📜
নমো তস্স ভগৰতো অরহতো সম্মাসম্বুদ্ধস্স
জিনালঙ্কার
পণামদীপনীগাথা
যো লোকত্থায বুদ্ধো ধনসুতভরিযাঅঙ্গজীৰে চজিত্ৰা পূরেত্ৰা আরমিযো তিদসমনুপমে বোধিপক্খীযধম্মে,
পত্ৰা বোধিং ৰিসুদ্ধং সকলগুণদদং সেট্ঠভূতো তিলোকে,
কত্ৰা দুক্খস্স অন্তং কতসুভজনতং দুক্খতো মোচযিত্থ.
নত্ৰানাহং জিনন্তং সমুপচিতসুভং সব্বলোকেকবন্ধুং,
নাহু যেনপি তুল্যো কুসলমহিমতো উত্তমো ভূতলোকে তস্সেৰাযং উৰিম্হং সুৰিপুলমমলং বোধিসম্ভারভূতং,
হেতুং হেত্ৰানুরূপং সুগতগতফলং ভাসতো মে সুণাথ.
যোগাৰচরসম্পত্তিদীপনীগাথা
জাতো যো নৰমে খণে সুতধরো সীলেন সুদ্ধিন্দ্রিযো সংসারং অযতো ভৰক্কযকরং দিস্ৰা সিৰং খেমতো,
তং সম্পাপকমগ্গদেসকমুনিং সম্পূজযন্তো ততো উদ্ধানুস্সতিভাৰনাদিকমতো সম্পাদযে তং সিৰং.
ৰত্থুৰিসোধনীগাথা
বুদ্ধোতি কো বুদ্ধগুণো তি কো সো,
অচিন্তযাদিত্তমুপাগতো যো;
অনঞ্ঞসাধারণভূতমত্থং,
অকাসি কিং সো কিমৰোচ বুদ্ধো.
ৰিসুদ্ধখন্ধসন্তানো বুদ্ধোতি নিযমো কতো,
খন্ধসন্তানসুদ্ধী তু গুণোতি নিযমো কতো.
অকাসি কিচ্চানি দিনেসু পঞ্চ,
পসাদযঞ্চিদ্ধিবলেন সেন;
জনানসেসং চরিযানুকূলং,
ঞত্ৰানৰোচানুসযপ্পহানং.
অনঞ্ঞসাধারণদীপনীগাথা
অব্ভুগ্গতা যস্স গুণা অনন্তা,
তিবুদ্ধখেত্তেকদিৰাকরোতি;
জানাতি সো লোকমিমং পরঞ্চ,
সচেতনঞ্চেৰ অচেতনঞ্চ;
সকস্স সন্তানগতং পরেসং,
ব্যতীতমপ্পত্তকমত্রভূতং.
অনন্তসত্তেসু চ লোকধাতুসু,
একোৰ সব্বেপি সমা ন তেন;
দিসাসু পুব্বাদিসু চক্কৰাল়া,
সহস্সসঙ্খাযপি অপ্পমেয্যা;
যে তেসু দেৰা মনুজা চ ব্রহ্মা,
একত্থ সঙ্গম্ম হি মন্তযন্তা.
অনাদিকালাগতনামরূপিনং,
যথাসকং হেতুফলত্তৰুত্তিনং;
তব্ভাৰভাৰিত্তমসম্ভুণন্তা,
নানাৰিপল্লাসমনুপৰিট্ঠা.
কম্মপ্পৰত্তিঞ্চ ফলপ্পৰত্তিং,
একত্তনানত্তনিরীহধম্মতং;
ৰিঞ্ঞত্তিসন্তানঘনেন ছন্নতো,
সিৰঞ্জসং নো ভণিতুং সমত্থা.
একো ৰ সো সন্তিকরো পভঙ্করো,
সঙ্খায ঞেয্যানি অসেসিতানি;
তেসঞ্হি মজ্ঝে পরমাসম্ভীৰদং,
সিৰঞ্জসং দীপযিতুং সমত্থো.
সো গোতমো সক্যসুতো মুনিন্দো,
সব্বস্স লোকস্স পদীপভূতো;
অনন্তসত্তে ভৰবন্ধনম্হা,
মোচেসি কারুঞ্ঞফলানুপেক্খী.
অভিনীহারদীপনীগাথা
ৰদেথ তস্সীধ অনপ্পকং গুণং,
ন তেন তুল্যো পরমো চ ৰিজ্জতি;
কিং তং গুণং তং সদিসেন দিন্নং,
সযংকতং কিন্নু অধিচ্চলদ্ধং.
নাধিচ্চলদ্ধং ন চ পুব্ববুদ্ধা,
ব্রহ্মাদিনং সম্মুতিযা বহূনং;
সযংকতেনেৰ অনোপমেন,
দানাদিনা লদ্ধমিদং ৰিপাকং.
ইতো চতুন্নং অসঙ্খিযানং,
সতংসহস্সানধিকানমত্থকে;
কপ্পে অতীতম্হি সুমেধতাপসো,
ৰেহাযসং গচ্ছতি ইদ্ধিযা তদা.
দিপঙ্করো নাম জিনো সসঙ্ঘো,
রম্মং পুরং যাতি ৰিরোচমানো;
মনুস্সদেৰেহিভিপূজিযন্তো,
সহস্সরংসি ৰিয ভাণুমা নভে.
তস্সঞ্জসং কাতুবহুস্সহানং,
বুদ্ধোতি সুত্ৰা সুমনো পতীতো;
মমজ্জ দেহং পনিমস্স দত্ৰা,
বুদ্ধো অহং হেস্সমনাগতেদিসো.
তস্মিঞ্জসে কন্দরতম্হি পঙ্কে,
কত্ৰান সেতুং সযি সো সদেহং;
বুদ্ধো অযং গচ্ছতু পিট্ঠিযা মমং,
বোধিস্সচে হেস্সতি মে অনাগতে.
উস্সীসকং যাতি জিনো হি তস্স,
অজ্ঝাসযো সিজ্ঝতিমস্সনাগতে;
ঞত্ৰান ব্যাকাসি অসেসতো হি,
বুদ্ধো অযং হেস্সতিনাগতেসু.
সুত্ৰান পত্তো ৰ মহাভিসেকং,
লদ্ধং ৰ বোধিং সমনুস্সরন্তো;
পূজেত্ৰা যাতে মুনিদেৰমানুসে,
উট্ঠায সো সম্মসি পারমী দস.
দল়্হং গহেত্ৰা সমতিংসপারমী,
সিক্খত্তযঞ্চস্স জিনস্স সন্তিকে;
কাতুং সমত্থো পি ভৰস্স পারং,
সত্তেসু কারুঞ্ঞবলা ভৰং গতো.
উপ্পন্নুপ্পন্নকে সো জিনৰরমতুলে পূজযিত্ৰা অসেসং বুদ্ধো এসো হি ওসো ভৰতি নিযমতো ব্যাকতো তেহি তেহি তেসং তেসং জিনানং অচনমনুপমং পূজযিত্ৰা সিরেন,
তং তং দুক্খং সহিত্ৰা সকলগুণদদং পারমী পূরযিত্থ.
বোধিসম্ভারদীপনীগাথা
সো দুক্খখিন্নজনদস্সনদুক্খখিন্নো,
কারুঞ্ঞমেৰ জনতায অকাসি নিচ্চং;
তেসং হি মোচনমুপাযমিদন্তি ঞত্ৰা,
তাদীপরাধমপি অত্তনি রোপযী সো.
