📜

নমো তস্স ভগৰতো অরহতো সম্মাসম্বুদ্ধস্স

নিরুত্তিদীপনীপাঠ

গন্থারম্ভ

১.

চতুরাসীতিসহস্স ¶ , ধম্মক্খন্ধাপভঙ্করা;

লোকম্হি যস্স জোতন্তি, নন্তৰণ্ণপভস্সরা.

২.

অনন্তৰণ্ণং সম্বুদ্ধং, ৰন্দে নিরুত্তিপারগুং;

সদ্ধম্মঞ্চস্স সঙ্ঘঞ্চ, ৰিসুদ্ধৰণ্ণভাজনং.

৩.

মোগ্গল্লানো মহাঞাণী, নিরুত্তারঞ্ঞকেসরী;

নদি ব্যাকরণংনাদং, সোগতারঞ্ঞব্যাপনং.

৪.

তস্সত্থং দীপযিস্সামি, নানারাসিংৰিভাজযং;

ওগায্হ সদ্দসত্থানি, নৰঙ্গং সত্থুসাসনন্তি.

১. সন্ধিকণ্ড

সঞ্ঞারাসি

গরুসঞ্ঞারাসি

ৰণ্ণো ¶ , সরো, সৰণ্ণো, দীঘো, রস্সো, ব্যঞ্জনো, ৰগ্গো, নিগ্গহীতং.

১. অআদযো তিতালীসং [তিতালীস (বহূসু)] ৰণ্ণা [ক. ২; রূ. ২; নী. ১, ২].

অআদযো বিন্দন্তা তেচত্তালীসক্খরা ৰণ্ণা নাম হোন্তি.

অ, আ, ই, ঈ, উ, ঊ, এত, এ, ওত, ও. ক, খ, গ, ঘ, ঙ, চ, ছ, জ, ঝ, ঞ, ট, ঠ, ড, ঢ, ণ, ত, থ, দ, ধ, ন, প, ফ, ব, ভ, ম, য, র, ল,ৰ স, হ, ল়, অং. অত্থং ৰণ্ণেন্তি পকাসেন্তীতি ৰণ্ণা, অক্খরাতি চ ৰুচ্চন্তি, নামপঞ্ঞত্তিরূপত্তা নক্খরন্তি খযৰযং ন গচ্ছন্তীতি অক্খরা. ‘‘নামগোত্তং ন জীরতী’’তি [সং. নি. ১.৭৬] হি ৰুত্তং.

২. দসাদো সরা [ক. ৩; রূ. ৩; নী. ৩].

তেসু ৰণ্ণেসু আদিম্হি দস ৰণ্ণা সরা নাম হোন্তি. সযমেৰ লদ্ধসরূপা হুত্ৰা রাজন্তি ৰিরোচন্তীতি সরা.

৩. দ্ৰে দ্ৰে সৰণ্ণা.

তেসু সরেসু দ্ৰে দ্ৰেসরা সৰণ্ণা নাম হোন্তি.

অ, আ অৰণ্ণো, ই, ঈ ইৰণ্ণো, উ, ঊ উৰণ্ণো, এত, এ এতৰণ্ণো, ওত, ও ওতৰণ্ণো. সমানো ৰণ্ণো সুতি এতেসন্তি সৰণ্ণা, সরূপাতি চ ৰুচ্চন্তি, সমানং রূপং সুতি এতেসন্তি সরূপা.

৪. পুব্বো রস্সো [ক. ৪; রূ. ৪; নী. ৪.২২].

দ্ৰীসু ¶ দ্ৰীসু সৰণ্ণেসু যো যো পুব্বো হোতি, সো সো রস্সো নাম হোতি. রস্সেন কালেন ৰত্তব্বাতি রস্সা, রস্সকালো নাম অক্খিদলানং উম্মিসননিম্মিসনসমকালো.

তত্থ এত, ওত ইতি দ্ৰে একপদসংযোগে পরে ক্ৰচি লব্ভন্তি. এট্ঠি, সেট্ঠো, ওট্ঠো, সোত্থি.

একপদসংযোগেতি কিং? পদন্তরসংযোগে পরে রস্সা মা হোন্তূতি. মং চে ত্ৰং নিখণং ৰনে, [জা. ২.২২.৫] পুত্তো ত্যাহং মহারাজ [জা. ১.১.৭].

ক্ৰচীতি কিং? একপদসংযোগেপি ৰগ্গন্তেসু ৰা য, র, ল, ৰেসু ৰা পরেসু রস্সা মা হোন্তূতি. এন্তি, সেন্তি, এয্য, ভাসেয্য, মেণ্ডো, সোণ্ডো.

৫. পরো দীঘো [ক. ৫; রূ. ৫; নী. ৫].

দ্ৰীসু দ্ৰীসু সৰণ্ণেসু যো যো পরো হোতি, সো সো দীঘো নাম হোতি. দীঘেন কালেন ৰত্তব্বাতি দীঘা, দীঘকালো নাম রস্সেহি দিগুণকালো.

৬. কাদযো ব্যঞ্জনা [ক. ৬; রূ. ৮; নী. ৬].

তেসু ৰণ্ণেসু কাদযো বিন্দন্তা ৰণ্ণা ব্যঞ্জনা নাম হোন্তি. অত্থং ব্যঞ্জযন্তীতি ব্যঞ্জনা. তে পন সুদ্ধা অদ্ধমত্তিকা, রস্সযুত্তা দিযদ্ধমত্তিকা, দীঘযুত্তা তিযদ্ধমত্তিকা.

৭. পঞ্চপঞ্চকা ৰগ্গা [ক. ৭; রূ ৯; নী. ৭].

তেসু ব্যঞ্জনেসু কাদি-মন্তা পঞ্চব্যঞ্জনপঞ্চকা ৰগ্গা নাম হোন্তি.

কাদি ¶ পঞ্চকো কৰগ্গো, চাদি চ ৰগ্গো, টাদি টৰগ্গো, তাদি তৰগ্গো, পাদি পৰগ্গো. সেসা অৰগ্গাতি সিদ্ধং. ৰণ্ণুদ্দেসে একট্ঠানিকানং ব্যঞ্জনানং ৰগ্গে সমূহে নিযুত্তাতি ৰগ্গা.

৮. বিন্দু নিগ্গহীতং [ক. ৮; রূ. ১০; নী. ৮].

অন্তে বিন্দুমত্তো ৰণ্ণো নিগ্গহীতং নাম. নিগ্গয্হ গয্হতি উচ্চারিযতীতি নিগ্গহীতং.

গরুসঞ্ঞারাসি নিট্ঠিতো.

ব্যঞ্জনৰুত্তিরাসি

ঠানং, করণং, পযতনং [রূ. ২ (পিট্ঠে); নী ৬ (পিট্ঠে); ২৩ (সুত্তঙ্কে)].

ছ ঠানানি – কণ্ঠট্ঠানং, তালুট্ঠানং, মুদ্ধট্ঠানং, দন্তট্ঠানং, ওট্ঠট্ঠানং, নাসিকট্ঠানং. তেসু ব্যত্তং ৰদন্তেন যত্থ ‘‘অক্খ’’ন্তি ৰুচ্চতি, তং কণ্ঠট্ঠানং. যত্থ ‘‘ইচ্ছ’’ন্তি, তং তালুট্ঠানং. যত্থ ‘‘রট্ঠ’’ন্তি, তং মুদ্ধট্ঠানং. যত্থ ‘‘সত্থ’’ন্তি, তং দন্তট্ঠানং. যত্থ ‘‘পুপ্ফ’’ন্তি ৰুচ্চতি, তং ওট্ঠট্ঠানং. নাসপদেসো নাসিকট্ঠানং.

কত্থচি পন উরট্ঠানং, সিরট্ঠানং, জিৰ্হামূলট্ঠানন্তিপি আগতং. তত্থ সিরট্ঠানং নাম মুদ্ধট্ঠানমেৰ. জিৰ্হামূলট্ঠানং পন সব্বৰণ্ণানং সাধারণন্তি ৰদন্তি.

করণং চতুব্বিধং – জিৰ্হামূলং, জিৰ্হোপগ্গং, জিৰ্হগ্গং, সকট্ঠানন্তি.

পযতনং চতুব্বিধং – সংৰুটং, ৰিৰটং, ফুট্ঠং, ঈসংফুট্ঠন্তি. তত্থ করণানং সকসকট্ঠানেহি সদ্ধিং সংৰরণাদিকো ৰিসেসাকারো সংৰুটাদি নাম.

তত্থ কণ্ঠপদেসানং অঞ্ঞমঞ্ঞং সঙ্ঘট্টনেন উপ্পন্না অৰণ্ণ, কৰগ্গ, হকারা কণ্ঠজা নাম. তালুম্হি জিৰ্হামজ্ঝসঙ্ঘট্টনেন উপ্পন্না ইৰণ্ণ, চৰগ্গ, যকারা তালুজা নাম. মুখব্ভন্তরমুদ্ধম্হি ¶ জিৰ্হোপগ্গসঙ্ঘট্টনেন উপ্পন্না টৰগ্গ, র, ল়কারা মুদ্ধজা নাম. উপরি দন্তপন্তিযং জিৰ্হগ্গসঙ্ঘট্টনেন উপ্পন্না তৰগ্গ, ল, সকারা দন্তজা নাম. ওট্ঠদ্ৰযসঙ্ঘট্টনেন উপ্পন্না উৰণ্ণ, পৰগ্গা ওট্ঠজা নাম. নিগ্গহীতং নাসিকজং নাম. পঞ্চৰগ্গন্তা পন নাসিকট্ঠানেপি সকট্ঠানেপি জাযন্তি. একারো কণ্ঠতালুজো. ওকারো কণ্ঠোট্ঠজো. ৰকারো দন্তোট্ঠজো. অপিচ ইৰণ্ণুৰণ্ণা কণ্ঠেপি জাযন্তিযেৰ. যদা হকারো ৰগ্গন্তেহি ৰা য, র, ল, ৰেহি ৰা যুত্তো হোতি, তদা উরজোতি ৰদন্তি. পঞ্হো, তুণ্হি, ন্হাতো, ৰিম্হিতো, গয্হতে, ৰুল্হতে, অৰ্হানং.

কণ্ঠং সংৰরিত্ৰা উচ্চারিতো অকারো সংৰুটো নাম. সকসকট্ঠান, করণানি ৰিৰরিত্ৰা উচ্চারিতা সেসসরা চ স, হকারা চ ৰিৰটা নাম. তানিযেৰ গাল়্হং ফুসাপেত্ৰা উচ্চারিতা পঞ্চৰগ্গা ফুট্ঠা নাম. থোকং ফুসাপেত্ৰা উচ্চারিতা য, র, ল, ৰা ঈসংফুট্ঠা নাম. তত্থ ওট্ঠজেসু তাৰ পৰগ্গং ৰদন্তানং ওট্ঠদ্ৰযস্স গাল়্হং ফুসনং ইচ্ছিতব্বং. কস্মা? ফুট্ঠপযতনিকত্তা পৰগ্গস্স. উৰণ্ণং ৰদন্তানং পন ওট্ঠদ্ৰযস্স ৰিৰরণং ইচ্ছিতব্বং. কস্মা? ৰিৰটপযতনিকত্তা উৰণ্ণস্স. এস নযো সেসেসু সব্বেসূতি.

চূল়নিরুত্তিযং পন সব্বে রস্সসরা সংৰুটা নাম, সব্বেদীঘসরা ৰিৰটা নামাতি ৰুত্তং. তথা সদ্দসারত্থজালিনিযং, কত্থচি সক্কটগন্থে চ. ইদং যুত্ততরং. অঞ্ঞট্ঠানিকব্যঞ্জনেহি যুত্তা সরা অত্তনো ঠান, করণানি জহন্তাপি পযতনং ন জহন্তি. তস্মা নানাৰণ্ণানং সংসগ্গে পযতনানং সংসগ্গভেদোপি ৰেদিতব্বোতি. তত্থ ‘‘সুণাতু মে’’তি ৰদন্তো যদি ণা-কারং জিৰ্হগ্গেন দন্তট্ঠানে কত্ৰা ৰদেয্য, দন্তজো না-কারো এৰ ভৰেয্য. তু-কারঞ্চ জিৰ্হোপগ্গেন মুদ্ধট্ঠানে কত্ৰা ৰদেয্য, মুদ্ধজো টু-কারো এৰ ভৰেয্য. এৰঞ্চ সতি অক্খরৰিপত্তি নাম সিযা. এস নযো সেসেসু মুদ্ধজদন্তজেসু. তস্মা কম্মৰাচং সাৰেন্তেহি নাম ঠান, করণ, পযতনেসু সুট্ঠু কুসলেহি ভৰিতব্বন্তি.

সিথিলঞ্চ ¶ , ধনিতঞ্চ, দীঘং, রস্সং, গরুং, লহুং;

নিগ্গহীতং, ৰিমুত্তঞ্চ, সম্বন্ধঞ্চ, ৰৰত্থিতং [নী. ৯, ১০, ১১, ১২, ১৩, ১৪, ১৫, ১৬-১৯, ২০, ২১ সুত্তেসু পস্সিতব্বং].

মুদুনা ৰচীপযোগেন ৰত্তব্বা ৰগ্গপঠম, ততিয, পঞ্চমা সিথিলা নাম. থদ্ধেন ৰচীপযোগেন ৰত্তব্বা ৰগ্গদুতিয, চতুত্থা ধনিতা নাম. দীঘ, রস্সা পুব্বে ৰুত্তা. দীঘা চেৰ সংযোগপুব্বা চ নিগ্গহীতন্তা চ গরুকা নাম. সেসা লহুকা নাম. যথা সদ্দসহিতো ৰাতো মুখছিদ্দেন বহি অনিক্খম্ম নাসসোতাভিমুখো হোতি, তথা মুখং অৰিৰটং কত্ৰা ৰত্তব্বং ব্যঞ্জনং নিগ্গহীতং নাম. তেন যুত্তানি সব্বব্যঞ্জনানি নিগ্গহীতন্তানি নাম. সেসা ৰিমুত্তা নাম. পদসন্ধিৰসেন ৰত্তব্বং সম্বন্ধং নাম. পদচ্ছেদং কত্ৰা ৰত্তব্বং ৰৰত্থিতং নাম.

ব্যঞ্জনৰুত্তিরাসি নিট্ঠিতো.

লহুসঞ্ঞারাসি

ঝো, লো, পো, ঘো, গো.

৯. যুৰণ্ণা [ইযুৰণ্ণা (বহূসু)] ঝলা নামস্সন্তে [ক. ৫৮; রূ. ২৯; নী. ২০৫].

অনিত্থিলিঙ্গস্স নামস্স অন্তে ইৰণ্ণুৰণ্ণা কমেন ঝলসঞ্ঞা হোন্তি.

১০. পিত্থিযং [ক. ৫৯; রূ. ১৮২; নী. ২০৬].

ইত্থিলিঙ্গে নামস্সন্তে ইৰণ্ণুৰণ্ণা পসঞ্ঞা হোন্তি.

১১. ঘা [ক. ৬০; রূ. ১৭৭; নী. ২০৭].

ঘো

¶ , আ ইতি দ্ৰিপদং. ইত্থিলিঙ্গে আকারো ঘসঞ্ঞো হোতি.

১২. গো স্যালপনে [ক. ৫৭; রূ. ৭১; নী. ২১৪].

আলপনে সি গসঞ্ঞো হোতি.

লহুসঞ্ঞারাসি নিট্ঠিতো.

সঙ্কেতরাসি

১৩. ৰিধি ৰিসেসনং যং তস্স [চং. ১.১.৬; পা. ১.১.৭২; ৰিধিব্বিসেসনন্তস্স (বহূসু)].

সুত্তে যং ৰিসেসনং দিস্সতি, তস্স ৰিধি ঞাতব্বো.

‘অতো যোনং টাটে’. নরা, নরে. যোনন্তি ৰিসেসনং. টাটেতি ৰিধি.

১৪. সত্তমিযং পুব্বস্স [রূ. ৮ (পিট্ঠে); চং. ১.১.৭; পা. ১.১.৬৬].

সত্তমীনিদ্দেসে পুব্বৰণ্ণস্সেৰ ৰিধি ঞাতব্বো.

‘সরো লোপো সরে’. লোকগ্গো [অপ. থের ১.১২.৫৭].

১৫. পঞ্চমিযং পরস্স [চং. ১.১.৮; পা. ১.১.৬৭].

পঞ্চমীনিদ্দেসে পরস্সেৰ ৰিধি ঞাতব্বো.

‘অতো যোনং টাটে’. নরা, নরে.

১৬. আদিস্স [চং. ১.১.৯; পা. ১.১.৫৪].

পরস্স সিস্সমানো [দিস্সমানো (মূ)] ৰিধি আদিৰণ্ণস্স ঞাতব্বো.

‘র ¶ সঙ্খ্যাতো ৰা’. তেরস.

১৭. ছট্ঠিযন্তস্স [চং. ১.১.১০; পা. ১.১.৫২].

ছট্ঠীনিদ্দেসে তদন্তস্স ৰিধি ঞাতব্বো.

‘রাজস্সি নাম্হি’. রাজিনা.

১৮. ঙানুবন্ধো [চং. ১.১.১১; পা. ১.১.৫৩].

ঙানুবন্ধো আদেসো ছট্ঠীনিদ্দিট্ঠস্স অন্তস্স ঞাতব্বো.

‘গোস্সাৰঙ’. গৰস্সং.

১৯. টানুবন্ধোনেকৰণ্ণো সব্বস্স [চং. ১.১.১২; পা. ১.১.৫৫; টানুবন্ধানেকৰণ্ণা সব্বস্স (বহূসু)].

যো চ টানুবন্ধো আদেসো, যো চ অনেকৰণ্ণো আদেসো, তদুভযং ছট্ঠীনিদ্দিট্ঠস্স সব্বস্সেৰ ৰণ্ণসমুদাযস্স ঞাতব্বং.

টানুবন্ধে তাৰ –

‘ইমস্সানিত্থিযং টে’. এসু.

অনেকৰণ্ণে –

‘অনিমি নাম্হি’. অনেন, ইমিনা.

২০. ঞকানুবন্ধা আদ্যন্তা [চং. ১.১.১৩; পা. ১.১.৪৬].

ঞানুবন্ধো আগমো চ কানুবন্ধো আগমো চ কমেন ছট্ঠীনিদ্দিট্ঠস্স আদিম্হি চ অন্তে চ ঞাতব্বো.

ঞানুবন্ধে –

‘ব্রূতো তিস্সিঞ’. ব্রৰিতি.

কানুবন্ধে ¶ –

‘ভূস্স ৰুক’. বভুৰ.

২১. মানুবন্ধো সরানমন্তা পরো [চং. ১.১.১৪; পা. ১.১.৪৭].

মানুবন্ধো আগমো সরানং অন্তসরম্হা পরো হোতি.

‘নজ্জাযো স্ৰাম’. নজ্জাযো সন্দন্তি. ‘মং ৰা রুধাদীনং’. রুন্ধতি. ‘জর সদানমীম ৰা’. জীরতি, সীদতি.

ইমস্মিং ব্যাকরণে অনেকসরতা নাম নদী, পুরিস ইচ্চাদীসু লিঙ্গপদেসু এৰ অত্থি, গমু, পচইচ্চাদীসু ধাতুপদেসু নত্থি. সব্বধাতুযো ব্যঞ্জনন্তা এৰ হোন্তি, ধাত্ৰন্তলোপকিচ্চং নত্থি. তস্মা নজ্জাযোতি এত্থ ঈ-কারো অন্তসরো নাম. ততো ‘নজ্জাযো স্ৰাম’ ইতি সুত্তেন আ-কারাগমো. রুন্ধতীতি এত্থ পন উ-কারো অন্তসরো নাম, ততো ‘‘মং ৰা রুধাদীন’’ন্তি সুত্তেন বিন্দাগমো. এৰং জীরতি, সীদতি ইচ্চাদীসু. ম্রম্মপোত্থকেসু পন ‘‘মানুবন্ধো পদানমন্তা পরো’’তি পাঠো, সো সীহল়পোত্থকেহি ন সমেতি.

২২. ৰিপ্পটিসেধে [চং. ১.১.১৬; পা. ১.৪.২].

সমানৰিসযানং দ্ৰিন্নং ৰিধীনং অঞ্ঞমঞ্ঞপটিসেধরহিতে ঠানে যেভুয্যেন পরো ৰিধি ওকাসং লভতি.

চত্তারোমে ভিক্খৰে ধম্মা [অঙ্গুত্তরনিকাযে] -এত্থ চত্তারিমেতি পুব্বলোপে সম্পত্তে পরলোপো ওকাসং লভতি.

২৩. সঙ্কেতো নাৰযৰোনুবন্ধো [চং. ১.১.৫].

যো ৰণ্ণো পযোগস্স অৰযৰো ন হোতি, সুত্তেসু সঙ্কেতমত্তো হোতি, সো অনুবন্ধো নাম.

‘গোস্সাৰ’ ¶ . গৰস্সং-এতেন পদরূপৰিধানে অনুবন্ধো উপযোগং ন গচ্ছতীতি ঞাপেতি.

২৪. ৰণ্ণপরেন সৰণ্ণোপি.

ৰণ্ণসদ্দো পরো এতস্মাতি ৰণ্ণপরো, ৰণ্ণপরেন রস্সসরেন সৰণ্ণোপি গয্হতি সযঞ্চ, অৰণ্ণোতি ৰুত্তে আ-কারোপি গয্হতি অ-কারো চাতি ৰুত্তং হোতি. এৰং ইৰণ্ণুৰণ্ণেসু.

২৫. ন্তুৰন্তুমন্তাৰন্তুতৰন্তুসম্বন্ধী [ন্তু ৰন্তুমন্ত্ৰাৰন্তুতৰন্তু সম্বন্ধী (বহূসু)].

ন্তুইতি ৰুত্তে ৰন্তু, মন্তু, আৰন্তু, তৰন্তূনং সম্বন্ধীভূতো ন্তুকারো গয্হতি.

‘ন্তন্তূনং ন্তো যোম্হি পঠমে’. গুণৰন্তো, সতিমন্তো, যাৰন্তো, ভুত্তৰন্তো.

সঙ্কেতরাসি নিট্ঠিতো.

সন্ধিৰিধান

অথ সন্ধিৰিধানং দীপিযতে.

লোপো, দীঘো, রস্সো, ৰুদ্ধি, আদেসো, আগমো, দ্ৰিভাৰো, ৰিপল্লাসো.

লোপরাসি

২৬. সরো লোপো সরে [ক. ১২; রূ. ১৩; নী. ৩০].

লুপ্পতীতি লোপো. সরে পরে সরূপো ৰা অসরূপো ৰা পুব্বো সরো লোপো হোতি.

সরূপে তাৰ –

অৰণ্ণে-লোকগ্গো ¶ [অপ. থের ১.১২.৫৭], ভৰাসৰো, [ধ. স. ১১০২] অৰিজ্জাসৰো [ধ. স. ১১০২], অৰিজ্জানুসযো [ৰিভ. ৯৪৯].

ইৰণ্ণে-মুনিন্দো, মুনীরিতো, ৰরৰাদীরিতো, ইত্থিন্দ্রিযং [ৰিভ. ২১৯].

উৰণ্ণে-বহূপকারো [জা. ১.২২.৫৮৮], বহুকা ঊমি বহূমি, সরভুযা ঊমি সরভূমি, সরভুযা উদকং সরভূদকং.

অসরূপে –

সোতিন্দ্রিযং [ৰিভ. ২১৯], কামুপাদানং, ভৰেসনা [দী. নি. ৩.৩০৫], ভৰোঘো [ধ. স. ১১৫৬], সো তুণ্হস্স [পারা. ৩৮১], দিট্ঠানুসযো [ৰিভ. ৯৪৯], দিট্ঠুপাদানং, দিট্ঠেকট্ঠং, দিট্ঠোঘো [ধ. স. ১১৫৬], মুদিন্দ্রিযং [মহাৰ. ৯], পুত্তা মত্থি [ধ. প. ৬২], উরস্স দুক্খো [পাচি. ৪০২], অসন্তেত্থ ন দিস্সন্তি [ধ. প. ৩০৪] ইচ্চাদি.

ইতি পুব্বলোপরাসি.

২৭. পরো ক্ৰচি [ক. ১৩; রূ. ১৫; নী. ৩১].

পুব্বসরম্হা সরূপো ৰা অসরূপো ৰা পরো সরো ক্ৰচি লোপো হোতি.

সরূপে তাৰ –

তং কদাস্সু ভৰিস্সতি [জা. ২.২২.১৪৪ আদযো; তং কুদস্সু], কুদাস্সু নাম দুম্মেধো, দুক্খস্সন্তং করিস্সতি [ধ. প. ৩৭৬], যদাস্স সীলং পঞ্ঞঞ্চ [জা. ২.২২.১৪৭৪], তদাস্সু কণ্হং যুঞ্জন্তি [জা. ১.১.২৯] -কণ্হন্তি মহাকণ্হগোণং, তণ্হাস্স ৰিপ্পহীনা, মাস্সু ¶ কুজ্ঝ রথেসভ, সত্থহারকং ৰাস্স পরিযেসেয্য [পারা. ১৬৭, ১৭১], আগতাত্থ তুম্হে, সোতুকামাত্থ তুম্হে, মায্যো এৰরূপমকাসি, পপং অৰিন্দুং [জা. ১.১.২] -পৰড্ঢং আপং লভিংসূত্যত্থো, নালং কবল়ং পদাতৰে [জা. ১.১.২৭] -প+আদাতৰেতি ছেদো, গণ্হিতুন্তত্থো, রুপ্পতীতি রূপং, বুজ্ঝতীতি বুদ্ধো-দীঘো, অগ্গীৰ তপ্পতি, ইত্থীৰ গচ্ছতি, নদীৰ সন্দতি, মাতুপট্ঠানং, পিতুপট্ঠানং, যেতে ধম্মা আদিকল্যাণা [চূল়ৰ. ৩৯৯] ইচ্চাদি.

অসরূপে –

ইতিস্স [পাচি. ৪৬৫], ইতিপি [পারা. ১], অস্সমণীসি [পারা. ১৩৫], অকতঞ্ঞূসি [ধ. প. ৩৮৩], ৰন্দেহং, সোহং, যস্সদানি [মহাৰ. ২৪২], ছাযাৰ অনপাযিনী [ধ. প. ২], মাদিসেসু কথাৰ কা, কিন্নুমাৰ সমণিযো মধুৰা মঞ্ঞতি বালো [ধ. প. ৬৯], চক্খুন্দ্রিযং [ৰিভ. ২১৯], দ্ৰেমে ভিক্খৰে ধম্মা [অ. নি. ২.৩], তযোমে ভিক্খৰে ধম্মা [অ. নি. ৩.১৭] ইচ্চাদি.

ক্ৰচীতি কিং? কতমা চানন্দ অনিচ্চসঞ্ঞা [অ. নি. ১০.৬০].

ইতি পরলোপরাসি.

২৮. ন দ্ৰে ৰা.

দ্ৰে পুব্বপরসরা ক্ৰচি লোপা ন হোন্তি ৰা.

অপ্পমাদো অমতং পদং [ধ. প. ২১], কো ইমং পথৰিংৰিচেস্সতি [ধ. প. ৪৪].

ক্ৰচিত্ৰেৰ? সোতিন্দ্রিযং [ৰিভ. ২১৯], চক্খুন্দ্রিযং [ৰিভ. ২১৯],

ৰাতি কিং ¶ ? কোমং ৰসলিং পরামসিস্সতি.

ইতো পট্ঠায যাৰসন্ধিকণ্ডাৰসানা যুত্তট্ঠানেসু সব্বত্থ ক্ৰচিসদ্দো, ৰাসদ্দো চ ৰত্তন্তে. তত্থ ক্ৰচিসদ্দো নানাপযোগং দস্সেতি. ৰাসদ্দো একপযোগস্স নানারূপং দস্সেতি. লোপনিসেধো.

২৯. পরসরস্স.

নিগ্গহীতম্হা পরসরস্স ক্ৰচি লোপো হোতি ৰা.

ত্ৰংসি [পে. ৰ. ৪৭; জা. ২.২২.৭৬৪], চন্দংৰ ৰিমলং সুদ্ধং [ধ. প. ৪১৩; সু. নি. ৬৪২], চক্কংৰ ৰহতো পদং [ধ. প. ১], হলংদানি পকাসিতুং [মহাৰ. ৮], কিন্তি ৰদেয্যং, চীৰরন্তি, পত্তন্তি, ভিক্খুন্তি.

ইতি সরলোপরাসি.

৩০. সংযোগাদি লোপো.

সংযোগস্স আদিভূতো ব্যঞ্জনো ক্ৰচি লোপো হোতি ৰা.

পুপ্ফংসা উপ্পজ্জতি [পারা. ৩৬] – ইধ পুব্বসুত্তেন সরলোপো, এৰংস তে আসৰা পহীনা হোন্তি [ম. নি. ১.২৪], সচে ভুত্তো ভৰেয্যাহং, সাজীৰো গরহিতো মম [মি. প. ৬.১.৫] - অস্স+আজীৰোতি ছেদো, ভৰেয্যাতি অত্থো.

তীসু ব্যঞ্জনেসু সরূপানং দ্ৰিন্নং আদিব্যঞ্জনস্স লোপো – অগ্যাগারং [পাচি. ৩২৬], অগ্যাহিতো, ৰুত্যস্স, ৰিত্যানুভূযতে, একসতং খত্যা [জা. ২.২২.৫৯৪], রত্যো, রত্যা, রত্যং, সক্ৰাহং মারিস দেৰানমিন্দো [সং. নি. ১.২৬৮], ইচ্চাদি.

সরূপানন্তি ¶ কিং? তিত্থ্যা পুথুসো ৰদন্তি [সু. নি. ৮৯৭], চতুত্থ্যন্তং, ছট্ঠুন্তং, চক্খ্ৰাবাধং, ৰত্থ্ৰেত্থ.

ইতি ব্যঞ্জনলোপরাসি.

৩১. লোপো.

নিগ্গহীতস্স ক্ৰচি লোপো হোতি ৰা.

সরে পরে তাৰ –

এৰাহং চিন্তযিত্ৰান [বু. ৰং. ২.২৭], পুপ্ফদানং অদাসহং-অদাসিং+অহন্তি ছেদো, বিন্দুলোপো, পুন পুব্বসরলোপো, তুয্হত্থায মহামুনি, তুয্হেৰেতং দুক্কটং [দী. নি. ২.১৭৮], তাসাহং সন্তিকে [পাচি. ৭০৯], তেসাহং এৰং ৰদামি, পঞ্চন্নেতং ধম্মানং অধিৰচনং, ছন্নেতং ধম্মানং অধিৰচনং, সমণ ত্ৰেৰ পুচ্ছামি [জা. ২.২২.২৫৩ সমণ তেৰ], ব্রাহ্মণ ত্ৰেৰ পুচ্ছামি [জা. ২.২২.২৫৮ ব্রাহ্মণ তেৰ] -ত্ৰং+এৰাতি ছেদো, ৰিদূনগ্গমিতি.

ব্যঞ্জনে পরে –

তং তুয্হমূলে পটিদেসেমি.

গাথাযং –

অরিযসচ্চানদস্সনং [খু. পা. ৫.১১], এতং বুদ্ধান সাসনং [ধ. প. ১৮৩], খন্ধানঞ্চ পটিপাটি, ধাতুআযতনান চ [ধ. স. অট্ঠ. নিদানকথা].

মাগমে পরে –

গরুল়ো উরগামিৰ [জা. ১.৪.১২৪ সুপণ্ণো], ধম্মো অরহতামিৰ [দী. নি. ২.৩৪৮], আলোকো পস্সতামিৰ [সু. নি. ৭৬৯], বকো কক্কটকামিৰ [জা. ১.১.৩৮], নভং তারকিতামিৰ [জা. ২.২২.১৯৮৯ তারাচিতামিৰ], পদুমং ¶ হত্থগতামিৰ [জা. ২.২২.২৩৩৬] -এতেসু মাগমে বিন্দুলোপো, ব্যঞ্জনে পুব্বসরদীঘো চ.

তথা সংউপসগ্গস্স বিন্দুলোপে অন্তসরদীঘো –

সারাগো, সারত্তো, অৰিসাহারো, সারম্ভো, সারদ্ধো, সাকেতং নগরং, সাধারণং, সং অস্স অত্থীতি সামী.

সমাসে তুমন্তম্হি নিচ্চং –

কত্তুকামো, গন্তুকামো ইচ্চাদি.

ইতি বিন্দুলোপরাসি.

৩২. স্যাদিলোপো পুব্বস্সেকস্স.

ৰিচ্ছাযং একস্স ৰিভত্যন্তস্স পদস্স দ্ৰিত্তে কতে পুব্বপদস্স স্যাদিলোপো হোতি.

একেকং, একেকানি, একেকেন, একেকস্স ইচ্চাদি.

মাগমে –

একমেকং, একমেকানি ইচ্চাদি.

ইতি স্যাদিলোপরাসি.

অপ্পৰিধানমুচ্চতে.

৩৩. তদমিনাদীনি [চং. ৫.২.১.২৭; পা. ৬.৩.১০৯; মু. ২.৩৪; কা. ২.২৭].

মহাৰুত্তিসুত্তমিদং, তদমিনাদীনি পদরূপানি ইমিনা নিপাতনেন সিজ্ঝন্তীতি অত্থো.

সরলোপো ব্যঞ্জনে –

লাবু=অলাবু ¶ , পিধানং=অপিধানং, দ্ৰারং পিদহিত্ৰা=অপিদহিত্ৰা, গিনি=অগ্গিনি, রত্নং=রতনং, ন্হানং=নহানং, অস্নাতি=অসনাতি, হন্তি=হনতি, হন্তি কুদ্ধো পুথুজ্জনো [অ. নি. ৭.৬৪], ফলং ৰে কদলিং হন্তি [অ. নি. ৪.৬৮], সক্কারো কাপুরিসং হন্তি. কত্থচি বহুৰচনম্পি দিস্সতি. ৰিক্কোসমানা তিব্বাহি, হন্তি নেসং ৰরং ৰরং [জা. ২.২২.২৩৭০].

ইৰণ্ণলোপে –

আরামরুক্খচেত্যানি=চেতিযানি [ধ. প. ১৮৮], অথত্থেকসতং খত্যা [জা. ২.২২.৫৯৪] =খত্তিযা, তিথ্যা পুথুসো ৰদন্তি [সু. নি. ৮৯৭]. তিথ্যা পুথুসো নিৰিট্ঠা [সু. নি. ৮৯৮] =তিত্থিযা. ৰিদ্ধস্তো=ৰিদ্ধংসিতো, উত্রস্তো=উত্রাসিতো, স্নেহো=সিনেহো, ক্লেসৰত্থূনি=কিলেসৰত্থূনি, ক্রিযা=কিরিযা, প্লৰন্তি=পিলৰন্তি.

উৰণ্ণলোপে –

পদ্ধানি=পদুমানি, উস্মা=উসুমা ইচ্চাদি.

সংযোগাদিব্যঞ্জনলোপো চ –

পুত্তানঞ্হি ৰধো দুখো, মাতিঘো লভতে দুখং, অপ্পস্সাদা কামা দুখা, নত্থি কামপরং দুখং [জা. ২.১৯.১১৮], সেখো=সেক্খো, অপেখা=অপেক্খা, উপসম্পদাপেখো=উপসম্পদাপেক্খো [মহাৰ. ৭০] ইচ্চাদি.

সরেন সহ ব্যঞ্জনলোপো –

পটিসঙ্খা যোনিসো [অ. নি. ৬.৫৮], অক্খাতি=অক্খাযতি, গন্ধং ঘাতি=ঘাযতি, অভিঞ্ঞা=অভিঞ্ঞায, পরিঞ্ঞা=পরিঞ্ঞায, অধিট্ঠা=অধিট্ঠায, পতিট্ঠা=পতিট্ঠায, আৰীকতা হিস্স ফাসু [মহাৰ. ১৩৪] ¶ , অস্সৰনতা ধম্মস্স পরিহাযন্তি [মহাৰ. ৮], ৰিপাকো তদারম্মণতা উপ্পজ্জতি [পট্ঠা. ৩.১.৯৮], দসাহপরমতা ধারেতব্বং [পারা. ৪৬২], নাযং ব্রাহ্মণভোজনত্থা, তিলোদনো হেহিতি [জা. ১.৮.১], ৰিসসেনোৰ গারয্হো, যস্সত্থা রুক্খরোপকা [জা. ১.৩.৫৪] =ৰিসসেনোৰাতি এৰংনামকো রাজা এৰ, যস্সত্থা দূরমাযন্তি [জা. ১.৩.২৮] – যস্সাতি উদরস্স, পিতু অত্থা চন্দৰতী [জা. ১.৯.৬৬], উপাদারূপং, অনুপাদা ৰিমুত্তো, সদ্ধাপব্বজিতো, উপনিধাপঞ্ঞত্তি. সংৰিধাৰহারো, যাতি=যাযতি, ৰাতি=ৰাযতি, নিব্বাতি=নিব্বাযতি, নিব্বন্তি=নিব্বাযন্তি, পহাতি=পহাযতি, সপ্পতিস্সো=সপ্পতিস্সযো, সুহদো=সুহদযো=সব্বত্থ যলোপো,

মুখরো=মুখখরো, ৰাচাকরণো=ৰাক্করণো, ৰাচাপথো=ব্যপ্পথো=ৰাস্স ব্যত্তং, রস্সত্তঞ্চ, এৰং ব্যাখো=এৰং ৰিয খো=ৰিস্স ব্যত্তং, দীঘো চ যলোপো চ.

লোলুপো, মোমুহো, কুক্কুচো, সুসুখো, রোরুৰোইচ্চাদীসু পন অতিসযত্থদীপনত্থং পদদ্ৰিত্তং কত্ৰা পুব্বপদেসু অক্খরলোপো.

পদলোপো আদিমজ্ঝন্তেসু –

দত্তো=দেৰদত্তো, অস্সেহি যুত্তো রথো=অস্সরথো, রূপভৰো=রূপং, অরূপভৰো=অরূপং ইচ্চাদি.

লোপরাসি নিট্ঠিতো.

দীঘ, রস্সরাসি

অথ ¶ দীঘ, রস্সা দীপিযন্তে.

৩৪. সেসা দীঘা.

পক্খিত্তমিদং সুত্তং. লুত্তেহি ৰা আদেসকতেহি ৰা ৰণ্ণেহি সেসা রস্সসরা ক্ৰচি দীঘা হোন্তি ৰা.

পুব্বলুত্তে তাৰ –

তত্রাযমাদি ভৰতিং [ধ. প. ৩৭৫], তত্রাভিরতিমিচ্ছেয্য [ধ. প. ৮৮; সং. নি. ৫.১৯৮], বুদ্ধানুস্সতি, সদ্ধীধ ৰিত্তং পুরিসস্স সেট্ঠং [সু. নি. ১৮৩], অনাগারেহি চূভযং [ধ. প. ৪০৪; সু. নি. ৬৩৩], ধম্মূপসংহিতা [দী. নি. ২.৩৪৯], তথূপমং ধম্মৰরং অদেসযি [খু. পা. ৬.১৩], তেসং ৰূপসমো সুখো [দী. নি. ২.২২১] ইচ্চাদি.

পরলুত্তে –

অজিতাতি ভগৰা অৰোচ [সু. নি. ১০৩৯, ১০৪১], সুমেধো সাজাতো চাতি, রুপ্পতীতি রূপং [সং. নি. ৩.৭৯], বুজ্ঝতীতি বুদ্ধো, সাধূতিপতিস্সুণিত্ৰা [ধ. প. অট্ঠ. ১.৪ কাল়যক্খিনীৰত্থু], কিংসূধ ৰিত্তং পুরিসস্স সেট্ঠং [সু. নি. ১৮৪] ইচ্চাদি.

বিন্দুলুত্তে –

তাসাহং [পাচি. ৭০৯], তেসাহং [জা. ২.২২.৩১৩].

আদেসেসু –

ম্যাযংধম্মো [মহাৰ. ৭], স্ৰাহং [পে. ৰ. ৪৮৫], ৰিত্যানুভূযতে ইচ্চাদি.

যদিপি ইমানি রূপানি ব্যঞ্জনে উপরিসুত্তেন সিজ্ঝন্তি, লুত্তাদেসেসু পন নিচ্চমিৰ দীঘসিদ্ধিঞাপনত্থং ইদং সুত্তং পক্খিত্তন্তি দট্ঠব্বং.

৩৫. ব্যঞ্জনে দীঘরস্সা [ক. ২৫, ২৬; নী. ৩৫, ৩৬, ৬৪, ৭১, ১৬৫, ১৭৯].

ব্যঞ্জনে ¶ পরে রস্সদীঘানং ক্ৰচি দীঘ, রস্সা হোন্তি ৰা. তত্থ দীঘৰিধি নাম গাথাৰসেন ৰা আগমৰসেন ৰা ৰচনসুখৰসেন ৰা বুদ্ধিসুখৰসেন ৰা হোতি.

তত্থ গাথাৰসেন তাৰ –

মধুৰামঞ্ঞতি বালো [ধ. প. ৬৯], খন্তী চ সোৰচস্সতা [খু. পা. ৫.১০], এৰং গামে মুনী চরে [ধ. প. ৪৯], সক্কো উজূ চ সুহুজূ চ [খু. পা. ৯.১] ইচ্চাদি.

আগমে –

উরগামিৰ [জা. ১.৭.৩০], অরহতামিৰ [দী. নি. ২.৩৪৮], পস্সতামিৰ [সু. নি. ৭৬৯] ইচ্চাদি. গাথাৰসেনাতিপি যুজ্জতি.

ৰচনসুখঞ্চ বুদ্ধিসুখঞ্চ পুরিমে সেসদীঘেপি লব্ভতি.

তত্থ ৰচনসুখে –

ছারত্তং মানত্তং [চূল়ৰ. ৯৭], পকট্ঠং ৰচনং পাৰচনং, পাসাদো, পাকারো, পাৰস্সি মেঘো, নগরং পাৰিসি, পাৰেক্খি, পারিসুদ্ধি, পাটিপদো, চতুরাসীতিসহস্সানি [ধ. স. অট্ঠ. ৫৮৪] ইচ্চাদি.

বুদ্ধিসুখং নাম পদচ্ছেদঞাণসুখং. তত্থ –

সাত্থং সব্যঞ্জনং [পারা. ১], সাত্থিকা ধম্মদেসনা, চক্খুমাস্স যথা অন্ধো ইচ্চাদি.

বিন্দুলুত্তে পন সারাগো, সারত্তো ইচ্চাদীনি পুব্বে উদ্ধটানিযেৰ.

ইতি দীঘরাসি.

রস্সসন্ধিম্হি ¶ গাথাৰসেন তাৰ –

যিট্ঠংৰহুতংৰ লোকে [ধ. প. ১০৮], ভোৰাদি নাম সো হোতি [ধ. প. ৩৯৬; সু. নি. ৬২৫], যথাভাৰি গুণেন সো ইচ্চাদি.

আগমে য, র, দাগমেসু পুব্বরস্সো –

যথযিদং [অ. নি. ১.১-৪], তথযিদং, যথরিৰ অম্হাকং ভগৰা, তথরিৰ ভিক্খুসঙ্ঘো, সম্মদেৰ সমাচরে [সং. নি. ১.১১২], সম্মদক্খাতো মযা সতিসম্বোজ্ঝঙ্গো [সং. নি. ৫.১৯৪] ইচ্চাদি.

সংযোগরস্সো নাম বহুলং লব্ভতি –

অক্কমো, পরক্কমো, অক্খাতো, অঞ্ঞা, অঞ্ঞিন্দ্রিযং, অঞ্ঞাতং ভগৰা, অঞ্ঞাতং সুগত, অত্থরণং, অপ্ফোটেতি, অল্লিযতি, অচ্ছিন্দতি, অস্সাদো, আভস্সরো, পভস্সরো, সব্বঞ্ঞুতঞ্ঞাণং, ঝানস্স লাভিম্হি ৰসিম্হি [পারা. ২০৩-২০৪].

তা, তোপচ্চযেসুপি রস্সো –

কতঞ্ঞুতা, অত্থঞ্ঞুতা, ধম্মঞ্ঞুতা, কঞ্ঞতো, নদিতো, ৰধুতো.

সমাসে –

ইত্থিপুমং, ইত্থিলিঙ্গং, ইত্থিভাৰো, সব্বঞ্ঞুবুদ্ধো ইচ্চাদি.

ইতি রস্সরাসি.

দীঘ, রস্সরাসি নিট্ঠিতো.

ৰুদ্ধিরাসি

অথ ¶ ৰুদ্ধিসন্ধি দীপিযতে.

৩৬. যুৰণ্ণানমেও লুত্তা [ক. ১৪; রূ. ১৬; নী. ৩৪].

লুত্তা পুব্বসরম্হা ৰা পরসরম্হা ৰা সেসানং ইৰণ্ণুৰণ্ণানং কমেন এ, ওআদেসা হোন্তি ৰা.

পরইৰণ্ণে –

বন্ধুস্সেৰ সমাগমো, অতেৰ মে অচ্ছরিযং [জা. ২.২২.১৯৮৮], ৰাতেরিতং, জিনেরিতং.

পরউৰণ্ণে –

গঙ্গোদকং, পত্তং ৰোদকং কত্ৰা [চূল়ৰ. ৩৭৬], সঙ্খ্যং [সু. নি. ৭৫৪] নোপেতি ৰেদগূ [মহানি. ৬], উদকোমিৰ জাতং.

ক্রিযাপদেসু –

ৰেতি, অপেতি, উপেতি, অপেক্খা, উপেক্খা ইচ্চাদি.

পুব্বইৰণ্ণে –

রথেসভো, জনেসভো, মুনেলযো ইচ্চাদি- তত্থ রথীনং আসভো জেট্ঠকোতি রথেসভো, রথীনন্তি রথৰন্তানং রথরুল়্হানং যোধানন্তি অত্থো. জনীনং আসভো জনেসভো, জনীনন্তি জনৰন্তানং ইস্সরানং. মুনীনং আলযো ৰিহারো মুনেলযো.

পুব্বউৰণ্ণে –

সুন্দরা ইত্থী সোত্থি, সুন্দরো অত্থো যস্সাতি সোত্থি, রস্সত্তং, মঙ্গলং.

ৰুদ্ধিরাসি নিট্ঠিতো.

আদেসসন্ধি

অথাদেসসন্ধি ¶ দীপিযতে.

৩৭. যৰা সরে [ক. ১৮, ১৯, ২১, ৪৫; নী. ৪৪, ৪৬, ৪৭, ৫১, ৫৮].

সরে পরে ইৰণ্ণুৰণ্ণানং য, ৰাদেসা হোন্তি ৰা.

ইৰণ্ণে –

পটিসন্থারৰুত্যস্স [ধ. প. ৩৭৬], সব্বা ৰিত্যানুভূযতে, ক্যাহং অপরজ্ঝামি [পারা. ৩৮৩] – ইধ পঠমং বিন্ধুলোপো, সুতা চ পণ্ডিতাত্যত্থ, সুতা চ পণ্ডিতাত্যম্হা [জা. ২.২১.১৪৯], ঞাতো সেনাপতীত্যাহং [জা. ২.২১.৯৪], ইচ্চেতং কুসলং [পারা. ৪১১], ইচ্চস্স ৰচনীযং [দীঘনিকাযে], পচ্চুত্তরিত্ৰা, পচ্চাহরতি [পারা. ৩০৫-৩০৭], পচ্চেতি, পচ্চযো, অচ্চেতি, অচ্চযো [দী. নি. ১.২৫১], অচ্চাযং মজ্ঝিমো খণ্ডো [জা. ১.৭.৩৩] – অতিরেকো অযং মজ্ঝিমো খণ্ডোত্যত্থো, অপুচ্চণ্ডতা – অপুতিঅণ্ডতাত্যত্থো, জচ্চন্ধো, জচ্চঘানকো, জচ্চেল়কো, অব্ভুগ্গচ্ছতি, অব্ভেতি, অব্ভোকাসো [দী. নি. ১.১৯১], অজ্ঝোকাসো অজ্ঝাগমা ইচ্চাদি.

ৰাত্ৰেৰ? ইতিস্স মুহুত্তম্পি [পাচি. ৪৬৫], অতিসিগণো, অধীরিতং.

এত্থ চ ইচ্চেতন্তিআদীসু ইমিনা সুত্তেন ইতি, পতি, অতিপুতি, জাতি, অভি, অধিসদ্দানং ইৰণ্ণস্স যত্তং, ‘তৰগ্গ, ৰরণান’…ন্তি সুত্তেন যম্হি তৰগ্গস্স চত্তং, ‘ৰগ্গ, ল, সেহি তে’তি সুত্তেন যস্স পুব্বরূপত্তং, অভি, অধিসদ্দেসু পন ‘চতুত্থদুতিযেস্ৰেস’…ন্তি সুত্তেন ৰগ্গচতুত্থানং ততিযত্তং.

উৰণ্ণে ¶ –

চক্খ্ৰাবাধমাগচ্ছতি, পাত্ৰাকাসি [ম. নি. ২.৩০৮], ৰত্থ্ৰেত্থ ৰিহিতং নিচ্চং, দ্ৰাকারো [মহাৰ. ৯], মধ্ৰাসৰো [পাচি. ৩২৮], অন্ৰযো, অন্ৰেতি, স্ৰাক্খাতো [মহাৰ. ২৬, ৬২], স্ৰাকারো [মহাৰ. ৯], বহ্ৰাবাধো ইচ্চাদি.

৩৮. এওনং [ক. ১৭, ১৮; রূ. ১৯, ২০; নী. ৪৩, ৪৪].

সরে পরে এ, ওনং য, ৰাদেসো হোতি ৰা.

ক্যস্স ব্যপথযো অস্সু [সু. নি. ৯৬৭], ক্যস্সু ইধ গোচরা [সু. নি. ৯৬৭] -কে+অস্স পুগ্গলস্সাতি অত্থো, ব্যপথযোতি ৰচনপথা, যথা নামং তথা ঝস্স-চে+অস্সাতি ছেদো, ত্যাহং এৰং ৰদেয্যং [ম. নি. ১.৩০], ত্যস্স পহীনা হোন্তি, পুত্তো ত্যাহং মহারাজ [জা. ১.১.৭], পব্বত্যাহং গন্ধমাদনে [জা. ২.২২.৩৯৭], অধিগতো খো ম্যাযং ধম্মো [মহাৰ. ৭], য্যস্স ৰিপ্পটিসারজা, য্যস্স তে হোন্তি অনত্থকামা, য্যস্সু মঞ্ঞামি সমণে-এত্থ চ অৰিসিট্ঠেপি ৰচনসদ্দে যে+অস্সাতি পদচ্ছেদবুদ্ধিসুখত্থং ‘য্যস্সা’তি পোত্থকারোপনং যুজ্জতিযেৰ, যথা তং? ‘যদাস্স সীলং পঞ্ঞঞ্চ’ [জা. ২.২২.১৪৭৪] ইচ্চাদীসু ৰিয, ক্ৰত্থোসি জীৰিতেন মে, যাৰতক্ৰস্স কাযো, তাৰতক্ৰস্স ব্যামো [দী. নি. ২.৩৫], অথ খ্ৰস্স, অত্থি খ্ৰেতং ব্রাহ্মণ, যত্ৰাধিকরণং [দী. নি. ১.২১৩], য্ৰাহং, স্ৰাহং ইচ্চাদি.

ৰাত্ৰেৰ? সো অহং ৰিচরিস্সামি [সু. নি. ১৯৪], সো অহং ভন্তে.

৩৯. যুৰণ্ণানমিযঙউৰঙ [মোগ. ৫-১৩৬ (যুৰণ্ণান মিযঙুৰঙ সরে)].

সরে পরে ইৰণ্ণুৰণ্ণন্তানং পদানং ইযঙ, উৰঙআদেসা হোন্তি ৰা. ঙানুবন্ধো অন্তাদেসত্থো. এৰং সব্বত্থ.

ইধ ¶ একেকস্স পদস্স রূপদ্ৰযং ৰুচ্চতে.

ইৰণ্ণে –

তিযন্তং ত্যন্তং – তত্থ তিযন্তন্তি ইমিনা সুত্তেন সিদ্ধং, ত্যন্তন্তি ‘যৰা সরে’তি সুত্তেন. এৰং সেসেসু. অগ্গিযাগারে অগ্যাগারে, চতুত্থিযত্থে [মহাৰ. ৩৭] চতুত্থ্যত্থে, পঞ্চমিযত্থে পঞ্চম্যত্থে, পথৰিযাকাসো পথব্যাকাসো, ৰিযঞ্জনং ব্যঞ্জনং, ৰিযাকতো ব্যাকতো, ৰিযাকংসু ব্যাকংসু, ৰিযত্তো ব্যত্তো, ৰিযূল়্হো ব্যূল়্হো, ধম্মং অধিযেতি অজ্ঝেতি, পতিযেতি পচ্চেতি পত্তিযাযতি ৰা, পরিযঙ্কো পল্লঙ্কো, ৰিপরিযাসো ৰিপল্লাসো, ইধ একরূপং হোতি – পরিযত্তি, পরিযত্তো, পরিযাযো, পল্লঙ্কোইচ্চাদীসু পরিসদ্দে রস্স লত্তং কত্ৰা ইস্স ‘যৰা সরে’তি যত্তে কতে যস্স পুব্বরূপত্তং.

উৰণ্ণে –

ভিক্খুৰাসনে, সযম্ভুৰাসনে, ইধপি রূপদ্ৰযং লব্ভতি – দুৰঙ্গিকং=দ্ৰঙ্গিকং, ভুৰাদিগণো=ভ্ৰাদিগণো ইচ্চাদি.

৪০. ৰিতিস্সেৰে ৰা [রূ. ৩৩ (পিট্ঠে)].

এৰসদ্দে পরে ইতিসদ্দস্স ই-কারস্স ৰো হোতি ৰা.

ইত্ৰেৰ চোরো অঙ্গুলিমালো, সমুদ্দোত্ৰেৰ সঙ্খ্যং [উদা. ৪৫] গচ্ছতি, মহাউদকক্খন্ধোত্ৰেৰ সঙ্খ্যং গচ্ছতি, মহাসম্মতোত্ৰেৰ পঠমং অক্খরং নিব্বত্তং [দী. নি. ৩.১৩১], ইসিগিলিত্ৰেৰ সমঞ্ঞা অহোসি [ম. নি. ৩.১৩৩].

ৰাতি কিং? ইচ্চেৰত্থো, সমুদ্দোতেৰ সঙ্খ্যং গচ্ছতি.

সুত্তৰিভত্তেন ¶ এৰসদ্দে পরে অঞ্ঞতি-কারস্স ৰত্তং. ৰিলপত্ৰেৰ সো দিজো [জা. ১.৬.১০৩], অনুসেত্ৰেৰস্স কামরাগো, অনুসেত্ৰেৰস্স রূপরাগো – অনুসেতি+এৰ+অস্সাতি ছেদো, হোত্ৰেৰ কারিযসন্নিট্ঠানং, হোতেৰ ৰা.

৪১. এওনম ৰণ্ণে [ক. ২৭; রূ ৩৯; নী. ৬৬, ১৬৩-৪].

সরব্যঞ্জনভূতে ৰণ্ণে পরে এ, ওনং অত্তং হোতি ৰা. তত্থ এস্স অত্তং যেভুয্যেন ম, দাগমেস্ৰেৰ হোতি.

অকরম্হস তে কিচ্চং [জা. ১.৪.২৯] – অকরম্হসেত্যত্থো, দিস্ৰা যাচকমাগতে [জা. ১.৭.৫৮; ২.২২.২২৬১], দিস্ৰা পণ্ডিতমাগতে [জা. ২.২২.৭৮৩], যমাহু নত্থি ৰীরিযন্তি [জা. ২.১৮.১৬২] – যে+আহুত্যত্থো. কদস্সু – কে+অস্সু, যদেৰ তে জাতিনিস্সিতা, তদেৰ তে জরানিস্সিতাযে+এৰ, তে+এৰাতি ছেদো, স্ৰে ভৰো স্ৰাতনং [পারা. ২২] – ব্যঞ্জনে দীঘো.

ওম্হি –

স সীলৰা [ধ. প. ৮৪], স পঞ্ঞৰা, স ৰে কাসাৰমরহতি [ধ. প. ১০], এস অত্থো, এস ধম্মো [ধ. প. ৫], দিন্নমাসি জনিন্দেন [জা. ২.২২.২১৬১ (দিন্নম্হাতি জনিন্দেন)] – দিন্নো+আসীতি ছেদো, মগ্গমত্থি [ৰিভ. অট্ঠ. ১৮৯] – মগ্গো+অত্থি, অগ্গমক্খাযতি [অ. নি. ১.৪৭], পচ্চযাকারমেৰ চ [ৰিভ. অট্ঠ. ২২৫], সঙ্ঘো পব্বতমিৰ, সদ্দো চিচ্চিটমিৰ, হিয্যো ভৰো হিয্যত্তনং, পাতো অসনং পাতরাসো, পাতমনুসিট্ঠো, ককুসন্ধ কোণাগমনো, থের ৰাদানমুত্তমো – ককুসন্ধোতি চ থেরোতি চ ছেদো, থেরৰাদোতি অত্থো.

সুত্তৰিভত্তেন ¶ অনিমিত্তেপি হোতি. তুৰঞ্চ ধনুসেখ চ [জা. ১.১৬.২৩৯], পচ্চযমহাপদেসো হেস, এককোট্ঠাসো এস, অভিলাপমত্তভেদো এস ইচ্চাদি.

৪২. গোস্সাৰঙ [ক. ২২, ৭৮; রূ. ২৮; নী. ৫২, ২২৯].

সরে পরে গোস্স অন্তস্স অৰঙ হোতি.

গো চ অস্সো চ গৰাস্সং.

সুত্তৰিভত্তেন ব্যঞ্জনেপি. সগৰচণ্ডো [অ. নি. ৪.১০৮], পরগৰচণ্ডো.

অপ্পৰিধানমুচ্চতে.

মহাৰুত্তিনা অৰণ্ণস্স উত্তং, ওত্তঞ্চ –

পুথুজ্জনো, পুথুভূতো-পুথূতি ৰা একো পাটিপদিকো, পুথুনা পুথুনীতিপি দিস্সতি, অপেক্খিযানো অপেক্খিযানঅপেক্খিত্ৰাত্যত্থো. এৰং অনুমোদিযানো, মরীচিকূপমং অভিসম্বুদ্ধানো, মা মং পিসাচা খাদন্তু, জীৰ ত্ৰং সরদোসতং [জা. ১.২.৯], রত্তিদিৰোৰ সো দিব্বো, মানুসং সরদোসতং-ৰস্সসতন্ত্যত্থো, অনুযন্তি দিসোদিসং [দী. নি. ৩.২৮১], সম্পতন্তি দিসোদিসং-তং তং দিসন্ত্যত্থো, পরোসতং, পরোসহস্সং, অঞ্ঞোঞ্ঞং অঞ্ঞমঞ্ঞং, পোনোপুঞ্ঞং পুনপ্পুনং, পোনোব্ভৰিকা তণ্হা-পুনোতি ৰা একো নিপাতো, পুনো তস্স মহে সিনো, পুনো পত্তং গহেত্ৰান, ন চ দানি পুনো অত্থি, মম তুয্হঞ্চ সঙ্গমো, ন পুনো অমতাকারং, পস্সিস্সামি মুখং তৰ [অপ. থেরী ২.২.২৩৫].

ইৰণ্ণস্স অত্তং, উত্তং, এত্তঞ্চ –

তদমিনাপেতং পরিযাযেন ৰেদিতব্বং-তং এতং অত্থজাতং ইমিনা পরিযাযেন ৰেদিতব্বন্তি অত্থো, সকিং আগচ্ছতি সীলেনাতি ¶ সকদাগামী, ইত্থিযা ভাৰো ইত্থত্তং, এৰুমং – এৰং+ইমন্তি ছেদো, ত্ৰং নো সত্থা মহামুনে, অত্থধম্মৰিদূ ইসে.

উৰণ্ণস্স ইত্তং, ওত্তঞ্চ –

মাতিতো [দী. নি. ১.৩০৩], পিতিতো, মাতিপক্খো, পিতিপক্খো, মাতিঘো [জা. ২.১৯.১১৮], পিতিঘো, মত্তিকং ধনং [পারা. ৩৪], পেত্তিকং ধনং, অপি নো লচ্ছসি, কচ্চি নো তুম্হে যাপেথ, কথং নো তুম্হে যাপেথ, সোতুকামত্থ নো তুম্হে ভিক্খৰে, ন নো সমং অত্থি [খু. পা. ৬.৩], ন হি নো সঙ্করন্তেন [ম. নি. ৩.২৭২], নত্থি নো কোচি পরিযাযো [জা. ১.৫.১১০ (ন হি নো কোচি পরিযাযো)] – ইমেসু তীসু নুসদ্দো একংসত্থে, সোসিতো সোতত্তো চেৰ [জা. ১.১.৯৪ সোতত্তো সোসিন্দো চেৰ; ম. নি. ১.১৫৭] – সুট্ঠু সীতলো সুট্ঠু সন্তত্তোত্যত্থো, জম্বুনদিযা জাতং জম্বোনদং.

এস্স ইত্তং –

ওকন্দামসি ভূতানি, পব্বতানি ৰনানি চ [জা. ২.২২.২১৭৩] – অৰকন্দামসেত্যত্থো, যং করোমসি ব্রহ্মুনো, তদজ্জ তুয্হং দস্সাম [দী. নি. ২.৩৭০], ইধ হেমন্তগিম্হিসু [ধ. প. ২৮৬], বুদ্ধপচ্চেকবুদ্ধিসু, চেতেহি চেতপুত্তিহি [চরিযা. ১.১০৬] – চেতপুত্তেহি সদ্ধিন্ত্যত্থো.

ওস্স উত্তং –

মনুঞ্ঞং, ন তেনত্থং অবন্ধিসু [জা. ১.৬.৭] – সো তেন ৰচনেন অত্থং ন অবন্ধি ন লভীত্যত্থো. অৰ্হাযন্তু সু যুদ্ধেন [জা. ২.২২.৮৭১] – সো ¶ পহারৰচনেন মং অৰ্হযন্তোত্যত্থো. অপি নু হনুকা সন্তা [জা. ১.১.১৪৬] – নো হনুকা একন্তং খিন্না দুক্খপত্তাত্যত্থো.

ৰিকারসন্ধিপি আদেসসন্ধিরূপত্তা ইধ সঙ্গয্হতি.

ইতি সরাদেসরাসি.

কৰগ্গতো পট্ঠায ৰগ্গাৰগ্গব্যঞ্জনানং আদেসো দীপিযতে.

৪৩. ৰগ্গলসেহি তে.

পঞ্চৰগ্গেহি চ ল, সেহি চ পরস্স য-কারস্স ক্ৰচি তে এৰ ৰগ্গ ল, সা হোন্তি ৰা যথাক্কমং, য-কারো পুব্বরূপত্তং আপজ্জতীতি ৰুত্তং হোতি.

নিপচ্চতীতি নিপকো, নিপকস্স ভাৰো নেপক্কং, ৰিপাকো এৰ ৰেপক্কং, ৰত্তব্বন্তি ৰাক্কং, ৰাক্যং ৰা. পমুখে সাধু পামোক্খং – যস্স পুব্বরূপত্তে কতে আদিদুতিযস্স পঠমত্তং, সুভগস্স ভাৰো সোভগ্গং, দোভগ্গং, ভুঞ্জিতব্বন্তি ভোগ্গং, যুঞ্জিতব্বন্তি যোগ্গং, কুক্কুচভাৰো কুক্কুচ্চং, ৰত্তব্বন্তি ৰাচ্চং, ৰুচ্চতে, পচ্চতে, ৰণিজানং কম্মং ৰাণিজ্জং, ভুঞ্জিতব্বন্তি ভোজ্জং, যুঞ্জিতব্বন্তি যোজ্জং.

৪৪. তৰগ্গৰরণানং যে চৰগ্গবযঞা [ক. ২৬৯, ৪১; নী. ১০৪, ১০৬, ১১৯, ১২১-৫].

আদেসভূতে ৰা ৰিভত্তিভূতে ৰা পচ্চযভূতে ৰা য-কারে পরে তৰগ্গানংৰ, র, ণানঞ্চ চৰগ্গ, ব, য, ঞাদেসা হোন্তি ৰা যথাক্কমং.

পোক্খরঞ্ঞো, পোক্খরঞ্ঞা, পোক্খরঞ্ঞং, সমণস্স ভাৰো সামঞ্ঞং, এৰং ব্রহ্মঞ্ঞং, ইচ্চেতং কুসলং [পারা. ৪১১] ইচ্চাদীনি ‘যৰা সরে’তি সুত্তে উদাহটানি.

পণ্ডিতস্স ¶ ভাৰো পণ্ডিচ্চং, সন্তস্স ভাৰো সচ্চং, তথস্স ভাৰোতচ্ছং, যজ্জেৰং-যদি+এৰং, নজ্জো, নজ্জা, নজ্জং, সুহদস্স ভাৰো সোহজ্জং, ৰত্তব্বন্তি ৰজ্জং, ঝানং উপসম্পজ্জ ৰিহরতি [ধ. স. ১৬০], উপসম্পজ্জতি, অজ্ঝোকাসো, বোজ্ঝঙ্গো, বোজ্ঝা, বোধিযা ৰা, বুজ্ঝিতব্বন্তি বোজ্ঝং, বুজ্ঝতি, পোনোপুঞ্ঞং, থনতো সম্ভূতং থঞ্ঞং.

পৰগ্গে যস্স পুব্বরূপং –

ৰপ্পতে, লুপ্পতে, অব্ভুগ্গতো, অব্ভোকাসো, উসভস্স ভাৰো ওসব্ভং, লভিযতেতি লব্ভং, লব্ভতে, গামে হিতং গম্মং, ওপম্মং, সোখুম্মং, আগম্ম, উপগম্ম, গমিযতেতি গম্মো, এৰং দম্মো, রম্মো, গম্মতে, রম্মতে.

‘তৰগ্গ ৰরণান…’ন্তি ইমিনা সুত্তেন যম্হি রস্স যত্তং –

কয্যতে করিযতে, অয্যো অরিযো.

‘ৰগ্গলসেহি তে’তি লতো যস্স পুব্বরূপং –

পল্লঙ্কো, ৰিপল্লাসো, কোসল্লং, পত্তকল্লং.

‘তৰগ্গৰরণান…’ন্তি যম্হি ৰস্স বত্তং –

পুথব্যা, পুথব্যং, ভাতু অপচ্চং ভাতব্যো, কোরব্যো, দিৰে ভৰং দিব্বং দিব্যং.

‘ৰগ্গলসেহি তে’তি সতো যস্স পুব্বরূপং –

রহসি ভৰং রহস্সং, সোমনস্সং, দোমনস্সং, সোৰচস্সং, দোৰচস্সং-মনোগণত্তা মজ্ঝে সাগমো, ভাসিতব্বন্তি ভস্সং, আদিস্স=আদিসিত্ৰা, উদ্দিস্স=উদ্দিসিত্ৰা, উপৰস্স=উপৰসিত্ৰা, সম্ফুস্স=সম্ফুসিত্ৰা, তুস্সতি, দুস্সতি, নস্সতিইচ্চাদি.

৪৫. তথনরানং ¶ টঠণলা [রূ. ৩ (পিট্ঠে)].

তাদীনং টাদিআদেসা হোন্তি ৰা.

তস্স টত্তং –

পটিহঞ্ঞতি, পটগ্গি দাতব্বো, পটিচ্ছন্নো, পটিপ্পন্নো, ব্যাৰটো, উদাহটো, দুক্কটং ইচ্চাদি.

থস্স ঠত্তং –

পীল়নট্ঠো [পটি. ম. ১.১৭], সঙ্খতট্ঠো [পটি. ম. ১.১৭], অট্ঠিংকত্ৰা সুণেয্য [জা. ২.১৭.৯২], অট্ঠকথা ইচ্চাদি.

নস্স ণত্তং –

গামং নেতীতি গামণি, সেনং নেতীতি সেনাণি, পণিধি, পণিধানং, পণিহিতং, পণামো, পরিণামো, ওণামো, উণ্ণামো, করণীযং, করণং, ঞাণং, তাণং, পমাণং, সরণং, গহণং ইচ্চাদি.

রস্স লত্তং –

পলিঘো, পলিবোধো, পলিপন্নো, পল্লঙ্কো, তলুণো তরুণো, কলুনং পরিদেৰযি [জা. ২.২২.২১৫১], মহাসালো, অট্ঠসালিনী, নযসালিনী ইচ্চাদীনি.

ইদানি মহাৰুত্তিৰিধানমুচ্চতে.

কস্স খত্তং –

নিক্খমতি, নিক্খন্তো, নেক্খমো, রাজকিচ্চং করোতীতি খত্তা, কত্তা ৰা.

দত্তঞ্চ –

সদত্থপসুতো সিযা [ধ. প. ১৬৬].

যত্তঞ্চ ¶ –

সযং রট্ঠং হিত্ৰান, পুপ্ফদানং দদাতীতি পুপ্ফদানিযো পুপ্ফদানিকো, সিপ্পলিৰনে ৰসতীতি সিপ্পলিৰনিযো সিপ্পলিৰনিকো, কুমারিযা কুমারিকা.

খস্স গত্তং –

এল়মূগো এল়মূখো.

গস্স কত্তং –

লুজ্জতীতি লোকো, আরোগ্যং অভিসজ্জেতীতি ভিসক্কো, কুলূপকো কুলূপগো, খীরূপকো খীরূপগো, গীৰূপকং গীৰূপগং.

ঘস্স হত্তং –

সীঘজৰতায সীহো.

চস্স ছত্তং –

ৰিনিচ্ছযো, অচ্ছরিযং, মচ্ছরিযং, রংসিযো নিচ্ছরন্তি-নিগচ্ছন্তীতি অত্থো.

ছস্স সত্তং –

অত্থি সাহস্স জীৰিতং [জা. ২.২২.৩১৪] -ছাহং+অস্সাতি ছেদো, সল়াযতনং.

জস্স দত্তং –

পরসেনং জিনাতীতিপস্সেনদী-মহাৰুত্তিনা সরলোপো, রস্স পররূপং.

যত্তঞ্চ –

নিস্সায জাযতীতি নিযো, নিযকো ৰা, নিযং পুত্তং.

ঞস্সণত্তং – ¶

পণ্ণত্তি পঞ্ঞত্তি, পণ্ণাসং পঞ্ঞাসং. পণ্ণৰীসতি পঞ্চৰীসতি.

নত্তঞ্চ –

নামমত্তং ন নাযতি, অনিমিত্তা ন নাযরে [ৰিসুদ্ধি. অট্ঠ. ১.২২৮] – ন পঞ্ঞাযন্তীতি অত্থো.

তস্স কত্তং –

নিযকো নিযতো.

থত্তঞ্চ –

নিত্থিণ্ণো, নিত্থরণং, নেত্থারং.

নত্তঞ্চ –

জিনো, পিনো, লিনো, পটিসল্লিনো, পল়িনো, মলিনো, সুপিনো, পহীনো, ধুনো, পুনো, লুনো, আহুনং, পাহুনং.

দস্স ডত্তং –

ছৰডাহো, দিসাডাহো, কাযডাহো.

ল়ত্তঞ্চ –

পরিল়াহো, আগন্ত্ৰা ছৰং দহন্তি এত্থাতি আল়হনং, সুসানং.

তত্তঞ্চ –

সুগতো, তথাগতো, কুসিতো, উদতি পসৰতীতি উতু.

ধস্স দত্তং –

একমিদাহং ভিক্খৰে সমযং [ম. নি. ১.৫০১] -ইধাতি ৰা নিপাতো.

হত্তঞ্চ ¶ –

সাহু দস্সনমরিযানং [ধ. প. ২০৬], সংহিতং, ৰিহিতং, পিহিতং, অভিহিতং, সন্নিহিতং, পণিহিতং, সদ্দহতি, ৰিদহতি, পিদহতি.

নস্স উত্তং –

উপঞ্ঞাসো=উপন্যাসো, ঞাযো=ন্যাযো-নিচ্চং এতি ফলং এতেনাতি ঞাযো, ঞেয্যং=নেয্যং.

যত্তঞ্চ –

থেনস্স কম্মং থেয্যং, থেরাধিনন্তি থেরাধেয্যং, পাতিমোক্খং, পরাধেয্যকং দুক্খং.

পস্স ফত্তং –

নিপ্ফজ্জতি, নিপ্ফত্তি, নিপ্ফন্নং.

বত্তঞ্চ –

সম্বহুলং=সম্পহুলং, বহুসন্তো ন ভরতি [সু. নি. ৯৮] =পহু সন্তো ন ভরতি.

ভস্স ফত্তং –

অনন্তং সব্বতোপফং [দী. নি. ১.৪৯৯].

মস্স পত্তং –

চিরপ্পৰাসিং [ধ. প. ২১৯], হত্থিপ্পভিন্নং [ধ. প. ৩২৬].

যস্স ৰত্তং –

দীঘাৰু কুমারো [মহাৰ. ৪৫৯] =দীঘাযু কুমারো, আযুং ধারেতীতি আৰুধং=আযুধং, আযু অস্স অত্থীতি অত্থে ‘আৰুসো’তি নিপাতো, কসাৰো=কসাযো, কাসাৰং=কাসাযং, সালিং লুনাতীতি সালিলাযকো, তিণলাযকো.

লস্স রত্তং ¶ –

নীলং জলং এত্থাতি নেরঞ্জরা, জলং গণ্হিতুং অলন্তি অরঞ্জরো, সস্সতং পরেতি, উচ্ছেদং পরেতি-পলেতীতি অত্থো.

ৰস্স পত্তং –

পিপাসতি পিৰাসতি.

বত্তঞ্চ –

ব্যাকতো, ব্যত্তো, ব্যঞ্জনং, সীলব্বতং, নিব্বানং, নিব্বুতং, দিব্বং, দিব্বতি, সিব্বতি, কুব্বতি, কুব্বন্তো, ক্রুব্বতি, ক্রুব্বন্তো, অসেৰিতব্বত্তা ৰারেতব্বোতি বালো, পব্বজিতো, পব্বজ্জা ইচ্চাদি.

সস্স ছত্তং –

উচ্ছিট্ঠং-অৰসিট্ঠন্ত্যত্থো, ‘‘দিব্বা সদ্দা নিচ্ছরন্তি, রংসিযো [ৰি. ৰ. ৭৩০] নিচ্ছরন্তী’’তি এত্থাপি সস্স ছত্তং ইচ্ছন্তি.

তত্তঞ্চ –

উত্তিট্ঠপত্তং উপনামেন্তি [মহাৰ. ৬৪], ‘‘উত্তিট্ঠে নপ্পমজ্জেয্যা’’ তি এত্থ পন উদ্দিস্স তিট্ঠনং উত্তিট্ঠন্তি অত্থো. ‘‘উদ্দিস্স অরিযা তিট্ঠন্তি, এসা অরিযান যাচনা [জা. ১.৭.৫৯]’’তি ৰুত্তং.

হস্স ঘত্তং –

নিচ্চং দহতি এত্থাতি নিদাঘো, লঘু লহু.

ল়স্স ডত্তং –

গরুডো গরুল়ো.

ইতি ব্যঞ্জনাদেসরাসি.

মিস্সকাদেসো ¶ ৰুচ্চতে.

অৰস্স উত্তং –

উদ্ধম্মো, উব্বিনযো, উপ্পথো, উম্মগ্গো, উঞ্ঞা অৰঞ্ঞা, উঞ্ঞাতং অৰঞ্ঞাতং, উজ্ঝানসঞ্ঞী.

ওত্তঞ্চ –

ওনদ্ধো, ওকাসো, ওৰাদো, ওলোকনং ইচ্চাদি.

ৰস্স ওত্তং –

উপোসথো – উপৰসথোতি ঠিতি, নোনীতং নৰনীতং, নিৰত্থকোচো নিৰত্থকৰচো, কো তে বলং মহারাজ, কো নু তে রথমণ্ডলং [জা. ২.২২.১৮৮০] – ক্ৰতি অত্থো. কো তে দিট্ঠো ৰা সুতো ৰা, ৰানরো ধম্মিকো ইতি, কো নুমে গোতমসাৰকা গতা-ক্ৰ নু+ইমেতি ছেদো, সোণ্ণং সুৰণ্ণং ইচ্চাদি.

কুস্স ক্রুত্তং –

ক্রুব্বতি কুব্বতি.

ত্তস্স ত্রত্তং –

অত্রজো পুত্তো, খেত্রজো পুত্তো অত্তজো, খেত্তজো, গোত্রভূ, ৰত্রভূ, চিত্রং, ৰিচিত্রং, চিত্তং, ৰিচিত্তং, উত্রস্তমিদং চিত্তং [সং. নি. ১.৯৮], উত্রাসী পলাযী [সং. নি. ১.২৪৯], যাত্রা চ মে ভৰিস্সতি [ম. নি. ১.২৩] ইচ্চাদি.

দস্স দ্রত্তং –

ইন্দ্রিযং, সুখো উদযো যস্সাতি সুখুদ্রযং, দুক্খুদ্রযং কম্মং [ম. নি. ২.১০৯], পথৰী উন্দ্রিয্যতি [সং. নি. ১.১৫৮] – ভিজ্জতীত্যত্থো, মিত্তদ্রুব্ভো মিত্তদ্দুব্ভো.

দ্দস্স দ্রত্তং ¶ –

ভদ্রং ভদ্দং, অস্সো ভদ্রো [ধ. প. ১৪৩], সদা ভদ্রানি পস্সতি [দী. নি. ২.১৫৩], সব্বে ভদ্রানি পস্সন্তু [জা. ১.২.১০৫], ভদ্রানি ভদ্রানি যানানি যোজেত্ৰা, লুদ্রং [দী. নি. ২.৪৩] লুদ্দং.

বস্স ব্রত্তং –

ব্রহাৰনং, ব্রহন্তং ৰা ৰনপ্পতিং [জা. ১.১.১৪], ব্রহ্মা, ব্রাহ্মণো – বাহিতপাপত্তা অরহা ব্রাহ্মণোতি ৰুচ্চতি, ব্রহ্মুনো অপচ্চন্তি জাতিব্রাহ্মণো ৰুচ্চতি.

ৰ, ৰীনং ব্যত্তং –

ব্যযো=ৰযো-ৰিনাসোত্যত্থো, কিচ্চাকিচ্চেসু ব্যাৰটো=ৰাৰটো, পঙ্কে ব্যসন্নো=ৰিসন্নো, ব্যম্হিতো=ৰিম্হিতো, ব্যম্হং=ৰিমানং-মানস্স ম্হত্তং.

ক্খস্স চ্ছত্তং –

অচ্ছি=অক্খি, সচ্ছি=সক্খি-সহ অক্খিনা ৰত্ততীতি অত্থে নিপাতো, পচ্চক্খন্তি অত্থো. নিব্বানং সচ্ছিকরোতি [মি. প. ৫.৩.১২], মচ্ছিকা=মক্খিকা, লচ্ছী=লক্খী-সিরীতি অত্থো.

মহাৰুত্তিনা অক্খরসংখিত্তং হোতি –

আচেরো আচরিযো, ন মাতাপিতরসংৰড্ঢো, অনাচেরকুলে ৰসং [জা. ১.১.৯], আচেরম্হি সুসিক্খিতা [জা. ১.৭.৮২], ব্রহ্মচেরো ব্রহ্মচরিযো, তিণ্হং তিখিণং, তণ্হা তসিণা, সুণ্হা সুণিসা, অভিণ্হং অভিক্খণং, পণ্হো পুব্বণ্হো, পণ্হে ৰজ্ঝো মহোসধো [জা. ১.১৫.৩২৪], সুরামেরযো-সুরামেরেয্যো, সুরামেরেয্যপানানি, যো নরো অনুযুঞ্জতি [ধ. প. ২৪৭]. কম্মধারযো= কম্মধারেয্যো ¶ , পাটিহীরং পাটিহেরং পাটিহারিযং, অচ্ছেরং অচ্ছরিযং, মচ্ছেরং মচ্ছরং মচ্ছরিযং ইচ্চাদি.

অক্খরৰড্ঢিপি হোতি –

একচ্চিযো একচ্চেয্যো একচ্চো, মাতিযো মচ্চো, কিচ্চযং কিচ্চং, পণ্ডিতিযং পণ্ডিচ্চং, সুৰামি সামি, সুৰামিনি সামিনি, সুৰকেহি পুত্তেহি সকেহি পুত্তেহি, সত্তৰো সত্তো, ত্ৰঞ্চ উত্তমসত্তৰো [জা. ২.২১.৭৬], এৰং উত্তমসত্তৰো [জা. ২.২১.৭৯] ইচ্চাদি.

ইতি মিস্সকাদেসরাসি.

বিন্দাদেসো দীপিযতে.

৪৬. ৰগ্গে ৰগ্গন্তো [ক. ৩১; রূ. ৪৯; নী. ১৩৮-৯].

ৰগ্গব্যঞ্জনে পরে নিগ্গহীতস্স সকৰগ্গন্তব্যঞ্জনাদেসো হোতি ৰা.

দীপঙ্করো, সঙ্খারো, সঙ্গহো, সঞ্চারো, সঞ্জাতো, সণ্ঠিতং, অত্তন্তপো, পরন্তপো, অমতন্দদো, পুরিন্দদো, সন্ধি, সন্নিধি, সম্পত্তি, সম্বুদ্ধো, সম্ভৰো, সম্ভারো, সম্ভিন্নো, সম্মতো ইচ্চাদীসু নিচ্চং, তঙ্করো, তংকরো ইচ্চাদীসু অনিচ্চং, বুদ্ধং সরণং গচ্ছামি [খু. পা. ১.সরণত্তয], ন তং কম্মং কতং সাধু ইচ্চাদীসু [ধ. প. ৬৭] নত্থি.

মহাৰুত্তিৰিধানমুচ্চতে.

ৰগ্গাৰগ্গেসু ব্যঞ্জনেসু পরেসু নিগ্গহীতং পররূপং গচ্ছতি –

সক্করোতি, সক্কতো, সক্কারো, সক্কচ্চং, তক্কত্তা, তক্করো, তক্খণং তঙ্খণং তং খণং, তগ্গতিকং তং গতিকং, তন্নিন্নো, তপ্পোণো, তপ্পব্ভারো, তপ্পধানো, এতপ্পরমো, যগ্গুণো যংগুণো, তল্লেণা, মল্লেণা, সল্লেখো, পটিসল্লীনো, তব্বণ্ণনা তংৰণ্ণনা, তস্সমো তংসমো, ইদপ্পচ্চযতা ¶ , চিরপ্পৰাসিং, হত্থিপ্পভিন্নং ইচ্চাদি. ইমস্মিং গন্থে একত্থ সিদ্ধম্পি তং তং রূপং তত্থ তত্থ পুনপ্পুনম্পি ৰিধিয্যতি ঞাণৰিচিত্তত্থং.

৪৭. মযদা সরে [ক. ৩৪, ৩৫; রূ. ৩৪, ৫২; নী. ১৪২-৫].

সরে পরে নিগ্গহীতস্স ক্ৰচি ম, য, দা হোন্তি ৰা.

তত্থ দাদেসো য, ত, এতসদ্দেহি নপুংসকে দিস্সতি –

যদব্রৰি [জা. ১.২.১৪৩], তদনিচ্চং [ম. নি. ২.১৯], এতদৰোচ সত্থা [সু. নি. দ্ৰযতানুপস্সনাসুত্ত].

সমাসে পন দাদেসো তিলিঙ্গে দিস্সতি –

যদনন্তরং, তদনন্তরং, এতদত্থা কথা [অ. নি. ২.৬৮]. এতদত্থা মন্তনা [অ. নি. ২.৬৮] -তত্থ যস্স অত্থস্স ৰা যস্স পদস্স ৰা যস্সা কথায ৰা অনন্তরং যদনন্তরং.

ক্ৰচিত্ৰেৰ? যমেতং ৰারিজং পুপ্ফং, অদিন্নং উপসিঙ্ঘসি [জা. ১.৬.১১৫].

মাদেসো য, ত, এতসদ্দেহি পুমিত্থিলিঙ্গেসু দিস্সতি –

যমাহু দেৰেসু সুজম্পতীতি [জা. ১.১৫.৫৪], তমত্থং পকাসেন্তো সত্থা [জা. অট্ঠ. ১.২০.৩৫], এতমত্থং ৰিদিত্ৰা [মহাৰ. ২-৩].

অঞ্ঞসদ্দেহি পন দ্ৰে আদেসা তিলিঙ্গে দিস্সন্তি –

সকদাগামী, এৰমেতমভিঞ্ঞায [সু. নি. ১২২১] ইচ্চাদি.

যাদেসো ইদংসদ্দে পরে তসদ্দম্হা এৰ ক্ৰচি দিস্সতি –

তযিদং ন সাধু [জা. ২.২২.২৭৯], তযিদং ন সুট্ঠু [জা. ২.২২.২৭৯].

৪৮. যেৰহিসু ঞো

য ¶ , এৰ, হিসদ্দেসু পরেসু নিগ্গহীতস্স ঞো হোতি. যস্স পুব্বরূপত্তং.

আনন্তরিকঞ্ঞমাহু [খু. পা. ৬.৫] – আনন্তরিকং + যং + আহূতি ছেদো, যঞ্ঞদেৰ-যং + যং + এৰ, তঞ্ঞেৰ তং+এৰ, পুরিসঞ্ঞেৰ, পচ্চত্তঞ্ঞেৰ, তঞ্হি, পুরিসঞ্হি, অত্থসঞ্হিতো অত্থসংহিতো, ধম্মসঞ্হিতো ধম্মসংহিতো.

৪৯. যে সংস্স [ক. ৩৩; রূ. ৫১; নী. ১৪১].

যম্হি পরে সং উপসগ্গস্স নিগ্গহীতস্স ঞো হোতি. যস্স পুব্বরূপত্তং.

সঞ্ঞোগো সংযোগো, সঞ্ঞুত্তো সংযুত্তো. সংযোজনং সংযোজনং, সঞ্ঞমো সংযমো, সঞ্ঞতো সংযতো, সঞ্ঞমতি সংযমতি, সঞ্ঞাচিকা সংযাচিকা কুটিং [পারা. ৩৪৮] ইচ্চাদি.

ইতি বিন্দাদেসরাসি.

আদেসসন্ধিরাসি নিট্ঠিতো.

আগমসন্ধি

অথাগমসন্ধি দীপিযতে.

মহাৰুত্তিনা সরাগমো –

অ –

পণ্ণসালং অমাপেত্ৰা [জা. ২.২২.১৯১৩], পণ্ণসালং অমাপিয [জা. ১.১.১৪৮] – মাপেত্ৰা ইচ্চেৰত্থো, ন চাপি অপুনপ্পুনং, হত্থিবোন্দিং পৰেক্খামি [জা. ১.১.১৪৮] -পুনপ্পুনং ইচ্চেৰত্থো ¶ , নত্থি লোকে অনামতং [জা. ১.২.৩১] – অমত পুব্বং ঠানন্তি অত্থো, অনৰজ্জং, অনমতগ্গো, জচ্চন্ধো, জচ্চবধিরো, জচ্চমূগো, জচ্চপণ্ডকো.

আ –

অড্ঢে আজাযরে কুলে [সং. নি. ১.৪৯], মনুস্সেসু পচ্চাজাতো, আপূরতি তস্স যসো [পরি. ৩৮৬].

ই –

ধম্মিকথং কত্ৰা [পারা. ৩৯], সরন্তা সপন্তি গচ্ছন্তীতি সরিসপা.

ঈ –

কবল়ীকারো, মনসীকারো, মনসীকরোতি, তপ্পাকটীকরোতি, দূরীভূতো, অব্যযীভাৰো.

উ –

ঞাতিপরিজিনস্স ভাৰো ঞাতিপারিজুঞ্ঞং, এৰং ভোগপারিজুঞ্ঞং- পরিজিনস্সাতি পরিহানস্স, পরিক্খযস্স.

ও –

পরোসতং, সরদোসতং, দিসোদিসং [ধ. প. ৪২] ইচ্চাদি.

‘অতিপ্পগো খো তাৰ পিণ্ডায চরিতু’ [দী. নি. ৩.১] ন্তি এত্থ পাতোত্থো পগোসদ্দো এৰ.

ইতি সরাগমরাসি.

৫০. ৰনতরগাচাগমা

সরে পরেৰ ন, ত, র, গা চ ম, য, দা চ আগমা হোন্তি.

গো, তো, দো, নো, মো, যো, রো, ৰো,

তত্থ ¶ গো –

অরিযেহি পুথগেৰাযং জনোতি পুথুজ্জনো [মহানিদ্দেসে], ইধ পন পগোসদ্দো এৰ, পগেৰ ৰুত্যস্স, পগেৰ মনুস্সিত্থিযাতি [পারা. ৫৫].

তো –

অজ্জতগ্গে [দী. নি. ১.২৫০], তস্মাতিহ [ম. নি. ১.২৯], কতমো নাম সো রুক্খো, যস্স তেৰং গতং ফলং [জা. ২.১৮.১০] -তেৰন্তি এৰং.

দো –

উদগ্গো, উদব্বহি, উদপাদি, উদযো, উদাহটো, উদিতো, উদীরিতো, দুভতো ৰুট্ঠানং [পটিসম্ভিদামগ্গে; ৰিসুদ্ধিমগ্গে], দুভযানি ৰিচেয্য পণ্ডরানি [সু. নি. ৫৩১], তোদেয্য, কপ্পা দুভযো [সু. নি. ১১৩১] – দ্ৰে ইসযোতি অত্থো. কিঞ্চিদেৰ, কোচিদেৰ, কিস্মিঞ্চিদেৰ, যাৰদেৰ, তাৰদেৰ, ৰলুত্তে-যাৰদে, তাৰদেতি সিদ্ধং, পুনদেৰ, সকিদেৰ, সম্মদেৰ-দাগমে রস্সো, সম্মদক্খাতো [সং. নি. ৫.১৯৫], সম্মদঞ্ঞা ৰিমুত্তো [ম. নি. ২.২৩৪], বহুদেৰ রত্তিং [অ. নি. ৩.১০১], অহুদেৰ ভযং [দী. নি. ১.১৫৯] ইচ্চাদি.

নো –

ইতো নাযতি, চিরং নাযতি, কম্মে সাধু কম্মনিযং কম্মঞ্ঞং, অত্তনো ইদং অত্তনিযং, অদ্ধানং খমতীতি অদ্ধনিযং, লোভস্স হিতং লোভনিযং লোভনেয্যং, দোসনিযং দোসনেয্যং, মোহনিযং মোহনেয্যং, ওঘনিযং, যোগনিযং, গন্থনিযং, নিদ্ধুননং, নিদ্ধুননকো, সঞ্জাননং, সঞ্জাননকো, সঞ্ঞাপনকো ইচ্চাদি.

মো ¶ –

লহুমেস্সতি [ধ. প. ৩৬৯], গরুমেস্সতি, মগ্গমত্থি [ৰিভ. অট্ঠ. ১৮৯], অগ্গমক্খাযতি [অ. নি. ৪.৩৪], উরগামিৰ [জা. ১.৭.৩০], অরহতামিৰ [দী. নি. ২.৩৪৮] ইচ্চাদীনি. তথা কেন তে ইধ মিজ্ঝতি [পে. ৰ. ১৮১], রূপানি মনুপস্সতি [ধ. স. অট্ঠ. ৫৯৬], আকাসে মভিপূজযে, অঞ্ঞমঞ্ঞস্স [ম. নি. ৩.৪০], একমেকস্স [পারা. অট্ঠ. ১.২৩], সমণমচলো [অ. নি. ৪.৮৭], অদুক্খমসুখা ৰেদনা [সং. নি. ৪.২৫০] ইচ্চাদি.

যো –

নযিমস্স ৰিজ্জা মযমত্থি [জা. ১.৩.২৫], যথযিদং [অ. নি. ১.২১-২২], তথযিদং, ছযিমে ধম্মা [অ. নি. ৬.১১], নৰযিমে ধম্মা [অ. নি. ৯.৯], দসযিমে ধম্মা [অ. নি. ১০.১৬], মমযিদং, সোযেৰ, তেযেৰ, তংযেৰ তঞ্ঞেৰ, তেহিযেৰ, তেসংযেৰ তেসঞ্ঞেৰ, তস্মিযেৰ, বুদ্ধোযেৰ, বুদ্ধেসুযেৰ, বোধিযাযেৰ কারণা [চরিযা. ১.৬৫], হোতিযেৰ, অত্থিযেৰ ইচ্চাদি. তিযন্তং, অগ্গিযাগারে, চতুত্থীযত্থে ইচ্চাদীনি ইৰণ্ণন্তরূপানি যাগমেনাপি সিজ্ঝন্তিযেৰ.

রো –

নিরন্তরং, নিরত্থকং, নিরাহারো, নিরাবাধো, নিরালযো, নিরিন্ধনো অগ্গি, নিরীহকং, নিরুদকং, নিরুত্তি, নিরুত্তরো, নিরূমিকা নদী, নিরোজং, দুরতিক্কমো, দুরভিসম্ভৰো, দুরাসদা বুদ্ধা [অপ. থের ১.৪০.২৭০], দুরাখ্যাতো ধম্মো [দী. নি. ৩.১৬৬], দুরাগতং, দুরুত্তং ৰচনং [অ. নি. ৫.১৪০], পাতুরহোসি [মহাৰ. ৮], পাতুরহু [জা. ১.১৪.২০২], পাতুরহেসুং [অ. নি. ৩.৭১], পাতরাসো, পুনরেতি, ধীরত্থু [জা. ১.১.১৩], চতুরঙ্গিকং ঝানং [ধ. স. ১৬৮], চতুরারক্খা, চতুরাসীতিসহস্সানি, চতুরিদ্ধিলাভো, ¶ চতুরোঘা, ৰুদ্ধিরেসা [দী. নি. ১.২৫১], পথৰীধাতুরেৰেসা [ম. নি. ৩.৩৪৮-৩৪৯], আপোধাতুরেৰেসা [ম. নি. ৩.৩৫০], সব্ভিরেৰ সমাসেথ, নক্খত্তরাজারিৰ তারকানং, ৰিজ্জুরিৰ অব্ভকূটে, আরগ্গেরিৰ, উসভোরিৰ [সু. নি. ২৯], যথরিৰ, তথরিৰ [দী. নি. ১.২৬৩] -রাগমে রস্সো. এত্থ চ যথা ‘‘অতিরিৰ কল্লরূপা [সু. নি. ৬৮৮], অতিৰিয লাভগ্গযসগ্গপত্তো, পরংৰিয মত্তায’’ ইচ্চাদীসু ইৰ, ৰিযসদ্দা এৰত্থে ৰত্তন্তি, তথা ‘‘যথরিৰ, তথরিৰ, ৰরম্হাকং ভুসামিৰ [জা. ১.৩.১০৮], নেতং অজ্জতনামিৰ’’ ইচ্চাদীসু ইৰসদ্দো এৰত্থে ৰত্ততি.

