📜

নমো তস্স ভগৰতো অরহতো সম্মাসম্বুদ্ধস্স

সাসনৰংসপ্পদীপিকা

বুদ্ধং ¶ সুমালী দ্ৰিপদুত্তমো তমো,

হন্ত্ৰান বোধেসিধ পঙ্কজং কজং;

মগ্গগ্গসেলম্হি সুঞট্ঠিতো ঠিতো,

সো মং চিরং পাতু সুখং সদা সদা.

সীহল়দ্দীপতোযেৰ,

আগতেহি দিসন্তরে;

ভিক্খূহি যাচিতো কস্সং,

সাস্নৰংসপ্পদীপিকং.

কামঞ্চ পোরাণেহি যা,

সাস্নৰংসপ্পদিপিকা;

ৰিত্থার ৰাচনামগ্গা,

ৰিরচিতা ৰিনিচ্ছযা.

সা ¶ পন মরম্মভাসায,

কতত্তাযেৰ এতেসং;

দীপন্তরনিৰাসিনং,

ৰহাতি সুট্ঠুনাত্থং.

তস্মা হি মূলভাসায,

করিস্সামি অহং হৰে;

সংসন্দিত্ৰান গন্থেহি,

তং সল্লক্খেন্তু সাধৰোতি.

তত্রাযংমাতিকা –

১. নৰট্ঠানাগতসাসনৰংসকথামগ্গো,

২. সীহল়দীপিকসাসনৰংসকথামগ্গো,

৩. সুৰণ্ণভূমিসাসনৰংসকথামগ্গো,

৪. যোনকরট্ঠসাসনৰংসকথামগ্গো,

৫. ৰনৰাসীরট্ঠসাসনৰংসকথামগ্গো,

৬. অপরন্তরট্ঠসাসনৰংসকথামগ্গো,

৭. কস্মীরগন্ধাররট্ঠসাসনৰংসকথামগ্গো,

৮. মহিংসকরট্ঠসাসনৰংসকথামগ্গো,

৯. মহারট্ঠসাসনৰংসৰথামগ্গো,

১০. চিনরট্ঠসাসনৰংসকথামগ্গোচাতি.

১. নৰট্ঠানাগতসাসনৰংসকথামগ্গো

১. তত্থ চ নৰট্ঠানাগতসাসনৰংসকথামগ্গো এৰং ৰেদিতব্বো. অম্হাকঞ্হি ভগৰা সম্মাসম্বুদ্ধো ৰেনেয্যানং হিতত্থায হত্থগতং সুখং অনাদিযিত্ৰা দীপঙ্করস্স ভগৰতো পাদমূলে ব্যাকরণং নাম মঞ্জূসক পুপ্ফং পিলন্ধিত্ৰা কপ্পসতসহস্সাধিকানি চত্তারি অসখ্যে যানি অনেকাসু জাতীসু অত্তনো খেদং অনপেক্খিত্ৰা সমতিংসপারমিযো ¶ পূরেত্ৰা ৰেস্সন্তরত্তভাৰতো চৰিত্ৰা তুসিতপুরে দেৰসুখং অনুভৰি.

তদা দেৰেহি উয্যোজিযমানো হুত্ৰা কপিলৰত্থুম্হি হোসমতরঞ্ঞা পভুতি অসম্ভিন্নাত্তিযৰংসিকস্স সুদ্ধো ধনস্সনাম মহারঞ্ঞো অগ্গমহেসিযা অসম্ভিন্নাত্তিযৰং সিকায মাযায কুচ্ছীস্মিং আসাল়িমাসস্স পুণ্ণমিযং গুরুৰারে পটিসন্ধিং গহেত্ৰা অসমাসচ্চযেন ৰেসাখমাসস্স পুণ্ণমিযং সুক্কৰারে ৰিজাযিত্ৰা সোল়সৰস্সিককালে রজ্জসম্পত্তিং পত্ৰা একূনতিংসৰস্সানি অতিক্কমিত্ৰা মঙ্গলউয্যানং নিক্খমনকালে দেৰেহি দস্সিতানি চত্তারি নিমিত্তানি পস্সিত্ৰা সংৰেগং আপজ্জিত্ৰা মহাভিনিক্খমনং নিক্খমিত্ৰা অনোমাযনাম নদিযা তীরে ভমর ৰণ্ণসন্নিভানি কেসানি ছিন্দিত্ৰা দেৰদত্তিযকাসাৰং পটিচ্ছাদেত্ৰা নে রঞ্জরাযনাম নদিযা তীরে ৰেসাখমাসস্স পুণ্ণমিযং পচ্চূসকালে সুজাতাযনাম সেট্ঠিধীতায দিন্নং পাযাসং একূনপণ্ণাসৰারেন পরিভুঞ্জিত্ৰা পুরিমিকানং সম্মাসম্বুদ্ধানং ধম্মতায সুৰণ্ণপাতিং নদিযং ওতারেত্ৰা মহাবোধিমণ্ডং উপসঙ্কমিত্ৰা অপরাজিতপল্লঙ্কে নিসীদিত্ৰা অনমতগ্গসং সারতো পট্ঠায অত্তানং ছাযা ৰিয অনুযন্তানং অনেকসতকিলেসৰেরীনং সীসং চতূহি মগ্গসত্থেহি ছিন্দিত্ৰা তিলোকগ্গমহাধম্মরাজত্তং পত্ৰা পঞ্চতালীসৰস্সানং তেসু তেসু ঠানেসু তেসং তেসং সত্তানং মহাকরুণাসমাপত্তিজালং পত্থারেত্ৰা দেসনাঞাণং ৰিজম্ভেত্ৰা ধম্মং দেসেত্ৰা সাসনং পতিট্ঠাপেসি. পতিট্ঠাপেত্ৰা চ পন অসীতিৰস্সাযুককালে ৰিজ্জোতযিত্ৰা নিব্বাযনপ্প দাপজালং ৰিয অনুপাদিসেসনিব্বানধাতুযা পরিনিব্বাযি. মচ্চু ধম্মস্স চ নাম তীসু লোকেসু অতিমমাযিতব্বো এস, অতিগরুকাতব্বো এস, অতিভাযিতব্বো এসাতি ৰিজাননসভাৰো নত্থি. ভগৰন্তংযেৰ তাৰ তিলোকগ্গপুগ্গলং আদায ¶ গচ্ছতি, কিংমঙ্গং পন অম্হে যেৰা তেৰা, অহোৰতঅচ্ছরিযা সঙ্খারধম্মোতি. হোন্তি চেত্থ–

মচ্চুধম্মো চ নামেস,

নিল্লজ্জো চ অনোত্তপ্পী;

তিলোকগ্গংৰ আদায,

গচ্ছী পগেৰ অঞ্ঞেসু.

যথা গোঘাতকো চোরো,

মারেতুংযেৰ আরভি;

গোণং লদ্ধান লোকম্হি,

পযোজনংৰ এত্তকং.

তথেৰ মচ্চুরাজা চ,

হিন্দগূনং গুণং ইধ;

ন ৰিজানাতি এসো হি,

মারেতুংযেৰ আরভীতি.

সত্তাহপরিনিব্বুতে চ ভগৰতি আযস্মা মহাকস্সপো তিযড্ঢসতাধিকেহি সহস্সমত্তেহি ভিক্খূহি সদ্ধি পাৰাতো কুসীনারাযং আগচ্ছন্তো অন্তরামগ্গে ভগৰা সম্মাসম্বুদ্ধো পরিনিব্বুতোতি সুত্ৰা অৰীতসোক ভিক্খূ রোদন্তে দিস্ৰা ৰুদ্ধপব্বজিতো সুভদ্দানাম ভিক্খু এৰং ৰদতি– মা আৰুসো পরিদেৰিত্থ, নত্থেত্থ সোচিতব্বোনামকোচি, পুব্বে মযং ভৰাম সমণেন গে,ভমেন উপদ্দুতা– ইদং করোথ ইদং তুম্হাকং কপ্পতি, মা ইদং করিত্থ ন ইদং তুম্হাকং কপ্পতীতি, সেয্যথাপি ইণসাধিকেন দাসোতি, ইদানি পন মযং যং যং ইচ্ছাম, তং তং সক্কা কাতুং, যং যং পন ন ইচ্ছাম,তং তং সক্কা অকাতুন্তি. তং সুত্ৰা ঈদিসং পন ৰেরীপুগ্গলং পটিচ্চ সম্মাসম্বুদ্ধস্স ভগৰতো সাসনং খিপ্পং অন্তরধারেয্য, ইদানি সুৰণ্ণক্খন্ধসদিসো সরীরো সংৰিজ্জমানো ¶ যেৰ দুক্খেন নিপ্ফাদিতে সাসনে মহাভযং উপ্পজ্জি চ, ঈদিসো পুগ্গলো অঞ্ঞং ঈদিসং পুগ্গলং সহাযং লভিত্ৰা ৰুদ্ধিমাপজ্জন্তো হাপেতুং সক্কুণেয্য মঞ্ঞেতি চিত্তক্খেদং পত্ৰা ধম্মসংৰেগং লভিত্ৰা ইমং ভিক্খুং ইধেৰ সেতৰত্থং নিৰাসাপেত্ৰা সরীরে ভস্মেন ৰিকিরিত্ৰা বহিদ্ধা করিস্সামীতি চিন্তেসি.

তদা আযস্মতো মহাকস্সপত্থেরস্স এতদহোসি,– ইদানি সমণস্স গোতমস্স সরীরং সংৰিজ্জমানংযেৰ পরিসা ৰিৰাদং করোন্তীতি মনুস্সা উপৰদিস্সন্তিতি. ততো পচ্ছা ইমং ৰিতক্কং ৰূপসমেত্ৰা খমিত্ৰা সম্মাসম্বুদ্ধো ভগৰা পরিনিব্বাযমানোপি তেন পন দেসিতো ধম্মো সংৰিজ্জতি, তেন দেসিতস্স ধম্মস্স থিরং পতিট্ঠাপনত্থায সঙ্গাযিযমানং ঈদিসেহি পুগ্গলেহি সাসনং ন অন্তরধাযিস্সতি, চিরং ঠস্সতি যেৰাতি মনসিকরিত্ৰা ভগৰতো দিন্নপংসু কূলচীৰরাদিৰসেন ধম্মানুগ্গহং অনুস্সরিত্ৰা ভগৰতো পরিনিব্বানতো ততিযে মাসে আসাল়িমাসস্স পুণ্ণমিতো পঞ্চমে দিৰসে রাজগহে সত্তপণ্ণিগুহাযং আজাতসত্তুংনাম রাজানং নিস্সায পঞ্চহি অরহন্ত সতেহি সদ্ধিং সত্তমাসেহি পঠমং সঙ্গাযনং অকাসি.

তদা অট্ঠচত্তালীসাধিকসতকলিযুগং অনৰসেসতো অপনেত্ৰা কলিযুগেন সাসনং সমং কত্ৰা ঠপেসি. যদা পন অজাতসত্তু রঞ্ঞো রজ্জং পত্ৰা অট্ঠৰস্সানি অহেসুং, তদা মরম্মরট্ঠে তঙ্কোসঙ্গত্ৰপুরে জম্বুদীপধজস্সনাম রঞ্ঞো রজ্জং পত্ৰা অতিরেকপঞ্চৰস্সানি অহেসুন্তি.

