীতি তীসু মিচ্ছাদিট্ঠীসু যায কাযচি নিযতায মিচ্ছাদিট্ঠিযা সমন্নাগতা. উভতোব্যঞ্জনকপণ্ডকাতি উভতোব্যঞ্জনকা, পণ্ডকা চ. কামঞ্চেতে অহেতুকপটিসন্ধিকত্তা ৰিপাকাৰরণেন সমন্নাগতা হোন্তি, তথাপি তিব্বকিলেসত্তা কিলেসাৰরণেন সমন্নাগতা ৰুত্তা. অহেতুকদ্ৰিহেতুকপটিসন্ধিকাতি অহেতুকপটিসন্ধিকা, দ্ৰিহেতুকপটিসন্ধিকা চ. দুহেতুকপটিসন্ধিকানম্পি হি অরিযমগ্গপটিৰেধো, ঝানপটিলাভো চ নত্থি, তস্মা তেপি ৰিপাকাৰরণেন সমন্নাগতা এৰ.

অপচ্চনীকপটিপদাযন্তি মগ্গস্স অনুলোমপটিপদাযং সচ্চানুলোমিকাযং ৰিপস্সনাযং. অচ্ছন্দিকাতি ‘‘কত্তুকম্যতাছন্দরহিতা’’তি সম্মোহৰিনোদনিযং ৰুত্তং, তম্পি নিব্বানাধিগমত্থমেৰ কত্তুকম্যতাছন্দং সন্ধায ৰুত্তন্তি দট্ঠব্বং. উত্তরকুরুকাপি মনুস্সা মারাদযো ৰিয অচ্ছন্দিকট্ঠানং পৰিট্ঠা নিব্বুতিছন্দরহিতত্তা. দুপ্পঞ্ঞাতি ভৰঙ্গপঞ্ঞায পরিহীনা. ‘‘ভৰঙ্গপঞ্ঞায পরিপুণ্ণাযপি যস্স ভৰঙ্গং লোকুত্তরস্স পাদকং ন হোতি, সোপি দুপ্পঞ্ঞোযেৰা’’তি সম্মোহৰিনোদনিযং ৰুত্তং. যস্মিং হি ভৰঙ্গে ৰত্তমানে তংসন্ততিযং লোকুত্তরং নিব্বত্ততি, তং তস্স পাদকং নাম হোতি.

কুসলেসু ধম্মেসূতি অনৰজ্জধম্মেসু, সুখৰিপাকধম্মেসু ৰা. ওক্কমিতুন্তি অধিগন্তুং. কসিণেযেৰাতি কসিণকম্মট্ঠানেযেৰ. এতেসন্তি কম্মাৰরণসমন্নাগতাদীনং. তস্মাতি যস্মা এতে ৰিপাকন্তরাযাদযো এৰং অত্থজানিকরা, অনত্থহেতুভূতা চ, তস্মা. তিণ্ণমেৰ চেত্থ অন্তরাযানং গহণং ইতরস্স সপ্পটিকারত্তা, কম্মন্তরাযপক্খিকত্তা ৰাতি দট্ঠব্বং. সপ্পুরিসূপনিস্সযাদীহীতি আদি-সদ্দেন তজ্জং যোনিসোমনসিকারাদিং সঙ্গণ্হাতি. সদ্ধন্তি কম্মফলসদ্ধং, রতনত্তযসদ্ধঞ্চ. ছন্দন্তি ভাৰনানুযোগে তিব্বকত্তুকম্যতাসঙ্খাতং কুসলচ্ছন্দং. পঞ্ঞন্তি পারিহারিযপঞ্ঞং. ৰড্ঢেত্ৰাতি যথা ভাৰনা ইজ্ঝতি, তথা পরিব্রূহেত্ৰা. যং পনেত্থ অত্থতো ন ৰিভত্তং, তং সুৰিঞ্ঞেয্যত্তা, হেট্ঠা ৰুত্তনযত্তা চ ন ৰিভত্তং.

সেসকসিণনিদ্দেসৰণ্ণনা নিট্ঠিতা.

ইতি পঞ্চমপরিচ্ছেদৰণ্ণনা.

৬. অসুভকম্মট্ঠাননিদ্দেসৰণ্ণনা

উদ্ধুমাতকাদিপদত্থৰণ্ণনা

১০২. ‘‘অৰিঞ্ঞাণকাসুভেসূ’’তি ইদং উদ্ধুমাতকাদীনং সভাৰদস্সনৰসেন ৰুত্তং. তস্মা ভূতকথনমত্তং দট্ঠব্বং, ন সৰিঞ্ঞাণকঅসুভস্স অকম্মট্ঠানভাৰতো. তথা হি ৰক্খতি ‘‘ন কেৰলং মতসরীর’’ন্তিআদি (ৰিসুদ্ধি. ১.১২২). উদ্ধং জীৰিতপরিযাদানাতি জীৰিতক্খযতো উপরি মরণতো পরং. সমুগ্গতেনাতি উট্ঠিতেন. উদ্ধুমাতত্তাতি উদ্ধং উদ্ধং ধুমাতত্তা সূনত্তা. উদ্ধুমাতমেৰ উদ্ধুমাতকন্তি ক-কারেন পদৰড্ঢনমাহ অনত্থন্তরতো যথা ‘‘পীতকং লোহিতক’’ন্তি. পটিক্কূলত্তাতি জিগুচ্ছনীযত্তা. কুচ্ছিতং উদ্ধুমাতং উদ্ধুমাতকন্তি কুচ্ছনত্থে ৰা অযং ক-কারোতি দস্সেতুং ৰুত্তং যথা ‘‘পাপকো কিত্তিসদ্দো অব্ভুগ্গচ্ছতী’’তি (মহাৰ. ২৮৫; পরি. ৩২৫; দী. নি. ২.১৪৯; অ. নি. ৫.২১৩). তথারূপস্সাতি ‘‘ভস্তা ৰিয ৰাযুনা’’তিআদিনা যথারূপং ৰুত্তং, তথারূপস্স.

সেতরত্তেহি পরিভিন্নং ৰিমিস্সিতং নীলং ৰিনীলং, পুরিমৰণ্ণৰিপরিণামভূতং ৰা নীলং ৰিনীলং.

পরিভিন্নট্ঠানেসু কাককঙ্কাদীহি. ৰিস্সন্দমানপুব্বন্তি ৰিস্সৰন্তপুব্বং, তহং তহং পগ্ঘরন্তপুব্বন্তি অত্থো.

অপধারিতন্তি ৰিৰটং উগ্ঘাটিতং. খিত্তন্তি ছড্ডিতং, সোণসিঙ্গালাদীহি ৰিসুং কত্ৰা খাদনেন সরীরসঙ্ঘাততো লুঞ্চিত্ৰা তহং তহং ছড্ডিতং. ৰিৰিধং খিত্তন্তি ৰিক্খিত্তং.

পুরিমনযেনাতি ‘‘ৰিৰিধং খিত্ত’’ন্তিআদিনা পুব্বে ৰুত্তনযেন. সত্থেন হনিত্ৰাতি ৰেরীহি খগ্গকরৰালাদিনা সত্থেন পহরিত্ৰা. ৰুত্তনযেনাতি ‘‘অঞ্ঞেন হত্থ’’ন্তিআদিনা পুব্বে ৰুত্তনযেন.

অব্ভন্তরতো নিক্খমন্তেহি কিমীহি পগ্ঘরন্তকিমিকুলং পুল়ৰকন্তি আহ ‘‘কিমিপরিপুণ্ণস্সা’’তি.

উদ্ধুমাতকাদীনি আমকসুসানাদীসু ছড্ডিতাসুভানি. নিস্সাযাতি পটিচ্চ তানিপি আরব্ভ. নিমিত্তানন্তি উগ্গহপটিভাগনিমিত্তানং. এতানেৰ উদ্ধুমাতকাদীনেৰ নামানি.

উদ্ধুমাতককম্মট্ঠানৰণ্ণনা

১০৩. ভাৰেতুকামেনাতি উপ্পাদেতুকামেন. তেনাতি আচরিযেন. অস্সাতি যোগিনো. অসুভনিমিত্তত্থাযাতি অসুভনিমিত্তস্স উগ্গণ্হনত্থায, অসুভে ৰা উগ্গহনিমিত্তস্স অত্থায. গমনৰিধানন্তি গমনৰিধি. যেন ৰিধিনা গন্তব্বং, সো ৰিধি. উগ্গহনিমিত্তস্স উপ্পন্নকালতো পট্ঠায পথৰীকসিণে ৰুত্তং পটিপজ্জনৰিধিং সন্ধাযাহ ‘‘অপ্পনাৰিধানপরিযোসান’’ন্তি.

১০৪. তাৰদেৰাতি সুতক্খণেযেৰ. অতিত্থেন পুণ্ণনদীআদিং পক্খন্দন্তেন ৰিয অনুপৰিসন্তেন ৰিয. কেদারকোটিযাতি কেদারমরিযাদায. ৰিসভাগরূপন্তি খেত্তরক্খিকাদিৰিসভাগৰত্থুরূপং. সরীরন্তি উদ্ধুমাতককল়েৰরং. অধুনামতন্তি অচিরমতং উদ্ধুমাতকভাৰং অপ্পত্তং. তক্কযতীতি সম্ভাৰেতি ভারিযং কত্ৰা ন মঞ্ঞতি.

১০৫. রূপসদ্দাদীতি এত্থ অমনুস্সানং রূপেহি, সীহব্যগ্ঘাদীনং সদ্দাদীহি, অমনুস্সানম্পি ৰা রূপসদ্দাদীহি. তথা সীহব্যগ্ঘাদীনন্তি যথারহং যোজেতব্বং. অনিট্ঠারম্মণাভিভূতস্সাতি ভেরৰাদিভাৰেন অনিট্ঠেহি আরম্মণেহি অভিভূতস্স অজ্ঝোত্থটস্স. ন পটিসণ্ঠাতীতি ৰিদাহৰসেন আসযে ন তিট্ঠতি, উচ্ছড্ডেতব্বং হোতীতি অত্থো. অঞ্ঞোতি অমনুস্সাদীনং ৰসেন ৰা অঞ্ঞথা ৰা ৰুত্তপ্পকারতো অঞ্ঞো আবাধো হোতি. সোতি সঙ্ঘত্থেরো, অভিঞ্ঞাতভিক্খু ৰা. যস্সানেন আরোচিতং, সো. কতকম্মাতি কতথেয্যকম্মা. অকতকম্মাতি থেয্যকম্মং কাতুকামা. কতকম্মা পন ইধাধিপ্পেতা. তস্মা তেতি কতকম্মা চোরা. সহ ওড্ঢেনাতি সহোড্ঢং, থেনেত্ৰা গহিযমানভণ্ডেন সদ্ধিন্তি অত্থো. যজমানোতি যঞ্ঞং যজন্তো যঞ্ঞসামিকো. ‘‘অদ্ধা ইমায পটিপত্তিযা জরামরণতো মুচ্চিস্সামী’’তি পীতিসোমনস্সং উপ্পাদেত্ৰা.

এৰং গমনৰিধানং একদেসেন ৰত্ৰা ইদানি অট্ঠকথাসু আগতনযেন তং দস্সেতুং ‘‘অট্ঠকথাসু ৰুত্তেন ৰিধিনা’’তিআদিমাহ. তত্থ উগ্গণ্হন্তোতি উগ্গণ্হনহেতু. একোতি অযং এক-সদ্দো অসহাযত্থো, ন অঞ্ঞাদিঅত্থোতি ‘‘অদুতিযো’’তি ৰুত্তং. যথা ৰণ্ণাদিতো ৰৰত্থানং একংসতো সমুদিতমেৰ ইচ্ছিতব্বং সব্বত্থকভাৰতো, ন তথা সন্ধিআদিতোতি দস্সনত্থং ‘‘ৰণ্ণতোপী’’তিআদিনা ছসু ঠানেসু সম্পিণ্ডনত্থো পি-সদ্দো গহিতো. পুন একো অদুতিযোতিআদি গহিতনিমিত্তস্স যোগিনো নিৰত্তিত্ৰা ৰসনট্ঠানগমনং সন্ধায ৰুত্তং. তব্ভাগিযঞ্ঞেৰাতি তপ্পক্খিযংযেৰ অসুভনিমিত্তমনসিকারসহিতমেৰ. আসনং পঞ্ঞপেতীতি নিসজ্জং কপ্পেতি. যং পন ‘‘অসুভনিমিত্তদিসাভিমুখে ভূমিপ্পদেসে’’তি (ৰিসুদ্ধি. ১.১১৩) ৰক্খতি, তম্পি ইমমেৰত্থং সন্ধায ৰুত্তং. ন হি কেৰলেন দিসাভিমুখভাৰেন কিঞ্চি ইজ্ঝতি.

সমন্তা নিমিত্তুপলক্খণাতি উদ্ধুমাতকস্স সমন্তা পাসাণাদিনিমিত্তসল্লক্খণা. অসম্মোহত্থাতি উগ্গহনিমিত্তে উপট্ঠিতে উপ্পজ্জনকসম্মোহৰিগমত্থা. একাদসৰিধেনাতি ৰণ্ণাদিৰসেন একাদসৰিধেন. উপনিবন্ধনত্থোতি অসুভারম্মণে চিত্তং উপনেত্ৰা নিবন্ধনত্থো. ৰীথিসম্পটিপাদনত্থাতি কম্মট্ঠানৰীথিযা সম্মদেৰ পটিপাদনত্থা. পুঞ্ঞকিরিযৰত্থু অধিগতং হোতীতি সম্বন্ধো.

১০৬. তস্মাতি যস্মা অসুভনিমিত্তস্স উগ্গণ্হনং অরিযমগ্গপদট্ঠানস্স পঠমজ্ঝানস্স অধিগমুপাযো, যস্মা ৰা ‘‘অসুভনিমিত্তং উগ্গণ্হন্তো একো অদুতিযো গচ্ছতী’’তি ৰুত্তং, তস্মা. চিত্তসঞ্ঞত্তত্থাযাতি সরীরসভাৰসল্লক্খণেন, সংৰেগজননেন চ অত্তনো চিত্তস্স সঞ্ঞত্তিঅত্থং সঞ্ঞাপনত্থং. ‘‘চিত্তসঞ্ঞতত্থাযা’’তি ৰা পাঠো, কিলেসৰসেন অসংযতস্স চিত্তস্স সংযমনত্থং দমনত্থং, ন কম্মট্ঠানত্থন্তি অত্থো. কম্মট্ঠানসীসেনাতি কম্মট্ঠানেন সীসভূতেন, তং উত্তমঙ্গং পধানং কারণং কত্ৰা. মূলকম্মট্ঠানন্তি পকতিযা অত্তনা কালেন কালং পরিহরিযমানং বুদ্ধানুস্সতিআদিসব্বত্থককম্মট্ঠানং. ‘‘কম্মট্ঠানসীসেন গচ্ছামী’’তি তং অৰিস্সজ্জেত্ৰা. তেনাহ ‘‘তং মনসিকরোন্তেনেৰা’’তি. সূপট্ঠিতভাৰসম্পাদনেনাতি মূলকম্মট্ঠানে সুট্ঠু উপট্ঠিতভাৰস্স সম্পাদনেন. এৰং হি সতি অসম্মুট্ঠা নাম হোতি. বহিদ্ধা পুথুত্তারম্মণে অপ্পৰত্তিত্ৰা কম্মট্ঠানেযেৰ পৰত্তমানং মানসং অবহিগতং নাম. তথাভূতেন চানেন রূপিন্দ্রিযানি অপ্পৰত্তকিচ্চানি কতানি হোন্তীতি আহ ‘‘মনচ্ছট্ঠানং…পে… গন্তব্ব’’ন্তি.

দ্ৰারং সল্লক্খেতব্বন্তি ৰিহারে পুরত্থিমাদীসু দিসাসু অসুকদিসায ইদং দ্ৰারং, ততো এৰ তায দিসায সল্লক্খিতেন অসুকদ্ৰারেন নিক্খন্তোম্হীতি দ্ৰারং উপধারেতব্বং. ততোতি দ্ৰারসল্লক্খণতো পচ্ছা. যেন মগ্গেন গচ্ছতি সযং. নিমিত্তট্ঠানন্তি অসুভনিমিত্তস্স গণ্হনট্ঠানং. আহারং ছড্ডাপেয্যাতি ৰমনং কারাপেয্য. কণ্টকট্ঠানন্তি কণ্টকৰন্তং ঠানং.

১০৭. দিসা ৰৰত্থপেতব্বাতি সঙ্খেপতো ৰুত্তমত্থং ৰিৰরিতুং ‘‘একস্মিং হী’’তিআদি ৰুত্তং. খাযতীতি উপট্ঠাতি. কম্মনিযন্তি ভাৰনায কম্মক্খমং. উব্বাল়্হস্সাতি বাধিতস্স. ৰিধাৰতীতি নানারম্মণে ৰিসরতি. উক্কম্মাতি উজুকং অনুৰাততো অপক্কম্ম. মতকল়েৰরং পুথুজ্জনস্স যেভুয্যেন ভযতো উপট্ঠাতীতি আহ ‘‘অচ্চাসন্নে ভযমুপ্পজ্জতী’’তি. অনুপাদন্তি পাদসমীপং. যত্থ ঠিতস্স সুখেন ওলোকেতুং সক্কা, তং ওলোকেন্তস্স ফাসুকট্ঠানং.

১০৮. সমন্তাতি সমন্ততো. পুন সমন্তাতি সামন্তা সমীপে. কচ্ছকোতি কাল়কচ্ছকো, ‘‘পিলক্খো’’তিপি ৰদন্তি. কপীতনোতি পিপ্পলিরুক্খো. সিন্দীতি খুদ্দকখজ্জুরী. করমন্দাদযো পাকটা এৰ. সামাতি সামলতা. কাল়ৰল্লীতি কাল়ৰণ্ণা অপত্তিকা একা লতাজাতি. পূতিলতাতি জীৰনৰল্লি, যা ‘‘গলোচী’’তি ৰুচ্চতি.

১০৯. তং নিমিত্তকরণাদি ইধেৰ যথাৰুত্তে পাসাণাদিনিমিত্তকরণে এৰ অন্তোগধং পরিযাপন্নং. সনিমিত্তং করোতীতি সহ নিমিত্তং করোতি, অসুভং পাসাণাদিনিমিত্তেন সহ করোতি ৰৰত্থপেতি. অথ ৰা অসুভনিমিত্তং, পাসাণাদিনিমিত্তঞ্চ সহ একজ্ঝং করোন্তো ৰৰত্থপেন্তো ‘‘সনিমিত্তং করোতী’’তি ৰুত্তো. সমানকালতাদীপকেন হি সহ-সদ্দেন অযং সমাসো যথা ‘‘সচক্কং দেহী’’তি. তযিদং নিমিত্তকরণং অপরাপরং সল্লক্খণেন হোতি, ন একৰারমেৰাতি আহ ‘‘পুনপ্পুনং ৰৰত্থপেন্তো হি সনিমিত্তং করোতী’’তি. দ্ৰেতি পাসাণাসুভনিমিত্তানি. সমাসেত্ৰা সঙ্গহেত্ৰা একজ্ঝং কত্ৰা. সারম্মণন্তি অসুভারম্মণেন সদ্ধিং পাসাণাদিং সমানারম্মণং করোতি, সহ ৰা আরম্মণং করোতি, একারম্মণং ৰিয উভযং আরম্মণং করোতি, একজ্ঝং ৰিয চ অপরাপরং সল্লক্খেন্তো পাসাণাদিং, অসুভনিমিত্তঞ্চাতি দ্ৰযং আরম্মণং করোতীতি অত্থো.

অত্তনিযোতি সকো. ৰণিতন্তি সূনং. সভাৰেন সরসেনাতি উদ্ধুমাতকভাৰসঙ্খাতেন অত্তনো লক্খণেন, পরেসং জিগুচ্ছুপ্পাদনসঙ্খাতেন অত্তনো কিচ্চেন চ, সভাৰো এৰ ৰা তথা নিপ্ফজ্জনতো ‘‘রসো’’তি ৰুত্তো.

১১০. ছব্বিধেন নিমিত্তং গহেতব্বন্তি ৰণ্ণাদিনা ছপ্পকারেন তাৰ উদ্ধুমাতকঅসুভনিমিত্তং গহেতব্বং. কেচি ‘‘কল়েৰরস্স দীঘরস্সাদিপ্পমাণেন সদ্ধিং সত্তৰিধেনা’’তি ৰদন্তি, তং অট্ঠকথাযং নত্থি. লিঙ্গতোতি এত্থ লিঙ্গং নাম ৰযো লিঙ্গং, ন থনমস্সুআদি ইত্থিপুরিসলিঙ্গন্তি দস্সেন্তেন ‘‘ইত্থিলিঙ্গং ৰা’’তিআদি ৰুত্তং. ঠিতস্স সত্তস্স ইদং সরীরন্তি সম্বন্ধো. উদ্ধুমাতকসণ্ঠানৰসেনেৰ, ন পাকতিকসণ্ঠানৰসেন. এতেন যদি তত্থ কোচি অনুদ্ধুমাতকভাৰপ্পত্তো পদেসো সিযা, সো ন গহেতব্বোতি দস্সেতি. ওল়ারিকাৰযৰৰসেন ইদং সণ্ঠানৰৰত্থানং, ন সুখুমাৰযৰৰসেনাতি সীসসণ্ঠানাদিকং নৰৰিধমেৰ সণ্ঠানং গহিতং.

ইমিস্সা দিসাযাতি ইমিস্সা পুরত্থিমায, দক্খিণপচ্ছিমউত্তরায দিসায, অনুদিসায ৰা ঠিতোতি যোজনা. ইমস্মিং নাম ওকাসে হত্থাতি ইমস্মিং নাম ভূমিপ্পদেসে ইমস্স কল়েৰরস্স হত্থা ঠিতাতি ৰৰত্থপেতব্বন্তি যোজনা.

অধো পাদতলেনাতিআদি নাভিযা হেট্ঠা অধো, ততো উদ্ধং উপরীতি ইমস্স ৰৰত্থানস্স ৰসেন ৰুত্তং. হত্থপরিচ্ছেদো হেট্ঠা অঙ্গুলিঅগ্গেন উপরি অংসকূটসন্ধিনা তিরিযং তচপরিযন্তেন গহেতব্বো. এস নযো পাদপরিচ্ছেদাদীসুপি. যত্তকং ৰা পন ঠানং গণ্হতীতি সচে সব্বং সরীরং পরিচ্ছিন্দিত্ৰা গহেতুং ন সক্কোতি, পদেসো তস্স উদ্ধুমাতো, সো যত্তকং সরীরপ্পদেসং উদ্ধুমাতকৰসেন ঞাণেন পরিগ্গণ্হাতি, তত্তকমেৰ যথাপরিগ্গহিতমেৰ. ইদং ঈদিসন্তি ইদং হত্থাদিকং ঈদিসং এৰমাকারং. উদ্ধুমাতকন্তি যথাসভাৰতো পরিচ্ছিন্দিতব্বং. ৰিসভাগে সরীরে আরম্মণন্তি কম্মট্ঠানং পটিক্কূলাকারো ন উপট্ঠাতি ন খাযতি, সুভতো উপট্ঠহেয্য. তেনাহ ‘‘ৰিপ্ফন্দনস্সেৰ পচ্চযো হোতী’’তি, কিলেসপরিপ্ফন্দনস্সেৰ নিমিত্তং হোতীতি অত্থো. উগ্ঘাটিতাপীতি উদ্ধুমাতভাৰপ্পত্তাপি, সব্বসো কুথিতসরীরাপীতি ৰা অত্থো. স্ৰাযমত্থো পঠমপারাজিকে (পারা. ৬৭ আদযো) ৰিনীতৰত্থূহি দীপেতব্বো.

১১১. আসেৰিতকম্মট্ঠানোতি অসুভকম্মট্ঠানে কতপরিচযো. সোসানিকঙ্গাদীনং ৰসেন পরিহতধুতঙ্গো. চতুধাতুৰৰত্থানৰসেন পরিমদ্দিতমহাভূতো. সলক্খণতো ঞাণেন পরিগ্গহিতসঙ্খারো. পচ্চযপরিগ্গহৰসেন ৰৰত্থাপিতনামরূপো. সলক্খণারম্মণিকৰিপস্সনায উক্কংসনেন সুঞ্ঞতানুপস্সনাবলেন উগ্ঘাটিতসত্তসঞ্ঞো. ৰিপস্সনায পটিপদাঞাণদস্সনৰিসুদ্ধিসম্পাপনেন কতসমণধম্মো. ততো এৰ সব্বসো কুসলৰাসনায, কুসলভাৰনায চ পূরণেন ৰাসিতৰাসনো ভাৰিতভাৰনো. ৰিৰট্টূপনিস্সযকুসলবীজেন সবীজো. ঞাণস্স পরিপক্কভাৰেন ঞাণুত্তরো. যথাৰুত্তায পটিপত্তিযা কিলেসানং তনুকরণেন অপ্পকিলেসো. ওলোকিতোলোকিতট্ঠানেযেৰাতি উদ্ধুমাতকাদিঅসুভস্স যত্থ যত্থ ওলোকিতোলোকিতট্ঠানে এৰ, তাদিসস্স কালৰিসেসো, অসুভস্স পদেসৰিসেসো ৰা অপেক্খিতব্বো নত্থীতি অত্থো. নো চে এৰং উপট্ঠাতীতি এৰং যথাৰুত্তপুরিসৰিসেসস্স ৰিয পটিভাগনিমিত্তং নো চে উপট্ঠাতি. এৰং ছব্বিধেনাতি এৰং ৰুত্তাকারেন ৰণ্ণাদিৰসেন ছব্বিধেন. পুনপীতি পি-সদ্দো সম্পিণ্ডনত্থো. তেন নিমিত্তগ্গহণৰিধিং সম্পিণ্ডেতি, ন পঞ্চৰিধতং. ছব্বিধেন হি পুব্বে নিমিত্তগ্গহণং ৰিহিতং.

১১২. অসীতিসতসন্ধিতোতি সব্বেপি সন্ধযো তদাপি অত্থেৰাতি দস্সনত্থং ৰত্ৰা উদ্ধুমাতভাৰেন যেভুয্যেন ন পঞ্ঞাযন্তি. যে পন পঞ্ঞাযন্তি, তে ৰৰত্থপেতব্বাতি দস্সেতুং ‘‘উদ্ধুমাতকে পনা’’তিআদি ৰুত্তং. তত্থ তযো দক্খিণহত্থসন্ধীতি অংসকপ্পরমণিবন্ধানং ৰসেন তযো দক্খিণহত্থসন্ধযো. তথা ৰামহত্থসন্ধযো. কটিজণ্ণুগোপ্ফকানং ৰসেন তযো দক্খিণপাদসন্ধযো. তথা ৰামপাদসন্ধযো. একো কটিসন্ধীতি কটিযা সদ্ধিং পিট্ঠিকণ্টকসন্ধিং সন্ধায ৰদতি. হত্থন্তরন্তি দক্খিণহত্থদক্খিণপস্সানং, ৰামহত্থৰামপস্সানঞ্চ অন্তরং ৰিৰরং. পাদন্তরন্তি উভিন্নং পাদানং ৰেমজ্ঝং. উদরন্তরন্তি নাভিট্ঠানসঞ্ঞিতং কুচ্ছিৰেমজ্ঝং, উদরস্স ৰা অব্ভন্তরং. কণ্ণন্তরন্তি কণ্ণছিদ্দং. ইতি-সদ্দো আদিঅত্থো, তেন নাসচ্ছিদ্দাদীনম্পি সঙ্গহো দট্ঠব্বো. অক্খীনং, মুখস্স চ ৰসেনাপি ৰিৰরং লব্ভতেৰাতি দস্সেতুং ‘‘অক্খীনম্পী’’তিআদি ৰুত্তং. সমন্ততোতি এৰং সন্ধিআদিতো উদ্ধুমাতকং ৰৰত্থপেন্তস্স চে নিমিত্তং উপতিট্ঠতি, ইচ্চেতং কুসলং. নো চে, সমন্ততো ৰৰত্থপেতব্বন্তি ৰৰত্থাপনৰিধিং দস্সেতুং ‘‘সকলসরীরে’’তিআদি ৰুত্তং. তত্থ ঞাণং চারেত্ৰাতি সব্বত্থকমেৰ সরীরং আৰজ্জেত্ৰা তত্থ পটিক্কূলাকারসহিতং উদ্ধুমাতকভাৰং আরব্ভ নিরন্তরং ভাৰনাঞাণং পৰত্তেত্ৰা. যং ঠানন্তি এৰং পন ঞাণং চারেন্তস্স তস্মিং সরীরে যো পদেসো ৰিভূতো হুত্ৰা উদ্ধুমাতকাকারেন ৰিভূতভাৰেন উপট্ঠাতি. উদরপরিযোসানং উপরিমসরীরং.

ৰিনিচ্ছযকথাৰণ্ণনা

১১৩. ৰিনিচ্ছযকথাতি ৰিনিচ্ছযসহিতা অত্থৰণ্ণনা. যথাৰুত্তনিমিত্তগ্গাহৰসেনাতি ৰণ্ণাদিতো, সন্ধিআদিতো চ ৰুত্তপ্পকারউদ্ধুমাতকনিমিত্তগ্গহণৰসেন. সুট্ঠু নিমিত্তং গণ্হিতব্বন্তি যথা উগ্গহনিমিত্তং উপট্ঠহতি, এৰং সম্মদেৰ অসুভনিমিত্তং গহেতব্বং. ইদানি তমেৰ নিমিত্তস্স সুট্ঠু গহণাকারং উপদিসন্তো ‘‘সতিং সূপট্ঠিতং কত্ৰা’’তিআদিমাহ. তত্থ এৰং পুনপ্পুনং করোন্তেনাতি যথা ‘‘ইমায পটিপদায জরামরণতো মুচ্চিস্সামী’’তি সঞ্জাতাদরেন সতিসম্পজঞ্ঞঞ্চ সুট্ঠু উপট্ঠপেত্ৰা উদ্ধুমাতকঅসুভং পঠমং আৰজ্জিতং, এৰং পুনপ্পুনং তত্থ আৰজ্জনং করোন্তেন. সাধুকং উপধারেতব্বঞ্চেৰ ৰৰত্থপেতব্বঞ্চাতি সক্কচ্চং সতিযা সল্লক্খেতব্বঞ্চেৰ পঞ্ঞায নিচ্ছেতব্বঞ্চ. সতি হি ‘‘ধারণা’’তি নিদ্দিট্ঠা, ধারণঞ্চেত্থ সল্লক্খণং. পঞ্ঞা ‘‘পৰিচযো’’তি (ধ. স. ১৬) নিদ্দিট্ঠা, পৰিচযো চেত্থ নিচ্ছযোতি. অথ ৰা উপধারেতব্বন্তি সতিপুব্বঙ্গমায পঞ্ঞায উপলক্খেতব্বং. ন হি কদাচি সতিরহিতা পঞ্ঞা অত্থি. ৰৰত্থপেতব্বন্তি পঞ্ঞাপুব্বঙ্গমায সতিযা নিচ্ছিনিতব্বং. পঞ্ঞাসহিতা এৰ হি সতি ইধাধিপ্পেতা, ন তব্বিরহিতা. অদ্ধক্খিঅপঙ্গাদিৰসেনাপি ওলোকনং অত্থীতি ‘‘উম্মীলেত্ৰা ওলোকেত্ৰা’’তি ৰুত্তং. তেন পরিব্যত্তমেৰ ওলোকনং দস্সেতি. এৰং পুনপ্পুনং করোন্তস্সাতি ৰুত্তপ্পকারেন চক্খুং উম্মীলেত্ৰা ওলোকনং, নিম্মীলেত্ৰা আৰজ্জনঞ্চ অপরাপরং অনেকৰারং করোন্তস্স. উগ্গহনিমিত্তন্তি উদ্ধুমাতকে উগ্গণ্হননিমিত্তং. সুগ্গহিতন্তি সুট্ঠু গহিতং. যথা ন ৰিনস্সতি ন পমুট্ঠং হোতি, এৰং গহিতং. একসদিসন্তি সমানসদিসং. সমানত্থো হি অযং এক-সদ্দো, যথা ‘‘অরিযৰিনযেতি ৰা, সপ্পুরিসৰিনযেতি ৰা, এসেসে একে একট্ঠে সমে সমভাগে তজ্জাতে তঞ্ঞে ৰা’’তি.

আগমনকালেতি ৰিহারতো সুসানং উদ্দিস্স আগমনকালে. ৰুত্তনযেনেৰাতি অতিদেসৰসেন দীপিতম্পি অত্থং ‘‘এককেনা’’তিআদিনা সরূপতো দস্সেতি. তত্থ তদেৰ কম্মট্ঠানন্তি উদ্ধুমাতককম্মট্ঠানং. মূলকম্মট্ঠানন্তি একে, তদযুত্তং. উপট্ঠিতনিমিত্তং হি কম্মট্ঠানং ৰিস্সজ্জেত্ৰা কম্মট্ঠানন্তরমনসিকারো রঞ্ঞো রজ্জং ছড্ডেত্ৰা ৰিদেসগমনং ৰিযাতি. আগতেনাতি অত্তনো ৰসনট্ঠানং আগতেন.

১১৪. অৰেলাযন্তি সঞ্ঝাৰেলাদিঅযুত্তৰেলাযং. বীভচ্ছন্তি ৰিরূপং. ভেরৰারম্মণন্তি ৰেতাল়সদিসং ভযানকং ৰিসযং. ৰিক্খিত্তচিত্তোতি ভীরুকপুরিসো ৰিয পিসাচাদিং দিস্ৰা চিত্তৰিক্খেপং পত্তো. উম্মত্তকো ৰিযাতি যক্খুম্মত্তকো ৰিয একচ্চো হোতি. ঝানৰিব্ভন্তকোতি ঝানতো ৰিচ্চুতকো সীলৰিব্ভন্তকমন্তৰিব্ভন্তকা ৰিয. সন্থম্ভেত্ৰাতি উপ্পন্নপরিত্তাসৰূপসমনেন ৰিগতকম্পতায নিচ্চলো হুত্ৰা. সতিং সূপট্ঠিতন্তিআদি সন্থম্ভনস্স উপাযদস্সনং. মতসরীরং উট্ঠহিত্ৰা অনুবন্ধনকং নাম নত্থি অসতি তাদিসে মন্তপ্পযোগে. সোপি উদ্ধুমাতকাদিভাৰমপ্পত্তে অৰিনট্ঠরূপে এৰ ইজ্ঝতি, তথা দেৰতাধিগ্গহো, ন এৰরূপেতি অধিপ্পাযো. সঞ্ঞজোতি ভাৰনাপরিকপ্পসঞ্ঞায জাতো. ততো এৰ সঞ্ঞাসম্ভৰো সঞ্ঞামত্তসমুট্ঠানো. তাসং ৰিনোদেত্ৰাতি নিমিত্তুপট্ঠাননিমিত্তং উপ্পন্নচিত্তসন্তাসং ৰুত্তপ্পকারেন ৰিনোদেত্ৰা ৰূপসমেত্ৰা. ‘‘ইদানি তৰ পরিস্সমো সপ্ফলো জাতো’’তি হাসং পীতিং পমোদনং উপ্পাদেত্ৰা. চিত্তং সঞ্চরাপেতব্বন্তি ভাৰনাচিত্তং পৰত্তেতব্বং মনসিকাতব্বং.

নিমিত্তগ্গাহন্তি নিমিত্তস্স উগ্গণ্হনং, উগ্গহনিমিত্তং. সম্পাদেন্তোতি সাধেন্তো নিপ্ফাদেন্তো. কম্মট্ঠানং উপনিবন্ধতীতি ভাৰনং যথাৰুত্তে নিমিত্তে উপনেন্তো নিবন্ধতি. যোগকম্মং হি যোগিনো সুখৰিসেসানং কারণভাৰতো ‘‘কম্মট্ঠান’’ন্তি অধিপ্পেতং, যোগকম্মস্স ৰা পৰত্তিট্ঠানতায যথাউপট্ঠিতনিমিত্তং কম্মট্ঠানং, তং ভাৰনাচিত্তে উপনিবন্ধতি. তং পনস্স উপনিবন্ধনং সন্ধায চিত্তং সঞ্চরাপেতব্বং. এৰং ‘‘ৰিসেসমধিগচ্ছতী’’তি ৰুত্তন্তি দস্সেন্তো ‘‘তস্স হী’’তিআদিমাহ. তত্থ তস্সাতি যোগিনো, তস্স ৰা উদ্ধুমাতকাসুভস্স. মানসং চারেন্তস্সাতি ভাৰনাচিত্তং অপরাপরং পৰত্তেন্তস্স, উগ্গহনিমিত্তং পুনপ্পুনং মনসি করোন্তস্সাতি অত্থো.

১১৫. ‘‘ৰীথিসম্পটিপাদনত্থা’’তি পদস্স ‘‘কম্মট্ঠানৰীথিযা সম্পটিপাদনত্থা’’তি অত্থং ৰত্ৰা তং পন কম্মট্ঠানৰীথিং, তস্সা চ সম্পটিপাদনৰিধিং ৰিত্থারতো দস্সেতুং ‘‘সচে হী’’তিআদি ৰুত্তং. তত্থ কতিমীতি পক্খস্স কতমী, কিং দুতিযা, ততিযাদীসু ৰা অঞ্ঞতরাতি অত্থো. তুণ্হীভূতেন গন্তুং ন ৰট্টতি পুচ্ছন্তানং চিত্তস্স অঞ্ঞথত্তপরিহরণত্থং. অপ্পসন্নানঞ্হি পসাদায, পসন্নানঞ্চ ভিয্যোভাৰায সাসনসম্পটিপত্তি. নস্সতীতি ন দিস্সতি, ন উপট্ঠাতীতি অত্থো. ‘‘আগন্তুকপটিসন্থারো কাতব্বো’’তি ইমিনা আগন্তুকৰত্তং একদেসেন দস্সিতন্তি ‘‘অৰসেসানিপী’’তি ৰত্ৰা আগন্তুকৰত্তং পরিপুণ্ণং গহেতুং পুন আগন্তুকগ্গহণং কতং. গমিকৰত্তাদীনীতি আদি-সদ্দেন আৰাসিকঅনুমোদনপিণ্ডচারিকঅনুমোদনপিণ্ডচারিকআরঞ্ঞিকসেনাসনৰচ্চকুটিৰত্তাদীনং সঙ্গহো দট্ঠব্বো. ৰত্তক্খন্ধকে (চূল়ৰ. ৩৫৬) হি আগতানি মহাৰত্তানি ইধ ‘‘খন্ধকৰত্তানী’’তি ৰুত্তানি. তজ্জনীযকম্মকতাদিকালে পন পারিৰাসিকাদিকালে চ চরিতব্বানি ইমস্স ভিক্খুনো অসম্ভৰতো ইধ নাধিপ্পেতানি. নিমিত্তং ৰা অন্তরধাযতীতি সুসানে ঠিতং অসুভনিমিত্তং উদ্ধুমাতকভাৰাপগমেন অন্তরধাযতি. তেনাহ ‘‘উদ্ধুমাতক’’ন্তিআদি. তস্মাতি তেন কারণেন, ইমস্স কম্মট্ঠানস্স দুল্লভত্তাতি অত্থো. নিসীদিত্ৰা পচ্চৰেক্খিতব্বোতি সম্বন্ধো.

নিমিত্তং গহেতুং গমনে ৰিয নিমিত্তং গহেত্ৰা নিৰত্তনেপি যথাসল্লক্খিতদিসাদিপচ্চৰেক্খণং যাৰ নিমিত্তৰিনাসা পৰত্তিতকিরিযায অৰিচ্ছেদেন উপধারণত্থং. সতি হি তস্স নিরন্তরূপধারণে ৰিহারং পৰিসিত্ৰা নিসিন্নকালে কম্মট্ঠানস্স উপট্ঠিতাকারো সমথনিমিত্তস্স গহণে চিত্তস্স সমাহিতাকারো ৰিয পাকটো হুত্ৰা উপতিট্ঠেয্যাতি. তেনাহ ‘‘তস্সেৰং…পে… ৰীথিং পটিপজ্জতী’’তি. পুরিমাকারেন নিমিত্তস্স পাকটভাৰেন উপট্ঠিতত্তা পুরিমাকারেনেৰ কম্মট্ঠানমনসিকারো ভাৰনাৰীথিং পটিপজ্জতি.

১১৬. উদ্ধুমাতকং নাম অতিৰিয অসুচিদুগ্গন্ধজেগুচ্ছপটিক্কূলং বীভচ্ছং ভযানকঞ্চ, এৰরূপে আরম্মণে ভাৰনমনুযুঞ্জন্তস্স এৰং আবদ্ধপরিকম্মস্স থিরীভূতস্সেৰ যোগিনো অধিপ্পাযো সমিজ্ঝতীতি দস্সেতুং ‘‘আনিসংসদস্সাৰী’’তিআদি ৰুত্তং. এৰন্তি এৰমেৰ ৰুত্তপ্পকারেনেৰ আনিসংসদস্সাৰিনা. তং রক্খেয্যাতি ‘‘অদ্ধা ইমিনা সুখং জীৰিস্সামী’’তি অত্তনো জীৰিতং ৰিয তং মণিরতনং রক্খেয্য. চতুধাতুকম্মট্ঠানিকোতিআদি নেসং কম্মট্ঠানানং সুলভতাদস্সনং. তত্থ চতুধাতুকম্মট্ঠানিকোতি চতুধাতুকম্মট্ঠানং ৰা তত্থ ৰা নিযুত্তো, চতুধাতুকম্মট্ঠানং ৰা পরিহরন্তো. ইতরানীতি ৰুত্তাৰসিট্ঠানি অনুস্সতিব্রহ্মৰিহারাদীনি. তং নিমিত্তন্তি তং যথালদ্ধং উগ্গহনিমিত্তং. ‘‘রক্খিতব্ব’’ন্তি ৰত্ৰা রক্খণৰিধিং পুন দস্সেতুং ‘‘রত্তিট্ঠানে’’তিআদি ৰুত্তং.

১১৭. নানা করীযতি এতেনাতি নানাকরণং, ভেদো. বীভচ্ছং ভেরৰদস্সনং হুত্ৰা উপট্ঠাতি মনসিকারস্স অনুল়ারতায, অনুপসন্ততায চ আরম্মণস্স. তব্বিপরিযাযতো ‘‘পটিভাগনিমিত্তং থূলঙ্গপচ্চঙ্গপুরিসো ৰিয উপট্ঠাতী’’তি আনেত্ৰা সম্বন্ধিতব্বং. বহিদ্ধাতি গোচরজ্ঝত্ততো বহিদ্ধা. কামানং অমনসিকারাতি অসুভভাৰনানুভাৰেন কামসঞ্ঞায দূরসমুস্সারিতত্তা কামগুণে আরব্ভ মনসিকারস্সেৰ অভাৰা. অমনসিকারাতি ৰা মনসিকারপটিপক্খহেতু. যায হি কামসঞ্ঞায ৰসেন সত্তা কামে মনসি করোন্তি, তস্সা পটিপক্খভূতা অসুভসঞ্ঞা কামানং অমনসিকারো, তন্নিমিত্তন্তি অত্থো. তেনাহ ‘‘ৰিক্খম্ভনৰসেন কামচ্ছন্দো পহীযতী’’তি. পটিভাগনিমিত্তারম্মণায হি অসুভসঞ্ঞায সদ্ধিং বলপ্পত্তো সমাধি উপ্পজ্জমানোৰ কামচ্ছন্দং ৰিক্খম্ভেতি, অনুরোধমূলকো আঘাতো মূলকারণে ৰিক্খম্ভিতে ৰিক্খম্ভিতোযেৰ হোতীতি আহ ‘‘অনুনয…পে… পহীযতী’’তি. ন হি কদাচি পহীনানুনযস্স ব্যাপাদো সম্ভৰতি. যথাৰুত্তঅসুভসঞ্ঞাসহগতা হি পীতি সাতিসযা পৰত্তমানাৰ ব্যাপাদং ৰিক্খম্ভেন্তী পৰত্ততি. তথা আরদ্ধৰীরিযতাযাতি যথা উপচারজ্ঝানং উপ্পজ্জতি, তথা কম্মট্ঠানমনসিকারৰসেন পগ্গহিতৰীরিযতায. ৰীরিযঞ্হি পগ্গণ্হন্তস্স সম্মাসঙ্কপ্পো মিচ্ছাসঙ্কপ্পং ৰিয সৰিপ্ফারতায থিনমিদ্ধং ৰিক্খম্ভেন্তমেৰ উপ্পজ্জতি.

ৰিপ্পটিসারো পচ্ছানুতাপো, তপ্পটিপক্খতো অৰিপ্পটিসারো দরথপরিল়াহাভাৰেন চিত্তস্স নিব্বুততা. তস্স অৰিপ্পটিসারস্স পচ্চযভূতং সীলং, তংসহগতা তদুপনিস্সযা চ পীতিপস্সদ্ধিসুখাদযো সভাৰতো, হেতুতো চ সন্তসভাৰা, তেসং অনুযুঞ্জনেন অৰূপসন্তসভাৰং উদ্ধচ্চকুক্কুচ্চং পহীযতীতি আহ ‘‘অৰিপ্পটিসারকরসন্তধম্মানুযোগৰসেন উদ্ধচ্চকুক্কুচ্চং পহীযতী’’তি. ভাৰনায হি পুব্বেনাপরং ৰিসেসং আৰহন্তিযা যং সাতিসযং সুখং লব্ভতি, তং অনুপসন্তসভাৰং উদ্ধচ্চকুক্কুচ্চং ৰিক্খম্ভেন্তমেৰ উপ্পজ্জতি. অধিগতৰিসেসস্সাতি যথাধিগতস্স ভাৰনাৰিসেসস্স. পচ্চক্খতাযাতি পটিপজ্জন্তস্স যোগিনো পচ্চক্খভাৰতো ‘‘সম্মাসম্বুদ্ধো ৰত সো ভগৰা, যো এৰরূপিং সম্মাপটিপত্তিং দেসেতী’’তি পটিপত্তিদেসকে সত্থরি. পটিপত্তিযন্তি পটিপজ্জমানজ্ঝানপটিপত্তিযং. পটিপত্তিফলেতি তায সাধেতব্বে লোকিযলোকুত্তরফলে. ৰিচিকিচ্ছা পহীযতি ধম্মন্ৰযৰিচারাহিতবলেন ৰিচারবলেন. ইতি পঞ্চ নীৰরণানি পহীযন্তীতি এৰং পটিভাগনিমিত্তপটিলাভসমকালমেৰ হেট্ঠা পৰত্তভাৰনানুভাৰনিপ্ফন্নেহি সমাধিআদীহি কামচ্ছন্দাদীনি পঞ্চ নীৰরণানি ৰিক্খম্ভনৰসেন পহীযন্তি. ন হি পটিপক্খেন ৰিনা পহাতব্বস্স পহানং সম্ভৰতি, পটিপক্খা চ সমাধিআদযো কামচ্ছন্দাদীনং. যথাহ পেটকে ‘‘সমাধি কামচ্ছন্দস্স পটিপক্খো’’তিআদি.

তেনেৰ চ ‘‘ইমেহি তেসং নীৰরণানং পহান’’ন্তি পহানপরিদীপনমুখেন ঝানঙ্গানি সরূপতো দস্সেতুং ‘‘তস্মিঞ্ঞেৰ চা’’তিআদি ৰুত্তং. তত্থ তস্মিঞ্ঞেৰ চাতি যং তং যথাউপট্ঠিতং উগ্গহনিমিত্তং ভিন্দিত্ৰা ৰিয উপট্ঠিতং, তস্স পটিচ্ছন্নভূতং পটিভাগনিমিত্তং, তস্মিঞ্ঞেৰ নিমিত্তে. চেতসোতি অত্তনা সম্পযুত্তচিত্তস্স. অভিনিরোপনলক্খণোতি আরোপনলক্খণো, অপ্পনাসভাৰোতি অত্থো. নিমিত্তানুমজ্জনং পটিভাগনিমিত্তে অনুৰিচরণং. আরম্মণে হি ভমরস্স পদুমস্সূপরি অনুপরিব্ভমনং ৰিয ৰিচারস্স অনুৰিচারণাকারেন পৰত্তি অনুমজ্জনকিচ্চং. ৰিসেসো এৰ অধিগন্তব্বতো ৰিসেসাধিগমো, পটিলদ্ধো চ সো ৰিসেসাধিগমো চাতি পটি…পে… গমো, তপ্পচ্চযা তংহেতুকা পটিলদ্ধৰিসেসাধিগমপচ্চযা পীতি. পীতিমনস্স পীতিসহিতচিত্তস্স. পস্সদ্ধিসম্ভৰতোতি কাযচিত্তপস্সদ্ধীনং সংসিজ্ঝনতো. ‘‘পীতিমনস্স কাযো পস্সম্ভতী’’তি হি ৰুত্তং. পস্সদ্ধিনিমিত্তং পস্সদ্ধিহেতুকং সুখং ‘‘পস্সদ্ধকাযো সুখং ৰেদিযতী’’তি ৰচনতো. সুখনিমিত্তা সুখপচ্চযা একগ্গতা. ‘‘সুখিনো চিত্তং সমাধিযতী’’তি (দী. নি. ১.৪৬৬; অ. নি. ৩.৯৬; ১১.১২) হি ৰুত্তং. ইতি ঝানঙ্গানি পাতুভৰন্তীতি এৰং এতানি ৰিতক্কাদীনি ঝানঙ্গানি তস্মিংযেৰ নিমিত্তে উপ্পজ্জন্তি. পঠমজ্ঝানপটিবিম্বভূতন্তি পঠমজ্ঝানস্স পটিচ্ছন্নভূতং. তঙ্খণঞ্ঞেৰ পটিভাগনিমিত্তপটিলাভসমকালমেৰ উপচারজ্ঝানম্পি নিব্বত্ততি, ন নীৰরণপ্পহানমেৰাতি অধিপ্পাযো.

ৰিনীলকাদিকম্মট্ঠানৰণ্ণনা

১১৮. ৰিনীলকাদীসুপি কম্মট্ঠানেসু. লক্খণং ৰুত্তন্তি যং তং নিমিত্তগ্গহণলক্খণং ৰুত্তং. ৰুত্তনযেনেৰাতি উদ্ধুমাতকে ৰুত্তনযেনেৰ. সহ ৰিনিচ্ছযেন, অধিপ্পাযেন চাতি সৰিনিচ্ছযাধিপ্পাযং. তং সব্বং লক্খণং ৰেদিতব্বন্তি সম্বন্ধো.

কবরকবরৰণ্ণন্তি যেভুয্যেন সবলৰণ্ণং. উস্সদৰসেনাতি রত্তসেতনীলৰণ্ণেসু উস্সদস্স ৰণ্ণস্স ৰসেন.

সন্নিসিন্নন্তি নিচ্চলভাৰেনেৰ সব্বসো থিরতং.

চোরাটৰিযন্তি চোরেহি পরিযুট্ঠিতঅরঞ্ঞে. যত্থাতি যস্মিং আঘাতনে. ছিন্নপুরিসট্ঠানেতি ছিন্নপুরিসৰন্তে ঠানে. নানাদিসাযং পতিতম্পীতি ছিন্নং হুত্ৰা সরীরস্স খণ্ডদ্ৰযং ৰিসুং দিসাসু পতিতম্পি. একাৰজ্জনেনাতি একসমন্নাহারেন. আপাথমাগচ্ছতীতি একজ্ঝং আপাথং আগচ্ছতি. ৰিস্সাসং আপজ্জতীতি অজেগুচ্ছিতং উপগচ্ছেয্য সেয্যথাপি ছৰডাহকো. সহত্থা অপরামসনে জিগুচ্ছা সণ্ঠাতিযেৰাতি আহ ‘‘কত্তরযট্ঠিযা ৰা দণ্ডকেন ৰা…পে… উপনামেতব্ব’’ন্তি. ৰিচ্ছিদ্দকভাৰপঞ্ঞাযনত্থং একঙ্গুলন্তরকরণং. উপনামেতব্বন্তি উপনেতব্বং.

খাযিতসদিসমেৰাতি খাযিতাসুভসদিসমেৰ. অঙ্গুলঙ্গুলন্তরন্তি ৰিৰিধং খিত্তং সরীরাৰযৰং অঙ্গুলন্তরং অঙ্গুলন্তরং. কত্ৰা ৰাতি কত্তরযট্ঠিযা ৰা দণ্ডকেন ৰা সযং কত্ৰা ৰা.

লদ্ধপ্পহারানন্তি লদ্ধাৰুধপ্পহারানং মুখতোতি সম্বন্ধো. মুখতোতি পহারাদিমুখতো. পগ্ঘরমানকালেতি লোহিতং পগ্ঘরমানকালে. লোহিতকং লব্ভতীতি যোজনা.

তন্তি পুল়ৰকং. তেসূতি সোণাদিসরীরেসু. অট্ঠিকন্তি অট্ঠিকঅসুভং নানপ্পকারতো ৰুত্তন্তি সম্বন্ধো. পুরিমনযেনেৰাতি পুব্বে উদ্ধুমাতকে ৰুত্তনযেনেৰ.

১১৯. তন্তি অট্ঠিকং. ন উপট্ঠাতীতি সভাৰতো ন উপট্ঠাতি, পটিক্কূলৰসেন ন উপট্ঠাতীতি অত্থো. তেনাহ ‘‘ওদাতকসিণসম্ভেদো হোতী’’তি. অট্ঠিকে পঠমৰযাদিসংলক্খণং ন সক্কাতি ‘‘লিঙ্গন্তি ইধ হত্থাদীনং নাম’’ন্তি ৰুত্তং. অট্ঠিকসঙ্খলিকা পন ‘‘অযং দহরস্স, অযং যোব্বনে ঠিতস্স, অযং অৰযৰেহি ৰুদ্ধিপত্তিস্সা’’তি এৰং ৰযৰসেন ৰৰত্থপেতুং সক্কুণেয্যাৰ, অব্যাপিতায পন ন গহিতন্তি ৰেদিতব্বং. যদিপি অট্ঠিকসঙ্খলিকাযং সন্ধিতো ৰৰত্থাপনং লব্ভতি, অট্ঠিকে পন ন লব্ভতীতি তস্স অনিযতভাৰদীপনত্থং কমৰিলঙ্ঘনং কত্ৰা ‘‘তস্স তস্স অট্ঠিনো নিন্নট্ঠানথলট্ঠানৰসেনা’’তিআদি ৰুত্তং. তত্থ নিন্নট্ঠানং নাম অট্ঠিনো ৰিনতপ্পদেসো. থলট্ঠানং উন্নতপ্পদেসো. ঘটিতঘটিতট্ঠানৰসেনাতি অনুপগতন্হারুবন্ধানং, ইতরেসঞ্চ অঞ্ঞমঞ্ঞং সংকিলিট্ঠসংকিলিট্ঠট্ঠানৰসেন. অন্তরৰসেনাতি অঞ্ঞমঞ্ঞস্স অন্তরৰসেন, সুসিরৰসেন চ. সব্বত্থেৰাতি সকলায অট্ঠিসঙ্খলিকায, সব্বস্মিং ৰা অট্ঠিকে.

১২০. এত্থাতি এতস্মিং অট্ঠিকাসুভে. যুজ্জমানৰসেন সল্লক্খেতব্বন্তি যং নিমিত্তগ্গহণং যত্থ যুজ্জতি, তং তত্থ উগ্গণ্হনত্থং নিমিত্তগ্গহণৰসেন উপলক্খেতব্বং. সকলাযাতি অনৰসেসভাগায পরিপুণ্ণাৰযৰায. সম্পজ্জতি নিমিত্তুপট্ঠানৰসেন. তেসূতি অট্ঠিকসঙ্খলিকট্ঠিকেসু. ৰুত্তং অট্ঠকথাযং. তন্তি ‘‘একসদিসমেৰা’’তি ৰচনং. একস্মিং অট্ঠিকে যুত্তন্তি ইদং যথা ৰিনীলকাদীসু উভিন্নং নিমিত্তানং যথারহং ৰণ্ণৰিসেসতো, পরিপুণ্ণাপরিপুণ্ণতো, সৰিৰরাৰিৰরতো, চলাচলতো চ ৰিসেসো লব্ভতি, ন এৰমেতস্সাতি কত্ৰা ৰুত্তং, ন পন সব্বেন সব্বং ৰিসেসাভাৰতো. তেনেৰাহ ‘‘একট্ঠিকেপি চা’’তিআদি. তত্থ বীভচ্ছেনাতি সুৰিভূতঅট্ঠিরূপত্তা অট্ঠিভাৰেনেৰ ৰিরূপেন. ভযানকেনাতি তেনেৰ পাকতিকসত্তানং ভযাৰহেন. পীতিসোমনস্সজনকেনাতি সণ্হমট্ঠভাৰেন উপট্ঠানতো, ভাৰনায চ সৰিসেসত্তা পীতিযা, সোমনস্সস্স চ উপ্পাদকেন. তেনেৰাহ ‘‘উপচারাৰহত্তা’’তি.

ইমস্মিং ওকাসেতি উগ্গহপটিভাগনিমিত্তানং ৰুত্তট্ঠানে. দ্ৰারং দত্ৰা ৰাতি ‘‘পটিক্কূলভাৰেযেৰ দিট্ঠে নিমিত্তং নাম হোতী’’তি এত্তকে এৰ অট্ঠত্ৰা অনন্তরমেৰ ‘‘দুৰিধং ইধ নিমিত্ত’’ন্তিআদিনা উগ্গহপটিভাগনিমিত্তানি ৰিভজিত্ৰা ৰচনেন যথাৰুত্তস্স নিমিত্তৰিভাগস্স দ্ৰারং দত্ৰাৰ ৰুত্তং. নিব্বিকপ্পন্তি ‘‘সুভ’’ন্তি ৰিকপ্পেন নিব্বিকপ্পং, অসুভন্ত্ৰেৰাতি অত্থো. ৰিচারেত্ৰাতি ‘‘একস্মিং অট্ঠিকে যুত্ত’’ন্তিআদিনা ৰিচারেত্ৰা.

মহাতিস্সত্থেরস্সাতি চেতিযপব্বতৰাসীমহাতিস্সত্থেরস্স. নিদস্সনানীতি দন্তট্ঠিকমত্তদস্সনেন সকলস্সাপি তস্সা ইত্থিযা সরীরস্স অট্ঠিসঙ্ঘাতভাৰেন উপট্ঠানাদীনি এত্থ অট্ঠিককম্মট্ঠানে উগ্গহপটিভাগনিমিত্তানং ৰিসেসৰিভাৰনানি উদাহরণানি.

সুভগুণোতি সৰাসনানং কিলেসানং পহীনত্তা সুপরিসুদ্ধগুণো. দসসতলোচনেনাতি সহস্সক্খেন দেৰানমিন্দেন. সো হি একাসনেনেৰ সহস্সঅত্থানং ৰিচারণসমত্থেন পঞ্ঞাচক্খুনা সমন্নাগতত্তা ‘‘সহস্সক্খো’’তি ৰুচ্চতি. থুতকিত্তীতি ‘‘যো ধীরো সব্বধি দন্তো’’তিআদিনা (মহাৰ. ৫৮) অভিত্থুতকিত্তিসদ্দো.

পকিণ্ণককথাৰণ্ণনা

১২১. উজুপটিপক্খেন পহীনভাৰং সন্ধাযাহ ‘‘সুৰিক্খম্ভিতরাগত্তা’’তি. অসুভপ্পভেদোতি উদ্ধুমাতকাদিঅসুভৰিভাগো. সরীরসভাৰপ্পত্তিৰসেনাতি সরীরস্স অত্তনো সভাৰূপগমনৰসেন. সরীরঞ্হি ৰিনস্সমানং অঞ্ঞরূপেন ঠিতস্স রক্খসস্স ৰিয সভাৰপ্পত্তিৰসেনেৰ ৰিনস্সতি. রাগচরিতভেদৰসেনাতি রাগচরিতৰিভাগৰসেন. যদি সরীরসভাৰপ্পত্তিৰসেন অযমসুভপ্পভেদো ৰুত্তো, মহাসতিপট্ঠানাদীসু (দী. নি. ২.৩৭২ আদযো; ম. নি. ১.১০৫ আদযো) কথং নৰপ্পভেদোতি? সো সরসতো এৰ সভাৰপ্পত্তিৰসেন ৰুত্তো, অযং পন পরূপক্কমেনাপি. তত্থ চ ইধাগতেসু দসসু অসুভেসু একচ্চানেৰ গহিতানি, অট্ঠিকঞ্চ পঞ্চৰিধা ৰিভত্তং. তানি চ ৰিপস্সনাৰসেন, ইমানি সমথৰসেনাতি পাকটোযং ভেদোতি.

ইমেসং পন দস্সনম্পি অসুভভাৰসামঞ্ঞেন সতিপি অৰিসেসতো রাগচরিতানং সপ্পাযভাৰে যং ৰুত্তং ‘‘রাগচরিতভেদৰসেন চা’’তি, তং ৰিভজিত্ৰা দস্সেতুং ‘‘ৰিসেসতো’’তিআদি ৰুত্তং. সূনভাৰেন সুসণ্ঠিতম্পি সরীরং দুস্সণ্ঠিতমেৰ হোতীতি উদ্ধুমাতকসরীরে সণ্ঠানৰিপত্তিং দীপেতীতি আহ ‘‘সরীরসণ্ঠানৰিপত্তিপ্পকাসনতো’’তি. সণ্ঠানসম্পত্তিযং রত্তো সণ্ঠানরাগী, তস্স সপ্পাযং সণ্ঠানরাগস্স ৰিক্খম্ভনুপাযভাৰতো. কাযো এৰ কাযৰণো, তত্থ পটিবদ্ধস্স নিস্সিতস্স. সুসিরভাৰপ্পকাসনতোতি সুসিরস্স ৰিৰরস্স অত্থিভাৰপ্পকাসনতো. সরীরে ঘনভাৰরাগিনোতি সরীরে অঙ্গপচ্চঙ্গানং থিরভাৰং পটিচ্চ উপ্পজ্জনকরাগৰতো. ৰিক্খেপপ্পকাসনতোতি সোণসিঙ্গালাদীহি ইতো চিতো চ ৰিক্খেপস্স পকাসনতো অঙ্গপচ্চঙ্গলীলারাগিনো সপ্পাযং. ঈদিসানং কির অনৰট্ঠিতরূপানং অৰযৰানং কো লীল়াৰিলাসোতি ৰিরাগসম্ভৰতো. সঙ্ঘাতভেদৰিকারপ্পকাসনতোতি সঙ্ঘাতস্স অঙ্গপচ্চঙ্গানং সংহতভাৰস্স সুসম্বন্ধতায ভেদো এৰ ৰিকারো সঙ্ঘাতভেদৰিকারো, তস্স পকাসনতো. লোহিতং মক্খিতং হুত্ৰা পটিক্কূলভাৰো লোহিতমক্খিতপটিক্কূলভাৰো, তস্স পকাসনতো. মমত্তরাগিনোতি ‘‘মম অয’’ন্তি উপ্পজ্জনকরাগৰতো. দন্তসম্পত্তিরাগিনোতি দন্তসম্পত্তিযং রজ্জনসীলস্স.

কস্মা পনেত্থ উদ্ধুমাতকাদিকে পঠমজ্ঝানমেৰ উপ্পজ্জতি, ন দুতিযাদীনীতি অনুযোগং মনসি কত্ৰা আহ ‘‘যস্মা পনা’’তিআদি. অপরিসণ্ঠিতজলাযাতি সোতৰসেন পৰত্তিযা সমন্ততো অট্ঠিতজলায অসন্নিসিন্নসলিলায. অরিত্তবলেনাতি পাজনদণ্ডবলেন. দুব্বলত্তা আরম্মণস্সাতি পটিক্কূলভাৰেন অত্তনি চিত্তং ঠপেতুং অসমত্থভাৰো আরম্মণস্স দুব্বলতা. পটিক্কূলে হি আরম্মণে সরসতো চিত্তং পৰত্তিতুং ন সক্কোতি, অভিনিরোপনলক্খণেন পন ৰিতক্কেন অভিনিরোপিযমানমেৰ চিত্তং একগ্গতং লভতি. ন ৰিনা ৰিতক্কেনাতি ৰিতক্করহিতানি দুতিযাদিজ্ঝানানি তত্থ পতিট্ঠং ন লভন্তি. তেনাহ ‘‘ৰিতক্কবলেনেৰা’’তিআদি.

যদি পটিক্কূলভাৰতো উদ্ধুমাতাদিআরম্মণে দুতিযাদিজ্ঝানানি ন পৰত্তন্তি, এৰং সন্তে পঠমজ্ঝানেনাপি তত্থ ন উপ্পজ্জিতব্বং. ন হি তত্থ পীতিসোমনস্সানং সম্ভৰো যুত্তোতি চোদনং সন্ধাযাহ ‘‘পটিক্কূলেপি চ এতস্মি’’ন্তিআদি. তত্থ আনিসংসদস্সাৰিতানীৰরণসন্তাপরোগৰূপসমানং যথাক্কমং পুপ্ফচ্ছড্ডক, ৰমনৰিরেচনউপমা যোজেতব্বা.

১২২. যথাৰুত্তকারণেন দসধা ৰৰত্থিতম্পি সভাৰতো একৰিধমেৰাতি দস্সেতুং ‘‘দসৰিধম্পি চেত’’ন্তিআদিং ৰত্ৰা স্ৰাযং সভাৰো যথা অৰিঞ্ঞাণকেসু, এৰং সৰিঞ্ঞাণকেসুপি লব্ভতেৰ. তস্মা তত্থাপি যোনিসোমনসিকারৰতো ভাৰনা ইজ্ঝতেৰাতি দস্সেন্তো ‘‘তদেতং ইমিনা লক্খণেনা’’তিআদিমাহ. এত্থাতি এতস্মিং জীৰমানকসরীরে. অলঙ্কারেনাতি পটিজগ্গনপুব্বকেন অলঙ্করণেন. ন পঞ্ঞাযতি পচুরজনস্সাতি অধিপ্পাযো. অতিরেকতিসতঅট্ঠিকসমুস্সযং দন্তট্ঠিকেহি সদ্ধিং, তেহি পন ৰিনা ‘‘তিমত্তানি অট্ঠিসতানী’’তি (ৰিসুদ্ধি. ১.১৯০) কাযগতাসতিযং ৰক্খতি. ছিদ্দাৰছিদ্দন্তি খুদ্দানুখুদ্দছিদ্দৰন্তং. মেদকথালিকা মেদভরিতভাজনং. নিচ্চুগ্ঘরিতপগ্ঘরিতন্তি নিচ্চকালং উপরি, হেট্ঠা চ ৰিস্সৰন্তং. ৰেমত্তন্তি নানত্তং. নানাৰত্থেহীতি নানাৰণ্ণেহি ৰত্থেহি. হিরিযা লজ্জায কোপনতো ৰিনাসনতো হিরিকোপিনং, উচ্চারপস্সাৰমগ্গং. যাথাৰসরসন্তি যথাভূতং সভাৰং. যাথাৰতো রসীযতি ঞাযতীতি হি রসো, সভাৰো. রতিন্তি অভিরতিং অভিরুচিং. অত্তসিনেহসঙ্খাতেন রাগেন রত্তা অত্তসিনেহরাগরত্তা. ৰিহঞ্ঞমানেনাতি ইচ্ছিতালাভেন ৰিঘাতং আপজ্জন্তেন.

কিংসুকন্তি পালিভদ্দকং, পলাসোতি কেচি, সিম্বলীতি অপরে. অতিলোলুপোতি অতিৰিয লোলসভাৰো. অদুন্তি এতং. নন্তি কেসাদিসরীরকোট্ঠাসং. মুচ্ছিতাতি মোহিতা, মুচ্ছাপাপিকায ৰা তণ্হায ৰসেন মুচ্ছং পত্তা. সভাৰন্তি পটিক্কূলভাৰং.

উক্করূপমোতি উচ্চারপস্সাৰট্ঠানসমো, ৰচ্চকূপসমো ৰা. চক্খুভূতেহীতি চক্খুং পত্তেহি পটিলদ্ধপঞ্ঞাচক্খুকেহি, লোকস্স ৰা চক্খুভূতেহি. অল্লচম্মপটিচ্ছন্নোতি অল্লচম্মপরিযোনদ্ধো.

দব্বজাতিকেনাতি উত্তরিমনুস্সধম্মে পটিলদ্ধুং ভব্বরূপেন. যত্থ যত্থ সরীরে, সরীরস্স ৰা যত্থ যত্থ কোট্ঠাসে. নিমিত্তং গহেত্ৰাতি অসুভাকারস্স সুট্ঠু সল্লক্খণৰসেন যথা উগ্গহনিমিত্তং উপ্পজ্জতি, এৰং উগ্গণ্হনৰসেন নিমিত্তং গহেত্ৰা, উগ্গহনিমিত্তং উপ্পাদেত্ৰাতি অত্থো. কম্মট্ঠানং অপ্পনং পাপেতব্বন্তি যথালদ্ধে উগ্গহনিমিত্তে কম্মং করোন্তেন পটিভাগনিমিত্তং উপ্পাদেত্ৰা উপচারজ্ঝানে ঠিতেন তমেৰ ভাৰনং উস্সুক্কাপেন্তেন অসুভকম্মট্ঠানং অপ্পনং পাপেতব্বং. অধিগতপ্পনো হি পঠমজ্ঝানে ঠিতো তমেৰ ঝানং পাদকং কত্ৰা ৰিপস্সনং আরভিত্ৰা সঙ্খারে সম্মসন্তো নচিরস্সেৰ সব্বাসৰে খেপেতীতি.

অসুভকম্মট্ঠাননিদ্দেসৰণ্ণনা নিট্ঠিতা.

ইতি ছট্ঠপরিচ্ছেদৰণ্ণনা.

৭. ছঅনুস্সতিনিদ্দেসৰণ্ণনা

১. বুদ্ধানুস্সতিকথাৰণ্ণনা

১২৩. অসুভানন্তরন্তি অসুভকম্মট্ঠানানন্তরং. অনুস্সতীসূতি অনুস্সতিকম্মট্ঠানেসু. ‘‘অনু অনু সতি অনুস্সতী’’তি ইমমত্থং দস্সেতুং ‘‘পুনপ্পুনং উপ্পজ্জনতো’’তি ৰত্ৰা ন এত্থ অনু-সদ্দযোগেন সতি-সদ্দো অত্থন্তরৰাচকোতি দস্সেতুং ‘‘সতিযেৰ অনুস্সতী’’তি ৰুত্তং. তেন নাযমনু-সদ্দো ‘‘উপলব্ভতী’’তিআদীসু উপ-সদ্দো ৰিয অনত্থকো, নাপি ‘‘সঞ্জাননং পজানন’’ন্তিআদীসু সং-সদ্দাদযো ৰিয অত্থন্তরদীপকোতি দস্সেতি. ‘‘পৰত্তিতব্বট্ঠানম্হিযেৰ ৰা পৰত্তত্তা’’তি ইমিনা চ অনুস্সতিযা অনুস্সরিতব্বানুরূপতা ৰুত্তা হোতীতি পৰত্তকস্সেৰ অনুরূপতং দস্সেতুং ‘‘কুলপুত্তস্স অনুরূপা’’তি ৰুত্তং, সদ্ধাপব্বজিতস্স ৰা কুলপুত্তস্স. অনুরূপতা নাম পৰত্তিতব্বট্ঠানস্স অনুরূপতায এৰ হোতীতি পৰত্তকস্সেৰ অনুরূপতা ৰুত্তা, ন উভযস্স. অনুরূপাতি চ যুত্তাতি অত্থো. বুদ্ধন্তি যে গুণে উপাদায ভগৰতি ‘‘বুদ্ধো’’তি পঞ্ঞত্তি, তে গুণে একজ্ঝং গহেত্ৰা ৰুত্তং. তেনাহ ‘‘বুদ্ধগুণারম্মণায সতিযা এতমধিৰচন’’ন্তি. আরব্ভাতি আলম্বিত্ৰা. ধম্মন্তি পরিযত্তিধম্মেন সদ্ধিং নৰৰিধম্পি লোকুত্তরধম্মং. ননু চ নিব্বানং ৰিসুং কম্মট্ঠানভাৰেন ৰক্খতি? কিঞ্চাপি ৰক্খতি, ধম্মভাৰসামঞ্ঞেন পন মগ্গফলেহি সদ্ধিং ইধ পাল়িযা সঙ্গহিতত্তা তস্সাপি ধম্মানুস্সতিকম্মট্ঠানে গহণং দট্ঠব্বং, অসঙ্খতামতাদিভাৰেন পন মগ্গফলেহি ৰিসিট্ঠতায তস্স ৰিসুং কম্মট্ঠানভাৰেন গহণং কতং. সীলানুস্সতিআদীনং পন তিস্সন্নং অনুস্সতীনং ৰিসুং কম্মট্ঠানভাৰেন গহণং যোগাৰচরস্স অত্তনো এৰ সীলস্স চাগস্স সদ্ধাদীনঞ্চ অনুস্সতিট্ঠানভাৰেন গহেতব্বত্তা. রূপকাযং গতাতি অত্তনো করজকাযং আরব্ভ আরম্মণকরণৰসেন পৰত্তা. কাযেতি কাযে ৰিসযভূতে. কোট্ঠাসনিমিত্তারম্মণাযাতি কেসাদিকোট্ঠাসেসু পটিক্কূলনিমিত্তারম্মণায. ইতো পুরিমাসু সত্তসু অনুস্সতীসু নত্থি নিমিত্তুপ্পত্তি, ইধ অত্থীতি দস্সনত্থং নিমিত্ত-গ্গহণং. তথা অস্সাসপস্সাসনিমিত্তারম্মণাযাতি এত্থাপি. উপসমন্তি সব্বসঙ্খারূপসমং, নিব্বানন্তি অত্থো.

১২৪. অৰেচ্চ বুদ্ধগুণে যাথাৰতো ঞত্ৰা উপ্পন্নো পসাদো অৰেচ্চপ্পসাদো, অরিযমগ্গেন আগতপ্পসাদো, তংসদিসোপি ৰা যো দিট্ঠিগতৰাতেহি অচলো অসম্পকম্পিযো, তেন সমন্নাগতেন. তাদিসস্স বুদ্ধানুস্সতিভাৰনা ইজ্ঝতি, ন ইতরস্স. পতিরূপসেনাসনেতি যথাৰুত্তঅট্ঠারসদোসৰজ্জিতে পঞ্চঙ্গসমন্নাগতে সেনাসনে. রহোগতেনাতি রহসি গতেন. তেন কাযৰিৰেকং দস্সেতি. পটিসল্লীনেনাতি নানারম্মণতো পটিসল্লীনেন, বহিদ্ধা পুথুত্তারম্মণতো পটিক্কমাপেত্ৰা কম্মট্ঠানে সল্লীনেন, সুসিলিট্ঠচিত্তেনাতি অত্থো. এৰন্তি ইমায পাল়িযা আগতনযেন.

সো ভগৰাতি এত্থ সোতি যো সো সমতিংস পারমিযো পূরেত্ৰা সব্বকিলেসে ভঞ্জিত্ৰা অনুত্তরং সম্মাসম্বোধিং অভিসম্বুদ্ধো দেৰানং অতিদেৰো ব্রহ্মানং অতিব্রহ্মা লোকনাথো ভাগ্যৰন্ততাদীহি কারণেহি সদেৰকে লোকে ‘‘ভগৰা’’তি পত্থটকিত্তিসদ্দো, সো. ভগৰাতি ইদং সত্থু নামকিত্তনং. তথা হি ৰুত্তং ‘‘ভগৰাতি নেতং নামং মাতরা কত’’ন্তিআদি (মহানি. ১৯৮, ২১০; চূল়নি. অজিতমাণৰপুচ্ছানিদ্দেস ২). পরতো পন ভগৰাতি গুণকিত্তনং. অরহন্তিআদীসু নৰসু ঠানেসু পচ্চেকং ইতিপি-সদ্দং যোজেত্ৰা বুদ্ধগুণা অনুস্সরিতব্বাতি দস্সেন্তো ‘‘ইতিপি অরহং…পে… ইতিপি ভগৰাতি অনুস্সরতী’’তি আহ. ‘‘ইতিপেতং ভূতং ইতিপেতং তচ্ছ’’ন্তিআদীসু (দী. নি. ১.৬) ৰিয ইতি-সদ্দো আসন্নপচ্চক্খকরণত্থো, পি-সদ্দো সম্পিণ্ডনত্থো. তেন নেসং বহুভাৰো দীপিতো, তানি চ গুণসল্লক্খণকারণানি ভাৰেন্তেন চিত্তস্স সম্মুখীভূতানি কাতব্বানীতি দস্সেন্তো ‘‘ইমিনা চ ইমিনা চ কারণেনাতি ৰুত্তং হোতী’’তি আহ.

১২৫. দূরতা নাম আসন্নতা ৰিয উপাদাযুপাদায ৰুচ্চতীতি পরমুক্কংসগতং দূরভাৰং দস্সেন্তো ‘‘সুৰিদূরৰিদূরে’’তি আহ, সুট্ঠু ৰিদূরভাৰেনেৰ ৰিদূরেতি অত্থো. সা পনস্স কিলেসতো দূরতা তেসং সব্বসো পহীনত্তাতি দস্সেন্তো আহ ‘‘মগ্গেন কিলেসানং ৰিদ্ধংসিতত্তা’’তি. ননু অঞ্ঞেসম্পি খীণাসৰানং তে পহীনা এৰাতি অনুযোগং মনসি কত্ৰা ৰুত্তং ‘‘সৰাসনান’’ন্তি. ন হি ভগৰন্তং ঠপেত্ৰা অঞ্ঞে সহ ৰাসনায কিলেসে পহাতুং সক্কোন্তি, এতেন অঞ্ঞেহি অসাধারণং ভগৰতো অরহত্তন্তি দস্সিতং হোতি. কা পনাযং ৰাসনা নাম? পহীনকিলেসস্সাপি অপ্পহীনকিলেসস্স পযোগসদিসপযোগহেতুভূতো কিলেসনিহিতো সামত্থিযৰিসেসো আযস্মতো পিলিন্দৰচ্ছস্স (পারা. ৬২১) ৰসলসমুদাচারনিমিত্তং ৰিয. কথং পন ‘‘আরকা’’তি ৰুত্তে ‘‘কিলেসেহী’’তি অযমত্থো লব্ভতীতি? সামঞ্ঞজোতনায ৰিসেসে অৰট্ঠানতো, ৰিসেসত্থিনা চ ৰিসেসস্স অনুপযোজেতব্বতো, ‘‘আরকাস্স হোন্তি পাপকা অকুসলা ধম্মা’’তিআদীনি (ম. নি. ১.৪৩৪) সুত্তপদানেত্থ উদাহরিতব্বানি. আরকাতি চেত্থ আ-কারস্স রস্সত্তং, ক-কারস্স চ হ-কারং, সানুসারং কত্ৰা নিরুত্তিনযেন ‘‘অরহ’’ন্তি পদসিদ্ধি ৰেদিতব্বা. ৰুত্তমেৰত্থং সুখগ্গহণত্থং ‘‘সো ততো আরকা নামা’’তি গাথাবন্ধমাহ. তত্থ সমঞ্জনসীলো সমঙ্গী, ন সমঙ্গিতা অসমঙ্গিতা অসমন্নাগমো অসহৰুত্তিতা.

১২৬. অনত্থচরণেন কিলেসা এৰ অরযোতি কিলেসারযো. ‘‘অরীনং হতত্তা অরিহা’’তি ৰত্তব্বে নিরুত্তিনযেন ‘‘অরহ’’ন্তি ৰুত্তং.

১২৭. যঞ্চেতং সংসারচক্কন্তি সম্বন্ধো. রথচক্কস্স নাভি ৰিয মূলাৰযৰভূতং অন্তো, বহি চ সমৰট্ঠিতং অৰিজ্জাভৰতণ্হামযং দ্ৰযন্তি ৰুত্তং ‘‘অৰিজ্জাভৰতণ্হামযনাভী’’তি. নাভিযা, নেমিযা চ সম্বন্ধা অরসদিসা পচ্চযফলভূতেহি অৰিজ্জাতণ্হাজরামরণেহি সম্বন্ধা পুঞ্ঞাদিসঙ্খারাতি ৰুত্তং ‘‘পুঞ্ঞাদিঅভিসঙ্খারার’’ন্তি. তত্থ তত্থ ভৰে পরিযন্তভাৰেন পাকটং জরামরণন্তি তং নেমিট্ঠানিযং কত্ৰা আহ ‘‘জরামরণনেমী’’তি. যথা চ রথচক্কপৰত্তিযা পধানকারণং অক্খো, এৰং সংসারচক্কপৰত্তিযা আসৰসমুদযোতি আহ ‘‘আসৰসমুদযমযেন অক্খেন ৰিজ্ঝিত্ৰা’’তি. আসৰা এৰ অৰিজ্জাদীনং কারণত্তা আসৰসমুদযো. যথাহ ‘‘আসৰসমুদযা অৰিজ্জাসমুদযো’’তি (ম. নি. ১.১০৩). ৰিপাককটত্তারূপপ্পভেদো কামভৰাদিকো তিভৰো এৰ রথো, তস্মিং তিভৰরথে. অত্তনো পচ্চযেহি সমং, সব্বসো ৰা আদিতো পট্ঠায যোজিতন্তি সমাযোজিতং. আদিরহিতং কালং পৰত্ততীতি কত্ৰা অনাদিকালপ্পৰত্তং.

‘‘খন্ধানঞ্চ পটিপাটি, ধাতুআযতনান চ;

অব্বোচ্ছিন্নং ৰত্তমানা, ‘সংসারো’তি পৰুচ্চতী’’তি. (দী. নি. অট্ঠ. ২.৯৫ অপসাদনাৰণ্ণনা; সং. নি. অট্ঠ. ২.২.৬০; অ. নি. অট্ঠ. ২.৪.১৯৯) –

এৰং ৰুত্তসংসারোৰ সংসারচক্কং. অনেনাতি ভগৰতা. বোধিমণ্ডেতি বোধিসঙ্খাতস্স ঞাণস্স মণ্ডভাৰপ্পত্তে ঠানে, কালে ৰা. ৰীরিযপাদেহীতি সংকিলেসৰোদানপক্খিযেসু সন্নিরুম্ভনসন্নিক্খিপনকিচ্চতায দ্ৰিধা পৰত্তেহি অত্তনো ৰীরিযসঙ্খাতেহি পাদেহি. সীলপথৰিযন্তি পতিট্ঠট্ঠেন সীলমেৰ পথৰী, তস্সং. পতিট্ঠাযাতি সম্পাদনৰসেন পতিট্ঠহিত্ৰা. সদ্ধাহত্থেনাতি অনৰজ্জধম্মাদানসাধনতো সদ্ধাৰ হত্থো, তেন. কম্মক্খযকরন্তি কাযকম্মাদিভেদস্স সব্বস্সপি কম্মস্স খযকরণতো কম্মক্খযকরং. ঞাণফরসুন্তি সমাধিসিলাযং সুনিসিতমগ্গঞাণফরসুং গহেত্ৰা.

১২৮. এৰং ‘‘অরানং হতত্তা’’তি এত্থ ৰুত্তঅরঘাতে সংসারং চক্কং ৰিয চক্কন্তি গহেত্ৰা অত্থযোজনং কত্ৰা ইদানি পটিচ্চসমুপ্পাদদেসনাক্কমেনপি তং দস্সেতুং ‘‘অথ ৰা’’তিআদি ৰুত্তং. তত্থ অনমতগ্গং সংসারৰট্টন্তি অনু অনু অমতগ্গং অৰিঞ্ঞাতকোটিকং সংসারমণ্ডলং. সেসা দস ধম্মা সঙ্খারাদযো জাতিপরিযোসানা অরা. কথং? নাভিযা অৰিজ্জায মূলতো, নেমিযা জরামরণেন অন্ততো সম্বন্ধত্তাতি দস্সেন্তো আহ ‘‘অৰিজ্জামূলকত্তা জরামরণপরিযন্তত্তা চা’’তি. দুক্খাদীসূতি দুক্খসমুদযনিরোধমগ্গেসু. তত্থ দুক্খে অঞ্ঞাণং তদন্তোগধত্তা, তপ্পটিচ্ছাদনতো চ, সেসেসু পটিচ্ছাদনতোৰ. দুক্খন্তি চেত্থ দুক্খং অরিযসচ্চং অধিপ্পেতন্তি তং কামভৰাদিৰসেন তিধা ভিন্দিত্ৰা তথা তপ্পটিচ্ছাদিকং অৰিজ্জং, অৰিজ্জাদিপচ্চযে তীসু ভৰেসু সঙ্খারাদিকে চ পটিপাটিযা দস্সেন্তো ‘‘কামভৰে চ অৰিজ্জা’’তিআদিমাহ. তত্থ কামভৰে অৰিজ্জাতি কামভৰে আদীনৰপ্পটিচ্ছাদিকা অৰিজ্জা. রূপভৰে অরূপভৰে অৰিজ্জাতি এত্থাপি এসেৰ নযো. কামভৰে সঙ্খারানন্তি কামভূমিপরিযাপন্নানং সঙ্খারানং, কামভৰে ৰা নিপ্ফাদেতব্বা যে সঙ্খারা, তেসং কামভৰূপপত্তিনিব্বত্তকসঙ্খারানন্তি অত্থো. পচ্চযো হোতীতি পুঞ্ঞাভিসঙ্খারানং তাৰ আরম্মণপচ্চযেন চেৰ উপনিস্সযপচ্চযেন চাতি দ্ৰিধা পচ্চযো হোতি. অপুঞ্ঞাভিসঙ্খারেসু সহজাতস্স সহজাতাদিৰসেন, অসহজাতস্স অনন্তরসমনন্তরাদিৰসেন, নানন্তরস্স পন আরম্মণৰসেন চেৰ উপনিস্সযৰসেন চ পচ্চযো হোতি. অরূপভৰে সঙ্খারানন্তি আনেঞ্জাভিসঙ্খারানং. পচ্চযো হোতি উপনিস্সযৰসেনেৰ. ইমস্মিং পনত্থে এত্থ ৰিত্থারিযমানে অতিপ্পপঞ্চো হোতি, সযমেৰ চ পরতো আগমিস্সতীতি ন নং ৰিত্থারযাম.

তিণ্ণং আযতনানন্তি চক্খুসোতমনাযতনানং. একস্সাযতনস্সাতি মনাযতনস্স. ইমিনা নযেন ফস্সাদীনম্পি ৰিভাগো ৰেদিতব্বো. তত্থ তত্থ সা সা তণ্হাতি রূপতণ্হাদিভেদা তত্থ তত্থ কামভৰাদীসু উপ্পজ্জনকা তণ্হা.

তণ্হাদিমূলিকা কথা অতিসংখিত্তাতি তং, উপাদানভৰে চ ৰিভজিত্ৰা ৰিত্থারেত্ৰা দস্সেতুং ‘‘কথ’’ন্তিআদি ৰুত্তং. তত্থ ‘‘কামে পরিভুঞ্জিস্সামী’’তি ইমিনা কামতণ্হাপৰত্তিমাহ. তথা ‘‘সগ্গসম্পত্তিং অনুভৰিস্সামী’’তিআদীহি. সা পন তণ্হা যস্মা ভুসমাদানৰসেন পৰত্তমানা কামুপাদানং নাম হোতি, তস্মা ৰুত্তং ‘‘কামুপাদানপচ্চযা’’তি. তথেৰাতি কামুপাদানপচ্চযা এৰ.

ব্রহ্মলোকসম্পত্তিন্তি রূপীব্রহ্মলোকে সম্পত্তিং. ‘‘সব্বেপি তেভূমকা ধম্মা কামনীযট্ঠেন কামা’’তি (মহানি. ১; চূল়নি. অজিতমাণৰপুচ্ছানিদ্দেস ৮ থোক ৰিসদিসং) ৰচনতো ভৰরাগোপি কামুপাদানমেৰাতি কত্ৰা ‘‘কামুপাদানপচ্চযা এৰ মেত্তং ভাৰেতী’’তিআদি ৰুত্তং. সেসুপাদানমূলিকাসুপীতি এত্থাযং যোজনা – ইধেকচ্চো ‘‘নত্থি পরো লোকো’’তি নত্থিকদিট্ঠিং গণ্হাতি, সো দিট্ঠুপাদানপচ্চযা কাযেন দুচ্চরিতং চরতীতিআদি ৰুত্তনযেন যোজেতব্বং. অপরো ‘‘অসুকস্মিং সম্পত্তিভৰে অত্তা উচ্ছিজ্জতী’’তি উচ্ছেদদিট্ঠিং গণ্হাতি, সো তত্রূপপত্তিযা কাযেন সুচরিতং চরতীতিআদি ৰুত্তনযেনেৰ যোজেতব্বং. অপরো ‘‘রূপী মনোমযো হুত্ৰা অত্তা উচ্ছিজ্জতী’’তি রূপূপপত্তিযা মগ্গং ভাৰেতি. ভাৰনাপারিপূরিযাতি সব্বং ৰুত্তনযেনেৰ ৰেদিতব্বং. অপরো ‘‘অরূপভৰে উপ্পজ্জিত্ৰা অত্তা উচ্ছিজ্জতী’’তি অরূপূপপত্তিযা মগ্গং ভাৰেতি. ভাৰনাপারিপূরিযাতি সব্বং ৰুত্তনযেনেৰ ৰেদিতব্বং. এতাহিযেৰ অত্তৰাদুপাদানমূলিকাপি যোজনা সংৰণ্ণিতাতি দট্ঠব্বং. এৰং দিট্ঠধম্মনিব্বানৰাদৰসেনাপি যোজনা ৰেদিতব্বা. অপরো ‘‘সীলেন সুদ্ধী’’তি ‘‘অসুদ্ধিমগ্গং সুদ্ধিমগ্গো’’তি পরামসন্তো সীলব্বতুপাদানপচ্চযা কাযেন দুচ্চরিতং চরতীতিআদিনা সব্বং ৰুত্তনযেনেৰ যোজেতব্বং.

ইদানি য্ৰাযং সংসারচক্কং দস্সেন্তেন ‘‘কামভৰে অৰিজ্জা কামভৰে সঙ্খারানং পচ্চযো হোতী’’তিআদিনা অৰিজ্জাদীনং পচ্চযভাৰো, সঙ্খারাদীনং পচ্চযুপ্পন্নভাৰো চ দস্সিতো, তমেৰ পটিসম্ভিদামগ্গপাল়িং আনেত্ৰা নিগমনৰসেন দস্সেন্তো ‘‘এৰং অয’’ন্তিআদিমাহ. তত্থ যথা সঙ্খারা হেতুনিব্বত্তা, এৰং অৰিজ্জাপি কামাসৰাদিনা সহেতুকা এৰাতি আহ ‘‘উভোপেতে হেতুসমুপ্পন্না’’তি. পচ্চযপরিগ্গহেতি নামরূপস্স পচ্চযানং অৰিজ্জাদীনং পরিচ্ছিজ্জ গহণে, নিপ্ফাদেতব্বে ভুম্মং. পঞ্ঞাতি কঙ্খাৰিতরণৰিসুদ্ধিসঙ্খাতা পকারতো জাননা. ধম্মট্ঠিতিঞাণন্তি পটিচ্চসমুপ্পাদাৰবোধো. ইদঞ্চ ধম্মট্ঠিতিঞাণং যস্মা অদ্ধাত্তযে কঙ্খামলৰিতরণৰসেন পৰত্ততি, তস্মা ‘‘অতীতম্পি অদ্ধান’’ন্তিআদি ৰুত্তং. এতেনেৰ নযেনাতি এতেন ‘‘অৰিজ্জা হেতূ’’তিআদিনা অৰিজ্জাযং ৰুত্তেন নযেন. ‘‘সঙ্খারা হেতু, ৰিঞ্ঞাণং হেতুসমুপ্পন্ন’’ন্তিআদিনা (পটি. ম. ১.৪৬) সব্বপদানি ৰিত্থারেতব্বানি.

সংখিপ্পন্তি এত্থ অৰিজ্জাদযো, ৰিঞ্ঞাণাদযো চাতি সঙ্খেপো, হেতু, ৰিপাকো চ. হেতু ৰিপাকোতি ৰা সংখিপ্পতীতি সঙ্খেপো, অৰিজ্জাদযো ৰিঞ্ঞাণাদযো চ. সঙ্খেপভাৰসামঞ্ঞেন পন একৰচনং কতন্তি দট্ঠব্বং. তে পন সঙ্খেপা অতীতে হেতু, এতরহি ৰিপাকো, এতরহি হেতু, আযতিং ৰিপাকোতি এৰং কালৰিভাগেন চত্তারো জাতা. তেনাহ ‘‘পুরিমসঙ্খেপো চেত্থ অতীতো অদ্ধা’’তিআদি. সঙ্খেপ-সদ্দো ৰা ভাগাধিৰচনন্তি অতীতো হেতুভাগো পঠমো সঙ্খেপো. এস নযো সেসেসুপি. তণ্হুপাদানভৰা গহিতাৰ হোন্তি কিলেসকম্মভাৰসামঞ্ঞতো, তেহি ৰিনা অৰিজ্জাসঙ্খারানং সকিচ্চাকরণতো চ. কম্মং তণ্হা চ তস্স সহকারীকারণং হুত্ৰা ৰট্টনত্থেন কম্মৰট্টং.

ৰিঞ্ঞাণনামরূপসল়াযতনফস্সৰেদনানং জাতিজরাভঙ্গাৰত্থা ‘‘জাতিজরামরণ’’ন্তি ৰুত্তাতি আহ ‘‘জাতিজরামরণাপদেসেন ৰিঞ্ঞাণাদীনং নিদ্দিট্ঠত্তা’’তি. ইমেতি ৰিঞ্ঞাণাদযো. আযতিং ৰিপাকৰট্টং পচ্চুপ্পন্নহেতুতো ভাৰীনং অনাগতানং গহিতত্তা. তেতি অৰিজ্জাদযো. আকারতোতি সরূপতো অৰুত্তাপি তস্মিং তস্মিং সঙ্গহে আকিরীযন্তি অৰিজ্জাসঙ্খারাদিগ্গহণেহি পকাসীযন্তীতি আকারা, অতীতহেতুআদীনং ৰা পকারা আকারা, ততো আকারতো. ৰীসতিৰিধা হোন্তি অতীতেহেতুপঞ্চকাদিভেদতো.

সঙ্খারৰিঞ্ঞাণানং অন্তরা একো সন্ধীতি হেতুতো ফলস্স অৰিচ্ছেদপ্পৰত্তিভাৰতো হেতুফলসম্বন্ধভূতো একো সন্ধি. তথা ভৰজাতীনমন্তরা. ৰেদনাতণ্হানমন্তরা পন ফলতো হেতুনো অৰিচ্ছেদপ্পৰত্তিভাৰতো ফলহেতুসম্বন্ধভূতো একো সন্ধি. ফলভূতোপি হি ধম্মো অঞ্ঞস্স হেতুসভাৰস্স ধম্মস্স পচ্চযো হোতীতি.

ইতীতি ৰুত্তপ্পকারপরামসনং. তেনাহ ‘‘চতুসঙ্খেপ’’ন্তিআদি. সব্বাকারতোতি ইধ ৰুত্তেহি, অৰুত্তেহি চ পটিচ্চসমুপ্পাদৰিভঙ্গে (ৰিভ. ২২৫ আদযো), অনন্তনযসমন্তপট্ঠানাদীসু চ আগতেহি সব্বেহি আকারেহি. জানাতীতি অৰবুজ্ঝতি. পস্সতীতি দস্সনভূতেন ঞাণচক্খুনা পচ্চক্খতো পস্সতি. অঞ্ঞাতি পটিৰিজ্ঝতীতি তেসংযেৰ ৰেৰচনং. তন্তি তং জাননং. ঞাতট্ঠেনাতি যথাসভাৰতো জাননট্ঠেন. পজাননট্ঠেনাতি অনিচ্চাদীহি পকারেহি পটিৰিজ্ঝনট্ঠেন.

ইদানি যদত্থমিদং ভৰচক্কং ইধানীতং, তং দস্সেতুং ‘‘ইমিনা’’তিআদি ৰুত্তং. তত্থ তে ধম্মেতি তে অৰিজ্জাদিকে ধম্মে. যথাভূতং ঞত্ৰাতি মহাৰজিরঞাণেন যাথাৰতো জানিত্ৰা. নিব্বিন্দন্তো বলৰৰিপস্সনায ৰিরজ্জন্তো ৰিমুচ্চন্তো অরিযমগ্গেহি অরে হনীতি যোজনা. তত্থ যদা ভগৰা ৰিরজ্জতি ৰিমুচ্চতি, তদা অরে হনতি নাম. ততো পরং পন অভিসম্বুদ্ধক্খণং গহেত্ৰা ৰুত্তং ‘‘হনি ৰিহনি ৰিদ্ধংসেসী’’তি.

১২৯. চক্কৰত্তিনো অচেতনে চক্করতনে উপ্পন্নে তত্থেৰ লোকো পূজং করোতি, অঞ্ঞত্থ পূজাৰিসেসা পচ্ছিজ্জন্তি, কিমঙ্গং পন সম্মাসম্বুদ্ধে উপ্পন্নেতি দস্সেন্তো ‘‘উপ্পন্নে তথাগতে’’তিআদিমাহ. কো পন ৰাদো অঞ্ঞেসং পূজাৰিসেসানন্তি যথাৰুত্ততো অঞ্ঞেসং অমহেসক্খেহি দেৰমনুস্সেহি করিযমানানং নাতিউল়ারানং পূজাৰিসেসানং অরহভাৰে কা নাম কথা. অত্থানুরূপন্তি অরহত্তত্থস্স অনুরূপং অন্ৰত্থং.

১৩০. অসিলোকভযেনাতি অকিত্তিভযেন. রহো পাপং করোন্তি ‘‘মা নং কোচি জঞ্ঞা’’তি এস ভগৰা ন কদাচি করোতি পাপহেতূনং বোধিমণ্ডে এৰ সুপ্পহীনত্তা. অপরো নযো – আরকাতি অরহং, সুৰিদূরভাৰতোইচ্চেৰ অত্থো. কুতো পন সুৰিদূরভাৰতোতি? যে অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা, ততো এৰ অপ্পহীনরাগদোসমোহা অরিযধম্মস্স অকোৰিদা অরিযধম্মে অৰিনীতা অরিযধম্মস্স অদস্সাৰিনো অপ্পটিপন্না মিচ্ছাপটিপন্না চ, ততো সুৰিদূরভাৰতো. ৰুত্তঞ্হেতং ভগৰতা –

‘‘সঙ্ঘাটিকণ্ণেচেপি মে, ভিক্খৰে, ভিক্খু গহেত্ৰা পিট্ঠিতো পিট্ঠিতো অনুবন্ধো অস্স পাদে পাদং নিক্খিপন্তো, সো চ হোতি অভিজ্ঝালু কামেসু তিব্বসারাগো ব্যাপন্নচিত্তো পদুট্ঠমনসঙ্কপ্পো মুট্ঠস্সতি অসম্পজানো অসমাহিতো ৰিব্ভন্তচিত্তো পাকতিন্দ্রিযো. অথ খো সো আরকাৰ ময্হং, অহঞ্চ তস্স. তং কিস্স হেতু? ধম্মং হি সো, ভিক্খৰে, ভিক্খু ন পস্সতি, ধম্মং অপস্সন্তো মং ন পস্সতী’’তি (ইতিৰু. ৯২).

যথাৰুত্তপুগ্গলা হি সচেপি সাযং পাতং সত্থু সন্তিকাৰচরাৰ সিযুং, ন তে তাৰতা ‘‘সত্থু সন্তিকা’’তি ৰত্তব্বা, তথা সত্থাপি নেসং. ইতি অসপ্পুরিসানং আরকা দূরেতি অরহং.

‘‘সম্মা ন পটিপজ্জন্তি, যে নিহীনাসযা নরা;

আরকা তেহি ভগৰা, দূরে তেনারহং মতো’’তি.

তথা আরকাতি অরহং, আসন্নভাৰতোতি অত্থো. কুতো পন আসন্নভাৰতোতি? যে ভাৰিতকাযা ভাৰিতসীলা ভাৰিতচিত্তা ভাৰিতপঞ্ঞা, ততো এৰ পহীনরাগদোসমোহা অরিযধম্মস্স কোৰিদা অরিযধম্মে সুৰিনীতা অরিযধম্মস্স দস্সাৰিনো সম্মাপটিপন্না, ততো আসন্নভাৰতো. ৰুত্তম্পি চেতং ভগৰতা –

‘‘যোজনসতে চেপি মে, ভিক্খৰে, ভিক্খু ৰিহরেয্য, সো চ হোতি অনভিজ্ঝালু কামেসু ন তিব্বসারাগো অব্যাপন্নচিত্তো অপ্পদুট্ঠমনসঙ্কপ্পো উপট্ঠিতস্সতি সম্পজানো সমাহিতো একগ্গচিত্তো সংৰুতিন্দ্রিযো. অথ খো সো সন্তিকেৰ ময্হং, অহঞ্চ তস্স. তং কিস্স হেতু? ধম্মং হি সো, ভিক্খৰে, ভিক্খু পস্সতি, ধম্মং পস্সন্তো মং পস্সতী’’তি (ইতিৰু. ৯২).

তথারূপা হি পুগ্গলা সত্থু যোজনসহস্সন্তরিকাপি হোন্তি, ন তাৰতা তে ‘‘সত্থু দূরচারিনো’’তি ৰত্তব্বা, তথা সত্থাপি নেসং. ইতি সপ্পুরিসানং আরকা আসন্নেতি অরহং.

যে সম্মা পটিপজ্জন্তি, সুপ্পণীতাধিমুত্তিকা;

আরকা তেহি আসন্নে, তেনাপি অরহং জিনো.

যে ইমে রাগাদযো পাপধম্মা যস্মিং সন্তানে উপ্পজ্জন্তি, তস্স দিট্ঠধম্মিকম্পি সম্পরাযিকম্পি অনত্থং আৰহন্তি. নিব্বানগামিনিযা পটিপদায একংসেনেৰ উজুৰিপচ্চনীকভূতা চ, তে অত্তহিতং, পরহিতঞ্চ পরিপূরেতুং সম্মা পটিপজ্জন্তেহি সাধূহি দূরতো রহিতব্বা পরিচ্চজিতব্বা পহাতব্বাতি রহা নাম, তে চ যস্মা ভগৰতো বোধিমূলেযেৰ অরিযমগ্গেন সব্বসো পহীনা সমুচ্ছিন্না. যথাহ –

‘‘তথাগতস্স খো, ব্রাহ্মণ, রাগো পহীনো দোসো মোহো, সব্বেপি পাপকা অকুসলা ধম্মা পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা’’তি (পারা. ৯-১০ অত্থতো সমানং).

তস্মা সব্বসো ন সন্তি এতস্স রহাতি অরহোতি ৰত্তব্বে ওকারস্স সানুসারং অ-কারাদেসং কত্ৰা ‘‘অরহ’’ন্তি ৰুত্তং.

পাপধম্মা রহা নাম, সাধূহি রহিতব্বতো;

তেসং সুট্ঠু পহীনত্তা, ভগৰা অরহং মতো.

যে তে সব্বসো পরিঞ্ঞাতক্খন্ধা পহীনকিলেসা ভাৰিতমগ্গা সচ্ছিকতনিরোধা অরহন্তো খীণাসৰা, যে চ সেক্খা অপ্পত্তমানসা অনুত্তরং যোগক্খেমং পত্থযমানা ৰিহরন্তি, যে চ পরিসুদ্ধপযোগা কল্যাণজ্ঝাসযা সদ্ধাসীলসুতাদিগুণসম্পন্না পুগ্গলা, তেহি ন রহিতব্বো ন পরিচ্চজিতব্বো, তে চ ভগৰতাতি অরহং. তথা হি অরিযপুগ্গলা সত্থারা দিট্ঠধম্মস্স পচ্চক্খকরণতো সত্থু ধম্মসরীরেন অৰিরহিতা এৰ হোন্তি. যথাহ আযস্মা পিঙ্গিযো –

‘‘পস্সামি নং মনসা চক্খুনাৰ,

রত্তিন্দিৰং ব্রাহ্মণ অপ্পমত্তো;

নমস্সমানো ৰিৰসেমি রত্তিং,

তেনেৰ মঞ্ঞামি অৰিপ্পৰাসং.

‘‘সদ্ধা চ পীতি চ মনো সতি চ,

নাপেন্তিমে গোতমসাসনম্হা;

যং যং দিসং ৰজতি ভূরিপঞ্ঞো,

স তেন তেনেৰ নতোহমস্মী’’তি. (সু. নি. ১১৪৮-১১৪৯);

তেনেৰ চ তে অঞ্ঞং সত্থারং ন উদ্দিসন্তি. যথাহ –

‘‘অট্ঠানমেতং, ভিক্খৰে, অনৰকাসো, যং দিট্ঠিসম্পন্নো পুগ্গলো অঞ্ঞং সত্থারং উদ্দিসেয্যাতি নেতং ঠানং ৰিজ্জতী’’তি (ম. নি. ৩.১২৮; অ. নি. ১.২৭৬).

কল্যাণপুথুজ্জনাপি যেভুয্যেন সত্থরি নিচ্চলসদ্ধা এৰ হোন্তি. ইতি সুপ্পটিপন্নেহি পুরিসৰিসেসেহি অৰিরহিতব্বতো, তেসঞ্চ অৰিরহনতো ন সন্তি এতস্স রহা পরিচ্চজনকা, নত্থি ৰা এতস্স রহো সাধূহি পরিচ্চজিতব্বতাতি অরহং.

‘‘যে সচ্ছিকতসদ্ধম্মা, অরিযা সুদ্ধগোচরা;

ন তেহি রহিতো হোতি, নাথো তেনারহং মতো’’তি.

রহোতি চ গমনং ৰুচ্চতি, ভগৰতো চ নানাগতীসু পরিব্ভমনসঙ্খাতং সংসারে গমনং নত্থি কম্মক্খযকরেন অরিযমগ্গেন বোধিমূলেযেৰ সব্বসো সসম্ভারস্স কম্মৰট্টস্স ৰিদ্ধংসিতত্তা. যথাহ –

‘‘যেন দেৰূপপত্যস্স, গন্ধব্বো ৰা ৰিহঙ্গমো;

যক্খত্তং যেন গচ্ছেয্যং, মনুস্সত্তঞ্চ অব্বজে;

তে ময্হং আসৰা খীণা, ৰিদ্ধস্তা ৰিনল়ীকতা’’তি. (অ. নি. ৪.৩৬);

এৰং নত্থি এতস্স রহোগমনং গতীসু পচ্চাজাতীতিপি অরহং.

রহো ৰা গমনং যস্স, সংসারে নত্থি সব্বসো;

পহীনজাতিমরণো, অরহং সুগতো মতো.

পাসংসত্তা ৰা ভগৰা অরহং. অক্খরচিন্তকা হি পসংসাযং অরহ-সদ্দং ৰণ্ণেন্তি. পাসংসভাৰো চ ভগৰতো অনঞ্ঞসাধারণো যথাভুচ্চগুণাধিগতো সদেৰকে লোকে সুপ্পতিট্ঠিতো. তথা হেস অনুত্তরেন সীলেন অনুত্তরেন সমাধিনা অনুত্তরায পঞ্ঞায অনুত্তরায ৰিমুত্তিযা অসমো অসমসমো অপ্পটিমো অপ্পটিভাগো অপ্পটিপুগ্গলোতি এৰং তস্মিং তস্মিং গুণে ৰিভজিত্ৰা ৰুচ্চমানে পণ্ডিতপুরিসেহি দেৰেহি ব্রহ্মেহি ভগৰতা ৰা পন পরিযোসাপেতুং অসক্কুণেয্যরূপো. ইতি পাসংসত্তাপি ভগৰা অরহং.

গুণেহি সদিসো নত্থি, যস্মা লোকে সদেৰকে;

তস্মা পাসংসিযত্তাপি, অরহং দ্ৰিপদুত্তমো.

এৰং সব্বথাপি –

‘‘আরকা মন্দবুদ্ধীনং, আরকা চ ৰিজানতং;

রহানং সুপ্পহীনত্তা, ৰিদূনমরহেয্যতো;

ভৰেসু চ রহাভাৰা, পাসংসা অরহং জিনো’’তি.

১৩১. সম্মাতি অৰিপরীতং. সামন্তি সযমেৰ. সম্বুদ্ধোতি হি এত্থ সং-সদ্দো ‘‘সয’’ন্তি এতস্স অত্থস্স বোধকো দট্ঠব্বো. সব্বধম্মানন্তি অনৰসেসানং ঞেয্যধম্মানং. কথং পনেত্থ সব্বধম্মাৰবোধো লব্ভতীতি? একদেসস্স অগ্গহণতো. পদেসগ্গহণে হি অসতি গহেতব্বস্স নিপ্পদেসতাৰ ৰিঞ্ঞাযতি যথা ‘‘দিক্খিতো ন দদাতী’’তি. এৰঞ্চ কত্ৰা অত্থৰিসেসানপেক্খা কত্তরি এৰ বুদ্ধসদ্দসিদ্ধি ৰেদিতব্বা কম্মৰচনিচ্ছায অভাৰতো. ‘‘সম্মা সামং বুদ্ধত্তা সম্মাসম্বুদ্ধো’’তি এত্তকমেৰ হি ইধ সদ্দতো লব্ভতি, ‘‘সব্বধম্মান’’ন্তি পন অত্থতো লব্ভমানং গহেত্ৰা ৰুত্তং. ন হি বুজ্ঝনকিরিযা অৰিসযা যুজ্জতি.

ইদানি তস্সা ৰিসযং ‘‘সব্বধম্মে’’তি সামঞ্ঞতো ৰুত্তং ৰিভজিত্ৰা দস্সেতুং ‘‘অভিঞ্ঞেয্যে ধম্মে’’তিআদি ৰুত্তং. তত্থ অভিঞ্ঞেয্যেতি অভিৰিসিট্ঠেন ঞাণেন জানিতব্বে. কে পন তেতি? চতুসচ্চধম্মে. অভিঞ্ঞেয্যতো বুদ্ধোতি অভিঞ্ঞেয্যভাৰতো বুজ্ঝি. পুব্বভাগে ৰিপস্সনাপঞ্ঞায, অধিগমক্খণে মগ্গপঞ্ঞায, অপরভাগে সব্বঞ্ঞুতঞ্ঞাণাদীহি অঞ্ঞাসীতি অত্থো. ইতো পরেসুপি এসেৰ নযো. পরিঞ্ঞেয্যে ধম্মেতি দুক্খং অরিযসচ্চমাহ. পহাতব্বেতি সমুদযপক্খিযে. সচ্ছিকাতব্বেতি নিব্বানং সন্ধাযাহ. বহুৰচননিদ্দেসো পন সোপাদিসেসাদিকং পরিযাযসিদ্ধং ভেদং গহেত্ৰা কতো, উদ্দেসো ৰা অযং চতুসচ্চধম্মানন্তি. তথা হি ৰক্খতি ‘‘চক্খুং দুক্খসচ্চ’’ন্তিআদি. উদ্দেসো চ অৰিনিচ্ছিতত্থপরিচ্ছেদস্স ধম্মস্স ৰসেন করীযতি. উদ্দেসেন হি উদ্দিসিযমানানং ধম্মানং অত্থিতামত্তং ৰুচ্চতি, ন পরিচ্ছেদোতি অপরিচ্ছেদেন বহুৰচনেন ৰুত্তং যথা ‘‘অপ্পচ্চযা ধম্মা, অসঙ্খতা ধম্মা’’তি (ধ. স. দুকমাতিকা ৭-৮). সচ্ছিকাতব্বেতি ৰা ফলৰিমুত্তীনম্পি গহণং, ন নিব্বানস্সেৰাতি বহুৰচননিদ্দেসো কতো. এৰঞ্চ ভাৰেতব্বেতি এত্থ ঝানানম্পি গহণং দট্ঠব্বং.

গাথাযং ভাৰেতব্বঞ্চাতি এত্থ চ-সদ্দো অৰুত্তসমুচ্চযত্থো, তেন সচ্ছিকাতব্বস্স গহণং ৰেদিতব্বং. তস্মা বুদ্ধোস্মীতি যস্মা চত্তারি সচ্চানি মযা বুদ্ধানি, সচ্চৰিনিমুত্তঞ্চ কিঞ্চি ঞেয্যং নত্থি, তস্মা সব্বম্পি ঞেয্যং বুদ্ধোস্মি, অব্ভঞ্ঞাসিন্তি অত্থো.

১৩২. এৰং সচ্চৰসেন সামঞ্ঞতো ৰুত্তমত্থং দ্ৰারারম্মণেহি সদ্ধিং দ্ৰারপ্পৰত্তধম্মেহি, খন্ধাদীহি চ সচ্চৰসেনেৰ ৰিভজিত্ৰা দস্সেতুং ‘‘অপি চা’’তিআদি আরদ্ধং. তত্থ মূলকারণভাৰেনাতি সন্তেসুপি অৰিজ্জাদীসু অঞ্ঞেসু কারণেসু তেসম্পি মূলভূতকারণভাৰেন. তণ্হা হি কম্মস্স ৰিচিত্তভাৰহেতুতো, সহাযভাৰূপগমনতো চ দুক্খৰিচিত্ততায পধানকারণং. সমুট্ঠাপিকাতি উপ্পাদিকা. পুরিমতণ্হাতি পুরিমভৰসিদ্ধা তণ্হা. উভিন্নন্তি চক্খুস্স, তংসমুদযস্স চ. অপ্পৰত্তীতি অপ্পৰত্তিনিমিত্তং. নিরোধপজাননাতি সচ্ছিকিরিযাভিসমযৰসেন নিরোধস্স পটিৰিজ্ঝনা. একেকপদুদ্ধারেনাতি ‘‘চক্খুং চক্খুসমুদযো’’তিআদিনা একেককোট্ঠাসনিদ্ধারণেন. তণ্হাযপি পরিঞ্ঞেয্যভাৰসব্ভাৰতো, উপাদানক্খন্ধন্তোগধত্তা চ দুক্খসচ্চসঙ্গহং দস্সেতুং ‘‘রূপতণ্হাদযো ছ তণ্হাকাযা’’তি ৰুত্তং.

কসিণানীতি কসিণজ্ঝানানি. দ্ৰত্তিংসাকারাতি দ্ৰত্তিংস কোট্ঠাসা, তদারম্মণজ্ঝানানি চ. নৰ ভৰাতি কামভৰাদযো তযো, সঞ্ঞীভৰাদযো তযো, একৰোকারভৰাদযো তযোতি নৰ ভৰা. চত্তারি ঝানানীতি অগ্গহিতারম্মণৰিসেসানি চত্তারি রূপাৰচরজ্ঝানানি, ৰিপাকজ্ঝানানং ৰা এতং গহণং. এত্থ চ কুসলধম্মানং উপনিস্সযভূতা তণ্হা সমুট্ঠাপিকা পুরিমতণ্হাতি ৰেদিতব্বা. কিরিযধম্মানং পন যত্থ তে তস্স অত্তভাৰস্স কারণভূতা.

অনুবুদ্ধোতি বুজ্ঝিতব্বধম্মস্স অনুরূপতো বুদ্ধো. তেনাতি তস্মা. যস্মা সামঞ্ঞতো, ৰিসেসতো চ একেকপদুদ্ধারেন সব্বধম্মে বুদ্ধো, তস্মা ৰুত্তং. কিন্তি আহ ‘‘সম্মা সামঞ্চ সব্বধম্মানং বুদ্ধত্তা’’তি, সব্বস্সপি ঞেয্যস্স সব্বাকারতো অৰিপরীতং সযমেৰ অভিসম্বুদ্ধত্তাতি অত্থো. ইমিনাস্স পরোপদেসরহিতস্স সব্বাকারেন সব্বধম্মাৰবোধনসমত্থস্স আকঙ্খপ্পটিবদ্ধৰুত্তিনো অনাৰরণঞাণসঙ্খাতস্স সব্বঞ্ঞুতঞ্ঞাণস্স অধিগমো দস্সিতো.

ননু চ সব্বঞ্ঞুতঞ্ঞাণতো অঞ্ঞং অনাৰরণঞাণং, অঞ্ঞথা ‘‘ছ অসাধারণঞাণানি বুদ্ধঞাণানী’’তি (পটি. ম. মাতিকা ১.৭৩) ৰচনং ৰিরুজ্ঝেয্যাতি? ন ৰিরুজ্ঝতি, ৰিসযপৰত্তিভেদৰসেন অঞ্ঞেহি অসাধারণভাৰদস্সনত্থং একস্সেৰ ঞাণস্স দ্ৰিধা ৰুত্তত্তা. একমেৰ হি তং ঞাণং অনৰসেসসঙ্খতাসঙ্খতসম্মুতিধম্মৰিসযতায সব্বঞ্ঞুতঞ্ঞাণং, তত্থ চ আৰরণাভাৰতো নিস্সঙ্গচারমুপাদায ‘‘অনাৰরণঞাণ’’ন্তি ৰুত্তং. যথাহ পটিসম্ভিদাযং ‘‘সব্বং সঙ্খতমসঙ্খতং অনৰসেসং জানাতীতি সব্বঞ্ঞুতঞ্ঞাণং, তত্থ আৰরণং নত্থীতি অনাৰরণঞাণ’’ন্তিআদি (পটি. ম. ১.১১৯). তস্মা নত্থি নেসং অত্থতো ভেদো, একন্তেন চেতং এৰমিচ্ছিতব্বং. অঞ্ঞথা সব্বঞ্ঞুতানাৰরণঞাণানং সাধারণতা, অসব্বধম্মারম্মণতা চ আপজ্জেয্য. ন হি ভগৰতো ঞাণস্স অণুমত্তম্পি আৰরণং অত্থি, অনাৰরণঞাণস্স চ অসব্বধম্মারম্মণভাৰে যত্থ তং ন পৰত্ততি, তত্থাৰরণসব্ভাৰতো অনাৰরণভাৰোযেৰ ন সিযা. অথ ৰা পন হোতু অঞ্ঞমেৰ অনাৰরণঞাণং সব্বঞ্ঞুতঞ্ঞাণতো, ইধ পন সব্বত্থ অপ্পটিহতৰুত্তিতায অনাৰরণঞাণন্তি সব্বঞ্ঞুতঞ্ঞাণমেৰ অধিপ্পেতং. তস্স চাধিগমেন ভগৰা ‘‘সব্বঞ্ঞূ, সব্বৰিদূ, সম্মাসম্বুদ্ধো’’তি চ ৰুচ্চতি ন সকিংযেৰ সব্বধম্মাৰবোধতো. তথা চ ৰুত্তং পটিসম্ভিদাযং (পটি. ম. ১.১৬২) ‘‘ৰিমোক্খন্তিকমেতং বুদ্ধানং ভগৰন্তানং বোধিযা মূলে সহ সব্বঞ্ঞুতঞ্ঞাণস্স পটিলাভা সচ্ছিকা পঞ্ঞত্তি যদিদং ‘‘বুদ্ধো’’তি. সব্বধম্মাৰবোধনসমত্থঞাণসমধিগমেন হি ভগৰতো সন্তানে অনৰসেসধম্মে পটিৰিজ্ঝিতুং সমত্থতা অহোসীতি.

এত্থাহ – কিং পনিদং ঞাণং পৰত্তমানং সকিংযেৰ সব্বস্মিং ৰিসযে পৰত্ততি, উদাহু কমেনাতি? কিঞ্চেত্থ – যদি তাৰ সকিংযেৰ সব্বস্মিং ৰিসযে পৰত্ততি, অতীতানাগতপচ্চুপ্পন্নঅজ্ঝত্তবহিদ্ধাদিভেদভিন্নানং সঙ্খতধম্মানং, অসঙ্খতসম্মুতিধম্মানঞ্চ একজ্ঝং উপট্ঠানে দূরতো চিত্তপটং পেক্খন্তস্স ৰিয পটিৰিভাগেনাৰবোধো ন সিযা, তথা চ সতি ‘‘সব্বে ধম্মা অনত্তা’’তি ৰিপস্সন্তানং অনত্তাকারেন ৰিয সব্বধম্মা অনিরূপিতরূপেন ভগৰতো ঞাণস্স ৰিসযা হোন্তীতি আপজ্জতি. যেপি ‘‘সব্বঞেয্যধম্মানং ঠিতলক্খণৰিসযং ৰিকপ্পরহিতং সব্বকালং বুদ্ধানং ঞাণং পৰত্ততি, তেন তে ‘সব্বৰিদূ’তি ৰুচ্চন্তি, এৰঞ্চ কত্ৰা ‘চরং সমাহিতো নাগো, তিট্ঠন্তোপি সমাহিতো’তি ইদম্পি ৰচনং সুৰুত্তং হোতী’’তি ৰদন্তি, তেসম্পি ৰুত্তদোসানাতিৰত্তি, ঠিতলক্খণারম্মণতায চ অতীতানাগতসম্মুতিধম্মানং তদভাৰতো একদেসৰিসযমেৰ ভগৰতো ঞাণং সিযা. তস্মা সকিংযেৰ ঞাণং পৰত্ততীতি ন যুজ্জতি.

অথ কমেন সব্বস্মিং ৰিসযে ঞাণং পৰত্ততি? এৰম্পি ন যুজ্জতি. ন হি জাতিভূমিসভাৰাদিৰসেন, দিসাদেসকালাদিৰসেন চ অনেকভেদভিন্নে ঞেয্যে কমেন গয্হমানে তস্স অনৰসেসপটিৰেধো সম্ভৰতি, অপরিযন্তভাৰতো ঞেয্যস্স. যে পন ‘‘অত্থস্স অৰিসংৰাদনতো ঞেয্যস্স একদেসং পচ্চক্খং কত্ৰা ‘সেসেপি এৰ’ন্তি অধিমুচ্চিত্ৰা ৰৰত্থাপনেন সব্বঞ্ঞূ ভগৰা, তঞ্চ ঞাণং ন অনুমানিকং সংসযাভাৰতো. সংসযানুবদ্ধং হি লোকে অনুমানঞাণ’’ন্তি ৰদন্তি, তেসম্পি তং ন যুত্তং. সব্বস্স হি অপ্পচ্চক্খভাৰে অত্থাৰিসংৰাদনেন ঞেয্যস্স একদেসং পচ্চক্খং কত্ৰা ‘‘সেসেপি এৰ’’ন্তি অধিমুচ্চিত্ৰা ৰৰত্থাপনস্স অসম্ভৰতো. যঞ্হি তং সেসং, তং অপ্পচ্চক্খন্তি.

অথ তম্পি পচ্চক্খং, তস্স সেসভাৰো এৰ ন সিযাতি? সব্বমেতং অকারণং. কস্মা? অৰিসযৰিচারণভাৰতো. ৰুত্তং হেতং ভগৰতা ‘‘বুদ্ধৰিসযো, ভিক্খৰে, অচিন্তেয্যো ন চিন্তেতব্বো. যো চিন্তেয্য, উম্মাদস্স ৰিঘাতস্স ভাগী অস্সা’’তি (অ. নি. ৪.৭৭). ইদং পনেত্থ সন্নিট্ঠানং – যংকিঞ্চি ভগৰতা ঞাতুং ইচ্ছিতং সকলং, একদেসো ৰা, তত্থ অপ্পটিহতৰুত্তিতায পচ্চক্খতো ঞাণং পৰত্ততি, নিচ্চসমাধানঞ্চ ৰিক্খেপাভাৰতো. ঞাতুং ইচ্ছিতস্স চ সকলস্স অৰিসযভাৰে তস্স আকঙ্খপ্পটিবদ্ধৰুত্তিতা ন সিযা, একন্তেনেৰ সা ইচ্ছিতব্বা ‘‘সব্বে ধম্মা বুদ্ধস্স ভগৰতো আৰজ্জনপ্পটিবদ্ধা আকঙ্খপ্পটিবদ্ধা মনসিকারপ্পটিবদ্ধা চিত্তুপ্পাদপ্পটিবদ্ধা’’তি ৰচনতো. অতীতানাগতৰিসযম্পি ভগৰতো ঞাণং অনুমানাগমতক্কগ্গহণৰিরহিতত্তা পচ্চক্খমেৰ.

