📜

নমো তস্স ভগৰতো অরহতো সম্মাসম্বুদ্ধস্স

পজ্জমধু

আনন্দ রঞ্ঞ রতনাদি মহা যতিন্দ,

নিচ্চপ্পবুদ্ধ পদুমপ্পিয সেৰিনঙ্গী;

বুদ্ধপ্পিযেন ঘন বুদ্ধ গুণপ্পিযেন,

থেরালিনা রচিত পজ্জমধুং পিবন্তু.

১.

উণ্ণাপপুণ্ণসসিমণ্দলতো গলিত্ৰা,

পাদম্বুজঙ্গুলি দলট্ঠ সুধা লৰানং;

পন্তীৰ সত্থু নখপন্তি পজাৰিসেসং,

পীণেতু সুদ্ধ সুখিতম্মণ তুণ্ডপীতা.

২.

খিত্তায মাররিপুনা পরিৰত্য সত্থু,

পাদস্সযা জিত দিসায সিতত্তলায;

যা জেতি কঞ্চন সরাৰলিযা সিরিং সা,

দেতন্গিনং রণজযঙ্গুলিপন্তিকন্তা.

৩.

সোৰণ্ণ ৰণ্ণ সুখুমচ্ছৰি সোম্ম কুম্ম,

পিট্ঠীৰ পিট্ঠি কমতুন্নতি ভাতি যেসং;

তেসুপ্পতিট্ঠিতসুকোমলদীঘপণ্হি,

পাদা জিনস্স পদদন্তু পদং জনস্স.

৪.

অচ্ছের পঙ্কজসিরং সিরিযা সকায,

যে মদ্দিনো ৰিয চরন্তি সরোজ সীসে;

সঞ্চুম্বিতা ৰিয চ তানি পরাগ রাগা,

তে নীরজা মুনিপদা পদদন্তু লক্খিং.

৫.

অগামি কাল জন মঙ্গল ভত্তু ভাৰং,

ৰ্যাকত্তুমত্র কুসলেনিৰ নিম্মিতানি;

যাত্রাসুমট্ঠসতমঙ্গলক্খণানি,

সাধেতু নং পদযুগং জযমঙ্গলানি.

৬.

সস্সেৰিজন্তুৰরসন্তিপুরপ্পৰেসে,

নিচ্চং সুসজ্জ ঠপিতানিৰ মঙ্গলায;

যে তে দধন্তি কলমঙ্গললক্খণানি,

ৰত্তন্তু তে জিনপদা জযমঙ্গলায.

৭.

সব্বেভিভূয সপদেসু নিপাতনস্স,

সঞ্ঞাণকং ৰিয যদস্সিতসব্বলোকো;

পাদাত্যধোকততিলোকসিরোৰরা পি,

লোকং পুণন্তু জযমঙ্গলকারণানি.

৮.

লোকত্তযেকসরণত্তৰিভাৰনায,

সজ্জো ৰ তিট্ঠতি যহিং সুৰিভত্তলোকো;

তং সব্বলোকপটিবিম্বিতদপ্পণাভং,

পাদদ্ৰযং জনসুসজ্জনহেতু হোতু.

৯.

লোকুত্তরায সিরিযাধিগমায সুট্ঠু,

রজন্তি যত্থ দিগুণানিৰ পাতু ভূতা;

চক্কাসনাভিসহনেমিসহস্সরানি,

ত্যঙ্ঘী দিসন্তু সকলিস্সরিযং জনস্স.

১০.

যত্রুল্লসন্তি দুৰিধানিৰ পাতূ ভূতা,

ধম্মস্সসব্বভুৰনস্স চ ইস্সরত্তে;

চক্কানি চক্কসদিসানি সুদস্সনস্স,

তানজ্জ জন্তু সরণা চরণানি হোন্তু.

১১.

সত্তেসু ৰচ্ছতু সিরী সিরিৰচ্ছকেন,

সোৰত্থি সোত্থিমনুতিট্ঠতু পুগ্গলেসু;

নন্দিং জনানমনুৰত্ততু নন্দিৰত্তী,

সীসানলংকুরুতু পাদৰতংসকো পি.

১২.

ভদ্দায পীঠমুপগচ্ছতু ভদ্দপীঠং,

ৰুদ্ধিং জনানমনুৰত্ততু ৰদ্ধমানং;

পুণ্ণত্তমঙ্গিমনুকুব্বতু পুণ্ণকুম্ভো,

পাতি চ পাতু সততং জনতং অপাযা.