ইমিস্সঞ্চ পঠমসঙ্গীতিযং আযস্মা মহাকস্সপো আযস্মা উপালি আযস্মা আনন্দো আযস্মা অনুরুদ্ধো চাতি এৰমাদযো পঞ্চসতপ্পমাণা মহাথেরা পঠমং সঙ্গাযিত্ৰা সাসনং অনুগ্গহেসুং. এৰং ¶ সুভদ্দস্স দুট্ঠপব্বজিতস্স দুট্ঠৰচনং সাসনস্স অনুগ্গহে কারণংনাম অহোসি. সুভদ্দো চ নাম দুট্ঠপব্বজিতো আতুমানগরৰাসী অহোসি কপ্পককুলিকো. সো যদা ভগৰা আতুমানগরং গচ্ছতি, তদা অত্তেনো পুত্তে দ্ৰে সামণেরে কপ্পককম্মং কারাপেত্ৰা লদ্ধেহি তণ্ডুলতেলাদীহি ৰত্থূহি যাগুং পচিত্ৰা সসঙ্ঘস্স বুদ্ধস্স অদাসি. ভগৰা পন তানি অপ্পটিগ্গহেত্ৰা কারণং পুচ্ছিত্ৰা ৰিগরহিত্ৰা অকপ্পিযসমাদানদুক্কটাপত্তিং কপ্পকপুব্বস্স ভিক্খুস্স খুরধারণদুক্কটাপত্তিঞ্চ পঞ্ঞাপেসি. তং কারণং পটিচ্চ ৰেরং বন্ধিত্ৰা সাসনং ৰিদ্ধংসিতুকামতায তত্তকঅযোগুল়ং গিলিত্ৰা উগ্গীরন্তো ৰিয ঈদিসদুট্ঠৰচনং ৰদীতি.

অজাতসত্তুরাজা চ তুম্হাকং ধম্মচক্কং হোতু, মম আণাচক্কং পৰত্তিস্সামি, ৰিস্সট্ঠা হুত্ৰা সঙ্গাযন্তূতি অনুগ্গহেসি. তেনেস পঠমং সাসনানুগ্গহো রাজাতি ৰেদিতব্বো, মহাকস্সপাদীনঞ্চ অরহন্তানং পঞ্চসতানং সিসাপরম্পরা অনেকা হোন্তি, গণনপথং ৰীতিৰত্তা. যমেত্থ ইতো পরং ৰত্তব্বং, তং অট্ঠকথাযং ৰুত্তনযেন ৰেদিতব্বং. তে পন মহাথেরা সঙ্গাযিত্ৰা পরিনিব্বাযিংসূতি. হোন্তি চেত্থ–

ইদ্ধিমন্তো চ যে থেরা,

পঠমস্সঙ্গীতিং কত্ৰা;

সাসনং পগ্গহিত্ৰান,

মচ্চূৰসংৰ সম্পত্তা.

কিঞ্চাপি ইদ্ধিযো সন্তি,

তথাপি তা জহিত্ৰান;

নিব্বাযিংসু ৰসং মচ্চু,

পত্ৰা তে ছিন্নপক্খাৰ.

কা ¶ কথাৰ চ অম্হাকং,

অম্হাকং গহণে পন;

মচ্চুনো নত্থি সারো চ,

এৰং ধারেয্য পণ্ডিতোতি.

অযং পঠমসঙ্গীতিকথা সঙ্খেপো.

ততো পরং ৰস্সসতং তেসং সিস্সপরম্পরা সাসনং ধারেত্ৰা আগমংসু. অথানুক্কমেন গচ্ছন্তেসু রত্তিদিৰেসু ৰস্সসতপরিনিব্বুতে ভগৰতি ৰেসালিকা ৰজ্জিপুত্তকা ভিক্খূ ৰেসালিযং কপ্পতি সিঙ্গিলোণকপ্পা, কপ্পতি দ্ৰঙ্গুলকপ্পো, কপ্পতি গামন্তরকপ্পো, কপ্পতি আৰাসকপ্পো, কপ্পতি অনুমতিকপ্পো, কপ্পতি আচিণ্ণকপ্পো, কপ্পতি আমথিতকপ্পো, কপ্পতি জল়োগিং পাতুং, কপ্পতি অদসকং নিসীদনং, কপ্পতি জাতরূপরজতন্তি ইমানি দসৰত্থূনি দীপেসুং.

তেসং সুসুনাগপুত্তো কাল়াসোকোনাম রাজা পক্খো অহোসি. তেন খো পন সমযেন আযস্মা যসো কাকণ্ডকপুত্তো ৰজ্জীসু চারিকং চরমানো ৰেসালিকা কির ৰজ্জিপুত্তকা ভিক্খূ ৰেসালিযং দসৰত্থূনি দিপেন্তীতি সুত্ৰা ন খো পনেতং প্পতিরূপং, য্ৰাহং দসবলস্স সাসনৰিপত্তিং সুত্ৰা অপ্পোস্সুক্কো ভৰেয্যং, সন্ধাহং অধম্মৰাদিনো নিগ্গহেত্ৰা ধম্মং দীপেস্সামীতি চিন্তযন্তো যেন ৰেসালী, তদৰসরি. তদা আযস্মা মহাযসো রেৰতসব্বকামিআদীহি সত্তসতেহি অরহন্তেহি সদ্ধিং সঙ্গাযিস্সামীতি ৰেসালিযং ৰালুকারামং আগচ্ছি. ৰজ্জিপুত্তকাচ ভিক্খূ উপারম্ভচিত্তা কাল়াসোকংনাম রাজানং উপসঙ্কমিত্ৰা মযং খো মহারাজ ইমস্মিং মহাৰনারামে গন্ধকুটিং রক্খিত্ৰা ৰস্সাম, ইদানি মহারাজ অধম্মৰাদিনো অঞ্ঞে ভিক্খূ ৰিলুম্পিতুকামা ৰিদ্ধংসিতুকামা আগতাতি আরোচেসুং. কাল়াসোকো ¶ চ মহারাজা আগন্তুকানং ভিক্খূনং অপ্পৰিসনত্থায নিৰারেথাতি অমচ্চে পেসেসি. অমচ্চাচ নিৰারেতুং গচ্ছন্তা দেৰতানং আনুভাৰেন ভিক্খূ ন পস্সন্তি. তদহেৰ চ রত্তিভাগে কাল়াসোকমহারাজা লোহকুম্ভীনিরযে পতনাকারেন সুপিনং পস্সি. তস্স রঞ্ঞো ভগিনি নন্দানাম থেরী আকাসেন আগচ্ছন্তি ধম্মৰাদিনো মহাথেরে নিগ্গণ্হিত্ৰা অধম্মৰাদীনং ভিক্খূনং পগ্গহণে দোসবহুলতং পকাসেত্ৰা সাসনস্স পগ্গহণত্থায ওৰাদং অকাসি.

কাল়াসোকরাজা চ সংৰেগপ্পত্তো হুত্ৰা আযস্মন্তানং মহাযসত্থেরাদীনং খমাপেত্ৰা অজাতসত্তুরাজা ৰিয সঙ্গাযনে পগ্গহং অকাসি.

মহাযসত্থেরাদযো চ কাল়াসোকং রাজানং নিস্সায ৰালুকারামে ৰজ্জিপুত্তকানং ভিক্খূনং পকাসিতানি অধম্মৰত্থূনি ভিন্দিত্ৰা অট্ঠতি মাসেহি দুতিযসঙ্গাযনং অকংসু.

তদা চ মজ্ঝিমদেসে পাতলিপুত্তনগরে সুসুনাগরঞ্ঞো পুত্তভূতস্স কাল়াসোকরঞ্ঞো অতিসেকং পত্ৰা দসৰস্সানি অহেসুং. পরম্মরট্ঠে পন সিরিখেত্তনগরে দ্ৰত্তগোঙ্কস্সনাম রঞ্ঞো অভিসিত্তকালতো পুরে একৰস্সং অহোসি. জিনসাসনং পন ৰস্সসতং অহোসি.

ইমিস্সঞ্চ দুতিযসঙ্গীতিযং মহাযস রেৰত সব্বকামিপ্পমুখা সত্তসতপ্পমাণা মহাথেরা দুতিযং সঙ্খাযিত্ৰা দুতিযং সাসনং পগ্গহেসুং.

আযস্মা মহাযসত্থেরোচনাম পঞ্চহি এতদগ্গল়ানে হি ভগৰতা থোমিতস্স আনন্দত্থেরস্স সদ্ধিৰিহারিকো অহোসি. ৰজ্জিপুত্তকানং ভিক্খূনং অধম্মৰত্থুদীপনং দুতিযসঙ্গীতিযং কারণমেৰ. কাল়াসোকরাজাচ পগেৰ অধম্মৰাদীভিক্খূনং সহাযোপি সমানো পুন ধম্মৰাদিভিক্খূনং সহাযো ¶ হুত্ৰা অনুগ্গহং অকাসি. তস্মা দুতিযসাসনপগ্গহো রাজাতি ৰেদিতব্বো.

দুতিযসঙ্গীতিযং পন মহাযসত্থের রেৰত সব্বকামিপ্পমুখানং সত্তসতানং মহাথেরানং সিস্সপরম্পরা অনেকা হোন্তি, গণনপথং ৰীতিৰত্তা. যমেত্থ ইতো পরং ৰত্তব্ব, তং অট্ঠকথাযং ৰুত্তনযেন ৰেদিতব্বং. তে পন মহাথেরা দুতিযং সঙ্গাযিত্ৰা পরিনিব্বাযিংসূতি. হোন্তি চেত্থ–

বুদ্ধিমন্তো চ যে থেরা,

দুতিযস্সঙ্গিতিং কত্ৰা;

সাসনং পগ্গহিত্ৰান,

মচ্চূৰসংৰ সম্পত্তা.

ইদ্ধিমন্তোপি যে থেরা,

মচ্চুনো তাৰ ৰসং গমুং;

কথংযেৰ মযং মুত্তা,

ততো আরক মুচ্চনাতি;

অযং দুতিযসঙ্গীতিকথাসঙ্খেপো.

ততো পরং অট্ঠতিংসাধিকানি দ্ৰেৰস্সসতানি সম্মাসব্বুদ্ধস্স ভগৰতো সাসনং নিরাকুলং অহোসি নিরব্বুদং. অট্ঠতিংসাধিকে পন দ্ৰিৰস্সসতে সম্পত্তে পাটলিপুত্ত নগরে ¶ সিরিধম্মাসোকস্সনাম রঞ্ঞো কালে নিগ্রোধসামণেরং পটিচ্চ বুদ্ধসাসনে পসীদিত্ৰা ভিক্খুসঙ্ঘস্স লাভসক্কারং বাহুল্লং অহোসি. তদা সট্ঠিসহস্সমত্তা তিত্থিযা লাভসক্কারং অপেক্খিত্ৰা অপব্বজিতাপি পব্বজিতাৰিয হুত্ৰা উপাসথপৰারণাদিকম্মেসু পৰিসন্তি, সেয্যথাপিনাম হংসানং মজ্ঝে বকা, যথা চ গুন্নং মজ্ঝে গৰজা, যথা চ সিন্ধৰানং মজ্ঝে গদ্রভাতি.