ননু চ এতস্মিং পক্খে যদা সকলং ঞাতুং ইচ্ছিতং, তদা সকিংযেৰ সকলৰিসযতায অনিরূপিতরূপেন ভগৰতো ঞাণং পৰত্তেয্যাতি ৰুত্তদোসানাতিৰত্তিযেৰাতি? ন, তস্স ৰিসোধিতত্তা. ৰিসোধিতো হি সো বুদ্ধৰিসযো অচিন্তেয্যোতি. অঞ্ঞথা পচুরজনঞাণসমানৰুত্তিতায বুদ্ধানং ভগৰন্তানং ঞাণস্স অচিন্তেয্যতা ন সিযা. তস্মা সকলধম্মারম্মণম্পি তং একধম্মারম্মণং ৰিয সুৰৰত্থাপিতেযেৰ তে ধম্মে কত্ৰা পৰত্ততীতি ইদমেত্থ অচিন্তেয্যং. ৰুত্তঞ্হেতং ‘‘যাৰতকং ঞেয্যং, তাৰতকং ঞাণং. যাৰতকং ঞাণং, তাৰতকং ঞেয্যং. ঞেয্যপরিযন্তিকং ঞাণং, ঞাণপরিযন্তিকং ঞেয্য’’ন্তি (মহানি. ৬৯; চূল়নি. মোঘরাজমাণৰপুচ্ছানিদ্দেস ৮৫; পটি. ম. ৩.৫). এৰমেকজ্ঝং, ৰিসুং, সকিং, কমেন ৰা ইচ্ছানুরূপং সম্মা সামঞ্চ সব্বধম্মানং বুদ্ধত্তা সম্মাসম্বুদ্ধো.

১৩৩. ৰিজ্জাহীতি এত্থ ৰিন্দিযং ৰিন্দতীতি ৰিজ্জা, যাথাৰতো উপলব্ভতীতি অত্থো. অত্তনো ৰা পটিপক্খস্স ৰিজ্ঝনট্ঠেন ৰিজ্জা, তমোক্খন্ধাদিকস্স পদালনট্ঠেনাতি অত্থো. ততো এৰ অত্তনো ৰিসযস্স ৰিদিতকরণট্ঠেনপি ৰিজ্জা. সম্পন্নত্তাতি সমন্নাগতত্তা, পরিপুণ্ণত্তা ৰা, অৰিকলত্তাতি অত্থো. তিস্সন্নং, অট্ঠন্নং চ ৰিজ্জানং তত্থ তত্থ সুত্তে গহণং ৰিনেয্যজ্ঝাসযৰসেনাতি দট্ঠব্বং. সত্ত সদ্ধম্মা নাম সদ্ধা হিরী ওত্তপ্পং বাহুসচ্চং ৰীরিযং সতি পঞ্ঞা চ. যে সন্ধায ৰুত্তং ‘‘ইধ ভিক্খু সদ্ধো হোতী’’তিআদি (অ. নি. ১০.১১). চত্তারি ঝানানীতি যানি কানিচি চত্তারি রূপাৰচরজ্ঝানানি.

কস্মা পনেত্থ সীলাদযো পন্নরসেৰ ‘‘চরণ’’ন্তি ৰুত্তাতি চোদনং সন্ধাযাহ ‘‘ইমেযেৰ হী’’তিআদি. তেন তেসং সিক্খত্তযসঙ্গহতো নিব্বানুপগমনে একংসতো সাধনভাৰমাহ. ইদানি তদত্থসাধনায আগমং দস্সেন্তো ‘‘যথাহা’’তিআদিমাহ. ভগৰাতিআদি ৰুত্তস্সেৰত্থস্স নিগমনৰসেন ৰুত্তং.

ননু চাযং ৰিজ্জাচরণসম্পদা সাৰকেসুপি লব্ভতীতি? কিঞ্চাপি লব্ভতি, ন পন তথা, যথা ভগৰতোতি দস্সেতুং ‘‘তত্থ ৰিজ্জাসম্পদা’’তিআদি ৰুত্তং. চরণধম্মপরিযাপন্নত্তা করুণাব্রহ্মৰিহারস্স, সো চেত্থ মহগ্গতভাৰপ্পত্তা সাধারণভাৰোতি আহ ‘‘চরণসম্পদা মহাকারুণিকতং পূরেত্ৰা ঠিতা’’তি. যথা সত্তানং অনত্থং পরিৰজ্জেত্ৰা অত্থে নিযোজনং পঞ্ঞায ৰিনা ন হোতি, এৰং নেসং অত্থানত্থজাননং সত্থু করুণায ৰিনা ন হোতীতি উভযম্পি উভযত্থ সকিচ্চকমেৰ সিযা. যত্থ পন যস্সা পধানভাৰো, তং দস্সেতুং ‘‘সো সব্বঞ্ঞুতাযা’’তিআদি ৰুত্তং. তত্থ যথা তং ৰিজ্জাচরণসম্পন্নোতি যথা অঞ্ঞোপি ৰিজ্জাচরণসম্পন্নো, তেন ৰিজ্জাচরণসম্পন্নস্সেৰাযং আৰেণিকা পটিপত্তীতি দস্সেতি. সা পনাযং সত্থু ৰিজ্জাচরণসম্পদা সাসনস্স নিয্যানিকতায সাৰকানং সম্মাপটিপত্তিযা একন্তকারণন্তি দস্সেতুং ‘‘তেনস্সা’’তিআদি ৰুত্তং. তং সুৰিঞ্ঞেয্যমেৰ.

এত্থ চ ৰিজ্জাসম্পদায সত্থু পঞ্ঞামহত্তং পকাসিতং হোতি, চরণসম্পদায করুণামহত্তং. তেসু পঞ্ঞায ভগৰতো ধম্মরজ্জপ্পত্তি, করুণায ধম্মসংৰিভাগো. পঞ্ঞায সংসারদুক্খনিব্বিদা, করুণায সংসারদুক্খসহনং. পঞ্ঞায পরদুক্খপরিজাননং, করুণায পরদুক্খপতিকারারম্ভো. পঞ্ঞায পরিনিব্বানাভিমুখভাৰো, করুণায তদধিগমো. পঞ্ঞায সযং তরণং, করুণায পরেসং তারণং. পঞ্ঞায বুদ্ধভাৰসিদ্ধি, করুণায বুদ্ধকিচ্চসিদ্ধি. করুণায ৰা বোধিসত্তভূমিযং সংসারাভিমুখভাৰো, পঞ্ঞায তত্থ অনভিরতি. তথা করুণায পরেসং অভিংসাপনং, পঞ্ঞায সযং পরেহি অভাযনং. করুণায পরং রক্খন্তো অত্তানং রক্খতি, পঞ্ঞায অত্তানং রক্খন্তো পরং রক্খতি. তথা করুণায অপরন্তপো, পঞ্ঞায অনত্তন্তপো. তেন অত্তহিতায পটিপন্নাদীসু চতূসু পুগ্গলেসু চতুত্থপুগ্গলভাৰো সিদ্ধো হোতি. তথা করুণায লোকনাথতা, পঞ্ঞায অত্তনাথতা. করুণায চস্স নিন্নতাভাৰো, পঞ্ঞায উন্নমাভাৰো. তথা করুণায সব্বসত্তেসু জনিতানুগ্গহো পঞ্ঞানুগতত্তা ন চ ন সব্বত্থ ৰিরত্তচিত্তো, পঞ্ঞায সব্বধম্মেসু ৰিরত্তচিত্তো করুণানুগতত্তা ন চ ন সব্বসত্তানুগ্গহায পৰত্তো. যথা হি করুণা ভগৰতো সিনেহসোকৰিরহিতা, এৰং পঞ্ঞা অহংকারমমংকারৰিনিমুত্তাতি অঞ্ঞমঞ্ঞৰিসোধিতা পরমৰিসুদ্ধা গুণৰিসেসা ৰিজ্জাচরণসম্পদাহি পকাসিতাতি দট্ঠব্বং.

১৩৪. গমনম্পি হি গতন্তি ৰুচ্চতি ‘‘গতে ঠিতে’’তিআদীসু (দী. নি. ১.২১৪; ২.৩৭৬). সোভনন্তি সুভং. সুভভাৰো ৰিসুদ্ধতায, ৰিসুদ্ধতা দোসৰিগমেনাতি আহ ‘‘পরিসুদ্ধমনৰজ্জ’’ন্তি. গমনঞ্চ নাম বহুৰিধন্তি ইধাধিপ্পেতং গমনং দস্সেন্তো ‘‘অরিযমগ্গো’’তি আহ. সো হি নিব্বানস্স গতি অধিগমোতি কত্ৰা ‘‘গতং, গমন’’ন্তি চ ৰুচ্চতি. ইদানি তস্সেৰ গহণে কারণং দস্সেতুং ‘‘তেন হেসা’’তিআদি ৰুত্তং. খেমং দিসন্তি নিব্বানং. অসজ্জমানোতি পরিপন্থাভাৰেন সুগতিগমনেপি অসজ্জন্তো সঙ্গং অকরোন্তো, পগেৰ ইতরত্থ. অথ ৰা একাসনে নিসীদিত্ৰা খিপ্পভিঞ্ঞাৰসেনেৰ চতুন্নম্পি মগ্গানং পটিলদ্ধভাৰতো অসজ্জমানো অসজ্জন্তো গতো. যং গমনং গচ্ছন্তো সব্বমনত্থং অপহরতি, সব্বঞ্চ অনুত্তরং সম্পত্তিং আৰহতি, তদেৰ সোভনং নাম. তেন চ ভগৰা গতোতি আহ ‘‘ইতি সোভনগমনত্তা সুগতো’’তি সোভনত্থো সু-সদ্দোতি কত্ৰা.

অসুন্দরানং দুক্খানং সঙ্খারপ্পৰত্তীনং অভাৰতো অচ্চন্তসুখত্তা একন্ততো সুন্দরং নাম অসঙ্খতা ধাতূতি আহ ‘‘সুন্দরঞ্চেস ঠানং গতো অমতং নিব্বান’’ন্তি. তেনাহ ভগৰা ‘‘নিব্বানং পরমং সুখ’’ন্তি (ম. নি. ২.২১৫; ধ. প. ২০৩-২০৪). সম্মাতি সুট্ঠু. সুট্ঠু গমনঞ্চ নাম পটিপক্খেন অনভিভূতস্স গমনন্তি আহ ‘‘পহীনে কিলেসে পুন অপচ্চাগচ্ছন্তো’’তি. ইদঞ্চ সিখাপ্পত্তং সম্মাগমনং, যায আগমনীযপটিপদায সিদ্ধং, সাপি সম্মাগমনমেৰাতি এৰম্পি ভগৰা সুগতোতি দস্সেতুং ‘‘সম্মা ৰা গতো’’তিআদি ৰুত্তং. সম্মাপটিপত্তিযাতি সম্মাসম্বোধিযা সম্পাপনে অৰিপরীতপটিপত্তিযা. ‘‘সব্বলোকস্স হিতসুখমেৰ করোন্তো’’তি এতেন মহাবোধিযা পটিপদা অৰিভাগেন সব্বসত্তানং সব্বদা হিতসুখাৰহভাৰেনেৰ পৰত্ততীতি দস্সেতি. ‘‘সস্সতং উচ্ছেদন্তি ইমে অন্তে অনুপগচ্ছন্তো গতো’’তি এতেন পটিচ্চসমুপ্পাদগতিং দস্সেতি. ‘‘কামসুখং অত্তকিলমথন্তি ইমে অনুপগচ্ছন্তো গতো’’তি এতেন অরিযমগ্গগতিং দস্সেতি.

তত্রাতি যুত্তট্ঠানে যুত্তস্সেৰ ভাসনে নিপ্ফাদেতব্বে, সাধেতব্বে চেতং ভুম্মং. অভূতন্তি অভূতত্থং. অত্থমুখেন হি ৰাচায অভূততা, ভূততা ৰা. অতচ্ছন্তি তস্সেৰ ৰেৰচনং. অভূতন্তি ৰা অসন্তং অৰিজ্জমানং. অতচ্ছন্তি অতথাকারং অঞ্ঞথাসন্তং. অনত্থসঞ্হিতন্তি দিট্ঠধম্মিকেন, সম্পরাযিকেন ৰা অনত্থেন সঞ্হিতং, অনত্থাৰহং. ন অত্থোতি অনত্থো, অত্থস্স পটিপক্খো, অভাৰো চ, তেন সঞ্হিতং, পিসুণৰাচং, সম্ফপ্পলাপঞ্চাতি অত্থো. এৰমেত্থ চতুব্বিধস্সাপি ৰচীদুচ্চরিতস্স সঙ্গহো দট্ঠব্বো. এত্থ চ পঠমা ৰাচা সীলৰন্তং ‘‘দুস্সীলো’’তি, অচণ্ডালাদিমেৰ ‘‘চণ্ডালো’’তিআদিনা ভাসমানস্স দট্ঠব্বা. দুতিযা দুস্সীলং ‘‘দুস্সীলো’’তি, চণ্ডালাদিমেৰ ‘‘চণ্ডালো’’তিআদিনা অৰিনযেন ভাসমানস্স. ততিযা নেরযিকাদিকস্স নেরযিকাদিভাৰৰিভাৰনীকথা যথা ‘‘আপাযিকো দেৰদত্তো নেরযিকো’’তিআদিকা (চূল়ৰ. ৩৪৮). চতুত্থী ‘‘ৰেদৰিহিতেন যঞ্ঞৰিধিনা পাণাতিপাতাদিকতং সুগতিং আৰহতী’’তি লোকস্স ব্যামোহনকথা. পঞ্চমী ভূতেন পেসুঞ্ঞূপসংহারাদিকথা. ছট্ঠা যুত্তপ্পত্তট্ঠানে পৰত্তিতা দানসীলাদিকথা ৰেদিতব্বা. এৰং সম্মা গদত্তাতি যথাৰুত্তং অভূতাদিং ৰজ্জেত্ৰা ভূতং তচ্ছং অত্থসঞ্হিতং পিযং মনাপং ততো এৰ সম্মা সুট্ঠু গদনতো সুগতো দ-কারস্স ত-কারং কত্ৰা. আপাথগমনমত্তেন কস্সচি অপ্পিযম্পি হি ভগৰতো ৰচনং পিযং মনাপমেৰ অত্থসিদ্ধিযা লোকস্স হিতসুখাৰহত্তা.

অপিচ সোভনং গতং গমনং এতস্সাতি সুগতো. ভগৰতো হি ৰেনেয্যজনুপসঙ্কমনং একন্তেন তেসং হিতসুখনিপ্ফাদনতো সোভনং ভদ্দকং. তথা লক্খণানুব্যঞ্জনপটিমণ্ডিতরূপকাযতায দুতৰিলম্বিতখলিতানুকড্ঢননিপ্পীল়নুক্কুটিককুটিলাকুলতাদিদোসরহিতৰিলাসিতরাজহংসৰসভৰারণমিগরাজগমনং কাযগমনং, ঞাণগমনঞ্চ ৰিপুলনিম্মলকরুণাসতিৰীরিযাদিগুণৰিসেসসহিতং অভিনীহারতো যাৰ মহাবোধি অনৰজ্জতায, সত্তানং হিতসুখাৰহতায চ সোভনমেৰ. অথ ৰা সযম্ভূঞাণেন সকলম্পি লোকং পরিঞ্ঞাভিসমযৰসেন পরিজানন্তো সম্মা গতো অৰগতোতি সুগতো. তথা লোকসমুদযং পহানাভিসমযৰসেন পজহন্তো অনুপ্পত্তিধম্মতং আপাদেন্তো সম্মা গতো অতীতোতি সুগতো. লোকনিরোধং নিব্বানং সচ্ছিকিরিযাভিসমযৰসেন সম্মা গতো অধিগতোতি সুগতো. লোকনিরোধগামিনিং পটিপদং ভাৰনাভিসমযৰসেন সম্মা গতো পটিপন্নোতি সুগতো. তথা যং ইমস্স সদেৰকস্স লোকস্স দিট্ঠং সুতং মুতং ৰিঞ্ঞাতং পত্তং পরিযেসিতং অনুৰিচরিতং মনসা, সব্বং তং হত্থতলে আমলকং ৰিয সম্মা পচ্চক্খতো গতো অব্ভঞ্ঞাসীতি সুগতো.

১৩৫. সব্বথাতি সব্বপ্পকারেন. যো যো লোকো যথা যথা ৰেদিতব্বো, তথা তথা. তে পন পকারে দস্সেতুং ‘‘সভাৰতো’’তিআদি ৰুত্তং. তত্থ সভাৰতোতি দুক্খসভাৰতো. সব্বো হি লোকো দুক্খসভাৰো. যথাহ ‘‘সংখিত্তেন পঞ্চুপাদানক্খন্ধা দুক্খা’’তি (মহাৰ. ১৪; দী. নি. ২.৩৮৭). সমুদযতোতি যতো সো সমুদেতি, ততো তণ্হাদিতো. নিরোধতোতি যত্থ সো নিরুজ্ঝতি, ততো ৰিসঙ্খারতো. নিরোধূপাযতোতি যেন ৰিধিনা সো নিরোধো পত্তব্বো, ততো অরিযমগ্গতো, ইতো অঞ্ঞস্স পকারস্স অভাৰা.

ইতি ‘‘সব্বথা লোকং অৰেদী’’তি ৰত্ৰা তদত্থসাধকং সুত্তং দস্সেন্তো ‘‘যত্থ খো আৰুসো’’তিআদিমাহ. তত্থ ‘‘ন জাযতী’’তিআদিনা উজুকং জাতিআদীনি পটিক্খিপিত্ৰা ‘‘ন চৰতি ন উপপজ্জতী’’তি পদদ্ৰযেন অপরাপরং চৰনুপপজ্জনানি পটিক্খিপতি. কেচি পন ‘‘ন জাযতীতিআদি গব্ভসেয্যকৰসেন ৰুত্তং, ইতরং ওপপাতিকৰসেনা’’তি ৰদন্তি. তন্তি জাতিআদিরহিতং. গমনেনাতি পদসা গমনেন. ঞাতেয্যন্তি জানিতব্বং. ‘‘ঞাতায’’ন্তি ৰা পাঠো, ঞাতা অযং নিব্বানত্থিকোতি অধিপ্পাযো.

কামং পাদগমনেন গন্ত্ৰা লোকস্সন্তং ঞাতুং, দট্ঠুং, পত্তুং ৰা ন সক্কা, অপিচ পরিমিতপরিচ্ছিন্নট্ঠানে তং পঞ্ঞাপেত্ৰা দস্সেমীতি দস্সেন্তো ‘‘অপিচা’’তিআদিমাহ. তত্থ সসঞ্ঞিম্হীতি সঞ্ঞাসহিতে. ততো এৰ সমনকে সৰিঞ্ঞাণকে. অৰিঞ্ঞাণকে পন উতুসমুট্ঠানরূপসমুদাযমত্তে পঞ্ঞাপেতুং ন সক্কাতি অধিপ্পাযো. লোকন্তি খন্ধাদিলোকং. লোকনিরোধন্তি তস্স লোকস্স নিরুজ্ঝনং, নিব্বানমেৰ ৰা. অদেসম্পি হি তং যেসং নিরোধো, তেসং ৰসেন উপচারতো, দেসতোপি নিদ্দিসীযতি যথা ‘‘চক্খুং লোকে পিযরূপং সাতরূপং, এত্থেসা তণ্হা পহীযমানা পহীযতি, এত্থ নিরুজ্ঝমানা নিরুজ্ঝতী’’তি (দী. নি. ২.৪০১; ম. নি. ১.১৩৪; ৰিভ. ২০৪).

গমনেনাতি পাকতিকগমনেন. লোকস্সন্তোতি সঙ্খারলোকস্স অন্তো অন্তকিরিযাহেতুভূতং নিব্বানং. কুদাচনন্তি কদাচিপি. অপত্ৰাতি অগ্গমগ্গেন অনধিগন্ত্ৰা. পমোচনন্তি পমুত্তি নিস্সরণং. তস্মাতি যস্মা লোকস্সন্তং অপত্ৰা ৰট্টদুক্খতো মুত্তি নত্থি, তস্মা. হৰেতি নিপাতমত্তং. লোকৰিদূতি সভাৰাদিতো সব্বং লোকং জানন্তো. সুমেধোতি সুন্দরপঞ্ঞো. লোকন্তগূতি পরিঞ্ঞাভিসমযেন লোকং ৰিদিত্ৰা পহানাভিসমযেন লোকন্তগূ. মগ্গব্রহ্মচরিযৰাসস্স পরিনিট্ঠিতত্তা ৰুসিতব্রহ্মচরিযো. সব্বেসং কিলেসানং সমিতত্তা, চতুসচ্চধম্মানং ৰা অভিসমিতত্তা সমিতাৰী. নাসীসতি ন পত্থেতি. যথা ইমং লোকং, এৰং পরঞ্চ লোকং অপ্পটিসন্ধিকত্তা.

১৩৬. এৰং যদিপি লোকৰিদুতা অনৰসেসতো দস্সিতা সভাৰতো দস্সিতত্তা, লোকো পন একদেসেনেৰ ৰুত্তোতি তং অনৰসেসতো দস্সেতুং ‘‘অপিচ তযো লোকা’’তিআদি ৰুত্তং. তত্থ ইন্দ্রিযবদ্ধানং খন্ধানং সমূহো, সন্তানো চ সত্তলোকো. রূপাদীসু সত্তৰিসত্ততায সত্তো, লোকীযন্তি এত্থ কুসলাকুসলং, তব্বিপাকো চাতি লোকোতি. অনিন্দ্রিযবদ্ধানং রূপাদীনং সমূহো, সন্তানো চ ওকাসলোকো লোকিযন্তি এত্থ তসা, থাৰরা চ, তেসঞ্চ ওকাসভূতোতি. তদাধারতায হেস ‘‘ভাজনলোকো’’তিপি ৰুচ্চতি. উভযেপি খন্ধা সঙ্খারলোকো পচ্চযেহি সঙ্খরীযন্তি, লুজ্জন্তি পলুজ্জন্তি চাতি. আহারট্ঠিতিকাতি পচ্চযট্ঠিতিকা, পচ্চযাযত্তৰুত্তিকাতি অত্থো. পচ্চযত্থো হেত্থ আহার-সদ্দো ‘‘অযমাহারো অনুপ্পন্নস্স ৰা কামচ্ছন্দস্স উপ্পাদাযা’’তিআদীসু (সং. নি. ৫.২৩২) ৰিয. এৰং হি ‘‘সব্বে সত্তা’’তি ইমিনা অসঞ্ঞসত্তাপি পরিগ্গহিতা হোন্তি. সা পনাযং আহারট্ঠিতিকতা নিপ্পরিযাযতো সঙ্খারধম্মো, ন সত্তধম্মোতি আহ ‘‘আহারট্ঠিতিকাতি আগতট্ঠানে সঙ্খারলোকো ৰেদিতব্বো’’তি.

যদি এৰং ‘‘সব্বে সত্তা’’তি ইদং কথন্তি? পুগ্গলাধিট্ঠানা দেসনাতি নাযং দোসো. যথা অঞ্ঞত্থাপি ‘‘একধম্মে, ভিক্খৰে, ভিক্খু সম্মা নিব্বিন্দমানো সম্মা ৰিরজ্জমানো সম্মা ৰিমুচ্চমানো সম্মা পরিযন্তদস্সাৰী সম্মদত্থং অভিসমেচ্চ দিট্ঠেৰ ধম্মে দুক্খস্সন্তকরো হোতি. কতমস্মিং একধম্মে? সব্বে সত্তা আহারট্ঠিতিকা’’তি (অ. নি. ১০.২৭). দিট্ঠিগতিকানং সস্সতাদিৰসেন ‘‘অত্তা, লোকো’’তি চ পরিকপ্পনা যেভুয্যেন সত্তৰিসযা, ন সঙ্খারৰিসযাতি আহ ‘‘সস্সতো লোকোতি ৰা অসস্সতো লোকোতি ৰা আগতট্ঠানে সত্তলোকো ৰেদিতব্বো’’তি.

যাৰতা চন্দিমসূরিযা পরিহরন্তীতি যত্তকে ঠানে চন্দিমসূরিযা পরিৰত্তন্তি পরিব্ভমন্তি. দিসা ভন্তি ৰিরোচমানাতি তেসং পরিব্ভমনেনেৰ তা দিসা পভস্সরা হুত্ৰা ৰিরোচন্তি. তাৰ সহস্সধা লোকোতি তত্তকং সহস্সপ্পকারো ওকাসলোকো, সহস্সলোকধাতুযোতি অত্থো. ‘‘তাৰ সহস্সৰা’’তি ৰা পাঠো.

তম্পীতি তং তিৰিধম্পি লোকং. তথা হিস্স সব্বথাপি ৰিদিতোতি সম্বন্ধো. একো লোকোতি ‘‘সব্বে সত্তা আহারট্ঠিতিকা’’তি যায পুগ্গলাধিট্ঠানায কথায সব্বেসং সঙ্খারানং পচ্চযাযত্তৰুত্তিতা ৰুত্তা, তায সব্বো সঙ্খারলোকো একো একৰিধো পকারন্তরস্স অভাৰতো. দ্ৰে লোকাতিআদীসুপি ইমিনা নযেন অত্থো ৰেদিতব্বো. নাম-গ্গহণেন চেত্থ নিব্বানস্স অগ্গহণং, তস্স অলোকসভাৰত্তা. ননু চ ‘‘আহারট্ঠিতিকা’’তি এত্থ পচ্চযাযত্তৰুত্তিতায মগ্গফলধম্মানম্পি লোকতা আপজ্জতীতি? নাপজ্জতি, পরিঞ্ঞেয্যানং দুক্খসচ্চধম্মানং ইধ ‘‘লোকো’’তি অধিপ্পেতত্তা. অথ ৰা ‘‘ন লুজ্জতি ন পলুজ্জতী’’তি যো গহিতো তথা ন হোতি, সো লোকোতি তংগহণরহিতানং লোকুত্তরানং নত্থি লোকতা. উপাদানানং আরম্মণভূতা খন্ধা উপাদানক্খন্ধা. দসাযতনানীতি দস রূপাযতনানি.

এত্থ চ ‘‘আহারট্ঠিতিকা’’তি পচ্চযাযত্তৰুত্তিতাৰচনেন সঙ্খারানং অনিচ্চতা. তায চ ‘‘যদনিচ্চং, তং দুক্খং. যং দুক্খং, তদনত্তা’’তি (সং. নি. ৩.১৫) ৰচনতো দুক্খানত্ততা চ পকাসিতা হোন্তীতি তীণিপি সামঞ্ঞলক্খণানি গহিতানি. নামন্তি চত্তারো অরূপিনো খন্ধা, তে চ অত্থতো ফস্সাদযো. রূপন্তি ভূতুপাদাযরূপানি, তানি চ অত্থতো পথৰীআদযোতি অৰিসেসেনেৰ সলক্খণতো সঙ্খারা গহিতা. তগ্গহণেনেৰ যে তেসং ৰিসেসা কুসলাদযো, হেতুআদযো চ, তেপি গহিতা এৰ হোন্তীতি আহ ‘‘ইতি অযং সঙ্খারলোকোপি সব্বথা ৰিদিতো’’তি.

আগম্ম চিত্তং সেতি এত্থাতি আসযো মিগাসযো ৰিয. যথা মিগো গোচরায গন্ত্ৰা পচ্চাগন্ত্ৰা তত্থেৰ ৰনগহনে সযতীতি সো তস্স আসযো, এৰং অঞ্ঞথা পৰত্তিত্ৰাপি চিত্তং আগম্ম যত্থ সেতি, সো তস্স আসযোতি ৰুচ্চতি. সো পন সস্সতদিট্ঠিআদিৰসেন চতুব্বিধো. ৰুত্তঞ্চ –

‘‘সস্সতুচ্ছেদদিট্ঠি চ, খন্তি চেৰানুলোমিকা;

যথাভূতঞ্চ যং ঞাণং, এতং আসযসদ্দিত’’ন্তি.

তত্থ সব্বদিট্ঠীনং সস্সতুচ্ছেদদিট্ঠীহি সঙ্গহিতত্তা সব্বেপি দিট্ঠিগতিকা সত্তা ইমা এৰ দ্ৰে দিট্ঠিযো সন্নিস্সিতা. যথাহ ‘‘দ্ৰযনিস্সিতো খ্ৰাযং, কচ্চান, লোকো যেভুয্যেন অত্থিতঞ্চ নত্থিতঞ্চা’’তি (সং. নি. ২.১৫). অত্থিতাতি হি সস্সতগ্গাহো অধিপ্পেতো, নত্থিতাতি উচ্ছেদগ্গাহো. অযং তাৰ ৰট্টনিস্সিতানং পুথুজ্জনানং আসযো. ৰিৰট্টনিস্সিতানং পন সুদ্ধসত্তানং অনুলোমিকা খন্তি, যথাভূতঞাণন্তি দুৰিধো আসযো.

আসযং জানাতীতি চতুব্বিধম্পি সত্তানং আসযং জানাতি. জানন্তো চ তেসং দিট্ঠিগতানং, তেসঞ্চ ঞাণানং অপ্পৰত্তিক্খণেপি জানাতি. ৰুত্তঞ্হেতং –

‘‘কামং সেৰন্তঞ্ঞেৰ জানাতি ‘অযং পুগ্গলো কামগরুকো কামাসযো কামাধিমুত্তো’তি, কামং সেৰন্তঞ্ঞেৰ জানাতি ‘অযং পুগ্গলো নেক্খম্মগরুকো নেক্খম্মাসযো নেক্খম্মাধিমুত্তো’তি’’আদি (পটি. ম. ১.১১৩).

অপ্পহীনভাৰেন সন্তানে অনু অনু সযন্তীতি অনুসযা, অনুরূপং কারণং লভিত্ৰা উপ্পজ্জন্তীতি অত্থো. এতেন নেসং কারণলাভে উপ্পজ্জনারহতং দস্সেতি. অপ্পহীনা হি কিলেসা কারণলাভে সতি উপ্পজ্জন্তি. কে পন তে? রাগাদযো সত্ত অনাগতা কিলেসা, অতীতা, পচ্চুপ্পন্না চ তংসভাৰত্তা তথা ৰুচ্চন্তি. ন হি ধম্মানং কালভেদেন সভাৰভেদো অত্থি. তং সত্তৰিধং অনুসযং তস্স তস্স সত্তস্স সন্তানে পরোপরভাৰেন পৰত্তমানং জানাতি.

চরিতন্তি সুচরিতদুচ্চরিতং. তং হি ৰিভঙ্গে (ৰিভ. ৮১৪, ৮১৭) চরিতনিদ্দেসে নিদ্দিট্ঠং. অথ ৰা চরিতন্তি চরিযা ৰেদিতব্বা. তা পন রাগদোসমোহসদ্ধাবুদ্ধিৰিতক্কৰসেন ছ মূলচরিযা, তাসং অপরিযন্তো অন্তরভেদো, সংসগ্গভেদো পন তেসট্ঠিৰিধো. তং চরিতং সভাৰতো সংকিলেসৰোদানতো সমুট্ঠানতো ফলতো নিস্সন্দতোতি এৰমাদিনা পকারেন জানাতি.

অধিমুত্তি অজ্ঝাসযধাতু. সা দুৰিধা হীনাধিমুত্তি পণীতাধিমুত্তীতি. যায হীনাধিমুত্তিকা সত্তা হীনাধিমুত্তিকেযেৰ সেৰন্তি, পণীতাধিমুত্তিকা চ পণীতাধিমুত্তিকেযেৰ. সা অজ্ঝাসযধাতু অজ্ঝাসযসভাৰো অধিমুত্তি. তং অধিমুত্তিং জানাতি ‘‘ইমস্স অধিমুত্তি হীনা, ইমস্স পণীতা’’তি, তত্থাপি ‘‘ইমস্স মুদু, ইমস্স মুদুতরা, ইমস্স মুদুতমা’’তিআদিনা. ইন্দ্রিযানং হি তিক্খমুদুভাৰাদিনা যথারহং অধিমুত্তিযা তিক্খমুদুভাৰাদিকো ৰেদিতব্বো. তথা হি ৰুত্তং সম্মোহৰিনোদনীযং (ৰিভ. অট্ঠ. ৮১৮, ৮২০) ‘‘হেট্ঠা গহিতাপি অধিমুত্তি ইধ সত্তানং তিক্খিন্দ্রিযমুদিন্দ্রিযভাৰদস্সনত্থং পুন গহিতা’’তি.

অপ্পরজং অক্খং এতেসন্তি অপ্পরজক্খা, অপ্পং ৰা রজং পঞ্ঞামযে অক্খিম্হি এতেসন্তি অপ্পরজক্খা, অনুস্সদরাগাদিরজা সত্তা, তে অপ্পরজক্খে. মহারজক্খেতি এত্থাপি এসেৰ নযো. উস্সদরাগাদিরজা মহারজক্খা.

তিক্খিন্দ্রিযেতি তিখিণেহি সদ্ধাদীহি ইন্দ্রিযেহি সমন্নাগতে. মুদিন্দ্রিযেতি মুদুকেহি সদ্ধাদীহি ইন্দ্রিযেহি সমন্নাগতে. উপনিস্সযইন্দ্রিযানি নাম ইধাধিপ্পেতানি. স্ৰাকারেতি সুন্দরাকারে কল্যাণপকতিকে, ৰিৰট্টজ্ঝাসযেতি অত্থো. সুৰিঞ্ঞাপযেতি সম্মত্তনিযামং ৰিঞ্ঞাপেতুং সুকরে সদ্ধে, পঞ্ঞৰন্তে চ. ভব্বে অভব্বেতি এত্থ ভব্বেতি কম্মাৰরণকিলেসাৰরণৰিপাকাৰরণরহিতে. ৰুত্তৰিপরিযাযেন দ্ৰাকারদুৰিঞ্ঞাপযাভব্বা ৰেদিতব্বা. এত্থ চ ‘‘ইমস্স রাগরজো অপ্পো, ইমস্স দোসরজো অপ্পো’’তিআদিনা অপ্পরজক্খেসু জাননং ৰেদিতব্বং. সেসেসুপি এসেৰ নযো. তস্মাতি যস্মা ভগৰা অপরিমাণে সত্তে আসযাদিতো অনৰসেসেত্ৰা জানাতি, তস্মা অস্স ভগৰতো সত্তলোকোপি সব্বথা ৰিদিতো.

ননু চ সত্তেসু পমাণাদিপি জানিতব্বো অত্থীতি? অত্থি. তস্স পন জাননং ন নিব্বিদায ৰিরাগায নিরোধাযাতি ইধ ন গহিতং, ভগৰতো পন তম্পি সুৰিদিতং সুৰৰত্থাপিতমেৰ, পযোজনাভাৰা দেসনং নারুল়্হং. তেন ৰুত্তং –

‘‘অথ খো ভগৰা পরিত্তং নখসিখাযং পংসুং আরোপেত্ৰা ভিক্খূ আমন্তেসি ‘তং কিং মঞ্ঞথ, ভিক্খৰে, কতমং নু খো বহুতরং – যো ৰাযং মযা পরিত্তো নখসিখাযং পংসু আরোপিতো, অযং ৰা মহাপথৰী’’’তিআদি (সং. নি. ৫.১১২১).

১৩৭. ওকাসলোকোপি সব্বথা ৰিদিতোতি সম্বন্ধো. চক্কৰাল়ন্তি লোকধাতু. সা হি নেমিমণ্ডলসদিসেন চক্কৰাল়পব্বতেন সমন্ততো পরিক্খিত্তত্তা ‘‘চক্কৰাল়’’ন্তি ৰুচ্চতি. চতুতিংসসতানি চাতি চতুঅধিকানি তিংসসতানি, তীণিসহস্সানি, চত্তারিসতানি চাতি অত্থো. অড্ঢুড্ঢানীতি উপড্ঢচতুত্থানি, তীণিসতানি, পঞ্ঞাসঞ্চাতি অত্থো. নহুতানীতি দসসহস্সানি. সঙ্খাতাতি কথিতা. সণ্ঠিতীতি হেট্ঠা, উপরিতো চাতি সব্বসো ঠিতি.

এৰং সণ্ঠিতেতি এৰমৰট্ঠিতে. এত্থাতি চক্কৰাল়ে. অচ্চুগ্গতো তাৰদেৰাতি তত্তকমেৰ চতুরাসীতি যোজনসহস্সানিযেৰ উব্বেধো. ন কেৰলং চেত্থ উব্বেধোৰ, অথ খো আযামৰিত্থারাপিস্স তত্তকাযেৰ. ৰুত্তঞ্হেতং –

‘‘সিনেরু, ভিক্খৰে, পব্বতরাজা চতুরাসীতি যোজনসহস্সানি আযামেন, চতুরাসীতি যোজনসহস্সানি ৰিত্থারেনা’’তি (অ. নি. ৭.৬৬).

ততোতি সিনেরুস্স হেট্ঠা, উপরি চ ৰুত্তপ্পমাণতো. উপড্ঢুপড্ঢেনাতি উপড্ঢেন উপড্ঢেন. ইদং ৰুত্তং হোতি – দ্ৰাচত্তালীস যোজনসহস্সানি সমুদ্দে অজ্ঝোগাল়্হো তত্তকমেৰ চ উপরি উগ্গতো যুগন্ধরপব্বতো, একৰীস যোজনসহস্সানি সমুদ্দে অজ্ঝোগাল়্হো তত্তকমেৰ চ উপরি উগ্গতো ঈসধরো পব্বতোতি ইমিনা নযেন সেসেসুপি উপড্ঢুপড্ঢপমাণতা ৰেদিতব্বা. যথা মহাসমুদ্দো যাৰ চক্কৰাল়পাদমূলা অনুপুব্বনিন্নো, এৰং যাৰ সিনেরুপাদমূলাতি হেট্ঠা সিনেরুপমাণতো উপড্ঢপমাণোপি যুগন্ধরপব্বতো পথৰিযং সুপ্পতিট্ঠিতো, এৰং ঈসধরাদযোপীতি দট্ঠব্বং. ৰুত্তং হেতং ‘‘মহাসমুদ্দো, ভিক্খৰে, অনুপুব্বনিন্নো অনুপুব্বপোণো অনুপুব্বপব্ভারো’’তি (উদা. ৪৫; চূল়ৰ. ৩৮৪; অ. নি. ৮.১৯). সিনেরুযুগন্ধরাদীনং অন্তরে সীদন্তরসমুদ্দা নাম. তে ৰিত্থারতো যথাক্কমং সিনেরুআদীনং অচ্চুগ্গতসমানপরিমাণাতি ৰদন্তি. ব্রহাতি মহন্তো.

সিনেরুস্স সমন্ততোতি পরিক্খিপনৰসেন সিনেরুস্স সমন্ততো ঠিতা. সিনেরুং তাৰ পরিক্খিপিত্ৰা ঠিতো যুগন্ধরো, তং পরিক্খিপিত্ৰা ঈসধরো. এৰং তং তং পরিক্খিপিত্ৰা ঠিতা ‘‘সিনেরুস্স সমন্ততো’’তি ৰুত্তা.

যোজনানং সতানুচ্চো, হিমৰা পঞ্চ পব্বতোতি হিমৰা পব্বতো পঞ্চ যোজনানং সতানি উচ্চো উব্বেধো. নগৰ্হযাতি নগ-সদ্দেন অৰ্হাতব্বা রুক্খাভিধানা. পঞ্ঞাসযোজনক্খন্ধসাখাযামাতি’ উব্বেধতো পঞ্ঞাসযোজনক্খন্ধাযামা, উব্বেধতো, সমন্ততো চ পঞ্ঞাসযোজনসাখাযামা চ. ততো এৰ সতযোজনৰিত্থিণ্ণা, তাৰদেৰ চ উগ্গতা. যস্সানুভাৰেনাতি যস্সা মহন্ততা কপ্পট্ঠাযিতাদিপ্পকারেন পভাৰেন.

গরুল়ানং সিম্বলিরুক্খো সিনেরুস্স দুতিযপরিভণ্ডে পতিট্ঠিতো.

সিরীসেনাতি পচ্চত্তে করণৰচনং. সত্তমন্তি লিঙ্গৰিপল্লাসেন ৰুত্তং, সিরীসো ভৰতি সত্তমোতি অত্থো.

তত্থ চণ্ডমণ্ডলং হেট্ঠা, সূরিযমণ্ডলং উপরি. তস্স আসন্নভাৰেন চন্দমণ্ডলং অত্তনো ছাযায ৰিকলভাৰেন উপট্ঠাতি. তানি যোজনন্তরিকানি যুগন্ধরগ্গপমাণে আকাসে ৰিচরন্তি. অসুরভৰনং সিনেরুস্স হেট্ঠা. অৰীচি জম্বুদীপস্স. জম্বুদীপো সকটসণ্ঠানো. অপরগোযানং আদাসসণ্ঠানো. পুব্বৰিদেহো অদ্ধচন্দসণ্ঠানো. উত্তরকুরু পীঠসণ্ঠানো. তংতংনিৰাসীনং, তংতংপরিৰারদীপৰাসীনঞ্চ মনুস্সানং মুখম্পি তংতংসণ্ঠানন্তি ৰদন্তি. তদন্তরেসূতি তেসং চক্কৰাল়ানং অন্তরেসু. তিণ্ণং হি পত্তানং অঞ্ঞমঞ্ঞআসন্নভাৰেন ঠপিতানং অন্তরসদিসে তিণ্ণং তিণ্ণং চক্কৰাল়ানং অন্তরে একেকো লোকন্তরনিরযো.

অনন্তানীতি অপরিমাণানি, ‘‘এত্তকানী’’তি অঞ্ঞেহি মিনিতুং অসক্কুণেয্যানি. ভগৰা অনন্তেন বুদ্ধঞাণেন অৰেদি ‘‘অনন্তো আকাসো, অনন্তো সত্তনিকাযো, অনন্তানি চক্কৰাল়ানী’’তি তিৰিধম্পি অনন্তং বুদ্ধঞাণং পরিচ্ছিন্দতি সযম্পি অনন্তত্তা. যাৰতকং হি ঞেয্যং, তাৰতকং ঞাণং. যাৰতকং ঞাণং, তাৰতকং ঞেয্যং. ঞেয্যপরিযন্তিকং ঞাণং, ঞাণপরিযন্তিকং ঞেয্যন্তি. তেন ৰুত্তং ‘‘অনন্তেন বুদ্ধঞাণেন অৰেদী’’তি. অনন্ততা চস্স অনন্তঞেয্যপটিৰিজ্ঝনেনেৰ ৰেদিতব্বা তত্থ অপ্পটিহতচারত্তা. ননু চেত্থ ৰিৰট্টাদীনম্পি ৰিদিততা ৰত্তব্বাতি? সচ্চং ৰত্তব্বং, সা পন পরতো অভিঞ্ঞাকথাযং আগমিস্সতীতি ইধ ন গহিতা.

১৩৮. অত্তনাতি নিস্সক্কৰচনমেতং. গুণেহি অত্তনা ৰিসিট্ঠতরস্সাতি সম্বন্ধো. তর-গ্গহণং চেত্থ ‘‘অনুত্তরো’’তি পদস্স অত্থনিদ্দেসতায কতং, ন ৰিসিট্ঠস্স কস্সচি অত্থিতায. সদেৰকে হি লোকে সদিসকপ্পোপি নাম কোচি তথাগতস্স নত্থি, কুতো সদিসো. ৰিসিট্ঠে পন কা কথা. কস্সচীতি কস্সচিপি. অভিভৰতীতি সীলসম্পদায উপনিস্সযভূতানং হিরোত্তপ্পমেত্তাকরুণানং, ৰিসেসপচ্চযানং সদ্ধাসতিৰীরিযপঞ্ঞানঞ্চ উক্কংসপ্পত্তিযা সমুদাগমতো পট্ঠায অনঞ্ঞসাধারণো সৰাসনপটিপক্খস্স পহীনত্তা উক্কংসপারমিপ্পত্তো সত্থু সীলগুণো. তেন ভগৰা সদেৰকং লোকং অঞ্ঞদত্থু অভিভুয্য পৰত্ততি, ন সযং কেনচি অভিভুয্যতীতি অধিপ্পাযো. এৰং সমাধিগুণাদীসুপি যথারহং ৰত্তব্বং. সীলাদযো চেতে লোকিযলোকুত্তরমিস্সকা ৰেদিতব্বা. ৰিমুত্তিঞাণদস্সনং পন লোকিযং কামাৰচরমেৰ.

যদি এৰং, কথং তেন সদেৰকং লোকং অভিভৰতীতি? তস্সাপি আনুভাৰতো অসদিসত্তা. তম্পি হি ৰিসযতো, পৰত্তিতো, পৰত্তি আকারতো চ উত্তরিতরমেৰ. তং হি অনঞ্ঞসাধারণং সত্থু ৰিমুত্তিগুণং আরব্ভ পৰত্ততি, পৰত্তমানঞ্চ অতক্কাৰচরং পরমগম্ভীরং সণ্হসুখুমং সৰিসযং পটিপক্খধম্মানং সুপ্পহীনত্তা সুট্ঠু পাকটং ৰিভূততরং কত্ৰা পৰত্ততি, সম্মদেৰ চ ৰসীভাৰস্স পাপিতত্তা, ভৰঙ্গপরিৰাসস্স চ অতিপরিত্তকত্তা লহুং লহুং পৰত্ততীতি.

এৰং সীলাদিগুণেহি ভগৰতো উত্তরিতরস্স অভাৰং দস্সেত্ৰা ইদানি সদিসস্সাপি অভাৰং দস্সেতুং ‘‘অসমো’’তিআদি ৰুত্তং. তত্থ অসমোতি একস্মিং কালে নত্থি এতস্স সীলাদিগুণেন সমা সদিসাতি অসমো. তথা অসমেহি অতীতানাগতবুদ্ধেহি সমো, অসমা ৰা সমা এতস্সাতি অসমসমো. সীলাদিগুণেন নত্থি এতস্স পটিমাতি অপ্পটিমো. সেসপদদ্ৰযেপি এসেৰ নযো. তত্থ উপমামত্তং পটিমা, সদিসূপমা পটিভাগো, যুগগ্গাহৰসেন ঠিতো পটিপুগ্গলো ৰেদিতব্বো.

ন খো পনাহং সমনুপস্সামীতি মম সমন্তচক্খুনা হত্থতলে আমলকং ৰিয সব্বলোকং পস্সন্তোপি তত্থ সদেৰকে…পে… পজায অত্তনা অত্ততো সীলসম্পন্নতরং সম্পন্নতরসীলং কঞ্চি পুগ্গলং ন খো পন পস্সামি, তাদিসস্স অভাৰতোতি অধিপ্পাযো. অগ্গপ্পসাদসুত্তাদীনীতি এত্থ –

‘‘যাৰতা, ভিক্খৰে, সত্তা অপদা ৰা দ্ৰিপদা ৰা চতুপ্পদা ৰা বহুপ্পদা ৰা রূপিনো ৰা অরূপিনো ৰা সঞ্ঞিনো ৰা অসঞ্ঞিনো ৰা নেৰসঞ্ঞিনাসঞ্ঞিনো ৰা, তথাগতো তেসং অগ্গমক্খাযতি অরহং সম্মাসম্বুদ্ধো. যে, ভিক্খৰে, বুদ্ধে পসন্না, অগ্গে তে পসন্না. অগ্গে খো পন পসন্নানং অগ্গো ৰিপাকো হোতী’’তি (অ. নি. ৪.৩৪; ৫.৩২; ১০.১৫; ইতিৰু৯০) –

ইদং অগ্গপ্পসাদসুত্তং. আদি-সদ্দেন –

‘‘সদেৰকে…পে… সদেৰমনুস্সায তথাগতো অভিভূ অনভিভূতো অঞ্ঞদত্থুদসো ৰসৰত্তী, তস্মা ‘তথাগতো’তি ৰুচ্চতী’’তি (অ. নি. ৪.২৪; দী. নি. ৩.১৮৮) –

এৰমাদীনি সুত্তপদানি ৰেদিতব্বানি. আদিকা গাথাযোতি এত্থ –

‘‘অহং হি অরহা লোকে, অহং সত্থা অনুত্তরো;

একোম্হি সম্মাসম্বুদ্ধো, সীতিভূতোস্মি নিব্বুতো. (মহাৰ. ১১; ম. নি. ১.২৮৫; ২.৩৪১);

‘‘দন্তো দমযতং সেট্ঠো, সন্তো সমযতং ইসি;

মুত্তো মোচযতং অগ্গো, তিণ্ণো তারযতং ৰরো. (ইতিৰু. ১১২);

‘‘নযিমস্মিং লোকে পরস্মিং ৰা পন,

বুদ্ধেন সেট্ঠো সদিসো চ ৰিজ্জতি;

যমাহু দক্খিণেয্যানং অগ্গতং গতো,

পুঞ্ঞত্থিকানং ৰিপুলফলেসিন’’ন্তি. (ৰি. ৰ. ১০৪৭; কথা. ৭৯৯) –

এৰমাদিকা গাথা ৰিত্থারেতব্বা.

১৩৯. দমেতীতি সমেতি, কাযসমাদীহি যোজেতীতি অত্থো. তং পন কাযসমাদীহি যোজনং যথারহং তদঙ্গৰিনযাদীসু পতিট্ঠাপনং হোতীতি আহ ‘‘ৰিনেতীতি ৰুত্তং হোতী’’তি. দমেতুং যুত্তাতি দমনারহা. অমনুস্সপুরিসাতি এত্থ ন মনুস্সাতি অমনুস্সা. তংসদিসতা এত্থ জোতীযতি, তেন মনুস্সত্তমত্তং নত্থি, অঞ্ঞং সমানন্তি যক্খাদযো ‘‘অমনুস্সা’’তি অধিপ্পেতা, ন যে কেচি মনুস্সেহি অঞ্ঞে. তথা হি তিরচ্ছানপুরিসানং ৰিসুং গহণং কতং, যক্খাদযো এৰ চ নিদ্দিট্ঠা. অপলালো হিমৰন্তৰাসী. চূল়োদরমহোদরা নাগদীপৰাসিনো. অগ্গিসিখধূমসিখা সীহল়দীপৰাসিনো. নিব্বিসা কতা দোসৰিসস্স ৰিনোদনেন. তেনাহ ‘‘সরণেসু চ সীলেসু চ পতিট্ঠাপিতা’’তি. কূটদন্তাদযোতি আদি-সদ্দেন ঘোটমুখউপালিগহপতিআদীনং সঙ্গহো দট্ঠব্বো. সক্কদেৰরাজাদযোতি আদি-সদ্দেন অজকলাপযক্খবকব্রহ্মাদীনং সঙ্গহো দট্ঠব্বো. ইদং চেত্থ সুত্তন্তি ইদং কেসিসুত্তং. ৰিনীতা ৰিচিত্রেহি ৰিনযনূপাযেহীতি এতস্মিং অত্থে ৰিত্থারেতব্বং যথারহং সণ্হাদীহি উপাযেহি ৰিনযস্স দীপনতো.

ৰিসুদ্ধসীলাদীনং পঠমজ্ঝানাদীনীতি ‘‘ৰিসুদ্ধসীলস্স পঠমজ্ঝানং, পঠমজ্ঝানলাভিনো দুতিযজ্ঝান’’ন্তিআদিনা তস্স তস্স উপরূপরি ৰিসেসং আচিক্খন্তোতি সম্বন্ধো. সোতাপন্নাদীনন্তি এত্থাপি এসেৰ নযো. ‘‘দন্তেপি দমেতিযেৰা’’তি ইদং পুব্বে ‘‘সব্বেন সব্বং দমথং অনুপগতা পুরিসদম্মা’’তি ৰুত্তাতি কত্ৰা ৰুত্তং. যে পন ৰিপ্পকতদম্মভাৰা সব্বথা দমেতব্বতং নাতিৰত্তা, তে সত্তে সন্ধায ‘‘দন্তেপি দমেতিযেৰা’’তি ৰুত্তং. তেপি হি পুরিসদম্মা এৰাতি, যতো নে সত্থা দমেতি.

অত্থপদন্তি অত্থাভিব্যঞ্জকপদং, ৰাক্যন্তি অত্থো. ৰাক্যেন হি অত্থাভিব্যত্তি, ন নামাদিপদমত্তেন. একপদভাৰেন চ অনঞ্ঞসাধারণো সত্থু পুরিসদম্মসারথিভাৰো দস্সিতো হোতি. তেনাহ ‘‘ভগৰা হী’’তিআদি. অট্ঠ দিসাতি অট্ঠ সমাপত্তিযো. তা হি অঞ্ঞমঞ্ঞসম্বন্ধাপি অসংকিণ্ণভাৰেন দিস্সন্তি অপদিস্সন্তীতি দিসা, দিসা ৰিযাতি ৰা দিসা. অসজ্জমানাতি ন সজ্জমানা ৰসীভাৰপ্পত্তিযা নিস্সঙ্গচারা. ধাৰন্তি জৰনৰুত্তিযোগতো. একংযেৰ দিসং ধাৰতি, অত্তনো কাযং অপরিৰত্তেন্তোতি অধিপ্পাযো. সত্থারা পন দমিতা পুরিসদম্মা একিরিযাপথেনেৰ অট্ঠ দিসা ধাৰন্তি. তেনাহ ‘‘একপল্লঙ্কেনেৰ নিসিন্না’’তি. অট্ঠ দিসাতি চ নিদস্সনমত্তমেতং, লোকিযেহি অগতপুব্বং নিরোধসমাপত্তিদিসং, অমতদিসঞ্চ পক্খন্দনতো.

১৪০. দিট্ঠধম্মো ৰুচ্চতি পচ্চক্খো অত্তভাৰো, তত্থ নিযুত্তোতি দিট্ঠধম্মিকো, ইধলোকত্থো. কম্মকিলেসৰসেন সম্পরেতব্বতো সম্মা গন্তব্বতো সম্পরাযো, পরলোকো, তত্থ নিযুত্তোতি সম্পরাযিকো, পরলোকত্থো. পরমো উত্তমো অত্থো পরমত্থো, নিব্বানং. তেহি দিট্ঠধম্মিকসম্পরাযিকপরমত্থেহি. যথারহন্তি যথানুরূপং. তেসু অত্থেসু যো যো পুগ্গলো যং যং অরহতি, তদনুরূপং. অনুসাসতীতি ৰিনেতি তস্মিং অত্থে পতিট্ঠপেতি, সহ অত্থেন ৰত্ততীতি সত্থো, ভণ্ডমূলেন ৰাণিজ্জায দেসন্তরং গচ্ছন্তো জনসমূহো. হিতুপদেসাদিৰসেন পরিপালেতব্বো সাসিতব্বো সো এতস্স অত্থীতি সত্থা, সত্থৰাহো. সো ৰিয ভগৰাতি আহ ‘‘সত্থা ৰিযাতি সত্থা, ভগৰা সত্থৰাহো’’তি.

ইদানি তমত্থং নিদ্দেসপাল়িনযেন দস্সেতুং ‘‘যথা সত্থৰাহো’’তিআদি ৰুত্তং. তত্থ সত্থেতি সত্থিকে জনে. কং তারেন্তি এত্থাতি কন্তারো, নিরুদকো অরঞ্ঞপ্পদেসো. রুল়্হীৰসেন পন ইতরোপি অরঞ্ঞপ্পদেসো তথা ৰুচ্চতি. চোরকন্তারন্তি চোরেহি অধিট্ঠিতকন্তারং. তথা ৰাল়কন্তারং. দুব্ভিক্খকন্তারন্তি দুল্লভভিক্খং কন্তারং. তারেতীতি অখেমন্তট্ঠানং অতিক্কামেতি. উত্তারেতীতিআদি উপসগ্গেন পদং ৰড্ঢেত্ৰা ৰুত্তং. অথ ৰা উত্তারেতীতি খেমন্তভূমিং উপনেন্তো তারেতি. নিত্তারেতীতি অখেমন্তট্ঠানতো নিক্খামেন্তো তারেতি. পতারেতীতি পরিগ্গহেত্ৰা তারেতি, হত্থেন পরিগ্গহেত্ৰা ৰিয তারেতীতি অত্থো. সব্বম্পেতং তারণুত্তারণাদিখেমট্ঠানে ঠপনমেৰাতি আহ ‘‘খেমন্তভূমিং সম্পাপেতী’’তি. সত্তেতি ৰেনেয্যসত্তে. মহাগহনতায, মহানত্থতায, দুন্নিত্থরণতায চ জাতিযেৰ কন্তারো জাতিকন্তারো, তং জাতিকন্তারং.

উক্কট্ঠপরিচ্ছেদৰসেনাতি উক্কট্ঠসত্তপরিচ্ছেদৰসেন. দেৰমনুস্সা এৰ হি উক্কট্ঠসত্তা, ন তিরচ্ছানাদযো. ভব্বপুগ্গলপরিচ্ছেদৰসেনাতি সম্মত্তনিযামোক্কমনস্স যোগ্যপুগ্গলস্স পরিচ্ছিন্দনৰসেন. এতন্তি ‘‘দেৰমনুস্সান’’ন্তি এতং ৰচনং. ভগৰতোতি নিস্সক্কৰচনং যথা ‘‘উপজ্ঝাযতো অজ্ঝেতী’’তি, ভগৰতো সন্তিকেতি ৰা অত্থো. উপনিস্সযসম্পত্তিন্তি তিহেতুকপটিসন্ধিআদিকং মগ্গফলাধিগমস্স বলৰকারণং.

গগ্গরাযাতি গগ্গরায নাম রঞ্ঞো দেৰিযা, তায ৰা কারিতত্তা ‘‘গগ্গরা’’তি লদ্ধনামায. সরে নিমিত্তং অগ্গহেসীতি ‘‘ধম্মো এসো ৰুচ্চতী’’তি ধম্মসঞ্ঞায সরে নিমিত্তং গণ্হি, গণ্হন্তো চ পসন্নচিত্তো পরিসপরিযন্তে নিপজ্জি. সন্নিরুম্ভিত্ৰা অট্ঠাসীতি তস্স সীসে দণ্ডস্স ঠপিতভাৰং অপস্সন্তো তত্থ দণ্ডং উপ্পীল়েত্ৰা অট্ঠাসি. মণ্ডূকোপি দণ্ডে ঠপিতেপি উপ্পীল়িতেপি ধম্মগতেন পসাদেন ৰিস্সরমকরোন্তোৰ কালমকাসি. দেৰলোকে নিব্বত্তসত্তানং অযং ধম্মতা, যা ‘‘কুতোহং ইধ নিব্বত্তো, তত্থ কিং নু খো কম্মমকাসি’’ন্তি আৰজ্জনা. তস্মা অত্তনো পুরিমভৰস্স দিট্ঠত্তা আহ ‘‘অরে অহম্পি নাম ইধ নিব্বত্তো’’তি. ভগৰতো পাদে ৰন্দি কতঞ্ঞুতাসংৰড্ঢিতেন পেমগারৰবহুমানেন.

ভগৰা জানন্তোৰ মহাজনস্স কম্মফলং, বুদ্ধানুভাৰঞ্চ পচ্চক্খং কাতুকামো ‘‘কো মে ৰন্দতী’’তি গাথায পুচ্ছি. তত্থ কোতি দেৰনাগযক্খগন্ধব্বাদীসু কো, কতমোতি অত্থো. মেতি মম. পাদানীতি পাদে. ইদ্ধিযাতি ইমায এৰরূপায দেৰিদ্ধিযা. ‘‘যসসা’’তি ইমিনা এদিসেন পরিৰারেন, পরিচ্ছেদেন চ. জলন্তি ৰিজ্জোতমানো. অভিক্কন্তেনাতি অতিৰিয কন্তেন কমনীযেন সুন্দরেন. ৰণ্ণেনাতি ছৰিৰণ্ণেন সরীরৰণ্ণনিভায. সব্বা ওভাসযং দিসাতি সব্বা দসপি দিসা পভাসেন্তো, চন্দো ৰিয, সূরিযো ৰিয চ একোভাসং একালোকং করোন্তোতি অত্থো.

এৰং পন ভগৰতা পুচ্ছিতো দেৰপুত্তো অত্তানং পৰেদেন্তো ‘‘মণ্ডূকোহং পুরে আসি’’ন্তি গাথমাহ. তত্থ পুরেতি পুরিমজাতিযং. ‘‘উদকে’’তি ইদং তদা অত্তনো উপ্পত্তিট্ঠানদস্সনং. ‘‘উদকে মণ্ডূকো’’তি এতেন উদ্ধমাযিকাদিকস্স থলে মণ্ডূকস্স নিৰত্তনং কতং হোতি. গাৰো চরন্তি এত্থাতি গোচরো, গুন্নং ঘাসেসনট্ঠানং. ইধ পন গোচরো ৰিযাতি গোচরো, ৰারি উদকং গোচরো এতস্সাতি ৰারিগোচরো. উদকচারীপি হি কোচি কচ্ছপাদি অৰারিগোচরোপি হোতীতি ‘‘ৰারিগোচরো’’তি ৰিসেসেত্ৰা ৰুত্তং. তৰ ধম্মং সুণন্তস্সাতি ব্রহ্মস্সরেন করৰীকরুতমঞ্জুনা দেসেন্তস্স তৰ ধম্মং ‘‘ধম্মো এসো ৰুচ্চতী’’তি সরে নিমিত্তগ্গাহৰসেন সুণন্তস্স. অনাদরে চেতং সামিৰচনং. অৰধি ৰচ্ছপালকোতি ৰচ্ছে রক্খন্তো গোপালদারকো মম সমীপং আগন্ত্ৰা দণ্ডমোলুব্ভ তিট্ঠন্তো মম সীসে দণ্ডং সন্নিরুম্ভিত্ৰা মং মারেসীতি অত্থো.

সিতং কত্ৰাতি ‘‘তথা পরিত্ততরেনাপি পুঞ্ঞানুভাৰেন এৰং অতিৰিয উল়ারা লোকিযলোকুত্তরা সম্পত্তিযো লব্ভন্তী’’তি পীতিসোমনস্সজাতো ভাসুরতরধৰলৰিপ্ফুরন্তদস্সনকিরণাৰলীহি ভিয্যোসো মত্তায তং পদেসং ওভাসেন্তো সিতং কত্ৰা. পীতিসোমনস্সৰসেন হি সো –

‘‘মুহুত্তং চিত্তপসাদস্স, ইদ্ধিং পস্স যসঞ্চ মে;

আনুভাৰঞ্চ মে পস্স, ৰণ্ণং পস্স জুতিঞ্চ মে.

‘‘যে চ তে দীঘমদ্ধানং, ধম্মং অস্সোসুং গোতম;

পত্তা তে অচলট্ঠানং, যত্থ গন্ত্ৰা ন সোচরে’’তি. (ৰি. ৰ. ৮৫৯-৮৬০);

ইমা দ্ৰে গাথা ৰত্ৰা পক্কামি.

১৪১. যং পন কিঞ্চীতি এত্থ যন্তি অনিযমিতৰচনং. তথা কিঞ্চীতি. পনাতি ৰচনালঙ্কারমত্তং. তস্মা যং কিঞ্চীতি ঞেয্যস্স অনৰসেসপরিযাদানং কতং হোতি. পনাতি ৰা ৰিসেসত্থদীপকো নিপাতো. তেন ‘‘সম্মাসম্বুদ্ধো’’তি ইমিনা সঙ্খেপতো, ৰিত্থারতো চ সত্থু চতুসচ্চাভিসম্বোধো ৰুত্তো. ‘‘বুদ্ধো’’তি পন ইমিনা তদঞ্ঞস্সপি ঞেয্যস্সাৰবোধো. পুরিমেন ৰা সত্থু পটিৰেধঞাণানুভাৰো, পচ্ছিমেন দেসনাঞাণানুভাৰো. পীতি উপরি ৰুচ্চমানো ৰিসেসো জোতীযতি. সব্বসো পটিপক্খেহি ৰিমুচ্চতীতি ৰিমোক্খো, অগ্গমগ্গো. তস্স অন্তো অগ্গফলং, তত্থ ভৰং তস্মিং লদ্ধে লদ্ধব্বতো ৰিমোক্খন্তিকঞাণং, সব্বঞ্ঞুতঞ্ঞাণেন সদ্ধিং সব্বম্পি বুদ্ধঞাণং. এৰং পৰত্তোতি এত্থ –

‘‘সব্বঞ্ঞুতায বুদ্ধো, সব্বদস্সাৰিতায বুদ্ধো, অনঞ্ঞনেয্যতায বুদ্ধো, ৰিসৰিতায বুদ্ধো, খীণাসৰসঙ্খাতেন বুদ্ধো, নিরুপলেপসঙ্খাতেন বুদ্ধো, একন্তৰীতরাগোতি বুদ্ধো, একন্তৰীতদোসোতি বুদ্ধো, একন্তৰীতমোহোতি বুদ্ধো, একন্তনিক্কিলেসোতি বুদ্ধো, একাযনমগ্গং গতোতি বুদ্ধো, একো অনুত্তরং সম্মাসম্বোধিং অভিসম্বুদ্ধোতি বুদ্ধো, অবুদ্ধিৰিহতত্তা বুদ্ধিপটিলাভা বুদ্ধো. বুদ্ধোতি নেতং নামং মাতরা কতং, ন পিতরা কতং, ন ভাতরা কতং, ন ভগিনিযা কতং, ন মিত্তামচ্চেহিকতং, ন ঞাতিসালোহিতেহি কতং, ন সমণব্রাহ্মণেহি কতং, ন দেৰতাহি কতং. ৰিমোক্খন্তিকমেতং বুদ্ধানং ভগৰন্তানং বোধিযা মূলে সহ সব্বঞ্ঞুতঞ্ঞাণস্স পটিলাভা সচ্ছিকা পঞ্ঞত্তি যদিদং বুদ্ধো’’তি (মহানি. ১৯২) –

অযং নিদ্দেসপাল়িনযো. যস্মা চেত্থ তস্সা পটিসম্ভিদাপাল়িযা ভেদো নত্থি, তস্মা দ্ৰীসু একেনাপি অত্থসিদ্ধীতি দস্সনত্থং ‘‘পটিসম্ভিদানযো ৰা’’তি অনিযমত্থো ৰা-সদ্দো ৰুত্তো.

তত্থ যথা লোকে অৰগন্তা ‘‘অৰগতো’’তি ৰুচ্চতি, এৰং বুজ্ঝিতা সচ্চানীতি বুদ্ধো সুদ্ধকত্তুৰসেন. যথা পণ্ণসোসা ৰাতা ‘‘পণ্ণসুসা’’তি ৰুচ্চন্তি, এৰং বোধেতা পজাযাতি বুদ্ধো হেতুকত্তুৰসেন, হেতুঅত্থো চেত্থ অন্তোনীতো.

সব্বঞ্ঞুতায বুদ্ধোতি সব্বধম্মবুজ্ঝনসমত্থায বুদ্ধিযা বুদ্ধোতি অত্থো. সব্বদস্সাৰিতায বুদ্ধোতি সব্বধম্মানং ঞাণচক্খুনা দিট্ঠত্তা বুদ্ধোতি অত্থো. অনঞ্ঞনেয্যতায বুদ্ধোতি অঞ্ঞেন অবোধনীতো সযমেৰ বুদ্ধত্তা বুদ্ধোতি অত্থো. ৰিসৰিতায বুদ্ধোতি নানাগুণৰিসৰনতো পদুমমিৰ ৰিকসনট্ঠেন বুদ্ধোতি অত্থো. খীণাসৰসঙ্খাতেন বুদ্ধোতি এৰমাদীহি ছহি পরিযাযেহি নিদ্দক্খযৰিবুদ্ধো পুরিসো ৰিয সব্বকিলেসনিদ্দক্খযৰিবুদ্ধত্তা বুদ্ধোতি ৰুত্তং হোতি. একাযনমগ্গং গতোতি বুদ্ধোতি গমনত্থানং বুদ্ধিঅত্থতায বুদ্ধিঅত্থানম্পি গমনত্থতা লব্ভতীতি একাযনমগ্গং গতত্তা বুদ্ধোতি ৰুচ্চতীতি অত্থো. একো অনুত্তরং সম্মাসম্বোধিং অভিসম্বুদ্ধোতি বুদ্ধোতি ন পরেহি বুদ্ধত্তা বুদ্ধো, অথ খো সযমেৰ অনুত্তরং সম্মাসম্বোধিং অভিসম্বুদ্ধত্তা বুদ্ধোতি অত্থো. অবুদ্ধিৰিহতত্তা বুদ্ধিপটিলাভা বুদ্ধোতি বুদ্ধি বুদ্ধং বোধোতি অনত্থন্তরং. তত্থ যথা রত্তগুণযোগতো রত্তো পটো, এৰং বুদ্ধগুণযোগতো বুদ্ধোতি ঞাপনত্থং ৰুত্তং. ততো পরং বুদ্ধোতি নেতং নামন্তিআদি অত্থানুগতাযং পঞ্ঞত্তীতি বোধনত্থং ৰুত্তন্তি এৰমেত্থ ইমিনাপি কারণেন ভগৰা বুদ্ধোতি ৰেদিতব্বং.

১৪২. অস্সাতি ভগৰতো. গুণৰিসিট্ঠসব্বসত্তুত্তমগরুগারৰাধিৰচনন্তি সব্বেহি সীলাদিগুণেহি ৰিসিট্ঠস্স ততো এৰ সব্বসত্তেহি উত্তমস্স গরুনো গারৰৰসেন ৰুত্তৰচনমিদং ভগৰাতি. তথা হি লোকনাথো অপরিমিতনিরুপমপ্পভাৰসীলাদিগুণৰিসেসসমঙ্গিতায সব্বানত্থপরিহারপুব্বঙ্গমায নিরৰসেসহিতসুখৰিধানতপ্পরায নিরতিসযায পযোগসম্পত্তিযা সদেৰমনুস্সায পজায, অচ্চন্তুপকারিতায চ অপরিমাণাসু লোকধাতূসু অপরিমাণানং সত্তানং উত্তমগারৰট্ঠানন্তি.

ভগৰাতি ৰচনং সেট্ঠন্তি সেট্ঠৰাচকং ৰচনং সেট্ঠগুণসহচরণতো ‘‘সেট্ঠ’’ন্তি ৰুত্তং. অথ ৰা ৰুচ্চতীতি ৰচনং, অত্থো. তস্মা যো ‘‘ভগৰা’’তি ৰচনেন ৰচনীযো অত্থো, সো সেট্ঠোতি অত্থো. ভগৰাতি ৰচনমুত্তমন্তি এত্থাপি এসেৰ নযো. গারৰযুত্তোতি গরুভাৰযুত্তো গরুগুণযোগতো, গরুকরণং ৰা সাতিসযং অরহতীতি গারৰযুত্তো, গারৰারহোতি অত্থো.

গুণৰিসেসহেতুকং ‘‘ভগৰা’’তি ইদং ভগৰতো নামন্তি সঙ্খেপতো ৰুত্তমত্থং ৰিত্থারতো ৰিভজিতুকামো নামংযেৰ তাৰ অত্থুদ্ধারৰসেন দস্সেন্তো ‘‘চতুব্বিধং ৰা নাম’’ন্তিআদিমাহ. তত্থ আৰত্থিকন্তি অৰত্থায ৰিদিতং তং তং অৰত্থং উপাদায পঞ্ঞত্তং ৰোহরিতং. তথা লিঙ্গিকং তেন তেন লিঙ্গেন ৰোহরিতং. নেমিত্তিকন্তি নিমিত্ততো আগতং. অধিচ্চসমুপ্পন্নন্তি যদিচ্ছায পৰত্তং, যদিচ্ছায আগতং যদিচ্ছকং. পঠমেন আদি-সদ্দেন বালো, যুৰা, ৰুড্ঢোতি এৰমাদিং সঙ্গণ্হাতি, দুতিযেন মুণ্ডী, জটীতি এৰমাদিং, ততিযেন বহুস্সুতো, ধম্মকথিকো, ঝাযীতি এৰমাদিং, চতুত্থেন অঘমরিসনং পাৰচনন্তি এৰমাদিং সঙ্গণ্হাতি. ‘‘নেমিত্তিক’’ন্তি ৰুত্তমত্থং ব্যতিরেকৰসেন পতিট্ঠাপেতুং ‘‘ন মহামাযাযা’’তিআদি ৰুত্তং. ‘‘ৰিমোক্খন্তিক’’ন্তি ইমিনা ইদং নামং অরিযায জাতিযা জাতক্খণেযেৰ জাতন্তি দস্সেতি. যদি ৰিমোক্খন্তিকং, অথ কস্মা অঞ্ঞেহি খীণাসৰেহি অসাধারণন্তি আহ ‘‘সহ সব্বঞ্ঞুতঞ্ঞাণস্স পটিলাভা’’তি. বুদ্ধানঞ্হি অরহত্তফলং নিপ্ফজ্জমানং সব্বঞ্ঞুতঞ্ঞাণাদীহি সব্বেহি বুদ্ধগুণেহি সদ্ধিংযেৰ নিপ্ফজ্জতি. তেন ৰুত্তং ‘‘ৰিমোক্খন্তিক’’ন্তি. সচ্ছিকা পঞ্ঞত্তীতি সব্বধম্মানং সচ্ছিকিরিযানিমিত্তা পঞ্ঞত্তি. অথ ৰা সচ্ছিকা পঞ্ঞত্তীতি পচ্চক্খসিদ্ধা পঞ্ঞত্তি. যংগুণনিমিত্তা হি সা, তে সত্থু পচ্চক্খভূতাতি গুণা ৰিয সাপি সচ্ছিকতা এৰ নাম হোতি, ন পরেসং ৰোহারমত্তেনাতি অধিপ্পাযো.

১৪৩. ৰদন্তীতি মহাথেরস্স গরুভাৰতো বহুৰচনেনাহ, সঙ্গীতিকারেহি ৰা কতমনুৰাদং সন্ধায. ইস্সরিযাদিভেদো ভগো অস্স অত্থীতি ভগী. অকাসি ভগ্গন্তি রাগাদিপাপধম্মং ভগ্গং অকাসি, ভগ্গৰাতি অত্থো. বহূহি ঞাযেহীতি কাযভাৰনাদিকেহি অনেকেহি ভাৰনাক্কমেহি. সুভাৰিতত্তনোতি সম্মদেৰ ভাৰিতসভাৰস্স. পচ্চত্তে চেতং সামিৰচনং.

নিদ্দেসে ৰুত্তনযেনাতি এত্থাযং নিদ্দেসনযো –

‘‘ভগৰাতি গারৰাধিৰচনমেতং. অপিচ ভগ্গরাগোতি ভগৰা, ভগ্গদোসোতি ভগৰা, ভগ্গমোহোতি ভগৰা, ভগ্গমানোতি ভগৰা, ভগ্গদিট্ঠীতি ভগৰা, ভগ্গতণ্হোতি ভগৰা, ভগ্গকিলেসোতি ভগৰা, ভজি ৰিভজি পৰিভজি ধম্মরতনন্তি ভগৰা, ভৰানং অন্তকরোতি ভগৰা, ভাৰিতকাযো ভাৰিতসীলো ভাৰিতচিত্তো ভাৰিতপঞ্ঞোতি ভগৰা, ভজি ৰা ভগৰা অরঞ্ঞৰনপত্থানি পন্তানি সেনাসনানি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানীতি ভগৰা, ভাগী ৰা ভগৰা চীৰরপিণ্ডপাতসেনাসনগিলানপচ্চযভেসজ্জপরিক্খারানন্তি ভগৰা, ভাগী ৰা ভগৰা অত্থরসস্স ধম্মরসস্স ৰিমুত্তিরসস্স অধিসীলস্স অধিচিত্তস্স অধিপঞ্ঞাযাতি ভগৰা, ভাগী ৰা ভগৰা চতুন্নং ঝানানং চতুন্নং অপ্পমঞ্ঞানং চতুন্নং অরূপসমাপত্তীনন্তি ভগৰা, ভাগী ৰা ভগৰা অট্ঠন্নং ৰিমোক্খানং অট্ঠন্নং অভিভাযতনানং নৰন্নং অনুপুব্বৰিহারসমাপত্তীনন্তি ভগৰা, ভাগী ৰা ভগৰা দসন্নং সঞ্ঞাভাৰনানং দসন্নং কসিণসমাপত্তীনং আনাপানস্সতিসমাধিস্স অসুভসমাপত্তিযাতি ভগৰা, ভাগী ৰা ভগৰা চতুন্নং সতিপট্ঠানানং চতুন্নং সম্মপ্পধানানং চতুন্নং ইদ্ধিপাদানং পঞ্চন্নং ইন্দ্রিযানং পঞ্চন্নং বলানং সত্তন্নং বোজ্ঝঙ্গানং অরিযস্স অট্ঠঙ্গিকস্স মগ্গস্সাতি ভগৰা, ভাগী ৰা ভগৰা দসন্নং তথাগতবলানং চতুন্নং ৰেসারজ্জানং চতুন্নং পটিসম্ভিদানং ছন্নং অভিঞ্ঞানং ছন্নং বুদ্ধধম্মানন্তি ভগৰা, ভগৰাতি নেতং নামং…পে… সচ্ছিকা পঞ্ঞত্তি যদিদং ভগৰা’’তি (মহানি. ৮৩).

এত্থ চ ‘‘গারৰাধিৰচন’’ন্তিআদীনি যদিপি গাথাযং আগতপদানুক্কমেন ন নিদ্দিট্ঠানি, যথারহং পন তেসং সব্বেসম্পি নিদ্দেসভাৰেন ৰেদিতব্বানি. তত্থ গারৰাধিৰচনন্তি গরূনং গরুভাৰৰাচকং ৰচনং. ভজীতি ভাগসো কথেসি. তেনাহ ‘‘ৰিভজী’’তি. ধম্মরতনন্তি মগ্গফলাদিঅরিযধম্মরতনং. পুন ভজীতি সেৰি. ভাগীতি ভাগধেয্যৰা. পুন ভাগীতি ভজনসীলো. অত্থরসস্সাতি অত্থসন্নিস্সযস্স রসস্স. ৰিমুত্তাযতনসীসে হি ঠত্ৰা ধম্মং কথেন্তস্স, সুণন্তস্স চ তদত্থং আরব্ভ উপ্পজ্জনকপীতিসোমনস্সং অত্থরসো. ধম্মং আরব্ভ ধম্মরসো. যং সন্ধায ৰুত্তং ‘‘লভতি অত্থৰেদং, লভতি ধম্মৰেদ’’ন্তি (অ. নি. ৬.১০). ৰিমুত্তিরসস্সাতি ৰিমুত্তিভূতস্স, ৰিমুত্তিসন্নিস্সযস্স ৰা রসস্স. সঞ্ঞাভাৰনানন্তি অনিচ্চসঞ্ঞাদীনং দসন্নং সঞ্ঞাভাৰনানং. ছন্নং বুদ্ধধম্মানন্তি ছ অসাধারণঞাণানি সন্ধায ৰুত্তং. তত্থ তত্থ ‘‘ভগৰা’’তি সদ্দসিদ্ধি নিরুত্তিনযেন ৰেদিতব্বা.

১৪৪. যদিপি ‘‘ভাগ্যৰা’’তিআদীহি পদেহি ৰুচ্চমানো অত্থো ‘‘ভগী ভজী’’তি নিদ্দেসগাথায সঙ্গহিতো এৰ, তথাপি পদসিদ্ধি অত্থৰিভাগঅত্থযোজনাদিসহিতো সংৰণ্ণনানযো ততো অঞ্ঞাকারোতি ৰুত্তং ‘‘অযং পন অপরো নযো’’তি. আদিকন্তি আদি-সদ্দেন ৰণ্ণৰিকারো, ৰণ্ণলোপো, ধাতুঅত্থেন নিযোজনঞ্চাতি ইমং তিৰিধং লক্খণং সঙ্গণ্হাতি. সদ্দনযেনাতি ব্যাকরণনযেন. পিসোদরাদীনং সদ্দানং আকতিগণভাৰতো ৰুত্তং ‘‘পিসোদরাদিপক্খেপলক্খণং গহেত্ৰা’’তি. পক্খিপনমেৰ লক্খণং. তপ্পরিযাপন্নতাকরণং হি পক্খিপনং. পারপ্পত্তন্তি পরমুক্কংসগতং পারমিভাৰপ্পত্তং. ভাগ্যন্তি কুসলং. তত্থ মগ্গকুসলং লোকুত্তরসুখনিব্বত্তকং, ইতরং লোকিযসুখনিব্বত্তকং, ইতরম্পি ৰা ৰিৰট্টূপনিস্সযং পরিযাযতো লোকুত্তরসুখনিব্বত্তকং সিযা.

লোভাদযো এককৰসেন গহিতা. তথা ৰিপরীতমনসিকারো ৰিপল্লাসভাৰসামঞ্ঞেন, অহিরিকাদযো দুকৰসেন. লোভাদযো চ পুন ‘‘তিৰিধাকুসলমূল’’ন্তি তিকৰসেন গহিতা. কাযদুচ্চরিতাদি-তণ্হাসংকিলেসাদিরাগমলাদিরাগৰিসমাদিকামসঞ্ঞাদিকামৰিতক্কাদিতণ্হাপপঞ্চাদযো তিৰিধদুচ্চরিতাদযো. সুভসঞ্ঞাদিকা চতুব্বিধৰিপরিযেসা. ‘‘চীৰরহেতু ৰা ভিক্খুনো তণ্হা উপ্পজ্জমানা উপ্পজ্জতি, পিণ্ডপাত, সেনাসন, ইতিভৰাভৰহেতু ৰা’’তি (অ. নি. ৪.৯) এৰমাগতা চত্তারো তণ্হুপ্পাদা. ‘‘বুদ্ধে কঙ্খতি, ধম্মে, সঙ্ঘে, সিক্খায, সব্রহ্মচারীসু কুপিতো হোতি অনত্তমনো আহতচিত্তো খীলজাতো’’তি (দী. নি. ৩.৩১৯; ম. নি. ১.১৮৫; অ. নি. ৫.২০৫; ৯.৭১; ৰিভ. ৯৪১) এৰমাগতানি পঞ্চ চেতোখীলানি. ‘‘কামে অৰীতরাগো হোতি, কাযে অৰীতরাগো, রূপে অৰীতরাগো, যাৰদত্থং উদরাৰদেহকং ভুঞ্জিত্ৰা সেয্যসুখং পস্সসুখং মিদ্ধসুখং অনুযুত্তো ৰিহরতি, অঞ্ঞতরং দেৰনিকাযং পণিধায ব্রহ্মচরিযং চরতী’’তি (দী. নি. ৩.৩২০; ম. নি. ১.১৮৬) আগতা পঞ্চ ৰিনিবন্ধা. রূপাভিনন্দনাদযো পঞ্চাভিনন্দনা. কোধো, মক্খো, ইস্সা, সাঠেয্যং, পাপিচ্ছতা, সন্দিট্ঠিপরামাসোতি ইমানি ছ ৰিৰাদমূলানি. রূপতণ্হাদযো ছ তণ্হাকাযা.

কামরাগপটিঘদিট্ঠিৰিচিকিচ্ছাভৰরাগমানাৰিজ্জা সত্তানুসযা. মিচ্ছাদিট্ঠিআদযো অট্ঠ মিচ্ছত্তা. ‘‘তণ্হং পটিচ্চ পরিযেসনা, পরিযেসনং পটিচ্চ লাভো, লাভং পটিচ্চ ৰিনিচ্ছযো, ৰিনিচ্ছযং পটিচ্চ ছন্দরাগো, ছন্দরাগং পটিচ্চ অজ্ঝোসানং, অজ্ঝোসানং পটিচ্চ পরিগ্গহো, পরিগ্গহং পটিচ্চ মচ্ছরিযং, মচ্ছরিযং পটিচ্চ আরক্খা, আরক্খাধিকরণং দণ্ডাদানাদযো’’তি (দী. নি. ২.১০৩; ৩.৩৫৯) এতে নৰ তণ্হামূলকা. চত্তারো সস্সতৰাদা, চত্তারো একচ্চসস্সতৰাদা, চত্তারো অন্তানন্তিকা, চত্তারো অমরাৰিক্খেপিকা, দ্ৰে অধিচ্চসমুপ্পন্নিকা, সোল়স সঞ্ঞীৰাদা, অট্ঠ অসঞ্ঞীৰাদা, অট্ঠ নেৰসঞ্ঞীনাসঞ্ঞীৰাদা, সত্ত উচ্ছেদৰাদা, পঞ্চ পরমদিট্ঠধম্মনিব্বানৰাদাতি এতানি দ্ৰাসট্ঠি দিট্ঠিগতানি. অজ্ঝত্তিকস্স উপাদায ‘‘অস্মী’’তি হোতি, ‘‘ইত্থস্মী’’তি, ‘‘এৰস্মী’’তি, ‘‘অঞ্ঞথাস্মী’’তি, ‘‘ভৰিস্স’’ন্তি, ‘‘ইত্থং ভৰিস্স’’ন্তি, ‘‘এৰং ভৰিস্স’’ন্তি, ‘‘অঞ্ঞথা ভৰিস্স’’ন্তি, ‘‘অসস্মী’’তি, ‘‘সাতস্মী’’তি, ‘‘সিয’’ন্তি, ‘‘ইত্থং সিয’’ন্তি, ‘‘এৰং সিয’’ন্তি, ‘‘অঞ্ঞথা সিয’’ন্তি, ‘‘অপাহং সিয’’ন্তি, ‘‘অপাহং ইত্থং সিয’’ন্তি, ‘‘অপাহং এৰং সিয’’ন্তি, ‘‘অপাহং অঞ্ঞথা সিয’’ন্তি হোতীতি অট্ঠারস, বাহিরস্সুপাদায ‘‘ইমিনা অস্মী’’তি হোতি, ‘‘ইমিনা ইত্থস্মী’’তি, ‘‘ইমিনা এৰস্মী’’তি, ‘‘ইমিনা অঞ্ঞথাস্মী’’তিআদিকা (ৰিভ. ৯৭৫-৯৭৬) ৰুত্তনযা অট্ঠারসাতি ছত্তিংস, অতীতা ছত্তিংস, অনাগতা ছত্তিংস, পচ্চুপ্পন্না ছত্তিংসাতি অট্ঠসততণ্হাৰিচরিতানি.

পভেদ-সদ্দো পচ্চেকং সম্বন্ধিতব্বো. তত্থাযং যোজনা – লোভপ্পভেদা দোসপ্পভেদা যাৰ অট্ঠসততণ্হাৰিচরিতপ্পভেদাতি. সব্বানি সত্তানং দরথপরিল়াহকরানি কিলেসানং অনেকানি সতসহস্সানি অভঞ্জীতি যোজনা. আরম্মণাদিৰিভাগতো হি পৰত্তিআকারৰিভাগতো চ অনন্তপ্পভেদা কিলেসাতি. সঙ্খেপতোতি এত্থ সমুচ্ছেদপ্পহানৰসেন সব্বসো অপ্পৰত্তিকরণেন কিলেসমারং, সমুদযপ্পহানপরিঞ্ঞাৰসেন খন্ধমারং, সহাযৰেকল্লকরণৰসেন সব্বথা অপ্পৰত্তিকরণেন অভিসঙ্খারমারং, বলৰিধমনৰিসযাতিক্কমনৰসেন দেৰপুত্তমচ্চুমারঞ্চ অভঞ্জি ভগ্গে অকাসি. পরিস্সযানন্তি উপদ্দৰানং. সম্পতি, আযতিঞ্চ সত্তানং অনত্থাৰহত্তা মারণট্ঠেন ৰিবাধনট্ঠেন কিলেসাৰ মারোতি কিলেসমারো. ৰধকট্ঠেন খন্ধাৰ মারোতি খন্ধমারো. তথা হি ৰুত্তং ‘‘ৰধকং রূপং ‘ৰধকং রূপ’ন্তি যথাভূতং নপ্পজানাতী’’তিআদি (সং. নি. ৩.৮৫). জাতিজরাদিমহাব্যসননিব্বত্তনেন অভিসঙ্খারোৰ মারোতি অভিসঙ্খারমারো. সংকিলেসনিমিত্তং হুত্ৰা গুণমারণট্ঠেন দেৰপুত্তোৰ মারোতি দেৰপুত্তমারো. সত্তানং জীৰিতস্স, জীৰিতপরিক্খারানঞ্চ জানিকরণেন মহাবাধরূপত্তা মচ্চু এৰ মারোতি মচ্চুমারো.

সতপুঞ্ঞলক্খণধরস্সাতি অনেকসতপুঞ্ঞনিব্বত্তমহাপুরিসলক্খণৰহতো রূপকাযসম্পত্তি দীপিতা হোতি, ইতরাসং ফলসম্পদানং মূলভাৰতো, অধিট্ঠানভাৰতো চ. ধম্মকাযসম্পত্তি দীপিতা হোতি, পহানসম্পদাপুব্বকত্তা ঞাণসম্পদাদীনং. ভাগ্যৰতায লোকিযানং বহুমতভাৰো. ভগ্গদোসতায পরিক্খকানং বহুমতভাৰোতি যোজনা. এৰং ইতো পরেসুপি যথাসঙ্খ্যং যোজেতব্বং. পুঞ্ঞৰন্তং হি গহট্ঠা খত্তিযাদযো অভিগচ্ছন্তি, পহীনদোসং পব্বজিততাপসপরিব্বাজকাদযো ‘‘দোসৰিনযায ধম্মং দেসেতী’’তি. অভিগতানঞ্চ নেসং কাযচিত্তদুক্খাপনযনে পটিবলভাৰো, আমিসদানধম্মদানেহি উপকারসব্ভাৰতো. রূপকাযং তস্স পসাদচক্খুনা, ধম্মকাযং পঞ্ঞাচক্খুনা দিস্ৰা দুক্খদ্ৰযস্স পটিপ্পস্সম্ভনতো উপগতানঞ্চ তেসং আমিসদানধম্মদানেহি উপকারিতা, ‘‘পুব্বে আমিসদানধম্মদানেহি মযা অযং লোকগ্গভাৰো অধিগতো, তস্মা তুম্হেহিপি এৰমেৰ পটিপজ্জিতব্ব’’ন্তি এৰং সম্মাপটিপত্তিযং নিযোজনেন অভিগতানং লোকিযলোকুত্তরসুখেহি সংযোজনসমত্থতা চ দীপিতা হোতি.

সকচিত্তে ইস্সরিযং অত্তনো চিত্তস্স ৰসীভাৰাপাদনং, যেন পটিক্কূলাদীসু অপ্পটিক্কূলসঞ্ঞিতাদিৰিহারসিদ্ধি, অধিট্ঠানিদ্ধিআদিকো ইদ্ধিৰিধোপি চিত্তিস্সরিযমেৰ চিত্তভাৰনায ৰসীভাৰপ্পত্তিযা ইজ্ঝনতো. অণিমালঘিমাদিকন্তি আদি-সদ্দেন মহিমা পত্তি পাকম্মং ঈসিতা ৰসিতা যত্থকামাৰসাযিতাতি ইমে ছপি সঙ্গহিতা. তত্থ কাযস্স অণুভাৰকরণং অণিমা. লহুভাৰো লঘিমা আকাসে পদসা গমনাদিনা. মহত্তং মহিমা কাযস্স মহন্ততাপাদনং. ইট্ঠদেসপ্পত্তি পত্তি. অধিট্ঠানাদিৰসেন ইচ্ছিতনিপ্ফাদনং পাকম্মং. সযংৰসিতা ইস্সরভাৰো ঈসিতা. ইদ্ধিৰিধে ৰসীভাৰো ৰসিতা. আকাসেন ৰা গচ্ছতো, অঞ্ঞং ৰা কিঞ্চি করোতো যত্থ কত্থচি ৰোসানপ্পত্তি যত্থকামাৰসাযিতা. ‘‘কুমারকরূপাদিদস্সন’’ন্তিপি ৰদন্তি. এৰমিদং অট্ঠৰিধং লোকিযসম্মতং ইস্সরিযং. তং পন ভগৰতো ইদ্ধিৰিধন্তোগধং, অনঞ্ঞসাধারণঞ্চাতি আহ ‘‘সব্বাকারপরিপূরং অত্থী’’তি.

কেসঞ্চি পদেসৰুত্তি, অযথাভূতগুণসন্নিস্সযত্তা অপরিসুদ্ধো চ যসো হোতি, ন এৰং তথাগতস্সাতি দস্সেতুং ‘‘লোকত্তযব্যাপকো’’তিআদি ৰুত্তং. তত্থ ইধ অধিগতসত্থুগুণানং আরুপ্পে উপ্পন্নানং ‘‘ইতিপি সো ভগৰা’’তিআদিনা ভগৰতো গুণে অনুস্সরন্তানং যসো পাকটো হোতীতি আহ ‘‘লোকত্তযব্যাপকো’’তি. যথাভুচ্চগুণাধিগতত্তা এৰ অতিৰিয পরিসুদ্ধো. অনৰসেসলক্খণানুব্যঞ্জনাদিসম্পত্তিযা সব্বাকারপরিপূরা. সব্বঙ্গপচ্চঙ্গসিরী সব্বেসং অঙ্গপচ্চঙ্গানং সোভা. ‘‘তিণ্ণো তারেয্য’’ন্তিআদিনা যং যং এতেন লোকনাথেন ইচ্ছিতং মনোৰচীপণিধানৰসেন, পত্থিতং কাযপণিধানৰসেন. তথেৰাতি পণিধানানুরূপমেৰ. ৰীরিযপারমিভাৰপ্পত্তো, অরিযমগ্গপরিযাপন্নো চ সম্মাৰাযামসঙ্খাতো পযত্তো.

ভেদেহীতি সব্বত্তিকদুকপদসংহিতেহি পভেদেহি. পটিচ্চসমুপ্পাদাদীহীতি আদি-সদ্দেন ন কেৰলং ৰিভঙ্গপাল়িযং আগতা সতিপট্ঠানাদযোৰ সঙ্গহিতা, অথ খো সঙ্গহাদযো, সমযৰিমুত্তাদযো, ঠপনাদযো, তিকপট্ঠানাদযো চ সঙ্গহিতাতি ৰেদিতব্বং. দুক্খসচ্চস্স পীল়নট্ঠো তংসমঙ্গিনো সত্তস্স হিংসনং অৰিপ্ফারিকতাকরণং. সঙ্খতট্ঠো সমেচ্চসম্ভূযপচ্চযেহি কতভাৰো. সন্তাপট্ঠো দুক্খদুক্খতাদীহি সন্তপ্পনং পরিদহনং. ৰিপরিণামট্ঠো জরায, মরণেন চাতি দ্ৰিধা ৰিপরিণামেতব্বতা. সমুদযস্স আযূহনট্ঠো দুক্খস্স নিব্বত্তনৰসেন সম্পিণ্ডনং. নিদানট্ঠো ‘‘ইদং তং দুক্খ’’ন্তি নিদদন্তস্স ৰিয সমুট্ঠাপনং. সংযোগট্ঠো সংসারদুক্খেন সংযোজনং. পলিবোধট্ঠো মগ্গাধিগমস্স নিৰারণং. নিরোধস্স নিস্সরণট্ঠো সব্বূপধীনং পটিনিস্সগ্গসভাৰত্তা ততো ৰিনিস্সটতা, তন্নিস্সরণনিমিত্ততা ৰা. ৰিৰেকট্ঠো সব্বসঙ্খারৰিসংযুত্ততা. অসঙ্খতট্ঠো কেনচিপি পচ্চযেন অনভিসঙ্খততা. অমতট্ঠো নিচ্চসভাৰত্তা মরণাভাৰো, সত্তানং মরণাভাৰহেতুতা ৰা. মগ্গস্স নিয্যানট্ঠো ৰট্টদুক্খতো নিগ্গমনট্ঠো. হেতুঅত্থো নিব্বানস্স সম্পাপকভাৰো. দস্সনট্ঠো অচ্চন্তসুখুমস্স নিব্বানস্স সচ্ছিকরণং. আধিপতেয্যট্ঠো চতুসচ্চদস্সনে সম্পযুত্তানং আধিপচ্চকরণং, আরম্মণাধিপতিভাৰো ৰা ৰিসেসতো মগ্গাধিপতিৰচনতো. সতিপি হি ঝানাদীনং আরম্মণাধিপতিভাৰে ‘‘ঝানাধিপতিনো ধম্মা’’তি এৰমাদিং অৰত্ৰা ‘‘মগ্গাধিপতিনো ধম্মা’’ ইচ্চেৰ ৰুত্তং, তস্মা ৰিঞ্ঞাযতি ‘‘অত্থি মগ্গস্স আরম্মণাধিপতিভাৰে ৰিসেসো’’তি. এতে চ পীল়নাদযো সোল়সাকারা নাম. কস্মা পনেত্থ অঞ্ঞেসু রোগগণ্ঠাদিআকারেসু ৰিজ্জমানেসু এতেৰ পরিগ্গয্হন্তীতি? সলক্খণতো চ সচ্চন্তরদস্সনতো চ আৰিভাৰতো. স্ৰাযমত্থো পরতো সচ্চকথাযমেৰ আৰি ভৰিস্সতি.

দিব্বৰিহারো কসিণাদিআরম্মণানি রূপাৰচরজ্ঝানানি. মেত্তাদিজ্ঝানানি ব্রহ্মৰিহারো. ফলসমাপত্তি অরিযৰিহারো. কামেহি ৰিৰেকট্ঠকাযতাৰসেন একীভাৰো কাযৰিৰেকো. পঠমজ্ঝানাদিনা নীৰরণাদীহি ৰিৰিত্তচিত্ততা চিত্তৰিৰেকো. উপধিৰিৰেকো নিব্বানং. অঞ্ঞেতি লোকিযাভিঞ্ঞাদিকে.

কিলেসাভিসঙ্খারৰসেন ভৰেসু পরিব্ভমনং, সো চ তণ্হাপ্পধানোতি ৰুত্তং ‘‘তণ্হাসঙ্খাতং গমন’’ন্তি. ৰন্তন্তি অরিযমগ্গমুখেন উগ্গিরিতং পুন অপচ্চাৰমনৰসেন ছড্ডিতং. ভগৰাতি ৰুচ্চতি নিরুত্তিনযেনাতি দস্সেন্তো আহ ‘‘যথা…পে… মেখলা’’তি.

অপরো নযো – ভাগৰাতি ভগৰা, ভতৰাতি ভগৰা, ভাগে ৰনীতি ভগৰা, ভগে ৰনীতি ভগৰা, ভত্তৰাতি ভগৰা, ভগে ৰমীতি ভগৰা. ভাগে ৰমীতি ভগৰা.

ভাগৰা ভতৰা ভাগে, ভগে চ ৰনি ভত্তৰা;

ভগে ৰমি তথা ভাগে, ৰমীতি ভগৰা জিনো.

তত্থ কথং ভাগৰাতি ভগৰা? যে তে সীলাদযো ধম্মক্খন্ধা গুণকোট্ঠাসা, তে অনঞ্ঞসাধারণা নিরতিসযা তথাগতস্স অত্থি উপলব্ভন্তি. তথা হিস্স সীলং সমাধি পঞ্ঞা ৰিমুত্তি ৰিমুত্তিঞাণদস্সনং, হিরী ওত্তপ্পং, সদ্ধা ৰীরিযং, সতি সম্পজঞ্ঞং, সীলৰিসুদ্ধি দিট্ঠিৰিসুদ্ধি, সমথো ৰিপস্সনা, তীণি কুসলমূলানি, তীণি সুচরিতানি, তযো সম্মাৰিতক্কা, তিস্সো অনৰজ্জসঞ্ঞা, তিস্সো ধাতুযো, চত্তারো সতিপট্ঠানা, চত্তারো সম্মপ্পধানা, চত্তারো ইদ্ধিপাদা, চত্তারো অরিযমগ্গা, চত্তারি অরিযফলানি, চতস্সো পটিসম্ভিদা, চতুযোনিপরিচ্ছেদকঞাণানি, চত্তারো অরিযৰংসা, চত্তারি ৰেসারজ্জঞাণানি, পঞ্চ পধানিযঙ্গানি, পঞ্চঙ্গিকো সম্মাসমাধি, পঞ্চঞাণিকো সম্মাসমাধি, পঞ্চিন্দ্রিযানি, পঞ্চ বলানি, পঞ্চ নিস্সারণীযা ধাতুযো, পঞ্চ ৰিমুত্তাযতনঞাণানি, পঞ্চ ৰিমুত্তিপরিপাচনীযা সঞ্ঞা, ছ অনুস্সতিট্ঠানানি, ছ গারৰা, ছ নিস্সারণীযা ধাতুযো, ছ সততৰিহারা, ছ অনুত্তরিযানি, ছ নিব্বেধভাগিযা সঞ্ঞা, ছ অভিঞ্ঞা, ছ অসাধারণঞাণানি, সত্ত অপরিহানিযা ধম্মা, সত্ত অরিযধম্মা, সত্ত অরিযধনানি, সত্ত বোজ্ঝঙ্গা, সত্ত সপ্পুরিসধম্মা, সত্ত নিজ্জরৰত্থূনি, সত্ত সঞ্ঞা, সত্তদক্খিণেয্যপুগ্গলদেসনা, সত্তৰিঞ্ঞাণট্ঠিতিদেসনা, সত্তখীণাসৰবলদেসনা, অট্ঠপঞ্ঞাপটিলাভহেতুদেসনা, অট্ঠ সম্মত্তানি, অট্ঠলোকধম্মাতিক্কমা, অট্ঠ আরম্ভৰত্থূনি, অট্ঠঅক্খণদেসনা, অট্ঠ মহাপুরিসৰিতক্কা, অট্ঠঅভিভাযতনদেসনা, অট্ঠ ৰিমোক্খা, নৰ যোনিসোমনসিকারমূলকা ধম্মা, নৰ পারিসুদ্ধিপধানিযঙ্গানি, নৰসত্তাৰাসদেসনা, নৰ আঘাতপটিৰিনযা, নৰ সঞ্ঞা, নৰ নানত্তা, নৰ অনুপুব্বৰিহারা, দস নাথকারণা ধম্মা, দস কসিণাযতনানি, দস কুসলকম্মপথা, দস সম্মত্তানি, দস অরিযৰাসা, দস অসেক্খধম্মা, দস তথাগতবলানি, একাদস মেত্তানিসংসা, দ্ৰাদস ধম্মচক্কাকারা, তেরস ধুতগুণা, চুদ্দস বুদ্ধঞাণানি, পঞ্চদস ৰিমুত্তিপরিপাচনীযা ধম্মা, সোল়সৰিধা আনাপানস্সতি, সোল়স অপরন্তপনীযা ধম্মা, অট্ঠারস বুদ্ধধম্মা, একূনৰীসতি পচ্চৰেক্খণঞাণানি, চতুচত্তালীস ঞাণৰত্থূনি, পঞ্ঞাস উদযব্বযঞাণানি, পরোপঞ্ঞাস কুসলধম্মা, সত্তসত্ততিঞাণৰত্থূনি, চতুৰীসতিকোটিসতসহস্সসমাপত্তিসঞ্চারিমহাৰজিরঞাণং, অনন্তনযসমন্তপট্ঠানপৰিচযপচ্চৰেক্খণদেসনাঞাণানি, তথা অনন্তাসু লোকধাতূসু অনন্তানং সত্তানং আসযাদিৰিভাৰনঞাণানি চাতি এৰমাদযো অনন্তাপরিমাণভেদা অনঞ্ঞসাধারণা নিরতিসযা গুণভাগা গুণকোট্ঠাসা সংৰিজ্জন্তি উপলব্ভন্তি. তস্মা যথাৰুত্তৰিভাগা গুণভাগা অস্স অত্থীতি ভাগৰাতি ৰত্তব্বে আ-কারস্স রস্সত্তং কত্ৰা ‘‘ভগৰা’’তি ৰুত্তো. এৰং তাৰ ভাগৰাতি ভগৰা.

যস্মা সীলাদযো সব্বে, গুণভাগা অসেসতো;

ৰিজ্জন্তি সুগতে তস্মা, ‘‘ভগৰা’’তি পৰুচ্চতি.

কথং ভতৰাতি ভগৰা? যে তে সব্বলোকহিতায উস্সুক্কমাপন্নেহি মনুস্সত্তাদিকে অট্ঠ ধম্মে সমোধানেত্ৰা সম্মাসম্বোধিযা কতমহাভিনীহারেহি মহাবোধিসত্তেহি পরিপূরেতব্বা দানপারমী, সীলনেক্খম্মপঞ্ঞাৰীরিযখন্তিসচ্চঅধিট্ঠানমেত্তাউপেক্খাপারমীতি দস পারমিযো, দস উপপারমিযো, দস পরমত্থপারমিযোতি সমতিংস পারমিযো, দানাদীনি চত্তারি সঙ্গহৰত্থূনি, সচ্চাদীনি চত্তারি অধিট্ঠানানি, অত্তপরিচ্চাগো, নযন, ধন, রজ্জ, পুত্তদারপরিচ্চাগোতি পঞ্চ মহাপরিচ্চাগা, পুব্বযোগো, পুব্বচরিযা, ধম্মক্খানং, ঞাতত্থচরিযা, লোকত্থচরিযা, বুদ্ধত্থচরিযাতি এৰমাদযো, সঙ্খেপতো ৰা সব্বে পুঞ্ঞসম্ভারঞাণসম্ভারবুদ্ধকারকধম্মা, তে মহাভিনীহারতো পট্ঠায কপ্পানং সতসহস্সাধিকানি চত্তারি অসঙ্খ্যেযানি যথা হানভাগিযা, সংকিলেসভাগিযা, ঠিতিভাগিযা ৰা ন হোন্তি, অথ খো উত্তরুত্তরি ৰিসেসভাগিযাৰ হোন্তি, এৰং সক্কচ্চং নিরন্তরং অনৰসেসতো ভতা সম্ভতা অস্স অত্থীতি ভতৰাতি ৰত্তব্বে ‘‘ভগৰা’’তি ৰুত্তো নিরুত্তিনযেন ত-কারস্স গ-কারং কত্ৰা. অথ ৰা ভতৰাতি তেযেৰ যথাৰুত্তে বুদ্ধকারকধম্মে ৰুত্তনযেন ভরি সম্ভরি, পরিপূরেসীতি অত্থো. এৰম্পি ভতৰাতি ভগৰা.

সম্মাসম্বোধিযা সব্বে, দানপারমিআদিকে;

সম্ভারে ভতৰা নাথো, তস্মাপি ভগৰা মতো.

কথং ভাগে ৰনীতি ভগৰা? যে তে চতুৰীসতিকোটিসতসহস্সসঙ্খা দেৰসিকং ৰল়ঞ্জনকসমাপত্তিভাগা, তে অনৰসেসতো লোকহিতত্থং, অত্তনো চ দিট্ঠধম্মসুখৰিহারত্থং নিচ্চকপ্পং নিচ্চকপ্পং ৰনি ভজি সেৰি বহুলমকাসীতি ভাগে ৰনীতি ভগৰা. অথ ৰা অভিঞ্ঞেয্যধম্মেসু, কুসলাদীসু, খন্ধাদীসু চ যে তে পরিঞ্ঞেয্যাদিৰসেন সঙ্খেপতো ৰা চতুব্বিধা অভিসমযভাগা, ৰিত্থারতো পন ‘‘চক্খুং পরিঞ্ঞেয্যং…পে… জরামরণং পরিঞ্ঞেয্য’’ন্তিআদিনা অনেকপরিঞ্ঞেয্যভাগা, ‘‘চক্খুস্স সমুদযো পহাতব্বো…পে… জরামরণস্স সমুদযো পহাতব্বো’’তিআদিনা পহাতব্বভাগা, ‘‘চক্খুস্স নিরোধো…পে… জরামরণস্স নিরোধো সচ্ছিকাতব্বো’’তিআদিনা (পটি. ম. ১.২১) সচ্ছিকাতব্বভাগা, ‘‘চক্খুস্স নিরোধগামিনী পটিপদা’’তিআদিনা, ‘‘চত্তারো সতিপট্ঠানা’’তিআদিনা চ অনেকভেদা ভাৰেতব্বভাগা চ ধম্মা, তে সব্বে ৰনি ভজি যথারহং গোচরভাৰনাসেৰনানং ৰসেন সেৰি. এৰম্পি ভাগে ৰনীতি ভগৰা. অথ ৰা যে ইমে সীলাদযো ধম্মক্খন্ধা সাৰকেহি সাধারণা গুণকোট্ঠাসা গুণভাগা, ‘‘কিন্তি নু খো তে ৰেনেয্যসন্তানেসু পতিট্ঠপেয্য’’ন্তি মহাকরুণায ৰনি অভিপত্থযি, সা চস্স অভিপত্থনা যথাধিপ্পেতফলাৰহা অহোসি. এৰম্পি ভাগে ৰনীতি ভগৰা.

যস্মা ঞেয্যসমাপত্তি-গুণভাগে তথাগতো;

ভজি পত্থযি সত্তানং, হিতায ভগৰা ততো.

কথং ভগে ৰনীতি ভগৰা? সমাসতো তাৰ কতপুঞ্ঞেহি পযোগসম্পন্নেহি যথাৰিভৰং ভজীযন্তীতি ভগা, লোকিযলোকুত্তরসম্পত্তিযো. তত্থ লোকিযে তাৰ তথাগতো সম্বোধিতো পুব্বে বোধিসত্তভূতো পরমুক্কংসগতে ৰনি ভজি সেৰি, যত্থ পতিট্ঠায নিরৰসেসতো বুদ্ধকারকধম্মে সমন্নানেন্তো বুদ্ধধম্মে পরিপাচেসি. বুদ্ধভূতো পন তে নিরৰজ্জসুখূপসংহিতে অনঞ্ঞসাধারণে লোকুত্তরেপি ৰনি ভজি সেৰি. ৰিত্থারতো পন পদেসরজ্জইস্সরিযচক্কৰত্তিসম্পত্তিদেৰরজ্জসম্পত্তিআদিৰসেন, ঝানৰিমোক্খসমাধিসমাপত্তিঞাণদস্সনমগ্গভাৰনাফলসচ্ছিকিরিযাদিউত্তরিমনুস্সধম্মৰসেন চ অনেকৰিহিতে অনঞ্ঞসাধারণে ভগে ৰনি ভজি সেৰি. এৰম্পি ভগে ৰনীতি ভগৰা.

যা তা সম্পত্তিযো লোকে, যা চ লোকুত্তরা পুথূ;

সব্বা তা ভজি সম্বুদ্ধো, তস্মাপি ভগৰা মতো.

কথং ভত্তৰাতি ভগৰা? ভত্তা দল়্হভত্তিকা অস্স বহূ অত্থীতি ভত্তৰা. তথাগতো হি মহাকরুণাসব্বঞ্ঞুতঞ্ঞাণাদিঅপরিমিতনিরুপমপ্পভাৰগুণৰিসেসসমঙ্গি ভাৰতো সব্বসত্তুত্তমো সব্বানত্থপরিহারপুব্বঙ্গমায নিরৰসেসহিতসুখৰিধানতপ্পরায নিরতিসযায পযোগসম্পত্তিযা সদেৰমনুস্সায পজায অচ্চন্তুপকারিতায দ্ৰত্তিংসমহাপুরিসলক্খণঅসীতিঅনুব্যঞ্জনব্যামপ্পভাদিঅনঞ্ঞসাধারণগুণৰিসেসপটিমণ্ডিতরূপকাযতায যথাভুচ্চগুণাধিগতেন ‘‘ইতিপি সো ভগৰা’’তিআদিনযপ্পৰত্তেন লোকত্তযব্যাপিনাসুৰিপুলেন, সুৰিসুদ্ধেন চ থুতিঘোসেন সমন্নাগতত্তা, উক্কংসপারমিপ্পত্তাসু অপ্পিচ্ছতাসন্তুট্ঠিআদীসু সুপতিট্ঠিতভাৰতো, দসবলচতুৰেসারজ্জাদিনিরতিসযগুণৰিসেসসমঙ্গিভাৰতো চ ‘‘রূপপ্পমাণো রূপপ্পসন্নো, ঘোসপ্পমাণো ঘোসপ্পসন্নো, লূখপ্পমাণো লূখপ্পসন্নো, ধম্মপ্পমাণো ধম্মপ্পসন্নো’’তি এৰং চতুপ্পমাণিকে লোকসন্নিৰাসে সব্বথাপি পসাদাৰহভাৰেন সমন্তপাসাদিকত্তা অপরিমাণানং সত্তানং সদেৰমনুস্সানং আদরবহুমানগারৰাযতনতায পরমপেমসম্ভত্তিট্ঠানং. যে তস্স ওৰাদে পতিট্ঠিতা অৰেচ্চপ্পসাদেন সমন্নাগতা হোন্তি, কেনচি অসংহারিযা তেসং সম্ভত্তি সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰাতি. তথা হি তে অত্তনো জীৰিতপরিচ্চাগেপি তত্থ পসাদং ন পরিচ্চজন্তি, তস্স ৰা আণং দল়্হভত্তিভাৰতো. তেনেৰাহ –

‘‘যো ৰে কতঞ্ঞূ কতৰেদি ধীরো,

কল্যাণমিত্তো দল়্হভত্তি চ হোতী’’তি. (জা. ২.১৭.৭৮);

‘‘সেয্যথাপি, ভিক্খৰে, মহাসমুদ্দো ঠিতধম্মো ৰেলং নাতিৰত্ততি, এৰমেৰ খো, ভিক্খৰে, যং মযা সাৰকানং সিক্খাপদং পঞ্ঞত্তং, তং মম সাৰকা জীৰিতহেতুপি নাতিক্কমন্তী’’তি (উদা. ৪৫; চূল়ৰ. ৩৮৫) চ.

এৰং ভত্তৰাতি ভগৰা নিরুত্তিনযেন একস্স ত-কারস্স লোপং কত্ৰা ইতরস্স গ-কারং কত্ৰা.

গুণাতিসযযুত্তস্স, যস্মা লোকহিতেসিনো;

সম্ভত্তা বহৰো সত্থু, ভগৰা তেন ৰুচ্চতি.

কথং ভগে ৰমীতি ভগৰা? যস্মা তথাগতো বোধিসত্তভূতোপি পুরিমাসু জাতীসু পারমিযো পূরেন্তো ভগসঙ্খাতং সিরিং, ইস্সরিযং, যসঞ্চ ৰমি উগ্গিরি খেল়পিণ্ডং ৰিয অনপেক্খো ছড্ডযি. তথা হিস্স সোমনস্সকুমারকালে (জা. ১.১৫.২১১ আদযো) হত্থিপালকুমারকালে (জা. ১.১৫.৩৩৭ আদযো) অযোঘরপণ্ডিতকালে (জা. ১.১৫.৩৬৩ আদযো) মূগপক্খপণ্ডিতকালে (জা. ২.২২.১ আদযো) চূল়সুতসোমকালেতি (জা. ২.১৭.১৯৫ আদযো) এৰমাদীসু নেক্খম্মপারমিপূরণৰসেন দেৰরজ্জসদিসায রজ্জসিরিযা পরিচ্চত্তঅত্তভাৰানং পরিমাণং নত্থি. চরিমত্তভাৰেপি হত্থগতং চক্কৰত্তিসিরিং দেৰলোকাধিপচ্চসদিসং চতুদীপিস্সরিযং, চক্কৰত্তিসম্পত্তিসন্নিস্সযং সত্তরতনসমুজ্জলং যসঞ্চ তিণাযপি অমঞ্ঞমানো নিরপেক্খো পহায অভিনিক্খমিত্ৰা সম্মাসম্বোধিং অভিসম্বুদ্ধো, তস্মা ইমে সিরিআদিকে ভগে ৰমীতি ভগৰা. অথ ৰা ভানি নাম নক্খত্তানি, তেহি সমং গচ্ছন্তি পৰত্তন্তীতি ভগা, সিনেরুযুগন্ধরউত্তরকুরুহিমৰন্তাদিভাজনলোকৰিসেসসন্নিস্সযা সোভা কপ্পট্ঠিযভাৰতো. তেপি ভগৰা ৰমি তন্নিৰাসসত্তাৰাসসমতিক্কমনতো তপ্পটিবদ্ধছন্দরাগপ্পহানেন পজহীতি. এৰম্পি ভগে ৰমীতি ভগৰা.

চক্কৰত্তিসিরিং যস্মা, যসং ইস্সরিযং সুখং;

পহাসি লোকচিত্তঞ্চ, সুগতো ভগৰা ততো.

কথং ভাগে ৰমীতি ভগৰা? ভাগা নাম সভাৰধম্মকোট্ঠাসা, তে খন্ধাযতনধাতাদিৰসেন, তত্থাপি রূপৰেদনাদিৰসেন, অতীতাদিৰসেন চ অনেকৰিধা, তে চ ভগৰা ‘‘সব্বং পপঞ্চং, সব্বং যোগং, সব্বং গন্থং, সব্বং সংযোজনং সমুচ্ছিন্দিত্ৰা অমতং ধাতুং সমধিগচ্ছন্তো ৰমি উগ্গিরি অনপেক্খো ছড্ডযি ন পচ্চাৰমি. তথা হেস সব্বত্থকমেৰ পথৰিং আপং তেজং ৰাযং, চক্খুং সোতং ঘানং জিৰ্হং কাযং মনং, রূপে সদ্দে গন্ধে রসে ফোট্ঠব্বে ধম্মে, চক্খুৰিঞ্ঞাণং…পে… মনোৰিঞ্ঞাণং, চক্খুসম্ফস্সং…পে… মনোসম্ফস্সং, চক্খুসম্ফস্সজং ৰেদনং…পে… মনোসম্ফস্সজং ৰেদনং, চক্খুসম্ফস্সজং সঞ্ঞং…পে… মনোসম্ফস্সজং সঞ্ঞং, চক্খুসম্ফস্সজং চেতনং…পে… মনোসম্ফস্সজং চেতনং, রূপতণ্হং …পে… ধম্মতণ্হং, রূপৰিতক্কং…পে… ধম্মৰিতক্কং, রূপৰিচারং…পে… ধম্মৰিচার’’ন্তিআদিনা অনুপদধম্মৰিভাগৰসেনপি সব্বেৰ ধম্মকোট্ঠাসে অনৰসেসতো ৰমি উগ্গিরি অনপেক্খপরিচ্চাগেন ছড্ডযি. ৰুত্তং হেতং –

‘‘যং তং, আনন্দ, চত্তং ৰন্তং মুত্তং পহীনং পটিনিস্সট্ঠং, তং তথাগতো পুন পচ্চাৰমিস্সতীতি নেতং ঠানং ৰিজ্জতী’’তি (দী. নি. ২.১৮৩).

এৰম্পি ভাগে ৰমীতি ভগৰা. অথ ৰা ভাগে ৰমীতি সব্বেপি কুসলাকুসলে সাৰজ্জানৰজ্জে হীনপণীতে কণ্হসুক্কসপ্পটিভাগে ধম্মে অরিযমগ্গঞাণমুখেন ৰমি উগ্গিরি অনপেক্খো পরিচ্চজি পজহি, পরেসঞ্চ তথত্তায ধম্মং দেসেসি. ৰুত্তম্পি চেতং –

‘‘ধম্মাপি ৰো, ভিক্খৰে, পহাতব্বা, পগেৰ অধম্মা (ম. নি. ১.২৪০). কুল্লূপমং ৰো, ভিক্খৰে, ধম্মং দেসেস্সামি নিত্থরণত্থায, নো গহণত্থাযা’’তিআদি (ম. নি. ১.২৪০).

এৰম্পি ভাগে ৰমীতি ভগৰা.

খন্ধাযতনধাতাদি-ধম্মভেদা মহেসিনা;

কণ্হা সুক্কা যতো ৰন্তা, ততোপি ভগৰা মতো.

তেন ৰুত্তং –

‘‘ভাগৰা ভতৰা ভাগে, ভগে চ ৰনি ভত্তৰা;

ভগে ৰমি তথা ভাগে, ৰমীতি ভগৰা জিনো’’তি.

এত্থ চ যস্মা সঙ্খেপতো অত্তহিতসম্পত্তিপরহিতপটিপত্তিৰসেন দুৰিধা বুদ্ধগুণা, তাসু অত্তহিতসম্পত্তি পহানসম্পদাঞাণসম্পদাভেদতো দুৰিধা, আনুভাৰসম্পদাদীনং তদৰিনাভাৰেন তদন্তোগধত্তা. পরহিতপটিপত্তি পযোগাসযভেদতো দুৰিধা. তত্থ পযোগতো লাভসক্কারাদিনিরপেক্খচিত্তস্স সব্বদুক্খনিয্যানিকধম্মূপদেসো, আসযতো পটিৰিরুদ্ধেসুপি নিচ্চং হিতেসিতা, ঞাণপরিপাককালাগমনাদিপরহিতপটিপত্তি চ, আমিসপটিগ্গহণাদিনাপি অত্থচরিযা পরহিতপটিপত্তি হোতিযেৰ. তস্মা তেসং ৰিভাৰনৰসেন পাল়িযং ‘‘অরহ’’ন্তিআদীনং পদানং গহণং ৰেদিতব্বং.

তত্থ ‘‘অরহ’’ন্তি ইমিনা পদেন পহানসম্পদাৰসেন ভগৰতো অত্তহিতসম্পত্তি ৰিভাৰিতা. ‘‘সম্মাসম্বুদ্ধো, লোকৰিদূ’’তি চ ইমেহি পদেহি ঞাণসম্পদাৰসেন. ননু চ ‘‘লোকৰিদূ’’তি ইমিনাপি সম্মাসম্বুদ্ধতা ৰিভাৰীযতীতি? সচ্চং ৰিভাৰীযতি, অত্থি পন ৰিসেসো, ‘‘সম্মাসম্বুদ্ধো’’তি ইমিনা সব্বঞ্ঞুতঞ্ঞাণানুভাৰো ৰিভাৰিতো, ‘‘লোকৰিদূ’’তি পন ইমিনা আসযানুসযঞাণাদীনম্পি আনুভাৰো ৰিভাৰিতোতি. ‘‘ৰিজ্জাচরণসম্পন্নো’’তি ইমিনা সব্বাপি ভগৰতো অত্তহিতসম্পত্তি ৰিভাৰিতা. ‘‘সুগতো’’তি পন ইমিনা সমুদাগমতো পট্ঠায ভগৰতো অত্তহিতসম্পত্তি, পরহিতপটিপত্তি চ ৰিভাৰিতা. ‘‘অনুত্তরো পুরিসদম্মসারথি সত্থা দেৰমনুস্সান’’ন্তি ইমেহি পদেহি ভগৰতো পরহিতপটিপত্তি ৰিভাৰিতা. ‘‘বুদ্ধো’’তি ইমিনা ভগৰতো অত্তহিতসম্পত্তি, পরহিতপটিপত্তি চ ৰিভাৰিতা. এৰঞ্চ কত্ৰা ‘‘সম্মাসম্বুদ্ধো’’তি ৰত্ৰা ‘‘বুদ্ধো’’তি ৰচনং সমত্থিতং হোতি. তেনেৰাহ ‘‘অত্তনাপি বুজ্ঝি অঞ্ঞেপি সত্তে বোধেসী’’তিআদি. ‘‘ভগৰা’’তি চ ইমিনাপি সমুদাগমতো পট্ঠায ভগৰতো সব্বা অত্তহিতসম্পত্তি, পরহিতপটিপত্তি চ ৰিভাৰিতা.

অপরো নযো – হেতুফলসত্তূপকারৰসেন সঙ্খেপতো তিৰিধা বুদ্ধগুণা. তত্থ ‘‘অরহং সম্মাসম্বুদ্ধো ৰিজ্জাচরণসম্পন্নো লোকৰিদূ’’তি ইমেহি পদেহি ফলসম্পত্তিৰসেন বুদ্ধগুণা ৰিভাৰিতা. ‘‘অনুত্তরো পুরিসদম্মসারথি সত্থা দেৰমনুস্সান’’ন্তি ইমেহি সত্তূপকারৰসেন বুদ্ধগুণা পকাসিতা. ‘‘বুদ্ধো’’তি ইমিনা ফলৰসেন, সত্তূপকারৰসেন চ বুদ্ধগুণা ৰিভাৰিতা. ‘‘সুগতো ভগৰা’’তি পন ইমেহি পদেহি হেতুফলসত্তূপকারৰসেন বুদ্ধগুণা ৰিভাৰিতাতি ৰেদিতব্বং.