ৰো –

দুৰঙ্গুলং, দুৰঙ্গিকং, তিৰঙ্গুলং, তিৰঙ্গিকং, পাগুঞ্ঞৰুজুতা, ৰুসিতং, ৰুত্তং, ৰুচ্চতে, আসনা ৰুট্ঠাতি [পাচি. ৫৪৭], ৰুট্ঠানং, ৰুট্ঠহিত্ৰা, ভিক্খুৰাসনে, পুথুৰাসনে, সযম্ভুৰাসনে ইচ্চাদীনি উৰণ্ণন্তরূপানি ৰাগমেনাপি সিজ্ঝন্তিযেৰ.

৫১. ছা ল়ো.

সরে পরে ছম্হা ল়াগমো হোতি.

ছল়ঙ্গং, ছল়াযতনং, ছল়াসীতিসহস্সানি [পে. ৰ. ৩৭৪], অত্থস্স দ্ৰারা পমুখা ছল়েতে [জা. ১.১.৮৪], ছল়েৰানুসযা হোন্তি [অভিধম্মত্থসঙ্গহ], ছল়ভিঞ্ঞা মহিদ্ধিকা [বু. ৰং. ৩.৫].

মহাৰুত্তিৰিধানমুচ্চতে.

সরে ¶ পরে মনাদীহি সাগমো –

মনসিকারো, মানসিকো, চেতসিকো, অব্যগ্গমনসো নরো [অ. নি. ১.৩০], পুত্তো জাতো অচেতসো, উরে ভৰো ওরসো ইচ্চাদি.

সরে পরে বহুলং হাগমো –

মাহেৰং আনন্দ [দী. নি. ২.৯৫], নোহেতং ভন্তে [দী. নি. ১.১৮৫-১৮৬], নোহিদং ভো গোতম [দী. নি. ১.২৬৩], নহেৰং ৰত্তব্বে [কথা. ১], হেৰং ৰত্তব্বে, হেৰং ৰদতি, উজূ চ সুহুজূচ [খু. পা. ৯.১], সুহুট্ঠিতং সুখণো ইচ্চাদি.

ইতি ব্যঞ্জনাগমরাসি.

৫২. নিগ্গহীতং [ক. ৩৫; রূ. ২১ (পিট্ঠে); নী. ৫৬].

নিগ্গহীতং ক্ৰচি আগতং হোতি ৰা.

উপৰস্সং খো পন [পারা. ৬৫৩], নৰং পন ভিক্খুনা চীৰরলাভেন [পাচি. ৩৬৮], অপ্পমাদো অমতং পদং [ধ. প. ২১], চক্খুং উদপাদি [মহাৰ. ১৫], অণুংথূলানি [ধ. প. ২৬৫], কত্তব্বং কুসলং বহুং [ধ. প. ৫৩], অৰংসিরা পতন্তি [জা. ১.১১.৩৫], যদত্থো, তদত্থো, এতদত্থো, তক্কত্তা, তক্করো ইচ্চাদীনি পুব্বে ৰুত্তানেৰ, তথা তংসম্পযুত্তো, তব্বোহারো, তব্বহুলো ইচ্চাদি.

ইতি বিন্দাগমরাসি.

মহাৰুত্তিনা পদানং অন্তে গত, জাত, অন্ত সদ্দা আগমা হোন্তি.

রূপগতং ¶ [ম. নি. ২.১৩৩] ৰেদনাগতং [ম. নি. ২.১৩৩], সঞ্ঞাগতং [ম. নি. ২.১৩৩], গূথগতং [ম. নি. ২.১১৯], মুত্তগতং [ম. নি. ২.১১৯], দিট্ঠিগতং [মহাৰ. ৬৬], অত্থজাতং [পারা. অট্ঠ. ১.পঠমমহাসঙ্গীতিকথা], ধম্মজাতং, সুত্তন্তো [কথা. ২২৬], ৰনন্তো, সম্মাকম্মন্তো, মিচ্ছাকম্মন্তো ইচ্চাদি.

আগমসন্ধিরাসি নিট্ঠিতো.

দ্ৰিভাৰসন্ধি

অথ দ্ৰিভাৰসন্ধি দীপিযতে.

দ্ৰিভাৰো তিৰিধো. তত্থ পক্কমো, পরক্কমো ইচ্চাদি ব্যঞ্জনদ্ৰিত্তং নাম. রুক্খং রুক্খং সিঞ্চতি ইচ্চাদি ৰিভত্যন্তপদদ্ৰিত্তং নাম. তিতিক্খা, তিকিচ্ছা, জগমা, জগমু ইচ্চাদি ধাতুপদদ্ৰিত্তং নাম.

৫৩. সরম্হা দ্ৰে [ক. ২৮; রূ. ৪০; নী. ৬৭].

সরম্হা পরস্স ব্যঞ্জনস্স ক্ৰচি দ্ৰে রূপানি হোন্তি.

তত্থ সরম্হা প, পতি, পটীনং পস্স দ্ৰিত্তং –

অপ্পমাদো, ইধপ্পমাদো, ৰিপ্পযুত্তো, সম্মপ্পধানং, অপ্পতিৰত্তিযং ধম্মচক্কং [মহাৰ. ১৭], সুপ্পতিট্ঠিতো, অপ্পটিপুগ্গলো, ৰিপ্পটিসারো, সুপ্পটিপন্নো ইচ্চাদি.

সরম্হাতি কিং? সম্পযুত্তো.

কী, কুধ, কমু, কুস, গহ, জুত, ঞা, সি, সু, সম্ভু, সর, সস ইচ্চাদীনং ধাতূনঞ্চ, উ, দু, নিপুব্বানং পদানঞ্চ আদিব্যঞ্জনস্স দ্ৰিত্তং.

কী ¶ –

ৰিক্কিনাতি, ৰিক্কযো, ধনক্কীতো.

কুধ –

অক্কুদ্ধো, অক্কোধো.

কমু –

অভিক্কমতি, অভিক্কমো, অভিক্কন্তো, অক্কমতি, অক্কমো, অক্কন্তো, পরক্কমতি, পরক্কমো, ৰিক্কমতি, ৰিক্কমো, ওক্কমতি, ওক্কন্তো.

কুস –

অক্কোসতি, অক্কোসো.

গহ –

পগ্গণ্হাতি, পগ্গহো, ৰিগ্গহো, পরিগ্গহো, অনুগ্গহো.

জুত –

উজ্জোততি, ৰিজ্জোততি.

ঞা –

অঞ্ঞা, পঞ্ঞা, অভিঞ্ঞা, পরিঞ্ঞা, ৰিঞ্ঞাণং, সব্বঞ্ঞুতঞ্ঞাণং, রত্তঞ্ঞূ, অত্থঞ্ঞূ, ধম্মঞ্ঞূ.

সি –

অতিস্সযো, ভূমস্সিতো, গেহস্সিতো.

সু –

অপ্পস্সুতো, বহুস্সুতো, ৰিস্সুতো, অস্সৰো, অনস্সৰো.

সম্ভু ¶ –

পস্সম্ভতি, পস্সদ্ধি, পস্সদ্ধো.

সর –

অনুস্সরতি, অনুস্সতি, অনুস্সরো.

সস –

অস্সসতি, অস্সসন্তো, অস্সাসো, পস্সাসো.

সজ –

ৰিস্সজ্জেতি, ৰিস্সজ্জন্তো, ৰিস্সগ্গো.

চজ –

পরিচ্চজতি, পরিচ্চজন্তো, পরিচ্চাগো ইচ্চাদি.

উপুব্বে –

উক্কংসতি, উক্কংসো, উগ্গহো, উচ্চারেতি, উচ্চারো, উচ্চযো, সমুচ্চযো, উজ্জলো, সমুজ্জলো, উণ্ণমতি, উত্তরতি ইচ্চাদি.

দুপুব্বে –

দুক্কটং, দুক্করং, দুগ্গতি, দুচ্চরিতং, দুত্তরো, দুদ্দমো, দুন্নযো, দুপ্পোসো, দুব্বলো, দুম্মগ্গো, দুল্লভো ইচ্চাদি.

নিপুব্বে –

নিক্কমো, নিক্খন্তো, নিগ্গতো, নিচ্চোরো, নিজ্জরো, নিদ্দোসো, নিপ্পাপো, নিম্মিতো, নিম্মানো, নিয্যানং, নিল্লোলো, নিব্বানং, নিস্সযো ইচ্চাদি.

তিক, তয, তিংসানং তস্স দ্ৰিত্তং –

কুসলত্তিকং, ৰেদনত্তিকং, ৰত্থুত্তযং, রতনত্তযং, দ্ৰত্তিংসং, তেত্তিংসং.

চতু ¶ , ছেহি পরব্যঞ্জনস্স দ্ৰিত্তং –

চতুব্বিধং, চতুদ্দস, চতুদ্দিসং, চতুপ্পদং, ছব্বিধং, ছন্নৰুতি.

ৰা ত্ৰেৰ? চতুসচ্চং, ছসতং.

সন্তস্স সত্তে পরব্যঞ্জনস্স নিচ্চং দ্ৰিত্তং –

সজ্জনো, সপ্পুরিসো, সদ্ধম্মো, সন্তস্স ভাৰো সত্তা, সব্ভাৰো.

ৰস্স বত্তে বস্স দ্ৰিত্তং –

সীলব্বতং, নিব্বানং, নিব্বুতং ইচ্চাদি পুব্বে ৰুত্তমেৰ.

ৰতু, ৰটু ইচ্চাদীনং অন্তব্যঞ্জনস্স দ্ৰিত্তং –

ৰত্ততি, পৰত্ততি, নিৰত্ততি, সংৰত্ততি, ৰট্টতি, ৰিৰট্টতি.

সংম্হা অনুনো নস্স দ্ৰিত্তং –

সমন্নাগতো, সমন্নাহারো, সমন্নেসতি.

অঞ্ঞত্রপি –

সীমং সম্মন্নেয্য [মহাৰ. ১৩৯], সীমং সম্মন্নিতুং [মহাৰ. ১৩৮], সীমং সম্মন্নতি [মহাৰ. ১৩৯], সম্পটিচ্ছন্নং, চীৰরচেতাপন্নং, চতুন্নং, পঞ্চন্নং.

ইতি সদিসদ্ৰিত্তরাসি.

৫৪. চতুত্থদুতিযেস্ৰেসং ততিযপঠমা [ক. ৪৪, ২৯; রূ. ২৪; নী. ৫৭, ৬৮, ৭৪, ৭৭-৮, ৮০, ৮২-৩, ৯১, ১২২].

ৰগ্গে চতুত্থ, দুতিযেসু পরেসু কমেন ততিয, পঠমা এসং চতুত্থ, দুতিযানং দ্ৰিভাৰং গচ্ছন্তি, দুতিযভাৰং গচ্ছন্তীতি অত্থো. ‘সরম্হা দ্ৰে’তি সুত্তেন ৰা ‘ৰগ্গলসেহি তে’ইচ্চাদীহি ৰা দুতিয, চতুত্থানম্পি সদিসত্তে জাতে পুন ইমিনা সুত্তেন ¶ আদিদুতিযস্স পঠমত্তং, আদিচতুত্থস্স ততিযত্তঞ্চ জাতং.

তত্থ কৰগ্গে –

আক্খাতং, পক্খিত্তং, পক্খেপো, রূপক্খন্ধো, ৰেদনাক্খন্ধো, ধাতুক্খোভো, আযুক্খযো, নক্খমতি.

‘ৰগ্গলসেহি তে’তি সুত্তৰিধানে –

পমুখে সাধু পামোক্খং, পগ্ঘরতি, উগ্ঘোসতি, নিগ্ঘোসো.

চৰগ্গে –

অচ্ছাদেতি, অচ্ছিন্দতি-সংযোগে রস্সত্তং, পচ্ছাদেতি, পচ্ছিন্দতি, সেতচ্ছত্তং, রুক্খচ্ছাযা, তথস্স ভাৰো তচ্ছং, রথস্স হিতা রচ্ছা, পজ্ঝাযতি, উজ্ঝাযতি, নিজ্ঝাযতি, পঠমজ্ঝানং, দুতিযজ্ঝানং, অজ্ঝোকাসো, বোজ্ঝঙ্গো, দুম্মেধস্স ভাৰো দুম্মেজ্ঝং, বুজ্ঝতি, বুজ্ঝিতব্বং, বোজ্ঝং, পটিৰিজ্ঝ, পটিৰিজ্ঝিয, পটিৰিজ্ঝিত্ৰা ইচ্চাদি.

টৰগ্গে –

যত্রট্ঠিতং, তত্রট্ঠিতো, উট্ঠিতো, নিট্ঠিতো, থলট্ঠো, জলট্ঠো, ৰুড্ঢো ইচ্চাদি.

তৰগ্গে –

সুমনত্থেরো, যসত্থেরো, অৰত্থা, অৰত্থানং, ৰিত্থারো, অভিত্থুতো, ৰিত্থম্ভিতো, উদ্ধরতি, উদ্ধরণং, উদ্ধটং, নিদ্ধারেতি, নিদ্ধারণং, নিদ্ধারিতং, নিদ্ধনো, নিদ্ধুতো, নিদ্ধোতো ইচ্চাদি.

পৰগ্গে –

ৰিপ্ফরতি, ৰিপ্ফরণং, ৰিপ্ফারো, অপ্ফোটেতি, মহপ্ফলং, নিপ্ফলং, মধুপ্ফাণিতং, ৰিব্ভমতি, ৰিব্ভমো, উব্ভতং, নিব্ভযং, দুব্ভরো, সব্ভাৰো ¶ , উসভস্স ভাৰো ওসব্ভং, লব্ভতি, আরব্ভো, আরব্ভ, আরব্ভিত্ৰা ইচ্চাদি.

ইধপি উ, দু, নিতো পরপদানং আদিব্যঞ্জনস্স দ্ৰিত্তং ৰিসেসতো ইচ্ছন্তি.

ইতি ৰিসদিসদ্ৰিত্তরাসি.

৫৫. ৰিচ্ছাভিক্খঞ্ঞেসু দ্ৰে [চং. ৬.৩-১; পা. ৮.১.১, ৪].

ৰিচ্ছাযং অভিক্খঞ্ঞে চ অনেকত্থস্স একপদস্স দ্ৰে রূপানি হোন্তি. ভিন্নে অত্থে ক্রিযায ৰা দব্বেন ৰা গুণেন ৰা ব্যাপিতুং ইচ্ছা ৰিচ্ছা. পুনপ্পুনক্রিযা অভিক্খঞ্ঞং.

ৰিচ্ছাযং তাৰ –

রুক্খং রুক্খং সিঞ্চতি. গামে গামে সতংকুম্ভা, গামো গামো রমণিযো, গেহে গেহে ইস্সরো, রসং রসং ভক্খযতি, ক্রিযং ক্রিযং আরভতে.

আনুপুব্বিযেপি ৰিচ্ছাৰ গম্যতে –

মূলে মূলে থূলা, অগ্গে অগ্গে সুখুমা, জেট্ঠং জেট্ঠং অনুপৰেসেথ, ইমেসং দেৰসিকং মাসকং মাসকং দেহি, মঞ্জূসকরুক্খো পুপ্ফং পুপ্ফং পুপ্ফতি, ইমে জনা পথং পথং অচ্চেন্তি, সব্বে ইমে অড্ঢা, কতরা কতরা ইমেসং অড্ঢতা, কতমা কতমা ইমেসং অড্ঢতা.

অভিক্খঞ্ঞে –

ভত্তং পচতি পচতি, অপুঞ্ঞং পসৰতি পসৰতি, ভুত্ৰা ভুত্ৰা নিপ্পজ্জন্তি, পটং পটং করোতি, পটপটাযতি, একমেকং, একমেকানি ইচ্চাদীসু ৰিচ্ছাসু পুব্বপদে স্যাদিলোপো.

৫৬. সব্বাদীনং ৰীতিহারে.

অতিক্কম্ম ¶ হরণং অতিহারো, ন অতিহারো ৰীতিহারো, অঞ্ঞমঞ্ঞস্স অন্তোযেৰ হরণন্তিঅত্থো, ৰীতিহারত্থে গম্যমানে সব্বাদীনং সব্বনামানং দ্ৰে রূপানি হোন্তি, পুব্বস্সেকস্স চ স্যাদিলোপো.

ইমে দ্ৰে জনা অঞ্ঞমঞ্ঞস্স উপকারকা, ইতরীতরস্স উপকারকা, অঞ্ঞমঞ্ঞং পস্সন্তি, অঞ্ঞমঞ্ঞস্স দেন্তি, অঞ্ঞমঞ্ঞস্স অপেন্তি, অঞ্ঞমঞ্ঞস্স ধনং, অঞ্ঞমঞ্ঞে নিস্সিতা.

৫৭. যাৰতাতাৰং সম্ভমে [চং. ৬.৩.১৪; পা. ৮.১.১২; যাৰবোধং সম্ভমে (বহূসু)].

যং পরিমাণমস্সাতি যাৰং. তং পরিমাণমস্সাতি তাৰং. পুনপ্পুনং ভমনং পৰত্তনং সম্ভমো. তুরিতেন ৰচীপযোগেন তং তং উপাযদীপনং সম্ভমো, আমেডিতমেৰ ৰুচ্চতি, সম্ভমে গম্যমানে যাৰতা যত্তকেন পদেন সো অত্থো পঞ্ঞাযতি, তত্তকং পদং পযুজ্জতে, দ্ৰিক্খত্তুং ৰা তিক্খত্তুং ৰা তদুত্তরি ৰা উদীরিযতেত্যত্থো. যথাবোধং সম্ভমেতিপি পাঠো, সোযেৰত্থো.

ভযে, কোধে, পসংসাযং, তুরিতে, কোতূহলে’চ্ছরে.

হাসে, সোকে, পসাদে চ, করে আমেডিতং বুধো.

তত্থ ভযে –

সপ্পো সপ্পো, চোরো চোরো –

কোধে –

ৰিজ্ঝ ৰিজ্ঝ, পহর পহর.

পসংসাযং –

সাধু সাধু.

তুরিতে ¶ –

গচ্ছ গচ্ছ.

কোতূহলে –

আগচ্ছ আগচ্ছ.

অচ্ছরে –

অহো বুদ্ধো অহো বুদ্ধো.

হাসে –

অভিক্কমথ ৰাসেট্ঠা অভিক্কমথ ৰাসেট্ঠা [দী. নি. ২.২১০].

সোকে –

কহং একপুত্তক কহং একপুত্তক [সং. নি. ৪.১২০].

পসাদে –

অভিক্কন্তং ভো গোতম অভিক্কন্তং ভো গোতম [ম. নি. ২.১০৬] ইচ্চাদি. তিক্খত্তুংউদানং উদানেসি ‘‘নমো তস্স ভগৰতো’’ [ম. নি. ২.৩৫৭] ইচ্চাদি.

ইতি পদৰাক্যদ্ৰিত্তরাসি.

দ্ৰিভাৰসন্ধিরাসি নিট্ঠিতো.

ৰিপল্লাসসন্ধি

অথ ৰিপল্লাসসন্ধি দীপিযতে.

পদক্খরানং পুব্বাপরৰিপরিযাযো ৰিপল্লাসো.

৫৮. হস্স ৰিপল্লাসো.

যম্হি পরে হস্স পুব্বাপরৰিপল্লাসো হোতি ৰা.

দয্হতি, সঙ্গয্হতি, সন্নয্হতি, ৰুয্হতি, দুয্হতি, মুয্হতি.

ৰাত্ৰেৰ ¶ ? সঙ্গণ্হিযতি, এৰং সঙ্গয্হ সঙ্গণ্হিত্ৰা, আরুয্হ আরুহিত্ৰা, ওগায্হ ওগাহিত্ৰা. পসয্হ পসহিত্ৰা.

৫৯. ৰে ৰা [রূ. ৪০ (পিট্ঠে)].

ৰম্হি পরে হস্স ৰিপল্লাসো হোতি ৰা.

বৰ্হাবাধো বহ্ৰাবাধো, বৰ্হেত্থ ন্হাযতী জনো [উদা. ৯] =বহ্ৰেত্থ ন্হাযতী জনো.

মহাৰুত্তিৰিধানং ৰুচ্চতে.

য, রানং ৰিপল্লাসো –

কুটি মে কযিরতি [পারা. ৩৫৮], ৰচনং পযিরুদাহাসি, গরুং পযিরূপাসতি, ৰন্দামি তে অয্যিরে পসন্নচিত্তো [জা. ২.১৭.৫৪] -যস্স দ্ৰিত্তং.

নিগ্গহীতস্স ৰিপল্লাসো –

নিরযম্হি অপচ্চিসুং [জা. ২.২২.৬০], তে মে অস্সে অযাচিসুং [জা. ২.২২.১৮৬৩]. ইমা গাথা অভাসিসুং.

সরানম্পি ৰিপল্লাসো –

হঞ্ঞয্যেৰাপি কোচি নং [জা. ২.২২.১১৯৩] – হঞ্ঞেয্যাতি ঠিতি, অমূলমূলং গন্ত্ৰা-মূলমূলং অগন্ত্ৰাতি অত্থো. এৰং পরত্র. অনোকাসং কারাপেত্ৰা [পারা ৩৮৯], অনিমিত্তং কত্ৰা, সদ্ধং ন ভুঞ্জতীতি অসদ্ধভোজি, দিস্ৰা পদমনুত্তিণ্ণং [জা. ১.১.২০] – উত্তিণ্ণং অদিস্ৰাতি অত্থো.

পদানম্পি ৰিপল্লাসো –

নৰং পন ভিক্খুনা চীৰরলাভেন, নাগকঞ্ঞা চরিতং গণেন [জা. ১.১৫.২৬৮] -নাগকঞ্ঞাগণেন চরিতন্তি ঠিতি.

ইতি ৰিপল্লাসরাসি.

৬০. বহুলং [চং. ১.১.১৩০; পা. ৩.৩.১১৩].

সন্ধিৰিধানং ¶ নাম বহুলং হোতি, যেভুয্যেন হোতীতি অত্থো. অধিকারসুত্তং. যাৰগন্থপরিযোসানা যুত্তট্ঠানেসু সব্বত্থ ৰত্ততে. এতেন সব্বসদ্দসুত্তেসু অনিট্ঠনিৰত্তি চ ইট্ঠপরিগ্গহো চ কতো হোতি.

ইতি নিরুত্তিদীপনিযা নাম মোগ্গল্লানদীপনিযং

সন্ধিকণ্ডো নিট্ঠিতো.

২. নামকণ্ড

ৰিভত্তিরাসি

অথ ¶ লিঙ্গম্হা স্যাদিৰিভত্তিৰিধানং দীপিযতে.

লিঙ্গং, নামং, পাটিপদিকন্তি অত্থতো একং, দব্বাভিধানস্স পুরিসাদিকস্স পকতিরূপস্সেতং নামং. তঞ্হি সত্তন্নং ৰিভত্তীনং ৰসেন ৰিভাগং পত্ৰা কিঞ্চি ৰিসদরূপং হোতি, কিঞ্চি অৰিসদরূপং, কিঞ্চি মজ্ঝিমরূপন্তি এৰং তিৰিধেন লিঙ্গরূপেন যুত্তত্তা লিঙ্গন্তি ৰুচ্চতি.

তদেৰ কিঞ্চি সদ্দলিঙ্গানুরূপং, কিঞ্চি অত্থলিঙ্গানুরূপঞ্চ পরিণমন্তং পৰত্ততি, তস্মা নামন্তি চ ৰুচ্চতি.

তদেৰ ধাতু, পচ্চয, ৰিভত্তিপদেহি চেৰসদ্দপদত্থকপদেহি চ ‘ৰিসুং ভূতং পদ’ন্তি কত্ৰা পাটিপদিকন্তি চ ৰুচ্চতি.

তত্থ ধাতুপদং নাম ব্রূ, ভূ, হূইচ্চাদি.

পচ্চযপদং নাম ণ, তব্ব, অনীয ইচ্চাদি.

ৰিভত্তিপদং নাম সি, যো, অং, যো,তি, অন্তি ইচ্চাদি.

সদ্দপদত্থকপদানি নাম রাজস্স, সখস্স, পুমস্স ইচ্চাদীনি. এত্থ চ রাজস্সইচ্চাদীনি সদ্দসুত্তে সদ্দপদত্থকানি হোন্তি, পযোগে অত্থপদত্থকানি. ধাতুপচ্চযৰিভত্তিপদানি পন নিচ্চং সদ্দপদত্থকানি এৰ হোন্তি, সদ্দসুত্তেস্ৰেৰ চ লব্ভন্তি, ন পযোগেতি, ইদং দ্ৰিন্নং নানত্তং.

যদিএৰং ভুস্স, ব্রুস্স, ভূতো, হূতো, ণে, তব্বে, সিম্হি, তিম্হি ইচ্চাদিনা তেহি কথং ৰিভত্তুপ্পত্তি হোতীতি? অনুকরণপদানি নাম তানি অত্থিস্স, করোতিস্স ইচ্চাদীনি ৰিয, তস্মা তানি চ রাজস্স ইচ্চাদীনি চ অনুকরণলিঙ্গভাৰেন এত্থ সঙ্গয্হন্তি, ন একন্তলিঙ্গভাৰেনাতি. এৰঞ্চ কত্ৰা ‘ধাতু- পচ্চয ¶ , ৰিভত্তিৰজ্জিতমত্থৰং লিঙ্গ’ন্তি অৰোচুং. তত্থ অত্থৰন্তি অত্থপদত্থকং ৰুচ্চতি, রাজস্সইচ্চাদিকং সদ্দপদত্থকং ৰিৰজ্জেতি, এতেন অত্থপদত্থকে সতি তদ্ধিত, সমাস, কিতকপদানম্পি একন্তলিঙ্গভাৰং সাধেন্তি. ন হি তেসং লিঙ্গনামব্যপদেসকিচ্চং অত্থি, যানি চ নামস্স ৰিসেসনানি ভৰিতুং অরহন্তি, তানি উপসগ্গ, নিপাতপদানি ত্ৰান্তাদিপদানি চ ইধ ৰিসেসননামভাৰেন সঙ্গয্হন্তীতি.

৬১. দ্ৰে দ্ৰেকানেকেসু নামস্মা সি যো অংযো না হি স নং স্মাহি সনংস্মিংসু [ক. ৫৫; রূ. ৬৩; নী. ২০০].

একস্মিং অত্থে চ অনেকেসু অত্থেসু চ পৰত্তা নামস্মা দ্ৰে দ্ৰে সি, যো…পে… স্মিং, সুৰিভত্তিযো হোন্তি.

ৰিভজন্তীতি ৰিভত্তিযো, একমেকং পকতিনামপদং নানারূপৰিভাগৰসেন কত্তু, কম্মাদিনানাঅত্থৰিভাগৰসেন একত্ত, বহুত্তসঙ্খ্যাৰিভাগৰসেন চ ৰিভজন্তীতি অত্থো. সি, লো ইতি পঠমা নাম…পে… স্মিং, সু ইতি সত্তমী নাম. দ্ৰীসু দ্ৰীসু পুব্বং পুব্বং ‘একস্মিং অত্থে পৰত্তং ৰচন’ন্তি একৰচনং নাম. পরং পরং ‘অনেকেসু অত্থেসু পৰত্তং ৰচন’ন্তি অনেকৰচনং নাম. বহুৰচনন্তি চ পুথুৰচনন্তি চ এতস্স নামং. সব্বমিদং ইমিনা সুত্তেন সিদ্ধং.

৬২. পঠমাত্থমত্তে [ক. ২৮৪; রূ. ৬৫; নী. ৫৭৭; চং. ২.১.৯৩; পা. ২.৩.৪৬].

কত্তু, কম্মাদিকং বাহিরত্থং অনপেক্খিত্ৰা লিঙ্গত্থমত্তে পৰত্তা নামস্মা পঠমাৰিভত্তি হোতি.

অযং মম পুরিসো, ইমে মম পুরিসা.

৬৩. আমন্তনে [ক. ২৮৫; রূ. ৭০; নী. ৫৭৮; চং. ২.১.৯৪; পা. ২.৩.৪৭].

আমন্তনং ¶ ৰুচ্চতি আলপনং. আমন্তনৰিসযে লিঙ্গত্থমত্তে পৰত্তা নামস্মা পঠমাৰিভত্তি হোতি.

ভো পুরিস, ভোন্তো পুরিসা.

৬৪. কম্মে দুতিযা [ক. ২৯৭; রূ. ৭৬, ২৮৪; নী. ৫৮০; চং. ২.১.৪৩; পা. ১.৪.৪৯-৫১].

নামস্মা কম্মত্থে দুতিযাৰিভত্তি হোতি.

পুরিসং পস্সতি, পুরিসে পস্সন্তি.

৬৫. কত্তুকরণেসু ততিযা [ক. ২৮৬, ২৮৮; রূ. ৮৩; নী. ৫৯১, ৫৯৪; চং. ২.১.৬২, ৬৩; পা. ২.৩.১৮].

নামস্মা কত্তরি চ করণে চ ততিযাৰিভত্তি হোতি.

পুরিসেন কতং, পুরিসেহি কতং, পুরিসেন কুলং সোভতি, পুরিসেহি কুলং সোভতি.

৬৬. চতুত্থী সম্পদানে [ক. ২৯৩; রূ ৮৫, ৩০১; নী. ৬০৫; চং. ২.১.৭৩; পা. ২.৩.১৩].

নামস্মা সম্পদানত্থে চতুত্থীৰিভত্তি হোতি.

পুরিসস্স দেতি, পুরিসানং দেতি.

৬৭. পঞ্চম্যাৰধিস্মিং [ক. ২৯৫; রূ. ৮৯, ৩০৭; নী. ৬০৭ চং. ২.১.৮১; পা. ২.৩.২৮; ১.৪.২৪ পঞ্চম্যৰধিস্মা (বহূসু)].

অৰধি ৰুচ্চতি অপাদানং. নামস্মা অৰধিঅত্থে পঞ্চমীৰিভত্তি হোতি.

পুরিসস্মা অপেতি, পুরিসেহি অপেতি.

৬৮. ছট্ঠী ¶ সম্বন্ধে [ক. ৩০; রূ. ৯২, ৩১৫; নী. ৬০৯; চং. ২.১.৯৫; পা. ২.৩.৫০].

নামস্মা সম্বন্ধত্থে ছট্ঠীৰিভত্তি হোতি.

পুরিসস্স ধনং, পুরিসানং ধনং.

৬৯. সত্তম্যাধারে [ক. ৩১২; রূ. ৯৪, ৩১৯; নী. ৬৩০; চং. ২.১.৮৮; পা. ২.৩.৩৬; ১.৩.৪৫].

নামস্মা আধারত্থে সত্তমীৰিভত্তি হোতি.

পুরিসস্মিং তিট্ঠতি, পুরিসেসু তিট্ঠতি.

ৰিভত্তিরাসি নিট্ঠিতো.

ইত্থিপচ্চযরাসি

৭০. ইত্থিযমত্ৰা [ক. ২৩৭; রূ. ১৭৬; নী. ৪৬৬; চং. ২.৩.১৫; পা. ৪.১.৪].

ইত্থিযং+অতো+আতি ছেদো. অকারন্তনামম্হা ইত্থিযং আপচ্চযো হোতি.

অভাসিতপুমেহি কেহিচি সঞ্ঞাসদ্দেহি নিচ্চং –

কঞ্ঞা, পঞ্ঞা, সঞ্ঞা, নাৰা, সালা, তণ্হা, ইচ্ছা, ভিক্খা, সিক্খা, গীৰা, জিৰ্হা, ৰীসা, তিংসা, চত্তালীসা, পঞ্ঞাসা ইচ্চাদি.

ভাসিতপুমেহিপি সব্বনামেহি তব্বা, নীয, তপচ্চযন্তেহি চ নিচ্চং –

সব্বা, কতরা, কতমা, অনুভৰিতব্বা, অনুভৰনীযা, গতা, জাতা, ভূতা, হূতা ইচ্চাদি.

অঞ্ঞেহি ¶ পন অনিচ্চং –

কল্যাণা, কল্যাণী, সুন্দরা, সুন্দরী, সোভণা, সোভণী, কুম্ভকারা, কুম্ভকারী, কুম্ভকারিনী, অত্থকামা, অত্থকামী, অত্থকামিনী, পরিব্বাজিকা, পরিব্বাজিকিনী, একাকা, একাকিনী, দীপনা, দীপনী ইচ্চাদি.

সুত্তৰিভত্তেন সমাসে মাতু, ধীতু ইচ্চাদীহি আপচ্চযো হোতি. নন্দমাতা, উত্তরমাতা, দেৰধীতা, রাজধীতা, অস্সমণী হোতি অসক্যধীতরা ইচ্চাদি.

এত্থ চ ‘ইত্থিয’ন্তি কত্থচি সদ্দমত্তস্স ৰা, কত্থচি অত্থমত্তস্স ৰা ইত্থিভাৰে জোতেতব্বেতি অত্থো. এৰঞ্চ সতি ইত্থিপচ্চযাপি স্যাদযো ৰিয জোতকমত্তা এৰ হোন্তি, ন ৰাচকাতি সিদ্ধং হোতি.

৭১. নদাদীহি ঙী [ক. ২৩৮; রূ. ১৮৭; নী. ৪৬৭; নদাদিতো ৰী (বহূসু)].

নদাদীহি ইত্থিযং ঙী হোতি. ঙানুবন্ধো ‘ন্তন্তূনং ঙীম্হি তো ৰা’তি এত্থ ৰিসেসনত্থো.

নদী, মহী, ইত্থী, কুমারী, তরুণী, ৰাসেট্ঠী, গোতমী, কচ্চানী, কচ্চাযনী, মাণৰী, সামণেরী, নাৰিকী, পঞ্চমী, ছট্ঠী, চতুদ্দসী, পঞ্চদসী, সহস্সী, দসসহস্সী, সতসহস্সী, কুম্ভকারী, মালকারী, চক্খুকরণী, ঞাণকরণী, ধম্মদীপনী ইচ্চাদি.

৭২. ন্তন্তূনং ঙীম্হি তো ৰা [ক. ২৩৯, ২৪১; রূ. ১৯০, ১৯১; নী. ৪৬৮, ৪৭১].

ন্ত, ন্তূনং তো হোতি ৰা ঙীম্হি পরে.

গচ্ছতী, গচ্ছন্তী, সতী, সন্তী, ভৰিস্সতী, ভৰিস্সন্তী, গুণৰতী, গুণৰন্তী, সতিমতী, সতিমন্তী, সব্বাৰতী, সব্বাৰন্তী, যাৰতী, যাৰন্তী, তাৰতী, তাৰন্তী, ভুত্তৰতী, ভুত্তৰন্তী.

৭৩. গোতো ৰা [ক. ২৩৮; রূ. ১৮৭; নী. ৪৬৭].

গোসদ্দম্হা ¶ ইত্থিযং ৰী হোতি ৰা.

গাৰী.

ৰাতি কিং? গোকাণা পরিযন্তচারিনীতি পাল়ি. তত্থ কাণাতি অন্ধা.

৭৪. যক্খাদীহিনী চ [ক. ২৩৮, ২৪০; রূ. ২৮৭, ১৯৩; নী. ৪৬৭, ৪৬৯; যক্খাদিত্ৰিনী চ (বহূসু)].

যক্খাদীহি অকারন্তেহি ইত্থিযং ৰী চ হোতি ইনী চ.

যক্খী, যক্খিনী, নাগী, নাগিনী, মহিংসী, মহিংসিনী, মিগী, মিগিনী, সীহী, সীহিনী, দীপী, দীপিনী, ব্যগ্ঘী, ব্যগ্ঘিনী, কাকী, কাকিনী, কপোতী, কপোতিনী, মানুসী, মানুসিনী ইচ্চাদি.

৭৫. আরামিকাদীহি [ক. ২৪০; রূ. ১৯৩; নী. ৪৬৯].

আরামিকাদীহি অকারন্তেহি ইত্থিযং ইনী হোতি.

আরামিকিনী, অন্তরাযিকিনী, নাৰিকিনী, ওলুম্বিকিনী, পংসুকূলিকিনী, পরিব্বাজিকিনী, রাজিনী, একাকিনী ইচ্চাদি.

সঞ্ঞাযং –

মানুসিনী মানুসা ৰা, অঞ্ঞত্র মানুসী সম্পত্তি.

৭৬. ঘরণ্যাদযো [ক. ২৪০; রূ. ১৯৩; নী. ৪৬৯].

ঘরণীইচ্চাদযো ইত্থিযং নীপচ্চযন্তা সিজ্ঝন্তি.

ঘরণী, ৰেত্রণী, পোক্খরণী-এসু নস্স ণত্তং. আচরিনীযলোপো, আচরিযা ৰা.

৭৭. মাতুলাদিত্ৰানী ¶ ভরিযাযং [ক. ৯৮; রূ. ১৮৯; নী. ২৬১].

মাতুলাদীহি অকারন্তেহি ভরিযাযং আনী হোতি.

মাতুভাতা মাতুলো, তস্স ভরিযা মাতুলানী, এৰং ৰরুণানী, গহপতানী, আচরিযানী, খত্তিযানী.

‘বহুলা’ধিকারা খত্তিযী খত্তিযা চ.

৭৮. যুৰণ্ণেহি নী.

ইৰণ্ণন্তেহি উৰণ্ণন্তেহি চ ইত্থিযং নী হোতি.

ছত্তপাণিনী, দণ্ডপাণিনী, দণ্ডিনী, ছত্তিনী, হত্থিনী, মালিনী, মাযাৰিনী, মেধাৰিনী, পিযপসংসিনী, ব্রহ্মচারিনী, ভযদস্সাৰিনী, অত্থকামিনী, হিতচারিনী, ভিক্খুনী, খত্তিযবন্ধুনী, পটুনী, পরচিত্তৰিদুনী, মত্তঞ্ঞুনী, অত্থঞ্ঞুনী, ধম্মঞ্ঞুনী ইচ্চাদি.

৭৯. তিম্হাঞ্ঞত্থে [ক্তিম্হাঞ্ঞত্থে (বহূসু), মোগ্গল্লানে ৩১ সুত্তঙ্কে].

অঞ্ঞপদত্থসমাসে তিপচ্চযন্তম্হা ইত্থিযং নী হোতি.

অহিংসারতিনী, ধম্মরতিনী, ৰচ্ছগিদ্ধিনী, পুত্তগিদ্ধিনী, মুট্ঠস্সতিনী, মিচ্ছাদিট্ঠিনী, সম্মাদিট্ঠিনী, অত্তগুত্তিনী ইচ্চাদি.

অঞ্ঞত্থেতি কিং? ধম্মে রতি ধম্মরতি.

৮০. যুৰাতি.

যুৰতো ইত্থিযন্তি হোতি.

যুৰতি.

এত্থ চ ‘তি’ ইতি সুত্তৰিভত্তেন ৰীস, তিংসতোপিতি হোতি ৰা. ৰীসতি, ৰীসং, তিংসতি, তিংসং.

৮১. উপমা ¶ সংহিত সহিত সঞ্ঞত সহ সফ ৰামলক্খণাদিতূরুত্ৰূ [চং. ২.৩.৭৯; পা. ৪.১.৬৯, ৭০ তূরুতূ (বহূসু)].

লক্খণাদিতো+ঊরুতো+ঊতি ছেদো.

অঞ্ঞপদত্থসমাসে উপমাদিপুব্বা ঊরুসদ্দম্হা ইত্থিযং ঊ হোতি.

নাগস্স নাসা ৰিয ঊরূ যস্সাতি নাগনাসূরূ, সংহিতা সম্বন্ধা ঊরূ যস্সাতি সংহিতোরূ, সহিতা একবদ্ধা ঊরূ যস্সাতি সহিতোরূ, সঞ্ঞতা অলোলা ঊরূ যস্সাতি সঞ্ঞতোরূ, ঊরুযা [ঊরুনা?] সহ ৰত্ততীতি সহোরূ, সফো ৰুচ্চতি খুরো, সংসিলিট্ঠতায সফভূতা ঊরূ যস্সাতি সফোরূ, ৰামা সুন্দরা ঊরূ যস্সাতি ৰামোরূ, লক্খণসম্পন্না ঊরূ যস্সাতি লক্খণোরূ.

সুত্তৰিভত্তেন ব্রহ্মবন্ধূতি সিজ্ঝতি.

‘‘সচে মং নাগনাসূরূ, ওলোকেয্য পভাৰতী’’তি [জা. ২.২০.১৪] চ ‘‘একা তুৰং তিট্ঠসি সহিতূরূ’’তি [জা. ১.১৬.২৯৭] চ ‘‘সঞ্ঞতূরূ মহামাযা, কুমারি চারুদস্সনা’’তি [জা. ২.১৭.১০৯] চ ‘‘ৰামোরূ সজ মং ভদ্দে’’তি [দী. নি. ২.৩৪৮] চ ‘‘কারণং নপ্পজানামি, সম্মত্তো লক্খণূরুযা’’তি [দী. নি. ২.৩৪৮] চ ‘‘গারয্হস্সং ব্রহ্মবন্ধুযা’’তি [জা. ২.২২.২১০৯] চ পাল়িপদানি দিস্সন্তি.

তত্থ ‘সজা’তি আলিঙ্গাহি, ‘গারয্হস্স’ন্তি অহং গারয্হো ভৰেয্যং.

এত্থ চ তাপচ্চযন্তা সভাৰইত্থিলিঙ্গা এৰ – লহুতা, মুদুতা, গামতা, জনতা, দেৰতা ইচ্চাদি.

তথা তিপচ্চযন্তা – গতি, মতি, রত্তি, সতি, তুট্ঠি, দিট্ঠি, ইদ্ধি, সিদ্ধি ইচ্চাদি, তথা যাগু, ধাতু, ধেনু, কণ্ডু, কচ্ছু, মাতু, ধীতু ¶ , দুহিতু ইচ্চাদি, জম্বূ, ৰধূ, চমূ, সুতনূ, সরবূ ইচ্চাদি চ. সক্কতগন্থেসু পন সুতনূ, সরবূ ইচ্চাদীসুপি ঊপচ্চযং ৰিদহন্তি.

তত্থ ইত্থিলিঙ্গভূতা সব্বে ‘ইৰণ্ণুৰণ্ণা পিত্থিয’ন্তি সুত্তেন নিচ্চং পসঞ্ঞা হোন্তি. ‘আকারো চ ঘা’তি সুত্তেন নিচ্চং ঘসঞ্ঞো.

ইত্থিপচ্চযরাসি নিট্ঠিতো.

আকারন্তিত্থিলিঙ্গরাসি

ইত্থিলিঙ্গং ছব্বিধং আকারন্তং, ইকারন্তং, ঈকারন্তং, উকারন্তং, ঊকারন্তং, ওকারন্তং. তত্থ কঞ্ঞাসদ্দম্হা অত্থমত্তে পঠমা.

৮২. গসীনং [ক. ২২০; রূ. ৭৪; নী. ৪৪৭].

কেনচি সুত্তেন অলদ্ধৰিধীনং গসীনং লোপো হোতীতি সিলোপো.

কঞ্ঞা তিট্ঠতি.

৮৩. জন্তুহেত্ৰীঘপেহি ৰা [ক. ১১৮; রূ. ১৪৬; নী. ২৯৩].

জন্তু, হেতূহি চ পুন্নপুংসকেসু ঈকারন্তেহি চ ঘতো চ পসঞ্ঞেহি ইৰণ্ণুৰণ্ণেহি চ যোনং লোপো হোতি ৰা.

কঞ্ঞা তিট্ঠন্তি, কঞ্ঞাযো তিট্ঠন্তি.

আমন্তনত্থে পঠমা, ‘গোস্যালপনে’তি গসঞ্ঞা.

৮৪. ঘব্রহ্মাদিত্ৰে [ক. ১১৪, ১৯৩; রূ. ১২২, ১৭৮; নী. ২৮৮; ঘব্রহ্মাদিতে (বহসু)].

ঘতো চ ব্রহ্মাদিতো চ গস্স এ হোতি ৰা. আদিসদ্দেন ইসি, মুনি, রেৰতী, কত্তু, খত্তুইচ্চাদিতোপি.

ভোতি ¶ কঞ্ঞে, ভোতি কঞ্ঞা, ভোতিযো কঞ্ঞাযো, ভোতী কঞ্ঞাযো, ‘‘উট্ঠেহি পুত্তিক পব্বজ্জা দুক্করা পুত্তিক’’ ইতি থেরীপাল়ি [থেরীগা. ৪৬৫], তস্মা গে পরে মহাৰুত্তিনা রস্সোপি যুজ্জতি. কুসজাতকে ‘‘ন মে অকাসি ৰচনং, অত্থকামায পুত্তিকে’’তিপি [জা. ২.২০.৪৭] অত্থি.

কম্মত্থে দুতিযা, ‘সরো লোপো সরে’তি পুব্বসরলোপো.

কঞ্ঞং পস্সতি, কঞ্ঞা পস্সতি, কঞ্ঞাযো পস্সতি.

কত্তরি ততিযা.

৮৫. ঘপতেকস্মিং নাদীনং যযা [ক. ১১১, ১১২; রূ. ১৭৯, ১৮৩ নী. ২৮৩, ২৮৪].

ঘতো চ পসঞ্ঞেহি ইৰণ্ণুৰণ্ণেহি চ একত্তে পৰত্তানং নাদীনং পঞ্চন্নং একৰচনানং কমেন য, যা হোন্তি.

কঞ্ঞায কতং, কঞ্ঞাহি কতং. এত্থ চ ঘতোপি যাআদেসো দিস্সতি. ‘‘তে চ তত্থ নিসীদিত্ৰা, তস্স রুক্খস্স ছাযযা’’ [জা. ১.১৪.১৮২] তি চ ‘‘সমন্তা পরিৰারিংসু, তস্স রুক্খস্স ছাযযা’’ [জা. ১.১৪.১৮৯] তি চ পাল়ি, তথা ‘‘সক্খরোপমযা ৰদে’’ [সচ্চসঙ্খেপ ১৭৬ গাথা], ‘‘বালদারকলীলযা’’তি [ৰিভাৰিনী ১৫৪] চ দিস্সন্তি. মহাৰুত্তিনা ঘস্স রস্সো.

৮৬. স্মাহিস্মিংনং ম্হাভিম্হি ৰা [ক. ৯৯; রূ. ৮১].

তেসং কমেন ম্হা, ভি, ম্হি হোন্তি ৰা. এতে আদেসা গাথাসু বহুলং দিস্সন্তি.

কঞ্ঞাহি কতং, কঞ্ঞাভি কতং.

সম্পদানে ¶ চতুত্থী, কঞ্ঞায দেতি, কঞ্ঞানং দেতি, কঞ্ঞায আভতং ৰত্থং, কঞ্ঞানং আভতং ৰত্থং.

অপাদানে পঞ্চমী, কঞ্ঞায অপেতি, কঞ্ঞম্হা অপেতিরস্সত্তং, কঞ্ঞাহি কঞ্ঞাভি অপেতি.

সম্বন্ধে ছট্ঠী, কঞ্ঞায সন্তকং, কঞ্ঞানং সন্তকং.

ওকাসে সত্তমী, কঞ্ঞায তিট্ঠতি.

৮৭. যং [ক. ১১৬; রূ. ১৮০; নী. ৪৪৩].

ঘতো চ পসঞ্ঞেহি ইৰণ্ণুৰণ্ণেহি চ স্মিংনো যং হোতি ৰা.

কঞ্ঞাযং তিট্ঠতি, কঞ্ঞায তিট্ঠতি, কঞ্ঞাসু তিট্ঠতি.

সদ্ধা মেধা পঞ্ঞা ৰিজ্জা, চিন্তা মন্তা ৰীণা তণ্হা.

ইচ্ছা মুচ্ছা এজা মাযা, মেত্তা মত্তা সিক্খা ভিক্খা.

জঙ্ঘা গীৰা জিৰ্হা ৰাচা, ছাযা আসা গঙ্গানাৰা.

গাথা সেনা লেখা সাখা, মালা ৰেলা পূজা খিড্ডা.

পিপাসা ৰেদনা সঞ্ঞা, চেতনা তসিণাপজা.

দেৰতা ৰট্টকা গোধা, বলাকা পরিসা সভা.

ঊকা সেফালিকা লঙ্কা, সলাকা ৰালিকা সিখা.

ৰিসাখা ৰিসিখা সাখা, গচ্ছা ৰঞ্ঝা জটা ঘটা.

জেট্ঠা সোণ্ডা ৰিতণ্ডা চ, ৰরুণা ৰনিতা লতা.

কথা নিদ্দা সুধা রাধা, ৰাসনা সীসপা পপা.

পভা সীমা খমা জাযা, খত্তিযা সক্খরা সুরা.

দোলা তুলা সিলা লীলা, লালে’লা মেখলা কলা.

ৰল়ৰা’ ¶ লম্বুসা মূসা, মঞ্জূসা সুলসা দিসা.

নাসা জুণ্হা গুহা ঈহা, লসিকা ৰসুধাদযো.

৮৮. নম্বাদীহি [নম্বাদীহি (বহূসু)].

গসঞ্ঞেহি অম্ব, অন্ন, অম্মইচ্চেতেহি গস্স এ ন হোতি.

৮৯. রস্সো ৰা.

অম্বাদীনং রস্সো হোতি ৰা গে পরে.

ভোতি অম্ব, ভোতি অম্বা, ভোতি অন্ন, ভোতি অন্না, ভোতি অম্ম, ভোতি অম্মা, সেসং কঞ্ঞাসমং.

এত্থ ৰিসেসৰিধানমুচ্চতে.

৯০. তি সভাপরিসায.

সভাপরিসাহি স্মিংনোতি হোতি. ‘ঘো স্সংস্সাস্সায তীসূ’তি সুত্তেন তিম্হি রস্সো.

সভতি, সভায, সভাযং, সভাসু, পরিসতি, পরিসায, পরিসাযং, পরিসাসু, তমদ্দস মহাব্রহ্মা, নিসিন্নং সম্হি পরিসতি, ইতি ভগৰা তস্মিং পরিসতি সুৰণ্ণৰণ্ণং কাযং ৰিৰরি [ম. নি. ১.৩৫৯].

নন্দমাতা, রাজধীতাইচ্চাদীসু ‘ঘব্রহ্মাদিত্ৰে’তি ঘস্স এত্তং.

অচ্ছরিযং নন্দমাতে, অব্ভুতং নন্দমাতে [অ. নি. ৭.৫৩], ভোতি দেৰধীতে, ভোতি সক্যধীতরে-মহাৰুত্তিনা সমাসে স্যাদীসু আরত্তং রস্সত্তঞ্চ. ল্তুপচ্চযন্তা পন যেভুয্যেন তীসু লিঙ্গেসু সমানরূপা হোন্তি, ‘‘অত্থধম্মং পরিপুচ্ছিতা চ উগ্গহেতা ¶ চ ধম্মানং সোতা চ পযিরূপাসিতা চা’’তি থেরীপাল়ি. তথা ক্ৰচি গচ্ছন্তাদিসদ্দাপি. তমোখন্ধং পদালযং, এৰং দুব্ভাসিতং ভণং ইচ্চাদি-তত্থ পদালযন্তি পদালযন্তী, ভণন্তি ভণন্তীতি অত্থো.

ৰীসা, তিংসা, চত্তালীসা, পঞ্ঞাসা ইচ্চেতে সঙ্খ্যারাসিম্হি আগমিস্সন্তি.

আকারন্তিত্থিলিঙ্গরাসি নিট্ঠিতো.

ইকারন্তিত্থিলিঙ্গরাসি

‘গসীন’ন্তি সিলোপো. রত্তি তিট্ঠতি, রত্তিযো তিট্ঠন্তি.

‘জন্তুহেত্ৰা’দিসুত্তেন যোলোপে –

৯১. যোলোপনীসু দীঘো [ক. ৮৮; রূ. ১৪৭; নী. ২৪৫].

তিলিঙ্গে যোনং লোপে চ নিআদেসে চ রস্সানং দীঘো হোতি.

রত্তী তিট্ঠন্তি.

৯২. যে পস্সিৰণ্ণস্স.

ৰিভত্তিভূতে ৰিভত্তাদেসভূতে চ যকারে পরে পসঞ্ঞস্স ইৰণ্ণস্স লোপো হোতি. গাথাসুযেৰ ইদং ৰিধানং দট্ঠব্বং.

রত্যো তিট্ঠন্তি [রূ. ৮৪ পিট্ঠে] -সন্ধিৰসেন আদিতকারলোপো.

৬৩. অযুনং ৰা দীঘো [ক. ৮৮; রূ. ১৪৭; নী. ২৪৫].

গে পরে তিলিঙ্গে অইউনং দীঘো হোতি ৰা.

হে ¶ রত্তী, হে রত্তি. বহুৰচনে হে রত্তী, হে রত্তিযো, হে রত্যো.

অংৰচনে ‘পরো ক্ৰচী’তি সুত্তেন পরসরে লুত্তে নিগ্গহীতং পুব্বে ইৰণ্ণুৰণ্ণেসু তিট্ঠতি.

রত্তিং, তথা ইত্থিং, ধেনুং, ৰধুং, অগ্গিং, দণ্ডিং, ভিক্খুং, সযম্ভুং ইতি. রত্তিযং, ‘বুজ্ঝস্সু জিনবোধিয’ন্তি পাল়ি [বু. ৰং. ২.১৮২], রত্তিনং ৰা, ‘যাৰন্তো পুরিসস্সত্থং, গুয্হং জানন্তি মন্তিন’ন্তিপাল়ি [জা. ১.১৫.৩৩৫].

রত্তী, রত্তিযো, রত্যো-‘ঘপতেকস্মিং নাদীনং যযা’তি নাদীনং যা হোতি, রত্তিযা, যকারে পরে ইৰণ্ণলোপো, রত্যা.

৯৪. সুনংহিসু [ক. ৮৯; রূ. ৮৭; নী. ২৪৬].

সু, নং, হিসু রস্সানং দীঘো হোতি.

রত্তীহি, রত্তীভি, রত্তিযা, রত্যা, রত্তীনং, রত্তিযা, রত্যা, রত্তীহি, রত্তীভি, রত্তিযা, রত্যা, রত্তীনং, রত্তিযা, রত্যা, রত্তিযং, রত্যং, রত্তীসু.

এত্থ গরূ সু, নং, হিসু দীঘত্তং অনিচ্চং ইচ্ছন্তি, তং গাথাসু যুজ্জতি.

পত্তি যুত্তি ৰুত্তি কিত্তি, মুত্তি তিত্তি খন্তি কন্তি.

সন্তি তন্তি সিদ্ধি সুদ্ধি, ইদ্ধি ৰুদ্ধি বুদ্ধি বোধি.

ভূমি জাতি পীতি সুতি, নন্দি সন্ধি সাণি কোটি.

দিট্ঠি ৰুড্ঢি তুট্ঠি যট্ঠি, পাল়ি আল়ি নাল়ি কেল়ি.

সতি মতি গতি মুতি, ধীতি যুৰতি ৰিকতি.

রতি রুচি রস্মি অসনি ৰসনি ওসধি অঙ্গুলি ধূলি দুদ্রভি

দোণি ¶ অটৰি ছৰিআদযো রত্তাদি.

এত্থ ৰিসেসৰিধানমুচ্চতে.

৯৫. রত্তাদীহি টো স্মিংনো [ক. ৬৯; রূ. ১৮৬; নী. ২১৮, ২১৯; রত্ত্যাদীহি টো স্মিনো (বহূসু) রত্যাদীহি (কত্থচি)].

রত্তিসদ্দ, আদিসদ্দেহি স্মিংনো টো হোতি ৰা.

দিৰা চ রত্তো চ [খু. পা. ৬.২; জা. ১.৯.৯২], আদো, আদিম্হি, পাদাদো, পাদাদিম্হি, গাথাদো, গাথাদিম্হি-আদিসদ্দো পন পুল্লিঙ্গোযেৰ, রত্তিং ভোজনং ভুঞ্জতি, আদিং তিট্ঠতীতি আধারত্থে দুতিযাৰ, রত্যো অমোঘা গচ্ছন্তি [জা. ২.২২.১০৫], তিণলতানি ওসধ্যো [জা. ২.২২.২১৭৪], ততো রত্যা ৰিৰসানে [জা. ২.২২.১৬৮৯], ন জচ্চা ৰসলো হোতি, ন জচ্চা হোতি ব্রাহ্মণো [সু. নি. ১৪২] -জচ্চাতি জাতিযা, ন নিকত্যা সুখমেধতি [জা. ১.১.৩৮], খন্ত্যা ভিয্যো ন ৰিজ্জতি [সং. নি. ১.২৫০].

নাঞ্ঞত্র বোজ্ঝা তপসা [সং. নি. ১.৯৮], যথেৰ খলতী ভূম্যা, ভূম্যাযেৰ পতিট্ঠতি [জা. ২.২২.১৫২২], মহাৰুত্তিনা মাতি, পিতিসদ্দা নাদীহি সদ্ধিং মত্যা, পেত্যাতি সিজ্ঝন্তি, মত্যা চ পেত্যা চ এতং জানামিমাতিতো পিতিতোতি অত্থো, মত্যা চ পেত্যা চ কতং সুসাধু [জা. ২.১৮.৬১] -কতন্তি কতং নামং, সুসাধূতি অতিসুন্দরং. ‘অনুঞ্ঞাতো অহং মত্যা, সঞ্চত্তো পিতরা অহ’ন্তি [জা. ২.২২.২৯] পাল়িপদানি. ‘মাতীনং দোহল়ো নাম জনিন্দ ৰুচ্চতী’ [জা. ২.২২.১৩৪৭] তি চ পাল়ি, ৰীসতি, তিংসতি, সট্ঠি, সত্ততি, অসীতি, নৰুতি, কোটি, পকোটি ইচ্চেতে সঙ্খ্যারাসিম্হি আগমিস্সন্তি.

ইকারন্তিত্থিলিঙ্গরাসি নিট্ঠিতো.

ঈকারন্তিত্থিলিঙ্গরাসি

৯৬. সিম্হি নানপুংসকস্স [ক. ৮৫; রূ. ১৫০; নী. ২৩৯ মোগ-দু. ৬৬; সিস্মিং (বহূসু)].

সিম্হি ¶ পরে অনপুংসকস্স পুমিত্থীনং দীঘস্স রস্সো ন হোতি.

ইত্থী তিট্ঠতি, ইত্থী তিট্ঠন্তি.

৯৭. একৰচনযোস্ৰঘোনং [ক. ৮৪; রূ. ১৪৪; নী. ২৩৭, ২৩৮].

ঘো চ ও চ ঘো, ন ঘো অঘো. একৰচনেসু চ যোসু চ পরেসু ঘ, ওৰজ্জিতানং সব্বেসং দীঘানং রস্সো হোতি.

ইত্থিযো তিট্ঠন্তি, ইথ্যো তিট্ঠন্তি.

৯৮. গে ৰা [ক. ২৪৫, ২৪৬; রূ. ১৫২, ৭৩; নী. ৪৭৬-৯].

গে পরে ঘ, ওৰজ্জিতানং সব্বেসং দীঘানং রস্সো হোতি ৰা.

ভোতি ইত্থি, ভোতি ইত্থী, ভোতিযো ইত্থী, ভোতিযো ইত্থিযো, ভোতিযো ইথ্যো, ইত্থিং পস্সতি.

৯৯. যং পীতো [ক. ২২৩; রূ. ১৮৮; নী. ৪৫০].

যো পসঞ্ঞো ঈকারো, ততো অংৰচনস্স যং হোতি ৰা.

ইত্থিযং পস্সতি, এত্থ চ যন্তি সুত্তৰিভত্তেন ‘‘বুজ্ঝস্সু জিনবোধিয’’ন্তি [বু. ৰং. ২.১৮২] সিজ্ঝতি. ইত্থী পস্সতি, ইত্থিযো পস্সতি, ইথ্যো ¶ পস্সতি, ইত্থিযা, ইথ্যা, ইত্থীহি, ইত্থীভি, ইত্থিযা, ইথ্যা, ইত্থীনং, ইত্থিযা, ইত্থিম্হা, ইথ্যা, ইত্থীহি, ইত্থীভি, ইত্থিযা, ইথ্যা, ইত্থীনং, ইত্থিযা, ইথ্যা, ইত্থিযং, ইথ্যং, ইত্থিম্হি, ইত্থীসু.

নদী সন্দতি, নদী সন্দন্তি, নদিযো সন্দন্তি.

ইৰণ্ণলোপে সন্ধিসুত্তেন যকারে পরে তৰগ্গস্স চৰগ্গো, যস্স চ পুব্বরূপং [ক. ৯৮; রূ. ৮৭ পিট্ঠে; নী. ১০৪; ২৬২-৩-৪]. নজ্জো সন্দন্তি [ক. ৯৮; রূ. ৮৭ পিট্ঠে; নী. ১০৪; ২৬২-৩-৪], নাদ্যেকৰচনেসু নজ্জা কতং, নজ্জা দেতি, নজ্জা অপেতি, নজ্জা সন্তকং, নজ্জা তিট্ঠতি, নজ্জং তিট্ঠতি, সেসরূপানি ইত্থিসদিসানি.

এৰং গচ্ছতী গচ্ছন্তী, সতী সন্তী, অসতী অসন্তী, মহতী মহন্তী, ব্রহ্মতী ব্রন্তী, ভোতী ভোন্তী, ভৰিস্সতী ভৰিস্সন্তী, গমিস্সতী গমিস্সন্তী, গুণৰতী গুণৰন্তী, সীলৰতী সীলৰন্তী, সতিমতী সতিমন্তী, সিরিমতী সিরিমন্তী, কতৰতী কতৰন্তী, ভুত্তাৰতী ভুত্তাৰন্তী, সব্বাৰতী সব্বাৰন্তী, যাৰতী যাৰন্তী, তাৰতী তাৰন্তী. কম্হি আগমে রস্সো, যাৰতিকা, তাৰতিকা.

গাৰী, যক্খী, যক্খিনী, আরামিকিনী, দণ্ডপাণিনী, দণ্ডিনী, ভিক্খুনী, পরচিত্তৰিদুনী, মুট্ঠস্সতিনী, ঘরণী, পোক্খরণী, আচরিনী, মাতুলানী, গহপতানী ইচ্চাদযো. নদাদি.

ৰিসেসৰিধানমুচ্চতে.

১০০. নজ্জা যোস্ৰাম [নী. ২৬২].

যোসু পরেসু নদিযা অন্তে আমআগমো হোতি ৰা.

নজ্জাযো ¶ সন্দন্তি [সং. নি. ৩.২২৪], নজ্জাযো সুপতিত্থাযো [জা. ২.২২.১৪১৪] তি পাল়ি, নিমিজাতকে পন নজ্জোনুপরিযাযতি, নানাপুপ্ফদুমাযুতাতি চ নজ্জো চানুপরিযাতীতি [জা. ২.২২.৫৩৭] চ পাল়ি, তত্থ মহাৰুত্তিনা সিস্স ওত্তং.

উট্ঠেহি রেৰতে সুপাপকম্মে [ৰি. ৰ. ৮৬৩], দাসা চ দাস্যো চ, অনুজীৰিনো [জা. ১.১০.১০১], বারাণস্যং মহারাজ, কাকরাজা নিৰাসকো [জা. ১.৩.১২৪], বারাণস্যং অহু রাজা [জা. ১.১৬.১৭৮], রঞ্ঞো মনো উম্মাদন্ত্যা নিৰিট্ঠো, উম্মাদন্ত্যা রমিত্ৰান, সিৰিরাজা ততো সিযং [জা. ২.১৮.৭০], দারকেৰ অহং নেস্সং. ব্রাহ্মণ্যা পরিচারকে [জা. ২.২২.২১১১]. তথা যোসু পোক্খরঞ্ঞো. নাদীসু পথব্যা, পুথব্যা, পোক্খরঞ্ঞা. স্মিংম্হি পথব্যা, পথব্যং, পুথব্যা, পুথব্যং, পোক্খরঞ্ঞা, পোক্খরঞ্ঞং, ৰেত্রঞ্ঞা, ৰেত্রঞ্ঞং [ৰে ত্ররঞ্ঞা, (নিস্সয)] ইচ্চাদীনি দিস্সন্তি.

ঈকারন্তিত্থিলিঙ্গরাসি নিট্ঠিতো.

উকারন্তিত্থিলিঙ্গরাসি

সিলোপো, ধেনু গচ্ছতি, ধেনুযো গচ্ছন্তি, যোলোপে দীঘো, ধেনূ গচ্ছন্তি, ভোতি ধেনু, ভোতি ধেনূ, ভোতিযো ধেনুযো, ভোতিযো ধেনূ, ধেনুং পস্সতি, ধেনুযো পস্সতি, ধেনূ পস্সতি, ধেনুযা, ধেনূহি, ধেনূভি, ধেনুযা, ধেনূনং, ধেনুযা, ধেনুম্হা, ধেনূহি, ধেনূভি, ধেনুযা, ধেনূনং, ধেনুযা, ধেনুযং, ধেনুম্হি, ধেনূসু.

এৰং যাগু, কাসু, দদ্দু, কণ্ডু, কচ্ছু, রজ্জু, করেণু, পিযঙ্গু, সস্সু ইচ্চাদযো. ধেন্ৰাদি.

ধাতুসদ্দো ¶ পন পাল়িনযে ইত্থিলিঙ্গো, সদ্দসত্থনযে পুমিত্থিলিঙ্গো.

মাতু, ধীতু, দুহিতুসদ্দা ইত্থি লিঙ্গা, তেসং রূপং পিতাদিগণে আগমিস্সতি.

উকারন্তিত্থিলিঙ্গরাসি নিট্ঠিতো.

ঊকারন্তিত্থিলিঙ্গরাসি

ৰধূ গচ্ছতি, ৰধূ গচ্ছন্তি, যোসু রস্সো, ৰধুযো গচ্ছন্তি, ভোতি ৰধু, ভোতি ৰধূ, ভোতিযো ৰধূ, ৰধুযো, ৰধুং, ৰধূ, ৰধুযো, ৰধুযা, ৰধূহি, ৰধূভি, ৰধুযা, ৰধূনং, ৰধুযা, ৰধুম্হা, ৰধূহি, ৰধূভি, ৰধুযা, ৰধূনং, ৰধুযা, ৰধুযং, ৰধূসু. এৰং জম্বূ, সরভূ, সুতনূ, নাগনাসূরূ, সংহিতোরূ, ৰামোরূ, লক্খণূরূ, ব্রহ্মবন্ধূ, ভূ, চমূ ইচ্চাদযো. ৰধাদি.

সাহং গন্ত্ৰা মনুস্সত্তং, ৰদঞ্ঞূ ৰীতমচ্ছরাতি [ৰি. ৰ. ৬৩৪] চ কোধনা অকতঞ্ঞূ চাতি [জা. ১.১.৬৩] চ পাল়িযো, তস্মা নীপচ্চযং ৰিনাপি ক্ৰচি ঊকারন্তকিতকসদ্দা ইত্থিলিঙ্গা ভৰন্তি.

ঊকারন্তিত্থিলিঙ্গরাসি নিট্ঠিতো.

ওকারন্তরাসি

গোসদ্দো দ্ৰিলিঙ্গো. তস্স রূপানি কানিচি দ্ৰিযত্থৰসেন ইত্থিযম্পি ৰত্তন্তি পুমেপি ৰত্তন্তি মিস্সকেপি ৰত্তন্তি, কানিচি ইত্থিযং কানিচি পুমে. ইধ পন সব্বানি যানি সমোধানেত্ৰা দীপিযন্তে.

সিলোপো, গোগচ্ছতি-এত্থ চ গোতি অভিন্নসদ্দলিঙ্গত্তা গোণোতিপি যুজ্জতি, গাৰীতিপি যুজ্জতি.

১০১. গোস্সাগসিহিনংসু ¶ গাৰগৰা [ক. ৭৩-৫; রূ. ১৬৯, ১৭০, ১৭৪; নী. ২২৪].

গ, সি, হি, নংৰজ্জিতাসু ৰিভত্তীসু গোসদ্দস্স গাৰ, গৰাদেসা হোন্তি.

১০২. উভগোহি টো [ক. ২০৫; রূ. ১৬০; নী. ৪২১].

উভ, গোহি যোনং টো হোতি.

গাৰো, গৰো, হে গো, হে গাৰো, হে গৰো, গাৰং, গৰং.

১০৩. গাৰুম্হি [ক. ৭৬; রূ ১৭১, ২২৬].

অংম্হি গোস্স গাৰু হোতি ৰা.

গাৰুং, গাৰো, গৰো, গাৰেন, গৰেন.

১০৪. নাস্সা.

গোস্স গাৰ, গৰাদেসতো নাৰচনস্স আ হোতি ৰা.

গাৰা, গৰা, গোহি, গোভি, গাৰস্স, গৰস্স.

১০৫. গৰং সেন.

সেন সহ গোস্স গৰং হোতি ৰা.

গৰং, গোনং.

১০৬. গুন্নঞ্চ নংনা [ক. ৮১; রূ. ১৭২; নী. ২৩০].

নংনা সহ গোস্স গুন্নঞ্চ হোতি গৰঞ্চ.

গুন্নং, গৰং, গাৰস্মা, গৰস্মা, গাৰম্হা, গৰম্হা, গাৰা, গৰা, গোহি, গোভি, গাৰস্স, গৰস্স, গৰং, গোনং, গুন্নং, গৰং, গাৰস্মিং, গাৰম্হি, গাৰে, গৰস্মিং, গৰম্হি, গৰে, গোসু, গাৰেসু, গৰেসু.

যোসু ¶ গাৰ, গৰাদেসে কতে অতো যোনং টা, টে চ হোন্তি, উসভা রুক্খা গাৰিযো গৰা চ [জা. ১.১.৭৭]. বলগৰা দম্মগৰা ৰা গঙ্গায পারং অগমিংসু. অথাপরে পতারেসি বলগাৰে দম্মগাৰে [ম. নি. ১.৩৫২ (থোকং ৰিসদিসং)] তি পাল়িপদানি.

এত্থ চ গাৰো নো পরমা মিত্তা, যাসু জাযন্তি ওসধা [সু. নি. ২৯৮] তি চ, গৰা খীরং, খীরম্হা দধি, দধিম্হা নৰনীতং, নৰনীতম্হা সপ্পি, সপ্পিম্হা সপ্পিমণ্ডোতি চ ইত্থিযং ৰত্তন্তি. গাৰিযো গৰাতি চ বলগৰা দম্মগৰা বলগৰে দম্মগৰেতি [ম. নি. ১.৩৫১] চ গাৰুং ৰা তে দম্মি গাৰিং ৰা তে দম্মীতি চ গৰংৰ সিঙ্গিনো সিঙ্গন্তি [জা. ১.১২.৩৯] চ পুমে ভৰন্তি. অতিত্থেনেৰ গাৰো পতারেসি, অথ খো তা গাৰো মজ্ঝে গঙ্গায অনযব্যসনং আপজ্জিংসূ [ম. নি. ১.৩৫০] তি চ অন্নদা বলদা চেতা, ৰণ্ণদা সুখদা চ তা, এতমত্থৰসং ঞত্ৰা, নাস্সু গাৰো হনিংসু তেতি [সু. নি. ২৯৮] চ ভদ্দৰসেন ইত্থিযং অত্থৰসেন মিস্সকে ৰত্তন্তি. গুন্নং চে তরমানানং, গৰং চে তরমানানং, উজুং গচ্ছতি পুঙ্গৰো, সব্বা তা উজুং গচ্ছন্তীতি [জা. ১.৪.১৩৫; ২.১৮.১০৪] চ মিস্সকে এৰ. বলগৰ, দম্মগৰসদ্দা জরগ্গৰ, পুঙ্গৰ, সগৰ, পরগৰ, দারগৰসদ্দা ৰিয অকারন্তা সমাসসদ্দাতিপি যুজ্জতি.

মিস্সকট্ঠানেসু পন ইত্থিবহুলত্তা তা গাৰো এতা গাৰোতিআদিনা ইত্থিলিঙ্গমেৰ দিস্সতি.

ইতি ওকারন্তরাসি.

ইত্থিলিঙ্গরাসি নিট্ঠিতো.

পুল্লিঙ্গরাসি

অকারন্ত পুল্লিঙ্গপুরিসাদিরাসি

অথ পুল্লিঙ্গানি দীপিযন্তে.

সত্তৰিধং পুল্লিঙ্গং – অদন্তং, আদন্তং, ইদন্তং, ঈদন্তং, উদন্তং, ঊদন্তং, ওদন্তং.

১০৭. সিস্সো [ক. ১০৪; রূ. ৬৬; নী. ২৭২].

অতো সিস্স ও হোতি পুমে.

পুরিসো তিট্ঠতি.

১০৮. অতো যোনং টাটে [ক. ১০৭; রূ. ৬৯; নী. ২৭৫, ২৭৭].

অতো পঠমাযোনং দুতিযাযোনঞ্চ কমেন টা, টে হোন্তি পুং, নপুংসকেসু. টানুবন্ধো সব্বাদেসত্থো.

পুরিসা তিট্ঠন্তি.

‘গসীন’ন্তি সিলোপো, ভো পুরিস, ‘অযুনং ৰা দীঘো’তি দীঘো, ভো পুরিসা, ভোন্তো পুরিসা, পুরিসং, পুরিসে.

১০৯. অতেন [ক. ১০৩; রূ. ৭৯; নী. ২৭১].

অতো নাৰচনস্স এনাদেসো হোতি পুং, নপুংসকেসু.

পুরিসেন.

১১০. সুহিস্ৰস্সে [ক. ১০১; রূ. ৮০; নী. ৬৮].

সু, হিসু পরেসু অস্স এ হোতি পুং, নপুংসকেসু.

পুরিসেহি, পুরিসেভি.

১১১. সুউ ¶ সস্স [ক. ৬১; রূ. ৮৬; নী. ২০৮].

সস্স আদিম্হি সাগমো হোতি. উকারো উচ্চারণত্থো, ঞানুবন্ধো আদিম্হীতি দীপনত্থো.

পুরিসস্স, ‘সুনংহিসূ’তি দীঘো. পুরিসানং, পুরিসস্মা, পুরিসম্হা.

১১২. স্মাস্মিংনং [ক. ১০৮; রূ. ৯০; নী. ২৭৬].

অতো স্মা, স্মিংনং কমেন টা, টে হোন্তি পুং, নপুংসকেসু.

পুরিসা, পুরিসেহি, পুরিসেভি, পুরিসস্স, পুরিসানং, পুরিসস্মিং, পুরিসম্হি, পুরিসে, পুরিসেসু.

এৰং বুদ্ধো, ধম্মো, সঙ্ঘো, সক্কো, দেৰো, সত্তো, নরো, গোণো, পুঙ্গৰো, জরগ্গৰো, সগৰো, পরগৰো, রাজগৰো, মাতুগামো, ওরোধো, দারোইচ্চাদি.

ৰিসেসৰিধানমুচ্চতে.

১১৩. ক্ৰচে ৰা [নী. ২৭৭].

অতো সিস্স ক্ৰচি এ হোতি ৰা পুং, নপুংসকেসু.

পুমে তাৰ –

ৰনপ্পগুম্বে যথ ফুস্সিতগ্গে [খু. পা. ৬.১৩; সু. নি. ২৩৬], ‘‘কে গন্ধব্বে রক্খসে চ নাগে, কে কিম্পুরিসে চাপি মানুসে. কে পণ্ডিতে সব্বকামদদে. দীঘরত্তং ভত্তা মে ভৰিস্সতি’’ [জা. ২.২২.১৩৫২]. নত্থি অত্তকারে নত্থি পরকারে নত্থি পুরিসকারে [দী. নি. ১.১৬৮], একে একত্থে, সমে সমভাগে, নহেৰং ৰত্তব্বে [কথা. ১], কে ছৰে সিঙ্গালে, কে ছৰে পাথিকপুত্তে [দী. নি. ৩.২৯-৩১] ইচ্চাদি.

নপুংসকে ¶ পন –

ভোগৰতী নাম মন্দিরে, নগরে নিম্মিতে কঞ্চনমযে [জা. ২.২২.১৩৭০] ইচ্চাদি.

ৰাতি কিং? ৰনপ্পগুম্বো.

ক্ৰচীতি কিং? পুরিসো.

মহাৰুত্তিনা পঠমাযোনঞ্চ ক্ৰচি টে হোতি. বালে চ পণ্ডিতে চ সন্ধাৰিত্ৰা সংসরিত্ৰা দুক্খস্সন্তং করিস্সন্তি [দী. নি. ১.১৬৮], ক্ৰচি যোনং পকতি হোতি, ৰনে ৰাল়মিগা চেৰ, অচ্ছকোকতরচ্ছযো, বহূহি পরিপন্থযো [জা. ২.২২.২৫৫], ক্যস্স ব্যপথযো অস্সু ইচ্চাদি.

১১৪. দিৰাদিতো [ক. ২০৬; রূ. ১৬৫].

দিৰাদীহি স্মিংনো টি হোতি.

দিৰি-দেৰলোকেত্যত্থো.

আদিসদ্দেন অস ভুৰি, নিচ্চং ৰাগমো. অয্যসদ্দম্হা মহাৰুত্তিনা আলপনে গ, যোনং টো হোতি ৰা. ভো অয্যো অয্য ৰা, ভোন্তো অয্যো অয্যা ৰা. সেসং পুরিসসমং.

পুরিসাদিরাসি নিট্ঠিতো.

মনোগণরাসি

মনো, মনা, ভো মন, ভো মনা, ভোন্তো মনা.

১১৫. মনাদীহি স্মিংসংনাস্মানং সিসোওসাসা [ক. ১৮১-২, ১৮৪; রূ. ৯৫-৯৭; নী. ৩৭৩-৪, ৩৭৬-৭].

তেহি স্মিং, স, অং, না, স্মানং কমেন সি, সো, ও, সা, সা হোন্তি ৰা.

মনং ¶ , মনো, মনে, মনেন, মনসা, মনেহি, মনেভি, মনস্স, মনসো, মনানং, মনস্মা, মনম্হা, মনসা, মনা, মনেহি, মনেভি, মনস্স, মনসো, মনানং, মনস্মিং, মনম্হি, মনসি, মনে, মনেসু.

তমো, তপো, তেজো, সিরো, উরো, ৰচো, রজো, ওজো, অযো, পযো, ৰযো, সরো, যসো, চেতো, ছন্দো, রধতা, অহো ইচ্চাদি মনোগণো.

ইদং মনোগণলক্খণং. ক্রিযাকম্মে ওদন্তো, নাদীনং সাদিতা, সমাসতদ্ধিতমজ্ঝে ওদন্তো চাতি.

যো ৰে দস্সন্তি ৰত্ৰান, অদানে কুরুতে মনো [জা. ১.১৫.৬১], কস্সপস্স ৰচো সুত্ৰা, তপো ইধ পক্রুব্বতি [সং. নি. ১.২০৪], চেতো পরিচ্চ জানাতি [দী. নি. ১.২৪২], সিরো তে বাধযিস্সামি ইচ্চাদি.

মনসা চে পসন্নেন [ধ. প. ২], ৰিপ্পসন্নেন চেতসা [জা. ২.২২.৫৫১], ৰচসা মনসা চেৰ, ৰন্দা মে তে তথাগতে [পরিত্তপাল়ি আটানাটিযসুত্ত]. একূনতিংসো ৰযসা [দী. নি. ২.২১৪], তেজসা যসসা জলং [ৰি. ৰ. ৮৫৭], তপসা উত্তমো সত্তো, ঘতেন ৰা ভুঞ্জস্সু পযসা ৰা, ৰন্দামি সিরসা পাদে [জা. ২.২০.৬৮], যে এতা উপসেৰন্তি, ছন্দসা ৰা ধনেন ৰা [জা. ২.২১.৩৫০], উরসা পনুদিস্সামি [জা. ২.২২.১৮৩৩], অযসা পটিকুজ্ঝিতো [অ. নি. ৩.৩৬] ইচ্চাদি.

ন ময্হং মনসো পিযো [জা. ১.১০.১১], চেতসো পরিৰিতক্কো উদপাদি [পারা. ১৮], চেতসো সমন্নাহারো, সাধু খলু পযসো পানং, সাৰিত্তী ছন্দসো মুখং [ম. নি. ২.৪০০] ইচ্চাদি.

সাধুকং ¶ মনসি করোথ [দী. নি. ২.৩], এতমত্থং চেতসি সন্নিধায, সিরসি অঞ্জলিং কত্ৰা [অপ. থের ১.৪১.৮২], উরসিলোমো, পাপং অকাসি রহসি ইচ্চাদি.

মনোধাতু, মনোমযং, তমোখন্ধং পদালযি, তপোধনো, তেজোধাতু, সিরোরুহা কেসা, সরোরুহং পদুমং, রজোহরণং ৰত্থং, ওজোহরণা সাখা, অযোপত্তো, ৰযোগুণা অনুপুব্বং জহন্তি, যসোধরা দেৰী, চেতোযুত্তা ধম্মা, ছন্দোৰিচিতিপকরণং, রহোগতো চিন্তেসি, অহোরত্তানমচ্চযে [সং. নি. ১.১১২] ইচ্চাদি.

মহাৰুত্তিনা অহম্হা স্মিংনো নি চ উ চ হোতি, তদহনি, তদহু. রহম্হা স্মিংনো ও হোতি, মাতুগামেন সদ্ধিং একো একায রহো নিসীদতি [পারা. ৪৫২], রহো তিট্ঠতি, রহো মন্তেতি.

মনোগণরাসি নিট্ঠিতো.

মনাদিগণরাসি

১১৬. কোধাদীহি.

এতেহি নাৰচনস্স সা হোতি ৰা.

কোধসা, কোধেন, অত্থসা, অত্থেন.

১১৭. নাস্স সা [ক. ১৮১; রূ. ৯৫; নী. ৩৭৩].

পদাদীহি নাৰচনস্স সা হোতি ৰা.

পদসা, পদেন, বিলসা, বিলেন.

১১৮. পদাদীহি ¶ সি.

পদাদীহি স্মিংনো সি হোতি ৰা.

পদসি, পদে, বিলসি, বিলে.

তত্থ কোধাদিকো পুল্লিঙ্গো, পদাদিকো নপুংসকো. তত্থ কেচি সদ্দা সমাস, তদ্ধিতমজ্ঝে ওদন্তা হোন্তি [ক. ১৮৩; রূ. ৪৮; নী. ৩৭৫], আপোধাতু, আপোমযং, ৰাযোধাতু, ৰাযোমযং, জীৰ ত্ৰং সরদোসতং [জা. ১.২.৯], অনুযন্তি দিসোদিসং [দী. নি. ৩.২৮১] ইচ্চাদি.

কেচি নাস্স সাদেসং লভন্তি, কোধসা উসুনা ৰিজ্ঝি [জা. ২.২২.৩৫২], দল়্হং গণ্হাহি থামসা [জা. ১.৭.৩০], পদসাৰ অগমাসি, মাকাসি মুখসা পাপং, সচ্চেন দন্তো দমসা উপেতো-দমসাতি ইন্দ্রিযদমনেন, সুচিং পণীতং রসসা উপেতং [জা. ১.৭.১৮], ৰেগসা গন্ত্ৰান, আযুসা একপুত্তমনুরক্খে [খু. পা. ৯.৭] ইচ্চাদি.

কেচি স্মিংনো স্যাদেসং লভন্তি, পদসি, বিলসি ইচ্চাদি.

কেহিচি মহাৰুত্তিনা না, স্মানং সো হোতি, অত্থসো, অক্খরসো, সুত্তসো, ব্যঞ্জনসো, হেতুসো, যোনিসো, উপাযসো, ঠানসো, দীঘসো, ওরসো, বহুসো, পুথুসো, মত্তসো, ভাগসো ইচ্চাদি.

‘‘পদসো ধম্মং ৰাচেয্য [পাচি. ৪৫], বিলসো ৰিভজিত্ৰা নিসিন্নো অস্স’’ [দী. নি. ২.৩৭৮] ইচ্চাদীসু পন ৰিচ্ছাযং সোপচ্চযো.

যদা পন সমাসন্তে মহাৰুত্তিনা স্যাদীসু ৰিভত্তীসু সাগমো হোতি, তদা পুরিসাদিগণোপি হোতি, ব্যাসত্তমনসো, অব্যগ্গমনসো [অ. নি. ৩.২৯], পুত্তো জাতো অচেতসো [জা. ২.২২.৪], সুমেধসো [অ. নি. ৪.৬২], ভূরিমেধসো [সু. নি. ১১৩৭] ইচ্চাদি.

ইতি মনাদিগণরাসি.

গুণৰাদিগণরাসি

১১৯. ন্তুস্স [ক. ১২৪; রূ. ৯৮; নী. ২৯৯].

সিম্হি ¶ ন্তুস্স টা হোতি.

গুণৰা তিট্ঠতি.

১২০. য্ৰাদো ন্তুস্স [ক. ৯২; রূ. ১০০; নী. ২৪৯].

যোআদীসু ন্তুস্স অত্তং হোতি.

গুণৰন্তা তিট্ঠন্তি.

১২১. ন্তন্তূনং ন্তো যোম্হি পঠমে [ক. ৯২; রূ. ১০০; নী. ২৪৯].

পঠমে যোম্হি সৰিভত্তীনং ন্ত, ন্তূনং ন্তো হোতি.

গুণৰন্তো তিট্ঠন্তি.

১২২. টটাঅং গে [ক. ১২৬; রূ. ১০১; নী. ৩০১-২].

গে পরে সৰিভত্তীনং ন্ত, ন্তূনং ট, টা, অং হোন্তি.

ভো গুণৰ, ভো গুণৰা, ভো গুণৰং, ভোন্তো গুণৰন্তা, ভোন্তো গুণৰন্তো, গুণৰন্তং, গুণৰন্তে, গুণৰন্তেন.

১২৩. তোতাতিতা সস্মাস্মিংনাসু [ক. ১২৭, ১৮৭; রূ. ১০২, ১০৮; নী. ৩০৩, ৩৮৬].

স, স্মা, স্মিং, নাসু সৰিভত্তীনং ন্ত, ন্তূনং কমেন তো, তা,তি, তা হোন্তি ৰা.

গুণৰতা, গুণৰন্তেহি, গুণৰন্তেভি, গুণৰন্তস্স, গুণৰতো.

১২৪. নংম্হি ¶ তং ৰা [ক. ১২৮; রূ. ১০৪; নী. ৩০৪].

নংম্হি সৰিভত্তীনং ন্ত, ন্তূনং তং হোতি ৰা.

গুণৰন্তানং, গুণৰতং, গুণৰন্তস্মা, গুণৰন্তম্হা, গুণৰন্তা, গুণৰতা, গুণৰন্তেহি, গুণৰন্তেভি, গুণৰন্তস্স, গুণৰতো, গুণৰন্তানং, গুণৰতং, গুণৰন্তস্মিং, গুণৰন্তম্হি, গুণৰতি, গুণৰন্তে, গুণৰন্তেসু.

এৰং ভগৰা, সীলৰা, পঞ্ঞৰা, বলৰা, ধনৰা, ৰণ্ণৰা, ভোগৰা, সুতৰা ইচ্চাদি. এত্থ চ আলপনে ভগৰাতি নিচ্চং দীঘো.

সব্বাৰা, সব্বাৰন্তো, সব্বাৰন্তং, সব্বাৰন্তে, সব্বাৰন্তেন, সব্বাৰতা, সব্বাৰন্তেহি…পে… সব্বাৰন্তেসু.

এৰং যাৰা, যাৰন্তো, তাৰা, তাৰন্তো, এত্তাৰা, এত্তাৰন্তো, কিংৰা, কিংৰন্তো, কিত্তাৰা, কিত্তাৰন্তো ইচ্চাদি. তথা ভোজনং ভুত্তৰা, ভুত্তৰন্তো, ধম্মং বুদ্ধৰা, বুদ্ধৰন্তো, কম্মং কতৰা, কতৰন্তো ইচ্চাদি চ.

সতিমা, সতিমন্তা, সতিমন্তো, ভো সতিম, ভো সতিমা, ভো সতিমং, ভোন্তো সতিমন্তা, ভোন্তো সতিমন্তো, সতিমন্তং, সতিমন্তে, সতিমন্তেন, সতিমতা, সতিমন্তেহি, সতিমন্তেভি, সতিমন্তস্স, সতিমতো, সতিমন্তানং, সতিমতং, সতিমন্তস্মা, সতিমন্তম্হা, সতিমন্তা, সতিমতা, সতিমন্তেহি, সতিমন্তেভি, সতিমন্তস্স, সতিমতো, সতিমন্তানং, সতিমতং, সতিমন্তস্মিং, সতিমন্তম্হি, সতিমতি, সতিমন্তে, সতিমন্তেসু.

এৰং মতিমা, গতিমা, পাপিমা, জাতিমা, ভাণুমা, আযুমা, আযস্মা, সিরিমা, হিরিমা, ধিতিমা, কিত্তিমা, ইদ্ধিমা, জুতিমা ¶ , মুতিমা, থুতিমা, বুদ্ধিমা, চক্খুমা, বন্ধুমা, গোমা ইচ্চাদি.

ৰিসেসৰিধানমুচ্চতে.

১২৫. হিমৰতো ৰা ও [ক. ৯৪; রূ. ১০৫; নী. ২৫২].

সিম্হি হিমৰন্তসদ্দস্স ও হোতি ৰা. ‘গসীন’ন্তি লোপো.

হিমৰন্তো পব্বতো [ধ. প. ৩০৪], হিমৰা পব্বতো.

১২৬. ন্তস্স চ ট ৰংসে [ক. ৯৩; রূ. ১০৬; নী. ২৫১].

অং, সেসু ন্তস্স চ ন্তুস্স চ সব্বস্স ট হোতি ৰা.

‘‘অজ্ঝোগাহেত্ৰা হিমৰ’’ন্তি [অপ. থের ২.৪৭.৫৯] পাল়ি. সতিমং, বন্ধুমং, গুণৰস্স, সতিমস্স, বন্ধুমস্স.

মহাৰুত্তিনা ক্ৰচি সিম্হি গে চ পরে ন্তুস্স অত্তং হোতি, ‘‘অতুলো নাম নামেন, পঞ্ঞৰন্তো জুতিন্ধরো’’তি [বু. ৰং. ২১.১০] চ ‘‘গতিমন্তো সতিমন্তো, ধিতিমন্তো চ যো ইসী’’তি [থেরগা. ১০৫২] চ ‘‘চক্খুমন্তো মহাযসো’’তি চ ‘‘তুয্হং পিতা মহাৰীর, পঞ্ঞৰন্ত জুতিন্ধরা’’তি [অপ. থেরী ২.২.৩৮৯] চ পাল়ী.

পঠমাযোম্হি ক্ৰচি ন্তুস্স ট হোতি, ৰগ্গুমুদাতীরিযা পন ভিক্খূ ৰণ্ণৰা হোন্তি [পারা. ১৯৪], এথ তুম্হে আৰুসো সীলৰা হোথ [অ. নি. ৫.১১৪], চক্খুমা অন্ধকা হোন্তি, যে ইত্থীনং ৰসং গতা [জা. অট্ঠ. ২.৩.৩৬], সংসুদ্ধপঞ্ঞা কুসলা মুতিমা ভৰন্তি [সু. নি. ৮৮৭ (সংসুদ্ধপঞ্ঞা কুসলা মুতীমা)].

ইতি গুণৰাদিগণরাসি.

গচ্ছন্তাদিগণরাসি

১২৭. ন্তস্সং সিম্হি [ক. ১৮৬; রূ. ১০৭; নী. ৩৮২-৪; ‘তস্সং’ (বহূসু)].

সিম্হি ¶ ন্তস্স অং হোতি ৰা. সিলোপো.

গচ্ছং, গচ্ছন্তো, গচ্ছন্তা, গচ্ছন্তো, ভো গচ্ছ, ভো গচ্ছা, ভো গচ্ছং, ভোন্তো গচ্ছন্তা, ভোন্তো গচ্ছন্তো, গচ্ছন্তং, গচ্ছন্তে, গচ্ছন্তেন, গচ্ছতা, গচ্ছন্তেহি, গচ্ছন্তেভি, গচ্ছন্তস্স, গচ্ছতো, গচ্ছন্তানং, গচ্ছতং, গচ্ছন্তস্মা, গচ্ছন্তম্হা, গচ্ছন্তা, গচ্ছতা, গচ্ছন্তেহি, গচ্ছন্তেভি, গচ্ছন্তস্স, গচ্ছতো, গচ্ছন্তানং, গচ্ছতং, গচ্ছন্তস্মিং, গচ্ছন্তম্হি, গচ্ছতি, গচ্ছন্তে, গচ্ছন্তেসু.

এৰং করং, কুব্বং, চরং, চৰং, জযং, জহং, জানং, জিরং, দদং, দহং, জুহং, সুণং, পচং, সরং, ভুঞ্জং, মুঞ্চং, সযং, সরং, হরং, তিট্ঠং, ভৰিস্সং, করিস্সং, গমিস্সং ইচ্চাদি.

ৰিসেসৰিধানমুচ্চতে.

‘ন্তস্স চ ট ৰংসে’তি অং, সেসু ন্তস্স টত্তং, যং যঞ্হি রাজ ভজতি, সন্তং ৰা যদি ৰা অসং. সীলৰন্তং ৰিসীলং ৰা, ৰসং তস্সেৰ গচ্ছতি [জা. ১.১৫.১৮১]. কিচ্চানুক্রুব্বস্স করেয্য কিচ্চং [জা. ১.২.১৪৫] – অনুক্রুব্বস্সাতি পুন করোন্তস্স.

মহাৰুত্তিনা পঠমাযোম্হি চ সৰিভত্তিস্স ন্তস্স অং হোতি, অপি নু তুম্হে একন্তসুখং লোকং জানং পস্সং ৰিহরথ [দী. নি. ১.৪২৫], কসং খেত্তং বীজং ৰপং, ধনং ৰিন্দন্তি মাণৰা [থেরীগা. ১১২], ভরন্তি মাতাপিতরো, পুব্বে কতমনুস্সরং [অ. নি. ৫.৩৯].

১২৮. মহন্তারহন্তানং টা ৰা [নী. ৩৮৭, ৭১২].

সিম্হি এতেসং ন্তস্স টা হোতি ৰা.

মহা ¶ , মহং, মহন্তো, মহন্তা, মহন্তো, ভো মহ, ভো মহা, ভো মহং, ভোন্তো মহন্তা, ভোন্তো মহন্তো, মহন্তং.

‘ন্তস্স চ ট ৰংসে’তি অংম্হি ন্তস্স টত্তং, ‘‘সুমহং পুরং, পরিক্খিপিস্স’’ন্তি [জা. ২.২২.৭৯২] পাল়ি-সুট্ঠু মহন্তং বারাণসিপুরন্তি অত্থো. সেসং গচ্ছন্তসমং.