১৩.

সেতাতপত্তমপনেতমঘাতপে তং,

খগ্গো ৰিছিন্দতু সদা দুরিতারিৰগ্গে;

সংক্লেসদাহমপনেতু সতালৰণ্ট,

সংৰীজনী কুমতিমক্খিকমোরহত্থো.

১৪.

আকড্ঢনো জনৰিলোচনমত্তনিন্নং,

ৰারেতু সব্বগতিৰারনমঙ্কুসো সো;

পাদম্বুজস্সিরিৰিলাসনিকেতনং ৰ,

পাসাদলখণমুপেতু মনোপসাদং.

১৫.

পাণীনমত্তভজতং ৰরপুণ্ণপত্তং,

সম্মা দদাতু পদনিস্সিতপুণ্ণপত্তো;

পাদেসু জন্তু মনবন্ধনদামভূতং,

দামং দমেতু ৰিমলং জনতম্মনানি.

১৬.

উণ্হীসকুপ্পলমণীপদুমেহি পাদা,

সস্সেৰিজন্তুকরণানি ৰিভূসযন্তু;

সন্নেত্তনাৰুপগতানমনগ্ঘকানি,

বোজ্ঝঙ্গসত্তরতনানি দদে সমুদ্দো.

১৭.

উত্তুঙ্গ নিচ্চলগুঙা জিততায নিচ্চং,

সেৰীৰ পাদসিরি নিচ্চ সমুব্বহং ৰ;

অত্রাপি সক্কভৰনুব্বহণে নিযুত্তো,

পাদট্ঠমেরু ভৰতং ভৰতং ৰিভূত্যা.

১৮.

সো চক্কৰাল়সিখরী প্যৰতং সমন্তা,

সব্বূপসগ্গৰিসরাজনতং সমগ্গং;

দীপা পুথূপি চতুরো দ্ৰিসহস্স খুদ্দা,

ধারেন্ত্ৰপাযপতমানমদত্ৰ জন্তুং.

১৯.

সূরো পবোধযতু জন্তু সরোরুহানি,

চন্দো পসাদ কুমুদানি মনোদহেসু;

নক্খত্তজাতমখিলং সুভতায হোতু,

চক্কং ধজং রিপুজযায জযদ্ধজায.

২০.

জেতুং সসংসদ-সুদস্সন-চক্কৰত্তি,

চক্কানুগন্তললিতং যহিমাৰহেয্য;

চক্কাণুৰত্তি পরিসাৰত-চক্কৰত্তি,

নংৰত্ততং পদযুগং জনতা হিতায.

২১.

পুজেতুমাগত ৰতা ৰজিরাসনট্ঠ,

মিন্দেন ছড্ডিত মহাৰিজযুত্তরাখ্যং;

সংখং পৰিট্ঠমিৰ মারভযা পদাধো,

পাদট্ঠসংখমিহ ৰত্ততু সন্তিযা ৰো.

২২.

সোৰণ্ণমচ্ছযুগলং সিৰভত্ত ভোগে,

ইচ্ছা বহূপকরণং ভৰতং জনানং;

কুম্ভীলধিগ্গহিততো ৰ পদুত্থচিত্তা,

পাদম্বুজাকর ৰিগাহি তু নোপহোন্তু.

২৩.

সত্তাপগা জনমনোজ মলে জহন্তু,

সংক্লেসদাহমপনেন্তু দহা চ সত্ত;

সেলা চ সত্ত ৰিদধন্তু জনস্স তানং,

লোকপ্পসিদ্ধিজননে ভৰতং পতাকা.

২৪.

পাটঙ্কি সন্তি গমনে ভৰতূপকারা,

দাহেত্তনেসু জহতং পদচামরং তং;

সল্লোকলোচনমহুস্সৰ-উস্সিতং ৰ,

ৰত্তেয্য তোরণমনুত্তরমঙ্গলায.

২৫.

যস্মিং মিগিন্দ গত ভীতি বলাৰ দড্ঢ,

দানা নতা সিরৰিদারণ পীল়িতাৰ;

নালাগিরী করিৰরো গিরিমেখলো চ,

তং সীহৰিক্কমপদং হনতা ঘদন্তিং.

২৬.

পাপাহিনো হনতু পাদসুৰণ্ণরাজা,

ৰ্যগ্ঘাধিপো কলিজনে অদতং অসেসং;

ৰালাহ-অস্সপতি সম্পতিতুং অদত্ৰা,

পাযেসু পাপযতু সন্তিপুরম্পজাযো.