দানাদিনেকৰরপারমিসাগরেসু,
ওগাল়্হতাযপি পদুট্ঠজনেন দিন্নং;
দুক্খং তথা অতিমহন্ততরম্পি কিঞ্চি,
নাঞ্ঞাসি সত্তহিতমেৰেঅ গৰেসযন্তো.
ছেত্ৰান সীসং হি সকং দদন্তো,
মংসং পচিত্ৰান সকং দদন্তো;
সো চত্তগত্তো পণিধানকালে,
দুট্ঠস্স কিং দুস্সতি ছেদনেন.
এৰং অনন্তমপি জাতিসতেসু দুক্খং,
পত্ৰান সত্তহিতমেৰ গৰেসযন্তো;
দীপঙ্করে গহিতসীলসমাধিপঞ্ঞং,
পালেসি যাৰ সকবোধিতলে সুনিট্ঠো.
যদাভিনীহারমকা সুমেধো,
যদা চ মদ্দিং অদদা সিৰিন্দো;
এত্থন্তরে জাতিসু কিঞ্চিপেকং,
নিরত্থকং নো অগমাসি তস্স.
মহাসমুদ্দে জলবিন্দুতোপি,
তদন্ত্রে জাতি অনপ্পকা ৰ;
নিরন্তরং পূরিতপারমীনং,
কথং পমাণং উপমা কুহিং ৰা.
যো মগ্গপস্সে মধুরম্ববীজং,
ছাযাফলত্থায মহাজনানং;
রোপেসি তস্মিং হি খণেৰ তেন,
ছাযাফলে পুঞ্ঞমলদ্ধমুদ্ধং.
তথেৰ সংসারপথে জনানং,
হিতায অত্তনমভিরোপিতক্খণে;
সিদ্ধং ৰ পুঞ্ঞূপরি তস্স তস্মিং,
ধনঙ্গজীৰং পি হরন্তি যে যে.
সো সাগরে জলধিকং রুহিরং অদাসি,
ভূমাপরাজিয সমংসমদাসি দানং;
মেরুপ্পমাণমধিকঞ্চ সমোল়িসীসং,
খে তারকাধিকতরং নযনং অদাসি.
গব্ভোক্কন্তিদীপনীগাথা
গম্ভীরপানদানাদিসাগরেসু হি থামসা;
তরন্তো মদ্দিদানেন নিট্ঠাপেত্ৰান পারমী.
ৰসন্তো তুসীতে কাযে বোধিপরিপাকমাগম্ম;
আযাচনায চ দেৰানং মাতুগব্ভমুপাগমি.
সতো চ সম্পজানো চ মাতুকুচ্ছিম্হি ওক্কমি;
তস্স ওক্কন্তিযং সব্বা দসসহস্সী পকম্পিত্থ.
ততো পুব্বনিমিত্তানি দ্ৰত্তিংসানি তদা সিযুং;
তুট্ঠহট্ঠা ৰ সা মাতা পুত্তং পস্সতি কুচ্ছিযং.
ৰিজাযনমঙ্গলদীপনীগাথা
সা পুণ্ণগব্ভা দসমাসতো পরং,
গন্ত্ৰান ফুল্লং ৰরলুম্বিনীৰনং;
ঠিতা গহেত্ৰা ৰরসালসাখং,
ৰিজাযি তং পুত্তৰরং সুখেন.
তদা সহস্সীদসলোকধাতুসু,
দেৰা চ নাগা অসুরা চ যক্খা;
নানাদিসা মঙ্গলচক্কৰাল়ং,
সুমঙ্গলং মঙ্গলমাগমিংসু.
অনেকসাখঞ্চ সহস্সমণ্ডলং,
ছত্তং মরূ ধারযুমন্তলিক্খে;
সুৰণ্ণদণ্ডা ৰিপতন্তি চামরা,
খজ্জিংসু ভেরী চ নদিংসু সঙ্খা.
মলেনকেনাপি অনূপলিত্তো,
ঠিতো ৰ পাদানি পসারযন্তো;
কথী ৰ ধম্মাসনতোতরন্তো,
জাতো যথাদিচ্চৰরো নভম্হা.
খীণাসৰা ব্রহ্মগণোপগন্ত্ৰা,
সুৰণ্ণজালেন পটিগ্গহেসুং;
ততো চ দেৰাজিনচম্মকেন,
ততো দুকূলেন চ তং মনুস্সা.
তেসং পি হত্থা ৰরভূমিযং ঠিতো,
দিসা ৰিলোকেসি সব্বা সমন্ততো;
ৰদিংসু দেৰা পি চ ব্রহ্মকাযিকা,
তযা সমো কত্থচি নত্থি উত্তরো.
গন্ত্ৰান উত্তরং সত্ত পদৰারেহি ৰিক্কমো,
সীহনাদং নদী তেসং দেৰতানং হি সাৰযং.
ততো পুত্তং গহেত্ৰান গতা মাতা সকঙ্ঘরং,
মাতা সত্তমিযং গন্ত্ৰা দেঅপুত্তত্তমাগমি.
তে ব্রহ্মণা পঞ্চমিযং সুভুত্তা,
নামং গহেতুং ৰরলক্খণানি;
দিস্ৰান একঙ্গুলিমুক্খিপিংসু,
বুদ্ধো অযং হেস্সতি ৰীতরাগো.
জিণ্ণঞ্চ দিস্ৰা ব্যাধিকং মতঞ্চ,
অৰ্হাযিতং পব্বজিতঞ্চ দিস্ৰা;
ওহায পব্বজ্জমুপেতি কামে,
বুদ্ধো অযং হেস্সতি ৰীতরাগো.
অগারিযসম্পত্তিদীপনীগাথা
কালক্কমেন চন্দো ৰ ৰড্ঢন্তো ৰড্ঢিতে কুলে,
পুঞ্ঞোদযেনুদেন্তো সো ভাণুমা ৰিয অম্বরে.
সিদ্ধথকো হি সিদ্ধত্থো লদ্ধা দেৰিং যসোধরং,
চত্তালীসসহস্সেহি পূরিত্থীহি পুরক্খিতো.
রম্মসুরম্মসুভেসু ঘরেসু,
তিণ্ণমুতূনমনুচ্ছৰিকেসু;
দিব্বসুখং ৰিয ভুঞ্জি সুখং সো,
অচ্ছরিযব্ভুতরাজৰিভূতিং.
নেক্খম্মজ্ঝাসযদীপনীযমকগাথা
নমো তস্স যতো মহিমতো যস্স তমো ন
দিস্ৰা নিমিত্তানি মদচ্ছিদানি,
থীনং ৰিরূপানি রতচ্ছিদানি;
পাপানি কম্মানি সুখচ্ছিদানি,
লদ্ধানি ঞাণানি ভৰচ্ছিদানি.
পদিত্তগেহা ৰিয ভেরৰং রৰং,
রৰং সম্মুট্ঠায গতো মহেসি;
মহেসিমোলোকিযপুত্তমত্তনো,
তনোসি নো পেমমহোঘমত্তনো.
উম্মারউম্মারগতুদ্ধরিত্ৰা,
পদং পদং যাতনরাসভস্স;
অলং অলংকারতরেন গন্তুং,
মতী মতীৰেতিমনঙ্গভঙ্গে.