অরহা তিট্ঠতি. ‘ন্তস্সং সিম্হী’তি সিম্হি ন্তস্স অং, অরহং সুগতো লোকে [সং. নি. ১.১৬১], অরহং সম্মাসম্বুদ্ধো [পারা. ১], অরহন্তা, অরহন্তো, অরহন্তং, অরহন্তে, অরহন্তেন, অরহতা, অরহন্তেহি, অরহন্তেভি, অরহন্তস্স, অরহতো, অরহন্তানং, অরহতং ইচ্চাদি.

মহাৰুত্তিনা ব্রহ্মন্তস্স চ ন্তস্স টা হোতি সিম্হি, ব্রহা, ব্রহন্তো, ব্রহন্তা, ব্রহন্তো, ব্রহন্তং, ব্রহন্তে ইচ্চাদি.

‘‘সা পরিসা মহা হোতি, সা সেনা দিস্সতে মহা’’তি [জা. ২.২২.৭৭১] চ ‘‘মহা ভন্তে ভূমিচালো’’তি [অ. নি. ৮.৭০] চ ‘‘মহা তে উপাসক পরিচ্চাগো’’তি [জা. অট্ঠ. ৪.১৩.অকিত্তিজাতকৰণ্ণনা] চ ‘‘মহা মে ভযমাগত’’ন্তি চ ‘‘বারাণসিরজ্জং নাম মহা’’তি [জা. অট্ঠ. ১.১.মহাসীলৰজাতকৰণ্ণনা] চ ‘‘মহাস্স হোন্তি পরিৰারা ব্রাহ্মণগহপতিকা, মহাস্স হোন্তি পরিৰারা ভিক্খূ ভিক্খুনিযো’’তি [দী. নি. ৩.২০৪] চ ‘‘মহা ৰহন্তি দুদিট্ঠিং, সঙ্কপ্পা রাগনিস্সিতা’’তি চ পাল়ী. অত্র মহাসদ্দো নিপাতপটিরূপকোপি সিযা.

১২৯. ভূতো.

ভূধাতুসিদ্ধতো ন্তস্স অং হোতি সিম্হি. সুদ্ধে নিচ্চং, উপপদে অনিচ্চং.

ভৰং ¶ তিট্ঠতি, সম্পত্তিং অনুভৰং, অনুভৰন্তো, তণ্হং অভিভৰং, অভিভৰন্তো, দুক্খং পরিভৰং, পরিভৰন্তো তিট্ঠতি, ভৰন্তা, ভৰন্তো, হে ভৰন্ত, হে ভৰন্তা, হে ভৰন্তো, হে ভৰ, হে ভৰা, হে ভৰং. ‘‘কচ্চি ভৰং অভিরমসি অরঞ্ঞে’’তি [জা. ২.১৮.১৮] পাল়ি.

হে ভৰন্তা, হে ভৰন্তো, ভৰন্তং, ভৰন্তে, ভৰন্তেন, ভৰতা, ভৰন্তেহি, ভৰন্তেভি, ভৰন্তস্স, ভৰতো, ভৰন্তানং, ভৰতং, ভৰন্তস্মা, ভৰন্তম্হা, ভৰন্তা, ভৰতা, ভৰন্তেহি, ভৰন্তেভি, ভৰন্তস্স, ভৰতো, ভৰন্তানং, ভৰতং, ভৰন্তস্মিং, ভৰন্তম্হি, ভৰতি, ভৰন্তে, ভৰন্তেসু.

১৩০. ভৰতো ৰা ভোন্তো গযোনাসে [ক. ২৪৩; রূ. ৮, ১১০; নী. ৪৮৪].

গ, যো, না, সেসু ভৰন্তস্স ভোন্তো হোতি ৰা. সুত্তৰিভত্তেন অং, হি, নং, স্মাদীসু চ.

ভোন্তা, ভোন্তো, হে ভোন্ত, হে ভোন্তা, হে ভোন্তো, ভোন্তং, ভোন্তে, ভোন্তেন, ভোতা, ভোন্তেহি, ভোন্তেভি, ভোন্তস্স, ভোতো, ভোন্তানং, ভোতং, ভোন্তস্মা, ভোন্তম্হা, ভোন্তা, ভোতা, ভোন্তেহি, ভোন্তেভি, ভোন্তস্স, ভোতো, ভোন্তানং, ভোতং, ভোন্তস্মিং, ভোন্তম্হি, ভোতি, ভোন্তে, ভোন্তেসু.

ভো, ভন্তেতি দ্ৰে ৰুদ্ধিঅত্থে সিদ্ধা আমন্তনত্থে নিপাতা এৰ, তেহি পরং গ, যোনং লোপো, ইতো ভো সুগতিং গচ্ছ [ইতিৰু. ৮৩], উম্মুজ্জভো পুথুসিলে, কুতো নু আগচ্ছথ ভো তযো জনা [জা. ১.৯.৮৭], পস্সথ ভো ইমং কুলপুত্তং, এহি ভন্তে খমাপেহি, সো তে ভিক্খূ খমাপেসি ‘‘খমথ ভন্তে’’তি. তথা ভদ্দন্তে, ভদ্দন্তাতি দ্ৰে ‘‘তুয্হং ভদ্দং হোতু ¶ , তুম্হাকং ভদ্দং হোতূ’’তি অত্থে সিদ্ধা আমন্তননিপাতাৰ, ‘‘ভদ্দন্তে’’তি তে ভিক্খূ ভগৰতো পচ্চস্সোসুং [সং. নি. ১.২৪৯], তং ৰো ৰদামি ভদ্দন্তে, যাৰন্তেত্থ সমাগতা [জা. ১.৭.১০৮]. ভদ্দন্ত, ভদন্তসদ্দা পন পুরিসাদিগণিকা এৰ.

সন্তসদ্দো পন সপ্পুরিসে ৰিজ্জমানে সমানে চ পৰত্তো ইধ লব্ভতি. সমেতি অসতা অসং [জা. ১.২.১৬]. সং, সন্তো, সন্তা, সন্তো, ভোসন্ত, ভোসন্তা, ভোস, ভো সা, ভো সং ৰা, ভোন্তো সন্তা, ভোন্তো সন্তো. যং যঞ্হি রাজ ভজতি, সন্তং ৰা যদি ৰা অসং [জা. ১.১৫.১৮০]. সন্তে, সন্তেন, সতা.

১৩১. সতো সব্ব ভে [ক. ১৮৫; রূ. ১১২; নী. ৩৭৮].

ভে পরে সন্তস্স সবআদেসো হোতি ৰা.

সন্তেহি, সন্তেভি, সব্ভি, সন্তস্স, সতো, সন্তানং, সতং, সন্তস্মা, সন্তম্হা, সন্তা, সতা, সন্তেহি, সন্তেভি, সব্ভি, সন্তস্স, সতো, সন্তানং, সতং, সন্তস্মিং, সন্তম্হি, সতি, সন্তে, সন্তেসু. সন্তো সপ্পুরিসা লোকে, দূরেসন্তো পকাসেন্তি [ধ. প. ৩০৪], চত্তারো পুগ্গলা সন্তো সংৰিজ্জমানা লোকস্মিং [অ. নি. ৪.৮৫], পহুসন্তো ন ভরতি [সু. নি. ৯১].

খেদে নিরোধে চ পৰত্তো সন্তো পুরিসাদিগণাদিকো, দীঘং সন্তস্স যোজনং [ধ. প. ৬১], সন্তা হোন্তি সমিতা নিরুদ্ধা ইচ্চাদি.

ইতি গচ্ছন্তাদিগণরাসি.

রাজাদিযুৰাদিগণরাসি

১৩২. রাজাদিযুৰাদীহা [ক. ১৮৯; রূ. ১১৩; নী. ৩৯০-১].

রাজাদীহি ¶ যুৰাদীহি চ সিস্স আ হোতি.

রাজা গচ্ছতি.

১৩৩. যোনমানো [ক. ১৯০; রূ. ১১৪; নী. ৩৯২].

রাজাদীহি যুৰাদীহি চ যোনং আনো হোতি ৰা.

রাজানো.

ৰাতি কিং? চতুরো চ মহারাজা.

ভো রাজ, ভো রাজা, ভোন্তো রাজানো.

১৩৪. ৰংম্হানঙ্ [ক. ১৮৮; রূ. ১১৫; নী. ৩৯৩].

রাজাদীনং যুৰাদীনঞ্চ আনঙ হোতি ৰা অংম্হি.

রাজানং, রাজং, রাজানো, চতুরো চ মহারাজে [পে. ৰ. ১১].

১৩৫. নাস্মাসু রঞ্ঞা [ক. ১৩৭, ২৭০; রূ. ১১৬, ১২০; নী. ৩১৬, ৫৪২].

না, স্মাসু রাজস্স রঞ্ঞা হোতি ৰা.

রঞ্ঞা, রাজেন.

১৩৬. রাজস্সি নাম্হি [নী. ৩১৬].

নাম্হি রাজস্স ই হোতি.

রাজিনা.

১৩৭. সুনংহিস্ৰু [ক. ১৬৯; রূ. ১১৭; নী. ৩৫৭].

সু ¶ , নং, হিসু রাজস্স উহোতি ৰা.

রাজূহি, রাজূভি, রাজেহি, রাজেভি.

১৩৮. রঞ্ঞোরঞ্ঞস্সরাজিনো সে [ক. ১৩৯; রূ. ১১৮; নী. ৩১৪].

সেপরে সৰিভত্তিস্স রাজস্স রঞ্ঞো, রঞ্ঞস্স, রাজিনো হোন্তি ৰা.

রঞ্ঞো, রঞ্ঞস্স, রাজিনো.

ৰাতি কিং? রাজস্স.

রাজূনং, রাজানং.

১৩৯. রাজস্স রঞ্ঞং [ক. ১৩৬; রূ. ১১৯; নী. ৩১৫].

নংম্হি রাজস্স রঞ্ঞং হোতি ৰা.

রঞ্ঞং, রাজস্মা, রাজম্হা, রঞ্ঞা, রাজূহি, রাজূভি, রাজেহি, রাজেভি, রঞ্ঞো, রঞ্ঞস্স, রাজিনো, রাজস্স ৰা, রাজূনং, রাজানং, রঞ্ঞং.

১৪০. স্মিংম্হি রঞ্ঞেরাজিনি [ক. ১৩৮; রূ. ১২১; নী. ৩১৭].

স্মিংম্হি সৰিভত্তিস্স রাজস্স রঞ্ঞে, রাজিনি হোন্তি ৰা.

রঞ্ঞে, রাজিনি, রাজস্মিং, রাজম্হি, রাজূসু, রাজেসু.

১৪১. সমাসে ৰা.

সমাসট্ঠানে সব্বে তে আদেসা ৰিকপ্পেন হোন্তি.

চত্তারো মহারাজা [দী. নি. ২.৩৩৬], চত্তারো মহারাজানো [অ. নি. ৩.৩৭], দেৰরাজানং, দেৰরাজং, দেৰরাজানো, দেৰরাজে, চত্তারো চ মহারাজে ¶ , মণিম্হি পস্স নিম্মিতং [জা. ২.২২.১৩৯৪], কাসিরঞ্ঞা, কাসিরাজেন, দেৰরাজূহি, দেৰরাজেহি, কাসিরঞ্ঞো, কাসিরাজস্স, দেৰরাজূনং, দেৰরাজানং…পে… কাসিরঞ্ঞে, কাসিরাজে, দেৰরাজূসু, দেৰরাজেসু.

মহাৰুত্তিনা রাজতো যোনং ইনো হোতি, ‘‘সমন্তপাসাদিকা নাম, সোল়সাসিংসু রাজিনো, একূনতিংসে কপ্পম্হি, ইতো সোল়সরাজিনো [অপ. থের ১.১২.৫৪-৫৫ (একূনতিংসকপ্পম্হি, ইতো সোল়সরাজানো)], কুসরাজং মহব্বলং [জা. ২.২০.৬৭], সালরাজংৰ পুপ্ফিতং [অপ. থের ১.৪২.৮৬], উল়ুরাজংৰ সোভিতং, চতুরো চ মহারাজে [পে. ৰ. ১১], যুধঞ্চযো অনুঞ্ঞাতো, সব্বদত্তেন রাজিনা [জা. ১.১১.৮১], তদা অদাসি মং তাতো, বিম্বিসারস্স রাজিনো [অপ. থেরী. ২.২.৩২৬], নিক্খমন্তে মহারাজে, পথৰী সম্পকম্পথ’’ ইচ্চাদীনি পাল়িপদানি.

ব্রহ্মা, ব্রহ্মানো, ভো ব্রহ্ম, ভো ব্রহ্মা. ‘ঘব্রহ্মাদিত্ৰে’তি গস্স এত্তং, ভো ব্রহ্মে, ভোন্তো ব্রহ্মানো, ব্রহ্মানং, ব্রহ্মং, ব্রহ্মানো.

১৪২. নাম্হি [ক. ১৯৮; রূ. ১২৩; নী. ৪১০].

নাম্হি ব্রহ্মস্স উহোতি ৰা.

ব্রহ্মুনা, ব্রহ্মেন, ব্রহ্মেহি, ব্রহ্মেভি.

১৪৩. ব্রহ্মস্সু ৰা [ক. ১৯৮; রূ. ১২৩; নী. ৪১০].

স, নংসু ব্রহ্মস্স উ হোতি ৰা.

১৪৪. ঝলা সস্স নো [ক. ১১৭; রূ. ১২৪; নী. ২৯২].

ঝ, লতো সস্স নো হোতি.

ব্রহ্মুনো, ব্রহ্মস্স, ব্রহ্মূনং, ব্রহ্মানং.

১৪৫. স্মা ¶ নাৰ ব্রহ্মা চ [ক. ২৭০; রূ. ১২০; নী. ৫৪২].

অত্তা’তুমেহি চ ব্রহ্মতো চ স্মাস্স না ৰিয রূপং হোতি.

ব্রহ্মুনা, ব্রহ্মস্মা, ব্রহ্মম্হা, ব্রহ্মুনো, ব্রহ্মস্স, ব্রহ্মূনং, ব্রহ্মানং. ‘কম্মাদিতো’তি সুত্তেন স্মিংনো নি হোতি, ব্রহ্মস্মিং, ব্রহ্মম্হি, ব্রহ্মনি, ব্রহ্মে, ব্রহ্মেসু.

অত্তা, অত্তানো, ভো অত্ত, ভো অত্তা, ভোন্তো অত্তানো, অত্তানং, অত্তং, অত্তানো. ‘নাস্সেনো’তি ৰিকপ্পেন নাস্স এনত্তং, অত্তনা, অত্তেন.

১৪৬. সুহিস্ৰনক [ক. ২১১; রূ. ১২৬; নী. ৪৩৯;. সুহিসুনক (বহূসু)].

সু, হিসু অত্তা’তুমানং অন্তো অনক হোতি.

অত্তনেহি, অত্তনেভি, অত্তেহি, অত্তেভি.

১৪৭. নোত্তাতুমা [ক. ২১৩; রূ. ১২৭; নী. ৪৪০].

অত্তা’তুমতো সস্স নো হোতি.

অত্তনো, অত্তস্স, অত্তানং, অত্তস্মা, অত্তম্হা, অত্তা, অত্তনা, অত্তনেহি, অত্তনেভি, অত্তেহি, অত্তেভি, অত্তনো, অত্তস্স, অত্তানং, অত্তস্মিং, অত্তম্হি, অত্তনি, অত্তে, অত্তেসু, অত্তনেসু.

সমাসে পন পুরিসাদিরূপং হোতি, পহিতো অত্তা এতেনাতি পহিতত্তো, পহিতত্তা, পহিতত্তং, পহিতত্তে, পহিতত্তেন, পহিতত্তেহি, পহিতত্তেভি, পহিতত্তস্স, পহিতত্তানং, পহিতত্তস্মা, পহিতত্তম্হা, পহিতত্তা, পহিতত্তেহি, পহিতত্তেভি, পহিতত্তস্স, পহিতত্তানং, পহিতত্তস্মিং, পহিতত্তম্হি, পহিতত্তে, পহিতত্তেসু.

আতুমা ¶ , আতুমানো, আতুমানং, আতুমং, আতুমানো, আতুমনা, আতুমেন, আতুমনেহি, আতুমনেভি, আতুমনো, আতুমস্স, আতুমানং ইচ্চাদি.

সখা তিট্ঠতি.

১৪৮. আযো নো চ সখা [ক. ১৯১; রূ. ১৩০; নী. ৩৯৪].

সখতো যোনং আযো চ নো চ হোন্তি ৰা আনো চ.

সখানো, সখাযো.

১৪৯. নোনাসেস্ৰি [ক. ১৯৪; রূ. ১৩১; নী. ৪০৭].

নো, না, সেসু সখন্তস্স ই হোতি ৰা.

সখিনো.

সুত্তৰিভত্তেন ত্তপচ্চযম্হি ইত্তং, ‘‘সখিত্তং করেয্য, সখিত্তং ন করেয্যা’’তি [থেরগা. ১০১৭ (সখিতং)] পাল়ী.

১৫০. যোস্ৰংহিস্মানংস্ৰারঙ [ক. ১৯৫-৬; রূ. ১৩৩-৪; নী. ৪০৮-৯; যোস্ৰংহিসুচারঙ (বহূসু)].

যোসু অং, হি, স্মা, নংসু সখন্তস্স আরঙ হোতি. ‘টোটে ৰা’তি সুত্তেন আরাদেসতো যোনং কমেন টো, টে হোন্তি.

সখারো তিট্ঠন্তি. ‘ঘব্রহ্মাদিত্ৰে’তি গস্স ৰিকপ্পেন এত্তং, ভো সখ, ভো সখা, ভো সখে, হরে সখা কিস্স মং জহাসি [জা. ১.৬.৯৪].

‘‘সখি, সখীতি দ্ৰযং ইত্থিযং সিদ্ধ’’ন্তি ৰুত্তিযং ৰুত্তং.

ভোন্তো ¶ সখানো, ভোন্তো সখাযো, ভোন্তো সখিনো, ভোন্তো সখারো, সখানং, সখারং, সখং, সখানো, সখাযো, সখিনো, সখারে, সখারো, সখিনা, সখারেন, সখেন, সখারেহি, সখারেভি, সখেহি, সখেভি, সখিস্স, সখিনো, সখারানং, সখানং.

১৫১. স্মানংসু ৰা [ক. ১৯৪, ১৭০; রূ. ১২০, ১৩১; নী. ৪০৭, ৫৪২].

স্মা, নংসু সখন্তস্স ই হোতি ৰা.

সখীনং, সখিস্মা, সখিম্হা, সখা, সখিনা, সখারস্মা, সখারম্হা, সখারা, সখারেহি, সখারেভি, সখেহি, সখেভি, সখিস্স, সখিনো, সখারানং, সখানং, সখীনং.

১৫২. টে স্মিংনো [ক. ১৯২; রূ. ১৩৫].

সখতো স্মিংনো টে হোতি. নিচ্চত্থমিদং সুত্তং.

সখে, সখারেসু, সখেসু. ‘‘নেতাদিসা সখা হোন্তি, লব্ভা মে জীৰতো সখা’’তি [জা. ১.৭.৯] পাল়ি. পুরিসাদিনযেন যোনং ৰিধি.

সমাসে পন সব্বং পুরিসাদিরূপং লব্ভতি, ‘‘সব্বমিত্তো সব্বসখো, পাপমিত্তো পাপসখো’’তি [দী. নি. ৩.২৫৩] চ পাল়ি. পাপসখো, পাপসখা, পাপসখং, পাপসখে, পাপসখেন, পাপসখেহি, পাপসখেভি…পে… পাপসখস্মিং, পাপসখম্হি, পাপসখে, পাপসখেসু.

যুৰা গচ্ছতি.

১৫৩. যোনং ¶ নোনে ৰা [ক. ১৫৫, ১৫৭; রূ. ১৩৭, ১৪০; নী. ৩৩৫, ৩৪৩].

যুৰ, পুমাদীহি পঠমা, দুতিযাযোনং কমেন নো, নে হোন্তি ৰা.

১৫৪. নোনানেস্ৰা [ক. ১৫৭; রূ. ১৪০; নী. ৩৪৩].

নো, না, নেসু যুৰাদীনং অন্তো আ হোতি ৰা.

যুৰানো, যুৰানা, যুৰা, হে যুৰ, হে যুৰা, হে যুৰানো, হে যুৰা ৰা, যুৰানং, যুৰং, যুৰানে, যুৰে, যুৰেন, যুৰানা.

১৫৫. যুৰাদীনং সুহিস্ৰানঙ [ক. ১৫৭; রূ. ১৪০; নী. ৩৩৭-৯, ৩৪৩].

যুৰ, পুমাদীনং অন্তো আনঙ হোতি ৰা সু, হিসু.

যুৰানেহি, যুৰেহি, যুৰানেভি, যুৰেভি, যুৰস্স.

১৫৬. যুৰা সস্সিনো.

যুৰতো সস্স ইনো হোতি ৰা.

যুৰিনো, যুৰানং, যুৰস্মা, যুৰম্হা.

১৫৭. স্মাস্মিংনং নানে [ক. ১৫৬-৭-৮; রূ. ১৪০-২-৩].

যুৰ, পুমাদীহি স্মা, স্মিংনং না, নে হোন্তি ৰা. ‘নোনানেস্ৰা’তি নাম্হি আত্তং.

যুৰানা, যুৰানেহি, যুৰানেভি, যুৰেহি, যুৰেভি, যুৰস্স, যুৰিনো, যুৰানং, যুৰস্মিং, যুৰম্হি, যুৰে, যুৰানে, যুৰানেসু, যুৰেসু.

রূপসিদ্ধিযং পন ‘‘মঘৰ, যুৰাদীনমন্তস্স আনাদেসো হোতি ৰা সব্বাসু ৰিভত্তীসূ’’তি [রূ. ১৪০; নী. ৩৪৩] ৰুত্তং.

পুমা ¶ , পুমানো, হে পুম, হে পুমা.

১৫৮. গস্সং [ক. ১৫৩; রূ. ১৩৮; নী. ৩৩৩].

পুমতো গস্স অং হোতি ৰা.

হে পুমং, হে পুমানো, পুমানং, পুমং, পুমানে, পুমে.

১৫৯. নাম্হি [ক. ১৫৯; রূ. ১৩৯; নী. ৩৪০].

নাম্হি পুমন্তস্স আ হোতি ৰা.

পুমানা, পুমেন.

১৬০. পুমকম্মথামদ্ধানং ৰা সস্মাসু চ [ক. ১৫৭, ১৫৯; রূ. ১৩৯, ১৪০; নী. ৩৩৮, ১৪০].

নাম্হি চ স, স্মাসু চ পুম, কম্ম, থামদ্ধানং অন্তো উ হোতি ৰা.

পুমুনা, পুমানেহি, পুমানেভি, পুমেহি, পুমেভি, পুমস্স, পুমুনো, পুমানং, পুমস্মা, পুমম্হা, পুমানা, পুমুনা, পুমানেহি, পুমানেভি, পুমেহি, পুমেভি, পুমুনো, পুমস্স, পুমানং, পুমস্মিং, পুমম্হি, পুমে.

১৬১. পুমা [ক. ১৫৬; রূ. ১৪২; নী. ৩৩৬].

পুমতো স্মিংনো নে হোতি ৰা. ‘নোনানেস্ৰা’তি পুমন্তস্স আত্তং.

পুমানে.

১৬২. সুম্হা চ [ক. ১৫৮; রূ. ১৪৩; নী. ৩৩৯].

সুম্হি পুমন্তস্স আ চ হোতি আনে চ.

পুমানেসু, পুমাসু, পুমেসু.

সি ¶ , যোনং পুরিসাদিৰিধি চ হোতি, ‘‘যথা বলাকযোনিম্হি, ন ৰিজ্জতি পুমো সদা [অপ. থের ১.১.৫১১], সোল়সিত্থিসহস্সানং, ন ৰিজ্জতি পুমো তদা [চরিযা ৩.৪৯], ইত্থী হুত্ৰা স্ৰজ্জ পুমোম্হি দেৰো [দী. নি. ২.৩৫৪], থিযো তস্স পজাযন্তি, ন পুমা জাযরে কুলে’’তি [জা. ১.৮.৫৪] পাল়ী.

মঘৰসদ্দো যুৰসদ্দসদিসোতি রূপসিদ্ধিযং [রূ. ৬৬] ৰুত্তং, গুণৰাদিগণিকোতি সদ্দনীতিযং [নী. পদ. ২২০] ইচ্ছিতো. অঘন্তি দুক্খং পাপঞ্চ ৰুচ্চতি, ন অঘং মঘং, সুখং পুঞ্ঞঞ্চ, মঘো ইতি পুরাণং নামং অস্স অত্থীতি মঘৰাতি [সং. নি. ১.২৫৯] অত্থো পাল়িযং দিস্সতি.

থামসদ্দো পুরিসাদিগণো, থামেন, থামুনা, থামস্স, থামুনো, থামস্মা, থামম্হা, থামা, থামুনা, থামস্স, থামুনো. সেসং পুরিসসমং.

অদ্ধা ৰুচ্চতি কালো. নাদ্যেকৰচনেসু-দীঘেন অদ্ধুনা, অদ্ধনা, অদ্ধেন, দীঘস্স অদ্ধুনো, অদ্ধুস্স, অদ্ধস্স, অদ্ধুনা, অদ্ধুম্হা, অদ্ধুস্মা, অদ্ধা, অদ্ধম্হা, অদ্ধস্মা, অদ্ধুনো, অদ্ধুস্স, অদ্ধস্স, অদ্ধনি, অদ্ধে, অদ্ধম্হি, অদ্ধস্মিন্তি চূল়মোগ্গল্লানে আগতং. সেসং যুৰসদিসং.

উপদ্ধৰাচকো অদ্ধসদ্দো ইধ ন লব্ভতি, একংসত্থৰাচকো চ নিপাতো এৰ. ‘‘অদ্ধানমগ্গপ্পটিপন্নো’’তিআদীসু অদ্ধানসদ্দো পন ৰিসুং সিদ্ধো নপুংসকলিঙ্গোৰ.

মুদ্ধসদ্দে ‘‘মুদ্ধা তে ফলতু সত্তধা, মুদ্ধা মে ফলতু সত্তধা’’ ইচ্চাদীসু [জা. ১.১৬.২৯৫; ধ. প. অট্ঠ. ১.তিস্সত্থেরৰত্থু] সিরো ৰুচ্চতি, ‘‘পব্বতমুদ্ধনিট্ঠিতো’’ ইচ্চাদীসু [দী. নি. ২.৭০] মত্থকং ৰুচ্চতি, তদুভযং ইধ লব্ভতি, স্মিংৰচনে মুদ্ধনীতি সিদ্ধং, সেসং যুৰসমং. বালৰাচকো পন পুরিসনযো. হত্থমুট্ঠিৰাচকো ইত্থিলিঙ্গো.

অস্মা ৰুচ্চতি পাসাণো, উস্মা ৰুচ্চতি কাযগ্গি, ভিস্মা ৰুচ্চতি ভযানকো মহাকাযো.

তত্থ ¶ অস্মসদ্দে ‘‘তং তে পঞ্ঞায ভিন্দামি, আমং পক্কংৰ অস্মনা [সু. নি. ৪৪৫], মা ত্ৰং চন্দে খলি অস্মনী’’তি পাল়ী. সেসং যুৰসমং. উস্মা, ভিস্মাসদ্দাপি যুৰসদিসাতি ৰদন্তি.

চূল়মোগ্গল্লানে মুদ্ধ, গাণ্ডীৰধন্ৰ, অণিম, লঘিমাদযো চ অস্মসদিসাতি ৰুত্তং.

যত্থ সুত্তৰিধানং ন দিস্সতি, তত্থ মহাৰুত্তিনা ৰা সুত্তৰিভত্তেন ৰা রূপং ৰিধিযতি.

ইতি রাজাদিযুৰাদিগণরাসি.

অকারন্তপুল্লিঙ্গং নিট্ঠিতং.

আকারন্তপুল্লিঙ্গরাসি

‘গসীন’ন্তি সিলোপো, সা তিট্ঠতি.

‘একৰচনযোস্ৰঘোন’ন্তি যোসু চ একৰচনেসু চ রস্সো, ‘অতো যোন’মিচ্চাদিনা ৰিধানং, সা তিট্ঠন্তি.

১৬৩. সাস্সংসে চানঙ.

অং, সেসু গে চ সাসদ্দস্স আনঙ হোতি.

ভো সান, ভোন্তো সা, সং, সানং, সে, সেন, সাহি, সাভি, সস্স, সানস্স, সানং, সস্মা, সম্হা, সা, সাহি, সাভি, সস্স, সানস্স, সানং, সস্মিং, সম্হি, সে, সাসু.

অথ ৰা ‘সাস্সংসে চানঙ’ইতি সুত্তে চসদ্দো অৰুত্তসমুচ্চযত্থোপি হোতীতিকত্ৰা সিতো সেসাসু ৰিভত্তীসুপি আনঙ হোতি ৰা, মহাৰুত্তিনা চ আনাদেসতো যোনং ও.

সা ¶ গচ্ছতি, সানো গচ্ছন্তি, সা ৰা, হে স, হে সা, হে সান, হে সা, হে সানো, সং, সানং, সে, সানে ইচ্চাদি.

সদ্দনীতিরূপং ৰুচ্চতে –

সা তিট্ঠতি, সা তিট্ঠন্তি, সানো তিট্ঠন্তি, ভো সা, ভোন্তো সা, সানো, সানং, সানে, সানা, সানেহি, সানেভি, সাস্স, সানং, সানা, সানেহি, সানেভি, সাস্স, সানং, সানে, সানেসূতি [নীতি. পদ. ২১১].

ৰত্তহা ৰুচ্চতি সত্তো [সক্কো (অমরকোস, ১-১৪৫ গাথাযং)].

১৬৪. ৰত্তহা সনংনং নোনানং.

ৰত্তহতো সস্স নো হোতি, নংৰচনস্স নানং হোতি.

ৰত্তহানো দেতি, ৰত্তহানানং দেতি. সেসং যুৰসদ্দসমং.

সদ্দনীতিযং পন না, সেসু ৰত্তহিনা, ৰত্তহিনোতি [নীতি. পদ. ২১৯; (তত্থ নাম্হি ৰত্তহানাতি দিস্সতি)] ৰুত্তং.

দল়্হধম্মা, দল়্হধম্মা, দল়্হধম্মানো. ‘‘সিক্খিতা দল়্হধম্মিনো’’তিপি [সং. নি. ১.২০৯] পাল়ি. ভো দল়্হধম্মা, ভোন্তো দল়্হধম্মা, দল়্হধম্মানো, দল়্হধম্মিনো, দল়্হধম্মানং, দল়্হধম্মানে, দল়্হধম্মিনা, দল়্হধম্মেহি. সেসং পুরিসসমং. এৰং পচ্চক্খধম্মাতি. ৰিৰটচ্ছদসদ্দে পন নাম্হি ইত্তং নত্থি, সেসং দল়্হধম্মসমং. পাল়িযং পন ‘‘দল়্হধম্মোতি ৰিস্সুতো’’তি [জা. ২.২২.৩০০] চ ‘‘লোকে ৰিৰটচ্ছদো’’তি [দী. নি. ১.২৫৮] চ দিট্ঠত্তা এতে সদ্দা পুরিসরূপা অকারন্তাপি যুজ্জন্তি.

ৰুত্তসিরা ৰুচ্চতি নৰৰোরোপিতকেসো, ৰুত্তসিরা ব্রাহ্মণো, ৰুত্তসিরা, ৰুত্তসিরানো, ৰুত্তসিরানং, ৰুত্তসিরানে, ৰুত্তসিরানা, ¶ ৰুত্তসিরানেহি. সেসং পুরিসসমং. পাল়িযং পন ‘‘কাপটিকো মাণৰো ৰুত্তসিরো’’তিপি [ম. নি. ২.৪২৬] দিস্সতি.

রহা ৰুচ্চতি পাপধম্মো. রহা, রহা, রহিনো, রহানং, রহিনে, রহিনা, রহিনেহি, রহিনেভি, রহস্স, রহিনো, রহানং…পে… রহানে, রহানেসূতি [নীতি. পদ. ২১৭] সব্বং সদ্দনীতিযং ৰুত্তং, ইধ পন মহাৰুত্তিনা সিদ্ধং.

ইতি আকারন্তপুল্লিঙ্গরাসি.

ইকারন্তপুল্লিঙ্গরাসি

‘গসীন’ন্তি লোপো, মুনি গচ্ছতি.

১৬৫. লোপো [ক. ১১৮; রূ. ১৪৬; নী. ২৯৩].

ঝ, লতো যোনং লোপো হোতি. ‘যোলোপনীসু দীঘো’তি দীঘো.

মুনী গচ্ছন্তি.

১৬৬. যোসু ঝিস্স পুমে [ক. ৯৬; রূ. ১৪৮; নী. ২৫৯].

পুল্লিঙ্গে যোসু ঝসঞ্ঞস্স ই-কারস্স ট হোতি ৰা.

মুনযো গচ্ছন্তি.

ঝিস্সাতি কিং? রত্তিযো, দণ্ডিনো.

পুমেতি কিং? অট্ঠীনি.

ভো মুনি, ‘অযুনং ৰা দীঘো’তি দীঘো, ভো মুনী, ভোন্তো মুনী, ভোন্তো মুনযো, মুনিং, মুনী, মুনযো, মুনিনা, মুনীহি, মুনীভি, মুনিস্স, মুনিনো, মুনীনং, মুনিস্মা, মুনিম্হা.

১৬৭. না ¶ স্মাস্স [ক. ২১৫; রূ. ৪১; নী. ৪৪২].

ঝ, লতো স্মাস্স না হোতি ৰা.

মুনিনা, মুনীহি, মুনীভি, মুনিস্স, মুনিনো, মুনীনং, মুনিস্মিং, মুনিম্হি, মুনীসু.

ইসি গচ্ছতি, ইসী, ইসযো, ভো ইসি, ভো ইসী, ভোন্তো ইসী, ভোন্তো ইসযো ইচ্চাদি.

অগ্গি জলতি, অগ্গী, অগ্গযো, ভো অগ্গি, ভো অগ্গী, ভোন্তো অগ্গী, ভোন্তো অগ্গযো ইচ্চাদি.

এৰং কুচ্ছি, মুট্ঠি, গণ্ঠি, মণি, পতি, অধিপতি, গহপতি, সেনাপতি, নরপতি, যতি, ঞাতি, সাতি, ৰত্থি, অতিথি, সারথি, বোন্দি, আদি, উপাদি, নিধি, ৰিধি, ওধি, ব্যাধি, সমাধি, উদধি, উপধি, নিরুপধি, ধনি, সেনানি, কপি, দীপি, কিমি, তিমি, অরি, হরি, গিরি, কলি, বলি, সালি, অঞ্জলি, কৰি, রৰি, অসি, মসি, কেসি, পেসি, রাসি, অহি, ৰীহিইচ্চাদযো.

ৰিসেসৰিধানমুচ্চতে.

মহাৰুত্তিনা অকতরস্সেহিপি কেহিচি ঝসঞ্ঞেহি যোনং নো হোতি, ‘‘ছ মুনিনো অগারমুনিনো, অনগারমুনিনো, সেখমুনিনো, অসেখমুনিনো, পচ্চেকমুনিনো, মুনিমুনিনো’’তি [মহানি. ১৪] চ ‘‘ঞাণুপপন্না মুনিনো ৰদন্তী’’তি চ ‘‘একমেকায ইত্থিযা, অট্ঠট্ঠ পতিনো সিযু’’ন্তি চ [জা. ২.২১.৩৪৪] ‘‘পতিনো কিরম্হাকং ৰিসিট্ঠনারীন’’ [ৰি. ৰ. ৩২৩] ন্তি চ ‘‘হংসাধিপতিনো ইমে’’তি [জা. ২.২১.৩৮] চ সুত্তপদানি দিস্সন্তি.

গাথাসু ‘ঘব্রহ্মাদিত্ৰে’তি মুনিতো গস্স এত্তঞ্চ হোতি, পোরোহিচ্চো তৰং মুনে [অপ. থের ১.১.৫৪০], ধম্মদস্সো তৰং মুনে [অপ. থের ১.১.৫৪০], চিরং ¶ জীৰ মহাৰীর, কপ্পং তিট্ঠ মহামুনে [অপ. থের ১.২.১৬৮], পটিগ্গণ্হ মহামুনে [অপ. থের ১.৪১.৮৩]. তুয্হত্থায মহামুনেতি [অপ. থের ১.৩.৩৪৫].

তেহিযেৰ অংৰচনস্স নঞ্চ হোতি, তমাহু একং মুনিনং চরন্তং [সু. নি. ২১০], মুনিনং মোনপথেসু সিক্খমানং [জা. ১.৮.৪৪], পিতরং পুত্তগিদ্ধিনং [জা. ২.২২.২৩৭৭], সব্বকামসমিদ্ধিনং [জা. ১.১৩.১০৩].

ইসিসদ্দে পন –

১৬৮. টে সিস্সিসিস্মা [টে সিস্সস্মা (মূলপাঠে)].

ইসিম্হা সিস্স টে হোতি ৰা.

যো নো’জ্জ ৰিনযে কঙ্খং, অত্থধম্মৰিদূ ইসে [জা. ২.২২.১১৬৪]. ‘ঘব্রহ্মাদিত্ৰে’তি গস্স এত্তঞ্চ হোতি, নিসীদাহি মহাইসে [জা. ২.২০.১১৪], ত্ৰং নো’সি সরণং ইসে [জা. ২.২২.১৩২৬], পুত্তো উপ্পজ্জতং ইসে [জা. ১.১৪.১০৪].

১৬৯. দুতিযস্স যোস্স.

ইসিম্হা দুতিযস্স যোস্স টে হোতি ৰা.

সমণে ব্রাহ্মণে ৰন্দে, সম্পন্নচরণে ইসে [জা. ১.১৬.৩১৪].

সমাসে পন মহেসি গচ্ছতি, মহেসী গচ্ছন্তি, মহেসযো, মহেসিনো. অংৰচনে মহেসিনন্তি সিজ্ঝতি. ‘‘সঙ্গাযিংসু মহেসযো [ৰি. ৰ. গন্থারম্ভকথা পে. ৰ. গন্থারম্ভকথা], ৰানমুত্তা মহেসযো’’তি [অভিধম্মত্থসঙ্গহে ১১৩ পিট্ঠে] চ ‘‘ন তং সম্মগ্গতা যঞ্ঞং, উপযন্তি মহেসিনো, এতং সম্মগ্গতা যঞ্ঞং, উপযন্তি মহেসিনো [সং. নি. ১.১২০], পহন্তা মহেসিনো কামে, যেন তিণ্ণা মহেসিনো’’তি চ ‘‘মহেসিং ৰিজিতাৰিন’’ন্তি [ম. নি. ২.৪৫৯] চ ‘‘সঙ্ঘঞ্চাপি মহেসিনং, কুঞ্জরংৰ মহেসিনং, উপগন্ত্ৰা মহেসিনং ¶ [বু. ৰং. ৯.১], খিপ্পং পস্স মহেসিনং [জা. ২.১৯.৭০], কতকিচ্চং মহেসিন’’ন্তি [জা. ২.১৯.১০২] চ সুত্তপদানি দিস্সন্তি.

অগ্গিসদ্দে –

১৭০. সিস্সগ্গিতো নি [ক. ৯৫; রূ. ১৪৫; নী. ২৫৪; ‘সিস্সাগ্গিতো নি’ (বহূসু)].

অগ্গিতো সিস্স নি হোতি ৰা.

অগ্গি জলতি, অগ্গিনি জলতি, অগ্গী জলন্তি, অগ্গযো ইচ্চাদি.

পাল়িযং পন ‘‘অগ্গি, গিনি, অগ্গিনী’’তি তযো অগ্গিপরিযাযা দিস্সন্তি – ‘‘রাগগ্গি, দোসগ্গি, মোহগ্গী’’তি [অ. নি. ৭.৪৬] চ ‘‘ছন্না কুটি আহিতো গিনি, ৰিৰটা কুটি নিব্বুতো গিনি [সু. নি. ১৯], মহাগিনি সম্পজ্জলিতো [থেরগা. ৭০২ (থোকং ৰিসদিসং)], যস্মা সো জাযতে গিনী’’তি [জা. ১.১০.৫৮] চ ‘‘অগ্গিনিং সম্পজ্জলিতং পৰিসন্তী’’তি [সু. নি. ৬৭৫] চ. তেসং ৰিসুং ৰিসুং রূপমালা লব্ভতি.

সেট্ঠি, পতি, অধিপতি, সেনাপতি, অতিথি, সারথিসদ্দেহি চ যোনং নো হোতি, অংৰচনস্স নং হোতি ৰা, সেট্ঠিনো, সেট্ঠিনং, পতিনো, পতিনং, অধিপতিনো, অধিপতিনং, সেনাপতিনো, সেনাপতিনং, অতিথিনো, অতিথিনং, সারথিনো, সারথিনন্তি. গহপতযো, জানিপতযো ইচ্চাদীনি নিচ্চরূপানি দিস্সন্তি.

আদিসদ্দে –

‘রত্থ্যাদীহি টো স্মিংনো’তি স্মিংনো টো হোতি, আদিস্মিং, আদিম্হি, আদো, গাথাদো, পাদাদো. ‘‘আদিং, গাথাদিং, পাদাদিং’’ ইচ্চাদীসু পন আধারত্থে দুতিযা এৰ ‘‘ইমং রত্তিং, ইমং দিৰসং, পুরিমং দিসং, পচ্ছিমং দিসং, তং খণং, তং লযং, তং মুহুত্তং’’ ইচ্চাদীসু ৰিয.

ইদানি সমাসে ঝিস্স টাদেসাভাৰো ৰুচ্চতি.

১৭১. ইতোঞ্ঞত্থে ¶ পুমে.

পুমে অঞ্ঞপদত্থসমাসে ই-কারম্হা পঠমা, দুতিযাযোনং কমেন নো, নে হোন্তি ৰা. সুত্তৰিভত্তেন উত্তরপদত্থসমাসেপি ক্ৰচি যোনং নো, নে হোন্তি.

পঠমাযোম্হি –

মিচ্ছাদিট্ঠিনো, সম্মাদিট্ঠিনো, মুট্ঠস্সতিনো, উপট্ঠিতস্সতিনো, অসারে সারমতিনো [ধ. প. ১১], নিম্মানরতিনো দেৰা, যে দেৰা ৰসৰত্তিনো [সং. নি. ১.১৬৮], অট্ঠেতে চক্কৰত্তিনো, ধম্মে ধম্মানুৰত্তিনো [সং. নি. ৫.৩৪], সগ্গং সুগতিনো যন্তি [ধ. প. ১২৬], তোমর’ঙ্কুসপাণিনো [জা. ২.২২.২২৩], দণ্ডমুগ্গরপাণিনো, অরিযৰুত্তিনো, নিপকা সন্তৰুত্তিনো ইচ্চাদি.

দুতিযাযোম্হি –

মুট্ঠস্সতিনে, উপট্ঠিতস্সতিনে, অরিযৰুত্তিনে, তোমর’ঙ্কুসপাণিনে [জা. ২.২২.১৯০] ইচ্চাদি.

ৰাত্ৰেৰ? মিচ্ছাদিট্ঠী জনা গচ্ছন্তি, মিচ্ছাদিট্ঠী জনে পস্সতি.

গরূ পন ‘‘তোমর’ঙ্কুসপাণযো, অত্থে ৰিসারদমতযো’’তি [ক. ২৫৩] রূপানি ইধ ইচ্ছন্তি.

অঞ্ঞত্থেতি কিং? মিচ্ছাদিট্ঠিযো ধম্মা, মিচ্ছাদিট্ঠিযো ধম্মে.

পুমেতি কিং? মিচ্ছাদিট্ঠিনিযো ইত্থিযো, মিচ্ছাদিট্ঠীনি কুলানি.

১৭২. নে স্মিংনো ক্ৰচি [নী. ৪৫৩].

পুমে অঞ্ঞত্থে ইতো স্মিংনো ক্ৰচি নে হোতি.

কতঞ্ঞুম্হি চ পোসম্হি, সীলৰন্তে অরিযৰুত্তিনে [জা. ১.১০.৭৮]. সব্বকামসমিদ্ধিনে কুলে, ছত্তপাণিনে, দণ্ডপাণিনে, তোমর’ঙ্কুসপাণিনে [জা. ২.২২.১৯০] ইচ্চাদি.

সুত্তৰিভত্তেন ¶ ঈতোপি স্মিংনো ক্ৰচি নে হোতি, মাতঙ্গস্মিং যসস্সিনে [জা. ২.১৯.৯৬], দেৰৰণ্ণিনে, ব্রহ্মৰণ্ণিনে, অরহন্তম্হি তাদিনে [থেরগা. ১১৮২] ইচ্চাদি.

ইকারন্তপুল্লিঙ্গরাসি নিট্ঠিতো.

ঈকারন্তপুল্লিঙ্গরাসি

ঈকারন্তে ‘সিম্হি না’নপুংসকস্সা’তি সুত্তেন সিম্হি রস্সত্তং নত্থি, ‘গে ৰা’তি গে পরে ৰিকপ্পেন রস্সো, যোসু চ অং, না, স, স্মা, স্মিং সু চ ‘একৰচনযোস্ৰঘোন’ন্তি নিচ্চং রস্সো, দণ্ডী গচ্ছতি. ‘জন্তু হেতু’ ইচ্চাদিসুত্তেন ৰিকপ্পেন যোনং লোপো, দণ্ডী গচ্ছন্তি.

পক্খে –

১৭৩. যোনং নোনে পুমে [ক. ২২৫; রূ. ১৫১; নী. ৪৫২, ৪৫৩].

পুমে ঝসঞ্ঞম্হা ঈ-কারতো পঠমা, দুতিযাযোনং কমেন নো, নে হোন্তি ৰা.

দণ্ডিনো গচ্ছন্তি, ভোদণ্ডি, ভো দণ্ডী, ভোন্তো দণ্ডিনো, দণ্ডিং.

১৭৪. নং ঝীতো [ক. ২২৪; রূ. ১৫৩; নী. ৪৫১].

পুমে ঝসঞ্ঞম্হা ঈ-কারতো অংৰচনস্স নং হোতি ৰা.

দণ্ডিনং.

১৭৫. নো ৰা [’নো’ (বহূসু)].

পুমে ঝীতো দুতিযাযোস্স নো হোতি ৰা.

দণ্ডী ¶ , দণ্ডিনো, দণ্ডিনে, দণ্ডিনা, দণ্ডীহি, দণ্ডীভি, দণ্ডিস্স, দণ্ডিনো, দণ্ডীনং, দণ্ডিস্মা, দণ্ডিম্হা, দণ্ডিনা, দণ্ডীহি, দণ্ডীভি, দণ্ডিস্স, দণ্ডিনো, দণ্ডীনং, দণ্ডিস্মিং, দণ্ডিম্হি.

১৭৬. স্মিংনো নিং [ক. ২২৬; রূ. ১৫৪; নী. ৪১৬].

ঝীতো স্মিংনো নি হোতি ৰা.

দণ্ডিনি.

‘নে স্মিংনো ক্ৰচী’তি ৰিভত্তসুত্তেন স্মিংনো নে চ হোতি, দণ্ডিনে, দণ্ডীসু.

এৰং চক্কী, পক্খী, সুখী, সিখী, চাগী, ভাগী, ভোগী, যোগী, সঙ্ঘী, ৰাচী, ধজী, ভজী, কুট্ঠী, রট্ঠী, দাঠী, ঞাণী, পাণী, গণী, গুণী, চম্মী, ধম্মী, সীঘযাযী, পাপকারী, ব্রহ্মচারী, মাযাৰী, মেধাৰী, ভুত্তাৰী, ভযদস্সাৰী, যসস্সী, তেজস্সী, ছত্তী, পত্তী, দন্তী, মন্তী, সত্তুঘাতী, সীহনাদী, সামী, পিযপ্পসংসী. অত্থদস্সী, ধম্মদস্সী ইচ্চাদযো. গামণী, সেনানী, সুধী ইচ্চাদীসু পন স্মিংনো নিত্তং নত্থি.

ৰিসেসৰিধানমুচ্চতে.

মহাৰুত্তিনা যোসু ঝী-কারস্সপি ক্ৰচি টত্তং হোতি,

‘‘হংসা কোঞ্চা মযূরা চ, হত্থযো পসদা মিগা;

সব্বে সীহস্স ভাযন্তি, নত্থি কাযস্মিং তুল্যতা [জা. ১.২.১০৩].

পুরিসালূ চ হত্থযো, সঞ্ঞতা ব্রহ্মচারযো [অ. নি. ৬.৩৭], অপচে ব্রহ্মচারযো’’তি দিস্সন্তি. তত্থ ‘হত্থযো’তি হত্থিনো, ‘পুরিসালূ’তি পুরিসলোলা বলৰামুখযক্খিনিযো, ‘ব্রহ্মচারযো’তি ব্রহ্মচারিনো, ‘অপচে’তি পূজেয্য.

সুস্সপি ¶ ক্ৰচি নেসু হোতি, সুসুখং ৰত জীৰাম, ৰেরিনেসু অৰেরিনো [ধ. প. ১৯৭], ৰেরিনেসু মনুস্সেসু, ৰিহরাম অৰেরিনো. তত্থ ‘ৰেরিনেসূ’তি ৰেরীচিত্তৰন্তেসু.

সমাসেপি পঠমাযোস্স নোত্তং, দুতিযাযোস্স নোত্তং নেত্তঞ্চ হোতি. তত্থ দ্ৰে নোত্তানি পাকটানি. নেত্তং পন ৰুচ্চতে, ‘‘অস্সমণে সমণমানিনে [অ. নি. ৮.১০], নরে পাণাতিপাতিনে [ইতিৰু. ৯৩], মঞ্জুকে পিযভাণিনে [জা. ২.২২.১৭২১], মালধারিনে [জা. ২.২২.১৭২৭], কাসিকুত্তমধারিনে [জা. ২.২২.১৯৫], ৰণ্ণৰন্তে যসস্সিনে [দী. নি. ২.২৮২], চাপহত্থে কলাপিনে, উভো ভস্সরৰণ্ণিনে [জা. ২.২১.১১১], ব্রাহ্মণে দেৰৰণ্ডিনে, সমুদ্ধরতি পাণিনে [অপ. থেরী ২.৩.১৩৭], এৰং জরা চ মচ্চু চ, অধিৰত্তন্তি পাণিনে’’তি [সং. নি. ১.১৩৬] দিস্সন্তি. তত্থ ‘ভস্সরৰণ্ণিনে’তি পভস্সরৰণ্ণৰন্তে. স্মিংনো নেত্তে পন ‘‘মাতঙ্গস্মিং যসস্সিনে’’ ইচ্চাদীনি [জা. ২.১৯.৯৬] পুব্বে ৰুত্তানেৰ.

ঈকারন্তপুল্লিঙ্গরাসি নিট্ঠিতো.

উকারন্তপুল্লিঙ্গরাসি

ভিক্খাদিগণরাসি

‘গসীন’ন্তি সিলোপো, ভিক্খু. যোনং লোপে দীঘো, ভিক্খূ.

পক্খে –

১৭৭. লা যোনং ৰো পুমে [ক. ১১৯; রূ. ১৫৫; নী. ২৯৪].

পুমে লসঞ্ঞেহি উৰণ্ণেহি যোনং ৰো হোতি ৰাতি যোনং ৰো.

১৭৮. ৰেৰোসু ¶ লুস্স [ক. ৯৭; রূ. ১৫৬; নী. ২৬০].

পুমে ৰে, ৰোসু পরেসু লসঞ্ঞস্স উ-কারস্স ট হোতি.

ভিক্খৰো.

লুস্সাতি কিং? সযম্ভুৰো.

ভো ভিক্খু, ভো ভিক্খূ, ভোন্তো ভিক্খূ.

১৭৯. পুমালপনে ৰেৰো [ক. ১১৬; রূ. ১৫৭; নী. ২৯১].

পুমে আলপনে লসঞ্ঞম্হা উ-কারতো যোস্স ৰে, ৰো হোন্তি ৰা.

ভোন্তো ভিক্খৰে, অথ খো ভগৰা ভিক্খূ আমন্তেসি ‘‘ভিক্খৰো’’তি [ম. নি. ১.১], দেৰকাযা অভিক্কন্তা, তে ৰিজানাথ ভিক্খৰো [দী. নি. ২.৩৩৪], ভিক্খুং, ভিক্খূ, ভিক্খৰো, ভিক্খুনা. ‘সুনংহিসূ’তি দীঘো, ভিক্খূহি, ভিক্খূভি, ভিক্খুস্স, ভিক্খুনো, ভিক্খূনং, ভিক্খুস্মা, ভিক্খুম্হা, ভিক্খুনা, ভিক্খূহি, ভিক্খূভি, ভিক্খুস্স, ভিক্খুনো, ভিক্খূনং, ভিক্খুস্মিং, ভিক্খুম্হি, ভিক্খূসু.

এৰং মঙ্কু, মচ্চু, উচ্ছু, পটু, ভাণু, সেতু, কেতু, সত্তু, সিন্ধু, বন্ধু, কারু, নেরু, মেরু, রুরু, ৰেল়ু ইচ্চাদযো.

ৰিসেসৰিধানমুচ্চতে.

হেতু, জন্তু, কুরুসদ্দেসু ‘জন্তুহেতু’ ইচ্চাদিসুত্তেন ৰিকপ্পেন যোনং লোপো, হেতু ধম্মো, হেতূ ধম্মা, অতীতে হেতৰো পঞ্চ.

১৮০. যোম্হি ৰা ক্ৰচি [ক. ৯৭; রূ. ১৫৬; নী. ২৬০].

যোসু লসঞ্ঞিনো উ-কারস্স ক্ৰচি ট হোতি ৰা.

অতীতে হেতযো পঞ্চ.

ৰাতি ¶ কিং? হেতুযো.

ক্ৰচীতি কিং? ভিক্খৰো.

ভো হেতু, ভো হেতূ, ভোন্তো হেতূ, হেতৰো, হেতযো, হেতুযো ৰা, হেতুং, হেতূ, হেতৰো, হেতযো, হেতুযো ৰা. সেসং ভিক্খুসমং.

জন্তু গচ্ছতি, জন্তূ, জন্তযো, জন্তুযো ৰা.

১৮১. জন্তাদিতো নো চ [ক. ১১৯; রূ. ১৫৫; নী. ২৯৪; ‘জন্ত্ৰাদিতো’ (বহূসু)].

পুমে জন্তাদিতো যোনং নো চ হোতি ৰো চ.

জন্তুনো, জন্তৰো, ভোজন্তু, ভোজন্তূ, ভোন্তো জন্তূ, জন্তযো, জন্তুযো, জন্তুনো, জন্তৰো, জন্তুং, জন্তূ, জন্তযো, জন্তুযো, জন্তুনো, জন্তৰো. সেসং ভিক্খুসমং.

কুরু, কুরূ, কুরযো, কুরুযো, কুরুনো, কুরৰোতি সব্বং জন্তুসমং.

‘‘অজ্জেৰ তং কুরযো পাপযাতু [জা. ২.২২.১৬৩২], নন্দন্তি তং কুরযো দস্সনেন [জা. ২.২২.১৬৪১], অজ্জেৰ তং কুরযো পাপযামী’’তি [জা. ২.২২.১৬৩৪] দিস্সন্তি.

মহাৰুত্তিনা লতোপি অংৰচনস্স ক্ৰচি নং হোতি, ‘‘কিমত্থিনং ভিক্খুনং আহু, ভিক্খুনমাহু মগ্গদেসিং, ভিক্খুনমাহু মগ্গজীৰিং, বুদ্ধং আদিচ্চবন্ধুন’’ন্তি দিস্সন্তি, তথা ‘‘রোগনিড্ডং পভঙ্গুনং, ভোগানঞ্চ পভঙ্গুনং [ধ. প. ১৩৯], ৰিঞ্ঞাণঞ্চ ৰিরাগুন’’ন্তি চ. তত্থ ‘কিমত্থিন’ন্তি কিংসভাৰং, ‘মগ্গদেসি’ন্তি মগ্গং দেসেন্তং, ‘মগ্গজীৰি’ন্তি মগ্গে জীৰন্তং, ‘রোগনিড্ড’ন্তি রোগানং কুলাৰকভূতং, ‘পভঙ্গুন’ন্তি পভিজ্জনসীলং, ‘ৰিরাগুন’ন্তি ৰিরজ্জনসীলং. কত্থচি পঠমন্তম্পি দিস্সতি, তত্থ নাগমো.

ইতি ভিক্খাদিগণরাসি.

সত্থাদিগণরাসি

সত্থাদিরাসি

১৮২. ল্তুপিতাদীনমা সিম্হি [ক. ২৯৯; রূ. ১৫৮; নী. ৪১১].

সিম্হি ¶ পরে ল্তুপচ্চযন্তানং সত্থু, কত্তুইচ্চাদীনং পিতাদীনঞ্চ উ-কারো আ হোতি. ‘গসীন’ন্তি লোপো.

সত্থা.

১৮৩. ল্তুপিতাদীনমসে [ক. ২০০; রূ. ১৫৯; নী. ৪১২].

সম্হা অঞ্ঞস্মিং ৰিভত্তিগণে পরে ল্তু, পিতাদীনং উ-কারো আরঙ হোতি.

১৮৪. আরঙস্মা [ক. ২০৫; রূ. ১৬০; নী. ৪২১].

আরঙতো যোনং টো হোতি.

সত্থারো.

১৮৫. গে অ চ [ক. ২৪৬; রূ. ৭৩; নী. ৪৭৬, ৪৭৮-৯].

গে পরে ল্তু, পিতাদীনং উ-কারো হোতি অ চ আ চ. ভোসত্থ, ভো সত্থা, ভোন্তো সত্থারো, সত্থারং.

১৮৬. টোটে ৰা [ক. ২০৫; রূ. ২৬০; নী. ৪২১].

আরঙতো যোনং কমেন টো, টে হোন্তি ৰা. এত্থ চ ৰাসদ্দো সখসদ্দে ৰিকপ্পনত্থো তত্থ ৰিধ্যন্তরসব্ভাৰা. পুন টোগ্গহণং লহুভাৰত্থং.

সত্থারো, সত্থারে.

১৮৭. টা ¶ নাস্মানং [ক. ২০৭, ২৭০; রূ. ১৬১, ১২০; নী. ৪২, ৫৪২].

আরঙতো না, স্মানং টা হোতি.

সত্থারা, সত্থারেহি, সত্থারেভি.

১৮৮. লোপো [ক. ২০৩; রূ. ১৬২; নী. ৪১৮].

ল্তু, পিতাদীহি সলোপো হোতি ৰা.

সত্থু, সত্থুস্স, সত্থুনো.

১৮৯. নংম্হি ৰা [ক. ২০১; রূ. ১৬৩; নী. ৪১৬].

নংম্হি পরে ল্তু, পিতাদীনং উ-কারো আরঙ হোতি ৰা. ইমেসং মহানাম তিণ্ণং সত্থারানং একা নিট্ঠা উদাহু পুথু নিট্ঠাতি [অ. নি. ৩.১২৭]. সত্থূনং.

১৯০. আ [ক. ২০২; রূ. ১৬৪; নী. ৪১৭].

নংম্হি পরে ল্তু, পিতাদীনং উ-কারো আ হোতি ৰা.

সত্থানং, সত্থারা, সত্থারেহি, সত্থারেভি, সত্থু, সত্থুস্স, সত্থুনো, সত্থূনং, সত্থারানং, সত্থানং.

১৯১. টি স্মিংনো [ক. ২০৬; রূ. ১৬৫; নী. ৪২২].

আরঙতো স্মিংনো টি হোতি.

১৯২. রস্সারঙ [ক. ২০৮; রূ. ১৬৬; নী. ৪২৪].

স্মিংম্হি পরে আরঙ্কতো রস্সো হোতি.

সত্থরি, সত্থারেসু.

বহুলাধিকারা ¶ না, স্মাসু সত্থুনাতি চ সুম্হি সত্থূসূতি চ সিদ্ধং. ‘‘ধম্মরাজেন সত্থুনা, পূজং লব্ভতি ভত্তুসূ’’তি [জা. ২.২২.১৫১৭] পাল়ি. ‘ভত্তুসূ’তি সামীসু, ‘ভত্তাসূ’তিপি পাঠো.

‘ল্তুপিতাদীনমসে’তি অসেগ্গহণেন তোম্হি আরঙ হোতি [নী. ৪১৪], ‘‘সত্থারতো সত্থারং গচ্ছন্তি, সত্থারতো সত্থারং ঘটেন্তী’’তি [মহানি. ২৭] পাল়ি.

এৰং কত্তা, ভত্তা, গন্তা, জেতা, জনেতা, ছেত্তা, ছেদিতা, ৰিঞ্ঞাতা, ৰিঞ্ঞাপেতা, উট্ঠাতা, উট্ঠাপেতা, তরিতা, তারেতা, দাতা, দাপেতা, সন্ধাতা, সন্ধাপেতা, নেতা, নেত্তা, পোসেতা, ভেত্তা, যাতা, ৰত্তা, সেতা, হন্তা, সকমন্ধাতা, মহামন্ধাতা ইচ্চাদযো.

ৰিসেসৰিধানমুচ্চতে.

মহাৰুত্তিনা যোনং আ হোতি, অৰিতক্কিতা গব্ভমুপৰজন্তি [জা. ১.১৩.১৩৮ (ৰিসদিসং)], তে ভিক্খূ ব্রূহেতা সুঞ্ঞাগারানং.

অমচ্চৰাচীহি কত্তু, খত্তুসদ্দেহি গস্স এত্তং, উট্ঠেহি কত্তে তরমানো [জা. ২.২২.১৬৯০], নত্থি ভো খত্তে পরোলোকো [দী. নি. ২.৪০৮].

গে পরে আরঙ চ হোতি, পুচ্ছাম কত্তার অনোমপঞ্ঞ, ‘‘কত্তারং অনোমপঞ্ঞ’’ন্তিপি [জা. ১.১০.২৮] যুজ্জতি.

অংম্হি পরে পুব্বস্সরলোপো চ হোতি, অনুকম্পকং পাণসমম্পি ভত্তুং জহন্তি ইত্থিযো. ‘‘সো পতীতো পমুত্তেন, ভত্তুনা ভত্তুগারৰো’’তি [জা. ২.২১.৪৮] দিট্ঠত্তা কত্তুনা, গন্তুনা ইচ্চাদীনিপি যুজ্জন্তি.

নেত্তুম্হা ¶ স্মিংনো এত্তং [নী. ৪৩০], নেত্তে উজুং গতে সতি [জা. ১.৪.১৩৩], এতে সদ্দা তীসু লিঙ্গেসু সমানরূপা হোন্তি, কত্তা ইত্থী, কত্তা পুরিসো, কত্তা কুলং ইচ্চাদি.

ইতি সত্থাদিরাসি.

পিতাদিরাসি

পিতা গচ্ছতি.

১৯৩. পিতাদীনমনত্তাদীনং [ক. ২০৯; রূ. ১৬৮; নী. ৪২৫; ‘পিতাদীনমনত্ৰাদীনং’ (বহূসু)].

নত্তাদিৰজ্জিতানং পিতাদীনং আরঙকতো রস্সো হোতি.

পিতরো, ভো পিত, ভো পিতা, ভোন্তো পিতরো. পিতরং, পিতুং ৰা. ‘‘মাতুং পিতুঞ্চ ৰন্দিত্ৰা’’তি [জা. ২.২২.১৮৫৯] দিস্সতি.

পিতরো, পিতরে, পিতরা, পিতুনা, পিতরেহি, পিতরেভি, পিতূহি, পিতূভি, পিতু, পিতুস্স, পিতুনো, পিতূনং, পিতরানং, পিতরা, পিতুনা, পিতরেহি, পিতরেভি, পিতূহি, পিতূভি, পিতু, পিতুস্স, পিতুনো, পিতূনং, পিতরানং, পিতানং, পিতুস্মিং, পিতুম্হি, পিতরি, পিতরেসু, পিতূসু.

অনণো ঞাতিনং হোতি, দেৰানং পিতুনঞ্চ সো [জা. ২.২২.১২৬], মাতাপিতূনং অচ্চযেন, ধম্মং চর মহারাজ, মাতাপিতূসু খত্তিয [জা. ২.১৭.৩৯].

এৰং ভাতা, ভাতরো, জামাতা, জামাতরোইচ্চাদি.

অনত্তাদীনন্তি কিং? নত্তা, নত্তারো, নত্তারং, নত্তারো, নত্তারে ইচ্চাদি. তথা পনত্তুসদ্দোপি.

মাতু ¶ , ধীতু, দুহিতুসদ্দা পন ইত্থিলিঙ্গা এৰ, মাতা, মাতরো, ভোতি মাত, ভোতি মাতা, ভোতি মাতে ৰা, ‘‘অচ্ছরিযং নন্দমাতে, অব্ভুতং নন্দমাতে’’তি [অ. নি. ৭.৫৩] দিস্সতি. ‘ঘব্রহ্মাদিত্ৰে’তি গস্স এত্তং. ভোতিযো মাতরো, মাতরং, মাতুং, মাতরো, মাতরে, মাতুযা, মাতরা, মাতরেহি, মাতরেভি, মাতূহি, মাতূভি, মাতু, মাতুস্স, মাতুযা. ‘‘মাতুস্স সরতি, পিতুস্স সরতী’’তি [রূ. ১৬৯; নী. ১৬০ পিট্ঠে] সত্থে দিস্সতি. ‘‘বুদ্ধমাতুস্স সক্কারং, করোতু সুগতোরসো’’তি [অপ. থেরী. ২.২.২৫৯] চ দিস্সতি. মাতূনং, মাতানং, মাতরানং. পঞ্চমীরূপং ততিযাসমং. ছট্ঠীরূপং চতুত্থীসমং. মাতুস্মিং, মাতুম্হি, মাতরি, মাতুযা, মাতুযং, মাতরেসু, মাতূসু. এৰং ধীতু, দুহিতুসদ্দা.

ৰিসেসৰিধিম্হি গাথাসু মহাৰুত্তিনা মাতু, পিতুসদ্দেহি নাদীনং পঞ্চন্নং একৰচনানং যা হোতি, স্মিংনো পন যঞ্চ হোতি, অন্তলোপো চ. মত্যা কতং, মত্যা দেতি, মত্যা অপেতি, মত্যা ধনং, মত্যা ঠিতং. মত্যং ঠিতং. এৰং পেত্যা কতংইচ্চাদি, ইধ ৰুদ্ধি.

অনুঞ্ঞাতো অহং মত্যা, সঞ্চত্তো পিতরা অহং [জা. ২.২২.২৯]. মত্যা চ পেত্যা চ কতং সুসাধু [জা. ২.১৮.৬১], অহঞ্হি জানামি জনিন্দ এতং, মত্যা চ পেত্যা চ [জা. ২.১৮.৫৯], সব্বং পুব্বেপি ৰুত্তমেৰ.

সত্থু, পিতাদীনং সমাসে ৰিধানং সমাসকণ্ডে আগমিস্সতি.

ইতি পিতাদিরাসি.

ইতি সত্থাদিগণরাসি.

উকারন্তপুল্লিঙ্গরাসি নিট্ঠিতো.

ঊকারন্তপুল্লিঙ্গরাসি

‘গসীন’ন্তি ¶ লোপো, সযম্ভূ গচ্ছতি. ‘লোপো’তি যোনং লোপো, সযম্ভূ গচ্ছন্তি.

পক্খে –

‘জন্তাদিতো নো চা’তি যোনং ৰো, নো, সযম্ভুৰো, সযম্ভুনো.

‘গে ৰা’তি গে পরে ৰিকপ্পেন রস্সো, ভো সযম্ভু, ভো সযম্ভূ, ভোন্তো সযম্ভূ, সযম্ভুৰো, সযম্ভুনো.

‘একৰচনযোস্ৰঘোন’ন্তি অমাদীসু একৰচনেসু নিচ্চং রস্সো, সযম্ভুং, গাথাযং ‘সযম্ভুন’ন্তিপি যুজ্জতি.

সযম্ভূ, সযম্ভুৰো, সযম্ভুনো. সযম্ভুনা, সযম্ভূহি, সযম্ভূভি, সযম্ভুস্স, সযম্ভুনো, সযম্ভূনং. সযম্ভুস্মা, সযম্ভুম্হা, সযম্ভুনা, সযম্ভূহি, সযম্ভূভি, সযম্ভুস্স, সযম্ভুনো, সযম্ভূনং. সযম্ভুস্মিং, সযম্ভুম্হি, সযম্ভূসু.

এৰং অভিভূ, পরাভিভূ, ৰেস্সভূ, গোত্রভূ, ৰত্রভূ ইচ্চাদি. সেসেসু পন যোনং নো এৰ লব্ভতি, চিত্তসহভুনো ধম্মা [ধ. স. দুকমাতিকা ৬১].

১৯৪. কূতো [ক. ১১৯; রূ. ১৫৫; নী. ২৯৪].

পুমে কূপচ্চযন্তেহি যোনং নো হোতি ৰা.

সব্বঞ্ঞূ, সব্বঞ্ঞুনো. সেসং সুৰিঞ্ঞেয্যং.

ৰিঞ্ঞূ ¶ , ৰদঞ্ঞূ, অত্থঞ্ঞূ, ধম্মঞ্ঞূ, মত্তঞ্ঞূ, ৰিদূ. ইধ কূসদ্দেন রূপচ্চযন্তাপি গয্হন্তি, ৰেদগূ, পারগূ. তথা ভীরূ, পভঙ্গূ, ৰিরাগূইচ্চাদি চ.

ঊকারন্তপুল্লিঙ্গরাসি নিট্ঠিতো.

ওকারন্তো পন গোসদ্দো এৰ, সো পুব্বে ৰুত্তোযেৰ.

পুল্লিঙ্গরাসি নিট্ঠিতো.

নপুংসকলিঙ্গরাসি

অকারন্তনপুংসক চিত্তাদিরাসি

অথ নপুংসকলিঙ্গং দীপিযতে. তং পন পঞ্চৰিধং অদন্তং, ইদন্তং ঈদন্তং, উদন্তং, ঊদন্তন্তি.

১৯৫. অং নপুংসকে [ক. ১২৫; রূ. ১৯৮; নী. ৩০০].

নপুংসকে অতো সিস্স অং হোতি.

চিত্তং.

১৯৬. যোনং নি [ক. ২১৮; রূ. ১৯৬; নী. ৪৪৫].

নপুংসকে অতো যোনং নি হোতি. ‘যোলোপনীসূ’তি নিম্হি দীঘো.

চিত্তানি.

১৯৭. নীনং ৰা [ক. ১০৭; রূ. ৬৯; নী. ২৭৫; ‘নীন ৰা’ (বহূসু)].

অতো নীনং টা, টে হোন্তি ৰা.

চিত্তা, হে চিত্ত, হে চিত্তা, হে চিত্তানি, হে চিত্তা ৰা, চিত্তং, চিত্তানি, চিত্তে, চিত্তেন. সেসং পুরিসসমং.

এৰং ¶ দকং, উদকং, সুখং, দুক্খং, মুখং, অঙ্গং, লিঙ্গং, সিঙ্গং, অঘং, সচ্চং, নচ্চং, রজ্জং, পজ্জং, অম্বুজং, ধঞ্ঞং, থঞ্ঞং, অরঞ্ঞং, পুঞ্ঞং, কিলিট্ঠং, পিট্ঠং, ভণ্ডং, তুণ্ডং, ঞাণং, তাণং, লেণং, করণং, চরণং, ছত্তং, খেত্তং, নেত্তং, অমতং, সোতং, পীঠং, ৰত্থং, পদং, গদং, আৰুধং, কাননং, ঘানং, ঝানং, দানং, ধনং, ৰনং, পাপং, দুমং, হদযং, চীরং, চীৰরং, কুলং, মূলং, বলং, মঙ্গলং, ভিসং, সীসং, লোহংইচ্চাদযো.

ইতি চিত্তাদিরাসি.

কম্মাদিরাসি

কম্মসদ্দে –

১৯৮. নাস্সেনো [ক. ১০৩; রূ. ৭৯; নী. ২৭১].

কম্মাদীহি নাস্স এনো হোতি ৰা.

কম্মেন, কম্মনা.

‘পুমকম্মথামদ্ধান’ন্তি সুত্তেন না, স্মাসু উত্তং, কম্মুনা, কম্মস্স, কম্মুনো, কম্মস্মা, কম্মম্হা, কম্মনা, কম্মুনা, কম্মস্স, কম্মুনো.

১৯৯. কম্মাদিতো [ক. ১৯৭; রূ. ১২৫; নী. ৪০৪].

কম্মাদীহি স্মিংনো নি হোতি ৰা.

কম্মস্মিং, কম্মম্হি, কম্মনি, কম্মে. সেসং চিত্তসমং.

কম্ম চম্ম ঘম্ম অস্ম ৰেস্ম অদ্ধ মুদ্ধ অহ ব্রহ্ম অত্তআতুমা কম্মাদি. কম্মনি, চম্মনি. ‘‘কিং ছন্দো কিমধিপ্পাযো, একো সম্মসি ঘম্মনী’’তি [জা. ১.১৬.১] চ ‘‘কিং পত্থযং মহাব্রহ্মে, একো সম্মসি ঘম্মনী’’তি [জা. ১.১৩.৮৩] চ ‘‘মা ত্ৰং চন্দে খলি অস্মনী’’তি চ ‘‘তমদ্দস মহাব্রহ্মা, নিসিন্নং সম্হি ৰেস্মনী’’তি চ দিস্সন্তি. অদ্ধনি ¶ , মুদ্ধনি, অহনি, ব্রহ্মনি, অত্তনি, আতুমনি, সব্বমেতং পুব্বেপি ৰুত্তমেৰ চ. তত্থ ‘সম্মসী’তি অচ্ছসি, ‘ঘম্মনী’তি গিম্হকালে আতপে ৰা, ‘অস্মনী’তি পাসাণে, ‘ৰেস্মনী’তি ঘরে.

ইতি কম্মাদিরাসি.

২০০. অং নপুংসকে [ক. ১২৫; রূ. ১৯৮; নী. ৩০০; ‘অংঙং নপুংসকে’ (বহূসু)?].

নপুংসকে সিম্হি ন্তুস্স অং হোতি ৰা. সিলোপো.

গুণৰং কুলং.

পক্খে –

সিম্হি মহাৰুত্তিনা ন্তুস্স অন্তো অ হোতি, ততো সিস্স অং হোতি, গুণৰন্তং কুলং.

‘য্ৰাদো ন্তুস্সা’তি য্ৰাদীসু ন্তুস্সন্তস্স অত্তং, গুণৰন্তানি, গুণৰন্তা, হে গুণৰ, হে গুণৰা, হে গুণৰন্তানি, হে গুণৰন্তা, গুণৰং, গুণৰন্তং, গুণৰন্তানি, গুণৰন্তে, গুণৰন্তেন, গুণৰতা কুলেন. সব্বং পুল্লিঙ্গসমং.

সতিমং কুলং, সতিমন্তং কুলং ইচ্চাদি.

গচ্ছং কুলং, গচ্ছন্তং কুলং, গচ্ছন্তানি কুলানি ইচ্চাদি.

ইতি অকারন্তনপুংসকরাসি.

ইকারন্তনপুংসকরাসি

অট্ঠি তিট্ঠতি, অট্ঠী তিট্ঠন্তি.

২০১. ঝলা ৰা [ক. ২১৭; রূ. ১৯৯; নী. ৪৪৪].

নপুংসকে ঝ, লতো যোনং নি হোতি ৰা. ‘যোলোপনীসূ’তি দীঘো.

অট্ঠীনি ¶ , হে অট্ঠি, হে অট্ঠী, হে অট্ঠীনি, হে অট্ঠী ৰা, অট্ঠিং, অট্ঠিনং, অট্ঠীনি, অট্ঠী, অট্ঠিনা, অট্ঠীহি, অট্ঠীভি. সেসং মুনিসমং.

সমাসেপি সম্মাদিট্ঠি কুলং, সম্মাদিট্ঠীনি কুলানি ইচ্চাদি, যোনং নো, নে নত্থি.

স্মিংম্হি সম্মাদিট্ঠিস্মিং, সম্মাদিট্ঠিম্হি, সম্মাদিট্ঠিনি, সম্মাদিট্ঠিনে কুলে, অরিযৰুত্তিনে কুলে ইতি ৰত্তব্বং.

এৰং অক্খি, অচ্ছি, সত্থি, দধি, ৰারি ইচ্চাদযো.

ইতি ইকারন্তনপুংসকরাসি.

ঈকারন্তনপুংসকরাসি

ঈকারন্তে ‘একৰচনযোস্ৰঘোন’ন্তি সুত্তেন সিম্হি রস্সো, দণ্ডি কুলং, দণ্ডীনি কুলানি, যোনং লোপে দণ্ডী.

‘গে ৰা’তি রস্সো, হে দণ্ডি, হে দণ্ডী ৰা, হে দণ্ডীনি, হে দণ্ডী, দণ্ডিং, দণ্ডিনং, দণ্ডীনি, দণ্ডী, দণ্ডিনা, দণ্ডীহি, দণ্ডীভি. পুল্লিঙ্গসমং.

সমাসেপি সীঘযাযি চিত্তং, সীঘযাযীনি, সীঘযাযী, হে সীঘযাযি, হে সীঘযাযী ৰা, হে সীঘযাযীনি, হে সীঘযাযী, সীঘযাযিং, সীঘযাযিনং, সীঘযাযীনি ইচ্চাদি.

এৰং সুখকারি দানং, চক্কী, পক্খী, সুখী, সিখী ইচ্চাদযো কুলসম্বন্ধিনো চ ৰেদিতব্বা.

ইতি ঈকারন্তনপুংসকরাসি.

উকারন্তনপুংসকরাসি

আযু ¶ তিট্ঠতি, ‘ঝলা ৰা’তি যোনং নিত্তে লোপে চ দীঘো, আযূনি, আযূ, হে আযু, হে আযূ, হে আযূনি, হে আযূ, আযুং, আযুনং, আযূনি, আযূ. সেসং ভিক্খুসমং.

আযুসদ্দো পুল্লিঙ্গেপি ৰত্ততি, ‘‘পুনরাযু চ মে লদ্ধো [দী. নি. ২.৩৬৯], আযুঞ্চ ৰো কীৰতকো নু সম্ম [জা. ১.১৫.২০৫], আযু নু খীণো মরণঞ্চ সন্তিকে, ন চাযু খীণো মরণঞ্চ দূরে’’তি পাল়িপদানি.

এৰং চক্খু, হিঙ্গু, সিগ্গু, জতু, ৰত্থু, মত্থু, মধু, ধনু, তিপু, দারু, ৰসু, অস্সু ইচ্চাদযো.

২০২. অম্বাদীহি [ক. ২১৭; রূ. ১৯৯; নী. ৪৪৪; ‘অম্বাদীহি’ (বহূসু)].

অম্বু, পংসুইচ্চাদীহি স্মিংনো নি হোতি ৰা.

ফলং পততি অম্বুনি, পুপ্ফং যথা পংসুনি আতপে গতং. সেসং আযুসমং. চিত্রগু, ৰহগু, দিগু ইচ্চাদযোপি উকারন্তপকতিকা এৰাতি.

ইতি উকারন্তনপুংসকরাসি.

ঊকারন্তনপুংসকরাসি

সিম্হি রস্সো, গোত্রভু ঞাণং, গোত্রভূনি, গোত্রভূ, হে গোত্রভু, হে গোত্রভূ, হে গোত্রভূনি, হেগোত্রভূ, গোত্রভুং, গোত্রভুনং, গোত্রভূনি, গোত্রভূ. সেসং পুল্লিঙ্গসমং. এৰং সযম্ভু ঞাণং, অভিভু ঝানং ইচ্চাদি.

ইতি ঊকারন্তনপুংসকরাসি.

নপুংসকলিঙ্গরাসি নিট্ঠিতো.

সব্বাদিরাসি

অথ ¶ সব্বনামানি দীপিযন্তে.

সব্ব, কতর, কতম, উভয, ইতর, অঞ্ঞ, অঞ্ঞতর, অঞ্ঞতম, পুব্ব, পর, অপর, দক্খিণ, উত্তর, অধর, য, ত, ত্য, এত, ইম, অমু, কিং, এক, উভ, দ্ৰি,তি, চতু, তুম্হ, অম্হ ইমানি অট্ঠৰীসতি সব্বনামানি নাম. সব্বেসং লিঙ্গত্থানং সাধারণানি নামানি সব্বনামানি.

তত্থ সব্বসদ্দো সকলত্থো.

কতর, কতমসদ্দা পুচ্ছনত্থা.

উভযসদ্দো দ্ৰিন্নং অৰযৰানং সমুদাযত্থো.

ইতরসদ্দো একতো ৰুত্তস্স পটিযোগীৰচনো.

অঞ্ঞসদ্দো যথাধিগতম্হা অপরৰচনো.

অঞ্ঞতর, অঞ্ঞতমসদ্দা অনিযমত্থা.

পুব্বাদযো সদ্দা দিসা, কালাদিৰৰত্থানৰচনা.

যসদ্দো অনিযমত্থৰচনো.

ত, ত্যসদ্দা পরম্মুখে দূরৰচনা.

এতসদ্দো পরম্মুখে সমীপৰচনো, সম্মুখে দূরৰচনো. অট্ঠকথাযং পন ‘‘এতেতি চক্খুপথং অতিক্কমিত্ৰা দূরগতে সন্ধাযাহা’’তি [জা. অট্ঠ ৪.১৫.১০৪] ৰুত্তং, তস্মা তসদ্দত্থেপি ৰত্ততি.

ইমসদ্দো সম্মুখে সমীপৰচনো.

অমুসদ্দো দূরৰচনো. সমীপ, দূরতা চ পরিকপ্পবুদ্ধিৰসেনাপি হোতি.

কিংসদ্দো পুচ্ছনত্থো.

একসদ্দো সঙ্খ্যত্থো অঞ্ঞত্থো চ.

উভসদ্দো ¶ দ্ৰিসদ্দপরিযাযো.

তত্থ ত্যসদ্দোপি বহুলং দিস্সতি. খিড্ডা পণিহিতা ত্যাসু, রতি ত্যাসু পতিট্ঠিতা, বীজানি ত্যাসু রুহন্তি [জা. ২.২১.১২০], কথং নু ৰিস্সসে ত্যম্হি [জা. ১.১৬.২৮৮], অথ ৰিস্সসতে ত্যম্হিইচ্চাদি [জা. ২.২২.১৪৭৪].

‘ইত্থিযমত্ৰা’তি আপচ্চযো, ঘসঞ্ঞো, সিলোপো, সব্বা ইত্থী, সব্বা, সব্বাযো, হে সব্বে, হে সব্বা, হে সব্বাযো, সব্বং, সব্বা, সব্বাযো, সব্বায, সব্বাহি, সব্বাভি, সব্বায.

২০৩. ঘপাসস্স স্সা ৰা [ক. ১৭৯, ৬২; রূ. ২০৪, ২০৬; নী. ৩৬৫, ২০৯].

ঘ, পসঞ্ঞেহি সব্বনামেহি সস্স স্সা হোতি ৰা.

২০৪. ঘোস্সংস্সাস্সাযংতিংসু [ক. ৬৬; রূ. ২০৫; নী. ২১৩].

স্সমাদীসু ঘো রস্সো হোতি.

সব্বস্সা.

২০৫. সংসানং [ক. ১৬৮; রূ. ২০৩; নী. ৩৫৩, ৩৬৮].

সব্বাদীহি নংৰচনস্স সং, সানং হোন্তি.

সব্বাসং, সব্বাসানং, সব্বায, সব্বাহি, সব্বাভি, সব্বায, সব্বস্সা, সব্বাসং, সব্বাসানং, সব্বায, সব্বাযং.

২০৬. স্মিংনো স্সং [ক. ১৭৯, ৬২; রূ. ২০৪, ২০৬; নী. ৩৬৫, ২০৯].

সব্বাদীহি স্মিংনো স্সং হোতি ৰা.

সব্বস্সং, সব্বাসু.

সদ্দনীতিযং ¶ না, স্মা, স্মিংনম্পি স্সাদেসো ৰুত্তো [নী. ৩৬৬]. ‘‘তস্সা কুমারিকায সদ্ধিং [পারা. ৪৪৩], কস্সাহং কেন হাযামী’’তি [পারা. ২৯০] পাল়ি. ইধ পন সুত্তৰিভত্তেন সাধিযতি. সব্বস্সা কতং, সব্বস্সা অপেতি, সব্বস্সা ঠিতং.

সব্বো পুরিসো.

২০৭. যোনমেট [ক. ১৬৪; রূ. ২০০; নী. ৩৪৭].

অকারন্তেহি সব্বাদীহি যোনং এট হোতি.

সব্বে পুরিসা.

অতোত্ৰেৰ? সব্বা ইত্থিযো, অমূ পুরিসা.

হে সব্ব, হে সব্বা, হে সব্বে, সব্বং, সব্বে, সব্বেন.

২০৮. সব্বাদীনং নংম্হি চ [ক. ১০২; রূ. ২০২; নী. ২৭০].

নংম্হি চ সু, হিসু চ সব্বাদীনং অস্স এ হোতি.

সব্বেহি, সব্বেভি, সব্বস্স, সব্বেসং, সব্বেসানং, সব্বস্মা, সব্বম্হা, সব্বেহি, সব্বেভি, সব্বস্স, সব্বেসং, সব্বেসানং, সব্বস্মিং, সব্বম্হি, সব্বেসু.

চূল়নিরুত্তিযং পন স্মা, স্মিংনং আ, এত্তং ৰুত্তং, সব্বা অপেতি, সব্বে পতিট্ঠিতন্তি. ‘‘সব্বা চ সৰতি, সব্বথা সৰতী’’তি চ ‘‘ত্যাহং মন্তে পরত্থদ্ধো’’তি [জা. ২.২২.৮৩৫] চ পাল়ী. তত্থ ‘ত্যাহ’ন্তি তে+অহং, তস্মিং মন্তেতি অত্থো.

সব্বনামেহি চতুত্থিযা আযাদেসোপি দিস্সতি, ‘‘যায নো অনুকম্পায, অম্হে পব্বাজযী মুনি. সো নো অত্থো ¶ অনুপ্পত্তো’’তি [থেরগা. ১৭৬] চ ‘‘যাযেৰ খো পনত্থায আগচ্ছেয্যাথ, তমেৰ অত্থং সাধুকং মনসি করেয্যাথা’’তি চ [দী. নি. ১.২৬৩] ‘‘নেৰ ময্হং অযং নাগো, অলং দুক্খায কাযচী’’তি [জা. ২.২২.৮৭০] চ পাল়ী.

সব্বং চিত্তং.

২০৯. সব্বাদীহি.

সব্বাদীহি নিস্স টা ন হোতি.

সব্বানি, সব্বং, সব্বানি. সেসং পুল্লিঙ্গসমং.

বহুলাধিকারা ক্ৰচি নিস্স টা, টেপি হোন্তি. পাল়িযং পন নিস্স টা, টেপি দিস্সন্তি- ‘‘যা পুব্বে বোধিসত্তানং, পল্লঙ্কৰরমাভুজে. নিমিত্তানি পদিস্সন্তি, তানি অজ্জ পদিস্সরে [বু. ৰং. ২.৮২]. কিং মাণৰস্স রতনানি অত্থি, যে তং জিনন্তো হরে অক্খধুত্তো’’তি [জা. ২.২২.১৩৯০]. এৰং কতর, কতমসদ্দাপি ঞেয্যা.

উভযসদ্দে ইত্থি, পুমেসু উভযা, উভযোতি পঠমেকৰচনরূপং অপ্পসিদ্ধং. মহাৰুত্তিনা যোনং টো ৰা হোতি, উভযো ইত্থিযো, উভযং ইত্থিং, উভযো ইত্থিযো, উভযায, উভযাহি, উভযাভি. সেসং সব্বসমং.

উভযো পুরিসা, উভযে পুরিসা, উভযং, উভযো, উভযে, উভযেন, উভযেহি, উভযেভি, উভযস্স, উভযেসং, উভযেসানং. সব্বসমং.

উভযং কুলং তিট্ঠতি, উভযানি, উভযং, উভযানি. সব্বসমং. ‘‘একরত্তেন উভযো, তুৰঞ্চ ধনুসেখ চ [জা. ১.১৬.২৩৯], তোদেয্য, কপ্পা উভযো, ইধেকরত্তিং উভযো ৰসেম, উভযে দেৰমনুস্সা, উভযে ৰসামসে’’তি পাল়ি.

২১০. স্সংস্সাস্সাযেসিতরেকঞ্ঞেতিমানমি [ক. ৬৩; রূ. ২১৭; নী. ২১০; ‘স্সংস্সাস্সাযেস্ৰিতরেকঞ্ঞেভিমানমি’ (বহূসু)].

স্সমাদীসু ¶ ইতরা, একা, অঞ্ঞা, এতা, ইমাসদ্দানং ই হোতি.

ইতরিস্সা কতং, ইতরিস্সা দেতি, ইতরিস্সা অপেতি, ইতরিস্সা ধনং, ইতরিস্সা, ইতরিস্সং ঠিতং. সেসং সব্বসমং.

অঞ্ঞা, অঞ্ঞা, অঞ্ঞাযো, অঞ্ঞং, অঞ্ঞা, অঞ্ঞাযো, অঞ্ঞায, অঞ্ঞিস্সা, অঞ্ঞাহি, অঞ্ঞাভি, অঞ্ঞায, অঞ্ঞিস্সা, অঞ্ঞাসং, অঞ্ঞাসানং, অঞ্ঞিস্সা, অঞ্ঞাহি, অঞ্ঞাভি, অঞ্ঞায, অঞ্ঞিস্সা, অঞ্ঞাসং, অঞ্ঞাসানং, অঞ্ঞায, অঞ্ঞিস্সা, অঞ্ঞাযং, অঞ্ঞিস্সং, অঞ্ঞাসু. সেসলিঙ্গেসু সব্বসমং.

‘‘অঞ্ঞতরিস্সা ইত্থিযা পটিবদ্ধচিত্তো হোতী’’তি [পারা. ৭৩] পাল়ি, ইধ সুত্তৰিভত্তেন সিজ্ঝতি. সেসং অঞ্ঞতর, অঞ্ঞতমেসু সব্বসমং.

ইতি সব্বাদিঅট্ঠকরাসি.

পুব্বা ইত্থী, পুব্বা, পুব্বাযো, পুব্বং, পুব্বা, পুব্বাযো, পুব্বায, পুব্বস্সা, পুব্বাহি, পুব্বাভি, পুব্বায, পুব্বস্সা, পুব্বাসং, পুব্বাসানং, সত্তমিযং পুব্বায, পুব্বস্সা, পুব্বাযং, পুব্বস্সং, পুব্বাসু.

২১১. পুব্বাদীহি ছহি [ক. ১৬৪; রূ. ২০০; নী. ৩৪৭; চং. ২.১.১৫; পা. ১.১.৩৪].

তেহি ছহি যোনং এট হোতি ৰা.

পুব্বে, পুব্বা, পরে, পরা, অপরে, অপরা, দক্খিণে, দক্খিণা, উত্তরে, উত্তরা, অধরে, অধরা. তত্থ ‘পুব্বে পুব্বা’তি পুরত্থিমদিসাভাগা, তত্রট্ঠকা ৰা অত্থা, পুরাতনা ৰা সত্তা সঙ্খারা চ. ‘‘পুব্ববুদ্ধা, পুব্বদেৰা, পুব্বাচরিযা’’তিআদীসু ‘‘পুব্বে বুদ্ধা ¶ পুব্ববুদ্ধা, পুব্বা বুদ্ধা ৰা পুব্ববুদ্ধা’’তিআদিনা অত্থো ৰেদিতব্বো. এৰং সেসেসু.

পুব্বেসং, পুব্বেসানং, পরেসং, পরেসানং, অপরেসং, অপরেসানং, দক্খিণেসং, দক্খিণেসানং, উত্তরেসং, উত্তরেসানং, অধরেসং, অধরেসানং. সেসং ঞেয্যং.

পুব্বাদীহীতি কিং? সব্বে.

ছহীতি কিং? যে, তে.

২১২. নাঞ্ঞঞ্চ নামপ্পধানা [চং. ২.১.১০; পা. ১.১.২৭-২৯].

সুদ্ধনামভূতা চ সমাসে অপ্পধানভূতা চ সব্বাদিতো পুব্বে ৰুত্তং সব্বাদিকারিযং অঞ্ঞঞ্চ উপরি ৰুচ্চমানং সব্বাদিকারিযং ন হোতি. তত্থ সুদ্ধনামভূতং সব্বাদিনাম ন জানাতীতি অত্থেন বালৰাচকো অঞ্ঞসদ্দো, আজানাতীতি অত্থেন মজ্ঝেমগ্গফলঞাণৰাচকো অঞ্ঞসদ্দো, অরহত্তফলঞাণৰাচকো অঞ্ঞসদ্দো, ‘পুব্বো লোহিত’ন্তিআদীসু পুব্বসদ্দো, অতিরেকপরমাদিৰাচকো পরসদ্দো, দিসাকালাদিতো অঞ্ঞেসু অত্থেসু পৰত্তা দক্খিণু’ত্তরসদ্দা চ সঙ্খ্যত্থৰাচিতো অঞ্ঞো একসদ্দো চাতি সব্বমেতং সুদ্ধনামং নাম, ততো সব্বাদিকারিযং নত্থি.

অপ্পধানে দিট্ঠপুব্ব, গতপুব্ব, পিযপুব্ব ইচ্চাদি. তত্থ পুব্বে দিট্ঠো দিট্ঠপুব্বো বুদ্ধো পুরিসেন. পুব্বে দিট্ঠো যেনাতি ৰা দিট্ঠপুব্বো পুরিসো বুদ্ধং. এৰং গতপুব্বো মগ্গো পুরিসেন, গতপুব্বো ৰা পুরিসো মগ্গং. পিযা ৰুচ্চতি ভরিযা, পিযা পুব্বা পুরাণা এতস্সাতি পিযপুব্বো, পিযো ৰুচ্চতি পতি, পিযো পুব্বো যস্সাতি পিযপুব্বা. এতেহি চ সব্বাদিকারিযং নত্থি.

২১৩. ততিযত্থযোগে [নী. ৩৫০; চং. ২.১.১১; পা. ১.১.৩০].

ততিযত্থেন ¶ পদেন যোগে সব্বাদিকারিযং নত্থি.

মাসেন পুব্বানং মাসপুব্বানং.

২১৪. চত্থসমাসে [ক. ১৬৬; রূ. ২০৯; নী. ৩৪৯; চং. ২.১.১১; পা. ১.১.৩১].

চত্থসমাসো ৰুচ্চতি দ্ৰন্দসমাসো, তস্মিং সব্বাদিকারিযং নত্থি.

দক্খিণা চ উত্তরা চ পুব্বা চ দক্খিণুত্তরপুব্বা, দক্খিণুত্তরপুব্বানং.

