📜

নমো তস্স ভগৰতো অরহতো সম্মাসম্বুদ্ধস্স

অনুদীপনীপাঠ

১. চিত্তসঙ্গহঅনুদীপনা

অনন্তঞ্ঞাণং নত্ৰান, লোকালোককরং জিনং;

করিস্সামি পরমত্থ-দীপনিযা নুদীপনিং.

[তত্থ, লোকালোককরন্তি দসসহস্সিলোকধাতুযং চতুস্সচ্চধম্মদেসনালোককারকং. পরমত্থদীপনীতি এত্থ অত্থো দুৰিধো পধানত্থোচ পরিযাযত্থোচ. তত্থ পধানত্থো পরমত্থোনাম, পধানত্থোতিচ পদৰাক্যানং মুখ্যত্থো উজুকত্থো. পরিযাযত্থোপি কোচি, যুত্তরূপো অত্থো পরমত্থো যেৰ. পরমত্থংদীপেতিপকাসেতীতিপরমত্থদীপনী]. তংপর মত্থদীপনিংকরোন্তোআচরিযো পথমংতাৰ বুদ্ধস্সভগৰতো পণামংকরোতি ‘‘উদযাযস্সা’’তিআদিনা.

তত্থ ‘‘উদযা’’তি উদযতোউগ্গমনতো. ‘‘যস্সা’’তি যস্স সব্বঞ্ঞুবুদ্ধমহাসূরস্স. ‘‘একস্সা’’তি অদুতীযস্স, অসদি সস্সৰা. ‘‘সদ্ধম্মরংসিজালিনো’’তি এত্থসদ্ধম্মোতিসত্থুসা সনধম্মোৰুচ্চতি. তত্থচ চতুরাসীতিসহস্সধম্মক্খন্ধসঙ্খাতো দেসনাসদ্ধম্মোইধাধিপ্পেতো. সদ্ধম্মসঙ্খাতংরংসিজালংঅস্স অত্থীতি সদ্ধম্মরংসিজালী. তস্সসদ্ধম্মরংসিজালিনো. ‘‘পবুজ্ঝিংসূ’’তি ৰিকসিংসু, চতুস্সচ্চঞ্ঞাণৰিকাসংতঞ্ঞাণসম্ফুল্লং পাপুণিংসু. ‘‘জনম্বুজা’’তি জনসঙ্খাতাঅম্বুজা. তত্থজনানাম ইধবোধনেয্যসত্তা অধিপ্পেতা, যেসব্বঞ্ঞুদেসনং সুত্ৰা চতুস্সচ্চ ধম্মং বুজ্ঝিস্সন্তি. অম্বুজাতিপদুমা. ‘‘জাতিক্খেত্তেমহাসরেতি’’ জাতিক্খেত্ত সঙ্খাতে জনম্বুজমহাসরে. তত্থ জাতিক্খেত্তং নামদসসহস্স চক্কৰাল়ং, যং একং বুদ্ধক্খেত্তন্তি ৰুচ্চতি. যত্থ চ মহাবোধিসত্তানং বুদ্ধভাৰত্থায পথমমহাভিনীহারকালাদীসু একপ্পহারেনপথৰিকম্পনাদীনিপৰত্তন্তি. যত্থচৰসন্তাদেৰব্রহ্মানো বুদ্ধপরিসাহোন্তি. জাতিক্খেত্তেমহাসরেযস্স একস্স সদ্ধম্মরংসিজালিনো মহাসূরস্স উদযা তস্মিং জাতিক্খেত্তে মহাসরে জনম্বুজাপবুজ্ঝিংসূতিযোজনা.

‘‘তং মহাসূর’’ন্তি সব্বঞ্ঞুবুদ্ধমহাসূরিযমণ্ডলং. জনম্বুজ সন্তানেসুপৰত্তং মহন্তং মোহতমংনূদতি অপনেতি, সদ্ধম্মরংসিজালং ৰিস্সজ্জন্তো অন্তরধাপেতীতি মহামোহতমোনুদো. তং ‘‘মহামোহতমোনুদং’’.

এৰং বুদ্ধস্সপণামং কত্ৰা অত্তনা ইচ্ছিতং পণামপ্পযোজনং পরিণামেন্তো ‘‘সঞ্জাত’’ন্তিআদিমাহ. ‘‘সোমহাসূরোময্হং হদযে সঞ্জাতং তমোখন্ধং পনূদত’’ন্তিযোজনা. তত্থ ‘‘সঞ্জাত’’ন্তি সুট্ঠুজাতং, অনমতগ্গেসংসারে দল়্হং পৰত্তন্তি অত্থো. ‘‘তমোখন্ধ’’ন্তি মহামোহতমোখন্ধং. সব্বকিলেসতমোখন্ধং ৰা. অন্তরাযকরানি উপৰীল়কোপঘাতককম্মানিপি তমোখন্ধে সঙ্গহিতানি এৰ. তথা রোগাদযো অন্তরায ধম্মাপি তমোজাতিকাএৰতমোতমপরাযনোতিআদীসু. ‘‘পনূদত’’ন্তি পনূদতু, অপনেতু, অন্তরধাপেতু.

এৰং সপ্পযোজনং পণামং কত্ৰা ইদানি সনিদানং গন্থপ্পটিঞ্ঞং করোন্তো ‘‘পোরাণকেহী’’তিআদিমাহ. তত্থ নিদানং নাম গন্থপ্পটিঞ্ঞায আসন্নকারণং. কতধংপনতন্তি, সারত্থাভিমানীনং যাচনঞ্চসঙ্গহস্সৰিপুলত্থতা চ.

তত্থ দ্ৰীহি গাথাহি সকারণং যাচনং দস্সেতি. পুন দ্ৰীহি গাথাহি সউপমংৰিপুলত্থতংদস্সেতি. ‘‘তস্মা’’তিআদিনা গন্থপ্পকার গন্থগুণেহি সহগন্থপ্পটিঞ্ঞং দস্সেতি. তত্থ আদিগাথাযং ‘‘অভিধম্মত্থসঙ্গহে পোরাণকেহি ৰিঞ্ঞূহি ৰণ্ণিতা বহূৰণ্ণনা ইধলোকম্হিদিস্সন্তী’’তি যোজনা. ‘‘ৰণ্ণনা’’তি পোরাণটীকাযো ৰুচ্চন্তি. এৰঞ্চসতি কস্মা অভিনৰং ৰণ্ণনং যাচন্তীতি. ‘‘যে সারত্থাভিমানিনো, তে তাহিবহূহি পোরাণৰণ্ণনাহিতুট্ঠিং নৰিন্দন্তি. তস্মা তং যাচন্তী’’তিযোজনা. এতেন অপ্পসারত্থা এৰ তাপোরাণৰণ্ণনাযোতিপি দীপেতিযেৰ. তত্থ ‘‘তুট্ঠি’’ন্তি সন্তুট্ঠিং. নৰিন্দন্তিনপটিলভন্তি. ‘‘যে’’তিযেজনা.

সারত্থমেৰ অভিমানেন্তি, ৰিসেসেন নন্দন্তিসীলেনাতি সারত্থাভিমানিনো. তেনৰিন্দন্তীতিপুরিমেনসম্বন্ধো. পুন ‘‘তে’’তি তাহি তুট্ঠিং অৰিন্দন্তা তেজনা. ‘‘ম’’ন্তি অত্তানং নিদ্দিসতি. ‘‘সঙ্গম্মা’’তি সমাগন্ত্ৰা. যস্মা পরমত্থস্সদীপনং যাচন্তি, তস্মা ইমিস্সাটীকায ‘‘পরমত্থদীপনী’’তি নামংপি সিদ্ধংহোতি. ‘‘মহণ্ণৰে’’তি মহাসমুদ্দে. ‘‘রতনানী’’তি সুৰণ্ণরজতাদীনি রতনানি. ‘‘উদ্ধরিত্ৰা’’তি উদ্ধং আহরিত্ৰা. ‘‘যথিচ্ছকংৰী’’তিযথিচ্ছিতংপি. যত্তকং ইচ্ছন্তি, তত্তকংৰীতি অধিপ্পাযো. ‘‘দজ্জেয্যুং’’তি দদেয্যুং. কামং দদন্তূতি অত্থো. এয্যাদিৰচনানং অনুমতি অত্থেপৰত্তনতো. ‘‘নৰত্তব্বাৰঊনতা’’তি মহণ্ণৰেরতনানং ঊনতাহানিতা নৰত্তব্বাৰ. কস্মা, অপরিমাণ রতনাধিট্ঠানত্তা মহাসমুদ্দস্স. যতো সো সাগরোতি ৰুচ্চতি, সানংধনরতনানং গেহগব্ভসদিসত্তাসাগরোতি হিস্স অত্থো.

‘‘তথেৰেত্থা’’তি এতস্মিং অভিধম্মত্থ সঙ্গহেতথেৰ. ‘‘ৰিপুলত্থা’’তি মহন্তা অত্থা. ‘‘রতনূপমা’’তি মহণ্ণৰে রতনসদিসা. ‘‘সতক্খত্তুংপী’’তি অনেকসতৰারংপি. ‘‘ৰণ্ণেয্যুং’’তি কামংৰণ্ণেন্তু. ‘‘পরিযাদিন্না’’তি পরিতো অনৰসেসতো আদিন্না গহিতা. পরিক্খীণাতি ৰুত্তং হোতি. ‘‘নহেস্সরে’’তি নহেস্সন্তি নভৰিস্সন্তি. ‘‘তস্মা’’তি যস্মাচ যাচন্তি, যস্মাচ পরিযাদিন্নানহেস্সন্তি, তস্মা. ‘‘তাসুৰণ্ণনাসূ’’তি তাসু পোরাণটীকাসু. ‘‘ৰণ্ণন’’ন্তি অভিনৰৰণ্ণনং, অভিনৰটীকংকরিস্সন্তি সম্বন্ধো. কীদিসংৰণ্ণনং করিস্সতীতি আহ ‘‘নানাসারত্থ সম্পুণ্ণ’’ন্তিআদি. তত্থ ‘‘উত্তানপদব্যঞ্জন’’ন্তি উত্তানপদঞ্চ উত্তানৰাক্যঞ্চ. ‘‘নাতিসঙ্খেপৰিত্থার’’ন্তি নাতিসঙ্খেপংনাতিৰিত্থারঞ্চ. মন্দা বুদ্ধি যেসং তে মন্দবুদ্ধিনো. ‘‘মন্দা’’তি মুদুকা. ‘‘বুদ্ধী’’তি ঞাণং. মন্দবুদ্ধিনো সোতুজনে পবোধেতি ৰিকাসেতি, ঞাণ ৰিকাসংপাপেতীতি মন্দবুদ্ধিপ্পবোধনা. ‘‘করিস্স’’ন্তি করিস্সামি. ‘‘ত’’ন্তি তংৰণ্ণনং. ‘‘পরমত্থেসুপাটৰত্থিনোসুণন্তূ’’তি যোজনা. পটুনোভাৰোপাটৰং. পটুনোতি ব্যত্তস্সপণ্ডিতস্স. পাটৰেন অত্থো যেসং তে পাটৰত্থিনো. ইতিসদ্দো পরিসমাপনজোতকো. সো হি গন্থারব্ভৰিধানস্স ইধপরিসমাপনং পরিনিট্ঠানং ঞাপেতুং গন্থারব্ভৰাক্যস্সপরিযন্তে যোজিতো. অৰযৰ ৰাক্যানং পিযোজীযতিযেৰ. এসনযোসব্বত্থ.

গন্থারব্ভগাথাৰণ্ণনানিট্ঠিতা.

১. এৰং গন্থারব্ভৰিধানং কত্ৰা ইদানি আদিগাথায সম্বন্ধং দস্সেন্তো ‘‘অভিধম্মত্থসঙ্গহ’’ন্তিআদিমাহ. সম্বন্ধন্তি কারণপ্ফলসংযোগং. তত্থ গাথাপৰত্তনং কারণং নাম. পঞ্চপিণ্ডত্থ দস্সনং ফলং নাম. কারণপ্ফলসংযোগো সম্বন্ধোনাম. ‘‘সপ্পযোজনে’’তি ফলপ্পযোজনসহিতে. গন্থেন অভিধাতব্বো কথেতব্বোতি গন্থাভিধেয্যো. নিপতস্স কম্মং নিপচ্চং. নিপচ্চ কিরিযা, নিপচ্চাকারো, নিপচ্চকারস্সকরণন্তি সমাসো. ‘‘সা’’তি রতনত্তযৰন্দনা. দস্সিতাতিসম্বন্ধো. ‘‘অভিহিতা’’তি কথিতা. পকাসিতাতি ৰুত্তং হোতি. ‘‘পধানত্থভূতা’’তি অধিপ্পেতত্থভূতাতি অধিপ্পাযো. দুৰিধোহি অত্থোৰচনত্থো চ অভিধানত্থোচ. তত্থ গচ্ছতীতি গতো, পুরিসোতি ৰুত্তেগচ্ছতি পদেন ৰুত্তো যোকোচি গচ্ছন্তো ৰচনত্থোনাম. পুরিসোতি পদেনদস্সিতো পধানত্থো অধিপ্পেতত্থো অভিধেয্যত্থো নামাতি. ‘‘অভিধম্মত্থা’’তি.

তত্থ ৰুত্তাভিধম্মত্থা, চতুধা পরমত্থতো;

চিত্তং চেতসিকং রূপং, নিব্বানমিতি সব্বথা. তি

এৰং ৰুত্তা অভিধম্মত্থা. এৰং ৰুত্তত্তাযেৰচ তেচত্তারো অভিধম্মত্থা এৰ ইধপধানত্থভূতাতি চ, - পধানত্থাএৰ ইধগন্থাভিধেয্য ভাৰেন অধিপ্পেতাতি চৰিঞ্ঞাযতীতি অধিপ্পাযো.

কেচিপনৰদেয্যুং, তেঅভিধম্মত্থা সঙ্গহপ্পকরণং পত্তা ৰিসুং সঙ্গহত্থানামভৰেয্যুং, নঅভিধম্মত্থা নাম. ইধ চ সঙ্গহত্থা এৰ অভিধেয্যভাৰেন অধিপ্পেতাতি ৰুত্তং অভিধেয্যো অভিধম্মত্থ সঙ্গহপ্পদেনাতি. ৰুচ্চতে. তেঅভিধম্মত্থা সঙ্গহপ্পকরণং পত্তাপি অভিধম্মত্থা এৰনাম হোন্তি, ন ৰিসুং সঙ্গহত্থানাম. তত্থ ৰুত্তাভিধম্মত্থাতিহি ৰুত্তং, নতুৰুত্তং তত্থ ৰুত্তাসঙ্গহত্থাতি. এৰঞ্চসতি সঙ্গহিতভাৰমত্তং ৰিসিট্ঠং হোতি. তদেৰ ইধ অভিধেয্যো নাম সিযাতি ৰুত্তং ‘‘সঙ্গহিতভাৰোপি অভিধেয্যো যেৰা’’তিআদি. তত্থ ‘‘সঙ্গহিতভাৰো’’তিচিত্তসঙ্গহো, চেতসিকসঙ্গহোতিআদিনা সঙ্গহণকিরিযা. সা সঙ্গহিতেহি ধম্মেহি অঞ্ঞা নহোতি. তেস্ৰেৰধম্মেসুসঙ্গয্হতীতি ৰুত্তং ‘‘সঙ্গহিতভাৰোপি অভিধেয্যো যেৰা’’তি. কিঞ্চাপিতেহি অঞ্ঞানহোতি, তে স্ৰেৰ সঙ্গয্হতি. সাপন গন্থস্সপধানত্থো নহোতি. ইধ চ পধানত্থোৰ অধিপ্পেতোতি ৰুত্তং ‘‘তংনসুন্দর’’ন্তি. কস্মা নসুন্দরন্তি আহ ‘‘নহিসো’’তিআদিং. এত্থচহিসদ্দো ইমস্স ৰাক্যস্সহেতুৰাক্যভাৰং জোতেতি. এসনযোপরত্থপি. ‘‘ইতোপট্ঠায চা’’তিআদি গন্থ গরুদোসৰিৰজ্জনং. তত্থ ‘‘ইমস্সসঙ্গহস্সা’’তি ইমস্সঅভিধম্মত্থসঙ্গহস্স. ‘‘দুতীযা’’তিদুতীযাটীকা. ‘‘দ্ৰেপী’’তি দ্ৰেপিটীকাযো. ‘‘ৰিসুদ্ধিমগ্গেমহাটীকা’’তি আচরিযধম্মপালত্থেরেন কতাপরমত্থমঞ্জূসানামটীকা. সা ব্রম্মরট্ঠে তিরিযপব্বতৰাসিনা থেরেনকতং চূল়টীকং উপাদায মহাটীকাতি পাকটা. তংসন্ধাযেতং ৰুত্তং.

গন্থপ্পকারোচ পকারৰন্তেহি ধম্মেহি সহেৰসিজ্ঝতি, ৰিনা নসিজ্ঝতীতি অধিপ্পাযেন ‘‘সোঅভিধম্মত্থপদেনা’’তি ৰুত্তং. কামঞ্চ সো তেহি সহেৰসিজ্ঝতি, ৰিনানসিজ্ঝতি. অভিধম্মত্থপদং পন সঙ্গহণকিরিযাপকারংন ৰদতীতি ৰুত্তং ‘‘তং নসুন্দর’’ন্তি. দুৰিধং নামং অন্ৰত্থনামং রুল়িনামন্তি. তত্থ, অত্থানুগতং নামং অন্ৰত্থনামং, যথা সুখিতস্সজনস্স সুখোতিনামং. অত্থরহিতং আরোপিতং নামং রুল়িনামং, যথা দুক্খিতস্সজনস্স সুখোতি নামং. ইধ পন অন্ৰত্থনা মন্তিদস্সেতুং ‘‘অত্থানুগতা’’তিআদি ৰুত্তং. তত্থ ‘‘অত্থানুগতা’’তি সকত্থানুগতা. সদ্দপ্পৰত্তিনিমিত্তানুগতাতি ৰুত্তং হোতি. ‘‘গন্থসমঞ্ঞা’’তি গন্থসম্মুতি. গন্থস্সনামন্তি ৰুত্তং হোতি. সঙ্গহগন্থোনাম পাল়িযংতত্থ তত্থ ৰিপ্পকিণ্ণেধম্মে একত্থ সভাগরাসিকরণৰসেন পৰত্তো গন্থো. তং উগ্গণ্হন্তো অপ্পকেন গন্থেনবহুকেধম্মেসুখেনজানাতি. ‘‘তদুগ্গহপরিপুচ্ছাদিৰসেনা’’তি তস্সউগ্গহোচ পরিপুচ্ছাচাতি দ্ৰন্দো. আদিসদ্দেন ধারণাদীনি সঙ্গণ্হাতি. তত্থ পাঠস্সৰাচুগ্গতকরণং উগ্গহোনাম. উগ্গহি তস্সপাঠস্স অত্থগ্গহণং পরিপুচ্ছানাম. ‘‘অনাযাসতো’’তি নিদ্দুক্খেন. ‘‘লদ্ধব্বংফলানুফল’’ন্তি সম্বন্ধো. সরূপতো অৰবুজ্ঝনং সরূপাৰবোধো. আদিসদ্দেন লক্খণাৰবোধো রসাৰ বোধোতিআদিং সঙ্গণ্হাতি. অনুপাদাপরিনিব্বানং অন্তো পরিযোসানং যস্সাতি অনুপাদাপরিনিব্বানন্তং. তত্থ ‘‘অনুপাদাপরিনিব্বান’’ন্তি তণ্হাদিট্ঠীহি খন্ধেসু অনুপাদাযপরিনিব্বানং. অনুপাদিসেস পরিনিব্বানন্তি ৰুত্তং হোতি. ‘‘ফলানুফল’’ন্তি ফলঞ্চেৰ অনুফলঞ্চ. তত্থ ‘‘ফল’’ন্তি মূলপ্ফলং. ‘‘অনুফল’’ন্তি পরম্পরপ্ফলং. পযোজেতীতি ‘‘পযোজনং’’. পযোজেতীতি নিযোজেতি. কিং নিযোজেতি. ফলত্থিকংজনং. কত্থ নিযোজেতি. ফলনিব্বত্তকেকম্মে. কিমত্থায নিযোজেতি. তস্সকম্মস্স করণত্থাযাতি. ফলানুভৰনত্থায তত্থতত্থ ফলানুভৰনকিচ্চেসু পযুজ্জীযতীতি পযোজনন্তি পিৰদন্তি. ‘‘সামত্থিযতো’’তি ৰচনসামত্থিযতো. কিং ৰচনসামত্থিযন্তি. কারণৰচনং ফলংপিদীপেতি. ফলৰচনং কারণংপিদীপেতি. যথাতং অসুকস্মিং রট্ঠে সম্মাদেৰো ৰুট্ঠোতি ৰুত্তে তং রট্ঠংসু ভিক্খন্তি ৰিঞ্ঞাযতি. অসুকরট্ঠং সুভিক্খন্তিৰুত্তে তস্মিং রট্ঠে সম্মাদেৰো ৰুট্ঠোতি ৰিঞ্ঞাযতীতি. পযোজনং পন অভিধম্মত্থ সদ্দেন দস্সেতব্বং নত্থি, সঙ্গহৰচনসামত্থিযেনেৰ সিদ্ধং হোতীতি অধিপ্পাযেন ‘‘সঙ্গহসদ্দেনা’’তি ৰুত্তং. সামত্থিযদস্সনে পন সুট্ঠু পরিপুণ্ণৰচনং ইচ্ছিতব্বং হোতি. ইতরথা অনিট্ঠত্থপ্পসঙ্গোপি সিযাতি ইমমত্থং দস্সেতুং ‘‘তং ন সুন্দর’’ন্তি ৰত্ৰা ‘‘নহী’’তিআদিনা হেতুৰাক্যেন তদত্থং সাধেতি.

২. এৰং সপ্পযোজনে পঞ্চপিণ্ডত্থেতি এত্থ পঞ্চপিণ্ডত্থে দস্সেত্ৰা ইদানি তেসংপঞ্চন্নং পিণ্ডত্থানং ৰিসুংৰিসুং পঞ্চপ্পযোজনানি দস্সেন্তো ‘‘তত্থা’’তিআদিমাহ. ‘‘তত্থা’’তি তেসুপঞ্চসু পিণ্ডত্থেসু. নসঙ্খ্যাতব্বন্তি অসঙ্খ্যেয্যং. সঙ্খাতুংঅসক্কুণেয্যন্তি অত্থো. নপমেতব্বন্তি অপ্পমেয্যং. পমেতুং অসক্কুণেয্যন্তি অত্থো. এৰং কিচ্চপচ্চযানং কত্থচি সক্কত্থ দীপনং হোতি. সকৰচনং পাল়িৰচনেন সাধেতুং ‘‘যথাহা’’তি পুচ্ছিত্ৰা পাল়িগাথং আহরি. তত্থ ‘‘যথাহা’’তি কথং আহ ইচ্চেৰত্থো. অনন্তরে ৰুত্তস্স অত্থস্স সাধকং ৰচনং কথং পাল়িযং আহ, কথং অট্ঠকথাযং আহ, কথং টীকাযং আহাতি এৰং যথারহং অত্থো ৰেদিতব্বো. ‘‘তেতাদিসেনিব্বুতে অকুতোভযে পূজযতো’’তি যোজনা. তত্থ ‘‘তে’’তি বুদ্ধ বুদ্ধ সাৰকে. ‘‘তাদিসে’’তি তথা রূপেসী লক্খন্ধাদিগুণ সম্পন্নে. ‘‘নিব্বুতে’’তি কিলেস নিব্বানেন নিব্বুতে. নত্থি কুতোচি হেতুতো ভযং যেসং তে অকুতো ভযা. অনাগামি খীণাসৰা. ‘‘ভয’’ন্তি চিত্তুত্রাসভযং. ‘‘পূজযতো’’তি পূজেন্তস্স. ‘‘তং পযোজন’’ন্তিতস্সারতনত্তয ৰন্দনায পযোজনং. ‘‘সঙ্গহকারা’’তি বুদ্ধঘোসত্থেরাদযো পচ্ছিম অট্ঠকথাকারা ৰুচ্চন্তি. তেহি পোরাণট্ঠকথাসু তত্থ তত্থ ৰিপ্পকিণ্ণেপকিণ্ণকৰিনিচ্ছযেযুত্তট্ঠানেসু সঙ্গহেত্ৰা অভিনৰ অট্ঠকথাযো করোন্তি. তস্মা সব্বাঅভিনৰঅট্ঠকথাযো সঙ্গহা নাম হোন্তি. তে চ আচরিযা সঙ্গহকারা নাম. তেন ৰুত্তং ‘‘সঙ্গহকারাতি বুদ্ধঘোস. পে… ৰুচ্চন্তী’’তি. তে অন্তরায নীৰারণমেৰ ইচ্ছন্তীতি কথং ৰিঞ্ঞাযতীতি চে. তেসং ৰচনেন ৰিঞ্ঞাযতীতি দস্সেতুং সঙ্গহকার গাথং আহরি. ‘‘রতনত্তযেকতস্স এতস্সনিপচ্চকারস্স আনুভাৰেন অন্তরাযে অসেসতোসোসেত্ৰাতি যোজনা. ‘‘হী’’তি ঞাপকহেতু জোতকো. ‘‘ৰুত্ত’’ন্তি অট্ঠসালিনিযং ৰুত্তং.

৩. ‘‘কথঞ্চহোতী’’তি সম্বন্ধো. ইতি অযং পুচ্ছা. ‘‘ৰুচ্চতে’’তি ৰিসজ্জনা কথীযতে. ‘‘হী’’তিৰিত্থারজোতকো. ‘‘ৰন্দনা কিরিযাভিনিপ্ফাদকো পুঞ্ঞপ্পৰাহো’’তি সম্বন্ধো. ‘‘অনেক…পে… ৰারে’’তি অচ্চন্ত সংযোগত্থে উপযোগ ৰচনং. ‘‘পুঞ্ঞাভিসন্দো’’তি পুঞ্ঞাভিসোতো, পুঞ্ঞপ্পৰাহোতি তস্সেৰ ৰেৰচনং. ‘‘সো চ পুঞ্ঞাতিস্সযো হোতী’’তি সম্বন্ধো. কস্মা সো পুঞ্ঞা তিস্সযো হোতীতি. খেত্ত সম্পত্তিযা চ অজ্ঝাসয সম্পত্তিযা চ হোতীতি দস্সেতুং ‘‘অনুত্তরেসূ’’তিআদিমাহ. সংৰড্ঢিত্থাতি সংৰড্ঢিতো. পুঞ্ঞাভিসন্দো. সংৰড্ঢিতস্সভাৰো সংৰড্ঢিতত্তং. সুগন্ধেহিৰিয সুপরিসুদ্ধংৰত্থং পরিভাৰীযিত্থাতি পরিভাৰিতো. পুঞ্ঞাভিসন্দোযেৰ. পরিভাৰিতস্স ভাৰো পরিভাৰিতত্তং. উভযত্থাপি হেতু অত্থে নিস্সক্কৰচনং. ‘‘মহাজুতিকো’’তি মহাতেজো. ‘‘মহপ্ফলো’’তি মূলপ্ফলেন মহপ্ফলো. ‘‘মহানিসংসো’’তি আনিসংসপ্ফলেন মহানিসংসো. আনিসংসপ্ফলন্তি চ পরম্পরা ফলং ৰুচ্চতি. অঞ্ঞং পুঞ্ঞং অতিক্কমন্তো সযতি পৰত্ততীতি অতিস্সযো. পুঞ্ঞঞ্চ তং অতিস্সযোচাতি পুঞ্ঞাতিস্সযো. অতিস্সযপুঞ্ঞং, অধিক পুঞ্ঞন্তি অত্থো. ‘‘সো অনুবলং দেতি, ওকাসলাভং করোতী’’তি সম্বন্ধো. কথঞ্চ অনুবলং দেতি, কথঞ্চ ওকাসলাভং করোতীতি আহ ‘‘সযং পযোগ সম্পত্তিভাৰেঠত্ৰা’’তিআদিং. তত্থ পযোগসম্পত্তিনাম অতীত পুঞ্ঞকম্মানং বলৰতরং উপত্থম্ভককম্মং হোতি. ‘‘বহিদ্ধা’’তি বহিদ্ধসন্তানতো. ‘‘ৰিপত্তিপচ্চযে সম্পত্তিপচ্চযে’’তি যোজেতব্বং. তত্থ, ৰিপত্তিপচ্চযানাম-রাজতোৰা চোরতোৰা-তিআদিনা আগতা দুক্খুপ্পত্তিপচ্চযা. সম্পত্তিপচ্চযানাম কাযচিত্তানং সপ্পায পচ্চযা. চত্তারো পচ্চযা চ উপট্ঠাককুলানি চ আরক্খ দেৰতাদযো চ সুখুপ্পত্তি পচ্চযা. তেহি পচ্চযেহি পামোজ্জ বহু লস্স থেরস্স সন্তানে রত্তিদিৰং পীতিপস্সদ্ধিসুখসমাধীনং পৰত্তিযা অজ্ঝত্তভূতা উতুচিত্তাহারা চ অতি পণীতা হোন্তি. তেহি সমুট্ঠিতা সরীরট্ঠকধাতুযো চ অতিপণীতা এৰ হুত্ৰা উপব্রূহন্তি. তত্থ সরীরট্ঠকধাতুযো নাম পথৰি আদযো ৰাতপিত্তসেম্হাদযোচ. ‘‘অনুবলংদেতী’’তিঅভিনৰংথামবলং পৰত্তেতি. ‘‘পুঞ্ঞন্তরস্সা’’তি পৰত্তিৰিপাকজনকস্স বহুৰিধস্স পুঞ্ঞ কম্মস্স. ‘‘অথা’’তি তস্মিং কালেতি অত্থো. ‘‘বলৰবলৰন্তিযো হুত্ৰা’’তি পকতি বলতো অতিবলৰন্তিযো হুত্ৰা. ‘‘তস্মিং থেরসন্তানে’’তি সম্বন্ধো. ‘‘ইট্ঠপ্ফলঘনপূরিতে’’তি ইট্ঠপ্ফলভূতানং রূপসন্ততীনং ঘনেন পূরিতে. ‘‘ওকাসো নাম নত্থী’’তি পতিট্ঠানোকাসো নাম নত্থি. ‘‘ইতী’’তি তস্মা. ‘‘দূরতো অপনীতানেৰ হোন্তী’’তি সম্বন্ধো. ইট্ঠপ্ফলসন্তানং ৰিবাধন্তি নীৰারেন্তীতি ইট্ঠপ্ফলসন্তানৰিবাধকানি উপপীল়কূপঘাতককম্মানি. অনিট্ঠপ্ফল সন্তান জনকানি, অকুসল জনক কম্মানি, অপুঞ্ঞ কম্মানীতি তানিতিৰিধানি অকুসলকম্মানি দূরতো অপনীতানেৰ হোন্তি, তেসং ৰিপাকস্স অনোকাসকরণেনাতি অধিপ্পাযো. তেনাহ ‘‘নহী’’তিআদিং. ‘‘ততো’’তি তস্মা অপুঞ্ঞ কম্মানং দূরতো অপনীতত্তা. অভিৰাদেতব্বানং মাতাপিতু সমণব্রাহ্মণাদীনং অভিৰাদনকম্মেগরুংকরণং অভিৰাদন সীলং নাম. তং অস্স অত্থীতি অভিৰাদনসীলী. গুণৰুদ্ধৰযৰুদ্ধে অপচেতি অত্তানং নীচৰুত্তি করণেন পূজেতিসীলেনাতি ৰুদ্ধাপচাযী. উভযত্থাপিসম্পদান ৰচনং. এৰন্তিআদিনি গমন ৰচনং. নিগমন্তি চ নিট্ঠঙ্গমনং. তস্মাতিআদি লদ্ধগুণ ৰচনং. লদ্ধগুণোতি চ তংতংপসঙ্গ ৰিসোধনং পরিপুণ্ণং কত্ৰা লদ্ধোৰিসুদ্ধো অত্থো ৰুচ্চতি. তথা ৰচন সামত্থিযেন লদ্ধো অত্থন্তরোপি অযমিধ অধিপ্পেতো. ‘‘নকেৰলঞ্চ থেরস্সেৰ অনন্তরাযেন পরিসমাপনত্থং হোতী’’তি যোজনা. ‘‘সোতূনঞ্চগহণ কিচ্চ সম্পজ্জনত্থ’’ন্তিসম্বন্ধো. সুণন্তীতি সোতারো. তেসং. ‘‘গণ্হন্তান’’ন্তি উগ্গণ্হন্তানং. ‘‘ৰন্দনাসিদ্ধিযা’’তির তনত্তযেৰন্দনা পুঞ্ঞস্সসিদ্ধিতো. জৰনৰিনিচ্ছযে যস্মা অন্তরায নীৰারণংনাম দিট্ঠধম্মে ইচ্ছিতব্বং ফলং হোতি. দিট্ঠ ধম্মো চ পথম জৰনস্স ৰিপাকক্খেত্তং. তস্মা উপত্থম্ভন কিচ্চং পত্ৰাপি পথম জৰন চেতনা এৰ ইধপরিযত্তাতি অধিপ্পাযেন ‘‘দিট্ঠধম্মৰেদনীযভূতা’’তি ৰুত্তং. সা পন পথম জৰন চেতনা উপত্থম্ভন কিচ্চং পত্ৰাপি সব্বদুব্বলা এৰসিযা. কস্মা, অলদ্ধাসেৰনত্তা. সেস চেতনাযো এৰ বলৰতিযো সিযুং. কস্মা, লদ্ধা সেৰনত্তাতি দট্ঠব্বং. ‘‘সত্তজৰনপক্খে অধিপ্পেতত্তা উপলদ্ধব্বত্তা তং নসুন্দর’’ন্তি সম্বন্ধো. ‘‘ইতী’’তি ৰাক্যপরিসমাপনং. ‘‘যথা অপ্পমত্তকং হোতি. এৰমেৰং অপ্পমত্তকং হোতী’’তি যোজেতব্বং. ‘‘তথাহী’’তি ততো এৰাতি অত্থো. পট্ঠানেপি=কবল়ীকারোআহারো ইমস্সকাযস্স আহার পচ্চযেনপচ্চযো=তিৰিভত্তো. ইতরথা ‘কবল়ীকারো আহারো আহারসমুট্ঠানানং রূপানং আহারপচ্চযেন পচ্চযো’তি ৰিভত্তো সিযাতি. ‘‘অধুনাৰা’’তি ইমস্মিং ভৰে এৰ. এৰং ৰন্দনাযপযোজনং দীপেত্ৰা ইদানি সেসানং পিণ্ডত্থানং পযোজনং দীপেতুং ‘‘যস্মাপনা’’তিআদি ৰুত্তং. তত্থ, ‘‘আদিতোৰিদিতেসতী’’তিআদিম্হি-ভাসিস্সং অভিধম্মত্থ সঙ্গহ-ন্তি পদং সুত্ৰা ৰিঞ্ঞাতেসতি, ‘‘উস্সাহোজাযতি’’. ইমং উগ্গহেত্ৰা সুদুল্লভে অভিধম্মত্থে চ অনাযাসেন জানিস্সাম, তম্মূলকস্স চ অনুপাদা পরিনিব্বানন্তস্স পযোজনস্সভাগিনো ভৰিস্সামাতি চিত্তুপ্পাদ সম্ভৰতোতি অধিপ্পাযো.

পিণ্ডত্থানুদীপনা নিট্ঠিতা.

৪. পদত্থে. ‘‘বুজ্ঝী’’তি অঞ্ঞাসি. ‘‘এত্থা’’তি এতস্মিং পদে. চ সদ্দো ৰাক্যারম্ভ জোতকো. ৰাক্যা রম্ভোতি চ মূলৰাক্যে যং যং ৰত্তব্বং অৰুত্তং, তস্স তস্স কথনত্থায অনুৰাক্যস্স আরম্ভো. বুজ্ঝনকিরিযাৰুচ্চতিঞাণং. কথংপনঅৰিপরীতত্থে পৰত্তো সম্মাসদ্দো অসেস ব্যাপনং দীপেতীতি পুচ্ছায পুরিমত্থমে ৰব্যতিরেকতো চ অন্ৰযতো চ পুন ৰিত্থারেন্তো ‘‘তথাহী’’তিআদিমাহ. তত্থ, ‘‘তথাহী’’তি তস্স ৰচনস্স অযং ৰিত্থারোতি জোতেতি. ‘‘অৰিপরীত’’ন্তি কিরিযাৰিসেসন পদমেতং. ‘‘অত্তনো ৰিসযে এৰা’’তি অত্তনো ঞাণৰিসযে এৰ তেসং ৰিসযোচাতি সম্বন্ধো. যস্মা একোপি ধম্মো কালদেসসন্তানাদিভেদেন অনন্ত ভেদো হোতি. তস্মা পদেসঞাণিকা পচ্চেকবুদ্ধাদযো একধম্মংপি সব্বাকারতো জানিতুং ন সক্কোন্তি. তেনাহ ‘‘তেহী’’তিআদিং. তত্থ ‘‘সব্বাকারতো’’তি সভাৰতো, হেতুতো, পচ্চযতো, ফলতো, নিস্সন্দতো, কালতো, দেসতোতিআদিনা আকারেন. ‘‘যত্থা’’তি যস্মিং অৰিসযেধম্মে. ‘‘তে ৰিপরীতং বুজ্ঝেয্যুং, সো অৰিসযো নামধম্মোনত্থী’’তিযোজনা. তং ৰিত্থারেন্তো ‘‘তেহী’’তিআদিমাহ. তত্থ, ‘‘তিযদ্ধগতে’’তি তীসুকালেসু গতে পৰত্তে. ‘‘অদ্ধামুত্তকে’’তি কালত্তযৰিমুত্তকে. ‘‘হত্থমণিকেৰিযা’’তি হত্থ তলে ঠপিতমণিরতনানিৰিয. ‘‘সব্বে ধম্মা’’তিআদি পাল়িসাধকং. তত্থ, ‘‘আপাত’’ন্তি অভিমুখং পতনং. আবাধন্তিপি পাঠো, ওত্থরিত্ৰা উপট্ঠানন্তি অত্থো. ‘‘সব্বঞ্ঞুমহাভৰঙ্গ’’ন্তি সব্বেসংসব্বঞ্ঞুবুদ্ধানং পচ্ছিমভৰে পটিসন্ধিতো পট্ঠায পৰত্তং অট্ঠসু মহাৰিপাকেসু পথমমহাৰিপাকং ভৰঙ্গ চিত্তং. ‘‘তত্থা’’তি তস্মিং মহাভৰঙ্গে. ‘‘নিচ্চকালং উপট্ঠহন্তী’’তি সব্বকালং উপট্ঠানাকার পত্তা হুত্ৰা তিট্ঠন্তি. কস্মা, কস্সচি আৰরণস্স অভাৰতো. ইদংপিহি একং উপট্ঠানং নামাতি. ‘‘আৰজ্জনাযা’’তি মনোদ্ৰারাৰজ্জন চিত্তেন. ধম্মা মহন্তা. ভৰঙ্গং পরিত্তকং. তস্মা পরিত্তকং ভৰঙ্গং একক্খণে মহন্তানং ধম্মানং নপহোতীতি চোদকস্স অধিপ্পাযো. ‘‘নচোদেতব্বমেত’’ন্তি এতং ঠানং নচোদেতব্বং. ‘‘পরমুক্কংসপত্তান’’ন্তি এত্থ ‘‘উক্কংসো’’তি অচ্চুগ্গমো অচ্চুত্তরো. পরমো উক্কংসো পরমুক্কংসোতিৰিগ্গহো.

এৰং সম্মাসদ্দস্স অত্থং ৰিচারেত্ৰা ইদানি সংসদ্দস্স অত্থং ৰিচারেন্তো ‘‘সংসদ্দোপনা’’তিআদিমাহ. তত্থ, ‘‘উপসগ্গো’’তি উপসগ্গপদং. ‘‘পটিৰেধধম্মেসূ’’তি পটিচ্চসমুপ্পাদাদীনং পটিৰিজ্ঝনঞ্ঞাণেসু. নত্থি আচরিযো এতস্সাতি অনাচরিযো. সমাসন্তে ককারেন সহ অনাচরিযকো. অনাচরিযকস্স ভাৰো অনাচরিযকতা. তং অনাচরিযকতং. ততীযা রুপ্পসমাপত্তি নাম আকিঞ্চঞ্ঞাযতনজ্ঝানং. তং ভগৰা আল়ারস্স সন্তিকে উগ্গণ্হাতি. চতুত্থারুপ্পসমাপত্তি নাম নেৰসঞ্ঞা নাসঞ্ঞাযতনজ্ঝানং. তং উদকস্সসন্তিকে উগ্গণ্হাতীতি ৰুত্তং ‘‘আল়ারুদকমূলিকা’’তি. ‘‘অনলঙ্করিত্ৰা’’তি আৰজ্জনসমাপজ্জনাদিৰসেন অনলঙ্করিত্ৰা. অনাসেৰিত্ৰাতি ৰুত্তং হোতি. ‘‘ছড্ডিতত্তা’’তি এতাসমাপত্তিযোনালং বোধায, অথ খো যাৰদেৰ ততীয চতুত্থারুপ্পভৰপ্পটিলাভায সংৰত্তন্তীতি এৰং আদীনৰং দিস্ৰা ছড্ডিতত্তা. ‘‘বুজ্ঝনকিরিযাযা’’তি পটিৰেধঞ্ঞাণস্স. ‘‘কুতো পটিৰেধধম্মা’’তি তা কুতো পটিৰেধধম্মা হোন্তি. পটিৰেধধম্মা এৰ চ বুদ্ধভাৰাযপদট্ঠানাহোন্তীতি অধিপ্পাযো.

পাল়িযং. ‘‘পুব্বে অননুস্সুতেসুধম্মেসূ’’তি ইমস্মিং ভৰে ইতো পুব্বে কস্সচিসন্তিকে অননুস্সুতে সুচতুস্সচ্চ ধম্মেসু. ‘‘অভিসম্বুজ্ঝী’’তিপদে অভিসম্বোধিসঙ্খাতং অরহত্তমগ্গঞ্ঞাণং ৰুত্তং. তদেৰ ঞাণং সব্বঞ্ঞুতঞ্ঞাণস্স পদট্ঠানং হোতি. তপ্পচ্চযা তদনন্তরা এৰসব্বঞ্ঞুতঞ্ঞাণং পাতুব্ভৰতীতি ৰুত্তং ‘‘তত্থ চ সব্বঞ্ঞুতং পাপুণাতী’’তি. ‘‘তদনন্তরা’’তি চ অরহত্ত মগ্গৰীথিযাচ চতুন্নং পচ্চৰেক্খন ৰারানঞ্চ অনন্তরে কালেতি অত্থো. ‘‘নিমিত্তত্থে’’তি নিমিত্ত হেত্ৰত্থে. ‘‘ভুম্ম’’ন্তি অট্ঠকথাসুআগতং সত্তমীৰিভত্তিযানামং. তাসু হি পচ্চত্তৰচনং, উপযোগৰচনং, করণ ৰচনং, সম্পদান ৰচনং, নিস্সক্কৰচনং, সামিৰচনং, সুম্মৰচনন্তি এৰং অনুক্কমেন সত্তন্নং ৰিভত্তীনং নামানি আগতানীতি.

‘‘দসবলঞ্ঞাণেসূ’’তি ঠানাঠান কোসল্লঞ্ঞাণাদীসু দস ঞাণবলেসু. ‘‘ৰসিভাৰ’’ন্তি এত্থ অত্তনো ৰসং ৰত্তেতুং সমত্থতা সঙ্খাতোসত্তি ৰিসেসো ৰসোনাম. ৰসো এতস্স অত্থীতি ৰসী-ৰসিগণেহীতিআদীসুৰিয. ৰসিনো ভাৰো ৰসিভাৰো. তং ৰসিভাৰন্তি অত্থো. তেনাহ ‘‘ৰসিভাৰ’’ন্তি ইস্সরভাৰন্তি. কত্থচি পন ‘‘ৰসী’’তি ইত্থিলিঙ্গপদংপি দিস্সতি=তত্রিমা পঞ্চৰসিযো আৰজ্জনৰসীসমাপজ্জনৰসী=তিআদীসু.

সম্মাসম্বুদ্ধপদ.

৫. অতুলপদে. অনেকেহিগুণপদেহি পৰত্তিতাৰন্দনা ‘‘অনেকগুণপদৰিসযানাম’’. ‘‘ইতিকিংদুতীযেনা’’তি ইতি তস্মা দুতীযেন অতুলপদেন কিং পযোজনং অত্থীতি অত্থো. ‘‘নন সমত্থা’’তি নসমত্থা ন হোতীতি যোজনা. সমত্থা এৰাতি অধিপ্পাযো. ‘‘মত্তকারিনো’’তি পমাণকারিনো. ‘‘থেরো চ তেসং অঞ্ঞতরো’’, তস্মা মত্তং ন করোতি, দুতীযং অতুল পদং আহরীতি অধিপ্পাযো. ‘‘অপিচা’’তি কিঞ্চি ৰত্তব্বং অত্থীতি অত্থো. ‘‘নকেৰলং ৰন্দনায অন্তরাযনীৰারণমেৰ ইচ্ছি তব্বং হোতী’’তি যোজনা. ‘‘ৰন্দনাযা’’তি ৰন্দনাহেতু. সোপি পঞ্ঞাপাটৰাদি অত্থো. ‘‘গন্থপারিসুদ্ধিযা’’তি গন্থদোসানাম পদদোস ৰাক্যদোস অত্থদোসাদযো অত্থি. তেহি দোসেহি ইমস্স গন্থস্স পারিসুদ্ধিযা. কথং পন ৰন্দনায পঞ্ঞাপাটৰাদি অত্থোসম্ভৰতীতি ৰুত্তং ‘‘অনুস্সতিট্ঠানেসূ’’তিআদি. অনুস্সতিট্ঠানানি নাম বুদ্ধ ধম্ম সঙ্ঘসীলাদীনি. চিত্তসমাধানং আৰহতীতি চিত্তসমাধানাৰহো. ‘‘তিক্খাসূরাহুত্ৰাৰহতী’’তি গম্ভীরেসু অত্থ ব্যঞ্জন পদেসু অমন্দা ৰিস্সট্ঠা হুত্ৰা ৰহতি. ‘‘তদত্থাযপী’’তি পঞ্ঞাপাটৰাদি অত্থাযপি. গুণনামপদানং গুণত্থোনামৰিগ্গহ ৰাক্যেসু পাকটো, সিদ্ধপদেসু অপাকটো. তস্মা তানি ৰিগ্গহত্থং অজানন্তানং সন্তিকে নাম মত্তানি সম্পজ্জন্তীতি ৰুত্তং ‘‘যথাৰুত্ত ৰচনত্থযোগেপি…পে… পৰত্তত্তা’’তি. ‘‘সভাৰনিরুত্তিং জানন্তান’’ন্তি মাগধ ভাসং জানন্তানং. মাগধভাসাহি মূলভাসাতি চ অরিযভাসাতি চ মাগধভাসাতি চ পাল়িভাসাতি চ ধম্মনিরুত্তীতি চ সভাৰনিরুত্তীতি চ ৰুচ্চতি. ‘‘ভাৰত্থসুঞ্ঞ’’ন্তি এত্থ গুণনামানং গুণত্থো ভাৰত্থো নাম. সো এৰসকত্থোতি চ ৰচনত্থোতি চ ৰিগ্গহত্থোতি চ ৰুচ্চতি. কিরিযনামাদীসূপি এসেৰনযো. ‘‘সত্থূ’’তি সত্থুনো. ‘‘সমঞ্ঞামত্ত’’ন্তি নামসঞ্ঞামত্তং ভৰিতুং নারহতি. তথাহি অনাথপিণ্ডিকোসেট্ঠি রাজগহং অনুপত্তো বুদ্ধো লোকে উপ্পন্নোতি সুত্ৰা উদানং উদানেসি=ঘোসোপি খো এসোদুল্লভো লোকস্মিং যদিদং বুদ্ধো=তি. তস্মা বুদ্ধোতি নামংপি লোকে মহন্তং সুদুল্লভংগুণপদং হোতি. সম্মাসম্বুদ্ধ নামেৰত্তব্বমেৰনত্থীতি. ‘‘সভাৰনিরুত্তিং অজানন্তানং পন পদসহস্সং ৰুচ্চমানংপী’’তি তিট্ঠতু একং অতুলপদং, পদসহস্সংপি ৰুচ্চমানং সত্থুসমঞ্ঞামত্তমেৰ সম্পজ্জতি. তাদিসাহি জনা ইদং লোকে মহন্তং গুণপদন্তিপি নজানন্তি. ভাৰত্থং কিংজানিস্সন্তি.

‘‘অতুলো’’তি অঞ্ঞেন সো অসদিসোতি ৰা, অঞ্ঞো ৰাতেন সদিসোতস্সনত্থীতিৰা, - দ্ৰিধাপিঅত্থোলব্ভতি. সাধকগাথাযং ‘‘পটিপুগ্গলো’’তি যুগগ্গাহীপুগ্গলো. কিঞ্চাপি মক্খলি পূরণাদযো ৰিসুংৰিসুং - অহং সব্বঞ্ঞূ সব্বদস্সাৰী - তিচ, অহং সম্মাসম্বুদ্ধো-তিচ পটিজানন্তা যুগগ্গাহিনো হুত্ৰা ৰিচরন্তি. ধম্মতো পন সিনেরু পব্বত রাজস্স সন্তিকে সক্খর কথলানিৰিযসম্পজ্জন্তীতি. ‘‘অনচ্ছরিয’’ন্তি নতাৰ অচ্ছরিতব্বং হোতীতি অত্থো. ‘‘বুদ্ধভূতস্সা’’তি বুদ্ধভাৰং ভূতস্সপত্তস্স. ‘‘যং বুদ্ধ ভূতস্স অতুলত্তং, এতং অনচ্ছরিয’’ন্তি যোজনা. যদি চেতং অনচ্ছরিযং হোতি, কতমং পন তাৰ অচ্ছরিযং ভৰতীতি আহ ‘‘সম্পতিজাতস্সা’’তিআদিং. তত্থ ‘‘সম্পতিজাতস্সা’’তি অজ্জেৰজাতস্সপি অস্স ভগৰতো. কথং অতুলতা পঞ্ঞাযতীতি আহ ‘‘তদাহী’’তিআদিং. ‘‘একঙ্গণানী’’তি একতলানি. তদাহি বোধিসত্তস্সপুঞ্ঞানুভাৰেন অতিমহন্তো ওভাসো পাতুব্ভৰতি. = উল়ারো ওভাসো পাতুরহোসি অতিক্কম্মদেৰানং দেৰানুভাৰ=ন্তিহি ৰুত্তং. তেন ওভাসেন ফরিতা সব্বে পথৰি পব্বতাদযো জাতিফলিকক্খন্ধাৰিয সুপ্পসন্না হোন্তি. দসসহস্স চক্কৰাল়ানি একতলং হুত্ৰা পঞ্ঞাযন্তি. তেন ৰুত্তং ‘‘অনেকানি চক্কৰাল়সহস্সানি একঙ্গণানি অহেসু’’ন্তি. ‘‘পরমায পূজাযাতি থুতিমঙ্গলৰচনপূজায. ‘‘লোকস্সা’’তি সব্ব সত্তলোকতো. এৰং অচ্ছম্ভি ৰাচং নিচ্ছারেসি ধম্মতায সঞ্চোদিতত্তাতি অধিপ্পাযো. তত্থ ‘‘অচ্ছম্ভিৰাচ’’ন্তি ৰিসারদৰাচং. আসভিং ৰাচন্তিপি পাঠো. উত্তমৰাচন্তি অত্থো. ‘‘নিচ্ছারেসী’’তি উদাহরতি. ইদম্পি অনচ্ছরিযং, অঞ্ঞং পিততো অচ্ছরিযতরং অত্থীতি দস্সেতুং ‘‘যদাপনা’’তিআদি আরদ্ধং. পারমিতা গুণেহি তেন সদিসো কোচিনত্থেৰ থপেত্ৰা অঞ্ঞে চ মহাবোধি সত্তেতি অধিপ্পাযো. ‘‘অস্সা’’তি তেন সদিসস্স. ‘‘নত্থিভাৰো দীপেতব্বো’’তি সম্বন্ধো. ‘‘দীপেতব্বো’’তি বুদ্ধৰংসপাল়িতো আহরিত্ৰা দীপেতব্বো. ‘‘কুতোসাৰকবোধিসত্তানং সতসহস্সং সক্খিস্সতী’’তি যোজনা. পারমিযো পকারেনৰিচিনন্তি এতেনাতি পারমিপৰিচযো. ঞাণং. তংপনঞাণং মহাবোধিসত্তানং এৰ উপ্পন্নং নহোতি. পচ্চেকবোধিসত্ত সাৰকবোধিসত্তানংপি উপ্পন্নমেৰ. তদেৰ চ সব্বেসংপি বোধিসত্তানং নিযতব্যাকরণপ্পটিলাভে পধানকারণন্তি দস্সেতুং ‘‘সাৰকবোধিসত্তাপী’’তিআদি ৰুত্তং. তত্থ বোধিৰুচ্চতিৰিমোক্খঞ্ঞাণং. অরিযমগ্গস্সেতং নামং. বোধিম্হিসজন্তি লগ্গন্তীতি বোধিসত্তা. ‘‘লগ্গন্তী’’তি তপ্পটিলাভত্থায নিযত চিত্তা হোন্তীতি অত্থো. বোধি অত্থায পটিপন্না সত্তা বোধিসত্তাতিপি যুজ্জতি. বুদ্ধ সুঞ্ঞেপিলোকে কম্মস্সকতাঞাণে ঠত্ৰা ৰট্টদুক্খতো মোক্খধম্মপরিযেসিনো সত্তাতি ৰুত্তং হোতি. ‘‘সম্ভার ধম্মে’’তি দসৰিধে পারমি ধম্মে. ৰট্টং অনুসরন্তি অনুগচ্ছন্তীতি ৰট্টানুসারিনো. পথৰিযং পংসুচুণ্ণানি ৰিয পকতিযা ৰপুথুভূতাজনাতি পুথুজ্জনা. মহন্তাপুথুজ্জনাতি মহাপুথুজ্জনা. ৰট্টানুসারিনো চ তে মহাপুথুজ্জনাচাতি সমাসো. তেসং ভাৰোতি ৰিগ্গহো. অযং ভাৰোযেৰ তেসং ভূমীতি চ ৰুচ্চতি. অত্থতো পন মোক্খধম্মনিরপেক্খতা এৰ. অচ্ছন্দিকতাতিপি ৰুচ্চতি. ‘‘ওক্কন্তা’’তি পৰিট্ঠা. তযোনিযতা, বোধিসত্তনিযতো চ চূল়সোতাপন্ননিযতো চ অরিয সোতাপন্ননিযতো চ. তত্থ বোধিসত্তনিযতো বোধিসম্ভারবলেন সিদ্ধো. চূল়সোতাপন্ন নিযতো পচ্চযাকারানুবোধঞ্ঞাণবলেন. অরিযসোতাপন্ন নিযতো সোতাপত্তি মগ্গঞ্ঞাণ বলেন. তেসু বোধিসত্তনিযতো ইধ অধিপ্পেতোতি ৰুত্তং ‘‘একেন পরিযাযেনা’’তিআদি. ৰত্তব্বমেৰনত্থিতেসং দ্ৰিন্নং বোধিসত্তানং পারমি পৰিচযঞ্ঞাণ সম্পত্তিযা ৰিনা নিযতব্যাকরণ লাভা সঙ্কায এৰ অভাৰতোতি অধিপ্পাযো.

পদসিদ্ধিৰিচারেযং ৰুত্তং ৰিভাৰনিযং=তুলাযসমিতোতুল্যো. তুল্যো এৰ তুলোযকার লোপৰসেনা=তি. তংসন্ধায ‘‘য কারস্সৰাৰসেনা’’তি ৰুত্তং. যঞ্চৰুত্তং তত্থেৰ=অথৰাসমীতত্থে অকারপচ্চযৰসেন তুলাযসমীতোতুলো=তি. তং সন্ধায ‘‘অকারস্সৰাৰসেনা’’তি ৰুত্তং. তত্থ ‘‘তুলাযা’’তি লোকে ধারণতুলাসদিসায পঞ্ঞাযাতি অত্থো. ‘‘সমীতো’’তি সমং কতো. নহি তুলসদ্দো ভৰিতুং নযুত্তো. যুত্তো এৰাতি অধিপ্পাযো. কথং ৰিঞ্ঞাযতীতি আহ ‘‘তুলযিতু’’ন্তিআদিং. তত্থহি ‘‘তুলযিতুং অসক্কুণেয্যো’’তিৰচনেন তস্সকম্মসাধনত্তংদস্সেতি. ‘‘কম্মসাধনেনেৰা’’তি পুব্বে-তুলযিতব্বো অঞ্ঞেন সহ পমিতব্বোতি তুলোতি এৰং ইধৰুত্তেন কম্ম সাধন ৰচনত্থেনেৰ. ‘‘তদত্থসিদ্ধিতো’’তি তস্স ৰিভাৰনিযং ৰুত্তস্স দুৰিধস্স অত্থস্স সিদ্ধিতো. ‘‘ততো’’তি তুলসদ্দতো. চিন্তায কিং পযোজনং অত্থি. নত্থিযেৰাতি অধিপ্পাযো. ৰদতি সীলেনাতি ৰত্তা. ৰাদী পুগ্গলো. ৰত্তুনো ইচ্ছাৰত্তিচ্ছা. ৰত্তুং ইচ্ছাৰত্তিচ্ছাতিপিৰদন্তি. ৰত্তিচ্ছং অনুগতো সম্মুতি সঙ্কেতৰোহার সিদ্ধত্তাতি সমাসো. ‘‘এত’’ন্তি এতং দ্ৰিধাসিদ্ধৰচনং. ‘‘চে’’তি চেৰদেয্য. ‘‘না’’তি নযুত্তং. ‘‘যথাসুত’’ন্তি তুল ইতি সুতং. ‘‘যুত্ত’’ন্তি যথাসুত নিযামেনেৰ যুত্তং ৰজ্জেত্ৰা. ‘‘অস্সুতস্সা’’তি ধারণতুলাপরিযাযস্স ইত্থিলিঙ্গতুলাসদ্দস্স. ততোযেৰযকার যুত্তস্সতুল্যসদ্দস্স চ অস্সুতস্স. ইত্থিলিঙ্গেসতি, ততোপি একো অকারোতি কত্ৰা সমীতত্থে দুতীযো তদ্ধিত অকারোপি অস্সুতোযেৰনামহোতি. ‘‘পরিকপ্পনাযা’’তি পরিকপ্পেত্ৰা কথনায. পযোজনাভাৰতো ন যুত্তন্তিসম্বন্ধো. অতুলপদং.

৬. এৰং দ্ৰিন্নং পদানং পদত্থ সংৰণ্ণনং কত্ৰা ইদানি তেসংযেৰ অত্থুদ্ধারসংৰণ্ণনং করোন্তো ‘‘ইমেহি পনা’’তিআদিমাহ. তত্থ ‘‘সম্পদা’’তি সম্পত্তিযো. ‘‘বোধিসম্ভারসম্ভরণং নাম’’ সমতিং সপারমীনং পরিপূরণং. ‘‘মহাৰজিরঞ্ঞাণ’’ন্তি ভগৰতো আসৰক্খযঞ্ঞাণম্পি ৰুচ্চতি. তস্স পুব্বভাগে বুদ্ধভাৰত্থায অনুপদধম্মৰিপস্সনাৰসেন ছত্তিংস কোটি সতসহস্স সঙ্খানং দেৰসিকং ৰল়ঞ্জনকপ্ফলসমাপত্তীনং পুব্বভাগ ৰিপস্সনাঞাণম্পি মহাৰজিরঞ্ঞাণন্তি ৰুচ্চতি. সব্বম্পেতং মহাটীকাযং ৰুত্তং. ‘‘মহাবোধিযা’’তি সব্বঞ্ঞু বুদ্ধানং অভিসম্বোধি সঙ্খাতস্স অগ্গমগ্গঞ্ঞাণস্স. পহিয্যন্তি পহাতব্বা ধম্মা এতেনাতি পহানং. পজহন্তি পহাতব্বেধম্মেএতেনাতিৰা পহানন্তি কত্ৰা তং অগ্গমগ্গঞ্ঞাণম্পিতং ৰিপস্সনাঞাণম্পি পহানন্তি ৰুচ্চতীতি ইমিনা অধিপ্পাযেন ‘‘পহানসম্পদাযং ৰা সা সঙ্গহিতা’’তি ৰুত্তং. পঞ্চসীলানি. পাণাতিপাতস্স পহানংসীলং, ৰেরমণিসীলং, চেতসিকংসীলং, সংৰরোসীলং, অৰীতিক্কমোসিলন্তিআদীসুৰিয এত্থহি পহানসীলং নাম যথা ৰুত্তেন অত্থেন ৰেরমণিসীলমেৰাতি যুজ্জতি. পহানং নাম কোচিধম্মো নহোতীতি অধিপ্পাযে পন সতিপহান সীসেন পহানসাধকং তদেৰঞাণদ্ৰযং উপচারেনপহানন্তি গহেতব্বং. ইতরথা পহানসম্পদা নাম অসারা অফলাতি আপজ্জেয্যাতি. পচ্চেকবুদ্ধ বুদ্ধসাৰকা কিলেসে পজহন্তাপি ৰাসনায সহ অপ্পজহনতো চিত্ত সন্তানে মোহৰাসনায ৰিজ্জমানত্তা সব্বঞ্ঞু ভাৰং নগচ্ছন্তি. তস্মা যথাতেসং কিলেসপ্পহানং পহানসম্পদা নাম নহোতি. নতথাসব্বঞ্ঞুবুদ্ধানন্তি আহ ‘‘সহৰাসনাযা’’তিআদিং. ৰিভাৰনিযংঞাণসম্পদা পথমং ৰুত্তা. ততো পহান সম্পদা. টীকাযং পন পহানসম্পদা পথমং ৰুত্তা. ততো অধিগম সম্পদানাম ৰুত্তা. ততো ঞাণসম্পদা. পহানসম্পদাযঞ্চ অগ্গমগ্গঞ্ঞাণং দস্সিতং. অধিগম সম্পদাতি চ সব্বঞ্ঞুতঞ্ঞাণপ্পটিলাভো ৰুত্তো. ঞাণসম্পদাযম্পন তেহি দ্ৰীহি ঞাণেহি অৰসেসানিদসবলঞ্ঞাণাদীনিসব্বঞ্ঞাণানিদস্সিতানি. ইধপি টীকানযমেৰ সম্ভাৰেন্তো ‘‘পহানসম্পদাযেৰপনা’’তিআদিমাহ. ‘‘সব্বঞ্ঞুতঞ্ঞাণপ্পদট্ঠান’’ন্তি সব্বঞ্ঞুতঞ্ঞাণস্সপদট্ঠানং, আসন্ন কারণং. ‘‘ন হি মগ্গঞ্ঞাণতো অঞ্ঞা পহানসম্পদানাম অত্থি’’. পরমত্থতো নত্থীতি অধিপ্পাযো. ইদঞ্চ ৰিসুদ্ধিমগ্গে=পহানন্তি কোচি ধম্মোনাম নত্থি অঞ্ঞত্র ৰুত্তপ্পকারানং পাণাতিপাতাদীনং অনুপ্পাদমত্ততো=তি আগতত্তা ৰুত্তং. পহাযকধম্মসমাদানেন পন পহাতব্ব ধম্মানং অনুপ্পাদো নাম একোপণীত ধম্মোহোতি. একং সন্তি পদং হোতি. তথাহি ৰুত্তং পটিসম্ভিদা মগ্গে=উপ্পাদো ভযং, অনুপ্পাদো খেমন্তি সন্তিপদে ঞাণং. পৰত্তি ভযং, অপ্পৰত্তি খেমন্তি সন্তিপদেঞাণ=ন্তি. তদঙ্গপ্পহানং পনতদঙ্গঅনুপ্পাদো নাম. ৰিক্খম্ভনপ্পহানং ৰিক্খম্ভন অনুপ্পাদো নাম. সমুচ্ছেদপ্পহানং সমুচ্ছেদ অনুপ্পাদো নামাতি ৰত্তব্বং. ইধ পন অনুপ্পাদ সম্পাপকং ৰিপস্সনা ঞাণঞ্চ মগ্গঞ্ঞাণঞ্চ উপচারেন পহানন্তি অধিপ্পেতং. কস্মা, উপরিঞাণ সম্পদাদীনং পচ্চযত্তাতি দট্ঠব্বং. ‘‘সম্পদাসঙ্করো’’তি সম্পদাসম্ভেদো, সম্পদাসম্মিস্সো. ‘‘ঞাযাগত’’ন্তি যুত্তিতো আগতং. ‘‘সীলাদিগুণেহী’’তি সীল সমাধি পঞ্ঞা ৰিমুত্তি ৰিমুত্তিঞ্ঞাণদস্সন গুণেহি. ‘‘ইদ্ধিধম্মেহী’’তি ইদ্ধিৰিধাভিঞ্ঞাদীহি ইদ্ধিগুণেহি. ‘‘লক্খণানুব্যঞ্জনপ্পটিমণ্ডিতস্সা’’তি দ্ৰত্তিংস মহাপুরিসলক্খণেহি চ অসীতি খুদ্দকলক্খণেহি চ পটিমণ্ডিতস্স. ‘‘আসযো’’তি চিত্ত সন্তানে অধিসযিতো ইচ্ছাৰিসেসো. ‘‘অজ্ঝাসযস্সা’’তি অলোভজ্ঝাসযাদিকস্সঅজ্ঝাসযস্স. ‘‘উল়ারতা’’তি পণীততা. ‘‘হিতজ্ঝাসযতা’’তিহিতকামতা. অপরিপাক গতিন্দ্রিযানং সত্তানং ইন্দ্রিযপরিপাককালাগমনঞ্চ এত্থ ৰত্তব্বং. ‘‘অভিঞ্ঞাতান’’ন্তি অতিপাকটানং. ‘‘দ্ৰেপহানসম্পদা’’তি দ্ৰেপহান সম্পদা ঞাণসম্পদা. সম্মাসম্বুদ্ধপদে. ‘‘সামং সচ্চানি অভিসম্বুজ্ঝী’’তি এত্থ অভিসম্বোধিসঙ্খাতং অগ্গমগ্গঞ্ঞাণং গহিতং. তঞ্চ পহানকিচ্চপ্পধানং হোতি. ‘‘তত্থ চ সব্বঞ্ঞুতং পত্তো’’তি এত্থ সব্বঞ্ঞুতঞ্ঞাণং. ‘‘বলেসু চ ৰসিভাৰ’’ন্তি এত্থ দসবলঞ্ঞাণানি গহিতানি. তেন ৰুত্তং ‘‘দ্ৰে…পে… সম্মাসম্বুদ্ধপদেনৰিভাৰিতা’’তি.

সম্পদানিট্ঠিতা.

৭. সসদ্ধম্মগণুত্তমপদে. যথা=সসঙ্ঘংলোকনাযকং নমস্সিস্সং=তি এত্থসহসদ্দস্স সমৰাযত্থত্তা অহংলোকনাযকঞ্চ সঙ্ঘঞ্চ নমস্সিস্সন্তি এৰং সমৰাযত্থো ৰিঞ্ঞাযতি. তথা ইধপি সম্মাসম্বুদ্ধঞ্চসদ্ধম্মঞ্চ গণুত্তমঞ্চ অভিৰাদিযামীতি এৰং কিরিযাসমৰাযত্থো সহসদ্দেন দীপিতোতি দস্সেতুং ‘‘দূরতোহং…পে… এৰমিদং দট্ঠব্ব’’ন্তি ৰুত্তং. ‘‘ইদ’’ন্তি সসদ্ধম্মগণুত্তমপদং. এত্থ চ‘‘সমৰাযো’’তি দ্ৰিন্নং তিণ্ণং বহূনং ৰা অত্থানং একস্মিং দব্বেৰা গুণেৰাকিরিযাযৰাসমং অৰেচ্চ অযনংপৰত্তনং সমৰাযো. পচ্চানুতাপ পচ্চানুমোদনাদিঠানেসু=অহং পুব্বেদানং নদদিস্সং, সীলং নরক্খিস্সং. - অনেকজাতি সংসারং সন্ধাৰিস্স=ন্তিআদিনা অতীতেপিকালে অনাগতৰচনং পযুজ্জতীতি আহ ‘‘নমস্সিস্স’’ন্তি নমস্সিংতি. ‘‘গুণীভূতান’’ন্তি সমাসপদে ৰিসেসনভূতানং, অপ্পধানভূতানন্তি অত্থো. অব্ভূত তব্ভাৰেচাযং ঈকারো. যথা, কাকো সেতী ভৰতি, বকো কণ্হীভৰতীতি. এত্থ চ ‘‘সেতী ভৰতী’’তি অসেতপুব্বো সেতোভৰতি. ‘‘কণ্হীভৰতী’’তি অকণ্হপুব্বো কণ্হোভৰতীতি অত্থো. তথা ইধপি. বুদ্ধং ধম্মঞ্চ সঙ্ঘঞ্চৰন্দিত্ৰা-তিআদীসু ৰিসুংৰিসুং পধানত্তা অগুণভূতাপি ধম্মসঙ্ঘা ইধসমাসপদে অঞ্ঞপদত্থস্সগুণভূতাহোন্তি. অযং অব্ভূততব্ভাৰত্থো নাম. ‘‘অভিৰাদিতভাৰো’’তি ৰুত্তে তপচ্চযস্স বহুলং অতীতকালৰিসযত্তা পুব্বেগন্থারম্ভকালে ধম্ম সঙ্ঘানংপি থেরস্স ৰন্দনাসিদ্ধি দস্সিতা হোতি. ‘‘অভিৰাদেতব্ব ভাৰো’’তি ৰুত্তেপন তব্বপচ্চযস্সকালসামঞ্ঞৰিসযত্তান তথা দস্সিতা হোতি. দানং দাতব্বং, সীলং রক্খিতব্বন্তিআদীসু ৰিয ধম্মসঙ্ঘানামসব্বকালংপি অভিৰাদেতব্বাতি. এৰং ধম্মসঙ্ঘানং সব্বকালংপি অভিৰাদনারহগুণো এৰ দস্সিতোতি ইমমত্থং দস্সেতুং ‘‘তত্থা’’তিআদি ৰুত্তং. তত্থ, ‘‘অভিৰাদন’’ন্তি ইদং কিরিযাসমৰাযদস্সনতো ৰুত্তং. কালৰিসেসং পন নদীপেতিযেৰ. ‘‘অত্তনো নিদস্সনেনা’’তি সপুত্তদারো আগতোতি অত্তনা নীহরিত্ৰা দস্সিতেন পযোগেন. সোহি পযোগো কিরিযা সমৰাযস্সেৰ. নগুণসমৰাযস্সাতি. এত্থ চ থেরস্স ৰন্দনাৰচনে থেরো ইমেহি যেৰপদেহি রতনত্তযংতীহিদ্ৰারে হিৰন্দতীতি গহেত্ৰা ‘‘অভিৰাদিযা’’তি এত্থ অভিৰাদিযাধীতি চ অত্থং নীহরন্তি. অপ্পধান কিরিযাপদে পন তদত্থ নীহরণং অসম্ভাৰেন্তো ‘‘অপিচা’’তিআদিমাহ. তত্থ ‘‘অপিচা’’তি কিঞ্চি ৰত্তব্বং অত্থীতি অত্থজোতনে অযং নিপাতসমুদযো. ‘‘গন্থপ্পটিঞ্ঞাযা’’তি গন্থপ্পটিঞ্ঞাৰচনেন. ‘‘সহঘটেত্ৰা’’তি একতো সম্বন্ধিত্ৰা.

ৰচনত্থে. সধনো পুরিসো, ধনৰাপুরিসো-তি আদযো সমাসতদ্ধিতসদ্দা যেভূয্যেন অতিস্সযত্থ দীপকা হোন্তি. নহি অপ্পকেন ধনেন তথা ৰোহরন্তি. তস্মা ইধাপি তথা রূপং অতিস্সযত্থং দস্সেতুং ‘‘অত্তনানিম্মিতেন…পে… সরণভূতেনা’’তি ৰুত্তং. তত্থ, ‘‘অত্তনানিম্মিতেনা’’তি অত্তনা উপ্পাদিতেন. ‘‘নহী’’তিআদিনা তদত্থমেৰ ব্যতিরেকতো ৰিৰরতি. তত্থ, ‘‘পরনিম্মিতেনা’’তি বুদ্ধনিম্মিতেনাতি অধিপ্পাযো. ‘‘তথা থোমন’’ন্তি সসদ্ধম্ম গণুত্তমন্তি থোমনং. ‘‘ইদংপী’’তি দুতীযত্থ সম্পিণ্ডনে অযংপিকারো. নকেৰলং পুরিমপদদ্ৰযমেৰ সত্থু অসাধারণগুণপদং হোতি. অথ খো ইদংপি পদং সত্থু পচ্চেকবুদ্ধাদীহি অসাধারণ পদমেৰহোতীতি যোজনা.

ধম্মৰচনত্থে. ‘‘ধারেতী’’তি ৰহতি. গাথাযং ‘‘রক্খতী’’তি অপাযাদিদুক্খতোরক্খতি. ‘‘যেস’’ন্তি কিলেসানং. ‘‘ইমস্মিং অত্থে’’তি কিলেসসমুচ্ছিন্দনসঙ্খাতে ধারণত্থে. ‘‘নিব্বানঞ্চনিপ্পরিযাযতো ধম্মো নামা’’তি কস্মা ৰুত্তং, ননু নিস্সরণপ্পহানমেৰ নিব্বানস্স কিচ্চং, ইদঞ্চ সমুচ্ছেদপ্পহানন্তি চোদনং পরিহরন্তো ‘‘অরিযমগ্গাহী’’তিআদিমাহ. ‘‘নিব্বানেন সহেৰ হুত্ৰা’’তি আরম্মণাধিপতিভূতং আরম্মণূ পনিস্সযভূতঞ্চ নিব্বানং অত্তনো পতিট্ঠং কত্ৰাতি অধিপ্পাযো. অপিচ, সমুচ্ছেদোতি চ নিস্সরণন্তি চ অত্থতো সমানগতিকং হোতি. তস্মা নিস্সরণংপি মুখ্যধারণ মেৰাতি দট্ঠব্বং. নিস্সরণমেৰৰা পধানধারণন্তি পিযুজ্জতিযেৰ. ‘‘ধারণূপাযোযেৰহোতি’’. নমুখ্যধারণং. কস্মা, সমুচ্ছেদ কিচ্চাভাৰতো. ‘‘এতেপঞ্চ পরিযাযধম্মাযেৰ’’. কস্মা, নিব্বানস্সৰিযমগ্গানং সমুচ্ছেদ কিচ্চে অসহাযত্তাতি. এত্থ চ ‘‘সামঞ্ঞপ্ফলানী’’তি সমণস্স ভাৰো সামঞ্ঞং. অরিযমগ্গস্সেতং নামং. সামঞ্ঞস্সফলং সামঞ্ঞপ্ফলং. দুতীযৰিকপ্পে অকিচ্চ পচ্চযভূতাপি কেচিকিতকপচ্চযা কম্মত্থেগতা কিচ্চপচ্চযানংপি অত্থং দীপেতি. যথা, দিট্ঠং, সুতং, মুতং, ৰিঞ্ঞাতন্তি ৰুত্তং ‘‘ধারণারহো’’তি. ‘‘যথা ৰুত্ত ধম্মা যেৰা’’তি পঞ্চমুখ্যধম্মা, পঞ্চপরিযাযধম্মাযেৰ. ‘‘কেচী’’তি চত্তারো মগ্গা. পুন ‘‘কেচী’’তি নিব্বানমেৰ. বহুৰচন সোতেপতিতত্তা এত্থ বহুৰচনং রুল়ং. পুন ‘‘কেচী’’তি চত্তারো সামঞ্ঞপ্ফল ধম্মা. ‘‘কেচী’’তি পরিযত্তি ধম্মো. এত্থাপি বহুৰচনং সোতপতিতমেৰ. ‘‘ধারেন্ত’’ন্তি ধারেন্তং পুগ্গলং. ততীয ৰিকপ্পে ‘‘অপতমানং ৰহন্তী’’তি অপতমানং কত্ৰা ৰহন্তি. চতুত্থ ৰিকপ্পে ‘‘এত্থা’’তি এতস্মিং ধম্মে. ধম্মোৰদীপং এতেসন্তি ধম্মদীপা. ধম্মোৰ পটিসরণং এতেসন্তি ধম্মপ্পটিসরণা. ধম্মদীপা ভিক্খৰে ভৰথ ধম্মপ্পটিসরণা, অনঞ্ঞপ্পটিসরণা তিহি ৰুত্তং. লদ্ধা পতিট্ঠা এতেসন্তি লদ্ধপ্পতিট্ঠা. যুজ্জতিযেৰ. ধম্মদীপপাঠানুলোমত্তাতি অধিপ্পাযো. ধম্মৰিচারণাযং, চোদকোপটিপত্তি ধম্মং দসৰিধ ধম্মতো অঞ্ঞংমঞ্ঞমানো ‘‘কস্মা’’তিআদিনা চোদেতি. সো পন পটিপত্তি ধম্মো ততো অঞ্ঞোন হোতি, তত্থেৰ অন্তোগধোতি দস্সেন্তো ‘‘সোপনা’’তিআদিমাহ. ‘‘মগ্গস্স পুব্বভাগপ্পটিপদা হোতী’’তি যথা অম্বরুক্খো অম্বপুপ্ফঅম্বপ্ফলস্স পতিট্ঠা ভাৰেন পুব্বভাগ নিস্সযো হোতি. কস্মা, ইতোযেৰতস্স পুপ্ফপ্ফলস্স জাতত্তা এত্থেৰসং ৰড্ঢিতত্তা চ. তথা পটিপত্তি ধম্মোপি অরিযমগ্গপ্ফলস্সপতিট্ঠাভাৰেন পুব্বভাগূপনিস্সযপ্পটিপদাহোতি. কস্মা, ইতোযেৰ তস্সজাতত্তা এত্থেৰসং ৰড্ঢিতত্তা চ. ৰুত্তঞ্হেতং মহাৰগ্গ সংযুত্তে. সেয্যথাপি ভিক্খৰে যেকেচি মেবীজগামভূতগামাৰুড্ঢিং ৰিরুল়িং ৰেপুল্লং আপজ্জন্তি. সব্বেতে পথৰিং নিস্সায পথৰিং পতিট্ঠায. এৰমেৰ খো ভিক্খৰে ভিক্খুসীলং নিস্সায সীলেপতিট্ঠায অরিযং অট্ঠঙ্গীকং মগ্গং ভাৰেন্তো ৰুড্ঢিং ৰিরুল়্হিং ৰেপুল্লং পাপুণাতি ধম্মেসূতি. ‘‘পুব্বচেতনাৰিযদানে’’তি যথা তিৰিধং পুঞ্ঞং, দানমযং পুঞ্ঞং সীলমযং পুঞ্ঞং ভাৰনামযং পুঞ্ঞন্তি ৰুত্তে দানৰত্থু পরিযেসনতো পট্ঠায দানং আরব্ভপৰত্তা সব্বা পুব্বভাগ চেতনা দানৰচনে সঙ্গহিতা দানন্ত্ৰেৰ সঙ্খ্যংগতা. এৰং সো পটিপত্তি ধম্মো অরিয মগ্গৰচনে এৰসঙ্গহিতো, অরিযমগ্গো ত্ৰেৰ সঙ্খ্যং গতোতি ৰুত্তং হোতি.

ইমস্মিং ধম্মসংসন্দনে অপরম্পি ৰত্তব্বং ৰদন্তো ‘‘অপিচা’’তিআদিমাহ. তত্থ ‘‘যদগ্গেনা’’তি যেনকারণকোট্ঠাসেন ধারণূপাযোতিআদিনা কারণভাগেনাতি অত্থো. ৰন্দনং অরহ তীতি ৰন্দনেয্যো. তস্মিং ৰন্দনেয্যে. ‘‘পুথুজ্জনকল্যাণকো’’তি এত্থ তিৰিধো কল্যাণকো ৰিনযকল্যাণকো সুত্তন্তকল্যাণকো অভিধম্মকল্যাণকোতি. তত্থ ৰিনযে পঞ্ঞত্তায কল্যাণপ্পটিপত্তিযা সমন্নাগতো ভিক্খু ৰিনযকল্যাণকো নাম. সো ইধ ভিক্খু পাতিমোক্খ সংৰরসংৰুতো ৰিহরতি আচার গোচর সম্পন্নো, অণুমত্তেসু ৰজ্জেসু ভযদস্সাৰী সমাদায সিক্খতি সিক্খাপদেসূতি এত্থ ৰেদিতব্বো. তত্থ ৰিনযে পঞ্ঞত্তাকল্যাণপ্পটিপত্তিদুৰিধা, আদি ব্রহ্মচরিযকসীলং অভিসমচারিকসীলন্তি. তত্থ, উভতোৰিভঙ্গপরিযাপন্নং সীলং আদিব্রহ্মচরিযকং নাম. খন্ধকপরিযাপন্নং সীলং অভিসমচারিকং নাম.

সুত্তন্তেসু ৰুত্তায কল্যাণপ্পটিপত্তিযা সমন্নাগতো গহট্ঠো ৰা পব্বজিতো ৰা সুত্তন্ত কল্যাণকো নাম. সো চতূহি ভিক্খৰে ধম্মেহি সমন্নাগতো অরিযসাৰকো সব্বং দুগ্গতিভযং সমতিক্কন্তো হোতি. কতমেহি চতূহি. ইধ ভিক্খৰে অরিযসাৰকো বুদ্ধে অৰেচ্চপ্পসাদেন সমন্নাগতো হোতি ইতি পিসো ভগৰা…পে… সত্থাদেৰমনুস্সানং, বুদ্ধো, ভগৰাতি. ধম্মে অৰেচ্চপ্পসাদেন সমন্নাগতো হোতি স্ৰাক্খাতো ভগৰতা ধম্মো…পে… পচ্চত্তং ৰেদিতব্বো ৰিঞ্ঞূহীতি. সঙ্ঘে অৰেচ্চপ্পসাদেন সমন্নাগতো হোতি সুপ্পটিপন্নো ভগৰতো সাৰকসঙ্ঘো…পে… অনুত্তরং পুঞ্ঞক্খেত্তং লোকস্সাতি. অরিযকন্তেহি সীলেহি সমন্নাগতো হোতীতি এত্থ ৰেদিতব্বো. তত্থ বুদ্ধে অৰেচ্চপ্পসাদো নাম অরহং, সম্মাসম্বুদ্ধো, তিআদিকানং গুণপদানং অত্থ জাননঞ্ঞাণেন যুত্তো পসাদো. অরিযেহিকামীযন্তি ইচ্ছীযন্তীতি অরিযকন্তানি. সুপরিসুদ্ধস্স আজীৰট্ঠমকসীলস্সেতং নামং. চত্তারিমানি ভিক্খৰে সোতাপত্তিযঙ্গানি. কতমানি চত্তারি. সপ্পুরিসসংসেৰো, সদ্ধম্মস্সৰনং, যোনিসো মনসিকারো, ধম্মানু ধম্মপ্পটিপত্তীতিআদীনি বহূনি সুত্তন্তানি ইধ ৰত্তব্বানি.

অভিধম্মে ৰা সুত্তন্তেসু ৰা ৰুত্তায কল্যাণপ্পটিপত্তিযা সমন্নাগতোগহট্ঠো ৰা পব্বজিতো ৰা অভিধম্মকল্যাণকো নাম. সো ইধ সুতৰা অরিযসাৰকো অরিযানং দস্সাৰী অরিয ধম্মস্সকোৰিদো অরিযধম্মেসু ৰিনীতো. সো রূপং অত্ততো ন সমনুপস্সতীতি এত্থ ৰেদিতব্বো. তত্থ, ‘‘সুতৰা’’তি এত্থ খন্ধা, যতন, ধাতু, পটিচ্চসমুপ্পাদ, সতিপট্ঠানা, দীসু উগ্গহ পরিপুচ্ছা ৰিনিচ্ছযঞ্ঞাণ সমন্নাগতো গহট্ঠো ৰা পব্বজিতো ৰা সুত ৰা নামাতি অট্ঠকথাসু ৰুত্তো. সো এৰ পুথুজ্জন কল্যাণকোতি চ ৰুচ্চতি.

দুৰে পুথুজ্জনা ৰুত্তা, বুদ্ধেনাদিচ্চবন্ধুনা;

অন্ধো পুথুজ্জনো একো, কল্যাণেকো পুথুজ্জনো. তি

চ ৰুত্তং. অঙ্গুত্তরে পন চতুক্কনিপাতে কতমো পুগ্গলো অপ্পস্সুতো সুতেন উপপন্নো হোতি. ইধেকচ্চো ধম্মং সুণাতি একাযপি চাতুপ্পদিকায গাথায অত্থ মঞ্ঞায ধম্ম মঞ্ঞায ধম্মা নু ধম্মপ্পটিপন্নো হোতি. অযং অপ্পস্সুতোসুতেন উপপন্নোতি ৰুত্তং. সুতৰাতি চ সুতেন উপপন্নোতি চ অত্থতো একন্তি. পুথুজ্জন কল্যাণকো সঙ্ঘে সেক্খেসুসঙ্গহিতো. ৰুত্তংহেতং পরিৰারে কে সিক্খন্তীতি. পুথুজ্জন কল্যাণকেন সদ্ধিং সত্ত অরিযপুগ্গলা সিক্খন্তি. অরহা খীণাসৰো সিক্খিতসিক্খোতি. দক্খিণ ৰিভঙ্গসুত্ত অট্ঠকথাযং পন. তি সরণ সরণং গতো উপাসকোপি সোতাপত্তিফলসচ্ছিকিরিযায পটিপন্নে সঙ্গহিতোতি ৰুত্তং. তত্থ, সোতাপত্তিফলসচ্ছিকিরিযায পটিপন্নোনাম সোতাপত্তি মগ্গট্ঠো অরিযপুগ্গলো. ‘‘সোহিসঙ্গহিতো’’তি সম্বন্ধো. ‘‘এত্তাৰতা পটিক্খিত্তং হোতী’’তি সম্বন্ধো. ‘‘সঙ্ঘে অসঙ্গহিতো’’তি সঙ্ঘংসরণং গচ্ছামীতি চ, সুপ্পটিপন্নো ভগৰতো সাৰকসঙ্ঘোতি চ, এৰরূপেসু ঠানেসু আগতে সঙ্ঘ ৰচনে অসঙ্গহিতো. ‘‘ন হিতং সরণং গচ্ছন্তস্সসরণগমনং সম্পজ্জতী’’তি ইদং সঙ্ঘংসরণং গচ্ছামীতি এত্থ সঙ্ঘ ৰচনেতস্সপুগ্গলস্স অসঙ্গহিত ভাৰসাধনত্থং ৰুত্তং. তেনাহ ‘‘তং পটিক্খিত্তং হোতী’’তি. সচে পন সব্বং ভগৰতো সাৰকসঙ্ঘং অনুদ্ধিস্সতমেৰ পুগ্গলং সঙ্ঘংসরণং গচ্ছেয্য আযস্মন্তং সরণং গচ্ছামীতি. সরণ গমনং ন সম্পজ্জতিযেৰ. অথ সব্বং ভগৰতো সাৰকসঙ্ঘং উদ্দিস্স তস্স সন্তিকে সরণং গচ্ছেয্য সঙ্ঘং সরণং গচ্ছামীতি. সম্পজ্জতিযেৰ. ইদঞ্চ দহরকালে সব্বপ্পথমং সরণগমনং সন্ধায ৰুত্তং. ইদঞ্হি সরণ গমনং নাম সকিং গহেত্ৰা রতনত্তযে সদ্ধং অজহন্তস্স যাৰজীৰংপি ন ভিজ্জতি. পুনপ্পুনং গহণ কিচ্চং নত্থি. পুনপ্পুনং গণ্হন্তেপি দোসোনত্থি. পুনপ্পুনং পুঞ্ঞং ৰড্ঢতি. সব্বপ্পথমং গহণকালে চ অঞ্ঞেন দিন্নত্তা লদ্ধং নহোতি. অত্তনোৰচী ভেদেন লদ্ধং হোতি. তস্মা অঞ্ঞস্স সন্তিকে অগ্গহেত্ৰা সযমেৰ ৰচীভেদং গণ্হন্তস্স গহট্ঠস্স সরণ গমনং সম্পজ্জতিযেৰ. তথা সব্বানি গহট্ঠসীলানীতি. সামণের সরণ গমনম্পন ভিক্খুনাদিন্নমেৰ লব্ভতি. তঞ্চ খো উভিন্নংপিঠানকরণ সম্পত্তিযা সতি এৰাতি দট্ঠব্বং. ‘‘ৰো’’তি তুম্হাকং. যোধম্মো চ দেসিতো যোৰিনযোচপঞ্ঞত্তো. ‘‘মমচ্চযেনা’’তি মমাতিক্কমেন. মযি পরিনিব্বুতেতি ৰুত্তং হোতি. সত্থা ভৰিস্সতীতি পাঠসেসো. ‘‘সংৰণ্ণিতো’’তি সুট্ঠুতরংৰণ্ণিতো থোমিতো. ‘‘কল্যাণপ্পটিপত্তিযং ঠিতোপী’’তি তীসুকল্যাণপ্পটিপত্তীসু অঞ্ঞতরপ্পটিপত্তিযং ঠিতোপি. ‘‘অট্ঠিতোপী’’তি সব্বপ্পটিপত্তিবাহিরো দুস্সীলোপাপধম্মোতি অধিপ্পাযো. ৰিসেসতো পন ৰিনযপ্পটিপত্তি এৰ ইধ পরিযত্তাতি দট্ঠব্বা. ‘‘সো’’তি সোদুস্সীলো পাপধম্মো. অত্তনোপি সরণং নহোতি. অৰস্সং অপাযগামীযেৰ সো হোতীতি অধিপ্পাযো. ‘‘কুতো সরণং ভৰিস্সতী’’তি যোজনা. ‘‘অনেকেসু সুত্তসহস্সেসূ’’তি ৰিনযেপি বহূনি গরহসুত্তপদানি দিস্সন্তি সুত্তন্তেসুপি. ৰিসেসতো পন অগ্গিক্খন্ধোপমসুত্তাদীসু.

সদ্ধম্মৰচনত্থে. কিলেসেসমেন্তি ৰূপসমেন্তীতি সন্তোতি ৰচনত্থং সন্ধায ‘‘সমিতকিলেসান’’ন্তি ৰুত্তং. সন্ত সদ্দো পন পসত্থেচ, পূজিতেচ, সপ্পুরিসেচ, পণ্ডিতেচ, দিস্সতীতি ইমং অভিধানত্থং সন্ধায ‘‘পসত্থান’’ন্তিআদিৰুত্তং. ‘‘সচ্চোৰা ধম্মো সদ্ধম্মো’’তি যোজনা. এতেন সভাৰতো অত্থিসংৰিজ্জতীতি সন্তোতি দস্সেতি. ‘‘সো’’তি অঞ্ঞতিত্থিয ধম্মো. ‘‘ধারেন্তস্সা’’তি সৰনুগ্গহধারণপ্পটিপজ্জনাদিৰসেন ধারেন্তস্স. অহিতোযেৰ সম্পজ্জতি, যেভুয্যেন দুগ্গতি ৰিপাকত্তাতি অধিপ্পাযো. ‘‘অযং পনা’’তি সত্থু সদ্ধম্মো পন. ‘‘তথা ধারেন্তস্সা’’তি অযং মে হিতোতি ধারেন্তস্স হিতোযেৰসম্পজ্জতি, সুগতি নিব্বান সম্পাপকত্তাতি অধিপ্পাযো.

‘‘সমানদিট্ঠিসীলান’’ন্তি সমানদিট্ঠিকানং সমানসীলানঞ্চ. এতেন সমানদিট্ঠিসীলা জনা গণীযন্তি এত্থাতি গণো. সংহনীযন্তি একতোকরীযন্তি এত্থাতি সঙ্ঘোতি ইমমত্থং দীপেতি. সহ একতো ধম্মং চরন্তীতি সহধম্মিকা. একস্স সত্থুনো ধম্ম ৰিনযে পব্বজিতা. তেসং সহধম্মিকানং. ভগৰতো সাৰকসঙ্ঘো উত্তমগণো নাম. যে কেচি লোকে সঙ্ঘাৰা গণাৰা. তথাগতস্স সাৰকসঙ্ঘো তেসং অগ্গমক্খাযতীতি হি ৰুত্তং. সোযেৰ ইধ গণুত্তমোতি ৰুচ্চতি ৰিসেসন পর নিপাত ৰসেনাতি অধিপ্পাযো. উত্তমসদ্দস্স গুণনামত্তা ‘‘গুণম্হিযেৰ পৰত্ততী’’তি ৰুত্তং. ‘‘তেনা’’তি উত্তম সদ্দেন. ‘‘গণোতি সঙ্ঘোযেৰ ৰুচ্চতি’’ সঙ্ঘসদ্দস্সপি সমূহট্ঠে নিরুল়্হত্তা, ‘‘সো ৰিনযকম্মেসু পসিদ্ধো’’তি পঞ্চসঙ্ঘা চতুৰগ্গসঙ্ঘো, পঞ্চৰগ্গসঙ্ঘো, দসৰগ্গসঙ্ঘো, ৰীসতিৰগ্গসঙ্ঘো, অতিরেকৰীসতিৰগ্গসঙ্ঘো, চতুৰগ্গকরণীযং কম্মং, পঞ্চৰগ্গকরণীযং কম্মন্তিআদিনা পসিদ্ধো পাকটো. দক্খিণা ৰুচ্চতি কম্মঞ্চ কম্মফলঞ্চ সদ্দহিত্ৰা আযতিং ৰিপাকপ্ফলপ্পটি লাভত্থায দিন্নং দানকম্মং দক্খন্তি ৰড্ঢন্তি সত্তা এতাযাতি কত্ৰা. তংদক্খিণং পটিগ্গণ্হিতুং অরহতীতি দক্খিণেয্যো. ‘‘অরহতী’’তি চ অনুত্তর পুঞ্ঞক্খেত্ত ৰিসেসত্তাদাযকেন ইচ্ছিত পত্থিতস্স আযতিং ফলস্স সুট্ঠুসম্পাদনৰসেন দাযকস্স চ অৰিরাধনতো অসঙ্খ্যেয্যাপ্পমেয্যৰড্ঢি আৰহনতো চ পটিগ্গণ্হিতুং অরহতি. এৰরূপংহিদানং নাম উল়ারদানং হোতি. তং যেসুদুস্সীলেসুদিয্যতি. তেসং খেত্ত দুট্ঠত্তা দাযকেন ইচ্ছিতপত্থিতং ফলং ন সম্পাদেতি. নিপ্ফলং ৰা হোতি. অপ্পপ্ফলং ৰা. এৰংসতি, তে দাযকঞ্চ ৰিরাধেন্তি নাম. পুঞ্ঞপ্ফলানি চ ৰিনাসেন্তি নাম. সযঞ্চ তংদানং পটিগ্গহণতো ৰা পরিভোগতো ৰা সদ্ধাদেয্যং ৰিনিপাতনতো ৰা দুগ্গতি ভাগিনো হোন্তি. তস্মাতে এৰরূপং দানং পটিগ্গণ্হিতুং নারহন্তীতি. ‘‘উপসম্পদাকম্মং সম্মুতি নামা’’তি একেন পরিযাযেন সম্মুতি কম্মং নাম. তঞ্হি কামংতের সসুসম্মুতি কম্মেসুনাগতং. ঞত্তি চতুত্থ কম্মৰাচা সঙ্খাতায পন সঙ্ঘসম্মুতিযা সিদ্ধত্তা তেন পরিযাযেন সম্মুতি কম্মন্তি ৰুচ্চতীতি. ‘‘উপসম্পন্নভূমিং পত্ৰা’’তি উপসম্পন্নভূমি সঙ্খাতং উপরিঠানন্তরং পত্ৰা. তথা হি ৰুত্তং ৰিনযে ভিক্খু ৰিভঙ্গে. ঞত্তি চতুত্থেন কম্মেন অকুপ্পেন ঠানারহেনাতি. তত্থ, ‘‘ঠানারহেনা’’তি উপসম্পন্ন ভূমিসঙ্খাতং ঠানন্তরং পাপেতুং অরহেনাতি অত্থো. ‘‘উপসম্পন্নভূমী’’তি চ উপসম্পন্ন সীলং ৰুচ্চতি. ‘‘ৰিনযকম্মেসু পসিদ্ধো’’তি. সুণাতুমেভন্তে সঙ্ঘো তিআদীসু পাকটো. অপিচ ‘‘সম্মুতি সঙ্ঘো’’তি, দেৰসঙ্ঘাসমাগতাতিআদীসু ৰিয বহূনং সমূহনট্ঠেন লোকসম্মুতিযা সিদ্ধোসঙ্ঘো সম্মুতি সঙ্ঘোতিপি যুজ্জতি. ‘‘অরিযপুগ্গলসমূহো’’তি পুথুজ্জনকল্যাণকো ভিক্খু পুব্বে ৰুত্তনযেন সোতাপত্তি মগ্গট্ঠে সঙ্গহিতোতি, তেন সহ অট্ঠৰিধো অরিয পুগ্গলসমূহো. ‘‘সম্মুতি সঙ্ঘে অন্তোগধোযেৰা’’তি এতেন দক্খিণেয্যসঙ্ঘো নাম ৰিসুং নৰত্তব্বো. তস্মিঞ্চ নৰত্তব্বে সতি, সম্মুতি সঙ্ঘোতিপি ৰত্তব্ব কিচ্চং নত্থি. ভগৰতো সাৰকসঙ্ঘো ত্ৰেৰ ৰত্তব্বং হোতীতি দস্সেতি. সচ্চমেতং. ইধ পন সঙ্ঘৰচনেন আগতট্ঠানস্স দুৰিধত্তা সঙ্ঘস্স দুৰিধতা ৰুত্তা. তত্থ সম্মুতি সঙ্ঘস্স আগতট্ঠানং ৰিনযকম্মেসূতি ৰুত্তমেৰ. ইদানি অরিযসঙ্ঘস্স আগতট্ঠানং দস্সেন্তো ‘‘তথাপী’’তিআদিমাহ. তত্থ সরণ গমন…পে… অনুস্সতিট্ঠানেসু উপসম্পন্নভূতো ভিক্খুসঙ্ঘোৰ গহেতব্বো. দক্খিণাৰিসুদ্ধিট্ঠানে পন পুগ্গলিকদানেসু চতূহি সোতাপত্তিযঙ্গেহি সমন্নাগতো উপাসকোপি সামণেরোপি যুজ্জতি. সঙ্ঘিক দানেসু পন ভিক্খুসঙ্ঘোৰ. ‘‘তথা তথা সংৰণ্ণেত্ৰা’’তি আহুনেয্যো, পাহুনেয্যো, দক্খিণেয্যো, অঞ্জলীকরণীয্যো, অনুত্তরং পুঞ্ঞক্খেত্তং লোকস্সা, তিআদিনাসুট্ঠু থোমেত্ৰা. সো দক্খিণেয্য সঙ্ঘো. ‘‘পুথুজ্জন সঙ্ঘো’’তি ইদং অরিয সঙ্ঘেন ৰিনাকেৰলং পুথুজ্জনসঙ্ঘং সন্ধায ৰুত্তং. এত্থ চ সঙ্ঘ ৰচনেন সঙ্ঘ পরিযাপন্নো একোপি ভিক্খু গহেতব্বো. সো সচে পুথুজ্জনো হোতি, অনুত্তরং পুঞ্ঞক্খেত্তং নহোতি. যদি অরিয পুগ্গলো হোতি, অনুত্তরং পুঞ্ঞক্খেত্তং হোতি.

দক্খিণৰিভঙ্গসুত্তে সঙ্ঘিকদানে ভৰিস্সন্তি খো পনানন্দ গোত্রভুনো কাসাৰকণ্ঠা দুস্সীলা পাপধম্মা. তেসংপি সঙ্ঘং উদ্দিস্স দানং দস্সন্তি. তদাপানন্দ সঙ্ঘগতং দক্খিণং অসঙ্খ্যেয্যং অপ্পমেয্যন্তি ৰদামীতি ৰুত্তত্তা সঙ্ঘিকট্ঠানং পত্ৰা কোচি ভিক্খু দক্খিণেয্য সঙ্ঘে অসঙ্গহিতোতি নত্থীতি দট্ঠব্বো.

খেত্তং দূসেন্তীতি খেত্তদুট্ঠানি. তিণানি. খেত্তদুট্ঠা কিলেসা. ৰুত্তঞ্হিধম্মপদে.

তিণদোসানি খেত্তানি, রাগদোসা অযংপজা;

তস্মাহি ৰীতরাগেসু, দিন্নং হোতি মহপ্ফলং.

তিণদোসানি খেত্তানি, দোসদোসা অযংপজা;

তস্মাহি ৰীতদোসেসু, দিন্নং হোতি মহপ্ফলং.

তিণদোসানি খেত্তানি, মোহদোসা অযংপজা;

তস্মাহি ৰীতমোহেসু, দিন্নং হোতি মহপ্ফলন্তি.

ইধ পন সাতিস্সযতো খেত্তদুট্ঠে কিলেসে দস্সেতুং ‘‘সক্কাযদিট্ঠিৰিচিকিচ্ছানুসযান’’ন্তি ৰুত্তং. ‘‘সব্ভাৰা’’তি সন্তস্স ৰিজ্জমানস্সভাৰো সব্ভাৰোতিৰিগ্গহো. ‘‘অস্সা’’তি পুথুজ্জন সঙ্ঘস্স. ‘‘সদ্ধম্মপদে ৰুত্তনযেনা’’তি অপিচযদগ্গেনাতি ৰুত্তনযেন.

সসদ্ধম্মগণুত্তমপদত্থানুদীপনী নিট্ঠিতা.

৮. ‘‘অভিৰাদিযা’’তি সুখীহোহিসপ্পুরিসাতি এৰং অভিৰদাপেত্ৰা. অভিৰাদনঞ্চ নাম ৰন্দনামেৰাতি ৰুত্তং ‘‘ৰন্দিত্ৰা’’তি. ৰন্দন্তোহি ৰন্দনেয্যে ৰুদ্ধে তথা ৰদাপেতি নাম. তথা ৰদনঞ্চ ৰন্দনেয্যানংৰুদ্ধানং ৰত্তং. ‘‘পচ্চুপট্ঠাপেত্ৰা’’তি পটিমুখং উপট্ঠাপেত্ৰা. ‘‘তিৰিধা’’তি দ্ৰার ভেদেন তিৰিধা. ‘‘ৰন্দনেয্যান’’ন্তি বুদ্ধাদীনং. ‘‘নিপজ্জন্তো’’তি নিপতন্তো. ‘‘অৰন্দিযেসূ’’তি ভিক্খূহি অৰন্দিতব্বে সুনৰকতরাদীসু. ‘‘গুণপদানী’’তি গুণদীপকানি অরহং সম্মাসম্বুদ্ধোতিআদিপদানি. এত্থচকাযেনৰন্দতীতিআদি উপচার ৰচনং হোতি. যথা চক্খুনা রূপং পস্সতীতি. তথাহি ৰুত্তং অট্ঠকথাসু চক্খুনা রূপং দিস্ৰাতি করণৰসেন চক্খূতি লদ্ধৰোহারেন রূপদস্সন সমত্থেন চক্খু ৰিঞ্ঞাণেন রূপং দিস্ৰা. পোরাণা পনাহু চক্খু রূপং ন পস্সতি, অচিত্তত্তা. চিত্তং ন পস্সতি, অচক্খুত্তা. দ্ৰারারম্মণ সঙ্ঘট্টনে পন সতি চক্খু পসাদৰত্থু কেনচিত্তেন পস্সতি. ঈদিসী পনেসা কথা ধনুনা ৰিজ্ঝতীতিআদীসু ৰিয সসম্ভার কথানাম হোতি. তস্মা চক্খুনা রূপং দিস্ৰাতি চক্খু ৰিঞ্ঞাণেন রূপং দিস্ৰাতি অযমেৰেত্থ অত্থোতি. এত্থহি ‘‘কাযেনা’’তি কায ৰিঞ্ঞত্তিসঙ্খাতং দ্ৰার রূপং করণং হোতি. তস্মা চক্খুনাতি ৰচনে উপচার ৰচনে সতি কাযেনাতি ৰচনংপি উপচার ৰচনন্তি ৰিঞ্ঞাযতি. তথা চক্খুনাতি পদে চক্খুৰিঞ্ঞাণেনাতি অত্থে সতি কাযেনাতি পদেপি কাযকম্মেনাতি অত্থো ৰিঞ্ঞাযতি. ৰাচায ৰন্দতি, মনসাৰন্দতী,তি পদেসুপি এসনযো. এৰঞ্চ সতি, কায কম্মেনৰন্দামি, ৰচীকম্মেন ৰন্দামি, মনোকম্মেন ৰন্দামি, তীহি কম্মেহি ৰন্দামীতি ইদমেৰ মুখ্যৰচনন্তি সিদ্ধং হোতি. সব্বমিদং ইন্দ্রিয সংৰরসীলট্ঠানে অট্ঠকথাসু আগতত্তা ৰুত্তং. চক্খুনাতি ইদং পন মুখ্য করণ ৰচনমেৰ সম্ভৰতি. কস্মা, চক্খুস্স দস্সনসঙ্খাতস্স চক্খুৰিঞ্ঞাণস্স ৰত্থু পুরেজাতিন্দ্রিযপচ্চযৰিসেসত্তা. সোতেন সদ্দংসুত্ৰাতিআদীসুপি এসনযো.

কাযেনৰন্দতি, ৰাচাযৰন্দতী,তি এত্থ তংকাযৰচীৰিঞ্ঞত্তি রূপ দ্ৰযং কিঞ্চাপি সহজাত চেতনা কম্মেন জাতং হোতি. ন তং চেতনাকম্মং ৰিঞ্ঞত্তি দ্ৰযেনজাতং. এৰং সন্তেপি তং রূপ দ্ৰযং তস্সাচেতনায কাযৰন্দনাকম্ম, ৰচীৰন্দনাকম্ম সিদ্ধিযা উপনিস্সয পচ্চযৰিসেসো হোতি. যথাতং মাতিতো জাতো পুত্তো ৰুদ্ধি পত্তো তং তং কম্মেসু মাতুযা বল ৰূপনিস্সযো হোতি. এৰঞ্চ কত্ৰা তং রূপদ্ৰযং অভিধম্মে দ্ৰাররূপন্তি ৰুত্তং. তস্মা ‘কাযেন, ৰাচাযা,তি ইদংপি মুখ্য করণ ৰচনমেৰাতি দট্ঠব্বং. কাযেনাতি পন কাযকম্মেনাতি অত্থে সতি, তস্সকম্মস্স ৰন্দনাকিরিযায সহ অভেদো আপজ্জতীতি চে. নাপজ্জতি. কস্মা চেতনাহং ভিক্খৰে কম্মং ৰদামি, চেতযিত্ৰা কম্মং করোতি ‘কাযেন, ৰাচায, মনসাতি ইমস্মিং সুত্তে যথাহি ‘‘চেতযিত্ৰা’’তি পুরিমচেতনাহি চেত যিত্ৰা. ‘‘কম্মং করোতী’’তি পচ্ছিমং সন্নিট্ঠাপন চেতনা কম্মং করোতীতি অত্থো. তথা ইধপি পুরিমপচ্ছিমচেতনা সম্ভৰতোতি. এত্থ হি ‘‘কাযকম্মেনা’’তি পুরিমচেতনা কম্মং গয্হতি. ‘‘ৰন্দতী’’তি পচ্ছিম সন্নিট্ঠাপনচেতনাকম্মন্তি.

৯. ‘‘রচযন্তো’’তি ৰিদহন্তো. ‘‘রচযিস্সতী’’তি অপচ্চক্খে অতীতে অনাগতৰচনং. ‘‘পোত্থকারুল়্হ’’ন্তি পোত্থক পত্তেসুলিখনৰসেন আরুল়্হং.

১০. অভিধম্মত্থপদে. ‘‘অভিধম্মে’’তি অভিধম্মপ্পকরণে. ‘‘এত্থ, এতেনা’’তি ৰচনেহি সঙ্গহসদ্দস্স একসেসৰিধানংপি ৰিঞ্ঞাযতি. ‘‘অঞ্ঞংপাল়িদ্ৰযং ৰুচ্চতি’’. কস্মাতং পাল়িদ্ৰযং অভিধম্মো নামাতি ৰুত্তং ‘‘তঞ্চা’’তিআদি. ‘‘যথাপৰত্তে’’তি অত্তনো পচ্চযানুরূপং পৰত্তে. ‘‘পরমত্থধম্মে এৰা’’তি দ্ৰে মে ভিক্খৰে পুগ্গলা, তযোমেভিক্খৰে পুগ্গলাতিআদিনা পঞ্ঞত্তিৰোহারেন পৰত্তাপি দেসনা পরমত্থ ধম্মেহি ৰিনা নপৰত্ততি. পরমত্থ ধম্মানং নানত্তৰসেনেৰ পুগ্গলানং নানত্তসম্ভৰতো. তস্মা পরমত্থধম্মে এৰ দীপেতি. ন আণাৰিধানং দীপেতি. ‘‘দ্ৰীসুধম্মেসূ’’তি নিদ্ধারণে ভুম্মৰচনং. ‘‘যোইতরতো’’তি নিদ্ধারণীযং. ‘‘যো’’তি যো ধম্মো. ‘‘ইতরতো’’তি ইতর ধম্মতো সুত্তন্ত ধম্মতো. ‘‘এৰঞ্চ কত্ৰা’’তি ইমিনাকারণেনাতি অত্থো. অট্ঠকথাসু ৰুত্তন্তি সম্বন্ধো. দেসেতব্বপ্পকারানং অনৰসেসৰিভত্তিৰসেন অতিরেকতা, সুদ্ধ ধম্মাধিট্ঠান দেসনা পৰত্তিৰসেন ৰিসেসতা যোজেতব্বা. ‘‘যতো’’তি যস্মা অনৰসেসৰিভত্তিতো, অতিৰিত্থারদেসনাভাৰতোতি ৰুত্তং হোতি. কস্মা দেৰেসু এৰ দেসেন্তীতি আহ ‘‘ন হি মনুস্সা’’তিআদিং. তত্থ ‘‘ন হি মনুস্সা পটিগ্গহেতুং সক্কোন্তী’’তি সম্বন্ধো. ‘‘পৰত্তনযোগ্য’’ন্তি পৰত্তনত্থায পহোন্তং. ‘‘কথামগ্গ’’ন্তি দেসনাকথাপবন্ধং. ‘‘একমাতিকানু বন্ধা’’তি কুসলা ধম্মা অকুসলা ধম্মাতিআদিকং একং অভিধম্ম মাতিকং অনুগতা. ‘‘তস্সা’’তি অভিধম্মস্স. অতিরেক ৰিসেসতন্তি সম্বন্ধো. ‘‘তত্থা’’তি তিস্সং অট্ঠসালিনিযং. আদিম্হিযেৰতত্থ কেনট্ঠেন অভিধম্মো, ধম্মাতিরেক ধম্মৰিসেসট্ঠে না-তি ৰত্ৰা তদত্থং ৰিত্থারেন্তো সুত্তঞ্হি পত্ৰা পঞ্চক্খন্ধা একদেসেনেৰ ৰিভত্তা, ননিপ্পদেসেন. অভিধম্মং পত্ৰা পন নিপ্পদেসতোৰ ৰিভত্তা-তি ৰুত্তং. তেনাহ ‘‘ধম্মনামিকান’’ন্তিআদিং. ‘‘ধম্মো পনা’’তি পাল়িদ্ৰযমাহ.‘‘এৰং সন্তেপী’’তি অট্ঠসালিনিযং এৰং ৰিচারিতেপিসতি. ‘‘সব্বজেট্ঠকো’’তি তিণ্ণং পিটকানং মজ্ঝেসব্বজেট্ঠকো. কস্মা সব্বজেট্ঠকো সিযাতি আহ ‘‘ৰিনযং ৰিৰণ্ণেন্তস্সহী’’তিআদিং. তত্থ ‘‘ৰিৰণ্ণেন্তস্সা’’তি গরহন্তস্স. চরতি পৰত্ততীতি চক্কং. লোকস্মিং কেনচি সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা পটিনিৰত্তিতুং অসক্কুণেয্যং আণাৰিধানং আণাচক্কং নাম. তথা অসক্কুণেয্যং দেসনা ৰিধানং ধম্মচক্কং নাম. তত্থ, যো পন ভিক্খু মেথুনং ধম্মং পটিসেৰতি, পারাজিকো হোতি অসংৰাসো-তিআদিনা নযেন পৰত্তং আণাৰিধানং আণাচক্কং নাম. চত্তারিমানি ভিক্খৰে অরিযসচ্চানী-তিআদিকং দেসনাৰিধানং ধম্মচক্কং নাম. তদুভযংপি কোচি ভিন্দিতুং পারাজিকং ৰা ভিক্খুং অপারাজিকং কাতুং চতুস্সচ্চং ৰা ধম্মং অসচ্চং কাতুং নসক্কোতি. অথ খো করোন্তোযেৰ দেৰদত্তোৰিয আপাযিকো হোতি. পারাজিকোচ ভিক্খু অত্তানং সুদ্ধং অকরোন্তো অপাযগামীযেৰ হোতি. এৰং সব্বেসু ৰিনয সিক্খাপদেসু. এৰং কেনচি পটিনিৰত্তিতুং অসক্কুণেয্যত্তা তদুভযংপি অপ্পটিৰত্তিযং চক্কং নাম হোতি. ‘‘ৰিনযো নাম সাসনস্স মূল’’ন্তি ৰিনযে ঠিতে ভিক্খুসঙ্ঘো পঞ্ঞাযতি. ভিক্খু সঙ্ঘে পঞ্ঞাযন্তে তিৰিধোপিসদ্ধম্মোপঞ্ঞাযতি, তিৰিধংপি সত্থুসাসনং তিট্ঠতি. এৰং ৰিনযো তিৰিধস্সসাসনস্স মূলং হোতীতি. কথঞ্চপরিযত্তিসদ্ধম্মে পঞ্ঞাযন্তে তিৰিধংপি সাসনং তিট্ঠতীতি. ৰুচ্চতে. তত্থ সাসনং তিট্ঠতীতি কিত্তকংকালং তিট্ঠতীতি. পঞ্চৰস্সসহস্সানি তিট্ঠতীতি পোরাণট্ঠকথাসুকথযিংসু. মিচ্ছাৰাদিনোপনৰদন্তি ৰিনযে চূল়ৰগ্গেভিক্খুনিক্খন্ধকে সচে আনন্দ মমসাসনেমাতুগামো পব্বজ্জং নলভেয্য. ৰস্সসহস্সং সদ্ধম্মো তিট্ঠেয্য. ইদানি মাতুগামস্স পব্বজ্জা অনুঞ্ঞাতা গোতমিযা পুনপ্পুনং আযাচনং উপাদায. পঞ্চেৰদানি আনন্দ ৰস্সসতানি সদ্ধম্মোঠস্সতীতি ৰুত্তং. তস্মা বুদ্ধসাসনং পঞ্চৰস্সসতানি এৰ তিট্ঠতি. ততোপরং একদিৰসংপি ন তিট্ঠতি. ইদানি সাসনপ্পটি রূপকমত্তং হোতীতি. তং তেসং মিচ্ছা ৰচনমত্তং. ‘‘পঞ্চেৰৰস্সসতানী’’তি ইদং পন সন্নিট্ঠান ৰচনং নহোতি. মাতুগামানং আদীনৰ দীপনমত্তৰচনং. সো চ আদীনৰো অট্ঠগরুধম্মে সণ্ঠপেত্ৰা সত্থারা এৰ পটিবাহিতো. পুন ‘‘ৰস্সসহস্স’’ন্তি ইদমেৰসন্নিট্ঠান ৰচনং জাতন্তি. এত্থপিকেচিৰদন্তি ৰস্সসহস্সমেৰ সাসনং তিট্ঠতি, ততোপরং একদিৰস মত্তংপি ন তিট্ঠতি, অন্তরধাযতি. তদা সীমাযোপি অসীমা হোন্তি. পচ্ছাতাসু উপসম্পাদিতাপি অনুপসম্পন্না হোন্তি. ইদানি সাসনপ্পটি রূপকমত্তং হোতীতি. ইদংপি তেসং অত্থঞ্চকারণঞ্চ অদিস্ৰা অজানিত্ৰা ৰুত্তত্তা মিচ্ছা ৰচনমত্তং হোতি. অযং পনেত্থ অত্থো. ‘‘ৰস্সসহস্সং সদ্ধম্মো তিট্ঠেয্যা’’তি ৰস্সসহস্সমেৰ সদ্ধম্মো অপরিহাযমানো তিট্ঠেয্য. ততোপরং পন ন তিট্ঠেয্য, অনুক্কমেন পরিহাযমানো গচ্ছেয্যাতি. কথং পন অপরিহাযমানো তিট্ঠতি, কথঞ্চ পরিহাযমানো গচ্ছতীতি. ৰুচ্চতে. পঞ্চসঙ্ঘা ৰেদিতব্বা. যেসু সঙ্ঘে সুসদ্ধম্মো তিট্ঠতি. কতমে পঞ্চ. খীণাসৰসঙ্ঘো, অনাগামিসঙ্ঘো, সকদাগামিসঙ্ঘো, সোতাপন্নসঙ্ঘো, পুথুজ্জনকল্যাণকসঙ্ঘো,তি. তত্থ, ৰস্সসহস্সব্ভন্তরে সব্বেপঞ্চসঙ্ঘা পঞ্ঞাযন্তি. এৰং ৰস্সসহস্সং সদ্ধম্মো অপরিহাযমানো তিট্ঠতি. ততোপরং খীণাসৰসঙ্ঘো ন পঞ্ঞাযতি. সেসানি চত্তারিৰস্সসহস্সানি অনুক্কমেন সেসানং চতুন্নং সঙ্ঘানং খেত্তানি জাতানি. এৰং ততোপরং পরিহাযমানো গচ্ছতীতি অযমেত্থ অত্থো. কারণং ৰুচ্চতে. ‘‘সদ্ধম্মো তিট্ঠেয্যা’’তি এত্থ তিৰিধো সদ্ধম্মো ‘পরিযত্তিসদ্ধম্মো, পটিপত্তিসদ্ধম্মো, পটিৰেধসদ্ধম্মো,তি. সো এৰ তিৰিধং সাসনন্তি চ ৰুচ্চতি. তত্থ, পরিযত্তি সদ্ধম্মো নাম সাট্ঠকথানিতীণিপিটকানি. সোচ এতরহি পরিপুণ্ণো তিট্ঠতি. কথং পরিযত্তি সাসনং পটিরূপকমত্তং ভৰেয্য. ভিক্খূ চ পরিযত্তিকম্মিকা অনেক সতসহস্সমত্তা পঞ্ঞাযন্তি. কথঞ্চিদং সাসনং ততোপরং একদিৰসংপি ন তিট্ঠেয্য. তে চ ভিক্খূ সীলপ্পটিপত্তিযং ঠিতা অনেক সতসহস্সমত্তা এতরহি সন্ধিস্সন্তি. কথঞ্চ পটিপত্তি সাসনং ততোপরং ন তিট্ঠেয্য. পরিযত্তিযাচ পটিপত্তিযাচ তিট্ঠমানাযপটিৰেধসদ্ধম্মোপি ন তিট্ঠতীতি ন ৰত্তব্বো. যথাহি-একো ধনসেট্ঠি নাম অত্থি. সো পুত্তধীতু পরম্পরানং অত্থায মহন্তারতননিধযো ভূমিযং বহূসুট্ঠানেসু নিদহিত্ৰা ঠপিতা হোন্তি. পোত্থকেসু চ তেসং পৰত্তিং পরিপুণ্ণং লিখিত্ৰা ঠপেতি. তত্থ নিমীসু চ পোত্থকেসু চ অক্খরেসু চ ধরন্তেসু তেনিধযো নস্সন্তি অন্তরধাযন্তীতি ন ৰত্তব্বাযেৰ. এৰমিদং সাসনং দট্ঠব্বং. তত্থহি নিধীনংনিধানভূমিসদিসং তেপিটকং বুদ্ধৰচনং, ধনরতনসদিসানি ধম্মরতনানি. যথা চ সেট্ঠিৰংসেজাতো বলসম্পন্নো পুরিসো পোত্থকং পস্সিত্ৰা সুট্ঠু খণন্তো তানিরতনানি লভিস্সতিযেৰ. এৰমিধপি বলসম্পন্নো ভিক্খু দেসনাধম্মং সুত্ৰা সুট্ঠু পটিপজ্জন্তো তানিধম্মরতনানি লভিস্সতিযেৰ. লভমানে চ সতি, কথং তানিধম্মরতনানি অন্তরহিতানি. সীমানঞ্চ পৰত্তিৰানিৰত্তি ৰা আণাচক্কস্সেৰ ৰিসযো হোতি. ন ধম্মচক্কস্স. যঞ্চ ৰুত্তং-পঞ্চেৰৰস্সসতানিসদ্ধম্মো ঠস্সতীতি চ, - ৰস্সসহস্সং সদ্ধম্মো তিট্ঠেয্যাতি চ. ইদঞ্চ ৰচনং ধম্মচক্কমেৰ হোতি, ন আণাচক্কং. বদ্ধসীমাযো চ নিৰত্তমানা দ্ৰীহি কারণেহি নিৰত্তন্তি অন্তরধাযন্তি. আণাচক্কভূতায কম্মৰাচায সমূহননেন ৰা, সাসনস্স ৰা অন্তরধানেন. তত্থ ৰস্সসহস্সপরিযন্তে কম্মৰাচায সমূহননঞ্চ নত্থি. সাসনন্তরধানঞ্চ নাম অনাগতে ধাতুপরিনিব্বানেন পরিচ্ছিন্নং হোতি. ধাতুপরিনিব্বানেহি জাতে সব্বং আণাচক্কং ৰিগতং হোতি, অন্তরধাযতি. ধম্মচক্কং পন দেৰলোকেসু যাৰানাগতবুদ্ধকালাপি পৰত্তিস্সতিযেৰ আল়ৰকপুচ্ছাগাথাযো ৰিয. অপিচযো ৰো আনন্দ মযা ধম্মো চ ৰিনযো চ দেসিতো পঞ্ঞত্তো. সো ৰো মমচ্চযেন সত্থা-তি ৰুত্তং. সোচতি পিটকভূতো ধম্মৰিনযো সত্থা এতরহি তিৰিধংপি সাসনং লোকস্স দীপেন্তো পকাসেন্তো তিট্ঠতি. যতোবুদ্ধভাসিকানং দেৰমনুস্সানং নানা বাহিরকেহি জনেহি অসাধারণো মহন্তো ঞাণালোকো এতরহি ৰিজ্জোতমানো পৰত্ততি. তেহি সব্বঞ্ঞুতঞ্ঞাণেন দেসিতানি এতরহিধরমানানি চতুরাসীতি ধম্মক্খন্ধ সহস্সানি সুত্ৰা অনমতগ্গেসংসারে অনন্তাসু লোকধাতূসু সব্বংলোকত্তযপ্পৰত্তিঞ্চ, সব্বংধম্মপ্পৰত্তিঞ্চ, সব্বঞ্ঞুতঞ্ঞাণানুগতিকেন সুতমযঞ্ঞাণেন জানন্তি. আযতিঞ্চ সগ্গত্থায চ মগ্গফলনিব্বানত্থায চ নানাপুঞ্ঞকিরিযৰত্থূনি আরভন্তি, পব্বজন্তি. পরিযত্তিং পরিযাপুণন্তি. পটিপত্তিং পূরেন্তি. ভাৰনংভাৰেন্তি. ইদং সব্বং সাসনপ্পটিরূপকমত্তংন হোতি. একন্ত সাসনং হোতি. কস্মা, যথা ধম্মং যথা ৰিনযং পটিপজ্জনতো. ইমায চ পটিপত্তিযা আযতিং সগ্গমগ্গফল নিব্বানপ্পটিলাভায সংৰত্তনিকত্তাতি. এত্তাৰতা সব্বং মিচ্ছাৰাদীনং মিচ্ছাৰচনং ৰিধমিতংৰিদ্ধংসিতং হোতীতি.

পণামগাথাৰণ্ণনা.

১১. দুতীযগাথাৰণ্ণনাযং. ‘‘আদিগাথাযা’’তি পথমগাথাৰাক্যেন. ‘‘তং তং পযোজনসহিতে’’তি তেনতেনপযোজনেন সহিতে. ‘‘পঞ্চ অত্থে’’তি পঞ্চপিণ্ডত্থে. ‘‘তেঅভিধম্মত্থে’’তি অভিধম্মত্থপদে দীপিতে তেঅভিধম্মত্থে. ‘‘তত্থা’’তি তিস্সং দুতীযগাথাযং. ‘‘নতু ৰুত্ত’’ন্তি নপনপকরণংপি পুব্বেৰুত্তং হোতি. অভিধম্মত্থা কুতোপুব্বেৰুত্তা হোন্তীতি যোজনা. এৰংতীসু অত্থৰিকপ্পেসু পথমস্স কালৰিরোধং দস্সেত্ৰা ইদানি দুতীয ততীযানং সদ্দতোৰিরোধং ৰত্তুং ‘‘নচা’’তিআদিমাহ. তত্থ ‘‘আদিম্হি যেৰা’’তি এতেন যদাকদাচি পচ্চামসনং অপ্পধানন্তি দস্সেতি. ‘‘অপ্পধানপদানী’’তি অভিধম্মত্থসঙ্গহন্তি ইমস্মিং একস্মিং সমাসপদে পুরিমানি ৰিসেসন পদানি. তত্থ সব্বথাপি ৰুত্তাতি যোজিতে সতি, তস্মিং অভিধম্মত্থসঙ্গহপ্পকরণে তস্মিং অভিধম্মত্থ পদেৰা সব্বথা মযা ৰুত্তাতি অত্থো হোতি. সো ন যুজ্জতি. তস্মিং অভিধম্মে বুদ্ধেন ভগৰতা সব্বথা ৰুত্তাতি অত্থো যুজ্জতি. অপ্পধানপদং পচ্চামসতীতি দোসোপন আপজ্জতেৰ. তেনাহ ‘‘এৰঞ্হিসতী’’তিআদিং. তত্থ, ‘‘এৰঞ্হিসতী’’তি অট্ঠসালিনিযং ৰিয ইধ অভিধম্মত্থসঙ্গহপদং পচ্চামসন্তে সতি. হিসদ্দো ফল ৰাক্যজোতকো. লদ্ধগুণজোতকোতিপি যুজ্জতি. ‘‘পটিক্খিত্তা হোতি’’ তস্মিং অভিধম্মত্থসঙ্গহপদে মযা সব্বথা ৰুত্তাতি অত্থস্স সম্ভৰতো. ন কেৰলং সো এৰ দোসো আপজ্জতি. অপরোপিদোসো অত্থীতি দস্সেতুং ‘‘সাহী’’তিআদিমাহ. ধাতুকথাযং ৰুত্তেনসঙ্গহাসঙ্গহাদিপ্পকারেনাতিযোজনা.

১২. পরমত্থপদৰণ্ণনাযং. ৰিসেসনপদং নাম কত্থচি ভূতকথনত্থাযৰা পযুজ্জতি কণ্হোকাকো, সেতোবকো,তি. কত্থচি অঞ্ঞনিৰত্তনত্থায ৰা পযুজ্জতি নীলোপটো, নীলংপুপ্ফ, ন্তি. ইধ পন অঞ্ঞ নিৰত্তনত্থাযাতি দস্সেতুং ‘‘দুৰিধানিহিসচ্চানী’’তিআদিমাহ. পঞ্ঞাপীযতীতিপঞ্ঞত্তি. পঞ্ঞাপনঞ্চ নাম সমগ্গানং জনানং ৰোহারেন চ সম্পটিচ্ছনেন চাতি দ্ৰীহি অঙ্গেহি সিজ্ঝতীতি আহ ‘‘তেচমহাজনা’’তিআদিং. ‘‘তস্মাতে সম্মুতি সচ্চন্তি ৰুচ্চন্তী’’তি সম্বন্ধো. ‘‘সম্মতত্তা’’তি ৰোহরিতত্তাচেৰ সম্পটিচ্ছিতত্তা চ. ‘‘ৰচীসচ্চৰিরতিসচ্চান’’ন্তি এত্থ ৰচীসচ্চং নাম মুসাৰাদরহিতং সচ্চৰচনং. ৰিরতিসচ্চং নাম সম্মাৰাচাৰিরতি. সাহি মুসাৰাদাদীহি ৰচীদুচ্চরিতেহি ৰিরমণমত্তেন ৰচীসচ্চন্তি ৰুচ্চতি. ‘‘ৰত্থুভূতত্তা’’তি অধিট্ঠানভূতত্তা. সম্মুতিসচ্চন্তি ৰুচ্চন্তি, সম্মতত্তা সম্মুতি চ, সা সচ্চানং ৰত্থুভূতত্তা সচ্চঞ্চাতি কত্ৰা. সম্মুতিযা সিদ্ধং সচ্চং সম্মুতিসচ্চন্তিপি যুজ্জতি. ‘‘সম্মাপটিপজ্জন্তা’’তি পাণো নহন্তব্বো, সব্বেসত্তা অৰেরা হোন্তূতিআদিনা সম্মাপটিপজ্জন্তা. ‘‘সব্বলোকিযসম্পত্তিযো’’তি দানসীলাদীনং পুঞ্ঞকিরিযৰত্থূনং ফলৰিপাকভূতা সব্বলোকিযসম্পত্তিযো. সব্বে ‘‘বোধিসম্ভারধম্মে’’তি দানপারমিসীলপারমিআদিকেপারমিধম্মে. ‘‘আরাধেন্তী’’তি সম্পাদেন্তি. ‘‘মিচ্ছাপটিপজ্জন্তা’’তি দুচ্চরিত দুরাজীৰমিচ্ছাজীৰাদীনং ৰসেন মিচ্ছাপটিপজ্জন্তা. ‘‘এৰং মহন্তং সম্মুতি সচ্চ’’ন্তি এতেন অহং পরমত্থ সচ্চমেৰগণ্হামীতি সম্মুতি সচ্চং নভিন্দিতব্বং. ভিন্দন্তোহি সব্বসম্পত্তীহি পরিবাহিরো অস্সাতি দস্সেতি. কথঞ্চ তং ভিন্দতীতি. সত্তো নাম নত্থি. সত্তস্স ভৰতোসঙ্কন্তি নাম নত্থি. ভৰনিব্বত্তকং কুসলাকুসলকম্মং নাম নত্থীতি গণ্হন্তো উচ্ছেদদিট্ঠিযং তিট্ঠতি. সব্বসম্পত্তীহি পরিবাহিরো হোতি. অপায পূরকো ভৰতীতি. ‘‘ৰিজ্জমানন্ত্ৰেৰ গণ্হাপেতী’’তি সঞ্ঞা চিত্তদিট্ঠি ৰিপল্লাসানং ৰত্থুভাৰেন গণ্হাপেতি. তেনাহ ‘‘সক্কাযদিট্ঠী’’তিআদিং. ‘‘এৰং ৰিপরীতঞ্হি সম্মুতিসচ্চ’’ন্তি এতেনসম্মুতি সচ্চমেৰদল়্হং গহেত্ৰা পরমত্থ সচ্চং নভিন্দিতব্বং. ভিন্দন্তোহি তাহি দিট্ঠীহি নমুচ্চতি. কথঞ্চ তং ভিন্দতি. খন্ধে ৰা খন্ধমুত্তকেৰা অত্তজীৰে গহেত্ৰা তেচ অত্তজীৰা পরম্মরণা উচ্ছিজ্জন্তীতি গণ্হন্তো উচ্ছেদদিট্ঠিযং তিট্ঠতি. তে চ অত্তজীৰা ভৰাভৰেসুসস্সতা হুত্ৰা ভৰতোভৰং সংসরন্তি সন্ধাৰন্তীতি গণ্হন্তোসস্সতদিট্ঠিযং তিট্ঠতি. ‘‘নৰিসংৰাদেন্তী’’তি ৰিপরীতং নাপাদেন্তি. ‘‘তং পনা’’তি সভাৰসচ্চং পন. অনুভৰনভেদমত্তং উপাদাযেৰ ৰেদনা সুখাতি ৰুত্তা. সব্বাকারতো সুখভূতত্তা ৰেদনা সুখাতি ৰুত্তা নহোতি. ‘‘সব্বাপিৰেদনা দুক্খা এৰা’’তি পধানত্থো. তত্থ অনুভৰনভেদো তিৰিধো. সাততো ৰা অনুভৰনং, অস্সাততো ৰা, মজ্ঝত্ততো ৰা. ‘‘দুক্খা এৰা’’তি ভযট্ঠেন দুক্খা এৰ. ভযট্ঠেনাতি চ সংসার ভযদস্সীহিভাযিতব্বট্ঠেন. সুখো ৰিপাকো যেসং তে সুখৰিপাকা. তেভূমককুসলা. ‘‘কুসলসম্মতা’’তি এতেন সভাৰসচ্চেপি এতেৰোহারা লোকসম্মুতি নিস্সিতাতি দীপেতি. ‘‘সাসৰতা’’তি আসৰেহি সহিতভাৰো. ‘‘সংকিলেসি কতা’’তি সংকিলেস ধম্মেহি সংযুত্তভাৰো. ওঘেহি চ যোগেহি চ উপাদানেহি চ পত্তব্বভাৰো ‘‘ওঘনীযযোগনীয উপাদানীযতা’’. অধিকা অত্তা অজ্ঝত্তা. বহিদ্ধারুক্খেরূপধম্মারুক্খস্স অত্তানাম সারট্ঠেন. সাখাযং রূপধম্মা সাখায অত্তানাম সারট্ঠেন. সত্তসন্তানপরিযাপন্না পন রূপারূপধম্মা তণ্হাপরিগ্গহ দল়্হট্ঠেন ততো বহিদ্ধা অত্ততো অধিকা অত্তাতি অত্থেন অজ্ঝত্তাতি লোকসম্মুতি হোতি. তেনাহ ‘‘অজ্ঝত্ততিকঞ্চা’’তিআদিং. দুক্খনিরোধ মগ্গভাৰো চ, ইতি ইদং চতুক্কং অরিযসচ্চং নামাতি যোজনা. ‘‘ইদমেৰা’’তি ইদং চতুক্কমেৰ. ‘‘অচলমান’’ন্তি এতেন অরিযসদ্দস্স অত্থং দীপেতি. তেভূমক ধম্মানং সুখতা নাম চলা হোতি. কস্মা, অনিচ্চ ধম্মত্তা. তে ধম্মেসুখাতি গহেত্ৰা অত্তনো অজ্ঝত্তঙ্গং করোন্তা অচিরেনেৰ দুক্খং পাপুণন্তি. তে ধম্মে দুক্খাতি ঞত্ৰা তেহিৰিমুত্তা পুন দুক্খং পাপুণন্তীতি নত্থি. এসনযো সেসঅরিযসচ্চেসু. ‘‘তেসূ’’তিআদিম্হি দুৰিধানিহি সচ্চানীতি ৰুত্তেসু দ্ৰীসু সচ্চেসু. ‘‘তেন ৰুত্ত’’ন্তিআদি লদ্ধগুণৰচনং. ‘‘যো ৰিনা অঞ্ঞাপদেসেনা’’তি এত্থ অঞ্ঞাপদেসো নাম অট্ঠধম্ম সমোধানং নিস্সায ঘটসণ্ঠানং পঞ্ঞাযতি, পটসণ্ঠানং পঞ্ঞাযতি, তং সণ্ঠানং অত্তনো সভাৰেন ৰিনা অঞ্ঞাপদেসেন সিদ্ধং হোতি. যাপনচিন্তন কিরিযা নাম অত্থি. যং চিত্তন্তি ৰুচ্চতি. সা অঞ্ঞাপদেসেন সিদ্ধা ন হোতি. অত্তনো সভাৰেনেৰসিদ্ধা. এসনযো ফুসনকিরিযা, ৰেদযিতকিরিযা, দীসূতি. ইমমত্থং দস্সেতুং ‘‘যোৰিনা অঞ্ঞাপদেসেনা’’তিআদিমাহ. ‘‘চিত্তেনপরিকপ্পেত্ৰা’’তি মনোৰিঞ্ঞাণ চিত্তেন অৰিজ্জমানং সণ্ঠানং ৰিজ্জমানং কত্ৰা. ‘‘সৰিগ্গহং কত্ৰা’’তি সরীরং কত্ৰা. ৰত্থু দব্বসহিতং কত্ৰাতি ৰুত্তং হোতি. ‘‘চিত্তমযোচিত্তনিম্মিতো’’তি সুপিনন্তে দিট্ঠরূপানি ৰিয চিত্তেনপকতো চিত্তেন নিম্মিতো. কস্মা সভাৰসিদ্ধো পরমত্থো নামাতি আহ ‘‘সোহী’’তিআদিং. ‘‘সন্তী’’তি এতেন অসধাতু ৰসেন অত্থোতি সিদ্ধং ৰুত্তং. সদ্দাবুদ্ধীহি অরণীযতো উপগন্তব্বতো অত্থোতিপিৰদন্তি. ‘‘ইতরতো’’তি পরিকপ্পসিদ্ধতো. ‘‘পরমো’’তি অধিকো. তেনাহ ‘‘উক্কংসগতো’’তি. এতেন পরমসদ্দস্স অধিকত্থং ৰদতি. ইদানি তস্স উত্তমত্থং দস্সেতুং ‘‘অপিচা’’তিআদিৰুত্তং. তত্থ, ইমস্মিং বুদ্ধসাসনে পঞ্চসাসন কিচ্চানি মহন্তানি অভিঞ্ঞেয্যানং ধম্মানং অভিজাননং. পরিঞ্ঞেয্যানং পরিজাননং. পহাতব্বানং পহানং. সচ্ছি কাতব্বানং সচ্ছিকরণং. ভাৰেতব্বানং ভাৰনাতি. তত্থ সব্বেপি পরমত্থ ধম্মা অভিঞ্ঞেয্যা নাম. দুক্খ সচ্চধম্মা পরিঞ্ঞেয্যা নাম. সমুদয সচ্চধম্মা পহাতব্বা নাম. সামঞ্ঞপ্ফলানি চ নিব্বানঞ্চ সচ্ছিকাতব্বা নাম. মগ্গসচ্চধম্মা ভাৰেতব্বা নাম. তেসু ধম্মেসু তেসং কিচ্চানং সিদ্ধিযা ইমস্মিং সাসনে সাসনকিচ্চং সিদ্ধং হোতি. নিট্ঠানং গচ্ছতি. তে চ ধম্মা এৰ রূপানং সাসন কিচ্চানং অৰিরাধকত্তা অৰিসংৰাদকত্তা উত্তমট্ঠেন পরমত্থা নাম হোন্তীতি ইমমত্থং দস্সেতুং ‘‘অপিচা’’তিআদিমাহ. তত্থ ‘‘যে’’তিযেজনা. ‘‘অয’’ন্তি অযং ধম্মো. ‘‘তস্সা’’তি তস্সঅভিঞ্ঞেয্যস্স, তস্সপরিঞ্ঞেয্যস্স, তস্সপহাতব্বস্স, তস্সসচ্ছিকা তব্বস্স তস্সভাৰেতব্বস্সাতি সম্বন্ধো. পরমত্থৰণ্ণনা নিট্ঠিতা.

‘‘তং নসুন্দর’’ন্তি ব্যঞ্জনতো নসুন্দরং. নকেৰলং ব্যঞ্জনতোযেৰ নসুন্দরং, অত্থতোপি নসুন্দরমেৰ. চতুসচ্চ ধম্মাহি পচ্চেকবুদ্ধঞ্ঞাণস্সপি গোচরা হোন্তি. পঞ্চঞেয্য ধম্মা পন সব্বঞ্ঞুতঞ্ঞাণস্সেৰ. তত্থ চতুসচ্চ ধম্মা নাম পরমত্থ ধম্মা এৰ. পঞ্চঞেয্যধম্মা পন সব্ব পঞ্ঞত্তিযা সহ সব্বপরমত্থ ধম্মা. সব্বঞ্ঞুবুদ্ধানং চতুসচ্চাভি সম্বোধো ধম্ম পঞ্ঞত্তিযা সহ সিজ্ঝতি. পচ্চেকবুদ্ধানং চতুসচ্চ সম্বোধো ধম্মপঞ্ঞত্তিযা সহ নসিজ্ঝতি. তস্মা তে সযং পটিৰিদ্ধং চতুসচ্চ ধম্মং নাম পঞ্ঞত্তিং নীহরিত্ৰা পরেসং দেসেতুং ন সক্কোন্তি. তেসং চতুসচ্চসম্বোধো মূগস্স সুপিনদস্সনং ৰিয হোতীতি অট্ঠকথাসু ৰুত্তং. তস্মা পঞ্ঞত্তিযা সহ পঞ্চ ঞেয্য ধম্মা এৰ সব্বঞ্ঞুতঞ্ঞাণস্স গোচরাতি সক্কাৰত্তুন্তি.

পরমত্থপদৰণ্ণনা নিট্ঠিতা.

১৩. চিত্তৰচনত্থে. নহি সা আরম্মণেনৰিনা লব্ভতি. চিন্তেতীতি ৰুত্তে কিং চিন্তেতি, আরম্মণং চিন্তেতীতি এৰং আরম্মণভূতেন কম্মপদেন ৰিনা অসম্ভৰতো. তস্মা ইধ চিন্তনাতি দট্ঠব্বা, তস্মা অস্স নামং সিদ্ধন্তি দট্ঠব্বন্তি সম্বন্ধো. সুতমযঞ্ঞাণং, চিন্তামযঞ্ঞাণ, ন্তি এত্থ আরম্মণস্স ভূতসভাৰ চিন্তাপি অত্থি, সাপঞ্ঞাএৰাতি তং নিৰত্তেতুং ‘‘আরম্মণ…পে… ণূপলদ্ধিযেৰা’’তি ৰুত্তং. চিত্তং, মনো, মানসং, ৰিঞ্ঞাণ, ন্তি সব্বং চিত্তস্স নামং. আরম্মণ পচ্চযপ্পটিবদ্ধং হোতি. ন অঞ্ঞপচ্চযপ্পটিবদ্ধং. ন চ অঞ্ঞপচ্চযেন লদ্ধং নামং. এৰরূপস্স আরম্মণ ৰিজানন সঙ্খাতস্স অত্থন্তরস্সবোধকং নহোতীতি দস্সেতুং ‘‘সন্তেসু চা’’তিআদিৰুত্তং. ‘‘এতেনা’’তি ইদং কত্তুনো কিরিযাসাধনে অতিস্সযূপকারকং করণ সাধনং ৰদতীতি দস্সেতুং ‘‘তঞ্হী’’তিআদিৰুত্তং. ‘‘চিন্তনমত্ত’’ন্তি এত্থ মত্তসদ্দো ৰিসেসনিৰত্তি অত্থোতি, তেন নিৰত্তিতং অত্থং দস্সেতি ‘‘সব্বেপিহী’’তিআদিনা. ‘‘ৰিগ্গহো ৰা’’তি সরীরং ৰা. পচ্চযেন আযত্তা পচ্চযাযত্তা. ‘‘আযত্তা’’তি সম্বন্ধা. ৰত্তনং ৰুত্তি. উপ্পজ্জনং ৰা ঠিতি ৰা. পচ্চযাযত্তা ৰুত্তি এতেসন্তি ‘‘পচ্চযাযত্ত ৰুত্তিনো’’. ‘‘থামেনা’’তিআদি অঞ্ঞমঞ্ঞৰেৰচনানি. ‘‘একং ভাৰসাধনমেৰ পধানতো লব্ভতী’’তি ইদং ধম্মানং তং তং কিরিযা মত্তভাৰং সন্ধায ৰুত্তং. কিরিযামত্তভূতাপি পন তে ধম্মাসযং নানাপচ্চযা ৰত্থাযং ঠিতা ৰা হোন্তি নানাপচ্চযুপ্পন্নাৰত্থাযং ঠিতা ৰা. তস্মা পরমত্থ পদেসুপি যথারহং তদঞ্ঞসাধনানং পটিলাভো অৰারিতো হোতি. ইতরথা হেতু পচ্চযো, আরম্মণ পচ্চযো, সহজাতপচ্চযো, নিস্সযপচ্চযোতিআদীসু কথং ভাৰসাধনং যুত্তং সিযাতি. ‘‘পধানতো’’তি মুখ্যতো. ‘‘অভেদস্স চিন্তনস্সভেদকরণ’’ন্তি ইদং চিন্তেতীতি চিত্তন্তিকতং কত্তুসাধনং সন্ধায ৰুত্তং. ‘‘সিলাপুত্তকস্সা’’তি ভেসজ্জমূলানং পিসনসিলাপোতকস্স. তস্স সরীরং নাম ৰিসুং অঙ্গং নত্থি. অভিন্নংপি ভিন্নং কত্ৰা ৰুচ্চতি ‘‘সিলাপুত্তকসরীর’’ন্তি. ইদং অভেদস্সভেদকরণং নাম অভূতরূপং হোতি. পযোজনে সতি ৰত্তব্বং, অসতি ন ৰত্তব্বন্তি আহ ‘‘তথাকরণঞ্চা’’তিআদিং. তত্থ ‘‘পরপরিকপ্পিতস্সা’’তি পরেহি অঞ্ঞতিত্থা চরিযেহি পরিচিন্তিতস্স. ‘‘সতিহি…পে… কপ্পনাযা’’তি সচে অত্তা অত্থি, অত্তা চিন্তেতি, তস্মা অত্তা চিত্তোনামাতিআদি ৰত্তব্বং. ন ৰত্তব্বং চিন্তেতীতি চিত্তন্তি, চিত্তস্স কিরিযামত্তত্তা. ন পন অত্তাদিকো কত্তা নাম অত্থি. তস্মা কিরিযা মত্তমেৰ কত্তারং কত্ৰা ‘‘চিন্তেতীতি চিত্ত’’ন্তি ৰুত্তং. তেন ৰিঞ্ঞাযতিলোকে অত্তাদিকোকত্তা নাম নত্থীতি. ইদং অভেদস্সভেদ পরিকপ্পনায পযোজনন্তি ৰুত্তং হোতি. ‘‘অত্তপ্পধানো’’তি কিরিযাসাধনে বহূনংকারকানং মজ্ঝে সযংপধানো সযংজেট্ঠকো হুত্ৰা. ‘‘তংকত্তুভাৰ’’ন্তি লোকেসিদ্ধং কত্তুভাৰং. ‘‘পুন করণভাৰ’’ন্তি পুন লোকে সিদ্ধং করণভাৰং. এৰং চিত্তস্স ৰচনত্থং দস্সেত্ৰা ইদানি তস্স অভিধানত্থং দস্সেন্তো ‘‘অপিচেত্থা’’তিআদিমাহ. যথযিদং যে ইমে তিরচ্ছানগতা পাণা চিত্তাৰিচিত্তা. এৰং চিত্তং ৰিচিত্তং যং অঞ্ঞং অত্থি, তং অঞ্ঞং একনিকাযংপি নসমনুপস্সামী-তি যোজনা. ‘‘নিকায’’ন্তি সত্তজাতিসমূ হং.‘‘নিস্সক্কে করণৰচন’’ন্তি ৰিভত্তাপাদানত্থে করণৰচনং. এতেন ততো চরণতো চিত্ততোতি অত্থং ৰদতি. গাথাযং. ‘‘তং তং সভাৰো’’তি ৰিজাননফুসনাদিকো সভাৰো, অগ্গিস্সউণ্হোৰিয. ‘‘কিচ্চসম্পত্তিযোরসো’’তি তেন তেন ধম্মেন করণকিচ্চঞ্চ, তং কিচ্চং কত্ৰা লদ্ধো সম্পত্তিগুণো চ. অগ্গিস্স ৰত্থুম্হি পরিপাচনকিচ্চং ৰিয, ওভাসনগুণোৰিয চ. ‘‘গয্হাকারো’’তি ঞাণেন গহেতব্বো তস্স তস্স ধম্মস্স ধজভূতো আকারো. সম্পত্তি রসোযেৰ ৰুচ্চতি. ‘‘ফলংৰাপী’’তি কারিযপ্ফলং ৰাপি, অগ্গিস্স ধূমোৰিয. ‘‘আসন্নকারণ’’ন্তি অত্তনো অনন্তরে ফলনিব্বত্তকং কারণং, অগ্গিস্স অগ্গিকারক পুরিসো ৰিয. ‘‘অল’’ন্তি সমত্থা. ‘‘ৰিবুদ্ধিনো’’তি ৰিসেসবুদ্ধি সম্পন্নস্স পণ্ডিতস্স. ‘‘পুব্বঙ্গমরস’’ন্তি আরম্মণগ্গহণে পধানরস কিচ্চং. ‘‘সন্ধান পচ্চুপট্ঠান’’ন্তি নিরন্তরপ্পৰত্তাকারপচ্চুপট্ঠানং. ‘‘নাম রূপপদট্ঠান’’ন্তি ফস্সাদিনামঞ্চ ৰত্থু রূপঞ্চচিত্তস্সপদট্ঠানং.

চিত্তৰণ্ণনা নিট্ঠিতা.

১৪. ‘‘চেতসি ভৰ’’ন্তি চিত্তস্মিং পাতুভূতং. ‘‘এতেন সিদ্ধা হোন্তী’’তি সম্বন্ধো. ‘‘সা এৰ ফস্সাদীনং জাতি. যাচিত্তস্সজরা, সা এৰ ফস্সাদীনংজরা’’তিআদিনা যোজেতব্বং. ‘‘একৰণ্টূপনি বন্ধানী’’তি একেন ৰণ্টদণ্ডকেন উপনিবন্ধানি. ‘‘একজাতিযাদি উপনিবন্ধা’’তি একজাতিকথা দিৰসেন উপনিবন্ধা. ‘‘চে’’তি চেৰদেয্য. ‘‘না’’তি ন ৰত্তব্বং. গাথাযং. ‘‘ধম্মা’’তি নামক্খন্ধ ধম্মা. ‘‘মনসা এৰা’’তি কত্তুভূতেন মনেন এৰ. ‘‘পকতা’’তি পৰত্তিতা. ‘‘নিম্মিতা’’তি নিপ্ফাদিতা. ‘‘চিত্তকিরিযা ভূতা এৰা’’তি আরম্মণং ৰিজানন্তং চিত্তং ফুসনাকারং জনেত্ৰাৰ ৰিজানাতি. সো ফুসনাকারো ফস্সোতি ৰুচ্চতি. অৰসেসা পন সব্বেপি চেতসিকধম্মা ফস্সং পটিচ্চ উপ্পজ্জন্তি. ফস্সো হেতু ফস্সো পচ্চযো ৰেদনাক্খন্ধস্স উপাদায. সঞ্ঞাক্খন্ধস্স. সঙ্খারক্খন্ধস্স উপাদাযাতি হি ৰুত্তং. এৰং সন্তেপি চিত্তমূলকত্তা চিত্তনিস্সিতত্তা চ তেপিধম্মা চিত্তকিরি যাভূতা এৰ হোন্তীতি. ‘‘এতেনা’’তি এতেনগাথাপদেন. ৰিভাৰনিযং পন একালম্বণতা মত্তেন ৰিভাৰেতি. পরিপুণ্ণানি চে তসিকঙ্গানি উপরি থেরেন সযমেৰ ৰক্খমানত্তাতি অধিপ্পাযো. ইধ পন পদত্থৰিভাৰনট্ঠানত্তা পরিপুণ্ণেহি অঙ্গেহি ৰিভাৰেতুং ৰট্টতীতি আহ ‘‘তং নসুন্দর’’ন্তি. ‘‘ৰত্থুম্হী’’তি পটকোট্ঠকাদিম্হি. ‘‘নানাচিত্তকম্মানী’’তি হত্থি অস্সরূপাদীনি. ৰিজাননমত্তং চিত্তং, কুসলন্তি ৰা অকুসলন্তি ৰা ৰত্তব্বং নত্থি. নানাচেতসিকে হি যুত্তত্তা এৰ তথা ৰত্তব্বং হোতি. ৰুত্তংহেতং ভগৰতা. পভস্সরমিদং ভিক্খৰে চিত্তং. তঞ্চ খো আগন্তুকেহি উপক্কিলেসেহি উপক্কিলিট্ঠন্তি. তেনাহ ‘‘উদকং ৰিযচিত্ত’’ন্তিআদিং.

চেতসিকৰণ্ণনা নিট্ঠিতা.

১৫. রুপ্পতীতি পদং কত্তরিৰাহেতুকম্মনিৰাসিদ্ধং. রুপ্পনঞ্চৰিকারাপত্তি এৰাতি দস্সেতুং ‘‘সীতুণ্হাদীহী’’তিআদি ৰুত্তং. তত্থ ‘‘ৰিসমপ্পৰত্তিৰসেনা’’তি ধাতূনং ৰিসমপ্পৰত্তিৰসেন. ধাতুক্খো ভৰসেনাতি ৰুত্তং হোতি, ‘‘কেনরুপ্পতী’’তি এত্থ ‘‘কেনা’’তি হেতু অত্থেৰা হেতু কত্তরিৰা করণৰচনং দট্ঠব্বং. তথা সীতেনাতিআদীসুপি. ডংসমকসা নাম সূচিমুখা খুদ্দকমক্খিকাচেৰ মহন্ত মক্খিকা চ. ৰাতা নাম পুরত্থিমৰাতাদযো. আতপো নাম সূরিযাতপো. সরিংসপানাম অহি ৰিচ্ছিক সতপদিকাদযো. তেসং সম্ফস্সেহিপি রুপ্পতি. মরণং ৰা গচ্ছতি, মরণ মত্তং ৰা দুক্খং. ‘‘যে ধম্মা’’তি দ্ৰাদসৰিধা সপ্পটিঘরূপধম্মা. ‘‘অঞ্ঞেস’’ন্তি সোল়সন্নং অপ্পটিঘরূপানঞ্চ অরূপধম্মানঞ্চ. ‘‘তেসূ’’তি নিদ্ধারণেভুম্মং. ইদানি পাল়িযা সদ্ধিং মুখ্যরুপ্পনং সংসন্দেন্তো ‘‘সমাগমো চা’’তিআদিমাহ. সমাগমো চ নাম অঞ্ঞমঞ্ঞাভিঘট্টনং ৰুচ্চতীতি সম্বন্ধো. আপাতাগমনঞ্চ আরম্মণকরণঞ্চ ঠপেত্ৰাতি যোজনা. ‘‘মহাভূতানমেৰ ৰা’’তি আপোধাতু ৰজ্জিতানং তিণ্ণং মহাভূতানমেৰ ৰা. ‘‘ৰিকারং আপজ্জতী’’তি ৰত্ৰা তমেৰত্থং ৰিৰরন্তো ‘‘যস্মিং খণে’’তিআদিমাহ. ‘‘সযংপি ৰিকারপত্তা হোন্তী’’তি তেমহাভূতাসযংপি পকতিং ৰিজহিত্ৰা ওমত্তাধিমত্তভাৰং পাপুণন্তীতি অত্থো. ‘‘ওমত্তাধিমত্তরূপসন্ততীনঞ্চা’’তি পরম্পরতো উপ্পজ্জমানা রূপসন্ততিযো সন্ধায ৰুত্তং. এৰং পাল়িনযেন ৰিপত্তিৰসেন রুপ্পনং ৰত্ৰা ইদানি ৰিপত্তি ৰা হোতু, সম্পত্তি ৰা. পুরিমপচ্ছি মসন্ততীনং ৰিসদিসপ্পৰত্তিভূতো ৰিকারোপি একেন পরিযাযেন রুপ্পনংনামাতি কত্ৰা পুন তং রুপ্পনং দস্সেন্তো ‘‘অপিচেত্থা’’তিআদিমাহ. ‘‘ঘট্টনৰসেন রুপ্পন ধম্মান মেৰা’’তি আপাতাগমনাদিৰসেন রুপ্পনধম্মেহিৰিনা অভিঘট্টনৰসেনরুপ্পন সভাৰানং রূপধম্মানমেৰ সিদ্ধন্তি পুচ্ছা. ‘‘সৰিগ্গহা হোন্তী’’তি দব্ব সণ্ঠানাকারসহিতা হোন্তি. কস্মা, ওল়ারিকসভাৰত্তা. বহূনঞ্চরূপকলাপানং একক্খণে একাবদ্ধভাৰেনপৰত্তত্তা. অরূপধম্মাহি সণ্হসুখুমসভাৰা চ হোন্তি. সচে অনেকসতসহস্সানিপি একতো পৰত্তেয্যুং. দব্বসণ্ঠানভাৰং নগমিস্সন্তিযেৰ. একস্মিঞ্চ সত্তসন্তানে একক্খণে এক কলাপোৰ পৰত্ততি. কস্মা, অনন্তর পচ্চযূপনিবন্ধেন পৰত্তত্তা. তস্মাতে সৰিগ্গহান হোন্তি. রূপধম্মা পন ওল়ারিক সভাৰা চ হোন্তি. বহূনং সন্নিচযেসতি দব্বসণ্ঠানত্থায সংৰত্তন্তি. একক্খণে চ বহুকলাপাপি একাবদ্ধাহুত্ৰা পৰত্তন্তি. তস্মা তেসৰিগ্গহাহোন্তীতি.