উম্মারউম্মারগতো মহেসি,
অনঙ্গভঙ্গং সমচিন্তযিত্থ;
কিং মে জরামচ্চুমুখে ঠিতস্স,
ন মে ৰসে কামৰসে ঠিতস্স.
কামেন কামেন ন সাধ্যমোক্খং,
মানেন মানেন মমত্থি কিঞ্চি;
মারো সসেনো হি অৰারণীযো,
যন্তেন উচ্ছুং ৰিয মদ্দতী মং.
আদিত্তমুযাতপযাতমূনং,
অতাণালেণাসরণে জনে তে;
দিস্ৰান দিস্ৰান সিৰং মযা তে,
কামেন কামেন কথং ৰিনেয্য.
ৰিজ্জাৰিজ্জায চুতঞ্চুপেতং,
অসারসারূপগতঞ্জনং জনং;
ৰিজ্জাযৰিজ্জায যুতো চুতোহং,
পহোমি তারেতুমসঙ্গহো গতো.
মগ্গন্তি নো দিট্ঠিগতাপৰগ্গং,
অগ্গা তি তেৰাহু জনা সমগ্গা;
নগ্গং অহো মোহতমস্স ৰগ্গং,
ৰগ্গং হনিস্সামি তমগ্গমগ্গা.
পসেয্হকারেন অসেয্হদুক্খং,
জনা জনেন্তীহ জনানমেৰ;
পসেয্হকারেনা অসেয্হদুক্খং,
পাপং ন জানন্তি ততো নিদানং.
তে ওঘযোগাসৰসংকিলেসা,
তমেৰ নাসেন্তি ততো সমুট্ঠিতা;
একন্তিকং জাতি জরা চ মচ্চু,
নিরন্তরং তং ব্যসনঞ্চনেকং.
চীরং কিলেসানসমুজ্জলন্তং,
দিস্ৰান সত্তানুসযং সযম্ভূ;
সাধেমি বোধিং ৰিনযামি সত্তে,
পচ্ছাপি পস্সামি সুতং সুতন্তং.
তং দিব্বচক্কং খুরচক্কমালং,
রজ্জং সসারজ্জসমজ্জমজ্জং;
তে বন্ধৰা বন্ধনমাগতা পরে,
সুতো পসূতোযমনঙ্গদূতো.
সমুজ্জলন্তং ৰসতী সতীসিরী,
সিরীসপাগারমিদং মহাৰিসং;
দদ্দল্লমানা যুৰতী ৰতীমা,
সকণ্টকাযেৰ সমঞ্জসঞ্জসে.
যস্সা ৰিরাজিতসিরী সিরিযাপি নত্থি,
তস্সাৰলোকিয ন তিত্তিৰসানমত্থি;
গচ্ছামি হন্দ তৰনঙ্গ সিরপ্পভেদং,
মত্তেভকুম্ভুপরি সীহৰিলাসগামিং.
ভো ভো অনঙ্গসুচির পি পনুণ্ণবাণ,
বাণানি সংহর পনুণ্ণমিতো নিরোধ;
রোধেন চাপদগতো মনসো ন সোচ,
সোচং তৰপ্পনৰলোকিয যামি সন্তিং.
রতী রতী কামগুণে ৰিৰেকে,
অলং অলন্তেৰ ৰিচিন্তযন্তো;
মনং মনঙ্গালযসম্পদালযং,
তহিং তহিং দিট্ঠবালা ৰ পক্কমি.
পাদুদ্ধারৰিম্হযদীপনীগাথা
যাৰঞ্চযং রৰি চরত্যচলেন রুদ্ধে,
যাৰঞ্চ চক্করতনঞ্চ পযাতি লোকে;
তাৰিস্সরো নভচরো জিতচাতুরন্তো,
হিত্ৰা কথং নু পদমুদ্ধরি সো নিরাসো.
দীপে মহা চ চতুরাধিকদ্ৰেসহস্সে,
তত্রাপি সেট্ঠভজিতং ৰরজম্বুদীপং;
ভূনাভিকং কপিলৰত্থুপুরং সুরম্মং,
হিত্ৰা কথং নু পদমুদ্ধরি সো নিরাসো.
ঞাতীনসীতি কুলতো হি সহস্স সাক্যে,
হত্থিস্সধঞ্ঞধনিনো ৰিজিতারিসঙ্ঘে;
গোত্তেন গোতমভৰং পিতরঞ্জনগ্গং,
হিত্ৰা কথং নু পদমুদ্ধরি সো নিরাসো.
রম্মং সুরম্মৰসতিং রতনুজ্জলন্তং,
গিম্হেপি ৰিম্হযকরং সুরমন্দিরাভং;
উস্সাপিতদ্ধজপটাকসিতাতপত্তং,
হিত্ৰা কথং নু পদমুদ্ধরি সো নিরাসো.
সপোক্খরা পোক্খরণী চতস্সো,
সুপুপ্ফিতা মন্দিরতো সমন্তা;
কোকা নদন্তূপরি কোকনাদে,
হিত্ৰা কথং নু পদমুদ্ধরি সো নিরাসো.
সরে সরোজে রুদিতাল়িপাল়ি,
সমন্ততো পস্সতি পঞ্জরঞ্জসা;
দিস্ৰারৰিন্দানি মুখারৰিন্দং
নাথস্স লজ্জা ৰিয সংকুজন্তি.
মধুরা মধুরাভিরুতা,
চরিতা পদুমে পদুমেল়িগণা;
ৰসতিং অধুনা মধুনা,
অকরুং জহিতং কিমিদং পতিনা.
তম্হা রসং মধুকরা ভৰনং হরিত্ৰা,
নিন্নাদিনো সমধুরং মধুরং করোন্তি;
নাদেন নাদমতিরিচ্চুপৰীণযন্তি,
নচ্চন্তি তা সুরপুরে ৰণিতা ৰ তাৰ.
সঞ্চোদিতা পীণপযোধরাধরা,
ৰিরাজিতানঙ্গজমেখলাখলা;
সুরঙ্গণা ৰঙ্গজফস্সদা সদা,
রমা রমাপেন্তি ৰরঙ্গদাগদা.
করাতিরত্তা রতিরত্তরামা,
তাল়েন্তি তাল়াৰচরে সমন্তা;
নচ্চুগ্গতানেকসহস্সহত্থা,
সক্কোপি কিং সক্যসমোতি চোদযুং.
ৰিসালনেত্তা হসুলা সুমজ্ঝা,
নিম্বত্থনী ৰিম্হযগীতসদ্দা;
অলঙ্কতা মল্লধরা সুৰত্থা,
নচ্চন্তি তাল়াৰচরেহি ঘুট্ঠা.
যাসং হি লোকে উপমা নত্থি,
তাসং হি ফস্সেসু কথাৰকাসা;
তং তাদিসং কামরতিংনুভোন্তো,
হিত্ৰা কথং নু পদমুদ্ধরি সো নিরাসো.
পাদেপাদে ৰলযৰিরৰামেখলাৰীণানাদা,
গীতংগীতং পতিরতিকরং গাযতী গাযতী সা;
হত্থেহত্থে ৰলযচলিতা সম্ভমং সম্ভমন্তি,
দিস্ৰাদিস্ৰা ইতি রতিকরং যাতি হাহা কিমীহা.
অপুনরাৰত্তিগমনদীপনীযমকগাথা
অনন্তকালোপচিতেন তেন,
পুঞ্ঞেন নিব্বত্তৰিমানযানে;
তস্মিং দিনে জাতসুতং পজাপতিং,
হিত্ৰা গতো সো সুগতো গতো ৰ.