২৭.

ছদ্দন্ত দন্তি ললিতং গলিতং রুসম্হা,

লুদ্দেত্ত দুব্ভিনি দিসে অচলং দধানো;

পাদট্ঠহত্থিপতি সম্পতি জন্তুতাসে,

তাসেতু হাসমপরন্দিসতং সতানং.

২৮.

সব্বঙ্গিনো চরণুপোসথ হত্থিরাজা,

পাপেতু সব্বচতুদীপিকরজ্জলক্খিং;

কিত্তীৰ পাদপরিচারিকতা নিযুত্তা,

কেলসসেলপটিমা হিতমাচরেয্য.

২৯.

সামিস্স হংসসমযে দহপাসবদ্ধ,

মাসীন ৰেসগমকো ৰিয পাদহংসো;

নিগ্ঘোস গন্তিজিততো ৰিয মূগপক্খো,

যারেতু সব্ব জনতা ভৰগন্তুকত্তং.

৩০.

ওহায দিব্বসরসিং খিললোক সব্ব,

রম্মঙ্ঘিৰাপিমৰগাহিতৰাৰ পাদে;

এরাৰণো করিৰরো মনসাভিরুল়্হে,

জন্তুং পুরিন্দদপুরং নযতং ৰ সীঘং.

৩১.

হিত্ৰা সকম্ভৰনমঙ্ঘিনিসেৰনত্থ,

মাগম্ম রম্ম তরতাযিহ নিস্সিতো ৰ;

পালেত্ৰ মূনি পদৰাপিতরঙ্গভঙ্গি,

মন্গী করোন্ততনুৰাসুকি নাগরাজা.

৩২.

নাথস্স কঞ্চনসিখাৰলজাতিলীল,

মাৰিকরং ৰ পদনিস্সিতমোররাজা;

তং ধম্মদেসনরৰেনিৰ লুদ্দকস্স,

লোকস্স পাপফণিনো হনতং অসেসং.

৩৩.

সংসারসাগরগতে সধনে জনে তে,

নেতম্পদে কলচতুম্মুখহেমনাৰা;

নিব্বাণপট্টনৰরং ভরুকচ্ছকন্তং,

সুপ্পারপণ্ডিত গতা ৰিয আসুনাৰা.

৩৪.

সম্বোধি ঞাণ পরিপাচযতো মুনিস্স,

ভত্তো যথা হিমৰতদ্দি সমাধিহেতু;

এৰম্মনেন ভজতং হিমৰদ্দিপাদে,

সম্বোধিঞাণ পরিপাচনহেতু হোতু.

৩৫.

দল়্হং পরাজিততযা মুনিনা সরেন,

সুঞ্ঞস্সরোপগত পঞ্জর বন্ধনোৰ;

সো পাদপঞ্জরগতো করৰীকপক্খী,

সব্বেসমপ্পীযাৰচঞ্জহতা ভৰন্তং.

৩৬.

তে চক্কৰাক মকরা অপি কোঞ্চ জীৰং,

জীৰাদি পক্খিৰিসরা সরসীৰ ভুত্তং;

ৰেস্সন্তরেন চরণম্বুজি নিব্ভজন্তা,

জন্তু তহিং ৰিয পদে সুরমেন্তু নিচ্চং.

৩৭.

তং চন্দকিন্নরগতিংৰ গতস্স বোধি,

সত্তস্স তস্স সপজাপতিকস্স ভাৰং;

সংসূচযন্ত পদ কিন্নর কিন্নরী ৰে,

সামগ্গিমগ্গ পটি পত্তিসু পাপযন্তু.

৩৮.

সংরাজধানিমুসভো ৰহতগ্গ ভারং,

পীতিপ্পযো পজনযেয্য সৰচ্ছধেনু;

সস্সেৰিনো অভিরমেন্তু ছকামসগ্গা,

ধারেন্তু ঝাযিমিহ সোল়স ধাতুধামা.

৩৯.

সুত্ৰা জিনস্স করৰীক সরম্মনুঞ্ঞং,

অঞ্ঞোঞ্ঞ ভীতিরহিতা অপি পচ্চনীকা;

হিত্ৰা গতিং ৰিয ঠিতা পদসত্তরূপা,

সব্বং ভৰস্সিত জনানগতিং হনন্তু.

৪০.