‘‘সীতাদিগ্গহণসামত্থিযেনা’’তি সীতেনপি রুপ্পতি, উণ্হেনপি রুপ্পতীতিআদিনা লোকস্স পচ্চক্খতো পাকটস্স সীতাদিৰচনস্সসামত্থিযেন. তঞ্হি ৰচনং লোকস্স অপাকটং অরূপধম্মানং রুপ্পনং ইধনাধিপ্পেতন্তি দীপেতীতি অধিপ্পাযো. ‘‘ৰোহারো নামা’’তি নামসঞ্ঞা নামাতি ৰুত্তং হোতি. ‘‘লোকোপচারেনা’’তি বহুজনস্স উপচারেন ৰোহারেন কথনেন. ‘‘পাকট নিমিত্তৰসেনেৰা’’তি পাকটস্স সদ্দপ্পৰত্তিনিমিত্তস্স ৰসেনেৰ. ‘‘সীতাদিগ্গহণেন ৰিনাপী’’তি পিসদ্দেন সীতাদিগ্গহণসামত্থিযেনপীতি দীপেতি. এৰং সন্তেপি পাল়িসাধকং নাম ন সক্কাসব্বত্থ লদ্ধুং. পাকটনিমিত্ত ৰচনমেৰ সব্বত্থ সাধারণন্তি দট্ঠব্বং. ‘‘তপ্পসঙ্গনিৰত্তী’’তি তস্স অরূপধম্মানং রূপতাপসঙ্গস্স নিৰত্তি. ‘‘ইদ্ধিৰিকুব্বনাৰসপ্পৰত্তা’’তি এত্থ ইদ্ধিৰিকুব্বনানামইদ্ধিযানানপ্পকারমাপনং. ‘‘রূপতা সিদ্ধী’’তি রূপন্তি নাম সঞ্ঞাসিদ্ধি. ‘‘ইদং পনা’’তি ইদং রূপং পন. ‘‘অনুগ্গহানং সীতাদীনং ৰসেনা’’তি কিঞ্চাপিপাল়িযং সীতাদিৰচনং উপঘাতকানং সীতাদীনং ৰসেন ৰুত্তং. তেচ ব্রহ্মলোকে নত্থি. অনুগ্গাহকা এৰ অত্থি. তেসংৰসেনাতি অধিপ্পাযো. ‘‘পাল়িযং নিদ্দিট্ঠানী’’তি সঞ্জানাতীতি খো ভিক্খৰে তস্মা সঞ্ঞাতি ৰুচ্চতি. কিঞ্চ সঞ্জানাতি. নীলংপি সঞ্জানাতি, পীতম্পি সঞ্জানাতী-তিআদিনা চ, ৰিজানাতীতি খো ভিক্খৰে তস্মা ৰিঞ্ঞাণন্তি ৰুচ্চতি. কিঞ্চ ৰিজানাতি. মধুরংপি ৰিজানাতি, অম্বিলংপি ৰিজানাতী-তিআদিনা চ-পাল়িযং নিদ্দিট্ঠানি.

রূপপদৰণ্ণনা নিট্ঠিতা.

১৬. নিব্বানপদে. ‘‘খন্ধাৰা’’তি ভৰন্তরে অপাযাদীসু ভৰিস্সমানা খন্ধাৰা. ন হি অতীত ধম্মা, নিব্বাযন্তি নাম, সত্তে পীল়েত্ৰা নিরুদ্ধত্তাতি অধিপ্পাযো. পচ্চুপ্পন্না চ ধম্মা এতরহি পীল়েন্তি, অৰস্সং উপ্পজ্জমানা অনাগতধম্মা চ অনাগতে পীল়েস্সন্তি, কথং তে নিব্বাযন্তি নামাতি আহ ‘‘পচ্চুপ্পন্নেসু…পে… ৰত্তব্বমেৰ নত্থী’’তি. ‘‘ৰিসযেভুম্ম’’ন্তি ৰিসযাধারেভুম্মং. ৰিসযাধারো নামমনুস্সাভূমিযং গচ্ছন্তীতিআদীসু ৰিয মুখ্যাধারো নহোতি. তেন পন ৰিনা অঞ্ঞত্থ তং কিরিযং কাতুং নসক্কোতি. তস্মা আধারভাৰেন পরিকপ্পিতো আধারোতি দস্সেতুং ‘‘যথাআকাসে’’তিআদিৰুত্তং. যথা সকুণানং পক্খন কিরিযা নাম আকাসেন ৰিনা অঞ্ঞত্থ নসিজ্ঝতি. তথা ৰট্টদুক্খধম্মানং নিব্বুতি কিরিযাপি নিব্বানেন ৰিনা অঞ্ঞত্থ নসিজ্ঝতীতি দস্সেতুং ‘‘যেহিতে’’তিআদিমাহ. তত্থ ‘‘যে’’তি যেতিৰিধৰট্টদুক্খসন্তাপধম্মা. হিসদ্দোনিপাতো. তেসদ্দো ৰচনালঙ্কারো. ‘‘তব্বিনিমুত্ত’’ন্তি নিব্বানৰিনিমুত্তং. নিব্বুতিঠানং নাম নত্থি. তস্মা নিব্বানং তেসং নিব্বুতি কিরিযায ৰিসযা ধারোহোতীতি অধিপ্পাযো. যথা অযং পদীপো নিব্বাযতি. তথাধীরা নিব্বন্তীতি যোজনা. ‘‘তং তং কিলেসানং ৰা’’তি তে সংতেসংকিলেসানং ৰা. ‘‘খন্ধানং ৰা’’তি অনাগতভৰেসু খন্ধানং ৰা. ‘‘পুনঅপ্পটিসন্ধিকভাৰ’’ন্তি সন্তানস্স পুন পটিসন্ধানাভাৰং পাপুণন্তি অরিযা জনা. যথা মগ্গে করণৰচনং দিস্সতি অদ্ধা ইমাযপটিপত্তিযা জরামরণম্হা পরিমুচ্চিস্সামীতিআদীসু. ন তথা নিব্বানেতি আহ ‘‘মগ্গেৰিযা’’তিআদিং. নিব্বানেপনভুম্মৰচনমেৰ দিস্সতি যত্থনামঞ্চরূপঞ্চ. অসেসং উপরুজ্ঝতীতিআদীসু. তস্মা নিব্বানে করণ ৰচনং ন দিস্সতি, করণ লক্খণস্সেৰ অভাৰতোতি দস্সেতুং ‘‘ন চ নিব্বান’’ন্তিআদি ৰুত্তং. করণ লক্খণং নামকত্তুনো সহকারী পচ্চযভাৰো. ননু অনুপাদিসেসায নিব্বানধাতুযা নিব্বাযন্তীতি দিস্সতীতি. সচ্চং, তত্থ পন ৰিসেসনে করণ ৰচনং. ন করণকারকে. তঞ্হি সউপাদিসেসনিব্বানধাতুযানিৰত্তনত্থং ৰুত্তন্তি.

নিব্বানপদৰণ্ণনা.

দুতীযগাথাৰণ্ণনা নিট্ঠিতা.

১৮. কামাৰচরপদে. ‘‘কামীযতী’’তি ইচ্ছীযতি. নিমিত্তস্সাদৰত্থু মজ্ঝিমট্ঠকথাযং আগতং. ‘‘তেকামীযন্তী’’তি তে অৰীচিনিরযাদযো ইচ্ছীযন্তি. ‘‘তত্থ উপ্পন্নানম্পী’’তি অৰীচিনিরযাদীসু উপ্পন্নানংপি সত্তানং. ‘‘ভৰনিকন্তি নাম হোতী’’তি ভৰসঙ্খাতং অত্তনো খন্ধং এতং মম, এসোহমস্মি, এসোমে অত্তাতি গণ্হন্তী তণ্হা ভৰনিকন্তি নাম. সা নেরযিকসত্তানংপি অত্থিযেৰ. ‘‘কামে অৰচরতী’’তি কামেপরিযাপন্নং হোতি. কামে অন্তোগধং হোতি. রূপারূপভূমীসু উপ্পন্নংপি রূপারূপসঙ্খ্যং নগচ্ছতি. কামসঙ্খ্যমেৰ গচ্ছতি. কামগণনমেৰগচ্ছতীতি অত্থো. ‘‘তীসুভৰেসু উপ্পন্নানিপী’’তি কামরূপারূপসত্তসন্তানেসু উপ্পন্নানিপি ন তত্রপরিযা পন্নানেৰ হোন্তি. তত্র অপরিযাপন্নানেৰ হোন্তীতি অধিপ্পাযো. ‘‘কামাৰচরতাপত্তিদোসো’’তি কামাৰচর ধম্মাতি ৰত্তব্বতা পত্তিদোসো. ‘‘রূপাৰচরতাদিমুত্তিদোসো’’তি ইমে রূপাৰচর ধম্মা ন হোন্তি, অরূপাৰচর ধম্মা ন হোন্তি, লোকুত্তর ধম্মা ন হোন্তীতি এৰং ৰত্তব্বতাপত্তি দোসোতি ৰুত্তং হোতি. এসনযো ‘‘রূপারূপাৰচরতাপত্তি দোসো কামাৰচরতামুত্তি দোসো’’ তিপদেসু. অৰচরসদ্দস্স উপ্পন্নত্থে গহিতেপি এতেদোসা নাপজ্জন্তি. কস্মা, লোকে যেভূয্যনযতব্বহুলনযানংপি সব্ভাৰাতি ইমমত্থং ৰদন্তো ‘‘ননুযেভূয্য ৰুত্তিৰসেনপী’’তিআদিমাহ. তত্থ ‘‘কেসঞ্চী’’তি কেসঞ্চি পুগ্গলানং ৰা ধম্মানং ৰা. যথামিগলুদ্দকো গামে চরন্তোপি ৰনে চরণবহুলত্তা ৰনচরকোতি নামং লভতি. রাজহত্থী অঞ্ঞত্থ চরন্তোপি সঙ্গামে চরণবহুলত্তা সঙ্গামাৰচরোতি নামং লভতি. অযং যেভূয্যনযো নাম. যস্মিং ৰনে অম্বরুক্খাপি অত্থি, অঞ্ঞরুক্খাপি অত্থি. অম্বরুক্খবহুলত্তা পন তং ৰনং অম্বৰনন্তি নামং লভতি. এৰং সিম্বলিৰনাদীসু. অযং তব্বহুলনযো. ইধ পন ভূমিযো তব্বহুলনযেন কামরূপারূপ নামং লভন্তি, ধম্মা যেভূয্যনযেন কামাৰচরাদি নামং লভন্তীতি. এৰং গহিতে সতি, তে দোসানা পজ্জন্তীতি ইমমত্থং দস্সেতুং ‘‘তস্মা ইধপি…পে… দোসোতী’’তিআহ. ‘‘না’’তি ন কোচিদোসো নত্থি. অত্থি এৰাতি অধিপ্পাযো. ‘‘তস্মাস্সা’’তি এত্থ ‘‘অস্সা’’তি অৰচরসদ্দস্স. ‘‘তথা অত্থং অগ্গহেত্ৰা’’তি উপ্পজ্জনত্থং অগ্গহেত্ৰা. ‘‘পরিগ্গাহিনিযা কামতণ্হায কতো’’তি তথা পরিগ্গাহিনিযা কামতণ্হায গোচরৰিসযত্তাতাযতণ্হায কতোনাম হোতি. এতেন কামেতীতি কামো, কামতণ্হা. অৰচরতি এত্থাতি অৰচরং. কামস্স অৰচরন্তি কামাৰচরং. কাম তণ্হায গোচরৰিসযত্তা কামাৰচরন্তি অযমত্থোপি সিজ্ঝতি.

রূপেঅৰচরতীতি রূপাৰচরং. ‘‘রূপে’’তি সোল়সৰিধাযরূপভূমিযা. ‘‘অৰচরতী’’তি তত্থ পরিযাপন্নভাৰেন পৰত্ততি. অরূপে অৰচরতীতি অরূপাৰচরং. ‘‘অরূপে’’তি চতুব্বিধায অরূপভূমিযা. ‘‘অৰচরতী’’তি তত্থ পরিযাপন্নভাৰেন পৰত্ততীতি ইমমত্থং ৰদতি ‘‘রূপারূপাৰচরেসুপি অযংনযো নেতব্বো’’তি. রূপে ভৰো রূপং. রূপতণ্হা. অরূপে ভৰো অরূপং, অরূপতণ্হা. রূপস্স অৰচরং রূপাৰচরং. অরূপস্স অৰচরং অরূপাৰচরন্তি ইমমত্থং দীপেতি ‘‘তেসু পনা’’তিআদিনা. ‘‘অত্রা’’তি ইমস্মিং ঠানে. যদিপি লোভো, রাগো, কামো, তণ্হা, তিসব্বম্পেতং লোভস্সৰেৰচনং হোতি. রূপরাগো অরূপরাগোতি পন ৰিসুং ৰিভত্তত্তা ইধ কামসদ্দেন তং দঞ্ঞোলোভো গয্হতি. ‘‘সব্বোপি লোভো’’তি এতেনসস্সতুচ্ছেদ দিট্ঠিসহগতোপি সঙ্গহিতোতি দট্ঠব্বং.

১৯. ‘‘রূপারূপসদ্দা তাসু ভূমীসু নিরুল়্হা’’তি অনিমিত্তা হুত্ৰা নিরুল়্হাতি অধিপ্পাযো. ইদানি সনিমিত্তং নযং ৰদতি ‘‘অপিচা’’তিআদিনা. ‘‘নিস্সযোপচারো’’তি ঠানূপচারো, যথা সব্বোগামো আগতোতি. ‘‘নিস্সিতো পচারো’’তি ঠান্যূপচারো. যথা ধজা আগচ্ছন্তীতি. ‘‘যং এতস্মিং অন্তরে’’তি যে এতস্মিং অন্তরে খন্ধধাতু আযতনা. যং রূপং, যা ৰেদনা, যাসঞ্ঞা, যে সঙ্খারা, যংৰিঞ্ঞাণন্তি যোজনা. ‘‘সুৰিসদ’’ন্তি যেভূয্যাদি নযেহি অনাকুলত্তাসুৰিসুদ্ধং. ‘‘কিং ৰিক্খেপেনা’’তি চিত্তৰিক্খেপেন কিং পযোজনন্তি অত্থো.

২০. ‘‘লুজ্জনপ্পলুজ্জনট্ঠেনা’’তি ভিজ্জনপ্পভিজ্জনট্ঠেন. ‘‘যত্থা’’তি যস্মিং তেভূমকে ধম্মসমূহে. ‘‘নিৰিসতী’’তি নিচ্চং ৰিসতি, উপগচ্ছতি. ‘‘তস্সা’’তি মিচ্ছাগ্গাহস্স. ‘‘তেস’’ন্তি লোকুত্তর ধম্মানং. ‘‘যেস’’ন্তি লোকিয ধম্মানং. ‘‘লুজ্জন’’ন্তি খণিকভঙ্গেন ভিজ্জনং. ‘‘পলুজ্জন’’ন্তি সণ্ঠানভেদেন সন্ততিচ্ছেদেন নানপ্পকারতো ভিজ্জনং. নিব্বানং পন ইধ ন লব্ভতি চিত্তসঙ্গহাধিকারত্তাতি অধিপ্পাযো. সো চ অপরিযাপন্নভাৰো, ৰিসুং একাচতুত্থী অৰত্থা ভূমিনামাতি যোজনা.

চতুব্ভূমিৰিভাগৰণ্ণনা নিট্ঠিতা.

২১. ‘‘হীন’’ন্তি সদ্ধাসতিআদীহি সোভণধম্মেহি অযুত্তত্তাহীনং. ‘‘সব্বহীন’’ন্তি লোভাদীহি পাপধম্মেহি যুত্তত্তা সব্ব চিত্তেহি হীনতরং. ‘‘তদত্থো’’তি উপরিমানং চিত্তানং সোভণসঞ্ঞাকরণসুখত্থো. ‘‘আদিতো’’তিআদিম্হি. ‘‘ৰীথিচিত্তৰসেনাতি এতং মম, এসোহমস্মি, এসোমে অত্তাতি এৰং পৰত্তস্স ভৰনিকন্তি জৰনৰীথিচিত্তস্স ৰসেন. এৰঞ্চসতি, কিং কারণং লোভমূলচিত্তস্সপথমং ৰচনেতি আহ ‘‘অকুসলেসু পনা’’তিআদিং.‘‘দ্ৰীহিৰট্টমূলেহী’’তি লোভমোহসঙ্খাতেহি দ্ৰীহি ৰট্টমূলেহি.

২২. ‘‘সিনিদ্ধচিত্ত’’ন্তি সাতৰেদনাযুত্তত্তালূখচিত্তং ন হোতীতি অধিপ্পাযো. সুমনস্সভাৰোতি ৰুত্তে কাযিকসুখৰেদনাযপি পসঙ্গো সিযাতি ৰুত্তং ‘‘মানসিক…পে… নাম’’ন্তি. ‘‘সুমনাভিধানস্সা’’তি সুমননামস্স. ‘‘পৰত্তিনিমিত্ত’’ন্তি পৰত্তিযা আসন্ন কারণং. কথং পন ভাৰো পৰত্তিনিমিত্তং নামহোতীতি আহ ‘‘ভৰন্তি…পে… কত্ৰা’’তি. নিমিত্তে ভুম্মং. তথাহি ভাৰো নাম সদ্দপ্পৰত্তিনিমিত্তন্তি ৰুত্তং. ইদানি নিমিত্ত লক্খণং দস্সেন্তো ‘‘যথাহী’’তিআদিমাহ. ‘‘তত্থা’’তি তস্মিং পযোগে. ‘‘দন্ত নিমিত্ত’’ন্তি দন্তকারণা. ‘‘তং ৰেদনা নিমিত্ত’’ন্তি তং ৰেদনাকারণা. এত্থ সিযা, ‘‘এতস্মিন্তি নিমিত্তে ভুম্ম’’ন্তি ৰুত্তং, নিমিত্তঞ্চনাম অকারকং অসাধনং, তং কথং সাধনৰিগ্গহে যুজ্জতীতি. অধিকরণ সাধনানুরূপত্তা সদ্দপ্পৰত্তিনিমিত্তস্সাতি দট্ঠব্বং. এতেনাতি চ এতস্মাতি চ হেতু অত্থে উভযৰচনন্তি ৰদন্তি. আসন্নহেতু নামসাধনরূপো ভৰতীতি তেসং অধিপ্পাযো. সুট্ঠু করোতি, পকতিপচ্চযেন অনিপ্ফন্নং কম্মং অত্তনো বলেন নিপ্ফাদেতীতি সঙ্খারো. ‘‘পুব্বাভিসঙ্খারো’’তি পুব্বভাগে অভিসঙ্খারো. পযোজেতি নিযোজেতীতি পযোগো. উপেতি ফলসঙ্খাতো অত্থো এতেনাতি উপাযো. ‘‘আণত্তিযাৰা’’তি পেসনাযৰা. ‘‘অজ্ঝেসনেন ৰা’’তি আযাচনেন ৰা. ‘‘তজ্জেত্ৰা ৰা’’তি ভযং দস্সেত্ৰা ৰা. ‘‘তং তং উপাযং পরে আচিক্খ’’ন্তি. কথং আচিক্খন্তীতি আহ ‘‘অকরণে’’তিআদিং. ‘‘তস্মিং তস্মিং কম্মে পযোজেতীতিকত্ৰা ইধ সঙ্খারো নামা’’তি যোজনা. ‘‘পচ্চয গণো’’তি পকতিপচ্চযগণো. ‘‘তেনা’’তি সঙ্খারেন. ‘‘সাধারণো’’তি কুসলাকুসলাব্যাকতানং সাধারণো. ‘‘দুৰিধেন সঙ্খারেনা’’তি পযোগেন ৰা উপাযেন ৰা. ‘‘যো পন তেনসহিতো’’তিআদিনা পুব্বেৰুত্তমেৰত্থং পকারন্তরেনপাকটং কাতুং ‘‘সোপন যদা’’তিআদি ৰুত্তং. ‘‘ইতী’’তিআদি লদ্ধগুণ ৰচনং. ‘‘পচ্চযগণস্সেৰনাম’’ন্তি পচ্চযগণস্সেৰ ৰিসেস নামন্তি ৰুত্তং হোতি. উপ্পন্নত্থে ইকপচ্চযোতি কথং ৰিঞ্ঞাযতীতি আহ ‘‘যস্মিং সমযে’’তিআদিং. ‘‘পাল়িয’’ন্তি ধম্মসঙ্গণিপাল়িযং. ‘‘অসল্লক্খেত্ৰা’’তি অচিন্তেত্ৰা ইচ্চেৰত্থো. সব্বমেতং নযুজ্জতিযেৰ. কস্মা, পাল়িঅট্ঠকথাহি অসংসন্দনত্তা, অত্থযুত্তিব্যঞ্জনযুত্তীনঞ্চ অৰিসদত্তাতি অধিপ্পাযো. ‘‘ত’’ন্তি চিত্তং. ‘‘এতেনা’’তি পুব্বপ্পযোগেন. ‘‘যথাৰুত্তনযেনা’’তি তিক্খভাৰসঙ্খাতমণ্ডনৰিসেসেন. ‘‘সো পনা’’তি পুব্বপ্পযোগো পন. ‘‘ইতী’’তি তস্মা. ‘‘তং নিব্বত্তিতো’’তি তেন পুব্বপ্পযোগেন নিব্বত্তিতো. ‘‘ৰিরজ্ঝিত্ৰা’’তি অযুত্তপক্খেপতিত্ৰা. এতেনপটিক্খিত্তা হোতীতি সম্বন্ধো. গাথাযং. ‘‘চিত্তসম্ভৰী’’তি চিত্তস্মিং সম্ভূতো. ৰিসেসো সঙ্খারো নামাতি যোজনা. সলোমকো, সপক্খকোত্যাদীসুৰিযাতি ৰুত্তং. সাসৰা ধম্মা, সারম্মণা ধম্মাত্যাদীসুৰিযাতি পন ৰুত্তে যুত্ততরং. ‘‘পাল়িঅট্ঠকথা সিদ্ধ’’ন্তি পাল়িঅট্ঠকথাতো সিদ্ধং. অপিচযত্থৰিসুদ্ধিমগ্গাদীসু অসঙ্খারং চিত্তং, সসঙ্খারং চিত্তন্তি আগতং. তত্থ অযং পচ্ছিমনযো যুত্তো. উপাযসমুট্ঠিতস্স অনেকসতসম্ভৰতো ‘‘ইদঞ্চ নযদস্সনমেৰা’’তি ৰুত্তং. ‘‘উদাসিনভাৰেনা’’তি মজ্ঝত্তভাৰেন. ‘‘যতো’’তি যস্মা. ৰিকারপত্তো হোতি. ততো অধিমত্তপস্সনং ৰিঞ্ঞাযতীতি যোজনা.

২৩. ইদানি সহগতৰচন সম্পযুত্তৰচনানি ৰিচারেন্তো ‘‘এত্থচা’’তিআদিমারভি. ‘‘ন পন তে ভেদৰন্তা হোন্তী’’তি কস্মা ৰুত্তং. ন নু তেপিচক্খু সম্ফস্সো, সোতসম্ফস্সো, তিআদিনা চ, কামৰিতক্কো, ব্যাপাদৰিতক্কো, তিআদিনা চ, দুক্খে অঞ্ঞাণং, দুক্খসমুদযে অঞ্ঞাণ, ন্তিআদিনাচ ভেদৰন্তা হোন্তীতি. সচ্চং. তে পন ভেদা ইমং চিত্তং ভিন্নং ন করোন্তি. তস্মা তে ভেদৰন্তান হোন্তীতি ৰুত্তা. ন চ তেসং অযং ৰিকপ্পো অত্থীতি সম্বন্ধো. ‘‘ইমস্মিং চিত্তে’’তি লোভমূলচিত্তে. ‘‘কত্থচী’’তি কিস্মিঞ্চি চিত্তে. যেৰাপনাতি ৰুত্তে সুধম্মেসু আগতানিযেৰাপনকানি. ‘‘অঞ্ঞেহী’’তি দোসমূলমোহমূলেহি. ননুতানিপি ইধ গহেতব্বানীতি সম্বন্ধো. ‘‘না’’তি ন গহেতব্বানি. কস্মাতি আহ ‘‘তেসুহী’’তিআদিং. তেপি ইধ নগহেতব্বা সিযুং. ন পন ন গহেতব্বা. কস্মা, ৰেদনায চ সযং ভেদৰন্তত্তা, দিট্ঠিসঙ্খারানঞ্চ ৰিকপ্পসব্ভাৰাতি অধিপ্পাযো.

২৪. ‘‘সোমনস্সস্সকারণ’’ন্তি সোমনস্সুপ্পত্তিযা কারণং. সোমনস্সুপ্পত্তিযা কারণে ৰুত্তে তং সহগত চিত্তুপ্পত্তিযাপিকারণং সিদ্ধং হোতীতি কত্ৰা তমেৰ ৰুত্তন্তি দট্ঠব্বং. তেনাহ ‘‘সোমনস্সপ্পটিসন্ধিকোহী’’তিআদিং. হীনেন ৰা…পে… আরম্মণেন সমাযোগো, তেন সমাযুত্তস্সাপি চিত্তং উপ্পজ্জমানন্তিআদিনা ৰত্তব্বং. তথা ব্যসনমুত্তিযংপি. উপেক্খাকারণে ‘‘ব্যসনমুত্তী’’তি ইদং দোমনস্সপ্পসঙ্গপরিহারৰচনং. অজ্ঝাসযোৰুচ্চতি অজ্ঝাৰুত্তং গেহং. দিট্ঠিসঙ্খাতো অজ্ঝাসযোযস্সাতি দিট্ঠজ্ঝাসযো. তস্স ভাৰো দিট্ঠজ্ঝাসযতা. ‘‘অযোনিসো উম্মুজ্জন’’ন্তি অনুপাযতো আভুজনং, মনসিকরণং. ‘‘চিন্তা পসুতৰসেনা’’তি গম্ভীরেসু ধম্মেসু চিন্তাপসৰনৰসেন, ৰীমংসা ৰড্ঢনৰসেন. ‘‘দিট্ঠকারণমেৰা’’তি দিট্ঠং কারণপ্পটিরূপকমেৰ. তেনাহ ‘‘সারতোসচ্চতো উম্মুজ্জন’’ন্তি. ‘‘তব্বিপরীতেনা’’তি ততো ৰিপরীতেন. অদিট্ঠজ্ঝাসযতা, দিট্ঠিৰিপন্নপুগ্গলপরিৰজ্জনতা, সদ্ধম্মসৰনতা, সম্মাৰিতক্কবহুলতা, যোনিসো উম্মুজ্জনঞ্চ দিট্ঠিৰিপ্পযোগকারণন্তি ৰত্তব্বং.

‘‘ইমেসং পন চিত্তানং উপ্পত্তিৰিধানং ৰিসুদ্ধিমগ্গেগহেতব্ব’’ন্তি ৰিসুদ্ধি মগ্গেখন্ধ নিদ্দেসতো গহেতব্বং. ৰুত্তঞ্হিতত্থ. যদা হিনত্থিকামেসু আদীনৰোতিআদিনানযেন মিচ্ছাদিট্ঠিং পুরেক্খিত্ৰা হট্ঠতুট্ঠো কামেৰা পরিভুঞ্জতি, দিট্ঠমঙ্গলাদীনি ৰা সারতোপচ্চেতি সভাৰ তিক্খেন অনুস্সাহিতেনচিত্তেন. তদা পথমং অকুসল চিত্তং উপ্পজ্জতি. যদা মন্দেন সমুস্সাহিতেন চিত্তেন, তদাদুতীযং. যদা মিচ্ছা দিট্ঠিং অপুরেক্খিত্ৰা কেৰলং হট্ঠতুট্ঠো মেথুনং ৰা সেৰতি, পর সম্পত্তিং ৰা অভিজ্ঝাযতি, পরভণ্ডং ৰা হরতি সভাৰতিক্খেনেৰ অনুস্সাহিতেন চিত্তেন. তদা ততীযং. যদা মন্দেন সমুস্সাহিতেনচিত্তেন, তদা চতুত্থং. যদা পন কামানং ৰা অসম্পত্তিং আগম্ম অঞ্ঞেসং ৰা সোমনস্সহেতূনং অভাৰেন চতূসুপি ৰিকপ্পেসু সোমনস্সরহিতাহোন্তি, তদাসেসানি চত্তারি উপেক্খাসহগতানি উপ্পজ্জন্তীতি.

লোভমূলচিত্তৰণ্ণনা নিট্ঠিতা.

২৫. দোসমূলচিত্তে. ‘‘ৰিরূপ’’ন্তি দুট্ঠং, লুদ্দং. দুম্মনস্স ভাৰোতি ৰুত্তে কাযিকদুক্খৰেদনাযপি পসঙ্গো সিযাতি ৰুত্তং ‘‘মানসিক…পে… নাম’’ন্তি. পটিহঞ্ঞতি বাধতি. ‘‘সন্তত্তে’’তি সন্তাপিতে.

২৬. ‘‘ভেদকরো’’তি অঞ্ঞমঞ্ঞৰিসেসকরো. ‘‘ভেদকরান হোন্তী’’তি ইমস্স চিত্তস্স অঞ্ঞমঞ্ঞৰিসেসকরান হোন্তি. দোমনস্সগ্গহণং পসঙ্গনিৰত্তনত্থং গহিতন্তি যোজনা. পসঙ্গোতি চনানপ্পকারতো সজ্জনং লগ্গনং. কথং পসঙ্গোতি আহ ‘‘যদাহী’’তিআদিং. ‘‘তুট্ঠিং পৰেদেন্তী’’তি তুট্ঠামযং ইমেসং মরণেনাতিআদি চিক্খন্তি. এৰং সহগতপ্পসঙ্গং নিৰত্তেত্ৰা সম্পযুত্তপ্পসঙ্গং নিৰত্তেতুং ‘‘পটিঘগ্গহণংপী’’তিআদি ৰুত্তং. তিরচ্ছানগতপাণৰধে অপুঞ্ঞং নাম নত্থি. আদিকপ্পতো পট্ঠায মনুস্সানং যথাকাম পরিভোগত্থায লোকিস্সরিযেনথাৰরট্ঠাযিনা নিম্মিতত্তাতি অধিপ্পাযো. ‘‘ৰিস্সট্ঠা’’তি অনাসঙ্কা. ‘‘অঞ্ঞেৰা’’তি অঞ্ঞে ৰা জনে. ৰিমতি এৰ ৰেমতিকং. ৰেমতিকং জাতং যেসং তে ৰেমতিকজাতা. পুরিমচিত্তস্সলোভসহগতভাৰো ইমানিঅট্ঠপি লোভসহগতচিত্তানিনামাতি ইমিনা চূল়নিগমনে নেৰ সিদ্ধোৰিযাতি যোজনা. চূল়নিগমনেন পটিঘসম্পযুত্ত ভাৰেসিদ্ধে দোমনস্সসহগতভাৰোপি তেনসিদ্ধো যেৰাতি কত্ৰা ‘‘তেসং গহণং’’তি ৰুত্তং. ‘‘তেস’’ন্তি দোনস্সপটিঘানং. ইমস্মিং চিত্তে ইস্সামচ্ছরিযকুক্কুচ্চানিচথিনমিদ্ধানি চ অনিযতযোগীনি চ হোন্তি যেৰাপনকানি চ. তেনাহ ‘‘পুরিমচিত্তে’’তিআদিং. দোমনস্সং ইমস্মিং চিত্তে অত্থি, অঞ্ঞচিত্তেসু নত্থি, তস্মা অসাধারণ ধম্মো নাম. অনঞ্ঞসাধারণ ধম্মোতিপি ৰুচ্চতি. ‘‘যথাতং’’তি তং নিদস্সনং তদুদাহরণং যথা কতমন্তি অত্থো. ‘‘উপলক্খেতী’’তি সঞ্ঞাপেতি. আতপংতাযতিরক্খতীতি আতপত্তং. সেতচ্ছত্তং. লদ্ধং আতপত্তং যেনাতি লদ্ধাতপত্তো. রাজকুমারো. সো আতপত্তং লদ্ধোতি ৰুত্তে সব্বং রাজসম্পত্তিং লদ্ধোতি ৰিঞ্ঞাযতি. তস্মা ইদং উপলক্খণ ৰচনং জাতন্তি দট্ঠব্বং. ‘‘উভিন্ন’’ন্তি দ্ৰিন্নং দোমনস্স পটিঘানং. পুব্বে দোমনস্সসহগতন্তি ৰত্ৰা নিগমনে পটিঘসম্পযুত্তচিত্তানীতি ৰুত্তত্তা ‘‘ইমস্স…পে… সিদ্ধিতো’’তি ৰুত্তং.

২৭. ‘‘অনিট্ঠলোকধম্মেহী’’তি অলাভো চ, অযসোচ, নিন্দাচ, দুক্খঞ্চাতি চতূহি অনিট্ঠলোকধম্মেহি. ‘‘তং কুতেত্থ লব্ভা’’তি অহং অলাভাদীহি মাসমাগচ্ছীতি পত্থেন্তস্সপি কুতোমেএত্থলোকেতং পত্থনা পূরণং সব্বকালং লব্ভাতি অত্থো. ‘‘লব্ভা’’তি চ কম্মত্থদীপকং পাটিপদিকপদং. ইমেসং উপ্পত্তিৰিধানং ৰিসুদ্ধিমগ্গে সঙ্খেপতোৰ ৰুত্তং তস্স পাণাতি পাতাদীসু তিক্খমন্দপ্পৰত্তিকালে পৰত্তিৰেদিতব্বাতি.

দোসমূলচিত্তৰণ্ণনা নিট্ঠিতা.

২৮. মোহমূলচিত্তে. ‘‘মূলন্তরৰিরহেনা’’তি অঞ্ঞমূলৰিরহেন. সংসপ্পতীতি সংসপ্পমানা. এৰং নু খো, অঞ্ঞথানু খোতি এৰং দ্ৰিধা এরযতি কম্পতীতি অত্থো. ৰিক্খিপতীতি ৰিক্খিপমানং. ‘‘নিযমনত্থ’’ন্তি ইদং ৰিচিকিচ্ছাসম্পযুত্তং নামাতি নিযমনত্থং. ইদঞ্হি পটিঘসম্পযুত্তং ৰিয নিগমনেন সিদ্ধং ন হোতি. ‘‘ইধ লদ্ধোকাসং হুত্ৰা’’তি মূলন্তর ৰিরহত্তা এৰ ইধলদ্ধোকাসং হুত্ৰা. পকতি সভাৰভূতং, ইতি তস্মা নত্থীতি যোজনা. ‘‘অনোসক্কমান’’ন্তি পচ্ছতো অনিৰত্তমানং. ‘‘অসংসীদমান’’ন্তি হেট্ঠতো অপতমানং. উভযেন অব্বোচ্ছিন্নন্তি ৰুত্তং হোতি. ‘‘অতিসম্মুল়্হতাযা’’তি মূলন্তর ৰিরহেন মোহেন অতিসম্মুল়্হতায. ‘‘অতিচঞ্চলতাযা’’তি সংসপ্পমানৰিক্খিপমানেহিৰিচিকিচ্ছুদ্ধচ্চেহি অতিচঞ্চলতায. ‘‘সব্বত্থপী’’তি সব্বেসুপি আরম্মণেসু. অট্ঠকথাযং সঙ্খার ভেদেন অৰিজ্জায দুৰিধভাৰোৰ ৰুত্তো. কথং ৰুত্তো. অৰিজ্জা অপ্পটিপত্তি মিচ্ছা পটিপত্তিতো দুৰিধা তথা সসঙ্খা রাসঙ্খারতোতি ৰুত্তো. ‘‘তিৰিধভাৰোৰা’’তি ইমস্মিং চিত্তেসঙ্খারৰিমুত্তায অৰিজ্জায সদ্ধিং তিৰিধভাৰোৰ. ইমেসং দ্ৰিন্নং চিত্তানং উপ্পত্তিৰিধানং ৰিসুদ্ধিমগ্গেসঙ্খেপতোৰৰুত্তং তস্সঅসন্নিট্ঠানৰিক্খেপকালেপৰত্তি ৰেদিতব্বাতি.

২৯. ‘‘সব্বথাপী’’তি নিপাতসমুদাযো ৰা হোতু অঞ্ঞমঞ্ঞৰেৰচনো ৰা, ৰিসুং নিপাতোৰাতি এৰং সব্বপ্পকারতোপি. অকুসলপদে অকারো ৰিরুদ্ধত্থো. যথা অমিত্তো, অসুরো, তিদস্সেতুং ‘‘অকুসলানী’’তিআদিমাহ. ‘‘পটিৰিরুদ্ধভাৰো’’তি মোহাদীহি অকুসলেহি ৰিরুদ্ধভাৰো. ভাৰনংনারহন্তীতি ‘‘অভাৰনারহা’’. কথং পন ভাৰনংনারহন্তীতি আহ ‘‘পুনপ্পুন’’ন্তিআদিং. ‘‘নিযামং ওক্কমন্তাপী’’তি পঞ্চানন্তরিয কম্মভাৰেন নিযতমিচ্ছাদিট্ঠিভাৰেন চ নিযামং ওক্কমন্তাপি. অপাযং ভজন্তীতি অপাযভাগিনো. কম্মকারকা. তেসং ভাৰো. তায. ‘‘ৰট্টসোতনিযতে’’তি সংসারৰট্ট সোতস্মিং নিযতে. ‘‘থিরতরপত্তা’’তি সমাধিৰসেন থিরতরভাৰং পত্তা. ইদানি তমেৰত্থং পকারন্তরেন ৰিভাৰেতুং ‘‘অপিচা’’তিআদিমাহ. ‘‘সিযু’’ন্তি পদং ধাতুপচ্চযেহি সিদ্ধং নিপ্ফন্নপদং নাম নহোতি. কস্মা, ইধপরিকপ্পত্থস্স অসম্ভৰতো. নিপাতপদং হোতি. কস্মা, অনেকত্থতা সম্ভৰতো. ইধ পন ভৰন্তি সদ্দেন সমানত্থো. তেনাহ ‘‘নিপাতপদং ইধ দট্ঠব্ব’’ন্তি.

অকুসলৰণ্ণনা.

৩০. অহেতুকচিত্তে. ‘‘সব্বনিহীন’’ন্তি সব্বচিত্তেহি হীনং. পুন ‘‘সব্বনিহীন’’ন্তি সব্বাহেতুকেহি হীনং. ‘‘ত’’ন্তি অকুসল ৰিপাকং.

৩১. সুত্তপাল়িযং, ‘‘কট্ঠ’’ন্তি সুক্খদারুং. ‘‘সকলিক’’ন্তি ছিন্দিতফালিতং কট্ঠক্খণ্ডকং. ‘‘থুস’’ন্তি ৰীহিসুঙ্কং. ‘‘সঙ্কার’’ন্তি কচৰরং. চক্খুঞ্চরূপে চ পটিচ্চ যংৰিঞ্ঞাণং উপ্পজ্জতি. তং চক্খুৰিঞ্ঞাণন্ত্ৰেৰ ৰুচ্চতীতিআদিনা যোজেতব্বং. তত্থ ‘‘রূপে’’তি রূপারম্মণান. ‘‘সদ্দে’’তিআদীসুপি এসনযো. এত্থ চ ৰিঞ্ঞাণানি একৰত্থু নিস্সিতানি হোন্তি. তস্মা ৰত্থু দ্ৰারেসু একৰচনং ৰুত্তং. আরম্মণানি পন একৰিঞ্ঞাণেনাপি বহূনি গহিতানি. তস্মা আরম্মণেসু বহুৰচনং. ‘‘দুক্খযতী’’তি দুক্খং করোতি. নামধাতু পদঞ্হেতং. যথা অত্তানং সুখেতি ৰীণেতীতি সদ্দৰিদূ. ধাতুপাঠেসু পন সুখদুক্খতক্কিরিযাযংতি ৰুত্তং. তক্কিরিযাতি চ সুখকিরিযা দুক্খ কিরিযাতি অত্থো. সাতকিরিযা অস্সাতকিরিযাতি ৰুত্তং হোতি. চ সদ্দো ওকাসত্থোতি কত্ৰা ‘‘দুক্করং ওকাসদান’’ন্তি ৰুত্তং.

৩২. ‘‘চক্খুস্স অসম্ভিন্নতা’’তি চক্খুপসাদরূপস্স অভিন্নতা. তস্মিঞ্হি ভিন্নেসতি অন্ধস্স চক্খুস্স রূপানিনুপট্ঠহন্তীতি. ‘‘সোতস্সঅসম্ভিন্নতা’’তিআদীসুপি এসনযো. ‘‘আলোকসন্নিস্সযপ্পটিলাভো’’তি চক্খু চ আলোকেসতি কিচ্চকারী হোতি. অসতি নহোতি. তথা রূপঞ্চ. তস্মা আলোকো তেসং ৰিসযৰিসযীভাৰূপগমনে সন্নিস্সযো হোতি. তস্স আলোকসন্নিস্সযস্স পটিলাভো. এসনযো আকাসসন্নিস্সযাদীসু. ইমেসং অঙ্গানং যুত্তি দীপনা উপরিরূপসঙ্গহে আগমিস্সতি. ‘‘অট্ঠকথায’’ন্তি অট্ঠসালিনিযং. তত্থ ‘‘তস্মিং পন আপাতং আগচ্ছন্তেপি আলোকসন্নিস্সযে অসতি চক্খুৰিঞ্ঞাণং নুপ্পজ্জতী’’তি ৰচনং অসম্ভাৰেন্তো ‘‘তং ৰিনা আলোকেনা’’তিআদিমাহ. ‘‘অভাৰদস্সন পর’’ন্তি অভাৰদস্সনপ্পধানং.

৩৩. ৰিপাকৰচনত্থে. ৰিপচ্চতীতি ৰিপাকং. ৰিপচ্চতীতি চ ৰিপক্কভাৰং আপজ্জতি. পুব্বে কতকম্মং ইদানি নিব্বত্তিং পাপুণাতীতি ৰুত্তং হোতি. ইদানি তদত্থং পাকটং করোন্তো ‘‘অযঞ্চ অত্থো’’তিআদিমাহ. অট্ঠকথাযং আযূহন সমঙ্গিতাপি আগতা. ইধ পনসা চেতনা সমঙ্গিতায সঙ্গহিতাতি কত্ৰা ‘‘চতস্সো সমঙ্গিথা’’তি ৰুত্তং. সমঙ্গিতাতি চ সম্পন্নতা. ‘‘তং তং কম্মাযূহন কালে’’তি পাণাতি পাতাদিকস্স তব্বিরমণাদিকস্স চ তস্স তস্স দুচ্চরিতসুচরিতকম্মস্স আযূহনকালে. সমুচ্চিননকালেতি অত্থো. ‘‘সব্বসো অভাৰং পত্ৰান নিরুজ্ঝতী’’তি যথা অব্যাকত ধম্মানিরুজ্ঝমানা সব্বসো অভাৰং পত্ৰা নিরুজ্ঝন্তি. তথা ননিরুজ্ঝন্তীতি অধিপ্পাযো. ‘‘সব্বাকার পরিপূর’’ন্তি পাণাতিপাতং করোন্তস্স কম্মানু রূপাবহূকায ৰচীমনো ৰিকারা সন্দিস্সন্তি. এসনযো অদিন্নাদানাদীসু. এৰরূপেহি সব্বেহি আকার ৰিকারেহি পরিপূরং. ‘‘নিদহিত্ৰা ৰা’’তি সণ্ঠপেত্ৰা এৰ. ‘‘যংসন্ধাযা’’তি যংকিরিযাৰিসেসনিধানং সন্ধায.

গাথাযং. ‘‘সজ্জূ’’তি ইমস্মিং দিৰসে. ‘‘খীরং ৰমুচ্চতী’’তি যথা খীরং নাম ইমস্মিং দিৰসে মুচ্চতি. পকতিং জহতি. ৰিপরিণামং গচ্ছতি. ন তথা পাপং কতং কম্মন্তি যোজনা. কথং পন হোতীতি আহ ‘‘দহন্তং বালমন্ৰেতী’’তি. ‘‘ভস্মাছন্নোৰপাৰকো’’তি ছারিকা ছন্নোৰিয অগ্গি. ‘‘সো পনা’’তি কিরিযা ৰিসেসো পন. ‘‘ৰিসুং একো পরমত্থ ধম্মোতিপি সঙ্খ্যং ন গচ্ছতী’’তি ৰিসুং সম্পযুত্ত ধম্ম ভাৰেন সঙ্খ্যং ন গচ্ছতীতি অধিপ্পাযো. সো হি কম্মপচ্চযধম্মত্তা পরমত্থ ধম্মো ন হোতীতি ন ৰত্তব্বো. তেনাহ ‘‘অনুসযধাতুযো ৰিযা’’তি. ‘‘সো’’তি কিরিযাৰিসেসো. ‘‘ত’’ন্তি কম্মং ৰা, কম্মনিমিত্তং ৰা, গতিনিমিত্তং ৰা. ‘‘তদা ওকাসং লভতী’’তি ৰিপচ্চনত্থায ওকাসং লভতি. ওকাসং লভিত্ৰা পচ্চুপট্ঠাতীতি অধিপ্পাযো. ‘‘তত্থা’’তি তাসু চ তূসুসমঙ্গিতাসু. ‘‘ইতী’’তি লদ্ধগুণৰচনং. ‘‘এৰঞ্চ কত্ৰা’’তিআদি পুন লদ্ধগুণৰচনং. ‘‘পাল়িয’’ন্তি ধম্মসঙ্গণি পাল়িযং. ‘‘কম্মসন্তানতো’’তি অরূপসন্তানং এৰ ৰুচ্চতি. ‘‘যে পনা’’তি গন্থকারা পন. ‘‘তেস’’ন্তি গন্থকারানং. আপজ্জতীতি সম্বন্ধো. তেসং ৰাদেতি ৰা যোজেতব্বং. যঞ্চউপমং দস্সেন্তীতি যোজনা. ‘‘তত্থা’’তি তস্মিং ৰচনে. ন চ ন লভন্তীতি যোজনা. ‘‘তদা’’তি তস্মিং পরিণতকালে. ‘‘নাল়’’ন্তি পুপ্ফফলানং দণ্ডকং.

৩৪. ‘‘সম্ভৰো’’তি পসঙ্গকারণং. অভিৰিসেসেন চরণং পৰত্তনং অভিচারো. ৰিসেস ৰুত্তি. ন অভিচারো ব্যভিচারো. সামঞ্ঞ ৰুত্তি. পক্খন্তরেন সাধারণতাতি ৰুত্তং হোতি. পক্খন্তরেন সাধারণতা নামপক্খন্তরস্স নানপ্পকারতো সজ্জনমেৰ লগ্গনমেৰাতি ৰুত্তং ব্যভিচারস্সাতি পসঙ্গস্স ইচ্চেৰত্থোতি. এত্থচাতিআদিনা সম্ভৰব্যভিচারানং অভাৰমেৰ ৰদতি. অকুসলহেতূহি চ সহেতুকতা সম্ভৰো নত্থীতি সম্বন্ধো. ‘‘তেস’’ন্তি অকুসলৰিপাকানং. ‘‘অব্যভিচারোযেৰা’’তি ব্যভিচাররহিতোযেৰ.

৩৫. ‘‘পঞ্চদ্ৰারে উপ্পন্ন’’ন্তি পঞ্চদ্ৰারৰিকারং পটিচ্চ উপ্পন্নত্তা ৰুত্তং. তেনাহ ‘‘তঞ্হী’’তিআদিং. এসনযো মনোদ্ৰারাৰজ্জনেপি.

যদি হি অযমত্থোসিযা, এৰঞ্চসতি, অযমত্থো আপজ্জতীতি সম্বন্ধো. ‘‘তেস’’ন্তি ৰীথিচিত্তানং. উপ্পাদসদ্দোনিযতপুল্লিঙ্গোতি কত্ৰা ‘‘টীকাসু পন…পে… নিদ্দিট্ঠং’’ সিযাতি ৰুত্তং. ‘‘ৰুত্তনযেনা’’তি সম্পযুত্তহেতুৰিরহতোতি ৰুত্তনযেন. ৰিপচ্চন কিচ্চং নাম ৰিপাকানং কিচ্চং. ৰিপাকুপ্পাদনকিচ্চং নাম কুসলাকুসলানং কিচ্চং. ‘‘তং তং কিরিযামত্তভূতানী’’তি আৰজ্জন কিরিযা হসনকিরিযামত্তভূতানি. পটিসন্ধিভৰঙ্গচুতিচিত্তানি নাম কেৰলং কম্মৰেগুক্খিত্তভাৰেনসন্তানেপতিতমত্তত্তা দুব্বল কিচ্চানি হোন্তি. পঞ্চ ৰিঞ্ঞাণানি চ অসারানং অবলানং পসাদৰত্থূনং নিস্সায উপ্পন্নত্তা দুব্বলৰত্থুকানি হোন্তি. সম্পটিচ্ছনাদীনি চ পঞ্চৰিঞ্ঞাণানুবন্ধ মত্তত্তা দুব্বল কিচ্চট্ঠানানি হোন্তি. তস্মা তানি সব্বানি অত্তনো উস্সাহেনৰিনা কেৰলং ৰিপচ্চনমত্তেন পৰত্তন্তি. ‘‘ৰিপাকসন্তানতো’’তি পঞ্চদ্ৰারাৰজ্জনঞ্চ মনোদ্ৰারাৰজ্জনঞ্চ ভৰঙ্গৰিপাকসন্তানতো লদ্ধপচ্চযং হোতি. ৰোট্ঠব্বনং পঞ্চৰিঞ্ঞাণাদি ৰিপাকসন্তানতো লদ্ধপচ্চযং. ‘‘ইতরানি পনা’’তি হসিতুপ্পাদচিত্ত মহাকিরিযচিত্তাদীনি. ‘‘নিরনুসযসন্তানে’’তি অনুসযরহিতে খীণাসৰসন্তানে. ‘‘উস্সাহরহিতানি এৰা’’তি যথা রুক্খানং ৰাতপুপ্ফানি নাম অত্থি. তানি ফলুপ্পাদকসিনেহরহিতত্তা ফলানি ন উপ্পাদেন্তি. তথা তানি চ ৰিপাকুপ্পাদকতণ্হাসিনেহরহিতত্তা উস্সাহব্যাপার রহিতানি এৰ.

৩৬. ৰেদনাৰিচারণাযং. ‘‘পিচুপিণ্ডকানং ৰিযা’’তি দ্ৰিন্নং কপ্পাসপিচুপিণ্ডকানং অঞ্ঞমঞ্ঞসঙ্ঘট্টনং ৰিয উপাদারূপানঞ্চ অঞ্ঞমঞ্ঞসঙ্ঘট্টনং দুব্বলমেৰাতি যোজনা. ‘‘তেসং আরম্মণভূতান’’ন্তি তিণ্ণং মহাভূতানং. ‘‘কাযনিস্সযভূতেসূ’’তি কাযনিস্সযমহাভূতেসু.‘‘তেহী’’তি পঞ্চৰিঞ্ঞাণেহি. ‘‘পুরিমচিত্তেনা’’তি সম্পটিচ্ছনচিত্ততো. ‘‘ত’’ন্তি অকুসলৰিপাকসন্তীরণং. পটিঘেন ৰিনা নপ্পৰত্ততি. কস্মা নপ্পৰত্ততীতি আহ ‘‘একন্তাকুসলভূতেনা’’তিআদিং. ‘‘অব্যাকতেসু অসম্ভৰতো’’তি অব্যাকত চিত্তেসু যুজ্জিতুং অসম্ভৰতো. কম্মানুভাৰতো চ মুঞ্চিত্ৰা যথাপুরিমং ৰিপাকসন্তানং কম্মানুভাৰেন পৰত্তং হোতি. তথা অপ্পৰত্তিত্ৰাতি অধিপ্পাযো. ‘‘কেনচী’’তি কেনচি চিত্তেন. ‘‘ৰিসদিসচিত্তসন্তান পরাৰট্টনৰসেনা’’তি পুরিমেনৰিপাক চিত্ত সন্তানেন ৰিসদিসং কুসলাদি জৰন চিত্তসন্তানং পরতো আৰট্টা পন ৰসেন. তথাহিদং চিত্তদ্ৰযং পাল়িযং আৰট্টনা, অন্ৰাৰট্টনা, আভোগো, সমন্নাহারোতি নিদ্দিট্ঠং. ‘‘সব্বত্থাপী’’তি ইট্ঠারম্মণেপি অনিট্ঠারম্মণেপি. ‘‘অত্তনো পচ্ছা পৰত্তস্স চিত্তস্স ৰসেনা’’তি অত্তনো পচ্ছা পৰত্তং চিত্তং পটিচ্চ ন ৰত্তব্বোতি অধিপ্পাযো. ‘‘অত্তনো পচ্চযেহি এৰ সো সক্কা ৰত্তু’’ন্তি অত্তনো পচ্চযেসু বলৰন্তেসু সতি, বলৰা হোতি. দুব্বলেসু সতি, দুব্বলো হোতীতি সক্কাৰত্তুন্তি অধিপ্পাযো. ‘‘ৰিসদিস চিত্তসন্তান’’ন্তি ৰোট্ঠব্বনকিরিযচিত্তসন্তানং.

৩৭. সঙ্খার ৰিচারণাযং ‘‘ৰিপাকুদ্ধারে’’তি অট্ঠসালিনিযং ৰিপাকুদ্ধার কথাযং. ‘‘উভযকম্মেনপী’’তি সসঙ্খারিক কম্মেনপি, অসঙ্খারিক কম্মেনপি. ‘‘থেরেনা’’তি মহাদত্তত্থেরেন. ‘‘তদুভযভাৰাভাৰো’’তি সসঙ্খারিক অসঙ্খারিকভাৰানং অভাৰো. ‘‘তানিপি হি অপরিব্যত্তকিচ্চানিযেৰা’’তি এত্থ আৰজ্জন দ্ৰযং জৰনানং পুরেচারিক কিচ্চত্তা অপরিব্যত্তকিচ্চং হোতু. হসিতুপ্পাদচিত্তং পন জৰনকিচ্চত্তা কথং অপরিব্যত্তকিচ্চং ভৰেয্যাতি. তম্পি সব্বঞ্ঞুতঞ্ঞাণাদীনং অনুচারিকমত্তত্তা অপরিব্যত্তকিচ্চং নাম হোতীতি. ‘‘অট্ঠমহাৰিপাকেসু ৰিয ৰত্তব্বো’’তি মহাৰিপাকানং সসঙ্খারিকা সঙ্খারিকভাৰো পুরিমভৰে মরণাসন্নকালে আরম্মণানং পযোগেন সহ ৰা ৰিনা ৰা উপট্ঠানং পটিচ্চ ৰুত্তো, তথা ৰত্তব্বোতি অধিপ্পাযো.

৩৮. ‘‘দুব্বল কম্মনিব্বত্তেসূ’’তি পটিসন্ধি ভৰঙ্গ চুতিকিচ্চানি সন্ধায ৰুত্তং. ‘‘দুব্বলৰত্থু কিচ্চট্ঠানেসূ’’তি চক্খাদিৰত্থুকেসু আৰজ্জনাদি দুব্বলকিচ্চ দুব্বলট্ঠানিকেসু. ‘‘তত্থা’’তিআদিনা তদত্থং ৰিৰরতি. তত্থ ‘‘ৰিক্খেপযুত্ত’’ন্তি ৰিক্খেপকিচ্চেন উদ্ধচ্চেনযুত্তং হুত্ৰা. ‘‘কপ্পট্ঠিতিকং’’ নাম সঙ্ঘভেদকম্মং. ছসুৰত্থু রূপেসু হদযৰত্থুমেৰ সুৰণ্ণরজতং ৰিয সারৰত্থু হোতি. ইতরানি ফলিকানিৰিয পসাদমত্তত্তা অসারানি হোন্তীতি ৰুত্তং ‘‘চক্খাদীসু দুব্বলৰত্থূসূ’’তি. দস্সনাদীনি চ কিচ্চানি জৰন কিচ্চস্স পুরেচরত্তা খুদ্দকিচ্চানি হোন্তি. তেনাহ ‘‘দস্সনাদীসূ’’তিআদিং.

৩৯. ইধ দীপনিযং ইচ্চেৰন্তি পদং অট্ঠারসাতিপদস্সৰিসেসনন্তি কত্ৰা ‘‘সব্বথাপীতি পদস্স…পে… ৰেদিতব্বো’’তি ৰুত্তং. ৰিভাৰনিযং পন তং সব্বথাপীতি পদস্স ৰিসেসনন্তি কত্ৰা ‘‘সব্বথা পীতিকুসলাকুসলৰিপাককিরিযাভেদেনা’’তি ৰুত্তং.

অহেতুকচিত্তৰণ্ণনা নিট্ঠিতা.

৪০. সোভণচিত্তেসু. অৰুত্তাপি সিদ্ধা হোতি. যথা অট্ঠচিত্তানি লোকুত্তরানীতি চ ৰুত্তে অৰুত্তেপিসিজ্ঝন্তি সেসচিত্তানি লোকিযানীতি চ সউত্তরানীতি চাতি অধিপ্পাযো. ‘‘অত্তসমঙ্গীনো’’তি অত্তনা পাপকম্মেন সমন্নাগতে. ‘‘অনিচ্ছন্তে যেৰা’’তি সচেপি অৰীচিনিমিত্তস্সাদৰত্থু ৰিয কেচি ইচ্ছন্তু. অজানন্তানং পন ইচ্ছা অপ্পমাণন্তি অধিপ্পাযো. ‘‘সোভগ্গ পত্তিযা’’তি এত্থ সুভগস্স ভাৰো সোভগ্গন্তি ৰিগ্গহো. সুভগস্সাতি চ সুসিরিকস্স.

৪১. ‘‘যাথাৰতো’’তি যথা সভাৰতো. এত্থ সিযা জানাতীতি ঞাণন্তি ৰুত্তং, কিং সব্বং ঞাণং যাথাৰতো জানাতীতি. কিঞ্চেত্থ. যদি সব্বং ঞাণং যাথাৰতো জানাতি. এৰং সতি, ঞাণেন চিন্তেন্তানং অজাননং নাম নত্থি, ৰিরজ্ঝনং নাম নত্থীতি আপজ্জতি. অথ সব্বং ঞাণং যাথাৰতো ন জানাতি, কত্থচি জানাতি, কত্থচি ন জানাতি. এৰঞ্চসতি, যত্থ জানাতি, তত্থেৰ তং ঞাণং হোতি. যত্থ ন জানাতি, তত্থ তং ঞাণমেৰ ন হোতীতি আপজ্জতীতি. ৰুচ্চতে. ঞাণেন চিন্তেস্সামীতি চিন্তেন্তানংপি যত্থ যত্থ যাথাৰতো জাননং ন হোতি, তত্থ তত্থ ঞাণ ৰিপ্পযুত্ত চিত্তং হোতি. ঞাণপ্পটি রূপকা চ ধম্মা অত্থি চিত্তঞ্চ ৰিতক্কো চ, ৰিচারো চ, দিট্ঠি চ. এতেহি চিন্তেন্তাপি অহং ঞাণেন চিন্তেমীতি মঞ্ঞন্তি. ‘‘দেয্য ধম্মপটিগ্গাহক সম্পত্তী’’তি দেয্যধম্ম ৰত্থু সম্পত্তি, পটিগ্গাহক পুগ্গল সম্পত্তি. ‘‘অব্যাপজ্জলোকূপপত্তিতা’’তি এত্থ অব্যাপজ্জলোকো নাম কাযিকদুক্খ চেতসিক দুক্খ রহিতো উপরিদেৰলোকো ৰা ব্রহ্মলোকো ৰা. উপপজ্জনং উপপত্তি. পটিসন্ধিৰসেন উপগমনন্তি অত্থো. অব্যাপজ্জলোকং উপপত্তি যস্স সো অব্যাপজ্জ লোকূপপত্তি. তস্স ভাৰোতি ৰিগ্গহো. ‘‘কিলেস দূরতা’’তি সমাপত্তি বলেন ৰা, অঞ্ঞতরপ্পটিপত্তিযা ৰা, ৰিক্খম্ভিত কিলেসতা ৰা, অরিযমগ্গেন সমুচ্ছিন্ন কিলেসতা ৰা.

তেসং উপ্পত্তি ৰিধানং ৰিসুদ্ধি মগ্গে খন্ধনিদ্দেসে এৰং ৰুত্তং. যদাহি দেয্যধম্ম পটিগ্গাহকাদি সম্পত্তিং অঞ্ঞং ৰা সোমনস্সহেতুং আগম্ম হট্ঠতুট্ঠো অত্থিদিন্নন্তিআদিনযপ্পৰত্তং সম্মাদিট্ঠিং পুরেক্খিত্ৰা অসংসীদন্তো অনুস্সাহিতোপরেহি দানাদীনি পুঞ্ঞানি করোতি, তদাস্স সোমনস্সসহগতং ঞাণ সম্পযুত্তং চিত্তং অসঙ্খারং হোতি. যদা পন ৰুত্তনযেন হট্ঠতুট্ঠো সম্মাদিট্ঠিং পুরেক্খিত্ৰা অমুত্ত চা গতাদিৰসেন সংসীদমানো ৰা পরেহি ৰা উস্সাহিতো করোতি, তদাস্স তদেৰ চিত্তং সসঙ্খারং হোতি. ইমস্মিঞ্হি অত্থে সঙ্খারোতি এতং অত্তনো ৰা পরেসং ৰা ৰসেন পৰত্তস্স পুব্বপ্পযোগস্সাধিৰচনং. যদা পন ঞাতি জনস্স পটিপত্তি দস্সনেন জাতপরিচযাবালদারকা ভিক্খূ দিস্ৰা সোমনস্স জাতাসহসা কিঞ্চি দেৰ হত্থগতং দদন্তি ৰা ৰন্দন্তি ৰা, তদা ততীযং চিত্তং উপ্পজ্জতি. যদা পন দেথৰন্দথাতি ঞাতীহি উস্সাহিতা এৰং পটিপজ্জন্তি, তদা চতুত্থং চিত্তং উপ্পজ্জতি. যদা পন দেয্যধম্ম পটিগ্গাহকাদীনং অসম্পত্তিং অঞ্ঞেসং ৰা সোমনস্সহেতূনং অভাৰং আগম্ম চতূসুপি ৰিকপ্পেসু সোমনস্সরহিতা হোন্তি. তদা সেসানি চত্তারি উপেক্খাসহগতানি উপ্পজ্জন্তীতি.

৪২. অট্ঠপীতি এত্থ পিসদ্দেন ইমানি চিত্তানি ন কেৰলং অট্ঠেৰ হোন্তি. অথ খো ততো বহূনিপি বহুতরানিপি হোন্তীতি ইমং সম্পিণ্ডনত্থং দীপেতীতি দস্সেতুং ‘‘তেনা’’তিআদিৰুত্তং. দসসু পুঞ্ঞকিরিযাৰত্থূসু দিট্ঠুজু কম্মং নাম ঞাণ কিচ্চং. তং কথং ঞাণ ৰিপ্পযুত্ত চিত্তেহি করোন্তীতি. ৰুচ্চতে. ঞাণ সম্পযুত্ত চিত্তেহি দিট্ঠিং উজুংকরোন্তা তেসং অন্তরন্তরা ঞাণসোতে পতিতৰসেন ঞাণৰিপ্পযুত্ত চিত্তেহিপি করোন্তিযেৰ. সব্বেসত্তা কম্মস্সকাতিআদিনা, বুদ্ধো সোভগৰা, স্ৰাক্খাতো সো ধম্মো, সুপ্পটিপন্নো সো সঙ্ঘো, তিআদিনা চাতি দট্ঠব্বং. তেনাহ ‘‘ইমানি অট্ঠ চিত্তানী’’তিআদিং. তত্থ দসপুঞ্ঞকিরিযৰত্থূনি নাম ‘দানং, সীলং, ভাৰনা, অপচাযনং, ৰেয্যাৰচ্চং, পত্তিদানং, পত্তানুমোদনং, ধম্মস্সৰনা, ধম্মদেসনা, দিট্ঠুজু কম্মং,. তেহি গুণিতানি ৰড্ঢিতানি. তানি চ অট্ঠছসু আরম্মণেসু উপ্পজ্জন্তি. তীণি চ কম্মানি করোন্তা তে হেৰ অট্ঠহি করোন্তি. তানিযেৰ চ সব্বানি অত্থি হীনানি, অত্থি মজ্ঝিমানি, অত্থি পণীতানি. তস্মা পুন অনুক্কমেন আরম্মণাদীহি ৰড্ঢনং করোতি. তত্থ ‘‘তানি ঠপেতব্বানী’’তি সম্বন্ধো. ‘‘সুদ্ধিকানী’’তি অধিপতীহি অমিস্সিতানি. ‘‘ইতি কত্ৰা’’তি ইতি মনসি করিত্ৰা. তথা ঞাণৰিপ্পযুত্তানি দ্ৰেসহস্সানি সতং সট্ঠি চ হোন্তীতি যোজনা. ‘‘ৰীমংসাৰজ্জিতেহী’’তি ৰীমংসাধিপতি ৰজ্জিতেহি. ‘‘তথাগুণিতানী’’তি সব্বানি পুঞ্ঞকিরিযাদীহি সমং গুণিতানি. ‘‘কোসল্লেনা’’তি কোসল্লসঙ্খাতেন. ‘‘নানাৰজ্জনৰীথিয’’ন্তি ঞাণৰিপ্পযুত্ত ৰীথীহি ৰিসুং ভূতায আৰজ্জনায যুত্ত ৰীথিযং. ‘‘তেনেৰা’’তি ৰীমংসাধিপতিভূতেন তেনেৰ উপনিস্সযঞ্ঞাণেন. এৰং সন্তেপি ন সক্কাভৰিতুন্তি সম্বন্ধো.

৪৩. ৰচনত্থে ‘‘রুজ্জনট্ঠেনা’’তি তুদনট্ঠেন. ‘‘অহিতট্ঠেনা’’তি হিতৰিরুদ্ধট্ঠেন. ‘‘অনিপুণট্ঠেনা’’তি অসণ্হা সুখুমট্ঠেন. ‘‘অনিট্ঠৰিপাকট্ঠেনা’’তি অনিট্ঠং ৰিপাকং এতেসন্তি অনিট্ঠ ৰিপাকানি. তেসং ভাৰো অনিট্ঠ ৰিপাকট্ঠো. তেন অনিট্ঠ ৰিপাকট্ঠেন. ‘‘তপ্পটি পক্খত্তা’’তি রাগাদীহি পটিপক্খত্তা. এৰং পরিযাযত্থ সঙ্খাতং অভিধানত্থং দস্সেত্ৰা ইদানি অট্ঠকথাসু আগতং ৰচনত্থং দস্সেতি কুচ্ছিতেতিআদিনা. তত্থ ‘‘কুচ্ছিতে’’তি জেগুচ্ছিতব্বে, নিন্দি তব্বে ৰা. চালেন্তি তদঙ্গপ্পহানৰসেন, কম্পেন্তি ৰিক্খম্ভনপ্পহানৰসেন, ৰিদ্ধংসেন্তি সমুচ্ছেদপ্পহানৰসেন. ‘‘তনুকরণট্ঠেনা’’তি সল্লিখনট্ঠেন. ‘‘অন্তকরণট্ঠেনা’’তি পরিযোসানকরণট্ঠেন. ‘‘অপি চা’’তিআদি দীপনীনযদস্সনং. ‘‘কোসল্ল সম্ভূতট্ঠেনা’’তি মহাঅট্ঠকথানযো. তত্থ, কুসলস্স পণ্ডিতস্স ভাৰো একাসল্লং. ঞাণং. তেন সম্ভূতং সঞ্জাতং কোসল্ল সম্ভূতং তিৰিগ্গহো.

৪৪. ‘‘বলৰকম্মেনা’’তি তিহেতু কুক্কট্ঠ কম্মেন. ‘‘দুব্বল কম্মেনা’’তি তিহেতুকোমকেন ৰা দ্ৰিহেতুক কুসল কম্মেন ৰা. ‘‘কেহিচি আচরিযেহী’’তি মোরৰাপি ৰাসী মহাদত্তত্থেরং সন্ধায ৰুত্তং. ‘‘সঙ্গহকারেনা’’তি ভদ্দন্ত বুদ্ধঘোসত্থেরেন. ‘‘সন্নিহিত পচ্চযৰসেনা’’তি আসন্নে সণ্ঠিতপচ্চয ৰসেন. পচ্চুপ্পন্ন পচ্চযৰসেনেৰাতি ৰুত্তং হোতি. উপট্ঠিতানি কম্মাদীনি আরম্মণানি. পৰত্তানি মহাৰিপাকানি. ‘‘অৰিপাক সভাৰতো’’তি অৰিপচ্চনসভাৰতো. অৰিপাকুপ্পাদনসভাৰতোতি ৰুত্তং হোতি. ‘‘অট্ঠকথায’’ন্তি ধম্মসঙ্গণিট্ঠকথাযং. ‘‘ইধা’’তি মহাৰিপাকচিত্তে. ‘‘তথা অপ্পৰত্তিযা চা’’তি দানাদিৰসেন অপ্পৰত্তিতো চ.

৪৫. মহাকিরিযচিত্তে. ‘‘উপরী’’তি ৰীথিসঙ্গহে তদা রম্মণ নিযমে. ‘‘সযমেৰা’’তি অনুরুদ্ধত্থেরেনেৰ. ‘‘ৰক্খতী’’তি ৰুচ্চিস্সতি. ‘‘যথারহ’’ন্তি খীণাসৰসন্তানে উপ্পন্নানং মহাকিরিযানং অরহানুরূপং. ভূতকথন ৰিসেসনং তেন নিৰত্তেতব্বস্স অত্থস্স অভাৰাতি অধিপ্পাযো. ‘‘তং’’তি সহেতুকগ্গহণং. ‘‘ব্যৰচ্ছেদকৰিসেসন’’ন্তি অহেতুক ৰিপাককিরিয চিত্তানঞ্চ সব্ভাৰাতপ্পসঙ্গস্স অৰচ্ছেদকং ৰিসেসনং. ‘‘যথা সক্খর কথলিকংপি মচ্ছগুম্বংপি তিট্ঠন্তংপি চরন্তংপি পস্সতী’’তি ৰচনে সক্খর কথলিকং তিট্ঠন্তং, মচ্ছগুম্বং তিট্ঠন্তংপি চরন্তংপি পস্সতীতি এৰং যথা লাভ যোজনা হোতি. তথা ইধ পীতি.

৪৬. ‘‘যদিদ’’ন্তি যা অযং দীপন সমত্থতা, ‘‘ইদং সামত্থিয’’ন্তি যোজনা. অযং সমত্থ ভাৰোতি অত্থো. ভেদৰচনে চোদনাযাতি সম্বন্ধো. রচনাগাথাযং. ‘‘এতানী’’তি সোভণ কামাৰচর চিত্তানি. ‘‘পুঞ্ঞ পাপ ক্রিযাভেদা’’তি পুঞ্ঞ পাপ ক্রিযভেদেন.

৪৭. কতমে ধম্মা কামাৰচরা. হেট্ঠতো অৰীচিনিরযং পরিযন্তং করিত্ৰা উপরিতো পরনিম্মিত ৰসৰত্তিদেৰে অন্তো করিত্ৰাতি এৰং পাল়িযং নিদ্দিট্ঠত্তা ইধকামসদ্দেন সহোকাসাকামভূমি ৰুচ্চতীতি আহ ‘‘কামে কামভূমিয’’ন্তি. পরিযাপন্নাতি পাঠসেসো. ‘‘ক্রিযা চা’’তি এত্থ চ সদ্দো পন সদ্দত্থো. ইতি সদ্দো ইচ্চেৰং সদ্দত্থো. এতেন পটিসিদ্ধাতি সম্বন্ধো. ‘‘ইধা’’তি ইমস্মিং চিত্তসঙ্গহে. ‘‘তস্সা’’তি সব্বথাসদ্দস্স. ভৰো নাম ইন্দ্রিয বদ্ধসন্তানগতো ধম্ম সমূহো ৰুচ্চতি. ইধ পন কামাৰচরা ধম্মাতি পদে কামসদ্দো. সো চ পথৰি পব্বতাদীহি সদ্ধিং সব্বং কামভূমিং ৰদতীতি ৰুত্তং ‘‘ভূমিপরিযাযো চা’’তিআদি. ‘‘ইন্দ্রিযানিন্দ্রিযবদ্ধ ধম্ম সমূহো’’তি ইন্দ্রিযবদ্ধ ধম্ম সমূহো সত্তসন্তানাগতো, অনিন্দ্রিযবদ্ধ ধম্ম সমূহো পথৰি পব্বতাদি গতো. তত্থ জীৰিতিন্দ্রিযেন অনাবদ্ধো অনাযত্তো অনিন্দ্রিযবদ্ধোতি.

ইতিকামচিত্তসঙ্গহদীপনিযাঅনুদীপনা নিট্ঠিতা.

৪৮. রূপাৰচরচিত্তে. ‘‘সমুদিতেনা’’তি পঞ্চঙ্গ সমুদিতেন. পঞ্চন্নং অঙ্গানং একতো সামগ্গিভূতেনাতি অত্থো. পঞ্চন্নঞ্হি একতো সামগ্গিযং সতিযেৰ অপ্পনা হোতি, নো অসতি. সামগ্গিযন্তি চ সুট্ঠু বলৰতায সমগ্গভাৰেতি অত্থো. ‘‘পটিপজ্জিতব্বত্তা’’তি পত্তব্বত্তা. ঝানং দুৰিধং আরম্মণূপনিজ্ঝানঞ্চ লক্খণূ পনিজ্ঝানঞ্চাতি আহ ‘‘কসিণাদিকস্সা’’তিআদিং. ইধ পন আরম্মণূপনিজ্ঝানং অধিপ্পেতং. উপনিজ্ঝানন্তি চ কসিণ নিমিত্তাদিকং আরম্মণং চেতসা উপগন্ত্ৰানিজ্ঝানং ওলোকনং. ঝানসদ্দস্সঝাপনত্থোপি সম্ভৰতীতি ৰুত্তং ‘‘পচ্চনীক ধম্মানঞ্চ ঝাপনতো’’তি. অগ্গিনা ৰিয কট্ঠানং কিলেসানং দয্হনতোতি অত্থো. একগ্গতা এৰ সাতিস্সয যুত্তা অপ্পনাপত্তকালেতি অধিপ্পাযো. পুব্বভাগে পন পথমজ্ঝানে ৰিতক্কস্স বলৰভাৰো ইচ্ছিতব্বো. ‘‘সাহী’’তিআদিনা তদত্থং ৰিৰরতি. সাহি একগ্গতাতি চ ৰুচ্চতীতি সম্বন্ধো. একো অত্তাসভাৰো অস্সাতি একত্তং. একত্তং আরম্মণমস্সাতি একত্তা রম্মণা. একগ্গতা. তস্স ভাৰোতি ৰিগ্গহো.

অগ্গসদ্দো কোটি অত্থো. কোট্ঠাসট্ঠোৰা. ‘‘তথা পৰত্তনে’’তি চিত্তস্স একগ্গভাৰেন পৰত্তিযং. ‘‘আধিপ্পচ্চগুণযোগেনা’’তি অধিপতিভাৰগুণযোগেন. ইন্দ্রিযপচ্চযতাগুণযোগেনাতি ৰুত্তং হোতি. সাযেৰ একগ্গতা একগ্গতা, সমাধী,তি চ ৰুচ্চতীতি সম্বন্ধো. ‘‘সমাধী’’তি পদস্স-সং-আধী-তি-ৰা, সমআধীতি-ৰা, দ্ৰিধা পদচ্ছেদো. তত্থ সংউপসগ্গো সম্মাসদ্দত্থো. সমসদ্দো পন ধম্মেন সমেন রজ্জং কারেতীতিআদীসু ৰিয নামিকসদ্দোতি দ্ৰিধা ৰিকপ্পং দস্সেন্তো ‘‘সাযেৰ চিত্ত’’ন্তিআদিমাহ. সাযেৰ চিত্তং-সম্মা চ আধিযতীতি সমাধি, সাযেৰ চিত্তং-সমঞ্চ আধিযতীতি সমাধীতি দ্ৰিধা ৰিকপ্পো. তত্থ সম্মা চাতি সুন্দরেন. আধিযতীতি আদহতি. আদহনঞ্চ ঠপনমেৰাতি ৰুত্তং ‘‘ঠপেতী’’তি. সমঞ্চাতি অৰিসমঞ্চ. ‘‘তত্থেৰা’’তি তস্মিং আরম্মণে এৰ. ‘‘লীনুদ্ধচ্চাভাৰা পাদনেনা’’তি লীনস্স চ উদ্ধচ্চস্স চ অভাৰো লীনুদ্ধচ্চাভাৰো. তস্স আপাদনং আপজ্জাপনন্তি ৰিগ্গহো. ৰিৰিধেন চিত্তস্স সংহরণং ৰিসাহারো. ন ৰিসাহারো অৰিসাহারো. সাযেৰ চ নিদ্দিট্ঠা. ইতি এৰং ইমেসু দ্ৰীসু অত্থেসু একগ্গতা এৰ সাতিস্সযযুত্তাতি যোজেতব্বং. এৰং পন সতি, একগ্গতা এৰ ঝানন্তি ৰত্তব্বা, ন ৰিতক্কাদযোতি চোদনং পরিহরন্তো ‘‘ৰিতক্কাদযোপনা’’তিআদিমাহ. অপিসদ্দো সম্পিণ্ডনত্থো. পনসদ্দো পক্খন্তরত্থো. তস্সা একগ্গতায. ‘‘সা তিস্সয’’ন্তি অতিস্সযেন সহ. ‘‘ওসক্কিতু’’ন্তি সংসীদিতুং. ‘‘নং’’তি চিত্তং. ‘‘সংসপ্পিতু’’ন্তি এৰং নু খো অঞ্ঞথানু খোতি দ্ৰিধা চঞ্চলিতুং. ‘‘উক্কণ্ঠিতু’’ন্তি অঞ্ঞাভিমুখী ভৰিতুং. আরমিতুন্তি ৰুত্তং হোতি. লদ্ধং সাতং যেনাতি লদ্ধস্সাতং. ‘‘সাতং’’তি সারত্তং. ‘‘উপব্রূহিতং’’তি ভুসংৰড্ঢিতং. ‘‘সন্ত সভাৰত্তা’’তি উপসন্ত সভাৰত্তা. ‘‘তথা অনুগ্গহিতা’’তি আরম্মণাভিমুখকরণাদিৰসেন অনুগ্গ হিতা. সমাধিস্স কামচ্ছন্দনীৰরণপ্পটিপক্খত্তা ‘‘সযং…পে… নীৰারেত্ৰা’’তি ৰুত্তং. ‘‘নিচ্চলংঠত্ৰা’’তি অপ্পনাকিচ্চমাহ.

এৰং উপনিজ্ঝানত্থং দস্সেত্ৰা ঝাপনত্থং দস্সেন্তো ‘‘তেসু চা’’তিআদিমাহ. ‘‘তপ্পচ্চনীকা’’তি তেসং ঝানঙ্গ ধম্মানং পচ্চনীকা পটিপক্খা. ‘‘মনস্মিং পী’’তি মনোদ্ৰারেপি. পগেৰ কাযৰচীদ্ৰারেসূতি এৰং সম্ভাৰনত্থো চেত্থ পিসদ্দো. অপিসদ্দোপি যুজ্জতি. ‘‘ঝাপিতা নাম হোন্তী’’তি ঝানঙ্গ ধম্মগ্গীহি দড্ঢানাম হোন্তি. ‘‘এৰং সন্তেপি তেসং সমুদাযে এৰ ঝান ৰোহারো সিদ্ধো’’তি যোজনা. ‘‘ধম্ম সামগ্গিপধান’’ন্তি ঝানট্ঠানে ঝানঙ্গ ধম্মানং মগ্গট্ঠানে মগ্গঙ্গ ধম্মানং বোধিট্ঠানে বোজ্ঝঙ্গ ধম্মানং সমগ্গভাৰপ্পধানং.

এৰং সঙ্গহকারানং মতিযা ঝানং ৰত্ৰা ইদানি অপরেসানং মতিযা তং দস্সেতুং ‘‘অপরে’’তিআদিমাহ. অপরে পন ৰদন্তীতি সম্বন্ধো. তত্থ ‘‘যথা সকংকিচ্চানী’’তি সস্স ইদং সকং. সস্সাতি অত্তনো. ইদন্তি সন্তকং. যানিযানি অত্তনো সন্তকানীতি অত্থো. ‘‘ইতী’’তি তস্মা. ‘‘পট্ঠানে ঝানপচ্চযং পত্ৰা…পে… সাধেন্তিযেৰ’’. ৰুত্তঞ্হি তত্থ. ঝানপচ্চযোতি ঝানঙ্গানিঝানসম্পযুত্তকানং ধম্মানং তং সমুট্ঠানানঞ্চ রূপানং ঝানপচ্চযেন পচ্চযো. মগ্গপচ্চযোতি মগ্গঙ্গানি মগ্গসম্পযুত্তকানং ধম্মানং তং সমুট্ঠানানঞ্চ রূপানং মগ্গপচ্চযেন পচ্চযোতি. ‘‘পঞ্চসমুদিতাদীনী’’তি পঞ্চসমূহ দসসমূহানি. ‘‘পথমজ্ঝানাদিভাৰস্সেৰচা’’তি পথমজ্ঝানাদি নামলাভস্সেৰচাতি অধিপ্পাযো. ‘‘ঝানভাৰস্সা’’তি ঝাননামলাভস্স. ‘‘তথাৰিধকিচ্চৰিসেসাভাৰা’’তি তথাৰিধানং আরম্মণাভিনিরোপনাদীনং কিচ্চ ৰিসেসানং অভাৰতো.

৪৯. ‘‘এত্থ সিযা’’তি এতস্মিং ঠানে পুচ্ছাসিযা. ‘‘অঙ্গ ভেদো’’তি পথমজ্ঝানে পঞ্চ অঙ্গানি, দুতীযজ্ঝানে চত্তারি অঙ্গানী তিআদিকো অঙ্গভেদো. ‘‘পুগ্গলজ্ঝাসযেনা’’তি পুগ্গলস্স ইচ্ছাৰিসেসেন. ইতি অযং ৰিসজ্জনা. ‘‘সো’’তি সো পুগ্গলো. ‘‘হী’’তি ৰিত্থার জোতকো. ৰিতক্কো সহাযো যস্সাতি ৰিতক্কসহাযো. ‘‘ৰিতক্কে নিব্বিন্দতী’’তি ওল়ারিকোৰতাযং ৰিতক্কো, নীৰরণানং আসন্নে ঠিতোতি এৰং ৰিতক্কে আদীনৰং দিস্ৰা নিব্বিন্দতি. তস্স অজ্ঝাসযোতি সম্বন্ধো. ৰিতক্কং ৰিরাজেতি ৰিগমেতি অতিক্কমাপেতীতি ৰিতক্কৰিরাগো. ৰিতক্কৰিরাগো চ সো ভাৰনা চাতি সমাসো. ‘‘উত্তরুত্তরজ্ঝানাধিগমনে’’তি উত্তরি উত্তরিঝানপ্পটিলাভে. অজ্ঝাসয বলেন পাদকজ্ঝানসদিসং ন হোতীতি সম্বন্ধো. চেতোপণিধি ইজ্ঝতীতি সম্বন্ধো. ‘‘ৰিসুদ্ধত্তা’’তি সীলৰিসুদ্ধত্তা.

৫০. সঙ্খার ভেদৰিচারণাযং. ‘‘সঙ্খার ভেদো ন ৰুত্তো’’তি পথমজ্ঝান কুসল চিত্তং অসঙ্খারিকমেকং, সসঙ্খারিকমেকন্তিআদিনা ন ৰুত্তোতি অধিপ্পাযো. ‘‘সো’’তি সঙ্খার ভেদো. ‘‘সিদ্ধত্তা’’তি সঙ্খার ভেদস্স সিদ্ধত্তা. কথং সিদ্ধোতি আহ ‘‘তথাহী’’তিআদিং. সুখা পটিপদা যেসং তানি সুখপ্পটিপদানি. তেসং ভাৰোতি ৰিগ্গহো. ‘‘যো’’তি যোগীপুগ্গলো. ‘‘আদিতো’’তিআদিম্হি. ‘‘ৰিক্খম্ভেন্তো’’তি ৰিমোচেন্তো ৰিযোগং করোন্তো. দুক্খেন ৰিক্খম্ভেতীতি সম্বন্ধো. ‘‘কামাদীনৰদস্সনাদিনা’’তি অঙ্গারকাসূ পমাকামাবহুদুক্খাবহুপাযাসা, আদীনৰো এত্থভিয্যোতিআদিনা কামেসুআদীনৰং দিস্ৰা. আদিসদ্দেন ৰিতক্কাদীসু আদীনৰদস্সনং সঙ্গয্হতি. ‘‘তেনেৰা’’তি কামাদীনৰদস্সনাদিনা এৰ. এত্থ অভিঞ্ঞাভেদেন সঙ্খার ভেদো ন ৰত্তব্বো, পটিপদা ভেদেনেৰ ৰত্তব্বোতি দস্সেতুং ‘‘খিপ্পাভিঞ্ঞজ্ঝানানংপী’’তিআদি ৰুত্তং. তত্থ, অভিজাননং অভিঞ্ঞা. খিপ্পাসীঘা অভিঞ্ঞা যেসং তানি খিপ্পাভিঞ্ঞানি. দন্ধা অসীঘা অভিঞ্ঞা যেসং তানি দন্ধাভিঞ্ঞানি. ঝানানি. ‘‘যদি এৰ’’ন্তি এৰং পটিপদা ভেদেন সঙ্খার ভেদো যদি সিযাতি অত্থো. ‘‘ৰল়ঞ্জনকালে’’তি সমাপত্তি সমাপজ্জনকালে. পটিবন্ধকা নাম অন্তরাযিকা. ‘‘সন্নিহিতাসন্নিহিতৰসেনা’’তি আসন্নে সণ্ঠিতাসণ্ঠিতৰসেন. সুদ্ধং ৰিপস্সনাযানং যেসং তে সুদ্ধৰিপস্সনাযানিকা. ‘‘সুদ্ধং’’তি সমথজ্ঝানেন অসম্মিস্সং. ‘‘সত্থেন হনিত্ৰা’’তি পরে ন সত্থেন হননতো ছিন্দনতো. ‘‘সহসা’’তি সীঘতরেন. ‘‘মরন্তানং উপ্পন্নং’’তি মরণাসন্নকালে উপ্পন্নংতি অধিপ্পাযো. অনাগামিনো হি সুদ্ধ ৰিপস্সনাযানিকাপি সমানা সমাধিস্মিং পরিপূরকারিনো নাম হোন্তি. ইচ্ছন্তে সুসতি কিঞ্চি নিমিত্তং আরব্ভমনসিকার মত্তেনপি ঝানং ইজ্ঝতি. তেনাহ ‘‘তংপি মগ্গসিদ্ধগতিক’’ন্তি. ‘‘রূপীব্রহ্মলোকে’’তি ইদং অট্ঠন্নং সমাপত্তীনংপি তত্থ পাকতিকভাৰং সন্ধায ৰুত্তং. অরূপী ব্রহ্মলোকে পন একা এৰ সমাপত্তি পাকতিকাসম্ভৰতি. উপপত্তিসিদ্ধজ্ঝানানং ভৰন্তরে সন্নিহিত পচ্চযভেদেন সঙ্খার ভেদো ৰুত্তো, সো কথং পচ্চেতব্বোতি আহ ‘‘একস্মিং ভৰেপি…পে… যুত্তানি হোন্তী’’তি. একস্মিং ভৰেসব্বপ্পথমং লদ্ধকালে সঙ্খার ভেদস্স আসন্নত্তা ৰল়ঞ্জনকালেপি সো এৰ সঙ্খার ভেদো সিযাতি আসঙ্কাসম্ভৰতো ইদং ৰুত্তং. তেন ভৰন্তরে উপপত্তি সিদ্ধজ্ঝানানং সন্নিহিত পচ্চযভেদেন সঙ্খারভেদে ৰত্তব্বমেৰ নত্থীতি দস্সেতি. ইদানি তানি মগ্গ সিদ্ধজ্ঝান উপপত্তি সিদ্ধজ্ঝানানি সন্নিহিতপচ্চযং অনপেক্খিত্ৰা মগ্গক্খণ উপপত্তিক্খণেসু সিদ্ধকালে ঝানুপ্পত্তি পটিপদায এৰ সব্বসো অভাৰং গহেত্ৰা অপরং ৰিকপ্পং দস্সেতুং ‘‘ঝানুপ্পত্তি পটিপদা রহিতত্তা ৰা’’তিআদি ৰুত্তং. এৰং মহগ্গতঝানানং অট্ঠকথাৰসেন সিদ্ধং সঙ্খার ভেদং ৰত্ৰা ইদানি পাল়িৰসেনাপি সো সিদ্ধো যেৰাতি দস্সেতুং ‘‘অপিচা’’তিআদি আরদ্ধং. দুক্খপ্পটিপদাপুব্বকানং দ্ৰিন্নং দন্ধাভিঞ্ঞখিপ্পাভিঞ্ঞসমাধীনং. ‘‘এত্তাৰতা’’তি এতং পরিমাণং অস্সাতি এত্তাৰং. এত্তাৰন্তেন. এত্থ সিযা, কস্মা ইধ সঙ্খারভেদো ন ৰুত্তোতিআদিনা ৰচনক্কমেন সিদ্ধো হোতীতি সম্বন্ধো. সেসং সুৰিঞ্ঞেয্যং.

৫১. ৰিভাৰনিপাঠে. পরিকম্মং নাম পথৰী, পথৰী, আপো, আপো-তিআদিকং, রূপং অনিচ্চং, রূপং দুক্খং, রূপং অনত্তা-তিআদিকঞ্চভাৰনাপরিকম্মং অধিকারো নাম পুব্বভৰেকতভাৰনাকম্মং. পুব্বভৰেঝানমগ্গফলানিপত্থেত্ৰা কতং দানসীলাদি পুঞ্ঞকম্মঞ্চ. ‘‘ইদং তাৰনযুজ্জতী’’তি এত্থ তাৰসদ্দো ৰত্তব্বন্তরাপেক্খনে নিপাতো. তেন অপরংপি ৰত্তব্বং অত্থীতি দীপেতি. পুব্বাভিসঙ্খারো দুৰিধো পকতি পুব্বাভিসঙ্খারো, পযোগপুব্বাভিসঙ্খারোতি. তত্থ পরিকম্ম পুব্বাভিসঙ্খারো পকতি পুব্বাভিসঙ্খারো নাম, অযং পকতি পচ্চযগণো এৰ. পুব্বে ৰুত্তো পুব্বপ্পযোগো পযোগপুব্বাভিসঙ্খারো নাম. সো এৰ ইধাধিপ্পেতোতি দস্সেতুং ‘‘নহী’’তিআদিমাহ. ‘‘অন্তমসো’’তি অন্তিম পরিচ্ছেদেন. ‘‘আলোপভিক্খা’’ নাম একা লোপভিক্খা. সো পরিকম্মসঙ্খাতপুব্বাভিসঙ্খারো. ঝানানি চ সব্বানি উপ্পন্নানি নাম নত্থীতি সম্বন্ধো. ‘‘ইতী’’তি তস্মা. ‘‘সো’’তি ভাৰনাভিসঙ্খারো. ‘‘তেসং’’তি সব্বেসংপি ঝানানং. ন হি লোকিযজ্ঝানানি নাম…পে… অত্থি, ইমেসং সত্তানং সব্বকপ্পেসুপি কপ্পৰিনাসকালে ঝানানি ভাৰেত্ৰা ব্রহ্মলোক পরাযনতা সব্ভাৰাতি অধিপ্পাযো. ‘‘পুব্বে সমথকম্মেসু কতাধিকারস্সা’’তি আসন্নভৰেকতাধিকারং সন্ধায ৰুত্তং. দূরভৰে পন সমথকম্মেসু অকতাধিকারো নাম কোচি নত্থীতি. ‘‘এৰমেৰা’’তি এৰং এৰ. ৰিপাকজ্ঝানেসু সঙ্খার ভেদস্স পুব্ব কম্মৰসেন ৰত্তব্বত্তা ‘‘কুসল ক্রিযজ্ঝানেসূ’’তি ৰুত্তং. ‘‘অথৰাতিআদিকো পচ্ছিম ৰিকপ্পো নাম’’ অথৰা পুব্বাভিসঙ্খারেনেৰ উপ্পজ্জমানস্স নকদাচি অসঙ্খারিকভাৰো সম্ভৰতীতি অসঙ্খারিকন্তি চ, ব্যভিচারাভাৰতো সসঙ্খারিকন্তি চ ন ৰুত্তন্তি অযং ৰিকপ্পো. তত্থ অসঙ্খারিকন্তি চ ন ৰুত্তন্তি সম্বন্ধো. ‘‘ব্যভিচারা ভাৰতো’’তি অসঙ্খারিকভাৰেন পসঙ্গাভাৰতো. সসঙ্খারিকন্তি চ ন ৰুত্তং. যদি ৰুচ্চেয্য. নিরত্থ কমেৰতংভৰেয্য. কস্মা, সম্ভৰ ব্যভিচারানং অভাৰতো. সম্ভৰে ব্যভিচারে চ. ৰিসেসনং সাত্থকং সিযাতি হি ৰুত্তং. ন চ নিরত্থকৰচনং পণ্ডিতা ৰদন্তি. কস্মা, অপণ্ডিতলক্খণত্তা. সতি পন সম্ভৰে চ ব্যভিচারে চ, তথা সক্কা ৰত্তুং. কস্মা, সাত্থকত্তা. সাত্থকমেৰ পণ্ডিতা ৰদন্তি. কস্মা, পণ্ডিত লক্খণত্তাতি অধিপ্পাযো.

৫২. পটিপদা অভিঞ্ঞাৰৰত্থানে. ‘‘নিমিত্তুপ্পাদতো’’তি পটিভাগনিমিত্তস্স উপ্পাদতো. সুখাপন পটিপদা, পচ্ছাদন্ধং ৰা খিপ্পং ৰা উপ্পন্নং ঝানং সুখপ্পটিপদং নাম করোতীতি যোজনা. ‘‘পুব্বভৰে’’তি আসন্নে পুব্বভৰে. অন্তরাযিকধম্মা নাম ‘কিলেসন্তরাযিকো চ, কম্মন্তরাযিকো চ, ৰিপাকন্তরাযিকো চ, পঞ্ঞত্তি ৰীতিক্কমন্তরাযিকো চ, অরিযূপৰাদন্তরাযিকো চ. তত্থ তিস্সো নিযতমিচ্ছাদিট্ঠিযোকিলেসন্তরাযিকো নাম. পঞ্চানন্তরিয কম্মানি কম্মন্তরাযিকো নাম. অহেতুক দ্ৰিহেতুকপ্পটিসন্ধিৰিপাকা ৰিপাকন্তরাযিকো নাম. ভিক্খু ভাৰেঠিতানং ৰিনয পঞ্ঞত্তিং ৰীতিক্কমিত্ৰা অকতপ্পটিকম্মো ৰীতিক্কমো পঞ্ঞত্তিৰীতিক্কমন্তরাযিকো নাম. পটিকম্মেপনকতে অন্তরাযিকো ন হোতি. অরিযপুগ্গলানং জাতিআদীহি উপৰদিত্ৰা অক্কোসিত্ৰা অকতপ্পটিকম্মং অক্কোসনং অরিযূপৰাদন্তরাযিকো নাম. ইধপি পটিকম্মে কতে অন্তরাযিকো ন হোতি. সেসেসু তীসু পটিকম্মং নাম নত্থি. ইমে ধম্মা ইমস্মিং ভৰে ঝানমগ্গানং অন্তরাযং করোন্তীতি অন্তরাযিকা নাম. তেহি ৰিমুত্তো অন্তরাযিক ধম্ম ৰিমুত্তো নাম. ‘‘কল্যাণপ্পটিপত্তিযং ঠিতো’’তি সীলৰিসুদ্ধি আদিকায কল্যাণপ্পটিপত্তিযং পরিপূরণ ৰসেন ঠিতো. ‘‘ছিন্নপলিবোধো’’তি আৰাসপলিবোধাদীনি দসৰিধানি পলিবোধকম্মানি ছিন্দিত্ৰা ঠিতো. ‘‘পহিতত্তো’’তি, যন্তং পুরিসথামেন পুরিসপরক্কমেন পত্তব্বং, ন তং অপত্ৰা ৰীরিযস্স সণ্ঠানং ভৰিস্সতীতি এৰং পৰত্তেন সম্মপ্পধান ৰীরিযেন সমন্নাগতো. সো হি পহিতো পেসিতো অনপেক্খিতো অত্তভাৰো অনেনাতি পহিতত্তোতি ৰুচ্চতি. ‘‘নসম্পজ্জতীতি নত্থি’’. সচে পঞ্চপধানিযঙ্গসমন্নাগতো হোতীতি অধিপ্পাযো. পঞ্চপধানিযঙ্গানি নাম সদ্ধাসম্পন্নতা, অসাঠেয্যং, আরোগ্যং, অলীনৰীরিযতা, পঞ্ঞৰন্ততা,তি.

৫২. ৰিপাকজ্ঝানে. ‘‘মুদুভূতং’’তি ভাৰনা বলপরিত্তত্তামন্দভূতং. মন্দভূতত্তা চ দুব্বলং. ‘‘নানা কিচ্চট্ঠানেসু চা’’তি দস্সনসৰনাদীসু. ‘‘হীনেসুপি অত্তভাৰেসূ’’তি অহেতুক দ্ৰিহেতুকপুগ্গলেসুপি. ‘‘অসদিসংপী’’তি তিহেতুকুক্কট্ঠংপি কম্মং অহেতুকৰিপাকংপি জনেতীতিআদিনা অসদিসংপি ৰিপাকং জনেতি. ‘‘ভৰঙ্গট্ঠানেসু যেৰা’’তি এত্থ ভৰঙ্গ সদ্দেন পটিসন্ধিট্ঠান চুতিট্ঠানানিপি সঙ্গয্হন্তি. ‘‘কুসলসদিসমেৰা’’তি পথমজ্ঝানকুসলং পথমজ্ঝান ৰিপাকমেৰ জনেতি, দুতীযজ্ঝান কুসলং দুতীযজ্ঝান ৰিপাকমেৰ জনেতীতিআদিনা কুসল সদিসমেৰ ৰিপাকং জনেতি. ‘‘কুসলমেৰ…পে… ক্রিযজ্ঝানং নাম হোতি’’ অভেদূ পচারেনাতি অধিপ্পাযো. ভেদম্পি অভেদং কত্ৰা উপচারো ৰোহারো অভেদূ পচারো.

৫৪. সঙ্গহগাথা ৰণ্ণনাযং. ঝানানং ভেদো ঝানভেদো. অত্থতো পন ঝানেহি সম্পযোগভেদো ঝানভেদোতি ৰুত্তো হোতীতি আহ ‘‘ঝানেহি সম্পযোগভেদেনা’’তি. পথমজ্ঝানিকং চিত্তন্তিআদিনা যোজেতব্বং. ‘‘তমেৰা’’তি রূপাৰচর মানসমেৰ. ৰিভাৰনিযং পন উপরিসঙ্গহগাথাযং ঝানঙ্গ যোগভেদেন, কত্ৰেকেকন্তু পঞ্চধাতি ৰচনং দিস্ৰা ইধ ঝান ভেদেনাতি ঝানঙ্গেহি সম্পযোগভেদেনাতি ৰুত্তং. এৰং সন্তেপি ইধ ঝানভেদস্স ৰিসুং অধিপ্পেতত্তা ‘‘অঞ্ঞোহি ঝানভেদো’’তিআদি ৰুত্তং.

রূপাৰচরচিত্তদীপনিযাঅনুদীপনা নিট্ঠিতা.

৫৫. অরূপচিত্তদীপনিযং. ‘‘ভুসো’’তি অতিরেকতরং. ‘‘সরূপতো’’তি পরমত্থ সভাৰতো. নত্থি জটা এত্থাতি অজটো. অজটো আকাসোতি অজটাকাসো. ‘‘পরিচ্ছিন্নাকাসো’’তি দ্ৰারচ্ছিদ্দৰাতপানচ্ছিদ্দাদিকো আকাসো, যত্থ আকাস কসিণ নিমিত্তং উগ্গণ্হন্তি. কসিণ নিমিত্তং উগ্ঘাটেত্ৰা লদ্ধো আকাসো কসিণুগ্ঘাটিমাকাসো, কসিণং উগ্ঘাটেন নিব্বত্তো কসিণুগ্ঘাটিমোতি কত্ৰা. রূপকলাপানং পরিচ্ছেদমত্তভূতো আকাসো রূপপরিচ্ছেদাকাসো. ‘‘অনন্তভাৰেন ফরীযতী’’তি চতুরঙ্গুলমত্তোপিসো অনন্ত নামং কত্ৰা ভাৰনামনসিকারেন ফরীযতি. ‘‘দেৰানং অধিট্ঠানৰত্থূ’’তি মহিদ্ধিকানং গামনগর দেৰানং বলিপ্পটিগ্গহণট্ঠানং ৰুচ্চতি, যত্থ মনুস্সা সমযে কুল দেৰতানং বলিং অভিহরন্তি. ‘‘বলিং’’তি পূজনীয ৰত্থু ৰুচ্চতি. ‘‘তস্মিং’’তি কসিণুগ্ঘাটিমাকাসে. ‘‘তদেৰা’’তি তং আরম্মণমেৰ. কুসলজ্ঝানং সমাপন্নস্সৰা, ৰিপাকজ্ঝানেন উপপন্নস্সৰা, ক্রিযজ্ঝানেন দিট্ঠধম্ম সুখ ৰিহারিস্সৰা, তিযোজেতব্বং. অনন্তন্তি ৰুচ্চতি, যথাপথৰীকসিণে পৰত্তনতো ঝানং পথৰীকসিণন্তি ৰুচ্চতীতি. ‘‘একদেসে’’তি উপ্পাদেৰা ঠিতিযং ৰা ভঙ্গেৰা. অন্তরহিতত্তা অনন্তন্তি ৰুচ্চতি. ‘‘অনন্ত সঞ্ঞিতে’’তি অনন্ত নামকে. ‘‘অনন্তন্তি ভাৰনায পৰত্তত্তা’’তি ইদং পথমা রুপ্পৰিঞ্ঞাণং অনন্তন্তি এৰং পুব্বভাগ ভাৰনায পৰত্তত্তা. ‘‘অত্তনো ফরণাকার ৰসেনা’’তি পুব্বভাগভাৰনং অনপেক্খিত্ৰাতি অধিপ্পাযো. ‘‘নিরুত্তি নযেনা’’তি সকত্থে যপচ্চযং কত্ৰা নকারস্সলোপেন. ‘‘পাল়িযা নসমেতী’’তি ৰিভঙ্গ পাল়িযানসমেতি. ‘‘অনন্তং ফরতী’’তি অনন্তং অনন্তন্তি ফরতি. ‘‘পথমা রুপ্পৰিঞ্ঞাণাভাৰো’’তি তস্স অভাৰ পঞ্ঞত্তিমত্তং. ‘‘নেৰত্থী’’তি নত্থি. ‘‘অস্সা’’তি চতুত্থা রুপ্পজ্ঝানস্স. অথৰাতিআদীসু ‘‘পটুসঞ্ঞা কিচ্চস্সা’’তি ব্যত্তসঞ্ঞা কিচ্চস্স. ‘‘সঙ্খারাৰসেস সুখুমভাৰেন ৰিজ্জমানত্তা’’তি ইমস্স অত্থং ৰিভাৰেন্তো ‘‘এত্থচা’’তিআদিমাহ. ‘‘মুদ্ধভূতং’’তি মত্থকপত্তং. ‘‘দেসনাসীসমত্তং’’তি রাজা আগচ্ছতীতিআদীসু ৰিয পধান কথামত্তন্তি ৰুত্তং হোতি. ‘‘তস্সেৰা’’তি পথমা রুপ্পৰিঞ্ঞাণস্সেৰ. কুসলভূতং পথমা রুপ্পৰিঞ্ঞাণং পুথুজ্জনানঞ্চ সেক্খানঞ্চ কুসলভূতস্স দুতীযারুপ্পৰিঞ্ঞাণস্স আরম্মণং হোতি. অরহা পন তিৰিধো. তত্থ, একোপথমা রুপ্পেঠত্ৰা অরহত্তং পত্ৰা পথমারুপ্পং অসমাপজ্জিত্ৰাৰ দুতীযা রুপ্পং উপ্পাদেতি. তস্স কুসলভূতং পথমা রুপ্পং ক্রিযভূতস্স দুতীযা রুপ্পস্স আরম্মণং. একোপথমা রুপ্পেঠত্ৰা অরহত্তং পত্ৰা পুন তমেৰ পথমা রুপ্পং সমাপজ্জিত্ৰা দুতীযা রুপ্পং উপ্পাদেতি. একো দুতীযা রুপ্পেঠত্ৰা অরহত্তং গচ্ছতি. তেসং দ্ৰিন্নং ক্রিযভূতং পথমা রুপ্পৰিঞ্ঞাণং ক্রিযভূতস্সেৰ দুতীযারুপ্পস্স আরম্মণং. তেনাহ ‘‘ৰিঞ্ঞাণং নামা’’তিআদিং.

অরূপচিত্তানুদীপনা.

৫৭. লোকুত্তরচিত্তে. ‘‘জলপ্পৰাহো’’তি উদকধারাসঙ্ঘাটো. ‘‘পভৰতো’’তিআদিপৰত্তিট্ঠানতো. ‘‘যথাহা’’তি কথং পাল়িযং আহ. ‘‘সেয্যথিদ’’ন্তি সো কতমো. ‘‘অযং পী’’তি অযং অরিযমগ্গোপি. একচিত্তক্খণিকো অরিযমগ্গো, কথং যাৰ অনুপাদিসেস নিব্বানধাতুযাসৰতি সন্দতীতি আহ ‘‘আনুভাৰপ্ফরণৰসেনা’’তি. পাল়িযং গঙ্গাদীনি পঞ্চন্নং মহানদীনং নামানি. ‘‘সমুদ্দ নিন্না’’তি মহাসমুদ্দাভিমুখং নিন্না নমিতা. ‘‘পোণা’’তি অনুপতিতা. ‘‘পব্ভারা’’তি অধোৰাহিতা. ‘‘কিলেসানং’’তি অনুপগমনে কম্মপদং. পাল়িযং ‘‘ঘটো’’তি উদক পুণ্ণঘটো. ‘‘নিকুজ্জো’’তি অধোমুখং ঠপিতো. ‘‘নোপচ্চাৰ মতী’’তি পুন নোগিলতি. ‘‘ন পুনেতী’’তি ন পুন এতি নুপগচ্ছতি অরিযসাৰকো. ‘‘ন পচ্চেতী’’তি ন পটি এতি. তদত্থং ৰদতি ‘‘ন পচ্চাগচ্ছতী’’তি. এৰং তং অনিৰত্তগমনং পাল়িসাধকেহি দীপেত্ৰা ইদানি যুত্তিসাধকেহি পকাসেতুং ‘‘যথা চা’’তিআদিমাহ. ‘‘যতো’’তি যং কারণা. ‘‘তে’’তি পুথুজ্জনা. ‘‘দুস্সীলা’’তি নিস্সীলা. ‘‘উম্মত্তকা’’তি পিত্তুম্মত্তকা. ‘‘খিত্ত চিত্তা’’তি ছট্টিতপকতি চিত্তাযক্খুম্মত্তকা. ‘‘দুপ্পঞ্ঞা’’তি নিপ্পঞ্ঞা. ‘‘এল়মূগা’’তি দুপ্পঞ্ঞতায এৰ পগ্ঘরিতলাল মুখ মূগা. ‘‘তস্মিং মগ্গে এৰা’’তি অট্ঠঙ্গীকে অরিযমগ্গে এৰ. সো পন মগ্গো পথম মগ্গো, দুতীয মগ্গো, ততীয মগ্গো, চতুত্থ মগ্গো,তি চতুব্বিধো হোতি. ‘‘আদিতো পজ্জনং’’তি চতূসু মগ্গেসু আদিম্হি পথম মগ্গসোতস্স পজ্জনং গমনং. পটিলাভোতি ৰুত্তং হোতি. ‘‘সোতাপত্তিযা’’তি সোতস্স আপজ্জনেন. ‘‘অধিগম্মমানো’’তি পটিলব্ভমানো. সব্বে বোধিপক্খিয ধম্মা অনিৰত্ত গতিযা পৰত্তমানা সোতোতি ৰুচ্চন্তীতি সম্বন্ধো. সম্বোধি ৰুচ্চতি চতূসু মগ্গেসু ঞাণং. উপরিসম্বোধি এৰ পরাযনং যেসং তে উপরিসম্বোধি পরাযনা. পরাযনন্তি চ পটিসরণং. কথং সোতাপত্তি ৰচনং মগ্গেন সমানাধিকরণং হোতীতি ৰুত্তং ‘‘পথম মগ্গ সঙ্খাতায সোতাপত্তিযা’’তিআদি. ‘‘মগ্গেতী’’তি গৰেসতি. মারেন্ত গমনোনিরুত্তিনযেন মগ্গোতি সিজ্ঝতীতি ৰুত্তং ‘‘কিলেসে মারেন্তো গচ্ছতীতি মগ্গো’’তি.

৫৮. সকদাগামি মগ্গে. ‘‘সকিং আগচ্ছতী’’তি ইতোগন্ত্ৰা পুন ইধ আগচ্ছতীতি অত্থো. ‘‘সীলেনা’’তি পকতিসভাৰেন. কামলোকং আগচ্ছন্তি এতেহীতি কামলোকাগমনা. কিলেসা. তেসং সব্ভাৰেন ৰিজ্জমানভাৰেন. পাল়িযং ‘‘একচ্চস্স পুগ্গলস্সা’’তি কত্তু অত্থেসামিৰচনং. একচ্চেন পুগ্গলেন অপ্পহীনা নীতি সম্বন্ধো. ‘‘সহব্যতং’’তি সহাযভাৰং. ‘‘আগামীহোতী’’তি ৰত্ৰা তমেৰত্থং ৰদতি ‘‘আগন্ত্ৰা ইত্থত্ত’’ন্তি. আগচ্ছতি সীলেনাতি আগন্ত্ৰা. ইত্থং ভাৰো ইত্থত্তং. ইমং কামত্তভাৰং আগন্ত্ৰা, তস্মা আগামী নাম হোতীতি যোজনা. ‘‘অযঞ্চ অত্থো’’তি পটিসন্ধিৰসেন সকিং ইমং লোকং আগচ্ছতীতিআদিকো অত্থো. ‘‘কিলেস গতিৰসেনা’’তি কামলোকা গমন কিলেস গতিৰসেন. মগ্গসহাযেন ঝানেন ৰিক্খম্ভিতা কিলেসা মগ্গেন সমুচ্ছিন্ন গতিকা হোন্তি. অযং মগ্গসহাযোঝানানুভাৰো নাম. তেনাহ ‘‘ন হী’’তিআদিং. ‘‘দেৰলোকতো’’তি এত্থ ব্রহ্মলোকোপি সঙ্গহিতো. পচ্ছিমস্মিং পন অত্থে সতীতি যোজনা. আগমনসীলো আগন্ত্ৰা. ন আগন্ত্ৰা অনাগন্ত্ৰা. ‘‘তেনা’’তি অনাগমনেন. ‘‘নানত্থা সম্ভৰতো’’তি দ্ৰীসু ইত্থত্তসদ্দেসু একস্মিং ইমং কামাৰচর লোকন্তি একস্মিং ইমং মনুস্স লোকন্তি এৰং নানত্থানং অসম্ভৰতো. পাল়িযং ‘‘সব্যা বজ্ঝো’’তি চেতোদুক্খ সঙ্খাতেন চেতসিকরোগা বাধেন সহিতো. তেনাহ ‘‘তেহি পটিঘানুসযস্সা’’তিআদিং. তত্থ ‘‘তে’’তি পুথুজ্জন সোতাপন্ন সকদাগামিনো. সব্যা বজ্ঝানামাতি সম্বন্ধো. ‘‘পচ্ছিমস্স ৰাক্যস্সা’’তি আগন্ত্ৰা ইত্থত্তং সোতাপন্ন সকদাগামিনো তেন দট্ঠব্বাতি ৰাক্যস্স. ‘‘দ্ৰীসু সকদাগামীসূ’’তি আগন্ত্ৰা ইত্থত্তন্তি ৰুত্তত্তা তেন অত্থেন সকদাগামিনামকেসু দ্ৰীসু সোতাপন্ন সকদাগামীসু. ‘‘পুরিমস্সা’’তি সোতাপন্নস্স. ‘‘অনঞ্ঞ সাধারণে নেৰা’’তি দুতীয ফলট্ঠাদীহি অসামঞ্ঞেনেৰ. ব্রহ্মলোকেঠিতানং সোতাপন্নানং সত্তক্খত্তু পরম তাদিভাৰো নত্থি ৰিয দুতীয ফলট্ঠানং সকদাগামি ভাৰোপি নত্থি. তেনাহ ‘‘পথম দুতীয ফলট্ঠাপী’’তিআদিং. ‘‘তস্মা’’তিআদি লদ্ধগুণৰচনং. ‘‘ইতি কত্ৰা’’তি ইমিনা কারণেন. ‘‘হেট্ঠূ পরূপপত্তিৰসেনা’’তি উপরিতো আগন্ত্ৰা হেট্ঠূপপত্তি চ, হেট্ঠতো আগন্ত্ৰা উপরূপপত্তি চাতি এৰং হেট্ঠূপরূপপত্তিৰসেন. ‘‘এৰঞ্চ কত্ৰা’’তিআদি দুতীয লদ্ধ গুণৰচনং. ‘‘পঞ্চন্নং ইধ নিট্ঠা’’তি পঞ্চন্নং পুগ্গলানং ইধ কামলোকে নিট্ঠা অনুপাদিসেস নিব্বানপত্তীতি ৰুত্তং হোতি. ‘‘সো পনা’’তি সকদাগামি পুগ্গলো পন. যেসং পন অট্ঠকথা চরিযানং অত্থো, তেসং অত্থেসো সকদাগামি পুগ্গলো পঞ্চৰিধোৰ ৰুত্তো, ন ছট্ঠো পুগ্গলোতি যোজনা. যেসং পন ইমং লোকন্তি অত্থো, তেসং অত্থে ছট্ঠোপি লব্ভতীতি দস্সেতুং ‘‘মহাপরিনিব্বান…পে… আগতো যেৰা’’তি ৰুত্তং. তত্থ ‘‘সকিং আগমনট্ঠেন আগতো যেৰা’’তি সকিং আগমনট্ঠেন সকদাগামীসু আগতোযেৰ. সব্বঞ্ঞু বুদ্ধাপি পথম ফলট্ঠ ভূতা সত্তক্খত্তু পরমতাযং সণ্ঠিতা ৰিযাতি যোজনা. এত্থ চ ‘‘সত্তক্খত্তুপরমতাযং’’তি সত্তক্খত্তু পরমভাৰে. ইদঞ্চ নিদস্সন ৰচনমত্তং. সব্বঞ্ঞু বুদ্ধাপি দুতীয ফলট্ঠভূতা সকিং আগমনপ্পকতিযং সণ্ঠিতাযেৰ হোন্তি. কস্মা, তস্মিং খণে তং সভাৰানতি ৰত্তনতোতি অধিপ্পাযো. সব্বোপি সো ছব্বীধো পুগ্গলো ইধ…পে… দট্ঠব্বো. এতেন যং ৰুত্তং ৰিভাৰনিযং পঞ্চসু সকদাগামীসু পঞ্চমকোৰ ইধাধিপ্পেতোতি. তং পটিক্খিত্তং হোতি. কস্মা, পঞ্চমকো এৰ ইধ সকদাগামিপদে অধিপ্পেতেসতি ইতরে চত্তারো কত্থ অধিপ্পেতা সিযুন্তি ৰত্তব্বত্তা. জনকভূতো সমানো. ‘‘ঞাযাগতা এৰা’’তি যুত্তিতো পরম্পরাগতা এৰ. তেনাহ ‘‘যথা’’তিআদিং. ‘‘অৰিরুদ্ধো’’তি ঞাযেন অৰিরুদ্ধো.

৫৯. ওরম্ভাগো নাম হেট্ঠাভাগো কামলোকো. ওরম্ভাগায সংৰত্তন্তীতি ওরম্ভাগিযানি কামরাগ ব্যাপাদ সংযোজনাদীনি. ‘‘সো’’তি অনাগামি পুগ্গলো.

৬০. মহপ্ফলং করোন্তি সীলেনাতি মহপ্ফল কারিনো. তেসং ভাৰো ‘‘মহপ্ফল কারিতা’’. সীলাদি গুণো. ‘‘অরহতী’’তি পটিগ্গহিতুং অরহতি. ‘‘অরহতো’’তি অরহন্তস্স. ‘‘নিব্বচনং’’তি নিরুত্তি. ৰিগ্গহ ৰাক্যন্তি ৰুত্তং হোতি. সুদ্ধিকসুঞ্ঞতায তথা ন ৰচিত্তানি, সুঞ্ঞতপ্পটিপদায তথা ন ৰচিত্তানীতিআদিনা যোজেতব্বং. তত্থ ‘‘সুদ্ধিক সুঞ্ঞতাযা’’তি সুদ্ধিকসুঞ্ঞতৰারে. ‘‘সুঞ্ঞতপ্পটিপদাযা’’তি সুঞ্ঞতপ্পটিপদাৰারে. ‘‘সচ্চ সতিপট্ঠান ৰিভঙ্গেসু পনা’’তি সচ্চ ৰিভঙ্গ সতিপট্ঠান ৰিভঙ্গেসু পন, সব্বং চিত্ত ৰড্ঢনং পাল়ি অট্ঠকথাসু দেসনাৰারে ৰিচারেত্ৰা ৰেদিতব্বং.

৬১. ফলচিত্তে. সোতাপত্তিযা অধিগতং ফলং সোতাপত্তি ফলং. তত্থ ‘‘অধিগতং’’তি পটিলদ্ধং. অট্ঠঙ্গীক ফলং সন্ধায ‘‘তেন সম্পযুত্ত’’ন্তি ৰুত্তং. ‘‘নিরুত্তী’’তি ৰিগ্গহো.

৬২. তনুভূতেপি কাতুং ন সক্কোতি, কুতো সমুচ্ছিন্দিতুং. ‘‘তানী’’তি ইন্দ্রিযানি. ‘‘পটূ নী’’তিতিক্খানি. ‘‘সো’’তি চতুত্থ মগ্গো. ‘‘তা চা’’তি রূপরাগ, অরূপরাগ, মান, উদ্ধচ্চ, অৰিজ্জাদযো চ. ‘‘অঞ্ঞে চা’’তি তেহি দসহি সংযোজনেহি অঞ্ঞে অহিরিকানোত্তপ্পাদিকে, সব্বেপি পাপ ধম্মে চ.

৬৩. কিরিয চিত্ত ৰিচারণাযং. ন গহিতং ইতি অযং পুচ্ছা. অভাৰা ইতি অযং ৰিসজ্জনাতিআদিনা যোজেতব্বং. ‘‘অস্সা’’তি কিরিযানুত্তরস্স. ‘‘নিরনুসযসন্তানেপী’’তি অনুসয রহিতে অরহন্ত সন্তানেপি. ‘‘ইতী’’তি ৰাক্য পরিসমাপনমত্তং. ‘‘ৰুচ্চতে’’তি ৰিসজ্জনা কথীযতে. পুন অনুপ্পজ্জনং অনুপ্পাদো. অনুপ্পাদো ধম্মো সভাৰো যেসং তে অনুপ্পাদ ধম্মা. তেসং ভাৰোতি ৰিগ্গহো. ৰিপাকঞ্চ জনেতীতি সম্বন্ধো. কথং জনেতীতি আহ ‘‘কুসল…পে… কত্ৰা’’তি. তত্থ, ‘‘কত্ৰা’’তি সাধেত্ৰা. সচেপি করেয্যাতি যোজনা. ‘‘কোচী’’তি অব্যত্তো কোচি অরিযসাৰকো. তদা ফল চিত্তমেৰ পৰত্তেয্যাতি সম্বন্ধো. ‘‘পটিবাহিতুং অসক্কুণেয্যো’’তি অপ্পটিবাহিযো আনুভাৰো অস্সাতি সমাসো.

৬৪. ‘‘আদি অন্ত পদেস্ৰে ৰা’’তিআদিম্হি দ্ৰাদসা কুসলানীতি চ, অন্তে ক্রিয চিত্তানি ৰীসতীতি চ পদেসু. রূপে পরিযা পন্নানি চিত্তানি. অরূপে পরিযা পন্নানি চিত্তানি. ‘‘পথমায ভূমিযা পত্তিযা’’তি পথমভূমিং পাপুণিতুং. ‘‘সামঞ্ঞ ফলং অধিপ্পেতন্তি ৰুত্তং’’ অট্ঠসালিনিযং. অত্থতো পন ধম্ম ৰিসেসোতি সম্বন্ধো. মগ্গ ফল নিব্বান সঙ্খাতো ধম্ম ৰিসেসো লোকুত্তরভূমি নামাতি যোজনা. অৰত্থা ভূমি এৰ নিপ্পরিযাযভূমি. কস্মা, অৰত্থা ৰন্তানং ধম্মানং সরূপতো লদ্ধত্তা. ইতরা ওকাসভূমি নিপ্পরিযায ভূমি ন হোতি. কস্মা, পঞ্ঞত্তিযা মিস্সকত্তা. ‘‘ধম্মানং তং তং অৰত্থা ৰিসেসৰসেনেৰ সিদ্ধা’’তি এতেন অৰত্থা ভূমি এৰ পধান ভূমীতি দস্সেতি. কামতণ্হায ৰিসযভূতো ওল়ারিকাকারো কামাৰচরতা নাম. ভৰতণ্হায ৰিসযভূতো মজ্ঝিমাকারো রূপারূপাৰচরতা নাম. তাসং তণ্হানং অৰিসযভূতো সণ্হ সুখুমাকারো লোকুত্তরতা নাম. হীনানং অকুসল কম্মানং ৰসেন হীনা অপাযভূমিযো. পণীতানং কুসল কম্মানং ৰসেন পণীতা সুগতি ভূমিযো. তত্থ চ নানা অকুসল কম্মানং ৰা নানা কুসল কম্মানং ৰা ওল়ারিক সুখুমতা ৰসেন নানা দুগ্গতি ভূমিযো নানা সুগতি ভূমিযো চ সিদ্ধা হোন্তীতি ইমমত্থং দস্সেতুং ‘‘অপি চা’’তিআদিমাহ.

৬৫. গাথায পুব্বদ্ধং নাম-ইত্থ মেকূন নৰুতি, প্পভেদং পন মানসন্তি পাদদ্ৰযং. অপরদ্ধং নাম একৰীসসতংৰাথ, ৰিভজন্তি ৰিচক্খণাতি পাদদ্ৰযং. তং ইমিনা ন সমেতি. কথং ন সমেতি. ইমিনা ৰচনেন সকলম্পি গাথং একূন নৰুতিপ্পভেদং মানসং একৰীস সতং কত্ৰা ৰিভজন্তী-তি এৰং একৰাক্যং কত্ৰা যোজনং ঞাপেতি. ‘‘পথমজ্ঝান সদিসট্ঠেনা’’তি লোকিয পথমজ্ঝান সদিসট্ঠেন. যং চতুরঙ্গীকং, তং সযমেৰ দুতীযজ্ঝানন্তি সিদ্ধং. যং তিযঙ্গীকং, তং সযমেৰ ততীযজ্ঝানন্তি সিদ্ধং. যং দুৰঙ্গীকং, তং সযমেৰ চতুত্থজ্ঝানন্তি সিদ্ধং. যং পুন দুৰঙ্গীকং, তং সযমেৰ পঞ্চমজ্ঝানন্তি সিদ্ধং. ‘‘এৰং ৰুত্ত’’ন্তি ৰিভাৰনিযং ঝানঙ্গৰসেন পথমজ্ঝান সদিসত্তা পথমজ্ঝানঞ্চাতি এৰং ৰুত্তং. ৰিতক্কাদি অঙ্গপাতুভাৰেন পঞ্চধা ৰিভজন্তীতি সম্বন্ধো. ন ইতরানি লোকিযজ্ঝানানি সাতিস্সযতো ঝানানি নাম সিযুং. কস্মাতি আহ ‘‘তানি হী’’তিআদিং. তত্থ ‘‘তানী’’তি লোকিযজ্ঝানানি. ‘‘উপেচ্চা’’তি উপগন্ত্ৰা. ‘‘ঝাপেন্তী’’তি দহন্তি. পকতিযা এৰ সিদ্ধো হোতি, ন পাদকজ্ঝানাদিৰসেন সিদ্ধো. ‘‘কিচ্চ’’ন্তি পঞ্চঙ্গীক ভাৰত্থায কত্তব্ব কিচ্চং. ‘‘তেন পচ্চয ৰিসেসেনা’’তি পাদকজ্ঝানাদিনা পচ্চয ৰিসেসেন. ‘‘তস্মিং’’তি পচ্চয ৰিসেসে. যথালোকিযজ্ঝানেসু উপচারভূতা ভাৰনা কাচি ৰিতক্ক ৰিরাগ ভাৰনা নাম হোতি…পে… কাচি রূপ ৰিরাগ ভাৰনা নাম. অসঞ্ঞি গামীনং পন সঞ্ঞা ৰিরাগ ভাৰনা নাম হোতি. এৰমেৰন্তি যোজনা. ‘‘সা’’তি উপচার ভাৰনা.‘‘উপেক্খা সহগতং ৰা’’তি এত্থ ৰা সদ্দেন রূপসমতিক্কমং ৰা সঞ্ঞা সমতিক্কমং ৰাতি অৰুত্তং ৰিকপ্পেতি. আদিকম্মিককালে এৰং হোতু, ৰসিভূতকালে পন কথন্তি আহ ‘‘ঝানেসূ’’তিআদিং. নানাসত্তিযুত্তা হোতীতি ৰত্ৰা নানাসত্তিযো দস্সেতি ‘‘কাচী’’তিআদিনা. যা উপচার ভাৰনা. ‘‘ৰিতক্কং ৰিরাজেতুং’’তি ৰিতক্কং ৰিগমেতুং. অত্তনো ঝানং অৰিতক্কং কাতুন্তি ৰুত্তং হোতি. তেনাহ ‘‘অতিক্কামেতুং’’তি. সা উপচার ভাৰনা. সেসাসুপি উপচার ভাৰনাসু.

৬৬. (ক) ‘‘সা ৰিপস্সনা’’তি ৰুট্ঠানগামিনি ৰিপস্সনা. ‘‘ৰিপস্সনা পাকতিকা এৰা’’তিকাচি ৰিরাগ ভাৰনা নাম ন হোতীতি অধিপ্পাযো. ‘‘নিযামেতুং’’তি অৰিতক্কমেৰ হোতূতি ৰদমানা ৰিয ৰৰত্থপেতুং. ‘‘অধিপ্পাযো’’তি পাদকৰাদিত্থেরস্স অধিপ্পাযো. ‘‘সম্মসীযতী’’তি ইদং ঝানং অনিচ্চং খযট্ঠেন, দুক্খং ভযট্ঠেন, অনত্তা অসারকট্ঠেনাতি সম্মসীযতি সমনুপস্সীযতি. তং অট্ঠকথায ন সমেতি. ৰুত্তঞ্হি তত্থ. যতো যতো সমাপত্তিতো ৰুট্ঠায যে যে সমাপত্তি ধম্মে সম্মসিত্ৰা মগ্গো নিব্বত্তিতো হোতি. তং তং সমাপত্তি সদিসোৰ হোতি. সম্মসিতসমাপত্তি সদিসোতি অত্থোতি. এত্থ হি ‘‘যতো যতো সমাপত্তিতো ৰুট্ঠাযা’’তি এতেন পাদকজ্ঝানং কথিতং হোতি. ‘‘পাদকজ্ঝানে সতী’’তি এতেন অযং ৰাদোপি পাদকজ্ঝানেন ৰিনা নসিজ্ঝতীতি দস্সেতি. ‘‘ৰিপস্সনাপি…পে… পত্তা হোতী’’তি এতেন ইমস্মিং ৰাদেপি ৰিপস্সনা নিযামো ইচ্ছিতব্বোতি দস্সেতি. তেনাহ ‘‘যথালোকিযজ্ঝানেসূ’’তিআদিং. কামঞ্চেত্থ…পে… অৰিরোধো ৰুত্তো ৰিয দিস্সতি. কথং. পঞ্চমজ্ঝানতো ৰুট্ঠায হি পথমজ্ঝানাদীনি সম্মসতো উপ্পন্নমগ্গো পথমত্থেরৰাদেন পঞ্চমজ্ঝানিকো, দুতীয ৰাদেন পথমাদিজ্ঝানিকো আপজ্জতীতি দ্ৰেপি ৰাদা ৰিরুজ্ঝন্তি. ততীয ৰাদেন পনেত্থ যং ইচ্ছতি, তং ঝানিকো হোতীতি তে চ ৰাদা ন ৰিরুজ্ঝন্তি, অজ্ঝাসযো চ সাত্থকো হোতীতি এৰং অৰিরুদ্ধো ৰুত্তো হোতীতি. এত্থ পন যং ইচ্ছতি, তং ঝানিকো হোতি. ইচ্ছায পন অসতি, ৰিরোধোযেৰ. তেনাহ ‘‘ইমে পন ৰাদা. …পে…. ৰিরোধো পরিহরিতুং’’তি. পাল়িযং ‘‘অজ্ঝত্তং সুঞ্ঞতং মনসি করোতী’’তি অজ্ঝত্তসন্তানেতং তং ঝানঞ্চ ঝানসহগতঞ্চ খন্ধ পঞ্চকং নিচ্চ সুখ অত্ত জীৰতো সুঞ্ঞতং মনসি করোতি. ‘‘ন পক্খন্দতী’’তি ন পৰিসতি. ‘‘সন্নিসাদেতব্বং’’তি সন্নিসিন্নং কাতব্বং. ‘‘একোদিকাতব্বং’’তি একমুখং কাতব্বং. ‘‘সমাদহাতব্বং’’তি সুট্ঠু ঠপেতব্বং. ‘‘নিস্সাযা’’তি পাদকং কত্ৰাতি অধিপ্পাযো.

৬৭. (ক) ৰাদৰিচারণাযং. উপচার ভাৰনা এৰ উপরিজ্ঝানে ঝানঙ্গং নিযামেতীতি ৰুত্তং. হেট্ঠা পন অজ্ঝাসযো এৰ উপরিজ্ঝানে ঝানঙ্গং নিযামেতীতি ৰুত্তং. তত্থ ‘‘অজ্ঝাসযো এৰা’’তি এৰ সদ্দেন পাদকজ্ঝানং নিৰত্তেতি. ‘‘ইধ উপচার ভাৰনা এৰা’’তি এৰ সদ্দেন অজ্ঝাসযং নিৰত্তেতি. এতেসু হি দ্ৰীসু সহ ভাৰীসু উপচার ভাৰনা এৰ পধানং হোতি. অজ্ঝাসযো পন তস্স নানা সত্তিযোগং সাধেতি. ‘‘অজ্ঝাসয সামঞ্ঞং সণ্ঠাতী’’তি মগ্গে যং লদ্ধব্বং হোতি, তং লব্ভতু, ময্হং ৰিসেসো নত্থীতি এৰং অজ্ঝাসয সামঞ্ঞং সণ্ঠাতি. ‘‘তস্মি’’ন্তি অজ্ঝাসয ৰিসেসে. ‘‘সো’’তি অজ্ঝাসয ৰিসেসো. কস্মা যুত্তন্তি আহ ‘‘ইচ্ছি তিচ্ছিত…পে… নিব্বত্তনং’’তি. ‘‘সব্বজ্ঝানেসু চিণ্ণৰসিভূতানং’’তি ইদং সমাপজ্জনন্তি চ নিব্বত্তনন্তি চ পদ দ্ৰযে সম্বন্ধ ৰচনং. ‘‘ৰিপস্সনা ৰিসেসত্থায এৰা’’তি ৰুট্ঠান গামিনি ৰিপস্সনা ৰিসেসত্থায এৰ. যস্মা পন অট্ঠসু সমাপত্তীসু একেকায সমাপত্তিযা ৰুট্ঠায ৰুট্ঠিত সমাপত্তি ধম্ম সম্মসনং আগতং, ন পন অঞ্ঞজ্ঝান সম্মসনং. তস্মা পাদকজ্ঝানমেৰ পমাণন্তি যোজনা. পাল়িপদেসু ‘‘গহপতী’’তি আলপন ৰচনং. ‘‘ৰিৰিচ্চেৰা’’তি ৰিৰিচ্চিত্ৰা এৰ. ৰিৰিত্তো ৰিগতো হুত্ৰা এৰ. ‘‘উপসম্পজ্জা’’তি সুট্ঠু সম্পাপুণিত্ৰা. ‘‘ইতি পটিসঞ্চিক্খতী’’তি এৰং পচ্চৰেক্খতি. ‘‘অভিসঞ্চেতযিত’’ন্তি সুসং সম্পিণ্ডিতং, সংৰিদহিতং. ‘‘তত্থ ঠিতো’’তি তস্মিং পথমজ্ঝানে অপরিহীনো হুত্ৰা ঠিতো. ‘‘মেত্তাচেতো ৰিমুত্তী’’তি মেত্তাঝানসঙ্খাতা চেতোৰিমুত্তি, অঞ্ঞত্থ অলগ্গনৰসেন চিত্তস্স পৰত্তি. তথা করুণা চেতোৰিমুত্তি. মুদিতা চেতোৰিমুত্তি. ‘‘ৰিৰেকজ’’ন্তি কাযৰিৰেক চিত্তৰিৰেকানং ৰসেন জাতং. ‘‘পীতি সুখং’’তি পীতিযা চ সুখেন চ সম্পন্নং. অথৰা, ৰিৰেকেহি জাতানি পীতি সুখানি অস্সাতি ৰিৰেকজং পীতি সুখং. মজ্ঝে নিগ্গহিতাগমো. রূপমেৰ রূপগতং, ৰেদনা এৰ ৰেদনা গতন্তিআদিনা সমাসো. গতসদ্দো চ পদপূরণমত্তে দট্ঠব্বো. ‘‘তেনেৰ ধম্ম রাগেন তাযধম্মনন্দিযা’’তি ৰিপস্সনানি কন্তিমাহ. সহত্থে চ করণ ৰচনং. ওপপাতিকো হোতীতি সম্বন্ধো. ‘‘তত্থ পরিনিব্বাযী’’তি ব্রহ্মলোকে অৰস্সং পরিনিব্বায ন ধম্মো. তেনাহ ‘‘অনাৰত্তি ধম্মো তস্মা লোকা’’তি. ‘‘পাদকজ্ঝানমেৰ পমাণ’’ন্তি পাদকজ্ঝানমেৰ মগ্গেঝানঙ্গং নিযামেস্সতি, ন সম্মসিতজ্ঝানন্তি অধিপ্পাযো. ‘‘পাদকং অকত্ৰা’’তি আসন্নে অসমাপজ্জিত্ৰাতি ৰুত্তং হোতি. ‘‘যং যং ঝানং ইচ্ছন্তী’’তি মগ্গে ইচ্ছন্তি.

৬৬. (খ) ‘‘তথা ৰিধো’’তি তথা পকারো. আসন্নে ৰুট্ঠিতস্সেৰ ঝানস্স. ‘‘চিত্তসন্তানং ৰিসেসেতুং’’তি সচে পাদকজ্ঝানং পথমজ্ঝানং হোতি, ততো পরং পৰত্তং চিত্তসন্তানং ৰিতক্কে নিন্নং হোতি, ৰিতক্কে পক্খন্দতি. অথ পাদকজ্ঝানং দুতীযজ্ঝানং হোতি. ততো পরং পৰত্তং চিত্তসন্তানং ৰিচারে নিন্নং হোতি, ৰিচারে পক্খন্দতীতিআদিনা নযেন চিত্তসন্তানং ৰিসেসেতুং. ‘‘যং তত্থ ৰুত্তং’’ তিযং ৰিভাৰনিযং ৰুত্তং.

ৰেদনা ৰিচারণাযং. ‘‘ন সিদ্ধো’’তি সিদ্ধো ন হোতি. ‘‘অঞ্ঞথা’’তি অঞ্ঞেন পকারেন. গহিতে সতীতি যোজনা. পাদকজ্ঝানাদীনং ৰসেন সিদ্ধোতি গহিতে সতীতি ৰুত্তং হোতি. ‘‘যায কায চি ৰেদনায যুত্তা হুত্ৰা’’তি সোমনস্স ৰেদনায ৰাযুত্তা হুত্ৰা উপেক্খা ৰেদনায ৰা যুত্তা হুত্ৰা. ‘‘তেহি নিযমিতায একেকায মগ্গ ৰেদনাযা’’তি পাদকজ্ঝানাদীহি নিযমিতায মগ্গে সোমনস্স ৰেদনায এৰ ৰাসদ্ধিং ঘটিযেয্য মগ্গে উপেক্খা ৰেদনায এৰ ৰাতি অত্থো. ৰেদনা নাম একং ঝানঙ্গং হোতি. তস্মা মগ্গেঝানঙ্গ নিযমে সিদ্ধে মগ্গে ৰেদনা নিযমোপি সিদ্ধো. তানি পন পাদকজ্ঝানাদীনি মজ্ঝে ৰুট্ঠান গামিনি ৰিপস্সনাযং নকিঞ্চিনিযামেন্তি. এৰঞ্চ সতি, পাদকজ্ঝানাদীহি নিযমিতায মগ্গে একেকায ৰেদনায সদ্ধিং দ্ৰে দ্ৰে ৰিপস্সনা ৰেদনাযো ঘটিযেয্যুং. মগ্গে সোমনস্স ৰেদনায ৰা সদ্ধিং দ্ৰে ৰিপস্সনা ৰেদনাযো ঘটিযেয্যুং. মগ্গে উপেক্খা ৰেদনায ৰা সদ্ধিং দ্ৰে ৰিপস্সনা ৰেদনাযো ঘটিযেয্যুংতি ৰুত্তং হোতি. এৰঞ্চসতি একৰীথিযং জৰনানি ভিন্ন ৰেদনানি সিযুং. তঞ্চ ন যুজ্জতি. তস্মা মগ্গে ৰেদনা নিযমো পাদকজ্ঝানাদি নিযমেন সিদ্ধো ন হোতি, ৰিপস্সনা নিযমেনেৰ সিদ্ধোতি অধিপ্পাযো. তানি পন পাদকজ্ঝানাদীনি মজ্ঝে ৰুট্ঠান গামিনি ৰিপস্সনাযং ন কিঞ্চি ন নিযামেন্তি. ৰেদনং নিযামেন্তি যেৰাতি দস্সেতুং ‘‘তংপি ন যুজ্জতী’’তি ৰত্ৰা ‘‘পাদকজ্ঝানাদীনং ৰসেনেৰা’’তিআদিমাহ. ‘‘ছ নেক্খম্মস্সিতা উপেক্খা’’তি একাৰ চতুত্থজ্ঝানু পেক্খা ছসু আরম্মণেসু সোমনস্সানি পজহিত্ৰা পৰত্তত্তা ছ নেক্খম্মস্সিতা উপেক্খা নাম হোতি. ‘‘ছ নেক্খম্মস্সিতানি সোমনস্সানী’’তি একং ৰপথমজ্ঝান সোমনস্সং ছসু আরম্মণেসু ছ গেহস্সিতানি পজহিত্ৰা পৰত্তত্তা ছ নেক্খম্মস্সিতানি সোমনস্সানি নাম হোন্তি. অট্ঠকথাযঞ্চ ৰুত্তন্তি সম্বন্ধো. ‘‘পথমাদীনি চ তীণি ঝানানী’’তি চতুক্কনযে তীণি সোমনস্স ঝানানি পাদকানি কত্ৰা. ‘‘সুদ্ধসঙ্খারে চ পাদকেকত্ৰা’’তি আরম্মণ ভাৰেন পাদকেকত্ৰাতি অধিপ্পাযো. অযঞ্চ পাদকজ্ঝানাদীনং ৰসেন ৰুট্ঠান গামিনি ৰিপস্সনাযঞ্চ মগ্গে চ ৰেদনা পরিণামো অট্ঠসালিনিযংপি ৰিত্থারতো ৰুত্তো. ‘‘অমানুসী রতী হোতী’’তি মনুস্সানং গেহস্সিতরতিং অতিক্কম্ম ঠিতত্তা অমানুসী নাম রতি হোতি. ‘‘সম্মধম্মং ৰিপস্সতো’’তি সম্মা অনিচ্চ লক্খণ ধম্মং পস্সন্তস্স ভিক্খুনোতি সম্বন্ধো.

৬৭. (খ) ‘‘ঝানঙ্গযোগভেদেনা’’তি ৰুত্তং, ঝানযোগভেদো পন অধিপ্পেতো. ‘‘পঞ্চ ৰিধেঝান কোট্ঠাসে’’তি পঞ্চক নযৰসেন ৰুত্তং. ইধ চিত্ত ভেদস্স অধিপ্পেতত্তা ঝানভেদেতি চ ঝানন্তি চ ৰুত্তেপি চিত্তমেৰ অধিপ্পেতন্তি দট্ঠব্বং.

গাথাযোজনাসু. ‘‘অপরাপি যোজনা ৰুত্তা’’তি অথৰা রূপাৰচরং চিত্তং অনুত্তরঞ্চ পথমাদিজ্ঝান ভেদেন যথা গয্হতি, তথা আরুপ্পঞ্চাপি পঞ্চমেঝানে গয্হতীতি এৰং অপরাপি যোজনা ৰুত্তা. ‘‘পঠিতত্তা’’তি উচ্চারিতত্তা. অন্তিমগাথা ৰণ্ণনাযং. ‘‘যথা’’তি যেন পকারেন. ‘‘তং সঙ্গহং’’তি এক ৰীসসতসঙ্গহং. বুজ্ঝন্তীতি বুধা. ‘‘আহা’’তি চ ‘‘আহূ’’তি চ ৰত্তমানকালেপি ইচ্ছন্তি সদ্দৰিদূতি ৰুত্তং ‘‘কথেন্তি ৰা’’তি. ইদঞ্চ ৰচনং পুব্বে ‘‘ইত্থমেকূন নৰুতি…পে… ৰিভজন্তি ৰিচক্খণা’’তি গাথায নিগমনন্তি ঞাপনত্থং ‘‘ৰিভজন্তি ৰিচক্খণা’’তি ৰুত্তং হোতী’’তি ৰুত্তং.

ইতিপরমত্থদীপনিযানামটীকাযঅনুদীপনিযং

চিত্তসঙ্গহস্সঅনুদীপনা নিট্ঠিতা.

২. চেতসিকসঙ্গহঅনুদীপনা

৬৮. এৰং চিত্ত সঙ্গহস্স দীপনিং কত্ৰা চেতসিক সঙ্গহস্স দীপনিং করোন্তো পথমং পুব্বাপরানু সন্ধিঞ্চ আদিগাথায পযোজন সম্বন্ধঞ্চ দস্সেতুং ‘‘এৰং’’তিআদি মারদ্ধো. তত্থ ‘‘অনুপত্ত’’ন্তিআদিম্হি চিত্তং চেতসিকং রূপং, নিব্বানমিতিসব্বথাতি এৰং অনুক্কমো ৰুত্তো. তেন অনুক্কমেন অনুপত্তং. হেতু ৰিসেসনঞ্চেতং. যস্মা চিত্তসঙ্গহানন্তরং চেতসিক সঙ্গহো অনুপত্তো, তস্মা ইদানি তং সঙ্গহং করোতীতি দীপেতি. চত্তারি সম্পযোগ লক্খণানি ‘একুপ্পাদতা, এক নিরোধতা, একা রম্মণতা, এক ৰত্থুকতা,তি. ‘‘চেতসি যুত্তা’’তি চিত্তস্মিং নিযুত্তা. চিত্তং নিস্সায অত্তনো অত্তনো কিচ্চেসু উস্সুক্কং আপন্নাতি অত্থো. ‘‘চেতসা ৰাযুত্তা’’তি চিত্তেন ৰা সম্পযুত্তা. চিত্তেন সহ একীভাৰং গতাতি অত্থো. ‘‘সরূপদস্সন’’ন্তি সঙ্খ্যাসরূপদস্সনং. সিদ্ধপদং নাম পকতি পচ্চযেহি নিপ্ফন্ন পদং. ‘‘পুব্বন্ততো’’তি একস্সসঙ্খত ধম্মস্স পথম ভাগতো. উদ্ধং পজ্জনং নাম কতমন্তি আহ ‘‘সরূপতো পাতুভৰন’’ন্তি. ধাতু পাঠেসু-জনিপাতুভাৰে-তি ৰুত্তত্তা আহ ‘‘জাতীতি ৰুত্তং হোতী’’তি. ‘‘সরূপ ৰিনাসো’’তি সরূপতো পাতুভৰন্তস্স ভাৰস্স ৰিনাসো অন্তরধানং. ‘‘এৰং পরত্থ পী’’তি পরস্মিং একালম্বণৰত্থুকাদিপদেপি. ‘‘এক চিত্তস্সপি বহুদেৰা’’তি চক্খু ৰিঞ্ঞাণং রূপং পস্সন্তং একমেৰ রূপং পস্সতীতি নত্থি. অনেকানি এৰরূপানি একতো কত্ৰা পস্সতি. সোতৰিঞ্ঞাণাদীসুপি এসেৰ নযো. এৰঞ্চ কত্ৰা পাল়িযং. চক্খুঞ্চ পটিচ্চ রূপে চ উপ্পজ্জতি চক্খু ৰিঞ্ঞাণং. সোতঞ্চ পটিচ্চ সদ্দে চ উপ্পজ্জতি সোতৰিঞ্ঞাণন্তিআদিনা ৰত্থুদ্ৰারেসু একৰচনং ৰত্ৰা আরম্মণেসু বহুৰচনং কতন্তি. ‘‘একত্তং উপনেত্ৰা’’তি চক্খু ৰিঞ্ঞাণে বহূনিপি রূপারম্মণানি রূপতা সমঞ্ঞেন একীভাৰং কত্ৰা একং আরম্মণন্ত্ৰেৰ ৰুত্তন্তি অধিপ্পাযো. সদ্দারম্মণাদীসুপি এসেৰ নযো. তং ন সুন্দরং. কস্মা. অত্থ ৰিসেসস্স অৰিঞ্ঞাপনতো. কোপনাযং অত্থ ৰিসেসোতি. যাচিত্তস্স জাতি, সাযেৰ ফস্সাদীনন্তিআদিকো অত্থো. তেনাহ ‘‘অথ খো’’তিআদিং. অধিপ্পেতা একুপ্পাদতা. এস নযো এক নিরোধতাদীসু. ‘‘মূলটীকায’’ন্তি রূপকণ্ডমূলটীকাযং. ‘‘সহেৰা’’তি একতো এৰ. ‘‘উপ্পাদাদিপ্পৰত্তিতো’’তি উপ্পাদস্স চ জীরণস্স চ নিরোধস্স চ পৰত্তিতো. ‘‘উপ্পাদাদযো’’তি উপ্পাদ জীরণ নিরোধা. জাতিজরামরণানীতি ৰুত্তং হোতি. ‘‘চেতসিকামতা’’তি চেতসিকা ইতি ৰিঞ্ঞাতা. ‘‘ভাৰপ্পধানং’’তি একুপ্পাদ ভাৰো একুপ্পাদোতি ৰুত্তো. তথা এক নিরোধাদীসু. যথা ইদংপি সঙ্ঘেরতনং পণীত-ন্তিআদীসু অযং রতন ভাৰো পণীতোতি হেত্থ অত্থো. ‘‘যে’’তি যে ধম্মা. ‘‘সহজাত পচ্চযুপ্পন্ন রূপানি পী’’তি সহজাতপচ্চযতো উপ্পন্নানি রূপানিপি. চেতসিকানি নাম সিযুন্তি সম্বন্ধো. ‘‘তদা যত্ত ৰুত্তিতাযা’’তি চিত্তাযত্তৰুত্তিযায. ‘‘চেতোযুত্তানী’’তি হেতু ৰিসেসনং. তদেৰ হেতুমন্ত ৰিসেসনন্তি চ হেতু অন্তো নীতৰিসেসনন্তি চ হেতু অন্তো গধৰিসেসনন্তি চ ৰদন্তি. ‘‘তেস’’ন্তি চিত্তস্স সহজাতপচ্চযুপ্পন্নরূপানং. ‘‘নানুভোন্তী’’তি নপাপুণন্তি. ‘‘ন হি সক্কা জানিতুং’’তি এতেন ভূতকথন ৰিসেসনানি এতানীতি দীপেতি. ভূতকথনংপি সমানং ৰত্তিচ্ছাৰসেন ব্যৰচ্ছেদকংপি সম্ভৰতি. ‘‘ৰযোপঞ্ঞাযতী’’তি ৰিনাসো পকাসতি. ‘‘ঠিতাযা’’তি তিট্ঠ মানায ৰেদনায. অঞ্ঞো পকারো অঞ্ঞথা. অঞ্ঞথা ভাৰো অঞ্ঞথত্তং. জরাৰসেন পরিণামোতি ৰুত্তং হোতি. যো পথৰীধাতুযা উপ্পাদো, যা ঠিতি, যা অভিনিব্বত্তি, যো পাতুভাৰো. এসো দুক্খস্স উপ্পাদো, এসা রোগানং ঠিতি, এসো জরামরণস্স পাতুভাৰোতি যোজনা. ‘‘ইতরথা’’তি ইতো অঞ্ঞথা গহিতে সতীতি অত্থো. একস্মিং রূপারূপকলাপে নানা ধম্মানং ৰসেন বহূসু উপ্পাদেসু চ নিরোধেসু চ গহিতেসূতি ৰুত্তং হোতি. ‘‘ৰিকাররূপানং’’তি ৰিঞ্ঞত্তি দ্ৰয লহুতাদিত্তযানং. সব্বানিপি উপাদারূপানি চতুন্নং মহাভূতানং উপাদায পৰত্তত্তা মহাভূত গণনায চত্তারি চত্তারি সিযুংতি ইমিনা অধিপ্পাযেন ‘‘সব্বেসম্পি ৰা’’তিআদিৰুত্তং. সব্বেসম্পি ৰা চক্খাদীনং উপাদারূপানং একেকস্মিং কলাপে বহুভাৰো ৰত্তব্বো সিযাতি যোজনা. কস্মা বহুভাৰো ৰত্তব্বোতি আহ ‘‘চতুন্নং মহাভূতান’’ন্তিআদিং.

যদি এৰং, একস্মিং চিত্তুপ্পাদে লহুতাদীনিপি একেকানি এৰ সিযুং, অথ কিমত্থং দ্ৰে দ্ৰে কত্ৰা ৰুত্তানীতি আহ ‘‘কাযলহুতা চিত্ত লহুতাদযোপনা’’তিআদিং. ‘‘ইমমত্থং অসল্লক্খেত্ৰা’’তি ঈদিসং ৰিনিচ্ছযত্তং অচিন্তেত্ৰাতি অধিপ্পাযো. ৰিভাৰনিপাঠে ‘‘চিত্তানুপরিৰত্তিনো’’তি এতেন চিত্তেন উপ্পজ্জিত্ৰা তেনেৰ চিত্তেন সহনিরুজ্ঝনৰসেন চিত্তং অনুপরিৰত্তিস্স. ‘‘পসঙ্গা’’তি চেতসিকতা পসঙ্গো. ‘‘পুরেতরমুপ্পজ্জিত্ৰা’’তি পুরেতরং একেন চিত্তেন সহ উপ্পজ্জিত্ৰাতি অধিপ্পাযো. ‘‘চিত্তস্সভঙ্গক্খণে’’তি অঞ্ঞস্স সত্তর সম চিত্তস্স ভঙ্গক্খণে. তথা রূপধম্মানং পসঙ্গো ন সক্কা নীৰারেতুং তিযোজনা. ‘‘পসঙ্গো’’তি চেতসিকতা পসঙ্গো. ‘‘অলমতি পপঞ্চেনা’’তি অভিধম্মে ৰেদনাত্তিকেটীকাসু ৰিয অতি ৰিত্থারেন নিরত্থকং হোতীতি অত্থো. ‘‘নিরত্থকং’’তি ৰিভাৰনিযং পপঞ্চো নিরত্থকো এৰাতি অধিপ্পাযো.