তং জীৰমানং পিতরঞ্চ মাতরং,
তে ঞাতকে তাদিসিযো চ ইত্থিযো;
তে তাদিসে রম্মকরে নিকেতে,
হিত্ৰা গতো সো সুগতো গতো ৰ.
খোমঞ্চ পত্তুণ্ণদুকূলচীনং,
সকাসিকং সাধুসুগন্ধৰাসিতং;
নিৰাসিতো সোভতি ৰাসৰো ৰ,
হিত্ৰা গতো সো সুগতো গতো ৰ.
ৰিধিপ্পকাসা নিধিযো চতস্সো,
সমুগ্গতা ভূতধরা ৰসুন্ধরা;
সত্তাৰসত্তাৰসুধা সুধাসা,
হিত্ৰা গতো সো সুগতো গতো ৰ.
সুৰণ্ণথালে সতরাজিকে সুভে,
সাধুং সুগন্ধং সুচিসালিভোজনং;
ভুত্ৰা সৰাসীহি ৰিলাসিনীহি,
হিত্ৰা গত সো সুগতো গতো ৰ.
মনুঞ্ঞগন্ধেন অসুঞ্ঞগন্ধো,
সুগন্ধগন্ধেন ৰিলিত্তগত্তো;
সুগন্ধৰাতেন সুৰিজ্জিতঙ্গো,
হিত্ৰা গতো সো সুগতো গতো ৰ.
সুলক্খণে হেৰভিলক্খিতঙ্গো,
পসাধিতো দেৰপসাধনেন;
ৰিরোচমানো সমরাজিনীহি,
হিত্ৰা গতো সো সুগতো গতো ৰ.
নানাসনানি সযনানি নিৰেসনানি,
ভাভানিভানি রতনাকরসন্নিভানি;
তত্রুস্সিতানি রতনদ্ধজভূসিতানি,
হিত্ৰা ৰ তানি হিমবিন্দুসমানি তানি.
নানাৰিধেহি রতনেহি সমুজ্জলেহি,
নারীহি নিচ্চমুপগাযিতহম্মিযেহি;
রজ্জেহি চক্করতনাদিৰিভূসিতেহি,
যাতো ততো হি মহিতো পুরিসস্সরেহি.
দ্ৰিপাদব্যাসযমকগাথা
যসোধরং পীণপযোধরাধরং,
অনঙ্গরঙ্গদ্ধজভূতমঙ্গং;
দেৰচ্ছরাৰুজ্জলিতং পতিব্বতং,
হিত্ৰা গতো সো সুগতো ৰ নূন.
সভাৰনিচ্ছন্দমতিং পভাৰতিং,
ভত্তো কুসো সংহরি ভত্তকাজং;
তাযাভিরূপং পি যসোধরং ৰরং,
হিত্ৰা গতো সো সুগতো ৰ নূন.
পুরে পুরে সঞ্চরি খগ্গহত্থো,
ৰরং পরিত্থীনং অনিত্থিগন্ধো;
সিরিঞ্চ রিঞ্চাপি ন রিঞ্চি নারিং,
হিত্ৰানিমন্দানি গতো তথাগতো.
হরিত্তচো রাগবলেন দেৰিযা,
অৰত্থলিঙ্গেন ন লিঙ্গনুস্সরি;
অসেৰি কামং তমিদানি কামং,
হিত্ৰা গতো সো সুগতো ৰ নূন.
অপমেয্যকপ্পেসু ৰিৰেকসেৰী,
হিত্ৰা গতো রজ্জসিরিং ৰরিত্থিং;
অণুং কলিং ৰণ্ণযি তং পুরাণং,
ৰত্থম্হি ছিদ্দং ৰিয তুন্নকারো.
তথাতি মন্ত্ৰান ইদানিনঙ্গো,
যসোধরং পগ্গহিতো ধজং ৰ;
মত্তো জিতোম্হী তি পমত্তবন্ধু,
ন পস্সি ঞাণাসনিপাতমন্তরং.
দিস্ৰান দুক্খানলসম্ভৰংভৰং,
কত্ৰা তদুপ্পাদকনঙ্গভঙ্গং;
যসোধরং পীণপযোধরাধরং,
হিত্ৰা গতো বুদ্ধবলপ্পদং পদং.
অনন্তসত্তানমনন্তকালে,
মনঙ্গহেত্ৰান জিতো অনঙ্গো;
পরাজিতো নূন হি এককস্স,
তথাগতো সো ন পুনাগতো ৰ.
দিস্ৰান ঞাণাসনিপাতমন্তরং,
তথাগতো সো ন পুনাগতো ৰ;
তথাগতো সো ন পুনাগতো ৰ,
দিস্ৰানঞাণাসনিপাতমন্তরং.
তিপাদব্যাসযমকগাথা
তথাগতচ্ছেরমহোসি তস্স,
তথা হিমারোপিতদাহসন্তিং;
তথা হি মারো পি তদাহ সন্তিং,
তথা হি মারোপি তদা হসন্তিং.
পাদব্যাসমহাযমকগাথা
সকামদাতা ৰিনযামনতগূ,
সকামদাতা ৰিনযামনন্তগূ;
সকামদাতা ৰিনযামনন্তগূ,
সকামদাতা ৰিনযামনন্তগূ.
অব্যাপেতাদ্যন্তযমকগাথা
রৰেরৰেরোরভিমারভেরৰে,
রৰেরৰেরিৰ ভেরৰে রৰে;
রৰে রৰে সূদিতগারৰে রৰে,
রৰেরৰেদেসি জিনোরৰে রৰে.
পটিলোমযমকগাথা
লোকাযাততযা কালো ৰিসেসং ন ন সংসেৰি,
ৰিসেসং ন ন সংসেৰি লোকা যাততযা কালো.
রাজরাজযসোপেতৰিসেসং রচিতং মযা,
যামতং চিরসংসেৰিতপেসো যজরাজরা.
একঠানিকাদিযমকগাথা
আকঙ্খক্খাকঙ্খঙ্গ কঙ্খাগঙ্গাখাগহক,
কঙ্খাগাহককঙ্খাঘ হা হা কঙ্খা কহং কহং.
অপ্পগব্ভো অপগব্ভো অমোহো মা পমোহকো,
মগ্গমুখং মোখমাহ মাহা মোহমূহক্খমং.
পাপাপাপভৰং পস্সং পাপাপভৰুগ্গতো,
পাপাপাপভৰাসঙ্গা পাপাপাপভৰাগতো.
কুসলাকুসলং পস্সং কুসলাকুসলং চজি,
কুসলাকুসলাসঙ্গ কুসলাকুসলা চুতো.
অক্খরুত্তরিকযমকগাথা
নোনানিনো ননূনানি ননেনানি ননানিনো,
নুন্নানেনানি নূন ন নাননং নাননেন নো.
সারে সুরাসুরে সারী রসসারসরিস্সরো,
রসসাররসে সারি সুরাসুরসরস্সিরে.
দেৰানং নন্দনো দেৰো দেৰদেৰ ন নন্দি নো,
ৰেদদীনেন ৰেদন ৰেদি ৰেদন ৰেদিনো.
দেৰাসনে নিসিন্নো সো দেৰদেৰো সসাসনে,
নিসিন্নানং সদেৰানং দেসেসি দস্সনাসনং.