১৪৫. তস্সাতি বুদ্ধানুস্সতিকম্মট্ঠানিকস্স যোগিনো. এৰন্তি ‘‘তত্রাযং নযো’’তিআদিনা ৰুত্তপ্পকারেন. তস্মিং সমযেতি বুদ্ধগুণানুস্সরণসমযে. রাগপরিযুট্ঠিতন্তি রাগেন পরিযুট্ঠিতং, পরিযুট্ঠানপ্পত্তেহি রাগেহি সহিতং চিত্তং অরঞ্ঞমিৰ চোরেহি তেন পরিযুট্ঠিতন্তি ৰুত্তং, তস্স পরিযুট্ঠানট্ঠানভাৰতো, পরিযুট্ঠিতরাগন্তি অত্থো. যং ৰা রাগস্স পরিযুট্ঠানং, তং তংসহিতে চিত্তে উপচরিতন্তি দট্ঠব্বং. এতস্মিং পক্খে রাগেনাতি রাগেন হেতুনাতি অত্থো. উজুগতমেৰাতি পগেৰ কাযৰঙ্কাদীনং অপনীতত্তা, চিত্তস্স চ অনুজুভাৰকরানং মাযাদীনং অভাৰতো, রাগাদিপরিযুট্ঠানাভাৰেন ৰা ওনতিউন্নতিৰিরহতো উজুভাৰমেৰ কতং. অথ ৰা উজুগতমেৰাতি কম্মট্ঠানস্স ৰীথিং ওতিণ্ণতায লীনুদ্ধচ্চৰিগমনতো মজ্ঝিমসমথনিমিত্তপটিপত্তিযা উজুভাৰমেৰ গতং. তথাগতং আরব্ভাতি তথাগতগুণে আরম্মণং কত্ৰা.

ইচ্চস্সাতি ইতি অস্স. ‘‘সো ভগৰা ইতিপি অরহ’’ন্তিআদিনা পুব্বে ৰুত্তপ্পকারেন বুদ্ধগুণে অনুৰিতক্কযতোতি সম্বন্ধো. এৰন্তি ‘‘নেৰ তস্মিং সমযে’’তিআদিনা ৰুত্তনযেন. বুদ্ধগুণপোণাতি বুদ্ধগুণনিন্না. ‘‘ৰিতক্কৰিচারা পৰত্তন্তী’’তি এতেন বুদ্ধগুণসঙ্খাতং কম্মট্ঠানং ৰিতক্কাহতং, ৰিতক্কপরিযাহতং, পুনপ্পুনং অনুমজ্জনঞ্চ করোতীতি দস্সেতি. পীতি উপ্পজ্জতীতি ভাৰনাৰসেন উপচারজ্ঝাননিপ্ফাদিকা বলৰতী পীতি উপ্পজ্জতি. পীতিমনস্স ৰুত্তপ্পকারপীতিসহিতচিত্তস্স. কাযচিত্তদরথাতি কাযচিত্তপস্সদ্ধীনং পটিপক্খভূতা সুখুমাৰত্থা উদ্ধচ্চসহগতা কিলেসা. পটিপ্পস্সম্ভন্তীতি সন্নিসীদন্তি. অনুক্কমেন একক্খণেতি যদা বুদ্ধগুণারম্মণা ভাৰনা উপরূপরি ৰিসেসং আৰহন্তী পৰত্ততি, তদা নীৰরণানি ৰিক্খম্ভিতানেৰ হোন্তি, কিলেসা সন্নিসিন্নাৰ হোন্তি, সুৰিসদানি সদ্ধাদীনি ইন্দ্রিযানি হোন্তি, ভাৰনায পগুণতায ৰিতক্কৰিচারা সাতিসযং পটুকিচ্চাৰ হোন্তি, বলৰতী পীতি উপ্পজ্জতি, পীতিপদট্ঠানা পস্সদ্ধি সৰিসেসা জাযতি, পস্সদ্ধকাযস্স সমাধিপদট্ঠানং সুখং থিরতরং হুত্ৰা পৰত্ততি, সুখেন অনুব্রূহিতং চিত্তং কম্মট্ঠানে সম্মদেৰ সমাধিযতি. এৰং অনুক্কমেন পুব্বভাগে ৰিতক্কাদযো উপরূপরি পটুপটুতরভাৰেন পৰত্তিত্ৰা ভাৰনায মজ্ঝিমসমথপটিপত্তিযা ইন্দ্রিযানঞ্চ একরসভাৰেন পটুতমানি হুত্ৰা একক্খণে ঝানঙ্গানি উপ্পজ্জন্তি. যং সন্ধায ৰুত্তং ভগৰতা –

‘‘যস্মিং, মহানাম, সমযে অরিযসাৰকো তথাগতং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি…পে… সুখিনো চিত্তং সমাধিযতী’’তি (অ. নি. ৬.১০).

কস্মা পনেত্থ ঝানং অপ্পনাপত্তং ন হোতীতি আহ ‘‘বুদ্ধগুণানং পন গম্ভীরতাযা’’তিআদি. গম্ভীরে হি আরম্মণে গম্ভীরে উদকে পতিতনাৰা ৰিয সমথভাৰনা পতিট্ঠং ন লভতি, ‘‘গম্ভীরতাযা’’তি চ ইমিনা সভাৰধম্মতাপি সঙ্গহিতা. সভাৰধম্মো হি গম্ভীরো ন পঞ্ঞত্তি. ননু চ তজ্জাপঞ্ঞত্তিৰসেন সভাৰধম্মো গয্হতীতি? সচ্চং গয্হতি পুব্বভাগে, ভাৰনায পন ৰড্ঢমানায পঞ্ঞত্তিং সমতিক্কমিত্ৰা সভাৰেযেৰ চিত্তং তিট্ঠতি. ননু চ সভাৰধম্মেপি কত্থচি অপ্পনা সমিজ্ঝতি দুতিযারুপ্পজ্ঝানাদীতি? সচ্চং সমিজ্ঝতি, তঞ্চ খো একপ্পকারে আরম্মণে, ইদং পন নানপ্পকারন্তি দস্সেন্তো ‘‘নানপ্পকারগুণানুস্সরণাধিমুত্ততাযা’’তি আহ. এৰম্পি যথা নানপ্পকারেসু কেসাদিকোট্ঠাসেসু মনসিকারং পৰত্তেন্তস্স একস্মিংযেৰ কোট্ঠাসে অপ্পনাৰসেন ভাৰনা অৰতিট্ঠতি, এৰমিধ কস্মা ন হোতীতি? ৰিসমোযং উপঞ্ঞাসো. তত্থ হি সতিপি কোট্ঠাসবহুভাৰে একপ্পকারেনেৰ ভাৰনা ৰত্ততি পটিক্কূলাকারস্সেৰ গহণতো, ইধ পন নানপ্পকারেন গুণানং নানপ্পকারত্তা, ন অযমেকস্মিংযেৰ গুণে ঠাতুং সক্কোতি ভাৰনাবলেন পচ্চক্খতো বুদ্ধগুণেসু উপট্ঠহন্তেসু সদ্ধায বলৰভাৰতো. তেনেৰ হি ‘‘অধিমুত্ততাযা’’তি ৰুত্তং. যদি উপচারপ্পত্তং ঝানং হোতি, কথং বুদ্ধানুস্সতীতি ৰুত্তন্তি আহ ‘‘তদেত’’ন্তিআদি.

সগারৰো হোতি সপ্পতিস্সো, সত্থু গুণসরীরস্স পচ্চক্খতো উপট্ঠহনতো. ততোযেৰ সদ্ধাৰেপুল্লং অৰেচ্চপ্পসাদসদিসং সদ্ধামহত্তং. বুদ্ধগুণানং অনুস্সরণৰসেন ভাৰনায পৰত্তত্তা সতিৰেপুল্লং. তেসং পরমগম্ভীরতায, নানপ্পকারতায চ পঞ্ঞাৰেপুল্লং. তেসং উল়ারপুঞ্ঞক্খেত্ততায পুঞ্ঞৰেপুল্লঞ্চ অধিগচ্ছতি. পীতিপামোজ্জবহুলো হোতি পীতিসম্বোজ্ঝঙ্গট্ঠানীযত্তা বুদ্ধানুস্সতিযা. ভযভেরৰসহো বুদ্ধগুণারম্মণায সতিযা ভযভেরৰাভিভৰনতো. তেনাহ ভগৰা ‘‘অনুস্সরেথ সম্বুদ্ধং, ভযং তুম্হাক নো সিযা’’তি (সং. নি. ১.২৪৯ থোকং ৰিসদিসং). দুক্খাধিৰাসনসমত্থো বুদ্ধানুস্সতিযা সরীরদুক্খস্স পদুমপলাসে উদকস্স ৰিয ৰিনিৰট্টনতো. সংৰাসসঞ্ঞন্তি সহৰাসসঞ্ঞং. বুদ্ধভূমিযং চিত্তং নমতি বুদ্ধগুণানং মহন্তভাৰস্স পচ্চক্খতো উপট্ঠানতো. বুদ্ধানুস্সতিভাৰনায সব্বদা বুদ্ধগুণানং চিত্তে ৰিপরিৰত্তনতো ৰুত্তং ‘‘সম্মুখা সত্থারং পস্সতো ৰিযা’’তি. উত্তরি অপ্পটিৰিজ্ঝন্তোতি ইমায ভাৰনায উপরি তং অধিট্ঠানং কত্ৰা সচ্চানি অপ্পটিৰিজ্ঝন্তো. সুগতিপরাযণোতি সুগতিসম্পরাযো.

অপ্পমাদন্তি অপ্পমজ্জনং সক্কচ্চং অনুযোগং. কযিরাথাতি করেয্য. সুমেধসোতি সুন্দরপঞ্ঞো. এৰং মহানুভাৰাযাতি ৰুত্তপ্পকারেন নীৰরণৰিক্খম্ভনাদিসমত্থেন সত্থরি সগারৰভাৰাদিহেতুভূতেন মহতা সামত্থিযেন সমন্নাগতায.

২. ধম্মানুস্সতিকথাৰণ্ণনা

১৪৬. ধম্মানুস্সতিন্তি এত্থ পদত্থো, সভাৰত্থো চ আদিতো ৰুত্তোযেৰাতি তং অনামসিত্ৰা ভাৰনাৰিধানমেৰ দস্সেতুং ‘‘ধম্মানুস্সতিং ভাৰেতুকামেনাপী’’তিআদি আরদ্ধং. কস্মা পনেত্থ বুদ্ধানুস্সতিযং ৰিয ‘‘অৰেচ্চপ্পসাদসমন্নাগতেনা’’তি ন ৰুত্তং. ননু এতা পটিপাটিযা ছ অনুস্সতিযো অরিযসাৰকানং ৰসেন দেসনং আরুল়্হাতি? সচ্চমেতং, এৰং সন্তেপি ‘‘পরিসুদ্ধসীলাদিগুণানং পুথুজ্জনানম্পি ইজ্ঝন্তী’’তি দস্সনত্থং ‘‘অৰেচ্চপ্পসাদসমন্নাগতেনা’’তি ইধ ন ৰুত্তং, অরিযসাৰকানং পন সুখেন ইজ্ঝন্তীতি. তথাপি পাল়িযং আগতত্তা চ বুদ্ধানুস্সতিনিদ্দেসে ৰুত্তন্তি দট্ঠব্বং, অযঞ্চ ৰিচারো পরতো আগমিস্সতেৰ.

১৪৭. পরিযত্তিধম্মোপীতি পি-সদ্দেন লোকুত্তরধম্মং সম্পিণ্ডেতি. ইতরেসূতি সন্দিট্ঠিকাদিপদেসু. লোকুত্তরধম্মোৰাতি অৰধারণং নিপ্পরিযাযেন সন্দিট্ঠিকাদিঅত্থং সন্ধায ৰুত্তং, পরিযাযতো পনেতে পরিযত্তিধম্মেপি সম্ভৰন্তেৰ. তথা হি পরিযত্তিধম্মো বহুস্সুতেন আগতাগমেন পরমেন সতিনেপক্কেন সমন্নাগতেন পঞ্ঞৰতা আদিকল্যাণতাদিৰিসেসতো সযং দট্ঠব্বোতি সন্দিট্ঠিকো. আচরিযপযিরুপাসনায ৰিনা ন লব্ভাতি চে? লোকুত্তরধম্মেপি সমানে কল্যাণমিত্তসন্নিস্সযেনেৰ সিজ্ঝনতো, তথা সত্থুসন্দস্সনেপি. ‘‘সন্দিট্ঠিযা জযতী’’তি অযং পনত্থো তিত্থিযনিম্মদ্দনে নিপ্পরিযাযতোৰ লব্ভতি, কিলেসজযে পরিযাযতো পরম্পরাহেতুভাৰতো. ‘‘সন্দিট্ঠং অরহতী’’তি অযম্পি অত্থো লব্ভতেৰ, সব্বসো সংকিলেসধম্মানং পহানং, ৰোদানধম্মানং পরিব্রূহনঞ্চ উদ্দিস্স পৰত্তত্তা. অযঞ্চ অত্থো ‘‘যে খো ত্ৰং, গোতমি, ধম্মে জানেয্যাসি, ইমে ধম্মা সরাগায সংৰত্তন্তি নো ৰিরাগায, সঞ্ঞোগায সংৰত্তন্তি নো ৰিসঞ্ঞোগায, সউপাদানায সংৰত্তন্তি নো অনুপাদানায. একংসেন, গোতমি, ধারেয্যাসি ‘নেসো ধম্মো, নেসো ৰিনযো, নেতং সত্থুসাসন’’’ন্তি (চূল়ৰ. ৪০৬; অ. নি. ৮.৫৩), ‘‘ধম্মাপি ৰো, ভিক্খৰে, পহাতব্বা, পগেৰ অধম্মা’’তি (ম. নি. ১.২৪০) চ এৰমাদীহি সুত্তপদেহি ৰিভাৰেতব্বো. অকালিকাধিগমুপাযতায অকালিকো. ৰিজ্জমানতাপরিসুদ্ধতাহি এহিপস্সৰিধিং অরহতীতি এহিপস্সিকো. ততো এৰ ৰট্টদুক্খনিত্থরণত্থিকেহি অত্তনো চিত্তে উপনযনং, চিত্তস্স ৰা তত্থ উপনযনং অরহতীতি ওপনেয্যিকো. ৰিমুত্তাযতনসীসে ঠত্ৰা পরিচযেন সম্মদেৰ অত্থৰেদং, ধম্মৰেদঞ্চ লভন্তেহি পচ্চত্তং ৰেদিতব্বো ৰিঞ্ঞূহীতি. এৰং সন্দিট্ঠিকাদিপদেসু পরিযত্তিধম্মম্পি পক্খিপিত্ৰা মনসিকারো যুজ্জতেৰ.

সাতি গাথা. সমন্তভদ্রকত্তাতি সব্বভাগেহি সুন্দরত্তা. ধম্মস্সাতি সাসনধম্মস্স. কিঞ্চাপি অৰযৰৰিনিমুত্তো সমুদাযো নাম পরমত্থতো কোচি নত্থি, যেসু পন অৰযৰেসু সমুদাযরূপেন অৰেক্খিতেসু ‘‘গাথা’’তি সমঞ্ঞা, তং ততো ভিন্নং ৰিয কত্ৰা সংসামিৰোহারং আরোপেত্ৰা দস্সেন্তো ‘‘পঠমেন পাদেন আদিকল্যাণা’’তিআদিমাহ. ‘‘একানুসন্ধিক’’ন্তি ইদং নাতিবহুৰিভাগং যথানুসন্ধিনা একানুসন্ধিকং সন্ধায ৰুত্তং, ইতরস্স পন তেনেৰ দেসেতব্বধম্মৰিভাগেন আদিমজ্ঝপরিযোসানভাগা লব্ভন্তীতি. নিদানেনাতি কালদেসদেসকপরিসাদিঅপদিসনলক্খণেন নিদানগন্থেন. নিগমনেনাতি ‘‘ইদমৰোচা’’তিআদিকেন (সং. নি. ১.২৪৯), ‘‘ইতি যং তং ৰুত্তং, ইদমেতং পটিচ্চ ৰুত্ত’’ন্তি (অ. নি. ১০.২৭) ৰা যথাৰুত্তত্থনিগমনেন.

অযং কথা ৰিসেসতো সুত্তপিটকসংৰণ্ণনাতি কত্ৰা সুত্তপিটকৰসেন ধম্মস্স আদিকল্যাণাদিকং দস্সেত্ৰা ইদানি সুত্তপিটকৰিনযপিটকানং ৰসেন তং দস্সেতুং ‘‘সনিদানসউপ্পত্তিকত্তা’’তিআদি ৰুত্তং. তত্থ সনিদানসউপ্পত্তিকত্তাতি যথাৰুত্তনিদানেন সনিদানতায, সঅট্ঠুপ্পত্তিকতায চ. ৰেনেয্যানং অনুরূপতোতি সিক্খাপদপঞ্ঞত্তিযা, ধম্মদেসনায চ তংতংসিক্খাপদভাৰেন পঞ্ঞাপিযমানস্স ৰেনেয্যজ্ঝাসযানুরূপং পৰত্তিযমানস্স অনুরূপতো. অত্থস্সাতি দেসিযমানস্স চ সীলাদিঅত্থস্স. ‘‘তং কিস্স হেতু (সং. নি. ১.২৪৯)? সেয্যথাপি, ভিক্খৰে’’তিআদিনা (সং. নি. ৩.৯৫) তত্থ তত্থ হেতূপমাগহণেন হেতুদাহরণযুত্ততো.

এৰং সুত্তৰিনযৰসেন পরিযত্তিধম্মস্স আদিমজ্ঝপরিযোসানকল্যাণতং দস্সেত্ৰা ইদানি তীণি পিটকানি একজ্ঝং গহেত্ৰা তং দস্সেতুং ‘‘সকলোপী’’তিআদি ৰুত্তং. তত্থ সাসনধম্মোতি –

‘‘সব্বপাপস্স অকরণং, কুসলস্স উপসম্পদা;

সচিত্তপরিযোদপনং, এতং বুদ্ধান সাসন’’ন্তি. (ধ. প. ১৮৩; দী. নি. ২.৯০) –

এৰং ৰুত্তস্স সত্থুসাসনস্স পকাসকো পরিযত্তিধম্মো. সীলেন আদিকল্যাণো সীলমূলকত্তা সাসনস্স. সমথাদীহি মজ্ঝেকল্যাণো তেসং সাসনসম্পত্তিযা ৰেমজ্ঝভাৰতো. নিব্বানেন পরিযোসানকল্যাণো তদধিগমতো উত্তরিকরণীযাভাৰতো. সাসনে সম্মাপটিপত্তি নাম পঞ্ঞায হোতি, তস্সা চ সীলং, সমাধি চ মূলন্তি আহ ‘‘সীলসমাধীহি আদিকল্যাণো’’তি. পঞ্ঞা পন অনুবোধপটিৰেধৰসেন দুৰিধাতি তদুভযম্পি গণ্হন্তো ‘‘ৰিপস্সনামগ্গেহি মজ্ঝেকল্যাণো’’তি আহ. তস্স নিপ্ফত্তি ফলং, কিচ্চং নিব্বানসচ্ছিকিরিযা, ততো পরং কত্তব্বং নত্থীতি দস্সেন্তো আহ ‘‘ফলনিব্বানেহি পরিযোসানকল্যাণো’’তি. ফলগ্গহণেন ৰা সউপাদিসেসনিব্বানমাহ, ইতরেন ইতরং, তদুভযঞ্চ সাসনসম্পত্তিযা ওসানন্তি আহ ‘‘ফলনিব্বানেহি পরিযোসানকল্যাণো’’তি.

বুদ্ধস্স সুবোধিতা সম্মাসম্বুদ্ধতা, তায আদিকল্যাণো তপ্পভৰত্তা. সব্বসো সংকিলেসপ্পহানং ৰোদানং, পারিপূরী চ ধম্মসুধম্মতা, তায মজ্ঝেকল্যাণো তংসরীরত্তা. সত্থারা যথানুসিট্ঠং তথা পটিপত্তি সঙ্ঘসুপ্পটিপত্তি, তায পরিযোসানকল্যাণো, তায সাসনস্স লোকে সুপ্পতিট্ঠিতভাৰতো. তন্তি সাসনধম্মং. তথত্তাযাতি যথত্তায ভগৰতা ধম্মো দেসিতো, তথত্তায তথভাৰায. সো পন অভিসম্বোধি পচ্চেকবোধি সাৰকবোধীতি তিৰিধো, ইতো অঞ্ঞথা নিব্বানাধিগমস্স অভাৰতো. তত্থ সব্বগুণেহি অগ্গভাৰতো, ইতরবোধিদ্ৰযমূলতায চ পঠমায বোধিযা আদিকল্যাণতা, গুণেহি ৰেমজ্ঝভাৰতো দুতিযায মজ্ঝেকল্যাণতা, তদুভযাৰরতায, তদোসানতায চ সাসনধম্মস্স ততিযায পরিযোসানকল্যাণতা ৰুত্তা.

এসোতি সাসনধম্মো. নীৰরণৰিক্খম্ভনতোতি ৰিমুত্তাযতনসীসে ঠত্ৰা সদ্ধম্মং সুণন্তস্স নীৰরণানং ৰিক্খম্ভনসম্ভৰতো. ৰুত্তং হেতং –

‘‘যথা যথাৰুসো, ভিক্খুনো সত্থা ৰা ধম্মং দেসেতি, অঞ্ঞতরো ৰা গরুট্ঠানিযো সব্রহ্মচারী, তথা তথা সো তত্থ লভতি অত্থৰেদং লভতি ধম্মৰেদ’’ন্তি (অ. নি. ৫.২৬).

‘‘যস্মিং, ভিক্খৰে, সমযে অরিযসাৰকো ওহিতসোতো ধম্মং সুণাতি, পঞ্চস্স নীৰরণানি তস্মিং সমযে পহীনানি হোন্তী’’তি (সং. নি. ৫.২১৯) –

চ আদি. সমথৰিপস্সনাসুখাৰহনতোতি সমথসুখস্স চ ৰিপস্সনাসুখস্স চ সম্পাদনতো. ৰুত্তম্পি চেতং –

‘‘সো ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখ’’ন্তিআদি (দী. নি. ১.২৭৯; ম. নি. ২.১৩৮).

তথা –

‘‘যতো যতো সম্মসতি, খন্ধানং উদযব্বযং;

লভতী পীতিপামোজ্জং, অমতং তং ৰিজানতং;

অমানুসী রতী হোতি, সম্মা ধম্মং ৰিপস্সতো’’তি চ. (ধ. প. ৩৭৪, ৩৭৩);

তথাপটিপন্নোতি যথা সমথৰিপস্সনাসুখং আৰহতি, যথা ৰা সত্থারা অনুসিট্ঠং, তথা পটিপন্নো সাসনধম্মো. তাদিভাৰাৰহনতোতি ছল়ঙ্গুপেক্খাৰসেন ইট্ঠাদীসু তাদিভাৰস্স লোকধম্মেহি অনুপলেপস্স আৰহনতো. এস ভগৰা ৰুত্তনযেন তিৰিধকল্যাণং ধম্মং দেসেন্তো যং সাসনব্রহ্মচরিযং, মগ্গব্রহ্মচরিযঞ্চ পকাসেতি, তং যথানুরূপং অত্থসম্পত্তিযা সাত্থং, ব্যঞ্জনসম্পত্তিযা সব্যঞ্জনন্তি যোজনা.

তত্থ অৰিসেসেন তিস্সো সিক্খা, সকলো চ তন্তিধম্মো সাসনব্রহ্মচরিযং. যং সন্ধায ৰুত্তং ‘‘কতমেসানং খো, ভন্তে, বুদ্ধানং ভগৰন্তানং ব্রহ্মচরিযং নচিরট্ঠিতিকং অহোসী’’তিআদি (পারা. ১৮). সব্বসিক্খানং মণ্ডভূতসিক্খত্তযসঙ্গহিতো অরিযমগ্গো মগ্গব্রহ্মচরিযং. যং সন্ধায ৰুত্তং ‘‘খীণা জাতি, ৰুসিতং ব্রহ্মচরিযং, কতং করণীয’’ন্তি (মহাৰ. ২৩; সং. নি. ৫.১৮৬). যথানুরূপন্তি যথারহং. সিক্খত্তযসঙ্গহং হি সাসনব্রহ্মচরিযং অত্থসম্পত্তিযা সাত্থং. মগ্গব্রহ্মচরিযে ৰত্তব্বমেৰ নত্থি. অত্থসম্পত্তিযাতি সম্পন্নত্থতায. সম্পত্তিঅত্থো হি ইধ সহ-সদ্দো. ইতরং পন যথাৰুত্তেনত্থেন সাত্থং, সব্যঞ্জনঞ্চ. যে পনেত্থ ‘‘ৰচনসভাৰং সাত্থং, অত্থসভাৰং সব্যঞ্জন’’ন্তি ৰিভজিত্ৰা ৰদন্তি, তং ন সুন্দরং, তথা ৰিভত্তস্স পরিযত্তিধম্মস্স অভাৰতো. সদ্দত্থা হি অভিন্নরূপা ৰিয হুত্ৰা ৰিনিযোগং গচ্ছন্তি. তথা হি নেসং লোকিযামিস্সীভাৰং পটিজানন্তি. সতিপি ৰা ভেদে ‘‘সব্যঞ্জন’’ন্তি এত্থ যদি তুল্যযোগো অধিপ্পেতো ‘‘সপুত্তো আগতো’’তিআদীসু ৰিয, এৰং সতি ‘‘অত্থপটিসরণা, ভিক্খৰে, হোথ, মা ব্যঞ্জনপটিসরণা’’তি অত্থপ্পধানৰাদো বাধিতো সিযা, অথ ৰিজ্জমানতামত্তং ‘‘সলোমকো সপক্খকো’’তিআদীসু ৰিয ব্যঞ্জনসম্পত্তি অগ্গহিতা সিযা. তস্মা অট্ঠকথাযং ৰুত্তনযেনেৰ অত্থো গহেতব্বো.

সাত্থং সব্যঞ্জনন্তি এত্থ নেত্তিনযেনাপি অত্থং দস্সেতুং ‘‘সঙ্কাসন…পে… সব্যঞ্জন’’ন্তি ৰুত্তং. তত্থ যদিপি নেত্তিযং ব্যঞ্জনমুখেন ব্যঞ্জনত্থগ্গহণং হোতীতি ‘‘অক্খরং পদ’’ন্তিআদিনা (নেত্তি. ৪ দ্ৰাদসপদ) ব্যঞ্জনপদানি পঠমং উদ্দিট্ঠানি, ইধ পন পাল়িযং ‘‘সাত্থং সব্যঞ্জন’’ন্তি আগতত্তা অত্থপদানিযেৰ পঠমং দস্সেতুং ‘‘সঙ্কাসনপকাসনা’’তিআদি ৰুত্তং. তত্থ সঙ্খেপতো কাসনং দীপনং সঙ্কাসনং ‘‘মঞ্ঞমানো ভিক্খু বদ্ধো মারস্স, অমঞ্ঞমানো মুত্তো’’তিআদীসু (সং. নি. ৩.৬৪) ৰিয. তত্তকেন হি তেন ভিক্খুনা পটিৰিদ্ধং. তেনাহ ‘‘অঞ্ঞাতং ভগৰা’’তিআদি. পঠমং কাসনং পকাসনং. আদিকম্মস্মিং হি অযং পসদ্দো ‘‘পঞ্ঞপেতি পট্ঠপেতী’’তিআদীসু (সং. নি. ২.২০) ৰিয. তিক্খিন্দ্রিযাপেক্খং চেতং পদদ্ৰযং উদ্দেসভাৰতো. তিক্খিন্দ্রিযো হি সঙ্খেপতো পঠমঞ্চ ৰুত্তমত্থং পটিপজ্জতি. সংখিত্তস্স ৰিত্থারৰচনং, সকিং ৰুত্তস্স পুন ৰচনঞ্চ ৰিৰরণৰিভজনানি. যথা ‘‘কুসলা ধম্মা’’তি সঙ্খেপতো সকিংযেৰ চ ৰুত্তস্স অত্থস্স ‘‘কতমে ধম্মা কুসলা? যস্মিং সমযে কামাৰচরং কুসলং চিত্ত’’ন্তিআদিনা (ধ. স. ১) ৰিত্থারতো ৰিৰরণৰসেন, ৰিভজনৰসেন চ পুন ৰচনং. মজ্ঝিমিন্দ্রিযাপেক্খমেতং পদদ্ৰযং নিদ্দেসভাৰতো. ৰিৰটস্স ৰিত্থারতরাভিধানং, ৰিভত্তস্স চ পকারেহি ঞাপনং ৰেনেয্যানং চিত্তপরিতোসনং উত্তানীকরণপঞ্ঞাপনানি. যথা ‘‘ফস্সো হোতী’’তিআদিনা (ধ. স. ২) ৰিৰটৰিভত্তস্স অত্থস্স ‘‘কতমো তস্মিং সমযে ফস্সো? যো তস্মিং সমযে ফস্সো ফুসনা সম্ফুসনা’’তিআদিনা (ধ. স. ২) উত্তানীকিরিযা, পঞ্ঞাপনা চ. মুদিন্দ্রিযাপেক্খমেতং পদদ্ৰযং পটিনিদ্দেসভাৰতো. ‘‘পঞ্ঞাপনপট্ঠপনৰিৰরণৰিভজনউত্তানীকরণপকাসনঅত্থপদসমাযোগতো’’তিপি পাঠো.

কথং পনাযং পাঠৰিকপ্পো জাতোতি? ৰুচ্চতে – নেত্তিপাল়িযং আগতনযেন পুরিমপাঠো. তত্থ হি –

‘‘সঙ্কাসনা পকাসনা,

ৰিৰরণা ৰিভজনুত্তানীকম্মপঞ্ঞত্তি;

এতেহি ছহি পদেহি,

অত্থো কম্মঞ্চ নিদ্দিট্ঠ’’ন্তি. (নেত্তি. ৪ দ্ৰাদসপদ) –

দেসনাহারযোজনায চ এতস্সেৰত্থস্স ‘‘সঙ্কাসনা পকাসনা’’তিআদিনা আগতং. পচ্ছিমো পন ‘‘পঞ্ঞপেতি পট্ঠপেতি ৰিৰরতি ৰিভজতি উত্তানীকরোতি ‘পস্সথা’তি চাহা’’তি (সং. নি. ২.২০) সুত্তে আগতনযেন ব্যঞ্জনমত্তকতো. এৰঞ্চ নেসং দ্ৰিন্নং পাঠানং ৰিসেসো, ন অত্থতো. তথা হি সঙ্খেপতো ‘‘পঠমং ঞাপনং পঞ্ঞাপনং, পঠমমেৰ ঠপনং পট্ঠপন’’ন্তি ইমানি পদানি সঙ্কাসনপকাসনপদেহি অত্থতো অৰিসিট্ঠানি. যঞ্চ পুরিমপাঠে ছট্ঠং পদং ‘‘পকারতো ঞাপন’’ন্তি পঞ্ঞাপনং ৰুত্তং, তং দুতিযপাঠে পকাসনপদেন ‘‘নিব্বিসেসং পকারতো কাসন’’ন্তি কত্ৰা. যস্মা ঞাপনকাসনানি অত্থাৰভাসনসভাৰতায অভিন্নানি, সব্বেসঞ্চ ৰেনেয্যানং চিত্তস্স তোসনং, বুদ্ধিযা চ নিসানং যাথাৰতো ৰত্থুসভাৰাৰভাসনে জাযতীতি. এৰং অত্থপদরূপত্তা পরিযত্তিঅত্থস্স যথাৰুত্তছঅত্থপদসমাযোগতো সাত্থং সাসনং.

অক্খরপদব্যঞ্জনাকারনিরুত্তিনিদ্দেসসম্পত্তিযাতি এত্থ উচ্চারণৰেলাযং অপরিযোসিতে পদে ৰণ্ণো অক্খরং. ‘‘একক্খরং পদং অক্খর’’ন্তি একে ‘‘আ এৰং কির ত’’ন্তিআদীসু আ-কারাদযো ৰিয. ‘‘ৰিসুদ্ধকরণানং মনসা দেসনাৰাচায অক্খরণতো অক্খর’’ন্তি অঞ্ঞে. ৰিভত্তিযন্তং অত্থঞাপনতো পদং. সঙ্খেপতো ৰুত্তং পদাভিহিতং অত্থং ব্যঞ্জেতীতি ব্যঞ্জনং, ৰাক্যং. ‘‘কিরিযাপদং অব্যযকারকৰিসেসনযুত্তং ৰাক্য’’ন্তি হি ৰদন্তি. পকারতো ৰাক্যৰিভাগো আকারো. আকারাভিহিতং নিব্বচনং নিরুত্তি. নিব্বচনৰিত্থারো নিস্সেসুপদেসতো নিদ্দেসো. এতেসং অক্খরাদীনং ব্যঞ্জনপদানং সম্পত্তিযা সম্পন্নতায সব্যঞ্জনং.

তত্রাযমস্স অত্থপদসমাযোগো, ব্যঞ্জনসম্পত্তি চ – অক্খরেহি সঙ্কাসেতি, পদেহি পকাসেতি, ব্যঞ্জনেহি ৰিৰরতি, আকারেহি ৰিভজতি, নিরুত্তীহি উত্তানীকরোতি, নিদ্দেসেহি পঞ্ঞপেতি, তথা অক্খরেহি উগ্ঘাটেত্ৰা পদেহি ৰিনেতি উগ্ঘটিতঞ্ঞুং, ব্যঞ্জনেহি ৰিপঞ্চেত্ৰা আকারেহি ৰিনেতি ৰিপঞ্চিতঞ্ঞুং, নিরুত্তীহি নেত্ৰা নিদ্দেসেহি ৰিনেতি নেয্যং. এৰঞ্চাযং ধম্মো উগ্ঘটিযমানো উগ্ঘটিতঞ্ঞুং ৰিনেতি, ৰিপঞ্চিযমানো ৰিপঞ্চিতঞ্ঞুং, নিয্যমানো নেয্যং. তত্থ উগ্ঘটনা আদি, ৰিপঞ্চনা মজ্ঝে, নযনমন্তে. এৰং তীসু কালেসু তিধা দেসিতো দোসত্তযৰিধমনো গুণত্তযাৰহো তিৰিধৰেনেয্যৰিনযনোতি. এৰম্পি তিৰিধকল্যাণোযং ধম্মো অত্থব্যঞ্জনপারিপূরিযা ‘‘সাত্থো সব্যঞ্জনো’’তি ৰেদিতব্বো ‘‘পরিপুণ্ণো, পরিসুদ্ধো’’তি চ.

অত্থগম্ভীরতাতিআদীসু অত্থো নাম তন্তিঅত্থো. ধম্মো তন্তি. পটিৰেধো তন্তিযা, তন্তিঅত্থস্স চ যথাভূতাৰবোধো. দেসনা মনসা ৰৰত্থাপিতায তন্তিযা দেসনা. তে পনেতে অত্থাদযো যস্মা সসাদীহি ৰিয মহাসমুদ্দো মন্দবুদ্ধীহি দুক্খোগাহা, অলব্ভনেয্যপতিট্ঠা চ, তস্মা গম্ভীরা. অথ ৰা অত্থো নাম হেতুফলং. ধম্মো হেতু. দেসনা পঞ্ঞত্তি, যথাধম্মং ধম্মাভিলাপো, অনুলোমপটিলোমসঙ্খেপৰিত্থারাদিৰসেন ৰা কথনং. পটিৰেধো অভিসমযো, অত্থানুরূপং ধম্মেসু, ধম্মানুরূপং অত্থেসু, পঞ্ঞত্তিপথানুরূপং পঞ্ঞত্তীসু অৰবোধো, তেসং তেসং ৰা ধম্মানং পটিৰিজ্ঝিতব্বো সলক্খণসঙ্খাতো অৰিপরীতসভাৰো. তেপি চেতে অত্থাদযো যস্মা অনুপচিতকুসলসম্ভারেহি দুপ্পঞ্ঞেহি সসাদীহি ৰিয মহাসমুদ্দো দুক্খোগাহা, অলব্ভনেয্যপতিট্ঠা চ, তস্মা গম্ভীরা. তেসু পটিৰেধস্সাপি অত্থসন্নিস্সিতত্তা ৰুত্তং ‘‘অত্থগম্ভীরতাপটিৰেধগম্ভীরতাহি সাত্থ’’ন্তি অত্থগুণদীপনতো. তাসং ধম্মদেসনানং ব্যঞ্জনসন্নিস্সিতত্তা ৰুত্তং ‘‘ধম্মগম্ভীরতাদেসনাগম্ভীরতাহি সব্যঞ্জন’’ন্তি তাসং ব্যঞ্জনসম্পত্তিদীপনতো.

অত্থেসু পভেদগতং ঞাণং অত্থপটিসম্ভিদা. অত্থধম্মনিরুত্তিপটিসম্ভিদাসু পভেদগতং ঞাণং পটিভানপটিসম্ভিদাতি ইমিস্সাপি পটিসম্ভিদায অত্থৰিসযত্তা আহ ‘‘অত্থপটিভানপটিসম্ভিদাৰিসযতো সাত্থ’’ন্তি, অত্থসম্পত্তিযা অসতি তদভাৰতো. ধম্মোতি তন্তি. নিরুত্তীতি তন্তিপদানং নিদ্ধারেত্ৰা ৰচনং. তত্থ পভেদগতানি ঞাণানি ধম্মনিরুত্তিপটিসম্ভিদাতি আহ ‘‘ধম্মনিরুত্তিপটিসম্ভিদাৰিসযতো সব্যঞ্জনন্তি, অসতি ব্যঞ্জনসম্পত্তিযা তদভাৰতো. পরিক্খকজনপ্পসাদকন্তি এত্থ ইতি-সদ্দো হেতুঅত্থো. যস্মা পরিক্খকজনানং কিংকুসলগৰেসীনং পসাদাৰহং, তস্মা সাত্থং. অত্থসম্পন্নন্তি ফলেন হেতুনো অনুমানং নদীপূরেন ৰিয উপরি ৰুট্ঠিপ্পৰত্তিযা. সাত্থকতা পনস্স পণ্ডিতৰেদনীযতায, সা পরমগম্ভীরসণ্হসুখুমভাৰতো ৰেদিতব্বা. ৰুত্তঞ্হেতং ‘‘গম্ভীরো দুদ্দসো’’তিআদি (মহাৰ. ৮). লোকিযজনপ্পসাদকন্তি সব্যঞ্জনন্তি যস্মা লোকিযজনস্স পসাদাৰহং, তস্মা সব্যঞ্জনং. লোকিযজনো হি ব্যঞ্জনসম্পত্তিযা তুস্সতি, ইধাপি ফলেন হেতুনো অনুমানং. সব্যঞ্জনতা পনস্স সদ্ধেয্যতায, সা আদিকল্যাণাদিভাৰতো ৰেদিতব্বা.

অথ ৰা পণ্ডিতৰেদনীযতো সাত্থ’’ন্তি পঞ্ঞাপদট্ঠানতায অত্থসম্পন্নতং আহ, ততো পরিক্খকজনপ্পসাদকং. সদ্ধেয্যতো সব্যঞ্জনন্তি সদ্ধাপদট্ঠানতায ব্যঞ্জনসম্পন্নতং, ততো লোকিযজনপ্পসাদকন্তি এৰমেত্থ অত্থো দট্ঠব্বো. গম্ভীরাধিপ্পাযতো সাত্থন্তি অধিপ্পাযতো অগাধাপারতায অত্থসম্পন্নং অঞ্ঞথা তদভাৰতো. উত্তানপদতো সব্যঞ্জনন্তি সুবোধসদ্দতায ব্যঞ্জনসম্পন্নং, পরমগম্ভীরস্সপি অত্থস্স ৰেনেয্যানং সুৰিঞ্ঞেয্যভাৰাপাদনতো. সব্বোপেস পঠমস্স অত্থদ্ৰযস্স পভেদো দট্ঠব্বো, তথা চেৰ তত্থ তত্থ সংৰণ্ণিতং. তথা হেত্থ ৰিকপ্পস্স, সমুচ্চযস্স ৰা অগ্গহণং. উপনেতব্বস্সাতি পক্খিপিতব্বস্স ৰোদানত্থস্স অৰুত্তস্স অভাৰতো. সকলপরিপুণ্ণভাৰেনাতি সব্বভাগেহি পরিপুণ্ণতায. অপনেতব্বস্সাতি সংকিলেসধম্মস্স.

পটিপত্তিযাতি সীলৰিসুদ্ধিযাদিসম্মাপটিপত্তিযা, তন্নিমিত্তং. অধিগমব্যত্তিতোতি সচ্চপটিৰেধেন অধিগমৰেয্যত্তিযসব্ভাৰতো সাত্থং কপিলৰতাদি ৰিয তুচ্ছং নিরত্থকং অহুত্ৰা অত্থসম্পন্নন্তি কত্ৰা. পরিযত্তিযাতি পরিযত্তিধম্মপরিচযেন. আগমব্যত্তিতোতি দুরক্খাতধম্মেসু পরিচযং করোন্তস্স ৰিয সম্মোহং অজনেত্ৰা বাহুসচ্চৰেয্যত্তিযসব্ভাৰতো সব্যঞ্চনং. ব্যঞ্জনসম্পত্তিযা হি সতি আগমব্যত্তীতি. সীলাদিপঞ্চধম্মক্খন্ধযুত্ততোতি সীলাদীহি পঞ্চহি ধম্মকোট্ঠাসেহি অৰিরহিতত্তা. কেৰলপরিপুণ্ণং অনৰসেসেন সমন্ততো পুণ্ণং পূরিতং. নিরুপক্কিলেসতোতি দিট্ঠিমানাদিউপক্কিলেসাভাৰতো. নিত্থরণত্থাযাতি ৰট্টদুক্খতো নিস্সরণায. লোকামিসনিরপেক্খতোতি কথঞ্চিপি তণ্হাসন্নিস্সযস্স অনিস্সযনতো.

এৰং আদিকল্যাণতাদিঅপদেসেন সত্থু পুরিমৰেসারজ্জদ্ৰযৰসেন ধম্মস্স স্ৰাক্খাততং ৰিভাৰেত্ৰা ইদানি পচ্ছিমৰেসারজ্জদ্ৰযৰসেনাপি তং দস্সেতুং ‘‘অত্থৰিপল্লাসাভাৰতো ৰা সুট্ঠু অক্খাতোতি স্ৰাক্খাতো’’তি ৰত্ৰা তমত্থং ব্যতিরেকমুখেন ৰিভাৰেন্তো ‘‘যথা হী’’তিআদিমাহ. তত্থ ৰিপল্লাসমাপজ্জতীতি তেসং ধম্মে ‘‘অন্তরাযিকা’’তি ৰুত্তধম্মানং ৰিপাকাদীনং অন্তরাযিকত্তাভাৰতো একংসেন অপাযূপপত্তিহেতুতায অভাৰতো. নিয্যানিকত্তাভাৰতোতি অতম্মযতাভাৰতো, সংসারতো চ নিয্যানিকাতি ৰুত্তধম্মানং একচ্চযঞ্ঞকিরিযাপকতিপুরিসন্তরঞ্ঞাণাদীনং ততো নিয্যানিকত্তাভাৰতো ৰিপরীতো এৰ হোতি. তেনাতি অত্থস্স ৰিপল্লাসাপজ্জনেন. তে অঞ্ঞতিত্থিযা. তথাভাৰানতিক্কমনতোতি কম্মন্তরাযাদীনং পঞ্চন্নং অন্তরাযিকভাৰস্স অরিযমগ্গধম্মানং নিয্যানিকভাৰস্স কদাচিপি অনতিৰত্তনতো.

নিব্বানানুরূপায পটিপত্তিযাতি অধিগন্তব্বস্স সব্বসঙ্খতৰিনিস্সটস্স নিব্বানস্স অনুরূপায সব্বসঙ্খারনিস্সরণূপাযভূতায সপুব্বভাগায সম্মাপটিপত্তিযা অক্খাতত্তাতি যোজনা. পটিপদানুরূপস্সাতি সব্বদুক্খনিয্যানিকভূতা আরম্মণকরণমত্তেনাপি কিলেসেহি অনামসনীযা যাদিসী পটিপদা, তদনুরূপস্স. সুপঞ্ঞত্তাতি সীলাদিক্খন্ধত্তযসঙ্গহিতা সম্মাদিট্ঠিআদিপ্পভেদা মিচ্ছাদিট্ঠিআদীনং পহাযিকভাৰেন সুট্ঠু সম্মদেৰ ৰিহিতা. সংসন্দতি কিলেসমলৰিসুদ্ধিতায সমেতি. এৰং মগ্গনিব্বানানং পটিপদাপটিপজ্জনীযভাৰেহি অঞ্ঞমঞ্ঞানুরূপতায স্ৰাক্খাততং দস্সেত্ৰা ইদানি তিৰিধস্সাপি লোকুত্তরধম্মস্স পচ্চেকং স্ৰাক্খাততং দস্সেতুং ‘‘অরিযমগ্গো চেত্থা’’তিআদি ৰুত্তং. তত্থ অন্তদ্ৰযন্তি সস্সতুচ্ছেদং, কামসুখঅত্তকিলমথানুযোগং, লীনুদ্ধচ্চং, পতিট্ঠানাযূহনন্তি এৰং পভেদং অন্তদ্ৰযং. অনুপগম্মাতি অনুপগন্ত্ৰা, অনুপগমনহেতু ৰা. পটিপস্সদ্ধকিলেসানীতি সুট্ঠু ৰূপসন্তকিলেসানি, পটিপস্সদ্ধিপ্পহানৰসেন সম্মদেৰ পহীনদোসানি. সস্সতাদিসভাৰৰসেনাতি ‘‘সস্সতঞ্চ ৰো, ভিক্খৰে, ধম্মং দেসেস্সামি অমতঞ্চ তাণঞ্চ লেণঞ্চা’’তিআদিনা তেসু তেসু সুত্তেসু সস্সতাদিভাৰকিত্তনৰসেন.

১৪৮. ‘‘রাগাদীনং অভাৰং করোন্তেন অরিযপুগ্গলেন সামং দট্ঠব্বো’’তি ইমিনা ‘‘অরিযমগ্গেন মম রাগাদযো পহীনা’’তি সযং অত্তনা অনঞ্ঞনেয্যেন দট্ঠব্বোতি সন্দিট্ঠি, সন্দিট্ঠি এৰ সন্দিট্ঠিকো.

তেন তেন অরিযসাৰকেন পরসদ্ধায পরস্স সদ্দহনেন পরনেয্যেন গন্তব্বতং হিত্ৰা ঞাপেতব্বতং পহায পচ্চৰেক্খণঞাণেন করণভূতেন. পসত্থা দিট্ঠি সন্দিট্ঠি যথা সম্বোজ্ঝঙ্গো. অরিযমগ্গো অত্তনা সম্পযুত্তায সন্দিট্ঠিযা কিলেসে জযতি, অরিযফলং তায এৰ অত্তনো কারণভূতায, নিব্বানং আরম্মণকরণেন অত্তনো ৰিসযীভূতায সন্দিট্ঠিযা কিলেসে জযতীতি যোজনা.

ভাৰনাভিসমযৰসেন মগ্গধম্মো. সচ্ছিকিরিযাভিসমযৰসেন নিব্বানধম্মো. ফলম্পি হেট্ঠিমং সকদাগামিৰিপস্সনাদীনং পচ্চযভাৰেন উপরি মগ্গাধিগমস্স উপনিস্সযভাৰতো পরিযাযতো ‘‘দিস্সমানো ৰট্টভযং নিৰত্তেতী’’তি ৰত্তব্বতং লভতি.

১৪৯. নাস্স কালোতি নাস্স আগমেতব্বো কালো অত্থি. যথা হি লোকিযকুসলস্স ‘‘উপপজ্জে, অপরপরিযাযে’’তিআদিনা ফলদানং পতি আগমেতব্বো কালো অত্থি, ন এৰমেতস্সাতি অত্থো. তেনাহ ‘‘ন পঞ্চাহা’’তিআদি. পকট্ঠোতি দূরো. ফলদানং পতি কালো পকট্ঠো অস্সাতি কালিকো, কালন্তরফলদাযী. তেনাহ ‘‘অত্তনো ফলদানে’’তি. পত্তোতি উপনীতো. ইদন্তি ‘‘অকালিকো’’তি পদং.

১৫০. ৰিধিন্তি ৰিধানং, ‘‘এহি পস্সা’’তি এৰংপৰত্তৰিধিৰচনং. ৰিজ্জমানত্তাতি পরমত্থতো উপলব্ভমানত্তা. পরিসুদ্ধত্তাতি কিলেসমলৰিরহেন সব্বথা ৰিসুদ্ধত্তা. অমনুঞ্ঞম্পি কদাচি পযোজনৰসেন যথাসভাৰপ্পকাসনেন দস্সেতব্বং ভৰেয্যাতি তদভাৰং দস্সেন্তো আহ ‘‘মনুঞ্ঞভাৰপ্পকাসনেনা’’তি.

১৫১. উপনেতব্বোতি উপনেয্যো, উপনেয্যোৰ ওপনেয্যিকোতি ইমস্স অত্থস্স অধিপ্পেতত্তা আহ ‘‘উপনেতব্বোতি ওপনেয্যিকো’’তি. চিত্তে উপনযনং উপ্পাদনন্তি আহ ‘‘ইদং সঙ্খতে লোকুত্তরধম্মে যুজ্জতী’’তি. চিত্তে উপনযনন্তি পন আরম্মণভূতস্স ধম্মস্স আরম্মণভাৰূপনযনে অধিপ্পেতে অসঙ্খতেপি যুজ্জেয্য ‘‘আরম্মণকরণসঙ্খাতং উপনযনং অরহতীতি ওপনেয্যিকো’’তি. অল্লীযনন্তি ফুসনং. নিব্বানং উপনেতি অরিযপুগ্গলন্তি অধিপ্পাযো.

১৫২. ৰিঞ্ঞূহীতি ৰিদূহি, পটিৰিদ্ধসচ্চেহীতি অত্থো. তে পন একংসতো উগ্ঘটিতঞ্ঞূআদযো হোন্তীতি আহ ‘‘উগ্ঘটিতঞ্ঞূআদীহী’’তি. ‘‘পচ্চত্ত’’ন্তি এতস্স ‘‘পতি অত্তনী’’তি ভুম্মৰসেন অত্থো গহেতব্বোতি আহ ‘‘অত্তনি অত্তনী’’তি. ৰেদিতব্বোতি ৰুত্তং, কথং ৰেদিতব্বোতি আহ ‘‘ভাৰিতো মে’’তিআদি. তত্থ ‘‘মে’’তি ইমিনা ‘‘পচ্চত্ত’’ন্তি পদেন ৰুত্তমত্থং অন্ৰযতো দস্সেত্ৰা পুন ব্যতিরেকেন দস্সেতুং ‘‘ন হী’’তিআদি ৰুত্তং, তং সুৰিঞ্ঞেয্যমেৰ. ‘‘ৰিঞ্ঞূহী’’তি ইদং অন্তোগধাৰধারণন্তি দস্সেন্তো ‘‘বালানং পন অৰিসযো চেসা’’তি আহ.

এৰং আদিকল্যাণতাদিনা অঞ্ঞমঞ্ঞস্স অনুরূপদেসনায ধম্মস্স স্ৰাক্খাততং দস্সেত্ৰা ইদানি পুরিমস্স পুরিমস্স পচ্ছিমং পচ্ছিমং পদং কারণৰচনন্তি দস্সেন্তো ‘‘অপিচা’’তিআদিমাহ. তত্থ সন্দিট্ঠিকত্তাতি যস্মা অযং ধম্মো ৰুত্তনযেন সামং দট্ঠব্বো, সন্দিট্ঠিযা কিলেসে ৰিদ্ধংসেতি, সন্দস্সনঞ্চ অরহতি, তস্মা স্ৰাক্খাতো দুরক্খাতে তিত্থিযধম্মে তদভাৰতো. ইমিনা নযেন সেসপদেসুপি যথারহং অত্থো দট্ঠব্বো.

১৫৩. তস্সেৰন্তিআদীসু যং ৰত্তব্বং, তং বুদ্ধানুস্সতিযং ৰুত্তনযেন ৰেদিতব্বং.

৩. সঙ্ঘানুস্সতিকথাৰণ্ণনা

১৫৪. অরিযসঙ্ঘগুণাতি আরকত্তা কিলেসেহি, অনযে ন ইরিযনতো, অযে চ ইরিযনতো, সদেৰকেন চ লোকেন ‘‘সরণ’’ন্তি অরণীযতো অরিযো চ সো সঙ্ঘো চ, অরিযানং ৰা সঙ্ঘো অরিযসঙ্ঘো, তস্স গুণা.

১৫৫. যং সম্মাপটিপদং পটিপন্নো ‘‘সুট্ঠু পটিপন্নো’’তি ৰুচ্চতি. সা অরিযমগ্গপটিপদা পটিপক্খধম্মে অনিৰত্তিধম্মে কত্ৰা পজহনতো পযোজনাভাৰা সযম্পি অনিৰত্তিধম্মা, অধিগন্তব্বস্স চ নিব্বানস্স একংসতো অনুলোমীতি. ততো এৰ অপচ্চনীকা, অনুধম্মভূতা চ, তস্সা চ পটিপন্নত্তা অরিযসঙ্ঘো ‘‘সুপ্পটিপন্নো’’তি ৰুত্তোতি দস্সেতুং ‘‘সুট্ঠু পটিপন্নো’’তিআদি ৰুত্তং. তত্থ ‘‘অনিৰত্তিপটিপদ’’ন্তি ইমিনা উজুপ্পটিপত্তিং দস্সেতি. পুনপ্পুনং নিৰত্তনে হি সতি উজুপ্পটিপত্তি ন হোতি. ‘‘অনুলোমপটিপদং অপচ্চনীকপটিপদ’’ন্তি ইমিনা ঞাযপ্পটিপত্তিং. পটিপজ্জিতব্বস্স হি নিব্বানস্স অনুলোমনেন, অপচ্চনীকতায চস্সা ঞাযতো. ‘‘ধম্মানুধম্মপটিপদ’’ন্তি ইমিনা সামীচিপ্পটিপত্তিং অনুচ্ছৰিকভাৰদীপনতো. এতেন পঠমপদস্স পপঞ্চনিদ্দেসো, ইতরানি তীণি পদানীতি দস্সেতি. তেনাহ ‘‘যস্মা পনা’’তিআদি.

যথানুসিট্ঠং পটিপজ্জনেন কিচ্চসিদ্ধিতো অরিযভাৰাৰহং সৰনং সক্কচ্চসৰনং নামাতি ৰুত্তং ‘‘সক্কচ্চং সুণন্তীতি সাৰকা’’তি, তেন অরিযা এৰ নিপ্পরিযাযতো সত্থু সাৰকা নামাতি দস্সেতি. সীলদিট্ঠিসামঞ্ঞতাযাতি অরিযেন সীলেন, অরিযায চ দিট্ঠিযা সমানভাৰেন. অরিযানঞ্হি সীলদিট্ঠিযো মজ্ঝে ভিন্নসুৰণ্ণং ৰিয নিন্নানাকরণং মগ্গেনাগতত্তা. তেন তে যত্থ কত্থচি ঠিতাপি সংহতাৰ. তেনাহ ‘‘সঙ্ঘাতভাৰমাপন্নো’’তি. মাযাসাঠেয্যাদিপাপধম্মসমুচ্ছেদেন উজু. ততো এৰ গোমুত্তৰঙ্কাভাৰেন অৰঙ্কা. চন্দলেখাৰঙ্কাভাৰেন অকুটিলা. নঙ্গলকোটিৰঙ্কাভাৰেন অজিম্হা. অৰঙ্কাদিভাৰেন ৰা উজু. পরিসুদ্ধট্ঠেন অরিযা. অপণ্ণকভাৰেন ঞাযতি কমতি নিব্বানং, তং ৰা ঞাযতি পটিৰিজ্ঝীযতি এতেনাতি ঞাযো. ৰট্টদুক্খনিয্যানায অনুচ্ছৰিকত্তা. অনুরূপত্তা সামীচি ওপাযিকাতিপি সঙ্খং সমঞ্ঞং গতা সম্মাপটিপত্তি, তায সমঙ্গিতায সুপ্পটিপন্না ‘‘সম্মা পটিপজ্জন্তী’’তি কত্ৰা. ৰত্তমানত্থো হি অযং পটিপন্ন-সদ্দো যথা ‘‘সোতাপত্তিফলসচ্ছিকিরিযায পটিপন্নো’’তি (পু. প. ২০৬). অতীতং পটিপদন্তি যথাৰুত্তমগ্গসম্মাপটিপত্তিং ৰদতি. উভযেন চ সামঞ্ঞনিদ্দেসেন, ‘‘সুপ্পটিপন্না চ সুপ্পটিপন্না চ সুপ্পটিপন্না’’তি একসেসনযেন ৰা গহিতানং সমূহো ‘‘সুপ্পটিপন্নো’’তি ৰুত্তোতি দস্সেতি.

এৰং আদিপদত্থনিদ্দেসভাৰেন ইতরপদানং অত্থং ৰত্ৰা ইদানি চতুন্নম্পি পদানং অৰোমিস্সকং অত্থং দস্সেতুং ‘‘অপিচা’’তিআদি ৰুত্তং. তত্থ যথানুসিট্ঠন্তি সত্থারা যথা অনুসিট্ঠং, তথা অনুসাসনীঅনুরূপন্তি অত্থো. অপণ্ণকপটিপদন্তি অৰিরজ্ঝনকপটিপদং, অনৰজ্জপটিপত্তিন্তি অত্থো. এত্থ চ স্ৰাক্খাতে ধম্মৰিনযে অপণ্ণকপটিপদং পটিপন্নত্তাতি এৰং সম্বন্ধিতব্বং. পুরিমপদেন সম্বন্ধে দুতিযপদং ন ৰত্তব্বং সিযা, ননু চ দুতিযপদেন সম্বন্ধেপি পঠমং পদং ন ৰত্তব্বং সিযাতি? ন তস্স পঠমং অপেক্খিতত্তা. সা পন সাৰকানং অপণ্ণকপটিপদা যথানুসিট্ঠং পটিপদাতি দস্সনত্থং ‘‘যথানুসিট্ঠং পটিপন্নত্তা’’তি ৰত্তব্বং. উভযস্সাপি ৰা সুপ্পটিপন্নভাৰসাধনত্তা উভযং ৰুত্তং. তথা হি পি-সদ্দেন উভযং সমুচ্চিনোতি.

কিলেসজিম্হৰসেন অন্তদ্ৰযগাহোতি সব্বসো তং পহায সম্মাপটিপদা কাযাদিৰঙ্কপ্পহাযিনী উজুপ্পটিপত্তি হোতীতি আহ ‘‘মজ্ঝিমায পটিপদায…পে… উজুপ্পটিপন্নো’’তি.

ঞাযো নাম যুত্তপ্পত্তপটিপত্তি, নিব্বানঞ্চ, সব্বসঙ্খারসমথতায আদিত্তং চেলং, সীসং ৰা অজ্ঝুপেক্খিত্ৰাপি পটিপজ্জিতব্বমেৰাতি আহ ‘‘ঞাযো ৰুচ্চতি নিব্বান’’ন্তি. নিব্বাযনকিরিযামুখেন চেত্থ নিব্বানং ৰুত্তন্তি দট্ঠব্বং, মগ্গঞাণাদীহি ৰা ঞাযতি পটিৰিজ্ঝীযতি সচ্ছিকরীযতি চাতি ঞাযো নিব্বানন্তি এৰমেত্থ অত্থো দট্ঠব্বো.

গুণসম্ভাৰনায পরেহি কযিরমানং পচ্চুপট্ঠানাদিসামীচিকম্মং অরহন্তীতি সামীচিকম্মারহা.

১৫৬. যদিদন্তি অন্তোগধলিঙ্গৰচনভেদো নিপাতোতি তস্স ৰচনভেদেন অত্থমাহ ‘‘যা ইমানী’’তি. এৰন্তি পকারত্থে নিপাতো, ইমিনা পকারেনাতি অত্থো. তেন ইতরানি তীণি যুগল়ানি দস্সিতানি হোন্তীতি আহ ‘‘এৰং চত্তারি পুরিসযুগল়ানি হোন্তী’’তি. এতন্তি এতং ‘‘পুরিসপুগ্গলা’’তি বহুৰচনৰসেন ৰুত্তং পদং. পুরিসা চ তে পুগ্গলা চ পুরিসপুগ্গলা. তত্থ ‘‘পুরিসা’’তি ইমিনা পঠমায পকতিযা গহণং, ‘‘পুগ্গলা’’তি পন দুতিযাযপি সত্তসামঞ্ঞেনাতি এৰং ৰা এত্থ অত্থো দট্ঠব্বো. চতুন্নং পচ্চযানং কীদিসানং? আনেত্ৰা হুনিতব্বানন্তি অধিকারতো পাকটোযমত্থো. দাতব্বন্তি ৰা পচ্চত্তৰচনং ‘‘চতুন্নং পচ্চযান’’ন্তি পদং অপেক্খিত্ৰা সামিৰসেন পরিণামেতব্বং, অঞ্ঞথা যেসং কেসঞ্চি চতুন্নং পচ্চযানং ‘‘আহুন’’ন্তি সমঞ্ঞা সিযা. আহুনং অরহতীতি ৰা আহুনেয্যো. সক্কাদীনম্পি ৰা আহৰনন্তি সক্কাদীহিপি দিয্যমানং দানং. যত্থ হুতং মহপ্ফলন্তি যস্মিং আৰহনীযগ্গিম্হি হুতং দধিআদি আহুনেয্যগ্গিগহপতগ্গিদক্খিণেয্যগ্গীসু হুততো উল়ারফলন্তি তেসং ব্রাহ্মণানং লদ্ধি. হুতন্তি দিন্নং. নিকাযন্তরেতি সব্বত্থিকৰাদিনিকাযে.

ঠপেত্ৰা ১৬৫ তেতি তে পিযমনাপে ঞাতিমিত্তে অপনেত্ৰা, তেসং অদত্ৰাতি অধিপ্পাযো. এস এসো. একবুদ্ধন্তরে চ দিস্সতীতি একস্মিং বুদ্ধন্তরে ৰীতিৰত্তে দিস্সতি. চ-সদ্দেন কদাচি অসঙ্খ্যেয্যেপি কপ্পে ৰীতিৰত্তেতি দস্সেতি. অব্বোকিণ্ণন্তি পটিপক্খেহি অৰোমিস্সং, কিরিযাৰিসেসকঞ্চেতং. পিযমনাপত্তকরধম্মা নাম সীলাদযো, তে অরিযসঙ্ঘে সুপ্পতিট্ঠিতা. অযং হেত্থ অধিপ্পাযো – ঞাতিমিত্তা ৰিপ্পযুত্তা ন চিরস্সেৰ সমাগচ্ছন্তি, অনৰট্ঠিতা চ তেসু পিযমনাপতা, ন এৰমরিযসঙ্ঘো. তস্মা সঙ্ঘোৰ পাহুনেয্যোতি. পুব্বকারন্তি অগ্গকিরিযং. সব্বপ্পকারেনাতি আদরগারৰবহুমানাদিনা, দেয্যধম্মস্স সক্কচ্চকরণাদিনা চ সব্বেন পকারেন. স্ৰাযং পাহৰনীয-সদ্দো ‘‘পাহুনেয্যো’’তি ৰুচ্চতি পরিযাযভাৰেন.

দক্খন্তি এতায সত্তা যথাধিপ্পেতাহি সম্পত্তীহি ৰড্ঢন্তীতি দক্খিণা. তথাভাৰকরণেন দক্খিণং অরহতি. যথা উল়ারাতিৰিপুলুদ্রযলাভেন ৰিসোধিতং নাম হোতি, এৰং দক্খিণা ৰিপুলফলতাযাতি ৰুত্তং ‘‘মহপ্ফলকরণতায ৰিসোধেতী’’তি.

পুঞ্ঞত্থিকেহি অঞ্জলি করণীযা এত্থাতি অঞ্জলিকরণীযো.

যদিপি পাল়িযং ‘‘অনুত্তর’’ন্তি ৰুত্তং. নত্থি ইতো উত্তরং ৰিসিট্ঠন্তি হি অনুত্তরং. সমম্পিস্স পন নত্থীতি দস্সেন্তো ‘‘অসদিস’’ন্তি আহ. খিত্তং ৰুত্তং বীজং মহপ্ফলভাৰকরণেন তাযতি রক্খতি, খিপন্তি ৰপন্তি এত্থ বীজানীতি ৰা খেত্তং, কেদারাদি, খেত্তং ৰিয খেত্তং, পুঞ্ঞানং খেত্তং পুঞ্ঞক্খেত্তং. সেসং বুদ্ধানুস্সতিযং ৰুত্তনযানুসারেন ৰেদিতব্বং.

৪. সীলানুস্সতিকথাৰণ্ণনা

১৫৮. অহো ৰত সীলানি অখণ্ডানি, অহো ৰত অচ্ছিদ্দানীতি এৰং সব্বত্থ যোজেতব্বং. অহো ৰতাতি চ সম্ভাৰনে নিপাতো. তেনাহ ‘‘অখণ্ডতাদিগুণৰসেনা’’তি. অখণ্ডভাৰাদিসম্পত্তিৰসেনাতি অত্থো. পরস্স সীলানি অনুস্সরিযমানানি পিযমনাপভাৰাৰহনেন কেৰলং মেত্তায পদট্ঠানং হোন্তি, ন ৰিসুং কম্মট্ঠানন্তি আহ ‘‘অত্তনো সীলানি অনুস্সরিতব্বানী’’তি. চাগাদীসুপি এসেৰ নযো.

যেসন্তি সীলাদীনং. পটিপাটিযা সমাদানে সমাদানক্কমেন, একজ্ঝং সমাদানে উদ্দেসক্কমেন সীলানং আদিঅন্তং ৰেদিতব্বং. পরিযন্তে ছিন্নসাটকো ৰিযাতি ৰত্থন্তে, দসন্তে ৰা ছিন্নৰত্থং ৰিয, ৰিসদিসূদাহরণং চেতং. এৰং সেসানিপি উদাহরণানি. ৰিনিৰেধৰসেন ছিন্নসাটকো ৰিনিৰিদ্ধসাটকো. ৰিসভাগৰণ্ণেন গাৰী ৰিযাতি সম্বন্ধো. সবলরহিতানি ৰা অসবলানি. তথা অকম্মাসানি. সত্তৰিধমেথুনসংযোগো হেট্ঠা সীলকথাযং ৰুত্তো এৰ. কোধূপনাহাদীহীতি আদি-সদ্দেন মক্খপল়াসইস্সামচ্ছরিযমাযাসাঠেয্যমানাতিমানাদযো গহিতা. তানিযেৰ অখণ্ডাদিগুণানি সীলানি. সীলস্স তণ্হাদাসব্যতো মোচনং ৰিৰট্টূপনিস্সযভাৰাপাদনং. ততো এৰ তংসমঙ্গীপুগ্গলো সেরী সযংৰসী ভুজিস্সো নাম হোতি. তেনাহ ‘‘ভুজিস্সভাৰকরণেন ভুজিস্সানী’’তি. ‘‘ইমিনাহং সীলেন দেৰো ৰা ভৰেয্যং দেৰঞ্ঞতরো ৰা, তত্থ নিচ্চো ধুৰো সস্সতো’’তি, ‘‘সীলেন সুদ্ধী’’তি চ এৰমাদিনা তণ্হাদিট্ঠীহি অপরামট্ঠত্তা অযং তে সীলেসু দোসোতি চতূসু ৰিপত্তীসু যায কাযচি ৰিপত্তিযা দস্সনেন পরামট্ঠুং অনুদ্ধংসেতুং. সমাধিসংৰত্তনপ্পযোজনানি সমাধিসংৰত্তনিকানি.

১৫৯. সিক্খায সগারৰোতি সীলধনং নিস্সায পটিলদ্ধসমাদানত্তা সাতিসযং সিক্খায সগারৰো সপ্পতিস্সো হোতি. সভাগৰুত্তীতি সম্পন্নসীলেহি সভাগৰুত্তিকো, তায এৰ ৰা সিক্খায সভাগৰুত্তি. যো হি সিক্খাগারৰরহিতো, সো তায ৰিসভাগৰুত্তি নাম হোতি ৰিলোমনতো. যথা পরেহি সদ্ধিং অত্তনো ছিদ্দং ন হোতি, এৰং ধম্মামিসেহি পটিসন্থরণং পটিসন্থারো. সিক্খায সগারৰত্তা এৰ তত্থ অপ্পমত্তো হোতি. অত্তানুৰাদভযং পরানুৰাদভযং দণ্ডভযং দুগ্গতিভযন্তি এৰমাদীনি ভযানি ইমস্স দূরসমুস্সারিতানীতি আহ ‘‘অত্তানুৰাদাদিভযৰিরহিতো’’তি. সেসং সুৰিঞ্ঞেয্যমেৰ.

৫. চাগানুস্সতিকথাৰণ্ণনা

১৬০. পকতিযাতি সভাৰেন. চাগাধিমুত্তেনাতি দেয্যধম্মপরিচ্চাগে যুত্তপ্পযুত্তেন তন্নিন্নেন তপ্পোণেন. নিচ্চং সদা পৰত্তা দানসংৰিভাগা যস্স সো নিচ্চপৰত্তদানসংৰিভাগো, তেন. ইধাপি ‘‘পকতিযা’’তি আনেত্ৰা সম্বন্ধিতব্বং. যং পরস্স পটিযত্তং দিয্যতি, তং দানং. যং অত্তনা পরিভুঞ্জিতব্বতো সংৰিভজতি, সো সংৰিভাগো. ইতো দানি পভুতীতি ইতো পট্ঠায দানি অজ্জতগ্গে অজ্জদিৰসং আদিং কত্ৰা. অদত্ৰা ন ভুঞ্জিস্সামীতি দানসমাদানং কত্ৰা. তংদিৰসন্তি তস্মিং ভাৰনারম্ভদিৰসে. তত্থ নিমিত্তং গণ্হিত্ৰাতি তস্মিং দানে পরিচ্চাগচেতনায পৰত্তিআকারস্স সল্লক্খণৰসেন নিমিত্তং গহেত্ৰা. ৰিগতমলমচ্ছেরতাদিগুণৰসেনাতি ৰিগতানি মলমচ্ছেরানি এতস্মাতি ৰিগতমলমচ্ছেরো, চাগো, তস্স ভাৰো ৰিগতমলমচ্ছেরতা. তদাদীনং গুণানং, সম্পত্তীনং, আনিসংসানং ৰা ৰসেন.

সতং ধম্মং অনুক্কমন্তি সাধূনং বোধিসত্তানং ধম্মং পৰেণিং অনু অনু কমন্তো ওক্কমন্তো, অৰোক্কমন্তো ৰা. যে ইমে দাযকস্স লাভা আযুৰণ্ণসুখবলপটিভানাদযো, পিযভাৰাদযো চ ভগৰতা সংৰণ্ণিতা পকিত্তিতা. মনুস্সত্তং ৰাতি ৰা-সদ্দো অৰুত্তৰিকপ্পত্থো, তেন ইন্দ্রিযপাটৰভাৰকম্মস্সকতাঞাণাদীনং সঙ্গহো দট্ঠব্বো.

মচ্ছেরমলেনাতি মচ্ছেরসঙ্খাতেন মলেন. অথ ৰা মচ্ছেরঞ্চ মলঞ্চ মচ্ছেরমলং, তেন মচ্ছেরেন চেৰ লোভাদিমলেন চাতি অত্থো. পজাযনৰসেনাতি যথাসকং কম্মনিব্বত্তনৰসেন. কণ্হধম্মানন্তি লোভাদিএকন্তকাল়কানং পাপধম্মানং. ৰিগতত্তাতি পহীনত্তা. ৰিগতমলমচ্ছেরেন চেতসাতি ইত্থম্ভূতলক্খণে করণৰচনং. সোতাপন্নস্স সতোতি গেহং আৰসন্তস্স সোতাপন্নস্স সমানস্স. নিস্সযৰিহারন্তি নিস্সায ৰিহরিতব্বৰিহারং, দেৰসিকং ৰল়ঞ্জনককম্মট্ঠানন্তি অত্থো. অভিভৰিত্ৰাতি অগারং আৰসন্তানং অঞ্ঞেসং উপ্পজ্জনকরাগাদিউপক্কিলেসে অভিভুয্য.

যো কিঞ্চি দেন্তোপি সাপেক্খোৰ দেতি, সো মুত্তচাগো ন হোতি, অযং পন ন এৰন্তি ‘‘মুত্তচাগো’’তি ৰুত্তং. ৰিস্সট্ঠচাগোতি নিরপেক্খপরিচ্চাগোতি অত্থো. যথা পাণাতিপাতবহুলো পুগ্গলো ‘‘লোহিতপাণী’’তি ৰুচ্চতি, এৰং দানবহুলো পুগ্গলো ‘‘পযতপাণী’’তি ৰুত্তোতি দস্সেন্তো ‘‘দাতুং সদা ধোতহত্থোযেৰা’’তি আহ. তত্থ সদাতি নিচ্চং, অভিণ্হন্তি অত্থো. পরিচ্চাগোতি দেয্যধম্মপরিচ্চাগোতি অধিকারতো ৰিঞ্ঞাযতি. যং যং দেয্যধম্মং পরে যাচনকা. যাচনে যোগো যাচনযোগো, পরেহি যাচিতুং যুত্তোতি অত্থো. যাজেন যুত্তোতি দানেন যুত্তো সদা পরিচ্চজনতো. উভযেতি যথাৰুত্তে দানে, সংৰিভাগে চ রতো অভিরতো.

১৬১. যথা পরিসুদ্ধসীলস্স পুগ্গলস্স অখণ্ডতাদিগুণৰসেন অত্তনো সীলস্স অনুস্সরন্তস্স সীলানুস্সতিভাৰনা ইজ্ঝতি, এৰং পরিসুদ্ধউল়ারপরিচ্চাগস্স পুগ্গলস্স অনুপক্কিলিট্ঠমেৰ অত্তনো পরিচ্চাগং অনুস্সরন্তস্স ভাৰনা ইজ্ঝতীতি দস্সেতুং ‘‘ৰিগতমলমচ্ছেরতাদিগুণৰসেনা’’তিআদি ৰুত্তং, তং ৰুত্তত্থমেৰ.

ভিয্যোসোতি উপরিপি. মত্তায পমাণস্স মহতিযা মত্তায, ৰিপুলেন পমাণেনাতি অত্থো. চাগাধিমুত্তোতি পরিচ্চাগে অধিমুত্তো নিন্নপোণপব্ভারো. ততো এৰ অলোভজ্ঝাসযো কত্থচিপি অনভিসঙ্গচিত্তো. পটিগ্গাহকেসু মেত্তাযনৰসেন পরিচ্চাগো হোতীতি মেত্তায মেত্তাভাৰনায অনুলোমকারী অনুরূপপটিপত্তি. ৰিসারদোতি ৰিসদো অত্তনোৰ গুণেন কত্থচিপি অমঙ্কুভূতো অভিভুয্য ৰিহারী. সেসং সুৰিঞ্ঞেয্যমেৰ.

৬. দেৰতানুস্সতিকথাৰণ্ণনা

১৬২. অরিযমগ্গৰসেনাতি অরিযমগ্গস্স অধিগমৰসেন. সমুদাগতেহীতি সম্মদেৰ তদুপ্পত্তিতো উদ্ধং আগতেহি. যাদিসা হি অরিযানং সন্তানে লোকিযাপি সদ্ধাদযো, ন তাদিসা কদাচিপি পোথুজ্জনিকা সদ্ধাদযো. দিব্বন্তীতি দেৰা. চত্তারো মহারাজানো এতেসন্তি চতুমহারাজা, তে এৰ চাতুমহারাজিকা. তেত্তিংস সহপুঞ্ঞকারিনো তত্থূপপন্নাতি তংসহচরিতং ঠানং তাৰতিংসং, তন্নিৰাসিনোপি দেৰা তংসহচরণতো এৰ তাৰতিংসা. দুক্খতো যাতা অপযাতাতি যামা. তুসায পীতিযা ইতা উপগতাতি তুসিতা. ভোগানং নিম্মানে রতি এতেসন্তি নিম্মানরতিনো. পরনিম্মিতেসু ভোগেসু ৰসং ৰত্তেন্তীতি পরনিম্মিতৰসৰত্তিনো. ব্রহ্মানং কাযো সমূহো ব্রহ্মকাযো, তপ্পরিযাপন্নতায তত্থ ভৰাতি ব্রহ্মকাযিকা. ততুত্তরীতি ততো ব্রহ্মকাযিকেহি উত্তরি, উপরি পরিত্তাভাদিকে সন্ধায ৰদতি. দেৰতা সক্খিট্ঠানে ঠপেত্ৰাতি ‘‘যথারূপায মগ্গেনাগতায সদ্ধায সমন্নাগতা, সীলেন সুতেন চাগেন পঞ্ঞায সমন্নাগতা ইতো চুতা তত্থ উপপন্না তা দেৰতা, ময্হম্পি তথারূপা সদ্ধা সীলং সুতং চাগো পঞ্ঞা চ সংৰিজ্জতী’’তি দেৰতা সক্খিট্ঠানে ঠপেত্ৰা সক্খিং ওতারেন্তেন ৰিয অত্তনো সদ্ধাদিগুণা অনুস্সরিতব্বা.

যদি এৰং সুত্তে (অ. নি. ৬.১০) উভযগুণানুস্সরণং ৰুত্তং, তং কথন্তি অনুযোগং মনসি কত্ৰা আহ ‘‘সুত্তে পনা’’তিআদি. তত্থ কিঞ্চাপি ৰুত্তন্তি ‘‘অত্তনো চ, তাসঞ্চ দেৰতান’’ন্তি উভযং সমধুরং ৰিয সুত্তে (অ. নি. ৬.১০) কিঞ্চাপি ৰুত্তং. অথ খো তং ‘‘দেৰতানং সদ্ধঞ্চ সীলঞ্চা’’তিআদিৰচনং. সক্খিট্ঠানে ঠপেতব্বন্তি ‘‘ৰুত্ত’’ন্তি পরতো পদং আনেত্ৰা সম্বন্ধিতব্বং. কিমত্থং পন সক্খিট্ঠানে ঠপনন্তি আহ ‘‘দেৰতানং অত্তনো সদ্ধাদীহি সমানগুণদীপনত্থন্তি ৰেদিতব্ব’’ন্তি. কস্মা পন সুত্তে যথারুতৰসেন অত্থং অগ্গহেত্ৰা এৰং অত্থো গয্হতীতি আহ ‘‘অট্ঠকথাযঞ্হী’’তিআদি.

১৬৩. তস্মাতি যস্মা অট্ঠকথাযং দেৰতা সক্খিট্ঠানে ঠপেত্ৰা অত্তনো গুণানুস্সরণং দল়্হং কত্ৰা ৰুত্তং, সীলচাগানুস্সতীসু ৰিয ইধাপি অত্তনো গুণানুস্সরণং ঝানুপ্পত্তিনিমিত্তং যুত্তং, তস্মা. পুব্বভাগে ভাৰনারম্ভে. অপরভাগেতি যথা ভাৰেন্তস্স উপচারজ্ঝানং ইজ্ঝতি, তথা ভাৰনাকালে. যদি অত্তনো এৰ ইধ গুণা অনুস্সরিতব্বা, কথমযং দেৰতানুস্সতীতি আহ ‘‘দেৰতানং গুণসদিসসদ্ধাদিগুণানুস্সরণৰসেনা’’তি. তেন সদিসকপ্পনায অযং ভাৰনা ‘‘দেৰতানুস্সতী’’তি ৰুত্তা, ন দেৰতানং, তাসং গুণানং ৰা অনুস্সরণেনাতি দস্সেতি. পুব্বভাগে ৰা পৰত্তং দেৰতাগুণানুস্সরণং উপাদায ‘‘দেৰতানুস্সতী’’তি ইমিস্সা সমঞ্ঞা ৰেদিতব্বা. তথা হি ৰক্খতি ‘‘পুব্বভাগে দেৰতা আরব্ভ পৰত্তচিত্তৰসেনা’’তি. সেসং সুৰিঞ্ঞেয্যমেৰ.

পকিণ্ণককথাৰণ্ণনা

১৬৪. এতাসন্তি এতাসং বুদ্ধানুস্সতিআদীনং ছন্নং অনুস্সতীনং. ৰিত্থারদেসনাযন্তি ৰিত্থারৰসেন পৰত্তদেসনাযং, মহানামসুত্তং (অ. নি. ৬.১০; ১১.১১) সন্ধায ৰদতি. ভগৰাতিআদীনং অত্থন্তি ভগৰাতিআদীনং পদানং অত্থং. অত্থৰেদন্তি ৰা হেতুফলং পটিচ্চ উপ্পন্নং তুট্ঠিমাহ. ধম্মৰেদন্তি হেতুং পটিচ্চ উপ্পন্নং তুট্ঠিং. ‘‘আরকত্তা অরহ’’ন্তি অনুস্সরন্তস্স হি যং তং ভগৰতো কিলেসেহি আরকত্তং, সো হেতু. ঞাপকো চেত্থ হেতু অধিপ্পেতো, ন কারকো, সম্পাপকো ৰা. যোনেন ঞাযমানো অরহত্তত্থো, তং ফলং. ইমিনা নযেন সেসপদেসুপি হেতুফলৰিভাগো ৰেদিতব্বো. ধম্মানুস্সতিআদীসুপি ‘‘আদিমজ্ঝপরিযোসানকল্যাণত্তা’’তিআদিনা, ‘‘যস্মা পন সা সম্মাপটিপদা’’তিআদিনা চ তত্থ তত্থ হেতুঅপদেসো কতোযেৰাতি. ধম্মূপসংহিতন্তি যথাৰুত্তহেতুহেতুফলসঙ্খাতগুণূপসংহিতং. গুণেতি অত্তনো গুণে.

১৬৫. অরিযসাৰকানঞ্ঞেৰ ইজ্ঝন্তীতি অরিযসাৰকানং ইজ্ঝন্তিযেৰাতি উত্তরপদাৰধারণং দট্ঠব্বং, অৰধারণঞ্চ তেসং সুখসিদ্ধিদস্সনত্থং. তেনাহ ‘‘তেসং হী’’তিআদি. ন পুথুজ্জনানং সব্বেন সব্বং ইজ্ঝন্তীতি. তথা হি ৰক্খতি ‘‘এৰং সন্তেপী’’তিআদি. যদি এৰং, কস্মা মহানামসুত্তাদীসু (অ. নি. ৬.১০; ১১.১১) বহূসু সুত্তেসু অরিযসাৰকগ্গহণং কতন্তি? তেসং বহুলৰিহারতাযাতি আচরিযা.

নিক্খন্তন্তি নিগ্গতং নিস্সটং. মুত্তন্তি ৰিস্সট্ঠং. ৰুট্ঠিতন্তি অপেতং. সব্বমেতং ৰিক্খম্ভনমেৰ সন্ধায ৰদতি. গেধম্হাতি পলিবোধতো. ইদম্পীতি বুদ্ধানুস্সতিৰসেন লদ্ধং উপচারজ্ঝানমাহ. আরম্মণং করিত্ৰাতি পচ্চযং কত্ৰা, পাদকং কত্ৰাতি অত্থো. ৰিসুজ্ঝন্তীতি পরমত্থৰিসুদ্ধিং পাপুণন্তি.

সম্বাধেতি তণ্হাসংকিলেসাদিনা সম্পীল়ে সংকটে ঘরাৰাসে. ওকাসাধিগমো লোকুত্তরধম্মস্স অধিগমায অধিগন্তব্বওকাসো. অনুস্সতিযো এৰ অনুস্সতিট্ঠানানি. ৰিসুদ্ধিধম্মাতি ৰিসুজ্ঝনসভাৰা, ৰিসুজ্ঝিতুং ৰা ভব্বা. পরমত্থৰিসুদ্ধিধম্মতাযাতি পরমত্থৰিসুদ্ধিযা নিব্বানস্স ভব্বভাৰেন. উপক্কমেনাতি পযোগেন. পরিযোদপনাতি ৰিসোধনা.

১৬৬. এৰং সন্তেপীতি এৰং মহানামসুত্তাদীসু অনেকেসু সুত্তেসু অরিযসাৰকস্সেৰ ৰসেন ছসু অনুস্সতীসু দেসিতাসুপি. যস্সানুভাৰেনাতি যস্স চিত্তপ্পসাদস্স বলেন. পীতিং পটিলভিত্ৰাতি অনুস্সৰৰসেন বুদ্ধারম্মণং পীতিং উপ্পাদেত্ৰা.

ছঅনুস্সতিনিদ্দেসৰণ্ণনা নিট্ঠিতা.

ইতি সত্তমপরিচ্ছেদৰণ্ণনা.

৮. অনুস্সতিকম্মট্ঠাননিদ্দেসৰণ্ণনা

মরণস্সতিকথাৰণ্ণনা

১৬৭. ইতোতি দেৰতানুস্সতিযা. সা হি ছসু অনুস্সতীসু সব্বপচ্ছা নিদ্দিট্ঠত্তা আসন্না, পচ্চক্খা চ. অনন্তরাযাতি তদনন্তরং উদ্দিট্ঠত্তা ৰুত্তং. মরণস্স সতি মরণস্সতীতি মরণং তাৰ দস্সেতুং ‘‘তত্থ মরণ’’ন্তিআদি ৰুত্তং. কামঞ্চেত্থ খন্ধানং ভেদো ‘‘জরামরণং দ্ৰীহি খন্ধেহি সঙ্গহিত’’ন্তি (ধাতু. ৭১) ৰচনতো চুতিখন্ধানং ৰিনাসো মরণন্তি ৰত্তব্বং, ৰিসেসতো পন তং জীৰিতিন্দ্রিযস্স ৰিনাসভাৰেন কম্মট্ঠানিকানং পচ্চুপতিট্ঠতীতি ‘‘জীৰিতিন্দ্রিযস্স উপচ্ছেদো’’তি ৰুত্তং. তেনেৰাহ নিদ্দেসে ‘‘কল়েৰরস্স নিক্খেপো জীৰিতিন্দ্রিযস্সুপচ্ছেদো’’তি (ৰিভ. ২৩৬; দী. নি. ২.৩৯০; ম. নি. ১.৯২, ১২৩). তত্থ একভৰপরিযাপন্নস্সাতি একেন ভৰেন পরিচ্ছিন্নস্স. জীৰিতিন্দ্রিযস্স উপচ্ছেদোতি জীৰিতিন্দ্রিযপ্পবন্ধস্স ৰিচ্ছেদো আযুক্খযাদিৰসেন অন্তরধানং. সমুচ্ছেদমরণন্তি অরহতো সন্তানস্স সব্বসো উচ্ছেদভূতং মরণং. সঙ্খারানং খণভঙ্গসঙ্খাতন্তি সঙ্খতধম্মানং উদযৰযপরিচ্ছিন্নস্স পৰত্তিখণস্স ভঙ্গো নিরোধোতি সঙ্খং গতং. খণিকমরণন্তি যথাৰুত্তখণৰন্তং তস্মিংযেৰ খণে লব্ভমানং মরণং. যং খন্ধপ্পবন্ধং উপাদায রুক্খাদিসমঞ্ঞা, তস্মিং অনুপচ্ছিন্নেপি অল্লতাদিৰিগমনং নিস্সায মতৰোহারো সম্মুতিমরণং. ন তং ইধ অধিপ্পেতন্তি তং সমুচ্ছেদখণিকসম্মুতিমরণং ইধ মরণানুস্সতিযং নাধিপ্পেতং অবাহুল্লতো, অনুপট্ঠহনতো, অসংৰেগৰত্থুতো চাতি অধিপ্পাযো.

অধিপ্পেতং সতিযা আরম্মণভাৰেন. আযুআদীনং খযকালে মরণং কালমরণং. তেসং অপরিক্খীণকালে মরণং অকালমরণং. ‘‘কালমরণং পুঞ্ঞক্খযেনা’’তি ইদং যথাধিকারং সম্পত্তিভৰৰসেন ৰুত্তং, ৰিপত্তিভৰৰসেন পন ‘‘পাপক্খযেনা’’তি ৰত্তব্বং.

আযুসন্তানজনকপচ্চযসম্পত্তিযাতি আযুপ্পবন্ধস্স পৰত্তাপনকানং আহারাদিপচ্চযানং সম্পত্তিযং. ৰিপক্কৰিপাকত্তাতি অত্তনো ফলানুরূপং দাতব্বৰিপাকস্স দিন্নত্তা. গতিকালাহারাদিসম্পত্তিযা অভাৰেনাতি দেৰানং ৰিয গতিসম্পত্তিযা, পঠমকপ্পিযানং ৰিয কালসম্পত্তিযা, উত্তরকুরুকাদীনং ৰিয আহারসম্পত্তিযা চ অভাৰেন. আদি-সদ্দেন উতুসুক্কসোণিতাদিং পরিগ্গয্হতি. অজ্জতনকালপুরিসানং ৰিযাতি ৰিয-সদ্দো অট্ঠানে পট্ঠপিতো, অজ্জতনকালপুরিসানং ৰস্সসতমত্তপরিমাণস্স ৰিয আযুনো খযৰসেনাতি যোজনা. এৰং হি অনাগতেপি পরমাযুনো সঙ্গহো কতো হোতি, অতীতে পন গতিসম্পত্তিযা ৰিয কালাহারাদিসম্পত্তিযা ভাৰেন অনেকৰস্সসহস্স পরিমাণোপি আযু অহোসি. অযঞ্চ ৰিভাগো ৰত্তমানস্স অন্তরকপ্পস্স ৰসেন ৰুত্তোতি দট্ঠব্বং. কলাবুরাজাদীনন্তি আদি-সদ্দেন নন্দযক্খনন্দমাণৰকাদীনং সঙ্গহো দট্ঠব্বো. তং সব্বম্পীতি যং ‘‘কালমরণং অকালমরণং, তত্থাপি পুঞ্ঞক্খযমরণং আযুক্খযমরণং উভযক্খযমরণং উপক্কমমরণ’’ন্তি ৰুত্তপ্পভেদং মরণং, তং সব্বম্পি.

১৬৮. যোনিসোতি উপাযেন. মনসিকারোতি মরণারম্মণো মনসিকারো. যেন পন উপাযেন মনসিকারো পৰত্তেতব্বো, তং ব্যতিরেকমুখেন দস্সেতুং ‘‘অযোনিসো পৰত্তযতো’’তিআদি ৰুত্তং. তত্থ অযোনিসো পৰত্তযতোতি অনুপাযেন সতিং, সংৰেগং, ঞাণঞ্চ অনুপট্ঠপেত্ৰা মরণং অনুস্সরতো. তদেতং সব্বম্পীতি সোকপামোজ্জানং উপ্পজ্জনং, সংৰেগস্স অনুপ্পজ্জনং, সন্তাসস্স উপ্পজ্জনঞ্চ যথাক্কমং সতিসংৰেগঞাণৰিহরতো হোতি. যো হি ‘‘মরণং নামেতং জাতস্স একন্তিক’’ন্তি পণ্ডিতানং ৰচনং সরতি, তত্থ সংৰেগজাতো হোতি সম্পজানো চ, তস্স ইট্ঠজনমরণাদিনিমিত্তং সোকাদযো অনোকাসাৰ. তস্মাতি যস্মা অযোনিসো মনসিকারং পৰত্তযতো এতে দোসা, তস্মা. তত্থ তত্থাতি অরঞ্ঞসুসানাদীসু. হতমতসত্তেতি চোরাদীহি হতে, সরসেন মতে চ সত্তে. দিট্ঠপুব্বা সম্পত্তি যেসং তে দিট্ঠপুব্বসম্পত্তী, তেসং দিট্ঠপুব্বসম্পত্তীনং. যোজেত্ৰাতি উপট্ঠপেত্ৰা. একচ্চস্সাতি তিক্খিন্দ্রিযস্স ঞাণুত্তরস্স.

১৬৯. ৰধকপচ্চুপট্ঠানতোতি ঘাতকস্স ৰিয পতি পতি উপট্ঠানতো আসন্নভাৰতো. সম্পত্তিৰিপত্তিতোতি আরোগ্যাদিসম্পত্তীনং ৰিয জীৰিতসম্পত্তিযা ৰিপজ্জনতো. উপসংহরণতোতি পরেসং মরণং দস্সেত্ৰা অত্তনো মরণস্স উপনযনতো. কাযবহুসাধারণতোতি সরীরস্স বহূনং সাধারণভাৰতো. আযুদুব্বলতোতি জীৰিতস্স দুব্বলভাৰতো. অনিমিত্ততোতি মরণস্স ৰৰত্থিতনিমিত্তাভাৰতো. অদ্ধানপরিচ্ছেদতোতি কালস্স পরিচ্ছন্নভাৰতো. খণপরিত্ততোতি জীৰিতক্খণস্স ইত্তরভাৰতো.

ৰধকপচ্চুপট্ঠানতোতি এত্থ ৰিয-সদ্দো লুত্তনিদ্দিট্ঠোতি দস্সেন্তো ‘‘ৰধকস্স ৰিয পচ্চুপট্ঠানতো’’তি ৰত্ৰা তমেৰত্থং ৰিৰরন্তো ‘‘যথা হী’’তিআদিমাহ. তত্থ চারযমানোতি আগুরেন্তো পহরণাকারং করোন্তো. পচ্চুপট্ঠিতোৰ উপগন্ত্ৰা ঠিতো সমীপে এৰ. জরামরণং গহেত্ৰাৰ নিব্বত্তন্তি ‘‘যথা হি অহিচ্ছত্তকমকুল়ং উগ্গচ্ছন্তং পংসুৰিরহিতং ন হোতি, এৰং সত্তা নিব্বত্তন্তা জরামরণৰিরহিতা ন হোন্তী’’তি এত্তকেন উপমা. অহিচ্ছত্তকমকুল়ং কদাচি কত্থচি পংসুৰিরহিতম্পি ভৰেয্য, সত্তা পন কথঞ্চিপি জরামরণৰিরহিতা ন হোন্তীতি খণিকমরণং তাৰ উপমাভাৰেন দস্সেত্ৰা ইধাধিপ্পেতং মরণং দস্সেতুং ‘‘তথা হী’’তিআদি ৰুত্তং. অথ ৰা যদিমে সত্তা জরামরণং গহেত্ৰাৰ নিব্বত্তন্তি, নিব্বত্তিসমনন্তরমেৰ মরিতব্বন্তি চোদনং সন্ধাযাহ ‘‘তথা হী’’তিআদি. অৰস্সং মরণতোতি অৰস্সং মরিতব্বতো, একন্তেন মরণসব্ভাৰতো ৰা. পব্বতেয্যাতি পব্বততো আগতা. হারহারিনীতি পৰাহে পতিতস্স তিণপণ্ণাদিকস্স অতিৰিয হরণসীলা. সন্দতেৰাতি সৰতি এৰ. ৰত্ততেৰাতি পৰাহৰসেন ৰত্ততি এৰ ন তিট্ঠতি.

যমেকরত্তিন্তি যস্সং একরত্তিযং, ভুম্মত্থে উপযোগৰচনং দট্ঠব্বং, অচ্চন্তসংযোগে ৰা. পঠমন্তি সব্বপঠমং পটিসন্ধিক্খণে. গব্ভেতি মাতুকুচ্ছিযং. মাণৰোতি সত্তো. যেভুয্যেন সত্তা রত্তিযং পটিসন্ধিং গণ্হন্তীতি রত্তিগ্গহণং. অব্ভুট্ঠিতোৰাতি উট্ঠিতঅব্ভো ৰিয, অভিমুখভাৰেন ৰা উট্ঠিতোৰ মরণস্সাতি অধিপ্পাযো. সো যাতীতি সো মাণৰো যাতি, পঠমক্খণতো পট্ঠায গচ্ছতেৰ. স গচ্ছং ন নিৰত্ততীতি সো এৰং গচ্ছন্তো খণমত্তম্পি ন নিৰত্ততি, অঞ্ঞদত্থু মরণংযেৰ উপগচ্ছতি.

কুন্নদীনন্তি পব্বততো পতিতানং খুদ্দকনদীনং. পাতো আপোরসানুগতবন্ধনানন্তি পুরিমদিৰসে দিৰা সূরিযসন্তাপেন অন্তো অনুপৰিসিত্ৰা পুন রত্তিযং বন্ধনমূলং উপগতেন আপোরসেন তিন্তসিথিলবন্ধনতায পাতো আপোরসানুগতবন্ধনানং.

অচ্চযন্তীতি অতিক্কমন্তি. উপরুজ্ঝতীতি নিরুজ্ঝতি. উদকমেৰ ওদকং, উদকোঘং ৰা. যস্মা অচ্চযন্তি অহোরত্তা, তস্মা জীৰিতং উপরুজ্ঝতি. যস্মা জীৰিতং উপরুজ্ঝতি, তস্মা আযু খীযতি মচ্চানং. পপততোতি পপতনতো ভযং সামিকানং রুক্খে ঠত্ৰা কম্মে ৰিনিযুঞ্জিতুকামানং, হেট্ঠা পৰিট্ঠানং ৰা. উগ্গমনং পতি উগ্গমননিমিত্তং. মা মং অম্ম নিৰারয পব্বজ্জাযাতি অধিপ্পাযো.

কোচি মিত্তমুখসত্তুরন্ধগৰেসী সহ ৰত্তমানোপি ন হনেয্য, অযং পন একংসেন হনতিযেৰাতি দস্সেতুং ‘‘সহজাতিযা আগততো’’তি ৰত্ৰা ‘‘জীৰিতহরণতো চা’’তি ৰুত্তং.

১৭০. নন্তি সম্পত্তিং. সুখীতি দিব্বসদিসেহি ভোগেহি, আধিপতেয্যেন চ সুখসমঙ্গী. দেহবন্ধেনাতি সরীরেন. অসোকোতি অসোকমহারাজা. সোকমাগতোতি সোচিতব্বতং গতো.

আরোগ্যং যোব্বনানং. ব্যাধিজরাপরিযোসানতা জীৰিতস্স মরণপরিযোসানতায উদাহরণৰসেন আনীতা, পচ্চযভাগৰসেন ৰা. লোকোযেৰ লোকসন্নিৰাসো যথা সত্তাৰাসাতি, সন্নিৰসিতব্বতায ৰা সত্তনিকাযো লোকসন্নিৰাসো. অনুগতোতি অনুবন্ধো পচ্চত্থিকেন ৰিয. অনুসটোতি অনুপৰিট্ঠো উপৰিসেন ৰিয. অভিভূতোতি অজ্ঝোত্থটো মদ্দহত্থীহি ৰিয. অব্ভাহতোতি পহটো ভূতেহি ৰিয.

সেলাতি সিলামযা, ন পংসুআদিমযা. ৰিপুলাতি মহন্তা অনেকযোজনাযামৰিত্থারা. নভং আহচ্চাতি ৰিপুলত্তা এৰ আকাসং অভিৰিহচ্চ সব্বদিসাসু ফরিত্ৰা. অনুপরিযেয্যুন্তি অনুৰিচরেয্যুং. নিপ্পোথেন্তাতি অত্তনা আঘাতিতং চুণ্ণৰিচুণ্ণং করোন্তা. অধিৰত্তন্তীতি অধিভৰন্তি. কুলেন ৰা রূপেন ৰা সীলেন ৰা সুতেন ৰা সদ্ধাদীহি ৰা সেট্ঠোতি সম্ভাৰনায খত্তিযাদীসু ন কঞ্চি পরিৰজ্জেতি. তেহি এৰ নিহীনোতি অৰমঞ্ঞমানায সুদ্দাদীসু ন কঞ্চি পরিৰজ্জেতি. অঞ্ঞদত্থু সব্বমেৰ অভিমদ্দতি নিম্মথতি. দণ্ডাদিউপাযা চ তত্থ অৰিসযা এৰাতি দস্সেতুং ‘‘ন তত্থ হত্থীনং ভূমী’’তিআদি ৰুত্তং. তত্থ মন্তযুদ্ধেনাতি আথব্বণৰেদৰিহিতেন মন্তসঙ্গামপ্পযোগেন. ধনেনাতি ধনদানেন. ৰা-সদ্দো অৰুত্তৰিকপ্পনত্থো. তেন সামং, ভেদঞ্চ সঙ্গণ্হাতি.

১৭১. পরেহি সদ্ধিং অত্তনো উপসংহরণতোতি পরেহি মতেহি সদ্ধিং ‘‘তেপি নাম মতা, কিমঙ্গং পন মাদিসা’’তি অত্তনো মরণস্স উপনযনতো. যসমহত্ততোতি পরিৰারমহত্ততো, ৰিভৰমহত্ততো চ. পুঞ্ঞমহত্ততোতি মহাপুঞ্ঞভাৰতো. থামমহত্ততোতি ৰীরিযবলমহত্ততো. যুধিট্ঠিলো ধম্মপুত্তো. চানুরো যো বলদেৰেন নিব্বুদ্ধং কত্ৰা মারিতো.

সহ ইদ্ধীহীতি ৰেজযন্তকম্পননন্দোপনন্দদমনাদীসু দিট্ঠানুভাৰাহি অত্তনো ইদ্ধীহি সদ্ধিং মচ্চুমুখং পৰিট্ঠো.

কলং নগ্ঘন্তি সোল়সিন্তি সোল়সন্নং পূরণভাগং ন অগ্ঘন্তি. ইদং ৰুত্তং হোতি – আযস্মতো থেরস্স সারিপুত্তস্স পঞ্ঞং সোল়সভাগে কত্ৰা ততো একং ভাগং সোল়সধা গহেত্ৰা লদ্ধং একভাগসঙ্খাতং কলং সম্মাসম্বুদ্ধং ঠপেত্ৰা অঞ্ঞেসং সত্তানং পঞ্ঞা ন অগ্ঘন্তীতি.

সব্বস্সাপি সংকিলেসপক্খস্স সমুগ্ঘাতো ঞাযেন আরদ্ধৰীরিযস্স হোতীতি আহ ‘‘ঞাণৰীরিযবলেনা’’তি. সম্মাদিট্ঠিসম্মাৰাযামেসু হি সিদ্ধেসু অট্ঠঙ্গিকো অরিযমগ্গো সিদ্ধোৰ হোতীতি. একাকীভাৰেন খগ্গৰিসাণকপ্পা. পরতোঘোসেন ৰিনা সযমেৰ ভূতা পটিৰিদ্ধাকুপ্পাতি সযম্ভুনো.

হত্থগতসুৰণ্ণৰলযানং অঞ্ঞমঞ্ঞং সঙ্ঘট্টনং ৰংসকল়ীরস্স কত্থচি অসত্ততাতি এৰমাদিকং তং তং নিমিত্তং কারণং আগম্ম. ৰীমংসন্তাতি পৰত্তিনিৰত্তিযো উপপরিক্খন্তা. মহন্তানং সীলক্খন্ধাদীনং এসনট্ঠেন মহেসযো. একচরিযনিৰাসেনাতি একচরিযনিৰাসমত্তেন, ন সীলাদিনা. খগ্গমিগসিঙ্গসমা উপমা যেসং, খগ্গমিগসিঙ্গং ৰা সমূপমা যেসং তে খগ্গসিঙ্গসমূপমা.

তম্বনখতুঙ্গনখতাদিঅসীতিঅনুব্যঞ্জনপটিমণ্ডিতেহি সুপ্পতিট্ঠিতপাদতাদীহি দ্ৰত্তিংসায মহাপুরিসলক্খণেহি ৰিচিত্রো অচ্ছরিযব্ভুতো রূপকাযো এতস্সাতি অসীতি…পে… রূপকাযো. সহ ৰাসনায সব্বেসং কিলেসানং পহীনত্তা সব্বাকারপরিসুদ্ধসীলক্খন্ধাদিগুণরতনেহি সমিদ্ধো ধম্মকাযো এতস্সাতি সব্বাকার…পে… ধম্মকাযো. ঠানসোতি তঙ্খণেযেৰ.

এৰং মহানুভাৰস্সাতি এৰং যথাৰুত্তরূপকাযসম্পত্তিযা, ধম্মকাযসম্পত্তিযা চ ৰিঞ্ঞাযমানৰিপুলাপরিমেয্যবুদ্ধানুভাৰস্স, ৰসং নাগতং অনুপগমনৰসেনাতি অধিপ্পাযো.

মরণং সামঞ্ঞং এতস্সাতি মরণসামঞ্ঞো, তস্স ভাৰো মরণসামঞ্ঞতা, তায.

১৭২. কিমিকুলানন্তি কিমিসমূহানং, কিমিজাতীনং ৰা. জীযন্তীতি জরং পাপুণন্তি.

নিক্খন্তেতি ৰীতিৰত্তে. পটিহিতাযাতি পচ্চানুগতায. সো মমস্স অন্তরাযোতি সা যথাৰুত্তা ন কেৰলং কালকিরিযাৰ, অথ খো মম অতিদুল্লভং খণং লভিত্ৰা ঠিতস্স সত্থুসাসনমনসিকারস্স অন্তরাযো অস্স ভৰেয্য. ব্যাপজ্জেয্যাতি ৰিপত্তিং গচ্ছেয্য. সত্থকেন ৰিয অঙ্গপচ্চঙ্গানং কন্তনকা মরণকালে সন্ধিবন্ধনচ্ছেদনকৰাতা সত্থকৰাতা.

১৭৩. অবলন্তি বলহীনং. দুব্বলন্তি তস্সেৰ ৰেৰচনং. অভাৰত্থো হি অযং দু-সদ্দো ‘‘দুস্সীলো (অ. নি. ৫.২১৩; অ. নি. ১০.৭৫) দুপ্পঞ্ঞো’’তিআদীসু (ম. নি. ১.৪৪৯) ৰিয. তদেতং আযু. অস্সাসপস্সাসানং সমৰুত্তিতা অপরাপরং পৰেসনিক্খমোৰ. বহি নিক্খন্তনাসিকৰাতে অন্তো অপৰিসন্তে, পৰিট্ঠে ৰা অনিক্খমন্তেতি একস্সেৰ পৰেসনিক্খমো ৰিয ৰুত্তং, তং নাসিকৰাতভাৰসামঞ্ঞেনাতি দট্ঠব্বং. অধিমত্ততায অচ্চাসন্নঅধিট্ঠানাদিনা. তদভাৰো হি ইরিযাপথানং সমৰুত্তিতা. অতিসীতেন অভিভূতস্স কাযস্স ৰিপজ্জনং মহিংসরট্ঠাদীসু হিমপাতকালেন দীপেতব্বং. তত্থ হি সত্তা সীতেন ভিন্নসরীরা জীৰিতক্খযং পাপুণন্তি. অতিউণ্হেন অভিভূতস্স ৰিপজ্জনং মরুকন্তারে উণ্হাভিতত্তায পচ্ছিং, তত্থ ঠপিতং উপরি সাটকং, পুত্তঞ্চ অক্কমিত্ৰা মতায ইত্থিযা দীপেতব্বং. মহাভূতানং সমৰুত্তিতা পকোপাভাৰো. পথৰীধাতুআদীনং পকোপেন সরীরস্স ৰিকারাপত্তি পরতো ধাতুকম্মট্ঠানকথাযং আগমিস্সতি. যুত্তকালেতি ভুঞ্জিতুং যুত্তকালে খুদ্দাভিভূতকালে.

১৭৪. অৰৰত্থানতোতি কালাদিৰসেন ৰৰত্থানাভাৰতো. ৰৰত্থানন্তি চেত্থ পরিচ্ছেদো অধিপ্পেতো, ন অসঙ্করতো ৰৰত্থানং, নিচ্ছযো চাতি আহ ‘‘পরিচ্ছেদাভাৰতো’’তি. ন নাযরেতি ন ঞাযন্তি.

ইতো পরন্তি এত্থ পরন্তি পরং অঞ্ঞং কালন্তি অত্থো. তেন ওরকালস্সাপি সঙ্গহো সিদ্ধো হোতি. পরমাযুতো ওরকালং এৰ চেত্থ ‘‘পর’’ন্তি অধিপ্পেতং. ততো পরং সত্তানং জীৰনস্স অভাৰতো ‘‘ৰৰত্থানাভাৰতো’’তি ৰত্তুং ন সক্কাতি. অব্বুদপেসীতিআদীসু ‘‘অব্বুদকালে পেসিকালে’’তিআদিনা কাল-সদ্দো পচ্চেকং যোজেতব্বো. কালোতি ইধ পুব্বণ্হাদিৰেলা অধিপ্পেতা. তেনাহ ‘‘পুব্বণ্হেপি হী’’তিআদি. ইধেৰ দেহেন পতিতব্বন্তি সম্বন্ধো. অনেকপ্পকারতোতি নগরে জাতানং গামে, গামে জাতানং নগরে, ৰনে জাতানং জনপদে, জনপদে জাতানং ৰনেতিআদিনা অনেকপ্পকারতো. ইতো চুতেনাতি ইতো গতিতো চুতেন. ইধ ইমিস্সং গতিযং. যন্তযুত্তগোণো ৰিযাতি যথা যন্তে যুত্তগোণো যন্তং নাতিৰত্ততি, এৰং লোকো গতিপঞ্চকন্তি এত্তকেন উপমা.

১৭৫. অপ্পং ৰা ভিয্যোতি ৰস্সসততো উপরি ‘‘দস ৰা ৰস্সানি, ৰীসতি ৰা’’তিআদিনা দুতিযং ৰস্সসতং অপাপুণন্তো অপ্পকং ৰা জীৰতীতি অত্থো. গমনীযোতি গন্ধব্বো উপপজ্জনৰসেন. সম্পরাযোতি পরলোকো.

হীল়েয্যাতি পরিভৰেয্য ন সম্ভাৰেয্য. নন্তি আযুং. সুপোরিসোতি সাধুপুরিসো পঞ্ঞৰা. চরেয্যাতি সুচরিতং চরেয্য. তেনাহ ‘‘আদিত্তসীসোৰা’’তি.

সত্তহি উপমাহীতি –

‘‘সেয্যথাপি, ব্রাহ্মণ, তিণগ্গে উস্সাৰবিন্দু সূরিযে উগ্গচ্ছন্তে খিপ্পংযেৰ পটিৰিগচ্ছতি, ন চিরট্ঠিতিকং হোতি. উদকে উদকপুব্বুল়ং. উদকে দণ্ডরাজি. নদী পব্বতেয্যা দূরঙ্গমা সীঘসোতা হারহারিনী. বলৰা পুরিসো জিৰ্হগ্গে খেল়পিণ্ডং সংযূহিত্ৰা অকসিরেনেৰ ৰমেয্য. দিৰসং সন্তত্তে অযোকটাহে মংসপেসি পক্খিত্তা খিপ্পংযেৰ পটিৰিগচ্ছতি, ন চিরট্ঠিতিকা হোতি. গাৰী ৰজ্ঝা আঘাতনং নীযমানা যং যদেৰ পাদং উদ্ধরতি, সন্তিকেৰ হোতি ৰধস্স, সন্তিকেৰ মরণস্স, এৰমেৰং খো, ব্রাহ্মণ, গোৰজ্ঝূপমং জীৰিতং মনুস্সানং পরিত্তং লহুকং বহুদুক্খং বহুপাযাসং মন্তাযং বোদ্ধব্বং, কত্তব্বং কুসলং, চরিতব্বং ব্রহ্মচরিযং, নত্থি জাতস্স অমরণ’’ন্তি (অ. নি. ৭.৭৪) –

এৰমাগতাহি ইমাহি সত্তহি উপমাহি অলঙ্কতং.

রত্তিন্দিৰন্তি একং রত্তিন্দিৰং. ভগৰতো সাসনন্তি অরিযমগ্গপটিৰেধাৰহং সত্থু ওৰাদং. বহুং ৰত মে কতং অস্সাতি বহুং ৰত মযা অত্তহিতং পব্বজিতকিচ্চং কতং ভৰেয্য. তদন্তরন্তি তং খণং তত্তকং ৰেলং. একং পিণ্ডপাতন্তি একং দিৰসং যাপনপ্পহোনকং পিণ্ডপাতং. দন্ধন্তি মন্দং চিরায. অৰিস্সাসিযো অৰিস্সাসনীযো.

১৭৬. চিত্তে ধরন্তেযেৰ সত্তানং জীৰিতৰোহারো, চিত্তস্স চ অতিইত্তরো খণো লহুপরিৰত্তিভাৰতো. যথাহ ভগৰা ‘‘নাহং, ভিক্খৰে, অঞ্ঞং একধম্মম্পি সমনুপস্সামি, যং এৰং লহুপরিৰত্তং, যথযিদং চিত্ত’’ন্তি (অ. নি. ১.৪৮; কথা. ৩৩৫). তস্মা সত্তানং জীৰিতং একচিত্তক্খণিকত্তা লহুসং ইত্তরন্তি দস্সেন্তো ‘‘পরমত্থতো’’তিআদিমাহ. তত্থ ‘‘পরমত্থতো’’তি ইমিনা যাযং ‘‘যো চিরং জীৰতি, সো ৰস্সসত’’ন্তিআদিনা সত্তানং (দী. নি. ২.৭; সং. নি. ১.১৪৫; অ. নি. ৭.৭৪) জীৰিতপ্পৰত্তি ৰুত্তা, সা পবন্ধৰিসযত্তা ৰোহারৰসেনাতি তং পটিক্খিপতি. ‘‘অতিপরিত্তো’’তি ইমিনা –

‘‘সেয্যথাপি, ভিক্খৰে, চত্তারো দল়্হধম্মা ধনুগ্গহা সুসিক্খিতা কতহত্থা কতূপাসনা চতুদ্দিসা ঠিতা অস্সু, অথ পুরিসো আগচ্ছেয্য ‘অহং ইমেসং…পে… কতূপাসনানং চতুদ্দিসা কণ্ডে খিত্তে অপ্পতিট্ঠিতে পথৰিযং গহেত্ৰা আহরিস্সামী’তি. যথা চ, ভিক্খৰে, তস্স পুরিসস্স জৰো, যথা চ চন্দিমসূরিযানং জৰো, ততো সীঘতরো. যথা চ, ভিক্খৰে, তস্স পুরিসস্স জৰো, যথা চ চন্দিমসূরিযানং জৰো, যথা চ যা দেৰতা চন্দিমসূরিযানং পুরতো ধাৰন্তি, তাসং দেৰতানং জৰো, ততো সীঘতরং আযুসঙ্খারা খীযন্তী’’তি (সং. নি. ২.২২৮) –

এৰং ৰুত্তং পরিত্তম্পি পটিক্খিপতি. তত্র হি গমনস্সাদানং দেৰপুত্তানং হেট্ঠুপরিযেন পটিমুখং ধাৰন্তানং সিরসি, পাদে চ বদ্ধখুরধারাসন্নিপাততোপি পরিত্তকো রূপজীৰিতিন্দ্রিযস্স সো খণো ৰুত্তো, চিত্তস্স পন অতিৰিয পরিত্ততরো, যস্স উপমাপি নত্থি. তেনেৰাহ ‘‘যাৰঞ্চিদং, ভিক্খৰে, উপমাপি ন সুকরা, যাৰ লহুপরিৰত্তং চিত্ত’’ন্তি (অ. নি. ১.৪৮). জীৰিতক্খণোতি জীৰনক্খণো. একচিত্তপ্পৰত্তিমত্তোযেৰ একস্স চিত্তস্স পৰত্তিমত্তেনেৰ সত্তানং পরমত্থতো জীৰনক্খণস্স পরিচ্ছিন্নত্তা. ইদানি তমত্থং উপমায পকাসেন্তো ‘‘যথা নামা’’তিআদিমাহ. তত্থ পৰত্তমানন্তি পৰত্তন্তং. একচিত্তক্খণিকন্তি একচিত্তক্খণমত্তৰন্তং. তস্মিং চিত্তে নিরুদ্ধমত্তেতি যেন ৰত্তমানচিত্তক্খণেন ‘‘জীৰতী’’তি ৰুচ্চতি, তস্মিং চিত্তে নিরোধং ভঙ্গং পত্তমত্তে তংসমঙ্গী সত্তো নিরুদ্ধো মতোতি ৰুচ্চতি. ৰুত্তমেৰত্থং পাল়িযা ৰিভাৰেতুং ‘‘যথাহা’’তিআদি ৰুত্তং. তেন তীসুপি কালেসু সত্তানং পরমত্থতো জীৰনং নাম চিত্তক্খণৰসেনেৰাতি দস্সেতি.

জীৰিতন্তি জীৰিতিন্দ্রিযং. সুখদুক্খাতি সুখদুক্খৰেদনা. উপেক্খাপি হি সুখদুক্খাসু এৰ অন্তোগধা ইট্ঠানিট্ঠভাৰতো. অত্তভাৰোতি জীৰিতৰেদনাৰিঞ্ঞাণানি ঠপেত্ৰা অৰসিট্ঠধম্মা ৰুত্তা. কেৰলাতি অত্তনা, নিচ্চভাৰেন ৰা অৰোমিস্সা. একচিত্তসমাযুত্তাতি একেকেন চিত্তেন সহিতা. লহুসো ৰত্ততি খণোতি ৰুত্তনযেন একচিত্তক্খণিকতায লহুকো অতিইত্তরো জীৰিতাদীনং খণো ৰত্ততি.

যে নিরুদ্ধা মরন্তস্সাতি চৰন্তস্স সত্তস্স চুতিতো উদ্ধং ‘‘নিরুদ্ধা’’তি ৰত্তব্বা যে খন্ধা. তিট্ঠমানস্স ৰা ইধাতি যে ৰা ইধ পৰত্তিযং তিট্ঠন্তস্স ধরন্তস্স ভঙ্গপ্পত্তিযা নিরুদ্ধা খন্ধা. সব্বেপি সদিসা তে সব্বেপি একসদিসা. কথং? গতা অপ্পটিসন্ধিকা পুন আগন্ত্ৰা পটিসন্ধানাভাৰেন ৰিগতা. যথা হি চুতিখন্ধা ন নিৰত্তন্তি, এৰং ততো পুব্বেপি খন্ধা, তস্মা একচিত্তক্খণিকং সত্তানং জীৰিতন্তি অধিপ্পাযো.

অনিব্বত্তেন ন জাতোতি অনুপ্পন্নেন চিত্তেন জাতো ন হোতি অজাতো নাম হোতি. পচ্চুপ্পন্নেন ৰত্তমানেন চিত্তেন জীৰতি জীৰমানো নাম হোতি. চিত্তভঙ্গা মতো লোকোতি চুতিচিত্তস্স ৰিয সব্বস্সপি তস্স তস্স চিত্তস্স ভঙ্গপ্পত্তিযা অযং লোকো পরমত্থতো মতো নাম হোতি নিরুদ্ধস্স অপ্পটিসন্ধিকত্তা. এৰং সন্তেপি পঞ্ঞত্তি পরমত্থিযা যা তং তং ধরন্তং চিত্তং উপাদায ‘‘তিস্সো জীৰতি, ফুস্সো জীৰতী’’তি ৰচনপ্পৰত্তিযা ৰিসযভূতা সন্তানপঞ্ঞত্তি, সা এত্থ পরমত্থিযা পরমত্থভূতা. তথা হি ৰদন্তি ‘‘নামগোত্তং ন জীরতী’’তি (সং. নি. ১.৭৬).

১৭৭. অঞ্ঞতরঞ্ঞতরেন আকারেন. চিত্তন্তি কম্মট্ঠানারম্মণং চিত্তং. আসেৰনং লভতীতি ভাৰনাসেৰনং লভতি, বহিদ্ধা ৰিক্খেপং পহায একত্তৰসেন মরণারম্মণমেৰ হোতীতি. তেনাহ ‘‘মরণারম্মণা সতি সন্তিট্ঠতী’’তি. সভাৰধম্মানং ভেদো সভাৰধম্মগতিকো এৰাতি আহ ‘‘সভাৰধম্মত্তা পন আরম্মণস্সা’’তি. তেনাহ ভগৰা ‘‘জরামরণং, ভিক্খৰে, অনিচ্চং সঙ্খতং পটিচ্চসমুপ্পন্ন’’ন্তিআদি (সং. নি. ২.২০). সংৰেজনীযত্তাতি সংৰেগজননতো মহাভূতেসু মহাৰিকারতা ৰিয গয্হমানা মরণং অনুস্সরিযমানং উপরূপরি উব্বেগমেৰ আৰহতীতি তত্থ ন ভাৰনাচিত্তং অপ্পেতুং সক্কোতি. যদি সভাৰধম্মত্তা অপ্পনং ন পাপুণাতি, লোকুত্তরজ্ঝানং একচ্চানি অরূপজ্ঝানানি চ কথন্তি আহ ‘‘লোকুত্তরজ্ঝানং পনা’’তিআদি. ৰিসুদ্ধিভাৰনানুক্কমৰসেনাতি হেট্ঠিমৰিসুদ্ধিযা আনুভাৰেন অধিগতাতিসযায পটিপদাঞাণদস্সনৰিসুদ্ধিভাৰনায, সব্বসঙ্খারেহি নিব্বিন্দনৰিরজ্জনাদিৰিসংযোগাধিমুত্তিঅপ্পনায চ পটিপক্খভূতানং পাপধম্মানং ৰিগমোতি এৰংভূতস্স ৰিসুদ্ধিভাৰনানুক্কমস্স ৰসেন লোকুত্তরজ্ঝানং অপ্পনাপ্পত্তমেৰ হোতি. আরম্মণসমতিক্কমনমত্তং তত্থ হোতীতি অঞ্ঞেসং সভাৰধম্মারম্মণকম্মট্ঠানানং ৰিয চিত্তস্স সমাধানে ব্যাপারো নত্থি. যথাসমাহিতেন পন চিত্তেন আরম্মণসমতিক্কমনমত্তমেৰ ভাৰনায কাতব্বং, তস্মা সভাৰধম্মেপি আরুপ্পজ্ঝানং অপ্পেতীতি.

সততং অপ্পমত্তো হোতি সংৰেগবহুলত্তা, ততো এৰস্স সব্বভৰেসু অনভিরতিসঞ্ঞাপটিলাভো. জীৰিতনিকন্তিং জহাতি মরণস্স অৰস্সংভাৰিতাদস্সনতো. পাপগরহী হোতি অনিচ্চসঞ্ঞাপটিলাভতো, ততো এৰ অসন্নিধিবহুলতা, ৰিগতমলমচ্ছেরতা চ. তদনুসারেনাতি অনিচ্চসঞ্ঞাপরিচযানুসারেন. অভাৰিতমরণাতি অভাৰিতমরণানুস্সরণা. অভযো অসম্মূল়্হো কালং করোতি পগেৰ মরণসঞ্ঞায সূপট্ঠিতত্তা.

কাযগতাসতিকথাৰণ্ণনা

১৭৮. বুদ্ধা উপ্পজ্জন্তি এত্থাতি বুদ্ধুপ্পাদো, বুদ্ধানং উপ্পজ্জনকালো, তস্মা. অঞ্ঞত্র তং ঠপেত্ৰা, অঞ্ঞস্মিং কালেতি অত্থো. ন পৰত্তপুব্বন্তি অপৰত্তপুব্বং. ততো এৰ সব্বতিত্থিযানং অৰিসযভূতং. ননু চ সুনেত্তসত্থারাদযো (অ. নি. ৬.৫৪; ৭.৬৬, ৭৩), অঞ্ঞে চ তাপসপরিব্বাজকা সরীরং ‘‘অসুভ’’ন্তি জানিংসু. তথা হি সুমেধতাপসেন সরীরং জিগুচ্ছন্তেন ৰুত্তং –

‘‘যন্নূনিমং পূতিকাযং, নানাকুণপপূরিতং;

ছড্ডযিত্ৰান গচ্ছেয্যং, অনপেক্খো অনত্থিকো’’তি. (বু. ৰং. ২.৮) –

আদি. কামং বোধিসত্তা, অঞ্ঞে চ তাপসাদযো সরীরং ‘‘অসুভ’’ন্তি জানন্তি, কম্মট্ঠানভাৰেন পন ন জানন্তি. তেন ৰুত্তং ‘‘অঞ্ঞত্র বুদ্ধুপ্পাদা’’তিআদি. সংৰেগায সংৰত্ততি যাথাৰতো কাযসভাৰপ্পৰেদনতো. অত্থাযাতি দিট্ঠধম্মিকাদিঅত্থায. যোগক্খেমাযাতি চতূহি যোগেহি খেমভাৰায. সতিসম্পজঞ্ঞাযাতি সব্বত্থ সতিঅৰিপ্পৰাসায চ সত্তট্ঠানিযসম্পজঞ্ঞায চ. ঞাণদস্সনপটিলাভাযাতি ৰিপস্সনাঞাণাধিগমায. ৰিজ্জাৰিমুত্তিফলসচ্ছিকিরিযাযাতি তিস্সো ৰিজ্জা, চিত্তস্স অধিমুত্তি নিব্বানং, চত্তারি সামঞ্ঞফলানীতি এতেসং পচ্চক্খকরণায. অমতস্স নিব্বানস্স অধিগমহেতুতায, অমতসদিসাতপ্পকসুখসহিততায চ কাযগতাসতি ‘‘অমত’’ন্তি ৰুত্তা. পরিভুঞ্জন্তীতি ঝানসমাপজ্জনেন ৰল়ঞ্জন্তি. পরিহীনন্তি জিনং. ৰিরদ্ধন্তি অনধিগমেন ৰিরজ্ঝিতং. আরদ্ধন্তি সাধিতং নিপ্ফাদিতং. অনেকেহি আকারেহি তেসু তেসু সুত্তন্তেসু পসংসিত্ৰা যং তং কাযগতাসতিকম্মট্ঠানং নিদ্দিট্ঠন্তি সম্বন্ধো. কত্থ পন নিদ্দিট্ঠন্তি? কাযগতাসতিসুত্তে (ম. নি. ৩.১৫৩ আদযো). তত্থ হি ‘‘কথং ভাৰিতা চ ভিক্খৰে’’তিআদিনা অযং দেসনা আগতা. তত্রাযং সঙ্খেপত্থো – ভিক্খৰে, কেন পকারেন কাযগতাসতিভাৰনা ভাৰিতা, কেন চ পকারেন পুনপ্পুনং কতা আনাপানজ্ঝানাদীনং নিপ্ফত্তিযা মহপ্ফলা, তেসং তেসং ৰিজ্জাভাগিযানং, অভিঞ্ঞাসচ্ছিকরণীযানঞ্চ ধম্মানং, অরতিরতিসহনতাদীনঞ্চ সংসিদ্ধিযা মহানিসংসা চ হোতীতি? আনাপানপব্বন্তি আনাপানকম্মট্ঠানাৰধি. এস নযো সেসেসুপি.