৬৯. ফস্সৰচনত্থে. ‘‘ফুসতী’’তি আরম্মণং আহনতি, সঙ্ঘট্টেতি. তঞ্চ সঙ্ঘট্ট নং নদোসপটিঘস্স ৰিয আরম্মণস্স ৰিবাধনং হোতি, অথ খো ভমরস্স পদুম পুপ্ফেসু পুপ্ফর সগ্গহণং ৰিয ৰিজানন মত্তে অঠত্ৰা আরম্মণ রসপাতুভাৰত্থং যথারম্মণং সংহনন মেৰাতি দস্সেতুং ‘‘ফুসনঞ্চেত্থা’’তিআদিমাহ. ‘‘আহচ্চা’’তি আহনিত্ৰা সম্পাপুণিত্ৰা. ‘‘উপহচ্চা’’তি তস্সেৰ ৰেৰচনং. অযমত্থো কথং পাকটোতি আহ ‘‘যতো’’তিআদিং. তত্থ ‘‘যতো’’তি যং কারণা. ‘‘তদনুভৰন্তী’’তি তং আরম্মণ রসং অনুভৰন্তী, ৰেদনা পাতুভৰতি, ৰেদনা পাতুভাৰং দিস্ৰা আরম্মণপ্ফুসনং ঞাণে পাকটং হোতীতি অধিপ্পাযো. স্ৰাযং ফুসন লক্খণো, সঙ্ঘট্টনরসো, সন্নিপাতপচ্চুপট্ঠানো, আপাতা গতৰিসয পদট্ঠানো. তত্থ সন্নিপাতো নাম তিণ্ণং তিণ্ণং দ্ৰারা রম্মণ ৰিঞ্ঞাণানং সঙ্গতি সমাগমো সমোধানং. তথাহি ৰুত্তং. চক্খুঞ্চ পটিচ্চ রূপে চ উপ্পজ্জতি চক্খু ৰিঞ্ঞাণং, তিণ্ণং সঙ্গতি ফস্সো তিআদি. ‘‘সঙ্ঘট্টনরসো’’তি আরম্মণে সম্মদেৰ ঘট্টন কিচ্চো. সঙ্ঘট্টন কিচ্চত্তা এৰ তিণ্ণং সন্নিপাতো হুত্ৰা ধম্ম চিন্তাঞাণস্স পটিমুখং উপট্ঠাতি পকাসতীতি. ‘‘সন্নিপাত পচ্চুপট্ঠানো’’. পচ্চুপট্ঠানন্তি ৰা পঞ্ঞাণং ৰুচ্চতি ধজোরথস্স পঞ্ঞাণন্তি এত্থ ৰিয. সন্নিপাতাকারো পচ্চুপট্ঠানং যস্সাতি সন্নিপাতপচ্চুপট্ঠানো. ৰেদনাপচ্চু পট্ঠানো ৰা. ধূমোৰিয অগ্গিস্স. ৰেদনাফলং পচ্চুপট্ঠানং যস্সাতি ৰিগ্গহো. অট্ঠসালিনিযং পন কস্মা পনেত্থ ফস্সো পথমং ৰুত্তো তিপুচ্ছিত্ৰা মহাঅট্ঠকথা ৰাদোতাৰ দস্সিতো. চিত্তস্স পথমাভিনিপাতত্তা. আরম্মণস্মিঞ্হি চিত্তস্স পথমাভিনিপাতো হুত্ৰা ফস্সো আরম্মণং ফুসমানো উপ্পজ্জতি. তস্মা পথমং ৰুত্তো. ফস্সেন ফুস্সিত্ৰা ৰেদনায ৰেদযতি. সঞ্ঞায সঞ্জানাতি. চেতনায চেততি. তেন ৰুত্তং ফুট্ঠো ভিক্খৰে ৰেদেতি, ফুট্ঠো সঞ্জানাতি, ফুট্ঠো চেতেতীতি. অপি চ অযং ফস্সো নাম যথাপাসাদং পত্ৰা থম্ভো নাম সেসদব্ব সম্ভারানং বলৰপচ্চযো. এৰমেৰ সহজাত সম্পযুত্ত ধম্মানং বলৰ পচ্চযো হোতি. তস্মা পথমং ৰুত্তোতি. সঙ্গহকারেন পন ইদং পন অকারণং, একক্খণস্মিঞ্হি উপ্পন্ন ধম্মানং অযং পথমং উপ্পন্নো অযং পচ্ছাতি ইদং ৰত্তুং ন লব্ভা. বলৰপচ্চযভাৰেপি ফস্সস্সকারণং ন দিস্সতীতি এৰং তং ৰাদং পটিক্খিপেত্ৰা ইদং ৰুত্তং দেসনা ৰারেনেৰ ফস্সো পথমং ৰুত্তোতি. তত্থ ‘‘দেসনাৰারে নেৰা’’তি দেসনক্কমেনেৰ, ততো অঞ্ঞং কারণং নত্থীতি অধিপ্পাযো. তেসু পন দ্ৰীসু ৰাদেসু মহাঅট্ঠকথা ৰাদো এৰ যুত্তো. যঞ্হি তত্থ ৰুত্তং চিত্তস্স পথমাভিনিপাতো হুত্ৰাতি. তত্থ পথমাভিনিপাতোতি ইদং কিচ্চপ্পধানত্তা ৰুত্তং. ন পনঞ্ঞেহি চেতসিকেহি ৰিনা ৰিসুং পথমং উপ্পন্নত্তা. যথা তং যে কেচি ভিক্খৰে ধম্মা অকুসলা অকুসলভাগিযা অকুসলপক্খিকা. সব্বে তে মনোপুব্বঙ্গমা, মনো তেসং ধম্মানং পথমং উপ্পজ্জতীতি ইমস্মিং সুত্তে কিচ্চপ্পধানত্তা মনো তেসং ধম্মানং পথমং উপ্পজ্জতীতি ৰুত্তং. ন পন সব্বচেতসিকেহি ৰিনা ৰিসুং পথমং উপ্পন্নত্তাতি দট্ঠব্বং. বলৰপচ্চয ভাৰেপি ফস্সস্সকারণং দিস্সতিযেৰ. ফস্সোহেতু ফস্সো পচ্চযো ৰেদনাক্খন্ধস্স পঞ্ঞা পনায. ফস্সো হেতু ফস্সো পচ্চযো সঞ্ঞাক্খন্ধস্স পঞ্ঞা নায. ফস্সো হেতু ফস্সো পচ্চযো সঙ্খারক্খন্ধস্স পঞ্ঞাপনাযাতি হি ৰুত্তং. তস্মা সব্বেসং চেতসিকানং ধম্মানং ফস্সপ্পধানত্তা এৰ ফস্স বলৰপচ্চযত্তা এৰ চ ফস্সো পথমং ৰুত্তোতি দট্ঠব্বং. এত্থ চ চিত্তং আরম্মণ ৰিজাননট্ঠেন ফস্সাদীনং সব্বচেতসিক ধম্মানং পুব্বঙ্গমং হোতি, পধানং, জেট্ঠকং. ফস্সো পন আরম্মণ সঙ্ঘট্টনট্ঠেন সব্বেসং চেতসিক ধম্মানং পুব্বঙ্গমো হোতি, পধানো, জেট্ঠকোতি অযং দ্ৰিন্নং ৰিসেসোতি. এত্থ চোদকো ফুসনং নাম সপ্পটিঘরূপানং এৰ কিচ্চন্তি মঞ্ঞমানো ‘‘ননুচা’’তিআদিনা চোদেতি. ‘‘ননুচা’’তি চোদেধীতি দীপেতি. ‘‘অপ্পটিঘসভাৰা’’তি হেতুৰিসেসনং. ‘‘কিঞ্চী’’তি কিঞ্চিৰত্থুং. অযং পন ফস্সো. ‘‘চিত্তস্স ৰিকারা পত্তিং’’তি চলন কম্পন থম্ভন জেগুচ্ছ ভয তাস ছম্ভিতত্তা দিৰসেন ৰিকারা পজ্জনং. ‘‘ৰেদনা ৰিসেসুপ্পত্তিং’’তি সুখৰেদনীযং ফস্সং পটিচ্চ সুখৰেদনা, দুক্খৰেদনীযং ফস্সং পটিচ্চ দুক্খ ৰেদনাতিআদিনা নযেন ফস্স ৰিসেসানুরূপং ৰেদনা ৰিসেসুপ্পত্তিং সাধেতি. এত্থ চ ফুসনং নাম দুৰিধং রূপপ্ফুসনং, নামপ্ফুসন, ন্তি. তত্থ রূপপ্ফুসনং নাম ফোট্ঠব্ব ধাতূনং কিচ্চং. নামপ্ফুসনং দুৰিধং ফস্সপ্ফুসনং, ঞাণপ্ফুসন, ন্তি. তত্থ ঞাণপ্ফুসনং নাম ঞাণপ্পটিৰেধো. অপি চ ঝানমগ্গ ফল নিব্বানানং পটিলাভোপি ফুসনন্তি ৰুচ্চতি. ফুসন্তি ধীরা নিব্বানং. যোগক্খেমং অনুত্তরং. ফুসামি নেক্খমং সুখং. অপুথুজ্জন সেৰিতন্তি-আদীসু. ইদং উপমা মত্তং সিযা, কস্সচি মন্দ পঞ্ঞস্সাতি অধিপ্পাযো. ‘‘ইদ’’ন্তি খেল়ুপ্পাদ ৰচনং. ৰিঞ্ঞুস্স পন অতিপাকট ফস্স নিদস্সনেন অপ্পাকট ফস্স ৰিভাৰনং যুত্তমেৰ. তেনাহ ‘‘অতিপাকটায পনা’’তিআদিং.

৭০. ৰেদনাৰচনত্থে. ‘‘তংসমঙ্গীপুগ্গলানং ৰা’’তি ৰেদনা সমঙ্গীপুগ্গলানং ৰা. ‘‘সাতং ৰা’’তি সাধুরসং ৰা. ‘‘অস্সাতং ৰা’’তি অসাধুরসং ৰা. ‘‘কিং ৰেদযতী’’তি কতমং ৰেদযতি. ‘‘সুখম্পি ৰেদযতী’’তি সুখম্পি ৰেদনং ৰেদযতি. অথৰা ‘‘কিঞ্চৰেদযতী’’তি কথঞ্চৰেদযতি. ‘‘সুখম্পি ৰেদযতী’’তি সুখং হুত্ৰাপি ৰেদযতি. সুখ ভাৰেন ৰেদযতীতি ৰুত্তং হোতি. এৰং সেসপদেসুপি. ‘‘কিচ্চন্তরব্যাৰটা’’তি অঞ্ঞকিচ্চব্যাৰটা. অধিপতি ভাৰো আধিপচ্চং. ইন্দ্রিয কিচ্চং. ‘‘এৰঞ্চ কত্ৰা’’তি লদ্ধগুণৰচনং. রাজারহ ভোজনং রাজগ্গভোজনং. ‘‘সূদসদিসতা’’তি রঞ্ঞোভত্তকারসদিসতা. তত্থ সূদো রঞ্ঞোভত্তং পচন্তো রসজাননত্থং থোকং গহেত্ৰা জিৰ্হগ্গে ঠপেত্ৰা রসং ৰীমংসতি. যথিচ্ছিতং পন ভুঞ্জিতুং অনিস্সরো. রাজা এৰ যথিচ্ছিতং ভুঞ্জিতুং ইস্সরো. রাজা ৰিয ৰেদনা. সূদো ৰিয সেসচেতসিক ধম্মা.

৭১. সঞ্ঞাৰচনত্থে. ‘‘সঞ্জানাতী’’তি সুট্ঠু জানাতি. সুট্ঠুজাননঞ্চ নাম ন ৰিঞ্ঞাণস্স ৰিয ৰিৰিধজাননং হোতি. ন চ পঞ্ঞায ৰিয যথাভূতজাননং হোতি. অথ খো ভূতং ৰা হোতু, অভূতং ৰা. যং যং ছ হি ৰিঞ্ঞাণেহি ৰিজানাতি, পঞ্ঞায ৰা পজানাতি. তস্স তস্স পচ্ছা অপ্পমুস্সকরণ মেৰাতি ৰুত্তং ‘‘পুনজাননত্থং সঞ্ঞাণং করোতী’’তি. তত্থ ‘‘সঞ্ঞাণ’’ন্তি নিমিত্ত করণং. ভৰন্তরং পত্ৰাপি অপ্পমুট্ঠভাৰং সাধেতি ওপপাতিক পুগ্গলানন্তি অধিপ্পাযো. তেহি পুরিমং অত্তনো ভৰং জানন্তি. গব্ভসেয্যকাপি কেচি পুরিমং ভৰং জানন্তি, যেজাতিস্সর পুগ্গলাতি ৰুচ্চন্তি. তত্থ ‘‘অপ্পমুট্ঠভাৰ’’ন্তি অনট্ঠভাৰং. মিচ্ছাভিনিৰেস সঞ্ঞা নাম অনিচ্চে নিচ্চন্তিআদিপ্পৰত্তা সঞ্ঞা. ‘‘বোধেতু’’ন্তি বুজ্ঝাপেতুং. ‘‘দারুতচ্ছকসদিসাতি চ ৰুত্তা’’তি দারুতচ্ছকো নাম কট্ঠৰড্ঢকী. সো কট্ঠক্খন্ধেসু নিমিত্তকারীহোতি. সুতচ্ছিতছিন্দিতেসু কট্ঠেসু নিমিত্তানি কত্ৰা ঠপেতি. পচ্ছাতানি ওলোকেত্ৰা কট্ঠানি কম্মে উপনেতি. ‘‘হত্থি দস্সক অন্ধসদিসা’’তি এত্থ একো কির রাজা কেল়িপ্পসুতো হোতি. সো জচ্চন্ধানংঠানে একং হত্থিং আনেত্ৰাঠপেন্তো জচ্চন্ধে আহ জানাথ ভো তুম্হে হত্থিন্তি. তে হত্থিং জানিস্সামাতি পরামসিত্ৰা অত্তনো পরামসিতং তং তং অঙ্গমৰহত্থীতি অভিনিৰিসন্তি. দল়্হং সল্লক্খেন্তি. পুন রাজা তে পুচ্ছি কীদিসো ভো হত্থীতি. তে রঞ্ঞো হত্থিসণ্ঠানং আচিক্খন্তা ৰিৰাদং আপজ্জন্তি. আচিক্খনমেৰ রঞ্ঞোহত্থিদস্সনন্তি কত্ৰা তে হত্থিদস্সক অন্ধাতি ৰুচ্চন্তি. ‘‘উপট্ঠিতৰিসযগ্গহণে’’তি রত্তিযং অন্ধকারে রজ্জুক্খণ্ডং পস্সন্তস্স সপ্পসণ্ঠানং উপট্ঠাতি. সো উপট্ঠিতং সণ্ঠানমত্তং সপ্পোতি গণ্হাতি. এৰং উপট্ঠিতৰিসযগ্গহণং হোতি. মিগপোতকানঞ্চ অরঞ্ঞেখেত্তমজ্ঝেপুরিসসণ্ঠানং তিণ রূপং পস্সন্তানং পুরিসসণ্ঠা নং উপট্ঠাতি. তে উপট্ঠিতং সণ্ঠানমত্তং পুরিসোতি গণ্হিত্ৰা সো অম্হে পহরেয্যাতি পলাযন্তি. ৰুত্তা অট্ঠসালিনিযং.

৭২. চেতনাৰচনত্থে. চেতেতীতি চেতনা. চেতনঞ্চেত্থ অভিসন্ধানং ৰা ৰুচ্চতি পকপ্পনং ৰা আযূহনং ৰাতি এৰং তিধা অত্থৰিকপ্পং দস্সেতুং ‘‘সম্পযুত্ত ধম্মে’’তিআদিমাহ. তত্থ ‘‘অভিসন্দহতী’’তি অভিমুখং সন্দহতি, সংযোগং করোতি. তেনাহ ‘‘পুনপ্পুনং ঘটেতী’’তি. ‘‘ঘটেতী’’তি সম্বন্ধতি. ‘‘পকপ্পেতি ৰাতে’’তি অথৰা তে সম্পযুত্ত ধম্মে পকারতো কপ্পেতি, সজ্জেতি. তেনাহ ‘‘সংৰিদহতী’’তি. ‘‘সংৰিদহতী’’তি ত্ৰং ফুসনকিচ্চং করোহি, ত্ৰং ৰেদযিত কিচ্চং করোহি, ত্ৰং সঞ্জাননকিচ্চং করোহীতিআদিনা ৰদমানা ৰিয সংৰিদহতি. ‘‘আযূহতিৰাতে’’তি অথৰা তেসম্পযুত্ত ধম্মে ভুসো ব্যূহযতি, রাসিং করোতি. তেনাহ ‘‘আরম্মণে সম্পিণ্ডেতী’’তি. ‘‘সমোসরন্তে’’তি একতো ওসরন্তে. সঙ্গমন্তে. ‘‘সা’’তি চেতনা. ‘‘তাযা’’তি চেতনায. ‘‘তস্মিং’’তি রূপাদিকেৰা আরম্মণে. পুঞ্ঞাপুঞ্ঞ কিচ্চেৰা. পৰত্তমানায সতিযা. জেট্ঠসিস্সো নাম বহূসু সিস্সেসু জেট্ঠভূতো সিস্সো. তস্মিং সজ্ঝাযন্তে সেসা সব্বে সজ্ঝাযন্তিযেৰ. তেন সো উভযকিচ্চ সাধকো হোতি. এৰং মহাৰড্ঢকীপি.

৭৩. একগ্গতাৰচনত্থে. একত্তারম্মণং নাম একারম্মণস্সপি বহূসু সভাৰেসু একসভাৰসঙ্খাতং আরম্মণং. ‘‘তস্মিং’’ চিত্তস্মিং. ‘‘নিৰাতে’’তি ৰাতরহিতে পদেসে. ‘‘দীপচ্চীনং’’তি দীপজালানং.

৭৪. জীৰিতিন্দ্রিযৰচনত্থে. ‘‘ইস্সরভাৰো ৰুচ্চতি’’ ভাৰপ্পধান নযেনাতি অধিপ্পাযো. ‘‘অভিভৰিত্ৰা’’তি জীৰন কিচ্চে অত্তনো ৰসং ৰত্তাপেত্ৰাতি ৰুত্তং হোতি. চিত্ত সন্তানং জীৰন্তং হুত্ৰাতি সম্বন্ধো.

৭৫. মনসীকারৰচনত্থে. সমাসমজ্ঝে সকারাগমো. করধাতুযোগে ঈকারাগমো চ দট্ঠব্বো. অলুত্ত সত্তমী পদন্থি কেচি. এৰং সতি ঈদীঘত্তং নসিজ্ঝতি. ‘‘অসুঞ্ঞং’’তি অরিত্তং. ‘‘পটিপাদেতী’’তি পটিপজ্জনং কিচ্চসাধনং কারাপেতি. অত্থতো নিযোজেতি নামাতি আহ ‘‘যোজেতী’’তি. ‘‘ইদমেৰ দ্ৰযং’’তি আৰজ্জন দ্ৰযং. ‘‘তং’’তি তং দ্ৰযং. উপত্থম্ভিতং হুত্ৰা আরম্মণে নিন্নং করোতীতি সম্বন্ধো. ‘‘যোনিসো’’তি উপাযেন হিতসুখ মগ্গেন. ‘‘অযোনিসো’’তি অনুপাযেন অহিত অসুখ মগ্গেন. ‘‘সমুদাচিণ্ণনিন্ননিযামিতাদীহী’’তি এত্থ সমুদাচিণ্ণং নাম আচিণ্ণ কম্মৰসেন সুট্ঠু পুনপ্পুনং আচরিতং. নিন্নং নাম ইদং নাম পস্সামি, ইদং নাম করিস্সামীতি পুব্বে এৰ অজ্ঝাসযেন নিন্নং. নিযামিতং নাম ইদং নাম কত্তব্বং, ইদং নাম ন কত্তব্বং, কত্তব্বং করোমি, অকত্তব্বং নকরোমীতি এৰং নিযামিতং. ‘‘অসতি কারণ ৰিসেসে’’তি ভৰঙ্গ চিত্তং ৰীথিচিত্তুপ্পত্তিযা অসতি, ৰীথিচিত্তানি চ কাযচিত্তানং অকল্লাদিকেৰা অধিমত্তস্স আরম্মণন্তরস্স উপট্ঠানেৰা অসতি. ‘‘সাধারণা’’তি এত্থ সংসদ্দে বিন্দু লোপো, দীঘত্তঞ্চাতি আহ ‘‘সমং ধারেন্তীতি সাধারণা’’তি.

৭৬. ৰিতক্কৰচনত্থে. ‘‘তথা তথা সঙ্কপ্পেত্ৰা’’তি কামসঙ্কপ্পাদীনং নেক্খম্মসঙ্কপ্পাদীনঞ্চৰসেন তেন তেন পকারেন সুট্ঠু চিন্তেত্ৰা. ‘‘তং’’তি আরম্মণং. ‘‘তে’’তি সম্পযুত্ত ধম্মে. ‘‘অৰিতক্কম্পি চিত্তং’’তি পঞ্চৰিঞ্ঞাণ চিত্তঞ্চ দুতীযা দিজ্ঝান চিত্তঞ্চ. ‘‘অপিচা’’তি কিঞ্চি ৰত্তব্বং অত্থীতি অত্থো. ‘‘দুতীযজ্ঝানাদীনি চা’’তি দুতীযজ্ঝান চিত্তাদীনি চ. ‘‘উপচার ভাৰনা ৰসেনা’’তি সমুদাচিণ্ণ ৰসিভূতায উপচার ভাৰনায ৰসেন. ‘‘কিং ৰা এতাযযুত্তিযা’’তি সৰিতক্ক চিত্তসন্তানেতিআদিকায যুত্তিযা কিং পযোজনং অত্থীতি অত্থো. কিঞ্চি পযোজনং নত্থীতি অধিপ্পাযো. আরম্মণং আরোহতিযেৰ আরম্মণেন অৰিনাভাৰৰুত্তিকত্তা. ‘‘তং’’তি চিত্তং. নিযামকো নাম নাৰং ইচ্ছিত দিসাদেসনিযোজকো. ‘‘অকুসলং পত্ৰা’’তি ৰুত্তং. কুসলং পত্ৰা পন কথংতি. কুসলং পত্ৰাপি পতিরূপদেসাৰাসাদিৰসেন সমুদা চিণ্ণ নিন্নাদিৰসেন চ লদ্ধ পচ্চযে সতি চিত্তম্পি সদ্ধাসতি আদযোপি আরম্মণ রূহনে থামগতা এৰ. অলদ্ধ পচ্চযে পন সতি অকুসল ভাৰে ঠত্ৰা থামগতং হোতি. ‘‘মনসিকার ৰীরিয সতীনং’’তি ভাৰনা বলপত্তা নন্তি অধিপ্পাযো. এৰং পন সতি, ৰিতক্কস্স ওকাসো নত্থীতি. অত্থি. সঙ্কপ্পন কিচ্চ ৰিসেসত্তা. তঞ্হি কিচ্চং অঞ্ঞেসং অসাধারণং, ৰিতক্কস্সেৰ কিচ্চন্তি দস্সেন্তো ‘‘ৰিতক্কোপনা’’তিআদিমাহ. ‘‘সারম্মণ সভাৰা’’তি হেতু ৰিসেসনমেতং. ‘‘তথা ৰুত্তো’’তি ৰিতক্কোতি ৰুত্তো.

৭৭. ৰিচারৰচনত্থে. ‘‘ৰিচরতী’’তি একমেকস্মিং এৰ আরম্মণে ৰিৰিধেন চরতি, পৰত্ততি. সভাৰাকারো নাম নীলপীতাদিকো অগম্ভীরো আরম্মণ সভাৰো চ আরম্মণস্স নানা পৰত্তাকারো চ. ‘‘অনুমজ্জনৰসেনা’’তি পুনপ্পুনং মজ্জনৰসেন সোধনৰসেন. ৰিতক্কো ওল়ারিকো চ হোতীতিআদিনা যোজেতব্বং. ‘‘ওল়ারিকো’’তি ৰিচারতো ওল়ারিকো. এৰং সেসপদেসু. ‘‘ঘণ্ডাভিঘাতো ৰিযা’’তি ঘণ্ডাভিঘাতেন পথমুপ্পন্নসদ্দো ৰিযাতি ৰদন্তি. তথাহি ৰিচারো ঘণ্ডস্স অনুরৰো ৰিয ৰুত্তোতি. দণ্ডকেন ঘণ্ডস্স অভিঘাত কিরিযা ৰা ঘণ্ডাভিঘাতো. তথাহি আরম্মণে চেতসো পথমাভি নিপাতো ৰিতক্কোতি চ, আহনন পরিযাহনন রসোতি চ ৰুত্তং. ‘‘ঘণ্ডানুরৰো ৰিযা’’তি ঘণ্ডস্স অনুরৰসদ্দো ৰিয.

৭৮. অধিমোক্খৰচনত্থে. ‘‘সংসপ্পনং’’তি অনৰত্থানং. ‘‘পক্খতো মুচ্চনৰসেনা’’তি এৰং নু খোতি একো পক্খো, নোনু খোতি দুতীযো পক্খো. তাদিসম্হা পক্খতো মুচ্চনৰসেন.

৭৯. ৰীরিযৰচনত্থে. ‘‘ৰীরস্সা’’তি ৰিস্সট্ঠস্স. সো চ কাযৰচীমনো কম্মেসু পচ্চু পট্ঠিতেসু সীতুণ্হাদি দুক্খ ভযতো অলীন ৰুত্তিৰসেন পৰত্তোতি আহ ‘‘কম্মসূরস্সা’’তি. এতেন অনোত্তপ্পিং নিৰত্তেতি. অনোত্তৰ্ৰীহি পাপসূরো, অযং কম্ম সূরোতি. ‘‘মহন্তং পিকম্ম’’ন্তি কুসীতস্স মহন্তন্তি মঞ্ঞিতং কম্মং. এৰং সেসেসু. ‘‘অপ্পকতো গণ্হাতী’’তি অপ্পকভাৰেন গণ্হাতি. অপ্পকমেৰিদন্তি মঞ্ঞতীতি ৰুত্তং হোতি. ‘‘অত্ত কিলমথং’’তি কাযচিত্তক্খেদং. ‘‘তং’’তি ৰীরিযং. ‘‘তথাপৰত্তিযা’’তি কম্মসূরভাৰেন পৰত্তিযা. ‘‘হেতুচে ৰা’’তি এতেন ভাৰসদ্দস্স অত্থং ৰদতি. ‘‘কাযচিত্ত কিরিযাভূতং’’তি এতেন কম্মসদ্দস্স অত্থং. ‘‘ৰিধিনা’’তি তস্স পৰত্তিযা পুব্বাভিসঙ্খার ৰিধানেন. তমেৰ ৰিধানং কম্মেসু নেতব্বত্তা নযোতি চ, উপেতব্বত্তা উপাযোতি চ ৰুচ্চতীতি আহ ‘‘নযেন উপাযেনা’’তি. তমেৰ ৰিধানং দস্সেতি ‘‘ৰীরিযৰতো’’তিআদিনা. ‘‘ঈরন্তী’’তি এরযন্তি. ‘‘কিচ্চ সম্পত্তিযা’’তি আরম্মণ ৰিজানন ফুসনাদি কিচ্চ সম্পত্তি অত্থায. ব্যাৰটানি কাযচিত্তানি যেসন্তি ৰিগ্গহো. ‘‘ব্যাৰটানী’’তি উস্সাহিতানি. ‘‘থূণূপত্থম্ভন সদিসং’’তি জিণ্ণস্স গেহস্স অপতনত্থায সারত্থম্ভেন উপত্থম্ভনসদিসং. উপত্থম্ভকত্থম্ভসদিসন্তিপি ৰদন্তি. ‘‘সব্ব সম্পত্তীনং মূলং’’তি সব্বাসং লোকিয সম্পত্তীনং লোকুত্তর সম্পত্তী নঞ্চ মূলং. কস্মা, পুঞ্ঞকম্ম সম্পত্তিযা চ পারমি পুঞ্ঞসম্পত্তিযা চ পতিট্ঠানত্তা. সতিহি পুঞ্ঞকম্মসম্পত্তিযা সব্বা লোকিয সম্পত্তি সিজ্ঝতি. সতি চ পারমি পুঞ্ঞ সম্পত্তিযা সব্বালোকুত্তর সম্পত্তি সিজ্ঝতীতি. এতেন হীন ৰীরিযো নাম সব্ব সম্পত্তিতো পরিবাহিযোতি দীপেতি.

৮০. পীতিৰচনত্থে. ‘‘পিনযতী’’তি পিনেতি, পিনং করোতীতি আহ ‘‘তপ্পেতী’’তি. তোসেতীতি অত্থো. ‘‘তুট্ঠিং’’তি তুসিতং, পহট্ঠং. ‘‘সুহিতং’’তি সুধাতং, সুপুণ্ণং, ৰদ্ধিতং. অনেকত্থত্তা ধাতূনং ‘‘ৰড্ঢেতী’’তি ৰুত্তং. ‘‘পিনন্তী’’তি তপ্পন্তি, জোতন্তি, ৰিরোচন্তি, দিৰা তপ্পতিআদিচ্চোতিআদীসু ৰিয. খুদ্দিকা পীতি নাম লোমহংস ন মত্তকারিকা পীতি. খণিকা পীতি নাম খণে খণে ৰিজ্জুপ্পাদসদিসা পীতি. ওক্কন্তিকা পীতি নাম সরীরং ওক্কমিত্ৰা ওক্কমিত্ৰাভিজ্জন্তী পীতি. উব্বেগাপীতি নাম কাযং উদগ্গং কত্ৰা আকাসে উল্লঙ্ঘাপেন্তী পীতি. ফরণা পীতি নাম কপ্পাসৰত্তিযং ফরণকতেলং ৰিয সকলকাযং ফরণৰসেন পৰত্তা পীতি.

৮১. ছন্দৰচনত্থে. ‘‘অভিসন্ধী’’তি অভিলাসো, অভিকঙ্খনং. ‘‘কত্তুসদ্দো’’তি করধাতু ৰসেন ৰুত্তং. ‘‘সব্বকিরিযা পদানী’’তি সব্বানি তুমিচ্ছত্থ কিরিযা পদানি. ‘‘অত্থিকো’’তি অসিদ্ধো হুত্ৰা সাধেতুং ইচ্ছিতো অত্থো অস্সাতি অত্থিকো. ইচ্ছন্তোতিপি ৰদন্তি. ‘‘আরাধেতুকামতা ৰসেনা’’তি সাধেতু কামতাৰসেন, সম্পাদেতু কামতা ৰসেন. উসুং সরং অ সন্তি খিপন্তীতি ইস্সাসা. ইকারস্স উকারো. ধনুগ্গহা. ‘‘যসেন ৰা’’তি পরিৰারেন ৰা, কিত্তি সদ্দেন ৰা. ‘‘সরে’’তি কণ্ডে. ৰিভাৰনিপাঠে নানাৰাদ সোধনত্থং অযঞ্চাতিআদিৰুত্তং. ‘‘যদগ্গেনা’’তি যেন কারণ কোট্ঠাসেন. সঙ্গহিতাতি সম্বন্ধো. ‘‘ৰিস্সজ্জিতব্ব যুত্তকেনা’’তি ৰিস্সজ্জিতব্ব যোগ্যেন. ‘‘তেন অত্থিকো যেৰা’’তি পদুদ্ধারো. ‘‘সো ন যুজ্জতী’’তি সো অত্থো ন যুজ্জতি. ‘‘খিপিত উসূনং’’তি পুব্বভাগে খিপিত উসূনং. ‘‘অত্থতো পনা’’তি অধিপ্পাযত্থতো পন. ‘‘হত্থপ্পসারণং ৰিযা’’তি লোকে কিঞ্চি ইচ্ছন্তস্স জনস্স হত্থপ্পসারণং ৰিযাতি অধিপ্পাযো. ‘‘থামপত্তো’’তি অধিপতি ভাৰ পত্তোতি ৰুত্তং হোতি. তেনাহ ‘‘তথাহেসা’’তিআদিং. ‘‘তণ্হায হত্থে ঠিতা’’তি উপচার ৰচনমেতং. তণ্হায পরিগ্গহিতাতি ৰুত্তং হোতি. নসক্খিস্সন্তিযেৰ, নো নসক্খিস্সন্তি. তস্মা ৰেদিতব্বমেতং ছন্দোযেৰ তণ্হায বলৰতরোতি. কস্মা বলৰতরোতি. আদীনৰানিসংস দস্সনঞ্ঞাণেন যুত্তত্তাতি.

৮২. ‘‘পকিরন্তী’’তি পত্থরন্তি. ‘‘সমানা’’তি সাৰজ্জেহি যুত্তা সাৰজ্জা, অনৰজ্জেহি যুত্তা অনৰজ্জাতি এৰং সদিসা, সাধারণা.

অঞ্ঞসমানরাসিম্হিঅনুদীপনা নিট্ঠিতা.

৮৩. অকুসলরাসিম্হি. ‘‘মুয্হতী’’তি ঞাতব্বস্সঞেয্য ধম্মস্স অঞ্ঞাণ ৰসেন সম্মুয্হতি, চিত্তস্স অন্ধভাৰো হোতি. চতুরঙ্গতমো নাম ‘কাল়পক্খ চাতুদ্দসি দিৰসো, অড্ঢরত্তি সমযো, তিব্বৰনসণ্ডো, বহলমেঘচ্ছন্নো,তি অযং চতুরঙ্গতমো. সো চক্খুস্স অন্ধভাৰং করোতি. এৰং তস্স তমস্স চক্খুস্স অন্ধভাৰকরণং ৰিয. ঞাণগতিকো হোতীতি দট্ঠব্বো অট্ঠকথা নযেন. তমেৰ অট্ঠকথা নযং দস্সেতুং ‘‘তথা হেসা’’তিআদি ৰুত্তং. অভিধম্মটীকাযং পন মিচ্ছা ঞাণন্তি মিচ্ছা ৰিতক্কো অধিপ্পেতো. সো হি মিচ্ছা সঙ্কপ্পো হুত্ৰা নানপ্পকার চিন্তা পৰত্তি ৰসেন ঞাণগতিকো হোতি. মোহো পন চিত্তস্স অন্ধী ভূতো, নানাচিন্তন কিচ্চ রহিতো, কথং ঞাণগতিকো ভৰেয্যাতি তস্স অধিপ্পাযো. ‘‘পাপ কিরিযাসূ’’তি দুচ্চরিত কম্মেসু. ‘‘উপায চিন্তাৰসেনা’’তি কতকম্মস্স সিদ্ধত্থায সত্থাৰুধাদিৰিধানেসু নানাউপায চিন্তাৰসেন. অপ্পটি পজ্জনং অপ্পটি পত্তি. ঞাণ গতিং অগমনন্তি অত্থো. তেনাহ ‘‘অঞ্ঞাণমেৰ ৰুচ্চতী’’তি. ‘‘ঞাণগতিকা’’তি ঞাণপ্পৰত্তিযা সমানপ্পৰত্তিকা. লোভো ঞাণ গতিকো মাযাসাঠেয্য কম্মেসু ৰিচিত্তপ্পৰত্তিকত্তা. ৰিচারো ঞাণ গতিকো. তথাহি সো ঝানঙ্গেসু ৰিচিকিচ্ছায পটিপক্খোতি ৰুত্তো. চিত্তস্স ঞাণ গতি কতা ৰিচিত্তত্থৰাচকেন চিত্তসদ্দেন সিদ্ধো. তে চ ধম্মা সব্ব সত্তেসু ঞাণ গতিকা ন হোন্তি. ঞাণূপনিস্সযং লভিত্ৰা এৰ হোন্তীতি দস্সেতুং ‘‘তেহী’’তিআদিমাহ. তে সাধেন্তীতি সম্বন্ধো. পকতিযা ৰিঞ্ঞুজাতিকা নাম তিহেতুকপ্পটি সন্ধিকা. অঞ্ঞপ্পটি সন্ধিকাপি বোধিসত্ত ভূমিযং ঠিতা ৰা পঞ্ঞাপসুত ভৰতো আগতা ৰা. সুতপরিযত্তি সম্পন্না নাম দ্ৰিহেতুকপ্পটি সন্ধিকাপি ইমস্মিং ভৰে বহুস্সুত সম্পন্না চ পরিযত্তি কম্ম সম্পন্না চ.

৮৪. অহিরিকৰচনত্থে. ‘‘ন হিরীযতী’’তি নাম ধাতু পদমেতং. হরাযতি লজ্জতীতি হিরী. হরে লজ্জাযংতি ধাতু. ন হিরী অহিরীতি ৰচনত্থো. ‘‘রুচিং উপ্পাদেত্ৰা’’তি গামসূ করস্স গূথরাসি দস্সনে ৰিয চিত্তরোচন চিত্ত খমনং উপ্পাদেত্ৰা. অত্তানং পাপকম্ম লিম্পতো চিত্তস্স অলীনতা অজিগুচ্ছনং নাম. অত্তানং অসপ্পুরিস ভাৰপত্তিতো চিত্তস্স অলীনতা অলজ্জা নাম.

৮৫. অনোত্তপ্পৰচনত্থে. ‘‘ন ভাযতী’’তি পাপকম্মং ভযতো ন উপট্ঠাতি. ‘‘ন উত্রসতী’’তি পাপকম্ম হেতু ন কম্পতি. ‘‘তাসূ’’তি পাপকিরিযাসু. ‘‘অসারজ্জমানং কত্ৰা’’তি সূরং ৰিস্সট্ঠং কত্ৰা. অসারজ্জং নাম সূরভাৰো. অনুত্তাসো নাম পাপকম্ম হেতু চিত্তস্স অকম্পনং. গাথাযং. অজিগুচ্ছনসীলো পুগ্গলো অজেগুচ্ছী. ‘‘পাপা’’তি পাপকম্মতো. ‘‘সূকরো’’তি গামসূকরো. সো গূথতো অজেগুচ্ছী. অহিরিকো পাপতো অজেগুচ্ছীতি যোজনা. অভাযনসীলো অভীরূ. ‘‘সলভো’’তি পটঙ্গো. ‘‘পাৰকা’’তি দীপজালম্হা. সলভো পাৰকম্হা অভীরূ ৰিয অনোত্তৰ্ৰী পাপতো অভীরূতি যোজনা.

৮৬. উদ্ধচ্চৰচনত্থে. ‘‘উদ্ধরতী’’তি উক্খিপতি. আরম্মণস্মিং ন সন্নি সীদতি. ৰিক্খিপতীতি ৰুত্তং হোতি. ‘‘ৰট্টেত্ৰা’’তি আৰট্টেত্ৰা. ‘‘ৰিস্সট্ঠগেণ্ডুকো ৰিযা’’তি ৰিস্সজ্জিতো সারগেণ্ডুকো ৰিয. ‘‘ধজপটাকা ৰিযা’’তি ৰাতেরিতা ধজপটাকা ৰিয.

৮৭. লোভৰচনত্থে. ‘‘লুব্ভতী’’তি গিজ্ঝতি, অভিকঙ্খতি. অভিসজ্জনং অভিলগ্গনং. মক্কটং আলিম্পতি বন্ধতি এতেনাতি মক্কটা লেপো. ‘‘তত্ত কপালে’’তি অগ্গিনাসন্তত্তে ঘট কপালে. তেলস্স ৰত্থম্হি অঞ্জনং অভিলগ্গনং তেলঞ্জনং. রজ্জনং পটিসজ্জনং রাগো. তেলঞ্জন ভূতো রাগো তেলঞ্জন রাগো. ন কিলেসরাগো. রত্তি দিৰং পৰত্তনট্ঠেন তণ্হা এৰ নদীসোতসদিসত্তা তণ্হা নদী. ‘‘সত্তানং’’তি পুথুজ্জন সত্তানং. ‘‘সুক্খকট্ঠসাখাপলাসতিণকসটানী’’তি সুক্খ কট্ঠকসটানি, সুক্খ সাখা কসটানীতিআদিনা যোজেতব্বং. কসট সদ্দেন অসারভাৰং দীপেতি. ‘‘নদী ৰিযা’’তি পব্বতেয্যা নদী ৰিয.

৮৮. দিট্ঠিৰচনত্থে. ‘‘দস্সনং’’তি পরিকপ্পনা সিদ্ধেসু মিচ্ছা সভাৰেসু ৰিপরীত দস্সনং. তেনাহ ‘‘ধম্মানং’’তিআদিং. তত্থ ‘‘ধম্মানং’’তি রূপারূপ ধম্মানং, অনিচ্চতাদি ধম্মানঞ্চ. ‘‘যাথাৰ সভাৰেসূ’’তি ভূতসভাৰেসু. ভূতসভাৰো হি যথা ধম্মং অৰতি রক্খতীতি অত্থেন যাথাৰোতি ৰুচ্চতি. অত্তানং পণ্ডিতং মঞ্ঞন্তীতি পণ্ডিত মানিনো. পটিৰেধঞ্ঞাণং নাম অরিয মগ্গঞ্ঞাণং. পরমং ৰজ্জন্তি দট্ঠব্বা লোকে মহাসাৰজ্জট্ঠেন তং সদিসস্স অঞ্ঞস্স ৰজ্জস্স অভাৰতোতি অধিপ্পাযো.

৮৯. মানৰচনত্থে. ‘‘মঞ্ঞতী’’তি ভূতসভাৰং অতিক্কম্ম অধিকং কত্ৰা অহমস্মীতিআদিনা তেন তেন অভূতাকারেন মঞ্ঞতি. তেনাহ ‘‘অহং লোকে’’তিআদিং. তত্থ ‘‘কট্ঠকথিঙ্গরো ৰিযা’’তি সুক্খদারুক্খন্ধো ৰিয. সো পন উপত্থম্ভিতো মঞ্ঞতীতি সম্বন্ধো. ‘‘অত্তানং অচ্চুগ্গতং মঞ্ঞতী’’তি পুগ্গলং মানেন অভিন্নং কত্ৰা ৰুত্তং. ‘‘উন্নতি লক্খণো’’তি উন্নমন সভাৰো.

৯০. দোসৰচনত্থে. চণ্ডেন কাযৰচী মনোকম্মেন সমন্নাগতো চণ্ডিকো. চণ্ডিকস্স ভাৰো চণ্ডিক্কং. ‘‘পহতাসীৰিসো ৰিযা’’তি দণ্ডেন পহতো আসীৰিসো ৰিয. ‘‘ৰিসপ্পনট্ঠেনা’’তি সকলকাযে ৰিৰিধেন সপ্পনট্ঠেন, ফরণট্ঠেন. ইদঞ্চ তং সমুট্ঠান রূপানং ফরণ ৰসেন ৰুত্তং. ‘‘অসনিপাতো ৰিযা’’তি সুক্খা সনিপতনং ৰিয. ‘‘দাৰগ্গিৰিযা’’তি অরঞ্ঞগ্গি ৰিয. ‘‘সপত্তো ৰিযা’’তি দুট্ঠৰেরী ৰিয. ‘‘ৰিসসংসট্ঠপূতিমুত্তং ৰিযা’’তি যথা মুত্তং নাম পকতিযা এৰ দুগ্গন্ধত্তা পটিকুলত্তা দূরে ছট্টনীযন্তি অহিতমেৰ হোতি. পুন পূতিভাৰে সতি, দূরতরে ছট্টেতব্বং. ৰিসসংসট্ঠেপন ৰত্তব্বমেৰনত্থি. সব্বসো অহিতরাসি হোতি. এৰং দোসোপি তং সমঙ্গীনো তস্মিং খণে পরেসং অমনাপিযতং আপাদেতি. অত্তহিত পরহিত ৰিনাসঞ্চ কারেতি, পরম্মরণা অপাযঞ্চ পাপেতীতি সব্বসো অহিতরাসি হোতি. তেন ৰুত্তং ‘‘ৰিসসংসট্ঠপূতি মুত্তং ৰিয দট্ঠব্বো’’তি.

৯১. ইস্সাৰচনত্থে. দুৰিধা ইস্সালদ্ধসম্পত্তি ৰিসযা চলভিতব্ব সম্পত্তি ৰিসযা চ. তত্থ লদ্ধ সম্পত্তি ৰিসযং তাৰদস্সেতি ‘‘পরেসং পকতিযা’’তিআদিনা. লদ্ধ সম্পত্তিগ্গহণেন অতীত সম্পত্তিপি সঙ্গহিতাতি দট্ঠব্বা. ইস্সাপকতিকাহি কেচি অসুকো নাম পুব্বে এৰং সম্পত্তিকো অহোসীতি ৰা, অহং পুব্বে এৰং সম্পত্তিকো অহোসিন্তি ৰা সুত্ৰা নসহন্তিযেৰ. তং ৰচনং সোতুংপি ন ইচ্ছন্তীতি. অসুকোতিআদিনা লভিতব্বসম্পত্তি ৰিসযং দস্সেতি.

৯২. মচ্ছরিযৰচনত্থে. ‘‘মম এৰা’’তি মমপক্খে এৰাতি অধিপ্পাযো. ‘‘গুণজাতং’’ৰাতি অত্তনিৰিজ্জমানং সিপ্পৰিজ্জাদি সম্পত্তি গুণজাতং ৰা. ‘‘ৰত্থু ৰা’’তি ধনধঞ্ঞাদিৰত্থু ৰা. ‘‘অৰিপ্ফারিকতাৰসেনা’’তি অঞ্ঞেন তং সিপ্পৰিজ্জাদিকং ৰা ধনধঞ্ঞাদিকং ৰা ময্হং দেহীতি ৰুত্তে পরহিতত্থায দাতব্ব যুত্তকং দস্সামীতি এৰং চিত্তেসতি, পরহিতপ্ফরণাৰসেন তং চিত্তং ৰিপ্ফারিকং নাম হোতি. দেহীতি ৰচনম্পি সোতুং অনিচ্ছন্তো পরহিতত্থায অৰিপ্ফারিক চিত্তো নাম হোতি. এৰং অৰিপ্ফারিকতাৰসেন চরতি পৰত্ততীতি মচ্ছরঞ্চ কারস্স ছ কারং কত্ৰা. তথা পৰত্তং চিত্তং. পুগ্গলো পন মচ্ছরীতি ৰুচ্চতি. ‘‘তং’’তি লদ্ধসম্পত্তিং. ‘‘পরেহি সাধারণং দিস্ৰা’’তিআদিনা যোজেতব্বং. সাধারণন্তি চ দ্ৰিসন্তকং ৰাতি সন্তকং ৰা ভৰিস্সমানং, পরেহি ৰা পরিভুঞ্জিযমানং. ‘‘নিগ্গুহনলক্খণং’’তি রক্খাৰরণগুত্তীহিসঙ্গোপন সভাৰং. অত্তনা লদ্ধ সম্পত্তি নাম ইস্সায অৰিসযো. লভিতব্বসম্পত্তি পন উভয সাধারণং. তস্মা তত্থ উভিন্নং ৰিসেসো ৰত্তব্বোতি তং দস্সেতুং ‘‘এত্থ চা’’তিআদিমাহ. ‘‘যস্স লাভং ন ইচ্ছতী’’তি অত্তনা লভতু ৰা মাৰা, কেৰলং পর সম্পত্তিং অসহন্তো যস্স পরস্স লাভং ন ইচ্ছতি. ‘‘চিত্ত ৰিঘাতো’’তি চিত্ত ৰিহঞ্ঞনং. ‘‘অত্তনা লদ্ধুং ইচ্ছতী’’তি পরো সম্পজ্জতু ৰা মাৰা, যত্থ পরলাভেসতি, অত্তনা ন লভিস্সতি, তত্থ অত্তনাৰ লদ্ধুং ইচ্ছতি. যত্থ অত্তনা চ লভতি, পরো চ লভতি, তত্থ ৰিঘাতো নত্থীতি অধিপ্পাযো. ‘‘অলব্ভমানকং চিন্তেত্ৰা’’তি অত্তনা অলভিস্সমানং সল্লক্খেত্ৰা.

৯৩. কুক্কুচ্চৰচনত্থে. ‘‘কিরিযা কতং’’তি কত সদ্দস্সভাৰ সাধনমাহ. এৰং ৰচনত্থং দস্সেত্ৰা অভিধেয্যত্থং দস্সেন্তো ‘‘অত্থতো পনা’’তিআদিমাহ. ‘‘অনুসোচন ৰসেনা’’তি পচ্ছা পুনপ্পুনং চিত্তসন্তাপৰসেন. সো কুকতন্তি ৰুচ্চতীতি সম্বন্ধো. ‘‘কুসল ধম্মেসূ’’তি পুঞ্ঞ কিরিযৰত্থু ধম্মেসু চিত্ত পরিযাদানায এৰ সংৰত্ততি. কুক্কুচ্চ সমঙ্গী পুগ্গলো পুঞ্ঞকম্মং করোন্তোপি চিত্ত সুখং ন লভতি. বহুজন মজ্ঝে ৰসিত্ৰা নানাকিচ্চানি করোন্তো নানা তিরচ্ছান কথং কথেন্তো চিত্ত সুখং লভতি. তদা তস্স পুঞ্ঞকম্ম করণত্থায চিত্তং পরিযাদীযতি, পরিক্খিয্যতি. চিত্তৰসং গচ্ছন্তো ৰিচরতি. এৰং চিত্ত পরিযাদানায এৰ সংৰত্ততি. ‘‘অট্ঠকথাযং’’তি অট্ঠসালিনিযং. ‘‘কতা কতস্স সাৰজ্জানৰজ্জস্সা’’তি পুব্বে কতস্স সাৰজ্জকম্মস্স, অকতস্স অনৰজ্জ কম্মস্স. কম্মত্থেসামিৰচনং. ‘‘অভিমুখগমনং’’তি আরম্মণ করণৰসেন চিত্তস্স অভিমুখপ্পৰত্তনং. এতেন পটিমুখং সরণং চিন্তনং পটিসারোতি দস্সেতি. ‘‘অকতং ন করোতী’’তি অকতং কাতুং ন সক্কোতীতি অধিপ্পাযো. এৰং কতং ন করোতীতি এত্থপি. ‘‘ৰিরূপো’’তি ৰীভচ্ছো অসোভণো. ‘‘কুচ্ছিতো’’তি গরহিতব্বো. ননু পুব্বে চিত্তুপ্পাদো কুচ্ছিতোতি ৰুত্তো. অট্ঠকথাযং পন ৰিপ্পটিসারো কুচ্ছিতোতি ৰুত্তো. উভযমেতং ন সমেতীতি. নো ন সমেতি, অঞ্ঞথানু পপত্তিতোতি দস্সেতুং ‘‘এত্থ চা’’তিআদিমাহ. ‘‘যেন চ কারণেনা’’তি কতাকতং পটিচ্চ নিরত্থক চিত্তপ্পৰত্তি কারণেন. সো চিত্তুপ্পাদোৰ কুকতপদে গহেতুং যুত্তো, নৰিভাৰনিযং ৰিয কতাকত দুচ্চরিত সুচরিতন্তি অধিপ্পাযো. ননু ৰিভাৰনিযম্পি সো চিত্তুপ্পাদোৰ উপচার নযেন গহিতোতি চে. যুত্তি ৰসেন চ অট্ঠকথাগমেন চ মুখ্যতো সিদ্ধে সতি, কিং উপচার নযেন. তেনাহ ‘‘ৰিভাৰনিযং পনা’’তিআদিং. কুকতস্সভাৰো কুক্কুচ্চং, অকারস্স উকারং কত্ৰাতি অযং অট্ঠকথানযো. ইদানি সদ্দসত্থনযেন অপরং ৰচনত্থঞ্চ অধিপ্পাযত্থঞ্চ দস্সেতুং ‘‘অপি চা’’তিআদি আরদ্ধং. তত্থ ‘‘ধাতুপাঠেসূ’’তি অক্খরধাতুপ্পকাসনেসু নিরুত্তি পাঠেসু. পঠন্তিযেৰ, নো ন পঠন্তি. তে চ অত্থা চেতসো ৰিপ্পটিসারো মনো ৰিলেখোতি এৰং পাল়িযং ৰুত্তেহি কুক্কুচ্চপরিযাযেহি সমেন্তিযেৰ. তস্মা অযং অপরোনযো ইধ অৰস্সং ৰত্তব্বো যেৰাতি দীপেতি. ৰিপ্পটি সারিপুগ্গলো চ তং তং পুঞ্ঞকম্মং করোন্তোপি ৰিপ্পটি সারগ্গিনা দয্হমান চিত্তো পুঞ্ঞকম্মে চিত্তপ্পসাদং নলভতি. চিত্ত সুখং ন ৰিন্দতি. কিং ইমিনা কম্মেনাতি তং পহায যত্থ চিত্ত সুখং ৰিন্দতি, তত্থ ৰিচরতি. এৰং ৰিপ্পটিসারো পুঞ্ঞকম্মতো সঙ্কোচনং নাম হোতীতি. কিলেসসল্লিখনং নাম সন্তুট্ঠি সল্লেখপ্পটিপত্তিযং ঠিতস্স তদঙ্গপ্পহানাদিৰসেন তং তং কিলেসপ্পহানং ৰুচ্চতি. ‘‘অনুত্থুননাকারেনা’’তি পুনপ্পুনং ৰিলপনাকারেন. সঙ্কোচতীতি ৰত্ৰা তস্স উভযং অত্থং দস্সেন্তো ‘‘কুসলকম্ম সমাদানে’’তিআদিমাহ. নমিতুম্পি ন দেতি. কুতো সমাদাতুং ৰা ৰড্ঢেতুং ৰা দস্সতীতি অধিপ্পাযো. ‘‘তনুকরণেনা’’তি দুব্বলকরণেন. ৰিসেসনট্ঠেকরণ ৰচনং. ‘‘সো’’তি ধম্মসমূহো. তং পন কুক্কুচ্চং. কেচি পন কুক্কুচ্চং পচ্চুপ্পন্ন সুচরিত দুচ্চরিতা রম্মণম্পি অনাগত সুচরিত দুচ্চরিতা রম্মণম্পি কপ্পেন্তি. তং পটিক্খিপন্তো ‘‘তেনা’’তিআদিমাহ. মহানিদ্দেসপাঠে দ্ৰীহাকারেহি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখোতি পাঠো. ‘‘কতত্তা চা’’তি অকত্তব্বস্স কতত্তা চ. ‘‘অকতত্তা চা’’তি কত্তব্বস্স অকতত্তা চ. কেচি পন অযং ৰিপ্পটিসারো নাম কদাচি কস্সচি কেনচি কারণেন পুব্বেকত সুচরিতম্পি অকত দুচ্চরিতম্পি আরব্ভ উপ্পজ্জতি. উম্মত্তকসদিসঞ্হি পুথুজ্জন চিত্তন্তি ৰদন্তি. তং পটিক্খিপন্তো ‘‘এতেনা’’তিআদিমাহ. সো পন কেসঞ্চি ৰাদে ৰিপ্পটিসারো নাম দোমনস্সং হোতি, ন কুক্কুচ্চন্তি অধিপ্পাযো. সোচ খো দ্ৰিধা ভাৰো. অপাযভযেন তজ্জীযন্তি তাসীযন্তীতি অপাযভয তজ্জিতা. ‘‘ন অঞ্ঞেসং’’তি সুচরিত দুচ্চরিতং অজানন্তানং অমনসিকরোন্তানঞ্চ ন হোতি. কথং ৰিঞ্ঞাযতীতি চে. সুচরিতদুচ্চরিত নামেন অনুসোচনাকারস্স দস্সিতত্তাতি ৰুত্তং ‘‘অকতং মে’’তিআদি. যাথাৰমানো নাম সেয্যস্স সেয্যো হমস্মীতি সদিসস্স সদিসোহমস্মীতি হীনস্স হীনোহমস্মীতিআদিনা পৰত্তো ভূতমানো. যঞ্চকুক্কুচ্চং উপ্পজ্জতীতি সম্বন্ধো. ‘‘অকত্ৰা’’তি তং কল্যাণ কম্মং অকত্ৰা. ‘‘কত্ৰা’’তি তং পাপকম্মং কত্ৰা. ইদং পন পুব্বেকতা কতকালে এৰ অযাথাৰং হোতি. অনুসোচন কালেপন যাথাৰমেৰ. ‘‘হত্থ কুক্কুচ্চং’’তি এত্থ সঙ্কোচনত্থো ন লব্ভতি. কুচ্ছিত কিরিযত্থো এৰ লব্ভতি. হত্থলোলতাহি হত্থ কুক্কুচ্চন্তি ৰুচ্চতি. পাদলোলতা চ পাদকুক্কুচ্চং. তেনাহ ‘‘অসংযত কুক্কুচ্চং নামা’’তি. যং পন কুক্কুচ্চং. ‘‘তং’’তি তং ৰত্থুং. কুক্কুচ্চং করোন্তীতি কুক্কুচ্চাযন্তা. নামধাতু পদঞ্হেতং. কপ্পতি নু খো, ন নু খো কপ্পতীতি এৰং ৰিনয সংসযং উপ্পাদেন্তাতি অত্থো. ‘‘কুক্কুচ্চপ্পকততাযা’’তি কুক্কুচ্চেন অপকততায অভিভূততায. ‘‘অত্তনো অৰিসযে’’তি আণাচক্কঠানে. আণাচক্ক সামিনো বুদ্ধস্সৰিসযত্তা অত্তনো সাৰক ভূতস্স অৰিসযেতি অত্থো. যে পন করোন্তিযেৰ কুক্কুচ্চাযন্তা পীতি অধিপ্পাযো. ‘‘আপত্তিং’’তি দুক্কটাপত্তিং.

৯৪-৯৫. থিনমিদ্ধৰচনত্থেসু. ‘‘চিত্তং মন্দমন্দং কত্ৰা’’তি চিন্তন কিচ্চে অতিমন্দং পরিদুব্বলং কত্ৰা. চিত্তং গিলানং মিলাতং কত্ৰাতি ৰুত্তং হোতি. ‘‘অজ্ঝোত্থরতী’’তি অভিভৰতি. আরম্মণ ৰিজাননে ৰা জৰনকিচ্চে ৰা পরিহীনথামবলং করোতি. ‘‘থিযতী’’তি পদং পাল়িৰসেন সিদ্ধন্তি আহ ‘‘থিনং থিযনা’’তিআদিং. ‘‘অকম্মঞ্ঞভূতে কত্ৰা’’তি কাযকম্মাদীসু অকম্মক্খমে পরিদুব্বলে কত্ৰা. [মুগ্গরেন পোথেত্ৰা ৰিযাতি ৰুত্তং হোতি ]. ‘‘তে’’তি চিত্ত চেতসিকে সম্পযুত্ত ধম্মে. ‘‘ওলীযাপেত্ৰা’’তি অৰলীনে অৰসীদন্তে কত্ৰা. তেনাহ ‘‘ইরিযা পথং পী’’তিআদিং. থিনং চিত্তং অভিভৰতি, ৰিজানন কিচ্চস্স গেলঞ্ঞত্তা থিনস্স. মিদ্ধং চেতসিকে অভিভৰতি, ফুসনাদি কিচ্চস্স গেলঞ্ঞত্তা মিদ্ধস্সাতি অধিপ্পাযো.

৯৬. ৰিচিকিচ্ছাৰচনত্থে. ‘‘চিকিচ্ছনং’’তি রোগাপনয নত্থে কিতধাতুৰসেন সিদ্ধং সঙ্খত কিরিযা পদন্তি আহ ‘‘ঞাণপ্পটিকারোতি অত্থো’’তি. ‘‘পটিকারো’’তি চ রোগস্স পটিপক্খ কম্মং. ‘‘এতাযা’’তি নিস্সক্কৰচনং. ৰিচিনন্তি ধম্মং ৰিচিনন্তীতি ৰিচিনো. ধম্ম ৰীমংসকা. কিচ্ছতি কিলমতি এতাযাতি কিচ্ছা. ৰিচিনং কিচ্ছাতি ৰিচিকিচ্ছাতি ইমমত্থং দস্সেন্তো ‘‘সভাৰং’’তিআদিমাহ. ‘‘ৰিচিকিচ্ছতী’’তি সঙ্খতধাতুপদং. তঞ্চ কঙ্খাযং ৰত্ততীতি দস্সেতুং ‘‘ৰিচিকিচ্ছতি ৰা’’তিআদি ৰুত্তং. দ্ৰিধা এল়যতি কম্পতীতি দ্ৰেল়কং. তথা পৰত্তং চিত্তং. দ্ৰেল়কস্স ভাৰোতি ৰিগ্গহো. ‘‘বুদ্ধাদীসু অট্ঠসূ’’তি বুদ্ধে কঙ্খতি, ধম্মে কঙ্খতি, সঙ্ঘে কঙ্খতি, সিক্খায কঙ্খতি, পুব্বন্তে কঙ্খতি, অপরন্তে কঙ্খতি, পুব্বন্তা পরন্তে কঙ্খতি, ইদপ্পচ্চযতা পটিচ্চ সমুপ্পন্নেসু ধম্মেসু কঙ্খতীতি এৰং ৰুত্তেসু অট্ঠসু সদ্ধেয্য ৰত্থূসু. তত্থ ‘‘বুদ্ধে কঙ্খতী’’তি ইতিপি সো ভগৰা অরহংতিআদিনা ৰুত্তেসু বুদ্ধগুণেসু অসদ্দহন্তো বুদ্ধে কঙ্খতি নাম. স্ৰাক্খাতো ভগৰতা ধম্মোতিআদিনা ৰুত্তেসু ধম্ম গুণেসু অসদ্দহন্তো ধম্মে কঙ্খতি নাম. সুপ্পটিপন্নো ভগৰতো সাৰকসঙ্ঘোতিআদিনা ৰুত্তেসু সঙ্ঘগুণেসু অসদ্দহন্তো সঙ্ঘে কঙ্খতি নাম. তিস্সন্নং সিক্খানং ৰট্ট দুক্খতো নিয্যানট্ঠেসু অসদ্দহন্তো সিক্খায কঙ্খতি নাম. অত্তনো অতীত ভৰস্স অত্থি নত্থিভাৰে কঙ্খন্তো পুব্বন্তে কঙ্খতি নাম. অত্তনো পরম্মরণা অনাগত ভৰস্স অত্থি নত্থিভাৰে কঙ্খন্তো অপরন্তে কঙ্খতি নাম. তদুভযস্স অত্থি নত্থি ভাৰে কঙ্খন্তো পুব্বন্তা পরন্তে কঙ্খতি নাম. ইমস্মিং ভৰে অত্তনো খন্ধানং পটিচ্চ সমুপ্পাদে চ পটিচ্চ সমুপ্পন্নভাৰে চ কঙ্খন্তো ইদপ্পচ্চযতা পটিচ্চ সমুপ্পন্নেসু ধম্মেসু কঙ্খতি নাম. ‘‘ৰিমতি ৰসেনা’’তি ৰেমতিকভাৰেন. পৰত্তমানা ৰিচিকিচ্ছা. ৰিচিকিচ্ছা পটিরূপকা নাম সব্ব ধম্মেসু অপ্পটিহতবুদ্ধীনং সব্বঞ্ঞু বুদ্ধানং এৰ নত্থীতি ৰুত্তং ‘‘অসব্বঞ্ঞূনং’’তিআদি.

অকুসলরাসিম্হিঅনুদীপনা নিট্ঠিতা.

৯৭. সদ্ধাৰচনত্থে. ‘‘সন্নিসিন্নং’’তি অচলিতং. ‘‘সুট্ঠূ’’তি অনস্সন্তং অচলন্তঞ্চ কত্ৰা. ‘‘ধারেতী’’তি এৰমেৰ হোতীতি সল্লক্খণৰসেন ধারেতি. তথা ঠপেতীতি. সদ্দহন্তি ৰা সদ্ধা সম্পন্না সত্তা. সদ্ধাতুং অরহন্তীতি সদ্ধেয্যানি. অকালুস্সং ৰুচ্চতি অনাৰিলং চিত্তং. অকালুস্সং এৰ অকালুস্সিযং. তস্স ভাৰোতি ৰিগ্গহো. ‘‘ওকপ্পনা’’তি অহোসাধু অহোসুট্ঠূতি অধিমুচ্চনৰসেন চিন্তনা. ‘‘মিচ্ছাধিমোক্খো যেৰা’’তি দিট্ঠিসম্পযুত্তো অধিমোক্খোযেৰ. ‘‘ৰিত্তে অসতী’’তি ধনে অসতি. ধনঞ্হি ৰিত্তন্তি ৰুচ্চতি. যং যং ইচ্ছতি, তং তং ৰিন্দন্তি এতেনাতি কত্ৰা. ‘‘তেসং’’তি মনুস্সানং.

৯৮. সতিৰচনত্থে. ‘‘সরতী’’তি অনুস্সরতি. ‘‘কতানী’’তি পুব্বেকতানি. ‘‘কত্তব্বানী’’তি ইদানি ৰা পচ্ছা ৰা কত্তব্বানি. কল্যাণ কম্মং নামপকতিযা চিত্তস্স রতিট্ঠানং ন হোতি. পাপ কম্মমেৰ চিত্তস্স রতিট্ঠানং হোতি. তস্মা কল্যাণ কম্মে এৰ অপ্পমজ্জিতুং ৰিসুং সতিনাম ইচ্ছিতব্বা. পাপকম্মে পন ৰিসুং সতিযা কিচ্চং নত্থি. সব্বেপি চিত্তচেতসিকা ধম্মা অপমত্ত রূপা হোন্তি. তেনাহ ‘‘ইতরাপনা’’তিআদিং. ‘‘সতিযেৰ ন হোতী’’তি ৰিসুং সতি নামকো একো চেতসিকোযেৰ ন হোতি. কতমা পন সা হোতীতি আহ ‘‘কতস্সা’’তিআদিং. তত্থ কতস্স অপ্পমজ্জনং নাম কেসঞ্চি অনুমোদনৰসেন কেসঞ্চি অনুসোচনৰসেন অপ্পমজ্জনং. কত্তব্বস্স অপ্পমজ্জনং নাম নিচ্চকালম্পি কাতুং অভিমুখতা. ‘‘কতস্সা’’তি ৰা ভুম্মত্থে সামিৰচনং. তথা সেসেসু দ্ৰীসু পদেসু. সব্বেসু রাজকম্মেসু নিযুত্তো সব্বকম্মিকো. ‘‘নিযুত্তো’’তি অপ্পমত্তো হুত্ৰা ব্যাৰটকায চিত্তো. সব্বেসু ঠানেসু ইচ্ছিতব্বাতি সব্বত্থিকা. সা হি ছসু দ্ৰারেসু চিত্তস্স আরক্খ কিচ্চা হোতি ইন্দ্রিয সংৰরণ ধম্মত্তা. তস্মা ছসু দ্ৰারেসু ইট্ঠারম্মণে লোভমূলচিত্তস্স অনুপ্পজ্জনত্থায সা ইচ্ছিতব্বা, অনিট্ঠা রম্মণে দোসমূল চিত্তস্স, মজ্ঝত্তারম্মণে মোহমূল চিত্তস্সাতি. অপি চ, বোজ্ঝঙ্গ ভাৰনা ঠানেসু ইদং সুত্ত পদং ৰুত্তং. তস্মা ভাৰনা চিত্তস্স লীনট্ঠানেপি সা ইচ্ছিতব্বা লীনপক্খতো চিত্তস্স নীৰারণত্থাযাতিআদিনা যোজেতব্বা.

৯৯-১০০. হিরিওত্তপ্পৰচনত্থেসু. ‘‘কাযদুচ্চরিতাদীহি লজ্জতী’’তি তানিকাতুং লজ্জতি. তানি হীনকম্মানি লামককম্মানীতি হীল়েত্ৰা ততো অত্তানং রক্খিতুং ইচ্ছতি. তেনাহ ‘‘জিগুচ্ছতী’’তি. ‘‘উক্কণ্ঠতী’’তি ৰিরুজ্ঝতি, ৰিযোগং ইচ্ছতি. ‘‘তেহি যেৰা’’তি কায দুচ্চরিতাদীহিযেৰ. ‘‘উব্বিজ্জতী’’তি উত্তসতি, ভযতো উপট্ঠাতি. গাথাসু. ‘‘অলজ্জিযেসূ’’তি অলজ্জিতব্বেসু কল্যাণ কম্মেসু. ‘‘লজ্জরে’’তি লজ্জন্তি. ‘‘অভযে’’তি অভাযিতব্বে কল্যাণকম্মে. যস্মা পন সপ্পুরিসা অত্তানং পরিহরন্তীতি সম্বন্ধো. ‘‘হিরিযা অত্তনি গারৰং উপ্পাদেত্ৰা’’তি অত্তনো জাতিগুণাদিকং ৰা সীল গুণাদিকং ৰা গরুং কত্ৰা মাদিসস্স এৰ রূপং পাপকম্মং অযুত্তং কাতুং. যদি করেয্যং, পচ্ছা অত্তানং অসুদ্ধং ঞত্ৰা দুক্খীদুম্মনো ভৰেয্যন্তি এৰং হিরিযা অত্তনি গারৰং উপ্পাদেত্ৰা. ‘‘ওত্তপ্পেন পরেসু গারৰং উপ্পাদেত্ৰা’’তি পরানুৰাদভযং ভাযিত্ৰাতি অধিপ্পাযো. তত্থ পরানুৰাদভযং নাম পরেসং সাধু জনানং গরহা ভযং. অঞ্ঞম্পি অপাযভযং সংসার ৰট্টভযঞ্চ এত্থ সঙ্গয্হতিযেৰ. লোকংপালেন্তীতি লোকপালা. ‘‘লোকং’’তি সত্তলোকং. ‘‘পালেন্তী’’তি অপায ভযতো রক্খন্তি.

১০১. অলোভৰচনত্থে. অকারো ৰিরুদ্ধত্থোতিআহ ‘‘লোভপ্পটিপক্খো’’তি. লোভস্স পটিৰিরুদ্ধোতি অত্থো. পটিৰিরুদ্ধতা চ পহাযক পহাতব্ব ভাৰেন ৰেদিতব্বাতি দস্সেতুং ‘‘সোহী’’তিআদিমাহ. তত্থ সো নেক্খম্মধাতুৰসেন হুত্ৰা পৰত্ততীতি সম্বন্ধো. ‘‘হিত সঞ্ঞিতেসূ’’তি ইদং মে অত্থায হিতায সুখাযাতি এৰং সঞ্ঞিতেসু. ‘‘লগ্গনৰসেনা’’তি অমুঞ্চিতুকামতাৰসেন. তেস্ৰেৰ পৰত্ততীতি সম্বন্ধো. ‘‘ভৰভোগ সম্পত্তিযো গূথরাসিং ৰিয হীল়েত্ৰা’’তি ইদং বোধিসত্তানং ৰসেন নিদস্সন ৰচনং. তত্থ ‘‘হীল়েত্ৰা’’তি গরহিত্ৰা. নিক্খমন্তি এতেনাতি নেক্খম্মো. সো এৰ ধাতূতি নেক্খম্মধাতু.

১০২. অযং নযো দোসপ্পটিপক্খো, মোহপ্পটিপক্খোতিআদীসুপি নেতব্বো.

১০৩. তত্র মজ্ঝত্ততাযং. ‘‘লীনুদ্ধচ্চানং’’তি চিত্তস্স লীনতা একো ৰিসমপক্খো. উদ্ধটতা দুতীযো ৰিসমপক্খো. লীনং চিত্তং কোসজ্জে ৰিসমপক্খে পততি. উদ্ধটং চিত্তং উদ্ধচ্চে ৰিসমপক্খে পততি. তদুভযম্পি অকুসল পক্খিকং হোতি. তথা চিত্তস্স অতি লূখতা একো ৰিসম পক্খো. অতিপহট্ঠতা একোতিআদিনা সব্বং বোজ্ঝঙ্গৰিধানং ৰিত্থারেতব্বং. তত্র মজ্ঝত্ততা পন সম্পযুত্ত ধম্মে উভোসু অন্তেসু পাতেতুং অদত্ৰা সযং মজ্ঝিমপ্পটিপদাযং দল়্হং তিট্ঠতি.

১০৪. পস্সদ্ধাদীসু. ‘‘তত্থ তং ৰীন্দন্তী’’তি তেসু পুঞ্ঞ কম্মেসু তং চিত্ত সুখং পটিলভন্তি.

১০৫. লহুতা দ্ৰযে. ‘‘তত্তপাসাণে’’তি সন্তত্তে পাসাণপিট্ঠে. ‘‘তত্থা’’তি পুঞ্ঞকম্মেসু.

১০৬-১১০. মুদুতা দ্ৰযাদীসু সব্বং সুৰিঞ্ঞেয্যং.

১১১. ৰিরতিত্তযে. ‘‘কথা, চেতনা, ৰিরতি, ৰসেনা’’তি ‘কথাসম্মাৰাচা, চেতনা সম্মাৰাচা, ৰিরতি সম্মাৰাচা, ৰসেন. তং কথাৰাচং সমুট্ঠাপেতীতি তং সমুট্ঠাপিকা. যা পন পাপ ৰিরমণাকারেন চিত্তস্স পৰত্তীতি যোজনা. ‘‘সমাদিযন্তস্স ৰা’’তি মুসাৰাদা ৰিরমামীতিআদিনা ৰচীভেদং কত্ৰা সমাদিযন্তস্স ৰা. ‘‘অধিট্ঠহন্তস্স ৰা’’তি ৰচীভেদং অকত্ৰা চিত্তেনেৰ তথা অধিট্ঠহন্তস্স ৰা. ইমেহি দ্ৰীহি পদেহি সমাদান ৰিরতিপ্পৰত্তিং ৰদতি. ‘‘অৰীতিক্কমন্তস্স ৰা’’তি এতেন সম্পত্ত ৰিরতিপ্পৰত্তিং ৰদতি. ‘‘এতাযা’’তি সম্মাৰাচা ৰিরতিযা. সা পন কত্তুনা চ ক্রিযায চ সহভাৰিনী হুত্ৰা সমাদান ক্রিযং সুট্ঠুতরং সাধেতি. তস্মা সা করণ সাধনং নাম হোতি. তেনাহ ‘‘করণত্থেৰাকরণ ৰচন’’ন্তি. বহূসুজৰনৰারেসু পৰত্তমানেসু পুরিম পুরিম জৰনৰারপরিযাপন্না সম্মাৰাচা পচ্ছিম পচ্ছিম জৰনৰারসমুট্ঠিতায সমাদান ক্রিযায পচ্চযো হোতি. সা পন তায ক্রিযায অসহভাৰিত্তা করণলক্খণং ন সম্পজ্জতি. হেতু লক্খণে তিট্ঠতি. তেনাহ ‘‘হেতু অত্থেৰা করণৰচন’’ন্তি. ইদঞ্চ অত্থতো লব্ভমানত্তা ৰুত্তং. সম্মাৰাচাতি পদং পন কিতসাধন পদত্তাকরণত্থে এৰসিদ্ধং. ন হি অকারক ভূতো হেতু অত্থো সাধনং নাম সম্ভৰতি. ‘‘সমাদান ৰচনানী’’তি সম্মাৰাচা সমুট্ঠিতানি সমাদান ৰচনানি. ‘‘ততো’’তি ততোপরং. ‘‘তেসং’’তি তে সংৰদমানানং. ইদঞ্চ সব্বং সম্মাৰাচাতি ৰচনে ৰচীভেদৰাচং পধানং কত্ৰা ৰুত্তং. সম্পত্তৰিরতি সমুচ্ছেদ ৰিরতিভূতায পন সম্মাৰাচায ৰচীভেদেন কিচ্চং নত্থি. ৰিরতি কিচ্চ মেৰপধানন্তি দস্সেতুং ‘‘অপিচা’’তিআদি ৰুত্তং. ‘‘পৰত্তমানা’’তি পৰত্তমানত্তা. ৰিসেসন হেতু পদমেতং.

১১২-১১৩. সম্মাকম্মন্তেপি সম্মাআজীৰেপি ৰত্তব্বং নত্থি.

১১৪. ‘‘সম্পত্তং ৰত্থুং’’তি পাণাতি পাতাদিকম্মস্স ৰত্থুং. সাপচ্চুপ্পন্নারম্মণাযেৰ. কস্মা, অত্তনো পচ্চক্খে সম্পত্ত ৰসেনৰত্থুস্সধরমানত্তা. ‘‘সমাদিযন্তস্স ৰা উপ্পন্না’’তি পাণাতি পাতাপটিৰিরমাধীতিআদিনা সমাদিযন্তস্সযা সমাদানক্খণে উপ্পন্না ৰিরতি. ‘‘সা পন পচ্চুপ্পন্নারম্মণা হোতী’’তি এত্থ কথং পচ্চুপ্পন্না রম্মণা হোতীতি. পাণাতি পাতাপটিৰিরমাধীতি ৰদন্তস্স চিত্তং অনুক্কমেন পাণসদ্দাদীনং অত্থং আরম্মণং কত্ৰা পৰত্ততি. তত্থ ‘‘পাণো’’তি ৰোহারতো সত্তো. পরমত্থতো জীৰিতিন্দ্রিযং. সো চ সত্তো তঞ্চজীৰিতিন্দ্রিযং লোকে সব্বকালম্পি সংৰিজ্জতিযেৰ. এৰরূপং জীৰিতিন্দ্রিয সামঞ্ঞং সন্ধায পচ্চুপ্পন্নারম্মণাতি ৰুত্তং. অদিন্নাদানা পটিৰিরমাধীতিআদীসুপি এসেৰ নযো. ‘‘অনাগতা রম্মণাৰা’’তি এত্থ একদিৰসং নিযমেত্ৰা সমাদিযন্তস্স তস্মিং দিৰসে ধরমান সত্তাপি অত্থি. উপ্পজ্জিস্সমানসত্তাপি অত্থি. তদুভযম্পি পাণৰচনে সঙ্গহিতমেৰ. পাণুপেতং কত্ৰা সমাদিযন্তস্স ৰত্তব্বমেৰ নত্থি. অপি চ অনাগতকালিকম্পি সমাদানং অত্থিযেৰ. অহং অসুকদিৰসতো পট্ঠায যাৰজীৰম্পি পাণাতিপাতা ৰিরমাধীতিআদি. এৰং সমাদান ৰিরতি অনাগতা রম্মণাপি হোতীতি. ‘‘পচ্চযসমুচ্ছেদৰসেনা’’তি তং তং কিলেসানুসয সঙ্খাতস্স পচ্চযস্স সমুচ্ছেদৰসেন. সেসমেত্থ সুৰিঞ্ঞেয্যং.

১১৫-১১৬. অপ্পমঞ্ঞাদ্ৰযে. অপিচাতিআদীসু. ‘‘কলিসম্ভৰেভৰে’’তি দুক্খুপ্পত্তিপচ্চযভূতে সংসারভৰে. ‘‘পাপেকলি পরাজযে’’তি কলিসদ্দো পাপে চ পরাজযে চ ৰত্ততীতি অত্থো. সত্তেহি কলিং অৰন্তি রক্খন্তি এতাযাতি করুণা. সত্তেহীতি চ রক্খণত্থযোগে ইচ্ছিতস্মিং অত্থে অপাদান ৰচনং. যথা-কাকে রক্খন্তি তণ্ডুলা-তি. সত্তেৰা কলিতো অৰন্তি রক্খন্তি এতাযাতি করুণা. কলিতোতি চ রক্খণত্থ যোগে অনিচ্ছিতস্মিম্পি অপাদানৰচনং. যথা-পাপাচিত্তং নিৰারযেতি. একস্মিং সত্তে পৰত্তাপি অপ্পমঞ্ঞা এৰ নাম হোন্তি. যথা তং সব্বঞ্ঞুতঞ্ঞাণং একস্মিং আরম্মণে পৰত্তম্পি সব্বঞ্ঞুতঞ্ঞাণমেৰ হোতীতি.

১১৭. পঞ্ঞিন্দ্রিযে ৰত্তব্বং নত্থি.

সোভণরাসিম্হিঅনুদীপনা নিট্ঠিতা.

১১৮. এতং পরিমাণং অস্সাতি এত্তাৰং. ‘‘এত্তাৰতা’’তি এত্তাৰন্তেন-ফস্সো, ৰেদনা, সঞ্ঞা,তিআদিৰচনক্কমেন. ‘‘চিত্তুপ্পাদেসূ’’তি এত্থ-কতমে ধম্মা দস্সনেন পহাতব্বা. চত্তারো দিট্ঠিগতসম্পযুত্ত চিত্তুপ্পাদা-তিআদীসু চিত্তচেতসিক সমূহো চিত্তুপ্পাদোতি ৰুচ্চতি. ইধ পন চিত্তানি এৰ চিত্তুপ্পাদাতি ৰুচ্চন্তীতি আহ ‘‘চিত্তুপ্পাদেসূতি চিত্তেসু ইচ্চেৰ অত্থো’’তি. ‘‘সব্বদুব্বলত্তা’’তি সব্বচিত্তেহি দুব্বলতরত্তা. ‘‘ভাৰনা বলেনা’’তি ৰিতক্ক ৰিরাগসত্তি যুত্তেন উপচার ভাৰনা বলেন, ৰুট্ঠান গামিনি ৰিপস্সনা ভাৰনা বলেন চ. ‘‘বলনাযকত্তা’’তি বল ধম্মানং নাযকত্তা, জেট্ঠকত্তা.

১১৯. অকুসল চেতসিকেসু. ‘‘পচ্ছিমং’’তি সব্বেসুপি দ্ৰাদসা কুসল চিত্তেসূতি ৰচনং. ‘‘পুরিমস্সা’’তি সব্বা কুসল সাধারণা নামাতি ৰচনস্স. ‘‘সমত্তন ৰচনং’’তি-কস্মা সব্বাকুসল সাধারণা নামাতি. যস্মা সব্বেসুপি. ল. চিত্তেসু লব্ভন্তি, তস্মা সব্বা কুসল সাধারণা নামা-তি এৰং সাধন ৰচনং. যস্মা পন ইমেহি চতূহি ৰিনানুপ্পজ্জন্তি, তস্মা তে সব্বেসু তেসু লব্ভন্তীতি যোজনা. কস্মা ৰিনা নুপ্পজ্জন্তীতি আহ ‘‘ন হিতানী’’তিআদিং. ‘‘তেহী’’তি পাপেহি. সব্ব পাপ ধম্মতোতি অত্থো. ‘‘তথা তথা আমসিত্ৰা’’তি দিট্ঠি খন্ধেসু নিচ্চো ধুৰো সস্সতোতিআদিনা আমসতি. মানো অহন্তি ৰা সেয্যো সদিসোতিআদিনা ৰা আমসতি. এৰং তথা তথা আমসিত্ৰা. ‘‘তেসূ’’তি দিট্ঠিমানেসু. নিদ্ধারণে ভুম্মং. দিট্ঠি পরামসন্তী পৰত্ততীতি যোজনা. ‘‘তং গহিতাকার’’ন্তি তং অহন্তি গহিতং নিমিত্তাকারং. সক্কায দিট্ঠি এৰ গতি যেসং তে দিট্ঠি গতিকা. অৰিক্খম্ভিত সক্কায দিট্ঠিকা. ‘‘অহন্তি গণ্হন্তী’’তি মানেন গণ্হন্তি. ‘‘ন হি মানস্স ৰিযা’’তি যথা মানস্স অত্তসম্পগ্গহণে ব্যাপারো অত্থি, ন তথা দিট্ঠিযা অত্তসম্পগ্গহণে ব্যাপারো অত্থীতি যোজনা. এত্থ চ অত্তসম্পগ্গহণং নাম পরেহি সদ্ধিং অত্তানং সেয্যাদিৰসেন সুট্ঠুপগ্গহণং. ‘‘ন চ দিট্ঠিযা ৰিযা’’তি যথা দিট্ঠিযা ধম্মানং অযাথাৰপক্খপরিকপ্পনে ব্যাপারো অত্থীতি যোজনা. তত্থ অযাথাৰপক্খো নাম অত্তা সস্সতো উচ্ছিন্নোতিআদি. মচ্ছরিযং অত্তসম্পত্তীসু লগ্গনলোভসমুট্ঠিতত্তা লোভসম্পযুত্তমেৰ সিযাতি চোদনং পরিহরন্তো ‘‘মচ্ছরিযং পনা’’তিআদিমাহ. তত্থ ‘‘তাসং’’তি অত্তসম্পত্তীনং. সেসমেত্থ সুৰিঞ্ঞেয্যং.

১২০. সোভণচেতসিকেসু. ‘‘তীসু খন্ধেসু’’তি সীলক্খন্ধ সমাধিক্খন্ধ পঞ্ঞাক্খন্ধেসু চ. ‘‘সম্মাদিট্ঠি পচ্ছিমকো’’তি সম্মাদিট্ঠিযা পচ্ছতো অনুবন্ধকোতি অত্থো. সম্মাদিট্ঠিযা পরিৰা রমত্তোতি ৰুত্তং হোতি. ‘‘তস্মিং অসতি পী’’তি দুতীযজ্ঝানিক মগ্গাদীসু তস্মিং সম্মাসঙ্কপ্পে অসন্তেপি. ‘‘সীলসমাধিক্খন্ধ ধম্মেসু পনা’’তি ‘সম্মাৰাচা, সম্মাকম্মন্তো, সম্মাআজীৰো,তি ইমে তযো ধম্মা সীলক্খন্ধ ধম্মা নাম. সম্মা ৰাযামো, সম্মাসতি, সম্মাসমাধী,তি ইমে তযো ধম্মা সমাধিক্খন্ধা নাম. ইমেসু সীলক্খন্ধ সমাধিক্খন্ধেসু. ‘‘একো একস্স কিচ্চং ন সাধেতী’’তি তেসু সম্মাৰাচা সম্মাকম্মন্তস্স কিচ্চং ন সাধেতি. সম্মা আজীৰস্স কিচ্চং ন সাধেতি. সম্মাকম্মন্তো চ সম্মাৰাচায কিচ্চং ন সাধেতীতিআদিনা সব্বং ৰত্তব্বং. ‘‘সীলেসু পরিপূরকারিতা ৰসেনা’’তি সীলপ্পটিপক্খ ধম্মানং সমুচ্ছিন্দকারিতা ৰসেনাতি অধিপ্পাযো. মুসাৰাদ ৰিরতি মুসাৰাদমেৰ পজহিতুং সক্কোতি. ন ইতরানি পিসুণৰাচাদীনীতি যোজনা. এত্থ সিযা. মুসাৰাদৰিরতি নাম কুসল ধম্মো হোতি. কুসল ধম্মো চ নাম সব্বস্স অকুসল ধম্মস্স পটিপক্খো. একস্মিম্পি কুসল ধম্মে উপ্পজ্জমানে তস্মিং সন্তানে সব্বানি অকুসলানি পজহিতুং সক্কোন্তীতি ৰত্তব্বানি. অথ চ পন মুসাৰাদ ৰিরতি মুসাৰাদমেৰ পজহিতুং সক্কোতি, ন ইতরানীতি ৰুত্তং. কথমিদং দট্ঠব্বন্তি. ৰুচ্চতে. পজহিতুং সক্কোতীতি ইদং পঞ্চসু পহানেসু তদঙ্গপ্পহান ৰচনং. তদঙ্গপ্পহানন্তি চ তেন তেন কুসলঙ্গেন তস্স তস্স অকুসলঙ্গস্স পহানং তদঙ্গপ্পহানং নাম. ইদং ৰুত্তং হোতি, ইধ সপ্পুরিসো পাণাতিপাতা পটিৰিরমামীতিআদিনা ৰিসুং ৰিসুং সিক্খাপদানি সমাদিযিত্ৰা পাণাতি পাতৰিরতি সঙ্খাতেন কুসলঙ্গেন পাণাতিপাত সঙ্খাতং অকুসলঙ্গং পজহতি. অদিন্নাদান ৰিরতি সঙ্খাতেন কুসলঙ্গেন অদিন্নাদান সঙ্খাতং অকুসলঙ্গং পজহতীতিআদিনা ৰিত্থারেতব্বং. একস্মিম্পি কুসল ধম্মে উপ্পজ্জমানে তস্মিং সন্তানে সব্বানি অকুসলানি ন উপ্পজ্জন্তীতি এত্থ পন অনোকাসত্তা এৰ ন উপ্পজ্জন্তি, ন পহানত্তা. ন হি তস্মিং সন্তানে তস্মিং খণে তানি অকুসলানি এৰ ন উপ্পজ্জন্তি. অথখো সব্বানি অঞ্ঞানি কুসল চিত্তানি চ ন উপ্পজ্জন্তি. সব্বানি অব্যাকত চিত্তানি চ ন উপ্পজ্জন্তি. তানি অনোকা সত্তা এৰ ন উপ্পজ্জন্তি. ন পহানত্তা ন উপ্পজ্জন্তি. তদঙ্গপ্পহানাদি ৰসেন পন পহানং সন্ধায ইধ পজহিতুং সক্কোতি-ন সক্কোতীতি ৰুত্তং. এত্তাৰতা তদঙ্গপ্পহানং নাম সুপাকটং হোতি. মুসাৰাদ ৰিরতি মুসাৰাদমেৰ পজহিতুং সক্কোতি. ন ইতরানীতি ইদঞ্চ সুট্ঠু উপপন্নং হোতীতি. ‘‘এত্থ চা’’তিআদীসু কাযঙ্গচোপনত্থায ৰাচঙ্গচোপনত্থায চ পৰত্তানি কাযৰচীচো পন ভাগিযানি নাম. কামাৰচর কুসলেস্ৰেৰ ৰিরতিযো সন্দিস্সন্তি. ‘‘কামাৰচর কুসলেসু পী’’তি নিদ্ধারণে ভুম্মৰচনং. কামভূমিযং উপ্পন্নেসু এৰ কামাৰচর কুসলেসু সন্দিস্সন্তি. তিৰিধ কুহনৰত্থূনি চ ৰিরমিতব্বৰত্থুট্ঠানেঠিতানি. এত্থ চ কুহনং নাম ৰিম্হাপনং লাভসক্কার সিলোকত্থায মনুস্সানং নানামাযাসাঠেয্য কম্মানি কত্ৰা অচ্ছরিযব্ভুত ভাৰকরণন্তি ৰুত্তং হোতি. তং পন তিৰিধং ‘পচ্চযপ্পটিসেৰনকুহনঞ্চ, সামন্তজপ্পন কুহনঞ্চ, ইরিযা পথসণ্ঠা পন কুহনঞ্চ. তত্থ মহিচ্ছোযেৰ সমানো অপ্পিচ্ছাকারং দস্সেত্ৰা আদিতো আগতা গতে চতুপচ্চযে পটিক্খিপিত্ৰা পচ্ছা বহুং বহুং আগতে পচ্চযে পটিগ্গণ্হাতি. ইদং পচ্চযপ্পটিসেৰন কুহনং নাম. পাপিচ্ছোযেৰ সমানো অযং ঝানলাভীতি ৰা অভিঞ্ঞালাভীতি ৰা অরহাতি ৰা জনো মং সম্ভাৰেতূতি সম্ভাৰনং ইচ্ছন্তো অত্তানং উত্তরি মনুস্স ধম্মানং সন্তিকে তে ৰা অত্তনো সন্তিকে কত্ৰা ৰঞ্চেতি. ইদং সামন্তজপ্পন কুহনং নাম. পাপিচ্ছোযেৰ সমানো অযং সন্তৰুত্তি সমাহিতো আরদ্ধৰীরিযোতি জনো মং সম্ভাৰেতূতি সম্ভাৰনং ইচ্ছন্তো ইরিযা পথ নিস্সিতং নানাৰঞ্চনং করোতি. ইদং ইরিযা পথ সণ্ঠাপন কুহনং নাম. ‘‘সিক্খাপদস্স ৰত্থূনী’’তি সুরা পান ৰিকাল ভোজন নচ্চগীতৰাদিত দস্সন সৰনাদীনি. সুরামেরযপানা ৰিরমাধীতি সমাদিযন্তস্স সুরামেরযপান চেতনা ৰিরমিতব্ব ৰত্থু নাম. ৰিকাল ভোজনা ৰিরমামীতি সমাদিযন্তস্স ৰিকালে যাৰকালিক ৰত্থুস্স পরিভুঞ্জন চেতনা ৰিরমিতব্ব ৰত্থু নাম. সেসেসুপি এসেৰ নযো. লোকুত্তর চিত্তেসু. ‘সব্বথাপী,তি চ ‘নিযতা’তি চ ‘একতো ৰা’তি চ তীণি ৰিসেসনানি. লোকিযেসু পন ‘কদাচী’তি চ ‘ৰিসুং ৰিসুং’তি চ দ্ৰে দ্ৰে ৰিসেসনানি. তত্থ লোকুত্তরেসু ‘সব্বথাপী’তি ইদং সমুচ্ছেদপ্পহান দস্সনং লোকিযেসুপি তব্বিপরীতং তদঙ্গপ্পহান দস্সনং অধিপ্পেতন্তি কত্ৰা ‘‘একেক দুচ্চরিতপ্পহানৰসেনে ৰা’’তি ৰুত্তং.

১২১. অপ্পমঞ্ঞাসু. ‘‘ৰিভঙ্গে’’তি অপ্পমঞ্ঞা ৰিভঙ্গে. ‘‘কারুঞ্ঞপ্পকতিকস্সা’’তি কারুঞ্ঞসভাৰস্স. ‘‘অনিস্সুকিনো’’তি ইস্সাধম্মরহিতস্স. থামগতা করুণা দোস সমুট্ঠিতং ৰিহিংসং পজহতি. থামগতা মুদিতা দোসসমুট্ঠিতং অরতিং পজহতীতি ৰুত্তং ‘‘ৰিহিংসা অরতীনং নিস্সরণ ভূতা’’তি. এত্থ চ অরতি নাম সুঞ্ঞাগারেসু চ ভাৰনা কম্মেসু চ নিব্বিদা. দোস নিস্সরণে সতি দোমনস্সনিস্সরণম্পি সিদ্ধমেৰ. নিস্সরণঞ্চ নাম পটিপক্খ ধম্ম সণ্ঠানেন হোতি. তস্মা পুব্বভাগেপি অপ্পমঞ্ঞাসু নিচ্চং সোমনস্স সণ্ঠানং ৰেদিতব্বন্তি অধিপ্পাযেন ‘‘দোমনস্সপ্পটিপক্খঞ্চা’’তিআদিমাহ. ‘‘অট্ঠকথাযপি সহ ৰিরুদ্ধো’’তি অট্ঠসালিনিযং উপেক্খা সহগত কামাৰচর কুসল চিত্তেসু করুণা মুদিতা পরিকম্মকালেপি হি ইমেসং উপ্পত্তি মহাঅট্ঠকথাযং অনুঞ্ঞাতা এৰা-তি ৰুত্তং. তায অট্ঠকথাযপি সহ ৰিরুদ্ধো. সেসমেত্থ সুৰিঞ্ঞেয্যং. ‘‘পটিকূলা রম্মণেসু পন…পে… ৰত্তব্বমেৰ নত্থী’’তি পটিকূলা রম্মণানি নাম সোমনস্সেন দূরে হোন্তি, তথা দুক্খিত সত্তা চ, তস্মা তদা রম্মণানি অসুভ ভাৰনা চিত্তানি চ করুণা ভাৰনা চিত্তানি চ আদিতো উপেক্খা সহগতা নেৰাতি ৰত্তব্বমেৰ নত্থি. ‘‘সাহিৰেদনুপেক্খা নামা’’তি কামাৰচর ৰেদনুপেক্খা ৰুত্তা. ৰিভাৰনিপাঠে, ‘‘অঞ্ঞৰিহিতস্স পী’’তি অঞ্ঞং আরম্মণং মনসিকরোন্তস্সপি. সজ্ঝাযনং সম্পজ্জতি, সম্মসনং সম্পজ্জতীতি পাঠসেসো. ইতি তস্মা. এত্থ সিযা ‘‘তং পটিক্খিত্তং হোতী’’তি কস্মা ৰুত্তং. ন নু তম্পি উপেক্খা সহগত চিত্তেসু করুণা মুদিতানং সম্ভৰং সাধেতি যেৰাতি. সচ্চং সাধেতিযেৰ. তেন পন পরিচয ৰসেন তেসু তাসং সম্ভৰং দীপেতি. ইধ পন ‘‘এত্থ চা’’তিআদিনা ‘‘পটিকূলা রম্মণেসূ’’তিআদিনা চ পরিচযেন ৰিনা পকতিযা তাসং উপেক্খা ৰেদনায এৰ সহ পৰত্তি বহুলতা ৰুত্তাতি. ‘‘যোগকম্ম বলেনা’’তি যুঞ্জন ৰীরিয কম্ম বলেন.

১২২. চেতো যুত্তানং চিত্ত চেতসিকানং. ‘‘এত্থ চা’’তিআদীসু. হেট্ঠা চ ৰুত্তো ‘কদাচি সন্দিস্সন্তি ৰিসুং ৰিসুং, কদাচি নানা হুত্ৰা জাযন্তী’তি. উপরি চ ৰক্খতি ‘অপ্পমঞ্ঞা ৰিরতিযো পনেত্থ পঞ্চপি পচ্চেকমেৰ যোজেতব্বা’তি. ইস্সাদীনঞ্চ নানা কদাচি যোগো উপরি ‘ইস্সামচ্ছের কুক্কুচ্চানি পনেত্থ পচ্চেকমেৰ যোজেতব্বানী’তি ৰক্খতি. মানথিন মিদ্ধানং পন নানা কদাচি যোগো ইধ ৰত্তব্বো. ‘‘কদাচী’’তি ৰত্ৰা তদত্থং ৰিৰরতি ‘‘তেসং’’তিআদিনা. ‘‘তেসং’’তি দিট্ঠি ৰিপ্পযুত্তানং. ‘‘নিদ্দাভিভূত ৰসেনা’’তি নিদস্সন ৰচনমেতং. তেন কোসজ্জাদীনম্পি গহণং ৰেদিতব্বং. ‘‘অকম্মঞ্ঞতাযা’’তি অকম্মঞ্ঞভাৰেন. তেহি ইস্সামচ্ছরিয কুক্কুচ্চেহি. তেন চ মানেন. কিচ্চ ৰিরোধে ৰা আরম্মণ ৰিরোধে ৰা নানাভাৰো. অৰিরোধে সহভাৰো.

১২৩. ‘‘যোগট্ঠানপরিচ্ছিন্দন ৰসেনা’’তি সব্বচিত্ত সাধারণা তাৰ সব্বেসুপি একূননৰুতিচিত্তুপ্পাদেসু, ৰিতক্কো পঞ্চপঞ্ঞা সচিত্তেসূতিআদিনা যুত্তট্ঠান ভূতানং চিত্তানং গণনসঙ্খ্যাপরিচ্ছেদৰসেন. ‘‘যুত্ত ধম্মরাসি পরিচ্ছিন্দন ৰসেনা’’তি অনুত্তরে ছত্তিংস, মহগ্গতে পঞ্চতিংসাতিআদিনা যুত্ত ধম্মরাসীনং গণন সঙ্খ্যা পরিচ্ছেদ ৰসেন. সেসং সুৰিঞ্ঞেয্যং. ‘‘পাল়িযং’’তি ধম্মসঙ্গণি পাল়িযং. ‘‘তেসং নযানং’’তি চতুক্ক পঞ্চক নযানং.

১২৪. ‘‘কাযৰচী ৰিসোধন কিচ্চা’’তি কাযদ্ৰারৰচীদ্ৰার সোধন কিচ্চা.

১২৫. লোকুত্তর ৰিরতীনং লোকুত্তর ৰিপাকেসুপি উপ্পজ্জনতো ‘‘ইদঞ্চ…পে… দট্ঠব্ব’’ন্তি. তাসং অপ্পমঞ্ঞানং. তেসু মহাৰিপাকেসু. সত্তপঞ্ঞত্তাদীনি আরম্মণানি যস্সাতি ৰিগ্গহো. ‘‘তেনা’’তি কুসলেন. ‘‘ৰিকপ্প রহিতত্তা’’তি ৰিৰিধাকার চিন্তন রহিতত্তা. অপ্পনাপত্ত কম্ম ৰিসেসেহি নিব্বত্তা অপ্পনাপত্তকম্ম ৰিসেস নিব্বত্তা. পঞ্ঞত্তি ৰিসেসানি নাম পথৰীকসিণ নিমিত্তাদীনি. ‘‘অপি চা’’তিআদীসু. ন পঞ্ঞত্তি ধম্মেহি অত্থি. এৰঞ্চ সতি, কামৰিপাকানি কামতণ্হায আরম্মণভূতা পঞ্ঞত্তিযোপি আলম্বেয্যুন্তি. ‘‘সঙ্গহনযভেদকারকা’’তি পথ মজ্ঝানিক চিত্তেসু ছত্তিংস. দুতীযজ্ঝানিক চিত্তেসু পঞ্চতিংসাতিআদিনা সঙ্গহনযভেদস্স কারকা.

১২৬. ‘‘এত্থ চা’’তিআদীসু. ‘‘পঞ্চসু অসঙ্খারিকেসূ’’তি নিদ্ধারণে ভুম্মৰচনং. তথা পঞ্চসু সসঙ্খারিকেসূতি. সেসমেত্থ সুৰিঞ্ঞেয্যং.

১২৮. ‘‘ভূমি জাতি সম্পযোগাদিভেদেনা’’তি ফস্সোতাৰ চতুব্বিধো হোতি কামাৰচরো, রূপাৰচরো, অরূপাৰচরো চাতি. অযং ভূমিভেদো.

দ্ৰাদসাকুসলা ফস্সা, কুসলা একৰীসতি;

ছত্তিংসেৰ ৰিপাকা চ, ৰীসতি ক্রিযা মতা.

ইতি অযং জাতিভেদো. সোমনস্স সহগতো, দিট্ঠিগত সম্পযুত্তো, অসঙ্খারিকো চ, সসঙ্খারিকো চাতিআদিনা সম্পযোগাদিভেদো ৰত্তব্বো. ‘‘চিত্তেন সমং ভেদ’’ন্তি অত্তনা ৰা সম্পযুত্তেন চিত্তভেদেন সমং ভেদং. একূনন ৰুতিযা চিত্তেসু ৰা. এত্থ চ ৰিচিকিচ্ছা চেতসিকং একস্মিং চিত্তে যুত্তন্তি একমেৰ হোতি. দোসো, ইস্সা, মচ্ছরিযং, কুক্কুচ্চন্তি ইমে চত্তারো দ্ৰীসু চিত্তেসু যুত্তাতি ৰিসুং ৰিসুং দ্ৰে দ্ৰে হোন্তি. তথা দিট্ঠিমানা পচ্চেকং চত্তারো. থিনমিদ্ধং পচ্চেকং পঞ্চাতিআদিনা সব্বং ৰত্তব্বন্তি.

চেতসিকসঙ্গহদীপনিযাঅনুদীপনা নিট্ঠিতা.

৩. পকিণ্ণকসঙ্গহঅনুদীপনা

১২৯. পকিণ্ণকসঙ্গহে. উভিন্নং চিত্ত চেতসিকানং. ‘‘তেপঞ্ঞাসা’’তি তেপঞ্ঞাসৰিধা. ‘‘ভাৰো’’তি ৰিজ্জমানকিরিযা. যো লক্খণ রসাদীসু লক্খণন্তি ৰুচ্চতি. তেনাহ ‘‘ধম্মানং’’তিআদিং. পৰত্তোতি পাঠসেস পদং. এতেন ‘ৰেদনা ভেদেন চিত্তচেতসিকানং সঙ্গহো’তিআদীসুপি ৰেদনা ভেদেন পৰত্তো চিত্তচেতসিকানং সঙ্গহোতিআদিনা সম্বন্ধং দস্সেতি. ‘‘ৰচনত্থো দস্সিতো’’তি, কথং দস্সিতোতি আহ ‘‘ৰেদনা ভেদেন চিত্তচেতসিকানং সঙ্গহো’’তিআদি. ‘‘তেসং দানি যথারহং’’তি এত্থ ‘‘তেসং’’তি চিত্তচেতসিকানং, সঙ্গহো নামাতি সম্বন্ধো. এতেন অযং সঙ্গহো চিত্ত চেতসিকানং এৰ সঙ্গহোতি সিদ্ধং হোতি. ৰেদনা হেতুতো. ল. লম্বণৰত্থুতো সঙ্গহো নামাতি সম্বন্ধো. এতেন উপরি ৰেদনা সঙ্গহোতিআদীসু ৰেদনাতো সঙ্গহো ৰেদনা সঙ্গহো. ল. ৰত্থুতো সঙ্গহো ৰত্থু সঙ্গহোতি সিদ্ধং হোতি, ৰেদনাতোতিআদীসু চ ৰেদনা ভেদতোতিআদি অত্থতো সিদ্ধং হোতি. এৰং ছন্নং পকিণ্ণকসঙ্গহানং ৰচনত্থো দস্সিতো. তেনাহ ‘‘ৰেদনা ভেদেনা’’তিআদিং. আদিনা দস্সিতোতি সম্বন্ধো. ‘‘সঙ্গহো নাম নিয্যতে’’তি ৰুত্তত্তা ‘‘নীতো নাম অত্থী’’তি ৰুত্তং. ‘‘নিয্যতে’’তি চ পৰত্তীযতেতি অত্থো. ননু তেসং ‘‘সঙ্গহো নাম নিয্যতে’’তি ৰুত্তত্তা দ্ৰীহি চিত্ত চেতসিকেহি এৰ অযং সঙ্গহো নেতব্বোতি. ন. চিত্তেন নীতে চেতসিকেহি ৰিসুং নেতব্ব কিচ্চস্স অভাৰতোতি দস্সেতুং ‘‘চিত্তে পন সিদ্ধে’’তিআদি ৰুত্তং.

১৩০. ৰেদনা সঙ্গহে. ৰেদনা ভেদং নিস্সায ইমস্স সঙ্গহস্স পৰত্তত্তা ‘‘নিস্সয ধম্ম পরিগ্গহত্থ’’ন্তি ৰুত্তং. ‘‘সংযুত্তকে’’তি ৰেদনা সংযুত্তকে. ‘‘আরম্মণং অনুভোন্তী’’তি আরম্মণ রসং অনুভোন্তি. ‘‘তে’’তি তেজনা. ‘‘তং’’তি তং আরম্মণং. ‘‘সাততো’’তি সুখাকারতো. ‘‘অস্সাততো’’তি দুক্খা কারতো. ততো অঞ্ঞোপকারো নত্থি, তস্মা ৰেদনা অনুভৰন লক্খণেন তিৰিধা এৰ হোতীতি যোজনা. ‘‘দ্ৰে’’তি দ্ৰে ৰেদনাযো. উপেক্খং সুখে সঙ্গহেত্ৰা সুখদুক্খৰসেন ৰা দ্ৰে ৰেদনা ৰুত্তাতি যোজনা. ‘‘সন্তস্মিং এসা পণীতে সুখে’’তি ঝানসম্পযুত্তং অদুক্খম সুখং সন্ধায ৰুত্তং. পঞ্চ ভেদাদীসু ৰিত্থারো ৰেদনা সংযুত্তে গহেতব্বো. ৰেদযিতন্তি চ ৰেদনাতি চ অত্থতো একং. ‘‘সব্বং তং দুক্খস্মিং’’তি সব্বং তং ৰেদযিতং দুক্খস্মিং এৰ পৰিট্ঠং হোতি. সঙ্খার দুক্খতং আনন্দ মযা সন্ধায ভাসিতং সঙ্খার ৰিপরিণামতঞ্চ, যং কিঞ্চি ৰেদযিতং, সব্বং তং দুক্খস্মিংতি পাল়ি. ‘‘ইন্দ্রিযভেদৰসেনা’’তি সোমনস্স সহগতং, উপেক্খাসহগতং, দোমনস্স সহগতং, সুখসহগতং, দুক্খ সহগতন্তি এৰং ইন্দ্রিয ভেদৰসেন. ‘‘যেসু ধম্মেসূ’’তি সম্পযুত্ত ধম্মেসু. ‘‘তেসং’’তি সম্পযুত্ত ধম্মানং. তত্থ সুখসম্পযুত্তা ধম্মা কাযিক সুখ সম্পযুত্ত চেতসিক সুখ সম্পযুত্ত ৰসেন দুৰিধা. এৰং ইস্সরট্ঠানভূতানং সম্পযুত্ত ধম্মানং দুৰিধত্তা অনুভৰন ভেদে তীসু ৰেদনাসু একং সুখ ৰেদনং দ্ৰিধা ভিন্দিত্ৰা সুখিন্দ্রিযং সোমনস্সিন্দ্রিযন্তি ৰুত্তং. দুক্খসম্পযুত্ত ধম্মেসুপি এসেৰনযো. ‘‘অপি চা’’তি কিঞ্চি ৰত্তব্বং অত্থীতি অত্থো. ‘‘তেপী’’তি উপেক্খা সম্পযুত্তাপি ধম্মা. চক্খাদি পসাদকাযা নাম চক্খু সোত ঘান জিৰ্হা পসাদকাযা. তেসু নিস্সিতা নাম চক্খু ৰিঞ্ঞাণ চিত্তুপ্পাদাদযো. ‘‘সব্ভাৰা’’তি সন্তভাৰতো সংৰিজ্জমান ভাৰতো দুৰিধা হোন্তীতি যোজনা. ‘‘এক রসত্তা’’তি মজ্ঝত্তভাৰেন একরসত্তা. ‘‘ইতরানী’’তি সোমনস্স দোমনস্স উপেক্খিন্দ্রিযানি. সেসমেত্থ সুৰিঞ্ঞেয্যং.

১৩১. হেতুসঙ্গহে. ‘‘সুপ্পতিট্ঠিতভাৰসাধনং’’তি সুট্ঠু পতিট্ঠহন্তীতি সুপ্পতিট্ঠিতা. সুপ্পতিট্ঠিত ভাৰসাধনং হেতু কিচ্চং নামাতি যোজনা. ‘‘ইমেপি ধম্মা’’তি ইমেপি ছ হেতু ধম্মা. ‘‘তত্থা’’তি তেসু আরম্মণেসু, সাধেন্তি. তস্মা সুপ্পতিট্ঠিত ভাৰসাধনং হেতুকিচ্চং নামাতি ৰুত্তং. ‘‘অপরে পনা’’তি পট্ঠানট্ঠ কথাযং আগতো রেৰতত্থের ৰাদো. ‘‘ধম্মানং কুসলাদি ভাৰসাধনং’’তি সহজাতধম্মানং কুসলভাৰসাধনং অকুসলভাৰসাধনং অব্যাকতভাৰসাধনং. ‘‘এৰং সন্তে’’তিআদি তং ৰাদং পটিক্খিপন্তানং পটিক্খেপৰচনং. ‘‘যেস’’ন্তি মোহমূল চিত্ত দ্ৰযে মোহো চ অহেতুক চিত্তুপ্পাদ রূপ নিব্বানানি চ. ‘‘ন সম্পজ্জেয্যা’’তি সহজাত হেতুনো অভাৰা তস্স মোহস্স অকুসল ভাৰো, ইতরে সঞ্চ অব্যাকত ভাৰো ন সম্পজ্জেয্য. ইদং ৰুত্তং হোতি. হেতু নাম সহজাত ধম্মানং কুসলাদিভাৰং সাধেতীতি ৰুত্তং. এৰং সতি, সো মোহো সম্পযুত্ত ধম্মানং অকুসল ভাৰং সাধেয্য. অত্তনো পন অকুসল ভাৰং সাধেন্তো সহজাতো অঞ্ঞো হেতু নত্থি. তস্মা তস্স অকুসলভাৰো ন সম্পজ্জেয্য. তথা অহেতুক চিত্তুপ্পাদ রূপ নিব্বানানঞ্চ অব্যাকতভাৰং সাধেন্তো কোচি সহজাতো হেতু নাম নত্থীতি তেসম্পি অব্যাকত ভাৰো ন সম্পজ্জেয্য. ন চ ন সম্পজ্জতি. তস্মা সো থেরৰাদো ন যুত্তোতি. এত্থ সিযা. সোচ মোহো অত্তনো ধম্মতায অকুসলো হোতি. তানি চ অহেতুক চিত্তুপ্পাদরূপ নিব্বানানি অত্তনো ধম্মতায অব্যাকতানি হোন্তীতি. এৰং সন্তে, যথা তে ধম্মা. তথা অঞ্ঞেপি ধম্মা অত্তনো ধম্মতায এৰ কুসলা কুসলা ব্যাকতা ভৰিস্সন্তি. ন চেত্থ কারণং অত্থি, যেনকারণেন তে এৰ ধম্মা অত্তনো ধম্মতায অকুসলা ব্যাকতা হোন্তি. অঞ্ঞে পন ধম্মা অত্তনো ধম্মতায কুসলা কুসলা ব্যাকতা ন হোন্তি, হেতূহি এৰ হোন্তীতি. তস্মা তেসং সব্বেসম্পি কুসলাদি ভাৰত্থায হেতূহি পযোজনং নত্থি. তস্মা সো থেরৰাদো ন যুত্তো যেৰাতি. ন কেৰলঞ্চ তস্মিং থেরৰাদে এত্তকো দোসো অত্থি. অথ খো অঞ্ঞোপি দোসো অত্থীতি দস্সেতুং ‘‘যানি চা’’তিআদিমাহ. তত্থাযং অধিপ্পাযো. সচে ধম্মানং কুসলাদি ভাৰো সহজাত হেতুপ্পটিবদ্ধো সিযা. এৰং সতি, হেতু পচ্চযে কুসল হেতুতো লদ্ধ পচ্চযানি রূপানি কুসলানি ভৰেয্যুং. অকুসল হেতুতো লদ্ধ পচ্চযানি রূপানি অকুসলানি ভৰেয্যুং. ন চ ভৰন্তি. তস্মা সো ৰাদো অযুত্তো যেৰাতি. ইদানি পুন তং থেরৰাদং পগ্গহেতুং ‘‘যথাপনা’’তিআদিমাহ. ‘‘ধম্মেসূ’’তি চতুস্সচ্চ ধম্মেসু. মুয্হনকিরিযা নাম অন্ধকার কিরিযা. ধম্মচ্ছন্দো নাম দানং দাতুকামো, সীলং পূরেতুকামো, ভাৰনং ভাৰেতুকামো ইচ্চাদিনা পৰত্তো ছন্দো. ‘‘অক্খন্তী’’তি অক্খমনং, অরোচনং, অমনাপো. পাপ ধম্ম পাপা রম্মণ ৰিরোধো নাম কামরাগট্ঠানীযেহি সত্তৰিধ মেথুন ধম্মাদীহি পাপ ধম্মেহি চেৰ পঞ্চকামগুণা রম্মণে হি চ চিত্তস্স ৰিরোধো, জেগুচ্ছো পটিকূলো. মুয্হনকিরিযা পন একন্ত অকুসল জাতিকা এৰ হোতি. এত্তাৰতা মোহমূল চিত্ত দ্ৰযে মোহো অত্তনো ধম্মতায অকুসলো হোতীতি ইমমত্থং পতিট্ঠাপেতি. ‘‘এৰং সন্তে’’তিআদিকং তত্থ দোসারোপনং ৰিধমতি. ইদানি অহেতুক চিত্তুপ্পাদ রূপ নিব্বানানি অত্তনো ধম্মতায অব্যাকতানি হোন্তীতি ইমমত্থং পতিট্ঠাপেতুং ‘‘যোচ ধম্মো’’তিআদিমাহ. ‘‘এত্তকমেৰা’’তি অঞ্ঞং দুক্কর কারণং নত্থীতি অধিপ্পাযো. ‘‘অহেতুক চিত্তানং’’তি অহেতুক চিত্তুপ্পাদানং. অত্তনো ধম্মতায এৰ সিদ্ধো. এত্তাৰতা-অহেতুক. ল. নিব্বানানি অত্তনো ধম্মতায অব্যাকতানি হোন্তী-তি ইমমত্থং পতিট্ঠাপেতি. ‘‘এৰং সন্তে’’তিআদি তত্থ দোসারোপনং অপনেতি. ইদানি সব্বোপি মোহো অত্তনো ধম্মতায অকুসল ভাৰেঠত্ৰা অঞ্ঞেসং ইচ্ছা নাম অত্থি, অক্খন্তি নাম অত্থীতি এৰং ৰুত্তানং ইচ্ছা অক্খন্তি ধম্মানম্পি অকুসল ভাৰং সাধেতীতি দস্সেতুং ‘‘তত্থ মোহো’’তিআদিমাহ. ‘‘মুয্হন নিস্সন্দানি এৰা’’তি মুয্হনকিরিযায নিস্সন্দপ্ফলানি এৰ. ন কেৰলং সো লোভাদীনং অকুসলভাৰং সাধেতি, অথ খো অলোভাদীনম্পি কুসলভাৰং সো এৰ সাধেতীতি দস্সেতুং ‘‘অলোভাদীনঞ্চা’’তিআদি ৰুত্তং. ‘‘অৰিজ্জানুসযেন সহেৰ সিদ্ধো’’তি তানি সত্তসন্তানে অৰিজ্জানুসযে অপ্পহীনে কুসলানি হোন্তি. পহীনে কিরিযানি হোন্তীতি অধিপ্পাযো. ইদানি লোভ দোসানং অলোভাদীনঞ্চ হেতু কিচ্চং দস্সেতুং ‘‘তানি পন লোভাদীনী’’তিআদি ৰুত্তং. রজ্জন দুস্সনানং নিস্সন্দানি রজ্জনাদিনিস্সন্দানি. ‘‘দিট্ঠি মানাদীনী’’তি দিট্ঠি মান ইস্সা মচ্ছরিযাদীনি. অরজ্জন অদুস্সন অমুয্হনানং নিস্সন্দানি অরজ্জনাদি নিস্সন্দানি. ‘‘সদ্ধাদীনী’’তি সদ্ধা সতি হিরি ওত্তপ্পাদীনি. ‘‘হেতুমুখেনপী’’তি অহেতুক চিত্তুপ্পাদ রূপ নিব্বানানং অব্যাকতভাৰো অত্তনো ধম্মতায সিদ্ধোতি ৰুত্তো. সহেতুক ৰিপাক ক্রিযানং অব্যাকত ভাৰো পন অত্তনো ধম্মতায সিদ্ধোতিপি সহজাত হেতূনং হেতু কিচ্চেন সিদ্ধোতিপি ৰত্তুং ৰট্টতীতি অধিপ্পাযো. ৰিভাৰ নিপাঠে. ‘‘মগ্গিতব্বো’’তি গৰেসিতব্বো. অথ তেসং কুসলাদি ভাৰো সেসসম্পযুত্ত হেতুপ্পটি বদ্ধো সিযাতি যোজনা. ‘‘অপ্পটি বদ্ধো’’তি হেতুনা অপ্পটি বদ্ধো. ‘‘কুসলাদিভাৰো’’তি কুসলাদিভাৰো সিযা. ‘‘সো’’তি কুসলাদিভাৰো. ‘‘অহেতুকানং’’তি অহেতুক চিত্তুপ্পাদ রূপ নিব্বানানং. ইদানি ‘যানি চ লদ্ধহেতু পচ্চযানী’তিআদি ৰচনং পটিক্খিপন্তো ‘‘যথাচা’’তিআদিমাহ. ‘‘রূপারূপ ধম্মেসূ’’তি নিদ্ধারণে ভুম্ম ৰচনং. ‘‘অরূপ ধম্মেসু এৰা’’তি নিদ্ধারণীযং. ন রূপ ধম্মেসু ফরন্তি. এৰং সতি, কস্মা তে রূপ ধম্মা ঝানপচ্চযুপ্পন্নেসু ৰুত্তাতি আহ ‘‘তে পনা’’তিআদিং. সেসমেত্থ সুৰিঞ্ঞেয্যং. ‘‘তং পন তেসং’’তি তেসং হংসাদীনং তং ৰণ্ণৰিসেসং. ‘‘যোনিযো’’তি মাতাপিতু জাতিযো. ‘‘অব্যাকতানং পনাতি সব্বং’’তি অব্যাকতানং পন অব্যাকতভাৰো নিরনুসয সন্তানপ্পটি বদ্ধো, কম্মপ্পটি বদ্ধো, অৰিপাকভাৰপ্পটি বদ্ধো চাতি দট্ঠব্বন্তি ইদং সব্বং. ‘‘ৰুত্ত পক্খেপততি যেৰা’’তি তস্মিং পক্খে অন্তোগধমেৰাতি অধিপ্পাযো.

১৩২. কিচ্চসঙ্গহে. তস্মিং পরিক্খীণেতি সম্বন্ধো. ‘‘কম্মস্সা’’তি কম্মন্তরস্স. চুতস্স সত্তস্স অভিনিব্বত্তীতি সম্বন্ধো. ‘‘ভৰন্তরাদিপ্পটি সন্ধান ৰসেনা’’তি ভৰন্তরস্স আদিকোটিযা পটিসন্ধান ৰসেন. ভৰসন্তানস্স পৰত্তীতি সম্বন্ধো. কথং পৰত্তীতি আহ ‘‘যাৰ তং কম্মং’’তিআদিং. ‘‘অৰিচ্ছেদপ্পৰত্তি পচ্চযঙ্গভাৰেনা’’তি অৰিচ্ছেদপ্পৰত্তিযা পধান পচ্চয সঙ্খাতেন অঙ্গভাৰেন. এতেন ভৰঙ্গপদে অঙ্গসদ্দস্স অত্থং ৰদতি. তেনাহ ‘‘তস্সহী’’তিআদিং. ‘‘তস্সা’’তি ভৰঙ্গস্স. আৰজ্জনং আৰট্টনন্তি একো ৰচনত্থো. তং ৰা আৰজ্জেতীতি একো. ‘‘তং’’তি চিত্ত সন্তানং. আৰট্টতি ৰা তং এত্থাতি একো. আৰট্টতি ৰা তং এতেনাতি একো. ‘‘তং’’তি চিত্ত সন্তানং. আৰজ্জেতি ৰাতি একো. ‘‘ৰোট্ঠব্বনং’’তি ৰি-অৰ-ঠপনংতি পদচ্ছেদো. ৰিভাৰনি ৰিচারণাযং. ‘‘একাৰজ্জন পরিকম্ম চিত্ততো’’তি মগ্গেন ৰা অভিঞ্ঞায ৰা একং সমানং আৰজ্জনং অস্সাতি ৰিগ্গহো. তস্সং ৰীথিযং ‘আৰজ্জনং, পরিকম্মং, উপচারো, অনুলোমং, গোত্রভূ,তি এত্থ পরিকম্ম জৰনচিত্তং ইধ পরিকম্ম চিত্তন্তি ৰুত্তং. ‘‘তানী’’তি মগ্গা ভিঞ্ঞাজৰনানি. ‘‘তত্থা’’তি তস্মিং ৰিভাৰনি পাঠে. ‘‘দীঘং অদ্ধানং’’তি সকলরত্তিযং ৰা সকল দিৰসং ৰা নিদ্দোক্কমন ৰসেন দীঘং কালং. সেসমেত্থ সুৰিঞ্ঞেয্যং. ‘‘পটিসন্ধিযাঠানং’’তি পটিসন্ধিকিচ্চস্স ঠানং. কালোহি নাম ৰিসুং চিত্তস্স আরম্মণ ভূতো একো পঞ্ঞত্তি ধম্মোতি এতেন কালো নাম সভাৰতো অৰিজ্জমানত্তা কথং কিচ্চানং পৰত্তিট্ঠানং নাম সক্কা ভৰিতুন্তি ইমং আসঙ্কং ৰিসোধেতি. ‘‘ইতরথা’’তি তথা অগ্গহেত্ৰা অঞ্ঞথা কিচ্চট্ঠানানং অভেদে গহিতে সতীতি অত্থো. ‘‘সযং সোমনস্স যুত্তংপী’’তি কদাচি সযং সোমনস্স যুত্তংপি. ‘‘তং’’তি সোমনস্স সন্তীরণং. ‘‘লদ্ধপচ্চয ভাৰেনা’’তি লদ্ধঅনন্তর পচ্চযভাৰেন. ‘‘আসেৰন ভাৰ রহিতং পী’’তি আসেৰন গুণ রহিতম্পি. তঞ্হি আসেৰন পচ্চযে পচ্চযোপি ন হোতি, পচ্চযুপ্পন্নম্পি ন হোতীতি. ‘‘পরিকম্ম ভাৰনা বলেন চ পৰত্তত্তা’’তি ইদং ফলসমাপত্তি ৰীথিযং ফলজৰনেসু পাকটং. সেসমেত্থসুবোধমেৰ.

১৩৩. দ্ৰারসঙ্গহে. ‘‘আদাসপট্টমযো’’তি আদাসপট্টেন পকতো. ‘‘দ্ৰে এৰা’’তি দ্ৰে এৰ দ্ৰারানি. ‘‘দ্ৰার সদিসত্তা’’তি নগর দ্ৰার সদিসত্তা. ‘‘কম্মৰিসেস মহাভূত ৰিসেস সিদ্ধেনা’’তি এত্থ কম্মৰিসেসেন চ মহাভূত ৰিসেসেন চ সিদ্ধোতি ৰিগ্গহো. আৰজ্জনাদীনি চ ৰীথি চিত্তানি গণ্হন্তি. ‘‘যম্হী’’তি যস্মিং চক্খুম্হি. তদেৰ চক্খু চক্খুদ্ৰারং নামাতি সম্বন্ধো. ‘‘তেসং দ্ৰিন্নং’’তি রূপ নিমিত্তানঞ্চ আৰজ্জনাদি ৰীথিচিত্তানঞ্চ. ‘‘ৰিসয ৰিসযী ভাৰূপগমনস্সা’’তি এত্থ রূপ নিমিত্তানং ৰিসযভাৰস্স উপগমনং নাম চক্খু মণ্ডে আপাতাগমনং ৰুচ্চতি. আৰজ্জনাদীনং ৰিসযী ভাৰস্স উপগমনং নাম তেসং নিমিত্তানং আরম্মণ করণং ৰুচ্চতি. ‘‘মুখপ্পথভূতত্তা’’তি মুখমগ্গভূতত্তা. এৰং দ্ৰার সদ্দস্স করণ সাধনযুত্তিং দস্সেত্ৰা ইদানি অধিকরণ সাধন যুত্তিং দস্সেতি ‘‘অথৰা’’তিআদিনা. ‘‘রূপানং’’তি রূপ নিমিত্তানং. ‘‘চক্খুমেৰ চক্খু দ্ৰার’’ন্তি এতেন চক্খুমেৰ দ্ৰারং চক্খু দ্ৰারন্তি অৰধারণ সমাসং দস্সেতি. ‘‘কারণং ৰুত্তমেৰা’’তি হেট্ঠা চিত্তসঙ্গহে মনোদ্ৰারাৰজ্জনপদে ৰুত্তমেৰ. সব্বং একূন নৰুতিৰিধং চিত্তং মনোদ্ৰারমেৰ নাম হোতি. তথাহি ৰুত্তং অট্ঠসালিনিযং অযং নামমনো মনোদ্ৰারং নাম ন হোতীতি ন ৰত্তব্বোতি. ‘‘উপপত্তি দ্ৰারমেৰা’’তি উপপত্তিভৰ পরিযাপন্নং কম্মজদ্ৰারমেৰ. ‘‘ইধ চা’’তি ইমস্মিং সঙ্গহগন্থে চ. যঞ্চ সাধক ৰচনন্তি সম্বন্ধো. ‘‘তত্থা’’তি ৰিভাৰনিযং. ‘‘তত্থেৰ তং যুত্তং’’তি তস্মিং পাল়িপ্পদেসে এৰ তং সাধক ৰচনং যুত্তং. ইতরে দ্ৰে পচ্চযাতি সম্বন্ধো. ‘‘মনঞ্চাতি এত্থা’’তি মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণংতি ৰাক্যে মনঞ্চাতিপদে. তত্থ পন জৰন মনোৰিঞ্ঞাণস্স উপ্পত্তিযা চতূসু পচ্চযেসু মনঞ্চাতি এত্থ দ্ৰারভূতং ভৰঙ্গমনো চ আৰজ্জন মনো চাতি দ্ৰে পচ্চযা লব্ভন্তি. ধম্মে চাতি পদে ধম্মারম্মণ সঙ্খাতো একো পচ্চযো লব্ভতি. চ সদ্দেন মনোৰিঞ্ঞাণ সম্পযুত্তক্খন্ধা গয্হন্তি. এৰং চত্তারো পচ্চযা হোন্তি. ‘‘এত্থ চা’’তি ইমস্মিং অট্ঠকথা ৰচনে. ‘‘সন্নিহিত পচ্চযানং এৰ তত্থ অধিপ্পেতত্তা’’তি পটিচ্চ সদ্দসামত্থিযেন আসন্নে ধরমানপচ্চযানং এৰ তস্মিং পাল়িৰাক্যে অধিপ্পেতত্তা. ‘‘দ্ৰারভাৰারহস্সা’’তি ৰিসয ৰিসযীনং ৰুত্ত নযেন পৰত্তি মুখভাৰারহস্স. এতেন আরম্মণানি আপাতং আগচ্ছন্তু ৰা, মাৰা, ৰীথি চিত্তানি পৰত্তন্তুৰা, মাৰা, অপ্পমাণং. পভস্সরপ্পসন্নভাৰেন দ্ৰারভাৰা রহতা এৰ পমাণন্তি দীপেতি. ‘‘নিট্ঠমেত্থ গন্তব্বং’’তি সন্নিট্ঠানং এত্থ গন্তব্বং. দ্ৰারৰিকার মূলকানি তাদিসানি কিচ্চানি যেসং তানি তং কিচ্চৰন্তানি. ‘‘কম্মৰসেন সিজ্ঝন্তী’’তি সত্তসন্তানে পৰত্তন্তীতি অধিপ্পাযো. তং কিচ্চৰন্তানি চিত্তানি. ৰিভাৰনি পাঠে ‘‘মনোদ্ৰার সঙ্খাত ভৰঙ্গতো’’তি মনোদ্ৰার সঙ্খাত ভৰঙ্গ ভাৰতো চ. ‘‘আরম্মণন্তরগ্গহণৰসেন অপ্পৰত্তিতো’’তি পটিসন্ধি চিত্তেন যথা গহিতং কম্মকম্মনিমিত্তাদিকং আরম্মণং মুঞ্চিত্ৰা পৰত্তিকালে ছসু দ্ৰারেসু আপাতাগতস্স আরম্মণন্তরস্স গহণ ৰসেন অপ্পৰত্তিতো চ. হেট্ঠাপি পঞ্চদ্ৰারা ৰজ্জন চক্খু ৰিঞ্ঞাণ সম্পটিচ্ছন সন্তীরণ ৰোট্ঠব্বন কামাৰচরজৰন তদা রম্মণ ৰসেনাতিআদিনা কিচ্চসীসেনেৰ. ল. ৰুত্তো. এত্থহি আৰজ্জন সম্পটিচ্ছনাদীনি কিচ্চ ৰিসেসানং নামানি হোন্তি. ‘‘চে’’তি চে ৰদেয্য. ‘‘না’’তি ন ৰত্তব্বং. ‘‘তথা অস্সুতত্তা’’তি একূন ৰীসতি দ্ৰার ৰিমুত্তানীতি চ, ছ দ্ৰারিকানি চেৰ দ্ৰার ৰিমুত্তানীতি চ, মহগ্গত ৰিপাকানি দ্ৰার ৰিমুত্তানে ৰাতি চ, সুতং. ন পন দ্ৰারিক ৰিমুত্তানীতি সুতং.

১৩৪. আরম্মণ সঙ্গহে. ‘‘দুব্বল পুরিসেনা’’তি গেলঞ্ঞাভিভূতত্তা ৰা জরাভিভূতত্তা ৰা দণ্ডেন ৰা রজ্জুকেন ৰা ৰিনা উট্ঠাতুম্পি পতিট্ঠাতুম্পি অপরাপরং গন্তুম্পি অসক্কোন্তেন দুব্বল পুরিসেন দণ্ডকং ৰা রজ্জুকং ৰা আলম্বিযতি. আলম্বিত্ৰা উট্ঠাতি. পতিট্ঠাতি. অপরাপরং গচ্ছতি. এৰমেৰ. অমুঞ্চ মানেহি হুত্ৰাতি পাঠসেসো. ‘‘আগন্ত্ৰা’’তি আরম্মণ করণ ৰসেন ততো ততো আগন্ত্ৰা. ‘‘ৰিসুং সিদ্ধানী’’তি আলম্বিযতীতি এতস্মিং অত্থে সতি, আলম্বণন্তি সিজ্ঝতি. আরম্মণন্তি ন সিজ্ঝতি. তানি এত্থ আগন্ত্ৰা রমন্তীতি এতস্মিং অত্থে সতি, আরম্মণন্তি সিজ্ঝতি. আলম্বণন্তি ন সিজ্ঝতি. এৰঞ্চ সতি একং পদং দ্ৰীহিৰাক্যেহি দস্সনং ন সুন্দরন্তি. ‘‘অঞ্ঞানি আরম্মণানী’’তি রূপারম্মণতো অঞ্ঞানি সদ্দারম্মণাদীনি. ‘‘আগচ্ছতী’’তি আৰিভাৰং গচ্ছতি, উপ্পাদপ্পৰত্তি ৰসেন পচ্চক্খভাৰং পাপুণাতি. ‘‘আগচ্ছিত্থা’’তি আৰিভাৰং গচ্ছিত্থ, উপ্পাদপ্পৰত্তি ৰসেন পচ্চক্খভাৰং পাপুণিত্থ. ‘‘অনাগতং’’তি এত্থ ন কারো অৰত্থা ৰসেন পটিসেধো. যো ধম্মো পচ্চয সামগ্গিযং সতি আগমন জাতিকো উপ্পজ্জন সীলো. সো এৰ ইদানি আগচ্ছতি, ইদানি আগচ্ছিত্থ, ইদানি আগমন জাতিযং ঠিতো, নাগচ্ছতি নাগচ্ছিত্থাতি ইমিনা অত্থেন সো অনাগতো নাম. নিব্বান পঞ্ঞত্তিযো পন আগমন জাতিকা ন হোন্তি. তস্মা আগমনপ্পসঙ্গাভাৰতো অনাগতাতি ন ৰুচ্চন্তীতি. তেনাহ ‘‘উপ্পাদ জাতিকা’’তিআদিং. ‘‘তং ৰিচারেতব্বং’’তি ৰত্ৰা ৰিচারণাকারং দস্সেতি ‘‘সব্বেপিহী’’তিআদিনা. তে যদা ৰত্তব্ব পক্খে তিট্ঠন্তীতি সম্বন্ধো. উপ্পাদ জাতিকানঞ্ঞেৰ সঙ্খত ধম্মানং. তাসং নিব্বান পঞ্ঞত্তীনং. ‘‘ন তথা ইমেসং’’তি ইমেসং দ্ৰার ৰিমুত্তানং আরম্মণং পন তথা ন হোতীতি যোজনা. ‘‘তত্থা’’তি তস্মিং ভৰ ৰিসেসে. ৰিভাৰনিপাঠে ‘‘আৰজ্জনস্সৰিযা’’তি আৰজ্জনস্স আরম্মণং ৰিয. অগ্গহিতমেৰ হুত্ৰা. ‘‘একৰজ্জন ৰীথিযং অগ্গহিত ভাৰো ইধ ন পমাণ’’ন্তি ছ দ্ৰারগ্গহিতন্তি ইধ অপ্পমাণং. ভৰন্তরে গহিতস্স অধিপ্পেতত্তা. ‘‘কালৰিমুত্ত সামঞ্ঞং’’ৰাতি যং কিঞ্চিকাল ৰিমুত্তং ৰা ন হোতীতি অধিপ্পাযো. আগমসিদ্ধি ৰোহারো নাম ‘‘কম্মন্তি ৰা, কম্মনিমিত্তন্তি ৰা, গতি নিমিত্তন্তি ৰা, পসিদ্ধো ৰোহারো ৰুচ্চতি. অজাত সত্তুরাজা সঙ্কিচ্চজাতকেপি পিতরং মারেতি. তস্মা ‘‘দ্ৰীসুভৰেসূ’’তি ৰুত্তং. ‘‘ছ হি দ্ৰারেহী’’তি করণ ভূতেহি ছহি চক্খাদি দ্ৰারেহি. ‘‘মরণাসন্ন জৰনেহী’’তি কত্তু ভূতেহি মরণাসন্নে পৰত্তেহি ছ দ্ৰারিক জৰনেহি. ‘‘অনেকং সভাৰং’’তি অনেকন্ত ভাৰং. যঞ্হি আরম্মণন্তি সম্বন্ধো. ‘‘কেনচি দ্ৰারেন অগ্গহিতমেৰ হোতী’’তি এত্থ অসঞ্ঞী ভৰতো চুতানং সত্তানং কামপটিসন্ধিযা কম্মাদি আরম্মণং ভৰন্তরে কেনচি দ্ৰারেন অগ্গহিতন্তি যুত্তং. কস্মা, তস্মিং ভৰে কস্সচিদ্ৰারস্সেৰ অভাৰতো. অরূপভৰতো চুতানং পন কামপটিসন্ধিযা গতি নিমিত্ত সম্মতং আরম্মণং কথং ভৰন্তরে কেনচি দ্ৰারেন অগ্গহিতং ভৰেয্য, মনোদ্ৰারগ্গহিতমেৰ ভৰেয্যাতি ইমং চোদনং ৰিসোধেতুং ‘‘এত্থ চ যস্মা পট্ঠানে’’তিআদি ৰুত্তং. ততো চুতানং সত্তানং যা কামপটিসন্ধি, তস্সাকামপটি সন্ধিযা. পচ্চুপ্পন্নং গতিনিমিত্তং আরম্মণং এতিস্সাতি ৰিগ্গহো. কামপটিসন্ধি. পরেসং পযোগ বলেনাপি কম্মাদীনং উপট্ঠানং নাম হোতীতিআদিনা যোজেতব্বং. ‘‘সুট্ঠু আসেৰিতানং’’তি চিরকালং সঙ্ঘ ৰত্ত চেতিযৰত্ত করণাদিৰসেন তং তং ভাৰনা কম্মৰসেন চ সুট্ঠু আসেৰিতানং কম্মকম্মনিমিত্তানং. ‘‘হোতি যেৰা’’তি কম্মাদীনং উপট্ঠানং নাম হোতিযেৰ. ‘‘আগন্ত্ৰা’’তি ইমং মনুস্স লোকং আগন্ত্ৰা গণ্হন্তিযেৰ. তদাপি নিরযপালেহি দস্সিতং তং তং গতি নিমিত্তং আরম্মণং কত্ৰা চৰন্তি. ‘‘তং’’তি রেৰতিং নাম ইত্থিং. ননু নিরযপালা নাম তাৰতিংসা ভৰনং গন্তুং ন সক্কুণেয্যুন্তি. নো নসক্কুণেয্যুং. কস্মা, মহিদ্ধিক যক্খ জাতিকত্তাতি দস্সেতুং ‘‘তেহী’’তিআদি ৰুত্তং. ‘‘ৰেস্সৰণ দূতা’’তি ৰেস্সৰণমহারাজস্স দূতা. ‘‘উপচারজ্ঝানেঠত্ৰা’’তি অপ্পনাঝানং অপত্ততায উপচারভাৰনাভূতে কামাৰচরজ্ঝানেঠত্ৰা. ‘‘তানেৰ নিমিত্তানী’’তি পথৰীকসিণ নিমিত্তাদীনি পটিভাগ নিমিত্তানি. ‘‘কামপটিসন্ধিযা আরম্মণং’’তি তেহি নিমিত্তারম্মণেহি অঞ্ঞং উপচার ভাৰনা কম্মং ৰা যং কিঞ্চি অনুরূপং গতি নিমিত্তং ৰা. ‘‘তানেৰ নিমিত্তানি গহেত্ৰা’’তি ৰচনেন তানি নিমিত্তানি মরণাসন্ন জৰনেহি গহিতানীতি দস্সেতি. তানি চ পঞ্ঞত্তি ধম্মত্তা কামপটিসন্ধিযা আরম্মণং ন হোন্তীতি. ‘‘পচ্চুপ্পন্নগতি নিমিত্তে সিদ্ধে সিদ্ধমেৰা’’তি তস্মিং ভৰে গতস্স তত্থ যাৰজীৰম্পি অনু ভৰিতব্বং আরম্মণং নাম তস্মিং খণে ধরমানং পচ্চুপ্পন্নম্পি অত্থি. ততো ৰড্ঢমানং অনাগতম্পি অত্থি. তত্থ পচ্চুপ্পন্নে উপট্ঠহন্তে পটিসন্ধিযা আরম্মণং সম্পজ্জতি. অনাগতং পন অনুপট্ঠহন্তম্পি পচ্চুপ্পন্নে অন্তোগধসদিসং হোতীতি অধিপ্পাযো. ৰিভাৰনি পাঠেন চ পচ্চুপ্পন্ন গতিনিমিত্তং ৰিয আপাতমাগতং, কস্মা, পচ্চুপ্পন্ন গতি নিমিত্তেনেৰ কিচ্চ সিদ্ধিতো-তি অধিপ্পাযো. সেসমেত্থ সুবোধং. ‘‘তানিহী’’তিআদীসু. কেচি ৰদন্তি. অনেজোসন্তি মারব্ভ. যং কালমকরীমুনীতি ৰুত্তত্তা সব্বঞ্ঞু বুদ্ধাদীনং পরিনিব্বান চুতি চিত্তং সন্তি লক্খণং নিব্বানং আরম্মণং করোতীতি. তং সব্বথাপি কামাৰচরা লম্বণা নেৰাতি ইমিনা অপনেতব্বন্তি দস্সেতুং ‘‘তা নিহি সব্বঞ্ঞু বুদ্ধানং উপ্পন্নানি পী’’তিআদি ৰুত্তং. ‘‘লোকুত্তর ধম্মা’’তিআদীসু. ‘‘তানী’’তি দ্ৰাদসা কুসল চিত্তানি অট্ঠঞাণ ৰিপ্পযুত্ত কুসল ক্রিয জৰনানি চ. অজ্ঝান লাভিনো পুথুজ্জনা মহগ্গতজ্ঝানানিপি আলম্বিতুং ন সক্কোন্তীতি ৰুত্তং ‘‘পঞ্ঞত্তিযা সহ কামাৰচরা রম্মণানী’’তি. ‘‘তানে ৰা’’তি ঞাণ সম্পযুত্ত কাম কুসলানি এৰ. ঝানলাভীনং তানেৰ ঞাণ সম্পযুত্তকাম কুসলানি. হেট্ঠিম ফলট্ঠানং তানেৰ অত্তনা অধিগত মগ্গফল নিব্বানা রম্মণানি. ‘‘ঝানানি পত্থেন্তী’’তি আযতিং ঝানলাভিনো ভৰেয্যামাতি পত্থনং করোন্তি. ‘‘তেসং পী’’তি তেসং পুথুজ্জনানম্পি. ‘‘তে’’তি তে লোকুত্তর ধম্মা. ‘‘অনুভোন্তী’’তি সম্পাপুণন্তি. ‘‘নৰনিপাতে’’তি অঙ্গুত্তর নিকাযে নৰনিপাতে. সেসং সব্বং সুৰিঞ্ঞেয্যমেৰ.

১৩৫. ৰত্থুসঙ্গহে. ‘‘ৰত্থূ’’তি নিস্সয ৰিসেসো ৰুচ্চতি. তানি নিস্সয ৰত্থূনি যেসং তানি তব্বত্থুকানি. ‘‘তেসঞ্চ সদ্দো ন যুজ্জতী’’তি তেসং ৰাদে চ সদ্দো ন যুজ্জতি. ন হি অলুত্ত চ কারং দ্ৰন্দ পদং নাম অত্থীতি. ‘‘পুব্বপদেসু আনেতব্বো’’তি চক্খু ৰত্থু চ সোতৰত্থু চাতিআদিনা আনেতব্বো. সমাস পদং ন যুজ্জতি. ন হি সমাস পদতো এক দেসং অঞ্ঞত্থ আনেতুং যুজ্জতীতি. অৰিভত্তিক নিদ্দেসো নাম চক্খুং, সোতং, ঘানং, জিৰ্হা, কাযো, হদযং, ৰত্থু চাতি ৰত্তব্বে পুব্বপদেসু অৰিভত্তিক নিদ্দেসো. এৰঞ্চসতি ৰত্থু সদ্দো চ সদ্দো চ পুব্বপদেসু আনেতুং লব্ভন্তীতি. কামতণ্হায অধীনেন আযত্তেন কামাৰচর কম্মেন নিব্বত্তা কামতণ্হাধীন কম্ম নিব্বত্তা. ‘‘রূপাদীনং পরিভোগো’’তি রূপাদীনং পঞ্চকামগুণানং পরিভোগো. ‘‘পরিত্তকম্মং পী’’তি সব্বং কামাৰচর কম্মম্পি. ‘‘পূরযমানং’’তি পরিপূরেন্তং. চক্খু দস্সনানুত্তরিযং নাম. সোতং সৰনানুত্তরিযং নাম. সব্বেসং দস্সন কিচ্চানং মজ্ঝে বুদ্ধ দস্সনা দিৰসেন অনুত্তরং দস্সনং জনেতীতি দস্সনানুত্তরিযং. এৰং সৰনানুত্তরিযেপি চতুসচ্চ ধম্মস্সৰনা দিৰসেনাতি ৰত্তব্বং. ‘‘অজ্ঝত্ত বহিদ্ধ সন্তা নেসু পী’’তি অজ্ঝত্ত সন্তানেপি বহিদ্ধ সন্তানেপি. ‘‘সুদ্ধে’’তি কেনচি আলোকেন চ অন্ধকারেন চ ৰিরহিতে. আলোকো হি একো রূপ ৰিসেসো. তথা অন্ধকারো চ. তে চ তত্থ নত্থি. ‘‘ইমস্মিং সঙ্গহে’’তি ৰত্থু সঙ্গহে. ৰিসিট্ঠং জাননং ৰিজাননং. তঞ্চ ৰিজাননং তীসু মনোধাতূসু নত্থীতি ৰুত্তং ‘‘ৰিজানন কিচ্চাভাৰতো’’তি. আৰজ্জন কিচ্চং কিমেতন্তি, মনসিকার মত্তং হোতি. সম্পটিচ্ছন কিচ্চঞ্চ পঞ্চৰিঞ্ঞাণেহি যথা গহিতানেৰ পঞ্চারম্মণানি সম্পটিচ্ছন মত্তং হোতি. তেনাহ ‘‘ৰিসেসজানন কিচ্চানি ন হোন্তী’’তি. দস্সনং, সৰনং, ঘাযনং, সাযনং, ফুসন, ন্তি ইমানি কিচ্চানি থোকং ৰিসেস জানন কিচ্চানি হোন্তীতি ৰুত্তং ‘‘পচ্চক্খতো দস্সনা দিৰসেনা’’তিআদিং. থোকং ৰিসেস জানন কিচ্চানি হোন্তি. তস্মা তানি পঞ্চৰিঞ্ঞাণানীতি ৰুত্তানি. অৰসেসা পন সন্তীরণাদযো মনোৰিঞ্ঞাণধাতুযো নামাতি সম্বন্ধো. ননু মননট্ঠেন মনো চ তং ৰিজাননট্ঠেন ৰিঞ্ঞাণঞ্চাতি ৰুত্তেপি পঞ্চৰিঞ্ঞাণেহি ৰিসেসো নত্থীতি আহ ‘‘অতিস্সয ৰিসেস জানন ধাতুযোতি অত্থো’’তি. এৰং সন্তেপি সো অত্থো সদ্দযুত্তিযা সিদ্ধো ন হোতি. যদিচ্ছা ৰসেন ৰুত্তো হোতীতি আহ ‘‘পরিযায পদানং’’তিআদি. এতেন সো অত্থো সদ্দযুত্তিযা এৰ সিদ্ধো. ন যদিচ্ছাৰসেন ৰুত্তোতি দস্সেতি. ‘‘ৰিসেসন সমাসে’’তি মনো চ তং ৰিঞ্ঞাণঞ্চাতি মনোৰিঞ্ঞাণন্তি এৰরূপে কম্মধারয সমাসে. ‘‘পদট্ঠানং’’তি এত্থ পদন্তি চ ঠানন্তি চ কারণত্থ ৰচনানি, তস্মা পরিযায সদ্দা নাম. পদঞ্চ তং ঠানঞ্চাতি ৰুত্তে অতিস্সয কারণন্তি অত্থো ৰিঞ্ঞাযতি. তথা দুক্খ দুক্খং, রূপ রূপং, রাজ রাজা, দেৰদেৰোতিআদীনি. ‘‘কত্থচি দিস্সতি যুজ্জতি চা’’তি ন হি কত্থচি দিস্সতি চ. সচেপি কত্থচি দিস্সেয্য, ন হি যুজ্জতি চাতি অত্থো. ‘‘মনসো ৰিঞ্ঞাণং’’তি এত্থ পটিসন্ধি চিত্ততো পট্ঠায যাৰচুতি চিত্তা অন্তরে সব্বং চিত্ত সন্তানং সত্ত ৰিঞ্ঞাণ ধাতূনং ৰসেন ৰিভাগং কত্ৰা অত্থো ৰত্তব্বো. পঞ্চদ্ৰারা ৰজ্জনঞ্চ সম্পটিচ্ছন দ্ৰযঞ্চ মনোধাতু মত্তত্তা মনো নাম. পঞ্চৰিঞ্ঞাণানি ৰিঞ্ঞাণ মত্তানি নাম. অৰসেসানি সব্বানি ৰিঞ্ঞাণানি মনস্স ৰিঞ্ঞাণন্তি অত্থেন মনোৰিঞ্ঞাণানি নাম. তত্থ ‘‘মনস্স ৰিঞ্ঞাণং’’তি অনন্তর পচ্চয ভূতস্স ৰা মনস্স পচ্চযুপ্পন্ন ভূতং ৰিঞ্ঞাণং. এত্থ সম্পটিচ্ছন দ্ৰযং পচ্চযমনো নাম. সন্তীরণতো পট্ঠায যাৰ দ্ৰারন্তরে পঞ্চদ্ৰারা ৰজ্জনং নাগচ্ছতি, তাৰ অন্তরে সব্বং মনোৰিঞ্ঞাণ সন্তানং পচ্চযুপ্পন্ন ৰিঞ্ঞাণং নাম. পুন ‘‘মনস্স ৰিঞ্ঞাণ’’ন্তি পচ্চযুপ্পন্ন ভূতস্স মনস্স পচ্চয ভূতং ৰিঞ্ঞাণং. এত্থ পঞ্চদ্ৰারা ৰজ্জনং পচ্চযুপ্পন্ন মনো নাম. ততো পুরে সব্বং মনোৰিঞ্ঞাণ সন্তানং পচ্চয মনো নাম. সেসং সুৰিঞ্ঞেয্যং. অৰসেসাপনাতিআদীসু. ‘‘মনোৰিঞ্ঞাণধাতু ভাৰং সম্ভাৰেতী’’তি অৰসেসা পন ধম্মা মনোৰিঞ্ঞাণধাতু চ নাম হোন্তি, হদয ৰত্থুঞ্চ নিস্সাযযেৰ ৰত্তন্তীতি এৰং তেসং ধম্মানং মনোৰিঞ্ঞাণধাতু ভাৰঞ্চ সম্ভাৰেতি, ৰণ্ণেতি. সুট্ঠু পকাসেতীতি অত্থো. এত্থ পনাতিআদীসু. ‘‘পাল়িযং’’তি ইন্দ্রিয সংযুত্ত পাল়িযং. দুতীযজ্ঝানে এৰ অপরিসেস নিরোধ ৰচনং ৰিরুদ্ধং সিযা. কথং, সচে পটিঘো অনীৰরণা ৰত্থো নাম নত্থি. পথমজ্ঝানতো পুব্বে এৰ সো নিরুদ্ধো সিযা. অথ দুতীযজ্ঝানুপচারেপি সো উপ্পজ্জেয্য, পথমজ্ঝানম্পি পরিহীনং সিযা. তস্মিং পরিহীনে সতি, দুতীযজ্ঝানম্পি নুপ্পজ্জেয্য. এৰং ৰিরুদ্ধং সিযা. ‘‘পুরিম কারণমেৰা’’তি অনীৰরণা ৰত্থস্স পটিঘস্স অভাৰতোতি কারণং এৰ. পরতোঘোসো নাম সাৰকানং সম্মাদিট্ঠিপ্পটিলাভায পধান পচ্চযো হোতি. সো চ অরূপভৰে নত্থি. ধম্মাভিসমযো নাম চতুসচ্চ ধম্মপ্পটিৰেধো, বুদ্ধা চ পচ্চেক সম্বুদ্ধা চ সযম্ভুনো পরতো ঘোসেন ৰিনা ধম্মং পটিৰিজ্ঝন্তি. তে চ তত্থ নুপ্পজ্জন্তি. ‘‘রূপৰিরাগ ভাৰনাযা’’তি রূপৰিরাগ ভাৰনা বলেন. তেসং রূপাৰচর চিত্তানং. ‘‘সমতিক্কন্তত্তা’’তি তেসু নিকন্তিপ্পহানৰসেন সুট্ঠু অতিক্কন্তত্তা. সেসং সব্বং সুৰিঞ্ঞেয্যং.

পকিণ্ণকসঙ্গহদীপনিযাঅনুদীপনানিট্ঠিতা.

৪. ৰীথিসঙ্গহঅনুদীপনা

১৩৬. ৰীথিসঙ্গহে. ‘‘তেসঞ্ঞে ৰা’’তি চিত্ত চেতসিকানং এৰ. ‘‘ৰুত্তপ্পকারেনা’’তি ‘তত্থ চিত্তং তাৰ চতুব্বিধং হোতি কামাৰচরং রূপাৰচরং, তিআদিনা ইচ্চেৰং ৰুত্তপ্পকারেন. ‘‘পুব্বা পরনিযামিতং’’তি ৰা দ্ৰত্তিংস সুখ পুঞ্ঞম্হাতিআদিনা নযেন পুব্বা পরনিযামিতং. ‘‘আরব্ভগাথাযা’’তি.

ৰীথি চিত্তৰসেনেৰং, পৰত্তিয মুদীরিতো;

পৰত্তি সঙ্গহো নাম, সন্ধিযং দানি ৰুচ্চতী.তি

এৰং পৰত্তিকালে পৰত্তি সঙ্গহো, পটিসন্ধিকালে পৰত্তি সঙ্গহোতি সিদ্ধো হোতি. কেচি ৰাদে ‘‘পটিসন্ধি পৰত্তিযং’’তি নিদ্ধারণে গহিতে দ্ৰীসু পটিসন্ধি সঙ্গহ পৰত্তি সঙ্গহেসু ইদানি পৰত্তি সঙ্গহং পৰক্খামি, পচ্ছা পটিসন্ধি সঙ্গহং পৰক্খামীতি অত্থো হোতি. তত্থ ‘‘পটিসন্ধি সঙ্গহো’’তি পটিসন্ধিকালে সঙ্গহো. ‘‘পৰত্তি সঙ্গহো’’তি পৰত্তিকালে সঙ্গহো. সো চ উপরিগাথায ন সমেতীতি দস্সেতুং ‘‘এৰং সতী’’তিআদিমাহ. ‘‘তানি তীণি ছক্কানি নিক্খিত্তানী’’তি ছক্কমত্তানি নিক্খিত্তানি, ন সকলং. ৰত্থু দ্ৰারা লম্বণ সঙ্গহোতি অধিপ্পাযো. ‘‘সা পনা’’তি সাৰিসযপ্পৰত্তি পন. ‘‘কাচি সীঘতমা’’তি কাচি অতিরেকতরং সীঘা. ‘‘দন্ধা’’তি সণিকা, চিরাযিকা. ‘‘অনুপপন্না’’তি অসম্পন্না. অসম্পন্ন দোসো আগচ্ছতীতি ৰুত্তং হোতি. ‘‘ধাতুভেদং’’তি সত্ত ৰিঞ্ঞাণ ধাতূনং ৰিভাগং. ‘‘ধাতুনানত্তং’’তি ধারণ কিচ্চনানত্তং. ইতি তস্মা মনোধাতু ৰিসুং ৰুত্তাতি সম্বন্ধো. ‘‘মননং’’তি ৰিজাননভাৰং অপত্তং. আৰজ্জনমত্ত সম্পটিচ্ছনমত্ত সঙ্খাতং জাননমত্তং. ‘‘যং কিঞ্চি মননং’’তি অন্তমসো আৰজ্জনমত্ত সম্পটিচ্ছনমত্তং পীতি অধিপ্পাযো. ‘‘সুদ্ধো পন মনোৰিঞ্ঞাণপ্পবন্ধো’’তি মনোদ্ৰার ৰিকারং পটিচ্চ পৰত্তো মনোৰিঞ্ঞাণপ্পবন্ধো. ন ভৰঙ্গ মনোৰিঞ্ঞাণপ্পবন্ধো. সো হি ৰীথিমুত্তত্তা ইধ অপ্পসঙ্গোতি. মনোদ্ৰারে পন দ্ৰিধাতি সম্বন্ধো. বুদ্ধস্স ভগৰতো পথমাভিনীহারকালো নাম সুমেধতাপসকালে বুদ্ধ ভাৰায কায চিত্তানং অভিনীহারকালো. আদিসদ্দেন পচ্ছিম ভৰে পটিসন্ধিগ্গহণাদিং সঙ্গণ্হাতি. ‘‘জাতি ফলিকক্খন্ধা ৰিয সম্পজ্জন্তী’’তি তেন ওভাসেন অজ্ঝোত্থটত্তা জাতিফলিকক্খন্ধ সদিসা হোন্তীতি অধিপ্পাযো. ‘‘উপপত্তি দেৰ ব্রহ্মানং পনা’’তি উপপত্তিপ্পটিসন্ধিকানং ওপপাতিক দেৰ ব্রহ্মানং পন. ‘‘পসাদ নিস্সয ভূতানং’’তি চক্খাদীনং পসাদ ৰত্থূনং নিস্সয মহাভূতানং.