পহেল়িগাথা
দসনাৰগতো সঞ্ঞো অন্ধস্স তমদো রৰি,
অট্ঠমাপুণ্ণসঙ্কপ্পো পাত্ৰনঞ্ঞমনঞ্ঞিৰ.
ব্যাপেতাদিযমকগাথা
একন্তমেৰ সপরত্থপরো মহেসি,
একন্তমেৰ দসপারমিতাবলেন;
একন্তমেৰ হতমারবলেন তেন,
একন্তমেৰ সুৰিসুদ্ধমলত্থ বোধিং.
মহাপধানদীপনীগাথা
ওরোহিতোতোহিতপাপধম্মো,
ছন্নেন স ছন্নহযেন গন্ত্ৰা;
অনোমতীরম্হি অনোমসত্তো,
অনোমপব্বজ্জমুপাগতো সো.
নিরামিসং পীতিসুখং অনূপমং,
অনূপিযে অম্বৰনে অলত্থ;
সরূপসোভায ৰিরূপসোভং,
সরাজিকং রাজগহং করিত্থ.
ততো অল়ার ঊদকতাপসানং,
ঝানেনসন্তুট্ঠমনো ৰিহায;
মহাপধানায উরুৰেলভূমিং,
গতো সিখপ্পত্তমকাসি দুক্করং.
ন কামতো নেৰতিদুক্করম্হি,
সব্বঞ্ঞুতা সিজ্ঝতি মজ্ঝিমায;
ঞত্ৰান তং পুব্বগুণোপলদ্ধং,
ধম্মং সমানেতুমগা সুবোধিং.
মারপরাজযদীপনীগাথা
তিবুদ্ধখেত্তম্হি তিসেতছত্তং,
লদ্ধান লোকাধিপতী ভৰেয্য;
গন্ত্ৰান বোধিম্হিপরাজিতাসনে,
যুদ্ধায মারেনচলো নিসীদি.
দত্ৰান মংসং রজ্জং পিতা সুদ্ধোদনো তদা,
নমস্সমানো সিরসা সেতছত্তেন পূজযি.
সযং নারাযনবলো অভিঞ্ঞাবলপারগূ,
জেতুং সব্বস্স লোকস্স বোধিমণ্ডংউপাগমি.
তদা ৰসৰত্তীরাজা ছকামৰচরিস্সরো,
সসেনাৰাহনো বোধিমণ্ডং যুদ্ধাযুপাগমি.
এথ গণ্হথ বন্ধথ ছট্টেথ চেটকং ইমং,
মনুস্সকললে জাতো কিমিহন্তি ন মঞ্ঞতি.
জলন্তং নৰৰিধং ৰস্সং ৰস্সাপেতি অনপ্পকং,
ধূমন্ধকারং কত্ৰান পাতেসি অসিনং বহুং.
চক্কাৰুধং খিপেন্তো পি নাসক্খি কিঞ্চি কাতৰে,
গহেতব্বং হি গহণং অপস্সন্তো ইতিব্রৰি.
সিদ্ধত্থ কস্মা আসি নু আসনে মম সন্তকে,
উট্ঠেহি আসনা নো চে ফালেমি হদযং তৰ.
সপাদমূলে কীল়ন্তং পস্সন্তো তরুণং সুতং,
পিতা ৰুদিক্খি তং মারং মেত্তাযন্তো দযপরো.
তদা সো অসম্ভিৰাচং সীহনাদং নদী মুনি,
ন জানাতি সযং ময্হং দাসভাৰপিযং খল়ো.
যেন কেনচি কম্মেন জাতো দেৰপুরে ৰরে,
সকং গতিং অজানন্তো লোকজেট্ঠোতি মঞ্ঞতি.
অনন্তলোকখাতুম্হি সত্তানং হি কতং সুভং,
ময্হেকপারমিযা পি কলং নগ্ঘতি সোল়সিং.
তিরচ্ছানো সসো হুত্ৰা দিস্ৰা যাচকমাগতং,
পচিত্ৰান সকং মংসং পতিইওগ্গিম্হি দাতৰে.
এৰং অনন্তকালেসু কতং দুক্করকারিকং,
কো হি নাম করেয্যঞ্ঞো অনুম্মত্তো সচেতনো.
এৰং অনন্তপুঞ্ঞেহি সিদ্ধং দেহমিমং পন,
যথাভুতং অজানন্তো মনুস্সোসী তি মঞ্ঞতি.
নাহং মনুস্সোমনুস্সো ন ব্রহ্মা ন চ দেৰতা,
জরামরণং লোকস্স দস্সেতুং পনিধাগতো.
অনুপলিত্তো লোকেন জাতোনন্তজিনো অহং,
বুদ্ধো বোধিতলে হুত্ৰা তারেমি জনতং বহুং.
সমন্তা ধজিনং দিস্ৰা যুদ্ধং মারং সৰাহনং,
যুদ্ধায পচ্চুগচ্ছামি মা মং ঠানা অচাৰযি.
যন্তে তং নপ্পসহতি সেনং লোকো সদেৰকো,
তন্তে পঞ্ঞায গচ্ছামি আমং পত্তং ৰ অস্মনা.
ইচ্ছন্তো সাসপে গব্ভে চঙ্কমামি ইতো চিতো,
ইচ্ছন্তো লোকধাতুম্হি অত্তভাৰেন ছাদযি.
এতে সব্বে গহেত্ৰান চুণ্ণেতুং অচ্ছরাযপি,
অত্থি থামং বলং ময্হং পাণঘাতো ন ৰট্টতি.
ইমস্স গণ্ডুপ্পাদস্স আযুধেন বলেন কিং,
ময্হং হি তেন পাপেন সল্লাপো পি ন যুজ্জতি.
পল্লঙ্কং মম ভাৰায কিমত্থঞ্ঞেন সক্খিনা,
কম্পিতা মদ্দিযা দানা সক্খি হোতি অযং মহী.
ইতি ৰত্ৰা দক্খিণং বাহুং পথৰিযা পণমযি,
তদা কম্পিত্থ পথৰী মহাঘোসো অজাযথ.
পথৰীঘোসেন আকাসে গজ্জন্তো অসনি ফলি,
তস্মিং মজ্ঝে গতো মারো সপরিসো ভযতজ্জিতো.
মহাৰাতসমুদ্ধতভস্মং ৰ ৰিকিরিয্যথ,
মহাঘোসো অজাযিত্থ সিদ্ধতস্স জযো ইতি.
অভিসম্বোধিদীপনীগাথা
পুরতো গচ্ছতি চন্দো রজতচক্কং ৰ অম্বরে,
সহস্সরংসি সুরিযো পচ্ছিমেনুপগচ্ছতি.
মজ্ঝে বোধিদুমচ্ছত্তে পল্লঙ্কে অপ্পরাজিতে,
পল্লঙ্কেন নিসীদিত্ৰা ধম্মং সম্মসতে মুনি.
সক্কো তস্মিং খণে সঙ্খং ধমন্তো অভিধাৰতি,
ব্রহ্মা তিযোজনং ছত্তং ধারেতি মুনিমুদ্ধনি.
মণিতালৰণ্টং তুসীতো সুযামো ৰাল়বীজনিং,
নানামঙ্গলভণ্ডানি গহিতো সেসদেৰতা.
এৰং দসসহস্সম্হি সক্কো ব্রহ্মা চ দেৰতা,
সঙ্খাদীনী ধমন্তা চ চক্কৰাল়ম্হি পূরযুং.