ধাতুমনসিকারকম্মট্ঠানেন যদিপি উপচারসমাধি ইজ্ঝতি, সম্মসনৰারো পন তত্থ সাতিসযোতি ধাতুমনসিকারপব্বম্পি ‘‘ৰিপস্সনাৰসেন ৰুত্ত’’ন্তি ৰুত্তং. ‘‘অযম্পি খো কাযো এৰংধম্মো এৰংভাৰী এৰংঅনতীতো’’তি (দী. নি. ২.৩৭৯; ম. নি. ১.১১২) তত্থ তত্থ অসুভানিচ্চতাদীহি সদ্ধিং কাযে আদীনৰস্স ৰিভাৰনৰসেন দেসনায আগতত্তা ‘‘নৰসিৰথিক…পে… ৰুত্তানী’’তি ৰুত্তং. এত্থ উদ্ধুমাতকাদীসূতি এতেসু সিৰথিকপব্বেসু আগতউদ্ধুমাতকাদীসু. আনাপানস্সতিৰসেনাতি আনাপানস্সতিভাৰনাৰসেন. যো উপরি ‘‘করীসং মত্থলুঙ্গ’’ন্তি মত্থলুঙ্গকোট্ঠাসো গয্হতি, তং ইধ পাল়িযং (ম. নি. ৩.১৫৪) অট্ঠিমিঞ্জেনেৰ সঙ্গণ্হিত্ৰা দেসনা আগতাতি দস্সেন্তো ‘‘মত্থলুঙ্গং অট্ঠিমিঞ্জেন সঙ্গহেত্ৰা’’তি আহ. ইধাতি ইমস্মিং অনুস্সতিনিদ্দেসে. কাযং গতা, কাযে ৰা গতা সতি কাযগতাসতীতি সতিসীসেন ইদং দ্ৰত্তিংসাকারকম্মট্ঠানং অধিপ্পেতন্তি যোজনা.

১৭৯. চতুমহাভূতিকন্তি চতুমহাভূতসন্নিস্সযং. পূতিকাযন্তি পূতিভূতং পরমদুগ্গন্ধকাযং. ঠানগমনাৰত্থং সরীরং সন্ধায, তস্স ৰা অৰযৰেসু সব্বহেট্ঠিমং পাদতলন্তি ৰুত্তং ‘‘উদ্ধং পাদতলা’’তি. তিরিযং তচপরিচ্ছিন্নন্তি এত্থ ননু কেসলোমনখানং, তচস্স চ অতচপরিচ্ছিন্নতা অত্থীতি? কিঞ্চাপি অত্থি, তচপরিচ্ছিন্নবহুলতায পন কাযস্স তচপরিচ্ছিন্নতা হোতীতি এৰং ৰুত্তং. তচো পরিযন্তো অস্সাতি তচপরিযন্তোতি এতেন পন ৰচনেন কাযেকদেসভূতো তচো গহিতো এৰ, তপ্পটিবদ্ধা চ কেসাদযো তদনুপৰিট্ঠমূলা তচপরিযন্তাৰ হোন্তীতি দ্ৰত্তিংসাকারসমূহো সব্বোপি কাযো তচপরিযন্তো ৰুত্তোতি ৰেদিতব্বো.

অত্থীতি ৰচনৰিপল্লাসেন ৰুত্তং, নিপাতপদং ৰা এতং. তস্মা তীসুপি সঙ্খাসু তদেৰস্স রূপং. তেনাহ ‘‘সংৰিজ্জন্তী’’তি. অক্খরচিন্তকেহি সরীরে কায-সদ্দং ৰণ্ণন্তেহিপি অসুচিসমুদাযভাৰেনেৰ ইচ্ছিতব্বোতি দস্সেন্তো ‘‘অসুচিসঞ্চযতো’’তি ৰত্ৰা পুন নং নিরুত্তিনযেন দস্সেতুং ‘‘কুচ্ছিতান’’ন্তিআদি ৰুত্তং. তত্থ আযভূততোতি উপ্পত্তিট্ঠানভূতত্তা. ‘‘পূরং নানপ্পকারস্সা’’তি ৰুত্তং. ‘‘কে পন তে পকারা? যেহি নানপ্পকারং অসুচি ৰুত্ত’’ন্তি তে কেসাদিকে দস্সেতুং পাল়িযং ‘‘কেসা লোমা’’তিআদি ৰুত্তন্তি ইমমত্থং দীপেন্তো আহ ‘‘এতে কেসাদযো দ্ৰত্তিংসাকারা’’তি. আকারা পকারাতি হি একো অত্থোতি. এৰং সম্বন্ধোতি ‘‘অত্থি ইমস্মিং কাযে নখা’’তিআদিনা সব্বকোট্ঠাসেসু ‘‘অত্থি ইমস্মিং কাযে’’তি পদত্তযেন সম্বন্ধো ৰেদিতব্বো.

পরিতোতি তিরিযং, সমন্ততো ৰা পাদতলকেসমূলেসু চ তচস্স লব্ভনতো. সুচিভাৰন্তি সুচিনো সব্ভাৰং, সুচিমেৰ ৰা.

১৮০. যেন ৰিধিনা উগ্গহে কুসলো হোতি, সো সত্তৰিধো ৰিধি ‘‘উগ্গহকোসল্ল’’ন্তি ৰুচ্চতি, তন্নিব্বত্তং ৰা ঞাণং. মনসিকারকোসল্লেপি এসেৰ নযো.

সজ্ঝাযন্তা ৰাতি সজ্ঝাযং করোন্তা এৰ. তেসং কির চত্তারো মাসে সজ্ঝাযন্তানং সজ্ঝাযমগ্গেনেৰ কোট্ঠাসে উপধারেন্তানং পটিপাটিযা দ্ৰত্তিংসাকারা ৰিভূততরা হুত্ৰা খাযিংসু, পটিক্কূলসঞ্ঞা সণ্ঠাসি, তে তস্মিং নিমিত্তে ঝানং অপ্পেত্ৰা ঝানপাদকং ৰিপস্সনং ৰড্ঢেত্ৰা দস্সনমগ্গং পটিৰিজ্ঝিংসু. তেন ৰুত্তং ‘‘সজ্ঝাযন্তা ৰ সোতাপন্না অহেসু’’ন্তি.

পরিচ্ছিন্দিত্ৰাতি তচপঞ্চকাদিৰসেনেৰ পরিচ্ছেদং কত্ৰা. পথৰীধাতুবহুলভাৰতো মত্থলুঙ্গস্স করীসাৰসানে তন্তিআরোপনমাহ. এত্থ চ মংসং, ন্হারু, অট্ঠি, অট্ঠিমিঞ্জং ৰক্কং, ৰক্কং অট্ঠিমিঞ্জং, অট্ঠি, ন্হারু, মংসং, তচো, দন্তা, নখা, লোমা, কেসাতি এৰং ৰক্কপঞ্চকাদীসু অনুলোমসজ্ঝাযং ৰত্ৰা পটিলোমসজ্ঝাযো পুরিমেহি সম্বন্ধো ৰুত্তো. স্ৰাযং সম্মোহৰিনোদনিযং (ৰিভ. অট্ঠ. ৩৫৬) ৰিসুং তিপঞ্চাহং, পুরিমেহি একতো তিপঞ্চাহন্তি ছপঞ্চাহং সজ্ঝাযো ৰুত্তো, তত্থ আদিঅন্তদস্সনৰসেন ৰুত্তোতি দট্ঠব্বো. অনুলোমপটিলোমসজ্ঝাযেপি হি পটিলোমসজ্ঝাযো অন্তিমো হোতি, সজ্ঝাযপ্পকারন্তরং ৰা এতম্পীতি ৰেদিতব্বং.

হত্থসঙ্খলিকাতি অঙ্গুলিপন্তিমাহ.

মনসা সজ্ঝাযোতি চিত্তেন চিন্তনমাহ, যং মানসং ‘‘জপ্পন’’ন্তি ৰুচ্চতি, সম্মদেৰ অজ্ঝাযোতি ৰা সজ্ঝাযো, চিন্তনন্তি অত্থো. চিরতরং সুট্ঠু পৰত্তনেন পগুণভূতা কম্মট্ঠানতন্তি সমাৰজ্জিত্ৰা মনসি করোন্তস্স আদিতো পট্ঠায যাৰ পরিযোসানা কত্থচি অসজ্জমানা নিরন্তরমেৰ উপট্ঠাতি, তদনুসারেন তদত্থোপি ৰিভূততরো হুত্ৰা খাযতীতি আহ ‘‘ৰচসা সজ্ঝাযো হি…পে… পটিৰেধস্স পচ্চযো হোতী’’তি. লক্খণপটিৰেধস্সাতি অসুভলক্খণপটিৰেধস্স.

পটিক্কূলসভাৰসল্লক্খণস্স কস্সচি ৰণ্ণগ্গহণমুখেন কোট্ঠাসা ৰৰত্থানং গচ্ছন্তি, কস্সচি সণ্ঠানগ্গহণমুখেন, কস্সচি দিসাৰিভাগগ্গহণমুখেন, কস্সচি পতিট্ঠিতোকাসগ্গহণমুখেন, কস্সচি সব্বসো পরিচ্ছিজ্জগ্গহণমুখেনাতি ৰণ্ণাদিতো সল্লক্খণং উগ্গহকোসল্লাৰহং ৰুত্তন্তি তং দস্সেন্তো ‘‘কেসাদীনং ৰণ্ণো ৰৰত্থপেতব্বো’’তিআদিমাহ.

অত্তনো ভাগো সভাগো, সভাগেন পরিচ্ছেদো সভাগপরিচ্ছেদো, হেট্ঠুপরিতিরিযপরিযন্তেহি, সকোট্ঠাসিককেসন্তরাদীহি চ পরিচ্ছেদোতি অত্থো. অমিস্সকতাৰসেনাতি কোট্ঠাসন্তরেহি অৰোমিস্সকতাৰসেন. অসভাগো হি ইধ ‘‘ৰিসভাগো’’তি অধিপ্পেতো, ন ৰিরুদ্ধসভাগো. স্ৰাযমত্থো কেসাদিসদ্দতো এৰ লব্ভতি. সদ্দন্তরত্থাপোহনৰসেন সদ্দো অত্থং ৰদতীতি ‘‘কেসা’’তি ৰুত্তে ‘‘অকেসা ন হোন্তী’’তি অযমত্থো ৰিঞ্ঞাযতি. কে পন তে অকেসা? লোমাদযো, ন চ ঘটাদীসু পসঙ্গোপকরণেনেৰ তেসং নিৰত্তিতত্তা.

পটিক্কূলৰসেনেৰ কথিতং ধাতুৰিভাগস্স সামঞ্ঞতোপি অগহিতত্তা. তত্থেৰ ৰিসুং ধাতুকম্মট্ঠানস্স কথিতত্তা চ ধাতুৰিভঙ্গো পক্কুসাতিসুত্তং (ম. নি. ৩.৩৪২) ৰিভঙ্গপ্পকরণে ধাতুৰিভঙ্গপাল়ি (ৰিভ. ১৭২ আদযো) চ. যস্স ৰণ্ণতো উপট্ঠাতি কেসাদি, তং পুগ্গলং সন্ধায ঝানানি কেসাদীসু ৰণ্ণকসিণারম্মণানি ৰিভত্তানি. ঞত্ৰা আচিক্খিতব্বন্তি যদত্থং ৰুত্তং, তং দস্সেতুং ‘‘তত্থ ধাতুৰসেনা’’তিআদি ৰুত্তং. ইধাতি ইমস্মিং পটিক্কূলমনসিকারপব্বে. কাযগতাসতিসুত্তে (ম. নি. ৩.১৫৩ আদযো) হি পটিক্কূলমনসিকারপব্বং গহেত্ৰা ইধ কাযগতাসতিভাৰনা নিদ্দিসীযতি.

১৮১. ন একন্তরিকাযাতি একন্তরিকাযপি ন মনসি কাতব্বং, পগেৰ দ্ৰন্তরিকাদিনাতি অধিপ্পাযো. ন ভাৰনং সম্পাদেতি, লক্খণপটিৰেধং ন পাপুণাতি একন্তরিকায মনসি করোন্তোতি সম্বন্ধো.

ওক্কমনৰিস্সজ্জনন্তি পটিপজ্জিতব্বৰিস্সজ্জেতব্বে মগ্গে. পুচ্ছিত্ৰাৰ গন্তব্বং হোতি গহেতব্বৰিস্সজ্জেতব্বট্ঠানস্স অসল্লক্খণতো. কম্মট্ঠানং পরিযোসানং পাপুণাতীতি আদিতো পট্ঠায যাৰ পরিযোসানা মনসিকারমত্তং হোতীতি অধিপ্পাযো. অৰিভূতং পন হোতি পটিক্কূলাকারস্স সুট্ঠু অসল্লক্খণতো. ততো এৰ ন ৰিসেসং আৰহতি.

কম্মট্ঠানং পরিযোসানং ন গচ্ছতীতি পটিপাটিযা সব্বকোট্ঠাসে মনসি করোতোযেৰ ৰিভূতা হুত্ৰা উপট্ঠহন্তি. তে সাতিসযং পাটিক্কূলতো মনসি করোন্তস্স কম্মট্ঠানং পরিযোসানং গচ্ছেয্য, ইমস্স পন অতিৰিয দন্ধং মনসি করোতো ৰিভূততো উপট্ঠানমেৰ নত্থি, কুতো পটিক্কূলতায সণ্ঠানং. তেনাহ ‘‘ৰিসেসাধিগমস্স পচ্চযো ন হোতী’’তি.

বহিদ্ধা পুথুত্তারম্মণেতি ‘‘অসুচি পটিক্কূল’’ন্তি কেসাদীসু পৰত্তেতব্বং অসুভানুপস্সনং হিত্ৰা সুভাদিৰসেন গয্হমানা কেসাদযোপি ইধ ‘‘বহিদ্ধা পুথুত্তারম্মণমেৰা’’তি ৰেদিতব্বা. রূপাদযো হি নীলাদিৰসেন পুথুসভাৰতায পুথুত্তারম্মণং নাম, নানারম্মণন্তি অত্থো. অসমাধানং চেতসো ৰিরূপো খেপোতি ৰিক্খেপো. সো সতিং সূপট্ঠিতং কত্ৰা সক্কচ্চং কম্মট্ঠানং মনসি করোন্তেন পটিবাহিতব্বো. পরিহাযতীতি হাযতি. পরিধংসতীতি ৰিনস্সতি.

যা অযং কেসা লোমাতিআদিকা লোকসঙ্কেতানুগতা. পণ্ণত্তীতি অট্ঠ ধম্মে উপাদায পণ্ণত্তি. তং কেসাদিপণ্ণত্তিং. অতিক্কমিত্ৰাতি পটিক্কূলভাৰনায অতিক্কমিত্ৰা উগ্ঘাটেত্ৰা. তস্সা উগ্ঘাটিতত্তা তস্মিং তস্মিং কোট্ঠাসে পটিক্কূলতো উপট্ঠহন্তে ‘‘পটিক্কূল’’ন্তি চিত্তং ঠপেতব্বং. ইদানি তমত্থং উপমায ৰিভাৰেন্তো ‘‘যথা হী’’তিআদিমাহ. তত্রিদং উপমাসংসন্দনং – মনুস্সা ৰিয যোগাৰচরো. উদপানং ৰিয কোট্ঠাসা. তালপণ্ণাদিসঞ্ঞাণং ৰিয কেসাদিপঞ্ঞত্তি. তেন মনুস্সানং উদপানে ন্হানপিৰনাদি ৰিয যোগাৰচরস্স পুব্বভাগে কেসা লোমাতি পণ্ণত্তিৰসেন মনসিকারো. অভিণ্হসঞ্চারেন মনুস্সানং সঞ্ঞাণেন ৰিনা উদপানে কিচ্চকরণং ৰিয যোগাৰচরস্স মনসিকারবলেন পণ্ণত্তিং অতিক্কমিত্ৰা পটিক্কূলভাৰেযেৰ চিত্তং ঠপেত্ৰা ভাৰনানুযোগো. পুব্বভাগে…পে… পাকটো হোতীতি ‘‘কেসা লোমা’’তিআদিনা (ম. নি. ৩.১৫৪) ভাৰনমনুযুঞ্জন্তস্স কেসাদিপঞ্ঞত্তিযা সদ্ধিংযেৰ কোট্ঠাসানং পটিক্কূলভাৰো পুব্বভাগে পাকটো হোতি. অথাতি পচ্ছা ভাৰনায ৰীথিপটিপন্নকালে. পটিক্কূলভাৰেযেৰ চিত্তং ঠপেতব্বন্তি কোট্ঠাসানং পটিক্কূলাকারেযেৰ ভাৰনাচিত্তং পৰত্তেতব্বং.

অনুপুব্বেন মুঞ্চনং অনুপুব্বমুঞ্চনং, অনুপট্ঠহন্তস্স অনুপট্ঠহন্তস্স মুঞ্চনন্তি অত্থো. কথং পন অনুপট্ঠানং হোতীতি আহ ‘‘আদিকম্মিকস্সা’’তিআদি. পরিযোসানকোট্ঠাসমেৰ আহচ্চ তিট্ঠতীতি ইদং কম্মট্ঠানং তন্তিঅনুসারেন আদিতো কম্মট্ঠানমনসিকারো পৰত্ততীতি কত্ৰা ৰুত্তং. তথা হিস্স মনসা সজ্ঝাযো ৰিয মনসিকারো তে তে কোট্ঠাসে আমট্ঠমত্তে কত্ৰা গচ্ছতি, ন লক্খণসল্লক্খণৰসেন. যদা পন নে লক্খণসল্লক্খণৰসেন সুট্ঠু উপধারেন্তো মনসি করোতি, তদা কেচি উপট্ঠহন্তি, কেচি ন উপট্ঠহন্তি. তত্থ পটিপজ্জনৰিধিং দস্সেন্তো ‘‘অথস্সা’’তিআদিমাহ. তত্থ কম্মন্তি মনসিকারকম্মং তাৰ কাতব্বং. কীৰ চিরন্তি? যাৰ দ্ৰীসু উপট্ঠিতেসু, তেসম্পি দ্ৰিন্নং একো সুট্ঠুতরং উপট্ঠহতি তাৰ.

উক্কুট্ঠুক্কুট্ঠিট্ঠানেযেৰ উট্ঠহিত্ৰাতি পুব্বে ৰিয একত্থকতায উক্কুট্ঠিযা কমেন সব্বতালেসু পতিত্ৰা উট্ঠহিত্ৰা উট্ঠহিত্ৰা পরিযন্ততালং, আদিতালঞ্চ আগন্ত্ৰা ততো ততো তত্থ তত্থেৰ কতায উক্কুট্ঠিযা উট্ঠহিত্ৰাতি অত্থো.

দ্ৰে ভিক্খাতি দ্ৰীসু গেহেসু লদ্ধভিক্খা.

অপ্পনাতোতি অপ্পনাকারতো দ্ৰত্তিংসাকারে অপ্পনা হোন্তি. কিং পচ্চেকং কোট্ঠাসেসু হোতি উদাহু অঞ্ঞথাতি ৰিচারণাযং আহ ‘‘অপ্পনাকোট্ঠাসতো’’তি, কোট্ঠাসতো কোট্ঠাসতোতি অত্থো. তেনাহ ‘‘কেসাদীসূ’’তিআদি.

অধিচিত্তন্তি সমথৰিপস্সনাচিত্তং.

অনুযুত্তেনাতি যুত্তপ্পযুত্তেন, ভাৰেন্তেনাতি অত্থো. কালেনকালন্তি কালে কালে. সমাধিনিমিত্তং উপলক্খিতসমাধানাকারো সমাধি এৰ. মনসি কাতব্বন্তি চিত্তে কাতব্বং, উপ্পাদেতব্বন্তি অত্থো. সমাধিকারণং ৰা আরম্মণং সমাধিনিমিত্তং, তং আৰজ্জিতব্বন্তি অত্থো. পগ্গহনিমিত্তউপেক্খানিমিত্তেসুপি এসেৰ নযো. ঠানং অত্থীতি ৰচনসেসো. তং ভাৰনা চিত্তং কোসজ্জায সংৰত্তেয্য, এতস্স সংৰত্তনস্স ঠানং কারণং অত্থীতি অত্থো. তং ৰা মনসিকরণচিত্তং কোসজ্জায সংৰত্তেয্য, এতস্স ঠানং কারণং অত্থীতি অত্থো. মুদুন্তি সুভাৰিতভাৰেন মুদুভূতং, ৰসীভাৰপ্পত্তন্তি অত্থো. মুদুত্তা এৰ কম্মঞ্ঞং কম্মক্খমং কম্মযোগ্গং. পভস্সরন্তি উপক্কিলেসৰিগমেন পরিসুদ্ধং, পরিযোদাতন্তি অত্থো. ন চ পভঙ্গূতি কম্মনিযভাৰূপগমনেন ন চ পভিজ্জনসভাৰং সুদ্ধন্তং ৰিয সুৰণ্ণং ৰিনিযোগক্খমং. তেনাহ ‘‘সম্মা সমাধিযতি আসৰানং খযাযা’’তি.

উক্কং বন্ধতীতি মূসং সম্পাদেতি. আলিম্পেতীতি আদীপেতি জালেতি. তঞ্চাতি তং পিল়ন্ধনৰিকতিসঙ্খাতং অত্থং পযোজনং অস্স সুৰণ্ণকারস্স অনুভোতি পহোতি সাধেতি. অস্স ৰা সুৰণ্ণস্স অত্থং সুৰণ্ণকারো অনুভোতি পাপুণাতি.

অভিঞ্ঞায ইদ্ধিৰিধাদিঞাণেন সচ্ছিকরণীযস্স ইদ্ধিৰিধপচ্চনুভৰনাদিকস্স অভিঞ্ঞা সচ্ছিকরণীযস্স. যস্স পচ্চক্খং অত্থি, সো সক্খি. সক্খিনো ভব্বতা সক্খিভব্বতা, সক্খিভৰনন্তি ৰুত্তং হোতি. সক্খি চ সো ভব্বো চাতি ৰা সক্খিভব্বো. অযঞ্হি ইদ্ধিৰিধাদীনং ভব্বো, তত্থ চ সক্খীতি সক্খিভব্বো, তস্স ভাৰো সক্খিভব্বতা, তং পাপুণাতি. সতি সতি আযতনেতি তস্মিং তস্মিং পুব্বহেতুআদিকে কারণে সতি.

সীতিভাৰন্তি নিব্বানং, কিলেসদরথৰূপসমং ৰা. নিগ্গণ্হাতীতি উদ্ধটং চিত্তং উদ্ধচ্চপাততো রক্খণৰসেন নিগ্গণ্হাতি. পগ্গণ্হাতীতি লীনং চিত্তং কোসজ্জপাততো রক্খণৰসেন পগ্গণ্হাতি. সম্পহংসেতীতি সমপ্পৰত্তং চিত্তং তথাপৰত্তিযং পঞ্ঞায তোসেতি, উত্তেজেতি ৰা. যদা ৰা নিরস্সাদং চিত্তং ভাৰনায ন পক্খন্দতি, তদা জাতিআদীনি সংৰেগৰত্থূনি (অ. নি. অট্ঠ. ১.১.৪১৮; ইতিৰু. অট্ঠ. ৩৭) পচ্চৰেক্খিত্ৰা সম্পহংসেতি সমুত্তেজেতি. অজ্ঝুপেক্খতীতি যদা পন চিত্তং অলীনং অনুদ্ধতং সম্মদেৰ ভাৰনাৰীথিং ওতিণ্ণং হোতি, তদা পগ্গহনিগ্গহসম্পহংসনেসু কঞ্চি ব্যাপারং অকত্ৰা সমপ্পৰত্তেসু যুগেসু সারথি ৰিয অজ্ঝুপেক্খতি উপেক্খকোৰ হোতি. পণীতাধিমুত্তিকোতি পণীতে উত্তমে মগ্গফলে অধিমুত্তো নিন্নপোণপব্ভারো.

সুগ্গহিতং কত্ৰাতি যথাৰুত্তং উগ্গহকোসল্লসঙ্খাতং ৰিধিং সুট্ঠু উগ্গহিতং পরিযাপুণনাদিনা সুপরিগ্গহিতং কত্ৰা. সুট্ঠু ৰৰত্থপেত্ৰাতি মনসিকারকোসল্লসঙ্খাতং ৰিধিং সম্মদেৰ সল্লক্খণৰসেন উপধারেত্ৰা. ৰিসেসন্তি পুব্বেনাপরং ভাৰনায ৰিসেসং. পুনপ্পুনং পরিৰত্তেত্ৰাতি কম্মট্ঠানতন্তিং পগুণভাৰং পাপেন্তো ভিয্যো ভিয্যো ৰাচায, মনসা চ পরিৰত্তেত্ৰা. গণ্ঠিট্ঠানন্তি যথা রুক্খস্স দুব্বিনিভেদো অরঞ্ঞস্স ৰা গহনভূতো পদেসো ‘‘গণ্ঠিট্ঠান’’ন্তি ৰুচ্চতি, এৰং কম্মট্ঠানতন্তিযা অত্থতো দুব্বিনিভেদো গহনভূতো চ পদেসো ‘‘গণ্ঠিট্ঠান’’ন্তি ৰুচ্চতি. তং পরিপুচ্ছনাদিলদ্ধেন ঞাণফরসুনা ছিন্দিত্ৰা.

নিমিত্তন্তি কম্মট্ঠাননিমিত্তং, অসুভাকারো. এদিসেন পযোজনেন লুঞ্চনম্পি অনৰজ্জন্তি দস্সেতুং ‘‘লুঞ্চিত্ৰা’’তি ৰুত্তং. ছিন্নট্ঠানেতি মুণ্ডিতট্ঠানে. ৰট্টতিযেৰ নিস্সরণজ্ঝাসযেন ওলোকনতো. উস্সদৰসেনাতি অফলিতানং, ফলিতানং ৰা বহুলতাৰসেন. দিস্ৰাৰ নিমিত্তং গহেতব্বং দস্সনযোগ্যতায তচপঞ্চকস্স, ইতরেসু সুত্ৰা চ ঞত্ৰা চ নিমিত্তং গহেতব্বং.

কোট্ঠাসৰৰত্থাপনকথাৰণ্ণনা

১৮২. অদ্দারিট্ঠকৰণ্ণাতি অভিনৰারিট্ঠফলৰণ্ণা. কণ্ণচূল়িকাতি উপরিকণ্ণসক্খলিকায পরভাগং সন্ধায ৰুত্তং. তিরিযং অঞ্ঞমঞ্ঞেন পরিচ্ছিন্না, কথং? দ্ৰে কেসা একতো নত্থীতি.

আসযোতি নিস্সযো, পচ্চযোতি অত্থো.

১৮৪. অসম্ভিন্নকাল়কা অঞ্ঞেন ৰণ্ণেন অসম্মিস্সকাল়কা.

১৮৫. পত্তসদিসত্তা নখা এৰ নখপত্তানি. নখা তিরিযং অঞ্ঞমঞ্ঞেন পরিচ্ছিন্নাতি ৰিসুং ৰৰত্থিততং সন্ধায ৰুত্তং. তমেৰ হি অত্থং দস্সেতুং ‘‘দ্ৰে নখা একতো নত্থী’’তি আহ.

১৮৬. দন্তপাল়িযাতি দন্তাৰলিযা. যানকউপত্থম্ভিনীতি সকটস্স ধুরট্ঠানে উপত্থম্ভকদণ্ডো. দন্তানং আধারভূতা অট্ঠি হনুকট্ঠি.

১৮৭. সঙ্কড্ঢিযমানাতি সম্পিণ্ডিযমানা. কোসকারককোসো উপল্লিণ্ডুপোট্টলকং, যং ‘‘কোসেয্যফল’’ন্তিপি ৰুচ্চতি. পুটবন্ধউপাহনো সকলপিট্ঠিপাদচ্ছাদনউপাহনো. আনিসদং আসনপদেসো. তূণিরো সরাৰাসো. গলকঞ্চুকং কণ্ঠত্তাণং. কীটকুলাৰকং খরমুখকুটি.

অনুলোমেন পটিলোমেন চাতি এত্থ অংসপদেসতো পট্ঠায বাহুনো পিট্ঠিপদেসেন ওতরণং অনুলোমো, মণিবন্ধতো পট্ঠায বাহুনো পুরিমভাগেন আরোহনং পটিলোমো. তেনেৰ নযেনাতি দক্খিণহত্থে ৰুত্তেন নযেন অনুলোমেন পটিলোমেন চাতি অত্থো. সুখুমম্পীতি যথাৰুত্তওল়ারিকচম্মতো সুখুমং. অন্তোমুখচম্মাদিকোট্ঠাসেসু ৰা তচেন পরিচ্ছিন্নত্তা যং দুরুপলক্খণীযং, তং ‘‘সুখুম’’ন্তি ৰুত্তং. তঞ্হি ৰুত্তনযেন ঞাণেন তচং ৰিৰরিত্ৰা পস্সন্তস্স পাকটং হোতি. ইধ ছৰিপি তচগতিকা এৰাতি ‘‘তচো উপরি আকাসেন পরিচ্ছিন্নো’’তি ৰুত্তো.

১৮৮. নিসদপোতো সিলাপুত্তকো. উদ্ধনকোটীতি মত্তিকাপিণ্ডেন কতউদ্ধনস্স কোটি. তালগুল়পটলং নাম পক্কতালফললসিকং তালপট্টিকাদীসু লিম্পিত্ৰা সুক্খাপেত্ৰা উদ্ধরিত্ৰা গহিতপটলং. সুখুমন্তি যথাৰুত্তমংসতো সুখুমং. পণ্হিকমংসাদিথূলানং সকলসরীরস্স কিসানং যেভুয্যেন মংসেন পটিচ্ছাদিতত্তা ৰুত্তং ‘‘তিরিযং অঞ্ঞমঞ্ঞেন পরিচ্ছিন্ন’’ন্তি.

১৮৯. জালাকারো কঞ্চুকো জালকঞ্চুকো. ৰিসুং ৰৰত্থিতভাৰেনেৰ ন্হারূ তিরিযং অঞ্ঞমঞ্ঞেন পরিচ্ছিন্না.

১৯০. দন্তানং ৰিসুং গহিতত্তা ‘‘ঠপেত্ৰা দ্ৰত্তিংস দন্তট্ঠীনী’’তি ৰুত্তং. একং জণ্ণুকট্ঠি, একং ঊরুট্ঠীতি এক-গ্গহণং ‘‘একেকস্মিং পাদে’’তি অধিকতত্তা. এৰং তিমত্তানীতি এৰং মত্তসদ্দেহি আনিসদট্ঠিআদীনি ইধ অৰুত্তানিপি দস্সেতীতি ৰেদিতব্বং. এৰঞ্চ কত্ৰা ‘‘অতিরেকতিসতঅট্ঠিকসমুস্সয’’ন্তি (ৰিসুদ্ধি. ১.১২২) ইদঞ্চ ৰচনং সমত্থিতং হোতি.

কীল়াগোল়কানি সুত্তেন বন্ধিত্ৰা অঞ্ঞমঞ্ঞং ঘট্টেত্ৰা কীল়নগোল়কানি. ধনুকদণ্ডো দারকানং কীল়নকখুদ্দকধনুকং. তত্থ জঙ্ঘট্ঠিকস্স পতিট্ঠিতট্ঠানন্তি জণ্ণুকট্ঠিম্হি পৰিসিত্ৰা ঠিতট্ঠানন্তি অধিপ্পাযো. তেন ঊরুট্ঠিনা পতিট্ঠিতং ঠানং যং কটিট্ঠিনো, তং অগ্গচ্ছিন্নমহাপুন্নাগফলসদিসং.

কুম্ভকারেন নিপ্ফাদিতং উদ্ধনং কুম্ভকারিকউদ্ধনং. সীসকপট্টৰেঠকং ৰেঠেত্ৰা ঠপিতং সীসমযং পট্টকং. যেন সুত্তং কন্তন্তি, তস্মিং তক্কম্হি ৰিজ্ঝিত্ৰা ঠপিতগোল়কা ৰট্টনা নাম, ৰট্টনানং আৰল়ি ৰট্টনাৰল়ি.

মণ্ডলাকারেন ছিন্নৰংসকল়ীরখণ্ডানি ৰংসকল়ীরচক্কলকানি. অৰলেখনসত্থকং উচ্ছুতচাৰলেখনসত্থকং.

১৯২. ৰক্কভাগেন পরিচ্ছিন্নন্তি ৰক্কপরিযন্তেন ভাগেন পরিচ্ছিন্নং. ইতো পরেসুপি এৰরূপেসু এসেৰ নযো.

১৯৩. যং নিস্সাযাতি যং লোহিতং নিস্সায, নিস্সযনিস্সযোপি ‘‘নিস্সযো’’ত্ৰেৰ ৰুচ্চতি. ভৰতি হি কারণকারণেপি কারণৰোহারো যথা ‘‘চোরেহি গামো দড্ঢো’’তি. অথ ৰা যস্মিং রূপকলাপে হদযৰত্থু, তম্পি লোহিতগতিকমেৰ হুত্ৰা তিট্ঠতীতি ‘‘যং নিস্সাযা’’তি ৰুত্তং.

১৯৪. পণ্ডুকধাতুকন্তি পণ্ডুসভাৰং.

১৯৫. পরিযোনহনমংসন্তি পটিচ্ছাদকমংসং.

১৯৬. উদরজিৰ্হামংসন্তি জিৰ্হাসণ্ঠানং উদরস্স মত্থকপস্সে তিট্ঠনকমংসং. ‘‘নীল’’ন্তি ৰত্ৰা নীলং নাম বহুধাতুকন্তি আহ ‘‘নিগ্গুণ্ডিপুপ্ফৰণ্ণ’’ন্তি.

১৯৭. পপ্ফাসমংসন্তি যথাঠানে এৰ লম্বিত্ৰা থোকং পরিৰত্তকমংসং. নিরসন্তি নিহীনরসং. নিরোজন্তি নিপ্পভং, ওজারহিতং ৰা.

১৯৮. ওভগ্গাতি অৰভুজিত্ৰা ঠিতা. সক্খরসুধাৰণ্ণন্তি মরুম্বেহি কতসুধাৰণ্ণং. ‘‘সেতসক্খরসুধাৰণ্ণ’’ন্তিপি পাঠো, সেতসক্খরৰণ্ণং, সুধাৰণ্ণঞ্চাতি অত্থো.

১৯৯. অন্তস্স আভুজিত্ৰা আভুজিত্ৰা ঠিতপ্পদেসা অন্তভোগট্ঠানানি. তেসং বন্ধনভূতং অন্তগুণং নামাতি দস্সেন্তো আহ ‘‘অন্তগুণন্তি অন্তভোগট্ঠানেসু বন্ধন’’ন্তি. কুদ্দালফরসুকম্মাদীনি করোন্তানং অন্তভোগে অগল়ন্তে একতো আবন্ধিত্ৰা, কিং ৰিয? যন্তসুত্তকমিৰ যন্তফলকানীতি. কিমিৰ তত্থ ঠিতন্তি আহ ‘‘পাদপুঞ্ছন…পে… ঠিত’’ন্তি. পুরিমঞ্চেত্থ আবন্ধনস্স, দুতিযং ঠানাকারস্স নিদস্সনন্তি দট্ঠব্বং.

২০০. অসিতং নাম ভুত্তং ওদনাদি. পীতং নাম পিৰনৰসেন অজ্ঝোহটপানকাদি. খাযিতং নাম সংখাদিতং পিট্ঠমূলফলখজ্জাদি. সাযিতং নাম অস্সাদিতং অম্বপক্কমধুফাণিতাদি.

যত্থাতি যস্মিং উদরে. যন্তি চ উদরমেৰ পচ্চামসতি. যত্থ পানভোজনাদীনি পতিত্ৰা তিট্ঠতীতি সম্বন্ধো. সুৰানৰমথু সারমেয্যৰন্তং. ৰিৰেকন্তি ৰিভাগং.

২০১. হেট্ঠানাভিপিট্ঠিকণ্টকমূলানং অন্তরেতি পুরিমভাগৰসেন নাভিযা হেট্ঠাপদেসস্স পচ্ছিমভাগৰসেন হেট্ঠিমপিট্ঠিকণ্টকানং ৰেমজ্ঝে. ৰেল়ুনাল়িকসদিসো পদেসোতি অধিপ্পাযো.

২০২. সমোহিতন্তি নিচিতং.

২০৪. পূতিভাৰং আপন্নং কুক্কুটণ্ডং পূতিকুক্কুটণ্ডং. উদ্দেকো পিত্তাদীহি ৰিনা কেৰলো উদ্ধঙ্গমৰাতো.

২০৫. আচামো অৰস্সাৰনকঞ্জিকং.

২০৬. ৰক্কহদযযকনপপ্ফাসে তেমযমানন্তি এত্থ যকনং হেট্ঠাভাগপূরণেনেৰ তেমেতি, ইতরানি তেসং উপরি থোকং থোকং পগ্ঘরণেনাতি দট্ঠব্বং.

২০৭. উতুৰিকারো উণ্হৰলাহকাদিহেতুকো. ৰিসমচ্ছিন্নো ভিসাদিকলাপো ৰিসমং উদকং পগ্ঘরতি, এৰমেৰং সরীরং কেসকূপাদিৰিৰরেহি উপরি, হেট্ঠা, তিরিযঞ্চ সেদং ৰিসমং পগ্ঘরতীতি দস্সেতুং ৰিসমচ্ছিন্ন-গ্গহণং কতং.

২০৮. ৰিসমাহারন্তি তদাপৰত্তমানসরীরাৰত্থায অসপ্পাযাহারং, অতিকটুকঅচ্চুণ্হাদিৰিসভাগাহারং ৰা. সম্মোহৰিনোদনিযং (ৰিভ. অট্ঠ. ৩৫৬) পন ‘‘ৰিসভাগাহার’’ন্ত্ৰেৰ ৰুত্তং তদা পৰত্তমানানং ধাতূনং ৰিসভাগত্তা.

২০৯. ‘‘ন্হানকালে’’তি ইদং উদকস্স উপরি সিনেহস্স সম্ভৰদস্সনত্থং ৰুত্তং. পরিব্ভমন্তসিনেহবিন্দুৰিসটসণ্ঠানাতি ৰিসটং হুত্ৰা পরিব্ভমন্তসিনেহবিন্দুসণ্ঠানা. উতুৰিসভাগো বহিদ্ধাসমুট্ঠানো. ধাতুৰিসভাগো অন্তোসমুট্ঠানো. তে পদেসাতি তে হত্থতলাদিপদেসা.

২১০. কিঞ্চীতি উণ্হাদিরসানং অঞ্ঞতরং আহারৰত্থু. নেসন্তি সত্তানং. হদযং আগিলাযতীতি ৰিসভাগাহারাদিং পটিচ্চ হদযপ্পদেসো ৰিৰত্ততি.

২১১. দধিনো ৰিস্সন্দনঅচ্ছরসো দধিমুত্তং. গল়িত্ৰাতি সন্দিত্ৰা. তালুমত্থকৰিৰরেন ওতরিত্ৰাতি মত্থকৰিৰরতো আগন্ত্ৰা তালুমত্থকেন ওতরিত্ৰা.

২১২. তেলং ৰিয সকটস্স নাভিঅক্খসীসানং অট্ঠিসন্ধীনং অব্ভঞ্জনকিচ্চং সাধযমানা. কটকটাযন্তীতি ‘‘কট কটা’’তি সদ্দং করোন্তি. অনুরৰদস্সনং হেতং. দুক্খন্তীতি দুক্খিতানি সঞ্জাতদুক্খানি হোন্তি.

২১৩. সমূলকূলমাসং ঝাপেত্ৰা ছারিকং অৰস্সাৰেত্ৰা গহিতযূসো মাসখারো. উচ্ছিট্ঠোদকগব্ভমলাদীনং ছড্ডনট্ঠানং চন্দনিকা. রৰণঘটং নাম পকতিযা সম্মুখমেৰ হোতি. যস্স পন আরগ্গমত্তম্পি উদকস্স পৰিসনমুখং নত্থি, তং দস্সেতুং ‘‘অমুখে রৰণঘটে’’তি ৰুত্তং. আযূহনন্তি সমীহনং.

২১৪. এৰঞ্হীতিআদি যথাৰুত্তায উগ্গহকোসল্লপটিপত্তিযা নিগমনং. ইদানি যথাৰুত্তং মনসিকারকোসল্লপটিপত্তিম্পি নিগমনৰসেন গহেত্ৰা কম্মট্ঠানং মত্থকং পাপেত্ৰা দস্সেতুং ‘‘অনুপুব্বতো’’তিআদি আরদ্ধং. তত্থ পণ্ণত্তিসমতিক্কমাৰসানেতি কেসাদিপণ্ণত্তিসমতিক্কমৰসেন পৰত্তায ভাৰনায অৰসানে. অপুব্বাপরিযমিৰাতি একজ্ঝমিৰ. কেসাতি ইতি-সদ্দো আদিঅত্থো, পকারত্থো ৰা, এৰমাদিনা ইমিনা পকারেন ৰাতি অত্থো. তে ধম্মাতি ৰণ্ণাদিৰসেন ৰৰত্থাপিতা পটিক্কূলাকারতো উপট্ঠিতা কোট্ঠাসধম্মা.

বহিদ্ধাপীতি সসন্তানতো বহিপি, পরসন্তানকাযেপীতি অত্থো. মনসিকারং উপসংহরতীতি যথাৰুত্তং পটিক্কূলমনসিকারং উপনেতি. যথা ইদং, তথা এতন্তি. এৰং সব্বকোট্ঠাসেসু পাকটীভূতেসূতি যথা অত্তনো কাযে, এৰং পরেসম্পি কাযে সব্বেসু কেসাদিকোট্ঠাসেসু পটিক্কূলৰসেন ৰিভূতভাৰেন উপট্ঠিতেসূতি অত্থো. অযমেত্থ কসিণেসু ৰড্ঢনসদিসো যোগিনো ভাৰনাৰিসেসো দস্সিতো.

অনুপুব্বমুঞ্চনাদীতি আদি-সদ্দেন সুত্তন্তনযেন ৰিভাৰিতং ৰীরিযসমতাযোজনং সঙ্গণ্হাতি. পুনপ্পুনং মনসি করোতোতি ৰুত্তনযেন অত্তনো কাযে কেসাদিকে ‘‘পটিক্কূলা পটিক্কূলা’’তি অভিণ্হসো মনসিকারং পৰত্তেন্তস্স যদা সদ্ধাদীনি ইন্দ্রিযানি লদ্ধসমথানি ৰিসদানি পৰত্তন্তি, তদা অস্সদ্ধিযাদীনং দূরীভাৰেন সাতিসযং বলপ্পত্তেহি সত্তহি সদ্ধম্মেহি লদ্ধূপত্থম্ভানি ৰিতক্কাদীনি ঝানঙ্গানি পটুতরানি হুত্ৰা পাতুভৰন্তি. তেসং উজুৰিপচ্চনীকতায নীৰরণানি ৰিক্খম্ভিতানেৰ হোন্তি সদ্ধিং তদেকট্ঠেহি পাপধম্মেহি. উপচারসমাধিনা চিত্তং সমাধিযতি, সো তংযেৰ নিমিত্তং আসেৰন্তো ভাৰেন্তো বহুলীকরোন্তো অপ্পনং পাপুণাতি. তেন ৰুত্তং ‘‘অনুক্কমেন অপ্পনা উপ্পজ্জতী’’তি. সব্বাকারতোতি ৰণ্ণাদিৰসেন পঞ্চধাপি. সাতি অপ্পনা.

যদি পনেতং কম্মট্ঠানং অৰিঞ্ঞাণকাসুভকম্মট্ঠানানি ৰিয পঠমজ্ঝানৰসেন সিজ্ঝতি, অথ কস্মা ‘‘কাযগতাসতী’’তি ৰুত্তন্তি আহ ‘‘এৰং পঠমজ্ঝানৰসেনা’’তিআদি. নানাৰণ্ণসণ্ঠানাদীসু দ্ৰত্তিংসায কোট্ঠাসেসু পৰত্তমানায সতিযা কিচ্চমেত্থ সাতিসযন্তি আহ ‘‘সতিবলেন ইজ্ঝনতো’’তি.

পন্তসেনাসনেসু, অধিকুসলেসু চ অরতিং, কামগুণেসু চ রতিং সহতি অভিভৰতীতি অরতিরতিসহো সরীরসভাৰচিন্তনেন অনভিরতিযা পহীনত্তা. তথা কোট্ঠাসভাৰনায অত্তসিনেহস্স পরিক্খীণত্তা ভযভেরৰং সহতি, সীতাদীনঞ্চ অধিৰাসকজাতিকো হোতি. অত্তসিনেহৰসেন হি পুরিসস্স ভযভেরৰং হোতি, দুক্খস্স চ অনধিৰাসনং. ইমং পন কোট্ঠাসভাৰনমনুযুত্তস্স ন কেৰলং পঠমজ্ঝানমত্তমেৰ, উত্তরিপি পটিৰেধো অত্থীতি দস্সেতুং ‘‘কেসাদীন’’ন্তিআদি ৰুত্তং.

আনাপানস্সতিকথাৰণ্ণনা

২১৫. যং তং এৰং পসংসিত্ৰা আনাপানস্সতিকম্মট্ঠানং নিদ্দিট্ঠন্তি সম্বন্ধো. তত্থ যস্মা ‘‘কথং ভাৰিতো’’তিআদিকায পুচ্ছাপাল়িযা অত্থে ৰিভাৰিতে থোমনাপাল়িযাপি অত্থো ৰিভাৰিতোযেৰ হোতি ভেদাভাৰতো, তস্মা তং লঙ্ঘিত্ৰা ‘‘কথং ভাৰিতো চা’’তিআদিনা আরভতি. তত্থ হি ইতো পসংসাভাৰো ‘‘অযম্পি খো’’তি ৰচনঞ্চ ৰিসেসো. তেসু পসংসাভাৰং দস্সেতুং ‘‘এৰং পসংসিত্ৰা’’তি ৰুত্তং. পসংসা চ তত্থ অভিরুচিজননেন উস্সাহনত্থা. তঞ্হি সুত্ৰা ভিক্খূ ‘‘ভগৰা ইমং সমাধিং অনেকেহি আকারেহি পসংসতি, সন্তো কিরাযং সমাধি পণীতো চ অসেচনকো চ সুখো চ ৰিহারো পাপধম্মে চ ঠানসো অন্তরধাপেতী’’তি সঞ্জাতাভিরুচযো উস্সাহজাতা সক্কচ্চং অনুযুঞ্জিতব্বং পটিপজ্জিতব্বং মঞ্ঞন্তি. ‘‘অযম্পি খো’’তি পদস্স যে ইমে মযা নিব্বানমহাসরস্স ওতরণতিত্থভূতা কসিণজ্ঝানঅসুভজ্ঝানাদযো দেসিতা, ন কেৰলং তে এৰ, অযম্পি খোতি ভগৰা অত্তনো পচ্চক্খভূতং সমাধিং দেসনানুভাৰেন তেসম্পি ভিক্খূনং আসন্নং, পচ্চক্খঞ্চ করোন্তো সম্পিণ্ডনৰসেন এৰমাহাতি সম্বন্ধমুখেন অত্থো ৰেদিতব্বো.

সোল়সৰত্থুকন্তি চতূসু অনুপস্সনাসু চতুন্নং চতুক্কানং ৰসেন সোল়সট্ঠানং. সব্বাকারপরিপূরোতি কম্মট্ঠানপাল়িযা পদত্থো পিণ্ডত্থো উপমা চোদনা পরিহারো পযোজনন্তি এৰমাদীহি সব্বেহি আকারেহি পরিপুণ্ণো. নিদ্দেসোতি কম্মট্ঠানস্স নিস্সেসতো ৰিত্থারো.

২১৬. কথন্তি ইদং পুচ্ছনাকারৰিভাৰনপদং. পুচ্ছা চেত্থ কথেতুকম্যতাৰসেন অঞ্ঞাসং অসম্ভৰতো. সা চ উপরি দেসনং আরুল়্হানং সব্বেসং পকারৰিসেসানং আমসনৰসেনাতি ইমমত্থং দস্সেন্তো ‘‘কথন্তি…পে… কম্যতাপুচ্ছা’’তি আহ. কথং বহুলীকতোতি এত্থাপি ‘‘আনাপানস্সতিসমাধী’’তি পদং আনেত্ৰা সম্বন্ধিতব্বং. তত্থ কথন্তি আনাপানস্সতিসমাধিবহুলীকারং নানপ্পকারতো ৰিত্থারেতুকম্যতাপুচ্ছা. বহুলীকতো আনাপানস্সতিসমাধীতি তথাপুট্ঠধম্মনিদস্সনন্তি ইমমত্থং ‘‘এসেৰ নযো’’তি ইমিনা অতিদিসতি. তথা সন্তভাৰাদযোপি তস্স যেহি ভাৰনাবহুলীকারেহি সিদ্ধা, তগ্গহণেনেৰ গহিতা হোন্তীতি দস্সেতুং ‘‘কথং বহুলীকতো…পে… ৰূপসমেতীতি এত্থাপি এসেৰ নযো’’তি ৰুত্তং.

‘‘পুন চ পরং, উদাযি, অক্খাতা মযা সাৰকানং পটিপদা, যথাপটিপন্না মে সাৰকা চত্তারো সতিপট্ঠানে ভাৰেন্তী’’তিআদীসু (ম. নি. ২.২৪৭) উপ্পাদনৰড্ঢনট্ঠেন ভাৰনা ৰুচ্চতীতি তদুভযৰসেন অত্থং দস্সেন্তো ‘‘ভাৰিতোতি উপ্পাদিতো ৰড্ঢিতো ৰা’’তি আহ. তত্থ ভাৰং ৰিজ্জমানতং ইতো গতোতি ভাৰিতো, উপ্পাদিতো পটিলদ্ধমত্তোতি অত্থো. উপ্পন্নো পন লদ্ধাসেৰনো, ভাৰিতো পগুণভাৰং আপাদিতো, ৰড্ঢিতোতি অত্থো. আনাপানপরিগ্গাহিকাযাতি দীঘরস্সাদিৰিসেসেহি সদ্ধিং অস্সাসপস্সাসে পরিচ্ছিজ্জগাহিকায, তে আরব্ভ পৰত্তায, সতিযং পচ্চযভূতাযন্তি অত্থো. পুরিমস্মিঞ্হি অত্থে সমাধিস্স সতিযা সহজাতাদিপচ্চযভাৰো ৰুত্তো সম্পযুত্তৰচনতো, দুতিযস্মিং পন উপনিস্সযভাৰোপি. উপচারজ্ঝানসহগতা হি সতি অপ্পনাসমাধিস্স উপনিস্সযো হোতীতি. বহুলীকতোতি বহুলং পৰত্তিতো, তেন আৰজ্জনাদিৰসীভাৰপ্পত্তিমাহ. যো হি ৰসীভাৰং আপাদিতো, সো ইচ্ছিতিচ্ছিতক্খণে সমাপজ্জিতব্বতো পুনপ্পুনং পৰত্তীযতি. তেন ৰুত্তং ‘‘পুনপ্পুনং কতো’’তি. যথা ‘‘ইধেৰ, ভিক্খৰে, সমণো’’তি (ম. নি. ১.১৩৯; অ. নি. ৪.২৪১), ‘‘ৰিৰিচ্চেৰ কামেহী’’তি (দী. নি. ১.২২৬; সং. নি. ২.১৫২; অ. নি. ৪.১২৩) চ এৰমাদীসু পঠমপদে ৰুত্তো এৰ-সদ্দো দুতিযাদীসুপি ৰুত্তো এৰ হোতি, এৰমিধাপীতি আহ ‘‘উভযত্থ এৰসদ্দেন নিযমো ৰেদিতব্বো’’তি. উভযপদনিযমেন লদ্ধগুণং দস্সেতুং ‘‘অযঞ্হী’’তিআদি ৰুত্তং.

অসুভকম্মট্ঠানন্তি অসুভারম্মণঝানমাহ. তং হি অসুভেসু যোগকম্মভাৰতো, যোগিনো সুখৰিসেসানং কারণভাৰতো চ ‘‘অসুভকম্মট্ঠান’’ন্তি ৰুচ্চতি. ‘‘কেৰল’’ন্তি ইমিনা আরম্মণং নিৰত্তেতি. পটিৰেধৰসেনাতি ঝানপটিৰেধৰসেন. ঝানঞ্হি ভাৰনাৰিসেসেন ইজ্ঝন্তং অত্তনো ৰিসযং পটিৰিজ্ঝন্তমেৰ পৰত্ততি, যথাসভাৰতো পটিৰিজ্ঝীযতি চাতি ‘‘পটিৰেধো’’তি ৰুচ্চতি. ওল়ারিকারম্মণত্তাতি বীভচ্ছারম্মণত্তা. পটিক্কূলারম্মণত্তাতি জিগুচ্ছিতব্বারম্মণত্তা. পরিযাযেনাতি কারণেন, লেসন্তরেন ৰা. আরম্মণসন্ততাযাতি অনুক্কমেন ৰিচেতব্বতং পত্তং আরম্মণস্স পরমসুখুমতং সন্ধাযাহ. সন্তে হি সন্নিসিন্নে আরম্মণে পৰত্তমানো ধম্মো সযম্পি সন্নিসিন্নোৰ হোতি. তেনাহ ‘‘সন্তো ৰূপসন্তো নিব্বুতো’’তি, নিব্বুতসব্বপরিল়াহোতি অত্থো. আরম্মণসন্ততায তদারম্মণধম্মানং সন্ততা লোকুত্তরধম্মারম্মণাহি পচ্চৰেক্খণাহি দীপেতব্বা.

নাস্স সন্তপণীতভাৰাৰহং কিঞ্চি সেচনন্তি অসেচনকো. অসেচনকত্তা অনাসিত্তকো. অনাসিত্তকত্তা এৰ অব্বোকিণ্ণো অসম্মিস্সো পরিকম্মাদিনা. ততো এৰ পাটিযেক্কো ৰিসুংযেৰেকো. আৰেণিকো অসাধারণো. সব্বমেতং সরসতো এৰ সন্তভাৰং দস্সেতুং ৰুত্তং. পরিকম্মং ৰা সন্তভাৰনিমিত্তং, পরিকম্মন্তি চ কসিণকরণাদীনি নিমিত্তুপ্পাদপরিযোসানং, তাদিসং ইধ নত্থীতি অধিপ্পাযো. তদা হি কম্মট্ঠানং নিরস্সাদত্তা অসন্তমপ্পণীতং সিযা. উপচারেন ৰা নত্থি এত্থ সন্ততাতি যোজনা. যথা উপচারক্খণে নীৰরণৰিগমেন, অঙ্গপাতুভাৰেন চ পরেসং সন্ততা হোতি, ন এৰমিমস্স. অযং পন আদিসমন্না…পে… পণীতো চাতি যোজনা. কেচীতি উত্তরৰিহারৰাসিকে সন্ধাযাহ. অনাসিত্তকোতি উপসেচনেন ন আসিত্তকো. তেনাহ ‘‘ওজৰন্তো’’তি, ওজৰন্তসদিসোতি অত্থো. মধূরোতি ইট্ঠো, চেতসিকসুখপটিলাভসংৰত্তনং তিকচতুক্কজ্ঝানৰসেন, উপেক্খায ৰা সন্তভাৰেন সুখগতিকত্তা সব্বেসম্পি ৰসেন ৰেদিতব্বং. ঝানসমুট্ঠানপণীতরূপফুট্ঠসরীরতাৰসেন পন কাযিকসুখপটিলাভসংৰত্তনং দট্ঠব্বং, তঞ্চ খো ঝানতো ৰুট্ঠিতকালে. ইমস্মিং পক্খে ‘‘অপ্পিতপ্পিতক্খণে’’তি ইদং হেতুম্হি ভুম্মৰচনং দট্ঠব্বং. অৰিক্খম্ভিতেতি ঝানেন সকসন্তানতো অনীহটে অপ্পহীনে. অকোসল্লসম্ভূতেতি অকোসল্লং ৰুচ্চতি অৰিজ্জা, ততো সম্ভূতে. অৰিজ্জাপুব্বঙ্গমা হি সব্বে পাপধম্মা. খণেনেৰাতি অত্তনো পৰত্তিক্খণেনেৰ. অন্তরধাপেতীতি এত্থ অন্তরধাপনং ৰিনাসনং, তং পন ঝানকত্তুকস্স ইধাধিপ্পেতত্তা পরিযুট্ঠানপ্পহানং হোতীতি আহ ‘‘ৰিক্খম্ভেতী’’তি. ৰূপসমেতীতি ৰিসেসেন উপসমেতি. ৰিসেসেন উপসমনং পন সম্মদেৰ উপসমনং হোতীতি আহ ‘‘সুট্ঠু উপসমেতী’’তি.

ননু চ অঞ্ঞোপি সমাধি অত্তনো পৰত্তিক্খণেনেৰ পটিপক্খধম্মে অন্তরধাপেতি ৰূপসমেতি, অথ কস্মা অযমেৰ সমাধি এৰং ৰিসেসেত্ৰা ৰুত্তোতি? পুব্বভাগতো পট্ঠায নানাৰিতক্কৰূপসমসব্ভাৰতো. ৰুত্তঞ্হেতং – ‘‘আনাপানস্সতি ভাৰেতব্বা ৰিতক্কুপচ্ছেদাযা’’তি (অ. নি. ৯.১; উদা. ৩১). অপিচ তিক্খপঞ্ঞস্স ঞাণুত্তরস্সেতং কম্মট্ঠানং, ঞাণুত্তরস্স চ কিলেসপ্পহানং ইতরেহি সাতিসযং, যথা সদ্ধাধিমুত্তেহি দিট্ঠিপ্পত্তস্স. তস্মা ইমং ৰিসেসং সন্ধায ‘‘ঠানসো অন্তরধাপেতি ৰূপসমেতী’’তি ৰুত্তং. অথ ৰা নিমিত্তপাতুভাৰে সতি খণেনেৰ অঙ্গপাতুভাৰসব্ভাৰতো অযমেৰ সমাধি ‘‘ঠানসো অন্তরধাপেতি ৰূপসমেতী’’তি ৰুত্তো. যথা তং মহতো অকালমেঘস্স উট্ঠিতস্স ধারানিপাতে খণেনেৰ পথৰিযং রজোজল্লস্স ৰূপসমো. তেনাহ – ‘‘সেয্যথাপি, ভিক্খৰে, মহাঅকালমেঘো উট্ঠিতো’’তিআদি (সং. নি. ৫.৯৮৫; পারা. ১৬৫). সাসনিকস্স ঝানভাৰনা যেভুয্যেন নিব্বেধভাগিযাৰ হোতীতি আহ ‘‘নিব্বেধভাগিযত্তা’’তি. বুদ্ধানং পন একংসেন নিব্বেধভাগিযাৰ হোতি. ইমমেৰ হি কম্মট্ঠানং ভাৰেত্ৰা সব্বেপি সম্মাসম্বুদ্ধা সম্মাসম্বোধিং অধিগচ্ছন্তি. অরিযমগ্গস্স পাদকভূতো অযং সমাধি অনুক্কমেন ৰড্ঢিত্ৰা অরিযমগ্গভাৰং উপগতো ৰিয হোতীতি আহ ‘‘অনুপুব্বেন অরিযমগ্গৰুদ্ধিপ্পত্তো’’তি.

অযং পনত্থো ৰিরাগনিরোধপটিনিস্সগ্গানুপস্সনানং ৰসেন সম্মদেৰ যুজ্জতি. হেট্ঠা পপঞ্চৰসেন ৰুত্তমত্থং সুখগ্গহণত্থং সঙ্গহেত্ৰা দস্সেন্তো ‘‘অযং পনেত্থ সঙ্খেপত্থো’’তি আহ, পিণ্ডত্থোতি ৰুত্তং হোতি.

২১৭. তমত্থন্তি তং ‘‘কথং ভাৰিতো’’তিআদিনা পুচ্ছাৰসেন সঙ্খেপতো ৰুত্তমত্থং. ‘‘ইধ তথাগতো লোকে উপ্পজ্জতী’’তিআদীসু (দী. নি. ১.১৯০; ম. নি. ১.২৯১; অ. নি. ৩.৬১) ইধ-সদ্দো লোকং উপাদায ৰুত্তো, ‘‘ইধেৰ তিট্ঠমানস্সা’’তিআদীসু (দী. নি. ২.৩৬৯) ওকাসং, ‘‘ইধাহং, ভিক্খৰে, ভুত্তাৰী অস্সং পৰারিতো’’তিআদীসু (ম. নি. ১.৩০) পদপূরণমত্তং, ‘‘ইধ ভিক্খু ধম্মং পরিযাপুণাতী’’তিআদীসু (অ. নি. ৫.৭৩) পন সাসনং, ‘‘ইধ, ভিক্খৰে, ভিক্খূ’’তি ইধাপি সাসনমেৰাতি দস্সেন্তো ‘‘ভিক্খৰে, ইমস্মিং সাসনে ভিক্খূ’’তি ৰত্ৰা তমত্থং পাকটং কত্ৰা দস্সেতুং ‘‘অযঞ্হী’’তিআদি ৰুত্তং. তত্থ সব্বপ্পকারআনাপানস্সতিসমাধিনিব্বত্তকস্সাতি সব্বপ্পকারগ্গহণং সোল়স পকারে সন্ধায. তে হি ইমস্মিংযেৰ সাসনে. বাহিরকা হি জানন্তা আদিতো চতুপ্পকারমেৰ জানন্তি. তেনাহ ‘‘অঞ্ঞসাসনস্স তথাভাৰপটিসেধনো’’তি, যথাৰুত্তস্স পুগ্গলস্স নিস্সযভাৰপটিসেধনোতি অত্থো. এতেন ‘‘ইধ ভিক্খৰে’’তি ইদং অন্তোগধেৰসদ্দন্তি দস্সেতি. সন্তি হি একপদানিপি সাৰধারণানি যথা ‘‘ৰাযুভক্খো’’তি. তেনেৰাহ ‘‘ইধেৰ, ভিক্খৰে, সমণো’’তিআদি. পরিপুণ্ণসমণকরণধম্মো হি সো, যো সব্বপ্পকারআনাপানস্সতিসমাধিনিব্বত্তকো. পরপ্পৰাদাতি পরেসং অঞ্ঞতিত্থিযানং নানপ্পকারা ৰাদা তিত্থাযতনানি.

অরঞ্ঞাদিকস্সেৰ ভাৰনানুরূপসেনাসনতং দস্সেতুং ‘‘ইমস্স হী’’তিআদি ৰুত্তং. দুদ্দমো দমথং অনুপগতো গোণো কূটগোণো. যথা থনেহি সব্বসো খীরং ন পগ্ঘরতি, এৰং দোহপটিবন্ধিনী কূটধেনু. রূপসদ্দাদিকে পটিচ্চ উপ্পজ্জনকো অস্সাদো রূপারম্মণাদিরসো. পুব্বে আচিণ্ণারম্মণন্তি পব্বজ্জতো পুব্বে, অনাদিমতি ৰা সংসারে পরিচিতারম্মণং.

নিবন্ধেয্যাতি বন্ধেয্য. সতিযাতি সম্মদেৰ কম্মট্ঠানসল্লক্খণসম্পৰত্তায সতিযা. আরম্মণেতি কম্মট্ঠানারম্মণে. দল়্হন্তি থিরং, যথা সতোকারিস্স উপচারপ্পনাভেদো সমাধি ইজ্ঝতি, তথা থামগতং কত্ৰাতি অত্থো.

ৰিসেসাধিগমদিট্ঠধম্মসুখৰিহারপদট্ঠানন্তি সব্বেসং বুদ্ধানং, একচ্চানং পচ্চেকবুদ্ধানং, বুদ্ধসাৰকানঞ্চ ৰিসেসাধিগমস্স চেৰ অঞ্ঞকম্মট্ঠানেন অধিগতৰিসেসানং দিট্ঠধম্মসুখৰিহারস্স চ পদট্ঠানভূতং.

ৰত্থুৰিজ্জাচরিযো ৰিয ভগৰা যোগীনং অনুরূপনিৰাসট্ঠানুপদিসনতো.

ভিক্খু দীপিসদিসো অরঞ্ঞে একিকো ৰিহরিত্ৰা পটিপক্খনিম্মথনেন ইচ্ছিতত্থসাধনতো. ফলমুত্তমন্তি সামঞ্ঞফলমাহ. পরক্কমজৰযোগ্গভূমিন্তি ভাৰনুস্সাহজৰস্স যোগ্গকরণভূমিভূতং.

২১৮. এৰং ৰুত্তলক্খণেসূতি অভিধম্মপরিযাযেন (ৰিভ. ৫৩০), সুত্তন্তপরিযাযেন চ ৰুত্তলক্খণেসু. রুক্খসমীপন্তি ‘‘যাৰতা মজ্ঝন্হিকে কালে সমন্তা ছাযা ফরতি, নিৰাতে পণ্ণানি পতন্তি, এত্তাৰতা রুক্খমূলন্তি ৰুচ্চতী’’তি এৰং ৰুত্তং রুক্খস্স সমীপট্ঠানং. অৰসেসসত্তৰিধসেনাসনন্তি পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জন্তি এৰং ৰুত্তং.

উতুত্তযানুকূলং ধাতুচরিযানুকূলন্তি গিম্হাদিউতুত্তযস্স, সেম্হাদিধাতুত্তযস্স, মোহাদিচরিযত্তযস্স চ অনুকূলং. তথা হি গিম্হকালে চ অরঞ্ঞং অনুকূলং, হেমন্তে রুক্খমূলং, ৰস্সকালে সুঞ্ঞাগারং, সেম্হধাতুকস্স সেম্হপকতিকস্স অরঞ্ঞং, পিত্তধাতুকস্স রুক্খমূলং, ৰাতধাতুকস্স সুঞ্ঞাগারং অনুকূলং, মোহচরিতস্স অরঞ্ঞং, দোসচরিতস্স রুক্খমূলং, রাগচরিতস্স সুঞ্ঞাগারং অনুকূলং. অলীনানুদ্ধচ্চপক্খিকন্তি অসঙ্কোচাৰিক্খেপপক্খিকং. সযনঞ্হি কোসজ্জপক্খিকং, ঠানচঙ্কমনানি উদ্ধচ্চপক্খিকানি, ন এৰং নিসজ্জা. ততো এৰস্স সন্ততা. নিসজ্জায দল়্হভাৰং পল্লঙ্কাভুজনেন, অস্সাসপস্সাসানং পৰত্তনসুখতং উপরিমকাযস্স উজুকট্ঠপনেন, আরম্মণপরিগ্গহূপাযং পরিমুখং সতিযা ঠপনেন দস্সেন্তো. ঊরুবদ্ধাসনন্তি ঊরূনমধোবন্ধনৰসেন নিসজ্জা. হেট্ঠিমকাযস্স অনুজুকং ঠপনং নিসজ্জা-ৰচনেনেৰ বোধিতন্তি ‘‘উজুং কায’’ন্তি এত্থ কায-সদ্দো উপরিমকাযৰিসযোতি আহ ‘‘উপরিমসরীরং উজুকং ঠপেত্ৰা’’তি. তং পন উজুকট্ঠপনং সরূপতো, পযোজনতো চ দস্সেতুং ‘‘অট্ঠারসা’’তিআদি ৰুত্তং. ন পণমন্তীতি ন ওনমন্তি. ন পরিপততীতি ন ৰিগচ্ছতি ৰীথিং ন ৰিলঙ্ঘতি, ততো এৰ পুব্বেনাপরং ৰিসেসুপ্পত্তিযা ৰুদ্ধিং ফাতিং উপগচ্ছতি. ইধ পরি-সদ্দো অভি-সদ্দেন সমানত্থোতি আহ ‘‘কম্মট্ঠানাভিমুখ’’ন্তি, বহিদ্ধা পুথুত্তারম্মণতো নিৰারেত্ৰা কম্মট্ঠানংযেৰ পুরক্খিত্ৰাতি অত্থো. পরীতি পরিগ্গহট্ঠো ‘‘পরিণাযিকা’’তিআদীসু (ধ. স. ১৬) ৰিয. নিয্যানট্ঠো পটিপক্খতো নিগ্গমনট্ঠো. তস্মা পরিগ্গহিতনিয্যানন্তি সব্বথা গহিতাসম্মোসং পরিচ্চত্তসম্মোসং সতিং কত্ৰা, পরমং সতিনেপক্কং উপট্ঠপেত্ৰাতি অত্থো.

২১৯. সতোৰাতি সতিযা সমন্নাগতো এৰ সরন্তো এৰ অস্সসতি নাস্স কাচি সতিৰিরহিতা অস্সাসপ্পৰত্তি হোতীতি অত্থো. সতো পস্সসতীতি এত্থাপি সতোৰ পস্সসতীতি এৰ-সদ্দো আনেত্ৰা ৰত্তব্বো. সতোকারীতি সতো এৰ হুত্ৰা, সতিযা এৰ ৰা কাতব্বস্স কত্তা, করণসীলো ৰা. যদি ‘‘সতোৰ অস্সসতি সতো পস্সসতী’’তি এতস্স ৰিভঙ্গে (ম. নি. ৩.১৪৮; সং. নি. ৫.৯৮৬; পারা. ১৬৫) ৰুত্তং, অথ কস্মা ‘‘অস্সসতি পস্সসতি’’চ্চেৰ অৰত্ৰা ‘‘সতোকারী’’তি ৰুত্তং? একরসং দেসনং কাতুকামতায. পঠমচতুক্কে পদদ্ৰযমেৰ হি ৰত্তমানকালৰসেন আগতং, ইতরানি অনাগতকালৰসেন. তস্মা একরসং দেসনং কাতুকামতায সব্বত্থ (পটি. ম. ১.১৬৫ আদযো) ‘‘সতোকারি’’চ্চেৰ ৰুত্তং.

দীঘং অস্সাসৰসেনাতি দীঘঅস্সাসৰসেন ৰিভত্তিঅলোপং কত্ৰা নিদ্দেসো. দীঘন্তি ৰা ভগৰতা ৰুত্তঅস্সাসৰসেন. চিত্তস্স একগ্গতং অৰিক্খেপন্তি ৰিক্খেপস্স পটিপক্খভাৰতো ‘‘অৰিক্খেপো’’তি লদ্ধনামচিত্তস্স একগ্গভাৰং পজানতো. সতি উপট্ঠিতা হোতীতি আরম্মণং উপগন্ত্ৰা ঠিতা হোতি. তায সতিযা তেন ঞাণেনাতি যথাৰুত্তায সতিযা, যথাৰুত্তেন চ ঞাণেন. ইদং ৰুত্ত হোতি – দীঘং অস্সাসং আরম্মণভূতং অৰিক্খিত্তচিত্তস্স, অসম্মোহতো ৰা পজানন্তস্স তত্থ সতি উপট্ঠিতা এৰ হোতি, তং সম্পজানন্তস্স আরম্মণকরণৰসেন, অসম্মোহৰসেন ৰা সম্পজঞ্ঞং, তদধীনসতিসম্পজঞ্ঞেন তংসমঙ্গী যোগাৰচরো সতোকারী নাম হোতীতি. পটিনিস্সগ্গানুপস্সী অস্সাসৰসেনাতি পটিনিস্সগ্গানুপস্সী হুত্ৰা অস্সসনস্স ৰসেন. ‘‘পটিনিস্সগ্গানুপস্সীঅস্সাসৰসেনা’’তি ৰা পাঠো. তস্স পটিনিস্সগ্গানুপস্সিনো অস্সাসা পটিনিস্সগ্গানুপস্সীঅস্সাসা, তেসং ৰসেনাতি অত্থো. ৰিনযনযেন অন্তো উট্ঠিতসসনং অস্সাসো, বহি উট্ঠিতসসনং পস্সাসো. সুত্তন্তনযেন পন বহি উট্ঠহিত্ৰাপি অন্তো সসনতো অস্সাসো, অন্তো উট্ঠহিত্ৰাপি বহি সসনতো পস্সাসো. অযমেৰ চ নযো –

‘‘অস্সাসাদিমজ্ঝপরিযোসানং সতিযা অনুগচ্ছতো অজ্ঝত্তং ৰিক্খেপগতেন চিত্তেন কাযোপি চিত্তম্পি সারদ্ধা চ হোন্তি ইঞ্জিতা চ ফন্দিতা চা’’তি, ‘‘পস্সাসাদিমজ্ঝপরিযোসানং সতিযা অনুগচ্ছতো বহিদ্ধা ৰিক্খেপগতেন চিত্তেন কাযোপি চিত্তম্পি সারদ্ধা চ হোন্তি ইঞ্জিতা চ ফন্দিতা চা’’তি (পটি. ম. ১.১৫৭) –

ইমায পাল়িযা সমেতি.

পঠমং অব্ভন্তরৰাতো বহি নিক্খমতি, তস্মা পৰত্তিক্কমেন অস্সাসো পঠমং ৰুত্তোতি ৰদন্তি. তালুং আহচ্চ নিব্বাযতীতি তালুং আহচ্চ নিরুজ্ঝতি. তেন কির সম্পতিজাতো বালদারকো খিপিতং করোতি. এৰং তাৰাতিআদি যথাৰুত্তস্স অত্থস্স নিগমনং. কেচি ‘‘এৰং তাৰাতি অনেন পৰত্তিক্কমেন অস্সাসো বহিনিক্খমনৰাতোতি গহেতব্বন্তি অধিপ্পাযো’’তি ৰদন্তি.

অদ্ধানৰসেনাতি কালদ্ধানৰসেন. অযং হি অদ্ধান-সদ্দো কালস্স, দেসস্স চ ৰাচকো. তত্থ দেসদ্ধানং উদাহরণভাৰেন দস্সেত্ৰা কালদ্ধানৰসেন অস্সাসপস্সাসানং দীঘরস্সতং ৰিভাৰেতুং ‘‘যথা হী’’তিআদি ৰুত্তং. তত্থ ওকাসদ্ধানন্তি ওকাসভূতং অদ্ধানং. ফরিত্ৰাতি ব্যাপেত্ৰা. চুণ্ণৰিচুণ্ণাপি অনেককলাপভাৰেন. দীঘং অদ্ধানন্তি দীঘং পদেসং. তস্মাতি সণিকং পৰত্তিযা দীঘসন্তানতায ‘‘দীঘা’’তি ৰুচ্চন্তি. এত্থ চ হত্থিআদিসরীরে, সুনখাদিসরীরে চ অস্সাসপস্সাসানং দেসদ্ধানৰিসিট্ঠেন কালদ্ধানৰসেনেৰ দীঘরস্সতা ৰুত্তাতি ৰেদিতব্বা. ‘‘সণিকং পূরেত্ৰা সণিকমেৰ নিক্খমন্তি’’, ‘‘সীঘং পূরেত্ৰা সীঘমেৰ নিক্খমন্তী’’তি চ ৰচনতো. মনুস্সেসূতি সমানপ্পমাণেসুপি মনুস্সসরীরেসু. দীঘং অস্সসন্তীতি দীঘং অস্সাসপ্পবন্ধং পৰত্তেন্তীতি অত্থো. পস্সসন্তীতি এত্থাপি এসেৰ নযো. সুনখসসাদযো ৰিয রস্সং অস্সসন্তি চ পস্সসন্তি চাতি যোজনা. ইদং পন দীঘং, রস্সঞ্চ অস্সসনং, পস্সসনঞ্চ তেসং সত্তানং সরীরসভাৰোতি দট্ঠব্বং. তেসন্তি সত্তানং. তেতি অস্সাসপস্সাসা. ইত্তরমদ্ধানন্তি অপ্পকং কালং.

নৰহাকারেহীতি ভাৰনমনুযুঞ্জন্তস্স পুব্বেনাপরং অলদ্ধৰিসেসস্স কেৰলং অদ্ধানৰসেন আদিতো ৰুত্তা তযো আকারা, তে চ খো একচ্চো অস্সাসং সুট্ঠু সল্লক্খেতি, একচ্চো পস্সাসং, একচ্চো তদুভযন্তি ইমেসং তিণ্ণং পুগ্গলানং ৰসেন. কেচি পন ‘‘অস্সসতিপি পস্সসতিপীতি একজ্ঝং ৰচনং ভাৰনায নিরন্তরং পৰত্তিদস্সনত্থ’’ন্তি ৰদন্তি. ছন্দৰসেন পুব্বে ৰিয তযো, তথা পামোজ্জৰসেনাতি ইমেহি নৰহাকারেহি.

কামং চেত্থ একস্স পুগ্গলস্স তযো এৰ আকারা লব্ভন্তি, তন্তিৰসেন পন সব্বেসং পাল়িআরুল়্হত্তা, তেসং ৰসেন পরিকম্মস্স কাতব্বত্তা চ ‘‘তত্রাযং ভিক্খু নৰহাকারেহী’’তি ৰুত্তং. এৰং পজানতোতি এৰং যথাৰুত্তেহি আকারেহি অস্সাসপস্সাসে পজানতো, তত্থ মনসিকারং পৰত্তেন্তস্স. একেনাকারেনাতি দীঘং অস্সাসাদীসু চতূসু আকারেসু একেন আকারেন, নৰসু তীসু ৰা একেন. তথা হি ৰক্খতি –

‘‘দীঘো রস্সো চ অস্সাসো, পস্সাসোপি চ তাদিসো;

চত্তারো ৰণ্ণা ৰত্তন্তি, নাসিকগ্গে ৰ ভিক্খুনো’’তি.

অযং ভাৰনা অস্সাসপস্সাসকাযানুপস্সনাতি কত্ৰা ৰুত্তং ‘‘কাযানুপস্সনাসতিপট্ঠানভাৰনা সম্পজ্জতী’’তি.

ইদানি পাল়িৰসেনেৰ তে নৰ আকারে, ভাৰনাৰিধিঞ্চ দস্সেতুং ‘‘যথাহা’’তিআদি আরদ্ধং. তত্থ কথং পজানাতীতি পজাননৰিধিং কথেতুকম্যতায পুচ্ছতি. দীঘং অস্সাসন্তি ৰুত্তলক্খণং দীঘং অস্সাসং. অদ্ধানসঙ্খাতেতি ‘‘অদ্ধান’’ন্তি সঙ্খং গতে দীঘে কালে, দীঘং খণন্তি অত্থো. কোট্ঠাসপরিযাযো ৰা সঙ্খাত-সদ্দো ‘‘থেয্যসঙ্খাত’’ন্তিআদীসু (পারা. ৯১) ৰিয, তস্মা অদ্ধানসঙ্খাতেতি অদ্ধানকোট্ঠাসে, দেসভাগেতি অত্থো. ছন্দো উপ্পজ্জতীতি ভাৰনায পুব্বেনাপরং ৰিসেসং আৰহন্তিযা লদ্ধস্সাদত্তা তত্থ সাতিসযো কত্তুকামতালক্খণো কুসলচ্ছন্দো উপ্পজ্জতি. ছন্দৰসেনাতি তথাপৰত্তছন্দস্স ৰসেন সৰিসেসং ভাৰনমনুযুঞ্জন্তস্স কম্মট্ঠানং ৰুদ্ধিং ফাতিং গমেন্তস্স. ততো সুখুমতরন্তি যথাৰুত্তছন্দপ্পৰত্তিযা পুরিমতো সুখুমতরং. ভাৰনাবলেন হি পটিপ্পস্সদ্ধদরথপরিল়াহতায কাযস্স অস্সাসপস্সাসা সুখুমতরা হুত্ৰা পৰত্তন্তি. পামোজ্জং উপ্পজ্জতীতি অস্সাসপস্সাসানং সুখুমতরভাৰেন আরম্মণস্স সন্ততরতায, কম্মট্ঠানস্স চ ৰীথিপটিপন্নতায ভাৰনাচিত্তসহগতো পমোদো খুদ্দিকাদিভেদা তরুণপীতি উপ্পজ্জতি. চিত্তং ৰিৰত্ততীতি অনুক্কমেন অস্সাসপস্সাসানং অতিৰিয সুখুমতরভাৰপ্পত্তিযা অনুপট্ঠহনে ৰিচেতব্বাকারপ্পত্তেহি চিত্তং ৰিনিৰত্ততীতি কেচি. ভাৰনাবলেন পন সুখুমতরভাৰপ্পত্তেসু অস্সাসপস্সাসেসু তত্থ পটিভাগনিমিত্তে উপ্পন্নে পকতিঅস্সাসপস্সাসতো চিত্তং নিৰত্ততি. উপেক্খা সণ্ঠাতীতি তস্মিং পটিভাগনিমিত্তে উপচারপ্পনাভেদে সমাধিম্হি উপ্পন্নে পুন ঝাননিব্বত্তনত্থং ব্যাপারাভাৰতো অজ্ঝুপেক্খনং হোতীতি. সা পনাযং উপেক্খা তত্রমজ্ঝত্তুপেক্খাতি ৰেদিতব্বা.

ইমেহি নৰহি আকারেহীতি ইমেহি যথাৰুত্তেহি নৰহি পকারেহি পৰত্তা. দীঘং অস্সাসপস্সাসা কাযোতি দীঘাকারা অস্সাসপস্সাসা চুণ্ণৰিচুণ্ণাপি সমূহট্ঠেন কাযো. অস্সাসপস্সাসে নিস্সায উপ্পন্ননিমিত্তম্পেত্থ অস্সাসপস্সাসসমঞ্ঞমেৰ ৰুত্তং. উপট্ঠানং সতীতি আরম্মণং উপগন্ত্ৰা তিট্ঠতীতি সতি উপট্ঠানং নাম. অনুপস্সনা ঞাণন্তি সমথৰসেন নিমিত্তস্স অনুপস্সনা, ৰিপস্সনাৰসেন অস্সাসপস্সাসে, তন্নিস্সযঞ্চ কাযং ‘‘রূপ’’ন্তি, চিত্তং তংসম্পযুত্তধম্মে চ ‘‘অরূপ’’ন্তি ৰৰত্থপেত্ৰা নামরূপস্স অনুপস্সনা চ ঞাণং, তত্থ যথাভূতাৰবোধো. কাযো উপট্ঠানন্তি সো কাযো আরম্মণকরণৰসেন উপগন্ত্ৰা সতি এত্থ তিট্ঠতীতি উপট্ঠানং নাম. এত্থ চ ‘‘কাযো উপট্ঠান’’ন্তি ইমিনা ইতরকাযস্সাপি সঙ্গহো হোতি যথাৰুত্তসম্মসনচারস্সাপি ইধ ইচ্ছিতত্তা. নো সতীতি সো কাযো সতি নাম ন হোতি. সতি উপট্ঠানঞ্চেৰ সতি চ সরণট্ঠেন, উপতিট্ঠনট্ঠেন চ. তায সতিযাতি যথাৰুত্তায সতিযা. তেন ঞাণেনাতি যথাৰুত্তেনেৰ ঞাণেন. তং কাযন্তি তং অস্সাসপস্সাসকাযঞ্চেৰ তন্নিস্সযরূপকাযঞ্চ. অনুপস্সতীতি ঝানসম্পযুত্তঞাণেন চেৰ ৰিপস্সনাঞাণেন চ অনু অনু পস্সতি. তেন ৰুচ্চতি কাযে কাযানুপস্সনাসতিপট্ঠানভাৰনাতি তেন অনুপস্সনেন যথাৰুত্তে কাযে অযং কাযানুপস্সনাসতিপট্ঠানভাৰনাতি ৰুচ্চতি.

ইদং ৰুত্তং হোতি – যা অযং যথাৰুত্তে অস্সাসপস্সাসকাযে, তস্স নিস্সযভূতে করজকাযে চ কাযস্সেৰ অনুপস্সনা অনুদকভূতায মরীচিযা উদকানুপস্সনা ৰিয ন অনিচ্চাদিসভাৰে কাযে নিচ্চাদিভাৰানুপস্সনা, অথ খো যথারহং অনিচ্চদুক্খানত্তাসুভভাৰস্সেৰানুপস্সনা. অথ ৰা কাযে ‘‘অহ’’ন্তি ৰা ‘‘মম’’ন্তি ৰা ‘‘ইত্থী’’তি ৰা ‘‘পুরিসো’’তি ৰা গহেতব্বস্স কস্সচি অভাৰতো তাদিসং অননুপস্সিত্ৰা কাযমত্তস্সেৰ অনুপস্সনা কাযানুপস্সনা, তায কাযানুপস্সনায সম্পযুত্তা সতিযেৰ উপট্ঠানং সতিপট্ঠানং, তস্স ভাৰনা ৰড্ঢনা কাযানুপস্সনাসতিপট্ঠানভাৰনাতি.

এস নযোতি ‘‘নৰহি আকারেহী’’তিআদিনা ৰুত্তৰিধিং রস্স-পদে অতিদিসতি. এত্থাতি এতস্মিং যথাদস্সিতে ‘‘কথং দীঘং অস্সসন্তো’’তিআদিনা (ম. নি. ৩.১৪৮; সং. নি. ৫.৯৮৬; পারা. ১৬৫) আগতে পাল়িনযে. ইধাতি ইমস্মিং রস্সপদৰসেন আগতে পাল়িনযে.

অযন্তি যোগাৰচরো. অদ্ধানৰসেনাতি দীঘকালৰসেন. ইত্তরৰসেনাতি পরিত্তকালৰসেন. ইমেহি আকারেহীতি ইমেহি নৰহি আকারেহি.

তাদিসোতি দীঘো, রস্সো চ. চত্তারো ৰণ্ণাতি চত্তারো আকারা, তে চ দীঘাদযো এৰ. নাসিকগ্গে ৰ ভিক্খুনোতি গাথাবন্ধসুখত্থং রস্সং কত্ৰা ৰুত্তং ‘‘নাসিকগ্গে ৰা’’তি, ৰা-সদ্দো অনিযমত্থো, তেন উত্তরোট্ঠং সঙ্গণ্হাতি.

২২০. সব্বকাযপটিসংৰেদীতি সব্বস্স কাযস্স পটি পটি পচ্চেকং সম্মদেৰ ৰেদনসীলো জাননসীলো, তস্স ৰা পটি পটি সম্মদেৰ ৰেদো এতস্স অত্থি, তং ৰা পটি পটি সম্মদেৰ ৰেদমানোতি অত্থো. তত্থ তত্থ সব্ব-গ্গহণেন অস্সাসাদিকাযস্স অনৰসেসপরিযাদানে সিদ্ধেপি অনেককলাপসমুদাযভাৰতো তস্স সব্বেসম্পি ভাগানং সংৰেদনদস্সনত্থং পটি-সদ্দগ্গহণং. তত্থ সক্কচ্চকারীভাৰদস্সনত্থং সং-সদ্দগ্গহণন্তি ইমমত্থং দস্সেন্তো ‘‘সকলস্সা’’তিআদিমাহ. তত্থ যথা সমানেপি অস্সাসপস্সাসেসু যোগিনো পটিপত্তিৰিধানে পচ্চেকং সক্কচ্চংযেৰ পটিপজ্জিতব্বন্তি দস্সেতুং ৰিসুং দেসনা কতা, এৰং তমেৰত্থং দীপেতুং সতিপি অত্থস্স সমানতায ‘‘সকলস্সা’’তিআদিনা পদদ্ৰযস্স ৰিসুং ৰিসুং অত্থৰণ্ণনা কতাতি ৰেদিতব্বং. পাকটং করোন্তোতি ৰিভূতং করোন্তো, সব্বসো ৰিভাৰেন্তোতি অত্থো. পাকটীকরণং ৰিভাৰনং তত্থ অসম্মুয্হনং ঞাণেনেৰ নেসং পৰত্তনেন হোতীতি দস্সেন্তো ‘‘এৰং ৰিদিতং করোন্তো’’তিআদিমাহ. তত্থ তস্মাতি যস্মা ঞাণসম্পযুত্তচিত্তেনেৰ অস্সাসপস্সাসে পৰত্তেতি, ন ৰিপ্পযুত্তচিত্তেন, তস্মা এৰংভূতো সব্বকাযপটিসংৰেদী অস্সসিস্সামি পস্সসিস্সামীতি সিক্খতীতি ৰুচ্চতি বুদ্ধাদীহীতি যোজনা. চুণ্ণৰিচুণ্ণৰিসটেতি অনেককলাপতায চুণ্ণৰিচুণ্ণভাৰেন ৰিসটে. আদি পাকটো হোতি সতিযা, ঞাণস্স চ ৰসেন তথা পুব্বাভিসঙ্খারস্স পৰত্তত্তা. তাদিসেন ভৰিতব্বন্তি চতুত্থপুগ্গলসদিসেন ভৰিতব্বং, পগেৰ সতিং, ঞাণঞ্চ পচ্চুপট্ঠপেত্ৰা তীসুপি ঠানেসু ঞাণসম্পযুত্তমেৰ চিত্তং পৰত্তেতব্বন্তি অধিপ্পাযো.

এৰন্তি ৰুত্তপ্পকারেন সব্বকাযপটিসংৰেদনৰসেনেৰ. ঘটতীতি উস্সহতি. ৰাযমতীতি ৰাযামং করোতি, মনসিকারং পৰত্তেতীতি অত্থো. তথাভূতস্সাতি আনাপানস্সতিং ভাৰেন্তস্স. সংৰরোতি সতি, ৰীরিযম্পি ৰা. তায সতিযাতি যা আনাপানে আরব্ভ পৰত্তা সতি, তায. তেন মনসিকারেনাতি যো সো তত্থ সতিপুব্বঙ্গমো ভাৰনামনসিকারো, তেন সদ্ধিন্তি অধিপ্পাযো. আসেৰতীতি ‘‘তিস্সো সিক্খাযো’’তি ৰুত্তে অধিকুসলধম্মে আসেৰতি. তদাসেৰনঞ্হেত্থ সিক্খনন্তি অধিপ্পেতং.

পুরিমনযেতি পুরিমস্মিং ভাৰনানযে, পঠমৰত্থুদ্ৰযেতি অধিপ্পাযো. তত্থাপি কামং ঞাণুপ্পাদনং লব্ভতেৰ অস্সাসপস্সাসানং যাথাৰতো দীঘরস্সভাৰাৰবোধসব্ভাৰতো, তথাপি তং ন দুক্করং যথাপৰত্তানং তেসং গহণমত্তভাৰতোতি তত্থ ৰত্তমানকালপ্পযোগো কতো. ইদং পন দুক্করং পুরিসস্স খুরধারাযং গমনসদিসং, তস্মা সাতিসযেনেত্থ পুব্বাভিসঙ্খারেন ভৰিতব্বন্তি দীপেতুং অনাগতকালপ্পযোগো কতোতি ইমমত্থং দস্সেতুং ‘‘তত্থ যস্মা’’তিআদি ৰুত্তং. তত্থ ঞাণুপ্পাদনাদীসূতি আদি-সদ্দেন কাযসঙ্খারপস্সম্ভনপীতিপটিসংৰেদনাদিং সঙ্গণ্হাতি. কেচি পনেত্থ ‘‘সংৰরসমাদানানং সঙ্গহো’’তি ৰদন্তি.

কাযসঙ্খারন্তি অস্সাসপস্সাসং. সো হি চিত্তসমুট্ঠানোপি সমানো করজকাযপ্পটিবদ্ধৰুত্তিতায তেন সঙ্খরীযতীতি কাযসঙ্খারোতি ৰুচ্চতি. যো পন ‘‘কাযসঙ্খারো ৰচীসঙ্খারো’’তি (ম. নি. ১.১০২) এৰমাগতো কাযসঙ্খারো চেতনালক্খণো সতিপি দ্ৰারন্তরুপ্পত্তিযং যেভুয্যৰুত্তিযা, তব্বহুলৰুত্তিযা চ কাযদ্ৰারেন লক্খিতো, সো ইধ নাধিপ্পেতো. পস্সম্ভেন্তোতিআদীসু পচ্ছিমং পচ্ছিমং পদং পুরিমস্স পুরিমস্স অত্থৰচনং, তস্মা পস্সম্ভনং নাম ৰূপসমনং, তঞ্চ তথাপযোগে অসতি উপ্পজ্জনারহস্স ওল়ারিকস্স কাযসঙ্খারস্স পযোগসম্পত্তিযা অনুপ্পাদনন্তি দট্ঠব্বং. তত্রাতি ‘‘ওল়ারিকং কাযসঙ্খারং পস্সম্ভেন্তো’’তি এত্থ. অপরিগ্গহিতকালেতি কম্মট্ঠানস্স অনারদ্ধকালে, ততো এৰ কাযচিত্তানম্পি অপরিগ্গহিতকালে. ‘‘নিসীদতি পল্লঙ্কং আভুজিত্ৰা উজুং কাযং পণিধাযা’’তি হি ইমিনা কাযপরিগ্গহো, ‘‘পরিমুখং সতিং উপট্ঠপেত্ৰা’’তি ইমিনা চিত্তপরিগ্গহো ৰুত্তো. তেনেৰাহ ‘‘কাযোপি চিত্তম্পি পরিগ্গহিতা হোন্তী’’তি. কাযোতি করজকাযো. সদরথাতি সপরিল়াহা, সা চ নেসং সদরথতা গরুভাৰেন ৰিয ওল়ারিকতায অৰিনাভাৰিনীতি আহ ‘‘ওল়ারিকা’’তি. বলৰতরাতি সবলা থূলা. সন্তা হোন্তীতি চিত্তং তাৰং বহিদ্ধা ৰিক্খেপাভাৰেন একগ্গং হুত্ৰা কম্মট্ঠানং পরিগ্গহেত্ৰা পৰত্তমানং সন্তং হোতি ৰূপসন্তং, ততো এৰ তংসমুট্ঠানা রূপধম্মা লহুমুদুকম্মঞ্ঞভাৰপ্পত্তা, তদনুগুণতায সেসং তিসন্ততিরূপন্তি এৰং চিত্তে, কাযে চ ৰূপসন্তে পৰত্তমানে তন্নিস্সিতা অস্সাসপস্সাসা সন্তসভাৰা অনুক্কমেন সুখুমতরসুখুমতমা হুত্ৰা পৰত্তন্তি. তেন ৰুত্তং ‘‘যদা পনস্স কাযোপী’’তিআদি.

আভুজনং আভোগো, ‘‘পস্সম্ভেমী’’তি পঠমাৰজ্জনা. সম্মা অনু অনু আহরণং সমন্নাহারো, তস্মিংযেৰ অত্থে অপরাপরং পৰত্তআৰজ্জনা. তস্সেৰ অত্থস্স মনসি করণং চিত্তে ঠপনং মনসিকারো. ৰীমংসা পচ্চৰেক্খণা.

সারদ্ধেতি সদরথে সপরিল়াহে. অধিমত্তন্তি বলৰং ওল়ারিকং. লিঙ্গৰিপল্লাসেন ৰুত্তং. কাযসঙ্খারোতি হি অধিপ্পেতো. ‘‘অধিমত্তং হুত্ৰা পৰত্ততী’’তি কিরিযাৰিসেসনং ৰা এতং. সুখুমন্তি এত্থাপি এসেৰ নযো. কাযম্হীতি এত্থ ‘‘চিত্তে চা’’তি আনেত্ৰা সম্বন্ধিতব্বং.

২২১. পঠমজ্ঝানতো ৰুট্ঠায করিযমানং দুতিযজ্ঝানস্স নানাৰজ্জনং পরিকম্মং পঠমজ্ঝানং ৰিয দূরসমুস্সারিতপটিপক্খন্তি কত্ৰা তংসমুট্ঠানো কাযসঙ্খারো পঠমজ্ঝানে চ দুতিযজ্ঝানূপচারে চ ওল়ারিকোতি সদিসো ৰুত্তো. এস নযো সেসূপচারদ্ৰযেপি. অথ ৰা দুতিযজ্ঝানাদীনং অধিগমায পটিপজ্জতো দুক্খাপটিপদাদিৰসেন কিলমতো যোগিনো কাযকিলমথচিত্তূপঘাতাদিৰসেন, ৰিতক্কাদিসঙ্খোভেন চ সপরিফন্দতায চিত্তপ্পৰত্তিযা দুতিযজ্ঝানাদিউপচারেসু কাযসঙ্খারস্স ওল়ারিকতা ৰেদিতব্বা. অতিসুখুমোতি অঞ্ঞত্থ লব্ভমানো কাযসঙ্খারো চতুত্থজ্ঝানে অতিক্কন্তসুখুমো. সুখুমভাৰোপিস্স তত্থ নত্থি, কুতো ওল়ারিকতা অপ্পৰত্তনতো. তেনাহ ‘‘অপ্পৰত্তিমেৰ পাপুণাতী’’তি.

লাভিস্স সতো অনুপুব্বসমাপত্তিসমাপজ্জনৰেলং, একাসনেনেৰ ৰা সব্বেসং ঝানানং পটিলাভং সন্ধায মজ্ঝিমভাণকা হেট্ঠিমহেট্ঠিমজ্ঝানতো উপরূপরিঝানূপচারেপি সুখুমতরং ইচ্ছন্তি. তত্থ হি সোপচারানং ঝানানং উপরূপরি ৰিসেসৰন্ততা, সন্ততা চ সম্ভৰেয্য, একাৰজ্জনূপচারং ৰা সন্ধায এৰং ৰুত্তং. এৰঞ্হি হেট্ঠা ৰুত্তৰাদেন ইমস্স ৰাদস্স অৰিরোধো সিদ্ধো ভিন্নৰিসযত্তা. সব্বেসঞ্ঞেৰাতি উভযেসম্পি. যস্মা তে সব্বেপি ৰুচ্চমানেন ৰিধিনা পস্সদ্ধিমিচ্ছন্তিযেৰ. ‘‘অপরিগ্গহিতকালে পৰত্তকাযসঙ্খারো পরিগ্গহিতকালে পটিপ্পস্সম্ভতী’’তি ইদং সদিসসন্তানতায ৰুত্তং. ন হি তে এৰ ওল়ারিকা অস্সাসাদযো সুখুমা হোন্তি. পস্সম্ভনাকারো পন নেসং হেট্ঠা ৰুত্তোযেৰ.

মহাভূতপরিগ্গহে সুখুমোতি চতুধাতুমুখেন ৰিপস্সনাভিনিৰেসং সন্ধায ৰুত্তং. সকলরূপপরিগ্গহে সুখুমো ভাৰনায উপরূপরি পণীতভাৰতো. তেনেৰাহ ‘‘রূপারূপপরিগ্গহে সুখুমো’’তি. লক্খণারম্মণিকৰিপস্সনাতি কলাপসম্মসনমাহ. নিব্বিদানুপস্সনতো পট্ঠায বলৰৰিপস্সনা. ততো ওরং দুব্বলৰিপস্সনা. পুব্বে ৰুত্তনযেনাতি ‘‘অপরিগ্গহিতকালে’’তিআদিনা সমথনযে ৰুত্তেন নযেন ‘‘অপরিগ্গহে পৰত্তো কাযসঙ্খারো মহাভূতপরিগ্গহে পটিপ্পস্সম্ভতী’’তিআদিনা ৰিপস্সনানযেপি পটিপ্পস্সদ্ধি যোজেতব্বাতি ৰুত্তং হোতি.

অস্সাতি ইমস্স ‘‘পস্সম্ভযং কাযসঙ্খার’’ন্তি পদস্স. চোদনাসোধনাহীতি অনুযোগপরিহারেহি. এৰন্তি ইদানি ৰুচ্চমানাকারেন.

কথন্তি যং ইদং ‘‘পস্সম্ভযং…পে… সিক্খতী’’তি (পটি. ম. ১.১৭১) ৰুত্তং, তং কথং কেন পকারেন কাযসঙ্খারস্স পস্সম্ভনং, যোগিনো চ সিক্খনং হোতীতি কথেতুকম্যতায পুচ্ছিত্ৰা কাযসঙ্খারে সরূপতো, ওল়ারিকসুখুমতো, ৰূপসমতো, অনুযোগপরিহারতো চ দস্সেতুং ‘‘কতমে কাযসঙ্খারা’’তিআদি আরদ্ধং. তত্থ কাযিকাতি রূপকাযে ভৰা. কাযপটিবদ্ধাতি কাযসন্নিস্সিতা. কাযে সতি হোন্তি, অসতি ন হোন্তি, ততো এৰ তে অকাযসমুট্ঠানাপি কাযেন সঙ্খরীযন্তীতি কাযসঙ্খারা. পস্সম্ভেন্তোতি ওল়ারিকোল়ারিকং পস্সম্ভেন্তো. সেসপদদ্ৰযং তস্সেৰ ৰেৰচনং. ওল়ারিকঞ্হি কাযসঙ্খারং অৰূপসন্তসভাৰং সন্নিসীদাপেন্তো ‘‘পস্সম্ভেন্তো’’তি ৰুচ্চতি, অনুপ্পাদনিরোধং পাপেন্তো ‘‘নিরোধেন্তো’’তি, সুট্ঠু সন্তসভাৰং নযন্তো ‘‘ৰূপসমেন্তো’’তি.

যথারূপেহীতি যাদিসেহি. কাযসঙ্খারেহীতি ওল়ারিকেহি কাযসঙ্খারেহি. আনমনাতি অভিমুখভাৰেন কাযস্স নমনা. ৰিনমনাতি ৰিসুং ৰিসুং পস্সতো নমনা. সন্নমনাতি সব্বতো, সুট্ঠু ৰা নমনা. পণমনাতি পচ্ছতো নমনা. ইঞ্জনাদীনি আনমনাদীনং ৰেৰচনানি, অধিমত্তানি ৰা অভিমুখং চলনাদীনি আনমনাদযো, মন্দানি ইঞ্জনাদযো. পস্সম্ভযং কাযসঙ্খারন্তি তথারূপং আনমনাদীনং কারণভূতং ওল়ারিকং কাযসঙ্খারং পস্সম্ভেন্তো. তস্মিং হি পস্সম্ভিতে আনমনাদযোপি পস্সম্ভিতা এৰ হোন্তি.

সন্তং সুখুমন্তি যথারূপেহি কাযসঙ্খারেহি কাযস্স অপরিপ্ফন্দনহেতূহি আনমনাদযো ন হোন্তি, তথারূপং দরথাভাৰতো সন্তং, অনোল়ারিকতায সুখুমং. পস্সম্ভযং কাযসঙ্খারন্তি সামঞ্ঞতো একং কত্ৰা ৰদতি. অথ ৰা পুব্বে ওল়ারিকোল়ারিকং কাযসঙ্খারং পটিপ্পস্সম্ভেন্তো অনুক্কমেন কাযস্স অপরিপ্ফন্দনহেতুভূতে সুখুমসুখুমতরে উপ্পাদেত্ৰা তেপি পটিপ্পস্সম্ভেত্ৰা পরমসুখুমতায কোটিপ্পত্তং যং কাযসঙ্খারং পটিপ্পস্সম্ভেতি, তং সন্ধায ৰুত্তং ‘‘সন্তং সুখুমং পস্সম্ভযং কাযসঙ্খার’’ন্তি.

ইতীতিআদি চোদকৰচনং. তত্থ ইতীতি পকারত্থে নিপাতো. কিরাতি অরুচিসূচনে, এৰং চেতি অত্থো. অযঞ্হেত্থ অধিপ্পাযো – ৰুত্তপ্পকারেন যদি অতিসুখুমম্পি কাযসঙ্খারং পস্সম্ভেতীতি. এৰং সন্তেতি এৰং সতি তযা ৰুত্তাকারে লব্ভমানে. ৰাতূপলদ্ধিযাতি ৰাতস্স উপলদ্ধিযা. চ-সদ্দো সমুচ্চযত্থো, অস্সাসাদিৰাতারম্মণস্স চিত্তস্স পভাৰনা উপ্পাদনা পৰত্তনা ন হোতি, তে চ তেন পস্সম্ভেতব্বাতি অধিপ্পাযো. অস্সাসপস্সাসানঞ্চ ভাৰনাতি ওল়ারিকে অস্সাসপস্সাসে ভাৰনায পটিপ্পস্সম্ভেত্ৰা সুখুমানং তেসং পভাৰনা চ ন হোতি, উভযেসং তেসং তেন পটিপ্পস্সম্ভেতব্বতো. আনাপানস্সতিযাতি আনাপানারম্মণায সতিযা চ পৰত্তনং ন হোতি, আনাপানানং অভাৰতো. ততো এৰ তংসম্পযুত্তস্স আনাপানস্সতিসমাধিস্স চ পভাৰনা উপ্পাদনাপি ন হোতি. ন হি কদাচি আরম্মণেন ৰিনা সারম্মণধম্মা সম্ভৰন্তি. ন চ নং তন্তি এত্থ নন্তি নিপাতমত্তং. তং ৰুত্তৰিধানং সমাপত্তিং পণ্ডিতা পঞ্ঞৰন্তো ন চেৰ সমাপজ্জন্তিপি ততো ন ৰুট্ঠহন্তিপীতি যোজনা. এৰং চোদকো সব্বেন সব্বং অভাৰূপনযনং পস্সম্ভনন্তি অধিপ্পাযেন চোদেতি.

পুন ইতি কিরাতিআদি যথাৰুত্তায চোদনায ৰিস্সজ্জনা. তত্থ কিরাতি ‘‘যদী’’তি এতস্স অত্থে নিপাতো. ইতি কির সিক্খতি, মযা ৰুত্তাকারেন যদি সিক্খতীতি অত্থো. এৰং সন্তেতি এৰং পস্সম্ভনে সতি. পভাৰনা হোতীতি যদিপি ওল়ারিকা কাযসঙ্খারা পটিপ্পস্সম্ভন্তি, সুখুমা পন অত্থেৰাতি অনুক্কমেন পরমসুখুমভাৰপ্পত্তস্স ৰসেন নিমিত্তুপ্পত্তিযা আনাপানস্সতিযা, আনাপানস্সতিসমাধিস্স চ পভাৰনা ইজ্ঝতেৰাতি অধিপ্পাযো.

যথা কথং ৰিযাতি যথাৰুত্তৰিধানং তং কথং ৰিয দট্ঠব্বং, অত্থি কিঞ্চি তদত্থসম্পটিপাদনে ওপম্মন্তি অধিপ্পাযো. ইদানি ওপম্মং দস্সেতুং ‘‘সেয্যথাপী’’তিআদি ৰুত্তং. তত্থ সেয্যথাপীতি ওপম্মত্থে নিপাতো. কংসেতি কংসভাজনে. নিমিত্তন্তি নিমিত্তস্স, তেসং সদ্দানং পৰত্তাকারস্সাতি অত্থো. সামিঅত্থে হি ইদং উপযোগৰচনং. সুগ্গহিতত্তাতি সুট্ঠু গহিতত্তা. সুমনসিকতত্তাতি সুট্ঠু চিত্তে ঠপিতত্তা. সূপধারিতত্তাতি সম্মদেৰ উপধারিতত্তা সল্লক্খিতত্তা. সুখুমকা সদ্দাতি অনুরৰে আহ, যে অপ্পকা. অপ্পত্থো হি অযং ক-সদ্দো. সুখুমসদ্দনিমিত্তারম্মণতাপীতি সুখুমো সদ্দোৰ নিমিত্তং সুখুমসদ্দনিমিত্তং, তদারম্মণতাযপি. কিং ৰুত্তং হোতি? কামং তদাসুখুমাপি সদ্দা নিরুদ্ধা, সদ্দনিমিত্তস্স পন সুগ্গহিতত্তা সুখুমতরসদ্দনিমিত্তারম্মণভাৰেনাপি চিত্তং পৰত্ততি. আদিতো পট্ঠায হি তস্স তস্স নিরুদ্ধস্স সদ্দস্স নিমিত্তং অৰিক্খিত্তেন চিত্তেন উপধারেন্তস্স অনুক্কমেন পরিযোসানে অতিসুখুমসদ্দনিমিত্তম্পি আরম্মণং কত্ৰা চিত্তং পৰত্ততেৰ. চিত্তং ন ৰিক্খেপং গচ্ছতি তস্মিং যথাউপট্ঠিতে নিমিত্তে সমাধানসব্ভাৰতো.

এৰং সন্তেতিআদি ৰুত্তস্সেৰত্থস্স নিগমনৰসেন ৰুত্তং. তত্থ যস্স সুত্তপদস্স সদ্ধিং চোদনাসোধনাহি অত্থো ৰুত্তো, তং উদ্ধরিত্ৰা কাযানুপস্সনাসতিপট্ঠানানি ৰিভাগতো দস্সেতুং ‘‘পস্সম্ভয’’ন্তিআদি ৰুত্তং. তং সব্বং ৰুত্তনযত্তা উত্তানমেৰ.

২২২. আদিকম্মিকস্স কম্মট্ঠানৰসেনাতি সমথকম্মট্ঠানং সন্ধায ৰুত্তং. ৰিপস্সনং কম্মট্ঠানং পন ইতরচতুক্কেসুপি লব্ভতেৰ. এত্থাতি পঠমচতুক্কে. পঞ্চসন্ধিকন্তি পঞ্চপব্বং, পঞ্চভাগন্তি অত্থো.

কম্মট্ঠানস্স উগ্গণ্হনন্তি কম্মট্ঠানগন্থস্স উগ্গণ্হনং. তদত্থপরিপুচ্ছা কম্মট্ঠানস্স পরিপুচ্ছনা. অথ ৰা গন্থতো, অত্থতো চ কম্মট্ঠানস্স উগ্গণ্হনং উগ্গহো. তত্থ সংসযপরিপুচ্ছনা পরিপুচ্ছা. কম্মট্ঠানস্স উপট্ঠানন্তি নিমিত্তুপট্ঠানং, এৰং ভাৰনমনুযুঞ্জন্তস্স ‘‘এৰমিধ নিমিত্তং উপট্ঠাতী’’তি উপধারণং, তথা কম্মট্ঠানপ্পনা ‘‘এৰং ঝানমপ্পেতী’’তি. কম্মট্ঠানস্স লক্খণন্তি গণনানুবন্ধনাফুসনানং ৰসেন ভাৰনং উস্সুক্কাপেত্ৰা ঠপনায সম্পত্তি, ততো পরম্পি ৰা সল্লক্খণাদিৰসেন মত্থকপ্পত্তীতি কম্মট্ঠানসভাৰস্স সল্লক্খণং. তেনাহ ‘‘কম্মট্ঠানসভাৰূপধারণন্তি ৰুত্তং হোতী’’তি.

অত্তনাপি ন কিলমতি ওধিসো কম্মট্ঠানস্স উগ্গণ্হনতো. ততো এৰ আচরিযম্পি ন ৰিহেসেতি ধম্মাধিকরণম্পি ভাৰনায মত্থকং পাপনতো. তস্মাতি তং নিমিত্তং অত্তনো অকিলমনআচরিযাৰিহেসনহেতু. থোকন্তি থোকং থোকং. উগ্গহেতব্বতো উগ্গহো, সব্বোপি কম্মট্ঠানৰিধি, ন পুব্বে ৰুত্তউগ্গহমত্তং. আচরিযতো উগ্গহো আচরিযুগ্গহো, ততো. একপদম্পীতি এককোট্ঠাসম্পি.

২২৩. অনুৰহনাতি অস্সাসপস্সাসানং অনুগমনৰসেন সতিযা নিরন্তরং অনুপৰত্তনা. ফুসনাতি অস্সাসপস্সাসে গণেন্তস্স গণনং পটিসংহরিত্ৰা তে সতিযা অনুবন্ধন্তস্স যথা অপ্পনা হোতি, তথা চিত্তং ঠপেন্তস্স চ নাসিকগ্গাদিট্ঠানস্স নেসং ফুসনা. যস্মা পন গণনাদিৰসেন ৰিয ফুসনাৰসেন ৰিসুং মনসিকারো নত্থি, ফুট্ঠফুট্ঠট্ঠানেযেৰ গণনাদি কাতব্বন্তি দস্সেতুং ইধ ফুসনাগহণন্তি দীপেন্তো ‘‘ফুসনাতি ফুট্ঠট্ঠান’’ন্তি আহ. ঠপনাতি সমাধানং. তং হি সম্মদেৰ আরম্মণে চিত্তস্স আধানং ঠপনং হোতি. তথা হি সমাধি ‘‘চিত্তস্স ঠিতি সণ্ঠিতী’’তি (ধ. স. ১১.১৫) নিদ্দিট্ঠো. সমাধিপ্পধানা পন অপ্পনাতি আহ ‘‘ঠপনাতি অপ্পনা’’তি. অনিচ্চতাদীনং সল্লক্খণতো সল্লক্খণা ৰিপস্সনা. পৰত্ততো, নিমিত্ততো চ ৰিনিৰট্টনতো ৰিৰট্টনা নাম মগ্গো. সকলসংকিলেসপটিপ্পস্সদ্ধিভাৰতো সব্বসো সুদ্ধীতি পারিসুদ্ধি ফলং. তেসন্তি ৰিৰট্টনাপারিসুদ্ধীনং. পটিপস্সনাতি পটি পটি দস্সনং পেক্খনং. তেনাহ ‘‘পচ্চৰেক্খণা’’তি.

খণ্ডন্তি একং তীণি পঞ্চাতি এৰং গণনায খণ্ডনং. ওকাসেতি গণনৰিধিং সন্ধাযাহ. গণননিস্সিতোৰ ন কম্মট্ঠাননিস্সিতো. ‘‘সিখাপ্পত্তং নু খো’’তি ইদং চিরতরং গণনায মনসি করোন্তস্স ৰসেন ৰুত্তং. সো হি তথা লদ্ধং অৰিক্খেপমত্তং নিস্সায এৰং মঞ্ঞেয্য. ‘‘অস্সাসপস্সাসেসু যো উপট্ঠাতি, তং গহেত্ৰা’’তি ইদং অস্সাসপস্সাসেসু যস্স একোৰ পঠমং উপট্ঠাতি, তং সন্ধায ৰুত্তং, যস্স পন উভোপি উপট্ঠহন্তি, তেন উভযম্পি গহেত্ৰা গণেতব্বং. ‘‘যো উপট্ঠাতী’’তি ইমিনা চ দ্ৰীসু নাসাপুটৰাতেসু যো পাকটতরো উপট্ঠাতি, সো গহেতব্বোতি অযম্পি অত্থো দীপিতোতি দট্ঠব্বং. পৰত্তমানং পৰত্তমানন্তি আমেডিতৰচনেন নিরন্তরং অস্সাসপস্সাসানং উপলক্খণং দস্সেতি. এৰন্তি ৰুত্তপ্পকারেন উপলক্খেত্ৰা ৰাতি অত্থো. পাকটা হোন্তি গণনাৰসেন বহিদ্ধা ৰিক্খেপাভাৰতো.

পলিঘস্স পরিৰত্তনং, তং যত্থ নিক্খিপন্তি, সো পলিঘত্থম্ভো. তিযামরত্তিন্তি অচ্চন্তসংযোগে উপযোগৰচনং. পুরিমনযেনাতি সীঘগণনায, গোপালকগণনাযাতি অত্থো. একো দ্ৰে তীণি চত্তারি পঞ্চাতি গণনাৰিধিদস্সনং. তস্মা অট্ঠাতিআদীসুপি একতো পট্ঠাযেৰ পচ্চেকং অট্ঠাদীনি পাপেতব্বানি. সীঘং সীঘং গণেতব্বমেৰ. কস্মাতি তত্থ কারণং, নিদস্সনঞ্চ দস্সেতি ‘‘গণনপটিবদ্ধে হী’’তিআদিনা. তত্থ অরীযতি তেন নাৰাতি অরিত্তং, পাজনদণ্ডো. অরিত্তেন উপত্থম্ভনং অরিত্তুপত্থম্ভনং, তস্স ৰসেন.

নিপ্পরিযাযতো নিরন্তরপ্পৰত্তি নাম ঠপনাযমেৰাতি আহ ‘‘নিরন্তরং পৰত্তং ৰিযা’’তি. অন্তো পৰিসন্তং ৰাতং মনসি করোন্তো অন্তো চিত্তং পৰেসেতি নাম. বহি চিত্তনীহরণেপি এসেৰ নযো. ৰাতব্ভাহতন্তি অব্ভন্তরগতং ৰাতং বহুলং মনসি করোন্তস্স ৰাতেন তং ঠানং অব্ভাহতং ৰিয, মেদেন পূরিতং ৰিয চ হোতি, তথা উপট্ঠাতি. নীহরতো ফুট্ঠোকাসং মুঞ্চিত্ৰা, তথা পন নীহরতো ৰাতস্স গতিসমন্নেসনমুখেন নানারম্মণেসু চিত্তং ৰিধাৰতীতি আহ ‘‘পুথুত্তারম্মণে চিত্তং ৰিক্খিপতী’’তি.

এতন্তি এতং অস্সাসপস্সাসজাতং.

২২৪. অনুগমনন্তি পৰত্তপৰত্তানং অস্সাসপস্সাসানং আরম্মণকরণৰসেন সতিযা অনু অনু পৰত্তনং অনুগচ্ছনং. তেনেৰাহ ‘‘তঞ্চ খো ন আদিমজ্ঝপরিযোসানানুগমনৰসেনা’’তি. নাভি আদি তত্থ পঠমং উপ্পজ্জনতো. পঠমুপ্পত্তিৰসেন হি ইধ আদিচিন্তা, ন উপ্পত্তিমত্তৰসেন. তথা হি তে নাভিতো পট্ঠায যাৰ নাসিকগ্গা সব্বত্থ উপ্পজ্জন্তেৰ. যত্থ যত্থ চ উপ্পজ্জন্তি, তত্থ তত্থেৰ ভিজ্জন্তি ধম্মানং গমনাভাৰতো. যথাপচ্চযং পন দেসন্তরুপ্পত্তিযং গতিসমঞ্ঞা. হদযং মজ্ঝন্তি হদযসমীপং তস্স উপরিভাগো মজ্ঝং. নাসিকগ্গং পরিযোসানন্তি নাসিকট্ঠানং তস্স পরিযোসানং অস্সাসপস্সাসসমঞ্ঞায তদৰধিভাৰতো. তথা হেতে ‘‘চিত্তসমুট্ঠানা’’তি ৰুত্তা, ন চ বহিদ্ধা চিত্তসমুট্ঠানানং সম্ভৰো অত্থি. তেনাহ ‘‘অব্ভন্তরং পৰিসনৰাতস্স নাসিকগ্গং আদী’’তি. পৰিসননিক্খমনপরিযাযো পন তংসদিসৰসেন ৰুত্তোতি ৰেদিতব্বো. ৰিক্খেপগতন্তি ৰিক্খেপং উপগতং, ৰিক্খিত্তং অসমাহিতন্তি অত্থো. সারদ্ধাযাতি সদরথভাৰায. ইঞ্জনাযাতি কম্মট্ঠানমনসিকারস্স চলনায.

ৰিক্খেপগতেন চিত্তেনাতি হেতুম্হি করণৰচনং, ইত্থম্ভূতলক্খণে ৰা. সারদ্ধাতি সদরথা. ইঞ্জিতাতি ইঞ্জনকা চলনকা. তথা ফন্দিতা.

আদিমজ্ঝপরিযোসানৰসেনাতি আদিমজ্ঝপরিযোসানানুগমনৰসেন ন মনসি কাতব্বন্তি সম্বন্ধো. ‘‘অনুবন্ধনায মনসি করোন্তেন ফুসনাৰসেন চ ঠপনাৰসেন চ মনসি কাতব্ব’’ন্তি যেনাধিপ্পাযেন ৰুত্তং, তং ৰিৰরিতুং ‘‘গণনানুবন্ধনাৰসেন ৰিযা’’তিআদিমাহ. তত্থ ৰিসুং মনসিকারো নত্থীতি গণনায, অনুবন্ধনায চ ৰিনা যথাক্কমং কেৰলং ফুসনাৰসেন, ঠপনাৰসেন চ কম্মট্ঠানমনসিকারো নত্থি. ননু ফুসনায ৰিনা ঠপনায ৰিয, ফুসনায ৰিনা গণনাযপি মনসিকারো নত্থিযেৰ? যদিপি নত্থি, গণনা পন যথা কম্মট্ঠানমনসিকারস্স মূলভাৰতো পধানভাৰেন গহেতব্বা, এৰং অনুবন্ধনা ঠপনায, তায ৰিনা ঠপনায অসম্ভৰতো. তস্মা সতিপি ফুসনায নানন্তরিকভাৰে গণনানুবন্ধনা এৰ মূলভাৰতো পধানভাৰেন গহেত্ৰা ইতরাসং তদভাৰং দস্সেন্তো আহ ‘‘গণনানুবন্ধনাৰসেন ৰিয হি ফুসনাঠপনাৰসেন ৰিসুং মনসিকারো নত্থী’’তি. যদি এৰং তা কস্মা উদ্দেসে ৰিসুং গহিতাতি আহ ‘‘ফুট্ঠফুট্ঠট্ঠানেযেৰা’’তিআদি. তত্থ ‘‘ফুট্ঠফুট্ঠট্ঠানেযেৰ গণেন্তো’’তি ইমিনা গণনায ফুসনা অঙ্গন্তি দস্সেতি. তেনাহ ‘‘গণনায চ ফুসনায চ মনসি করোতী’’তি. তত্থেৰাতি ফুট্ঠফুট্ঠট্ঠানেযেৰ. তেতি অস্সাসপস্সাসে. সতিযা অনুবন্ধন্তোতি গণনাৰীথিং অনুগন্ত্ৰা সতিযা নিবন্ধন্তো, ফুট্ঠোকাসেযেৰ তে নিরন্তরং উপধারেন্তোতি অত্থো. অপ্পনাৰসেন চিত্তং ঠপেন্তোতি যথা অপ্পনা হোতি, এৰং যথাউপট্ঠিতে নিমিত্তে চিত্তং ঠপেন্তো সমাদহন্তো. অনুবন্ধনায চাতিআদীসু অনুবন্ধনায চ ফুসনায চ ঠপনায চ মনসি করোতীতি ৰুচ্চতীতি যোজনা. স্ৰাযমত্থোতি য্ৰাযং ‘‘ফুট্ঠফুট্ঠট্ঠানেযেৰ গণেন্তো, তত্থেৰ গণনং পটিসংহরিত্ৰা তে সতিযা অনুবন্ধন্তো’’তি চ ৰুত্তো, সো অযমত্থো. যা অচ্চন্তায ন মিনোতি ন ৰিনিচ্ছিনাতি, সা মানস্স সমীপেতি উপমা যথা ‘‘গোণো ৰিয গৰযো’’তি.

২২৫. পঙ্গুল়োতি পীঠসপ্পী. দোলা পেখোলো. কীল়তন্তি কীল়ন্তানং. মাতাপুত্তানন্তি অত্তনো ভরিযায, পুত্তস্স চ. উভো কোটিযোতি আগচ্ছন্তস্স পুরিমকোটিং, গচ্ছন্তস্স পচ্ছিমকোটিন্তি দ্ৰেপি কোটিযো. মজ্ঝন্তি দোলাফলকস্সেৰ মজ্ঝং. উপনিবন্ধনথম্ভো ৰিযাতি উপনিবন্ধনথম্ভো, নাসিকগ্গং, মুখনিমিত্তং ৰা, তস্স মূলে সমীপে ঠত্ৰা. কথং ঠত্ৰা? সতিযা ৰসেন. সতিঞ্হি তত্থ সূপট্ঠিতং করোন্তো যোগাৰচরো তত্থ ঠিতো নাম হোতি, অৰযৰধম্মেন সমুদাযস্স অপদিসিতব্বতো. নিমিত্তেতি নাসিকগ্গাদিনিমিত্তে. সতিযা নিসীদন্তোতি সতিৰসেন নিসীদন্তো. ‘‘সতিঞ্হি তত্থা’’তিআদিনা ঠানে ৰিয ৰত্তব্বং. তত্থাতি ফুট্ঠফুট্ঠট্ঠানে.