‘‘যানি পনা’’তিআদীসু. দ্ৰত্তি চিত্তক্খণানি অতিক্কম্ম আপাতং আগচ্ছন্তীতি যোজনা. এৰং পরত্থপি. ৰিভূতস্সাতি চ অৰিভূতস্সাতি চ ইদং আদিম্হি মনোদ্ৰারে পন ৰিভূতস্সাতি চ অৰিভূতস্সাতি চ পদানং উদ্ধরণং. ‘‘রূপা রূপানং’’তি রূপ ধম্মানঞ্চ অরূপ ধম্মানঞ্চ. ‘‘তাৰা’’তি ৰীথি চিত্তপ্পৰত্তি দস্সনতো পথমতরং এৰাতি অত্থো. ‘‘অদ্ধান পরিচ্ছেদং’’তি খণকাল পরিচ্ছেদং. ৰিভাৰনিপাঠে ‘‘অতিমহন্তা দিৰসেন ৰিসয ৰৰত্থানং হোতী’’তি ৰচনেন আদিম্হি ‘ছৰত্থূনি, ছ দ্ৰারানি, ছ আরম্মণানি, ছ ৰিঞ্ঞাণানি, ছ ৰীথিযো, ছ ধাৰিসযপ্পৰত্তী,তি এৰং ৰুত্তেসু ছসু ছক্কেসু ছধাৰিসযপ্পৰত্তীতি পদমত্তং সঙ্গণ্হাতি. তং অনুপপন্নং হোতি. তেনাহ ‘‘এৰঞ্হি সতী’’তিআদিং. ‘‘ৰিসয ৰৰত্থানত্থ মেৰা’’তি অতিমহন্তাদি ৰিসয ৰৰত্থানত্থমেৰ ৰুত্তন্তি ন চ সক্কা ৰত্তুং. রূপা রূপ ধম্মানং অদ্ধান পরিচ্ছেদো নাম অভিধম্মে সব্বত্থ ইচ্ছিতব্বো. তস্মা তস্স দস্সনত্থম্পি তং ৰুত্তন্তি দট্ঠব্বং. ‘‘সভাৰপ্পটিলাভো’’তি চিন্তন ফুসনাদীনং পাতুভাৰো ৰুচ্চতি. ‘‘অনিৰত্তী’’তি অনন্তরধানং ৰুচ্চতি. ‘‘পরিহাযিত্ৰা’’তি জরা কিচ্চং আহ. ‘‘অচ্ছরাসঙ্ঘাটক্খণস্সা’’তি অঙ্গুলীনং সঙ্ঘট্টনক্খণস্স. আচরিযানন্দত্থেরো নাম অভিধম্ম টীকাকারো ৰুচ্চতি. ‘‘অস্সা ৰিজ্জুযাঠিতি নাম ৰিসুং ন পঞ্ঞাযতী’’তি ৰিজ্জুপ্পাদং পস্সন্তানং ন পঞ্ঞাযতি. তথা চিত্তম্পি ৰড্ঢনানন্তরমেৰ ভিজ্জতীতি যোজনা. তেনাহ ‘‘তং পী’’তিআদিং. উদযভাগো নাম ৰড্ঢনভাগো, ৰযভাগো নাম অন্তরধানভাগো. ‘‘এৰঞ্চ কত্ৰা’’তি লদ্ধগুণ ৰচনং. ‘‘একংচিত্তং দিৰসং তিট্ঠতী’’তি পুচ্ছা ৰচনং. ‘‘আমন্তা’’তি পটিঞ্ঞা ৰচনং. ‘‘ৰযক্খণো’’তি পুচ্ছা. ‘‘ন হেৰং ৰত্তব্বে’’তি পটিক্খেপো. পচ্চত্ত ৰচনস্স একারত্তং. এৰং নৰত্তব্বন্তি অত্থো. ‘‘মহাথেরেনা’’তি মোগ্গলি পুত্ততিস্স মহাথেরেন. ননু সুত্তন্তেসু ৰুত্তন্তি সম্বন্ধো. ‘‘না’’তি ন উপলব্ভতি. ‘‘ইমস্স ৰুত্তত্তা’’তি ইমস্স ৰচনস্স ৰুত্তত্তা. সঙ্খত লক্খণং ৰিসযো যেসং তানি সঙ্খত ৰিসয লক্খণানি. সঙ্খত ধম্মমেৰ আহচ্চ তিট্ঠতি. অযং অভিধম্মে ধম্মতাতি অধিপ্পাযো. ‘‘সঙ্গহ কারেনা’’তি আচরিয বুদ্ধঘোসত্থেরং ৰদতি. ‘‘অত্থিক্খণং’’তি খণদ্ৰযমেৰ ৰুচ্চতি. ইতি ৰত্ৰা তমত্থং সাধেন্তীতি সম্বন্ধো. গাথাযং. ‘‘তস্সেৰা’’তি তস্সা ঠিতিযা এৰ ভেদো. সব্বদা সব্বপাণিনং মরণং নাম ৰুচ্চতীতি যোজনা. ‘‘তমত্থং’’তি তানি অত্থিক্খণং উপাদায লব্ভন্তীতি অত্থং. ‘‘অথৰা’’তি একো থেরৰাদো. ‘‘সন্ততি ৰসেন ঠানং’’তি ঠিতায অঞ্ঞথত্তং পঞ্ঞাযতীতি এত্থ ঠিতভাৰসঙ্খাতং ঠানং সন্ততি ঠিতিৰসেন ৰেদিতব্বন্তি ৰদন্তি. ‘‘ইমস্মিং পন সুত্তে’’তি ৰেদনায উপ্পাদো পঞ্ঞাযতি, ৰযো পঞ্ঞাযতি, ঠিতায অঞ্ঞথত্তং পঞ্ঞাযতীতি ইদং সুত্তং ৰদতি. ‘‘অপ্পটিবাহেত্ৰা’’তি অনীৰারেত্ৰা. যাৰড্ঢনস্স নিৰত্তি নাম অত্থি. উদয পরিযন্ত মত্তভূতা সা এৰ নিৰত্তি. ‘‘দ্ৰীহি খন্ধেহী’’তি রূপ জরা রূপক্খন্ধেন সঙ্গহিতা. অরূপ জরা সঙ্খারক্খন্ধেনাতি এৰং দ্ৰীহি খন্ধেহি. যঞ্চ তত্থ ৰুত্তন্তি সম্বন্ধো. রূপস্স উপ্পাদো দ্ৰিধাভিন্দিত্ৰা দেসিতো. কথং, উপচযো সন্ততী তিযোজনা. ‘‘ৰিভাগা রহস্সা’’তি উপ্পাদো উপ্পজ্জ নট্ঠেন একো সমানো রূপানং ৰড্ঢন সমযে উপ্পাদো. উপরি ৰড্ঢনট্ঠেন উপচযোতি ৰুত্তো. অৰড্ঢিত্ৰা ঠিত সমযে উপ্পাদো যথা ঠিত নীহারেন চিরকালং পৰত্তি অত্থেন সন্ততীতি ৰুত্তো. এৰং ৰিভাগা রহস্স. ‘‘যথানুলোম সাসনং’’তি ৰিনেতব্ব পুগ্গলানং অজ্ঝাসযানুলোম সাসনং.

‘‘অরূপ’’ন্তিআদীসু. ‘‘অরূপং’’তি সব্বসো রূপসণ্ঠান রহিতত্তা চিত্ত চেতসিকং নামং ৰুচ্চতি. ‘‘অরূপি সভাৰত্তা’’তি অরূপ ধম্ম সভাৰত্তা ইচ্চেৰত্থো. তত্থ অরূপ ধম্ম সভাৰো নাম রূপ ধম্মতো সতগুণেনৰাসহস্সগুণেনৰাসণ্হসুখুমসভাৰো. ৰিভাৰ নিপাঠে. ‘‘গাহক গহেতব্ব ভাৰস্স তং তং খণৰসেন নিপ্ফজ্জনতো’’তি এত্থ পঞ্চদ্ৰার ৰীথীসু ৰীথি চিত্তানঞ্চ আরম্মণানঞ্চ ৰিসযী ৰিসযভাৰো গাহক গহেতব্ব ভাৰো নাম. ‘‘তং তং খণৰসেন নিপ্ফজ্জনতো’’তি ৰীথি চিত্তানি চ একস্মিং আরম্মণেপি আৰজ্জনাদীহি নানা কিচ্চেহি গণ্হন্তা এৰ গহণ কিচ্চং সম্পাদেন্তি. নানা কিচ্চানি চ নানা চিত্তানং ৰসেন সম্পজ্জন্তি. আরম্মণানি চ পুরেজাতানি হুত্ৰা যাৰ তানি কিচ্চানি সম্পজ্জন্তি, তাৰ পচ্চুপ্পন্নভাৰেন ধরমানানি এৰ গহণং সম্পাদেন্তি. এৰং সতি, গাহকানং ৰীথি চিত্তানঞ্চ খণত্তযাযুকত্তা এৰ গাহক কিচ্চং নিপ্ফজ্জতি, সিজ্ঝতি. গহেতব্বানং আরম্মণানঞ্চ সত্তরস চিত্তক্খণাযুকত্তা এৰ গহেতব্ব কিচ্চং নিপ্ফজ্জতি, সিজ্ঝতি. এৰং তং তং খণ ৰসেন নিপ্ফজ্জনতো. ৰিঞ্ঞত্তি দ্ৰযং এক চিত্তক্খণিকং. কস্মা, চিত্তানু পরিৰত্তি ধম্মত্তা. ‘‘উপ্পাদমত্তা’’তি নিপ্ফন্ন রূপানং উপ্পাদমত্তা. ‘‘ভঙ্গমত্তা’’তি তেসমেৰ ভঙ্গমত্তা. ‘‘রূপ ধম্মানং’’তি নিপ্ফন্ন রূপ ধম্মানং. ‘‘উপ্পাদনিরোধ ৰিধানস্সা’’তি উপ্পাদ নিরোধ ৰিধানভূতস্স মহাঅট্ঠকথাৰাদস্স পটিসিদ্ধত্তাতি সম্বন্ধো. ‘‘তং’’তি তং মহাঅট্ঠকথা ৰচনং. ‘‘তস্মিং ৰাদে’’তি তস্মিং মহাঅট্ঠকথাৰাদে. ‘‘তত্থ আগতা’’তি তস্মিং ৰাদে আগতা. যং পন ৰিভাৰনিযং কারণং ৰুত্তন্তি সম্বন্ধো. ‘‘তং টীকানযং’’তি তং সোল়স চিত্তক্খণাযুক দীপকং মূলটীকানযং. তদত্থং সাধেন্তেন ৰিভাৰনি টীকাচরিযেন ৰুত্তন্তি সম্বন্ধো. সঙ্গহকারস্স অট্ঠকথা চরিযস্স. ‘‘উপচরীযতী’’তি উপচার ৰসেন ৰোহরীযতি. ৰিভাৰনিপাঠে. ‘‘এতানী’’তি আরম্মণানি. ‘‘তং’’তি তং এক চিত্তক্খণং. ‘‘তে চা’’তি রূপ ধম্মা চ. ‘‘পরিপুণ্ণ পচ্চযূপলদ্ধা’’তি পরিপুণ্ণং পচ্চযং উপলদ্ধা. ‘‘সো’’তি টীকাকারো. ‘‘ইতরানী’’তি গন্ধরস ফোট্ঠব্বানি. ‘‘গোচরভাৰং’’তি পঞ্চদ্ৰারিক চিত্তানং গোচরভাৰং. ‘‘পুরিমানি দ্ৰে’’তি রূপসদ্দা রম্মণানি. ‘‘নিমিত্ত ৰসেন ঘট্টেন্তী’’তি আদাসং পস্সন্তস্স মুখসদিসং মুখনিমিত্তং মুখপ্পটিবিম্বং আদাসে উপট্ঠাতি. এৰং রূপারম্মণং চক্খুপসাদে সদ্দারম্মণঞ্চ সোতপসাদে তং সদিস নিমিত্ত ৰসেন ঘট্টেন্তি. নৰত্থু ৰসেন ঘট্টেন্তি. সযং গন্ত্ৰা ন ঘট্টেন্তীতি অধিপ্পাযো. অসম্পত্তানঞ্ঞেৰ আরম্মণানং. ‘‘নিমিত্তু পট্ঠান ৰসেনা’’তি নিমিত্তস্স উপট্ঠানৰসেন. ‘‘নিমিত্ত অপ্পনাৰসেনা’’তি নিমিত্তস্স পৰেসন ৰসেন. মনোদ্ৰারে পন অসম্পত্তানিযেৰ হুত্ৰাতি পাঠসেসো. ‘‘আপাতা গমনঞ্চেত্থা’’তিআদীসু. ‘‘লঞ্ছকানং’’তি লঞ্ছনকারানং. ‘‘লঞ্ছনক্খন্ধং’’তি অযোমযং লঞ্ছনক্খন্ধং. সো চ লঞ্ছনক্খন্ধো তালপণ্ণে আপাতেত্ৰা অক্খরং উপট্ঠাপেতি. তত্থ ‘‘আপাতেত্ৰা’’তি অজ্ঝোত্থরিত্ৰা. ‘‘চক্খাদিপ্পথে’’তি চক্খাদীনং ৰিসযক্খেত্তে. ন কেৰলং অত্তনো দ্ৰারেসু এৰ আপাত মাগচ্ছন্তি. অথ খো মনোদ্ৰারেপি আপাত মাগচ্ছন্তি. ন কেৰলং ভৰঙ্গ মনোদ্ৰারে এৰ আপাত মাগচ্ছন্তীতি যোজনা. ‘‘তেসু পনা’’তি তেসু আরম্মণেসু পন. তানি আরম্মণানি যেসং তানি তদা রম্মণানি. ন একক্খণে পঞ্চসু আরম্মণেসু ৰীথি চিত্তানি পৰত্তন্তি, একেকস্মিং আরম্মণে এৰাতি ৰুত্তত্তা ন দ্ৰীসু, ন তীসু, ন চতূসূতিপি ৰত্তব্বং. বহুচিত্তক্খণাতীতানি পঞ্চারম্মণানি বহুচিত্তক্খণাতীতে পঞ্চদ্ৰারেতি যোজনা. পঞ্চদ্ৰারেতি চ পঞ্চদ্ৰারেসূতি অত্থো. ‘‘এৰং সতী’’তি তেসং পসাদানং আৰজ্জনেন সদ্ধিং উপ্পত্তিযা সতি. ‘‘আদিলক্খণং’’তি পঞ্চারম্মণানং পঞ্চদ্ৰারেসু আপাতা গমন সঙ্খাতং ৰিসযপ্পৰত্তিযা আদিলক্খণং. চলনঞ্চ দট্ঠব্বন্তি সম্বন্ধো. ‘‘যথা গহিতং’’তি পটিসন্ধিতো পট্ঠায গহিতপ্পকারং. ৰিভাৰনিপাঠে ‘‘যোগ্য দেসাৰট্ঠান ৰসেনা’’তি আপাতং আগন্তুং যুত্তট্ঠানে অৰেচ্চট্ঠান ৰসেন. যুজ্জনঞ্চ, মন্থনঞ্চ, খোভকরণঞ্চ, ঘট্টনন্তি চ আপাতা গমনন্তি চ ৰুচ্চতীতি যোজনা. হেট্ঠা ৰুত্তোযেৰ আপাতা গমনঞ্চেত্থাতিআদিনা. ‘‘নানা ঠানিযেসূ’’তি নানা ঠানেসু ঠিতেসু. ‘‘একো ধম্মনিযামো নামা’’তি যথা বোধিসত্তে মাতুকুচ্ছিম্হি পটিসন্ধিং গণ্হন্তে ধম্মনিযাম ৰসেন সকলে জাতিক্খেত্তে পথৰিকম্পনং অহোসি. তথা ইধপি পঞ্চদ্ৰারেসু একেকস্মিং দ্ৰারে আরম্মণে ঘট্টেন্তে ধম্মনিযাম ৰসেন ভৰঙ্গ চলনং হোতি. অযং ধম্মনিযামো নাম. ‘‘সহেৰা’’তি একতোযেৰ. কথং হদয ৰত্থু নিস্সিতস্স ভৰঙ্গস্স চলনং সিযাতি যোজনা. এত্থ চ পঞ্চৰিঞ্ঞাণস্স চলনং সিযাতি ইদং ন ৰত্তব্বং. কস্মা, তদা পঞ্চৰিঞ্ঞাণস্স অৰিজ্জমানত্তা. যদা চ তং ৰিজ্জতি, তদা তং ন চলতীতি ন ৰত্তব্বং. সব্বম্পি হি ৰীথিচিত্তং নাম চলতি যেৰাতি. সন্ততি নাম পুব্বা পরপ্পবন্ধো. সণ্ঠানং নাম সহপ্পৰত্তানং একতো ঠিতি. ইধ সণ্ঠানং অধিপ্পেতং. পঞ্চনিস্সয মহাভূতেহি সদ্ধিং হদয ৰত্থু নিস্সযভূতানং এক সণ্ঠান ভাৰেন একাবদ্ধত্তাতি ৰুত্তং হোতি. তেনাহ ‘‘সণ্ঠান ৰসেনাতি পন ৰত্তব্বং’’তি. ‘‘তাদিসস্স অনুক্কম চলনস্সা’’তি ৰিভাৰনিযং ভেরিসক্খরোপমায সদ্ধিং রূপাদিনা পসাদে ঘট্টিতে তন্নিস্স যেসু মহাভূতেসু চলিতেসু অনুক্কমেন তং সম্বন্ধানং সেসরূপানম্পি চলনেন হদয ৰত্থুম্হি চলিতে তন্নিস্সিতস্স ভৰঙ্গস্স চলনা কারেন পৰত্তিতোতীতি এৰং ৰুত্তস্স অনুক্কম চলনস্স. ‘‘ভৰঙ্গপ্পৰাহং’’তি ভৰঙ্গ সন্ততিং. ‘‘কুরুমানং’’তি করোন্তং. সল্লক্খেন্তং’’তি ইদমেৰাতি সন্নিট্ঠাপেন্তং. ‘‘যোনি সোমনসিকারাদিৰসেনা’’তি যোনি সোমনসিকারো কুসল জৰনুপ্পত্তিযা পচ্চযো. অযোনি সোমনসিকারো অকুসল জৰনুপ্পত্তিযা পচ্চযো. নিরনুসয সন্তানতা ক্রিযজৰনুপ্পত্তিযা পচ্চযো. তেসু চ সোমনস্স জৰনাদীনং উপ্পত্তি পচ্চযোপি হেট্ঠা চিত্ত সঙ্গহে ৰুত্তনযেন ৰেদিতব্বো.

‘‘ভৰঙ্গপাতো’’তিআদীসু. ‘‘আৰজ্জনতো পট্ঠায উট্ঠিতং’’তি কম্ম ৰিপাকসন্তানতো চ তদারম্মণতো চ মুঞ্চিত্ৰা ৰিসুং ক্রিযাময ব্যাপারেন আরম্মণন্তরং গহেত্ৰা উট্ঠিতং সমুট্ঠিতং. ভৰঙ্গ চলনম্পি উট্ঠানস্স আদি হোতি. তস্মা তম্পি উট্ঠিতে চিত্ত সন্তানে সঙ্গণ্হন্তো পথম ভৰঙ্গ চলনতোযেৰ ৰাতি ৰুত্তং. ‘‘ইমস্মিং ঠানে’’তি ৰীথি চিত্তানং অনুক্কমেন অত্তনো কিচ্চেহি আরম্মণপ্পৰত্তিট্ঠানে. ‘‘দোৰারিকোপমা’’তি বধিরদোৰারিকোপমা. ‘‘গামিল্লোপমা’’তি গামদারকোপমা. ‘‘অম্বোপমা’’তি অম্বপ্ফলোপমা. অঞ্ঞাপি উপমা অত্থি. মক্কটসুত্তোপমা, উচ্ছুযন্তোপমা, জচ্চন্ধোপমা. তাসব্বাপি অট্ঠসালিনিযং ৰিপাকুদ্ধার কথাতো গহেতব্বা. ‘‘যত্থহী’’তিআদীসু. ‘‘কথং ছ ছক্ক যোজনা হোতী’’তি. চক্খু ৰত্থু ৰচনঞ্চ, চক্খুদ্ৰার ৰচনঞ্চ, রূপা রম্মণ ৰচনঞ্চ, চক্খু ৰিঞ্ঞাণ ৰচনঞ্চ, চক্খুদ্ৰার ৰীথি চক্খু ৰিঞ্ঞাণ ৰীথি ৰচনঞ্চ, অতিমহন্তা রম্মণ ৰচনঞ্চা,তি এতানি ছৰচনানি. তেহি ছছক্কেহি আহরিত্ৰা ইমিস্সং ৰীথিযং দস্সিতানি. সেসৰীথীসুপি যথালাভং দস্সিতব্বানি. এৰং ছছক্কযোজনা হোতি. ‘‘এত্থ চ যত্তকানী’’তিআদীসু. ‘‘একূন পঞ্ঞাস পরিমাণেসূ’’তি একস্সনিপ্ফন্ন রূপধম্মস্স একপঞ্ঞাস মত্তেসু খুদ্দকক্খণেসু উপ্পাদক্খণঞ্চ ভঙ্গক্খণঞ্চ ঠপেত্ৰা মজ্ঝে একূন পঞ্ঞাস মত্তানি ঠিতিক্খণানি সন্তি. তেসু খণেসু অনুক্কমেন উপ্পন্না একূন পঞ্ঞাস চক্খু পসাদা চ সন্তি. ‘‘কিস্মিঞ্চী’’তি তেসু কতরস্মিং নাম চক্খু পসাদে ন ঘট্টেন্তীতি ন ৰত্তব্বানি. ‘‘তেসু পনা’’তি নিদ্ধারণে ভুম্মৰচনং. ‘‘যদেৰ একং চক্খূ’’তি নিদ্ধারণীযং. তং পন কতমন্তি. অতীত ভৰঙ্গেন সদ্ধিং উপ্পজ্জিত্ৰা তং অতিক্কম্ম ভৰঙ্গ চলনক্খণে লদ্ধঘটনং একং চক্খু. তং পন চক্খু ৰিঞ্ঞাণস্স ৰত্থু ভাৰঞ্চ দ্ৰারভাৰঞ্চ সাধেতি. সেসৰিঞ্ঞাণানং দ্ৰারভাৰং সাধেতীতি. তেনাহ ‘‘যথারহং’’তি. এতদেৰ এতং এৰ চক্খু কিচ্চ সাধনং নাম হোতি ৰীথি চিত্তুপ্পত্তিযা ৰত্থু কিচ্চদ্ৰার কিচ্চানং সাধনতো. ‘‘যং মজ্ঝিমাযুকং’’তি মন্দাযুক অমন্দাযুকানং মজ্ঝে পৰত্তত্তা যং মজ্ঝিমাযুকন্তি ৰদন্তি. তং কিচ্চ সাধনং নামাতি যোজনা. ‘‘ইতরানি পনা’’তি একূন পঞ্ঞাস পরিমাণেসু চক্খু পসাদেসূতি ৰুত্তানি, তেসু একং কিচ্চ সাধনং ঠপেত্ৰা সেসানি ইতরানি অট্ঠ চত্তালীস চক্খূনি মোঘৰত্থূনি নাম হোন্তি. রূপা রম্মণেহি সদ্ধিং লদ্ধ ঘট্টনানম্পি সতং ৰীথি চিত্তুপ্পত্তিযা ৰত্থু কিচ্চদ্ৰার কিচ্চরহিতত্তা. তেসু কতমানি মন্দাযুকানি নামাতি আহ ‘‘তানি পনা’’তিআদিং. কিচ্চ সাধনতো পুরিমানি নাম অতীত ভৰঙ্গতো পুরে তেরসসু ভৰঙ্গেসু আদি ভৰঙ্গস্স ভঙ্গক্খণতো পট্ঠায খণে খণে উপ্পন্না সত্ততিংস চক্খু পসাদা. তানি মন্দাযুকানীতি ৰদন্তি. কস্মা, কিচ্চ সাধনতো অপ্পতরাযুকত্তা. কিচ্চ সাধনতো পচ্ছিমানি নাম অতীত ভৰঙ্গস্স ঠিতিক্খণতো পট্ঠায খণে খণে উপ্পন্না একাদস চক্খু পসাদা, তানি অমন্দাযুকানীতি ৰদন্তি. কস্মা, কিচ্চ সাধনতো বহুতরাযুকত্তা. তদুভযানিপি অট্ঠ চত্তালীস মত্তানি ৰেদিতব্বানীতি সম্বন্ধো. ‘‘ততো’’তি তেহি অট্ঠচত্তালীস মত্তেহি. ‘‘পুরিমতরানী’’তি সত্ততিংস মন্দাযুকেহি পুরিমতরানি. তানি হি চক্খু ৰিঞ্ঞাণস্স উপ্পাদক্খণে ঠিতি ভাৰেন অনুপলদ্ধত্তা ইধ ন গহিতানি. ‘‘পচ্ছিমতরানী’’তি একাদস অমন্দাযুকেহি পচ্ছিমতরানি. তানি চ চক্খু ৰিঞ্ঞাণস্স উপ্পাদক্খণে উপ্পন্নানিপি তস্মিং খণে ঠিতি ভাৰেন অনুপলদ্ধত্তা ইধ ন গহিতানি. কস্মা পন চক্খুৰিঞ্ঞাণস্স উপ্পাদক্খণে ঠিতি ভাৰেন অনুপলদ্ধানি তদুভযানি ইধ ন গহিতানীতি. চক্খু ৰিঞ্ঞাণস্স উপ্পাদক্খণে ঠিতি ভাৰেন ধরমানানং অট্ঠচত্তালীস মত্তানং চক্খূনং মজ্ঝে এৰ কতমং চক্খু চক্খু ৰিঞ্ঞাণস্স ৰত্থু কিচ্চ দ্ৰার কিচ্চং সাধেতীতি আসঙ্কিতব্বং হোতি. এত্থ চ পঞ্চ ৰত্থূনি নাম অত্তনো ঠিতিক্খণে এৰ পঞ্চৰিঞ্ঞাণানং ৰত্থুদ্ৰার কিচ্চ সাধকত্তা চক্খু ৰিঞ্ঞাণস্স উপ্পাদক্খণে ঠিতি ভাৰেন অনুপলদ্ধত্তা ইধ ন গহিতানীতি চ, চক্খু ৰিঞ্ঞাণস্স উপ্পাদক্খণে ঠিতি ভাৰেন ধরমানানন্তি চ, ৰুত্তন্তি দট্ঠব্বং.

‘‘এত্থ সিযা’’তিআদীসু. ‘‘ইমায ৰীথিযা’’তি ইমায অতিমহন্তা রম্মণ ৰীথিযা. ‘‘সমুদাযগ্গাহিকা’’তি রূপা রম্মণানং সমূহগ্গাহিকা. ‘‘ৰণ্ণসল্লক্খণা’’তি ৰণ্ণৰৰত্থানিকা. ‘‘ৰত্থুগ্গাহিকা’’তি দব্ব সণ্ঠানগ্গাহিকা. ‘‘নামগ্গাহিকা’’তি নাম পঞ্ঞত্তিগ্গাহিকা. ‘‘অলাতচক্কস্স গাহিকা ৰিযা’’তি রত্তন্ধকারে একো অলাতং গহেত্ৰা পরিব্ভমতি. অঞ্ঞো তং পস্সন্তো চক্কং ৰিয মঞ্ঞতি. তত্থ অলাতস্স গতগতট্ঠানে পচ্চুপ্পন্নং রূপং আরব্ভ চক্খুদ্ৰার ৰীথিযো উপ্পজ্জন্তি. মনোদ্ৰার ৰীথিযো পন পুরিম পুরিমাহি চক্খুদ্ৰার ৰীথীহি গহিতানি অতীত রূপানি অমুঞ্চিত্ৰা একতো সণ্ঠানঞ্চ সন্ততিঞ্চ কত্ৰা গণ্হন্তি. তদা পস্সন্তস্স চক্কং ৰিয উপট্ঠাতি. এৰং অযং সমুদাযগ্গাহিকা দট্ঠব্বা. ‘‘নত্থি তদারম্মণুপ্পাদো’’তিআদীসু. ‘‘যস্সা’’তি যস্স আরম্মণস্স. চিত্তানীতি চ নানারম্মণানীতি চ কম্মপদানি. অৰসেসে তস্মিং আরম্মণে. ‘‘সঙ্গহ কারেনা’’তি পোরাণ অট্ঠকথাযো একতো সঙ্গহেত্ৰা কতত্তা বুদ্ধঘোসত্থেরেন কতা সব্বা অট্ঠকথাযো সঙ্গহট্ঠকথা নাম. সো চ সঙ্গহ কারোতি ৰুচ্চতি. ‘‘ইধ পী’’তি ইমস্মিং অভিধম্মত্থ সঙ্গহেপি. ‘‘থেরেনা’’তি অনুরুদ্ধত্থেরেন. ‘‘একম্পি ইচ্ছতি যেৰা’’তি. ‘‘যস্স হি চত্তারী’’তিআদীসু যস্স আরম্মণস্স চত্তারি ৰা পঞ্চৰা ছৰাতিআদিনা যোজেতব্বং. ‘‘জৰনম্পি অনুপ্পজ্জিত্ৰা’’তিআদীসু. ‘‘অত্তনো পধান ক্রিযাযা’’তি অনুপ্পজ্জিত্ৰাতি পদস্স পরতো ‘যং পৰত্ততী’তি অত্তনো পধান ক্রিযাপদং অত্থি. তেন অত্তনো ক্রিযাপদেন সদ্ধিন্তি অত্থো. ‘‘কত্থচি ৰুত্তা’’তি কত্থচি সদ্দগন্থেসু ৰুত্তা. অপি চ, হেতুম্হি ত্ৰাপচ্চযো লক্খণে হেতুম্হি চ মানন্ত পচ্চযা জোতনীযট্ঠেন ৰুত্তা, ন ৰচনীযট্ঠেনাতি দট্ঠব্বা. ‘‘পকতি নিযামেনা’’তি এতেন পচ্চয ৰিসেসেসতি, চত্তারি ৰা পঞ্চৰা ছৰা জৰনানি উপ্পজ্জন্তীতি দীপেতি. তেনাহ ‘‘এত্থপনা’’তিআদিং. ‘‘দ্ৰত্তিক্খত্তুং’’তি ৰাসদ্দত্থে অঞ্ঞপদত্থ সমাসপদন্তি ৰুত্তং ‘‘দ্ৰিক্খত্তুং ৰা তিক্খত্তুং ৰা’’তি. ‘‘ৰোট্ঠব্বনস্স আসেৰনতা’’তি আসেৰন পচ্চযতাৰা পচ্চযুপ্পন্নতাৰা. ‘‘আৰজ্জনাযা’’তি এত্থ ৰোট্ঠব্বন কিচ্চং আৰজ্জনম্পি সঙ্গণ্হাতি. ইধপি আরম্মণ দুব্বলতায চতুপ্পঞ্চ জৰনুপ্পত্তি ইচ্ছি তব্বাতি যোজনা. তত্থ ‘‘ইধ পী’’তি ইমস্মিং পরিত্তা রম্মণ ৰারেপি. তিৰোট্ঠব্বনিকা পঞ্চ পরিত্তা রম্মণ ৰীথিযোতি যোজনা. ‘‘ইতরানী’’তি পরিত্ত মহন্তাতি মহন্তা রম্মণানি. ‘‘উভযথাপী’’তি আপাতা গমন ৰসেনপি আরম্মণ করণ ৰসেনপি. ইমস্স পদস্স.

১৩৭. ‘‘মনোদ্ৰারে পনা’’তিআদীসু. ‘‘পরিত্তক্খণা পী’’তি চিত্ত ফস্সাদযো অপ্পতরক্খণাপি. ‘‘অতীতানাগতা পী’’তি অতীতানাগত ধম্মাপি. ‘‘ঘট্টনেনা’’তি রূপাদীনং ঘট্টনেন. ‘‘যত্থা’’তি যস্মিং ভৰঙ্গে. ‘‘পঞ্চদ্ৰারানু বন্ধকং’’তি পঞ্চদ্ৰার ৰীথি অনুগতং. অতীতং আলম্বণং পৰত্তেতি যেৰাতি সম্বন্ধো. ‘‘যথাপাতা গতমেৰা’’তি পকতিযা আপাতা গতপ্পকারমেৰ. ‘‘তথা তথা’’তি দিট্ঠ সম্বন্ধাদিনা তেন তেন পকারেন. ‘‘কিঞ্চী’’তি কিঞ্চি আরম্মণং. ‘‘দিস্ৰা’’তি পচ্চক্খং কত্ৰা. পঞ্চদ্ৰারগ্গহিতঞ্হি আরম্মণং পচ্চক্খকতট্ঠেন দিট্ঠন্তি ৰুচ্চতি. যং কিঞ্চি আরম্মণং. ‘‘অনুমানেন্তস্সা’’তি এৰমেৰ ভৰিত্থ, ভৰিস্সতি, ভৰতীতি অনুমানঞ্ঞাণেন চিন্তেন্তস্স. তং সদিসং আরম্মণং. ‘‘পরস্স সদ্দহনা’’তি পরৰচনং সুত্ৰা যথা অযং ৰদতি, তথে ৰেতন্তি সদ্দহনা. ‘‘দিট্ঠি’’ ৰুচ্চতি ঞাণং ৰা লদ্ধি ৰা. ‘‘নিজ্ঝানং’’তি সুট্ঠু ওলোকনং. ‘‘খন্তী’’তি খমনং সহনং. অঞ্ঞথত্তং অগমনং. দিট্ঠিযা নিজ্ঝানং দিট্ঠিনিজ্ঝানং. দিট্ঠিনিজ্ঝানস্স খন্তি দিট্ঠিনিজ্ঝানক্খন্তি. ‘‘সেসং’’তি নানাকম্ম বলেনাতিআদিকং. ‘‘দেৰতো পসংহারৰসেনা’’তি দেৰতা কদাচি কেসঞ্চি সুপিনন্তে নানারম্মণানি উপসংহরিত্ৰা দস্সেন্তি. এৰং দেৰতো পসংহার ৰসেনাপি. অনুবোধো নাম লোকিযঞ্ঞাণ ৰসেন চতুস্সচ্চ ধম্মানং অনুবুজ্ঝনং. পটিৰেধো নাম লোকুত্তরঞ্ঞাণ কিচ্চং. অনন্ত রূপ নিস্সয পচ্চযগ্গহণেন পকতূ পনিস্সয পচ্চযম্পি উপলক্খেতি. চিত্ত সন্তানস্স অনন্তরূপনিস্সয পচ্চযভাৰো নামাতি সম্বন্ধো. অনন্ত রূপ নিস্সয পচ্চযসত্তি নাম অনন্তর পরম্পর ৰিপ্ফরণৰসেন মহাগতিকা হোতীতি ৰুত্তং হোতি. অনন্ত রূপ নিস্সয পচ্চযানু ভাৰোতিপি যুজ্জতি. কথং মহাৰিপ্ফারোতি আহ ‘‘সকিং পী’’তিআদিং. ‘‘সুট্ঠু আসেৰিত্ৰা’’তি এত্থ পচ্ছা অপ্পমুস্সমানং কত্ৰা পুনপ্পুনং সেৰনং সুট্ঠু আসেৰনং নাম. ন কেৰলং পুরিম চিত্ত সন্তানস্স সো উপনিস্সয পচ্চযানুভাৰো এৰ মহাৰিপ্ফারো হোতি. পকতিযা চিত্তস্স ৰিচিত্ত ভাৰ সঙ্খাতং চিন্তনা কিচ্চম্পি মহাৰিপ্ফারং হোতীতি দস্সেতুং ‘‘চিত্তঞ্চ নামা’’তিআদিৰুত্তং. কথং মহাৰিপ্ফারং হোতীতি আহ ‘‘কিঞ্চি নিমিত্তং’’তিআদিং. ‘‘কিঞ্চি নিমিত্তং’’তি দিট্ঠাদীসু নানা রম্মণেসু কিঞ্চি অপ্পমত্তকং দিট্ঠাদিকং আরম্মণ নিমিত্তং. ‘‘তেহি চকারণেহী’’তি তেহি কত্তুভূতেহি দিট্ঠাদীহি কারণেহি. ‘‘চোদীযমানং’’তি পযোজীযমানং. ‘‘অজ্ঝাসয যুত্তং’’তি অজ্ঝাসযেন সংযুত্তং. ভৰঙ্গ চিত্তস্স আরম্মণং নাম অৰিভূতং হোতি. ভৰঙ্গং চালেত্ৰা আৰজ্জনং নিযোজেতীতি সম্বন্ধো. ‘‘লদ্ধ পচ্চযেসূ’’তি আলোকাদিৰসেন ৰা দিট্ঠাদিৰসেন ৰা লদ্ধ পচ্চযৰন্তেসু. তদভিনিন্নাকারো নাম নিচ্চকালম্পি তেসু আরম্মণেসু অভিমুখং নিন্নাকারো. তেন আকারেন পৰত্তো মনসিকারো. তেন সম্পযুত্তস্স. এতেহি ৰচনেহি সুদ্ধমনোদ্ৰারে আরম্মণানং অপাতাগমনঞ্চ ভৰঙ্গ চলনঞ্চ ন কেৰলং লদ্ধ পচ্চযানং আরম্মণানং ৰসেনেৰ হোতি. তাদিসেন পন মনসিকারেন যুত্তস্স সযঞ্চ ৰীথি চিত্ত চিন্তনা কিচ্চস্স চিত্তস্স ৰসেনাপি হোতীতি সিদ্ধং হোতি. ন হি আরম্মণন্তরে অভিনিন্নাকারো নাম নত্থীতি সক্কা ৰত্তুং. কস্মা, অভাৰিত চিত্তানং পমাদ বহুলানং জনানং কদাচি করহচি ভাৰনা মনসিকারে করীযমানেপি ৰীথি চিত্ত সন্তানস্স বহিদ্ধা নানারম্মণেসু অভিনিন্নাকারস্স সন্দিস্সনতোতি. ‘‘যথা চেত্থা’’তি যথা এত্থ মনোদ্ৰারে রূপারূপ সত্তানং ৰিভূতা রম্মণেপি তদা রম্মণুপ্পাদো নত্থি, এৰন্তি যোজনা. ঞাণৰিভঙ্গট্ঠকথাযং পন ৰোট্ঠব্বনৰারোপি আগতো. যথাহ সুপিনেনেৰ দিট্ঠং ৰিয মে, সুতং ৰিয মেতি কথনকালেপি অব্যাকতো যেৰাতি. তত্থ হি ‘‘অব্যাকতো যেৰা’’তি সুপিনন্তে মনোদ্ৰারে দ্ৰত্তিক্খত্তুং উপ্পন্নস্স আৰজ্জনস্স ৰসেন অব্যাকতোযেৰ. ততো পরং ভৰঙ্গপাতো. অট্ঠসালিনিযম্পি ৰুত্তং অযং পন ৰারো দিট্ঠং ৰিয মে, সুতং ৰিয মে তিআদীনি ৰদনকালে লব্ভতীতি. তং পন পঞ্চ দ্ৰারে পরিত্তারম্মণে দ্ৰত্তিক্খত্তুং উপ্পন্নস্স ৰোট্ঠব্বনস্স ৰসেন ৰুত্তং. ‘‘সোপি ইধ লদ্ধুং ৰট্টতি যেৰা’’তি সোপি ৰারো ইমস্মিং মনোদ্ৰারে লদ্ধুং ৰট্টতিযেৰ. ‘‘ভৰঙ্গে চলিতে নিৰত্তনকৰারানং’’তি দ্ৰিক্খত্তুং ভৰঙ্গ চলনমত্তে ঠত্ৰা ৰীথি চিত্তানি অনুপ্পজ্জিত্ৰা ভৰঙ্গপাতৰসেন নিৰত্তনকানং মোঘৰারানং মনোদ্ৰারেপি পমাণং ন ভৰিস্সতিযেৰ. অথ ইমস্মিংৰারে ৰীথি চিত্তপ্পৰত্তি নত্থি. এৰং সতি, ইমস্মিং ৰীথি সঙ্গহে সো ৰারো ন ৰত্তব্বোতি চে. ৰত্তব্বোযেৰ. কস্মা, ছধা ৰিসযপ্পৰত্তীতি ইমস্মিং ছক্কে সঙ্গহিতত্তাতি দস্সেতুং ‘‘ৰিসযে চ আপাতাগতে’’তিআদি ৰুত্তং. আরম্মণভূতা ৰিসযপ্পৰত্তি. একেকস্মিং অনুবন্ধকৰারে. ‘‘তদারম্মণ ৰারাদযো’’তি তদারম্মণ ৰারো জৰনৰারো ৰোট্ঠব্বন ৰারো মোঘৰারো. তেসু পন তদা রম্মণৰারো ৰত্থুগ্গহণে চ নামগ্গহণে চ ন লব্ভতি. ‘‘ৰত্থূ’’তি হি সণ্ঠান পঞ্ঞত্তি. ‘‘নামং’’তি নাম পঞ্ঞত্তি. ন চ তদা রম্মণং পঞ্ঞত্তা রম্মণং হোতীতি. তেন ৰুত্তং ‘‘যথারহং’’তি. ‘‘তত্থা’’তি তেসু দিট্ঠৰারাদীসু ছসু ৰারেসু. এতরহি পন কেচি আচরিযাতি পাঠসেসো. ‘‘অতীত ভৰঙ্গ ৰসেনা’’তি একং ভৰঙ্গং অতিক্কম্ম আপাতা গতে আরম্মণে একো ৰারো, দ্ৰে ভৰঙ্গানি অতিক্কম্ম আপাতা গতে একোতিআদিনা অতীত ভৰঙ্গ ভেদৰসেন. ‘‘তদা রম্মণ ৰসেনা’’তি তদা রম্মণস্স উপ্পন্নৰারো অনুপ্পন্ন ৰারোতি এৰং তদা রম্মণ ৰসেন. কপ্পেন্তি চিন্তেন্তি, ৰিদহন্তি ৰা. ‘‘খণ ৰসেন বলৰদুব্বলতা সম্ভৰো’’তি যথা পঞ্চদ্ৰারে অতিমহন্তা রম্মণেসুপি আরম্মণ ধম্মা উপ্পাদং পত্ৰা আদিতো একচিত্তক্খণমত্তে দুব্বলা হোন্তি. অত্তনো দ্ৰারেসু আপাতং আগন্তুং ন সক্কোন্তি. এক চিত্তক্খণং পন অতিক্কম্ম বলৰন্তা হোন্তি. অত্তনো দ্ৰারেসু আপাতং গন্তুং সক্কোন্তি. মহন্তা রম্মণাদীসু পন দ্ৰি চিত্তক্খণিকমত্তে দুব্বলা হোন্তীতিআদিনা ৰত্তব্বা. ন তথা মনোদ্ৰারে আরম্মণানং খণ ৰসেন বলৰদুব্বলতা সম্ভৰো অত্থি. কস্মা নত্থীতি আহ ‘‘তদা’’তিআদিং. তত্থ ‘‘তদা’’তি তস্মিং ৰীথি চিত্তপ্পৰত্তিকালে. ‘‘তত্থা’’তি মনোদ্ৰারে.

‘‘এত্থ সিযা’’তিআদীসু. ‘‘সিযা’’তি কেসঞ্চি ৰিচারণা সিযা. একং আৰজ্জনং অস্সাতি একাৰজ্জনা. ‘‘ৰীথী’’তি ৰীথিচিত্তপ্পবন্ধো. একাৰজ্জনা চ সা ৰীথি চাতি ৰিগ্গহো. ‘‘আৰজ্জনং’’তি আৰজ্জন চিত্তং. তং ৰা আৰজ্জতীতি সম্বন্ধো. ‘‘তং তং জৰনেনা’’তি তেন তেন জৰনেন সহুপ্পন্নং ৰা পরস্স চিত্তং আৰজ্জতি কিন্তি যোজনা. ‘‘কিঞ্চেত্থা’’তি এত্থ ৰচনে কিঞ্চি ৰত্তব্বং অত্থীতি অত্থো. যদি তাৰ আৰজ্জনঞ্চ জৰনানি চাতি অধিকারো. ‘‘তঞ্হি চিত্তং’’তি পরস্স চিত্তং. ‘‘এৰম্পি ভিন্নমেৰা’’তি জৰনানং ধম্মতো ভিন্নমেৰ. এত্থ অট্ঠকথাযং ৰিনিচ্ছিতন্তি সম্বন্ধো. তং চিত্তং নিরুদ্ধম্পি জৰনানম্পি পচ্চুপ্পন্নমেৰ হোতীতি যোজনা. ‘‘অদ্ধাৰসেন গহিতং’’তি অদ্ধা পচ্চুপ্পন্ন ৰসেন গহিতং. ‘‘সন্ততিৰসেন গহিতং’’তি সন্ততি পচ্চুপ্পন্নৰসেন গহিতং. আচরিযানন্দমতে. সব্বেসম্পি আৰজ্জন জৰনানং. চিত্তমেৰ হোতি, তস্মা ধম্মতো অভিন্নং. পচ্চুপ্পন্নঞ্চ হোতি, তস্মা কালতো অভিন্নন্তি ৰুত্তং হোতি. অনন্তরপচ্চযে অতীতো চ পচ্চুপ্পন্নো চ খণ ৰসেন যুজ্জতি. যদি অদ্ধাসন্ততি ৰসেন যুজ্জেয্য, পচ্চুপ্পন্নো ধম্মো পচ্চুপ্পন্নস্স ধম্মস্স অনন্তর পচ্চযেন পচ্চযোতি ৰুত্তো ভৰেয্য. কস্মা, একাৰজ্জন ৰীথিযঞ্হি সব্বানি চিত্তানি অদ্ধাসন্ততি ৰসেন পচ্চুপ্পন্নানি এৰ হোন্তীতি.

১৩৮. অপ্পনাৰারে. ‘‘অপ্পনা জৰনং’’তি কম্মপদং. ‘‘তদা রম্মণং’’তি কত্তুপদং. ‘‘ইন্দ্রিয সমতাদীহী’’তি সদ্ধাদীনং পঞ্চন্নং ইন্দ্রিযানং অঞ্ঞমঞ্ঞং অনতি ৰত্তনৰসেন সমতাদীহি. ‘‘পরিতো’’তি সমন্ততো. ‘‘উপেচ্চা’’তি উপগন্ত্ৰা. অপ্পনং ৰহিতুং জনেতুং সমত্থ ভাৰো অপ্পনাৰহসমত্থভাৰো. ‘‘যস্স পৰত্তিযা’’তি যস্স উপচার জৰনস্স পৰত্তিতো. ‘‘অচিরং কালং’’তি অচিরেকালে. পরিত্ত জাতিকা নাম কামাৰচরজাতি. ‘‘গোত্তং’’তি কম্মকত্তু পদং. ‘‘অভিভুয্যতী’’তি ভাৰনা বলেন অভিভুয্যমানং হোতি. অভিমদ্দীযমানং হোতীতি অত্থো. ‘‘ছিজ্জতী’’তি ইদং পন অভিভৰনস্স সিখাপত্ত দস্সনং. যাৰ তং গোত্তং ছেদং পাপুণাতি, তাৰ অভিভুয্যতি, মদ্দীযতীতি ৰুত্তং হোতি. গোত্তং অভিভৰতীতি গোত্রভূতিপি যুজ্জতি. ‘‘পঞ্চমং’’তি পঞ্চমে চিত্তৰারে. ‘‘তদাহি জৰনং পতিতং নাম হোতী’’তি পকতিযা জৰনপ্পৰত্তিনাম সত্তক্খত্তু পরমো হোতি. চতুত্থঞ্চ মুদ্ধপত্তং. পঞ্চমতো পট্ঠায পতিতং. তস্মা তস্মিং পঞ্চমৰারে জৰনং পতিতং নাম হোতি. ‘‘দুতীযেনা’’তি দুতীযেন এৰ সদ্দেন. ‘‘দুতীযং’’তি দুতীযে চিত্তৰারে. তদা অনুলোমং পথমজৰনং হোতীতি ৰুত্তং ‘‘অলদ্ধা সেৰনং অনুলোম’’ন্তি. ‘‘এতেনেৰা’’তি এতেন এৰ সদ্দ দ্ৰযে নেৰ. অট্ঠসালিনিযং পন অনুঞ্ঞাতা ৰিয দিস্সতি. ৰুত্তঞ্হি তত্থ. মন্দপঞ্ঞস্স চত্তারি অনুলোমানি হোন্তি, পঞ্চমং গোত্রভু, ছট্ঠং মগ্গচিত্তং, সত্তমং ফলন্তি. ‘‘ইতরট্ঠকথাসূ’’তি ৰিনযট্ঠ কথাদীসু. ‘‘পটিসিদ্ধত্তা’’তি পঞ্চমং গোত্র ভুপ্পৰত্তিযা পটিসিদ্ধত্তা আদিম্হি অট্ঠন্নং অঞ্ঞত্রস্মিংতি ৰুত্তত্তা ইধ নিরুদ্ধেতি পদং অৰস্সং ইচ্ছিতব্বমেৰাতি ৰুত্তং ‘‘নিরুদ্ধে অনন্তরমেৰাতি পদচ্ছেদো’’তি. অনন্তর সদ্দস্স চ নিচ্চং সম্বন্ধাপেক্খত্তা তমেৰপদং ৰিভত্তি পরিণামেন অধিকতন্তি আহ ‘‘নিরুদ্ধস্সাতি অত্থতো লদ্ধমেৰা’’তি. ‘‘ৰসিভূতাপী’’তি ৰসিভূতাপি সমানা. ‘‘একৰারং জৰিত্ৰা’’তি ইদং লোকিযপ্পনাৰসেন ৰুত্তং. লোকুত্তর অপ্পনাপন সত্তমম্পি উপ্পজ্জতিযেৰ. মূলটীকা পাঠে ‘‘ভূমন্তরপত্তিযা’’তি গোত্রভু চিত্তং কামভূমি হোতি. অপ্পনাপন মহগ্গতভূমি ৰা লোকুত্তরভূমি ৰা হোতি. এৰং ভূমন্তরপত্তিযা. ‘‘আরম্মণন্তর লদ্ধিযা’’তি ফলসমাপত্তি ৰীথিযং ফলজৰনং সন্ধায ৰুত্তং. তত্থহি পুরিমানি অনুলোম জৰনানি সঙ্খারা রম্মণানি হোন্তি. ফলজৰনং নিব্বানারম্মণং. ইদঞ্চ কারণমত্তমেৰ. যথাৰুত্ত লেড্ডুপমা এৰ ইধ যুত্তরূপাতি দট্ঠব্বং. ‘‘ন খো পনেতং এৰং দট্ঠব্ব’’ন্তি এতং অত্থজাতং ন খো এৰং দট্ঠব্বং. ‘‘অনদ্ধনীযা’’তি অদ্ধানং দীঘকালং নখ মন্তীতি অনদ্ধনীযা. অসারা. অসারত্তা এৰ সীঘতরং রুহন্তি. সীঘতরং ৰুদ্ধিং ৰিরুল়্হিং আপজ্জন্তি. সারৰন্তা পন সারেন সহ ৰড্ঢমানত্তা সীঘতরং নরুহন্তি. সীঘতরং ৰুদ্ধিং ৰিরুল়্হিং না পজ্জন্তি. তেনাহ ‘‘একৰস্সজীৰিনো’’তিআদিং. ‘‘এৰমেৰা’’তিআদীসু ‘‘পতিতজৰনেসূ’’তি পঞ্চম ছট্ঠ সত্তম জৰনেসু. ‘‘এত্থ চা’’তিআদীসু. ‘‘সুপক্কসালিভত্ত সদিসানী’’তি যথা সালিভত্তানি সুপক্কত্তা এৰ মুদুতরানি হুত্ৰা দুব্বলানি অচিরট্ঠিতিকানি. তস্মিং দিৰসেপি পূতিভাৰং গচ্ছন্তি. এৰং অপ্পনা জৰনানি. ‘‘যস্মা চা’’তিআদীসু. ‘‘দুৰিধস্স নিযমস্সা’’তি জৰননিযমস্স চ কালনিযমস্স চ. ‘‘পটিসন্ধিযা অনন্তর পচ্চয ভাৰিনো’’তি সত্তম জৰন চেতনা অনন্তর পচ্চযো, তদনন্তরে পৰত্তং ৰিপাক সন্তানং পচ্চযুপ্পন্নো, তমেৰ চ অৰসানে চুতি চিত্তং হুত্ৰা ভৰন্তরে পটিসন্ধি চিত্তস্স অনন্তর পচ্চযো. এৰং পটিসন্ধি চিত্তস্স অনন্তর পচ্চয ভাৰেন অৰস্সং ভৰিস্সমানস্সাতি অত্থো. ইদঞ্চ কারণ মত্তমেৰ. মহাটীকাৰচনং পন কিঞ্চি ৰত্তব্ব রূপন্তি ন পটিক্খিত্তং. ‘‘নিরন্তরপ্পৰত্তানং’’তি আদীসু. ভিন্না অসদিসা ৰেদনা যেসং তানি ভিন্নৰেদনানি. ‘‘আসেৰন পচ্চনীকানং’’তি আসেৰন পচ্চযপ্পটি পক্খানং. অভিন্না ৰেদনা যেসন্তি ৰিগ্গহো. ক্রিযজৰনানন্তরং অরহত্তফলং ফলসমাপত্তি ৰীথিযং দট্ঠব্বং. সেসমেত্থসুৰিঞ্ঞেয্যং.

১৩৯. ‘‘সব্বথা পী’’তিআদীসু. লোকে মজ্ঝিমকে হি মহাজনেহি ইচ্ছিতম্পি কিঞ্চি আরম্মণং অতিউক্কট্ঠেহি মন্ধাতু রাজাদীহি ইচ্ছিতং ন হোতি. তথা তেহি মহাজনেহি অনিচ্ছিতম্পি কিঞ্চি আরম্মণং অতিদুগ্গতেহি পচ্চন্ত ৰাসীহি ইচ্ছিতং হোতি. তস্মা আরম্মণানং ইট্ঠানিট্ঠ ৰৰত্থানং পত্ৰা অতিউক্কট্ঠেহি চ অতিদুগ্গতেহি চ ৰৰত্থানং ন গচ্ছতি, মজ্ঝিমকেহি এৰ ৰৰত্থানং গচ্ছতি. তেনাহ ‘‘তত্থ চা’’তিআদিং. ‘‘আরম্মণং’’তি কত্তুপদং. ‘‘ৰিপাকচিত্তং’’তি কম্মপদং. ‘‘কিঞ্চী’’তি কিঞ্চি রূপং. ‘‘কিস্মিঞ্চী’’তি কস্মিংচি একস্মিং পুপ্ফে. ‘‘তেন ৰা’’তি তেন ৰা সুখসম্ফস্সেন ৰত্থেন. সেসমেত্থ সুৰিঞ্ঞেয্যং.

‘‘ৰেদনানিযমোপনা’’তিআদীসু. ‘‘আদাসে মুখনিমিত্তস্স ৰিযা’’তি যথা আদাসে মুখ নিমিত্তস্স চলন চৰনাদিযোগো নানাৰণ্ণযোগো চ যথামুখমেৰ সিদ্ধো. তথা ৰিপাকানং. ৰেদনা যোগো পন যথারম্মণমেৰ সিদ্ধোতি যোজনা. তত্থ ‘‘ৰেদনাযোগো’’তি নানাৰেদনাযোগো. ‘‘কপ্পেত্ৰা’’তি চিন্তেত্ৰা. ‘‘পকপ্পেত্ৰা’’তি নানপ্পকারতো চিন্তেত্ৰা. ন কেৰলঞ্চ ৰিপাকানং এৰ যথারম্মণং ৰেদনা যোগো হোতীতি যোজনা.

‘‘অযঞ্চা’’তিআদীসু. ‘‘অট্ঠকথাযং পী’’তি পট্ঠান অট্ঠকথাযম্পি. ‘‘তদারম্মণ ৰসেনা’’তি তদারম্মণৰসেন পৰত্তানন্তি পাঠসেসো. ‘‘পঞ্চন্নং’’তি সোমনস্স সন্তীরণেন সদ্ধিং চত্তারি মহাৰিপাক সোমনস্সানি সন্ধায ৰুত্তং. ‘‘পকতি নীহারেনা’’তি পকতিযা নিচ্চকালং পৰত্তপ্পকারেন. পাল়িপাঠে. ভাৰিতানি ইন্দ্রিযানি যেনাতি ভাৰিতিন্দ্রিযো. ‘‘মনাপং’’তি মনোরম্মং. ‘‘অমনাপং’’তি অমনোরম্মং. ৰিহরেয্যন্তি সচে কঙ্খতীতি সম্বন্ধো. ‘‘পটিকূলে’’তি অমনাপে. ‘‘অপ্পটিকূল সঞ্ঞী’’তি মনাপসঞ্ঞী. এৰং সেসেসু. ‘‘তেসং’’তি খীণাসৰানং. পাল়িপাঠে. ‘‘সুমনো’’তি সোমনস্সিতো. ‘‘দুম্মনো’’তি দোমনস্সিতো. পাল়িপাঠে. ‘‘মেত্তাযৰা ফরতী’’তি অযং সত্তো অৰেরোহোতূতিআদিনা মেত্তাচিত্তেন ৰা ফরতি. ‘‘ধাতুসো উপসংহরতী’’তি যথা ম ম কাযোপি চতুধাতু সমুস্সযো হোতি. তত্থ একাপি ধাতু নাম পটিকূলা ৰা অপ্পটিকূলা ৰা ন হোতি. কেৰলং তুচ্ছ সুঞ্ঞ সভাৰমত্তা হোতি. এৰমেৰ ইমস্স সত্তস্স কাযোপীতিআদিনা ধাতু সো উপসংহরতি. ‘‘অসুভায ৰা’’তি অসুভ ভাৰনায ৰা. অসুভ ভাৰনা চিত্তেন ৰাতি ৰুত্তং হোতি. ‘‘অসুভাযা’’তি ৰা তস্স অসুভভাৰত্থায. দেৰনাটকা দেৰচ্ছরা নাম. কুথিতানি কুট্ঠানি যেসং তানি কুথিত কুট্ঠানি. ‘‘সরীরানী’’তি কাযঙ্গানি. কুথিত কুট্ঠানি সরীরানি যস্স সো কুথিতকুট্ঠসরীরো. ‘‘কুথিতানী’’তি অব্ভুক্কিরণানি. ৰেদনা যুত্তানি হোন্তি ইতি অপরে ৰদন্তীতি যোজনা. তস্মা পচ্চযো হোতীতি সম্বন্ধো. কথং পচ্চযো হোতীতি আহ ‘‘যথা আনিসংস দস্সনেনা’’তিআদিং. তত্থ ‘‘অট্ঠকথাযং’’তি ৰিসুদ্ধি মগ্গট্ঠকথাযং. ‘‘বুদ্ধসুবুদ্ধতা দস্সনেনা’’তি অত্তনো সত্থুভূতস্স বুদ্ধস্স সুবুদ্ধতা দস্সনেন. ‘‘অত্তসম্পত্তি দস্সনেনা’’তি মযং পন এৰরূপা দুক্খা মুত্তাম্হাতি এৰং অত্তনো সম্পত্তি দস্সনেন. ‘‘অট্ঠিকঙ্কলিকপেতরূপে’’তি নিম্মং সলোহিতে অট্ঠিপুঞ্জপেতসরীরে. ‘‘কুট্ঠিনো’’তি কুট্ঠসরীরস্স. ‘‘অট্ঠকথাযং’’তি ধম্মপদ অট্ঠকথাযং. অতি ইট্ঠে দেৰচ্ছর ৰণ্ণাদিকে. অতি অনিট্ঠে কুথিতকুট্ঠসরীরাদিকে. ‘‘ৰত্থু ভূতো’’তি উপ্পত্তিট্ঠান ভূতো. ‘‘তেসং তেসং সত্তানং’’তি কত্তু অত্থেসামিৰচনং. ‘‘তদুভযং পী’’তি উভযং তং গহণংপি. ‘‘তেসং’’তি তেসং লোকিয মহাজনানং. ‘‘ৰিপল্লাসৰসেনেৰ হোতী’’তি দেৰচ্ছরৰণ্ণাদীসু অতিইট্ঠেসু অতিইট্ঠাকারতো গহণম্পি ৰিপল্লাস ৰসেনেৰ হোতি. কস্মা, দেৰচ্ছর ৰণ্ণাদীসু অতি ইট্ঠ সঞ্ঞায ৰিপল্লাস সঞ্ঞাভাৰতো.

ৰিভাৰনিপাঠে. ‘‘পৰত্তিযা’’তি পৰত্তনতো. অট্ঠকথাধিপ্পাযে ঠত্ৰা ৰুত্তত্তা অট্ঠকথাগারৰেন’’তং ৰিচারেতব্ব মেৰা’’তি ৰুত্তং. অত্থতো পন অযুত্তমেৰাতি ৰুত্তং হোতি. এসনযো অঞ্ঞত্থপি. ‘‘ধম্ম চক্খুরহিতা’’তি ধম্ম ৰৰত্থানঞ্ঞাণ চক্খু রহিতা. ‘‘কুসলাকুসলানি যেৰা’’তি তেসং ধম্ম চক্খু রহিতানং উপ্পন্নানি কুসলাকুসলানিযেৰ. গাথাযং. ‘‘রূপা’’তি রূপতো নপ্পৰেধন্তীতি সম্বন্ধো. ‘‘সদ্দা’’তিআদীসুপি এসেৰনযো. নপ্পৰেধন্তীতি চ ন চলন্তি, ন কম্পন্তি, চিত্তঞ্ঞথত্তং ন গচ্ছন্তি. তথা উপেক্খা ক্রিযজৰনানন্তরম্পি তদারম্মণানি সোমনস্সু পেক্খাৰেদনা যুত্তানি এৰ সিযুন্তি যোজনা. মূলটীকাপাঠে. ‘‘তদারম্মণতা’’তি তদারম্মণতায তদারম্মণভাৰেন. ‘‘কত্থচী’’তি কত্থচি অভিধম্ম পাল়িযং. ‘‘ৰিজ্জমানে চ তস্মিং’’তি তস্মিং ক্রিযজৰনানু বন্ধকে তদা রম্মণে ৰিজ্জমানে সতি. এতং ভৰঙ্গঞ্চ নাম অনুবন্ধতীতি সম্বন্ধো. নদীসোতো পটিসোতগামিনাৰং অনুবন্ধতি ৰিযাতি যোজনা. ‘‘সৰিপ্ফারিকং এৰজৰনং’’তি কিলেস ধম্মানং ৰিপল্লাস ধম্মানঞ্চ ৰসেন খণমত্তেপি অনেকসতেসু আরম্মণেসু ৰিৰিধাকারেন ফরণৰেগসহিতং কুসলাকুসল জৰনমেৰ অনুবন্ধতীতি যুত্তং. ন পন ক্রিযজৰনং অনুবন্ধতীতি যুত্তন্তি যোজনা. ‘‘ছল়ঙ্গু পেক্খাৰতো’’তি চক্খুনা রূপং দিস্ৰা নেৰ সুমনো হোতি, ন দুম্মনো, উপেক্খকো ৰিহরতী-তিআদিনা ৰুত্তায ছ দ্ৰারিকৰসেন ছল়ঙ্গ সমন্নাগতায উপেক্খায সম্পন্নস্স. ৰত্তনং ৰুত্তি. সন্তা ৰুত্তি অস্সাতি সন্ত ৰুত্তি. তং ৰিচারেন্তো ‘‘পট্ঠানে পনা’’তিআদিমাহ. ‘‘যদি চেতং ৰুচ্চেয্যা’’তি এত্থ ‘‘এতং’’তি ক্রিযা ব্যাকতেতিআদিকং এতং ৰচনং. ‘‘তস্মিং’’তি তস্মিং ৰচনে. ‘‘এৰমাদিনা’’তি এৰমাদিনা নযেন. ৰিভাৰনিপাঠে. ‘‘উত্তরং’’তি পরিহারং. ‘‘ৰিপস্সনাচার ৰসেনা’’তি ৰিপস্সনা পৰত্তি ৰসেন. ‘‘তেসং’’তি সোমনস্স দোমনস্সানং. ‘‘ইতরীতরানন্তর পচ্চযতা’’তি অঞ্ঞমঞ্ঞানন্তর পচ্চযতাতি অত্থো. ‘‘থেরেনা’’তি অনুরুদ্ধত্থেরেন. সব্বানি তদা রম্মণানি, সব্বানি ভৰঙ্গানি চ. ‘‘সমুদা চরন্তী’’তি চিরকালং সঞ্চরন্তি. ‘‘এতানিহী’’তিআদিনা তেসং অট্ঠারসন্নং জৰনানং অনন্তরং তদারম্মণানং অনিযমতো পৰত্তিযা কারণযুত্তিং দস্সেতি. সম্ভৰতি উপ্পজ্জতি এতেনাতি সম্ভৰো. তদা রম্মণস্স সম্ভৰো তদা রম্মণ সম্ভৰো. অথৰা, সম্ভৰনং উপ্পজ্জনং সম্ভৰোতি ইমে দ্ৰে অত্থে দস্সেতুং ‘‘তদা রম্মণ সম্ভৰো’’তিআদি ৰুত্তং. ‘‘যেসং পনা’’তিআদীসু. ‘‘যেসং’’তি যেসং পুগ্গলানং. ‘‘ইতরানী’’তি উপেক্খা সন্তীরণ দ্ৰযতো অঞ্ঞানি. ‘‘ন হোন্তীতি ন ৰত্তব্বানী’’তি ৰুত্তং. এৰংসতি, কস্মা থেরেন ইধ ন ৰুত্তানীতি. অট্ঠসালিনিযং অৰুত্তত্তা ইধ ন ৰুত্তানীতি. অট্ঠসালিনিযং পন কস্মা ন ৰুত্তানি. যেভূয্য নিযমসোতে পতিতত্তা ন ৰুত্তানি. ন পন অলব্ভমানত্তা ন ৰুত্তানীতি ইমমত্থং দস্সেন্তো ‘‘অট্ঠকথাযং পনা’’তিআদিমাহ. ‘‘উপেক্খাসহগত সন্তীরণ দ্ৰযমেৰ ৰুত্তং’’তি আগন্তুক ভৰঙ্গভাৰেন ৰুত্তং. যথাহ অথস্স যদা সোমনস্স সহগতপ্পটিসন্ধিকস্স পৰত্তে ঝানং নিব্বত্তেত্ৰা পমাদেন পরিহীনজ্ঝানস্স পণীত ধম্মো মে নট্ঠোতি পচ্চৰেক্খতো ৰিপ্পটিসারি ৰসেন দোমনস্সং উপ্পজ্জতি, তদা কিং উপ্পজ্জতি. সোমনস্সানন্তরঞ্হি দোমনস্সং, দোমনস্সানন্তরঞ্চ সোমনস্সং পট্ঠানে পটিসিদ্ধং. মহগ্গত ধম্মং আরব্ভ জৰনে জৰিতে তদা রম্মণম্পি তত্থেৰ পটিসিদ্ধন্তি. কুসল ৰিপাকাৰা অকুসলৰিপাকাৰা উপেক্খা সহগতা হেতুকমনোৰিঞ্ঞাণ ধাতু উপ্পজ্জতি. কিমস্সা রম্মণন্তি. রূপাদীসু পরিত্ত ধম্মেসু অঞ্ঞতরং. এতেসু হি যদেৰ তস্মিং সমযে আপাতমাগতং হোতি. তং আরব্ভ এতং চিত্তং উপ্পজ্জতীতি ৰেদিতব্বং-তি. এৰং দোমনস্সসহগত জৰনানুরূপং উপেক্খাসহগত সন্তীরণ দ্ৰযমেৰ আগন্তুক ভৰঙ্গভাৰেন অট্ঠকথাযং ৰুত্তন্তি. ‘‘এতম্পি যুজ্জতি যেৰা’’তি অকুসল জৰনাৰসানে এতং সহেতুকং আগন্তুক ভৰঙ্গংপি যুজ্জতিযেৰ. ‘‘দোমনস্স জৰনানন্তরং ভৰঙ্গ পাতোৰ হোতী’’তি উপেক্খা সহগত মূলভৰঙ্গ পাতোৰ হোতি. আগন্তুক ভৰঙ্গেন কিচ্চং নত্থি. কস্মা, উপেক্খা পটিসন্ধিকত্তা. নেৰতদারম্মণ সম্ভৰো অত্থি. কস্মা, তেসু আরম্মণেসু তদারম্মণৰারস্স অসম্ভৰতো. ন হি মহন্তারম্মণেসু চ অৰিভূতারম্মণেসু চ তদারম্মণৰারো সম্ভৰতি. ন চ মূলভৰঙ্গ সম্ভৰো অত্থি. কস্মা, মূলভৰঙ্গভূ তস্স সোমনস্স ভৰঙ্গস্স দোমনস্স জৰনেন সহ ৰিরুদ্ধত্তা. ‘‘ইতি কত্ৰা’’তি ইমিনা কারণেন. ‘‘একং’’তি একং উপেক্খাসহগত ৰিপাকং. তথা তস্সেৰ দোমনস্সং উপ্পাদেন্তস্স নেৰ তদারম্মণ সম্ভৰো অত্থি. ন চ মূলভৰঙ্গ সম্ভৰোতি কত্ৰা দোমনস্সানন্তরং ছসু…পে… পৰত্ততীতি যোজনা. তত্থ ‘‘তস্সেৰা’’তি সোমনস্সপ্পটিসন্ধিকস্সেৰ. নেৰতদারম্মণ সম্ভৰো অত্থি. কস্মা, আরম্মণানং অতিমহন্তত্তেপি অতিৰিভূতত্তেপি সতি সোমনস্স তদারম্মণস্স জৰনেন সহ ৰিরুদ্ধত্তা. উপেক্খা তদা রম্মণস্স চ আরম্মণেন সহ ৰিরুদ্ধত্তা. ন হি অতি ইট্ঠারম্মণে উপেক্খা তদারম্মণং পৰত্ততি. মহগ্গত পঞ্ঞত্তা রম্মণেসু পন উভযম্পি তদারম্মণং নুপ্পজ্জতিযেৰ. ন চ মূলভৰঙ্গ সম্ভৰো অত্থি. কস্মা, জৰনেন সহ ৰিরুদ্ধত্তাতি.

‘‘এত্থ চা’’তিআদীসু. ‘‘সব্ব ধম্মেসূ’’তি সব্বেসু আরম্মণ ধম্মেসু. ‘‘পথম সমন্নাহারো’’তি আৰজ্জন কিচ্চং আহ. সুত্তন্ত পাঠে. ‘‘তজ্জো’’তি তেন আরম্মণানং আপাতা গমনেন জাতো. ‘‘তজ্জো’’তি ৰা তদনুরূপোতিপি ৰদন্তি. ‘‘ৰিঞ্ঞাণভাগস্সা’’তি চক্খু দ্ৰারিক ৰিঞ্ঞাণ কোট্ঠাসস্স. ‘‘যতো’’তি যস্মিং কালে. কথং আৰজ্জনেন ৰিনা নুপ্পজ্জতীতি আহ ‘‘সচে আৰজ্জনেনা’’তিআদিং. ‘‘এত্থ সিযা’’তিআদীসু. যথা পন নিরাৰজ্জনং হোতি ভিন্না রম্মণঞ্চ, এৰং তথাতি যোজনা. ‘‘একস্সপী’’তি একস্স আগন্তুক ভৰঙ্গস্সপি নত্থি দোসো. মহাঅট্ঠকথাযঞ্চ নত্থি. অট্ঠসালিনিযং পন অত্থিযেৰ. ‘‘সৰিপ্ফন্দনত্তা’’তি এত্থ অত্থো সৰিপ্ফারিকন্তি পদে ৰুত্তনযেন ৰেদিতব্বো. ‘‘ইতরে সঞ্চা’’তি মহগ্গতলোকুত্তর জৰনানঞ্চ. কানি চি পরিত্তারম্মণানিপি সমানানি. যদি তদারম্মণূ পনিস্স যস্স কামভৰঙ্গস্স অভাৰতো তদারম্মণানি রূপারূপ ব্রহ্মানং নুপ্পজ্জন্তি. এৰং সতি, চক্খুসোত দ্ৰারিক চিত্তানিপি রূপ ব্রহ্মানং নুপ্পজ্জেয্যুন্তি আহ ‘‘চক্খু সোতৰিঞ্ঞাণানি পনা’’তিআদিং. ‘‘ইন্দ্রিযপ্পৰত্তি আনুভাৰতো’’তি চক্খু ৰত্থু সোতৰত্থু সঙ্খাতানং ইন্দ্রিয ৰত্থূনং রূপ ব্রহ্ম সন্তানে পৰত্তত্তা তেসং পৰত্তি আনুভাৰতো চক্খু সোতৰিঞ্ঞাণানি রূপব্রহ্মানং পৰত্তন্তিযে ৰাতি দস্সেতুং ‘‘সম্পটিচ্ছন সন্তীরণানী’’তিআদি ৰুত্তং. ‘‘ৰিকপ্পবলেৰা’’তি কামকুসলা কুসলানং ৰিয ৰিৰিধেন আকারেন কপ্পেত্ৰা পকপ্পেত্ৰা আরম্মণগ্গহসামত্থিযেৰাসতি. ‘‘অপ্পনাপত্ত ভাৰনা কম্মৰিসেসে ৰা’’তি এত্থ অভিঞ্ঞা জৰনানি ৰিয মহগ্গত ৰিপাক লোকুত্তর ৰিপাকানি ৰিয চাতি ৰত্তব্বং. ‘‘অট্ঠকথাযং’’তি পটিচ্চ সমুপ্পাদ ৰিভঙ্গট্ঠকথাযং. ‘‘ৰিভাৰনিযং ৰুত্ত কারণানী’’তি অট্ঠকথাতো আহরিত্ৰা ৰিভাৰনিযং ৰুত্তানি ‘অজনকত্তা জনক সমানত্তা ভাৰতো’তিআদীনি কারণানি.

১৪০. জৰন নিযমে. অট্ঠকথাযম্পি ছক্খত্তুং পৰত্তি ৰুত্তা. যথাহ সচে পন বলৰা রম্মণং আপাতাগতং হোতি. ক্রিযমনোধাতুযা ভৰঙ্গে আৰট্টিতে চক্খুৰিঞ্ঞাণাদীনি উপ্পজ্জন্তি. জৰনট্ঠানে পন পথমকামাৰচর কুসল চিত্তং জৰনং হুত্ৰা ছসত্তৰারে জৰিত্ৰা তদারম্মণস্স ৰারং দেতীতি. ‘‘মুদুতর ভাৰেনা’’তি মাতুকুচ্ছিম্হি ঠিতকালেৰা সম্পতি জাতকালে ৰা ৰত্থুস্স অতিমুদুভাৰেন. ‘‘কেনচিউপদ্দুত ভাৰেনা’’তি বাল়্হগেলঞ্ঞজাতকালে কেনচি ৰাতপিত্তসেম্হাদিনা উপদ্দুত ভাৰেন. ‘‘অজ্ঝোত্থট ভাৰেনা’’তি তস্স ৰেৰচনমত্তং. মন্দীভূতো ৰেগো যেসং তানি মন্দীভূত ৰেগানি. ‘‘অসয্হ রূপেহী’’তি দুক্খমসভাৰেহি. অভিভূতানং সত্তানং. তঞ্চ খো ৰচনং পাকতিক সত্তানং ৰসেনেৰ ৰুত্তং. ন সত্তৰিসেসানং ৰসেন. এৰং সতি, সত্তৰিসেসানং ৰসেন কথং দট্ঠব্বন্তি আহ ‘‘যে পনা’’তিআদিং. ‘‘উপরী’’তি মরণুপ্পত্তিট্ঠানে. ‘‘ৰুত্তঞ্হী’’তি ৰিসুদ্ধি মগ্গে ৰুত্তমেৰ. ‘‘যমকপ্পাটিহারিযং’’তি যুগল়ৰত্থূনং একতো পৰত্ত অচ্ছরিয কম্মং. ‘‘দ্ৰে ঝানঙ্গানী’’তি উপেক্খেকগ্গতা ঝানঙ্গানি.

‘‘যোগকম্মসিদ্ধিযা’’তি ভাৰনানু যোগকম্মসিদ্ধস্স. ইদ্ধি ৰিকুব্বনং নাম ইদ্ধিযা নানাকম্মকরণং. ‘‘সিদ্ধিযা এৰা’’তি সিজ্ঝ নত্থায এৰ. অত্তনো অনন্তরে এৰ উপ্পন্নং ফলং এতিস্সাতি আনন্তরিকপ্ফলা. মগ্গচেতনা. ‘‘ইতী’’তি তস্মা. ‘‘মন্দস্সা’’তি মন্দ পুগ্গলস্স. ‘‘তিক্খস্সা’’তি তিক্খ পুগ্গলস্স. তীণি ফলচিত্তানি. ‘‘পযোগাভিসঙ্খারস্সা’’তি পথমজ্ঝানতো পট্ঠায সমথ ৰিপস্সনাযুগনন্ধপ্পৰত্তি সঙ্খাতস্স পুব্বপ্পযোগাভিসঙ্খারস্স. ‘‘অকতাধিকারস্সা’’তি আসন্নে পুরিমভৰে অকত ঝানপরিকম্মস্স পুগ্গলস্স. সব্বেসম্পি ফলট্ঠানং চিণ্ণৰসিভাৰানেৰ হোন্তীতি যোজনা.

জৰননিযমোনিট্ঠিতো.

১৪১. দুহেতুকাদীসু. জাতি দ্ৰিহেতুকাদযো এৰ অধিপ্পেতাতি ৰুত্তং ‘‘পটিসন্ধিৰিঞ্ঞাণ সহগতা’’তিআদিং. ‘‘তেসং দ্ৰিন্নং পী’’তি দ্ৰিহেতুকানম্পি অহেতুকানম্পি. ভুসোঝান মগ্গফলানি ৰারেন্তি নীৰারেন্তীতি আৰরণানি. ৰিপাকানি চ তানি আৰরণানি চাতি ৰিগ্গহো. ‘‘ৰিপাকানী’’তি অহেতুক দ্ৰিহেতুক ৰিপাকানি. তেহি গহিতপ্পটিসন্ধিকানং ইমস্মিং ভৰেঝান মগ্গফলপ্পটিলাভো নাম নত্থি. তেনাহ ‘‘ৰিপাকাৰরণ সব্ভাৰতো’’তিআদিং. ‘‘তেসং’’তি দুগ্গতি অহেতুক পুগ্গলানং. পুগ্গলানন্তি ৰুত্তং হোতি. ন লব্ভন্তীতি সম্বন্ধো. ‘‘ইতরেসং’’তি ততো অঞ্ঞেসং সুগতি অহেতুক পুগ্গলানং.

‘‘এত্থ সিযা’’তিআদীসু. দুগ্গতি পরিযাপন্নানঞ্চ অহেতুকানং. ‘‘মূলভৰঙ্গে’’তিআদিম্হি পটিসন্ধি চিত্তং হুত্ৰা আগতে মূলভৰঙ্গে. ‘‘যং কিঞ্চী’’তি যং কিঞ্চি ভৰঙ্গং. ‘‘ৰুচ্চতে’’তি ৰিসজ্জনা ৰুচ্চতে. ‘‘সব্ব অট্ঠকথাসু পটিক্খিত্তো’’তি অট্ঠসালিনিযং তাৰ ৰিপাকুদ্ধারকথাযং সোল়সসু কামাৰচর কুসল ৰিপাকেসু অট্ঠন্নং অহেতুক ৰিপাকানং এৰ আপাযিকেসু সত্তেসু উপ্পত্তিং দস্সেতি. ন অট্ঠন্নং সহেতুক ৰিপাকানং. তথা পটিচ্চ সমুপ্পাদট্ঠ কথাসু চ ৰিঞ্ঞাণ পদৰণ্ণনাসু অঞ্ঞাসু চ অভিধম্মাৰতারাদীসূতি এৰং সব্বট্ঠকথাসু পটিক্খিত্তা নাম হোতি. ‘‘যোগসা ধনীযত্তা’’তি পযোগেন সাধেতব্বত্তা. কুসলাকুসলানি হি ৰড্ঢেতুং ৰা হাপেতুং ৰা পযোগে কতে ৰড্ঢন্তি চেৰ হাযন্তি চ. ঞাণৰিপ্পযুত্তভূতং গহেতুং যুত্তং. কস্মা, অহেতুকস্স ভৰঙ্গস্সাতি ৰুত্তস্স মূলভৰঙ্গস্স অহেতুকত্তা. ‘‘দ্ৰিন্নম্পি অহেতুকানং’’তি দুগ্গতি অহেতুকানঞ্চ সুগতি অহেতুকানঞ্চ. ‘‘অপরেপনা’’তিআদি ৰিভাৰনিযং আগতো অপরে ৰাদো. ৰুত্তঞ্হি তত্থ ‘অপরেপন যথা অহেতুকানং সহেতুক তদারম্মণং হোতি, এৰং দ্ৰিহেতুকানং তিহেতুক তদারম্মণংপী’তি ৰণ্ণেন্তি. তেসংমতানুরোধেন চ ইধপি ঞাণসম্পযুত্ত ৰিপাকপ্পটিক্খেপো অহেতুকেযেৰ সন্ধাযাতি ৰদন্তীতি. তং পন ৰিপাকুদ্ধারকথাযং ‘এত্থেৰ দ্ৰাদস কমগ্গোপী’তি চ, এত্থেৰ দসকমগ্গোপী’তি চ আগতেহি ন সমেতি. তত্থ হি সোল়সসুকুসলৰিপাকেসু দ্ৰিহেতুক কম্মনিব্বত্তানং দ্ৰিন্নং দ্ৰিহেতুকাহেতুক পুগ্গলানং চত্তারি ঞাণসম্পযুত্ত ৰিপাকানি ৰজ্জেত্ৰা দ্ৰাদস কমগ্গো নাম হোতি. পুন সেসেসু দ্ৰাদস ৰিপাকেসুপি অসঙ্খারিক কম্মনিব্বত্তানং দ্ৰে ঞাণৰিপ্পযুত্ত সসঙ্খারিক ৰিপাকানি, সসঙ্খারিক কম্মনিব্বত্তানঞ্চ দ্ৰে ঞাণৰিপ্পযুত্ত অসঙ্খারিক ৰিপাকানি ৰজ্জেত্ৰা দুতিযত্থের ৰাদে দসকমগ্গো নাম হোতীতি. এত্থ পন দ্ৰি হেতুকোপি পুগ্গলো অধিকেন ছন্দেন ৰা ৰীরিযেন ৰা চিত্তেন ৰা যুত্তো পরিযত্তি ধম্মং ৰা নানাৰিজ্জাসিপ্পানি ৰা বহুং গণ্হেয্য, সুণেয্য, ধারেয্য, ৰাচেয্য, চিন্তেয্য. অথস্স ঞাণসম্পযুত্ত জৰনং বহুলং সমুদা চরেয্য. তদা তস্স নানাকম্মেন জৰনানু রূপং ঞাণসম্পযুত্ত তদারম্মণং ন ন সম্ভৰতীতি ৰুত্তং. তং যুত্তং ৰিয দিস্সতীতি. ‘‘অট্ঠকথাযং পিহি. ল. ৰুত্তা’’তি কথং ৰুত্তা. এতানি হি মনুস্সেসু চ কামাৰচর দেৰেসু চ পুঞ্ঞৰন্তানং দ্ৰিহেতুকতি হেতুকানং পটিসন্ধিকালে পটিসন্ধি হুত্ৰা ৰিপচ্চন্তীতিআদিনা ৰুত্তাতি. তে পন তিৰিধা, নৰৰিধাতি সম্বন্ধো. ‘‘তেসং তব্ভাৰো’’তি কুসলানং কুসলভাৰো, অকুসলানং অকুসলভাৰো. ‘‘সিক্খন ধম্মযুত্তা’’তি তীহি সিক্খাহি পহাতব্বানং কিলেসানং অত্থিতায সিক্খিতব্বতা পকতিযং ঠিতাতি অধিপ্পাযো.‘‘হেট্ঠিমানঞ্চা’’তি হেট্ঠিম ফলানঞ্চ. যানিযানিসকানি যথাসকং. ‘‘উপরিমানং’’তি উপরিমানং পুগ্গলানং. ‘‘পরিনিট্ঠিত সিক্খা কিচ্চত্তা’’তি সিক্খা কিচ্চং নাম কিলেস ধম্মানং পহানত্থায এৰ হোতীতি তেসু সব্বসো পহীনেসু সিক্খা কিচ্চং পরিনিট্ঠিতং হোতি. এৰং পরিনিট্ঠিত সিক্খা কিচ্চত্তা. সুট্ঠু ভব্বোতি সম্ভৰো. সম্ভৰোতি ৰিসেসন পদমেতন্তি আহ ‘‘যথা সম্ভৰং’’তি.

১৪২. ‘‘এত্থেৰা’’তি এতস্মিং কামলোকে এৰ. ‘‘তং তং পসাদরহিতানং’’তি তেনতেন পসাদেন রহিতানং. তস্মিং তস্মিং দ্ৰারে উপ্পন্নানি তং তং দ্ৰারিকানি. চতুসট্ঠিৰীথি চিত্তানি. দ্ৰে চত্তালীস ৰীথি চিত্তানি. ‘‘ব্রহ্মলোকে ৰা’’তিআদীসু. ইদং অট্ঠকথা ৰচনং. যথাহ রূপভৰে চতুন্নং ৰিঞ্ঞাণানং, তথেৰ পচ্চযো. পৰত্তে, নোপটিসন্ধিযং. সোচ খো কামাৰচরে অনিট্ঠ রূপদস্সন সদ্দসৰনৰসেন, ব্রহ্মলোকে পন অনিট্ঠা রূপাদযো নাম নত্থি. তথা কামাৰচর দেৰলোকে পীতি. তানি চত্তারি চিত্তানি. ‘‘তত্থা’’তি তস্মিং রূপলোকে. ৰিভাৰনিপাঠে. ‘‘ইধা’’তি ইমস্মিং ৰচনে. ‘‘তং তং ভূমি পরিযাপন্নে’’তি তিস্সং তিস্সং ভূমিযং পরিযাপন্নে. সেসমেত্থ সুৰিঞ্ঞেয্যং.

ৰীথিসঙ্গহদীপনিযাঅনুদীপনা নিট্ঠিতা.

৫. ৰীথিমুত্তসঙ্গহঅনুদীপনা

১৪৩. ৰীথিমুত্তসঙ্গহে. ‘‘পৰত্তিসঙ্গহং’’তি চিত্তুপ্পাদানং পৰত্তাকারকথনসঙ্গহং. ‘‘পটিসন্ধিযং’’তি পটিসন্ধিকালে. ‘‘তেসং’’তি চিত্ত চেতসিকানং. ৰিভাৰনিপাঠে. ‘‘তদাসন্নতাযা’’তি তাযপটিসন্ধিযা আসন্নতায. ‘‘তং গহণেনে ৰা’’তি সন্ধিগ্গহণেন এৰ সন্ধিৰচনেন এৰ. ‘‘ৰিসযপ্পৰত্তি নামা’’তি কম্ম কম্মনিমিত্তাদীনং ৰিসযানং দ্ৰারেসু আপাতা গমন ৰসেন পৰত্তি নাম. ‘‘মরণুপ্পত্তিযং এৰ সিদ্ধা’’তি মরণুপ্পত্তিযং জৰনেসু এৰ সিদ্ধা. এতেন মরণুপ্পত্তি ৰিধানং জৰনপ্পধানং হোতি, ন চুতিপ্পধানন্তি দীপেতি. ন হি তস্মিং ৰিধানে তস্সং চুতিযং ৰিসযপ্পৰত্তি ৰচনং নাম অত্থি. জৰনেসু এৰ অত্থি. সা পন চুতি তস্মিং ভৰে আদিম্হি পটিসন্ধি পৰত্তিযা সিদ্ধায সিজ্ঝতি যেৰাতি. ‘‘তেসং’’তি ৰীথিমুত্তানং. ‘‘ভৰন্তী’’তি পাতুব্ভৰন্তি. ‘‘ততো’’তি অযতো. ‘‘গন্তব্বা’’তি পটিসন্ধিগ্গহণৰসেন উপপজ্জিতব্বা. ‘‘গচ্ছন্তী’’তি পৰত্তন্তি. ‘‘তিরো’’তি তিরিযতো. ‘‘অঞ্ছিতা’’তি গতা পৰত্তা, আযতা ৰা. ‘‘সমানজাতিতাযা’’তি তিরচ্ছান গতজাতি ৰসেন সমানজাতি ভাৰেন. ‘‘যুৰন্তী’’তি মিস্সী ভৰন্তি. ‘‘সুখসমুস্সযতো’’তি সুখসমুদাযতো. ‘‘দিব্বন্তী’’তি ৰিজ্জোতন্তি. ‘‘ইতি কত্ৰা’’তি ইতি ৰচনত্থং কত্ৰা উপরিদেৰা সুরাতি ৰুচ্চন্তীতি যোজনা. ‘‘ৰেপচিত্তিপহারাদাদযো’’তি ৰেপচিত্তি অসুরিন্দ পহারাদঅসুরিন্দাদিকে দেৰাসুরে. ‘‘সুরপ্পটি পক্খা’’তি তাৰতিংসাদেৰপ্পটিপক্খা. ‘‘সুরসদিসা’’তি তাৰতিংসাদেৰ সদিসা. ‘‘ৰেমানিকপেতে’’তি ৰেমানিক নামকে পেতে. ‘‘ৰিনিপাতিকে’’তি ৰিনিপাতিক নামকে দুগ্গত দেৰজাতিকে. তেসং পৰত্তি উপরি ‘ৰিনিপাতিকাসুরানঞ্চা’তি পদে আৰি ভৰিস্সতি. ‘‘তেপী’’তি লোকন্তরিক নেরযিক সত্তাপি. ‘‘কালকঞ্চিকপেতে’’তি কালকঞ্চিক নামকে পেতে. এৰং কথাৰত্থু পাল়িযং আগতা ৰেস্সভু আদযো যমরাজানোপনাতি সম্বন্ধো. ৰেস্সভূ চ নোত্তি চ সোমো চ যমো চ ৰেস্সৰণো চ ইতি ইমে পেত্তি রাজানো. ‘‘রজ্জ’’ন্তি রাজভাৰং রাজকিচ্চং. যে চ যক্খরক্খসা নাম করোন্তা ৰিচরন্তীতি সম্বন্ধো. ‘‘কুরূরকম্মকারিনো’’তি লুদ্দকম্মকারিনো. ‘‘রেৰতি ৰিমানে’’তি রেৰতি ৰিমান ৰত্থুম্হি. ‘‘ইতো’’তি মনুস্স লোকতো, সুগতিভৰতো ৰা. তেহি যক্খ রক্খসা নাম ভূমট্ঠকাপি সন্তি, আকাসট্ঠকাপি. ‘‘নানাকম্মকারণাযো’’তি দ্ৰত্তিংস ৰিধানি কম্মকরণ কিচ্চানি. তেসম্পি নিরযপালানন্তি সম্বন্ধো. ‘‘তিস্সন্নং’’তি তিস্সন্নং অপাযভূমীনং. অপাযভূমি.

উস্সিতো মনো এতেসন্তি ৰা, উস্সন্নো মনো এতেসন্তি ৰা, দ্ৰিধাৰিগ্গহো. ‘‘উস্সিতো’’তি উগ্গতো. ‘‘উস্সন্নো’’তি ৰিপুলো. কস্মা তিক্খতর চিত্তা হোন্তীতি ৰুত্তন্তি আহ ‘‘পরিপুণ্ণানং’’তিআদিং. পুব্বৰাক্যে অনন্ত চক্কৰাল়সাধারণ ৰসেন ৰুত্তত্তা পুন ‘‘ইমস্মিং’’তিআদি ৰুত্তং. ৰত্তব্বং নত্থি. ইধেৰ সব্বঞ্ঞু বুদ্ধাদীনং উপ্পন্নতোতি অধিপ্পাযো. ‘‘অধিগ্গণ্হন্তী’’তি অধিকং কত্ৰা গণ্হন্তি. ‘‘সূরা’’তি পাপকল্যাণ কম্মেসু সূরচিত্তা. ‘‘সতিমন্তো’’তি ৰিপুলস্সতিকা. ‘‘ইধ ব্রহ্মচরিযৰাসো’’তি ইধেৰ সিক্খত্তযপূরণ সঙ্খাতস্স ব্রহ্মচরিযৰাসস্স অত্থিতা. ‘‘মরিযাদধম্মেসূ’’তি লোকচারিত্ত ধম্মেসু. ‘‘ধতরট্ঠো’’তি ধতরট্ঠো মহারাজা. এৰং ৰিরুল়্হকোতিআদীসু. ‘‘গন্ধরুক্খাধি ৰত্থা’’তি গন্ধরুক্খেসু অজ্ঝাৰুত্থা. ‘‘কুম্ভণ্ডা’’তি কুৰুচ্চতি পথৰী. পথৰি গতানি রতনভণ্ডানি যেসং তেতি ৰিগ্গহো. ‘‘দানৰরক্খসা’’তি দনুনামদেৰধীতায অপচ্চন্তি অত্থেন দানৰ নামকা রক্খসা. অৰরুজ্ঝন্তি অন্তরাযং করোন্তীতি অৰরুদ্ধকা. ‘‘ৰিগচ্ছরূপো’’তি ৰিপন্নৰণ্ণো. ‘‘নিহীনকম্মকতা’’তি নিহীনানিপাপকম্মানি কত্ৰা আগতা. কাচিগন্ধপ্পিযো জাযন্তীতি সম্বন্ধো. যাগন্ধপ্পিযো জোগিনীতি চ ৰুচ্চন্তি, জুণ্হাতি চ ৰুচ্চন্তীতি সম্বন্ধো. ‘‘অভিলক্খিতরত্তীসূ’’তি অভিঞ্ঞাতরত্তীসু. উপোসথরত্তীসূতি ৰুত্তং হোতি. ‘‘গোচরপ্পসুতকালে’’তি গোচরত্থায ৰিচরিতকালে. ‘‘জুতিঅত্থেনা’’তি ৰিজ্জোতনট্ঠেন. ৰসূনি ধনানি ধারেন্তীতি ৰসুন্ধরা. ৰসুন্ধরা চ তে দেৰ যক্খা চাতি ৰিগ্গহো. ‘‘নাগাত্ৰেৰ ৰুচ্চন্তী’’তি পাল়িযং নাগেসু সঙ্গয্হন্তীতি অধিপ্পাযো. ‘‘যা’’তি যা ভুম্মদেৰযক্খ জাতিযো. ‘‘যাসং’’তি যাসং ভুম্মদেৰ যক্খজাতীনং. ‘‘কীল়াপসুতৰসেনা’’তি বোধিসত্তানঞ্চ বুদ্ধানঞ্চ অচ্ছরিয ধম্মজাতকালে উগ্ঘোসন কীল়াকম্মৰড্ঢনৰসেন. ‘‘যাসঞ্চ মন্তপদানী’’তি যাসং নিগ্গহ পগ্গহপূজনাদি ৰসেন পৰত্তানি মন্তপদানি. ‘‘তেসূ’’তি + তেসু চতূসু অৰরুদ্ধকেসু. ‘‘কীল়াসোণ্ডৰসেনা’’তি কীল়াধুত্তৰসেন. ‘‘ঘাসসোণ্ডৰসেনা’’তি খাদনভুঞ্জন ধুত্তৰসেন. সোণো ৰুচ্চতি সুনখো. ‘‘সত্তে’’ নেরযিকে ৰা পেতেৰা. ‘‘কামঞ্চ হোতী’’তি কিঞ্চাপি হোতীতি অত্থো. ‘‘নিবন্ধনোকাসো’’তি নিচ্চসম্বন্ধনোকাসো. ‘‘সমুদাগতেসূ’’তি পরম্পরতো আগতেসু. ‘‘দেৰরাজট্ঠানেসূ’’তি ইমস্মিং চক্কৰাল়ে তাৰতিংসাভৰনে দেৰরাজট্ঠানেসূতি অধিপ্পাযো. ‘‘পাল়িযং এৰা’’তি দীঘনিকাযে জনৰসভসুত্তপাল়িযং এৰ. যচ্ছন্তি নিযচ্ছন্তি এত্থাতি যামো. ‘‘নিযচ্ছন্তী’’তি অঞ্ঞমঞ্ঞং ইস্সামচ্ছরিয মূলকেহি কলহভণ্ডনাদীহি ৰিগচ্ছন্তীতি অত্থো. ‘‘তং সহচরিতত্তা’’তি তেন যাম নামকেন ইস্সরদেৰকুলেন নিচ্চকালং সহ পৰত্তত্তা. ‘‘ৰসং ৰত্তেন্তী’’তি ইচ্ছং পূরেন্তীতি ৰুত্তং হোতি.

‘‘পুরে’’তি সম্মুখট্ঠানে. তং পন ঠানং উচ্চট্ঠানং নাম হোতীতি আহ ‘‘উচ্চেঠানে’’তি. ‘‘সহস্সো ব্রহ্মা’’তিআদীসু অত্তনো সরীরোভাসেন সহস্সং চক্কৰাল় লোকং ফরন্তো সহস্সোনামাতি অট্ঠকথাযং অধিপ্পেতং. কুলদেৰতাযো নাম কুল পরম্পর পূজিত দেৰতাযো নাম. ‘‘উপট্ঠহন্তী’’তি যুত্তট্ঠানে দেৰৰত্থু দেৰমালকানি কত্ৰা সমযে সমযে তত্থ গন্ত্ৰা গন্ধমালাদীহি পূজেন্তি, ৰন্দন্তি, থোমেন্তি, ৰরং পত্থেন্তীতি অত্থো. ‘‘উপট্ঠকা এৰসম্পজ্জন্তী’’তি উপট্ঠকমত্তাৰহোন্তীতি অধিপ্পাযো. ‘‘কস্সচী’’তি কস্সচি হেট্ঠিমস্স. ‘‘তত্থা’’তি তাসু ব্রহ্মভূমীসু. পুন ‘‘তত্থা’’তি তস্মিং দুতীযতলে. ‘‘আভা’’তি সরীরাভা. নিচ্ছরন্তি অঙ্গপচ্চঙ্গেহি নিগ্গচ্ছন্তি. ‘‘অচল সণ্ঠিতা’’তি দুতীয তলে ৰিয চলিতা ন হোতি. অথ খো অচল সণ্ঠিতা. ‘‘তেসং’’তি তেসংৰাদীনং পাঠে. ব্রহ্মপারিসজ্জাতিআদিকং নামং নসিদ্ধংতি যোজনা. ‘‘ইঞ্জনজাতিকেহী’’তি চলনজাতিকেহি. ‘‘হেট্ঠিমতলানং ইঞ্জিতং পুঞ্ঞপ্ফলং অত্থীতি সম্বন্ধো. ‘‘আনেঞ্জ জাতিকেনা’’তি অচলনজাতিকেন উপেক্খাঝানেন নিব্বত্তানং চতুত্থতলানং. ‘‘কেনচি অন্তরাযেনা’’তি তেজোসংৰট্টাদিকেন অন্তরাযেন. ‘‘এত্থপী’’তি এতস্মিং চতুত্থতলেপি. ‘‘আযু ৰেমত্ততাযা’’তি আযুপ্পমাণনানত্তস্স. ‘‘ওল়ারিকানং’’তি ইদং পকতিযা ওল়ারিক সভাৰতায ৰুত্তং. ন সুখুমানং অত্থিতায. নত্থি ৰিহঞ্ঞনং এতেসন্তি অৰিহা. কিং ৰিহঞ্ঞনং নামাতি আহ ‘‘সমথৰিপস্সনা কম্মেসু অৰিপ্ফারিকতা পত্তী’’তি. চিত্তস্স অৰিপ্ফারতা পজ্জনং নাম নত্থীতি ৰুত্তং হোতি. ‘‘পসাদ দিব্ব ধম্ম পঞ্ঞা চক্খূহী’’তি ‘পসাদ চক্খু, দিব্বচক্খু, ধম্মচক্খু, পঞ্ঞা চক্খূ, হি. তত্থ পসাদচক্খু এৰ ইধ দিব্বচক্খূতিপি ৰুচ্চতি. ‘‘ধম্ম চক্খূ’’তি হেট্ঠিমমগ্গঞ্ঞাণং. ‘‘পঞ্ঞা চক্খূ’’তি ৰিপস্সনা ঞাণপচ্চৰেক্খনাঞাণেহি সদ্ধিং অৰসেসং সব্বঞ্ঞাণং. ‘‘রূপীনং সত্তানং’’তি রূপকাযৰন্তানং সত্তানং. ‘‘কনিট্ঠভাৰো’’তি অপ্পতরভাৰো. ‘‘অনাগামিমগ্গট্ঠস্সপি পটিক্খেপো’’তি সকদাগামিভাৰেঠত্ৰা ভাৰেন্তস্সেৰ অনাগামিমগ্গো উপ্পজ্জতি. নো অঞ্ঞথাতি আহ ‘‘সকদাগামীনং পটিক্খেপেনা’’তিআদিং.

ভূমিচতুক্কং নিট্ঠিতং.

১৪৪. ভৰন্তরে ওক্কমন্তি এতাযাতি ওক্কন্তীতি পিযুজ্জতি. ‘‘সোতরহিতো’’তি পসাদসোতরহিতো. এৰং সেসেসুপি. ‘‘আসিত্তকাদিভাৰেনা’’তি আসিত্তকপণ্ডকাদি ভাৰেন. ‘‘দ্ৰীহি ব্যঞ্জনেহী’’তি দ্ৰীহি নিমিত্তেহি. ‘‘ৰিবচ্ছৰচনো’’তি ৰিপন্নৰচনো. ‘‘ৰত্থু ৰিপন্নস্সা’’তি এত্থ ‘‘ৰত্থূ’’তি সম্ভার চক্খু ৰুচ্চতি. তস্স আদিতো পট্ঠায ৰিপন্নত্তা তেন সমন্নাগতো পুগ্গলো ৰত্থুৰিপন্নোতি ৰুচ্চতি. ‘‘তস্স তস্সা’’তি চক্খুসো তাদিকস্স.‘‘পসূতিযং যেৰা’’তি ৰিজাযমানকালেযেৰ. ‘‘পঞ্ঞাৰেয্যত্তিযভাৰস্সা’’তি এত্থ ব্যত্তস্স ভাৰো ৰেয্যত্তিযং. ‘‘ব্যত্তস্সা’’তি ফরণঞ্ঞাণস্স পুগ্গলস্স. পঞ্ঞা সঙ্খাতং ৰেয্যত্তিযং অস্সাতি ৰিগ্গহো. দ্ৰিহেতুক তিহেতুকানংপি ন সক্কা নিযমেতুন্তি সম্বন্ধো. কথং ন সক্কাতি আহ ‘‘মাতুকুচ্ছিম্হি ৰিপত্তি নাম নত্থী’’তি. কতমেসং ৰিপত্তীতি. উপ্পন্নানম্পি চক্খু সোতানং ৰিপত্তি. কেনকারণেন ৰিপত্তীতি. পরূপক্কমেনৰা মাতুযা ৰিসম পযোগেন ৰা নানাবাধেন ৰা ৰিপত্তীতি যোজনা. ধাতুপাঠে যক্খ পূজাযংতি পঠিতত্তা ‘‘পূজনীযট্ঠেনা’’তি ৰুত্তং. এতেন যক্খিতব্বা পূজিতব্বা যক্খাতি দস্সেতি. যে পন কিচ্ছজীৰিকপত্তা ৰিচরন্তি, তে ভূমস্সিতা নাম হোন্তীতি যোজনা. ‘‘ভূমিস্সিতা’’তি পাঠে ভূমিযং সিতা নিস্সিতাতি ইমমত্থং দস্সেতুং ‘‘পুঞ্ঞনিব্বত্তস্সা’’তিআদি ৰুত্তং. ‘‘ৰিরূপা হুত্ৰা’’তি তে ৰণ্ণতোপি দুব্বণ্ণা হোন্তি. সণ্ঠানতোপি দুস্সণ্ঠানা. জীৰিকতোপি কিচ্ছজীৰিকাতিআদিনা ৰিপন্নরূপা হুত্ৰা. ‘ৰিৰসা হুত্ৰা নিপতন্তী’তি ৰিনিপাতিকাতিপি ৰদন্তি. ৰিৰসাতি চ অত্তনো ৰসেন ইচ্ছায ৰিনাতি অত্থো. ‘‘ৰিৰিত্তট্ঠানেসূ’’তি জনৰিৰিত্তেসু ঠানেসু. পরিযেসিত্ৰা ৰা জীৰিতং কপ্পেন্তি. পীল়েত্ৰা ৰা জীৰিতং কপ্পেন্তি. তাসেত্ৰা পীল়েত্ৰা ৰা জীৰিতং কপ্পেন্তীতি যোজনা. ‘‘ৰেমানিকপেতাপী’’তি অত্তনো পুঞ্ঞনিব্বত্তং দিব্বৰিমানং যেসং অত্থি, তে ৰেমানিকা. তে পন পুঞ্ঞাপুঞ্ঞমিস্সক কম্মেন নিব্বত্তত্তা কেচি দিৰা দিব্বসুখং অনুভৰন্তি, রত্তিং পেতদুক্খং. কেচি রত্তিং দিব্বসুখং অনুভৰন্তি, দিৰা পেতদুক্খন্তি. পরেহি দত্তং দিন্নং পুঞ্ঞপ্ফলং উপনিস্সায জীৰন্তীতি পরদত্তূপজীৰিনো. ‘‘পরেহি দিন্নং পুঞ্ঞপ্ফলং’’তি ঞাতকেহি পুঞ্ঞং কত্ৰা ইদং মে পুঞ্ঞং পেতানং কালঙ্কতানং ঞাতীনং দেধীতি এৰং দিন্নং পুঞ্ঞপ্ফলং. ‘‘সকলচক্কৰাল়পরিযাপন্না একভূমকা’’তি যথা তাৰতিংসাভূমি নাম সব্ব চক্কৰাল়েসুপি অত্থি. সব্বাপি দিব্বেন ৰস্সসহস্সেন একআযু পরিচ্ছেদো হোতি. ইমস্মিং চক্কৰাল়ে ৰত্তব্বং নত্থি. ন তথা নিরযেসু ৰা তিরচ্ছান যোনিযং ৰা পেত্তিৰিসযেৰা অসুরকাযেৰা মনুস্সেসুৰা ভুম্মদেৰেসু ৰা একপরিচ্ছেদো নাম অত্থি. চতুন্নং অপাযানং আযুপ্পমাণ গণনায নিযমো নত্থীতি ৰুত্তং, ন নু ব্রহ্ম সংযুত্তে কোকালিকং ভিক্খুং আরব্ভ ভগৰতা ৰুত্তো দসন্নং নিরযানং ৰিসুং ৰিসুং অত্থীতি. সচ্চং অত্থি. তে পন দসনিরযা অৰীচিনিরযে পরিযাপন্না হুত্ৰা তস্স পদেসমত্তা হোন্তি. ন তেহি পদে সমত্তেহি সকলো অৰীচিনিরযো নিযতাযু পরিমাণোতি সক্কা ৰত্তুং. অপি চ সোপি তেসং আযুপরিচ্ছেদো অৰীচিভূমিযা নিযামেন সিদ্ধো ন হোতি. তেন তেন কম্মৰিসেসেনেৰ সিদ্ধো. তস্মা যং ৰুত্তং ‘‘তত্থ যেভূয্যেন কম্মপ্পমাণত্তা’’তি, তং সু ৰুত্তং হোতি. তেনাহ ‘‘তত্থ নিরযেসূ’’তিআদিং. ‘‘এৰং সন্তে’’তি ন ইতর দীপৰাসীনং আযুকপ্পস্স আরোহণঞ্চ ওরোহণঞ্চ অত্থীতি ৰুত্তে সতীতি অত্থো. সমাচারো নাম দসসুচরিতানি. ৰিসমাচারো নাম দসদুচ্চরিতানি. তেসং নিস্সন্দভূতা সম্পত্তিৰিপত্তিযোতি সম্বন্ধো. ‘‘তেসং পী’’তি ইতর দীপৰাসীনংপি. সো এৰপরিচ্ছেদোতি আপজ্জতি. ন চ সক্কা তথা ভৰিতুং. আদিকপ্পকালে সব্বেসম্পি চতুদীপ ৰাসীনং অসঙ্খ্যেয্যাযুকতা সম্ভৰতোতি. অথ ইতরদীপৰাসীনম্পি আযুকপ্পস্স আরোহণং ওরোহণঞ্চ অত্থি. এৰং সতি, এতরহিপি তেসং আযুকপ্পো জম্বুদীপৰাসীনং আযুকপ্পেন একগতিকো সিযাতি চোদনা. নিস্সন্দমত্তত্তাতিআদি পরিহারো. নত্থি ইদং মম ইদং মমাতি পৰত্তা পাটিপুগ্গলিকতণ্হা এতেসন্তি ‘‘অমমা’’. ‘‘অপরিগ্গহা’’তি পুত্তদারাদিপরিগ্গহরহিতা. ‘‘উপরিমে চাতুমহারাজিকে’’তি আকাসট্ঠকচাতুমহারাজিকে. দিৰে দেৰলোকে সিদ্ধানি দিব্বানি. ‘‘যাৰ নিমিরাজকালা’’তি যাৰ অম্হাকং বোধিসত্তভূতস্স নিমিরঞ্ঞো উপ্পন্নকালা. কস্স পবুদ্ধো পুরিমে অন্তরকপ্পে উপ্পন্নো. নিমিরাজা পন ইমস্মিং অন্তর কপ্পে উপ্পন্নো. ‘‘মনুস্স লোকেহি পঞ্ঞাসৰস্সানি চাতুমহারাজিকে একোদিব্বরত্তিদিৰো হোতী’’তিআদি অভিধম্মে ধম্ম হদয ৰিভঙ্গে আগতনযেন ৰুত্তো. চতুগ্গুণৰচনে. ‘‘উপরিমানং’’তি উপরিমানং দেৰানং. একং ৰস্সসহস্সং আযুপ্পমাণং হোতীতি সম্বন্ধো. ‘‘দ্ৰে’’তি দ্ৰে ৰস্সসহস্সানি. ‘‘অট্ঠা’’তি অট্ঠৰস্সসহস্সানি. ‘‘হেট্ঠিমানং’’তি হেট্ঠিমানং দেৰানং. ‘‘উপরিমানং’’তি উপরিমানং দেৰানং. যামে একো রত্তিদিৰোতিআদিনা যোজেতব্বং. ‘‘চত্তারী’’তি মনুস্সলোকে চত্তারি ৰস্সসতানি. এৰং সেসেসু. ‘‘আদিঅন্ত দস্সনৰসেনা’’তি চাতুমহারাজিকে মনুস্সৰস্সগণনা দস্সনং আদিদস্সনং নাম. ইদানি ৰসৰত্তিযং মনুস্সৰস্সগণনা দস্সনং অন্ত দস্সনং নাম.

ন অতিদুব্বলংতি নাতিদুব্বলং. ‘‘তং’’তি তং অৰিতক্ক অৰিচারমত্তঝানং. ‘‘ভূমন্তরে’’তি পথমজ্ঝানভূমিতো অঞ্ঞিস্সং দুতীযজ্ঝানভূমিযং. কপ্পৰচনে. কপ্পীযতি ৰস্স, উতু, মাস, পক্খ, রত্তি, দিৰা, দিৰসেন পরিচ্ছিজ্জীযতীতি কপ্পো. কপ্পীযন্তি ৰা নানাধম্মপ্পৰত্তিযো অতীতা দিৰসেন পরিচ্ছিজ্জীযন্তি এতেনাতি কপ্পো. কালো. মহন্তো কপ্পোতি মহাকপ্পো. ৰস্সানং সতভাগেহিপি সহস্সভাগেহিপি সতসহস্সভাগেহিপি সঙ্খাতুং অসক্কুণেয্যোতি অসঙ্খ্যেয্যো. একস্স অসঙ্খ্যেয্যস্স অন্তরে দিস্সমানো কপ্পো অন্তরকপ্পো. সত্তানং নানাআযুপরিচ্ছেদো আযুকপ্পো. সো পন মনুস্সানং দসৰস্সাযুককালে দসৰস্সেন পরিচ্ছিন্নো. নেৰসঞ্ঞা দেৰানং নিচ্চকালং চতুরাসীতি কপ্পসহস্সেহি পরিচ্ছিন্নো. অন্তরকপ্পো নাম চূল়কপ্পা ৰুচ্চন্তীতি সম্বন্ধো. ৰীসতিপ্পভেদা চূল়কপ্পা ৰুচ্চন্তীতি কেচি ৰদন্তীতিআদিনা যোজনা. ‘‘যে’’তি যে চতুসট্ঠিযাদিভেদা অন্তরকপ্পা. ‘‘যথাৰিনট্ঠং’’তি ৰিনট্ঠপ্পকারেন ৰিনট্ঠপ্পকতিযা. ৰড্ঢমানো কপ্পো ৰিৰট্টো. ‘‘যথাৰিৰট্টং’’তি ৰিৰট্টপ্পকারেন ৰিৰট্টপ্পকতিযা. অচ্চযেন অতিক্কমনেন. হরণেন অপনযনেন. ‘‘তত্থা’’তি তস্মিং কপ্পৰচনে. অট্ঠকথাযং ৰুত্তত্তাতি সম্বন্ধো. ‘‘তেজেনা’’তি অগ্গিনা. ‘‘সংৰট্টতী’’তি ৰিনস্সতি তদা. ‘‘হেট্ঠা’’তি হেট্ঠালোকো. ‘‘চতুসট্ঠিৰারেসূ’’তি নিদ্ধারণে ভুম্মৰচনং.

গাথাসু. ‘‘সত্তসত্তগ্গিনাৰারা’’তি সত্তসত্তৰারা অগ্গিনা ৰিনস্সন্তি. অথৰা, ভুম্মত্থে পচ্চত্তৰচনং. সত্তসুসত্তসুৰারেসু লোকো অগ্গিনা ৰিনস্সতীতি যোজনা. তেনাহ ‘‘অট্ঠমে অট্ঠমে’’তি. ‘‘দকা’’তি উদকেন. অট্ঠমে অট্ঠমেৰারে লোকো দকেন ৰিনস্সতীতি যোজনা. যদা চতুসট্ঠিৰারা পুণ্ণা, তদা একো ৰাযুৰারো সিযা. তত্থ ‘‘তদা’’তি তস্মিং চতুসট্ঠিৰারে. ‘‘ৰিৰট্টমানং’’তি সণ্ঠহমানং. ‘‘ৰিৰট্টতী’’তি সণ্ঠহতি. ‘‘সংৰট্টমানং’’তি ৰিনস্সমানং. ‘‘সংৰট্টতী’’তি ৰিনস্সতি. ‘‘দ্ৰে অসঙ্খ্যেয্যানী’’তি অড্ঢদ্ৰযং একং অসঙ্খ্যেয্যন্তি কত্ৰা উপচারেন ৰুত্তং. যথাতং-আভস্সরানং অট্ঠকপ্পানীতি. ‘‘উপড্ঢেনা’’তি উদকৰারে হেট্ঠিমভূমীসু উদকেন ৰিনস্সমানাসু দুতীযজ্ঝানভূমি ন তাৰ ৰিনস্সতি. সংৰট্টকপ্পেপি চিরকালং তিট্ঠতেযেৰ. ইদং সন্ধায ৰুত্তং. সব্বঞ্চেতং লব্ভমানত্তা ৰুত্তং. অসঙ্খ্যেয্যকপ্পং সন্ধায ৰুত্তন্তি. ইদমেৰ পমাণন্তি.

পটিসন্ধিচতুক্কং নিট্ঠিতং.

১৪৫. কম্মচতুক্কে. ‘‘জনেতী’’তি অজনিতং জনেতি. পাতুভাৰেতি. ‘‘উপত্থম্ভতী’’তি জনিতং উপত্থম্ভতি. চিরট্ঠিতিকং করোতি. ‘‘উপপীল়েতী’’তি জনিতং উপপীল়েতি, পরিহাপেতি. ‘‘উপঘাতেতী’’তি উপচ্ছিন্দতি. ‘‘কটত্তা রূপানং’’তি কটত্তানামকানং কম্মজরূপানং. ‘‘কম্মপথপত্তাৰা’’তি এত্থ পটিসন্ধিজনেন সতি, সব্বম্পি কম্মং কম্মপথপত্তং নাম হোতীতি দট্ঠব্বং. ৰিপচ্চিত্থাতি ৰিপক্কং. ৰিপক্কং ৰিপাকং যেসন্তি ৰিপক্ক ৰিপাকা. উপত্থম্ভমানা পৰত্ততি. সযংপি পচ্চযলাভে সতীতি অধিপ্পাযো. ‘‘অলদ্ধোকাসস্সা’’তি ইদং নিদস্সন মত্তং. লদ্ধোকাসস্সপি উপত্থম্ভনং নাম ইচ্ছিতব্বমেৰ. অঞ্ঞং অকুসলকম্মং ওকাসং লভতীতি যোজনা. ‘‘চাযং’’তি চে অযং. ‘‘কালঙ্করিযা’’তি কালংকরেয্য. ‘‘অস্সা’’তি ইমস্স পুগ্গলস্স. ‘‘পসাদিতং’’তি পসন্নং. ‘‘পদূসিতং’’তি পদুট্ঠং. পুব্বে ‘মরণাসন্ন কালে’তি ৰুত্তত্তা ইধ ‘পৰত্তিকালেপী’তি ৰুত্তং. ‘‘এতং’’তি কম্মন্তরস্স উপত্থম্ভনং. ‘‘জীৰিতপরিক্খারে’’তি জীৰিতপরিৰারে পচ্চযে. ‘‘সমুদানেত্ৰা’’তি সমাহ রিত্ৰা.‘‘এত্থা’’তি উপত্থম্ভক কম্মট্ঠানে. খন্ধসন্তানস্স উপব্রূহনন্তি সম্বন্ধো. ‘‘ৰুত্তনযেনা’’তি ‘জীৰিতন্তরাযে অপনেত্ৰা’তিআদিনা ৰুত্তনযেন. খন্ধসন্তানস্স চিরতরপ্পৰত্তিন্তি সম্বন্ধো. ‘‘ৰুত্তপ্পকারা’’তি ‘ৰিপচ্চিতুং অলদ্ধোকাসাৰা ৰিপক্ক ৰিপাকা ৰা সব্বাপি কুসলা কুসল চেতনা’তি এৰং ৰুত্তপ্পকারা. ‘‘দুব্বলতরং কত্ৰা ৰা ৰিবাধমানা’’তি উপপীল়ক কম্মকিচ্চং ৰুত্তং. ‘‘জনক কম্মস্স দুব্বল আযূহনকালে’’তি সমুচ্চযনকালে. ‘‘ৰিহত সামত্থিযং’’তি ৰিনাসিতসত্তিকং. ‘‘মহেসক্খেসূ’’তি মহানুভাৰেসু. ‘‘উপত্থম্ভকম্পি তব্বিপরিযাযেন ৰেদিতব্বং’’তি উপপীল়ক কম্মতো ৰিপরিযাযেন ৰেদিতব্বং. ‘উপরিভূমি নিব্বত্তকম্পি সমানং হেট্ঠাভূমিযং নিব্বত্তেতী’তিআদীসু ‘হেট্ঠাভূমি নিব্বত্তকম্পি সমানং উপরিভূমিযং নিব্বত্তেতী’তিআদিনা ৰত্তব্বন্তি অধিপ্পাযো. অজাতসত্তুরাজৰত্থুম্হি তস্স রঞ্ঞো পিতুঘাতকম্মং মহাঅৰীচিনিরযে নিব্বত্তনকম্পি সমানং পচ্ছা বুদ্ধু পট্ঠান কম্মেন বাধীযমানং ৰিহতসামত্থিযং হুত্ৰা তং উস্সদনিরযে নিব্বত্তেতি. খন্ধসন্তানস্স ৰিবাধনং নাম সত্তস্স দুক্খুপ্পত্তি করণন্তি সম্বন্ধো. কথং গোমহিংসাদীনং পুত্তদারঞাতিমিত্তানঞ্চ ৰিপত্তিকরণং তস্স সত্তস্স উপপীল়ক কম্মকিচ্চং ভৰেয্য. অঞ্ঞোহি সো পুগ্গলো, অঞ্ঞে গোমহিংসাদযো. ন চ অঞ্ঞেন কতং কম্মং অঞ্ঞেসং সত্তানং দুক্খুপ্পত্তিং ৰা সুখুপ্পত্তিং ৰা করেয্যাতি চোদনা. দুৰিধন্তিআদিনা তং ৰিস্সজ্জেতি. আনন্দ সেট্ঠিৰত্থুম্হি. সোসেট্ঠি মহামচ্ছরিযো অহোসি. অঞ্ঞেপি দানং দেন্তে নীৰারেসি. সো ততো চৰিত্ৰা একস্মিং গামকে একিস্সা ইত্থিযাকুচ্ছিম্হি জাতো. তস্স জাতকালতো পট্ঠায তস্স পাপকম্মেন মাতরং আদিং কত্ৰা সকলগামিকানং জনানং দুক্খুপ্পত্তি হোতীতি ধম্মপদ অট্ঠকথাযং ৰুত্তং. তস্মা নিস্সন্দফলৰসেন অঞ্ঞেন কতং কম্মং অঞ্ঞেসং সত্তানং দুক্খুপ্পত্তিং ৰা সুখুপ্পত্তিং ৰা করোতি যেৰাতি দট্ঠব্বং. [‘‘কম্মজসন্ততি সীসেসূ’’তি পটিসন্ধিকালতো পট্ঠায উপ্পন্না একেকা কম্মজরূপসন্ততি নাম অত্থি. সা পচ্ছা অপরাপরং তাদিসায কম্মজরূপসন্ততিযা পৰত্তত্থায সীসভূতত্তা সন্ততি সীসন্তি ৰুচ্চতি. যং কিঞ্চি একং ৰাকম্মজসন্ততি সীসং. দ্ৰে ৰাকম্মজসন্ততি সীসানি ]. ৰিসুদ্ধিমগ্গপাঠে. ‘‘তদেৰা’’তি তং উপঘাতক কম্মমেৰ. ‘‘ইধ চা’’তি ইমস্মিং অভিধম্মত্থসঙ্গহে. ‘‘ইমস্স পী’’তি ইমস্স উপঘাতক কম্মস্সপি. দুট্ঠগামণি রঞ্ঞো ৰত্থুম্হি চ সোণত্থের পিতুনো ৰত্থুম্হি চ তেসং মরণাসন্নকালে পথমং দুগ্গতি নিমিত্তানি উপট্ঠহন্তি. পচ্ছা রঞ্ঞো একং পুব্বকতং কল্যাণ কম্মং অনুস্সরন্তস্স থেরপিতু চ তঙ্খণে এৰ একং কল্যাণ কম্মং করোন্তস্স তানি দুগ্গতি নিমিত্তানি অন্তরধাযন্তি. সগ্গনিমিত্তানি পাতুব্ভৰন্তি. উভোপি চৰিত্ৰা সগ্গে নিব্বত্তন্তীতি. কুসলা কুসল কম্মানং খযং করোতীতি কুসলা কুসল কম্মক্খযকরো. ‘‘আযু কম্মেসু ৰিজ্জমানেসূ’’তি তস্স সত্তস্স আযু পরিচ্ছেদো চ পরিযন্ত গতো ন হোতি, কম্মানুভাৰো চ পরিক্খীণো ন হোতি. এৰং আযু কম্মেসু ৰিজ্জমানেসু. ‘‘অপরাধ কম্মস্সা’’তি মাতাপিতূসুৰা ধম্মিকসমণ ব্রাহ্মণেসু ৰা অপরজ্ঝনৰসেন কতস্স অপরাধকম্মস্স. ‘‘সো পনা’’তি মজ্ঝিমট্ঠকথাৰাদো পন. ‘‘অরুচ্চমানো ৰিযা’’তি অনিচ্ছিযমানোৰিয. ‘‘সো’’তি মজ্ঝিমট্ঠকথা ৰাদো. ‘‘তত্থ পনা’’তি মজ্ঝিমট্ঠকথাযং পন. ‘‘সব্বঞ্চেতং’’তি সব্বঞ্চ এতং সুত্তৰচনং, ৰসেন ৰুত্তন্তি সম্বন্ধো. অনিচ্ছন্তেহি টীকা চরিযেহি. ‘‘ৰিপাকং পটিইচ্ছিতব্বো’’তি ৰিপাকং পটিচ্চ ইচ্ছি তব্বো. এত্থ ‘‘ৰিপাকং’’তি কম্মনিব্বত্তক্খন্ধ সন্তানং ৰুচ্চতি. তস্স জনকং কম্মং জনক কম্মন্তি ৰুচ্চতি. তস্সেৰ খন্ধসন্তানস্স উপত্থম্ভকং তস্সেৰ উপপীল়কং তস্সেৰ উপঘাতকং কম্মং উপঘাতক কম্মন্তি ৰুচ্চতীতি অধিপ্পাযো. ‘‘সাকেত পঞ্হে’’তি ৰিপাকুদ্ধারে আগতে সাকেত পঞ্হে. ধম্মদিন্নায নাম উগ্গসেন রঞ্ঞো দেৰিযা ৰত্থুম্হি সাদেৰী পুব্বে একং অজং ঘাতেসি, তেন কম্মেন অপাযেসু পতিত্ৰা পচ্ছা পৰত্তি ৰিপাকৰসেন বহূসু ভৰেসু অজসরীরে লোমগণনামত্তং অত্তনো সীসচ্ছেদন দুক্খং অনুভোসীতি. ‘‘সা পনা’’তি সা একা পাণাতিপাত চেতনা পন. মহামোগ্গলান ৰত্থু নাম পঞ্চসত চোরানং থেরস্স ঘাত ন ৰত্থু. থেরোহি অত্তনা পুব্বকতেন উপচ্ছেদক কম্মেন চোরঘাতনং লভিত্ৰা পরিনিব্বুতো. সামাৰতিদেৰী চ ৰগ্গুমুদানদিতীরৰাসিনো পঞ্চসত ভিক্খূ চ অত্তনো পুব্বকতেহি উপচ্ছেদক কম্মেহি তাদিসং পরূপক্কমং লভিত্ৰা সগ্গেসু নিব্বত্তা. দুস্সিমারো নাম ককুসন্ধ বুদ্ধকালে মারদেৰ পুত্তো ৰুচ্চতি. কলাবুরাজানাম খন্তি ৰাদিতা পসস্স ঘাতকো ৰুচ্চতি. তে পন তঙ্খণে অত্তনা কতেন উপচ্ছেদক কম্মেন তঙ্খণে এৰ চৰিত্ৰা অৰীচিম্হি নিব্বত্তা. তত্থ পুরিম ৰত্থূসু উপচ্ছেদক কম্মং উপচ্ছিন্দন মত্তং করোতি. ন অত্তনো ৰিপাকং দেতি. পচ্ছিমৰত্থূসু পন উপচ্ছিন্দনঞ্চ করোতি, ৰিপাকঞ্চ দেতীতি. ৰিভাৰনিপাঠে. ‘‘উপচ্ছেদন পুব্বকং’’তি উপচ্ছেদন পুব্বকং ৰিপাকং জনেতীতি যোজনা. কম্মন্তরস্স ৰিপাকং উপচ্ছিন্দিত্ৰাৰ অত্তনো ৰিপাকং জনেতীতি অধিপ্পাযো. তত্থ ‘‘অত্তনো ৰিপাকং জনেতী’’তি ইধ কদাচি জনেতি, কদাচি ন জনেতীতি এৰং ৰিভাগস্স অকতত্তা ‘‘তং ন সুন্দরং’’তি ৰুত্তং. তেনাহ ‘‘ইধ পুব্বকতেনা’’তিআদিং. ‘‘অট্ঠকথাসুযেৰ আগতত্তা’’তি তেসু ৰত্থূসু তেজনা উপচ্ছেদক কম্মেন মরন্তীতি এৰং ৰত্ৰা আগতত্তা. ৰিপাকং নিব্বত্তেতীতি ৰিপাক নিব্বত্তকং. তস্স ভাৰো ৰিপাক নিব্বত্তকত্তং. ৰিপাক নিব্বত্তকত্তস্স অভাৰোতি ৰিগ্গহো.

জনকচতুক্কং নিট্ঠিতং.

১৩৬. ‘‘নিকন্তি বলেন ৰা পটিবাহিযমানং ৰিপাকং ন দেতী’’তি ঝানলাভিনো হুত্ৰাপি মরণকালে উপ্পজ্জিতুং নিকন্তিযা সতি, তং ঝানং ৰিপাকং ন দেতীতি অধিপ্পাযো. ‘‘একস্সা’’তি একস্স পুগ্গলস্স. ‘‘তেসং’’তি মহগ্গতকম্ম আনন্তরিয কম্মানং. অন্তিম জৰনৰীথিযং কতং নাম ৰত্থু দুব্বলত্তা সযম্পি দুব্বলং হোতি. পটিসন্ধিং ন জনেতি. তেনাহ ‘‘অন্তিম জৰনৰীথিতো পুব্বভাগে আসন্নে কতং’’তি. ইদঞ্চ কম্মসামঞ্ঞ ৰসেন ৰুত্তং. কম্মৰিসেসে পন সতি, ন দেতীতি ন ৰত্তব্বন্তি দস্সেতুং ‘‘মিচ্ছাদিট্ঠিকম্মং পনা’’তিআদি ৰুত্তং. কতং আসন্ন কম্মং নামাতি গহেতব্বন্তি যোজনা. পাল়িপাঠে. অস্সপুগ্গলস্স মরণকালেৰা সম্মাদিট্ঠি সমত্তা সমাদিন্না, মিচ্ছাদিট্ঠি সমত্তা সমাদিন্নাতি যোজনা. পরতো পরিপুণ্ণং আগমিস্সতি. সোমনস্স জনকং পরচেতনা পৰত্তিৰসেন. সন্তাপ জনকং কুক্কুচ্চৰিপ্পটিসারপ্পৰত্তিৰসেন. ইদং গরুক চতুক্কং নাম অনন্তরে ভৰে ৰিপচ্চনকানং কম্মানং ৰসেন ৰুত্তন্তি আহ ‘‘উপপজ্জৰেদনীয কম্মানি এৰা’’তি. কম্মং নাম কুসলং ৰা হোতু, অকুসলং ৰা. পুনপ্পুনং লদ্ধা সেৰনে সতি, ৰিপাকং দেতি. অসতি ন দেতি. কামাৰচরস্স কুসলস্স কম্মস্স কতত্তা উপচিতত্তা ৰিপাকং উপ্পন্নং হোতি চক্খু ৰিঞ্ঞাণন্তি চ, অকুসলস্স কম্মস্স কতত্তা উপচিতত্তা ৰিপাকং উপ্পন্নং হোতি চক্খু ৰিঞ্ঞাণন্তি চ, পাল়িযং ৰুত্তং. এত্থহি কতত্তাতি ৰত্ৰা পুন উপচিতত্তাতি ৰচনং পুনপ্পুনং ৰড্ঢনসঙ্খাতে আসেৰনে সতি এৰ ৰিপাকং দেতীতি ঞাপেতি. তস্মা কতমত্ত কম্মত্তা কটত্তা কম্মং নামাতি ৰুত্তেপি অনন্তরভৰে ৰিপচ্চনক কম্মস্সেৰ ইধ অধিপ্পেতত্তা পুনপ্পুনং লদ্ধা সেৰনমেৰ ইধ গহেতব্বন্তি দস্সেতুং অট্ঠকথাযং ‘‘পুনপ্পুনং লদ্ধাসেৰনং’’তি ৰুত্তং.

‘‘এৰঞ্চ কত্ৰা’’তিআদীসু. ‘‘যত্থ তং পুব্বকতং কম্মন্তি আগতং’’তি যস্মিং অট্ঠকথা পদেসে তং কটত্তা কম্মং পুব্বকতং কম্মংতি আগতং. ‘‘কস্মা ইধা’’তিআদীসু. ‘‘ইধা’’তি ইমস্মিং অভিধম্মত্থ সঙ্গহে. পাল়িযং. যং গরুকং, তং ৰিপাকং দেতি. তস্মিং অসতি, যং বহুলং. তস্মিং অসতি, যং আসন্নং. তস্মিং অসতি, যং কটত্তা ৰা পন কম্মং, তং ৰিপাকং দেতীতি অত্থো. সেসমেত্থ সুৰিঞ্ঞেয্যং.

সুত্তন্তপাঠে. সুখৰেদনং জনেতীতি সুখৰেদনীযং. ‘‘সমত্তা’’তি সুট্ঠুগহিতা. ‘‘সমাদিন্না’’তি তদত্থৰিৰরণং. ‘‘পরিযত্তং’’তি সমত্থং. তম্বদাধিকস্স যাৰজীৰং বহূনি পাপকম্মানি আচিণ্ণানি. মরণ দিৰসে পন সারিপুত্তত্থেরস্স ধম্মদেসনং সুত্ৰা চৰিত্ৰা তেন আসন্ন কম্মেন সগ্গে নিব্বত্তি. ৰাতকালস্স যাৰজীৰং বহূনি কল্যাণ কম্মানি আচিণ্ণানি. মরণ দিৰসেপন বুদ্ধসাসনে ৰিপরীত সঞ্ঞং কত্ৰা তেন আসন্ন কম্মেন অপাযে নিব্বত্তি.

গরুকচতুক্কং নিট্ঠিতং.

১৪৭. দিট্ঠধম্মচতুক্কে. পস্সিতব্বোতি দিট্ঠো. ‘‘ধম্মো’’তি খন্ধাযতন ধম্ম সমূহো. দিট্ঠো ধম্মোতি দিট্ঠ ধম্মো. ৰত্তমানো ধম্মসমূহো. যো অত্তভাৰোতি ৰুচ্চতি. অত্তসঙ্খাতস্স দিট্ঠিযা পরিকপ্পিতসারস্স ভাৰো পৰত্তি কারণন্তি কত্ৰাতি ইমমত্থং দস্সেন্তো ‘‘দিট্ঠ ধম্মো ৰুচ্চতী’’তিআদিমাহ. ‘‘ৰিপাকং পটিসংৰেদেতী’’তি এতেন কথং কম্মসাধনং দস্সেতি. পটিসংৰেদন ক্রিযাপদে ৰিপাকন্তি কম্মপদং দিস্ৰা ৰিপাকং নাম ৰেদিতব্বং ৰেদনীযং. পটিসংৰেদিতব্বং পটিসংৰেদনীযন্তি ৰিঞ্ঞাতত্তা. ‘‘উপেচ্চা’’তি উপগন্ত্ৰা. ‘‘উপপজ্জিত্ৰা’’তি উপেচ্চ পজ্জিত্ৰা. পাপুণিত্ৰাতি অত্থো. ৰিভাৰনিপাঠে. ‘‘দিট্ঠ ধম্মতো’’তি দিট্ঠ ধম্মস্স. সামিঅত্থে পঞ্চমী. পাল়িযং ৰুত্তং. ‘‘এত্থহী’’তিআদি পুব্বৰাক্যে ৰুত্ত নযমেৰ. অপরসদ্দো নিচ্চং অপাদানা পেক্খো. তঞ্চ অপাদানং নাম অনন্তরে ৰুত্তপদেহি. ‘‘দিট্ঠধম্মা নাগতানন্তর ভৰেহী’’তি দিট্ঠধম্মতো চ অনাগতানন্তর ভৰতো চাতি অত্থো. ‘‘পরিৰত্তো’’তি পবন্ধো. অপরাপরিযোতি ৰা, অপরো চ অপরো চ অপরাপরো. অপরাপরে পৰত্তো অপরাপরিযোতি অত্থো. ‘‘উপপজ্জভৰং’’তি অনাগতানন্তরভৰং. অহোসি কম্মে ‘‘অহোসী’’তি পদং অঞ্ঞাসি কোণ্ডঞ্ঞোতি পদেৰিয রুল়্হীনামপদন্তি আহ ‘‘অহোসি নামকং’’তি. তং পন রুল়্হিপদং কুতোপৰত্তংতি আহ ‘‘অহোসি কম্মং’’তিআদিং. ‘‘এৰং ৰুত্ত পাঠৰসেনা’’তি এত্থ ইধ ৰুত্তো পাঠো সা ৰসেসো. পরিপুণ্ণপাঠো পন অহোসি কম্মং অহোসি কম্ম ৰিপাকো, অহোসি কম্মং নাহোসি কম্ম ৰিপাকো, অহোসি কম্মং অত্থিকম্ম ৰিপাকো, অহোসি কম্মং নত্থি কম্মৰিপাকো, অহোসিকম্মং ভৰিস্সতি কম্ম ৰিপাকো, অহোসি কম্মং ন ভৰিস্সতি কম্ম ৰিপাকোতিআদিনা পটিসম্ভিদা মগ্গে আগতো. ‘‘সা’’তি পথম জৰন চেতনা. ‘‘অপ্পতর ৰিপাকা চাতী’’তি এত্থ ‘‘ইতী’’তি হেতু অত্থে নিপাতো, তস্মা অচিরট্ঠিতি কত্তা দিট্ঠ ধম্মে এৰ ফলং দত্ৰা ৰিগচ্ছতি, তস্মা অপ্পতর ৰিপাকত্তা অহেতুকমত্তং ফলং দত্ৰা ৰিগচ্ছতীতি যোজনা. ‘‘পচ্চযোতি চা’’তি পচ্চযং লদ্ধাতি ৰুত্তো পচ্চযোতি চ. ‘‘সো’’তি মহন্তং ৰুত্তো পচ্চযো. ‘‘কাকৰলিযাদীনং ৰিযা’’তি কাকৰলিযাদীনং পুগ্গলানং দিট্ঠৰেদনীয কম্মং ৰিয. ‘‘পাকটতরপ্ফলদানং’’তি সত্তাহব্ভন্তরে এৰ সেট্ঠিট্ঠানপ্পটি লাভাদিৰসেন পাকটতরপ্ফলদানকং কম্মৰিসেসং. কম্ম পথজৰনসন্তানে পৰত্তা পথমজৰন চেতনা ৰা ইতরাপি পথম জৰন চেতনা ৰাতি যোজনা. ‘‘কাচী’’তি একচ্চা পথমজৰন চেতনা. সেসানি দিট্ঠধম্ম ৰেদনীয কম্মানি.

উপপজ্জকম্মে. ‘‘অত্থ সাধিকা’’তি সন্নিট্ঠানত্থসাধিকা. পাণঘাতাদি কিচ্চসাধিকাতি ৰুত্তং হোতি. সুট্ঠু নিট্ঠাপেতীতি সন্নিট্ঠাপিকা. ‘‘সেসানি পী’’তি সেসানি উপপজ্জ ৰেদনীয কম্মানিপি. ‘‘ইধা’’তি ইমস্মিং মনুস্স লোকে. ‘‘মিস্সককম্মানী’’তি কুসলা কুসলমিস্সকানি কম্মানি. ৰেমানিকপেতৰত্থূনি ৰিমানৰত্থু পাল়িযং আগতানি. ‘‘সুগতিযং ৰিপত্তিং অনুভৰন্তানি ৰত্থূনী’’তি এত্থ ‘‘ৰিপত্তিং’’তি চক্খু সোতাদীনং অঙ্গ পচ্চঙ্গানং ৰা ৰিপত্তিং. নানা দুক্খুপ্পত্তিভূতং ৰা ৰিপত্তিং. ‘‘দুগ্গতিযং সম্পত্তিং’’তি মহিদ্ধীনং নাগসুপণ্ণাদীনং সম্পত্তিং. ‘‘যথা ৰুত্ত ৰত্থূহী’’তি ৰেমানিক পেতৰত্থাদীহি. অট্ঠকথাপাঠে. ‘‘তেসং সঙ্কমনং নত্থী’’তি তেসং কম্মানং ৰিপচ্চনকাল সঙ্কন্তি নাম নত্থি. ‘‘যথাঠানেযেৰ পতিট্ঠন্তী’’তি তানি দিট্ঠ ধম্মট্ঠানাদিৰসেন ভগৰতা যথা ৰুত্তট্ঠানে এৰ তিট্ঠন্তি. ‘‘এৰং ৰুত্তং’’তি তেসং সঙ্কমনং নত্থীতিআদিনযেন ৰুত্তং. ‘‘যুত্তিযা ৰা অভাৰতো’’তি এত্থ দিট্ঠ ধম্ম ৰেদনীযস্স পটিসন্ধি ৰিপাকাদি যুত্তিযা অভাৰতো.

দিট্ঠধম্মচতুক্কং.

১৪৮. পাকট্ঠানচতুক্কে. ‘‘কাযাদীনং’’তি চোপনকাযাদীনং. কায ৰিঞ্ঞত্তাদীনন্তি ৰুত্তং হোতি. ‘‘অতিপাতেন্তী’’তি অতিক্কম্ম পযোগেন অভিভৰিত্ৰা পাতেন্তি. তেনাহ ‘‘অতিপাতনঞ্চেত্থা’’তিআদিং. ‘‘অদিন্নং’’তি সামিকেনঅদিন্নং পরসন্তকং. অগমনীযৰত্থূনি নাম অৰীতিক্কমনত্থায অনুপগন্তব্বানি মাতুরক্খিতাদীনি ইত্থি পুরিসসরীরানি. ‘‘তস্সা’’তি পরপাণস্স. ‘‘ততো’’তি পরপরিগ্গহিত ভাৰতো. ‘‘অচ্ছিন্দক চেতনা’’তি পরসন্তকস্স অত্তনো সন্তককরণৰসেন ভুসং পরসন্তকা ভাৰচ্ছিন্দক চেতনা. ৰিলুপ্পন চেতনাতি ৰুত্তং হোতি. ‘‘মগ্গেন মগ্গপ্পটিপাদকস্সা’’তি অত্তনো মগ্গেন পরমগ্গ সম্পযোজকস্স. ‘‘এত্থপী’’তি যথা অদিন্নাদানে পরপরিগ্গহিত সঞ্ঞিনোতি দুতীযং অঙ্গপদং ৰুত্তং. এৰং এত্থপি. এত্থ ৰদন্তি অগমনীয ৰত্থু ৰসেন চিত্তন্তি অৰত্ৰা তস্মিং সেৰন চিত্তন্তি ৰুত্তং. তস্মা অগমনীয ৰত্থু সঞ্ঞিতাতি অৰুত্তম্পি ৰুত্তসদিসং হোতীতি. ন হোতি. ন হি তস্মিন্তি ৰচনং সঞ্ঞাৰিসেস সহিতং অত্থং ৰদতি. ঈদিসেসু চ ঠানেসু সচে সঞ্ঞাপধানং হোতি. পাণসঞ্ঞিতা, পরপরিগ্গহিত সঞ্ঞিতা,তি অঙ্গ পদং ৰিয ইধপি অগমনীয ৰত্থু সঞ্ঞিতাতি দুতীযং অঙ্গপদং অৰস্সং ৰত্তব্বং হোতি. কস্মা, অঙ্গনিযমট্ঠানত্তা. তেনাহ ‘‘এতেনা’’তিআদিং. ‘‘চতুরঙ্গীকোৰ ৰুত্তো’’তি তস্স চত্তারো সম্ভারা. অগমনীয ৰত্থু, তস্মিং সেৰন চিত্তং, সেৰনপ্পযোগো, মগ্গেন মগ্গপ্পটিপত্তি অধিৰাসনন্তি. ‘‘সা’’তি ভিক্খুনী. ‘‘রক্খিতাসু সঙ্গহিতা’’তি মাতুরক্খিত পিতু রক্খিতাদীসু সঙ্গহিতা. ‘‘টীকাসু পনা’’তি সুত্তন্তটীকাসু পন. ‘‘সা’’তি ভিক্খুনী. পাসণ্ডা ৰুচ্চন্তি দ্ৰাসট্ঠি দিট্ঠিগতাদীনি. তং ৰাদিনো পাসণ্ডিযা নাম. তেসং ধম্মো পাসণ্ডিয ধম্মো নাম. মিচ্ছাচারোপি দুস্সীলায ইত্থিযা ৰীতিক্কমো অপ্পসাৰজ্জো. ততো গোরূপ সীলিকায মহাসাৰজ্জো. ততো সরণঙ্গতায, পঞ্চ সিক্খা পদিকায, সামণেরিযা, পুথুজ্জন ভিক্খুনিযাতিআদি. অট্ঠকথা পাঠে. ‘‘এত্থা’’তি ইমস্মিং অকুসলকাযকম্মে. ‘‘ন গহিতং’’তি থেরেন ৰা অট্ঠকথাচরিযেহি ৰা ন গহিতং. সুরঞ্চ মেরযঞ্চ পিৰন্তি এতেনাতি সুরামেরয পানং. তদজ্ঝোহরণ চেতনা কম্মং. ‘‘সব্ব লহুকো’’তি সব্বেসং সুরাপান কম্ম ৰিপাকানং মজ্ঝে যো ৰিপাকো লহুকতরো, পৰত্তিৰিপাকমত্তোতি ৰুত্তং হোতি. ‘‘উম্মত্তকসংৰত্তনিকো’’তি উম্মত্তভাৰ সংৰত্তনিকো. ‘‘পঞ্চপী’’তি সুরাপান কম্মেন সহ পঞ্চপি. মূলটীকা ৰচনে. ‘‘তস্সা’’তি সুরাপান কম্মস্স. পটিসম্ভিদা মগ্গটীকাযং ইমস্স ৰাক্যস্স সংৰণ্ণনাযং ৰুত্তন্তি সম্বন্ধো. তত্থ ‘‘তব্বি রমণাদযো চা’’তি ততো সুরাপানতো ৰিরমণাদযো চ. ‘‘মদস্সা’’তি মজ্জনস্স. ‘‘অপুঞ্ঞপথস্সা’’তি অকুসল কম্ম পথস্স. ‘‘তব্বিরতি পী’’তি ততো সুরাপানতো ৰিরতিপি. ‘‘নিম্মদতাযা’’তি মজ্জনরহিত ভাৰস্স. ‘‘সা’’তি নিম্মদতা. ‘‘পুঞ্ঞপথস্সা’’তি কুসলকম্ম পথস্স. ‘‘ইতী’’তি তস্মা. ‘‘তানী’’তি সুরাপান কম্মতব্বিরতি কম্মানি. ‘‘ন ইতরং’’তি কম্মপথেহি অসম্বন্ধং. সুরাপানং ৰিসুং পটিসন্ধিং ন দেতীতি যোজনা. তব্বিরতি কম্মে পন সচে ইদং সুরাপানং নাম পাপকম্মং দুচ্চরিতন্তি ঞত্ৰা সমাদান ৰিরতি সম্পত্তৰিরতি ৰসেন তং সিক্খাপদং রক্খতি. তং সীলং অঞ্ঞেহি পুঞ্ঞপথেহি অসম্বন্ধম্পি ৰিসুং পটিসন্ধিং ন দেতীতি ন ৰত্তব্বং. ‘‘এৰমিদং পী’’তি এৰং ইদম্পি সুরাপান কম্মং কম্ম পথপত্তস্স কম্মস্স পরিৰারভূতং এৰ পটিসন্ধিং জনেতীতি যোজনা. ‘‘তত্থা’’তি কম্মপথসুত্তেসু. সরূপতো ন ৰুত্তন্তি চ সক্কা ৰত্তুন্তি সম্বন্ধো. ‘‘যং’’তি যং সুরাপান কম্মং. ‘‘তত্থা’’তি তেসু কম্মপথসুত্তেসু. কম্ম জননং নাম দুচ্চরিত কম্মানং জননং. সক্কেন দেৰান মিন্দেন তস্স অপাযগামিতা ৰুত্তাতি সম্বন্ধো. তস্সাসুরায পুণ্ণং ইমং সুরাকুম্ভংকিণাথ. মূলং দেথ গণ্হাথাতি অত্থো. ‘‘তস্সা’’তি সুরাপান কম্মস্স. অপাযং গমেতি সম্পাপেতীতি অপায গামী. ‘‘যদিদং’’তি যা অযং যথালাভ যোজনা অত্থি. মূলটীকা ৰচনে. ‘‘কম্মসহজাতা’’তি অকুসল কম্মসহজাতা তণ্হা. ‘‘তেসং’’তি তেসং পঞ্চন্নং কম্মানং. ‘‘কোট্ঠাসতো’’তি ধম্মসঙ্গণিযং ফস্সো হোতি, ৰেদনা হোতীতিআদিনা ৰুত্তে ধম্মুদ্দেসৰারে ঝানাদিকোট্ঠাসা নাম আগতা. তেসু পঞ্চ সিক্খাপদা কোট্ঠাসতো কম্মপথ কোট্ঠাসিকা এৰ. কম্মপথ কোট্ঠাসে অন্তোগধাতি অত্থো. ‘‘পুরিমানং চতুন্নং’’তি পাণাতি পাতাদীনং চতুন্নং কম্মানং. ‘‘পটিক্খিত্তো’’তি তস্স কম্মপথভাৰো পটিক্খিত্তো. ‘‘ততীযং’’তি ততীয সুত্তং. এতাসুপি চ অট্ঠকথাসু.

কাযকম্মাদীসু. সসম্ভারকাযো নাম সকলো রূপকাযো. পসাদকাযো নাম কাযপসাদো এৰ. কায ৰিঞ্ঞত্তি চোপনকাযো নাম. ‘‘চোপন’’ন্তি চ চলনং ৰুচ্চতি. ‘‘সো যেৰা’’তি চোপনকাযোযেৰ. কাযকম্ম নাম লাভো চ হোতি, তস্মা সো কম্মানং পৰত্তি মুখন্তি ৰুচ্চতীতি যোজনা. ‘‘কম্মানি ৰিসেসেতুং’’তি ইদং কাযকম্মং নাম, ইদং ৰচীকম্মং নামাতি ৰিসেসেতুং নিযমেতুং. ‘‘সক্কোন্তী’’তি কম্মানি ৰিসেসেতুং সক্কোন্তি. তস্মা কাযদ্ৰারে ৰুত্তিতোতি চ ৰচীদ্ৰারে ৰুত্তিতোতি চ ৰুত্তন্তি অধিপ্পাযো. মিচ্ছাচারস্স ৰচীদ্ৰারে অপ্পৰত্তিতো ‘‘পুরিমানি দ্ৰে’’তি ৰুত্তং. ‘‘মজ্ঝিমানি চত্তারী’’তি মুসাৰাদাদীনি চত্তারি ৰচীকম্মানি. ‘‘ছব্বিধানি তানি ৰজ্জানীতি’’তি ‘কাযকম্মং জহেয্যু’ন্তিআদীনি ছব্বিধানি তানি ৰজ্জানি. কথং একমেকেন বাহুল্ল সদ্দেন ছব্বিধানি তানি ৰজ্জেতীতি. অন্ৰযতো চ ব্যতিরেকতো চ ৰজ্জেতি. কথং, পাণাতিপাত কম্মং কদাচি অপ্পকেন ৰচীদ্ৰারে উপ্পন্নম্পি কাযদ্ৰারে এৰ পৰত্তি বহুলত্তা কাযকম্মমেৰ হোতি. ৰচীকম্ম সঙ্খ্যং ন গচ্ছতি. দ্ৰে ৰা অস্স নামানি ন ভৰন্তি. ৰচীদ্ৰারে পন অপ্পকৰুত্তিত্তা ৰচীকম্মং নাম ন হোতি. কাযকম্মন্তি নামং ন জহতি. দ্ৰে ৰা অস্স নামানি ন ভৰন্তীতি এৰং একেন কাযদ্ৰারে বাহুল্ল ৰুত্তিৰচনেন পাণাতিপাত কম্মে ছব্বিধানি ৰজ্জানি ৰজ্জেতীতি. এৰং সেসেসু. ৰনচরকো নাম ৰনলুদ্দকো. সো পন কদাচি অপ্পকেন গামে চরন্তোপি ৰনে বাহুল্ল চারিত্তা ৰনচরকো এৰ হোতি. গামচরকোতি নামং ন লভতি. দ্ৰে ৰা অস্স নামানি ন ভৰন্তি. এৰং সঙ্গামাৰচরকাপি. সঙ্গামাৰচরো নাম সঙ্গামে বাহুল্লাৰচরো হত্থী ৰুচ্চতি. এত্থ মনোদ্ৰারং সব্ব কম্ম সাধারণত্তা কম্মানি ৰিসেসেতুং ন সক্কোতীতি ৰুত্তং. এৰঞ্চসতি, ‘অভিজ্ঝা ব্যাপাদো মিচ্ছাদিট্ঠি চেতি মনস্মিং ৰুত্তিতো মনোকম্মং নামা’তি ইদং ন ৰত্তব্বন্তি. নো ন ৰত্তব্বং. কম্ম সিদ্ধিং পটিচ্চ অঞ্ঞদ্ৰারেহি অসাধারণত্তা. তেনাহ ‘‘মনোকম্মানি পনা’’তিআদিং. ‘‘সিদ্ধং’’তি নিব্বত্তং. ‘‘কাযকম্মদ্ৰারং’’তি এত্থ তত্থ চোপনকাযো কাযকম্মানং পৰত্তি বহুলত্তা কাযকম্ম দ্ৰারং নাম. চোপনৰাচা তত্থ ৰচীকম্মানং পৰত্তি বহুলত্তা ৰচীকম্মদ্ৰারং নাম. কুসলা কুসল জৰন চিত্তং পন মনোকম্মানং তত্থেৰ কম্ম কিচ্চ সিদ্ধিতো মনোকম্ম দ্ৰারং নামাতি এৰং কম্মেন দ্ৰার ৰৰত্থানং ৰেদিতব্বং. ‘‘তস্স দ্ৰারস্স নামং ভিন্দিতুং ৰা’’তি কাযোতি নামং ভিন্দিতুং ৰা. ‘‘অত্তনো নামং দাতুন্তি ৰা’’তি ৰচীতি নামং তস্স দাতুং ৰা. ‘‘ব্রাহ্মণ গামাদীনং ব্রাহ্মণ গামাদিভাৰো ৰিযা’’তি তস্মিং অঞ্ঞকুলেসু ৰসন্তেসুপি ব্রাহ্মণ কুলবহুলত্তা ব্রাহ্মণ গামোত্ৰেৰ নামং হোতি. তস্মিং ৰনে অঞ্ঞরুক্খেসু সন্তেসুপি খদীররুক্খ বহুলত্তা খদীরৰনন্ত্ৰেৰ নামং হোতীতি ৰত্তব্বন্তি. কাযকম্মং নিট্ঠিতং.