তদা ভিক্খুসঙ্ঘো ইদানি অপরিসুদ্ধা পরিসাতি মনসি করিত্ৰা উপোসথং ন অকাসি. সাসনে অব্বুদং হুত্ৰা সত্তৰস্সানি উপোসথপৰারণানি ছিজ্জন্তি. সিরিধম্মাসো কো চ রাজা তং সুত্ৰা তং অধিকরণং ৰূপসমেহি উপোসথং কারাপেহীতি একং অমচ্চং পেসেসি. অমচ্চো চ ভিক্খূ উপোসথং অকত্তুকামে কিং করিস্সামীতি রাজানং পটিপুচ্ছিতুং অৰিসহতায সযং মূল়ো হুত্ৰা অঞ্ঞেন মূল়েন মন্থেত্ৰা সচে ভিক্খুসঙ্ঘো উপোসথং ন করেয্য, ভিক্খুসঙ্ঘং ঘাতেতুকামো মহারাজাতি সযং মূল়ো হুত্ৰা মূল়স্স সন্তিকা মূল়ৰচনং সুত্ৰা ৰিহারং গন্ত্ৰা উপোসথং অকত্তুকামং ভিক্খুসঙ্ঘং ঘাতেসি.

রাজা চ তং সুত্ৰা অযং বালো মযা অনাণত্তোৰ হুত্ৰা ঈদিসং লুদ্দকম্মং অকাসি, অহং পাপকম্মতো মুচ্চিস্সামিৰা মাৰাতি দ্ৰল়কজাতো হুত্ৰা মহামোগ্গলিপুত্ত তিস্সত্থেরং গঙ্গায পতিসোততো আনেত্ৰা তং কারণং থেরং পুচ্ছি. থেরো চ দীপকতিত্তিরজাতকেন অচেতনতায পাপকম্মতো মোচেস্সসিতি ৰিস্সজ্জেসি, সত্তাহম্পি তিত্থিযানং ৰাদং সিরিধম্মাসোকরঞ্ঞো সিক্খাপেসি, ৰাদেন ৰাদং তুলযিত্ৰা সট্ঠিসহস্সমত্তে তিত্থিযে সাসনবাহিরং অকাসি. তদা পন উপোসথং অকাসি. ভগৰতা ৰুত্তনিযামেনেৰ কথাৰত্থুঞ্চ ভিক্খুসঙ্ঘমজ্ঝে ব্যাকাসি ¶ . অসোকারামে চ সহস্সমত্তা মহাথেরা নৰহি মাসেহি সঙ্গাযিংসুং.

তদা মজ্ঝিমদেসে পাটলিপুত্তনগরে সিরিধম্মাসোকরঞ্ঞো রজ্জং পত্ৰা অট্ঠারসৰস্সানি অহেসুং. মরম্মরট্ঠে পন সিরিখেত্তনগরে রম্বোঙ্কস্সনাম রঞ্ঞো রজ্জং পত্ৰা দ্ৰাদস ৰস্সানি অহেসুন্তি.

ইমিস্সঞ্চ ততিযসঙ্গীতিযং মহামোগ্গলিপুত্ততিস্সত্থেরোনাম দুতিযসঙ্গাযকেহি মহাথেরেহি ব্রহ্মলো কং গন্ত্ৰা সাসনস্স পগ্গহণত্থং তিস্সনাম মহাব্রহ্মানং আযাচিত নিযামেন ততো চৰিত্ৰা ইধ মোগ্গলিযানাম ব্রাহ্মণিযা কুচ্ছিম্হি নিব্বত্তসত্তো.

লাভসক্কারং অপেক্খিত্ৰা সট্ঠিসহস্সমতানং তিত্থিযানং সমণালযং কত্ৰা উপোসথপৰারণাদীসু কম্মেসু পৰেসনং পরিসায অসুদ্ধত্তা সত্তৰস্সানি উপোসথস্স অকরণঞ্চ সাসনস্স পগ্গহণে কারণমেৰ. মহামোগ্গলিপুত্ততিস্স মজ্ঝন্তিক মহারেৰপ্পমুখা মহাথেরা ততিযং সঙ্গাযিত্ৰা ততিযং সাসনং পগ্গহেসুং.

সিরিধম্মাসোকরাজা চ তিত্থিযানং ৰাদং সল্লক্খেত্ৰা তিত্থিযে বহিসাসনকরণাদীহি সাসনস্স পগ্গহো রাজাতি ৰেদিতব্বো. মহামোগ্গলিপুত্ততিস্স মজ্ঝিন্তিক মহারেৰপ্পমুখানং সহস্সমত্তানং মহাথেরানং সিস্সপরম্পরা অনেকা হোন্তি, গণনপথং ৰীতিৰত্তা. যমেত্থ ইতো পরং ৰত্তব্বং, তং অট্ঠকথাযং ৰুত্তনযেন ৰেদিতব্বং. তে পন মহাথেরা ততিযং সঙ্গাযিত্ৰা পরিনিব্বাযিংসূতি. হোন্তি চেত্থ–

মহিদ্ধিকাপি যে থেরা,

সঙ্গাযিত্ৰান সাসনে;

মচ্চূৰসংৰ গচ্ছিংসু,

অব্ভগব্ভংৰ ভাকরো.

যথা ¶ এতেচ গচ্ছন্তি,

তথা মযম্পি গচ্ছাম;

কোনাম মচ্চুনা মুচ্চে,

মচ্চূপরাযনা সত্তা.

তস্মা হি পণ্ডিতো পোসো,

নিব্বানং পন অচ্চুতং;

তস্সেৰ সচ্ছিকত্থায,

পুঞ্ঞং করেয্য সব্বদাতি.

অযং ততিযসঙ্গীতিকথাসঙ্খেপো.

ততো পরং কত্থ সম্মাসম্বুদ্ধস্স ভগৰতো সাসনং সুট্ঠু পতিট্ঠহিস্সতীতি ৰিমংসিত্ৰা মহামোগ্গলিপুত্ততিস্সত্থেরো পচ্চন্তদেসে জিনসাসনস্স সুপ্পতিট্ঠিযমানভাৰং পস্সিত্ৰা নৰট্ঠানানি জিনসাসনস্স পতিট্ঠাপনত্থায ৰিসুং ৰিসুং মহাথেরে পেসেসি. সেয্যথিদং. মহামহিন্দত্থেরং সীহল়দীপং পেসেসি-ত্ৰং এতং দীপং গন্ত্ৰা তত্থ সাসনং পতিট্ঠপেহীতি, সোণত্থেরং উত্তরত্থেরঞ্চসুৰণ্ণভূমিং, মহারক্খিতত্থেরং যোনকলোকং, রক্খিতত্থেরং ৰনৰাসীরট্ঠং, যোনকধম্মরক্খিতত্থেরং অপরন্তরট্ঠং, মজ্ঝন্তি কত্থেরং কস্মীরগন্ধা ররট্ঠং, মহারেৰত্থেরং মহিংসকমণ্ডলং, মহাধম্মরক্খিতত্থেরং মহারট্ঠং, মজ্ঝিমত্থেরং চীনরট্ঠন্তি. তত্থ চ উপসম্পদপহোনকেন সঙ্ঘেন সদ্ধিং পেসেসি. তে চ মহাথেরা ৰিসুং ৰিসুং গন্ত্ৰা সাসনং তত্থ তত্থ পতিট্ঠাপেসুং. পতিট্ঠাপেত্ৰা চ তেসু তেসু ঠানেসু ভিক্খূনং কাসাৰপজ্জোতেন ৰিজ্জোতমানা অব্ভহিমধূরজোরাহুসঙ্খাতেহি ৰিমত্তো ৰিয নিসানাথো জিনসাসনং অনন্তরাযং হুত্ৰা পতিট্ঠাসি.

তেসু পন নৰসু ঠানেসু সুৰণ্ণভূমিনাম অধুনা সুধম্মনগরমেৰ. কস্মা পনেতং ৰিঞ্ঞাযতীতি চে. মগ্গানুমানতো ঠানানুমানতো ¶ ৰা. কথং মগ্গানুমানতো. ইতো কির সুৰণ্ণভূমি সত্তমত্তানি যোজনসতানি হোন্তি, একেন ৰাতে ন গচ্ছন্তী নাৰা সত্তহি অহোরত্তেহি গচ্ছতি, অথেকস্মিং সমযে এৰং গচ্ছন্তি নাৰা সত্তাহম্পি নদিযা ৰট্টমচ্ছ পিট্ঠে নেৰ গতাতি অট্ঠকথাযং ৰুত্তেন সীহল়দীপতো সুৰণ্ণভূমিং গতমগ্গপ্পমাণেন সুখম্মপুরতো সীহল়দীপং গতমগ্গপ্পমাণং সমেতি. সুধম্মে পুরতো কির হি হিংসল়দীপং সত্তমত্তানি যোজনসতানি হোন্তি, উজুং ৰাযুআগমনকালে গচ্ছন্তি ৰাযুনাৰা সত্তহি অহোরত্তেহি সম্পাপুণাতি. এৰংমগ্গানুমানতো ৰিঞ্ঞাযতি.

কথং ঠানানুমানতো. সুৰণ্ণভূমি কির মহাসমুদ্দসমীপে তিট্ঠতি, নানাৰেরজ্জকানম্পি ৰাণিজানং উপসঙ্কমনট্ঠানভূতং মহাতিত্থং হোতি. তেনেৰ মহাজনককুমারাদযো চম্পানগরাদিতো সংৰোহারত্থায নাৰায সুৰণ্ণভূমিং আগমংসূতি. সুধম্মপুরম্পি অধুনা মহাসমুদ্দসমীপেযেৰ তিট্ঠতি. এৰং ঠানানুমাসতো ৰিঞ্ঞাযতীতি.

অপরে পন সুৰণ্ণভূমিনাম হরিভুঞ্জরট্ঠংযেৰ, তত্থ সু ৰণ্ণস্স বাহুল্লত্তাতি ৰদন্তি. অঞ্ঞে পন সিযামরট্ঠংযেৰাতি ৰদন্তি. তং সব্বং ৰিমংসিতব্বং.

অপরন্তং নাম ৰিসুং একরট্ঠমেৰাতি অপরে ৰদন্তি. অঞ্ঞে পন অপরন্তংনাম সুনাপরন্তরট্ঠমেৰাতি ৰদন্তি. তং যুত্তমেৰ. কস্মা অপরন্তং নাম সুনাপরন্তরট্ঠমেৰাতি ৰিঞ্ঞাযতীতি চে. অট্ঠকথাসু দ্ৰীহি নামেহি ৰুত্তত্তা. উপরিপণ্ণাসঅট্ঠকথাযঞ্হি সল়াযতনসংযুত্তট্ঠকথাযঞ্চ অট্ঠকথাচরিযেহি সুনাপরন্তরট্ঠে কোণ্ডধানত্থেরেন সলাকাদানাধিকারে লদ্ধেতদগ্গট্ঠানতং দস্সন্তেহি অপরন্তরট্ঠং সুন সদ্দেন যোজেত্ৰা ৰুত্তং. ধম্মপদট্ঠকথাযং পন অঙ্গুত্তরট্ঠকথাযঞ্চ তমেৰ রট্ঠং ৰিনা সুনসদ্দেন ৰুত্তং. সুনসদ্দো চেত্থ পুত্তপরিযাযো. মন্ধাতুরঞ্ঞো জেট্ঠপুত্তো চতুদ্দীপৰাসি নো ¶ পক্কোসিত্ৰা তেসং ৰিসুং ৰিসুং নিৰাসট্ঠানং নিয্যাদেসি. তত্থ উত্তরদীপৰাসীনং ঠানং কুরুরট্ঠংনাম, পুব্বদীপৰাসীনং পন ৰেদেহরট্ঠংনাম, পচ্ছিমদীপৰাসীনং অপরন্তং নাম. ভত্তপচ্ছিমদীপে জাতত্তা তে সুনসদ্দেন ৰুত্তা. তত্র জাতাপি হি তেসং পুত্তাতিৰা সুনাতিৰা ৰুত্তা, যথা ৰজ্জিপুত্তকা ভিক্খূতি. ৰত্তিচ্ছাৰসেন ৰা ৰাচাসিলিট্ঠৰসেন চ ইদমেৰ সুনসদ্দেন ৰিসেসেত্ৰা ৰোহরন্তীতি দট্ঠব্বং.