২২৬. তেতি নগরস্স অন্তোবহিগতা মনুস্সা, তেসং সঙ্গহা চ হত্থগতা.

২২৭. আদিতো পট্ঠাযাতি উপমেয্যত্থদস্সনতো পট্ঠায. গাথাযং নিমিত্তন্তি উপনিবন্ধনানিমিত্তং. অনারম্মণমেকচিত্তস্সাতি একস্স চিত্তস্স ন আরম্মণং, আরম্মণং ন হোন্তীতি অত্থো. অজানতো চ তযো ধম্মেতি নিমিত্তং অস্সাসো পস্সাসোতি ইমে তযো ধম্মে আরম্মণকরণৰসেন অৰিন্দন্তস্স. চ-সদ্দো ব্যতিরেকে. ভাৰনাতি আনাপানস্সতিসমাধিভাৰনা. নুপলব্ভতীতি ন উপলব্ভতি ন সিজ্ঝতীতি অযং চোদনাগাথায অত্থো, দুতিযা পন পরিহারগাথা সুৰিঞ্ঞেয্যাৰ.

কথন্তি তাসং অত্থং ৰিৰরিতুং কথেতুকম্যতাপুচ্ছা. ইমে তযো ধম্মাতিআদীসু পদযোজনায সদ্ধিং অযমত্থনিদ্দেসো – ইমে নিমিত্তাদযো তযো ধম্মা একচিত্তস্স কথং আরম্মণং ন হোন্তি, তথাপি ন চিমে ন চ ইমে তযো ধম্মা অৰিদিতা হোন্তি, কথং ন চ হোন্তি অৰিদিতা? তেসঞ্হি অৰিদিতত্তে চিত্তঞ্চ কথং ৰিক্খেপং ন গচ্ছতি, পধানঞ্চ ভাৰনায নিপ্ফাদকং ৰীরিযঞ্চ কথং পঞ্ঞাযতি, নীৰরণানং ৰিক্খম্ভকং সম্মদেৰ সমাধানাৰহং ভাৰনানুযোগসঙ্খাতং পযোগঞ্চ যোগী কথং সাধেতি, উপরূপরি লোকিযলোকুত্তরঞ্চ ৰিসেসং কথমধিগচ্ছতীতি.

ইদানি তমত্থং ককচূপমায সাধেতুং ‘‘সেয্যথাপী’’তিআদি ৰুত্তং. ভূমিভাগস্স ৰিসমতায চঞ্চলে রুক্খে ছেদনকিরিযা ন সুকরা সিযা, তথা চ সতি ককচদন্তগতি দুব্বিঞ্ঞেয্যাতি আহ ‘‘সমে ভূমিভাগে’’তি. ককচেনাতি খুদ্দকেন খরপত্তেন. তেনাহ ‘‘পুরিসো’’তি. ফুট্ঠককচদন্তানন্তি ফুট্ঠফুট্ঠককচদন্তানং ৰসেন. তেন ককচদন্তেহি ফুট্ঠফুট্ঠট্ঠানেযেৰ পুরিসস্স সতিযা উপট্ঠানং দস্সেতি. তেনাহ ‘‘ন আগতে ৰা গতে ৰা ককচদন্তে মনসি করোতী’’তি. ককচস্স আকড্ঢনকালে পুরিসাভিমুখং পৰত্তা আগতা. পেল্লনকালে ততো ৰিগতা ‘‘গতা’’তি ৰুত্তা. ন চ আগতা ৰা গতা ৰা ককচদন্তা অৰিদিতা হোন্তি সব্বত্থ সতিযা উপট্ঠিতত্তা ছিন্দিতব্বট্ঠানং অফুসিত্ৰা গচ্ছন্তানং, আগচ্ছন্তানঞ্চ ককচদন্তানং অভাৰতো. পধানন্তি রুক্খস্স ছেদনৰীরিযং. পযোগন্তি তস্সেৰ ছেদনকিরিযং. ৰিসেসন্তি অনেকভাৰাপাদনং, তেন চ সাধেতব্বং পযোজনৰিসেসং.

যথা রুক্খোতিআদি উপমাসংসন্দনং. উপনিবন্ধতি আরম্মণে চিত্তং এতাযাতি সতি উপনিবন্ধনা নাম, তস্সা অস্সাসপস্সাসানং সল্লক্খণস্স নিমিত্তন্তি উপনিবন্ধনানিমিত্তং, নাসিকগ্গং, মুখনিমিত্তং ৰা. এৰমেৰাতি যথাপি সো পুরিসো ককচেন রুক্খং ছিন্দন্তো আগতগতে ককচদন্তে অমনসিকরোন্তোপি ফুট্ঠফুট্ঠট্ঠানেযেৰ সতিযা উপট্ঠপনেন আগতগতে ককচদন্তে জানাতি, সুত্তপদঞ্চ অৰিরজ্ঝন্তো অত্থকিচ্চং সাধেতি, এৰমেৰ. নাসিকগ্গে মুখনিমিত্তেতি দীঘনাসিকো নাসিকগ্গে ইতরো মুখং দসনং নিমীযতি ছাদীযতি এতেনাতি মুখনিমিত্তন্তি লদ্ধনামে উত্তরোট্ঠে.

ইদং পধানন্তি যেন ৰীরিযারম্ভেন আরদ্ধৰীরিযস্স যোগিনো কাযোপি চিত্তম্পি কম্মনিযং ভাৰনাকম্মক্খমং ভাৰনাকম্মযোগ্গং হোতি, ইদং ৰীরিযং পধানন্তি ফলেন হেতুং দস্সেতি. উপক্কিলেসা পহীযন্তীতি চিত্তস্স উপক্কিলেসভূতানি নীৰরণানি ৰিক্খম্ভনৰসেন পহীযন্তি. ৰিতক্কা ৰূপসমন্তীতি ততো এৰ কামৰিতক্কাদযো মিচ্ছাৰিতক্কা উপসমং গচ্ছন্তি, নীৰরণপ্পহানেন ৰা পঠমজ্ঝানাধিগমং দস্সেত্ৰা ৰিতক্কৰূপসমাপদেসেন দুতিযজ্ঝানাদীনমধিগমমাহ. অযং পযোগোতি অযং ঝানাধিগমস্স হেতুভূতো কম্মট্ঠানানুযোগো পযোগো. সংযোজনা পহীযন্তীতি দসপি সংযোজনানি মগ্গপটিপাটিযা সমুচ্ছেদৰসেন পহীযন্তি. অনুসযা ব্যন্তী হোন্তীতি তথা সত্তপি অনুসযা অনুপ্পত্তিধম্মতাপাদনেন ভঙ্গমত্তস্সপি অনৰসেসতো ৰিগতন্তা হোন্তি. এত্থ চ সংযোজনপ্পহানং নাম অনুসযনিরোধেনেৰ হোতি, পহীনেসু চ সংযোজনেসু অনুসযানং লেসোপি ন ভৰিস্সতীতি চ দস্সনত্থং ‘‘সংযোজনা পহীযন্তি অনুসযা ব্যন্তী হোন্তী’’তি ৰুত্তং. অযং ৰিসেসোতি ইমং সমাধিং নিস্সায অনুক্কমেন লব্ভমানো অযং সংযোজনপ্পহানাদিকো ইমস্স সমাধিস্স ৰিসেসোতি অত্থো.

যস্সাতি যেন. অনুপুব্বন্তি অনুক্কমেন. পরিচিতাতি পরিচিণ্ণা. অযং হেত্থ সঙ্খেপত্থো – আনাপানস্সতি যথা বুদ্ধেন ভগৰতা দেসিতা, তথেৰ যেন দীঘরস্সপজাননাদিৰিধিনা অনুপুব্বং পরিচিতা সুট্ঠু ভাৰিতা, ততো এৰ পরিপুণ্ণা সোল়সন্নং ৰত্থূনং পারিপূরিযা সব্বসো পুণ্ণা. সো ভিক্খু ইমং অত্তনো খন্ধাদিলোকং পঞ্ঞোভাসেন পভাসেতি. যথা কিং অব্ভা মুত্তোৰ চন্দিমা অব্ভুপক্কিলেসৰিমুত্তো চন্দিমা তারকরাজা ৰিযাতি.

ইধাতি ককচূপমাযং. অস্সাতি যোগিনো. ইধাতি ৰা ইমস্মিং ঠানে. অস্সাতি উপমাভূতস্স ককচস্স. আগতগতৰসেন যথা তস্স পুরিসস্স অমনসিকারো, এৰং অস্সাসপস্সাসানং আগতগতৰসেন অমনসিকারমত্তমেৰ পযোজনং.

২২৮. নিমিত্তন্তি পটিভাগনিমিত্তং. অৰসেসঝানঙ্গপটিমণ্ডিতাতি অপ্পনাৰিতক্কাদিঅৰসেসঝানঙ্গপটিমণ্ডিতাতি ৰদন্তি, ৰিচারাদীতি পন ৰত্তব্বং নিপ্পরিযাযেন ৰিতক্কস্স অপ্পনাভাৰতো. সো হি পাল়িযং ‘‘অপ্পনা ব্যপ্পনা’’তি (ধ. স. ৭) নিদ্দিট্ঠো, তংসম্পযোগতো ৰা যস্মা ঝানং ‘‘অপ্পনা’’তি অট্ঠকথাৰোহারো, ঝানঙ্গেসু চ সমাধি পধানং, তস্মা তং ‘‘অপ্পনা’’তি দস্সেন্তো ‘‘অৰসেসঝানঙ্গপটিমণ্ডিতা অপ্পনাসঙ্খাতা ঠপনা চ সম্পজ্জতী’’তি আহ. কস্সচি পন গণনাৰসেনেৰ মনসিকারকালতো পভুতীতি এত্থ ‘‘অনুক্কমতো…পে… লঙ্ঘনাকারপ্পত্তং ৰিয হোতী’’তি এত্তকো গন্থো পরিহীনো.

সারদ্ধকাযস্স কস্সচি পুগ্গলস্স. ওনমতি পট্টিকাদীনং পলম্বনেন. ৰিকূজতীতি সদ্দং করোতি. গত্তানিসদকপ্পরাদীনং সন্ধিট্ঠানেসু ৰলিং গণ্হাতি তত্থ তত্থ ৰলিতং হোতি. কস্মা? যস্মা সারদ্ধকাযো গরুকো হোতীতি কাযদরথৰূপসমেন সদ্ধিং সিজ্ঝমানো ওল়ারিকঅস্সাসপস্সাসনিরোধো ব্যতিরেকমুখেন তস্স সাধনং ৰিয ৰুত্তো. ওল়ারিকঅস্সাসপস্সাসনিরোধৰসেনাতি অন্ৰযৰসেন তদত্থসাধনং. তত্থ কাযদরথে ৰূপসন্তেতি চিত্তজরূপানং লহুমুদুকম্মঞ্ঞভাৰেন যো সেসতিসন্ততিরূপানম্পি লহুআদিভাৰো, সো ইধ কাযস্স লহুভাৰোতি অধিপ্পেতো. স্ৰাযং যস্মা চিত্তস্স লহুআদিভাৰেন ৰিনা নত্থি, তস্মা ৰুত্তং ‘‘কাযোপি চিত্তম্পি লহুকং হোতী’’তি.

ওল়ারিকে অস্সাসপস্সাসে নিরুদ্ধেতিআদি হেট্ঠা ৰুত্তনযম্পি ৰিচেতব্বাকারপ্পত্তস্স কাযসঙ্খারস্স ৰিচযনৰিধিং দস্সেতুং আনীতং.

২২৯. উপরূপরি ৰিভূতানীতি ভাৰনাবলেন উদ্ধং উদ্ধং পাকটানি হোন্তি. দেসতোতি পকতিযা ফুসনদেসতো, পুব্বে অত্তনা ফুসনৰসেন উপধারিতট্ঠানতো.

‘‘কত্থ নত্থী’’তি ঠানৰসেন, ‘‘কস্স নত্থী’’তি পুগ্গলৰসেন ৰীমংসিযমানমত্থং একজ্ঝং কত্ৰা ৰিভাৰেতুং ‘‘অন্তোমাতুকুচ্ছিয’’ন্তিআদি ৰুত্তং. তত্থ যথা উদকে নিমুগ্গস্স পুগ্গলস্স নিরুদ্ধোকাসতায অস্সাসপস্সাসা ন পৰত্তন্তি, এৰং অন্তোমাতুকুচ্ছিযং. যথা মতানং সমুট্ঠাপকচিত্তাভাৰতো, এৰং অসঞ্ঞীভূতানং মুচ্ছাপরেতানং, অসঞ্ঞীসু ৰা জাতানং, তথা নিরোধসমাপন্নানং. চতুত্থজ্ঝানসমাপন্নানং পন ধম্মতাৰসেনেৰ নেসং অনুপ্পজ্জনং, তথা রূপারূপভৰসমঙ্গীনং. কেচি পন ‘‘অনুপুব্বতো সুখুমভাৰপ্পত্তিযা চতুত্থজ্ঝানসমাপন্নস্স, রূপভৰে রূপানং ভৰঙ্গস্স চ সুখুমভাৰতো রূপভৰসমঙ্গীনং নত্থী’’তি কারণং ৰদন্তি. অত্থিযেৰ তে অস্সাসপস্সাসা পরিযেসতোতি অধিপ্পাযো, যথাৰুত্তসত্তট্ঠানৰিনিমুত্তস্স অস্সাসপস্সাসানং অনুপ্পজ্জনট্ঠানস্স অভাৰতো. পকতিফুট্ঠৰসেনাতি পকতিযা ফুসনট্ঠানৰসেন. নিমিত্তং ঠপেতব্বন্তি সতিযা তত্থ তত্থ সুখপ্পৰত্তনত্থং থিরতরসঞ্জাননং পৰত্তেতব্বং. থিরসঞ্ঞাপদট্ঠানা হি সতি. ইমমেৰাতি ইমং এৰ অনুপট্ঠহন্তস্স কাযসঙ্খারস্স কণ্টকুট্ঠাপননযেন উপট্ঠাপনৰিধিমেৰ. অত্থৰসন্তি হেতুং. অত্থোতি হি ফলং, সো যস্স ৰসেন পৰত্ততি, সো অত্থৰসোতি. মুট্ঠস্সতিস্সাতি ৰিনট্ঠস্সতিস্স. অসম্পজানস্সাতি সম্পজঞ্ঞরহিতস্স, ভাৰেন্তস্স অনুক্কমেন অনুপট্ঠহন্তে অস্সাসপস্সাসে ৰীমংসিত্ৰা ‘‘ইমে তে’’তি উপধারেতুং, সম্মদেৰ পজানিতুঞ্চ সমত্থাহি সতিপঞ্ঞাহি ৰিরহিতস্সাতি অধিপ্পাযো.

২৩০. ইতো অঞ্ঞং কম্মট্ঠানং. গরুকন্তি ভারিযং. সা চস্স গরুকতা ভাৰনায সুদুক্করভাৰেনাতি আহ ‘‘গরুকভাৰন’’ন্তি. উপরূপরি সন্তসুখুমভাৰপ্পত্তিতো ‘‘বলৰতী সুৰিসদা সূরা চ সতিপঞ্ঞা চ ইচ্ছিতব্বা’’তি ৰত্ৰা সুখুমস্স নাম অত্থস্স সাধনেনাপি সুখুমেনেৰ ভৰিতব্বন্তি দস্সেতুং ‘‘যথা হী’’তিআদি ৰুত্তং. ইদানি অনুপট্ঠহন্তানং অস্সাসপস্সাসানং পরিযেসনুপাযং দস্সেন্তো ‘‘তাহি চ পনা’’তিআদিমাহ. তত্থ গোচরমুখেতি গোচরাভিমুখে. অনুপদন্তি পদানুপদং. চরিত্ৰাতি গোচরং গহেত্ৰা. তস্মিংযেৰ ঠানেতি উপনিবন্ধনানিমিত্তসঞ্ঞিতট্ঠানে. যোজেত্ৰাতি মনসিকারেন যোজেত্ৰা. সতিরস্মিযা বন্ধিত্ৰাতি ৰা ৰুত্তমেৰত্থমাহ ‘‘তস্মিংযেৰ ঠানে যোজেত্ৰা’’তি. ন হি উপমেয্যে বন্ধনযোজনট্ঠানানি ৰিসুং লব্ভন্তি.

২৩১. নিমিত্তন্তি উগ্গহনিমিত্তং, পটিভাগনিমিত্তং ৰা. উভযম্পি হি ইধ একজ্ঝং ৰুত্তং. তথা হি তূলপিচুআদিউপমত্তযং উগ্গহে যুজ্জতি, সেসং উভযত্থ. একচ্চেতি একে আচরিযা.

তারকরূপং ৰিযাতি তারকায পভারূপং ৰিয. মণিগুল়িকাদিউপমা পটিভাগে ৰট্টন্তি. কথং পনেতং একংযেৰ কম্মট্ঠানং অনেকাকারতো উপট্ঠাতীতি আহ ‘‘তঞ্চ পনেত’’ন্তিআদি. সুত্তন্তন্তি একং সুত্তং. পগুণপ্পৰত্তিভাৰেন অৰিচ্ছেদং, মহাৰিসযতঞ্চ সন্ধাযাহ ‘‘মহতী পব্বতেয্যা নদী ৰিযা’’তি. অত্থব্যঞ্জনসম্পত্তিযা সমন্তভদ্দকং সুত্তং সব্বভাগমনোহরা সব্বপালিফুল্লা ৰনঘটা ৰিযাতি আহ ‘‘একা ৰনরাজি ৰিযা’’তি. তেনাহ ভগৰা – ‘‘ৰনপ্পগুম্বে যথ ফুস্সিতগ্গে’’তি (খু. পা. ৬.১৩; সু. নি. ২৩৬). নানানুসন্ধিকং নানাপেয্যালং ৰিৰিধনযনিপুণং বহুৰিধকম্মট্ঠানমুখসুত্তন্তং অত্থিকেহি সক্কচ্চং সমুপজীৰিতব্বন্তি আহ ‘‘সীতচ্ছাযো…পে… রুক্খো ৰিযা’’তি. সঞ্ঞানানতাযাতি নিমিত্তুপট্ঠানতো পুব্বেৰ পৰত্তসঞ্ঞানং নানাৰিধভাৰতো.

ইমে তযো ধম্মাতি অস্সাসো, পস্সাসো, নিমিত্তন্তি ইমে তযো ধম্মা. নত্থীতি কম্মট্ঠানৰসেন মনসিকাতব্বভাৰেন নত্থি ন উপলব্ভন্তি. ন চ উপচারন্তি উপচারম্পি ন পাপুণাতি, পগেৰ অপ্পনন্তি অধিপ্পাযো. যস্স পনাতি ৰিজ্জমানপক্খো ৰুত্তনযানুসারেন ৰেদিতব্বো.

ইদানি ৰুত্তস্সেৰ অত্থস্স সমত্থনত্থং ককচূপমাযং আগতা ‘‘নিমিত্ত’’ন্তিআদিকা গাথা পচ্চানীতা.

২৩২. নিমিত্তেতি যথাৰুত্তে পটিভাগনিমিত্তে. এৰং হোতীতি ভাৰনমনুযুত্তস্স এৰ হোতি. তস্মা ‘‘পুনপ্পুনং এৰং মনসি করোহী’’তি ৰত্তব্বো. ৰোসানং আপজ্জেয্যাতি ‘‘নিমিত্তং নাম দুক্করং উপ্পাদেতুং, তযিদং লদ্ধং, হন্দাহং দানি যদা ৰা তদা ৰা ৰিসেসং নিব্বত্তেস্সামী’’তি সঙ্কোচং আপজ্জেয্য. ৰিসীদেয্যাতি ‘‘এত্তকং কালং ভাৰনমনুযুত্তস্স নিমিত্তম্পি ন উপ্পন্নং, অভব্বো মঞ্ঞে ৰিসেসস্সা’’তি ৰিসাদং আপজ্জেয্য.

‘‘ইমায পটিপদায জরামরণতো মুচ্চিস্সামীতি পটিপন্নস্স নিমিত্ত’’ন্তি ৰুত্তে কথং সঙ্কোচাপত্তি, ভিয্যোসো মত্তায উস্সাহমেৰ করেয্যাতি ‘‘নিমিত্তমিদং…পে… ৰত্তব্বো’’তি মজ্ঝিমভাণকা আহু. এৰন্তি ৰুত্তপ্পকারেন পটিভাগনিমিত্তেযেৰ ভাৰনাচিত্তস্স ঠপনেন. ইতো পভুতীতি ইতো পটিভাগনিমিত্তুপ্পত্তিতো পট্ঠায. পুব্বে যং ৰুত্তং ‘‘অনুবন্ধনায চ ফুসনায চ ঠপনায চ মনসি করোতী’’তি (ৰিসুদ্ধি. ১.২২৪), তত্থ অনুবন্ধনং, ফুসনঞ্চ ৰিস্সজ্জেত্ৰা ঠপনাৰসেন ভাৰনা হোতীতি ঠপনাৰসেনেৰ ভাৰেতব্বন্তি অত্থো.

পোরাণেহি ৰুত্তোৰাযমত্থোতি ‘‘নিমিত্তে’’তি গাথমাহ. তত্থ নিমিত্তেতি পটিভাগনিমিত্তে. ঠপযং চিত্তন্তি ভাৰনাচিত্তং ঠপেন্তো, ঠপনাৰসেন মনসি করোন্তোতি অত্থো. নানাকারন্তি ‘‘চত্তারো ৰণ্ণা’’তি (ৰিসুদ্ধি. ১.২১৯; পারা. অট্ঠ. ২.১৬৫; পটি. ম. অট্ঠ. ২.১.১৬৩) এৰং ৰুত্তং নানাকারং. আকারসামঞ্ঞৰসেন হেতং একৰচনং. ৰিভাৰযন্তি ৰিভাৰেন্তো অন্তরধাপেন্তো. নিমিত্তুপ্পত্তিতো পট্ঠায হি তে আকারা অমনসিকরোতো অন্তরহিতা ৰিয হোন্তি. অস্সাসপস্সাসেতি অস্সাসপস্সাসে যো নানাকারো, তং ৰিভাৰযং, অস্সাসপস্সাসসম্ভূতে ৰা নিমিত্তে. সকং চিত্তং নিবন্ধতীতি তায এৰ ঠপনায অত্তনো চিত্তং উপনিবন্ধতি, অপ্পেতীতি অত্থো. যে পন ‘‘ৰিভাৰযন্তি ৰিভাৰেন্তো ৰিদিতং পাকটং করোন্তো’’তি অত্থং ৰদন্তি, তং পুব্বভাগৰসেন যুজ্জেয্য. অযঞ্হেত্থ অত্থো – ধিতিসম্পন্নত্তা ধীরো যোগী অস্সাসপস্সাসে নানাকারং ৰিভাৰেন্তো নানাকারতো তে পজানন্তো ৰিদিতে পাকটে করোন্তো, নানাকারং ৰা ওল়ারিকোল়ারিকে পস্সম্ভেন্তো ৰূপসমেন্তো তত্থ যং লদ্ধং নিমিত্তং, তস্মিং চিত্তং ঠপেন্তো অনুক্কমেন সকং চিত্তং নিবন্ধতি অপ্পেতীতি.

ৰণ্ণতোতি পিচুপিণ্ডতারকরূপাদীসু ৰিয উপট্ঠিতৰণ্ণতো. লক্খণতোতি খরভাৰাদিসভাৰতো, অনিচ্চাদিলক্খণতো ৰা. রক্খিতব্বং তং নিমিত্তন্তি সম্বন্ধো. নিমিত্তস্স রক্খণং নাম তত্থ পটিলদ্ধস্স উপচারঝানস্স রক্খণেনেৰ হোতীতি আহ ‘‘পুনপ্পুনং মনসিকারৰসেন ৰুদ্ধিং ৰিরুল়্হিং গমযিত্ৰা’’তি.

২৩৩. এত্থাতি এতিস্সং কাযানুপস্সনাযং. পারিসুদ্ধিং পত্তুকামোতি অধিগন্তুকামো, সমাপজ্জিতুকামো চ, তত্থ সল্লক্খণাৰিৰট্টনাৰসেন অধিগন্তুকামো, সল্লক্খণাৰসেন সমাপজ্জিতুকামোতি যোজেতব্বং. নামরূপং ৰৰত্থপেত্ৰা ৰিপস্সনং পট্ঠপেতীতি সঙ্খেপতো ৰুত্তমত্থং ৰিত্থারতো দস্সেতুং ‘‘কথ’’ন্তিআদি ৰুত্তং. তত্থ যথা হীতিআদি কাযস্স, চিত্তস্স চ অস্সাসপস্সাসানং সমুদযভাৰদস্সনং. কম্মারগগ্গরিযাতি কম্মারানং উক্কাযং অগ্গিধমনভস্তা. ধমমানাযাতি ধমযন্তিযা, ৰাতং গাহাপেন্তিযাতি অত্থো. তজ্জন্তি তদনুরূপং. এৰমেৰাতি এত্থ কম্মারগগ্গরী ৰিয করজকাযো, ৰাযামো ৰিয চিত্তং দট্ঠব্বং. কিঞ্চাপি অস্সাসপস্সাসা চিত্তসমুট্ঠানা, করজকাযং পন ৰিনা তেসং অপ্পৰত্তনতো ‘‘কাযঞ্চ চিত্তঞ্চ পটিচ্চ অস্সাসপস্সাসা’’তি ৰুত্তং.

তস্সাতি নামরূপস্স. পচ্চযং পরিযেসতীতি ‘‘অৰিজ্জাসমুদযা রূপসমুদযো’’তিআদিনা (পটি. ম. ১.৫০) অৰিজ্জাদিকং পচ্চযং ৰীমংসতি পরিগ্গণ্হাতি. কঙ্খং ৰিতরতীতি ‘‘অহোসিং নু খো অহং অতীতমদ্ধান’’ন্তি (ম. নি. ১.১৮; সং. নি. ২.২০) আদিনযপ্পৰত্তং সোল়সৰত্থুকং ৰিচিকিচ্ছং অতিক্কমতি পজহতি. ‘‘যং কিঞ্চি রূপং অতীতানাগতপচ্চুপ্পন্ন’’ন্তি (ম. নি. ১.৩৪৭; ৩৬১; ৩.৮৬; অ. নি. ৪.১৮১) আদিনযপ্পৰত্তং কলাপসম্মসনং. পুব্বভাগেতি পটিপদাঞাণদস্সনৰিসুদ্ধিপরিযাপন্নায উদযব্বযানুপস্সনায পুব্বভাগে উপ্পন্নে. ওভাসাদযোতি ওভাসো ঞাণং পীতি পস্সদ্ধি সুখং অধিমোক্খো পগ্গহো উপেক্খা উপট্ঠানং নিকন্তীতি ইমে ওভাসাদযো দস. উদযং পহাযাতি উদযব্বযানুপস্সনায গহিতং সঙ্খারানং উদযং ৰিস্সজ্জেত্ৰা তেসং ভঙ্গস্সেৰ অনুপস্সনতো ভঙ্গানুপস্সনং ঞাণং পত্ৰা আদীনৰানুপস্সনাপুব্বঙ্গমায নিব্বিদানুপস্সনায নিব্বিন্দন্তো. মুঞ্চিতুকম্যতাপটিসঙ্খানুপস্সনাসঙ্খারুপেক্খানুলোমঞাণানং চিণ্ণপরিযন্তে উপ্পন্নগোত্রভুঞাণানন্তরং উপ্পন্নেন মগ্গঞাণেন সব্বসঙ্খারেসু ৰিরজ্জন্তো ৰিমুচ্চন্তো. মগ্গক্খণে হি অরিযো ৰিরজ্জতি ৰিমুচ্চতীতি চ ৰুচ্চতি. তেনাহ ‘‘যথাক্কমেন চত্তারো অরিযমগ্গে পাপুণিত্ৰা’’তি. মগ্গফলনিব্বানপহীনাৰসিট্ঠকিলেসসঙ্খাতস্স পচ্চৰেক্খিতব্বস্স পভেদেন একূনৰীসতিভেদস্স. অরহতো হি অৰসিট্ঠকিলেসাভাৰেন একূনৰীসতিতা. অস্সাতি আনাপানকম্মট্ঠানিকস্স.

২৩৪. ৰিসুং কম্মট্ঠানভাৰনানযো নাম নত্থি পঠমচতুক্কৰসেন অধিগতঝানস্স ৰেদনাচিত্তধম্মানুপস্সনাৰসেন দেসিতত্তা. তেসন্তি তিণ্ণং চতুক্কানং.

পীতিপটিসংৰেদীতি পীতিযা পটি পটি সম্মদেৰ ৰেদনাসীলো, তস্সা ৰা পটি পটি সম্মদেৰ ৰেদো এতস্স অত্থি, তং ৰা পটি পটি সম্মদেৰ ৰেদযমানো. তত্থ কামং সংৰেদন-গ্গহণেনেৰ পীতিযা সক্কচ্চং ৰিদিতভাৰো বোধিতো হোতি, যেহি পন পকারেহি তস্সা সংৰেদনং ইচ্ছিতং, তং দস্সেতুং পটি-সদ্দগ্গহণং ‘‘পটি পটি সংৰেদীতি পটিসংৰেদী’’তি. তেনাহ ‘‘দ্ৰীহাকারেহী’’তিআদি.

তত্থ কথং আরম্মণতো পীতি পটিসংৰিদিতা হোতীতি পুচ্ছাৰচনং. সপ্পীতিকে দ্ৰে ঝানে সমাপজ্জতীতি পীতিসহগতানি দ্ৰে পঠমদুতিযঝানানি পটিপাটিযা সমাপজ্জতি. তস্সাতি তেন. ‘‘পটিসংৰিদিতা’’তি হি পদং অপেক্খিত্ৰা কত্তুঅত্থে এতং সামিৰচনং. সমাপত্তিক্খণেতি সমাপন্নক্খণে. ঝানপটিলাভেনাতি ঝানেন সমঙ্গিভাৰেন. আরম্মণতোতি আরম্মণমুখেন, তদারম্মণঝানপরিযাপন্না পীতি পটিসংৰিদিতা হোতি আরম্মণস্স পটিসংৰিদিতত্তা. কিং ৰুত্তং হোতি? যথা নাম সপ্পপরিযেসনং চরন্তেন তস্স আসযে পটিসংৰিদিতে সোপি পটিসংৰিদিতো গহিতো এৰ হোতি মন্তাগদবলেন তস্স গহণস্স সুকরত্তা, এৰং পীতিযা আসযভূতে আরম্মণে পটিসংৰিদিতে সা পীতি পটিসংৰিদিতা এৰ হোতি সলক্খণতো, সামঞ্ঞতো চ তস্সা গহণস্স সুকরত্তাতি.

কথং অসম্মোহতো পীতি পটিসংৰিদিতা হোতীতি আনেত্ৰা সম্বন্ধিতব্বং. ৰিপস্সনাক্খণেতি ৰিপস্সনাপঞ্ঞায তিক্খৰিসদপ্পত্তায ৰিসযতো দস্সনক্খণে. লক্খণপটিৰেধেনাতি পীতিযা সলক্খণস্স, সামঞ্ঞলক্খণস্স চ পটিৰিজ্ঝনেন. যং হি যস্স ৰিসেসতো, সামঞ্ঞতো চ লক্খণং, তস্মিং ৰিদিতে সো যাথাৰতো ৰিদিতো এৰ হোতি. তেনাহ ‘‘অসম্মোহতো পীতি পটিসংৰিদিতা হোতী’’তি.

ইদানি তমত্থং পাল়িযা এৰ ৰিভাৰেতুং ‘‘ৰুত্তঞ্হেত’’ন্তিআদিমাহ. তত্থ দীঘং অস্সাসৰসেনাতিআদীসু যং ৰত্তব্বং, তং হেট্ঠা ৰুত্তমেৰ. তত্থ পন সতোকারিতাদস্সনৰসেন পাল়ি আগতা, ইধ পীতিপটিসংৰেদিতাৰসেন, পীতিপটিসংৰেদিতা চ অত্থতো ৰিভত্তা এৰ. অপিচ অযমেত্থ সঙ্খেপত্থো – দীঘং অস্সাসৰসেনাতি দীঘস্স অস্সাসস্স আরম্মণভূতস্স ৰসেন পজানতো সা পীতি পটিসংৰিদিতা হোতীতি সম্বন্ধো. চিত্তস্স একগ্গতং অৰিক্খেপং পজানতোতি ঝানপরিযাপন্নং ‘‘অৰিক্খেপো’’তি লদ্ধনামং চিত্তস্সেকগ্গতং তংসম্পযুত্তায পঞ্ঞায পজানতো. যথেৰ হি আরম্মণমুখেন পীতি পটিসংৰিদিতা হোতি, এৰং তংসম্পযুত্তধম্মাপি আরম্মণমুখেন পটিসংৰিদিতা এৰ হোন্তীতি. সতি উপট্ঠিতা হোতীতি দীঘং অস্সাসৰসেন ঝানসম্পযুত্তা সতি তস্স আরম্মণে উপট্ঠিতা আরম্মণমুখেন ঝানেপি উপট্ঠিতা নাম হোতি. তায সতিযাতি এৰং উপট্ঠিতায তায সতিযা যথাৰুত্তেন তেন ঞাণেন সুপ্পটিৰিদিতত্তা আরম্মণস্স তস্স ৰসেন তদারম্মণা সা পীতি পটিসংৰিদিতা হোতি. দীঘং পস্সাসৰসেনাতিআদীসুপি ইমিনাৰ নযেন অত্থো ৰেদিতব্বো.

এৰং পঠমচতুক্কৰসেন দস্সিতং পীতিপটিসংৰেদনং আরম্মণতো, অসম্মোহতো চ ৰিভাগসো দস্সেতুং ‘‘আৰজ্জতো’’তিআদি ৰুত্তং. তত্থ আৰজ্জতোতি ঝানং আৰজ্জন্তস্স. সা পীতীতি সা ঝানপরিযাপন্না পীতি. জানতোতি সমাপন্নক্খণে আরম্মণমুখেন জানতো. তস্স সা পীতি পটিসংৰিদিতা হোতীতি সম্বন্ধো. পস্সতোতি দস্সনভূতেন ঞাণেন ঝানতো ৰুট্ঠায পস্সন্তস্স. পচ্চৰেক্খতোতি ঝানং পচ্চৰেক্খন্তস্স. চিত্তং অধিট্ঠহতোতি ‘‘এত্তকং ৰেলং ঝানসমঙ্গী ভৰিস্সামী’’তি ঝানচিত্তং অধিট্ঠহন্তস্স. এৰং পঞ্চন্নং ৰসীভাৰানং ৰসেন ঝানস্স পজাননমুখেন আরম্মণতো পীতিযা পটিসংৰেদনা দস্সিতা.

ইদানি যেহি ধম্মেহি ঝানং, ৰিপস্সনা চ সিজ্ঝন্তি; তেসং ঝানপরিযাপন্নানং, ৰিপস্সনামগ্গপরিযাপন্নানঞ্চ সদ্ধাদীনং ৰসেন পীতিপটিসংৰেদনং দস্সেতুং ‘‘সদ্ধায অধিমুচ্চতো’’তিআদি ৰুত্তং. তত্থ অধিমুচ্চতোতি সদ্দহন্তস্স, সমথৰিপস্সনাৰসেনাতি অধিপ্পাযো. ৰীরিযং পগ্গণ্হতোতিআদীসুপি এসেৰ নযো. অভিঞ্ঞেয্যন্তি অভিৰিসিট্ঠায পঞ্ঞায জানিতব্বং. অভিজানতোতি ৰিপস্সনাপঞ্ঞাপুব্বঙ্গমায মগ্গপঞ্ঞায জানতো. পরিঞ্ঞেয্যন্তি দুক্খসচ্চং তীরণপরিঞ্ঞায, মগ্গপঞ্ঞায চ পরিজানতো. পহাতব্বন্তি সমুদযসচ্চং পহানপরিঞ্ঞায, মগ্গপঞ্ঞায চ পজহতো. ভাৰযতো সচ্ছিকরোতো ভাৰেতব্বং মগ্গসচ্চং, সচ্ছিকাতব্বং নিরোধসচ্চং. কেচি পনেত্থ পীতিযা এৰ ৰসেন অভিঞ্ঞেয্যাদীনি উদ্ধরন্তি, তং অযুত্তং ঝানাদিসমুদাযং উদ্ধরিত্ৰা ততো পীতিযা নিদ্ধারণস্স অধিপ্পেতত্তা.

এত্থ চ ‘‘দীঘং অস্সাসৰসেনা’’তিআদিনা পঠমচতুক্কৰসেন আরম্মণতো পীতিপটিসংৰেদনং ৰুত্তং, তথা ‘‘আৰজ্জতো’’তিআদীহি পঞ্চহি পদেহি. ‘‘অভিঞ্ঞেয্যং অভিজানতো’’তিআদীহি পন অসম্মোহতো. ‘‘সদ্ধায অধিমুচ্চতো’’তিআদীহি উভযথাপীতি সঙ্খেপতো সমথৰসেন আরম্মণতো, ৰিপস্সনাৰসেন অসম্মোহতো পীতিপটিসংৰেদনং ৰুত্তন্তি দট্ঠব্বং. কস্মা পনেত্থ ৰেদনানুপস্সনাযং পীতিসীসেন ৰেদনা গহিতা, ন সরূপতো এৰাতি? ভূমিৰিভাগাদিৰসেন ৰেদনং ভিন্দিত্ৰা চতুধা ৰেদনানুপস্সনং দস্সেতুং. অপিচ ৰেদনাকম্মট্ঠানং দস্সেন্তো ভগৰা পীতিযা ওল়ারিকত্তা তংসম্পযুত্তসুখং সুখগ্গহণত্থং পীতিসীসেন দস্সেতি.

এতেনেৰ নযেন অৰসেসপদানীতি ‘‘সুখপটিসংৰেদী চিত্তসঙ্খারপটিসংৰেদী’’তি পদানি পীতিপটিসংৰেদিপদে আগতনযেনেৰ অত্থতো ৰেদিতব্বানি. সক্কা হি ‘‘দ্ৰীহাকারেহি সুখপটিসংৰেদিতা হোতি, চিত্তসঙ্খারপটিসংৰেদিতা হোতি আরম্মণতো’’তিআদিনা পীতিট্ঠানে সুখাদিপদানি পক্খিপিত্ৰা ‘‘সুখসহগতানি তীণি ঝানানি, চত্তারি ৰা ঝানানি সমাপজ্জতী’’তিআদিনা অত্থং ৰিঞ্ঞাতুং. তেনাহ ‘‘তিণ্ণং ঝানানং ৰসেনা’’তিআদি. ৰেদনাদযোতি আদি-সদ্দেন সঞ্ঞা গহিতা. তেনাহ ‘‘দ্ৰে খন্ধা’’তি. ৰিপস্সনাভূমিদস্সনত্থন্তি পকিণ্ণকসঙ্খারসম্মসনৰসেন ৰিপস্সনায ভূমিদস্সনত্থং ‘‘সুখন্তি দ্ৰে সুখানী’’তিআদি ৰুত্তং সমথে কাযিকসুখাভাৰতো. সোতি সো পস্সম্ভনপরিযাযেন ৰুত্তো নিরোধো. ‘‘ইমস্স হি ভিক্খুনো পুব্বে অপরিগ্গহিতকালে’’তিআদিনা (ৰিসুদ্ধি. ১.২২০) ৰিত্থারতো কাযসঙ্খারে ৰুত্তো, তস্মা ৰুত্তনযেনেৰ ৰেদিতব্বো. তত্থ কাযসঙ্খারৰসেন আগতো, ইধ চিত্তসঙ্খারৰসেনাতি অযমেৰ ৰিসেসো.

এৰং চিত্তসঙ্খারস্স পস্সম্ভনং অতিদেসেন দস্সেত্ৰা যদঞ্ঞং ইমস্মিং চতুক্কে ৰত্তব্বং, তং দস্সেতুং ‘‘অপিচা’’তিআদি ৰুত্তং. তত্থ পীতিপদেতি ‘‘পীতিপটিসংৰেদী’’তিআদিনা দেসিতকোট্ঠাসে. পীতিসীসেন ৰেদনা ৰুত্তাতি পীতিঅপদেসেন তংসম্পযুত্তা ৰেদনা ৰুত্তা, ন পীতীতি অধিপ্পাযো. তত্থ কারণং হেট্ঠা ৰুত্তমেৰ. দ্ৰীসু চিত্তসঙ্খারপদেসূতি ‘‘চিত্তসঙ্খারপটিসংৰেদী পস্সম্ভযং চিত্তসঙ্খার’’ন্তি চিত্তসঙ্খারপটিসংযুত্তেসু দ্ৰীসু পদেসু. ‘‘ৰিঞ্ঞাণপচ্চযা নামরূপ’’ন্তি (মহাৰ. ১; ম. নি. ৩.১২৬; উদা. ১) ৰচনতো চিত্তেন পটিবদ্ধাতি চিত্তপটিবদ্ধা. ততো এৰ কামং চিত্তেন সঙ্খরীযন্তীতি চিত্তসঙ্খারা, সঞ্ঞাৰেদনাদযো, ইধ পন উপলক্খণমত্তং সঞ্ঞা ৰেদনাৰ অধিপ্পেতাতি আহ ‘‘সঞ্ঞাসম্পযুত্তা ৰেদনা’’তি.

২৩৫. চিত্তপটিসংৰেদীতি এত্থ দ্ৰীহাকারেহি চিত্তপটিসংৰেদিতা হোতি আরম্মণতো, অসম্মোহতো চ. কথং আরম্মণতো? চত্তারি ঝানানি সমাপজ্জতি, তস্স সমাপত্তিক্খণে ঝানপটিলাভেনাতিআদিনা ৰুত্তনযানুসারেন সব্বং সুৰিঞ্ঞেয্যন্তি আহ ‘‘চতুন্নং ঝানানং ৰসেন চিত্তপটিসংৰেদিতা ৰেদিতব্বা’’তি. চিত্তং মোদেন্তোতি ঝানসম্পযুত্তং চিত্তং সম্পযুত্তায পীতিযা মোদযমানো, তং ৰা পীতিং আরম্মণং কত্ৰা পৰত্তং ৰিপস্সনাচিত্তং তায এৰ আরম্মণভূতায পীতিযা মোদযমানো. পমোদেন্তোতিআদীনি পদানি তস্সেৰ ৰেৰচনানি পীতিপরিযাযভাৰতো.

সম্পযুত্তায পীতিযা চিত্তং আমোদেতীতি ঝানচিত্তসম্পযুত্তায পীতিসম্বোজ্ঝঙ্গভূতায ওদগ্যলক্খণায ঝানপীতিযা তমেৰ ঝানচিত্তং সহজাতাদিপচ্চযৰসেন চেৰ ঝানপচ্চযৰসেন চ পরিব্রূহেন্তো হট্ঠপহট্ঠাকারং পাপেন্তো আমোদেতি পমোদেতি চ. আরম্মণং কত্ৰাতি উল়ারং ঝানসম্পযুত্তং পীতিং আরম্মণং কত্ৰা পৰত্তমানং ৰিপস্সনাচিত্তং তায এৰ আরম্মণভূতায পীতিযা যোগাৰচরো হট্ঠপহট্ঠাকারং পাপেন্তো ‘‘আমোদেতি পমোদেতী’’তি ৰুচ্চতি.

সমং ঠপেন্তোতি যথা ঈসকম্পি লীনপক্খং, উদ্ধচ্চপক্খঞ্চ অনুপগম্ম অনোনতং অনুন্নতং যথা ইন্দ্রিযানং সমত্তপটিপত্তিযা অৰিসমং, সমাধিস্স ৰা উক্কংসগমনেন আনেঞ্জপ্পত্তিযা সম্মদেৰ ঠিতং হোতি, এৰং অপ্পনাৰসেন ঠপেন্তো. লক্খণপটিৰেধেনাতি অনিচ্চাদিকস্স লক্খণস্স পটি পটি ৰিজ্ঝনেন খণে খণে অৰবোধেন. খণিকচিত্তেকগ্গতাতি খণমত্তট্ঠিতিকো সমাধি. সোপি হি আরম্মণে নিরন্তরং একাকারেন পৰত্তমানো পটিপক্খেন অনভিভূতো অপ্পিতো ৰিয চিত্তং নিচ্চলং ঠপেতি. তেন ৰুত্তং ‘‘এৰং উপ্পন্নাযা’’তিআদি.

মোচেন্তোতি ৰিক্খম্ভনৰিমুত্তিৰসেন ৰিৰেচেন্তো ৰিসুং করোন্তো, নীৰরণানি পজহন্তোতি অত্থো. ৰিপস্সনাক্খণেতি ভঙ্গানুপস্সনাক্খণে. ভঙ্গো হি নাম অনিচ্চতায পরমা কোটি, তস্মা তায ভঙ্গানুপস্সকো যোগাৰচরো চিত্তমুখেন সব্বসঙ্খারগতং অনিচ্চতো পস্সতি, নো নিচ্চতো. অনিচ্চস্স দুক্খত্তা, দুক্খস্স চ অনত্তকত্তা তদেৰ দুক্খতো অনুপস্সতি, নো সুখতো. অনত্ততো অনুপস্সতি, নো অত্ততো. যস্মা পন যং অনিচ্চং দুক্খং অনত্তা, ন তং অভিনন্দিতব্বং. যঞ্চ ন অভিনন্দিতব্বং, ন তং রঞ্জিতব্বং. তস্মা ভঙ্গদস্সনানুসারেন ‘‘অনিচ্চং দুক্খং অনত্তা’’তি সঙ্খারগতে দিট্ঠে তস্মিং নিব্বিন্দতি, নো নন্দতি. ৰিরজ্জতি, নো রজ্জতি. সো এৰং নিব্বিন্দন্তো ৰিরজ্জন্তো লোকিযেনেৰ তাৰ ঞাণেন রাগং নিরোধেতি, নো সমুদেতি, নাস্স সমুদযং করোতীতি অত্থো. অথ ৰা সো এৰং ৰিরত্তো যথা দিট্ঠং সঙ্খারগতং, তথা অদিট্ঠং অত্তনো ঞাণেন নিরোধেতি, নো সমুদেতি. নিরোধমেৰস্স মনসিকরোতি, নো সমুদযন্তি অত্থো. সো এৰং পটিপন্নো পটিনিস্সজ্জতি, নো আদিযতি. কিং ৰুত্তং হোতি? অযঞ্হি অনিচ্চাদিঅনুপস্সনা সদ্ধিং খন্ধাভিসঙ্খারেহি কিলেসানং পরিচ্চজনতো, সঙ্খতদোসদস্সনেন তব্বিপরীতে নিব্বানে তন্নিন্নতায পক্খন্দনতো পরিচ্চাগপটিনিস্সগ্গো পক্খন্দনপটিনিস্সগ্গো চাতি ৰুচ্চতি. তস্মা তায সমন্নাগতো যোগাৰচরো ৰুত্তনযেন কিলেসে চ পরিচ্চজতি, নিব্বানে চ পক্খন্দতি. তেন ৰুত্তং ‘‘সো ৰিপস্সনাক্খণে অনিচ্চানুপস্সনায নিচ্চসঞ্ঞাতো চিত্তং মোচেন্তো ৰিমোচেন্তো …পে… পটিনিস্সগ্গানুপস্সনায আদানতো চিত্তং মোচেন্তো ৰিমোচেন্তো অস্সসতি চেৰ পস্সসতি চা’’তি.

তত্থ অনিচ্চস্স, অনিচ্চন্তি ৰা অনুপস্সনা অনিচ্চানুপস্সনা. তেভূমকধম্মানং অনিচ্চতং গহেত্ৰা পৰত্তায ৰিপস্সনায এতং নামং. নিচ্চসঞ্ঞাতোতি সঙ্খতধম্মে ‘‘নিচ্চা সস্সতা’’তি পৰত্তায মিচ্ছাসঞ্ঞায. সঞ্ঞাসীসেন চিত্তদিট্ঠীনম্পি গহণং দট্ঠব্বং. এস নযো সুখসঞ্ঞাদীসুপি. নিব্বিদানুপস্সনাযাতি সঙ্খারেসু নিব্বিন্দনাকারেন পৰত্তায অনুপস্সনায. নন্দিতোতি সপ্পীতিকতণ্হাতো. ৰিরাগানুপস্সনাযাতি তথা ৰিরজ্জনাকারেন পৰত্তায অনুপস্সনায. তেন ৰুত্তং ‘‘রাগতো মোচেন্তো’’তি. নিরোধানুপস্সনাযাতি সঙ্খারানং নিরোধস্স অনুপস্সনায. যথা সঙ্খারা নিরুজ্ঝন্তিযেৰ, আযতিং পুনব্ভৰৰসেন ন উপ্পজ্জন্তি, এৰং ৰা অনুপস্সনা নিরোধানুপস্সনা. মুঞ্চিতুকম্যতা হি অযং বলপ্পত্তা. তেনাহ ‘‘সমুদযতো মোচেন্তো’’তি. পটিনিস্সজ্জনাকারেন পৰত্তা অনুপস্সনা পটিনিস্সগ্গানুপস্সনা. আদানতোতি নিচ্চাদিৰসেন গহণতো, পটিসন্ধিগ্গহণতো ৰাতি এৰমেত্থ অত্থো দট্ঠব্বো.

২৩৬. অনিচ্চন্তি অনুপস্সী, অনিচ্চস্স ৰা অনুপস্সনসীলো অনিচ্চানুপস্সীতি এত্থ কিং পনেতং অনিচ্চং, কথং ৰা অনিচ্চং, কা ৰা অনিচ্চানুপস্সনা, কস্স ৰা অনিচ্চানুপস্সনাতি চতুক্কং ৰিভাৰেতব্বন্তি তং দস্সেন্তো ‘‘অনিচ্চং ৰেদিতব্ব’’ন্তিআদিমাহ.

তত্থ নিচ্চং নাম ধুৰং সস্সতং যথা তং নিব্বানং, ন নিচ্চন্তি অনিচ্চং, উদযব্বযৰন্তং, অত্থতো সঙ্খতা ধম্মাতি আহ ‘‘অনিচ্চন্তি পঞ্চক্খন্ধা. কস্মা? উপ্পাদৰযঞ্ঞথত্তভাৰা’’তি, উপ্পাদৰযঞ্ঞথত্তসব্ভাৰাতি অত্থো. তত্থ সঙ্খতধম্মানং হেতুপচ্চযেহি উপ্পজ্জনং অহুত্ৰা সম্ভৰো অত্তলাভো উপ্পাদো. উপ্পন্নানং তেসং খণনিরোধো ৰিনাসো ৰযো. জরায অঞ্ঞথাভাৰো অঞ্ঞথত্তং. যথা হি উপ্পাদাৰত্থায ভিন্নায ভঙ্গাৰত্থাযং ৰত্থুভেদো নত্থি, এৰং ঠিতিসঙ্খাতায ভঙ্গাভিমুখাৰত্থাযম্পি ৰত্থুভেদো নত্থি, যত্থ জরাৰোহারো. তস্মা একস্সাপি ধম্মস্স জরা যুজ্জতি, যা খণিকজরাতি ৰুচ্চতি. একংসেন চ উপ্পাদভঙ্গাৰত্থাসু ৰত্থুনো অভেদো ইচ্ছিতব্বো, অঞ্ঞথা ‘‘অঞ্ঞো উপ্পজ্জতি, অঞ্ঞো ভিজ্জতী’’তি আপজ্জেয্য. তযিমং খণিকজরং সন্ধাযাহ ‘‘অঞ্ঞথত্ত’’ন্তি. যং পনেত্থ ৰত্তব্বং, তং পরতো কথযিস্সাম.

যস্স লক্খণত্তযস্স ভাৰা খন্ধেসু অনিচ্চসমঞ্ঞা, তস্মিং লক্খণত্তযে অনিচ্চতাসমঞ্ঞাতি ‘‘অনিচ্চতাতি তেসংযেৰ উপ্পাদৰযঞ্ঞথত্ত’’ন্তি ৰত্ৰা ৰিসেসতো ধম্মানং খণিকনিরোধে অনিচ্চতাৰোহারোতি দস্সেন্তো ‘‘হুত্ৰা অভাৰো ৰা’’তিআদিমাহ. তত্থ উপ্পাদপুব্বকত্তা অভাৰস্স হুত্ৰাগহণং. তেন পাকভাৰপুব্বকত্তং ৰিনাসভাৰস্স দস্সেতি. তেনেৰাকারেনাতি নিব্বত্তনাকারেনেৰ. খণভঙ্গেনাতি খণিকনিরোধেন. তস্সা অনিচ্চতাযাতি খণিকভঙ্গসঙ্খাতায অনিচ্চতায. তায অনুপস্সনাযাতি যথাৰুত্তায অনিচ্চানুপস্সনায. সমন্নাগতোতি সমঙ্গিভূতো যোগাৰচরো.

খযো সঙ্খারানং ৰিনাসো, ৰিরজ্জনং তেসংযেৰ ৰিলুজ্জনং ৰিরাগো, খযো এৰ ৰিরাগো খযৰিরাগো, খণিকনিরোধো. অচ্চন্তমেত্থ এতস্মিং অধিগতে সঙ্খারা ৰিরজ্জন্তি নিরুজ্ঝন্তীতি অচ্চন্তৰিরাগো, নিব্বানং. তেনাহ ‘‘খযৰিরাগো সঙ্খারানং খণভঙ্গো, অচ্চন্তৰিরাগো নিব্বান’’ন্তি. তদুভযৰসেন পৰত্তাতি খযৰিরাগানুপস্সনাৰসেন ৰিপস্সনায, অচ্চন্তৰিরাগানুপস্সনাৰসেন মগ্গস্স পৰত্তি যোজেতব্বা. আরম্মণতো ৰা ৰিপস্সনায খযৰিরাগানুপস্সনাৰসেন পৰত্তি, তন্নিন্নভাৰতো অচ্চন্তৰিরাগানুপস্সনাৰসেন, মগ্গস্স পন অসম্মোহতো খযৰিরাগানুপস্সনাৰসেন, আরম্মণতো অচ্চন্তৰিরাগানুপস্সনাৰসেন পৰত্তি ৰেদিতব্বা. ‘‘এসেৰ নযো’’তি ইমিনা যস্মা ৰিরাগানুপস্সী-পদে ৰুত্তনযানুসারেন ‘‘দ্ৰে নিরোধা খযনিরোধো চ অচ্চন্তনিরোধো চা’’তি এৰমাদিঅত্থৰণ্ণনং অতিদিসতি, তস্মা ৰিরাগট্ঠানে নিরোধপদং পক্খিপিত্ৰা ‘‘খযো সঙ্খারানং ৰিনাসো’’তিআদিনা ইধ ৰুত্তনযেন তস্স অত্থৰণ্ণনা ৰেদিতব্বা.

পটিনিস্সজ্জনং পহাতব্বস্স তদঙ্গৰসেন ৰা সমুচ্ছেদৰসেন ৰা পরিচ্চজনং পরিচ্চাগপটিনিস্সগ্গো. তথা সব্বূপধীনং পটিনিস্সগ্গভূতে ৰিসঙ্খারে অত্তনো নিস্সজ্জনং, তন্নিন্নতায ৰা তদারম্মণতায ৰা তত্থ পক্খন্দনং পক্খন্দনপটিনিস্সগ্গো.

তদঙ্গৰসেনাতি এত্থ অনিচ্চানুপস্সনা তাৰ তদঙ্গপ্পহানৰসেন নিচ্চসঞ্ঞং পরিচ্চজতি, পরিচ্চজন্তী চ তথা অপ্পৰত্তিযং যে ‘‘নিচ্চ’’ন্তি গহণৰসেন কিলেসা, তম্মূলকা অভিসঙ্খারা, তদুভযমূলকা চ ৰিপাকক্খন্ধা অনাগতে উপ্পজ্জেয্যুং, তে সব্বেপি অপ্পৰত্তিকরণৰসেন পরিচ্চজতি, তথা দুক্খসঞ্ঞাদযো. তেনাহ ‘‘ৰিপস্সনা হি তদঙ্গৰসেন সদ্ধিং খন্ধাভিসঙ্খারেহি কিলেসে পরিচ্চজতী’’তি.

সঙ্খতদোসদস্সনেনাতি সঙ্খতে তেভূমকে সঙ্খারগতে অনিচ্চতাদিদোসদস্সনেন. নিচ্চাদিভাৰেন তব্বিপরীতে. তন্নিন্নতাযাতি তদধিমুত্ততায. পক্খন্দতীতি অনুপৰিসতি অনুপৰিসন্তং ৰিয হোতি. সদ্ধিং খন্ধাভিসঙ্খারেহি কিলেসে পরিচ্চজতীতি মগ্গেন কিলেসেসু পরিচ্চত্তেসু অৰিপাকধম্মতাপাদনেন অভিসঙ্খারা, তম্মূলকা চ খন্ধা অনুপ্পত্তিরহভাৰেন পরিচ্চত্তা নাম হোন্তীতি সব্বেপি তে মগ্গো পরিচ্চজতীতি ৰুত্তং. উভযন্তি ৰিপস্সনাঞাণং, মগ্গঞাণঞ্চ. মগ্গঞাণম্পি হি গোত্রভুঞাণস্স অনু পচ্ছা নিব্বানদস্সনতো ‘‘অনুপস্সনা’’তি ৰুচ্চতি.

সোল়সৰত্থুৰসেন চাতি সোল়সন্নং ৰত্থূনং ৰসেনাপি ৰুচ্চমানসন্তভাৰাদিৰসেনাপীতি সমুচ্চযত্থো চ-সদ্দো. ‘‘আনাপানস্সতি ভাৰিতা’’তি পদং আনেত্ৰা সম্বন্ধিতব্বং.

২৩৭. অস্সাতি আনাপানস্সতিসমাধিস্স. কামৰিতক্কাদিৰিতক্কুপচ্ছেদসমত্থতাযপি মহানিসংসতা ৰেদিতব্বাতি সম্বন্ধো. অযন্তি আনাপানস্সতিসমাধি. উচ্চাৰচেসু আরম্মণেসু পৰত্তিযেৰ ইতো চিতো চ চিত্তস্স ৰিধাৰনং.

ৰিজ্জা নাম মগ্গো. ৰিমুত্তি ফলং. মূলভাৰো ৰিপস্সনায পাদকভাৰো. চত্তারো সতিপট্ঠানে পরিপূরেতি কাযানুপস্সনাদীনং চতুন্নং অনুপস্সনানং ৰসেন তস্সা ভাৰনায পৰত্তনতো. সত্ত বোজ্ঝঙ্গে পরিপূরেন্তি বোজ্ঝঙ্গভাৰনায ৰিনা সতিপট্ঠানভাৰনাপারিপূরিযা অভাৰতো. ৰিজ্জাৰিমুত্তিং পরিপূরেন্তি বোজ্ঝঙ্গভাৰনায তাসং সিখাপ্পত্তিভাৰতো. চরিমকানন্তি অন্তিমকানং.

২৩৮. নিরোধৰসেনাতি নিরুজ্ঝনৰসেন. ভৰচরিমকাতি ভৰৰসেন চরিমকা নিহীনভৰপৰত্তিনো. তথা ঝানচরিমকা ৰেদিতব্বা. চুতিচরিমকাতি চুতিযা চরিমকা চুতিক্খণপৰত্তিনো সব্বপরিযোসানকা. তস্মাতি তীসু ভৰেসু নিহীনে কামভৰে পৰত্তনতো. তেতি অস্সাসপস্সাসা. পুরতোতি হেট্ঠা. যস্মা ৰিভঙ্গট্ঠকথাযং (ৰিভ. অট্ঠ. ২৬ পকিণ্ণককথা) রূপধম্মানং সোল়সচিত্তক্খণাযুকতা ৰিভাৰিতা, তস্মা ‘‘সোল়সমেন চিত্তেন সদ্ধিং উপ্পজ্জিত্ৰা’’তি ৰুত্তং. চুতিচিত্তস্স পুরতোতি ৰা চুতিচিত্তং অৰধিভাৰেন গহেত্ৰা ততো ওরং সোল়সমেন চিত্তেন সদ্ধিং উপ্পজ্জিত্ৰাতি এৰং পন অত্থে গয্হমানে সত্তরসচিত্তক্খণাযুকতাৰ অস্সাসপস্সাসানং ৰুত্তা হোতি.

ইমে কির ইমং কম্মট্ঠানং অনুযুত্তস্স ভিক্খুনো পাকটা হোন্তীতি আনেত্ৰা সম্বন্ধো. তত্থ কারণমাহ ‘‘আনাপানারম্মণস্স সুট্ঠু পরিগ্গহিতত্তা’’তি. তমেৰত্থং ৰিভাৰেতুং ‘‘চুতিচিত্তস্সা’’তিআদি ৰুত্তং.

তত্থ আযুঅন্তরং নাম জীৰিতন্তরং জীৰনক্খণাৰধি. ধম্মতায এৰাতি সভাৰেনেৰ, রুচিৰসেনেৰাতি অত্থো.

চন্দালোকং ওলোকেত্ৰাতি জুণ্হপক্খে পদোসৰেলাযং সমন্ততো আসিঞ্চমানখীরধারং ৰিয গগনতলং, রজতপত্তসদিসৰালিকাসন্থতঞ্চ ভূমিভাগং দিস্ৰা ‘‘রমণীযো ৰতাযং কালো, দেসো চ মম অজ্ঝাসযসদিসো, কীৰ চিরং নু খো অযং দুক্খভারো ৰহিতব্বো’’তি অত্তনো আযুসঙ্খারে উপধারেত্ৰা পরিক্খীণেতি অধিপ্পাযো. লেখং কত্ৰাতি চঙ্কমে তিরিযং লেখং কত্ৰা.

অনুযুঞ্জেথাতি অনুযুঞ্জেয্য, ভাৰেয্যাতি অত্থো.

উপসমানুস্সতিকথাৰণ্ণনা

২৩৯. এৰন্তি যথাৰুত্তেন ৰিরাগাদিগুণানুস্সরণপ্পকারেন. সব্বদুক্খূপসমসঙ্খাতস্সাতি দুক্খদুক্খাদিভেদং সব্বম্পি দুক্খং উপসম্মতি এত্থাতি সব্বদুক্খূপসমোতি সঙ্খাতব্বস্স.

‘‘পঞ্ঞত্তিধম্মা’’তিআদীসু অসভাৰোপি ঞাণেন ধারীযতি অৰধারীযতীতি ধম্মোতি ৰুচ্চতীতি ততো নিৰত্তেন্তো ‘‘ধম্মাতি সভাৰা’’তি আহ. ভৰনং পরমত্থতো ৰিজ্জমানতা ভাৰো, সহ ভাৰেনাতি সভাৰা, সচ্ছিকট্ঠপরমত্থতো লব্ভমানরূপাতি অত্থো. তে হি অত্তনো সভাৰস্স ধারণতো ধম্মাতি, যথাৰুত্তেনট্ঠেন সভাৰাতি চ ৰুচ্চন্তি. সঙ্গম্মাতি পচ্চযসমোধানলক্খণেন সঙ্গমেন সন্নিপতিত্ৰা. সমাগম্মাতি তস্সেৰ ৰেৰচনং. পচ্চযেহীতি অনুরূপেহি পচ্চযেহি. কতাতি নিব্বত্তিতা. অকতাতি কেহিচিপি পচ্চযেহি ন কতা. অসঙ্খতাতি বহুৰচনস্স কারণং হেট্ঠা ৰুত্তমেৰ. অগ্গমক্খাযতীতি অগ্গো অক্খাযতি, ম-কারো পদসন্ধিকরো. সো অসঙ্খতলক্খণো সভাৰধম্মো ৰিরাগোতি পচ্চেতব্বো, ৰিরজ্জতি এত্থ সংকিলেসধম্মোতি. নিব্বানং আরম্মণং কত্ৰা পৰত্তমানেন অরিযমগ্গেন পহীযমানা মানমদাদযো তং পত্ৰা পহীযন্তি নামাতি আহ ‘‘তমাগম্ম…পে… ৰিনস্সন্তী’’তি. তত্থ ‘‘সেয্যোহমস্মী’’তিআদিনা (ধ. স. ১১২১; সং. নি. ৪.১০৮) মঞ্ঞনাৰসেন পৰত্তো মানো এৰ মানমদো. পুরিসভাৰং নিস্সায উপ্পজ্জনকমদো পুরিসমদো. আদি-সদ্দেন জাতিমদাদীনং সঙ্গহো দট্ঠব্বো. নিম্মদাতি ৰিগতমদভাৰা. ইমমেৰ হি অত্থং দস্সেতুং ‘‘অমদা’’তি ৰুত্তং. মদা নিম্মদীযন্তি এত্থ অমদভাৰং ৰিনাসং গচ্ছন্তীতি মদনিম্মদনো. এসেৰ নযো সেসপদেসুপি. কামপিপাসাতি কামানং পাতুকম্যতা, কামতণ্হা. কামগুণা এৰ আলিযন্তি এত্থ সত্তাতি কামগুণালযা. তেভূমকং ৰট্টন্তি তীসু ভূমীসু কম্মকিলেসৰিপাকৰট্টং. এস অসঙ্খতধম্মো. অপরাপরভাৰাযাতি অপরাপরং যোনিআদিতো যোনিআদিভাৰায. আবন্ধনং গণ্ঠিকরণং. সংসিব্বনং তুন্নকারণং. নিক্খমনং, নিস্সরণঞ্চস্স তণ্হায ৰিসংযোগো এৰাতি আহ ‘‘ৰিসংযুত্তো’’তি.

যে গুণে নিমিত্তং কত্ৰা মদনিম্মদনাদিনামানি নিব্বানে নিরুল়্হানি, তে মদনিম্মদনতাদিকে যথাৰুত্তে নিব্বত্তিতনিব্বানগুণে এৰ গহেত্ৰা আহ ‘‘মদনিম্মদনতাদীনং গুণানং ৰসেনা’’তি, ন পন মদা নিম্মদীযন্তি এতেনাতি এৰমাদিকে. তে হি অরিযমগ্গগুণা. ভগৰতা উপসমগুণা ৰুত্তাতি সম্বন্ধো. কত্থ পন ৰুত্তাতি? অসঙ্খতসংযুত্তাদীসু (সং. নি. ৪.৩৬৬ আদযো). তত্থ সচ্চন্তি অৰিতথং. নিব্বানং হি কেনচি পরিযাযেন অসন্তভাৰাভাৰতো একংসেনেৰ সন্তত্তা অৰিপরীতট্ঠেন সচ্চং. তেনাহ ‘‘একং হি সচ্চং, ন দুতিযমত্থী’’তি (সু. নি. ৮৯০). পারন্তি সংসারস্স পরতীরভূতং. তেনেৰাহ ‘‘তিণ্ণো পারঙ্গতো থলে তিট্ঠতি ব্রাহ্মণো’’তি (ইতিৰু. ৬৯), ‘‘অপ্পকা তে মনুস্সেসু, যে জনা পারগামিনো’’তি (ধ. প. ৮৫) চ. সুদুদ্দসন্তি পরমগম্ভীরতায, অতিসুখুমসন্তসভাৰতায চ অনুপচিতঞাণসম্ভারেহি দট্ঠুং অসক্কুণেয্যতায সুট্ঠু দুদ্দসং. নত্থি এত্থ জরা, এতস্মিং ৰা অধিগতে পুগ্গলস্স জরাভাৰোতি অজরং. ততো এৰ জরাদীহি অপলোকিযতায থিরট্ঠেন ধুৰং. তণ্হাদিপপঞ্চাভাৰতো নিপ্পপঞ্চং. নত্থি এত্থ মতন্তি অমতং. অসিৰভাৰকরানং সংকিলেসধম্মানং অভাৰেন সিৰং. চতূহি যোগেহি অনুপদ্দুতত্তা খেমং. ৰিসঙ্খারভাৰেন অচ্ছরিযতায, অভূতপুব্বতায চ অব্ভুতং. সব্বাসং ঈতীনং অনত্থানং অভাৰেন অনীতিকং. নিদ্দুক্খতায অব্যাবজ্ঝং. সব্বসংকিলেসমলতো অচ্চন্তসুদ্ধিযা ৰিসেসতো সুদ্ধীতি ৰিসুদ্ধি. চতূহিপি ওঘেহি অনজ্ঝোত্থরণীযতায দীপং. সকলৰট্টদুক্খতো পরিপালনট্ঠেন তাণং.

‘‘সচ্চঞ্চ ৰো, ভিক্খৰে, দেসেস্সামী’’তিআদিকা পাল়ি সংখিত্তাতি ৰেদিতব্বা. আদি-সদ্দেন অনন্তঅনাসৰনিপুণঅজজ্জরঅপলোকিতঅনিদস্সনপণীতঅচ্ছরিযঅনীতিকধম্মমুত্তিলেণপরাযণগম্ভীরাদিৰচনেহি চ বোধিতা ইধ অৰুত্তা গুণা সঙ্গয্হন্তি, তত্থ নত্থি এতস্স উপ্পাদন্তো ৰা ৰযন্তো ৰাতি অনন্তো, অসঙ্খতধম্মো. আসৰানং অনারম্মণতায অনাসৰো. নিপুণঞাণগোচরতায নিপুণো. সঙ্খতধম্মো ৰিয জরায অজজ্জরিততায অজজ্জরো. ব্যাধিআদীহি অপলোকিযতায অপলোকিতং. অচক্খুৰিঞ্ঞাণৰিঞ্ঞেয্যতায অনিদস্সনো. অতিত্তিকরট্ঠেন পণীতো. অপচুরতায অচ্ছরিযো. ঈতীহি অনভিভৰনীযসভাৰত্তা, অনীতিকভাৰহেতুতো চ অনীতিকধম্মো. ৰট্টদুক্খমুত্তিনিমিত্ততায মুত্তি. সংসারং ভযতো পস্সন্তেহি নিলীযনীযতো লেণং. তেসংযেৰ পরা গতীতি পরাযণো. পকতিঞাণেন অলদ্ধপতিট্ঠতায অগাধট্ঠেন গম্ভীরো. কতপুঞ্ঞেহিপি দুক্খেন কিচ্ছেন অনুবুজ্ঝিতব্বতো দুরনুবোধো. সচ্ছিকিরিযং মুঞ্চিত্ৰা ন তক্কঞাণেন অৰচরিতব্বোতি অতক্কাৰচরো. বুদ্ধাদীহি পণ্ডিতেহেৰ ৰেদিতব্বতো অধিগন্তব্বতো পণ্ডিতৰেদনীযোতি এৰমত্থো ৰেদিতব্বো.

অরিযসাৰকস্সেৰ ইজ্ঝতি সচ্ছিকিরিযাভিসমযৰসেন নিব্বানগুণানং পাকটভাৰতো. অট্ঠানে চাযং এৰ-সদ্দো ৰুত্তো, ইজ্ঝতি এৰাতি যোজনা. সুখসিদ্ধিৰসেন ৰা এৰং ৰুত্তং ‘‘অরিযসাৰকস্সেৰা’’তি. তেনেৰাহ ‘‘এৰং সন্তেপী’’তিআদি. উপসমগরুকেনাতি নিব্বাননিন্নেন. মনসি কাতব্বা যথাৰুত্তা উপসমগুণা. সুখং সুপতীতিআদীসু ৰত্তব্বং মেত্তাকথাযং আৰি ভৰিস্সতি. পণীতাধিমুত্তিকো হোতি নিব্বানাধিমুত্তত্তা.

অনুস্সতিকম্মট্ঠাননিদ্দেসৰণ্ণনা নিট্ঠিতা.

ইতি অট্ঠমপরিচ্ছেদৰণ্ণনা.

৯. ব্রহ্মৰিহারনিদ্দেসৰণ্ণনা

মেত্তাভাৰনাকথাৰণ্ণনা

২৪০. মেত্তং ব্রহ্মৰিহারং. ভাৰেতুকামেনাতি উপ্পাদেতুকামেন পচ্চৰেক্খিতব্বোতি সম্বন্ধো. সুখনিসিন্নেনাতি ৰিসমং অনিসীদিত্ৰা পল্লঙ্কাভুজনেন সুখনিসিন্নেন.

কস্মাতি পচ্চৰেক্খণায কারণপুচ্ছা, অঞ্ঞং অধিগন্তুকামেন অঞ্ঞত্থ আদীনৰানিসংসপচ্চৰেক্খণা কিমত্থিযাতি অধিপ্পাযো. মেত্তা নাম অত্থতো অদোসো. তথা হি অদোসনিদ্দেসে ‘‘মেত্তি মেত্তাযনা মেত্তাযিতত্ত’’ন্তি (ধ. স. ১০৬২) নিদ্দিট্ঠং. খন্তীতি চ ইধ অধিৰাসনক্খন্তি অধিপ্পেতা. সা পন অত্থতো অদোসপ্পধানা চত্তারো অরূপক্খন্ধাতি মেত্তায সিজ্ঝমানায তিতিক্খাখন্তি সিদ্ধা এৰ হোতীতি আহ ‘‘খন্তি অধিগন্তব্বা’’তি. তেন খন্তিযং আনিসংসপচ্চৰেক্খণা সত্থিকাৰাতি দস্সেতি. অভিভূতো পরিযুট্ঠানেন. পরিযাদিন্নচিত্তো কুসলুপ্পত্তিযা ওকাসালাভেন. আদীনৰো দট্ঠব্বো পাণঘাতাদিৰসেন দিট্ঠধম্মিকসম্পরাযিকাদিঅনত্থমূলভাৰতো.

খন্তী পরমং তপোতি পরাপকারসহনাদিকা তিতিক্খলক্খণা খন্তি উত্তমং তপো অকত্তব্বাকরণকত্তব্বকরণলক্খণায সম্মাপটিপত্তিযা মূলভাৰতো. খন্তিবলং বলানীকন্তি পরমং মঙ্গলভূতা খন্তি এৰ বলং এতস্সাতি খন্তিবলং. ৰুত্তঞ্হি ‘‘খন্তিবলা সমণব্রাহ্মণা’’তি. দোসাদিপটিপক্খৰিধমনসমত্থতায অনীকভূতেন তেনেৰ চ খন্তিবলেন বলানীকং. খন্ত্যা ভিয্যো ন ৰিজ্জতীতি অত্তনো পরেসঞ্চ অনত্থপটিবাহনো, অত্থাৰহো চ খন্তিতো উত্তরি অপস্সযো নত্থি.

ৰিৰেচনত্থাযাতি ৰিক্খম্ভনত্থায. খন্তিযা সংযোজনত্থায অত্তানন্তি অধিপ্পাযো. ভাৰনং দূসেন্তীতি দোসা, পুগ্গলাযেৰ দোসা পুগ্গলদোসা. যেসু ভাৰনা ন সম্পজ্জতি, অঞ্ঞদত্থু ৰিপজ্জতেৰ, তে এৰ ৰুত্তা. পঠমন্তি ৰক্খমানেন কোট্ঠাসতো কোট্ঠাসন্তরুপসংহরণনযেন ৰিনা সব্বপঠমং.

পিযাযিতব্বো পিযো, তপ্পটিপক্খো অপ্পিযো. সো সঙ্খেপতো দুৰিধো অত্থস্স অকারকো, অনত্থস্স কারকোতি. তত্থ যো অত্তনো, পিযস্স চ অনত্থস্স কারকো, সো ৰেরিপুগ্গলো দট্ঠব্বো. যো পন অত্তনো, পিযস্স চ অত্থস্স অকারকো, অপ্পিযস্স চ অত্থস্স কারকো, ‘‘অত্থং মে নাচরী’’তিআদিনা (ধ. স. ১২৩৭), ‘‘অপ্পিযস্স মে অমনাপস্স অত্থং অচরী’’তিআদিনা চ আঘাতৰত্থুভূতো, সো অপ্পিযো, অননুকূলৰুত্তিকো অনিট্ঠোতি অত্থো. লিঙ্গৰিসভাগেতি ইত্থিলিঙ্গাদিনা লিঙ্গেন ৰিসদিসে. ওধিসোতি ভাগসো. ‘‘তিস্স দত্তা’’তিআদিনা ওধিসকন্তি অত্থো.

ইদানি যথাৰুত্তেসু ছসু পুগ্গলেসু অভাৰেতব্বতায কারণং দস্সেন্তো ‘‘অপ্পিযং হী’’তিআদিমাহ. তত্থ অপ্পিযং হি পিযট্ঠানে ঠপেন্তো কিলমতীতি দোসেন ভাৰনায সপরিস্সযতমাহ. অপ্পিযতা হি পিযভাৰস্স উজুপটিপক্খা, ন চ তস্স পিযট্ঠানে ঠপনেন ৰিনা ভাৰনা সিজ্ঝতি. অতিপ্পিযসহাযকং মজ্ঝত্তট্ঠানে ঠপেন্তো কিলমতীতি রাগেন ভাৰনায সপরিস্সযতমাহ অতিপ্পিযসহাযস্স গেহস্সিতপেমট্ঠানভাৰতো. তেনাহ ‘‘অপ্পমত্তকেপী’’তিআদি. মজ্ঝত্তং ইট্ঠানিট্ঠতাহি মজ্ঝসভাৰং নেৰ পিযং নাপ্পিযন্তি অত্থো. গরুট্ঠানে পিযট্ঠানে চ ঠপেন্তো কিলমতি মজ্ঝত্তে সম্ভাৰনীযপিযাযিতব্বতানং অভাৰা. ন হি অজ্ঝুপেক্খিতব্বে ভাৰনীযতা, মনাপতা ৰা পচ্চুপট্ঠাতি, পিযগরুভাৰসম্পন্নে চ পঠমং মেত্তা ভাৰেতব্বা. কোধো উপ্পজ্জতি কোট্ঠাসন্তরভাৰানুপনযনতো.

তমেৰাতি ৰিসভাগলিঙ্গমেৰ. লিঙ্গসভাগেতি অৰিসেসেত্ৰা ‘‘পিযপুগ্গলে’’তি আহ. ভিত্তিযুদ্ধমকাসীতি সীলং অধিট্ঠায পিহিতদ্ৰারে গব্ভে সযনপীঠে নিসীদিত্ৰা মেত্তং ভাৰেন্তো মেত্তামুখেন উপ্পন্নরাগেন অন্ধীকতো ভরিযায সন্তিকং গন্তুকামো দ্ৰারং অসল্লক্খেত্ৰা ভিত্তিং ভিন্দিত্ৰাপি নিক্খমিতুকামতায ভিত্তিং পহরি. তেনাহ ‘‘মেত্তাযনামুখেন রাগো ৰঞ্চেতী’’তি (নেত্তি. অট্ঠ. ২১), ‘‘অন্ধতমং তদা হোতি, যং রাগো সহতে নর’’ন্তি চ.

আদাননিক্খেপপরিচ্ছিন্নে অদ্ধাপচ্চুপ্পন্নভূতে ধরমানতায পচ্চক্খতো ৰিয উপলব্ভমানে খন্ধপ্পবন্ধে ইধ সত্তাদিগ্গহণং, ন তিযদ্ধগতেতি আহ ‘‘কালকতে পনা’’তিআদি. কস্মা পন কালকতে মেত্তাভাৰনা ন ইজ্ঝতীতি? মেত্তাব্যাপারস্স অযোগ্যট্ঠানভাৰতো. ন হি মতপুগ্গলো হিতূপসংহারারহো. যত্থ সতি সম্ভৰে পযোগতো হিতূপসংহারো লব্ভেয্য, তত্থেৰ মানসো হিতূপসংহারো যুজ্জেয্য. দুক্খাপনযনমোদপ্পৰত্তীসুপি এসেৰ নযোতি করুণাভাৰনাদীনম্পি কালকতে অনিজ্ঝনং ৰুত্তন্তি দট্ঠব্বং. অঞ্ঞত্থ পগুণমেত্তাঝানো আচরিযস্স কালকতভাৰং অজানন্তো তং মেত্তায ফরিতুকামো ‘‘আচরিযং আরব্ভ মেত্তং আরভতী’’তি ৰুত্তো. তেনাহ ‘‘পগুণাৰ মে মেত্তাঝানসমাপত্তী’’তি. নিমিত্তন্তি আরম্মণং. গৰেসাহীতি ‘‘যং পুগ্গলং উদ্দিস্সমেত্তং আরভসি, সো জীৰতি ন জীৰতী’’তি জানাহীতি অত্থো. মেত্তাযন্তোতি মেত্তং করোন্তো, মেত্তং ভাৰেন্তোতি অত্থো.

২৪১. অত্তনি ভাৰনা নাম সক্খিভাৰত্থাতি নানাৰিধসুখানুবন্ধঅনৰজ্জসুখঅব্যাসেকসুখাদি যং অত্তনি উপলব্ভতি, তং নিদস্সেন্তো তস্স ৰত্তমানতায আহ ‘‘অহং সুখিতো হোমী’’তি. সরীরসুখং নাম অনেকন্তিকং, ঈদিসস্স পুগ্গলস্স অনোকাসং চিত্তদুক্খন্তি তদভাৰং সন্ধাযাহ ‘‘নিদ্দুক্খোতি ৰা’’তি. হোমীতি সম্বন্ধো. তথা অৰেরোতিআদীসু, ৰিসেসতো চ দুক্খাভাৰে সুখসঞ্ঞা. সা পনাযং নিদ্দুক্খতা ৰেরীনং পুগ্গলানং ৰেরসঞ্ঞিতানং পাপধম্মানং অভাৰতো, ৰিসেসতো ব্যাপাদৰিরহতো ঈঘসঞ্ঞিতায ঈতিযা অভাৰতো, অনৰজ্জকাযিকসুখসমঙ্গিতায চ হোতীতি দস্সেন্তো আহ ‘‘অৰেরো অব্যাপজ্জো অনীঘো সুখী’’তি. অত্তানং পরিহরামীতি এৰংভূতো হুত্ৰা মম অত্তভাৰং পৰত্তেমি, যাপেমীতি অত্থো.

এৰং সন্তে যং ৰিভঙ্গে ৰুত্তং, তং ৰিরুজ্ঝতীতি সম্বন্ধো. এৰং সন্তেতি এৰং সতি, যদি অত্তনিপি মেত্তা ভাৰেতব্বাতি অত্থো. ‘‘যং ৰিভঙ্গে ৰুত্ত’’ন্তি ৰত্ৰা ৰিভঙ্গদেসনায সমানগতিকং সুত্তপদং আহরন্তো ‘‘কথঞ্চ ভিক্খূ’’তিআদিমাহ. তস্সত্থো পরতো আগমিস্সতি.

তন্তি ৰিভঙ্গাদীসু ৰচনং. অপ্পনাৰসেনাতি অপ্পনাৰহভাৰনাৰসেন. ইদন্তি ‘‘অহং সুখিতো হোমী’’তিআদিৰচনং. সক্খিভাৰৰসেনাতি অহং ৰিয সব্বে সত্তা অত্তনো সুখকামা, তস্মা তেসু মযা অত্তনি ৰিয সুখূপসংহারো কাতব্বোতি এৰং তত্থ অত্তানং সক্খিভাৰে ঠপনৰসেন. তেনাহ ‘‘সচেপি হী’’তিআদি. কস্মা পন অত্তনি ভাৰনা অপ্পনাৰহা ন হোতীতি? অত্তসিনেহৰসেন সপরিস্সযভাৰতো. কোট্ঠাসন্তরে পন ভাৰিতভাৰনস্স তত্থাপি সীমসম্ভেদো হোতিযেৰ.

সব্বা দিসাতি অনৰসেসা দসপি দিসা. অনুপরিগম্ম চেতসাতি চিত্তেন পরিযেসনৰসেন অনুগন্ত্ৰা. নেৰজ্ঝগা পিযতরমত্তনা ক্ৰচীতি সব্বুস্সাহেন পরিযেসন্তো অতিসযেন অত্ততো পিযতরং অঞ্ঞং সত্তং কত্থচি দিসায নেৰ অধিগচ্ছেয্য ন পস্সেয্য. এৰং পিযো পুথু অত্তা পরেসন্তি এৰং কস্সচি অত্ততো পিযতরস্স অনুপলব্ভনৰসেন পুথু ৰিসুং ৰিসুং তেসং তেসং সত্তানং অত্তা পিযো. তস্মা তেন কারণেন, অত্তকামো অত্তনো হিতসুখং ইচ্ছন্তো, পরং সত্তং অন্তমসো কুন্থকিপিল্লিকম্পি, ন হিংসে ন হনেয্য, ন ৰিহেঠেয্যাতি অত্থো.

অযং নযোতি সব্বেহি সত্তেহি, অত্তনো চ পিযতরভাৰং নিদস্সেত্ৰা তেসু করুণাযনং ৰদতা ভগৰতা সুখেসিতায ‘‘অত্তানং সক্খিভাৰে ঠপেত্ৰা সত্তেসু মেত্তা ভাৰেতব্বা’’তি মেত্তাভাৰনায নযদস্সনং কতমেৰাতি অত্থো.

২৪২. সুখপৰত্তনত্থন্তি সুখেন অকিচ্ছেন মেত্তায পৰত্তনত্থং. য্ৰাস্সাতি যো পুগ্গলো অস্স যোগিনো. পিযোতি ইট্ঠো. মনাপোতি মনৰড্ঢনকো. গরূতি গুণৰিসেসৰসেন গরুকাতব্বো. ভাৰনীযোতি সম্ভাৰেতব্বো. আচরিযমত্তোতি সীলাদিনা আচরিযপ্পমাণো. পিযৰচনাদীনীতি আদি-সদ্দেন অত্থচরিযাদিকে সঙ্গণ্হাতি. সীলসুতাদীনীতি আদি-সদ্দেন সদ্ধাদিকে, ধুতধম্মজাগরিযানুযোগাদিকে চ সঙ্গণ্হাতি.

কামন্তি যুত্তপ্পত্তকারিতাসুখসিদ্ধিদীপনোযং নিপাতো. তেনেতং দীপেতি – তাদিসং পুগ্গলং উদ্দিস্স ভাৰনং আরভন্তো যোগী যুত্তপ্পত্তকারী, সুখেন চস্স তত্থ ভাৰনা ইজ্ঝতি, তেন পন যোগিনা তাৰতা সন্তোসো ন কাতব্বোতি. তেনাহ ‘‘অপ্পনা সম্পজ্জতী’’তিআদি. সীমাসম্ভেদন্তি মরিযাদাপনযনং, অত্তা পিযো মজ্ঝত্তো ৰেরীতি ৰিভাগাকরণন্তি অত্থো. তদনন্তরন্তি ততো পিযমনাপগরুভাৰনীযতো, তত্থ ৰা মেত্তাধিগমতো অনন্তরং. অতিপ্পিযসহাযকে মেত্তা ভাৰেতব্বাতি সম্বন্ধো, গরুট্ঠানীযে পটিলদ্ধং মেত্তামনসিকারং অতিপ্পিযসহাযকে উপসংহরিতব্বন্তি অত্থো. সুখূপসংহারকতস্স তং হোতি পগেৰ পটিপক্খধম্মানং ৰিক্খম্ভিতত্তা. অতিপ্পিযসহাযকতো অনন্তরং মজ্ঝত্তে মেত্তা ভাৰেতব্বা মজ্ঝত্তং পিযগরুট্ঠানে ঠপেতুং সুকরভাৰতো. ‘‘অতিপ্পিযসহাযকতো’’তি চ ইদং পুরিমাৰত্থং গহেত্ৰা ৰুত্তং. পগুণমনসিকারাধিগমতো পট্ঠায হিস্স সোপি পিযট্ঠানে এৰ তিট্ঠতি. মজ্ঝত্ততো ৰেরীপুগ্গলেতি মজ্ঝত্তপুগ্গলে মেত্তাযন্তেন তত্থ পগুণমনসিকারাধিগমেন পিযভাৰং উপসংহরিত্ৰা তদনন্তরং ৰেরীপুগ্গলং ভাৰনায মজ্ঝত্তে ঠপেত্ৰা ততো মজ্ঝত্ততো পিযভাৰূপসংহারেন ৰেরীপুগ্গলে মেত্তা ভাৰেতব্বা. ‘‘ৰেরীপুগ্গলে’’তি চ ইদং পুরিমাৰত্থং গহেত্ৰা ৰুত্তং. একেকস্মিং কোট্ঠাসে মুদুং কম্মনিযং চিত্তং কত্ৰাতি পিযগরুট্ঠানীযো, অতিপ্পিযো, মজ্ঝত্তো, ৰেরীতি চতূসু পুগ্গলকোট্ঠাসেসু পঠমং তাৰ পিযগরুট্ঠানীযে মেত্তাভাৰনং অধিগন্ত্ৰা ৰসীভাৰপ্পত্তিযা তথাপৰত্তং চিত্তং কোট্ঠাসন্তরূপসংহারত্থং মুদুং কম্মনিযং কত্ৰা তদনন্তরং অতিপ্পিযসহাযে অতিপ্পিযভাৰং ৰিক্খম্ভেত্ৰা পিযভাৰমত্তে চিত্তং ঠপেন্তেন ভাৰনা উপসংহরিতব্বা, তম্পি ৰসীভাৰাপাদনেন মুদুং কম্মনিযং কত্ৰা তদনন্তরং মজ্ঝত্তে উদাসিনভাৰং ৰিক্খম্ভেত্ৰা পিযভাৰং উপট্ঠপেত্ৰা ভাৰনা উপসংহরিতব্বা, পুন তম্পি ৰসীভাৰাপাদনেন মুদুং কম্মনিযং কত্ৰা তদনন্তরং ৰেরিম্হি ৰেরীসঞ্ঞং ৰিক্খম্ভেত্ৰা মজ্ঝত্তভাৰূপট্ঠপনমুখেন পিযভাৰং উপ্পাদেন্তেন ভাৰনা উপসংহরিতব্বা. তেন ৰুত্তং ‘‘তদনন্তরে তদনন্তরে উপসংহরিতব্ব’’ন্তি, ঝানচিত্তং উপনেতব্বং উপ্পাদেতব্বন্তি অত্থো.

ৰেরীপুগ্গলো ৰা নত্থি কম্মবলেন ৰা এতরহি পযোগসম্পত্তিযা ৰা সব্বসো অনত্থকরস্স অভাৰতো. মহাপুরিসজাতিকত্তাতি মহাপুরিসসভাৰত্তা চিরকালপরিচযসমিদ্ধখন্তিমেত্তানুদ্দযাদিগুণসম্পন্নতায উল়ারজ্ঝাসযত্তাতি অত্থো. তাদিসো হি সব্বসহো পরাপরাধং তিণাযপি ন মঞ্ঞতি. তেন ৰুত্তং ‘‘অনত্থং করোন্তেপি পরে ৰেরীসঞ্ঞাৰ নুপ্পজ্জতী’’তি. তেনাতি তেন যোগিনা. অত্থি ৰেরীপুগ্গলোতি সম্বন্ধো.

২৪৩. পুরিমপুগ্গলেসূতি পিযাদীসু ঝানস্স আরম্মণভূতেসু পুরিমেসু পুগ্গলেসু. মেত্তং সমাপজ্জিত্ৰাতি পটিঘং ৰিক্খম্ভেত্ৰা উপ্পাদিতং মেত্তাঝানং সমাপজ্জিত্ৰা. মেত্তাযন্তেন পটিঘং পটিৰিনোদেতব্বন্তি এত্থ কেচি পন ‘‘উপচারজ্ঝানং সম্পাদেত্ৰা’’তি অত্থং ৰদন্তি, তেসং উপচারজ্ঝানতো ৰুট্ঠানম্পি ইচ্ছিতব্বং সিযা ‘‘ৰুট্ঠহিত্ৰা’’তি ৰুত্তত্তা. পুব্বে তস্মিং পুগ্গলে অসতিযা অমনসিকারেন পটিঘং অনুপ্পাদেন্তস্স সাধারণতো তং ৰিক্খম্ভেত্ৰা ঝানস্স উপ্পাদনং, সমাপজ্জনঞ্চ ৰুত্তং. ইদানি পন তং অনুস্সরন্তস্সপি মনসি করোন্তস্সপি যথা পটিঘং ন উপ্পজ্জতি, তং ৰিধিং দস্সেতুং ইদং ৰুত্তং ‘‘তং পুগ্গলং মেত্তাযন্তেন পটিঘং ৰিনোদেতব্ব’’ন্তি. মেত্তাযনমেৰ হি ইধ পটিঘৰিনোদনং অধিপ্পেতং. ন নিব্বাতীতি ন ৰূপসম্মতি.

অনুসারতোতি অনুগমনতো, পচ্চৰেক্খণতোতি অত্থো. ঘটিতব্বন্তি ৰাযমিতব্বং.

তঞ্চ খো ঘটনং ৰাযমনং. ইমিনা ইদানি ৰক্খমানেন আকারেন.

উভতো দ্ৰীসু ঠানেসু দণ্ডো এতস্সাতি উভতোদণ্ডকং, তেন. ওচরকা লামকাচারা পাপপুরিসা. তত্রাপীতি তেসুপি অঙ্গমঙ্গানি ওক্কন্তেসুপি. তেনাতি মনোপদোসেন. ন সাসনকরো. সব্বপাপস্স অকরণং হি সাসনং. তস্সেৰাতি ততোপি. নিস্সক্কে হি ইদং সামিৰচনং, সমুচ্চযে চ এৰ-সদ্দো, পঠমং কুদ্ধপুরিসতোপীতি অত্থো. তেনাতি কুজ্ঝনেন. পাপিযোতি পাপতরো. সারম্ভাদিকস্স কিলেসানুবন্ধস্স ৰত্থুভাৰতো কোধস্স সাৰজ্জতং ঞত্ৰাপি কুজ্ঝনতো সচে কোধে অনৰজ্জসঞ্ঞী কুদ্ধস্স পুগ্গলস্স ন পটিকুজ্ঝেয্যাতি কেচি. উভিন্নন্তি দ্ৰিন্নং পুগ্গলানং. তেনাহ ‘‘অত্তনো চ পরস্স চা’’তি. অথ ৰা উভিন্নন্তি উভযেসং লোকানং, ইধলোকপরলোকানন্তি অত্থো.

সপত্তকন্তাতি পটিসত্তূহি ইচ্ছিতা. সপত্তকরণাতি তেহি কাতব্বা. কোধনন্তি কুজ্ঝনসীলং. কোধনাযন্তি কোধনো অযং, অযন্তি চ নিপাতমত্তং. কোধপরেতোতি কোধেন অনুগতো, পরাভিভূতো ৰা. দুব্বণ্ণোৰ হোতীতি পকতিযা ৰণ্ণৰাপি অলঙ্কতপটিযত্তোপি মুখৰিকারাদিৰসেন ৰিরূপো এৰ হোতি এতরহি, আযতিং চাতি. কোধাভিভৰস্স একন্তিকমিদং ফলন্তি দীপেতুং ‘‘দুব্বণ্ণো ৰা’’তি অৰধারণং কত্ৰা পুন ‘‘কোধাভিভূতো’’তি ৰুত্তং. ন পচুরত্থোতি ন পহূতধনো. ন ভোগৰাতি উপভোগপরিভোগৰত্থুরহিতো. ন যসৰাতি ন কিত্তিমা.

ছৰালাতন্তি ছৰদহনালাতং, চিতকাযং সন্তজ্জনুম্মুক্কন্তিপি ৰদন্তি. উভতোপদিত্তন্তি উভোসু কোটীসু দড্ঢং. মজ্ঝে গূথগতন্তি ৰেমজ্ঝট্ঠানে সুনখস্স ৰা সিঙ্গালস্স ৰা উহদেন গূথেন মক্খিতং. কট্ঠত্থন্তি দারুকিচ্চং. নেৰ ফরতি ন সাধেতি. তথূপমাহন্তি তথূপমং তাদিসং অহং. ইমন্তি ‘‘সো চ হোতি অভিজ্ঝালূ’’তিআদিনা (ইতিৰু. ৯২) হেট্ঠা ৰুত্তং সন্ধায সত্থা ৰদতি, তস্মা কামেসু তিব্বসারাগতাদিনা সীলরহিতন্তি অধিপ্পাযো. ইধ পন ব্যাপন্নচিত্তং পদুট্ঠমনসঙ্কপ্পতাৰসেন যোজেতব্বং.

সো দানি ত্ৰন্তিআদি যথাৰুত্তেহি সুত্তপদেহি অত্তনো ওৰদনাকারদস্সনং.

২৪৪. যো যো ধম্মোতি কাযসমাচারাদীসু যো যো সুচরিতধম্মো. ৰূপসন্তোতি সংযতো. পরিসুদ্ধোতি কিলেসমলৰিগমেন ৰিসুদ্ধো. কিলেসদাহাভাৰেন ৰা উপসন্তো, অনৰজ্জভাৰেন পরিসুদ্ধো, কাযসমাচারস্সেৰ উপসমো চিরকালং সংযতকাযকম্মতায ৰেদিতব্বো. এৰং সেসেসুপি.

তেতি ৰচীমনোসমাচারে.

সোতি উপসন্তৰচীসমাচারো পুগ্গলো. পটিসন্থারকুসলোতি যথা পরেহি ছিদ্দং ন হোতি, এৰং পটিসন্থরণে কুসলো. সখিলোতি অধিৰাসনখন্তিসঙ্খাতেন সখিলভাৰেন সমন্নাগতো. সুখসম্ভাসোতি পিযকথো. সম্মোদকোতি সম্মোদনীযকথায সম্মোদনসীলো. উত্তানমুখোতি ৰিকুণিতমুখো অহুত্ৰা পীতিসোমনস্সৰসেন ৰিকসিতমুখো. পুব্বভাসীতি যেন কেনচি সমাগতো পটিসন্থারৰসেন পঠমংযেৰ আভাসনসীলো. মধুরেন সরেন ধম্মং ওসারেতি সরভঞ্ঞৰসেন. সরভাণং পন করোন্তো পরিমণ্ডলেহি পরিপুণ্ণেহি পদেহি চ ব্যঞ্জনেহি চ অব্যাকুলেহি ধম্মকথং কথেতি.

সব্বজনস্স পাকটো সক্কচ্চকিরিযাযাতি অধিপ্পাযো. তেনাহ ‘‘যো হী’’তিআদি. ওকপ্পেত্ৰাতি সদ্দহিত্ৰা. ওকপ্পনলক্খণা হি সদ্ধা. ওহিতসোতোতি অৰহিতসোতো, সুস্সুসন্তোতি অত্থো. অট্ঠিংকত্ৰা অত্থং কত্ৰা, অত্থিকো ৰা হুত্ৰা.

‘‘একোপি ন ৰূপসন্তো হোতী’’তি পাঠো, এৰরূপো পুগ্গলো নিরযতো নিরযং উপপজ্জন্তো বহুকালং তত্থেৰ সংসরতীতি দস্সেতুং ‘‘অট্ঠমহানিরযসোল়সউস্সদনিরযপরিপূরকো ভৰিস্সতী’’তি ৰুত্তং. তত্থ সঞ্জীৰাদযো অট্ঠ মহানিরযা. অৰীচিমহানিরযস্স দ্ৰারে দ্ৰারে চত্তারো চত্তারো কত্ৰা কুক্কুল়াদযো সোল়স উস্সদনিরযা. কারুঞ্ঞং উপট্ঠপেতব্বং মহাদুক্খভাগিভাৰতো. যস্মিং পুগ্গলে অৰিহেসাভূতা দুক্খাপনযনকামতা উপতিট্ঠতি, তত্থ পটিঘো অনোকাসোৰাতি আহ ‘‘কারুঞ্ঞম্পি পটিচ্চ আঘাতো ৰূপসম্মতী’’তি.

ইমস্স চ অত্থস্সাতি ‘‘যো যো ধম্মো’’তিআদিনা ৰুত্তস্স অত্থস্স.

২৪৫. যং ৰেরী দুক্খাপেতুং সক্কোতি, সো তস্স ৰসেন ‘‘অত্তনো ৰিসযে’’তি ৰুত্তো ভিক্খুনো কাযো. কিন্তি কিং কারণং. তস্সাতি ৰেরিনো. অৰিসযেতি দুক্খং উপ্পাদেতুং অসক্কুণেয্যতায অগোচরে. সচিত্তেতি অত্তনো চিত্তে. মহানত্থকরন্তি ইধলোকত্থপরলোকত্থপরমত্থানং ৰিরাধনৰসেন মহতো ৰিপুলস্স, নানাৰিধস্স চ দিট্ঠধম্মিকাদিভেদস্স অনত্থস্স কারণং. মূলনিকন্তনন্তি সীলস্স মূলানি নাম হিরোত্তপ্পখন্তিমেত্তানুদ্দযা, তেসং ছিন্দনং. কোধো হি উপ্পজ্জমানোৰ পাণাতিপাতাদিৰসেন হিরোত্তপ্পাদীনি উচ্ছিন্দতি. জল়োতি অন্ধবালো.

অনরিযং কম্মন্তি ৰেরিনা কতমহাপরাধমাহ. যো সযন্তি যো ত্ৰং সযম্পি. দোসেতুকামোতি কোধং উপ্পাদেতুকামো. যদি করি যদি অকাসি. দোসুপ্পাদেনাতি দোসস্স উপ্পাদনেন. দুক্খং তস্স চ নামাতি দুক্খঞ্চ নাম তস্স অপরাধকস্স. নামাতি অসম্ভাৰনে নিপাতো, তেন তস্স কারণং অনেকন্তিকন্তি দস্সেতি. তেনাহ ‘‘কাহসি ৰা ন ৰা’’তি, করিস্সসি ন ৰা করিস্সসীতি অত্থো. অহিতং মগ্গন্তি অত্তনো অহিতাৰহং দুগ্গতিমগ্গং.

অট্ঠানেতি দোসো তৰ অপ্পিযস্স কারাপকো, সত্তু পন তস্স ৰসৰত্তিতায দাসসদিসোতি অট্ঠানং পচ্চাপকিরিযায. তস্মা তমেৰ দোসং ছিন্দস্সু উচ্ছিন্দ. খণিকত্তাতি উদযৰযপরিচ্ছিন্নো অত্তনো পৰত্তিকালসঙ্খাতো খণো এতেসং অত্থীতি খণিকা, তব্ভাৰতো খণপভঙ্গুভাৰতোতি অত্থো. কস্স দানীধ কুজ্ঝসীতি অপরাধকস্স সন্তানে যেহি খন্ধেহি তে অপরাধো কতো, তে তংখণংযেৰ সব্বসো নিরুদ্ধা. ইদানি পন অঞ্ঞে তিট্ঠন্তীতি কস্স ত্ৰং ইধ কুজ্ঝসি. ন হি যুত্তং অনপরাধেসু কুজ্ঝনন্তি অধিপ্পাযো. তং ৰিনা কস্স সো করেতি যো পুগ্গলো যস্স দুক্খং করোতি, তং দুক্খকিরিযায ৰিসযভূতং পুগ্গলং ৰিনা কস্স নাম সো দুক্খকারকো দুক্খং করে করেয্য. সযম্পি দুক্খহেতু ত্ৰমিতীতি এৰং সযম্পি ত্ৰং এতস্স দুক্খস্স হেতু, এৰং সমানে তস্স তুয্হঞ্চ তস্স দুক্খস্স হেতুভাৰে কিং কারণা তস্স কুজ্ঝসি ন তুয্হন্তি অত্থো.

২৪৬. পরলোকেপি অনুগামিভাৰতো কম্মংযেৰ সকং সন্তকং এতেসন্তি কম্মস্সকা, তেসং ভাৰো কম্মস্সকতা. পচ্চৰেক্খণা নাম নিসেধনত্থা, নিসেধনঞ্চ ভাৰিনো কম্মস্সাতি আহ ‘‘যং কম্মং করিস্সসী’’তি. পটিঘৰসেন পন পৰত্তকম্মং পাকটভাৰতো আসন্নং, পচ্চক্খঞ্চাতি আহ ‘‘ইদঞ্চা’’তি. চ-সদ্দো ব্যতিরেকে, সো তস্স কম্মস্স ফলনিস্সন্দেন ‘‘নেৰ সম্মাসম্বোধি’’ন্তিআদিনা ব্যতিরেকতো ৰুচ্চমানমেৰত্থং জোতেতি. নেৰ সমত্থন্তি সম্বন্ধো. নিরযে নিযুত্তং, জাতন্তি ৰা নেরযিকং. অত্তানংযেৰ ওকিরতি দোসরজেনাতি অধিপ্পাযো.

২৪৭. সত্থু পুব্বচরিযগুণা পচ্চৰেক্খিতব্বা, সত্থু গারৰেনাপি পটিঘং ৰূপসমেয্যাতি.

বোধিসত্তোপি সমানো ননু তে সত্থা চিত্তং নপ্পদূসেসি, পগেৰ অভিসম্বুদ্ধোতি অধিপ্পাযো. দেৰিযা পদুট্ঠেনাতি দেৰিযা সদ্ধিং পদুব্ভিনা মিচ্ছাচারৰসেন অপরদ্ধেন. যত্থ সুসানে ছৰসরীরং ছড্ডীযতি, তং আমকসুসানং. নিখঞ্ঞমানোতি নিখণিযমানো. পুরিসকারং কত্ৰাতি আৰাটতো নিক্খমনত্থায বাহুবলেন পুরিসকারং কত্ৰা. যক্খানুভাৰেনাতি অড্ডৰিনিচ্ছযেন আরাধিতচিত্তস্স যক্খস্স আনুভাৰেন. সিরিগব্ভন্তি ৰাসাগারে.

আসীসেথেৰাতি যথাধিপ্পেতে অত্থে ঞাযতো অনৰজ্জতো আসং করেয্য. ন নিব্বিন্দেয্যাতি ‘‘এৰং কিচ্ছাপন্নস্স মে কুতো সোত্থিভাৰো’’তি ন নিব্বিন্দেয্য. ৰুত্তঞ্হি ‘‘আপদাসু খো, মহারাজ, থামো ৰেদিতব্বো’’তি (উদা. ৫৩). যথা ইচ্ছিন্তি যেন পকারেন কস্সচি পীল়ং অকত্ৰা রজ্জে পতিট্ঠিতং অত্তানং ইচ্ছিং, তথা অহং অহুন্তি পস্সামি. ৰোতি হি নিপাতমত্তং.

কাসিরঞ্ঞাতি কলাবুনা কাসিরাজেন. সকণ্টকাহীতি অযকণ্টকেহি সকণ্টকাহি.

মহল্লকোতি ৰুদ্ধো ৰযোঅনুপ্পত্তো. রুজ্ঝন্তীতি নিরুজ্ঝন্তি.

চিত্তপরিগ্গণ্হনকালোতি ৰিসেৰনং কাতুং অদত্ৰা চিত্তস্স সম্মদেৰ দমনকালো.

পুথুসল্লেনাতি ৰিপুলেন সল্লেন. নাগোতি হত্থিনাগো. ৰধীতি ৰিজ্ঝি, মারেসীতি ৰা অত্থো. ইমং ঠানং আগন্ত্ৰা মযি এৰং করণং নাম ন তৰ ৰসেন হোতি, তস্মা কস্স ৰা রঞ্ঞো, রাজমত্তস্স ৰা অযং পযোগো উয্যোজনাতি অত্থো.

ছব্বণ্ণরস্মীতি নীলপীতলোহিতাদিৰসেন ছব্বণ্ণমযূখা. ছব্বণ্ণকিরণৰন্তদন্ততায হি তে হত্থী ‘‘ছদ্দন্তা’’তি ৰুচ্চন্তি, ন ছদ্দন্তৰন্ততায.

ছাতোতি জিঘচ্ছিতো. খাদেয্যাতি খাদেয্যং, অযমেৰ ৰা পাঠো. আহিতোতি সুহিতো. সম্বলন্তি মগ্গাহারং. তং পন যস্মা উপচারেন পথস্স হিতন্তি ৰুচ্চতি, তস্মা ‘‘পাথেয্য’’ন্তিপি ৰুত্তং. ‘‘মিত্তদুব্ভী ৰতাযং অন্ধবালো’’তি কারুঞ্ঞেন অস্সুপুণ্ণেহি নেত্তেহি তং পুরিসং উদিক্খমানো.

মা অয্যোসি মে ভদন্তেতি এত্থ মাতি নিপাতমত্তং, মাতি ৰা পটিক্খেপো, তেন উপরি তেন কাতব্বং ৰিপ্পকারং পটিসেধেতি. অয্যো মেতি অয্যিরকো ত্ৰং মম অতিথিভাৰতো. ভদন্তেতি পিযসমুদাচারো. ত্ৰং নামেতাদিসং করীতি ত্ৰম্পি এৰরূপং অকাসি নাম.

তিরচ্ছানভূতোপি পন মহাকপি হুত্ৰা খেমন্তভূমিং সম্পাপেসীতি যোজনা.

পেল়ায পক্খিপন্তেপীতি খুদ্দকায পেল়ায পাদেহি কোটেত্ৰা পক্খিপন্তেপি. মদ্দন্তেপীতি দুব্বলভাৰকরণত্থং নানপ্পকারেহি মদ্দন্তেপি. অলম্পানেতি এৰংনামকে অহিতুণ্ডিকে.

পীতং ৰাতি এত্থ ৰা-সদ্দো অৰুত্তত্থৰিকপ্পে, তেন ওদাতমঞ্জিট্ঠাদিং অৰুত্তং সঙ্গণ্হাতি. চিত্তানুৰত্তন্তোতি চিত্তং অনুৰত্তন্তো. হোমি চিন্তিতসন্নিভো এৰমযং বহুলাভং লভতূতি. আনুভাৰেন পন থলং করেয্য উদকং…পে… ছারিকং করে. এৰং পন যদি চিত্তৰসী হেস্সং…পে… উত্তমত্থো ন সিজ্ঝতীতি তদা অত্তনা তত্থ দিট্ঠং আদীনৰং দস্সেতি ভগৰা. তত্থ উত্তমত্থোতি বুদ্ধভাৰমাহ. ভোজপুত্তেহীতি লুদ্দপুত্তেহি.

অল়ারাতি যেন সযং তদা লুদ্দহত্থতো মোচিতো, তং সত্থৰাহং নামেন আলপতি. অতিকস্সাতি নাসায আৰুতরজ্জুং আকড্ঢিত্ৰা. সম্পরিগয্হাতি কাল়ৰেত্তলতাদীহি সব্বসো পরিগ্গহেত্ৰা, অচ্ছরিযানি দুস্সহানং সহনৰসেনাতি অধিপ্পাযো.

অতিৰিয অযুত্তং অপ্পতিরূপং পটিঘচিত্তুপ্পাদনেন কেনচি অপ্পটিসমখন্তিগুণস্স সত্থুসাসনাৰোক্কমনপ্পসঙ্গতো.

২৪৮. ‘‘অনমতগ্গোযং, ভিক্খৰে, সংসারো’’তিআদিনা (সং. নি. ২.১২৪; ৩.৯৯, ১০০; ৩.৫.৫২০; কথা. ৭৫) আগতানি সুত্তপদানি অনমতগ্গসদ্দো, তদত্থো ৰা এতেসন্তি অনমতগ্গিযানি.

অজেহি গমনমগ্গো অজপথো. সঙ্কূ লগ্গাপেত্ৰা তে আলম্বিত্ৰা গমনমগ্গো সঙ্কুপথো. সঙ্কূতি অঙ্কুসাকারেন কতদীঘদণ্ডো ৰুচ্চতি. আদি-সদ্দেন পপাতমগ্গদুগ্গমগ্গাদিকে সঙ্গণ্হাতি. উভতোব্যূল়্হেতি সম্পহারত্থং দ্ৰীহিপি পক্খেহি গাল়্হসন্নাহে. অঞ্ঞানি চ দুক্করানি করিত্ৰা ধনাসায পব্বতৰিদুগ্গনদীৰিদুগ্গাদিপক্খন্দনৰসেনাতি অধিপ্পাযো. মং পোসেসি, উপকারং অকাসি, তত্র নপ্পতিরূপং মনং পদূসেতুন্তি এৰং চিত্তং উপ্পাদেতব্বন্তি সম্বন্ধো. এৰং চিত্তুপ্পাদনঞ্চ এতরহি দিস্সমানেন পুত্তাদীনং পোসনাদিনা অতীতস্স অনুমানতো গহণৰসেন ৰেদিতব্বং.

২৪৯. মেত্তাযাতি মেত্তাসঙ্খাতায, মেত্তাসহিতায ৰা. চেতোৰিমুত্তিযাতি চিত্তসমাধানে. আসেৰিতাযাতি আদরেন সেৰিতায. ভাৰিতাযাতি ৰড্ঢিতায. বহুলীকতাযাতি পুনপ্পুনং কতায. যানীকতাযাতি যুত্তযানং ৰিয কতায. ৰত্থুকতাযাতি অধিট্ঠানৰত্থুং ৰিয কতায. অনুট্ঠিতাযাতি অধিট্ঠিতায. পরিচিতাযাতি পরিচিণ্ণায চিণ্ণৰসীভাৰায. সুসমারদ্ধাযাতি সুট্ঠু সম্পাদিতায. পাটিকঙ্খাতি ইচ্ছিতব্বা অৰস্সংভাৰিনো. সেসং পরতো আগমিস্সতি.

২৫০. ধাতুৰিনিব্ভোগোতি সসম্ভারসঙ্খেপাদিনা ধাতূনং ৰিনিব্ভুজনং. অপরাধো নাম অপরজ্ঝন্তস্স পুগ্গলস্স রূপধম্মমুখেন গয্হতীতি কত্ৰা আহ ‘‘কিং কেসানং কুজ্ঝসী’’তিআদি, কেসাদিৰিনিমুত্তস্স অপরজ্ঝনকস্স পুগ্গলস্স অভাৰতো. ইদানি নিব্বত্তিতপরমত্থধম্মৰসেনেৰ ৰিনিব্ভোগৰিধিং দস্সেতুং ‘‘অথ ৰা পনা’’তিআদি ৰুত্তং. পঞ্চক্খন্ধে উপাদায, দ্ৰাদসাযতনানি উপাদাযাতি পচ্চেকং উপাদায-সদ্দো যোজেতব্বো. কোধস্স পতিট্ঠানট্ঠানং ন হোতীতি যথা আরগ্গে সাসপস্স, আকাসে চ চিত্তকম্মস্স পতিট্ঠানট্ঠানং নত্থি, এৰমস্স ‘‘ৰেরী’’তি পরিকপ্পিতে পুগ্গলে কোধস্স পতিট্ঠানট্ঠানং ন হোতি, কেসাদীনং অকুজ্ঝিতব্বতো, তব্বিনিমুত্তস্স চ পুগ্গলস্স অভাৰতো.

২৫১. সংৰিভাগোতি আমিসসংৰিভাগো. পরস্সাতি পচ্চত্থিকস্স. ভিন্নাজীৰোতি অপরিসুদ্ধাজীৰো. তস্সেৰং করোতোতি এৰং সংৰিভাগং করোন্তস্স তস্স দাযকস্স. ইতরস্সাতি পটিগ্গাহকস্স. ‘‘মম মাতরা উপাসিকায দিন্নো’’তি ইদং ‘‘ধম্মিযলাভো’’তি এতস্স কারণৰচনং. তেন পন তস্স আগমনসুদ্ধিং দস্সেতি.

সব্বত্থসাধকন্তি ‘‘অত্তত্থো পরত্থো দিট্ঠধম্মিকো অত্থো সম্পরাযিকো অত্থো’’তি (মহানি. ৬৯; চূল়নি. মোঘরাজমাণৰপুচ্ছানিদ্দেস ৮৫; পটি. ম. ৩.৫) এৰমাদীনং সব্বেসং অত্থানং, হিতানং, পযোজনানঞ্চ নিপ্ফাদকং. উন্নমন্তি দাযকা. নমন্তি পটিগ্গাহকা.

২৫২. এৰন্তি যথাৰুত্তেহি ককচূপমোৰাদানুস্সরণাদীহি অত্তনো ওৰদনাকারেহি. ৰূপসন্তপটিঘস্সাতি পটিসঙ্খানবলেন ৰিনোদিতাঘাতস্স. তস্মিম্পীতি ৰেরীপুগ্গলেপি. ৰেরী-গহণেনেৰ চেত্থ অপ্পিযপুগ্গলস্সাপি গহণং দট্ঠব্বং ৰেরিম্হি মেত্তায সিদ্ধায তস্মিম্পি মেত্তাসিদ্ধিতো, পিযতো পন অতিপ্পিযসহাযকস্স ৰিসুং গহণং আসন্নপচ্চত্থিকস্স দুব্বিনিমোচযভাৰদস্সনত্থং. মেত্তাৰসেনাতি মেত্তাযনৰসেন. সমচিত্ততন্তি হিতূপসংহারেন সমানচিত্ততং. সীমাসম্ভেদো সা এৰ সমচিত্ততা. ইমস্মিং পুগ্গলেতি মেত্তাকম্মট্ঠানিকপুগ্গলে. নিসিন্নেতি ভাৰেনভাৰলক্খণে ভুম্মং.

হিতমজ্ঝত্তেতি পিযে, মজ্ঝত্তে চ. চতুব্বিধেতি চতুব্বিধে জনে, যত্থ কত্থচীতি অধিপ্পাযো. নানত্তন্তি পিযমজ্ঝত্তাদিনানাকরণং. হিতচিত্তোৰ পাণিনন্তি কেৰলং সত্তেসু হিতচিত্তো এৰাতি পৰুচ্চতি, ন পন ‘‘মেত্তায নিকামলাভী’’তি ৰা ‘‘কুসলী’’তি ৰা পৰুচ্চতি. কস্মা? যস্মা অত্তাদীসু পস্সতি নানত্তন্তি. কস্মা পনাযং হিতচিত্তো কুসলীতি ন ৰুচ্চতীতি? সাতিসযস্স কুসলস্স ৰসেন কুসলিভাৰস্স অধিপ্পেতত্তা. ইমস্স চ পুগ্গলস্স মেত্তাভাৰনা ন ৰিসেসৰতী. অথ ৰা ন নিকামলাভী মেত্তায যতো অত্তাদীসু পস্সতি নানত্তং. কুসলীতি পৰুচ্চতি, যস্মা হিতচিত্তোৰ পাণিনন্তি এৰমেত্থ অত্থো দট্ঠব্বো. গামসীমাদযো ৰিয গামন্তরাদীহি সত্তসঙ্খাতে মেত্তাৰিসযে ভাৰনায পুব্বে অঞ্ঞমঞ্ঞং অসংকিণ্ণমরিযাদারূপেন ঠিতত্তা অত্তাদযো ইধ সীমা নামাতি আহ ‘‘চতস্সো সীমাযো’’তি. সম্ভিন্না হোন্তীতি এত্থ ৰুত্তং সম্ভেদং দস্সেতুং ‘‘সমং ফরতি মেত্তাযা’’তিআদি ৰুত্তং. মহাৰিসেসোতি মহন্তো ভাৰনায ৰিসেসো অতিসযো. পুরিমেন পুরিমতো অত্তাদিনানত্তদস্সিনা. ন নাযতীতি ন ঞাযতি.

২৫৩. নিমিত্তন্তি যথা কসিণকম্মট্ঠানাদীসু তংতংকসিণমণ্ডলাদিপরিগ্গহমুখেন ভাৰনাৰসেন লদ্ধং উগ্গহনিমিত্তং নিস্সায ঝানস্স গোচরভাৰেন পটিভাগনিমিত্তং উপতিট্ঠতি, ন এৰমিধ উপট্ঠিতং নিমিত্তং নাম অত্থি. যো পনাযং যথাৰুত্তো সীমাসম্ভেদো লদ্ধো, স্ৰেৰ নিমিত্তং ৰিযাতি নিমিত্তং. তস্মিং হি লদ্ধে ভাৰনায সাতিসযত্তা নীৰরণানি ৰিক্খম্ভিতানেৰ হোন্তি, কিলেসা সন্নিসিন্নাৰ, উপচারসমাধিনা চিত্তং সমাহিতমেৰ. তেনাহ ‘‘নিমিত্তঞ্চ উপচারঞ্চ লদ্ধং হোতী’’তি. তমেৰ নিমিত্তন্তি সীমাসম্ভেদৰসেন পৰত্তসমথনিমিত্তং. অপ্পকসিরেনেৰ অকিচ্ছেনেৰ, পগেৰ পরিপন্থস্স ৰিসোধিতত্তা.

এত্তাৰতাতি এত্তকেন ভাৰনানুযোগেন. অনেন যোগিনা. পঞ্চঙ্গৰিপ্পহীনন্তিআদীনং পদানং অত্থো হেট্ঠা ৰুত্তো এৰ.

‘‘পঠমজ্ঝানাদীনং অঞ্ঞতরৰসেনা’’তি ইদং ৰক্খমানায ৰিকুব্বনায তেসং সাধারণতায ৰুত্তং. অপ্পনাপ্পত্তচিত্তস্সেৰ ন উপচারমত্তলাভিনো. পগুণবলৰভাৰাপাদনেন ৰেপুল্লাদিৰিসেসপ্পত্তস্স ওধিসো, অনোধিসো চ দিসাফরণাদিৰসেন ঝানস্স পৰিজম্ভনা ৰিকুব্বনা ৰিৰিধা কিরিযাতি কত্ৰা.

২৫৪. মেত্তাসহগতেনাতি উপ্পাদতো যাৰ ভঙ্গা মেত্তায সহ পৰত্তেন সংসট্ঠেন সম্পযুত্তেনাতি অত্থো. যস্মা পন তং ৰুত্তনযেন মেত্তায সহগতং, তায একুপ্পাদাদিৰিধিনা সম্মদেৰ আগতং হোতি, তস্মা ৰুত্তং ‘‘মেত্তায সমন্নাগতেনা’’তি. চেতো-সদ্দো ‘‘অধিচেতসো’’তিআদীসু (পাচি. ১৫৩; উদা. ৩৭) সমাধিপরিযাযোপি হোতীতি ততো ৰিসেসেতুং ‘‘চেতসাতি চিত্তেনা’’তি ৰুত্তং. এতন্তি এতং পদং. দিসোধিপরিগ্গহো সত্তোধিপরিগ্গহমুখেনেৰ হোতীতি দস্সেন্তো আহ ‘‘একিস্সা দিসায পঠমপরিগ্গহিতং সত্তং উপাদাযা’’তি. দিসাসু হি ঠিতসত্তা দিসাগহণেন গহিতা. তেনাহ ‘‘একদিসাপরিযাপন্নসত্তফরণৰসেন ৰুত্ত’’ন্তি. ফরণঞ্চ সারম্মণস্স ধম্মস্স অত্তনো আরম্মণস্স ফস্সনা পচ্চক্খতো দস্সনং গহণং আরম্মণকরণমেৰাতি আহ ‘‘ফরিত্ৰাতি ফুসিত্ৰা আরম্মণং কত্ৰা’’তি. ব্রহ্মৰিহারাধিট্ঠিতন্তি মেত্তাঝানুপত্থম্ভিতং. তথাতি নিযমনং. তং অনিযমাপেক্খসম্বন্ধীভাৰতো উপমাকারনিযমনং. দুতিযন্তি উপমেয্যদস্সনং, উপমেয্যঞ্চ নাম উপমং, তেন সম্বন্ধঞ্চ ৰিনা নত্থীতি তদুভযম্পি দস্সেতুং ‘‘যথা পুরত্থিমাদীসূ’’তিআদি ৰুত্তং. তত্থ তথা দুতিযন্তি এত্থ ফরিত্ৰা ৰিহরতীতি আনেত্ৰা সম্বন্ধিতব্বং. এৰং ততিযং চতুত্থন্তি এত্থাপি. তদনন্তরন্তি চ ফরণাপেক্খং অনন্তরগ্গহণং, ন ফরিতব্বদিসাপেক্খং দিসানং অনিদ্দিট্ঠরূপত্তা. ফরণানুক্কমেন হি তাসং দুতিযাদিতা, ন সরূপতো. তেনেৰাহ ‘‘যং কিঞ্চি একং দিস’’ন্তি. ইতীতি এৰং যথাৰুত্তং চতস্সো, এৰং উদ্ধং দিসং ফরিত্ৰা ৰিহরতীতি অত্থো. তেনাহ ‘‘এতেনেৰ নযেনা’’তি. ইদম্পি ইতি-সদ্দস্সেৰ অত্থদস্সনং. পাল়িযং (ম. নি. ৩.৩০৯; ৩.২৩০; ৰিভ. ৬৪২) অধো তিরিযন্তি এত্থ পি-সদ্দো লুত্তনিদ্দিট্ঠোতি দস্সেতুং ‘‘অধোদিসম্পি তিরিযং দিসম্পী’’তি ৰুত্তং. এতেনেৰ ‘‘দুতিয’’ন্তিআদীসুপি পি-সদ্দস্স লুত্তনিদ্দিট্ঠতা দীপিতাতি ৰেদিতব্বং. এৰমেৰাতি ইদম্পি ইতি-সদ্দস্সেৰ অত্থদস্সনং. এত্থ চ ‘‘অধো’’তি ইমিনা যথা নিরযেসু, নাগভৰনাদীসু, যত্থ তত্থ ৰা অত্তনো হেট্ঠিমদিসায সত্তা গয্হন্তি, এৰং ‘‘উদ্ধ’’ন্তি ইমিনা দেৰলোকে, যত্থ তত্থ ৰা অত্তনো উপরিমদিসাযং সত্তা গহিতাতি ৰেদিতব্বং.