মঙ্গলানি গহেত্ৰান তিট্ঠন্তি কাচি দেৰতা,
ধজমাল গহেত্ৰান তথা পুণ্ণঘটাদযো.
তত্থ নচ্চন্তি গাযন্তি সেল়েন্তি ৰাদযন্তি চ,
দেৰা দসসহস্সম্হি তুট্ঠহট্ঠা পমোদিতা.
ধম্মামতরসস্সাদং লভিস্সামস্স সন্তিকে,
নযনামতরসস্সাদং পাটিহারিযঞ্চ পস্সিতুং.
জারমরণকন্তারা সোকোপাযাসসল্লতো,
মোচেসি কামপাসম্হা দেসেন্তো অমতং পদং.
ইতি তুট্ঠেহি দেৰেহি পূজিযন্তো নরাসভো,
কিঞ্চি পূজং অচিন্তেন্তো চিন্তেন্তো ধম্মমুত্তমং.
সব্বত্থসাধিতো সন্তো সিদ্ধত্থো অপ্পরাজিতো,
চক্কৰাল়সিলাসাণিপাকারেহি মনোরমে.
তারামণিখচিতাকাসৰিতানে চন্দদীপকে,
মানারতমপজ্জোতে মালাগন্ধাদিপূজিতে.
দিব্বেহি ছণভেরীহি ঘুট্ঠে মঙ্গলগীতিযা,
চক্কৰাল়ে সুপ্পাসাদে বোধিমণ্ডমহাতলে.
বোধিরুক্খমণিচ্ছত্তে পল্লঙ্কে অপ্পরাজিতে,
নিস্সিন্নো পঠমে যামে পুরিমং জাতিমনুস্সরি.
নমরূপামনুপ্পত্তি সুদিট্ঠা হোতি তেনিধা,
সক্কাতদিট্ঠি তেনস্স পহীনা হোতি সব্বসো.
ততো হি দুতিযে যামে যথাযম্মুপগে সরি,
সুদিট্ঠং হোতি তেনস্স কম্মক্লেসেহি সম্ভৰং.
কঙ্খাৰিতরণী নাম ঞাণন্তং সমুপাগতং,
তেনসেস পহীযিত্থ কঙ্খা সোল়সধা ঠিতা.
ততো সো ততিযে যামে দ্ৰাদসঙ্গে অসেসতো,
সো পটিচ্চসমুপ্পাদে ঞাণমোতারযী মুনি.
অৰিজ্জৰাদ্যানুলোমেন জরাদিপটিলোমতো,
সম্মসন্তো যথাভূতং ঞাণদস্সনমাগমি.
কপ্পকোটিসতেনাপি অপ্পমেয্যেসু জাতিসু,
লোভং অসেসদানেন ৰিনাসেন্তো পুনপ্পুনং.
সীলেন খন্তিমেত্তায কোখদোসং নিৰারেসি,
পঞ্ঞায মোহং ছেত্ৰান মিচ্ছাদিট্ঠি তথেৰ চ.
গরূপসেৰনাদীহি ৰিচিকিচ্ছং ৰিনোদযং,
মানুদ্ধচ্চং ৰিনোদেন্তো কুলে জেট্ঠোপচাযিনা.
নেক্খম্মেন ৰিনাসেন্তো কামরাগং পুনপ্পুনং,
সচ্চেন ৰিসংৰাদং কোসজ্জং ৰীরিযেন চ.
এৰং দানাদিনা তং তং কিলেসঙ্গং ৰিনোদযং,
সুৰড্ঢিতা মহাপঞ্ঞা কথং সন্তিং ন রূহতি.
সুদুক্করং করিত্ৰান দানাদিপচ্চযং পুরে,
ন কিঞ্চি ভৰসম্পত্তিং পত্থেসি বোধিমুত্তমং.
পণিধানম্হা পট্ঠায কতং পুঞ্ঞঞ্চ পত্থনং,
এক্কত্থ দানি সম্পত্তিং দেতি বোধিং অসংসযং.
ততো সো সব্বসঙ্খারে অনিচ্চদুক্খনত্ততো,
সম্মসন্তোনুলোমেন নিব্বানং সমুপাগমি.
সৰাসনে কিলেসে সো ঝাপেন্তোনুমত্তং পি চ,
অরহত্তপ্পত্তিযা সুদ্ধো বুদ্ধো বোধিতলে অহু.
পত্তো ৰিমেত্তিং ৰরসেতছত্তং,
সো পীতিৰেগেন উদানুদীরযি;
ছেত্ৰান মারে ৰিজিতারিসঙ্ঘো,
তিবুদ্ধখেত্তেকদিৰাকরো অহু.
রাজাধিরাজা ৰরমেৰমাসি,
তিছত্তধারি ৰরধম্মরাজা;
মহাসহস্সং পি চ লোকধাতুং,
সরেন ৰিঞ্ঞাপযিতুং সমত্থো.
বুদ্ধো লোকালোকে লোকে,
জাতো সত্তো কোনুম্মত্তো;
সুদ্ধং বুদ্ধং ওঘা তিণ্ণং,
সদ্ধো পঞ্ঞো কো নো ৰন্দে.
ভজিতং চজিতং পৰনং ভৰনং,
জহিতং গহিতং সমলং অমলং;
সুগতং অগতং সুগতিং অগতিং,
নমিতং অমিতং নমতিং সুমতিং.
ধম্মচক্কপৰত্তনদীপনীগাথা
সম্মাসম্বোধিঞানং হতসকলমলং সুদ্ধতো চাতিসুদ্ধং,
অদ্ধা লদ্ধা সুলদ্ধং ৰতমিতি সততং চিন্তযন্তো সুবোধিং;
সত্তাহং সত্তমেৰং ৰিৰিধফলসুখং ৰিতিনামেসি কালং,
ব্রহ্মেনাযাচিতো সো ইসিপতনৰনে ৰত্তযী ধম্মচক্কং.
পাটিহারিযদীপনীগাথা
ব্রহ্মস্স সদ্দং করৰীকভাণিং,
যথিচ্ছিতং সাৰযিতুং সমত্থং;
সচ্চং পিযং ভূতহিতং ৰদন্তং,
ন পূজযে কো হি নরো সচেতনো.
ইদ্ধি চ আদেসনানুসাসনী,
পাটিহীরে ভগৰা ৰসী অহু;
কত্ৰান অচ্ছেরসুপাটিহীরং,
দেসেসি ধম্মং অনুকম্পিমং পজং.
নৰগুণদীপনীগাথা
এৰং হি বুদ্ধত্তমুপাগতো সো,
দেসেসি ধম্মং সনরামরানং;
নানানযেহীভিসমেসি সত্তে,
তস্মা হি ঝাতো তিভৰেসু নাথো.
অদ্ধা লদ্ধা ধম্মালোকং,
দিট্ঠা পত্তা ঞাতা সচ্চং;
তিঞ্ঞারাগাদোসমোহা,
থোমেসুং তে দেৰা ব্রহ্মা.
মুনিরাজৰরো নররাজৰরো,
দিৰিদেৰৰরো সুচিব্রহ্মৰরো;
সকপাপহরো পরপাপহরো,
সকৰুড্ঢিকরো পরৰুড্ঢিকরো.
সনরামরুব্রহ্মগণেভি রুতা,
অরহাদিগুণা ৰিপুলা ৰিমলা;
নৰধা ৰসুধাগগণে,
সকলে তিদিৰে তিভৰে ৰিসটা.