চত্থেতি কিং? দক্খিণস্সা চ পুব্বস্সা চ যা অন্তরদিসাতি দক্খিণপুব্বা, দক্খিণা চ সা পুব্বা চাতি দক্খিণপুব্বা, দক্খিণপুব্বস্সা, দক্খিণপুব্বস্সং.

২১৫. ৰেট [ক. ১৬৫; রূ. ২০৮; নী. ৩৪৮; চং. ২.১.১৩; পা. ১.১.৩২].

চত্থসমাসে যোনং এট হোতি ৰা.

কতরকতমে, কতরকতমা, ইতরিতরে, ইতরিতরা, অঞ্ঞমঞ্ঞে, অঞ্ঞমঞ্ঞা, পুব্বপরে, পুব্বপরা, পুব্বাপরে, পুব্বাপরা ইচ্চাদি.

ইমেসু পুব্বাদীসু স্মা, স্মিংনং আ, এত্তং হোতি, পুব্বা, পুব্বে, পরা, পরে, অপরা, অপরে, দক্খিণা, দক্খিণে, উত্তরা, উত্তরে, অধরা, অধরে.

ইতি পুব্বাদিছক্করাসি.

যা ইত্থী, যা, যাযো, যং, যা, যাযো, যায, যস্সা, যাহি, যাভি, যায, যস্সা, যাসং, যাসানং, যায ¶ , যস্সা, যাহি, যাভি, যায, যস্সা, যাসং, যাসানং, যায, যস্সা, যাযং, যস্সং, যাসু.

যো পুরিসো, যে, যং, যে, যেন, যেহি, যেভি, যস্স, যেসং, যেসানং, যস্মা, যম্হা, যেহি, যেভি, যস্স, যেসং, যেসানং, যস্মিং, যম্হি, যেসু.

যং চিত্তং, যানি চিত্তানি, যং, যানি. সেসং পুল্লিঙ্গসমং.

২১৬. ত্যতেতানং তস্স সো [ক. ১৭৪; রূ. ২১১; নী. ৩৬০].

অনপুংসকানংত্য, ত, এতসদ্দানং তব্যঞ্জনস্স সো হোতি সিম্হি. সিলোপো.

সা ইত্থী, তা, তাযো, ইত্থিযো, তং, তা, তাযো, তায.

২১৭. স্সা ৰা তেতিমামূহি [ক. ১৭৯, ৬২; রূ. ২০৪, ২০৬; নী. ৩৬৫-৬, ২০৯].

ঘ, পসঞ্ঞেহি তা, এতা, ইমা, অমুসদ্দেহি নাদীনং পঞ্চন্নং একৰচনানং স্সা হোতি ৰা. রস্সো.

তস্সা কতং, তাহি, তাভি, তায, তস্সা.

২১৮. তাস্সি ৰা [ক. ৬৪; রূ. ২১৬; নী. ২১১].

স্সং, স্সা, স্সাযেসু ঘসঞ্ঞস্স তাসদ্দস্স ই হোতি ৰা.

তিস্সা.

২১৯. তেতিমাতো ¶ সস্স স্সায [ক. ৬৫; রূ. ২১৫; নী. ২১২].

তা, এতা, ইমাহি সস্স স্সাযাদেসো হোতি ৰা.

তস্সায, তিস্সায, তাসং, তাসানং, তায, তস্সা, তস্সায, তিস্সায, তাসং, তাসানং, তায, তাযং, তস্সা, তস্সং, তিস্সা, তিস্সং, তাসু.

সো পুরিসো, তে পুরিসা, তং, তে, তেন, তেহি, তেভি, তস্স, তেসং, তেসানং, তস্মিং, তম্হি, তেসু.

তং চিত্তং, তানি চিত্তানি, তং, তানি. সেসং পুল্লিঙ্গসমং.

২২০. তস্স নো সব্বাসু [ক. ১৭৫; রূ. ২১২; নী. ৩৬১].

য্ৰাদীসু সব্বাসু ৰিভত্তীসু তস্স নো হোতি.

নে পুরিসা, নং, নে, নেহি, নেভি, নেসং, নেসানং, নেহি, নেভি, নেসং, নেসানং, নম্হি, নেসু.

এত্থ চ ‘সব্বাসূ’তি ৰুত্তেপি যা যা ৰিভত্তি লব্ভতি, তং তং ঞত্ৰা যোজেতব্বা.

নং চিত্তং, নেহি, নেভি. পুল্লিঙ্গসমং.

২২১. ট সস্মাস্মিংস্সাযস্সংস্সাসংম্হাম্হিস্ৰিমস্স চ [ক. ১৭৬; রূ. ২১৩; নী. ৩৬২].

সাদীসু তস্স চ ইমস্স চ ট হোতি ৰা.

অস্সা ইত্থিযা কতং, অস্সা, অস্সায দেতি. সংম্হি দীঘো [নী. ৩৬৮] – আসং ইত্থীনং, নাসং কুজ্ঝন্তি পণ্ডিতা [জা. ১.১.৬৫], অস্সা অপেতি, অস্সা, অস্সায ধনং, আসং ধনং, ‘‘অভিক্কমো সানং পঞ্ঞাযতি, নো পটিক্কমো’’তি [সং. নি. ৫.১৯৬] এত্থ ‘সান’ন্তি ৰেদনানং, মহাৰুত্তিনা তস্স সত্তং. অস্সা, অস্সং ঠিতং.

অস্স ¶ পুরিসস্স, আসং পুরিসানং. নেৰাসং কেসা দিস্সন্তি, হত্থপাদা চ জালিনো [জা. ২.২২.২২২১]. অস্মা, অম্হা, অস্স, আসং, অস্মিং, অম্হি.

অস্স চিত্তস্স. পুল্লিঙ্গসমং.

এসা ইত্থী, এতা, এতাযো, এতং, এতা, এতাযো, এতায, এতস্সা, এতিস্সা কতং.

এসো পুরিসো, এতে, এতং, এতে, এতেন.

এতং চিত্তং, এতানি, এতং, এতানি, এতেন. সব্বং তসদ্দসমং ঠপেত্ৰা নত্তং, টত্তঞ্চ.

২২২. সিম্হানপুংসকস্সাযং [ক. ১৭২; রূ. ২১৮; নী. ৩০৬-৭; ‘সিম্হ…’ (বহূসু)].

সিম্হি নপুংসকতো অঞ্ঞস্স ইমস্স অযং হোতি. সিলোপো.

অযং ইত্থী, ইমা, ইমাযো, ইমং, ইমা, ইমাযো, ইমায, ইমস্সা, ইমিস্সা, ইমাহি, ইমাভি, ইমায, ইমস্সা, ইমস্সায, ইমিস্সা, ইমিস্সায, ইমিস্সং, অস্সা, অস্সায, ইমাসং, ইমাসানং, আসং. পঞ্চমীরূপং ততিযাসমং, ছট্ঠীরূপং চতুত্থীসমং. ইমায, ইমাযং, ইমস্সা, ইমস্সায, ইমস্সং, ইমিস্সা, ইমিস্সায, ইমিস্সং, অস্সা, অস্সং, ইমাসু.

অযং পুরিসো, ইমে, ইমং, ইমে.

২২৩. নাম্হিনিমি [ক. ১৭১; রূ. ২১৯; নী. ৩৫৭; ‘নাম্হনিম্হি’ (বহূসু)].

নাম্হি অনিত্থিলিঙ্গে ইমস্স অন, ইমিআদেসা হোন্তি.

ইমিনা, অনেন, ইমেহি, ইমেভি.

২২৪. ইমস্সানিত্থিযং টে [ক. ১৭০; রূ. ২২০; নী. ৩৫৬].

অনিত্থিলিঙ্গে ¶ ইমস্স টে হোতি ৰা সু, নং, হিসু.

এহি, এভি, ইমস্স, অস্স, ইমেসং, ইমেসানং, এসং, এসানং, ইমস্মা, ইমম্হা, অস্মা, অম্হা, ইমেহি, ইমেভি, এহি, এভি, ইমস্স, অস্স, ইমেসং, ইমেসানং, এসং, এসানং, ইমস্মিং, ইমম্হি, অস্মিং, অম্হি, ইমেসু, এসু.

‘‘অনম্হি ভদ্দে সুসোণে, কিন্নু জগ্ঘসি সোভনে’’তি [জা. ১.৫.১৩০ (অনম্হি কালে সুসোণি)] পাল়ি- ‘অনম্হী’তি ইমস্মিং ঠানে, মহাৰুত্তিনা স্মিংম্হি অনাদেসো.

ইমং চিত্তং.

২২৫. ইমস্সিদং ৰা [ক. ১২৯; রূ. ২২২; নী. ৩০৫].

নপুংসকে অং, সিসু ইমস্স তেহি অং, সীহি সহ ইদং হোতি ৰা.

ইদং চিত্তং, ইমানি চিত্তানি, ইমং, ইদং, ইমানি, ইমিনা, অনেন. সব্বং পুল্লিঙ্গসমং.

ইধ মিস্সকরূপং ৰুচ্চতি –

যা, সা ইত্থী, যা, তা ইত্থিযো, যং, তং ইত্থিং, যা, এসা ইত্থী, যা, এতা ইত্থিযো, যং, এতং ইত্থিং, যা, অযং ইত্থী, যা, ইমা ইত্থিযো, যং, ইমং ইত্থিং, যো, সো পুরিসো, যে, তে পুরিসাইচ্চাদযো.

‘‘স খো সো কুমারো ৰুদ্ধিমন্ৰাযা’’তি এত্থ সো সো কুমারোতি, ‘এসে সে একে একত্থে’তি এত্থ এসো সো একো একত্থোতি ৰত্তব্বং. তত্থ পুব্বং পুব্বং অত্থপদং, পরং পরং ব্যঞ্জনমত্তং. ‘‘অযং সো সারথি এতী’’তি [জা. ২.২২.৫১] এত্থ পন দ্ৰেপি ৰিসুং ¶ ৰিসুং অত্থপদানি এৰাতি. যং, তং, ইদন্তি ইমে সদ্দা নিপাতরূপাপি হুত্ৰা পাল়িৰাক্যেসু সঞ্চরন্তি সব্বলিঙ্গৰিভত্তীসু অভিন্নরূপাতি.

২২৬. ইমেতানমেনান্ৰাদেসে দুতিযাযং [নী. ৩৭৫-৬ পিট্ঠে; পা. ২.৪.৩৪].

অন্ৰাদেসো ৰুচ্চতি অনুকথনং, পুনকথনং, অন্ৰাদেসঠানে ইম, এতানং এনাদেসো হোতি দুতিযাৰিভত্তীসু.

ইমং ভিক্খুং ৰিনযং অজ্ঝাপেহি, অথো এনং ভিক্খুং ধম্মং অজ্ঝাপেহি, ইমে ভিক্খূ ৰিনযং অজ্ঝাপেহি, অথো এনে ভিক্খূ ধম্মং অজ্ঝাপেহি, এতং ভিক্খুং ৰিনযং অজ্ঝাপেহিইচ্চাদিনা ৰত্তব্বং. তমেনং ভিক্খৰে নিরযপালা [অ. নি. ৩.৩৬], যত্ৰাধিকরণমেনং ভিক্খুং ইচ্চাদীসুপি [দী. নি. ১.২১৩] অনুকথনমেৰ.

২২৭. মস্সামুস্স [ক. ১৭৩; রূ. ২২৩; নী. ৩৫৯].

সিম্হি অনপুংসকস্স অমুস্স মস্স সো হোতি.

অসু ইত্থী, অমু ৰা, অমূ, অমুযো, অমুং, অমূ, অমুযো, অমুযা, অমুস্সা, অমূহি, অমূভি, অমুযা, অমুস্সা, অমূসং, অমূসানং, অমুযা, অমুস্সা, অমূহি, অমূভি, অমুযা, অমুস্সা, অমূসং, অমূসানং, অমুযা, অমুযং, অমুস্সা, অমুস্সং, অমূসু.

অসু পুরিসো, অমু ৰা.

২২৮. লোপোমুস্মা [ক. ১১৮; রূ. ১৪৬; নী. ২৯৩].

অমুতো যোনং লোপো হোতি. ৰো, নোপৰাদোযং [ক. ১১৯; রূ. ১৫৫; নী. ২৯৪].

অমূ ¶ , অমুং, অমূ, অমুনা, অমূহি, অমূভি.

২২৯. ন নো সস্স.

অমুতো সস্স নো ন হোতি.

অমুস্স.

মহাৰুত্তিনা সম্হি মুস্স দুত্তং, অদুস্স. পাল়িযং ‘‘দুস্স মে খেত্তপালস্স, রত্তিং ভত্তং অপাভত’’ন্তি [জা. ১.৪.৬২] এত্থ গাথাৰসেন অ-কারলোপো. অমূসং, অমূসানং, অমুস্মা, অমুম্হা, অমূহি, অমূভি, অমুস্স, অদুস্স, অমূসং, অমূসানং, অমুস্মিং, অমুম্হি, অমূসু.

২৩০. অমুস্সাদুং [ক. ১৩০; রূ. ২২৫; নী. ৩০৮].

নপুংসকে অং, সিসু অমুস্স তেহি সহ অদুং হোতি ৰা.

অমুং চিত্তং, অদুং চিত্তং, অমূনি, অমুং, অদুং, অমূনি. সেসং পুল্লিঙ্গসমং. ‘সকত্থে’তি সুত্তেন কপচ্চযে কতে সব্বাদিরূপং নত্থি. অমুকা কঞ্ঞা, অমুকা, অমুকাযো. অমুকো পুরিসো, অমুকা পুরিসা. অমুকং চিত্তং, অমুকানি চিত্তানি ইচ্চাদি.

২৩১. কে ৰা.

কে পরে অমুস্স মস্স সো হোতি ৰা.

অসুকা ইত্থী, অসুকা, অসুকাযো. অসুকো পুরিসো, অসুকা পুরিসা. অসুকং কুলং, অসুকানি কুলানি. সব্বং কঞ্ঞা, পুরিস, চিত্তসমং.

‘ইত্থিযমত্ৰা’তি এত্থ ‘ইত্থিযং আ’তি ৰিভত্তসুত্তেন কিংসদ্দতো ইত্থিযং আপচ্চযো.

২৩২. কিংস্স কো [ক. ২২৭-৯; রূ. ২৭০, ২২৬; নী. ৪৫৬-৭-৮? ‘কিস্স কো সব্বাসু’ (বহূসু)].

সব্বেসু ¶ ৰিভত্তিপচ্চযেসু কিংস্স কো হোতি.

কা ইত্থী, কা, কাযো, কং, কা, কাযো, কায, কস্সা ইচ্চাদি সব্বসমং. কো পুরিসো, কে পুরিসা, কং, কে, কেন, কেহি, কেভি, কস্স.

২৩৩. কি সস্মিংসু ৰানিত্থিযং.

অনিত্থিলিঙ্গে স, স্মিংসু কিংসদ্দস্স কি হোতি ৰা.

কিস্স, কেসং, কেসানং, কস্মা, কম্হা, কেহি, কেভি, কস্স, কিস্স, কেসং, কেসানং, কস্মিং, কম্হি, কিস্মিং, কিম্হি, কেসু.

২৩৪. কিমংসিসু নপুংসকে [‘কিমংসিসু সহ নপুংসকে’ (বহূসু)].

নপুংসকে অং, সিসু কিংসদ্দস্স তেহি অংসীহি সহ কিং হোতি.

কিং চিত্তং, কানি, কিং, কং ৰা, কানি. সেসং পুল্লিঙ্গসমং. ইদং পুচ্ছনত্থস্স সুদ্ধকিংসদ্দস্স রূপং.

‘চি’ইতিনিপাতেন যুত্তে পন একচ্চত্থং ৰা অপ্পত্থং ৰা ৰদতি. কাচি ইত্থী, কাচি ইত্থিযো, কিঞ্চি ইত্থিং, কাচি, কাযচি, কাহিচি, কাযচি, কস্সাচি, কাসঞ্চি, কুতোচি, কাহিচি. সত্তমিযং - কাযচি, কত্থচি, কাসুচি.

কোচি পুরিসো, কেচি, কিঞ্চি, কেচি, কেনচি, কেহিচি, কস্সচি, কেসঞ্চি, কিস্মিঞ্চি, কিম্হিচি, কত্থচি, কেসুচি.

কিঞ্চি কুলং, কানিচি কুলানি, কিঞ্চি, কানিচি. সেসং পুল্লিঙ্গসমং.

পুন ¶ যসদ্দেন যুত্তে সকলত্থং ৰদতি. যা কাচি ইত্থী, যাকাচি ইত্থিযো.

যো কোচি পুরিসো, যে কেচি, যং কিঞ্চি, যে কেচি যেন কেনচি, যেহি কেহিচি, যস্স কস্সচি, যেসং কেসঞ্চি যতো কুতোচি, যেহি কেহিচি, যস্স কস্সচি, যেসংকেসঞ্চি, যস্মিং কিস্মিঞ্চি, যম্হি কিম্হিচি, যত্থ কত্থচি, যেসু কেসুচি.

যং কিঞ্চিচিত্তং, যানি কানিচি, যং কিঞ্চি, যানি কানিচি. সেসং পুল্লিঙ্গসমং.

সঙ্খ্যারাসি

একসদ্দো সঙ্খ্যত্থে পৰত্তো একৰচনন্তোৰ, অঞ্ঞত্থে পৰত্তো একবহুৰচনন্তো.

তত্থ সঙ্খ্যত্থে – একা ইত্থী, একং, একায, একিস্সা ইচ্চাদি. পুন্নপুংসকেসু একৰচনেসু পুরিস, চিত্তরূপমেৰ.

অঞ্ঞত্থে – একা ইত্থী, একা ইত্থিযো, একং, একা, একায, একিস্সা, একাহি, একাভি ইচ্চাদি.

একো পুরিসো, একে, একং, একে, একেন, একেহি, একেভি, একস্স, একেসং, একেসানং. পুল্লিঙ্গ সব্বসমং.

একং কুলং, একানি কুলানি, একং কুলং, একানি কুলানি. সেসং পুল্লিঙ্গসমং.

কপচ্চযে পরে সব্বাদিরূপং নত্থি.

‘‘একিকা সযনে সেতু, যা তে অম্বে অৰাহরি [জা. ১.৪.১৭৫]. একাকিনী গহট্ঠাহং, মাতুযা পরিচোদিতা’’তি [অপ. থেরী ২.৩.১৮৮] পাল়ি, এককো পুরিসো, এককং, এককেন. এককং কুলং ইচ্চাদি একৰচনন্তমেৰ, এককানং বহুত্তে ৰত্তব্বে দ্ৰে এককা, দ্ৰে এককে ¶ , দ্ৰীহি এককেহীতি লব্ভতি. ‘‘পঞ্চালো চ ৰিদেহো চ, উভো একা ভৰন্তু তে’’তি পাল়ি. ইমিনা নযেন বহুৰচনম্পি লব্ভতি. ‘একা’তি মিস্সকা.

পটিসেধযুত্তে পন অনেকা ইত্থিযো, অনেকাসং ইত্থীনং. অনেকে পুরিসা, অনেকেসং পুরিসানং. অনেকানি কুলানি, অনেকেসং কুলানং. পাল়িযং পন ‘‘নেকানি ধঞ্ঞগণানি, নেকানি খেত্তগণানি, নেকানং ধঞ্ঞগণানং, নেকানং খেত্তগণান’’ন্তিপি অত্থি.

একচ্চ, একচ্চিয, কতি, বহুসদ্দাপি ইধ ৰত্তব্বা. একচ্চা ইত্থী, একচ্চা, একচ্চাযোতি সব্বং কঞ্ঞাসমং.

একচ্চো পুরিসো.

১৩৫. একচ্চাদীহ্যতো [‘একচ্চাদীহতো’ (বহূসু)].

অকারন্তেহি একচ্চাদীহি যোনং টে হোতি.

একচ্চে পুরিসা, একচ্চে পুরিসে. সেসং পুরিসসমং. আদিসদ্দেন অপ্পেকচ্চ, একতিয, উভাদযো সঙ্গয্হন্তি. অপ্পেকচ্চে পুরিসা, একতিযে পুরিসা, উভে পুরিসা.

একচ্চং চিত্তং.

২৩৬. ন নিস্স টা.

একচ্চাদীহি নিস্স টা ন হোতি.

একচ্চানি চিত্তানি. সেসং চিত্তসমং.

একচ্চিয, একচ্চেয্য, একতিযসদ্দা কঞ্ঞা, পুরিস, চিত্তনযা. ‘‘ইত্থীপি হি একচ্চিযা, সেয্যা পোস জনাধিপ [সং. নি. ১.১২৭]. সচ্চং কিরেৰমাহংসু, নরা একচ্চিযা ইধ. কট্ঠং নিপ্লৰিতং সেয্যো, ন ত্ৰেৰেকচ্চিযো ¶ নরো’’তি [জা. ১.১.৭৩] চ ‘‘পরিৰারিতা মুঞ্চরে একচ্চেয্যা’’তি চ ‘‘ন ৰিস্সসে একতিযেসূ’’তি চ পাল়ী – তত্থ ‘নিপ্লৰিত’ন্তি উদকতো উব্ভতং.

কতিসদ্দো বহুৰচনন্তোৰ.

২৩৭. টিকতিম্হা [রূ. ১২০ পিট্ঠে].

কতিম্হা যোনং টি হোতি.

কতি ইত্থিযো, কতি পুরিসা, কতি পুরিসে, কতি চিত্তানি. কতিহি ইত্থীহি, কতিহি পুরিসেহি, কতিহি চিত্তেহি.

২৩৮. বহুকতীনং [‘বহু কতিন্নং’ (বহূসু)].

নংম্হি বহু, কতীনং অন্তে নুক হোতি.

কতিন্নং ইত্থীনং, কতিন্নং পুরিসানং, কতিন্নং চিত্তানং, অযং নাগমো বহুলং ন হোতি, ‘কতিনং তিথীনং পূরণী কতিমী’তি চ দিস্সতি. ‘‘বহূনং ৰস্সসতানং, বহূনং ৰস্সসহস্সান’’ন্তি চ ‘‘বহূনং কুসলধম্মানং, বহূনং অকুসলধম্মান’’ন্তি চ ‘‘বহূনং ৰত অত্থায, উপ্পজ্জিংসু তথাগতা’’তি [ৰি. ৰ. ৮০৭] চ পাল়ী.

কতিসু ইত্থীসু, কতিসু পুরিসেসু, কতিসু চিত্তেসু.

বহুসদ্দে দ্ৰীসু নংৰচনেসু বহুন্নং, বহুন্নন্তি ৰত্তব্বং. সেসং ধেনু, ভিক্খু, আযুসদিসং.

কপচ্চযে কঞ্ঞা, পুরিস, চিত্তসদিসং, বহূ ইত্থিযো, বহুকা ইত্থিযো. বহূ পুরিসা, বহৰো পুরিসা, বহুকা পুরিসা. বহূনি চিত্তানি, বহুকানি চিত্তানি ইচ্চাদিনা ৰত্তব্বং. বহূনং ¶ সমুদাযাপেক্খনে সতি একৰচনম্পি লব্ভতি, ‘‘বহুজনস্স অত্থায বহুজনস্স হিতায, বহুনো জনস্স অত্থায হিতাযা’’তি [অ. নি. ১.১৪১] পাল়ি.

উভসদ্দো বহুৰচনন্তোৰ, ‘উভগোহি টো’তি যোনং টো, উভো ইত্থিযো, পুরিসা, কুলানি গচ্ছন্তি, উভো ইত্থিযো, পুরিসা, কুলানি পস্সতি.

২৩৯. সুহিসুভস্সো [নী. ৩১৩ (রূ. ১০৯ পিট্ঠে)].

সু, হিসু উভস্স অন্তো ও হোতি.

উভোহি, উভোসু.

২৪০. উভিন্নং [ক. ৮৬; নীরূ. ২২৭; নী. ৩৪১].

উভম্হা নংৰচনস্স ইন্নং হোতি.

উভিন্নং. সব্বত্থ ইত্থি, পুরিস, কুলেহি যোজেতব্বং.

২৪১. যোম্হি দ্ৰিন্নং দুৰেদ্ৰে [ক. ১৩২; রূ. ২২৮; নি. ৩১০].

যোসু সৰিভত্তিস্স দ্ৰিস্স দুৰে, দ্ৰে হোন্তি. ‘দ্ৰিন্ন’ন্তি ৰচনং দ্ৰিস্স বহুৰচনন্তনিযমত্থং.

দ্ৰে ইত্থিযো, দ্ৰে পুরিসা, দ্ৰে পুরিসে, দ্ৰে চিত্তানি, দুৰে ইত্থিযো, দুৰে পুরিসা, দুৰে পুরিসে, দুৰে চিত্তানি, দ্ৰীহি, দ্ৰীভি.

২৪২. নংম্হি নুক দ্ৰাদীনং সত্তরসন্নং [ক. ৬৭; নী. ২২৯; নী. ২১৪].

নংম্হি ¶ পরে দ্ৰাদীনং অট্ঠারসন্তানং সত্তরসন্নং সঙ্খ্যানং অন্তে নুক হোতি. উ-কারো উচ্চারণত্থো. কানুবন্ধং দিস্ৰা অন্তেতি ঞাযতি.

দ্ৰিন্নং.

২৪৩. দুৰিন্নং নংম্হি [ক. ১৩২; রূ. ২২৮; নী. ২৪৪].

নংম্হি সৰিভত্তিস্স দ্ৰিস্স দুৰিন্নং হোতি ৰা.

দুৰিন্নং, দ্ৰীহি, দ্ৰীভি, দ্ৰিন্নং, দুৰিন্নং, দ্ৰীসু. মহাৰুত্তিনা সুম্হি দুৰে হোতি, নাগস্স দুৰেসু দন্তেসু নিম্মিতা [ৰি. ৰ. ৭০৬], চক্কানি পাদেসু দুৰেসু ৰিন্দতি [দী. নি. ৩.২০৫]. এৰঞ্চ সতি দুৰেহি, দুৰেভীতিপি সিদ্ধমেৰ হোতি, অযং দ্ৰিসদ্দো উভসদ্দো ৰিয অলিঙ্গো.

২৪৪. তিস্সো চতস্সো যোম্হি সৰিভত্তীনং [ক. ১৩৩; রূ. ২৩০; নী. ৩১১].

ইত্থিযং যোসু সৰিভত্তীনন্তি, চতুন্নং তিস্সো, চতস্সো হোন্তি.

তিস্সো ইত্থিযো, চতস্সো ইত্থিযো.

মহাৰুত্তিনা হিসু চ তিস্স, চতস্সা হোন্তি, ‘‘তিস্সেহি চতস্সেহি পরিসাহি, চতস্সেহি সহিতো লোকনাযকো’’তি পাল়ী. তীহি, তীভি ইত্থীহি, চতূহি, চতূভি, চতুব্ভি ইত্থীহি.

২৪৫. নংম্হি তিচতুন্নমিত্থিযং তিস্সচতস্সা [দী. নি. ৩.২০৫].

ইত্থিযং নংম্হিতি, চতুন্নং তিস্স, চতস্সা হোন্তি.

তিস্সন্নং ¶ ইত্থীনং, চতস্সন্নং ইত্থীনং, তিণ্ণং ইত্থীনং, চতুন্নং ইত্থীনং, সমণো গোতমো চতুন্নং পরিসানং সক্কতো হোতি, চতুন্নং পরিসানং পিযো হোতি মনাপোতি [দী. নি. ১.৩০৪], তিস্সেহি, চতস্সেহি, তীহি, তীভি, চতূহি, চতূভি, চতুব্ভি, তিস্সন্নং, চতস্সন্নং, তিণ্ণং, চতুন্নং, তীসু, চতূসু.

পাল়িযং ‘‘চতস্সেহী’’তি দিট্ঠত্তা তিস্সেসু, চতস্সেসূতিপি দিট্ঠমেৰ হোতি.

২৪৬. পুমে তযো চত্তারো [ক. ১৩৩; রূ. ২৩০; নী. ৩১১].

পুল্লিঙ্গে যোসু সৰিভত্তীনন্তি, চতুন্নং তযো, চত্তারো হোন্তি.

তযো পুরিসা, তযো পুরিসে, চত্তারো পুরিসা, চত্তারো পুরিসে.

২৪৭. চতুরো চতুস্স [ক. ৭৮, ২০৫, ৩১; রূ. ১৬০; নী. ২৩৪; ‘চতুরো ৰা চতুস্স’ (বহূসু)].

পুমে সৰিভত্তিস্স চতুসদ্দস্স চতুরো হোতি.

চতুরো পুরিসা, চতুরো পুরিসে. কথং চতুরো নিমিত্তে নাদস্সিং, চতুরো ফলমুত্তমেতি? ‘‘লিঙ্গৰিপল্লাসা’’তি ৰুত্তিযং ৰুত্তং, তীহি, তীভি, চতূহি, চতূভি, চতুব্ভি.

২৪৮. ইণ্ণংইণ্ণন্নং তিতো ঝা [ক. ৮৭; রূ. ২৩১; নী. ২৪৩; ‘ণ্ণংণ্ণন্নংতিকো ঝা’ (বহূসু)].

ঝসঞ্ঞম্হা তিম্হা নংৰচনস্স ইণ্ণং, ইণ্ণন্নং হোন্তি.

তিণ্ণং, তিণ্ণন্নং, চতুন্নং, তীহি, তীভি, চতূহি, চতূভি, চতুব্ভি, তিণ্ণং, তিণ্ণন্নং, চতুন্নং, তীসু, চতূসু.

২৪৯. তীণিচত্তারি নপুংসকে [ক. ১৩৩; রূ. ২৩০; নী. ৩১১].

নপুংসকে ¶ যোসু সৰিভত্তীনন্তি, চতুন্নং তীণি, চত্তারি হোন্তি.

তীণি চিত্তানি, চত্তারি চিত্তানি. সেসং পুল্লিঙ্গসমং.

ৰচনসিলিট্ঠত্তে পন সতি ৰিসদিসলিঙ্গৰচনানম্পি পদানং অঞ্ঞমঞ্ঞসংযোগো হোতি, চত্তারো সতিপট্ঠানা [দী. নি. ৩.১৪৫], চত্তারো সম্মপ্পধানা [দী. নি. ৩.১৪৫], তযোমহাভূতা, তযো মহাভূতে [পট্ঠা. ১.১.৫৮], সব্বে মালা উপেন্তি মং [ধু. ৩.৬], সব্বে কঞ্ঞা উপেন্তি মং [ধু. ৩.৬], সব্বে রতনা উপেন্তি মং [ধু. ৩.৬], সব্বে যানা উপেন্তি মং [ধু. ৩.৬], অৰিজ্জায সতি সঙ্খারা হোন্তি, সঙ্খারেসু সতি ৰিঞ্ঞাণং হোতি [সং. নি. ২.৫০] ইচ্চাদি.

গাথাসু ৰিপল্লাসাপি বহুলং দিস্সন্তি, অঞ্ঞে ধম্মানি দেসেন্তি, এৰং ধম্মানি সুত্ৰান, সতঞ্চ ধম্মানি সুকিত্তিতানি সুত্ৰা, অত্থানি চিন্তযিত্ৰান, উত্তমত্থানি তযি লভিম্হা, কিং ত্ৰং অত্থানি জানাসি, ইচ্ছেয্যামি ভন্তে সত্তপুত্তানি, সিৰিপুত্তানি অৰ্হয [জা. ২.২২.২২৩৫], পুত্তদারানি পোসেন্তি, বলীবদ্দানি সোল়স ইচ্চাদি.

ইধ সেসসঙ্খ্যানামানি দীপিযন্তে.

২৫০. ট পঞ্চাদীহি চুদ্দসহি [ক. ১৩৪; রূ. ২৫১; নী. ২৪৭].

পঞ্চাদীহি অট্ঠারসন্তেহি সঙ্খ্যাসদ্দেহি যোনং ট হোতি.

পঞ্চ ইত্থিযো, পঞ্চ পুরিসা, পুরিসে, পঞ্চ চিত্তানি, ছ ইত্থিযো.

ল়াগমে ¶ পন ‘‘ইত্থিভাৰা ন মুচ্চিস্সং, ছল়ানি গতিযো ইমা’’তি পাল়ি.

ছ পুরিসা, ছ পুরিসে, ছ চিত্তানি. এৰং সত্ত, অট্ঠ, নৰ, দস, একাদস…পে… অট্ঠারস.

২৫১. পঞ্চাদীনং চুদ্দসন্নম [ক. ৯০; রূ. ২৫২; নী. ২৪৭].

সু, নং, হিসু পঞ্চাদীনং চুদ্দসন্নং অস্স অত্তমেৰ হোতি, ন এত্তং ৰা দীঘত্তং ৰা হোতি.

পঞ্চহি, পঞ্চন্নং, পঞ্চসু, ছহি, ছন্নং, ছসু, সত্তহি, সত্তন্নং, সত্তসু, অট্ঠহি, অট্ঠন্নং, অট্ঠসু, নৰহি, নৰন্নং, নৰসু, দসহি, দসন্নং, দসসু, একাদসহি, একাদসন্নং, একাদসসু…পে… অট্ঠারসহি, অট্ঠারসন্নং, অট্ঠারসসু.

এতে সব্বে অলিঙ্গা বহুৰচনন্তা এৰ.

‘ইত্থিযমত্ৰা’তি ৰীস, তিংস, চত্তালীস, পঞ্ঞাসেহি আপচ্চযো, মহাৰুত্তিনা সিম্হি রস্সো সিলোপো চ, ‘নিগ্গহীত’ন্তি ৰিকপ্পেন নিগ্গহীতাগমো, ৰিকপ্পেন অংলোপো, নাদীনং একৰচনানং যাদেসো, ৰীস ইত্থিযো, ৰীসং ইত্থিযো, ৰীস পুরিসা, ৰীসং পুরিসা, ৰীস পুরিসে, ৰীসং পুরিসে, ৰীস চিত্তানি, ৰীসং চিত্তানি, ৰীসায ইত্থীহি কম্মং কতং, ৰীসায পুরিসেহি কম্মং কতং, ৰীসায কুলেহি কম্মং কতং, ৰীসায ইত্থীনং, পুরিসানং, কুলানং, সত্তমিযং ৰীসায ইত্থীসু, পুরিসেসু, কুলেসু.

তিপচ্চযে ৰীসতি, তিংসতিসদ্দাপি সট্ঠি, সত্ততি, অসীতি, নৰুতিসদ্দা ৰিয নিচ্চং ইত্থি লিঙ্গেকৰচনন্তা এৰ, সি, অংলোপো, ৰীসতি ইত্থিযো, ৰীসতি পুরিসা, পুরিসে, ৰীসতি কুলানি, ৰীসতিযা ইত্থীহি, ইত্থীনং, পুরিসেহি, পুরিসানং, কুলেহি, কুলানং ¶ , ৰীসতিযা, ৰীসতিযং ইত্থি, পুরিস, কুলেসু, এৰং যাৰনৰুতিযা ৰেদিতব্বা. ৰগ্গভেদে পন সতি বহুৰচনম্পি ৰিকপ্পেন দিস্সতি, দ্ৰে ৰীসতিযো ইচ্চাদি.

সতং, সহস্সং, দসসহস্সং, সতসহস্সং, দসসতসহস্সন্তি ইমে নপুংসকলিঙ্গাযেৰ. সঙ্খ্যেয্যপধানে পন ইত্থিলিঙ্গে ৰত্তব্বে সহস্সী, দসসহস্সী, সতসহস্সীতি ইত্থিলিঙ্গং ভৰতি. ৰগ্গভেদে পন দ্ৰে সতানি, তীণি সতানি, দ্ৰে সহস্সানি, তীণি সহস্সানি ইচ্চাদীনি ভৰন্তি. কোটি, পকোটি, কোটিপকোটি, অক্খোভিণীসদ্দা ইত্থিলিঙ্গা এৰ. সেসং সব্বং যাৰঅসঙ্খ্যেয্যা নপুংসকমেৰ.

সহস্সং কাসি নাম, দসসহস্সং নহুতং নাম, সতসহস্সং লক্খং নাম.

দুৰিধং পধানং সঙ্খ্যাপধানং, সঙ্খ্যেয্যপধানঞ্চ. পুরিসানং ৰীসতি হোতি, পুরিসানং নৰুতি হোতি, পুরিসানং সতং হোতি, সহস্সং হোতি ইচ্চাদি সঙ্খ্যাপধানং নাম, ৰীসতি পুরিসা, নৰুতি পুরিসা, সতং পুরিসা, সহস্সং পুরিসা ইচ্চাদি সঙ্খ্যেয্যপধানং নাম.

এত্থপি ৰীসতিসদ্দো ইত্থিলিঙ্গেকৰচনো এৰ. সত, সহস্সসদ্দা নপুংসকেকৰচনা এৰ. সঙ্খ্যাসদ্দানং পন পদৰিধানঞ্চ গুণৰিধানঞ্চ সমাসকণ্ডে আগমিস্সতি.

সঙ্খ্যারাসি নিট্ঠিতো.

২৫২. সিম্হাহং [ক. ১৪৯; রূ. ২৩২; নী. ৩১৯; ‘সিম্হহং’ (বহূসু)].

সিম্হি সৰিভত্তিস্স অম্হস্স অহং হোতি.

অহং গচ্ছামি.

২৫৩. মযমস্মাম্হস্স [ক. ১২১; রূ. ২৩৩; নী. ২৯৬].

যোসু ¶ সৰিভত্তিস্স অম্হস্স কমেন মযং, অস্মা হোন্তি ৰা.

মযং গচ্ছাম, অস্মে পস্সামি.

পক্খে –

‘যোনমেট’ ইতি ৰিধি, অম্হে গচ্ছাম.

২৫৪. তুম্হস্স তুৰংত্ৰংম্হি চ [ক. ১৪৬; রূ. ২৩৬; নী. ৩২৪; ‘তুম্হস্স তুৰংত্ৰমম্হিচ’ (বহূসু)].

সিম্হি চ অংম্হি চ সৰিভত্তিস্স তুম্হস্স তুৰং, ত্ৰং হোন্তি.

তুৰং বুদ্ধো তুৰং সত্থা, তুৰং মারাভিভূ মুনি [থেরগা. ৮৩৯], ত্ৰং নো সত্থা অনুত্তরো, তুম্হে গচ্ছথ, তুৰং পস্সতি, ত্ৰং পস্সতি.

২৫৫. অংম্হি তং মং তৰং মমং [ক. ১৪৩-৪; রূ. ২৩৪-৫; নী. ৩২২].

অংম্হি সৰিভত্তীনং তুম্হা’ম্হানং তং, মং, তৰং, মমং হোন্তি.

মং পস্সতি, মমং পস্সতি, তং পস্সতি, তৰং পস্সতি, অম্হে পস্সতি, তুম্হে পস্সতি.

২৫৬. দুতিযাযোম্হি ৰা [ক. ১৬২; রূ. ২৩৭; নী. ৩৪৫; ‘দুতিযে যোম্হি ৰা’ (বহূসু)].

দুতিযাযোম্হি সৰিভত্তীনং তুম্হা’ম্হানং ঙানুবন্ধা অং, আকংআদেসা হোন্তি ৰা.

অম্হং, অম্হাকং পস্সতি, তুম্হং, তুম্হাকং পস্সতি.

২৫৭. নাস্মাসু তযামযা [ক. ১৪৫, ২৭০; রূ. ২৩৮, ১২০; নী. ৩২৩, ৫৪২].

না ¶ , স্মাসু সৰিভত্তীনং তুম্হা’ম্হানং তযা, মযা হোন্তি.

মযা কতং, তযা কতং, মযা অপেতি, তযা অপেতি.

২৫৮. তযাতযীনং ত্ৰ ৰা তস্স [ক. ২১০; রূ. ২৩৯; নী. ৪৩৫].

তযা, তযীনং তস্স ত্ৰ হোতি ৰা.

ত্ৰযা কতং, ত্ৰযা অপেতি, অম্হেহি কতং, তুম্হেহি কতং.

২৫৯. তৰমমতুয্হংময্হং সে [ক. ১৪১-২; রূ. ২৪১-২; নী. ৩২১].

সম্হি সৰিভত্তীনং তুম্হা’ম্হানং তৰাদযো হোন্তি.

মম দীযতে, ময্হং দীযতে, তৰ দীযতে, তুয্হং দীযতে.

২৬০. নংসেস্ৰস্মাকংমমং [নী. ৪৩৮].

নং, সেসু সৰিভত্তিস্স অম্হস্স কমেন অস্মাকং, মমং হোন্তি.

মমং দীযতে, অস্মাকং দীযতে.

২৬১. ঙংঙাকং নংম্হি [ক. ১৬১; রূ. ২৪৪; নী. ৩৪৪].

নংম্হি সৰিভত্তীনং তুম্হা’ম্হানং ঙানুবন্ধা অং, আকংআদেসা হোন্তি ৰা.

অম্হং দীযতে, অম্হাকং দীযতে, তুম্হং দীযতে, তুম্হাকং দীযতে. পঞ্চমিযং মযা, তযা, ত্ৰযা, পুব্বে ৰুত্তাৰ.

২৬২. স্মাম্হি ত্ৰম্হা.

স্মাম্হি ¶ সৰিভত্তিস্স তুম্হস্স ত্ৰম্হা হোতি.

ত্ৰম্হা অপেতি, অম্হেহি, তুম্হেহি, মম, মমং, ময্হং, তৰ, তুয্হং, অম্হং, অম্হাকং, অস্মাকং, তুম্হং, তুম্হাকং.

২৬৩. স্মিংম্হি তুম্হম্হানং তযিমযি [ক. ১৩৯; রূ. ২৪৫; নী. ৩১৮].

স্মিংম্হি সৰিভত্তীনং তুম্হা’ম্হানং তযি, মযি হোন্তি.

তযি, মযি, ত্ৰত্তে ত্ৰযি, অম্হেসু, তুম্হেসু.

২৬৪. সুম্হাম্হস্সাস্মা [নী. ৪৩৮].

সুম্হি অম্হস্স অস্মা হোতি.

অস্মাসু.

মহাৰুত্তিনা যো, হিসু অম্হস্স অস্মাদেসো, যোনং এত্তঞ্চ, অস্মা গচ্ছাম, অস্মে পস্সতি, অস্মাহি কতং, অস্মাকং দীযতে, অস্মাহি অপেতি, অস্মাকং ধনং, অস্মাসু ঠিতং. ‘‘অস্মাভিজপ্পন্তি জনা অনেকা’’তি [জা. ১.৭.৬৮] পাল়ি-অস্মে অভিজপ্পন্তি পত্থেন্তীতি অত্থো. ‘‘অস্মাভি পরিচিণ্ণোসি, মেত্তচিত্তা হি নাযকা’’তি [অপ. থেরী ২.২.২৩০] থেরীপাল়ি – ‘পরিচিণ্ণো’তি পরিচারিতো.

চতুত্থিযং অস্মাকং অধিপন্নানং, খমস্সু রাজকুঞ্জর [জা. ২.২১.১৮১] – ‘অধিপন্নান’ন্তি দুক্খাভিভূতানং.

ছট্ঠিযং এসস্মাকং কুলে ধম্মো [জা. ১.৪.১৪৭], এসা অস্মাকং ধম্মতা.

সত্তমিযং যং কিচ্চং পরমে মিত্তে, কতমস্মাসু তং তযা. পত্তা নিস্সংসযং ত্ৰম্হা, ভত্তিরস্মাসু যা তৰ [জা. ২.২১.৮১] – তত্থ ‘যং ¶ কিচ্চ’ন্তি যং কম্মং কত্তব্বং, তৰ অস্মাসু যা ভত্তি, তায মযং ত্ৰম্হা নিস্সংসযতং পত্তাতি অত্থো.

২৬৫. অপাদাদো পদতেকৰাক্যে [চং. ৬.৩.১৫; পা. ৮.১.১৭, ১৮].

অপাদাদিম্হি পৰত্তানং পদতো পরেসং একৰাক্যে ঠিতানং তুম্হা’ম্হানং ৰিধি হোতি. অধিকারসুত্তমিদং.

২৬৬. যোনংহিস্ৰপঞ্চম্যা ৰোনো [ক. ১৪৭, ১৫১; রূ. ২৪৬, ২৫০; নী. ৩২৫, ৩২৯, ৩৩০].

পঞ্চমীৰজ্জিতেসু যো, নং, হিসু পরেসু অপাদাদোপৰত্তানং পদতো পরেসং একৰাক্যে ঠিতানং সৰিভত্তীনং তুম্হা’ম্হসদ্দানং ৰো, নো হোন্তি ৰা.

গচ্ছথ ৰো, গচ্ছথ তুম্হে, গচ্ছাম নো, গচ্ছাম অম্হে, পস্সেয্য ৰো, পস্সেয্য তুম্হে, পস্সেয্য নো, পস্সেয্য অম্হে, দীযতে ৰো, দীযতে তুম্হাকং, দীযতে নো, দীযতে অম্হাকং, ধনং ৰো, ধনং তুম্হাকং, ধনং নো, ধনং অম্হাকং, কতং ৰো পুঞ্ঞং, কতং তুম্হেহি পুঞ্ঞং, কতং নো পুঞ্ঞং, কতং অম্হেহি পুঞ্ঞং.

অপঞ্চম্যাতি কিং? নিস্সটং তুম্হেহি, নিস্সটং অম্হেহি.

অপাদাদোত্ৰেৰ? বলঞ্চ ভিক্খূনমনুপ্পদিন্নং, তুম্হেহি পুঞ্ঞং পসুতং অনপ্পকং [খু. পা. ৭.১২].

পদতোত্ৰেৰ? তুম্হে গচ্ছথ, অম্হে গচ্ছাম.

একৰাক্যেত্ৰেৰ? দেৰদত্তো তিট্ঠতি গামে, তুম্হে তিট্ঠথ নগরে.

সৰিভত্তীনন্ত্ৰেৰ? অরহতি ধম্মো তুম্হাদিসানং.

২৬৭. তেমে নাসে [ক. ১৪৮, ১৫০; রূ. ২৪৭, ২৪৯; নী. ৩২৬, ৩২৮; চং. ৬.৩.১৭; পা. ৮.১.২১].

না ¶ , সেসু তাদিসানং সৰিভত্তীনং তুম্হ, অম্হসদ্দানং তে, মে হোন্তি ৰা.

কতং তে পুঞ্ঞং, কতং তযা পুঞ্ঞং, কতং মে পুঞ্ঞং, কতং মযা পুঞ্ঞং, দিন্নং তে ৰত্থং, দিন্নং তুয্হং ৰত্থং, দিন্নং মে ৰত্থং, দিন্নং ময্হং ৰত্থং, ইদং তে রট্ঠং, ইদং তৰ রট্ঠং, ইদং মে রট্ঠং, ইদং মম রট্ঠং.

২৬৮. অন্ৰাদেসে [চং. ৬.৩.২০; পা. ৮.১.২৩].

অন্ৰাদেসট্ঠানে তুম্হা’ম্হসদ্দানং ৰো, নো, তে, মেআদেসা নিচ্চং ভৰন্তি পুনব্বিধানা.

গামো তুম্হাকং পরিগ্গহো, অথো নগরম্পি ৰো পরিগ্গহো. এৰং সেসেসু.

২৬৯. সপুব্বা পঠমন্তা ৰা [‘সংপুব্বা পঠমন্থা ৰা’ (মূলপাঠে) চং. ৬.১.২১; পা. ৮.১.২৬].

সংৰিজ্জতি পুব্বপদং অস্সাতি সপুব্বং, সপুব্বা পঠমন্তপদম্হা পরেসং সৰিভত্তীনং তুম্হা’ম্হসদ্দানং ৰো, নো, তে, মেআদেসা ৰিকপ্পেন হোন্তি অন্ৰাদেসট্ঠানেপি.

গামে পটো তুম্হাকং, অথো নগরে কম্বলং ৰো, অথো নগরে কম্বলং তুম্হাকং ৰা. এৰং সেসেসু.

২৭০. ন চৰাহাহেৰযোগে [চং. ৬.৩.২২; পা. ৮.১.২৪].

চ, ৰা, হ, অহ, এৰসদ্দেহি যোগে তুম্হা’ম্হানং ৰো, নো, তে, মেআদেসা ন হোন্তি.

গামো ¶ তৰ চ মম চ পরিগ্গহো, গামো তৰ ৰা মম ৰা পরিগ্গহো ইচ্চাদি.

চাদিযোগেতি কিং? গামো চ তে পরিগ্গহো, নগরঞ্চ মে পরিগ্গহো.

২৭১. দস্সনত্থেনালোচনে [চং. ৬.৩.২৩; পা. ৮.১.২৫].

আলোচনং ওলোকনং, আলোচনতো অঞ্ঞস্মিং দস্সনত্থে পযুজ্জমানে তুম্হা’ম্হানং ৰো, নো, তে, মেআদেসা ন হোন্তি.

গামো তুম্হে উদ্দিস্স আগতো, গামো অম্হে উদ্দিস্স আগতো – ‘গামো’তি গামৰাসী মহাজনো.

অনালোচনেতি কিং? গামো ৰো পস্সতি, গামো নো পস্সতি.

২৭২. আমন্তনপুব্বং অসন্তংৰ [‘আমন্তণং পুব্বমসন্তংৰ’ (বহূসু) চং. ৬.৩.২৪; পা. ৮.১.৭২].

আমন্তনভূতং পুব্বপদং অসন্তং ৰিয হোতি, পদতোতি সঙ্খ্যং ন গচ্ছতি.

দেৰদত্ত! তৰ পরিগ্গহো.

২৭৩. ন সামঞ্ঞৰচনমেকত্থে [চং. ৬.৩.২৫; পা. ৮.১.৭৩].

তুল্যাধিকরণভূতে পদে সতি পুব্বং সামঞ্ঞৰচনভূতং আমন্তনপদং অসন্তং ৰিয ন হোতি, পদতোতি সঙ্খ্যং গচ্ছতি.

মাণৰক জটিল! তে পরিগ্গহো.

সামঞ্ঞৰচনন্তি ¶ কিং? মাণৰক দেৰদত্ত! তুয্হং পরিগ্গহো.

একত্থেতি কিং? দেৰদত্ত! যঞ্ঞদত্ত! তুম্হাকং পরিগ্গহো.

২৭৪. বহূসু ৰা [চং. ৬.৩.২৬; পা. ৮.১.৭৪].

বহূসু জনেসু পৰত্তমানং সামঞ্ঞৰচনভূতম্পি আমন্তনপদং একত্থে পদে সতি অসন্তং ৰিয ন হোতি ৰা.

ব্রাহ্মণা গুণৰন্তো ৰো পরিগ্গহো, ব্রাহ্মণা গুণৰন্তো তুম্হাকং পরিগ্গহো.

সব্বাদিরাসি নিট্ঠিতো.

ৰিভত্তিপচ্চযন্তরাসি

অথ ৰিভত্তিপচ্চযা দীপিযন্তে.

ৰিভত্যত্থানং জোতকত্তা ৰিভত্তিট্ঠানে ঠিতা পচ্চযা ৰিভত্তিপচ্চযা.

২৭৫. তো পঞ্চম্যা [ক. ২৪৮; রূ. ২৬০; নী. ৪৯৩; চং. ৪.৩.৬; পা. ৫.৪.৪৫].

পঞ্চমিযা ৰিভত্তিযা অত্থে তোপচ্চযো হোতি.

তোম্হি দীঘানং রস্সো, কঞ্ঞতো, রত্তিতো, ইত্থিতো, ধেনুতো. মহাৰুত্তিনা তোম্হি মাতাপিতূনং ইত্তং, মাতিতো, পিতিতো, ৰধুতো, পুরিসতো, মুনিতো, দণ্ডিতো ¶ , ভিক্খুতো, সত্থারতো, কত্তুতো, গোত্রভুতো, সব্বতো, যতো, ততো.

ইম, এত, কিংসদ্দেহি তো.

২৭৬. ইতোতেত্তোকুতো [‘ইতো তেত্তো কতো’ (বহূসু) চং. ৪.৩.৮; পা. ৭.২.১০৪].

ইতো, অতো, এত্তো, কুতোতি এতে সদ্দা তোপচ্চযন্তা নিপচ্চন্তে.

ইমম্হা ইমেহীতি ৰা ইতো, এতস্মা এতেহীতি ৰা অতো, এত্তো, কস্মা কেহীতি ৰা কুতো. এত্থ চ ইমম্হা, ইমেহীতিআদিকং অত্থৰাক্যং দিস্ৰা পকতিলিঙ্গং ৰেদিতব্বং. ইমিনা সুত্তেন ইমস্স ইত্তং, এতস্স অত্তং এত্তঞ্চ, ‘সরম্হা দ্ৰে’তি এসরম্হা দ্ৰিত্তং, কিংসদ্দস্স কুত্তং. এস নযো সেসেসু নিপাতনেসু.

২৭৭. অভ্যাদীহি [পা. ৫.৩.৯].

অভিআদীহি তো হোতি, পুনব্বিধানা’পঞ্চম্যত্থেপীতিপি সিদ্ধং.

অভিতো গামং গামস্স অভিমুখেতি অত্থো.

পরিতো গামং গামস্স সমন্ততোতি অত্থো.

উভতো গামং গামস্স উভোসু পস্সেসূতি অত্থো.

পচ্ছতো, হেট্ঠতো, উপরিতো.

২৭৮. আদ্যাদীহি [চং. ৪.৩.৯; পা. ৫.৪.৪৪].

আদিপভুতীহি অপঞ্চম্যত্থেপি তো হোতি.

আদিতো ¶ , মজ্ঝতো, পুরতো, পস্সতো, পিট্ঠিতো, ওরতো, পরতো, পচ্ছতো, পুরত্থিমতো, দক্খিণতোইচ্চাদীসু বহুলং সত্তম্যত্থে দিস্সতি.

তথা ততিযত্থেপি রূপং অত্ততো সমনুপস্সতি [সং. নি. ৩.৪৪], পঞ্চক্খন্ধে অনিচ্চতো ৰিপস্সতি ইচ্চাদি.

যতোনিদানং [সু. নি. ২৭৫], যত্ৰাধিকরণং, যতোদকং তদাদিত্তমিচ্চাদীসু [জা. ১.৯.৫৮] পঠমত্থে ইচ্ছন্তি.

ইতো এহি, ইতো বলাকে আগচ্ছ, চণ্ডো মে ৰাযসো সখা ইচ্চাদীসু দুতিযত্থে.

পরতোঘোসো, নাদিট্ঠা পরতো দোসং ইচ্চাদীসু ছট্ঠ্যত্থে.

২৭৯. সব্বাদিতো সত্তম্যা ত্রত্থা [ক. ২৪৯; রূ. ২৬৬; নী. ৪৯৪; চং. ৪.১.১০; পা. ৫.৩.১০].

সব্বাদিনামকেহি সব্বনামেহি সত্তমিযা অত্থে ত্র, ত্থা হোন্তি.

সব্বস্মিং সব্বেসূতি ৰা সব্বত্র, সব্বত্থ, সব্বস্সং সব্বাসু ৰাতিপি. এৰং কতরত্র, কতরত্থ, অঞ্ঞত্র, অঞ্ঞত্থ ইচ্চাদি.

যত্র, যত্থ, তত্র, তত্থ.

২৮০. কত্থেত্থকুত্রাত্রক্ৰেহিধ [ক. ২৫১; রূ. ২৬৯; নী. ৪৯৯; চং. ৪.১.১১; পা. ৫.৩.১১, ১২].

কত্থ, এত্থ, কুত্র, অত্র, ত্ৰ, ইহ, ইধাতি এতে সদ্দাত্থ, ত্র,ৰ হ, ধাপচ্চযন্তা সত্তম্যত্থে সিজ্ঝন্তি.

কস্মিং কেসূতি ৰা কত্থ, কুত্র, ক্ৰ. ‘কুৰ’ন্তিপি সিজ্ঝতি, ‘‘কুৰং সত্তস্স কারকো, কুৰং সত্তো সমুপ্পন্নো [সং. নি. ১.১৭১], কুৰং অসিস্সং, কুৰং খাদিস্স’’ন্তি পাল়ি.

এতস্মিং ¶ এতেসূতি ৰা এত্থ, অত্র, ইমস্মিং ইমেসূতি ৰা ইহ, ইধ.

২৮১. ধি সব্বা ৰা [ক. ২৫০; রূ. ২৬৮; নী. ৫০২].

সব্বসদ্দম্হা সত্তম্যত্থে ধি হোতি ৰা.

নমো তে বুদ্ধ ৰীর’ত্থু, ৰিপ্পমুত্তোসি সব্বধি [সং. নি. ১.৯০].

২৮২. যা হিং [ক. ২৫৫; রূ. ২৭৫; নী. ৫০৪].

যম্হা সত্তম্যত্থে হিং হোতি.

যহিং.

২৮৩. তা হঞ্চ [ক. ২৫৩; রূ. ২৭৩; নী. ৫০১].

তম্হা সত্তম্যত্থে হিং হোতি হঞ্চ.

তহিং, তহং. দুতিযত্থেপি দিস্সতি ‘‘তহং তহং ওলোকেন্তো গচ্ছতী’’তি.

২৮৪. কিংস্স কুকঞ্চ [ক. ২৫১, ২২৭-৮-৯; রূ. ২২৬, ২৭০-১-২; নী. ৫০০, ৪৫৬-৭, ৪৬০].

কিংম্হা সত্তম্যত্থে হিং, তং হোতি. কিংস্স কুত্তং কত্তঞ্চ হোতি.

কুহিং গচ্ছতি, কুহং গচ্ছতি. কহং একপুত্তক কহং একপুত্তক [সং. নি. ২.৬৩]. কুহিঞ্চি, কুহিঞ্চনন্তি দ্ৰে চি, চন-নিপাতন্তা সিজ্ঝন্তি.

ইতি সামঞ্ঞসত্তম্যন্তরাসি.

কালসত্তম্যন্তং ¶ ৰুচ্চতে.

২৮৫. সব্বেকঞ্ঞযতেহি কালেদা [ক. ২৫৭; রূ. ২৭৬; নী. ৫০৫].

সব্ব, এক, অঞ্ঞ, য, তসদ্দেহি কালে দা হোতি.

সব্বস্মিং কালে সব্বদা, একস্মিং কালে একদা, অঞ্ঞস্মিং কালে অঞ্ঞদা, যস্মিং কালে যদা, তস্মিং কালে তদা.

২৮৬. কদাকুদাসদাঅধুনেদানি [ক. ২৫৭-৮-৯; রূ. ২৭৬-৮-৯; নী. ৫০৫-৬-৭].

এতেপি সত্তম্যত্থে কালে দা, ধুনা, দানিপচ্চযন্তা সিজ্ঝন্তি.

কিংস্মিং কালে কদা, কুদা, সব্বস্মিং কালে সদা, ইমস্মিং কালে অধুনা, ইদানি.

২৮৭. অজ্জসজ্জুপরজ্জেতরহিকরহা [ক. ২৫৯; রূ. ২৭৯, ৪২৩; নী. ৫০৭].

এতেপি কালে জ্জ, জ্জু, রহি, রহ পচ্চযন্তা সিজ্ঝন্তি.

ইমস্মিং কালে অজ্জ, ইমস্মিং দিৰসেত্যত্থো.

সমানে কালে সজ্জু-‘সমানে’তি ৰিজ্জমানে. ন হি পাপং কতং কম্মং, সজ্জু খীরংৰ মুচ্চতি [ধ. প. ৭১], সজ্জুকং পাহেসি – তত্থ ‘সজ্জূ’তি তস্মিং দিৰসে.

অপরস্মিং কালে অপরজ্জু, পুনদিৰসেতি অত্থো.

ইমস্মিং কালে এতরহি, কিংস্মিং কালে করহ. কুতোচি, ক্ৰচি, কত্থচি, কুহিঞ্চি, কদাচি, করহচিসদ্দা পন চি-নিপাতন্তা হোন্তি, তথা যতো কুতোচি, যত্থ কত্থচি, যদা কদাচীতি. কিঞ্চনং, কুহিঞ্চনং, কুদাচনন্তি চন-নিপাতন্তাতি.

ৰিভত্তিপচ্চযন্তরাসি নিট্ঠিতো.

অব্যযপদানি

উপসগ্গপদরাসি

অথ ¶ অব্যযপদানি দীপিযন্তে.

ছব্বিধানি অব্যযপদানি উপসগ্গপদং, নিপাতপদং, ৰিভত্তিপচ্চযন্তপদং, অব্যযীভাৰসমাসপদং, অব্যযতদ্ধিতপদং, ত্ৰাদিপচ্চযন্তপদন্তি. ব্যযো ৰুচ্চতি ৰিকারো, নানালিঙ্গৰিভত্তিৰচনেহি নত্থি রূপব্যযো এতেসন্তি অব্যযা, অসঙ্খ্যাতি চ ৰুচ্চন্তি.

তত্থ ৰিভত্তিপচ্চযন্তপদতো পুন ৰিভত্তুপ্পত্তি নাম নত্থি. অব্যযীভাৰসমাসম্হি ৰিভত্তীনং ৰিধি সমাসকণ্ডে ৰক্খতি, তস্মা তানি দ্ৰে ঠপেত্ৰা সেসানি চত্তারি ইধ ৰুচ্চন্তে.

২৮৮. অসঙ্খ্যেহি সব্বাসং [চং. ২.১.৩৮; পা. ২.৪.৮২].

অসঙ্খ্যেহি পদেহি যথারহং সব্বাসং ৰিভত্তীনং লোপো হোতি, কেহিচি পদেহি পঠমায লোপো, কেহিচি পদেহি দুতিযায লোপো…পে… কেহিচি সত্তমিযা, কেহিচি দ্ৰিন্নং, কেহিচি তিস্সন্নং…পে… কেহিচি সত্তন্নন্তি ৰুত্তং হোতি.

তত্থ আৰুসো, ভো, ভন্তেইচ্চাদীহি আমন্তননিপাতেহি অত্থি, নত্থি, সক্কা, লব্ভা, সিযা, সিযুং, সাধু, তুণ্হীইচ্চাদীহি চ পঠমায লোপো.

চিরং, চিরস্সং, নিচ্চং, সততং, অভিণ্হং, অভিক্খণং, মুহুত্তং ইচ্চাদীহি অচ্চন্তসংযোগলক্খণে দুতিযায.

যথা, তথা, সব্বথা, সব্বসো, মুসা, মিচ্ছাইচ্চাদীহি ততিযায.

কাতুং, কাতৰে ইচ্চাদীহি চতুত্থিযা.

সমন্তা ¶ , সমন্ততো, দীঘসো, ওরসোইচ্চাদীহি পঞ্চমিযা.

পুরে, পুরা, পচ্ছা, উদ্ধং, উপরি, অধো, হেট্ঠা, অন্তরা, অন্তো, রহো, আৰি, হিয্যো, সুৰেইচ্চাদীহি সত্তমিযা লোপো.

নমোসদ্দম্হা ‘‘নমো তে বুদ্ধ ৰীর’ত্থূ’’তি এত্থ পঠমায. ‘‘নমো করোহি নাগস্সা’’তি এত্থ দুতিযায.

সযংসদ্দম্হা ‘‘কুসূলো সযমেৰ ভিজ্জতে’’তি এত্থ পঠমায. ‘‘সযং কতং সুখদুক্খ’’ন্তি [দী. নি. ৩.১৯১, ১৯৩] এত্থ ততিযায, ইচ্চাদিনা যথারহৰিভাগো ৰেদিতব্বো.

ইতি, এৰংসদ্দেহি পযোগানুরূপং সত্তন্নং ৰিভত্তীনং লোপং ইচ্ছন্তি.

উপসগ্গেহিপি অত্থানুরূপং তংতংৰিভত্তিলোপো.

রূপসিদ্ধিযং পন ‘‘তেহি পঠমেকৰচনমেৰ ভৰতী’’তি [রূ. ১৩১ (পিট্ঠে)] ৰুত্তং.

তত্থ ‘‘অভিক্কমতি, অভিধম্মো’’ ইচ্চাদীসু ধাতুলিঙ্গানি উপেচ্চ তেসং অত্থং নানাপ্পকারং করোন্তা সজ্জন্তি সঙ্খরোন্তীতি উপসগ্গা. তে হি ক্ৰচি তদত্থং ৰিসিট্ঠং করোন্তি ‘‘জানাতি, পজানাতি, সঞ্জানাতি, অৰজানাতি, অভিজানাতি, পরিজানাতি, সুসীলো, দুস্সীলো, সুৰণ্ণো, দুব্বণ্ণো, সুরাজা, দুরাজা’’ ইচ্চাদীসু.

ক্ৰচি তদত্থং নানাপ্পকারং কত্ৰা ৰিভজ্জন্তি ‘‘গচ্ছতি, আগচ্ছতি, উগ্গচ্ছতি, ওগচ্ছতি’’ইচ্চাদীসু.

ক্ৰচি তদত্থং বাধেত্ৰা তপ্পটিৰিরুদ্ধে ৰা তদঞ্ঞস্মিং ৰা অত্থে তানি যোজেন্তি.

তত্থ ¶ তপ্পটিৰিরুদ্ধে –

জেতি, পরাজেতি, ওমুঞ্চতি, পটিমুঞ্চতি, গিলতি, উগ্গিলতি, নিম্মুজ্জতি, উম্মুজ্জতি, ধম্মো, উদ্ধম্মোইচ্চাদি.

তদঞ্ঞস্মিং –

দদাতি, আদদাতি, দধাতি, ৰিধেতি, পিধেতি, নিধেতি, সন্ধিযতি, সদ্দহতি, অভিধাতিইচ্চাদি.

ক্ৰচি পন পদসোভণং কত্ৰা তদত্থং অনুৰত্তন্তি, ‘‘ৰিজ্জতি, সংৰিজ্জতি, লভতি, পটিলভতি’’ ইচ্চাদি.

তে ৰীসতি হোন্তি-প, আ, উ, ও, দু, নি, ৰি, সু, সং, অতি, অধি, অনু, অপ, অপি, অভি, অৰ, উপ, পতি, পরা, পরি.

কচ্চাযনে পন ওসদ্দো অৰকারিযমত্তন্তি তং অগ্গহেত্ৰা নীসদ্দং গণ্হাতি, ইধ পন নীসদ্দো নিস্স দীঘমত্তন্তি তং অগ্গহেত্ৰা ওসদ্দং গণ্হাতি.

তত্থ প –

পকারত্থে-পঞ্ঞা. আদিকম্মে-ৰিপ্পকতং. পধানে-পণীতং. ইস্সরিযে-পভূ. অন্তোভাৰে-পক্খিত্তং, পস্সাসো. ৰিযোগে-পৰাসো. তপ্পরে-পাচরিযো. তদনুবন্ধে-পুত্তো, পপুত্তো, নত্তা, পনত্তা. ভুসত্থে-পৰড্ঢো. সম্ভৰে-পভৰতি. তিত্তিযং-পহুতং অন্নং. অনাৰিলে-পসন্নো. পত্থনাযং-পণিধানং.

আ –

অভিমুখে-আগচ্ছতি. উদ্ধংকম্মে-আরোহতি. মরিযাদাযং-আপব্বতা খেত্তং. অভিৰিধিম্হি-আব্রহ্মলোকা কিত্তিসদ্দো. পত্তিযং-আপন্নো. ইচ্ছাযং-আকঙ্খা. পরিস্সজনে-আলিঙ্গতি. আদিকম্মে-আরম্ভো. গহণে-আদীযতি. নিৰাসে-আৰসথো. সমীপে-আসন্নং. অৰ্হানে-আমন্তনং.

উ –

উগ্গতে-উগ্গচ্ছতি ¶ . উদ্ধংকম্মে-উট্ঠাতি. পধানে-উত্তরো. ৰিযোগে-উপৰাসো. সম্ভৰে-উব্ভূতো. অত্থলাভে-রূপস্স উপ্পাদো. সত্তিযং-উস্সহতি গন্তুং. সরূপখ্যানে-উদ্দেসো.

ও –

অন্তোভাৰে-ওচরকো, ওরোধো. অধোকম্মে-ওক্খিত্তো. নিগ্গহে-ওৰাদো. অন্তরে, দেসে চ-ওকাসো. পাতুভাৰে-ওপপাতিকো. যেসু অত্থেসু অৰসদ্দো ৰত্ততি, তেসুপি ওসদ্দো ৰত্ততি.

দু –

অসোভণে-দুগ্গন্ধো. অভাৰে-দুব্ভিক্খং, দুস্সীলো, দুপ্পঞ্ঞো. কুচ্ছিতে-দুক্কটং. অসমিদ্ধিযং-দুসস্সং. কিচ্ছে-দুক্করং. ৰিরূপে-দুব্বণ্ণো, দুম্মুখো.

নি –

নিস্সেসে-নিরুত্তি. নিগ্গতে-নিয্যানং. নীহরণে-নিদ্ধারণং. অন্তোপৰেসনে-নিখাতো. অভাৰে-নিম্মক্খিকং. নিসেধে-নিৰারেতি. নিক্খন্তে-নিব্বানং. পাতুভাৰে-নিম্মিতং. অৰধারণে-ৰিনিচ্ছযো. ৰিভজ্জনে-নিদ্দেসো. উপমাযং-নিদস্সনং. উপধারণে-নিসামেতি. অৰসানে-নিট্ঠিতং. ছেকে-নিপুণো.

ৰি –

ৰিসেসে-ৰিপস্সতি. ৰিৰিধে-ৰিচিত্তং. ৰিরুদ্ধে-ৰিৰাদো. ৰিগতে-ৰিমলো. ৰিযোগে-ৰিপ্পযুত্তো. ৰিরূপে-ৰিপ্পটিসারো.

সু –

সোভণে-সুগ্গতি ¶ . সুন্দরে-সুমনো. সম্মাসদ্দত্থে-সুগতো. সমিদ্ধিযং-সুভিক্খং. সুখত্থে-সুকরো.

সং –

সমোধানে-সন্ধি. সম্মা, সমত্থেসু-সমাধি, সম্পযুত্তো. সমন্তভাৰে-সংকিণ্ণো. সঙ্গতে-সমাগমো, সঙ্খেপে-সমাসো. ভুসত্থে-সারত্তো. সহত্থে-সংৰাসো, সম্ভোগো. অপ্পত্থে-সমগ্ঘো. পভৰে-সম্ভৰো. অভিমুখে-সম্মুখং. সঙ্গহে-সঙ্গয্হতি. পিদহনে-সংৰুতো. পুনপ্পুনকম্মে-সন্ধাৰতি, সংসরতি. সমিদ্ধিযং-সম্পন্নো.

অতি –

অতিক্কমে-অতিরোচতি, অচ্চযো, অতীতো. অতিক্কন্তে-অচ্চন্তং. অতিস্সযে-অতিকুসলো. ভুসত্থে-অতিকোধো. অন্তোকম্মে-মঞ্চং ৰা পীঠং ৰা অতিহরিত্ৰা ঠপেতি.

অধি –

অধিকে-অধিসীলং. ইস্সরে-অধিপতি, অধিব্রহ্মদত্তে পঞ্চালা. উপরিভাৰে-অধিসেতি. পরিভৰনে-অধিভূতো. অজ্ঝাযনে-অজ্ঝেতি, ব্যাকরণমধীতে. অধিট্ঠানে-নৰকম্মং অধিট্ঠাতি, চীৰরং অধিট্ঠাতি, ইদ্ধিৰিকুব্বনং অধিট্ঠাতি. নিচ্ছযে-অধিমুচ্চতি. পাপুণনে-ভোগক্খন্ধং অধিগচ্ছতি, অমতং অধিগচ্ছতি.

অনু –

অনুগতে-অন্ৰেতি. অনুপ্পচ্ছিন্নে-অনুসযো. পচ্ছাসদ্দত্থে-অনুরথং. পুনপ্পুনভাৰে-অন্ৰড্ঢমাসং, অনুসংৰচ্ছরং. যোগ্যভাৰে-অনুরূপং ¶ .কনিট্ঠভাৰে-অনুবুদ্ধো, অনুথেরো. সেসং কারককণ্ডে ৰক্খতি.

অপ –

অপগতে-অপেতি, অপাযো. গরহে-অপগব্ভো, অপসদ্দো. ৰজ্জনে-অপসালায আযন্তি. পূজাযং-ৰুড্ঢ-মপচাযন্তি. পদুস্সনে-অপরজ্ঝতি.

অপি –

সম্ভাৰনে-অপিপব্বতং ভিন্দেয্য, মেরুম্পি ৰিনিৰিজ্ঝেয্য. অপেক্খাযং-অযম্পি ধম্মো অনিযতো. সমুচ্চযে-ইতিপি অরহং, ছৰিম্পি দহতি, চম্মম্পি দহতি, মংসম্পি দহতি. গরহাযং-অপি অম্হাকং পণ্ডিতক. পুচ্ছাযং-অপি ভন্তে ভিক্খং লভিত্থ, অপি নু তুম্হে সোতুকামাত্থ.

অভি –

অভিমুখে-অভিক্কন্তো. ৰিসিট্ঠে-অভিঞ্ঞা. অধিকে-অভিধম্মো. উদ্ধংকম্মে-অভিরূহতি. কুলে-অভিজাতো. সারুপ্পে-অভিরূপো. ৰন্দনে-অভিৰাদেতি. সেসং কারককণ্ডে ৰক্খতি.

অৰ –

অধোভাগে-অৰক্খিত্তো. ৰিযোগে-অৰকোকিলং ৰনং. পরিভৰে-অৰজানাতি. জাননে-অৰগচ্ছতি. সুদ্ধিযং-ৰোদাযতি, ৰোদানং. নিচ্ছযে-অৰধারণং. দেসে-অৰকাসো. থেয্যে-অৰহারো.

উপ –

উপগমে-উপনিসীদতি. সমীপে-উপচারো, উপনগরং. উপপত্তিযং-সগ্গং লোকং উপপজ্জতি. সদিসে-উপমাণং, উপমেয্যং. অধিকে-উপখারিযং দোণো. উপরিভাৰে – উপসম্পন্নো ¶ , উপচযো. অনসনে-উপৰাসো. দোসক্খানে-পরং উপৰদতি. সঞ্ঞাযং-উপধা, উপসগ্গো. পুব্বকম্মে-উপক্কমো, উপহারো. পূজাযং-বুদ্ধং উপট্ঠাতি. গয্হাকারে-পচ্চুপট্ঠানং. ভুসত্থে-উপাদানং, উপাযাসো, উপনিস্সযো.

পতি –

পতিগতে-পচ্চক্খং. পটিলোমে-পটিসোতং. পটিযোগিম্হি-পটিপুগ্গলো. নিসেধে-পটিসেধো. নিৰত্তে-পটিক্কমতি. সদিসে-পটিরূপকং. পটিকম্মে-রোগস্স পটিকারো. আদানে-পটিগ্গণ্হাতি. পটিবোধে-পটিৰেধো. পটিচ্চে-পচ্চযো. সেসং কারককণ্ডে ৰক্খতি.

পরা –

পরিহানিযং-পরাভৰো. পরাজযে-পরাজিতো. গতিযং-পরাযনং. ৰিক্কমে-পরক্কমো. আমসনে-পরামসনং.

পরি –

সমন্তভাৰে-পরিৰুতো, পরিক্খিত্তো, পরিক্খারো. পরিচ্ছেদে-পরিঞ্ঞেয্যং, পরিজানাতি. ৰজ্জনে-পরিহরতি. পরিহারো. আলিঙ্গনে-পরিস্সজতি. নিৰাসনে-ৰত্থং পরিদহতি. পূজাযং-পারিচরিযা. ভোজনে-পরিৰিসতি. অভিভৰে-পরিভৰতি. দোসক্খানে-পরিভাসতি. সেসং কারককণ্ডে ৰক্খতি.

নীসদ্দো পন নীহরণ, নীৰরণাদীসু ৰত্ততি, নীহরণং, নীৰরণংইচ্চাদি.

ইতি উপসগ্গপদরাসি.

নিপাতপদরাসি

নিচ্চং ¶ একরূপেন ৰাক্যপথে পতন্তীতি নিপাতা. পদানং আদি, মজ্ঝা’ৰসানেসু নিপতন্তীতি নিপাতাতিপি ৰদন্তি.

অসত্ৰৰাচকা চাদিসদ্দা নিপাতা নাম. তে পন ৰিভত্তিযুত্তা, অযুত্তা চাতি দুৰিধা হোন্তি. তত্থ ৰিভত্তিযুত্তা পুব্বে দস্সিতা এৰ. চাদযো অযুত্তা নাম. তে পন অনেকসতপ্পভেদা হোন্তি. নিঘণ্টুসত্থেসু গহেতব্বাতি.

অব্যযতদ্ধিতপচ্চযপদরাসি

অব্যযতদ্ধিতপচ্চযন্তা নাম যথা, তথা, একধা, একজ্ঝং, সব্বসো, কথং, ইত্থং ইচ্চাদযো. তেহি ততিযালোপো.

ত্ৰাদিপচ্চযন্তপদরাসি

ত্ৰাদিপচ্চযন্তা নাম কত্ৰা, কত্ৰান, কাতুন, কাতুং, কাতৰে, দক্খিতাযে, হেতুযে, আদায, উপাদায, ৰিচেয্য, ৰিনেয্য, সক্কচ্চ, আহচ্চ, উপসম্পজ্জ, সমেচ্চ, অৰেচ্চ, পটিচ্চ, অতিচ্চ, আগম্ম, আরব্ভইচ্চাদযো. তেসু ত্ৰা, ত্ৰানন্তেহি পঠমালোপো. তুং, তৰে, তাযে, তুযেপচ্চযন্তেহি চতুত্থীলোপোতি.

ধাতৰো পচ্চযা চেৰ, উপসগ্গনিপাতকা.

অনেকত্থাৰ তে পটি-সম্ভিদা ঞাণগোচরা.

ইতি নিরুত্তিদীপনিযা নাম মোগ্গল্লানদীপনিযা

নামকণ্ডো নিট্ঠিতো.

৩. কারককণ্ড

পঠমাৰিভত্তিরাসি

অথ নামৰিভত্তীনং অত্থভেদা ৰুচ্চন্তে.

কস্মিং অত্থে পঠমা?

২৮৯. পঠমত্থমত্তে [চং. ২.১.৯৩; পা. ২.৩.৪৬].

নামস্স অভিধেয্যমত্তে পঠমাৰিভত্তি হোতি.

রুক্খো, মালা, ধনং.

এত্থ চ মত্তসদ্দেন কত্তু, কম্মাদিকে ৰিভত্যত্থে নিৰত্তেতি. তস্মা অত্থমত্তন্তি লিঙ্গত্থোযেৰ ৰুচ্চতি.

তত্থ অনুচ্চারিতে সতি সুণন্তস্স অৰিদিতো অত্থো লীনত্থো নাম. তং লীনমত্থং গমেতি বোধেতীতি লিঙ্গং, উচ্চারিতপদং.

তং পন পকতিলিঙ্গং, নিপ্ফন্নলিঙ্গন্তি দুৰিধং. তত্থ ৰিভত্তিরহিতং পকতিলিঙ্গং ইধাধিপ্পেতং লিঙ্গ, ৰিভত্তীনং ৰিসুং ৰিসুং ৰিভাগট্ঠানত্তা.

লীনং অঙ্গন্তি লিঙ্গং. তত্থ ‘লীন’ন্তি অপাকটং. ‘অঙ্গ’ন্তি অৰযৰো. লিঙ্গং, নামং, পাটিপদিকন্তি অত্থতো একং.

লিঙ্গস্স অত্থো পরমত্থো, পঞ্ঞত্তিঅত্থোতি দুৰিধো. তথা ৰিসেসনত্থো, ৰিসেস্যত্থোতি.

তত্থ ৰিসেসনত্থো নাম সকত্থো, তস্স তস্স সদ্দস্স পটিনিযতো পাটিপুগ্গলিকত্থোতি ৰুত্তং হোতি. সোযেৰ তস্মিং তস্মিং অত্থে আদিম্হি সদ্দুপ্পত্তিযা চিরকালঞ্চ সদ্দপৰত্তিযা নিবদ্ধকারণত্তা নিমিত্তত্থোতি চ ৰুচ্চতি ¶ . সো সুতি, জাতি, গুণ, দব্ব, ক্রিযা, নাম, সম্বন্ধৰসেন সত্তৰিধো হোতি.

ৰিসেস্যত্থো নাম সামঞ্ঞত্থো, বহুনিমিত্তানং সাধারণত্থোতি ৰুত্তং হোতি, সোযেৰ তংতংনিমিত্তযোগা নেমিত্তকত্থোতি চ ৰুচ্চতি, সো জাতি, গুণ, দব্ব, ক্রিযা, নামৰসেন পঞ্চৰিধো. গো, সুক্কো, দণ্ডী, পাচকো, তিস্সোতি.

তত্থ গোসদ্দো যদা জাতিমত্তং ৰদতি গো জাতীতি, তদা সুতি ৰিসেসনং. যদা দব্বং ৰদতি গো গচ্ছতীতি, তদা সুতি চ জাতি চ ৰিসেসনং.

সুক্কসদ্দো যদা গুণমত্তং ৰদতি সুক্কো গুণোতি, তদা সুতি ৰিসেসনং. যদা গুণৰিসেসং ৰদতি গোস্স সুক্কোতি, তদা সুতি চ গুণজাতি চ ৰিসেসনং. যদা গুণৰন্তং দব্বং ৰদতি সুক্কো গোতি, তদা সুতি চ গুণজাতি চ গুণৰিসেসো চ সম্বন্ধো চ ৰিসেসনং.

দণ্ডীসদ্দো যদা জাতিমত্তং ৰদতি দণ্ডী জাতীতি, তদা সুতি চ দব্বঞ্চ ৰিসেসনং. যদা দব্বৰন্তং দব্বং ৰদতি দণ্ডী পুরিসোতি, তদা সুতি চ দব্বঞ্চ জাতি চ সম্বন্ধো চ ৰিসেসনং.

পাচকসদ্দো যদা জাতিমত্তং ৰদতি পাচকো জাতীতি, তদা সুতি চ ক্রিযা চ ৰিসেসনং. যদা ক্রিযানিপ্ফাদকং দব্বং ৰদতি পাচকো পুরিসোতি, তদা সুতি চ ক্রিযা চ জাতি চ ক্রিযাকারকসম্বন্ধো চ ৰিসেসনং.

তিস্সসদ্দো যদা নামমত্তং ৰদতি তিস্সো নামন্তি, তদা সুতি ৰিসেসনং. যদা নামৰন্তং দব্বং ৰদতি, তিস্সো ভিক্খূতি, তদা সুতি চ নামজাতি চ সম্বন্ধো চ ৰিসেসনং.

সব্বত্থ যং যং ৰদতীতি ৰুত্তং, তং তং ৰিসেস্যন্তি চ দব্বন্তি চ ৰেদিতব্বং. এত্থ চ সুতি নাম সদ্দসভাৰা এৰ হোতি, সদ্দপক্খিকা ¶ এৰ. সব্বো সদ্দো পঠমং সত্তাভিধাযকোতি চ ঞাসে ৰুত্তং. তস্মা সব্বত্থ সুতিট্ঠানে সত্তা এৰ যুত্তা ৰত্তুন্তি. সত্তাতি চ তস্স তস্স অত্থস্স ৰোহারমত্তেনপি লোকে ৰিজ্জমানতা ৰুচ্চতি, তং তং সদ্দং সুণন্তস্স চ ঞাণং তংতদত্থস্স অত্থিতামত্তং সব্বপঠমং জানাতি, ততো পরং জাতিসদ্দে জাতিং জানাতি. গুণসদ্দে গুণন্তি এৰমাদি সব্বং ৰত্তব্বং. লিঙ্গ, সঙ্খ্যা, পরিমাণানিপি ৰিসেসনত্থে সঙ্গয্হন্তি.

তত্থ লিঙ্গং নাম যে ইত্থি, পুরিসানং লিঙ্গ, নিমিত্ত, কুত্তা’কপ্পা নাম অভিধম্মে ৰুত্তা, যে চ নপুংসকানং লিঙ্গ, নিমিত্ত, কুত্তা’কপ্পা নাম অৰুত্তসিদ্ধা, যে চ সদ্দেসু চেৰ অত্থেসু চ ৰিসদা’ৰিসদাকার, মজ্ঝিমাকারা সন্দিস্সন্তি, সব্বমেতং লিঙ্গং নাম.

এৰং ৰিসেসন, ৰিসেস্যৰসেন দুৰিধো অত্থো পুব্বে ৰুত্তস্স সদ্দলিঙ্গস্স অত্থো নাম, সো সলিঙ্গো, সসঙ্খ্যো, সপরিমাণো চাতি তিৰিধো হোতি.

তত্থ সলিঙ্গো যথা? সঞ্ঞা, ফস্সো, চিত্তং. কঞ্ঞা, পুরিসো, কুলং. মালা, রুক্খো, ধনন্তি.

সসঙ্খ্যো যথা? একো, দ্ৰে, তযো, বহূ ইচ্চাদি.

সপরিমাণো যথা? ৰিদত্থি, হত্থো, দোণো, আল়্হকং ইচ্চাদি.

অপি চ সুদ্ধো, সংসট্ঠোতি দুৰিধো লিঙ্গত্থো. তত্থ কম্মাদিসংসগ্গরহিতো সুদ্ধো নাম. সো সলিঙ্গো, সসঙ্খ্যো, সপরিমাণো, উপসগ্গত্থো, নিপাতত্থো, পাটি-পদিকত্থোতি ছব্বিধো. অত্থি, সক্কা, লব্ভাইচ্চাদি ইধ পাটিপদিকং নাম. তুন, ত্ৰান, ত্ৰা, তৰে, তুং, খত্তুংপচ্চযন্তাপি নিপাতেসু গয্হন্তি.

সংসট্ঠো ¶ ৰুত্তসংসট্ঠো, অৰুত্তসংসট্ঠোতি দুৰিধো. তত্থ ৰুত্তসংসট্ঠো চতুব্বিধো সমাসেন ৰুত্তসংসট্ঠো, তদ্ধিতেন, আখ্যাতেন, কিতেনাতি. তত্থ সমাসেন ৰুত্তো ছকারকসম্বন্ধৰসেন সত্তৰিধো, ভাৰেন সদ্ধিং অট্ঠৰিধো ৰা, তথা তদ্ধিতেন ৰুত্তো. আখ্যাতেন ৰুত্তো কত্তু, কম্ম, ভাৰৰসেন তিৰিধো. কিতেন ৰুত্তো ছকারক, ভাৰৰসেন সত্তৰিধো. সব্বো সুদ্ধো চেৰ ৰুত্তসংসট্ঠো চ পঠমায ৰিসযো.

অৰুত্তসংসট্ঠোপি কত্তুসংসট্ঠো, কম্মসংসট্ঠোতিআদিনা অনেকৰিধো. সো দুতিযাদীনং এৰ ৰিসযোতি. এত্থ চ ৰিভত্তিযা ৰিনা কেৰলো সদ্দো পযোগং নারহতীতি কত্ৰা পযোগারহত্থমেৰ ছব্বিধে সুদ্ধে চতুব্বিধে চ ৰুত্তসংসট্ঠে পঠমা পযুজ্জতি, ন অত্থজোতনত্থং.

কেনচি ৰাচকেন অৰুত্তানি পন কম্মাদীনি ৰিভত্তীহি ৰিনা ৰিদিতানি ন হোন্তীতিকত্ৰা অত্থজোতনত্থম্পি কম্মাদীসু দুতিযাদযো পযুজ্জন্তি. তস্মা অত্থমত্তেতি ইধ দেসন্তরাৰচ্ছেদকে ৰিসযমত্তে ভুম্মং. কম্মে দুতিযাইচ্চাদীসু পন নিপ্ফাদেতব্বে পযোজনে ভুম্মন্তি এৰং দ্ৰিন্নং ভুম্মানং নানত্তং ৰেদিতব্বন্তি.

২৯০. আমন্তনে [ক. ২৮৫; রূ. ৭০; নী. ৫৭৮; চং. ২.১.৯৪; পা. ২.৩.৪৭; আমন্তণে (বহূসু)].

পগেৰ সিদ্ধস্স ৰত্থুনো নামেন ৰা নিপাতেন ৰা অত্তনো অভিমুখীকরণং আমন্তনং নাম. অধিকামন্তনে অত্থমত্তে পঠমা হোতি. এত্থ চ আমন্তনপদং নাম ক্রিযাপেক্খং ন হোতি, তস্মা কারকসঞ্ঞং ন লভতি.

তং পন দুৰিধং সাদরা’নাদরৰসেন. এহি সম্ম, এহি জেতি.

তথা ¶ সজীৰ, নিজ্জীৰৰসেন, ভো পুরিস, ৰদেহি ভো সঙ্খ, ৰদেহি ভো সঙ্খ [দী. নি. ২.৪২৬]. উম্মুজ্জ ভো পুথুসিলে, উম্মুজ্জ ভো পুথুসিলেতি [সং. নি. ৪.৩৫৮].

তথা পচ্চক্খা’পচ্চক্খৰসেন, ভো পুরিস, কহং একপুত্তক, কহং একপুত্তকাতি [সং. নি. ২.৬৩; ধ. প. অট্ঠ. ১.২].

তথা নিযমা’নিযমৰসেন, ভো পুরিস, অচ্ছরিযং ৰত ভো অব্ভুতং ৰত ভো [দী. নি. ২.১৯২]. যত্র হি নাম সঞ্ঞী সমানোতিআদি [দী. নি. ২.১৯২]. ইদং আমন্তনং নাম পগেৰ সিদ্ধে এৰ হোতি, ন ৰিধাতব্বে, ন হি পগেৰ রাজভাৰং ৰা ভিক্খুভাৰং ৰা অপ্পত্তং জনং ‘‘ভো রাজা’’তি ৰা ‘‘ভো ভিক্খূ’’তি ৰা আমন্তেন্তীতি.

পঠমাৰিভত্তিরাসি নিট্ঠিতো.

দুতিযাৰিভত্তিরাসি

কস্মিং অত্থে দুতিযা?

২৯১. কম্মে দুতিযা [ক. ২৯৭; রূ. ২৮৪; নী. ৫৮০; চং. ২.১.৪৩; পা. ১.৪.৪৯-৫১].

কম্মত্থে দুতিযা হোতি. করিযতেতি কম্মং, তং নিব্বত্তিকম্মং, ৰিকতিকম্মং, পত্তিকম্মন্তি তিৰিধং হোতি.

তত্থ নিব্বত্তিকম্মং যথা? ইদ্ধিমা হত্থিৰণ্ণং মাপেতি, রাজা নগরং মাপেতি, মাতা পুত্তং ৰিজাযতি, বীজং রুক্খং জনেতি, কম্মং ৰিপাকং জনেতি, আহারো বলং জনেতি, জনো পুঞ্ঞং করোতি, পাপং করোতি, বুদ্ধো ধম্মং দেসেসি, ৰিনযং পঞ্ঞপেসি, ভিক্খু ঝানং উপ্পাদেতি, মগ্গং উপ্পাদেতি ইচ্চাদি.

ৰিকতিকম্মং ¶ যথা? গেহং করোতি, রথং করোতি, ঘটং করোতি, পটং ৰাযতি, ওদনং পচতি, ভত্তং পচতি, কট্ঠং অঙ্গারং করোতি, সুৰণ্ণং কটকং করোতি, গেহং ঝাপেতি, রুক্খং ছিন্দতি, পাকারং ভিন্দতি, ৰিহযো লুনাতি, পাণং হনতি, ভত্তং ভুঞ্জতি ইচ্চাদি.

পত্তিকম্মং যথা? গামং গচ্ছতি, গেহং পৰিসতি, রুক্খং আরোহতি, নদিং তরতি, আদিচ্চং পস্সতি, ধম্মং সুণাতি, বুদ্ধং ৰন্দতি পযিরুপাসতি ইচ্চাদি.

পকতিকম্মং, ৰিকতিকম্মন্তি দুৰিধং. সুৰণ্ণং কটকং করোতি, কট্ঠং অঙ্গারং করোতি, পুরিসং ঠিতং পস্সতি, পুরিসং গচ্ছন্তং পস্সতি, ভিক্খুং পস্সতি সতং, সম্পজানং, অভিক্কমন্তং, পটিক্কমন্তং, আলোকেন্তং, ৰিলোকেন্তং, সমিঞ্জেন্তং, পসারেন্তং.

এত্থ ‘পুরিসং, ভিক্খু’ন্তি পকতিকম্মং, ‘ঠিতং, সতং’ইচ্চাদীনি ৰিকতিকম্মানি.

ধাতুকম্মং, কারিতকম্মন্তি দুৰিধং. গামং গচ্ছতি, পুরিসং গামং গমেতি.

ধাতুকম্মঞ্চ দ্ৰিকম্মিকধাতূনং দুৰিধং পধানকম্মং, অপ্পধানকম্মন্তি. অজপালো অজং গামং নেতি, পুরিসো ভারং গামং ৰহতি, হরতি, গামং সাখং কড্ঢতি, গাৰিং খীরং দোহতি, ব্রাহ্মণং কম্বলং যাচতি, ব্রাহ্মণং ভত্তং ভিক্খতি, গাৰিযো ৰজং অৰরুন্ধতি, ভগৰন্তং পঞ্হং পুচ্ছতি, রুক্খং ফলানি ওচিনাতি, সিস্সং ধম্মং ব্রৰীতি, ভগৰা ভিক্খূ এতদৰোচ [উদা. ২৩ (থোকং ৰিসদিসং)], সিস্সং ধম্মং অনুসাসতি ইচ্চাদি.

এত্থ চ ‘অজং, খীরং’ ইচ্চাদি পধানকম্মং নাম কত্তারা পরিগ্গহেতুং ইট্ঠতরত্তা. ‘গামং, গাৰিং’ইচ্চাদি অপ্পধানকম্মং নাম তথা অনিট্ঠতরত্তা.

তত্থ ¶ পধানকম্মং কথিনকম্মং নাম, কম্মভাৰে থিরকম্মন্তি ৰুত্তং হোতি. অপ্পধানকম্মং অকথিনকম্মং নাম, অথিরকম্মন্তি ৰুত্তং হোতি. তঞ্হি কদাচি সম্পদানং হোতি, কদাচি অপাদানং, কদাচি সামি, কদাচি ওকাসো. যথা – সো মং দকায নেতি, গাৰিতো খীরং দোহতি, গাৰিযা খীরং দোহহি, গাৰিযং খীরং দোহতি ইচ্চাদি.

কম্মে দুতিযাতি ৰত্ততে.

২৯২. গতিবোধাহারসদ্দত্থা কম্মক ভজ্জাদীনং পযোজ্জে [ক. ৩০০; রূ. ২৮৬; নী. ৫৮৭; চং. ২.১.৪৪; পা. ১.৪.৫২].

নিচ্চৰিধিসুত্তমিদং. গমনত্থানং বোধনত্থানং আহারত্থানং সদ্দত্থানং অকম্মকানং ভজ্জাদীনঞ্চ ধাতূনং পযোজ্জে কম্মনি দুতিযা হোতি. এত্থ চ পযোজ্জকম্মং নাম কারিতকম্মং ৰুচ্চতি.