১৪৯. ৰচীকম্মে. ‘‘মুসা ৰদন্তী’’তি অভূততো ৰদন্তি. পিসতি এতাযাতি পিসুণা. ‘‘নিরুত্তি নযেনা’’তি এত্থ পিযসুঞ্ঞ করণাতি ৰত্তব্বে অক্খর লোপকরণং নিরুত্তি নযো নাম. ‘‘যেনা’’তি যেনজনেন. ‘‘সম্ফং’’তি এত্থ সংসদ্দো সম্মতি দুক্খং এতেনাতি অত্থেন সুখে হিতে ৰত্ততীতি আহ ‘‘সং সুখং হিতঞ্চা’’তি. কীদিসং সুখং হিতঞ্চাতি আহ ‘‘সাধুজনেহি অধিগন্তব্বং’’তি. এতেন পাপজনেহি অধিগন্তব্বং হিতসুখং পটিক্খিপতি. হিতসুখস্স ৰিনাসনং নাম তস্স আগমন মগ্গভিন্দনন্তি আহ ‘‘হিতসুখ মগ্গং ভিন্দতী’’তি. ‘‘তং ৰা’’তি এত্থ ‘‘তং’’তি হিতসুখং. ‘‘অত্থ ধম্মা পগতস্সা’’তি অত্থতো চ ধম্মতো চ অপগতস্স. ‘‘পটিভাণ চিত্তস্সা’’তি সুণন্তানং চিত্তরতি চিত্তহাসৰড্ঢনত্থায পটিভাণঞ্ঞাণেন চিত্তীকতস্স. ‘‘যত্থা’’তি যস্মিং কথা মগ্গে. ‘‘অত্থ ধম্ম ৰিনযপদং’’তি অত্থ পদঞ্চ ধম্মপদঞ্চ ৰিনয পদঞ্চ. তত্থ অত্থো নাম আরোগ্যসম্পত্তি, মিত্তসম্পত্তি, পঞ্ঞাসম্পত্তি, ধন সম্পত্তি, ভোগসম্পত্তিযো. তাসু কোসল্লজনকং ৰাক্যপদং অত্থপদং নাম. ইদং সুচরিতং নাম সগ্গসংৰত্তনিকং, ইদং দুচ্চরিতং নাম অপায সংৰত্তনিকন্তি এৰং সভাৰ ধম্মেসু কোসল্ল জনকং ৰাক্য পদং ধম্ম পদং নাম. এৰং চিত্তং দমিতব্বং, এৰং ইন্দ্রিযানি দমিতব্বানি, এৰং রাগো ৰিনেতব্বো, এৰং দোসো ৰিনেতব্বোতিআদিনা ৰিনেতব্বেসু ৰিনয কোসল্লজনকং ৰাক্যপদং ৰিনয পদং নাম. যত্থ এৰরূপং অত্থ পদঞ্চ ধম্ম পদঞ্চ ৰিনয পদঞ্চ কিঞ্চি নত্থি. তস্স ৰাচা ৰত্থুমত্তস্স এতংনামং হোতীতি যোজনা. ‘‘সম্ফং’’তি ৰুত্তপ্পকারং নিরত্থকৰচনং. ‘‘তত্থা’’তি তেসু ৰচীকম্মেসু. ৰিসংৰাদনং নাম ৰিরজ্ঝা পনং. ৰিসংৰাদকো নাম ৰিরজ্ঝাপনকো. অত্থং ভঞ্জতি ৰিনাসেতীতি অত্থ ভঞ্জনকো. ‘‘কম্মপথভেদো’’তি পটিসন্ধি জনকো কম্মপথৰিসেসো. ‘‘ইতরো’’তি অত্থ ভঞ্জনকতো অঞ্ঞো মুসাৰাদো. ‘‘কম্ম মেৰা’’তি পৰত্তি ৰিপাক জনকং ৰচীকম্মমেৰ. ‘‘রজানং’’তি ধূলীনং. তাসু সুগতি দুগ্গতীসু উপ্পজ্জন্তীতি তদুপ্পজ্জনকানি. ‘‘পথভূতত্তা’’তি উপ্পত্তিমগ্গভূতত্তা. ‘‘ভেদ পুরেক্খারেনা’’তি মিত্তভেদপুরেক্খারেন. মিত্তং ভিন্দতীতি ভেদকো. ‘‘সংকিলিট্ঠ চেতনা’’তি অত্থ পুরেক্খার ধম্ম পুরেক্খার ৰিনয পুরেক্খার অনুসাসনি পুরেক্খার রহিতা কেৰলং ভেদপুরেক্খার চেতনা সংকিলিট্ঠ চেতনা নাম. ‘‘পরে ভিন্নে যেৰা’’তি পরজনে পরজনেন মিথুভেদৰসেন ভিন্নেযেৰ. ‘‘যং কিঞ্চী’’তি যং কিঞ্চি অক্কোসৰত্থু. ‘‘অযং পী’’তি অযং ফরুসৰাচাপি. এৰং অক্কোসন কম্মংপি অক্কোসিতব্বস্স দূরে ঠিতস্সপি মতস্সপি সম্পজ্জতীতি যোজনা. অনত্থং নিরত্থকৰাচা ৰত্থু মত্তং ৰিঞ্ঞাপেতীতি অনত্থৰিঞ্ঞাপনকো. ‘‘সচ্চতো গণ্হন্তে যেৰা’’তি যথা সো কথেতি, তথা তং ৰত্থু উপ্পন্ন পুব্বন্তি এৰং সচ্চতো গণ্হন্তেযেৰ. কেচি সচ্চতো গণ্হিত্ৰা কিঞ্চি ৰত্থুং পূজনীয ঠানে ঠপেত্ৰা থোমেন্তা পূজেন্তা ৰন্দন্তা পরিহরন্তি. সম্পরাযি কত্থায তং সরণং গচ্ছন্তি. সব্বমেতং নিরত্থকং হোতি. ‘‘তদস্সাদৰসেনা’’তি তং রাজকথাদিং তত্থ চিত্তরতিং লভিত্ৰা অস্সাদৰসেন কথেন্তস্সেৰ কম্মং হোতি. অনিচ্চ লক্খণ ৰিভাৰনত্থায ৰা রতনত্তয গুণৰিভাৰনত্থায ৰা পাপ গরহ কল্যাণ সম্ভাৰনায ৰা কথেন্তস্স পন সত্থকমেৰ হোতীতি অধিপ্পাযো. তেনাহ ‘‘অত্থ ধম্ম ৰিনয নিস্সিতং’’তিআদিং. সেসমেত্থ কাযদ্ৰারে দীপিতমেৰ.

১৫০. মনোকম্মে. ‘‘অভিঝাযন্তী’’তি অতিরেকতরং ঝাযন্তি, চিন্তেন্তি, ওলোকেন্তি ৰাতি ইমমত্থং দস্সেন্তো ‘‘অস্সাদমত্তে অঠত্ৰা’’তিআদিমাহ. ‘‘ব্যাপাদেন্তী’’তি ৰিগতভাৰং আপাদেন্তি সম্পাপেন্তি. তঞ্চ আপাদনং ন কাযৰাচাহি. অথ খো চিত্তেনেৰাতি ৰুত্তং ‘‘চিন্তেন্তী’’তি. ‘‘তব্বি পরীততো’’তি সপ্পুরিস পঞ্ঞত্তিতো ৰিপরীতেন. ‘‘তত্থা’’তি তেসু মনোকম্মেসু. ‘‘ইদং মমস্সা’’তি ইদং সন্তকং মমসন্তকং ভৰেয্য, অহো সাধু ৰতাতি যোজনা. ‘‘অত্তনো কত্ৰা’’তি অত্তনো সন্তকং কত্ৰা. ‘‘লাভাৰতিমে’’তি এত্থ সুলাভং লভন্তীতি লাভা. ‘‘অত্তনো করেয্যং’’তি অত্তনো সন্তকং করেয্যং. পরভণ্ডং ৰত্থু যস্সাতি পরভণ্ড ৰত্থুকো. ‘‘ৰত্থূ’’তি আরম্মণভূতং ৰত্থু. যাৰ ন পরিণামেতি, তাৰ ন কম্মপথভেদো হোতীতি যোজনা. ‘‘ৰুত্তঞ্হেতং অট্ঠকথাসূ’’তি অধিকারো. ‘‘অযং’’তি অযং সত্তো. ‘‘তস্সা’’তি তস্স সত্তস্স. দসৰত্থুকামিচ্ছাদিট্ঠি নাম ‘নত্থিদিন্নং, নত্থিযিট্ঠং, নত্থিহুতং’তিআদিকা মিচ্ছাদিট্ঠি. দ্ৰাসট্ঠি দিট্ঠিগতেসু কাচিদিট্ঠিযো নত্থিকাদি সভাৰা হোন্তি. ইধ পন তব্বহুলনযেন কম্মমেৰাতি ৰুত্তং. যথাৰুত্তোতি সম্বন্ধো. গচ্ছন্তস্স পুগ্গলস্স. ‘‘চিত্তুপ্পাদো’’তি মগ্গচিত্তুপ্পাদে. ‘‘পস্সন্তো’’তি তীণি লক্খণানি পস্সন্তো. ৰুত্তোতি সম্বন্ধো. ‘‘নিযামং’’তি সম্মত্ত নিযামং. অৰিপরীতনিযামন্তি অত্থো. পুন ‘‘নিযামং’’তি মিচ্ছত্তনিযামং. ৰিপরীত নিযামন্তি অত্থো. তিকিচ্ছিতুং অসক্কুণেয্যোতি অতেকিচ্ছো. একন্তেন অপাযগামী হোতীতি অত্থো. ‘‘অপস্সিত্ৰা’’তি দিট্ঠিট্ঠানানং অপস্সিত্ৰা. ‘‘মিচ্ছাধিমোক্খমত্তেনা’’তি তিত্থা চরিযেসু সদ্দহন মত্তেনাতি অধিপ্পাযো. ‘‘সকং আচরিযকং’’তি অত্তনো আচরিযস্স সন্তকভূতং. ঠিতো পুগ্গলো. অট্ঠকথাযং ৰুত্তো, যথাহ মিচ্ছত্ততিকে মিচ্ছাসভাৰাতি মিচ্ছত্তা. ৰিপাকদানে সতি, খন্ধভেদানন্তরমেৰ ৰিপাকদানতো নিযতা. মিচ্ছত্তা চ তে নিযতা চাতি মিচ্ছত্তনিযতা. সম্মাস ভাৰাতি সম্মত্তা. সম্মত্তা চ তে নিযতা চ অনন্তরমেৰ ফলদান নিযমেনাতি সম্মত্তনিযতাতি. ‘‘তস্সা’’তি মিচ্ছাদিট্ঠিযা. ‘‘অচোপেত্ৰা’’তি অচালেত্ৰা. ‘‘এতেনা’’তি এতেনপি সদ্দেন. ‘‘ইমেসং’’তি মনোকম্মানং. ‘‘এতেনা’’তি মনস্মিং এৰাতি ৰচনেন. ‘‘উপপন্নং’’তি পরিপুণ্ণং. ‘‘উপলক্খণাদিৰসেনা’’তি উপলক্খণনয নিদস্সননয পধাননযাদিৰসেন. ‘‘অত্থন্তরপ্পসঙ্গো হোতী’’তি কথং হোতি. এৰসদ্দেন ৰিনা পাণাতিপাত কম্মং কাযদ্ৰারে বাহুল্ল ৰুত্তিতো কাযকম্মং নামাতি ৰুত্তে ইদং লদ্ধাতপত্তো রাজকুমারোতি ৰিয উপলক্খণনযমত্তং. তেন সেসদ্ৰারেসুপি বাহুল্ল ৰুত্তিং উপসল্লক্খেতীতি অত্থন্তরপ্পসঙ্গো সিযাতি. এৰং সেসনযেসুপীতি. ‘‘অপিচা’’তি কিঞ্চি ৰত্তব্বং অত্থীতি জোতেতি. ‘‘তেসূ’’তি পাণৰধাদীসু. ‘‘একং অঙ্গং’’তি উপক্কমোতি চতুত্থং অঙ্গং. ‘‘তং সহজাতা চা’’তি চেতনা সহজাতা চ. চেতনা পক্খে ভৰাতি চেতনা পক্খিকা. চেতনা ৰিয কাযকম্মভাৰং গচ্ছন্তীতি ৰুত্তং হোতি. ‘‘অব্বোহারিকত্তং গচ্ছন্তী’’তি মনোকম্মন্তি ৰোহরিতুং অপ্পহোনকত্তং গচ্ছন্তীতি অত্থো. অত্তা পধানং যেসং তে অত্তপ্পধানা. অভিজ্ঝাদযো. অত্তপ্পধানা ন হোন্তি. চেতনা পধানা হোন্তি. ইধেৰ তে অত্তপ্পধানা হোন্তীতি অত্থো. ‘‘তথা তথা’’তি অহোৰত ইদং মমস্সাতিআদিনা তেন তেন পকারেন. ‘‘তত্থা’’তি তেসু মনোকম্মেসু. ‘‘সব্বেন সব্বং’’তি পাটিপদিকপদমেতং. সব্বপ্পকারতোতি অত্থো. ‘‘ইধা’’তি মনোকম্মট্ঠানে. ‘‘মনোকম্ম কিচ্চৰিসেসেনা’’তি অহোৰত ইদং মমস্সাতিআদিকেন কিচ্চ ৰিসেসেন. মনোকম্ম দীপনা নিট্ঠিতা.

১৫১. ‘‘এত্থ চ দসন্নং পী’’তিআদীসু. ‘‘তাপী’’তি তা পুব্বাপরচেতনাযোপি. আদিতো পট্ঠায পৰত্তা তাপীতি সম্বন্ধো. ‘‘যানিপনা’’তিআদীসু. একো একস্স ৰদতি অহং ইমং সত্তং মারেমি, ত্ৰং অসুকংসত্তং মারেহীতি. এৰং ৰত্ৰা উভোপি উপক্কমং করোন্তি. কম্মং পন উভিন্নম্পি ন সিজ্ঝতি. তত্থ আণাপকস্স ত্ৰং অসুকং সত্তং মারেহীতি আণাপন কম্মং সচে সিজ্ঝতি. ৰচীদ্ৰারে পৰত্তং কাযকম্মন্তি ৰুচ্চতি. ইধ পন অসিদ্ধত্তা ৰচীদ্ৰারে দিস্স মানং ৰচীকম্মন্তি ৰুচ্চতি. ৰচীদুচ্চরিতমত্তন্তি ৰুত্তং হোতি. এসনযো সেসেসুপি.

‘‘দোসমূলেনা’’তিআদীসু. দোসো এৰ মূলং দোসমূলং. দোসো মূলং মস্সাতি দোসমূলং. তং সম্পযুত্ত চিত্তন্তি দ্ৰিধা অত্থো. ব্যাপাদো নাম দোসো এৰ. সো কথং দোসেন মূলেন জাযেয্যাতি ৰুত্তং ‘‘পুরিমো ব্যাপাদৰজ্জেহী’’তি. পরতো অভিজ্ঝাযম্পি এসনযো. ৰিভাৰনিপাঠে. নিধিপাঠকা নাম রাজনিধি ৰিধাযকা. তত্থ চণ্ডো নিগ্গহেতব্বোতি আগতত্তা দুট্ঠনিগ্গহত্থন্তি ৰুত্তং. রাজূনং অদিন্নাদানং মোহমূলেন জাযতীতি যোজনা. ‘‘ব্রাহ্মণানঞ্চা’’তি সকসঞ্ঞায এৰ যং কিঞ্চি হরন্তানং ব্রাহ্মণানঞ্চ কম্মফলসম্বন্ধাপৰাদীনঞ্চ. ‘‘আহরণং’’তি অদিন্নাদানৰসেন হরণং. অৰহরণন্তি ৰুত্তং হোতি. যো পন মোহো রাজূনং উপ্পন্নো, যো চ ব্রাহ্মণানং উপ্পন্নো, যো চ কম্ম ফলসম্বন্ধা পৰাদীনং উপ্পন্নোতি সম্বন্ধো. ‘‘লোভো নিদানং কম্মানং সমুদযাযা’’তি লোভো কম্মানং সুট্ঠুৰড্ঢনায নিদানং কারণং হোতীতি যোজনা. সঞ্জাতা কঙ্খাযেসং তে সঞ্জাতকঙ্খা. পরিতো উট্ঠাতি এত্থাতি পরিযুট্ঠানং. কঙ্খায পরিযুট্ঠানং কঙ্খাপরিযুট্ঠানং. জনানং তানিকম্মানীতি সম্বন্ধো.

অকুসলকম্মদীপনানিট্ঠিতা.

১৫৭. কুসলকম্মে. অযং পন এৰমাদীসু সুত্তপদেসু আগতোতি সম্বন্ধো. ‘‘মেত্তং কাযকম্মং’’তি মেত্তাসহগতং কাযকম্মং. এৰং ৰচীকম্মেপি. চেতনা হেত্থ কম্মন্তি অধিপ্পেতা. মনোকম্মে পন চেতনাপি যুজ্জতি. অব্যাপাদোপি যুজ্জতি. ঞাণং অনুপরিৰত্তীতি ঞাণানুপরিৰত্তং. ঞাণানুপরিৰত্তীতিপি পাঠো, সো যেৰত্থো. ‘‘পদক্খিণং’’তি পৰড্ঢিতং. অপরং পরিযাযং দস্সেতি ‘‘যস্মিং পনা’’তিআদিনা. দুস্সীলস্স ভাৰো দুস্সিল্যং. পাণাতিপাতাদিকম্মং. ‘‘পৰত্তমানে’’তি কাযদ্ৰারে পৰত্তমানে. ‘‘যং পন কুসলং’’তি পাণাতি পাতাদিতো ৰিরতি কুসলং. ‘‘পৰত্তমানং’’তি চিত্তে পৰত্তমানং. ‘‘কিচ্চ সীসেনা’’তি কিচ্চপ্পধানেন. কিচ্চং পধানং কত্ৰাতি অধিপ্পাযো. সেসমেত্থ কাযকম্মে সুৰিঞ্ঞেয্যং.

‘‘ৰচীকম্মেপি এসেৰনযো’’তি যস্মিং দুস্সিল্যে পৰত্তমানে ৰাচা অপরিসুদ্ধা হোতি. ৰচী সংৰরো ভিজ্জতীতিআদিনা ৰত্তব্বং. ‘‘অৰসেসং পনা’’তি তীহি কাযকম্মেহি চতূহি ৰচীকম্মেহি অৰসেসং. তত্থ ‘‘তীহি কাযকম্মেহী’’তি তীহি কাযদুচ্চরিত ৰিরতি কম্মেহি. ‘‘চতূহি ৰচীকম্মেহী’’তি চতূহি ৰচীদুচ্চরিত ৰিরতি কম্মেহি. ‘‘সব্বংপি কল্যাণ কম্মং’’তি সব্বম্পি দানকম্মং, সব্বম্পি ভাৰনা কম্মং, অপচাযন কম্মং, ৰেয্যাৰচ্চকম্মং, পত্তিদানকম্মং, পত্তানুমোদনাকম্মং, ধম্মসৰন কম্মং, ধম্ম দেসনা কম্মং, সব্বম্পি দিট্ঠিজুকম্মং তীসুদ্ৰারেসু পৰত্তম্পি মনোকম্মং নামাতি যোজনা. ইমেসু পন দ্ৰীসু পরিযাযেসু পচ্ছিমোযেৰ পধানন্তি সম্বন্ধো. ‘‘যাৰ দেৰা’’তি অন্তিম পরিচ্ছেদ জোতকো নিপাতো. মত্থকপরিচ্ছেদেনাতি অত্থো.

সীলপদে. ‘‘সীলযতী’’তি সম্মা দহতি চ উপধারেতি চাতি দ্ৰিধা অত্থো. ‘‘সুসমাহিতানী’’তি সুপ্পতিট্ঠিতানি. ‘‘উপরিমে কুসল ধম্মে’’তি মহগ্গত লোকুত্তর কুসলধম্মে. সত্তসু ৰিসুদ্ধীসু উপরিমে চিত্ত ৰিসুদ্ধাদি কুসলধম্মে. ‘‘অধিকুসল ধম্মে’’তি অধিকে বোধিপক্খিয কুসল ধম্মে. পরেহি দিন্নং, তদেৰ পত্তিং. সব্বানি পন তানি দানাদীনি কুসলানি. সোধেন্তি সপ্পুরিসাজনা. তানি এৰপুঞ্ঞানি. একমেকং পুঞ্ঞক্রিযৰত্থু. ‘‘ইমিনা পচ্চযেনা’’তি চীৰরাদি পচ্চযেন, অন্নপানাদি পচ্চযেন, ধন ধনঞ্ঞাদিপচ্চযেন ৰা. ‘‘সব্বংপি চেতং’’তি সব্বম্পি এতং দসৰিধং পুঞ্ঞং. ‘‘হীনেন ছন্দেনা’’তি যসকামতাদিৰসেন হীনেন ছন্দেন, হীনেন চিত্তেন, হীনেন ৰীরিযেন, হীনায ৰীমংসায. ‘‘মজ্ঝিমেনা’’তি পুঞ্ঞপ্ফলকামতাদিৰসেন মজ্ঝিমেন. ‘‘পণীতেনা’’তি কত্তব্বমেৰিদন্তি অরিযৰংসানু ব্রূহনৰসেন পণীতেন ছন্দাদিনা পৰত্তি তং পণীতন্তি যোজনা. ‘‘যসকামতাযা’’তি কিত্তি সদ্দকামতায ৰা, পরিৰারকামতায ৰা. ‘‘পুঞ্ঞপ্ফলকামতাযা’’তি ভৰসম্পত্তি ভোগসম্পত্তিকামতায. ‘‘অরিযভাৰং নিস্সাযা’’তি ইদং দানং নাম অরিযানং ৰংসো. অহম্পি অরিযো. তস্মা মযাপি কত্তব্বমেৰিদন্তি এৰং অরিযভাৰং নিস্সাযাতি অত্থো. এত্থ চ ‘‘অরিযো’’তি আচার অরিযোপি যুজ্জতি দস্সন অরিযোপি. তত্থ আচার অরিযো নাম সপ্পুরিসো পুথুজ্জন কল্যাণকো ৰুচ্চতি. দস্সন অরিযো নাম পরমত্থ অরিযো. ‘‘পারমিতা দানং’’তি সব্বদানেহি অগ্গপত্তং মহাবোধি সত্তানং পারঙ্গতদানং. তঞ্হি সব্ব সত্তৰিমোক্খত্থায পৰত্তি তত্তা অগ্গপত্তং হোতি, পারঙ্গতং. ততো উত্তরিতরস্স কস্সচিদানস্স অভাৰতো. সেসেসুপি পুঞ্ঞ ক্রিযৰত্থূসু. ‘‘তিকদ্ৰযং’’তি পুরিমাদি হীনাদি তিকদ্ৰযং. ‘‘অন্তিম ৰত্থুনা’’তি অন্তিম ৰত্থু অজ্ঝাপজ্জনেন ৰা. ‘‘দুস্সীলো নামা’’তি দুস্সীল ভিক্খু নাম. সো হি যাৰভিক্খুপ্পটীঞ্ঞং ন ৰিজহি. তাৰ ভিক্খু এৰ. ন সামণেরো, ন গিহী. তং চে অঞ্ঞো ভিক্খু অমূলকেন অন্তিম ৰত্থুনা অনুদ্ধংসেতি. অনুদ্ধংসেন্তস্স সঙ্ঘাদি সেসো. ওমসৰাদে পাচিত্তিযং. সহসেয্যট্ঠানে তেন সহ অতিরেক রত্তিং সযন্তস্সাপি আপত্তি নত্থি. তস্মা সো দুস্সীল ভিক্খুত্ৰেৰ ৰত্তব্বোতি. ‘‘পুন কম্মৰাচায সমাদাতব্বন্তি নত্থী’’তি যথা সিক্খং পচ্চক্খন্তস্স সব্বং সমাদানং ভিজ্জতি. পুন ভিক্খুভাৰং ইচ্ছন্তেন পুন কম্মৰাচায সমাদাতব্বং হোতি. এৰং পুন কম্মৰাচায সমাদাতব্বন্তি নত্থি. ‘‘ইতরেসু পনা’’তি লিঙ্গনাসনঙ্গতো অঞ্ঞেসু দণ্ডকম্মঙ্গেসু. নিচ্চসীলাদীসু. ‘‘যং নিচ্চমেৰ ৰট্টতী’’তি যং পাণাতিপাত ৰিরতি সীলং নিচ্চমেৰ রক্খিতুং ৰট্টতি. অনিচ্চং ন ৰট্টতি. কস্মা, পাণঘাতাদিং করোন্তস্স সব্বকালম্পি দুচ্চরিত সম্ভৰতো. তেনাহ ‘‘অনিচ্চং সাৰজ্জং হোতী’’তি. দুচ্চরিতং হোতীতি অত্থো. ‘‘যং নিচ্চম্পি ৰট্টতী’’তি পকতি গহট্ঠানং যং ৰিকাল ভোজনাদি ৰিরতি সীলং নিচ্চম্পি ৰট্টতি. ‘‘অনিচ্চম্পি ৰট্টতী’’তি সমাদান দিৰসং অতিক্কমিত্ৰা ৰিকাল ভোজনাদিং করোন্তস্স ৰীতিক্কম দোসোৰা দুচ্চরিত দোসো ৰা নত্থীতি অধিপ্পাযো. তেনাহ ‘‘সাৰজ্জং ন হোতী’’তি. দুচ্চরিতং ন হোতীতি অত্থো. তথা দসসীলঞ্চ পকতি গহট্ঠানং অনিচ্চসীলং নামাতি যোজনা. ‘‘অনিচ্চসীলমেৰ হোতী’’তি পকতি গহট্ঠানং তং দসসীলং যাৰজীৰং নিচ্চং কত্ৰা সমাদিযিত্ৰা রক্খন্তানম্পি অপব্বজিতত্তা পব্বজিতেসু জাতি সভাৰেনেৰ সিদ্ধং নিচ্চসীলং নাম ন হোতি. যাৰজীৰং কত্ৰা সমাদান ৰসেনেৰ নিচ্চং হোতীতি অধিপ্পাযো. ‘‘ৰেসধারণেন সহ সিদ্ধত্তা’’তি এত্থ কথং ৰেসধারণেন সিদ্ধং হোতীতি. ৰেসধারণং নাম গিহিৰত্থং পহায কাসায ৰত্থ ধারণং. কাসাযৰত্থঞ্চ নাম অরহত্তধজো হোতি. ন চ অরহত্তধজং ধারেন্তস্স সিক্খাপদং অসমাদিযন্তস্সপি ৰিকালে ভুঞ্জিতুং ৰট্টতি. তথা নচ্চাদীনি পস্সিতুং, মালাদীনি ধারেতুং, উচ্চাসযনাদীসু ৰসিতুং, জাতরূপাদীনি সাদিতুং. কস্মা ইতি চে, তেসঞ্হি তং তং যথাসকং সীলং নিচ্চং সুদ্ধং কত্ৰা রক্খিতুমেৰ ৰট্টতীতিআদিনা কারণং হেট্ঠা ৰুত্তমেৰাতি. ‘‘অপ্পনং অপত্তাৰ অধিপ্পেতা’’তি অপ্পনাপত্তানং মহগ্গতভাৰনানং ৰিসুং উপরি ৰক্খমানত্তাতি অধিপ্পাযো. ‘‘এত্থেৰা’’তি ইমস্মিং ভাৰনা কম্মে এৰ. ‘‘তে সঞ্ঞেৰা’’তি রতনত্তযাদীনং এৰ চ. গন্তুং আরদ্ধো গমিকো. অদ্ধানং দীঘমগ্গং গচ্ছন্তো অদ্ধিকো. ‘‘পরিসুদ্ধেনা’’তি লাভসক্কারাদি নিরপেক্খতায অত্তুক্কং সন পরৰম্ভনাদি রহিততায চ পরিসুদ্ধেন. ‘‘হিতপ্ফরণ চিত্তেনা’’তি মযি করোন্তে ইমস্স এত্তকং হিতসুখং ভৰিস্সতীতি এৰং তেসং হিতসুখেসু ফরণ চিত্তেন. মেত্তচিত্তেনাতি ৰুত্তং হোতি. ‘‘অত্তনো কিচ্চেসু ৰিযা’’তি এতেন তেসং সব্বং কিচ্চং অত্তনোভারং করোতীতি দীপেতি. ‘‘সাধারণ করণং’’তি অত্তনো পুঞ্ঞং পরেসং দানং. অত্ত মনতাপৰেদনিযাধুসাধূতি ৰচীভেদকরণং. তঞ্হিদিন্নঞ্চানুমোদিতঞ্চ দিট্ঠধম্মৰেদনীযং জাতন্তি সম্বন্ধো. ‘‘যোনিসোমনসিকারে ঠত্ৰাতি এত্থ সিলোকাদিপক্খিকং অযোনিসোমনসিকারং জহিত্ৰা সুণন্তস্স ইমং ধম্মং সুত্ৰা অত্থরসধম্মরসপ্পটিসংৰেদী ভৰিস্সামীতি, দেসেন্তস্স ইমং দেসেন্তো ধম্মস্স চ সুণন্তানঞ্চ অনুগ্গহং করিস্সামীতি যোনিসোমনসিকারে ঠত্ৰা. লাভ সক্কারাদি পক্খিকো মনসিকারো অযোনি সোমনসিকারো নাম. নিয্যানত্থ নিস্সরণত্থ পক্খিকো যোনিসোমনসিকারো নাম. নিরৰজ্জ কম্মানি নাম কসিগোরক্খাদি কম্মানি. নিরৰজ্জসিপ্পানি নাম ৰড্ঢকিসিপ্পাদীনি ৰেজ্জসিপ্পাদীনি চ. নিরৰজ্জ ৰিজ্জাঠানানি নাম পরূপরোধর হিতানি অঙ্গৰিজ্জা ৰেদৰিজ্জা মন্তৰিজ্জাদীনি. ‘‘ৰোদান করণং’’তি ৰিসেসেন ৰিসুদ্ধকরণং. ‘‘তং সভাৰত্তা’’তি দানসভাৰত্তা. ‘‘চারিত্ত সীলত্তা’’তি সপ্পুরিসানং পকতি চারিত্ত সীলত্তা. পুন ‘‘তং সভাৰত্তা’’তি ভাৰনা সভাৰত্তা. তথাহি দেসেন্তস্স চ সুণন্তস্স চ দেসনাসোতানুসারেন চিত্তভাৰনা ঞাণভাৰনাৰহত্তা দেসনাসৰনা সভাৰা হোন্তি. অত্তনো দিট্ঠিং সযমেৰ উজুং করোন্তস্স চ ঞাণভাৰনা কম্মমেৰ. তথা পরস্স ধম্মদেসনং সুত্ৰা উজুং করোন্তস্সাপীতি. ‘‘ধম্মো নাম নত্থী’’তি দেসনা ধম্মো নাম নত্থি. কস্মা, দানসীলানি দেসেন্তেনপি অন্তে লক্খণত্তযেন সহসচ্চপ্পকাসনস্স কত্তব্বত্তা. এতেন দেসনাসৰনা অন্তে লক্খণত্তযানুপস্সনা ভাৰনা কম্মট্ঠানে পতিট্ঠিতত্তা তং সভাৰা হোন্তীতি দস্সেতি. ‘‘মনোকম্ম মেৰা’’তি পদুদ্ধারো. ‘‘মনস্মিং এৰা’’তি মনোদ্ৰারে এৰ. ‘‘কিচ্চসিদ্ধিতো’’তি অপ্পনাকিচ্চস্স সিজ্ঝনতো. ‘‘অঙ্গভাৰা সম্ভৰতো’’তি অপ্পনা কিচ্চসিদ্ধিযং অঙ্গভাৰা সম্ভৰতো. ‘‘তঞ্চভাৰনা ময’’ন্তি পদুদ্ধারো. ‘‘দানাদিৰসেনা’’তি দানসীলৰসেন. দানৰসেন অপ্পৰত্তনতোতি ইদং তাৰ যুজ্জতি. সীলৰসেন অপ্পৰত্তনতোতি ইদং পন পাল়িযা ন সমেতি. পাল়িযঞ্হি মহগ্গতজ্ঝানেসুপি পহানং সীলং ৰেরমণি সীলন্তিআদি ৰুত্তন্তি চোদনা. তং পরিহরন্তো ‘‘যং পনা’’তিআদিমাহ. ‘‘পরিযাযেন ৰুত্তং’’তি কেনপরিযাযেন ৰুত্তন্তি. পকতি চারিত্তং সীলন্তি ৰুচ্চতি. উপ্পন্নে চ পথমজ্ঝানে নীৰরণানং পহানং নাম পকতিচারিত্তমেৰ পকতি নিযামেন পৰত্তমেৰ. ইতি পকতিচারিত্তত্তা সীলন্তি ৰুত্তং. পুন নীৰরণানং পহানমেৰ তেহি ৰিগমনট্ঠেন ৰেরমণীতি চ, পিদহনট্ঠেন সংৰরোতি চ, পহান কিচ্চং অৰিজহনট্ঠেন অৰীতিক্কমোতি চ, ৰুত্তং. চেতনাসীলন্তি এত্থ পন ঝানসম্পযুত্ত চেতনা এৰ ৰুচ্চতি. সা চ সীলজাতি কত্তা সীলন্তি ৰুত্তাতি দট্ঠব্বং. ‘‘অপ্পনাপত্ত’’ন্তি পদুদ্ধারো. ‘‘ঝানভেদেনা’’তি পন ৰত্তব্বং. রূপাৰচরকুসলঞ্হি ঝানভেদেন পঞ্চৰিধং, ঝানমেৰ পন ঝানঙ্গভেদেন পঞ্চৰিধন্তি.

কুসলকম্মদীপনা নিট্ঠিতা.

১৫৩. ‘‘এত্থা’’তিআদীসু. ‘‘ধম্মসঙ্গহে’’তি ধম্মসঙ্গণি পাল়িযং. ‘‘দস্সনেনা’’তি সোতাপত্তি মগ্গঞ্ঞাণেন. ‘‘তং’’তি উদ্ধচ্চ চেতনং. ‘‘ভাৰনাযা’’তি উপরিমগ্গত্তযসঙ্খাতায ভাৰনায. পাল়িপাঠে. ‘‘চিত্তুপ্পাদা’’তি চিত্তচেতসিকা ৰুচ্চন্তি. ‘‘সিযা’’তি একচ্চেতি অত্থে নিপাত পদং. ইমেসু ছসু চিত্তুপ্পাদেসু একচ্চে ছ চিত্তুপ্পাদা সোতাপত্তি মগ্গেন পহাতব্বা, একচ্চে ছ চিত্তুপ্পাদা তীহি উপরি মগ্গেহি পহাতব্বাতি অত্থো. তত্থ পথমপদে ‘‘একচ্চে ছ চিত্তুপ্পাদা’’তি কম্মপথপত্তকম্মসহজাতা ছ চিত্তুপ্পাদা. দুতীয পদে ‘‘একচ্চে ছ চিত্তুপ্পাদা’’তি অকম্মপথ পত্তা ধম্মিকেসু ঠানেসু অস্সাদনাভি নন্দাদিৰসেন পৰত্তা ছ চিত্তুপ্পাদা. ‘‘তত্থা’’তি ধম্মসঙ্গহে. ‘‘ইতরত্থা’’তি ইতরেসু ভাৰনায পহাতব্বেসু. ‘‘তস্সা’’তি নানক্খণিক কম্মপচ্চযস্স. পাল়িপাঠে. ‘‘সহজাতা’’তি অত্তনো পচ্চযুপ্পন্নেহি সহজাতা. ‘‘নানক্খণিকা’’তি অত্তনো পচ্চযুপ্পন্নেহি অসহজাতা অতীতকালভূতে নানক্খণে পৰত্তা পাণাতিপাতাদি চেতনা. ‘‘যদি এৰং’’তি এৰং যদি সিযাতি অত্থো. যদি উদ্ধচ্চ চেতনা দস্সন পদে অনুদ্ধটত্তা পটিসন্ধিং নাকড্ঢতীতি ৰিঞ্ঞাযেয্য. এৰং সতীতি পাঠসেসো. ‘‘চে’’তি চে ৰদেয্য. ‘‘না’’তি ন সক্কা ৰত্তুং. ‘‘তস্সা ৰিপাকস্সা’’তি তস্সা উদ্ধচ্চ চেতনায ৰিপাকস্স. পাল়িপাঠে. ‘‘ইমেসু ধম্মেসু ঞাণং’’তি ইমে ধম্মে আরম্মণং কত্ৰা উপ্পন্নঞ্ঞাণং. ‘‘তেসং ৰিপাকে’’তি উদ্ধচ্চ সহগতানং ৰিপাকে. ‘‘ঞাণং’’তি তং ৰিপাকং আরম্মণং কত্ৰা উপ্পন্নঞ্ঞাণং. ‘‘সব্ব দুব্বলন্তি চ সক্কা ৰত্তুং’’তি সম্বন্ধো. ‘‘অতিৰিয কাল়কধম্মত্তা’’তি বুদ্ধাদীসু মহন্তেসু ঠানেসু সদ্ধারতনস্স অন্তরাযং কত্ৰা পৰত্তনতো অতিযেৰকণ্হ ধম্মত্তা. তস্সা ৰিচিকিচ্ছা চেতনায পটিসন্ধি আকড্ঢনম্পি ৰিঞ্ঞাতব্বন্তি যোজনা. ‘‘সভাৰ ৰিরুদ্ধত্তা যেৰা’’তি ৰিচিকিচ্ছা অসন্নিট্ঠান সভাৰা. অধিমোক্খো সন্নিট্ঠান সভাৰোতি এৰং সভাৰ ৰিরুদ্ধত্তাযেৰ.

‘‘সব্বত্থা’’তিআদীসু. ‘‘ৰিপচ্চতীতি ৰিপাচেতী’’তি ৰদন্তি. তং পন পদরূপেন ন সমেতীতি অঞ্ঞং অত্থং ৰদন্তো ‘‘সব্বম্পি ৰা’’তিআদিমাহ. ‘‘মহাসম্পত্তিযো সমুট্ঠাপেত্ৰা’’তি দেৰলোকে দেৰসম্পত্তি সদিসা দিব্বৰিমানাদিকা মহাসম্পত্তিযো সমুট্ঠাপেত্ৰা. ইদং ‘‘ওকাসং কত্ৰা’’তি পদে ৰিসেসনং. তত্থ ‘‘সুখ ৰিপাকং’’তি ইদং অট্ঠ অহেতুক ৰিপাকানি সন্ধায ৰুত্তং. রূপলোকে ব্রহ্মানং রূপকাযো রূপাৰচর কম্মেন নিব্বত্তো. সো চ কামাৰচর ধম্ম সমূহো এৰ. এৰং সন্তে তস্মিং লোকে পঞ্চ অহেতুক ৰিপাকানিপি রূপাৰচর কম্মেন নিব্বত্তানি সিযুন্তি চোদনা. তং পরিহরন্তো ‘‘রূপাৰচর কুসলংহী’’তিআদিমাহ. ‘‘তানী’’তি অপাযভূমিযং উপ্পন্নানি অট্ঠ অহেতুক ৰিপাকানি. ‘‘সব্বস্মিং কামলোকে’’তি একাদসৰিধে কামলোকে. ‘‘তেসু চা’’তি তেসু অট্ঠ অহেতুক ৰিপাকেসু চ. ‘‘আরম্মণন্তরে’’তি কসিণ নিমিত্তাদিতো অঞ্ঞস্মিং আরম্মণে. ‘‘নিমিত্তা রম্মণে’’তি কসিণ নিমিত্তাদিকে নিমিত্ত পঞ্ঞত্তা রম্মণে. ‘‘তানি পঞ্চৰিপাকানী’’তি চক্খু ৰিঞ্ঞাণাদীনি পঞ্চ অহেতুক ৰিপাকানি কামাৰচর কুসল কম্মস্সেৰ ৰিপাকানি হোন্তীতি যোজনা. ‘‘সোল়সক মগ্গো’’তি সোল়সকথা মগ্গো কথাপবন্ধো. এৰং দ্ৰাদস কমগ্গো. ‘‘অহেতুকট্ঠক’’ন্তি অহেতুক ৰিপাকট্ঠকং. সম্মা পকারেন জানাতীতি সম্পজানং. ঞাণং. সম্পজানেন কতন্তি ৰিগ্গহো. ন সম্পজানকতং অসম্পজানকতং. ‘‘সদ্দহিত্ৰা’’তি এতেন দিট্ঠুজু কম্মঞাণ সম্পত্তিং দীপেতি. ন হি তেন ঞাণেন অসম্পন্নো কম্মঞ্চ কম্মফলঞ্চ সদ্দহতীতি. জানিত্ৰাতি ৰা পাঠো সিযা. ‘‘একমেকং’’তি একমেকং কুসলকম্মং. ‘‘কুসল সমযে’’তি কুসল কম্ম করণকালে. কুসলুপ্পত্তিকালে ৰা. যস্সমে ঈদিসং পুঞ্ঞং পসুতং. তস্সমে ভৰলাভো ভোগলাভো মিত্তলাভো সব্বেলাভা একন্তেন সুলাভাতি অত্থো. ‘‘সুলদ্ধং’’তি ইদং পুঞ্ঞং সুলদ্ধং. দেৰেসু চ মনুস্সেসু সংসরিত্ৰাতি পাঠসেসো. ‘‘সেসেনা’’তি তস্সকম্মস্স ৰিপাকাৰসেসেন. অট্ঠকথা পাঠে. ‘‘একপিণ্ডপাতস্মিং’’তি একৰারং পিণ্ডপাতদানে. সংযুত্তট্ঠকথাযং ৰুত্তং. তস্মা যং ৰুত্তং ‘একা চেতনা একমেৰ পটিসন্ধিং দেতী’তি, তং সুৰুত্তন্তি অধিপ্পাযো. ‘‘পটিপক্খেহী’’তি পটিপক্খেহি অকুসলেহি. ৰিসেসেন ভুসং মুল়্হো ব্যামুল়্হো. অতিৰিয ব্যামুল়্হো অতিব্যামুল়্হো. অতিব্যামুল়্হত্থায পচ্চযভূতন্তি ৰিগ্গহো. অতিদুপ্পঞ্ঞায পচ্চযভূতন্তি অত্থো. সো হি থেরো ৰদতীতি সম্বন্ধো. ‘‘ইতি কত্ৰা’’তি এৰং মনসিকরিত্ৰা. ‘‘সন্নিহিতপচ্চযমত্তেনা’’তি আসন্নে সণ্ঠিতপচ্চয মত্তেন. ‘‘পুব্বপযোগ পচ্চযমত্তেনা’’তি ৰুত্তং হোতি. বলৰকম্মৰসেন উপ্পন্নত্তা তিক্খতরং ৰিপাকং. যদা পযোগ রহিতেন পচ্চযগণেন উপ্পজ্জতি, তদা অসঙ্খারিকং নাম. যদা পযোগসহিতেন, তদা সসঙ্খারিকং নাম. তত্থ অসঙ্খারিকং তিক্খং নাম. সসঙ্খারিকং মন্দং নাম. তথা দুব্বল কম্মেন উপ্পন্নে মন্দৰিপাকেপি যোজেতব্বং. এৰং তিক্খমন্দানং মন্দতিক্খতাপত্তি নাম সিযা. ন চ তথা সক্কা ভৰিতুন্তি অধিপ্পাযো. এত্থ সিযা, যদি পুব্বকম্মৰসেন অট্ঠন্নং মহাৰিপাকানং সঙ্খারভেদো সিদ্ধো সিযা, অট্ঠন্নং অহেতুক ৰিপাকানম্পি সোসঙ্খারভেদো সিদ্ধো ভৰেয্য. তানিপি হি কানিচি অসঙ্খারিকেন কম্মেন নিব্বত্তানি, কানিচি সসঙ্খারিকেনাতি চোদনা. তং পরিহরন্তো ‘‘অহেতুক ৰিপাকানং পনা’’তিআদিমাহ. ‘‘উভযকম্ম নিব্বত্তনং’’তি তেসং সঙ্খার ভেদরহিতত্তা অসঙ্খারিক কম্মেনপি ৰিরোধো নত্থি. সসঙ্খারিক কম্মেনপি ৰিরোধো নত্থি. অসঙ্খারিক কম্মেনপি নিব্বত্তন্তি. সসঙ্খারিক কম্মেনপি নিব্বত্তন্তি. এৰং উভযকম্ম নিব্বত্তনং যুত্তং. ‘‘ইতি অধিপ্পাযো’’তি তস্স থেরস্স অধিপ্পাযো. ‘‘ন কম্মাগমন ৰসেনা’’তি কম্মসঙ্খাতস্স চিরকালতো আগমন পচ্চযস্স ৰসেন. ‘‘আগমনং’’তি চ আগচ্ছতি এতেনাতি আগমনন্তি ৰিগ্গহো. ‘‘কম্মভৰে’’তি অতীতে কম্মকরণভৰে. ‘‘কেচনা’’তি কেচি. অট্ঠসালিনিযং পন আগতাতি চ. পটিসম্ভিদা মগ্গে পন দ্ৰিহেতুকা ৰুত্তাতি চ সম্বন্ধো. ইমস্মিং ঠানে পটিসম্ভিদা মগ্গট্ঠকথা ৰচনম্পি ৰত্তব্বন্তি ৰদন্তো ‘‘তত্থ পনা’’তিআদিমাহ. ‘‘তীসুখণেসূ’’তি কম্মক্খণে নিকন্তিক্খণে পটিসন্ধিক্খণেতি তীসুখণেসু. ‘‘টীকাকারাপনা’’তি অভিধম্মটীকাকারাপন. ‘‘সাৰসেসপাঠো’’তি পাল়িযং তিহেতুকেন কম্মেন দ্ৰিহেতুক পটিসন্ধি, দ্ৰিহেতুকেন কম্মেন অহেতুক পটিসন্ধি অৰসেসা হোতি. এৰং অৰসেস ৰাক্য সহিতো পাঠো. সরিক্খমেৰ সরিক্খকং. কম্মেন সরিক্খকং সদিসং কম্মসরিক্খকং. ৰিপাকং. ‘‘মহাথেরেনা’’তি সারিপুত্ত মহাথেরেন. এৰঞ্চ কত্ৰাতিআদিনা টীকাকারানং ৰচনং উপত্থম্ভেতি.

কামাৰচরকম্মং নিট্ঠিতং.

১৫৪. রূপাৰচরকম্মে. ‘‘অপ্পগুণতাযা’’তি অপরিচিততায. অৰড্ঢতায. ‘‘হীনেহি ছন্দাদীহী’’তি লাভসক্কার সিলোকাদি সাপেক্খতায হীনেহি ছন্দাদীহি. ‘‘তে ধম্মা’’তি ছন্দাদযো ধম্মা. তানি ইধ নাধিপ্পেতানি. কস্মা, উপপত্তিপ্পভেদস্স অসাধকত্তাতি অধিপ্পাযো. ‘‘ইমানেৰা’’তি ইমানি এৰ ঝানানি. ‘‘তিৰিধাসূ’’তি একস্মিংতলে ব্রহ্মপারিসজ্জাদি ৰসেন তিৰিধাসু. ‘‘অট্ঠারসপ্পভেদেন ৰিভজিত্ৰা’’তি তীসু হীন মজ্ঝিমপণীতেসু একেকস্মিং হীন হীনং হীন মজ্ঝিমং হীন পণীতন্তিআদিনা ৰিভত্তেন নৰৰিধানি হোন্তি. পুন তেসু তীণি মজ্ঝিমানি. মজ্ঝিমহীনং মজ্ঝিমমজ্ঝিমন্তিআদিনা ৰিভত্তানি নৰৰিধানি হোন্তি. এৰং অট্ঠারসভেদেন ৰিভজিত্ৰা. ‘‘কম্মদ্ৰারানি নামা’’তি কম্মপ্পৰত্তি মুখানি নাম. ‘‘ইমেহি পভাৰিতত্তা’’তি ইমেহি পভাৰেহি মূলকারণেহি পভাৰিতত্তা পৰত্তাপিতত্তা. ‘‘অট্ঠারসখত্তিযা’’তি হীনমজ্ঝিমাদিভেদেন অট্ঠারস খত্তিযা. তথা অট্ঠারস ব্রাহ্মণাদযো. অট্ঠ চত্তালীস গোত্তানি নাম হীনমজ্ঝিমা দিৰসেন ৰিভত্তানি গোতমগোত্তাদীনি অট্ঠচত্তালীস গোত্তানি. তেসং চারিত্ত পটিপত্তিভূতানি চরণানিপি অট্ঠচত্তালীস হোন্তীতি. এত্থ সিযা. পুরিম ৰচনে হীনাদীনি ব্রহ্মলোকে, অট্ঠকথা ৰচনেহীনাদীনি মনুস্সলোকেতি সাধেতব্বং অঞ্ঞং, সাধকং অঞ্ঞন্তি চোদনা. তং পরিহরতি ‘‘এতেনহী’’তিআদিনা. ‘‘উপলক্খেতী’’তি পচ্চক্খতো পাকটং একদেসং দস্সেত্ৰা অপাকটে তাদিসেপি জানাপেতীতি অত্থো. ‘‘সমত্থা সমত্থং ৰা’’তি সমত্থা সমত্থভাৰং ৰা. ‘‘তথা হানেনা’’তি তথাহি অনেন আচরিযেন. অনুরুদ্ধা চরিযেনাতি ৰুত্তং হোতি. নাম রূপ পরিচ্ছেদে ৰুত্তন্তি সম্বন্ধো. সমানাসেৰনে লদ্ধে সতি, মহব্বলে ৰিজ্জমানে মহগ্গতকম্মং ৰিপাকং জনেতি. তাদিসং হেতুং অলদ্ধা অলভিত্ৰা অভিঞ্ঞা চেতনা ৰিপাকং ন পচ্চতীতি যোজনা. তত্থ ‘‘সমানা সেৰনে’’তি ভূমিসমানতা ৰসেন সমানাসেৰনে. কামজৰনং কামজৰনেন সমানাসেৰনং. রূপজৰনং রূপজৰনেন. অরূপজৰনং অরূপজৰনেনাতি দট্ঠব্বং. তেন ৰুত্তং ‘‘সমানভূমিকতো’’তিআদি. তত্থ ‘‘তদভাৰতো’’তি তাদিসস্স বলৰভাৰস্স অভাৰতো. একৰারমত্তভূতা মহগ্গত চেতনা চ. ‘‘সব্ব পথমভূতা’’তি সমাপত্তি ৰীথীসু গোত্রভুস্স অনন্তরে মহগ্গত জৰনং সন্ধায ৰুত্তং. লোকুত্তর মগ্গচেতনা কদাচিপি সমানা সেৰনং ন লভতি. এৰং সন্তেপি অত্তনো অনন্তরতো পট্ঠায যাৰজীৰম্পি ভৰন্তরেপি অরিযফলং জনেতিযেৰ. এৰমেৰাতি ৰুত্তং হোতি. ইদং পৰত্তিফলং নাম হোতি, ইধ পন পটিসন্ধি ফলং ৰিচারিতং, তস্মা অসমানং ইদং নিদস্সনন্তি চে. ৰুচ্চতে. মগ্গচেতনা নাম তণ্হা সহাযকং ৰট্টগামি কম্মং ন হোতি. অতণ্হা সহাযকং ৰিৰট্টগামি কম্মং হোতি. তস্মা পটিসন্ধিং ন দেতি. সচে পন তং তণ্হা সহাযকং ৰট্টগামিকম্মং ভৰেয্য. পটিসন্ধি কালেপি ফলং দদেয্য. অসমানা সেৰনতা পমাণং ন ভৰেয্য. এৰং অঞ্ঞকারণত্তা অসমানং নিদস্সনং হোতি. ন অসমানা সেৰনতাযাতি দট্ঠব্বং. ‘‘উপচিতত্তা’’তি পুনপ্পুনং আসেৰন লাভেন ৰড্ঢিতত্তা. ‘‘সা চেতনা’’তিআদিকম্মিকমহগ্গত চেতনা চ. ‘‘না’’তি চোদনা, ন সিযাতি অত্থো. ন চ সাপি সমানভূমক ধম্মতো লদ্ধা সেৰনা হোতি. এৰং সন্তেপি কতত্তা ভাৰিতত্তাতি ৰুত্তং. ভাৰিতত্তাতি চ পুনপ্পুনং আসেৰন লাভেন ৰড্ঢিতত্তা ইচ্চেৰত্থো. তস্মা ৰিঞ্ঞাযতি অসমানভূমিকেহি পুব্বভাগপ্পৰত্তেহি কামজৰনেহি পরম্পরতো পুনপ্পুনং লদ্ধা সেৰনতায এৰ ইধ উপচিতত্তাতি ৰুত্তন্তি. তেন ৰুত্তং ‘‘উভযত্থ পনা’’তিআদি. তত্থ ‘‘উভযত্থা’’তি উভযেসু কতত্তা উপচিতত্তাতি চ কতত্তা ভাৰিতত্তাতি চ ৰুত্তেসু পাঠেসু. ‘‘পথম সমন্নাহারতো পট্টাযা’’তি মহগ্গতজ্ঝানে অপ্পনাৰীথিতো পুরে দ্ৰীসু পরিকম্ম ভাৰনা উপচার ভাৰনাসু পরিকম্ম ভাৰনং ভাৰেন্তস্স পথৰী পথৰীতিআদিনা পথম সমন্নাহারতো পট্ঠায. লোকুত্তর মগ্গেপন দসসু ৰিপস্সনা ঞাণেসু সব্বপথমং সম্মসনঞ্ঞাণং ভাৰেন্তস্স রূপং অনিচ্চং ৰেদনা অনিচ্চাতিআদিনা পথম সমন্নাহারতো পট্ঠাযাতি অত্থো. উপচিনিত্ৰাতি চ ভাৰেত্ৰাতি চ ৰড্ঢেত্ৰা ইচ্চেৰ অত্থো. ‘‘অব্ভুণ্হা’’তি অভিনৰাতি ৰুত্তং হোতি. ‘‘অযং ৰাদো’’তি অনুরুদ্ধা চরিযস্স ৰাদো. যদি এৰং, অট্ঠকথাসু সঙ্খার পচ্চযা ৰিঞ্ঞাণ পদ নিদ্দেসেসু অভিঞ্ঞা চেতনা পনেত্থ পরতো ৰিঞ্ঞাণস্স পচ্চযো ন হোতীতি ন গহিতাতি ৰুত্তং. তত্থ অঞ্ঞং যুত্তং কারণং ৰত্তব্বন্তি, তং ৰদন্তো ‘‘চতুত্থজ্ঝান সমাধিস্স পনা’’তিআদিমাহ. ‘‘টীকাকারা’’তি অভিধম্মটীকাকারা. ‘‘তস্সা পনা’’তিআদি অত্তনোৰাদ দস্সনং. সাধেন্তিযা অভিঞ্ঞা চেতনায. অচিত্তকভৰ পত্থনাসহিতং সঞ্ঞা ৰিরাগন্তি সম্বন্ধো. ‘‘ইধা’’তি মনুস্স লোকে.

‘‘অনাগামিনো পনা’’তিআদীসু. ‘‘এতেনা’’তি এতেন অত্থ ৰচনেন. ‘‘সদ্ধাধিকো’’তি সন্ধিন্দ্রিযাধিকো. এৰং ৰীরিযাধিকাদীসুপি. ‘‘অত্তনা লদ্ধ সমাপত্তীনং’’তি একস্সপি পুগ্গলস্স বহূনং অত্তনা লদ্ধ সমাপত্তীনং. তেসু পুথুজ্জন সোতাপন্ন সকদাগামীসু. ‘‘পুথুজ্জনো’’তি ঝানলাভি পুথুজ্জনো. ‘‘নিকন্তিযাসতী’’তি কামভৰনিকন্তিযা সতি. ‘‘ইতরে পনা’’তি সোতাপন্ন সকদাগামিনো পন. পরিহীনজ্ঝানা এৰ তত্থ নিব্বত্তন্তি. ন নিকন্তি বলেনাতি অধিপ্পাযো. ৰিভাৰনিপাঠে ‘‘তেসং পী’’তি ঝানলাভি সোতাপন্ন সকদাগামীনম্পি. ইচ্ছন্তেন টীকাচরিযেন. তথা নিকন্তিযা সতি পুথুজ্জনাদযো কামাৰচর কম্ম বলেন কামভৰেপি নিব্বত্তন্তীতি যোজনা. চেতোপণিধি ইজ্ঝতি. কস্মা, ৰিসুদ্ধত্তা. সীলৰিসুদ্ধত্তাতি অধিপ্পাযো. ‘‘তে’’তি ঝানলাভি সোতাপন্ন সকদাগামিনো. অঙ্গুত্তর পাঠে. ‘‘সহদস্সনুপ্পাদা’’তি সোতাপত্তি মগ্গঞ্ঞাণং দস্সনন্তি ৰুচ্চতি. দস্সনস্স উপ্পাদক্খণেন সদ্ধিং. নত্থি তস্স তং সংযোজনন্তিপি পাঠো. ‘‘ইমং লোকং’’তি ইমং কামলোকং. ‘‘ৰিপস্সনা নিকন্তি তণ্হা’’তি তেনেৰ ধম্মরাগেন তায ধম্ম নন্দিযাতি এৰং ৰুত্তা ৰিপস্সনা সুখে নিকন্তি তণ্হা. পচ্চযে সতি কুপ্পন্তি নস্সন্তীতি কুপ্পা. কুপ্পা ধম্মা যেসং তে কুপ্প ধম্মা. ‘‘ধম্মা’’তি মহগ্গত ধম্মা. ইমে দ্ৰে সোতাপন্ন সকদাগামিনো সীলেসু পরিপূরকারিনো নাম. সীলপ্পটি পক্খানং কিলেসানং সব্বসো পহীনত্তা. তস্মা তে সীলেসু অকুপ্প ধম্মাতি ৰুচ্চন্তি. সমাধিস্মিং পন কুপ্প ধম্মা এৰ. ‘‘মহাব্রহ্মেসু ন নিব্বত্তন্তী’’তি মহাব্রহ্মত্তং ন লভন্তীতি অধিপ্পাযো. ‘‘হীনজ্ঝাসযত্তা’’তি এত্থ ইত্থিযো নাম পকতিযাৰ হীনজ্ঝাসযা হোন্তি নীচ ছন্দা নীচ চিত্তা মন্দৰীরিযা মন্দপঞ্ঞা. কস্মা, হীনলিঙ্গত্তা. কস্মা চ তা হীনলিঙ্গা হোন্তি. দুব্বল কম্মনিব্বত্তত্তা. দুব্বল কম্মন্তি চ পুরিসত্ত জনকং কম্মং উপাদায ৰুচ্চতি. ব্রহ্মপুরোহিতানম্পি সঙ্গহণং ৰেদিতব্বং. কস্মা, ব্রহ্মপারিসজ্জানন্তি অট্ঠকথা ৰচনস্স যেভূয্যৰচনত্তা. তেনাহ ‘‘ন মহাব্রহ্মানং’’তি. ইতরথা ন ব্রহ্মপুরোহিতানং ন চ মহাব্রহ্মানন্তি ৰুত্তং সিযা. ন চ তথা সক্কা ৰত্তুং ‘ব্রহ্মত্তন্তি মহাব্রহ্মত্ত’ন্তি ইমিনা ৰচনেন ৰিরুজ্ঝনতো. অযঞ্চ অত্থো ন কেৰলং যেভূয্যনযমত্তেন সিদ্ধো. অথ খো ব্যঞ্জন সামত্থিযেনাপি সিদ্ধোতি দস্সেতুং ‘‘তেহী’’তিআদিমাহ. তত্থ ‘‘তে’’তি ব্রহ্মপুরোহিতা. সংযুত্তপাঠে. ‘‘পটিভাতুতং’’তি এত্থ ‘‘তং’’তি তুয্হং. ধম্মীকথা তুয্হং পটিভাতু, পাতুব্ভৰতু. কথেতু ইচ্চেৰ ৰুত্তং হোতি. ‘‘ব্রাহ্মণা’’তি অভিভুং ভিক্খুং আলপতি. ‘‘ব্রহ্মুনো’’তি মহাব্রহ্মুনো অত্থায. এৰং সেসেসু দ্ৰীসু. ‘‘তেসং’’তি ব্রহ্মপুরোহিতানং. ৰিভাৰনিপাঠে ‘‘ইতি অত্থো দট্ঠব্বো’’তি ‘‘ব্রহ্মপারিসজ্জেসু যেৰা’’তি পুল্লিঙ্গ ৰচনত্তা পুগ্গলপ্পধানং হোতি. নভূমিপ্পধানং. তস্মা অযমত্থো যুত্তিৰসেন দট্ঠব্বোতি. ‘‘তীসুভৰগ্গেসূ’’তি ৰেহপ্ফলভূমি পুথুজ্জনভৰগ্গো নাম হোতি রূপলোকে. ততো উপরি পুথুজ্জনভূমিযা অভাৰতো. অকনিট্ঠভূমি অরিযভৰগ্গো নাম. তত্থ ঠিতানং অরিযানং তত্থেৰ নিট্ঠানতো. নেৰসঞ্ঞাভূমি লোকভৰগ্গো নাম. ততো উপরি লোকস্সেৰ অভাৰতোতি.

কম্মচতুক্কানুদীপনা নিট্ঠিতা.

১৫৫. মরণুপ্পত্তিযং. ‘‘আযুপরিমাণস্সা’’তি আযুকপ্পস্স. ‘‘তদুভযস্সা’’তি আযুকপ্পস্স চ কম্মস্স চ. ‘‘উপঘাতক কম্মেনা’’তি বলৰন্তেন পাণাতিপাতকম্মেন. ‘‘দুস্সিমার কলাবুরাজাদীনং ৰিযা’’তি তেসং মরণং ৰিয. উপরোধিতং খন্ধ সন্তান মস্সাতি ৰিগ্গহো. ‘‘উপরোধিতং’’তি উপগন্ত্ৰা নিরোধাপিতং. কম্মং খিয্যতিযেৰ. এৰং সতি, সব্বংপি মরণং একেন কম্মক্খযেন সিদ্ধং. তস্মা একং কম্মক্খয মরণমেৰ ৰত্তব্বন্তি ৰুত্তং হোতি. ‘‘ইতরেপি ৰুত্তা’’তি ইতরানিপি তীণি মরণানি ৰুত্তানীতি চোদনা. ৰুচ্চতে পরিহারো. ‘‘সরসৰসেনেৰা’’তি অত্তনো ধম্মতাৰসেনেৰ. নানা আযু কপ্পং ৰিদহন্তি সঙ্খরোন্তীতি নানাআযুকপ্প ৰিধাযকা. ‘‘সত্তনিকাযে’’তি সত্তসমূহে. নিচ্চকালং ঠিতিং করোন্তীতি ঠিতিকরা. কদাচি ৰুদ্ধিং করোন্তি, কদাচি হানিং করোন্তীতি ৰুদ্ধিকরা হানিকরা চ. ‘‘তেসং ৰসেনা’’তি তেসং উতু আহারানং ৰসেন. ‘‘তযোপি চেতে’’তি এতেতযোপি ঠিতিকরাদযো. কম্মং ৰিপচ্চমানং দত্ৰা খিয্যতীতি সম্বন্ধো. এতেন এৰরূপেঠানে কম্মং অপ্পধানন্তি দীপেতি. ‘‘তদনুরূপং এৰা’’তি তং দসৰস্সকালানু রূপং এৰ. ‘‘ভো গঞ্চা’’তি ধনধঞ্ঞাদিপরিভোগঞ্চ. তেসং উতুআহারানং গতি এতেসন্তি তগ্গতিকা. তেসং উতুআহারানং গতিং অনুৰত্তন্তীতি ৰুত্তং হোতি. তেনাহ ‘‘তদনুৰত্তিকা’’তি. সঙ্খারৰিদূহি অঞ্ঞত্রাতি সম্বন্ধো. সঙ্খারৰিদুনো ঠপেত্ৰাতি অত্থো. ইদ্ধিযা পকতাতি ইদ্ধিমযা. ‘‘ইদ্ধিযা’’তি দেৰিদ্ধিযাৰা ভাৰনামযিদ্ধিযাৰা. ৰিজ্জায পকতাতি ৰিজ্জামযা. ‘‘ৰিজ্জাযা’’তি গন্ধারিৰিজ্জায. অট্ঠি ন্হারু মংস লোহিতাদিকা রসধাতুযো অযন্তি ৰড্ঢন্তি এতেহীতি রসাযনানি. তানি ৰিদহন্তি এতেহীতি রসাযন ৰিধযো. নযূপদেসা. চিরট্ঠিতি কত্থায জীৰিতং সঙ্খরোন্তি এতেহীতি জীৰিত সঙ্খারা. ইদ্ধিময ৰিজ্জাময জীৰিত সঙ্খারেসু চ রসাযন ৰিধিসঙ্খাতেসু জীৰিত সঙ্খারেসু চ ৰিদুনোতি সমাসো. ‘‘দ্ৰি সমুট্ঠানিক রূপধম্মেসূ’’তি উতুসমুট্ঠানিক রূপধম্মেসু চ আহার সমুট্ঠানিক রূপধম্মেসু চ. ‘‘পরিণমন্তেসূ’’তি ৰিপরিণমন্তেসু. তেনাহ ‘‘জিয্যমানেসূ’’তিআদিং. ‘‘যাৰমহন্তং পীতি’’ সব্বঞ্ঞুবুদ্ধানং কম্মং ৰিয কোটিপত্তৰসেন অতিমহন্তম্পি. ‘‘অস্সা’’তি কম্মস্স. ‘‘উপচ্ছেদক মরণেপি নেতব্বো’’তি বলৰন্তে উপচ্ছেদক কম্মে আগতে যাৰমহন্তম্পি জনক কম্মং অত্তনো ৰিপাকাধিট্ঠান ৰিপত্তিযা খিয্যতিযেৰ. সো চস্সখযো ন সরসেন হোতি, অথ খো উপচ্ছেদক কম্ম বলেন হোতীতি ইধ উপচ্ছেদক মরণং ৰিসুং গহিতন্তি এৰং উপচ্ছেদক মরণেপি নেতব্বো. ‘‘অকাল মরণং’’তি আযুক্খযমরণাদীনি তীণি মরণানি কালমরণানি নাম, মরণা রহকালে মরণানীতি ৰুত্তং হোতি. ততো অঞ্ঞং যং কিঞ্চি মরণং অকাল মরণন্তি ৰুচ্চতি. তেনাহ ‘‘তঞ্হি পৰত্তমানং’’তিআদিং. ‘‘মূলভেদতো’’তি মূলকারণপ্পভেদতো. যস্মা পন মিলিন্দ পঞ্হে ৰুত্তন্তি সম্বন্ধো. সন্নিপতন্তীতি সন্নিপাতা. সন্নিপাতেহি উপ্পন্না সন্নিপাতিকাতি অত্থং সন্ধায ‘‘সন্নিপতিতানং’’তি ৰুত্তং. অথৰা. সন্নিপতনং সন্নিপাতো. দ্ৰিন্নং তিণ্ণং ৰা দোসানং মিস্সকভাৰো. সন্নিপাতেন উপ্পন্না সন্নিপাতিকাতিপি যুজ্জতি. ‘‘অনিসম্মকারীনং’’তি অনিসামেত্ৰা অনুপধারেত্ৰা করণ সীলানং. পৰত্তা আবাধা ৰিসমপরিহারজানামাতি যোজনা. ‘‘অত্তনা ৰাকতানং পযোগানং’’তি সত্থহরণ, ৰিসখাদন, উদকপাতনাদিৰসেন কতানং. ‘‘ৰিনাসেন্তী’’তি সত্থৰস্স ৰালুকৰস্সাদীনি ৰস্সাপেত্ৰাৰা সমুদ্দ ৰীচিযো উট্ঠাপেত্ৰাৰা এৰরূপে মহন্তে ভযুপদ্দৰে কত্ৰা ৰিনাসেন্তি. ‘‘মনুস্স পথে’’তি মনুস্স পদেসে. ‘‘তে’’তি চণ্ডা যক্খা. ‘‘জীৰিতক্খযং পাপেন্তী’’তি মনুস্সানং ৰা গোমহিংসানং ৰা মেদলোহিতানি পাতব্যত্থায তেসু নানারোগন্তর কপ্পানি উপ্পাদেত্ৰা জীৰিতক্খযং পাপেন্তীতি অত্থো. ‘‘ৰত্তব্বমেৰ নত্থী’’তি সকলং রজ্জং ৰা রট্ঠং ৰা দীপকং ৰা ৰিনাসেন্তীতি ৰুত্তে সকলং জনপদং ৰা নগরং ৰা নিগমং ৰা গামং ৰা তং তং পুগ্গলং ৰা ৰিনাসেন্তীতি ৰিসুং ৰত্তব্বং নত্থীতি অধিপ্পাযো. ‘‘সত্থদুব্ভিক্খরোগন্তর কপ্পাপী’’তি সত্থন্তর কপ্পো দুব্ভিক্খন্তর কপ্পো রোগন্তর কপ্পোতি ইমে তযো অন্তর কপ্পাপি ইধ ৰত্তব্বাতি অত্থো. তেসু পন রোগন্তর কপ্পো যক্খা ৰাল়ে অমনুস্সে ওস্সজ্জন্তি, তেন বহূ মনুস্সা কালঙ্করোন্তীতি ইমিনা একদেসেন ৰুত্তোযেৰ. ‘‘উপপীল়কো পঘাতকানং কম্মানং ৰিপচ্চনৰসেনা’’তি এত্থ তেসং কম্মানং ওকাসপ্পটিলাভেন সত্তসন্তানে সুখসন্তানং ৰিবাধেত্ৰা মরণং ৰা পাপেত্ৰা মরণ মত্তং ৰা দুক্খং জনেত্ৰা পীল়নঞ্চ ঘাতনঞ্চ ইধ ৰিপচ্চন নামেন ৰুত্তন্তি দট্ঠব্বং. ৰিপাকং পন জনেন্তুৰা, মাৰা, ইধ অপ্পমাণন্তি. এত্থ সিযা. অট্ঠসু কারণেসু ওপক্কমিকট্ঠানে ‘কুপ্পিতাহি দেৰতা সকলং রজ্জাদিকং অসেসং কত্ৰা ৰিনাসেন্তী’তি ৰুত্তং. তত্থ ৰিনাসিতা জনা কিং নু খো অত্তনো অত্তনো কম্ম ৰিপাকজেহি আবাধন দণ্ডেহি ৰা ৰিনস্সন্তি, উদাহু ৰিসুং ওপক্কমিকেহি আবাধন দণ্ডেহি ৰা ৰিনস্সন্তি. যঞ্চেত্থ ৰুত্তং ‘এৰং অকাল মরণং উপচ্ছেদক কম্মুনা ৰা অঞ্ঞেহি ৰা অনেক সহস্সেহি কারণেহি হোতী’তি. তত্থ যস্স উপচ্ছেদক কম্মং নাম নত্থি. কিং তস্স অঞ্ঞেন কারণেন অকাল মরণং নাম ভৰেয্যাতি. এত্থ ৰদেয্যুং, তস্স অঞ্ঞেন কারণেন অকাল মরণং নাম ন ভৰেয্য. সব্বে সত্তা কম্মস্সকা, কম্মদাযাদা, কম্মযোনী, কম্ম বন্ধূ, কম্মপ্পটিস্সরণাতিহি ৰুত্তংতি. তেসং তং ৰাদং ভিন্দন্তো ‘‘যেহিকেচি লোকে দিস্সন্তী’’তিআদিমাহ. পুন তদত্থং দল়্হং করোন্তো ‘‘যথাহা’’তিআদিং ৰদতি. তত্থ দুৰিধং কম্মফলং, ৰিপাক ফলঞ্চ নিস্সন্দ ফলঞ্চ. তত্থ ৰিপাক ফলং নাম ৰিপাকক্খন্ধা চ চক্খু সোতাদীনি কটত্তা রূপানি চ. তং যেন পুব্বে কম্মং কতং, তস্সেৰ সাধারণং হোতি. তস্স সন্তানে এৰ পৰত্ততি. নিস্সন্দ ফলং নাম তস্স সুখুপ্পত্তিযা ৰা দুক্খুপ্পত্তিযা ৰা অত্তনো কম্মানুভাৰেন বহিদ্ধা সমুট্ঠিতানি ইট্ঠারম্মণানি ৰা অনিট্ঠা রম্মণানি ৰা. তং পন অঞ্ঞেসম্পি সাধারণং হোতি. তং সন্ধায ৰুত্তং ‘‘সককম্মসমুট্ঠিতা এৰ. ল. পরেসং সাধারণা এৰা’’তি. লোকে অট্ঠলোক ধম্মা নাম সব্বে কম্ম ৰিপাকজা এৰাতি ন ৰত্তব্বা. ইমে চ সত্তা সংসারে সংসরন্তা অট্ঠসুলোক ধম্মেসু নিম্মুজ্জন্তা সংসরন্তি, তস্মা তে ৰিনাপি উপপীল়ক কম্মেন অঞ্ঞেহি কারণেহি নানাদুক্খং ফুসন্তিযেৰ. তথা ৰিনাপি উপচ্ছেদক কম্মেন মরণ দুক্খং পাপুণন্তিযেৰ. তেন ৰুত্তং ‘‘কম্মেন ৰিনা যতোকুতোচি সমুট্ঠিতা’’তিআদি.

‘‘তে উপ্পজ্জন্তী’’তি তে নানারোগাদযো উপ্পজ্জন্তি. ‘‘ন উপায কুসলা ৰা’’তি ততো অত্তানং মোচেতুং কারণ কুসলা ৰা ন হোন্তি. ‘‘ন চ পটিকার কুসলা ৰা’’তি উপ্পন্নং রোগাদিভযং অপনেতুং ৰূপসমেতুং পটিকার কম্মেতি কিচ্ছকম্মে কুসলা ৰা ন হোন্তি. ‘‘নাপি পরিহার কুসলা ৰা’’তি ততো মোচনত্থং পরিহরিতুং দেসন্তরং গন্তুং কুসলা ৰা ন হোন্তীতি অত্থো. সেসমেত্থ সুৰিঞ্ঞেয্যং. ‘‘রোগাদযো এৰ তং খেপেন্তা পৰত্তন্তী’’তি কথং তে পুব্বকম্মং খেপেন্তীতি. তস্স ৰিপাকভূতং জীৰিত সন্তানং ৰিনাসেন্তা খেপেন্তি. ৰিনট্ঠেহি জীৰিত সন্তানে তং ভৰং জনেন্তং খিয্যতি যেৰাতি. তেনাহ ‘‘যথাহী’’তিআদিং. ‘‘কম্মস্সপি তথেৰা’’তি তথেৰ পুব্বকম্মস্সপি তিণগ্গে উস্সাৰ বিন্দুস্সেৰ পরিদুব্বলতা সিদ্ধা হোতি. জীৰিতে পরিক্খীণে তং ভৰং জনেন্তস্স পুব্বকম্মস্সপি পরিক্খীণত্তা. ‘‘এৰঞ্চেতং’’তি এতং কম্মপ্পটি সংযুত্ত ৰচনং ইধ অম্হেহি ৰুত্তনযেন সম্পটিচ্ছিতব্বং. সব্বং পুব্বেকতহেতুদিট্ঠি নাম সব্বং সুখং ৰা দুক্খং ৰা সুচরিতং ৰা দুচ্চরিতং ৰা পুব্বভৰে অত্তনা কতেন পুব্বকম্মহেতুনা এৰ উপ্পজ্জতীতি এৰং পৰত্তা দিট্ঠি. ‘‘যং কিঞ্চাযং’’তি যং কিঞ্চি অযং. মহাবোধিসত্তানং অধিমুত্তিকালঙ্করিযা নাম ইধ মে চিরকালং ঠিতস্স পারমিপূরণ কিচ্চং নত্থি, ইদানেৰ ইতো চৰিত্ৰা মনুস্সলোকে উপ্পজ্জিস্সামি, উপরুজ্ঝতু মে ইদং জীৰিতন্তি অধিমুঞ্চিত্ৰা দল়্হং মনসিকরিত্ৰা কালঙ্করিযা. ‘‘সযমেৰ সত্থং আহরিত্ৰা’’তি সযমেৰ অত্তনো গীৰং সত্থেন হনিত্ৰাতি অত্থো. ‘‘এত্থেৰা’’তি অকালমরণে এৰ.

‘‘তথা চা’’তিআদীসু. ‘‘সমাপত্তি লাভীনং’’তি নিদ্ধারণেভুম্ম ৰচনং. ‘‘জীৰিত সমসীসীনং’’তি অরহত্ত মগ্গং লভিত্ৰা মগ্গপচ্চৰেক্খনৰীথি এৰ মরণাসন্নৰীথিং কত্ৰা পরিনিব্বানত্তা সমং সীসং এতেসন্তি সমসীসিনো. ‘‘সমং সীসং’’তি জীৰিত সন্তান পরিযন্তেন সমং ৰট্টদুক্খ সন্তান পরিযন্তং ৰুচ্চতি. ‘‘সব্বেসং পী’’তি সব্বেসম্পি খীণাসৰানং. ‘‘ইমং সুত্তপদং’’তি মহাপরিনিব্বানসুত্তে আগতং সুত্তপদং. ‘‘তে’’তি তে ৰাদিনো. ‘‘তেনা’’তি তেন ৰাদৰচনেন. ক্রিযমনোধাতু নাম পঞ্চদ্ৰারাৰজ্জনং. ক্রিযাহেতুকমনো ৰিঞ্ঞাণধাতু নাম হসিতুপ্পাদচিত্তং. ‘‘অস্সা’’তি পরিনিব্বাযন্তস্স বুদ্ধস্স. ‘‘ন সমেতি যেৰা’’তি সন্তিং অনুপাদিসেসং নিব্বানং আরম্মণং কত্ৰাতি এত্থ পরিনিব্বান জৰনেহি আরম্মণং কত্ৰাতি ৰুত্তেপি ন সমেতিযেৰ. তেনাহ ‘‘তথাহী’’তিআদিং. ‘‘ভৰঙ্গং ওতরিত্ৰা পরিনিব্বাযতী’’তি এত্থ পরিনিব্বান চুতিচিত্তমেৰ ভৰঙ্গন্তি ৰুত্তং. চুতিচিত্তন্তি চ ভৰন্তরং গচ্ছন্তস্সেৰ ৰুচ্চতি. ইধ পন ৰোহার মত্তন্তি দট্ঠব্বং. ৰিভাৰনিপাঠে. চুতিপরিযোসানানং মরণাসন্ন চিত্তানং. যথা পন বুদ্ধানং ভগৰন্তানং যাৰজীৰং উপ্পন্নং মহাভৰঙ্গচিত্তং কম্মকম্মনিমিত্তাদযো আরম্মণং করোতিযেৰ. তথা পরিনিব্বান চুতিচিত্তং পীতি আহ ‘‘ন হী’’তিআদিং. ননু মরণকালে কম্মকম্মনিমিত্তাদীনং গহণং নাম ভৰন্তর গমনত্থায হোতি, বুদ্ধা চ ভৰন্তরং ন গচ্ছন্তি. তস্মা ‘‘ন হি. ল. ন করোতী’’তি ইদং ন যুত্তন্তি. নো ন যুত্তং. ভৰন্তর গমনত্থাযাতি ইদং জৰনেহি গহণে দট্ঠব্বং. ইধ পন চুতিচিত্তেন গহণেতি দস্সেন্তো ‘‘নচচুতিযাগহিতানী’’তিআদিমাহ. ‘‘কম্মসিদ্ধিযা’’তি কম্মসিজ্ঝনত্থায.‘‘এত্থ চা’’তিআদীসু. ‘‘তস্সা’’তি সোণত্থের পিতুনো. ‘‘কম্মবলেনা’’তিআদীসু. ‘‘অঞ্ঞেনপি কারণ বলেনা’’তি আচিণ্ণভাৰাদিকেন কারণবলেন. গতিনিমিত্তং পন কম্মবলেনেৰাতি যুত্তং সিযা. ‘‘তথোপট্ঠিতং’’তি অন্তিমৰীথিতো পুব্বে বহূসুৰীথীসু উপট্ঠিতপ্পকারন্তিঅত্থো. পাপপক্খিযেসু দুগ্গতিনিমিত্তেসু. কল্যাণপক্খিযানি সগ্গনিমিত্তানি. ধম্মাসোকরঞ্ঞো মরণকালে পাপপক্খিযানং উপট্ঠানং কত্থচি সীহল়গন্থে ৰুত্তং.

সকলং পথৰিং ভুত্ৰা,

দত্ৰা কোটিসতং ধনং;

অন্তে অড্ঢামলকমত্তস্স;

অসোকো ইস্সরং গতো; তি চ;

অসোকো সোক মাগতো; তি চ;

‘‘তং’’তি ৰিপচ্চমানকং কম্মং. ‘‘নিযামক সহকারি পচ্চযভূতা’’তি এত্থ যথা নাৰাযং নিযামকো নাম নাৰং ইচ্ছিতদিসাভিমুখং নিযামেতি, নিযোজেতি. তথা অযং তণ্হাপি ভৰনিকন্তি হুত্ৰা চিত্তসন্তানং গন্তব্বভৰাভিমুখং নিযামেতি, নিযোজেতি. কম্মস্স চ অচ্চাযত্ত সহাযভাৰেন সহকারী পচ্চযো হোতীতি দট্ঠব্বং. ‘‘কুসলাকুসল কম্মনিমিত্তানি ৰা’’তি অঞ্ঞানি কুসলা কুসলকম্মনিমিত্তানি ৰা. ‘‘তদুপত্থম্ভিকা’’তি তস্স কম্মস্স উপত্থম্ভিকা. ‘‘নিমিত্তস্সাদগধিতং’’তি মুখনিমিত্তাদীসু অস্সাদেন্তং গিজ্ঝন্তং. ‘‘তিট্ঠমানং তিট্ঠতী’’তি তিট্ঠমানং হুত্ৰা তিট্ঠতি. অমুঞ্চিত্ৰা তিট্ঠতীতি ৰুত্তং হোতি. অনুব্যঞ্জনং নাম পিযসাতরূপো কথিতলপিতাদি ক্রিযাৰিসেসো. ‘‘অস্স পুগ্গলস্সা’’তি আসন্ন মরণস্স পুগ্গলস্স. অট্ঠকথা পাঠে. ‘‘কিলেস বলৰিনামিতং’’তি অৰিজ্জা তণ্হাদীনং কিলেসানং বলেন ৰিনামিতং. পটিচ্ছাদিকা আদীন ৰা যস্সাতি ৰিগ্গহো. ‘‘তং’’তি চিত্তসন্তানং. ‘‘তস্মিং’’তি কম্মাদিৰিসযে. অট্ঠকথায ন সমেতি. তস্মিং ৰিসযেতিহি তত্থ ৰুত্তং. ন ৰুত্তং তস্মিং ভৰেতি. ‘‘তস্মিং ৰুত্তা নং’’তি তস্মিং ‘যেভূয্যেন ভৰন্তরে ছ দ্ৰারগ্গহিতং’তি ঠানে টীকাসু ৰুত্তানং. তং সদিস জৰনুপ্পত্তি নাম কম্মকরণকালে পৰত্ত জৰনেহি সদিসানং ইদানি জৰনানং উপ্পত্তি. ভৰপ্পটিচ্ছন্নঞ্চ কম্মং অপাকটঞ্চ কম্মং ন তথা উপট্ঠাতি. কেৰলং অত্তানং অভিনৰকরণ ৰসেন দ্ৰারপত্তং হুত্ৰা উপট্ঠাতীতি অধিপ্পাযো. ‘‘ৰিসীদ পত্তা’’তি ৰিসঞ্ঞীভাৰেন ৰিরূপং হুত্ৰা সীদনপত্তা. ‘‘তব্বিপরীতেন পাপকম্ম বহুলাপি ৰত্তব্বা’’তি তেপিৰিসীদন্তরে আৰুধ হত্থা পাণঘাতং করোন্তা গণ্হথবন্ধথাতি উগ্ঘোসন্তা দুট্ঠচিত্তা হোন্তীতিআদিনা ৰত্তব্বা. অট্ঠকথা পাঠেসু. উক্খিত্তো অসি যস্সাতি উক্খিত্তা সিকো. পতুদন্তি ৰিজ্ঝন্তি এতেনাতি পতোদনং. পাজনদণ্ডো. তস্স অগ্গে কতা সূচি পতোদন সূচি. ‘‘পতোদন দুক্খং’’তি ৰিজ্ঝন দুক্খং. কথং পন উক্খিত্তাসিকাদিভাৰেন উপট্ঠানং কম্মুপট্ঠানং নাম হোতি. কথঞ্চ তং পটিসন্ধিযা আরম্মণভাৰং উপেতীতি আহ ‘‘সো চা’’তিআদিং. উপ্পজ্জমানানং সত্তানং. ‘‘ইতরেসং পনা’’তি রূপারূপ ভৰেসু উপ্পজ্জমানানং পন. ‘‘পরিপুণ্ণং কত্ৰা’’তি তদারম্মণ পরিযোসানাযৰা সুদ্ধায ৰা জৰনৰীথিযাতি এৰং পরিপুণ্ণং কত্ৰা. অযং পন ভৰঙ্গাৰসানে চুতিচিত্তুপ্পত্তি নাম অট্ঠকথাসু নত্থি. যঞ্চ ভৰঙ্গং ওতরিত্ৰা পরিনিব্বাযতীতিআদি তত্থ তত্থ ৰুত্তং. তত্থপি ‘‘ভৰঙ্গং’’তি চুতিচিত্তমেৰ টীকাসু ৰণ্ণেন্তি. তস্মা ‘‘ভৰঙ্গক্খযেৰা’’তি ইদং কথং যুজ্জেয্যাতি আহ ‘‘এত্থ চা’’তিআদিং. অনুরূপং সেতীতি অনুসযো. অনুবন্ধো হুত্ৰা সেতীতি অনুসযো. অনু অনু ৰা সেতীতি অনুসযো. এত্থ চ অনুসযো নাম জৰনসহজাতো ন হোতি. ইধ চ অনুসয নামেন ৰুত্তং. নানাজৰন সহজাতা চ অৰিজ্জা তণ্হা পটিসন্ধিযা ৰিসেস পচ্চযা হোন্তেৰ. কথং তা ইধ গহিতা সিযুন্তি আহ ‘‘এত্থ চা’’তিআদিং. এৰং সন্তে অৰিজ্জা পরিক্খিত্তেন তণ্হামূলকেনাতি ৰুত্তেসু সুট্ঠু যুজ্জতি. অনুসযেহি সহ জৰনসহজাতানম্পি লদ্ধত্তা. তস্মা ইধ অনুসয ৰচনং ন যুত্তন্তি চোদনা. যুত্তমেৰাতি দস্সেন্তো ‘‘অপি চা’’তিআদিমাহ. ‘‘পরিযত্তা’’তি সমত্তা. ‘‘সো পী’’তি ফস্সাদি ধম্ম সমূহোপি.‘‘তথা রূপা যেৰা’’তি অগ্গমগ্গেন অপ্পহীন রূপাযেৰ, অনুসযভূতাযেৰাতি ৰুত্তং হোতি. ‘‘তং’’তি চিত্ত সন্তানং. ‘‘তত্থা’’তি তদুভযস্মিং. কথং তং তত্থ খিপন্তীতি আহ ‘‘তস্মিং’’তিআদিং. ‘‘ৰিজাননধাতুযা’’তি ৰিঞ্ঞাণ ধাতুযা. সঙ্কন্তা নাম নত্থি. যত্থ যত্থ উপ্পজ্জন্তি. তত্থ তত্থেৰ ভিজ্জন্তীতি অধিপ্পাযো. কুতো মরণকালে সঙ্কন্তা নাম অত্থি ৰিজ্জন্তীতি যোজনা. এৰং সন্তে ইদং ৰচনং অনমতগ্গিয সুত্তেন ৰিরুদ্ধং সিযাতি. ন ৰিরুদ্ধং. ইদঞ্হি অভিধম্ম ৰচনং, মুখ্যৰচনং, অনমতগ্গিয সুত্তং পন সুত্তন্ত ৰচনং পরিযায ৰচনন্তি দস্সেন্তো ‘‘যঞ্চা’’তিআদিমাহ. পরিযাযেন ৰুত্তন্তি ৰত্ৰা তং পরিযাযং দস্সেতি ‘‘যেসঞ্হী’’তিআদিনা. ‘‘সো’’তি সো পুগ্গলো. ‘‘তেসং’’তি অৰিজ্জা তণ্হা সঙ্খারানঞ্চ পটিসন্ধি নাম রূপ ধম্মানঞ্চ. ‘‘হেতুপ্ফলসম্বন্ধেন ভৰন্তরং সন্ধাৰতি সংসরতীতি ৰুচ্চতী’’তি পুব্বে কম্মকরণকালেপি তে অৰিজ্জা তণ্হা সঙ্খারা এৰ সো সত্তোতি ৰুচ্চন্তি. পচ্ছা তেসং ফলভূতাযং পটিসন্ধিযা পাতুভৰনকালেপি সাপটিসন্ধি এৰ সো সত্তোতি ৰুচ্চতি. মজ্ঝে ধম্মপ্পবন্ধোপি সো সত্তোতি ৰুচ্চতি. এৰং হেতুধম্মেহি সদ্ধিং ফলধম্মে একং সত্তং করোন্তস্স হেতুপ্ফল সম্বন্ধো হোতি. এৰং হেতুপ্ফল সম্বন্ধেন সো এৰ কম্মং করোতি. তেন কম্মেন সো এৰ ভৰন্তরং সন্ধাৰতি সংসরতীতি ৰুচ্চতি. এত্থ চ অনমতগ্গো যং ভিক্খৰে. ল. অৰিজ্জানীৰরণানং সত্তানংতি এৰং সত্তৰোহারেন ৰুত্তত্তা সাধম্মদেসনা পরিযাযদেসনা হোতি. পরিযাযদেসনত্তা চ সন্ধাৰতং সংসরতন্তি পরিযাযোপি সিজ্ঝতি. যস্সং পন ধম্ম দেসনাযং ধম্মদেসনাতি ৰচনানু রূপং ধম্মমেৰ দেসেতি, ন সত্তং, ন পুগ্গলং. অযং ধম্মদেসনা এৰ মুখ্যদেসনা নাম হোতি. তত্থ দেসিত ধম্মা পন পকতিকালেপি দেসন্তরং কালন্তরং খণন্তরং সঙ্কন্তা নাম নত্থি. যত্থ যত্থ উপ্পন্না, তত্থ তত্থেৰ ভিজ্জন্তি. খযৰযং গচ্ছন্তি. তেন ৰুত্তং ‘ন হি উপ্পন্নুপ্পন্না ধম্মা. ল. সঙ্কন্তা নাম অত্থী’তি. পটিঘোসো চ, পদীপো চ, মুদ্দা চ. আদিসদ্দেন পটিবিম্বচ্ছাযা চ, বীজসঙ্খারো চ, পাটিভোগো চ, বালকুমার সরীরেসু উপযুত্তা ৰিজ্জাসিপ্পোসধা চাতি এৰং অট্ঠকথা যং আগতানি নিদস্সনানি সঙ্গয্হন্তি. ‘‘নিদস্সনা’’নীতি চ উপমাযো ৰুচ্চন্তি. তত্থ ‘‘পটিঘোসো’’তি গম্ভীরলেণ দ্ৰারে ঠত্ৰা সদ্দং করোন্তস্স অন্তোলেণে পটিঘোসো পৰত্ততি. তত্থ দ্ৰারে উপ্পন্নো মূলসদ্দো অন্তোলেণং ন গচ্ছতি, উপ্পন্নট্ঠানে এৰ নিরুজ্ঝতি. পটিঘোসো চ ততো আগতো ন হোতি. ন চ ৰিনা মূলসদ্দ + পচ্চযেন অঞ্ঞতো পৰত্ততি. মূলসদ্দপচ্চযা এৰ তত্থ পৰত্ততীতি. তত্থ মূলসদ্দো ৰিয অতীত কম্মং. পটিঘোসো ৰিয অনন্তরে পটিসন্ধি. এসনযো পদীপ মুদ্দা পটিবিম্বচ্ছাযাসু. তত্থ ‘‘পদীপো’’তি পথমং একং পদীপং জালেত্ৰা তেন অঞ্ঞং পদীপসতম্পি পদীপ সহস্সম্পি জালেতি. ‘‘মুদ্দা’’তি লঞ্ছনলেখা. তত্থ একেন লঞ্ছনক্খন্ধেন, তেন লঞ্ছনলেখাসতম্পি লঞ্ছনলেখা সহস্সম্পি করোতি. ‘‘পটিবিম্বচ্ছাযা’’তি পসন্নেসু আদাসপট্টেসুৰা উদকেসুৰা উপ্পন্না সরীরচ্ছাযা. এতেহি নিদস্সনেহি ফলং নাম হেতুতো আগতং ন হোতি. হেতুনা চ ৰিনা ন সিজ্ঝতীতি এত্তকমত্থং দীপেতি. ‘‘বীজসঙ্খারো’’তি কালন্তরে উপ্পন্নেসু পুপ্ফফলেসু ইচ্ছিতৰণ্ণ গন্ধরসপাতুভাৰত্থায রোপনকালে অম্ববীজাদীসু ইচ্ছিতৰণ্ণ গন্ধরসধাতূনং পরিভাৰনা. তত্থ তপ্পচ্চযা কালন্তরে পুপ্ফফলেসু উপ্পন্নেসু তেৰণ্ণগন্ধরসা পাতুব্ভৰন্তি. ‘‘পাটিভোগো’’তি কিঞ্চি অত্থং সাধেতুং পরস্স সন্তিকে ইণং গণ্হন্তস্স তৰধনং সংৰচ্ছরেন ৰুড্ঢিযা সহ দস্সামি, সচে নদদেয্যং. অসুকং নাম মমখেত্তং ৰা ৰত্থুৰা তুয্হং হোতূতি পটিঞ্ঞাঠপনং. তত্থ তপ্পচ্চযা ধনং লভিত্ৰা তং অত্থঞ্চ সাধেতি. কালে সম্পত্তে ৰুড্ঢিযা সহ ইণঞ্চ সোধেতি. ‘‘ৰিজ্জাসিপ্পোসধা’’তি লোকে পুত্তকে যাৰজীৰং হিতত্থায দহরকালে কিঞ্চি ৰিজ্জংৰা সিপ্পংৰা সিক্খাপেন্তি. যাৰজীৰং খররোগানং অনুপ্পাদত্থায দহরকালে ওজৰন্তং কিঞ্চি ওসধং ৰা অজ্ঝোহারেন্তি. তত্থ তপ্পচ্চযা পুত্তানং যাৰজীৰং হিতপ্পটিলাভো ৰা তাদিসানং রোগানং অনুপ্পাদো ৰা হোতিযেৰ. এতেহি যথা কালন্তরে অসন্তেসুযেৰ পাটিভোগাদীসু মূলকম্মেসু পুব্বভাগে কতপচ্চযা এৰ পচ্ছা অত্থ সাধনাদীনি সিজ্ঝন্তি. তথা কুসলা কুসল কম্মানি কত্ৰা কালন্তরে তেসু অসন্তেসুপি পুব্বে কতত্তা এৰ পচ্ছা পটিসন্ধাদীনি ফলানি পাতুব্ভৰন্তীতি দীপেতি. তেনৰুত্তং ‘‘পটিঘোস পদীপমুদ্দাদীনি চেত্থ নিদস্সনানী’’তি. ‘‘কম্মদুব্বলভাৰেনা’’তি তদা জীৰিতিন্দ্রিযস্স দুব্বলত্তা কম্মম্পি দুব্বলমেৰ হোতীতি কত্ৰা ৰুত্তং. কামঞ্চেত্থ অট্ঠকথাযং ৰত্ৰা দস্সিতং, তথাপি সম্ভৰতীতি সম্বন্ধো. তত্থ ‘‘তং পী’’তি গতিনিমিত্তম্পি. ‘‘তথা চৰন্তানং’’তি দিব্বরথাদীনি গতিনিমিত্তং কত্ৰা চৰন্তানং. ‘‘দয্হমানকাযেনা’’তি ইত্থম্ভূতলক্খণে করণৰচনং. গাথাযং. পঞ্চদ্ৰারে পটিসন্ধিকম্মং ৰিনা দ্ৰিগোচরে সিযাতি যোজনা. তত্থ ‘‘দ্ৰিগোচরে’’তি কম্মনিমিত্ত গতিনিমিত্তভূতে দ্ৰিগোচরে. তত্থ পঞ্চদ্ৰারে পটিসন্ধি নাম পঞ্চদ্ৰারিক মরণাসন্ন ৰীথিচিত্তানং অন্তে চ ৰন্তানং পটিসন্ধি. সাপি গতিনিমিত্তভূতে গোচরে সিযাতি ৰুত্তে পঞ্চদ্ৰারিক ৰীথিচিত্তানি পঞ্চারম্মণভূতানি গতিনিমিত্তানি আরম্মণং করোন্তীতিপি সিদ্ধং হোতি. এৰঞ্চ সতি. তেসং ৰীথিচিত্তানং অন্তে অচৰিত্ৰা তদনুবন্ধক মনোদ্ৰারিকৰীথিচিত্তেহিপি কদাচি কেসঞ্চি চ ৰনং ননসম্ভৰতীতি সক্কা ৰত্তুং. তেসু পন অনুবন্ধক ৰীথীসু অতীতগ্গহণ সমুদাযগ্গহণেহি চ ৰন্তানং অতীতানিপি গতিনিমিত্তানি লব্ভন্তি. ৰত্থুগ্গহণনামগ্গহণেহি চ ৰন্তানং ধম্মা রম্মণংপি লব্ভতিযেৰ. তস্মা যং ৰুত্তং আচরিযেন কামাৰচর পটিসন্ধিযা ছ দ্ৰারগ্গহিতং কম্মনিমিত্তং গতিনিমিত্তঞ্চ পচ্চুপ্পন্নমতীতা রম্মণং উপলব্ভতীতি. তং সুৰুত্তমেৰাতি দট্ঠব্বং. যং পন ‘তমেৰ তথোপট্ঠিতং আরম্মণং আরব্ভ চিত্তসন্তানং অভিণ্হং পৰত্ততী’তি এৰং অন্তিমৰীথিতো পুব্বভাগে বহূনং ৰীথিৰারানং পৰত্তনং আচরিযেন ৰুত্তং. তং তথোপট্ঠিতং গতিনিমিত্তং আরব্ভাতিপি লদ্ধুং ৰট্টতিযেৰ. এৰঞ্চসতি, গতিনিমিত্তংপি অতীতং লব্ভতীতি দস্সেতুং ‘‘যদাপনা’’তিআদি ৰুত্তং. ‘‘সন্ততি ৰসেনা’’তি সন্ততি পচ্চুপ্পন্ন ৰসেন. ‘‘তস্সা’’তি গতিনিমিত্তস্স. যেভূয্যেন ৰুত্তো, ন সব্বসঙ্গাহিকেন ৰুত্তোতি অধিপ্পাযো. ‘‘মনোদ্ৰারিক মরণাসন্ন জৰনানংপি ইচ্ছিতব্বত্তা’’তি পুরেজাতপচ্চয ভাৰেন ইচ্ছিতব্বত্তাতি অধিপ্পাযো. ‘‘তদনুবন্ধাযা’’তি তানি মনোদ্ৰারি কমরণাসন্ন জৰনানি অনুগতায. ‘‘পটিসন্ধিযাপি সম্ভৰতো’’তি তস্স পুরেজাত পচ্চযস্স পটিসন্ধিযাপি পুরেজাত পচ্চযতা সম্ভৰতো. ননু থেরেন ভিন্দিত্ৰা অৰুত্তেপি ভিন্দিতব্বে সতি, ভিন্দনমেৰ যুত্তন্তি চে. ন যুত্তং. কস্মা, কম্মনিমিত্তেন সমানগতিকত্তা. তেনাহ ‘‘নচতং’’তিআদিং. ৰিভাৰনিযং যথাসম্ভৰং যোজেতব্বংতি ৰত্ৰা অপরেপন অৰিসেসতোৰ ৰণ্ণেন্তীতি অপরেৰাদোপি ৰুত্তো. তত্থ ‘‘অৰিসেসতো ৰণ্ণেন্তী’’তি অভিন্দিত্ৰাৰ ৰণ্ণেন্তীতি ৰুত্তং হোতি. পুন তং অপরেৰাদং অসম্পটিচ্ছন্তো ‘‘অট্ঠকথাযং পনা’’তিআদিমাহ. ইধ পন তং অপরেৰাদং পগ্গণ্হন্তো পুন ‘‘যঞ্চ তত্থা’’তিআদিমাহ. তত্থ ‘‘তদারম্মণাযা’’তি তং গতিনিমিত্তা রম্মণায. ‘‘তেসং ৰচনং’’তি অপরেসং ৰচনং. ‘‘অঞ্ঞত্র অৰিচারণাযা’’তি কস্মা ৰুত্তং. ননু অট্ঠকথাযং পনাতিআদি সব্বং ৰিচারণা ৰচনমেৰ হোতীতি. সচ্চং যথা দিট্ঠপাঠৰসেন, সাৰসেস পাঠভাৰং পন ন ৰিচারেতিযেৰ. তস্মা ‘‘অঞ্ঞত্র অৰিচারণাযা’’তি ৰুত্তং. এত্থ সিযা. অট্ঠকথাপাঠো সাৰসেসো হোতু, মূলটীকাপাঠো পন মনোদ্ৰারে যেৰাতি নিযমেত্ৰা ৰুত্তত্তা কথং সাৰসেসো সিযাতি. নিযমেত্ৰা ৰুত্তোপি ইধ অধিপ্পেতত্থে অপরিপুণ্ণে সাৰসেসো এৰ হোতীতি. তেন ৰুত্তং ‘‘অঞ্ঞং কারণং নত্থি অঞ্ঞত্র অৰিচারণাযা’’তি. ‘‘পচ্চুপ্পন্নমতীতং’’তিআদীসু. তদারম্মণাৰসানায পঞ্চদ্ৰারিক জৰনৰীথিযা চ ৰনং হোতীতি যোজনা. এৰং অপরত্থপি. বলৰন্তেপি সতি. তদারম্মণাৰসানায এৰ ৰীথিযা. ‘‘ৰুত্তত্তা পনা’’তি অট্ঠকথাযং এৰ ৰুত্তত্তা পন. ‘‘পুরিমভাগে এৰা’’তি পঞ্চদ্ৰারিক অন্তিম ৰীথিতো পুব্বভাগে এৰ. ‘‘তাহী’’তি দেয্যধম্মৰত্থূহি. ‘‘যথাতং’’তি তং অত্থজাতং কতমং ৰিযাতি অত্থো. ‘‘ইতো’’তি মনুস্স ভৰতো. নিমিত্ত সদিসং সদ্দং ৰণ্ণন্তি সম্বন্ধো. ‘‘নট্ঠচকারং’’তি পতিতচকারং. অট্ঠকথাপাঠে ঞাতকা মাতাদযো পঞ্চদ্ৰারে উপসংহরন্তীতি সম্বন্ধো. ‘‘তৰত্থাযা’’তি তৰঅত্থায. ‘‘চীনপটসোমারপটাদিৰসেনা’’তি চীনরট্ঠে পৰত্তো পটো চীনপটো. তথা সোমারপটেপি. ‘‘তানী’’তি রসফোট্ঠব্বানি. ফোট্ঠব্বং পন অঞ্ঞংপি যুজ্জতেৰ. অত্থিদানীতি মনসিকতত্তা পচ্চুপ্পন্নভূতানীতি ৰুত্তং. ‘‘অরূপীনং’’তি অরূপব্রহ্মানং. ‘‘তে’’তি অরূপিনো. ‘‘তানী’’তি হেট্ঠিমজ্ঝানানি. ৰিস্সট্ঠং লদ্ধঝানং যেসং তে ৰিস্সট্ঠজ্ঝানা. ‘‘ততোযেৰ চা’’তি ৰিস্সট্ঠজ্ঝানত্তাযেৰ চ. আকড্ঢিতং মানসং চিত্তং এতেসন্তি ৰিগ্গহো. ইদঞ্চ হেতুৰিসেসন পদং. আকড্ঢিতমানসত্তা কামভৰে উপ্পজ্জমানানন্তি দীপেতি. তেসং অরূপীনং. ‘‘অঞ্ঞং দুব্বল কম্মং’’তি উপচারজ্ঝানকম্মতো অঞ্ঞং তিহেতুকোমকং কম্মং. ‘‘তেসং’’তি রূপলোকতো চ ৰন্তানং. ‘‘সতো’’তি সন্তস্স সমানস্স. ‘‘উপত্থম্ভনে কারণং নত্থী’’তি ইদং উপচারজ্ঝান কম্মস্স গরুক কম্মগতিকত্তা ৰুত্তং. একন্ত গরুককম্মভূতংপি পন মহগ্গতজ্ঝান কম্মং নাম নানানিকন্তি বলেন পটিবাহীযমানং পটিসন্ধিং ন দেতিযেৰ. উপচারজ্ঝান কম্মে ৰত্তব্বং নত্থীতি দট্ঠব্বং. ‘‘তাদিসানী’’তি তথা রূপানি দ্ৰিহেতুকোমক কম্মানি তেসং ওকাসং ন লভন্তি. নীৰরণানং সুট্ঠুৰিক্খম্ভিতত্তাযেৰ. ‘‘যেনা’’তি যেন ছন্দাদীনং পৰত্তি কারণেন. ‘‘নানাকম্মানি পী’’তি উপচারজ্ঝান কম্মতো অঞ্ঞানি পচ্চুপ্পন্ন কম্মানিপি অতীতভৰেসু কতানি অপরপরিযায কম্মানিপি. ‘‘যেন চা’’তি যেন নানাকম্মানম্পি ওকাস লাভকারণেন চ. ‘‘তে’’তি রূপী ব্রহ্মানো. ‘‘ৰুত্তনযেনে ৰা’’তি সুট্ঠুৰিক্খম্ভিতনীৰরণানং তেসং অপ্পনা পত্তজ্ঝানৰিসেসেন [ যস্মা পনাতিআদিনা চ ] পরিভাৰিত চিত্তসন্তানত্তা’তি চ ৰুত্তনযেনেৰ. ‘‘তং কারণং’’তি অহেতুক পটিসন্ধিযা অভাৰ কারণং. পরম্পর ভৰেসুচ ৰীথিমুত্তচিত্তানং পৰত্তাকারং দস্সেতুন্তি সম্বন্ধো. ‘‘যথা তানিযেৰ ওসধানী’’তি লোকে একং ওসধং লভিত্ৰাতং দেৰসিকং ভুঞ্জতি. একোপথমদিৰসে ভুঞ্জন্তং দিস্ৰা কতমং নাম ত্ৰং ওসধং ভুঞ্জসীতি পুচ্ছি. ইদং নাম ওসধং ভুঞ্জামীতি ৰদতি. পুনদিৰসেসুপি ওসধং ভুঞ্জন্তং দিস্ৰা তথেৰ পুচ্ছি. তমেৰ ওসধং ভুঞ্জামীতি ৰদতি. তত্থ ‘‘তমেৰ ওসধং’’তি যং পথমদিৰসে ওসধং তযাচ পুচ্ছিতং. মযা চ কথিতং. তমেৰ অজ্জ ভুঞ্জামীতি অত্থো. তত্থ পন পথমদিৰসে ভুত্তং ওসধং অঞ্ঞং. অজ্জ ভুত্তং অঞ্ঞং. তংসদিসং পন অঞ্ঞংপি তমেৰাতি লোকে ৰোহরন্তি তানিযেৰ ওসধানি ভুঞ্জামীতি. এৰং ইধপি তস্সদিসে তব্বোহারো দট্ঠব্বো. ‘‘তস্মিং’’তি ভৰঙ্গচিত্তে. অৰত্তমানে উপপত্তিভৰো ওচ্ছিজ্জতি. ৰত্তমানে ন ওচ্ছিজ্জতি. তস্মা তস্স উপপত্তি ভৰস্স অনোচ্ছেদ অঙ্গত্থায কারণত্তা ভৰঙ্গন্তি ৰুচ্চতীতি অধিপ্পাযো. ‘‘উপপত্তি ভৰো’’তি চ কম্মজক্খন্ধসন্তানং ৰুচ্চতি. ‘‘পরসমযে’’তি উচ্ছেদ দিট্ঠীনং ৰাদে. ‘‘ৰট্টমূলানী’’তি অৰিজ্জাতণ্হা ৰুচ্চন্তি. ৰট্টমূলানি সুট্ঠুউচ্ছিজ্জন্তি এত্থাতি ৰিগ্গহো. ‘‘যস্স অত্থাযা’’তি সউপাদিসেসাদিকস্স নিব্বানস্স পটিলাভত্থায. ‘‘পট্ঠপীযন্তী’’তি পৰত্তাপীযন্তি. পজ্জন্তি পাপুণন্তি অরিযা জনা এত্থাতি পদং. পরতো সমন্তিপদে অনুপাদিসেসস্স গয্হমানত্তা ইধ সউপাদিসেসন্তি ৰুত্তং. বুজ্ঝন্তীতি বুধা. সুট্ঠু সদ্ধিং উচ্ছিন্নং সিনেহবন্ধনং যেহি তে সুসমুচ্ছিন্নসিনেহবন্ধনা. কথঞ্চ সুট্ঠুউচ্ছিন্নং, কেহি চ সদ্ধিং উচ্ছিন্নন্তিআহ ‘‘অনুসযমত্তং পী’’তিআদিং. ‘‘সেসকিলেসেহী’’তি তণ্হাসিনেহ বন্ধনতো অৰসেস কিলেসেহি. ‘‘অধিসযিতং’’তি ৰিক্খম্ভিতুংপি অসক্কুণেয্যং হুত্ৰা অতিরেকতরং সযিতং. ‘‘অধিগমাৰহং’’তি অধিগমো ৰুচ্চতি নৰৰিধো লোকুত্তর ধম্মো. তং আৰহতীতি অধিগমাৰহং. ‘‘সীলং’’তি চতুপারিসুদ্ধিসীলং. ‘‘ধুতঙ্গং’’তি তেরসধুতঙ্গং. সেসমেত্থ সুৰিঞ্ঞেয্যং.

ৰীথিমুত্তসঙ্গহদীপনিযাঅনুদীপনা নিট্ঠিতা.

৬. রূপসঙ্গহঅনুদীপনা

১৫৬. রূপসঙ্গহে. ‘‘চিত্তচেতসিকে’’তি চিত্তচেতসিক ধম্মে. ‘‘দ্ৰীহি পভেদপ্পৰত্তীহী’’তি দ্ৰীহি পভেদসঙ্গহপৰত্তি সঙ্গহেহি. ‘‘যে ৰত্তন্তী’’তি যে ধম্মা ৰত্তন্তি পৰত্তন্তি. ‘‘এত্তাৰতা’’তি এত্তকেন ‘তত্থ ৰুত্তাভিধম্মত্থা’তিআদিকেন ৰচনক্কমেন. নিপাতং ইচ্ছন্তা এত্তকেহি পঞ্চহি পরিচ্ছেদেহীতি ৰণ্ণেন্তি. ৰচনৰিপল্লাসং ইচ্ছন্তাতিপি যুজ্জতি. ‘‘সমুট্ঠাতী’’তি সুট্ঠু উট্ঠাতি, পাতুব্ভৰতি, ৰিজ্জমানতং গচ্ছতি. ‘‘কম্মাদী’’তি কম্মাদিপচ্চযো. ‘‘পিণ্ডী’’তি একগ্ঘনতা ৰুচ্চতি. উপাদায মহন্তানি এৰ হুত্ৰাতি সম্বন্ধো. ইন্দ্রিযবদ্ধসন্তানং সত্তসন্তানং. অজ্ঝত্ত সন্তানংতিপি ৰুচ্চতি. ‘‘ৰিসংৰাদকট্ঠেনা’’তি ৰিরাধকট্ঠেন. ভূতঞ্চ অভূতং কত্ৰা অভূতঞ্চ ভূতং কত্ৰা সন্দস্সকট্ঠেনাতি ৰুত্তং হোতি. ভূতৰজ্জপ্পটিচ্ছাদনকম্মং মহামাযা নাম. মাযং করোন্তীতি মাযাকারা. আৰিসনং নাম সত্তানং সরীরেসু আৰিসনং. গহণং নাম সত্তানং অত্তনোৰসং ৰত্তাপনং. তদুভযং করোন্তা কত্থ ঠত্ৰা করোন্তি. অন্তোৰাঠত্ৰা করোন্তি, বহিৰা ঠত্ৰা করোন্তীতি পাকতিকেহি মনুস্সেহি জানিতুং পস্সিতুং অসক্কুণেয্যত্তা অচিন্তেয্যট্ঠানং নাম. ‘‘ৰঞ্চকট্ঠেনা’’তি এতা পকতিযা অতিদুব্বণ্ণং অত্তানং দেৰচ্ছরাৰণ্ণং কত্ৰা ৰঞ্চেন্তি. ৰসনরুক্খগুম্বংপি দিব্বৰিমানং কত্ৰা ৰঞ্চেন্তি. এৰরূপেন ৰঞ্চকট্ঠেন. ‘‘তেনেৰট্ঠেনা’’তি ৰিসংৰাদকট্ঠাদিনা তিৰিধেনেৰ অত্থেন. তানিপিহি অসত্তভূতংযেৰ অত্তানং সত্তোতি ৰিসংৰাদেন্তি. অরুক্খংযেৰ অত্তানং রুক্খোতি ৰিসংৰাদেন্তি. অনিট্ঠং, অকন্তং, অমনাপংযেৰ অত্তানং ইট্ঠো, কন্তো, মনাপোতি ৰঞ্চেন্তি, তথা সহজাতানঞ্চ তেসং অঞ্ঞমঞ্ঞস্স অন্তো ৰা তিট্ঠন্তি. উদাহুবহিৰাতিট্ঠন্তীতি জানিতুং পস্সিতুং অসক্কুণেয্যং ঠানং হোতীতি. ‘‘উভযত্থপী’’তি মাযাকারাদি মহাভূতেসু চ পথৰিযাদিমহাভূতেসু চ. ‘‘অভূতানী’’তি অসন্তানি, অসচ্চানি.‘‘অব্ভুতানী’’তি অচ্ছরিযকম্মানি. ‘‘ইমস্মিং পাঠে’’তি চতুন্নং মহাভূতানন্তি এৰং সম্বন্ধ পদসহিতে পাঠে. অঞ্ঞত্থ পন উপাদারূপং অনুপাদারূপন্তিআদীসু যকার ৰিরহো দিট্ঠোতি অধিপ্পাযো. ধাতূনং অনেকত্থত্তা ‘‘পথযতি পক্খাযতী’’তি ৰুত্তং. ‘‘পুথূ’’তি পাটিপদিকপদং. তমেৰ জাতত্থে নিরুত্তিনযেন পথৰীতি সিদ্ধন্তি দস্সেতুং ‘‘পুথুমহন্তী’’তিআদি ৰুত্তং. পকারেন থৰীযতীতি অত্থে পথৰীতি ইদং উজুকমেৰ. ‘‘আপেতী’’তি ব্যাপেতি. ‘‘অপ্পাযতী’’তি ভুসং পাযতি, ৰড্ঢেতি. তেনাহ ‘‘সুট্ঠু ব্রূহেতী’’তিআদিং. নিসানত্থৰসেনেৰ পরিপাচনত্থোপি লব্ভতীতি আহ ‘‘পরিপাচেতিৰা’’তি. ‘‘সমীরেতী’’তি সুট্ঠু ঈরেতি কম্পেতি. ৰাযতি ৰহতীতি ৰাযো অত্থাতিস্সয নযেন. ‘‘ৰিত্থম্ভনং’’তি ৰিৰিধেন আকারেন ভূতসঙ্ঘাটানং থম্ভনং ৰহনং অভিনীহরণং. কক্খল়তা নাম খরতা ফরুসতা. সহজাতরূপানং পতিট্ঠানত্থায থদ্ধতা থূলতা. সা সেসভূতেসু নত্থীতি আহ ‘‘সেসভূতত্তযং উপাদাযা’’তি. ‘‘অনৰট্ঠানতা’’তি এত্থ অৰট্ঠানং নাম অচলট্ঠানং. ন অৰট্ঠানন্তি অনৰট্ঠানং. চলনন্তি ৰুত্তং হোতি. তেনাহ ‘‘মুদুভূতাপী’’তিআদিং. আবন্ধকং নাম আবন্ধিতব্বে ৰত্থুম্হি মুদুম্হি সতি, দল়্হং ন বন্ধতি. থদ্ধেসতি, দল়্হং বন্ধতীতি ইদং লোকতোৰ সিদ্ধন্তি আহ ‘‘আবন্ধিতব্বাযা’’তিআদিং. ‘‘তব্ভাৰং’’তি পরিণতভাৰং. ‘‘পরিপাচকতা দস্সনতো’’তি হেমন্তে অজ্ঝোহটাহারানং সুট্ঠুপরিপাচকতা দস্সনতোতি ৰদন্তি. উসতি দহতীতি উণ্হং. ‘‘দহতী’’তি চ উণ্হতেজোপি উণ্হভাৰেন দহতি, সীততেজোপি সীতভাৰেন দহতি. উণ্হেন ফুট্ঠং ৰত্থু উণ্হত্তং গচ্ছতি, সীতেন ফুট্ঠং ৰত্থু সীতত্তং গচ্ছতি. যঞ্চ উণ্হত্তং গচ্ছতি, তং উণ্হতেজো উণ্হভাৰেন দহতিনাম. যঞ্চ সীতত্তং গচ্ছতি, তং সীততেজো সীতভাৰেন দহতিনাম. এৰং সীততেজোপি উসতিদহতীতি অত্থেন উণ্হত্ত লক্খণোনাম হোতীতি. এৰংসন্তে নীলেনৰণ্ণেন ফুট্ঠং ৰত্থু নীলং হোতি. পীতেন ফুট্ঠং পীতং হোতি. নীলংপি পীতংপি তং ৰত্থুং দহতিনামাতি চে. নীলেন ৰণ্ণেন ফুট্ঠংনাম নত্থি. তথা পীতেন. কস্মা, নীলাদীনং উপাদারূপানং ফুসন কিচ্চা ভাৰতো. সম্মিস্সিতং নাম হোতি. ন চ সম্মিস্সনমত্তেন দহতি. ফুসন্তো এৰ দহতি. ফুসন্তানংপি পথৰিৰাতানং দহনকিচ্চং নত্থি. পরিপাচনকিচ্চং নত্থীতি অধিপ্পাযো. সচে ঘনথদ্ধে সিলাথম্ভে ৰিত্থম্ভনং অত্থি, সকলো সিলাথম্ভো কপ্পাসপিচুগুল়্হোৰিয সিথিলো চ লহুকো চ ভৰেয্য. নচ ভৰতি. তস্মা তত্থ ৰিত্থম্ভনং নত্থীতি অধিপ্পাযেন ‘‘সো পন ঘনথদ্ধেসু সিলাথম্ভাদীসু ন লব্ভতী’’তি চোদেতি. তত্থ পন ৰিত্থম্ভনং লব্ভমানং অধিমত্তেন ন লব্ভতি, সহজাতভূতানং উপত্থম্ভনমত্তেন লব্ভতীতি দস্সেন্তো ‘‘না’’তি ৰত্ৰা ‘‘তত্থহী’’তিআদিমাহ. তত্থ ‘‘ৰহতী’’তি থদ্ধকক্খল় কিচ্চং ৰহতি.

পসাদরূপেসু. ‘‘সমৰিসমং’’তি সমট্ঠানঞ্চ ৰিসমট্ঠানঞ্চ, সমদেসঞ্চ ৰিসমদেসঞ্চ, সমপথঞ্চ ৰিসমপথঞ্চাতি এৰমাদিং সমৰিসমং. ‘‘আচিক্খতী’’তি আচিক্খন্তং ৰিয তং জানন কিচ্চং সম্পাদেতি. তেনাহ ‘‘সমৰিসমজাননস্স তং মূলকত্তা’’তি. ‘‘অনিরাকরণতো’’তি অপ্পটিক্খিপনতো. ‘‘তং ৰা’’তি রূপং ৰা. সুণন্তি জনা. সুয্যন্তি জনেহি. এৰং ঘাযন্তীতিআদীসু. ‘‘জীৰিত নিমিত্তং’’তি জীৰিতপ্পৰত্তিকারণভূতো. ‘‘নিন্নতাযা’’তি ৰিসযৰিসযীভাৰূপগমনেন নিন্নতায. ‘‘জীৰিতৰুত্তি সম্পাদকত্তা’’তি নানাৰচীভেদৰচীকম্মপ্পৰত্তনেনাতি অধিপ্পাযো. ইমে পন পঞ্চ চক্খু পসাদাদযোতি সম্বন্ধো. ‘‘দট্ঠুকামতা’’তি রূপতণ্হা ৰুচ্চতি. আদিসদ্দেন সোতুকামতা ঘাযিতুকামতা সাযিতুকামতা ফুসিতুকামতাযো সঙ্গয্হন্তি. অত্থতো সদ্দতণ্হা গন্ধতণ্হা রসতণ্হা ফোট্ঠব্বতণ্হা এৰ. ‘‘নিদানং’’তি কারণং. দট্ঠুকামতাদযো নিদান মস্সাতি ৰিগ্গহো. কুসলা কুসলকম্মং. সমুট্ঠাতি এতেনাতি সমুট্ঠানং. কম্মমেৰ. দট্ঠুকামতাদিনিদানকম্মং সমুট্ঠানং যেসন্তি সমাসো. পথৰিআদীনি ভূতানি. তেসং পসাদো লক্খণং এতেসন্তি ৰিগ্গহো. দুতীয ৰিকপ্পে. রূপাদীনং পঞ্চারম্মণানং অভিঘাতং অরহতীতি রূপাদিঅভিঘাতারহো. ভূতানং পসাদো ভূতপ্পসাদো. সো লক্খণং এতেসন্তি ৰিগ্গহো. চক্খু ঊকাসিরপ্পমাণে দিট্ঠ মণ্ডলে তিট্ঠতীতি সম্বন্ধো. ‘‘দিট্ঠমণ্ডলে’’তি মহাজনেহি পকতি চক্খুনা দিট্ঠে পসন্নমণ্ডলে. তেলং সত্তপিচুপটলানি ব্যাপেত্ৰা তিট্ঠতিৰিযাতি যোজনা. ‘‘সোতবিলং’’ নাম সোতকূপো. ‘‘অঙ্গুলিৰেঠনা’’ নাম অঙ্গুলিমুদ্দিকা. ‘‘উপচিততনুতম্বলোমং’’তি রাসীকতঞ্চ ৰিরল়ঞ্চ তম্বলোহৰণ্ণঞ্চ সুখুমলোমং. উপচিতং রাসীকতং তনুতম্বলোমং এত্থাতি ৰিগ্গহো. ‘‘অজপদসণ্ঠানং’’তি অজস্স পাদেন অক্কন্তপদসণ্ঠানৰন্তং. ‘‘উপ্পলদলং’’ নাম উপ্পলপণ্ণং. উপ্পলদলস্স অগ্গসণ্ঠানৰন্তং. ‘‘ৰট্টি’’ নাম ইধ মনুস্সানং সরীরাকারসণ্ঠিতা আযতপিণ্ডি. ‘‘সুক্খচম্মানি চ ঠপেত্ৰা’’তি সম্বন্ধো. তে পন পঞ্চপ্পসাদা. সমুদীরণং চঞ্চলনং. ‘‘যথাতং’’তি কতমং ৰিয তং. ইমে পসাদা ৰিচিত্তা, কথংৰিচিত্তাতি আহ ‘‘অঞ্ঞমঞ্ঞং অসদিসা’’তি. কথং অসদিসাতি আহ ‘‘তেহী’’তিআদিং.

গোচররূপেসু. ‘‘ৰণ্ণৰিসেসং’’তি ৰণ্ণৰিসেসত্থং. ৰণ্ণৰিকারন্তি ৰুত্তং হোতি. হদযে গতো পৰত্তো ভাৰো হদযঙ্গতভাৰো. ‘‘ভাৰো’’তি চ অধিপ্পাযো ৰুচ্চতি. তং পকাসেতি, মুখে ৰণ্ণৰিকারং দিস্ৰা অযং মে তুস্সতি, অযং মে রুচ্চতি, অযং মে কুপ্পতি, অযং সোমনস্সিতো, অযং দোমনস্সিতোতি এৰং জাননপচ্চযত্তা. ‘‘পকতিযা পী’’তি ৰণ্ণৰিসেসং অনাপজ্জিত্ৰাপীতি অধিপ্পাযো. ‘‘যং কিঞ্চিদব্বং’’তি সৰিঞ্ঞাণকৰত্থুং. সমৰিসমং পুব্বে পকাসিতং. তং তং অত্থং ৰা আচিক্খতি তং সুত্ৰা তস্স তস্স অত্থস্স জাননতো. অত্তনো ৰত্থুং ৰা আচিক্খতি তং সুত্ৰা তস্স ৰত্থুস্সপি জাননতো. ‘‘অত্তনো ৰত্থুং সূচেতী’’তি ইধ ইদং নাম অত্থীতি পকাসেতি. ‘‘ফুসীযতী’’তি ফুসিত্ৰা ৰিজানীযতি. ‘‘তং’’তি ফুসনং. ‘‘তস্সা’’তি আপোধাতুযা. ‘‘দ্রৰতাৰা’’তি অদ্দতিন্তরসতাৰা. ফুসিত্ৰা গয্হতি, সা চ আপোধাতু সিযাতি চোদেতি. ৰুচ্চতে পরিহারো. এৰং পন ন লব্ভতি, তস্মা সা তেজোযেৰ. ন আপোতি. এত্থ এৰং অলব্ভমানাপি সাসীততা আপোযেৰ, ন তেজো. কস্মা, আপস্সপি সীতুণ্হৰসেন দুৰিধতা সম্ভৰতো. তস্মিঞ্হি লোহরসে উণ্হতা উণ্হআপো, সীতৰত্থূসু সীততা সীতআপোতি চে. এৰং পন সতি তেজো নাম নত্থীতি আপজ্জতীতি পরিহারো. ‘‘সহ অপ্পৰত্তনতো’’তি একতো অপ্পৰত্তনতো. ‘‘ওরপারানং ৰিযা’’তি নদিযং তীরং নাম ইদং ওরিমতীরং, ইদং পারিমন্তি নিযমতো নত্থি. যত্থ সযং তিট্ঠতি, তং ওরিমন্তি, ইতরং পারিমন্তি ৰোহরতি. এৰং ওরপারানং অনৰট্ঠানং হোতীতি. এত্থ চ ‘‘সীতুণ্হানং সহ অপ্পৰত্তনতো’’তি এতেন যদি তে সহ পৰত্তেয্যুং. তত্থ সীততা আপোনাম, উণ্হতা তেজোনামাতি ৰত্তব্বা সিযুং. ন পন তে সহ পৰত্তন্তি, তস্মা তথা ন ৰত্তব্বা হোন্তীতি দস্সেতি. ন ন ৰত্তব্বা. কস্মা, উণ্হতেজেন যুত্তোহি আপো উণ্হত্তমেৰ গচ্ছতি. যথাতং উণ্হতেজেন যুত্তা পথৰীপি ৰাযোপি উণ্হত্তমেৰ গচ্ছন্তীতি. তস্মা তে সহ ন পৰত্তন্তি. সহ অপ্পৰত্তেসুপি তেসু অঞ্ঞত্থ সীতৰত্থূসু সীততা আপোনামাতি ৰত্তব্বমেৰ হোতীতি চোদনা. এৰংসন্তে তস্মিং লোহরসে সব্বেপি রূপধম্মা উণ্হত্তং গচ্ছন্তীতি সব্বেপি তেজোভাৰং পাপুণন্তি. ‘উণ্হত্ত লক্খণো তেজো’তিহি ৰুত্তং. যদি চ সীতৰত্থূসু সীতভাৰো নাম সিযা. তত্থপি তেন যুত্তা সব্বেপি রূপধম্মা সীততং গচ্ছন্তিযেৰ. তত্থপি তৰমতিযা সব্বেপি আপোভাৰং পাপুণন্তি. ন পন সক্কা তথা ভৰিতুং. ন হি এৰরূপং লক্খণঞ্ঞথত্তং নাম তেসং অত্থি. ভাৰঞ্ঞথত্তমেৰ অত্থি. তত্থ ‘‘লক্খণঞ্ঞথত্তং’’ নাম পথৰী আপোভাৰং গচ্ছতি. আপো পথৰিভাৰং গচ্ছতীতিআদি. ‘‘ভাৰঞ্ঞথত্তং’’ নাম পথৰী কদাচি কক্খল়া হোতি. কদাচি মুদুকা. আপো কদাচি আবন্ধনমত্তো হোতি. কদাচি পগ্ঘরণকো. তেজো কদাচি উণ্হো, কদাচি সীতো. ৰাযো কদাচি ৰিত্থম্ভনমত্তো, কদাচি সমুদীরণোতি. এৰং একমেকস্সা ধাতুযা তিক্খ মন্দ ওমত্তাধিমত্তৰসেন ক্রিযাসঙ্কন্তি নাম অত্থীতি. তস্মা যং ৰুত্তং ‘উণ্হতেজেন যুত্তোহি আপো উণ্হত্তমেৰ গচ্ছতি, যথা তং উণ্হতেজেন যুত্তা পথৰীপি ৰাযোপি উণ্হত্তমেৰ গচ্ছন্তী’তি. তং লক্খণঞ্ঞথত্তৰচনং হোতি. ন যুজ্জতি. ন হি উণ্হতেজেন যুত্তা সব্বেতেধম্মা উণ্হত্তং গচ্ছন্তি. অত্তনো অত্তনো সভাৰং ন ৰিজহন্তি. তথাহি তস্মিং পক্কুথিতে সন্তত্তে লোহরসে ভাৰো উণ্হত্তং ন গচ্ছতি. আবন্ধন সভাৰং ৰা পগ্ঘরণ সভাৰং ৰা ন ৰিজহতি. যদি উণ্হত্তং গচ্ছেয্য, তং সভাৰং ৰিজহেয্য. এৰংসতি, তস্মিং লোহরসে আবন্ধনাকারো ৰা পগ্ঘরণাকারো ৰা ন পঞ্ঞাযেয্য. সব্বেরূপ ধম্মা ৰিক্কিরেয্যুং. ৰিক্কিরিত্ৰা অন্তরধারেয্যুং. ন চ ন পঞ্ঞাযতি. নাপি ৰিক্কিরন্তি. নোচ তত্থ আবন্ধনাকারো উণ্হত্তং গচ্ছতি. অঞ্ঞোহি আবন্ধনাকারো, অঞ্ঞং উণ্হত্তং. আবন্ধনাকারো আপো, উণ্হত্তং তেজো. তত্থ পথৰিৰাযেসুপি এসেৰনযো. তস্মা যং ৰুত্তং ‘‘যদি তে সহ পৰত্তেয্যুং. তত্থ সীততা আপোনাম, উণ্হতা তেজো নামাতি ৰত্তব্বা সিযুং. ন পন তে সহ পৰত্তন্তি. তস্মা তথা ন ৰত্তব্বা হোন্তীতি দস্সেতী’’তি. তং সুৰুত্তমেৰাতি দট্ঠব্বং. ‘‘তেসং অনৰট্ঠানতো’’তি এতেন সচে তে সীতুণ্হা অৰট্ঠিতা সিযুং. অথ সব্বকালেপি সীততা আপোনাম, উণ্হতা তেজোনামাতি ৰত্তব্বা সিযুং. ন পন তে অৰট্ঠিতা হোন্তি. অনৰট্ঠিতা এৰ হোন্তি. তস্মা তথা ন ৰত্তব্বা হোন্তীতি দস্সেতি. এত্থ চ অনৰট্ঠিতেসু সন্তেসু যদি সীততা আপো নাম, উণ্হতা তেজোনামাতি ৰদেয্যুং. এৰঞ্চসতি, আপতেজাপি অনৰট্ঠিতা সিযুং. যো ইদানি আপো, সোযেৰ খণন্তরে তেজো নাম. যো ৰা ইদানি তেজো, সোযেৰ খণন্তরে আপো নামাতি আপজ্জেয্যুং. ন চ সক্কা তথা ভৰিতুং. লক্খণঞ্ঞথত্তে অসন্তে ৰোহারঞ্ঞথত্তস্সপি অসম্ভৰতো. তেন ৰুত্তং ‘‘ওরপারানং ৰিয তেসং অনৰট্ঠানতো চ ৰিঞ্ঞাযতী’’তি. তত্থ ‘‘ৰিঞ্ঞাযতী’’তি সাসীততা তেজোযেৰ, ন আপোতি ৰিঞ্ঞাযতীতি.

‘‘অথ পনা’’তিআদীসু. যং পুব্বে পরেন ৰুত্তং ‘ননু দ্রৰতা ৰা ফুসিত্ৰা গয্হতী’তি. তং ৰিচারেতুং ‘‘অথ পনা’’তিআদি ৰুত্তং. তত্থ ‘‘অথ পনা’’তি যদি পন গয্হতি, এৰংসতীতি চ. এৰঞ্চসতি আরম্মণ ভূতো এৰ সিযাতি সম্বন্ধো. অযং পনেত্থা ধিপ্পাযো. সচে দ্রৰভাৰভূতো আপো ফুসিত্ৰা গয্হেয্য. এৰং সতি, অযোপিণ্ডাদীসু আবন্ধনমত্তভূতো আপোপি ফুসিত্ৰা গহেতব্বো সিযা. কস্মা, আপভাৰেন একত্তা. এৰঞ্চসতি, তেসু অযোপিণ্ডাদীসু সো আপো তানি হত্থেন ৰা পাদেন ৰা ফুসন্তস্স পহরন্তস্স ৰিনা ইতর মহাভূতেহি ৰিসুং কাযিক সুখদুক্খানং আরম্মণ পচ্চযো সিযা. যথাতং, তেস্ৰেৰ অযোপিণ্ডাদীসু পথৰিমহাভূতং ৰিনা ইতরমহাভূতেহি ৰিসুং কাযিকসুখদুক্খানং আরম্মণ পচ্চযো হোতি. এৰং তেজোৰাযেসুপীতি. ন পন সো ৰিসুং কাযিকসুখদুক্খানং আরম্মণ পচ্চযো হোতি. তস্মা সো ফোট্ঠব্ব সভাৰো ন হোতি. যথা চ সো ফোট্ঠব্বসভাৰো ন হোতি. তথা পকতি উদকাদীসু দ্রৰভাৰভূতোপি আপো তানি ফুসন্তস্স পহরন্তস্স কাযিকসুখদুক্খানং আরম্মণ পচ্চযো ন হোতি. ন চ ফোট্ঠব্ব সভাৰোতি. এৰঞ্চসতি, কথং অযোপিণ্ডাদীসু আবন্ধনমত্তভূতো আপো কাযিকসুখদুক্খানং পচ্চযো ন হোতি. কথঞ্চ তেসু ইতরমহাভূতানি ৰিসুং ৰিসুং কাযিকসুখদুক্খানং পচ্চযা হোন্তীতি. তং দস্সেতুং ‘‘যঞ্হী’’তিআদিমাহ. তত্থ ‘‘সণ্হথদ্ধতাৰসেনৰা’’তি তেসু ঠিতায পথৰিধাতুযা সণ্হথদ্ধতাৰসেন ৰা. সণ্হপথৰীসুখৰেদনায থদ্ধপথৰীদুক্খৰেদনায আরম্মণ পচ্চযোতি ৰুত্তং হোতি. এৰং সেসেসু. ‘‘অব্ভন্তরত্থম্ভনস্সা’’তি তেসং অযোপিণ্ডাদীনং অব্ভন্তরে ঠিতস্স ৰিত্থম্ভন সভাৰস্স. ‘‘নো অঞ্ঞথা’’তি তানিতীণি কারণানি ঠপেত্ৰা আবন্ধন ক্রিযং পটিচ্চ কাযিকসুখদুক্খুপ্পত্তি নাম নত্থীতি অধিপ্পাযো. ইদানি পকতি উদকাদীসু দ্রৰভাৰভূতং আপোধাতুম্পি ফুসিত্ৰা জানন্তীতি মহাজনা মঞ্ঞন্তি. তব্বিসোধনেন সহ লদ্ধগুণং দস্সেতুং ‘‘তস্মা’’তিআদিমাহ. তত্থ ‘‘পথমং দ্রৰতা সহিতানি. ল. জানন্তী’’তি ইদং পধান ৰচনং. লোকে হত্থেন পরামসিত্ৰা ৰা চক্খুনা দিস্ৰা ৰা ইদং রস্সং, ইদং দীঘং, ইদং ৰট্টং, ইদং মণ্ডলন্তিআদিনা সণ্ঠানং জানন্তা হত্থ ফুসনেন ৰা চক্খু দস্সনেন ৰা সহেৰ তং জানন্তীতি মঞ্ঞন্তি. তত্থ পন পুরিমভাগে কাযদ্ৰারৰীথি চিত্তেন পচ্চুপ্পন্নানি তীণিভূতানি ফুসিত্ৰা ৰা চক্খুদ্ৰার ৰীথিচিত্তেন পচ্চুপ্পন্নং রূপং দিস্ৰা ৰা পচ্ছা ৰত্থুগ্গহণৰীথিযা উপ্পন্নায এৰ সণ্ঠানং জানন্তি. এসেৰনযো রত্তিযং অলাতচক্কসণ্ঠানং জানন্তস্সপি. তত্থ পন বহূনিপি পুব্বাপরৰীথিচিত্তসন্তানানি ইচ্ছিতব্বানি. তথা লোকে চক্খুনা দিস্ৰা দ্ৰারৰাতপানাদীনং ছিদ্দৰিৰরানি জানন্তা চক্খুনা দস্সনেন সহেৰ তানি জানন্তীতি মঞ্ঞন্তি. তত্থ পন পুরিমভাগে চক্খুদ্ৰারিকৰীথি চিত্তেন পচ্চুপ্পন্নানি কৰাটরূপভিত্তি রূপানি পুনপ্পুনং দিস্ৰা পচ্ছা অলাতচক্কস্স মজ্ঝে ৰিৰরংপি জানন্তা ৰিয ৰিসুং উপ্পন্নায মনোদ্ৰারিক ৰিঞ্ঞাণৰীথিযা এৰ তং ছিদ্দৰিৰরভূতং আকাসং জানন্তি. তথা হত্থেন উদকং ফুসন্তস্স পথমং দ্রৰসহিতানি ৰিলীনানি মুদূনি তীণিফোট্ঠব্ব মহাভূতানি ৰিসুং ৰিসুং কাযদ্ৰারিক ৰীথি চিত্তেহি ফুসনকিচ্চেন আরম্মণং করিত্ৰা পচ্ছা ৰিসুং সুদ্ধায মনোদ্ৰারিক ৰীথিযা এৰ দ্রৰভাৰসঙ্খাতং পগ্ঘরণক আপোধাতুং জানন্তি. এৰং সন্তেপি তং দ্রৰভাৰংপি হত্থেন ফুসনেন সহেৰ জানন্তীতি মঞ্ঞন্তীতি অধিপ্পাযো.

গাৰো চরন্তি এত্থাতি আহ ‘‘গুন্নং চরণট্ঠানং’’তি. অক্খর ৰিদূ পন গোসদ্দং ইন্দ্রিযত্থেপি ইচ্ছন্তীতি আহ ‘‘গোতি ৰা’’তিআদিং. তানি চক্খাদীনি এতেসু রূপাদীসু চরন্তি, এতানি ৰা রূপাদীনি তেসু চক্খাদীসু চরন্তি. তত্থ পুরিমেন গাৰো ইন্দ্রিযানি চরন্তি এতেসূতি গোচরানীতি দস্সেতি. পচ্ছিমেন গোসুইন্দ্রিযেসু চরন্তীতি গোচরানীতি. ইমানি পন পঞ্চ রূপাদীনি.

ভাৰদ্ৰযে. ইচ্ছনট্ঠেন ঠানট্ঠেন ঠপনট্ঠেন চ ইত্থী. সাহিকামরতি অত্থায সযংপি অঞ্ঞংকামিকং ইচ্ছতি. সযঞ্চ কামিকেন ইচ্ছীযতি. অঞ্ঞো চ কামিকো ঘরাৰাস সুখত্থায তত্থ ঠানং উপেতি, পতিট্ঠাতি. আযতিঞ্চ কুলৰংসপ্পতিট্ঠানত্থায তত্থ কুলৰংস বীজং ঠপেতীতি. পূরণট্ঠেন ইচ্ছনট্ঠেন চ পুরিসো. সোহি অত্তহিতঞ্চ পূরেতি, পরহিতঞ্চ ইচ্ছতি. ইধলোকহিতঞ্চ পূরেতি, পরলোকহিতঞ্চ ইচ্ছতি. উভযলোকহিতঞ্চ পূরেতি, লোকুত্তরহিতঞ্চ ইচ্ছতি, এসতি, গৰেসতীতি. পুমস্সসকং পুংসকং. পুরিসলিঙ্গাদি. নত্থি পুংসকং এতস্সাতি নপুংসকং. ‘‘যস্স পন ধম্মস্সা’’তি ভাৰরূপধম্মস্স. ‘‘তং’’তি খন্ধপঞ্চকং. মহাসণ্ঠানং সত্তানং জাতিভেদং লিঙ্গেতি ঞাপেতীতি লিঙ্গং. লক্খণপাঠকা নিমিনন্তি সঞ্জানন্তি কল্যাণ পাপকং কম্মৰিপাকং এতেনাতি নিমিত্তং. কিরিযা কুত্তং. আযুকন্তং কপ্পীযতি সঙ্খরীযতীতি আকপ্পো. সব্বেপেতেলিঙ্গাদযো. সোচ অৰিসদাদিভাৰো. ‘‘ৰচনেসুচা’’তি ইত্থিসদ্দপুরিসসদ্দাদীসু চ. ‘‘ৰচনত্থেসু চা’’তি ইত্থি সণ্ঠান পুরিসসণ্ঠানাদি অত্থেসু চ. ‘‘নিমিত্তসদ্দো ৰিযা’’তি নিমিত্ত সদ্দো অঙ্গজাতে পাকটো ৰিযাতি. ন পাকটো দিট্ঠো. অপাকটো পন কত্থচি দিট্ঠোতি অধিপ্পাযো. ‘‘ভৰন্তি সদ্দবুদ্ধিযো’’তি সদ্দসত্থনযো. ‘‘ভৰন্তি লিঙ্গাদীনী’’তি অট্ঠকথানযো. তত্থ হি ইত্থিলিঙ্গাদীনং হেতুভাৰ লক্খণন্তি ৰুত্তং. ‘‘এতস্মিং সতী’’তি চ জাতিযা সতি, জরামরণং হোতি. অসতি ন হোতীতি এত্থৰিয হেতু ফলভাৰপাকটত্থং ৰুত্তং.

ৰত্থুরূপে. নিরুত্তিনযেন ৰচনত্থা ভৰন্তি. ধাতু দ্ৰযং নাম মনোধাতু মনোৰিঞ্ঞাণধাতু দ্ৰযং. ‘‘অৰত্ৰা’’তি হদয ৰত্থুং অৰত্ৰা. ‘‘তং’’তি হদয ৰত্থু রূপং. ‘‘পঞ্চা’’তি পঞ্চৰত্থূনি. ‘‘তেসং’’তি তেসং কুসলাদীনং. ‘‘তত্থ ৰুত্তং’’তি পট্ঠানে ৰুত্তং. ‘‘যং রূপং নিস্সাযা’’তি যং রূপং নিস্সায মনোধাতু চ মনোৰিঞ্ঞাণধাতু চ ৰত্তন্তীতি ইমং পাঠং নিদ্দিসতি. ‘‘অনঞ্ঞ সাধারণেসু ঠানেসূ’’তি চক্খু ৰত্থাদীহি অঞ্ঞৰত্থূহি অসাধারণেসু কুসলাকুসলট্ঠানেসু.

জীৰিতরূপে. ‘‘আধিপ্পচ্চযোগেনা’’তি অধিপতিভাৰযোগেন. ‘‘অধিপতিভাৰো’’তি চ ইন্দ্রিযপচ্চয কিচ্চং ৰুচ্চতি. ন অধিপতি পচ্চযকিচ্চং. ‘‘জীৰন্তী’’তি হরিতভাৰং ন ৰিজহন্তীতি ৰুত্তং হোতি. ন হি তানি একন্তেন জীৰন্তানি নাম হোন্তি. জীৰিত রূপস্স একন্ত কম্মজস্স বহিদ্ধা অনুপলদ্ধত্তা. কম্মজরূপানি জীৰন্তি যেৰাতি সম্বন্ধো. ‘‘কম্মে অসন্তেপী’’তি কম্মচেতনায পুব্বে নিরুদ্ধত্তা ৰুত্তং. তদত্থং ব্যতিরেকতো পাকটং করোন্তো ‘‘তথাহী’’তিআদিমাহ. ‘‘ইতর রূপানী’’তি চিত্তজরূপাদীনি. একৰীথিৰারো নাম পঞ্চদ্ৰারৰীথিৰারো. মনোদ্ৰারৰীথিৰারো একজৰন ৰারোতি ৰুত্তো. পরিচ্ছিন্নং হোতি. কস্মা, একেকস্মিং ৰীথিৰারে নিরুদ্ধে ভৰঙ্গ সমযে অসদিসস্স রূপসন্তানস্স পাতুব্ভাৰতোতি অধিপ্পাযো. তঞ্চ খো রূপৰিসেসং জানন্তস্সেৰ পাকটং হোতি. অজানন্তস্স পন তঙ্খণমত্তে অপাকটং. কস্মা, তাদিসস্সপি উতুজরূপসন্তানস্স থোকং পৰত্তনতো. যস্সহি দোস সমুট্ঠিতেন রূপসন্তানেন মুখরূপং দুব্বণ্ণং হোতি. তস্স দোসে নিরুদ্ধেপি তং রূপং থোকং দুব্বণ্ণমেৰ খাযতীতি. ‘‘উতুজাহারজানঞ্চ সন্ততি পচ্চুপ্পন্নং’’তি অধিকারো. একং অদ্ধাপচ্চুপ্পন্নমেৰ হোতীতি ৰুত্তং. ন নু চক্খুসোতাদীনি কম্মজরূপসন্তানানিপি পৰত্তিকালে কদাচি সুপ্পসন্নানি, কদাচি পসন্নানি, কদাচি অপ্পসন্নানি দিস্সন্তীতি. সচ্চং, তথা পৰত্তি পন সন্তান ৰিচ্ছেদেন ন হোতি, নানাৰিচ্ছিন্নে চ একেকস্মিং সন্তানে তেসং পুনঘটনং নাম নত্থি. সকিং অন্ধো অন্ধোযেৰ হোতি. বধিরোচ বধিরোযেৰাতি অধিপ্পাযো. ‘‘যদি এৰং’’তি এৰং যদি সিযাতি অত্থো. ‘‘অরূপ ধম্মানং সন্ততি পচ্চুপ্পন্নং’’তি অধিকারো. ‘‘ৰিপাকানী’’তি ভৰঙ্গভূতানি ৰিপাকানি. একসন্ততিৰসেন পৰত্তিস্সন্তিযেৰ, তস্মা তেসং নানাসন্ততি পচ্চুপ্পন্নং নাম ন ৰত্তব্বং. কস্মা, যাৰজীৰম্পি এক কম্মনিব্বত্তত্তাতি অধিপ্পাযো. ‘‘ইতরানি পনা’’তি কুসলা কুসল ক্রিযচিত্তানি পন. ‘‘তদারম্মণা’’তি নিরুদ্ধারম্মণা. অদ্ধানপ্ফরণানুভাৰেন পৰত্তন্তিযেৰ. ন পন চিত্তজরূপাদীনি ৰিয অত্তনো জনকপচ্চযে নিরুদ্ধে নিরুজ্ঝন্তি. অযং অরূপধম্মানং জীৰন্তত্তে ৰিসেসোতি অধিপ্পাযো. ‘‘অযমত্থো ৰত্তব্বো’’তি অরূপ ধম্মানং জীৰন্ততাৰিসেসো ৰত্তব্বো. যথা রূপসন্ততিযং অনন্তর পচ্চযো নাম নত্থি. চুতিকালে ভৰন্তররূপসন্তানস্স কিঞ্চি পচ্চযত্তং অনুপগন্ত্ৰা নিরুজ্ঝতি. তেন ভৰন্তর পাতুব্ভাৰো নাম তেসং নত্থি. ন তথা অরূপসন্ততিযং. তত্থ পন চুতিচিত্তম্পি পটিসন্ধিযা অনন্তর পচ্চযো হুত্ৰা নিরুজ্ঝতি. তেন ভৰন্তরপাতুব্ভাৰো নাম তেসং অত্থি. অযম্পি অরূপধম্মানং জীৰন্তত্তে ৰিসেসো. তস্মা অরূপধম্মানংপি কম্মজরূপানং ৰিয নিচ্চং জীৰিতযোগেন জীৰন্তত্তা সন্ততি পচ্চুপ্পন্নং নাম ন ভৰেয্যাতি ন চোদেতব্বন্তি. কুসলা কুসল ক্রিযচিত্তানি নাম অকম্মজানি হোন্তি. চিত্তজরূপাদীনি ৰিয অতীতং কম্মং অনপেক্খিত্ৰা তঙ্খণিকেহি নানাপচ্চযেহি উপ্পজ্জন্তি. তস্মা তেসং জীৰন্তানংপি সতং অজীৰন্তানং চিত্তজরূপাদীনং ৰিয নানাসন্ততি পচ্চুপ্পন্নং নাম অত্থি. জীৰন্ততা ৰিসেসোপি অত্থীতি অধিপ্পাযো. এত্থ কেচি ৰদন্তি. রুক্খাদীসুপি জীৰিতং নাম অত্থি. যতো তেসং হরিততা চ অহরিততা চ রূহনঞ্চ-অরূহনঞ্চ দিস্সতীতি. ৰুচ্চতে, যদি তেসং জীৰিতং নাম অত্থি, অরূপজীৰিতং ৰা সিযা, রূপজীৰিতং ৰা. তত্থ সচে অরূপজীৰিতং হোতি. যথা তেন সমন্নাগতো সত্তো পুনপ্পুনং মরিত্ৰা পুনপ্পুনং ভৰন্তরে পাতুব্ভৰন্তি. তথা রুক্খাপি মরিত্ৰা ভৰন্তরে পাতুব্ভৰেয্যুং. অথ রূপজীৰিতং সিযা. যথা সত্তানং চক্খাদি অঙ্গেসু জীৰিত সন্তানে ভিন্নে তানি অঙ্গানি পুন জীৰন্তানি কাতুং ন সক্কোন্তি. তথা রুক্খাপি খন্ধেসু ৰা সাখাসুৰা ছিন্নেসু জীৰিতসন্তানে ভিন্নে তেখন্ধাৰা সাখাযো ৰা পুন অঞ্ঞত্থ রোপেতুং ন সক্কা ভৰেয্যুং. সক্কা এৰ ভৰন্তি. তস্মা তদুভযংপি জীৰিতং নাম তেসং নত্থীতি দট্ঠব্বং. ৰিভাৰনিপাঠে. ন হি তেসং কম্মংযেৰ ঠিতিকারণং হোতীতি এত্থ কম্মং ঠিতিকারণং এৰ ন হোতীতি যোজেতব্বং. তেনাহ ‘‘আহারজাদীনং’’তিআদিং. এককলাপে গতা পৰত্তা সহজাত পচ্চযা, তেহি আযত্তা পটিবদ্ধাতি ৰিগ্গহো. কম্মাদীনং রূপজনকপচ্চযানং জনকানুভাৰো নাম রূপকলাপানং উপ্পাদক্খণে এৰ ফরতি, ন ঠিতিক্খণে. উপচযসন্ততিযো চ উপ্পাদক্খণে লব্ভন্তি, ন ঠিতিক্খণে. তস্মা তা জনকপচ্চযানুভাৰক্খণে লদ্ধত্তা কুতোচিজাতনামং লভন্তি. জরতাপন ঠিতিক্খণে এৰ লব্ভতি, ন উপ্পাদক্খণে. তস্মা সা কুতোচিজাত নামং ন লভতি. যদি পন আহারজাদীনং রূপধম্মানং ঠিতি নাম আহারাদি জনকপচ্চযাযত্তা ভৰেয্য. জরতাপি জনকপচ্চযানুভাৰক্খণেৰ লব্ভমানা সিযা. এৰঞ্চসতি, সাপি কুতোচিজাত নামং লভেয্য. ন পন লভতি. তস্মা তেসং ঠিতি নাম জনকপচ্চযাযত্তা ন হোতীতি ইমমত্থং দস্সেন্তো ‘‘ইতরথা’’তিআদিমাহ. ‘‘উপত্থম্ভমানা’’তি কলাপন্তরে ঠত্ৰা উপত্থম্ভমানা. ‘‘ন খণঠিতিপ্পৰত্তিযা’’তি খণঠি তিভাৰেন পৰত্তিঅত্থায উপত্থম্ভন্তি, অনুপালেতীতি যোজনা. সব্বেসংপি রূপারূপধম্মানং. ‘‘তং’’তি ৰিভাৰনিৰচনং. ‘‘ইদং পনা’’তি জীৰিতরূপং পন.

আহাররূপে. ‘‘সৰত্থুকৰচনং’’তি ভোজনাদি ৰত্থুনা সহ পৰত্ততীতি সৰত্থুকং. ৰচনং. ন হি নিব্বত্তিতং আহার রূপং নাম কবল়ং কাতুং সক্কা হোতীতি. ‘‘ৰিৰেচিতানী’’তি পাচন কিচ্চেন ৰিভজিতানি. ৰিসুং ৰিসুং কতানি. ‘‘পঞ্চধা ৰিভাগং গচ্ছন্তী’’তি একং ভাগং পাণকা খাদন্তি. একং ভাগং উদরগ্গি ঝাপেতি. একো ভাগো মুত্তং হোতি. একোভাগো করীসং. একোভাগো রসভাৰং আপজ্জিত্ৰা সোণিতমংসাদীনি উপব্রূহযতীতি এৰং ৰুত্তনযেন পঞ্চধা ৰিভাগং গচ্ছন্তি. ‘‘লোকে’’তি লোকিয গন্থে. ‘‘ততো’’তি আমাসযতো. অনুফরন্তো হুত্ৰা. ‘‘তস্সা’’তি রসভাগস্স. ‘‘ভূতেসূ’’তি মহাভূতেসু. সহ ইন্দ্রিযেন ৰত্ততীতি সেন্দ্রিযো. কাযো. উদযতীতি ওজা. দকারস্স জকারো. অৰতি জনেতীতি ওজা. অৰসদ্দস্স ওকারো. ‘‘অত্তনোৰত্থুং’’তি অত্তনোনিস্সযভূতং রূপকাযং.

‘‘অঞ্ঞাপদেসো’’ নাম রূপস্স লহুতাতিআদীসু অঞ্ঞস্স রূপস্স ক্রিযামত্তভাৰেন অপদিসনং ৰুচ্চতি. ‘‘উজুকতোৰ নিপ্ফাদিতং’’তি মুখ্যতোৰ জনিতং. যথাহি সব্বং অনিপ্ফন্নরূপং অজাতি ধম্মত্তা উজুকতো কম্মাদীহি জাতং নাম ন হোতি. কম্মাদীহি জাতং পন নিপ্ফন্নরূপং নিস্সায দিস্সমানত্তা ঠানূপচারেন ৰিঞ্ঞত্তি দ্ৰযং চিত্তজংতিআদিনা ৰুচ্চতি. ন তথা ইদং নিপ্ফন্নরূপং. ইদং পন জাতিধম্মত্তা উজুকতোৰ কম্মাদীহি পচ্চযেহি নিপ্ফাদিতং জনিতন্তি ৰুত্তং হোতি. ‘‘রূপং’’তি ৰুত্তে অনিপ্ফন্নরূপংপি লব্ভতীতি ততো ৰিসেসনত্থং রূপরূপন্তি ৰুচ্চতীতি আহ ‘‘রুপ্পনলক্খণ সম্পন্নং’’তিআদিং. তত্থ ‘‘রুপ্পনলক্খণং’’ নাম সীতুণ্হাদীহি ৰিকারপত্তিলক্খণং. তম্পন অনিপ্ফন্ন রূপে মুখ্যতো ন লব্ভতি. নিপ্ফন্নরূপে এৰ লব্ভতি. কস্মা, নিপ্ফন্নরূপস্সহি নানাৰিকারো ৰিকাররূপন্তি ৰুচ্চতি. লক্খণং লক্খণ রূপন্তি ৰুচ্চতি. ৰিকারস্স পন ৰিকারো নাম নত্থি. লক্খণস্স চ লক্খণং নাম নত্থি. যদি অত্থীতি ৰদেয্য. ৰিকারস্স ৰিকারো, তস্স চ ৰিকারো, তস্স চ ৰিকারোতি অপরিযন্তমেৰ সিযা. তথা লক্খণেপীতি.