মজ্ঝত্তাদীতি আদি-সদ্দেন ইত্থিপুরিসঅরিযানরিযদেৰমনুস্সাদিকে পভেদে সঙ্গণ্হাতি. ঈসকম্পি বহি অৰিক্খিপমানোতি অপ্পকম্পি কম্মট্ঠানতো বহি ৰিক্খেপং অনাপজ্জন্তো হিতূপসংহারতো অঞ্ঞথা থোকম্পি অৰত্তমানো. সব্বত্ততাযাতি ৰা সব্বেন অত্তভাৰেন যথা সব্বভাৰেন অত্তনি অত্তনো অত্তভাৰে হিতেসিতা, এৰং সব্বধি সব্বসত্তেসু মেত্তায ফরিত্ৰা ৰিহরতীতি অত্থো. মেত্তায ৰুচ্চমানত্তা সত্তৰিসযো সব্ব-সদ্দো, সো চ দীঘং কত্ৰা ৰুত্তো, তস্মা সব্বসত্তকাযসঙ্খাতা পজা এতস্স অত্থীতি সব্বাৰন্তোতি পদত্থতো দস্সেন্তো ‘‘সব্বাৰন্তন্তি সব্বসত্তৰন্ত’’ন্তি আহ. এত্থ চ সব্বধীতি দিসোধিনা, দেসোধিনা চ অনোধিসোফরণং ৰুত্তং, সব্বত্ততায সব্বাৰন্তন্তি সত্তোধিনা. তথা হি ৰুত্তং ‘‘অনোধিসো দস্সনত্থ’’ন্তি. একমেৰত্থং পকারতো পরিযাযেন্তি ঞাপেন্তীতি পরিযাযা, ৰেৰচনানি. ৰিপুলাদিসদ্দা চেত্থ তাদিসাতি অধিপ্পাযো. তেনাহ ‘‘ৰিপুলেনাতি এৰমাদিপরিযাযদস্সনতো’’তি. পরিযাযদস্সনে চ পুব্বে গহিতপদানিপি পুন গয্হন্তি, যথা ‘‘সদ্ধা সদ্দহনা’’তি (ধ. স. ১২) এত্থ ৰুত্তম্পি সদ্ধাপদং পুন ইন্দ্রিযাদিপরিযাযদস্সনে ‘‘সদ্ধা সদ্ধিন্দ্রিয’’ন্তি (ধ. স. ১২) ৰুত্তং. তথাসদ্দো ৰা ইতিসদ্দো ৰা ন ৰুত্তোতি ‘‘মেত্তাসহগতেন চেতসা একং দিসং ফরিত্ৰা ৰিহরতী’’তি এতস্স অনুৰত্তকো তথা-সদ্দো চ ইতি-সদ্দো চ তেসং ফরণানন্তরাদিট্ঠানং অট্ঠানন্তি কত্ৰা তে ন ৰুত্তাতি পুন ‘‘মেত্তাসহগতেন চেতসাতি ৰুত্ত’’ন্তি অত্থো. ৰুত্তস্সেৰত্থস্স পুন ৰচনং নিগমনন্তি আহ ‘‘নিগমনৰসেন ৰা এতং ৰুত্ত’’ন্তি. ননু চ সমাপনৰসেন ৰুত্তস্সেৰত্থস্স পুন ৰচনং নিগমনন্তি? নাযং দোসো ওধিসোঅনোধিসোফরণানং সমাপনে এৰ ৰুত্তত্তা. ৰিপুলেনাতি মহন্তেন, মহত্তঞ্চস্স অসুভকম্মট্ঠানাদীসু ৰিয আরম্মণস্স একদেসমেৰ অগ্গহেত্ৰা অনৰসেসগ্গহণৰসেনাতি আহ ‘‘ফরণৰসেন ৰিপুলতা দট্ঠব্বা’’তি.

কিলেসৰিক্খম্ভনসমত্থতাদীহি মহত্তং গতং, মহন্তেহি ৰা উল়ারচ্ছন্দচিত্তৰীরিযপঞ্ঞেহি গতং পটিপন্নন্তি মহগ্গতং. তযিদং যস্মা একন্ততো রূপাৰচরং, তস্মা ৰুত্তং ‘‘ভূমিৰসেন মহগ্গত’’ন্তি. নিরুল়্হো হি রূপারূপাৰচরেসু মহগ্গতৰোহারো. পগুণৰসেনাতি পকারতো গুণিতং বহুলীকতং পগুণং, তস্স ৰসেন, সুভাৰিতভাৰেনাতি অত্থো. তং হি পমাণং গহেতুং অসক্কুণেয্যতায অপ্পমাণং নাম হোতি. অপ্পমাণসত্তারম্মণৰসেনাতি অপরিমাণসত্তারম্মণকরণৰসেন. সযম্পি ৰেররহিতত্তা, তংসমঙ্গিনো ৰেরাভাৰহেতুত্তা চ অৰেরং. তযিদং দ্ৰযং যতো লভতি, তং দস্সেতুং ‘‘ব্যাপাদপচ্চত্থিকপ্পহানেনা’’তি ৰুত্তং. চেতসো ব্যাপত্তিৰসেন হননতো ব্যাপজ্জং, চেতসিকং অসাতং, তদভাৰতো অব্যাপজ্জং. তেনাহ ‘‘নিদ্দুক্খ’’ন্তি. তং পনস্স অব্যাপজ্জত্তং পঞ্চৰিঞ্ঞাণাদীনং ৰিয ন সভাৰতো, অথ খো পচ্চত্থিকৰিৰেকতোতি দস্সেন্তো ‘‘দোমনস্সপ্পহানতো’’তি আহ. অযন্তি ইধ যথানীতং অপ্পমঞ্ঞাৰিভঙ্গে (ৰিভ. ৬৪২), তেসু তেসু চ সুত্তপদেসেসু (ম. নি. ১.৪৫৯; ২.৩০৯, ৩১৫) আগতং মেত্তাব্রহ্মৰিহারৰিকুব্বনমাহ.

২৫৫. ‘‘তথা’’তি ইমিনা ইমিস্সা ‘‘পঞ্চহাকারেহি, সত্তহাকারেহি, দসহাকারেহী’’তি আকারৰিভাগেন পটিসম্ভিদাযং (পটি. ম. ২.২২) ৰুত্তায চ ৰিকুব্বনায মজ্ঝে ভিন্নসুৰণ্ণস্স ৰিয ভেদাভাৰমুপসংহরতি ওধিসোফরণঅনোধিসোফরণদিসাফরণৰসেন দেসনায আগতত্তা. কেৰলং পনেত্থ পটিসম্ভিদামগ্গে (পটি. ম. ২.২২) ৰিয সত্তোধি ন গহিতোতি অযমেৰ ৰিসেসো. যম্পীতি ৰিকুব্বনং সন্ধাযাহ.

ইদানি ভেদাভাৰদস্সনমুখেন উদ্দেসতো আনীতং পটিসম্ভিদামগ্গপাল়িং নিদ্দেসতো দস্সেত্ৰা তস্সা অনুত্তানপদৰণ্ণনং কাতুং ‘‘তত্থ চা’’তিআদিমাহ.

২৫৬. তত্থ সব্বে সত্তাতি সব্ব-সদ্দো কামং পদেসসব্বৰিসযো, ন সব্বসব্বৰিসযো যথা ‘‘সব্বং জানাতীতি সব্বঞ্ঞুতঞ্ঞাণ’’ন্তি (পটি. ম. ১.১১৯-১২০), ‘‘সত্তা’’তি পন পদেন পরিচ্ছিন্নং অত্তনো ৰিসযং অসেসেত্ৰাৰ পরিযাদিযতীতি আহ ‘‘অনৰসেসপরিযাদানমেত’’ন্তি.

তত্রাতি তস্মিং রূপে. সত্তোতি সজ্জনকিচ্চেন ছন্দাদিপরিযাযেন লোভেন আসত্তো লগ্গো. তত্রাতি ৰা করণে ভুম্মং, তেন ছন্দাদিনাতি অত্থো.

যদি সত্ততায সত্তা, কথং ৰীতরাগেসূতি আহ ‘‘রুল়্হীসদ্দেনা’’তিআদি. অৰীতরাগেসু রুল়্হেন, অৰীতরাগেসু ৰা পৰত্তিত্ৰা ইন্দ্রিযবদ্ধখন্ধসন্তানতায তংসদিসেসু ৰীতরাগেসু রুল়্হেন সদ্দেন. অথ ৰা কিঞ্চি নিমিত্তং গহেত্ৰা সতিপি অঞ্ঞস্মিং তন্নিমিত্তযুত্তে কত্থচি ৰিসযে সম্মুতিযা চিরকালতায নিমিত্তৰিরহেপি পৰত্তি রুল়্হী নাম যথা ‘‘গচ্ছন্তীতি গাৰো’’তি, এৰং সত্তসদ্দস্সাপি রুল়্হীভাৰো দট্ঠব্বো. ভূতপুব্বগতিযা ৰা ৰীতরাগেসু সত্তৰোহারো দট্ঠব্বো. সত্ৰযোগতোতি এত্থ সত্ৰং নাম বুদ্ধি, ৰীরিযং, তেজো ৰা, তেন যোগতো সত্তা, যথা ‘‘নীলগুণযোগতো নীলো পটো’’তি.

পাণন্তি এতেনাতি পাণনং, অস্সাসপস্সাসা, তস্স কম্মং পাণনতা, তায, অস্সাসপস্সাসসম্পযোগেনাতি অত্থো. ভূতত্তাতি কম্মকিলেসেহি জাতত্তা. পূরণতো, গলনতো চ পুগ্গলাতি নেরুত্তা. সত্তা হি নিব্বত্তন্তা তংতংসত্তনিকাযং পূরেন্তা ৰিয হোন্তি, সব্বাৰত্থনিপাতিতায চ গলন্তি চৰন্তীতি অত্থো. অপরিঞ্ঞাতৰত্থুকানং ‘‘অত্তা’’তি ভৰতি এত্থ অভিধানং, চিত্তঞ্চাতি অত্তভাৰো, সরীরং, খন্ধপঞ্চকমেৰ ৰা. তন্তি খন্ধপঞ্চকং. উপাদাযাতি গহেত্ৰা উপাদানং নিস্সযং কত্ৰা. পঞ্ঞত্তিমত্তসম্ভৰতোতি পরমত্থতো অসন্তেপি সত্তসঞ্ঞিতে পঞ্ঞত্তিমত্তেন সম্ভৰতো.

যথা চ সত্তাতি ৰচনন্তি যথা সত্ত-সদ্দো যথাৰুত্তেনট্ঠেন নিপ্পরিযাযতো পদেসৰুত্তিপি রুল়্হীৰসেন অনৰসেসপরিযাদাযকো. সেসানিপীতি পাণাদিৰচনানিপি. তানিপি হি রূপারূপভৰূপগচতুত্থজ্ঝানাদিসমঙ্গীনং অস্সাসপস্সাসাভাৰতো অৰিনিপাতধম্মানং পুগলনস্স অভাৰতো পদেসৰুত্তীনি. রুল়্হীৰসেন আরোপেত্ৰা যথাৰুত্তায রুল়্হিযা ৰসেন কত্থচি ৰিসযে অৰিজ্জমানম্পি পাণপুগ্গলভাৰং আরোপেত্ৰা. যদি সাধারণতো সত্তৰেৰচনানীতি গহেত্ৰা অনোধিসোফরণা মেত্তা ৰুচ্চতি, অথ কস্মা পঞ্চহেৰ আকারেহি ৰুত্তাতি অনুযোগং সন্ধাযাহ ‘‘কামঞ্চা’’তিআদি. কেচি পনাহু ‘‘ন খো পনেতানি ‘‘সত্তা’’তিআদীনি পদানি ৰেৰচনতামত্তং উপাদায গহিতানি, যতো জন্তুআদীনম্পি গহণং আপজ্জেয্য, অত্থৰিসেসং পন নিমিত্তভূতং উপাদায গহিতানী’’তি, তে সন্ধাযাহ ‘‘যে পনা’’তিআদি. তত্থ অত্থতোতি সজ্জনট্ঠেন সত্তা, পাণনট্ঠেন পাণাতি এৰমাদিঅত্থতো. তেসং তং মতিমত্তন্তি দস্সেন্তো আহ ‘‘অনোধিসোফরণা ৰিরুজ্ঝতী’’তি. কস্মা? কেচি সত্তা, কেচি পাণা, কেচি পুগ্গলাতি আপজ্জনতো. তথা অত্থং অগ্গহেত্ৰাতি সত্তাদিসদ্দা সপ্পদেসৰিসযাতি এৰমত্থং অগ্গহেত্ৰা পুব্বে ৰুত্তনযেন নিপ্পদেসৰিসযাতি এৰমত্থং গহেত্ৰাতি অধিপ্পাযো. তেনাহ ‘‘ইমেসূ’’তিআদি. পঞ্চসু আকারেসূতি ‘‘সব্বে সত্তা’’তিআদিনা পাল়িযং (পটি. ম. ২.২২) আগতেসু পঞ্চসু ভাৰনাকারেসু. অঞ্ঞতরৰসেনাতি যস্স কস্সচি ৰসেন.

২৫৭. ইদানি দ্ৰাৰীসতিযা ভাৰনাকারেসু অপ্পনা পরিগ্গহেত্ৰা দস্সেতুং ‘‘এত্থ চা’’তিআদি ৰুত্তং. ব্যাপাদরহিতাতি দোমনস্সব্যাপাদরহিতা. তস্মাতি যস্মা ন কেৰলং যথাৰুত্তআকারৰিভাগমত্ততো অপ্পনাৰিভাগো, তস্মা. ইমেসুপি পদেসূতি ‘‘সব্বে সত্তা অৰেরা হোন্তূ’’তিআদিকোট্ঠাসেসুপি. যং যং পাকটং হোতীতি যদিপি পুব্বভাগে তত্থ তত্থ অভিনিৰেসে অনেককোট্ঠাসৰসেনেৰ মনসিকারং পৰত্তেতি, ভাৰনায সমিজ্ঝনক্খণে পন তত্থ যং পগুণতরতায সুপাকটং হোতি, তস্স ৰসেন অপ্পনা হোতি, যথা তং দ্ৰত্তিংসাকারে. তত্থ পন আরম্মণং, ইধ ভাৰনাকারোতি অযমেৰ ৰিসেসো. চতুন্নন্তি চতুন্নং চতুন্নং. ব্যাপনিচ্ছালোপেন হি নিদ্দিট্ঠং. এস নযো সেসেসুপি.

লিঙ্গৰসেন ৰুত্তং তেসং পচুরতো লব্ভমানত্তা. ততিযা পন পকতি যদিপি পঠমদুকেন ন সঙ্গহিতা, দুতিযদুকেন পন তিকেন চ সঙ্গহিতা এৰ.

ইতি সব্বানিপীতি অনোধিসোফরণে ৰীসতি, ওধিসোফরণে অট্ঠৰীসতি, দিসাফরণে চত্তারি সতানি, অসীতি চাতি এৰং সব্বানিপি. সত-সদ্দাপেক্খায নপুংসকনিদ্দেসো.

২৫৮. এৰং মেত্তাভাৰনং ৰিভাৰেত্ৰা ইদানি তত্থ আনিসংসে ৰিভাৰেতুং ‘‘ইতী’’তিআদি আরদ্ধং. তত্থ সেসা জনাতি মেত্তায চেতোৰিমুত্তিযা অলাভিনো. সম্পরিৰত্তমানাতি দক্খিণেন পস্সেন অসযিত্ৰা সব্বসো পরিৰত্তমানা. কাকচ্ছমানাতি ঘুরুঘুরুপস্সাসৰসেন ৰিস্সরং করোন্তা. সুখং সুপতীতি এত্থ দুৰিধাসুপনা সযনে পিট্ঠিপ্পসারণলক্খণা, কিরিযামযচিত্তেহি অৰোকিণ্ণভৰঙ্গপ্পৰত্তিলক্খণা চ. তত্থাযং উভযথাপি সুখমেৰ সুপতি. যস্মা সণিকং নিপজ্জিত্ৰা অঙ্গপচ্চঙ্গানি সমোধায পাসাদিকেন আকারেন সযতি, নিদ্দোক্কমনেপি ঝানং সমাপন্নো ৰিয হোতি. তেনাহ ‘‘এৰং অসুপিত্ৰা’’তিআদি.

নিদ্দাকালে সুখং অলভিত্ৰা দুক্খেন সুত্তত্তা এৰ পটিবুজ্ঝনকালে সরীরখেদেন নিত্থুননং, ৰিজম্ভনং, ইতো চিতো ৰিপরিৰত্তনঞ্চ হোতীতি আহ ‘‘নিত্থুনন্তা ৰিজম্ভন্তা সম্পরিৰত্তন্তা দুক্খং পটিবুজ্ঝন্তী’’তি. অযং পন সুখেন সুত্তত্তা সরীরখেদাভাৰতো নিত্থুননাদিরহিতোৰ পটিবুজ্ঝতি. তেন ৰুত্তং ‘‘এৰং অপ্পটিবুজ্ঝিত্ৰা’’তিআদি. সুখপটিবোধো চ সরীরৰিকারাভাৰেনাতি আহ ‘‘সুখং নিব্বিকার’’ন্তি.

‘‘ভদ্দকমেৰ সুপিনং পস্সতী’’তি ইদং অনুভূতপুব্বৰসেন, দেৰতূপসংহারৰসেন চস্স ভদ্দকমেৰ সুপিনং হোতি, ন পাপকন্তি কত্ৰা ৰুত্তং. তেনাহ ‘‘চেতিযং ৰন্দন্তো ৰিযা’’তিআদি. ধাতুক্খোভহেতুকম্পি চস্স বহুলং ভদ্দকমেৰ সিযা যেভুয্যেন চিত্তজরূপানুগুণতায উতুআহারজরূপানং.

উরে আমুত্তমুত্তাহারো ৰিযাতি গীৰায বন্ধিত্ৰা উরে লম্বিতমুত্তাহারো ৰিযাতি কেহিচি ৰুত্তং. তং একাৰলিৰসেন ৰুত্তং সিযা, অনেকরতনাৰলিসমূহভূতো পন মুত্তাহারো অংসপ্পদেসতো পট্ঠায যাৰ কটিপ্পদেসস্স হেট্ঠাভাগা পলম্বন্তো উরে আমুক্কোযেৰ নাম হোতি.

তত্থেৰাতি পাটলিপুত্তেযেৰ. সক্কা নিসীদিতুং ৰা নিপজ্জিতুং ৰা দেসস্স খেমতায, তস্স তস্স পদেসস্স রমণীযতায চ.

দসাৰ অন্তো দসন্তো, ৰত্থস্স ওসানন্তো.

সমপ্পৰত্তৰাসন্তি তত্থ তত্থ ৰিহারে সমপ্পৰত্তৰত্তৰাসং. থেরো কির অত্তনা পৰিট্ঠপৰিট্ঠৰিহারে ‘‘অহমেত্থ আগন্তুকো’’তি অচিন্তেত্ৰা তত্থ তত্থ যথারহং অত্তনা কাতব্বৰত্তানি পরিপূরেন্তো এৰ ৰিহাসি. অপরে পন ভণন্তি সব্বসত্তেসু সমপ্পৰত্তমেত্তাৰিহারৰাসং. অযং হি থেরো অরহত্তাধিগমতো পুব্বেপি মেত্তাৰিহারী অহোসি.

ৰনন্তরে ঠিতোতি থেরো কির তথা সমপ্পৰত্তৰাসৰসেন চরমানো একদিৰসং অঞ্ঞতরং রমণীযং ৰনন্তরং দিস্ৰা তত্থ অঞ্ঞতরস্মিং রুক্খমূলে সমাপত্তিং সমাপজ্জিত্ৰা যথাপরিচ্ছেদেন ততো উট্ঠিতো অত্তনো গুণাৰজ্জনহেতুকেন পীতিসোমনস্সেন উদানেন্তো ‘‘যাৰতা উপসম্পন্নো’’তি গাথং অভাসি. তমত্থং দস্সেতুং ‘‘ৰনন্তরে ঠিতো’’তি পঠমগাথা ঠপিতা. তত্থ গজ্জমানকোতি সীহগজ্জিতং গজ্জন্তো. গুণমেসন্তোতি অত্তনো গুণসমুদযং গৰেসন্তো পচ্চৰেক্খন্তো.

মণিলরুক্খে নিৰাসিতায তং দেৰতং ‘‘মণিলিযা’’তি ৰোহরন্তি, তস্মা সা দেৰতাপি ‘‘অহং, ভন্তে, মণিলিযা’’তি আহ. রুক্খদেৰতানং হি যেভুয্যেন নিৰাসরুক্খৰসেন ৰোহারো যথা ফন্দনদেৰতাতি. তত্থেৰাতি চিত্তলপব্বতেযেৰ.

‘‘বলৰপিযচিত্ততাযা’’তি ইমিনা বলৰপিযচিত্ততামত্তেনপি সত্থং ন কমতি, পগেৰ মেত্তায চেতোৰিমুত্তিযাতি দস্সেতি.

খিপ্পমেৰ চিত্তং সমাধিযতি কেনচি পরিপন্থেন পরিহীনজ্ঝানস্স ব্যাপাদস্স দূরসমুস্সারিতভাৰতো খিপ্পমেৰ সমাধিযতি. আসৰানং খযাযাতি কেচি. সেসং সুৰিঞ্ঞেয্যমেৰ. এত্থ চ কিঞ্চাপি ইতো অঞ্ঞকম্মট্ঠানৰসেন অধিগতজ্ঝানানম্পি সুখসুপনাদযো আনিসংসা লব্ভন্তি, যথাহ –

‘‘সুখং সুপন্তি মুনযো, অজ্ঝত্তং সুসমাহিতা;

সুপ্পবুদ্ধং পবুজ্ঝন্তি, সদা গোতমসাৰকা’’তি. –

চ আদি, তথাপিমে আনিসংসা ব্রহ্মৰিহারলাভিনো অনৰসেসা লব্ভন্তি ব্যাপাদাদীনং উজুৰিপচ্চনীকভাৰতো ব্রহ্মৰিহারানং. তেনেৰাহ ‘‘নিস্সরণং হেতং, আৰুসো, ব্যাপাদস্স, যদিদং মেত্তা চেতোৰিমুত্তী’’তিআদি (দী. নি. ৩.৩২৬; অ. নি. ৬.১৩). ব্যাপাদাদিৰসেন চ সত্তানং দুক্খসুপনাদযোতি তপ্পটিপক্খভূতেসু ব্রহ্মৰিহারেসু সিদ্ধেসু সুখসুপনাদযো হত্থগতা এৰ হোন্তীতি.

করুণাভাৰনাৰণ্ণনা

২৫৯. করুণন্তি করুণাব্রহ্মৰিহারং. নিক্করুণতাযাতি ৰিহেসায, ‘‘ইধেকচ্চো পাণিনা ৰা লেড্ডুনা ৰা দণ্ডেন ৰা সত্থেন ৰা অঞ্ঞতরঞ্ঞতরেন ৰা সত্তানং ৰিহেঠনজাতিকো হোতী’’তি এৰং ৰুত্তৰিহেঠনেতি অত্থো. আদীনৰন্তি দোসং. যথা তথা সত্তানং ৰিহেঠনায পাপকো ৰিপাকো ইধ চেৰ সম্পরাযে চ. তথা হি যো সত্তে জীৰিতা ৰোরোপনেন ৰা অঙ্গপচ্চঙ্গচ্ছেদনেন ৰা ধনজানিযা ৰা অলাভায ৰা অৰাসায ৰা অনত্থায ৰা অযসত্থায ৰা পরিসংসক্কনেন ৰা অন্তমসো যথাৰজ্জদস্সনেনপি ৰিহেঠেতি, তস্স সো পমাদৰিহারো দিট্ঠেৰ ধম্মে অলাভাযপি হোতি, লদ্ধস্স পরিহানাযপি হোতি, তন্নিমিত্তং পাপকো কিত্তিসদ্দো অব্ভুগ্গচ্ছতি, অৰিসারদো পরিসং উপসঙ্কমতি মঙ্কুভূতো, সম্মূল়্হো কালং করোতি, কাযস্স ভেদা দুগ্গতি পাটিকঙ্খা, সুগতিযম্পি মনুস্সভূতো দুজ্জচ্চোপি হোতি নীচকুলিকো, দুব্বণ্ণোপি হোতি দুদ্দসিকো, বহ্ৰাবাধোপি হোতি রোগবহুলো, দুগ্গতোপি হোতি অপ্পন্নপানো, অপ্পাযুকোপি হোতি পরিত্তজীৰিতোতি এৰমাদিঅনেকানত্থানুবন্ধিতা ৰিহেসায পচ্চৰেক্খিতব্বা, তপ্পটিপক্খতো করুণায আনিসংসা পচ্চৰেক্খিতব্বা. তেন ৰুত্তং ‘‘নিক্করুণতায আদীনৰং করুণায চ আনিসংসং পচ্চৰেক্খিত্ৰা’’তি. ‘‘পিযো হী’’তিআদিনা পঠমং পিযপুগ্গলাদীসু অনারম্ভস্স কারণমাহ. পিযং হি পুগ্গলং করুণাযিতুমারভন্তস্স ন তাৰ পিযভাৰো ৰিগচ্ছতি, অৰিগতে চ তস্মিং কুতো করুণাযনা. তেনাহ ‘‘পিযট্ঠানেযেৰ তিট্ঠতী’’তি. সেসপুগ্গলেসুপি এসেৰ নযো. লিঙ্গৰিসভাগকালকতানং অখেত্তভাৰে কারণং হেট্ঠা ৰুত্তমেৰ.

যত্থ পন পঠমং আরভিতব্বা, তং পাল়িনযেনেৰ দস্সেতুং ‘‘কথঞ্চ ভিক্খূ’’তিআদি আরদ্ধং. তত্থ দুগ্গতন্তি দলিদ্দং. সো হি ভোগপারিজুঞ্ঞতো সুখসাধনানং অভাৰেন দুক্খং গতো উপগতো দুগ্গতোতি ৰুচ্চতি. অথ ৰা দুগ্গতন্তি দুক্খেন সমঙ্গিভাৰং গতং. দুরুপেতন্তি কাযদুচ্চরিতাদীহি উপেতং. গতিকুলরূপাদিৰসেন ৰা তমভাৰে ঠিতো দুগ্গতো. কাযদুচ্চরিতাদীহি উপেতত্তা তমপরাযণভাৰে ঠিতো দুরুপেতোতি এৰমেত্থ অত্থো ৰেদিতব্বো. পরমকিচ্ছপ্পত্তন্তি অতিৰিয কিচ্ছমাপন্নং মহাব্যসনং নিমুগ্গং. অপ্পেৰ নামাতি সাধু ৰত.

ৰধেথ নন্তি ‘‘ঘাতেথ নং চোর’’ন্তি এৰং পহিতায রঞ্ঞো আণায খাদনীযম্পি…পে… দেন্তি ‘‘ইদানেৰ মারিযমানো এত্তকম্পি সুখং লভতূ’’তি. সুসজ্জিতোতি সুখানুভৰনে সন্নদ্ধো.

এতেনেৰ উপাযেনাতি যেন যেন ৰিধিনা এতরহি যথাৰুত্তে পরমকিচ্ছাপন্নে আযতিং ৰা দুক্খভাগিম্হি পুগ্গলে করুণাযিতুং করুণা উপ্পাদিতা, এতেনেৰ নযেন. পিযপুগ্গলেতি পিযাযিতব্বপুগ্গলে. এতরহি ৰা দিস্সমানং আযতিং ৰা ভাৰিনিং দুক্খপ্পত্তিং গহেত্ৰা করুণা পৰত্তেতব্বাতি সম্বন্ধো. মজ্ঝত্তৰেরীসুপি এসেৰ নযো. যো হি সো করুণায ৰত্থুভূতো দুৰিধো পুগ্গলো ৰুত্তো, কামং তত্থ করুণাভাৰনা সুখেনেৰ ইজ্ঝতি, ইমিনা পন ভিক্খুনা তত্থ ভাৰনং পগুণতরং কত্ৰা সীমাসম্ভেদং কাতুং তদনন্তরং পিযপুগ্গলে, ততো মজ্ঝত্তে, ততো ৰেরিপুগ্গলে করুণা ভাৰেতব্বা. ভাৰেন্তেন চ একেকস্মিং কোট্ঠাসে মুদুং কম্মনিযং চিত্তং কত্ৰা তদনন্তরে তদনন্তরে উপসংহরিতব্বং. যস্স পন ৰেরিপুগ্গলো ৰা নত্থি, মহাপুরিসজাতিকত্তা ৰা অনত্থং করোন্তেপি ৰেরিসঞ্ঞাৰ নুপ্পজ্জতি, তেন মজ্ঝত্তে মে চিত্তং কম্মনিযং জাতং, ইদানি ৰেরিম্হি উপসংহরামীতি ব্যাপারোৰ ন কাতব্বো. যস্স পন অত্থি, তং সন্ধাযাহ ‘‘সচে পনা’’তিআদি.

তত্থ পুব্বে ৰুত্তনযেনেৰাতি মেত্তাকম্মট্ঠানিকস্স (ৰিসুদ্ধি. ১.২৪০ আদযো) ৰুত্তনযেন. তং মেত্তায ৰুত্তনযেনেৰ. ৰূপসমেতব্বন্তি ‘‘অথানেন পুরিমপুগ্গলেসূ’’তিআদিনা (ৰিসুদ্ধি. ১.২৪৩), ‘‘ককচূপমওৰাদাদীনং অনুস্সরতো’’তিআদিনা (ৰিসুদ্ধি. ১.২৪৩) চ মেত্তাভাৰনায ৰুত্তেন নযেন তং পটিঘং ৰূপসমেতব্বং. এৰং এতরহি মহাদুক্খপ্পত্তে সুখিতেপি অকতকুসলতায আযতিং দুক্খপ্পত্তিযা ৰসেন করুণাযনৰিধিং দস্সেত্ৰা ইদানি কতকল্যাণেপি তং দস্সেতুং ‘‘যোপি চেত্থা’’তিআদি ৰুত্তং. তেসন্তি ব্যসনানং. ৰট্টদুক্খং অনতিক্কন্তত্তাতি সম্মাসম্বুদ্ধেনাপি অক্খানেন পরিযোসাপেতুং অসক্কুণেয্যস্স অনাগতস্স আপাযিকস্স সুগতীসুপি জাতিজরাদিভেদস্সাতি অপরিমিতস্স সংসারদুক্খস্স অনতিক্কন্তভাৰতো. সব্বথাপি করুণাযিত্ৰাতি দুক্খপ্পত্তিযা, সুখপ্পত্তিযা অকতকুসলতায ৰা কতাকুসলতায ৰাতি সব্বপকারেনপি করুণায ৰত্থুভাৰস্স সল্লক্খণেন তস্মিং তস্মিং পুগ্গলে করুণং কত্ৰা করুণাভাৰনং ৰড্ঢেত্ৰা. ৰুত্তনযেনেৰাতি ‘‘অথানেন পুনপ্পুনং মেত্তাযন্তেনা’’তিআদিনা (ৰিসুদ্ধি. ১.২৪৩) মেত্তাভাৰনাযং ৰুত্তেন নযেন. তং নিমিত্তন্তি সীমাসম্ভেদৰসেন পৰত্তং সমথনিমিত্তং. মেত্তায ৰুত্তনযেনেৰাতি যথা মেত্তাভাৰনাযং ‘‘অপ্পকসিরেনেৰা’’তিআদিনা (ৰিসুদ্ধি. ১.২৫৩) তিকচতুক্কজ্ঝানৰসেন অপ্পনা ‘‘একং দিসং ফরিত্ৰা ৰিহরতী’’তিআদিনা (ৰিসুদ্ধি. ১.২৫৩-২৫৪) তস্সা ৰড্ঢনা চ ৰুত্তা, এৰমিধ করুণাভাৰনাযং তিকচতুক্কজ্ঝানৰসেন অপ্পনা ৰেদিতব্বা চ ৰড্ঢেতব্বা চ, তথেৰস্সা ৰড্ঢনাৰিধিপি ৰেদিতব্বাতি অধিপ্পাযো. ৰুত্তনযেনেৰাতি অৰধারণেন ‘‘পঠমং ৰেরিপুগ্গলো করুণাযিতব্বো’’তি ইদং যথা পাল়িৰিরুদ্ধং, এৰং যুত্তিৰিরুদ্ধম্পীতি ইমমত্থং দীপেতি. পঠমং হি ৰেরিং সমনুস্সরতো কোধো উপ্পজ্জেয্য, ন করুণা. অত্তাপি সক্খিভাৰেন করুণাযনৰসেন গহেতব্বো, সো কিমিতি পচ্ছা গয্হতীতি. ‘‘অপ্পনা ৰড্ঢেতব্বা’’তি ইমিনা চ অপ্পনাপ্পত্তচিত্তস্সেৰ ‘‘করুণাসহগতেন চেতসা একং দিসং ফরিত্ৰা ৰিহরতী’’তিআদিনা (দী. নি. ৩.৩০৮; ম. নি. ১.৭৭, ৫০৯; ২.৩০৯, ৩১৫, ৪৫২, ৪৭১; ৩.২৩০) ৰুত্তৰিকুব্বনা ইজ্ঝতীতি অযমত্থো দস্সিতো.

করুণাপদমত্তমেৰ চস্সা পাল়িযা ৰিসেসোতি তং অনামসিত্ৰা পটিসম্ভিদাযং ৰুত্তৰিকুব্বনা, মেত্তায ৰুত্তআনিসংসা চ ইধ লব্ভন্তীতি দস্সেতুং ‘‘ততো পরং…পে… ৰেদিতব্বা’’তি ৰুত্তং. তত্থ ততো পরন্তি ‘‘করুণাসহগতেন চেতসা’’তি (দী. নি. ৩.৩০৮; ম. নি. ১.৭৭, ৫০৯; ২.৩০৯, ৩১৫, ৪৫২, ৪৭১; ৩.২৩০) ৰুত্তৰিকুব্বনতো উপরি. সেসং ৰুত্তনযমেৰ.

মুদিতাভাৰনাৰণ্ণনা

২৬০. পিযপুগ্গলাদীসূতি পিযমজ্ঝত্তৰেরীসু ন আরভিতব্বা. মুদিতাভাৰনাতি ৰিভত্তিং পরিণামেত্ৰা যোজনা. ন হীতিআদি তত্থ কারণৰচনং. পিযভাৰমত্তেনাতি এত্থ মত্ত-সদ্দো ৰিসেসনিৰত্তি অত্থো, তেন সোমনস্সপটিসন্ধিকতাদিসিদ্ধা নিচ্চপ্পহংসিতমুখতা, পুব্বভাসিতা, সুখসম্ভাসতা, সখিলতা, সম্মোদকতাতি এৰমাদিকে মুদিতায পদট্ঠানভূতে ৰিসেসে উল্লিঙ্গেতি, ঈদিসেহি ৰিসেসেহি ৰিরহিতোতি ৰুত্তং হোতি. এৰ-কারেন পন পিযপুগ্গলস্স সুখসমপ্পিততাদিং, মুদিতায চ হেতুভূতং পমোদপ্পৰত্তিং নিৰত্তেতি. পিযপুগ্গলেপি হি পরমায সম্পত্তিযা পমুদিতে হট্ঠতুট্ঠে ভিক্খুনো মুদিতোকাসং লভেয্য. ৰক্খতি হি ‘‘পিযপুগ্গলং ৰা’’তিআদি. আদিতো মজ্ঝত্তপুগ্গলং অনুস্সরন্তস্স উদাসিনতা সণ্ঠাতি, ৰেরিং সমনুস্সরন্তস্স কোধো উপ্পজ্জতি. তেনাহ ‘‘পগেৰ মজ্ঝত্তৰেরিনো’’তি.

পমোদপ্পৰত্তিযা সোণ্ডসদিসো সহাযো সোণ্ডসহাযো. মুদিতমুদিতোৰাতি পসাদসোম্মতায অতিৰিয মুদিতো এৰ. পসাদে হি ইদং আমেডিতং. এৰং অট্ঠকথানযেন আদিতো মুদিতাভাৰনায ৰত্থুং দস্সেত্ৰা ইদানি পাল়িনযেন দস্সেতুং ‘‘পিযপুগ্গলং ৰা’’তিআদি ৰুত্তং. তত্থ সুখিতন্তি সঞ্জাতসুখং, সুখপ্পত্তন্তি অত্থো. সজ্জিতন্তি সুখানুভৰনে সন্নদ্ধং পটিযত্তসুখসাধনং. অহো সাধূতি তস্স সত্তস্স সম্পত্তিযং সম্পজঞ্ঞপুব্বপমোদনাকারদস্সনং. পুন অহো সুট্ঠূতি তস্স পমোদনস্স বহুলীকারদস্সনং. পিযং মনাপন্তি এত্থ মনাপ-গ্গহণেন পাল়িযম্পি অতিপ্পিযসহাযকো অধিপ্পেতোতি একে.

অতীতেতি তস্মিংযেৰ অত্তভাৰে অতীতে. অনাগতেতি এত্থাপি এসেৰ নযো. ন হি ভৰন্তরগতে ব্রহ্মৰিহারভাৰনা রুহতি. যদি এৰং, অতীতানাগতে কথন্তি? নাযং দোসো. ‘‘সো এৰাযং দত্তো তিস্সো’’তি অদ্ধাপচ্চুপ্পন্নতায ৰিজ্জমানভাৰেন গহেতব্বতো. কথং পনস্স অনাগতে সম্পত্তি আরম্মণং হোতীতি? আদেসাদিতো, পচ্চুপ্পন্নায ৰা পযোগসম্পত্তিযা অনুমানতো লদ্ধায গহেতব্বতো.

পিযপুগ্গলেতি সোণ্ডসহাযসঞ্ঞিতে অতিপ্পিযপুগ্গলে, পিযপুগ্গলে চ. দুৰিধোপি চেস ইধ পিযভাৰসামঞ্ঞতো ‘‘পিযপুগ্গলো’’তি ৰুত্তো. অনুক্কমেনাতি অতিপ্পিযপুগ্গলো পিযপুগ্গলো মজ্ঝত্তো ৰেরীতি চতূসু কোট্ঠাসেসু একেকস্মিং কম্মট্ঠানং পগুণং, মুদুং, কম্মনিযঞ্চ কত্ৰা সেসেসু উপসংহরণানুক্কমেন. কিঞ্চাপি চতূসু জনেসু সমচিত্ততাৰ সীমাসম্ভেদো সীমা সম্ভিজ্জতি এতাযাতি কত্ৰা. ভাৰনায পন তথা বহুসো পৰত্তমানায পুরিমসিদ্ধং হেতুং, ইতরং ফলঞ্চ কত্ৰা ৰুত্তং ‘‘সমচিত্ততায সীমাসম্ভেদং কত্ৰা’’তি. যথাৰুত্তসীমাভাৰো ৰা সীমাসম্ভেদোতি ৰুত্তং ‘‘সমচিত্ততায সীমাসম্ভেদং কত্ৰা’’তি. সেসমেত্থ যং ৰত্তব্বং, তং হেট্ঠা ৰুত্তনযমেৰ.

উপেক্খাভাৰনাৰণ্ণনা

২৬১. উপেক্খাভাৰনন্তি উপেক্খাব্রহ্মৰিহারভাৰনং. যস্মা পুরিমব্রহ্মৰিহারত্তযনিস্সন্দো চতুত্থব্রহ্মৰিহারো, তস্মা ৰুত্তং ‘‘মেত্তাদীসু পটিলদ্ধতিকচতুক্কজ্ঝানেনা’’তি. পগুণততিযজ্ঝানাতি সুভাৰিতং ৰসীভাৰং পাপিতং পগুণং, তথারূপা ততিযব্রহ্মৰিহারজ্ঝানতো. অপ্পগুণং হি উপরিঝানস্স পদট্ঠানং ন হোতি. চতুক্কনযৰসেন চেত্থ ততিযগ্গহণং. সুখিতা হোন্তূতিআদিৰসেনাতি আদি-সদ্দেন ‘‘নিদ্দুক্খা হোন্তূ’’তি এৰমাদীনং সঙ্গহো দট্ঠব্বো. সত্তকেলাযনং সত্তেসু মমাযনং মমত্তকরণং, তথা মনসিকারেন যোগো সত্তকেলাযনমনসিকারযুত্তত্তং, তস্মা. মেত্তাদীনং রাগগেহস্সিতদোমনস্সসোমনস্সানং আসন্নৰুত্তিতায যথারহং পটিঘানুনযসমীপচারিতা ৰেদিতব্বা. অথ ৰা ‘‘সুখিতা হোন্তু, দুক্খতো মুচ্চন্তু মোদন্তূ’’তি হিতেসিতভাৰপ্পত্তিযা তিস্সন্নম্পি অনুনযস্স আসন্নচারিতা. সতি চ তব্বিপরিযাযে লোহিতপ্পকোপে পুব্বো ৰিয লদ্ধোকাসমেৰেত্থ পটিঘন্তি অৰিসেসেন তাসং পটিঘানুনযসমীপচারিতা দট্ঠব্বা.

‘‘সোমনস্সযোগেন ওল়ারিকত্তা’’তি ইদং ততিযজ্ঝানস্স ৰসেন ৰুত্তং, ততো ৰুট্ঠিতস্স ইদমাদীনৰদস্সনন্তি. মেত্তাদিৰসেন পন ওল়ারিকভাৰে ৰুচ্চমানে ৰিতক্কৰিচারপীতিযোগেনেৰ ওল়ারিকতা ৰত্তব্বা সিযা, তাহিপি তাসং সমাযোগসম্ভৰতো, উপেক্খায চ তদভাৰতো. ন ৰা ৰত্তব্বা ততিযজ্ঝানিকানংযেৰ মেত্তাদীনং ইধাধিপ্পেতত্তা, তংতংঝানসমতিক্কমেনেৰ চ তংতংঝানিকা মেত্তাদযোপি সমতিক্কন্তা এৰ নাম হোন্তি, ঝানসামঞ্ঞেন ৰিয মেত্তাদিসামঞ্ঞেন ৰোহারমত্তং. পুরিমাসূতি মেত্তাকরুণামুদিতাসু. সন্তভাৰতোতি যথাৰুত্তসত্তকেলাযনাদিঅনুপসন্তভাৰাভাৰতো উপেক্খায সন্তভাৰতো. ‘‘সন্তভাৰতো’’তি চ ইদং নিদস্সনমত্তং দট্ঠব্বং. সুখুমতা পণীততা ৰিদূরকিলেসতা ৰিপুলফলতাতি এৰমাদযোপি উপেক্খায আনিসংসা দট্ঠব্বা. পকতিমজ্ঝত্তোতি কিঞ্চি কারণং অনপেক্খিত্ৰা পকতিযা সভাৰেনেৰ ইমস্স ভিক্খুনো উদাসিনপক্খে ঠিতো. অজ্ঝুপেক্খিত্ৰাতি অত্তনা কতকম্মৰসেনেৰ অযমাযস্মা আগতো গচ্ছতি চ, ত্ৰম্পি অত্তনা কতকম্মৰসেনেৰ আগতো গচ্ছসি চ, ন তস্স তৰ পযোগেন কিঞ্চি সুখং ৰা উপনেতুং, দুক্খং ৰা অপনেতুং লব্ভা, কেৰলং পনেতং চিত্তস্স অনুজুকম্মং, যদিদং মেত্তাযনাদিনা সত্তেসু কেলাযনং. বুদ্ধাদীহি অরিযেহি গতমগ্গো চেস অপণ্ণকপটিপদাভূতো, যদিদং সব্বসত্তেসু মজ্ঝত্ততাতি এৰং পটিপক্খজিগুচ্ছামুখেন মজ্ঝত্ততায সমুপজাতগারৰবহুমানাদরো তং পুগ্গলং পুনপ্পুনং অজ্ঝুপেক্খতি, তত্থ চ সৰিসেসং উপেক্খং পচ্চুপট্ঠপেতি, তস্স তথা পটিপজ্জতো পকতিযাপি উদাসিনত্তা সাতিসযং তত্থ মজ্ঝত্ততা সণ্ঠাতি. ভাৰনাবলেন নীৰরণানি ৰিক্খম্ভিতানেৰ হোন্তি, কিলেসা সন্নিসিন্না এৰ হোন্তি, সো তং উপেক্খং পিযপুগ্গলাদীসু উপসংহরতি. তেনাহ ‘‘উপেক্খা উপ্পাদেতব্বা. ততো পিযপুগ্গলাদীসূ’’তি. একং পুগ্গলন্তি এত্থ অঞ্ঞত্থো এক-সদ্দো ‘‘ইত্থেকে অভিৰদন্তী’’তিআদীসু (ম. নি. ৩.২৭) ৰিয. একৰচনেনেৰ চেত্থ সঙ্খ্যাৰিসেসো সিদ্ধো, তস্মা অঞ্ঞং একং পুগ্গলন্তি অযমেত্থ অত্থো. তেন অত্তানং নিৰত্তেতি. ‘‘নেৰ মনাপ’’ন্তি ইমিনা পিযপুগ্গলং, অতিপ্পিযসহাযকঞ্চ নিৰত্তেতি, অত্তানম্পি ৰা অত্তনি অমনাপতায অভাৰতো. ‘‘ন অমনাপ’’ন্তি ইমিনা অপ্পিযং, ৰেরিপুগ্গলঞ্চ, পারিসেসতো মজ্ঝত্তপুগ্গলস্স গহণং আপন্নং. ইতি ‘‘একং পুগ্গলং নেৰ মনাপং নামনাপ’’ন্তি ইমিনা অত্তনো, পিযাদীনঞ্চ পটিক্খেপমুখেন উদাসিনপুগ্গলং দস্সেতি.

ৰুত্তনযেনাতি ‘‘য্ৰাস্স পকতিমজ্ঝত্তো’’তিআদিনা অনন্তরং ৰুত্তেন নযেন. অত্তসিনেহস্স বলৰভাৰতো ৰেরিতোপি অত্তনি মজ্ঝত্ততায দুরূপসংহারত্তা ‘‘ইমেসু চ অত্তনি চা’’তি অত্তা পচ্ছা ৰুত্তো. পথৰীকসিণে ৰুত্তনযেনেৰাতি ‘‘অযং সমাপত্তি আসন্নপীতিপচ্চত্থিকা’’তিআদিনা (ৰিসুদ্ধি. ১.৮৭) পথৰীকসিণে ৰুত্তনযেন. যং হি হেট্ঠা ‘‘পগুণততিযজ্ঝানা ৰুট্ঠাযা’’তিআদি (ৰিসুদ্ধি. ১.৮৭) ৰুত্তং, তং হেট্ঠা তীসু ব্রহ্মৰিহারেসু, চতুত্থব্রহ্মৰিহারে চ আদীনৰানিসংসদস্সনৰসেন ৰুত্তং. ইদং পন ততিযজ্ঝানে আদীনৰং, চতুত্থজ্ঝানে চ আনিসংসং দিস্ৰা চতুত্থাধিগমায যোগং করোন্তস্স চতুত্থজ্ঝানস্স উপ্পজ্জনাকারদস্সনং. তস্মা তত্থ ৰুত্তং ‘‘পথৰীসদ্দং অপনেত্ৰা তদেৰ নিমিত্তং আরম্মণং কত্ৰা মনোদ্ৰারাৰজ্জনং উপ্পজ্জতী’’তিআদিনা যোজেতব্বং.

পথৰীকসিণাদীসূতি আদি-সদ্দেন সেসকসিণানি, অস্সাসপস্সাসনিমিত্তঞ্চ সঙ্গণ্হাতি. কামং কসিণানাপানেসু উপ্পন্নস্সাপি ততিযজ্ঝানস্স উপেক্খাব্রহ্মৰিহারেন রূপাৰচরজ্ঝানাদিতায অত্থেৰ সভাগতা, তং পন অকারণং আরম্মণস্স ৰিসদিসতাযাতি আহ ‘‘আরম্মণৰিসভাগতাযা’’তি. ননু চ অঞ্ঞথাৰ কসিণাদিভাৰনা, অঞ্ঞথা ব্রহ্মৰিহারভাৰনাতি ভাৰনাৰসেনাপি যথাৰুত্তজ্ঝানানং অত্থেৰ ৰিসদিসতাতি? সচ্চমেতং, ভাৰনাৰসেন পন ৰিসদিসতা অনুপ্পত্তিযা ন একন্তিকং কারণং. তথা হি অঞ্ঞথাৰ মেত্তাদিভাৰনা, অঞ্ঞথা উপেক্খাভাৰনা. তথাপি সত্তেসু যথাপৰত্তিতং হিতেসিতাদিআকারং ব্যতিরেকমুখেন আমসন্তী, ততো ৰিনিৰত্তমানরূপেন অজ্ঝুপেক্খনাকারেন ব্রহ্মৰিহারুপেক্খা পৰত্ততি. তথা হি ৰক্খতি ‘‘কম্মস্সকা সত্তা, তে কস্স রুচিযা সুখিতা ৰা ভৰিস্সন্তী’’তিআদি (ৰিসুদ্ধি. ১.২৬৩). আরম্মণসভাগতাপি চেত্থ অত্থীতি মেত্তাদিৰসেন পটিলদ্ধততিযজ্ঝানস্স ইজ্ঝতি উপেক্খাব্রহ্মৰিহারো. তেন ৰুত্তং ‘‘মেত্তাদীসূ’’তিআদি. তত্থ মেত্তাদীসূতি মেত্তাদীসু নিপ্ফাদেতব্বেসু, মেত্তাদিৰসেনাতি অত্থো. সেসং হেট্ঠা ৰুত্তনযমেৰ.

পকিণ্ণককথাৰণ্ণনা

২৬২. ব্রহ্মুত্তমেনাতি এত্থ সম্মুতিব্রহ্মানো উপপত্তিব্রহ্মানো ৰিসুদ্ধিব্রহ্মানোতি তিৰিধা ব্রহ্মানো.

‘‘সম্পন্নং সালিকেদারং, সুৰা ভুঞ্জন্তি কোসিয;

পটিৰেদেমি তে ব্রহ্মে, ন নে ৰারেতুমুস্সহে. (জা. ১.১৪.১);

পরিব্বজ মহাব্রহ্মে, পচন্তঞ্ঞেপি পাণিনো’’তি. (পাচি. ৬৪৭) –

চ এৰমাদীসু হি ব্রহ্মসদ্দেন সম্মুতিব্রহ্মানো ৰুত্তা.

‘‘অপারুতা তেসং অমতস্স দ্ৰারা,

যে সোতৰন্তো পমুঞ্চন্তু সদ্ধং;

ৰিহিংসসঞ্ঞী পগুণং ন ভাসিং,

ধম্মং পণীতং মনুজেসু ব্রহ্মে’’.

‘‘অথ খো ব্রহ্মা সহম্পতী’’তি (দী. নি. ২.৭১; ম. নি. ১.২৮৩; ২.৩৪০; সং. নি. ১.১৭২; মহাৰ. ৯) চ এৰমাদীসু ব্রহ্মসদ্দেন উপপত্তিব্রহ্মানো ৰুত্তা. ‘‘ব্রহ্মচক্কং পৰত্তেতী’’তিআদি (ম. নি. ১.১৪৮; সং. নি. ২.২১; অ. নি. ৪.৮; ৫.১১; পটি. ম. ২.৪৪) ৰচনতো ‘‘ব্রহ্ম’’ন্তি অরিযধম্মো ৰুচ্চতি, ততো নিব্বত্তত্তা অৰিসেসেন সব্বেপি অরিযা ৰিসুদ্ধিব্রহ্মানো নাম পরমত্থব্রহ্মতায. ৰিসেসতো পন ‘‘ব্রহ্মাতি, ভিক্খৰে, তথাগতস্সেতং অধিৰচন’’ন্তি ৰচনতো সম্মাসম্বুদ্ধো উত্তমব্রহ্মা নাম সদেৰকে লোকে ব্রহ্মভূতেহি গুণেহি উক্কংসপারমিপ্পত্তিতো. ইতি ব্রহ্মানং উত্তমো, ব্রহ্মা চ সো উত্তমো চাতি ৰা ব্রহ্মুত্তমো, ভগৰা. তেন কথিতে ‘‘সো মেত্তাসহগতেন চেতসা’’তিআদিনা (দী. নি. ১.৫৫৬; ৩.৩০৮; ম. নি. ১.৭৭, ৪৫৯, ৫০৯; ২.৩০৯, ৩১৫, ৪৫১, ৪৭১) তত্থ তত্থ ৰেনেয্যানং দেসিতে. ইতীতি এৰং যথাৰুত্তেন ভাৰনাক্কমেন চেৰ অত্থৰণ্ণনাক্কমেন চ ৰিদিত্ৰা জানিত্ৰা. পকিণ্ণককথাপি ৰিঞ্ঞেয্যাতি পুব্বে ৰিয অসাধারণং তংতংব্রহ্মৰিহারপটিনিযতমেৰ অত্থং অগ্গহেত্ৰা সাধারণভাৰতো তত্থ তত্থ পকিণ্ণকং ৰিসটং অত্থং গহেত্ৰা পৰত্তিতা পকিণ্ণককথাপি ৰিজানিতব্বা.

মেজ্জতীতি ধম্মতো অঞ্ঞস্স কত্তুনিৰত্তনত্থং ধম্মমেৰ কত্তারং কত্ৰা নিদ্দিসতি. সিনিয্হতীতি এত্থ সত্তেসু ব্যাপজ্জনৰসেন লূখভাৰস্স পটিপক্খভূতং ঞাণপুব্বঙ্গমং হিতাকারপৰত্তিৰসেন সিনেহনং দট্ঠব্বং, ন তণ্হাযনৰসেন. তং হি মোহপুব্বঙ্গমং লুব্ভনসভাৰং, ইদং পন অদুস্সনসভাৰং অলোভসম্পযুত্তং. ননু চ তণ্হাসিনেহোপি ব্যাপাদৰিরোধী তেন সহানৰট্ঠানতো. যদিপি তেন সহ একস্মিং চিত্তে নপ্পৰত্ততি, ৰিরোধী পন ন হোতি অপ্পহাযকতো. মেজ্জতীতি মিত্তো, হিতজ্ঝাসযো খন্ধপ্পবন্ধো, তপ্পরিযাপন্নতায মিত্তে ভৰা, মিত্তে ৰা আরম্মণভূতে পিযে পুগ্গলে ভৰা, মিত্তস্স এসা পৰত্তি মেজ্জনৰসেন ৰাতি ৰেদিতব্বা.

করোতীতি করুণা, কিং করোতি, কেসং, কিং নিমিত্তন্তি আহ ‘‘পরদুক্খে সতি সাধূনং হদযকম্পন’’ন্তি. কম্পনন্তি চ পরেসং দুক্খং দিস্ৰা তস্স অপনেতুকামস্স অসহনাকারেন চিত্তস্স অঞ্ঞথত্তং. তযিদং সপ্পুরিসানংযেৰ হোতীতি আহ ‘‘সাধূন’’ন্তি. সপ্পুরিসা হি সপরহিতসাধনেন ‘‘সাধূ’’তি ৰুচ্চন্তি. ৰিনাসেতীতি অদস্সনং গমেতি, অপনেতীতি অত্থো. তেনেত্থ হিংসনং অপনযনন্তি দস্সেতি. পরদুক্খাপনযনাকারপ্পৰত্তিলক্খণা হি করুণা. ফরণৰসেনাতি ফুসনৰসেন, আরম্মণকরণৰসেনাতি অত্থো. আরম্মণকরণঞ্চেত্থ দুক্খিতেসু দুক্খাপনযনাকারেনেৰাতি দট্ঠব্বং.

মোদন্তি তাযাতি মোদনকিরিযায মুদিতায করণভাৰনিদ্দেসো, স্ৰাযং উপচারসিদ্ধো, মুদিতাৰিনিমুত্তো নত্থি তত্থ কোচি কত্তাতি তমেৰ কত্তুভাৰেন নিদ্দিসতি ‘‘সযং ৰা মোদতী’’তি, অযম্পি উপচারনিদ্দেসোৰ. ধম্মানং অৰসৰত্তনতোতি ৰসৰত্তিভাৰনিৰারণত্থং ‘‘মোদনমত্তমেৰ ৰা তন্তি মুদিতা’’তি আহ.

পিযাদীসু পক্খপাতুপচ্ছেদনমুখেন উদাসিনভাৰসঙ্খাতা উপপত্তিতো ইক্খা উপেক্খা. তেনাহ ‘‘অৰেরা হোন্তূ’’তিআদি. তত্থ উপেক্খতীতি কত্তুনিদ্দেসে কারণং হেট্ঠা ৰুত্তমেৰ.

২৬৩. হিতো নাম অত্থচরো, তস্মা হিতাকারপ্পৰত্তিলক্খণাতি সত্তানং হিতচরণাকারেন পৰত্তিলক্খণা, হিতাকারস্স ৰা পৰত্তনলক্খণা. হিতূপসংহাররসাতি সত্তেসু হিতস্স উপনযনকিচ্চা, উপনযনসম্পত্তিকা ৰা. ‘‘অনত্থং মে অচরী’’তিআদিনা (ধ. স. ১২৩৭; ৰিভ. ৯০৯) পৰত্তনকস্স আঘাতস্স ৰিনযনাকারেন পচ্চুপতিট্ঠতি, ঞাণস্স গোচরভাৰং গচ্ছতি, যত্থ ৰা সযং উপ্পজ্জতি, তত্থ আঘাতৰিনযনং পচ্চুপট্ঠপেতীতি আঘাতৰিনযপচ্চুপট্ঠানা. অমনাপানম্পি সত্তানং পটিক্কূলে অপ্পটিক্কূলসঞ্ঞিতারূপেন, পগেৰ মনাপানং যং মনাপভাৰদস্সনং, তথাপৰত্তো যোনিসোমনসিকারো, তং পদট্ঠানং এতিস্সাতি মনাপভাৰদস্সনপদট্ঠানা. ব্যাপাদূপসমোতি ব্যাপাদস্স ৰিক্খম্ভনৰসেন ৰূপসমো. সম্পত্তীতি সম্পজ্জনং সম্মদেৰ নিব্বত্তি. সিনেহসম্ভৰোতি তণ্হাসিনেহস্স উপ্পত্তি. ৰিপত্তীতি ৰিনাসো. মেত্তামুখেন হি রাগো ৰঞ্চেতি.

করুণাদীনং লক্খণাদীসু ইমিনা নযেন অত্থো ৰেদিতব্বো. ৰিসেসমত্তমেৰ ৰণ্ণযিস্সাম. সত্তানং পৰত্তদুক্খস্স অপনযনাকারো. অপনযনং পন হোতু ৰা মা ৰা, যো দুক্খাপনযনাকারো, তথাপৰত্তিলক্খণা দুক্খাপনযনাকারপ্পৰত্তিলক্খণা. অপনেতুকামতায পরেসং দুক্খস্স অসহনং অনধিৰাসনং পরদুক্খাসহনং. ন ৰিহিংসা অৰিহিংসা, সত্তানং অৰিহেঠনং. তং পচ্চুপট্ঠপেতি, ৰিহিংসায ৰা পটিপক্খভাৰেন পচ্চুপতিট্ঠতীতি অৰিহিংসাপচ্চুপট্ঠানা. ৰিহিংসূপসমোতি এত্থ ৰিহিংসন্তি এতায সত্তে, ৰিহিংসনং ৰা নেসং তন্তি ৰিহিংসা, সত্তানং ৰিহেঠনাকারেন পৰত্তো করুণায পটিপক্খভূতো পটিঘচিত্তুপ্পাদো. করুণামুখেন সোকো ৰঞ্চেতীতি আহ ‘‘সোকসম্ভৰো ৰিপত্তী’’তি.

পমোদনলক্খণাতি পরসম্পত্তিযা পমোদনলক্খণা. অনিস্সাযনরসাতি ইস্সাযনস্স উসূযনস্স পটিপক্খভাৰকিচ্চা. সত্তানং সম্পত্তিযা, পন্তসেনাসনেসু, অধিকুসলধম্মেসু চ অসহনং অরমণং অরতিইচ্চেৰ সঙ্গহং গচ্ছতি, তস্সা ৰিহননাকারেন পচ্চুপতিট্ঠতি, তস্স ৰা ৰিঘাতং ৰূপসমং পচ্চুপট্ঠপেতীতি অরতিৰিঘাতপচ্চুপট্ঠানা.

পহাসো গেহসিতপীতিৰসেন পহট্ঠভাৰো উপ্পিলাৰিতত্তং. সত্তেসু সমভাৰদস্সনরসাতি পিযাদিভেদেসু সব্বসত্তেসু উদাসিনৰুত্তিযা সমভাৰস্সেৰ দস্সনকিচ্চা, উপপত্তিতো ইক্খণতো সমভাৰেনেৰ তেসং গহণকিচ্চাতি অত্থো. সত্তেসু পটিক্কূলাপটিক্কূলাকারানং অগ্গহণতো তত্থ পটিঘানুনযানং ৰূপসমনাকারেন ৰুত্তিযা তেসং ৰূপসমং ৰিক্খম্ভনং পচ্চুপট্ঠপেতীতি পটিঘানুনযৰূপসমপচ্চুপট্ঠানা. এৰং পৰত্তকম্মস্সকতাদস্সনপদট্ঠানাতি এত্থ ‘‘এৰ’’ন্তি ইমিনা ব্যতিরেকমুখেন হিতূপসংহারদুক্খাপনযনসম্পত্তিপমোদনাকারেন পচ্চামসন্তো মেত্তাদীনং তিস্সন্নং পৰত্তিআকারপটিসেধনমুখেন পৰত্তং কম্মস্সকতাঞাণং উপেক্খাব্রহ্মৰিহারস্স আসন্নকারণং, ন যং কিঞ্চীতি দস্সেতি.

২৬৪. ৰিপস্সনাসুখঞ্চেৰ ভৰসম্পত্তি চাতি এত্থ দিট্ঠধম্মসুখৰিহারো চাতি ৰত্তব্বং. তম্পি হি নেসং সাধারণপযোজনং. তথা ‘‘সুখং সুপতী’’তিআদযো (অ. নি. ৮.১; ১১.১৫) একাদসানিসংসা. তে পন হেট্ঠা ৰুত্তা এৰাতি ইধ ন গহিতা.

নিস্সরতি অপগচ্ছতি এতেনাতি নিস্সরণং, পহাযকং. কামঞ্চেতেহি পঞ্চপি নীৰরণানি, তদেকট্ঠা চ পাপধম্মা ৰিক্খম্ভনৰসেন পহীযন্তি, উজুৰিপচ্চনীকদস্সনৰসেন পন ব্যাপাদাদযো পাল়িযং (দী. নি. ৩.৩২৬; অ. নি. ৬.১৩) ৰুত্তা. এৰঞ্চ কত্ৰা রাগনিস্সরণতাৰচনং উপেক্খাব্রহ্মৰিহারস্স সুট্ঠু সমত্থিতং দট্ঠব্বং.

২৬৫. এত্থাতি এতেসু ব্রহ্মৰিহারেসু. মেত্তা সত্তেসু যথারহং দানপিযৰচনাদিসীলসুতাদিগুণগহণৰসেন পৰত্ততি. তেন ৰুত্তং ‘‘সত্তানং মনাপভাৰদস্সনপদট্ঠানা’’তি. রাগোপি তত্থ যথা তথা গুণগ্গহণমুখেনেৰ পৰত্ততি মনাপসঞ্ঞাপলোভতোতি আহ ‘‘গুণদস্সনসভাগতাযা’’তি. তস্মা মিত্তমুখসপত্তো ৰিয তুল্যাকারেন দূসনতো রাগো মেত্তায আসন্নপচ্চত্থিকো, সো লহুং ওতারং লভতি সতিসম্মোসমত্তেনাপি মেত্তং অপনীয তস্সা ৰত্থুস্মিং উপ্পজ্জনারহত্তা. ততোতি রাগতো, রাগস্স ৰা ওতারলাভতো. সভাগৰিসভাগতাযাতি সভাগস্স, সভাগেন ৰা ৰিসভাগতায. সত্তেসু হি মনাপাকারগাহিনো মেত্তাসভাগস্স তব্বিপরীতসভাৰো ব্যাপাদো তেন ৰিসভাগো. তস্মা সো ওতারং লভমানো চিরেনেৰ লভেয্যাতি পুরিসস্স দূরে ঠিতসপত্তো ৰিয মেত্তায দূরপচ্চত্থিকো. ততোতি ব্যাপাদতো. নিব্ভযেনাতি অনুস্সঙ্কনপরিসঙ্কনেন, লদ্ধপতিট্ঠায মেত্তায ব্যাপাদেন দুপ্পধংসিযত্তাতি অধিপ্পাযো. তেনাহ ‘‘মেত্তাযিস্সতী’’তিআদি.

ইট্ঠানন্তি পিযানং. কন্তানন্তি কমনীযানং. মনাপানন্তি মনৰড্ঢনকানং. ততো এৰ মনো রমেন্তীতি মনোরমানং. লোকামিসপটিসংযুত্তানন্তি তণ্হাসন্নিস্সিতানং. অপ্পটিলাভতো সমনুপস্সতোতি অপ্পটিলাভেন অহমিমে ন লভামীতি পরিতস্সতো. অতীতন্তি অতিক্কন্তং. নিরুদ্ধন্তি নিরোধপ্পত্তং. ৰিপরিণতন্তি সভাৰৰিগমেন ৰিগতং. সমনুস্সরতোতি অনুত্থুননৰসেন চিন্তযতো. গেহসিতন্তি কামগুণনিস্সিতং. ‘‘আদিনা’’তি ইমিনা ‘‘সোতৰিঞ্ঞেয্যানং সদ্দান’’ন্তি এৰমাদিং সঙ্গণ্হাতি. ৰিপত্তিদস্সনসভাগতাযাতি যেসু সত্তেসু ভোগাদিৰিপত্তিদস্সনমুখেন করুণা পৰত্ততি, তেসু তন্নিমিত্তমেৰ অযোনিসো আভোগে সতি যথাৰুত্তদোমনস্সমুখেন সোকো উপ্পজ্জেয্য, সো করুণায আসন্নপচ্চত্থিকো. সোকো হি ইধ দোমনস্সসীসেন ৰুত্তো. সভাগৰিসভাগতাযাতি এত্থ সত্তেসু দুক্খাপনযনকামতাকারস্স করুণাসভাগস্স তেসু দুক্খূপনযনাকারো ৰিহেসাসভাৰো ৰিসভাগোতি তায সভাগৰিসভাগতায সা ওতারং লভমানা চিরেনেৰ লভেয্যাতি পুরিসস্স দূরে ঠিতসপত্তো ৰিয করুণায দূরপচ্চত্থিকা ৰুত্তা.

সম্পত্তিদস্সনসভাগতাযাতি যেসু সত্তেসু ভোগাদিসম্পত্তিদস্সনমুখেন মুদিতা পৰত্ততি, তেসু তন্নিমিত্তমেৰ অযোনিসো আভোগে সতি ‘‘চক্খুৰিঞ্ঞেয্যানং রূপান’’ন্তিআদিনা (ম. নি. ৩.৩০৬) ৰুত্তসোমনস্সমুখেন পহাসো উপ্পজ্জেয্য, সো চ মুদিতায আসন্নপচ্চত্থিকো. পহাসো হি ইধ সোমনস্সসীসেন ৰুত্তো. সভাগৰিসভাগতাযাতি ভোগাদিসম্পত্তীহি মুদিতেসু সত্তেসু পমোদনাকারস্স মুদিতাসভাগস্স তত্থ অনভিরমনাকারা অরতি ৰিসভাগাতি তায সভাগৰিসভাগতায সা ওতারং লভমানা চিরেনেৰ লভেয্যাতি পুরিসস্স দূরে ঠিতসপত্তো ৰিয মুদিতায দূরপচ্চত্থিকা ৰুত্তা. পমুদিতো চাতিআদি মুদিতায সিদ্ধায অযম্পি অরতি ন হোতীতি লদ্ধব্বগুণদস্সনৰসেন ৰুত্তং, ন ইধাধিপ্পেতঅরতিনিগ্গহদস্সনৰসেন. কাযচিত্তৰিৰেকপটিপক্খায ৰা অরতিযা ৰিক্খম্ভিতায মুদিতায পটিপক্খা অরতি সুৰিক্খম্ভনেয্যা হোতীতি দস্সনত্থং একদেসেন অরতি দস্সিতাতি দট্ঠব্বং. অধিকুসলধম্মেসূতি সমথৰিপস্সনাধম্মেসু.

বালকরধম্মযোগতো বালস্স. অত্তহিতপরহিতব্যামূল়্হতায মূল়্হস্স. পুথূনং কিলেসাদীনং জননাদীহি কারণেহি পুথুজ্জনস্স. কিলেসোধীনং মগ্গোধীহি অজিতত্তা অনোধিজিনস্স, ওধিজিনা ৰা সেক্খা ওধিসোৰ কিলেসানং জিতত্তা. তেন ইমস্স ওধিজিতভাৰং পটিক্খিপতি. সত্তমভৰাদিতো উদ্ধং পৰত্তনৰিপাকস্স অজিতত্তা অৰিপাকজিনস্স, ৰিপাকজিনা ৰা অরহন্তো অপ্পটিসন্ধিকত্তা. তেনস্স অসেক্খত্তং পটিক্খিপতি. অনেকাদীনৰে সব্বেসম্পি পাপধম্মানং মূলভূতে সম্মোহে আদীনৰানং অদস্সনসীলতায অনাদীনৰদস্সাৰিনো. আগমাধিগমাভাৰা অস্সুতৰতো. এদিসো একংসেন অন্ধপুথুজ্জনো নাম হোতীতি তস্স অন্ধপুথুজ্জনভাৰদস্সনত্থং পুনপি ‘‘পুথুজ্জনস্সা’’তি ৰুত্তং. এৰরূপাতি ৰুত্তাকারেন সম্মোহপুব্বিকা. রূপং সা নাতিৰত্ততীতি রূপানং সমতিক্কমনায কারণং ন হোতি, রূপারম্মণে কিলেসে নাতিৰত্ততীতি অধিপ্পাযো. সোমনস্সদোমনস্সরহিতং অঞ্ঞাণমেৰ অঞ্ঞাণুপেক্খা. দোসগুণাৰিচারণৰসেন সভাগত্তাতি যথা ব্রহ্মৰিহারুপেক্খা মেত্তাদযো ৰিয সত্তেসু হিতূপসংহারাদিৰসেন গুণদোসে অৰিচারেন্তী কেৰলং অজ্ঝুপেক্খনৰসেনেৰ পৰত্ততি, এৰং অঞ্ঞাণুপেক্খা সত্তেসু ৰিজ্জমানম্পি গুণদোসং অচিন্তেন্তী কেৰলং অজ্ঝুপেক্খনৰসেনেৰ পৰত্ততীতি দোসগুণাৰিচারণৰসেন সভাগা. তস্মা সা লহুং ওতারং লভতীতি ব্রহ্মৰিহারুপেক্খায আসন্নপচ্চত্থিকা ৰুত্তা. সভাগৰিসভাগতাযাতি ইট্ঠানিট্ঠেসু মজ্ঝত্তাকারস্স উপেক্খাসভাগস্স তত্থ অনুরোধৰিরোধপৰত্তিআকারা রাগপটিঘা ৰিসভাগাতি তায সভাগৰিসভাগতায তে ওতারং লভমানা চিরেনেৰ লভেয্যুন্তি পুরিসস্স দূরে ঠিতসপত্তো ৰিয উপেক্খাব্রহ্মৰিহারস্স দূরপচ্চত্থিকা ৰুত্তা.

২৬৬. কত্তুকামতা ছন্দো আদি ‘‘ছন্দমূলকা কুসলা ধম্মা’’তি (অ. নি. ৮.৮৩) ৰচনতো, অথ ৰা সত্তেসু হিতেসিতাদুক্খাপনযনকামতাদিনা অনৰজ্জাভিপত্থনাৰসেন পৰত্তনতো ‘‘কত্তুকামতা ছন্দো আদী’’তি ৰুত্তং. উপেক্খাব্রহ্মৰিহারোপি হি সত্তেসু অনিরাকতহিতচ্ছন্দোযেৰ ‘‘তত্থ অব্যাৰটতা অপণ্ণকপটিপদা’’তি অজ্ঝুপেক্খনাকারেন পৰত্ততি মাতা ৰিয সকিচ্চপসুতে পুত্তে. নীৰরণাদীতি আদি-সদ্দেন তদেকট্ঠকিলেসানং সঙ্গহো দট্ঠব্বো. কত্থচি সত্তগ্গহণম্পি সঙ্খারগ্গহণমেৰ হোতি পুগ্গলাধিট্ঠানায দেসনায যথা ‘‘সব্বে সত্তা আহারট্ঠিতিকা’’তি (অ. নি. ১০.২৭; খু. পা. ৪.১), ন এৰমিধাতি আহ ‘‘পঞ্ঞত্তিধম্মৰসেন একো ৰা সত্তো অনেকে ৰা সত্তা আরম্মণ’’ন্তি. পঞ্ঞত্তিধম্মৰসেনাতি পঞ্ঞত্তিসঙ্খাতধম্মৰসেন. কামঞ্চেত্থ ‘‘সুখিতা হোন্তূ’’তিআদিনা (পটি. ম. ২.২৩) ভাৰনাযং সুখাদিগ্গহণম্পি লব্ভতি. তং পন ‘‘সব্বে সঙ্খারা অনিচ্চা’’তি (ধ. প. ২৫৫; থেরগা. ৬৭৬; নেত্তি. ৫) ৰিপস্সনায অনিচ্চলক্খণগহণং ৰিয অপ্পধানভূতং, সত্তপঞ্ঞত্তি এৰ পধানভাৰেন গয্হতীতি দট্ঠব্বং. উপচারে ৰা পত্তে আরম্মণৰড্ঢনং তত্থাপি সীমাসম্ভেদসিদ্ধিতোতি অধিপ্পাযো.

একমাৰাসং পরিচ্ছিন্দিত্ৰাতি এত্থ ‘‘সত্তে মেত্তায ফরিস্সামী’’তি এৰং ঞাণেন পরিচ্ছেদং কত্ৰা একা রচ্ছা পরিচ্ছিন্দিতব্বাতি যোজনা. রচ্ছাগহণেন রচ্ছাৰাসিনো সত্তা গহিতা যথা একং দিসন্তি. এৰং সব্বত্থ.

২৬৭. কসিণানং নিস্সন্দোতি কসিণজ্ঝানানং নিস্সন্দফলসদিসা আরুপ্পা অরূপজ্ঝানানি, কসিণজ্ঝানানং পারিপূরিযাৰ সিজ্ঝনতো. তেহি ৰিনা অসিজ্ঝনতোতি কেচি. সমাধিনিস্সন্দোতি রূপজ্ঝানসমাধীনং, হেট্ঠিমানং তিণ্ণং অরূপজ্ঝানসমাধীনঞ্চ নিস্সন্দো পটিপাটিযা তে অধিগন্ত্ৰাৰ পটিলভিতব্বতো. ৰিপস্সনানিস্সন্দো ৰিপস্সনানুভাৰেন লদ্ধব্বতো, ৰিপস্সনাৰসেনেৰ চ সমাপজ্জিতব্বতো. সমথৰিপস্সনানিস্সন্দো নিরোধসমাপত্তি. যথাহ ‘‘দ্ৰীহি বলেহি সমন্নাগতত্তা’’তিআদি (ৰিসুদ্ধি. ২.৮৬৮). ‘‘পুরিমব্রহ্মৰিহারত্তযনিস্সন্দো’’তি ইমিনা মেত্তাদিৰসেন তীণি ঝানানি অধিগন্ত্ৰা ঠিতস্সেৰ উপেক্খাব্রহ্মৰিহারো, ন ইতরস্সাতি দস্সেতি. তমেৰত্থং উপমায পাকটতরং কত্ৰা দস্সেতুং ‘‘যথা হী’’তিআদি ৰুত্তং. যং পনেত্থ ৰত্তব্বং, তং হেট্ঠা ৰুত্তমেৰ.

২৬৮. সিযাতি ৰুচ্চমানাকারেন সিযা কস্সচি পরিৰিতক্কো. এত্থাতি এতেসু মেত্তাদীসু ব্রহ্মৰিহারতা ৰেদিতব্বা, ইতরকম্মট্ঠানানি অত্তহিতপটিপত্তিমত্তানি. ইমানি পন ‘‘সব্বে সত্তা সুখিতা হোন্তূ’’তিআদিনা (পটি. ম. ২.২২) পরহিতপটিপত্তিভূতানি. তস্মা সত্তেসু সম্মা পটিপত্তিভাৰেন সেট্ঠা এতে ৰিহারা. ব্রহ্মানোতি উপপত্তিব্রহ্মানো. তে হি ইধ ঝানভাৰনায ৰিনীৰরণচিত্তা হুত্ৰা ব্রহ্মলোকে উপ্পন্না তত্থ যাৰতাযুকং ৰিনীৰরণচিত্তাৰ হোন্তি. তস্মা ‘‘নিদ্দোসচিত্তা ৰিহরন্তী’’তি ৰদন্তি. ব্রহ্মানোতি ৰা সকলবুদ্ধগুণহেতুভূতানং দানপারমিতাদীনং বুদ্ধকরধম্মানং পরিপূরণৰসেন ব্রূহিতগুণা মহাসত্তা বোধিসত্তা. তে হি সব্বসত্তানং হিতেসনেন, অহিতাপনযনেন, সম্পত্তিপমোদনেন, সব্বত্থ ৰিৰজ্জিতাগতিগমনমজ্ঝত্তভাৰাধিট্ঠানেন চ নিদ্দোসচিত্তা ৰিহরন্তি. এৰন্তি যথা তে উপপত্তিব্রহ্মানো, মহাবোধিসত্তব্রহ্মানো ৰা, এৰং এতেহি ব্রহ্মৰিহারেহি সম্পযুত্তা সমঙ্গীভূতা.

২৬৯. চতস্সোৰাতিআদিপঞ্হস্সাতি চতস্সোতিআদিকস্স তিৰিধস্স পঞ্হস্স. ৰিসুদ্ধিমগ্গাদিৰসাতি এত্থ ব্যাপাদসংকিলেসাদিতো ৰিসুজ্ঝনুপাযো ৰিসুদ্ধিমগ্গো. আদি-সদ্দেন হিতূপসংহারাদিমনসিকারৰিসেসা সঙ্গহিতা. আসং মেত্তাদীনং. অপ্পমাণেতি পমাণরহিতে. যেনাতি যেন কারণেন. তন্তি তস্মা. দ-কারো পদসন্ধিকরো.

ব্যাপাদবহুলস্স ৰিসুদ্ধিমগ্গোতি আনেত্ৰা সম্বন্ধিতব্বং, উজুৰিপচ্চনীকভাৰতোতি অধিপ্পাযো. এস নযো সেসেসুপি. পক্খপাতৰসেন অনাভুজনমনাভোগো মজ্ঝত্তাকারোতি অধিপ্পাযো. য্ৰাযং চতুব্বিধো সত্তেসু মনসিকারো ৰুত্তো, তমেৰ উপমায দস্সেতুং ‘‘যস্মা চ যথা মাতা’’তিআদি ৰুত্তং. তত্থ ৰুত্তস্সাপি হিতূপসংহারাদিঅত্থস্স উপমেয্যভাৰং উপনেত্ৰা দস্সেতুং অত্থুপনযনত্থো ‘‘যস্মা চা’’তি চ-সদ্দো. পরিযাযেতি ৰারে, তস্মিং তস্মিং কিচ্চৰসেন পরিৰত্তনক্কমেতি অত্থো. অব্যাৰটাতি অনুস্সুক্কা. তথাতি যথা মাতা দহরাদীসু পুত্তেসু, তথা সব্বসত্তেসু মেত্তাদিৰসেন মেত্তাযনাদিৰসিকেন ভৰিতব্বন্তি যোজনা. তস্মাতি যস্মা সব্বেপি সংকিলেসধম্মা যথারহং দোসমোহরাগপক্খিযা, তেহি চ ৰিসুজ্ঝনুপাযো অপ্পমঞ্ঞা, হিতূপসংহারাদিৰসেন চতুব্বিধো চ সত্তেসু মনসিকারো, তস্মা ৰিসুদ্ধিমগ্গাদিৰসা চতস্সোৰ অপ্পমঞ্ঞা. চতস্সোপি এতা ভাৰেতুকামেন ন একেকন্তি অধিপ্পাযো. সতি হি সব্বসঙ্গহে কমেন ভৰিতব্বং. হিতেসিতা মেত্তাযনন্তি আহ ‘‘এৰং পত্থিতহিতান’’ন্তি. সম্ভাৰেত্ৰা ৰাতি ‘‘ইমায পটিপত্তিযা অযং নিরযাদীসু নিব্বত্তেয্যা’’তি পরিকপ্পেত্ৰা ৰা. দুক্খাপনযনাকআরপ্পৰত্তিৰসেন পটিপজ্জিতব্বন্তি সম্বন্ধো. ততো পরন্তি ততো হিতাকারপ্পৰত্তিআদিতো পরং. কত্তব্বাভাৰতোতি চতুত্থস্স পকারস্স কত্তব্বস্স অভাৰতো. অযং কমোতি অযং ইমাসং অপ্পমঞ্ঞানং যেভুয্যেন পৰত্তনক্কমোতি কত্ৰা ৰুত্তং, ন ‘‘ইমিনাৰ কমেন এতাসং পৰত্তি, ন অঞ্ঞথা’’তি. মেত্তাদীনং হি তিস্সন্নং ভাৰনানং কমনিযমো নত্থি, যং ৰা তং ৰা পঠমং ভাৰেতুং লব্ভা, দেসনাক্কমৰসেন ৰা এৰং ৰুত্তং.

একসত্তস্সাপীতি একস্সাপি সত্তস্স. অপ্পটিভাগনিমিত্তত্তা পরিচ্ছেদগ্গহণং নত্থি, ন চ সম্মুতিসচ্চৰসেন পৰত্তং সত্তগ্গহণং পরিচ্ছিন্নরূপাদিগ্গহণং হোতীতি অপ্পনাপ্পত্তিযা অপরামাসসত্তগ্গহণমুদ্ধভূতানং মেত্তাদীনং একসত্তারম্মণানম্পি অপ্পমাণগোচরতা ৰুত্তা. এৰং পমাণং অগ্গহেত্ৰাতি যথা উদ্ধুমাতকাদীসু অতিরেকুদ্ধুমাতকাদিভাৰপ্পত্তে পদেসে নিমিত্তং গয্হতি, এৰং পমাণং অগ্গহেত্ৰা. সকলফরণৰসেনাতি নিরৰসেসফরণৰসেন.

২৭০. নিস্সরণত্তাতি এত্থ যং যস্স নিস্সরণং, তং তস্স উজুপটিপক্খভূতমেৰ হোতি. যথা কামানং নেক্খম্মং, রূপানং আরুপ্পা, সঙ্খারানং নিব্বানং, এৰং দোমনস্সসহিতানং ব্যাপাদৰিহিংসারতীনং নিস্সরণভূতা মেত্তাকরুণামুদিতা ন সোমনস্সরহিতা হোন্তি. নিস্সরণগ্গহণেনেৰ চ পুব্বভাগিযানং তাসং উপেক্খাসম্পযোগোপি অনুঞ্ঞাতোতি দট্ঠব্বং অনিস্সরণভাৰতো. তথা হি অট্ঠৰীসতিযা চিত্তুপ্পাদেসু করুণামুদিতানং পৰত্তিং আচরিযা ইচ্ছন্তি. ন হি ব্রহ্মৰিহারুপেক্খা উপেক্খাৰেদনং ৰিনা ৰত্ততি পারিসুদ্ধিউপেক্খা ৰিয. ন হি কদাচি পারিসুদ্ধিউপেক্খা ৰেদনুপেক্খং ৰিনা ৰত্ততীতি.

২৭১. সাতসহগতন্তি সুখসহগতং. তস্মাতি যস্মা ‘‘ততো ত্ৰং ভিক্খূ’’তিআদিকায (অ. নি. ৮.৬৩) দেসনায চতুন্নম্পি অপ্পমঞ্ঞানং সৰিতক্কাদিভাৰো ৰিয উপেক্খাসহগতভাৰোপি ৰিঞ্ঞাযতি, তস্মা. চতস্সোপি অপ্পমঞ্ঞা চতুক্কপঞ্চকজ্ঝানিকাতি চোদকস্স অধিপ্পাযো. এৰঞ্হি সতীতি যদি মূলসমাধিম্হি ৰুত্তমত্থং অনন্তরং ৰুত্ততায ব্রহ্মৰিহারেসু পক্খিপতি, এৰং সন্তে কাযানুপস্সনাদযোপি চতুক্কপঞ্চকজ্ঝানিকা সিযুং, ন পন হোন্তি ৰিপস্সনাৰসেন দেসিতত্তাতি অধিপ্পাযো, হোন্তু কাযানুপস্সনাদযো আনাপানভাৰনাৰসেন চতুক্কপঞ্চকজ্ঝানিকাতি ৰদেয্যাতি আসঙ্কন্তো আহ ‘‘ৰেদনাদীসূ’’তিআদি. ব্যঞ্জনচ্ছাযামত্তং গহেত্ৰাতি ‘‘মেত্তা মে চেতোৰিমুত্তি ভাৰিতা ভৰিস্সতী’’তিআদীহি ব্যঞ্জনেহি পকাসিতো এৰ চিত্তসমাধি ‘‘অজ্ঝত্তং মে চিত্তং ঠিতং ভৰিস্সতী’’তিআদীহিপি ব্যঞ্জনেহি পকাসিতোতি ব্যঞ্জনতো লব্ভমানসমাধিচ্ছাযামত্তং গহেত্ৰা উভযত্থ লব্ভমানং অধিপ্পাযং অগ্গহেত্ৰাতি অত্থো. সুত্তত্থং হি অঞ্ঞথা ৰদন্তো অযথাৰাদিতায সত্থারং অপৰদন্তো নাম হোতি. তেনাহ ‘‘মা ভগৰন্তং অব্ভাচিক্খী’’তি.

২৭২. ‘‘তযিমং দোসং পরিহরিতুকামেন ন সব্বং সুত্তং নীতত্থমেৰ, তস্মা গরুকুলতো অধিপ্পাযো মগ্গিতব্বো’’তি দস্সেন্তো ‘‘গম্ভীরং হী’’তিআদিং ৰত্ৰা তত্থ আদিতো পট্ঠায অধিপ্পাযং দস্সেতুং ‘‘অযঞ্হী’’তিআদিমাহ. আযাচিতা ধম্মদেসনা এতেনাতি আযাচিতধম্মদেসনো, তং আযাচিতধম্মদেসনং. এৰমেৰাতি গরহনে নিপাতো, মুদা এৰাতি অত্থো. অজ্ঝত্তন্তি গোচরজ্ঝত্তে, কম্মট্ঠানারম্মণেতি অত্থো. যস্মা চিত্তেকগ্গতা নাম সসন্ততিপরিযাপন্না হোতি, তস্মা অত্থৰণ্ণনাযং ‘‘নিযকজ্ঝত্তৰসেনা’’তি ৰুত্তং. চিত্তং ঠিতং ভৰিস্সতীতি বহিদ্ধা অৰিক্খিপ্পমানং একগ্গভাৰে ঠিতং ভৰিস্সতি. ততো এৰ সুসণ্ঠিতং, সুট্ঠু সমাহিতন্তি অত্থো. উপ্পন্নাতি অৰিক্খম্ভিতা. পাপকাতি লামকা. অকুসলা ধম্মাতি কামচ্ছন্দাদযো অকোসল্লসম্ভূতট্ঠেন অকুসলা ধম্মা. চিত্তং পরিযাদায পৰত্তিতুং ওকাসাদানেন কুসলচিত্তং খেপেত্ৰা ন চ ঠস্সন্তীতি যোজনা. ইমিনা যথাৰুত্তস্স সমাধানস্স কারণমাহ.

চিত্তেকগ্গতামত্তোতি ভাৰনমনুযুত্তেন পটিলদ্ধমত্তং নাতিসুভাৰিতং সমাধানং. তং পন উপরি ৰুচ্চমানানং সমাধিৰিসেসানং মূলকারণভাৰতো ‘‘মূলসমাধী’’তি ৰুত্তো. স্ৰাযং চিত্তেকগ্গতামত্তো ‘‘অজ্ঝত্তমেৰ চিত্তং সণ্ঠপেমি সন্নিসাদেমি একোদিং করোমি সমাদহামী’’তিআদীসু ৰিয খণিকসমাধি অধিপ্পেতো. যথেৰ হি অঞ্ঞত্থাপি ‘‘আরদ্ধং খো পন মে, ভিক্খৰে, ৰীরিযং অহোসি অসল্লীনং…পে… সমাহিতং চিত্তং একগ্গ’’ন্তি (অ. নি. ৮.১১; পারা. ১১) ৰত্ৰা ‘‘ৰিৰিচ্চেৰ কামেহী’’তিআদিৰচনতো (অ. নি. ৮.১১) পঠমং ৰুত্তচিত্তেকগ্গতা ‘‘খণিকসমাধী’’তি ৰিঞ্ঞাযতি, এৰমিধাপীতি. সো এৰ সমাধীতি মূলসমাধিমাহ.

অস্সাতি ভিক্খুনো, অস্স ৰা মূলসমাধিস্স. ভাৰনন্তি ৰড্ঢনং. অযং সমাধীতি চ মূলসমাধিযেৰ অধিপ্পেতো. এৰং ভাৰিতোতি যথা অরণিসহিতেন উপ্পাদিতো অগ্গি গোমযচুণ্ণাদীহি ৰড্ঢিতো গোমযগ্গিআদিভাৰং পত্তোপি অরণিসহিতেন উপ্পাদিতমূলগ্গীত্ৰেৰ ৰুচ্চতি, এৰমিধাপি মূলসমাধি এৰ মেত্তাদিৰসেন ৰড্ঢিতোতি কত্ৰা ৰুত্তং.

অঞ্ঞেসুপি আরম্মণেসু পথৰীকসিণাদীসু. তত্থ যথা মেত্তাভাৰনাপুব্বঙ্গমেন ভাৰনানযেন পথৰীকসিণাদীসু সৰিতক্কাদিভাৰৰসেন চতুক্কপঞ্চকজ্ঝানসম্পাপনৰিধিনা মূলসমাধিস্স ভাৰনা ৰুত্তা, এৰং করুণাদিভাৰনাপুব্বঙ্গমং পথৰীকসিণাদীসুপি ভাৰনাৰিধিং দস্সেত্ৰা পচ্ছা কাযানুপস্সনাদিপুব্বঙ্গমং ভাৰনাৰিধিং দস্সেন্তো আসৰক্খযায ধম্মং দেসেসি. তেন ৰুত্তং ‘‘করুণা মে চেতোৰিমুত্তী’’তিআদি. যদি এৰং ধম্মানুপস্সনাপরিযোসানায দেসনায অরহত্তাধিগমায কম্মট্ঠানস্স কথিতত্তা পুন ‘‘ততো ত্ৰং, ভিক্খু, ইমং সমাধিং সৰিতক্কম্পী’’তিআদি (অ. নি. ৮.৬৩) কস্মা ৰুত্তন্তি? ধম্মানুপস্সনায মত্থকপ্পত্তিদস্সনত্থং. সা হি সঙ্খারুপেক্খাভাৰেন ৰত্তমানা যথাৰুত্তজ্ঝানধম্মে সম্মসন্তী ৰিসেসতো মত্থকপ্পত্তা নাম হোতি. ফলসমাপত্তিভূমিদস্সনত্থং ৰুত্তন্তি কেচি.

পুন যতো খো তেতিআদি অরহত্তপ্পত্তিতো উদ্ধং লদ্ধব্বফাসুৰিহারদস্সনং. তত্থ গগ্ঘসীতি গমিস্সসি. তস্মাতি যস্মা ‘‘সৰিতক্কম্পী’’তিআদিকা দেসনা মেত্তাদীনং আরম্মণতো অঞ্ঞস্মিং আরম্মণে সমাধিং সন্ধায ৰুত্তা, ন অপ্পমঞ্ঞা, তস্মা. ‘‘তথেৰা’’তিআদিনা গন্থন্তরেনপি তমেৰত্থং সমত্থেতি. তত্থ তথেৰাতি তিকচতুক্কজ্ঝানৰসেনেৰ. অভিধম্মেতি চিত্তুপ্পাদকণ্ডে (ধ. স. ২৫১ আদযো), অপ্পমঞ্ঞাৰিভঙ্গাদীসু (ৰিভ. ৬৮৪ আদযো) চ তত্থ তত্থ অভিধম্মপ্পদেসেসু.

২৭৩. সুভপরমাদিৰসেনাতি সুভ-সদ্দো ‘‘সুভন্তেৰ অধিমুত্তো হোতী’’তি (পটি. ম. ১.২১২; অ. নি. ৮.৬৬) এৰং ৰুত্তসুভৰিমোক্খং সন্ধায ৰুত্তো উত্তরপদলোপেন. পরম-সদ্দো উক্কংসত্থো. সুভো সুভৰিমোক্খো পরমো উক্কংসো পরমা কোটি এতিস্সাতি সুভপরমা, মেত্তাচেতোৰিমুত্তি, ততো পরং তায সাধেতব্বং নত্থীতি অত্থো. অসাধারণস্স অত্থস্স অধিপ্পেতত্তা ৰিপস্সনাসুখাদযো ইধ অনৰসরা. ইতরেতরৰিসিট্ঠাপেতে ৰিসেসা, পগেৰ পরেহি. তেনাহ ‘‘অঞ্ঞমঞ্ঞং অসদিসো আনুভাৰৰিসেসো ৰেদিতব্বো’’তি. ৰিসেসেত্ৰাতি অঞ্ঞমঞ্ঞং ৰিসিট্ঠং কত্ৰা.

তস্স তস্স উপনিস্সযত্তাতি সুভৰিমোক্খাদিকস্স তস্স তস্স ৰিমোক্খস্স পকতূপনিস্সযৰসেন উপনিস্সযপচ্চযভাৰতো. ইদানি তমত্থং পাকটতরং কত্ৰা দস্সেতুং ‘‘মেত্তাৰিহারিস্সা’’তিআদি ৰুত্তং. অস্স মেত্তাৰিহারিস্স চিত্তং উপসংহরতোতি সম্বন্ধো. অপ্পটিক্কূলপরিচযাতি মেত্তাভাৰনাৰসেন সত্তসঞ্ঞিতে যত্থ কত্থচি আরম্মণে অপ্পটিক্কূলাকারেনেৰ গহণস্স পরিচিতত্তা. তস্স সঙ্খারভূতম্পি যং কিঞ্চি আরম্মণং অপ্পটিক্কূলাকারেনেৰ পচ্চুপতিট্ঠতি, পগেৰ সভাৰতো. ‘‘অপ্পটিক্কূল’’ন্তি তত্থস্স চিত্তং অভিরতিৰসেন নিরাসঙ্কং পৰত্ততি, পচ্চনীকধম্মেহি চ সুখেন, সুট্ঠু চ ৰিমুচ্চতি, যতস্স ঝানস্স ৰিমোক্খপরিযাযো ৰুত্তো. তেনাহ ‘‘অপ্পটিক্কূলেসূ’’তিআদি. যথাৰুত্তো চ অত্থো অনত্থচরণাদিঅধিপ্পাযেন সচেতনে আরম্মণে আঘাতং উপ্পাদেন্তস্স পটিক্কূলপরিচযা অচেতনেপি ৰাতাতপাদিকে আঘাতুপ্পত্তিযা ৰিভাৰেতব্বো. ন ততো পরন্তি ততো সুভৰিমোক্খতো পরং কস্সচি ৰিমোক্খস্স উপনিস্সযো ন হোতীতি অত্থো.

অভিহনন্তি এতেনাতি অভিঘাতো, দণ্ডো অভিঘাতো যস্স তং দণ্ডাভিঘাতং, তং আদি যস্স তং দণ্ডাভিঘাতাদি, দণ্ডাভিঘাতাদি রূপং নিমিত্তং যস্স তং দণ্ডাভিঘাতাদিরূপনিমিত্তং. কিং পন তন্তি আহ ‘‘সত্তদুক্খ’’ন্তি, দণ্ডপ্পহারাদিজনিতং করজরূপহেতুকং সত্তানং উপ্পজ্জনকদুক্খন্তি অত্থো. রূপে আদীনৰো সুপরিৰিদিতো হোতি করুণাৰিহারিস্স রূপনিমিত্তত্তা, দুক্খস্স করুণায চ পরদুক্খাসহনরসত্তাতি অধিপ্পাযো. তত্থ আকাসে. চিত্তং পক্খন্দতি সব্বসো রূপানং অভাৰো ৰিৰরমপগমোতি.

তেন তেনাতিআদীসু অযং যোজনা – তেন তেন ভোগসম্পত্তিআদিনা পামোজ্জকারণেন পমুদিতানং সত্তানং উপ্পন্নপামোজ্জৰিঞ্ঞাণং সমনুপস্সন্তস্স যোগিনো ‘‘সাধু ৰতাযং সত্তো পমোদতী’’তি মুদিতায পৰত্তিসম্ভৰতো পমুদিতৰিঞ্ঞাণস্স দস্সনেন ৰিঞ্ঞাণগ্গহণপরিচিতং চিত্তং হোতীতি.

অনুক্কমাধিগতন্তি আকাসকসিণৰজ্জে যত্থ কত্থচি কসিণে রূপাৰচরজ্ঝানাধিগমানুক্কমেন রূপৰিরাগভাৰনায অধিগতং. আকাসনিমিত্তং গোচরো এতস্সাতি আকাসনিমিত্তগোচরং, তস্মিং আকাসনিমিত্তগোচরে পঠমারুপ্পৰিঞ্ঞাণে. চিত্তং উপসংহরতোতি দুতিযারুপ্পাধিগমায ভাৰনাচিত্তং নেন্তস্স, তথা ভাৰযতোতি অত্থো. তত্থাতি তস্মিং পঠমারুপ্পৰিঞ্ঞাণে. চিত্তন্তি ৰিঞ্ঞাণঞ্চাযতনচিত্তং. পক্খন্দতীতি অনুপৰিসতি ৰিমোক্খভাৰেন অপ্পেতি.

আভোগাভাৰতোতি ‘‘সুখিতা হোন্তূ’’তিআদিনা (পটি. ম. ২.২৩) সুখাসীসনাদিৰসেন আভুজনাভাৰতো. সত্তানং সুখাসীসনাদিৰসেন পৰত্তমানা মেত্তাদিভাৰনাৰ পরমত্থগ্গহণমুখেন সত্তে আরম্মণং করোতি, উপেক্খাভাৰনা পন তথা অপ্পৰত্তিত্ৰা কেৰলং অজ্ঝুপেক্খনৰসেনেৰ সত্তে আরম্মণং করোতীতি আহ ‘‘উপেক্খাৰিহারিস্স সুখদুক্খাদিপরমত্থগ্গাহৰিমুখভাৰতো অৰিজ্জমানগ্গহণদুক্খং চিত্তং হোতী’’তি. ননু চ ‘‘কম্মস্সকা সত্তা, তে কস্স রুচিযা সুখিতা ৰা ভৰিস্সন্তী’’তিআদিনা পটিক্খেপৰসেনপি পরমত্থগ্গহণমুখেনেৰ উপেক্খাব্রহ্মৰিহারোপি সত্তে আরম্মণং করোতীতি? সচ্চমেতং, তং পন ভাৰনায পুব্বভাগে, মত্থকপ্পত্তিযং পন কেৰলং অজ্ঝুপেক্খনৰসেনেৰ সত্তে আরম্মণং করোতীতি সৰিসেসং পরমত্থতো অৰিজ্জমানে এৰ ৰিসযে তস্স পৰত্তি. অৰিজ্জমানগ্গহণদুক্খতা চ অজ্ঝুপেক্খনৰসেন অপ্পনাপ্পত্তিযা অপরামাসসত্তগ্গহণমুদ্ধভূততায ৰেদিতব্বা. সেসং ৰুত্তনযমেৰ.

২৭৪. সব্বাপেতাতি সব্বাপি এতা অপ্পমঞ্ঞা. দানাদীনন্তি পারমিভাৰপ্পত্তানং দানাদীনং বুদ্ধকরধম্মানং. সব্বকল্যাণধম্মানন্তি সব্বেসং অনৰজ্জধম্মানং, সমতিংসায পারমিতানং, তন্নিমিত্তানং বুদ্ধযানিযানঞ্চ, সব্বেহি ৰা সুন্দরসভাৰানং. ন হি লোকিযধম্মা বুদ্ধকরধম্মেহি আনুভাৰতো উক্কট্ঠা নাম অত্থি, বুদ্ধধম্মেসু ৰত্তব্বমেৰ নত্থি. পরিপূরিকাতি পরিৰুদ্ধিকরা. অধিট্ঠানানি ৰিয হি অপ্পমঞ্ঞা সব্বাসং পারমিতানং পারিপূরিকরা. ‘‘হিতজ্ঝাসযতাযা’’তিআদিনা মেত্তাব্রহ্মৰিহারাদীনং উপেক্খাব্রহ্মৰিহারস্স অধিট্ঠানভাৰদস্সনমুখেন চতূহি অপ্পমঞ্ঞাহি অত্তনো সন্তানস্স পগেৰ অভিসঙ্খতত্তা মহাবোধিসত্তা দানাদিপারমিযো পূরেতুং সমত্থা হোন্তি, নাঞ্ঞথাতি ইমমত্থং দস্সেতি. ইমস্স দাতব্বং, ইমস্স ন দাতব্বন্তি নিদস্সনমত্তং দট্ঠব্বং, ‘‘ইদং দাতব্বং, ইদং ন দাতব্বন্তি চ ৰিভাগং অকত্ৰা’’তি ৰত্তব্বতো. দেয্যপটিগ্গাহকৰিকপ্পরহিতা হি দানপারমিতা. যথাহ –

‘‘যথাপি কুম্ভো সম্পুণ্ণো, যস্স কস্সচি অধোকতো;

ৰমতেৰুদকং নিস্সেসং, ন তত্থ পরিরক্খতী’’তি. (বু. ৰং. ২.১১৮);

‘‘সব্বসত্তান’’ন্তি ইদং ‘‘সুখনিদান’’ন্তি ইমিনাপি সম্বন্ধিতব্বং, ‘‘দেন্তী’’তি ইমিনা চ. তেন দেয্যধম্মেন ৰিয দানধম্মেনাপি মহাসত্তানং লোকস্স বহূপকারতা ৰুত্তা হোতি, তথা তস্স পরিণামনতো. তদত্থদীপনত্থং হি ‘‘ৰিভাগং অকত্ৰা’’তি ৰত্ৰাপি ‘‘সব্বসত্তান’’ন্তি ৰুত্তং. তেসন্তি সব্বসত্তানং. উপঘাতন্তি এত্থাপি ‘‘ৰিভাগং অকত্ৰা’’তি আনেত্ৰা সম্বন্ধিতব্বং. অযং হেত্থ পদযোজনা – ৰিভাগং অকত্ৰা উপঘাতং পরিৰজ্জযন্তা সব্বসত্তানং সুখনিদানং সীলং সমাদিযন্তীতি. সত্তকালৰিকপ্পরহিতা হি সীলপারমিতা, লোকত্থমেৰ চস্স ফলং পরিণমীযতি. নেক্খম্মং ভজন্তীতি পব্বজ্জং উপগচ্ছন্তি. পব্বজিতস্স হি সব্বসো সীলং পরিপূরতি, ন গহট্ঠস্স. ইধাপি ‘‘ৰিভাগং অকত্ৰা সব্বসত্তানং সুখনিদান’’ন্তি ইদং আনেত্ৰা সম্বন্ধিতব্বং. ন হি বোধিসত্তা কালৰিভাগং কত্ৰা পব্বজ্জং অনুতিট্ঠন্তি, সীলং ৰা সমাদিযন্তি, নিদস্সনমত্তঞ্চেতং ঝানাদিনেক্খম্মভজনস্সাপি ইচ্ছিতব্বত্তা. সব্বসত্তানং সুখনিদানতা হেট্ঠা ৰুত্তনযাৰ. এস নযো সেসেসুপি. হিতাহিতেসূতি অত্থানত্থেসু. অসম্মোহত্থাযাতি সম্মোহৰিদ্ধংসনায. পঞ্ঞং পরিযোদপেন্তীতি যোগৰিহিতং ৰিজ্জাট্ঠানাদিং অস্সুতং সুণন্তা সুতং ৰোদপেন্তা অহংকারমমংকারাদিং ৰিধুনন্তা ঞাণং ৰিসোধেন্তি. ‘‘অহং মমা’’তি ৰিকপ্পরহিতা হি পঞ্ঞাপারমিতা. হিতসুখত্থাযাতি সত্তানং হিতসুখাদিৰুদ্ধিযত্থমেৰ. নিচ্চন্তি সততং অৰিচ্ছেদেন পটিপক্খেন অৰোকিণ্ণং. ৰীরিযমারভন্তীতি যথা সত্তানং অনুপ্পন্নং হিতসুখং উপ্পজ্জতি, উপ্পন্নং অভিৰড্ঢতি, এৰং পরক্কমং করোন্তি. সঙ্কোচৰিক্খেপরহিতা হি ৰীরিযপারমিতা. ‘‘ৰীরভাৰং পত্তাপী’’তি ইমিনা অপরদ্ধানং নিগ্গহসমত্থতং দস্সেতি. নানপ্পকারকং অপরাধং খমন্তীতি মম্মচ্ছেদনাকারেন অত্তনি পৰত্তিতং নানাৰিধং অপরাধং সহন্তি. অত্তপরৰিকপ্পৰিরহিতা হি দোসসহনা খন্তিপারমিতা.

পটিঞ্ঞং ন ৰিসংৰাদেন্তীতি অৰিসংৰাদনসামঞ্ঞেন সব্বস্সপি অনরিযৰোহারস্স অকরণমাহ. পটিঞ্ঞাতে, অপটিঞ্ঞাতে চ দিট্ঠাদিকে মিচ্ছাৰিকপ্পরহিতা হি সচ্চপারমিতা. অৰিচলাধিট্ঠানাতি যথাসমাদিন্নেসু দানাদিধম্মেসু নিচ্চলাধিট্ঠাযিনো অচলসমাদানাধিট্ঠানা, সমাদিন্নেসু চ বুদ্ধকরধম্মেসু সম্মদেৰ অৰট্ঠানং অধিট্ঠানপারমিতা. তেসূতি সত্তেসু. অৰিচলাযাতি পটিপক্খেন অকম্পনীযায. এৰন্তি যথাৰুত্তেন সত্তেসু হিতজ্ঝাসযতাদিআকারেন. যথা চ ব্রহ্মৰিহারাধিট্ঠানা পারমিযো, এৰং অধিট্ঠানাধিট্ঠানাপি. তথা হি যথাপটিঞ্ঞং পরানুগ্গহায পারমীনং অনুট্ঠানেন সচ্চাধিট্ঠানং, তপ্পটিপক্খপরিচ্চাগতো চাগাধিট্ঠানং, পারমীহি সচিত্তুপসমতো উপসমাধিট্ঠানং, তাহি পরহিতূপাযকোসল্লতো পঞ্ঞাধিট্ঠানং. এৰং পচ্চেকম্পি পারমিতাসু যথারহং নেতব্বং. অযমেত্থ সঙ্খেপো, ৰিত্থারতো পন পারমিতাসু যং ৰত্তব্বং, তং পরমত্থদীপনিযং চরিযাপিটকৰণ্ণনাযং ৰুত্তনযেনেৰ ৰেদিতব্বং, অতিৰিত্থারভযেন ন ৰিত্থারযিম্হ. তথা দসবলঞাণাদিকেতি. এতাৰ হোন্তীতি এতা হোন্তি এৰাতি যোজনা.

ব্রহ্মৰিহারনিদ্দেসৰণ্ণনা নিট্ঠিতা.

ইতি নৰমপরিচ্ছেদৰণ্ণনা.

১০. আরুপ্পনিদ্দেসৰণ্ণনা

পঠমারুপ্পৰণ্ণনা

২৭৫. উদ্দিট্ঠেসূতি ‘‘চত্তারো আরুপ্পা’’তি এৰং উদ্দিট্ঠেসু, নিদ্ধারণে চেতং ভুম্মং. তেনেৰাহ ‘‘চতূসু আরুপ্পেসূ’’তি. তত্থ রূপৰিৰেকেন অরূপং, অরূপমেৰ আরুপ্পং ঝানং, ইধ পন তদত্থং কম্মট্ঠানং অধিপ্পেতং. তং ভাৰেতুকামো চতুত্থজ্ঝানং উপ্পাদেতীতি সম্বন্ধো. রূপাধিকরণন্তি রূপহেতু. হেতুঅত্থো হি এত্থ অধিকরণ-সদ্দো ‘‘কামাধিকরণ’’ন্তিআদীসু (ম. নি. ১.১৬৮-১৬৯) ৰিয. দণ্ডনট্ঠেন দণ্ডো, মুগ্গরাদি. পরপীল়াধিপ্পাযেন তস্স আদানং দণ্ডাদানং. সত্তানং সসনট্ঠেন সত্থং, আৰুধং. ভণ্ডনং কলহো. ৰিরোধো ৰিগ্গহো. নানাৰাদো ৰিৰাদো. এতন্তি যথাৰুত্তং দণ্ডাদানাদিকং. সব্বসোতি অনৰসেসতো. আরুপ্পে অরূপভাৰে, আরুপ্পে ৰা ভৰে. রূপানংযেৰাতি দিট্ঠাদীনৰানং রূপানংযেৰ, ন অরূপানন্তি অধিপ্পাযো. নিব্বিদাযাতি ৰিক্খম্ভনৰসেন নিব্বিন্দনত্থায. ৰিরাগাযাতি ৰিরজ্জনত্থায. নিরোধাযাতি নিরুজ্ঝনত্থায. সব্বমেতং সমতিক্কমং সন্ধায ৰুত্তং. দণ্ডাদানাদীনন্তি আদি-সদ্দেন অদিন্নাদানাদিকং সব্বং রূপহেতুকং অনত্থং সঙ্গণ্হাতি, ন ইধ পাল়িযং আগতমেৰাতি দট্ঠব্বং. করজরূপেতি যথাৰুত্তাদীনৰাধিকরণভাৰযোগ্যং দস্সেতুং ৰুত্তং, ওল়ারিকরূপেতি অত্থো. আদীনৰন্তি দোসং. তস্সাতি রূপস্স. আলোকোতি ৰণ্ণৰিসেসো এৰাতি তত্থ পৰত্তং পটিভাগনিমিত্তং উগ্ঘাটেত্ৰা সিযা আকাসনিমিত্তং উগ্গহেতুং, ন পন পরিচ্ছিন্নাকাসকসিণং উগ্ঘাটেত্ৰা. তস্স হি উগ্ঘাটনা নাম রূপনিমিত্তেনেৰ সিযাতি আহ ‘‘ঠপেত্ৰা পরিচ্ছিন্নাকাসকসিণং নৰসূ’’তি. কেচি পন ‘‘আলোককসিণম্পি ঠপেত্ৰা অট্ঠসূ’’তি ৰদন্তি, তস্স পন ঠপনে কারণং ন দিস্সতি, করজরূপং অতিক্কন্তং হোতি তস্স অনালম্বনতো.

যদি এৰং কস্মা ‘‘চতুত্থজ্ঝানৰসেনা’’তি ৰুত্তং. ননু পঠমজ্ঝানাদীনিপি তস্স অনালম্বনৰসেনেৰ পৰত্তন্তি পটিভাগনিমিত্তারম্মণত্তা? সচ্চমেতং, ওল়ারিকঙ্গপ্পহানতো পন সন্তসভাৰেন আনেঞ্জপ্পত্তেন চতুত্থজ্ঝানেন অতিক্কন্তং সুট্ঠু অতিক্কন্তং নাম হোতীতি ‘‘চতুত্থজ্ঝানৰসেনা’’তি ৰুত্তং. কেচি ‘‘অস্সাসপস্সাসানং নিরুজ্ঝনতো, কামধাতুসমতিক্কমনতো চা’’তি ৰদন্তি, তং অকারণং, ইতরেসং চিত্তসমুট্ঠানরূপানং সম্ভৰতো, হেট্ঠিমজ্ঝানানঞ্চ অকামধাতুসংৰত্তনীযতো. তপ্পটিভাগমেৰাতি করজরূপপটিভাগমেৰ নিমিত্তগ্গাহসম্ভৰতো. সদিসঞ্চ নাম তং ন হোতি, তস্মা কিং তস্স সমতিক্কমনেনাতি অনুযোগং সন্ধায ‘‘কথং? যথা’’তিআদি ৰুত্তং. তত্থ কথন্তি কথেতুকম্যতাপুচ্ছা. যথাতি ওপম্মত্থে নিপাতো. লেখাচিত্তন্তি কাল়ৰণ্ণাদিনা কতপরিকম্মায লেখায চিত্তং. ফলিতন্তরন্তি ৰিৰরং. দিস্ৰাতি দূরতো দিস্ৰা. সমানরূপসদ্দসমুদাচারন্তি সদিসরূপসণ্ঠানসরপ্পযোগং.

আরম্মণৰসেনাতি ‘‘মম চক্খু সোভনং, মম কাযো থিরো, মম পরিক্খারা সুন্দরা’’তি এৰং আরম্মণকরণৰসেন. করজরূপসমঙ্গিকালোতি অত্তনো অত্তভাৰরূপেন চেৰ আরম্মণরূপেন চ সমন্নাগতকালো. তম্পীতি কসিণরূপস্সপি. সামিঅত্থে হি ইদং উপযোগৰচনং. ভযসন্তাসঅদস্সনকামতা ৰিয সমতিক্কমিতুকামতাতি যোজনা. ইদঞ্চ যথাৰুত্তানং নিব্বিদাৰিরাগনিরোধানং সাধারণৰচনং. তে হি তযো অপেক্খিত্ৰা ভযসন্তাসঅদস্সনকামতা ৰুত্তা. একো কির সুনখো ৰনে সূকরেন পহটমত্তো পলাতো, সো অরূপদস্সনৰেলায ভত্তপচনউক্খলিং দূরতো দিস্ৰা সূকরসঞ্ঞায ভীতো উত্তসন্তো পলাযি, পিসাচভীরুকো পুরিসো রত্তিভাগে অপরিচিতে দেসে মত্থকচ্ছিন্নং তালক্খন্ধং দিস্ৰা পিসাচসঞ্ঞায ভীতো উত্তসন্তো মুচ্ছিতো পপতি, তং সন্ধায ৰুত্তং ‘‘সূকরা…পে… ৰেদিতব্বা’’তি.

২৭৬. এৰন্তি যথাৰুত্তং ওপম্মত্থং নিগমেন্তো আহ. সোতি যোগাৰচরো. তস্মিং ঝানে আদীনৰং পস্সতীতি সম্বন্ধো. রূপন্তি কসিণরূপং. সন্তৰিমোক্খতোতি অরূপজ্ঝানতো. তানি হি ‘‘যে তে সন্তা ৰিমোক্খা অতিক্কম্ম রূপে আরুপ্পা’’তিআদীসু (অ. নি. ৮.৭২; ১০.৯) সন্তৰিমোক্খাতি আগতা. সন্ততাসিদ্ধি চস্স অনুস্সুতিতো দট্ঠব্বা. যথেৰাতি এৰ-কারেন যেন পকারেন এতং রূপাৰচরচতুত্থজ্ঝানং দুৰঙ্গিকং, এৰং আরুপ্পানিপীতি উপেক্খাচিত্তেকগ্গতাৰসেন দুৰঙ্গিকত্তং দস্সেতি, ন ততিযজ্ঝানে ৰিয দুৰঙ্গিকতামত্তং. ননু চেত্থাপি দুৰঙ্গিকতামত্তমেৰ ভূমিভেদতোতি? নাযং দোসো উপমোপমেয্যভাৰস্স ভিন্নাধিকরণতো.

তত্থাতি তস্মিং রূপাৰচরচতুত্থজ্ঝানে. নিকন্তিন্তি অপেক্খং. পরিযাদাযাতি আদীনৰদস্সনেন তস্মিং ঝানে খেপেত্ৰা, অনপেক্খো হুত্ৰাতি অত্থো. সন্ততো মনসিকরণেনেৰ পণীততো, সুখুমতো চ মনসিকারো সিদ্ধো হোতীতি আহ ‘‘সন্ততো অনন্ততো মনসি করিত্ৰা’’তি. পত্থরিত্ৰাতি পগেৰ ৰড্ঢিতং, তদা ৰড্ঢনৰসেন ৰা পত্থরিত্ৰা. তেনাতি কসিণরূপেন. উগ্ঘাটেতি কসিণন্তি রূপাৰচরচতুত্থজ্ঝানস্স আরম্মণভূতং পথৰীকসিণাদিকসিণরূপং অপনেতি. উগ্ঘাটনৰিধিং পন দস্সেন্তো ‘‘উগ্ঘাটেন্তো হী’’তিআদিমাহ. তত্থ সংৰেল্লেতীতি পটিসংহরতি. অঞ্ঞদত্থূতি একংসেন. নেৰ উব্বট্টতীতি নেৰ উট্ঠহতি. ন ৰিৰট্টতীতি ন ৰিনিৰট্টতি. ইমস্সাতি ইমস্স কসিণরূপস্স. অমনসিকারন্তি মনসি অকরণং অচিন্তনং. মনসিকারঞ্চ পটিচ্চাতি ‘‘আকাসো আকাসো’’তি ভাৰনামনসিকারঞ্চ নিস্সায. ইদং ৰুত্তং হোতি – রূপাৰচরচতুত্থজ্ঝানস্স আরম্মণভূতং কসিণরূপং ন সব্বেন সব্বং মনসি করোতো, তেন চ ফুট্ঠোকাসং ‘‘আকাসো আকাসো’’তি মনসি করোতো যদা তং ভাৰনানুভাৰেন আকাসং হুত্ৰা উপট্ঠাতি, তদা সো কসিণং উগ্ঘাটেতি নাম, তঞ্চ তেন উগ্ঘাটিতং নাম হোতীতি. তেনাহ ‘‘কসিণুগ্ঘাটিমাকাসমত্তং পঞ্ঞাযতী’’তি. সব্বমেতন্তি তিৰিধম্পেতং একমেৰ পরিযাযভাৰতো.

‘‘নীৰরণানি ৰিক্খম্ভন্তী’’তি কস্মা ৰুত্তং? ননু রূপাৰচরপঠমজ্ঝানস্স উপচারক্খণেযেৰ নীৰরণানি ৰিক্খম্ভিতানি, ততো পট্ঠায চস্স ন নেসং পরিযুট্ঠানং. যদি সিযা, ঝানতো পরিহাযেয্য? যং পনেকে ৰদন্তি ‘‘অত্থেৰ সুখুমানি অরূপজ্ঝানৰিক্খম্ভনেয্যানি নীৰরণানি, তানি সন্ধাযেতং ৰুত্ত’’ন্তি, তং তেসং মতিমত্তং. ন হি মহগ্গতকুসলেসু লোকুত্তরকুসলেসু ৰিয ওধিসো পহানং নাম অত্থি. যো পন রূপাৰচরেহি আরুপ্পানং উল়ারফলতাদিৰিসেসো, সো ভাৰনাৰিসেসেন সন্ততরপণীততরভাৰেন তেসুযেৰ পুরিমপুরিমেহি পচ্ছিমপচ্ছিমানং ৰিযাতি দট্ঠব্বং. ‘‘ৰিক্খম্ভন্তী’’তি পন ৰচনং ৰণ্ণভণনৰসেন ৰুত্তং. তথা হি অঞ্ঞত্থাপি হেট্ঠা পহীনানং উপরি পহানং ৰুচ্চতি. যে পন ‘‘সব্বে কুসলা ধম্মা সব্বেসং অকুসলানং পটিপক্খাতি কত্ৰা এৰং ৰুত্ত’’ন্তি ৰদন্তি, তেহি দুতিযজ্ঝানূপচারাদীসু নীৰরণৰিক্খম্ভনাৰচনস্স কারণং ৰত্তব্বং. সতি সন্তিট্ঠতীতি আকাসনিমিত্তারম্মণা সতি সম্মা সূপট্ঠিতা হুত্ৰা তিট্ঠতি. সতিসীসেন চেত্থ উপচারজ্ঝানানুগুণানং সদ্ধাপঞ্চমানং সকিচ্চযোগং দস্সেতি. উপচারেনাতি উপচারজ্ঝানেন. ইধাপীতি রূপাৰচরচতুত্থজ্ঝানং সন্ধায সম্পিণ্ডনং. তং হি উপেক্খাৰেদনাসম্পযুত্তং. সেসন্তি ‘‘সেসানি কামাৰচরানী’’তিআদি. যং ইধ ৰত্তব্বমৰুত্তং, তং পন পথৰীকসিণনিদ্দেসে (ৰিসুদ্ধি. ১.৫১ আদযো) ৰুত্তনযানুসারেন ৰেদিতব্বন্তি আহ ‘‘পথৰীকসিণে ৰুত্তনযমেৰা’’তি.

এৰং যং তত্থ অৰিসিট্ঠং, তং অতিদিসিত্ৰা ইদানি ৰিসিট্ঠং দস্সেতুং ‘‘অযং পন ৰিসেসো’’তিআদিমাহ. যানপ্পুতোল়ি কুম্ভিমুখাদীনন্তি ওগুণ্ঠনসিৰিকাদিযানানং মুখং যানমুখং, পুতোল়িযা খুদ্দকদ্ৰারস্স মুখং পুতোল়িমুখং, কুম্ভিমুখন্তি পচ্চেকং মুখ-সদ্দো সম্বন্ধিতব্বো. আকাসংযেৰ যানমুখাদিপরিচ্ছিন্নং. পরিকম্মমনসিকারেনাতি পরিকম্মভূতেন মনসিকারেন উপচারজ্ঝানেন. পরিকম্মং অনুলোমং উপচারোতি চ অনত্থন্তরঞ্হেতং. পেক্খমানো অরূপাৰচরজ্ঝানচক্খুনা.

২৭৭. সব্বাকারেনাতি রূপনিমিত্তং দণ্ডাদানসম্ভৰদস্সনাদিনা সব্বেন রূপধম্মেসু, পথৰীকসিণাদিরূপনিমিত্তেসু, তদারম্মণজ্ঝানেসু চ দোসদস্সনাকারেন, তেসু এৰ ৰা রূপাদীসু নিকন্তিপ্পহানঅনাৰজ্জিতুকামতাদিনা. রূপজ্ঝানম্পি রূপন্তি ৰুচ্চতি উত্তরপদলোপেন ‘‘রূপূপপত্তিযা মগ্গং ভাৰেতী’’তিআদীসু (ধ. স. ১৬০; ৰিভ. ৬২৫) যথা রূপভৰো রূপং. রূপীতি হি রূপজ্ঝানলাভীতি অত্থো. আরম্মণম্পি কসিণরূপং রূপন্তি ৰুচ্চতি পুরিমপদলোপেন যথা ‘‘দেৰদত্তো দত্তো’’তি. রূপানি পস্সতীতি কসিণরূপানি ঝানচক্খুনা পস্সতীতি অত্থো. তস্মাতি যস্মা উত্তরপদলোপেন, পুরিমপদলোপেন চ যথাক্কমং রূপজ্ঝানকসিণরূপেসু রূপৰোহারো দিস্সতি, তস্মা. রূপে রূপজ্ঝানে তংসহগতা সঞ্ঞা রূপসঞ্ঞা. তদারম্মণস্স চাতি চ-সদ্দেন যথাৰুত্তং রূপাৰচরজ্ঝানং সম্পিণ্ডেতি, তেন পাল়িযং ‘‘রূপসঞ্ঞান’’ন্তি সরূপেকসেসেন নিদ্দেসো কতোতি দস্সেতি. ৰিরাগাতি জিগুচ্ছনতো. নিরোধাতি তপ্পটিবন্ধছন্দরাগৰিক্খম্ভনেন নিরোধনতো. ৰুত্তমেৰত্থং পাকটতরং কাতুং ‘‘কিং ৰুত্তং হোতী’’তিআদি ৰুত্তং. তস্স সব্বাকারেন ৰিরাগা অনৰসেসানং নিরোধাতি এৰং ৰা এত্থ যোজনা কাতব্বা.