সোৰণ্ণ কাহল় যুগো পমমিন্দিরায,

সন্নীরপুপ্ফ মুকুলোপমমুস্সৰায;

নিচ্চং সুসজ্জ ঠপিতং মুনি তিট্ঠতন্তে,

জঙ্ঘাদ্ৰযং জনৰিলোচন মঙ্গলায.

৪১.

লখ্যা ৰিলাস মুকুরদ্ৰয সন্নিকাসং,

তাডঙ্ক মণ্ডন ৰিডম্বকমংসু সণ্ডং;

জানুদ্ৰযং লল়িত সাগর বুব্বলাভং,

হোতং জগত্তয নিজত্ত ৰিভূসিতুন্তে.

৪২.

ছদ্দন্তি দিন্ন ৰরদন্ত যুগোপমানা,

তং হত্থি সোণ্ড কম পুণ্ণ গুণা তৰোরূ;

লীল পযোধি সিরি কেল়ি সুৰণ্ণরম্ভা,

খন্ধাৰ দেন্তু পরিপুণ্ণ গুনে জনানাং.

৪৩.

জঙ্ঘক্খ কদ্ৰ্য সমপ্পিত চিত্তপাদ,

চক্কদ্ৰযী মনমনোজহযো মুনে তে;

সোনী রথো সিরিৰহো মনসা ভিরুল়্হং,

লোকত্তযং সিৰপুরং লহু পাপযাতু.

৪৪.

রম্মোর পাকট তটাক তটা সৰন্ত,

রোমাৰলী জল পনালিক কোটিকট্ঠা;

নাভী গভীর সরসী সিরি কেল়িতা তে,

সস্সেৰিনং ৰ্যসন ঘম্মমলং সমেতু.

৪৫.

কন্তিচ্ছটা লুল়িত রূপ পযোধি নাভি,

আৰট্ট ৰট্টিত নিমুজ্জিত সব্বলোকো;

সোভগ্গ তোয নিৰহং ৰিসসো পিৰিত্ৰা,

লোকুত্তরাদি সুখ মুচ্ছিততং পযাতু.

৪৬.

গম্ভীর চিত্তরহদং পরিপূরযিত্ৰা,

তং সন্দমান করুণম্বু পৰাহ তুল্যা;

রোমালিৰল্লিহরি নাভি সুভালৰালা,

দেতং লহুং সিৰফলং ভজতং মুনে তে.

৪৭.

চারূর সারিফলকো কুটিলগ্গ লোম,

পন্তী ৰিভত্তি সহিতো সিরি কেল়ি সজ্জো;

সগ্গাপৰগ্গ সুখ জূতক কেল়ি হেতু,

হোতং তিলোক সুখ জূতক সোণ্ডকানং.

৪৮.

গম্ভীর চিত্ত রহদো দর গাহমান,

মেত্তাদযা করি ৰধূ কর সন্নি কাসা;

সব্বঙ্গিনং সিৰফলং তনু দেৰ রুক্খে,

সাখা সখা তৰ ভুজা ভজতং দদন্তু.

৪৯.

নিহার বিন্দু সহিতগ্গদলোপ সোভি,

ব্যালম্ব রত্ত পদুমদ্ৰয ভঙ্গি ভাজা;

পাপারিসীসলুনতেনিৰ রত্ত রত্তা,

রত্তা করা তৰ ভৰুম্ভুৰি মঙ্গলায.

৫০.

রুপস্সিরী চরিত চঙ্কম ৰিব্ভমা তে,

পিট্ঠী যথা কলল মুদ্ধনি সেতু ভূতা;

এৰং ভৰণ্ণৰ সমুত্তরণায সেতু,

হোতম্মহাকনক সংকম সন্নিকাসা.

৫১.

সদ্ধম্ম দেসন মনোহর ভেরিনাদ,

সংচারণে সিৰপুরং ৰিসিতুং জনানং;

গীৰা সুৰণ্ণময চারু মুতিঙ্গ ভেরি,

ভাৰম্ভজা ভৰতু ভূত ৰিভূতিযা তে.

৫২.

লখী নিৰাস ৰদনম্বুজ মত্ত নিন্ন,

মাকড্ঢযং জন ৰিলোচন চঞ্চরীকে;

সোরব্ভ ধম্ম মকরন্দ নিসন্দমানং,

পিণেতু তেন সরসেন সভা জনে তে.

৫৩.

লখী সমারুহিত ৰত্তরথে রথঙ্গ,

দ্ৰন্দানু কারি মিগ রাজ কপোল লীলং;

তাদঙ্ক মণ্ডলযুগং ৰিয কণ্ণভাজং,

গণ্ডত্থলদ্ৰ্যমলংকুরুতং জনত্তে.