আকাসধাতুযং. ‘‘পকাসন্তী’’তি ইদং একং ইদং একন্তি পঞ্ঞাযন্তি. ‘‘পরিচ্ছিন্দতী’’তি আহ ‘‘পরিতো’’তিআদিং. ‘‘অসম্মিস্সং’’তি ৰত্ৰা তদত্থং ৰিৰরতি ‘‘একত্তং অনুপগমনং’’তি. পরিচ্ছিন্দীযতীতি পরিচ্ছেদোতি আহ ‘‘তেহি ৰা’’তিআদিং. ‘‘তেহি ৰা’’তি কলাপন্তরভূতেহি ৰা. ‘‘অত্তনো ৰা পরেসং ৰা অকত্ৰা’’তি অত্তনোপক্খিকং ৰা পরেসং পক্খিকং ৰা অকত্ৰা. পরিচ্ছেদ ক্রিযামত্তং পরিচ্ছেদোতি আহ ‘‘তেসং ৰা’’তিআদিং. ‘‘তেসং ৰা’’তি কলাপন্তরভূতানং ৰা. ‘‘অযং পনা’’তি অযং পরিচ্ছেদো পন. ‘‘তস্সা’’তি পরিচ্ছেদস্স. সো পাল়িযং ৰুত্তোতি সম্বন্ধো. ‘‘ইতি কত্ৰা’’তি এৰং মনসিকত্ৰা. ‘‘এতেহী’’তি এতেহি মহাভূতেহি. ‘‘অঞ্ঞমঞ্ঞ অব্যাপিততা’’তি দ্ৰিন্নং তিণ্ণং ৰা রূপকলাপানং এককলাপত্তূপগমনং অঞ্ঞমঞ্ঞ ব্যাপিতা নাম, তথা অনুপগমনং অঞ্ঞমঞ্ঞ অব্যাপিততা নাম. তেনাহ ‘‘একত্তং’’তিআদিং. ‘‘তত্থা’’তি তিস্সং পাল়িযং. ‘‘নানাকলাপগতানং ভূতানং’’তি এতেন কলাপপরিযন্ততা এৰ ৰুত্তা হোতি.

ৰিঞ্ঞত্তি দ্ৰযে. ‘‘সযঞ্চা’’তি ৰিঞ্ঞত্তি সঙ্খাতং সযঞ্চ. ‘‘তেনা’’তি চলমানেন কাযঙ্গেন. ‘‘তেহী’’তি পচ্চক্খে ঠিতেহি জনেহি. তত্থাতিআদীসু. ‘‘কাযঙ্গৰিকারং করোন্তস্সা’’তি অভিক্কমনাদি অত্থায হত্থপাদাদীনং কাযঙ্গানং চলন সঙ্খাতং ৰিকারং করোন্তস্স. উপ্পজ্জন্তা চ সব্বেতে চিত্তজৰাতকলাপা যথাধিপ্পেত দিসাভিমুখা এৰ উপ্পজ্জন্তীতি যোজনা. ‘‘যথা ৰা তথা ৰা অনুপ্পজ্জিত্ৰা’’তি অনিযমতো অনুপ্পজ্জিত্ৰাতি ৰুত্তং হোতি. যস্স চোপন কাযস্স. ‘‘তেহী’’তি চিত্তজৰাতকলাপেহি. নিযামকো নাৰানিযোজকো. ‘‘তে চা’’তি তেচিত্তজৰাতকলাপসঙ্ঘাটা. এতেন সকলং কাযঙ্গং নিদস্সেতি. সকলকাযঙ্গং নাৰাসদিসন্তি ৰুত্তং হোতি. ‘‘চারেত্ৰা’’তি ৰিযূহিত্ৰা. কথং পন সা নিযামকসদিসী হোতীতি আহ ‘‘যথাহী’’তিআদি. যদেতং সক্কোতীতি ৰচনং ৰুত্তন্তি সম্বন্ধো. ‘‘কতীপযজৰন ৰারেহী’’তি দ্ৰত্তি জৰনৰারেহি. ‘‘ততো’’তি যস্মিং ৰারে চলন সঙ্খাতং দেসন্তর পাপনং জাযতি. ততো চলনৰারতো. সন্থম্ভন সন্ধারণানি এৰ সম্পজ্জন্তি, ন চলনসঙ্খাতং দেসন্তর পাপনং. ‘‘এত্থা’’তি এতিস্সং অট্ঠকথাযং. নানাজৰনৰীথীসু. ল. উপত্থম্ভনে চ যুজ্জতিযেৰ. ন একিস্সায জৰনৰীথিযং এৰ যুজ্জতীতি অধিপ্পাযো. যদি নানাজৰনৰীথীসু তথা উপত্থম্ভনঞ্চ গয্হেয্য. এৰংসতি, অন্তরন্তরা বহূ ভৰঙ্গৰারাপি সন্তি. তত্থ কথং তদুপত্থম্ভনং সম্পজ্জেয্যাতি আহ ‘‘তথাহী’’তিআদিং. তত্থ ‘‘উতুজরূপসঙ্ঘাটানি পী’’তি ভৰঙ্গসমযে পৰত্তানি উতুজরূপকলাপসন্ধানকানি. ‘‘তদাকার ৰন্তানী’’তি তস্সা চিত্তজরূপসন্ততিযা আকার ৰন্তানি. পচ্ছিম পচ্ছিমানং রূপকলা পসঙ্ঘাটানং অপরাপরং উপ্পজ্জনন্তি সম্বন্ধো. পুরিমপুরিমানং রূপকলাপসঙ্ঘাটানং খণিকধম্মতা চ তেসং ন সিযা. ন চ তে খণিকধম্মা ন হোন্তি. অঞ্ঞথা দেসন্তর সঙ্কমনসঙ্খাতং চলনং এৰ ন সিযা. চলনং তিহি নানাক্রিযানং পাতুব্ভাৰো ৰুচ্চতি. নানাক্রিযা চ নাম নানাধম্মা এৰ. যস্মা চ অঙ্গপচ্চঙ্গানং খণেখণে চলনং নাম লোকে পচ্চক্খতো দিট্ঠং. তস্মা তেসং খণিকধম্মতাপি দট্ঠব্বা হোতীতি. এতেন তেসং খণিকমরণং দস্সেতি, যং রূপারূপধম্মানং অনিচ্চলক্খণন্তি ৰুচ্চতি. অব্যাপার ধম্মতা চ অৰসৰত্তিতা চ তেসং ন সিযা. ন চ তে অব্যাপার ধম্মা, ন অৰসৰত্তি ধম্মা চ ন হোন্তি. অঞ্ঞথা পচ্চযাযত্ত ৰুত্তিতা এৰ তেসং ন সিযা. পচ্চযাযত্ত ৰুত্তিতাতি চ পচ্চযে সতি, তে ৰত্তন্তি, অসতি ন ৰত্তন্তীতি এৰং পৰত্তা পচ্চযাযত্ত ৰুত্তিতা যস্মা চ পচ্চযসামগ্গিযং সতি, তে ৰত্তন্তিযেৰ. তেসং ৰত্তনত্থায কেনচিব্যাপারেন কিচ্চং নত্থি. তে মাৰত্তন্তূতি চ অত্তনো ৰসেন ৰত্তন্তি. পচ্চযে অসতি, ন ৰত্তন্তিযেৰ. তেসং অৰত্তনত্থায কেনচিব্যাপারেন কিচ্চং নত্থি. তেমাৰত্তন্তূতি চ অত্তনো ৰসেনৰত্তন্তি. যস্মা চ তেসং পচ্চযাযত্ত ৰুত্তিতা নাম লোকে ৰিঞ্ঞূনং পচ্চক্খতোদিট্ঠা. তস্মা তেসং অব্যাপারতা চ অৰসৰত্তিতা চ দট্ঠব্বা হোতি. এতেন তেসং সব্বেহি সত্তপুগ্গল অত্তাকারেহি সব্বসো সুঞ্ঞং দস্সেতি, যং রূপারূপধম্মানং অনত্তলক্খণন্তি ৰুচ্চতীতি.

‘‘ৰচীভেদং’’তি অক্খর পদভাৰপত্তং ৰচীমযসদ্দপ্পকারং. উপাদিন্নকপথৰীধাতুযো নাম কম্মজ পথৰীধাতুযো. তাসু সঙ্ঘট্টনন্তি সম্বন্ধো. অত্তনা সহজাতেনযেন আকারৰিকারেন উপগচ্ছতি, যেন চ উপলব্ভতীতি সম্বন্ধো. অজ্ঝত্ত সন্তানগতা সব্বে চতুজরূপধম্মাপি কত্থচি উপাদিন্নকাতি ৰুচ্চন্তীতি আহ ‘‘চতুজভূতায এৰ ৰা’’তি. দ্ৰীসুঠান করণেসু করণপক্খে চলনাকারপ্পৰত্তা চিত্তজপথৰীধাতু ঠানপক্খে পথৰিধাতুযং সঙ্ঘট্টযমানা কম্মজপথৰিযং এৰ ঘট্টেতি. ইতর পথৰিযং ন ঘট্টেতীতি ন সক্কা ৰত্তুংতি কত্ৰা ইধ এৰগ্গহণং কতং. ‘‘ৰিকার দ্ৰযঞ্চা’’তি কাযৰিকার ৰচীৰিকার দ্ৰযঞ্চ. কথং পন অসম্মিস্সং কত্ৰা ৰেদিতব্বন্তি আহ ‘‘এত্থচা’’তিআদিং. যং পন তাসং ঘট্টনপ্পকারৰিধানং অত্থীতি সম্বন্ধো. ‘‘তাসং’’ চিত্তজপথৰীনং. ‘‘তং তং ৰণ্ণত্তপত্তিযা’’তি ক, খা, দিৰণ্ণত্তপত্তত্থায. যং পন কাযৰিঞ্ঞত্তিট্ঠানে ‘অযঞ্চ অত্থো উপরি অক্খরুপ্পত্তি ৰিচারণাযং পাকটো ভৰিস্সতী’তি ৰুত্তং. তং ইধ পাকটং করোন্তো ‘‘এত্থ চা’’তিআদিমাহ. তেনেৰ হি মূলটীকাযং ৰুত্তন্তি সম্বন্ধো. ‘‘এত্থ চা’’তি মূলটীকাপাঠে. ‘‘পুব্বভাগে’’তি পরিব্যত্ত অক্খরপ্পৰত্তৰীথিতো পুব্বভাগে. ‘‘নানাজৰনৰীথীহী’’তি নানপ্পকারেহি জৰনৰীথিৰারেহি. ‘‘পথমজৰনচিত্তস্সপী’’তি পরিব্যত্ত অক্খরপ্পৰত্তিৰীথিযং উপ্পন্নপথমজৰন চিত্তস্সপি. তস্স আসেৰনঞ্চ নাম ততো পুরিমেহি ৰীথিৰারেহি এৰ লদ্ধং সিযাতি অধিপ্পাযো. ‘‘আসেৰনং’’তি চ উপচার ৰচনং দট্ঠব্বন্তি হেট্ঠা ৰুত্তমেৰ. ‘‘তস্সা’’তি পরিব্যত্তক্খরস্স. ৰুত্তঞ্চ সদ্দসত্থেসু. ‘‘দীঘমুচ্চরে’’তি পঞ্চদীঘা ৰুচ্চন্তি. মিথিন্দ পঞ্হাপাঠে. ‘‘সাধিকে ৰীহিৰাহসতে’’তি ৰীহিধঞ্ঞপূরো সকটো ৰীহিৰাহো নাম. ৰীহিৰাহানং সাধিকে সতস্মিং. অভিমঞ্ঞনং অভিমানো. ‘‘সেসমেত্থ কাযৰিঞ্ঞত্তিযং ৰুত্তনযে না’’তি তথাহি চলনচিত্তজরূপসন্ততিযং পৰত্তানীতিআদিনা ৰুত্ত নযেনাতি অত্থো. ইধ পন ৰচীভেদকর চিত্তজসদ্দসন্ততিযং পৰত্তানি উতুজরূপসঙ্ঘাটানীতিআদিনা ৰত্তব্বং. তেনাহ ‘‘যথাসম্ভৰং’’তি. ‘‘পৰত্তনত্থো’’তি অভিক্কমনাদি সজ্ঝাযনাদীনং পৰত্তাপনত্থো. ‘‘এত্থ চা’’তিআদীসু. ‘‘বোধেতু কামতা রহিতেসূ’’তি অভিক্কমনপটিক্কমনাদীসু কাযৰিঞ্ঞত্তি চ, সুত্তন্ত সজ্ঝাযনাদীসু ৰচীৰিঞ্ঞত্তি চ পরং বোধেতুকামতা রহিতাতি দট্ঠব্বা. ‘‘দ্ৰীসু বোধকৰিঞ্ঞত্তীসূ’’তি বোধককাযৰিঞ্ঞত্তি বোধকৰচী ৰিঞ্ঞত্তীসু. পুরিমা কাযৰিঞ্ঞত্তি, পচ্ছিমা চ ৰচীৰিঞ্ঞত্তি. পচ্ছা সুদ্ধেন মনোদ্ৰারিক জৰনেন এৰ ৰিঞ্ঞাযতি, ন পঞ্চদ্ৰারিক জৰনেনাতি যোজনা. চক্খুৰিঞ্ঞাণ ৰীথিযা গহেত্ৰাতি সম্বন্ধো. ‘‘কাযৰিঞ্ঞাণ ৰীথিযা’’তি ৰচীভেদং অকত্ৰা হত্থগ্গহণাদি ৰসেন অধিপ্পায ৰিঞ্ঞাপনে অযং কাযৰিঞ্ঞাণৰীথি দট্ঠব্বা. কস্মা পন সযঞ্চৰিঞ্ঞাযতীতি ৰিঞ্ঞত্তীতি অযং ৰিকপ্পো ৰুত্তোতি আহ ‘‘সাহি অত্তানং’’তিআদিং. ‘‘মজ্ঝে’’তি ৰিঞ্ঞত্তিগ্গহণৰীথি অধিপ্পাযগ্গহণৰীথিনং মজ্ঝে. কথং পৰত্তকৰিঞ্ঞত্তীসু অধিপ্পাযং ৰিঞ্ঞাপেতি, সযঞ্চৰিঞ্ঞাযতীতি দ্ৰে অত্থা লব্ভন্তীতি আহ ‘‘দ্ৰীসু পনা’’তিআদিং. অযং অভিক্কমতি, অযং পটিক্কমতীতি জানন্তা অভিক্কমনপযোগঞ্চ তপ্পযোগ জনকচিত্তঞ্চ জানন্তি. ‘‘পরস্সকথং’’তি বোধেতুকামতারহিতম্পি পরস্সৰচনসদ্দং. রাগচিত্তঞ্চ জানন্তি. তেন ৰুত্তং মূলটীকাযং পরং বোধেতুকামতায ৰিনাপি অভিক্কমনাদিপ্পৰত্তনেন সোচিত্তসহভুৰিকারো অধিপ্পাযং. ল. দ্ৰিধাপি ৰিঞ্ঞত্তি যেৰাতি.

ৰিকাররূপেসু. ‘‘কম্মযোগ্যং’’তি অভিক্কমনাদিকম্মেসু যোজেতুং যুত্তং. অদন্ধতা ৰুচ্চতি সীঘপ্পৰত্তি. সা লক্খণং অস্সাতি ৰিগ্গহো. সরীর ক্রিযানুকুলো কম্মঞ্ঞভাৰো লক্খণং যস্সাতি সমাসো. ‘‘ধাতুযো’’তি মহাভূতধাতুযো ৰা, পিত্তসেম্হাদিধাতুযো ৰা. পূতিমুখসপ্পসঙ্খাতস্স আপস্স পরিযুট্ঠানন্তি ৰাক্যং. অসয্হভারো নাম ৰহিতুং অসক্কুণেয্যভারো. ‘‘সা পৰত্ততী’’তি কাযলহুতা পৰত্ততি. থদ্ধং করোন্তি সরীরগতা ধাতুযোতি অধিকারো. ভুসং মারেতীতি আমরিকো. দকারো আগমো. গামনিগমৰিলুপ্পকো চোরগণো. তস্স ভযেন পরিযুট্ঠিতং. ‘‘ৰিৰট্টমানং’’তি ৰিরূপং হুত্ৰা ৰট্টন্তং. ‘‘মূলভূতা হোতী’’তি অসপ্পায সেৰনে সতি, সা পথমং পরিযুট্ঠাতি. সীতাধিকাৰা হোতি, উণ্হাধিকাৰা. তায পরিযুট্ঠিতায এৰ সব্বপরিযুট্ঠানানি পৰত্তন্তীতি ৰুত্তং হোতি. ‘‘ইমাপনতিস্সো রূপজাতিযো রূপকাযস্স ৰিসেসাকারা হোন্তি. ইতি তস্মা ৰিকাররূপং নামাতি যোজনা.

লক্খণরূপেসু. ‘‘চযনং’’তি সঞ্চিতভাৰগমনং. ‘‘আদিতো’’তিআদিম্হি. ‘‘উপরিতো’’তি উপরিভাগে. ‘‘আচযো’’তিআদিম্হি চযো. ‘‘উপচযো’’তি উপরূপরিচযো. ‘‘অদ্ধানপূরণৰসেনা’’তি ৰস্সসতম্পি ৰস্সসহস্সম্পি দীঘকালং অত্তভাৰং পূরণৰসেন. ‘‘তেন পরিযাযেনা’’তি উপসদ্দস্স অত্থনানত্তং অচিন্তেত্ৰা নিব্বত্তিং ৰড্ঢিযং অন্তোগধং কত্ৰা ৰুত্তেন তেনপরিযাযেন. তস্স চ একেকস্স সন্ততি পচ্চুপ্পন্নস্স. তত্থ চিত্তজরূপেসু অস্সাস পস্সাসানং ৰা পদৰারহত্থৰারাদীনং ৰা অক্খরানং ৰা নিব্বত্তি ৰড্ঢি পৰত্তিযো দিস্সন্তিযেৰ. তথা নানাচিত্তসমুট্ঠিতানং নানারূপসন্ততীনং পীতি. উতুজরূপেসু ইরিযা পথনানত্তং পটিচ্চ সুখদুক্খজনকানং নানারূপসন্ততীনং নিব্বত্তিৰড্ঢিপৰত্তিযো দিস্সন্তিযেৰ. তথা বহিদ্ধা খাণুকণ্টকাদিসম্ফস্সেন সীতুণ্হাদিসম্ফস্সেন ৰাতাতপাদিসম্ফস্সেন ৰা সরীরে উপ্পন্নানং নানারূপসন্ততীনম্পি চক্খুরোগাদিরূপানম্পীতি. আহারজরূপেসু আহারনানত্তং পটিচ্চ সরীরে উপ্পন্নানং সমৰিসমরূপসন্ততীনংতি. ‘‘অযং নযো’’তি বহিদ্ধাসন্তানে নিদস্সন নযো. তেন অজ্ঝত্তসন্তানেপি সত্তসন্তানানং হত্থপাদাদিসন্তানানং কেসলোমাদি সন্তানানঞ্চ নিব্বত্তি ৰড্ঢিপৰত্তিযো নিদস্সেতি. ‘‘জীরণং’’তি অভিনৰাৰত্থতো হাযনং. পাল়িপাঠে. ‘‘ঠিতস্স অঞ্ঞথত্তং’’তি অঞ্ঞো পকারো অঞ্ঞথা. অঞ্ঞথা ভাৰো অঞ্ঞথত্তং. এতেন জরাৰসেনৰা নানারোগাবাধাদিৰসেন ৰা ৰিপরিণামো ৰুত্তো. ‘‘তথা অৰত্থাভেদযোগতো’’তি জাতিরূপমেৰ আদিম্হি নিব্বত্তি হোতি. ততোপরং তমেৰ ৰড্ঢি হোতি. ততো পরং তমেৰ পৰত্তি হোতীতি এৰং তথা অৰত্থাভেদযোগতো. তেনাহ ‘‘সাহী’’তিআদিং. ‘‘পবন্ধযতী’’তি পবন্ধং করোতি. সঙ্গহগাথাদীসু পন সুৰিঞ্ঞেয্যা. ‘‘এত্থ চ পচ্ছিমানী’’তিআদীসু. ৰোহারসিদ্ধমত্তভাৰং’’তি পুগ্গলো সত্তো অত্তা জীৰোতিআদিকা পঞ্ঞত্তি নাম ৰোহার সিদ্ধমত্তা হোতি. সভাৰসিদ্ধা ন হোতি. সাহি মহাজনেহি খন্ধ পঞ্চকং উপাদায পুগ্গলো নাম অত্থীতি সম্মতত্তা ৰোহরিতত্তা ৰোহারসিদ্ধা নাম. সভাৰসিদ্ধা পন ন হোতি. তস্মা অরিযানং ৰোহারে পুগ্গলো নাম নত্থীতি সিজ্ঝতি. ইমানি পন রূপানি সভাৰসিদ্ধত্তা অরিযানং ৰোহারেপি অত্থীতি সিজ্ঝন্তি. তেনাহ ‘‘তাদিসেনা’’তিআদিং. ‘‘সুদ্ধধম্মগতিযা সিদ্ধেনা’’তি পথৰীধাতু নাম সুদ্ধধম্মো হোতি. সা উপ্পাদম্পি গচ্ছতি, জরম্পি গচ্ছতি, ভেদম্পি গচ্ছতি. তস্মা তস্সা উপ্পাদোপি জরাপি ভেদোপি সুদ্ধধম্মগতিযা সিদ্ধো নাম. এৰং লক্খণরূপানং সুদ্ধধম্মগতিসিদ্ধং পরমত্থলক্খণং ৰেদিতব্বং. তথা ৰিঞ্ঞত্তি দ্ৰযস্সপি ৰিকাররূপত্তযস্সপি পরিচ্ছেদ রূপস্সপীতি. যথা চ ইমেসং রূপানং. তথা নিব্বানস্সপি সুদ্ধধম্মগতিসিদ্ধং পরমত্থলক্খণং অত্থিযেৰ. কিলেসধম্মাহি অরিযমগ্গে অভাৰিতে ভৰপরম্পরায উপ্পাদং গচ্ছন্তিযেৰ. ভাৰিতেপন অনুপ্পাদং নিরোধং গচ্ছন্তিযেৰ. তস্মা কিলেসধম্মানং অনুপ্পাদনিরোধোপি সুদ্ধধম্মগতিযা সিদ্ধো নাম. এৰং নিব্বানস্সপি সুদ্ধধম্মগতিসিদ্ধং পরমত্থলক্খণং ৰেদিতব্বং. অত্থি ভিক্খৰে অজাতং অভূতন্তি ইদং সুত্তংপি এত্থ ৰত্তব্বং. এতেন অরিযৰোহারে নিব্বানস্স একন্তেন অত্থিতা ভগৰতা ৰুত্তা হোতি. তেনাহ ‘‘ইতরথা’’তিআদিং. ‘‘নসভাৰতো অনুপলদ্ধত্তা অনিপ্ফন্নানি নাম হোন্তী’’তি এতেন এতানি অসভাৰরূপানীতি চ অলক্খণ রূপানীতি চ অসম্মসনরূপানীতি চ ন সক্কা ৰত্তুংতিপি দীপেতি. কস্মা, যথাসকং সভাৰেহি সভাৰৰন্তত্তা যথাসকং লক্খণে হি সলক্খণত্তা পটিসম্ভিদামগ্গে সম্মসনঞ্ঞাণ ৰিভঙ্গে জাতিজরামরণানম্পি সম্মসিতব্বধম্মেসু আগতত্তাতি. অট্ঠসালিনিযম্পি অযমত্থো ৰুত্তোযেৰ. যথাহ পরিনিপ্ফন্নন্তি পন্নরসরূপানি পরিনিপ্ফন্নানি নাম. দসরূপানি অপরিনিপ্ফন্নানি নাম. যদি অপরিনিপ্ফন্নানি নাম. এৰংসতি, অসঙ্খতানি নাম সিযুং. তেসংযেৰ পনরূপানং কাযৰিকারো কাযৰিঞ্ঞত্তি নাম. ৰচীৰিকারো ৰচীৰিঞ্ঞত্তি নাম. ছিদ্দং ৰিৰরং আকাসধাতু নাম. লহুভাৰো লহুতা নাম. মুদুভাৰো মুদুতা নাম. কম্মঞ্ঞভাৰো কম্মঞ্ঞতা নাম. নিব্বত্তি উপচযো নাম. পৰত্তি সন্ততি নাম. জীরণাকারো জরতা নাম. হুত্ৰা অভাৰাকারো অনিচ্চতা নামাতি সব্বং পরিনিপ্ফন্নং সঙ্খতমেৰাতি. তত্থ ‘‘তেসংযেৰ রূপানং’’তি নিদ্ধারণে ভুম্মং. তেসংযেৰ দসন্নং রূপানং মজ্ঝেতি ৰুত্তং হোতি. ‘‘ইতিসব্বং’’তি ইদং সব্বং দসৰিধং রূপং পরিনিপ্ফন্নমেৰ সঙ্খতমেৰাতি অত্থো. খন্ধৰিভঙ্গট্ঠকথাযম্পি ৰুত্তোৰ. যথাহ পঞ্চৰিপনখন্ধা পরিনিপ্ফন্নাৰ হোন্তি, নো অপরিনিপ্ফন্না. সঙ্খতাৰ, নো অসঙ্খতা. অপিচ নিপ্ফন্নাপি হোন্তিযেৰ. সভাৰধম্মেসুহি নিব্বানমেৰেকং অপরিনিপ্ফন্নং অনিপ্ফন্নঞ্চাতি চ. নিরোধসমাপত্তি চ নাম পঞ্ঞত্তি চ কথন্তি. নিরোধসমাপত্তি লোকিযলোকুত্তরাতি ৰা সঙ্খতাসঙ্খতাতি ৰা পরিনিপ্ফন্নাপরিনিপ্ফন্নাতি ৰা ন ৰত্তব্বা. নিপ্ফন্না পন হোতি. সমাপজ্জন্তেন সমাপজ্জিতব্বতো. তথা নামপঞ্ঞত্তি, সাপিহি লোকিযাদিভেদং নলভতি. নিপ্ফন্না পন হোতি. নো অনিপ্ফন্না. নামগ্গহণঞ্হি গণ্হন্তোৰ গণ্হাতীতি চ. এতেন লক্খণরূপানম্পি নিপ্ফন্নতা সিদ্ধা হোতি. ৰিসুদ্ধি মগ্গেপন নিপ্ফন্নং অনিপ্ফন্নংতিদুকস্স নিদ্দেসে. অট্ঠারসৰিধং রূপং পরিচ্ছেদৰিকার লক্খণভাৰং অতিক্কমিত্ৰা সভাৰেনেৰ পরিগ্গহেতব্বতো নিপ্ফন্নং, সেসং তব্বিপরীততায অনিপ্ফন্নন্তি চ. নিপ্ফন্নরূপং পন রূপরূপং নামাতি চ. যং চতূহি কম্মাদীহি জাতং, তং চতুজং নাম. তং লক্খণ রূপৰজ্জং অৰসেসরূপং. লক্খণরূপং পন ন কুতোচিজাতন্তি চ ৰুত্তং. সব্বঞ্চেতং আচরিযেহি গহিতনামমত্তত্তা ৰত্তিচ্ছানুগতং হোতি. যং রুচ্চতি, তং গহেত্ৰা কথেতব্বন্তি.

রূপসমুদ্দেসানুদীপনা নিট্ঠিতা.

১৯৭. রূপৰিভাগে.‘‘একৰিধনযং তাৰ দস্সেতুং’’তি রূপৰিভাগতো পথমং দস্সেতুং. এতেন একৰিধনযো রূপৰিভাগো নাম ন তাৰ হোতীতি দস্সেতি. তং ন সমেতি. কেন ন সমেতীতি আহ ‘‘ৰক্খতিহী’’তিআদিং. ‘‘অজ্ঝত্তিকাদিভেদেন ৰিভজন্তি ৰিচক্খণা’’তি এতেন সব্বংরূপং অজ্ঝত্তিকবাহিরৰসেন দুৰিধন্তিআদিকো দুৰিধনযো এৰ রূপৰিভাগনযো নামাতি ৰিঞ্ঞাযতি. তস্মা তেন ন সমেতীতি ৰুত্তং হোতি. অপিচ পাল়িযং. সহেতুকা ধম্মা, অহেতুকা ধম্মাতিআদি দুকেসু সব্বংরূপং অহেতুকমেৰ, ন সহেতুকন্তিআদি নিযমকরণম্পি রূপৰিভাগো এৰাতি কত্ৰা তথা ৰুত্তন্তি গহেতব্বং. ‘‘ইতরানি পনা’’তি কামাৰচরন্তিআদীনি পন. ‘‘জনকেন পচ্চযেনা’’তি পধানৰচনমেতং. উপত্থম্ভকাদি পচ্চযাপি গহেতব্বা এৰ. ‘‘সঙ্গম্মা’’তি সমাগন্ত্ৰা. ‘‘করীযতী’’তি নিপ্ফাদীযতি. যোধম্মোতিআদীসু. ‘‘পহীনো পী’’তি ছিন্দনভিন্দনাদিৰসেন পহীনোপি. ‘‘তস্মিং সতী’’তি সমুদযপ্পহানে সতি. কিচ্চপচ্চযানং অরহত্থস্স চ সক্কত্থস্স চ দীপনতো দুৰিধং অত্থং দস্সেতুং ‘‘অট্ঠানত্তা’’তিআদি ৰুত্তং. ‘‘তব্বিসযস্সা’’তি রূপৰিসযস্স. ‘‘এৰং’’তি এৰংসন্তে. ‘‘পহীনং ভৰিস্সতী’’তি অনাগতভৰে পুন অনুপ্পাদত্থায ইধেৰ পহীনং ভৰিস্সতীতি অত্থো. তেনাহ ‘‘উচ্ছিন্নমূলং’’তিআদিং. ‘‘তালাৰত্থুকতং’’তি ছিন্নতালক্খাণুকং ৰিয কতং ভৰিস্সতি. ‘‘অনভাৰং কতং’’তি পুন অভাৰং কতং. ‘‘পাকটো’’তি দস্সনাদিকিচ্চৰিসেসেহি পঞ্ঞাতো. ‘‘তদুপাদাযা’’তি তং উপনিধায. ৰিভাৰনিপাঠে. ‘‘অজ্ঝত্তিকরূপং’’তি পদুদ্ধারণং. অত্তানং অধিকিচ্চ পৰত্তং অজ্ঝত্তং. অজ্ঝত্তমেৰ অজ্ঝত্তিকন্তি দস্সেতি ‘‘অত্তভাৰসঙ্খাতং’’তিআদিনা. তং ন সুন্দরং. কস্মা, অজ্ঝত্তধম্ম অজ্ঝত্তিক ধম্মানঞ্চ অৰিসেসো আপজ্জতীতি ৰক্খমানকারণত্তা. ‘‘দ্ৰাররূপং নামা’’তি পদুদ্ধারপদং. কস্মা দ্ৰাররূপং নামাতি আহ ‘‘যথাক্কমং’’তিআদিং. পরতোপি এসনযো. ‘‘দেসনাভেদ রক্খণত্থং’’তি দুকদেসনাভেদতো রক্খণত্থং. তত্থ দেসনাভেদো নাম রূপকণ্ডে পঞ্চৰিঞ্ঞাণানং ৰত্থু রূপঞ্চ, ন ৰত্থু রূপঞ্চ, আরম্মণ রূপঞ্চ, ন আরম্মণ রূপঞ্চ ৰত্ৰা মনোৰিঞ্ঞাণস্স ন ৰুত্তং. যদি ৰুচ্চেয্য, আরম্মণদুকে মনোৰিঞ্ঞাণস্স আরম্মণ রূপং, ন আরম্মণ রূপন্তি দুকপদং ন লব্ভেয্য. অযং দেসনাভেদো নাম. ৰত্থুদুকেসু হদযৰত্থুৰসেন লব্ভমানং মনোৰিঞ্ঞাণদুকং ন ৰুত্তন্তি. ‘‘থূলসভাৰত্তা’’তি সুখুমরূপং উপাদায ৰুত্তং. ‘‘দূরে পৰত্তস্সপী’’তি যথা সুখুমরূপং অত্তনো সরীরে পৰত্তম্পি ঞাণেন সীঘং পরিগ্গহেতুং ন সক্কা হোতি, তথা ইদং. ইমস্স পন দূরে পৰত্তস্সপি. ‘‘গহণযোগ্যত্তা’’তি ঞাণেন পরিগ্গহণপত্তত্তাতি অধিপ্পাযো. ৰিভাৰনিপাঠে. ‘‘সযংনিস্সযৰসেন চা’’তি সযঞ্চ নিস্সয মহাভূতৰসেন চ. তত্থ সযং সম্পত্তা নাম ফোট্ঠব্বধাতুযো. নিস্সযৰসেন সম্পত্তা নাম গন্ধরসা. উভযথাপি অসম্পত্তা নাম চক্খু রূপ, সোত সদ্দা. যো পটিমুখভাৰো অত্থি, যং অঞ্ঞমঞ্ঞপতনং অত্থীতি যোজনা. ন চ তানি অঞ্ঞপ্পকারানি এৰ সক্কা ভৰিতুন্তি সম্বন্ধো. ‘‘অনুগ্গহ উপঘাতৰসেনা’’তি ৰড্ঢনত্থায অনুগ্গহৰসেন, হাযনাদি অত্থায উপঘাতৰসেন. ‘‘যং কিঞ্চী’’তি চতুসমুট্ঠানিকরূপং গণ্হাতি. ‘‘আদিন্নপরামট্ঠত্তা’’তি তণ্হামানেহি এতং মম এসোহমস্মীতিআদিন্নত্তা, দিট্ঠিযা এসো মে অত্তাতি পরামট্ঠত্তা চ. ‘‘নিচ্চকালং পৰত্তিৰসেনা’’তি একেন জনককম্মেন পটিসন্ধিক্খণতো পট্ঠায নিচ্চকালং পৰত্তিৰসেন. ‘‘উপচরীযতী’’তি ৰোহরীযতি. ‘‘অত্থৰিসেসবোধো’’তি রূপারম্মণস্স কিচ্চৰিসেসবোধো. ‘‘অসম্পত্তৰসেনা’’তি ৰিসযট্ঠানং সযং অসম্পজ্জনৰসেন. অত্তনোঠানং ৰা ৰিসযস্স অসম্পজ্জনৰসেন. তত্থ ৰিসযস্স অসম্পত্তং দস্সেন্তো ‘‘তত্থা’’তিআদিমাহ. তথা সোতসদ্দেসু চ অঞ্ঞমঞ্ঞং লগ্গিত্ৰা উপ্পজ্জমানেসু. ‘‘সম্পত্তিযা এৰা’’তি সম্পজ্জনত্থায এৰ. তথা আপো চ সম্পত্তিযা এৰ পচ্চযোতি যোজনা. দুব্বলপথৰী এৰ সন্নিস্সযো যস্সাতি ৰিগ্গহো. ‘‘অস্সা’’তি চক্খুস্স. ‘‘সোতস্সপনকথং’’তি সোতস্স অসম্পত্তগ্গহণং কথং পাকটং. সম্পত্তগ্গহণং এৰ পাকটন্তি দীপেতি. তেনাহ ‘‘তত্থহী’’তিআদিং. দক্খিণপস্সতো ৰা সুয্যতি, চেতিযাদিকস্স পুরত্থিমদিসাভাগে ঠিতানন্তি অধিপ্পাযো. ‘‘পটিঘট্টনানিঘংসো’’তি সোতেসু পটিঘট্টনৰেগো. ‘‘তেসং’’তি আসন্নেৰা দূরে ৰা ঠিতানং. হোতু দূরে ঠিতানং চিরেন সুতোতি অভিমানো. কস্মা পন উজুকং অসুত্ৰা দক্খিণপস্সতোৰা উত্তরপস্সতো ৰা সুণেয্য, অসুয্যমানো ভৰেয্যাতি পুচ্ছা. তং কথেন্তো ‘‘অপিচা’’তিআদিমাহ. ৰিভাৰনিপাঠে. ‘‘গন্ত্ৰা ৰিসযদেসং তং, ফরিত্ৰা গণ্হতীতি চে’’তি তং চক্খুসোত দ্ৰযং দূরেৰিসযানং উপ্পন্নদেসং ফরিত্ৰা গণ্হতীতি চেৰদেয্যাতি অত্থো. দূরেঠত্ৰা পস্সন্তো সুণন্তো চ মহন্তম্পিপব্বতং একক্খণে পস্সতি, মহন্তংপি মেঘসদ্দং একক্খণে সুণাতি. তস্মা উভযং অসম্পত্তগোচরন্তি ৰিঞ্ঞাযতি. ইমস্মিং ৰচনে ঠত্ৰা ইদং পরিকপ্পৰচনং দস্সেতি তং দ্ৰযং ৰিসযপ্পদেসং গন্ত্ৰা মহন্তংপি পব্বতং ৰা মেঘসদ্দং ৰা ফরিত্ৰা গণ্হাতি. তস্মা মহন্তংপি পস্সতি, সুণাতি. ন অসম্পত্তগোচরত্তা মহন্তং পস্সতি সুণাতীতি কোচি ৰদেয্যাতি ৰুত্তং হোতি. অধিট্ঠানৰিধানেপি তস্স সো গোচরো সিযাতি. এৰংসতি, দিব্বচক্খু দিব্বসোতাভিঞ্ঞানং অধিট্ঠানৰিধানেপি সো রূপসদ্দৰিসযো তস্স পসাদচক্খুসোতস্স গোচরো সিযাতি অভিঞ্ঞাধিট্ঠান কিচ্চং নাম নত্থি. চক্খুসোতং দেৰলোকম্পি গন্ত্ৰা দিব্বরূপম্পি দিব্বসদ্দম্পি গণ্হেয্য. ন পন গণ্হাতি. তস্মা তস্স ৰিসযদেসগমনঞ্চ মহন্তদেসফরণঞ্চ ন চিন্তেতব্বন্তি ৰুত্তং হোতি.

রূপৰিভাগানুদীপনা নিট্ঠিতা.

১৫৮. রূপসমুট্ঠানে. সুত্তন্তেসু চেতনাসম্পযুত্তা অভিজ্ঝাদযোপি কম্মন্তি ৰুত্তা. তে পন পট্ঠানে কম্মপচ্চযং পত্ৰা তপ্পচ্চযকিচ্চং ন সাধেন্তি, চেতনা এৰ সাধেতীতি আহ ‘‘সা যেৰা’’তিআদিং. ‘‘তং সমুট্ঠানানঞ্চ রূপানং’’তি হেতূহি চ হেতুসম্পযুত্তকধম্মেহি চ সমুট্ঠানানঞ্চ রূপানন্তি অত্থৰসেন চেতসিকধম্মানম্পি রূপসমুট্ঠাপকতা সিদ্ধা হোতি. সো হি উদযতি পসৰতীতি সম্বন্ধো. ‘‘কপ্পসণ্ঠাপনৰসেনা’’তি কপ্পপ্পতিট্ঠাপনৰসেন. অজ্ঝত্তিকসদ্দো ছসু চক্খাদীসু অজ্ঝত্তিকাযতনে স্ৰেৰ পৰত্ততি. ইধ পন সকলং অজ্ঝত্তসন্তানং অধিপ্পেতন্তি আহ ‘‘অজ্ঝত্ত সন্তানেতি পন ৰত্তব্বং’’তি. ‘‘খণে খণে’’তি ৰিচ্ছাৰচনং. ‘‘ৰিচ্ছা’’তি চ বহূসুখণেসু ব্যাপনন্তি আহ ‘‘তীসুতীসুখণেসূ’’তি.

যমকপাঠেসু. যস্স ৰা পন পুগ্গলস্স. ‘‘নিরুজ্ঝতী’’তি ভঙ্গক্খণ সমঙ্গিতমাহ. ‘‘উপ্পজ্জতী’’তি উপ্পাদক্খণ সমঙ্গিতং. ‘‘ইতী’’তি অযং পুচ্ছা. ‘‘নো’’তি পটিক্খেপো. সমুদযসচ্চস্স ভঙ্গক্খণে দুক্খসচ্চভূতস্স রূপস্সৰা নামস্সৰা উপ্পাদো নাম নত্থীতি ৰুত্তং হোতি. যস্স কুসলা ধম্মা উপ্পজ্জন্তি, যস্স অকুসলা ধম্মা উপ্পজ্জন্তীতি দ্ৰে পাঠাগহেতব্বা. ‘‘নো’’তি কুসলাকুসল ধম্মানং উপ্পাদক্খণে অব্যাকতভূতানং রূপানং ৰা নামানং ৰা নিরোধো নাম নত্থীতি ৰুত্তং হোতি. তেসুপাঠেসু কেসঞ্চিৰাদীনং ৰচনোকাসং দস্সেতুং ‘‘অরূপভৰং’’তিআদি ৰুত্তং. ‘‘চে’’তি কোচিৰাদী চেৰদেয্য. ‘‘না’’তি ন ৰত্তব্বং. ‘‘উপ্পজ্জতী’’তি চ উদ্ধটা সিযুন্তি সম্বন্ধো. ‘‘ইতরত্থ চা’’তি ততো ইতরস্মিং যস্স কুসলা ধম্মাতিআদিপাঠে চ. ‘‘তম্পি না’’তি তম্পি ৰচনং ন ৰত্তব্বন্তি অত্থো. ‘‘পুরিমকোট্ঠাসে’’তি অসঞ্ঞসত্তানং তেসং তত্থাতি ইমস্মিং পুরিমপক্খেতি অধিপ্পাযো. ‘‘পচ্ছিমকোট্ঠাসে’’তি সব্বেসং চৰন্তানং পৰত্তে চিত্তস্সভঙ্গক্খণেতি ইমস্মিং পচ্ছিম পক্খে. চৰন্তানং ইচ্চেৰ ৰুত্তং সিযা, ন পৰত্তে চিত্তস্স ভঙ্গক্খণেতি, নো চ ন ৰুত্তং, তস্মা ৰিঞ্ঞাযতি পৰত্তে চিত্তস্স ভঙ্গক্খণে রূপজীৰিতিন্দ্রিযম্পি ন উপ্পজ্জতীতি. রূপজীৰিতিন্দ্রিযে চ অনুপ্পজ্জমানে সতি, সব্বানি কম্মজরূপানি উতুজরূপানি আহারজরূপানি চ চিত্তস্স ভঙ্গক্খণে নুপ্পজ্জন্তীতি ৰিঞ্ঞাতব্বং হোতীতি অধিপ্পাযো. ‘‘পচ্ছিমকোট্ঠাসে’’তি সব্বেসং চৰন্তানং পৰত্তে চিত্তস্স ভঙ্গক্খণেতি ইমস্মিং পচ্ছিমপক্খে. তত্থ চ পৰত্তে চিত্তস্স ভঙ্গক্খণেতি ইদং অধিপ্পেতং. এৰং পাল়িসাধকং দস্সেত্ৰা ইদানি যুত্তিসাধকং দস্সেন্তো ‘‘যস্মা চা’’তিআদিমাহ. ‘‘তস্সা’’তি আনন্দা চরিযস্স মূলটীকাকারস্স. ৰিভাৰনিযং. ভঙ্গে রূপস্স নুপ্পাদো, চিত্তজানং ৰসেন ৰা. আরুপ্পং ৰাপি সন্ধায, ভাসিতো যমকস্স হি. ন চিত্তট্ঠিতি ভঙ্গে চ, ন রূপস্স অসম্ভৰো. তি ৰুত্তং. তত্থ ‘‘ন হি ন চিত্তট্ঠিতী’’তি চিত্তস্সঠিতি নাম ন হি নত্থি. ‘‘ভঙ্গেচা’’তি চিত্তস্সভঙ্গক্খণে চ. তং অসম্ভাৰেন্তো ‘‘যমকপাল়িযো পনা’’তিআদিমাহ. ‘‘নানত্থা নানাব্যঞ্জনা’’তি এতেন পাল়িসংসন্দনা নাম গরুকত্তব্বাতি দীপেতি. ‘‘গম্ভীরো চ সত্থু অধিপ্পাযো’’তি এতেন অত্তানং সত্থুমতঞ্ঞুং কত্ৰা ইদং সন্ধায এতং সন্ধাযাতি ৰত্তুং দুক্করন্তি দীপেতি. ‘‘সুদ্ধং অরূপমেৰা’’তি সুদ্ধং অরূপপ্পটিসন্ধিং এৰ. ছ চত্তালীসচিত্তানি রূপং জনেতুং ন সক্কোন্তি. এৰং সতি অরূপৰিপাকৰজ্জিতন্তি কস্মা ৰুত্তন্তি আহ ‘‘অরূপৰিপাকাপনা’’তিআদিং. ৰিভাৰনিপাঠে. ‘‘হেতুনো’’তি রূপৰিরাগভাৰনা কম্মসঙ্খাতস্স হেতুস্স. ‘‘তব্বীধুরতাযা’’তি রূপৰিরুদ্ধতায. রূপারূপৰিরাগভাৰনাভূতো মগ্গো. তেন নিব্বত্তস্স. রূপোকাসো নাম কামরূপভৰো. ৰিভাৰনিপাঠে. ‘‘একূন ন ৰুতিভৰঙ্গস্সে ৰা’’তি পৰত্তিকালে রূপজনকস্স একূন ন ৰুতিভৰঙ্গ চিত্তস্সাতি অত্থো. তত্থ পন অরূপৰিপাকং পৰত্তিকালেপি রূপজনকং ন হোতীতি আহ ‘‘তত্থা’’তিআদিং. কেচি পন পটিসন্ধি চিত্তস্স উপ্পাদক্খণে রূপং পচ্ছাজাত পচ্চযং ন লভতি. ঠিতিক্খণে রূপং পরতো ভৰঙ্গচিত্ততো পচ্ছাজাতপচ্চযং লভতীতি ৰদন্তি. তং ন গহেতব্বন্তি দস্সেতুং ‘‘ন হি অত্তনা’’তিআদি ৰুত্তং. সযং ৰিজ্জমানো হুত্ৰা উপকারকো পচ্চযো অত্থিপচ্চযো. পচ্ছাজাতো চ তস্স একদেসো. ‘‘আযুসঙ্খারানং’’তি উস্মাদীনং. ‘‘তং’’তি খীণাসৰানং চুতিচিত্তং. ‘‘যথাহা’’তি সো থেরো কিং আহ. ‘‘ৰুত্তং’’তি অট্ঠকথাযং ৰুত্তং. ইতি পন ৰচনতো অঞ্ঞেসংপি চুতিচিত্তং রূপং ন সমুট্ঠাপেতীতি ৰিঞ্ঞাযতীতি পধানৰচনং. পন সদ্দো অরুচি জোতকো. ‘‘তথা ৰুত্তেপী’’তি জোতেতি. ৰচীসঙ্খারো নাম ৰিতক্কৰিচারো. কাযসঙ্খারো নাম অস্সাসপস্সাসৰাতো. সো সব্বেসংপি কামসত্তানং চুতি চিত্তস্স উপ্পাদক্খণে চ ততো পুরিমচিত্তস্স উপ্পাদক্খণে চ ননিরুজ্ঝতীতি ৰচনেন চুতিচিত্ততো পুব্বভাগেযেৰ অস্সাসপস্সাসানং অভাৰং ঞাপেতি. ননু ইমিস্সং পাল়িযং চুতিকালে অস্সাসপস্সাসস্স অভাৰং ৰদতি. অঞ্ঞেসং চিত্তজরূপানং অভাৰং ন ৰদতি. তস্মা ইমায পাল়িযা সব্বেসম্পি চুতিচিত্তং অস্সাসপস্সাসং ন জনেতীতি ৰিঞ্ঞাযতি. ন অঞ্ঞানি চিত্তজরূপানীতি চোদনা. তং পরিহরন্তো ‘‘ন হী’’তিআদিমাহ. ন হি রূপসমুট্ঠাপকচিত্তস্স কাযসঙ্খার সমুট্ঠাপনং অত্থীতি সম্বন্ধো. ‘‘গব্ভগমনাদিৰিনিবদ্ধাভাৰে’’তি মাতুকুচ্ছিম্হি গতস্স অস্সাসপস্সাসো ন উপ্পজ্জতি, তথা উদকে নিমুগ্গস্স. বাল়্হং ৰিসঞ্ঞীভূতস্স. চতুত্থজ্ঝানং সমাপজ্জন্তস্স. নিরোধসমাপত্তিং সমাপজ্জন্তস্স. রূপারূপভৰে ঠিতস্সাতি. তস্মা এতেগব্ভগমনাদযো অস্সাসপস্সাসং ৰিনিবদ্ধন্তি নীৰারেন্তীতি গব্ভগমনাদিৰিনিবদ্ধা. তেসং অভাৰোতি ৰিগ্গহো. ৰিনা ইমেহি কারণেহি অস্সাসপস্সাসস্স চ অঞ্ঞচিত্তজরূপানঞ্চ ৰিসেসো নত্থীতি ৰুত্তং হোতি. অঞ্ঞংপি যুত্তিং দস্সেতি ‘‘চুতো চা’’তিআদিনা. চুতো চ হোতি, অস্স চিত্তসমুট্ঠান রূপঞ্চ পৰত্ততীতি ন চ যুত্তন্তি যোজনা. সো চ সুট্ঠু ওল়ারিকো রূপধম্মো. ইতি তস্মা ন সক্কা ৰত্তুংতি সম্বন্ধো. ‘‘ইমস্স অত্থস্সা’’তি ৰত্ৰা তং অত্থং ৰদতি ‘‘ওল়ারিকস্সা’’তিআদিনা. ‘‘কতীপয খণমত্তং’’তি পন্নরসখণসোল়সখণমত্তং. ‘‘চিত্তজরূপপ্পৰত্তিযা’’তি চিত্তজরূপপ্পৰত্তনতো. দুব্বলা হোন্তি, তদা পঞ্চারম্মণানিপি পঞ্চদ্ৰারেসু আপাতং নাগচ্ছন্তি. ‘‘পচ্চযপরিত্ততায ৰা’’তি তদা পচ্ছাজাতপচ্চযস্স অলাভতো ৰুত্তং. দুব্বলা হোন্তি. তদা দুব্বলত্তা এৰ পঞ্চারম্মণানি পঞ্চদ্ৰারেসু আপাতং নাগচ্ছন্তি. পরিযোসানেপি একচিত্তক্খণমত্তে. ৰত্থুস্স আদিঅন্তনিস্সিতানি পটিসন্ধিক্খণে আদিম্হি নিস্সিতানি. মরণাসন্নকালে অন্তে নিস্সিতানি. সমদুব্বলানি এৰ হোন্তি. তস্মা যথা সব্বপটিসন্ধিচিত্তম্পি রূপং ন জনেতি, তথা সব্বচুতিচিত্তম্পি রূপং ন জনেতীতি সক্কা ৰিঞ্ঞাতুন্তি. ‘‘পাল়িৰিরোধং’’তি পুব্বে দস্সিতায সঙ্খার যমকপাল়িযা ৰিরোধং.‘‘কারণং ৰুত্তমেৰা’’তি চিত্তঞ্হি উপ্পাদক্খণে এৰ পরিপুণ্ণং পচ্চযং লভিত্ৰা বলৰং হোতীতি ৰুত্তমেৰ. ‘‘তং’’তি অপ্পনাজৰনং. অচলমানং হুত্ৰা. ‘‘অব্বোকিণ্ণে’’তি ৰীথিচিত্ত ৰারেন অৰোকিণ্ণে. ন তথা পৰত্তমানেসু অঙ্গানি ওসীদন্তি, যথা ঠপিতানেৰ হুত্ৰা পৰত্তন্তি. ‘‘ন ততোপরং’’তি ততো অতিরেকং রূপৰিসেসং ন জনেতি. ‘‘কিঞ্চী’’তি কিঞ্চিচিত্তং. ‘‘উত্তরকিচ্চং’’তি উপরূপরিকিচ্চং. ‘‘অট্ঠ পুথুজ্জনানং’’তি অট্ঠ সোমনস্স জৰনানি হসনংপি জনেন্তি. ছ জৰনানি পঞ্চজৰনানীতি অধিকারো. তেসং বুদ্ধানং. সিতকম্মস্সাতি সম্বন্ধো. সিতকম্মং নাম মিহিতকম্মং. ‘‘কারণং ৰুত্তমেৰা’’তি ‘রূপস্স পন উপত্থম্ভকভূতা উতুআহারা পচ্ছাজাতপচ্চয ধম্মা চ ঠিতিক্খণে এৰ ফরন্তী’তি এৰং কারণং ৰুত্তমেৰ. ‘‘উতুনো বলৰভাৰো’’তি রূপুপ্পাদনত্থায বলৰভাৰো. সন্ততিঠিতিযা বলৰভাৰো পন পচ্ছাজাতপচ্চযাযত্তো হোতি. রূপং ন সমুট্ঠাপেয্য. নো ন সমুট্ঠাপেতীতি আহ ‘‘ৰক্খতি চা’’তিআদিং. অজ্ঝত্ত সন্তানগতো চ বহিদ্ধাসন্তানগতো চ দুৰিধাহারোতি সম্বন্ধো.

এত্থচাতিআদীসু. উতু পঞ্চৰিধো. অজ্ঝত্তসন্তানে চতুজৰসেন চতুব্বিধো, বহিদ্ধা সন্তানে উতুজৰসেন একো. তথা আহারোপি পঞ্চৰিধো. তেসু ঠপেত্ৰা বহিদ্ধাহারং অৰসেসানং অজ্ঝত্ত সন্তানে রূপসমুট্ঠাপনে ৰিৰাদো নত্থি. বহিদ্ধাহারস্স পন অজ্ঝত্তসন্তানে রূপসমুট্ঠাপনে ৰিৰাদো অত্থীতি তং দস্সেতুং ‘‘এত্থ চা’’তিআদিমাহ. ‘‘উতুওজানং ৰিযা’’তি উতুওজানং অজ্ঝত্তসন্তানে রূপসমুট্ঠাপনং ৰিয. অট্ঠকথাপাঠে. ‘‘দন্তৰিচুণ্ণিতং পনা’’তি দন্তেহি সঙ্খাদিত্ৰা ৰিচুণ্ণং কতং পন. ‘‘সিত্থং’’তি ভত্তচুণ্ণসিত্থং. টীকাপাঠে. ‘‘সা’’তি বহিদ্ধা ওজা. ‘‘নসঙ্খাদিতো’’তি ন সুট্ঠুখাদিতো. ‘‘তত্তকেনপী’’তি মুখেঠপিতমত্তেনপি. ‘‘অব্ভন্তরস্সা’’তি অজ্ঝত্তাহারস্স. ‘‘অট্ঠঅট্ঠরূপানি সমুট্ঠাপেতী’’তি উপত্থম্ভনৰসেন সমুট্ঠাপেতি, জনন ৰসেন পন অজ্ঝত্তিকাহারো এৰ সমুট্ঠাপেতীতি অধিপ্পাযো. ‘‘উপাদিন্নকা’’তি অজ্ঝত্ত সম্ভূতা ৰুচ্চন্তি. বহিদ্ধা ওজাপি রূপং সমুট্ঠাপেতি যেৰাতি সম্বন্ধো. ‘‘তেনউতুনা’’তি অজ্ঝত্ত উতুনা. ‘‘সেদিযমানা’’তি উস্মাপিযমানা. ‘‘তায চ ওজাযা’’তি অজ্ঝত্ত ওজায. ‘‘মেদসিনেহুপচয ৰসেনা’’তি মেদকোট্ঠাসরসসিনেহ কোট্ঠাসানং ৰড্ঢনৰসেন. ইতরানি পন তীণিরূপসমুট্ঠানানি. পাল়িপাঠে. ‘‘ইন্দ্রিযানী’’তি চক্খাদীনি ইন্দ্রিয রূপানি. ‘‘ৰিহারো’’তি সমাপত্তি এৰ ৰুচ্চতি. সমাপত্তি চিত্তেন জাতত্তা তানি ইন্দ্রিযানি ৰিপ্পসন্ন নীতি কত্ৰা কস্মা ৰুত্তন্তি পুচ্ছতি. ‘‘উপচরিতত্তা’’তি ঠানূপচারেন ৰোহরিতত্তা. ‘‘তেসং ন ৰন্নং’’তি ইন্দ্রিযরূপানং. নিধিকণ্ডপাঠে. সুন্দরো ৰণ্ণো যস্সাতি সুৰণ্ণো. সুৰণ্ণস্স ভাৰো সুৰণ্ণতা. তথাসুস্সরতা. ‘‘সরো’’তি চ সদ্দো ৰুচ্চতি. ‘‘সুসণ্ঠানং’’তি অঙ্গপচ্চঙ্গানং সুট্ঠুসণ্ঠানং. ‘‘সুরূপতা’’তি সুন্দররূপকাযতা. ‘‘যথা’’তি যেনআকারেন সণ্ঠিতে সতি. তথা তেন আকারেন সণ্ঠিতা হোতীতি যোজনা.

লহুতাদিত্তযে. দন্ধত্তাদিকরানং ধাতুক্খোভানং পটিপক্খেহি পচ্চযেহি সমুট্ঠাতীতি ৰিগ্গহো. ‘‘এতস্সা’’তি লহুতাদিত্তযস্স ৰুত্তা. তস্মা এতং লহুতাদিত্তযং কম্মসমুট্ঠানন্তি ৰত্তব্বন্তি অধিপ্পাযো. ‘‘যমকেসুপি অদ্ধাপচ্চুপ্পন্নেনেৰ গহিতো’’তি যস্স চক্খাযতনং উপ্পজ্জতি, তস্স সোতাযতনং উপ্পজ্জতীতি. সচক্খুকানং অসোতকানং উপপজ্জন্তানং তেসং চক্খাযতনং উপ্পজ্জতীতিআদীসু উপ্পাদৰারে পটিসন্ধিৰসেন, নিরোধৰারে চুতিৰসেন অদ্ধাপচ্চুপ্পন্নংৰ ৰুত্তন্তি অধিপ্পাযো. অকম্মজানং পৰত্তিকালে কালভেদো ৰুত্তোতি. ‘‘কম্মৰিপাকজা আবাধাতি ৰুত্তং’’তি ৰীথিমুত্তসঙ্গহে উপচ্ছেদককম্মদীপনিযং ‘অত্থি ৰাত সমুট্ঠিতা আবাধা. ল. অত্থি কম্মৰিপাকজা আবাধা’তি ৰুত্তং. তানি উপপীল়কুপঘাতক কম্মানিপি ৰিপত্তিযো লভমানানি এৰ খোভেত্ৰা নানাবাধে উপ্পাদেন্তীতি সম্বন্ধো. সরীরে ঠন্তি তিট্ঠন্তীতি সরীরট্ঠকা. ‘‘তদনুগতিকানি এৰ হোন্তী’’তি কম্মজাদীনিপি খুব্ভিতানি এৰ হোন্তীতি অধিপ্পাযো. এতেন অট্ঠসু কারণেসু যেনকেনচিকারণেন চক্খুরোগাদিকে আবাধে জাতে তস্মিং অঙ্গে পৰত্তানি সব্বানি রোগসমুট্ঠানানি আবাধভাৰং গচ্ছন্তিযেৰ. এৰং সন্তেপি তপ্পরিযাপন্নানি কম্মজরূপানি তদনুগতিকভাৰেন আবাধভাৰং গচ্ছন্তি, ন উজুকতো কম্মৰসেনাতি দীপেতি. কম্মসমুট্ঠানো আবাধো নাম নত্থি. তথাপি অট্ঠসু আবাধেসুপি অত্থি ৰাতসমুট্ঠানা আবাধাতিআদীসু ৰিয অত্থি কম্মসমুট্ঠানা আবাধাতি অৰত্ৰা অত্থি কম্মৰিপাকজা আবাধাতি ৰুত্তং. তত্থ উপপীল়কো পঘাতককম্মানংৰসেন উপ্পন্নো যোকোচিধাতুক্খোভো সুত্তন্তপরিযাযে ন কম্মৰিপাকোতি ৰুচ্চতিযেৰ. ততো জাতো যোকোচি আবাধো কম্মৰিপাকজোতি ৰুত্তোতি. সুগম্ভীরমিদংঠানং. সুট্ঠুৰিচারেত্ৰা কথেতব্বং. ‘‘যতো’’তি যস্মা কম্মসমুট্ঠানা বাধপচ্চযা. ল. লব্ভমানো সিযা. কেৰলং সো কম্মসমুট্ঠানো আবাধো নাম নত্থীতি যোজনা. ‘‘অৰিহিংসা কম্মনিব্বত্তা’’তি মেত্তাকরুণাকম্মনিব্বত্তা. সুৰিদূরতাযচেৰ নিরাবাধা হোন্তীতি সম্বন্ধো. ‘‘সণ্ঠিতিযা’’তি দুক্খোভনীযে ৰিসেসনপদং. হেতুপদং ৰা দট্ঠব্বং. খোভেতুং দুক্করা দুক্খোভনীযা. ‘‘কামং’’তি কিঞ্চাপীতি অত্থে নিপাতপদং. সেসমেত্থ সুৰিঞ্ঞেয্যং.

‘‘ৰুচ্চতে’’তিআদীসু. রূপপচ্চযধম্মানং পচ্চযকিচ্চং তিৰিধং. জননঞ্চ উপত্থম্ভনঞ্চ অনুপালনঞ্চ. তত্থ জননকিচ্চং জনেতব্বানং জাতিক্খণে এৰ লব্ভতি. সেসদ্ৰযং পন ঠিতিক্খণেপি লব্ভতি. ভঙ্গক্খণে পন সব্বং পচ্চযকিচ্চং নত্থি. তত্থ জননকিচ্চৰসেন ৰিচারেন্তো ‘‘রূপজনকানং’’তিআদিমাহ. ‘‘অপিচা’’তিআদীসু. ‘‘তাসং’’তি উপচযসন্ততীনং, জরতা অনিচ্চতানঞ্চ. ‘‘তেসূ’’তি কুতোচি সমুট্ঠানেসু. ইধ পন অভিধম্মত্থ সঙ্গহেপন. ‘‘এৰং সন্তেপী’’তি পচ্চযৰিসেসেন অদিস্সমানৰিসেসত্থেপি. ‘‘সারতর’’ন্তি অতিসারভূতং. ‘‘সেয্যো’’তি সেট্ঠো.

রূপসমুট্ঠানানুদীপনা নিট্ঠিতা.

১৬৯. কলাপযোজনাযং. ‘‘সঙ্খানে’’তি গণনে. ‘‘তেনা’’তি সঙ্খানট্ঠেন একসদ্দেন দস্সেতীতি সম্বন্ধো. ‘‘পিণ্ডী’’তি একগ্ঘনো. মূলটীকাপাঠে. ‘‘উপ্পাদাদিপ্পৰত্তিতো’’তি উপ্পাদাদিৰসেন পৰত্তনতো. ‘‘ইতী’’তি তস্মা. উপাদারূপানি ত্ৰেৰ ৰুচ্চন্তি. ‘‘এৰং ৰিকারপরিচ্ছেদ রূপানি চ যোজেতব্বানী’’তি পঞ্চৰিকাররূপানি কলাপস্সেৰ চোপনাদিসভাৰা হোন্তি, ন একমেকস্স রূপস্স. তস্মা তানি একেকস্মিং কলাপে একেকানি এৰ হোন্তি. পরিচ্ছেদরূপং পন কলাপপরিযাপন্নং রূপং ন হোতি. তস্মা দ্ৰিন্নং দ্ৰিন্নং কলাপানং অন্তরা তংপি একেকমেৰ হোতীতি দট্ঠব্বং. ‘‘চতুন্নং মহাভূতানং নিস্সযতা সম্ভৰতো’’তি এত্থ চতুন্নং মহাভূতানংপি লক্খণমত্তেন নানত্তং হোতি, পৰত্তিৰসেন পন একগ্ঘনত্তা সঙ্খানট্ঠেনপি একো নিস্সযোতি ৰত্তব্বমেৰ. এৰঞ্হিসতি একসদ্দস্স অত্থ চলনং নত্থীতি. ‘‘তেন সদ্দেনা’’তি চিত্তজসদ্দেন. অত্তানং মোচেন্তো ‘‘অধিপ্পাযেনা’’তি আহ. থেরস্স অধিপ্পাযেনাতি ৰুত্তং হোতি. অত্তনো অধিপ্পাযং দস্সেন্তো ‘‘এত্থ পনা’’তিআদিমাহ. তত্থ ‘‘সদ্দেনা’’তি চিত্তজসদ্দেন. ‘‘তাযৰাচাযা’’তি ৰচীমযসদ্দেনাতি অত্থো. ‘‘ৰিঞ্ঞত্তী’’তি ৰিঞ্ঞাপনং ইচ্চেৰত্থো. ৰিঞ্ঞাপেতীতি ৰিঞ্ঞাপিতো. তস্স ভাৰো ৰিঞ্ঞাৰিতত্তং. ৰিতক্কৰিপ্ফারসদ্দো নাম কস্সচি মহন্তং অত্থং চিন্তেন্তস্স সোকৰসেন ৰা তুট্ঠিৰসেন ৰা বলৰৰিতক্কো পৰত্ততি. সো সোকং ৰা তুট্ঠিং ৰা সন্ধারে তুং অসক্কোন্তো দুতীযেন সদ্ধিং মন্তেন্তো ৰিয অত্তনো মুখেযেৰ অব্যত্তং সদ্দং কত্ৰা সমুদীরতি. পকতিজনো তং সদ্দমত্তং সুণাতি ৰা ন ৰাসুণাতি. সুণন্তোপি অক্খরং ৰা অত্থং ৰা অধিপ্পাযং ৰা ন জানাতি. দিব্বসোতেন ৰা ৰিজ্জাসোতেন ৰাসুণন্তো অক্খরংপি অত্থংপি অধিপ্পাযংপি জানাতি. জানিত্ৰা এৰংপি তে মনো, ইত্থংপি তে মনোতিআদিসতি. অযং ৰিতক্কৰিপ্ফারসদ্দো নাম. সো ৰিঞ্ঞত্তিরহিতো সোতৰিঞ্ঞেয্যোতি মহাঅট্ঠকথাযং ৰুত্তো. সঙ্গহকারোপন ৰচীমযসদ্দোনাম ৰিঞ্ঞত্তিরহিতোতি ৰা অসোতৰিঞ্ঞেয্যোতি ৰা নত্থীতি পটিক্খিপতি. ‘‘আগতে’’তি অট্ঠকথাসু আগতে. ‘‘পচ্চেতব্বা’’তি সদ্ধাতব্বা. ‘‘টীকাসুপনস্সা’’তি অস্সসচ্চসঙ্খেপস্স দ্ৰীসুটীকাসু. অক্খরঞ্চ পদঞ্চ ব্যঞ্জনঞ্চ অত্থো চাতি দ্ৰন্দো. অপ্পঞ্ঞাযমানা অক্খরপদব্যঞ্জনত্থা যস্সাতি ৰিগ্গহো. ‘‘অন্ধদমিল়াদীনং’’তি অন্ধজাতিকদমিল়জাতিকাদীনং মিলক্খূনং. ‘‘উক্কাসিতসদ্দো চ খিপিতসদ্দো চ ৰমিতসদ্দো চ ছড্ডিতসদ্দো চাতি দ্ৰন্দো. আদিসদ্দেন তাদিসা উগ্গার হিক্কার হসিত রোদিতাদযো সঙ্গণ্হাতি. সেসমেত্থসুৰিঞ্ঞেয্যং.

কলাপযোজনানুদীপনা নিট্ঠিতা.

১৬১. রূপপ্পৰত্তিক্কমে. নপুগ্গলৰসেন ৰিসেসনং হোতি. ভূমিৰসেন ৰিসেসনং হোতি. তঞ্চ খো পৰত্তিকালৰসেনাতি অধিপ্পাযো.

এত্থচাতিআদীসু. পুরিমেসু দ্ৰীসু যোনীসু পাল়িনযেন ৰেদিতব্বাতি সম্বন্ধো. নিক্খন্তা, ইতি তস্মা অণ্ডজাতি চ জলাবুজাতি চ ৰুচ্চন্তি. কথং অযং নযো পাল়িনযো নাম হোতীতি. পাল়িযং অণ্ডকোসং ৰত্থিকোসং অভিনিব্ভিজ্জ অভিনিব্ভিজ্জ জাযন্তীতি ৰচনেন অণ্ডতো জলাবুতো জাতা ৰিজাতা নিক্খন্তাতি অত্থো ৰিঞ্ঞাযতি. অট্ঠকথাযং পন অণ্ডেজাতা জলাবুম্হিজাতাতি ৰুত্তং. গব্ভপলিৰেঠনাসযো নাম যেন পলিৰেঠিতো গব্ভো তিট্ঠতি. ৰিভাৰনিপাঠে ‘‘উক্কংসগতি পরিচ্ছেদৰসেনা’’তি উক্কট্ঠপ্পৰত্তিনিযমনৰসেন. উক্কট্ঠনযৰসেনাতি ৰুত্তং হোতি. অভিরূপস্স কঞ্ঞা দাতব্বাতি এত্থ কঞ্ঞা দাতব্বাতি সামঞ্ঞতো ৰুত্তেপি অভিরূপস্স পুরিসস্সাতি ৰুত্তত্তা কঞ্ঞাপি অভিরূপকঞ্ঞা এৰ ৰিঞ্ঞাযতি. অযং উক্কট্ঠনযো নাম. ‘‘তত্থ তানি সব্বানী’’তিআদীসু. তানিসব্বানিপি চক্খু সোত ঘান ভাৰ দ্ৰযানি ন ওমকেন কম্মেন লব্ভতি. উক্কট্ঠেন কম্মেন এৰ লব্ভতীতি অধিপ্পাযো. ৰিভঙ্গপাঠে. সদ্দাযতনং নাম পটিসন্ধিকালে ন লব্ভতীতি ৰুত্তং ‘‘একাদসাযতনানী’’তি. চক্খুৰেকল্লস্স দস, সোতৰেকল্লস্স অপরানিদস, চক্খু সোতৰেকল্লস্সনৰ, গব্ভসেয্যস্সৰসেন সত্তাযতনানি. পাল়িযং ওপপাতি কগব্ভসেয্যকানং এৰ ৰুত্তত্তা ‘‘পাল়িযং অৰুত্তংপিপনা’’তি ৰুত্তং. অৰুত্তম্পি চক্খাদিৰেকল্লং. ‘‘অঞ্ঞমঞ্ঞং অৰিনাভাৰৰুত্তিতা ৰুত্তা’’তি কথং ৰুত্তা যস্স ঘানাযতনং উপ্পজ্জতি, তস্স জিৰ্হাযতনং উপ্পজ্জতীতি, আমন্তা. যস্স ৰা পন জিৰ্হাযতনং উপ্পজ্জতি, তস্স ঘানাযতনং উপ্পজ্জতীতি, আমন্তাতিআদিনা ৰুত্তা পেয্যালমুখেন. আচরিযানন্দত্থেরে ন পন ইচ্ছিতন্তি সম্বন্ধো. ‘‘জিৰ্হাৰেকল্লতাৰিযা’’তি জিৰ্হাৰেকল্লতানাম নত্থি ৰিয. ‘‘ঘানৰেকল্লতাপি অত্থীতি যুত্তং’’তি এত্থ পাল়িযং অঘানকানং ইত্থীনং পুরিসানংতি ইদং মাতুগব্ভে ঘানাযতনে অনুপ্পন্নেযেৰ পুরেতরঞ্চ ৰন্তানং ইত্থিপুরিসানং ৰসেন ৰুত্তং. ন ঘানৰেকল্লানং অত্থিতাযাতিপি ৰদন্তি. গব্ভে সেন্তীতি গব্ভসযা. গব্ভসযা এৰ গব্ভসেয্যা.

পৰত্তিকালেতিআদীসু. মূলটীকাপাঠে. ‘‘ওরতো’’তি পটিসন্ধিং উপাদায ৰুত্তং. একাদসমসত্তাহে অনাগতেতি ৰুত্তং হোতি. রূপাযতনং নুপ্পজ্জিস্সতি. নো চ চক্খাযতনং নুপ্পজ্জিস্সতীতি ইদং অদ্ধাপচ্চুপ্পন্নৰসেন ৰুত্তং. তস্মা পটিসন্ধিতো পট্ঠায উপ্পন্নং রূপাযতনং যাৰজীৰংপি উপ্পন্নন্ত্ৰেৰ ৰুচ্চতি. ন উপ্পজ্জিস্সমানন্তি. চক্খাযতনং পন একাদসমসত্তাহা ওরতো ঠিতস্স ন উপ্পন্নং. তদা অনুপ্পন্নত্তা একাদসমে সত্তাহে সম্পত্তে উপ্পজ্জিস্সতীতি ৰত্তব্বং হোতি. পচ্ছিম ভৰিকত্তা পন তদুভযম্পি ভৰন্তরে নুপ্পজ্জিস্সতিযেৰাতি. ঘানাযতনং নিব্বত্তেতীতি ঘানাযতনানিব্বত্ততং, কম্মং. তেন কম্মেন গহিতপ্পটিসন্ধিকানং. ইদঞ্চ যদি তন্নিব্বত্তকেন কম্মেন পটিসন্ধিং গণ্হেয্যুং. ঘানাযতনে অনুপ্পন্নে অন্তরা ন কালঙ্করেয্যুন্তি কত্ৰা ৰুত্তং. তন্নিব্বত্তকেন কম্মেন পটিসন্ধিং গণ্হন্তাপি ততো বলৰন্তে উপচ্ছেদককম্মে আগতে সতি. ঘানাযতনুপ্পত্তিকালং অপত্ৰা অন্তরা নকালঙ্করোন্তীতি নত্থি. ‘‘চক্খুঘানেসু ৰুত্তেসূ’’তি টীকাযং ৰুত্তেসু. ‘‘অত্থতো সিদ্ধা এৰা’’তি একাদসমসত্তাহে উপ্পন্নাতি সিদ্ধা এৰ. ‘‘ঈদিসেসুঠানেসূ’’তি সভাৰং ৰিচারে তুং দুক্করেসু ঠানেসু. অট্ঠকথাযেৰ পমাণং কাতুং যুত্তাতি অধিপ্পাযো. অট্ঠকথাপাঠে. ‘‘পুরিমং ভৰচক্কং’’তি অৰিজ্জামূলকং ৰেদনাৰসানং ভৰচক্কং. ‘‘অনুপুব্বপ্পৰত্তিদীপনতো’’তি যথা পচ্ছিমে তণ্হামূলকে ভৰচক্কে উপপত্তিভৰপ্পৰত্তিং ৰদন্তেন ভৰপচ্চযাজাতীতি এৰং একতো কত্ৰা ৰুত্তা, ন তথা পুরিমে ভৰচক্কে. তত্থ পন সঙ্খারপচ্চযা ৰিঞ্ঞাণং, ৰিঞ্ঞাণ পচ্চযা নাম রূপন্তিআদিনা অনুপুব্বপ্পৰত্তিদীপনতো. ‘‘সো পটিক্খিত্তোযেৰা’’তি আযতনানং কমতো ৰিনিচ্ছযট্ঠানে দেসনাক্কমোৰ যুত্তোতি ৰত্ৰা সো উপ্পত্তিক্কমো পটিক্খিত্তো.

সংযুত্তকে যক্খসংযুত্তপাল়িযং. গাথাসু. ‘‘কললা’’তি কললতো. ‘‘অব্বুদা’’তি অব্বুদতো. ‘‘পেসিযা’’তি পেসিতো. ‘‘ঘনা’’তি ঘনতো. ‘‘জাতিউণ্ণংসূহী’’তি সুদ্ধজাতিকস্স এলকস্স লোমংসূহি. ‘‘পরিপক্কসমূহকং’’তি কললতো পরং থোকং পরিপক্কঞ্চ সমূহাকারঞ্চ হুত্ৰা. ‘‘ৰিৰত্তমানং তব্ভাৰং’’তি কললভাৰং ৰিজহিত্ৰা ৰত্তমানং. ‘‘ৰিলীনতি পুসদিসা’’তি অগ্গিম্হি ৰিলীনতিপুরসসদিসা. ‘‘মুচ্চতী’’তি কপালে নলগ্গতি. এতানিজাযন্তীতি এৰং অট্ঠকথাযঞ্চ ৰুত্তং. ‘‘দ্ৰা চত্তালীসমে সত্তাহে’’তি নৰমাসে অতিক্কম্ম ৰীসতিমেদিৰসে. যদি এৰং, পঞ্চমেসত্তাহে পঞ্চপ্পসাখা জাযন্তি, একাদসমেসত্তাহে চত্তারি আযতনানি জাযন্তি, মজ্ঝেপন পঞ্চসত্তাহা অত্থি. তত্থ কথন্তি আহ ‘‘এত্থ চা’’তিআদিং. ‘‘ছসত্তাহা’’তি একাদসমেন সদ্ধিং ছসত্তাহা. একাদসমেপি হি পচ্ছিমদিৰসে জাতত্তা ছদিৰসানি অৰসিট্ঠানি হোন্তি. ‘‘পরিণতকালা’’তি পরিপক্ককালা. পরিপাকগতা এৰ হি কম্মজমহাভূতা সুপ্পসন্না হোন্তি. তেসঞ্চ পসাদগুণা পসাদরূপা হোন্তীতি. ‘‘তস্সা’’তি কললস্স. ৰণ্ণজাতং ৰা সণ্ঠানং ৰাতি সম্বন্ধো. ‘‘আকাসকোট্ঠাসিকো’’তি মনুস্সেহি আকাসকোট্ঠাসে ঠপিতো. হুত্ৰাতি পাঠসেসো. কথং পরমাণুতো পরিত্তকং সিযাতি আহ ‘‘সোহী’’তিআদিং. ‘‘সো’’তি পরমাণু. পটিসন্ধিক্খণে কললরূপং কলাপত্তযপরিমাণং. পরমাণু পন একূনপঞ্ঞাসকলাপপরিমাণো. তস্মা তং ততো পরিত্তকন্তি ৰুত্তং হোতি. পটিসন্ধিক্খণতো পরং পন তংপি খণেখণে উপচিতমেৰ হোতি. ‘‘ধাতূনং’’তি চতুধাতুৰৰত্থানে আগতানং চতুন্নং মহাভূতানং. কললস্সৰা উপচিতপ্পমাণং গহেত্ৰা ৰুত্তন্তিপি যুজ্জতি. ‘‘ৰত্থুস্মিং’’তি অব্বুদাদিৰত্থুম্হি. ‘‘জলাবুমূলানুসারেনা’’তি জলাবুজাতকালে তস্স মূলানু সারেনাতি অধিপ্পাযো. গাথাযং. ‘‘মাতুতিরো কুচ্ছিগতো’’তি ৰত্তব্বে গাথাবন্ধৰসেন ‘‘মাতুকুচ্ছিগতো তিরো’’তি ৰুত্তং. তেনাহ ‘‘মাতুযা তিরোকুচ্ছি গতো’’তি. ‘‘ছিদ্দো’’তি সুখুমেহি ছিদ্দেহি সমন্নাগতো. লদ্ধংৰা পানভোজনং. ‘‘ততো পট্ঠাযা’’তি সত্তরসমভৰঙ্গচিত্ততো পট্ঠায. ‘‘রূপসমুট্ঠানে ৰুত্তমেৰা’’তি রূপসমুট্ঠানে মূলটীকাৰাদ ৰিচারণাযং ‘যং পিতত্থ ন চ যুত্ত’ন্তিআদিনা ৰুত্তমেৰ. ‘‘অজ্ঝোহটাহারাভাৰতো’’তি বহিদ্ধাহারাভাৰতোতি অধিপ্পাযো. ‘‘তত্থা’’তি রূপব্রহ্মলোকে. অভাৰং ৰণ্ণেতি. কস্মাপন ৰণ্ণেতি, ননু ৰণ্ণেন্তস্স অট্ঠকথা ৰিরোধো সিযাতি. ৰিরোধো ৰা হোতু, অৰিরোধো ৰা. পাল়িযেৰ পমাণন্তি দস্সেন্তো ‘‘রূপধাতুযা’’তিআদিনা ৰিভঙ্গে পাল়িং আহরি. তত্থ ‘‘রূপধাতুযা’’তি রূপলোকধাতুযা. রূপ ব্রহ্মলোকেতি ৰুত্তং হোতি. ‘‘উপপত্তিক্খণে’’তি পটিসন্ধিক্খণে. আচরিযস্স অধিপ্পাযং ৰিভাৰেন্তো ‘‘এত্থচা’’তিআদিমাহ. ‘‘ফোট্ঠব্বে পটিক্খিত্তেপী’’তি পঞ্চাযতনানীতি ৰা পঞ্চধাতুযোতি ৰা পরিচ্ছেদকরণমেৰ পটিক্খি পনং দট্ঠব্বং. ‘‘কিচ্চন্তর সব্ভাৰা’’তি ফোট্ঠব্বকিচ্চতো কিচ্চন্তরস্স ৰিজ্জমানত্তা. কিম্পন কিচ্চন্তরন্তি. রূপকাযস্স পৰত্তিযা হেতুপচ্চযকিচ্চং. মহাভূতা হেতূ মহাভূতা পচ্চযা রূপক্খন্ধস্স পঞ্ঞাপনাযাতি হি ভগৰতা ৰুত্তং. তত্থ হেতুকিচ্চং নাম রূপজননকিচ্চং. পচ্চয কিচ্চং নাম রূপূপত্থম্ভন কিচ্চং. কিচ্চন্তরমেৰনত্থীতি ঘানাদীনং ৰিসয গোচরভাৰকিচ্চং তেসং কিচ্চং নাম, ততো অঞ্ঞং কিচ্চং নাম নত্থি. ‘‘যেনা’’তি কিচ্চন্তরেন. ‘‘তে’’তি গন্ধাদযো. ইদানি অট্ঠক তানুগতং ৰাদং দস্সেন্তো ‘‘যথাপনা’’তিআদিমাহ. ‘‘যেন কিচ্চৰিসেসেনা’’তি ৰিসযগোচরভাৰকিচ্চৰিসেসেন. রূপজননরূপূপত্থম্ভন কিচ্চৰিসেসেন চ. ‘‘সব্বত্থা’’তি সব্বস্মিং পাল়িপ্পদেসে. ‘‘তেসং’’তি গন্ধাদীনং. ‘‘তত্থা’’তি রূপলোকে. ‘‘নিস্সন্দ ধম্মমত্তভাৰেনা’’তি এত্থ যথা অগ্গিম্হি জাতে তস্স নিস্সন্দা নাম ইচ্ছন্তস্সপি অনিচ্ছন্তস্সপি জাযন্তিযেৰ. ৰণ্ণোপি জাযতি, ওভাসোপি, গন্ধোপি, রসোপি, ধূমোপি, পুপ্ফুল্লানিপি কদাচি জাযন্তিযেৰ. তেহি ৰণ্ণাদীহি করণীযে কিচ্চৰিসেসে সতিপি অসতিপি. তথা মহাভূতেসু জাতেসু তেসং নিস্সন্দা নাম ইচ্ছন্তস্সপি অনিচ্ছন্তস্সপি কিচ্চৰিসেসে সতিপি অসতিপি জাযন্তিযেৰ. এৰং নিস্সন্দধম্মমত্তভাৰেন. অনুপ্পৰেসো যুত্তো সিযা অজ্ঝত্ত সন্তানেতি অধিপ্পাযো. বহিদ্ধা সন্তানে পন ৰত্থা ভরণ ৰিমানাদীসু তেসং ভাৰো ইচ্ছি তব্বো সিযা. অজ্ঝত্তেপি ৰা কাযং ওল়ারিকং কত্ৰা মাপিতকালেতি. এত্থ চ ‘‘ধম্মাযতন ধম্মধাতূসু অনুপ্পৰেসো’’তি এত্থ অট্ঠসালিনিযং তাৰ. যে পন অনাপাতাগতা রূপাদযোপি ধম্মারম্মণমিচ্চেৰ ৰদন্তীতি ৰুত্তং. তং তত্থ পটিক্খিত্তং. অনাপাতাগমনং নাম ৰিসযগোচর কিচ্চরহিততা ৰুচ্চতি. তঞ্চ মনুস্সানম্পি দেৰানম্পি ব্রহ্মানম্পি পসাদরূপেসু অনাপাতা গমনমেৰ অধিপ্পেতং. তং পন অত্থিনত্থীতি ৰিচারেত্ৰা কথেতব্বং. অপি চ নিস্সন্দধম্মা নাম ওল়ারিকানং মহাভূতানং ৰিৰিধাকারাপি ভৰেয্যুং. ব্রহ্মানং পন অজ্ঝত্ত রূপং অপ্পনা পত্তকম্মৰিসেসেন পৰত্তং অতিসুখুমং হোতি. তস্মা কামসত্ত সন্তানে ৰিয তত্থ পরিপুণ্ণং নিস্সন্দরূপং নাম ৰিচারেতব্বমেৰ. ধম্মা রম্মণঞ্চ মুখ্যধম্মারম্মণং অনুলোম ধম্মাযতনন্তি পাল়িযং ৰুত্তং নত্থি যেৰাতি. ‘‘জীৰিত ছক্কঞ্চা’’তি ৰত্তব্বং রূপলোকে. ‘‘তত্থা’’তি অসঞ্ঞসত্তে. কামলোকে জীৰিতনৰকং কস্মা ৰিসুং ন ৰুত্তন্তি. পটিসন্ধিক্খণে কস্মা ন ৰুত্তং. পৰত্তিকালেপি ৰিসুং ন ৰুত্তমেৰ. ‘‘আহারূপত্থম্ভকস্সা’’তি আহারসঙ্খাতস্স রূপূপত্থম্ভকস্স. ‘‘সকলসরীর ব্যাপিনো অনুপালকজীৰিতস্সা’’তি কাযদসকভাৰদসকেসু পরিযাপন্নস্স জীৰিতস্স. ‘‘এত দেৰা’’তি জীৰিতনৰকমেৰ. ‘‘তত্থা’’তি রূপলোকে. উদযভূতস্সা’’তি ৰড্ঢিভূতস্স. ‘‘দ্ৰীসু অগ্গীসূ’’তি পাচকগ্গিস্মিঞ্চ কাযগ্গিস্মিঞ্চ. আতঙ্কো ৰুচ্চতি রোগো. বহুকো আতঙ্কো যস্সাতি ৰিগ্গহো. ‘‘ৰিসমৰেপাকিনিযা’’তি ৰিসমং পাচেন্তিযা. ‘‘গহণিযা’’তি উদরগ্গিনা. ‘‘পধানক্খমাযা’’তি পধান সঙ্খাতং ভাৰনারব্ভকিচ্চং খমন্তিযা. ‘‘এতং’’তি জীৰিতনৰকং. ‘‘থেরেন চা’’তি অনুরুদ্ধত্থেরেন চ. ‘‘এতং’’তি জীৰিত নৰকং. ‘‘নিরোধক্কমো’’তি মরণাসন্নকালে নিরোধক্কমো. ‘‘এত্থা’’তি রূপলোকে. কল়েৰরং ৰুচ্চতি মতসরীরং. তস্স নিক্খেপো কল়েৰরনিক্খেপো. অঞ্ঞেসঞ্চ ওপপাতিকানং কল়েৰরনিক্খেপো নাম নত্থি. কস্মা পন তেসং কল়েৰরনিক্খেপো নাম নত্থীতি আহ ‘‘তেসঞ্হী’’তিআদিং. ৰিভাৰনিপাঠে. সব্বেসংপি রূপব্রহ্মানং. আহারসমুট্ঠানানং রূপানং অভাৰতো তিসমুট্ঠানানীতি ৰুত্তং. অসঞ্ঞসত্তে চিত্তসমুট্ঠানানম্পি অভাৰতো দ্ৰিসমুট্ঠানানীতি ৰুত্তং. ‘‘তানী’’তি মরণাসন্ন চিত্তসমুট্ঠানানি. তং পরিমাণং অস্সাতি তাৰত্তকং. ‘‘লহুকগরুকতাদিৰিকারো’’তি সকলরূপকাযস্স লহুকগরুকাদিৰিকারো. অপি চ তত্থ দন্ধত্তাদিকর ধাতুক্খোভপচ্চযানং সব্বসো অভাৰতো নিচ্চকালম্পি সকলসরীরস্স লহুতাদিগুণো ৰত্ততিযেৰ. কিং তত্থ পটিপক্খ ধম্মপ্পৰত্তি চিন্তায. তথা অসঞ্ঞসত্তেপি রুপ্পনৰিকার চিন্তাযাতি.

রূপপ্পৰত্তিক্কমানুদীপনা নিট্ঠিতা.

১৬১. নিব্বানসঙ্গহে. দ্ৰীসু নিব্বানপদেসু পথমপদং অৰিঞ্ঞাতত্থং সামঞ্ঞ পদং. দুতীযং ৰিঞ্ঞা তত্থং ৰিসেসপদং. কিলেসে সমেতীতি সমণো. অরিযপুগ্গলো. সমণস্স ভাৰো সামঞ্ঞং. অরিযমগ্গো. সামঞ্ঞস্স ফলানি সামঞ্ঞফলানি. লোকতো উত্তরতি অতিক্কমতীতি লোকুত্তরং. লোকে ন পঞ্ঞাৰীযতীতি পঞ্ঞত্তীতি ইমমত্থং সন্ধায ‘‘নহী’’তিআদিমাহ. চত্তারিমগ্গঞ্ঞাণানি চতুমগ্গঞ্ঞাণন্তি এৰং সমাসৰসেন একৰচনন্তং পদং ৰাক্যং পত্ৰা বহুৰচনন্তং হোতীতিআহ ‘‘চতূহি অরিযমগ্গঞ্ঞাণেহী’’তি. ‘‘তাদিসম্হা’’তি অরিযমগ্গসদিসম্হা. ‘‘ৰিমুখানং’’তি পরম্মুখানং. ‘‘জচ্চন্ধানং ৰিযা’’তি জচ্চন্ধানং চন্দমণ্ডলস্স অৰিসযভাৰো ৰিয. ‘‘তস্সা’’তি নিব্বানস্স. তত্থ ‘‘জচ্চন্ধানং’’তি অৰিসযপদে সামিপদং. ‘‘তস্সা’’তি ভাৰপদং. ‘‘যং কিঞ্চী’’তি কিঞ্চিযং অত্থজাতং. অস্সনিব্বানস্স সিদ্ধতন্তি সম্বন্ধো. অপাকটস্স ধম্মস্স. ৰাযামোপি নাম ন অত্থি. কুতো তস্স সচ্ছিকরণং ভৰিস্সতীতি অধিপ্পাযো. ‘‘যেনা’’তি ৰাযামেন. ‘‘নিব্বানেন ৰিনা’’তি নিব্বানারম্মণং অলভিত্ৰাতি ৰুত্তং হোতি. ‘‘অকিচ্চসিদ্ধিং’’তি কিলেসপ্পহান কিচ্চস্স অসিদ্ধিং. ‘‘ততো’’তি তস্মা. ‘‘ৰধাযা’’তি ৰধিতুং. ‘‘পরিসক্কন্তা’’তি ৰাযমন্তা. গাথাযং. ‘‘অন্তোজটা’’তি অজ্ঝত্তসন্তানে তণ্হাজটা, তণ্হাৰিনদ্ধা. ‘‘বহিজটা’’তি বহিদ্ধাসন্তানে তণ্হাজটা, তণ্হাৰিনদ্ধা. ‘‘তস্সা’’তি তণ্হায. ‘‘ৰত্থুতো’’তি ৰিসুংৰিসুং জাতসরূপতো. পরিনিব্বাযিংসু, পরিনিব্বাযন্তি, পরিনিব্বাযিস্সন্তীতি পরিনিব্বুতা. তকারপচ্চযস্স কালত্তযেপি পৰত্তনতো. যথা দিট্ঠা, সুতা, মুতা, ৰিঞ্ঞাতা,তি. ৰিসিট্ঠং কত্ৰা জানিতব্বন্তি ৰিঞ্ঞাণং. ন নিদস্সিতব্বন্তি অনিদস্সনং. নত্থি অন্তো এতস্সাতি অনন্তং. সব্বতো পৰত্তা গুণপ্পভা এতস্সাতি সব্বতোপভং. ‘‘ভগৰতা ৰুত্তং’’তি দীঘনিকাযে কেৰট্টসুত্তে ৰুত্তং. ‘‘সৰন্তিযো’’তি মহানদিযো ৰা কুন্নদিযো ৰা. ‘‘অপ্পেন্তী’’তি পৰিসন্তি. ‘‘ধারাতি’’ মেঘৰুট্ঠিধারা. বুদ্ধেসু অনুপ্পজ্জন্তেসু একসত্তোপি পরিনিব্বাতুং ন সক্কোতীতি ইদং বুদ্ধুপ্পাদকপ্পে এৰ পচ্চেক সম্বুদ্ধাপি উপ্পজ্জন্তীতি কত্ৰা ৰুত্তং. অপদান পাল়িযং পন বুদ্ধসুঞ্ঞকপ্পেপি পচ্চেকসম্বুদ্ধানং উপ্পত্তি আগতা এৰ. ‘‘একসত্তোপী’’তি ৰা সাৰকসত্তো গহেতব্বো. এৰঞ্হি সতি অপদানপাল়িযা অৰিরোধো হোতি. ‘‘আরাধেন্তী’’তি সাধেন্তি পটিলভন্তি. সব্বতো পৰত্তা গুণপ্পভা এতস্সাতি অত্থং সন্ধায ‘‘সব্বতোপভা সম্পন্নং’’তি ৰুত্তং. ‘‘জোতি ৰন্ত তরোৰা’’তি ওভাসৰন্ততরো ৰা. সব্বত্থ পভৰতি সংৰিজ্জতীতি সব্বতোপভন্তি ইমমত্থং সন্ধায সব্বতো ৰা পভুতমেৰ হোতীতি ৰুত্তং. তেনাহ ‘‘ন কত্থচি নত্থী’’তি. ‘‘এৰংসন্তে পী’’তি এৰং ৰুত্তনযেন একৰিধে সন্তেপি. ‘‘উপচরিতুং’’তি উপচারৰসেন ৰোহরিতুং. ‘‘যথাহা’’তি তস্মিং যেৰসুত্তে পুন কিং আহ. ভৰং নেতীতি ভৰনেত্তি. ভৰতণ্হা এৰ. ‘‘সম্পরাযিকা’’তি চুতিঅনন্তরে পত্তব্বা. দ্ৰিন্নং খীণাসৰানং অনুপাদিসেসতা ৰুত্তাতি সম্বন্ধো. এত্থ ‘‘অনুপাদিসেসতা’’তি অনুপাদিসেসনিব্বানং ৰুচ্চতি. সেক্খেসু অরহত্তমগ্গট্ঠস্স সেক্খস্স কিলেসুপাদিসেস ৰসেন অনুপাদিসেসতা ৰুত্তা. ‘‘কিলেসুপাদিসেসো’’তি চ কিলেস সঙ্খাতো উপাদিসেসো. তথা খন্ধুপাদিসেসোপি. অন্তরাপরিনিব্বাযীতিআদীসু পরিনিব্বানং নাম কিলেসপরিনিব্বানং ৰুত্তং. উভতো ভাগ ৰিমুত্তাদীনং পদত্থো নৰমপরিচ্ছেদে আগমিস্সতি. ‘‘কিলেসক্খযেন সহেৰ খিয্যন্তী’’তি পচ্চুপ্পন্নভৰে অরহত্তমগ্গক্খণে কিলেসক্খযেন সদ্ধিং এৰ খিয্যন্তি. অনুপ্পাদ ধম্মতং গচ্ছন্তি. তথা অনাগামি পুগ্গলস্স কামপটিসন্ধিক্খন্ধাপি অনাগামিমগ্গক্খণে, সোতাপন্নস্স সত্তভৰেঠপেত্ৰা অৰসেস কামপটিসন্ধিক্খন্ধা সোতাপত্তি মগ্গক্খণে তং তং কিলেসক্খযে ন সহেৰ খিয্যন্তীতি. পচ্চুপ্পন্নক্খন্ধা পন কিলেসক্খযেন সহখিয্যন্তি. খন্ধুপাদিসেসা নাম হুত্ৰা যাৰমরণকালা খীণাসৰানম্পি পৰত্তন্তি. কস্মা পৰত্তন্তীতি আহ ‘‘যাৰচুতিযা পৰত্তমানং’’তিআদিং. পচ্চুপ্পন্নক্খন্ধসন্তানং পন ধম্মতাসিদ্ধন্তি সম্বন্ধো. ‘‘ফলনিস্সন্দভূতং’’তি ৰিপাকফলভূতঞ্চ নিস্সন্দফলভূতঞ্চ হুত্ৰা. ‘‘তেনসহেৰা’’তি কিলেসক্খযেন সহেৰ. ‘‘যস্মাপনা’’তিআদীসু. পরিসমন্ততো বুন্ধন্তি নীৰারেন্তি, সন্তিসুখস্স অন্তরাযং করোন্তীতি পলিবোধা. কিলেসাভিসঙ্খরণ কিচ্চানি, কম্মাভিসঙ্খরণকিচ্চানি, খন্ধাভিসঙ্খরণ কিচ্চানি চ. পলিবোধেহি সহ ৰত্তন্তীতি সপলিবোধা. সঙ্খার নিমিত্তেহি সহ ৰত্তন্তীতি সনিমিত্তা. তণ্হাপণিধীহি সহ ৰত্তন্তীতি সপণিহিতা.‘‘ততো’’তি পাপকম্মতো, অপাযদুক্খতো চ. ‘‘কোচী’’তি কোচিধম্মো. ‘‘নিরোধেতুং সক্কোতী’’তি সক্কাযদিট্ঠিযা নিরুদ্ধায তে নিরুজ্ঝন্তি. অনিরুদ্ধায ননিরুজ্ঝন্তি. তস্মা সক্কাযদিট্ঠি নিরোধো নিব্যাপারধম্মোপি সমানো তে পলিবোধে নিরোধেতি নাম. ‘‘নিরোধেতুং সক্কোতী’’তি চ অব্যাপারে ব্যাপারপরিকপ্পনাতি দট্ঠব্বং. সক্কাযদিট্ঠিনিরোধোযেৰ তে পলিবোধে নিরোধেতুং সক্কোতীতি এত্থ দ্ৰিন্নম্পি নিরোধো একোযেৰ. এৰং সন্তেপি অৰিজ্জা নিরোধা সঙ্খার নিরোধোতিআদীসু ৰিয অভেদে ভেদপরিকপ্পনা হোতীতি. উপ্পাদো চ পৰত্তো চ উপ্পাদপ্পৰত্তা. তে মূলং যস্সাতি ৰিগ্গহো. যেন ওল়ারিকাকারেন. মারেন্তীতি মারা. ৰধকপচ্চত্থিকাতি ৰুত্তং হোতি. কিলেসমারাদযো. মারা দহন্তি তিট্ঠন্তি এতেসূতি মারধেয্যা. মারেতি চাৰেতি চাতি মচ্চু. মরণমেৰ. মচ্চুদহতি তিট্ঠতি এতেসূতি মচ্চুধেয্যা. ‘‘নত্থি তস্মিং নিমিত্তং’’তি ৰুত্তে পঞ্ঞত্তিধম্মেসুপি উপ্পাদপ্পৰত্তমূলং নিমিত্তং নাম নত্থি. এৰংসতি, তেহি নিব্বানস্স অৰিসেসো আপজ্জতীতি চোদনা. তং পরিহরন্তো ‘‘তঞ্হী’’তিআদিমাহ. ৰিদ্ধংসেত্ৰাতি চ সাধেন্তন্তি চ অত্থৰিসেস পাকটত্থায অব্যাপারে ব্যাপার পরিকপ্পনা এৰ. পণীতাদিভেদে. ইদং বুদ্ধানং নিব্বানং পণীতং. ইদং পচ্চেকবুদ্ধানং নিব্বানং মজ্ঝিমং. ইদং বুদ্ধসাৰকানং নিব্বানং হীনন্তি ভিন্নং ন হোতীতি যোজেতব্বং. নানপ্পকারেন চিত্তং নিধেতি এতেনাতি পণিহিতং. ‘‘নিধেতী’’তি আরম্মণেসু নিন্নং পোণং পব্ভারং কত্ৰা ঠপেতীতি অত্থো. তথা পণিধানপণিধীসু. অত্থতো একং আসাতণ্হায নামং. ‘‘লব্ভমানাপী’’তি ভৰসম্পত্তি ভোগসম্পত্তিযো লব্ভমানাপি. ‘‘পিপাসৰিনয ধম্মত্তা’’তি পাতুং পরিভুঞ্জিতুং ইচ্ছা পিপাসা. পিপাসং ৰিনেতি ৰিগমেতীতি পিপাসৰিনযো. ‘‘ৰেদযিতসুখং’’তি ৰেদনাসুখং. ‘‘কতমং তং আৰুসো’’তি পাল়িপাঠে ‘‘তং’’তি তস্মা. ‘‘যদেত্থ ৰেদযিতং নত্থী’’তি যস্মা এত্থ ৰেদযিতং নত্থি. তস্মা নিব্বানে সুখং নাম কতমন্তি যোজনা. ‘‘এত্থা’’তি এতস্মিং নিব্বানে. ‘‘এতদেৰেত্থা’’তিআদিম্হি. ‘‘এত দেৰা’’তি এসোএৰ. যস্মা এত্থ ৰেদযিতং নত্থি. তস্মা এসো ৰেদযিতস্স নত্থিভাৰো এৰ এত্থনিব্বানে সুখন্তি যোজনা.

‘‘এত্থ চা’’তিআদীসু. যদেতং খিয্যনং নিরুজ্ঝনং অত্থীতি সম্বন্ধো. কেচি পন তংখিয্যন নিরুজ্ঝন ক্রিযামত্তং নিব্বানং ন হোতি. অভাৰ পঞ্ঞত্তিমত্তং হোতীতি ৰদন্তি. তং পটিসেধেন্তো ‘‘ন হিতং’’তিআদিমাহ. ‘‘পঞ্ঞত্তিরূপং’’তি পঞ্ঞত্তিসভাৰো. পাল়িপাঠে. ‘‘পদহতী’’তি ৰীরিযং দল়্হং করোতি. পহিতো অত্তা অনেনাতি পহিতত্তো. ‘‘পহিতো’’তি পদহিতো. অনিৰত্তভাৰে ঠপিতো. পেসিতোতিপি ৰণ্ণেন্তি. ‘‘কাযেনা’’তি নামকাযেন. তণ্হাৰসে ৰত্তন্তীতি তণ্হাৰসিকা. ‘‘তেসং পী’’তি তেসং ৰাদেপি. তস্মিং খয নিরোধমত্তে অনন্তগুণা নাম নত্থীতি ইমং ৰাদং ৰিসোধেতুং ‘‘নিব্বানস্স চা’’তিআদি ৰুত্তং. ‘‘পটিপক্খৰসেন সিজ্ঝন্তী’’তি এতেন ৰট্টধম্মেসু মহন্তং আদীনৰং পস্সন্তা এৰ তেসং নিরোধে মহন্তং গুণানিসংসং পস্সন্তীতি দীপেতি. যে পন যথাৰুত্তং খযনিরোধং পরমত্থনিব্বানন্তি ন জানন্তি, তেসং ৰত্তব্বমেৰ নত্থি. এৰং গুণপদানং গম্ভীরত্তা তংখযনিরোধমত্তং অনন্তগুণানং ৰত্থু ন হোতীতি মঞ্ঞন্তি. ইদানি নিব্বানং পরমং সুখন্তি ৰুত্তং. কথং তং খযনিরোধমত্তং পরমসুখং নাম ভৰেয্যাতি ইমং ৰাদং ৰিসোধেতুং ‘‘সন্তিসুখঞ্চনামা’’তিআদি ৰুত্তং. অত্থিভিক্খৰেতি সুত্তে. ‘‘নোচেতং অভৰিস্সা’’তি এতং অজাতং নোচে সন্তং ৰিজ্জমানং ন ভৰেয্য. ‘‘নযিমস্সা’’তি ন ইমস্স. পচ্চক্খভূতং খন্ধপঞ্চকং দস্সেন্তো ‘‘ইমস্সা’’তি ৰদতি. নিস্সক্কত্থে চ সামিৰচনং. ইমস্মা জাতা ভূতা কতা সঙ্খতা সত্তানং নিস্সরণং নাম ন পঞ্ঞাযেয্যাতি যোজনা. পরত্থপি এসনযো. এসনযো সব্বেসূতিআদীসু. দুচ্চরিত ধম্মা নাম পচ্চযে সতি, জাযন্তি. অসতি, ন জাযন্তীতি এৰং জাতং ৰিয অজাতম্পি তেসং অত্থি. যদি চ অজাতং নাম নত্থি. জাতমেৰ অত্থি. এৰংসতি, অত্তনি দুচ্চরিতানং অজাতত্থায সম্মাপটিপজ্জন্তানংপি সব্বে দুচ্চরিত ধম্মা অত্তনি জাতাযেৰ সিযুং, নো অজাতা. কস্মা, অজাতস্স নাম নত্থিতাযাতিআদিনা যোজেতব্বং.

‘‘এত্তাৰতা’’তি, অত্থি ভিক্খৰে অজাতংতিআদিনা পাল়িৰচনেন. সব্বেসঙ্খারা সমন্তি ৰূপসমন্তি এত্থাতি সব্বসঙ্খার সমথো. সব্বে উপধযো এত্থ নিস্সজ্জন্তি অরিযাজনাতি সব্বুপধিনিস্সগ্গো. ‘‘উপলব্ভমানো’’তি সন্তিলক্খণেন ঞাণেন উপলব্ভমানো. ‘‘এসিংসূ’’তি কত্ৰা এসনকিচ্চস্স সিখাপত্তং অত্থং দস্সেতুং ‘‘অধিগচ্ছিংসূ’’তি ৰুত্তং.

নিব্বানসঙ্গহানুদীপনা নিট্ঠিতা.

রূপসঙ্গহদীপনিযাঅনুদীপনা নিট্ঠিতা.

৭. সমুচ্চযসঙ্গহঅনুদীপনা

১৬২. সমুচ্চযসঙ্গহে. অত্তনো আৰেণিকভূতেন সামঞ্ঞ লক্খণেনতি চ সম্বন্ধো. অঞ্ঞাপদেসেন এৰ তদুভযলক্খণেন সলক্খণানি নাম ৰুচ্চন্তীতি অধিপ্পাযো. ‘‘নিব্বানস্সপি সরূপতো লব্ভমানসভাৰতা’’তি অঞ্ঞনিস্সয রহিতেন লব্ভমানসভাৰতা. ননু নিব্বানম্পি রাগক্খযো দোসক্খযো মোহক্খযোতিআদিনা অঞ্ঞনিস্সযদস্সনং অত্থি যেৰাতি. দস্সনমত্তং অত্থি. নিব্বানং পন রাগাদীহি পটিবদ্ধং ন হোতি. অথ খো তেহি দূরতরং হোতি. পটিপক্খতরং, পটিৰিরুদ্ধতরং. যঞ্হি রূপস্স খযো ৰযো ভেদো অনিচ্চাতি ৰুত্তং. তত্থ রূপস্স উপ্পজ্জিত্ৰা খযো ৰুত্তোতি সো রূপস্স নিস্সিতো এৰ হোতি. ইধ পন রাগাদীনং পুন উপ্পাদস্সপি অভাৰো ৰুত্তোতি সো রাগাদীসু অনিস্সিতো এৰ. ন কেৰলং অনিস্সিতো. অথ খো তেহি দূরতরো চ পটিপক্খতরো চ তেসং পটিপক্খগুণেহি ইমস্সসিদ্ধত্তাতি. অনিপ্ফন্নরূপানিপি অধিপ্পেতানি এৰ তেসম্পি খন্ধাযতনধাতু সচ্চেসু সঙ্গহিতত্তা.

আসৰাদীসু. ‘‘পারিৰাসিযট্ঠেনা’’তি পরিৰাসকরণট্ঠেন. ‘‘মদনীযট্ঠেনা’’তি মদনজনকট্ঠেন. ‘‘পরিৰাসং গণ্হন্তী’’তি দোসৰেপুল্লং আপজ্জন্তীতি ৰুত্তং হোতি. পুন ‘‘পরিৰাসং’’তি দুগ্গন্ধতাদিপরিৰাসং. ‘‘আসৰভরিতমেৰা’’তি আসৰেহি পূরিতমেৰ. ‘‘ছল়ারম্মণানি দূসেন্তী’’তি তানি সাসৰাদিভাৰং পাপেন্তীতি অধিপ্পাযো. ‘‘ভৰতো’’তি ভূমিতো ইচ্চেৰত্থো. অৰধীযতি পরিচ্ছিন্দীযতি এতস্মাতি অৰধি. অপাদানং ৰুচ্চতি. মরিযাদো নাম পরিযন্তপরিচ্ছেদো. মরিযাদমত্তভূতো ক্রিযাৰিসযো মরিযাদৰিসযো. অৰধি নাম ব্যাপন ৰিধানং, ক্রিযা ব্যাপনস্স ৰিসযো অভিৰিধিৰিসযো. ‘‘যস্সা’’তি অৰধি ৰত্থুস্স. ‘‘অত্তানং’’তি অৰধিৰত্থুং. ‘‘বহিকত্ৰা’’তি সম্পত্তমত্তং কত্ৰাতি অধিপ্পাযো. অৰধিৰিচারণাযং. ‘‘সদ্দস্সা’’তি ভগৰতো কিত্তিসদ্দস্স. ‘‘তং’’তি অৰধিভূতং অত্থং. ‘‘যসো’’তি কিত্তিসদ্দো. ‘‘ইতরং’’তি অনভিৰিধিৰিসযং বহি কত্ৰা পৰত্ততি.

কামাসৰাদীসু. ‘‘তন্নামেনা’’তি কামনামেন. ‘‘তদারম্মণা’’তি কামধম্মারম্মণা. ‘‘অযমত্থো ৰা’’তি কামীযতীতিআদিনা ৰুত্তো পচ্ছিমত্থোৰ. ‘‘মহগ্গতকুসলধম্মা’’তি ইধাধিপ্পেতং কম্মভৰং সন্ধায ৰুত্তং. ‘‘তং নিব্বত্তা’’তি তেন নিব্বত্তা. ‘‘তদারম্মণা’’তি দুৰিধভৰারম্মণা. ‘‘তণ্হা এৰা’’তি ভৰতণ্হা এৰ. ‘‘ভৰো এৰা’’তি ভৰারম্মণতায ভৰনামিকা তণ্হা এৰ. ‘‘ইমে এৰা’’তি তণ্হাদিট্ঠি অৰিজ্জা এৰ. ‘‘পরিৰুত্থে সতী’’তি পরিৰসিতে সতি. ‘‘কামৰিসযা’’তি কামধম্মৰিসযা. ‘‘তস্মিং’’তি কামাসৰে. ভৰৰিসযা মানাদযো পরিৰুত্থা এৰাতিআদিনা যোজেতব্বং. তথা দিট্ঠিৰিসযাতি পদেপি.

‘‘অনস্সাসিকং কত্ৰা’’তি অস্সাসপস্সাসরহিতং কত্ৰা. ‘‘অৰহননট্ঠেনা’’তি অজ্ঝোত্থরিত্ৰা মারণট্ঠেন. অধোকত্ৰা মারণট্ঠেনাতিপি যুজ্জতি. ‘‘দুত্তরট্ঠেনা’’তি তত্থ পতন্তস্স তরিতুং দুক্করট্ঠেন. ‘‘ৰুত্তনযেনা’’তি আসৰেসু ৰুত্তনযেন.

‘‘ৰট্টস্মিং’’তি তিৰিধৰট্টস্মিং. ‘‘ভৰযন্তকে’’তি অৰিজ্জাসঙ্খারাদিকে ভৰচক্কে. ‘‘আমসনং’’তি পদস্স অত্থং দস্সেতি ‘‘তথা তথা কপ্পেত্ৰা গহণ’’ন্তি. ‘‘সাসনে’’তি পরিযত্তিসাসনে তস্মিং তস্মিং সুত্তন্তে. ‘‘দিট্ঠিযো দিট্ঠুপাদানং’’তি দিট্ঠিৰত্থূসু দল়্হগ্গাহট্ঠেন দিট্ঠিযো এৰ দিট্ঠুপাদানং. অত্তৰাদুপাদানে. পরিকপ্প বুদ্ধি নাম মিচ্ছাঞাণং ৰুচ্চতি. ‘‘ইস্সর নিম্মিতং’’তি সকললোকিস্সরেন মহাব্রহ্মুনা আদিকপ্পকালে নিম্মিতং. ‘‘অধিচ্চ সমুপ্পন্নং’’তি অহেতু অপচ্চযা সমুপ্পন্নং. ‘‘অচ্চন্তসস্সতং’’তি ভৰপরম্পরাসু সস্সতং. ‘‘একচ্চসস্সতং’’তি ভৰৰিসেসং পত্ৰা একচ্চানং সত্তানং সস্সতং. ‘‘উচ্ছিন্নং’’তি যত্থকত্থচি পরম্মরণা উচ্ছিন্নং. পুরাণঞ্চকম্মং পরিক্খীণং, নৰঞ্চকম্মং অকতং. এৰং সংসার সুদ্ধীতিআদিনা গহণন্তি অত্থো. সন্তো কাযো সক্কাযো. ‘‘সন্তো’’তি পরমত্থতো ৰিজ্জমানো. ‘‘কাযো’’তি রূপকাযো, নামকাযো. অত্তনো অত্তনো কাযো ৰা সক্কাযো. পচ্চত্তকাযো, পাটিপুগ্গলিক কাযোতি ৰুত্তং হোতি. যথাৰুত্তকায দ্ৰযমেৰ. সক্কাযে দিট্ঠি সক্কাযদিট্ঠি. তত্থ ‘‘সক্কাযে দিট্ঠী’’তি পুব্বন্তাপরন্ত কপ্পিকানং ৰিয পুব্বন্তা পরন্তেঅচিন্তেত্ৰা সব্বসত্তানংপি অত্তনো খন্ধেসু এৰ ‘রূপং মে অত্তাতি ৰা’ অত্তা মে রূপৰাতি ৰা, অত্তনি মে রূপন্তি ৰা, রূপস্মিং মে অত্তাতি ৰা, এৰমাদিনা ধম্মতা সিদ্ধা দিট্ঠীতি ৰুত্তং হোতি. ‘‘অস্সুতৰা’’তি খন্ধদেসনাদিকে সুঞ্ঞতধম্মপ্পটিসং যুত্তে দেসনা ধম্মে অস্সুত পুব্বত্তা নত্থি সুতং এতস্সাতি অস্সুতৰা. ‘‘পুথুজ্জনো’’তি লোকিযমহাজনো. তত্থ পরিযাপন্নো পন একপুগ্গলোপি পুথুজ্জনোত্ৰেৰ ৰুচ্চতি. সো সুতৰাপি অত্থি, অস্সুতৰাপি অত্থি. ইধ অস্সুতৰা অধিপ্পেতো. অরিয পুগ্গলো পন তত্থ পরিযাপন্নো ন হোতি. অহন্তিৰা, মমাতি ৰা, মযীতি ৰা, মেতি ৰা, পরামসন পদানি নাম. ‘‘সেসধম্মেৰা গহেত্ৰা’’তি রূপতো অৰসেসে নামক্খন্ধ ধম্মে অত্তা মেতি গহেত্ৰা ৰা. ‘‘ধম্ম মুত্তকং ৰা অত্তানং গহেত্ৰা’’তি পঞ্চক্খন্ধধম্মৰিমুত্তং পরিকপ্পসিদ্ধং অত্তানং ৰা গহেত্ৰা. চতস্সো অৰত্থা যস্সাতি চতুরাৰত্থিকা. ৰেদনায সম্ভোগরসত্তা ‘‘সংভুঞ্জিং’’তি ৰুত্তং. ‘‘সুখিতো’’তি সুখৰেদনায সমঙ্গীপুগ্গলো. ধম্মতো খন্ধ পঞ্চকমেৰ. তত্থ পন সুখৰেদনাপধানত্তা তথা সমনুপস্সন্তো ৰেদনং অত্তাতি সমনুপস্সতি নাম. ‘‘সমূহতো গহেত্ৰা’’তি অহমস্মি, অহং একো সত্তোতিআদিনা সমূহতো. ‘‘ৰত্থূ’’তি পঞ্চক্খন্ধা ৰুচ্চন্তি. ঞাতপরিঞ্ঞাদিৰসেন অপরিঞ্ঞাতানি ৰত্থূনি এতেহীতি অপরিঞ্ঞাতৰত্থুকা. একমুহুত্তমত্তেপি কালে. রূপং অত্ততো সমনুপস্সতীতিআদিকং চতুরাৰত্থং সন্ধায ‘‘কদাচি অত্ততো’’তিআদি ৰুত্তং. ‘‘অত্তনিমিত্তং’’তি অভিক্কমনাদীসু কাযৰচীমনো ক্রিযাসু অহং অভিক্কমামি, অহং পটিক্কমামীতিআদিনা চিত্তে দিস্সমানা অত্তচ্ছাযা ৰুচ্চতি.

‘‘কামনট্ঠেনা’’তি ইচ্ছনট্ঠেন. ‘‘ছন্দনট্ঠেনা’’তি পত্থনট্ঠেন. লীনভাৰো নাম চিত্তচেতসিকানং পটিকুটনং. আপাদীযতে আপাদনং. লীনভাৰস্স আপাদনন্তি ৰিগ্গহো. ‘‘তন্দী’’তি আলস্যং ৰুচ্চতি. ‘‘ৰিজম্ভিততা’’ নাম কিলেসৰসেন কাযঙ্গানং ৰিজম্ভনং সমিঞ্জনপ্পসারণাদিকরণং. সা এৰ পচ্চযো এতস্সাতি ৰিগ্গহো.

অনুসযপদত্থে. ‘‘উপ্পজ্জন্তী’’তি উপ্পজ্জিতুং সক্কোন্তি. ন পন একন্ততো উপ্পজ্জন্তি. সন্তেসুহি একন্ততো উপ্পজ্জন্তেসু অনুসযা নাম ন হোন্তি সযনকিচ্চস্সেৰ অভাৰতো. ‘‘উপ্পজ্জন্তী’’তি ৰা উপ্পজ্জিতুং পহোন্তি. পত্থোদনো বহূনং জনানং পহোতীতিআদীসু ৰিয. পঞ্ঞত্তিযোহি অসভাৰধম্মজাতিকত্তা কারণ লাভেপি উপ্পজ্জিতুং নপ্পহোন্তি. ইমে পন সভাৰধম্মজাতিকত্তা কারণ লাভে সতি উপ্পজ্জিতুং পহোন্তীতি. এৰঞ্হিসতি, উপ্পাদং অপত্তানংপি তেসং পরমত্থজাতিকতা সিদ্ধা হোতীতি. ‘‘সহ অনুসেন্তী’’তি একতো অনুসেন্তীতি ৰুত্তা কামরাগানুসযো চ পটিঘানুসযো চ মানানুসযো চ দিট্ঠানুসযো চ ৰিচিকিচ্ছানুসযো চ. ইমেসং সত্তানং সত্তসন্তানে অনুসযকিচ্চমত্তং ঠপেত্ৰা একতো উপ্পত্তি নাম নত্থি. যদি একতো উপ্পজ্জেয্যুং. দ্ৰাদসা কুসলচিত্তানি সত্তসন্তানে নিচ্চকালম্পি একতো উপ্পজ্জেয্যুং. ন চ উপ্পজ্জন্তি. তস্মা ৰিঞ্ঞাযতি উপ্পজ্জনং নাম অপ্পহীনট্ঠেন উপ্পজ্জনারহভাৰো ৰুত্তোতি. সেন্তীতি ৰত্ৰা তদত্থং দস্সেতি ‘‘ৰিসুং’’তিআদিনা. ‘‘অৰুট্ঠিতা’’তি উপ্পাদং অপত্তা. ‘‘তথাপৰত্তা’’তি চালনাকারেন পৰত্তা. পুন ‘‘তথাপৰত্তা’’তি জৰনসহজাতাকারেন পৰত্তা. ‘‘যেসং’’তি কামরাগানুসযাদীনং. ‘‘আৰজ্জনং’’তি আৰজ্জনচিত্তং. ‘‘দমথং’’তি সুদন্তভাৰং. ‘‘তথা পৰত্তা’’তি চিত্তসন্তানানুসযনাকারেন পৰত্তা. তাঅৰত্থা যেসং তে তদৰত্থিকা. যদি তে উপ্পাদং অপত্তা. এৰংসতি, তে পরমত্থাপি নাম ন ভৰেয্যুন্তি চোদনং পরিহরতি ‘‘তে পনা’’তিআদিনা. সচে তে কুসলাব্যাকত চিত্তসন্তানম্পি অনুগতা. এৰংসতি, তে কুসলাব্যাকতানি নাম সিযুন্তি চোদনং পরিহরতি ‘‘ন চা’’তিআদিনা. অথ তে একন্ত অকুসলা সিযুং. এৰংসতি, কুসলাব্যাকতেহি ৰিরুদ্ধা ভৰেয্যুংতি চোদনং পরিহরতি ‘‘নাপী’’তিআদিনা. যদি উপ্পাদং অপত্তা. এৰংসতি, কালৰিমুত্তা সিযুন্তি আহ ‘‘নাপিকালত্তয ৰিনিমুত্তা’’তিআদিং. ‘‘সানুসযে চিত্তসন্তানে’’তি সেক্খপুথুজ্জনানং চিত্তসন্তানে. ‘‘সহ মগ্গুপ্পাদা’’তি মগ্গুপ্পাদেন সহেৰ. ‘‘তত্থ তত্থ ৰুত্তো’’তি অট্ঠকথাটীকাসু ৰুত্তো. ‘‘অনাগতসামঞ্ঞং’’তি অনাগতসদিসং. ন একন্ত অনাগতন্তিপি ৰদন্তি. কথং তে সঙ্খতজাতিকা হোন্তীতি আহ ‘‘তেহি মগ্গে’’তিআদিং. ৰিভাৰনিপাঠে. ‘‘অপ্পহীনা’’তি মগ্গেন অপ্পহীনা. ‘‘তদৰত্থা’’তি উপ্পজ্জনারহাৰত্থা. ‘‘তং সভাৰত্তা’’তি কামরাগাদি সভাৰত্তা. ‘‘তথা ৰুচ্চন্তী’’তি অনুসযাতি ৰুচ্চন্তি. অনাগতা নাম ন হোন্তি. চিত্তসন্তানে ৰত্তমানভাৰেন সিদ্ধত্তা. ‘‘হঞ্চি পজহতী’’তি যদিপজহতি. ‘‘তেনহী’’তি ততো এৰ. ‘‘রত্তো’’তি রাগসমঙ্গী হুত্ৰা. ‘‘দুট্ঠো’’তি দোসসমঙ্গী হুত্ৰা. ‘‘মুল়্হো’’তি মোহসমঙ্গী হুত্ৰা পজহতীতি দোসো আপজ্জতীতি ৰুত্তং হোতি. পরিযুট্ঠান পত্তানং রাগাদীনং. ‘‘মগ্গৰজ্ঝং’’তি মগ্গেন ৰধিতব্বং. ‘‘উপ্পন্নং’’তি পচ্চুপ্পন্নং. ৰত্তমানঞ্চ তং উপ্পন্নঞ্চাতি ৰত্তমানুপ্পন্নং. ‘‘ভুত্ৰা’’তি আরম্মণং পরিভুঞ্জিত্ৰা. ৰিগচ্ছতীতি ৰিগতং. ভুত্ৰা ৰিগতঞ্চ তং উপ্পন্নঞ্চাতি ভুত্ৰা ৰিগতুপ্পন্নং. ৰিপচ্চনত্থায ওকাসং করোন্তীতি ওকাসকতং. ওকাসকতঞ্চ তং উপ্পন্নঞ্চাতি ওকাসকতুপ্পন্নং. সমুদাচারো ৰুচ্চতি ভিয্যো পৰত্তনং. সমুদাচারো চ সো উপ্পন্নঞ্চাতি সমুদাচারুপ্পন্নং. খন্ধপঞ্চক সঙ্খাতং ভূমিং লভতীতি ভূমিলদ্ধং. ভূমিলদ্ধঞ্চ তং উপ্পন্নঞ্চাতি ভূমিলদ্ধুপ্পন্নং. আরম্মণং অধিকতরং গণ্হাতীতি আরম্মণাধিগ্গহিতং. আরম্মণাধিগ্গহিতঞ্চ তং উপ্পন্নঞ্চাতি আরম্মণাধিগ্গহিতুপ্পন্নং. মহগ্গতজ্ঝানেন অৰিক্খম্ভিতঞ্চ তং উপ্পন্নঞ্চাতি অৰিক্খম্ভিতুপ্পন্নং. মগ্গেন অসমুগ্ঘাটিতঞ্চ তং উপ্পন্নঞ্চাতি অসমুগ্ঘাটিতুপ্পন্নং. এৰং মগ্গৰজ্ঝানং অনুসযানং উপ্পন্নভাৰেন ৰুত্তত্তা পচ্চুপ্পন্নতা পরিযাযোৰ তেসং ৰত্তব্বোতি. ‘‘সেক্খা’’তি সত্তসেক্খপুগ্গলা.

ওরম্ভাগো ৰুচ্চতি কামলোকোচেৰ পুথুজ্জনভাৰো চ. ওরম্ভাগে সন্দিস্সন্তীতি ওরম্ভাগিযানি. উদ্ধংভাগো ৰুচ্চতি মহগ্গতভাৰোচেৰ অরিযভাৰো চ. উদ্ধংভাগে সন্দিস্সন্তীতি উদ্ধংভাগিযানি. তত্থ. কামচ্ছন্দো, ব্যাপাদো,তি ইমানি দ্ৰেসং যোজনানি কামলোকসঙ্খাতে ওরম্ভাগে এৰ সন্দিস্সন্তি. দিট্ঠি, ৰিচিকিচ্ছা, সীলব্বতপরামাসো,তি ইমানি তীণি পুথুজ্জনভাৰ সঙ্খাতে. সেসানি পন পঞ্চ মহগ্গতভাৰসঙ্খাতে চ অরিযভাৰসঙ্খাতেচ উদ্ধংভাগেপি সন্দিস্সন্তি. অথৰা. পুরিমানি পঞ্চযস্স তানি মগ্গেন অপ্পহীনানি, তং উপরিভৰগ্গে ঠিতংপি কামলোকসঙ্খাতং ওরম্ভাগং আকড্ঢন্তি, তস্মা ওরম্ভাগায সংৰত্তন্তীতি ওরম্ভাগিযানি. পচ্ছিমানি পঞ্চ যস্স তানি অপ্পহীনানি, তং কামলোকে ঠিতংপি উদ্ধংভাগং আকড্ঢন্তি, তস্মা উদ্ধংভাগায সংৰত্তন্তীতি উদ্ধংভাগিযানি. তত্থহি দ্ৰেরূপারূপরাগা একন্তেন মহগ্গতভাৰং আকড্ঢন্তিযেৰ. মানো চ উদ্ধচ্চঞ্চ অৰিজ্জাচাতি ইমানি চ রূপারূপরাগসহগতানি হুত্ৰা আকড্ঢন্তি. ওরং হেট্ঠিমং কামলোকং ভজন্তীতি ওরম্ভাগিযানি. উদ্ধং রূপারূপলোকং ভজন্তীতি উদ্ধংভাগিযানীতিপি ৰণ্ণেন্তি. ‘‘ইতরানি পনা’’তি দ্ৰে ইস্সা সংযোজন মচ্ছরিযসংযোজনানি. ‘‘কমোপন দ্ৰিন্নং পী’’তি ইধ সঙ্গহে দ্ৰিন্নংপি অনুক্কমোপন.

‘‘ৰিবাধেন্তী’’তি ৰিহিংসন্তি. ‘‘উপতাপেন্তিচা’’তি উপগন্ত্ৰা সন্তাপেন্তি. সেসমেত্থ সুৰিঞ্ঞেয্যং.

অকুসলসঙ্গহানুদীপনা নিট্ঠিতা.

১৬৩. মিস্সকসঙ্গহে. ‘‘চিত্তপ্পটিপাদনং চিত্তনিযোজনং. ‘‘সুগতি দুগ্গতি ৰিৰট্টসঙ্খাতাসু চা’’তি সুগতিভৰ দুগ্গতি ভৰনিব্বানসঙ্খাতাসু চ. নিব্বানঞ্হি ৰট্টতো গিগতত্তা ৰিৰট্টন্তি ৰুচ্চতি. ‘‘দস্সনাদীহি এৰা’’তি দস্সনসঙ্কপ্পনাদীহি এৰ. উজুগতি নাম হিতসুখসংৰত্তনিকা পৰত্তি ৰুচ্চতি. ৰঙ্কগতিনাম অহিত দুক্খসংৰত্তনিকা পৰত্তি. ‘‘পথঙ্গানী’’তি পথস্সমগ্গস্স অঙ্গানি. মগ্গোতি চ উপাযো ৰুচ্চতীতি আহ ‘‘উপাযঙ্গানী’’তি. ‘‘ইতরানী’’তি সম্মাদিট্ঠি সম্মাসঙ্কপ্পাদীনি অঙ্গানি. উজুগতিযা গমনস্স উপাযঙ্গানি. ইমেপি চত্তারো মগ্গঙ্গ ধম্মা ধম্মা নাম আগতা. ‘‘তথা তথা পৰত্তানং’’তি মুসাৰাদাদিৰসেন পৰত্তানং. ‘‘না নামগ্গোৰা’’তি মিচ্ছামগ্গো চ সম্মামগ্গো চ.

‘‘অত্তাধীনৰুত্তিকে’’তি অত্তাযত্তপ্পৰত্তিকে. অত্তনো গতি নাম চক্খুন্দ্রিযাদীনং দস্সনাদি কিচ্চমেৰ ৰুচ্চতি. ‘‘ইস্সরা অধিপতিনো’’তি ইদং আধিপ্পচ্চত্থপাকটত্থং ৰুত্তং. অত্থো পন ভাৰপ্পধানৰসেন গহেতব্বো. ইন্দ্রিযং ইস্সরিযং আধিপ্পচ্চন্তিহি ইমে একত্থাতি. ‘‘ইত্থাকারানি’’ নাম ইত্থিলিঙ্গপুরিসলিঙ্গাদি. ‘‘অঞ্ঞথা অপ্পৰত্তিযং’’তি ইত্থিসণ্ঠানে পুরিসলিঙ্গাদীনং, পুরিসসণ্ঠানে ইত্থিলিঙ্গাদীনং অপ্পৰত্তিযং. তেনাহ ‘‘তথাহী’’তিআদিং. মনো ৰিজাননকিচ্চে সম্পযুত্তধম্মানং ইস্সরো হোতি অনঞ্ঞাভিভৰনীযভাৰেন পৰত্তনতোতি সম্বন্ধো. এৰং পরত্থ. ‘‘আরম্মণাধিমুচ্চনে’’তি আরম্মণে নিরাসঙ্কপ্পৰত্তিযং. ‘‘আরম্মণুপট্ঠানে’’তি চিত্তে বুদ্ধগুণাধিকস্স আরম্মণস্স উপট্ঠানে. ‘‘চতুসচ্চধম্মো’’তি তেন পুগ্গলেন অনঞ্ঞাত পুব্বো চতুসচ্চ ধম্মো. অনঞ্ঞাত পুব্বং অমতং ৰা পদং. অনঞ্ঞাতং ঞস্সামি ইতি পৰত্তং ইন্দ্রিযন্তি সমাসো. পটিপন্নস্সাতি পন অত্থতো সিদ্ধত্তা ৰুত্তং. ‘‘ৰিপ্পকতভাৰেনা’’তি অনিট্ঠঙ্গতভাৰেন. পুনপ্পুনং জাননকিচ্চযুত্তানং মজ্ঝে ছন্নংসেক্খানং. এতেন অৰসদ্দস্সযাৰ সব্বকিলেসপ্পহানা জাননন্তি অত্থং দীপেতি. পথম মগ্গেন ঞাতং মরিযাদং অনতিক্কম্ম জাননন্তিপি ৰণ্ণেন্তি. আজানিতত্থাতি অঞ্ঞাতাৰী. অরহা খীণাসৰো কতকিচ্চো ৰুসিত ব্রহ্মচরিযো. অঞ্ঞাতাৰিনো ইন্দ্রিযন্তি অঞ্ঞাতাৰিন্দ্রিযন্তি অত্থং দস্সেতুং ‘‘পরিনিট্ঠিত আজাননকিচ্চস্সা’’তিআদি ৰুত্তং. ‘‘তব্বিমুত্তী’’তি অত্তগ্গাহ ৰিমুত্তি. ‘‘তস্মিং ৰা’’তি তস্মিং অত্তনিৰা. ‘‘সংকিলিট্ঠো’’তি নানাকিলেসেহি সংকিলেসিতো. ‘‘ৰিপ্ফন্দিতো’’তি নানাসুখদুক্খেহি সংকম্পিতো. ‘‘ৰোদানপত্তিযা’’তি ৰিসুদ্ধিপত্তত্থায. ‘‘তাযপটি পত্তিযা’’তি করণত্থে, হেতু অত্থে ৰা করণৰচনং. ‘‘ৰোদানপত্তিযা’’তি সামিঅত্থে সামিৰচনং.

‘‘বলীযন্তী’’তি নামধাতুনিদ্দেসো. তেনাহ ‘‘বলসা করোন্তী’’তি. ‘‘বলসা’’তি বলেন. পরিতো সমন্ততো সেন্তি পরিৰারেন্তীতি পরিস্সযা. অস্সদ্ধস্স ভাৰো অস্সদ্ধিযং. কোসজ্জসঙ্খাতেন পটিপক্খধম্মেন. মুট্ঠা নট্ঠা সতি যস্সাতি মুট্ঠস্সতি. মুট্ঠস্সতিস্স ভাৰো মুট্ঠস্সচ্চং. ‘‘সেসদুক দ্ৰযং’’তি অহিরিকদুকং হিরিদুকঞ্চ.

গহপতি, জাযম্পতী, তিআদীসু ৰিয পতিসদ্দো সামিইস্সর পরিযাযোতি আহ ‘‘পতীতি সামিইস্সরো’’তি. ‘‘পরেসং’’তি সহজাতেসু পরেসং ইন্দ্রিযানং. ‘‘পরেহী’’তি কম্মত্থে করণৰচনং. পরে সহজাতে ইন্দ্রিয ধম্মেতি অত্থো. ‘‘অধিকো’’তি অধিকতরো. ‘‘অত্তাধীন ৰুত্তীনং’’তি অত্তাযত্তৰুত্তীনং. ‘‘ছন্দাগমনৰসেন ৰা’’তি এত্থ আগচ্ছতি ফলং এতেনাতি আগমনং. আদিকারণং, মূলকারণং, পভৰকারণং. ছন্দো এৰ আগমনং ছন্দাগমনং. তেনাহ ‘‘পুব্বে অতীতভৰেসূ’’তিআদিং. সম্পযুত্ত ধম্মে অত্তপরাধীনে কত্ৰাতি সম্বন্ধো. মহোঘো তিণপণ্ণকসটে অত্তপরাধীনে করোন্তো ৰিযাতি যোজনা. তত্থ ‘‘অত্তপরাধীনে’’তি অত্তসঙ্খাতোপরো অত্তপরো. অত্তপরেন অধীনা অত্তপরাধীনাতি অত্থো. ‘‘সেসেসুপী’’তি সেসেসু ৰীরিয চিত্ত ৰীমংসাধিপতীসুপি. এতেন ‘ৰীরিযমেৰ অধিপতি ৰীরিযাধিপতি. ৰীরিযৰতো কিং নাম কম্মং ন সিজ্ঝতীতি এৰং পুব্বাভিসঙ্খারৰসেন ৰা পুব্বে অতীতভৰেসু সুট্ঠু আসেৰিতৰীরিযাগমনৰসেন ৰা তেসু তেসু কল্যাণ পাপকম্মেসু সম্পযুত্ত ধম্মে মহোঘো ৰিয তিণপণ্ণকসটে অত্তপরাধীনে নিচ্চং পগ্গহিতধুরেকত্ৰা পৰত্তং ৰীরিয’ন্তিআদিনযং অতিদিসতি. ‘‘পচ্ছিমা তযো ধম্মা’’তি ৰীরিয চিত্ত ৰীমংসা ধম্মা. পরৰসেপি ৰত্তন্তি, তদা তেসং অধিপতিভাৰো নত্থীতি চোদনা. অধিপতি কিচ্চং নাম ধুরৰাহিতাতি সম্বন্ধো. ‘‘তং তং কিচ্চ ৰিসেসং অনপেক্খিত্ৰা’’তি চক্খুন্দ্রিযং দস্সন কিচ্চে ইস্সরো, সোতিন্দ্রিযং সৰন কিচ্চেতিআদীসু তং তং কিচ্চৰিসেসং অপেক্খতি, তথা অনপেক্খিত্ৰা. ‘‘ৰিজাননাদি কিচ্চং’’তি ‘মনো আরম্মণ ৰিজাননে’তিআদিনা ৰুত্তং সব্বং ইন্দ্রিয কিচ্চং.

ভুসো হরন্তি ৰহন্তীতি আহারা. ‘‘ভুসো’’তি অতিরেকতরন্তি অত্থো. কথং পন ভুসো হরন্তীতি আহ ‘‘সহজাতাদী’’তিআদিং. তেতে পচ্চয ধম্মা তেতে পচ্চযুপ্পন্ন ধম্মা চাতি যোজনা. ‘‘এত্থা’’তি ইমিস্সং পাল়িযং. ‘‘পচ্চযাহারো ৰা’’তি এত্থ হেতু আরম্মণাদিকো সব্বোপচ্চযো পচ্চযাহারো নাম. আহার পচ্চযোপন ৰিসুং একো পচ্চযৰিসেসো. ‘‘পচ্চযট্ঠেনা’’তি হেতু আরম্মণাদি পচ্চযট্ঠেন. ‘‘আহারভূতা’’তি উপত্থম্ভনকিচ্চৰিসেসভূতাতি ৰুত্তং হোতি. ‘‘কল়ীরঙ্কুরানং’’তি কম্মত্থে সামিৰচনং. ‘‘ৰড্ঢিযা’’তি ৰড্ঢনত্থায. ‘‘ঠিতিযা’’তি ঠিতত্থায. ইমেসত্তা ৰট্টে পৰত্তন্তীতি সম্বন্ধো. সেসমেত্থ সুৰিঞ্ঞেয্যং. ‘‘পক্খে ৰিযূহিত্ৰা’’তি পক্খে সঞ্চালেত্ৰাতি ৰুত্তং হোতি. ‘‘পক্খে’’তি ৰা পক্খেহি ৰাতং ব্যূহিত্ৰা. ‘‘তদনুসযিতস্সা’’তি তস্মিং ৰিপাক সন্তানে অনুসযি তস্স. ‘‘ৰিভাৰেত্ৰা’’তি পচ্চক্খতো ৰিভূতং পাকটং কত্ৰা. ‘‘অলভিত্ৰা’’তি চক্খুম্হি অলভিত্ৰা. অপস্সিত্ৰাতি ৰুত্তং হোতি. ‘‘তত্থেৰা’’তি নিৰাসট্ঠানে এৰ. ‘‘সম্পযুত্তা’’তি ৰিঞ্ঞাণেন সম্পযুত্তা. ভৰিংসু ৰড্ঢিং সূতি ভূতা. সম্ভৰং ৰুড্ঢিকারণং এসন্তি গৰেসন্তীতি সম্ভৰেসিনো. ‘‘ৰুত্তনযেনা’’তি ‘যথা যৰবীজানং ৰা সালিবীজানং ৰা’তিআদিনা ৰুত্তনযেন. ‘‘আহারেতী’’তি পৰত্তেতি. ‘‘মনোসঞ্চেতনাহারো’’তি কুসলাকুসল কম্মভূতো মনোসঞ্চেতনাহারো. ‘‘তযো ভৰে’’তি তযো কামভৰাদিকে উপপত্তিভৰে. ঠিতিযাতি চ অনুগ্গহাযাতি চ ৰুত্তং. ইতরথা উপ্পত্তিযাতি চ ৰুত্তং সিযাতি অধিপ্পাযো.

‘‘দুব্বলকিচ্চট্ঠানৰত্থুকত্তা’’তি দুব্বলকিচ্চত্তা দুব্বলট্ঠানত্তা দুব্বলৰত্থুকত্তা. ‘‘অভিনিপাত মত্তানি হোন্তী’’তি দস্সন সৰনাদি মত্তানি হোন্তীতি অধিপ্পাযো. ‘‘ৰিতক্ক পচ্ছিমকং ঝানং’’তি ঝানানি নাম ৰিতক্কস্স পচ্ছানুগতং হোতীতি অত্থো. ‘‘তত্থা’’তি তেসুপঞ্চৰিঞ্ঞাণেসু. ‘‘তা’’তি ৰেদনা একগ্গতা. ‘‘তং’’তি ঝানকিচ্চং. একগ্গতা বলৰতী ন হোতীতি সম্বন্ধো. ‘‘মগ্গিন্দ্রিয বলভাৰাযা’’তি মগ্গিন্দ্রিয বলভাৰত্থায. লোকুত্তরৰিপাকানি জৰনকিচ্চানি চ সাধিপতিকানি চ হোন্তীতি ৰুত্তং ‘‘তিভূমকানী’’তিআদি. সেসমেত্থ সুবোধং.

মিস্সকসঙ্গহানুদীপনা নিট্ঠিতা.

১৬৪. বোধিপক্খিযসঙ্গহে. ‘‘সতিপট্ঠানা’’তি এত্থ পসদ্দো পমুখত্থো পধানত্থোতি আহ ‘‘পমুখা পধানা হুত্ৰা’’তি. ঠাসদ্দো গতিনিৰত্তি অত্থোতি আহ ‘‘চিত্তগমনং নিৰত্তেত্ৰা পৰত্তন্তী’’তি. ‘‘কাযে অনুপস্সনা’’তি কাযে পৰত্তা অনুপস্সনা. পুনপ্পুনং পস্সন্তি যোগিনো এতাযাতি অনুপস্সনা. কতমং পস্সন্তীতি আহ ‘‘অস্সাসপস্সাসাদিকস্সা’’তিআদিং. কথঞ্চতং পস্সন্তীতি ৰুত্তং ‘‘তং তং কাযভাৰেনা’’তিআদি. ইদানি পুনপ্পুন সদ্দস্স অত্থং দস্সেন্তো ‘‘যাৰা’’তিআদিমাহ. ৰেদনানু পস্সনাদীসুপি এসেৰনযো. তং ন সুন্দরং. কস্মা, সকলস্স রূপকাযস্স অধিপ্পেতত্তা. সেসমেত্থ সুৰিঞ্ঞেয্যং. যদি এৰন্তিআদীসু. ‘‘ইতরাপি সিদ্ধা’’তি কাযানুপস্সনাদযোপি সিদ্ধা. কস্মা, ধম্মানুপস্সনায অন্তোগধত্তা. ‘‘তথা অনুপস্সন্তস্সা’’তি রূপ্পনলক্খণতো অনুপস্সন্তস্স. ‘‘তং তং সমূহভূতরূপধম্মৰসেনা’’তি অস্সাসপস্সাসাদি সমূহভূতস্স রূপ ধম্মস্স ৰসেন. ‘‘সুভাদিৰিপল্লাসস্সা’’তি সুভ সুখ নিচ্চৰিপল্লাসস্স. ‘‘ওল়ারিকস্সা’’তি সুপাকটৰসেন ওল়ারিকস্স. ‘‘অত্তূপনিবন্ধা’’তি অত্তেন উপনিবন্ধা, পটিবদ্ধা.

‘‘কামং’’তি একন্তেন. উপসুস্সতূতি সম্বন্ধো. ‘‘যন্তং’’তি ঝানাভিঞ্ঞা মগ্গফলনিব্বানং. ‘‘ৰীরিযস্স সণ্ঠানং’’তি ৰীরিযগমনস্স ৰীরিযপ্পৰত্তনস্স নিৰত্তিৰসেন সণ্ঠানং. উপ্পন্নসদ্দেন অতীত কিলেসাপি পচ্চুপ্পন্ন কিলেসাপি গহেতব্বা হোন্তীতি আহ ‘‘অসুকস্মিং কালে’’তিআদিং. ‘‘ময্হং উপ্পন্নং’’তি ইদানি উপ্পন্নং. ‘‘পহানাযা’’তি এত্থ সমুচ্ছেদপ্পহানং অধিপ্পেতন্তি আহ ‘‘অনুপ্পাদ ধম্মতাপাদনকরণত্থং’’তি. তত্থ অনুপ্পাদো ধম্মো যেসং তে অনুপ্পাদ ধম্মা. মগ্গেন পহীনা অকুসল ধম্মা. অনুপ্পাদ ধম্মানং ভাৰোতি ৰিগ্গহো. অনুপ্পাদ ধম্মতায আপাদনং. তস্স করণন্তি সমাসো. ‘‘দিস্ৰা’’তি তেসং উপ্পত্তি ৰত্থুং দিস্ৰা. ‘‘পচ্চযসমুচ্ছিন্দনত্থং’’তি পচ্চযভূতস্স অনুসযস্স সমুচ্ছিন্দনত্থং. ‘‘অপত্তা’’তি ইদানি অপত্তা. ‘‘সমযে’’তি বুদ্ধুপ্পাদনৰমক্খণে. ‘‘নিযামং ন ওক্কমন্তী’’তি অরিযমগ্গসঙ্খাতং সম্মত্তনিযামং ন ওক্কমন্তি. নপ্পৰিসন্তি. কিলেসেহি অকোপেতব্বতায অকুপ্পো ধম্মো যস্সাতি অকুপ্প ধম্মো. খীণাসৰো. অকুপ্প ধম্মস্স ভাৰো অকুপ্প ধম্মতা. অরহত্ত ফলং. ‘‘তেসং’’তি কুসলানং ধম্মানং. উপ্পন্নানং পাপকানং পহানাযাতি কত্ৰা ৰিসুদ্ধিধম্মেসু যোগং করোন্তস্স অনুক্কমেন ভাৰনা কম্মে মত্থকং পত্তেআদিতো পট্ঠায উপ্পন্নাপি পাপকা পহিয্যন্তি. অনুপ্পন্নাপি নুপ্পজ্জন্তি. অনুপ্পন্নাপি কুসলা উপ্পজ্জন্তি. উপ্পন্নাপি ভাৰনা পারিপূরিং গচ্ছন্তি. এসনযো অনুপ্পন্নানং পাপকানং অনুপ্পাদাযাতিআদীসু. এৰং চতূসু মুখেসু একেকমুখেনপি সম্মা পদহন্তস্স সম্মপ্পধানং চতুকিচ্চসাধকং হোতি. তেনাহ ‘‘এতেসু পনা’’তিআদিং.

অভিৰিসিট্ঠেন ধম্মৰৰত্থানঞ্ঞাণেন ঞাতব্বা সব্বে পরমত্থ ধম্মা অভিঞ্ঞেয্যা নাম. ‘‘অভিঞ্ঞা সিদ্ধী’’তি অভিজানন কিচ্চসিদ্ধি. ৰিসুং ৰিসুং পরিচ্ছিন্দিত্ৰা ঞাতব্বা চতুসচ্চ ধম্মা পরিঞ্ঞেয্যা নাম. তেহি দুক্খসচ্চ ধম্মা পরিঞ্ঞাতব্বভাৰেন, সমুদয সচ্চ ধম্মা পহাতব্ব ভাৰেন, নিরোধসচ্চ ধম্মা সচ্ছিকাতব্ব ভাৰেন, মগ্গসচ্চ ধম্মা ভাৰেতব্বভাৰেন ঞাতব্বা হোন্তীতি. ‘‘ভাৰনাসিদ্ধী’’তি ভাৰনাকিচ্চ সিদ্ধি. তং সংযুত্তকে ইমাযপাল়িযা সমেতীতি সম্বন্ধো. ‘‘ৰিভঙ্গে পনা’’তি ইদ্ধিপাদৰিভঙ্গে পন. ‘‘চিত্ত চেতসিকরাসী’’তি সহ পুব্বভাগভাৰনায উত্তরি মনুস্স ধম্মপরিযা পন্না চিত্তচেতসিকরাসি. ‘‘তত্থ পনা’’তি ৰিভঙ্গে তস্মিং উত্তরচূল়ভাজনীযে পন. ‘‘ইধা’’তি ইমস্মিং সঙ্গহে.

চত্তারি সোতাপত্তিযঙ্গানি নাম বুদ্ধে অৰেচ্চপ্পসাদেন সমন্নাগতো. ধম্মে, সঙ্ঘে, অরিযকন্তেহি সীলেহি সমন্নাগতোতি এৰং ৰুত্তানি সোতাপত্তিযা অঙ্গানি. তত্থ ‘‘অরিযকন্তেহী’’তি অরিযজনেহি কামিতেহি ইচ্ছিতেহি. ‘‘সীলেহী’’তি পঞ্চনিচ্চসীলেহি, আজীৰট্ঠমকসীলেহি ৰা. ‘‘সম্মপ্পধানেসূ’’তি সম্মপ্পধানকিচ্চেসু.

‘‘সোল়সহিকিচ্চেহী’’তি একেকস্মিং সচ্চে চত্তারি চত্তারি কত্ৰা সোল়সহি কিচ্চেহি. পীল়নট্ঠো, সঙ্খতট্ঠো, তিআদীহি সোল়সহি অত্থেহীতি ৰুত্তং হোতি. তে চ অত্থা পরতো আগমিস্সন্তি. সতি এৰ সম্বোজ্ঝঙ্গোতি ৰুত্তং, কথং পন সাসতি সম্বোধিং সমুট্ঠাপেতীতি আহ ‘‘সাহী’’তিআদিং. এসনযো সেসবোজ্ঝঙ্গেসুপি. ‘‘তেসু ধম্মেসূ’’তি অজ্ঝত্তবহিদ্ধা ধম্মেসু. ‘‘লীনসঙ্কোচ কোসজ্জপক্খং’’তি লীনপক্খ সঙ্কোচ পক্খকোসজ্জ পক্খং. ধুরং সুট্ঠু পগ্গণ্হাতি উক্খিপতীতি ধুরসম্পগ্গহো. ‘‘ধুরং’’তি সমথধুরং ৰিপস্সনা ধুরঞ্চ. ‘‘অরতি উক্কণ্ঠ পক্খং’’তি অরতিপক্খ নিব্বিদাপক্খং. ধম্মে রতি ধম্মরতি. ধম্মে নন্দী ধম্মনন্দী. ধম্মে আরামো ধম্মারামো. ‘‘সারম্ভো’’ নাম চিত্তৰিহেসা. ‘‘দরথো’’ নাম চিত্তসন্তাপো. সমাহিতো ভিক্খৰে যথাভূতং পজানাতি পস্সতীতি ৰচনতো পঞ্ঞায সমাধি পাদকতা পাকটাতি ৰুত্তং ‘‘তস্সা’’তিআদিং. সমং অৰিসমং অত্তনো কিচ্চং ৰহতি সীলেনাতি সমৰাহী. সমৰাহিস্স ভাৰো সমৰাহিতা.

সা পন চতুব্বিধা হোতীতি সম্বন্ধো. ‘‘তস্সা’’তি সম্মাদিট্ঠিযা. ‘‘ৰিসাখা’’তি আলপন পদং. ‘সব্বে লোকুত্তরে হোন্তী’তি ৰচনস্স সম্বন্ধং দস্সেতুং ‘‘তে পন সত্ততিংসপ্পভেদা’’তিআদিমাহ. ন ৰট্ঠানানি অস্স অত্থীতি নৰট্ঠানিকং. ‘‘লোকুত্তরে’’তি লোকুত্তর চিত্তে. ‘‘অত্তপ্পটিপক্খানং’’তি অত্তনা উজুপ্পটিপক্খানং. ‘‘তে’’তি বোধিপক্খিয ধম্মা. এতেন দস্সেতীতি সম্বন্ধো. ‘‘কুণ্ডলিযা’’তি এৰং নামকং ব্রাহ্মণং আলপতি. ‘‘ৰিজ্জা’’তি মগ্গৰিজ্জা. ‘‘ৰিমুত্তী’’তি ফলৰিমুত্তি.

বোধিপক্খিযানুদীপনা নিট্ঠিতা.

১৬৫. সব্বসঙ্গহে. ‘‘পঞ্চরাসযো’’তি পঞ্চসঙ্গহা. ‘‘অতীতাদিভেদভিন্নানং’’তি অতীতানাগতপচ্চুপ্পন্নভেদেন, অজ্ঝত্ত বহিদ্ধাভেদেন, ওল়ারিকসুখুমভেদেন, হীনপণীতভেদেন, দূরসন্তিকভেদেন চ ভিন্নানং. ‘‘উপপত্তি দ্ৰারেসূ’’তি চক্খাদি দ্ৰারেসু. ‘‘কম্মদ্ৰারেসূ’’তি কাযকম্মদ্ৰারাদীসু. ‘‘সঙ্গম্মা’’তি সঙ্গন্ত্ৰা. ‘‘সমাগম্মা’’তি সমাগন্ত্ৰা. ‘‘সাধারণ কিচ্চানি ৰা’’তি সব্বিরিযাপথেহি সাধারণ কিচ্চানিৰা. পাল়িপাঠে. ‘‘কিঞ্চা’’তি কস্মা চ. ‘‘সঙ্খারেৰদেথা’’তি সঙ্খারা সঙ্খারা ইতি তুম্হে ৰদেথ. ‘‘কিঞ্চসঙ্খতং’’তি কতমঞ্চসঙ্খতং. ‘‘রূপং রূপত্থাযা’’তি রূপৰিকতিযা জাতত্থায রূপসঙ্খাতং সঙ্খতং অভিসঙ্খরোন্তীতি অত্থো. উপভোগো নাম ৰত্থাভরণাদিকো অন্তোভোগো. পরিভোগো নাম মঞ্চপীঠাদিকো বাহির পরিভোগো. সম্পরাযিকঞ্চ ৰেদনন্তি অধিকারো. সেসেসুপি সঞ্ঞাসঙ্খার ৰিঞ্ঞাণেসুপি. ‘‘দানং দানত্থাযা’’তি দানপুঞ্ঞস্স জাতত্থায. দানসঙ্খাতং সঙ্খতং অভিসঙ্খরোন্তীতি অত্থো. অথৰা দানস্স অত্থো দানত্থো. ‘‘অত্থো’’তি চ ৰিপাকত্থো ফলত্থো. দানৰিপাকত্থায দানফলত্থায দানপুঞ্ঞসঙ্খাতং সঙ্খতং অভিসঙ্খরোন্তীতি অত্থো. এৰং সেসেসুপি. ‘‘অনুযুঞ্জন্তা’’তি ৰিপস্সনা কম্মং অনুযুঞ্জন্তা. ‘‘তীসু ধম্মেসু কিলমিস্সন্তী’’তি ৰুত্তং. কথং কিলমিস্সন্তীতি আহ ‘‘তথাহি যথা’’তিআদিং. ‘‘সুখসঞ্ঞিতেসু পটিসরণেসূ’’তি চিত্তসাতচিত্তরতি পটিলাভত্থায পটিসরণেসু আরম্মণেসু. ‘‘তাহী’’তি সম্পত্তীহি. ‘‘তা’’তি সম্পত্তিযো. পরমুক্কংসগতং সুখসঞ্ঞিতট্ঠানং হোতি. তস্মা তত্থ দুক্খানুপস্সনাঞাণং অতিরেকতরং পৰত্তেতব্বন্তি তদত্থায ভগৰা তং ৰেদনং ৰিসুং একং খন্ধং কত্ৰা খন্ধ দেসনং দেসেতীতি অধিপ্পাযো. এসনযো পরত্থপি. ‘‘ঞাণসম্মতং’’তি পুথুজ্জনেহি ঞাণসম্মতং. ‘‘পরমং অত্তানং কত্ৰা’’তি লোকে ৰিঞ্ঞুত্তং পরমং হোতি, তস্মা ৰিজাননং পরমং অত্তানং কত্ৰা. সেসমেত্থ সুপাকটং. ‘‘যত্থভুঞ্জতী’’তিআদীসু. ‘‘যত্থ ভুঞ্জতী’’তি যস্মিং ভাজনে ভুঞ্জতি. ‘‘যঞ্চ ভুঞ্জতী’’তি যঞ্চ ভোজনং ভুঞ্জতি. ‘‘যেন চ ভুঞ্জতী’’তি যেনব্যঞ্জনেন ভুঞ্জতি. ‘‘যো চ ভোজকো’’তি সমীপে ঠত্ৰা পরিৰেসকো. ‘‘যো চ ভুঞ্জিতা’’তি যো চ ভুঞ্জকো.