যোনকরট্ঠংনাম যৰনমনুস্সানং নিৰাসট্ঠানমেৰ, যংজঙ্গমঙ্ঘইতি ৰুচ্চতি.

ৰনৰাসীরট্ঠংনাম সিরিখেত্তনগরট্ঠানমো. কেচি পন ৰনৰাসীরট্ঠংনাম একং রট্ঠমেৰ, ন সিরিখেত্তনগরট্ঠানন্তি ৰদন্তি. তং ন সুন্দরং. সিরিখেত্তনগরট্ঠানমেৰ হি ৰনৰাসীরট্ঠং নাম. কস্মা পনেতং ৰিঞ্ঞাযতীতিচে. ইমস্স অম্হাকং রঞ্ঞো ভাতিকরঞ্ঞো কালে সিরিখেত্তনগরে গুম্ভেহি পটিচ্ছাদিতে একস্মিং পথৰিপুঞ্জে অন্তো নিম্মুজ্জিত্ৰা ঠিতং পোরাণিকং একং লোহমযবুদ্ধপটিপিব্বং পটিলভি, তস্স চ পল্লঙ্কে ইদং ৰনৰাসীরট্ঠৰাসীনং পূজনত্থাযাতিআদিনা পোরাণলেখনং দিস্সতি, তস্মা যেৰেতং ৰিঞ্ঞাযতীতি.

কস্মীরগন্ধাররট্ঠংনাম কস্মীররট্ঠং গন্ধাররট্ঠঞ্চ. তানি পন রট্ঠানি একাবদ্ধানি হুত্ৰা তিট্ঠন্তি. তেনেৰ মজ্ঝন্তি কত্থেরং একং দ্ৰীসু রট্ঠেসু পেসেসি. জনপদত্তা পন নপুংসকেকত্তং ভৰতি. তদা পন একস্স রঞ্ঞো আণায পতিট্ঠানৰিসযত্তা একত্তৰচনেন অট্ঠকথাযং ৰুত্তন্তিপি ৰদন্তি.

মহিংসকমণ্ডলংনাম অন্ধকরট্ঠং, যং যক্খপুররট্ঠন্তি ৰুচ্চতি.

মহারট্ঠংনাম মহানগররট্ঠং. আধুনা হি মহারট্ঠমেৰ ন গরসদ্দেন যোজেত্ৰা মহানগররট্ঠন্তি ৰোহরন্তীতি. সিযামরট্ঠন্তিপি ৰদন্তি আচরিযা.

চিনরট্ঠংনাম ¶ হিমৰন্তেন একাবদ্ধং হুত্ৰা ঠিতং চীনরট্ঠং যে ৰাতি.

ইদং সাসনস্স নৰসু ঠানেসু ৰিসুং ৰিসুং পতিট্ঠানং.

ইদানি আদিতো পট্ঠায থেরপরম্পরকথা ৰত্তব্বা. সম্মাসম্বুদ্ধস্স হি ভগৰতো সদ্ধিৰিহারিকো উপালিত্থে রো,তস্স সিস্সো দাসকত্থেরো, তস্স সিস্সো সোণকত্থেরো, তস্স সিস্সো সিগ্গৰত্থেরো চন্দৰজ্জিত্থে রো চ, তেসং সিস্সো মোগ্গলিপুত্ততিস্সত্থেরোতি ইমে পঞ্চমহাথেরা সাসনৰংসে আদিভূতা আচরিযপরম্পরানাম. তেসঞ্হি সিস্সপরম্পরভূতা থেরপরম্পরা যাৰজ্জতনা ন উপচ্ছিন্ধন্তি. আচরিযপরম্পরায চ লজ্জিভিক্খূ যেৰ পৰেসেত্ৰা কথেতব্বা নো অলজ্জিভিক্খূ. অলজ্জীভিক্খূ নাম হি বহুস্সুতাপি সমানা লাভগরুলোকগরুআদিহি ধম্মতন্তি নাসেত্ৰা সাসনৰরে মহাভযং উপ্পাদেন্তীতি. সাসনরক্খনকম্মংনাম হি লজ্জীনংযেৰ ৰিসযো নো অলজ্জীনং. তেনাহু পোরাণা থেরা, অনাগতে সাসনং কো নাম রক্খিস্সতীতি অনুপেক্খিত্ৰা অনাগতে সাসনং লজ্জিনো রক্খিস্সন্তি, লজ্জিনো রক্খিস্সন্তি, লজ্জিনো রক্খিস্সন্তীতি তিক্খাত্তুং ৰাচং নিচ্ছারেসুং. এৰং মজ্ঝিমদেসেপি অলজ্জীপুগ্গলা বহু সন্তীতি ৰেদিতব্বা.

পরিনিব্বানতো হি ভগৰতো ৰস্সসতানং উপরি পুব্বে ৰুত্তনযেনেৰ ৰজ্জিপুত্তকা ভিক্খূ অধম্মৰত্থূনি দীপেত্ৰা পঠমসঙ্গীতিকালে বহিকতেহি পাপভিক্খূহি সদ্ধিং মন্তেত্ৰা সহাযং গৰেসেত্ৰা মহাসঙ্গীতিৰোহারেন মহাথেরা ৰিয সঙ্গীতিং অকংসু. কত্ৰা চ ৰিসুং গণা অহেসুং. অহোৰত ইদং হাসিতব্বকম্মং, সেয্যথাপি নাম জরসিঙ্গালো চতুপদসামঞ্ঞেন মানং জপ্পেত্ৰা অত্তানং সীহং ৰিয মঞ্ঞিত্ৰা সীহো ৰিয সীহনাদং নদীতি. তে পাৰচনং যথা ভূতং ¶ অজানিত্ৰা সদ্দচ্ছাযামত্তেন যথাভূতং অত্থং নাম সিংসু. কিঞ্চি পাৰচনম্পী অপনেসুং. তঞ্চ সকগণেযেৰ হোতি, ন ধম্মৰাদীগণে. ধম্মৰিনযং ৰিকোপেত্ৰা যথিচ্ছিত ৰসেনেৰ চরিংসু. অযং পন মহাসঙ্গীতিনাম একো অধম্মৰাদীগণো.

ততো পচ্ছা কালং অতিক্কন্তে ততোযেৰ অঞ্ঞমঞ্ঞং ৰাদতো ভিজ্জিত্ৰা গোকুলিকোনাম একো গণো একব্যোহারোনাম একোতি দ্ৰে গণা ভিজ্জিংসু. ততো পচ্ছা গোকুলিকগণগণতোযেৰ অঞ্ঞমঞ্ঞং ভিজ্জিত্ৰা বহুস্সুতিকোনাম একো গণো পঞ্ঞত্তিৰাদোনাম একোতি দ্ৰে গণা ভিজ্জিংসু. পুনপি তেহিযেৰ গণেহি চেতিযৰাদোনাম একো গণো ভিজ্জি.

ততো পচ্ছা চিরকালং অতিক্কন্তে ধম্মৰাদীগণেহি ৰিসভাগগণং পৰিসিত্ৰা মহিংসাসকোনাম একোগণো ৰজ্জিপুত্তকোনাম একোতি দ্ৰে গণা ভিজ্জিংসু. ততো পচ্ছাপি ৰজ্জিপুত্তকগণতোযেৰ অঞ্ঞমঞ্ঞং ভিজ্জিত্ৰা ধম্মুত্তরিকোনাম একো গণো, ভদ্দযানিকোনাম একো, ছন্নাগারিকোনাম একো, সমুতিকোনাম একোতি চত্তারো গণা ভিজ্জিংসু.

পুনপি মহিংসাসকগণতো অঞ্ঞমঞ্ঞং ভিজ্জিত্ৰা সব্বত্থিৰাদোনাম একো গণো, ধম্মগুত্তিকোনাম একো, কস্সপিযোনাম একো, সঙ্কন্তিকোনাম একো, সুত্তৰাদো নাম একোতি পঞ্চ গণা ভিজ্জিংসু.

এৰং মজ্ঝিমদেসে দুতিযসঙ্গীতিং সঙ্গাযন্তানং মহাথেরানং ধম্মৰাদীথেরৰাদগণতো ৰিসুং ৰিসুং ভিজ্জমানা অধম্মৰাদীগণা সত্তরস অহেসুং. তে চ অধম্মৰাদীগণা সাসনে থেরপরম্পরায অনন্তো গধা. তে হি সাসনে উপকারা ন হোন্তি, থেরপরম্পরায চ পৰেসেত্ৰা গণ্হিতুং ন সক্কা, যথা হংসগণে বকো, যথা চ গো গণে ¶ গৰজো, যথা চ সুৰণ্ণগণে হারকুটোতি.

মহাকস্সপত্থেরাদিতো পন আগতা থেরপরম্পরা উপালি দাসকো চেৰাতিআদিনা পরিৰারখন্ধকে সমন্তপাসাদিকট্ঠকথাযঞ্চ আগতনযেনেৰ ৰেদিতব্বা.

উপালিত্থেরাদীনং পরিসুদ্ধাচারাদীনি অনুমানেত্ৰা যাৰ মোগ্গলিপুত্ততিস্সত্থেরা, তাৰ তেসং থেরানং পরিসুদ্ধা চারাদীনীতি সক্কা ঞাতুং, সেয্যথাপি নদিযা উপরিসোতে মেঘৰস্সানি অনুমানেত্ৰা অধোসোতে নদিযা উদকস্স বাহুল্লভাৰো ৰিঞ্ঞাতুং সক্কাতি অযং কারণানুমাননযো নাম.

যাৰ পন মোগ্গলিপুত্ততিস্সত্থেরা, তাৰ থেরানং পরিসুদ্ধাচারাদীনি অনুমানেত্ৰা উপালিত্থেরস্স পরিসুদ্ধাচারাদীনীতি সক্কা ঞাতুং, সেয্যথাপি নাম উপরিধূমং পস্সিত্ৰা অনুমানেত্ৰা অগ্গি অত্থীতি সক্কা ঞাতুন্তি অযং ফলানুমানন যো নাম.

অদিভূতস্স পন উপালিত্থেরস্স অৰসানভূতস্স চ মোগ্গলিপুত্ততিস্সত্থেরস্স পরিসুদ্ধাচারাদীনি অনুমানেত্ৰা মজ্ঝে দাসকসোণসিগ্গৰাদীনং থেরানং পরিসুদ্ধাচারাদীনিতি সক্কা ঞাতুং, সেয্যথাপি নাম সিলাপট্টস্স ওরভাগে পারভাগে চ মিগপদৰল়ঞ্জনং দিস্ৰা অনুমানেত্ৰা মজ্ঝে অপাকটং পদৰল়ঞ্চনং অত্থীতি সক্কা ঞাতুন্তি অযং মিগপদৰল়ঞ্জন নযো নাম.