৫৪.

লাৰণ্ণ মণ্ণৰ পৰাল় লতা দ্ৰযাভং,

তন্দেহ দেৰ তরু পল্লৰ কন্তে মন্তং;

ৰত্তারৰিন্দ মকরন্দ পরাজিসোভং,

রত্তাধরদ্ৰযমধো কুরুতং জনাঘং.

৫৫.

উণ্ণা সকুন্তিগত মত্থক নত্থু কূপ,

সুব্ভূ লকার সহিতোট্ঠ পৰাল় নাৰা;

গত্তুত্তররণ্ণৰ গতা তৰ জন্তুকানং,

হোতং ভৰণ্ণৰ সমুত্তরনয নাথ.

৫৬.

ইসং ৰিকাস পদুমোদর কেসরালি,

লীলা ৰিনদ্ধ রুচিরা তৰ দন্ত পন্তি;

ৰানী ৰধূ ধরিত মালতি মাল্য তুল্যা,

তস্সং জানস্স মনরঞ্জন মাচরেয্য.

৫৭.

সদ্ধম্ম নিজ্ঝর সুরত্ত সিলাতলাভা,

জিৰ্হা ৰচী নট ৰধূ কল রঙ্গ ভূতা;

সদ্ধম্ম সেট্ঠ তরণী নিহিতপ্পিযা তে,

সংসার সাগর সমুত্তরণায হোতু.

৫৮.

দন্তংসু কঞ্চুকীত রত্তধরো পধানে,

জিৰ্হা সুরত্ত সযনে মুখ মন্দিরট্ঠে;

আমোক্খ মুত্তি ৰধুযা সযিতায তুয্হং,

কুব্বন্তু সংগম মলং জন সোতু কামি.

৫৯.

উণ্ণা তথাভিনৰ পত্ত ৰরাভি রামা,

লীলোল্লসন্ত ভমুকদ্ৰয নীল পত্তা;

ঘানোরু চারু কদলী ৰদনা লৰালা,

তুয্হং পৰত্ততু চিরং জন মঙ্গলায.

৬০.

বালত্থলী হরি সিলাতল পিট্ঠিকট্ঠ,

ভূৰল্লরিদ্ৰয মযূর যুগস্স তুয্হং;

পঞ্চপ্পভা রুচির পিচ্ছ যুগস্সিরীকং,

নেত্তদ্ৰযং মনসি পুঞ্ছতু পাপধূলিং.

৬১.

ইন্দীৰরান্তগত ভিঙ্গিক পন্তি ভঙ্গি,

পঞম্বুজস্সরততে ৰিয গচ্ছপন্তী;

নেত্তম্বুজস্সিরি তিরোকরণীৰ তুয্হং,

পম্হাৰলী সিরিগতেহ তিরো করোন্তু.

৬২.

ৰত্তুল্লসম্বুজ ৰিলোচন হংস তুণ্ড,

কঞ্জংসু পিঞ্জর মুলাল লতা দ্ৰ্যাভং;

দোলাদ্ৰযংৰ সৰণদ্ৰ্যমত্ত লক্খ্যা,

হোতং তৰজ্জ জনতা মতিচারহেতু.

৬৩.

ৰম্মীক মত্থক সযানক ভূরিদত্ত,

ভোগিন্দ ভোগৰলি ৰিব্ভমমা ৰহন্তি;

ঘানোপরিট্ঠিতমুনে তৰ তুণ্ণমুণ্ণা,

তগ্গাহিনো ৰিয জনস্স দদাতু ৰিত্তং.

৬৪.

রূপিন্দিরায ৰিজযে খিল লোক রূপং,

ঘাণোরু চারু পরিঘোপরি বদ্ধ সিদ্ধা;

নীলাভ ৰাত ৰিলুথন্ত ৰযদ্ধজাভা,

তিট্ঠন্তু সজ্জ দুরিতারি জযায তে ভূ.

৬৫.

উণ্ণস্সিতোপল নিৰেসিত বুন্দ সন্ধি,

ঘাণোরু পিণ্ডকমঘা তপ রুন্ধিতুন্তে;

হোতম্মুখম্বুজ সিরী সিরসুস্সিতাভং,

ভূ নীল পট্টিক ললাত সুৰণ্ণ ছত্তং.

৬৬.