যে পিস্স তে ভগৰতো চ অচিন্তিযাদী,
সুদ্ধাতিসুদ্ধতরবুদ্ধগুণা হি সব্বে;
সঙ্খেপতো নৰৰিধেসু পদেসু খিত্তা,
ৰক্খামি দানি অরহাদিগুণে অহং পি.
যো চীধ জাতো অরহং নিরাসো,
সম্মাভিসম্বুদ্ধসমন্তচক্খু;
সম্পন্নৰিজ্জাচরণোঘতিণ্ণো,
সম্মাগতো সো সুগতো গতো ৰ.
অৰেদি সো লোকমিমং পরঞ্চ,
অমুত্তরো সারথিদম্মসত্তে;
সদেৰকানং ৰরসত্থুকিচ্চং,
অকাসি বুদ্ধো ভগৰা ৰিসুদ্ধো.
গুণদীপনীগাথা
ন তস্স অদিট্ঠনমিধত্থি কিঞ্চি,
অতো অৰিঞ্ঞাতমজানিতব্বং;
সব্বং অভিঞ্ঞাসি যদত্থি ঞেয্যং,
তথাগতো তেন সমন্তচক্খু.
ইতি মহিতমনন্তাকিত্তিসম্ভারসারং,
সকলদসসহস্সীলোকধাতুম্হি নিচ্চং;
উপচিতসুভহেতুপযুতানন্তকালং,
তদিহ সুগতবোধিসাধুকং চিন্তনীযং;
তক্কব্যাকরণঞ্চ ধম্মৰিনযং সুত্ৰা পি যো পঞ্ঞৰা,
তেনাযং সুচিসারভূতৰচনং ৰিঞ্ঞাযতে কেৰলং;
হেতুঞ্চাপি ফলেন তেন সফলং সম্পস্সমানো ততো বোধিং সদ্দহতেৰ তস্স মহতাৰাযমতো সম্ভৰং.
যো সদ্দহন্তো পন তস্স বোধিং,
ৰুত্তানুসারেন গুণেরহাদী;
কথেতি চিন্তেন্তি চ সো মুহুত্তং,
ওহায পাপানি উপেতি সন্তিং.
সদ্ধেয্যা তে চিন্তেয্যা তে,
ৰন্দেয্যা তে পূজেয্যাতে;
বুদ্ধোলোকালোকে লোকে,
জাতে নেতং পত্থেন্তেন.
পূজানিধানদীপনীগাথা
তসমা হি জাতোৰরকম্হি তস্স,
আযত্তকে মঙ্গলচক্কৰাল়ে;
ভূতেহি ৰত্থূহি মনোরমেহি,
পূজেমি তং পূজিত্পূজিতং পুরে.
সোহং অজ্জ পনেতস্মিং চক্কৰাল়ম্হি পুপ্ফিতে,
থলজে জলজে ৰাপি সুগন্ধে চ অগন্ধকে.
মনুস্সেসু অনেকত্থ তল়াকুয্যানৰাপিসু,
পৰনে হিমৰন্তস্মিং তত্থ সত্ত মহাসরে.
পরিত্তদীপে দ্ৰিসহস্সে মহাদীপে সুপুপ্ফিতে,
সত্তপরিভণ্ডসেলেসু সিনেরুপব্বতুত্তমে.
কুমুদুপ্পলকাদীনি নাগানং ভৰনেসুপি,
পাটলাদীনি পুপ্ফানি অসুরানং হি আলযে.
কোৰিল়ারাদিকানি তু দেৰতানং হি আলযে,
এৰমাদী অনেকত্থ পুপ্ফিতে ধরণীরুহে.
চম্পকা সললা নিম্বা নাগপুন্নাগকেতকা,
ৰস্সিকা মল্লিকা সালা কোৰিল়ারা চ পাটলি.
ইন্দীৰরা অসোকা চ কণিকারা চ মকুলা,
পদুমা পুণ্ডরিকা চ সোগন্ধিকুমুদুপ্পলা.
এতে চঞ্ঞে চ রুক্খা চ ৰল্লিযো চাপি পুপ্ফিতা,
সুগন্ধা সুখসম্ফস্সা নানাৰণ্ণনিভা সুভা.
ৰিচিত্রা নীলানেকানি পীতা লোহিতকানি চ,
কাল়া সেতা চ মঞ্জট্ঠ নেকৰণ্ণা সুপুপ্ফিতা.
সোভতে পব্বতে হেট্ঠা সরেহি ৰনরাজিহি,
সন্দমানাহি গঙ্গাহি হিমৰা রতনাকরো.
পত্তকিঞ্জক্খরেণূহি ওকিণ্ণং হোতি তং ৰনং,
ভমরা পুপ্ফগন্ধেহি সমন্তা অভিনাদিতা.
অথেত্ত সকুণা সন্তি দিজা মঞ্জুস্সরা সুভা,
কূজন্তমুপকূজন্তি উতুসম্পুপ্ফিতে দুমে.
নিচ্ছরানং নিপাতেন পব্বতা অভিনাদিতা,
পঞ্চঙ্গিকানি তূরিযানি দিব্বানি ৰিয সুয্যরে.
তত্থ নচ্চন্তি তস্মিং জলন্তগ্গিসিখূপমা,
তস্মিং হি কিন্নরা কিচ্চং পদীপেন করীযতি.
মুত্তাজালাৰ দিস্সন্তি নিচ্ছরানং হি পাতকা,
পজ্জলন্তা ৰ তিট্ঠন্তি মণিৰেল়ুরিযাদযো.
কাল়ানুসারি তগ্গরং কপ্পূরং হরিচন্দনং,
সকুণানং হি সদ্দেন মযূরানং হি কেকযা.
ভমরানং হি নিন্নাদা কোঞ্চনাদেন হত্থিনং,
ৰিজম্ভিতেন ৰাল়ানং কিন্নরানং হি গীতিযা;
পব্বতানং হি ওভাসা মণীনং জোতিযাপি চ,
ৰিচিত্রব্ভৰিতানেহি দুমানং পুপ্ফধূপিযা;
এৰং সব্বঙ্গসম্পন্নং কিং সিযা নন্দনং ৰনং.
এৰং সুসম্ফুল্লৰনং হি যং যং,
তহিং তহিং পুপ্ফিতপুপ্ফিতং সুভং;
মালং সুসদ্দঞ্চ মনুঞ্ঞগন্ধং,
পূজেমি তং পূজিতপূজিতং পুরা.
নাগলোকে মনুস্সে চ দেৰে ব্রহ্মে চ যং সিযা,
সামুদ্দিকং ভূমিগতং আকাসট্ঠঞ্চ যং ধমং.
রজতং জাতরূপঞ্চ মুত্তা ৰেল়ুরিযা মণি,
মসারগল্লং ফলিকং লোহিতঙ্গং পৰাল়কং.
যো সো অনন্তকপ্পেসু পূরেত্ৰা দসপারমী,
বুদ্ধো বোধেসি সত্তানং তস্স পূজেমি তং ধনং.
খোমং কোসেয্যং কপ্পাসং সাণং ভঙ্গঞ্চ কম্বলং,
দুকূলানি চ দিব্বানি দুস্সানি ৰিৰিধানি তে.
অনন্তৰত্থদানেন হিরোত্তপ্পাদিসংৰরং,
যস্স সিদ্ধং সিযা তস্স দুস্সানি পুজযামহং.