এৰং তীহি নযেহি অযং থেরৰাদগণো ধম্মৰাদীলজ্জিপেসলোতি ৰেদিতব্বো. এৰমুপরিপি নযো নেতব্বো. থেরপরম্পরা চ যাৰ পোত্থকারুল়া পরিৰারখন্ধকে সমন্ত পাসাদিকাযঞ্চ ততো মহিন্দো ইট্টিযোতিআদিনা ৰুত্ত নযেন ৰেদিতব্বাতি.

ইতি সাসনৰংসে নৰট্ঠানাগতসাসনৰংসকথামগ্গো

নাম পঠমো পরিচ্ছেদো.

২. সীহল়দীপিকসাসনৰংসকথামগ্গো

২. ইদানি ¶ সীহল়দীপসাসনকথামগ্গং ৰত্তুং ওকাসো অনুপ্পত্তো, তস্মা তং ৰক্খামি.

সীহল়দীপঞ্হি সাসনস্স পতিট্ঠানভূতত্তা চেতিযগব্ভসদিসং হোতি. সম্মাসম্বুদ্ধো কির সীহল়দীপং ধরমানকালেপি তিক্খত্তুং অগমাসি. পঠমং যক্খানং দমনত্থং এককোৰ গন্ত্ৰা যক্খে দমেত্ৰা মযি পরিনিব্বুতে সীহল়দীপে সাসনং পতিট্ঠহিস্সতীতি তম্বপণ্ণিদীপে আরক্খং করোন্তো তিক্খত্তুং দীপং আৰিঞ্ছি. দুতিযং মাতুলভাগিনেয্যানং নাগরা জূনং দমনত্থায এককোৰ গন্ত্ৰা তে দমেত্ৰা অগমাসি. ততিযং পঞ্চভিক্খুসতপরিৰারো গন্ত্ৰা মহাচেতিযট্ঠানে চ থূপারামচেতিযট্ঠানে চ মহাবোধিপতিট্ঠিতট্ঠানে চ মহিযঙ্গণচেতিযট্ঠানে চ মুদিঙ্গণচেতিযট্ঠানে চ দীঘৰাপি চেতিযট্ঠানে চ কল্যাণিযচেতিযট্ঠানে চ নিরোধসমাপত্তিং সমাপজ্জিত্ৰা নিসীদি.

তদা চ পন সাসনং ওগাহেত্ৰান তাৰ তিট্ঠতি. পচ্ছা পন যথাৰুত্তত্থেরপরম্পরায সমভিনিৰিট্ঠেন মহামোগ্গলিপুত্ততিস্সত্থেরেন পেসিতো মহিন্দত্থেরো জিনচক্কে পঞ্চতিংসাধিকে দ্ৰিসতে সম্পত্তে দুতিযকত্তিকমাসে ইট্টিযেন উত্তিযেন সম্বুলেন ভদ্দসালেন চাতি এতেহি থেরেহি সদ্ধিং সীহল়দীপং অগমাসি. সোণুত্তরত্থেরাদযো জিনচক্কে পঞ্চতিংসাধিকে দ্ৰিসতে সম্পত্তে দুতিযকত্তিকমাসেযেৰ সাসনস্স পতিট্ঠাপনত্থায অত্তনো অত্তনো সম্পত্তভারভূতং তং তং ঠানং অগমংসু.

মহামহিন্দত্থেরো পন সত্তমাসানি আগমেত্ৰা জিনচক্কে ছত্তিংসাধিকে দ্ৰিসতে সম্পত্তে জেট্ঠমাসস্স পুণ্ণমিযং সীহল়দীপং সাসনস্স পতিট্ঠাপনত্থায অগমাসি. তেনেৰ তেসু নৰসু ঠানেসু সীহল়দীপং ছত্তিংসাধিকে দ্ৰিস তে ¶ অগমাসি. অঞ্ঞানি পন অট্ঠ ঠানানি পঞ্চতিংসাধিকদ্ৰিসতেযেৰ অগমাসীতি ৰিসুংৰ ৰত্থপেতব্বো.

কস্মা পন মহামহিন্দত্থেরো সত্তমাসানি আগমেত্ৰা সব্বপচ্ছা সীহল়দীপং গচ্ছতীতি. সীহল়দীপে মুটভিৰো নাম রাজা জরাদুব্বলো অহোতি, সাসনং পগ্গহেতুং অসমত্থো, তস্স পন পুত্তো দেৰানং পিয তিস্সো নাম রাজকুমারো দহরো সাসনং পগ্গহেতুং সমত্থো ভৰিস্সতি, সো চ দেৰানং ৰিযতিস্সো রজ্জং তাৰ লভতু ৰেদিস্সকগিরিনগরে মাতুযা সদ্ধিং ঞাতকে তাৰ পস্সামীতি অপেক্খিত্ৰা সত্তমাসানি আগমেত্ৰা ছত্তিংসাধিকদ্ৰিসতেযেৰ জিনচক্কে মহামহিন্দত্থেরো সীহল়দীপং গচ্ছতীতি ৰেদিতব্বং.

মহামহিন্দত্থেরো চ ইট্টিযাদীহি থেরেহি চতূহি ভাগিনেয্যেন সুমনসামণেরেন ভণ্ডুকেন নাম উপাসকে ন চাতি এতেহি সদ্ধিং ছত্তিংসাধিকে দ্ৰিসতে জিনচক্কে জেট্ঠমাসপুণ্ণমিযং সুৰণ্ণহংসা ৰিয জেট্ঠমাসে নভং উগ্গন্ত্ৰা আকাসমগ্গেন অনুরাধপুরস্স পুরত্থিমদিসাভাগে মিস্স কপব্বতকূটে পতিট্ঠাসি.

জেট্ঠমাসস্স চ পুণ্ণমিযং লঙ্কাদীপে জেট্ঠমূলনক্খত্তসভা হুত্ৰা মনুস্সা ছণং অকংসু. তেনেৰাহ সারত্থদীপনিযং নাম ৰিনযডীকাযং, জেট্ঠমাসস্স পুণ্ণমিযং জেট্ঠনক্খত্তং মূলনক্খত্তং ৰা হোতীতি. তত্থ চ পুণ্ণমিনক্খত্তং রাজমত্তন্তে পুণ্ণমিনক্খত্তৰিচারণনযেন ৰুত্তন্তি দট্ঠব্বং.

দেৰানং পিয তিস্সো চ রাজা নক্খত্তং নাম ঘোসাপেত্ৰা ছণং কারেথাতি অমচ্চে আণাপেত্ৰা চত্তালী সপুরিসসহস্সপরিৰারো নগরম্হা নিক্খমিত্ৰা যেন মিস্স কপব্বতো, তেন পাযাসি মিগৰং কীল়িতুকামো. অথ তস্মিং পব্বতে অধিৰত্থা একা দেৰতা মিগরূপেন রাজানং ফলোভেত্ৰা পক্কোসিত্ৰা থেরস্স অভিমুখং অকাসি.

থেরো ¶ রাজানং আগচ্ছন্তং দিস্ৰা মমংযেৰ রাজা পস্সতু মা ইতরেতি অধিট্ঠহিত্ৰা তিস্স তিস্স ইতো এহীতি আহ. রাজা তং সুত্ৰা চিন্তেসি, ইমস্মিং দীপে জাতো সকলোপি মনুস্সো মং তিস্সোতি নামং গহেত্ৰা আলপিতুং সমত্থো নাম নত্থি, অযং পন ভিন্নভিন্নপটধরো ভণ্ডুকাসাৰ ৰসনো মং নামেন আলপতি, কো নুখো অযং ভৰিস্সতি, মনুস্সো ৰা অমনুস্সো ৰাতি. থেরো আহ,–

সমণা মযং মহারাজ, ধম্মরাজস্স সাৰকা;

তৰেৰ অনুকম্পায, জম্বুদীপা ইধাগতাতি.

তদা চ দেৰানং পিযতিস্সো রাজা অসোকরঞ্ঞা পেসিতেন অভিসেকেন একমাসাভিসিত্তো অহোসি. ৰিসাখপুণ্ণমাযং হিস্স অভিসেকমকংসু. সো চ অসোকরঞ্ঞা পেসিতে ধম্মপণ্ণাকারে রতনত্তযগুণপ্পটিসংযুত্তং সাসনপ্পৰত্তিং অচিরসুতং অনুস্সরমানো তং থেরস্স সমণা মযং মহারাজ, ধম্মরাজস্স সাৰকাতি ৰচনং সুত্ৰা অয্যা নুখো আগতাতি তাৰদেৰ আৰুধং নিক্খিপিত্ৰা একমন্তং নিসীদি সম্মোদনীযং কথং কথযমানো. যথাহ,–

আৰুধং নিক্খিপিত্ৰান, একমন্তং উপাৰিসি;

নিসজ্জ রাজা সম্মোদি, বহুং অত্থূপসঞ্হিতন্তি.

সম্মোদনীযং কথঞ্চ কুরুমানেযেৰ তস্মিং তানিপি চত্তালীসপুরিসসহস্সানি আগন্ত্ৰা সম্পরিৰারেসুং. তদাথেরো ইতরেপি ছ জনে দস্সেসি. রাজা দিস্ৰা ইমে কদা আগতাতি আহ. মযা সদ্ধিংযেৰ মহারাজাতি. ইদানি পন জম্বুদীপে অঞ্ঞেপি এৰরূপা সমণা সন্তীতি. সন্তি ¶ মহারাজ এতরহিজম্বুদীপো কালাৰপজ্জোতো ইসিৰাতপটিৰাতো, তস্মিং–

তেৰিজ্জা ইদ্ধিপত্তা চ, চেতোপরিযকোৰিদা;

খীণাসৰা অরহন্তো, বহূ বুদ্ধস্স সাৰকাতি.

ভন্তে কেন আগতত্থাতি. নেৰ মহারাজ উদকেন, ন থলেনাতি. রাজা আকাসেন আগতাতি অঞ্ঞাসি. থেরো অত্থি নুখো রঞ্ঞো পস্সাৰেয্যত্তিকন্তি ৰীমংসনত্থায আসন্নং অম্বরুক্খং আরব্ভ পঞ্হং পুচ্ছি, –

কিন্নামো মহারাজ অযং রুক্খোতি. অম্বরুক্খো নাম ভন্তেতি. ইমং পন মহারাজ অম্বং মুঞ্চিত্ৰা অঞ্ঞো অম্বো অত্থি ৰা নত্থি ৰাতি. অত্থি ভন্তে অঞ্ঞেপি বহূ অম্বরুক্খাতি. ইমঞ্চ অম্বং তে চ অম্বে মুঞ্চিত্ৰা অত্থি নুখো মহারাজ অঞ্ঞে রুক্খাতি. অত্থি ভন্তে, তে পন ন অম্বরুক্খাতি. অঞ্ঞে চ অম্বে অনম্বে চ মুঞ্চিত্ৰা অত্থি পন অঞ্ঞো রুক্খোতি. অযমেৰ ভন্তে অম্ব রুক্খোতি. সাধু মহারাজ পণ্ডিতোসীতি.

অত্থি পন মহারাজ তে ঞাতকাতি. অত্থি ভন্তে বহূজনাতি. তে মুঞ্চিত্ৰা কেচি অঞ্ঞাতকাপি অত্থি মহারাজাতি. অঞ্ঞাতকা ভন্তে ঞাতকেহি বহুতরাতি. তৰঞাতকে চ অঞ্ঞাতকে চ মুঞ্চিত্ৰা অত্থঞ্ঞো কোচি মহারাজাতি. অহমেৰ ভন্তেতি. সাধু মহারাজ অত্তা নাম অত্তনো নেৰ ঞাতকো ন অঞ্ঞাতকোতি.