পুরিসো পুরিসং গামং গমযতি, সামিকো অজপালং অজং গামং নযাপেতি, আচরিযো সিস্সং ধম্মং বোধেতি, পুরিসো পুরিসং ভত্তং ভোজেতি, আচরিযো সিস্সং ধম্মং পাঠেতি, পুরিসো পুরিসং সযাপেতি, অচ্ছাপেতি, উট্ঠাপেতি, পুরিসো পুরিসং ধঞ্ঞং ভজ্জাপেতি, কোট্টাপেতি, উদ্ধরাপেতি.

এতেসমীতি কিং? পুরিসো পুরিসেন ওদনং পাচেতি.

এত্থ চ গমনত্থাদীনং পযোজ্জে ততিযাপি রূপসিদ্ধিযং [১৪১ পিট্ঠে] সদ্দনীতিযঞ্চ [সুত্ত-১৪৮ পিট্ঠে] ৰুত্তা. সদ্দনীতিযং ততিযাপযোগেপি কম্মত্থমেৰ ইচ্ছতি. ঞাসাদীসু কত্ৰত্থং ইচ্ছন্তি.

যদা ¶ পন পঠমং পযোজকং অঞ্ঞো দুতিযো পযোজেতি, তদা পঠমো পযোজ্জো নাম. তস্মিং ততিযাএৰাতি ৰুত্তিযং ৰুত্তং. অত্তনা ৰিপ্পকতং কুটিং পরেহি পরিযোসাপেতি [পারা. ৩৬৩].

২৯৩. হরাদীনং ৰা [ক. ৩০০; রূ. ২৮৬; নী. ৫৮৭; চং. ২.১.৪৫; পা. ১.৪.৫৩].

হরাদীনং পযোজ্জে কম্মনি ৰিকপ্পেন দুতিযা হোতি.

সামিকো পুরিসং ভারং হারেতি পুরিসেন ৰা, পুরিসং আহারং অজ্ঝোহারেতি পুরিসেন ৰা, পুরিসং কম্মং কারেতি পুরিসেন ৰা, রাজা পুরিসং অত্তানং দস্সেতি পুরিসেন ৰা, পুরিসং বুদ্ধং ৰন্দাপেতি পুরিসেন ৰা.

১৯৪. ন খাদাদীনং [ক. ৩০০; রূ. ২৮৬; নী. ৫৮৭; চং. ২.১.৪৭; পা. ১.৪.৫৭].

খাদাদীনং পযোজ্জে কম্মনি ন দুতিযা হোতি.

সামিকো পুরিসেন খজ্জং খাদাপেতি, অদ-ভক্খনে, ভত্তং আদেতি, সামিকো দাসেন পুরিসং অৰ্হাপেতি, সদ্দাযাপেতি, কন্দযতি, নাদযতি. এত্থ চ ‘সদ্দাযাপেতী’তি সদ্দং কারাপেতি, নামধাতু চেসা. কন্দ, নদাপি সদ্দত্থাযেৰ.

২৯৫. ৰহিস্সানিযন্তুকে [ক. ৩০০; রূ. ২৮৬; নী. ৫৮৭; চং. ২.১.৪৮; পা. ১.৪.৫২].

ৰহিস্সাতি ধাতুনিদ্দেসো ই-কারো, নিযামেতি পযোজেতীতি নিযন্তা, নত্থি নিযন্তা এতস্সাতি অনিযন্তুকো. যস্স অঞ্ঞেন পযোজকেন কিচ্চং নত্থি, সযমেৰ ঞত্ৰা ৰহতি, সো অনিযন্তুকো নাম, ৰহধাতুস্স তাদিসে অনিযন্তুকে পযোজ্জে কম্মনি দুতিযা ন হোতি.

সামিকো ¶ দাসেন ভারং ৰাহেতি.

অনিযন্তুকেতি কিং? বলীবদ্দে ভারং ৰাহেতি.

২৯৬. ভক্খিস্সাহিংসাযং [ক. ৩০০; রূ. ২৮৬; নী. ৫৮৭; চং. ২.১.৪৯; পা. ১.৪.৫].

ভক্খিতুং ইচ্ছন্তস্স ভক্খাপনং হিংসা নাম ন হোতি, অনিচ্ছন্তস্স ভক্খাপনং হিংসা নাম, ভক্খধাতুস্স পযোজ্জে কম্মনি অহিংসাৰিসযে দুতিযা ন হোতি.

সামিকো পুরিসেন মোদকে ভক্খাপেতি.

অহিংসাযন্তি কিং? বলীবদ্দে সস্সং ভক্খাপেতি. এত্থ ‘সস্স’ন্তি থূলতরং সস্সন্তি ৰদন্তি.

পাল়িযং ‘‘সব্বেসং ৰিঞ্ঞাপেত্ৰান [অপ. থের ১.১.৪৩৮], তোসেন্তি সব্বপাণিনং [অপ. থের ১.১.৩০০]. থেরস্স পত্তো দুতিযস্স গাহেতব্বো’’ ইচ্চাদিনা [পারা. ৬১৫] পযোজ্জে ছট্ঠীপি দিস্সতি.

২৯৭. ঝাদীহি যুত্তা [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫০; পা. ২.৩.২].

ধীইচ্চাদীহি নিপাতোপসগ্গেহি যুত্তা লিঙ্গম্হা দুতিযা হোতি.

ধী ব্রাহ্মণস্স হন্তারং [ধ. প. ৩৮৯], ধীরত্থু’মং পূতিকাযং [জা. ১.৩.১২৯], ধীরত্থু তং ধনলাভং [জা. ১.৪.৩৬], ধীরত্থু বহুকে কামে. ততিযাপি দিস্সতি, ধীরত্থু জীৰিতেন মে [জা. ২.১৭.১৩৫]. অন্তরা চ রাজগহং অন্তরা চ নাল়ন্দং [দী. নি. ১.১], অভিতো গামং ৰসতি, পরিতোগামং ৰসতি, নদিং নেরঞ্জরং পতি [সু. নি. ৪২৭], এতেসু ছট্ঠ্যত্থে দুতিযা.

তথা ¶ পটিভাতি মং ভগৰা [উদা. ৪৫; সং. নি. ১.২১৭], অপিস্সু মং তিস্সো উপমাযো পটিভংসু [ম. নি. ১.৩৭৪], পটিভাতু তং ভিক্খু ধম্মো ভাসিতুং [মহাৰ. ২৫৮]. পটিভন্তু তং চুন্দ বোজ্ঝঙ্গা [সং. নি. ৩.৭৯] – ‘ম’ন্তি মম, ‘ত’ন্তি তৰ, সম্পদানত্থে দুতিযা. ‘ম’ন্তি মমঞাণে, ‘ত’ন্তি তৰঞাণেতিপি ৰণ্ণেসুং. ন উপাযমন্তরেন অত্থস্স সিদ্ধি, নত্থি সমাদানমন্তরেন সিক্খাপটিলাভো, নেৰিধ ন হুরং ন উভযমন্তরেন, এসেৰন্তো দুক্খস্স [ম. নি. ৩.৩৯৩; উদা. ৭৪]. তত্থ ‘অন্তরেনা’তি নিপাতপদমেতং, ৰজ্জেত্ৰাত্যত্থো. পুব্বেন গামং, দক্খিণেন গামং, উত্তরেন গামং, গামস্স পুব্বেতি অত্থো.

উপসগ্গপুব্বানং অকম্মকধাতূনং পযোগে আধারে দুতিযা, পথৰিং অধিসেস্সতি, গামং অধিতিট্ঠতি, রুক্খং অজ্ঝাৰসতি, মঞ্চং ৰা পীঠং ৰা অভিনিসীদেয্য ৰা অভিনিপজ্জেয্য ৰা [পাচি. ১৩০], গামং উপৰসতি, গামং অনুৰসতি, পব্বতং অধিৰসতি, ঘরং আৰসতি, অগারং অজ্ঝাৰসতি [দী. নি. ১.২৫৮; পারা. ৫১৯], উপোসথং উপৰসতি, কামাৰচরং উপপজ্জতি, রূপাৰচরং উপপজ্জতি, অরূপাৰচরং উপপজ্জতি, সক্কস্স সহব্যতং উপপজ্জতি, নিপন্নং ৰা উপনিপজ্জেয্য [দী. নি. ৩.২৮২], নিসিন্নং ৰা উপনিসীদেয্য [দী. নি. ৩.২৮২], ঠিতং ৰা উপতিট্ঠেয্য [দী. নি. ৩.২৮২] ইচ্চাদি.

তপ্পান, চারেপি দুতিযা, নদিং পিৰতি, সমুদ্দং পিৰতি, গামং চরতি, অরঞ্ঞং চরতি, নদিযং, গামেতি অত্থো.

কাল, দিসাসুপি আধারে এৰ দুতিযা, তং খণং, তং মুহুত্তং, তং কালং, একমন্তং [খু. পা. ৫.১], একং সমযং [খু. পা. ৫.১; দী. নি. ১.১], পুব্বণ্হসমযং [পারা. ১৬], সাযন্হসমযং, তং দিৰসং, ইমং রত্তিং [দী. নি. ৩.২৮৫], দুতিযম্পি, ততিযম্পি, চতুত্থং ৰা পঞ্চমং ৰা অপ্পেতি, ততো পুব্বং, ততো পরং, পুরিমং দিসং [দী. নি. ২.৩৩৬], দক্খিণং দিসং [দী. নি. ২.৩৩৬], পচ্ছিমং দিসং [দী. নি. ২.৩৩৬], উত্তরং দিসং [দী. নি. ২.৩৩৬], ইমা দস ¶ দিসাযো, কতমং দিসং তিট্ঠতি নাগরাজা [জা. ১.১৬.১০৪], ইমাসু দিসাসু কতমায দিসায তিট্ঠতি ছদ্দন্তনাগরাজাতি অত্থোইচ্চাদি.

২৯৮. লক্খণিত্থম্ভূতৰিচ্ছাস্ৰভিনা [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৪; পা. ১.৪.৯০, ৯১; ২.৩.৮].

লক্খণাদীসু অত্থেসু পৰত্তেন অভিনা যুত্তা লিঙ্গম্হা দুতিযা হোতি.

লক্খীযতি লক্খিতব্বং অনেনাতি লক্খণং. অযং পকারো ইত্থং, ঈদিসো ৰিসেসোতি অত্থো. ইত্থং ভূতো পত্তোতি ইত্থম্ভূতো. ভিন্নে অত্থে ব্যাপিতুং ইচ্ছা ৰিচ্ছা.

তত্থ লক্খণে –

রুক্খমভি ৰিজ্জোততে ৰিজ্জু, রুক্খং অভি ব্যাপেত্ৰা ৰিজ্জোততেতি অত্থো, ৰিজ্জোভাসেন ব্যাপিতো রুক্খো ৰিজ্জুপ্পাদস্স লক্খণং সঞ্ঞাণং হোতি.

ইত্থম্ভূতে –

সাধু দেৰদত্তো মাতরমভি, মাতরং অভি ৰিসিট্ঠং কত্ৰা সাধূতি অত্থো, দেৰদত্তো সক্কচ্চং মাতুপট্ঠানে অগ্গপুরিসোতি ৰুত্তং হোতি. তং খো পন ভৰন্তং গোতমং এৰং কল্যাণো কিত্তিসদ্দো অব্ভুগ্গতো [পারা. ১]. এত্থ চ ‘অব্ভুগ্গতো’তি অভি ৰিসিট্ঠং কত্ৰা উগ্গতোতি অত্থো, অযং কিত্তিসদ্দো ভোতো গোতমস্স সকললোকগ্গভাৰং পকাসেত্ৰা উগ্গতোতি ৰুত্তং হোতি, কিত্তিসদ্দসম্বন্ধে পন তস্স খো পন ভোতো গোতমস্সাতি অত্থো.

ৰিচ্ছাযং –

রুক্খং ¶ রুক্খং অভি ৰিজ্জোততে চন্দো, ব্যাপেত্ৰা ৰিজ্জোততেত্যত্থো.

এত্থ চ লক্খণাদিঅত্থা অভিসদ্দেন জোতনীযা পিণ্ডত্থা এৰ, ন ৰচনীযত্থা, ব্যাপনাদিঅত্থা এৰ ৰচনীযত্থাতি.

২৯৯. পতিপরীহি ভাগে চ [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৫; পা. ১.৪.৯০].

লক্খণি’ত্থম্ভূত, ৰিচ্ছাসু চ ভাগে চ পৰত্তেহি পতি, পরীহি যুত্তা লিঙ্গম্হা দুতিযা হোতি.

লক্খণে –

রুক্খং পতি ৰিজ্জোততে ৰিজ্জু, রুক্খং পরি ৰিজ্জোততে ৰিজ্জু. তত্থ ‘পতী’তি পটিচ্চ, ‘পরী’তি ফরিত্ৰা.

ইত্থম্ভূতে –

সাধু দেৰদত্তো মাতরং পতি, সাধু দেৰদত্তো মাতরং পরি.

ৰিচ্ছাযং –

রুক্খং রুক্খং পতি ৰিজ্জোততে চন্দো, রুক্খং রুক্খং পরি ৰিজ্জোততে চন্দো.

ভাগে –

তং দীযতু, যদেত্থ মং পতি সিযা, তং দীযতু, যদেত্থ মং পরি সিযা. তত্থ ‘পতী’তি পটিচ্চ, ‘পরী’তি পরিচ্চ, উদ্দিস্সাতি অত্থো, ‘ঠপিত’ন্তি পাঠসেসো. এত্থ মং উদ্দিস্স যং ¶ ৰত্থু ঠপিতং সিযা, তং মে দীযতূত্যত্থো, এতেসু বহূসু ভাগেসু যো মম ভাগো, সো ময্হং দীযতূতি ৰুত্তং হোতীতি.

৩০০. অনুনা [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৬; পা. ১.৪.৮৪, ৯০].

লক্খণি’ত্থম্ভূত, ৰিচ্ছাসু চ ভাগে চ পৰত্তেন অনুনা যুত্তা লিঙ্গম্হা দুতিযা হোতি.

লক্খণে –

রুক্খং অনু ৰিজ্জোততে ৰিজ্জু, রুক্খং অনু ফরিত্ৰাতি অত্থো. চতুরাসীতিসহস্সানি, সম্বুদ্ধমনুপব্বজুং [বু. ৰং. ২১.৫], ‘সম্বুদ্ধ’ন্তি বোধিসত্তং, অনু গন্ত্ৰা পব্বজিংসূতি অত্থো, ৰিপস্সিবোধিসত্তে পব্বজিতে সতি তানিপি চতুরাসীতিকুলপুত্তসহস্সানি পব্বজিংসূতি ৰুত্তং হোতি. সচ্চক্রিযমনু ৰুট্ঠি পাৰস্সি, ‘অনূ’তি অন্ৰায, পটিচ্চাতি অত্থো, সচ্চক্রিযায সতি সচ্চক্রিযহেতু দেৰো পাৰস্সীতি ৰুত্তং হোতি. ‘‘হেতু চ লক্খণং ভৰতী’’তি ৰুত্তিযং ৰুত্তং. সচ্চক্রিযায সহেৰাতিপি যুজ্জতি. ‘‘সহ সচ্চে কতে ময্হ’’ন্তি [চরিযা. ৩.৮২] হি ৰুত্তং.

ইত্থম্ভূতে –

সাধু দেৰদত্তো মাতরমনু. তত্থ ‘অনূ’তি অন্ৰায পটিচ্চ.

ৰিচ্ছাযং –

রুক্খং রুক্খং অনু ৰিজ্জোততে চন্দো. তত্থ ‘অনূ’তি অনু ফরিত্ৰা.

ভাগে –

যদেত্থ ¶ মং অনু সিযা, তং দীযতু. তত্থ ‘অনূ’তি অন্ৰায. সেসং ৰুত্তনযমেৰ.

৩০১. সহত্থে [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৭; পা. ১.৪.৮৫].

সহত্থে অনুনা যুত্তা লিঙ্গম্হা দুতিযা হোতি.

পব্বতং অনু তিট্ঠতি [পব্বতমনুসেনা তিট্ঠতি (মোগ্গল্লানৰুত্তিযং)]. নদিং অন্ৰাৰসিতা বারাণসী. ‘অনূ’তি অনুগন্ত্ৰা, নদিযা সহ আবদ্ধা তিট্ঠতীতি ৰুত্তং হোতি.

৩০২. হীনে [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৮; পা. ১.৪.৮৬].

হীনে পৰত্তেন অনুনা যুত্তা লিঙ্গম্হা দুতিযা হোতি.

অনু সারিপুত্তং পঞ্ঞৰন্তো, অনুগতা পচ্ছতো গতাতি অত্থো, সব্বে পঞ্ঞৰন্তো সারিপুত্ততো হীনাতি ৰুত্তং হোতি.

৩০৩. উপেন [ক. ২৯৯; রূ. ২৮৮; নী. ৫৮২, ৫৮৬; চং. ২.১.৫৯; পা. ১.৪.৮৭].

হীনে উপেন যুত্তা লিঙ্গম্হা দুতিযা হোতি.

উপ সারিপুত্তং পঞ্ঞৰন্তো, উপেচ্চ গতা সমীপে গতাতি অত্থো, হীনাত্ৰেৰ ৰুত্তং হোতি.

এত্থ চ অভিইচ্চাদযো কম্মপ্পৰচনীযাতি সদ্দসত্থেসু ৰুত্তা. তত্থ পকারেন ৰুচ্চতীতি পৰচনীযং, পকারো চ লক্খণি’ত্থম্ভূত, ৰিচ্ছাদিকো পিণ্ডত্থো ৰুচ্চতি, কম্মন্তি ব্যাপনাদিক্রিযা, কম্মং পৰচনীযং যেহি তে কম্মপ্পৰচনীযা.

তত্থ ¶ ব্যাপনাদিক্রিযাৰিসেসৰাচীহি উপসগ্গেহি সম্বন্ধেসতি কম্মত্থে দুতিযা হোতি, অসম্বন্ধে পন আধার, সাম্যাদিঅত্থেসু হোতি, লক্খণাদযো পন সামত্থিযসিদ্ধা পিণ্ডত্থা এৰাতি.

৩০৪. কালদ্ধানমচ্চন্তসংযোগে [ক. ২৯৮; রূ. ২৮৭; নী. ৫৮১; পা. ২.৩.৫]

কালস্স ৰা অদ্ধুনো ৰা দব্ব, গুণ, ক্রিযাহি অচ্চন্তং নিরন্তরং সংযোগে কাল’দ্ধানৰাচীহি লিঙ্গেহি পরং দুতিযা হোতি.

কালে –

সত্তাহং গৰপানং, মাসং মংসোদনং, সরদং রমণীযা নদী, সব্বকালং রমণীযং নন্দনং, মাসং সজ্ঝাযতি, ৰস্সসতং জীৰতি, তযো মাসে অভিধম্মং দেসেতি.

অদ্ধানে –

যোজনং ৰনরাজি, যোজনং দীঘো পব্বতো, কোসং সজ্ঝাযতি.

অচ্চন্তসংযোগেতি কিং? মাসে মাসে ভুঞ্জতি, যোজনে যোজনে ৰিহারো.

এত্থ চ ক্রিযাৰিসেসনম্পি কত্তারা সাধেতব্বত্তা কম্মগতিকং হোতি, তস্মা তম্পি ‘কম্মে দুতিযা’তি এত্থ কম্মসদ্দেন গয্হতি.

সুখং সেতি, দুক্খং সেতি, সীঘং গচ্ছতি, খিপ্পং গচ্ছতি, দন্ধং গচ্ছতি, মুদুং পচতি, গরুং এস্সতি, লহুং এস্সতি, সন্নিধিকারকং ভুঞ্জতি, সম্পরিৰত্তকং ওতাপেতি, কাযপ্পচালকং গচ্ছতি [পাচি. ৫৯০], হত্থপ্পচালকং ¶ গচ্ছতি, সীসপ্পচালকং গচ্ছতি [পাচি. ৫৯৪-৫৯৫], সুরুসুরুকারকং ভুঞ্জতি [পাচি. ৬২৭], অৰগণ্ডকারকং ভুঞ্জতি [পাচি. ৬২২], পিণ্ডুক্খেপকং ভুঞ্জতি [পাচি. ৬২০], হত্থনিদ্ধুনকং ভুঞ্জতি [পাচি. ৬২৩], হত্থনিল্লেহকং ভুঞ্জতি [পাচি. ৬২৮], চন্দিমসূরিযা সমং পরিযাযন্তি, ৰিসমং পরিযাযন্তি ইচ্চাদি.

দুতিযাৰিভত্তিরাসি নিট্ঠিতো.

ততিযাৰিভত্তিরাসি

কস্মিং অত্থে ততিযা?

৩০৫. কত্তুকরণেসু ততিযা [ক. ২৮৬, ২৮৮; রূ. ২৯১, ২৯৩; নী. ৫৯১, ৫৯৪; চং. ২.১.৬২-৩; পা. ২.৩.১৮].

কত্তরি করণে চ ততিযা হোতি. কত্তাতি চ কারকোতি চ অত্থতো একং ‘‘করোতীতি কত্তা, করোতীতি কারকো’’তি, তস্মা ‘‘কত্তুকারকো’’তি ৰুত্তে দ্ৰিন্নং পরিযাযসদ্দানং ৰসেন অযমেৰ ক্রিযং একন্তং করোতি, সামী হুত্ৰা করোতি, অত্তপ্পধানো হুত্ৰা করোতীতি ৰিঞ্ঞাযতি, ততো ক্রিযা নাম কত্তুনো এৰ ব্যাপারো, ন অঞ্ঞেসন্তি চ, অঞ্ঞে পন ক্রিযাসাধনে কত্তুনো উপকারকত্তা কারকা নামাতি চ, তথা অনুপকারকত্তা অকারকা নামাতি চ ৰিঞ্ঞাযন্তীতি.

তত্থ কত্তা তিৰিধো সযংকত্তা, পযোজককত্তা, কম্মকত্তাতি.

তত্থ ধাত্ৰত্থং সযং করোন্তো সযংকত্তা নাম, পুরিসো কম্মং করোতি.

পরং ¶ নিযোজেন্তো পযোজককত্তা নাম, পুরিসো দাসং কম্মং কারেতি.

কম্মকত্তা নাম পযোজ্জককত্তাপি ৰুচ্চতি, পুরিসো দাসেন কম্মং কারেতি দাসস্স ৰা, যো চ অঞ্ঞেন কতং পযোগং পটিচ্চ কম্মভূতোপি সুকরত্তা ৰা কম্মভাৰেন অৰত্তুকামতায ৰা অজাননতায ৰা ৰঞ্চেতুকামতায ৰা কত্তুভাৰেন ৰোহরীযতি, সো কম্মকত্তা নাম, কুসূলো সযমেৰ ভিজ্জতি, ঘটো সযমেৰ ভিজ্জতি. অপিচ সুকরো ৰা হোতু দুক্করো ৰা, যো কম্মরূপক্রিযাপদে পঠমন্তো কত্তা, সো কম্মকত্তাতি ৰুচ্চতি. সদ্দরূপেন কম্মঞ্চ তং অত্থরূপেন কত্তা চাতি কম্মকত্তা, কুসূলো ভিজ্জতি, ঘটো ভিজ্জতি, পচ্চতি মুনিনো ভত্তং, থোকং থোকং ঘরে ঘরে ইচ্চাদি.

এত্থ চ সদ্দত্থো দুৰিধো পরমত্থো, পঞ্ঞত্তত্থোতি. তত্থ পরমত্থো একন্তেন ৰিজ্জমানোযেৰ. পঞ্ঞত্তত্থো পন কোচি ৰিজ্জমানোতি সম্মতো. যথা? রাজপুত্তো, গোৰিসাণং, চম্পকপুপ্ফন্তি. কোচি অৰিজ্জমানোতি সম্মতো. যথা? ৰঞ্ঝাপুত্তো, সসৰিসাণং, উদুম্বরপুপ্ফন্তি. সদ্দো চ নাম ৰত্তিচ্ছাপটিবদ্ধৰুত্তী হোতি, ৰত্তমানো চ সদ্দো অত্থং ন দীপেতীতি নত্থি, সঙ্কেতে সতি সুণন্তস্স অত্থৰিসযং বুদ্ধিং ন জনেতীতি নত্থীতি অধিপ্পাযো. ইতি অৰিজ্জমানসম্মতোপি অত্থো সদ্দবুদ্ধীনং ৰিসযভাৰেন ৰিজ্জমানো এৰ হোতি. ইতরথা ‘ৰঞ্ঝাপুত্তো’তি পদং সুণন্তস্স তদত্থৰিসযং চিত্তং নাম ন পৰত্তেয্যাতি, সদ্দবুদ্ধীনঞ্চ ৰিসযভাৰেন ৰিজ্জমানো নাম অত্থো সদ্দনানাত্তে বুদ্ধিনানাত্তে চ সতি নানা হোতি, ৰিসুং ৰিসুং ৰিজ্জমানো নাম হোতীতি অধিপ্পাযো. এৰং সদ্দবুদ্ধিৰিসযভাৰেন ৰিজ্জমানঞ্চ নানাভূতঞ্চ অত্থং পটিচ্চ কারকনানাত্তং ক্রিযাকারকনানাত্তঞ্চ হোতি ¶ , ন পন সভাৰতো ৰিজ্জমানমেৰ নানাভূতমেৰ চ অত্থন্তি নিট্ঠমেত্থ গন্তব্বং. তস্মা ‘‘সংযোগো জাযতে’’ ইচ্চাদীসু সদ্দবুদ্ধীনং নানাত্তসিদ্ধেন অত্থনানাত্তেন দ্ৰিন্নং সদ্দানং দ্ৰিন্নং অত্থানঞ্চ ক্রিযাকারকতাসিদ্ধি ৰেদিতব্বাতি.

কযিরতে অনেনাতি করণং, ক্রিযাসাধনে কত্তুনো সহকারীকারণন্তি ৰুত্তং হোতি. তং দুৰিধং অজ্ঝত্তিককরণং, বাহিরকরণন্তি.

তত্থ কত্তুনো অঙ্গভূতং করণং অজ্ঝত্তিকং নাম, পুরিসো চক্খুনা রূপং পস্সতি, মনসা ধম্মং ৰিজানাতি, হত্থেন কম্মং করোতি, পাদেন মগ্গং গচ্ছতি, রুক্খো ফলভারেন ওণমতি.

কত্তুনো বহিভূতং বাহিরং নাম, পুরিসো যানেন গচ্ছতি, ফরসুনা [পরসুনা (সক্কতগন্থেসু)] ছিন্দতি, রুক্খো ৰাতেন ওণমতি.

৩০৬. সহত্থেন [ক. ২৮৭; রূ. ২৯৬; নী. ৫৯২; চং. ২.১.৬৫; পা. ২.৩.১৯].

সহসদ্দস্স অত্থো যস্স সোতি সহত্থো, সহত্থেন সদ্দেন যুত্তা লিঙ্গম্হা ততিযা হোতি. সহসদ্দস্স অত্থো নাম সমৰাযত্থো.

সো তিৰিধো দব্বসমৰাযো, গুণসমৰাযো, ক্রিযাসমৰাযোতি. পুত্তেন সহ ধনৰা পিতা, পুত্তেন সহ থূলো পিতা, পুত্তেন সহ আগতো পিতা. সহ, সদ্ধিং, সমং, নানা, ৰিনাইচ্চাদিকো সহত্থসদ্দো নাম.

নিসীদি ভগৰা সদ্ধিং ভিক্খুসঙ্ঘেন [মহাৰ. ৫৯], সহস্সেন সমং মিতা [সং. নি. ১.৩২], পিযেহি নানাভাৰো ৰিনাভাৰো [দী. নি. ২.১৮৩, ২০৭], সঙ্ঘো সহ ৰা গগ্গেন ৰিনা ৰা গগ্গেন উপোসথং করেয্য [মহাৰ. ১৬৭].

৩০৭. লক্খণে [রূ. ১৪৭ পিট্ঠে; নী. ৫৯৮; চং. ২.১.৬৬; পা. ২.৩.২১].

লক্খণং ¶ ৰুচ্চতি ইত্থম্ভূতলক্খণং, তস্মিং ততিযা হোতি.

অস্সুপুণ্ণেহি নেত্তেহি, পিতরং সো উদিক্খতি [জা. ২.২২.২১২৩]. ব্রহ্মভূতেন অত্তনা ৰিহরতি [অ. নি. ৩.৬৭], অসম্ভিন্নেন ৰিলেপনেন রাজানমদক্খি, তিদণ্ডকেন পরিব্বাজকমদক্খি, ঊনপঞ্চবন্ধনেন পত্তেন অঞ্ঞং পত্তং চেতাপেতি [পারা. ৬১২ (থোকং ৰিসদিসং)], ভিক্খু পাসাদিকেন অভিক্কন্তেন পটিক্কন্তেন আলোকিতেন ৰিলোকিতেন সমিঞ্জিতেন পসারিতেন গামং পিণ্ডায পাৰিসি, সা কাল়ী দাসী ভিন্নেন সীসেন লোহিতেন গলন্তেন পতিৰিস্সকানং উজ্ঝাপেসি [ম. নি. ১.২২৬], উক্খিত্তকায অন্তরঘরে গচ্ছন্তি [পাচি. ৫৮৪], পল্লত্থিকায অন্তরঘরে নিসীদন্তি [পাচি. ৫৯৯].

অঙ্গৰিকারোপি ইধ সঙ্গয্হতি [ক. ২৯১; রূ. ২৯৯; নী. ৬০৩], অক্খিনা কাণং পস্সতি, ‘অক্খী’তি ইদং ‘কাণ’ন্তি পদে ৰিসেসনং, ৰিকলেন চক্খুঅঙ্গেন সো কাণো নাম হোতি. হত্থেন কুণিং পস্সতি, পাদেন খঞ্জং পস্সতি.

৩০৮. হেতুম্হি [ক. ২৮৯; রূ. ২৯৭; নী. ৬০১].

হিনোতি পৰত্ততি ফলং এতেনাতি হেতু, তস্মিং ততিযা হোতি.

অন্নেন ৰসতি, ৰিজ্জায সাধু, কম্মুনা ৰত্ততি লোকো, কম্মুনা ৰত্ততি পজা [ম. নি. ২.৪৬০; সু. নি. ৬৫৯ (ৰত্ততী পজা)]. কম্মুনা ৰসলো হোতি, কম্মুনা হোতি ব্রাহ্মণো [সু. নি. ১৩৬]. কেনট্ঠেন [ধ. স. অট্ঠ. নিদানকথা], কেন নিমিত্তেন, কেন ৰণ্ণেন ¶ [সং. নি. ১.২৩৪] কেন পচ্চযেন, কেন হেতুনা [জা. ২.২২.২০৯৭], কেন কারণেন [জা. অট্ঠ. ৪.১৫ মাতঙ্গজাতকৰণ্ণনা] ইচ্চাদি.

এত্থ চ করণং তিৰিধং ক্রিযাসাধককরণং, ৰিসেসনকরণং, নানাত্তকরণন্তি.

তত্থ ক্রিযাসাধকং পুব্বে ৰুত্তমেৰ.

ৰিসেসনকরণং যথা? আদিচ্চো নাম গোত্তেন, সাকিযো নাম জাতিযা [সু. নি. ৪২৫]. গোত্তেন গোতমো নাথো [অপ. থের ১.১.২৫৩ (ৰিসদিসং)], সারিপুত্তোতি নামেন [অপ. থের ১.১.২৫১], ৰিস্সুতো পঞ্ঞৰা চ সো, জাতিযা খত্তিযো বুদ্ধো [দী. নি. ২.৯২], জাতিযা সত্তৰস্সিকো [মি. প. ৬.৪.৮], সিপ্পেন নল়কারো সো, একূনতিংসো ৰযসা [দী. নি. ২.২১৪], ৰিজ্জায সাধু, তপসা উত্তমো, সুৰণ্ণেন অভিরূপো, পকতিযা অভিরূপো, পকতিযা ভদ্দকো, যেভুয্যেন মত্তিকা [পাচি. ৮৬], ধম্মেন সমেন রজ্জং কারেতি, সমেন ধাৰতি, ৰিসমেন ধাৰতি, সুখেন সুখিতো হোমি, পামোজ্জেন পমুদিতো [বু. ৰং. ২.৭৮]. দ্ৰিদোণেন ধঞ্ঞং কিণাতি, সহস্সেন অস্সে ৰিক্কিণাতি, অত্তনাৰ অত্তানং সম্মন্নতি [পারা. অট্ঠ. ১.পঠমমহাসঙ্গীতিকথা (সম্মন্নি)] ইচ্চাদি.

নানাত্তকরণং যথা? কিং মে একেন তিণ্ণেন, পুরিসেন থামদস্সিনা [বু. ৰং. ২.৫৬]. কিং তে জটাহি দুম্মেধ, কিং তে অজিনসাটিযা [ধ. প. ৩৯৪]. অলং তে ইধ ৰাসেন [পারা. ৪৩৬], অলং মে বুদ্ধেন [পারা. ৫২], কিন্নুমেবুদ্ধেন [পারা. ৫২], ন মমত্থো বুদ্ধেন [পারা. ৫২], মণিনা মে অত্থো [পারা. ৩৪৪], ৰদেয্যাথ ভন্তে যেনত্থো, পানীযেন [পাণিযেন (মূ.)] অত্থো, মূলেহি ভেসজ্জেহি অত্থো [মহাৰ. ২৬৩], সেয্যেন অত্থিকো, মহগ্ঘেন ¶ অত্থিকো, মাসেন পুব্বো, পিতরা সদিসো, মাতরা সমো, কহাপণেন ঊনো, ধনেন ৰিকলো, অসিনা কলহো, ৰাচায কলহো, আচারেন নিপুণো, ৰাচায নিপুণো, গুল়েন মিস্সকো, তিলেন মিস্সকো, ৰাচায সখিলো ইচ্চাদি.

তথা কম্মা’ৰধি, আধার’চ্চন্তসংযোগ, ক্রিযাপৰগ্গাপি নানাত্তকরণে সঙ্গয্হন্তি.

কম্মে তাৰ –

তিলেহি খেত্তে ৰপ্পতি, তন্তৰাযেহি চীৰরং ৰাযাপেতি, সুনখেহি খাদাপেন্তি ইচ্চাদি.

অৰধিম্হি –

সুমুত্তা মযং তেন মহাসমণেন [চূল়ৰ. ৪৩৭], মুত্তোম্হি কাসিরাজেন, চক্খু সুঞ্ঞং অত্তেন ৰা অত্তনিযেন ৰা [সং. নি. ৪.৮৫], ওত্তপ্পতি কাযদুচ্চরিতেন [অ. নি. ৫.২], হিরীযতি কাযদুচ্চরিতেন [অ. নি. ৫.২], জিগুচ্ছতি সকেন কাযেন, পথব্যা একরজ্জেন, সগ্গস্স গমনেন ৰা. সব্বলোকাধিপচ্চেন, সোতাপত্তিফলং ৰরং [ধ. প. ১৭৮] ইচ্চাদি.

আধারে –

তেন খণেন তেন লযেন তেন মুহুত্তেন [মহাৰ. ১৭], তেন সমযেন [পারা. ১], কালেন ধম্মস্সৰনং [খু. পা. ৫.৯]. সো ৰো মমচ্চযেন সত্থা [দী. নি. ২.২১৬], তিণ্ণং মাসানং অচ্চযেন [দী. নি. ২.১৬৮; উদা. ৫১], পুব্বেন গামং, দক্খিণেন গামং, পুরত্থিমেন ধতরট্ঠো, দক্খিণেন ৰিরূল়্হকো পচ্ছিমেন ৰিরূপক্খো [দী. নি. ২.৩৩৬], যেন ভগৰা তেনুপসঙ্কমি [খু. পা. ৫.১] ইচ্চাদি.

অচ্চন্তসংযোগে –

মাসেন ভুঞ্জতি, যোজনেন ধাৰতি ইচ্চাদি.

ক্রিযাপৰগ্গো ¶ নাম ক্রিযায সীঘতরং নিট্ঠাপনং, তস্মিং জোতেতব্বে ততিযা, একাহেনেৰ বারাণসিং পাপুণি, তীহি মাসেহি অভিধম্মং দেসেসি, নৰহি মাসেহি ৰিহারং নিট্ঠাপেসি, গমনমত্তেন লভতি, ওট্ঠপহটমত্তেন পগুণং অকাসি.

ততিযাৰিভত্তিরাসি নিট্ঠিতো.

চতুত্থীৰিভত্তিরাসি

কস্মিং অত্থে চতুত্থী?

৩০৯. সম্পদানে চতুত্থী [ক. ২৯৩; রূ. ৩০১; নী. ৬০৫; চতুত্থী সম্পদানে (বহূসু), চং. ২.১.৭৩; পা. ২.৩.১৩].

সম্পদানে চতুত্থী হোতি. সম্মা পদীযতে অস্সাতি সম্পদানং, সম্পটিচ্ছকন্তি ৰুত্তং হোতি.

তং ৰত্থুসম্পটিচ্ছকং, ক্রিযাসম্পটিচ্ছকন্তি দুৰিধং. ভিক্খুস্স চীৰরং দেতি, বুদ্ধস্স সিলাঘতে.

পুন অনিরাকরণং, অনুমতি, আরাধনন্তি তিৰিধং হোতি. তত্থ ন নিরাকরোতি ন নিৰারেতীতি অনিরাকরণং, দিয্যমানং ন পটিক্খিপতীতি অত্থো. অসতি হি পটিক্খিপনে সম্পটিচ্ছনং নাম হোতীতি. কাযচিত্তেহি সম্পটিচ্ছনাকারং দস্সেত্ৰা পটিগ্গণ্হন্তং সম্পদানং অনুমতি নাম. ৰিৰিধেহি আযাচনৰচনেহি পরস্স চিত্তং আরাধেত্ৰা সম্পটিচ্ছন্তং আরাধনং নাম. বোধিরুক্খস্স জলং দেতি, ভিক্খুস্স অন্নং দেতি, যাচকস্স অন্নং দেতি.

ক্রিযাসম্পটিচ্ছকং নানাক্রিযাৰসেন বহুৰিধং.

তত্থ ¶ রোচনক্রিযাযোগে –

তঞ্চ অম্হাকং রুচ্চতি চেৰ খমতি চ [ম. নি. ১.১৭৯; ম. নি. ২.৪৩৫], পব্বজ্জা মম রুচ্চতি [জা. ২.২২.৪৩], কস্স সাদুং ন রুচ্চতি, ন মে রুচ্চতি ভদ্দন্তে, উলূকস্সাভিসেচনং [জা. ১.৩.৬০]. গমনং ময্হং রুচ্চতি, মাযস্মন্তানম্পি সঙ্ঘভেদো রুচ্চিত্থ [পারা. ৪১৮], যস্সাযস্মতো ন খমতি, খমতি সঙ্ঘস্স [পারা. ৪৩৮], ভত্তং ময্হং ছাদেতি, ভত্তমস্স নচ্ছাদেতি [চূল়ৰ. ২৮২], তেসং ভিক্খূনং লূখানি ভোজনানি নচ্ছাদেন্তি [মহাৰ. ২৬১ (থোকং ৰিসদিসং)]. তত্থ ‘ছাদেতী’তি ইচ্ছং উপ্পাদেতীতি অত্থো.

ধারণপ্পযোগে –

ছত্তগ্গাহো রঞ্ঞো ছত্তং ধারেতি, সম্পতিজাতস্স বোধিসত্তস্স দেৰা ছত্তং ধারযিংসু.

বুদ্ধস্স সিলাঘতে, থোমেতীতি অত্থো, তুয্হং হনুতে, তুণ্হিভাৰেন ৰঞ্চেতীতি অত্থো, ভিক্খুনী ভিক্খুস্স ভুঞ্জমানস্স পানীযেন ৰা ৰিধূপনেন ৰা উপট্ঠাতি [পাচি. ৮১৬ (ৰিসদিসং)]. দুতিযাপি হোতি, রঞ্ঞো উপট্ঠাতি, রাজানং উপট্ঠাতি, অহং ভোতিং উপট্ঠিস্সং [জা. ২.২২.১৯৩৪], অহং তং উপট্ঠিস্সামি, মাতাপিতুউপট্ঠানং [খু. পা. ৫.৬], তুয্হং সপতে, সপস্সু মে ৰেপচিত্তি [সং. নি. ১.২৫৩], সপথম্পি তে সম্ম অহং করোমি [জা. ২.২১.৪০৭], তৰ মযি সদ্দহনত্থং সচ্চং করোমীতি অত্থো, রঞ্ঞো সতং ধারেতি, ইধ কুলপুত্তো ন কস্সচি কিঞ্চি ধারেতি [অ. নি. ৪.৬২], তস্স রঞ্ঞো মযং নাগং ধারযাম. তত্থ ‘রঞ্ঞো সতং ধারেতী’তি সতং বলিধনং ৰা দণ্ডধনং ৰা নিদেতীতি [নিধেতীতি, নিধেম (কেচি)] অত্থো, ‘‘ইণং কত্ৰা গণ্হাতী’’তি চ ৰদন্তি. ‘ধারযামা’তি পুন নিদেম [নিধেতীতি, নিধেম (কেচি)], তুয্হং সদ্দহতি, ময্হং সদ্দহতি, সদ্দহাসি সিঙ্গালস্স, সুরাপীতস্স ব্রাহ্মণ [জা. ১.১.১১৩].

দেৰাপি ¶ তে পিহযন্তি তাদিনো [ধ. প. ৯৪ (তস্স পিহযন্তি)], দেৰাপি তেসং পিহযন্তি, সম্বুদ্ধানং সতীমতং [ধ. প. ১৮১], ‘পিহযন্তী’তি পুনপ্পুনং দট্ঠুং পত্থেন্তীতি অত্থো. দুতিযাপি হোতি, সচে মং পিহযসি, ধনং পিহেতি, হিরঞ্ঞং পিহেতি, সুৰণ্ণং পিহেতি. ততিযাপি দিস্সতি, রূপেন পিহেতি, সদ্দেন পিহেতি ইচ্চাদি.

তস্স কুজ্ঝ মহাৰীর [জা. ১.৪.৪৯], মা মে কুজ্ঝ রথেসভ [জা. ২.২২.১৬৯৬ (কুজ্ঝি)], যদিহং তস্স কুপ্পেয্যং, মাতু কুপ্পতি, পিতু কুপ্পতি, যো অপ্পদুট্ঠস্স নরস্স দুস্সতি [ধ. প. ১২৫; সু. নি. ৬৬৭; জা. ১.৫.৯৪], দুহযতি দিসানং মেঘো, পূরেতি ৰিনাসেতি ৰাতি অত্থো, অকালে ৰস্সন্তো হি ৰিনাসেতি নাম, যো মিত্তানং ন দুব্ভতি [জা. ২.২২.১৯], অদুট্ঠস্স তুৰং দুব্ভি [জা. ১.১৬.২৯৫], মিত্তানং ন দুব্ভেয্য, তিত্থিযা ইস্সন্তি সমণানং, উস্সূযন্তি দুজ্জনা গুণৰন্তানং, পতিৰিস্সকানং উজ্ঝাপেসি [ম. নি. ১.২২৬ (উজ্ঝাপেসি)], মা তুম্হে তস্স উজ্ঝাযিত্থ [উদা. ২৬ (ৰিসদিসং)], মহারাজানং উজ্ঝাপেতব্বং ৰিরৰিতব্বং ৰিক্কন্দিতব্বং, ক্যাহং অয্যানং অপরজ্ঝামি [পারা. ৩৮৩] অয্যে ৰা, রঞ্ঞো অপরজ্ঝতি রাজানং ৰা, আরাধো মে রাজা হোতি.

পতি, আপুব্বস্স সু-ধাতুস্স অনু, পতিপুব্বস্স চ গী-ধাতুস্স যোগে সম্পদানে চতুত্থী. তত্র খো ভগৰা ভিক্খূ আমন্তেসি ‘‘ভিক্খৰো’’তি, ‘‘ভদ্দন্তে’’তি তে ভিক্খূ ভগৰতো পচ্চস্সোসুং [অ. নি. ১.১]. এত্থ চ পুব্বৰাক্যে আমন্তনক্রিযায কত্তা ভগৰা, সো পরৰাক্যে পচ্চাসুযোগে সম্পদানং হোতি, ‘পচ্চস্সোসু’ন্তি ভদ্দন্তেতি পটিৰচনং অদংসূতি অত্থো. ভিক্খূ বুদ্ধস্স আসুণন্তি, রাজা বিম্বিসারো পিলিন্দৰচ্ছত্থেরস্স আরামিকং পটিস্সুত্ৰা [মহাৰ. ২৭০], অমচ্চো রঞ্ঞো বিম্বিসারস্স পটিস্সুত্ৰা [মহাৰ. ২৭০], সম্পটিচ্ছিত্ৰাতি অত্থো, ভিক্খু জনং ধম্মং সাৰেতি ¶ , জনো তস্স ভিক্খুনো অনুগিণাতি পটিগিণাতি, সাধুকারং দেতীতি অত্থো.

আরোচনত্থযোগে –

আরোচযামি ৰো ভিক্খৰে [ম. নি. ১.৪১৬], পটিৰেদযামি ৰো ভিক্খৰে [ম. নি. ১.৪১৬], আমন্তযামি ৰো ভিক্খৰে [দী. নি. ২.২১৮ (ৰিসদিসং)], ধম্মং ৰো দেসেস্সামি [ম. নি. ৩.১০৫], ভিক্খূনং ধম্মং দেসেতি, যথা নো ভগৰা ব্যাকরেয্য, নিরুত্তিং তে পৰক্খামি, অহং তে আচিক্খিস্সামি, অহং তে কিত্তযিস্সামি, ভিক্খূনং এতদৰোচ.

৩১০. তদত্থে [ক. ২৭৭; রূ. ৩০৩; নী. ৫৫৪].

তস্সা তস্সা ক্রিযায অত্থোতি তদত্থো, তদত্থে সম্পদানে চতুত্থী হোতি.

৩১১. সস্সায চতুত্থিযা [ক. ১০৯; রূ. ৩০৪; নী. ২৭৯-৮০].

অকারন্ততো চতুত্থীভূতস্স সস্স আযো হোতি ৰা.

ৰিনযো সংৰরত্থায, সংৰরো অৰিপ্পটিসারত্থায, অৰিপ্পটিসারো পামুজ্জত্থায, পামুজ্জং পীতত্থায, পীতি পস্সদ্ধত্থায, পস্সদ্ধি সুখত্থায, সুখং সমাধত্থায, সমাধি যথাভূতঞাণদস্সনত্থায, যথাভূতঞাণদস্সনং নিব্বিদত্থায, নিব্বিদা ৰিরাগত্থায, ৰিরাগো ৰিমুত্তত্থায, ৰিমুত্তি ৰিমুত্তিঞাণদস্সনত্থায, ৰিমুত্তিঞাণদস্সনং অনুপাদাপরিনিব্বানত্থায [পরি. ৩৬৬], অত্থায হিতায সুখায দেৰমনুস্সানং [ম. নি. ১.৫০], অলং কুক্কুচ্চায [পারা. ৩৮], অলং সম্মোহায, পাকায ৰজতি, যুদ্ধায গচ্ছতি, গামং পিণ্ডায পাৰিসিং [পাচি. ৯০২].

তুমত্থোপি ¶ তদত্থে সঙ্গয্হতি, অলং মিত্তে সুখাপেতুং, অমিত্তানং দুখায চ [জা. ২.১৭.১৩]. লোকানুকম্পায বুদ্ধো লোকে উপ্পজ্জতি, অলং ফাসুৰিহারায, অভিঞ্ঞায সম্বোধায নিব্বানায সংৰত্ততি [মহাৰ. ১৩].

অলমত্থযোগে –

অলং মল্লো মল্লস্স, অরহতি মল্লো মল্লস্স, অলং তে ইধ ৰাসেন [পারা. ৪৩৬], অলং তে হিরঞ্ঞসুৰণ্ণেন, কিং মে একেন তিণ্ণেন [বু. ৰং. ২.৫৬], কিং তে জটাহি দুম্মেধ, কিং তে অজিনসাটিযা [ধ. প. ৩৯৪].

মঞ্ঞনাপযোগে অনাদরে অপাণিস্মিমেৰ চতুত্থী, কট্ঠস্স তুৰং মঞ্ঞে, কলিঙ্গরস্স [কল়িঙ্গরস্স, কল়ঙ্গরস্স (ক.)] তুৰং মঞ্ঞে, জীৰিতং তিণাযপি ন মঞ্ঞতি.

অনাদরেতি কিং? সুৰণ্ণং তং মঞ্ঞে.

অপাণিস্মিন্তি কিং? গদ্রভং তুৰং মঞ্ঞে.

গত্যত্থানং নযনত্থানঞ্চ ধাতূনং কম্মনি চতুত্থী, অপ্পো সগ্গায গচ্ছতি [ধ. প. ১৭৪], যো মং দকায নেতি [জা. ১.৬.৯৭], নিরযাযুপকড্ঢতি [ধ. প. ৩১১], মূলায পটিকস্সেয্য [চূল়ৰ. ১১১].

আসীসনক্রিযাযোগে –

আযু ভৰতো হোতু, ভদ্দং তে হোতু, ভদ্দমত্থু তে [জা. ১.৮.১৫; জা. ২.১৭.১], কুসলং তে হোতু, অনামযং তে হোতু, সুখং তে হোতু, অত্থং তে হোতু, হিতং তে হোতু, কল্যাণং তে হোতু, স্ৰাগতং তে হোতু, সোত্থি তে হোতু সোত্থি গব্ভস্স [ম. নি. ২.৩৫১], মঙ্গলং তে হোতু.

সম্মুতিযোগে ¶ কম্মত্থে [ছট্ঠী], ইত্থন্নামস্স ভিক্খুনো রূপিযছড্ডকস্স সম্মুতি [পারা. ৫৯০], পত্তগাহাপকস্স সম্মুতিইচ্চাদি [পারা. ৬১৪].

আৰিকরণাদিযোগে –

তুয্হঞ্চস্স আৰি করোমি, তস্স মে সক্কো পাতুরহোসি, তস্স পহিণেয্য, ভিক্খূনং দূতং পাহেসি, কপ্পতি ভিক্খূনং আযোগো, ৰট্টতি ভিক্খূনং আযোগো, পত্থোদনো দ্ৰিন্নং তিণ্ণং নপ্পহোতি, একস্স পহোতি, একস্স পরিযত্তো, উপমং তে করিস্সামি [ম. নি. ১.২৫৮; জা. ২.১৯.২৪], অঞ্জলিং তে পগ্গণ্হামি [জা. ২.২২.৩২৭], তথাগতস্স ফাসু হোতি, আৰিকতা হিস্স ফাসু [মহাৰ. ১৩৪], লোকস্স অত্থো, লোকস্স হিতং, মণিনা মে অত্থো [পারা. ৩৪৪], ন মমত্থো বুদ্ধেন [পারা. ৫২], নমত্থু বুদ্ধানং নমত্থু বোধিযা [জা. ১.২.১৭], ৰিপস্সিস্স চ নমত্থু [দী. নি. ৩.২৭৭], নমো করোহি নাগস্স [ম. নি. ১.২৪৯], নমো তে পুরিসাজঞ্ঞ, নমো তে পুরিসুত্তম [অপ. থের ১.২.১২৯]. সোত্থি পজানং [দী. নি. ১.২৭৪], সুৰত্থি পজানং ইচ্চাদি.

চতুত্থীৰিভত্তিরাসি নিট্ঠিতো.

পঞ্চমীৰিভত্তিরাসি

কস্মিং অত্থে পঞ্চমী?

৩১২. পঞ্চম্যাৰধিস্মিং [ক. ২৯৫; রূ. ৩০৭; নী. ৬০৭; চং. ২.১.৮১; পা. ২.৩.২৮; ১.৪.২৪].

অৰধিযতি ৰৰত্থিযতি পদত্থো এতস্মাতি অৰধি, তস্মিং পঞ্চমী হোতি, অৰধীতি চ অপাদানং ৰুচ্চতি.

অপনেত্ৰা ইতো অঞ্ঞং আদদাতি গণ্হাতীতি অপাদানং. তং তিৰিধং নিদ্দিট্ঠৰিসযং, উপ্পাটৰিসযং, অনুমেয্যৰিসযন্তি.

তত্থ ¶ যস্মিং অপাদানৰিসযভূতো ক্রিযাৰিসেসো সরূপতো নিদ্দিট্ঠো হোতি, তং নিদ্দিট্ঠৰিসযং. যথা? গামা অপেন্তি মুনযো, নগরা নিগ্গতো রাজা.

যস্মিং পন সো পাঠসেসং কত্ৰা অজ্ঝাহরিতব্বো হোতি, তং উপ্পাটৰিসযং. যথা? ৰলাহকা ৰিজ্জোততে ৰিজ্জু, অগারস্মা অনগারিযং পব্বজিতোতি [মহাৰ. ৩০]. এত্থ হি ‘নিক্খমিত্ৰা’তি পদং অজ্ঝাহরিতব্বং.

যস্মিং পন সো নিদ্দিট্ঠো চ ন হোতি, অজ্ঝাহরিতুঞ্চ ন সক্কা, অথ খো অত্থতো অনুমানৰসেন সো ৰিঞ্ঞেয্যো হোতি, তং অনুমেয্যৰিসযং. যথা? মাথুরা পাটলিপুত্তকেহি অভিরূপতরা, সীলমেৰ সুতা সেয্যো [জা. ১.৫.৬৫], মযা ভিয্যো ন ৰিজ্জতি, অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্স ইচ্চাদি [ম. নি. ৩.২০৭]. ক্রিযং ৰিনা কারকং নাম ন সিজ্ঝতীতিকত্ৰা উক্কংসনক্রিযা এত্থ অনুমেতব্বা হোতি. এৰং ক্রিযাপদরহিতেসু দূরযোগাদীসুপি অৰিনাভাৰিক্রিযানুমানং ৰেদিতব্বং.

পুন চলা’চলৰসেন দুৰিধং.

চলং যথা? পুরিসো ধাৰতা অস্সা পততি, দ্ৰে মেণ্ডা যুজ্ঝিত্ৰা অঞ্ঞমঞ্ঞতো অপসক্কন্তি. এত্থ চ যদি চলং সিযা, কথং অৰধি নাম ভৰেয্য. অচ্চুতিলক্খণো হি অৰধীতি? ৰুচ্চতে-দ্ৰে মেণ্ডা সকসকক্রিযায চলন্তি, ইতরীতরক্রিযায অৰধী হোন্তীতি নত্থি এত্থ অৰধিলক্খণৰিরোধোতি.

অচলং যথা? গামা অপেন্তি মুনযো, নগরা নিগ্গতো রাজা.

পুন কাযসংসগ্গপুব্বকং, চিত্তসংসগ্গপুব্বকন্তি দুৰিধং হোতি, গামা অপেন্তি মুনযো, চোরা ভযং জাযতে. এত্থ চ ‘‘কিংৰ ¶ দূরো ইতো গামো, ইতো সা দক্খিণা দিসা [দী. নি. ৩.২৭৯]. ইতো একনৰুতিকপ্পে’’তি [দী. নি. ২.৪] আদীসু ৰদন্তস্স চিত্তসংসগ্গপুব্বকম্পি ৰেদিতব্বং. ‘‘ন মাতা পুত্ততো ভাযতি, ন চ পুত্তো মাতিতো ভাযতি, ভযা ভীতো ন ভাসসী’’তি [জা. ২.২১.১৩৮] পাল়ি. অত্থি তে ইতো ভযং [ম. নি. ২.৩৫০], নত্থি তে ইতো ভযং, যতো খেমং ততো ভযং [জা. ১.৯.৫৮], চোরা ভাযতি, চোরা ভীতো. ছট্ঠী চ, চোরস্স ভাযতি, চোরস্স ভীতো. দুতিযা চ, ‘‘কথং পরলোকং ন ভাযেয্য, এৰং পরলোকং ন ভাযেয্য, ভাযসি মং সমণ [সু. নি. সূচিলোমসুত্ত], নাহং তং ভাযামি [সু. নি. সূচিলোমসুত্ত], ভাযিতব্বং ন ভাযতি, নাহং ভাযামি ভোগিনং [জা. ২.২২.৮৩৫], ন মং মিগা উত্তসন্তী’’তি [জা. ২.২২.৩০৭] পাল়িপদানি দিস্সন্তি. তত্থ ‘‘ভোগিন’ন্তি নাগং, চোরা তসতি উত্তসতি চোরস্স ৰা, সব্বে তসন্তি দণ্ডস্স [ধ. প. ১২৯], পাপতো ওত্তপ্পতি জিগুচ্ছতি হরাযতি পাপেন ৰা.

যতো কিঞ্চি সিপ্পং ৰা ৰিজ্জং ৰা ধম্মং ৰা গণ্হাতি, তস্মিং অক্খাতরি পঞ্চমী, উপজ্ঝাযা অধীতে, উপজ্ঝাযা সিপ্পং গণ্হাতি, দ্ৰাসীতি বুদ্ধতো গণ্হিং, দ্ৰে সহস্সানি ভিক্খুতো. চতুরাসীতিসহস্সানি, যেমে ধম্মা পৰত্তিনো [থেরগা. ১০২৭].

যতো সুণাতি, তস্মিং পঞ্চমী, ছট্ঠী চ, ইতো সুত্ৰা, ইমস্স সুত্ৰা ৰা, যম্হা ধম্মং ৰিজানেয্য, সম্মাসম্বুদ্ধদেসিতং [ধ. প. ৩৯২].

যতো লভতি, তস্মিং পঞ্চমী, সঙ্ঘতো লভতি, গণতো লভতি.

যতো পরাজযতি, যতো পভৰতি, যতো জাযতি, তস্মিং পঞ্চমী, বুদ্ধস্মা পরাজযন্তি অঞ্ঞতিত্থিযা, পাল়িযং পন পরাজিযোগে অপাদানং পাঠসেসৰসেন লব্ভতি, তস্মিং খো ¶ পন সঙ্গামে দেৰা জিনিংসু, অসুরা পরাজিনিংসু. এত্থ দেৰেহি পরাজিনিংসূতি পাঠসেসো. ‘‘মযং জিতাম্হা অম্বকায. হিমৰন্তা পভৰন্তি পঞ্চ মহানদিযো [অ. নি. অট্ঠ. ৩.৮.১৯], অযং ভাগীরথী গঙ্গা, হিমৰন্তা পভাৰিতা’’তি পাল়ি [অপ. থের ১.১.২৫৫], চোরা ভযং জাযতে, কামতো জাযতে ভযং [ধ. প. ২১৫], জাতং সরণতো ভযং [জা. ১.১.৩৬; ১.২.১৩; ১.৯.৫৬, ৫৭, ৫৯], যংকিঞ্চি ভযং ৰা ৰেরং ৰা উপদ্দৰো ৰা উপসগ্গো ৰা জাযতি, সব্বং তং বালতো জাযতি, নো পণ্ডিততো, কামতো জাযতী সোকো [ধ. প. ২১৪], উভতো সুজাতো পুত্তো [দী. নি. ১.৩১১], উরস্মা জাতো, উরে জাতো ৰা, চীৰরং উপ্পজ্জেয্য সঙ্ঘতো ৰা গণতো ৰা ঞাতিমিত্ততো ৰা [পারা. ৫০০ (থোকং ৰিসদিসং)].

অঞ্ঞত্থানং যোগে পঞ্চমী, ততো অঞ্ঞং, ততো পরং [মহাৰ. ৩৪৬], ততো অপরেন সমযেন [পারা. ১৯৫].

উপসগ্গানং যোগে পন –

৩১৩. অপপরীহি ৰজ্জনে [ক. ২৭২; রূ. ৩০৯; নী. ৫৫৮, ৫৬৮; চং. ২.১.৮২; পা. ১.৪.৮৮; ২.৩.১০].

ৰজ্জনে পৰত্তেহি অপ, পরীহি যোগে পঞ্চমী হোতি.

অপপব্বতা ৰস্সতি দেৰো, পরিপব্বতা ৰস্সতি দেৰো, অপসালায আযন্তি ৰাণিজা, পরিসালায আযন্তি ৰাণিজা, পব্বতং সালং ৰজ্জেত্ৰাতি অত্থো. কচ্চাযনে পন ‘‘উপরিপব্বতা দেৰো ৰস্সতী’’তি পাঠো [পোরাণপাঠো], পরিপব্বতাতি যুত্তো. উপরিযোগে পন সত্তমীযেৰ দিস্সতি – ‘‘তস্মিং উপরিপব্বতে [ম. নি. ৩.২১৬; জা. ১.৮.১৬], উপরিপাসাদে [দী. নি. ২.৪০৮], উপরিৰেহাসে, উপরিৰেহাসকুটিযা’’তি, [পাচি. ১৩০] তত্থ পব্বতস্স উপরি উপরিপব্বতন্তি অত্থো.

৩১৪. পটিনিধিপটিদানেসু পতিনা [ক. ২৭২; রূ. ৩০৯; নী. ৫৫৮, ৫৬৮; চং. ২.১.৮৩; পা. ২.৩.১১; ১.৪.৯.২].

পটিনিধি ¶ নাম পটিবিম্বট্ঠপনং, পটিদানং নাম পটিভণ্ডদানং তেসু পৰত্তেন পতিনা যোগে পঞ্চমী হোতি.

বুদ্ধস্মা পতি সারিপুত্তো ধম্মং দেসেতি, তেলস্মা পতি ঘতং দেতি.

৩১৫. রিতে দুতিযা চ [ক. ২৭২; রূ. ৩০৯; নী. ৫৫৮, ৫৬৮; চং. ২.১.৮৪; পা. ২.৩.২৯].

রিতেসদ্দেন যোগে পঞ্চমী হোতি দুতিযা চ.

রিতে সদ্ধম্মা, রিতে সদ্ধম্মং.

৩১৬. ৰিনাঞ্ঞত্রেহি ততিযা চ [ক. ২৭২; রূ. ৩০৯; নী. ৫৫৮, ৫৬৮; চং. ২.১.৮৫; পা. ২.৩.৩২; ‘ৰিনাঞ্ঞত্র ততিযাচ’ (বহূসু)].

ৰজ্জনে পৰত্তেহি ৰিনা, অঞ্ঞত্রসদ্দেহি যোগে পঞ্চমী, দুতিযা, ততিযা চ হোন্তি.

ৰিনা সদ্ধম্মা, ৰিনা সদ্ধম্মং, ৰিনা সদ্ধম্মেন, অঞ্ঞত্র সদ্ধম্মা, অঞ্ঞত্র সদ্ধম্মং, অঞ্ঞত্র সদ্ধম্মেন.

৩১৭. পুথুনানাহি চ [ক. ২৭২; রূ. ৩০৯; নী. ৫৫৮, ৫৬৮; চং. ২.১.৮৬; পা. ২.৩.৩২; ‘পুথনানাহি চ’ (বহূসু)].

ৰজ্জনে পৰত্তেহি পুথু, নানাসদ্দেহি চ যোগে পঞ্চমী, ততিযা চ হোন্তি.

পুথগেৰ জনস্মা, পুথগেৰ জনেন, নানা সদ্ধম্মা, নানা সদ্ধম্মেন, পিযেহি মনাপেহি নানাভাৰো ৰিনাভাৰো [দী. নি. ২.১৮৩; চূল়ৰ. ৪৩৭]. ‘‘তে ভিক্খূ নানাকুলা পব্বজিতা’’তি এত্থ পন নানাপ্পকারত্থো নানাসদ্দো, ন ৰজ্জনত্থো, এত্থ চ ৰজ্জনত্থো নাম ৰিযোগত্থো অসম্মিস্সত্থো.

মরিযাদা’ভিৰিধীসু ¶ পৰত্তেহি আসদ্দ, যাৰসদ্দেহি যোগেপি পঞ্চমী, দুতিযা চ.

তত্থ যস্স অৰধিনো সম্বন্ধিনী ক্রিযা, তং বহিকত্ৰা পৰত্ততি, সো মরিযাদো. যথা? আপব্বতা খেত্তং তিট্ঠতি আপব্বতং ৰা, যাৰপব্বতা খেত্তং তিট্ঠতি যাৰপব্বতং ৰা.

যস্স সম্বন্ধিনী ক্রিযা, তং অন্তোকত্ৰা ব্যাপেত্ৰা পৰত্ততি, সো অভিৰিধি. যথা? আভৰগ্গা ভগৰতো কিত্তিসদ্দো অব্ভুগ্গতো আভৰগ্গং ৰা, ভৰতো আভৰগ্গং ধম্মতো আগোত্রভুং সৰন্তীতি আসৰা, যাৰভৰগ্গা যাৰভৰগ্গং ৰা, তাৰদেৰ যাৰব্রহ্মলোকা সদ্দো অব্ভুগ্গতো.

আরব্ভে, সহত্থে চ পঞ্চমী, যতোহং ভগিনি অরিযায জাতিযা জাতো [ম. নি. ২.৩৫১], যতো পট্ঠাযাতি অত্থো. যতো সরামি অত্তানং, যতো পত্তোস্মি ৰিঞ্ঞুতং [জা. ২.২২.৩০৭]. যতো পট্ঠায, যতো পভুতি.

সহত্থে –

সহ সব্বঞ্ঞুতঞ্ঞাণপ্পটিলাভা, সহ পরিনিব্বানা [দী. নি. ২.২২০], সহ দস্সনুপ্পাদা.

‘‘উপ্পাদা ৰা তথাগতানং অনুপ্পাদা ৰা তথাগতান’’ন্তি [সং. নি. ২.২০], এত্থ ভাৰলক্খণে পঞ্চমী.

‘‘সহত্থা দানং দেতি, সহত্থা পটিগ্গণ্হাতী’’তি এত্থ করণে.

‘‘অজ্জতগ্গে পাণুপেতং [দী. নি. ১.২৫০], তদগ্গে খো ৰাসেট্ঠ’’ইচ্চাদীসু [দী. নি. ৩.১৩০], আরব্ভে সত্তমী.

‘‘যত্ৰাধিকরণং ¶ [দী. নি. ১.২১৩], যতোনিদানং [সু. নি. ২৭৫], ততোনিদানং’’ ইচ্চাদীসু [ম. নি. ১.২৩৮] ৰাক্যে ইচ্ছিতে সতি হেত্ৰত্থে পঞ্চমী, সমাসে ইচ্ছিতে সতি অত্থমত্তে পঞ্চমী.

দ্ৰিন্নং কারকানং ক্রিযানঞ্চ মজ্ঝে পৰত্তকালদ্ধানৰাচীহি পঞ্চমী, লুদ্দকো পক্খস্মা মিগং ৰিজ্ঝতি, কোসা কুঞ্জরং ৰিজ্ঝতি. এত্থ চ লুদ্দকো সকিং মিগং ৰিজ্ঝিত্ৰা পক্খব্ভন্তরম্হি ন ৰিজ্ঝি, পক্খে পরিপুণ্ণে পুন ৰিজ্ঝতি, পক্খসদ্দো দ্ৰিন্নং ৰিজ্ঝনৰারানং মজ্ঝে কালৰাচী হোতি, দ্ৰেপি ৰিজ্ঝনক্রিযা কারকেহি সহেৰ সিজ্ঝন্তীতি কারকানঞ্চ মজ্ঝেতি ৰুচ্চতি. ৰুত্তিযং পন ‘‘অজ্জ ভুত্ৰা দেৰদত্তো দ্ৰিহে ভুঞ্জিস্সতি, দ্ৰিহা ভুঞ্জিস্সতি, অত্রট্ঠো’যমিস্সাসো কোসে লক্খং ৰিজ্ঝতি, কোসা লক্খং ৰিজ্ঝতী’’তি [মোগ. ৭৯] এৰং সত্তমীৰসেন পরিপুণ্ণৰাক্যম্পি ৰুত্তং. পাল়িযং ‘‘অনাপত্তি ছব্বস্সা করোতি [পারা. ৫৬৪], অতিরেকছব্বস্সা করোতী’’তি [পারা. ৫৬৪], ‘‘ছব্বস্সানী’’তিপি পাঠো.

রক্খনত্থানং যোগে –

যঞ্চ ৰত্থুং গুত্তং ইচ্ছিযতে, যতো চ গুত্তং ইচ্ছিযতে, তত্থ পঞ্চমী, যৰেহি গাৰো রক্খতি ৰারেতি, তণ্ডুলা কাকে রক্খতি ৰারেতি, তং মং পুঞ্ঞা নিৰারেসি, পাপা চিত্তং নিৰারযে [ধ. প. ১১৬], ন নং জাতি নিৰারেতি, দুগ্গত্যা গরহায ৰা [সু. নি. ১৪১ (ন নে)]. রাজতো ৰা চোরতো ৰা আরক্খং গণ্হন্তু.

অন্তরধানত্থযোগে –

যস্স অদস্সনং ইচ্ছিযতি, তস্মিং পঞ্চমী, উপজ্ঝাযা অন্তরধাযতি সিস্সো, নিলীযতীতি অত্থো. পাল়িযং পন যস্স অদস্সনং ইচ্ছিযতি, তস্মিং ছট্ঠী এৰ- ‘‘অন্তরধাযিস্সামি সমণস্স ¶ গোতমস্স, অন্তরধাযিস্সামি সমণস্স গোতমস্সা’’তি. ‘‘ন সক্খি মে অন্তরধাযিতু’’ন্তি পাল়ি, ‘অন্তরধাযিস্সামী’তি অন্তরিতে অচক্খুৰিসযে ঠানে অত্তানং ঠপেস্সামীত্যত্থো, নিলীযিস্সামীতি ৰুত্তং হোতি.

যস্মিং ঠানে অন্তরধাযতি, তস্মিং সত্তমী এৰ দিস্সতি, অতিখিপ্পং লোকে চক্খু অন্তরধাযিস্সতি [দী. নি. ২.২২৪ (ৰিসদিসং)], জেতৰনে অন্তরধাযিত্ৰা, ব্রহ্মলোকে অন্তরধাযিত্ৰা, মদ্দকুচ্ছিস্মিং অন্তরধাযিত্ৰা, তত্থেৰন্তরধাযী [সং. নি. ১.১] ইচ্চাদি. ‘‘ভগৰতো পুরতো অন্তরধাযিত্ৰা’’তি এত্থপি তোসদ্দো সত্তম্যত্থে এৰ. ‘‘সক্কো নিমিস্স রঞ্ঞো সম্মুখে অন্তরহিতো’’তি পাল়ি. ‘ধজতৰনে অন্তরধাযিত্ৰা’তি জেতৰনে অঞ্ঞেসং অদস্সনং কত্ৰা, অঞ্ঞেসং অচক্খুৰিসযং কত্ৰাতি অত্থো. ‘‘অন্ধকারো অন্তরধাযতি, আলোকো অন্তরধাযতি, সদ্ধম্মো অন্তরধাযতি, সাসনং অন্তরধাযতি’’ ইচ্চাদীসু পন ছট্ঠী, সত্তমিযো যথাসম্ভৰং ৰেদিতব্বা.

দূরত্থযোগে –

কিংৰ দূরো ইতো গামো, কচ্চি আরা পমাদম্হা [সু. নি. ১৫৬], অথো আরা পমাদম্হা [সু. নি. ১৫৭], গামতো অৰিদূরে, আরকা তে মোঘপুরিসা ইমস্মা ধম্মৰিনযা, আরকা তেহি ভগৰা, কিলেসেহি আরকাতি অরহং, আরা সো আসৰক্খযা [ধ. প. ২৫৩]. দুতিযা চ ততিযা চ ছট্ঠী চ, আরকা ইমং ধম্মৰিনযং ইমিনা ধম্মৰিনযেন ৰা, আরকা মন্দবুদ্ধীনং [ৰিসুদ্ধি টী. ১.১৩০].

দূরত্থে –

দূরতোৰ নমস্সন্তি, অদ্দসা খো ভগৰন্তং দূরতোৰ আগচ্ছন্তং [দী. নি. ১.৪০৯], কিন্নু তিট্ঠথ আরকা, তস্মা তিট্ঠাম আরকা. দুতিযা চ ততিযা চ, দূরং গামং আগতো, দূরেন গামেন আগতো ¶ , দূরা গামা আগতো ইচ্চেৰত্থো, দূরং গামেন ৰা.

অন্তিকত্থযোগে –

অন্তিকং গামা, আসন্নং গামা, সমীপং গামা. দুতিযা চ ততিযা চ ছট্ঠী চ, অন্তিকং গামং, অন্তিকং গামেন, অন্তিকং গামস্স.

কালদ্ধানং পরিমাণৰচনে –

ইতো মথুরায চতূসু যোজনেসু সঙ্কস্সং, রাজগহতো পঞ্চচত্তালীসযোজনে সাৰত্থি, ইতো একনৰুতিকপ্পে [দী. নি. ২.৪], ইতো একতিংসে কপ্পে [দী. নি. ২.৪], ইতো সত্তমে দিৰসে, ইতো তিণ্ণং মাসানং অচ্চযেন পরিনিব্বাযিস্সামি [দী. নি. ২.১৬৮; উদা. ৫১] ইচ্চাদি.

পমাণত্থে –

আযামতো চ ৰিত্থারতো চ যোজনং, পরিক্খেপতো নৰযোজনসতপরিমাণো মজ্ঝিমদেসো পরিক্খেপেন ৰা, দীঘসো নৰৰিদত্থিযো [পাচি. ৫৪৮], যোজনং আযামেন যোজনং ৰিত্থারেন যোজনং উব্বেধেন সাসপরাসি [সং. নি. ২.১২৯] ইচ্চাদি.

ত্ৰালোপেপি পঞ্চমী. এত্থ চ ত্ৰালোপো নাম পরিপুণ্ণৰাক্যে লদ্ধব্বস্স ত্ৰান্তপদস্স অপরিপুণ্ণৰাক্যে নত্থি ভাৰো, যঞ্চ পদং ত্ৰান্তপদে সতি কম্মং ৰা হোতি অধিকরণং ৰা. তং ত্ৰান্তপদে অসতি পদন্তরে অৰধি হোতি, তস্মিং পঞ্চমী, পাসাদা ৰা পাসাদং সঙ্কমেয্য [সং. নি. ১.১৩২], হত্থিক্খন্ধা ৰা হত্থিক্খন্ধং সঙ্কমেয্য [সং. নি. ১.১৩২] ইচ্চাদি. এত্থ চ পঠমং একং পাসাদং অভিরূহিত্ৰা পুন অঞ্ঞং পাসাদং সঙ্কমেয্যাতি ৰা পঠমং একস্মিং পাসাদে নিসীদিত্ৰা পুন অঞ্ঞং পাসাদং সঙ্কমেয্যাতি ৰা এৰং পরিপুণ্ণৰাক্যং ৰেদিতব্বং. ‘‘অন্ধকারা ৰা অন্ধকারং গচ্ছেয্য, তমা ৰা ¶ তমং গচ্ছেয্যা’’তি [সং. নি. ১.১৩২] পাল়ি. তথা রট্ঠা রট্ঠং ৰিচরতি, গামা গামং ৰিচরতি, ৰনা ৰনং ৰিচরতি, ৰিহারতো ৰিহারং গচ্ছতি, পরিৰেণতো পরিৰেণং গচ্ছতি, ভৰতো ভৰং গচ্ছতি, কুলতো কুলং গচ্ছতি ইচ্চাদি. তথা ৰিনযা ৰিনযং পুচ্ছতি, অভিধম্মা অভিধম্মং পুচ্ছতি, ৰিনযা ৰিনযং কথেতি, অভিধম্মা অভিধম্মং কথেতি. এত্থপি পঠমং একং ৰিনযৰচনং পুচ্ছিত্ৰা ৰা একস্মিং ৰিনযৰচনে ঠত্ৰা ৰা পুন অঞ্ঞং ৰিনযৰচনং পুচ্ছতীতি পরিপুণ্ণৰাক্যং ৰেদিতব্বং. ৰুত্তিযং পন ‘‘পাসাদং আরুয্হ পেক্খতি, পাসাদা পেক্খতি, আসনে পৰিসিত্ৰা পেক্খতি, আসনা পেক্খতী’’তি ৰুত্তং.

দিসত্থযোগে দিসত্থে চ পঞ্চমী, ইতো সা পুরিমা দিসা [দী. নি. ৩.২৭৮], ইতো সা দক্খিণা দিসা [দী. নি. ৩.২৭৮], অৰীচিতো উপরি, উদ্ধং পাদতলা, অধো কেসমত্থকা [দী. নি. ২.৩৭৭; ম. নি. ১.১১০].

দিসত্থে –

পুরিমতো গামস্স, দক্খিণতো গামস্স, উপরিতো পব্বতস্স, হেট্ঠতো পাসাদস্স, পুরত্থিমতো, দক্খিণতো, যতো খেমং, ততো ভযং [জা. ১.৯.৫৮], যতো যতো সম্মসতি, খন্ধানং উদযব্বযং [ধ. প. ৩৭৪] ইচ্চাদি.

পুব্বাদিযোগেপি পঞ্চমী, পুব্বেৰ মে সম্বোধা [অ. নি. ৩.১০৪], ইতো পুব্বে, ততো পুব্বে, ইতো পরা পচ্চন্তিমা জনপদা [মহাৰ. ২৫৯], ততো পুরে, ততো পচ্ছা, ততো উত্তরি [পারা. ৪৯৯] ইচ্চাদি.

ৰিভত্তত্থে চ পঞ্চমী ছট্ঠী চ. ৰিভত্তি নাম পগেৰ ৰিসুংভূতস্স অত্থস্স কেনচি অধিকেন ৰা হীনেন ৰা ভাগেন তদঞ্ঞতো পুথক্করণং, মাথুরা পাটলিপুত্তকেহি অভিরূপতরা, যতো পণীততরো ৰা ৰিসিট্ঠতরো ৰা নত্থি, অত্তদন্তো ততো ৰরং [ধ. প. ৩২২], ছন্নৰুতীনং পাসণ্ডানং পৰরং যদিদং সুগতৰিনযো ¶ , সদেৰকস্স লোকস্স, সত্থা লোকে অনুত্তরো, অগ্গোহমস্মি লোকস্স [ম. নি. ৩.২০৭], জেট্ঠোহমস্মি লোকস্স [ম. নি. ৩.২০৭], সেট্ঠোহমস্মি লোকস্স [ম. নি. ৩.২০৭], পঞ্ঞৰন্তা নাম সারিপুত্ততো হীনা সারিপুত্তস্স ৰা, ততো অধিকং ৰা ঊনং ৰা ন ৰট্টতি ইচ্চাদি.

ৰিরমণত্থযোগে –

আরতী ৰিরতী পাপা [খু. পা. ৫.৮], পাণাতিপাতা ৰেরমণি [খু. পা. ২.১] ইচ্চাদি.

সুদ্ধত্থযোগে –

লোভনীযেহি ধম্মেহি সুদ্ধো ইচ্চাদি.

মোচনত্থযোগে পঞ্চমী ততিযা চ, সো পরিমুচ্চতি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, পরিমুত্তো সো দুক্খস্মাতি ৰদামি [সং. নি. ৩.২৯], মোক্খন্তি মারবন্ধনা [ধ. প. ৩৭], ন তে মুচ্চন্তি মচ্চুনা ইচ্চাদি, সব্বত্থ অৰধিঅত্থো ৰেদিতব্বো.

হেত্ৰত্থে –

কস্মা হেতুনা, কেন হেতুনা, কস্মা নু তুম্হং কুলে দহরা ন মিয্যরে [জা. ১.১০.৯২ (মীযরে)], তস্মাতিহ ভিক্খৰে [সং. নি. ২.১৫৭]. দুতিযা ততিযা ছট্ঠী চ, কিংকারণং [জা. অট্ঠ. ৬.২২.উমঙ্গজাতকৰণ্ণনা], যত্ৰাধিকরণং [দী. নি. ১.২১৩], যতোনিদানং [সু. নি. ২৭৫], ততোনিদানং [ম. নি. ১.২৩৮], কেন কারণেন [জা. অট্ঠ. ৪.২০.মাতঙ্গজাতকৰণ্ণনা], তং কিস্সহেতু [ম. নি. ১.২], কিস্স তুম্হে কিলমথ ইচ্চাদি.

ৰিৰেচনত্থযোগে –

ৰিৰিচ্চেৰ কামেহি ৰিৰিচ্চ অকুসলেহি ধম্মেহি [দী. নি. ১.২২৬], ৰিৰিত্তো পাপকা ধম্মা.

বন্ধনত্থযোগে ¶ –

৩১৮. পঞ্চমীণে ৰা [ক. ২৯৬; রূ. ৩১৪; নী. ৬০৮; চং. ২.১.৬৯; পা. ২.৩.২৪].

ইণভূতে হেতুম্হি পঞ্চমী হোতি ৰা.

সতস্মা বন্ধো নরো সতেন ৰা.

৩১৯. গুণে [চং. ২.১.৭০; পা. ২.৩.২৫].

অজ্ঝত্তভূতো হেতু গুণো নাম, অগুণোপি ইধ গুণোত্ৰেৰ ৰুচ্চতি, তস্মিং পঞ্চমী হোতি ৰা.

জল়ত্তা বন্ধো নরো জল়ত্তেন ৰা, অত্তনো বালত্তাযেৰ বন্ধোতি অত্থো, পঞ্ঞায বন্ধনা মুত্তো, ৰাচায মরতি, ৰাচায মুচ্চতি, ৰাচায পিযো হোতি, ৰাচায দেস্সো, ইস্সরিযা জনং রক্খতি রাজা ইস্সরিযেন ৰা, সীলতো নং পসংসন্তি [অ. নি. ৪.৬] সীলেন ৰা, হুত্ৰা অভাৰতো অনিচ্চা, উদযব্বযপীল়নতো দুক্খা, অৰিজ্জানিরোধা সঙ্খারনিরোধো [উদা. ২], সঙ্খারনিরোধা ৰিঞ্ঞাণনিরোধো [উদা. ২], চতুন্নং অরিযসচ্চানং অনঞ্ঞা অপ্পটিৰেধা দীঘমদ্ধানং সংসরন্তি [দী. নি. ২.১৮৬ (ৰিসদিসং)] ইচ্চাদি.

পঞ্হা, কথনেসুপি পঞ্চমী, কুতো ভৰং, অহং পাটলিপুত্ততো ইচ্চাদি.

থোকত্থেপি অসত্ৰৰচনে পঞ্চমী, সত্ৰং ৰুচ্চতি দব্বং, থোকা মুচ্চতি থোকেন ৰা, মুচ্চনমত্তং হোতীতি ৰুত্তং হোতি ‘‘নদিং তরন্তো মনং ৰুল়্হো’’তি [মহাৰ. ১৪৮] এত্থ ৰিয. অপ্পমত্তকা মুচ্চতি অপ্পমত্তকেন ৰা, কিচ্ছা মুচ্চতি কিচ্ছেন ৰা, কিচ্ছা লদ্ধো পিযো পুত্তো [জা. ২.২২.৩৫৩], কিচ্ছা মুত্তা’ম্হ দুক্খস্মা, যাম দানি মহোসধ [জা. ২.২২.৭০০].

অসত্ৰৰচনেতি ¶ কিং? পচ্চতি মুনিনো ভত্তং, থোকং থোকং ঘরে ঘরেতি [থেরগা. ২৪৮ (কুলে কুলে)].

‘‘অনুপুব্বেন মেধাৰী, থোকং থোকং খণে খণে [ধ. প. ২৩৯]’’ ইচ্চাদীসু ক্রিযাৰিসেসনে দুতিযা.

অকত্তরিপি পঞ্চমী, তস্স কম্মস্স কতত্তা উপচিতত্তা উস্সন্নত্তা ৰিপুলত্তা তথাগতো সুপ্পতিট্ঠিতপাদো হোতি [দী. নি. ৩.২০১]. এত্থ চ ‘অকত্তরী’তি অকারকে ঞাপকহেতুম্হীতি ৰদন্তি. ঞাসে পন ‘‘অকত্তরীতি হেত্ৰত্থে সঙ্গণ্হাতি. যত্থ হি কত্তুবুদ্ধি সঞ্জাযতে, সোৰ কত্তা ন হোতীতি ৰত্তুং সক্কা’’তি ৰুত্তং. এতেন কত্তুসদিসো জনকহেতু অকত্তা নামাতি দীপেতি, কম্মস্স কতত্তাইচ্চাদি চ জনকহেতু এৰাতি.

ভিয্যত্থযোগে –

যোধ সীতঞ্চ উণ্হঞ্চ, তিণা ভিয্যো ন মঞ্ঞতি [দী. নি. ৩.২৫৩], সুখা ভিয্যো সোমনস্সং [দী. নি. ২.২৮৭], খন্ত্যা ভিয্যো ন ৰিজ্জতি [সং. নি. ১.২৫০], মযা ভিয্যো ন ৰিজ্জতি, সোতুকামাত্থ তুম্হে ভিক্খৰে ভিয্যোসোমত্তায পুব্বেনিৰাসকথং, অত্তমনো ত্ৰং হোহি পরং ৰিয মত্তায, অহম্পি অত্তমনো হোমি পরং ৰিয মত্তায.

পঞ্চমীৰিভত্তিরাসি নিট্ঠিতো.

ছট্ঠীৰিভত্তিরাসি

কস্মিং অত্থে ছট্ঠী?

৩২০. ছট্ঠী সম্বন্ধে [ক. ৩০১; রূ. ৩১৫; নী. ৬০৯; চং. ২.১.৯৫; পা. ২.৩.৫০].

দ্ৰিন্নং সম্বন্ধীনং কেনচি পকারেন আযত্তভাৰো সম্বন্ধো নাম, সম্বন্ধে জোতেতব্বে ৰিসেসনসম্বন্ধিম্হি ছট্ঠী হোতি.

তত্থ ¶ ক্রিযাকারকসঞ্জাতো অস্সেদম্ভাৰহেতুকো সম্বন্ধো নামাতি ৰুত্তং. তত্থ দ্ৰে সম্বন্ধিনো অঞ্ঞমঞ্ঞং তংতংক্রিযং করোন্তি, তং দিস্ৰা ‘‘ইমে অঞ্ঞমঞ্ঞসম্বন্ধিনো’’তি জানন্তস্স দ্ৰিন্নং কারকানং দ্ৰিন্নং ক্রিযানঞ্চ সংযোগং নিস্সায সম্বন্ধোপি ৰিদিতো হোতি, এৰং সম্বন্ধো ক্রিযাকারকসঞ্জাতো, ‘ইমস্স অয’ন্তি এৰং পৰত্তবুদ্ধিযা হেতুভূতত্তা অস্সেদম্ভাৰহেতুকো চ.

তত্থ সম্বন্ধো তিৰিধো সামিসম্বন্ধো, নানাত্তসম্বন্ধো, ক্রিযাকারকসম্বন্ধোতি.

তত্থ ‘সামী’তি যস্স কস্সচি ৰিসেসনসম্বন্ধিনো নামং, তস্মা ৰিসেস্যপদত্থস্স তংতংৰিসেসনভাৰেন সম্বন্ধো সামিসম্বন্ধো নাম.

সো ৰিসেস্যপদত্থভেদেন অনেকৰিধো.

তত্থ তস্স মাতা, তস্স পিতাইচ্চাদি জনকসম্বন্ধো নাম.

তস্সা পুত্তো, তস্সা ধীতা ইচ্চাদি জঞ্ঞসম্বন্ধো নাম.

তস্স ভাতা, তস্স ভগিনী ইচ্চাদি কুলসম্বন্ধো নাম.

সক্কো দেৰানমিন্দো [সং. নি. ১.২৪৮] ইচ্চাদি সামিসম্বন্ধো নাম.

পহূতং মে ধনং সক্ক [জা. ১.১৫.৭২], ভিক্খুস্স পত্তচীৰরং ইচ্চাদি সংসম্বন্ধো নাম.

অম্বৰনস্স অৰিদূরে, নিব্বানস্সেৰ সন্তিকে [ধ. প. ৩২] ইচ্চাদি সমীপসম্বন্ধো নাম.

সুৰণ্ণস্স রাসি, ভিক্খূনং সমূহো ইচ্চাদি সমূহসম্বন্ধো নাম.

মনুস্সস্সেৰ তে সীসং [জা. ১.৪.৮১], রুক্খস্স সাখা ইচ্চাদি অৰযৰসম্বন্ধো নাম.

সুৰণ্ণস্স ¶ ভাজনং, অলাবুস্স কটাহং, ভট্ঠধঞ্ঞানং সত্তু ইচ্চাদি ৰিকারসম্বন্ধো নাম.

যৰস্স অঙ্কুরো, মেঘস্স সদ্দো, পুপ্ফানং গন্ধো, ফলানং রসো, অগ্গিস্স ধূমো ইচ্চাদি কারিযসম্বন্ধো নাম.

খন্ধানং জাতি, খন্ধানং জরা, খন্ধানং ভেদো [সং. নি. ২.১] ইচ্চাদি অৰত্থাসম্বন্ধো নাম.

সুৰণ্ণস্স ৰণ্ণো, ৰণ্ণো ন খীয্যেথ তথাগতস্স [দী. নি. অট্ঠ. ১.৩০৪], বুদ্ধস্স কিত্তিসদ্দো, সিপ্পিকানং সতং নত্থি [জা. ১.১.১১৩], তিলানং মুট্ঠি ইচ্চাদি গুণসম্বন্ধো নাম.

পাদস্স উক্খিপনং, হত্থস্স সমিঞ্জনং, ধাতূনং গমনং ঠানং ইচ্চাদি ক্রিযাসম্বন্ধো নাম.

চাতুমহারাজিকানং ঠানং ইচ্চাদি ঠানসম্বন্ধো নাম. এৰমাদিনা নযেন সামিসম্বন্ধো অনেকসহস্সপ্পভেদো, সো চ ক্রিযাসম্বন্ধাভাৰা কারকো নাম ন হোতি. যদি এৰং ‘‘পাদস্স উক্খিপনং’’ ইচ্চাদি ক্রিযাসম্বন্ধো নামাতি ইদং ন যুজ্জতীতি? ৰুচ্চতে – ক্রিযাসম্বন্ধাভাৰাতি ইদং সাধকভাৰেন সম্বন্ধাভাৰং সন্ধায ৰুত্তং, সিদ্ধায পন ক্রিযায সম্বন্ধং সন্ধায ক্রিযাসম্বন্ধো নাম ৰুত্তোতি.

নানাত্তসম্বন্ধে পন নানাঅত্থেসু ছট্ঠী হোতি. তত্থ ণী, আৰীপচ্চযানং কম্মে নিচ্চং ছট্ঠী, ঝানস্স লাভী, চীৰরস্স লাভী, ধনস্স লাভী, আদীনৰস্স দস্সাৰী, অত্থি রূপানং দস্সাৰী, অত্থি সমৰিসমস্স দস্সাৰী, অত্থি তারকরূপানং দস্সাৰী, অত্থি চন্দিমসূরিযানং দস্সাৰী.

তু, অক, অন, ণপচ্চযানং যোগে ক্ৰচি কম্মত্থে ছট্ঠী.

তুপচ্চযে তাৰ –

তস্স ¶ ভৰন্তি ৰত্তারো [ম. নি. ২.১৭৩], সহসা কম্মস্স কত্তারো, অমতস্স দাতা [ম. নি. ১.২০৩], ভিন্নানং সন্ধাতা [দী. নি. ১.৯, ১৬৪], সহিতানং ৰা অনুপ্পদাতা [দী. নি. ১.৯, ১৬৪] ইচ্চাদি.

ক্ৰচীতি কিং? গম্ভীরঞ্চ কথং কত্তা [অ. নি. ৭.৩৭], গাধং কত্তা নোৰসিতা [অ. নি. ৪.১০৭], কালেন ধম্মীকথং ভাসিতা, সরসি ত্ৰং এৰরূপং ৰাচং ভাসিতা, পরেসং পুঞ্ঞং অনুমোদেতা, বুজ্ঝিতা সচ্চানি [মহানি. ১৯২] ইচ্চাদি.

অকপচ্চযে –

কম্মস্স কারকো নত্থি, ৰিপাকস্স চ ৰেদকো [ৰিসুদ্ধি ২.৬৮৯], অৰিসংৰাদকো লোকস্স [দী. নি. ১.৯] ইচ্চাদি.

ক্ৰচীতি কিং? মহতিং মহিং অনুসাসকো, জনং অহেঠকো, কটং কারকো, পসৰো ঘাতকো ইচ্চাদি.

অনপচ্চযে –

পাপস্স অকরণং সুখং [ধ. প. ৬১], ভারস্স উক্খিপনং, হত্থস্স গহণং, হত্থস্স পরামসনং, অঞ্ঞতরস্স অঙ্গস্স পরামসনং [পারা. ২৭০] ইচ্চাদি.

ক্ৰচীতি কিং? ভগৰন্তং দস্সনায [উদা. ২৩] ইচ্চাদি.

ণপচ্চযে –

অচ্ছরিযো অরজকেন ৰত্থানং রাগো, অগোপালকেন গাৰীনং দোহো, অপ্পপুঞ্ঞেন লাভানং লাভো, হত্থস্স গাহো, পত্তস্স পটিগ্গাহো ইচ্চাদি.

ত্ৰাপচ্চযেপি ¶ ক্ৰচি কম্মনি ছট্ঠী, অলজ্জীনং নিস্সায, আযস্মতো নিস্সায ৰচ্ছামি, চতুন্নং মহাভূতানং উপাদায পসাদো [ধ. স. ৫৯৬-৫৯৯ (উপাদায)] ইচ্চাদি.

কত্তরি ত, তৰন্তু, তাৰী, মান’ন্তানং যোগে পন কম্মনি দুতিযা এৰ, সুখকামো ৰিহারং কতো, গামং গতো, ওদনং ভুত্তৰা ভুত্তাৰী, কম্মং কুরুমানো, কম্মং করোন্তো ইচ্চাদি.

ক্ৰচি ছট্ঠীপি দিস্সতি, ধম্মস্স গুত্তো মেধাৰী [ধ. প. ২৫৭] ইচ্চাদি.

সর, ইসু, চিন্ত, ইস, দযধাতূনং কম্মনি ছট্ঠী ৰা, মাতুস্স সরতি, মাতরং সরতি, পিতুস্স সরতি, পিতরং সরতি, ন রজ্জস্স সরিস্সসি [জা. ২.২২.১৭২১], ন তেসং কোচি সরতি, সত্তানং কম্মপচ্চযা [খু. পা. ৭.২], আপত্তিপরিযন্তং নস্সরতি, রত্তিপরিযন্তং নস্সরতি [চূল়ৰ. ১৫৭], পুত্তস্স ইচ্ছতি পুত্তং ৰা, মাতুস্স চিন্তেতি মাতরং ৰা, থেরস্স অজ্ঝেসতি থেরং ৰা, তেলস্স দযতি তেলং ৰা, রক্খতীতি অত্থো.

করধাতুস্স অভিসঙ্খরণত্থৰাচিনো কম্মে ছট্ঠী, উদকস্স পটিকুরুতে উদকং ৰা, কণ্ডস্স পটিকুরুতে কণ্ডং ৰা ইচ্চাদি.