রুপঙ্ক ৰেদন ৰিলোচন বান দিট্ঠী,

ধারা নিসান মণিৰট্ট সিরী সিরো তে;

সিদ্ধা মতোসধ কতঞ্জন পুঞ্জ লক্খী,

হোতং জনস্স নযনাময নাসনায.

৬৭.

সক্খন্ধ বাহুযুগ তোরন মজ্ঝ গীৰা,

ধরপ্পিতস্সিরিঘতো পরি মুস্সৰায;

নীলুপ্পলাৰ ঠপিতা সৰিভত্তি কন্তে,

কেসা ভৰন্তু ভুৰনত্তয মঙ্গলায.

৬৮.

হেমগ্ঘিযে ঠপিত নীল সিলা কপালে,

পজ্জোত জাল ললিতং মুনি সারযন্তী;

রূপস্সিরী সিরসি ভূসিত হেম মালা,

কারা করোতু সুভগং তৰ কেতু মালা.

৬৯.

ভ্যামপ্পভালি তৰ কঞ্চন মোর কালে,

সুরোদযে ৰিতত চন্দক চক্কলক্খী;

মেঘাৰনদ্ধ সিখরুন্নত হেম সেলা,

যন্তিন্দচাপ ৰিকতীৰ দদাতু সোভং.

৭০.

পট্ঠায তে পণিধিতো সুচি দান সীল,

নেক্খম্ম পঞ্ঞ ৰিরিযক্খম সচ্চধিট্ঠা;

মেত্তা উপেক্খিতি ইমে দস পূরতোৰ,

পূরেন্তু পারমি গুণা জনতানমত্তে.

৭১.

পত্তুত্তরুত্তরদসা পণিধান বীজা,

চেতোরধরায করুণা জল সেখ ৰুদ্ধা;

সব্বঞ্ঞু ঞাণ ফলদা সতি ৰাট গুত্তা,

তং সম্ফলন্দিসতু পারমিতা লতা তে.

৭২.

আবোধি পুণ্ণমি পদিট্ঠ দিনাদিতো তে,

সম্ভার কাল সিত পক্খ কমাভি ৰুদ্ধো;

সম্পুণ্ণ পারমি গুণামতরংসি তংৰ,

সব্বঙ্গি কুন্দ কুমুদানি পবোধযেয্য.

৭৩.

আপচ্ছিমব্ভৰ সিৰপ্ফল লাভ দানা,

দানপ্পবন্ধমপিদান ফলপ্পভন্দং;

সংৰড্ঢযি ত্ৰং অভিপত্থনতো যথেৰং,

জন্তুত্তরুত্তর ফলং খলু সম্ভুনন্তু.

৭৪.

আরম্ভতোপ্পভুতি যাৰ তৰগ্গমগ্গা,

ৰিক্খালিত ঘকলুসং সুচি সীল তোযং;

মেত্তা দযা মধুর সীতলতাযুপেতং,

সোধেতু ত্ৰংৰ ভৰ নিস্সিত জন্তু মেতং.

৭৫.

আপচ্চিমত্তমভিনিক্খমনাভিযোগা,

পট্ঠায তম্পভৰতো পরিপুণ্ণ গেহা;

ত্ৰং সব্ব জাতি গহতো অপি নিক্খমিত্থো,

এৰং জনা ভৰ দুখা খলু নিক্খমন্তু.

৭৬.

একগ্গতো পল তলে নিসিতা চিরন্ধি,

ধারা সুচিত্তু সুতলে সতি দণ্ড বদ্ধে;

নিব্বিজ্ঝি লক্খণ ধনুট্ঠিতি সন্তি লক্খং,

খিত্তা তযোনমনু ৰিজ্ঝতু জন্তু খিত্তা.

৭৭.

ত্ৰং পারমী জল নিধিং চতুরিহ বাহু,

সত্তীহি সুত্তরি চিরং জনকোৰ সিন্ধুং;

সম্পন্ন ৰিক্কম ফলোসি যথা চসোৰ,

এৰং জনা ৰিরিযতপ্ফলমে ধযন্তু.

৭৮.

সত্ত পরধ দহনেসু চিরং সুধন্তং,

খন্তী সুৰণ্ণ কত রূপ সমন্তিমত্তা;

সব্বা পরাধমসহি ত্ৰংঅসয্হমেৰং,

সব্বে জনাপি খমনেন ভজন্তু সন্তিং.

৭৯.