অথ থেরো পণ্ডিতো রাজা সক্খিস্সতি ধম্মং অঞ্ঞাতুন্তি চূল়হত্থিপদোপমসুত্তং কথেসি. কথাপরিযোসানে রাজা তীসু সরণেসু পতিট্ঠহি সদ্ধিং চত্তালীসায পাণসহস্সেহীতি. ততো পরং যং যং ৰত্তব্বং, তং তং সমন্তপাসাদিকাদীসু ৰুত্তনযেন ৰেদিতব্বং.

ইচ্চেৰং সীহল়দীপে সাসনানুগ্গহণ মহিন্দত্থেরতো আগতা ¶ সিস্সপরম্পরা বহূ হোন্তি, গণনপথং ৰীতি ৰত্তা. কথং. মহামহিন্দত্থেরস্স সিস্সো অরিট্ঠো নাম থেরো, তস্স সিস্সো তিস্সদত্তো, তস্স সিস্সো কাল়সুমনো, তস্স সিস্সো দীঘো, তস্স সিস্সো দীঘ সুমনো, তস্স সিস্সো কাল়সুমনো, তস্স সিস্সো নাগো, তস্স সিস্সো বুদ্ধরক্খিতো, তস্স সিস্সো তিস্সো, তস্স সিস্সো রেৰো, তস্স সিস্সো সুমনো, তস্স সিস্সো চূল়নাগো, তস্স সিস্সো ধম্মপালি এতা, তস্স সিস্সো খেমো, তস্স সিস্সো উপলিস্সো, তস্স সিস্সো ফুস্সদেৰো, তস্স সিস্সো সুমনো, তস্স সিস্সো মহাপদুমো, তস্স সিস্সো মহাসীৰো, তস্স সিস্সো উপালি, তস্স সিস্সো মহানাগো, তস্স সিস্সো অভযো, তস্স সিস্সো তিস্সো, তস্স সিস্সো সুমনো, তস্স সিস্সো চূল়াভযো, তস্স সিস্সো তিস্সো, তস্স সিস্সো চূল়দেৰো, তস্স সিস্সো সীৰোতি. অযং যাৰ পোত্থকারুল়সঙ্খাতা চতুত্থসঙ্গীতিকা, তাৰ থেরপরম্পরাতি দট্ঠব্বা.

ৰুত্তঞ্হেতং অট্ঠকথাযং,– যাৰজ্জভনা তেসংযেৰ অন্তেৰাসিকপরম্পরভূতায আচরিযপরম্পরায আভতন্তিতি ৰেদিতব্বন্তি.

এৰং তেসং সিস্সপরম্পরভূতা আচরিযপরম্পরা যাৰজ্জতনা সাসনে পাকটা হুত্ৰা আগচ্ছন্তীতি ৰেদিতব্ব.

সাসনে ৰিনযধরেহি নাম তিলক্খণসম্পন্নেহি ভৰিতব্বং. তীণি হি ৰিনযধরস্স লক্খণানি ইচ্ছি তব্বানি. কতমানি তীণি. সুত্তঞ্চস্স স্ৰাগতং হোতি সুপ্পৰত্তি সুৰিনিচ্ছিতং সুত্ততো অনুব্যঞ্জনতোতি ইদমেকং লক্খণং, ৰিনযে খো পন ঠিতো হোতি অসংহীরোতি ইদং দুতিযং, আচরিযপরম্পরা খো পনস্স সুগ্গহিতা হোতি সুমনসিকতা সুপধারিতাতি ইদং ততিযং.

তত্থ ¶ আচরিযপরম্পরা খো পনস্স সুগ্গহিতা হোতীতি থেরপরম্পরা ৰংসপরম্পরা চস্স সুট্ঠুগহিতা হোতি. সুমনসিকতাতি সুট্ঠু মনসিকতা, আৰজ্জিতমত্তে ঞজ্জলি তপ্পদীপো ৰিয হোতি.

সুপধারিতাতি সুট্ঠু উপধারিতা, পুব্বাপরানুসন্ধিতো অত্থতো কারণতো চ উপ ধারিতা. অত্তনো মতিং পহায আচরিযসুদ্ধিযা ৰত্তা হোতি, ময্হং আচরিযো অসুকাচরিযস্স সন্তিকে উগ্গণ্হি, সো অসুকস্সাতি এৰং সব্বং আচরিযপরম্পরং থের ৰাদঙ্গং আহরিত্ৰা যাৰ উপালিত্থেরো সম্মাসম্বুদ্ধস্স সন্তিকে উগ্গণ্হীতি পাপেত্ৰা ঠপেতি. ততোপি আহরিত্ৰা উপালিত্থেরো সম্মাসম্বুদ্ধস্স সন্তিকে উগ্গণ্হি, দাসকত্থেরো অত্তনো উপজ্ঝাযস্স উপালিত্থেরস্স, সোণকত্থেরো অত্তনো উপজ্ঝাযস্স দোসকত্থেরস্স, সিগ্গৰত্থেরো অত্তনো উপজ্ঝাযস্স সোণকত্থেরস্স, মোগ্গলিপুত্ততিস্সত্থেরো অত্তনো উপজ্ঝাযস্স সিগ্গৰত্থেরস্স চণ্ড ৰজ্জিত্থেরস্স চাতি এৰং সব্বং আচরিযপরম্পরং থেরৰাদঙ্গং আহরিত্ৰা অত্তনো আচরিযং পাপেত্ৰা ঠপেতি. এৰং উগ্গহিতা হি আচরিযপরম্পরা সুগ্গহিতা হোতি.

এৰং অসক্কোন্তেন পন দ্ৰে তযো পরিৰট্টা উগ্গহেতব্বা. সব্বপচ্ছিমেন হি নযেন যথা আচরিযো চ আচরিযাচরিযো চ পাল়িঞ্চ পরিপুঞ্ছঞ্চ ৰদন্তি, তথা ঞাতুং ৰত্ততীতি.

যথা ৰুত্তত্থেরপরম্পরা পন ভগৰতো ধরমানকালতো পট্ঠায যাৰ পোত্থকারুল়া মুখপাঠেনেৰ পিটকত্তযং ধারেসুং, পরিপুণ্ণং পন কত্ৰা পোত্থকে লিখিত্ৰা ন ঠপেন্তি. এৰং মহাথেরা দুক্করকম্মং কত্ৰা সাসনং পগ্গণ্হিংসু. তত্রিদং ৰত্থু,–

সীহল়দীপে কির চণ্ডালতিস্সভযেন সঙ্খুব্ভিত্ৰা দেৰো ¶ চ অৰস্সিত্ৰা দুব্ভিক্খভযং উপ্পজ্জি. তদা অক্কো দেৰানমিন্দো আগন্ত্ৰা তুম্হে ভন্তে পিটকং ধারেতুং ন সক্খিস্সথ, নাৰং পন আরূহিত্ৰা জম্বুদীপং গচ্ছথ, সচে নাৰা অপ্পহোনকা ভৰেয্য, কট্ঠেন ৰা ৰেল়ুনা ৰা তরথ, অভযত্থায পন মযং রক্খিস্সামাতি আহ.

তদা সট্ঠিমত্তা ভিক্খূ সমুদ্দতীরং গন্ত্ৰা পুন এতদহোসি,– মযং জম্বুদীপং ন গচ্ছিস্সাম, ইধেৰ ৰসিত্ৰা তেপিটকং ধারিস্সামাতি. ততো পচ্ছা নাৰা তিত্থতো নিৰত্তিত্ৰা সীহল়দীপেকদেসং মলযজনপদং গন্ত্ৰা মূলফলাদীহিযেৰ যাপেত্ৰা সজ্ঝাযং অকংসু. ছাতকভযেন অতিপীল়িতা হুত্ৰা এৰম্পি কাতুং অসক্কোন্তো ৰাল়ুকতলে উরং ঠপেত্ৰা সীসেন সীসং অভিমুখং কত্ৰা ৰাচং অনিচ্ছারেত্ৰা মনসাযেৰ অকংসু. এৰং দ্ৰাদসৰস্সানি সদ্ধিং অট্ঠকথায তেপিটকং রক্খিত্ৰা সাসনং অনুগ্গহেসুং.

দ্ৰাদসৰস্সেসু পন অতিক্কন্তেসু তং ভযং ৰূপসমিত্ৰা পুব্বে জম্বুদীপং গচ্ছন্তা সত্তভিক্খুসতা আগন্ত্ৰা সীহল়দীপেকদেসং রামজনপদে মণ্ডলারামৰিহারং আপজ্জিংসু. তেপি সট্ঠিমত্তা ভিক্খূ তমেৰ ৰিহারং গন্ত্ৰা অঞ্ঞমঞ্ঞং সম্মন্তেত্ৰা সজ্ঝাযিংসু. তদা অঞ্ঞমঞ্ঞং সমেন্তি, ন ৰিরুজ্ঝন্তি, গঙ্গাদকেন ৰিয যমুনোদকং সংসন্দেন্তি. এৰং পিটকত্তযং মুখপাঠেনেৰ ধারেত্ৰা মহাথেরা দুক্করকম্মং করোন্তীতি ৰেদিতব্বা.

যম্পি পরিযত্তিং একপদমত্তম্পি অৰিরজ্ঝিত্ৰা ধারেন্তি, তং দুক্করকম্মমেৰ.

সীহল়দীপে কির পুনব্বসুকস্স নাম কুটুম্বিকস্স পুত্তো তিস্সত্থেরো বুদ্ধৰচনং উগ্গণ্হিত্ৰা ইমং জম্বুদীপং আগন্ত্ৰা যোনকধম্মরক্খিতত্থেরস্স সন্তিকে বুদ্ধৰচনং উগ্গণ্হিত্ৰা গচ্ছন্তো নাৰং অভিরূহনতিত্থে একস্মিং পদে উপ্পন্নকঙ্খো যোজনসতমগ্গং নিৰত্তিত্ৰা আচরিযস্স সন্তিকং আগচ্ছন্তো ¶ অন্তরামগ্গে একস্স কুটুম্বিকস্স পঞ্হং কথেসি. সো পসীদিত্ৰা সতসহস্সগ্ঘনকং কম্পলং অদাসি. সোপি তং আহরিত্ৰা আচরিযস্স অদাসি. থেরো ৰা সিযা কোট্টেত্ৰা নিসীদনট্ঠানে পরিভণ্ডং কারেসি. কিমত্থাযাতি. পচ্ছিমায জনতায অনুগ্গহত্থায. এৰং কিরস্স অহোসি,– অম্হাকং গতমগ্গং আৰজ্জিত্ৰা অনাগতে সব্রহ্মচারিনো পটিপত্তিং পূরেতব্বং মঞ্ঞিস্সন্তীতি. তিস্সত্থেরোপি আচরিযস্স সন্তিকে কঙ্খং ছিন্দিত্ৰা সীহল়দীপমেৰ সকট্ঠানং আগমাসীতি. ইচ্চেৰং পরিযত্তিং একপদমত্তম্পি অৰিরজ্ঝিত্ৰা ধারণম্পি দুক্করকম্মমেৰাতি দট্ঠব্বং.

যম্পি যেভুয্যেন পগুণং ন করোন্তি, তস্স অনন্তরধানত্থায অসম্মোসত্থায উগ্গহধারণাদিৰসেন রক্খনম্পি করোন্তি, তং দুক্করকম্মমেৰ.