‘‘সাসৰা এৰা’’তি সাসৰা নাম লোকিয ধম্মা. ‘‘উস্সাহন্তা ৰিয হোন্তী’’তি অব্যাপার ধম্মত্তা ৰুত্তং. ন হি অব্যাপার ধম্মানং একন্তেন উস্সাহো নাম অত্থি. ফলস্স নিব্বত্তনতো ফলত্থায উস্সাহন্তা ৰিয হোন্তীতি. ‘‘আকিরিত্ৰা’’তি পত্থরিত্ৰা. সেসমেত্থ সুবোধং.

ধাতুসঙ্গহে. ‘‘অত্তনো এৰ সভাৰং’’তি অত্তনো সভাৰং এৰাতিপি যুজ্জতি. ‘‘ঈহা চ ব্যাপারো চা’’তি অভিক্কমামি পটিক্কমামীতিআদিনা উস্সাহো চ, অভিক্কমনাদি ব্যাপারো চ. ‘‘ন চ জীৰযোগা’’তি ন চ লোকিযমহাজন সম্মতেন জীৰেন যুত্তা. অট্ঠকথাপাঠে. যাযতি এত্থাতি যন্তং. উদুক্খলং. যন্ত চক্কযট্ঠিনাম যন্ত চক্কসম্বন্ধা মুসলযট্ঠি. অরণী ৰুচ্চতি অগ্গিনিব্বত্তকত্থায কতা দ্ৰে সারঘটিকা. অধরারণী নাম হেট্ঠারণী. উত্তরারণী নাম উদ্ধারণী. ‘‘সল্লমিৰা’’তি কণ্ডোৰিয. ‘‘সূলমিৰা’’তি ৰিজ্ঝনকদণ্ডো ৰিয. ‘‘আতুরাৰিযা’’তি তেহিসল্লসূলেহি ৰিদ্ধগিলানা ৰিয. অযথাভুচ্চ নিমিত্তং নাম অযথাভূতং সত্তপুগ্গলাদিনিমিত্তং. ‘‘ৰনমিগো ৰিযা’’তি তিণ রূপে পুরিস সঞ্ঞালাভো ৰনমিগো ৰিয. ‘‘অঙ্গারকাসুযং’’তি অঙ্গারকূপে. ‘‘নানাৰিধুপদ্দৰ নিমিত্ততো’’তি নানাৰিধানং উপদ্দৰানং উপ্পত্তি পচ্চযতো. ‘‘ৰনমক্কটো ৰিযা’’তি ৰনৰানরো ৰিয. দুক্খেন দমনং অস্সাতি দুদ্দমনো. ‘‘অস্সখল়ুঙ্কো’’তি দুট্ঠ অস্সো. ‘‘যত্থ কামনিপাতিতো’’তি যস্মিং যস্মিং আরম্মণে পতিতুং কামেতি ইচ্ছতি, তত্থ তত্থ নিপাতিতো. পুগ্গলৰসে অৰত্তিত্ৰা আরম্মণেসু যদিচ্ছকং নিপতনতোতি ৰুত্তং হোতি. ‘‘রঙ্গনটো ৰিযা’’তি সমজ্জনটকো ৰিয. সভাৰতো অত্থি সংৰিজ্জতীতি সন্তো. তথোতি চ অৰিতথোতি চ অত্থতো একং. অঞ্ঞো পকারো অঞ্ঞথা. নত্থি অঞ্ঞথা অস্সাতি অনঞ্ঞথং. দুক্খদুক্খং নাম কাযিকদুক্খ চেতসিকদুক্খং. ‘‘কম্মজানং’’তি ৰিপাকক্খন্ধকটত্তা রূপানং. ‘‘উপ্পত্তিযা’’তি উপ্পাদত্থায. ‘‘পগেৰা’’তি পুরেতরমেৰ. ‘‘উপ্পন্নং পী’’তি উপ্পন্নম্পি চক্খু. ‘‘পৰত্তিযা’’তি সন্তানট্ঠিতিযা ঠিতত্থায. ‘‘পটিজগ্গন দুক্খং’’তি সোধন দুক্খং. পচ্চযৰেকল্লং নাম আহারচ্ছেদাদিকং. ননু ভিজ্জনভযেন পগেৰ পচ্চযসম্পাদনং নাম সঙ্খার দুক্খমেৰ সিযাতি. সচ্চং. ইধ পন আসন্নে ভিজ্জননিমিত্তং দিস্ৰা কতং পচ্চয সম্পাদনং অধিপ্পেতং. ‘‘রক্খাৰরণগুত্তি সংৰিধান দুক্খং’’তি নানাভযতো রক্খণস্স চ আৰরণস্স চ গোপনস্স চ সংৰিধান দুক্খং. ‘‘তদুভযেন সহেৰ সিজ্ঝতী’’তি কসিগোরক্খাদীনি সঙ্খার কম্মানি ৰা রক্খাৰরণ গুত্তিসং ৰিধানাদীনিৰা করোন্তানং তং দুক্খ দুক্খং তদুভযেন দুক্খেন সহেৰ সিজ্ঝতি. ‘‘তেসং’’তি চক্খাদীনি অস্সাদেন্তানং ন মুচ্চতীতি সম্বন্ধো. ‘‘পৰত্তি নিরোধ ভূতস্সা’’তি পৰত্তিযা নিরোধ ভূতস্স. ‘‘তং পজহতি যেৰা’’তি তং লোভং পজহতিযেৰ. ‘‘যাৰদেৰা’’তি উপরিমপরিযন্তেন. অহং অস্মীতি পৰত্তো মানো অস্মিমানো. তস্স সমুগ্ঘাতনং সমুচ্ছিন্দনং. ‘‘পরিঞ্ঞাতেসূ’’তি তেসু অনুসযিতায তণ্হায পহানৰসেন পরিঞ্ঞাতেসু. ‘‘তব্বিপরীতেন পনা’’তি ততো ৰিপরীতেন পন. অস্মিমানস্স অনধিট্ঠানভূতাতিআদি অত্থেন. অনিন্দ্রিযবদ্ধ ধম্মা নাম পথৰীপব্বতাদীসু পৰত্তা রূপ ধম্মা.

সত্তে অনুক্কণ্ঠমানে করোতীতি সম্বন্ধো. ‘‘ইতী’’তি তস্মা. তেসং সত্তানং. দুজ্জহো নাম নত্থি. তস্মা লোভোযেৰ দুক্খসমুদযারিয সচ্চং নামাতি যোজনা. সাসৰা কুসলা কুসল ধম্মা সমুদযসচ্চং নাম, দুক্খ সচ্চভূতানং ৰিপাকক্খন্ধকটত্তা রূপানং সমুদযত্তা সংৰড্ঢনত্তা. মূলভাৰেন ৰুত্তা ‘অৰিজ্জা পচ্চযা সঙ্খারা’তিআদীসু. ‘‘নন্দনসদিসং’’তি দেৰলোকে নন্দনৰনুয্যানসদিসং. ‘‘আদিপভৰপধানভূতা’’তি দুক্খ ধম্মানং আদিভূতা, পভৰভূতা, পধানভূতা. ‘‘পভৰভূতা’’তি চ পথমুপ্পত্তিহেতুভূতা. ‘‘তেসং’’তি দুক্খ ধম্মানং.

‘‘কত্থচী’’তি কামভৰাদীসু কিস্মিঞ্চিভৰে. ‘‘কদাচী’’তি অতীতাদিকালেসু কিস্মিঞ্চিকালে. ‘‘কেসঞ্চী’’তি দেৰমনুস্সাদীসু সত্তেসু কেসঞ্চিসত্তানং. ‘‘কুতোচী’’তি বহূসুকারণেসু কুতোচিকারণা. ‘‘কথঞ্চী’’তি কেনচিপকারেন.

‘‘পরিণামো’’তি পরিণমনং অঞ্ঞথাভাৰো. ‘‘তং সমঙ্গীনং’’তি তেহি চক্খাদীহি সমঙ্গীনং পুগ্গলং. পাল়িপাঠে. ‘‘আদিত্তং’’তিআদীপিতং সমুজ্জলন্তং. ‘‘কেনা’’তি করণভূতেন কেন অগ্গিনা. তথা অরিযমগ্গো ৰিপরিণাম ধম্মো চ হোতি. সোৰিপরিণাম দুক্খেনপি পুগ্গলং ভুসং পীল়েতিযেৰাতি যোজনা. ‘‘না’’তি ন সিযা. সমনং ৰূপসমনং সন্তি. সব্বদুক্খানং সন্তীতি ৰিগ্গহো. সব্বং ৰট্টদুক্খন্তি সম্বন্ধো. ‘‘তস্সা’’তি অরিযমগ্গস্স. ‘‘পৰত্তমানা চা’’তি সন্ততিঠিতিৰসেন ৰত্তমানা চ. ‘‘মহন্তং পরিল়াহদুক্খং’’তি সোক পরিদেৰ দুক্খ দোমনস্সুপাযাসানং পৰত্তিৰসেন মহন্তং পরিল়াহ দুক্খং. নিব্বানস্স অনুপ্পাদ ধম্মত্তা উপ্পাদত্থায পচ্চযো নাম নত্থি. তথা অপ্পৰত্তি ধম্মত্তা পৰত্তত্থায. সম্পাপুণিতব্বত্তা পন সম্পাপনত্থায পচ্চযো অত্থীতি আহ ‘‘সম্পাপক পচ্চযাভিসঙ্খরণলেসং’’তি. সম্পাপক পচ্চযা নাম অরিয মগ্গো চ তস্স পচ্চযা চ.

ভৰাভৰসঙ্খাতস্স দুক্খক্খন্ধস্সাতি সম্বন্ধো. ‘‘তদেৰা’’তি তং দুক্খক্খন্ধং এৰ. অনুপুনপ্পুনং পদীযতে অনুপ্পদানং. ‘‘নিয্যাতনট্ঠো’’তি হন্দ গণ্হাতি সম্পটিচ্ছাপনট্ঠো. ‘‘ততো’’তি ৰট্টদুক্খতো. ‘‘মুচ্চনূপাযস্সা’’তি দানসীলনিক্খমাদিকস্স মুচ্চনূপাযস্স. ‘‘নিস্সরণৰিমুত্তিযা’’তি নিস্সরণ সঙ্খাতায ৰিমুত্তিযা. সঙ্খার দুক্খস্স অভাৰট্ঠো. ‘‘সম্মোহস্স পহানৰসেনা’’তি এতেন ইধ দস্সনং নাম ইতো পট্ঠায চতূসু সচ্চেসু অসম্মোহ ভাৰপত্তি এৰ আলোকপত্তি এৰ ৰুচ্চতীতি দস্সেতি. তেনাহ ‘‘পটিৰিজ্ঝনট্ঠো’’তি. তণ্হায দাসো তণ্হাদাসো. তণ্হাদাসস্স ভাৰো তণ্হাদাসব্যং. পরৰসতো ৰিমুত্তিৰসেন অপরাধীনতা ভুজিস্সভাৰো নাম. লোকিযমগ্গাহি তণ্হাদাসব্যং নাতিৰত্তন্তি. তণ্হাৰসং পূরযমানা তণ্হাৰিসযং ৰিপাকং জনেন্তি. অযং অরিযমগ্গো এৰ তণ্হায অনারম্মণভাৰে ঠিতো তণ্হাদাসব্যং অতিৰত্ততি. তণ্হাৰসং ভিন্দমানো তণ্হায অৰিসযং ৰিপাকং জনেতীতি অধিপ্পাযো. ‘‘দুক্খমুত্তিযা’’তি দুক্খতো মুচ্চনত্থং. ‘‘দুক্খৰড্ঢিযা’’তি দুক্খৰড্ঢনত্থায. সেসমেত্থ সুবোধং. ‘‘খযৰিরাগ নিরোধ ভূতো’’তি এত্থ কিলেস ধম্মানং ৰিরজ্জনং ৰিগমনং অন্তরধানং ৰিরাগো. ‘‘অনত্থ পদানী’’তি অহিতপদানি. ভযাদীনৰপদানি. ‘‘দ্ৰারছক্কআরম্মণ ছক্কভেদেনা’’তি দ্ৰারছক্কং ধম্মারম্মণং হোতি. এৰংসতি, আরম্মণ ছক্কন্তি ন ৰত্তব্বং ধম্মারম্মণস্স ৰিসুং গহিতত্তাতি. নো নৰত্তব্বং. কস্মা, দ্ৰারছক্কতো সেসানং ধম্মারম্মণানং অত্থিতাযাতি দস্সেতুং ‘‘এত্থ চা’’তিআদি ৰুত্তং. পরতো ‘‘এত্থপী’’তিআদীসু এসেৰনযোতি.

সব্বসঙ্গহানুদীপনা নিট্ঠিতা.

সমুচ্চযসঙ্গহদীপনিযাঅনুদীপনা নিট্ঠিতা.

৮. পচ্চযসঙ্গহঅনুদীপনা

১৬৬. যেহিপকারেহি যথা. তেসং ৰিভাগো তং ৰিভাগো. অযঞ্চনিদ্দেসো একসেসনিদ্দেসো, ৰিচ্ছালোপনিদ্দেসোৰাতি দস্সেতুং ‘‘তেসং’’তিআদিমাহ. ন সমেতি. গাথাযং ‘যেসং’তিআদিনা তীহি-য-সদ্দেহি দস্সিতানং তিণ্ণং অত্থানং-ত-সদ্দত্থ সম্ভৰতো. ত-সদ্দত্থানঞ্চ অনুসন্ধিযং পরিপুণ্ণং কত্ৰা ৰত্তব্বতো. ‘‘সমুপ্পজ্জতী’’তি সুট্ঠু পরিপুণ্ণং কত্ৰা উপ্পজ্জতি, পাতুভৰতি. ‘‘অৰিনা’’তি অৰিনা হুত্ৰা. ‘‘সহজাত ধম্মেহী’’তি অৰিজ্জা পচ্চযা সঙ্খারাতিআদীসু সঙ্খারাদীনং সহজাত ধম্মেহি সহেৰ উপ্পজ্জনং. ‘‘কলাপৰসেনা’’তি সুদ্ধ ধম্ম কলাপৰসেন. ‘‘সামঞ্ঞ লক্খণং’’তি সাধারণ লক্খণং. ‘‘অত্থো’’তি ইদপ্পচ্চযতা সদ্দস্স অত্থো. ‘‘অযমত্থো পটিক্খিত্তো’’তি ‘সমুপ্পজ্জনং সমুপ্পাদো’তি অযংভাৰসাধনত্থো পটিক্খিত্তো. ‘‘অযমেৰা’’তি অযং ভাৰসাধনত্থো এৰ. জরামরণং সম্ভৰতীতি যোজনা. ‘‘উপ্পাদাৰা তথাগতানং’’তি সম্মাসম্বুদ্ধানং উপ্পাদেৰা সতি. ‘‘অনুপ্পাদাৰা’’তি অনুপ্পাদেৰা সতি. ‘‘ঠিতাৰ সাধাতূ’’তি জাতিযা সতি জরামরণস্স পৰত্তিসভাৰো লোকে ঠিতোযেৰ. কতমা পন সাধাতূতি আহ ‘‘ধম্মট্ঠিততা’’তিআদিং. তত্থ ‘‘ধম্মট্ঠিততা’’তি কেনচি অকতা সভাৰট্ঠিততা. ‘‘ধম্মনিযামতা’’তি সভাৰনিযামতা. ‘‘তত্র তথতা’’তি তস্মিং সামঞ্ঞলক্খণে সঙ্খত ধম্মানং তথতা. সামঞ্ঞ লক্খণমেৰ পটিচ্চসমুপ্পাদো নামাতি দস্সেতি, ন অৰিজ্জাদিকো পচ্চয ধম্মো. কস্মা, তেহি ৰচনেহি ধম্মনিযামতা মত্তস্স দস্সিতত্তা. অৰিজ্জাদীনং ধম্ম সরূপানং অদস্সিতত্তা. ‘‘ধম্মনিযামতামত্তং’’তি চ যথা ৰুত্তসামঞ্ঞ লক্খণমেৰ ৰুচ্চতি. যদি ভাৰসাধনং ইচ্ছেয্য, ভাৰসাধনং নাম কত্তুরহিতং ভৰেয্য. কত্তুরহিতে চ সতি, কথং পটিচ্চ ক্রিযায সমানকত্তুকতা লব্ভতি. অলদ্ধে চ সমানকত্তুকত্তে কথঞ্চ পুব্বকালেত্ৰা পচ্চযসম্ভৰোতি. অযং ভাৰসাধনং ইচ্ছন্তস্স ব্যঞ্জনযুত্তিৰিরোধো. তং পরিহরন্তো ন চেত্থাতিআদিমাহ. গম্ভীরোচানন্দ পটিচ্চসমুপ্পাদো গম্ভীরাৰ ভাসোচাতি ভগৰতা ৰুত্তং. ভাৰসাধনে চ কতে উপ্পজ্জন ক্রিযামত্তং নাম ৰিসুং একো ধম্মো ন হোতীতি কথং তং গম্ভীরং সিযাতি. অযং ভাৰসাধনং ইচ্ছন্তস্স গম্ভীরৰচন ৰিরোধো. তং পরিহরন্তো ‘‘সঙ্খত ধম্মেসু চা’’তিআদিমাহ. অপি চ সঙ্খত লক্খণং নাম সঙ্খত ধম্মতোপি গম্ভীরং হোতি. তথাহি চিত্তং নাম সঙ্খত ধম্মো. তঞ্চ অত্থি মেচিত্তং নামাতি সত্তানং পাকটং হোতি. তস্স পন অনিচ্চতা সঙ্খাতং সঙ্খত লক্খণং অপাকটং হোতি সুট্ঠু সন্ততিযা পটিচ্ছন্নং. তথা ৰেদনা নাম সুখাৰা দুক্খাৰা সঙ্খত ধম্মো. সা চ অত্থি মেৰেদনাতি সত্তানং পাকটা হোতি. তস্সা পন অনিচ্চতা সঙ্খাতং সঙ্খত লক্খণং অপাকটং হোতি সুট্ঠু সন্ততিযা পটিচ্ছন্নং. এৰং সেসেসু নামধম্মেসু চ রূপধম্মেসু চ. যতো সত্তসু ৰিসুদ্ধীসু সঙ্খত ধম্ম ৰৰত্থান সঙ্খাতং দিট্ঠিৰিসুদ্ধিঞাণঞ্চ অৰিজ্জাদিপচ্চয পরিগ্গহ সঙ্খাতং কঙ্খাৰিতরণ ৰিসুদ্ধিঞাণঞ্চ পথমং সম্পাদেত্ৰা পচ্ছা দসৰিধানি সঙ্খত লক্খণানুপস্সনা ঞাণানি সম্পাদেতব্বানি হোন্তীতি. যথা চ অনিচ্চতা সঙ্খাতং সঙ্খত লক্খণং সঙ্খত ধম্মতো গম্ভীরং হোতি. তথা ইদম্পি পটিচ্চসমুপ্পাদ সঙ্খাতং সঙ্খত লক্খণং সঙ্খত ধম্মতো গম্ভীরং হোতীতি দট্ঠব্বং.

‘‘তব্ভাৰভাৰীভাৰো’’তি এত্থ ভৰতি সংৰিজ্জতীতি ভাৰো. সো সো অৰিজ্জাদিকো ভাৰো তব্ভাৰো. তব্ভাৰে ভৰন্তি সম্ভৰন্তি সীলেনাতি তব্ভাৰভাৰিনো. সঙ্খারাদযো. ‘‘ভাৰো’’তি উপ্পত্তিকারণং. তব্ভাৰভাৰীনং ভাৰোতি তব্ভাৰভাৰি ভাৰোতি ইমমত্থং দস্সেন্তো ‘‘তস্মিং তস্মিং’’তিআদিমাহ. অপি চ ‘‘ভাৰো’’তি ৰিজ্জমানতা ৰুচ্চতি. তস্স তস্স পচ্চয ধম্মস্স ভাৰোতি তব্ভাৰো. তব্ভাৰে সতি ভৰন্তি সম্ভৰন্তি ধম্মতাযাতি তব্ভাৰভাৰিনো. তেসং ভাৰোতিপি যুজ্জতিযেৰ. ‘‘হেত্ৰাদি পচ্চয সত্তিনিযামং’’তি হেতুপচ্চযো, আরম্মণ পচ্চযো, তিআদীসু হেতুসদ্দ আরম্মণ সদ্দাদযো লোভাদীনং রূপারম্মণাদীনঞ্চ ধম্মানং তং তং পচ্চয সত্তিৰিসেসং দীপেন্তি. তেসঞ্চ সো সো পচ্চয সত্তিৰিসেসো ৰিসুং ধম্মনিযামো হোতি, এৰং হেত্ৰাদি পচ্চযসত্তিনিযামং নিৰত্তেতি. ‘‘তথা তথা’’তি মূলট্ঠগোচরৰিসযট্ঠাদিকেন তেন তেন পচ্চযাকারেন. সো হি ৰুচ্চতীতি সম্বন্ধো. ‘‘পচ্চয ধম্মুদ্ধার মত্তে অঠত্ৰা’’তি পচ্চয ধম্মানং নাম সঞ্ঞাৰসেন উদ্ধরণমত্তং অকত্ৰাতি অধিপ্পাযো. ‘‘আহচ্চা’’তি আহনিত্ৰা তং তং পচ্চযসত্তি ৰিসেসং পাপেত্ৰাতি অত্থো. তেনাহ ‘‘মত্থকং পাপেত্ৰা’’তি. পচ্চযসত্তি ৰিসেসো হি হেতুফলদীপনে ততো উত্তরি ৰত্তব্ব কিচ্চাভাৰতো মত্থকং নাম হোতীতি. ‘‘অনোসক্কমানা’’তি অনিৰত্তমানা. ‘‘এতাযা’’তি পচ্চয সত্তিযা. পপঞ্চেন্তে আচরিযে.

এতস্মা কারণা ফলং এতদেৰ পটিচ্চ অনাগতপক্খতো পচ্চুপ্পন্নপক্খং আগচ্ছতি পাতুব্ভৰতীতি পচ্চযো. উপ্পত্তিকারণং পৰত্তিকারণঞ্চ. তত্থ উপ্পত্তিকারণং জনকপচ্চযো. পৰত্তিকারণং উপত্থম্ভক পচ্চযো. ‘‘এতেনা’’তি হেতুনা. ‘‘কাযৰচী মনোকম্মং’’তি এত্থ ‘‘কম্মং’’তি ক্রিযাৰুচ্চতি, গমন ঠান নিসজ্জসযনাদিকং কাযিক ক্রিযঞ্চ. আলাপ সল্লাপ কথন সজ্ঝাযন গাযনাদিকং ৰাচসিক ক্রিযঞ্চ. ৰিজানন চিন্তন ৰীমংসনাদিকং মানসিক ক্রিযঞ্চ. ‘‘অভিসঙ্খরোন্তী’’তি অভিনিপ্ফাদেন্তি. ‘‘এতেহী’’তি এতেহি লোকিযকুসলা কুসল চেতনা ধম্মেহি. অপি চ সঙ্খরোন্তি সত্তা এতেহীতি সঙ্খারা. ‘‘সঙ্খরোন্তী’’তি কিং সঙ্খরোন্তি. অত্তভাৰং সঙ্খরোন্তি. ভৰাভৰং সঙ্খরোন্তি. দিট্ঠধম্মিকম্পি অত্থং ৰা অনত্থং ৰা সঙ্খরোন্তি. সম্পরাযিকম্পি অত্থং ৰা অনত্থং ৰা সঙ্খরোন্তীতিআদিনা. চক্খুম্পি সঙ্খরোন্তি, সোতংপি সঙ্খরোন্তীতিআদিনা. দস্সনম্পি সঙ্খরোন্তি, সৰনম্পি সঙ্খরোন্তীতিআদিনা চ ৰত্তুং ৰট্টতিযেৰ. ‘‘ৰিজানাতী’’তি ৰিৰিধেন জানাতি. ভূতেনপি জানাতি, অভূতেনপি জানাতি. ‘‘নমতী’’তি গোচর ৰিসযত্থায নমতি. ‘‘রুপ্পতী’’তি কুপ্পতি, খোভতি. ‘‘ফুসতী’’তি সংহনতি. ‘‘ৰেদযতী’’তি ৰিদিতং করোতি. তং তং আরম্মণং লগ্গনৰসেন ভুসং নহতি বন্ধতি, মুঞ্চিতুং ন দেতীতি তণ্হাতিপি যুজ্জতি. ‘‘উপাদিযতী’’তি দল়্হং গণ্হাতি. তেনাহ ‘‘অমুঞ্চগ্গাহং গণ্হাতী’’তি. ভৰতীতি ভৰো. উপপত্তিভৰো. ভৰন্তি এতেনাতি ভৰো. কম্মভৰো. ‘‘জননং’’তি অভিনৰস্স পাতুব্ভৰনং. ‘‘জীরণং’’তি অভিনৰভাৰতো হাযনং. ‘‘সোচনং’’তি চিত্তসন্তাপনং. ‘‘পরিদেৰনং’’তি রোদনং. ‘‘দুক্খং’’তি কাযরুজ্জনং. ‘‘দোমনস্সং’’তি চিত্তরুজ্জনং. ‘‘ৰিসীদনং’’তি বাল়্হং চিত্তকিলমথভাৰেন ৰিরূপং হুত্ৰা চিত্তস্সসীদনং. থামবলখিয্যনং. যতো অস্সাসপস্সাসানং ৰিরূপপ্পৰত্তিৰা তঙ্খণে সব্বসো উপরুজ্ঝনং ৰা হোতীতি. ‘‘কেনচি সুখেনা’’তি দুক্খসচ্চতো ৰিমুত্তেন কেনচি সন্তিসুখেন.

‘‘দুক্খপ্পটিচ্ছাদিকা’’তি ভযট্ঠেন দুক্খভূতানং তেভূমিক ধম্মানং দুক্খভাৰপ্পটিচ্ছাদিকা. ‘‘সমুদযপ্পটিচ্ছাদিকা’’তি তণ্হায দুক্খ সমুদয ভাৰপ্পটিচ্ছাদিকা. ‘‘নিরোধপ্পটিচ্ছাদিকা’’তি তণ্হানিরোধস্সেৰ দুক্খনিরোধ ভাৰপ্পটিচ্ছাদিকা. ‘‘মগ্গপ্পটিচ্ছাদিকা’’তি অট্ঠঙ্গীক মগ্গস্সেৰ দুক্খনিরোধ মগ্গভাৰপ্পটিচ্ছাদিকা. পুব্বন্তো ৰুচ্চতি অতীতেকালে ভৰপরম্পরা. অপরন্তো ৰুচ্চতি অনাগতে ভৰপরম্পরা. পুব্বন্তা পরন্তো ৰুচ্চতি তদুভযং. ‘‘পটিচ্চসমুপ্পাদপ্পটিচ্ছাদিকা’’তি পচ্চুপ্পন্নভৰে খন্ধানং পটিচ্চসমুপ্পাদপ্পটিচ্ছাদিকা. ‘‘সুত্তন্তিকনযেনা’’তি অভিধম্মেপি ৰিভঙ্গে সুত্তন্ত ভাজনীযং নাম আগতং. তেন সুত্তন্ত ভাজনীযনযেন. সাসৰা কুসলা কুসল চেতনা সঙ্খারা নামাতি যোজনা. ‘‘অভিধম্মনযেনা’’তি ৰিভঙ্গে অভিধম্মভাজনীযনযেন. অট্ঠকথাপাঠে. অৰিজ্জা কিরিয ধম্মানং নেৰ উপনিস্সয পচ্চযত্তং লভতি. কুসলা কুসলমূলানি কিরিয ধম্মানং ন উপনিস্সয পচ্চযত্তং লভন্তীতি যোজনা. কিরিয ধম্মা অৰিজ্জাতো চ কুসলা কুসল মূলেহি চ উপনিস্সয পচ্চযং ন লভন্তীতি ৰুত্তং হোতি. ‘‘পচ্চযাকারো’’তি পটিচ্চ সমুপ্পাদো. ‘‘অৰিজ্জাৰিরাগা’’তি অৰিজ্জা ৰিগমনতো. তেসংপিকিরিয ধম্মানং. ৰিঞ্ঞাণাদীসুপি কিরিয ৰিঞ্ঞাণং, কিরিয নামং, কিরিয মনাযতনং, কিরিযফস্সো, কিরিয ৰেদনাতি অত্থিতায ‘‘এসনযো ৰিঞ্ঞাণাদীসুপী’’তি ৰুত্তং. ‘‘কুসলা কুসল ৰিপাকসম্পযুত্তং’’তি কুসল ৰিঞ্ঞাণ সম্পযুত্তং, অকুসলৰিঞ্ঞাণসম্পযুত্তং, ৰিপাক ৰিঞ্ঞাণ সম্পযুত্তং. ‘‘তং অনুপপন্নং’’তি পৰত্তিৰিপাকৰিঞ্ঞাণ সহগতস্স খন্ধত্তযস্স তং সহজাতস্স চিত্তজরূপস্স চ অৰসিট্ঠত্তা তং ন সম্পন্নংতি অত্থো. তত্থ হি ৰিঞ্ঞাণপদে পৰত্তিৰসেন দ্ৰত্তিংসৰিধং ৰিপাকচিত্তং ৰিঞ্ঞাণং নামাতি ৰুত্তং. এৰঞ্চসতি, নাম রূপপদেপি পৰত্তিৰসেন তদুভযং পৰত্তিৰিঞ্ঞাণসহগতংপি গহেতব্বমেৰাতি. ‘‘তং তং ৰিঞ্ঞাণ সম্পযুত্তা’’তি পটিসন্ধিৰিঞ্ঞাণ পৰত্তি ৰিঞ্ঞাণসম্পযুত্তা. ‘‘তণ্হুপাদানানিপাকটানী’’তি ছ তণ্হা রূপতণ্হা সদ্দতণ্হাদিৰসেন. চত্তারি উপাদানানি কামুপাদানাদিৰসেনাতি এৰং পাকটানিযেৰ. ‘‘লক্খণমত্তানী’’তি সঙ্খত ধম্মানং সঙ্খতভাৰসল্লক্খণ নিমিত্তমত্তানি. ‘‘ঞাতিব্যসনাদীহী’’তি ঞাতিৰিনাসনাদীহি. ‘‘ঞাতিব্যসনাদিনিমিত্তং’’তি ঞাতিৰিনাসনাদিকারণা.

‘‘খন্ধদুক্খে’’তি পচ্চক্খন্ধসঙ্খাতে দুক্খসচ্চে. খন্ধপ্পৰত্তি মগ্গো নাম তণ্হাসমুদযো এৰ. খন্ধনিরোধ মগ্গো নাম অরিযমগ্গো. ‘‘খন্ধ সমুদযভূতা’’তি খন্ধপ্পৰত্তিযা কারণভূতা. ‘‘অৰিজ্জানি ৰুটানং’’তি অৰিজ্জাযনীৰারিতানং পিহিতানং. ‘‘অপ্পহীন ভৰাভিলাসানং’’তি মগ্গেন অপ্পহীন ভৰপত্থনানং. অপ্পহীনভৰতণ্হানন্তি ৰুত্তং হোতি. ‘‘ৰিবন্ধো’’তি অন্তরাযো. ‘‘উদযভূতানং’’তি ৰড্ঢিভূতানং. ‘‘অৰস্সযো’’তি নিস্সযো. সুখৰেদনা ৰিসেসতো তণ্হায পচ্চযো হোতীতি ৰুত্তং ‘‘সুখৰেদনাসদিসো’’তিআদি. দোমনস্সানং পন তস্সা পচ্চযভাৰো পরতো পরিযেট্ঠিতণ্হাযং পাকটো ভৰিস্সতি. উপেক্খা ৰেদনাপি দুক্খেন পীল়িতস্স সুখঠানে তিট্ঠতি. সুখং ৰিয তং পত্থেতীতি. সমুদা চরিত্ৰা পরিচযিত্ৰা. ‘‘তণ্হা এৰা’’তি কামতণ্হা এৰ. ‘‘অত্তনি চা’’তি দিট্ঠিযঞ্চাতি অধিপ্পাযো. ‘‘অত্তনো আরম্মণেসূ’’তি অত্ত জীৰ লোকাদীসু দিট্ঠিযাগহিতা রম্মণেসু. ‘‘অস্সাদন খমনরোচনভূতাযা’’তি সাধুৰতাযং মমদস্সনন্তি এৰং রজ্জন তুস্সন কন্তিভূতায. ‘‘উপাদানীযস্সা’’তি দল়্হং গহেতব্বস্স. ‘‘অত্থস্সা’’তি অত্তনো অত্তাদিকস্স অত্থস্স. গাথাযং.‘‘ভৰং হোতী’’তি ভৰন্তো ৰড্ঢন্তো হোতি. ‘‘পরাভৰো’’তি ৰিনাসন্তো.

‘‘অদ্ধানৰন্তে ধম্মে’’তি তেকালিকসঙ্খত ধম্মে. অপতমানে কত্ৰাতি পাঠসেসো. যথা উপাদানংতি দিস্ৰা উপাদারূপংতি পদে আদাসদ্দো ৰিঞ্ঞাযতি. ন উপুব্ব পদসদ্দো. ইতরথা উপাদানন্তি নসিজ্ঝতি. এৰং অদ্ধা, অদ্ধান, পদেসুপি. তেনাহ ‘‘অদ্ধানং’’তি নসিজ্ঝতীতি. সংখিপন্তি ৰীসতাকারা এতেসূতি সঙ্খেপা. সঙ্গহা. ‘‘ৰট্টধম্মা’’তি সঙ্খারাদযো ধম্মা. ‘‘এত্থা’’তি এতাসু অৰিজ্জাতণ্হাসু. কথং তিট্ঠন্তীতি আহ ‘‘তদাযত্তৰুত্তিতাযা’’তি. ‘‘পতিট্ঠা’’তি সুপ্পতিট্ঠিতট্ঠানানি. ‘‘পভৰা’’তি ৰট্টধম্মপরম্পরপ্পৰত্তিযা মূল পধান কারণানি. তত্থ হেতু চ দেসেতব্বো হোতি. ইতরথা ইস্সরনিম্মানদিট্ঠি অহেতুক দিট্ঠীনং ওকাসো সিযাতি. ফলঞ্চ দেসেতব্বং হোতি. ইতরথা উচ্ছেদদিট্ঠিযা ওকাসো সিযাতি. ‘‘অদ্ধুনো’’তি দীঘকালস্স. ‘‘নিৰত্তেতী’’তি সমুচ্ছিন্দতি. ‘‘অহেতূ অপচ্চযা সত্তা পৰত্তন্তী’’তি পুব্বহেতুরহিতা পুব্বপচ্চযরহিতা হুত্ৰা ইমেসত্তা পৰত্তন্তি. ‘‘অৰিজ্জাদীহি সাধেতব্বো ন হোতী’’তি ভৰপরম্পরাসু নিচ্চো হুত্ৰা সন্ধাৰন্তস্স অৰিজ্জাদীহি কত্তব্ব কিচ্চং ন হোতীতি অধিপ্পাযো. ‘‘কেসঞ্চি ন সম্ভৰন্তিযেৰা’’তি অনাগামীনং অরহন্তানঞ্চ ন সম্ভৰন্তিযেৰ. মহাআদীনৰরাসিদস্সনত্থং সোকাদিৰচনং হোতীতি যোজনা. ‘‘তেসং’’তি অঞ্ঞেসং পচ্চযানং. ‘‘লদ্ধা’’তি অত্থতো লদ্ধা. ‘‘তদৰিনাভাৰিভাৰলক্খণেনা’’তি এত্থ তেন তেন পচ্চযেন অৰিনাভাৰীনং ভাৰো, সো এৰ লক্খণন্তি ৰিগ্গহো. ‘‘পরত্থ পী’’তি ইতো পরেসু তণ্হুপাদান ভৰগ্গহণেনাতিআদীসুপি. ‘‘আদিতো’’তিআদিম্হি. ৰিভাৰনিপাঠে. ‘‘কিলেসভাৰসামঞ্ঞতো’’তি কিলেসভাৰেন সমানত্তা সদিসত্তা. ‘‘লক্খিতব্ব ধম্মেহী’’তি ৰিঞ্ঞাণাদীহি. ‘‘পথমেন দুতীযস্সা’’তি পথমসঙ্খেপেন সদ্ধিং দুতীযস্স সঙ্খেপস্স একা সন্ধীতিআদিনা যোজেতব্বং. ‘‘লোকস্স পাকট ৰোহারেনা’’তি কিলেসধম্মা কম্মধম্মা চ লোকে হেতূতি পাকটা হোন্তি. ৰিপাকধম্মা পন ফলন্তি পাকটা. এৰং লোকে পাকট ৰোহারেন. ইধ পন কিলেসধম্মকম্মধম্মা ৰা হোন্তু, ৰিপাকধম্মা ৰা, যো যো পচ্চযপক্খে ঠিতো, সো সো হেতূতিপি ৰত্তব্বোযেৰ. যো যো পচ্চযুপ্পন্ন পক্খে ঠিতো, সো সো ফলন্তিদস্সেন্তো ‘‘হেতুফলসদ্দাপনা’’তিআদিমাহ. অট্ঠকথা পাঠে. ‘‘সজ্জন্তস্সা’’তি সংৰিদহন্তস্স. ‘‘আযূহন সঙ্খারা নামা’’তিআদিতো পট্ঠায সমুচ্চযনসঙ্খারা নাম. ‘‘দক্খিণং’’তি দানৰত্থুং. দক্খিণোদকং ৰা. ‘‘এত্থ চা’’তি ইমস্মিং ততীযপঞ্চকে চ. ‘‘ৰুত্তনযেনে ৰা’’তি পথমপঞ্চকে ৰুত্তনযেনেৰ. ৰিভাৰনিপাঠে. ‘‘আযতিং পটিসন্ধিযা পচ্চযচেতনা ভৰো নামা’’তি ইদং উদ্দেসপাল়িযং যথাদিট্ঠপাঠৰসেনেৰ ৰুত্তং. তথা পুরিমকম্মভৰস্মিং ইধ পটিসন্ধিযা পচ্চযচেতনা সঙ্খারা নামাতি ইদঞ্চ. ইধ পন পুব্বেযেৰ দ্ৰীসুহেতুপঞ্চকেসু দ্ৰিন্নং সঙ্খার কম্মভৰানং সঙ্গহিতত্তা অট্ঠকথাযং ৰুত্তনযেনেৰ দ্ৰিন্নং সঙ্খার কম্মভৰানং ৰিসেসো যুত্তো. তেনাহ ‘‘তং ইধ ন যুজ্জতী’’তি. ‘‘সঙ্গহিতত্তা’’তি পুব্বেযেৰ সঙ্গহিতত্তা. ‘‘এতং’’তি ৰিভাৰনি ৰচনং. ‘‘ধম্মৰিভাগরক্খণত্থং’’তি ৰিভঙ্গে ভৰপদে উপপত্তিভৰস্সপি ৰিভত্তত্তা এৰং ৰিভত্তস্স ধম্মৰিভাগস্স রক্খণত্থং. ফলপঞ্চকতো অনঞ্ঞংপি উপপত্তিভৰং অঞ্ঞংৰিয কত্ৰা ‘উপপত্তিভৰসঙ্খাতো ভৰেকদেসো’তি ৰুত্তং. সো চ উপপত্তিভৰো নাম পচ্চুপ্পন্নহেতূহি নিব্বত্তত্তা চতুত্থে ফলপঞ্চকে এৰ সঙ্গহিতো. তস্মা তেন উপপত্তিভৰসদ্দেন চতুত্থ পঞ্চকমেৰ গহিতন্তি যুত্তং. ইতরথা দ্ৰে ফলপঞ্চকানি ৰিপাকৰট্টন্তি ৰুত্তে সিদ্ধমেৰ হোতি. এৰঞ্চসতি অৰসেসা চাতি এত্থ দুতীযফলপঞ্চকমেৰ অৰসিট্ঠং হোতীতি দট্ঠব্বং. ‘‘অৰিজ্জা নাম মোহো, সো চ অকুসল মূল’’ন্তিআদি অভিধম্মে মূলযমকে মূলনামেন আগতত্তা ৰুত্তং. দ্ৰীসুপনভৰ চক্কেসু পুরিমচক্কে অৰিজ্জা আদি হোতি. পচ্ছিমচক্কে তণ্হা. আদি চ নাম মূলন্তি চ সীসন্তি চ ৰত্তুং ৰট্টতীতি পরিযাযং দস্সেতুং ‘‘অথৰা’’তিআদি ৰুত্তং.‘‘আগমনসম্ভারেসূ’’তি অতীতভৰতো ইমংভৰং আগমনসম্ভারেসু. তণ্হা এৰ সীসং কত্ৰা ৰুত্তাতি যোজনা. ‘‘তেসং অন্তরে’’তি অৰিজ্জাসঙ্খারানং অন্তরে. তণ্হায ওকাসো নত্থীতি কস্মা ৰুত্তং. ননু অৰিজ্জায সতি, তণ্হা নাম একন্তেন সম্ভৰতিযেৰ. সা চ সঙ্খারানং বলৰপচ্চযো হোতি. তস্মা সা অৰিজ্জা পচ্চযা তণ্হা, তণ্হা পচ্চযা সঙ্খারাতি ৰত্তব্বা সিযাতি. তং পরিহরিতুং ‘‘অযঞ্হী’’তিআদিৰুত্তং. পটিলোমপটিচ্চসমুপ্পাদো নাম অৰিজ্জানিরোধা সঙ্খারনিরোধোতি এৰং পৰত্তো পটিচ্চসমুপ্পাদো. ‘‘জরামরণমুচ্ছযাতিআদি নৰত্তব্বং সিযা’’তি জরামরণমুচ্ছাযাতিআদিৰচনং অনুলোমপটিচ্চসমুপ্পাদ সম্বন্ধ ৰচনন্তি কত্ৰা ৰুত্তং. ‘‘উপরিৰট্টমূল ধম্মপ্পটিপাদকানং’’তি উপরি দুতিযানাগতভাৰাদীসু অৰিজ্জাতণ্হা সঙ্খাতানং ৰট্টমূলধম্মানং নিযোজকানং. ‘‘তে পী’’তি সোকাদযো দুক্খধম্মাপি. ‘‘আসৰসম্ভূতা’’তি আসৰেহি সম্ভূতা সঞ্জাতা. ‘‘তেসং’’তি সোকাদীনং দুক্খধম্মানং. ‘‘জরামরণঙ্গে গহণং’’তি দ্ৰাদসসু অঙ্গেসু জরামরণঙ্গে সঙ্গহণং. ‘‘পৰড্ঢতী’’তি ভুসং ৰড্ঢতি. ‘‘আসৰসমুদযা’’তি আসৰসমুপ্পাদা. ‘‘অৰিজ্জাসমুদযো’’তি অৰিজ্জাসমুপ্পাদো. ‘‘অৰিজ্জাপচ্চযাসঙ্খারাতী’’তি এত্থ ইতিসদ্দো আদিঅত্থো. ‘‘নানাব্যসন ফুট্ঠস্সা’’তি ঞাতিব্যসনাদীহি নানাব্যসনেহি ফুট্ঠস্স, ৰিহিংসিতস্স. ‘‘যতো’’তি যং কারণা, অৰিজ্জাতণ্হানং ৰড্ঢনকারণা. ‘‘ৰট্টং’’তি সঙ্খারাদিকং ভৰচক্কং. সংমুয্হনং সম্মোহো. পরিযেসনং পরিযেট্ঠি. ৰিপচ্চতীতি ৰিপাকো. ৰিপাকো এৰ ৰেপক্কং. সম্মোহো ৰেপক্কং অস্সাতি সম্মোহৰেপক্কং. তথা পরিযেট্ঠিৰে পক্কঞ্চাতি ইমমত্থং দস্সেতি ‘‘তদুভযং’’তিআদিনা. তদুভযং ৰিপাকং এতস্সাতি কত্ৰা দুক্খং সম্মোহৰেপক্কন্তি চ পরিযেট্ঠিৰেপক্কন্তি চ ৰুচ্চতীতি যোজনা. অপি চ, সম্মোহং ৰিপাচেতি সঞ্জনেতীতি সম্মোহ ৰেপক্কং. এৰং পরিযেট্ঠিৰেপক্কন্তিপি যুজ্জতি. ‘‘কিচ্ছং’’তি কসিরং দুক্খং আপন্নো. ‘‘মিয্যতী’’তি মরতি. ‘‘চ ৰতী’’তি সঙ্কমতি. ‘‘উপপজ্জতী’’তি ভৰন্তরং উপেতি. ‘‘অথ চ পনা’’তি এৰংভূতস্স সতো. ‘‘জরামরণস্সা’’তি জরামরণ সঙ্খাতস্স ইমস্স দুক্খস্সাতি সম্বন্ধো. ‘‘নিস্সরণং’’তি নিগ্গমনং. ‘‘নপ্পজানাতী’’তি অযং লোকো নপ্পজানাতি. ‘‘আগতিযা’’তি ইমস্মিং ভৰে পটিসন্ধিৰিঞ্ঞাণুপ্পত্তিৰসেন আগমনেন. ‘‘গতিযা চা’’তি অনাগতভৰে জাতিপাতুব্ভাৰৰসেন গমনেন চ. আদিসঙ্খাতো পুব্বপরিযন্তো যস্স অত্থীতিআদিমন্তং. ন আদিমন্তং অনাদিমন্তং. ‘‘ৰট্টপ্পৰত্তস্সা’’তি তিৰিধৰট্টসঙ্খাতস্স পবন্ধপ্পৰত্তস্স. জাতিযা ৰুত্তায সব্বানি তস্সা নিদানানি ৰুত্তানি এৰ হোন্তীতি কত্ৰা ‘‘জাতিযা এৰ ৰা’’তি ৰুত্তং. ‘‘ইচ্চেৰং’’তি ইতি এৰং. তত্থ অৰিজ্জাপচ্চযা সঙ্খারাতিআদিনা নযেন পট্ঠপেসি মহামুনীতি সম্বন্ধো. আচরিয ৰাদেপন ‘‘ইচ্চেৰং’’তি জরামরণ মুচ্ছাযাতিআদিনানযেন. আবন্ধং অনাদিকন্তি সম্বন্ধো. ইধপি তমেৰ সম্বন্ধং গহেত্ৰা যোজেতি ‘‘ইচ্চেৰং আবন্ধন্তি. ল. পুনপ্পুনং আবন্ধং’’তি. অৰিজ্জা আদিম্হি ৰুত্তা. তস্মা সা সযং অহেতু অপচ্চযা হুত্ৰা ৰট্টস্স আদিপচ্চযভূতা হোতীতি চোদনা. তং পরিহরতি ‘‘ৰট্টস্সা’’তিআদিনা. ‘‘ৰট্টকথায সীসভূতত্তা’’তি ৰট্টস্স আদিনাম নত্থি. তস্স পন পৰত্তি নিৰত্তিযো অত্থি. জানন্তেহি তাসং পকাসনত্থায পটিচ্চসমুপ্পাদকথানাম ৰট্টকথা একন্তেন কথেতব্বা হোতি. কথেন্তেহি চ ৰট্টধম্মানং মজ্ঝে কতমস্স ধম্মস্স কিচ্চং ৰট্টপ্পৰত্তত্থায পধানতরং হোতীতি জানিতব্বং হোতি. তদা কিচ্চৰসেন পধানতরং একং ধম্মং মূলং সীসং কত্ৰা ৰট্টকথা কথেতব্বাতি. ইদং ৰট্টকথায সীসং নাম. তত্থ অৰিজ্জা নাম মোহো. সো চ মুয্হনকিরিযা. অন্ধভাৰকরণঞ্চস্স কিচ্চং. ন চ পঞ্ঞা চক্খুস্স অন্ধভাৰকরণ সদিসং অঞ্ঞং ৰট্টস্স পৰত্তত্থায পধানকিচ্চং নাম অত্থি. তস্মা অৰিজ্জা এৰেত্থ সব্বপ্পধান কিচ্চত্তা ৰট্টকথায সীসভূতা হোতি. এৰং ৰট্টকথায সীসভূতত্তা সা আদিম্হি ৰুত্তাতি. ‘‘অনাদিকভাৰো এৰ দস্সিতো’’তি অনাদিকভাৰো দস্সিতো এৰ. নো ন দস্সিতোতি অত্থো. ইতি এতং অত্থজাতং পচ্চক্খতো সিদ্ধং. ‘‘ইধা’’তি ইমস্মিংভৰে. ‘‘তস্সা’’তি অতীত ভৰপরিযাপন্নায অৰিজ্জায. ‘‘অঞ্ঞায অৰিজ্জায এৰা’’তি অতীতভৰতোপি পুরিমভৰে সিদ্ধায অঞ্ঞায অৰিজ্জায এৰ. ‘‘তস্সাপী’’তি পুরিমতরভৰে অৰিজ্জাযপি. ‘‘অত্তভাৰো’’তি পুরিমতরো অত্তভাৰো. ‘‘পধান পচ্চযভূতত্তা’’তি পুব্বে ৰুত্তনযেন অন্ধভাৰকরণ কিচ্চত্তা ৰট্টপ্পৰত্তিযা পধান পচ্চযভূতা হোতি. এৰং পধানপচ্চযভূতত্তা. ‘‘তস্স তস্সাতি নিট্ঠানমেৰ ন পঞ্ঞাযেয্যা’’তি তস্স পচ্চযস্স পচ্চযো ৰত্তব্বো. তস্সপি পচ্চযস্স পচ্চযো ৰত্তব্বোতি এৰং ৰস্সসতম্পি ৰস্সসহস্সংপি নিট্ঠানমেৰ ন পঞ্ঞাযেয্য. ‘‘ৰুত্তোযেৰা’’তি অৰিজ্জায পচ্চযো ৰুত্তোযেৰ. ‘‘পঞ্চনীৰরণাতিস্সৰচনীযং’’তি পঞ্চনীৰরণ ধম্মা অৰিজ্জায আহারোতি ৰচনীযং ভৰেয্য. তত্থ ‘‘আহারো’’তি বলৰপচ্চযো ৰুচ্চতীতি.

পটিচ্চসমুপ্পাদনযানুদীপনা নিট্ঠিতা.

১৬৭. পট্ঠাননযে. ‘‘হেতু চ সো পচ্চযো চা’’তি এত্থ লোভো হেতুজাতিকত্তা হেতু চ হোতি. আরম্মণানন্তরাদি পচ্চযেন অঞ্ঞধম্মস্স পচ্চযো চ হোতীতি অত্থস্স সম্ভৰতো ‘‘হেতু হুত্ৰা পচ্চযো’’তি ৰণ্ণেতি. এৰং ৰণ্ণিতেপি ‘‘হেতু হুত্ৰা পচ্চযো’’তি হেতু হোন্তো পচ্চযোতি অত্থে সতি, সো যেৰত্থো সম্ভৰতীতি ‘‘পুন হেতুভাৰেন পচ্চযো’’তি ৰণ্ণেতি. এত্থ সিযা, হেতু চ সো পচ্চযো চাতি এত্থ পদ দ্ৰযং একধম্মাধিকরণত্তা তুল্যাধিকরণং হোতি. হেতুভাৰেন পচ্চযোতি এত্থ পন পদদ্ৰযং তুল্যাধিকরণং ন হোতি. পুরিম পদঞ্হি ধম্ম ভাৰপ্পধানং, পচ্ছিমং ধম্মপ্পধানন্তি. এৰং সন্তে তুল্যাধিকরণং ৰাক্যং ভিন্নাধিকরণং কত্ৰা ৰণ্ণেতীতি ন যুত্তমেতন্তি. নো ন যুত্তং. মুখ্যোপচারমত্তেন নানত্থত্তা. পচ্ছিমৰাক্যংহি মুখ্যৰচনং. পুরিমৰাক্যং উপচার ৰচনং. উপচারৰচনে চ উপচারত্থো যুজ্জতি. মুখ্যৰচনে মুখ্যত্থোতি. ‘‘হেট্ঠাৰুত্তমেৰা’’তি পকিণ্ণকসঙ্গহে ৰুত্তমেৰ. হিনোন্তি এত্থাতি হেতু. হিনোন্তি এতেনাতি হেতু. তত্থ ‘‘হিনোন্তী’’তি সুট্ঠুপতিট্ঠহন্তি. কে পতিট্ঠহন্তীতি আহ ‘‘সহজাত ধম্মা’’তি. কথঞ্চ সুট্ঠুপতিট্ঠহন্তীতি আহ ‘‘ৰুদ্ধি ৰিরুল়্হি ৰেপুল্লপত্তৰসেনা’’তি. কস্মা তে সুট্ঠু পতিট্ঠহন্তীতি. পতিট্ঠিতট্ঠানস্স পতিট্ঠিতকারণস্স ৰা থামবলসম্পন্নত্তাতি দস্সেতুং ‘‘আরম্মণে দল়্হনিপাতিনা থামবলসম্পন্নেনা’’তি ৰুত্তং. হেতুৰিসেসনঞ্চেতং. আরম্মণে দল়্হনিপাতিম্হি থামবলসম্পন্নে এত্থ ধম্মেতিপি যোজেতব্বং. উপকারকোতি চ উপলদ্ধিযেৰাতি সম্বন্ধো. ‘‘যাদিসেনসভাৰেনা’’তি হেতুভাৰাদিসভাৰেন. ‘‘উপলদ্ধিযেৰা’’তি কস্মা ৰুত্তং. ননু উপকারক সদ্দো কত্তারং ৰা কারেতারং ৰা ৰদতীতি. ৰোহারমত্তেন ৰদতি. ধম্মতো পন কত্তা ৰা কারেতা ৰা নত্থীতি দস্সেতুং ‘‘ন হি সভাৰ ধম্মেসূ’’তিআদিমাহ. যদি ধম্মতো কত্তাৰা কারেতাৰা নত্থি. কস্মা উপকারকোতি ৰুচ্চতীতি আহ ‘‘তথা উপলদ্ধিযং পনা’’তিআদিং.

আরম্মণপচ্চযে. ‘‘অজ্ঝোলম্বমানা’’তি আরম্মণ করণৰসেন অধিওলম্বমানা. ‘‘আরম্মণভাৰেনা’’তি গোচরৰিসযভাৰেন.

অধিপতিপচ্চযে. ‘‘গরুকতা’’তি অস্সাদনাভিনন্দনাদিৰসেন ৰা সদ্ধাপসাদাদিৰসেন ৰা গরুকতা. ‘‘সামিনো ৰিয দাসে’’তি সামিনো অত্তনোদাসে অত্তনোৰসে ৰত্তযমানা ৰিয. সহজাতাধিপতি পন হেট্ঠা সমুচ্চয সঙ্গহে ৰুত্তোতি ইধ ন ৰুত্তো.

অনন্তরপচ্চযদ্ৰযে. ‘‘অন্তরং’’তি ছিদ্দং ৰিৰরং. ‘‘সন্তানং’’তি চিত্তসন্তানং. ‘‘সন্তানানুবন্ধৰসেনা’’তি চিত্তসন্তানং পুনপ্পুনং বন্ধনৰসেন. উপ্পাদনন্তি সম্বন্ধো. ‘‘ধম্মন্তরস্সা’’তি নামক্খন্ধ ধম্মন্তরস্স. ‘‘অনন্তর পচ্চযতা’’তি অনন্তরপচ্চয কিচ্চন্তি ৰুত্তং হোতি. যং কিঞ্চি ধম্মন্তরং. ‘‘পুরিমপচ্ছিমভাগপ্পৰত্তানং’’তি নিরোধস্স অসঞ্ঞীভৰস্স চ পুরিমভাগে চ পচ্ছিমভাগে চ পৰত্তানং. ‘‘চিত্তুপ্পাদানং পী’’তি নিরোধস্স পুব্বভাগে নেৰসঞ্ঞানাসঞ্ঞাযতন কুসল ক্রিয চিত্তুপ্পাদানং. পচ্ছাভাগে অনাগামিফল অরহত্তফলচিত্তুপ্পাদানং. অসঞ্ঞীভৰস্স পুব্বভাগে কামভৰে চুতি চিত্তুপ্পাদানং. পচ্ছাভাগে কামভৰে এৰ পটিসন্ধি চিত্তুপ্পাদানং. তেসু পন কথং অনন্তরং নাম সিযা. দ্ৰিন্নং দ্ৰিন্নং পুরিমভাগ পচ্ছিম ভাগানং মজ্ঝে অচিত্তকস্স কালস্স অচিত্তকস্স রূপসন্তানস্স চ অন্তরিকত্তাতি চোদনা. তং পরিহরিতুং ‘‘ন হি অভাৰভূতো’’তিআদি ৰুত্তং. ‘‘তেসং’’তি দ্ৰিন্নং দ্ৰিন্নং চিত্তুপ্পাদানং. রূপধম্মো অন্তরং ন চ করোতি নাম. অরূপধম্মানং অনন্তরতা নামাতিআদিনা যোজনা হোতি. ‘‘তথাপৰত্তন সমত্থতা’’তি একীভূতানং ৰিয অত্তনো অনন্তরে ধম্মন্তরং উপ্পাদনে সমত্থতা.

সহজাতপচ্চযে. ‘‘যে পন ধম্মা’’তি পচ্চযুপ্পন্ন ধম্মা. ‘‘অত্তনী’’তি পচ্চয ধম্মো ৰুচ্চতি.

‘‘অঞ্ঞমঞ্ঞং উপত্থম্ভন্তং তিদণ্ডং ৰিযা’’তি ভূমিযং অঞ্ঞমঞ্ঞং নিস্সায উস্সিতা তযোদণ্ডা অঞ্ঞমঞ্ঞং উপত্থম্ভন্তা ৰিয. ‘‘পুরিমেনা’’তি পুরিমেন সহজাত পচ্চযেন. ‘‘ইতরীতরো পত্থম্ভনং’’তি অঞ্ঞমঞ্ঞো পত্থম্ভনং.

‘‘সূদো’’তি ভত্তকারকো. ‘‘উক্খলী’’তি ভত্তপচনকুম্ভী. ‘‘ৰুট্ঠিধারা’’তি মেঘৰুট্ঠিধারা. ‘‘উপনিস্সযো’’তি ভত্তুপ্পত্তিযা উপনিস্সযো. ‘‘তাসু অসতী’’তি সালিক্খেত্ত ৰুট্ঠিধারাসু অসতি. ‘‘বলৰতরট্ঠেনা’’তি বলৰতরনিস্সযট্ঠেন. ‘‘পকতূপনিস্সযো’’তি এত্থ ‘‘পকতো’’তি ভুসং কতো. তেনাহ ‘‘সুট্ঠুকতো’’তি. করণঞ্চ অত্তনো সন্তানে সুট্ঠুউপ্পাদনঞ্চ সুট্ঠুউপসেৰনঞ্চ দট্ঠব্বন্তি সম্বন্ধো. ‘‘ৰুত্তপ্পকারেনা’’তি ‘যথা কতে সতী’তিআদিনা ৰুত্তপ্পকারেন.

‘‘নিস্সযারম্মণ ধম্মা এৰা’’তি নিস্সয পচ্চয ধম্ম আরম্মণ পচ্চয ধম্মা এৰ. ‘‘পুরেজাততামত্তৰিসিট্ঠা’’তি এত্থ মত্তসদ্দেন নিস্সযারম্মণসত্তিতো ৰিসুং পুরেজাতসত্তি নাম নত্থীতি দস্সেতি. ৰিসুং পুরেজাতসত্তি নাম অত্থীতিপি ৰদন্তি. তং ৰাদং দস্সেতুং ‘‘আচরিযানন্দত্থেরেনা’’তিআদিমাহ. এত্থ পঞ্চৰত্থূনি চ পঞ্চারম্মণানি চ পুরেজাতত্তা এৰ সুট্ঠুবলৰতায পঞ্চৰিঞ্ঞাণানং ৰত্থু কিচ্চ আরম্মণ কিচ্চানি সাধেন্তি. তথা হদযৰত্থু চ মনোধাতু মনোৰিঞ্ঞাণধাতূ নন্তি. অযং ৰিসুং পুরেজাতসত্তি ৰিসেসোতি ৰদেয্য. সচ্চং. সুদ্ধমনো দ্ৰারেপন ইধ ঠত্ৰা নিরযেসু এৰরূপানি নিরযগ্গিরূপানি অত্থি. ইদানি দেৰেসু চ এৰরূপানি দিব্বরূপানি অত্থীতি চিন্তযন্তানম্পি, তেসু পুরে এৰরূপানি উপ্পজ্জিংসূতি ৰা, তেসু অনাগতে এৰরূপানি উপ্পজ্জিস্সন্তীতি ৰা চিন্তযন্তানংপিতানি রূপানি নিব্বিসেসানি হুত্ৰা মনোৰিঞ্ঞাণানং আরম্মণ পচ্চযত্তং গচ্ছন্তি. তত্থ পুরে জাতানি হুত্ৰা তদা ৰিজ্জমানানি পচ্চুপ্পন্নরূপানি আরম্মণ পুরেজাতপচ্চযো. ইতরানি আরম্মণ পচ্চযো এৰ. ন চেত্থ পুরেজাতানং পচ্চুপ্পন্নরূপানং পুরেজাতত্তেন ৰিসেসো অত্থি. ন চ তানি পুরেজাতপচ্চযো ন হোন্তি. যদি ৰিসুং পুরেজাতসত্তিৰিসেসো পুরেজাতপচ্চযোতি ৰদেয্য. তানি পুরেজাতপচ্চযো নাম ন ভৰেয্যুং. কস্মা, তাদিসস্স ৰিসেসস্স নত্থিতায. ন চ নভৰন্তি. কস্মা, পুরেজাতমত্তৰিসেসস্স অত্থিতায. এত্থ ৰদেয্যুং, পঞ্চদ্ৰারেসু পন পুব্বে ৰুত্তনযেন ৰিসুং পুরেজাতসত্তিৰিসেসো দিস্সতীতি. কিঞ্চাপিদিস্সতি. সো পন বহুৰিধানং নিস্সয পচ্চয আরম্মণপচ্চযানং মজ্ঝে নিস্সয সত্তিৰিসেসো এৰ, আরম্মণ সত্তিৰিসেসো এৰ চাতি. অপি চ ৰিসুং পুরেজাত সত্তিৰিসেসো নাম নত্থীতি ইদং যথাৰুত্তে সুদ্ধমনোদ্ৰারে তব্বিসেসাভাৰং সন্ধায ৰুত্তং. ৰিসুং পুরেজাত সত্তিৰিসেসো নাম অত্থীতি ইদং পঞ্চদ্ৰারেসু তব্বিসেসস্স অত্থিভাৰং সন্ধায ৰুত্তন্তি. যং রুচ্চতি, তং গহেতব্বং.

পচ্ছাজাতপচ্চযে. ‘‘রুক্খপোতকানং ৰিযা’’তি পচ্ছা আসিঞ্চিযমানং উদকং রুক্খপোতকানং ৰুদ্ধৰিরুল়্হভাৰং পাপেত্ৰা উপত্থম্ভনৰসেন উপকারকো ৰিযাতি যোজনা. আহারং আসিং সতীতি আহারাসা. জিঘচ্ছা, পিপাসা, তণ্হা. তায সম্পযুত্তা চেতনাতি ৰিগ্গহো. সা পন আহারাসা চেতনা উপত্থম্ভতি যেৰাতি সম্বন্ধো. ‘‘অযমত্থো’’তি ‘সুপাকটেনা’তিআদিনা ৰুত্তো অযমত্থো. সব্বাচেসাৰিচারণা গিজ্ঝোপমায উপমামত্তভাৰং নীৰারেতা হোতীতি.

আসেৰন্তি তং পচ্চয ধম্মং পচ্চযুপ্পন্না ধম্মাতি আসেৰনং. এতেন ভুসো পচ্চযুপ্পন্ন ধম্মেহি আসেৰিতব্বত্তা আসেৰনন্তি ৰুচ্চতীতি দস্সেতীতি. ‘‘তং’’তি তং পুরিমং পুরিমং পচ্চয ধম্মং. ‘‘ভজন্তী’’তি উপেন্তি. কে ভজন্তীতি আহ ‘‘অপরাপরং উপ্পজ্জমানা ধম্মা’’তি. ‘‘ধম্মা’’তি চ অনন্তরুপ্পন্না চিত্তচেতসিকা ধম্মা. কথঞ্চ তং তেভজন্তীতি আহ ‘‘সুট্ঠুসেৰমানা ৰিয ভজমানা ৰিয পৰত্তন্তী’’তি. ৰিয সদ্দেন লোকে কিঞ্চিজনং কেচিজনা কেনচি অত্থেন সুট্ঠুসেৰন্তা ৰিযাতি দস্সেতি. কথং সুট্ঠুসেৰিযমানা ৰিয হোন্তীতি আহ ‘‘তস্স পুরিমস্সা’’তিআদিং. পুরিমস্স অনন্তরস্স চিত্তুপ্পাদস্সাতি অত্থো. ‘‘সব্বপরিপূরং আকারং’’তি জৰৰেগসহিতেহি ৰিজানন ফুসনাদীহি সাৰজ্জান ৰজ্জাদীহি চ সব্বেহি জৰনগুণেহি পরিপূরং আকারং. ‘‘আসেৰেতী’’তি মং সুট্ঠু সেৰথাতি নিযোজেন্তং ৰিয হোতি. তেনাহ ‘‘অত্তনো ৰাসং’’তিআদিং. তত্থ ‘‘ৰাসং’’তি ৰাসনং. ‘‘সুট্ঠু গাহাপেতী’’তি পরিপুণ্ণং দেতীতি ৰুত্তং হোতি. এতেন যথা লোকে একো পরেসং যথিচ্ছিতং দেতি. এৰং দেন্তং পন পরে ভজন্তিযেৰ. মং ভজথাতি নিযোজনকিচ্চং নত্থি. এৰমেৰ ইধপি সুট্ঠুৰাসদানমেৰ ভজাপনং নামাতি দস্সেতি. ‘‘ৰড্ঢেতি ৰা’’তি এতেন আসেৰনা ভাৰনা ৰড্ঢনাতি ইমংপরিযাযত্থং ৰদতি. পুরিমাভিযোগো নাম আদিতো পট্ঠায সজ্ঝাযনাদিকম্মেসু যথাসত্তি যথাবলং ৰা যামকরণং. তথা করোন্তস্স তং উগ্গহণ কম্মং উপরূপরি পগুণভাৰং গচ্ছতীতি. ‘‘আসেৰনট্ঠেনা’’তি ৰড্ঢাপনট্ঠেন, উপকারকোতি সম্বন্ধো. ‘‘সজাতিযানং’’তি কুসলাদিভাৰেন সমানজাতিকানং.

কাযঙ্গাভিসঙ্খরণং নাম কাযসঞ্চেতনাকিচ্চং. ৰাচঙ্গাভিসঙ্খরণং ৰচীসঞ্চেতনাকিচ্চং. চিত্তঙ্গাভিসঙ্খরণং মনোসঞ্চেতনাকিচ্চং. ‘‘কিরিযাভাৰেনা’’তি দস্সনসৰনাদিকিচ্চেসু গমনঠান নিসজ্জাদিকিচ্চেসু সংৰিধানকিরিযাভাৰেন. ‘‘ৰত্থুম্হী’’তি গব্ভৰত্থুম্হি. যথাৰুত্তাভিসঙ্খরণকিচ্চং নাম কাযঙ্গৰাচঙ্গ চিত্তঙ্গাভিসঙ্খরণ কিচ্চং. ‘‘তদভিসঙ্খরণৰেগজনিতং’’তি তস্স কাযঙ্গাদিকস্স অভিসঙ্খরণৰেগেন জনিতং কিরিযাৰিসেস নিধানকিচ্চন্তি সম্বন্ধো. ‘‘সন্তানে’’তি চিত্তসন্তানে.

ৰিপচ্চনভাৰো চ নাম পাতুভাৰোতি সম্বন্ধো. নিরুস্সাহ সন্তভাৰো নাম কুসলা কুসলানং ৰিয কাযঙ্গৰাচঙ্গাভিসঙ্খরণ কিচ্চেসু চ আযতিং ৰিপচ্চন কিচ্চেসু চ নিরুস্সাহভাৰেন সন্তভাৰো. ন কিলেসু পসন্তভাৰেন. চিত্তাভিসঙ্খরণ কিচ্চেসুপন সম্পযুত্তচেতনাৰসেন যথোপট্ঠিতেসু আরম্মণেসু সম্পযুত্তধম্মানং একতো সন্নিপাতগমনুস্সাহমত্তং অত্থি. ততোপরং পন সুপিন দস্সন কিচ্চংপি নত্থীতি. ‘‘মন্দমন্দাকারেনা’’তি মন্দতো অতিমন্দাকারেন. কিঞ্চিজানন চিত্তং নাম কম্মাদি আরম্মণং অপ্পমত্তকংপি জাননং ৰীথিচিত্তং. তস্স পৰত্তিযা.

‘‘অরূপিনো’’তি অরূপলক্খণ সমঙ্গিনো. নামলক্খণ সমঙ্গীনোতি ৰুত্তং হোতি. ‘‘জনযন্তাপী’’তি সহজাত ধম্মে জনেন্তাপি. ‘‘সন্তানট্ঠিতিযা’’তি পবন্ধপ্পতিট্ঠানস্স.

‘‘কস্মাপনেত্থা’’তিআদীসু. ‘‘ভাৰিন্দ্রিয দ্ৰযং’’তি ইত্থিন্দ্রিয পুরিসিন্দ্রিয দ্ৰযং. ‘‘ইধা’’তি ইমস্মিং ইন্দ্রিযপচ্চযে. কস্মা ন গহিতং. ননু ইত্থিলিঙ্গাদীনং পৰত্তিকারণত্তা ইধ গহেতব্বমেৰাতি অধিপ্পাযো. জনকত্তং নাম জনক কিচ্চং. এৰং সেসেসুপি. ‘‘এতংতযংপি নত্থী’’তি জনকত্তাদিকিচ্চত্তযংপি নত্থি. এৰংসন্তেকথং লিঙ্গাদীনং পৰত্তিকারণং হোতীতিআহ ‘‘কেৰলং পনা’’তিআদিং. ‘‘দ্ৰযং’’তি ইত্থিভাৰপুম্ভাৰ দ্ৰযং. ন ইন্দ্রিয পচ্চযত্তেন ইন্দ্রিযং নাম হোতি. যথাহি একো রাজা অত্তনো ৰিজিতে গেহানি করোন্তি. এৰং করোন্তূতি গেহসণ্ঠানং পট্ঠপেতি. সব্বেজনা তথেৰ করোন্তি, নো অঞ্ঞথা. তত্থ রাজা গেহুপ্পত্তিযা চ গেহট্ঠিতিযা চ কিঞ্চি কিচ্চং ন করোতি. গেহসামিকাৰা গেহৰড্ঢকিনো ৰা করোন্তি. করোন্তা পন রঞ্ঞা পট্ঠপিতং সণ্ঠানং অনতিক্কমিত্ৰাৰ করোন্তি. এৰমেৰ মিদং দট্ঠব্বং. উপগন্ত্ৰা ঝাযনট্ঠেনাতি সম্বন্ধো. উপসদ্দো উপনিস্সয পদেৰিয উপরি অত্থো. ‘‘উপরী’’তি চ থামবলৰুদ্ধিৰসেনাতি আহ ‘‘তস্মিং ৰা’’তিআদিং. ‘‘তস্মিং’’তি আরম্মণে.

‘‘সুগতি দুগ্গতি নিব্বান সম্পাপকট্ঠেনা’’তি ৰুত্তং. সো অত্থো অব্যাকতমগ্গঙ্গেসু নত্থি. এৰঞ্চসতি তানি কথং মগ্গপচ্চযত্তং গচ্ছন্তীতি আহ ‘‘এত্থ চা’’তিআদিং. ‘‘সম্মাদস্সনাদিনা’’তি সম্মাদস্সন সঙ্কপ্পনাদিনা. ‘‘তেসং’’তি সম্মাদিট্ঠীনং. ‘‘তেসং পী’’তি অব্যাকত ভূতানং সম্মাদিট্ঠীনম্পি. ‘‘তেনেৰট্ঠেনা’’তি সম্মাদস্সনাদিনা লক্খণট্ঠেন. অথৰা. ‘‘তেনেৰট্ঠেনা’’তি সুগতি নিব্বান সম্পাপকট্ঠেনে ৰাতি অত্থো. এৰঞ্চসতি সহেতুকা ৰিপাক ক্রিযা ব্যাকতধম্মাপি তেনেৰট্ঠেন সব্বসো কুসলসদিসা সিযুন্তি. ন সিযুং, পচ্চয ৰেকল্লত্তা. ৰিপাকাব্যাকতাহি কম্মৰেগেন সন্তানে পতিতমত্তত্তা নিরুস্সাহসন্তসভাৰতো তং সম্পযুত্তা চেতনা নানক্খণিক কম্মপচ্চযত্তং ন গচ্ছতি. কিরিযাব্যাকতা চ নিরনুসযসন্তানে উপ্পন্নত্তা তং সম্পযুত্তচেতনাপি তপ্পচ্চযত্তং ন গচ্ছতিযেৰ. তস্মা তেসু ৰিপাক ক্রিযাব্যাকতেসু সম্মাদিট্ঠাদীনিপি সুগতি সম্পাপকট্ঠং ন সাধেন্তি. কিলেসপ্পহান কিচ্চস্স অভাৰতো নিব্বান সম্পাপকট্ঠম্পি নসাধেন্তি. সভাৰ লক্খণৰেকল্লতাপন তেসং সম্মাদিট্ঠাদীনং নত্থিযেৰ. তস্মা তানি মগ্গপচ্চযে সঙ্গহিতানীতি. ইন্দ্রিয ধম্মেসু অরূপিন্দ্রিযানং আধিপ্পচ্চ কিচ্চং অরূপধম্মে স্ৰেৰ ফরতি. রূপধম্মা পন তং সমুট্ঠিতত্তা এৰ তপ্পচ্চযুপ্পন্নেসু ৰুত্তা. তথা হেতু কম্ম মগ্গ ঝানেসু. তেন ৰুত্তং ‘‘এসনযো কম্মিন্দ্রিযঝানপচ্চযেসুপী’’তি. তত্থ কম্মসদ্দেন নানক্খণিক পচ্চযো গহেতব্বো.

‘‘সম্পযুত্তাসঙ্কা সম্ভৰতী’’তি সহজাতা নামধম্মা তং সমুট্ঠান রূপেহি, পচ্ছাজাতা চ অত্তনো অত্তনো পচ্চযুপ্পন্নরূপেহি, ৰত্থু ধম্মা চ তন্নিস্সিতনামধম্মেহি কালতো চ ঠানতো চ এক সম্বন্ধত্তা তেসু সম্পযুত্তাসঙ্কা সম্ভৰতি. ‘‘ৰিপ্পযুত্তপচ্চযপ্পসঙ্গো নত্থী’’তি আরম্মণানন্তরাদিপচ্চযাপি অত্তনো পচ্চযুপ্পন্নেহি সম্পযুত্তা ন হোন্তি. তস্মা তেপি ৰিপ্পযুত্তপচ্চয ভাৰেন ৰত্তব্বাতি এৰরূপো ৰিপ্পযুত্তপচ্চযপ্পসঙ্গো তেসু আরম্মণ পচ্চযাদীসু নত্থীতি অধিপ্পাযো.

‘‘হেট্ঠাৰুত্তপ্পকারেসু এৰা’’তি এত্থ এৰসদ্দেন পচ্চযন্তরং ন হোতীতি দস্সেতি. যদি পচ্চযন্তরং ন হোতি, ন ৰত্তব্বোযেৰ. কস্মা, দেসকস্স পুনরুত্তিনিরত্থকৰাদিতা পত্তিতোতি. নো ন ৰত্তব্বো. কস্মা, লোকে যো সযং নত্থি, ৰিগতো হোতি. সো কস্স পচ্চযো ভৰিতুং অরহতীতি এৰরূপস্স মিচ্ছাভিনিৰেসস্স পহানতো. তেন ইমমত্থং ঞাপেতি, লোকে কেচিধম্মা সযং অত্থিকালে এৰ অঞ্ঞেসং পচ্চযা হোন্তি, নো নত্থিকালে. কেচি ধম্মা সযং নত্থিকালে এৰ অঞ্ঞেসং পচ্চযা হোন্তি, নো অত্থিকালেতি অযঞ্চৰিভাগো অৰস্সং ইচ্ছিতব্বো যেৰাতি. ‘‘ওকাসদানসঙ্খাতেনা’’তি তস্স অঞ্ঞস্স চিত্তুপ্পাদস্স উপ্পত্তিযা ওকাসদানসঙ্খাতেন.

সুত্তন্তে, অত্থীতি অয মেকো অন্তোতি সত্তানং সেট্ঠসারভূতো অত্তানাম অনমতগ্গে সংসারে নিচ্চকালং অত্থি. উচ্ছেদো ৰা ৰিমোক্খো ৰা সব্বসো নত্থি. অযং সস্সতৰাদো নাম একোৰিসমন্তো একাৰিসমাকোটি. নত্থীতি সত্তোনাম একভৰপরমো হোতি, মরণতো পরং নত্থি. একন্তেন উচ্ছিজ্জতি. অযং উচ্ছেদৰাদো নাম দুতীযো ৰিসমন্তো দুতীযাৰিসমকোটি. ইমে পটিচ্চ সমুপ্পাদং অজানন্তানং উভোৰিসমন্তা নাম. জানন্তানং পন তাদিসো অত্তানাম নত্থি, যো অত্থীতি ৰা নত্থীতি ৰা ৰত্তব্বো ভৰেয্য. সুদ্ধধম্মপ্পবন্ধো এৰ অত্থি. তস্স চ যাৰ অৰিজ্জা অপ্পহীনা হোতি, তাৰ উচ্ছেদো নাম নত্থি. অৰিজ্জায পন পহীনায ততোপরং ন পৰত্ততি. অত্থি নাম ন হোতি. অযং অন্তদ্ৰযমুত্তো মজ্ঝিমঞাযো নাম. বহুং নানত্থ সম্ভৰং ৰণ্ণেন্তিযেৰ. ৰণ্ণেন্তানংপি তেসং বহু পযোজনং নত্থি যেৰাতি অধিপ্পাযো.

পচ্চযুদ্দেসানুদীপনা নিট্ঠিতা.

১৬৮. পচ্চযনিদ্দেসে. ‘‘পঞ্চধা’’তি পঞ্চৰিধেহি পচ্চযেহি. ‘‘একধা’’তি একৰিধেন পচ্চযেন. এৰং সেসেসুপি. ‘‘অৰিচ্ছেদাযা’’তি অৰিচ্ছেদত্থায. ‘‘পটিপাদনাযা’’তি যোজনত্থায. যো কোচি চিত্তুপ্পাদো অৰিরুদ্ধস্স যস্স কস্সচি চিত্তুপ্পাদস্স পচ্চযো ন ন হোতীতি যোজনা. ‘‘পুনুপ্পন্নানং’’তি নিরুজ্ঝিত্ৰা পুন উপ্পন্নানং. ‘‘পুরিমানি জৰনানী’’তি এত্থ মগ্গো গোত্রভুতো আসেৰন পচ্চযং লভতি. ফলস্স পন সো ভিন্নজাতিকত্তা আসেৰন পচ্চযো ন হোতি. ফলং পন সব্বসো আসেৰন মুত্তং হোতি. তস্মা তদুভযং ইধ পুরিমজৰনসঙ্খ্যং ন গচ্ছতীতি ৰুত্তং ‘‘মগ্গ ফলজৰনৰজ্জানী’’তি. ফলজৰনৰজ্জানং পচ্ছিমানং জৰনানং. ‘‘সব্বাকারপারিপূরং’’তি এত্থ কুসলাদিজাতিপি সঙ্গহিতাতি ৰুত্তং ‘‘জাতিমত্তেনপী’’তি. অভিন্না এৰ সিযুং. ন পন ভিন্না হোন্তি. কদাচি কেচিভিন্না এৰ হোন্তি. তস্মা ভিন্নজাতিকা ধম্মা. ল. ন সক্কোন্তীতি যোজনা. ‘‘কামাৰচরভাৰতো মহগ্গতানুত্তরভাৰপত্তি নামা’’তি চিত্তসন্তানস্সাতি অধিপ্পাযো. গোত্র ভুচিত্তং কামভূমি. ঝানচিত্তং মহগ্গতভূমি. মগ্গচিত্তং লোকুত্তর ভূমি. কম্মচেতনায নিরুদ্ধাযপি তস্সা পৰত্তাকারো ননিরুজ্ঝতি. চিত্তসন্তানং অনুগচ্ছতি. সো এৰ আযতিং ৰিপাকধম্মরাসি হুত্ৰা পাতুব্ভৰতি. তস্মা সো ৰিপাকস্স বীজসঙ্খ্যং গচ্ছতি. সো চ যাৰ ন ৰিপচ্চতি. তাৰ সংসারপ্পৰত্তিযা সতি, অন্তরা ৰিনট্ঠো নাম ন হোতি. তস্মা কম্মচেতনা উপ্পজ্জমানা চিত্তসন্তানে তস্স বীজস্স নিধানত্থায উপ্পজ্জতি, নিরুজ্ঝমানা চ নিদহিত্ৰা এৰ নিরুজ্ঝতীতি ৰুত্তং ‘‘অত্তনো পৰত্তাকারসঙ্খাত বীজনিধানঞ্চা’’তি. ‘‘চেতনায হোতী’’তি চেতনায সাধারণং হোতি. পুরেজাতা সালরুক্খপোতকা পচ্চযা হোন্তীতি সম্বন্ধো. পুরিমচিত্তক্খণেসু উপ্পন্না চতুসমুট্ঠানিকরূপধম্মাতি সম্বন্ধিতব্বং. ‘‘আহারজকাযো’’তি এৰং ৰুত্তাতি পাঠসেসো. ‘‘পচ্ছা জাতেনা’’তি পচ্ছাজাতপচ্চযেন পযোজনং নত্থি. জিণ্ণপতরুক্খস্স উদকাসিঞ্চনং ৰিয হোতীতি অধিপ্পাযো. ‘‘যদগ্গেনা’’তি যেনকারণ কোট্ঠাসেন. ‘‘ৰত্থু রূপং’’তি নিরোধাসন্নং হদযৰত্থু রূপং. ‘‘এৰমযং পী’’তি এৰং অযং পচ্ছাজাতপচ্চযোপি. ৰিৰিধেন আকারেন ফরণং কালন্তর দেসন্তর গমনং ৰিপ্ফারো. মহন্তো ৰিপ্ফারো যস্সাতি সমাসো. ‘‘ৰত্থুম্হী’’তি হদযৰত্থুম্হি. পঞ্চহি খন্ধেহি ৰোকিণ্ণো সম্মিস্সোতি পঞ্চৰোকারো. কাম রূপভৰো. ৰিনা উপ্পজ্জিতুং ন সক্কোতি. রূপৰিরাগভাৰনাবলেন রূপস্স অৰিক্খম্ভিতত্তাতি অধিপ্পাযো. ‘‘পুরেজাতং ৰা’’তি একচিত্তক্খণাতীতে পুরেজাতং ৰা. ‘‘ৰড্ঢনপক্খে ঠিতং ৰা’’তি ততো পচ্ছা যাৰ অট্ঠম চিত্তক্খণা ৰড্ঢনপক্খে ঠিতং ৰা. ‘‘উপ্পন্নং ৰত্থূ’’তি উপ্পন্নং ৰত্থুরূপং. ‘‘এত্থা’’তি ইমস্মিং পুরেজাত পচ্চযে. কিঞ্চাপি দিস্সতীতি সম্বন্ধো. ‘‘পচ্চনীযে’’তি পচ্চনীয ৰারে. ‘‘তং’’তি আরম্মণপুরেজাতং. তস্স আরম্মণস্স অপরিব্যত্তত্তাৰাতি সম্বন্ধো. কারণং ৰদন্তি পট্ঠানটীকাচরিযা. অরূপভৰে মরণাসন্নকালে কস্সচি গতিনিমিত্তু পট্ঠানং অট্ঠকথাসু ৰুত্তমেৰ. এৰঞ্চসতি, তত্থ আরম্মণ পুরেজাতং লদ্ধব্বমেৰ. পট্ঠানেপন তস্মিংভৰে সব্বং পুরেজাতপচ্চযং পটিক্খিপতি. কস্মা ইতি চে, ৰত্থু পুরেজাতপচ্চযস্স তত্থ অলদ্ধব্বত্তাতি ইমিনা অধিপ্পাযেন ‘‘আরুপ্পেৰিযা’’তি ৰুত্তং. এত্থ চ পট্ঠানে অরূপভৰে দ্ৰেপি পুরেজাতপচ্চযা পটিক্খিত্তা, তস্মা সব্বেপি অরূপ পুগ্গলা সব্বংপি রূপধম্মং আরম্মণং ন করোন্তীতিপি ৰদন্তি. এৰঞ্চ কত্ৰা আরম্মণ সঙ্গহদীপনিযং ‘অসঞ্ঞীভৰতো চুতানং ৰিয অরূপভৰতো চুতানংপি গতিনিমিত্তভূতং কামপটিসন্ধিযা আরম্মণং ভৰন্তরে কেনচিদ্ৰারেন অগ্গহিতং, কেৰলং কম্মবলেনেৰ উপট্ঠাপিত’ন্তি ৰুত্তং. ‘‘গূথকুণপাদীনী’’তি গূথঞ্চ মতপূতিসরীরানি চ. ‘‘এৰং ৰুত্তেহী’’তি পট্ঠানে ৰুত্তেহি. তে পন অকুসলা ধম্মা কথং চতুভূমিক কুসলানং উপনিস্সয পচ্চযা হোন্তীতি আহ ‘‘তত্থ আনন্তরিয ৰজ্জানী’’তিআদিং. তত্থ আনন্তরিয কম্মকতানং কিলেসাৰরণ কম্মাৰরণেহি সমন্নাগতত্তা ঝানমগ্গপ্পটিলাভো নাম নত্থীতি ৰুত্তং ‘‘আনন্তরিয ৰজ্জানী’’তি. ‘‘তানী’’তি রাগাদীনি অকুসলানি চতুভূমিক কুসলানং উপ্পত্তিযা বলৰনিস্সযা হোন্তীতি যোজনা. ‘‘সমতিক্কমমুখেনা’’তি পট্ঠানে অকুসলো ধম্মো কুসলস্স ধম্মস্স উপনিস্সয পচ্চযেন পচ্চযোতি এতস্স পঞ্হস্স ৰিভঙ্গে পাণং হন্ত্ৰা তস্স পটিঘা তত্থায দানং দেতি, সীলং সমাদিযতি, উপোসথকম্মং করোতি, ঝানং উপ্পাদেতি, মগ্গং উপ্পাদেতি, অভিঞ্ঞং উপ্পাদেতীতি ৰুত্তং. তত্থ ‘‘তস্স পটিঘাতত্থাযা’’তি তস্স পাণাতিপাতকম্মস্স পটিহননত্থায পহানত্থায সমতিক্কমনত্থাযাতি ৰুত্তং হোতি. সো চে পাণাতিপাতী পুগ্গলো পুন সংৰেগং আপজ্জিত্ৰা তস্স কম্মস্স সমতিক্কমনত্থায দানং দেতি, সীলং সমাদিযতি, উপোসথ কম্মং করোতি. তদা তং পাণাতি পাতকম্মং তং পুগ্গলং দানকম্মেনিযোজেতি নাম. তথা সীলকম্মে উপোসথ কম্মেতি. যথাহি রাজা এৰং ৰদেয্য ইমস্মিং দিৰসে যো উপোসথং নুপৰসতি, তং ঘাতেস্সামীতি. তদা সব্বেপি নাগরা উপোসথং উপৰসেয্যুং. এৰমিদং দট্ঠব্বং. রাজাৰিয হি তস্স পাণাতিপাতকম্মং. নাগরা ৰিয সো পাণঘাতকো. উপোসথ কম্ম কুসলানি ৰিয তস্স দানসীল উপোসথ কম্ম কুসলানীতি. ‘‘ঝানং উপ্পাদেতি, মগ্গং উপ্পাদেতি, অভিঞ্ঞং উপ্পাদেতী’’তি পদেসুপি এসেৰনযো. এৰং সমতিক্কমমুখেন একংপি অকুসলং সব্বানি চতুভূমিক কুসলানি উপনিস্সয সত্তিযা জনেতি পৰত্তেতীতি ৰেদিতব্বং. ‘‘তানিযেৰ সব্বানী’’তি আনন্তরিয কম্মসহিতানিসব্বানি অকুসলানিযেৰ সব্বেসং অকুসলানং অব্যাকত ধম্মানং উপ্পত্তিযা বলৰনিস্সযা হোন্তীতি যোজনা. দানসীলাদযো কুসলা ধম্মা. সুট্ঠু বলৰং কম্মং অধিপ্পেতং, ন দুব্বলং. উপনিস্সযট্ঠানত্তা. তেসংপি রূপধম্মানং বলৰনিস্সযা ননুহোন্তীতি সম্বন্ধো. কথং হোন্তীতি আহ ‘‘বহিদ্ধারুক্খতিণাদীনং’’তিআদিং. তত্থ পথৰীরস আপোরসৰস্সোদক বীজানি রুক্খতিণাদীনং বলৰনিস্সযা হোন্তি. মূলভেসজ্জাদীনি অজ্ঝত্তং সন্তানং বলৰনিস্সযা হোন্তীতি যোজনা. ‘‘পকতস্সেৰা’’তি পথমতরং কতস্স উপ্পাদনাদিকম্মস্সেৰ. ‘‘ন এৰং রূপসন্তানেনা’’তি এৰং রূপসন্তানেন উপ্পাদিতা উপসেৰিতা ধম্মা নত্থি. ‘‘তং’’তি উতুবীজাদিকং. কম্মাদিকঞ্চ. ‘‘পকতং’’তি পুরেতরং উপ্পাদিতঞ্চ উপসেৰিতঞ্চ. সচেতনস্সেৰ চেতনং পকপ্পনং পকরণন্তি সম্বন্ধো. চেতনং পকপ্পনং পকরণং নামাতি অত্থো. ‘‘পকপ্পনং’’তি চ সংৰিধানং. ‘‘কিঞ্চী’’তি কিঞ্চিকম্মাদিকং উতুভোজনাদিকঞ্চ. অত্তনো চ উপ্পন্না রাগাদযো পরস্স চ সন্তানে পরস্স চ উপ্পন্না রাগাদযো অত্তনো চ সন্তানেতি যোজনা. ‘‘নিদস্সনং’’তি উদাহরণং হোতি. মনোপদোসিকদেৰা অঞ্ঞমঞ্ঞং দিস্ৰা অত্তনো মনং পদূসেন্তি. বাল়্হং ইস্সাধম্মং উপ্পাদেন্তি. তস্মিংযেৰ খণে চৰন্তি. তেসং দ্ৰে ইস্সাধম্মা অঞ্ঞমঞ্ঞস্স বলৰনিস্সযা হোন্তীতি. কামাৰচর কুসলস্স বলৰনিস্সযা হোন্তীতিআদিনা যোজেতব্বং. ৰিভাৰনিপাঠে. ঝান মগ্গ ফল ৰিপস্সনাদিভেদং আলম্বণং পচ্চৰেক্খন অস্সাদনাদি ধম্মে অত্তাধীনে করোতীতি যোজনা. ‘‘অত্তাধীনে’’তি অত্তাযত্তে অত্তাবদ্ধে. পট্ঠানে পঞ্হৰারে দানং দত্ৰা সীলংসমাদিযিত্ৰা উপোসথকম্মং কত্ৰা তং গরুং কত্ৰা পচ্চৰেক্খতি. পুব্বে সুচিণ্ণানি গরুং কত্ৰা পচ্চৰেক্খন্তীতিআদিনা আগতত্তাদান সীল. ল. নিব্বানানি চেৰাতি ৰুত্তং. রাগং গরুংকত্ৰা অস্সাদেন্তি, অভিনন্দতীতিআদিনা, চক্খুং গরুং কত্ৰা অস্সাদেন্তীতিআদিনা চ আগতত্তা ‘‘রাগ দিট্ঠি চক্খু সোতাদীনিচা’’তি ৰুত্তং. ‘‘পরত্থ পী’’তি পরতো নিস্সয পচ্চযাদীসুপি. ‘‘সো এৰা’’তি পচ্চুপত্থম্ভকো এৰ. ‘‘কিঞ্চী’’তি কিঞ্চিমত্তংপি. মহাভূতে কিঞ্চি উপত্থম্ভেতুং ন সক্কোন্তীতি যোজনা. ননু আহার রূপং মহাভূতে উপত্থম্ভেতুং সক্কোতি. জীৰিতরূপঞ্চ কম্মজমহাভূতে অনুপালেতুন্তি. সচ্চং. ইধ পন সহজাতপচ্চয কিচ্চং অধিপ্পেতং. তেসঞ্চ দ্ৰিন্নং সহজাতপচ্চয কিচ্চং নত্থি. তং পরতো আৰী ভৰিস্সতীতি. ‘‘ৰত্থু ৰিপাকানং’’তি ৰত্থুরূপং ৰিপাকানং. পট্ঠানপাঠে. আরম্মণঞ্চ, নিস্সযো চ, পুরেজাতঞ্চ, ৰিপ্পযুত্তো চ, অত্থি চ, অৰিগতো চা,তি ছসুপচ্চযেসু ঘটিতেসু তীণি ৰিসজ্জনানি লব্ভন্তীতি যোজনা. তীণি ৰিসজ্জনানি নাম ৰত্থু কুসলানং খন্ধানং ছ হি পচ্চযেহি পচ্চযো. ৰত্থু অকুসলানং, ৰত্থু অব্যাকতানন্তি. এত্থ চ অত্তনো অজ্ঝত্তং ৰত্থুং আরব্ভ ৰত্থু মে অনিচ্চন্তিআদিনা সম্মসন্তস্স ৰত্থুরূপং কুসলানং খন্ধানং ছহি পচ্চযেহি পচ্চযো. এতং মম, এসো হমস্মি, এসো মে অত্তা,তি উপাদিযন্তস্স ৰত্থু রূপং অকুসলানং. উভযত্থপি আৰজ্জনক্খণে অব্যাকতানং. অরহতো পন তং অনিচ্চন্তিআদিনা সম্মসন্তস্স ক্রিযাব্যাকতানং খন্ধানন্তি. তেনাহ ‘‘পচ্চুপ্পন্নং ৰত্থুং’’তিআদিং. তত্থ ‘‘পচ্চুপ্পন্নং ৰত্থুং’’তি অত্তনো পচ্চুপ্পন্নং ৰত্থুং. অধিট্ঠানৰিধানে পন আকাস গমনে রূপকাযং আরব্ভচিত্তং ৰিয কাযং লহুকং অধিট্ঠহন্তস্স তপ্পরিযাপন্নং ৰত্থু অভিঞ্ঞাচিত্ত দ্ৰযস্সাতি যোজেতব্বং. ‘‘অনিট্ঠেঠানে’’তি জৰনচিত্তস্স আৰজ্জনেন ৰিনা উপ্পজ্জনং নাম কত্থচি ইচ্ছিতব্বং হোতি. কত্থচি অনিচ্ছিতব্বং. তত্থ নিরোধসমাপত্তিতো ৰুট্ঠানে, মগ্গৰীথীসু গোত্রভুৰোদানট্ঠানে, আগন্তুক ভৰঙ্গট্ঠানেতি ইদং ইচ্ছিতব্বট্ঠানং নাম. ইতো অঞ্ঞং অনিচ্ছিতট্ঠানং নাম. এৰং অনিচ্ছিতব্বে ঠানেতি অত্থো. ‘‘পকতিকালে’’তি মরণাসন্নকালতো অঞ্ঞস্মিংকালে. ‘‘তানিৰা’’তি অত্তনো অত্তনো নিস্সযৰত্থূনিৰা. ‘‘অঞ্ঞং ৰা’’তি ৰত্থুতো অঞ্ঞং রূপাদিকং ৰা. ‘‘ভিন্নারম্মণানি নামা’’তি অঞ্ঞং আৰজ্জনস্স আরম্মণং, অঞ্ঞং জৰনানন্তি এৰং জৰনানি আৰজ্জনেন ভিন্নারম্মণানি ৰা. তেন ৰুত্তং ‘‘পচ্ছাউপ্পন্নানী’’তিআদি. ‘‘তেসং’’তি ৰীথিচিত্তানং. ‘‘তদেৰা’’তি তং এৰৰত্থু রূপং. ‘‘ৰত্থু চা’’তি নিস্সযো চ. ‘‘তেসং’’তি অট্ঠকথাচরিযানং. ন হি গহেতুং সক্কোন্তীতি সম্বন্ধো. সেসমেত্থ সুবোধং. ‘‘কস্মা ৰুত্তং’’তিআদীসু. ‘‘তস্স যক্খস্সা’’তি ইন্দকনামস্স তস্সযক্খস্স. ‘‘ইতরেসংপী’’তি সংসেদজোপপাতিকানংপি. ‘‘দুৰিধেনা’’তি রূপজনন কিচ্চং রূপূপত্থম্ভন কিচ্চন্তি এৰং দুৰিধেন. অথৰা ‘‘দুৰিধেনা’’তি অজ্ঝত্তাহারস্স উপত্থম্ভনং বহিদ্ধাহারস্স উপত্থম্ভনন্তি এৰং দুৰিধেন. ‘‘তথারূপানঞ্চা’’তি অপ্পনাপত্তকম্মৰিসেসেন সিদ্ধানঞ্চ. ‘‘অজ্ঝত্তাহারোপী’’তি পিসদ্দেন যথাৰুত্তজীৰিতিন্দ্রিযঞ্চ অরূপাহারে চ সম্পিণ্ডেতি. ‘‘ৰত্থুৰিপাকানং’’তি ৰত্থুরূপং ৰিপাকানং. ‘‘সব্বথা’’তি অব্যাযপদং. তঞ্চ সব্বৰিভত্তিযুত্তং. ইধ পন পচ্চত্তৰচনন্তি আহ ‘‘সব্বথা’’তি সব্বপ্পকারন্তি. পকারো চ ৰেদিতব্বোতি সম্বন্ধো. কথং ৰেদিতব্বোতি আহ ‘‘তিৰিধো’’তিআদিং. ‘‘সহজাতে সঙ্গহেতব্বং’’তি পচ্চযভাৰেন সঙ্গহেতব্বং. সহজননং নাম অত্তনা সহ জনেন্তস্স সহজননং. তঞ্চ কম্মচিত্তাদীনং ৰিয ৰিসুং জননকিচ্চং ন হোতি. অত্তনি উপ্পজ্জন্তে এৰ ইতরানি রূপানি উপ্পজ্জন্তি. অনুপ্পজ্জন্তে ন উপ্পজ্জন্তীতি এৰরূপং জননকিচ্চং ৰেদিতব্বং.‘‘ৰিনাৰ সহুপ্পাদনকিচ্চেনা’’তি অত্তনা সহুপ্পাদনকিচ্চে আহারস্স ব্যাপারো নত্থীতি অধিপ্পাযো. তেনেৰ সহজাতানি উপত্থম্ভন্তোপি সহজাতপচ্চযত্তং ন গচ্ছতীতি. এসনযো রূপজীৰিতিন্দ্রিযেপি. তেন ৰুত্তং ‘‘জীৰিতংপী’’তিআদি. ‘‘তীসূ’’তি আরম্মণঞ্চ উপনিস্সযো চ অত্থিচাতি ইমেসু তীসু. আরম্মণাধিপতিম্হি পুরেজাতা রম্মণাধিপতিপি অত্থি. সো পুরেজাতত্থি পচ্চযো এৰাতি অত্থিপচ্চযে সঙ্গহিতো. ‘‘তস্মিং কতে পৰত্তমানানং’’তি তস্মিং কম্মে কতে তস্স কতত্তা এৰ পৰত্তমানানং. আরম্মণাকারো গোচরৰিসযাকারো. ‘‘সন্তানৰিসেসং কত্ৰা’’তি বীজনিধানং কত্ৰাতি অধিপ্পাযো. ‘‘তে’’তি আরম্মণপচ্চয কম্ম পচ্চযা. ‘‘অকালিকো’’তি মগ্গচেতনাৰসেন অকালিকো. সোহি অত্তনো অনন্তরেফলং জনেতি. তস্মা আগমেতব্বস্স আযতিকালস্স অভাৰা অকালিকোতি ৰুচ্চতি. অৰসেসো নানক্খণিকপচ্চযো কালিকো. ‘‘পচ্চযট্ঠেনা’’তি পচ্চযকিচ্চেন. লোকপ্পৰত্তিযা কম্মহেতুকত্তাতি সম্বন্ধো. ‘‘ফলহেতূ পচারেনা’’তি ফলভূতায সব্বলোকপ্পৰত্তিযা হেতুভূতস্স কম্মস্স নামং ফলম্হি আরোপেত্ৰা ৰোহারেন সব্বেপি তেৰীসতিপচ্চযা কম্মসভাৰং নাতিৰত্তন্তীতি যোজনা. কম্মপচ্চয সঙ্খ্যং গচ্ছন্তীতি ৰুত্তং হোতি. ‘‘ৰিজ্জমানা যেৰা’’তি অত্থিপচ্চযা এৰাতি ৰুত্তং হোতি. ‘‘সাসনযুত্তিযা ৰিরুদ্ধমেৰা’’তি এত্থ সাসনযুত্তি নাম তীণিপিটকানি. ‘‘ৰিরুদ্ধমেৰা’’তি আরম্মণ পচ্চযভূতা সব্বে পথৰী পব্বত নদীসমুদ্দ অজটাকাসাদযো চ সব্বাপঞ্ঞত্তিযো চ নিব্বানঞ্চ কম্মসঙ্খ্যং গচ্ছন্তীতি ৰদন্তো চ, সব্বে অতীতানাগত ধম্মা অত্থিপচ্চযা এৰাতি ৰদন্তো চ, তীহি পিটকেহিপি ৰিরুজ্ঝতিযেৰ. পট্ঠানপাল়িযা পন ৰত্তব্বমেৰ নত্থি. অত্থি সদ্দোহি পট্ঠানে পচ্চুপ্পন্নভাৰেন ৰিজ্জমানত্থো. ন পরমত্থ ধম্ম ভাৰেন. নাপিলোক সম্মুতিৰসেন. ন হি পরমত্থ ধম্ম ভূতাপি অতীতানাগতধম্মা ইধ অত্থি সঙ্খ্যং গচ্ছন্তি. নাপিপঞ্ঞত্তি হোতি. ‘‘অঞ্ঞমঞ্ঞপ্পটিবদ্ধওকাসে’’তি অঞ্ঞমঞ্ঞং নিস্সযনিস্সিতভাৰে ন পটিবদ্ধে কামরূপভৰোকাসে. ‘‘যতো’’তি যম্হাপটিসন্ধি ৰিঞ্ঞাণতো. ‘‘যতো’’তি ৰা যম্হাসীসতো, যম্হাবীজতো নিব্বত্তীতি যোজনা. ‘‘বীজতো ৰিয মহারুক্খস্সা’’তি বীজপচ্চযা কল়ীরঙ্কুরাদিকস্স মহারুক্খসন্তানস্স নিব্বত্তিৰিয. পাল়িপাঠে. ‘‘ন ওক্কমিস্সথা’’তি সচে ন ওক্কমেয্য. ‘‘সমুচ্চিস্সথা’’তি অপিনুখো সমুচ্চেয্য, ৰড্ঢেয্য. ‘‘ৰোক্কমিস্সথা’’তি সচে ৰিগমেয্য, ৰিনাসেয্য. ‘‘অভিনিব্বত্তিস্সথা’’তি অপিনুখো অভিনিব্বত্তেয্য, পাতুভৰেয্য. ‘‘ৰোচ্ছিজ্জিস্সথা’’তি সচেউচ্ছিজ্জেয্য. ‘‘আপজ্জিস্সথা’’তি অপিনুখো আপজ্জেয্য. ‘‘যদিদং’’তি যং ইদং. ‘‘ইদং’’তি নিপাতমত্তং. ‘‘ৰিঞ্ঞাণং’’তি পটিসন্ধিৰিঞ্ঞাণং. যং ৰিঞ্ঞাণং অত্থি. এসেৰ ৰিঞ্ঞাণ ধম্মোতি যোজনা. ‘‘রূপুপ্পত্তিযা’’তি রূপুপ্পাদস্স. ৰিঞ্ঞাণং পচ্চযো এতস্সাতি ৰিঞ্ঞাণ পচ্চযা. রূপুপ্পত্তি. ‘‘রূপপ্পৰেণিযা’’তি কম্মজরূপসন্ততিযা. ‘‘উতুআহারাপী’’তি অজ্ঝত্ত উতুঅজ্ঝত্ত আহারাপি. ইদঞ্চ সম্ভৰযুত্তি ৰসেন ৰুত্তং. অত্থতো পন পুরিমুপ্পন্নায রূপপ্পৰেণিযা অসতি, অজ্ঝত্তং তে উতুআহারাপি নত্থিযেৰ. বহিদ্ধা উতুপন অসতিপি পুরিমুপ্পন্নায রূপপ্পৰেণিযা রূপং ন জনেতীতি ন ৰত্তব্বং. টীকাপাঠে. ‘‘অরূপং পনা’’তি অরূপভূমিপন. ‘‘যস্মিংরূপে’’তি কম্মজরূপে. ‘‘পচ্চযভাৰো অত্থী’’তি পচ্ছিমরূপুপ্পত্তিযা পচ্চযসত্তি অত্থি. কস্মা ৰিঞ্ঞাযতীতি চে. ‘‘পুত্তস্সা’’তিআদিমাহ. ‘‘বীজভাৰসঙ্খাতং’’তি অম্ববীজাদীনং বীজভাৰসঙ্খাতং. ‘‘নিযামরূপং নামা’’তি উতুৰিসেসমাহ. ‘‘যথা ৰা তথা ৰা’’তি অনিযমতোতি ৰুত্তং হোতি. ‘‘যোনিভাৰসঙ্খাতং’’তি তং তং গোত্তকুলজাতীনং জাতিভাৰসঙ্খাতং. ‘‘নিযামরূপং’’তি উতুৰিসেস সঙ্খাতং নিযামরূপং. সদিসানি রূপসণ্ঠানানি যেসন্তি ৰিগ্গহো. ‘‘পটিসন্ধিরূপস্সেৰ আনুভাৰো’’তি কললকালাদীসু উপ্পন্নস্স পটিসন্ধিরূপস্সেৰ আনুভাৰো. পুন তমেৰত্থং ৰিসেসেত্ৰা দস্সেতুং ‘‘অপিচা’’তিআদিমাহ. ‘‘সমুদাগতং’’তি সুট্ঠু উপরূপরিআগতং. ইত্থিভাৰাদিরূপং বীজরূপঞ্চ নিযামেতীতি সম্বন্ধো. ‘‘নিযামকং’’তি নানাৰণ্ণসণ্ঠানাদীনং নিযামকং. ‘‘তত্থ ইমস্মিং ভৰে’’তিআদীসু. ধনঞ্চ ধঞ্ঞঞ্চ ততো অৰসেসা সব্বেউপভোগপরিভোগাচাতি ৰিগ্গহো. ৰিজ্জা চ সিপ্পঞ্চ নানাবহুস্সুতঞ্চ পরিযত্তি চাতি দ্ৰন্দো. ‘‘অনাগতানং তাসং’’তি তাসং অভিনৰধনধঞ্ঞাদিসম্পত্তীনং. ‘‘উপনিস্সয পচ্চযতা’’তি পুব্বযোগকম্মস্স উপনিস্সয পচ্চযতা. তত্থ ধনধঞ্ঞভোগানং পটিলাভত্থায পুব্বযোগকরণং নাম কসিকম্ম ৰাণিজ্জকম্মাদীনং করণং. তত্থ কসিকম্মে তাৰ ধনধঞ্ঞভোগানং পটিলাভত্থায কসিকম্মকরণে ধনধঞ্ঞভোগা অনাগতূপনিস্সয পচ্চযো. ইদানি কসিকম্মকরণং তস্স পচ্চযুপ্পন্নং. ধনধঞ্ঞ ভোগানং পটিলাভপরিভোগকালেসু কসিকম্মকরণং অতীতূপনিস্সয পচ্চযো. তেসং পটিলাভো চ পরিভোগো চ তস্স পচ্চযুপ্পন্নো. কসিকম্মকরণক্খণে পন খেত্ত, ৰত্থু, বীজ, মেঘৰুট্ঠিযো চ নঙ্গলাদীনি কসিভণ্ডানি চ গোমহিংসা চ কম্মকারক পুরিসা চ পচ্চুপ্পন্নূপনিস্সযো. কসিকম্মকরণং তস্স পচ্চযুপ্পন্নং. কম্মসাধিকস্স মাতাপিতাদযো পুব্বপুরিসা তস্স কম্মস্স অতীতূপনিস্সয পচ্চযো. তং কম্মং তস্স পচ্চযুপ্পন্নন্তি. এৰং সেসেসুপি. সেসং সুৰিঞ্ঞেয্যং.

‘‘পঞ্চৰিধ’’ন্তিআদীসু. ‘‘সণ্ঠানত্তং’’তি অণু, তজ্জারী, রথরেণু, লিক্খাদীনি উপাদায সব্বেসং রূপসণ্ঠানানং ভাৰো সণ্ঠানত্তং. ‘‘ভাৰো’’তি চ তেসং পৰত্তি ৰুচ্চতি. ‘‘পৰত্তি হেতূ’’তি চ পরমত্থ রূপ ধম্মা এৰ. ‘‘অনুপগমনতো’’তি এত্থ সভাৰতো অতিসুখুমত্তা অনুপগমনং ৰেদিতব্বং. অধিৰচনসঙ্খাতং নামাভিধানন্তি ৰিগ্গহো. ‘‘অধিৰচনং’’তি চ অত্থপ্পকাসকত্তা অধিকং ৰচনং অধিৰচনং. ‘‘নামাভিধান’’ন্তি চ নামপঞ্ঞত্তি ৰুচ্চতি. ‘‘গহেতব্ব ভাৰো’’তি ইদং চিত্তং নাম, অযং ফস্সোনামাতিআদিনা কথেন্তানং সন্তিকা নামাভিধানং সুত্ৰা তদনুরূপস্স সভাৰত্থস্স জাননৰসেন ঞাণেন গহেতব্বভাৰো. নাম পঞ্ঞত্তানুসারেন জানিতব্বত্তা নামন্তি ৰুচ্চতীতি ৰুত্তং হোতি. আরম্মণে নমতীতি নামং. আরম্মণিক ধম্মা ৰা এত্থ নমন্তীতি নামন্তিপি যুজ্জতি.

ইমস্মিং পচ্চযসঙ্গহে পচ্চযধম্মেসু পঞ্ঞত্তীনংপি সঙ্গহিতত্তা পঞ্ঞত্তি সঙ্গহোপি থেরেন ইধ নিক্খিত্তো. তত্থ ‘‘পঞ্ঞাৰীযতী’’তি এত্থ পঞ্ঞাপনং নাম ৰোহারট্ঠপনং. তঞ্চঠপনং দ্ৰীহিকারণেহি সিজ্ঝতি ৰদন্তানং ৰোহারেন চ, সুণন্তানং সম্পটিচ্ছনেন চাতি দস্সেতুং ‘‘অযং পী’’তিআদিমাহ. ‘‘সম্পটিচ্ছীযতী’’তি যথা পুব্বপুরিসেহি ৰোহরীযতি, তথা পচ্ছিম জনপরম্পরাহি ৰোহরীযতীতি ৰুত্তং হোতি. পকারেন ঞাপীযতীতি পঞ্ঞত্তীতিপি যুজ্জতি. ‘‘ব্যঞ্জনত্থো’’তি মনুস্স, দেৰ, পথৰী, পব্বতাদিকো সদ্দত্থো. ‘‘পঞ্ঞা পীযন্তী’’তি পকারেন ঠপীযন্তি. সদ্দপঞ্ঞত্তিং আহাতি অধিকারো. অধিমত্তভাৰপ্পকারো নাম পথৰীপব্বতাদীসু পথৰীধাতুযা অধিমত্ত ভাৰৰিসেসো. নদী সমুদ্দোদকাদীসু আপোধাতুযা. অগ্গিক্খন্ধেসু তেজোধাতুযা. ৰাতক্খন্ধেসু ৰাযোধাতুযাতি এৰং অধিমত্ত ভাৰৰিসেসো. ৰিৰিধেন পকারেন পরিণমনং ৰিপরিণামোতি আহ তথা তথা ৰিপরিণামাকারন্তি. পথৰীপব্বতাদিৰোহারো সণ্ঠিতাকারং নিস্সায পৰত্তো ন হোতি. পথৰী নাম এৰং সণ্ঠানা, পব্বতো নাম এৰং সণ্ঠানোতি সণ্ঠাননিযমো নত্থি. পংসুসিলানং রাসিপুঞ্জপ্পৰত্তিমত্তেন ৰোহারো সিদ্ধোতি ৰুত্তং ‘‘ন হি ইধ সণ্ঠানং পধানং’’তি. ‘‘কট্ঠাদযো এৰ ৰুচ্চন্তী’’তি তে এৰসণ্ঠাননানত্তং পটিচ্চ নানাৰোহারেন ৰুচ্চন্তি. পথৰী পব্বত নদী সমুদ্দাদীসু ৰিয ভূতানং পৰত্তিৰিসেসাকারেনাতি ৰুত্তং ‘‘ন হি ইধ সমূহো পধানং’’তি. ‘‘উপাদাপঞ্ঞত্তী’’তি পঞ্চক্খন্ধ ধম্মে উপাদায তেহি অনঞ্ঞং একীভূতং কত্ৰা পঞ্ঞত্তি. ন আকাস পঞ্ঞত্তি দিসাদেসপঞ্ঞত্তিযো ৰিয তেহি খন্ধেহি মুঞ্চিত্ৰা পঞ্ঞত্তি. ‘‘যতো’’তি যম্হাদিসতো. ‘‘লদ্ধপ্পকাসত্তা’’তি লদ্ধপ্পভাসত্তা. ‘‘অহস্সা’’তি দিৰসস্স. উদ্ধুমাতকাদীনি ‘উদ্ধুমাতকং পটিকূলং’তিআদিনা পটিকূলৰসেন মনসিকরোন্তস্সপি নিমিত্তং উপট্ঠহন্তং ভূতৰিকারপ্পকারেন উপট্ঠহতীতি কত্ৰা ভূতনিমিত্তে সঙ্গণ্হাতি. ‘‘অট্ঠকথাযং’’তি পুগ্গলপঞ্ঞত্তি অট্ঠকথাযং. ‘‘তাসং’’তি ভূমিপব্বতাদিকানং অত্থ পঞ্ঞত্তীনং. ‘‘তথা তথা’’তি অযং ভূমি, অযং পব্বতো, তিআদিনা তেন তেন ৰোহারেন. অত্থানং পরমত্থানং ছাযাতি অত্থচ্ছাযা. ‘‘ছাযা’’তি চ নিমিত্তচ্ছাযাযো ৰুচ্চন্তি. অত্থচ্ছাযানং আকারো অত্থচ্ছাযাকারো. ‘‘আকারো’’তি চ নানাসমূহ নানাসণ্ঠানাদিকো আকারো. অত্থোতি ৰা সদ্দাভিধেয্যো ৰচনত্থো. সোযেৰ সমূহাকারাদি নিমিত্ত মত্তত্তা অত্থচ্ছাযাকারোতি ৰুচ্চতীতি ইমমত্থং দস্সেতি ‘‘সদ্দাভিধেয্য সঙ্খাতেনা’’তিআদিনা. ‘‘দব্বপ্পটিবিম্বাকারেনা’’তি দব্বসঙ্খাতেন পটিবিম্বাকারেন. ‘‘ওলম্বিযা’’তি অৰলম্বিত্ৰা. ‘‘গণনূপগং কত্ৰা’’তি অয মেকো অত্থো, ইদমেকং ৰত্থূতি এৰং গণনূপগং কত্ৰা. ‘‘ইমেছা’’তি ইমে ছসদ্দপঞ্ঞত্তি ৰোহারা নাম নামকম্মাদি নাম. ‘‘অত্তনী’’তি নামপদ সঙ্খাতে অত্তনি. অত্থ ৰিসযং এৰ হুত্ৰা পৰত্ততি ভাসঞ্ঞূনন্তি অধিপ্পাযো. ‘‘নামে সতী’’তি অক্খরসমূহো পদং, পদসমূহো ৰাক্যন্তি এৰং ৰুত্তে নামপদে ৰিজ্জমানে সতি. ‘‘তদুগ্গণ্হন্তানং’’তি তং তং নামপদং ৰাচুগ্গতকরণ ৰসেন উগ্গণ্হন্তানং জনানং. ‘‘তদত্থা’’তি তস্স তস্স নাম পদস্স অত্থা. ‘‘আগচ্ছন্তি যেৰা’’তি ভাসঞ্ঞূনং ঞাণাভিমুখং আগচ্ছন্তিযেৰ. এতেন অত্তনি অত্থস্স নামনং নাম অত্থজোতন কিচ্চমেৰাতি দীপেতি. ‘‘সুণন্তানং ঞাণং’’তি এত্থ ‘‘ঞাণং’’তি উপলক্খণ ৰচনং, অকুসল ৰিঞ্ঞাণস্সপি অধিপ্পেতত্তা. ‘‘তং তং অত্থাভিমুখং নামেতী’’তি আরম্মণ করণৰসেন নামেতি. ‘‘নামগ্গহণ ৰসেনা’’তি অযং অসুকোনাম হোতূতি এৰং নামগ্গহণৰসেন. ‘‘ধারীযতী’’তি যাৰজীৰংপি অপ্পমুস্সমানং কত্ৰা ধারীযতি. নীহরিত্ৰা ৰুচ্চতি অত্থো এতাযাতি নিরুত্তি. ‘‘এতাযা’’তি করণভূতায এতাযনামজাতিযা. ‘‘অৰিদিতপক্খে’’তি নামপদং অস্সুতকালে অৰিঞ্ঞাতপক্খে. ‘‘ততো নীহরিত্ৰা’’তি অৰিদিতপক্খতো ঞাণেন নীহরিত্ৰা. ‘‘কথীযতী’’তি তং সুতকালে ৰদন্তেন সুণন্তস্স আচিক্খীযতি জানাপীযতি. ‘‘অত্থস্সা’’তি অৰিদিতপক্খে ঠিতস্স অত্থস্স. ‘‘এতস্সে ৰা’’তি নামপদস্সেৰ. নামপদন্তি চ ক্রিয পদংপি, উপসগ্গপদম্পি, নিপাতপদম্পি, পাটিপদিকপদংপি, ইধ নামপদন্ত্ৰেৰ ৰুচ্চতি. ‘‘ৰিসেসনভূতানং’’তি অঞ্ঞপদত্থসমাসে সমাসপদানং অত্থা ৰিসেসনা নাম. এৰং ৰিসেসনভূতানং. ‘‘পুগ্গলস্সা’’তি অঞ্ঞপদত্থভূতস্স অভিঞ্ঞালাভী পুগ্গলস্স. ‘‘ৰদন্তী’’তি আনন্দাচরিযং সন্ধায ৰুত্তং. সো হি ধম্মসঙ্গণিযং পঞ্ঞত্তিদুকনিদ্দেসে মূলটীকাযং তথা ৰদতি. ‘‘তব্ভাৰং’’তি অক্খর পদব্যঞ্জনভাৰং. ‘‘অস্সা’’তি নামপঞ্ঞত্তিযা. অক্খরপদব্যঞ্জনং গোচরো আরম্মণং অস্সাতি ৰিগ্গহো. ‘‘অনুসারেনা’’তি অনুগমনেন. ‘‘লোকসঙ্কেত নিম্মিতা’’তি লোকসঙ্কেতঞ্ঞাণেন পৰত্তিতা. ‘‘লোকসঙ্কেতঞ্ঞাণং’’তি চ ইদং নামং ইমস্সত্থস্স নামং, অযমত্থো ইমস্স নামস্স অত্থোতি এৰং পুরেতরং লোকসঞ্ঞাণ জাননকঞ্ঞাণং. ‘‘অতীত সদ্দমত্তারম্মণা’’তি সোতৰিঞ্ঞাণ ৰীথিযা আরম্মণং হুত্ৰা নিরুদ্ধং অতীত সদ্দমত্তং কুরুমানা. ‘‘তেন ৰুত্তৰচনে’’তি তেন সিক্খং পচ্চক্খন্তেন ভিক্খুনা সিক্খং পচ্চক্খামীতি ৰুত্তৰচনে. পচ্চুপ্পন্নং সদ্দং সোতৰিঞ্ঞাণ ৰীথিযা, অতীতঞ্চ সদ্দং মনোৰিঞ্ঞাণ ৰীথিযাতি যোজনা. ‘‘তানি অক্খরানী’’তি সিক্খং পচ্চক্খামীতি ৰাক্যে অৰযৰক্খরানি. ‘‘অযং অক্খর সমূহো’’তি ইদং নামপদন্তি ৰুত্তং হোতি. এতস্স অত্থস্স. ‘‘ৰিনিচ্ছযৰীথিং’’তি অক্খর পদসল্লক্খণৰীথিঞ্চ. ‘‘একক্খরে সদ্দে’’তি ‘গো’ ইচ্চাদিকে একক্খরে পঞ্ঞত্তি সদ্দে. ‘‘যা’’তি নাম পঞ্ঞত্তি. ‘‘ৰদন্তস্স মনসা’’তি সম্বন্ধো. ‘‘পুব্বভাগে’’তি যং কিঞ্চি অত্থং পরেসং ৰত্তুকামো ৰদন্তো তস্স তস্স অত্থস্স নামং পথমং মনোদ্ৰারৰীথিযা নিযমেত্ৰা এৰ ৰদতি, তং নামং পুব্বভাগে ৰদন্তেন মনসা ৰৰত্থাপিতা নামপঞ্ঞত্তীতি ৰুচ্চতি. পটিপাটিকথনং পৰত্তিক্কমকথনং. ‘‘ৰুত্তং’’তি অট্ঠকথাসু ৰুত্তং. তথা অদ্ধমত্তিকন্তি চ ৰুত্তন্তি সম্বন্ধো. ‘‘ৰুত্তং’’তি চ সদ্দসত্থেসু ৰুত্তং.

গাথাযং. ‘‘মত্তা’’তি একৰিজ্জুপ্পাদক্খণং ৰুচ্চতি. একা মত্তাযস্সাতি একমত্তো. ‘‘দীঘমুচ্চতে’’তি দীঘো নাম ৰুচ্চতে. ‘‘প্লুতো’’তি নানপ্পকারেন রুতো গাযিতোতি পরুতো. সো এৰ রকারস্স লকারং কত্ৰা পকারে চ সরলোপং কত্ৰা প্লুতোতি ৰুচ্চতি. গীতন্তি ৰুত্তং হোতি. ‘‘পরমত্থ সদ্দসঙ্ঘাটানং’’তি পরম্পরা পৰত্তানং পরমত্থ সদ্দরাসীনং. ‘‘অনেককোটিসতসহস্সানি চিত্তানী’’তি জৰনৰীথীনং অন্তরন্তরা ভৰঙ্গচিত্তেহি সদ্ধিং অনেককোটিসতসহস্সানি চিত্তানি.

পট্ঠাননযানুদীপনা নিট্ঠিতা.

পচ্চযসঙ্গহানুদীপনা নিট্ঠিতা.

৯. কম্মট্ঠানসঙ্গহঅনুদীপনা

১৭০. কম্মট্ঠানসঙ্গহে. ৰিদিতো ৰিঞ্ঞাতো নামরূপ ৰিভাগো যেনাতি ৰিগ্গহো. যোগী পুগ্গলো. ‘‘কিলেসে সমেতী’’তি কামচ্ছন্দাদিকে নীৰরণকিলেসে উপসমেতি. ‘‘তথা পৰত্তো’’তি ভাৰনাৰসেন পৰত্তো. ৰূপসমনৰসেন ৰা পৰত্তো. ‘‘তাযা’’তি তাযভাৰনা পঞ্ঞায, পস্সন্তীতি সম্বন্ধো. ‘‘পস্সিতং’’তি সমনুপস্সিতং. কথং কসিণভাৰনাদিকং যোগকম্মং অত্তাৰ অত্তনো ঠানং হোতীতি ৰুত্তং ‘‘আদিমজ্ঝপরিযোসানানংহী’’তিআদি. ৰিভাৰনিপাঠে. ‘‘পদট্ঠানতাযা’’তি এতেন তিট্ঠতি অনিৰত্তমানং পৰত্ততি এতেনাতি ঠানন্তি অত্থেন পদট্ঠানমেৰ ঠানন্তি ৰুচ্চতীতি দীপেতি. ‘‘সুখৰিসেসানং’’তি ঝানসুখ মগ্গসুখ ফলসুখানং. ‘‘দসকসিণানী’’তিআদীসু মুখ্যতো ৰা উপচারতো ৰা দ্ৰিধাপি অত্থং দস্সেতুং ‘‘দসকসিণানী’’তিআদি ৰুত্তং. ‘‘সেসানিপী’’তি অপ্পমঞ্ঞাদীনি সেসকম্মট্ঠানানিপি. যং যং অনুরূপং যথানুরূপং. ‘‘সমুদাচরণং’’তি পুনপ্পুনং ভুসং পৰত্তনং. ‘‘সংসগ্গ ভেদো’’তি একমেকস্স পুগ্গলস্স কস্সচি দ্ৰেচরিযা, কস্সচি তিস্সোতিআদিনা সম্মিস্স ৰিভাগো. অট্ঠকথাযং’’তি ৰিসুদ্ধিমগ্গ অট্ঠকথাযং. ‘‘সব্বাযপি অপ্পনাযা’’তি ঝানপ্পনায চ মগ্গপ্পনায চ ফলপ্পনায চ. ‘‘যা আসন্নে পৰত্তা দূরে পৰত্তাতি অধিকারো. ‘‘ইতরা পনা’’তি দূরে পৰত্তাপন. ‘‘তাসং পনা’’তি তিস্সন্নং ভাৰনানং পন. ‘‘তেসং পী’’তি দ্ৰিন্নং নিমিত্তানংপি. ‘‘ৰিদত্থিচতুরঙ্গুলং’’ নাম ৰিত্থারতো চতুরঙ্গুলাধিকং ৰিদত্থিপ্পমাণং. ৰিদত্থিপ্পমাণং ৰা চতুরঙ্গুলপ্পমাণং ৰাতিপি যুজ্জতি. তথাহি ৰিসুদ্ধিমগ্গে ৰাযোকসিণ ৰিধানে চতুরঙ্গুলপ্পমাণং সীসং ৰাতেন পহরিযমানং দিস্ৰাতি ৰুত্তং. খলমণ্ডলং নাম কস্সকানং কস্সমদ্দনভূমিভাগমণ্ডলং. ‘‘কতং ৰা’’তি নীলাদিৰণ্ণৰিসেসরহিতং অরুণৰণ্ণং মত্তিকক্খণ্ডং উদকেন মদ্দিত্ৰা চক্কমণ্ডলং ৰিয পরিমণ্ডলং সুমট্ঠতলং পথৰিমণ্ডলং করোন্তি. এৰং কতং ৰা. ‘‘অকতং ৰা’’তি কত্থচি ভূমিভাগে কেনচি অকতং সযং জাতং ৰা. ‘‘কসিণেন জম্বুদীপস্সা’’তি এত্থ.

বুদ্ধোতি কিত্তযন্তস্স, কাযে ভৰতি যা পীতি;

ৰরমেৰ হি সাপীতি, কসিণেনপি জম্বুদীপস্সাতি.

গাথাসেসো. তত্থ জম্বুদীপস্স কসিণতো সাপীতিৰরা এৰাতি যোজনা. ‘‘কসিণতো’’তি চ সকলমণ্ডলতো. সকলস্স জম্বুদীপমণ্ডলস্স ইস্সরিযাধিপতিতো পীতি ৰুত্তং হোতি. ‘‘সন্নিৰিট্ঠা’’তি সমং সণ্ঠিতা. ‘‘সণ্ঠান পঞ্ঞত্তী’’তি মণ্ডলসণ্ঠানেন উপট্ঠিতা নিমিত্তপঞ্ঞত্তি এৰ ৰুচ্চতি. ‘‘ফুট্ঠট্ঠানে’’তি কাযেৰা রুক্খগ্গাদীসুৰা ৰাতেন পহতট্ঠানে. ‘‘ৰাযু ৰট্টী’’তি ৰাতপরিমণ্ডলং. চন্দসূরিযানং অগ্গিস্স চ ওভাসেন ৰিসিট্ঠাতি সমাসো. ‘‘ৰিসিট্ঠা’’তি ৰিসেসিতা.

‘‘ধূমাতং’’তি ধূমাযিতং. ধূমপূরিতপটং ৰিযাতি ৰুত্তং হোতি. তেনাহ ‘‘সূনভাৰং গতং’’তি. অন্তে ককারো নিন্দত্থজোতকোতি ৰুত্তং ‘‘কুচ্ছিতত্তা’’তি. জেগুচ্ছি তব্বত্তাতি অত্থো. ‘‘ছৰসরীরস্সা’’তি লামকসরীরস্স. ‘‘তদেৰা’’তি ছৰসরীরমেৰ. ৰিপুব্বকং ৰিচ্ছিন্নকং নামাতি সম্বন্ধো. তত্থ ৰিসেসেন নীলন্তিৰিনীলং. তমেৰ কুচ্ছিতত্তা ৰিনীলকং. ‘‘তদেৰ পুন পচ্চিত্ৰা’’তি ৰিনীলকসরীরমেৰ পুন কালাতিক্কমে পচ্চিত্ৰা. পূতিলোহিতানং পরিপক্কভাৰং পত্ৰাতি অত্থো. ততো ততো দ্ৰারচ্ছিদ্দতো. যুত্তং তদেৰ সরীরন্তি সম্বন্ধো. ৰিচ্ছিন্নকং নাম, ৰিচ্ছিদ্দকন্তিপি পঠন্তি. ‘‘অপকড্ঢিত্ৰা’’তি খণ্ডানি সরীরতো মোচেত্ৰা তং তং পদেসং কড্ঢিত্ৰা. ‘‘পগ্ঘরিতলোহিত সরীরং’’তি ছিন্নৰিদ্ধট্ঠানেসু ৰণমুখেহি পগ্ঘরিতলোহিতসরীরং.

‘‘বুদ্ধানুস্সতী’’তি এত্থ বুদ্ধসদ্দো গুণ্যূপচার ৰচনং হোতি. গুণিনো দব্বস্স নামেন গুণানং গহেতব্বত্তাতি ৰুত্তং ‘‘বুদ্ধগুণস্স অনুস্সতি বুদ্ধানুস্সতী’’তি. এসনযো ধম্মানুস্সতাদীসু. ‘‘অরহতাদী’’তি অরহতাদিগুণো. ৰিগতানি দুস্সিল্যাদি মলানি চ মচ্ছেরঞ্চ যস্স তং ৰিগতমলমচ্ছেরং. তস্স ভাৰোতি ৰিগ্গহো. ‘‘অত্তনা অধিগতনিব্বানঞ্চা’’তি এতেন অরিযপুগ্গলানং কিলেসানং অচ্চন্তৰূপসমো ৰুত্তো. ‘‘যং আরব্ভা’’তি যং পুগ্গলং আরব্ভ. হিতূপসংহারো নাম অযং পুগ্গলো অৰেরো হোতু, অব্যাপজ্জো হোতূতিআদিনা অৰেরতাদীনি হিতসুখানি তস্মিং পুগ্গলে চিত্তেন উপসংহরণং. করুণা, মুদিতা, হেট্ঠা চেতসিকসঙ্গহে ৰুত্তত্থা এৰ. হিতূপসংহারো চ হিতমোদনা চ অহিতাপনযনঞ্চাতি দ্ৰন্দো. তত্থ হিতূপসংহারো মেত্তায কিচ্চং. হিতমোদনা মুদিতায. অহিতাপনযনং করুণায কিচ্চং. তত্থ পরং হিতসুখসম্পন্নং দিস্ৰা তেন পরহিতেন অত্তনি পীতিপামোজ্জৰড্ঢনং হিতমোদনা নাম. পরং দুক্খিতং দিস্ৰা অযং ইমম্হাদুক্খা মুচ্চতু, মাকিলমতূতি এৰং চিত্তেন পরস্মিং অহিতস্স দুক্খস্স অপনযনং অহিতাপনযনং নাম. ‘‘তেসং’’তি পরসত্তানং. সস্স অত্তনো ইদন্তি সকং. ‘‘ইদং’’ সুখদুক্খকারণং. অত্তনা কতকম্মং এৰ সকং যেসং তে কম্মস্সকা. পরসত্তা এৰ. তেসং ভাৰো. তস্স অনুব্রূহনন্তি ৰিগ্গহো. ‘‘সীমসম্ভেদো’’তি অত্তা চ পিযপুগ্গলো চ মজ্ঝত্তপুগ্গলো চ ৰেরিপুগ্গলো চাতি চতস্সো সীমা. সম্ভিন্দনং সম্ভেদো. সম্মিস্সনং অনানত্তকরণন্তি অত্থো. সীমানং সম্ভেদো সীমসম্ভেদো. সব্বা ইত্থিযো, সব্বেপুরিসাতিআদিনা ওধিসো পরিচ্ছেদতো ফরণং ওধিসোফরণং নাম. সব্বেসত্তা, সব্বেপাণা, সব্বেভূতাতিআদিনা অনোধিসো অপরিচ্ছেদতো ফরণং অনোধিসোফরণং নাম. পুরত্থিমাযদিসায সব্বেসত্তা অৰেরাহোন্তূতিআদিনা দিসাৰিভাগৰসেন ফরণং দিসাফরণং নাম. ‘‘তং সমঙ্গীনো চা’’তি তাহি অপ্পমঞ্ঞাহি সমঙ্গীনো পুগ্গলা. ‘‘নিচ্চং সোম্মহদযভাৰেনা’’তি সব্বকালং সন্তসীতল হদযভাৰেন. ব্রহ্মসদ্দো ৰা সেট্ঠপরিযাযো ‘ব্রহ্মং পুঞ্ঞং পসৰতী’তিআদীসু ৰিয. অসিতব্বং ভুঞ্জিতব্বন্তি অসিতং. পঞ্চভোজনং. পাতব্বন্তি পীতং. অট্ঠৰিধং পানং. দন্তেন খাযিতব্বং খাদিতব্বন্তি খাযিতং. পূৰক্খজ্জফলক্খজ্জাদিকং নানাখাদনীযং. অঙ্গুলীহিপি গহেত্ৰা সাযিতব্বং লেহিতব্বন্তি সাযিতং. মধুপ্ফাণিতাদিকং সাযনীযং. সরসপ্পটিকূলতা নাম অত্তনো সভাৰতো পটিকূলতা. চতুব্বিধোপি হি আহারো ভাজনেসু ৰা হত্থমুখাদীসু ৰা যত্থ যত্থ সম্মক্খেতি, লগ্গতি, লিম্পতি. তং উদকেন ধোৰিতব্বং হোতি. অধোতং পন তম্পি জেগুচ্ছনীযং হোতি. আসযতো পটিকূলতা নাম তস্স অজ্ঝোহরীযমানস্স কণ্ঠাদীসু ঠিতেহি পিত্তসেম্হাদীহি আসযেহি সম্মিস্সনৰসেন পটিকূলতা. নিধানতো পটিকূলতা নাম নিধানতো পটিকূলতা. ‘‘নিধানং’’তি চ আমাসযো ৰুচ্চতি. পক্কতো পটিকূলতা নাম তস্স নিধানগতস্স পরিপক্ককালে গূথমুত্তাদিভাৰপত্তিতো পটিকূলতা. অপক্কতো পটিকূলতা নাম তস্মিং অপরিপক্কে অজিণ্ণে সতি সরীরে নানারোগুপ্পত্তিৰসেন পটিকূলতা. ফলতো পটিকূলতা নাম তস্স পরিপক্ককালতো পট্ঠায সরীরে কেসলোমাদীনং পটিকূলরাসীনং ৰড্ঢনৰসেন পটিকূলতা. নিস্সন্দতো পটিকূলতা নাম তস্স ন ৰহিদ্ৰারেহি ৰা লোমকূপেহিৰা অঞ্ঞেহি নানাৰণমুখেহি ৰা উগ্ঘরণ পগ্ঘরণাদিৰসেন পটিকূলতা. ‘‘তত্থা’’তি তস্মিং চতুব্বিধে আহারে. ‘‘নিকন্তিপ্পহানসঞ্ঞা’’তি কন্তারমগ্গে মাতাপিতূনং কন্তারনিত্তরণত্থায পুত্ত মংসখাদনে ৰিয অতি মনুঞ্ঞেপি আহারে রসতণ্হা পহানৰসেন পৰত্তা সঞ্ঞা. ‘‘সলক্খণাদিৰসেনা’’তি সলক্খণসসম্ভারাদিৰসেন. ‘‘রাগেন চরতী’’তি এত্থ ‘‘রাগেনা’’তি করণত্থে, ইত্থম্ভূতলক্খণেৰা করণ ৰচনং. তত্থ করণত্থেতাৰ ‘‘রাগেন চরতী’’তি চতূসু ইরিযাপথেসু যেভূয্যেন রাগচিত্তেন চরতি. রাগচিত্তেন নিয্যমানো ৰিচরতীতি ৰুত্তং হোতি. ইত্থম্ভূত লক্খণে পন ‘‘রাগেন চরতী’’তি তেসু রাগকেতু রাগধজো হুত্ৰা ৰিচরতীতি ৰুত্তং হোতি. ‘‘অস্সা’’তি তস্সপুগ্গলস্স. ‘‘উস্সন্নো’’তি উগ্গতো পাকটতরো. বহুতরোতিপি ৰদন্তি. ‘‘পহানাযা’’তি এত্থ ইতিসদ্দো আদি অত্থো. তেন করুণা ভাৰেতব্বা ৰিহিংসায পহানায. মুদিতা ভাৰেতব্বা অরতিযা পহানাযাতি ইমং পাল়িসেসং সঙ্গণ্হাতি. ‘‘নিস্সরণতাৰচনতো’’তি নিস্সরণঞ্হেতং ব্যাপাদস্স যদিদং মেত্তাচেতো ৰিমুত্তি. নিস্সরণঞ্হেতং ৰিহেসাযযদিদং করুণা চেতোৰিমুত্তি. নিস্সরণঞ্হেতং অরতিযা যদিদং মুদিতা চেতো ৰিমুত্তীতি এৰং নিস্সরণ ভাৰৰচনতো চ. চতস্সো অপ্পমঞ্ঞাযো. ল. দোস চরিতস্সাতি ৰুত্তং. ‘‘দোস ৰত্থুত্তাভাৰতো চা’’তি দোসুপ্পত্তিযা ৰত্থু ভাৰস্সকরণ ভাৰস্স অভাৰতো চ. নীলাদীনি চত্তারি কসিণানি দোস চরিতস্সাতি ৰুত্তং. কস্মাপনেত্থ দোস চরিতস্স উপেক্খা সপ্পাযকারণং ৰিসুং ন ৰুত্তন্তি. অঞ্ঞকারণত্তা ন ৰুত্তন্তি দস্সেন্তো ‘‘এত্থ চা’’তিআদিমাহ. ‘‘তিস্সো’’তি তিস্সো অপ্পমঞ্ঞাযো. ‘‘মনাপিযরূপানী’’তি মনাপিযৰণ্ণানি. ৰিক্খিত্তচিত্তো চ হোতীতি অধিকারো. ‘‘তস্সা’’তি পমাদ বহুলস্স ৰিক্খিত্তচিত্তস্স চ পুগ্গলস্স. ৰুত্তং সিযা. ৰিসুদ্ধি মগ্গে পন এৰং ৰুত্তং নত্থীতি অধিপ্পাযো. ৰিভাৰনিপাঠে. ‘‘বুদ্ধিৰিসয ভাৰেনা’’তি ৰুত্তং. যদি বুদ্ধিৰিসযত্তা মোহচরিতস্স সপ্পাযং. বুদ্ধিৰিসযভূতানি মরণ উপসমসঞ্ঞা ৰৰত্থানানিপি মোহচরিতস্স সপ্পাযানি সিযুন্তি ৰুত্তং ‘‘এৰঞ্হিসতী’’তিআদিং. ‘‘ভূতকসিণানী’’তি পথৰীকসিণাদীনি মহাভূতকসিণানি. ‘‘তত্থাপী’’তি ৰা তেসু চত্তালীস কম্মট্ঠানেসুপি. এৰংসতি ৰণ্ণকসিণানং পুথুলখুদ্দকতাপি এত্থ সঙ্গহিতা হোতীতি. ‘‘মহন্তং’’তি ৰিদত্থি চতুরঙ্গুলতো মহন্তং. যদি এৰসদ্দো যথারুতমেৰ যুজ্জেয্য. এৰংসতি খুদ্দকং ৰিতক্কচরিতস্সেৰ সপ্পাযং, ন বুদ্ধিচরিতাদীনন্তি এৰমত্থোপি গণ্হেয্য. অথ বুদ্ধিচরিতস্স পন অসপ্পাযং নাম নত্থীতি অট্ঠকথাৰচনেন ৰিরুজ্ঝেয্যাতি ইমিনা অধিপ্পাযেন ‘‘খুদ্দকন্তি পদেযুজ্জতী’’তি ৰুত্তং. অথৰা, পুথুলং মোহচরিতস্স, খুদ্দকং ৰিতক্কচরিতস্সেৰ, নমোহচরিতস্সাতি অত্থে সতি, বুদ্ধিচরিতাদীনং পন পুথুলংপি খুদ্দকংপি অনুঞ্ঞাতং হোতীতি দট্ঠব্বং. ‘‘সব্বঞ্চেতং’’তি সব্বঞ্চ এতংচরিতৰিভাগৰচনং. উজুৰিপচ্চনীকৰসেন তীসু অকুসল চরিতেসু পুগ্গলেসু. ৰিতক্ক চরিতে চ অতিসপ্পাযতায সদ্ধাবুদ্ধি চরিতেসূতি অধিপ্পাযো. তেনাহ ‘‘রাগাদীনং পন অৰিক্খম্ভিকা’’তিআদিং.

‘‘বুদ্ধধম্ম. ল. গুণানং’’তি এত্থ গুণসদ্দো পুব্বপদেসু যোজেতব্বো বুদ্ধগুণানঞ্চ ধম্মগুণানঞ্চাতিআদিনা. ‘‘তত্থা’’তি তস্মিং গুণপদে. ন তপ্পেতীতি অতপ্পনীযো. তপ্পনং সন্তুট্ঠিং ন জনেতীতি অত্থো. সংৰেজনং সংৰেগং জনেতীতি সংৰেজনিযো. ‘‘ধম্মো’’তি সভাৰো. সংৰেজনিযো ধম্মো যস্সাতি সংৰেজনিয ধম্মং. মরণং. ‘‘পঞ্চমজ্ঝানসমাধিস্সা’’তি রূপাৰচর পঞ্চমজ্ঝান সমাধিস্স. ‘‘উদযমত্তানী’’তি ৰড্ঢিতমত্তানি. ‘‘তত্থা’’তি পটিকূলারম্মণেসু. ‘‘পুব্বচ্ছট্টকস্সা’’তি পুরাণচ্ছট্টকস্স. গূথমুত্তৰিস্সজ্জন কস্সাতি ৰুত্তং হোতি. তেনাহ ‘‘গূথরাসি দস্সনে ৰিযা’’তি. ন তে কদাচি সোমনস্সেন ৰিনা অপ্পনং পাপুণন্তি. ব্যাপাদৰিহিংসা অরতীনং দূরিভাৰেন সোমনস্সুপ্পত্তিযা অতিসুকরত্তা পঞ্চমজ্ঝানে ৰিয সুখসোমনস্সানঞ্চ অৰিক্খম্ভনতো. ‘‘উদাসিনপক্খে’’তি অজ্ঝুপেক্খনপক্খে. ‘‘দল়্হং’’তি ভুসং. ‘‘ৰিভূতং’’তি পাকটং. নিমিত্তং দল়্হৰিভূতং কত্ৰা গহণং দল়্হ ৰিভূতগ্গহণং. ‘‘কস্সচি আরম্মণস্সা’’তি বুদ্ধগুণাদি আরম্মণস্স. ‘‘পটিভাগনিমিত্তং’’তি এত্থ পটিভাগসদ্দো তস্স দিসে পৰত্তোতি আহ ‘‘তাদিসে’’তিআদিং. ‘‘তংসণ্ঠানে’’তি এতেন পথৰিমণ্ডলাদীসু ৰিয সণ্ঠানাকারেন ঠিতেসু সভাৰ ধম্ম পুঞ্জেসু এৰ তস্সদিসং পটিভাগনিমিত্তং নাম সিজ্ঝতীতি দস্সেতি. ‘‘এৰ’’ন্তি সমথসঙ্গহে তাৰ দসকসিণানি, দসঅসুভাতিআদিনা ৰুত্তেন ৰচনক্কমেন. ‘‘উগ্গহকোসল্লং’’তি ভাৰনাকম্মং আরভিতুকামেন ভিক্খুনা আচরিযস্স সন্তিকে সব্বস্স কম্মট্ঠান ৰিধানস্স উগ্গহণং উগ্গহো. তস্মিং কোসল্লং উগ্গহকোসল্লং. অপিচেত্থ. সব্বং উগ্গহিতুং অসক্কোন্তেন যং অত্তনা আরভিস্সতি. তস্স একস্স ৰিধানং পরিপুণ্ণং উগ্গহেতব্বং. ‘‘উগ্গণ্হন্তস্সা’’তি এত্থ উকারো উপরি অত্থো. ‘‘গহণং’’তি চ যথা চিত্তে অৰিনস্সমানং হুত্ৰা লব্ভতি, তথা কত্ৰা চিত্তেন গহণন্তি দস্সেতুং ‘‘উপরূপরী’’তিআদি ৰুত্তং. ‘‘সমনুপস্সন্তস্সা’’তি সম্মা পুনপ্পুনং চক্খুনা দস্সনসদিসং করোন্তস্স. পরিতো সমন্ততো করণং পরিকম্মং. তস্মিং নিমিত্তগ্গহণকম্মে যং যং কত্তব্বৰিধানং অত্থি, তং তং পরিপুণ্ণং কত্ৰা গহণন্তি ৰুত্তং হোতি. ভাৰনাতি ৰড্ঢনাতি ইমমত্থং দস্সেন্তো ‘‘পুনপ্পুন’’ন্তিআদিমাহ. ‘‘নিরন্তরং পদহন্তস্সা’’তি রত্তিদিৰং নিরন্তরং আরভন্তস্স. উগ্গহ নিমিত্তে সণ্ঠানং গণ্হন্তোপি ৰণ্ণরূপাদিনা সভাৰ ধম্মেন সহেৰ গণ্হাতি. পটিভাগনিমিত্তে পন সভাৰধম্মং মুঞ্চিত্ৰা তস্স দিসং নিমিত্ত পঞ্ঞত্তি সঙ্খাতং সুদ্ধসণ্ঠানমেৰ গণ্হাতি. এত্থ সিযা, পটিভাগনিমিত্তেপি ৰণ্ণো নাম সন্দিস্সতি যেৰাতি. সচ্চং. সো পন পটিভাগমত্তং হোতি. ন একন্তৰণ্ণো. তেনাহ ‘‘তপ্পটিভাগং ৰত্থু ধম্মৰিমুচ্চিতং’’তি. ‘‘সন্নিসিন্নং’’তি অচলং. ‘‘পৰেসিতং’’তি ভাৰনাচিত্তস্স অব্ভন্তরে পক্খিত্তং ৰিয হোতীতি অধিপ্পাযো. ওভাসতীতি ওভাসো. ওভাসো হুত্ৰা জাতন্তি ওভাসজাতং. ওভাসনং ৰা ওভাসো. জাতো ওভাসো অস্সাতি ওভাসজাতং. ‘‘পাতেন্তী’’তি পটিপাতেন্তি. পুন উপ্পজ্জনৰসেন উট্ঠাতুং ন দেন্তি. ‘‘এতাযা’’তি কত্তু অত্থে করণৰচনং. ‘‘নিমিত্তরক্খণৰিধানং’’তি সমুপ্পন্নস্স নিমিত্তস্স অনস্সনত্থায সত্তৰিধেহি পলিবোধ ধম্মেহি রক্খণত্থং. কতমে পন তেসত্তৰিধা পলিবোধধম্মা নামাতি. ইধ অম্হেহি ৰত্তব্বং নত্থি. ৰিসুদ্ধি মগ্গে এৰ তে ৰুত্তাতি দস্সেতুং গাথমাহ. ‘‘আৰাসো’’তি অসপ্পাযাৰাসো. ‘‘গোচরো’’তি অসপ্পাযগোচরগামো. ‘‘ভস্সং’’তি অসপ্পাযৰচনং. এৰং পুগ্গলাদীসু. ‘‘সেৰেথা’’তি সেৰেয্য. ‘‘এৰঞ্হিপটিপজ্জতো’’তি এৰংহিৰজ্জিতব্বে ৰজ্জনৰসেন সেৰিতব্বে সেৰনৰসেন পটিপজ্জন্তস্স. ‘‘কামতণ্হায ৰিসযভাৰং অতিক্কমিত্ৰা’’তি এতেন কামভূমি কামভৰসমতিক্কমো, রূপভূমিরূপভৰ ওক্কমো চ ৰুত্তো. ৰসনং ৰসী. সত্তি. সামত্থিযন্তি অত্থো. ৰসিং ভূতং পত্তন্তি ৰসিভূতং. ৰসী এৰ ৰসিতা. যথা পারমিতাতি. ‘‘ততো ৰিচারন্তি’’ এত্থ ইতিসদ্দো আদিঅত্থো. তেন ততো পীতিংতিআদিং সঙ্গণ্হাতি. ইচ্ছন্তানং তেসং সব্বঞ্ঞুবুদ্ধানং. ‘‘যত্থা’’তি যেসুদ্ৰীসুভৰঙ্গেসু. ‘‘ভৰঙ্গচারে’’তি ভৰঙ্গপ্পৰত্তিযং. ‘‘দন্ধাযিতত্তং’’তি দন্ধং হুত্ৰা অযতি পৰত্ততীতি দন্ধাযিতং. তস্স ভাৰো দন্ধাযিতত্তং. ‘‘ঠপেতুং’’তি অধিট্ঠানং কত্ৰা ঠপেতুং. ততো অনতিক্কমিতুং. ‘‘যত্থিচ্ছকং’’তিআদীনি ক্রিযাৰিসেসনপদানি. ‘‘যত্থিচ্ছকং’’তি যত্থ যত্থ ঠানে ইচ্ছানু রূপং. যদিচ্ছকন্তিযস্মিং যস্মিং খণে ইচ্ছানু রূপং. ‘‘যাৰতিচ্ছকং’’তি যত্তকেন পমাণেন ইচ্ছানু রূপং. ‘‘ৰিতক্কাদিকং ওল়ারিকঙ্গং পহানাযা’’তি এত্থ কস্স বলেন পহানং হোতি. তং তং ৰিরাগ ভাৰনা বলেন পহানং হোতি. কাচ তং তং ৰিরাগভাৰনা নাম হোতি. অজ্ঝাসয ৰিসেস পরিগ্গহিতা উপচারভাৰনা এৰাতি ইমমত্থং দস্সেতুং ‘‘পথমজ্ঝানং তাৰা’’তিআদি ৰুত্তং. ‘‘আতাপৰীরিযং’’তি যেনৰীরিযেন যোগিনো অত্তানং ৰা কিলেস ধম্মে ৰা আতাপেন্তি পরিতাপেন্তি. তং আতাপৰীরিযং নাম. উগ্ঘাটীযমানম্পি আকাসমেৰ হোতি. তং আরব্ভ উপরিঝানন্তরুপ্পত্তিযা ভাৰনং করোন্তস্সপি পুনপ্পুনং তমেৰ পঞ্চমজ্ঝানং উপ্পজ্জতি. আরম্মণে চ অনতিক্কন্তে ঝানংপি অনতিক্কন্তমেৰ হোতীতি. ‘‘তত্থা’’তি তস্মিং আকাসকসিণে. ‘‘তদতিক্কমনসম্ভৰো’’তি কসিণ নিমিত্তাতিক্কমনসম্ভৰো. ‘‘যথাদিট্ঠে’’তি ঝানচক্খুনা দিট্ঠপ্পকারে. ‘‘সম্ভাৰেত্ৰা’’তি থোমেত্ৰা. সম্মা অনুস্সরণং সমনুস্সরণং. ‘‘ইতরেসংপি ৰা’’তি পুথুজ্জন পণ্ডিতানংপি ৰা. মরণ সঞ্ঞা ৰৰত্থানেসু পরিকম্মঞ্চ সমাধিযতি, উপচারো চ সম্পজ্জতীতি যোজনা তিক্খপঞ্ঞানং পন পুথুজ্জনানংপি সতং বুদ্ধগুণাদীসুপি উপচার সম্ভৰো অট্ঠকথাযং ৰুত্তোযেৰ. ‘‘সমথজ্ঝানেসূ’’তি ইদং অধিকারৰসেন ৰুত্তং. ৰিপস্সনা কম্মংপি গহেতব্বমেৰাতি দট্ঠব্বং. পুব্বেদানং দত্ৰা ইমিনা পুঞ্ঞেন আযতিং ঝানাভিঞ্ঞাযো ৰা মগ্গফলানি ৰা পটিলভিস্সামীতি পত্থনং কত্ৰা আগতোপি কতাধিকারো এৰাতিপি ৰদন্তি. কতমো পন কতাধিকারো নামাতি আহ ‘‘আসন্নভৰে’’তিআদিং. অট্ঠৰিধেসু চতুক্কনযৰসেন, নৰৰিধেসু পঞ্চকনযৰসেন ৰুত্তোতি তেসং ৰাদীনং সাধকৰচনং. ৰিচারেত্ৰা পন গহেতব্বং. আকাস কসিণেন ৰিনা অরূপজ্ঝানানি লভিত্ৰা পুন অভিঞ্ঞত্থায পরিকম্মেকতে আকাসকসিণেপি কত্তব্বত্তা তস্স অভিঞ্ঞাপাদকতা সম্ভৰো ৰুত্তোতি অত্থস্স সম্ভৰতো. পুব্বে অভাৰিত ভাৰনোতি চ অকতাধিকারোতি চ অত্থতো একং. ‘‘আদিকম্মিকো’’তি অভিঞ্ঞাকম্মে আদিকম্মিকো. ‘‘তাদিসানং’’তি পুব্বে অকতাধিকারানং অভাৰিতভাৰনানং ইদানি ইদ্ধিৰিকুব্বনং করিস্সামীতি আরভন্তানং অভিঞ্ঞাকম্মে আদিকম্মিককুলপুত্তানন্তি সম্বন্ধো. ‘‘ইদ্ধিৰিকুব্বনং’’তি চ উপলক্খণৰচনং. দিব্বায সোতধাতুযা সদ্দং সৰনং করিস্সামীতিআদিকংপি গহেতব্বং. ইদঞ্চ আদিকম্মিকৰিধানাধিকারত্তা ৰুত্তং. অভিঞ্ঞাসু ৰসিপত্তানম্পি তং পঞ্চমজ্ঝানং ছসুআরম্মণেসু যথারহং অপ্পেতিযেৰ. ‘‘অধিট্ঠাতব্বং’’তি যথিচ্ছিত নিপ্ফত্তত্থায সতং হোতু সহস্সং হোতূতিআদিনা চিত্তেন অভিৰিধাতব্বং. অভিনীহরিতব্বন্তি ৰুত্তং হোতি. ‘‘সতং হোমি, সহস্সং হোমীতি ৰা’’তি অত্তানং সতং ৰা সহস্সং ৰা নিম্মিননৰসেন ৰুত্তং. সেসং পন অঞ্ঞথানিম্মিননৰসেন. সোতুং ৰা সদ্দং, পস্সিতুং ৰা রূপং, জানিতুং ৰা পরচিত্তং. অনুস্সরিতুং ৰা পুব্বেনিৰুত্থং. অট্ঠকথাপাঠে. ‘‘অধিট্ঠাতী’’তি অভিঞ্ঞায অধিট্ঠাতি. অভিৰিধাতি নিব্বত্তেতীতি ৰুত্তং হোতি. দুৰিধংহি অধিট্ঠানং পরিকম্মেন অধিট্ঠানং অভিঞ্ঞায অধিট্ঠানন্তি. ইধ পন অভিঞ্ঞায অধিট্ঠানং ৰুত্তং. ‘‘অধিট্ঠান চিত্তেনা’’তি অভিঞ্ঞাচিত্তেনাতি ৰুত্তং হোতি. ‘‘পরিকম্মচিত্তস্সা’’তি পুব্বভাগে আৰজ্জন পরিকম্ম অধিট্ঠানপরিকম্মচিত্তস্স. পচ্ছিমং পন পাদকজ্ঝান সমাপজ্জনং. পরিকম্মচিত্তস্স সমাধানত্থাযাতি ৰুত্তং. পরিকম্মচিত্তে সমাহিতে কিং পযোজনন্তি আহ ‘‘তথাহী’’তিআদিং. ‘‘সেসাভিঞ্ঞাসুপি যথারহং ৰত্তব্বো’’তি দিব্বসোতপরিকম্মে তেনেৰপরিকম্ম সমাধিঞ্ঞাণসোতেন আসন্নে দিব্বৰিসযংপি সদ্দং সুণাতীতিআদিনা ৰত্তব্বো. ‘‘ইতি কত্ৰা’’তি ইতি মনসিকত্ৰা. ‘‘তং’’তি পচ্ছিমং পাদকজ্ঝান সমাপজ্জনং. ‘‘ইধ নগহিতন্তি দট্ঠব্বং’’তি থেরস্স মতেন দট্ঠব্বন্তি অধিপ্পাযো. ইধ পন আদিকম্মিকৰিধানপ্পধানত্তা পচ্ছিমংপি পাদকজ্ঝান সমাপজ্জনং ৰত্তব্বমেৰাতি. ‘‘কাযগতিকং অধিট্ঠহিত্ৰা’’তি অযং কাযো ৰিয ইদং চিত্তংপি দন্ধগমনং হোতূতি এৰং চিত্তং কাযগতিকং করণেন অধিট্ঠহিত্ৰা. ‘‘দিস্সমানেন কাযেনা’’তি দন্ধগমনেন গচ্ছন্তত্তা বহুজনানম্পি দিস্সমানেন রূপকাযেন. তব্বি পরীতেন সীঘগমনং ৰেদিতব্বং. ‘‘আরম্মণমত্তং হোতী’’তি অনিপ্ফন্নরূপং সন্ধায ৰুত্তং. ‘‘আরম্মণ পুরেজাতং’’তি নিপ্ফন্নরূপং. ইতরং পন হদয ৰত্থুরূপং সন্ধায ৰুত্তন্তি দট্ঠব্বং. পরচিত্ত ৰিজাননট্ঠানে অট্ঠকথাটীকাচরিযানং ৰিচারণা অত্থীতি তং দস্সেতুং ‘‘এত্থ চ অট্ঠকথাযং তাৰা’’তিআদি ৰুত্তং. ‘‘অট্ঠকথাযং’’তি ধম্মসঙ্গণি অট্ঠকথাযংপি ৰিসুদ্ধিমগ্গ অট্ঠকথাযংপি. ‘‘খণিকৰসেনা’’তি খণিকপচ্চুপ্পন্নৰসেন. আৰজ্জনে নিরুদ্ধেতি সম্বন্ধো. ‘‘একং চিত্তং’’তি পরস্স চিত্তং. তদেৰ অতীতং চিত্তং গণ্হন্তি. ‘‘তানী’’তি জৰনানি. ‘‘তেসং’’তি জৰনানং. ‘‘তেনা’’তি আৰজ্জনেন. ‘‘ইতরথা’’তি অঞ্ঞথা সন্ততি অদ্ধাৰসেন ৰুত্তন্তি গহিতে সতি. ৰুত্তো সিযা. কস্মা, সন্ততি অদ্ধাৰসেন পচ্চুপ্পন্নে গহিতে সতি, সব্বায একজৰনৰীথিযা একপচ্চুপ্পন্নত্তা. ‘‘সব্বানি চিত্তানী’’তি জৰনচিত্তানি. ‘‘সহুপ্পন্নানী’’তি ইদং সহুপ্পন্নানংপি অত্থিতায ৰুত্তং. আৰজ্জনাদীনি পন খণভেদং নগণ্হন্তি. সব্বং পরস্স চিত্তং একচিত্তমিৰ গণ্হন্তি. তস্মা কালভেদোপি নত্থীতি দট্ঠব্বং. ‘‘নিব্বানঞ্চা’’তি ৰুত্তং, কথং নিব্বানং পুব্বেনিৰুত্থং নাম সিযাতি. অতীতে পরিনিব্বুতানং মগ্গফলানি অনুস্সরণকালে তেসং আরম্মণভূতং নিব্বানংপি অনুস্সরতিযেৰ. তত্থ তেসং মগ্গফলানং অতীতত্তা নিব্বানংপি পুব্বেনিৰুত্থং নাম হোতীতি.