‘‘আরম্মণে অৰিরত্তস্স সঞ্ঞাসমতিক্কমো ন হোতী’’তি ইদং যস্মা ইমানি ঝানানি আরম্মণাতিক্কমেন পত্তব্বানি, ন অঙ্গাতিক্কমেনাতি কত্ৰা ৰুত্তং. যস্মা পনেত্থ সঞ্ঞাসমতিক্কমো আরম্মণসমতিক্কমেন ৰিনা ন হোতি, তস্মা ‘‘সমতিক্কন্তাসু চ সঞ্ঞাসু আরম্মণং সমতিক্কন্তমেৰ হোতী’’তি আহ. অৰত্ৰা ৰুত্তোতি সম্বন্ধো. সমাপন্নস্সাতিআদীসু কুসলসঞ্ঞাৰসেন সমাপন্নগ্গহণং, ৰিপাকসঞ্ঞাৰসেন উপপন্নগ্গহণং, কিরিযাসঞ্ঞাৰসেন দিট্ঠধম্মসুখৰিহারগ্গহণং. অরহতো হি ঝানানি ৰিসেসতো দিট্ঠধম্মসুখৰিহারো. যদি সঞ্ঞাসমতিক্কমস্স অনুনিপ্ফাদিআরম্মণসমতিক্কমো ৰিভঙ্গে চ অৰুত্তো, অথ কস্মা ইধ গহিতোতি অনুযোগং সন্ধাযাহ ‘‘যস্মা পনা’’তিআদি. আরম্মণসমতিক্কমৰসেনাপি অযমত্থৰণ্ণনা কতা, ‘‘তদারম্মণস্স চেতং অধিৰচন’’ন্তিআদিনা ৰিভঙ্গে ৰিয সঞ্ঞাসমতিক্কমমেৰ অৰত্ৰাতি অধিপ্পাযো.

২৭৮. পটিঘাতেনাতি পটিহননেন ৰিসযীৰিসযসমোধানেন. অত্থঙ্গমাতিআদীসু পুরিমং পুরিমং পচ্ছিমস্স পচ্ছিমস্স অত্থৰচনং, তস্মা পটিঘসঞ্ঞানং অত্থঙ্গমো ঝানসমঙ্গিকালে অনুপ্পত্তীতি তস্স ইধেৰ গহণে কারণং অনুযোগমুখেন দস্সেতুং ‘‘কামঞ্চেতা’’তিআদি ৰুত্তং. উস্সাহজননত্থং পটিপজ্জনকানং. এতাসং পটিঘসঞ্ঞানং. এত্থ পঠমারুপ্পকথাযং. ৰচনং অত্থঙ্গমৰসেন.

কিং ৰা পসংসাকিত্তনেন, পটিঘসঞ্ঞানং পন অত্থঙ্গমো ইধেৰ ৰত্তব্বত্তা ৰুত্তোতি দস্সেতুং ‘‘অথ ৰা’’তিআদি ৰুত্তং. তত্থ সভাৰধম্মস্স অভাৰো নাম পটিপক্খেন পহীনতায ৰা পচ্চযাভাৰেন ৰা. তেসু রূপজ্ঝানসমঙ্গিনো পটিঘসঞ্ঞানং অভাৰো পচ্চযাভাৰমত্তেন, ন পটিপক্খাধিগমেনাতি দস্সেন্তো আহ ‘‘কিঞ্চাপী’’তিআদি. তত্থ তাতি পটিঘসঞ্ঞা. রূপাৰচরন্তি রূপাৰচরজ্ঝানং. সমাপন্নস্সাতি সমাপজ্জিত্ৰা ৰিহরন্তস্স. কিঞ্চাপি ন সন্তীতি যোজনা. ন পহীনত্তা ন সন্তীতি ন তদা পটিঘসঞ্ঞা পহীনভাৰেন ন সন্তি নাম. তত্থ কারণমাহ ‘‘ন হি রূপৰিরাগায রূপাৰচরভাৰনা সংৰত্ততী’’তি. ননু চ পটিঘসঞ্ঞাপি অরূপধম্মা এৰাতি চোদনং সন্ধাযাহ ‘‘রূপাযত্তা চ এতাসং পৰত্তী’’তি. অযং পন ভাৰনাতি অরূপভাৰনমাহ. ধারেতুন্তি অৰধারেতুং. ইধাতি অরূপজ্ঝানে. আনেঞ্জাভিসঙ্খারৰচনাদীহি আনেঞ্জতা. ‘‘যে তে সন্তা ৰিমোক্খা অতিক্কম্ম রূপে আরুপ্পা’’তিআদিনা (অ. নি. ৮.৭২; ১০.৯) সন্তৰিমোক্খতা চ ৰুত্তা.

২৭৯. দোসদস্সনপুব্বকপটিপক্খভাৰনাৰসেন পটিঘসঞ্ঞানং সুপ্পহীনত্তা মহতাপি সদ্দেন অরূপসমাপত্তিতো ন ৰুট্ঠাতি. তথা পন ন সুপ্পহীনত্তা সব্বরূপাৰচরসমাপত্তিতো ৰুট্ঠানং সিযা, পঠমজ্ঝানং পন অপ্পকম্পি সদ্দং ন সহতীতি তং সমাপন্নস্স সদ্দো কণ্টকোতি ৰুত্তং. আরুপ্পভাৰনায অভাৰে চুতিতো উদ্ধং উপ্পত্তিরহানং রূপসঞ্ঞাপটিঘসঞ্ঞানং যাৰ অত্তনো ৰিপাকপ্পৰত্তি, তাৰ অনুপ্পত্তিধম্মতাপাদনেন সমতিক্কমো, অত্থঙ্গমো চ ৰুত্তো. নানত্তসঞ্ঞাসু পন যা তস্মিং ভৰে ন উপ্পজ্জন্তি একন্তরূপনিস্সিতা, তা অনোকাসতায ন উপ্পজ্জন্তি, ন আরুপ্পভাৰনায নিৰারিতত্তা, অনিৰারিতত্তা চ কাচি উপ্পজ্জন্তি. তস্মা তাসং অমনসিকারো অনাৰজ্জনং অপচ্চৰেক্খণং, জৰনপটিপাদকেন ৰা ভৰঙ্গমনস্স অন্তো অকরণং অপ্পৰেসনং ৰুত্তং.

তেন চ নানত্তসঞ্ঞামনসিকারহেতূনং রূপানং সমতিক্কমা সমাধিস্স থিরভাৰং দস্সেতুং ‘‘সঙ্খেপতো’’তিআদি ৰুত্তং. অপিচ ইমেহি তীহি পদেহি আকাসানঞ্চাযতনসমাপত্তিযা ৰণ্ণো কথিতো সোতূনং উস্সাহজননত্থং, পলোভনত্থঞ্চ. যে হি অকুসলা এৰংগাহিনো ‘‘সব্বস্সাদরহিতে আকাসে পৰত্তিতসঞ্ঞায কো আনিসংসো’’তি, তে ততো মিচ্ছাগাহতো নিৰত্তেতুং তীহি পদেহি ঝানস্স আনিসংসো কথিতো. তং হি সুত্ৰা তেসং এৰং ভৰিস্সতি ‘‘এৰং সন্তা কিরাযং সমাপত্তি এৰং পণীতা, হন্দস্সা নিব্বত্তনত্থং উস্সাহং করিস্সামী’’তি.

২৮০. অস্সাতি আকাসস্স. উপ্পাদো এৰ অন্তো উপ্পাদন্তো, তথা ৰযন্তো. সভাৰধম্মো হি অহুত্ৰা সম্ভৰতো, হুত্ৰা চ ৰিনস্সনতো উদযৰযপরিচ্ছিন্নো. আকাসো পন অসভাৰধম্মত্তা তদুভযাভাৰতো অনন্তো ৰুত্তো. অজটাকাসপরিচ্ছিন্নাকাসানং ইধ অনধিপ্পেতত্তা ‘‘আকাসোতি কসিণুগ্ঘাটিমাকাসো ৰুচ্চতী’’তি আহ. কসিণং উগ্ঘাটীযতি এতেনাতি কসিণুগ্ঘাটো, তদেৰ কসিণুগ্ঘাটিমং. মনসিকারৰসেনাপীতি রূপৰিৰেকমত্তগ্গহণেন পরিচ্ছেদস্স অগ্গহণতো অনন্তফরণাকারেন পৰত্তপরিকম্মমনসিকারৰসেনাপি. অনন্তং ফরতীতি অগ্গহিতপরিচ্ছেদতায অনন্তং কত্ৰা পরিকম্মসম্ফস্সপুব্বকেন ঝানসম্ফস্সেন ফুসতি. যথা ভিসগ্গমেৰ ভেসজ্জং, এৰং আকাসানন্তমেৰ আকাসানঞ্চং সংযোগপরস্স ত-কারস্স চ-কারং কত্ৰা. ঝানস্স পৰত্তিট্ঠানভাৰতো আরম্মণং অধিট্ঠানট্ঠেন ‘‘আযতনমস্সা’’তি ৰুত্তং, অধিট্ঠানট্ঠে আযতন-সদ্দস্স দস্সনতো. কারণাকরসঞ্জাতিদেসনিৰাসত্থেপি আযতন-সদ্দো ইধ যুজ্জতেৰ.

ৰিঞ্ঞাণঞ্চাযতনকথাৰণ্ণনা

২৮১. চিণ্ণো চরিতো পগুণিকতো আৰজ্জনাদিলক্খণো ৰসীভাৰো এতেনাতি চিণ্ণৰসীভাৰো, তেন চিণ্ণৰসীভাৰেন. রূপাৰচরসঞ্ঞং অনতিক্কমিত্ৰা অনধিগন্তব্বতো, তংসহগতসঞ্ঞামনসিকারসমুদাচারস্স হানভাগিযভাৰাৰহতো, তংসমতিক্কমেনেৰ তদঞ্ঞেসং সমতিক্কমিতব্বানং সমতিক্কমসিদ্ধিতো চ ৰুত্তং ‘‘আসন্নরূপাৰচরজ্ঝানপচ্চত্থিকা’’তি. ৰীথিপটিপন্নায ভাৰনায উপরূপরিৰিসেসাৰহভাৰতো, পণীতভাৰসিদ্ধিতো চ পঠমারুপ্পতো দুতিযারুপ্পং সন্ততরসভাৰন্তি আহ ‘‘নো চ ৰিঞ্ঞাণঞ্চাযতনমিৰ সন্তা’’তি ৰক্খতি হি ‘‘সুপ্পণীততরা হোন্তি, পচ্ছিমা পচ্ছিমা ইধা’’তি (ৰিসুদ্ধি. ১.২৯০). অনন্তং অনন্তন্তি কেৰলং ‘‘অনন্তং অনন্ত’’ন্তি ন মনসি কাতব্বং ন ভাৰেতব্বং, ‘‘অনন্তং ৰিঞ্ঞাণং, অনন্তং ৰিঞ্ঞাণ’’ন্তি পন মনসি কাতব্বং, ‘‘ৰিঞ্ঞাণং ৰিঞ্ঞাণ’’ন্তি ৰা.

তস্মিং নিমিত্তেতি তস্মিং পঠমারুপ্পৰিঞ্ঞাণসঙ্খাতে ৰিঞ্ঞাণনিমিত্তে. চিত্তং চারেন্তস্সাতি ভাৰনাচিত্তং পৰত্তেন্তস্স. আকাসফুটে ৰিঞ্ঞাণেতি কসিণুগ্ঘাটিমাকাসং ফরিত্ৰা পৰত্তে পঠমারুপ্পৰিঞ্ঞাণে আরম্মণভূতে. অপ্পেতীতি অপ্পনাৰসেন পৰত্ততি. সভাৰধম্মেপি আরম্মণসমতিক্কমভাৰনাভাৰতো ইদং অপ্পনাপ্পত্তং হোতি চতুত্থারুপ্পং ৰিয. অপ্পনানযো পনেত্থ ৰুত্তনযেনেৰাতি এত্থ দুতিযারুপ্পজ্ঝানে পুরিমভাগে তীণি, চত্তারি ৰা জৰনানি কামাৰচরানি উপেক্খাৰেদনাসম্পযুত্তানেৰ হোন্তি. ‘‘চতুত্থং পঞ্চমং ৰা অরূপাৰচর’’ন্তিআদিনা (ৰিসুদ্ধি. ১.২৭৬) পঠমারুপ্পজ্ঝানে ৰুত্তেন নযেন, অথ ৰা অপ্পনানযোতি সভাৰধম্মেপি আরম্মণে ঝানস্স অপ্পনানযো আরম্মণাতিক্কমভাৰনাৰসেন আরুপ্পং অপ্পনং পাপুণাতি, ‘‘অপ্পনাপ্পত্তস্সেৰ হি ঝানস্স আরম্মণসমতিক্কমনমত্তং তত্থ হোতী’’তি মরণানুস্সতিনিদ্দেসে (ৰিসুদ্ধি. ১.১৭৭) ৰুত্তনযেন ৰেদিতব্বোতি অত্থো.

২৮২. সব্বসোতি সব্বাকারেন পঠমারুপ্পে ‘‘আসন্নরূপজ্ঝানপচ্চত্থিকতা, অসন্তসভাৰতা’’তি এৰমাদিনা সব্বেন দোসদস্সনাকারেন, তত্থ ৰা নিকন্তিপহানঅনাৰজ্জিতুকামতাদিআকারেন, সব্বং ৰা কুসলৰিপাককিরিযাভেদতো অনৰসেসন্তি অত্থো. স্ৰাযমত্থো হেট্ঠা ৰুত্তনযেন ঞাতুং সক্কাতি আহ ‘‘সব্বসোতি ইদং ৰুত্তনযমেৰা’’তি. ঝানস্স আকাসানঞ্চাযতনতা বাহিরত্থসমাসৰসেন হেট্ঠা ৰুত্তাতি আহ ‘‘পুব্বে ৰুত্তনযেন ঝানম্পি আকাসানঞ্চাযতন’’ন্তি. আরম্মণস্স পন সমানাধিকরণসমাসৰসেনাতি সন্দস্সেতুং ‘‘আরম্মণম্পী’’তিআদি ৰুত্তং. তত্থ ‘‘পুরিমনযেনেৰা’’তি ইদং ‘‘নাস্স অন্তো’’তিআদিনা ৰুত্তপদসিদ্ধিং সন্ধায ৰুত্তং. যথা অধিট্ঠানট্ঠেন, এৰং সঞ্জাতিদেসট্ঠেনপি আযতন-সদ্দেন ইধ অত্থো যুজ্জতীতি দস্সেতুং ‘‘তথা’’তিআদি ৰুত্তং. তত্থ সঞ্জাযতি এত্থাতি সঞ্জাতি, সঞ্জাতি এৰ দেসো সঞ্জাতিদেসো. ঝানং অপ্পৰত্তিকরণেন. আরম্মণং অমনসিকরণেন. উভযম্পি ৰা উভযতা যোজেতব্বা. ঝানস্সপি হি অনাৰজ্জনং, জৰনপটিপাদকেন ৰা ভৰঙ্গমনস্স অন্তো অকরণং অমনসিকরণং, আরম্মণস্স চ আরম্মণকরণৰসেন অপ্পৰত্তনং অপ্পৰত্তিকরণন্তি অত্থস্স সম্ভৰতো একজ্ঝং কত্ৰা সামঞ্ঞনিদ্দেসেন, একসেসনযেন ৰা.

পুব্বে অনন্তস্স আকাসস্স আরম্মণকরণৰসেন পঠমারুপ্পৰিঞ্ঞাণং অত্তনো ফরণাকারেনেৰ ‘‘অনন্ত’’ন্তি মনসি কাতব্বত্তা ‘‘অনন্তং ৰিঞ্ঞাণ’’ন্তি ৰুত্তন্তি পুন ‘‘মনসিকারৰসেন ৰা অনন্ত’’ন্তি ৰুত্তং, সব্বসো মনসিকরণৰসেনাতি অধিপ্পাযো. তেনাহ ‘‘অনৰসেসতো মনসি করোন্তো ‘অনন্ত’ন্তি মনসি করোতী’’তি. ঝানৰিভঙ্গেপি অযমেৰত্থো ৰুত্তোতি দস্সেন্তো ‘‘যং পন ৰিভঙ্গে ৰুত্ত’’ন্তিআদিমাহ. তস্সা পাল়িযা এৰং ৰা অত্থো ৰেদিতব্বো – তংযেৰ আকাসং ফুটং ৰিঞ্ঞাণং ৰিঞ্ঞাণঞ্চাযতনৰিঞ্ঞাণেন মনসি করোতীতি. অযং পনত্থো যুত্তো ৰিয দিস্সতি, তংযেৰ আকাসং ৰিঞ্ঞাণেন ফুটং তেন গহিতাকারং মনসি করোতি. এৰং তং ৰিঞ্ঞাণং অনন্তং ফরতীতি. যং হি আকাসং পঠমারুপ্পসমঙ্গী ৰিঞ্ঞাণেন অনন্তং ফরতি, তং ফরণাকারসহিতমেৰ ৰিঞ্ঞাণং মনসি করোন্তো দুতিযারুপ্পসমঙ্গী অনন্তং ফরতীতি ৰুচ্চতি.

মনসিকারৰসেন অনন্তফরণাকারেন ইধ অনন্ততা, ন আকাসস্স ৰিয উপ্পাদন্তাদিঅভাৰেনাতি ‘‘নাস্স অন্তোতি অনন্ত’’ন্তি এত্তকমেৰাহ. ‘‘রুল়্হীসদ্দো’’তি ইমিনা ‘‘ৰিঞ্ঞাণানঞ্চ’’ন্তি এতস্স পদস্স অত্থে ৰিঞ্ঞাণঞ্চ-সদ্দো নিরুল়্হোতি দস্সেতি, যথাৰুত্তং ৰা ৰিঞ্ঞাণং দুতিযারুপ্পজ্ঝানেন অঞ্চীযতি ৰুত্তাকারেন আলম্বীযতীতি ৰিঞ্ঞাণঞ্চন্তি এৰম্পেত্থ অত্থো দট্ঠব্বো. সেসং ৰুত্তত্থমেৰাতি আহ ‘‘সেসং পুরিমসদিসমেৰা’’তি.

আকিঞ্চঞ্ঞাযতনকথাৰণ্ণনা

২৮৩. ততিযারুপ্পকম্মট্ঠানে যং হেট্ঠা ৰুত্তসদিসং, তং ৰুত্তনযানুসারেন ৰেদিতব্বং, অপুব্বমেৰ ৰণ্ণযিস্সাম. তত্থ তস্সেৰাতি যং আরব্ভ ৰিঞ্ঞাণঞ্চাযতনং পৰত্তং, তস্সেৰ. কিং পন তন্তি আহ ‘‘আকাসানঞ্চাযতনৰিঞ্ঞাণস্সা’’তি. এতেন ততো অঞ্ঞং ততিযারুপ্পজ্ঝানস্স আরম্মণং নত্থীতি দস্সেতি. ‘‘আরম্মণভূতস্সা’’তি ইমিনা তস্স অনারম্মণভূতং দুতিযারুপ্পৰিঞ্ঞাণং নিৰত্তেতি. অভাৰোতি নত্থিতা. সুঞ্ঞতাতি রিত্ততা. ৰিৰিত্তাকারোতি ৰিৰেকো. তীহি পদেহি পঠমারুপ্পৰিঞ্ঞাণস্স অপগমমেৰ ৰদতি. ‘‘মনসি কাতব্বো’’তি ৰত্ৰা মনসিকারৰিধিং দস্সেতুং ‘‘তং ৰিঞ্ঞাণ’’ন্তিআদি ৰুত্তং. তত্থ অমনসিকরিত্ৰাতি সব্বেন সব্বং মনসি অকত্ৰা অচিন্তেত্ৰা. ৰা-সদ্দো অনিযমত্থো, তেন তীসু পকারেসু একেনপি অত্থসিদ্ধীতি দস্সেতি.

তস্মিং নিমিত্তেতি তস্মিং পঠমারুপ্পৰিঞ্ঞাণস্স অভাৰসঙ্খাতে ঝানুপ্পত্তিনিমিত্তে. আকাসে ফুটেতি আকাসং ফরিত্ৰা পৰত্তে. ‘‘আকাসফুটে’’তি ৰা পাঠো. সুঞ্ঞৰিৰিত্তনত্থিভাৰেতি সুঞ্ঞভাৰে, ৰিৰিত্তভাৰে, নত্থিভাৰে চাতি যেন আকারেন ভাৰিতং, তস্স গহণত্থং ৰুত্তং. অথ ৰা সুঞ্ঞৰিৰিত্তনত্থিভাৰেতি সুঞ্ঞৰিৰিত্ততাসঙ্খাতে নত্থিভাৰে, তেন ৰিনাসাভাৰমেৰ দস্সেতি, ন পুরে অভাৰাদিকে.

তস্মিং হি অপ্পনাচিত্তেতি আকিঞ্চঞ্ঞাযতনজ্ঝানসম্পযুত্তে অপ্পনাৰসেন পৰত্তে চিত্তে, তস্মিং ৰা পঠমারুপ্পস্স অপগমসঙ্খাতে নত্থিভাৰে যথাৰুত্তে অপ্পনাচিত্তে উপ্পন্নে. সো ভিক্খু অভাৰমেৰ পস্সন্তো ৰিহরতীতি সম্বন্ধো. পুরিসো কত্থচি গন্ত্ৰা আগন্ত্ৰা সুঞ্ঞমেৰ পস্সতি, নত্থিভাৰমেৰ পস্সতীতি যোজনা. তং ঠানন্তি তং সন্নিপাতট্ঠানং. ‘‘পরিকম্মমনসিকারেন অন্তরহিতে’’তি ইমিনা আরম্মণকরণাভাৰেন তস্স অন্তরধানং ন নট্ঠত্তাতি দস্সেতি. তত্রিদং ওপম্মসংসন্দনং – যথা সো পুরিসো তত্থ সন্নিপতিতং ভিক্খুসঙ্ঘং দিস্ৰা গতো, ততো সব্বেসু ভিক্খূসু কেনচিদেৰ করণীযেন অপগতেসু আগন্ত্ৰা তং ঠানং ভিক্খূহি সুঞ্ঞমেৰ পস্সতি, ন ভিক্খূনং ততোপি অপগতকারণং, এৰমযং যোগাৰচরো পুব্বে ৰিঞ্ঞাণঞ্চাযতনজ্ঝানচক্খুনা পঠমারুপ্পৰিঞ্ঞাণং দিস্ৰা পচ্ছা নত্থীতি পরিকম্মমনসিকারেন তস্মিং অপগতে ততিযারুপ্পজ্ঝানচক্খুনা তস্স নত্থিভাৰমেৰ পস্সন্তো ৰিহরতি, ন তস্স অপগমনকারণং ৰীমংসতি ঝানস্স তাদিসাভোগাভাৰতোতি. সব্বসো ৰিঞ্ঞাণঞ্চাযতনং সমতিক্কম্মাতি এত্থ যং ৰত্তব্বং, তং হেট্ঠা ৰুত্তনযানুসারেন ৰেদিতব্বং.

২৮৪. নত্থিতা পরিযাযাসুঞ্ঞৰিৰিত্তভাৰাতি ‘‘নত্থী’’তি পদস্স অত্থং ৰদন্তেন সুঞ্ঞৰিৰিত্তপদানিপি গহিতানি. আমেডিতৰচনং পন ভাৰনাকারদস্সনং. ৰিভঙ্গেপি ইমস্স পদস্স অযমেৰত্থো ৰুত্তোতি দস্সেতুং ‘‘যম্পি ৰিভঙ্গে’’তিআদি ৰুত্তং. তত্থ তঞ্ঞেৰ ৰিঞ্ঞাণং অভাৰেতীতি যং পুব্বে ‘‘অনন্তং ৰিঞ্ঞাণ’’ন্তি মনসি কতং পঠমারুপ্পৰিঞ্ঞাণং, তংযেৰাতি অত্থো. তংযেৰ হি আরম্মণভূতং পঠমেন ৰিয রূপনিমিত্তং ততিযেনারুপ্পেনাভাৰেতীতি. খযতো সম্মসনন্তি ভঙ্গানুপস্সনমাহ. সা হি সঙ্খতধম্মানং ভঙ্গাভাৰমেৰ পস্সন্তী ‘‘ৰিঞ্ঞাণম্পি অভাৰেতী’’তিআদিনা ৰত্তব্বতং লভতীতি অধিপ্পাযেনাহ ‘‘খযতো সম্মসনং ৰিয ৰুত্ত’’ন্তি. অস্সাতি পাঠস্স. পুন অস্সাতি ৰিঞ্ঞাণস্স. অভাৰেতীতি অভাৰং করোতি. যথা ঞাণস্স ন উপতিট্ঠতি, এৰং করোতি অমনসিকরণতো. ততো এৰ ৰিভাৰেতি ৰিগতভাৰং করোতি, ৰিনাসেতি ৰা যথা ন দিস্সতি, তথা করণতো. তেনেৰ অন্তরধাপেতি তিরোভাৰং গমেতি. ন অঞ্ঞথাতি ইমিস্সা পাল়িযা এৰমত্থো, ন ইতো অঞ্ঞথা অযুজ্জমানকত্তাতি অধিপ্পাযো.

অস্সাতি পঠমারুপ্পৰিঞ্ঞাণাভাৰস্স. কিঞ্চনন্তি কিঞ্চিপি. সভাৰধম্মস্স অপ্পাৰসেসতা নাম ভঙ্গো এৰ সিযাতি আহ ‘‘ভঙ্গমত্তম্পি অস্স অৰসিট্ঠং নত্থী’’তি. সতি হি ভঙ্গমত্তেপি তস্স সকিঞ্চনতা সিযা. অকিঞ্চনন্তি চ ৰিঞ্ঞাণস্স কিঞ্চি পকারং অগ্গহেত্ৰা সব্বেন সব্বং ৰিভাৰনমাহ. সেসং ৰুত্তনযমেৰ.

নেৰসঞ্ঞানাসঞ্ঞাযতনকথাৰণ্ণনা

২৮৫. নো চ সন্তাতি যথা নেৰসঞ্ঞানাসঞ্ঞাযতনসমাপত্তি সঙ্খারাৰসেসসুখুমভাৰপ্পত্তিযা সৰিসেসা সন্তা, এৰমযং আকিঞ্চঞ্ঞাযতনসমাপত্তি নো চ সন্তা তদভাৰতো. যা অযং খন্ধেসু পচ্চযযাপনীযতায, রোগমূলতায চ রোগসরিক্খতা, দুক্খতাসূলযোগাদিনা গণ্ডসরিক্খতা, পীল়াজননাদিনা সল্লসরিক্খতা চ, সা সঞ্ঞায সতি হোতি, নাসতীতি ৰুত্তং ‘‘সঞ্ঞা রোগো, সঞ্ঞা গণ্ডো, সঞ্ঞা সল্ল’’ন্তি. সা চেত্থ পটুকিচ্চা পঞ্চৰোকারভৰতো ওল়ারিকসঞ্ঞা ৰেদিতব্বা. ন কেৰলং সঞ্ঞা এৰ, অথ খো ৰেদনাচেতনাদীনম্পি সঙ্গহো দট্ঠব্বো. সঞ্ঞাসীসেন পন নিদ্দেসো কতো. এতং সন্তন্তি এতং অসন্তভাৰকররোগাদিসরিক্খসঞ্ঞাৰিরহতো সন্তং. ততো এৰ পণীতং. কিং পন তন্তি আহ ‘‘নেৰসঞ্ঞানাসঞ্ঞা’’তি? তদপদেসেন তংসম্পযুত্তজ্ঝানমাহ ‘‘আদীনৰ’’ন্তি. এত্থ রোগাদিসরিক্খসঞ্ঞাদিসব্ভাৰোপি আদীনৰো দট্ঠব্বো, ন আসন্নৰিঞ্ঞাণঞ্চাযতনপচ্চত্থিকতাৰ. উপরীতি চতুত্থারুপ্পে. সা ৰাতি সা এৰ. ৰত্তিতাতি পৰত্তিতা নিব্বত্তিতা ৰল়ঞ্জিতা.

তস্মিং নিমিত্তেতি তস্মিং ততিযারুপ্পসমাপত্তিসঙ্খাতে ঝাননিমিত্তে. মানসন্তি চিত্তং ‘‘মনো এৰ মানস’’ন্তি কত্ৰা, ভাৰনামনসিকারং ৰা. তং হি মনসি ভৰন্তি মানসন্তি ৰুচ্চতি. ঝানসম্পযুত্তধম্মানম্পি ঝানানুগুণতায সমাপত্তিপরিযাযো লব্ভতীতি আহ ‘‘আকিঞ্চঞ্ঞাযতনসমাপত্তিসঙ্খাতেসু চতূসু খন্ধেসূ’’তি, আরম্মণভূতেসূতি অধিপ্পাযো.

২৮৬. যথাৰুত্তং আকিঞ্চঞ্ঞং আরম্মণপচ্চযভাৰতো আযতনং কারণমস্সাতি ঝানং আকিঞ্চঞ্ঞাযতনং, আকিঞ্চঞ্ঞমেৰ আরম্মণপচ্চযভূতং ঝানস্স কারণন্তি আরম্মণং আকিঞ্চঞ্ঞাযতনন্তি এৰং ৰা অত্থো দট্ঠব্বো. সেসমেত্থ হেট্ঠা ৰুত্তনযানুসারেন ৰেদিতব্বং.

যায সঞ্ঞায ভাৰতোতি যাদিসায সঞ্ঞায অত্থিভাৰেন. যা হি সা পটুসঞ্ঞাকিচ্চস্স অভাৰতো সঞ্ঞাতিপি ন ৰত্তব্বা, সঞ্ঞাসভাৰানাতিৰত্তনতো অসঞ্ঞাতিপি ন ৰত্তব্বা, তস্সা ৰিজ্জমানত্তাতি অত্থো. তন্তি তং ঝানং. তং তাৰ দস্সেতুন্তি এত্থ তন্তি তং সসাপটিপদং, যথাৰুত্তসঞ্ঞং, তস্সা চ অধিগমুপাযন্তি অত্থো. নেৰসঞ্ঞীনাসঞ্ঞীতি হি পুগ্গলাধিট্ঠানেন ধম্মং উদ্ধরন্তেন সঞ্ঞাৰন্তমুখেন সঞ্ঞা উদ্ধটা, অঞ্ঞথা নেৰসঞ্ঞানাসঞ্ঞাযতনন্তি উদ্ধরিতব্বং সিযা. সা পন পটিপদা যত্থ পৰত্ততি, যথা চ পৰত্ততি, তং দস্সেতুং ‘‘আকিঞ্চঞ্ঞাযতনং সন্ততো মনসি করোতি, সঙ্খারাৰসেসসমাপত্তিং ভাৰেতী’’তি ৰুত্তং. আকিঞ্চঞ্ঞাযতনং হি চতুত্থারুপ্পভাৰনায পৰত্তিট্ঠানং, সঙ্খারাৰসেসসমাপত্তি পৰত্তিআকারোতি. যত্র হি নামাতি যা নাম. নত্থিভাৰম্পীতি ৰিঞ্ঞাণস্স সুঞ্ঞতম্পি, এৰং সুখুমম্পীতি অধিপ্পাযো. সন্তারম্মণতাযাতি সন্তং আরম্মণং এতিস্সাতি সন্তারম্মণা, তব্ভাৰো সন্তারম্মণতা, তায, ন ঝানসন্ততায. ন হি ততিযারুপ্পসমাপত্তি চতুত্থারুপ্পজ্ঝানতো সন্তা.

চোদকো ‘‘যং সন্ততো মনসি করোতি, ন তত্থ আদীনৰদস্সনং ভৰেয্য. অসতি চ আদীনৰদস্সনে সমতিক্কমো এৰ ন সিযা’’তি দস্সেন্তো ‘‘সন্ততো চে মনসি করোতি, কথং সমতিক্কমো হোতী’’তি আহ. ইতরো ‘‘অসমাপজ্জিতুকামতাযা’’তি পরিহারমাহ, তেন আদীনৰদস্সনম্পি অত্থেৰাতি দস্সেতি. সো হীতিআদিনা ৰুত্তমেৰত্থং পাকটতরং করোতি. তত্থ যস্মিং ঝানে অভিরতি, তত্থ আৰজ্জনসমাপজ্জনাদিপটিপত্তিযা ভৰিতব্বং. সা পনস্স ততিযারুপ্পে সব্বসো নত্থি, কেৰলং অঞ্ঞাভাৰতো আরম্মণকরণমত্তমেৰাতি দস্সেন্তো ‘‘কিঞ্চাপী’’তিআদিমাহ.

সমতিক্কমিত্ৰাৰ গচ্ছতীতি তেসং সিপ্পীনং জীৰিকং তিণাযপি অমঞ্ঞমানো তে ৰীতিৰত্ততিযেৰ. সোতি যোগাৰচরো. তন্তি ততিযারুপ্পসমাপত্তিং. পুব্বে ৰুত্তনযেনাতি ‘‘সন্তা ৰতাযং সমাপত্তী’’তিআদিনা ৰুত্তেন নযেন সন্ততো মনসি করোন্তো. তন্তি যায নেৰসঞ্ঞীনাসঞ্ঞী নাম হোতি, সঙ্খারাৰসেসসমাপত্তিং ভাৰেতীতি ৰুচ্চতি, তং সঞ্ঞং পাপুণাতীতি যোজনা. সঞ্ঞাসীসেন হি দেসনা. পরমসুখুমন্তি উক্কংসগতসুখুমভাৰং. সঙ্খারাৰসেসসমাপত্তিন্তি উক্কংসগতসুখুমতায সঙ্খারানং সেসতামত্তং সমাপত্তিং. তেনাহ ‘‘অচ্চন্তসুখুমভাৰপ্পত্তসঙ্খার’’ন্তি. অন্তমতিচ্চ অচ্চন্তং. যতো সুখুমতমং নাম নত্থি, তথাপরমুক্কংসগতসুখুমসঙ্খারন্তি অত্থো. পঠমজ্ঝানূপচারতো পট্ঠায হি তচ্ছন্তিযা ৰিয পৰত্তমানায ভাৰনায অনুক্কমেন সঙ্খারা তত্থ অন্তিমকোট্ঠাসতং পাপিতা, ততো পরং নিরোধো এৰ, ন সঙ্খারপ্পৰত্তীতি. তেন ৰুচ্চতি ‘‘সঙ্খারাৰসেসসমাপত্তী’’তি.

২৮৭. যং তং চতুক্খন্ধং. অত্থতোতি কুসলাদিৰিসেসৰিসিট্ঠপরমত্থতো. ৰিসেসতো অধিপঞ্ঞাসিক্খায অধিট্ঠানভূতং ইধাধিপ্পেতন্তি আহ ‘‘ইধ সমাপন্নস্স চিত্তচেতসিকা ধম্মা অধিপ্পেতা’’তি. ওল়ারিকায সঞ্ঞায অভাৰতোতি যদিপি চতুত্থারুপ্পৰিপাকসঞ্ঞায চতুত্থারুপ্পকুসলসঞ্ঞা ওল়ারিকা, তথা ৰিপস্সনামগ্গফলসঞ্ঞাহি, তথাপি ওল়ারিকসুখুমতা নাম উপাদাযুপাদায গহেতব্বাতি পঞ্চৰোকারভৰপরিযাপন্নায ৰিয চতুৰোকারেপি হেট্ঠা তীসু ভূমীসু সঞ্ঞায ৰিয ওল়ারিকায অভাৰতো. সুখুমাযাতি সঙ্খারাৰসেসসুখুমভাৰপ্পত্তিযা সুখুমায সঞ্ঞায ভাৰতো ৰিজ্জমানত্তা. নেৰসঞ্ঞাতি এত্থ ন-কারো অভাৰত্থো, নাসঞ্ঞন্তি এত্থ ন-কারো অঞ্ঞত্থো, অ-কারো অভাৰত্থোৰ, অসঞ্ঞং অনসঞ্ঞঞ্চাতি অত্থো. পরিযাপন্নত্তাতি একদেসভাৰেন অন্তোগধত্তা. এত্থাতি চতুত্থারুপ্পে. দুতিযে অত্থৰিকপ্পে নেৰসঞ্ঞাতি এত্থ ন-কারো অঞ্ঞত্থো. তথা নাসঞ্ঞাতি এত্থ ন-কারো, অ-কারো চ অঞ্ঞত্থো এৰাতি তেন দ্ৰযেন সঞ্ঞাভাৰো এৰ দস্সিতোতি ধম্মাযতনপরিযাপন্নতায আযতনভাৰো ৰুত্তোৰাতি ‘‘অধিট্ঠানট্ঠেনা’’তি ৰুত্তং নিস্সযপচ্চযভাৰতো.

কিং পন কারণং, যেনেত্থ সঞ্ঞাৰ এদিসী জাতাতি অনুযোগং সন্ধাযাহ ‘‘ন কেৰল’’ন্তিআদি. সঞ্ঞাসীসেনাযং দেসনা কতা ‘‘নানত্তকাযা নানত্তসঞ্ঞিনো’’তিআদীসু (দী. নি. ৩.৩৪১, ৩৫৯; অ. নি. ৯.২৪) ৰিযাতি দট্ঠব্বং. এৰং এস অত্থোতি কঞ্চি ৰিসেসং উপাদায সভাৰতো অত্থীতি ৰত্তব্বস্সেৰ ধম্মস্স কঞ্চি ৰিসেসং উপাদায নত্থীতি ৰত্তব্বতাসঙ্খাতো অত্থো.

অতিথোকম্পি যং তেলমত্থি ভন্তেতি আহ অকপ্পিযভাৰং উপাদায, তদেৰ নত্থি, ভন্তে, তেলন্তি আহ নাল়িপূরণং উপাদায. তেনাহ ‘‘তত্থ যথা’’তিআদি.

যদি আরম্মণসঞ্জাননং সঞ্ঞাকিচ্চং, তং সঞ্ঞা সমানা কথমযং কাতুং ন সক্কোতীতি আহ ‘‘দহনকিচ্চমিৰা’’তিআদি. সঙ্খারাৰসেসসুখুমভাৰপ্পত্তিযা এৰ হেসা পটুসঞ্ঞাকিচ্চং কাতুং ন সক্কোতি, ততো এৰ চ ঞাণস্স সুগয্হাপি ন হোতি. তেনাহ ‘‘নিব্বিদাজননম্পি কাতুং ন সক্কোতী’’তি. অকতাভিনিৰেসোতি অকতৰিপস্সনাভিনিৰেসো অপ্পৰত্তিতসম্মসনচারো. পকতিৰিপস্সকোতি পকতিযা ৰিপস্সকো. খন্ধাদিমুখেন ৰিপস্সনং অভিনিৰিসিত্ৰা দ্ৰারালম্বনেহি সদ্ধিং দ্ৰারপ্পৰত্তধম্মানং ৰিপস্সকো সক্কুণেয্য তব্বিসযউদযব্বযঞাণং উপ্পাদেতুং, যথা পন সক্কোতি, তং দস্সেতুং ‘‘সোপী’’তিআদি ৰুত্তং. কলাপসম্মসনৰসেনেৰাতি চতুত্থারুপ্পচিত্তুপ্পাদপরিযাপন্নে ফস্সাদিধম্মে অৰিনিব্ভুজ্জ একতো গহেত্ৰা কলাপতো সমূহতো সম্মসনৰসেন নযৰিপস্সনাসঙ্খাতকলাপসম্মসনৰসেন. ফস্সাদিধম্মে ৰিনিব্ভুজ্জিত্ৰা ৰিসুং ৰিসুং সরূপতো গহেত্ৰা অনিচ্চাদিৰসেন সম্মসনং অনুপদধম্মৰিপস্সনা. এৰং সুখুমত্তং গতা যথা ধম্মসেনাপতিনাপি নাম অনুপদং ন ৰিপস্সনেয্যাতি অত্থো.

থেরস্সাতি অঞ্ঞতরস্স থেরস্স. অঞ্ঞাহিপীতি এত্থ অযমপরা উপমা – একো কির ব্রাহ্মণো অঞ্ঞতরং পুরিসং মনুঞ্ঞং মত্তিকভাজনং গহেত্ৰা ঠিতং দিস্ৰা যাচি ‘‘দেহি মে ইমং ভাজন’’ন্তি. সো সুরাসিত্ততং সন্ধায ‘‘নায্যো সক্কা দাতুং, সুরা এত্থ অত্থী’’তি আহ. ব্রাহ্মণো অত্তনো সমীপে ঠিতং পুরিসং উদ্দিস্স আহ ‘‘তেন হি ইমস্স পাতুং দেহী’’তি. ইতরো ‘‘নত্থয্যো’’তি আহ. তত্থ যথা ব্রাহ্মণস্স অযোগ্যভাৰং উপাদায ‘‘অত্থী’’তিপি ৰত্তব্বং, পাতব্বতায তত্থ অভাৰতো ‘‘নত্থী’’তিপি ৰত্তব্বং জাতং, এৰং ইধাপীতি দট্ঠব্বং.

কস্মা পনেত্থ যথা হেট্ঠা ‘‘অনন্তো আকাসো, অনন্তং ৰিঞ্ঞাণং, নত্থি কিঞ্চী’’তি তত্থ তত্থ ভাৰনাকারো গহিতো, এৰং কোচি ভাৰনাকারো ন গহিতোতি? কেচি তাৰ আহু – ‘‘ভাৰনাকারো নাম সোপচারস্স ঝানস্স যথাসকং আরম্মণে পৰত্তিআকারো, আরম্মণঞ্চেত্থ আকিঞ্চঞ্ঞাযতনধম্মা. তে পন গয্হমানা একস্স ৰা পুব্বঙ্গমধম্মস্স ৰসেন গহেতব্বা সিযুং, সব্বে এৰ ৰা. তত্থ পঠমপক্খে ৰিঞ্ঞাণস্স গহণং আপন্নন্তি ‘ৰিঞ্ঞাণং ৰিঞ্ঞাণ’ন্তি মনসিকারে চতুত্থারুপ্পস্স ৰিঞ্ঞাণঞ্চাযতনভাৰো আপজ্জতি. দুতিযপক্খে পন সব্বসো আকিঞ্চঞ্ঞাযতনধম্মারম্মণতায ঝানস্স ‘আকিঞ্চঞ্ঞং আকিঞ্চঞ্ঞ’ন্তি মনসিকারে আকিঞ্চঞ্ঞাযতনতা ৰা সিযা, অভাৰারম্মণতা ৰা. সব্বথা নেৰসঞ্ঞানাসঞ্ঞাযতনভাৰো ন লব্ভতী’’তি. তদিদমকারণং তথা ঝানস্স অপ্পৰত্তনতো. ন হি চতুত্থারুপ্পভাৰনা ৰিঞ্ঞাণমাকিঞ্চঞ্ঞং ৰা আমসন্তী পৰত্ততি, কিঞ্চরহি? ততিযারুপ্পস্স সন্ততং.

যদি এৰং, কস্মা পাল়িযং ‘‘সন্ত’’ন্তি ন গহিতন্তি? কিঞ্চাপি ন গহিততং সুত্তে (দী. নি. ২.১২৯; সং. নি. ২.১৫২), ৰিভঙ্গে (ৰিভ. ৬০৬ আদযো) পন গহিতমেৰ. যথাহ – ‘‘তঞ্ঞেৰ আকিঞ্চঞ্ঞাযতনং সন্ততো মনসি করোতি, সঙ্খারাৰসেসসমাপত্তিং ভাৰেতী’’তি (ৰিভ. ৬১৯). অথ কস্মা ৰিভঙ্গে ৰিয সুত্তে ভাৰনাকারো ন গহিতোতি? ৰেনেয্যজ্ঝাসযতো, দেসনাৰিলাসতো চ. যে হি ৰেনেয্যা যথা হেট্ঠা তীসু আরুপ্পেসু ‘‘অনন্তো আকাসো, অনন্তং ৰিঞ্ঞাণং, নত্থি কিঞ্চী’’তি ভাৰনাকারো গহিতো, এৰং অগ্গহিতে এৰ তস্মিং তমত্থং পটিৰিজ্ঝন্তি, তেসং ৰসেন সুত্তে তথা দেসনা কতা, সুত্তন্তগতিকাৰ অভিধম্মে সুত্তন্তভাজনীযে (ৰিভ. ৬০৫ আদযো) উদ্দেসদেসনা. যে পন ৰেনেয্যা ৰিভজিত্ৰা ৰুত্তেযেৰ তস্মিং তমত্থং পটিৰিজ্ঝন্তি, তেসং ৰসেন ৰিভঙ্গে ভাৰনাকারো ৰুত্তো. ধম্মিস্সরো পন ভগৰা সম্মাসম্বুদ্ধো ধম্মানং দেসেতব্বপ্পকারং জানন্তো কত্থচি ভাৰনাকারং গণ্হাতি, কত্থচি ভাৰনাকারং ন গণ্হাতি. সা চ দেসনা যাৰদেৰ ৰেনেয্যৰিনযত্থাতি অযমেত্থ দেসনাৰিলাসো. সুত্তন্তদেসনা ৰা পরিযাযকথাতি তত্থ ভাৰনাকারো ন গহিতো, অভিধম্মদেসনা পন নিপ্পরিযাযকথাতি তত্থ ভাৰনাকারো গহিতোতি এৰম্পেত্থ ভাৰনাকারস্স গহণে, অগ্গহণে চ কারণং ৰেদিতব্বং.

অপরে পন ভণন্তি – ‘‘চতুত্থারুপ্পে ৰিসেসদস্সনত্থং সুত্তে ভাৰনাকারস্স অগ্গহণং, স্ৰাযং ৰিসেসো অনুপুব্বভাৰনাজনিতো. সা চ অনুপুব্বভাৰনা পহানক্কমোপজনিতা পহাতব্বসমতিক্কমেন ঝানানং অধিগন্তব্বতো. তথা হি কামাদিৰিৰেকৰিতক্কৰিচারৰূপসমপীতিৰিরাগসোমনস্সত্থঙ্গমমুখেন রূপাৰচরজ্ঝানানি দেসিতানি, রূপসঞ্ঞাদিসমতিক্কমমুখেন অরূপজ্ঝানানি. ন কেৰলঞ্চ ঝানানিযেৰ, অথ খো সব্বম্পি সীলং, সব্বাপি পঞ্ঞা পটিপক্খধম্মপ্পহানৰসেনেৰ সম্পাদেতব্বতো পহাতব্বধম্মসমতিক্কমদস্সনমুখেনেৰ দেসনা আরুল়্হা. তথা হি ‘‘পাণাতিপাতং পহায পাণাতিপাতা পটিৰিরতো’’তিআদিনা (দী. নি. ১.৮, ১৯৪) সীলসংৰরো, ‘‘চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী’’তিআদিনা (দী. নি. ১.২১৩; ম. নি. ১.৪১১, ৪২১; ৩.১৫, ৭৫) ইন্দ্রিযসংৰরো, ‘‘নেৰ দৰায ন মদাযা’’তিআদিনা (ম. নি. ১.২৩, ৪২২; ২.২৪; ৩.৭৫; সং. নি. ২.৬৩; অ. নি. ৬.৫৮; মহানি. ২০৬; ৰিভ. ৫১৮) ভোজনে মত্তঞ্ঞুতা, ‘‘ইধ ভিক্খু মিচ্ছাজীৰং পহায সম্মাআজীৰেন জীৰিকং কপ্পেতী’’তিআদিনা (সং. নি. ৫.৮) আজীৰপারিসুদ্ধি, ‘‘অভিজ্ঝং লোকে পহায ৰিগতাভিজ্ঝেন চেতসা’’তিআদিনা (দী. নি. ১.২১৭; ম. নি. ১.৪১২, ৪২৫; ৩.১৬, ৭৫) জাগরিযানুযোগো, ‘‘অনিচ্চসঞ্ঞা ভাৰেতব্বা অস্মিমানসমুগ্ঘাতায, অনিচ্চসঞ্ঞিনো, মেঘিয, অনত্তসঞ্ঞা সণ্ঠাতি, অনত্তসঞ্ঞী অস্মিমানসমুগ্ঘাতং গচ্ছতি, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তিআদিনা পঞ্ঞা পটিপক্খধম্মপ্পহানৰসেনেৰ দেসিতা. তস্মা ঝানানি দেসেন্তো ভগৰা ‘‘ৰিৰিচ্চেৰ কামেহী’’তিআদিনা (দী. নি. ১.২২৬; সং. নি. ২.১৫২; অ. নি. ৪.১২৩) পহাতব্বধম্মসমতিক্কমদস্সনমুখেনেৰ দেসেসি. তেন ৰুত্তং ‘‘কামাদিৰিৰেকৰিতক্কৰিচারৰূপসমপীতিৰিরাগসোমনস্সত্থঙ্গমমুখেন রূপাৰচরজ্ঝানানি দেসিতানি, রূপসঞ্ঞাদিসমতিক্কমমুখেন অরূপজ্ঝানানী’’তি. তত্থ যথা রূপাৰচরং পঠমং ঝানং ভাৰনাৰিসেসাধিগতেহি ৰিতক্কাদীহি ৰিয সদ্ধাদীহিপি তিক্খৰিসদসূরসভাৰেহি ধম্মেহি সমন্নাগতত্তা কামচ্ছন্দাদীনং নীৰরণানং, তদেকট্ঠানঞ্চ পাপধম্মানং ৰিক্খম্ভনতো উত্তরিমনুস্সধম্মভাৰপ্পত্তং কামাৰচরধম্মেহি সণ্হসুখুমং, সন্তং, পণীতঞ্চ হোতি; দুতিযজ্ঝানাদীনি পন ভাৰনাৰিসেসেন ওল়ারিকঙ্গপ্পহানতো ততো সাতিসযং সণ্হসুখুমসণ্হসুখুমতরাদিভাৰপ্পত্তানি হোন্তি. তথা অরূপাৰচরং পঠমজ্ঝানং রূপৰিরাগভাৰনাভাৰেন পৰত্তমানং আরম্মণসন্ততাযপি অঙ্গসন্ততাযপি পাকতিকপরিত্তধম্মেহি ৰিয সব্বরূপাৰচরধম্মেহি সন্তসুখুমভাৰপ্পত্তং হোতি. আরম্মণসন্তভাৰেনাপি হি তদারম্মণধম্মা সন্তসভাৰা হোন্তি, সেয্যথাপি লোকুত্তরধম্মারম্মণা ধম্মা.

সতিপি ধম্মতো, মহগ্গতভাৰেনাপি চ অভেদে রূপাৰচরচতুত্থতো আরুপ্পং অঙ্গতোপি সন্তমেৰ, যতস্স সন্তৰিমোক্খতা ৰুত্তা. দুতিযারুপ্পাদীনি পন পঠমারুপ্পাদিতো অঙ্গতো, আরম্মণতো চ সন্তসন্ততরসন্ততমভাৰপ্পত্তানি তথা ভাৰনাৰিসেসসমাযোগতো, স্ৰাযং ভাৰনাৰিসেসো পঠমজ্ঝানূপচারতো পট্ঠায তংতংপহাতব্বসমতিক্কমনৰসেন তস্স তস্স ঝানস্স সন্তসুখুমভাৰং আপাদেন্তো চতুত্থারুপ্পে সঙ্খারাৰসেসসুখুমভাৰং পাপেতি. যতো চতুত্থারুপ্পং যথা অনুপদধম্মৰিপস্সনাৰসেন ৰিপস্সনায আরম্মণভাৰং উপগন্ত্ৰা পকতিৰিপস্সকস্সাপি নিব্বিদুপ্পত্তিযা পচ্চযো ন হোতি সঙ্খারাৰসেসসুখুমভাৰপ্পত্তিতো, তথা সযং ততিযারুপ্পধম্মেসু পৰত্তমানং তে যাথাৰতো ৰিভাৰেতুং ন সক্কোতি, যথা তদঞ্ঞজ্ঝানানি অত্তনো আরম্মণং. কেৰলং পন আরব্ভ পৰত্তিমত্তমেৰস্স তত্থ হোতি, তযিদং আরম্মণভাৰেনাপি নাম ৰিভূতাকারতায ঠাতুং অপ্পহোন্তং আরম্মণকরণে কিং পহোতি. তস্মা তদস্স অৰিভূতকিচ্চতং দিস্ৰা সত্থা হেট্ঠা তীসু ঠানেসু ভাৰনাকারং ৰত্ৰা তাদিসো ইধ ন লব্ভতীতি দীপেতুং চতুত্থারুপ্পদেসনাযং সুত্তে ভাৰনাকারং পরিযাযদেসনত্তা ন কথেসি.

যস্মা পন সারম্মণস্স ধম্মস্স আরম্মণে পৰত্তিআকারো অত্থেৰাতি অতিসুখুমভাৰপ্পত্তং তং দস্সেতুং ‘‘তংযেৰ আকিঞ্চঞ্ঞাযতনং সন্ততো মনসি করোতী’’তি (ৰিভ. ৬১৯) ৰিভঙ্গে ৰুত্তং যথাধম্মসাসনভাৰতো, পুব্বভাগৰসেন ৰা ৰিভঙ্গে ‘‘সন্ততো মনসি করোতী’’তি ৰুত্তং তদা যোগিনো তস্স ৰিভূতভাৰতো. অপ্পনাৰসেন পন সুত্তে ভাৰনাকারো ন গহিতো অৰিভূতভাৰতো. কম্মট্ঠানং হি কিঞ্চি আদিতো অৰিভূতং হোতি, যথা তং? বুদ্ধানুস্সতিআদি. কিঞ্চি মজ্ঝে, যথা তং? আনাপানস্সতি. কিঞ্চি উভযত্থ, যথা তং? উপসমানুস্সতিআদি. চতুত্থারুপ্পকম্মট্ঠানং পন পরিযোসানে অৰিভূতং ভাৰনায মত্থকপ্পত্তিযং আরম্মণস্স অৰিভূতভাৰতো. তস্মা চতুত্থারুপ্পে ইমং ৰিসেসং দস্সেতুং সত্থারা সুত্তে ভাৰনাকারো ন গহিতো, ন সব্বেন সব্বং অভাৰতোতি নিট্ঠমেত্থ গন্তব্বং.

পকিণ্ণককথাৰণ্ণনা

২৮৮. অসদিসরূপোতি দ্ৰত্তিংসমহাপুরিসলক্খণঅসীতিঅনুব্যঞ্জনব্যামপ্পভাকেতুমালাদীহি রূপগুণেহি অঞ্ঞেহি অসাধারণরূপকাযো, সভাৰত্থো ৰা রূপ-সদ্দো ‘‘যং লোকে পিযরূপং সাতরূপ’’ন্তিআদীসু (দী. নি. ২.৪০০; ম. নি. ১.১৩৩; ৰিভ. ২০৩) ৰিয. তস্মা অসদিসরূপোতি অসদিসসভাৰো, তেন দসবলচতুৰেসারজ্জাদিগুণৰিসেসসমাযোগদীপনতো সত্থু ধম্মকাযসম্পত্তিযাপি অসদিসতা দস্সিতা হোতি. ইতীতি এৰং ৰুত্তপ্পকারেন. তস্মিন্তি আরুপ্পে. পকিণ্ণককথাপি ৰিঞ্ঞেয্যাতি পুব্বে ৰিয অসাধারণং তত্থ তত্থ ঝানে পতিনিযতমেৰ অত্থং অগ্গহেত্ৰা সাধারণভাৰতো তত্থ তত্থেৰ পকিণ্ণকং ৰিসটং অত্থং গহেত্ৰা পৰত্তা পকিণ্ণককথাপি ৰিজানিতব্বা.

২৮৯. রূপনিমিত্তাতিক্কমতোতি কসিণরূপসঙ্খাতস্স পটিভাগনিমিত্তস্স অতিক্কমনতো. আকাসাতিক্কমতোতি কসিণুগ্ঘাটিমাকাসস্স অতিক্কমনতো. আকাসে পৰত্তিতৰিঞ্ঞাণাতিক্কমতোতি পঠমারুপ্পৰিঞ্ঞাণস্স অতিক্কমনতো, ন দুতিযারুপ্পৰিঞ্ঞাণাতিক্কমনতো. তদতিক্কমতো হি তস্সেৰ ৰিভাৰনং হোতি. দুতিযারুপ্পৰিঞ্ঞাণৰিভাৰনে হি তদেৰ অতিক্কন্তং সিযা, ন তস্স আরম্মণং, ন চ আরম্মণে দোসং দিস্ৰা অনারম্মণস্স ৰিভাৰনাতিক্কমো যুজ্জতি. পাল়িযঞ্চ ‘‘ৰিঞ্ঞাণঞ্চাযতনং সতো সমাপজ্জতি…পে… সতো ৰুট্ঠহিত্ৰা তংযেৰ ৰিঞ্ঞাণং অভাৰেতী’’তি ৰুত্তং, ন ৰুত্তং ‘‘তংযেৰ ৰিঞ্ঞাণঞ্চাযতনং অভাৰেতী’’তি, ‘‘তংযেৰ অভাৰেতী’’তি ৰা. ‘‘অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জা’’তি এত্থ পন দ্ৰযং ৰুত্তং আরম্মণঞ্চ ৰিঞ্ঞাণং, ৰিঞ্ঞাণঞ্চাযতনঞ্চ. তস্মিং দ্ৰযে যেন কেনচি, যতো ৰা ৰুট্ঠিতো, তেনেৰ পধাননিদ্দিট্ঠেন তং-সদ্দস্স সম্বন্ধে আপন্নে ‘‘অযঞ্চ আরম্মণাতিক্কমভাৰনা’’তি ৰিঞ্ঞাণঞ্চাযতনস্স নিৰত্তনত্থং ৰিঞ্ঞাণৰচনং. তস্মা পঠমারুপ্পৰিঞ্ঞাণস্সেৰ অভাৰনাতিক্কমো ৰুত্তো.

২৯০. এৰং সন্তেপীতি অঙ্গাতিক্কমে অসতিপি. সুপ্পণীততরাতি সুট্ঠু পণীততরা, সুন্দরা পণীততরা চাতি ৰা অত্থো. সতিপি চতুন্নং পাসাদতলানং, সাটিকানঞ্চ তব্ভাৰতো, পমাণতো চ সমভাৰে উপরূপরি পন কামগুণানং, সুখসম্ফস্সাদীনঞ্চ ৰিসেসেন পণীততরাদিভাৰো ৰিয এতাসং চতুন্নং সমাপত্তীনং আরুপ্পভাৰতো, অঙ্গতো চ সতিপি সমভাৰে ভাৰনাৰিসেসসিদ্ধো পন সাতিসযো উপরূপরি পণীততরাদিভাৰোতি ইমমত্থং দস্সেতি ‘‘যথা হী’’তিআদিনা.

২৯১. নিস্সিতোতি নিস্সায ঠিতো. দুট্ঠিতাতি ন সম্মা ঠিতা, দুক্খং ৰা ঠিতা. তন্নিস্সিতন্তি তেন নিস্সিতং, ঠানন্তি অত্থো. তন্নিস্সিতন্তি ৰা তং মণ্ডপলগ্গং পুরিসং নিস্সায ঠিতং পুরিসন্তি অত্থো. মণ্ডপলগ্গঞ্হি অনিস্সায তেন ৰিনাভূতে ৰিৰিত্তে বহি ওকাসে ঠানং ৰিয আকাসলগ্গৰিঞ্ঞাণস্স ৰিৰেকে তদপগমে ততিযারুপ্পস্স ঠানন্তি.

২৯২. আরম্মণং করোতেৰ, অঞ্ঞাভাৰেন তং ইদন্তি ‘‘আসন্নৰিঞ্ঞাণঞ্চাযতনপচ্চত্থিকরূপাসন্নাকাসারম্মণৰিঞ্ঞাণাপগমারম্মণং, নো চ সন্ত’’ন্তি চ দিট্ঠাদীনৰম্পি তং আকিঞ্চঞ্ঞাযতনং ইদং নেৰসঞ্ঞানাসঞ্ঞাযতনজ্ঝানং অঞ্ঞস্স তাদিসস্স আরম্মণভাৰযোগ্যস্স অভাৰেন অলাভেন আরম্মণং করোতি এৰ. ‘‘সব্বদিসম্পতি’’ন্তি ইদং জনস্স অগতিকভাৰদস্সনত্থং ৰুত্তং. ৰুত্তিন্তি জীৰিকং. ৰত্ততীতি জীৰতি.

২৯৩. আরুল়্হোতিআদীসু অযং সঙ্খেপত্থো – যথা কোচি পুরিসো অনেকপোরিসং দীঘনিস্সেণিং আরুল়্হো তস্স উপরিমপদে ঠিতো তস্সা নিস্সেণিযা বাহুমেৰ ওলুব্ভতি অঞ্ঞস্স অলাভতো, যথা চ পংসুপব্বতস্স, মিস্সকপব্বতস্স ৰা অগ্গকোটিং আরুল়্হো তস্স মত্থকমেৰ ওলুব্ভতি, যথা চ গিরিং সিলাপব্বতং আরুল়্হো পরিপ্ফন্দমানো অঞ্ঞাভাৰতো অত্তনো জণ্ণুকমেৰ ওলুব্ভতি, তথা এতং চতুত্থারুপ্পজ্ঝানং তং ততিযারুপ্পং ওলুব্ভিত্ৰা পৰত্ততীতি. যং পনেত্থ অত্থতো অৰিভত্তং, তং উত্তানমেৰ.

আরুপ্পনিদ্দেসৰণ্ণনা নিট্ঠিতা.

ইতি দসমপরিচ্ছেদৰণ্ণনা.

১১. সমাধিনিদ্দেসৰণ্ণনা

আহারেপটিক্কূলভাৰনাৰণ্ণনা

২৯৪. উদ্দেসো নাম নিদ্দেসত্থো মুদুমজ্ঝিমপঞ্ঞাবাহুল্লতো, আগতো চ ভারো অৰস্সং ৰহিতব্বোতি আহ ‘‘একা সঞ্ঞাতি এৰং উদ্দিট্ঠায আহারে পটিক্কূলসঞ্ঞায ভাৰনানিদ্দেসো অনুপ্পত্তো’’তি. তত্থাযং সঞ্ঞা-সদ্দো ‘‘রূপসঞ্ঞা সদ্দসঞ্ঞা’’তিআদীসু (মহানি. ১৪) সঞ্জাননলক্খণে ধম্মে আগতো, ‘‘অনিচ্চসঞ্ঞা দুক্খসঞ্ঞা’’তিআদীসু ৰিপস্সনাযং আগতো, ‘‘উদ্ধুমাতকসঞ্ঞাতি ৰা সোপাকরূপসঞ্ঞাতি ৰা ইমে ধম্মা একত্থা উদাহু নানত্থা’’তিআদীসু সমথে আগতো. ইধ পন সমথস্স পরিকম্মে দট্ঠব্বো. আহারে হি পটিক্কূলাকারগ্গহণং, তপ্পভাৰিতং ৰা উপচারজ্ঝানং ইধ ‘‘আহারে পটিক্কূলসঞ্ঞা’’তি অধিপ্পেতং. তত্থ যস্মিং আহারে পটিক্কূলসঞ্ঞা ভাৰেতব্বা, তত্থ নিব্বেদৰিরাগুপ্পাদনায তপ্পসঙ্গেন সব্বম্পি আহারং কিচ্চপ্পভেদাদীনৰোপম্মেহি ৰিভাৰেতুং ‘‘আহরতীতি আহারো’’তিআদি আরদ্ধং.

তত্থ আহরতীতি আহারপচ্চযসঙ্খাতেন উপ্পত্তিযা, ঠিতিযা ৰা পচ্চযভাৰেন অত্তনো ফলং আনেতি নিব্বত্তেতি পৰত্তেতি চাতি অত্থো. কবল়ং করীযতীতি কবল়ীকারো, ৰত্থুৰসেন চেতং ৰুত্তং, লক্খণতো পন ওজালক্খণো ৰেদিতব্বো, কবল়ীকারো চ সো যথাৰুত্তেনত্থেন আহারো চাতি কবল়ীকারাহারো. এস নযো সেসেসুপি. ফুসতীতি ফস্সো. অযং হি অরূপধম্মোপি সমানো আরম্মণে ফুসনাকারেনেৰ পৰত্ততি. তথা হি সো ফুসনলক্খণোতি ৰুচ্চতি. চেতযতীতি চেতনা, অত্তনো সম্পযুত্তধম্মেহি সদ্ধিং আরম্মণে অভিসন্দহতীতি অত্থো, মনোসন্নিস্সিতা চেতনা মনোসঞ্চেতনা. উপপত্তিপরিকপ্পনৰসেন ৰিজানাতীতি ৰিঞ্ঞাণং. এৰমেত্থ সামঞ্ঞত্থতো, ৰিসেসত্থতো চ আহারা ৰেদিতব্বা. কস্মা পনেতে চত্তারোৰ ৰুত্তা, অঞ্ঞে ধম্মা কিং অত্তনো ফলস্স পচ্চযা ন হোন্তীতি? নো ন হোন্তি, ইমে পন তথা চ হোন্তি অঞ্ঞথা চাতি সমানেপি পচ্চযভাৰে অতিরেকপচ্চযা হোন্তি, তস্মা আহারাতি ৰুচ্চন্তি.

কথং? এতেসু হি পঠমো সযং যস্মিং কলাপে তপ্পরিযাপন্নানং যথারহং পচ্চযো হোন্তোৰ ওজট্ঠমকং রূপং আহরতি, দুতিযো তিস্সো ৰেদনা আহরতি, ততিযো তীসু ভৰেসু পটিসন্ধিং আহরতি, চতুত্থো পটিসন্ধিক্খণে নামরূপং আহরতি. তেনাহ ‘‘কবল়ীকারাহারো’’তিআদি. এত্থ চ কম্মজাদিভেদভিন্না ওজা সতি পচ্চযলাভে দ্ৰে তিস্সো পৰেণিযো ঘটেন্তী ওজট্ঠমকরূপং আহরতি, সুখৰেদনীযাদিভেদভিন্নো ফস্সাহারো যথারহং তিস্সো ৰেদনা আহরতি, পুঞ্ঞাভিসঙ্খারাদিভেদভিন্নো মনোসঞ্চেতনাহারো কামভৰাদীসু তীসু ভৰেসু যথারহং সৰিঞ্ঞাণং, অৰিঞ্ঞাণঞ্চ পটিসন্ধিং আহরতি, ৰিঞ্ঞাণাহারো যথাপচ্চযং পটিসন্ধিক্খণে নামং রূপং, নামরূপঞ্চ আহরতীতি দট্ঠব্বং. অথ ৰা উপত্থম্ভকট্ঠেন ইমে এৰ ধম্মা আহারাতি ৰুত্তা. যথা হি কবল়ীকারাহারো রূপকাযস্স উপত্থম্ভকট্ঠেন পচ্চযো, এৰং অরূপিনো আহারা সম্পযুত্তধম্মানং. তথা হি ৰুত্তং ‘‘কবল়ীকারো আহারো ইমস্স কাযস্স আহারপচ্চযেন পচ্চযো, অরূপিনো আহারা সম্পযুত্তকানং ধম্মানং তংসমুট্ঠানানঞ্চ রূপানং আহারপচ্চযেন পচ্চযো’’তি (পট্ঠা. ১.১.১৫). অপরো নযো – অজ্ঝত্তিকসন্ততিযা ৰিসেসপচ্চযত্তা কবল়ীকারাহারো, ফস্সাদযো চ তযো ধম্মা আহারাতি ৰুত্তা. ৰিসেসপচ্চযো হি কবল়ীকারাহারভক্খানং সত্তানং রূপকাযস্স কবল়ীকারাহারো, নামকাযে ৰেদনায ফস্সো, ৰিঞ্ঞাণস্স মনোসঞ্চেতনা, নামরূপস্স ৰিঞ্ঞাণং. যথাহ ‘‘সেয্যথাপি, ভিক্খৰে, অযং কাযো আহারট্ঠিতিকো, আহারং পটিচ্চ তিট্ঠতি, অনাহারো নো তিট্ঠতি (সং. নি. ৫.১৮৩). তথা ফস্সপচ্চযা ৰেদনা, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপ’’ন্তি (উদা. ১; মহাৰ. ১; নেত্তি. ২৪).

কবল়ীকারাহারেতি কবল়ীকারে আহারে নিকন্তি তণ্হা, তং ভযং অনত্থাৰহতো. গধিতস্স হি আহারপরিভোগো অনত্থায হোতি. হেতুঅত্থে ভুম্মং. এৰং সেসেসু. নিকন্তীতি নিকামনা ছন্দরাগো. ভাযতি এতস্মাতি ভযং, নিকন্তি এৰ ভযং নিকন্তিভযং. কবল়ীকারাহারহেতু ইমেসং সত্তানং ছন্দরাগো ভযং ভযানকং দিট্ঠধম্মিকাদিভেদস্স অনত্থস্স সকলস্সাপি ৰট্টদুক্খস্স হেতুভাৰতো. তেনেৰাহ ‘‘কবল়ীকারে চে, ভিক্খৰে, আহারে অত্থি রাগো, অত্থি নন্দী, অত্থি তণ্হা, পতিট্ঠিতং তত্থ ৰিঞ্ঞাণং ৰিরুল়্হ’’ন্তিআদি (সং. নি. ২.৬৪; কথা. ২৯৬; মহানি. ৭). উপগমনং অপ্পহীনৰিপল্লাসস্স আরম্মণেন সমোধানং সঙ্গতি সুখৰেদনীযাদিফস্সুপ্পত্তি ভযং ভযানকং তীহি দুক্খতাহি অপরিমুচ্চনতো. তেনাহ ‘‘সুখৰেদনীযং, ভিক্খৰে, ফস্সং পটিচ্চ উপ্পজ্জতি সুখা ৰেদনা (সং. নি. ৪.১২৯), তস্স ৰেদনাপচ্চযা তণ্হা…পে… দুক্খক্খন্ধস্স সমুদযো হোতী’’তি (উদা. ১). তত্থ তত্থ ভৰে উপপজ্জতি এতেনাতি উপপত্তি, উপপজ্জনং ৰা উপপত্তি, খিপনং ভযং ভযানকং উপপত্তিমূলকেহি ব্যসনেহি অপরিমুত্ততো. তেনাহ ‘‘অৰিদ্ৰা, ভিক্খৰে, পুরিসপুগ্গলো পুঞ্ঞঞ্চে সঙ্খারং অভিসঙ্খরোতি, পুঞ্ঞুপগং ভৰতি ৰিঞ্ঞাণং. অপুঞ্ঞঞ্চে সঙ্খারং অভিসঙ্খরোতি, অপুঞ্ঞুপগং ভৰতি ৰিঞ্ঞাণ’’ন্তিআদি (সং. নি. ২.৫১). পটিসন্ধীতি ভৰন্তরাদীহি পটিসন্ধানং, তং ভযং ভযানকং পটিসন্ধিনিমিত্তেহি দুক্খেহি অৰিমুচ্চনতো. তেনাহ ‘‘ৰিঞ্ঞাণে চে, ভিক্খৰে, আহারে অত্থি রাগো, অত্থি নন্দী, অত্থি তণ্হা, পতিট্ঠিতং তত্থ ৰিঞ্ঞাণং ৰিরুল়্হ’’ন্তিআদি (সং. নি. ২.৬৪).

পুত্তমংসূপমেন ওৰাদেন দীপেতব্বো নিচ্ছন্দরাগপরিভোগায. এৰং হি তত্থ নিকন্তিভযং ন হোতি. নিচ্চম্মা গাৰী যং যং ঠানং উপগচ্ছতি, তত্থ তত্থেৰ নং পাণিনো খাদন্তিযেৰ. এৰং ফস্সে সতি ৰেদনা উপ্পজ্জতি, ৰেদনা চ দুক্খসল্লাদিতো দট্ঠব্বাতি ফস্সে আদীনৰং পস্সন্তস্স উপগমনভযং ন হোতীতি আহ ‘‘ফস্সাহারো নিচ্চম্মগাৰূপমেন দীপেতব্বো’’তি. একাদসহি অগ্গীহি সব্বসো আদিত্তা ভৰা অঙ্গারকাসুসদিসাতি পস্সতো উপপত্তিভযং ন হোতীতি আহ ‘‘মনোসঞ্চেতনাহারো অঙ্গারকাসূপমেন দীপেতব্বো’’তি. চোরসদিসং ৰিঞ্ঞাণং অনত্থপাততো, পহারসদিসী ৰেদনা দুরধিৰাসতোতি সম্মদেৰ পস্সতো পটিসন্ধিভযং ন হোতীতি আহ ‘‘ৰিঞ্ঞাণাহারো সত্তিসতূপমেন দীপেতব্বো’’তি.

এৰং কিচ্চাদিমুখেন আহারেসু আদীনৰং ৰিভাৰেত্ৰা ইদানি তত্থ যথাধিপ্পেতং আহারং নিদ্ধারেত্ৰা পটিক্কূলতো মনসিকারৰিধিং দস্সেতুং ‘‘ইমেসু পনা’’তিআদি ৰুত্তং. উপাদাযরূপনিদ্দেসেপি ‘‘কবল়ীকারো আহারো’’তি (ধ. স. ৫৯৫) আগতত্তা ততো ৰিসেসেন্তো ‘‘অসিতপীতখাযিতসাযিতপ্পভেদো’’তি আহ, ভূতকথনং ৰা এতং. তত্থ অসিতপীতখাযিতসাযিতপ্পভেদোতি অসিতব্বপাতব্বখাযিতব্বসাযিতব্বৰিভাগো কালভেদৰচনিচ্ছায অভাৰতো যথা ‘‘দুদ্ধ’’ন্তি. কবল়ীকারো আহারো ৰাতি অৰধারণং যথা ফস্সাহারাদিনিৰত্তনং, এৰং ওজাহারনিৰত্তনম্পি দট্ঠব্বং. সৰত্থুকো এৰ হি আহারো ইধ কম্মট্ঠানভূতো, তেন আহরীযতীতি আহারোতি এৰমেত্থ অত্থো দট্ঠব্বো. আহরতীতি আহারোতি অযং পনত্থো নিব্বত্তিতওজাৰসেন ৰেদিতব্বো. ইমস্মিং অত্থেতি ইমস্মিং কম্মট্ঠানসঙ্খাতে অত্থে. উপ্পন্না সঞ্ঞাতি সঞ্ঞাসীসেন ভাৰনং ৰদতি. তথা হি ৰক্খতি ‘‘পটিক্কূলাকারগ্গহণৰসেন পনা’’তিআদি (ৰিসুদ্ধি. ১.৩০৫).

কম্মট্ঠানং উগ্গহেত্ৰাতি কম্মট্ঠানং পরিযত্তিধম্মতো, অত্থতো চ সুগ্গহিতং সুমনসিকতং সূপধারিতং কত্ৰা. তেনাহ ‘‘উগ্গহতো একপদম্পি অৰিরজ্ঝন্তেনা’’তি. তত্থ উগ্গহতোতি আচরিযুগ্গহতো. একপদম্পীতি একম্পি পদং, এককোট্ঠাসম্পি ৰা, পদেসমত্তম্পীতি অত্থো. দসহাকারেহীতি কস্মা ৰুত্তং, ননু অন্তিমজীৰিকাভাৰতো, পিণ্ডপাতস্স অলাভলাভেসু পরিতস্সনগেধাদিসমুপ্পত্তিতো, ভুত্তস্স সম্মদজননতো, কিমিকুলসংৰদ্ধনতোতি এৰমাদীহিপি আকারেহি আহারে পটিক্কূলতা পচ্চৰেক্খিতব্বা? ৰুত্তং হেতং ‘‘অন্তমিদং, ভিক্খৰে, জীৰিকানং যদিদং পিণ্ডোল্যং, অভিসাপোযং, ভিক্খৰে, লোকস্মিং ‘পিণ্ডোলো ৰিচরসি পত্তপাণী’’’তি (সং. নি. ৩.৮০), ‘‘অলদ্ধা চ পিণ্ডপাতং পরিতস্সতি, লদ্ধা চ পিণ্ডপাতং গধিতো মুচ্ছিতো অজ্ঝোসন্নো অনাদীনৰদস্সাৰী অনিস্সরণপঞ্ঞো পরিভুঞ্জতী’’তি (অ. নি. ৩.১২৪), ‘‘ভুত্তো চ আহারো কস্সচি কদাচি মরণং ৰা মরণমত্তং ৰা দুক্খং আৰহতি, উক্কোচকাদযো, তক্কোটকাদযো চ দ্ৰত্তিংস দ্ৰত্তিংস কুলপ্পভেদা কিমযো চ নং উপনিস্সায জীৰন্তী’’তি.

ৰুচ্চতে – অন্তিমজীৰিকাভাৰো তাৰ চিত্তসংকিলেসৰিসোধনত্থং কম্মট্ঠানাভিনিৰেসতো পগেৰ মনসি কাতব্বো ‘‘মাহং ছৰালাতসদিসো ভৰেয্য’’ন্তি. তথা পিণ্ডপাতস্স অলাভলাভেসুপি পরিতস্সনগেধাদিসমুপ্পত্তিনিৰারণং পগেৰ অনুট্ঠাতব্বং সুপরিসুদ্ধসীলস্স পটিসঙ্খানৰতো তদভাৰতো. ভত্তসম্মদো অনেকন্তিকো, পরিভোগন্তোগধো ৰা ৰেদিতব্বো. কিমিকুলসংৰদ্ধনং পন ন সঙ্গহেতব্বং, সঙ্গহিতমেৰ ৰা ‘‘দসহাকারেহী’’তি এত্থ নিযমস্স অকতত্তা. ইমিনা ৰা নযেন ইতরেসম্পেত্থ সঙ্গহো দট্ঠব্বো যথাসম্ভৰমেত্থ পটিক্কূলতাপচ্চৰেক্খণস্স অধিপ্পেতত্তা. তথা হি ঘরগোল়িকৰচ্চমূসিকজতুকৰচ্চাদিকং সম্ভৰন্তং গহিতং, ন একন্তিকন্তি. তথা পরিযেসনাদীসুপি যথাসম্ভৰং ৰত্তব্বং.

গমনতোতিআদীসু পচ্চাগমনম্পি গমনসভাগত্তা গমনেনেৰ সঙ্গহিতং. পটিক্কমনসালাদিউপসঙ্কমনং ৰিয পরিযেসনে সমানপটিক্কূলং হি অসুচিট্ঠানক্কমনৰিরূপদুগ্গন্ধদস্সনঘাযনাধিৰাসনেহি. গমনতোতি ভিক্খাচারৰসেন গোচরগামং উদ্দিস্স গমনতো. পরিযেসনতোতি গোচরগামে ভিক্খত্থং আহিণ্ডনতো. পরিভোগতোতি আহারস্স পরিভুঞ্জনতো. উভযং উভযেন আসযতি, একজ্ঝং পৰত্তমানোপি কম্মবলৰৰত্থিতো হুত্ৰা মরিযাদৰসেন অঞ্ঞমঞ্ঞং অসঙ্করতো সযতি তিট্ঠতি পৰত্ততীতি আসযো, আমাসযস্স উপরি তিট্ঠনকো পিত্তাদিকো. মরিযাদত্থো হি অযমাকারো, ততো আসযতো. নিদধাতি যথাভুত্তো আহারো নিচিতো হুত্ৰা তিট্ঠতি এত্থাতি নিধানং, আমাসযো, ততো নিধানতো. অপরিপক্কতোতি গহণীসঙ্খাতেন কম্মজতেজেন অপরিপক্কতো. পরিপক্কতোতি যথাভুত্তস্স আহারস্স ৰিপক্কভাৰতো. ফলতোতি নিব্বত্তিতো. নিস্সন্দতোতি ইতো চিতো চ ৰিস্সন্দনতো. সম্মক্খনতোতি সব্বসো মক্খনতো. সব্বত্থ আহারে পটিক্কূলতা পচ্চৰেক্খিতব্বাতি যোজনা. তংতংকিরিযানিপ্ফত্তিপটিপাটিৰসেন চাযং গমনতোতিআদিকা অনুপুব্বী ঠপিতা, সম্মক্খনং পন পরিভোগাদীসু লব্ভমানম্পি নিস্সন্দৰসেন ৰিসেসতো পটিক্কূলন্তি সব্বপচ্ছা ঠপিতন্তি দট্ঠব্বং.

২৯৫. এৰং মহানুভাৰেতি ইদানি ৰত্তব্বপটিপত্তিযা মহানুভাৰেতি ৰদন্তি, সব্বত্থককম্মট্ঠানপরিহরণাদিসিদ্ধং ৰা ধম্মসুধম্মতং পুরক্খত্ৰা যোগাৰচরেন এৰং পটিপজ্জিতব্বন্তি দস্সেন্তো ‘‘এৰং মহানুভাৰে নাম সাসনে’’তিআদিমাহ. তত্থ নাম-সদ্দো সম্ভাৰনে দট্ঠব্বো. পব্বজিতেন গামাভিমুখেন গন্তব্বন্তি যোজনা. অযঞ্চ গমনাদিতো পচ্চৰেক্খণা যোগিনো ন অত্তুদ্দেসিকাৰ, অথ খো অনুদ্দেসিকাপীতি দস্সেন্তো ‘‘সকলরত্তি’’ন্তিআদিনা ধুরদ্ৰযং পরিগ্গহেসি. পরিৰেণন্তি পরিৰেণঙ্গণং. ৰীসতিংসৰারেতি এত্থ সন্ততিপচ্চুপ্পন্নৰসেন ৰারপরিচ্ছেদোতি কেচি, অপরে পন ‘‘উণ্হাসনেনা’’তি ৰদন্তি. নীৰরণৰিক্খম্ভনঞ্হি অপ্পত্তা ভাৰনা ফরণপীতিযা অভাৰতো নিসজ্জাৰসেন কাযকিলমথং ন ৰিনোদতিযেৰাতি ইরিযাপথচলনং হোতিযেৰ. ৰীসতিংসগ্গহণং পন যথাসল্লক্খিতভিক্খাচরণৰেলাৰসেন. অথ ৰা গমনতো যাৰ সম্মক্খনমনসিকারো একো ৰারো, এৰং ৰীসতিংসৰারে কম্মট্ঠানং মনসি করিত্ৰা. নিজনসম্বাধানীতি জনসম্বাধরহিতানি, তেন অপ্পাকিণ্ণতং, অপ্পসদ্দতং, অপ্পনিগ্ঘোসতঞ্চ দস্সেতি. ততো এৰ পৰিৰেকসুখানি জনৰিৰেকেন ইট্ঠানি, পৰিৰেকস্স ৰা ঝানানুযোগস্স উপকারানি. যস্মা ছাযূদকসম্পন্নানি, তস্মা সীতলানি. যস্মা সুচীনি, তস্মা রমণীযভূমিভাগানীতি পুরিমানি দ্ৰে পচ্ছিমানং দ্ৰিন্নং কারণৰচনানি. অরিযন্তি নিদ্দোসং. ৰিৰেকরতিন্তি ঝানানুযোগরতিং.

কিঞ্চাপি যোগাৰচরানং ৰসনট্ঠানং নাম সুজগ্গিতং সুসম্মট্ঠমেৰ হোতি, কদাচি পন জগ্গনতো পচ্ছা এৰম্পি সিযাতি পটিক্কূলতাপচ্চৰেক্খণায সম্ভৰদস্সনত্থং ‘‘পাদরজঘরগোলিকৰচ্চাদিসম্পরিকিণ্ণ’’ন্তিআদি ৰুত্তন্তি দট্ঠব্বং. তত্থ পচ্চত্থরণন্তি ভূমিযা ছৰিরক্খণত্থং অত্থরিতব্বং চিমিলিকাদিঅত্থরণমাহ. জতুকা খুদ্দকৰগ্গুলিযো. উপহতত্তাতি দূসিতত্তা. ততোতি ততো ততো. অপ্পেকদা উলূকপারাৰতাদীহীতি ইধাপি ‘‘অপ্পেকদা’’তি পদং আনেত্ৰা সম্বন্ধিতব্বং. উদকচিক্খল্লাদীহীতি আদি-সদ্দেন কচৰরাদিং সঙ্গণ্হাতি. পরিৰেণতো ৰিহারঙ্গণপ্পৰেসমগ্গো ৰিহাররচ্ছা.

ৰিতক্কমাল়কেতি ‘‘কত্থ নু খো অজ্জ ভিক্খায চরিতব্ব’’ন্তিআদিনা ৰিতক্কনমাল়কে. গামমগ্গন্তি গামগামিমগ্গং. খাণুকণ্টকমগ্গোতি খাণুকণ্টকৰন্তো মগ্গো. দট্ঠব্বো হোতীতি দস্সনেন গমনং উপলক্খেতি.

গণ্ডং পটিচ্ছাদেন্তেনাতিআদি এৰমজ্ঝাসযেন নিৰাসনাদি কাতব্বন্তি ৰত্তদস্সনং, গণ্ডরোগিনা ৰাতাতপাদিপরিস্সযৰিনোদনত্থং গণ্ডং পটিচ্ছাদযমানেন ৰিয. অথ ৰা গণ্ডং ৰিয গণ্ডং পটিচ্ছাদযমানেনাতি একং গণ্ড-সদ্দং আনেত্ৰা সম্বন্ধিতব্বং ভৰতি. ‘‘গণ্ডোতি খো, ভিক্খৰে, পঞ্চন্নেতং উপাদানক্খন্ধানং অধিৰচন’’ন্তি (অ. নি. ৯.১৫; সং. নি. ৪.১০৩) ৰচনতো গণ্ডোতি অত্তভাৰস্স পরিযাযো, ৰিসেসতো রূপকাযস্স দুক্খতাসূলযোগতো, অসুচিপগ্ঘরণতো, উপ্পাদজরাভঙ্গেহি উদ্ধুমাতকপক্কপভিজ্জনতো. ৰণচোল়কন্তি ৰণপটিচ্ছাদকৰত্থখণ্ডং. নীহরিত্ৰাতি থৰিকতো উদ্ধরিত্ৰা. কুণপানিপীতি পি-সদ্দো গরহাযং এৰরূপানিপি দট্ঠব্বানি ভৰন্তীতি, সম্ভৰদস্সনে ৰা ইদম্পি তত্থ সম্ভৰতীতি. অধিৰাসেতব্বোতি খমিতব্বো অঞ্ঞথা আহারস্স অনুপলব্ভনতো. গামদ্ৰারেতি গামদ্ৰারসমীপে, উম্মারব্ভন্তরে ৰা. গামরচ্ছা ৰিনিৰিজ্ঝিত্ৰা ঠিতা ওলোকেতব্বা হোন্তি যুগমত্তদস্সিনাপি সতাতি অধিপ্পাযো.

পচ্চত্থরণাদীতি ঘরগোলিকৰচ্চাদিসংকিলিট্ঠপচ্চত্থরণাদিকং. অনেককুণপপরিযোসানন্তি এত্থ দুন্নিৰত্থদুপ্পারুতমনুস্সসমাকুলানং গামরচ্ছানং ওলোকনম্পি আনেত্ৰা ৰত্তব্বং. তম্পি হি পটিক্কূলমেৰাতি. অহো ৰতাতি গরহনে নিপাতো. ভোতি ধম্মালপনং. যাৰঞ্চিদং পটিক্কূলো আহারো যদত্থং গমনম্পি নাম এৰং জেগুচ্ছং, দুরধিৰাসনঞ্চাতি অত্থো.

২৯৬. গমনপটিক্কূলন্তি গমনমেৰ পটিক্কূলং গমনপটিক্কূলং. অধিৰাসেত্ৰাপীতি পি-সদ্দো সম্পিণ্ডনত্থো, তেন ‘‘এত্তকেনাপি মুত্তি নত্থি, ইতো পরম্পি মহন্তং পটিক্কূলং সকলং অধিৰাসেতব্বমেৰা’’তি ৰক্খমানং পটিক্কূলং সম্পিণ্ডেতি. সঙ্ঘাটিপারুতেনাতি সঙ্ঘাটিযা কপ্পনপারুপনেন পারুতসরীরেন. যত্থাতি যাসু ৰীথীসু. যাৰ পিণ্ডিকমংসাপীতি যাৰ জঙ্ঘপিণ্ডিকমংসপ্পদেসাপি. উদকচিক্খল্লেতি উদকমিস্সে কদ্দমে. একেন চীৰরন্তি একেন হত্থেন নিৰত্থচীৰরং. মচ্ছা ধোৰীযন্তি এতেনাতি মচ্ছধোৰনং, উদকং. সম্মিস্স-সদ্দো পচ্চেকং সম্বন্ধিতব্বো. ওল়িগল্লানি উচ্ছিট্ঠোদকগব্ভমলাদীনং সকদ্দমানং সন্দনট্ঠানানি, যানি জণ্ণুমত্তঅসুচিভরিতানিপি হোন্তি. চন্দনিকানি কেৰলানং উচ্ছিট্ঠোদকগব্ভমলাদীনং সন্দনট্ঠানানি. যতোতি ওল়িগল্লাদিতো. তা মক্খিকাতি তত্থ সণ্ডসণ্ডচারিনো নীলমক্খিকা. নিলীযন্তীতি অচ্ছন্তি.

দদমানাপীতিআদি সতিপি কেসঞ্চি সদ্ধানং ৰসেন সক্কচ্চকারে পটিক্কূলপচ্চৰেক্খণাযোগ্যং পন অসদ্ধানং ৰসেন পৰত্তনকঅসক্কচ্চকারমেৰ দস্সেতুং আরদ্ধং. তুণ্হী হোন্তি সযমেৰ রিঞ্চিত্ৰা গচ্ছিস্সতীতি. গচ্ছাতি অপেহি. রেতি অম্ভো. মুণ্ডকাতি অনাদরালপনং. সমুদাচরন্তীতি কথেন্তি. পিণ্ডোল্যস্স অন্তিমজীৰিকাভাৰেনাহ ‘‘কপণমনুস্সেন ৰিয গামে পিণ্ডায চরিত্ৰা নিক্খমিতব্ব’’ন্তি.

২৯৭. তত্থাতি তস্মিং পত্তগতে আহারে. লজ্জিতব্বং হোতি ‘‘উচ্ছিট্ঠং নু খো অযং ময্হং দাতুকামো’’তি আসঙ্কেয্যাতি, সেদো পগ্ঘরমানো আহারস্স ৰা উণ্হতায, ভিক্খুনো ৰা সপরিল়াহতাযাতি অধিপ্পাযো. সুক্খথদ্ধভত্তম্পীতি সুক্খতায থদ্ধম্পি ভত্তং, পগেৰ তক্ককঞ্জিকাদিনা উপসিত্তন্তি অধিপ্পাযো. তেন সেদেন কিলিন্নতায পটিক্কূলতং ৰদতি.

তস্মিন্তি পিণ্ডপাতে. সম্ভিন্নসোভেতি সব্বসো ৰিনট্ঠসোভে. ৰেমজ্ঝতো পট্ঠাযাতি জিৰ্হায মজ্ঝতো পট্ঠায. দন্তগূথকো দন্তমলং. ৰিচুণ্ণিতমক্খিতোতি উভযেহি দন্তেহি ৰিচুণ্ণিতো খেল়াদীহি সমুপলিত্তো. এৰংভূতস্স চস্স যাযং পুব্বে ৰণ্ণসম্পদা, গন্ধসম্পদা, অভিসঙ্খারসম্পদা চ, সা একংসেন ৰিনস্সতি, রসো পন নস্সেয্য ৰা ন ৰাতি আহ ‘‘অন্তরহিতৰণ্ণগন্ধসঙ্খারৰিসেসো’’তি. সুৰানদোণিযন্তি সারমেয্যানং ভুঞ্জনকঅম্বণে. সুৰানৰমথু ৰিযাতি ৰন্তসুনখছড্ডনং ৰিয. চক্খুস্স আপাথং অতীতত্তা অজ্ঝোহরিতব্বো হোতীতি উক্কংসগতং তস্স পটিক্কূলভাৰং ৰিভাৰেতি.

২৯৮. পরিভোগন্তি অজ্ঝোহরণং. এস আহারো অন্তো পৰিসমানো বহলমধুকতেলমক্খিতো ৰিয পরমজেগুচ্ছো হোতীতি সম্বন্ধো. অন্তোতি কোট্ঠস্স অব্ভন্তরে. নিধানমনুপগতো আমাসযং অপ্পত্তোযেৰ আহারো পিত্তাদীহি ৰিমিস্সিতো হোতীতি আহ ‘‘পৰিসমানো’’তি. আমাসযপক্কাসযৰিনিমুত্তো কোযমাসযো নামাতি আসঙ্কং সন্ধাযাহ ‘‘যস্মা’’তিআদি. পিত্তমেৰাসযো পিত্তাসযো. অধিকো হোতীতি ৰুত্তং মন্দপুঞ্ঞবাহুল্লতো লোকস্স. এৰং আসযতোতি জেগুচ্ছো হুত্ৰা অন্তো পৰিট্ঠো জেগুচ্ছতরেহি পিত্তাদীহি ৰিমিস্সিতো অতিৰিয জেগুচ্ছো হোতীতি এৰং আসযতো পটিক্কূলতা পচ্চৰেক্খিতব্বা.

২৯৯. নিধানতোতি এত্থাপি এসেৰ নযো. সোতি আহারো. দসৰস্সিকেনাতি জাতিযা দসৰস্সেন সত্তেন. ওকাসেতি আমাসযসঙ্খাতে পদেসে.

৩০০. এৰরূপেতি এদিসে, দসৰস্সানি যাৰ ৰস্সসতং অধোতৰচ্চকূপসদিসেতি অত্থো. নিধানন্তি নিধাতব্বতং. যথাৰুত্তপ্পকারেতি সচে পন ‘‘দসৰস্সিকেনা’’তিআদিনা (ৰিসুদ্ধি. ১.২৯৯) যথাৰুত্তো পকারো এতস্সাতি যথাৰুত্তপ্পকারো, তস্মিং. পরমন্ধকারতিমিসেতি অতিৰিয অন্ধকরণমহাতমসি. অতিদুগ্গন্ধজেগুচ্ছে পদেসে পরমজেগুচ্ছভাৰং উপগন্ত্ৰা তিট্ঠতীতি সম্বন্ধো. কত্থ কিং ৰিযাতি আহ ‘‘যথা নামা’’তিআদি. কালমেঘেন অভিৰুট্ঠে আৰাটে বহুসো ৰস্সনেন একচ্চং অসুচিজাতং উপ্পিলৰিত্ৰা ৰিগচ্ছেয্যাতি অকালমেঘ-গ্গহণং. তিণপণ্ণকিলঞ্জখণ্ড-গ্গহণং ন অসুভস্সাপি অসুভেন সম্মিস্সতায অসুভভাৰপ্পত্তিদস্সনত্থং. কাযগ্গিসন্তাপকুথিতকুথনসঞ্জাতফেণপুব্বুল়কাচিতোতি গহণিতেজেন পক্কুথিতনিপ্পক্কতায সমুপ্পন্নফেণপুব্বুল়নিচিতো. অপরিপক্কতোতি অপরিপক্কভাৰতো.

৩০১. সুৰণ্ণরজতাদিধাতুযো ৰিযাতি যথা সুৰণ্ণরজতাদিধাতুযো ৰিধিনা তাপিযমানা সুৰণ্ণরজতাদিকে মুঞ্চন্তিযো সুৰণ্ণরজতাদিভাৰং উপগচ্ছন্তীতি ৰুচ্চন্তি, ন এৰমযং. অযং পন আহারো কাযগ্গিনা পরিপক্কো ফেণপুব্বুল়কে মুঞ্চন্তো সণ্হং করোন্তি এত্থাতি ‘‘সণ্হকরণী’’তি লদ্ধনামকে নিসদে পিসিত্ৰা নাল়িকে খুদ্দকৰেল়ুনাল়িকাযং ৰণ্ণসণ্ঠানমত্তেন পক্খিপ্পমানপণ্ডুমত্তিকা ৰিয করীসভাৰং উপগন্ত্ৰা পক্কাসযং পূরেতি, মুত্তভাৰং উপগন্ত্ৰা মুত্তৰত্থিং পূরেতীতি যোজনা. গহণিযা ইন্ধনভাগো ৰিয কিমিভক্খভাগো চ অপাকটোৰ. রসভাগো ফলতো পকাসীযতি, অপরিপক্কসভাগা চ তেতি তে অনামসিত্ৰা করীসমুত্তভাগা এৰেত্থ দস্সিতা.

৩০২. পটিক্কূলস্স নাম ফলেন পটিক্কূলেনেৰ ভৰিতব্বন্তি দস্সেন্তো ‘‘সম্মা পরিপচ্চমানো’’তিআদিমাহ. নখদন্তাদীনীতি আদি-সদ্দেন ন কেৰলং তচাদীনি এৰ দ্ৰত্তিংসাকারপাল়িযং (ম. নি. ৩.১৫৪; খু. পা. ৩.দ্ৰত্তিংসাকার) আগতানি, অথ খো অক্খিগূথকণ্ণগূথদন্তমলজল্লিকাসম্ভৰাদীনি দ্ৰত্তিংসকোট্ঠাসৰিনিমুত্তানি অসুভানি সঙ্গণ্হন্তো ‘‘নানাকুণপানী’’তি আহাতি দট্ঠব্বং.

৩০৩. নিস্সন্দমানোতি ৰিস্সৰন্তো, পগ্ঘরন্তোতি অত্থো. আদিনা পকারেনাতি এত্থ আদি-সদ্দেন নাসিকায সিঙ্ঘাণিকা, মুখেন খেল়ো, কদাচি পিত্তং, সেম্হং, লোহিতং ৰমতি, ৰচ্চমগ্গেন উচ্চারো, পস্সাৰমগ্গেন পস্সাৰো, সকলকাযে লোমকূপেহি সেদজল্লিকাতি এৰংপকারং অসুচিং সঙ্গণ্হাতি. ‘‘পঠমদিৰসে’’তি ইদং নিস্সন্দদিৰসাপেক্খায ৰুত্তং. তেনাহ ‘‘দুতিযদিৰসে নিস্সন্দেন্তো’’তি. ৰিকুণিতমুখোতি জিগুচ্ছাৰসেন সঙ্কুচিতমুখো. তেনাহ ‘‘জেগুচ্ছী’’তি. মঙ্কুভূতোতি ৰিমনকজাতো ‘‘ইমম্পি নাম পোসেমী’’তি. রত্তোতি ৰত্থং ৰিয রঙ্গজাতেন চিত্তস্স ৰিপরিণামাকারেন ছন্দরাগেন রত্তো. গিদ্ধোতি অভিকঙ্খনসভাৰেন অভিগিজ্ঝনেন গিদ্ধো গেধং আপন্নো. গধিতোতি দুম্মোচনীযভাৰেন গন্থিতো ৰিয তত্থ পটিবদ্ধো. মুচ্ছিতোতি রসতণ্হায মুচ্ছং মোহং আপন্নো. ৰিরত্তোতি ৰিগতরাগো. অট্টীযমানোতি দুক্খিযমানো. হরাযমানোতি লজ্জমানো. জিগুচ্ছমানোতি হীল়েন্তো.

নৰদ্ৰারেহীতি পাকটানং মহন্তানং ৰসেন ৰুত্তং, লোমকূপৰিৰরেহিপি সন্দতেৰাতি. নিলীযতীতি অত্তানং অদস্সেন্তো নিগূহতি, সঙ্কুচতি ৰা. এৰন্তি একেন দ্ৰারেন পৰেসনং অনেকেহি দ্ৰারেহি অনেকধা নিক্খামনং, পকাসনং পৰেসনং, নিগূল়্হং নিক্খামনম্পীতি সোমনস্সজাতেন পৰেসনং, মঙ্কুভূতেন নিক্খামনং, সারত্তেন পৰেসনং, ৰিরত্তেন নিক্খামনন্তি ইমেহি পকারেহি.

৩০৪. পরিভোগকালেপীতি পি-সদ্দেন পৰিট্ঠমত্তোপি নাম পৰেসদ্ৰারং জেগুচ্ছং করোতি, পগেৰ লদ্ধপরিৰাসো পরিপাকপ্পত্তো ইতরদ্ৰারানীতি দস্সেতি. এস আহারো. গন্ধহরণত্থন্তি ৰিস্সগন্ধাপনযনত্থং. কাযগ্গিনাতি গহণিতেজানুগতেন কাযুস্মানা. ফেণুদ্দেহকন্তি ফেণানি উট্ঠপেত্ৰা উট্ঠপেত্ৰা. পচ্চিত্ৰাতি পরিপাকং গন্ত্ৰা. উত্তরমানোতি উপ্পিলৰন্তো. সেম্হাদীতি আদি-সদ্দেন পিত্তাদিকে সঙ্গণ্হাতি. করীসাদীতি আদি-সদ্দেন সেদজল্লিকাদিকে. ইমানি দ্ৰারানি মুখাদীনি. একচ্চন্তি পস্সাৰমগ্গং সন্ধায ৰদতি. চোক্খজাতিকা পন মুখাদীনিপি ধোৰিত্ৰা হত্থং পুন ধোৰন্তিযেৰ. পুন একচ্চন্তি ৰচ্চমগ্গং. দ্ৰত্তিক্খত্তুন্তি দ্ৰিক্খত্তুং, তিক্খত্তুং ৰা. এত্থ চ আহারত্থায গমনপরিযেসনানং পটিক্কূলতা আহারে পটিক্কূলতা ৰুত্তা. পরিভোগস্স তন্নিস্সযতো, আসযনিধানানং তংসম্বন্ধতো, ইতরেসং তব্বিকারতোতি অযম্পি ৰিসেসো ৰেদিতব্বো. কিমিভক্খভাৰোপি হিস্স ৰিকারপক্খেযেৰ ঠপেতব্বোতি.

৩০৫. তং নিমিত্তন্তি যথাৰুত্তেহি আকারেহি পুনপ্পুনং মনসি করোন্তস্স পটিক্কূলাকারৰসেন উপট্ঠিতং কবল়ীকারাহারসঞ্ঞিতং ভাৰনায নিমিত্তং আরম্মণং, ন উগ্গহপটিভাগনিমিত্তং. যদি হি তত্থ উগ্গহনিমিত্তং উপ্পজ্জেয্য, পটিভাগনিমিত্তেনপি ভৰিতব্বং. তথা চ সতি অপ্পনাপ্পত্তেন ঝানেন ভৰিতব্বং, ন চ ভৰতি, কস্মা? ভাৰনায নানাকারতো, সভাৰধম্মভাৰেন চ কম্মট্ঠানস্স গম্ভীরভাৰতো. তেনাহ ‘‘কবল়ীকারাহারস্স সভাৰধম্মতায গম্ভীরত্তা’’তি. এত্থ হি যদিপি পটিক্কূলাকারৰসেন ভাৰনা পৰত্ততি. যে পন ধম্মে উপাদায কবল়ীকারাহারপঞ্ঞত্তি, তে এৰ ধম্মা পটিক্কূলা, ন পঞ্ঞত্তীতি পটিক্কূলাকারগ্গহণমুখেনপি সভাৰধম্মেযেৰ আরব্ভ ভাৰনায পৰত্তনতো, সভাৰধম্মানঞ্চ সভাৰেনেৰ গম্ভীরভাৰতো ন তত্থ ঝানং অপ্পেতুং সক্কোতি. গম্ভীরভাৰতো হি পুরিমসচ্চদ্ৰযং দুদ্দসং জাতন্তি. যদি উপচারসমাধিনা চিত্তং সমাধিযতি, কথং কম্মট্ঠানং ‘‘সঞ্ঞা’’ ইচ্চেৰ ৰোহরীযতীতি আহ ‘‘পটিক্কূলাকারগ্গহণৰসেন পনা’’তিআদি.

ইদানি ইমিস্সা ভাৰনায আনিসংসং দস্সেতুং ‘‘ইমঞ্চ পনা’’তিআদি ৰুত্তং. রসতণ্হাযাতি মধুরাদিরসৰিসযায তণ্হায. পতিলীযতীতি সঙ্কুচতি অনেকাকারং তত্থ পটিক্কূলতায সণ্ঠিতত্তা. পতিকুটতীতি অপসক্কতি ন ৰিসরতি. পতিৰত্ততীতি নিৰত্ততি. কন্তারনিত্থরণত্থিকোতি মহতো দুব্ভিক্খকন্তারস্স নিত্থরণপ্পযোজনো. ৰিগতমদোতি মানমদাদীনং অভাৰেন নিম্মদো, মদাভাৰগ্গহণেনেৰ চস্স দৰমণ্ডনৰিভূসনাদীনম্পি অভাৰো গহিতোযেৰাতি দট্ঠব্বং. কবল়ীকারাহারপরিঞ্ঞামুখেনাতি ৰুত্তনযেন পটিক্কূলাকারতো কবল়ীকারাহারস্স পরিচ্ছিজ্জ জাননদ্ৰারেন. পঞ্চকামগুণিকো রাগোতি অনতিৰত্তনট্ঠেন পঞ্চসু কামগুণেসু নিযুত্তো, তপ্পযোজনো ৰা রাগো. পরিঞ্ঞং সমতিক্কমং গচ্ছতি. রসতণ্হায হি সম্মদেৰ ৰিগতায রূপতণ্হাদযোপি ৰিগতা এৰ হোন্তি ভোজনে মত্তঞ্ঞুতায উক্কংসগমনতো. সতি চ ৰিসযিসমতিক্কমে ৰিসযো সমতিক্কন্তো এৰ হোতীতি আহ ‘‘সো পঞ্চকামগুণপরিঞ্ঞামুখেন রূপক্খন্ধং পরিজানাতী’’তি. রূপাযতনাদীসু হি পরিঞ্ঞং গচ্ছন্তেসু তন্নিস্সযভূতানি, তগ্গাহকা পসাদা চ সুখেনেৰ পরিঞ্ঞং গচ্ছন্তীতি. অপরিপক্কাদীতি আদি-সদ্দেন আসযনিধানানম্পি সঙ্গহো দট্ঠব্বো. তত্থ অপরিপক্কং তাৰ উদরিযমেৰ. আসযগ্গহণেন পিত্তসেম্হপুব্বলোহিতানং, পরিপক্কগ্গহণেন করীসমুত্তানং, ফলগ্গহণেন কেসাদীনং সব্বেসং পরিগ্গহো সিদ্ধো হোতীতি আহ ‘‘কাযগতাসতিভাৰনাপি পারিপূরিং গচ্ছতী’’তি. অসুভসঞ্ঞাযাতি অসুভভাৰনায, অৰিঞ্ঞাণকঅসুভভাৰনানুযোগস্সাতি অত্থো. অনুলোমপটিপদং পটিপন্নো হোতি পটিক্কূলাকারগ্গহণেন কাযস্স অসুচিদুগ্গন্ধজেগুচ্ছভাৰসল্লক্খণতো. ইমং পন পটিপত্তিন্তি ইমং আহারে পটিক্কূলসঞ্ঞাভাৰনং. অমতপরিযোসানতন্তি নিব্বাননিট্ঠিতং আহারে পটিক্কূলসঞ্ঞাভাৰনাসঙ্খাতং উপচারজ্ঝানং পাদকং কত্ৰা ৰিপস্সনং ৰড্ঢেত্ৰা নিব্বানাধিগমন্তি অত্থো.

আহারেপটিক্কূলভাৰনাৰণ্ণনা নিট্ঠিতা.

চতুধাতুৰৰত্থানভাৰনাৰণ্ণনা

৩০৬. ‘‘একং ৰৰত্থানন্তি এৰং উদ্দিট্ঠস্স চতুধাতুৰৰত্থানস্স ভাৰনানিদ্দেসো অনুপ্পত্তো’’তি উদ্দেসো নাম নিদ্দেসত্থো মুদুমজ্ঝপঞ্ঞাবাহুল্লতো, আগতো চ ভারো অৰস্সং ৰহিতব্বোতি কত্ৰা ৰুত্তং. তত্থ সতিপি ৰিসযভেদেন ৰৰত্থানস্স ভেদে ৰৰত্থানভাৰসামঞ্ঞেন পন তং অভিন্নং কত্ৰা ৰুত্তং ‘‘একং ৰৰত্থান’’ন্তি, পুব্বভাগে ৰা সতিপি ৰিসযভেদে অত্থসিদ্ধিযং তস্স একৰিসযতাৰাতি ‘‘একং ৰৰত্থান’’ন্তি ৰুত্তং. যথা হি দ্ৰত্তিংসাকারে কম্মং করোন্তস্স যোগিনো যদিপি পুব্বভাগে ৰিসুং ৰিসুং কোট্ঠাসেসু মনসিকারো পৰত্ততি, অপরভাগে পন একস্মিং খণে একস্মিংযেৰ কোট্ঠাসে অত্থসিদ্ধি হোতি, ন সব্বেসু, এৰমিধাপীতি. তত্থ সিযা – যথা পটিক্কূলভাৰসামঞ্ঞেন দ্ৰত্তিংসাকারকম্মট্ঠানে অভেদতো মনসিকারো পৰত্ততি, এৰং ইধ ধাতুভাৰসামঞ্ঞেন অভেদতো মনসিকারো পৰত্ততীতি ‘‘একং ৰৰত্থান’’ন্তি ৰুত্তন্তি? নযিদমেৰং. তত্থ হি পণ্ণত্তিসমতিক্কমতো পট্ঠায পটিক্কূলৰসেনেৰ সব্বত্থ মনসিকারো পৰত্তেতব্বো, ইধ পন সভাৰসরসলক্খণতো ধাতুযো মনসি কাতব্বা, ন ধাতুভাৰসামঞ্ঞতো. তেনেৰাহ ‘‘সভাৰূপলক্খণৰসেন সন্নিট্ঠান’’ন্তি. কিং ৰা এতেন পপঞ্চেন, অঞ্ঞেহি একূনচত্তালীসায কম্মট্ঠানেহি অসংসট্ঠং চতুধাতুৰৰত্থানং নাম একং কম্মট্ঠানন্তি দস্সেতুং ‘‘একং ৰৰত্থান’’ন্তি ৰুত্তন্তি দট্ঠব্বং. ‘‘চতুধাতুৰৰত্থানস্স ভাৰনানিদ্দেসো’’তি কস্মা ৰুত্তং, ননু চতুধাতুৰৰত্থানং ভাৰনাৰ? সচ্চং ভাৰনাৰ, সকিং পৰত্তং পন ৰৰত্থানং, তস্স বহুলীকারো ভাৰনাতি ৰচনভেদেন ৰুত্তং. কথং পন ভাৰনা নিদ্দিসীযতি তস্সা ৰচীগোচরাতিক্কন্তভাৰতোতি? নাযং দোসো ভাৰনত্থে ভাৰনাৰোহারতো. ভাৰনত্থো হি কম্মট্ঠানপরিগ্গহো ইধ ‘‘ভাৰনা’’তি অধিপ্পেতো.

সভাৰূপলক্খণৰসেনাতি কক্খল়ত্তাদিকস্স সলক্খণস্স উপধারণৰসেন. ইদং হি কম্মট্ঠানং পথৰীকসিণাদিকম্মট্ঠানং ৰিয ন পণ্ণত্তিমত্তসল্লক্খণৰসেন, নীলকসিণাদিকম্মট্ঠানং ৰিয ন নীলাদিৰণ্ণসল্লক্খণৰসেন, নাপি ৰিপস্সনাকম্মট্ঠানং ৰিয সঙ্খারানং অনিচ্চতাদিসামঞ্ঞলক্খণসল্লক্খণৰসেন পৰত্ততি, অথ খো পথৰীআদীনং সভাৰসল্লক্খণৰসেন পৰত্ততি. তেন ৰুত্তং ‘‘সভাৰূপলক্খণৰসেনা’’তি, কক্খল়ত্তাদিকস্স সলক্খণস্স উপধারণৰসেনাতি অত্থো. সন্নিট্ঠানন্তি ঞাণৰিনিচ্ছযো ৰেদিতব্বো, ন যেৰাপনকৰিনিচ্ছযো, নাপি ৰিতক্কাদিৰিনিচ্ছযো. ধাতুমনসিকারোতি ধাতূসু মনসিকারো, চতস্সো ধাতুযো আরব্ভ ভাৰনামনসিকারোতি অত্থো. কাতব্বতো কম্মং, যোগিনো সুখৰিসেসানং কারণভাৰতো ঠানঞ্চাতি কম্মট্ঠানং, চতুন্নং মহাভূতানং সভাৰসল্লক্খণৰসেন পৰত্তং যোগকম্মং. তেনাহ ‘‘ধাতুমনসিকারো, ধাতুকম্মট্ঠানং, চতুধাতুৰৰত্থানন্তি অত্থতো এক’’ন্তি. তযিদং চতুধাতুৰৰত্থানং. ‘‘দ্ৰিধা আগত’’ন্তি কস্মা ৰুত্তং, ননু ধাতুৰিভঙ্গে নাতিসঙ্খেপৰিত্থারৰসেন আগতং, তস্মা ‘‘তিধা আগত’’ন্তি ৰত্তব্বন্তি? ন, তত্থাপি অজ্ঝত্তিকানং ধাতূনং পভেদতো অনৰসেসপরিযাদানস্স কতত্তা, বাহিরানঞ্চ ধাতূনং পরিগ্গহিতত্তা. অথ ৰা দ্ৰিধা আগতন্তি এত্থ দ্ৰিধাৰ আগতন্তি ন এৰং নিযমো গহেতব্বো, অথ খো দ্ৰিধা আগতমেৰাতি, তেন ততিযস্সাপি পকারস্স সঙ্গহো সিদ্ধো হোতি. সো চ নাতিসঙ্খেপৰিত্থারনযো ‘‘সঙ্খেপতো চ ৰিত্থারতো চা’’তি এত্থ আৰুত্তিৰসেন, চ-সদ্দেনেৰ ৰা সঙ্গহোতি দট্ঠব্বো. অথ ৰা যো নাতিসঙ্খেপৰিত্থারনযেন অতিসঙ্খেপপটিক্খেপমুখেন লব্ভমানো ৰিত্থারভাগো, তং ৰিত্থারনযন্তোগধমেৰ কত্ৰা ৰুত্তং ‘‘দ্ৰিধা আগত’’ন্তি. এৰঞ্চ কত্ৰা ‘‘নাতিতিক্খপঞ্ঞস্স ধাতুকম্মট্ঠানিকস্স ৰসেন ৰিত্থারতো আগত’’ন্তি ইদঞ্চ ৰচনং সমত্থিতং হোতি. ‘‘মহাসতিপট্ঠানে’’তি চ ইদং নিদস্সনমত্তং দট্ঠব্বং, সতিপট্ঠান(দী. নি. ২.৩৭৮ আদযো; ম. নি. ৩.১১১ আদযো) কাযগতাসতিসুত্তাদীসুপি (ম. নি. ৩.১৫৩ আদযো) তথেৰ আগতত্তা. রাহুলোৰাদেতি মহারাহুলোৰাদে (ম. নি. ২.১১৩ আদযো). ধাতুৰিভঙ্গেতি ধাতুৰিভঙ্গসুত্তে (ম. নি. ৩.৩৪২ আদযো), অভিধম্মে ধাতুৰিভঙ্গে (ৰিভ. ১৭২ আদযো) চ.

কামং মহাসতিপট্ঠানে অত্থেন উপমং পরিৰারেত্ৰা দেসনা আগতা, উপমা চ নাম যাৰদেৰ উপমেয্যত্থৰিভাৰনত্থাতি উপমং তাৰ দস্সেত্ৰা উপমেয্যত্থং ৰিভাৰেতুং ‘‘সেয্যথাপী’’তিআদিনা পাল়ি আনীতা. কস্মা পনেত্থ ধাতুৰসেন, তত্থপি চতুমহাভূতৰসেন কম্মট্ঠাননিদ্দেসো কতোতি? সত্তসুঞ্ঞতাসন্দস্সনত্থং, এত্থ ধাতুৰসেন, তত্থাপি ওল়ারিকভাৰেন সুপাকটতায, একচ্চৰেনেয্যজনচরিতানুকুলতায চ মহাভূতৰসেন কম্মট্ঠাননিদ্দেসো কতোতি ৰেদিতব্বো. তত্থ পথৰীধাতূতিআদীসু ধাতুত্থো নাম সভাৰত্থো, সভাৰত্থো নাম সুঞ্ঞতত্থো, সুঞ্ঞতত্থো নাম নিস্সত্তত্থো. এৰং সভাৰসুঞ্ঞতনিস্সত্তত্থেন পথৰীযেৰ ধাতু পথৰীধাতু. আপোধাতুআদীসুপি এসেৰ নযো. পথৰীধাতূতি সহজরূপধম্মানং পতিট্ঠা ধাতু, তথা আপোধাতূতি আবন্ধনধাতু, তেজোধাতূতি পরিপাচনধাতু, ৰাযোধাতূতি ৰিত্থম্ভনধাতূতি এৰমেত্থ সমাসো, ভাৰত্থো চ ৰেদিতব্বো. অযমেত্থ সঙ্খেপো, ৰিত্থারো পন পরতো আগমিস্সতি.

এৰং তিক্খপঞ্ঞস্সাতিআদীসু এৰন্তি যথাদস্সিতং পাল়িং পচ্চামসতি. নাতিতিক্খপঞ্ঞস্স ৰিত্থারদেসনাতি কত্ৰা আহ ‘‘তিক্খপঞ্ঞস্সা’’তি. যথা ৰত্থযুগং অরহতীতি ৰত্থযুগিকো, এৰং ধাতুকম্মট্ঠানং অরহতি, ধাতুকম্মট্ঠানপযোজনোতি ৰা ধাতুকম্মট্ঠানিকো, তস্স ধাতুকম্মট্ঠানিকস্স.

ছেকোতি তংতংসমঞ্ঞায কুসলো, যথাজাতে সূনস্মিং নঙ্গুট্ঠখুরৰিসাণাদিৰন্তে অট্ঠিমংসাদিঅৰযৰসমুদাযে অৰিভত্তে গাৰীসমঞ্ঞা, ন ৰিভত্তে, ৰিভত্তে পন অট্ঠিমংসাদিঅৰযৰসমঞ্ঞাতি জাননকো. গোঘাতকোতি জীৰিকত্থায গুন্নং ঘাতকো. অন্তেৰাসীতি কম্মকরণৰসেন তস্স সমীপৰাসী তস্স তন্নিস্সায জীৰনতো. ৰিনিৰিজ্ঝিত্ৰাতি একস্মিং ঠানে অঞ্ঞং ৰিনিৰিজ্ঝিত্ৰা. মহাপথানং ৰেমজ্ঝট্ঠানসঙ্খাতেতি চতুন্নং মহাপথানং তায এৰ ৰিনিৰিজ্ঝনট্ঠানসঙ্খাতে. যস্মা তে চত্তারো মহাপথা চতূহি দিসাহি আগন্ত্ৰা সমোহিতা ৰিয হোন্তি, তস্মা তং ঠানং চতুমহাপথানং, তস্মিং চতুমহাপথে. ৰিলীযন্তি ভিজ্জন্তি ৰিভজ্জন্তীতি বীলা, ভাগা, ৰ-কারস্স ব-কারং, ই-কারস্স চ ঈ-কারং কত্ৰা. তমেৰ হি ভাগত্থং দস্সেতুং ‘‘কোট্ঠাসং কত্ৰা’’তি ৰুত্তং. কিঞ্চাপি ঠিত-সদ্দো ‘‘ঠিতো ৰা’’তিআদীসু (অ. নি. ৫.২৮) ৰিয ঠানসঙ্খাতইরিযাপথসমঙ্গিতায, গতিনিৰত্তিঅত্থতায ৰা ঠা-সদ্দস্স অঞ্ঞত্থ ঠপেত্ৰা গমনং সেসইরিযাপথসমঙ্গিতায বোধকো, ইধ পন যথা তথা রূপকাযস্স পৰত্তিআকারবোধকো অধিপ্পেতোতি আহ ‘‘চতুন্নং ইরিযাপথানং যেন কেনচি আকারেন ঠিতত্তা যথাঠিত’’ন্তি. তত্থ আকারেনাতি ঠানাদিনা রূপকাযস্স পৰত্তিআকারেন. ঠানাদযো হি ইরিযাসঙ্খাতায কাযিককিরিযায পৰত্তিট্ঠানতায ‘‘ইরিযাপথা’’তি ৰুচ্চন্তি. যথাঠিতন্তি যথাপৰত্তং. যথাৰুত্তট্ঠানমেৰেত্থ পণিধানন্তি অধিপ্পেতন্তি আহ ‘‘যথাঠিতত্তাৰ যথাপণিহিত’’ন্তি. ঠিতন্তি ৰা কাযস্স ঠানসঙ্খাতইরিযাপথসমাযোগপরিদীপনং. পণিহিতন্তি তদঞ্ঞইরিযাপথসমাযোগপরিদীপনং. ঠিতন্তি ৰা কাযসঙ্খাতানং রূপধম্মানং তস্মিং তস্মিং খণে সকিচ্চৰসেন অৰট্ঠানপরিদীপনং. পণিহিতন্তি পচ্চযকিচ্চৰসেন তেহি তেহি পচ্চযেহি পকারতো নিহিতং পণিহিতন্তি এৰমেত্থ অত্থো ৰেদিতব্বো. ধাতুসোতি ধাতুং ধাতুং পথৰীআদিধাতুং ৰিসুং ৰিসুং কত্ৰা. পচ্চৰেক্খতীতি পতি পতি অৰেক্খতি ঞাণচক্খুনা ৰিনিব্ভুজিত্ৰা পস্সতি.

যথা ছেকোতিআদিনা পাল়িযা সদ্দত্থৰিৰরণৰসেন ৰুত্তমেৰত্থং ইদানি ভাৰত্থৰিভাৰনৰসেন দস্সেতুং ‘‘যথা গোঘাতকস্সা’’তিআদি ৰুত্তং. তত্থ পোসেন্তস্সাতি মংসূপচযপরিব্রূহনায কুণ্ডকভত্তকপ্পাসট্ঠিআদীহি সংৰড্ঢেন্তস্স. ৰধিতং মতন্তি হিংসিতং হুত্ৰা মতং. মতন্তি চ মতমত্তং. তেনেৰাহ ‘‘তাৰদেৰা’’তি. গাৰীতি সঞ্ঞা ন অন্তরধাযতি যানি অঙ্গপচ্চঙ্গানি উপাদায গাৰীসমঞ্ঞা, মতমত্তাযপি গাৰিযা তেসং সন্নিৰেসস্স অৰিনট্ঠত্তা. বিলাসোতি বিলং বিলং কত্ৰা. ৰিভজিত্ৰাতি অট্ঠিসঙ্ঘাততো মংসং ৰিৰেচেত্ৰা, ততো ৰা ৰিৰেচিতং মংসং ভাগসো কত্ৰা. তেনেৰাহ ‘‘মংসসঞ্ঞা পৰত্ততী’’তি. পব্বজিতস্সপি অপরিগ্গহিতকম্মট্ঠানস্স. ঘনৰিনিব্ভোগন্তি সন্ততিসমূহকিচ্চঘনানং ৰিনিব্ভুজনং ৰিৰেচনং. ধাতুসো পচ্চৰেক্খতোতি যথাৰুত্তং ঘনৰিনিব্ভোগং কত্ৰা ধাতুসো পচ্চৰেক্খন্তস্স. সত্তসঞ্ঞাতি অত্তানুদিট্ঠিৰসেন পৰত্তা সত্তসঞ্ঞাতি ৰদন্তি, ৰোহারৰসেন পৰত্তসত্তসঞ্ঞাযপি তদা অন্তরধানং যুত্তমেৰ যাথাৰতো ঘনৰিনিব্ভোগস্স সম্পাদনতো. এৰং হি সতি যথাৰুত্তওপম্মত্থেন ওপমেয্যত্থো অঞ্ঞদত্থু সংসন্দতি সমেতি. তেনেৰাহ ‘‘ধাতুৰসেনেৰ চিত্তং সন্তিট্ঠতী’’তি.

৩০৭. এৰং ধাতুকম্মট্ঠানস্স সঙ্খেপতো আগতট্ঠানং দস্সেত্ৰা ইদানি ৰিত্থারতো আগতট্ঠানং দস্সেতুং ‘‘মহাহত্থিপদূপমে পনা’’তিআদি ৰুত্তং. এৰন্তি ইমিনা রাহুলোৰাদ- (ম. নি. ২.১১৩ আদযো) ধাতুৰিভঙ্গেসু (ম. নি. ৩.৩৪২ আদযো; ৰিভ. ১৭২ আদযো) ধাতুকম্মট্ঠানস্স ৰিত্থারতো আগমনমেৰ উপসংহরতি, ন সব্বং দেসনানযং অঞ্ঞথাপি তত্থ দেসনানযস্স আগতত্তা.