সীহল়দীপেযেৰ কির মহাভযে একস্সেৰ ভিক্খুনো মহানিদ্দেসো পগুণো অহোসি. অথ চতুনিকাযিকতিস্সত্থেরস্স উপজ্ঝাযো মহাতিপিটকত্থেরো নাম মহারক্খিতত্থেরংআহ,– আৰুসো মহারক্খিত অসুকস্স সন্তিকে মহানিদ্দেসং গণ্হাহীতি. পাপোকিরাযং ভন্তে ন গণ্হামীতি. গণ্হাৰুসো অহং তে সন্তিকে নিসীদিস্সামীতি. সাধু ভন্তে তুম্হেসু নিসিন্নেসু গণ্হিস্সামীতি পট্ঠপত্ৰা রত্তিন্দিৰং নিরন্তরং পরিযাপুণন্তো ওসানদিৰসে হেট্ঠামঞ্চে ইত্থিং দিস্ৰা ভন্তে সুতংযেৰ মে পুব্বে, সচাহং এৰং জানেয্যং, ন ঈদিসস্স সন্তিকে ধম্মং পরিযাপুণেয্যন্তি আহ. তস্স পন সন্তিকে বহূ মহাথেরা উগ্গণ্হিত্ৰা মহানিদ্দেসং পতিট্ঠাপেসুং. এৰং যং যেভুয্যেন পগুণং ন করোন্তি, তস্স অনন্তরধানত্থায অসম্মোসত্তায উগ্গহধারণাদিৰসেন রক্খনম্পি দুক্করকম্মং যেৰাতি দট্ঠব্বং.

ইচ্চেৰং ভগৰতো ধরমানকালতো পভুতি চিরকালং যথাৰুত্তমহাথেরপরম্পরা পরিযত্তিং মুখপাঠেনেৰ ধারেসুং ¶ . অহোৰত পোরাণিকানং মহাথেরানং সতিপঞ্ঞাসমাধিৰেপুল্লতায হি তে মুখপাঠেনেৰ ধারেতু সক্কাতি. মুখপাঠেনেৰ পোরাণকত্থেরানং পরিযত্তিধারণং পঞ্চনৰুতাধিকানি চতুসতানি অহোসি.

ভগৰতো পরিনিব্বানতো মহাৰংসসারত্থসঙ্গহেসু আগতনযেন জিনচক্কে পণ্ণাস্সাধিকে চতুসতে সম্পত্তে তম্বপণ্ণিদীপে রাজূনং অট্ঠারসমকো’সদ্ধাতিস্সস্স নাম রঞ্ঞো পুত্তো ৰট্টগামণি নাম রাজা রজ্জং পত্ৰা ছৰস্সকালে অনাগতে সত্তা হীনসতিপঞ্ঞাসমাধিকা হুত্ৰা ন সক্খিস্সন্তি মুখপাঠেন ধারেতুন্তি উপপরিক্খিত্ৰা পুব্বে ৰুত্তেহি মহাথেরেহি অনুপুব্বেন আগতা পঞ্চমত্তা মহাথেরসতা ৰট্টগামণিরাজানং নিস্সায তম্বপণ্ণিদীপেকদেসে মলযজনপদে আলোকলেণে অট্ঠকথায সহপিটকত্তযং পোত্থকে আরোপেসুং.

তঞ্চ যথাৰুত্তসঙ্গীতিযো উপনিধায চতুত্থসঙ্গীতিযেৰ নামাতি ৰেদিতব্বা. ৰুত্তঞ্হেতং সারত্থদীপনিযং নাম ৰিনযটীকাযং,– চতুত্থসঙ্গীতিসদিসা হি পোত্থকারোহসঙ্গীতীতি.

সীহল়দীপে পন ৰট্টগামণিরাজা মরম্মরট্ঠে সিরিখেত্তনগরে একো নাম কুক্কুটসীসরাজা চ এককালেন রজ্জং কারেসি. অমরপুরমাপকস্স রঞ্ঞো কালে সীহল়দীপভিক্খুহি ইধ পেসিতসন্দেসকথাযং পন তেত্তিংসাধিকচতুসতে সম্পত্তে পোত্থকারুল়ং অকংসূতি আগতং. ৰুত্তঞ্হেতং তত্থ,– তেত্তিংসাধিকচতুৰস্সসতপরিমাণকালন্তি.

ইদং সীহল়দীপে যাৰ পোত্থকারুল়্হা

সাসনস্স পতিট্ঠানং.

অথাপরং ¶ জম্বুদীপে সীহল়দীপে চ ভিক্খূ ৰিসুং ৰিসুং গণৰসেন ভিজ্জিংসু, যথা অনোতত্তদহতো নিক্খমননদিযা গঙ্গাযমুনাদিৰসেন ভিজ্জন্তীতি. তত্থ জম্বুদীপে গণানং ভিজ্জমানতং উপরিযেৰ ৰক্খাম.

সীহল়দীপে পন গণানং ভিজ্জমানতা এৰং দট্ঠব্বা. কথং. সীহল়দীপে হি সাসনস্স পতিট্ঠমানকালতো অট্ঠারসাধি কদ্ৰিৰস্সসতে সম্পত্তে ৰট্টগামণিরঞ্ঞা কারাৰিতে অভযগিরিৰিহারে পরিৰারখন্ধকং পাঠতো চ অত্থতো চ ৰিপল্লাসং কত্ৰা মহাৰিহারৰাসিগণতো পুথু হুত্ৰা একো গণো ভিজ্জি, সো অভযগিরিৰাসিগণো নাম, ধম্মরুচিগণোতি চ তস্সেৰ নামং.

অভযগিরিৰাসিগণস্স ভিজ্জমানতো দ্ৰেচত্তালীসাধিকতিৰস্সসতে সম্পত্তে মহাসেনেন নাম রঞ্ঞা কারাপিতে জেতৰনৰিহারে ভিক্খূ উভতোৰিসঙ্গপাঠে ৰিপরীতৰসেন অভিসঙ্খরিত্ৰা অভযগিরিৰাসিগণতো ৰিসুং একো গণো অহোসি, সো জেতৰনৰাসিগণো নাম, সাগলিযগণোতি চ তস্সেৰ নামং.

জেতৰন ৰাসিগণস্স ভিজ্জমানকালতো একপঞ্ঞাসৰস্সাধিকানং তিণ্ণং ৰস্সসতানং উপরি কুরুন্দৰাসিনো চ কোলম্বৰাসিনো চ ভিক্খূ ভাগিনেয্যং দাঠাপতিং নাম রাজানং নিস্সায উভতোৰিভঙ্গপরিৰারখন্ধকপাঠে ৰিপরীতৰসেন অভিসঙ্খরিত্ৰা ৰুত্তেহি দ্ৰীহি গণেহি ৰিসুং হুত্ৰা মহাৰিহার ৰাসিগণ্হত্তমং তুলযিত্ৰা উপধারেত্ৰা মহাৰিহারনামং গহেত্ৰা একো গণো ভিজ্জি. এৰং সীহল়দীপে মহামহিন্দত্থেরাদীনং ৰংসভূতেন মহাৰিহারৰাসি গণেন সদ্ধিং চত্তারো গণা ভিজ্জিংসু.

তত্থ মহাৰিহারৰাসি গণোযেৰ একো ধম্মৰাদী অহোসি, সেসা পন অধম্মৰাদিনো. তে চ তযো অধম্মৰাদিনো গণা ভূতত্থং পহায অভূতত্থেন ধম্মং অগরুং কত্ৰা চরিংসূতি ¶ ৰচনতো সীহল়দীপে অধম্মৰাদিনো তযোপি অলজ্জিনো গণা পরিমণ্ডলসুপ্পটিচ্ছন্নাদিসিক্খাপদানি অনাদিযিত্ৰা ৰিচরিংসু. ততো পট্ঠায সাসনে একচ্চানং ভিক্খূনং নানপ্পকারৰসেন নিৰাসনপারুপনাদীনি দিস্সন্তিতি ৰেদিতব্বং.

অধম্মৰাদিগণানং ভিজ্জমানকালতো সত্তৰীসাধিকানং পঞ্চসতানং ৰস্সানঞ্চ উপরি সিরিসঙ্ঘবোধি নাম রাজা মহাৰিহার গণস্স পক্খো হুত্ৰা অধম্মৰাদিনা তযো গণে নিগ্গহিত্ৰা জিনসাসনং পগ্গহেসি. সো চ সিরিসঙ্ঘ বোধিরাজা অম্হাকং মরম্মরট্ঠে অরিমন্দননগরে অনুরুদ্ধেন নাম রঞ্ঞা সমকালৰসেন রজ্জসম্পত্তিং অনুভৰি.

ততো পচ্ছা সীহল়দীপে ৰোহারকতিস্সস্স নাম রঞ্ঞো কালে কপিলেন নাম অমচ্চেন সদ্ধিং মন্তেত্ৰা মহাৰিহার ৰাসিনো ভিক্খূ নিস্সায অধম্মৰাদিগণে নিগ্গণ্হিত্ৰা জিনসাসনং পগ্গণ্হাতি.

ততো পচ্ছা চ গোট্ঠাভযস্স নাম রঞ্ঞো কালে অভযগিরি ৰাসিনো ভিক্খূ পরসমুদ্দং পব্বাজেত্ৰা মহাৰিহার ৰাসিনো ভিক্খূ নিস্সায সাসনং ৰিসোধযি.

ততো পচ্ছাপি গোট্ঠাভযরঞ্ঞো পুত্তভূতস্স মহাসেনস্স নাম রঞ্ঞো কালে অভযগিরিৰাসীনং ভিক্খূনং অব্ভন্তরে সঙ্ঘমিত্তো নাম একো ভিক্খু রঞ্ঞো পধানাচরিযো হুত্ৰা মহামহিন্দত্থেরাদীনং অরহন্তানং নিৰাসট্ঠানভূতং মহাৰিহারারামং ৰিনস্সিতুং মহাসেনরঞ্ঞা মন্তেত্ৰা আরভি. তদা নৰৰস্সানি মহাৰিহারে ভিক্খু সঞ্ঞো অহোসি. অহোৰত মহাথেরানং মহিদ্ধিকানং নিৰাসট্ঠানং অলজ্জিনো ভিক্খূ ৰিনস্সাপেসুং, সুৰণ্ণহংস্সানং নিৰাসট্ঠানং কাকা ৰিযাতি.

জেতৰনৰাসীনঞ্চ ভিক্খূনং অব্ভন্তরে একো তিস্সো নাম ভিক্খু তেনেৰ রঞ্ঞা মন্তেত্ৰা মহাৰিহারে সীমং সমূহনি ¶ . অছেকত্তা পন তেসং সীমসমূহনকম্মং ন সম্পজ্জীতি. অহোৰত দুস্সীলানং পাপকানং কম্মং অচ্ছরিযং, সেয্যথাপি নাম সাখমিগো অগ্গগ্ঘো কাসিৰত্থং মহগ্ঘং ভিন্নতি, এৰমেৰ ভিন্দিতব্বৰত্থুনা ভেদকপুগ্গলো অতিৰিয দূরো অহোসীতি. ভৰন্তি চেত্থ, –

যথা সাখমিগো পাপো, অপ্পগ্ঘোযেৰ কাসিকং;

মহগ্ঘং কচ্চ ভিন্নংভিন্নং, মহুস্সাহেন ছিন্দতি.

এৰং অধম্মৰাদী পাপো, ধম্মৰাদিগণং সুভং;

মহুস্সাহেন ভিন্দযি, অহো অচ্ছরিযো অযং.