‘‘যং যং অধিট্ঠাতী’’তি যং যং সতাদিকং সংৰিধাতি. ‘‘যথা যথা অধিট্ঠাতী’’তি যেন যেন আৰিভাৰাদিকেন পকারেন সংৰিধাতি. ‘‘পকতিৰণ্ণং’’তি পকতিসণ্ঠানং. ‘‘তস্সেৰা’’তি পকতিৰণ্ণস্সেৰ. দেৰানং পসাদসোতন্তি সম্বন্ধো. ‘‘আরম্মণ সম্পটিচ্ছন সমত্থং’’তি আরম্মণস্স উপট্ঠানং সম্পটিচ্ছন সমত্থং. তদেৰ চেতোপরিযঞাণন্তিপি ৰুচ্চতীতি সম্বন্ধো. ‘‘চেতো’’তি চিত্তং. ‘‘পরিচ্ছিজ্জা’’তি ইদং সরাগচিত্তং, ইদং ৰিরাগচিত্তন্তিআদিনা পরিচ্ছিন্দিত্ৰা. ‘‘গোচর নিৰাসৰসেনা’’তি গোচরং কত্ৰা নিৰসনৰসেন. সব্বঞ্ঞুতঞ্ঞাণগতিকং সব্বঞ্ঞুবুদ্ধানং অনাগতং সঞ্ঞাণন্তি অধিপ্পাযো. অনাগতে সত্তদিৰসতো ওরিমা চিত্তচেতসিক ধম্মা চেতোপরিযঞ্ঞাণস্স ৰিসযোতি কত্ৰা অনাগতে সত্তদিৰসতোতি ৰুত্তং. পট্ঠায পৰত্তমানাতি পাঠসেসো. ইমস্মিং দিৰসে চ অনাগতপক্খে সব্বংপি আরম্মণং পকতিঞাণস্স ৰিসযোতি কত্ৰা ‘‘দুতীযদিৰসতো পট্ঠাযা’’তি ৰুত্তং. ‘‘এতং’’তি এতং অনাগতং সঞ্ঞাণং. ‘‘যথা চেতং’’তি যথা চ এতং ইমস্মিং ভৰে অনাগত ধম্মে জানাতি. ‘‘অসাধারণকালৰসেনা’’তি অঞ্ঞেনঞাণেন অসাধারণ কালৰসেন. পচ্চুপ্পন্নভৰোহি অঞ্ঞঞ্ঞাণসাধারণোতি.

সমথকম্মট্ঠানানুদীপনা নিট্ঠিতা.

১৭১. ৰিপস্সনাকম্মট্ঠানে. ‘‘যথাদিট্ঠং’’তি সক্কাযদিট্ঠিযা যথাদিট্ঠং. নিচ্চনিমিত্তং নাম সত্তপুগ্গলাদিনিমিত্তমেৰ. সত্তনিমিত্তঞ্হি পঞ্ঞত্তি ধম্মত্তা খণেখণে খযৰযভেদাভাৰতো সো এৰগচ্ছতি সো এৰ তিট্ঠতীতিআদিনা নিচ্চাকারসণ্ঠিতং হোতীতি. ‘‘ধুৰনিমিত্তং’’তি থিরনিমিত্তং. ইদম্পি সো গচ্ছন্তোপি ননস্সতি, তিট্ঠন্তোপি ননস্সতীতিআদিনা থিরাকারসণ্ঠিতং সত্তনিমিত্তমেৰ. ‘‘সুখনিমিত্তং’’তি খণেখণে খযৰযভেদ দুক্খানং অভাৰতো সুখিতো নিদ্দুক্খো নিব্ভযোতিআদিনা সুখাকারসণ্ঠিতং সত্তনিমিত্তমেৰ. ‘‘অত্তনিমিত্তং’’তি গন্তুং ইচ্ছন্তো গচ্ছতি, ঠাতুং ইচ্ছন্তো তিট্ঠতীতিআদিনা ৰসৰত্তনাকার সণ্ঠিতং সত্তনিমিত্তমেৰ. ‘‘কিরিযা’’তি ভাৰনাকিরিযা.

ৰিসুজ্ঝতীতি ৰিসুদ্ধি. ৰিসোধেতীতি ৰা ৰিসুদ্ধি. সীলমেৰ ৰিসুদ্ধি সীলৰিসুদ্ধীতি ইমমত্থং দস্সেন্তো ‘‘নিচ্চসীলমেৰা’’তিআদিমাহ. তত্থ নিচ্চসীলমেৰ উপরিঝানাদিৰিসেসানং অধিট্ঠান কিচ্চসাধকত্তা ইধ অধিপ্পেতন্তি ৰুত্তং ‘‘নিচ্চসীলমেৰা’’তি. সমাধি অধিপ্পেতো. ৰক্খতিহি ‘‘দুৰিধোপি সমাধি চিত্তৰিসুদ্ধি নামা’’তি. এতেন ৰিসুজ্ঝতি এতাযাতি ৰিসুদ্ধি. চিত্তস্স ৰিসুদ্ধি চিত্তৰিসুদ্ধি. সমাধি এৰাতিপি দীপেতি. ৰিসুজ্ঝনং ৰা ৰিসুদ্ধি. চিত্তস্স ৰিসুদ্ধি চিত্তৰিসুদ্ধি. অত্থতোপন ৰিসুদ্ধচিত্তমেৰ ৰুচ্চতীতিপি যুজ্জতি. ৰিসুদ্ধিসদ্দ সম্পন্নে হি সতি, চিত্তৰিসুদ্ধি ইচ্চেৰ ৰুচ্চতি. ন সমাধিৰিসুদ্ধীতি. ‘‘সোল়সৰিধং কঙ্খং’’তি অহোসিং নু খো অহ মতীতমদ্ধানন্তিআদিনা সুত্তন্তেআগতং সোল়সৰিধং ৰিচিকিচ্ছং. ‘‘অট্ঠৰিধং ৰা কঙ্খং’’তি সত্থরিকঙ্খতীতিআদিনা অভিধম্মে আগতং অট্ঠৰিধং ৰিচিকিচ্ছং. ৰিসমহেতুদিট্ঠি নাম সত্তানং উপ্পত্তিযা অকারণমেৰ কারণং কত্ৰা গহণদিট্ঠি. ‘‘মনসিকারৰিধী’’তি অনিচ্চলক্খণাদীসু মনসিকারৰিধি. অনুপাযভূতো মনসিকারো নাম নিচ্চাদিৰসেন মনসিকারো. অধিমানৰত্থু নাম ওভাসাদীনি. ‘‘মগ্গতো’’তি মগ্গভাৰেন. ‘‘অমগ্গতো’’তি অমগ্গভাৰেন. ‘‘দস্সনঞ্চা’’তি তেসংঅধিমানৰত্থূনং অনিচ্চতাদিদস্সনঞ্চ. তমেৰ ৰিসুদ্ধিনামাতি সম্বন্ধো. ‘‘সম্মোহমলতো’’তি চতুসচ্চপ্পটিচ্ছাদক সম্মোহমলতো. ননু দস্সনন্তি ঞাণমেৰ. এৰংসতি, ঞাণন্তি ৰুত্তে সিদ্ধে কত্ৰা দস্সনসদ্দেন সহ ঞাণদস্সনন্তি ৰুত্তন্তি আহ ‘‘এত্থচা’’তিআদিং. ‘‘সুতমযাদিৰসেনা’’তি সুতময চিন্তামযৰসেন. তত্থ যথাসুতস্স পাল়িধম্মস্স অত্থমত্তজাননং সুতমযঞ্ঞাণং নাম. অত্থং ঞত্ৰা অত্থানুরূপস্স সভাৰলক্খণস্স চিন্তনাৰসেন উপ্পন্নং ঞাণং চিন্তামযঞ্ঞাণং নাম. ‘‘অনুমানাদিঞাণংপী’’তি নামরূপ ধম্মেসু সভাৰানুমানঞ্ঞাণ সভাৰজাননঞ্ঞাণংপি. ‘‘অত্তপচ্চক্খঞ্ঞাণমেৰা’’তি অত্তনা পচ্চক্খকরণঞ্ঞাণমেৰ. ‘‘সব্বত্থা’’তি মগ্গামগ্গঞ্ঞাণদস্সনাদীসু সব্বেসু ঠানেসু. এত্থ চ দসসু ৰিপস্সনাঞাণেসুপি ৰিপস্সনা ৰচনেন পচ্চক্খদস্সনমেৰ অধিপ্পেতন্তি কত্ৰা সব্বত্থগ্গহণং কতন্তি দট্ঠব্বং. সম্মসনঞ্ঞাণতো পট্ঠায হি দস্সনমেৰ অধিপ্পেতং. ন সভাৰজাননমত্তং. যতো চক্খুনা পস্সন্তস্সেৰ সুট্ঠু পচ্চক্খতো দস্সনত্থায পুনপ্পুনং ভাৰনা কম্মং নাম তত্থ ইচ্ছিতব্বং হোতি.

‘‘ধম্মা’’তি সঙ্খত ধম্মা. অনিচ্চতা এৰ লক্খণন্তি অনিচ্চলক্খণং. অনিচ্চানং ৰা সঙ্খত ধম্মানং লক্খণন্তি অনিচ্চলক্খণন্তিপি যুজ্জতি. ‘‘অভিণ্হসম্পটিপ্পীল়নাকারো’’তি যথা সীঘসোতাযং নদিযং নাৰায উদ্ধং গচ্ছন্তং সানাৰা অভিসঙ্খরণদুক্খেন অভিণ্হং সুট্ঠু পটিপ্পীল়েতি. কস্মা, অসতি অভিসঙ্খারে তঙ্খণে এৰ অধোৰুয্হনতো. অধোৰুয্হনঞ্হি নাৰায পকতি কিচ্চং. উদ্ধং আরূহনং অভিসঙ্খার সিদ্ধং. এৰমেৰং সীঘসোতে সংসারে অত্তভাৰেন উদ্ধং খণতো খণং দিৰসতো দিৰসং গচ্ছন্তং পুগ্গলং অযং অত্তভাৰো অভিসঙ্খরণ দুক্খেন অভিণ্হং সুট্ঠু পটিপ্পীল়েতি. কস্মা, অসতি অভিসঙ্খারে, পচ্চযৰেকল্লে চ সতি, তঙ্খণে এৰ ৰিপরিণমনতো. ৰিপরিণমনঞ্হি অত্তভাৰস্স পকতি কিচ্চং. উদ্ধংগমনং অভিসঙ্খার সিদ্ধং. এৰং অভিণ্হ সম্পটিপ্পীল়নং ৰেদিতব্বং. এত্থ চ সংসারস্স সীঘসোততা নাম অত্তভাৰপরিযাপন্নানং নাম রূপধম্মানং পৰত্তিনিৰত্তি সীঘতা ৰুচ্চতি. এত্থ চ মরণং দুৰিধং সম্মুতি মরণঞ্চ পরমত্থ মরণঞ্চ. তত্থ সম্মুতি মরণং নাম সম্মুতি সচ্চভূতস্স সত্তস্স মরণং. তং একভৰপরিযন্তে সন্দিস্সতি. পরমত্থ মরণং নাম পরমত্থ সচ্চভূতানং নামরূপ ধম্মানং মরণং. ইদমেৰ একন্তমরণং, সচ্চমরণং, সভাৰমরণং হোতি. ইমস্মিং ৰিপস্সনা কম্মে ইদং পরমত্থ মরণং এৰ অনিচ্চতাতি চ ৰুচ্চতি. ধম্মানং সুসানক্খেত্তন্তি চ সুসানভূমীতি চ ৰুচ্চতীতি. সা চ সুসানভূমিনাম সত্তানং পটিসন্ধিতো পট্ঠায সন্তানং অনুবন্ধতিযেৰ. অনুবন্ধত্তা চ সত্তানং পটিসন্ধিতো পট্ঠায সো নাম সমযো নত্থি, যত্থ সত্তা ন মরন্তীতি. ইদঞ্চ অনুবন্ধনং সত্তানং অভিণ্হসম্পটিপ্পীল়নমেৰ হোতি. তেসং সব্বিরিযাপথেসু জীৰিতস্স চ অঙ্গপচ্চঙ্গানঞ্চ কাযৰচীমনো কম্মানঞ্চ সম্বাধপত্তিতো. অৰসৰত্তনাকারো পন অভিসঙ্খার দুক্খং অভিণ্হং পচ্চনুভৰন্তানং পাকটোযেৰ. ৰসৰত্তনেহি সতি, অভিসঙ্খরণ কিচ্চস্স ওকাসো নত্থি. ৰসৰত্তনেনেৰ যথিচ্ছি তস্স কিচ্চস্স সম্পজ্জনতো. লোকস্মিঞ্হি সব্বংপি অভিসঙ্খার কিচ্চং নাম অন্তমসো অস্সাসনপস্সাসন কিচ্চং উপাদায ধম্মানং ৰসৰত্তনাভাৰতো করোন্তীতি.

অনিচ্চস্স ধম্মস্স অনুঅনুপস্সনাতি সম্বন্ধো. ‘‘অনুঅনুপস্সনা’’তি চ ঞাণচক্খুনা পুনপ্পুনং নিজ্ঝাযনা ওলোকনা. ‘‘ধম্মানং’’তি পঞ্চক্খন্ধ ধম্মানং. ‘‘যত্থ যত্থা’’তি যস্মিং যস্মিং সরীরঙ্গে. ‘‘পুরাণ ধম্মানং’’তি পুরাণানং পাতুব্ভূতানং, ৰড্ঢিতানঞ্চ ধম্মকোট্ঠাসানং অন্তরধানং ৰযো ৰুচ্চতি. ৰিপস্সনা কম্মং পত্ৰা খণিকৰসেন একেকধম্মৰিভাগৰসেন চ অনুপস্সনা কিচ্চং নত্থীতি আহ ‘‘সমূহ সন্ততিৰসেন পনা’’তি. একেকধম্মৰিভাগৰসেন অনুপস্সনাপি পন পকতিযা সুপাকটেসু চিত্তৰেদনাদীসু ইচ্ছিতব্বাযেৰ. ‘‘অনিচ্চতায পরমাকোটী’’তি ততো উত্তরি অনিচ্চতা নাম নত্থীতি অধিপ্পাযো. ধম্মানং তথা তথা ভাযিতব্বপ্পকারো নাম পঞ্চক্খন্ধে ‘অনিচ্চতো, দুক্খতো, রোগতো, গণ্ডতো, সল্লতো, অঘতো, আবাধতো, তিআদিনা ৰুত্তো ভাযিতব্বপ্পকারো. তস্স সমনুপস্সনাঞাণং ভযঞাণং. এতেন অপাযদুক্খ সংসার দুক্খভীরুকেহি জনেহি ভাযিতব্বন্তি ভযং. তে ৰা ভাযন্তি এতস্মাতি ভযং. ভযস্স সমনু পস্সনাঞাণং ভযঞাণন্তি ইমমত্থং দস্সেতি. ‘‘কিঞ্চিভযৰত্থুং’’তি সীহব্যগ্ঘাদিকং ভযৰত্থুং. ‘‘পটিস্সরণে’’তি গুহালেণাদিকে পটিস্সরণে. ‘‘তেসং’’তি ভিজ্জনসভাৰানং ধম্মানং. ‘‘তেহী’’তি ভিজ্জনসভাৰেহি. উক্কণ্ঠতা নাম চিত্তস্স ৰিরুদ্ধতা নিক্খমাভিমুখতা. ‘‘চত্তালীসায আকারেহী’’তি পঞ্চক্খন্ধে ‘অনিচ্চতো, দুক্খতো, রোগতো, গণ্ডতো, সল্লতো, অঘতো, আবাধতো, পরতো, পলোকতো, ঈতিতো,. উপদ্দৰতো, ভযতো, উপসগ্গতো, চলতো, পভঙ্গুতো, অদ্ধুৰতো, অতাণতো, অলেণতো, অস্সরণতো, রিত্ততো,. তুচ্ছতো, সুঞ্ঞতো, অনত্ততো, আদীনৰতো, ৰিপরিণাম ধম্মতো, অসারকতো, অঘমূলতো, ৰধকতো, ৰিভৰতো, সাসৰতো,. সঙ্খততো, মারামিসতো, জাতিধম্মতো, জরাধম্মতো, ব্যাধিধম্মতো, মরণধম্মতো, সোকপরিদেৰধম্মতো, দুক্খদোমনস্স ধম্মতো, উপাযাস ধম্মতো, সংকিলেসিক ধম্মতো, পস্সন্তো সুঞ্ঞতো লোকং অৰেক্খতীতি এৰং মহানিদ্দেসে মোঘপঞ্হনিদ্দেসে আগতেহি চত্তালীসায আকারেহি. তত্থ পঞ্চক্খন্ধে অনিচ্চতো পস্সন্তোতিআদিনা যোজেতব্বং. ‘‘অনিচ্চতো’’তি চ অনিচ্চভাৰেনাতি অত্থো. সব্বেপি পঞ্চক্খন্ধা অনিচ্চা এৰাতি পস্সন্তোতি ৰুত্তং হোতি. কথং পন অনিচ্চতো পস্সন্তো সুঞ্ঞতো লোকং অৰেক্খতীতি. নিচ্চগুণ সুঞ্ঞতায সুঞ্ঞতো পঞ্চক্খন্ধভূতং লোকং অৰেক্খতি. সেসপদেসুপি এসেৰনযো. তত্থ ‘‘অনিচ্চা এৰা’’তি পটিসন্ধিক্খণতো পট্ঠায যদাকদাচি মরণ ধম্মত্তা অনিচ্চা এৰ. ‘‘দুক্খা এৰা’’তি অনিচ্চ ধম্মত্তাযেৰ দুক্খা এৰ. যদনিচ্চং, তং দুক্খংতিহি ৰুত্তং. দুক্খ সচ্চধম্মত্তা ৰা. ‘‘রোগা এৰা’’তি রোগজাতিকত্তা রোগা এৰ. যেহি কেচি লোকে চক্খু রোগাদিকা অনেকসহস্সা রোগা নাম সন্দিস্সন্তি. সব্বেতে ইমেপঞ্চক্খন্ধা এৰ. ইতো অঞ্ঞোকোচি রোগো নাম নত্থি. তস্মা তে একন্তেন রোগজাতিকা এৰাতি. অপি চ, দুক্খসচ্চ ধম্মত্তাতীহি দুক্খতাহি চতূহি দুক্খট্ঠেহি চ অভিণ্হসম্পটিপ্পীল়নতো রুজ্জনট্ঠেন রোগা এৰ. তত্থ ‘‘তীহি দুক্খতাহী’’তি দুক্খদুক্খতা সঙ্খার দুক্খতা ৰিপরিণাম দুক্খতাতি ইমাহি তীহিদুক্খতাহি. ‘‘চতূহি দুক্খট্ঠেহী’’তি দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো,তি ইমেহি চতূহি দুক্খট্ঠেহি. দুক্খ কিচ্চেহীতি অত্থো. এসনযো গণ্ডাদীসু. তত্থ গণ্ডোনাম পীল়কাবাধো. সল্লং নাম ৰিজ্ঝনট্ঠেন কিলেস সল্লঞ্চ দুক্খসল্লঞ্চ. অঘন্তি নিরত্থকং. ইমে চ খন্ধা ৰিপত্তিপরিযোসানত্তা নিরত্থকা এৰ হোন্তি. সব্বাসম্পত্তিযো ৰিপত্তিপরিযোসানাতি হি ৰুত্তং. অৰিস্সাসিকট্ঠেন পরে এৰ. ন হি তে এতং মম, এসো হমস্মি, এসো মে অত্তাতি এৰং ৰিস্সাসং অরহন্তি. তথা ৰিস্সাসং করোন্তস্স নানাদুক্খেহি নিচ্চং ৰিহিংসনতো. পটিসন্ধিতো পট্ঠায যদাকদাচি পলুজ্জনধম্মত্তা পলোকধম্মা এৰ. ‘‘ঈতী’’তি অন্তরাযো ৰুচ্চতি. খন্ধা অন্তরায জাতিকা এৰাতি ৰুত্তং হোতি. অজ্ঝত্তভাৰং উপগন্ত্ৰা দুতত্তা ৰিবাধকত্তা উপদ্দৰা এৰ. ভাযিতব্বত্তা ভযা এৰ. অনত্তা এৰ সমানা অজ্ঝত্তভাৰং উপগন্ত্ৰা সজ্জনতো লগ্গনতো দুম্মো চযতো উপসগ্গা এৰ. নিচ্চকালং লোকধম্মেহি চলনত্তা ৰিপ্ফন্দনত্তা চলাএৰ. নানপ্পকারেন ভঞ্জনধম্মত্তা পভঙ্গুনো এৰ. খণমত্তম্পি অথিরত্তা অদ্ধুৰা এৰ. জরামরণাদিতো অপাযৰিনিপতনাদিতো ভযতো তাযতি রক্খতীতি তাণং. তে চ খন্ধা কস্সচিতাণা ন হোন্তি. তেসঞ্চ কিঞ্চিতাণং নাম নত্থি. তস্মা অতাণা এৰ. ভযতো ভীরুকা জনা লীযন্তি নিলীযন্তি এত্থাতি লেণং. তে চ কস্সচিলেণা ন হোন্তি. তেসঞ্চ কিঞ্চিলেণং নাম নত্থি. তস্মা অলেণা এৰ. ভযং সরতিহিংসতীতি সরণং. তে চ কস্সচিসরণং ন হোন্তি. তেসঞ্চ কিঞ্চিসরণং নাম নত্থি. তস্মা অস্সরণা এৰ. নিচ্চতাদীহি সব্বেহি সোভণগুণেহি সব্বসো রহিতত্তা তুচ্ছত্তা সুঞ্ঞত্তারিত্তা এৰ. তুচ্ছা এৰ. সুঞ্ঞা এৰ. অত্তা ৰুচ্চতি যস্সকস্সচি কোচি সারভূতো পটিস্সরণো. তে সযঞ্চ কস্সচি অত্তান হোন্তি. অত্তনো চ কোচি অত্তানাম নত্থি. তস্মা অনত্তা এৰ. অনিচ্চতাদীহি আদীনৰেহি দোসেহি সম্পুণ্ণত্তা আদীনৰা এৰ. ৰিপরিণাম সভাৰত্তা ৰিপরিণামা এৰ. সারভূতস্স কস্সচি অধিট্ঠানস্স অভাৰা অসারাএৰ. অঘস্স সব্বনিরত্থকস্স পতিট্ঠানত্তা অঘমূলা এৰ. তে সযং মরণ ধম্মসমঙ্গীনো হুত্ৰা তেন মরণসত্থেন মরণাৰুধেন সংসারে সত্তানং নিচ্চং মারকত্তা জীৰিতিন্দ্রিযুপচ্ছেদকত্তা ৰধকা এৰ. নিচ্চসুখহিত ৰুড্ঢিৰিগতত্তা ৰিভৰা এৰ. আসৰেহি পরিগ্গহিতত্তা সাসৰা এৰ. নিচ্চকালং পচ্চযাযত্তৰুত্তিকত্তা সঙ্খতা এৰ. কিলেসমারমচ্চুমারানং আমিসাহারত্তা মারামিসা এৰ. অনিচ্ছন্তস্সেৰ সতো চক্খুরোগাদিভাৰেন অপাযভৰাদিভাৰেন জাতসভাৰত্তা জাতিধম্মা এৰ. অনিচ্ছন্তস্সেৰ সতো হাযনমরণসভাৰত্তা জরামরণ ধম্মা এৰ. সোকাদীনং ৰত্থুভাৰেন ধারণত্তা সোকাদি ধম্মা এৰ. তণ্হা সংকিলেস দিট্ঠিসংকিলেস দুচ্চরিত সংকিলেসেহি নিযুত্তত্তা সংকিলেসিক ধম্মা এৰাতি. তেন ৰুত্তং ‘‘চত্তালীসায আকারেহী’’তি. ‘‘পটিসঙ্খানৰসেনা’’তি পরিৰীমংসনৰসেন.‘‘নিকন্তিযা’’তি নিকন্তিতণ্হায. ‘‘পরিযাদিন্নাযা’’তি সুক্খভাৰপত্তায. ‘‘ভযঞ্চা’’তি ভযঞাণৰসেন উপ্পন্নং ওত্তপ্পভযঞ্চ.

লোকে অত্তজীৰা নাম সত্তানং অজ্ঝত্ত ধম্মেসু সারধম্মা হোন্তি. তেসু ৰিগতেসু সেসধম্মা নিস্সত্ত নিজ্জীৰভাৰং পত্ৰা ফেগ্গুভূতা কচৰরভূতাতি লোকস্স অভিমানো. তে চ অত্তজীৰা নাম সব্বসো নত্থীতি দিট্ঠে খন্ধেসু কচৰরভাৰদস্সনং অত্তজীৰ সুঞ্ঞতা দস্সনং নাম. ‘‘ৰিমুচ্চমানো’’তি এতেন ৰিমুচ্চতীতি ৰিমোক্খোতি অত্থং দস্সেতি. ৰিমুচ্চন্তি এতেনাতি ৰিমোক্খোতিপি যুজ্জতি. ‘‘নিমিত্তানী’’তি ৰিপল্লাসধম্মেহি নিম্মিতানি নিচ্চনিমিত্ত সুখনিমিত্ত অত্তনিমিত্ত জীৰনিমিত্তানি. সত্ত পুগ্গল ইত্থি পুরিস হত্থ পাদ সীস গীৰাদীনি নিমিত্তানি চ. তত্থ সঙ্খারানং খণিক ধম্মত্তা অনিচ্চানংযেৰ সতং সন্ততি ঘনেন পটিচ্ছন্নত্তা হিয্যোপি সো এৰ, অজ্জপি সো এৰাতিআদিনা নিচ্চাকারেন উপট্ঠানং নিচ্চনিমিত্তং নাম. কিলেসমলেহি পরিগ্গহিতত্তা অসুভানংযেৰ সতং অৰিজ্জায পটিচ্ছন্নত্তা ইদং ইট্ঠং, কন্তং, মনাপং, পিযরূপ, ন্তিআদিনা সুভাকারেন উপট্ঠানং সুভনিমিত্তং নাম. ভযট্ঠেন অখেমট্ঠেন দুক্খানংপি সতং তাযেৰ পটিচ্ছন্নত্তা ইদং সুখং, নিব্ভযং, খেমং, সাতরূপ, ন্তিআদিনা সুখাকারেন উপট্ঠানং সুখনিমিত্তং নাম. পচ্চযা যত্তৰুত্তিকত্তা পচ্চযেন ৰিনা কেৰলং অত্তনো ৰসাযত্তৰুত্তিতা ভাৰতো অনত্তানংযেৰ সতং অত্তনো ইচ্ছাৰসেন করোতি, কথেতি, চিন্তেতি, গন্তুং ইচ্ছন্তো গচ্ছতি, ঠাতুং ইচ্ছন্তো তিট্ঠতী, তিআদিনা ৰসৰত্তনাকারেন উপট্ঠানং অত্তনিমিত্তং নাম. তথা সত্তোনাম সত্তাহংপি জীৰতি, মাসংপি জীৰতি, সংৰচ্ছরংপি জীৰতীতিআদিনা জীৰাকারেন উপট্ঠানং জীৰনিমিত্তং নাম. ননু চেত্থ অত্তনো ইচ্ছাৰসেন করোতীতিআদীসু ইচ্ছানাম তণ্হাৰাছন্দো ৰা. তদুভযম্পি চিত্তসম্পযুত্তং. করণঞ্চ নাম কাযিকক্রিযাভূতানং চিত্তজরূপকলাপানং পৰত্তিৰিসেসো. এৰঞ্চসতি তেসং চিত্তৰসেন পৰত্তত্তা অত্তনো ইচ্ছাৰসেন করোতীতি ইদং অভিধম্মৰিরুদ্ধং ন হোতীতি. ন ন হোতি. অত্তনোতি চ করোতীতি চ ৰুত্তত্তা. ন হি অত্তানাম অত্থি, যো অত্তনোতি ৰুচ্চেয্য. ন চ কত্তানাম অত্থি, যো করোতীতি ৰুচ্চেয্য. ইধ পন তস্মিং সমযে পৰত্তং খন্ধপঞ্চকমেৰ অত্তাতি চ কত্তাতি চ গহেত্ৰা অত্তনোতি চ করোতীতি চ ৰুত্তং. ‘‘অৰস্সযো হোতী’’তি পতিট্ঠা হোতি. ‘‘ৰিধমিত্ৰা’’তি ঞাণেন অন্তরধাপেত্ৰা. সভাৰতো ৰিজ্জমানানি ন হোন্তীতি দস্সনঞাণেন ৰিনিচ্ছযং পাপেত্ৰাতি ৰুত্তং হোতি. ভাৰদস্সনং নাম সোকদুক্খাদীনং অভাৰদস্সনং.

‘‘তং তং ঘনৰিনিব্ভুজ্জনৰসেনা’’তি সমূহসন্ততি ঘনাদীনং ভিন্দন ছিন্দনৰসেন. তত্থ সমূহঘনভিন্দনং আদিতো ধম্মৰৰত্থানঞাণকিচ্চং. তদা অত্তদিট্ঠি ৰিক্খম্ভিতা হোতি. জীৰদিট্ঠি চ নাম সুখুমতরা অত্তদিট্ঠি এৰ ৰুচ্চতি. মগ্গক্খণং পত্ৰা এৰ তদুভযংপি সব্বসো সমুচ্ছিন্দতীতি দট্ঠব্বং. ‘‘পণিহিতগুণস্সা’’তি পত্থিতগুণস্স.

‘‘পাতিমোক্খ’’ন্তি এত্থ ‘‘পতী’’তি জেট্ঠকো ৰুচ্চতি. ‘‘মুখং’’তি মূলকারণং. পতি চ সো মুখঞ্চাতি পতিমুখং. পতিমুখমেৰ পাতিমোক্খন্তি ইমমত্থং দস্সেন্তো ‘‘তং হী’’তিআদিমাহ. সব্বলোকিযসীলানি নাম চতুপারিসুদ্ধিসীলানি. তেসং মজ্ঝে. ‘‘জেট্ঠকত্তা’’তি জেট্ঠকসীলত্তা. ‘‘তমেৰা’’তি ৰিনযপঞ্ঞত্তিসীলমেৰ +. ‘‘যেসং ধম্মানং’’তি উদ্ধচ্চ মুট্ঠস্সচ্চাদি ধম্মানং. ‘‘ৰিপ্ফন্দিতানি নামা’’তি ৰিপ্পকিণ্ণানি নামাতি অধিপ্পাযো. তেনাহ ‘‘লোলানি নামা’’তি. ‘‘তদনুবন্ধা’’তি তানিৰিপ্ফন্দিতানি ইন্দ্রিযানি অনুগতা. ‘‘বুদ্ধপ্পটিকুট্ঠেহী’’তি বুদ্ধেনভগৰতা পটিক্কোসিতেহি নীৰারিতেহি. ‘‘মিচ্ছাপযোগেহী’’তি অট্ঠকুলদূসনকম্মেহি চেৰ একৰীসতিঅনেসনকম্মেহি চ. ‘‘তিৰিধকুহনৰত্থূহী’’তি পচ্চযপ্পটিসেৰনঞ্চ, সামন্তজপ্পনঞ্চ, ইরিযা পথ সন্নিস্সিতঞ্চাতি ইমেহি তিৰিধেহি কুহনৰত্থূহি. তিৰিধেহি অচ্ছরিয কম্মৰিধানেহীতি ৰুত্তং হোতি. পরিসুজ্ঝতীতি পরিসুদ্ধি. পরিসুদ্ধি এৰ পারিসুদ্ধি. ‘‘সম্মোহস্সা’’তি ধাতুমনসিকারাদীসু সম্মুয্হনস্স. ‘‘গেধস্সা’’তি সম্মোহত্তাযেৰ পচ্চযেসু ভত্তনিক্খিত্তকা কস্সৰিয গেধস্স, অভিকঙ্খস্স. ‘‘মদস্সা’’তি লাভসক্কারা দিমূলকস্স মানমদস্স. ‘‘পমাদস্সা’’তি কুসলেসু ধম্মেসু পমাদস্স মুট্ঠস্সচ্চস্স. তং তং পযোজন মরিযাদো নাম চীৰরপচ্চযে তাৰ সীতপ্পটিঘাতাদিকো পযোজনমরিযাদো. ‘‘মরিযাদো’’তি চ যাৰদেৰাতি পদেন দস্সিতো সীতপ্পটিঘাতাদিকো চীৰরপ্পযোজন পরিচ্ছেদো. সো চ চীৰরপচ্চযে সম্মোহাদিকে সাৰজ্জপক্খে অপতনত্থায ঠপিতো. তেন ৰুত্তং ‘‘সম্মোহস্স গেধস্স মদস্স পমাদস্স পহানত্থং’’তি. এসনযো পিণ্ডপাতপচ্চযাদীসুপি. এতেন পচ্চৰেক্খনাপাঠেসু অযমত্থো দস্সিতো. ইধ ভিক্খু চীৰরং পটিসেৰতি যাৰদেৰ সীতস্স পটিঘাতায উণ্হস্স পটিঘাতাযাতিআদীসু যাৰদেৰ সীতস্স পটিঘাতায পটিসেৰতি. ন ততো উত্তরি সম্মোহত্থায গেধত্থায মদত্থায পমাদত্থায পটিসেৰতীতিআদি. এৰঞ্চসতি, যং চীৰরং পটিসেৰন্তস্স সম্মোহগেধমদপ্পমাদা উপ্পজ্জন্তি. তং ন সেৰিতব্বং. ইতরং সেৰিতব্বন্তি দস্সিতং হোতীতি.

‘‘পচ্চত্তসভাৰো’’তি পচ্চেকসভাৰো. ‘‘কারিযসঙ্খাতং’’তি কাতব্বং অভিনিপ্ফাদেতব্বন্তি কারিযং. আসন্নপ্ফলং. তেনাহ ‘‘অগ্গিস্সধূমোৰিযা’’তি. আসন্নকারণং পদট্ঠানং নাম অগ্গিকারকো ৰিয. পজ্জতি গচ্ছতি পৰত্ততি ফলং এতেনাতি পদং. তিট্ঠতি ফলং এত্থাতি ঠানং. উভযংপি কারণ পরিযাযো এৰ. তেন অতিস্সযত্থোপি সিজ্ঝতীতি আহ ‘‘আসন্নকারণং’’তি. ‘‘সদ্ধিং সঞ্ঞা চিত্ত ৰিপল্লাসেহী’’তি দিট্ঠিসম্পযুত্তেহীতি অধিপ্পাযো. দিট্ঠিৰিপ্পযুত্তা পন সঞ্ঞা চিত্ত ৰিপল্লাসা ৰিক্খম্ভিতুং সক্কোতীতি ন ৰত্তব্বা. ‘‘সাসন ধম্মে’’তি অনত্তলক্খণ সুত্তন্তাদিকে সুঞ্ঞত ধম্মপ্পটিসংযুত্তে দেসনাধম্মে. ‘‘দিট্ঠিৰিপল্লাসো ৰিক্খম্ভিতো’’তি তাদিসং ধম্মদেসনং সুত্ৰা দেসকে সত্থরি চ দেসিতে ধম্মে চ সদ্ধং পটিলভিত্ৰা সচ্চমেৰ ভগৰা আহ, অহং পন এতং মম, এসোহমস্মি, এসো মে অত্তা,তি গণ্হামি, মিচ্ছাৰতাযং মমগাহোতি এৰং ৰিক্খম্ভিতো হোতি. ততো পট্ঠায এসো মে অত্তাতি ৰদন্তোপি দিট্ঠিসম্পযুত্তচিত্তেন ন ৰদতি. দিট্ঠিৰিপ্পযুত্তচিত্তেন এৰ ৰদতীতি অধিপ্পাযো. ইদম্পন দল়্হগ্গাহ ৰিক্খম্ভনমত্তং এৰ. ন অত্তদস্সন ৰিক্খম্ভনং. তং পন ধম্মৰৰত্থানঞ্ঞাণে সিদ্ধে এৰ সিজ্ঝতীতিপি ৰদন্তি. চতুন্নং আহারানং ৰসেন চতুধা নামরূপং পরিগ্গহেতব্বমেৰ. কস্মা, চত্তারো আহারে পরিগ্গহেত্ৰা তেস্ৰেৰ লক্খণত্তযং সমনুপস্সন্তস্স অন্তে লোকুত্তরঞ্ঞাণদস্সনপ্পটিলাভকিচ্চস্স সিদ্ধত্তাতি অধিপ্পাযো. পঞ্চধাতিআদীসু এসনযো. আদিকম্মিকানং অৰিসযো, ৰিসুং ৰিসুং লক্খণ রসাদীহি পরিগ্গহেতুং অসক্কুণেয্যত্তা. পরিগ্গহণে সক্কোন্তস্সপি ৰিপস্সনা কম্মে ৰিসুং ৰিসুং পস্সিতুং অসক্কুণেয্যত্তা চ. তথাহি ৰক্খতি ‘‘কলাপৰসেন সংখিপিত্ৰা’’তি. ‘‘অঞ্ঞস্স কস্সচী’’তি অত্তজীৰাদিকস্স. সো করোতি কুসলাকুসলং কম্মং. সো পটিসংৰেদেতি ভৰন্তরং পত্ৰা তব্বিপাকং. সংসরতি ভৰতো ভৰং. সন্ধাৰতি কম্মৰেগেন খিত্তো. সুদ্ধে নামে এৰ ৰা রূপে এৰ ৰা ঈহাব্যাপারানং অভাৰদস্সনতোতি যোজনা. পুগ্গলসত্তানং ক্রিযাযোতি সঞ্ঞিতাতি ৰিগ্গহো. ‘‘অত্তাতি পৰত্তা দিট্ঠী’’তি কারক দিট্ঠি. ‘‘তদত্থা ভিনিৰেসৰসেনা’’তি সত্তো, পুগ্গলো, তিআদি ৰোহারস্স সব্ভাৰতো তস্স অত্থভূতো সত্তপুগ্গলাদিকোপি সভাৰতো অত্থিযেৰ. নো নত্থীতি এৰং দল়্হং হদযে সন্নিধানকরণ ৰসেন. ‘‘অতিধাৰনঞ্চা’’তি ৰোহার পঞ্ঞত্তিমত্তে অট্ঠত্ৰা তং অতিক্কমিত্ৰা পঞ্চক্খন্ধে সত্তাদিভাৰেন গহণঞ্চাতি অধিপ্পাযো.

‘‘কম্মচিত্তোতুকাহারৰসেনা’’তি এত্থ ককারো সন্ধি ৰসেন আগমো. কম্মৰসেন চিত্তৰসেন উতুৰসেন আহারৰসেনাতি অত্থো. অনুরূপানং পচ্চযানং সামগ্গীতি ৰিগ্গহো. ‘‘অঞ্ঞথা পৰত্তিযা’’তি অঞ্ঞেন পকারেন পৰত্তনস্স. ‘‘হেতুসম্ভারপচ্চযেহী’’তি হেতুপচ্চয সম্ভারপচ্চযেহি. জনক পচ্চযা হেতুপচ্চযা নাম. পরিৰারপচ্চযা সম্ভারপচ্চযা নাম. ‘‘কম্মপ্পৰত্তিযা’’তি কম্মপ্পৰত্তিতো. ‘‘ৰিপাকপ্পৰত্তিযা’’তি ৰিপাকপ্পৰত্তিতো. একস্স সত্তস্স অনমতগ্গে সংসারে সংসরন্তস্স রূপকাযোপি অত্থি নামকাযোপি অত্থি. ততো অঞ্ঞো কোচিসভাৰো নাম নত্থি. দ্ৰে চ কাযা পঞ্চৰোকারে সংসরন্তস্স একতো পৰত্তন্তি. অসঞ্ঞসত্তে সংসরন্তস্স রূপকাযো এৰ পৰত্ততি. সো এৰ তত্থ একোসত্তোতি সঙ্খ্যং গচ্ছতি. অরূপে সংসরন্তস্স নাম কাযো এৰ পৰত্ততি. সো এৰ তত্থ একো সত্তোতি সঙ্খ্যং গচ্ছতি. ‘‘সঙ্খ্যং গচ্ছতী’’তি চ পঞ্ঞত্তিমত্তং গচ্ছতীতি অধিপ্পাযো. তেসু চ কাযেসু রূপকাযে চুতি পটিসন্ধীনং অঞ্ঞমঞ্ঞং অনন্তর পচ্চযতা নাম নত্থি. একমেকস্মিং ভৰে একমেকো হুত্ৰা চুতিকালে ভিজ্জতি. রূপসন্ততি ছিজ্জতি. পটিসন্ধিরূপেন সহ পচ্চয পচ্চযুপ্পন্নতা পবন্ধো নপ্পৰত্ততি. নাম কাযে পন চুতি পটিসন্ধীনং অঞ্ঞমঞ্ঞং অনন্তরপচ্চযতা অত্থি. চুতিকালেপি নামসন্ততি ন ছিজ্জতি. পটিসন্ধি নামেন সহ পচ্চয পচ্চযুপ্পন্নতা পবন্ধো পৰত্ততিযেৰ. তত্থ পটিচ্চসমুপ্পাদ কুসলো ভিক্খু পটিচ্চসমুপ্পাদঞ্ঞাণে ঠত্ৰা একস্মিংভৰে একস্স সত্তস্স পৰত্তিং পস্সন্তো সত্তং নাম ন পস্সতি. পুগ্গলং নাম ন পস্সতি. অহন্তিপি ন পস্সতি. পরোতিপি ন পস্সতি. অহং অতীতেসু ভৰেসু অহোসিন্তিপি ন পস্সতি. ইমস্মিংভৰে অস্মীতিপি ন পস্সতি. অনাগতেসু ভৰিস্সামীতিপি ন পস্সতি. অথ খো অৰিজ্জা পচ্চযা সঙ্খারা পৰত্তন্তি. সঙ্খার পচ্চযা ভৰন্তরে ৰিঞ্ঞাণং পৰত্ততীতিআদিনা নযেন নামরূপ ধম্মানং হেতুফল পরম্পরাৰসেন অৰিচ্ছেদপ্পৰত্তিমেৰ পস্সতি. একস্মিংভৰে পৰত্তিং পস্সন্তে সতি, অনমতগ্গেসংসারে অনন্তেসু ভৰেসু তস্স সত্তস্স পৰত্তি দিট্ঠা এৰ হোতি তত্থপি এৰমেৰ, তত্থপি এৰমেৰাতি. তদা তস্স সোল়সৰিধা কঙ্খা পহীযতীতি ইমমত্থং ‘‘দস্সেন্তো অনমতগ্গে সংসারে’’তিআদিমাহ. তত্থ কতমা সোল়সৰিধা কঙ্খাতি. অহোসিং নু খো অহং অতীতমদ্ধানং. ন নু খো অহোসিং. কিং নু খো অহোসিং. কথং নু খো অহোসিং. কিং হুত্ৰা কিং অহোসিং নু খো অহং অতীতমদ্ধানন্তি এৰং পুব্বন্তে পঞ্চৰিধা কঙ্খাৰুত্তা. ভৰিস্সামি নু খো অহং অনাগতমদ্ধানং. ন নু খো ভৰিস্সামি. কিং নু খো ভৰিস্সামি. কথং নু খো ভৰিস্সামি. কিং হুত্ৰা কিং ভৰিস্সামি নু খো অহং অনাগতমদ্ধানন্তি এৰং অপরন্তে পঞ্চৰিধা কঙ্খা ৰুত্তা. অহং নু খো স্মি. নো নু খো স্মি. কিন্নু খো স্মি. কথং নু খো স্মি. অহং নু খো সত্তো কুতো আগতো. সো কুহিং গামী ভৰিস্সামীতি এৰং পচ্চুপ্পন্নে ছব্বিধা কঙ্খা ৰুত্তা. ইমা সোল়সৰিধা কঙ্খাতি. তত্থ অহোসিং নু খো, ন নু খো অহোসিন্তি ইমিনা পদদ্ৰযেন অতীতকালে অত্তনো অত্থি নত্থিভাৰে কঙ্খতি. সচে অত্থি, কিং নু খো অহোসিন্তি কঙ্খতি. কেনচি হেতুনা পচ্চযেন ৰা অহোসিং. কেনচি ইদ্ধিমন্তেন ৰা নিম্মিতো অহোসিং. অহেতু অপচ্চযা ৰা অনিম্মিতো ৰা সযংজাতো অহোসিন্তি অত্থো. যদি তেসুপকারেসু অঞ্ঞতরেন অহোসিং. কথং নু খো অহোসিং. অপাদকোৰা অহোসিং. দ্ৰিপাদকো ৰা. চতুপ্পাদকোৰা. বহুপ্পাদকোৰা. রূপীৰা. অরূপীৰা. সঞ্ঞীৰা. অসঞ্ঞীৰা ইচ্চাদি. অথ তেসু অপাদকাদীসু অঞ্ঞতরো অহং অহোসিং. কিং হুত্ৰা কিং অহোসিং. পথমভৰে কিং হুত্ৰা দুতীয ভৰাদীসু কিং অহোসিন্তি ইদং ভৰপরম্পরাৰসেন ৰুত্তং. এসনযো অপরন্তেপি. পচ্চুপ্পন্নে ‘‘অহং নু খো স্মি, নো নু খো স্মী’’তি যথা খুদ্দকৰত্থু ৰিভঙ্গে অট্ঠসততণ্হাৰিচরিতেসু. সতস্মীতি হোতি. সীতস্মীতি হোতীতি ৰুত্তং. তত্থ ‘‘সতস্মী’’তি অহং সস্সতো ৰা ভৰামি. ‘‘সীতস্মী’’তি অহং উচ্ছিন্নোৰা ভৰামীতি অত্থো. যথা চ. অত্থীতি খো একো অন্তো. নত্থীতি খো দুতীযো অন্তোতি ৰুত্তং. তত্থ ‘‘অত্থী’’তি অত্তানাম ভৰাভৰেসু নিচ্চকালং অত্থি. ‘‘নত্থী’’তি তথা নত্থি, উচ্ছিজ্জতি. ন হোতি পরম্মরণাতি অত্থো. তথা ইধাপি অহং নু খো স্মি. নো নু খো স্মীতি কঙ্খতি. তত্থ ‘‘অহং নু খোস্মী’’তি অযং অহং নাম ভৰাভৰেসু নিচ্চকালং অস্মি নু খো, মম অত্তানাম সস্সতো হুত্ৰা সব্বকালং অত্থি নু খোতি ৰুত্তং হোতি. ‘‘নো নু খো স্মী’’তি তথা নো অস্মি নু খো. মম অত্তা তথা নত্থি নু খোতি অত্থো. এত্থ চ ‘‘ভৰাভৰেসূ’’তি পৰত্তেপি পচ্চুপ্পন্নে ৰত্তমানং অত্তানং গহেত্ৰা পৰত্তা পচ্চুপ্পন্নে সঙ্গহিতন্তি দট্ঠব্বং. ‘‘কিং নু খো স্মী’’তি অহং নাম সন্তো জাতো কিং নু খো অস্মি. কেনচি হেতুনা পচ্চযেন ৰা অস্মি নু খো. কেনচি ইদ্ধিমন্তেন ৰা নিম্মিতো ভৰামি নু খো. উদাহু অহেতু অপচ্চযা ৰা কেনচি অনিম্মিতো ৰা সযং নু খো ভৰামি নু খোতি অত্থো. ‘‘কথং নু খো স্মী’’তি এত্থ পন অপদাদীহি অযোজেত্ৰা অহং নু খো কিং গোত্তো ভৰামি. গোতমগোত্তো ৰা ৰাসেট্ঠ গোত্তো ৰা তিআদিনা যোজেতব্বং. আদি কপ্পকালে তানি গোত্তানি এতরহি সম্ভেদং গচ্ছন্তি. তস্মা তেসু কঙ্খন্তো কঙ্খতিযেৰ. ‘‘অহং কুতো আগতো’’তি অহং অতীতে কুতোভৰতো আগতো অস্মি. ‘‘সোকুহিংগামী ভৰিস্সামী’’তি সো অহং আযতিং ভৰে কুহিং গামিকো ভৰিস্সামীতি কঙ্খতি. ‘‘কঙ্খায অতিক্কমো’’তি সো ভিক্খু পটিচ্চসমুপ্পাদে অৰিজ্জাদিকং অতীতহেতু পঞ্চকং পস্সন্তো তস্মিংভৰে সব্বংপি পটিচ্চসমুপ্পাদং পস্সতিযেৰ. এৰং পস্সন্তো ন তত্থ অহং নাম কোচি অত্থি, যং পটিচ্চ অতীত ৰিসযা পঞ্চৰিধা কঙ্খা উপ্পজ্জতি. ধম্ম মত্তমেৰ তত্থ অত্থীতি এৰং অতীতে কঙ্খা ৰত্থুস্স অভাৰদস্সনেন পঞ্চৰিধায কঙ্খায অতিক্কমো হোতি. ননু তথা পস্সন্তস্সপি কথং নু খো স্মি, কিং হুত্ৰা কিং অহোসিং নু খোতি অযং কঙ্খা অত্থিযেৰ. তথা পস্সন্তোপি হি ৰিনা পুব্বেনিৰাসঞ্ঞাণেন অতীতে ভৰে অহং দ্ৰিপাদকো অহোসিন্তিৰা চতুপ্পাদকো অহোসিন্তি ৰা ততো চুতো অসুকভৰে উপ্পন্নোতি ৰা ন জানাতি ন পস্সতীতি. ৰুচ্চতে. সা পন কঙ্খা ধম্ম মত্তপ্পৰত্তি দস্সনতো পট্ঠায অন্তরাযিক কঙ্খা ন হোতি. ৰিচিকিচ্ছা পটিরূপিকা এৰ. সা হি অরিযানংপি লব্ভতি যেৰাতি. তথা অনাগতে ফলপঞ্চকং পস্সন্তো অপরন্তে পঞ্চৰিধং কঙ্খং অতিক্কমতি. পচ্চুপ্পন্নে ফলপঞ্চকঞ্চ হেতুপঞ্চকঞ্চ পস্সন্তো পচ্চুপ্পন্নে কঙ্খা ছক্কং অতিক্কমতি. সেসং সব্বং পুব্বন্তে ৰুত্তনযমেৰাতি. অট্ঠৰিধায কঙ্খায অতিক্কমনে পন পটিচ্চসমুপ্পাদং অনুলোমপ্পটিলোমং পস্সন্তো দেসনা ধম্মে চ লোকুত্তর ধম্মেসু চ কঙ্খং অতিক্কমতি. ধম্মে কঙ্খাতিক্কমনেন সহেৰ দেসেন্তে সত্থরি চ, যথানুসিট্ঠং পটিপন্নে সঙ্ঘে চ, তীসু সিক্খাসু চ, যথাৰুত্তে পুব্বন্তে চ, অপরন্তে চ, পুব্বন্তা পরন্তেসু চ, পটিচ্চসমুপ্পাদেন সহ পটিচ্চসমুপ্পন্নেসু ধম্মেসু চ সব্বং কঙ্খং অতিক্কমতিযেৰ. তেনাহ ‘‘সভাৰ ধম্মপ্পৰত্তিযা’’তিআদিং. তত্থ ‘‘সভাৰধম্মপ্পৰত্তিযা চা’’তি পচ্চযপরম্পরাৰসেন সভাৰধম্মানং পরম্পরপ্পৰত্তিযা চ. ধম্মসু ধম্মতা নাম দেসনা ধম্মস্স স্ৰাক্খাততাদিভাৰেন সুন্দর ধম্মতা. অনৰজ্জধম্মতা. বুদ্ধসুবুদ্ধতা নাম তং ধম্মং দেসেন্তস্স বুদ্ধস্স সব্বঞ্ঞুবুদ্ধতা.

পরিযুট্ঠিতানং দিট্ঠিৰিচিকিচ্ছানং ৰিক্খম্ভনং নাম হেট্ঠা ধম্মৰৰত্থান ৰসেন পচ্চযপরিগ্গহৰসেন চ সিজ্ঝতি. ৰিপস্সনা কম্মং পন অনুসযভূতানং দিট্ঠিৰিচিকিচ্ছানং সল্লিখনত্থায করীযতীতি ৰুত্তং ‘‘অনুসয সমূহননত্থঞ্চা’’তিআদি. ‘‘তত্থ পনা’’তি তস্মিং পটিসম্ভিদা মগ্গে পন. ৰিভত্তেসূতি পাঠসেসো. ‘‘যস্সা’’তি যোগী পুগ্গলস্স. ‘‘যং দূরে সন্তিকেৰা’’তি যং দূরে পৰত্তং রূপং ৰা, সন্তিকে পৰত্তং রূপংৰাতি পাঠসেসো. ‘‘তদত্থস্স পনা’’তি সম্মসিতধম্মুদ্ধারত্থস্স. ‘‘ঞাণেন দল়্হং গহেত্ৰা’’তি ধম্মৰৰত্থানঞ্ঞাণেন সুট্ঠুৰিভূতং কত্ৰাতি অধিপ্পাযো. ইদানি যং যং দল়্হং গহেতব্বং. তং তং সরূপতো দস্সেতুং ‘‘তত্থা’’তিআদিমাহ. পুন দল়্হং গহিতস্স রূপস্স অনিচ্চলক্খণং দস্সেতুং ‘‘সা চ ক্রিযা’’তিআদি ৰুত্তং. ‘‘নস্সন্তী’’তি ভিজ্জন্তি. অনিচ্চতং গচ্ছন্তি. ‘‘ৰিত্থম্ভন ক্রিযা’’তি এত্থ ৰিৰিধেন থম্ভনং ৰিত্থম্ভনং. নানাদিসাভিমুখৰসেন থম্ভনং ৰহনন্তি অত্থো. ‘‘ইমাসঞ্চা’’তি চতুন্নং মহাভূতানঞ্চ. ৰিসুং ৰিসুন্তি ৰুত্তত্তা তাসং অঞ্ঞমঞ্ঞঞ্চ সহজাতেসু গহণং সম্ভৰতীতি ৰুত্তং ‘‘আপাদীনং’’তি. আপাদীনং সেসমহাভূতানঞ্চাতি অত্থো. সন্ততিযা সরীরানি সন্ততি সরীরানি. ‘‘তথা তথা কপ্পেত্ৰা’’তি রূপধম্মানং সন্ততি পরিৰত্তি নাম অভিক্কমন্তস্স এৰং ভৰেয্য, পটিক্কমন্তস্স এৰং ভৰেয্য, তথা সমিঞ্জন্তস্স পসারেন্তস্সাতিআদিনা পরিকপ্পেত্ৰা. ‘‘সেসখন্ধেসুপি তং তং সন্ততি নানত্তং’’তি ৰেদনাক্খন্ধে তাৰ কাযে কাযিকসুখসন্ততি দুক্খসন্ততীনং নানত্তং. চিত্তে সোমনস্স দোমনস্স সন্ততীনং. উপেক্খা সন্ততি পন অৰিভূতা হোতি. কপ্পেত্ৰা গহেতব্বা. যদা চিত্তে সোমনস্স দোমনস্সানি ন সন্দিস্সন্তি, তদা ইদানি উপেক্খা মে ৰেদনা পৰত্ততীতি ৰা, যদা তানি সন্দিস্সন্তি, তদা সা নিরুজ্ঝতীতি ৰা এৰং তক্কেত্ৰা সম্মসিতব্বাতি ৰুত্তং হোতি. সঞ্ঞাক্খন্ধে রূপসঞ্ঞাসদ্দসঞ্ঞাদীনং ৰসেন. সঙ্খারক্খন্ধে রূপসঞ্চেতনা সদ্দসঞ্চেতনাদীনং ৰসেন, নানাৰিতক্ক ৰিচারাদীনং ৰসেন, লোভালোভ দোসাদোস মোহামোহাদীনং ৰসেন চ. ৰিঞ্ঞাণক্খন্ধে চক্খুৰিঞ্ঞাণাদীনং, কুসলা কুসলৰিঞ্ঞাণাদীনঞ্চ ৰসেন সন্ততি নানত্তং ৰেদিতব্বং. ৰিস্সাসং করোতীতি ৰত্ৰা তদত্থং ৰিৰরতি ‘‘এতং মে’’তিআদিনা. তত্থ তযোৰিস্সাসা তণ্হাৰিস্সাসো, মানৰিস্সাসো, দিট্ঠিৰিস্সাসো. তত্থ এতং মমাতি তণ্হাৰিস্সাসো. এসোহমস্মীতি মানৰিস্সাসো. এসো মে অত্তাতি দিট্ঠিৰিস্সাসো. ‘‘পরিহরতী’’তি ভৰাভৰেসু পরিগ্গহেত্ৰা হরতি ৰহতি. ‘‘পরমজ্ঝত্তভাৰেনা’’তি পধানঅজ্ঝত্তভাৰেন. অজ্ঝত্তসারভাৰেনাতি ৰুত্তং হোতি. ‘‘পরিগ্গহিতো’’তি এসো মে অত্তাতি দিট্ঠিপরিগ্গহেন পরিগ্গহিতো. তযো হি পরিগ্গহা তণ্হা পরিগ্গহো, মানপরিগ্গহো, দিট্ঠিপরিগ্গহোতি. ৰসে সব্বসো ৰত্তন্তো নাম কেৰলং ৰসাযত্তৰুত্তিকো এৰ সিযা, ন পচ্চযাযত্তৰুত্তিকোতি দস্সেন্তো ‘‘যথাৰুত্তেহী’’তিআদিমাহ. তত্থ ‘‘যথাৰুত্তেহী’’তি সব্বসঙ্গহে ৰুত্তপ্পকারেহি কম্মাভিসঙ্খরণাদীহি. ‘‘তথাপরিগ্গহেতব্বো’’তি এসো মে অত্তাতি এৰং পরমজ্ঝত্তভাৰেন পরিগ্গহেতব্বো. তথা হি যো অত্তনো ৰসেন ৰত্ততি, তস্মিং অত্তনো সামিভাৰো নত্থি. যস্মিঞ্চ সামিভাৰো নত্থি, তস্মিং রূপাদিকে ধম্মে অত্তানং সামিকং কত্ৰা এসো মম অত্তাতি পরিগ্গহো নাম মিচ্ছা এৰ. তথা যো চ খণিক ধম্মো হোতি, খণে খণে ভিজ্জতি, তং রূপাদিকং খন্ধপঞ্চকং অত্তনো সারং কত্ৰা তথা পরিগ্গহোপি মিচ্ছা এৰ. এত্থ চ ‘‘মিচ্ছা এৰা’’তি পরমত্থ সচ্চং পত্ৰা মিচ্ছা এৰ. ৰিপল্লাসো এৰাতি ৰুত্তং হোতি. ‘‘সুখং ৰিদ্ধংসেতী’’তি কাযিকসুখঞ্চ চেতসিক সুখঞ্চ ৰিদ্ধংসেতি. ৰিনাসেতি. ‘‘নানাদুক্খং জনেতী’’তি কাযিকদুক্খঞ্চ চেতসিক দুক্খঞ্চ জনেতি উপ্পাদেতি. ‘‘ইদঞ্চ রূপং এদিসমেৰ হোতী’’তি কথং হোতি. মনুস্সত্তভাৰে ঠিতানং সত্তানং যথাপৰত্তং মনুস্স সুখং ৰিদ্ধংসেতি, জিণ্ণভিন্নভাৰং পাপেতি, নানাদুক্খং জনেতি. সযং অপাযত্তভাৰং গহেত্ৰা তেসং নানাঅপায দুক্খং জনেতি. তথা দেৰত্তভাৰে সক্কত্তভাৰে ব্রহ্মত্তভাৰে ঠিতানন্তিআদিনা ৰত্তব্বং. তথা মনুস্সত্তভাৰে ঠিতানং নানাৰিপরিণাম কিচ্চেহি যথাপৰত্তং সুখং ৰিদ্ধংসেতি, নানাপচ্চযাভিসঙ্খরণকিচ্চেহি নানাদুক্খং জনেতি. তেন ৰুত্তং ‘‘ইদঞ্চ রূপং এদিসমেৰা’’তি. ‘‘সারোনাম থামবলৰিসেসো ৰুচ্চতী’’তি এতেন থামবলৰিসেসেন সম্পন্নং ৰত্থুংপি সঙ্গণ্হাতি. ‘‘অসারকট্ঠেনা’’তি এত্থ সারো এৰ সারকং, ন সারকং অসারকন্তি ইমমত্থং সন্ধায ‘‘রূপং পন সযংপি এৰরূপো সারো ন হোতী’’তি ৰুত্তং. সত্তানং অত্তসারো জীৰসারো ন হোতীতি অত্থো. নত্থি সারো এতস্সাতি অসারকন্তি ইমমত্থং সন্ধায ‘‘ন চ এৰরূপেন সারেন যুত্তং’’তি ৰুত্তং. অত্তসারেন জীৰসারেন সংযুত্তং হোতীতি অত্থো. তত্থ পুরিমো অত্থো রূপং অত্ততো সমনুপস্সতীতি ইদং সন্ধায ৰুত্তো. পচ্ছিমো রূপৰন্তং ৰা অত্তানং, অত্তনি ৰা রূপং, রূপস্মিং ৰা অত্তানংতি ইমানি সন্ধায ৰুত্তো. এতেন অসারকট্ঠেনাতি অসারভাৰেন, অসারযুত্তভাৰেন ৰাতি চ. অনত্তাতি এত্থপি ন অত্তা অনত্তা, নত্থি অত্তা এতস্সাতি ৰা অনত্তাতি চ দ্ৰিধা অত্থো সিজ্ঝতি. ‘‘যঞ্চা’’তি যঞ্চ রূপং. ‘‘পীল়েতী’’তি তং সমঙ্গী পুগ্গলং পীল়েতি. এতেন অনত্তভাৰে সিদ্ধে দুক্খভাৰোপি সিদ্ধোতি দস্সেতি. ‘‘তিণ্ণং ৰযানং ৰসেন অদ্ধাভেদো যোজেতব্বো’’তি পথমৰযে পৰত্তং রূপং দুতীযৰযং ন পাপুণাতি, পথমৰযে এৰ নিরুজ্ঝতীতিআদিনা অদ্ধাপচ্চুপ্পন্নে অন্তোগধভেদো যোজেতব্বো. ‘‘সভাগেকসন্তানৰসেনা’’তি সভাগানং ধম্মানং সভাগট্ঠেন একীভূতা সন্ততি সভাগেকসন্ততি. ‘‘সভাগানং ধম্মানং’’তি চ চিত্তজেসুতাৰ নিরন্তরপ্পৰত্তেন লোভসম্পযুত্তচিত্তেন সহজাতা রূপধম্মা সভাগরূপধম্মা নাম. তথা নাম ধম্মা চ. এৰং দোসসম্পযুত্তাদীসুপি. উতুজেসু নিরন্তরপ্পৰত্তেন সীতউতুনা সমুট্ঠিতা রূপধম্মা সভাগরূপ ধম্মা নাম. তথা উণ্হউতুনা সমুট্ঠিতা. এসনযো আহারজেসুপীতি এৰং সভাগেকসন্ততিৰসেন. ‘‘সম্পাপুণিতুং’’তি ঞাণেন সম্পাপুণিতুং. ‘‘অদ্ধাসন্ততিৰসেনা’’তি এত্থ সন্ততিৰসেন সম্মসনং ৰিসেসতো অধিপ্পেতং. এৰঞ্চ কত্ৰা হেট্ঠা অনিচ্চং খযট্ঠেনাতি পদে চতুন্নং মহাভূতানং সন্ততি ৰিভাগনযো সুট্ঠু দস্সিতোতি. ‘‘অনিচ্চলক্খণ দস্সনমেৰ পধানং’’তি ইমস্মিং ঞাণেপি উদযব্বযঞ্ঞাণেপি ভঙ্গঞ্ঞাণেপি অনিচ্চলক্খণ দস্সনমেৰ পধানং. ভযঞ্ঞাণে চ আদীনৰঞ্ঞাণে চ নিব্বিদাঞাণে চ দুক্খলক্খণ দস্সনং পধানং. উপরি চতূসু ঞাণেসু অনত্তলক্খণ দস্সনং পধানন্তি. ‘‘সমুদিতেসূ’’তি অঞ্ঞমঞ্ঞং অৰিনাভাৰসহাযভাৰেন সমুপ্পন্নেসু. ইদঞ্চ অৰিজ্জাসমুদযা রূপসমুদযো. তণ্হাসমুদযা উপাদান সমুদযো. আহার সমুদযা রূপসমুদযোতি পাল়িৰসেন ৰুত্তং. অপ্পহীন ৰসেনাতি পাল়িপদে পন অৰিজ্জা তণ্হা দিট্ঠানুসযানং অপ্পহীনট্ঠেন সন্তানে ৰিজ্জমানতা এৰ পমাণন্তি দট্ঠব্বং. ‘‘সমুদেন্তী’’তি পটিসন্ধিতো পট্ঠায একতো উদেন্তি. উপরূপরি এন্তি. আগচ্ছন্তীতি অত্থো. একভৰভাৰেন পাতুব্ভৰন্তীতি অধিপ্পাযো. তেনাহ ‘‘যাৰমরণকালা’’তিআদিং. ‘‘পসৰন্তী’’তি পৰড্ঢমানা সৰন্তি, পৰত্তন্তি, সন্দন্তি. ‘‘তেসু পনা’’তি অৰিজ্জা তণ্হুপাদান কম্মেসু. ‘‘নিরুজ্ঝন্তী’’তি তস্মিংভৰে এৰ নিরুজ্ঝন্তি. তস্মিং ভৰে নিরোধো নাম ভৰন্তরে পুন অনুপ্পাদো যেৰাতি ৰুত্তং ‘‘ভৰন্তরে’’তিআদি. ‘‘তং সন্ততিযং’’তি তস্মিং পচ্চুপ্পন্ন ভৰেতি ৰুত্তং হোতি. ‘‘পুন অনুপ্পাদসঙ্খাতং নিরোধং’’তি সন্ততি নিরোধো নাম ৰুত্তো. ন নিব্বান নিরোধো. এতাহি পচ্চযে সতি, ভৰন্তরে উপ্পজ্জীস্সন্তি যেৰাতি. ইদানি যথাপৰত্ত সন্ততীসু পরিযাপন্নানং সব্বপচ্ছিমানং নামরূপানং খণিকনিরোধৰসেন অত্থং ৰদন্তো ‘‘যথাপৰত্ত সন্ততিযো ৰা ছিজ্জন্তি ভিজ্জন্তী’’তি ৰুত্তং. ‘‘উদযব্বযং সমনুপস্সন্তস্স চা’’তি এত্থ কতমো উদযো নাম, কতমো ৰযো নাম, কথঞ্চ তদুভযং সমনুপস্সতীতি আহ ‘‘উদযব্বযং পস্সন্তস্সাতি এত্থ যথা নামা’’তিআদিং. তত্থ ‘‘তমো খন্ধো’’তি তমোরাসি. ‘‘ৰেতী’’তি ৰিগচ্ছতি. অন্তর ধাযতি.‘‘উদযো’’তি উপ্পাদো চেৰ ৰড্ঢি চ. ‘‘ৰযো’’তি ৰিগমনং, অন্তরধানং. ‘‘নানাপযোগৰসেনৰা’’তি সমিঞ্জনপ্পসারণাদি নানাপযোগৰসেন ৰা. উদযপক্খানং নানাসন্ততীনং উদযঞ্চ উদযতো. ৰযপক্খানং নানাসন্ততীনং ৰযঞ্চ ৰযতোতি যোজনা.

বোজ্ঝঙ্গ ধম্মেহি সম্পন্নত্তা আরাধেতি অত্তনো চিত্তংতি আরদ্ধো. তুট্ঠচিত্তোতি অত্থো. ৰিপস্সতীতি ৰিপস্সকো. আরদ্ধো হুত্ৰা ৰিপস্সকো আরদ্ধৰিপস্সকো. দুৰিধোহি ৰিপস্সকো তরুণ ৰিপস্সকো চ আরদ্ধ ৰিপস্সকো চ. তত্থ খন্ধানং উদযব্বযং সুট্ঠু অপস্সন্তো দুব্বলৰিপস্সকো তরুণ ৰিপস্সকো নাম. খন্ধানং উদযব্বযং সুট্ঠু পস্সন্তো ৰিপস্সনা কম্মে আরাধিত চিত্তো বলৰৰিপস্সকো আরদ্ধৰিপস্সকো নাম. যং সন্ধায ৰুত্তং.

[ক]

‘সুঞ্ঞাগারে পৰিট্ঠস্স, সন্তচিত্তস্স ভিক্খুনো;

অমানুসী রতী হোতি, সম্ম ধম্মং ৰিপস্সতো,তি চ.

[খ]

‘যো চ ৰস্সসতং জীৰে, অপস্সং উদযব্বযং;

একাহং জীৰিতং সেয্যো, পস্সতো উদযব্বযং,তি চ.

অযমিধ অধিপ্পেতো. ৰিপস্সনং উপেচ্চ কিলেসেন্তি, মলীনভাৰং গমেন্তীতি ৰিপস্সনুপক্কিলেসা. পরিবন্ধন্তি নীৰারেন্তীতি পরিবন্ধকাতি হেট্ঠা ৰুত্তমেৰ অন্তরাযিক ধম্মানং নামং. ‘‘সরীরোভাসো’’তি সকলসরীরতো নিক্খন্তো ওভাসো. ‘‘পঞ্চৰিধা পীতী’’তি খুদ্দিকা পীতি, খণিকা পীতি, ওক্কন্তিকা পীতি, উব্বেগা পীতি, ফরণা পীতীতি. ‘‘দুৰিধা পস্সদ্ধী’’তি অতিবলৰন্তী কাযপস্সদ্ধিচেৰ চিত্তপস্সদ্ধি চ. ৰিপস্সনা কম্মে ওকপ্পনাকারপ্পৰত্তা সদ্ধাএৰ অধিমুচ্চনট্ঠেন অধিমোক্খো সদ্ধাধিমোক্খো. ‘‘ৰীরিযং’’তি তস্মিং কম্মে অনিক্খিত্তধুরং পগ্গহিতসীসং ৰীরিযং. ‘‘সুখং’’তি চিত্তসুখং. তেনাহ ‘‘সোমনস্সং’’তি. ‘‘ৰিপস্সনাঞাণং’’তি ইন্দৰিস্সট্ঠৰজিরসদিসং বলৰৰিপস্সনাঞাণং. ‘‘সতী’’তি তস্মিং কম্মে অপ্পমুট্ঠা সতি. ‘‘তত্রমজ্ঝত্তুপেক্খা’’তি চিত্তস্স লীনুদ্ধচ্চাদীহি ৰিসমন্তেহি ৰিমুত্তা তত্রমজ্ঝত্ততাসঙ্খাতা উপেক্খা. ‘‘আৰজ্জনুপেক্খা’’তি ৰসিভাৰপত্তা আৰজ্জনসঙ্খাতা উপেক্খা. ‘‘আলযং’’তি তণ্হালযং. ‘‘কুরুমানা’’তি করোন্তী. ‘‘সুখুমা তণ্হা’’তি কুসলেহি মিস্সকত্তা ইদং অকুসলন্তিপি জানিতুং অসক্কুণেয্যা সুখুমতণ্হা. ‘‘ন ৰতমে’’তি মম ন উপ্পন্নপুব্বোৰতাতি যোজনা. ‘‘অস্সাদসহিতা’’তি ওভাসাদীসু অস্সাদতণ্হা সহিতা. ‘‘অধিমান ৰসেনা’’তি অধিকতরং মঞ্ঞনাৰসেন. ‘‘তাৰদেৰা’’তি নিকন্তিযা উপ্পত্তিক্খণেযেৰ. ‘‘নিকামনাকারো’’তি ইচ্ছনাকারো. অস্সাদনাকারো. ‘‘নিকামনস্সৰত্থূ’’তি নিকন্তিযা ৰত্থু. ‘‘অদ্ধা’’তি একন্তেন. ‘‘হন্দা’’তি চিত্তৰিস্সট্ঠকরণে নিপাতপদং. ইদানেৰ নং ৰিসোধেমি, ন চিরং পৰত্তিতুং দস্সামীতি ইমমত্থং দীপেতি. ‘‘তেস্ৰেৰা’’তি তেসুওভাসাদীসু এৰ. অট্ঠকথায ন সমেতি. অট্ঠকথাযং নিকন্তি ৰিক্খম্ভনস্স ৰিসুং ৰুত্তত্তাতি অধিপ্পাযো. ৰিপস্সনাপরিপাকো নাম ৰিসেসন্তরপ্পৰত্তেন পাকটোতি দস্সেতুং ‘‘সঙ্খারুপেক্খাভাৰং পত্তা’’তিআদিমাহ. ৰুট্ঠানগামিনি ৰিপস্সনাভাৰপত্তেনাতি ৰুত্তং হোতি. ‘‘দ্ৰে ৰিপস্সনা চিত্তানী’’তি উপচারানুলোমচিত্তানি. সো হি ৰুট্ঠানন্তি ৰুচ্চতীতি সম্বন্ধো. সঙ্খার নিমিত্ততো ৰা ৰুট্ঠাতি. নিব্বানং আরব্ভ পৰত্তিতো. যদি এৰং গোত্রভুপি ৰুট্ঠানং নাম সিযাতি. ন সিযা. মগ্গস্স আৰজ্জনমত্তে ঠিতত্তা. পটিৰেধকিচ্চস্সচ সম্মোহ সমুচ্ছেদকিচ্চস্স অভাৰতো. ‘‘সযং’’তি মগ্গসঙ্খাতো সযং. ‘‘তং সমঙ্গীপুগ্গলং ৰা’’তি তেন মগ্গেন সমঙ্গীপুগ্গলং ৰা. ‘‘ৰট্টপ্পৰত্ততো চা’’তি আযতিং ভৰেসু অপাযৰট্টপ্পৰত্ততো ৰা, অট্ঠম ভৰতো পট্ঠায কামসুগতি ৰট্টপ্পৰত্ততো ৰা. অৰস্সং ৰুট্ঠানং গমেতি সম্পাপেতীতি ৰুট্ঠানগামিনীতি ৰচনত্থো. ‘‘অৰস্সং ৰুট্ঠানং গচ্ছন্তী’’তি ইধ ঠিতানং ৰুট্ঠানতো নিৰত্তি নাম নত্থীতি অধিপ্পাযো. ইদঞ্চ পচ্চেকবুদ্ধানং বুদ্ধসাৰকানঞ্চ ৰসেন দট্ঠব্বং. সব্বঞ্ঞু বোধিসত্তা পন পুব্ববুদ্ধানং সাসনে পব্বজিত্ৰা ৰিপস্সনা কম্মং আরভন্তা অনুলোমঞ্ঞাণং আহচ্চ ঠপেন্তীতি অট্ঠক থাসু ৰুত্তং. তত্থ ‘‘আহচ্চা’’তি ইদং সঙ্খারুপেক্খাঞাণস্স মত্থকপত্তিদস্সনত্থং ৰুত্তন্তি দট্ঠব্বং. ‘‘আৰজ্জনট্ঠানিযং’’তি ততো পুব্বভাগে কেনচি চিত্তেন অগ্গহিতে নিব্বানা রম্মণে আৰজ্জনট্ঠানিযং. ‘‘তং’’তি গোত্রভুঞ্ঞাণং. গোত্তং ভৰতি অভিভৰতি ছিন্দতীতি গোত্রভু. গোত্তং ৰা অভিসম্ভুণাতি পাপুণাতীতি গোত্রভূতি ৰচনত্থো. কথং পন গোত্রভু চিত্তং গোত্রভুঞ্ঞাণং পুথুজ্জনগোত্তং ছিন্দতি, অরিযগোত্তং পাপুণাতীতি যুজ্জেয্য, সোহি পুগ্গলো তস্মিংখণে পুথুজ্জনগোত্তপরিযাপন্নোএৰাতি. সচ্চং. অত্তনি পন ছিন্নত্তা সযং ছিন্দতি নাম. নিব্বানস্স চ অরিযগোচরত্তা তং আরম্মণ করণৰসেন অরিযগোত্তং পাপুণাতি নামাতি দট্ঠব্বং. পচ্চযসত্তিৰিসেসেন অত্তনো অনন্তরে অরিযগোত্তং ভাৰেতি, পাতুভাৰেতীতি গোত্রভূতিপি যুজ্জতি. ‘‘পরিচ্ছিজ্জা’’তি পরিচ্ছিন্দিত্ৰা. দিট্ঠিৰিচিকিচ্ছাদীহি সব্বৰিপ্ফন্দনেহি মুঞ্চিত্ৰাতি ৰুত্তং হোতি. সম্মোহস্স পহানমেৰ দট্ঠব্বং. ন তে ধম্মে আরম্মণ করণ ৰসেন জাননং. কথং তে ধম্মে আরম্মণং অকরোন্তো মগ্গো তে ধম্মে পরিজানাতি নামাতি. কিচ্চসিদ্ধি ৰসেন. সো হি সম্মোহং পজহন্তো আরম্মণং করোন্তানিপি হি পুব্বভাগঞ্ঞাণানি তপ্পহানকিচ্চস্স অসাধকত্তা দুক্খ সচ্চং পরিজানন্তানীতি ন ৰুচ্চন্তি. মগ্গো পন আরম্মণং অকরোন্তোপি তপ্পহানকিচ্চস্স সাধকত্তাতং সচ্চং পরিজানাতীতি ৰুচ্চতি. কস্মা. ততো পট্ঠায তস্সপুগ্গলস্স সব্বকালং তস্মিংসচ্চে পরিজানন কিচ্চস্স সিদ্ধত্তা. যথাহি একো পুরিসো চক্খুম্হি পিত্তসেম্হাদিদোসেহি পলিবুদ্ধত্তা অন্ধো হোতি. ন কিঞ্চি পস্সতি. যদা পন সো একং তেজৰন্তং অঞ্জনং লভিত্ৰা চক্খুং অঞ্জযন্তো সব্বরত্তিং নিদ্দাযতি. তস্স নিদ্দাযন্তস্সেৰ চক্খুম্হি সব্বদোসা নস্সন্তি. চক্খু ৰিপ্পসন্নং হোতি. তঙ্খণতো পট্ঠায সো নিদ্দাযন্তোপি রূপানি পস্সতীতি ৰুচ্চতি. কস্মা, অন্ধভাৰৰিগমেন দস্সনকিচ্চস্স সিদ্ধত্তা. এৰমেৰমিদং দট্ঠব্বন্তি. একদেসেন ৰা হেট্ঠিমমগ্গেসু, অনৰসেসেন ৰা অরহত্তমগ্গে. ‘‘অপচ্ছাৰত্তিকং’’তি এত্থ পচ্ছতো আৰত্তনং পচ্ছাৰত্তং. নত্থি পচ্ছাৰত্তং অস্সাতি অপচ্ছাৰত্তিকন্তি ৰিগ্গহো. ‘‘পুন অনুপ্পাদধম্মতাপত্তিৰসেন নিরোধসঙ্খাতং’’তি মগ্গক্খণে এৰ তানিৰট্টানি পুন অনুপ্পাদসভাৰং আপজ্জন্তি, নিরুজ্ঝন্তি. তথা নিরোধসঙ্খাতং. ‘‘উপ্পাদনসঙ্খাতায ভাৰনাযা’’তি এতেন মগ্গস্স একচিত্তক্খণিকত্তা ৰড্ঢনসঙ্খাতায ভাৰনায ওকাসো নত্থীতি কত্ৰা ৰুত্তং. অরিযমগ্গং পটিলাভত্থায পন পৰত্তিতা পুব্বভাগভাৰনাপি মগ্গভাৰনা এৰ. সা চ অরিযমগ্গং পত্ৰা মত্থকপত্তা হোতি. তস্মা অরিযমগ্গো এৰ মত্থকপত্তো ভাৰনানুত্তরো হোতীতি ইমিনাপরিযাযেন ৰড্ঢন সঙ্খাতায ভাৰনাযাতিপি যুজ্জতিযেৰ. অত্তনো অনন্তরে পৰত্তং আনন্তরিকং. আনন্তরিকং ফলং এতস্সাতি ৰিগ্গহো. তস্স চ ততোপরং দ্ৰে ৰা তীণি ৰা ফলচিত্তানি পৰত্তন্তীতি ইমিনা সম্বন্ধো. অপনীতো অগ্গি এতস্মাতি অপনীতগ্গিকো. ‘‘নিব্বাপেন্তো ৰিযা’’তি এতেন পটিপ্পস্সম্ভনপ্পহানকিচ্চেন মগ্গানুকুলপ্পৰত্তিং দস্সেতি. ‘‘তেসং’’তি তেসং চক্খূনং. তং রূপং তস্স পাকটং ন তাৰ হোতীতি সম্বন্ধো. ‘‘তস্সা’’তি তস্স পুগ্গলস্স. ‘‘পচ্চৰেক্খনৰারেসূ’’তি এত্থ পসাদচক্খুনা দিট্ঠে পৰত্তা অনুবন্ধক ৰীথিযোপি সঙ্গয্হন্তি.

উপরিমগ্গেহি ৰধিতব্বা মারেতব্বাতি উপরিমগ্গৰজ্ঝা. ‘‘কিলেসৰিভাগেসূ’’তি অসুকমগ্গেন অসুকাকিলেসা পহীযন্তীতি এৰং কিলেসৰিভাগেসু. ‘‘পাল়িযং’’তি পটিসম্ভিদা মগ্গপাল়িযং. ৰুচ্চমানে পন ৰত্তব্বন্তি সম্বন্ধো. মগ্গঙ্গবোজ্ঝঙ্গাদীনং পচ্চৰেক্খনং নাম মগ্গপচ্চৰেক্খনমেৰ. তথা পচ্ছা ৰা পৰত্ততীতি সিদ্ধং. ‘‘অৰিরুদ্ধা হোতী’’তি ৰিসুদ্ধিমগ্গেন অসমেন্তাপি পচ্চৰেক্খন্তানং ইচ্ছানুরূপসম্ভৰতোতি অধিপ্পাযো. ‘‘অধিমাননিদ্দেস অট্ঠকথাসূ’’তি ৰিনযে চতুত্থপারাজিকে অধিমানপদনিদ্দেস অট্ঠকথাসু. ‘‘সো’’তি অরিযভূতো ভিক্খু. ‘‘নো লদ্ধুং ন ৰট্টতী’’তি অলদ্ধুং ন ৰট্টতীতি অত্থো. লদ্ধুং নো ন ৰট্টতীতি ৰা যোজনা. চতুব্বিধং মগ্গঞ্ঞাণং গহিতং. ঞাণদস্সনৰিসুদ্ধি নামাতি ৰুত্তত্তা.

‘‘অভিনিৰিসনং’’তি অজ্ঝত্তং দল়্হতরং পতিট্ঠানং. ‘‘নিখাতসিনেরুপা দস্সৰিযা’’তি তস্স পৰত্তনং ৰিয. ‘‘কেৰলং পচ্চযাযত্ত ৰুত্তিতায অদিট্ঠত্তা’’তি এতেন এসো মে অত্তা, ন পরস্স অত্তাতি এৰং অত্তানং অত্তস্স সামিকং কত্ৰা গহণকারণং ৰদতি. তত্থ কেৰলসদ্দেন পরমত্থ সচ্চং পত্ৰা অত্তস্সেৰ অভাৰতো খন্ধপঞ্চকস্স অত্তনোৰসাযত্ত ৰুত্তিতং নিৰত্তেতি. সম্মুতি সচ্চং পন পত্ৰা অত্তস্স ৰিজ্জমানত্তা মহাজনো অত্তনো খন্ধপঞ্চকং অত্তনো ৰসাযত্ত ৰুত্তিং মঞ্ঞমানো এসো মে অত্তাতি গণ্হাতি. ‘‘খণভঙ্গস্স চ অদিট্ঠত্তা’’তি এতেন এসো মে সারট্ঠেন অত্তা. এসো মম সারো. এতং মম সরীরং. যাৰ ৰস্সসতংপি ৰস্সসহস্সম্পি এতং খন্ধপঞ্চকং ন ভিজ্জতি, ন ৰিনস্সতি. তাৰ অহং ন মরামি. যদা এতং ভিজ্জতি, ৰিনস্সতি. তদা অহং মরামি. অহঞ্চ মম খন্ধপঞ্চকঞ্চ অদ্ৰযং অনানত্তন্তি এৰং গহণকারণং ৰদতি. তত্থ ‘‘খণভঙ্গস্সা’’তি নামরূপধম্মানং খণে খণে ভঞ্জনস্স ভিজ্জনস্স মরণস্স. ইদম্পনমরণং সম্মুতি সচ্চে নত্থি. পরমত্থ সচ্চে এৰ অত্থি. তস্মা তং অপস্সন্তো মহাজনো অত্তনো খন্ধপঞ্চকং অত্তনোসারং মঞ্ঞমানো এসো মে অত্তাতি গণ্হাতীতি. ‘‘তং দ্ৰযং সুদিট্ঠং কত্ৰা’’তি খন্ধপঞ্চকস্স কেৰলং পচ্চযাযত্ত ৰুত্তিতঞ্চ খণভঙ্গঞ্চ ঞাণ চক্খুনা সুট্ঠুদিট্ঠং কত্ৰা. তত্থ পঞ্চন্নং খন্ধানং পটিচ্চসমুপ্পাদং সুট্ঠুপস্সন্তো কেৰলং পচ্চযাযত্ত ৰুত্তিতঞ্চ অৰসাযত্ত ৰুত্তিতঞ্চ সুট্ঠু পস্সতি. যো চ অত্তনো ৰসাযত্তৰুত্তি ন হোতি. সো পরমত্থসচ্চং পত্ৰা এসো মম সন্তকন্তিপি ৰত্তুং নারহতি. কুতো মম অত্তাতি. অপি চ, সত্তো নাম সভাৰতো নত্থি. পঞ্ঞত্তিমত্তং হোতি. যো ‘অহন্তি ৰা, মেতি ৰা, মমাতি ৰা, গয্হেয্য. অসন্তে চ অত্তস্মিং কো মম অত্তা নাম ভৰেয্যাতি. খণভঙ্গো হোতি. খণে খণে ভিজ্জতি. সত্তো চ নাম একস্মিংভৰে আদিম্হি সকিং এৰ জাযতি. অন্তে সকিং এৰ মরতি. অন্তরা ৰস্সসতংপি ৰস্সসহস্সংপি মরণং নাম নত্থি. অঞ্ঞাহি খণিকধম্মানং গতি. অঞ্ঞা সত্তস্স. এৰংসন্তে কথং খণিকধম্মা সত্তস্স সারট্ঠেন অত্তানাম ভৰেয্যুন্তি. তস্মা তে অৰসৰত্তনট্ঠেন অসারকট্ঠেন চ অনত্তা এৰ. অপিচ ‘‘অৰসৰত্তনট্ঠেনা’’তি এত্থ ৰসো নাম সত্তসন্তানে একো পধানধম্মো. সচে অত্তানাম অত্থি. সো এৰ পধানভূতস্স ৰসস্সপি অত্তা ভৰেয্য. এৰংসতি, যো ৰসো, সো অত্তা. যো অত্তা, সো ৰসোতি ভৰেয্য. তথা চ সতি, রূপং অত্তাতি গণ্হন্তো রূপঞ্চ ৰসঞ্চ অত্তানঞ্চ একত্তং কত্ৰা গণ্হাতি নাম. তথা ৰেদনং অত্তাতি. সঞ্ঞং, সঙ্খারে, ৰিঞ্ঞাণং অত্তাতি গণ্হন্তেপি. এৰঞ্চসতি, সত্তো চ খন্ধপঞ্চকঞ্চ ৰসো চ অত্তা চ সব্বমেতং একত্তং গচ্ছতি, একো সত্তোতি সঙ্খ্যং গচ্ছতি. ন হি ইমস্মিং ৰসৰত্তনট্ঠে একস্সসত্তস্স দ্ৰে অত্তা তযো অত্তা বহূঅত্তাতি সক্কা ভৰিতুং. অথ যথা যথা সত্তস্স ৰসো ৰত্ততি, ইচ্ছা পৰত্ততি. তথা তথা খন্ধপঞ্চকম্পি নিচ্চকালং সত্তস্সৰসং অনুগচ্ছেয্য. কস্মা, সত্তস্স চ খন্ধপঞ্চকস্স চ ৰসস্স চ নানত্তাভাৰতো. এৰং অনুগচ্ছন্তে সতি. রূপং মে অত্তা, ৰেদনা মে অত্তাতিআদিগ্গহণং ৰট্টেয্য. সভাৰতো অৰিরুদ্ধং ভৰেয্য. ন পন তথা অনুগচ্ছতি. ন হি দুব্বণ্ণো দুরূপো পুরিসো অত্তনো রূপকাযং অত্তনো ৰসেনেৰ সুৰণ্ণং সুরূপং কাতুং সক্কোতি. তথা দুস্সদ্দোৰা সুসদ্দং, দুগ্গন্ধোৰা সুগন্ধং. ন চ অন্ধোৰা অনন্ধং. বধিরোৰা অবধিরং. রোগীৰা অরোগং. কুট্ঠীৰা অকুট্ঠং. গণ্ডীৰা অগণ্ডং. জিণ্ণোৰা তরুণং. অজরং ৰা অমরণং ৰা কাতুং সক্কোতি. নাপি অপাযেসু চ অপতন্তং. পতিত্ৰা ৰা ততো ৰিমুত্তং কাতুং সক্কোতি. তথা দেৰো ৰা দেৰত্তা অচাৰেতুং. সক্কোৰা সক্কত্তা, মারো ৰা মারত্তা, ব্রহ্মা ৰা ব্রহ্মত্তাতি. এসনযো সেসখন্ধেসুপি. তথা পন অৰসানুগমনতো পরমত্থ সচ্চং পত্ৰা খন্ধপঞ্চকে অত্তনো সামিকিচ্চং ইস্সরকিচ্চং নাম নত্থি. অসামিকমেৰ তং হোতি, অনিস্সরং. তথা চ সতি, অত্তানং তস্স সামিং ইস্সরং কত্ৰা রূপং মে অত্তাতি গহণং মিচ্ছাগহণং নাম হোতীতি. লোকে পন মহাজনো ধম্মানং পটিচ্চসমুপ্পাদং ন জানন্তি, ন পস্সন্তি, ন পটিৰিজ্ঝন্তি. তেসং পরম্পর পচ্চযৰসেন পৰত্তমানে খন্ধসন্তানে সম্মুতি সচ্চৰসেন নানাৰসৰত্তনাকারা নাম সন্তি. নানাসামি ইস্সরাধিপতিৰোহারা চ লোকে সন্দিস্সন্তি. তে সম্মুতি সচ্চৰসেন উপ্পন্নেসু তেসু সামিইস্সরাধিপতি ৰোহারেসু ৰোহারমত্তে অঠত্ৰা সভাৰসচ্চং মঞ্ঞন্তা মিচ্ছাগহণং গণ্হন্তি. এত্থ সিযা. ন নু ৰসোনাম ইচ্ছা. সত্তো চ গন্তুং ইচ্ছন্তো গচ্ছতি. ঠাতুং ইচ্ছন্তো তিট্ঠতি. এৰংসতি. তস্স খন্ধপঞ্চকং তস্স ৰসাযত্ত ৰুত্তি এৰ হোতীতি. ন হোতি. কস্মা, পচ্চযাযত্ত ৰুত্তিত্তা এৰ. তথাহি গন্তুং ইচ্ছানাম বহিদ্ধা ধনহেতুৰা উপ্পজ্জেয্য. নানাভোগহেতু ৰা. অঞ্ঞেন ৰা নানাকারণেন. তত্থ যেসং ধনে অসতি, যং যং দুক্খং আগচ্ছেয্য কাযিকং ৰা চেতসিকং ৰা. তেসং তং তং দুক্খপচ্চযা ধনিচ্ছা নাম উপ্পজ্জতি. ধনিচ্ছা পচ্চযা গন্তিচ্ছাদযো উপ্পজ্জন্তি. তথা নানাভোগিচ্ছা নানাকম্মিচ্ছাসু চাতি. নানাদুক্খভযুপদ্দৰমূলিকাসু ইচ্ছাসু ৰত্তব্ব মেৰ নত্থি. তথা নানারম্মণানং পলোভন দুক্খমূলিকাসু চ নানাৰিতক্কানং ৰিপ্ফন্দনমূলিকাসু চ ইচ্ছাসু. এৰং ৰসোপি পচ্চযাযত্ত ৰুত্তিকো এৰ হোতি. ‘‘গমনং’’তি গমনাকারেন পৰত্তং খন্ধপঞ্চকং. যেনযেনধনাদিহেতুনা সো সো ৰসো উপ্পজ্জতি. গমনম্পি তেন তেনেৰ উপ্পজ্জতি আহারুপত্থম্ভনাদিপচ্চযেন চ. ৰসো পন গমনস্স পচ্চযেক দেসমত্তং হোতি. সো হি তদঞ্ঞপচ্চযেহি ৰিনা সযং উপ্পজ্জিতুং ন সক্কোতি. কুতো গমনং উপ্পাদেতুং. এৰং ঠানাদীসু. এৰঞ্চ সতি, ইদং খন্ধপঞ্চকং পচ্চযাযত্ত ৰুত্তিকন্তিচ্চেৰ ৰত্তুং অরহতি. নো ৰসাযত্ত ৰুত্তিকন্তি. অপি চ গন্তুং ইচ্ছন্তো গচ্ছতীতি পঞ্ঞত্তি মত্তভূতো সত্তো গচ্ছতি. খন্ধপঞ্চকং পন খণিক ধম্মত্তা ন গচ্ছতি. উপ্পন্নুপ্পন্নং তত্থ তত্থেৰ ভিজ্জতি. সন্ততি ৰসেন গমনাকার নিমিত্তং পঞ্ঞাযতি. এৰং অৰসৰত্তনং হোতীতি. হোতু তত্থ তত্থেৰ ভিজ্জনং. অৰিচ্ছেদপ্পৰত্তিযা সতি, গমনং সম্পজ্জতিযেৰ. গমনে চ সম্পজ্জমানে খণিকভিজ্জনেন দোসো নত্থীতি চে. অত্থি. খণিকমরণঞ্হি সত্তস্স সুসানভূমি নাম হোতি. অন্তরাযেৰা আগতে পক্খলন্তে ৰা সতি, গচ্ছন্তো সত্তো যদা কদাচি মরণং ৰা নিগচ্ছতি মরণ মত্তং ৰা দুক্খন্তি. কিলেসে নিমিনাতি পৰত্তেতীতি নিমিত্তন্তি ৰচনত্থো. ‘‘ৰিপল্লাসনিমিত্তং’’তি চ ৰিপল্লাস ধম্মানং ৰসেন উপট্ঠিতং কিচ্চ নিমিত্তং. তণ্হা এৰ পণিধীতি সম্বন্ধো. মহন্তানং আদীনৰানং রাসি মহাআদীনৰরাসি. খন্ধেসু সুঞ্ঞতলক্খণং নাম অতি গম্ভীরং হোতি. ঞাণস্সেৰ ৰিসযভূতং. সুঞ্ঞত দস্সনঞ্চ দিট্ঠিযা উজুপ্পটিপক্খন্তি আহ ‘‘সঙ্খারেসু সুঞ্ঞতদস্সনৰসেনা’’তিআদিং. তত্থ ‘‘অত্থ সিদ্ধি নামা’’তি মগ্গফলপ্পটিলাভসঙ্খাতস্স অত্থস্স সিদ্ধি নাম. অত্তাতি অভিনিৰেসো অত্তাভিনিৰেসো. গণ্হাতীতি গাহো. উপাদীযতীতি অত্থো. দিট্ঠিসঙ্খাতো গাহো দিট্ঠিগ্গাহো. অত্থাভিনিৰেসো চ সো দিট্ঠিগ্গাহো চাতি ৰিগ্গহো. তস্স পটিপক্খং অনত্তানুপস্সনাঞাণং. অনু অনু ভৰনং আনুভাৰো. পরম্পরতো ৰড্ঢনন্তি অত্থো. ‘‘তথা সমনুপস্সিত্ৰা’’তি সুঞ্ঞতা কারেন সমনুপস্সিত্ৰা. ৰিমুঞ্চন্তস্স অরিযপুগ্গলস্স. ‘‘অনিচ্চলক্খণং নাম নাতি গম্ভীরং হোতি. সদ্ধাযপি ৰিসযভূতং. উন্নতিলক্খণো চ অহং মানো খন্ধেসু নিচ্চধুৰৰিপল্লাসমূলকো সদ্ধায চ পটিপক্খোতি আহ ‘‘অনিচ্চদস্সনৰসেনা’’তিআদিং. ‘‘নিমিত্তাভিনিৰেসভূতস্সা’’তি নিচ্চধুৰনিমিত্তাভিনিৰেসভূতস্স. ‘‘মানগ্গাহস্সা’’তি মানসঙ্খাতস্স গাহস্স. ‘‘সদ্ধায পী’’তিপিসদ্দেন ঞাণং সম্পিণ্ডেতি. দুক্খলক্খণং নাম ভযসংৰেগ জনকং হোতি. আরম্মণেসু তণ্হালোলস্স তণ্হাৰিপ্ফন্দনস্স পটিপক্খং. ৰিসেসতো সমাধিস্স অনুরূপন্তি আহ ‘‘দুক্খদস্সন ৰসেনা’’তিআদিং. ‘‘তিণ্ণং ধম্মানং’’তি পঞ্ঞিন্দ্রিয সদ্ধিন্দ্রিয সমাধিন্দ্রিয সঙ্খাতানং তিণ্ণং ইন্দ্রিয ধম্মানং. ‘‘ৰিপস্সনা গমনৰসেনে ৰা’’তি ৰুট্ঠানগামিনি ৰিপস্সনা সঙ্খাতস্স আগমন কারণস্স ৰসেনেৰ.

ইদানি পুব্বে যং ৰুত্তং ‘সত্তঅরিয পুগ্গলৰিভাগস্স পচ্চযভাৰপত্তিযা চা’তি. তত্থ সত্ত অরিযপুগ্গলৰিভাগং দস্সেতুং ‘‘তত্থা’’তিআদি ৰুত্তং. ধম্মানুসারী নামাতি এত্থ ‘‘ধম্মো’’তি পঞ্ঞা ৰুচ্চতি ‘সচ্চং, ধম্মো, ধীতি, চাগো,তি এত্থ ৰিয. তিক্খতরং ধম্মং অনুস্সরতীতি ধম্মানুসারী. পঞ্ঞাবলানুসারেন আদিম্হি মগ্গং লভতীতি ৰুত্তং হোতি. অথৰা. ‘‘ধম্মো’’তি নিস্সত্তনিজ্জীৰট্ঠেন সঙ্খার ধম্মো ৰুচ্চতি. সুঞ্ঞতদস্সনঞ্চ নাম ৰিসেসতো সুদ্ধধম্ম দস্সনং নাম. ইতি সুদ্ধধম্মং অনুস্সরতি, ঞাণগতিযা অনুগচ্ছতীতি ধম্মানুসারী. দিট্ঠিপত্তোতি এত্থ দিট্ঠিনাম দস্সনঞ্ঞাণং ৰুচ্চতি. আদিতো পট্ঠায পরিসুদ্ধ দস্সনসম্পন্নত্তা দিট্ঠিবলেনেৰ সুখেন তং তং মগ্গফলং পত্তোতি দিট্ঠিপত্তো. তেনেৰ দস্সন পঞ্ঞাবলেন কিলেসবন্ধনতো ৰিমুত্তোতি পঞ্ঞাৰিমুত্তো. সঙ্খার ধম্মানং খণিক ধম্মভাৰে সুট্ঠু সদ্দহনং অৰেচ্চপ্পসাদো সদ্ধা নাম. তত্থ ‘‘অৰেচ্চপ্পসাদো’’তি ঞাণসম্পযুত্তপ্পসাদো. ‘‘ঞাণং’’তি চ সঙ্খার ধম্মানং খণিকভাৰনিমিত্তানং দস্সনঞ্ঞাণং. তাদিসে হি ঞাণে সতি, তত্থ অৰেচ্চপ্পসাদো নাম জাযতি, নো অঞ্ঞথাতি. সদ্ধং অনুস্সরতীতি সদ্ধানুসারী. সদ্ধাবলেনেৰ আদিম্হি অরিযমগ্গং পাপুণাতীতি ৰুত্তং হোতি. সদ্ধাবলেন ৰিমুত্তোতি সদ্ধাৰিমুত্তো. ‘‘কাযসক্খি নামা’’তি এত্থ সক্খংতি সন্দিট্ঠং. যং সাধকন্তিপি ৰুচ্চতি. অত্তনো কাযে এৰ লদ্ধং সক্খং যস্সাতি কাযসক্খী. দুক্খানু পস্সী পুগ্গলো হি সংৰেগ বহুলো হোতি. সংৰেগো চ পধান ৰীরিযস্স পদট্ঠানং. সংৰিগ্গো যোনিসো পদহতীতি হি ৰুত্তং. তস্মা সো সংৰেগৰসেন ভাৰনং অনুযুঞ্জন্তো যং যং পুরিসথামেন পত্তব্বং হোতি. তং তং পাপুণাতি. পাপুণন্তো চ অত্তনো কাযে এৰ সক্খং লভতি. সন্দিট্ঠং ঝানসুখং ৰা মগ্গফলসুখং ৰা লভতীতি ৰুত্তং হোতি. ‘‘উভতোভাগ ৰিমুত্তো’’তি অরূপজ্ঝানেহি রূপকাযতো অরহত্তমগ্গফলেহি নামকাযতোতি এৰং উভোহি কাযভাগেহি ৰিমুত্তো. এত্থ চ তযো অরিযপুগ্গলা পঞ্ঞাধিকো চ সদ্ধাধিকো চ ৰীরিযাধিকো চ. তত্থ ধম্মানুসারী চ দিট্ঠিপত্তো চ পঞ্ঞাৰিমুত্তো চ পঞ্ঞাধিকো নাম. সদ্ধানুসারী চ সদ্ধাৰিমুত্তো চ সদ্ধাধিকো নাম. কাযসক্খী চ উভতোভাগৰিমুত্তো চ ৰীরিযাধিকো নামাতি দট্ঠব্বং. অযঞ্চ পুগ্গলৰিভাগনযো পটিসম্ভিদামগ্গনযেন ৰুত্তো. অভিধম্মে পন পুগ্গল পঞ্ঞত্তিযং সদ্ধাৰিমুত্তো চ কাযসক্খী চ দ্ৰেপুগ্গলা সেক্খেসু এৰ ৰুত্তা. অরহত্তং পত্তা পন এতে দ্ৰেপি পঞ্ঞাৰিমুত্তা এৰাতি দট্ঠব্বা. এত্থ সিযা, সঙ্খার ধম্মানং খণিক ধম্মভাৰে সুট্ঠু সদ্দহনং অৰেচ্চপ্পসাদো সদ্ধা নামাতি ৰুত্তং. কিং পন তাদিসেন সদ্ধামত্তেন সোতাপত্তি মগ্গং পাপুণাতীতি. এত্থ অম্হেহি ৰত্তব্বং নত্থি. ভগৰতা এৰ ৰুত্তং. যথাহ মহাৰগ্গে ওক্কন্ত সংযুত্তে চক্খু ভিক্খৰে অনিচ্চং ৰিপরিণামী অঞ্ঞথাভাৰী, যো এৰং সদ্দহতি, এৰং অধিমুচ্চতি. অযং ৰুচ্চতি সদ্ধানুসারী. ওক্কন্তো অরিযভূমিং. অতিক্কন্তো পুথুজ্জনভূমিং. সো যেনকম্মেন অপাযং দুগ্গতিং ৰিনিপাতং উপ্পজ্জেয্য. ন তং কম্মং করোতীতি. সোতং ভিক্খৰে অনিচ্চং. ৰিপরিণামী অঞ্ঞথাভাৰীতিআদিনা দ্ৰাদসাযতনানি ৰিত্থারে তব্বানি. তত্থ ‘‘ৰিপরিণামী’’তি ৰিপরিণামো যস্স অত্থীতি ৰিপরিণামী. ৰিপরিণামোতি চ খণে খণে জীরণতা ভিজ্জনতা ৰুচ্চতি. ‘‘অঞ্ঞথাভাৰী’’তি তস্সেৰ ৰেৰচনং. ‘‘এৰং অধিমুচ্চতী’’তি এতেন ঞাণসম্পযুত্তসদ্ধং দীপেতি. সা এৰ সোতাপত্তিযঙ্গেসু বুদ্ধে অৰেচ্চপ্পসাদেন সমন্নাগতো, ধম্মে, সঙ্ঘে অৰেচ্চপ্পসাদেন সমন্নাগতোতি ৰুত্তা. তত্থ ঞাণসম্পযুত্তসদ্ধা নাম চক্খাদীনং অনিচ্চনিমিত্ত দস্সনঞ্ঞাণেন সম্পযুত্তা ওকপ্পনসদ্ধা. অনিচ্চনিমিত্তঞ্চ নাম রূপং অনিচ্চং খযট্ঠেনাতিপদে ৰুত্তনযেন চক্খাদিনিস্সযানং মহাভূতানং সন্ততি পরিৰত্তনাদিকং ৰুচ্চতি. তঞ্হি পস্সন্তো চক্খাদীনং অনিচ্চভাৰে সদ্দহতি, অধিমুচ্চতি. তানিপি খণে খণে একন্তেন ভিজ্জতি যেৰাতি সদ্ধাধিমোক্খং সদ্ধাৰিনিচ্ছযং পটিলভতীতি অত্থো. ‘‘বুদ্ধে অৰেচ্চপ্পসাদেনা’’তি এত্থ পন অরহতা সম্মাসম্বুদ্ধতাদীনং বুদ্ধগুণাদীনং দস্সনঞ্ঞাণেন সম্পযুত্তো পসাদো অৰেচ্চপ্পসাদো নাম. অরিযভূমি নাম দিট্ঠানুসয ৰিচিকিচ্ছানুসযেহি পরিসুদ্ধা অৰত্থাভূমি ৰুচ্চতি. তেহি সহিতা অৰত্থাভূমি পুথুজ্জনভূমি নাম. কথং পন তস্স পুগ্গলস্স পুথুজ্জনভূমিং অতিক্কন্ততা অরিযভূমিং ওক্কন্ততা চ ৰিঞ্ঞাযতীতি আহ ‘‘সো যেনা’’তিআদিং. যো অত্তনো জীৰিতহেতুপি কিঞ্চি কম্মপথপত্তং অপাযগামি কম্মং ন করোতি. সো একন্তেন পুথুজ্জনভূমিং অতিক্কন্তো, অরিযভূমিং ওক্কন্তোতি ৰিঞ্ঞাযতীতি ৰুত্তং হোতি. ইদং সদ্ধানুসারিসুত্তং. অপরংপি ৰুত্তং চক্খু ভিক্খৰে ৰিপরিণামী অঞ্ঞথাভাৰী. যস্স এৰং মত্তসো নিজ্ঝানং খমতি. অযং ৰুচ্চতি ধম্মানুসারী তিআদি. তত্থ ‘‘মত্তসো নিজ্ঝানং খমতী’’তি সদ্ধানুসারীৰিয সদ্দহনমত্তে অট্ঠত্ৰা চক্খাদীনং তাদিসং অনিচ্চতং সমনুপস্সন্তো থোকং থোকং দস্সনং লভতিযেৰ. এৰংসতি, চক্খাদীনি তস্স পুগ্গলস্স নিজ্ঝানং ওলোকনং মত্তসো খমন্তি নাম. ইদং ধম্মানুসারিসুত্তং. অপরংপি ৰুত্তং চক্খু ভিক্খৰে অনিচ্চং ৰিপরিণামী অঞ্ঞথাভাৰী. যো এৰং পজানাতি পস্সতি. অযং ৰুচ্চতি সোতাপন্নো তিআদি. তত্থ ‘‘পজানাতি পস্সতী’’তি ধম্মানুসারীৰিয মত্তসো নিজ্ঝানক্খমমত্তে অট্ঠত্ৰা পঞ্ঞায পজানাতি, ঞাণচক্খুনো পচ্চক্খতো পস্সতীতি অত্থো. ইদং দিট্ঠিপত্তাদীনং সুত্তং.

‘‘যথা সকং ফলং’’তি এত্থ সস্স অত্তনো ইদং সকং. যং যং সকং যথাসকন্তি অত্থং দস্সেতি সোতাপন্নস্সাতিআদিনা. ফলসমাপত্তি ৰীথিযং পন অনুলোমজৰনানি এৰ ফলানং আসন্নকারণানি, ন মগ্গজৰনানীতি আহ ‘‘ন মগ্গাগমনৰসেনা’’তি. ‘‘সো’’তি মগ্গো. সন্তো সংৰিজ্জমানো সব্ভাৰো. ‘‘অস্সা’’তি মগ্গস্স.

অনিচ্চানুপস্সনা কিচ্চতো অনিমিত্তা হোতি. সভাৰতো সনিমিত্তাএৰ. নিচ্চনিমিত্তসহিতাএৰ. যতো সা এসোহমস্মীতিগ্গহণং লভতি. ইদংপি ৰিপস্সনাঞাণং অনিচ্চং খযট্ঠেনাতি সমনুপস্সিতব্বা চ হোতীতি. তত্থ চ অভিধম্মং পত্ৰা সভাৰপ্পধানং হোতি, ন কিচ্চপ্পধানং. তস্মা অভিধম্ম নযেন ৰিপস্সনা অত্তনো নিমিত্ত নামং মগ্গস্স দাতুং ন সক্কোতি. অযং অট্ঠকথায অধিপ্পাযো. কিলেস ধম্মা নাম যস্স উপ্পজ্জন্তি, তং পুগ্গলং পলিবুন্ধন্তি. সম্বাধং করোন্তি. তস্মা পলিবোধকরানাম. তং পুগ্গলং নিচ্চনিমিত্ত সুভনিমিত্ত সুখনিমিত্ত অত্তনিমিত্তানি গাহেন্তি. তস্মা নিমিত্তকরানাম. তং পুগ্গলং আরম্মণেসু ভুসং নিহিতং নিৰিট্ঠং করোন্তি. তস্মা পণিধিকরানাম. তে চ মগ্গফলানি আরম্মণং ন করোন্তি. মগ্গফলেহি চ সম্পযোগং ন গচ্ছন্তি. এৰং আরম্মণকরণা দিৰসেন মগ্গফলেসু তেসং অভাৰো. অভাৰত্তাএৰ চ তানি মগ্গফলানি অত্তনো ধম্মতায তীণিনামানি লভন্তীতি দস্সেতুং ‘‘আরম্মণ করণৰসেনৰা’’তিআদি ৰুত্তং. ‘‘অত্তনো সভাৰেনা’’তি অত্তনো ধম্মতায.

‘‘অত্তদিট্ঠিযা উপ্পন্নায উপ্পজ্জন্তী’’তি ইদং তাসং দিট্ঠিৰিচিকিচ্ছানং অত্তদিট্ঠিযা অৰিনাভাৰং দীপেতি. ন পন অত্তদিট্ঠিযা তাহি অৰিনাভাৰন্তি দট্ঠব্বং. ৰিপচ্চন্তীতি অপাযেসু ৰিপচ্চন্তি. অপাযপটিসন্ধিং জনেন্তি. দিট্ঠসচ্চানঞ্চ অরিযপুগ্গলানং. দিট্ঠিৰিচিকিচ্ছাসম্পযুত্তা অকুসলধম্মা দিট্ঠিৰিচিকিচ্ছাগ্গহণেন গহিতাতি আহ ‘‘দিট্ঠিৰিচিকিচ্ছা ৰিপ্পযুত্তা’’তি. ‘‘অকুসলধম্মাচে ৰা’’তি পচ্চুপ্পন্নভূতা দসাকুসলকম্মপথ ধম্মা চেৰ. ‘‘সত্তহি ভৰেহী’’তি ক্রিযাপৰগ্গে করণৰচনং. যথা সত্তহি মাসেহি ৰিহারং নিট্ঠাপেতীতি. ক্রিযাপৰগ্গোতিচ ক্রিযাযসীঘতরং নিট্ঠাপনং ৰুচ্চতি. ‘‘সত্তক্খত্তুং’’তি সত্তৰারা. তীণি সংযোজনানিনাম ‘সক্কাযদিট্ঠি, ৰিচিকিচ্ছা, সীলব্বতপরামাসসংযোজনানি,. ‘‘অৰিনিপাত ধম্মো’’তি ৰিরূপং হুত্ৰা পতনং ৰিনিপাতো. অপাযনিপাতোতি ৰুত্তং হোতি. ‘‘ধম্মো’’তি সভাৰো. নত্থি ৰিনিপাতো ধম্মো যস্সাতি ৰিগ্গহো. ‘‘নিযতো’’তি সুগতিভৰেসু নিযত গতিকো. সম্মা বুজ্ঝতীতি সম্বোধি. মগ্গঞ্ঞাণং. ‘‘পরাযনং’’তি পরভাগে গন্তব্বট্ঠানং ৰুচ্চতি. সম্বোধিসঙ্খাতং পরাযনং অস্সাতি সম্বোধিপরাযনো. ‘‘অনিযমত্থো’’তি ৰাসদ্দত্থোতি ৰুত্তং হোতি. ৰা সদ্দত্থেসু চ অনিযমত্থো. ন ৰিকপ্পত্থো. ৰিকপ্পত্থেহি সতি দ্ৰে এৰ সত্তক্খত্তুপরমা লব্ভন্তি. মিস্সকভৰোন লব্ভতি. অনিযমত্থে তযোপি লব্ভন্তি. অট্ঠকথাযং পন সমুচ্চযত্থস্স গহিতত্তা একো মিস্সকভৰো এৰ লব্ভতি. ননু চ সদ্দো নাম সমুচ্চযত্থে পাকটো, ন অনিযমত্থে. তস্মা সমুচ্চযত্থোৰ ইধ যুত্তোতি চে. ন যুত্তো. কস্মা. দ্ৰিন্নং অসঙ্গহিতত্তা. অট্ঠকথাযং পন সমুচ্চযত্থং গহেত্ৰা তে দ্ৰে পুগ্গলা ইমস্মিং পাঠে অসঙ্গহিতাতি ৰুত্তং. যদি তে ইমস্মিং পাঠে অসঙ্গহিতা. কত্থতে সঙ্গহিতা ভৰেয্যুং. ন হি কোচি সত্তক্খত্তু পরমো নাম ইধ অসঙ্গহিতোতি যুত্তোতি. ‘‘অস্সা’’তি তস্সপাল়িপাঠস্স. ‘‘এত্থ চ যস্মা. ল. পরমো নাম ৰুত্তো’’তি ইদং উপরি ‘যে কামভৰে যেৰা’তিআদিনা ‘যেদিট্ঠ ধম্মে ৰা’তিআদিনা চ যোজেতব্বং. সো চ সুক্খৰিপস্সকো ৰা পরিহীনজ্ঝানো ৰা দট্ঠব্বোতি সম্বন্ধো. ‘‘পাল়িযং’’তি পুগ্গলপঞ্ঞত্তি পাল়িযং. ‘‘ইধ নিট্ঠা’’তি ইমস্মিং কামলোকে আসৰক্খযং পত্ৰা খন্ধপরিনিব্বানপত্তি ৰসেন নিট্ঠা. নিট্ঠানং পরিযোসানন্তি অত্থো. কুলতো কুলং গচ্ছতীতি কোলংকোলো. ভৰতো ভৰং গচ্ছতীতি অত্থো. একমেৰ পটিসন্ধিসঙ্খাতং ভৰবীজং অস্স অত্থীতি একবীজী. যো চ দিট্ঠেৰ ধম্মে অরহা. তস্স চ ইধ নিট্ঠাতি যোজনা. কেন পন তিণ্ণং সোতাপন্নানং ৰিসেসো কতোতি. সত্তক্খত্তু পরমো তাৰ কেৰলং পথমমগ্গ সম্পযুত্তেহি ইন্দ্রিযেহি কতো. ইতরে দ্ৰে উপরিমগ্গত্থায পৰত্তিতেহি ৰিপস্সনিন্দ্রিযেহি কতোতি. তত্থ সত্তক্খত্তু পরমো সব্বমুদুকো হোতি. ততো কোলংকোলো তিক্খো. সো পন ছ ভৰিকো, পঞ্চভৰিকো, চতুভৰিকো, তিভৰিকো, দ্ৰিভৰিকোতি পঞ্চৰিধো. তত্থ পঞ্চভৰিকো তিক্খো. সেসা অনুক্কমেন তিক্খতরাতি দট্ঠব্বা. একবীজী পন একভৰিকো সব্বতিক্খো. তত্থ সত্তক্খত্তু পরমো কেৰলেন পথমমগ্গানুভাৰেন সিদ্ধত্তা সব্বমুদুকো হোতি. ইতরে দ্ৰেপকতিযা সত্তক্খত্তু পরমভাৰে ঠত্ৰা উপরিমগ্গত্থায ৰিপস্সনা কম্মং পট্ঠপেন্তি. তদা তেসং ইন্দ্রিযানি পুন ৰিসেস পত্তানি হোন্তি, তিক্খানি. তস্মা তে সত্তক্খত্তু পরমতো তিক্খানাম হোন্তীতি. ‘‘সত্তৰারতো ওরং ৰা’’তি ইদং কোলংকোল একবীজিনো সন্ধায ৰুত্তং. ‘‘উপরি তিণ্ণং মগ্গানং ৰিপস্সনা নিযামেতী’’তি ইদং উপরিমে দ্ৰেসোতাপন্নে সন্ধায ৰুত্তং. সত্তক্খত্তু পরমোপন পথমমগ্গেনেৰ নিযমিতোতি দট্ঠব্বং. তথাহি সোযেৰ সঙ্গহপাঠে সরূপতো আগতো সোতাপত্তি মগ্গং ভাৰেত্ৰা দিট্ঠিৰিচিকিচ্ছাপহানেন পহীনাপাযগমনো সত্তক্খত্তু পরমো সোতাপন্নো নাম হোতীতি. ইতরে পন দ্ৰে পাল়িযং সোতাপন্ন পুগ্গলৰিভাগট্ঠানেস্ৰেৰ আগতাতি. ‘‘যে পনা’’তি যে সোতাপন্ন পুগ্গলাপন. গাথাযং ‘‘ইতোসত্তা’’তি ইমস্মিং মনুস্সলোকে সত্ত সংসরানি. ‘‘ততোসত্তা’’তি তস্মিং দেৰলোকে সত্তাতি অত্থো. অঙ্গুত্তরপাঠে ‘‘তেনচিত্তপ্পসাদেনা’’তি মহাসহস্সিলোকধাতুং সরেন ৰিঞ্ঞাপেতুং সমত্থস্স সত্থুগুণে চিত্তপ্পসাদো জাযতি. তেন চিত্তপ্পসাদেন. ‘‘তেন পরিযাযেনা’’তি সচে সো দেৰেসু এৰ সংসরতি. সত্তক্খত্তুং ওপপাতিক পটিসন্ধিযো গণ্হিত্ৰা তত্থেৰ পরিনিব্বাযিস্সতি. যদি মনুস্সেসু এৰ সংসরতি. সত্তগব্ভসেয্যক পটিসন্ধিযো গণ্হিত্ৰা এত্থেৰ পরিনিব্বাযিস্সতি. এৰং দেসনা ৰারেন চুদ্দস কত্ৰা দেসিতেন পরিযাযেনাতি অত্থো. ‘‘তং ৰীমংসিতব্বং’’তি ৰদন্তেন টীকাচরিযেন সযং চুদ্দসপটিসন্ধিযোৰ ইচ্ছতীতি দীপেতি. ইদানি তং চুদ্দসপটিসন্ধিৰাদং পটিক্খিপন্তো ‘‘ৰিভঙ্গে পনা’’তিআদিমাহ. ‘‘ৰিভঙ্গে’’তি অভিধম্মে ঞাণৰিভঙ্গে. নত্থি ঠানমস্সাতি অট্ঠানং. ‘‘ঠানং’’তি মূলকারণং. নত্থি অৰকাসো অস্সাতি অনৰকাসো. ‘‘অৰকাসো’’তি পচ্চযকারণং. ‘‘যং’’তি ক্রিযাপরামসনং. যং নিব্বত্তেয্য, তং নিব্বত্তনং অট্ঠানং. সো নিব্বত্তন ধম্মো অনৰকাসোতি যোজনা. ‘‘অভিসঙ্খার ৰিঞ্ঞাণস্সা’’তি সত্তভৰতো উদ্ধং কামভৰে পটিসন্ধিজনকস্স কুসলা কুসলকম্ম ৰিঞ্ঞাণস্স. ‘‘নিরোধেনা’’তি সোতাপত্তি মগ্গক্খণে এৰ নিরোধনেন. নিরুজ্ঝন্তীতি সম্বন্ধো. ‘‘নামঞ্চ রূপঞ্চা’’তি যে নাম রূপধম্মা উপ্পজ্জেয্যুং. এতে নাম রূপধম্মা এত্থ এতস্মিং অভিসঙ্খার ৰিঞ্ঞাণ নিরোধক্খণে নিরুজ্ঝন্তীতি যোজনা. ‘‘যথাৰুত্তনযেনেৰা’’তি তেন পরিযাযেনাতি ৰুত্তপ্পকারনযেনেৰ. ‘‘তদেকট্ঠমোহস্সা’’তি তেন রাগেন তেন দোসেন একস্মিং চিত্তে একতো ঠিতস্স মোহস্স. ন দিট্ঠিৰিচিকিচ্ছা সম্পযুত্তস্স মোহস্স. তস্স পথমমগ্গে এৰ পহীনত্তা. নাপি উদ্ধচ্চচিত্তসম্পযুত্তস্স মোহস্স. তস্স চতুত্থমগ্গে এৰ পহাতব্বত্তা. উপ্পজ্জন্তা রাগদোসমোহা. ‘‘ধম্মিকেসূ’’তি ধম্মেন সমেন উপ্পন্নেসু. ‘‘যতো’’তি যংকারণা. বলৰন্তকারণাতি অত্থো. ‘‘তেসং’’তি সোতাপন্নানং. ‘‘সল্লিখন ৰসেনা’’তি বহলপক্খং থূলভাগং সুট্ঠুলিখনৰসেন. অধিচ্চুপ্পত্তি নাম পুব্বে যথাপৰত্তং কালং অধিচ্চ অতিক্কম্ম উপ্পত্তি. উপ্পজ্জন্তানম্পি রাগদোসমোহানং. ‘‘তেসং পী’’তি সকদাগামীনম্পি. ‘‘মেথুনৰত্থু সমাযোগো ইচ্ছিতো’’তি জাযম্পতীনং মেথুনকম্মসমাযোগো নাম সকদাগামীনং অত্থীতি ইচ্ছিতো. থেরোহি অধিচ্চুপ্পত্তিমত্তং ইচ্ছতি. পরিযুট্ঠানমন্দতং ন ইচ্ছতি. সকদাগামীনং পুত্তধীতরোপি সন্দিস্সন্তীতি ৰদতি. ‘‘মহাঅট্ঠকথাযং পটিক্খিত্তো’’তি থেরস্স মনোরথমত্তংতি ৰত্ৰা পটিক্খিত্তো. ইদং সব্বং অট্ঠসালিনিযং ৰুত্তং. ‘‘ছক্কনিপাতে’’তি অঙ্গুত্তরে ছক্কনিপাতে. ‘‘মিগাসাল়ৰত্থুম্হী’’তি মিগাসাল়নামিকায উপাসিকায ৰত্থুম্হি. কেচি ইমং ৰত্থুং দিস্ৰা মহাঅট্ঠকথাৰাদং ন রোচেন্তি. মহাসিৰত্থেরৰাদং রোচেন্তি. ‘‘অব্রহ্মচারিনো’’তি মেথুন ধম্মা অপ্পটিৰিরতস্স. ‘‘সকদাগামিত্তং ব্যাকতং’’তি তস্মিং কালঙ্কতে সো ব্রাহ্মণো ইধ সকদাগামিভাৰং পত্ৰা তুসিতাকাযং উপপন্নোতি এৰং তস্স যং সকদাগামিত্তং ভগৰতা ব্যাকতং. ‘‘অধিগমৰসেনা’’তি সকদাগামিভাৰং পটিলাভৰসেন. ন পন অব্রহ্মচারিনো সতো অধিগমৰসেনাতি অধিপ্পাযো. মরণাসন্নকালেপি হি সিক্খাপদাধিট্ঠানেন সহ উপরিমগ্গফলাধিগমনং নাম তিক্খপঞ্ঞস্স অরিযসাৰকস্স ন দুক্করন্তি. এতেন কেসঞ্চি থেরৰাদরোচনং পটিক্খিত্তং হোতি. ‘‘সকিংদেৰ ইমংলোকং আগন্ত্ৰা’’তি এতেন ইতো পরলোকং গমনস্স চ ততো পুন ইধাগমনস্স চ সিদ্ধত্তা অযং পুগ্গলো সুদ্ধেন মগ্গনিযামেন কামভৰে দ্ৰিক্খত্তু পরমোনাম হোতীতি সিদ্ধো. কথং. ইধ পত্ৰা তত্থ নিব্বত্তিত্ৰা ইধ পরিনিব্বাযী, তত্থ পত্ৰা ইধ নিব্বত্তিত্ৰা তত্থ পরিনিব্বাযীতি. সেসাপন চত্তারো ৰিপস্সনানিযামেন সিদ্ধা হোন্তীতি ৰিঞ্ঞাযতি. কতমে চত্তারো. ইধ পত্ৰা ইধ পরিনিব্বাযী. তত্থ পত্ৰা তত্থ পরিনিব্বাযী. ইধ পত্ৰা তত্থ পরিনিব্বাযী. তত্থ পত্ৰা ইধ পরিনিব্বাযীতি. এত্থ চ তীসু সোতাপন্নেসু একোসত্তক্খত্তু পরমো এৰ মগ্গনিযামেন সিদ্ধো. সেসা পন দ্ৰে সোতাপন্না ৰিপস্সনানিযামেন সিদ্ধা. ছ সকদাগামীসু দ্ৰে এৰ মগ্গনিযামেন সিদ্ধা. সেসা পন চত্তারো ৰিপস্সনানিযামেন সিদ্ধা. তত্থ মগ্গসিদ্ধেসু সোতাপন্ন সকদাগামীসু সঙ্করো নত্থি. ৰিপস্সনাসিদ্ধেসু পন সঙ্করো অত্থি. অত্থতো অৰিরুদ্ধে সতি, ৰোহারমত্তেন সঙ্করে দোসো নত্থীতি দট্ঠব্বং. আগন্ত্ৰাতি পাঠৰসেন আগমনতোতি ৰুত্তং. আগন্তাতি পন পাঠো যুত্তো. আগমনসীলো আগমন ধম্মো হুত্ৰা সকদাগামী নামাতি অত্থো. অনাগন্ত্ৰা ইত্থত্তন্তি এত্থপি এসেৰনযো. অরহতো ভাৰো অরহত্তং. অরহত্ত মগ্গং. দক্খিণায ৰিপত্তিকরানাম অপ্পপ্ফল অপ্পানিসংসকরা. সম্পত্তিকরা নাম মহপ্ফল মহানিসংসকরা. সীলক্খন্ধাদিগুণা নাম সীলক্খন্ধ সমাধিক্খন্ধ পঞ্ঞাক্খন্ধ ৰিমুত্তিক্খন্ধ ৰিমুত্তিঞ্ঞাণ দস্সনক্খন্ধগুণা. ‘‘দক্খিণেয্যেসূ’’তি দক্খিণারহ পুগ্গলেসু. ‘‘ধুরং’’তি পধানসীসট্ঠানিযং ৰুচ্চতি. সদ্ধা এৰ ধুরং অস্সাতি সদ্ধাধুরো. এৰং পঞ্ঞাধুরো. কস্মা পনেত্থ ৰীরিযধুরো ন গহিতোতি. পাল়িযং সদ্ধাৰাহী মগ্গং ভাৰেতি, পঞ্ঞাৰাহী মগ্গং ভাৰেতীতি ৰুত্তং. ন পন ৰুত্তং ৰীরিযৰাহী মগ্গং ভাৰেতীতি. তস্মা ন গহিতোতি. কস্মা পন ৰীরিযৰাহী মগ্গং ভাৰেতীতি ন ৰুত্তন্তি. ৰুচ্চতে. মগ্গং ভাৰেন্তস্স নাম আদিম্হি দিট্ঠিৰিচিকিচ্ছানং পহানায কম্মং মহন্তং হোতি. কস্মা, অপাযমূলকত্তা. তত্থ সদ্ধা চ ৰিচিকিচ্ছা চ দ্ৰে উজুপ্পটিপক্খা হোন্তি. যস্মিং আরম্মণে সদ্ধা নিৰিসতি, তস্মিং ৰিচিকিচ্ছা নত্থি. যস্মিং ৰিচিকিচ্ছা নিৰিসতি, তস্মিং সদ্ধা নত্থি. তথা পঞ্ঞাদিট্ঠিযো চ উজুপ্পটিপক্খা. যত্থ পঞ্ঞা, ন তত্থ দিট্ঠি. যত্থ দিট্ঠি, ন তত্থ পঞ্ঞাতি. অপি চ সদ্ধা অত্তনো ৰিসযে দিট্ঠিং ৰিধমতিযেৰ. পঞ্ঞায ৰিচিকিচ্ছাৰিধমনে ৰত্তব্বমেৰ নত্থি. তস্মা আরদ্ধ ৰিপস্সকো অনিচ্চাদীসু অৰেচ্চপ্পসাদমত্তেনপি দিট্ঠিৰিচিকিচ্ছাযো পজহিত্ৰা সদ্ধানুসারিভাৰঞ্চ সুট্ঠুতরং পসীদিত্ৰা সদ্ধাৰিমুত্তভাৰঞ্চ পাপুণাতি. পঞ্ঞায অনিচ্চাদীনি নিজ্ঝানক্খমং কত্ৰা ধম্মানুসারিভাৰঞ্চ সুট্ঠুতরং পস্সিত্ৰা দিট্ঠিপত্তপঞ্ঞা ৰিমুত্তভাৰঞ্চ পাপুণাতি. ৰীরিযং পন দিট্ঠিৰিচিকিচ্ছানং পটিপক্খমত্তম্পি ন হোতি. অথ খো তাসং সহাযোপি হোতি, ধুরভূতঞ্চ. পগ্গহলক্খণঞ্হি ৰীরিযং. তং সদ্ধংপি পগ্গণ্হাতি, পঞ্ঞংপি পগ্গণ্হাতি, দিট্ঠিংপি পগ্গণ্হাতি, ৰিচিকিচ্ছম্পি পগ্গণ্হাতিযেৰ. কুতোপন অত্তনো সভাৰেন দিট্ঠিৰিচিকিচ্ছাযো পজহিতুং সক্খিস্সতি. তস্মা ইমস্মিং ঠানে ৰীরিযৰাহীতি চ ৰীরিযধুরোতি চ ন ৰুত্তোতি. কাযসক্খিম্হি পন সদ্ধা চ পঞ্ঞা চ সমবলা হোন্তি. ৰীরিযঞ্চ সযং সম্মপ্পধানট্ঠানে ঠত্ৰা তদুভযং উপব্রূহেতি. সো চ পুগ্গলো তদুভযবলেন দিট্ঠিৰিচিকিচ্ছাদযো পজহিত্ৰা কাযসক্খিভাৰং পাপুণাতি. অট্ঠৰিমোক্খে ৰা উপ্পাদেত্ৰা উভতোভাগ ৰিমুত্তভাৰং পাপুণাতি. ইমেসু পন দ্ৰীসু পুগ্গলেসু ৰীরিযস্স থামো সুট্ঠু পাকটো. তস্মা ইমে দ্ৰে ৰীরিযাধিকাত্ৰেৰ ৰত্তব্বা. ন ৰীরিযধুরোতি. চতুপ্পটিপদা নাম দুক্খাপটিপদা দন্ধাভিঞ্ঞা. দুক্খাপটিপদা খিপ্পাভিঞ্ঞা. সুখাপটিপদা দন্ধাভিঞ্ঞা. সুখাপটিপদা খিপ্পাভিঞ্ঞা. তিৰিধৰিমোক্খো নাম সুঞ্ঞতো ৰিমোক্খো. অনিমিত্তো ৰিমোক্খো. অপ্পণিহিতো ৰিমোক্খো. ‘‘তযো অন্তরা পরিনিব্বাযিনো’’তি এত্থ আযুকপ্পস্স পরিযন্তং অপত্ৰা অন্তরা এৰ কিলেসপরিনিব্বানপত্তা অন্তরাপরিনিব্বাযী নাম. সো তিৰিধো. আযুকপ্পস্স পথমভাগে পরিনিব্বাযী, দুতীযভাগে, ততীযভাগেতি. ইমে তযো অন্তরা পরিনিব্বাযিনো নাম. উপহচ্চপরিনিব্বাযী নাম আযুকপ্প পরিযন্তে পরিনিব্বাযী. উদ্ধং মুখো ৰট্টসোতো এতস্সাতি উদ্ধংসোতো. অকনিট্ঠং অৰস্সং গমিস্সতীতি অকনিট্ঠগামী. ৰিপস্সনা কম্মং সসঙ্খারং সপ্পযোগং কত্ৰা পরিনিব্বাযী সসঙ্খার পরিনিব্বাযী. সঙ্খাররহিতেন সুখেন ৰিপস্সনা কম্মেন পরিনিব্বাযী অসঙ্খার পরিনিব্বাযী. ‘‘দ্ৰাদস সোতাপন্না’’তি একবীজিকা তযো. তে এৰ চতূহি পটিপদাহি গুণিতা দ্ৰাদস. দ্ৰাদস সকদাগামিনো পুব্বে ৰুত্তনযা এৰ.

একচ্চানং এৰ অনাগামি অরহন্তানং এৰ. ‘‘অজ্ঝোসিতস্সা’’তি অধিওসিতস্স. মমেৰিদন্তি নিট্ঠানং কত্ৰা ঠপিতস্স. গিলিত্ৰা ঠপিতস্সাতি ৰুত্তং হোতি. বহলেন থূলেন কামরাগেন ৰিমুত্তা বহলরাগৰিমুত্তা. আরুপ্পেসু চ তস্সো অরূপসমাপত্তিযো এৰ অত্থি. ন চতস্সো রূপসমাপত্তিযো. তস্মা তত্থ অনুপুব্বনিরোধো ন লব্ভতি. ‘‘আদিতো পট্ঠাযা’’তি অট্ঠসু সমাপত্তীসু পথমজ্ঝান সমাপত্তিআদি. ততো পট্ঠায. অনুপুব্বনিরোধো নাম পথমজ্ঝানে পটিঘসঞ্ঞানানত্তসঞ্ঞানং নিরোধো. পটিঘসঞ্ঞা নাম পঞ্চৰিঞ্ঞাণসঞ্ঞা. নানত্তসঞ্ঞা নাম কসিণ নিমিত্ততো অঞ্ঞেসু নানারম্মণেসু পৰত্তমনোৰিঞ্ঞাণ সঞ্ঞা. দুতীযজ্ঝানে ৰিতক্ক ৰিচারানং নিরোধোতিআদিনা অনুপুব্ব নিরোধো. ‘‘ততো পঞ্চমজ্ঝানং’’তি পঞ্চকনযেন ৰুত্তং. অট্ঠসমাপত্তি ৰচনং পন চতুক্কনযেন ৰুত্তং. তদুভযংপি পুগ্গলানুরূপং লব্ভতিযেৰ. যুগনন্ধং নাম দ্ৰন্দবন্ধনং, সমথৰিপস্সনানং যুগনন্ধন্তি ৰিগ্গহো. ‘‘সমাপজ্জন ৰুট্ঠান ৰিপস্সনাৰসেনা’’তি এত্থ ৰসিভাৰপত্তং সমাপজ্জনঞ্চ ৰুট্ঠানঞ্চ গহেতব্বং. অত্তনো সরীরা বদ্ধেসু পরিক্খারেসু সমাপত্তিবলেনেৰ অন্তরাযাভাৰতো ৰিসুং অধিট্ঠাতব্ব কিচ্চং নত্থীতি ৰুত্তং ‘‘অত্তনো সরীরাবদ্ধে পরিক্খারে ঠপেত্ৰা’’তি. ‘‘নানাবদ্ধানী’’তি নানাঠানেহি আবদ্ধানি. নানাঠানেসু ঠপিতানীতি ৰুত্তং হোতি. ‘‘পরিস্সযেনা’’তি অন্তরাযেন. মাৰিনস্সন্তূতি ৰা নানাবদ্ধ অৰিকোপনং অধিট্ঠাতব্বং. তদা ৰুট্ঠহামীতিৰা সঙ্ঘপ্পতিমাননং অধিট্ঠাতব্বং. এৰং সত্থুপক্কোসনংপি. ‘‘অদ্ধানপরিচ্ছেদো’’তি অত্তনো জীৰিতকালস্স উপপরিক্খণং. মরণঞ্হি নাম সমাপত্তিবলেনপি পটিবাহিতুং ন সক্কাহোতি. অন্তো সমাপত্তিযঞ্চ মরণে সতি সব্রহ্মচারীসু কত্তব্বৰত্তং ন করেয্য. এতঞ্হি ৰত্তং যং অরিযসাৰকানং মরণাসন্নে সব্রহ্মচারীনং ৰা উপট্ঠাকানং ৰা অপ্পমাদকথানু সাসনিকম্মং. সমাপত্তিযং ৰা অঞ্ঞতিত্থিযানং গরহা ৰিৰজ্জনত্থং. এৰঞ্হি তে গরহেয্যুং. গোতমসাৰকানং নিরোধসমাপত্তি নাম একং মরণমুখং. যং সমাপজ্জন্তো অসুকো ভিক্খু মরণং গচ্ছতি. অনরিয কম্মং হেতন্তি.

‘‘যদত্থং’’তি পটিপত্তি রসস্সাদত্থং. ‘‘তদত্থে’’তি তস্মিং অত্থে. নিরামিস সুখং নাম আমিসরহিত সুখং. দুৰিধঞ্হি সুখং সামিসসুখঞ্চ নিরামিসসুখঞ্চ. তত্থ যে লোকে ইট্ঠ কন্ত মনাপিযা পঞ্চকামগুণা নাম অত্থি. তে কিলেসেহি আমসিতব্বত্তা আমিসা নাম. যঞ্চসুখং তে আমিসে পটিচ্চ উপ্পজ্জতি, তং সামিসসুখং নাম. যং লোকে দিব্বং সুখং মানুসকং সুখন্তি মমাযন্তি. যঞ্চ অনুভৰন্তং মহাজনং সব্বানি অপাযভয ৰট্টভযানি সম্পরিৰারেন্তি. ঝানসুখ মগ্গসুখ ফলসুখ নিব্বানসুখং পন নিরামিসসুখং নাম. যং নেক্খম্মসুখন্তি চ পৰিৰেকসুখন্তি চ উপসমসুখন্তি চ সম্বোধিসুখন্তি চ ৰিমুত্তিসুখন্তি চ অরিযসুখন্তি চ অনৰজ্জসুখন্তি চ ৰুচ্চতি. যঞ্চ অনুভৰন্তং অরিযজনং সব্বানি অপাযভয ৰট্টভযানি সম্পরিৰজ্জন্তি. ‘‘অস্সাদিতব্বট্ঠেনা’’তি কিলেসপলিবোধেহি ৰিমুত্তত্তা ৰিপুল গম্ভীর সন্ত পণীতরসত্তা চ অহোসুখং অহোসুখন্তি উদাহরন্তেনপি অস্সাদিতব্বট্ঠেনাতি.

কম্মট্ঠানসঙ্গহানুদীপনা নিট্ঠিতা.

নিগমগাথাসু.

২৬২. চরিতব্বন্তি চারিত্তং. দসকুসলকম্মপথধম্মজাতং. ‘‘কুলাচারেনা’’তি কুলপরম্পরতো আগতেন আচারেন. ‘‘ঞাতি মিত্ত ধন ভোগসম্পত্তিযা’’তি হেতুঅত্থে করণৰচনং. ‘‘ৰিসালে’’তি ৰিপুলে. ‘‘তেনা’’তি তস্সপদস্স ৰিভত্যন্ত দস্সনং. ‘‘সদ্ধাযা’’তি রতনত্তযে অৰেচ্চপ্পসাদসদ্ধাৰসেন. ‘‘অভিৰুড্ঢানং’’তি হানভাগিয ঠিতিভাগিযভাৰং অতিক্কম্মৰিসেসভাগিয নিব্বেধভাগিয ভাৰপত্তিৰসেন অতিস্সয ৰুড্ঢানং. ‘‘পরিসুদ্ধানঞ্চা’’তি অত্তুক্কংসন পরৰম্ভনাদি দোসেহি পরিসুদ্ধানঞ্চ. নং নং জনং পাতিরক্খতীতি নম্পো. দিট্ঠদিট্ঠেসু মেত্তাৰিহারীতি ৰুত্তং হোতি. আৰ্হাতব্বোতি অৰ্হযো. নামং. নম্পো ইতি অৰ্হযো অস্সাতি নম্পৰ্হযোতি ৰচনত্থো. ‘‘পণিধাযা’’তি পত্থেত্ৰাতি অত্থং নিৰত্তেতি ‘‘ভুসং নিধাযা’’তিআদিনা. ‘‘উপাদায পটিচ্চা’’তি তস্স পদস্স পরিযাযদস্সনমেতং. ‘‘অত্তনো মন্দবুদ্ধীনং’’তি পচ্চক্খে ধরমানানন্তি অধিপ্পাযো. তেনাহ ‘‘পচ্ছিম জনানং ৰা’’তি. অনুকম্পনং অনুকম্পো. কথং নু খো ইমে জনা অভিধম্মত্থেসু সুখেন আজানেয্যুন্তি এৰং পৰত্তো চিত্তব্যাপারো. অত্থতো অনুদযসঙ্খাতা করুণাযেৰ. তেনাহ ‘‘অনুদযং কারুঞ্ঞং’’তি. ‘‘পত্থিতং’’তি ৰা সাধুৰতস্স যং থেরো এৰরূপং পকরণং করেয্যাতি এৰং চিরকালং পত্থিতং আসিংসিতন্তি অত্থো. ‘‘খুদ্দসিক্খাটীকাযং’’তি পোরাণটীকং সন্ধায ৰুত্তং. সোমৰিহারোত্ৰেৰ পঞ্ঞাযিত্থ তস্মিং দীপেতি অধিপ্পাযো. গাথাযং ‘‘অথা’’তি তস্মিংকালে. ‘‘এত্থা’’তি এতস্মিং নগরে. ‘‘সদ্দো’’তি কস্মা রাজা এৰরূপং মঙ্গলহত্থিং ব্রাহ্মণানং অদাসি. নেতং পতিরূপং যং রঞ্ঞা কতন্তি এৰং পৰত্তো অমনাপসদ্দো. ‘‘ভেরৰো’’তি ভীরুতাজনকো ভযানকো. ‘‘সিৰীনং’’তি সিৰিরট্ঠৰাসীনং. ‘‘রট্ঠৰড্ঢনে’’তি রট্ঠং ৰড্ঢেতীতি রট্ঠৰড্ঢনো. হত্থিনাগো. সো হি লক্খণসম্পন্নো আজানিযো হোতি. যস্মিং রট্ঠে তং অভিমঙ্গলং করোন্তি, তস্মিং রট্ঠে দেৰো সম্মা ৰস্সতি, নানাভযুপদ্দৰা তস্মিং নুপ্পজ্জন্তীতি লোকসম্মতো মঙ্গলহত্থী হোতি. তেন ৰুত্তং ‘‘সিৰীনং রট্ঠৰড্ঢনে’’তি. ‘‘ৰিত্থিণ্ণো’’তি ৰিত্থারিতো. অতিৰিত্থারোতি ৰুত্তং হোতি. ধনীযন্তি মহাজনেহি দট্ঠুং পত্থীযন্তীতি ধঞ্ঞা. মহিদ্ধিকা. অধিৰসন্তি এত্থাতি অধিৰাসো. ধঞ্ঞানং অধিৰাসোতি সমাসো. অজ্ঝাৰসিংসু এত্থাতি অজ্ঝাৰুত্থং. কিত্তিগুণৰসেন উদেন্তি উগ্গচ্ছন্তীতি উদিতা. উদিতানংপি উদিতোতি ৰিগ্গহো. তেনাহ ‘‘নভমজ্ঝে’’তিআদিং. সারজ্জনং সারদো. ৰিগতো সারদো যস্সাতি ৰিসারদো. ৰিসারদস্স ভাৰো ৰেসারজ্জং. পরিযত্তিযং ৰেসারজ্জং পরিযত্তিৰেসারজ্জং. তেপিটকপরিযত্তিযং ৰেয্যত্তিযঞ্ঞাণং. তং আদি এতিস্সা পঞ্ঞাযাতি পরিযত্তিৰেসারজ্জাদি পঞ্ঞা. পাপতো লজ্জনসীলাতি লজ্জিনোতি আহ ‘‘পাপগরহিনো’’তি. পাপং ধম্মং গরহন্তিআদীনৰং কথযন্তি সীলেনাতি পাপগরহিনো. ‘‘অনুস্সরন্তূ’’তি পুনপ্পুনং সরন্তু. ৰিসেসেন ভৰন্তি ৰেপুল্লং গচ্ছন্তীতি ৰিভৰা. পুঞ্ঞানি চ তানি ৰিভৰাচাতি পুঞ্ঞৰিভৰা. ৰিপুলপুঞ্ঞানীতি দস্সেতুং ‘‘ৰিপুলানং’’তিআদিমাহ. অনুত্তরিয ধম্মা নাম দস্সনানুত্তরিয সৰনানুত্তরিযাদযো. লোকে বহূসু দস্সনেসু ইতো উত্তরং অঞ্ঞং দস্সনং নাম নত্থীতি দস্সনানুত্তরিযং. রতনত্তযদস্সনং. চতুসচ্চদস্সনঞ্চ. রতনত্তযগুণকথাসৰনং, খন্ধাযতন ধাতু সচ্চপটিচ্চসমুপ্পাদকথাসৰনঞ্চ সৰনানুত্তরিযং নাম. তেসু রতনত্তযাদীসু সদ্ধা পটিলাভো লাভানুত্তরিযং নাম. তেসমেৰ পুনপ্পুনং সরণং অনুস্সতানুত্তরিযং নাম. রতনত্তযে চতূহি পচ্চযেহি ৰা ৰত্তপ্পটিৰত্তকরণেন ৰা পরিচরণং পারিচরিযানুত্তরিযং নাম. বুদ্ধপঞ্ঞত্তাসু তীসু সিক্খাসু সমাদায সিক্খনং সিক্খানুত্তরিযং নাম. তাদিসে পঞ্ঞাৰদাতগুণসোভাদিকে গুণে অৰস্সং ভজন্তি পাপুণন্তীতি তাদিসগুণভাগিনো. ‘‘ভৰিস্সামা’’তি ভৰিতুং উস্সাহং করিস্সামাতি ৰুত্তং হোতি.

দীপনিযা নিগমগাথাসু.

‘‘বস্হ্যুসুঞ্ঞচম্মেকম্হী’’তি এত্থ ‘‘বস্হ্যূ’’তি অট্ঠসঙ্খ্যায সঙ্কেত ৰচনং. ‘‘চম্মং’’তি দ্ৰিসঙ্খ্যায. একঞ্চ দুকঞ্চ সুঞ্ঞঞ্চ অট্ঠচাতি গণনক্কমো. সহস্স দ্ৰিসত অট্ঠসঙ্খাতে সাকেতি অত্থো. এসনযো পরতো ‘‘নৰপঞ্চ চম্মেকম্হী’’তি পদেপি. গাথাৰণ্ণনাসু. নগরতি ন চৰতীতি নগরং. থাৰরিযন্তি ৰুত্তং হোতি. ‘‘রঞ্জেতী’’তি রমেতি. খেমসুভিক্খতাদিগুণেহি অনাগতে জনে গমাপেতি, আগতে অঞ্ঞত্থ গন্তুং ন দেতীতি ৰুত্তং হোতি. রোহিতমিগা নাম সুৰণ্ণৰণ্ণমিগা. ‘‘সাকে’’তি সাকনামেন রঞ্ঞা পুন সঙ্খতত্তা ইমং কলিযুগং সাকন্তি ৰুচ্চতি. যং এতরহি সাক্ররাজন্তিপি ৰোহরন্তি. সাকরাজা চ নাম উত্তরাপথেসু একো গন্ধাররাজা. যং জেট্ঠকং কত্ৰা ভিন্নলদ্ধিকা ৰজ্জীভিক্খূ ইমং ধম্ম ৰিনযং মহাসঙ্ঘীকং নাম সঙ্গহং আরোপেন্তি. সো চ ধম্মৰিনযসঙ্গহো উত্তরাপথেসু ৰত্ততি. ৰেসালিযং যসত্থের সঙ্গহো পন দক্খিণাপথেসূতি. চত্তারিযুগানি নাম লোকে পঞ্ঞপেন্তি সত্যযুগং, দ্ৰাপরযুগং, তেত্রযুগং, কলিযুগ,ন্তি. যুগন্তি চ আযুপরিমাণং ৰুচ্চতি. ইদানিপন কলিযুগং ৰত্ততি. তেন ৰুত্তং ‘‘সাকেতি কলিযুগে’’তি. পাপযুগেতি অত্থো. ‘‘ল তী’’তি সালিক্খেত্তানং সোধনট্ঠানত্তা এৰং ম্রম্মদেসৰোহারেন লদ্ধনামং অরঞ্ঞং. তং পন মুংর্ৰানগরস্স এসন্নে পঞ্চধনুসতিকে পদেসে জাতং. ‘‘ৰিস্সুতে’’তি ৰিসেসেন কিত্তিতে. সারঞ্চ অসারঞ্চ ৰিৰেচেন্তি ৰিচারেত্ৰা জানন্তিসীলেনাতি সারাসার ৰিৰেকিনোতি ৰচনত্থোতি.

ইতি পরমত্থদীপনিযা অনুদীপনা নিট্ঠিতা.

১. পরমত্থদীপনী নাম, যেন থেরেন সা কতা.

তেনেৰে সা কতা হোতি, অযং তস্সানু দীপনী.

২. অট্ঠসত্তদ্ৰযেকম্হি, সাকে সা জেট্ঠমাসকে.

কাল়ে নৰমিযং দিৰা, মজ্ঝন্হিকে নিট্ঠং গতা.

অনুদীপনী নিট্ঠিতা.