লক্খাধিকং চতুর সংখিয কপ্প কালং,

সচ্চেন সুট্ঠু পরিভাৰিত ৰাচিনো তে;

ৰাচায সচ্চ ফুসিতায সমেন্তি জন্তু,

এৰং ৰিসুদ্ধ ৰচনা জনতা ভৰন্তু.

৮০.

আদিন্ন ধম্ম মহিযত্থির সুপ্পতিট্ঠা,

ধিট্ঠান পারমি মহা ৰজিরদ্দি তুয্হং;

সত্তেন কেন পি যথাহি অভেজ্জ নেজ্জো,

এৰং জনাপি কুসলেসু অধিট্ঠ হন্তু.

৮১.

ত্ৰং সব্ব সত্ত চিরভাৰিত মেত্ত চিত্ত,

তোযেহি সংসমিত কোধ মহা হুতাসো;

লোকুত্তরং তদিতরং হিতমাৰহিত্থো,

এৰং জনেসু জনতা হিতমাৰহন্তূ.

৮২.

মিত্তোপকার পটিপক্খ জনাপকারে,

ত্ৰং নিব্বিকার মনসো চিরভাৰনায;

পত্তোসিলাভ পভুতট্টুসু নিব্বিকারং,

এৰং জনানুনয কোপ নুদা ভৰন্তু.

৮৩.

সম্পন্ন হেতু ৰিভৰো তুসিতে ৰিমানং,

যুত্তং গুণেহি নৰভিপ্পদৰী ৰিমানং;

ত্ৰং ৰাধিপরমিধিরোহিনিযা তিলোকো,

আরোহতু ভয সুখং পদৰী ৰিমানং.

৮৪.

ত্ৰংৰেরহংসি সমবুজ্ঝি যথাচ সম্মা,

সম্পন্ন ৰিজ্জ চরণো সুগতোসি হোন্তু;

লোকং ৰিদো পুরিসদম্মসুসারথী সি,

সত্থাসি বুজ্ঝি ভগৰা সি তথেৰ জন্তু.

৮৫.

সচ্চিত্ত ভূ নিদহিতং জনতায তুয্হং,

কল্যাণৰণ্ণরতনণ্ণৰজাতিভিন্নং;

দুক্খগ্গি চোর জলুপদ্দুতজাতি গেহে,

তস্সা সুখং ভৰতু জীৰিতুমাপদায.

৮৬.

ৰাচা ৰিচিত্ত ৰর তন্তু গতঙ্গি কণ্ঠে,

স্ৰা মুত্ত সগ্গুণ মহা রতনা ৰলী তে;

ৰেৰণ্ণি যত্তনি ভৰং সকলম্পহায,

হোতঞ্জনস্স সিরি সঙ্গম মঙ্গলায.

৮৭.

তং সগ্গুণত্থৰ দহট্ঠ সুতিপ্পনালি,

নিস্সন্দমান গুণনীর নিপান তিন্তে;

খেত্তেত্ত সঞ্ঞিনি জনা কত লোম হংস,

বীজঙ্কুরী কুসল সস্স ফলং লভন্তু.

৮৮.

আপাযিকপ্পভুতি দুক্খ নিদাঘ কাল,

সন্তাপিতা নিখিল লোক মনো কদম্বা;

তং ৰঙ্ণ মেঘ ফুসনা হসনঙ্কুরেহি,

ইদ্ধা ভৰন্তু মতি ৰল্লরি ৰেল্লীতা তে.

৮৯.

হেতুদ্দসা ফলদসা সমৰট্ঠিতং তং,

সব্বত্থ সত্ত হিতমাৰহণেন সিদ্ধং;

চিন্তাপথাতিগনুভাৰ ৰিভাৰনন্তে,

ভূতানমত্থু চরিতব্ভুতমত্থ সিধ্যা.

৯০.

অঙ্গারকাসুমভিলঙ্ঘিয দান কালে,

ভত্তত্তনো পদ পটিচ্ছক পঙ্কজা চ;

যাতক্খণে তৰ পদে ধটমুট্ঠহিত্ৰা,

পঙ্কেরুহাং সিৰ মধুং সরতং দদন্তু.

৯১.

সচ্চেন মচ্ছ পতি ৰস্সিত ৰস্সধারা,

সত্তে দযায তৰ ৰস্সিত ৰস্সধারা;

গিম্হে জনস্স সমযিংসু যথা তথাতা,

ধমম্বুৰুট্ঠিৰ সমেন্তু কিলেস দাহে.

৯২.