তত্রাতি তস্মিং যথাদস্সিতে মহাহত্থিপদূপমপাঠে. অজ্ঝত্তিকাতি সত্তসন্তানপরিযাপন্না. অজ্ঝত্তং পচ্চত্তন্তি পদদ্ৰযেনাপি তংতংপাটিপুগ্গলিকধম্মো ৰুচ্চতীতি আহ ‘‘উভযম্পি নিযকস্স অধিৰচন’’ন্তি. সসন্ততিপরিযাপন্নতায পন অত্তনি গহেতব্বভাৰূপগমনৰসেন অত্তানং অধিকিচ্চ পৰত্তং অজ্ঝত্তং. তংতংসন্ততিপরিযাপন্নতায পচ্চত্তং. তেনেৰাহ ‘‘অত্তনি পৰত্তত্তা অজ্ঝত্তং, অত্তানং পটিচ্চ পটিচ্চ পৰত্তত্তা পচ্চত্ত’’ন্তি. কক্খল়ন্তি কথিনং. যস্মা তং থদ্ধভাৰেন সহজাতানং পতিট্ঠা হোতি, তস্মা ‘‘থদ্ধ’’ন্তি ৰুত্তং. খরিগতন্তি খরীসু খরসভাৰেসু গতং তপ্পরিযাপন্নং, খরসভাৰমেৰাতি অত্থো. যস্মা পন খরসভাৰং ফরুসাকারেন উপট্ঠানতো ফরুসাকারং হোতি, তস্মা ৰুত্তং ‘‘ফরুস’’ন্তি. তেনাহ ‘‘দুতিযং আকারৰচন’’ন্তি. উপাদিন্নং নাম সরীরট্ঠকং. তং পন কম্মসমুট্ঠানতং সন্ধায উপাদিন্নম্পি অত্থি অনুপাদিন্নম্পি, তণ্হাদীহি আদিন্নগহিতপরামট্ঠৰসেন সব্বম্পেতং উপাদিন্নমেৰাতি দস্সেতুং ‘‘উপাদিন্নন্তি দল়্হং আদিন্ন’’ন্তিআদি ৰুত্তং. তত্থ ‘‘মম’’ন্তি গহিতং ‘‘অহ’’ন্তি পরামট্ঠন্তি যোজনা. সেয্যথিদন্তি কথেতুকম্যতাপুচ্ছাৰাচীতি আহ ‘‘তং কতমন্তি চেতি অত্থো’’তি. ততোতি পচ্ছা. তন্তি তং অজ্ঝত্তিকাদিভেদতো দস্সিতং পথৰীধাতুং. দস্সেন্তোতি ৰত্থুৰিভাগেন দস্সেন্তো. কিঞ্চাপি মত্থলুঙ্গং অট্ঠিমিঞ্জেনেৰ সঙ্গহেত্ৰা ইধ পাল়িযং ৰিসুং ন উদ্ধটং, পটিসম্ভিদামগ্গে (পটি. ম. ১.৪) পন ৰীসতিযা আকারেহি পরিপুণ্ণং কত্ৰা দস্সেতুং ৰিসুং গহিতন্তি তম্পি সঙ্গণ্হন্তো থদ্ধভাৰাধিকতায পথৰীধাতুকোট্ঠাসেসুযেৰ ‘‘মত্থলুঙ্গং পক্খিপিত্ৰা ৰীসতিযা আকারেহি পথৰীধাতু নিদ্দিট্ঠাতি ৰেদিতব্বা’’তি আহ. ‘‘যং ৰা পনঞ্ঞম্পি কিঞ্চী’’তি ৰা ইমিনা পাল়িযং মত্থলুঙ্গস্স সঙ্গহো দট্ঠব্বো. তস্মা ইধ ‘‘যং ৰা পনঞ্ঞম্পি কিঞ্চী’’তি ইদং পুব্বাপরাপেক্খং ‘‘মত্থলুঙ্গং পক্খিপিত্ৰা ৰীসতিযা আকারেহি পথৰীধাতু নিদ্দিট্ঠাতি ৰেদিতব্বা, যং ৰা পনঞ্ঞম্পি কিঞ্চী’’তি ৰচনতো. পুন যং ৰা পনঞ্ঞম্পি কিঞ্চীতি অৰসেসেসু তীসু কোট্ঠাসেসূতি যোজেতব্বং. তীসু কোট্ঠাসেসূতি তিপ্পকারেসু কোট্ঠাসেসু. ন হি তে তযো কোট্ঠাসা.

ৰিস্সন্দনভাৰেনাতি পগ্ঘরণসভাৰেন. অপ্পোতীতি ৰিসরতি. পপ্পোতীতি পাপুণাতি, সসম্ভারআপৰসেন চেতং ৰুত্তং. সো হি ৰিস্সন্দনভাৰেন সসম্ভারপথৰীসঙ্খাতং তং তং ঠানং ৰিসরতি, পাপুণাতি চ, লক্খণাপৰসেনেৰ ৰা. সোপি হি সহজাতঅঞ্ঞমঞ্ঞনিস্সযাদিপচ্চযতায সেসভূতত্তযসঙ্খাতং তং তং ঠানং দ্রৰভাৰসিদ্ধেন ৰিস্সন্দনভাৰেন আবন্ধত্তং, আসত্তত্তং, অৰিপ্পকিণ্ণঞ্চ করোন্তং ‘‘অপ্পোতি পপ্পোতী’’তি ৰত্তব্বতং অরহতীতি.

তেজনৰসেনাতি নিসিতভাৰেন তিক্খভাৰেন. ৰুত্তনযেনাতি কম্মসমুট্ঠানাদিৰসেন ‘‘নানাৰিধেসূ’’তি আপোধাতুযং ৰুত্তনযেন. কুপিতেনাতি খুভিতেন. উসুমজাতোতি উস্মাভিভূতো. জীরতীতি জিণ্ণো হোতি. তেজোধাতুৰসেন লব্ভমানা ইমস্মিং কাযে জরাপৰত্তি পাকটজরাৰসেন ৰেদিতব্বাতি দস্সেতুং ‘‘ইন্দ্রিযৰেকল্লত’’ন্তিআদি ৰুত্তং. সরীরে পকতিউসুমং অতিক্কমিত্ৰা উণ্হভাৰো সন্তাপো, সরীরস্স দহনৰসেন পৰত্তো মহাদাহো পরিদাহোতি অযমেতেসং ৰিসেসো. যেন জীরীযতীতি চ একাহিকাদিজররোগেন জরীযতীতিপি অত্থো যুজ্জতি. সতক্খত্তুং তাপেত্ৰা তাপেত্ৰা সীতুদকে পক্খিপিত্ৰা উদ্ধটা সপ্পি ‘‘সতধোতসপ্পী’’তি ৰদন্তি. অসিতন্তি ভুত্তং. খাযিতন্তি খাদিতং. সাযিতন্তি অস্সাদিতং. সম্মা পরিপাকং গচ্ছতীতি সমৰেপাকিনিযা গহণিযা ৰসেন ৰুত্তং, অসম্মাপরিপাকোপি পন ৰিসমৰেপাকিনিযা তস্সা এৰ ৰসেন ৰেদিতব্বো. রসাদিভাৰেনাতি রসরুধিরমংসমেদন্হারুঅট্ঠিঅট্ঠিমিঞ্জসুক্কৰসেন. ৰিৰেকন্তি পুথুভাৰং অঞ্ঞমঞ্ঞং ৰিসদিসভাৰং. অসিতাদিভেদস্স হি আহারস্স পরিণামে রসো হোতি, তং পটিচ্চ রসধাতু উপ্পজ্জতীতি অত্থো. এৰং ‘‘রসস্স পরিণামে রুধির’’ন্তিআদিনা সব্বং নেতব্বং.

ৰাযনৰসেনাতি সমুদীরণৰসেন, সৰেগগমনৰসেন ৰা. উগ্গারহিক্কাদীতি এত্থ আদি-সদ্দেন উদ্দেকখিপনাদিপৰত্তনকৰাতানং সঙ্গহো দট্ঠব্বো. উচ্চারপস্সাৰাদীতি আদি-সদ্দেন পিত্তসেম্হলসিকাকেৰলদুগ্গন্ধাদিনীহরণকানং সঙ্গহো দট্ঠব্বো. যদিপি কুচ্ছি-সদ্দো উদরপরিযাযো, কোট্ঠ-সদ্দেন পন অন্তন্তরস্স ৰুচ্চমানত্তা তদৰসিট্ঠো উদরপ্পদেসো ইধ কুচ্ছি-সদ্দেন ৰুচ্চতীতি আহ ‘‘কুচ্ছিসযা ৰাতাতি অন্তানং বহিৰাতা’’তি. সমিঞ্জনপসারণাদীতি আদি-সদ্দেন আলোকনৰিলোকনউদ্ধরণাতিহরণাদিকা সব্বা কাযিককিরিযা সঙ্গহিতা. ‘‘অস্সাসপস্সাসা চিত্তসমুট্ঠানাৰা’’তি এতেন অস্সাসপস্সাসানং সরীরং মুঞ্চিত্ৰা পৰত্তি নত্থীতি দীপেতি. ন হি বহিদ্ধা চিত্তসমুট্ঠানস্স সম্ভৰো অত্থীতি. যদি এৰং কথং ‘‘পস্সাসোতি বহিনিক্খমননাসিকৰাতো, দীঘনাসিকস্স নাসিকগ্গং, ইতরস্স উত্তরোট্ঠং ফুসন্তো পৰত্ততী’’তি ৰচনং? তং নিক্খমনাকারেন পৰত্তিযা চিত্তসমুট্ঠানস্স, সন্তানে পৰত্তউতুসমুট্ঠানস্স চ ৰসেন ৰুত্তন্তি ৰেদিতব্বং. সব্বত্থাতি আপোধাতুআদীনং তিস্সন্নং ধাতূনং নিদ্দেসং সন্ধাযাহ. তত্থ আপোধাতুনিদ্দেসে ‘‘যং ৰা পনঞ্ঞ’’ন্তি ইমিনা সম্ভৰস্স, তেজোধাতুনিদ্দেসে সরীরে পাকতিকউস্মায, ৰাযোধাতুনিদ্দেসে ধমনিজালানুসটস্স তত্থ তত্থ চম্মখীলপীল়কাদিনিব্বত্তকৰাযুনো সঙ্গহো দট্ঠব্বো. সমিঞ্জনাদিনিব্বত্তকৰাতা চিত্তসমুট্ঠানাৰ. যদি এৰং, কথং ‘‘পুরিমা পঞ্চ চতুসমুট্ঠানা’’তি ৰচনং? ন হি সমিঞ্জনাদিনিব্বত্তকা এৰ অঙ্গমঙ্গানুসারিনো ৰাতা, অথ খো তদঞ্ঞেপীতি নত্থি ৰিরোধো.

ইতীতি ৰুত্তপ্পকারপরামসনং. তেনাহ ‘‘ৰীসতিযা আকারেহী’’তিআদি. এত্থাতি এতস্মিং ৰিত্থারতো আগতে ধাতুকম্মট্ঠানেতি অত্থো. তেন অযং ৰণ্ণনা ন কেৰলং মহাহত্থিপদূপমস্সেৰ (ম. নি. ১.৩০০ আদযো), অথ খো মহারাহুলোৰাদ- (ম. নি. ২.১১৩ আদযো) ধাতুৰিভঙ্গসুত্তানম্পি (ম. নি. ৩.৩৪২ আদযো) অত্থসংৰণ্ণনা হোতিযেৰাতি দস্সিতং হোতি. ভাৰনানযেপি এসেৰ নযো. তথা হি ৰুত্তং ‘‘এৰং রাহুলোৰাদধাতুৰিভঙ্গেসুপী’’তি.

৩০৮. ভাৰনানযেতি ভাৰনায নযে. যেন কম্মট্ঠানভাৰনা ইজ্ঝতি, তস্মিং ভাৰনাৰিধিম্হীতি অত্থো. এত্থাতি ধাতুকম্মট্ঠানে. যস্মা যেসং ‘‘তিক্খপঞ্ঞো নাতিতিক্খপঞ্ঞো’’তি ইমেসং দুৰিধানং পুগ্গলানং ৰসেন ইদং কম্মট্ঠানং দ্ৰিধা আগতং দ্ৰিধা দেসিতং, তস্মা কম্মট্ঠানাভিনিৰেসোপি তেসং দ্ৰিধাৰ ইচ্ছিতব্বোতি তং তাৰ দস্সেতুং ‘‘তিক্খপঞ্ঞস্স ভিক্খুনো’’তিআদি আরদ্ধং. লোমা পথৰীধাতূতীতি এত্থ ইতি-সদ্দো আদিঅত্থো. এৰং ৰিত্থারতো ধাতুপরিগ্গহোতি ‘‘কেসা পথৰীধাতু, লোমা পথৰীধাতূ’’তিআদিনা এৰং দ্ৰাচত্তালীসায আকারেহি ৰিত্থারতো ধাতুকম্মট্ঠানপরিগ্গহো. পপঞ্চতোতি দন্ধতো সণিকতো. যং থদ্ধলক্খণন্তি কেসাদীসু যং থদ্ধলক্খণং কক্খল়ভাৰো. যং আবন্ধনলক্খণন্তিআদীসুপি এসেৰ নযো. এৰং মনসি করোতোতি ৰত্থুং অনামসিত্ৰা এৰং লক্খণমত্ততো মনসিকারং পৰত্তেন্তস্স. অস্সাতি তিক্খপঞ্ঞস্স. কম্মট্ঠানং পাকটং হোতীতি যোগকম্মস্স পৰত্তিট্ঠানভূতং তদেৰ লক্খণং ৰিভূতং হোতি, তস্স ৰা লক্খণস্স সুট্ঠু উপট্ঠানতো তং আরব্ভ পৰত্তমানং মনসিকারসঙ্খাতং কম্মট্ঠানং ৰিভূতং ৰিসদং হোতি, তিক্খপঞ্ঞস্স ইন্দ্রিযপাটৰেন সংখিত্তরুচিভাৰতো. সব্বসো মন্দপঞ্ঞস্স ভাৰনাৰ ন ইজ্ঝতীতি আহ ‘‘নাতিতিক্খপঞ্ঞস্সা’’তি. এৰং মনসি করোতোতি ৰুত্তনযেন সঙ্খেপতো মনসি করোতো. অন্ধকারং অৰিভূতং হোতীতি অনুপট্ঠানতো অন্ধং ৰিয করোন্তং অপাকটং হোতি কম্মট্ঠানন্তি যোজনা. পুরিমনযেনাতি ‘‘কেসা পথৰীধাতূ’’তিআদিনা পুব্বে ৰুত্তনযেন. ৰত্থুআমসনেন ৰিত্থারতো মনসি করোন্তস্স পাকটং হোতি কম্মট্ঠানং, নাতিতিক্খপঞ্ঞস্স অখিপ্পনিসন্তিতায ৰিত্থাররুচিভাৰতো.

ইদানি যথাৰুত্তমত্থং উপমায ৰিভাৰেতুং ‘‘যথা দ্ৰীসু ভিক্খূসূ’’তিআদি ৰুত্তং. তত্থ পেয্যালমুখন্তি পেয্যালপাল়িযা মুখভূতং দ্ৰারভূতং আদিতো ৰারং, ৰারদ্ৰযং ৰা. ৰিত্থারেত্ৰাতি অনৰসেসতো সজ্ঝাযিত্ৰা. উভতোকোটিৰসেনেৰাতি তস্স তস্স ৰারস্স আদিঅন্তগ্গহণৰসেনেৰ. ওট্ঠপরিযাহতমত্তন্তি ওট্ঠানং সম্ফুসনমত্তং. যথা গন্থপরিৰত্তনে তিক্খপঞ্ঞস্স ভিক্খুনো সঙ্খেপো রুচ্চতি, ন ৰিত্থারো. ইতরস্স চ ৰিত্থারো রুচ্চতি, ন সঙ্খেপো, এৰং ভাৰনানযেপীতি উপমাসংসন্দনং ৰেদিতব্বং.

তস্মাতি যস্মা তিক্খপঞ্ঞস্স সঙ্খেপো, নাতিতিক্খপঞ্ঞস্স চ ৰিত্থারো সপ্পাযো, তস্মা. যস্মা কম্মট্ঠানং অনুযুঞ্জিতুকামস্স সীলৰিসোধনাদিপুব্বকিচ্চং ইচ্ছিতব্বং, তং সব্বাকারসম্পন্নং হেট্ঠা ৰুত্তমেৰাতি ইধ ন আমট্ঠং. যস্মা পন ৰিৰেকট্ঠকাযস্স, ৰিৰেকট্ঠচিত্তস্সেৰ চ ভাৰনা ইজ্ঝতি, ন ইতরস্স, তস্মা তদুভযং দস্সেন্তো ‘‘রহোগতেন পটিসল্লীনেনা’’তি আহ. তত্থ রহোগতেনাতি রহসি গতেন, একাকিনা ভাৰনানুকূলট্ঠানং উপগতেনাতি অত্থো. পটিসল্লীনেনাতি পতি পতি পুথুত্তারম্মণতো চিত্তং নিসেধেত্ৰা কম্মট্ঠানে সল্লীনেন, তত্থ সংসিলিট্ঠচিত্তেনাতি অত্থো. সকলম্পি অত্তনো রূপকাযং আৰজ্জেত্ৰাতি উদ্ধং পাদতলা, অধো কেসমত্থকা, তিরিযং তচপরিযন্তং সব্বম্পি অত্তনো করজকাযং ধাতুৰসেন মনসি করোন্তো যস্মা চাতুমহাভূতিকো অযং কাযো, তস্মা ‘‘অত্থি ইমস্মিং কাযে পথৰীধাতু আপোধাতু তেজোধাতু ৰাযোধাতূ’’তি চতুমহাভূতৰসেন সমন্নাহরিত্ৰাতি অত্থো. ইদানি তাসং ধাতূনং লক্খণতো, উপট্ঠানাকারতো চ মনসিকারৰিধিং দস্সেতুং ‘‘যো ইমস্মিং কাযে’’তিআদি ৰুত্তং.

তত্থ থদ্ধভাৰোতি লক্খণমাহ. থদ্ধত্তলক্খণা হি পথৰীধাতু. খরভাৰোতি উপট্ঠানাকারং, ঞাণেন গহেতব্বাকারন্তি অত্থো. দ্রৰভাৰো লক্খণং আপোধাতুযা পগ্ঘরণসভাৰত্তা. আবন্ধনং উপট্ঠানাকারো. উণ্হভাৰো লক্খণং তেজোধাতুযা উস্মাসভাৰত্তা. পরিপাচনং উপট্ঠানাকারো. ৰিত্থম্ভনং লক্খণং ৰাযোধাতুযা উপত্থম্ভনসভাৰত্তা. সমুদীরণং উপট্ঠানাকারো, উপট্ঠানাকারো চ নাম ধাতূনং সকিচ্চকরণৰসেন ঞাণস্স ৰিভূতাকারো. কস্মা পনেত্থ উভযগ্গহণং? পুগ্গলজ্ঝাসযতো. একচ্চস্স হি ধাতুযো মনসি করোন্তস্স তা সভাৰতো গহেতব্বতং গচ্ছন্তি, একচ্চস্স সকিচ্চকরণতো, যো রসোতি ৰুচ্চতি. তত্রাযং যোগী ধাতুযো মনসি করোন্তো আদিতো পচ্চেকং সলক্খণতো, সরসতোপি পরিগ্গণ্হাতি. তেনাহ ‘‘যো ইমস্মিং কাযে থদ্ধভাৰো ৰা খরভাৰো ৰা…পে… এৰং সংখিত্তেন ধাতুযো পরিগ্গহেত্ৰা’’তি. তত্থ পরিগ্গহেত্ৰাতি পরিগ্গাহকভূতেন ঞাণেন ধাতুযো লক্খণতো, রসতো ৰা পরিচ্ছিজ্জ গহেত্ৰা. অযং তাৰ সংখিত্ততো ভাৰনানযে কম্মট্ঠানাভিনিৰেসো.

এৰং পন ধাতুযো পরিগ্গহেত্ৰা ‘‘অত্থি ইমস্মিং কাযে পথৰীধাতু থদ্ধভাৰো ৰা খরভাৰো ৰা, আপোধাতু দ্রৰভাৰো ৰা আবন্ধনভাৰো ৰা, তেজোধাতু উণ্হভাৰো ৰা পরিপাচনভাৰো ৰা, ৰাযোধাতু ৰিত্থম্ভনভাৰো ৰা সমুদীরণভাৰো ৰা’’তি এৰং লক্খণাদীহি সদ্ধিংযেৰ ধাতুযো মনসি করোন্তেন কালসতম্পি কালসহস্সম্পি পুনপ্পুনং আৰজ্জিতব্বং মনসি কাতব্বং, তক্কাহতং ৰিতক্কপরিযাহতং কাতব্বং. তস্সেৰং মনসি করোতো যং লক্খণাদীসু সুপাকটং হুত্ৰা উপট্ঠাতি, তদেৰ গহেত্ৰা ইতরং ৰিস্সজ্জেত্ৰা তেন সদ্ধিং ‘‘পথৰীধাতু আপোধাতূ’’তিআদিনা মনসিকারো পৰত্তেতব্বো. এৰং মনসি করোন্তেন হি অনুপুব্বতো, নাতিসীঘতো, নাতিসণিকতো, ৰিক্খেপপটিবাহনতো, পণ্ণত্তিসমতিক্কমনতো, অনুপট্ঠানমুঞ্চনতো, লক্খণতো, তযো চ সুত্তন্তাতি ইমেহি দসহাকারেহি মনসিকারকোসল্লং অনুট্ঠাতব্বং.

তত্থ অনুপুব্বতোতি অনুপটিপাটিতো আচরিযস্স সন্তিকে উগ্গহিতপটিপাটিতো, সা চ দেসনাপটিপাটিযেৰ. এৰং অনুপুব্বতো মনসি করোন্তেনাপি নাতিসীঘতো মনসি কাতব্বং. অতিসীঘতো মনসি করোতো হি অপরাপরং কম্মট্ঠানমনসিকারো নিরন্তরং পৰত্ততি, কম্মট্ঠানং পন অৰিভূতং হোতি, ন ৰিসেসং আৰহতি. তস্মা নাতিসীঘতো মনসি কাতব্বং. যথা চ নাতিসীঘতো, এৰং নাতিসণিকতোপি. অতিসণিকতো মনসি করোতো হি কম্মট্ঠানং পরিযোসানং ন গচ্ছতি, ৰিসেসাধিগমস্স পচ্চযো ন হোতি. অতিসীঘং অতিসণিকঞ্চ মগ্গং গচ্ছন্তা পুরিসা এত্থ নিদস্সেতব্বা. ৰিক্খেপপটিবাহনতোতি কম্মট্ঠানং ৰিস্সজ্জেত্ৰা বহিদ্ধা পুথুত্তারম্মণে চেতসো ৰিক্খেপো পটিবাহিতব্বো. বহিদ্ধা ৰিক্খেপে হি সতি কম্মট্ঠানা পরিহাযতি পরিধংসতি. একপদিকমগ্গগামী পুরিসো চেত্থ নিদস্সেতব্বো. পণ্ণত্তিসমতিক্কমনতোতি ‘‘যা অযং পথৰীধাতূ’’তিআদিকা পণ্ণত্তি, তং অতিক্কমিত্ৰা লক্খণেসু এৰ চিত্তং ঠপেতব্বং.

এৰং পণ্ণত্তিং ৰিজহিত্ৰা কক্খল়লক্খণাদীসু এৰ মনসিকারং পৰত্তেন্তস্স লক্খণানি সুপাকটানি সুৰিভূতানি হুত্ৰা উপট্ঠহন্তি. তস্সেৰং পুনপ্পুনং মনসিকারৰসেন চিত্তং আসেৰনং লভতি. সব্বো রূপকাযো ধাতুমত্ততো উপট্ঠাতি সুঞ্ঞো নিস্সত্তো নিজ্জীৰো যন্তং ৰিয যন্তসুত্তেন অপরাপরং পরিৰত্তমানো. সচে পন বহিদ্ধাপি মনসিকারং উপসংহরতি, অথস্স আহিণ্ডন্তা মনুস্সতিরচ্ছানাদযো সত্তাকারং ৰিজহিত্ৰা ধাতুসমূহৰসেনেৰ উপট্ঠহন্তি, তেহি করিযমানা কিরিযা ধাতুমযেন যন্তেন পৰত্তিযমানা হুত্ৰা উপট্ঠাতি, তেহি অজ্ঝোহরিযমানং পানভোজনাদি ধাতুসঙ্ঘাতে পক্খিপ্পমানো ধাতুসঙ্ঘাতো ৰিয উপট্ঠাতি. অথস্স তথা লদ্ধাসেৰনম্পি চিত্তং যদি অচ্চারদ্ধৰীরিযতায উদ্ধচ্চৰসেন ৰা অতিলীনৰীরিযতায কোসজ্জৰসেন ৰা ভাৰনাৰিধিং ন ওতরেয্য, তদা অধিচিত্তসুত্তং (অ. নি. ৩.১০৩), অনুত্তরসীতিভাৰসুত্তং (অ. নি. ৬.৮৫), বোজ্ঝঙ্গসুত্তন্তি (সং. নি. ৫.১৯৪-১৯৫) ইমেসু তীসু সুত্তেসু আগতনযেন ৰীরিযসমাধিযোজনা কাতব্বা. তেন ৰুত্তং ‘‘তযো চ সুত্তন্তা’’তি. এৰং পন ৰীরিযসমতং যোজেত্ৰা তস্মিংযেৰ লক্খণে মনসিকারং পৰত্তেন্তস্স যদা সদ্ধাদীনি ইন্দ্রিযানি লদ্ধসমতানি সুৰিসদানি পৰত্তন্তি, তদা অসদ্ধিযাদীনং দূরীভাৰেন সাতিসযং থামপ্পত্তেহি সত্তহি বলেহি লদ্ধূপত্থম্ভানি ৰিতক্কাদীনি ঝানঙ্গানি পটুতরানি হুত্ৰা পাতুভৰন্তি, তেসং উজুৰিপচ্চনীকতায নীৰরণানি ৰিক্খম্ভিতানিযেৰ হোন্তি সদ্ধিং তদেকট্ঠেহি পাপধম্মেহি. এত্তাৰতা চানেন উপচারজ্ঝানং সমধিগতং হোতি ধাতুলক্খণারম্মণং. তেন ৰুত্তং ‘‘পুনপ্পুনং পথৰীধাতু আপোধাতূতি…পে… উপচারমত্তো সমাধি উপ্পজ্জতী’’তি.

তত্থ ধাতুমত্ততোতি ৰিসেসনিৰত্তিঅত্থো মত্ত-সদ্দো. তেন যং ইতো বাহিরকা, লোকিযমহাজনো চ ‘‘সত্তো জীৰো’’তিআদিকং ৰিসেসং ইমস্মিং অত্তভাৰে অৰিজ্জমানং ৰিকপ্পনামত্তেনেৰ সমারোপেন্তি, তং নিৰত্তেতি. তেনেৰাহ ‘‘নিস্সত্ততো নিজ্জীৰতো’’তি. আৰজ্জিতব্বন্তি সমন্নাহরিতব্বং. মনসি কাতব্বন্তি পুনপ্পুনং ভাৰনাৰসেন ধাতুমত্ততো ধাতুলক্খণং মনসি ঠপেতব্বং. পচ্চৰেক্খিতব্বন্তি তদেৰ ধাতুলক্খণং পতি পতি অৰেক্খিতব্বং, ভাৰনাসিদ্ধেন ঞাণচক্খুনা অপরাপরং পচ্চক্খতো পস্সিতব্বং.

তস্সেৰং ৰাযমমানস্সাতি তস্স যোগিনো এৰং ৰুত্তপ্পকারেন ভাৰনং অনুযুঞ্জন্তস্স, তত্থ চ ভাৰনাঅনুযোগে সক্কচ্চকারিতায, সাতচ্চকারিতায, সপ্পাযসেৰিতায, সমথনিমিত্তসল্লক্খণেন, বোজ্ঝঙ্গানং অনুপৰত্তনেন, কাযে চ জীৰিতে চ নিরপেক্খৰুত্তিতায, অন্তরা সঙ্কোচং অনাপজ্জন্তেন ভাৰনং উস্সুক্কাপেত্ৰা উস্সোল়্হিযং অৰট্ঠানেন সম্মদেৰ ৰাযামং পযোগং পরক্কমং পৰত্তেন্তস্স. ধাতুপ্পভেদাৰভাসনপঞ্ঞাপরিগ্গহিতোতি পথৰীআদীনং ধাতূনং সভাৰলক্খণাৰভাসনেন অৰভাসনকিচ্চায ভাৰনাপঞ্ঞায আদিমজ্ঝপরিযোসানেসু অৰিজহনেন সব্বতো গহিতো মহগ্গতভাৰং অপ্পত্ততায উপচারমত্তো সিখাপ্পত্তো কামাৰচরসমাধি উপ্পজ্জতি. উপচারসমাধীতি চ রুল়্হীৰসেন ৰেদিতব্বং. অপ্পনং হি উপেচ্চ চারী সমাধি উপচারসমাধি, অপ্পনা চেত্থ নত্থি. তাদিসস্স পন সমাধিস্স সমানলক্খণতায এৰং ৰুত্তং. কস্মা পনেত্থ অপ্পনা ন হোতীতি? তত্থ কারণমাহ ‘‘সভাৰধম্মারম্মণত্তা’’তি. সভাৰধম্মে হি তস্স গম্ভীরভাৰতো অসতি ভাৰনাৰিসেসে অপ্পনাঝানং ন উপ্পজ্জতি, লোকুত্তরং পন ঝানং ৰিসুদ্ধিভাৰনানুক্কমৰসেন, আরুপ্পং আরম্মণাতিক্কমভাৰনাৰসেন অপ্পনাপ্পত্তং হোতীতি মরণানুস্সতিনিদ্দেসে (ৰিসুদ্ধি. ১.১৭৭) ৰুত্তোৰাযমত্থো.

এৰং রূপকাযে অৰিসেসেন চতুন্নং ধাতূনং পরিগ্গণ্হনৰসেন ধাতুকম্মট্ঠানং দস্সেত্ৰা ইদানি তত্থ অট্ঠিআদীনং ৰিনিব্ভুজনৰসেন সঙ্খেপতো সুত্তে আগতং ধাতুমনসিকারৰিধিং দস্সেতুং ‘‘অথ ৰা পনা’’তিআদি আরদ্ধং. তত্থ যে ইমে চত্তারো কোট্ঠাসা ৰুত্তাতি সম্বন্ধো. যথাপচ্চযং ঠিতা সন্নিৰেসৰিসিট্ঠা কট্ঠৰল্লিতিণমত্তিকাযো উপাদায যথা অগারসমঞ্ঞা, ন তত্থ কোচি অগারো নাম অত্থি, এৰং যথাপচ্চযং সন্নিৰেসৰিসিট্ঠানি পৰত্তমানানি অট্ঠিন্হারুমংসচম্মানি পটিচ্চ সরীরসমঞ্ঞা, ন এত্থ কোচি অত্তা জীৰো. কেৰলং তেহি পরিৰারিতমাকাসমত্তন্তি দস্সেতি. দেসনা সত্তসুঞ্ঞতাসন্দস্সনপরাতি ইমমত্থং ৰিভাৰেন্তো ‘‘নিস্সত্তভাৰদস্সনত্থ’’ন্তিআদিমাহ. তত্থ অট্ঠিঞ্চ পটিচ্চাতি পণ্হিকট্ঠিকাদিভেদং পটিপাটিযা উস্সিতং হুত্ৰা ঠিতং অতিরেকতিসতভেদং অট্ঠিং উপাদায. ন্হারুঞ্চাতি তমেৰ অট্ঠিসঙ্ঘাটং আবন্ধিত্ৰা ঠিতং নৰসতপ্পভেদং ন্হারুং. মংসন্তি তমেৰ অট্ঠিসঙ্ঘাটং অনুলিম্পিত্ৰা ঠিতং নৰপেসিসতপ্পভেদং মংসং. চম্মন্তি মচ্ছিকপত্তকচ্ছাযায ছৰিযা সঞ্ছাদিতং সকলসরীরং পরিযোনন্ধিত্ৰা ঠিতং বহলচম্মং পটিচ্চ উপাদায. সব্বত্থ চ-সদ্দো সমুচ্চযত্থো. আকাসো পরিৰারিতোতি যথা ভিত্তিপাদাদিৰসেন ঠপিতং কট্ঠং, তস্সেৰ আবন্ধনৰল্লি, অনুলেপনমত্তিকা, ছাদনতিণন্তি এতানি কট্ঠাদীনি অন্তো, বহি চ পরিৰারেত্ৰা ঠিতো আকাসো অগারন্ত্ৰেৰ সঙ্খং গচ্ছতি, গেহন্তি পণ্ণত্তিং লভতি, এৰমেৰ যথাৰুত্তানি অট্ঠিআদীনি অন্তো, বহি চ পরিৰারেত্ৰা ঠিতো আকাসো তানেৰ অট্ঠিআদীনি উপাদায রূপন্ত্ৰেৰ সঙ্খং গচ্ছতি, সরীরন্তি ৰোহারং লভতি. যথা চ কট্ঠাদীনি পটিচ্চ সঙ্খং গতং অগারং লোকে ‘‘খত্তিযগেহং, ব্রাহ্মণগেহ’’ন্তি ৰুচ্চতি, এৰমিদম্পি ‘‘খত্তিযসরীরং ব্রাহ্মণসরীর’’ন্তি ৰোহরীযতি, নত্থেত্থ কোচি সত্তো ৰা জীৰো ৰাতি অধিপ্পাযো.

তেতি তে চত্তারো কোট্ঠাসে ৰিনিব্ভুজিত্ৰা ৰিনিব্ভুজিত্ৰাতি যোজনা. তংতংঅন্তরানুসারিনাতি অট্ঠিন্হারূনং ন্হারুমংসানং মংসচম্মানন্তি তেসং তেসং কোট্ঠাসানং ৰিৰরানুপাতিনা ঞাণসঙ্খাতেন হত্থেন. ৰিনিব্ভুজিত্ৰা ৰিনিব্ভুজিত্ৰাতি অনেকক্খত্তুং ৰিনিৰেঠেত্ৰা. অথ ৰা ৰিনিব্ভুজিত্ৰা ৰিনিব্ভুজিত্ৰাতি পচ্চেকং অট্ঠিআদীনং অন্তরানুসারিনা ঞাণহত্থেন ৰিনিব্ভোগং কত্ৰা. এতেসূতি সকলম্পি অত্তনো রূপকাযং চতুধা কত্ৰা ৰিভত্তেসু যথাৰুত্তেসু অট্ঠিআদীসু চতূসু কোট্ঠাসেসু. পুরিমনযেনেৰাতি ‘‘যো ইমস্মিং কাযে থদ্ধভাৰো ৰা’’তিআদিনা পুব্বে ৰুত্তনযেনেৰ. যং পনেত্থ ৰত্তব্বং ভাৰনাৰিধানং, তং অনন্তরনযে ৰুত্তাকারেনেৰ ৰত্তব্বং.

৩০৯. ৰিত্থারতো আগতে পন ‘‘চতুধাতুৰৰত্থানে’’তি আনেত্ৰা যোজনা. এৰং ইদানি ৰুচ্চমানাকারেন ৰেদিতব্বো ভাৰনানযো. ‘‘দ্ৰাচত্তালীসায আকারেহি ধাতুযো উগ্গণ্হিত্ৰা’’তি কস্মা ৰুত্তং, ননু আদিতো দ্ৰত্তিংসাকারা ধাতুযো ন হোন্তীতি? ৰত্থুসীসেন ধাতূনংযেৰ উগ্গহেতব্বত্তা নাযং দোসো. ৰুত্তপ্পকারেতি ‘‘গোচরগামতো নাতিদূরনাচ্চাসন্নতাদীহি পঞ্চহি অঙ্গেহি সমন্নাগতে’’তিআদিনা (ৰিসুদ্ধি. ১.৫৩) ৰুত্তপ্পকারে. কতসব্বকিচ্চেনাতি পলিবোধুপচ্ছেদাদিকং কতং সব্বকিচ্চং এতেনাতি কতসব্বকিচ্চো, তেনস্স সীলৰিসোধনাদি পন কম্মট্ঠানুগ্গহণতো পগেৰ সিদ্ধং হোতীতি দস্সেতি. সসম্ভারসঙ্খেপতোতি সম্ভরীযন্তি এতেন বুদ্ধিৰোহারাতি সম্ভারো, তন্নিমিত্তং. কিং পনেতং? পথৰীআদি. কেসাদীসু হি ৰীসতিযা আকারেসু ‘‘পথৰী’’তি বুদ্ধিৰোহারা পথৰীনিমিত্তকা থদ্ধতং উপাদায পৰত্তনতো. তস্মা তত্থ পথৰীসম্ভারো নাম সৰিসেসায তস্সা অত্থিতায কেসাদযো সহ সম্ভারেহীতি সসম্ভারা. আপোকোট্ঠাসাদীসুপি এসেৰ নযো. সসম্ভারানং সঙ্খেপো সসম্ভারসঙ্খেপো, ততো সসম্ভারসঙ্খেপতো ভাৰেতব্বন্তি যোজনা. সঙ্খেপতো ৰীসতিযা, দ্ৰাদসসু, চতূসু, ছসু চ কোট্ঠাসেসু যথাক্কমং পথৰীআদিকা চতস্সো ধাতুযো পরিগ্গহেত্ৰা ধাতুৰৰত্থানং সসম্ভারসঙ্খেপতো ভাৰনা. তেনাহ ‘‘ইধ ভিক্খু ৰীসতিযা কোট্ঠাসেসূ’’তিআদি.

সসম্ভারৰিভত্তিতোতি সসম্ভারানং কেসাদীনং ৰিভাগতো কেসাদিকে ৰীসতি কোট্ঠাসে পুব্বে ৰিয একজ্ঝং অগ্গহেত্ৰা ৰিভাগতো পথৰীধাতুভাৰেন ৰৰত্থাপনং. আপোকোট্ঠাসাদীসুপি এসেৰ নযো. সলক্খণসঙ্খেপতোতি লক্খীযতি এতেনাতি লক্খণং, ধম্মানং সভাৰো, ইধ পন থদ্ধতাদি. তস্মা থদ্ধলক্খণাদিৰন্ততায সহ লক্খণেহীতি সলক্খণা, কেসাদযো দ্ৰাচত্তালীস আকারা. তেসং সঙ্খেপতো. ইদং ৰুত্তং হোতি – কেসাদিকে ৰীসতি কোট্ঠাসে একজ্ঝং গহেত্ৰা তত্থ থদ্ধতাদিকং চতুব্বিধম্পি লক্খণং ৰৰত্থপেত্ৰা ভাৰনা সলক্খণসঙ্খেপতো ভাৰনা. এস নযো আপোকোট্ঠাসাদীসুপি. সলক্খণৰিভত্তিতোতি থদ্ধলক্খণাদিনা সলক্খণানং কেসাদীনং ৰিভাগতো কেসাদীসু দ্ৰাচত্তালীসায আকারেসু পচ্চেকং থদ্ধতাদীনং চতুন্নং চতুন্নং লক্খণানং ৰৰত্থাপনৰসেন ভাৰনা.

এৰং চতূহি আকারেহি উদ্দিট্ঠং ভাৰনানযং নিদ্দিসিতুং ‘‘কথং সসম্ভারসঙ্খেপতো ভাৰেতী’’তিআদি আরদ্ধং. এত্থ চ যথা তিক্খপঞ্ঞো পুগ্গলো তিক্খতায পরোপরিযত্তসব্ভাৰতো তিক্খিন্দ্রিযমুদিন্দ্রিযতাৰসেন দুৰিধোতি. তত্থ তিক্খিন্দ্রিযস্স ৰসেন সঙ্খেপতো পঠমনযো ৰুত্তো, মুদিন্দ্রিযস্স ৰসেন দুতিযো. এৰং নাতিতিক্খপঞ্ঞোপি পুগ্গলোতি. তত্থ যো ৰিসদিন্দ্রিযো পুগ্গলো, তস্স ৰসেন সসম্ভারসঙ্খেপতো, সলক্খণসঙ্খেপতো চ ভাৰনানযো নিদ্দিট্ঠো. যো পন নাতিৰিসদিন্দ্রিযো, তস্স ৰসেন সসম্ভারৰিভত্তিতো, সলক্খণৰিভত্তিতো চ ভাৰনানযো নিদ্দিট্ঠোতি ৰেদিতব্বো. তস্স এৰং ৰৰত্থাপযতো এৰ ধাতুযো পাকটা হোন্তি সৰিসেসং ধাতূনং পরিগ্গহিতত্তা. ভাৰনাৰিধানং পনেত্থ হেট্ঠা ৰুত্তনযেনেৰ ৰেদিতব্বং.

৩১০. যস্সাতি নাতিৰিসদিন্দ্রিযং পুগ্গলং সন্ধায ৰদতি. এৰং ভাৰযতোতি সসম্ভারসঙ্খেপতো ভাৰেন্তস্স. যেন ৰিধিনা উগ্গহেত্ৰা কুসলো হোতি, সো সত্তৰিধো ৰিধি ‘‘উগ্গহকোসল্ল’’ন্তি ৰুচ্চতি, তন্নিব্বত্তং ৰা ঞাণং. এৰং মনসিকারকোসল্লম্পি ৰেদিতব্বং. দ্ৰত্তিংসাকারেতি ধাতুমনসিকারৰসেন পরিগ্গহিতে কেসাদিকে দ্ৰত্তিংসৰিধে কোট্ঠাসে. ‘‘দ্ৰত্তিংসাকারে’’তি চ ইদং তেজৰাযুকোট্ঠাসেসু ৰণ্ণাদিৰসেন ৰৰত্থানস্স অভাৰতো ৰুত্তং. সব্বং তত্থ ৰুত্তৰিধানং কাতব্বন্তি ‘‘ৰচসা মনসা’’তিআদিনা ৰুত্তউগ্গহকোসল্লুদ্দেসতো পট্ঠায যাৰ ‘‘অনুপুব্বমুঞ্চনাদিৰসেনা’’তি পদং, তাৰ আগতং সব্বং ভাৰনাৰিধানং কাতব্বং সম্পাদেতব্বং. ৰণ্ণাদিৰসেনাতি ৰণ্ণসণ্ঠানদিসোকাসপরিচ্ছেদৰসেন. অযঞ্চ ৰণ্ণাদিৰসেন মনসিকারো ধাতুপটিক্কূলৰণ্ণমনসিকারানং সাধারণো পুব্বভাগোতি নিব্বত্তিতধাতুমনসিকারমেৰ দস্সেতুং ‘‘অৰসানে এৰং মনসিকারো পৰত্তেতব্বো’’তি ৰুত্তং.

৩১১. অঞ্ঞমঞ্ঞং আভোগপচ্চৰেক্খণরহিতা এতে ধম্মাতি এতে ‘‘সীসকটাহপলিৰেঠনচম্মং কেসা’’তি এৰং ৰোহরিযমানা ভূতুপাদাযধম্মা ‘‘মযি কেসা জাতা, মযমেত্থ জাতা’’তি এৰং অঞ্ঞমঞ্ঞং আভোগপচ্চৰেক্খণসুঞ্ঞা. ইমিনা কারণস্স চ ফলস্স চ অব্যাপারতায ধাতুমত্ততং সন্দস্সেতি, তেন চ আভোগপচ্চৰেক্খণানম্পি এৰমেৰ অব্যাপারতা দীপিতাতি দট্ঠব্বং. ন হি তানি, তেসং কারণানি চ তথা তথা আভুজিত্ৰা, পচ্চৰেক্খিত্ৰা চ উপ্পজ্জন্তি, পচ্চযভাৰং ৰা গচ্ছন্তীতি. ইতীতি ৰুত্তপ্পকারপরামসনং. অচেতনোতি ন চেতনো, চেতনারহিতো ৰা. অব্যাকতোতি অব্যাকতরাসিপরিযাপন্নো. সুঞ্ঞোতি অত্তসুঞ্ঞো. ততো এৰ নিস্সত্তো. থদ্ধলক্খণাধিকতায থদ্ধো. ততো এৰ পথৰীধাতূতি এৰং মনসিকারো পৰত্তেতব্বোতি সম্বন্ধো. এৰং সব্বত্থ.

৩১২. সুঞ্ঞগামট্ঠানেতি এত্থ সুঞ্ঞগামগ্গহণং পরমত্থতো ৰেদকৰিরহদস্সনত্থং কাযস্স.

৩১৩. মধুকট্ঠিকেতি মধুকবীজানি.

৩১৪. গেহথম্ভানং আধারভাৰেন ঠপিতসিলাযো পাসাণউদুক্খলকানীতি অধিপ্পেতানি.

৩১৫. দুগ্গন্ধাদিভাৰে চস্স সদিসভাৰদস্সনত্থং অল্লগোচম্মগ্গহণং.

৩১৬. যেভুয্যেন মংসপেসীনং বহলতায মহামত্তিকগ্গহণং.

৩১৭. কুট্টদারূসূতি দারুকুট্টিকায কুটিযা ভিত্তিপাদভূতেসু কট্ঠেসু.

৩১৮. পণ্হিকট্ঠিআদীনং আধারভাৰো ৰিয গোপ্ফকট্ঠিআদীনং আধেয্যভাৰোপি অসমন্নাহারসিদ্ধোতি দস্সনত্থং ‘‘পণ্হিকট্ঠিগোপ্ফকট্ঠিং উক্খিপিত্ৰা ঠিত’’ন্তিআদিং ৰত্ৰা পুন ‘‘সীসট্ঠিগীৰট্ঠিকে পতিট্ঠিত’’ন্তিআদি ৰুত্তং.

৩১৯. সিন্নৰেত্তগ্গাদীসূতি সেদিতৰেত্তকল়ীরাদীসু.

৩২১. উরট্ঠিসঙ্ঘাটো পঞ্জরসদিসতায ‘‘উরট্ঠিপঞ্জর’’ন্তি ৰুত্তো. তস্স অথিরভাৰদস্সনত্থং জিণ্ণসন্দমানিকপঞ্জরং নিদস্সনভাৰেন গহিতং.

৩২২. যমকমংসপিণ্ডেতি মংসপিণ্ডযুগল়ে.

৩২৩. কিলোমকস্স সেতৰণ্ণতায ‘‘পিলোতিকপলিৰেঠিতে’’তি পিলোতিকং নিদস্সনভাৰেন ৰুত্তং. এৰমেৰ ন ৰক্কহদযানি সকলসরীরে চ মংসং জানাতীতি এত্থ ন ৰক্কহদযানি জানন্তি ‘‘মযং পটিচ্ছন্নকিলোমকেন পটিচ্ছন্নানী’’তি, ন সকলসরীরে চ মংসং জানাতি ‘‘অহং পটিচ্ছন্নকিলোমকেন পটিচ্ছন্ন’’ন্তি যোজেতব্বং.

৩২৪. কোট্ঠমত্থকপস্সন্তি কুসূলস্স অব্ভন্তরে মত্থকপস্সং.

৩২৫. দ্ৰিন্নং থনানমন্তরেতি দ্ৰিন্নং থনপ্পদেসানং ৰেমজ্ঝে, থনপ্পদেসো চ অব্ভন্তরৰসেন ৰেদিতব্বো.

৩২৭. একৰীসতিঅন্তভোগেতি একৰীসতিযা ঠানেসু ওভগ্গোভগ্গে অন্তমণ্ডলে.

৩২৮. আমাসযে ঠিতো পরিভুত্তাহারো উদরিযন্তি অধিপ্পেতন্তি আহ ‘‘উদরিযং উদরে ঠিতং অসিতপীতখাযিতসাযিত’’ন্তি.

৩৩১. অবদ্ধপিত্তং সংসরণলোহিতং ৰিয, কাযুস্মা ৰিয চ কম্মজরূপপটিবদ্ধৰুত্তিকন্তি আহ ‘‘আবদ্ধপিত্তং জীৰিতিন্দ্রিযপটিবদ্ধং সকলসরীরং ব্যাপেত্ৰা ঠিত’’ন্তি. পটিবদ্ধতাৰচনেন চস্স জীৰিতিন্দ্রিযে সতি সব্ভাৰমেৰ দীপেতি, ন জীৰিতিন্দ্রিযস্স ৰিয একন্তকম্মজতন্তি দট্ঠব্বং. পিত্তকোসকেতি মহাকোসাটকীকোসসদিসে পিত্তাধারে. যূসভূতোতি রসভূতো.

৩৩২. উচ্ছিট্ঠোদকগব্ভমলাদীনং ছড্ডনট্ঠানং চন্দনিকা, তস্সং চন্দনিকাযং.

৩৩৩. পুব্বাসযো মন্দপঞ্ঞানং কেসঞ্চিদেৰ হোতীতি কত্ৰা অসব্বসাধারণন্তি অধিপ্পাযেনাহ ‘‘পুব্বো অনিবদ্ধোকাসো’’তি.

৩৩৪. পিত্তং ৰিযাতি অবদ্ধপিত্তং ৰিয. সকলসরীরন্তি জীৰিতিন্দ্রিযপটিবদ্ধং সব্বং সরীরপ্পদেসং. ৰক্কহদযযকনপপ্ফাসানি তেমেন্তন্তি এত্থ যকনং হেট্ঠাভাগপূরণেন, ইতরানি তেসং উপরি থোকং থোকং পগ্ঘরণেন চ তেমেতীতি দট্ঠব্বং. হেট্ঠা লেড্ডুখণ্ডাদীনি তেমযমানেতি তেমকতেমিতব্বানং অব্যাপারতাসামঞ্ঞনিদস্সনত্থং এৰ উপমা দট্ঠব্বা, ন ঠানসামঞ্ঞনিদস্সনত্থং. সন্নিচিতলোহিতেন হি তেমেতব্বানং কেসঞ্চি হেট্ঠা, কস্সচি উপরি ঠিততা কাযগতাসতিনিদ্দেসে (ৰিসুদ্ধি. ১.২০৬) দস্সিতাতি. যকনস্স হেট্ঠাভাগট্ঠানং ‘‘মযি লোহিতং ঠিত’’ন্তি ন জানাতি, ৰক্কাদীনি ‘‘অম্হে তেমযমানং লোহিতং ঠিত’’ন্তি ন জানন্তীতি এৰং যোজনা ৰেদিতব্বা.

৩৩৬. পত্থিন্নসিনেহোতি থিনভাৰং ঘনভাৰং গতসিনেহো. সকলসরীরে মংসন্তি যোজনা, তঞ্চ থূলসরীরং সন্ধায ৰুত্তং. মেদস্স সতিপি পত্থিন্নতায ঘনভাৰে মংসস্স ৰিয ন বদ্ধতাতি ৰুত্তং ‘‘পত্থিন্নযূসো’’তি. তেনেৰস্স আপোকোট্ঠাসতা.

৩৩৭. উদকপুণ্ণেসু তরুণতালট্ঠিকূপকেসূতি নাতিপরিণতানং সজলকানং অগ্গতো ছিন্নানং তালসলাটুকানং ৰিৰরানি সন্ধায ৰুত্তং.

৩৩৮. ৰসায অত্তনো আধারে অভিব্যাপনমুখেন অব্যাপারতাসামঞ্ঞং ৰিভাৰেতব্বন্তি আচামগততেলং নিদস্সিতন্তি দট্ঠব্বং.

৩৩৯. খেল়ুপ্পত্তিপচ্চযে অম্বিলগ্গমধুরগ্গাদিকে.

৩৪৩. কেসাদীসু মনসিকারং পৰত্তেত্ৰা তেজোকোট্ঠাসেসু পৰত্তেতব্বো মনসিকারোতি ৰিভত্তিং পরিণামেত্ৰা যোজেতব্বং. যেন সন্তপ্পতীতি যেন কাযো সন্তপ্পতি, অযং সন্তপ্পনকিচ্চো. তেজোতি তস্স পরিগ্গণ্হনাকারো এৰ পচ্চামট্ঠো. যেন জীরীযতীতিআদীসুপি এসেৰ নযো.

৩৪৪. অস্সাসপস্সাসৰসেনাতি অন্তোপৰিসনবহিনিক্খমননাসিকাৰাতভাৰেন. ‘‘এৰং পৰত্তমনসিকারস্সা’’তি ইমিনা ৰুত্তাকারেন সসম্ভারৰিভত্তিতো পৰত্তকম্মট্ঠানমনসিকারস্স. ধাতুযো পাকটা হোন্তীতি ৰিত্থারতো পরিগ্গহিতত্তা ধাতুযো ৰিভূতা হোন্তি. ইধাপি ভাৰনাৰিধানং হেট্ঠা ৰুত্তনযেনেৰ ৰেদিতব্বং.

৩৪৫. তত্থেৰাতি তেসুযেৰ ৰীসতিযা কোট্ঠাসেসু. পরিপাচনলক্খণং ৰিত্থম্ভনলক্খণন্তি এত্থাপি ‘‘তত্থেৰা’’তি আনেত্ৰা সম্বন্ধিতব্বং.

পুন তত্থেৰাতি তেসুযেৰ দ্ৰাদসসু কোট্ঠাসেসূতি অত্থো. এত্থ চ কেসাদিকোট্ঠাসানং সংৰিগ্গহতায তত্থ ৰিজ্জমানা আপোধাতুআদযো ন্হানিযচুণ্ণাদীসু উদকাদযো ৰিয সুৰিঞ্ঞেয্যাতি ‘‘তত্থেৰ আবন্ধনলক্খণ’’ন্তিআদি ৰুত্তং.

সন্তপ্পনাদিতেজোকোট্ঠাসেসু পন ৰাযোধাতুআদযো ন তথা সুৰিঞ্ঞেয্যাতি কত্ৰা ‘‘তেন অৰিনিভুত্ত’’ন্তি ৰুত্তং, ন তত্থেৰাতি. যদি এৰং, ৰাযুকোট্ঠাসেসু কথং তত্থেৰাতি? ৰাযুকোট্ঠাসাপি হি উদ্ধঙ্গমৰাতাদযো পিণ্ডাকারেনেৰ পরিগ্গহেতব্বতং উপগচ্ছন্তি, ন পন সন্তপ্পনাদিতেজোকোট্ঠাসাতি নাযং দোসো. তত্থ তেনাতি তেন তেজেন. অৰিনিভুত্তন্তি অৰিনাভূতং, তংতংকলাপগতৰসেন ৰা এৰং ৰুত্তং. এৰং ৰৰত্থাপযতোতি ৰুত্তাকারেন সলক্খণসঙ্খেপতো ধাতুযো ৰৰত্থাপেন্তস্স. ৰুত্তনযেনাতি ‘‘তস্সেৰং ৰাযমমানস্সা’’তিআদিনা (ৰিসুদ্ধি. ১.৩০৮) হেট্ঠা ৰুত্তনযেন.

৩৪৬. এৰম্পি ভাৰযতোতি সলক্খণসঙ্খেপতো ধাতুযো পরিগ্গহেত্ৰা ভাৰেন্তস্সাপি. পুব্বে ৰুত্তনযেনাতি সসম্ভারৰিভত্তিতো ভাৰনাযং ৰুত্তেন নযেন. এৰন্তি যথা কেসে, এৰং. সব্বকোট্ঠাসেসূতি একচত্তালীসভেদেসু সেসসব্বকোট্ঠাসেসু এৰমেত্থ অট্ঠসট্ঠিধাতুসতস্স পরিগ্গহো ৰুত্তো হোতি. ভাৰনাৰিধানং পনেত্থ হেট্ঠা ৰুত্তনযমেৰ.

ইদানি ৰচনত্থাদিমুখেনপি ধাতূসু মনসিকারৰিধানং দস্সেতুং ‘‘ৰচনত্থতো’’তিআদি ৰুত্তং. তত্থ ৰচনত্থতোতি যস্মা সব্বপঠমং কম্মট্ঠানস্স উগ্গহণং ৰচনৰসেন হোতি ৰচনদ্ৰারেন তদত্থস্স আদিতো গহেতব্বতো, তস্মা ৰচনত্থতোপি ধাতূনং মনসিকাতব্বতা ৰুত্তা. কলাপতোতি ৰচনত্থৰসেন ৰিসেসতো, সামঞ্ঞতো চ ধাতুযো পরিগ্গহেত্ৰা ঠিতস্স যস্মা তা পিণ্ডসো পৰত্তন্তি, ন পচ্চেকং, তস্মা কলাপতোপি মনসিকাতব্বতা ৰুত্তা. তে পন কলাপা পরমাণুপরিমাণা হোন্তীতি তপ্পরিযাপন্নানং পথৰীধাতুআদীনং একস্মিং সরীরে পরিমেয্যপরিচ্ছেদং দস্সেতুং চুণ্ণতো মনসিকাতব্বতা ৰুত্তা. সো পনাযং তাসং চুণ্ণতো মনসিকারো সঙ্ঘাটৰসেন হোতীতি নিব্বট্টিতসরূপমেৰ পরিগ্গহেতব্বং দস্সেতুং লক্খণাদিতো মনসিকারো ৰুত্তো. লক্খণাদিতো ধাতুযো পরিগ্গণ্হন্তেন সলক্খণৰিভত্তিতো কম্মট্ঠানাভিনিৰেসে যস্মা দ্ৰাচত্তালীসায কোট্ঠাসানং ৰসেন ধাতূসু পরিগ্গয্হমানাসু ‘‘এত্তকা উতুসমুট্ঠানা, এত্তকা চিত্তাদিসমুট্ঠানা’’তি অযং ৰিভাগো ঞাতব্বো হোতি, তস্মা সমুট্ঠানতো মনসিকারো ৰুত্তো.

এৰং পরিঞ্ঞাতসমুট্ঠানানম্পি তাসং সদ্দানুসারেন ৰিনা ৰিসেসসামঞ্ঞপরিগ্গহো কাতব্বোতি দস্সেতুং নানত্তেকত্ততো মনসিকারো ৰুত্তো. লক্খণৰিসেসতো ৰিনিভুত্তরূপাপি এতা অনিদ্দিসিতব্বট্ঠানতায পদেসেন অৰিনিভুত্তাতি অযং ৰিসেসো পরিগ্গহেতব্বোতি দস্সেতুং ৰিনিব্ভোগাৰিনিব্ভোগতো মনসিকারো ৰুত্তো. সতিপি অৰিনিব্ভোগৰুত্তিযং কাচিদেৰ কাসঞ্চি সভাগা, কাচি ৰিসভাগাতি অযম্পি ৰিসেসো পরিগ্গহেতব্বোতি দস্সেতুং সভাগৰিসভাগতো মনসিকারো ৰুত্তো. সভাগৰিসভাগাপি ধাতুযো অজ্ঝত্তিকা ঈদিসকিচ্চৰিসেসযুত্তা, বাহিরা তব্বিপরীতাতি অযং ৰিসেসো পরিগ্গহেতব্বোতি দস্সেতুং অজ্ঝত্তিকবাহিরৰিসেসতো মনসিকারো ৰুত্তো. সজাতিসঙ্গহাদিকো ধাতুসঙ্গহৰিসেসোপি পরিগ্গহিতব্বোতি দস্সেতুং সঙ্গহতো মনসিকারো ৰুত্তো. সন্ধারণাদীহি যথাসককিচ্চেহি অঞ্ঞমঞ্ঞূপত্থম্ভভাৰতোপি ধাতুযো পরিগ্গহেতব্বাতি দস্সেতুং পচ্চযতো মনসিকারো ৰুত্তো. অব্যাপারনযতো ধাতুযো পরিগ্গহেতব্বাতি দস্সেতুং অসমন্নাহারতো মনসিকারো ৰুত্তো. অত্তনো পচ্চযধম্মৰিসেসতো, পচ্চযভাৰৰিসেসতো চ ধাতুযো পরিগ্গহেতব্বাতি দস্সেতুং পচ্চযৰিভাগতো মনসিকারো ৰুত্তোতি এৰমেতেসং তেরসন্নং আকারানং পরিগ্গহে কারণং ৰেদিতব্বং. আকারেহীতি পকারেহি, কারণেহি ৰা.

৩৪৭. তত্থ পত্থটত্তাতি পুথুত্তা, তেন পুথুভাৰতো পুথুৰী, পুথুৰী এৰ পথৰীতি নিরুত্তিনযেন সদ্দত্থমাহ. পত্থনট্ঠেন ৰা পথৰী, পতিট্ঠাভাৰেন পত্থাযতি উপতিট্ঠতীতি অত্থো. ‘‘অপ্পোতী’’তি পদস্স অত্থো হেট্ঠা ৰুত্তো এৰ. আপীযতীতি সোসীযতি, পিৰীযতীতি কেচি. ‘‘অযং পনত্থো সসম্ভারাপে যুজ্জতী’’তি ৰদন্তি, লক্খণাপেপি যুজ্জতেৰ. সোপি হি ফরুসপাচনৰিসোসনাকারেন সেসভূতত্তযেন পীযমানো ৰিয পৰত্ততীতি. অপ্পাযতীতি ব্রূহেতি. পরিব্রূহনরসা হি আপোধাতু. তেজতীতি নিসেতি, তিক্খভাৰেন সেসভূতত্তযং উস্মাপযতীতি অত্থো. ৰাযতীতি সমীরেতি, দেসন্তরুপ্পত্তিহেতুভাৰেন ভূতসঙ্ঘাতং গমেতীতি অত্থো.

এৰং তাৰ ৰিসেসতো ৰচনত্থং ৰত্ৰা ইদানি সামঞ্ঞতো ৰত্তুং ‘‘অৰিসেসেন পনা’’তিআদি ৰুত্তং. সলক্খণধারণতোতি যথা তিত্থিযপরিকপ্পিতো ‘‘পকতি অত্তা’’তি এৰমাদিকো সভাৰতো নত্থি, ন এৰমেতা. এতা পন সলক্খণং সভাৰং ধারেন্তীতি ধাতুযো. দুক্খাদানতোতি দুক্খস্স ৰিদহনতো. এতা হি ধাতুযো কারণভাৰেন ৰৰত্থিতা হুত্ৰা অযলোহাদিধাতুযো ৰিয অযলোহাদিং অনেকপ্পকারং সংসারদুক্খং ৰিদহন্তি. দুক্খাধানতোতি অনপ্পকস্স দুক্খস্স ৰিধানমত্ততো অৰসৰত্তনতো, তং ৰা দুক্খং এতাহি কারণভূতাহি সত্তেহি অনুৰিধীযতি, তথাৰিহিতঞ্চ তং এতাস্ৰেৰ ধীযতি ঠপীযতীতি এৰং দুক্খাধানতো, ধাতুযো. অপিচ ‘‘নিজ্জীৰট্ঠো ধাতুট্ঠো’’তি ৰুত্তোৰাযমত্থো. তথা হি ভগৰা ‘‘ছধাতুরোযং ভিক্খু পুরিসো’’তিআদীসু (ম. নি. ৩.৩৪৩-৩৪৫) জীৰসঞ্ঞাসমূহননত্থং ধাতুদেসনং অকাসীতি. ইতি ৰচনত্থমুখেনপি অসাধারণতো, সাধারণতো চ ধাতূনং সরসলক্খণমেৰ ৰিভাৰীযতীতি আহ ‘‘এৰং ৰিসেসসামঞ্ঞৰসেন ৰচনত্থতো মনসি কাতব্বা’’তি. মনসিকারো পন ৰচনত্থমুখেন ধাতুযো পরিগ্গহেত্ৰা ঠিতস্স হেট্ঠা ৰুত্তনযেনেৰ ৰেদিতব্বো.

৩৪৮. আকারেহীতি পকারেহি. অথ ৰা আকরীযন্তি দিস্সন্তি এত্থ ধাতুযোতি আকারা, কোট্ঠাসা. অট্ঠধম্মসমোধানাতি যথাৰুত্তানং পচ্চযৰিসেসেন ৰিসিট্ঠরূপানং ৰণ্ণাদীনং অট্ঠন্নং ধম্মানং সমৰধানতো সন্নিৰেসৰিসেসৰসেন সহাৰট্ঠানতো তং উপাদায. কেসাতি সম্মুতি সমঞ্ঞামত্তং হোতি. তেসংযেৰ ৰিনিব্ভোগাতি তেসংযেৰ ৰণ্ণাদীনং ৰিনিব্ভুজনতো. যথা হি ৰণ্ণাদযো অট্ঠ ধম্মা পঞ্ঞায ৰিনিব্ভুজ্জমানা অঞ্ঞমঞ্ঞব্যতিরেকেন পরমত্থতো উপলব্ভন্তি, ন এৰং ৰণ্ণাদিব্যতিরেকেন পরমত্থতো কেসা উপলব্ভন্তি. তস্মা যে চ ধম্মে সমুদিতে উপাদায ‘‘কেসা’’তি সম্মুতি, তেসু ৰিসুং ৰিসুং কতেসু নত্থি ‘‘কেসা’’তি সম্মুতি, ৰোহারমত্তন্তি অত্থো.

‘‘অট্ঠধম্মকলাপমত্তমেৰা’’তি ইদং কেসপঞ্ঞত্তিযা উপাদাযভূতে ৰণ্ণাদিকে একত্তেন গহেত্ৰা ৰুত্তং, ন তেসং অট্ঠধম্মমত্তভাৰতো. কম্মসমুট্ঠানো কোট্ঠাসোতি কেসেসু তাৰ কেসমূলং, এৰং লোমাদীসুপি যথারহং ৰেদিতব্বং. দসধম্মকলাপোপীতি এত্থ অসিতাদিপরিপাচকো তেজোকোট্ঠাসো নৰধম্মকলাপোপীতি ৰত্তব্বো. যদিমে কেসাদিকোট্ঠাসা যথারহং অট্ঠনৰদসধম্মসমূহভূতা, অথ কস্মা পথৰীআদিধাতুমত্ততো মনসি করীযন্তীতি আহ ‘‘উস্সদৰসেন পনা’’তিআদি. যস্মা অযং ধাতুমনসিকারো যাৰদেৰ সত্তসঞ্ঞাসমুগ্ঘাটনত্থো, ধম্মৰিনিব্ভোগো চ সাতিসযং সত্তসঞ্ঞাসমুগ্ঘাটায সংৰত্ততি, তস্মা কোট্ঠাসেসু এৰং ধম্মৰিভাগো ৰেদিতব্বো. এত্থ হি উদরিযং করীসং পুব্বো মুত্তঞ্চ উতুসমুট্ঠানা, অসিতাদিপরিপাচকতেজো কম্মসমুট্ঠানো, অস্সাসপস্সাসৰাতো চিত্তসমুট্ঠানোতি ছ একসমুট্ঠানা, সেদোঅস্সু খেল়ো সিঙ্ঘাণিকাতি চত্তারো উতুচিত্তৰসেন দ্ৰিসমুট্ঠানা, সেসা দ্ৰত্তিংস চতুসমুট্ঠানা.

তেসু অসিতাদিপরিপাচকে তেজোকোট্ঠাসে একো কলাপো জীৰিতনৰকো, অঞ্ঞেসু একসমুট্ঠানেসু উতুসমুট্ঠানো, চিত্তসমুট্ঠানো ৰা একেকো অট্ঠকো, দ্ৰিসমুট্ঠানেসু উতুচিত্তৰসেন দ্ৰে দ্ৰে অট্ঠকা, চতুসমুট্ঠানেসু উতুচিত্তাহারসমুট্ঠানা তযো তযো অট্ঠকা, উতুচিত্তসমুট্ঠানেসু সদ্দনৰকা, অট্ঠসু তেজোৰাযোকোট্ঠাসেসু অট্ঠ জীৰিতনৰকা, সেসেসু চতুৰীসতিযা কোট্ঠাসেসু কাযভাৰদসকদ্ৰযসহিতা, চক্খাদিসঞ্ঞিতেসু মংসকোট্ঠাসেসু চক্খুসোতঘানজিৰ্হাৰত্থুদসকসহিতা চাতি পরিপুণ্ণাযতনকে রূপকাযে ভেদং অনামসিত্ৰা একত্তৰসেন গয্হমানা সত্তচত্তালীসাধিকসতরূপকলাপা রূপৰিভাগতো সাধিকং দিযড্ঢরূপসহস্সং হোতি, কোট্ঠাসানং পন অৰযৰৰিভাগেন তদৰযৰকলাপানং ভেদে গয্হমানে রূপধম্মানং অসঙ্খ্যেয্যভেদতা ৰেদিতব্বা. এৰং ধম্মৰিভাগতো অনেকভেদভিন্নাপি ইমে দ্ৰাচত্তালীস কোট্ঠাসা উস্সদগ্গহণেন চতুধাতুৰসেনেৰ ৰৰত্থপেতব্বা. তেনাহ ‘‘উস্সদৰসেন পন…পে… মনসি কাতব্বা’’তি. তত্থ মনসিকারৰিধি ৰুত্তনযেনেৰ ৰেদিতব্বো.

৩৪৯. মজ্ঝিমেন পমাণেনাতি আরোহপরিণাহেহি মজ্ঝিমসরীরে লব্ভমানেন মজ্ঝিমেন পরিমাণেন. পরিগ্গয্হমানাতি পঞ্ঞায পরিতক্কেত্ৰা গয্হমানা. পরমাণুভেদসঞ্চুণ্ণাতি এত্থ যথা ‘‘অঙ্গুলস্স অট্ঠমো ভাগো যৰো, যৰস্স অট্ঠমো ভাগো ঊকা, ঊকায অট্ঠমো ভাগো লিক্খা, লিক্খায অট্ঠমো ভাগো রথরেণু, রথরেণুস্স অট্ঠমো ভাগো তজ্জারী, তজ্জারিযা অট্ঠমো ভাগো অণু, এৰং অণুনো অট্ঠমো ভাগো পরমাণু নামা’’তি কেচি. অট্ঠকথাযং (ৰিভ. অট্ঠ. ৫১৫) পন ‘‘সত্তধঞ্ঞমাসপ্পমাণং একং অঙ্গুলং, সত্তঊকাপমাণো একো ধঞ্ঞমাসো, সত্তলিক্খাপমাণা একা ঊকা, ছত্তিংসরথরেণুপ্পমাণা একা লিক্খা, ছত্তিংসতজ্জারিপ্পমাণো একো রথরেণু, ছত্তিংসঅণুপ্পমাণা একা তজ্জারী, ছত্তিংসপরমাণুপ্পমাণো একো অণূ’’তি ৰুত্তং. তস্মা অণুনো ছত্তিংসতিমভাগমত্তো পরমাণু নাম আকাসকোট্ঠাসিকো মংসচক্খুস্স অগোচরো দিব্বচক্খুস্সেৰ গোচরভূতো. তং সন্ধাযাহ ‘‘পরমাণুভেদসঞ্চুণ্ণা’’তি, যথাৰুত্তপরমাণুপ্পভেদেন চুণ্ণৰিচুণ্ণভূতা. সুখুমরজভূতাতি ততোযেৰ অতিৰিয সুখুমরজভাৰং গতা.

দোণমত্তা সিযাতি সোল়স নাল়িমত্তা. ইধাপি ‘‘মজ্ঝিমেন পমাণেনা’’তি আনেত্ৰা সম্বন্ধিতব্বং. তেন ‘‘পকতিযা চতুমুট্ঠিকং কুডুৰং, চতুকুডুৰং নাল়ি, তায নাল়িযা সোল়স নাল়িযো দোণং, তং পন মগধনাল়িযা দ্ৰাদস নাল়িযো হোন্তী’’তি ৰদন্তি. সঙ্গহিতাতি যথা ন ৰিপ্পকিরতি, এৰং আবন্ধনৰসেন সম্পিণ্ডিত্ৰা গহিতা. অনুপালিতাতি যথা পগ্ঘরণসভাৰায আপোধাতুযা ৰসেন কিলিন্নভাৰং, পিচ্ছিলভাৰং ৰা নাপজ্জতি, এৰং অনুরক্খিতা. ৰিত্থম্ভিতাতি সঙ্ঘাতৰাযুনা অতিৰিয ৰিত্থম্ভনং পাপিতা. ন ৰিকিরতি ন ৰিদ্ধংসতীতি সুখুমরজভূতাপি পথৰীধাতু আবন্ধনপরিপাচনসমুদীরণকিচ্চাহি আপোতেজোৰাযোধাতূহি লদ্ধপচ্চযা সিনেহেন তেমিতা তেজসা পরিপক্কা ৰাযুনা ৰিত্থম্ভনং পাপিতা পিট্ঠচুণ্ণা ৰিয ন ইতো চিতো চ ৰিকিরতি ন ৰিদ্ধংসতি, অথ খো পিণ্ডিতা ঘনভূতা হুত্ৰা নানপ্পকারেন গহেতব্বতং আপজ্জতি. তেনাহ ‘‘অৰিকিরিযমানা’’তিআদি. তত্থ ৰিকপ্পন্তি ৰিভাগং. যদিপি তেজোৰাযোধাতুযোপি সৰিগ্গহা রূপধম্মভাৰতো, যাদিসো পন ঘনভাৰো পথৰীআপোধাতূসু লব্ভতি, ন তাদিসো তেজোৰাযোধাতূসু লব্ভতীতি মেয্যভাৰাভাৰতো তত্থ চুণ্ণভেদো ন উদ্ধটো. তথা হি সসম্ভারতেজোৰাযূসুপি মেয্যভাৰো ন লব্ভতেৰ.

যূসগতাতি যূসভাৰং দ্রৰভাৰং গতা. ততো এৰ আবন্ধনাকারভূতা. ন পগ্ঘরতীতি ন ওগল়তি. ন পরিস্সৰতীতি ন ৰিস্সন্দতি. পীণিতপীণিতভাৰং দস্সেতীতি আপোধাতুযা ব্রূহনরসতায ৰুত্তং.

উসুমাকারভূতাতি এতেন কাযে পাকতিকউস্মাপি গহণীসঙ্খাতায তস্সাযেৰ তেজোধাতুযা ৰসেন হোতীতি দস্সেতি. পরিপাচেতীতি সন্তেজেতি. সা হি যথাভুত্তস্স আহারস্স সম্মা পরিণামনেন রসাদিসম্পত্তিযা হেতুভাৰং গচ্ছন্তী ইমং কাযং পরিপাচেতি সন্তেজেতীতি ৰুচ্চতি. তেনেৰাহ ‘‘ন পূতিভাৰং দস্সেতী’’তি. কম্মূপনিস্সযায, চিত্তপ্পসাদহেতুকায চ সরীরে ৰণ্ণসম্পদায তেজোধাতু ৰিসেসপচ্চযো, পগেৰ উতুআহারসমুট্ঠানায রূপসম্পত্তিযা যথাৰুত্ততেজোধাতূতি আহ ‘‘ৰণ্ণসম্পত্তিঞ্চস্স আৰহতী’’তি.

সমুদীরণৰিত্থম্ভনলক্খণাতি এত্থ সমুদীরণং অনুপেল্লনং, ৰিসোসনন্তি কেচি. ৰিত্থম্ভনং সেসভূতত্তযস্স থম্ভিতত্তাপাদনং, উপ্পীলনন্তি একে. তাযাতি ৰিত্থম্ভনলক্খণায ৰাযোধাতুযা. অপরাযাতি সমুদীরণলক্খণায. সা হি পেল্লনসভাৰা. তেনাহ ‘‘সমব্ভাহতো’’তি. সমব্ভাহনঞ্চ রূপকলাপস্স দেসন্তরুপ্পত্তিযা হেতুভাৰো. অৰঘট্টনং আসন্নতরুপ্পত্তিযা. লাল়েতীতি পরিৰত্তেতি. ইদানি যদত্থং চুণ্ণতো মনসিকারো আগতো, তং নিগমনৰসেন দস্সেতুং ‘‘এৰমেত’’ন্তিআদি ৰুত্তং. তত্থ ধাতুযন্তন্তি সুত্তেন ৰিয যন্তরূপকং অসতিপি কত্তুভূতে অত্তনি চিত্তৰসেন ধাতুমযং যন্তং পৰত্ততি, ইধাপি মনসিকারৰিধি ৰুত্তনযেনেৰ ৰেদিতব্বো.

৩৫০. যদিপি চতুন্নং ধাতূনং লক্খণাদযো হেট্ঠা তত্থ তত্থ ৰুত্তা এৰ, তথাপি তে অনৰসেসতো দস্সেত্ৰা ৰিসুং কম্মট্ঠানপরিগ্গহৰিধিং দস্সেতুং ‘‘লক্খণাদিতো’’তিআদি আরদ্ধং. তত্থ লক্খীযতি এতেনাতি লক্খণং, কক্খল়ত্তং লক্খণমেতিস্সাতি কক্খল়ত্তলক্খণা. ননু চ কক্খল়ত্তমেৰ পথৰীধাতূতি? সচ্চমেতং, তথাপি ৰিঞ্ঞাতাৰিঞ্ঞাতসদ্দত্থতাৰসেন অভিন্নেপি ধম্মে কপ্পনাসিদ্ধেন ভেদেন এৰং নিদ্দেসো কতো. এৰং হি অত্থৰিসেসাৰবোধো হোতীতি. অথ ৰা লক্খীযতীতি লক্খণং, কক্খল়ত্তং হুত্ৰা লক্খিযমানা ধাতু কক্খল়ত্তলক্খণাতি এৰমেত্থ অত্থো দট্ঠব্বো. সেসাসুপি এসেৰ নযো. পতিট্ঠানরসাতি সহজাতধম্মানং পতিট্ঠাভাৰকিচ্চা. ততো এৰ নেসং সম্পটিচ্ছনাকারেন ঞাণস্স পচ্চুপতিট্ঠতীতি সম্পটিচ্ছনপচ্চুপট্ঠানা. পদট্ঠানং পনেত্থ অঞ্ঞধম্মতায ন উদ্ধটং, সাধারণভাৰসব্ভাৰতো ৰা দূরকারণং ৰিয. যথা ৰা ধম্মুদ্দেসৰারৰণ্ণনাদীসু রসাদিনা অঞ্ঞেসং পচ্চযভাৰং দস্সেত্ৰা পচ্চযৰন্ততাদস্সনত্থং পদট্ঠানং উদ্ধটং, ন এৰমিধ. ইধ পন ধাতূনং অনঞ্ঞসাধারণৰিসেসৰিভাৰনপরায চোদনায অঞ্ঞধম্মভূতং পদট্ঠানং ন উদ্ধটন্তি দট্ঠব্বং. ব্রূহনরসাতি সহজাতধম্মানং ৰড্ঢনকিচ্চা. তথা হি সা নেসং পীণিতভাৰং দস্সেতীতি ৰুচ্চতি. সঙ্গহপচ্চুপট্ঠানাতি বাহিরউদকং ৰিয ন্হানীযচুণ্ণস্স সহজাতধম্মানং সঙ্গহণপচ্চুপট্ঠানা. মদ্দৰানুপ্পদানপচ্চুপট্ঠানাতি বাহিরগ্গি ৰিয জতুলোহাদীনং সহজাতধম্মানং মুদুভাৰানুপ্পদানপচ্চুপট্ঠানা. অভিনীহারো ভূতসঙ্ঘাটস্স দেসন্তরুপ্পত্তিহেতুভাৰো, নীহরণং ৰা বীজতো অঙ্কুরস্স ৰিয.

৩৫১. উতুসমুট্ঠানাৰ কম্মাদিৰসেন অনুপ্পত্তিতো. উতুচিত্তসমুট্ঠানা কদাচি উতুতো, কদাচি চিত্ততো উপ্পজ্জনতো. অৰসেসাতি ৰুত্তাৰসেসা কেসাদযো চতুৰীসতি, আদিতো তযো তেজোকোট্ঠাসা, পঞ্চ ৰাযোকোট্ঠাসা চাতি দ্ৰত্তিংস. সব্বেপীতি তে সব্বেপি কম্মাদিৰসেন উপ্পজ্জনতো চতুসমুট্ঠানা. কেসাদীনম্পি হি মংসতো অৰিমুত্তভাগো কম্মাহারচিত্তসমুট্ঠানোৰ হোতীতি.

৩৫২. নানত্তেকত্ততোতি ৰিসেসসামঞ্ঞতো. ধম্মানং হি অঞ্ঞমঞ্ঞং ৰিসদিসতা নানত্তং, সমানতা একত্তং. সব্বাসম্পীতি চতুন্নম্পি. সলক্খণাদিতোতি সকং লক্খণং সলক্খণং, ততো সলক্খণাদিতো. আদি-সদ্দেন রসপচ্চুপট্ঠানানং ৰিয মুদুসণ্হফরুসভাৰাদীনম্পি সঙ্গহো দট্ঠব্বো. ‘‘কম্মসমুট্ঠানাদিৰসেন নানত্তভূতান’’ন্তি কস্মা ৰুত্তং, ননু কম্মসমুট্ঠানাদিৰসেন চতুন্নং ধাতূনং একত্তং হোতি সাধারণত্তাতি? ন, ‘‘অঞ্ঞা এৰ ধাতুযো কম্মসমুট্ঠানা, অঞ্ঞা উতুআদিসমুট্ঠানা’’তিআদিকং ভেদং সন্ধায তথা ৰচনতো. এতাসং ধাতূনং. রুপ্পনলক্খণং রুপ্পনসভাৰং. কিম্পনেতং রুপ্পনং নাম? যা সীতাদিৰিরোধিপচ্চযসন্নিপাতে ৰিসদিসুপ্পত্তি, তস্মিং ৰা সতি যো ৰিজ্জমানস্সেৰ ৰিসদিসুপ্পত্তিযা হেতুভাৰো, তং রুপ্পনং. অনতীতত্তাতি অপরিচ্চজনতো.

মহন্তপাতুভাৰো চেত্থ সসম্ভারধাতুৰসেন ৰেদিতব্বো, তথা মহাৰিকারতা মহাভূতসামঞ্ঞলক্খণধাতুৰসেন, মহাপরিহারতা, মহত্তৰিজ্জমানতা চ উভযৰসেনাতি. ভূতসদ্দাপেক্খায ‘‘এতানী’’তি নপুংসকনিদ্দেসো. মহন্তানি পাতুভূতানি অনেকসতসহস্স রূপকলাপসঙ্ঘাটতায সমূহৰসেন, সন্ততিৰসেন চ অপরিমিতপরিমাণানং, অনেকযোজনাযামৰিত্থারানঞ্চ উপ্পজ্জনতো. চত্তারি নহুতানীতি চত্তারি দসসহস্সানি. দেৰদানৰাদীনং তিগাৰুতাদিসরীরৰসেন মহন্তানি পাতুভূতানি.

তত্থাযং ৰচনত্থো – মহন্তানি ভূতানি জাতানি নিব্বত্তানীতি মহাভূতানীতি. অনেকাভূতৰিসেসদস্সনেন, অনেকব্ভুতদস্সনেন চ অনেকচ্ছরিযদস্সনৰসেন মহন্তো অব্ভুতো, মহন্তানি ৰা অভূতানি এত্থাতি মহাভূতো, মাযাকারো. যক্খাদযো জাতিৰসেনেৰ মহন্তা ভূতাতি মহাভূতা, নিরুল়্হো ৰা অযং তেসু মহাভূতসদ্দো দট্ঠব্বো. পথৰীআদযো পন ৰঞ্চকতায, অনিদ্দিসিতব্বট্ঠানতায চ মহাভূতা ৰিয মহাভূতা. ভূতসদ্দস্স উভযলিঙ্গতায নপুংসকতা কতা. তত্থ ৰঞ্চকতা সযং অনীলাদিসভাৰানি হুত্ৰা নীলাদিসভাৰস্স উপট্ঠাপনং, অনিত্থিপুরিসাদিসভাৰানেৰ চ হুত্ৰা ইত্থিপুরিসাদিআকারস্স উপট্ঠাপনং. তথা অঞ্ঞমঞ্ঞস্স অন্তো, বহি চ অট্ঠিতানংযেৰ অঞ্ঞমঞ্ঞং নিস্সায অৰট্ঠানতো অনিদ্দিসিতব্বট্ঠানতা. যদি হি ইমা ধাতুযো অঞ্ঞমঞ্ঞস্স অন্তো ঠিতা, ন সকিচ্চকরা সিযুং অঞ্ঞমঞ্ঞানুপ্পৰেসনতো, অথ বহি ঠিতা ৰিনিব্ভুত্তা সিযুং. তথা সতি অৰিনিব্ভুত্তৰাদো হাযেয্য, তস্মা ন নিদ্দিসিতব্বট্ঠানা. এৰং সন্তেপি পতিট্ঠানাদিনা যথাসকং কিচ্চৰিসেসেন সেসানং তিণ্ণং তিণ্ণং উপকারিকা হোন্তি, যেন সহজাতাদিনা পচ্চযেন পচ্চযা হোন্তি. তেনাহ ‘‘ন চ অঞ্ঞমঞ্ঞং নিস্সায ন তিট্ঠন্তী’’তি. মনাপেহীতি মনোহরেহি চাতুরিযৰন্তেহি. ৰণ্ণসণ্ঠানৰিক্খেপেহীতি কাল়সামতাদিৰণ্ণেহি, পুথুলৰিৰরকিসতাদিসণ্ঠানেহি, হত্থভমুকাদিৰিক্খেপেহি চ. সরসলক্খণন্তি সভাৰভূতং লক্খণং, সকিচ্চকং ৰা সভাৰং.

মহাপরিহারতোতি এত্থ ৰচনত্থং ৰদন্তো আহ ‘‘মহন্তেহি…পে… ভূতানি, মহাপরিহারানি ৰা ভূতানী’’তি. তত্থ পচ্ছিমত্থে পুরিমপদে উত্তরপদস্স পরিহার-সদ্দস্স লোপং কত্ৰা ‘‘মহাভূতানী’’তি ৰুত্তং.

তথা হীতি ততো এৰ ৰিকারস্স মহন্তত্তা এৰাতি তং ৰিকারং দস্সেতুং ‘‘ভূমিতো’’তিআদি ৰুত্তং. তত্থ অচ্চিমতোতি অগ্গিস্স. কোটিসতসহস্সং একং কোটিসতসহস্সেকং চক্কৰাল়ন্তি তং সব্বং আণাখেত্তভাৰেন একং কত্ৰা ৰদতি. ৰিলীযতীতি ৰিপত্তিকরমেঘাভিৰুট্ঠেন খারুদকেন লৰণং ৰিয ৰিলযং গচ্ছতি ৰিদ্ধংসতি. কুপিতেনাতি খুভিতেন. ৰিকীরতীতি ৰিধমতি ৰিদ্ধংসতি.

অনুপাদিন্নেসু ৰিকারমহত্তং দস্সেত্ৰা উপাদিন্নেসু দস্সেন্তো ‘‘পত্থদ্ধো’’তিআদিমাহ. তত্থ কট্ঠমুখেন ৰাতি ৰা-সদ্দো উপমত্থো. যথা কট্ঠমুখেন সপ্পেন ডট্ঠো পত্থদ্ধো হোতি, এৰং পথৰীধাতুপ্পকোপেন সো কাযো কট্ঠমুখেৰ হোতি, কট্ঠমুখমুখগতো ৰিয পত্থদ্ধো হোতীতি অত্থো. অথ ৰা ৰা-সদ্দো অৰধারণত্থো. সো ‘‘পথৰীধাতুপ্পকোপেন ৰা’’তি এৰং আনেত্ৰা সম্বন্ধিতব্বো. অযঞ্হেত্থ অত্থো – কট্ঠমুখেন ডট্ঠোপি কাযো পথৰীধাতুপ্পকোপেনেৰ পত্থদ্ধো হোতি, তস্মা পথৰীধাতুযা অৰিযুত্তো সো কাযো সব্বদা কট্ঠমুখমুখগতো ৰিয হোতীতি. ৰা-সদ্দো ৰা অনিযমত্থো, তত্রাযমত্থো – কট্ঠমুখেন ডট্ঠো কাযো পত্থদ্ধো হোতি ৰা, ন ৰা হোতি মন্তাগদৰসেন, পথৰীধাতুপ্পকোপেন পন মন্তাগদরহিতো সো কাযো কট্ঠমুখমুখগতো ৰিয হোতি একন্তপত্থদ্ধোতি.

পূতিযোতি কুথিতো. সন্তত্তোতি সব্বসো তত্তো সমুপ্পন্নদাহো. সঞ্ছিন্নোতি সমন্ততো ছিন্নো পরমাণুভেদসঞ্চুণ্ণো আযস্মতো উপসেনত্থেরস্স সরীরং ৰিয. মহাৰিকারানি ভূতানীতি মহাৰিকারৰন্তানি ভূতানি মহাভূতানীতি পুরিমপদে উত্তরপদলোপেন নিদ্দেসো দট্ঠব্বো. ‘‘পথৰী’’তিআদিনা সব্বলোকস্স পাকটানিপি ৰিপল্লাসং মুঞ্চিত্ৰা যথাসভাৰতো পরিগ্গণ্হনে মহন্তেন ৰাযামেন ৰিনা ন পরিগ্গণ্হন্তীতি দুৰিঞ্ঞেয্যসভাৰত্তা ‘‘মহন্তানী’’তি ৰুচ্চন্তি. তানি হি সুৰিঞ্ঞেয্যানি. ‘‘অমহন্তানী’’তি মন্ত্ৰা ঠিতা তেসং দুপ্পরিগ্গহতং দিস্ৰা ‘‘অহো মহন্তানি এতানী’’তি জানাতীতি মহাভূতেকদেসতাদীহি ৰা কারণেহি মহাভূতানি. এতা হি ধাতুযো মহাভূতেকদেসতো, মহাভূতসামঞ্ঞতো, মহাভূতসন্নিস্সযতো, মহাভূতভাৰতো, মহাভূতপরিযোসানতো চাতি ইমেহিপি কারণেহি ‘‘মহাভূতানী’’তি ৰুচ্চন্তি.

তত্থ মহাভূতেকদেসতোতি ‘‘ভূতমিদন্তি, ভিক্খৰে, সমনুপস্সথা’’তিআদীসু (ম. নি. ১.৪০১) হি অৰিসেসেন খন্ধপঞ্চকং ‘‘ভূত’’ন্তি ৰুচ্চতি. তত্থ যদিদং কামভৰে, রূপভৰে, পঞ্চৰোকারভৰে, একচ্চে চ সঞ্ঞীভৰে পৰত্তং খন্ধপঞ্চকং, তং মহাৰিসযতায ‘‘মহাভূত’’ন্তি ৰত্তব্বতং অরহতি. পথৰীআদযো পন চতস্সো ধাতুযো তস্স মহাভূতস্স একদেসভূতা ‘‘মহাভূতা’’তি ৰুচ্চন্তি. সমুদাযেসু হি পৰত্তৰোহারা অৰযৰেসুপি দিস্সন্তি যথা ‘‘সমুদ্দো দিট্ঠো, পটো দড্ঢো’’তি চ. মহাভূতসমঞ্ঞতোতি তদধীনৰুত্তিতায ভৰন্তি এত্থ উপাদারূপানীতি ভূতানি, পথৰীআদযো চতস্সো ধাতুযো. সা পনাযমেতাসু ভূতসমঞ্ঞা অনঞ্ঞত্থৰুত্তিতায উপাদারূপানং অৰিপরীতট্ঠা, লোকস্স চেতা বহূপকারা, চক্খুসমুদ্দাদীনং নিস্সযভূতা চাতি মহন্তানি ভূতানীতি সমঞ্ঞাযিংসু. মহাভূতসন্নিস্সযতোতি মহন্তানং মহানুভাৰানং মহাসম্মতমন্ধাতুপ্পভুতীনং রঞ্ঞং, সক্কাদীনং দেৰানং, ৰেপচিত্তিআদীনং অসুরানং, মহাব্রহ্মাদীনং ব্রহ্মানং, গুণতো ৰা মহন্তানং বুদ্ধানং, পচ্চেকবুদ্ধানং, সাৰকানং উপাদাযুপাদায ৰা সব্বেসম্পি ভূতানং সত্তানং নিস্সযভূততায মহন্তা ভূতা এতেসূতি মহাভূতা. চাতুমহাভূতিকো হি নেসং কাযোতি. মহাভূতভাৰতোতি বহুভূতভাৰতো. অযং হি মহা-সদ্দো ‘‘মহাজনো সন্নিপতিতো’’তিআদীসু বহুভাৰে দিস্সতি. পথৰীআদযো চ ধাতুযো একস্মিম্পি অত্তভাৰে অপরিমেয্যপ্পভেদা পৰত্তন্তি. তস্মা মহন্তা বহূ অনেকসতসহস্সপ্পভেদা ভূতাতি মহাভূতা. মহাভূতপরিযোসানতোতি মহাভূতস্স ৰসেন পরিযোসানপ্পত্তিতো.

‘‘কালো ঘসতি ভূতানি, সব্বানেৰ সহত্তনা;

যো চ কালঘসো ভূতো, স ভূতপচনিং পচী’’তি. (জা. ১.২.১৯০) –

হি এৰমাদীসু খীণাসৰো ‘‘ভূতো’’তি ৰুত্তো. সো হি উচ্ছিন্নভৰনেত্তিকতায আযতিং অপ্পটিসন্ধিকত্তা একন্ততো ‘‘ভূতো’’তি ৰুচ্চতি, ন ইতরে, ভৰিস্সন্তীতি ৰোহারং অনতীতত্তা. ভূতো এৰ ইধ পূজাৰসেন ‘‘মহাভূতো’’তি ৰুত্তো যথা ‘‘মহাখীণাসৰো, মহামোগ্গল্লানো’’তি চ. ইমাসঞ্চ ধাতূনং অনাদিমতি সংসারে পবন্ধৰসেন পৰত্তমানানং যথাৰুত্তস্স মহাভূতস্সেৰ সন্তানে পরিযোসানপ্পত্তি, নাঞ্ঞত্র. তস্মা মহাভূতে ভূতা পরিযোসানং পত্তাতি মহাভূতা পুরিমপদে ভূত-সদ্দস্স লোপং কত্ৰা. এৰমেতা ধাতুযো মহাভূতেকদেসতাদীহি মহাভূতাতি ৰেদিতব্বা. পথৰীআদীনং কক্খল়পগ্ঘরণাদিৰিসেসলক্খণসমঙ্গিতা অপরিচ্চত্তধাতুলক্খণানংযেৰাতি আহ ‘‘ধাতুলক্খণং অনতীতত্তা’’তি. ন হি সামঞ্ঞপরিচ্চাগেন ৰিসেসো, ৰিসেসনিরপেক্খং ৰা সামঞ্ঞং পৰত্ততি. তথা হি ৰদন্তি –

‘‘তমত্থাপেক্খতো ভেদং, সসামঞ্ঞং জহাতি নো;

গণ্হাতি সংসযুপ্পাদা, সমেৰেকত্থকং দ্ৰয’’ন্তি.

সলক্খণধারণেন চাতি যেন সলক্খণধারণেন ‘‘ধাতুযো’’তি ৰুচ্চন্তি, তেনেৰ ‘‘ধম্মা’’তিপি ৰুচ্চন্তি উভযথাপি নিস্সত্তনিজ্জীৰতায এৰ ৰিভাৰনতো. তেনেৰাহ – ‘‘ছধাতুরোযং ভিক্খু পুরিসো, ধম্মেসু ধম্মানুপস্সী ৰিহরতী’’তি চ. অরূপানং খণতো রূপানং খণস্স নাতিইত্তরতাযাহ ‘‘অত্তনো খণানুরূপ’’ন্তি. ধরণেনাতি ঠানেন, পৰত্তনেনাতি অত্থো. খযট্ঠেনাতি খণভঙ্গুতায. ভযট্ঠেনাতি উদযৰযপটিপীল়নাদিনা সপ্পটিভযতায. অসারকট্ঠেনাতি অত্তসারৰিরহেন.

৩৫৩. সহুপ্পন্নাৰ এতাতি এতা চতস্সো ধাতুযো সহ উপ্পন্নাৰ সহ পৰত্তমানাৰ সমানকালে লব্ভমানাপি অৰকংসতো সব্বপরিযন্তিমে উতুচিত্তাহারসমুট্ঠানেসু সুদ্ধট্ঠকে, কম্মজেসু জীৰিতনৰকেতি একেকস্মিং সুদ্ধট্ঠকাদিকলাপেপি পদেসেন অৰিনিব্ভুত্তা ৰিসুং ৰিসুং অনিদ্দিসিতব্বট্ঠানতায. যত্থ হি তিস্সন্নং ধাতূনং পতিট্ঠাৰসেন পথৰী, তত্থেৰ তস্সা আবন্ধনপরিপাচনসমুদীরণৰসেন ইতরা. এস নযো সেসাসুপি.

৩৫৪. পুরিমা দ্ৰে গরুকত্তা সভাগা অঞ্ঞমঞ্ঞন্তি অধিপ্পাযো. এত্থ চ ননু পথৰিযাপি লহুভাৰো অত্থি. তথা হি সা ‘‘কক্খল়ং মুদুকং সণ্হং ফরুসং গরুকং লহুক’’ন্তি নিদ্দিট্ঠা, আপেপি লহুভাৰো লব্ভতেৰাতি? ন, নিপ্পরিযাযগরুভাৰস্স অধিপ্পেতত্তা. গরুভাৰো এৰ হি পথৰীধাতুযা গরুতরং উপাদায লহুভাৰোতি পরিযাযেন ৰুত্তো সীতভাৰো ৰিয তেজোধাতুযা. যদি এৰং রূপস্স লহুতাতি কথং? অযম্পি ৰুত্তনযা এৰ লহুতাকারং উপাদায লব্ভনতো. ন হি পরিচ্ছেদৰিকারলক্খণানি পরমত্থতো লব্ভন্তি নিপ্ফন্নরূপানং অৰত্থাৰিসেসসভাৰতো. তস্মা পরমত্থসিদ্ধং গরুভাৰং সন্ধায ৰুত্তং ‘‘পুরিমা দ্ৰে গরুকত্তা সভাগা’’তি. ‘‘তথা’’তি পদেন ‘‘সভাগা’’তি ইমমত্থং উপসংহরতি. ‘‘দ্ৰে’’তি পন ইদং যথা ‘‘পুরিমা’’তি এত্থ, এৰং ‘‘পচ্ছিমা’’তি এত্থাপি আনেত্ৰা সম্বন্ধিতব্বং. ৰিসভাগা গরুকলহুকভাৰতোতি অধিপ্পাযো. যথা চ গরুকলহুকভাৰেহি, এৰং পেয্যভাৰাপেয্যভাৰেহি চ সভাগৰিসভাগতা যোজেতব্বা.

৩৫৫. অজ্ঝত্তিকা হেট্ঠা ৰুত্তঅজ্ঝত্তিকা, সত্তসন্তানপরিযাপন্নাতি অত্থো. ৰিঞ্ঞাণৰত্থু ৰিঞ্ঞত্তিইন্দ্রিযানন্তি চক্খাদীনং ছন্নং ৰিঞ্ঞাণৰত্থূনং, দ্ৰিন্নং ৰিঞ্ঞত্তীনং, ইত্থিপুরিসিন্দ্রিযজীৰিতিন্দ্রিযানঞ্চ. যে পন ‘‘ৰিঞ্ঞাণৰত্থূতি হদযৰত্থু গহিত’’ন্তি ৰদন্তি, তেসং ইন্দ্রিয-গ্গহণেন অট্ঠন্নম্পি রূপিন্দ্রিযানং গহণং ৰেদিতব্বং. ‘‘ৰুত্তৰিপরীতপ্পকারা’’তি ইদং বাহিরানং ধাতূনং যথা সব্বসো ৰিঞ্ঞাণৰত্থুৰিঞ্ঞত্তিইন্দ্রিযানং অনিস্সযতা চ ইরিযাপথৰিরহো চ ৰুত্তৰিপরিযাযো, এৰং চতুসমুট্ঠানতাপীতি কত্ৰা ৰুত্তং, ন লক্খণরূপস্স ৰিয কুতোচিপি সমুট্ঠানস্স অভাৰতো উতুসমুট্ঠানতায তাসং. লহুতাদিনিস্সযতাপি অজ্ঝত্তিকানং ধাতূনং ৰত্তব্বা, ন ৰা ৰত্তব্বা. ৰিঞ্ঞত্তি-গ্গহণং হি লক্খণন্তি.

৩৫৬. ইতরাহীতি আপোতেজোৰাযুধাতূহি. একসঙ্গহাতি সজাতিসঙ্গহেন একসঙ্গহা. সমানজাতিযানং হি সঙ্গহো সহজাতিসঙ্গহো. তেনাহ ‘‘সমুট্ঠাননানত্তাভাৰতো’’তি.

৩৫৭. তিণ্ণং মহাভূতানং পতিট্ঠা হুত্ৰা পচ্চযো হোতীতি যেহি মহাভূতেহি সম্পিণ্ডনৰসেন সঙ্গহিতা, পরিপাচনৰসেন অনুপালিতা, সমুদীরণৰসেন ৰিত্থম্ভিতা চ, তেসং অত্তনা সহজাতানং তিণ্ণং মহাভূতানং পতিট্ঠা হুত্ৰা ততো এৰ সন্ধারণৰসেন অৰস্সযো হোতি, ৰুত্তনযেন ৰা পতিট্ঠা হুত্ৰা সহজাতাদিৰসেন পচ্চযো হোতীতি. এস নযো সেসাসুপি.

৩৫৮. যদিপি অঞ্ঞমঞ্ঞআভোগপচ্চৰেক্খণরহিতা এতে ধম্মাতি হেট্ঠা ধাতূনং অসমন্নাহারতা দস্সিতা এৰ, অথাপি ইমিনাৰ নযেন ৰিসুং কম্মট্ঠানপরিগ্গহো কাতব্বোতি দস্সেন্তো ‘‘পথৰীধাতু চেত্থা’’তিআদিমাহ. তত্থ পথৰীধাতু চেত্থাতি চ-সদ্দো সম্পিণ্ডনত্থো, তেন অযম্পি একো মনসিকারপ্পকারোতি দীপেতি. এত্থাতি এতাসু ধাতূসু. অহং ‘‘পথৰীধাতূ’’তি ৰা ‘‘পচ্চযো হোমী’’তি ৰা ন জানাতীতি অত্তনি ৰিয অত্তনো কিচ্চে চ আভোগাভাৰং দস্সেত্ৰা উপকারকস্স ৰিয উপকত্তব্বানম্পি আভোগাভাৰং দস্সেতুং ‘‘ইতরানিপী’’তিআদি ৰুত্তং. সব্বত্থাতি সব্বাসু ধাতূসু, তত্থাপি অত্তকিচ্চুপকত্তব্বভেদেসু সব্বেসু.

৩৫৯. পচ্চযৰিভাগতোতি পচ্চযধম্মৰিভাগতো চেৰ পচ্চযভাৰৰিভাগতো চ. ‘‘পচ্চযতো’’তি হি ইমিনা পথৰীআদীনং অঞ্ঞাসাধারণো পতিট্ঠাভাৰাদিনা সেসভূতত্তযস্স পচ্চযভাৰো ৰুত্তো. ইধ পন যেহি ধম্মেহি পথৰীআদীনং উপ্পত্তি, তেসং পথৰীআদীনঞ্চ অনৰসেসতো পচ্চযভাৰৰিভাগো ৰুচ্চতীতি অযং ইমেসং দ্ৰিন্নং আকারানং ৰিসেসো. কম্মন্তি কুসলাকুসলং রূপুপ্পাদকং কম্মং. চিত্তন্তি যং কিঞ্চি রূপুপ্পাদকং চিত্তং. আহারোতি অজ্ঝত্তিকো রূপুপ্পাদকো আহারো. উতূতি যো কোচি উতু, অত্থতো তেজোধাতু. কম্মমেৰাতি অৰধারণং সমুট্ঠানসঙ্করাভাৰদস্সনত্থং, তেন অকম্মজানম্পি কেসঞ্চি কম্মস্স পরিযাযপচ্চযভাৰো দীপিতো হোতি. তথা হি ৰক্খতি ‘‘কম্মপচ্চযচিত্তসমুট্ঠান’’ন্তিআদি. ননু চ কম্মসমুট্ঠানানং কম্মতো অঞ্ঞেনপি পচ্চযেন ভৰিতব্বন্তি? ভৰিতব্বং, সো পন কম্মগতিকোৰাতি পটিযোগীনিৰত্তনত্থং অৰধারণং কতং, তেনাহ ‘‘ন চিত্তাদযো’’তি. চিত্তাদিসমুট্ঠানানন্তি এত্থাপি অযমত্থো যথারহং ৰত্তব্বো. ইতরেতি চিত্তাদিতো অঞ্ঞে. জনকপচ্চযোতি সমুট্ঠাপকতং সন্ধায ৰুত্তং, পচ্চযো পন কম্মপচ্চযোৰ. ৰুত্তং হি ‘‘কুসলাকুসলা চেতনা ৰিপাকানং খন্ধানং কটত্তা চ রূপানং কম্মপচ্চযেন পচ্চযো’’তি (পট্ঠা. ১.১.৪২৭).

সেসানন্তি চিত্তাদিসমুট্ঠানানং. পরিযাযতো উপনিস্সযপচ্চযো হোতীতি পট্ঠানে (পট্ঠা. ১.১.৯) অরূপানংযেৰ উপনিস্সযপচ্চযস্স আগতত্তা নিপ্পরিযাযেন রূপধম্মানং উপনিস্সযপচ্চযো নত্থি. সুত্তে পন ‘‘পুগ্গলং উপনিস্সায ৰনসণ্ডং উপনিস্সাযা’’তি ৰচনতো সুত্তন্তিকপরিযাযেন ৰিনা অভাৰো উপনিস্সযপচ্চযোতি ৰেদিতব্বো. চিত্তং জনকপচ্চযো হোতীতি সহজাতনিস্সযাহারাদিৰসেন পচ্চযো হোন্তং চিত্তং সমুট্ঠাপকতং উপাদায ‘‘জনকপচ্চযো হোতী’’তি ৰুত্তং. আহারউতূসুপি এসেৰ নযো.

এৰং কম্মাদীনং পচ্চযধম্মানং ৰসেন ধাতূসু পচ্চযৰিভাগং দস্সেত্ৰা ইদানি তংসমুট্ঠানানং ধাতূনম্পি ৰসেন পচ্চযৰিভাগং দস্সেন্তো পঠমং তাৰ ‘‘কম্মসমুট্ঠানং মহাভূত’’ন্তিআদিনা উদ্দিসিত্ৰা পুন ‘‘তত্থ কম্মসমুট্ঠানা পথৰীধাতূ’’তিআদিনা নিদ্দিসতি. তত্থ কম্মসমুট্ঠানা পথৰীধাতূতি ‘‘কম্মসমুট্ঠানং মহাভূত’’ন্তি এত্থ সামঞ্ঞতো ৰুত্তা কম্মজপথৰীধাতু. কম্মসমুট্ঠানানং ইতরাসন্তি কম্মজানং আপোধাতুআদীনং তিস্সন্নং ধাতূনং সহুপ্পত্তিযা অত্তনো উপকারকানং তাসং উপকারকতো, আধারভাৰতো, উপ্পাদতো যাৰ ভঙ্গাধরণতো, ৰিগমাভাৰতো চ সহজাতঅঞ্ঞমঞ্ঞনিস্সযঅত্থিঅৰিগতৰসেন চেৰ পতিট্ঠাৰসেন চ পচ্চযো হোতি, হোন্তী চ কম্মং ৰিয অত্তনো, তাসঞ্চ ন জনকৰসেন পচ্চযো হোতি অসমুট্ঠাপকত্তা তাসং. কামঞ্চেত্থ নিস্সযপচ্চয-গ্গহণেনেৰ পতিট্ঠাভাৰো সঙ্গহিতো, পথৰীধাতুযা পন অনঞ্ঞসাধারণকিচ্চং সহজাতানং পতিট্ঠাভাৰোতি ইমং ৰিসেসং দস্সেতুং ‘‘পতিট্ঠাৰসেন চা’’তি ৰিসুং কত্ৰা ৰুত্তং. আবন্ধনৰসেন চাতিআদীসুপি এসেৰ নযো. তিসন্ততিমহাভূতানন্তি উতুচিত্তাহারসমুট্ঠানানং চতুমহাভূতানং অঞ্ঞমঞ্ঞং অৰোকিণ্ণানং, অৰিচ্ছেদেন পৰত্তিং উপাদায সন্ততীতি সন্ততিগ্গহণং. পথৰীধাতুযা পতিট্ঠাভাৰো নাম সহজাতানং ধম্মানংযেৰাতি আহ ‘‘ন পতিট্ঠাৰসেনা’’তি. ন আবন্ধনৰসেনাতিআদীসুপি এসেৰ নযো. এত্থাতি এতেসু কম্মসমুট্ঠানমহাভূতেসু. ‘‘চিত্তসমুট্ঠানা পথৰীধাতু চিত্তসমুট্ঠানানং ইতরাস’’ন্তিআদীসু সুকরো তন্তিনযো নেতুন্তি ‘‘চিত্তআহার…পে… এসেৰ নযো’’তি অতিদিসতি.

সহজাতাদিপচ্চযৰসপ্পৰত্তাসু চ পনাতি এত্থ চ-সদ্দো সমুচ্চযত্থো, পন-সদ্দো ৰিসেসত্থো, তদুভযেন চ যথাৰুত্তসহজাতাদিপচ্চযেহি পৰত্তমানা ধাতুযো ইমিনা ৰিসেসেন পৰত্তন্তীতি ইমমত্থং দীপেতি.

ইদানি তং ৰিসেসং দস্সেতুং ‘‘একং পটিচ্চা’’তিগাথমাহ. তত্থ একং ধাতুং পটিচ্চ তিস্সো ধাতুযো চতুধা সম্পৰত্তন্তি, তিস্সো ধাতুযো পটিচ্চ একাৰ ধাতু চতুধা সম্পৰত্ততি, দ্ৰে ধাতুযো পটিচ্চ দ্ৰে ধাতুযো ছধা সম্পৰত্তন্তীতি যোজনা. অত্থো পন পথৰীআদীসু একেকিস্সা পচ্চযভাৰে ইতরাসং তিস্সন্নং তিস্সন্নং পচ্চযুপ্পন্নতাতি অযমেকো চতুক্কো, তিস্সন্নং তিস্সন্নং পচ্চযভাৰে ইতরায একেকিস্সা পচ্চযুপ্পন্নতাতি অযমপরো চতুক্কো, পঠমদুতিযা, ততিযচতুত্থা, পঠমততিযা, দুতিযচতুত্থা, পঠমচতুত্থা, দুতিযততিযাতি ইমাসং দ্ৰিন্নং দ্ৰিন্নং পচ্চযভাৰে তত্থ তত্থ ইতরাসং দ্ৰিন্নং দ্ৰিন্নং পচ্চযুপ্পন্নতাতি অযমেকো ছক্কো. এৰং পচ্চযভাৰেন চতুধা, ছধা চ পৰত্তমানানং এককদ্ৰিকতিকৰসেন তিকদুকএককৰসেন চ যথাক্কমং পচ্চযপচ্চযুপ্পন্নতাৰিভাগো ৰেদিতব্বো. অযঞ্চ পচ্চযভাৰো সহজাতঅঞ্ঞমঞ্ঞনিস্সযঅত্থিঅৰিগতপচ্চযৰসেন, তত্থাপি চ অঞ্ঞমঞ্ঞমুখেনেৰ ৰেদিতব্বো. যং সন্ধায ৰুত্তং পটিচ্চৰারে ‘‘একং মহাভূতং পটিচ্চ তযো মহাভূতা, তযো মহাভূতে পটিচ্চ একং মহাভূতং, দ্ৰে মহাভূতে পটিচ্চ দ্ৰে মহাভূতা উপ্পজ্জন্তী’’তি (পট্ঠা. ১.১.৫৩).

অভিক্কমপটিক্কমাদীতি আদি-সদ্দেন আদানৰিস্সজ্জনাদিকাযিককিরিযাকরণস্স সঙ্গহো দট্ঠব্বো. উপ্পীল়নস্স পচ্চযো হোতি ঘট্টনকিরিযায পথৰীধাতুৰসেন সিজ্ঝনতো. সাৰাতি পথৰীধাতুযেৰ. আপোধাতুযা অনুগতা আপোধাতুযা তত্থ অপ্পধানভাৰং, পথৰীধাতুযা চ পধানভাৰন্তি পতিট্ঠাভাৰে ৰিয পতিট্ঠাপনেপি সাতিসযকিচ্চত্তা তস্সা পতিট্ঠাপনস্স পাদট্ঠপনস্স পচ্চযো হোতীতি সম্বন্ধো. অৰক্খেপনস্সাতি অধোনিক্খিপনস্স. তত্থ চ গরুতরসভাৰায আপোধাতুযা সাতিসযো ব্যাপারোতি আহ ‘‘পথৰীধাতুযা অনুগতা আপোধাতূ’’তি. তথা উদ্ধঙ্গতিকা তেজোধাতূতি উদ্ধরণে ৰাযোধাতুযা তস্সা অনুগতভাৰো ৰুত্তো. তিরিযং গতিকায ৰাযোধাতুযা অতিহরণৰীতিহরণেসু সাতিসযো ব্যাপারোতি তেজোধাতুযা তস্সা অনুগতভাৰো গহিতো. তত্থ ঠিতট্ঠানতো অভিমুখং পাদস্স হরণং অতিহরণং, পুরতো হরণং. ততো থোকং ৰীতিক্কম্ম হরণং ৰীতিহরণং, পস্সতো হরণং.

একেকেন মুখেনাতি ‘‘পত্থটত্তা পথৰী’’তিআদিনা (ৰিসুদ্ধি. ১.৩৪৭) ৰিভত্তেসু তেরসসু আকারেসু একেকেন ধাতূনং পরিগ্গণ্হনমুখেন. স্ৰাযন্তি সো অযং উপচারসমাধি. কথং পনস্স ৰৰত্থানপরিযাযোতি আহ ‘‘চতুন্নং ধাতূন’’ন্তিআদি.

৩৬০. ইদানি ইমিস্সা ভাৰনায আনিসংসে দস্সেতুং ‘‘ইদঞ্চ পনা’’তিআদি ৰুত্তং. সুঞ্ঞতং অৰগাহতীতি ধাতুমত্ততাদস্সনেন রূপকাযস্স অনত্তকতং ৰৰত্থাপযতো তদনুসারেন নামকাযস্সাপি অনত্তকতা সুপাকটা হোতীতি সব্বসো অত্তসুঞ্ঞতং পরিযোগাহতি তত্থ পতিট্ঠহতি. সত্তসঞ্ঞং সমুগ্ঘাতেতীতি ততো এৰ ‘‘সত্তো পোসো ইত্থী পুরিসো’’তি এৰং পৰত্তং অযাথাৰসঞ্ঞং উগ্ঘাতেতি সমূহনতি. ৰাল়মিগযক্খরক্খসাদিৰিকপ্পং অনাৰজ্জমানোতি সসন্তানে ৰিয পরসন্তানেপি ধাতুমত্ততায সুদিট্ঠত্তা খীণাসৰো ৰিয ‘‘ইমে সীহব্যগ্ঘাদযো ৰাল়মিগা, ইমে যক্খরক্খসা’’তি এৰমাদিৰিকপ্পং অকরোন্তো ভযভেরৰং সহতি অভিভৰতি. যথাৰুত্তৰিকপ্পনাপজ্জনং হি ভযভেরৰসহনস্স কারণং ৰুত্তং. উগ্ঘাতো উপ্পিলাৰিতত্তং. নিগ্ঘাতো দীনভাৰপ্পত্তি. মহাপঞ্ঞো চ পন হোতি ধাতুৰসেন কাযে সম্মদেৰ ঘনৰিনিব্ভোগস্স করণতো. তথা হিদং কম্মট্ঠানং বুদ্ধিচরিতস্স অনুকূলন্তি ৰুত্তং, সুগতিপরাযণো ৰা ইন্দ্রিযানং অপরিপক্কতাযন্তি অধিপ্পাযো.

একূনৰীসতিভাৰনানযপটিমণ্ডিতস্স

চতুধাতুৰৰত্থাননিদ্দেসস্স লীনত্থৰণ্ণনা নিট্ঠিতা.

৩৬১. ‘‘কো সমাধী’’তিআদিনা সরূপাদিপুচ্ছা যাৰদেৰ ৰিভাগাৰবোধনত্থা. সরূপাদিতো হি ঞাতস্স পভেদো ৰুচ্চমানো সুৰিঞ্ঞেয্যো হোতি সঙ্খেপপুব্বকত্তা ৰিত্থারস্স, ৰিত্থারৰিধিনা চ সঙ্খেপৰিধি সঙ্গয্হতীতি ‘‘সমাধিস্স ৰিত্থারং ভাৰনানযঞ্চ দস্সেতু’’ন্তি ৰুত্তং. অথ ৰা ‘‘কো সমাধী’’তিআদিনাপি সমাধিস্সেৰ পকারভেদো দস্সীযতি, ভাৰনানিসংসোপি ভাৰনানযনিস্সিতো এৰাতি অধিপ্পাযেন ‘‘ৰিত্থারং ভাৰনানযঞ্চ দস্সেতু’’ন্তি ৰুত্তং. সব্বপ্পকারতোতি পলিবোধুপচ্ছেদাদিকস্স সব্বস্স ভাৰনায পুব্বকিচ্চস্স করণপ্পকারতো চেৰ সব্বকম্মট্ঠানভাৰনাৰিভাৰনতো চ.

‘‘সমত্তা হোতী’’তি ৰত্ৰা তমেৰ সমত্তভাৰং ৰিভাৰেতুং ‘‘দুৰিধোযেৰা’’তিআদি ৰুত্তং. ইধ অধিপ্পেতো সমাধীতি লোকিযসমাধিং আহ. দসসু কম্মট্ঠানেসূতি যানি হেট্ঠা ‘‘উপচারাৰহানী’’তি ৰুত্তানি দস কম্মট্ঠানানি, তেসু. অপ্পনাপুব্বভাগচিত্তেসূতি অপ্পনায পুব্বভাগচিত্তেসু অট্ঠন্নং ঝানানং পুব্বভাগচিত্তুপ্পাদেসু. একগ্গতাতি একাৰজ্জনৰীথিযং, নানাৰজ্জনৰীথিযঞ্চ একগ্গতা. অৰসেসকম্মট্ঠানেসূতি ‘‘অপ্পনাৰহানী’’তি ৰুত্তেসু তিংসকম্মট্ঠানেসু.

সমাধিআনিসংসকথাৰণ্ণনা

৩৬২. দিট্ঠধম্মো ৰুচ্চতি পচ্চক্খভূতো অত্তভাৰো, তত্থ সুখৰিহারো দিট্ঠধম্মসুখৰিহারো. কামং ‘‘সমাপজ্জিত্ৰা’’তি এতেন অপ্পনাসমাধিযেৰ ৰিভাৰিতো, ‘‘একগ্গচিত্তা’’তি পন পদেন উপচারসমাধিনোপি গহণং হোতীতি ততো নিৰত্তনত্থং ‘‘অপ্পনাসমাধিভাৰনা’’তি ৰুত্তং. ন খো পনেতেতি এতে বাহিরকভাৰিতা ঝানধম্মা চিত্তেকগ্গতামত্তকরা. অরিযস্স ৰিনযে বুদ্ধস্স ভগৰতো সাসনে ‘‘সল্লেখা’’তি ন ৰুচ্চন্তি কিলেসানং সল্লেখনপটিপদা ন হোতীতি কত্ৰা, সাসনে পন অৰিহিংসাদযোপি সল্লেখাৰ লোকুত্তরপাদকত্তা.

সম্বাধেতি তণ্হাসংকিলেসাদিনা সংকিলিট্ঠতায পরমসম্বাধে অতিৰিয সঙ্কটট্ঠানভূতে সংসারপ্পৰত্তে. ওকাসাধিগমনযেনাতি অত্থপটিলাভযোগ্গস্স নৰমখণসঙ্খাতস্স ওকাসস্স অধিগমনযেন. তস্স হি দুল্লভতায অপ্পনাধিগমম্পি অনধিগমযমানো সংৰেগবহুলো পুগ্গলো উপচারসমাধিম্হিযেৰ ঠত্ৰা ৰিপস্সনায কম্মং করোতি ‘‘সীঘং সংসারদুক্খং সমতিক্কমিস্সামী’’তি.

অভিঞ্ঞাপাদকন্তি ইদ্ধিৰিধাদিঅভিঞ্ঞাঞাণপাদকভূতং অধিট্ঠানভূতং. হোতীতি ৰুত্তনযাতি এত্থ ইতি-সদ্দো পকারত্থো, তেন ‘‘ইমিনা পকারেন ৰুত্তনযা’’তি সেসাভিঞ্ঞানম্পি ৰুত্তপ্পকারং সঙ্গণ্হাতি. সতি সতি আযতনেতি পুরিমভৰসিদ্ধে অভিঞ্ঞাধিগমস্স কারণে ৰিজ্জমানে. অভিঞ্ঞাধিগমস্স হি অধিকারো ইচ্ছিতব্বো, যো ‘‘পুব্বহেতূ’’তি ৰুচ্চতি. ন সমাপত্তীসু ৰসীভাৰো. তেনাহ ভগৰা ‘‘সতি সতি আযতনে’’তি (ম. নি. ৩.১৫৮; অ. নি. ৩.১০২). অভিঞ্ঞাসচ্ছিকরণীযস্সাতি ৰক্খমানৰিভাগায অভিৰিসিট্ঠায পঞ্ঞায সচ্ছিকাতব্বস্স. ধম্মস্সাতি ভাৰেতব্বস্স চেৰ ৰিভাৰেতব্বস্স চ ধম্মস্স. অভিঞ্ঞাসচ্ছিকিরিযায চিত্তং অভিনিন্নামেতীতি যোজনা. তত্র তত্রেৰাতি তস্মিং তস্মিংযেৰ সচ্ছিকাতব্বধম্মে. সক্খিভাৰায পচ্চক্খকারিতায ভব্বো সক্খিভব্বো, তস্স ভাৰো সক্খিভব্বতা, তং সক্খিভব্বতং.

তং তং ভৰগমিকম্মং আরব্ভ ভৰপত্থনায অনুপ্পন্নাযপি কম্মস্স কতূপচিতভাৰেনেৰ ভৰপত্থনাকিচ্চং সিজ্ঝতীতি দস্সেন্তো আহ ‘‘অপত্থযমানা ৰা’’তি. সহ ব্যেতি পৰত্ততীতি সহব্যো, সহাযো, ইধ পন একভৰূপগো অধিপ্পেতো, তস্স ভাৰো সহব্যতা, তং সহব্যতং.

কিং পন অপ্পনাসমাধিভাৰনাযেৰ ভৰৰিসেসানিসংসা, উদাহু ইতরাপীতি চোদনং মনসি কত্ৰা আহ ‘‘উপচারসমাধিভাৰনাপী’’তিআদি.

নিব্বানন্তি তিস্সন্নং দুক্খতানং নিব্বুতিং. রূপধম্মে পরিযাপন্না ৰিজ্জমানাপি সঙ্খারদুক্খতা চিত্তস্স অভাৰেন অসন্তসমাৰ. তেনাহ ‘‘সুখং ৰিহরিস্সামা’’তি. সোল়সহি ঞাণচরিযাহীতি অনিচ্চানুপস্সনাদুক্খঅনত্তনিব্বিদাৰিরাগনিরোধপটিনিস্সগ্গৰিৰট্টানুপস্সনাতি ইমাহি অট্ঠহি, অট্ঠহি চ অরিযমগ্গফলঞাণেহীতি এৰং সোল়সহি. নৰহি সমাধিচরিযাহীতি পঞ্চন্নং রূপজ্ঝানানং, চতুন্নং অরূপজ্ঝানানঞ্চ ৰসেন এৰং নৰহি. কেচি পন ‘‘চত্তারো রূপজ্ঝানসমাধী, চত্তারো অরূপজ্ঝানসমাধী, উভযেসং উপচারসমাধিং একং কত্ৰা এৰং নৰা’’তি ৰদন্তি.

সমাধিভাৰনাযোগেতি সমাধিভাৰনায অনুযোগে অনুযুঞ্জনে, সমাধিভাৰনাসঙ্খাতে ৰা যোগে. যোগোতি ভাৰনা ৰুচ্চতি. যথাহ ‘‘যোগা ৰে জাযতী ভূরী’’তি (ধ. প. ২৮২).

৩৬৩. সমাধিপীতি পি-সদ্দেন সীলং সম্পিণ্ডেতি.

সমাধিনিদ্দেসৰণ্ণনা নিট্ঠিতা.

ইতি একাদসমপরিচ্ছেদৰণ্ণনা.

পঠমো ভাগো নিট্ঠিতো.