তপচ্চযে পূজনত্থাদিধাতূনং কত্তরি ছট্ঠী ৰা, রঞ্ঞো সম্মতো রঞ্ঞা ৰা, গামস্স পূজিতো গামেন ৰা, রঞ্ঞো সক্কতো রঞ্ঞা ৰা, রঞ্ঞো অপচিতো রঞ্ঞা ৰা, রঞ্ঞো মানিতো [দী. নি. ১.৩০৩] রঞ্ঞা ৰা, তথা সুপ্পটিৰিদ্ধা বুদ্ধানং ধম্মধাতু, অমতং তেসং পরিভুত্তং, যেসং কাযগতাসতি পরিভুত্তা [অ. নি. ১.৬০৩], অমতং তেসং ৰিরদ্ধং, যেসং কাযগতাসতি ৰিরদ্ধা [অ. নি. ১.৬০৩].

তিপচ্চযেপি ¶ ক্ৰচি কত্তরি ছট্ঠী ৰা, সোভণা কচ্চাযনস্স পকতি কচ্চাযনেন ৰা, সোভণা বুদ্ধঘোসস্স পকতি বুদ্ধঘোসেন ৰা ইচ্চাদি.

পূজনত্থানং পূরণত্থানঞ্চ করণে ছট্ঠী, পুপ্ফস্স বুদ্ধং পূজেতি পুপ্ফেন ৰা, ঘতস্স অগ্গিং জুহোতি ঘতেন ৰা, পত্তং উদকস্স পূরেত্ৰা, পূরং নানাপ্পকারস্স অসুচিনো [দী. নি. ২.৩৭৭], বালো পূরতি পাপস্স [ধ. প. ১২১], ধীরো পূরতি পুঞ্ঞস্স [ধ. প. ১২১] পূরতি ধঞ্ঞানং ৰা মুগ্গানং ৰা মাসানং ৰা ইচ্চাদি. ততিযা ৰা, খেমা নাম পোক্খরণী, পুণ্ণা হংসেহি তিট্ঠতি.

তব্ব, রুজাদিযোগে পন সম্পদানে চতুত্থী এৰ, যক্খসেনাপতীনং উজ্ঝাপেতব্বং ৰিক্কন্দিতব্বং ৰিরৰিতব্বং [দী. নি. ৩.২৮৩ (ৰিসদিসং)], দেৰদত্তস্স রুজ্জতি, রজকস্স ৰত্থং দদাতি ইচ্চাদি.

ভযত্থাদীনং অপাদানে বহুলং ছট্ঠী, কিং নু খো অহং তস্স সুখস্স ভাযামি, সব্বে তসন্তি দণ্ডস্স, সব্বে ভাযন্তি মচ্চুনো [ধ. প. ১২৯], ভীতো চতুন্নং আসীৰিসানং [সং. নি. ৪.২৩৮], মা ভিক্খৰে পুঞ্ঞানং ভাযিত্থ [উদা. ২২], সঙ্খাতুং নোপি সক্কোমি, মুসাৰাদস্স ওত্তপং [সং. নি. ১.১৮৪] ইচ্চাদি. তত্থ ‘ওত্তপ’ন্তি ওত্তপ্পন্তো. তথা অগ্গোহমস্মি লোকস্স, জেট্ঠোহমস্মি লোকস্স [ম. নি. ৩.২০৭] ইচ্চাদি চ.

কুসল, কোৰিদ, পসাদত্থানং আধারে ছট্ঠী, কুসলা নচ্চগীতস্স [জা. ২.২২.৯৪], কুসলো ত্ৰং রথস্স অঙ্গপচ্চঙ্গানং [ম. নি. ২.৮৭], অমচ্চে তাত জানাহি, ধীরে অত্থস্স কোৰিদে [জা. ১.১৭.১৩], নরা ধম্মস্স কোৰিদা [জা. ১.১.৩৭], মগ্গামগ্গস্স কোৰিদা, ‘‘কেচি ইদ্ধীসু কোৰিদা’’তিপি অত্থি, সন্তি যক্খা বুদ্ধস্স পসন্না [দী. নি. ৩.২৭৬ (ৰিসদিসং)], ধম্মস্স পসন্না, সঙ্ঘস্স পসন্না, বুদ্ধে পসন্না, ধম্মে পসন্না, সঙ্ঘে পসন্না ৰা. তথা ¶ চেতোপরিযঞাণস্স, ৰসী হোমি মহামুনি. ঝানস্স ৰসিম্হি ইচ্চাদি.

৩২১. ছট্ঠী হেত্ৰত্থেহি [রূ. ১৬৩ পিট্ঠে; নী. ৬৫০; চং. ২.১.৭১; পা. ২.৩.২৬].

হেত্ৰত্থেহি যোগে হেতুম্হি ছট্ঠী হোতি.

তং কিস্স হেতু [ম. নি. ১.২; চং. ২.১.৯৬; পা. ২.৩.৭২], অঙ্গৰরস্স হেতু, উদরস্স হেতু, উদরস্স কারণা [পারা. ২২৮] ইচ্চাদি.

৩২২. তুল্যত্থেন ৰা ততিযা [নী. ৬৩৮].

তুল্যত্থেন যোগে ছট্ঠী হোতি ততিযা ৰা.

তুল্যো পিতু পিতরা ৰা, সদিসো পিতু পিতরা ৰা. ইতি নানাত্তসম্বন্ধো.

ক্রিযাকারকসম্বন্ধো নাম কারকানং ক্রিযায সহ সাধক, সাধ্যভাৰেন অঞ্ঞমঞ্ঞাপেক্খতা অৰিনাভাৰিতা ৰুচ্চতি, ন হি ক্রিযং ৰিনা কারকং নাম সিজ্ঝতি, ন চ কারকং ৰিনা ক্রিযা নাম সিজ্ঝতীতি, সা পন ছট্ঠীৰিসযো ন হোতীতি.

ছট্ঠীৰিভত্তিরাসি নিট্ঠিতো.

সত্তমীৰিভত্তিরাসি

কস্মিং অত্থে সত্তমী?

৩২৩. সত্তম্যাধারে [ক. ৩০২; রূ. ৩১৩; নী. ৬৩০; চং. ২.১.৮৮; পা. ১.৩.৪৫].

আধারো, ওকাসো, অধিকরণন্তি অত্থতো একং, আধারত্থে সত্তমী হোতি. কত্তুকম্মট্ঠং ক্রিযং ভুসো ধারেতীতি আধারো.

কটে ¶ নিসীদতি পুরিসো, থালিযং ওদনং পচতি. তত্থ কটো কত্তুভূতে পুরিসে ঠিতং নিসীদনক্রিযং ধারেতি, থালী কম্মভূতে তণ্ডুলে ঠিতং পচনক্রিযং ধারেতি.

সো চতুব্বিধো ব্যাপিকাধারো, ওপসিলেসিকাধারো, সামীপিকাধারো, ৰেসযিকাধারোতি.

তত্থ যস্মিং আধেয্যৰত্থু সকলে ৰা একদেসে ৰা ব্যাপেত্ৰা তিট্ঠতি, সো ব্যাপিকো. যথা? তিলেসু তেলং তিট্ঠতি, উচ্ছূসু রসো তিট্ঠতি, জলেসু খীরং তিট্ঠতি, দধিম্হি সপ্পি তিট্ঠতীতি.

যস্মিং আধেয্যৰত্থু অল্লীযিত্ৰা ৰা তিট্ঠতি, অধিট্ঠিতমত্তং হুত্ৰা ৰা তিট্ঠতি, সো ওপসিলেসিকো. যথা? উক্খলিযং আচামো তিট্ঠতি, ঘটেসু উদকং তিট্ঠতি, আসনে নিসীদতি ভিক্খু, পরিযঙ্কে রাজা সেতি.

যো পন অত্থো আধেয্যস্স অৰত্থুভূতোপি তদাযত্তৰুত্তিদীপনত্থং আধারভাৰেন ৰোহরিযতি, সো সামীপিকো নাম. যথা? গঙ্গাযং ঘোসো তিট্ঠতি, সাৰত্থিযং ৰিহরতি ভগৰাতি [অ. নি. ১.১].

যো চ অত্থো অত্তনা ৰিনা আধেয্যস্স অঞ্ঞত্থত্তং ক্রিযং সম্পাদেতুং অসক্কুণেয্যত্তা আধারভাৰেন ৰোহরিযতি, যো চ আধেয্যস্স অনঞ্ঞাভিমুখভাৰদীপনত্থং আধারভাৰেন ৰোহরিযতি, সো ৰেসযিকো নাম. যথা? আকাসে সকুণা পক্খন্তি, ভূমীসু মনুস্সা চরন্তি ¶ , উদকে মচ্ছা চরন্তি, ভগৰন্তং পাদেসু ৰন্দতি, পাদেসু পতিত্ৰা রোদতি, পাপস্মিং রমতী মনো [ধ. প. ১১৬], পসন্নো বুদ্ধসাসনেতি [ধ. প. ৩৬৮].

৩২৪. নিমিত্তে [ক. ৩১০; রূ. ৩২৪; নী. ৬৪১; চং. ২.১.৮৯; পা. ২.৩.৩৬].

নিমিনন্তি সঞ্জানন্তি এতেনাতি নিমিত্তং, নেমিত্তকসহভাৰিনো সঞ্ঞাণকারণস্সেতং নামং, তস্মিং নিমিত্তে সত্তমী হোতি.

দীপি চম্মেসু হঞ্ঞতে, কুঞ্জরো দন্তেসু হঞ্ঞতে, মুসাৰাদে পাচিত্তিযং [পাচি. ২], ওমসৰাদে পাচিত্তিযং [পাচি. ১৪] ইচ্চাদি.

৩২৫. যম্ভাৰো ভাৰলক্খণং [ক. ৩১৩; রূ. ৩২৭; নী. ৬৪৪; চং. ২.১.৯০; পা. ২.৩.৩৭; ‘যব্ভা ৰো’ (বহূসু)].

যাদিসো ভাৰো যম্ভাৰো, লক্খিযতি এতেনাতি লক্খণং, ভাৰন্তরস্স লক্খণং ভাৰলক্খণং, যম্ভাৰো ভাৰন্তরস্স লক্খণং হোতি, তস্মিং ভাৰে গম্যমানে সত্তমী হোতি, ছট্ঠীপি দিস্সতি.

অচিরপক্কন্তস্স সারিপুত্তস্স ব্রাহ্মণো কালমকাসি [ম. নি. ২.৪৫২ (ৰিসদিসং)], অপ্পমত্তস্স তে ৰিহরতো ইত্থাগারোপি তে অপ্পমত্তো ৰিহরিস্সতি [সং. নি. ১.১২৯ (ৰিসদিসং)] ইচ্চাদি.

ইমস্মিং সতি ইদং হোতি, ইমস্মিং অসতি ইদং ন হোতি [সং. নি. ২.২১], অচিরপক্কন্তে ভগৰতি ব্রাহ্মণো কালমকাসি, সব্বে মগ্গা ৰিৰজ্জন্তি, গচ্ছন্তে লোকনাযকে [ম. নি. অট্ঠ. ২.২২]. গাৰীসু দুয্হমানাসু গতো, গাৰীসু দুদ্ধাসু আগতো ইচ্চাদি.

ক্ৰচি ¶ পঠমাপি বহুলং দিস্সতি, গচ্ছন্তো সো ভারদ্ৰাজো, অদ্দসা অচ্চুতং ইসিং [জা. ২.২২.২০০৭ (অদ্দস্স)]. যাযমানো মহারাজা, অদ্দা সীদন্তরে নগে [জা. ২.২২.৫৬৬] ইচ্চাদি.

পুব্বণ্হসমযে গতো, সাযন্হসমযে আগতো ইচ্চাদি ৰেসযিকাধারো এৰ.

তথা অকালে ৰস্সতী তস্স, কালে তস্স ন ৰস্সতি [জা. ১.২.৮৮; ১.৮.৪৮]. ইতো সতসহস্সম্হি, কপ্পে উপ্পজ্জি নাযকো [অপ. থের ২.৫৪.২৮] ইচ্চাদি.

৩২৬. ছট্ঠী চানাদরে [ক. ৩০৫; রূ. ৩২৩; নী. ৬৩৩; চং. ২.১.৯১; পা. ২.৩.৩৮].

‘অনাদরো’তি দ্ৰিন্নং লক্খণ, লক্খিতব্বক্রিযানং একপ্পহারেন পৰত্তিযা অধিৰচনং, অনাদরভূতে ভাৰলক্খণে গম্যমানে সত্তমী ছট্ঠী চ হোতি.

মচ্চু গচ্ছতি আদায, পেক্খমানে মহাজনে. আকোটযন্তো সো নেতি, সিৰিরাজস্স পেক্খতো [জা. ২.২২.২১২২ (তেনেতি)]. অকামকানং মাতাপিতূনং রুদন্তানং পব্বজি, অনগারিযুপেতস্স, ৰিপ্পমুত্তস্স তে সতো. সমণস্স ন তং সাধু, যদঞ্ঞমনুসোচতি [জা. ১.৭.১০৭ (যং পেতমনুসোচসি)].

৩২৭. যতো নিদ্ধারণং [ক. ৩০৪; রূ. ৩২২; নী. ৬৩২; চং. ২.১.৯২; পা. ২.৩.৪১].

জাতি, গুণ, ক্রিযা, নামেহি সমুদাযতো একদেসস্স পুথক্করণং নিদ্ধারণং, যতো তং নিদ্ধারণং জাযতি, তস্মিং সমুদাযে ছট্ঠী, সত্তমিযো হোন্তি.

জাতিযং ¶ তাৰ –

মনুস্সানং খত্তিযো সূরতমো, মনুস্সেসু খত্তিযো সূরতমো.

গুণে –

কণ্হা গাৰীনং সম্পন্নখীরতমা, কণ্হাগাৰীসু সম্পন্নখীরতমা.

ক্রিযাযং –

অদ্ধিকানং ধাৰন্তো সীঘতমো, অদ্ধিকেসু ধাৰন্তো সীঘতমো.

নামে –

আযস্মা আনন্দো অরহতং অঞ্ঞতরো, অরহন্তেসু অঞ্ঞতরো ইচ্চাদি.

ইধ নানাত্তসত্তমী ৰুচ্চতে.

কম্মত্থে সত্তমী, ভিক্খূসু অভিৰাদেন্তি [পারা. ৫১৭], পুত্তং মুদ্ধনি চুম্বিত্ৰা, পুরিসং নানাবাহাসু গহেত্ৰা [সং. নি. ২.৬৩] ইচ্চাদি.

অথ ৰা ‘মুদ্ধনি, বাহাসূ’তি আধারে এৰ ভুম্মং. যথা? রুক্খং মূলে ছিন্দতি, রুক্খং খন্ধে ছিন্দতি, পুরিসং সীসে পহরতি, ভগৰন্তং পাদেসু ৰন্দতি.

করণে চ সত্তমী, হত্থেসু পিণ্ডায চরন্তি [মহাৰ. ১১৯], পত্তেসু পিণ্ডায চরন্তি, পথেসু গচ্ছন্তি, সোপি মং অনুসাসেয্য, সম্পটিচ্ছামি মত্থকে [মি. প. ৬.৪.৮].

সম্পদানে চ সত্তমী, সঙ্ঘে দিন্নে মহপ্ফলং, সঙ্ঘে গোতমী দদেয্যাসি, সঙ্ঘে দিন্নে অহঞ্চেৰ পূজিতো ভৰিস্সামি ¶ [ম. নি. ৩.৩৭৬], ৰিচেয্য দানং দাতব্বং, যত্থ দিন্নং মহপ্ফলং [পে. ৰ. ৩২৯]. এতেসু পন ৰিসযসত্তমীপি যুজ্জতি.

অপাদানে চ সত্তমী, গদলীসু গজে রক্খন্তিইচ্চাদি.

সামিস্সরাদিযোগে পন ছট্ঠী সত্তমী চ হোতি, গুন্নং সামি, গোসু সামি, গুন্নং ইস্সরো, গোসু ইস্সরো, গুন্নং অধিপতি, গোসু অধিপতি, গুন্নং দাযাদো, গোসু দাযাদো, গুন্নং সক্খি, গোসু সক্খি, গুন্নং পতিভূ, গোসু পতিভূ, গুন্নং পসুতো, গোসু পসুতো, আযুত্তো কটকরণস্স, আযুত্তো কটকরণেতি, এতেসু পন সম্বন্ধে ছট্ঠী, ৰিসযাধারে সত্তমী. ঞাণস্মিং পসন্নো, ঞাণস্মিং উস্সুক্কোতি ৰিসযাধারে সত্তমী. ঞাণেন পসন্নো, ঞাণেন উস্সুক্কোতি করণে ততিযা.

৩২৮. সত্তম্যাধিক্যে [ক. ৩১৪; রূ. ৩২৮; নী. ৬৪৫; চং. ২.১.৬০; পা. ২.৩.৯; ১.৪.৮৭].

অধিকভাৰত্থে উপেন যুত্তা লিঙ্গম্হা সত্তমী হোতি.

উপ খারিযং দোণো, উপ নিক্খে কহাপণং, অতিরেকদোণা খারী, অতিরেককহাপণং নিক্খন্তি ৰুত্তং হোতি.

৩২৯. সামিত্তেধিনা [চং. ২.১.৬১; পা. ২.৩.৯; ১.৪.৯৭].

সামিভাৰত্থে অধিনা যুত্তা লিঙ্গম্হা সত্তমী হোতি.

অধি ব্রহ্মদত্তে পঞ্চালা, অধি পঞ্চালেসু ব্রহ্মদত্তো, অধি দেৰেসু বুদ্ধো. তত্থ ‘অধি ব্রহ্মদত্তে পঞ্চালা’তি ব্রহ্মদত্তিস্সরা পঞ্চালরট্ঠৰাসিনোতি ৰদন্তি, ‘পঞ্চালা’তি ৰা জনপদনামত্তা বহুৰচনং, কদাচি পঞ্চালরাজা ব্রহ্মদত্তে কাসিরঞ্ঞে ইস্সরো, কদাচি ব্রহ্মদত্তো পঞ্চালরঞ্ঞে ইস্সরোতি অত্থো.

৩৩০. সব্বাদিতো ¶ সব্বা [চং. ২.১.৭২; পা. ২.৩.২৭].

হেত্ৰত্থেহি যোগে সব্বাদীহি সব্বনামেহি হেত্ৰত্থে সব্বা ৰিভত্তিযো হোন্তি.

কিং কারণং, কেন কারণেন [জা. অট্ঠ. ৪.১৫ মাতঙ্গজাতকৰণ্ণনা], কিং নিমিত্তং, কেন নিমিত্তেন, কিং পযোজনং, কেন পযোজনেন, কেনট্ঠেন [ধ. স. অট্ঠ. নিদানকথা], কেন ৰণ্ণেন [সং. নি. ১.২৩৪], কিমত্থং, কুতো নিদানং [পারা. ৪২], কিস্স হেতু [পারা. ৩৯], কস্মিং নিদানে, এতস্মিং নিদানে [পারা. ৪২], এতস্মিং পকরণে [পারা. ৪২] ইচ্চাদি.

সত্তমীৰিভত্তিরাসি নিট্ঠিতো.

ইতি নিরুত্তিদীপনিযা নাম মোগ্গল্লানদীপনিযা

কারককণ্ডো নিট্ঠিতো.

৪. সমাসকণ্ড

অথ ¶ যুত্তত্থানং স্যাদ্যন্তপদানং একত্থীভাৰো ৰুচ্চতে. একত্থীভাৰোতি চ ইধ সমাসো ৰুচ্চতি. সো চ সমাসো ছব্বিধো অব্যযীভাৰো, তপ্পুরিসো, কম্মধারযো, দিগু, বহুব্বীহি, দ্ৰন্দোতি.

অব্যযীভাৰসমাস

তত্থ অব্যযীভাৰো পঠমং ৰুচ্চতে. ব্যযো ৰুচ্চতি ৰিকারো, নত্থি ব্যযো এতস্সাতি অব্যযো, অব্যযো হুত্ৰা ভৰতীতি অব্যযীভাৰো, নানালিঙ্গ, ৰিভত্তি, ৰচনেসু রূপৰিকাররহিতো হুত্ৰা ভৰতীতি অত্থো, সব্বলিঙ্গ,-ৰিভত্তি, ৰচনেসুপি যেভুয্যেন একরূপেন পৰত্ততীতি ৰুত্তং হোতি.

অব্যযন্তি ৰা উপসগ্গনিপাতানং এৰ নামং, অযং পন পকতি অব্যযং ন হোতি, অসঙ্খ্যেহি সহ একত্থতাৰসেন অব্যযং হোতি, ইতি অনব্যযম্পি অব্যযং ভৰতীতি অব্যযীভাৰো.

৩৩১. স্যাদিস্যাদিনেকত্থং [ক. ৩১৬; রূ. ৩৩১; নী. ৬৭৫; চং. ২.২.১; পা. ২.১.৪].

অধিকারসুত্তমিদং. স্যাদি ৰুচ্চতি স্যাদ্যন্তপদং, ‘স্যাদিনা’তি স্যাদ্যন্তপদেন, একো অত্থো যস্স তং একত্থং, স্যাদিপদং স্যাদিপদেন সহ একত্থং হোতীতি অত্থো.

এত্থ চ ‘স্যাদী’তি ৰচনেন উপসগ্গ, নিপাতেহি সদ্ধিং সব্বানি নামিকপদানি নামপটিরূপকানি চ সঙ্গণ্হাতি, ত্যাদ্যন্তপদানি নিৰত্তেতি.

তত্থ ¶ নামপটিরূপকানি নাম ‘যেৰাৰনকধম্মা’ ইচ্চাদীনি. তথা সঞ্ঞাসদ্দভাৰং পত্তানি ‘‘অত্থিপচ্চযো, নত্থিপচ্চযো, অত্থিখীরা ব্রাহ্মণী, অঞ্ঞাসিকোণ্ডঞ্ঞো, মক্খলিগোসালো’’ ইচ্চাদীসু ‘অত্থি’ ইচ্চাদীনি.

‘একত্থ’ন্তি এতেন দ্ৰন্দসমাসেপি পদানং এককত্তু, এককম্মাদিভাৰেন একত্থীভাৰো ৰুত্তো হোতীতি.

৩৩২. অসঙ্খ্যং ৰিভত্তিসম্পত্তিসমীপসাকল্যাভাৰযথাপচ্ছাযুগপদত্থে [ক. ৩১৯; রূ. ৩৩০; নী. ৬৯৬; চং. ২.২.২; পা. ২.১.৬].

‘অসঙ্খ্য’ন্তি উপসগ্গপদং নিপাতপদঞ্চ ৰুচ্চতি. তং দ্ৰযম্পি হি একত্ত, বহুত্তসঙ্খ্যং পটিচ্চ রূপৰিকাররহিতত্তা ‘অসঙ্খ্য’ন্তি ৰুচ্চতি. ৰিভত্যত্থে, সম্পত্যত্থে, সমীপত্থে, সাকল্যত্থে, অভাৰত্থে, যথাত্থে, পচ্ছাত্থে, যুগপদত্থে পৰত্তং অসঙ্খ্যং নাম স্যাদিপদং অঞ্ঞেন স্যাদিপদেন সহ একত্থং হোতি. অযঞ্চ সমাসো অন্ৰত্থৰসেন ‘অসঙ্খ্যো’তি চ ‘অব্যযীভাৰো’তি চ ৰুচ্চতি.

ৰিভত্যত্থে তাৰ –

অধিত্থি. এত্থ চ অধিতো সি, তস্স ‘অসঙ্খ্যেহি সব্বাস’ন্তি সুত্তেন লোপো, ইত্থিতো সু, ‘অধি ইত্থীসূ’তি ৰাক্যং, তস্স চ অত্থং কথেন্তেন নিচ্চসমাসত্তা অঞ্ঞপদেন ৰিগ্গহো কাতব্বো ‘‘ইত্থীসু পৰত্তা কথা’’তি ৰা ‘‘ইত্থীসু পৰত্তো ৰচনপথো’’তি ৰা ‘‘ইত্থীসু পৰত্তং ৰচন’’ন্তি ৰা, ততো পুরিমসুত্তেন একত্থসঞ্ঞা, ইমিনা সুত্তেন অসঙ্খ্যেকত্থসঞ্ঞা চ করিযতে, একত্থসঞ্ঞায পন কতায ৰাক্যত্থায পযুত্তানং ৰিভত্তীনং অত্থো একত্থপদেন ৰুত্তো হোতি, তদা ৰিভত্তিযো ৰুত্তত্থা নাম.

ইদানি ¶ ৰুত্তত্থানং অপ্পযোগারহত্তা লোপৰিধানমাহ.

৩৩৩. একত্থতাযং [ক. ৩১৬; রূ. ৩৩১; নী. ৬৭৫; চং. ২.১.৩৯; পা. ২.৪.৭১; ১.২.৪৫, ৪৬].

একো অত্থো যেসং তানি একত্থানি, ‘অত্থো’তি চেত্থ পদন্তরে কত্তু, কম্মাদিভাৰেন ৰিধেয্যো পধানত্থো এৰ ৰেদিতব্বো. তথা হি ‘রাজপুত্তো’তি এত্থ পুত্তসদ্দত্থো এৰ তথাৰিধেয্যো হোতি, ন রাজসদ্দত্থো, সব্বঞ্চ ৰচনৰাক্যং নাম ৰিধেয্যত্থেহি এৰ সিজ্ঝতি, নো অঞ্ঞথা, যস্মা চ ‘রাজপুত্তো’তি এতং পুত্তসদ্দত্থস্সেৰ নামং হোতি, ন রাজসদ্দত্থস্স, তস্মা একো পধানভূতো পুত্তসদ্দত্থো এৰ তেসং দ্ৰিন্নং সদ্দানং অত্থো নাম হোতি, ন রাজসদ্দত্থোতি, একত্থানং ভাৰো একত্থতা, একত্থীভাৰোতি ৰুত্তং হোতি. সো তিৰিধো সমাসো, তদ্ধিতো, ধাতুপচ্চযন্তো চাতি. তিস্সং তিৰিধাযং একত্থতাযং সব্বাসং ৰুত্তত্থানং স্যাদিৰিভত্তীনং লোপো হোতীতি ইমিনা সুস্স লোপো. বহুলাধিকারত্তা পন অলুত্তসমাসোপি দিস্সতি.

৩৩৪. তং নপুংসকং [ক. ৩২০; রূ. ৩৩৫; নী. ৬৯৮; চং. ২.২.১৫; পা. ২.৪.১৮].

তং অসঙ্খ্যং নাম একত্থং নপুংসকং হোতীতি ইমিনা অধিত্থীসদ্দস্স নপুংসকভাৰং কত্ৰা ততো স্যাদ্যুপ্পত্তি.

৩৩৫. স্যাদীসু রস্সো [ক. ৩৪২; রূ. ৩৩৭; নী. ৭৩৪; চং. ২.২.৮৪; পা. ১.২.৪৭].

নপুংসকস্স একত্থস্স রস্সো হোতি স্যাদীসু ৰিভত্তীসূতি ইমিনা ঈকারস্স রস্সো.

৩৩৬. পুব্বস্মামাদিতো [ক. ৩৪৩; রূ. ৩৩৮; নী. ৩৭৫; চং. ২.১.৪০; পা. ১.১.৪১].

পুব্বঅমাদি ¶ নাম পুব্বপদত্থপধানভূতো অসঙ্খ্যসমাসো ৰুচ্চতি, ততো পরাসং সব্বাসং ৰিভত্তীনং লোপো হোতি, আদিসদ্দেন চেত্থ পঠমাৰিভত্তিপি গয্হতি. অথ ৰা অমাদি ৰুচ্চতি তপ্পুরিসো, ততো পুব্বং নাম অসঙ্খ্যসমাসো, ইতি অমাদিতো পুব্বভূতা অসঙ্খ্যেকত্থা পরাসং সব্বাসং ৰিভত্তীনং লোপো হোতীতি ইমিনা অধিত্থিসদ্দতো সব্বৰিভত্তীনং লোপো.

অধিত্থি তিট্ঠতি, ইত্থীসু পৰত্তা কথা তিট্ঠতীতি অত্থো. অধিত্থি তিট্ঠন্তি, ইত্থীসু পৰত্তা কথাযো তিট্ঠন্তীতি অত্থো. এস নযো সেসৰিভত্তীসু সেসৰচনেসু সেসলিঙ্গেসু চ. এৰং সব্বলিঙ্গেসু সব্বৰিভত্তীসু সব্বৰচনেসু চ একেনেৰ রূপেন তিট্ঠতি, তস্মা অযং সমাসো রূপৰিকাররহিতত্তা ‘অব্যযীভাৰো’তি ৰুচ্চতি.

এত্থ চ ৰিভত্যত্থো নাম ‘‘অধিত্থি, বহিগামং, উপরিগঙ্গ’’ মিচ্চাদীসু সম্পত্যাদীহি ৰিসেসত্থেহি রহিতো কেৰলো ৰিভত্তীনং অত্থো ৰুচ্চতি. ৰিগ্গহে পন ‘‘কথা, পৰত্তা’’ ইচ্চাদীনি সমাসসামত্থিযেন ৰিদিতানি অত্থপদানি নাম, অধিসদ্দস্স অত্থপদানীতিপি ৰদন্তি. এৰং অধিকুমারি, অধিৰধু, অধিজম্বুইচ্চাদি.

অত্তনি পৰত্তো ধম্মো, পৰত্তা ৰাধম্মাতি অত্থে ৰিভত্তীনং লোপে কতে অধিঅত্তসদ্দস্স নপুংসকভাৰং কত্ৰা ততো স্যাদ্যুপ্পত্তি, ‘পুব্বস্মামাদিতো’তি স্যাদীনং লোপে সম্পত্তে –

৩৩৭. নাতোমপঞ্চমিযা [ক. ৩৪১; রূ. ৩৩৬; নী. ৭৩৩; চং. ২.১.৪১; পা. ২.৪.৮৩; মু. ৪.৩.৩৭৪].

অকারন্তম্হা ¶ অসঙ্খ্যেকত্থা পরং সব্বাসং ৰিভত্তীনং লোপো ন হোতি, পঞ্চমীৰজ্জিতানং ৰিভত্তীনং অং হোতি.

অজ্ঝত্তং ধম্মো জাযতি, অজ্ঝত্তং ধম্মা জাযন্তি, অজ্ঝত্তং ধম্মং পস্সতি, অজ্ঝত্তং ধম্মে পস্সন্তি.

অপঞ্চমিযাতি কিং? অজ্ঝত্তা অপেতি, অজ্ঝত্তেহি অপেতি.

৩৩৮. ৰা ততিযাসত্তমীনং [ক. ৩৪১; রূ. ৩৩৬; নী. ৭৩৩; চং. ২.১.৪২; পা. ২.৪.৮৪; মু. ৪.৩.৩৭৫].

অকারন্তম্হা অসঙ্খ্যেকত্থা পরং ততিযা, সত্তমীনং ৰিকপ্পেন অং হোতি.

অজ্ঝত্তং ধম্মেন ৰত্ততি অজ্ঝত্তেন ৰা, অজ্ঝত্তং ধম্মেহি ৰত্ততি অজ্ঝত্তেহি ৰা, অজ্ঝত্তং ধম্মস্স দেতি, অজ্ঝত্তং ধম্মানং দেতি, অজ্ঝত্তা ধম্মা অপেতি, অজ্ঝত্তেহি ধম্মেহি অপেতি, অজ্ঝত্তং ধম্মস্স সন্তকং, অজ্ঝত্তং ধম্মানং সন্তকং, অজ্ঝত্তং ধম্মে তিট্ঠতি অজ্ঝত্তে ৰা, অজ্ঝত্তং ধম্মেসু তিট্ঠতি অজ্ঝত্তেসু ৰা. এত্থ চ ‘অজ্ঝত্তং ধম্মো’তি অজ্ঝত্তভূতো ধম্মো, ‘অজ্ঝত্তং ধম্মা’তি অজ্ঝত্তভূতা ধম্মা ইচ্চাদিনা অত্থো ৰেদিতব্বো. অত্তানং অধিকিচ্চ পৰত্তো পৰত্তাতি ৰা ৰুত্তেপি অত্তস্স আধারভাৰো সিজ্ঝতিযেৰ. এৰং অধিচিত্তং, অত্তনি ৰিসুং ৰিসুং পৰত্তং পৰত্তানি ৰা পচ্চত্তং. এত্থ চ ‘‘অজ্ঝত্তং অভিনিৰিসিত্ৰা অজ্ঝত্তং ৰুট্ঠাতি, বহিদ্ধা অভিনিৰিসিত্ৰা অজ্ঝত্তং ৰুট্ঠাতী’’তি [ধ. স. অট্ঠ. ৩৫০; সং. নি. অট্ঠ. ২.২.৩২] পাঠো অত্থি, তস্মা পঞ্চমিযা অংভাৰৰজ্জনং অপ্পকত্তাতি দট্ঠব্বং. ‘‘অজ্ঝত্তা ধম্মা, বহিদ্ধা ¶ ধম্মা’’তি [ধ. স. তিকমাতিকা ২০] পাঠো অত্থি, তস্মা পঠমাদীনম্পি ৰিকপ্পো লব্ভতীতি.

সম্পত্তিঅত্থে –

সম্পন্নং ব্রহ্মং সব্রহ্মং, ‘ব্রহ্ম’ন্তি ৰেদো ৰুচ্চতি. এত্থ চ ‘অকালে সকত্থস্সা’তি সুত্তেন সহসদ্দস্স সাদেসো, ভিক্খানং সমিদ্ধি সুভিক্খং, ‘স্যাদীসু রস্সো’তি সুত্তেন কতনপুংসকস্স রস্সত্তং.

সমীপে –

নগরস্স সমীপং উপনগরং, কুম্ভস্স সমীপং উপকুম্ভং, মণিকায সমীপং উপমণিকং, ৰধুযা সমীপং উপৰধু, গুন্নং সমীপং উপগু, ‘গোস্সূ’তি সুত্তেন ওস্স উত্তং.

সাকল্যে –

তিণেন সহ সকলং সতিণং, তিণেন সদ্ধিং সকলং ৰত্থুং অজ্ঝোহরতীতি অত্থো. সহসদ্দস্স সাদেসো.

অভাৰে –

মক্খিকানং অভাৰো নিম্মক্খিকং, দরথানং অভাৰো নিদ্দরথং, ভিক্খানং অভাৰো দুব্ভিক্খং, অভাৰত্থোপি দুসদ্দো অত্থি. যথা? দুস্সীলো দুপ্পঞ্ঞোতি. এত্থ চ ‘সম্পন্নং ব্রহ্ম’ন্তিআদিনা সদ্দব্যাকরণেসু অত্থৰচনং সদ্দত্থৰিভাৰনমত্তং. সুত্তন্তেসু পন ইমেসং পদানং যুত্তং অভিধেয্যত্থং ঞত্ৰা তদনুরূপং অত্থৰচনম্পি ৰেদিতব্বং.

যথাসদ্দত্থে –

রূপস্স সভাৰস্স যোগ্যং অনুরূপং, অত্তানং অত্তানং পটিচ্চ পৰত্তং পচ্চত্তং, অড্ঢমাসং অড্ঢমাসং অনুগতং অন্ৰড্ঢমাসং, ঘরং ঘরং অনুগতং অনুঘরং, ৰস্সং ৰস্সং অনুগতং অনুৰস্সং, জেট্ঠানং ¶ অনুপুব্বং অনুজেট্ঠং, সত্তিযা অনুরূপং যথাসত্তি, বলস্স অনুরূপং যথাবলং, কমস্স অনুরূপং যথাক্কমং. এৰং যথাসঙ্খ্যং, যথালাভং. সোতস্স পটিলোমং পটিসোতং, পটিৰাতং, পটিসদ্দং.

পচ্ছাপদত্থে –

রথস্স পচ্ছা অনুরথং.

যুগভূতো পদত্থো যুগপদত্থো, সহভাৰীঅত্থদ্ৰযস্সেতং নামং. তত্থ অসনিফলেন সহ পৰত্তং চক্কং সচক্কং, গদাৰুধেন যুগল়পৰত্তং ৰাসুদেৰস্স চক্কাৰুধন্তিপি ৰদন্তি [যুগপদত্থে সচক্কং নিধেহি, (মোগ্গল্লানৰুত্তিযং). চক্কেন যুগপত ধেহি সচক্কং, (মুগ্ধবোধৰুত্তিযং). হে বিসণু! চক্কেন সহ যুগপদেককালে গদং ধারয. (মুগ্ধবোধটীকাযং ২২৬ পিট্ঠে)], সহস্স সত্তং.

৩৩৯. যথা নতুল্যে [ক. ৩১৯; রূ. ৩৩০; নী. ৬৯৬; চং. ২.২.৩; পা. ২.১.৭].

তুল্যতো অঞ্ঞস্মিং অত্থে পৰত্তো যথাসদ্দো স্যাদিনা সহ একত্থো হোতি [মোগ্গল্লানে অঞ্ঞথাৰুত্তি দস্সিতা].

যথাসত্তি, যথাবলং, যথাক্কমং, যে যে ৰুড্ঢা যথাৰুড্ঢং, ৰুড্ঢানং পটিপাটি ৰা যথাৰুড্ঢং.

নতুল্যেতি কিং? যথা দেৰদত্তো, তথা যঞ্ঞদত্তো.

৩৪০. যাৰাৰধারণে [ক. ৩১৯; রূ. ৩৩০; নী. ৬৯৬; চং. ২.২.৪; পা. ২.১.৮].

অৰধারণং ৰুচ্চতি পরিচ্ছিন্দনং, অৰধারণে পৰত্তো যাৰসদ্দো স্যাদিনা সহ একত্থো ভৰতি.

যত্তকং ¶ অত্থো ৰত্ততীতি যাৰদত্থং, দাগমো. যত্তকং জীৰো ৰত্ততীতি যাৰজীৰং, যত্তকং আযু ৰত্ততীতি যাৰতাযুকং, তকার, ককারা আগমা.

৩৪১. পরাপাবহিতিরোপুরেপচ্ছা ৰা পঞ্চম্যা [ক. ৩১৯; রূ. ৩৩০; নী. ৬৯৬; চং. ২.২.৭; পা. ২.১.১২, ১৩; ‘পয্যপা…’ (বহূসু)].

পরি, অপ, আইচ্চাদযো সদ্দা পঞ্চম্যন্তেন স্যাদিনা সহ একত্থা ভৰন্তি ৰা.

পব্বততো পরি সমন্তা ৰস্সীতি দেৰো পরিপব্বতং পরিপব্বতা ৰা, পব্বতং ৰজ্জেত্ৰা ৰস্সীতি অত্থো. পব্বততো বহিদ্ধা অপপব্বতং অপপব্বতা ৰা, পাটলিপুত্ততো বহিদ্ধা ৰস্সীতি দেৰো আপাটলিপুত্তং আপাটলিপুত্তা ৰা, আকুমারেহি কচ্চাযনস্স যসো ৰত্ততীতি আকুমারং আকুমারা ৰা, আভৰগ্গা ভগৰতো যসো ৰত্ততীতি আভৰগ্গং আভৰগ্গা ৰা, আপাণকোটিযা সরণগমনং ৰত্ততীতি আপাণকোটিকং, কাগমো. গামতো বহি বহিগামং বহিগামা ৰা, এৰং বহিনগরং, বহিলেণং, পব্বততো তিরো তিরোপব্বতং তিরোপব্বতা ৰা, এৰং তিরোপাকারং, তিরোকুট্টং. এত্থ চ ‘তিরো’তি পরভাগো ৰুচ্চতি. ভত্তম্হা পুরে পুরেভত্তং পুরেভত্তা ৰা, অরুণম্হা পুরে পুরারুণং পুরারুণা ৰা, ভত্তস্স পচ্ছা পচ্ছাভত্তং পচ্ছাভত্তা ৰা.

৩৪২. সমীপাযামেস্ৰনু [ক. ৩১৯; রূ. ৩৩০; নী. ৬৯৬; চং. ২.২.৯; পা. ২.১.১৫, ১৬].

সমীপে আযামে চ পৰত্তো অনুসদ্দো স্যাদিনা সহ একত্থো ভৰতি ৰা.

ৰনস্স সমীপং অনুৰনং, অসনি অনুৰনং গতা, গঙ্গং অনুযাতা অনুগঙ্গং, বারাণসী.

৩৪৩. ওরো ¶ পরি পটি পারে মজ্ঝে হেট্ঠুদ্ধাধোন্তো ৰা ছট্ঠিযা [ক. ৩১৯; রূ. ৩৩০; নী. ৬৯৬; চং. ২.২.১১; পা. ২.১.১৮; ‘ওরেপরি…’ (বহূসু)].

ওরাদযো সদ্দা ছট্ঠীযন্তেন স্যাদিনা সহ একত্থা ভৰন্তি ৰা.

এত্থ চ ওরে, পারে, মজ্ঝেসদ্দেসু ‘তদমিনাদীনী’তি সুত্তেন একারো, গঙ্গায ওরং ওরেগঙ্গং, সিখরস্স উপরি উপরিসিখরং. এৰং উপরিপাসাদং, উপরিমঞ্চং, উপরিপব্বতং, সোতস্স পটিলোমং পটিসোতং. এৰং পটিৰাতং, যমুনায পারং পারেযমুনং, গঙ্গায মজ্ঝং মজ্ঝেগঙ্গং, পাসাদস্স হেট্ঠা হেট্ঠাপাসাদং, হেট্ঠামঞ্চং, গঙ্গায উদ্ধং উদ্ধংগঙ্গং, গঙ্গায অধো অধোগঙ্গং, পাসাদস্স অন্তো অন্তোপাসাদং. এৰং অন্তোগামং, অন্তোনগরং, অন্তোৰস্সং.

ৰাতি কিং? গঙ্গাওরং, মজ্ঝেসমুদ্দস্মিং ইচ্চাদি.

৩৪৪. তিট্ঠগ্ৰাদীনি [ক. ৩১৯; রূ. ৩৩০; নী. ৬৯৭; চং. ২.২.১০; পা. ২.১.১৭].

তিট্ঠগুইচ্চাদীনি অসঙ্খ্যেকত্থে সিজ্ঝন্তি.

তিট্ঠন্তি গাৰো যস্মিং কালে তিট্ঠগু, ৰহন্তি গাৰোযস্মিং কালে ৰহগু, ‘গোস্সূ’তি সুত্তেন ওস্স উত্তং. আযতিং যৰো যস্মিং কালেতি আযতিযৰো, খলে যৰো যস্মিং কালেতি খলেযৰং. পুব্বপদে ৰিভত্তিঅলোপো. লুনা যৰা যস্মিং কালেতি লুনযৰং, এত্থ ‘লুনা’তি লাৰিতা, লুযমানা যৰা যস্মিন্তি লুযমানযৰং ইচ্চাদি.

তথা পাতো নহানং যস্মিং কালেতি পাতনহানং. এৰং সাযনহানং, পাতো কম্মকরণকালো যস্মিন্তি ¶ পাতকালং. এৰং সাযকালং, পাতো ৰস্সতি মেঘো যস্মিন্তি পাতমেঘং. এৰং সাযমেঘং, পাতো গন্তব্বো মগ্গো যস্মিন্তি পাতমগ্গং. এৰং সাযমগ্গং ইচ্চাদি. মহাৰুত্তিনা পাতোসদ্দস্স পাতত্তং. এত্থ চ ‘তিট্ঠগু’ ইচ্চাদীনি ৰিগ্গহত্থৰসেন অঞ্ঞপদত্থে সিদ্ধানি ৰিয দিস্সন্তি, অঞ্ঞপদস্স পন লিঙ্গাদীনং ৰসেন তেসং রূপৰিকারো নাম নত্থি, তস্মা অব্যযরূপত্তা ইধ গহিতানি, সব্বঞ্চেতং অসঙ্খ্যসমাসপদং নাম নপুংসকং এৰ হোতি, রস্সন্তমেৰ হোতি. সব্বৰিভত্তীনঞ্চ অকারন্তম্হা বহুলং অং হোতি, ইকারুকারন্তেহি লোপো হোতি.

অব্যযীভাৰসমাসো নিট্ঠিতো.

তপ্পুরিসসমাস

দুতিযাতপ্পুরিস

অথ অমাদিসমাসো ৰুচ্চতে, সো তপ্পুরিসোতি চ ৰুচ্চতি. তস্স পুরিসো তপ্পুরিসো, তপ্পুরিসসদ্দেন সদিসত্তা অযং সমাসো তপ্পুরিসোতি ৰুচ্চতি. যথা হি তপ্পুরিসসদ্দো ৰিসেসনপদত্থং জহিত্ৰা ৰিসেস্যপদত্থে তিট্ঠতি, এৰং অযং সমাসোপীতি.

৩৪৫. অমাদি [ক. ৩২৭; রূ. ৩৫১; নী. ৭০৪; চং. ২.২.১৬].

অমাদিৰিভত্তিযুত্তং স্যাদ্যন্তপদং পঠমন্তেন স্যাদ্যন্তপদেন সহ একত্থং ভৰতি, অযঞ্চ সমাসো অন্ৰত্থৰসেন ‘‘অমাদিসমাসো’’তি চ ‘‘তপ্পুরিসসমাসো’’তি চ ৰুচ্চতি. ইমিনা অমাদিসহিতস্স ৰাক্যস্স অমাদেকত্থসঞ্ঞং কত্ৰা ৰুত্তত্থানং ৰিভত্তীনং লোপো, ততো একত্থপদন্তে স্যাদ্যুপ্পত্তি হোতি.

সো ¶ পন সমাসো দুতিযাতপ্পুরিসো, ততিযাতপ্পুরিসো, চতুত্থীতপ্পুরিসো, পঞ্চমীতপ্পুরিসো, ছট্ঠীতপ্পুরিসো, সত্তমীতপ্পুরিসোতি ছব্বিধো. একমেকস্মিঞ্চেত্থ ‘‘নিচ্চসমাসো, অনিচ্চসমাসো’’তি চ ‘‘লুত্তসমাসো, অলুত্তসমাসো’’তি চ দুৰিধো.

তত্থ দুতিযাতপ্পুরিসো কত্তুৰাচকেসু গত, নিস্সিত,-অতীত, অতিক্কন্ত, পত্ত, আপন্নইচ্চাদীসু পরেসু হোতি.

গামং গতোতি গামগতো গামং গতো ৰা. এৰং অরঞ্ঞগতো, ভূমিগতো, রাজানং নিস্সিতোতি রাজনিস্সিতো. এৰং অত্থনিস্সিতো, ধম্মনিস্সিতো. ভৰং অতীতো ভৰাতীতো. এৰং ভযাতীতো, কালাতীতো, খণাতীতো, পমাণং অতিক্কন্তোতি পমাণাতিক্কন্তো, সুখং পত্তোতি সুখপ্পত্তো. এৰং দুক্খপ্পত্তো, সোতং আপন্নোতি সোতাপন্নো. এৰং নিরোধসমাপন্নো, অদ্ধানমগ্গং পটিপন্নোতি অদ্ধানমগ্গপ্পটিপন্নো, রুক্খং আরূল়্হোতি রুক্খারূল়্হো, রথারূল়্হো, ওঘং তিণ্ণোতি ওঘতিণ্ণো ওঘং তিণ্ণো ৰা ইচ্চাদি.

কম্মুপপদৰিহিতেহি কিতন্তপদেহি পন নিচ্চসমাসোযেৰ, কুম্ভং করোতীতি কুম্ভকারো, রথকারো, পত্তং গণ্হাতীতি পত্তগ্গাহো, অত্থং কামেতীতি অত্থকামো, ধম্মকামো, ৰিনযং ধারেতীতি ৰিনযধরো, ধম্মধরো, ব্রহ্মং চরতি সীলেনাতি ব্রহ্মচারী, ভৰপারং গচ্ছতি সীলেনাতি ভৰপারগূ, সব্বং জানাতীতি সব্বঞ্ঞূ, অত্থঞ্ঞূ, ধম্মঞ্ঞূইচ্চাদি.

বহুলাধিকারত্তা ত, তৰন্তু, তাৰী, অন্ত, মান, তুন, ত্ৰান, ত্ৰা, তুং, তৰেপচ্চযন্তেসু পরেসু সমাসো ন হোতি, ৰস্সং ৰুত্থো, ওদনং ভুত্তো, ওদনং ভুত্তৰা, ওদনং ভুত্তাৰী, ধম্মং সুণন্তো, ধম্মং সুণমানো ¶ ধম্মং সোতুন, ধম্মং সুত্ৰান, ধম্মং সুত্ৰা, ধম্মং সোতুং, ধম্মং সোতৰে.

ইতি দুতিযাতপ্পুরিসো.

ততিযাতপ্পুরিস

ততিযাতপ্পুরিসো কম্মৰাচকেসু কিতন্তেসু চ সম্পন্ন, সহগতাদীসু চ পুব্ব, সদিস, সম, ঊনত্থ, কলহ, নিপুণ,-মিস্সক, সখিলাদীসু চ পরেসু হোতি.

বুদ্ধেন ভাসিতো বুদ্ধভাসিতো. এৰং বুদ্ধদেসিতো, বুদ্ধপঞ্ঞত্তো, বুদ্ধরক্খিতো, সত্থারা ৰণ্ণিতো সত্থুৰণ্ণিতো, ৰিঞ্ঞূহি গরহিতো ৰিঞ্ঞুগরহিতো, ৰিঞ্ঞুপসত্থো, ইস্সরেন কতং ইস্সরকতং, অত্তনা কতং সযংকতং, পরেহি কতং পরংকতং, বিন্দাগমো. সুকেহি আহটং সুকাহটং, রঞ্ঞা হতো রাজহতো, রোগেন পীল়িতো রোগপীল়িতো, অগ্গিনা দড্ঢো অগ্গিদড্ঢো, সপ্পেন দট্ঠো সপ্পদট্ঠো, সল্লেন ৰিদ্ধো সল্লৰিদ্ধো, ইচ্ছায অপকতো অভিভূতো ইচ্ছাপকতো.

সীলেন সম্পন্নো সীলসম্পন্নো. এৰং সুখসহগতং, ঞাণসম্পযুত্তং, মিত্তসংসগ্গো, পিযসম্পযোগো, পিযৰিপ্পযোগো, জাতিযা অন্ধো জচ্চন্ধো, গুণহীনো, গুণৰুড্ঢো, চতুৰগ্গেন সঙ্ঘেন করণীযং কম্মং চতুৰগ্গকরণীযং. এৰং পঞ্চৰগ্গকরণীযং, কাকেহি পেয্যা কাকপেয্যা, নদী.

একক্খরেসু পরপদেসু নিচ্চসমাসো, উরেন গচ্ছতীতি উরগো, পাদেন পিৰতীতি পাদপো ইচ্চাদি.

ক্ৰচি মজ্ঝেপদলোপো, গুল়েন সংসট্ঠো ওদনো গুল়োদনো. এৰং খীরোদনো, অস্সেন যুত্তো রথো অস্সরথো. এৰং আজঞ্ঞরথো, মগ্গেন সম্পযুত্তং চিত্তং মগ্গচিত্তং ¶ , জম্বুযা পঞ্ঞাতো দীপো জম্বুদীপো, একেন অধিকা দস একাদস ইচ্চাদি.

পুব্বাদীসু – মাসেন পুব্বো মাসপুব্বো, মাতরা সদিসো মাতুসদিসো. এৰং মাতুসমো, পিতুসমো, একেন ঊনা ৰীসতি একূনৰীসতি, সীলেন ৰিকলো সীলৰিকলো, অসিনা কলহো অসিকলহো, ৰাচায নিপুণো ৰাচানিপুণো. এৰং যাৰকালিকসম্মিস্সং, ৰাচাসখিলো, সত্থারা সদিসো সত্থুকপ্পো, পুঞ্ঞেন অত্থো পুঞ্ঞত্থো, পুঞ্ঞেন অত্থিকো পুঞ্ঞত্থিকো. এৰং সেয্যত্থিকো, মহগ্ঘত্থিকো, গুণেন অধিকো গুণাধিকো ইচ্চাদি.

বহুলাধিকারা ক্ৰচি সমাসো ন হোতি, ফরসুনা ছিন্নং, কাকেহি পাতব্বা, দস্সনেন পহাতব্বা ধম্মা, ভাৰনায পহাতব্বা ধম্মা ইচ্চাদি.

ইতি ততিযাতপ্পুরিসো.

চতুত্থীতপ্পুরিস

চতুত্থীতপ্পুরিসো তদত্থে ৰা অত্থ, হিত, দেয্যাদীসু ৰা পরেসু হোতি.

কথিনস্স দুস্সং কথিনদুস্সং, কথিনত্থায আভটং দুস্সন্তি অত্থো. এৰং কথিনচীৰরং, কথিনায দুস্সং, কথিনায চীৰরন্তিপি যুজ্জতি, কথিনত্থারাযাতি অত্থো. চীৰরায দুস্সং চীৰরদুস্সং. এৰং চীৰরমূলং [চীৰরমূল্যং (রূ. নী.)], সঙ্ঘস্স আভটং ভত্তং সঙ্ঘভত্তং, সঙ্ঘত্থায ৰা পটিযত্তং ভত্তং সঙ্ঘভত্তং. এৰং আগন্তুকভত্তং, গমিকভত্তং, গিলানভত্তং.

সঙ্ঘস্স ¶ অত্থো সঙ্ঘত্থো, লোকস্স হিতো লোকহিতো, বুদ্ধস্স দেয্যং বুদ্ধদেয্যং, বুদ্ধস্স পণামো বুদ্ধপ্পণামো. এৰং বুদ্ধথোমনা, বুদ্ধুপট্ঠানং, সুত্তস্স অনুলোমং সুত্তানুলোমং. এৰং সুত্তানুরূপং, সুত্তানুকূলং, সুত্তানুগুণং, ঠানস্স অরহং ঠানারহং, রঞ্ঞো অরহং রাজারহং. এৰং রাজগ্ঘং, রাজদেয্যং, কত্তুং কামেতীতি কত্তুকামো. এৰং গন্তুকামো, কথেতুকামো, দট্ঠুকামো, সোতুকামো. এত্থ চ তুমন্তস্স অসঙ্খ্যত্তা ‘অসঙ্খ্যেহি সব্বাস’ন্তি ততো নিচ্চং চতুত্থীলোপো হোতি, সমাসে কতে নিচ্চং নিগ্গহীতলোপো চ. ‘‘সঙ্ঘস্স দাতব্বং, সঙ্ঘস্স দাতুং’’ ইচ্চাদীসু সমাসো ন হোতি.

ইতি চতুত্থীতপ্পুরিসো.

পঞ্চমীতপ্পুরিস

পঞ্চমীতপ্পুরিসো অপগমন, ভয, ৰিরতি, মোচনাদিঅত্থেসু পরেসু হোতি.

মেথুনা অপেতোতি মেথুনাপেতো, পলাসতো অপগতোতি পলাসাপগতো, নগরম্হা নিগ্গতোতি নগরনিগ্গতো, পিণ্ডপাততো পটিক্কন্তোতি পিণ্ডপাতপ্পটিক্কন্তো. এৰং গামনিক্খন্তো, রুক্খপতিতো, সাসনম্হা চুতোতি সাসনচুতো, আপত্তিযা ৰুট্ঠানং আপত্তিৰুট্ঠানং, উদকতো উগ্গতো উদকুগ্গতো, ভৰতো নিস্সটো ভৰনিস্সটো, খন্ধসঙ্গহতো নিস্সটন্তি খন্ধসঙ্গহনিস্সটং, চোরম্হা ভীতোতি চোরভীতো, পাপতো ভাযতি সীলেনাতি পাপভীরুকো, পাপতো জিগুচ্ছতি সীলেনাতি পাপজিগুচ্ছী, ৰট্টতো নিব্বিন্দতীতি ৰট্টনিব্বিন্নো, কাযদুচ্চরিততো ৰিরতি কাযদুচ্চরিতৰিরতি. এৰং ৰচীদুচ্চরিতৰিরতি, বন্ধনা মুত্তো বন্ধনমুত্তো. এৰং বন্ধনমোক্খো, কম্মতো সমুট্ঠিতং কম্মসমুট্ঠিতং ¶ . এৰং কম্মজাতং, কম্মসম্ভূতং, কম্মনিব্বত্তং, লোকতো অগ্গো লোকগ্গো. এৰং লোকজেট্ঠো, লোকুত্তমো, সব্বেহি জেট্ঠো সব্বজেট্ঠো, সব্বেহি কনিট্ঠো সব্বকনিট্ঠো. এৰং সব্বহীনো, সব্বপচ্ছিমো, উক্কট্ঠতো উক্কট্ঠোতি উক্কট্ঠুক্কট্ঠো, ওমকতো ওমকোতি ওমকোমকো.

ক্ৰচি নিচ্চসমাসো হোতি, মাতিতো জাতো মাতুজো. এৰং পিতুজো, কম্মজং, চিত্তজং, উতুজং ইচ্চাদি.

ইতি পঞ্চমীতপ্পুরিসো.

ছট্ঠীতপ্পুরিস

রঞ্ঞো পুত্তো রাজপুত্তো. এৰং রাজপুরিসো, বুদ্ধসাৰকো, সমুদ্দঘোসো, ধঞ্ঞানং রাসি ধঞ্ঞরাসি, মত্তিকায পত্তোতি মত্তিকাপত্তো, ৰিকারসম্বন্ধে ছট্ঠী, মত্তিকামযপত্তোতি অত্থো. এৰং সুৰণ্ণকটাহং, সুৰণ্ণভাজনং, পানীযস্স থালকং পানীযথালকং.

সমাসমজ্ঝে ঈ, ঊনং বহুলং রস্সত্তং, দণ্ডিনো কুলং দণ্ডিকুলং, হত্থিপদং, ইত্থিরূপং, নদিকূলং, নদিতীরং, ভিক্খুনীনং সঙ্ঘো ভিক্খুনিসঙ্ঘো, জম্বুযা সাখা জম্বুসাখা ইচ্চাদি.

অন্ত, মান, নিদ্ধারণিয, পূরণ, ভাৰ, সুহিতত্থেহি সমাসো ন হোতি, মমং অনুকুব্বন্তো, মমং অনুকুরুমানো, গুন্নং কণ্হা সম্পন্নখীরতমা. ৰিভত্তাৰধিছট্ঠিযা পন হোতিযেৰ, নরানং উত্তমো নরুত্তমো, নরসেট্ঠো, নরৰরো, গণানং উত্তমো গণুত্তমো, দ্ৰিপদানং উত্তমো দ্ৰিপদুত্তমো ইচ্চাদি. সিস্সানং পঞ্চমো সিস্সো, কপ্পস্স ততিযো ভাগো, পক্খস্স অট্ঠমী, পটস্স সুক্কতা, রূপস্স লহুতা, রূপস্স ¶ মুদুতা, রূপস্স কম্মঞ্ঞতা. ক্ৰচি হোতি, কাযলহুতা, চিত্তলহুতা, বুদ্ধসুবুদ্ধতা. ধম্মসুধম্মতা, ফলানং সুহিতো, ফলানং তিত্তো, ফলানং অসিতো, করণত্থে ছট্ঠী.

‘‘ভটো রঞ্ঞো পুত্তো দেৰদত্তস্সা’’তি এত্থ ‘রাজপুত্তো’তি ন হোতি অঞ্ঞমঞ্ঞানপেক্খত্তা. ‘‘দেৰদত্তস্স কণ্হা দন্তা’’তি এত্থ ‘দেৰদত্তকণ্হদন্তা’তি ন হোতি অঞ্ঞসাপেক্খত্তা [নী. ৬৯০]. অঞ্ঞসাপেক্খত্তেপি নিচ্চং সম্বন্ধীপেক্খসদ্দানং সমাসো হোতি ৰাক্যে ৰিয সমাসেপি সম্বন্ধস্স ৰিদিতত্তা. ৰুত্তঞ্চ ‘‘সতিপি সাপেক্খত্তে গমকত্তা সমাসো হোতী’’তি [ক. ৩২৮; রূ. ৩৫২; নী. ৬৯১], দেৰদত্তগুরুকুলং, রাজদাসীপুত্তো, দেৰদাসীপুত্তো ইচ্চাদি. তত্থ দেৰদত্তস্স গুরু দেৰদত্তগুরু, তস্স কুলং দেৰদত্তগুরুকুলন্তি ৰিগ্গহো. গুরুনো কুলং গুরুকুলং, দেৰদত্তস্স গুরুকুলং দেৰদত্তগুরুকুলন্তিপি ৰদন্তি. ‘‘রঞ্ঞো মাগধস্স বিম্বিসারস্স পুত্তো’’তি এত্থপি অঞ্ঞসাপেক্খত্তা ‘বিম্বিসারপুত্তো’তি ন হোতি, রঞ্ঞো গো চ অস্সো চ পুরিসো চাতি অত্থে ‘রাজগৰস্সপুরিসা’তি হোতি দ্ৰন্দতো পুব্বপদস্স দ্ৰন্দপদেহিপি পচ্চেকং সম্বন্ধস্স ৰিদিতত্তা. তথা দ্ৰন্দতো পরপদস্সপি, নরানঞ্চ দেৰানঞ্চ সারথি নরদেৰসারথি.

ইতি ছট্ঠীতপ্পুরিসো.

সত্তমীতপ্পুরিস

সত্তমীতপ্পুরিসে রূপে সঞ্ঞা রূপসঞ্ঞা. এত্থ চ কারকানং ক্রিযাসাধনলক্খণত্তা ক্রিযাপদেহেৰ সম্বন্ধো হোতি, তস্মা অক্রিযৰাচকেন পরপদেন সদ্ধিং সমাসে জাতে মজ্ঝে অনুরূপং ক্রিযাপদং ৰিঞ্ঞাযতি, যথা ¶ ‘অস্সেন যুত্তো রথো অস্সরথো’ ইতি ‘রূপে সঞ্ঞা’তি রূপে উপ্পন্না সঞ্ঞাতি অত্থো. চক্খুস্মিং ৰিঞ্ঞাণং চক্খুৰিঞ্ঞাণং, ধম্মে রতো ধম্মরতো. এৰং ধম্মরুচি, ধম্মগারৰো, দানে অজ্ঝাসযো দানজ্ঝাসযো. এৰং দানাধিমুত্তি, ৰট্টে ভযং ৰট্টভযং, ৰট্টদুক্খং, গামে সূকরো গামসূকরো, ৰনমহিংসো, সমুদ্দমচ্ছো, ইত্থীসু ধুত্তো ইত্থিধুত্তো, ইত্থিসোণ্ডো.

উপপদকিতন্তেসু নিচ্চসমাসো [নী. ৬৮২], ৰনে চরতীতি ৰনচরো, কামাৰচরো, কুচ্ছিম্হি সযতীতি কুচ্ছিস্সযো, গব্ভে সেতীতি গব্ভসেয্যো, থলে তিট্ঠতীতি থলট্ঠো, জলট্ঠো, পব্বতট্ঠো, পঙ্কে জাতং পঙ্কজং. এৰং অত্রজো, খেত্রজো ইচ্চাদি. ইধ ন হোতি [নী. ৬৮১], ভোজনে মত্তঞ্ঞুতা, ইন্দ্রিযেসু গুত্তদ্ৰারো, আসনে নিসিন্নো, আসনে নিসীদিতব্বং.

ইতি সত্তমীতপ্পুরিসো.

লুত্ততপ্পুরিস

তপ্পুরিসপদানং মহাৰুত্তিসুত্তেন ক্ৰচি ৰিপল্লাসো.

উপরিগঙ্গা, হেট্ঠানদী, অন্তোৰিহারো, অন্তোসমাপত্তি, হংসানং রাজা রাজহংসো হংসরাজা ৰা, মাসস্স অড্ঢং অড্ঢমাসং, কহাপণস্স অড্ঢং অড্ঢকহাপণং, অড্ঢমাসং, রত্তিযা অড্ঢং অড্ঢরত্তং. এৰং পুব্বরত্তং, পররত্তং, ইস্স অত্তং. কাযস্স পুব্বভাগো পুব্বকাযো, পরকাযো, অহস্স পুব্বো পুব্বণ্হো, মজ্ঝণ্হো, সাযন্হো, পুব্বেদিট্ঠো দিট্ঠপুব্বো, তথাগতং দিট্ঠপুব্বো থেরো, তথাগতো দিট্ঠপুব্বো থেরেন ইচ্চাদি.

ইতি লুত্ততপ্পুরিসো.

অলুত্ততপ্পুরিস

ইদানি ¶ অলুত্ততপ্পুরিসা ৰুচ্চন্তে.

দীপঙ্করো, পভঙ্করো, অমতন্দদো, পুরিন্দদো, ৰেস্সন্তরো, অত্তন্তপো, পরন্তপো, রণঞ্জহো, জুতিন্ধরো, ৰিজ্জন্ধরো, দস্সনেনপহাতব্বধম্মো, কুতোজো, ততোজো, ইতোজো, ভযতো উপট্ঠানং ভযতুপট্ঠানং, কটত্তাকম্মং, কটত্তারূপং, পরস্সপদং, অত্তনোপদং, দেৰানমিন্দো, দেৰানংপিযতিস্সো, গৰম্পতিত্থেরো, পুব্বেনিৰাসো, মজ্ঝেকল্যাণং, দূরেরূপং, সন্তিকেরূপং, দূরেনিদানং, সন্তিকেনিদানং, অন্তেৰাসিকো, জনেসুতো, কামেসুমিচ্ছাচারো ইচ্চাদি [ক. ৩২৭; রূ. ৩৫১; নী. ৬৮৬].

ইতি অলুত্ততপ্পুরিসো.

সব্বো চাযং অমাদিতপ্পুরিসো অভিধেয্যৰচনো পরপদলিঙ্গো চ.

অমাদিতপ্পুরিসো নিট্ঠিতো.

কম্মধারযসমাস

অথ কম্মধারযসঞ্ঞিতো পঠমাতপ্পুরিসো ৰুচ্চতে.

কম্মমিৰ দ্ৰযং ধারেতীতি কম্মধারযো. যথা কম্মং ক্রিযঞ্চ পযোজনঞ্চ দ্ৰযং ধারেতি কম্মে সতি তস্স দ্ৰযস্স সম্ভৰতো, তথা অযং সমাসো একস্স অত্থস্স দ্ৰে নামানি ধারেতি ইমস্মিং সমাসে সতি একত্থজোতকস্স নামদ্ৰযস্স সম্ভৰতোতি [ক. ৩২৪; রূ. ৩৩৯; নী. ৭০২].

অপি চ কত্তব্বন্তি কম্মং, ধারেতব্বন্তি ধারিযং, কম্মঞ্চ তং ধারিযঞ্চাতি কম্মধারিযং, যংকিঞ্চি হিতকম্মং, কম্মধারিযসদ্দসদিসত্তা ¶ সব্বো চাযং সমাসো কম্মধারযোতি ৰুচ্চতি ইস্স অত্তং কত্ৰা. যথা হি কম্মধারিযসদ্দো একস্স অত্থস্স দ্ৰে নামানি ধারেতি, তথা অযং সমাসোপীতি. সো এৰ উত্তরপদত্থপধানতাসঙ্খাতেন তপ্পুরিসলক্খণেন যুত্তত্তা ‘তপ্পুরিসো’তি চ ৰুচ্চতি. ভিন্নপৰত্তিনিমিত্তানং দ্ৰিন্নং পদানং ৰিসেসনৰিসেসিতব্বভাৰেন একস্মিং অত্থে পৰত্তি তুল্যাধিকরণতা নাম, তেন তুল্যাধিকরণলক্খণেন যুত্তত্তা ‘তুল্যাধিকরণসমাসো’তি চ ৰুচ্চতি. সো এৰ চ ৰিসেসনপদৰসেন গুণৰিসেসদীপনত্তা ‘ৰিসেসনসমাসো’তি চ ৰুচ্চতি. তস্মিং ৰিসেসনসমাসে –

৩৪৬. ৰিসেসনমেকত্থেন [ক. ৩২৪; রূ. ৩৩৯; নী. ৭০২; চং. ২.২.১৮; পা. ২.১.৫৭].

ৰিসেসনভূতং স্যাদ্যন্তপদং একত্থেন ৰিসেস্যভূতেন স্যাদ্যন্তপদেন সদ্ধিং একত্থং হোতি.

এত্থ চ ৰিসেসীযতি দব্বং ৰিসিট্ঠং করীযতি এতেনাতি ৰিসেসনং. একো অত্থো যস্সাতি একত্থং, ‘একো’তি সমানো, ‘অত্থো’তি অভিধেয্যত্থো, নেমিত্তকত্থো, সোযেৰ দ্ৰিন্নং পৰত্তিনিমিত্তানং অধিট্ঠানট্ঠেন ‘অধিকরণ’ন্তি চ ৰুচ্চতি. পৰত্তিনিমিত্তানঞ্চ অধিট্ঠানত্তে সতি পদানম্পি অধিট্ঠানতা সিদ্ধা হোতি. ইতি একত্থন্তি তুল্যাধিকরণং, সমানাধিকরণন্তি ৰুত্তং হোতি, তেন একত্থেন. ‘একত্থং হোতী’তি একত্থীভূতং হোতীতি অত্থো.

সো চ সমাসো নৰৰিধো ৰিসেসনপুব্বপদো, ৰিসেসনুত্তরপদো, ৰিসেসনোভযপদো, উপমানুত্তরপদো, সম্ভাৰনাপুব্বপদো, অৰধারণপুব্বপদো, ননিপাতপুব্বপদো, কুনিপাতপুব্বপদো, পাদিপুব্বপদো চাতি.

তত্থ ¶ ৰিসেসনপুব্বপদো যথা? মহাপুরিসো, মহানদী, মহব্ভযং. এত্থ চ ‘‘সা সেনা দিস্সতে মহা [জা. ২.২২.৭৭১], বারাণসিরজ্জং নাম মহা’’তি [জা. অট্ঠ. ১.১.মহাসীলৰজাতকৰণ্ণনা] পাল়ি দিস্সতি. তস্মা সমাসেপি তিলিঙ্গে নিপাতরূপো মহাসদ্দো যুজ্জতি. মহা চ সো পুরিসো চাতি মহাপুরিসো, মহা চ সা নদী চাতি মহানদী, মহা চ তং ভযঞ্চাতি মহব্ভযং, দ্ৰিত্তং সংযোগে চ রস্সত্তং. মহাসদ্দৰেৰচনেন মহন্তসদ্দেনপি ৰাক্যং দস্সেতুং যুজ্জতি, মহন্তো পুরিসো মহাপুরিসো, মহন্তী নদী মহানদী, মহন্তং ভযং মহব্ভযন্তি. চ, তসদ্দেহি চ সদ্ধিং পরিপুণ্ণং কত্ৰা দস্সেতুং যুজ্জতি, মহন্তো চ সো পুরিসো চাতি মহাপুরিসো, মহন্তী চ সা নদী চাতি মহানদী, মহন্তঞ্চ তং ভযঞ্চাতি মহব্ভযন্তি. মহন্তসদ্দো ৰা মহা হোতি, ‘ট ন্তন্তূন’ন্তি সুত্তেন উত্তরপদে পরে ন্তস্স সব্বস্স অত্তং, মহাৰুত্তিনা দীঘো চ.

এত্থ চ দ্ৰীহি চসদ্দেহি দ্ৰিন্নং পদানং সকত্থনানাত্তং দীপেতি. তংসদ্দেন সকত্থনানাত্তেপি সকত্থানং অধিকরণভূতস্স দব্বত্থস্স একত্তং দীপেতি. ইমস্মিং ব্যাকরণে ৰিসুং রূপৰিধানকিচ্চং নাম নত্থি, তংতংসুত্তৰিধানঞ্চ তদনুরূপং দস্সিতৰিগ্গহৰাক্যঞ্চ দিস্ৰা তস্স তস্স সিদ্ধপদস্স অত্থব্যঞ্জনৰিনিচ্ছযে ঞাতে রূপৰিধানকিচ্চং সিদ্ধং হোতি, সন্তো চ সো পুরিসো চাতি সপ্পুরিসো, সেতহত্থী, নীলুপ্পলং, লোহিতচন্দনং.

ৰিসদিসলিঙ্গ, ৰচনাপি সদ্দা একত্থা হোন্তি, ৰিনযো চ সো পরিযত্তি চাতি ৰিনযপরিযত্তি, ৰিনযো চ সো পিটকঞ্চাতি ৰিনযপিটকং, অৰিজ্জা চ সা পচ্চযো চাতি অৰিজ্জাপচ্চযো, অৰিজ্জা চ সা নীৰরণঞ্চাতি অৰিজ্জানীৰরণং. এৰং ইত্থিরতনং, সীলঞ্চ তং গুণো চাতি সীলগুণো, সীলঞ্চ তং পতিট্ঠা চাতি সীলপতিট্ঠা ইচ্চাদি.

তথা ¶ ৰীসতি চ সা পুরিসা চাতি ৰীসতিপুরিসা, সতঞ্চ তং পুরিসা চাতি সতপুরিসা, সঙ্খারা চ তে পচ্চযো চাতি সঙ্খারপচ্চযো, অঙ্গা চ তে জনপদঞ্চাতি অঙ্গজনপদং, মগধা চ তে রট্ঠঞ্চাতি মগধরট্ঠং. এৰং কাসিরট্ঠং ইচ্চাদি.

ইধ ন হোতি [রূ. ৩৪১; নী. ৬৮১], পুণ্ণো মন্তানীপুত্তো, চিত্তো গহপতি, সক্কো দেৰরাজা, ব্রহ্মা সহম্পতি ইচ্চাদি.

ক্ৰচি নিচ্চসমাসো, কণ্হসপ্পো, লোহিতমালং ইচ্চাদি.

ৰিসেসনুত্তরপদো যথা? সারিপুত্তত্থেরো, বুদ্ধঘোসাচরিযো, আচরিযগুত্তিলো ৰা, মহোসধপণ্ডিতো, পুরিসুত্তমো, পুরিসৰরো, পুরিসৰিসেসো ইচ্চাদি.

ৰিসেসনোভযপদো যথা? ছিন্নঞ্চ তং পরূল়্হঞ্চাতি ছিন্নপরূল়্হং, সীতঞ্চ তং উণ্হঞ্চাতি সীতুণ্হং, খঞ্জো চ সো খুজ্জো চাতি খঞ্জখুজ্জো. এৰং অন্ধবধিরো, কতঞ্চ তং অকতঞ্চাতি কতাকতং, ছিদ্দাৰছিদ্দং, ছিন্নভিন্নং, সিত্তঞ্চ তং সম্মট্ঠঞ্চাতি সিত্তসম্মট্ঠং, সন্তস্স ভাৰো সচ্চং, অখেমট্ঠেন দুক্খঞ্চ তং অৰিপরীতট্ঠেন সচ্চঞ্চাতি দুক্খসচ্চং ইচ্চাদি.

উপমানুত্তরপদো যথা? সীহো ৰিযাতি সীহো, মুনি চ সো সীহো চাতি মুনিসীহো. এৰং মুনিপুঙ্গৰো, বুদ্ধনাগো, বুদ্ধাদিচ্চো, রংসি ৰিযাতি রংসি, সদ্ধম্মো চ সো রংসি চাতি সদ্ধম্মরংসি. এৰং ৰিনযসাগরো, সমণপদুমো, সমণপুণ্ডরীকো ইচ্চাদি.

সম্ভাৰনাপুব্বপদো যথা? হেতু হুত্ৰা পচ্চযো হেতুপচ্চযো. এৰং আরম্মণপচ্চযো, মনুস্সভূতো, দেৰভূতো, ধম্মো ইতি সঙ্খাতো ধম্মসঙ্খাতো, ধম্মসম্মতো, ধম্মসঞ্ঞিতো ¶ , ধম্মলক্খিতো, এৰ ইতি সঙ্খাতো সদ্দো এৰসদ্দো. এৰং চসদ্দো, ৰাসদ্দো, অরিযভূতো সঙ্ঘো অরিযসঙ্ঘো. এৰং বুদ্ধমুনি, পচ্চেকমুনি ইচ্চাদি. এত্থ চ সম্ভাৰনা নাম সামঞ্ঞভূতস্স উত্তরপদত্থস্স দল়্হং কত্ৰা থোমনা সরূপৰিসেসদীপনা, ন গুণমত্তদীপনাতি অধিপ্পাযো. গরূ পন ‘‘ধম্মো ইতি বুদ্ধি ধম্মবুদ্ধি. এৰং ধম্মসঞ্ঞা, অনিচ্চসঞ্ঞা, ধাতুসঞ্ঞা, মাতুসঞ্ঞা, পাণসঞ্ঞিতা, অত্তদিট্ঠি’’ ইচ্চাদীনিপি এত্থ আহরন্তি, ইমানি পন ‘‘সরণং ইতি গতো উপগতো সরণঙ্গতো’’তি পদং ৰিয ইতিলুত্তানি পঠমাতপ্পুরিসপদানি নাম যুজ্জন্তীতি [রূ. ৩৪৩; নী. ৭০২].

অৰধারণপুব্বপদো যথা? গুণো এৰ ধনং ন মণিসুৰণ্ণাদীতি গুণধনং. এৰং সদ্ধাধনং, সীলধনং, চক্খু এৰ দ্ৰারং ন গামদ্ৰারাদীতি চক্খুদ্ৰারং. এৰং চক্খুৰত্থু, চক্খুন্দ্রিযং, চক্খাযতনং, চক্খুধাতু, খন্ধা এৰ ভারা খন্ধভারা. এত্থ চ যদি ভরিতব্বট্ঠেন ভারা নাম সিযুং, পঞ্চক্খন্ধা এৰ ভারা নাম সিযুং, ন সীসভার, অংসভারাদযো. খন্ধা হি নিচ্চভারা হোন্তি, ইতরে তাৰকালিকা, খন্ধমূলিকা চাতি. এৰং অতিসযত্থসম্ভাৰনত্থং খন্ধা এৰ ভারাতি অৰধারণৰাক্যং পযুজ্জতি, ন সীসভারাদীনং সব্বসো ভারভাৰপটিক্খিপনত্থন্তি. এৰং সব্বত্থ, অৰিজ্জা এৰ মলং ন কংসমলাদিকন্তি অৰিজ্জামলং, অৰিজ্জা এৰ আসৰো ন মধ্ৰাসৰাদিকোতি অৰিজ্জাসৰো. এৰং তণ্হাসল্লং, পঞ্ঞাসত্থং, পঞ্ঞালোকো, পঞ্ঞাপজ্জোতো, রাগগ্গি, দোসগ্গি, মোহগ্গি ইচ্চাদি. গরূ পন ‘‘ধনং ৰিযাতি ধনং, সদ্ধা এৰ অরিযানং ধনং সদ্ধাধনং, সত্থং ৰিযাতি সত্থং, পঞ্ঞা এৰ সত্থং পঞ্ঞাসত্থ’’ন্তি যোজেন্তি, এৰং সতি অতিসযসম্ভাৰনত্থো ন সিজ্ঝতি [রূ. ৩৪৩; নী. ৭০২].

৩৪৭. ননিপাতপুব্বপদে নউ [ক. ৩২৬; রূ. ৩৪১; নী. ৭০৭].

ঞানুবন্ধো ¶ পটিসেধম্হা অঞ্ঞনকার নিৰত্তনত্থো, নউইচ্চেতং স্যাদ্যন্তং অঞ্ঞেন স্যাদ্যন্তেন সহ একত্থং হোতি. ইমিনা নঞে কত্থসঞ্ঞং কত্ৰা –

৩৪৮. ট নউস্স [ক. ৩৩৩; রূ. ৩৪৪; নী. ৭১৭; চং. ২.২.২০; পা. ২.২.৬; ‘‘নউ’’ (বহূসু)].

উত্তরপদে পরে নউইচ্চেতস্স টানুবন্ধো অ হোতীতি নস্স অত্তং.

ন ব্রাহ্মণো অব্রাহ্মণো. এত্থ সিযা – কিং ৰিজ্জমানস্স ৰাযং নিসেধো, উদাহু অৰিজ্জমানস্স ৰাতি, কিঞ্চেত্থ – যদি ৰিজ্জমানস্স নিসেধো, এৰং সতি লোকে ৰিজ্জমানা সব্বে ব্রাহ্মণা অব্রাহ্মণা নাম ভৰেয্যুং. তস্মা ‘‘ইধ জনো ন ব্রাহ্মণো, তত্থ জনো ন ব্রাহ্মণো’’তিআদিনা দেসাদিনিযমং ৰিনা লোকে ৰিজ্জমানস্স ব্রাহ্মণস্স নিসেধো ন যুজ্জতি, অথ লোকে অৰিজ্জমানস্স নিসেধো, এৰঞ্চ সতি কিং অৰিজ্জমানস্স নিসেধেন নিসেধনীযস্সেৰ অৰিজ্জমানত্তাতি? ৰুচ্চতে – তংসদিসাদিঅত্থেসু তব্বোহারস্সেৰাযং নিসেধো. তথা হি ব্রাহ্মণসদিসে অব্রাহ্মণে কেসঞ্চি ব্রাহ্মণসঞ্ঞা সণ্ঠাতি, সঞ্ঞানুরূপঞ্চ ব্রাহ্মণৰোহারো তস্মিং পৰত্ততি, এৰং পৰত্তস্স অব্রাহ্মণে ব্রাহ্মণৰোহারস্স অযং পটিসেধো হোতি. যথা তং? লোকস্মিং বালজনানং মিচ্ছাসঞ্ঞাৰসেন মিচ্ছাৰোহারো পৰত্ততিযেৰ ‘‘রূপং অত্তা, ৰেদনা অত্তা’’ ইচ্চাদি, তেসং তস্স মিচ্ছাভাৰখ্যাপনত্থং পটিসেধো যোজিযতি ‘‘রূপং অনত্তা, ৰেদনা অনত্তা’’ [মহাৰ. ২০] ইচ্চাদি. এত্তাৰতা সুদ্ধব্রাহ্মণসদ্দস্সপি মিচ্ছাৰসেন তংসদিসে অত্থে পৰত্তিসম্ভৰো সিদ্ধো হোতি, নকারস্স ¶ চ তদত্থজোতকমত্ততা সিদ্ধা হোতি, এৰঞ্চ সতি উত্তরপদত্থপধানতাসঙ্খাতং তপ্পুরিসলক্খণম্পি ইধ ন ৰিরুজ্ঝতি, তস্মা অব্রাহ্মণোতি ব্রাহ্মণসদিসোতি ৰুত্তং হোতি. এস নযো তদঞ্ঞ, তব্বিরুদ্ধ, তদভাৰত্থাদীসু.

তত্থ তদঞ্ঞত্থে –

সঙ্খতা ধম্মা অসঙ্খতা ধম্মা [ধ. স. দুকমাতিকা ৮]. এত্থ চ ন সঙ্খতা অসঙ্খতা, সঙ্খতধম্মেহি অঞ্ঞে ধম্মাতি অত্থো.

তব্বিরুদ্ধে –

অকুসলো, কুসলপটিপক্খো ধম্মোতি অত্থো.

তদভাৰে –

ন কত্ৰা অকত্ৰা, করণেন সব্বসো ৰিনাতি অত্থো.

দুৰিধো পটিসেধো পসজ্জপটিসেধো, পযিরুদাসপটিসেধো চাতি.

তত্থ অত্তনা যুত্তপদত্থং পসজ্জ লগ্গেত্ৰা পটিসেধেতীতি পসজ্জপটিসেধো, তদভাৰমত্তজোতকো নকারো, ক্রিযামত্তনিসেধোতি ৰুত্তং হোতি. অকত্ৰা, অকাতুং, অকরোন্তো, ন করোতি, ন কাতব্বং ইচ্চাদি.

পসজ্জমত্তে অট্ঠত্ৰা তংসদিসাদিকে পরিতোভাগে উগ্গয্হ নিসেধেতব্বং অত্থং অসতি খিপতি ছড্ডেতীতি পযিরুদাসো, তংসদিসাদিজোতকো, দব্বনিসেধোতি ৰুত্তং হোতি. অব্রাহ্মণো ইচ্চাদি. এৰং অসমণো, অসক্যপুত্তিযো, অমিত্তো, মিত্তধম্মৰিধুরোতি অত্থো.

৩৪৯. অন সরে [ক. ৩৩৪; রূ. ৩৪৫; নী. ৭১৮; চং. ৫.২.১১৯; পা. ৬.৩.১০৫].

সরে পরে নউইচ্চেতস্স অন হোতি.

ন ¶ অরিযো অনরিযো, অরিযধম্মৰিমুখোতি অত্থো. ন আৰাসো অনাৰাসো, ন ইস্সরো অনিস্সরো. ন ঈতি অনীতি, ‘ঈতী’তি উপদ্দৰো, ন যুত্তো উপাযো অনুপাযো, ন ঊমি অনূমি, ন যুত্তা এসনা অনেসনা, ন যুত্তো ওকাসো অনোকাসো, ন অতিক্কম্ম অনতিক্কম্ম, অনাদায, অনোলোকেত্ৰা ইচ্চাদি.

বহুলাধিকারা অযুত্তত্থানম্পি সমাসো হোতি [ক. ৩৩৬; রূ. ৩৪৭; নী. ৬৮৯], পুন ন গাযিতব্বাতি অপুনগেয্যা, গাথা, চন্দং ন উল্লোকেন্তীতি অচন্দমুল্লোকিকানি, মুখানি, সূরিযং ন পস্সন্তীতি অসূরিযপস্সা, রাজকঞ্ঞা, সদ্ধং ন ভুঞ্জতি সীলেনাতি অসদ্ধভোজী. এৰং অলৰণভোজী, অত্থং ন কামেন্তীতি অনত্থকামা. এৰং অহিতকামা, ওকাসং ন কারেসীতি অনোকাসংকারেত্ৰা. এৰং অনিমিত্তংকত্ৰা, মূলমূলং ন গচ্ছতীতি অমূলমূলংগন্ত্ৰা ইচ্চাদি.

‘‘পুন গাযিতব্বাতি পুনগেয্যা, ন পুনগেয্যা অপুনগেয্যা. অত্থং কামেন্তীতি অত্থকামা, ন অত্থকামা অনত্থকামা. অথ ৰা ন অত্থো অনত্থো, অনত্থং কামেন্তীতি অনত্থকামা’’ ইচ্চাদিনা ৰাক্যে যোজিতে পন যুত্তসমাসা হোন্তি. গরূ পন ‘‘অত্থং ন কামেন্তি অনত্থমেৰ কামেন্তীতি অনত্থকামা, হিতং ন কামেন্তি অহিতমেৰ কামেন্তীতি অহিতকামা, ফাসুং ন কামেন্তি অফাসুমেৰ কামেন্তীতি অফাসুকামা’’তি যোজেসুং, দ্ৰাধিপ্পাযপদং নামেতং.

কুনিপাতপুব্বপদে নিচ্চসমাসত্তা অঞ্ঞপদেন ৰিগ্গহো, খুদ্দকা নদী কুন্নদী, খুদ্দকো সোম্ভো কুসোম্ভো, খুদ্দকং ৰনং কুব্বনং.

৩৫০. সরে কদ কুস্সুত্তরত্থে [ক. ৩৩৫; রূ. ৩৪৬; নী. ৭১৯].

সরাদিকে ¶ উত্তরপদে পরে উত্তরপদত্থে ৰত্তমানস্স কুনিপাতস্স কদি হোতি.

কুচ্ছিতং অন্নং কদন্নং, কুচ্ছিতং অসনং কদসনং, কুচ্ছিতো অরিযো কদরিযো, মচ্ছরী.

সরেতি কিং? কুপুত্তা, কুদারা, কুদাসা.

উত্তরত্থেতি কিং? কুচ্ছিতো ওট্ঠো যস্সাতি কুওট্ঠো.

৩৫১. কাপ্পত্থে [ক. ৩৩৬; রূ. ৩৪৭; নী. ৭২০].

উত্তরপদে পরে উত্তরপদত্থে ঠিতস্স অপ্পত্থে ৰত্তমানস্স কুনিপাতস্স কা হোতি ৰা.

অপ্পকং লৰণং কালৰণং. এৰং কাপুপ্ফং.

পাদিপুব্বপদো চ নিচ্চসমাসোৰ, পকট্ঠং ৰচনং পাৰচনং, দীঘত্তং, পকট্ঠং হুত্ৰা নীতং পণীতং, পমুখং হুত্ৰা ধানং পধানং. এৰং পট্ঠানং, ৰিৰিধা মতি ৰিমতি, অধিকো দেৰো অধিদেৰো, অতিরেকো ৰিসেসো ৰা ধম্মো অভিধম্মো, সুন্দরো গন্ধো সুগন্ধো, কুচ্ছিতো গন্ধো দুগ্গন্ধো. সোভণং কতং সুকতং, কুচ্ছিতং কতং দুক্কটং, ৰিপরীতো পথো উপ্পথো. এৰং উম্মগ্গো, উদ্ধম্মো, উব্বিনযোইচ্চাদি.

অযম্পি কম্মধারযসমাসো অভিধেয্যৰচনো পরপদলিঙ্গো চ.

কম্মধারযসমাসো নিট্ঠিতো.

দিগুসমাস

অথ ¶ দিগুসঙ্খাতো পঠমাতপ্পুরিসো ৰুচ্চতে.

দ্ৰে গাৰো দিগু, সঙ্খ্যাপুব্বত্তেন নপুংসকেকত্তেন চ দিগুসদ্দসদিসত্তা সব্বো চাযং সমাসো দিগূতি ৰুচ্চতি.

৩৫২. সঙ্খ্যাদি [ক. ৩২১; রূ. ৩৪৯; নী. ৬৯৯].

সমাহারেকত্থে সঙ্খ্যাপুব্বকং একত্থং নপুংসকং হোতি, সমাহারৰচনেনেৰ একত্তঞ্চ সিদ্ধং.

দ্ৰে গাৰো দিগু, ‘গোস্সূ’তি সুত্তেন ওস্স উত্তং, তযো লোকা তিলোকং, তযো লোকা ঞাণস্মিং সমাহটা সম্পিণ্ডিতাতি তিলোকং, তিণ্ণং লোকানং সমাহারোতি তিলোকং, তযো চ তে লোকা চাতি তিলোকং. এৰং তিভৰং, তিপুরিসং, তীণি মলানি তিমলং, তিরতনং, তিস্সো সঞ্ঞাযোতিসঞ্ঞং, ‘স্যাদীসু রস্সো’তি রস্সত্তং. চত্তারো পথা চতুপ্পথং, চত্তারি সচ্চানি চতুসচ্চং, চতস্সো দিসা চতুদ্দিসং. এৰং পঞ্চসিক্খাপদং, সল়াযতনং, সত্তাহং, অট্ঠপদং, নৰলোকুত্তরং, দসসিক্খাপদং, সতযোজনং, সহস্সযোজনং ইচ্চাদি.

ইমস্মিং সমাহারদিগুম্হি সব্বং নপুংসকমেৰ রস্সন্তমেৰ একৰচনন্তমেৰ চাতি.

অসমাহারদিগু [রূ. ৩৫০ নী. ৭০৩] যথা? একো পুগ্গলো একপুগ্গলো, তযো ভৰা তিভৰা, চতস্সো দিসা চতুদ্দিসা ইচ্চাদি.

সঙ্খ্যাঠানে পন [ক. ৩৯২; রূ. ৪১৮; নী. ৮৩১] দ্ৰে সতানি দ্ৰিসতং. এৰং তিসতং, চতুসতং, পঞ্চসতং, ছসতং, সত্তসতং, অট্ঠসতং, নৰসতং, দসসতং, দ্ৰিসহস্সং, তিসহস্সং, চতুসহস্সং, পঞ্চসহস্সং, দসসহস্সং.

দ্ৰে ¶ সতসহস্সানি দ্ৰিসতসহস্সং. এৰং ‘‘তিসতসহস্সং, চতুসতসহস্সং, পঞ্চসতসহস্স’’ন্তি ৰা ‘‘দ্ৰিসতানি, দ্ৰে সতানি, তিসতানি, তীণি সতানি, চতুসতানি, চত্তারি সতানি, দ্ৰিসহস্সানি, দ্ৰে সহস্সানি, তিসহস্সানি, তীণি সহস্সানি, দ্ৰিসতসহস্সানি, দ্ৰে সতসহস্সানী’’তি ৰা এৰং ৰচনদ্ৰযঞ্চ ৰাক্যঞ্চ ৰেদিতব্বং. এৰং সতসহস্সেপীতি.

এত্থ সিযা – দিগু নাম সঙ্খ্যাপুব্বমেৰ সিযা, ইমেসু চ সব্বং সঙ্খ্যাপদমেৰ হোতীতি? দিগুম্হি পুব্বং সঙ্খ্যাপদমেৰ সিযা, পরপদং পন সঙ্খ্যাপদম্পি অঞ্ঞম্পি যুজ্জতীতি.

দিগুসমাসো নিট্ঠিতো.

বহুব্বীহিসমাস

অথ বহুব্বীহিসমাসো ৰুচ্চতে.

বহৰো ৰীহযো যস্মিং দেসে সোযং বহুব্বীহি, তাদিসো গামো ৰা দেসো ৰা জনপদো ৰা, বহুব্বীহিসদ্দসদিসত্তা সব্বো চাযং সমাসো বহুব্বীহীতি ৰুচ্চতি. যথা হি বহুব্বীহিসদ্দো সমাসপদত্থে অতিক্কম্ম গাম, দেস, জনপদইচ্চাদীনং অঞ্ঞেসং পদানং অত্থেসু তিট্ঠতি, তথা অযং সমাসোপি. অঞ্ঞপদত্থপধানো হি বহুব্বীহিসমাসো.

সো সঙ্খেপেন দুৰিধো তগ্গুণসংৰিঞ্ঞাণো, অতগ্গুণসংৰিঞ্ঞাণো চাতি.

তত্থ ‘গুণো’তি অপ্পধানভূতো সমাসপদানং অত্থো, সো অঞ্ঞপদত্থস্স ৰিসেসনভূতত্তা তস্স অঞ্ঞপদত্থস্স গুণোতি ¶ অত্থেন তগ্গুণোতি ৰুচ্চতি, ৰিঞ্ঞাতব্বোতি ৰিঞ্ঞাণো, অঞ্ঞপদত্থো, তগ্গুণং অমুঞ্চিত্ৰা তগ্গুণেন সহেৰ ৰিঞ্ঞাণো অঞ্ঞপদত্থো যস্মিন্তি তগ্গুণসংৰিঞ্ঞাণো, ন তগ্গুণসংৰিঞ্ঞাণো অতগ্গুণসংৰিঞ্ঞাণো, যত্থ সমাসপদত্থো অৰযৰভাৰেন ৰা সহৰিধেয্যভাৰেন ৰা অঞ্ঞপদত্থে অন্তোগধো হোতি, সো তগ্গুণসংৰিঞ্ঞাণো. যথা? ছিন্নহত্থো পুরিসো, বুদ্ধপ্পমুখস্স ভিক্খুসঙ্ঘস্স ভত্তং দেতি, সপুত্তদারো আগতো, পাদযো উপসগ্গা নামাতি.