পৰনে জাতরুক্খানং নানাফলরসুত্তমং,
অম্বা কপিট্ঠা পন্সা চোচমোচাদিনপ্পকা.
তস্মিং গন্ধরসং ওজং বুদ্ধসেট্ঠস্স পূজিতং,
ৰন্দামি সিরসা নিচ্চং ৰিপ্পসন্নেন চেতসা.
পূজেমি পঠমং তস্স পণিধানং অচিন্তিযং,
চক্কৰাল়ম্হি সব্বেহি ৰিজ্জমানেহি ৰত্থুহি.
দসন্নং পারমীনন্তু পূরিতট্ঠানমুত্তমং,
ততো সালৰনে রম্মে জাতট্ঠানং চরিমকং.
ছব্বসানি পধানস্মিং করণং দুক্করকারিকং,
অপ্পরাজিতপল্লঙ্কং বুদ্ধং বুদ্ধগুণং নমে.
চুদ্দস বুদ্ধঞাণানি অট্ঠর্স আৰেণিকং,
পূজেমি দসবলঞাণং চতুৰেসারজ্জমুত্তমং.
আসযানুসযঞাণং ইন্দ্রিযানং পরোপরং,
যমকপাটিহীরঞ্চ ঞাণং সব্বঞ্ঞুতং পি চ.
মহাকরুণাপত্তিঞাণং অনাৰরণ্মিতি চ,
ছ অসাধারণানেতে ঞত্ৰান পূজযামহং.
ততো চ সত্তসত্তাহে ধম্মসম্মসিতং নমে,
ব্রহ্মুনা যাচিতট্ঠানং ধম্মং দেসযিতুং ৰরং.
ইসিপতনে মিগদাযে ধম্মচক্কপৰত্তনং,
ততো ৰেল়ুৰনারামে ৰসিতঠানঞ্চ পূজযে.
ততো জেতৰনং রম্মং চিরৰুত্থং মহেসিনা,
অসাধারণমঞ্ঞেসং যমকপাটিহরিযং.
পারিচ্ছত্তকমূলম্হি অভিধম্মঞ্চ দেসনং,
সঙ্কস্সনগরদ্ৰারে দেৰোরোহণকং পি চ.
ততো চ হিমৰন্তস্মিং মহাসমযদেসনং,
ৰুত্তানেতানি ঠানানি নত্ৰান পুজযামহং.
চতুরাসীতিসহস্সেহি ধম্মক্খন্ধেহি সঙ্গহং,
পিটকত্তযং যথাৰুত্তৰিধিনা পূজযামহং.
মারস্স অত্তনো আযুসঙ্খারোসজ্জনং নমে,
কুসিনারায মল্লানং যমকসালমন্তরে.
পণিধানম্হি পট্ঠায কতং কিচ্চং অসেসতো,
নিট্ঠপেত্ৰান সো সব্বং পরিনিব্বাযিনাসৰো.
এৰং নিব্বাযমানস্স কতকিচ্চস্স তাদিনো,
চিরগতা মহাকরুণা ন নিব্বাযিত্থ কিঞ্চিপি.
স্ৰাযং ধম্মো ৰিনযো চ দেসিতো সাধুকং মযা,
মমচ্চযেন সো সত্থা ধাতু চাপি সরীরজা.
অপ্পরাজিতপল্লঙ্কং বোধিরুক্খঞ্চ উত্তমং,
মমচ্চযেন সত্থা তি অনুজানি মহামুনি.
মম ঠনে ঠপেত্ৰান ধাতুবোধিঞ্চ পূজিতং,
অনুজানামি তুম্হাকং সাধনত্থং সিৰঞ্জসং.
তস্মা হি তস্স সদ্ধম্মং উগ্গণ্হিত্ৰা যথাতথং,
যো দেসেতি সম্বুদ্ধো তি নত্ৰান পূজযামহং.
তস্মা সাসপমত্তং পি জিনধাতুং অসেসিয,
ৰিত্থিন্নচক্কৰাল়ম্হি নত্ৰান পূজযামহং.
পরম্পরাভতানং হি ইমম্হা বোদ্ধিরুক্খতো,
সব্বেসং বোধিরুক্খানং নত্ৰান পূজযামহং.
যং যং পরিভুঞ্জি ভগৰা পত্তচীৰরমাদিকং,
সব্বং পরিভোগধাতুং নত্ৰান পূজযামহং.
যত্থ কত্থচি সযিতো আসিন্নো চঙ্কমেপি ৰা,
পাদলঞ্ছন্কং কত্ৰা ঠিতো নত্ৰান পূজযে.
ন সঞ্জানন্তি যে বুদ্ধং এৰরূপো তি ঞাত্ৰে,
কতং তং পটিমং সব্বং নত্ৰান পূজযামহং.
এৰং বুদ্ধঞ্চ ধম্মঞ্চ সঙ্ঘঞ্চ অনুত্তরং,
চক্কৰাল়ম্হি সব্বেহি ৰত্থূহি পূজযামহং.
পত্থনাদীপনীগাথা
অস্মিং চ পুব্বেপি চ অত্তভাৰে,
সব্বেহি পুঞ্ঞেহি মযা কতেহি;
পূজাৰিধানেহি চ সঞ্ঞমেহি,
ভৰে ভৰে পেমনিযো ভৰেয্যং.
সদ্ধা হিরোত্তপ্পবহুস্সুতত্তং,
পরক্কমো চেৰ সতিস্সমাধি;
নিব্বেধভাগী ৰজিরূপমাতি,
পঞ্ঞা চ মে সিজ্ঝতু যাৰ বোধিং.
রাগঞ্চ দোসঞ্চ পহায মোহং,
দিট্ঠিঞ্চ মানং ৰিচিকিচ্ছিতঞ্চ;
মচ্ছেরেইস্সামলৰিপ্পহীনো,
অনুদ্ধতো অচ্চপলো ভৰেয্যং.
ভৰেয্যহং কেনচি নপ্পসেয্হো,
ভোগো চ দিন্নেহি পটেহি;
ভোগো চ কাযো চ মমেস লদ্ধো,
পরূপকারায ভৰেয্যং নূন.
ধম্মেনা মালাপিতরো ভরেয্যং,
ৰুড্ঢপচাযী চ বহূপকারী;
ঞাতীসু মিত্তেসু সপত্তকেসু,
ৰুড্ঢিং করেয্যং হিতমত্তনো চ.
মেত্তেয্যনাথং উপসঙ্কমিত্ৰা,
তস্সত্তভাৰং অভিপূজযিত্ৰা;
লদ্ধান ৰেয্যাকরণং অনূনং,
বুদ্ধো অযং হেস্সতিনাগতেসু.
লোকেন কেনাপি অনুপলিত্তো,
দানে রতো সীলগুণে সুসাণ্ঠিতো;
নেক্খম্মভাগি ৰরঞাণলাভী,
ভৰেয্যহং থামবলুপপন্নো.
সীসং সমংসমং মম হত্থপাদে,
সংছিনদমানেপি করেয্যখন্তিং;
সচ্চে ঠিতো কালুমধিট্ঠিতে ৰ,
মেত্তাযুপেক্খায যুতো ভৰেয্যং.
মহাপরিচ্চাগং কত্ৰা পঞ্চ,
সম্বোধিমগ্গং অৰিরাধযন্তো;
ছেত্ৰা কিলেসে চিতপঞ্চমারো,
বুদ্ধো ভৰিস্সামি অনাগতেসু.