ছদ্দন্ত নাগ পতিনা খমতা পরাধং,

ছেত্ৰা করে ঠপিত দন্তৰরাৰ লুদ্দং;

লোকে হিতায ঠপিতা তৰ দন্ত ধাতু,

সেট্ঠা জনং সিৰ পুরং লহু পাপযন্তু.

৯৩.

তং তেমিযাখ্য যতিনোস্সম মালকম্হি,

ওকিণ্ণ মুত্ত কনকা ৰুজ ৰিপ্পকিণ্ণা;

কারুঞ্ঞ ৰারিদ চুতো দক বিন্দু বন্ধূ,

ধাতু সমেন্তু তৰ জন্তুসু দুক্খদাহে.

৯৪.

রট্ঠস্স অত্থ চরণায অসম্মুখস্স,

রামেন দিন্ন তিণ সংখত পাদুকাৰ;

ভুত্তা তযা চিরমসম্মুখ নাগতস্স,

লোকস্স অত্থমনু তিট্ঠতু পত্ত ধাতু.

৯৫.

ৰুত্তো জনানমুপদিস্স ৰরাহ রঞ্ঞা,

সত্থিং সহস্স সরদং ৰিয ঞায ধম্মো;

আদেয্য হেয্যমুপদিস্স তযা পৰুত্তো,

ধম্মো পৰত্ততু চিরং জনতা হিতায.

৯৬.

মারারি মদ্দন হিতাধিগমং করোতা,

ভত্তো তযা ৰর মহা জয বোধি রাজা;

সগ্গা পৰৰগ্গ হিতহেতু জনস্স হন্ত্ৰা,

সব্বন্তরাযমিহ তিট্ঠতু সুট্ঠু সজ্জো.

৯৭.

সামোদ ৰণ্ণ ভজনী গুণ মঞ্জরীযং,

চরিযা লতা ৰিকসিতা তৰ সপ্ফলঙ্গং;

ওকিণ্ণ চিত্ত মধুপে রস পীণযন্তি,

সম্ভাৰিতা ভুৰি পৰত্ততু মত্থকেহি.

৯৮.

সম্বুদ্ধ সেলৰলযন্তর জাননৰ্হা,

নোত্তত্ততো তিপথগা যতি সাগরট্ঠা;

ধম্মা পগা সুতি ৰসে তরিতে পুণন্তি,

সম্ভার সস্সমিহ ৰত্ততু পচযন্তি.

৯৯.

পঞ্ঞাণ কূপ সিত পগ্গহ ৰাযু গাহী,

সদ্ধা লকার সহিতা সতি পোত ৰাহা;

সম্পাপযাতু ভৰ সাগর পার তীর,

সপ্পত্তনং ৰরধনে পতি পত্তি নাৰা.

১০০.

বোজ্ঝঙ্গ সত্ত রতনাকর ধম্ম খন্ধ,

গম্ভীর নীর চয সাসন সাগরো সং;

সো সীল্যনন্ত তনু ৰেটিথ ঞাণ মন্থ,

সেলেন মন্থিতৰতং দিসতা মতং ৰে.

১০১.

ৰুত্তেন তেন ৰিধিনা ৰিধিনা ততো তং,

লদ্ধা নুভূতমমতং খিল দোস নাসং;

অচ্চন্ত রোগ জরতা মরণা ভি ভূতং,

ভূতং করোতু অমরং অজরং অরোগং.

১০২.

সদ্ধম্ম রাজ রৰিনিগ্গত ধম্মরংসি,

ফুল্লো ধুতঙ্গদল সংৰর কেসরালি;

সঙ্ঘারৰিন্দ নিকরো সমধুং সমাধি,

সক্কিণ্ণিকো দিসতু সাসন ৰাপি জতো.

১০৩.

আনন্দ রঞ্ঞ রতনাদি মহা যতিন্দ,

নিচ্চপ্পবুদ্ধ পদুমপ্পিয সেৰিনঙ্গী;

বুদ্ধপ্পিযেন ঘন বুদ্ধ গুণপ্পিযেন,

থেরালিনা রচিত পজ্জমধুং পিবন্তু.

১০৪.

ইত্থং রূপ গুণানুকিত্তনৰসা তং তং হিতা সিং সতো,

ৰত্থানুস্সতি ৰত্তিত ইহ যথা সত্তেসু মেত্তা চ মে;

এৰং তাভি ভৰন্ত রুত্তর তরা ৰত্তন্তু তা বোধি মে,

সংযোগোচ ধনেহি সন্তিহি ভৰে কল্যান মিত্তেহি চ.