এত্থ চ ‘বুদ্ধপ্পমুখস্স ভিক্খুসঙ্ঘস্স ভত্তং দেতী’তি ভিক্খুসঙ্ঘস্স চ ভত্তং দেতি, পমুখভূতস্স বুদ্ধস্স চ ভত্তং দেতীতি অত্থো. ‘সপুত্তদারো আগতো’তি পুত্তদারা চ আগতা, পুরিসো চ আগতোতি অত্থো. ‘পাদযো উপসগ্গা নামা’তি প-কারো চ উপসগ্গো নাম, পরাদযো চ উপসগ্গা নামাতি অত্থো. এৰং যোজনারহতা অঞ্ঞপদত্থেন সহ সমাসপদত্থস্স ৰিধেয্যতা নামাতি.

অতগ্গুণসংৰিঞ্ঞাণো যথা? দিন্নসুঙ্কো রাজা দানং দেতি, পব্বতাদীনি খেত্তানি কস্সতি ইচ্চাদি. ইমেসু পন সমাসপদত্থো অৰিধেয্যো, অঞ্ঞপদত্থো এৰ ৰিধেয্যো.

পঠমাবহুব্বীহি

পঠমাবহুব্বীহি, দুতিযাবহুব্বীহি, ততিযাবহুব্বীহি, চতুত্থীবহুব্বীহি, পঞ্চমীবহুব্বীহি, ছট্ঠীবহুব্বীহি, সত্তমীবহুব্বীহি চাতি সত্তৰিধো.

তত্থ পঠমাবহুব্বীহি সহপুব্বপদ, উপমানপুব্বপদ, সঙ্খ্যোভযপদ, দিসন্তরাল়ত্থ, ব্যতিহারলক্খণৰসেন পঞ্চৰিধো.

তত্থ –

৩৫৩. ৰানেকমঞ্ঞত্থে [ক. ৩২৮; রূ. ৩৫২; নী. ৭০৮].

অনেকং ¶ স্যাদ্যন্তপদং অঞ্ঞপদস্স অত্থে ৰিকপ্পেন একত্থং হোতি.

সহ ৰিতক্কেনাতি সৰিতক্কো, ৰিতক্কেন সহ যো ৰত্ততীতি ৰা সৰিতক্কো, সমাধি.

এত্থ চ ‘সহ ৰিতক্কেনা’তি এত্থ পঠমাৰিভত্তিযা অত্থভূতো অঞ্ঞপদত্থো ৰাক্যসামত্থিযেন সিজ্ঝতি. ন হি ক্রিযাকারকরহিতং ৰাক্যং নাম সম্ভৰতি, ইমিনা সুত্তেন সহপদ, ৰিতক্কপদানং সমাধিসঙ্খাতেন অঞ্ঞপদত্থেন একত্থীভাৰো হোতি, একত্থীভাৰে চ হোন্তে ৰাক্যে ঠিতানং অঞ্ঞপদানং ৰিভত্তীনঞ্চ সব্বে অত্থা একত্থভূতেন সমাসেন ৰুত্তা নাম হোন্তি, অঞ্ঞপদানি চ ৰিভত্তিযো চ ৰুত্তত্থা নাম, ৰুত্তত্থানঞ্চ অত্থরহিতত্তা পযোগকিচ্চং নত্থি, তস্মা ‘একত্থতায’ন্তি সুত্তেন ৰিভত্তীনং লোপো, এৰং সব্বসমাসেসু ৰাক্যেদিস্সমানানং য, ত, এত, ইম, ইতি, এৰ, ইৰ, ৰিয, চ, ৰাইচ্চাদীনং অঞ্ঞপদানং মহাৰুত্তিসুত্তেন লোপো, ৰিভত্তীনঞ্চ লোপে সতি সরন্তানং ব্যঞ্জনন্তানঞ্চ সমাসপদানং সযমেৰ পকতিভাৰো, ইধ পন ‘সহস্স সোঞ্ঞত্থে’তি সুত্তেন সহসদ্দস্স সত্তং, ততো স্যাদ্যুপ্পত্তি, সৰিতক্কো সমাধি, সৰিতক্কা সমাধযো, সৰিতক্কা পঞ্ঞা, সৰিতক্কা পঞ্ঞাযো, সৰিতক্কং ঝানং, সৰিতক্কানি ঝানানি ইচ্চাদিনা সব্বলিঙ্গ, ৰিভত্তি, ৰচনেহি যোজেত্ৰা পযোগসিদ্ধি ৰেদিতব্বা.

উপমানপুব্বপদো যথা? কাযব্যামানং সমপমাণত্তা নিগ্রোধো ইৰ পরিমণ্ডলো নিগ্রোধপরিমণ্ডলো, নিগ্রোধো ইৰ ৰা পরিমণ্ডলো যো হোতীতি সো নিগ্রোধপরিমণ্ডলো, রাজকুমারো, সঙ্খো ইৰ পণ্ডরো সঙ্খপণ্ডরো, কাকো ¶ ইৰ সূরো কাকসূরো, সত্তানং পঞ্ঞাচক্খুপটিলাভকরণেন তেসং চক্খু ৰিয ভূতোতি চক্খুভূতো, লোকুত্তরধম্মপটিলাভকরণেন তেসং ধম্মো ৰিয ভূতোতি ধম্মভূতো, নিচ্চসোম্মহদযতায ব্রহ্মা ৰিয ভূতোতি ব্রহ্মভূতো, অন্ধো ৰিয ভূতো অযন্তি অন্ধভূতো ইচ্চাদি.

সঙ্খ্যোভযপদো যথা? দ্ৰে ৰা তযো ৰা পত্তা দ্ৰিত্তিপ্পত্তা, ইধ ৰাসদ্দাযেৰ অঞ্ঞপদানি নাম, অনিযমভূতো তেসং অত্থো অঞ্ঞপদত্থো নাম. দ্ৰীহং ৰা তীহং ৰা দ্ৰীহতীহং, ছ ৰা পঞ্চ ৰা ৰাচা ছপ্পঞ্চৰাচা. এৰং সত্তট্ঠমাসা, একযোজনদ্ৰিযোজনানি ইচ্চাদি.

দিসন্তরাল়ত্থো যথা? দক্খিণস্সা চ পুব্বস্সা চ যদন্তরাল়ং হোতি সা দক্খিণপুব্বা. এৰং পুব্বুত্তরা, পচ্ছিমুত্তরা, অপরদক্খিণা, মহাৰুত্তিনা পুব্বপদে রস্সত্তং. দক্খিণা চ সা পুব্বা চাতি দক্খিণপুব্বা ইচ্চাদিনা কম্মধারযোপি যুজ্জতি.

ব্যতিহারলক্খণে [ক. ৩২৮; রূ. ৩৫২; নী. ৭০৮] –

৩৫৪. তত্থ গহেত্ৰা তেন পহরিত্ৰা যুদ্ধে সরূপং.

সত্তম্যন্তং ততিযন্তঞ্চ সমানরূপং স্যাদ্যন্তপদং তত্থ গহেত্ৰা তেন পহরিত্ৰা যুদ্ধে অঞ্ঞপদত্থে একত্থং হোতি ৰা.

৩৫৫. ঙি ৰীতিহারে [ক. ৪০৪; রূ. ৩৭০].

অঞ্ঞপদত্থৰিসযে ক্রিযাব্যতিহারে গম্যমানে পদন্তে ঙানুবন্ধো ইপচ্চযো হোতি, এত্থ ইকারো রস্সো এৰ.

৩৫৬. ঙি স্মিংচ [ক. ৪০৩; রূ. ৩৫৪].

ৰিপচ্চযন্তে ¶ উত্তরপদে পরে পুব্বপদন্তস্স আত্তং হোতি.

কেসেসু চ কেসেসু চ গহেত্ৰা ইদং যুদ্ধং পৰত্ততীতি কেসাকেসি, দণ্ডেহি চ দণ্ডেহি চ পহরিত্ৰা ইদং যুদ্ধং পৰত্ততীতি দণ্ডাদণ্ডি. এৰং মুট্ঠামুট্ঠি, মুসলামুসলি.

ইতি পঠমাবহুব্বীহি.

দুতিযাবহুব্বীহি

আগতা সমণা ইমং সঙ্ঘারামং সোযং আগতসমণো, সঙ্ঘারামো. এত্থ চ সমাসপদস্স অত্থো দুৰিধো ৰাচ্চত্থো, অভিধেয্যত্থো চাতি.

তত্থ সঙ্ঘারামস্স সমণেহি পত্তব্বভাৰসঙ্খাতা কম্মসত্তি ৰাচ্চত্থো নাম, সত্তিমন্তভূতো সঙ্ঘারামো অভিধেয্যত্থো নাম.

তত্থ আগতসমণসদ্দো ৰাচ্চত্থমেৰ উজুং ৰদতি, ন অভিধেয্যত্থং, আগতসমণোতি সুত্ৰা সমণেহি পত্তব্বভাৰমত্তং জানাতি, সঙ্ঘারামদব্বং ন জানাতীতি ৰুত্তং হোতি, তস্মা তস্সং অভিধেয্যত্থো অঞ্ঞেন সঙ্ঘারামসদ্দেন আচিক্খিযতি, ৰাচ্চত্থস্স পন তেন উজুং ৰুত্তত্তা পুন ৰত্তব্বাভাৰতো দুতিযাৰিভত্তিযা আচিক্খনকিচ্চং নত্থি, তস্মা সঙ্ঘারামপদে দুতিযাৰিভত্তিসম্ভৰো নত্থি, লিঙ্গত্থমত্তৰিসযা পঠমাৰিভত্তি এৰ পৰত্ততি, পুন পদন্তরসম্বন্ধে সতি ‘‘সঙ্ঘারামং পস্সতি আগতসমণং, সঙ্ঘারামেন গামো সোভতি আগতসমণেন, সঙ্ঘারামস্স পূজেতি আগতসমণস্সা’’তিআদিনা ততো সব্বা ৰিভত্তিযো ¶ পৰত্তন্তি. এস নযো সব্বেসু ৰাচকপদেসু নেতব্বোতি.

আগতসমণা সাৰত্থি, আগতসমণং জেতৰনং, আগচ্ছন্তি সমণা ইমন্তি ৰা আগতসমণো, ৰিহারো. আরূল়্হা ৰানরা ইমং রুক্খন্তি আরূল়্হৰানরো, রুক্খো. সম্পত্তা গামিকা যং গামন্তি সম্পত্তগামিকো. এৰং পৰিট্ঠগামিকো ইচ্চাদি.

ইতি দুতিযাবহুব্বীহি.

ততিযাবহুব্বীহি

জিতানি ইন্দ্রিযানি যেনাতি জিতিন্দ্রিযো, সমণো. দিট্ঠো চতুসচ্চধম্মো যেনাতি দিট্ঠধম্মো. এৰং পত্তধম্মো, ৰিদিতধম্মো, পরিযোগাল়্হধম্মো, কতানি চতুমগ্গকিচ্চানি যেনাতি কতকিচ্চো, বহুৰচনে সতি কতানি কিচ্চানি যেহি তে কতকিচ্চা, অরহন্তো. ধম্মেন অধিগতা ভোগা যেনাতি ধম্মাধিগতভোগো, পুরিসো. এৰং অধম্মাধিগতভোগো. এৰং কত্তরি. করণে পন ছিন্নো রুক্খো যেনাতি ছিন্নরুক্খো, ফরসু ইচ্চাদি.

ইতি ততিযাবহুব্বীহি.

চতুত্থীবহুব্বীহি

দিন্নো সুঙ্কো যস্স রঞ্ঞো সোযং দিন্নসুঙ্কো, উপনীতং ভোজনং যস্সাতি উপনীতভোজনো, নত্থি তুলো এতস্সাতি অতুলো, ‘ট নঞ্স্সা’তি ন-কারস্স টত্তং, নত্থি পটিপুগ্গলো যস্সাতি অপ্পটিপুগ্গলো, নত্থি সীলং অস্সাতি দুস্সীলো, নত্থি পটিসন্ধিপঞ্ঞা অস্সাতি দুপ্পঞ্ঞো, ‘ঘপস্সন্তস্সাপ্পধানস্সা’তি সুত্তেন ঘসঞ্ঞস্স আস্স ¶ রস্সত্তং. নত্থি সীলং অস্সাতি নিস্সীলো, নিপ্পঞ্ঞো, অপঞ্ঞো, ৰিরূপং মুখং অস্সাতি দুম্মুখো. এৰং দুম্মনো, দুব্বণ্ণো, নত্থি অত্তনো উত্তরো অধিকো যস্সাতি অনুত্তরো, ‘অন সরে’তি সুত্তেন নস্স অন.

ইধ বাহিরত্থবহুব্বীহি নাম ৰুচ্চতি, সত্তাহং পরিনিব্বুতস্স অস্সাতি সত্তাহপরিনিব্বুতো, অচিরং পরিনিব্বুতস্স অস্সাতি অচিরপরিনিব্বুতো, মাসো জাতস্স অস্সাতি মাসজাতো, দ্ৰেমাসজাতো, একো মাসো অভিসিত্তস্স অস্স রঞ্ঞোতি একমাসাভিসিত্তো, একাহং মতস্স অস্সাতি একাহমতং. এৰং দ্ৰীহমতং, তীহমতং, একাহং পটিচ্ছন্নায অস্সাতি একাহপ্পটিচ্ছন্না. এৰং দ্ৰীহপ্পটিচ্ছন্না, আপত্তি. যোজনং গতস্স অস্সাতি যোজনগতো, দ্ৰিযোজনগতো ইচ্চাদি.

ইতি চতুত্থীবহুব্বীহি.

পঞ্চমীবহুব্বীহি

নিগ্গতা জনা অস্মা গামাতি নিগ্গতজনো, অপগতং কাল়কং ইতোতি অপগতকাল়কো, পটো. অপগতকাল়কং, ৰত্থং. অপেতং ৰিঞ্ঞাণং যম্হাতি অপেতৰিঞ্ঞাণং, মতসরীরং ইচ্চাদি.

ইতি পঞ্চমীবহুব্বীহি.

ছট্ঠীবহুব্বীহি

ছিন্নো হত্থো যস্স সোতি ছিন্নহত্থো, হত্থচ্ছিন্নো, জাতো ছন্দো যস্সাতি জাতছন্দো, ছন্দজাতো, সঞ্জাতং পীতিসোমনস্সং যস্সাতি সঞ্জাতপীতিসোমনস্সো, পীতিসোমনস্সসঞ্জাতো, ৰিসুদ্ধং সীলং যস্সাতি ৰিসুদ্ধসীলো ¶ , সীলৰিসুদ্ধো, মহন্তো কাযো যস্সাতি মহাকাযো.

ইধ উপমানপুব্বপদো নাম ৰুচ্চতি, সুৰণ্ণস্স ৰিয ৰণ্ণো যস্সাতি সুৰণ্ণৰণ্ণো, ব্রহ্মুনো ৰিয সরো যস্সাতি ব্রহ্মস্সরো, নাগস্স ৰিয গতি অস্সাতি নাগগতি. এৰং সীহগতি, নাগৰিক্কমো, সীহৰিক্কমো, সীহস্স ৰিয হনু অস্সাতি সীহহনু, এণিস্স ৰিয জঙ্ঘা যস্সাতি এণিজঙ্ঘো, উসভস্স ৰিয অস্স খন্ধোতি উসভক্খন্ধো ইচ্চাদি.

রূপং ৰুচ্চতি সভাৰো, যাদিসং রূপং অস্সাতি যথারূপং. এৰং তথারূপং, এৰং রূপং অস্সাতি এৰরূপং, বিন্দুলোপো. এৰং আদি অস্সাতি এৰমাদি. তথা ইচ্চাদি, ইচ্চেৰমাদি, ঈদিসং নামং যস্সাতি ইত্থন্নামো, এৰংনামো, কীদিসং নামং যস্সাতি কিন্নামো, ‘কোনামো’তি এত্থ মহাৰুত্তিনা কিংসদ্দস্স কোত্তং.

কো সমুদযো যস্স ধম্মস্সাতি কিংসমুদযো, কা জাতি যস্সাতি কিংজাতিকো, কিংনিদানং যস্সাতি কিংনিদানো, কতি ৰস্সানি যস্সাতি কতিৰস্সো, কো অত্থো অস্সাতি কিমত্থং, ৰচনং. ‘ক্ৰত্থো’তি মহাৰুত্তিনা কিংসদ্দস্স কোত্তং, যাদিসো অত্থো অস্সাতি যদত্থো, তাদিসো অত্থো অস্সাতি তদত্থো, এদিসো অত্থো যস্স ৰিনযস্সাতি এতদত্থো, ৰিনযো. এতদত্থা, ৰিনযকথা. এতদত্থং, সোতাৰধানং ইচ্চাদি.

ইতি ছট্ঠীবহুব্বীহি.

সত্তমীবহুব্বীহি

সম্পন্নানি সস্সানি যস্মিং জনপদে সোযং সম্পন্নসস্সো, সুলভা ভিক্খা যস্মিং জনপদে সোযং সুভিক্খো ¶ , দুল্লভা ভিক্খা যস্মিন্তি দুব্ভিক্খো, বহৰো গামা অস্মিং জনপদেতি বহুগামো. এৰং বহুজনো, গামো. নত্থি গামখেত্তং যস্মিং অরঞ্ঞে তযিদং অগামকং, সমাসন্তে কো. সংৰিজ্জন্তি মনুস্সা যস্মিং গামে সমনুস্সো, ন ৰিজ্জন্তি মনুস্সা যস্মিং গামে অমনুস্সো ইচ্চাদি.

ইতি সত্তমীবহুব্বীহি.

ভিন্নাধিকরণবহুব্বীহি

ভিন্নাধিকরণবহুব্বীহি নাম ৰুচ্চতি, একরত্তিং ৰাসো অস্সাতি একরত্তিৰাসো, সমানেন জনেন সদ্ধিং ৰাসো অস্সাতি সমানৰাসো, উভতো কম্মতো উপ্পন্নং ব্যঞ্জনদ্ৰযং অস্সাতি উভতোব্যঞ্জনো, অলুত্তসমাসো. এৰং কণ্ঠস্মিং কাল়ো অস্সাতি কণ্ঠেকাল়ো, উরস্মিং লোমানি অস্সাতি উরসিলোমো, যস্স হত্থে পত্তো অত্থীতি পত্তহত্থো. এৰং অসিহত্থো, দণ্ডহত্থো, ছত্তং পাণিম্হি অস্সাতি ছত্তপাণি. এৰং সত্থপাণি, দণ্ডপাণি, ৰজিরপাণি, দানে অজ্ঝাসযো অস্সাতি দানজ্ঝাসযো, দানাধিমুত্তিকো, বুদ্ধেসু ভত্তি অস্সাতি বুদ্ধভত্তিকো, বুদ্ধে গারৰো অস্সাতি বুদ্ধগারৰো, ধম্মগারৰো ইচ্চাদি.

তিপদবহুব্বীহি

তিপদবহুব্বীহি নাম ৰুচ্চতি, পরক্কমেন অধিগতা সম্পদা যেহি তে পরক্কমাধিগতসম্পদা, ধম্মেন অধিগতা ভোগা যেহি তে ধম্মাধিগতভোগা, ওণীতো পত্তম্হা পাণি যেন সো ওণীতপত্তপাণি, সীহস্স পুব্বদ্ধং ৰিয কাযো অস্সাতি সীহপুব্বদ্ধকাযো, মত্তা বহৰো মাতঙ্গা যস্মিং ৰনেতি মত্তবহুমাতঙ্গং ইচ্চাদি.

বহুব্বীহিসমাসো নিট্ঠিতো.

দ্ৰন্দসমাস

অথ ¶ দ্ৰন্দসমাসো দীপিযতে.

দ্ৰে চ দ্ৰে চ পদানি দ্ৰন্দা, দ্ৰে চ দ্ৰে চ অত্থা ৰা দ্ৰন্দা, মহাৰুত্তিনা দ্ৰিন্নং দ্ৰিসদ্দানং দ্ৰন্দাদেসো. দ্ৰন্দসদ্দসদিসত্তা সব্বো চাযং সমাসো দ্ৰন্দোতি ৰুচ্চতি.

অথ ৰা দ্ৰে অৰযৰা অন্দিযন্তি বন্ধিযন্তি এত্থাতি দ্ৰন্দো, যুগল়স্সেতং নামং ‘‘পাদদ্ৰন্দং মুনিন্দস্স, ৰন্দামি সিরসামহ’’ন্তি এত্থ ৰিয, ইধ পন পদযুগল়ং অত্থযুগল়ঞ্চ গয্হতি. উভযপদত্থপধানো হি দ্ৰন্দো.

এত্থ সিযা – যদি উভযপদত্থপ্পধানো দ্ৰন্দো, এৰঞ্চ সতি দ্ৰন্দে কথং একত্থীভাৰলক্খণং সিযাতি? ৰুচ্চতে – অভিন্নৰিধেয্যত্থত্তা. ৰচনপথঞ্হি পত্ৰা কত্তুভাৰকম্মভাৰাদিকো ৰিধেয্যত্থো এৰ পদানং অচ্চন্তপ্পধানত্থো হোতি ৰচনৰাক্যসম্পত্তিযা পধানঙ্গত্তা, সো চ ৰিধেয্যত্থো দ্ৰন্দেপি অভিন্নো এৰ হোতি. তথা হি ‘‘সারিপুত্তমোগ্গল্লানা গচ্ছন্তি, সারিপুত্তমোগ্গল্লানে পস্সতি’’ ইচ্চাদীসু দ্ৰে অত্থা একৰিভত্তিযা ৰিসযা হুত্ৰা এককত্তু, এককম্মাদিভাৰেন একত্তং গচ্ছন্তি, এৰং দ্ৰন্দেপি দ্ৰিন্নং তিণ্ণং বহুন্নং ৰা পদানং একত্থীভাৰলক্খণং লব্ভতিযেৰাতি.

৩৫৭. চত্থে [ক. ৩২৯; রূ. ৩৫৭; নী. ৭০৯].

অনেকং স্যাদ্যন্তপদং চসদ্দস্স অত্থে একত্থং হোতি ৰা.

এত্থ চ সমুচ্চযো, অন্ৰাচযো, ইতরীতরযোগো, সমাহারোতি চত্তারো চসদ্দত্থা হোন্তি.

তত্থ সমুচ্চযো যথা? চীৰরঞ্চ পিণ্ডপাতঞ্চ সেনাসনঞ্চ দেতীতি. অন্ৰাচযো যথা? দানঞ্চ দেতি, সীলঞ্চ রক্খতীতি. ইমে ¶ দ্ৰে চসদ্দত্থা ৰাক্যদ্ৰন্দে এৰ লব্ভন্তি, ন সমাসদ্ৰন্দে পদানং অঞ্ঞমঞ্ঞং নিরপেক্খত্তাতি ৰদন্তি. তং অন্ৰাচযে যুজ্জতি নানাক্রিযাপেক্খত্তা, সমুচ্চযে পন ‘‘চীৰরঞ্চ পিণ্ডপাতঞ্চ সেনাসনঞ্চ দেতী’’তি ৰা ‘‘চীৰরপিণ্ডপাতসেনাসনানি দেতী’’তি ৰা এৰং দ্ৰিধাপি যোজেতুং যুজ্জতিযেৰ ‘‘লাভী হোতি চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি [ম. নি. ১.৬৫] পাল়িদস্সনতো. অন্ৰাচযোপি ৰা সমাসদ্ৰন্দে নো ন লব্ভতি ‘‘মালাগন্ধৰিলেপনধারণমণ্ডনৰিভূসনট্ঠানা’’তি [দী. নি. ১.১০] পাল়িদস্সনতো. এৰং পন যুজ্জেয্য – চসদ্দত্থো একক্রিয, নানাক্রিযাপেক্খনভেদেন দুৰিধো হোতি সমুচ্চযো, অন্ৰাচযো চাতি, তেসু চ একেকো অৰযৰপ্পধান, সমুদাযপ্পধানভেদেন দুৰিধো হোতি ইতরীতরযোগো, সমাহারো চাতি. তত্থ ইতরীতরযোগে অৰযৰপ্পধানত্তা সব্বৰিভত্তীসু বহুৰচনমেৰ যুজ্জতি.

দ্ৰন্দে পণীততরং পুব্বে নিপততি. সারিপুত্তো চ মোগ্গল্লানো চ সারিপুত্তমোগ্গল্লানা, সারিপুত্তমোগ্গল্লানে, সারিপুত্তমোগ্গল্লানেহি ইচ্চাদি. এৰং সমণব্রাহ্মণা, ব্রাহ্মণগহপতিকা, খত্তিযব্রাহ্মণা, দেৰমনুস্সা, চন্দিমসূরিযা.

অপ্পক্খর, বহ্ৰক্খরেসু অপ্পক্খরং ক্ৰচি পুব্বং হোতি, গামনিগমা, গামজনপদা ইচ্চাদি.

ক্ৰচি ইৰণ্ণু’ৰণ্ণন্তা পুব্বে হোন্তি, অগ্গি চ ধূমো চ অগ্গিধূমা, রত্তিদিৰা, ধাতুলিঙ্গানি.

অৰণ্ণন্তেসু সরাদিপদং পুব্বং হোতি, অত্থো চ ধম্মো চ অত্থধম্মা, ধম্মত্থা ৰা ইচ্চাদি.

অযঞ্চ ¶ নিযমো দ্ৰিপদদ্ৰন্দেসু যেভুয্যেন লব্ভতি, বহুপদদ্ৰন্দেসু ন লব্ভতি.

সমাহারদ্ৰন্দে –

৩৫৮. সমাহারে নপুংসকং [ক. ৩২২; রূ. ৩৫৯; নী. ৭০০].

চত্থে সমাহারে একত্থপদং নপুংসকং হোতি, একৰচনন্তত্তং পন সমাহারৰচনেনেৰ সিদ্ধং, অযঞ্চ সমাহারো পাণ্যঙ্গাদীনং দ্ৰন্দেসু নিচ্চং লব্ভতি, রুক্খতিণাদীনং দ্ৰন্দেসু ৰিকপ্পেন লব্ভতি.

তত্থ নিচ্চলদ্ধেসু তাৰ পাণ্যঙ্গদ্ৰন্দে –

চক্খু চ সোতঞ্চ চক্খুসোতং, মুখঞ্চ নাসিকা চ মুখনাসিকং, ‘স্যাদীসু রস্সো’তি রস্সত্তং. হনু চ গীৰা চ হনুগীৰং. এৰং কণ্ণনাসং, ছৰি চ মংসঞ্চ লোহিতঞ্চ ছৰিমংসলোহিতং, নামঞ্চ রূপঞ্চ নামরূপং, জরা চ মরণঞ্চ জরামরণং. বহুলাধিকারা ক্ৰচি ৰিকপ্পরূপম্পি দিস্সতি, হত্থা চ পাদা চ হত্থপাদং, হত্থপাদা ৰা ইচ্চাদি.

তূরিযঙ্গদ্ৰন্দে –

নচ্চঞ্চ গীতঞ্চ ৰাদিতঞ্চ নচ্চগীতৰাদিতং. এৰং সম্মতাল়ং, ‘সম্ম’ন্তি কংসতাল়ং, ‘তাল়’ন্তি হত্থতাল়ং, সঙ্খো চ পণৰো চ ডিণ্ডিমো চ সঙ্খপণৰডিণ্ডিমং ইচ্চাদি.

যোগ্গঙ্গদ্ৰন্দে –

ফালো চ পাচনঞ্চ ফালপাচনং, যুগঞ্চ নঙ্গলঞ্চ যুগনঙ্গলং ইচ্চাদি.

সেনঙ্গদ্ৰন্দে –

হত্থিনো ¶ চ অস্সা চ হত্থিঅস্সং. এৰং রথপত্তিকং, অসি চ চম্মঞ্চ অসিচম্মং. ‘চম্ম’ন্তি সরপরিত্তাণফলকং, ধনু চ কলাপো চ ধনুকলাপং ইচ্চাদি.

খুদ্দকপাণদ্ৰন্দে –

ডংসা চ মকসা চ ডংসমকসং. এৰং কুন্থকিপিল্লিকং [সু. নি. ৬০৭], কীটপটঙ্গং ইচ্চাদি.

নিচ্চৰেরিদ্ৰন্দে –

অহি চ নকুলো চ অহিনকুলং, বিল়ারো চ মূসিকা চ বিল়ারমূসিকং, রস্সত্তং. কাকোলূকং, সপ্পমণ্ডূকং, নাগসুপণ্ণং ইচ্চাদি.

সভাগদ্ৰন্দে –

সীলঞ্চ পঞ্ঞাণঞ্চ সীলপঞ্ঞাণং, সমথো চ ৰিপস্সনা চ সমথৰিপস্সনং, ৰিজ্জা চ চরণঞ্চ ৰিজ্জাচরণং. এৰং সতিসম্পজঞ্ঞং, হিরিওত্তপ্পং, উদ্ধচ্চকুক্কুচ্চং, থিনমিদ্ধং ইচ্চাদি.

ৰিৰিধৰিরুদ্ধদ্ৰন্দে –

কুসলাকুসলং, সাৰজ্জানৰজ্জং, কণ্হসুক্কং, হীনপণীতং, ছেকবালং ইচ্চাদি.

একসঙ্গীতিদ্ৰন্দে –

দীঘো চ মজ্ঝিমো চ দীঘমজ্ঝিমং, অঙ্গুত্তরসংযুত্তকং, খন্ধকৰিভঙ্গং ইচ্চাদি.

সঙ্খ্যাপরিমাণদ্ৰন্দে –

এককদুকং, দুকতিকং, তিকচতুক্কং, চতুক্কপঞ্চকং ইচ্চাদি.

পচনচণ্ডালদ্ৰন্দে –

ওরব্ভিকা ¶ চ সূকরিকা চ ওরব্ভিকসূকরিকং. এৰং সাকুণিকমাগৰিকং, সপাকচণ্ডালং, ৰেনরথকারং, পুক্কুসছৰডাহকং ইচ্চাদি.

লিঙ্গৰিসভাগদ্ৰন্দে –

ইত্থিপুমং, দাসিদাসং ইচ্চাদি.

দিসাদ্ৰন্দে –

পুব্বা চ অপরা চ পুব্বাপরং. এৰং দক্খিণুত্তরং, পুব্বদক্খিণং, পুব্বুত্তরং, অপরদক্খিণং, অপরুত্তরং.

নদীদ্ৰন্দে –

গঙ্গাযমুনং, মহিসরভু, সব্বত্থ নপুংসকত্তা অন্তে দীঘানং রস্সত্তং সত্তসু ৰিভত্তীসু একৰচনন্তঞ্চ.

ইতি নিচ্চসমাহাররাসি.

ৰিকপ্পলদ্ধেসু [ক. ৩২৩; রূ. ৩৬০; নী. ৭০১] তিণৰিসেসদ্ৰন্দে –

উসীরানি চ বীরণানি চ উসীরবীরণং, উসীরবীরণা. এৰং মুঞ্জপব্বজং, মুঞ্জপব্বজা, কাসকুসং, কাসকুসা.

রুক্খৰিসেসদ্ৰন্দে –

খদিরো চ পলাসো চ খদিরপলাসং, খদিরপলাসা, ধৰো চ অস্সকণ্ণো চ ধৰস্সকণ্ণং, ধৰস্সকণ্ণা, পিলক্খনিগ্রোধং, পিলক্খনিগ্রোধা, অস্সত্থকপীতনং [কপিত্থনং (কত্থচি)], অস্সত্থকপীতনা, সাকসালং, সাকসালা.

পসুৰিসেসদ্ৰন্দে –

গজা ¶ চ গৰজা চ গজগৰজং, গজগৰজা, গোমহিসং, গোমহিসা, এণেয্যৰরাহং, এণেয্যৰরাহা, অজেল়কং, অজেল়কা, কুক্কুটসূকরং, কুক্কুটসূকরা, হত্থিগৰস্সৰল়ৰং, হত্থিগৰস্সৰল়ৰা.

সকুণৰিসেসদ্ৰন্দে –

হংসবিলৰং, হংসবিলৰা, কারণ্ডৰচক্কৰাকং, কারণ্ডৰচক্কৰাকা, বকবলাকং, বকবলাকা.

ধনদ্ৰন্দে –

হিরঞ্ঞসুৰণ্ণং, হিরঞ্ঞসুৰণ্ণা, মণি চ সঙ্খো চ মুত্তা চ ৰেল়ুরিযঞ্চ মণিসঙ্খমুত্তৰেল়ুরিযং, মণিসঙ্খমুত্তৰেল়ুরিযা, জাতরূপরজতং, জাতরূপরজতা.

ধঞ্ঞদ্ৰন্দে –

সালিযৰং, সালিযৰা, তিলমুগ্গমাসং, তিলমুগ্গমাসা, নিপ্ফাৰকুলত্থং, নিপ্ফাৰকুলত্থা.

ব্যঞ্জনানং দ্ৰন্দে –

মচ্ছমংসং, মচ্ছমংসা, সাকসূপং, সাকসূপা, গব্যমাহিসং, গব্যমাহিসা, এণেয্যৰারাহং, এণেয্যৰারাহা, মিগমাযূরং, মিগমাযূরা.

জনপদদ্ৰন্দে –

কাসিকোসলং, কাসিকোসলা, ৰজ্জিমল্লং, ৰজ্জিমল্লা, চেতৰংসং, চেতৰংসা, মজ্ঝঞ্চ সূরসেনঞ্চ মজ্ঝসূরসেনং, মজ্ঝসূরসেনা, কুরুপঞ্চালং, কুরুপঞ্চালা.

ইতি ৰিকপ্পসমাহাররাসি.

দ্ৰন্দসমাসো নিট্ঠিতো.

ৰিসেসৰিধান

ইদানি ¶ পুব্বে ৰুত্তানি অৰুত্তানি চ ছসু সমাসেসু ৰিসেসৰিধানানি ৰুচ্চন্তে.

নপুংসকেকত্তং, সমাসন্তরস্সো, পুম্ভাৰাতিদেসো, সমাসন্তে ক, সমাসন্তে অ, নানাদেসো, অব্যযো, সঙ্খ্যা.

নপুংসকেকত্তরাসি

তত্থ সব্বো অব্যযীভাৰো নপুংসকলিঙ্গো এৰ, সমাহারভূতা দিগু, দ্ৰন্দা নপুংসকা চ একত্তসঙ্খ্যা চ.

৩৫৯. ক্ৰচেকত্তঞ্চ ছট্ঠিযা [ক. ৩২৭; রূ. ৩৫১; নী. ৭০৪; চং. ২.২.৬৯-৭৩; পা. ২.৪.২২-২৫].

ছট্ঠীসমাসে ক্ৰচি নপুংসকত্তং একত্তঞ্চ হোতি.

ছাযা, সভাস্ৰেৰাযং ৰিধি, সলভানং ছাযা সলভচ্ছাযং […সভচ্ছাযং (মূলপাঠে)]. এৰং সকটচ্ছাযং, ঘরচ্ছাযং. ইধ ন হোতি, রুক্খচ্ছাযা, পব্বতচ্ছাযা. সভাসদ্দে অমনুস্সসভাস্ৰেৰাযং ৰিধি, ব্রহ্মূনং সভা ব্রহ্মসভং. এৰং দেৰসভং, ইন্দসভং, যক্খসভং, রক্খসসতং. মনুস্সসভাসু নত্থি, খত্তিযসভা, রাজসভা ইচ্চাদি.

ক্ৰচীতি কিং? রাজপরিসা.

ইতি নপুংসকেকত্তরাসি.

সমাসন্তরস্সরাসি

‘স্যাদীসু রস্সো’তি সুত্তেন অব্যযীভাৰ, সমাহারদিগু, দ্ৰন্দানং কস্সচি তপ্পুরিসস্স চ স্যাদীসু রস্সো.

অব্যযীভাৰে –

উপমণিকং ¶ অধিত্থি, উপৰধু.

সমাহারদিগুম্হি –

চতুদ্দিসং, দসিত্থি, দসৰধু.

সমাহারদ্ৰন্দে –

মুখনাসিকং, হনুগীৰং.

তপ্পুরিসে –

সলভচ্ছাযং, ব্রহ্মসভং.

৩৬০. ঘপস্সন্তস্সাপ্পধানস্স [ক. ৪০৩; রূ. ৩৫৪; নী. ৮৫৮; চং. ২.২.৮৬; পা. ১.২.৪৮].

স্যাদীসু অন্তভূতস্স অপ্পধানভূতস্স চ ঘপস্স রস্সো হোতি.

বহুব্বীহিম্হি –

বহুকঞ্ঞো, পোসো, বহুইত্থি, কুলং, বহুৰধু, কুলং.

অব্যযীভাৰে –

উপমণিকং, অধিত্থি, উপৰধু.

অন্তস্সাতি কিং? সদ্ধাধনো, পুরিসো.

অপ্পধানস্সাতি কিং? রাজকঞ্ঞা, রাজকুমারী, ব্রহ্মবন্ধূ.

৩৬১. গোস্সু [ক. ৩৪২; রূ. ৩৩৭; নী. ৭২২; চং. ২.২.৮৫; পা. ১.২.৪৮].

স্যাদীসু অন্তভূতস্স অপ্পধানভূতস্স চ গোস্স উ হোতি.

তিট্ঠগু ¶ চিত্তগু.

অপ্পধানস্সাতি কিং? রাজগৰো.

অন্তস্সাতি কিং? গোকুলং.

ইতি সমাসন্তরস্সরাসি.

পুম্ভাৰাতিদেসরাসি

৩৬২. ইত্থিযং ভাসিতপুমিত্থী পুমাৰেকত্থে [ক. ৩৩১; রূ. ৩৫৩; নী. ৭১৪; চং. ৫.২.২৯; পা. ৬.৩.৩৪].

‘একত্থে’তি তুল্যাধিকরণে, ইত্থিযং ৰত্তমানে একত্থে উত্তরপদে পরে কদাচি ভাসিতপুমো ইত্থিলিঙ্গসদ্দো পুমা ইৰ হোতি. চতুরঙ্গমিদং ৰিধানং, পুব্বপদং ইত্থিলিঙ্গঞ্চ ভাসিতপুমঞ্চ সিযা, পরপদং নিযতিত্থিলিঙ্গঞ্চ পুব্বপদেন একত্থঞ্চ সিযাতি.

দীঘা জঙ্ঘা যস্স সো দীঘজঙ্ঘো, পুরিসো, দীঘজঙ্ঘা, ইত্থী, দীঘজঙ্ঘং, কুলং.

এত্থ চ যে সদ্দা কত্থচি পুল্লিঙ্গরূপা হোন্তি, কত্থচি ইত্থিপচ্চযযুত্তা ইত্থিলিঙ্গরূপা, তে ভাসিতপুমা নাম. দীঘো মগ্গো, দীঘা রত্তি, গতো পুরিসো, গতা ইত্থী, কুমারো, কুমারী, ব্রাহ্মণো, ব্রাহ্মণী ইচ্চাদি.

যে পন ইত্থিপচ্চযযুত্তা নিচ্চং ইত্থিলিঙ্গরূপা হোন্তি, তে ভাসিতপুমা নাম ন হোন্তি, কঞ্ঞা, পঞ্ঞা, সদ্ধা, নদী, ইত্থী, পথৰী ইচ্চাদি. তথা সভাৰইত্থিলিঙ্গাপি নিযতপুন্নপুংসকলিঙ্গাপি ভাসিতপুমা ন হোন্তি, দেৰতা, রত্তি, ধেনু, ৰধূ, সক্কো, দেৰো, ব্রহ্মা, রতনং, সরণং ইচ্চাদি.

ইধ পন দীঘসদ্দো ‘‘দীঘো বালান সংসারো’’তি [ধ. প. ৬০] আদীসু ভাসিতপুমো, সো ৰিসেস্যলিঙ্গানুগতৰসেন ইধ ইত্থিপচ্চযযুত্তো ¶ ইত্থিলিঙ্গসদ্দো নাম. ইমিনা সুত্তেন পুম্ভাৰাতিদেসে কতে তত্থ আপচ্চযো অন্তরধাযতি, ‘ঘপস্সন্তস্সাপ্পধানস্সা’তি সুত্তেন সমাসন্তস্স আকারস্স রস্সত্তং, কুমারী ভরিযা যস্স সো কুমারভরিযো, ঈপচ্চযনিৰত্তি. যুৰতি জাযা যস্স সো যুৰজাযো, তিপচ্চযনিৰত্তি. ব্রহ্মবন্ধূ ভরিযা যস্স সো ব্রহ্মবন্ধুভরিযো, ঊপচ্চযনিৰত্তি.

ইত্থিযন্তি কিং? কুমারী রতনং যস্স সো কুমারীরতনো, পুরিসো, ইধ পরপদং ইত্থিলিঙ্গং ন হোতি, তস্মা পুম্ভাৰাতিদেসো ন কাতব্বো, যদি করেয্য, কুমারো রতনং যস্স কুমাররতনোতি এৰং অনিট্ঠত্থো ভৰেয্য.

একত্থেতি কিং? কুমারীসু ভত্তি যস্স সো কুমারীভত্তিকো. এৰং সমণীভত্তিকো, ব্রাহ্মণীভত্তিকো, সমাসন্তে কো, ইধ পরপদং পুব্বপদেন একত্থং ন হোতি, তস্মা পুম্ভাৰাতিদেসো ন কাতব্বো, যদি করেয্য, কুমারেসু ভত্তি যস্স সো কুমারভত্তিকোতি এৰং অনিট্ঠত্থো ভৰেয্য.

ইত্থীতি কিং? দট্ঠব্বট্ঠেন দিট্ঠি, গামণিকুলং দিট্ঠি যেন সো গামণিদিট্ঠি, ইধ গামণিসদ্দো ভাসিতপুমো হোতি, ইধ পন কুলৰাচকত্তা নপুংসকলিঙ্গে তিট্ঠতি, ইত্থিপচ্চযো নত্থি, তস্মা পুম্ভাৰাতিদেসকিচ্চং নত্থি.

ভাসিতপুমোতি কিং? সদ্ধা পকতি যস্স সো সদ্ধাপকতিকো. এৰং পঞ্ঞাপকতিকো, ইধ পুব্বপদং নিযতিত্থিলিঙ্গত্তা ভাসিতপুমং ন হোতীতি. সদ্ধাধনো, পঞ্ঞাধনো, সদ্ধাধুরো পঞ্ঞাধুরো ইচ্চত্র দুৰঙ্গৰেকল্লং হোতি.

কম্মধারযম্হি [ক. ৩৩২; রূ. ৩৪৩; নী. ৭১৬] পন ‘একত্থে’তি পদং ৰিসুং একং অঙ্গং ন হোতি অনেকত্থস্স ইধ অসম্ভৰতো. দীঘা চ সা জঙ্ঘা চাতি ¶ দীঘজঙ্ঘা, কুমারী চ সা ভরিযা চাতি কুমারভরিযা. এৰং খত্তিযকঞ্ঞা, ব্রাহ্মণকঞ্ঞা, যুৰতি চ সা ভরিযা চাতি যুৰভরিযা, ব্রহ্মবন্ধূ চ সা ভরিযা চাতি ব্রহ্মবন্ধুভরিযা.

ইত্থিযন্তি কিং? কুমারী চ সা রতনঞ্চাতি কুমারীরতনং. এৰং সমণীপদুমং.

ইত্থীতি কিং? গামণিকুলঞ্চ তং দিট্ঠি চাতি গামণিদিট্ঠি.

ভাসিতপুমোতি কিং? সদ্ধাপকতি, গঙ্গানদী, তণ্হানদী, পথৰীধাতু.

সঞ্ঞাসদ্দেসু পন চতুরঙ্গযুত্তেপি ৰিধানং ন হোতি, নন্দাদেৰী, নন্দাপোক্খরণী, কাযগতাসতি, পঠমাৰিভত্তি, দুতিযাৰিভত্তি, পঞ্চমীৰিভত্তি, ছট্ঠীৰিভত্তি ইচ্চাদি.

৩৬৩. ক্ৰচি পচ্চযে [ক. ৩৩২; রূ. ৩৪৩; নী. ৭১৬; চং. ৫.২.৩১; পা. ৬.৩.৩৫].

পচ্চযে পরে কদাচি ভাসিতপুমো ইত্থিলিঙ্গসদ্দো ক্ৰচি পুমাৰ হোতি.

ব্যত্ততরা, ব্যত্ততমা, এত্থ চ ব্যত্তানং ইত্থীনং অতিসযেন ব্যত্তাতি ব্যত্ততরা, ব্যত্ততমাতি অত্থো. এৰং পণ্ডিততরা, পণ্ডিততমা ইচ্চাদি.

৩৬৪. সব্বাদযো ৰুত্তিমত্তে [ক. ৩৩১; রূ. ৩৫৩; নী. ৭১৪; চং. ৫.২.৪১; পা. ৬.৩.৩৫].

ৰুত্তিমত্তে ঠানে সব্বাদিনামকা সব্বনামসদ্দা পুমাৰ হোন্তি.

সা পমুখা যস্স সো তপ্পমুখো. এৰং তপ্পধানো, তায তাহি ৰা সম্পযুত্তো তংসম্পযুত্তো. সা এৰ পমুখা তপ্পমুখা. এৰং তপ্পধানা, তস্সা মুখং তম্মুখং, তস্সং গাথাযং ¶ তাসু গাথাসু ৰা তত্র, তায গাথতো তাহি ৰা গাথাহি ততো, তস্সং ৰেলাযং তদা ইচ্চাদি.

এত্থ চ ৰুত্তি নাম সমাস, তদ্ধিতা’ যাদিধাতুপচ্চযন্ত, ৰিভত্তিপচ্চযন্তানং নামং.

ইতি পুম্ভাৰাতিদেসরাসি.

সমাসন্তকপচ্চযরাসি

৩৬৫. ল্তিত্থিযূহি কো [ক. ৩৩৮; রূ. ৩৫৬; নী. ৭২৫; চং. ৪.৪.১৪০; পা. ৫.৪.১৫২].

অঞ্ঞপদত্থৰিসযে কত্তুইচ্চাদীহি ল্তুপচ্চযন্তেহি ইত্থিযং ঈ, ঊকারন্তেহি চ বহুলং কপচ্চযো হোতি.

বহৰো কত্তারো যস্মিং দেসে সো বহুকত্তুকো. এৰং বহুৰত্তুকো, বহুকা নদিযো যস্মিং দেসে সো বহুনদিকো. এৰং বহুইত্থিকো, গামো, বহুইত্থিকা, সভা, বহুইত্থিকং, কুলং. এৰং বহুকুমারিকং, বহুব্রহ্মবন্ধুকো.

এত্থ চ ‘ব্রহ্মবন্ধূ’তি রস্সপদং ব্রাহ্মণং ৰদতি, দীঘপদং ব্রাহ্মণিং ৰদতি, কপচ্চযে পরে দীঘানং মহাৰুত্তিনা রস্সত্তং ইচ্ছন্তি.

বহুলন্তি কিং? বহুকত্তা, গামো.

৩৬৬. ৰাঞ্ঞতো [ক. ৩৩৮; রূ. ৩৫৬; নী. ৭২৫; চং. ৬.২.৭২; পা. ৫.৪.১৫২].

অঞ্ঞপদত্থৰিসযে ল্তিত্থিযূহি অঞ্ঞতো অৰণ্ণিৰণ্ণুৰণ্ণন্তেহি বহুলং কপচ্চযো হোতি ৰা.

অৰণ্ণন্তম্হা ¶ তাৰ –

অগামকং, অরঞ্ঞং, বহুগামকো, জনপদো, সসোতকো, অসোতকো, সলোমকো, সপক্খকো, বহুমালকো, বহুমালো, বহুমাযকো, বহুমাযো.

ইৰণ্ণন্তম্হা –

সুন্দরা দিট্ঠি যস্স সো সম্মাদিট্ঠিকো, সম্মাদিট্ঠি, মিচ্ছাদিট্ঠিকো, মিচ্ছাদিট্ঠি, মতপতিকা, ইত্থী, সদ্ধাপকতিকো, পঞ্ঞাপকতিকো, বহুহত্থিকো, বহুদণ্ডিকো.

উৰণ্ণন্তম্হা –

সহেতুকো, অহেতুকো, সচক্খুকো, অচক্খুকো, সভিক্খুকো, অভিক্খুকো, দীঘাযুকো, অপ্পাযুকো, বহুধেনুকো, ৰজো, বহুরত্তঞ্ঞুকো, ভিক্খুসঙ্ঘো.

ইত্থিলিঙ্গে কম্হি পরে অকারস্স মহাৰুত্তিনা ৰা ‘অধাতুস্স কে…’তি সুত্তেন ৰা বহুলং ইকারত্তং হোতি, বহুপুত্তিকা, ইত্থী, বহুপুত্তকা ৰা, একপুত্তিকা, একপুত্তকা ইচ্চাদি.

ইতি সমাসন্তকপচ্চযরাসি.

সমাসন্তঅপচ্চযরাসি

৩৬৭. সমাসন্ত [ক. ৩৩৭; রূ. ৩৫০; নী. ৭২২; চং. ৪.৪.৫২; পা. ৫.৪.৬৮; ‘ত্ৰ’ (বহূসু)].

‘সমাসন্তো+অ’ ইতি দ্ৰিপদমিদং, সমাসন্তো হুত্ৰা অপচ্চযো হোতীতি অত্থো. অধিকারসুত্তমিদং.

৩৬৮. পাপাদীহি ভূমিযা [ক. ৩৩৭; রূ. ৩৫০; নী. ৭২২; চং. ৪.৪.৭২; …পে… ৫.৪.৭৫; ‘গোদাৰরীনং’ (বহূসু)].

পাপাদীহি ¶ পরায ভূমিযা সমাসন্তো অহোতি, ‘ভূমিসদ্দস্সা’তি ৰত্তব্বে নিযতিত্থিলিঙ্গদস্সনত্থং ‘ভূমিযা’তি ৰুত্তং. এৰং অঞ্ঞত্থপি.

পাপানং ভূমি পাপভূমং, পাপানং উপ্পত্তিভূমিত্যত্থো, জাতিযা ভূমি জাতিভূমং, সত্থুজাতরট্ঠং. এৰং পচ্ছাভূমং, মজ্ঝিমদেসে পচ্ছাভাগরট্ঠং.

৩৬৯. সঙ্খ্যাহি [ক. ৩৩৭; রূ. ৩৫০; নী. ৭২২; চং. ৪.৪.৭৩; পা. ৫.৪.৭৫].

সঙ্খ্যাহি পরায ভূমিযা সমাসন্তো অ হোতি.

দ্ৰে ভূমিযো এত্থাতি দ্ৰিভূমো, দ্ৰিভূমকো, পাসাদো, দ্ৰিভূমিকো ৰা, তিস্সো ভূমিযো এতেসন্তি ৰা তীসু ভূমিসু পরিযাপন্নাতি ৰা তেভূমকা, ধম্মা, চতুভূমকা, ধম্মা, তেভূমিকা, চতুভূমিকা ৰা. দিগুম্হি-দ্ৰে ভূমিযো দ্ৰিভূমং, তিস্সো ভূমিযো তিভূমং, চতস্সো ভূমিযো চতুভূমং ইচ্চাদি.

৩৭০. নদীগোধাৰরীনং [ক. ৩৩৭; রূ. ৩৫০; নী. ৭২২; চং. ৪.৪.৭৩; পা. ৫.৪.৭৫].

সঙ্খ্যাহি পরাসং নদী, গোধাৰরীনং সমাসন্তো অ হোতি.

পঞ্চ নদিযো পঞ্চনদং, পঞ্চ ৰা নদিযো যস্মিং পদেসে সো পঞ্চনদো, সত্ত গোধাৰরিযো সত্তগোধাৰরং.

৩৭১. অসঙ্খ্যেহি চঙ্গুল্যানঞ্ঞাসঙ্খ্যত্থেসু [ক. ৩৩৭; রূ. ৩৫০; নী. ৭২২; চং. ৪.৪.৭৪; পা. ৫.৪.৮৬].

অঞ্ঞত্থো চ অসঙ্খ্যত্থো চ অঞ্ঞাসঙ্খ্যত্থা. তত্থ ‘অঞ্ঞত্থো’তি অঞ্ঞপদত্থো বহুব্বীহিসমাসো, ‘অসঙ্খ্যত্থো’তি অসঙ্খ্যত্থসমাসো ¶ অব্যযীভাৰসমাসোতি ৰুত্তং হোতি, ন অঞ্ঞাসঙ্খ্যত্থা অনঞ্ঞাসঙ্খ্যত্থা, অঞ্ঞাসঙ্খ্যত্থৰজ্জিতেসু সমাসেসু অসঙ্খ্যেহি উপসগ্গেহি চ সঙ্খ্যাহি চ পরায অঙ্গুলিযা সমাসন্তো অ হোতি. চসদ্দেন ‘‘সুগতঙ্গুলেন, পমাণঙ্গুলেন’’ ইচ্চাদীনি সিজ্ঝন্তি.

অঙ্গুলীহি নিগ্গতং নিরঙ্গুলং, অঙ্গুলিযো অতিক্কন্তং অচ্চঙ্গুলং, ইমে দ্ৰে অমাদিসমাসা, দ্ৰে অঙ্গুলিযো সমাহটাতি দ্ৰঙ্গুলং.

অনঞ্ঞাসঙ্খ্যত্থেসূতি কিং? পঞ্চ অঙ্গুলিযো অস্মিন্তি পঞ্চঙ্গুলি, হত্থো. অঙ্গুলিযা সমীপং উপঙ্গুলি. ‘‘চতুরঙ্গুলং কণ্ণং ওসারেত্ৰা [মহাৰ. ৬৬], অট্ঠঙ্গুলং দন্তকট্ঠং, দ্ৰঙ্গুলপরমং, চতুরঙ্গুলপরমং, অট্ঠঙ্গুলপরম’’ন্তিআদীসু ‘অঙ্গুল’ন্তি অকারন্তং পমাণৰাচীসদ্দন্তরং.

৩৭২. দারুম্হঙ্গুল্যা [ক. ৩৩৭; রূ. ৩৫০; নী. ৭২২; চং. ৪.৪.৯৭; পা. ৫.৪.১১৪; ‘দারুম্যঙ্গুল্যা’ (বহূসু)].

দারুসঙ্খাতে অঞ্ঞপদত্থে পৰত্তায অঙ্গুলিযা সমাসন্তো অহোতি.

পঞ্চ অঙ্গুলিযো অস্সাতি পঞ্চঙ্গুলং, দারু. এত্থ চ অঙ্গুলিপমাণাৰযৰো ধঞ্ঞাদীনং মানৰিসেসো ‘দারূ’তি ৰুচ্চতি.

৩৭৩. দীঘাহোৰস্সেকদেসেহি চ রত্যা [ক. ৩৩৭; রূ. ৩৫০; নী. ৭২২; চং. ৪.৪.৭৫; পা. ৫.৪.৮৭].

দীঘো চ অহো চ ৰস্সো চ একদেসো চাতি দ্ৰন্দো, একদেসো নাম পুব্ব, পরাদি, অনঞ্ঞাসঙ্খ্যত্থেসু দীঘাদীহি চ অসঙ্খ্যেহি চ সঙ্খ্যাহি চ পরায রত্তিযা সমাসন্তো অ হোতি. চসদ্দেন ‘‘চিররত্ত’’ন্তি সিজ্ঝতি.

দীঘা ¶ রত্তিযো দীঘরত্তং, দীঘা রত্তিদিৰপরংপরাত্যত্থো. অহো চ রত্তি চ অহোরত্তং, ৰস্সেন তেমিতা রত্তি ৰস্সরত্তং, রত্তিযা পুব্বং পুব্বরত্তং, রত্তিযা পরং পররত্তং, রত্তিযা অড্ঢং অড্ঢরত্তং, রত্তিং অতিক্কন্তো অতিরত্তো, দ্ৰে রত্তিযো দ্ৰিরত্তং. এৰং তিরত্তং, চতুরত্তং, পঞ্চরত্তং, ছারত্তং, ৰাধিকারত্তা ‘‘একরত্তং, একরত্তী’’তি সিজ্ঝতি.

অনঞ্ঞাসঙ্খ্যত্থেসূতি কিং? দীঘা রত্তি এত্থাতি দীঘরত্তি, হেমন্তো. রত্তিযা সমীপং উপরত্তি.

৩৭৪. গো ত্ৰচত্থে চালোপে [ক. ৩৩৭; রূ. ৩৫০; নী. ৭২২; চং. ৪.৪.৭৭; পা. ৫.৪.৯২].

অচত্থে চ অনঞ্ঞা’সঙ্খ্যত্থেসু চ পৰত্তা গোসদ্দম্হা অলোপট্ঠানে সমাসন্তো অ হোতি.

রঞ্ঞো গো রাজগৰো, অত্তনো গো সগৰো, পরেসং গো পরগৰো, পঞ্চগৰো, পঞ্চগৰং. এৰং দসগৰং.

অলোপেতি কিং? পঞ্চহি গোহি কীতো পঞ্চগু. এত্থ চ তেন কীতোতি এতস্মিং অত্থে তদ্ধিতপচ্চযস্স লোপো, তেন অযং অপচ্চযো ন হোতি, ‘গোস্সূ’তি ওস্সুত্তং.

অচত্থেতি কিং? গৰজা চ গাৰো চ গৰজগৰো, যোম্হি গোস্স গৰত্তং.

অনঞ্ঞাসঙ্খ্যত্থেসূতি কিং? চিত্তগু, উপগু.

৩৭৫. রত্তিদিৰ দারগৰ চতুরস্সা [ক. ৩৩৭; রূ. ৩৫০; নী. ৭২২; চং. ৪.৪.৬২; পা. ৫.৪.৭৭].

এতে তযো সদ্দা অঅন্তা নিপচ্চন্তে.

রত্তি চ দিৰা চ রত্তিদিৰং, দারা চ গাৰো চ দারগৰং, চতস্সো অস্সিযো যস্স সো চতুরস্সো, অপচ্চযো, অস্সিস্স ইস্স অত্তং.

৩৭৬. আযামেনুগৰং [ক. ৩৩৭; রূ. ৩৫০; নী. ৭২২; চং. ৪.৪.৬৯; পা. ৫.৪.৮৩].

আযামে ¶ গম্যমানে অনুগৰন্তি নিপচ্চতে.

গোহি অনুট্ঠিতং সকটং অনুগৰং.

আযামেতি কিং? গুন্নং পচ্ছা অনুগু.

৩৭৭. অক্খিস্মাঞ্ঞত্থে [ক. ৩৩৭; রূ. ৩৫০; নী. ৭২২; চং. ৪.৪.৯৬; পা. ৫.৪.১১৩].

অঞ্ঞপদত্থে পৰত্তা অক্খিম্হা সমাসন্তো অ হোতি.

ৰিসালানি অক্খীনি যস্স সো ৰিসালক্খো, ৰিরূপানি অক্খীনি যস্স সো ৰিরূপক্খো, অনেকসহস্সানি অক্খীনি যস্স সো সহস্সক্খো, লোহিতানি অক্খীনি যস্স সো লোহিতক্খো. এৰং নীলক্খো, নীলক্খি ৰা. বহুলাধিকারা অনঞ্ঞত্থেপি, অক্খীনং পটিমুখং পচ্চক্খং, অক্খীনং পরভাগো পরোক্খং, অক্খীনং তিরোভাগো তিরোক্খং. অক্খিসদ্দেন চেত্থ পঞ্চিন্দ্রিযানি গয্হন্তি.

মহাৰুত্তিনা ক্ৰচি সমাসন্তো অ, আ, ইপচ্চযা হোন্তি.

তত্থ অপচ্চযে –

ৰাযুনো সখা ৰাযুসখো, ৰাযুসঙ্খাতো সখা অস্সাতি ৰা ৰাযুসখো, অগ্গি, সব্বেসং পিযা’পিযমজ্ঝত্তানং সখাতি সব্বসখো, সব্বে ৰা সখাযো অস্সাতি সব্বসখো, মেত্তাৰিহারী. ‘‘সব্বমিত্তো সব্বসখো’’তি [থেরগা. ৬৪৮] পাল়ি. পাপানং সখাতি পাপসখো, পাপা সখারো যস্সাতি ৰা পাপসখো. ‘‘পাপমিত্তো পাপসখো’’তি [দী. নি. ৩.২৫৩] পাল়ি. পহিতো পেসিতো অত্তা যেনাতি পহিতত্তো, মজ্ঝিমো অত্তা সভাৰো যস্সাতি মজ্ঝত্তো, ছাতং অজ্ঝত্তসন্তানং [সণ্ঠানং (মূলপাঠে)] যস্সাতি ছাতজ্ঝত্তো, সুহিতো অত্তা যস্সাতি সুহিতত্তো ¶ , যতো সংযতো অত্তা যস্সাতি যতত্তো, ঠিতো অত্তা অস্সাতি ঠিতত্তোইচ্চাদি.

আপচ্চযে –

পচ্চক্খো ধম্মো যস্সাতি পচ্চক্খধম্মা, ছাদেতীতি ছদো, মোহো, ৰিৰটো ছদো যস্মিন্তি ৰিৰটচ্ছদা, সম্মাসম্বুদ্ধো.

ইপচ্চযে –

সুন্দরো গন্ধো যস্সাতি সুগন্ধি, কুচ্ছিতো গন্ধো যস্সাতি দুগ্গন্ধি, পূতিনো গন্ধো যস্সাতি পূতিগন্ধি, সুরভিনো গন্ধো সুরভিগন্ধি. ‘‘সরীরস্স সুগন্ধিনো, গুণগন্ধিযুত্তো অহ’’ন্তি পাল়ি.

ইতি সমাসন্তঅপচ্চযরাসি.

নানাদেসরাসি

৩৭৮. উত্তরপদে [ক. ৩৩৩-৩৩৪; রূ. ৩৪৪-৩৪৫; নী. ৭১৭-৭১৮].

উত্তরপদে পরে পুব্বপদে ৰিধি হোতীতি অত্থো. অধিকারসুত্তমিদং.

‘‘অব্রাহ্মণো, অনরিযো, অভিক্খুকো, অনন্তো’’ইচ্চাদীসু সমাসে উত্তরপদে পরে ন-কারস্স অ, অন হোন্তি.

৩৭৯. নখাদযো [ক. ৩২৮; রূ. ৩৫২; নী. ৭০৮; চং. ৫.২.৯৫; পা. ৬.৩.৭৫].

নখাদযো সদ্দা নপকতিকা সিজ্ঝন্তি.

না’স্স খমত্থীতি নখো, ‘খ’ন্তি সুখং, দুক্খঞ্চ, না’স্স কুলমত্থীতি নকুলো, এৰংনামকো ব্রাহ্মণো, পুমস্স সকং পুংসকং ¶ নত্থি পুংসকং এতস্মিন্তি নপুংসকো, খঞ্জনং ৰেকল্লগমনং খত্তং, নত্থি খত্তং এতস্সাতি নক্খত্তং, কং ৰুচ্চতি সুখং, তব্বিরুদ্ধত্তা অকং ৰুচ্চতি দুক্খং, নত্থি অকং এতস্মিন্তি নাকো, সগ্গো, ন মুঞ্চতীতি নমুচি, মারো. ন গলতি ন চৰতীতি নগরং, গেহে ৰত্তব্বে ‘অগার’ন্তি সিজ্ঝতি.

৩৮০. নগো ৰা পাণিনি [ক. ৩৩৩-৩৩৪; রূ. ৩৪৪-৩৪৫; নী. ৭১৭-৭১৮; চং. ৫.২.৯৬; পা. ৬.৩.৭৭; ‘নগো ৰাপ্পাণিনি’ (বহূসু)].

অপাণিম্হি নগোতি সিজ্ঝতি ৰা.

ন গচ্ছন্তীতি নগা, রুক্খা. নগা, পব্বতা. অগা, রুক্খা, অগা, পব্বতা.

অপাণিনীতি কিং? অগো ৰসলো কিং তেন. এত্থ ‘অগো’তি দুগ্গতজনো, ‘ৰসলো’তি লামকো, ‘কিং তেনা’তি নিন্দাৰচনং, ‘‘সীতেনা’’তিপি পাঠো. এৰং নেকে, অনেকে, নেকানি, অনেকানি ইচ্চাদি.

ইতি ন-রাসি.

৩৮১. সহস্স সোঞ্ঞত্থে [ক. ৪০৪; রূ. ৩৭০; নী. ৮৫৯; চং. ৫.২.৯৭; পা. ৬.৩.৮২].

অঞ্ঞপদত্থে সমাসে উত্তরপদে পরে সহস্স সো হোতি ৰা.

পুত্তেন সহ যো ৰত্ততীতি সপুত্তো, সহপুত্তো.

অঞ্ঞত্থেতি কিং? সহ কত্ৰা, সহ যুজ্ঝিত্ৰা.

৩৮২. সঞ্ঞাযং [ক. ৪০৪; রূ. ৩৭০; নী. ৮৫৯; চং. ৫.২.৯৮; পা. ৬.৩.৭৮].

সঞ্ঞাযং উত্তরপদে পরে সহস্স সো হোতি.

সহ ¶ আযত্তং সাযত্তং, সহ পলাসং সপলাসং, অগরুকারস্সেতং নামং.

৩৮৩. অপচ্চক্খে [ক. ৪০৪; রূ. ৩০৭; নী. ৮৫৯; চং. ৫.২.৯৯; পা. ৬.৩.৮০].

অপচ্চক্খে গম্যমানে উত্তরপদে পরে সহস্স সো হোতি.

ওড্ডিযতি এতাযাতি ওড্ডি, পাসো. ওড্ডিযা সহ যো ৰত্ততীতি সোড্ডি, কপোতো. ইধ ‘ওড্ডি’ অপচ্চক্খা. ‘‘সাগ্গি কপোতো’’তিপি পাঠো, পিচুনা সহ ৰত্ততীতি সপিচুকা, ৰাতমণ্ডলিকা, সা চ অপচ্চক্খা, উগ্গন্ত্ৰা আকাসে পরিব্ভমন্তং পিচুসঙ্ঘাটং দিস্ৰা ঞাতব্বা. ‘‘সপিসাচা ৰাতমণ্ডলিকা’’তিপি পাঠো. এৰং সরজা, ৰাতা, সরক্খসী, রত্তি.

৩৮৪. অকালে সকত্থস্স [ক. ৪০৪; রূ. ৩৭০; নী. ৮৫৯; চং. ৫.২.১১০; পা. ৬.৩.৮১].

সকত্থপ্পধানস্স সহসদ্দস্স সো হোতি অকালে উত্তরপদে পরে.

সব্রহ্মং, সচক্কং.

অকালেতি কিং? সহ পুব্বণ্হং, সহ পরণ্হং, সুনক্খত্তেন সহ পৰত্তং পুব্বণ্হং, পরণ্হন্তি অত্থো.

৩৮৫. গন্থন্তাধিক্যে [ক. ৪০৪; রূ. ৩৭০; নী. ৮৫৯; চং. ৫.২.১০১; পা. ৬.৩.৭৯].

গন্থস্স অন্তো গন্থন্তো. যথা তং কচ্চাযনগন্থস্স অন্তো উণাদিকপ্পো, অধিকভাৰো আধিক্যং, গন্থন্তে চ আধিক্যে চ ৰত্তমানস্স সহসদ্দস্স সো হোতি উত্তরপদে পরে.

সহ ¶ উণাদিনা’ যং অধিযতেতি তং সোণাদি, সকলং কচ্চাযনং অধীতেত্যত্থো. সহ মুহুত্তেন সকলং জোতিং অধীতে সমুহুত্তং, জোতীতি নক্খত্তসত্থং.

আধিক্যে – সদোণা, খারী, সকহাপণং, নিক্খং, সমাসকং, কহাপণং. নিচ্চত্থমিদং সুত্তং.

৩৮৬. সমানস্স পক্খাদীসু ৰা [ক. ৪০৪; রূ. ৩৭০; নী. ৮৫৯; চং. ৫.২.১০৩-৪; পা. ৬.৩.৮৪-৮৬].

পক্খাদীসু উত্তরপদেসু সমানস্স সো হোতি ৰা.

সমানো পক্খো সহাযো সপক্খো, সমানো পক্খো যস্সাতি ৰা সপক্খো, সমানপক্খো ৰা. এৰং সজাতি, সমানজাতি, সজনপদো, সরত্তি.

সমানো পতি যস্সা সা সপতি. এৰং সনাভি, সবন্ধু, সব্রহ্মচারী, সনামো. অৰ্হযং ৰুচ্চতি নামং, চন্দেন সমানং অৰ্হযং যস্স সো চন্দসৰ্হযো, সগোত্তো, ইন্দেন সমানং গোত্তং যস্স সো ইন্দসগোত্তো, সরূপং, সট্ঠানং. হরি ৰুচ্চতি সুৰণ্ণং, হরিনা সমানো ৰণ্ণো যস্স সো হরিস্সৰণ্ণো, সস্স দ্ৰিত্তং. এৰং সিঙ্গীনিক্খসৰণ্ণো, সৰযো, সধনো, সধম্মো, সজাতিযো.

পক্খাদীসূতি কিং? সমানসীলো.

৩৮৭. উদরে ইযে [ক. ৪০৪; রূ. ৩৭০; নী. ৮৫৯; চং. ৫.২.১০৫; পা. ৬.৩.৮৮].

ইযযুত্তে উদরে পরে সমানস্স সো হোতি ৰা.

সমানে উদরে জাতো সোদরিযো, সমানোদরিযো.

ইযেতি কিং? সমানোদরতা.

অঞ্ঞেসুপি ¶ সমানস্স সো হোতি, চন্দেন সমানা সিরী যস্স তং চন্দস্সসিরীকং, মুখং. এৰং পদুমস্সসিরীকং, ৰদনং.

মহাৰুত্তিনা সন্তাদীনঞ্চ সো হোতি, সংৰিজ্জতি লোমং অস্সাতি সলোমকো. এৰং সপক্খকো, সংৰিজ্জন্তি আসৰা এতেসন্তি সাসৰা, সংৰিজ্জন্তি পচ্চযা এতেসন্তি সপ্পচ্চযা, সংৰিজ্জন্তি অত্তনো উত্তরিতরা ধম্মা এতেসন্তি সউত্তরা, সন্তো পুরিসো সপ্পুরিসো. তথা সজ্জনো, সদ্ধম্মো, সন্তস্স ভাৰো সব্ভাৰো ইচ্চাদি.

ইতি স-রাসি.

৩৮৮. ইমস্সিদং [ক. ১২৯; রূ. ২২২; নী. ৩০৫].

উত্তরপদে পরে ইমস্স ইদং হোতি.

অযং অত্থো এতস্সাতি ইদমত্থী, সমাসন্তে ঈ, ইদমত্থিনো ভাৰো ইদমত্থিতা. অযং পচ্চযো এতেসন্তি ইদপ্পচ্চযা, ইদপ্পচ্চযানং ভাৰো ইদপ্পচ্চযতা. ‘‘ইমেসং পচ্চযা ইদপ্পচ্চযা, ইদপ্পচ্চযা এৰ ইদপ্পচ্চযতা’’তিপি যোজেন্তি. ‘ইদ’ন্তি নিপাতপদম্পি অত্থি, ‘‘রূপঞ্চ হিদং ভিক্খৰে অত্তা অভৰিস্সা, ৰেদনা চ হিদং. সঞ্ঞা চ হিদং. সঙ্খারা চ হিদং ভিক্খৰে অত্তা অভৰিস্সংসু’’ ইচ্চাদি [মহাৰ. ২০].

৩৮৯. পুং পুমস্স ৰা [ক. ৮২; রূ. ১৪৯].

উত্তরপদে পরে পুমস্স পুং হোতি ৰা.

পুমস্স লিঙ্গং পুল্লিঙ্গং, পুমস্স ভাৰো পুম্ভাৰো, পুমা চ সো কোকিলো চাতি পুঙ্কোকিলো, পুমা চ সো গো চাতি পুঙ্গৰো, ‘গো ত্ৰচত্থে…’তি অপচ্চযো, নপুংসকো.

ৰাতি কিং? পুমিত্থী.

৩৯০. ট ন্তন্তূনং [ক. ১২৬; রূ. ১০১; নী. ৩০১].

উত্তরপদে ¶ পরে ন্ত, ন্তূনং ট হোতি ৰা ক্ৰচি.

ভৰং পতিট্ঠো যেসং তে ভৰংপতিট্ঠা, বিন্দাগমো. ভগৰা মূলং যেসং তে ভগৰংমূলকা, ধম্মা. এৰং ভগৰংপটিসরণা, ধম্মা.

বহুলাধিকারা তরাদীসু চ পরেসু, মহন্তীনং অতিসযেন মহাতি মহত্তরী, রত্তঞ্ঞূনং মহন্তস্স ভাৰো রত্তঞ্ঞুমহত্তং. এৰং জাতিমহত্তং, গুণমহত্তং, পুঞ্ঞমহত্তং, অরহন্তস্স ভাৰো অরহত্তং.

৩৯১. অ [ক. ৬৪২; রূ. ৫৮৯; নী. ১২৬৯; চং. ৫.২.১০৬; পা. ৬.৩.৮৯].

উত্তরপদে পরে ন্ত, ন্তূনং অ হোতি.

ভৰন্তপতিট্ঠা, মযং, গুণৰন্তপতিট্ঠা, মযং.

৩৯২. রীরিক্খকেসু [ক. ৬৪২; রূ. ৫৮৯; নী. ১২৬৯; চং. ৫.২.১০৭; পা. ৬.৩.৮৯-৯০].

রী, রিক্খ, কপচ্চযন্তেসু পরেসু সমানস্স সো হোতি.

নিচ্চসমাসত্তা অঞ্ঞপদেন ৰিগ্গহো, সংৰিজ্জতীতি সমানো, পচ্চক্খে ৰিয চিত্তে উপলব্ভতীতি অত্থো. সমানো ৰিয সো দিস্সতীতি সদী, সদিক্খো, সদিসো, সমানা ৰিয তে দিস্সন্তীতি সদিসা.

৩৯৩. ন্তকিমিমানং টাকীটী [ক. ১২৬; রূ. ১০১; নী. ৩০১].

তেসু পরেসু ন্তপচ্চযন্তস্স চ কিং, ইমসদ্দানঞ্চ কমেন টা, কী, টী হোন্তি.

ভৰং ¶ ৰিয সো দিস্সতীতি ভৰাদী, ভৰাদিক্খো, ভৰাদিসো, কো ৰিয সো দিস্সতীতি কীদী, কীদিক্খো, কীদিসো, অযং ৰিয সো দিস্সতীতি ঈদী, ঈদিক্খো, ঈদিসো.

৩৯৪. সব্বাদীনমা [ক. ৬৪২; রূ. ৫৮৯; নী. ১২৬৯; চং. ৫.২.১০৮; পা. ৬.৩.৯১].

তেসু পরেসু সব্বাদিনামকানং য, ত, এত, অঞ্ঞ, অম্হ, তুম্হসদ্দানং অন্তো আ হোতি.

যাদী, যাদিক্খো, যাদিসো, তাদী, তাদিক্খো, তাদিসো, এতাদী, এতাদিক্খো, এতাদিসো.

৩৯৫. ৰেতস্সেট [ক. ৬৪২; রূ. ৫৮৯; নী. ১২৬৯].

তেসু পরেসু এতস্স এট হোতি ৰা.

এদী, এদিক্খো, এদিসো, অঞ্ঞাদী, অঞ্ঞাদিক্খো, অঞ্ঞাদিসো, অম্হাদী, অম্হাদিক্খো, অম্হাদিসো, তুম্হাদী, তুম্হাদিক্খো, তুম্হাদিসো.

৩৯৬. তুম্হম্হানং তামেকস্মিং [ক. ৬৪২; রূ. ৫৮৯; নী. ১২৬৯].

তেসু পরেসু একৰচনে পৰত্তানং তুম্হ’ ম্হসদ্দানং তা, মা হোন্তি ৰা.

অহং ৰিয সো দিস্সতীতি মাদী, মাদিক্খো, মাদিসো, ত্ৰং ৰিয সো দিস্সতীতি তাদী, তাদিক্খো, তাদিসো.

একস্মিন্তি কিং? অম্হে ৰিয তে দিস্সন্তীতি অম্হাদিনো, অম্হাদিক্খা, অম্হাদিসা, তুম্হে ৰিয তে দিস্সন্তীতি তুম্হাদিনো, তুম্হাদিক্খা, তুম্হাদিসা. এত্থ চ উপমানত্থস্সেৰ একত্তং ইচ্ছীযতি, তস্মা অহং ৰিয তে দিস্সন্তীতি মাদিসা ¶ ত্ৰং ৰিয তে দিস্সন্তীতি তাদিনো, তাদিসাতিপি যুজ্জন্তি. ‘‘মাদিসা ৰে জিনা হোন্তি, যে পত্তা আসৰক্খয’’ন্তি [মহাৰ. ১১] পাল়ি, ইমানি পদানি উপরি কিতকণ্ডেপি আগমিস্সন্তি.

৩৯৭. তংমমঞ্ঞত্র [ক. ১৪৩; রূ. ২৩৫; নী. ৩২২].

রী, রিক্খ, কপচ্চযেহি অঞ্ঞস্মিং উত্তরপদে পরে তুম্হ’ম্হানং তং, মংআদেসা হোন্তি ক্ৰচি.

ত্ৰং লেণং যেসং তে তংলেণা, অহং লেণং যেসং তে মংলেণা [সং. নি. ৪.৩৫৯]. এৰং তংদীপা, মংদীপা [সং. নি. ৪.৩৫৯], তংপটিসরণা, মংপটিসরণা.

৩৯৮. মনাদ্যাপাদীনমো মযে চ [ক. ১৮৩; রূ. ৩৮৬; নী. ৩৭৫].

উত্তরপদে মযপচ্চযে চ পরে মনাদীনং আপাদীনঞ্চ ও হোতি.

মনোসেট্ঠা, মনোমযা, রজোজল্লং, রজোমযং, সব্বো মনোগণো ইধ ৰত্তব্বো, আপোধাতু, আপোমযং. অনুযন্তি দিসোদিসং [দী. নি. ৩.২৮১], জীৰ ত্ৰং সরদোসতং [জা. ১.২.৯].

৩৯৯. পরস্স সঙ্খ্যাসু [ক. ৩৬; রূ. ৪৭; নী. ১৩০].

সঙ্খ্যাসু পরাসু পরস্স ও হোতি.

পরোসতং, পরোসহস্সং, পরোপণ্ণাস ধম্মা, ইধ পরসদ্দো ‘‘ইন্দ্রিযপরোপরিযত্ত’’ন্তি এত্থ ৰিয অধিকত্থৰাচিসদ্দন্তরং, ন সব্বনামং.

৪০০. জনে পুথস্সু [ক. ৪৯; রূ. ৪৪; নী. ১২৯].

জনে ¶ পরে পুথস্স উ হোতি.

অরিযেহি পুথগেৰাযং জনোতি পুথুজ্জনো. অপি চ পাল়িনযে পুথুসদ্দোযেৰ বহুলং দিস্সতি, পুথু কিলেসে জনেন্তীতি পুথুজ্জনা, পুথু নানাসত্থারানং মুখং উল্লোকেন্তীতি পুথুজ্জনা, পুথু নানাওঘেহি ৰুয্হন্তীতি পুথুজ্জনা [মহানি. ৫১, ৯৪], সঞ্ঞানানাত্তপুথুত্তপভেদং পটিচ্চ তণ্হানানাত্তপুথুত্তপভেদো হোতি [ধ. স. অট্ঠ. ১], ইঙ্ঘ অঞ্ঞেপি পুচ্ছস্সু, পুথূ সমণব্রাহ্মণে [সং. নি. ১.২৪৬]. গামা গামং ৰিচরিস্সং, সাৰকে ৰিনযং পুথূ, আযতানি পুথূনি চ, পুথুনা ৰিজ্জুৰণ্ণিনা [জা. ২.২২.৯৬৮], পুথুকাযা পুথুভূতা ইচ্চাদি. তস্মা ‘‘পুথগেৰ, পুথক্করণে’’ ইচ্চাদীসু থুস্স উকারস্স অকারো [অকারোতি?] যুজ্জতি.

৪০১. সো ছস্সাহাযতনেসু ৰা [ক. ৩৭৪; রূ. ৪০৮; নী. ৮০৪].

অহে চ আযতনে চ পরে ছস্স সো হোতি ৰা.

ছ অহানি সাহং. অত্থি সাহস্স জীৰিতং [জা. ২.২২.৩১৪], ‘সাহস্সা’তি সাহং+অস্সাতি ছেদো. সল়াযতনং.

ৰাতি কিং? ছাহপ্পটিচ্ছন্না আপত্তি [চূল়ৰ. ১৩৪], ছ আযতনানি.

৪০২. ল্তুপিতাদীনমারঙ্রঙ [ক. ২০০; রূ. ১৫৯; নী. ৪১৫; চং. ৫.২.২০; পা. ৬.৩.৩২].

সমাসুত্তরপদে পরে ল্তুপচ্চযন্তানং পিতাদীনঞ্চ কমেন আরঙ, রঙ হোন্তি ৰা.

সত্থুনো ¶ দস্সনং সত্থারদস্সনং. এৰং কত্তারনিদ্দেসো. মাতা চ পিতা চ মাতরপিতরো, মাতাপিতূসু সংৰড্ঢো মাতাপিতরসংৰড্ঢো.

ৰাতি কিং? সত্থুদস্সনং, কত্তু নিদ্দেসো, মাতাপিতরো.

৪০৩. ৰিজ্জাযোনিসম্বন্ধীনমা তত্র চত্থে [ক. ১৯৯; রূ. ১৫৮; নী. ৭৩৬; চং. ৫.২.২১; পা. ৬.৩.২৫].

চত্থসমাসে ৰিজ্জাসম্বন্ধীনং যোনিসম্বন্ধীনঞ্চ ল্তুপিতাদীনং আ হোতি তেস্ৰেৰ পরেসু.

মাতাপিতা, মাতাপিতরো ইচ্চাদি.

তত্রাতি কিং? মাতুযা ভাতা মাতুভাতা.

এত্থ চ ৰিজ্জাসিপ্পানি সিক্খাপেন্তা আচরিযা সিস্সানং ৰিজ্জাসম্বন্ধী মাতাপিতরো নাম.

৪০৪. পুত্তে [ক. ১৯৯; রূ. ১৫৮; নী. ৭৩৬; চং. ৫.২.২২; পা. ৬.৩.২৫].

চত্তে পুত্তে পরে ৰিজ্জাযোনিসম্বন্ধীনং ল্তুপিতাদীনং আ হোতি.

মাতাপুত্তা গচ্ছন্তি, পিতাপুত্তা গচ্ছন্তি. মহাৰুত্তিনা তেসঞ্চ ই হোতি, মাতিপক্খো, পিতিপক্খো. মাতিঘো লভতে দুখং [জা. ২.১৯.১১৮], পিতিঘো লভতে দুখং, মাত্তিকং ধনং, পেত্তিকং ধনং [পারা. ৩৪]. এত্থ চ মাতুযা সন্তকং মাত্তিকং, পিতুনো সন্তকং পেত্তিকং, দ্ৰিত্তং ৰুদ্ধি চ. মাতিতো, পিতিতো, ভাতা এৰ ভাতিকো, ভাতিকরাজা.

৪০৫. জাযায জাযং পতিম্হি [ক. ৩৩৯; রূ. ৩৫৮; নী. ৭৩১; ‘…জযং পতিম্হি’ (বহূসু)].

পতিম্হি ¶ পরে জাযাসদ্দস্স জাযং হোতি.

পুত্তং জনেতীতি জাযা, জাযা চ পতি চ জাযম্পতী [জযম্পতী (বহূসু)]. অথ ৰা ‘‘জাযম্পতী’’তি ইদং সন্ধিৰিধিনাৰ সিদ্ধং, তস্মা ‘‘জম্পতী’’তিপাঠো সিযা যথা ‘‘দেৰরাজা সুজম্পতী’ [সং. নি. ১.২৬৪]’তি, যথা চ সক্কতগন্থেসু ‘‘দারো চ পতি চ দম্পতী’’তি. ইধ পন মহাৰুত্তিনা পতিম্হি সুজাতায সুজং হোতি, দারস্স চ দং হোতি, তথা জাযা চ পতি চ জম্পতীতি নিট্ঠং গন্তব্বং.

যঞ্চ ৰুত্তিযং ‘‘জানিপতীতি পকত্যন্তরেন সিদ্ধং, তথা দম্পতী’’তি ৰুত্তং. তত্থ পুত্তং জনেতীতি জানী. জানী চ পতি চ জানীপতীতি যুজ্জতি. ‘‘তুদম্পতী’’তি পাঠো. কচ্চাযনে চ ‘জাযায তু দংজানি পতিম্হী’তি. তত্থ তুসদ্দো পদপূরণমত্তে যুজ্জতি.

৪০৬. সঞ্ঞাযমুদোদকস্স [ক. ৪০৪; রূ. ৩৭০; নী. ২৫৭; চং. ৫.২.৬৫; পা. ৬.৩.৫৭].

সঞ্ঞাযং গম্যমানাযং উত্তরপদে পরে উদকস্স উদো হোতি.

উদকং ধারেতীতি উদধি, মহন্তং উদকং ধারেতীতি মহোদধি, উদকং পিৰন্তি এত্থাতি উদপানং, উদকং পিৰন্তি এতাযাতি উদপাতি.

৪০৭. কুম্ভাদীসু ৰা [ক. ৪০৪; রূ. ৩৭০; নী. ২৫৭; চং. ৫.২.৬৯; পা. ৬.৩.৫৯].

কুম্ভাদীসু পরেসু উদকস্স উদো হোতি ৰা.

উদকস্স ¶ কুম্ভো উদকুম্ভো, উদককুম্ভো. এৰং উদপত্তো, উদকপত্তো, উদবিন্দু, উদকবিন্দু. মহাৰুত্তিনা স্যাদীসুপি, ‘‘নীলোদা পোক্খরণী’’তি পাল়ি.

৪০৮. সোতাদীসু লোপো [ক. ৪০৪; রূ. ৩৭০; নী. ২৫৬].

সোতাদীসু পরেসু উদকস্স উস্স লোপো হোতি.

উদকস্স সোতং দকসোতং, উদকে রক্খসো দকরক্খসো, উদকং আসযো যেসং তে দকাসযা, পাণা. মহাৰুত্তিনা স্যাদীসুপি, ‘‘দকে দকাসযা সেন্তী’’তি [সং. নি. ৩.৭৮ (থোকং ৰিসদিসং)] পাল়ি.

৪০৯. পুব্বাপরজ্জসাযমজ্ঝেহাহস্স ণ্হো [ক. ৪০৪; রূ. ৩৭০; ন্হো (সী.)].

পুব্বাদীহি পরস্স অহস্স ণ্হো হোতি.

পুব্বণ্হো, অপরণ্হো, অজ্জণ্হো, সাযণ্হো [সাযন্হো], মজ্ঝণ্হো.

নানাদেসরাসি নিট্ঠিতো.

অব্যযরাসি

৪১০. কুপাদযো নিচ্চমস্যাদিৰিধিম্হি [ক. ৩২৪; রূ. ৩৩৯; চং. ২.২.২৪; পা. ২.২.১৮].

স্যাদিৰিধিতো অঞ্ঞত্থ কুআদযো পাদযো চ সদ্দা স্যাদ্যন্তেন সহ নিচ্চং একত্থা হোন্তি.

কুচ্ছিতো ব্রাহ্মণো কুব্রাহ্মণো, ঈসকং উণ্হং কদুণ্হং, পাকটো হুত্ৰা ভৰতীতি পাতুভূতো, আৰী [‘আৰি’পি দিস্সতি] হুত্ৰা ভৰতীতি আৰীভূতো, তুণ্হী ভৰতীতি তুণ্হীভূতো, পমুখো নাযকো পনাযকো, পকারেন করিত্ৰা পকরিত্ৰা ¶ পকারেন কতং পকতং, পঠমং ৰা কতং পকতং, ৰিরূপো পুরিসো দুপ্পুরিসো. এৰং দুক্কটং, সোভণো পুরিসো সুপুরিসো. এৰং সুকতং, অভিধম্মো, অভিত্থুতো, ভুসং কল়ারো আকল়ারো, ভুসং বন্ধো আবন্ধো ইচ্চাদি.

পাদযো পকতাদ্যত্থে পঠমায একত্থা হোন্তি, পকতো আচরিযো পাচরিযো. এৰং পয্যকো, পরো অন্তেৰাসী পন্তেৰাসী, পরো পুত্তো পপুত্তো, পরো নত্তা পনত্তা.

অত্যাদযো অতিক্কন্তাদ্যত্থে দুতিযায, মঞ্চং অতিক্কন্তো অতিমঞ্চো. এৰং অতিবালো, অতিৰেলা.

অৰাদযো কুট্ঠাদ্যত্থে ততিযায, কোকিলায অৰকুট্ঠং ৰনং অৰকোকিলং, ‘অৰকুট্ঠ’ন্তি ছড্ডিতন্তি ৰদন্তি. এৰং অৰমযূরং.

পরিযাদযো গিলানাদ্যত্থে চতুত্থিযা, অজ্ঝাযিতুং গিলানো পরিযজ্ঝেনো.

ন্যাদযো নিক্খন্তাদ্যত্থে পঞ্চমিযা, কোসম্বিযা নিক্খন্তো নিক্কোসম্বি, ৰানতো নিক্খন্তং নিব্বানং.

অস্যাদিৰিধিম্হীতি কিং? রুক্খং পতি ৰিজ্জোততে.

৪১১. চী ক্রিযত্থেহি [চং. ২.২.২৫; পা. ১.৪.৬০, ৬১].

চীপচ্চযন্তো সদ্দো ক্রিযত্থেহি সদ্দেহি সহ একত্থো হোতি.

বলসা কিরিয বলীকিরিয, পাকটীকিরিয, পাকটীভুয্য, পাকটীভৰিয.

৪১২. ভূসনাদরানাদরাদীস্ৰেহি সহ [চং. ২.২.২৭; পা. ১.৪.৬৩, ৬৪].

অলমাদযো ¶ সদ্দা ভূসনাদীসু অত্থেসু এতেহি ক্রিযত্থেহি সহ একত্থা হোন্তি.

ভূসনং অকাসীতি অলংকিরিয, সমং আদরং অকাসীতি সক্কচ্চ, অসমং অনাদরং অকাসীতি অসক্কচ্চ, বিন্দুনো পররূপত্তং.

ভূসনাদীসূতি কিং? অলং ভুত্ৰা গতো, ‘অল’ন্তি পরিযত্তং, সক্কত্ৰা গতো, সোভণং কত্ৰাত্যত্থো. ‘‘কচ্চ, কিরিয’’ ইচ্চাদিনা সংখিত্তরূপেহি উপপদেন সহ সিদ্ধেহি এৰ একত্থসঞ্ঞা, ন ‘‘কত্ৰা’’ ইচ্চাদিনা অসংখিত্তরূপেহি ৰিসুং সিদ্ধেহীতি অধিপ্পাযো.

৪১৩. অঞ্ঞে চ [ক. ৩২৪, ৩২৭; রূ. ৩৩৯, ৩৫১; নী. ৬৮২-৬৮৮, চং. ২.২.৩০, ৩৩, ৩৪, ৩৭, ৪৪; পা ১.৪.৬৭, ৭১, ৭২, ৭৫, ৭৬; ৩.৪.৬৩].

অঞ্ঞে চ সদ্দা ক্রিযত্থেহি স্যাদ্যন্তেহি সহ বহুলং একত্থা হোন্তি.

অতিরেকং অভৰীতি পরোভুয্য. এৰং তিরোভুয্য, পরোকিরিয, তিরোকিরিয, উরসিকিরিয, মনসিকিরিয, মজ্ঝেকিরিয, তুণ্হীভুয্য.

ত্যাদিসদ্দাপি সঞ্ঞাভাৰং পত্তা নিপাতরূপা হোন্তি, স্যাদিরূপা চ. তস্মা তেপি ইমস্মিং সুত্তে সঙ্গয্হন্তি.

অত্থিখীরা গাৰী, নসন্তিপুত্তা ইত্থী, অত্থি হুত্ৰা পচ্চযো অত্থিপচ্চযো. এৰং নত্থিপচ্চযো, অহোসি এৰ কম্মং অহোসিকম্মং, এহি চ পস্স চ এহিপস্স, এহিপস্স ইতি ৰিধানং অরহতীতি এহিপস্সিকো, অযং তদ্ধিতন্তসমাসো নাম. এৰং পরত্থ.

এহি ¶ ভদ্দন্তেতি ৰুত্তোপি ন এতীতি নএহিভদ্দন্তিকো [দী. নি. ১.৩৯৪], তিট্ঠ ভদ্দন্তেতি ৰুত্তোপি ন তিট্ঠতীতি নতিট্ঠভদ্দন্তিকো, এহি স্ৰাগতং তুয্হন্তি ৰদনসীলো এহিস্ৰাগতিকো, এহিস্ৰাগতৰাদী [পারা. ৪৩২] ৰা, এহি ভিক্খূতি ৰচনেন সিদ্ধা উপসম্পদা এহিভিক্খূপসম্পদা, এৰং পোরাণা আহংসু ৰা, এৰং পুরে আসিংসু ৰাতি এৰং পৰত্তং ৰিধানং এত্থ অত্থীতি ইতিহাসো [দী. নি. ১.২৫৬], পুরাণগন্থো, যং পুব্বে অনঞ্ঞাতং, তং ইদানি ঞস্সামি ইতি পৰত্তস্স ইন্দ্রিযং অনঞ্ঞাতঞ্ঞস্সামীতিন্দ্রিযং, অসুকো ইতি আহ অসুকো ইতি আহ, অসুকস্মিংৰা গন্থে ইতি আহ অসুকস্মিং গন্থে ইতি আহাতি এৰং পৰত্তৰচনং ইতিহিতিহং, অঞ্ঞাসি ইতি ব্যাকতো কোণ্ডঞ্ঞো অঞ্ঞাসিকোণ্ডঞ্ঞো [মহাৰ. ৮] ইচ্চাদি.

কেচি পন ‘‘সচ্ছিকরোতি, মনসিকরোতি, পাকটীকরোতি, আৰীকরোতি, পাতুকরোতি, অলঙ্করোতি, সক্করোতি, পভৰতি, পরাভৰতি’’ ইচ্চাদীনম্পি একত্থীভাৰং ৰদন্তি. তুমন্তত্ৰন্তাদিকাপি এত্থ সঙ্গয্হন্তি, গন্তুং কামেতীতি গন্তুকামো, কত্তুকামো, দট্ঠুকামো, গন্তুং মনো এতস্সাতি গন্তুমনো, সংৰিধায অৰহারো সংৰিধাৰহারো, যলোপো. এৰং উপাদায উপ্পন্নং রূপং উপাদারূপং, অনুপাদায ৰিমুত্তো অনুপাদাৰিমুত্তো, পটিচ্চসমুপ্পাদো, আহচ্চভাসিতো, উপহচ্চপরিনিব্বাযী [পু. প. ৩৭], অৰেচ্চপ্পসাদো, ছক্খত্তুপরমং, সত্তক্খত্তুপরমো [পু. প. ৩১] ইচ্চাদি.

অব্যযরাসি নিট্ঠিতো.

সঙ্খ্যারাসি

ইদানি ¶ সঙ্খ্যারাসি ৰুচ্চতে.

৪১৪. ৰিধাদীসু দ্ৰিস্স দু [ক. ৩৮৬; রূ. ৪১০; নী. ৮১১].

ৰিধাদীসু পরেসু দ্ৰিস্স দু হোতি.

দ্ৰে ৰিধা পকারা যস্সাতি দুৰিধো, দ্ৰে পট্টানি যস্সাতি দুপট্টং, চীৰরং, দুৰঙ্গিকং, ঝানং ইচ্চাদি.

৪১৫. দি গুণাদীসু [ক. ৩৮৬; রূ. ৪১০; নী. ৮১১].

গুণাদীসু দ্ৰিস্স দি হোতি.

দ্ৰে গুণা পটলা যস্সাতি দিগুণা, সঙ্ঘাটি, দ্ৰে গাৰো দিগু, দ্ৰে রত্তিযো দিরত্তং, দ্ৰিরত্তং ৰা.

৪১৬. তীস্ৰ [ক. ৩৮৩; রূ. ২৫৩; নী. ৮১৫].

তীসু পরেসু দ্ৰিস্স অ হোতি.

দ্ৰে ৰা তযো ৰা ৰারা দ্ৰত্তিক্খত্তুং, দ্ৰে ৰা তযো ৰা পত্তা দ্ৰত্তিপত্তা.

৪১৭. আ সঙ্খ্যাযাসতাদোনঞ্ঞত্থে [ক. ৩৮৩; রূ. ২৫৩; নী. ৮১৫; চং. ৫.২.৫২; পা. ৬.৩.৪৭].

অঞ্ঞপদত্থৰজ্জিতে সমাসে সতাদিতো অঞ্ঞস্মিং সঙ্খ্যাপদে পরে দ্ৰিস্স আ হোতি.

দ্ৰে চ দস চ দ্ৰাদস, দ্ৰীহি ৰা অধিকা দস দ্ৰাদস, দ্ৰাৰীসতি, দ্ৰত্তিংস, রস্সত্তং.

অসতাদোতি কিং? দ্ৰিসতং, দ্ৰিসহস্সং.

অনঞ্ঞত্থেতি কিং? দ্ৰে দস যস্মিন্তি দ্ৰিদস.

৪১৮. তিস্সে [ক. ৪০৪; রূ. ৩৭০; চং. ৫.২.৫৩; পা. ৬.৩.৪৮].

অনঞ্ঞত্থে ¶ অসতাদো সঙ্খ্যাপদে পরে তিস্স এ হোতি.

তযো চ দস চ তেরস, তীহি ৰা অধিকা দস তেরস. এৰং তেৰীসতি, তেত্তিংস.

৪১৯. চত্তালীসাদো ৰা [ক. ৪০৪; রূ. ৩৭০; চং. ৫.২.৫৪; পা. ৬.৩.৪৯].

চত্তালীসাদীসু পরেসু তিস্স এ হোতি ৰা.

তেচত্তালীসং, তিচত্তালীসং, তেপঞ্ঞাসং, তিপঞ্ঞাসং, তেসট্ঠি, তিসট্ঠি, তেসত্ততি, তিসত্ততি, তেঅসীতি, তিঅসীতি, তেনৰুতি, তিনৰুতি.

৪২০. দ্ৰিস্সা চ [ক. ৪০৪; রূ. ৩৭০ চং. ৫.২.৫৪; পা. ৬.৩.৬৯].

চত্তালীসাদো দ্ৰিস্স এ হোতি ৰা আ চ.

দ্ৰেচত্তালীসং, দ্ৰাচত্তালীসং, দ্ৰিচত্তালীসং, দ্ৰেপঞ্ঞাসং, দ্ৰিপঞ্ঞাসং, দ্ৰাসট্ঠি, দ্ৰেসট্ঠি, দ্ৰাসত্ততি, দ্ৰেসত্ততি, দ্ৰাসীতি, দ্ৰানৰুতি, দ্ৰেনৰুতি. ৰাসদ্দেন পঞ্ঞাসম্হি আত্তং, অসীতিম্হি এত্তঞ্চ নত্থি.

৪২১. বাচত্তালীসাদো ৰা [ক. ৩৮০; রূ. ২৫৫; নী. ৮১০].

অচত্তালীসাদো পরে দ্ৰিস্স বা হোতি ৰা.

বারস, দ্ৰাদস, বাৰীসতি, দ্ৰাৰীসতি, বাত্তিংস, দ্ৰত্তিংস.

অচত্তালীসাদোতি কিং? দ্ৰাচত্তালীসং.

৪২২. চতুস্স চুচো দসে [ক. ৩৯০; রূ. ২৫৬; নী. ৮২৬].

দসে ¶ পরে চতুস্স চু, চো হোন্তি ৰা.

চুদ্দস, চোদ্দস, চতুদ্দস.

৪২৩. ৰীসতিদসেসু পঞ্চস্স পণ্ণপন্না [ক. ৪০৪; রূ. ৩৭০; নী. ৮১৪].

এসু পঞ্চস্স পণ্ণ, পন্না হোন্তি ৰা যথাক্কমং.

পণ্ণৰীসতি, পঞ্চৰীসতি, পন্নরস, পঞ্চদস.

৪২৪. ছস্স সো [ক. ৩৭৪; রূ. ৪০৮; নী. ৮০৬].

দসে পরে ছস্স সো হোতি.

সোল়স.

৪২৫. একট্ঠানমা [ক. ৩৮৩; রূ. ২৫৩; নী. ৮১৫].

দসে পরে এক, অট্ঠানং আ হোতি.

একাদস, অট্ঠারস.

৪২৬. র সঙ্খ্যাতো ৰা [ক. ৩৮১; রূ. ২৫৪; নী. ৮১২].

একাদিসঙ্খ্যম্হা পরস্স দসস্স র হোতি ৰা.

একারস, একাদস, বারস, দ্ৰাদস, পন্নরস, পঞ্চদস, সত্তরস, সত্তদস, অট্ঠারস, অট্ঠাদস, বাদেসে পন্নাদেসে চ নিচ্চং. ইধ ন হোতি, চতুদ্দস.

৪২৭. ছতীহি ল়ো চ [ক. ৩৭৯; রূ. ২৫৮; নী. ৮০৯].

ছ, তীহি পরস্স দস্স ল়ো হোতি রো চ.

সোল়স, তেরস, তেল়স.

৪২৮. চতুত্থততিযানমড্ঢুড্ঢতিযা [ক. ৩৮৭; রূ. ৪১১; নী. ৮১৯].

‘অড্ঢুড্ঢতিযা’তি ¶ অড্ঢা+উড্ঢতিযাতি ছেদো, অড্ঢম্হা পরেসং চতুত্থ, ততিযানং উড্ঢ, তিযা হোন্তি যথাক্কমং.

অড্ঢেন চতুত্থো অড্ঢুড্ঢো, অড্ঢেন ততিযো অড্ঢতিযো.

সকত্থে ণ্যম্হি অড্ঢতেয্যো.

৪২৯. দুতিযস্স সহ দিযড্ঢদিৰড্ঢা [ক. ৩৮৭; রূ. ৪১১; নী. ৮১৯].

অড্ঢম্হা পরস্স দুতিযস্স সহ অড্ঢেন দিযড্ঢ, দিৰড্ঢা হোন্তি.

অড্ঢেন দুতিযো দিযড্ঢো, দিৰড্ঢো.

যথা চ এক, দ্ৰি,তি, চতু, পঞ্চ, ছ, সত্ত, অট্ঠ, নৰ, দসসদ্দা পচ্চেকং অত্তনো অত্থেসু নিপতন্তি, তথা ৰীসতি, তিংসতি, চত্তালীস, পঞ্ঞাস, সট্ঠি, সত্ততি, অসীতি, নৰুতিসদ্দা পচ্চেকং অত্তনো অত্থেসু নিপতন্তি, দসসদ্দস্স কারিযা ন হোন্তি, এৰং সতসহস্সসদ্দাপীতি দট্ঠব্বং.

ততো পরং পন দস সহস্সানি দসসহস্সং, ইদং ‘নহুত’ন্তি চ ৰুচ্চতি, সতং সহস্সানি সতসহস্সং, ইদং ‘লক্খ’ন্তি চ ৰুচ্চতি, দস সতসহস্সানি দসসতসহস্সন্তি এৰং দিগুসমাসৰসেন এতানি পদানি সিজ্ঝন্তি.

দ্ৰে সতানি দ্ৰিসতং, তীণি সতানি তিসতং, দ্ৰে সহস্সানি দ্ৰিসহস্সং, তীণি সহস্সানি তিসহস্সং ইচ্চাদীনি দিগুম্হি ৰুত্তানেৰ.

গণনপথে পন একট্ঠানং, দসট্ঠানং, সতট্ঠানং, সহস্সট্ঠানং, দসসহস্সট্ঠানং, সতসহস্সট্ঠানং, দসসতসহস্সট্ঠানন্তি ¶ ইমানি সত্ত ঠানানি কমেন দসগুণিতানি হোন্তি. তত্থ একট্ঠানং নাম একং, দ্ৰে, তীণি ইচ্চাদি. দসট্ঠানং নাম দস, ৰীসং, তিংসং ইচ্চাদি. সতট্ঠানং নাম সতং, দ্ৰিসতং, তিসতং ইচ্চাদি. সহস্সট্ঠানং নাম সহস্সং, দ্ৰিসহস্সং, তিসহস্সং ইচ্চাদি. এৰং উপরিপি. একমেকস্মিঞ্চ ঠানে নৰ পদানি চ নৰ অন্তরনৰন্তানি চ হোন্তি. অযং মূলভূমি নাম.

তদুত্তরি কোটিভূমি নাম. তত্থপি একট্ঠানং, দসট্ঠানং, সতট্ঠানংইচ্চাদীনি সত্ত ঠানানি হোন্তি. তত্থ মূলভূমিযা অন্তিমট্ঠানং গহেত্ৰা দসগুণিতে কতে কোটিভূমিযং একট্ঠানং হোতি, ইধপি সত্ত ঠানানি কমেন দসগুণিতানিযেৰ, ইধ দসকোটিসতসহস্সং অন্তিমট্ঠানং ভৰতি.

তদুত্তরি পকোটিভূমি নাম. এত্থপি সত্ত ঠানানি হোন্তি. তত্থ কোটিভূমিযা অন্তিমট্ঠানং গহেত্ৰা দসগুণিতে কতে পকোটিভূমিযং একট্ঠানং হোতি, ইধপি সত্ত ঠানানি দসগুণিতানিযেৰ, দসপকোটিসতসহস্সং অন্তিমট্ঠানং, ইমিনা নযেন সব্বভূমীসু উপরূপরি ভূমিসঙ্কন্তি চ ঠানভেদো চ ৰেদিতব্বো.

অযং পনেত্থ ভূমিক্কমো-মূলভূমি, কোটিভূমি, পকোটিভূমি, কোটিপকোটিভূমি, নহুতভূমি, নিন্নহুতভূমি, অক্খোভিণীভূমি [ভিনী, ভনীতিপি দিস্সন্তি], বিন্দুভূমি, অব্বুদভূমি, নিরব্বুদভূমি, অহহভূমি, অববভূমি, অটটভূমি, সোগন্ধিকভূমি, উপ্পলভূমি, কুমুদভূমি, পুণ্ডরীকভূমি, পদুমভূমি, কথানভূমি, মহাকথানভূমি, অসঙ্খ্যেয্যভূমীতি একৰীসতি ভূমিযো সত্তচত্তালীসসতং ঠানানি চ হোন্তি.

নিরযভূমীনং কমেন পন অব্বুদভূমি, নিরব্বুদভূমি, অববভূমি, অটটভূমি, অহহভূমি, কুমুদভূমি, সোগন্ধিকভূমি, উপ্পলভূমি ¶ , পুণ্ডরীকভূমি, পদুমভূমীতি ৰত্তব্বো. এত্থ চ যস্মা পাল়িভাসাযং দসসতসহস্সং নাম সত্তমট্ঠানং নত্থি, ছ ঠানানি এৰ অত্থি, তস্মা গরূ অট্ঠকথাসু [সং. নি. ১.১৮১] আগতনযেন সত্তমট্ঠানং উল্লঙ্ঘেত্ৰা ছট্ঠট্ঠানতো উপরি ভূমিসঙ্কন্তিং কথেন্তা সতগুণিতং কত্ৰা কথেন্তি, সতসহস্সানং সতং কোটি, কোটিসতসহস্সানং সতং পকোটি ইচ্চাদি.

তত্থ সতসহস্সানং সতং নাম দসসতসহস্সানং দসকমেৰ হোতি, তস্মা তথা কথেন্তাপি ভূমীনং সব্বট্ঠানানঞ্চ দসগুণসিদ্ধিমেৰ কথেন্তীতি ৰেদিতব্বং. যস্মা চ গণনভূমিসঙ্খাতো গণনপথো নাম নানাদেসৰাসীনং ৰসেন নানাৰিধো হোতি, তস্মা দীপৰংসে অক্খোভিণী, বিন্দু, কথান, মহাকথানানি ৰজ্জেত্ৰা পাল়িনযেন সত্তরস ভূমিযোৰ ৰুত্তা. কচ্চাযনে [ক. ৩৯৪, ৩৯৫; রূ. ৪১৬, ৪১৭] পুব্বে দস্সিতা একৰীসতি ভূমিযো, সক্কতগন্থেসু ততো সাধিকভূমিযো, কত্থচি পন মহাবলক্খন্ধপরিযন্তা সট্ঠি ভূমিযোতি আগতা.

তত্থ সকসকভূমিতো অতিরেকৰত্থূনি গণনপথৰীতিৰত্তানি নাম হোন্তি, যেসং পন মূলভূমিমত্তং অত্থি, তেসং কোটিমত্তানিপি ৰত্থূনি গণনপথাতিক্কন্তানি এৰ.

অপি চ ‘গণনপথৰীতিৰত্ত’ন্তি চ ‘গণনপথাতিক্কন্ত’ন্তি চ ‘অসঙ্খ্যেয্য’ন্তি চ অত্থতো একং. তস্মা ইধপি ৰীসতি ভূমিযো এৰ অনুক্কমেন দসগুণিতা গণনপথা নাম হোন্তি. অসঙ্খ্যেয্যন্তি পন দসগুণৰিনিমুত্তা গণনপথাতিক্কন্তভূমি এৰ ৰুচ্চতি. মহাকথানভূমাতিক্কন্ততো পট্ঠায হি অনন্তমহাপথৰিযা সব্বপংসুচুণ্ণানিপি ইধ অসঙ্খ্যেয্যভূমিযং সঙ্গয্হন্তি. ইতরথা অসঙ্খ্যেয্যন্তি চ গণনপথভূমীতি চ ৰিরুদ্ধমেতন্তি.

দীপৰংসে ¶ চ ‘‘ততো উপরি অভূমি, অসঙ্খ্যেয্যন্তি ৰুচ্চতী’’তি ৰুত্তং. তত্থ ‘অভূমী’তি ৰচনেন গণনপথভূমি এৰ পটিসিদ্ধা, ন তু গণনপথাতিক্কন্তা ৰিসুং অসঙ্খ্যেয্যভূমি নাম. চরিযাপিটকসংৰণ্ণনাযম্পি [চরিযা. অট্ঠ. নিদানকথা] অযমত্থো ৰুত্তো. অসঙ্খ্যেয্যভূমিযম্পি অসঙ্খ্যেয্যানং চূল়, মহাদিৰসেন অনেকপ্পভেদো দক্খিণৰিভঙ্গসুত্তেন [ম. নি. ৩.৩৭০] দীপেতব্বো.

সদ্দনীতিযং [নী. ৮৩৩] পন পাল়িনযং গহেত্ৰা ‘‘ৰীসতি অব্বুদানি একং নিরব্বুদং নাম. ৰীসতি নিরব্বুদানি একং অববং নাম’’ ইচ্চাদিনা নিরব্বুদাদীনং সঙ্খ্যানম্পি ৰীসতিমত্তগুণং নাম ৰুত্তং. তং ন যুজ্জতি. নিরযেসু হি ৰীসতিমত্তগুণেন অব্বুদ, নিরব্বুদাদীনং দসন্নং নিরযানং তানি নামানি সিদ্ধানি ভৰন্তি. গরূ পন তানি নামানি গহেত্ৰা দসগুণসিদ্ধেসু গণনপথেসু পক্খিপিংসু, তস্মা নামমত্তেন সদিসানি ভৰন্তি, গুণৰিধি পন ৰিসদিসোএৰ.

এৰঞ্চকত্ৰা পাল়িযম্পি বকব্রহ্মাসুত্তে [সং. নি. ১.১৭৫] ‘‘সতং সহস্সানং নিরব্বুদানং, আযুং পজানামি তৰাহং ব্রহ্মে’’তি ৰুত্তং. এত্থ চ যদি গণনভূমিপথেপি নিরব্বুদানং ৰীসতিমত্তেন অববভূমি ভৰেয্য, এৰং সতি নিরব্বুদানং সতসহস্সং নাম ন ৰুচ্চেয্য. জাতকট্ঠকথাযঞ্চ [জা. অট্ঠ. ৩.৭.৬৯] ‘‘নিরব্বুদসতসহস্সানং একং অহহং নাম, এত্তকং বকস্স ব্রহ্মুনো তস্মিংভৰে অৰসিট্ঠং আযূ’’তি ৰুত্তং. তস্মা ইমং গণনভূমিপথং পত্ৰা ৰীসতিগুণং নাম নত্থীতি সিদ্ধং হোতি. অক্খোভিণী, বিন্দু, কথান, মহাকথানানিপি অঞ্ঞতো গহেত্ৰা পক্খিত্তানি সিযুং. এৰং পক্খিত্তানঞ্চ চুদ্দসন্নং সঙ্খ্যানং কচ্চাযনে কমোক্কমতা পন পচ্ছাজাতা সিযাতি.

ইতি নিরুত্তিদীপনিযা নাম মোগ্গল্লানব্যাকরণদীপনিযা

সমাসকণ্ডো চতুত্থো.

৫. তদ্ধিত

অথ ¶ তদ্ধিতৰিধানং দীপিযতে.

তদ্ধিতৰুত্তি নাম ৰিচিত্রা হোতি, সাতিসযেন ৰিচিত্রঞাণহিতং ৰহতি, তস্মা তেসং তেসং কুলপুত্তানং হিতন্তি তদ্ধিতং, ইমস্মিং কণ্ডে সব্বৰিধানস্স নামং. তং পন অট্ঠৰিধং হোতি অপচ্চং, অনেকত্থং, অস্সত্থি, ভাৰকম্মং, পরিমাণং, সঙ্খ্যা, খুদ্দকং, নানাত্তন্তি.

অপচ্চরাসি

৪৩০. ণো ৰাপচ্চে [ক. ৩৪৪; রূ. ৩৬১; নী. ৭৫২; চং. ২.৪.১৬; পা. ৪.১.৯২; ‘সরানমাদিস্সা…’ (বহূসু)].

ছট্ঠ্যন্তা নামম্হা তস্স অপচ্চন্তি অত্থে ৰিকপ্পেন ণপচ্চযো হোতি. ৰাসদ্দো ৰাক্য, সমাসানং ৰিকপ্পনত্থো, ইতো পরং অনুৰত্ততে, তেন সব্বত্থ ৰিকপ্পৰিধি সিজ্ঝতি. ণানুবন্ধো ৰুদ্ধ্যত্থো, সো পযোগঅপ্পযোগী. ৰসিট্ঠস্স অপচ্চন্তি অত্থে ইমিনা সুত্তেন ৰসিট্ঠম্হা ণপচ্চযো, সো সাম্যত্থঞ্চ অপচ্চত্থঞ্চ উভযং ৰদতি, ছট্ঠী চ অপচ্চপদঞ্চ তেন ৰুত্তত্থা নাম হোন্তি, ৰসিট্ঠপদং পচ্চযেন সহ একত্থং হোতি, উভযং একতো হুত্ৰা পুত্তস্স নামং হোতীতি অত্থো. ততো ‘একত্থতায’ন্তি ছট্ঠিযা লোপো, অপচ্চপদং পন ৰুত্তত্থমত্তেন লুপ্পতি. তঞ্হি সুত্তে পধানভাৰেন নিদ্দিট্ঠং হোতি, ন ছট্ঠীতি, মহাৰুত্তিনা ৰা পদানং লোপো. এৰং সব্বত্থ.

৪৩১. পদানমাদিস্সাযুৰণ্ণস্সাএও ণানুবন্ধে [ক. ৪০৫; রূ. ৩৬৫; নী. ৮৬০].

পদানং আদিভূতস্স অকারস্স চ ইৰণ্ণু’ৰণ্ণস্স চ আ, এ, ও ৰুদ্ধিযো হোন্তি ণানুবন্ধে পচ্চযে পরেতি পদাদিঅ-কারস্স আৰুদ্ধি, স্যাদ্যুপ্পত্তি.

ৰাসিট্ঠো, ¶ পুরিসো, ৰাসিট্ঠী, ইত্থী, ৰাসিট্ঠং, কুলং, ৰসিট্ঠস্স পুত্তো ৰাসিট্ঠো, ৰসিট্ঠস্স ধীতা ৰাসিট্ঠী, ৰসিট্ঠস্স কুলং ৰাসিট্ঠন্তি এৰম্পি যোজেতুং যুজ্জতি.

তত্থ ‘ৰসিট্ঠস্সা’তি এতেন গোত্তস্সেৰ পিতুভূতং আদিপুরিসং ৰদতি. কস্মা? গোত্তসদ্দত্তা. এৰঞ্হি সতি তস্মিং গোত্তে পচ্চাজাতা সব্বেপি জনা তস্স অপচ্চা নাম হোন্তি.

৪৩২. মজ্ঝে [ক. ৪০৪; রূ. ৩৭০; নী. ৮৫৯].

মজ্ঝে পৰত্তানং অ, যুৰণ্ণানং আ, এ, ওৰুদ্ধিযো হোন্তি ৰা ক্ৰচি.

ৰাসেট্ঠো, ৰাসেট্ঠী, ৰাসেট্ঠং. ৰাসদ্দেন ‘‘ৰসিট্ঠস্স পুত্তো ধীতা কুল’’ন্তি ৰাক্যং ৰা ‘‘ৰসিট্ঠপুত্তো ৰসিট্ঠধীতা ৰসিট্ঠকুল’’ন্তি সমাসং ৰা ৰিকপ্পেতি. এৰং সব্বত্থ.

ভরদ্ৰাজস্স অপচ্চং ভারদ্ৰাজো, ৰিসামিত্তস্স [ভারদ্ৰাজস্স… ৰেসামিত্তস্স… (রূ.)] অপচ্চং ৰেসামিত্তো, গোতমস্স অপচ্চং গোতমো, কস্সপস্স অপচ্চং কস্সপো, ৰসুদেৰস্স অপচ্চং ৰাসুদেৰো. এৰং বালদেৰো.

উপগুস্স অপচ্চন্তি এত্থ ‘উৰণ্ণস্সাৰঙ…’তি ণানুবন্ধে পচ্চযে পরে উৰণ্ণস্স অৰঙ হোতি. ওপগৰো, ওপগৰী, ওপগৰং, মনুনো অপচ্চং মানৰো, ভগ্গুনো অপচ্চং ভগ্গৰো, পণ্ডুনো অপচ্চং পণ্ডৰো, উপৰিন্দুস্স অপচ্চং ওপৰিন্দৰো ইচ্চাদি.

৪৩৩. ৰচ্ছাদিতো ণানণাযনা [ক. ৩৪৫; রূ. ৩৬৬; নী. ৭৫৪; পা. ৪.১.৯৩, ৯৪, ১৬২, ১৬৩].

ছট্ঠুন্তেহি ¶ ৰচ্ছাদীহি গোত্তসদ্দগণেহি তস্স অপচ্চন্তি অত্থে ণানুবন্ধা আন, আযনপচ্চযা হোন্তি ৰা.

ৰচ্ছস্স অপচ্চং ৰচ্ছানো, ৰচ্ছাযনো, ৰচ্ছানী, ৰচ্ছাযনী, ৰচ্ছানং, ৰচ্ছাযনং. এৰং কচ্চানো, কচ্চাযনো, কাতিযানো, কাতিযাযনো, সাকটানো, সাকটাযনো, কণ্হানো, কণ্হাযনো, মোগ্গল্লানো, মোগ্গল্লাযনো, অগ্গিৰেস্সানো [অগ্গিৰেস্সনোতিপি দিস্সতি দী. নি. ১.১৭৬; ম. নি. ১.৩৫৩ আদযো], অগ্গিৰেস্সাযনো, মুঞ্চানো, মুঞ্চাযনো, কুঞ্চানো, কুঞ্চাযনো ইচ্চাদি.

৪৩৪. কত্তিকাৰিধৰাদীহি ণেয্যণেরা [ক. ৩৪৬; রূ. ৩৬৭; নী. ৭৫৫; পা. ৪.১.১২০, ১২৩, ১২৬, ১২৭, ১২৮, ১২৯, ১৩১].

ছট্ঠ্যন্তেহি কত্তিকাদীহি ৰিধৰাদীহি চ তস্স অপচ্চন্তি অত্থে কমেন ণানুবন্ধা এয্য, এরপচ্চযা হোন্তি ৰা.

ণেয্যে – কত্তিকায নাম দেৰধীতায অপচ্চং কত্তিকেয্যো, ৰিনতায নাম দেৰিযা অপচ্চং ৰেনতেয্যো, রোহিণিযা নাম দেৰিযা অপচ্চং রোহিণেয্যো, ভগিনিযা অপচ্চং ভাগিনেয্যো, নদিযা নাম ইত্থিযা অপচ্চং নাদেয্যো. এৰং অন্তেয্যো, আহেয্যো, কামেয্যো, সুচিযা অপচ্চং সোচেয্যো, বালায অপচ্চং বালেয্যো ইচ্চাদি.

ণেরে – ৰিধৰায অপচ্চং ৰেধৰেরো, ৰিধৰা নাম মতপতিকা ইত্থী. বন্ধুকিযা অপচ্চং বন্ধুকেরো, নাল়িকিযা নাম ইত্থিযা পুত্তো নাল়িকেরো, সমণস্স উপজ্ঝাযস্স পুত্তো সামণেরো, সমণিযা পৰত্তিনিযা ধীতা সামণেরী ইচ্চাদি.

৪৩৫. ণ্য দিচ্চাদীহি [ক. ৩৪৭; রূ. ৩৬৮; নী. ৭৫৬; চং. ২.৪.২; পা. ৪.১.৮৫].

ছট্ঠুন্তেহি ¶ দিতিইচ্চাদীহি তস্স অপচ্চন্তি অত্থে ণানুবন্ধো যপচ্চযো হোতি ৰা.

৪৩৬. লোপোৰণ্ণিৰণ্ণানং [ক. ২৬১; রূ. ৩৬৯; নী. ৫০৯].

যে পরে অৰণ্ণস্স ইৰণ্ণস্স চ লোপো হোতীতি ণ্যম্হি পরে অৰণ্ণি’ৰণ্ণানং লোপো.

দিতিযা নাম দেৰধীতায অপচ্চং দেচ্চো, অদিতিযা অপচ্চং আদিচ্চো.

তত্থ ইৰণ্ণলোপে ‘তৰগ্গৰরণানং যে চৰগ্গবযঞা’তি যম্হি পরে তৰগ্গস্স চৰগ্গত্তং, পুন ‘ৰগ্গলসেহি তে’তি যস্স পুব্বরূপত্তং, কুণ্ডনিযা অপচ্চং কোণ্ডঞ্ঞো.

৪৩৭. উৰণ্ণস্সাৰঙ সরে [ক. ৩৪৮; রূ. ৩৭১; নী. ৭৫৭].

সরে পরে উৰণ্ণস্স অৰঙ হোতীতি উৰণ্ণস্স অৰত্তং. ‘তৰগ্গৰরণান…’ন্তি সুত্তেন ৰস্স বত্তং, পুন ‘ৰগ্গলসেহি তে’তি সুত্তেন যস্স পুব্বরূপত্তং, ভাতুনো অপচ্চং ভাতব্যো.

৪৩৮. আ ণি [ক. ৩৪৭; রূ. ৩৬৮; নী. ৭৫৬; চং. ২.৪.১৯; পা. ৪.১.৯৫].

রস্সা’কারন্ততো অপচ্চত্থে ণানুবন্ধো রস্সি’পচ্চযো হোতি ৰা.

দক্খস্স অপচ্চং দক্খি. এৰং দোণি, ৰাসৰি, সক্যপুত্তি, নাটপুত্তি, দাসপুত্তি, দারুনো অপচ্চং দারৰি [ৰিচারেতব্বমিদং], ৰরুণস্স অপচ্চং ৰারুণি ¶ . এৰং কণ্ডি, বালদেৰি, পাৰকি, জিনদত্তস্স অপচ্চং জেনদত্তি, সুদ্ধোদনি, অনুরুদ্ধি ইচ্চাদি.

৪৩৯. রাজতো ঞো জাতিযং [ক. ৩৪৭; রূ. ৩৬৮; নী. ৭৫৬; চং. ২.৪.৭০; পা. ৪.১.১৩৭].

জাতিযং গম্যমানাযং রাজসদ্দম্হা অপচ্চত্থে ঞপচ্চযো হোতি ৰা.

রঞ্ঞো অপচ্চং রাজঞ্ঞো, রাজকুলস্স পুত্তোতি অত্থো.

জাতিযন্তি কিং? রাজপুত্তো.

৪৪০. খত্তা যিযা [ক. ৩৪৭; রূ. ৩৬৮; নী. ৭৫৬; চং. ২.৪.৬৯; পা. ৪.১.১৩৮].

জাতিযং গম্যমানাযং খত্তসদ্দম্হা অপচ্চত্থে য, ইযপচ্চযা হোন্তি.

খত্তকুলস্স অপচ্চং খত্যো, খত্তিযো.

জাতিযন্ত্ৰেৰ? খত্তি.

৪৪১. মনুতো স্সসণ [ক. ৩৪৮; রূ. ৩৭১; নী. ৭৫৩; চং. ২.৪.৯৪, ৯৫; পা. ৪.১.১৬১].

জাতিযং গম্যমানাযং মনুসদ্দম্হা অপচ্চত্থে স্স, সণপচ্চযা হোন্তি.

মনুনো অপচ্চং মনুস্সো, মানুসো, মনু নাম কপ্পে আদিখত্তিযো মহাসম্মতরাজা, ইত্থিযং মনুস্সী, মানুসী,

জাতিযন্ত্ৰেৰ? মাণৰো.

৪৪২. জনপদনামস্মা জনখত্তিযা রঞ্ঞে চ ণো [ক. ৩৫২; রূ. ৩৭৬; নী. ৭৬৫; চং. ২.৪.৯৬; পা. ৪.১.১৬৮; ‘‘জনপদনামস্মা খত্তিযা…’’ (বহূসু)].

জনৰাচিনা ¶ চ খত্তিযৰাচিনা চ জনপদনামম্হা রঞ্ঞে চ অপচ্চে চ ণো হোতি.

পঞ্চালানং জনানং রাজা পঞ্চালো, পঞ্চালস্স খত্তিযস্স অপচ্চং পঞ্চালো. এৰং কোসলো, মাগধো, ওক্কাকো [দী. নি. ১.২৬৭].

জনপদনামস্মাতি কিং? দসরথরঞ্ঞো পুত্তো দাসরথি [দাসরট্ঠি].

জনখত্তিযাতি কিং? পঞ্চালস্স ব্রাহ্মণস্স অপচ্চং পঞ্চালি.

৪৪৩. ণ্য কুরুসিৰীহি [ক. ৩৪৬; রূ. ৩৬৭; নী. ৭৫৫; চং. ২.৪.১০১ …পে… ৪.১.১৭২].

কুরু, সিৰিসদ্দেহি অপচ্চে রঞ্ঞে চ ণ্যো হোতি.

কুরুরঞ্ঞো অপচ্চং কোরব্যো [জা. ১.১৪.২২৮, ২৩২, ২৩৬], কুরুরট্ঠৰাসীনং রাজা কোরব্যো, কোরব্বো, পুব্বরূপত্তং, সিৰিরঞ্ঞো অপচ্চং সেব্যো, সিৰিরট্ঠৰাসীনং রাজা সেব্যো.

অপচ্চরাসি নিট্ঠিতো.

অনেকত্থরাসি

৪৪৪. ণ রাগা তেন রত্তং [ক. ৩৪৭; রূ. ৩৬৮; নী. ৭৫৬; চং. ৩.১.১ …পে… ৪.২.১].

রজ্জন্তি ৰত্থং এতেনাতি রাগো, রজনৰত্থু, রাগৰাচিম্হা তেন রত্তন্তি অত্থে ণো হোতি.

কসাৰেন রত্তং ৰত্থং কাসাৰং [ধ. প. ৯], কাসাযং ৰা. এৰং কোসুম্ভং, হলিদ্দিযা রত্তং হালিদ্দং, পাটঙ্গেন রত্তং পাটঙ্গং, মঞ্জিট্ঠং, কুঙ্কুমং ইচ্চাদি.

‘‘নীলং ¶ ৰত্থং, পীতং ৰত্থ’’ন্তিআদীসু পন নীল, পীতাদিসদ্দা গুণসদ্দত্তা পচ্চযেন ৰিনা গুণনিস্সযং দব্বং ৰদন্তি. এৰং সব্বেসু গুণসদ্দ, জাতিসদ্দ, নামসদ্দেসু.

৪৪৫. নক্খত্তেনিন্দুযুত্তেন কালে [ক. ৩৫২; রূ. ৩৭৬; নী. ৭৬৫; চং. ৩.১.৫; পা. ৪.২.৩].

ইন্দুযুত্তেন নক্খত্তেন লক্খিতে কালে তন্নক্খত্তৰাচীহি ণো হোতি.

পুণ্ণচন্দযুত্তেন ফুস্সনক্খত্তেন লক্খিতা ফুস্সা, রত্তি, ফুস্সো, অহো. এৰং মাঘো ইচ্চাদি.

নক্খত্তেনাতি কিং? গরুগহেন লক্খিতা রত্তি.

ইন্দুযুত্তেনাতি কিং? ফুস্সেন লক্খিতো মুহুত্তো.

কালেতি কিং? ফুস্সেন লক্খিতা অত্থসিদ্ধি.

৪৪৬. সাস্স দেৰতা পুণ্ণমাসী [ক. ৩৫২; রূ. ৩৭৬; নী. ৭৬৫; চং. ৩.১.১৮, ১৯ …পে… ৪.২.২১-২৪].

সা অস্স দেৰতা, সা অস্স পুণ্ণমাসীতি অত্থে পঠমন্তা ণো হোতি.

বুদ্ধো অস্স দেৰতাতি বুদ্ধো, যো বুদ্ধং অত্তনো আরক্খদেৰতং ৰিয গরুং কত্ৰা ৰিচরতি, নিরন্তরং ৰা ‘‘বুদ্ধো বুদ্ধো’’তি ৰাচং নিচ্ছারেতি, তস্সেতং নামং. সুগতো অস্স দেৰতাতি সোগতো, মহিন্দদেৰো অস্স দেৰতাতি মাহিন্দো. এৰং যামো, সোমো, ৰারুণো.

ফুস্সী অস্স পুণ্ণমাসীতি ফুস্সো, মাসো. এৰং মাঘো, ফগ্গুনো, চিত্তো, ৰেসাখো, জেট্ঠমূলো, আসল়্হো, সাৰণো, পোট্ঠপাদো, অস্সযুজো, কত্তিকো, মাগসিরো.

পুণ্ণমাসীতি কিং? ফুস্সী অস্স পঞ্চমী তিথী.

৪৪৭. তমধীতে তং জানাতি কণিকা চ [ক. ৩৫১; রূ. ৩৭৪; নী. ৭৬৪; চং. ৩.১.৩৭ …পে… ৪.২.৫৯].

এতেসু ¶ অত্থেসু দুতিযন্তা ণো চ কো চ ণিকো চাতি এতে পচ্চযা হোন্তি.

ণম্হি – ব্যাকরণং অধীতে জানাতি ৰা ৰেয্যাকরণো [দী. নি. ১.২৫৬]. পক্খে ‘‘ৰেয্যাকরণিকো, ব্যঞ্জনং অধীতে জানাতি ৰা ৰেয্যঞ্জনিকো’’তি ইমানি ণিকেন সিজ্ঝন্তি.

কম্হি-ছন্দং অধীতে জানাতি ৰা ছন্দো. এৰং পদকো [দী. নি. ১.২৫৬], নামকো.

ণিকম্হি-ৰিনযং অধীতে জানাতি ৰা ৰেনযিকো, সুত্তন্তিকো, আভিধম্মিকো.

এত্থ চ ‘ৰেয্যাকরণো’তি পদে ৰিয্যাকরণং অধীতেতি ৰাক্যং, ‘ৰেযঞ্জনিকো’তি পদে ৰিযঞ্জনং অধীতেতি. উপরি ‘দোৰারিকো, সোৰগ্গিক’ন্তি পদেসুপি ‘দুৰারে নিযুত্তো, সুৰগ্গায সংৰত্ততী’তি ৰাক্যং, অত্থং কথেন্তেন পন দুৰার, সুৰগ্গসদ্দানং তদ্ধিতভাৰে এৰ সিদ্ধত্তা দ্ৰারেতি চ সগ্গাযাতি চ কথেতব্বো.

৪৪৮. তস্স ৰিসযে দেসে [ক. ৩৫২; রূ. ৩৭৬; নী. ৩৬৫; চং. ৩.১.৬১; পা. ৪.২.৫২, ৫৩].

তস্স দেসরূপে ৰিসযে ছট্ঠুন্তা ণো হোতি.

থূযমিগা ৰসাতিনো নাম, ৰসাতীনং ৰিসযো দেসো ৰাসাতো. ইধ অদেসরূপত্তা ণো ন হোতি, চক্খুস্স ৰিসযো রূপং.

৪৪৯. নিৰাসে তন্নামে [ক. ৩৫২; রূ. ৩৭৬; নী. ৩৬৫; চং. ৩.১.৬৪; পা. ৪.২.৬৯].

তন্নামভূতে ¶ নিৰাসে ছট্ঠ্যন্তা ণো হোতি.

সিৰীনং নিৰাসো দেসো সেব্যো. ৰসং অদেন্তি ভক্খন্তীতি ৰসাদা, ব্যগ্ঘা সীহা ৰা, ৰসাদানং নিৰাসো দেসো ৰাসাদো.

৪৫০. অনুভৰে [ক. ৩৫২; রূ. ৩৭৬; নী. ৭৬৫; চং. ৩.১.৬৫; পা. ৪.২.৭০].

সমীপে ভৰং অনুভৰং, ‘‘অদূরভৰে’’তিপি পাঠো, তন্নামে অনুভৰে দেসে ছট্ঠ্যন্তা ণো হোতি.

ৰিদিসায অনুভৰং ৰেদিসং, নগরং, উদুম্বরস্স অনুভৰং ওদুম্বরং, ৰিমানং.

৪৫১. তেন নিব্বত্তে [ক. ৩৫২; রূ. ৩৭৬; নী. ৭৬৫; চং. ৩.১.৬৬; পা. ৪.২.৬৮].

তন্নামে তেন নিব্বত্তে দেসে ততিযন্তা ণো হোতি.

কুসম্বেন নাম ইসিনা নিব্বত্তা কোসম্বী, ইত্থিযং ঈ, নগরী. এৰং কাকন্দী, মাকন্দী, সহস্সেন ধনেন নিব্বত্তা সাহস্সী, পরিখা, অযঞ্চ ততিযা হেতুম্হি কত্তরি করণে চ যথাযোগং যুজ্জতি.

৪৫২. তমিধত্থি [ক. ৩৫২; রূ. ৩৭৬; নী. ৭৬৫; চং. ৩.১.৬৭; পা. ৪.২.৬৭].

তং ইধ অত্থীতি অত্থে তন্নামে দেসে পঠমন্তা ণো হোতি.

উদুম্বরা ¶ অস্মিং দেসে সন্তীতি ওদুম্বরো, বদরা অস্মিং দেসে সন্তীতি বাদরো. এৰং পব্বজো.

৪৫৩. তত্র ভৰে [ক. ৩৫২; রূ. ৩৭৬; নী. ৭৬৫; চং. ৩.২.৪৮; পা. ৪.২.১৩৩].

তত্র ভৰত্থে সত্তম্যন্তা ণো হোতি.

উদকে ভৰো ওদকো, মচ্ছো, উরসি ভৰো ওরসো, পুত্তো, সাগমো. নগরে ভৰো নাগরো. এৰং জানপদো, মাগধো, কপিলৰত্থুম্হি ভৰো কাপিলৰত্থৰো, ‘উৰণ্ণস্সাৰঙ…’তি উস্স অৰত্তং. কোসম্বিযং ভৰো কোসম্বো, মিত্তে ভৰা মেত্তা, পুরে ভৰা পোরী [দী. নি. ১.৯], ৰাচা, মনস্মিং ভৰো মানসো. এত্থ পন –

৪৫৪. মনাদীনং সক [ক. ৪০৪; রূ. ৩৭০; নী. ৮৫৯].

ণানুবন্ধে পচ্চযে পরে মনাদীনং অন্তে সাগমো হোতীতি সব্বত্থ মনোগণাদীনং অন্তে সাগমো.

মানসো, রাগো, মানসা, তণ্হা, মানসং, সুখং. এৰং চেতসো, চেতসা, চেতসং. ক্ৰচি মনো এৰ মানসং, চেতো এৰ চেতসোতিপি যুজ্জতি.

৪৫৫. অজ্জাদীহি তনো [ক. ৩৫২; রূ. ৩৭৬; নী. ৭৬৫; চং. ৩.১৫; পা. ৪.২.১০৫].

তত্র ভৰোতি অত্থে অজ্জাদীহি তনো হোতি.

অজ্জ ভৰো অজ্জতনো, অত্থো, অজ্জত্তনী, ৰিভত্তি, দ্ৰিত্তং, অজ্জতনং, হিতং, স্ৰে ভৰো স্ৰাতনো, মহাৰুত্তিনা এস্স আত্তং. হিয্যো ভৰো হিয্যত্তনো, হিয্যত্তনো, হিয্যত্তনং, ওস্স অত্তং দ্ৰিত্তঞ্চ.

৪৫৬. পুরাতো ণো চ [ক. ৩৫২; রূ. ৩৭৬; নী. ৭৬৫].

তত্র ¶ ভৰোতি অত্থে পুরাসদ্দম্হা ণো চ তনো চ হোন্তি.

পুরে ভৰো পুরাণো, ইধ ণো অনুবন্ধো ন হোতি, পোরাণো ৰা, পুরাতনো.

৪৫৭. অমাত্ৰচ্চো [ক. ৩৫২; রূ. ৩৭৬; নী. ৭৬৫; চং. ৩.২.১৩; পা. ৪.২.১০৪].

অমাসদ্দম্হা ভৰত্থে অচ্চো হোতি. ‘অমা’তি সহত্থৰাচী.

রাজকিচ্চেসু রঞ্ঞা সহ ভৰতীতি অমচ্চো [দী. নি. টী. ১.৩৩৯].

৪৫৮. মজ্ঝাদীহিমো [ক. ৩৫৩; রূ. ৩৭৮; নী. ৭৬৭; চং. ৩.২.৮২; পা. ৪.৩.৮, ২২; ‘মজ্ঝাদিত্ৰিমো’ (বহূসু)].

মজ্ঝাদীহি ভৰত্থে ইমো হোতি.

মজ্ঝে ভৰো মজ্ঝিমো. এৰং অন্তিমো, হেট্ঠিমো, উপরিমো, ওরিমো, পচ্ছিমো, অব্ভন্তরিমো, পচ্চন্তিমো, পুরত্থিমো.

৪৫৯. কণ ণেয্য ণেয্যক যিযা [ক. ৩৫২; রূ. ৩৭৬; নী. ৭৬৫; চং. ৩.২.৪, ৫, ৬ …পে… ৪.২.৯৪, ৯৫, ৯৭, ১১৯-১৩০].

ভৰত্থে সত্তম্যন্তা এতে পঞ্চ পচ্চযা হোন্তি.

কণ-কুসিনারাযং ভৰো কোসিনারকো, মগধেসু ভৰো মাগধকো, আরঞ্ঞকো, ৰিহারো.

ণেয্য-গঙ্গাযং ভৰো গঙ্গেয্যো, পব্বতেয্যো, ৰনে ভৰো ৰানেয্যো.

ণেয্যক-কোসলেয্যকো ¶ , বারাণসেয্যকো, চম্পেয্যকো, মিথিলেয্যকো, ইধ ন ৰুদ্ধি.

য-গামে ভৰো গম্মো, দিৰে ভৰো দিব্বো,

ইয-গামিযো, গামিকো, যস্স কত্তং, উদরে ভৰো ওদরিযো, ওদরিকো, দিৰে ভৰো দিৰিযো, পঞ্চালিযো, বোধিপক্খিযো, লোকিযো.

৪৬০. ণিকো [ক. ৩৫১; রূ. ৩৭৪; নী. ৭৬৪; চং. ৩.২.৪০, ৪১, ৪২; পা. ৪.২.১২৬, ১২৭, ১২৮].

ভৰত্থে সত্তম্যন্তা ণিকো হোতি.

সারদিকো, দিৰসো, সারদিকা, রত্তি, সারদিকং, পুপ্ফং. ভৰসদ্দেন চেত্থ অঞ্ঞেপি অত্থে উপলক্খেতি, পব্বততো পক্খন্দা নদী পব্বতেয্যা, কিমীনং কোসে জাতং কোসেয্যং, ৰত্থং. এৰং সিৰেয্যং, বারাণসেয্যং.

৪৬১. তমস্স সিপ্পং সীলং পণ্যং পহরণং পযোজনং [ক. ৩৫১; রূ. ৩৭৪; নী. ৭৬৪; চং. ৩.৪.৪৯-৬৬ …পে… ৪.৪.৪৭-৬৫].

তমস্স সিপ্পং, তমস্স সীলং, তমস্স পণ্যং, তমস্স পহরণং, তমস্স পযোজনন্তি অত্থেসু পঠমন্তা ণিকো হোতি.

সিপ্পে – ৰীণাৰাদনমস্স সিপ্পং ৰেণিকো. এত্থ চ ৰীণাসদ্দেন ৰীণাৰাদনং ৰুচ্চতি. একত্থীভাৰসামত্থিযঞ্হেতং. এৰং সব্বত্থ. এৰং মোদিঙ্গিকো, পাণৰিকো, ৰংসিকো.

সীলে-পংসুকূলধারণং অস্স সীলং পংসুকূলিকো, পংসুকূলং ধারেতুং সীলমস্সাতি ৰা পংসুকূলিকো. সীলসদ্দেন চেত্থ ৰত, ধম্ম, সাধুকারাপি গয্হন্তি, পংসুকূলং ধারেতি সীলেনাতি পংসুকূলিকোতিপি যুজ্জতি. এৰং তেচীৰরিকো ¶ , পিণ্ডং পিণ্ডং পততীতি পিণ্ডপাতো, পিণ্ডাচারেন লদ্ধভোজনং, পিণ্ডপাতযাপনং অস্স সীলন্তি পিণ্ডপাতিকো, পিণ্ডপাতেন যাপেতুং সীলঞ্চ ৰতঞ্চ ধম্মো চ গরুকারো চ অস্সাতি পিণ্ডপাতিকো.

‘পণ্য’ন্তি ৰিক্কেয্যৰত্থু ৰুচ্চতি, গন্ধো পণ্যং অস্সাতি গন্ধিকো. এৰং তেলিকো, গোল়িকো.

পহরন্তি এতেনাতি পহরণং, আৰুধভণ্ডং, চাপো পহরণমস্সাতি চাপিকো. এৰং তোমরিকো, মুগ্গরিকো.

পযোজনং ৰুচ্চতি ফলং, উপধি পযোজনমস্সাতি ওপধিকং [অ. নি. ৮.৫৯], পুঞ্ঞং, সতং পযোজনমস্সাতি সাতিকং. এৰং সাহস্সিকং [জা. ২.২১.৪১৫].

৪৬২. তং হন্তারহতি গচ্ছতুঞ্ছতি চরতি [ক. ৩৫১; রূ. ৩৭৪; নী. ৭৬৪; চং. ৩.৪.২৭-৪৩; পা. ৪.৪.২৮-৪৬].

তং হন্তি, তং অরহতি, তং গচ্ছতি, তং উঞ্ছতি, তং চরতীতি অত্থেসু দুতিযন্তা ণিকো হোতি.

পক্খীহি পক্খিনো হন্তীতি পক্খিকো. এৰং সাকুণিকো [অ. নি. ২.২৬৩ (সাকুনিকোতিপি দিস্সতি)], মাযূরিকো, মচ্ছেহি মচ্ছে হনতীতি মচ্ছিকো. এৰং ধেনুকো, মগেহি মগে হনতীতি মাগৰিকো, মজ্ঝে ৰাগমো. এৰং হারিণিকো, ‘হরিণো’তি মগো এৰ. সূকরিকো, ইধ ন ৰুদ্ধি.

সতং অরহতীতি সাতিকং. এৰং সাহস্সিকং.

পরদারং গচ্ছতীতি পারদারিকো, পরদারিকো ৰা. এৰং পথিকো, মগ্গিকো.

বদরে ¶ উঞ্ছতি গৰেসতীতি বাদরিকো. এৰং আমলকিকো.

ধম্মং চরতীতি ধম্মিকো. এৰং অধম্মিকো.

৪৬৩. তেন কতং কীতং বন্ধং অভিসঙ্খতং সংসট্ঠং হতং হন্তি জিতং জযতি দিব্বতি খণতি তরতি চরতি ৰহতি জীৰতি [ক. ৩৫০; রূ. ৩৭৩; নী. ৩৬৪; চং. ৩.৪.১-২৬; পা. ৪.৪.১-২৭].

তেন কতং, তেন কীতং…পে… তেন জীৰতি ইচ্চত্থেসু ততিযন্তা ণিকো হোতি.

কাযেন কতং কাযিকং. এৰং ৰাচসিকং, মানসিকং, ৰাতেন কতো ৰাতিকো, আবাধো.

সতেন মূলেন কীতং ভণ্ডং সাতিকং. এৰং সাহস্সিকং.

ৰরত্তায যোত্তায বন্ধিতো ৰারত্তিকো, অযসা বন্ধিতো আযসিকো, সাগমো. এৰং পাসিকো.

ঘতেন অভিসঙ্খতং সংসট্ঠং ৰা ঘাতিকং. এৰং গোল়িকং, দাধিকং, মারিচিকং.

জালেন হতো জালিকো, মচ্ছো.

জালেন হন্তীতি জালিকো, জালকেৰট্টো. এৰং বাল়িসিকো [সং. নি. ২.১৫৮].

অক্খেহি জিতং ধনং অক্খিকং. এৰং সালাকিকং.

অক্খেহি জযতি দিব্বতীতি ৰা অক্খিকো.

খণিত্তিযা খণতীতি খাণিত্তিকো. এৰং কুদ্দালিকো, ইধ ন ৰুদ্ধি.

উল়ুম্পেন ¶ তরতীতি ওল়ুম্পিকো, উল়ুম্পিকো ৰা. এৰং নাৰিকো [জা. ২.২০.১৪৯], গোপুচ্ছিকো.

সকটেন চরতীতি সাকটিকো. এৰং রথিকো, যানিকো, দণ্ডিকো,

খন্ধেন ৰহতীতি খন্ধিকো. এৰং অংসিকো, সীসিকো, ইধ ন ৰুদ্ধি.

ৰেতনেন জীৰতীতি ৰেতনিকো. এৰং ভতিকো, কসিকো, কযিকো, ৰিক্কযিকো, ভতিকাদীসু ন ৰুদ্ধি.

৪৬৪. তস্স সংৰত্ততি [ক. ৩৫১; রূ. ৩৭৪; নী. ৭৬৫; চং. ৩.৪.৬৭-৬৯; পা. ৪.৪.৬৬-৬৮].

তস্স সংৰত্ততীতি অত্থে চতুত্থ্যন্তা ণিকো হোতি.

পুন ভৰায সংৰত্ততীতি পোনোব্ভৰিকো, পুনস্স ওত্তং, ভস্স দ্ৰিত্তং, পোনোব্ভৰিকা [মহাৰ. ১৪], তণ্হা, লোকায সংৰত্ততীতি লোকিকো, সুট্ঠু অগ্গোতি সগ্গো, সগ্গায সংৰত্ততীতি সোৰগ্গিকং [দী. নি. ১.১৬৩], পুঞ্ঞং. এৰং দিট্ঠধম্মিকং, সম্পরাযিকং.

৪৬৫. ততো সম্ভূতমাগতং [ক. ৩৫১; রূ. ৩৭৪; নী. ৭৬৫; চং. ৩.৩.৪৯-৫১; …পে… ৪.৩.৭৭-৭৯].

ততো সম্ভূতং, ততো আগতং ইচ্চত্থেসু পঞ্চম্যন্তা ণিকো হোতি.

মাতিতো সম্ভূতং আগতং ৰা মত্তিকং [পারা. ৩৪], দ্ৰিত্তং রস্সো চ. এৰং পেত্তিকং. ণ্য, ণিযাপি দিস্সন্তি, সুরভিতো সম্ভূতং সোরভ্যং, থনতো সম্ভূতং থঞ্ঞং, পিতিতো সম্ভূতো পেত্তিযো. এৰং মত্তিযো. ণ্যম্হি-মচ্চো.

৪৬৬. তত্থ ৰসতি ৰিদিতো ভত্তো নিযুত্তো [ক. ৩৫১; রূ. ৩৭৪; নী. ৭৬৫; চং. ৩.৪.৭০-৭৫ …পে… ৪.৪.৬৯-৭৪].

এতেস্ৰত্থেসু ¶ সত্তম্যন্তা ণিকো হোতি.

রুক্খমূলে ৰসতীতি রুক্খমূলিকো. এৰং আরঞ্ঞিকো, সোসানিকো.

এত্থ চ ৰসতীতি সামঞ্ঞৰচনেপি তস্সীল, তব্বত, তদ্ধম্ম, তস্সাধুকারিতানং ৰসেন অত্থো ৰেদিতব্বো তদ্ধিতপচ্চযানং পসিদ্ধত্থদীপকত্তা. ন হি রুক্খমূলে মুহুত্তমত্তং ৰসন্তো রুক্খমূলিকোতি ৰোহরীযতি.

লোকে ৰিদিতো লোকিকো.

চতুমহারাজেসু ভত্তা চাতুমহারাজিকা [সং. নি. ৫.১০৮১].

দ্ৰারে নিযুত্তো দোৰারিকো. এৰং ভণ্ডাগারিকো, নৰকম্মিকো, ইধ ন ৰুদ্ধি. ‘‘জাতিকিযো, অন্ধকিযো’’ ইচ্চাদীসু মহাৰুত্তিনা কিযো.

৪৬৭. তস্সিদং [ক. ৩৫১; রূ. ৩৭৪; নী. ৭৬৪; চং. ৩.৩.৮৫-১০২; পা. ৪.৩.১২০-১৩৩].

তস্স ইদন্তি অত্থে ছট্ঠুন্তা ণিকো হোতি.

সঙ্ঘস্স অযং সঙ্ঘিকো, ৰিহারো, সঙ্ঘিকা, ভূমি, সঙ্ঘস্স ইদং সঙ্ঘিকং, ভণ্ডং. এৰং পুগ্গলিকং, গণিকং, মহাজনিকং, সক্যপুত্তস্স এসোতি সক্যপুত্তিকো. এৰং নাটপুত্তিকো, দাসপুত্তিকো.

৪৬৮. ণিকস্সিযো ৰা [ক. ৪০৪; রূ. ৩৭০; নী. ৭৫৬].

ণিকপচ্চযস্স ইযো হোতি ৰা.

সক্যপুত্তিযো, সক্যপুত্তিকো ইচ্চাদি.

৪৬৯. ণো [ক. ৩৫২; রূ. ৩৭৬; নী. ৭৬৫; চং. ৩.৩.৮৫; পা. ৪.৩.১২০].

তস্সিদন্তি ¶ অত্থে ছট্ঠুন্তা ণো হোতি.

কচ্চাযনস্স ইদং কচ্চাযনং, ব্যাকরণং. এৰং সোগতং, সাসনং, মাহিংসং, মংসাদি.

৪৭০. গৰাদীহি যো [ক. ৩৫৩; রূ. ৩৭৮; নী. ৭৮১].

তস্সিদন্তি অত্থে গৰাদীহি যো হোতি.

৪৭১. যম্হি গোস্স চ [ক. ৭৮; রূ. ৩১; নী. ২২৯].

যৰন্তে পচ্চযে পরে গোস্স চ উৰণ্ণানঞ্চ অৰঙ হোতীতি অৰাদেসো. ‘তৰগ্গৰরণান…’ন্তি সুত্তেন ৰস্স বত্তং, গুন্নং ইদং গব্যং, মংসাদি, দু ৰুচ্চতি রুক্খো, তস্স ইদং দব্যং, দব্বং, মূলাদি.

অনেকত্থরাসি নিট্ঠিতো.

অস্সত্থিরাসি

৪৭২. তমেত্থস্সত্থীতি মন্তু [ক. ৩৬৯; রূ. ৪০৩; নী. ৭৯৩; চং. ৪.২.৯৮; পা. ৫.২.৯৪].

তং এত্থ অত্থি, তং অস্স অত্থীতি অত্থেসু পঠমন্তা মন্তুপচ্চযো হোতি, ইৰণ্ণু’ৰণ্ণো’কারেহি মন্তু. তত্থ ইৰণ্ণন্তেহি নিচ্চং, উপট্ঠিতা সতি এতস্মিং অত্থি, এতস্স ৰা অত্থীতি সতিমা. এৰং গতিমা, মতিমা, ধিতিমা [সং. নি. ১.১৯৫২; জা. ২.২২.১৪৫১], অত্থদস্সিমা [জা. ২.২২.১৪৫১], সিরীমা [জা. অট্ঠ. ১.অৰিদূরেনিদানকথা] ইচ্চাদি.

উৰণ্ণন্তেহি পন ¶ –

৪৭৩. আযুস্সাযস মন্তুম্হি [ক. ৩৭১; রূ. ৪০৪; নী. ৭৯৭].

মন্তুম্হি পরে আযুস্স আযসাদেসো হোতি.

দীঘং আযু অস্মিং অত্থি, অস্স ৰা অত্থীতি আযস্মা [মহানি. ৪৯]. এৰং চক্খুমা, বন্ধুমা, ভাণুমা ইচ্চাদি.

বহূ গাৰো অস্মিং সন্তি, অস্স ৰা সন্তীতি গোমা. চন্দিমা, পাপিমাপদেসু চ মহাৰুত্তিনা ইমন্তুপচ্চযং ইচ্ছন্তি. তত্থ চন্দসঙ্খাতং ৰিমানং অস্স অত্থীতি চন্দিমা [ধ. প. ৩৮৭], দেৰপুত্তো, উপচারেন পন ৰিমানম্পি চন্দিমাতি ৰুচ্চতি, দেৰপুত্তোপি চন্দোতি ৰুচ্চতি. অতি ৰিয পাপো অজ্ঝাসযো অস্স অত্থীতি পাপিমা [সং. নি. ১.১৩৭], মারো. ন হি অপ্পকেন পাপেন পাপিমাতি ৰুচ্চতি পহূতাদিৰসেন পসিদ্ধে এৰ মন্তাদীনং পৰত্তনতো. ৰুত্তঞ্হি ৰুত্তিযং –

‘‘পহূতে চ পসংসাযং, নিন্দাযঞ্চাতিসাযনে.

নিচ্চযোগে চ সংসগ্গে, হোন্তিমে মন্তুআদযো’’তি [মোগ. ৭৮].

তত্থ পহূতে-গোমা [সং. নি. ১.১২], ধনৰাতি.

পসংসাযং-জাতিমা, গুণৰাতি.

নিন্দাযং-ৰলিমাতি.

অতিসাযনে – বুদ্ধিমা, ৰণ্ণৰাতি.

নিচ্চযোগে-সতিমা, সীলৰা, দণ্ডীতি.

সংসগ্গে – হলিদ্দিমাতি.

তথা ৰিজ্জমানেহি এৰ সতিআদীহি সতিমা ইচ্চাদযো ৰুচ্চন্তি, ন অতীতেহি অনাগতেহি চ অৰিজ্জমানেহি, কস্মা ¶ ? অত্থিসদ্দেন পচ্চুপ্পন্নেন নিদ্দিট্ঠত্তা. এৰং পন সতি কথং পুব্বেপি ত্ৰং সতিমা আসি, অনাগতেপি সতিমা ভৰিস্সসীতি ইদং সিদ্ধন্তি? তদপি তদা ৰিজ্জমানায এৰ সতিযা সিদ্ধন্তি.

গো, অস্সো, মনুস্সো ইচ্চাদীসু জাতিসদ্দেসু তেসং দব্বাভিধানসমত্থত্তা মন্তাদযো ন হোন্তি, তথা নীলো পটো, সুক্কো পটোইচ্চাদীসু গুণসদ্দেসু তিস্সো, ফুস্সোইচ্চাদীসু নামসদ্দেসু চ. যেসং পন দব্বাভিধানসামত্থিযং নত্থি, তেস্ৰেৰ হোন্তি, বুদ্ধিমা, পঞ্ঞৰা, রূপৰা, ৰণ্ণৰা ইচ্চাদি.

৩৭৪. ইমিযা [ক. ৩৫৩; রূ. ৩৭৮; নী. ৭৬৮].

পঠমন্তা মন্ত্ৰত্থে ইম, ইযা হোন্তি.

বহৰো পুত্তা অস্স অস্মিং ৰা সন্তীতি পুত্তিমো, পত্থটা কিত্তি অস্স অস্মিং ৰা অত্থীতি কিত্তিমো. এৰং ফলিমো, খন্ধিমো, রুক্খো, পুত্তিযো, কপ্পিমো, কপ্পিযো, জটিমো, জটিযো, থিরং গুণজাতং অস্স অস্মিং ৰা অত্থীতি থেরিযো, হানভাগো অস্স অত্থি, অস্মিং ৰা ৰিজ্জতীতি হানভাগিযো. এৰং ঠিতিভাগিযো, ৰিসেসভাগিযো, নিব্বেধভাগিযো ইচ্চাদি.

এত্থ চ পাল়িযং চন্দিমা, পুত্তিমাসদ্দানং সিম্হি রাজাদিগণরূপং দিস্সতি, রত্তিমাভাতি চন্দিমা [ধ. প. ৩৮৭], পুত্তেহি নন্দতি পুত্তিমাতি [সং. নি. ১.১২]. কিত্তিমাসদ্দস্স পন কিত্তিমস্স কিত্তিমতোতি রূপন্তি.

৪৭৫. ৰন্ত্ৰাৰণ্ণা [ক. ৩৬৮; রূ. ৪০২; নী. ৭৯২; চং. ৬.৩.৩৫ …পে… ৮.২.৯].

অৰণ্ণভূতা পঠমন্তা মন্ত্ৰত্থে ৰন্তু হোতি.

নিচ্চসীলৰসেন ¶ ৰিসুদ্ধং সীলং অস্স অত্থি, অস্মিং ৰা ৰিজ্জতীতি সীলৰা, পসত্থো গুণো অস্স অত্থি, অস্মিং ৰা ৰিজ্জতীতি গুণৰা.

এৰং সব্বত্থ পদত্থানুরূপং মন্ত্ৰত্থৰিসেসো ৰত্তব্বো, পটিসন্ধিসহগতা পঞ্ঞা অস্স অত্থীতি পঞ্ঞৰা, পচ্চযে পরে দীঘানং ক্ৰচি রস্সত্তং. ৰিদতি এতেনাতি ৰিদো, ঞাণং, ৰিদো এতস্স অত্থি, এতস্মিং ৰা ৰিজ্জতীতি ৰিদ্ৰা, ব্যঞ্জনে পুব্বস্সরলোপো.

অৰণ্ণাতি কিং? সতিমা, বন্ধুমা.

বহুলাধিকারা রস্মিৰা, লক্খিৰা, যসস্সিৰা, ভযদস্সিৰা, মস্সুৰা, গাণ্ডীৰধন্ৰাতিপি সিজ্ঝন্তি. তত্থ গাণ্ডীৰধনু অস্স অত্থি, অস্মিং ৰা ৰিজ্জতীতি গাণ্ডীৰধন্ৰা, ব্যঞ্জনে পুব্বস্সরলোপো.

৪৭৬. দণ্ডাদীহিকঈ ৰা [ক. ৩৬৬; রূ. ৪০০; নী. ৭৯০; চং. ৪.২.১১৮-১২১; পা. ৫.২.১১৫-৬].

তেহি মন্ত্ৰত্থে ইক, ঈ হোন্তি ৰা.

নিচ্চং গহিতো দণ্ডো অস্স অত্থি, অস্মিং ৰা ৰিজ্জতীতি দণ্ডিকো, দণ্ডী, দণ্ডৰা. এৰং গন্ধিকো, গন্ধী, গন্ধৰা, রূপিকো, রূপী, রূপৰা. ইণসামিকে ৰত্তব্বে ধনা ইকো, ধনিকো, অঞ্ঞত্র ধনী, ধনৰা, অত্থিকো, অত্থী, অত্থৰা.

এত্থ চ অসন্নিহিতেন অত্থেন অত্থো অস্স অত্থীতি অত্থিকো, মহগ্ঘেন অত্থিকো মহগ্ঘত্থিকো. এৰং ধনত্থিকো, পুঞ্ঞত্থিকো, সেয্যত্থিকো, অযং অত্থো এতস্সাতি ইদমত্থী, পাটৰেন অত্থো অস্সাতি পাটৰত্থী. এৰং ছেকত্থী, কুসলত্থীইচ্চাদীনি সিজ্ঝন্তি.

ৰণ্ণসদ্দন্তা পন ঈযেৰ হোতি, ব্রহ্মুনো ৰণ্ণো সণ্ঠানং অস্স অত্থীতি ব্রহ্মৰণ্ণী. অথ ৰা ব্রহ্মুনো ৰণ্ণো ব্রহ্মৰণ্ণো ¶ , ব্রহ্মৰণ্ণো ৰিয ৰণ্ণো যস্স সো ব্রহ্মৰণ্ণী. এৰং ব্রহ্মৰচ্ছসী, ‘ৰচ্ছস’ন্তি সীসং, তদ্ধিতন্তসমাসপদং নামেতং. এৰং দেৰৰণ্ণী.

হত্থ, দন্তাদীহি জাতিযং ঈ, হত্থী, দন্তী, গজো, দাঠী, কেসরী, সীহো, অঞ্ঞত্র হত্থৰা, দন্তৰা. ব্রহ্মচারিম্হি ৰত্তব্বে ৰণ্ণতো ঈযেৰ, ৰণ্ণী, অঞ্ঞত্র ৰণ্ণৰা. পোক্খরাদীহি দেসে ঈযেৰ, পোক্খরং ৰুচ্চতি কমলং, পোক্খরণী, পুন ইত্থিযং নী, পুব্বঈ-কারস্স অত্তং, উপ্পলিনী, কুমুদিনী, ভিসিনী, মুল়ালিনী, সালুকিনী, পদুমং এত্থ দেসে অত্থীতি পদুমী, ততো ইত্থিযং নী, পদুমিনী, পুব্বঈ-কারস্স রস্সত্তং, সব্বং কমলাকরস্স ৰা কমলগচ্ছস্স ৰা নামং, অঞ্ঞত্র পোক্খরৰা হত্থী, ইধ সোণ্ডা পোক্খরং নাম.

সিখী, সিখাৰা, মালী, মালাৰা, সীলী, সীলৰা, বলী, বলৰা. সমাসন্তেপি ঈ, নিদ্দাসীলী, সভাসীলী, বাহুবলী, ঊরুবলী. সুখ, দুক্খেহি ঈযেৰ, সুখী, দুক্খী ইচ্চাদি.

৪৭৭. তপাদীহি সী [ক. ৩৬৫; রূ. ৩৯৯; নী. ৭৮৯; চং. ৪.২.১০৬; পা. ৫.২.১০২; ‘… স্সী’ (বহূসু)].

তপাদীহি মন্ত্ৰত্থে সী হোতি ৰা.

তপো অস্স অস্মিং ৰা ৰিজ্জতীতি তপস্সী, দ্ৰিত্তং. এৰং যসস্সী, তেজস্সী, মনো অস্স অত্থীতি মনস্সী.

ৰাত্ৰেৰ? যসৰা.

৪৭৮. ণো তপা [ক. ৩৭০; রূ. ৪০৫; নী. ৭৯৫; চং. ৪.২.১০৬; পা. ৫.২.১০৩].

তপম্হা মন্ত্ৰত্থে ণো হোতি.

তপো অস্স অত্থীতি তাপসো, ইত্থিযং তাপসী.

৪৭৯. মুখাদিতো রো [ক. ৩৬৭; রূ. ৪০১; নী. ৭৯১; চং. ৪.২.১১০, ১১১; পা. ৫.২.১০৬, ১০৭].

মুখাদীহি ¶ মন্ত্ৰত্থে রো হোতি.

অসংযতং মুখং অস্স অত্থীতি মুখরো, সুসি অস্স অত্থীতি সুসিরো, রুক্খো, ঊসো খারো যস্মিং অত্থীতি ঊসরো, খারভূমিপ্পদেসো, মধু রসো অস্স অত্থীতি মধুরো, গুল়ো, নগা এত্থ সন্তীতি নগরো, বহুপব্বতপ্পদেসো, ‘‘নগর’’ন্তিপি পাঠো, কুঞ্জো ৰুচ্চতি হনু, কুঞ্জরো, হত্থী, উণ্ণতা দন্তা অস্স সন্তীতি দন্তুরো, হত্থীযেৰ, মহাৰুত্তিনা অস্স উত্তং.

৪৮০. তুন্দ্যাদীহি ভো [ক. ৩৬৪; রূ. ৩৯৮; নী. ৩৮৭; চং. ৪.২.১৪৮; পা. ৫.২.১৩৯].

তুন্দিইচ্চাদীহি মন্ত্ৰত্থে ভো হোতি ৰা.

তুন্দি ৰুচ্চতি ৰুদ্ধা নাভি, তুন্দিভো, ৰলিযো এতস্মিং অত্থীতি ৰলিভো.

ৰাত্ৰেৰ? তুন্দিমা.

৪৮১. সদ্ধাদিত্ৰ [ক. ৩৭০; রূ. ৪০৫; নী. ৭৯৫; চং. ৪.২.১০৫; পা. ৫.২.১০১ (সদ্দাদিৰ্হ?)].

সদ্ধাদীহি মন্ত্ৰত্থে অ হোতি.

সদ্ধা অস্স অত্থি, অস্মিং ৰা ৰিজ্জতীতি সদ্ধো. এৰং পঞ্ঞো, সতো.

ৰাত্ৰেৰ? পঞ্ঞৰা, সতিমা.

৪৮২. আল্ৰাভিজ্ঝাদীহি [ক. ৩৫৯; রূ. ৩৮৪; নী. ৭৭৯; চং. ৪.২.১৫৭; পা. ৩.২.১৫৮].

অভিজ্ঝাদীহি মন্ত্ৰত্থে আলু হোতি ৰা.

অভিজ্ঝা ¶ অধিকা অস্স অত্থীতি অভিজ্ঝালু, সীতলদুক্খং অধিকং অস্স অত্থীতি সীতালু, ধজা বহুলা অস্মিং রথে সন্তীতি ধজালু, দযা বহুলা অস্সাতি দযালু, পুরিসচিত্তং বহুলং অস্সাতি পুরিসালু, পুরিসলোলা ইত্থী.

ৰাত্ৰেৰ? দযাৰা.

৪৮৩. পিচ্ছাদিত্ৰিলো [ক. ৩৬৪; রূ. ৩৯৮; নী. ৭৮৭; চং. ৪.২.১০২, ১০৩; পা. ৫.২.৯৯, ১০০].

পিচ্ছাদিতো মন্ত্ৰত্থে ইলো হোতি ৰা.

পিচ্ছং তূলং অস্স অত্থি, তস্মিং ৰা ৰিজ্জতীতি পিচ্ছিলো, পিচ্ছৰা, তূলরুক্খো, পিচ্ছিলা সিপ্পলি [সিপ্পলী, সীম্বলী, সেম্মলীতিপি দিস্সতি], ফেনিলো [ফেণিলোতিপি দিস্সতি], ফেনৰা, অদ্দারিট্ঠকো, জটিলো, জটাৰা, তাপসো, তুণ্ডিলো, তুণ্ডৰা, অধিকা ৰাচা অস্স অত্থীতি ৰাচালো, মহাৰুত্তিনা ইলোপো.

৪৮৪. সীলাদিতো ৰো [ক. ৩৬৪; রূ. ৩৯৮; নী. ৭৮৭; চং. ৪.২.১১৩; পা. ৫.২.১০৯].

সীলাদীহি মন্ত্ৰত্থে ৰো হোতি.

নিচ্চরক্খিতসীলং অস্স অত্থি, অস্মিং ৰা ৰিজ্জতীতি সীলৰো, পুরিসো, সীলৰা, ইত্থী, কেসা অতিদীঘা অস্মিং সন্তীতি কেসৰো, কেসৰা, অপরিমাণা অণ্ণা উদকা অস্মিং সন্তীতি অণ্ণৰো, মহন্তং বলং অস্স অত্থীতি বলৰো, বলৰা, বলৰং. গাণ্ডী ৰুচ্চতি সন্ধি, বহৰো গাণ্ডী অস্মিং অত্থীতি গাণ্ডীৰং, ধনু [গণ্ডস্স গণ্ডমিগসিঙ্গস্স অযং গাণ্ডী, সো অস্স অত্থীতি গাণ্ডীতি গাণ্ডীৰো. (পঞ্চকাটীকা). গাণ্ডীমেণ্ডসিঙ্গমস্স অত্থীতি গাণ্ডীৰং, ধনু. (পযোগসিদ্ধি). গাণ্ডী গন্থি, সো অত্থি অস্স অস্মিং ৰা গাণ্ডীৰো অজ্জুনধনু, (মুগ্ধবোধটীকা)], বহুকা রাজী অস্স অত্থীতি রাজীৰং, পঙ্কজং.

৪৮৫. মাযামেধাহি ৰী [ক. ৩৬৪; রূ. ৩৯৮; নী. ৭৮৭; চং. ৪.২.১৩৭; পা. ৫.২.১২১].

এতেহি ¶ মন্ত্ৰত্থে ৰী হোতি.

মাযাৰী, মেধাৰী.

৪৮৬. ইস্সরে আম্যুৰামী [ক. ৩৬৪; রূ. ৩৯৮; নী. ৭৮৭; চং. ৪.২.১৪৩; পা. ৫.২.১২৬; ‘‘সিস্সরে…’’ (বহূসু)].

ইস্সরভূতে মন্ত্ৰত্থে আমী, উৰামী হোন্তি.

ইস্সরিযট্ঠানভূতং সং অস্স অত্থীতি সামী, সুৰামী [সু. নি. ৬৭১], ইত্থিযং সামিনী, সুৰামিনী, বিন্দুলোপো, কাগমে সামিকো.

৪৮৭. লক্খ্যা ণো অ চ [ক. ৩৬৪; রূ. ৩৯৮; নী. ৭৮৭; পা. ৫.২.১০০].

লক্খীম্হা মন্ত্ৰত্থে ণো হোতি, ঈকারস্স অত্তঞ্চ হোতি.

লক্খী সিরী এতস্স অত্থীতি লক্খণো.

৪৮৮. অঙ্গা নো কল্যাণে [ক. ৩৬৪; রূ. ৩৯৮; নী. ৭৮৭; পা. ৫.২.১০০].

কল্যাণে ৰত্তব্বে অঙ্গম্হা মন্ত্ৰত্থে নো হোতি.

কল্যাণং অঙ্গং এতিস্সা ইত্থিযা অত্থীতি অঙ্গনা.

৪৮৯. সো লোমা [ক. ৩৬৪; রূ. ৩৯৮; নী. ৭৮৭; চং. ৪.২.১০৪; পা. ৫.২.১০০].

লোমম্হা মন্ত্ৰত্থে সপচ্চযো হোতি.

বহূনি লোমানি অস্স সন্তীতি লোমসো. এত্থ ‘সো’তি সুত্তৰিভাগেন ‘‘সুমেধসো, ভূরিমেধসো’’ ইচ্চাদীনিপি সিজ্ঝন্তি.

অস্সত্থিরাসি নিট্ঠিতো.

ভাৰ, কম্মরাসি

৪৯০. তস্স ¶ ভাৰকম্মেসু ত্ত তা ত্তন ণ্য ণেয্যণিয ণ ইযা [ক. ৩৬০; রূ. ৩৮৭; নী. ৭৮০; চং. ৪.১.১৩৬-১৫৩; পা. ৫.১.১১৯-১৩৬].

তস্স ভাৰো, তস্স কম্মন্তি অত্থে ছট্ঠুন্তা এতে অট্ঠ পচ্চযা বহুলং ভৰন্তি.

তত্থ ভৰন্তি বুদ্ধি, সদ্দা এতস্মাতি ভাৰো, সদ্দানং অত্তনো অত্থেসু আদিম্হি উপ্পত্তিকারণং, চিরকালং পৰত্তিকারণঞ্চ. তত্থ আদিম্হি পৰত্তিকারণং ব্যপ্পত্তিনিমিত্তং নাম. চিরকালং পৰত্তিকারণং পৰত্তিনিমিত্তং নাম. তদুভযম্পি জাতি, দব্ব, গুণ, ক্রিযা, নামৰসেন পঞ্চৰিধং হোতি.

তত্থ ‘‘গোস্স ভাৰো গোত্ত’’ন্তি এত্থ গোজাতি ভাৰো নাম.

‘‘দণ্ডিনো ভাৰো দণ্ডিত্ত’’ন্তি এত্থ দণ্ডদব্বং ভাৰো নাম.

‘‘নীলস্স পটস্স ভাৰো নীলত্ত’’ন্তি এত্থ নীলগুণো ভাৰো নাম.

‘‘পাচকস্স ভাৰো পাচকত্ত’’ন্তি এত্থ পচনক্রিযা ভাৰো নাম.

‘‘তিস্সনামস্স জনস্স ভাৰো তিস্সত্ত’’ন্তি এত্থ তিস্সনামং ভাৰো নাম.

তত্থ গোস্স ভাৰোতি গোসদ্দং সুত্ৰা গোদব্বে গোবুদ্ধিযা ৰা গোদব্বং দিস্ৰা তস্মিং দব্বে গোৰোহারস্স ৰা পৰত্তিকারণন্তি অত্থো. এৰং সেসেসুপি যথানুরূপং অত্থো ৰেদিতব্বো.

ত্তম্হি-গোত্তং, দণ্ডিত্তং, পাচকত্তং, তিস্সত্তং ইচ্চাদি.

তাম্হি-সঙ্গণিকারামতা ¶ , নিদ্দারামতা, ভস্সারামতা ইচ্চাদি.

ত্তনম্হি-পুথুজ্জনত্তনং, ৰেদনত্তনং, জারত্তনং, জাযত্তনং ইচ্চাদি.

ণ্যম্হি-অলসস্স ভাৰো আলস্যং, সমণস্স ভাৰো সামঞ্ঞং, ব্রাহ্মণস্স ভাৰো ব্রাহ্মঞ্ঞং, সীলসমাধিপঞ্ঞাগুণো সামঞ্ঞঞ্চ ব্রাহ্মঞ্ঞঞ্চ নাম. তাপসস্স ভাৰো তাপস্যং, নিপুণস্স ভাৰো নেপুঞ্ঞং, ৰিপুলস্স ভাৰো ৰেপুল্লং, রঞ্ঞো ভাৰো রজ্জং, আপব্বতস্স খেত্তস্স ভাৰো আপব্বত্যং, দাযাদস্স ভাৰো দাযজ্জং, ৰিসমস্স ভাৰো ৰেসম্মং, সখিনো ভাৰো সখ্যং, ৰাণিজানং ভাৰো ৰাণিজ্জং ইচ্চাদি.

ণেয্যম্হি – সুচিস্স ভাৰো সোচেয্যং. এৰং আধিপতেয্যং ইচ্চাদি.

ণিযম্হি-আলসিযং, মদভাৰো মদিযং. এৰং দক্খিযং, পুরোহিতভাৰো পোরোহিতিযং, ব্যত্তস্স ভাৰো ৰেয্যত্তিযং, ব্যাৰটস্স ভাৰো ৰেয্যাৰটিযং, ইমানি দ্ৰে পুব্বে ৰেয্যাকরণপদং ৰিয সিদ্ধানি.

ণম্হি-গরুনো ভাৰো গারৰো, পটুভাৰো পাটৰং ইচ্চাদি.

ইযম্হি-অধিপতিভাৰো অধিপতিযং, পণ্ডিতভাৰো পণ্ডিতিযং, বহুস্সুতভাৰো বহুস্সুতিযং, নগ্গস্স ভাৰো নগ্গিযং, সূরভাৰো সূরিযং, ৰীরভাৰো ৰীরিযং ইচ্চাদি.

কম্মত্থে কম্মং নাম ক্রিযা, অলসস্স কম্মং অলসত্তং, অলসতা, অলসত্তনং, আলস্যং, আলসেয্যং, আলসিযং, আলসং, অলসিযং ইচ্চাদি.

৪৯১. ব্য ৰদ্ধদাসা ৰা [ক. ৩৬০; রূ. ৩৮৭; নী. ৭৮০].

ভাৰ ¶ , কম্মেসু ৰদ্ধ, দাসেহি ব্যো হোতি ৰা.

ৰদ্ধস্স ভাৰো কম্মং ৰা ৰদ্ধব্যং, ৰদ্ধতা, দাসব্যং, দাসতা, ‘ৰদ্ধৰ’ন্তি ইধ ণে পরে ৰাগমো.

৪৯২. নণ যুৰা বো চ ৰযে [ক. ৩৬১; রূ. ৩৮৮; নী. ৭৮১; চং. ৪.১.১৪৬; পা. ৫.১.১৩০; ‘…ৰস্স’ (বহূসু)].

ৰযে গম্যমানে ভাৰ, কম্মেসু যুৰতো নণ হোতি ৰা বাগমো চ.

যুৰস্স ভাৰো যোব্বনং.

ৰাত্ৰেৰ? যুৰত্তং, যুৰতা.

৪৯৩. অণ্ৰাদীহিমো [ক. ৩৬০; রূ. ৩৮৭; নী. ৭৮০; চং. ৪.১.১৩৯; পা. ৫.১.১২২; ‘অণ্ৰাদিত্ৰিমো’ (বহূসু)].

তেহি ভাৰে ইমো হোতি ৰা.

অণুনো ভাৰো অণিমা, লঘুনো ভাৰো লঘিমা.

৪৯৪. কস্সমহতমিমে কসমহা [ক. ৪০৪; রূ. ৩৭০; নি. ৮৫৯; ‘কস্সক…’?].

ইমপচ্চযে পরে কস্স, মহন্তসদ্দানং কমেন কস, মহা হোন্তি.

কস্সকস্স কম্মং কসিমা [(কিসমহতমিমে কসমহা. ইমপচ্চযে পরে কিস, মহন্থসদ্দানং কমেন কস, মহা হোন্থি. কিসস্স ভাৰো কসিমা, মোগ. ৪-১৩৩)], মহন্তস্স ভাৰো মহিমা. সুমনস্স ভাৰো সোমনস্সং, ণ্যম্হি সাগমো, ‘ৰগ্গলসেহি তে’তি যস্স পররূপত্তং. এৰং দোমনস্সং, সুন্দরং ৰচো ¶ এতস্মিন্তি সুৰচো, সুৰচস্স ভাৰো সোৰচস্সং. এৰং দোৰচস্সং.

‘‘আরামরামণেয্যকং, উয্যানরামণেয্যকং, ভূমিরামণেয্যকং’’ ইচ্চাদীসু রমিতব্বন্তি রমণং, রমণং এত্থ অত্থীতি রামণো, আরামো, আরামরামণস্স ভাৰো আরামরামণেয্যকং, ণেয্যো, সকত্থে চ কো [কথং রামণিযকত্থি? সকত্থে কন্থা ণেন সিদ্ধং, (মোগ. ৪-৫৯)], আরামসম্পত্তি, আরামসিরীতি ৰুত্তং হোতি. এৰং সেসেসু.

ভাৰ, কম্মরাসি নিট্ঠিতো.

পরিমাণরাসি

৪৯৫. তমস্স পরিমাণং ণিকো চ [ক. ৩৫১; রূ. ৩৭৪; নী. ৭৬৪; চং. ৪.১.৬২; পা. ৫.১.৫৭, ৫৮].

তং অস্স পরিমাণন্তি অত্থে পঠমন্তা ণিকো হোতি কো চ. পরিমীযতে অনেনাতি পরিমাণং.

দোণো পরিমাণমস্সাতি দোণিকো. এৰং খারিকো, কুম্ভিকো, অসীতিৰস্সানি পরিমাণমস্সাতি আসীতিকো, ৰযো. এৰং নাৰুতিকো, উপড্ঢকাযো পরিমাণমস্সাতি উপড্ঢকাযিকং, বিম্বোহনং, দ্ৰে পরিমাণমস্সাতি দুকং. এৰং তিকং, চতুক্কং, পঞ্চকং, ছক্কং, দ্ৰিত্তং. দসকং, সতকং.

৪৯৬. যতেতেহি ত্তকো [ক. ৩৯১; রূ. ৪২৩; নী. ৮৩০; পা. ৫.১.২২, ২৩]

তমস্স পরিমাণন্তি অত্থে য, ত, এতসদ্দেহি সদিসদ্ৰিভূতো ত্তকো হোতি.

যং পরিমাণমস্সাতি যত্তকং. এৰং তত্তকং.

৪৯৭. এতস্সেট ত্তকে [ক. ৪০৪; রূ. ৩৭০; নী. ৮৫৯].

ত্তকে ¶ পরে এতসদ্দস্স এট হোতি.

এতং পরিমাণমস্সাতি এত্তকং, যাৰ পরিমাণমস্সাতি যাৰত্তকং. এৰং তাৰত্তকং, এতাৰত্তকং. ‘যতেতেহী’তি ৰচনেন যাৰ, তাৰ, এতাৰাপি গয্হন্তি.

৪৯৮. সব্বা চ টাৰন্তু [ক. ৩৯১; রূ. ৪২৩; নী. ৮৩০; চং. ৪.২.৪৩; পা. ৫.২.৩৯; ‘সব্বা চচৰন্তু’ (বহূসু)].

তমস্স পরিমাণন্তি অত্থে য, তে’তেহি চ সব্বতো চ টাৰন্তু হোতি, এতস্স দ্ৰিত্তং.

সব্বং পরিমাণং অস্সাতি সব্বাৰন্তং, সব্বাৰা, অত্থো, সব্বাৰন্তো, সব্বাৰন্তা, অত্থা, সব্বাৰতি, অত্থে, সব্বাৰন্তেসু, অত্থেসু, ইত্থিযং সব্বাৰতী, সব্বাৰন্তী, পরিসা. এৰং যাৰা, যাৰন্তা, যাৰন্তো, তাৰা, তাৰন্তা, তাৰন্তো, এত্তাৰা, এত্তাৰন্তা, এত্তাৰন্তো ইচ্চাদি.

ক্ৰচি মহাৰুত্তিনা একস্স ত-কারস্স লোপো, যাৰতকো কাযো, তাৰতকো ব্যামো [দী. নি. ৩.২০০], যাৰতিকা যানস্স ভূমি.

৪৯৯. কিংম্হা রতি রীৰ রীৰতক রিত্তকা [ক. ৩৯১; রূ. ৪২৩; নী. ৮৩০; চং. ৪.২.৪৫; পা. ৫.২.৪১].

তং অস্স পরিমাণন্তি অত্থে কিংসদ্দতো এতে চত্তারো পচ্চযা ভৰন্তি.

৫০০. রানুবন্ধেন্তসরাদিস্স [ক. ৫৩৯; রূ. ৫৫৮; নী. ১১২৪].

রানুবন্ধে ¶ পচ্চযে পরে পদন্তসরাদিস্স লোপো হোতি. আদিসদ্দেন পদন্তব্যঞ্জনং গয্হতি, সুত্তৰিভত্তেন রীৰন্তু, রিত্তাৰন্তুপচ্চযা চ হোন্তি.

কিং পরিমাণমস্সাতি কতি. পঞ্চক্খন্ধা কতি কুসলা, কতি অকুসলা [ৰিভ. ১৫১], কতিৰস্সোসি ত্ৰং ভিক্খু, একৰস্সো অহং ভগৰা [মহাৰ. ৭৮], কিং পরিমাণং অস্সাতি কীৰং, কিংৰ দূরো ইতো গামো. এৰং কীৰতকং, কিত্তকং.

রীৰন্তুম্হি – কীৰন্তো হোন্তু যাচকা [জা. ২.২০.১০৩] তি.

রিত্তাৰন্তুম্হি – কিত্তাৰতা খন্ধানং খন্ধপঞ্ঞত্তি [সং. নি. ৩.৮২], কিত্তাৰতা নু খো ভন্তে রূপন্তি ৰুচ্চতি, কিত্তাৰতা নু খো ভন্তে মারোতি ৰুচ্চতি [সং. নি. ৩.১৬১].

পুব্বসুত্তেন টাৰন্তুম্হি – এত্তাৰতা খন্ধানং খন্ধপঞ্ঞত্তি, এত্তাৰতা রূপন্তি ৰুচ্চতি, এত্তাৰতা মারোতি ৰুচ্চতি.

৫০১. মানে মত্তো [ক. ৩২৮; রূ. ৩৫২; নী. ৭০৮; চং. ৪.২.৩৮; পা. ৫.২.৩৭].

মীযতে এতেনাতি মানং, তং উম্মানং, পরিমাণন্তি দুৰিধং, উদ্ধং মানং উম্মানং, তদঞ্ঞং মানং পরিমাণং, ইমস্মিং সুত্তে পন সামঞ্ঞৰচনত্তা দুৰিধম্পি লব্ভতি, দুৰিধে মানে পৰত্তা হত্থাদিসদ্দম্হা তমস্স পরিমাণন্তি অত্থে মত্তপচ্চযো হোতি.

হত্থো পরিমাণং অস্সাতি হত্থমত্তং, দ্ৰে হত্থা পরিমাণং অস্সাতি দ্ৰিহত্থমত্তং, দ্ৰে অঙ্গুলিযো পরিমাণং অস্সাতি দ্ৰঙ্গুলমত্তং. এৰং চতুরঙ্গুলমত্তং, ৰিদত্থিমত্তং, যোজনমত্তং ¶ , তীণি যোজনানি পরিমাণং অস্সাতি তিযোজনমত্তং, নাল়িমত্তং, পত্থমত্তং, দোণমত্তং, পলং ৰুচ্চতি উম্মানসঙ্খাতো পাতিৰিসেসো, পলং পরিমাণং অস্সাতি পলমত্তং, পঞ্চমত্তং, পঞ্চমত্তেহি ভিক্খুসতেহি সদ্ধিং [পারা. ১], তিংসমত্তং, সট্ঠিমত্তং, সতমত্তং, সহস্সমত্তং, কোটিমত্তং, কুম্ভমত্তং, চাটিমত্তং, হত্থিমত্তং, পব্বতমত্তং ইচ্চাদি.

‘মত্তা’তি ৰা পরিমাণৰাচিসদ্দন্তরং, হত্থো মত্তা এতস্সাতি হত্থমত্তং. এৰং দ্ৰিহত্থমত্তং, ইচ্চাদিনা সমাসোপি যুজ্জতি. অভেদূপচারেন পন হত্থপরিমাণং হত্থোতি কত্ৰা ‘‘দ্ৰিহত্থং ৰত্থং, দোণো ৰীহি, দোণো মাসো’’তি সিজ্ঝতি.

৫০২. তগ্ঘো চুদ্ধং [ক. ৩২৮; রূ. ৩৫২; নী. ৭০৮; চং. ৪.২.৩৯; পা. ৫.২.৩৭].

উদ্ধংমানে পৰত্তা সদ্দা তমস্স পরিমাণন্তি অত্থে তগ্ঘপচ্চযো হোতি মত্তো চ.

জণ্ণু পরিমাণমস্সাতি জণ্ণুতগ্ঘং, জণ্ণুমত্তং.

৫০৩. ণো চ পুরিসা [ক. ৩৫২; রূ. ৩৭৬; নী. ৭৬৫; চং. ৪.২.৪০ …পে… ৫.২.৩৮].

উদ্ধংমানে পৰত্তা পুরিসম্হা ণো চ হোতি তগ্ঘো চ মত্তো চ.

চতুহত্থো পুরিসো পরিমাণমস্সাতি পোরিসং, তিপোরিসং, সতপোরিসং, গম্ভীরং. এৰং পুরিসতগ্ঘং, পুরিসমত্তং, উদ্ধং পসারিতহত্থেন সদ্ধিং পঞ্চহত্থং পুরিসপমাণং পোরিসন্তি ৰদন্তি, ‘‘একূনতীসো ৰযসা’’তি [দী. নি. ২.২১৪ (একূনতিংসো)] এত্থ একূনতীস ৰস্সানি আযুপরিমাণং অস্সাতি একূনতীসো. এৰং ¶ ৰীসো, তীসো, চত্তালীসো, পঞ্ঞাসো, সহস্সো ব্রহ্মা, দ্ৰিসহস্সো ব্রহ্মা, দসসহস্সো ব্রহ্মা. এত্থ চ ‘‘সহস্সপরিমাণং চক্কৰাল়ং অস্সাতি সহস্সো’’-ইচ্চাদিনা ণপচ্চযেন সিজ্ঝতি.

পরিমাণরাসি নিট্ঠিতো.

সঙ্খ্যারাসি

৫০৪. একা কাক্যসহাযে [ক. ৩৯১; রূ. ৪২৩; নী. ৮৩৫; চং. ৪.২.৬৭; পা. ৫.৩.৫২].

অসহাযত্থে একম্হা ক, আকী হোন্তি ৰা.

অসহাযো একো, এককো, একাকী, একো ৰা.

ইত্থিযং একিকা, একাকিনী, একা ৰা, ‘অধাতুস্স কে’তি সুত্তেন ইত্থিযং কম্হি পরে অস্স ইত্তং.

৫০৫. দ্ৰিতি চতূহি তীযত্থা [ক. ৩৮৫; রূ. ৪০৯; নী. ৮১৭; তিসত্থা?].

তেহি তস্স পূরণন্তি অত্থে তীযো চ ত্থো চ হোন্তি.

৫০৬. দ্ৰিতীনং দুতা তীযে [ক. ৩৮৬, ৪১০; নী. ৮১৮; তিযে?].

তীযে পরে দ্ৰি, তিসদ্দানং দু, তাদেসা হোন্তি.

দ্ৰিন্নং পূরণো দুতীযো [ছট্ঠসংগীতি পাঠেসু দুতিযোত্যাদিনা দিস্সন্তি], দ্ৰিন্নং পূর