আরকা দূরতো আসুং, ভিন্দিতব্বেহি ভেদকা;

ভূমিতোৰ ভৰগ্গন্তো, অহো কম্মং অজানতন্তি.

ইচ্চেৰং অধম্মৰাদিগণানং বলৰতায ধম্মৰাদিগণো পরিহাযতি. যথা হি গিজ্ঝসকুণস্স পক্খৰাতেন সুৰণ্ণহংসা পকতিযা ঠাতুং ন সক্কোন্তি, এৰমেৰ অধম্মৰাদীনং বলৰতায ধম্মৰাদী পরিহাযতি. ব্যগ্ঘৰনে ৰিয সুৰণ্ণমিগো নিল্লযিত্ৰা গোচরং গণ্হাতি, যথারুচিৰসেন ধম্মং চরিতুং ওকাসং ন লভি.

সীহল়দীপে সাসনস্স পতিট্ঠানতো দ্ৰিসত্ততাধিকানং চতুসতানং ৰস্সসহস্সানঞ্চ উপরি সম্মাসম্বুদ্ধস্স পরিনিব্বানতো অট্ঠসত্তসতাধিকানং ৰস্সসহস্সানং উপরি মহারাজা নাম ভূপালো রজ্জং কারেসি. সো পন রাজা ঞদুম্বরগিরিৰাসিকস্সপত্থেরগ্গমুখা মহাৰিহারৰাসিনো ভিক্খূ তমেৰ রাজানং নিস্সায সাসনে মলং ৰিসোধেসুং, যথা হেরঞ্ঞিকো হিরঞ্ঞে মলন্তি.

মহাৰিহারৰাসিগণতো অঞ্ঞে অধম্মৰাদিনা উপ্পব্বা জেত্ৰা ¶ ৰিসোধেসুং. সো চ মহারাজা অম্হাকং মরম্মরট্ঠে অরিমদ্দননগরে নরপতিচঞ্ঞিসূনা নাম রঞ্ঞা সমকাল ৰসেন রজ্জং কারেসীতি ৰেদিতব্বো.

ততো পচ্ছা ৰি ৰিজযবাহুরাজানং পরক্কমবাহুরাজানঞ্চ নিস্সায মহাৰিহার ৰাসিনো ভিক্খূ সাসনং পরিসুদ্ধং অকংসু, অধম্মৰাদিনো সব্বেপি উপ্পব্বাজেত্ৰা মহাৰিহারৰাসিগণোযেৰ একো পতিট্ঠহি, যথা অব্ভাদিউপক্কিলেসমলেহি ৰিমুত্তো নিসানাথোতি.

সিরিসঙ্ঘবোধিরাজা ৰোহারিকতিস্সরাজা গোট্ঠাভযরাজাতি এতে রাজানো সাসনং ৰিসোধেন্তোপি সব্বেন সব্বং অধম্মৰাদিগণানং অৰিনস্সনতো সাসনং পরিসুদ্ধং ন তাৰ অহোসি. সিরিসঙ্ঘবোধিরঞ্ঞো মহারঞ্ঞো ৰিজযবাহুরঞ্ঞো পরক্কমবাহুরঞ্ঞোতি এতেসংযেৰ রাজূনং কালে সব্বেন সব্বং অধম্মৰাদীনং ৰিনস্সনতো সাসনং পরিসুদ্ধং অহোসি. তদা পন অধম্মৰাদিনা সীসম্পি উট্ঠহিতুং ন সক্কা, যথা অরুণুগ্গে কোসিযাতি.

অপরভাগে পন চিরং কালং অতিক্কন্তে মিচ্ছাদিট্ঠিকানং ৰিজাতিযানং ভযেন লঙ্কাদীপে সাসনং ওসক্কিত্ৰা গণপূরণমত্তস্সপি ভিক্খুসঙ্ঘস্স অৰিজ্জমানতায মহাৰিজযবাহুরঞ্ঞো কালে রামঞ্ঞদেসতো সঙ্ঘং আনেত্ৰা সাসনং পতিট্ঠাপেসি.

ততো পচ্ছা চ ৰিমলধম্মসূরিযস্স নাম রঞ্ঞো কালে রক্খাপুররট্ঠতো সঙ্ঘং আনেত্ৰা সাসনং পতিট্ঠাপেসি. ততো পচ্ছা চ ৰিমলস্স নাম রঞ্ঞো কালে ততোযেৰ সঙ্ঘং আনেত্ৰা সাসনং পতিট্ঠাপেসি. ততো পচ্ছা চ কিত্তিস্সিরিরাজসীহস্স নাম রঞ্ঞো কালে স্যামরট্ঠতো সঙ্ঘং আনেত্ৰা তথেৰ অকাসীতি.

অযং সীহল়দীপে সাসনস্স ওসক্কনকথা.

ততো ¶ পচ্ছা জিনসাসনে নৰুতাধিকে অট্ঠৰস্সসতে সম্পত্তে বুদ্ধদাসস্স নাম রঞ্ঞো কালে একো ধম্ম কথিকত্থেরো ঠপেত্ৰা ৰিনযপিটকং অভিধম্মপিটকঞ্চ অৰসেসং সুত্তন্তপিটকং সীহল়ভাসায পরিৰত্তিত্ৰা অভিসঙ্খরিত্ৰা ঠপেসি. তঞ্চ কারণং চূল়ৰংসে ৰুত্তং.

তস্স কির বুদ্ধদাসস্স রঞ্ঞো পুত্তা অসীতিমত্তা অসীতিমহাসাৰকানং নামেনেৰ ৰোহারিতা অহেসুং. তেসু পুত্তেসু সারিপুত্তত্থেরস্স নামেন ৰোহারিতো একো উপতিস্সো নাম রাজকুমারো পিতরি দেৰঙ্গতে দ্ৰেচত্তালীসৰস্সানি রজ্জং করেসি.

ততো পচ্ছা কনিট্ঠো মহানামো নাম রাজকুমারো দ্ৰাৰীসৰস্সানি রজ্জং কারেসি. তস্স রঞ্ঞো কালে জিন চক্কে তেত্তিংসাধিকনৰসতৰস্সে সীহল়দীপে ছসট্ঠিমত্তানং রাজূনং পূরণকালে বুদ্ধঘোসো নাম থেরো সীহল়দীপং গন্ত্ৰা সীহল়ভাসায লিখিতে অট্ঠকথাগন্থে মাগধভাসায পরিৰত্তিত্ৰা লিখি.

সো পন মহানাম রাজা অম্হাকং মরম্মরট্ঠে সিরিপচ্চযনগরে সৰিলঞ্ঞিক্রোৰি নামকেন রঞ্ঞা সমকালো হুত্ৰা রজ্জং কারেসি. পরিত্তনিদ্দানে পন ব্রূমৰি?থী? নামকেন রঞ্ঞা সমকালো হুত্ৰা রজ্জং কারেসীতি ৰুত্তং. তং ন যুজ্জতিযেৰ.

সীহল়দীপে পন কিত্তিস্সিরিমেঘো নাম রাজা হুত্ৰা নৰমে ৰস্সে তস্মিংযেৰ দীপে রাজূনং দ্ৰাসট্ঠিমত্তানং পূরণকালে জিনচক্কে তিংসাধিকে অট্ঠসতৰস্সে জম্বুদীপে কলিঙ্গপুরতো কুহসিৰস্স নাম রঞ্ঞো জামাতা দন্তকুমারো হেমমালং নাম রাজধীতং গহেত্ৰা দাঠাধাতুং থেনেত্ৰা নৰায তরিত্ৰা সীহল়দীপং অগমাসি. জিনচক্কে তিংসাধিকঅট্ঠৰস্সসতে জেট্ঠতিস্সরাজা নৰৰস্সানি রজ্জং কারেসি.

বুদ্ধদাসরাজা ¶ একূনতিংসতি ৰস্সানি উপলিস্সরাজা চদ্ৰিচত্তালীসৰস্সানি মহানামরাজা দ্ৰাৰীসৰস্সানীতি সব্বানি সম্পিণ্ডিত্ৰা জিনসাসনং দ্ৰত্তিংসাধিকনৰৰস্সসতপ্পমাণং হোতি.

তস্মিঞ্চ কালে যদা দ্ৰীহি ৰস্সেহি ঊনং অহোসি, তদা মহানামরঞ্ঞো কালে তিংসাধিকনৰৰস্সসতমত্তে সাসনে বুদ্ধঘোসো নাম থেরো লঙ্কাদীপং অগমাসি.

অমরপুরমাপকস্স রঞ্ঞো কালে সীহল়দীপিকেহি ভিক্খূহি পেসিতসন্নেসপণ্ণে পন ছপণ্ণাসাধিকনৰৰস্সসতাতিক্কন্তে সূতি ৰুত্তং.

এত্থ ঠত্ৰা বুদ্ধঘোসত্থেরস্স অট্ঠুপ্পত্তিংসঙ্খেপমত্তং ৰক্খাম. কথং. সীহল়ভাসক্খরেহি পরিৰত্তিতং পরিযত্তিসাসনং মাগধসাসক্খরেন কো নাম পুগ্গলো পরিৰত্তিতুং সক্খিস্সতীতি মহাথেরা নিমন্তযিত্ৰা তাৰতিংসভৰনং গন্ত্ৰা ঘোসং দেৰপুত্তং দিস্ৰা সদ্ধিং সক্কেন দেৰানমিন্দেন তং যাচিত্ৰা বোধিরুক্খসমীপে ঘোসগামে কেসস্স নাম ব্রাহ্মণস্স কেসিযা নাম ব্রাহ্মণিযা কুচ্ছিম্হি পটিসন্ধিং গণ্হাপেসুং. খাদথ ভোন্তো পিৰথ ভোন্তোতিআদিনা ব্রাহ্মণানং অঞ্ঞমঞ্ঞং ঘোসকালে ৰিজাযনত্তা ঘোসোতি নামং অকাসি. সত্তৰস্সিককালে সো তিণ্ণং ৰেদানং পারগূ অহোসি.

অথ খো একেন অরহন্তেন সদ্ধিং ৰেদকথং সল্লপন্তো তং কথং নিট্ঠাপেত্ৰা কুসলা ধম্মা অকুসলা ধম্মা অব্যাকতা ধম্মাতিআদিনা পরমত্থৰেদং নাম বুদ্ধমন্তং পুচ্ছি. তদা সো সুত্ৰা উগ্গণ্হিতুকামো হুত্ৰা তস্স অরহন্তস্স সন্তিকে পব্বজিত্ৰা দেৰসিকং দেৰসিকং পিটকত্তযং সট্ঠিমত্তেহি পদসহস্সেহি সজ্ঝাযং অকাসি, ৰাচুগ্গতং অকাসি. একমাসেনেৰ তিণ্ণং পিটকানং পারগূ অহোসি.

ততো ¶ পচ্চা রহো এককোৰ নিসিন্নস্স এতদহোসি,– বুদ্ধভাসিতে পিটকত্তযে মম ৰা পঞ্ঞা অধিকা, উদাহু উপজ্ঝাযস্স ৰাতি. তং কারণং ঞত্ৰা উপজ্ঝাচরিযো নিগ্গহং কত্ৰা ওৰদি. সো সংৰেগপ্পত্তো হুত্ৰা খমাপেতুং ৰন্দি. উপজ্ঝাচরিযো ত্ৰং আৰুসো সীহল়দীপং গন্ত্ৰা পিটকত্তযং সীহল়স্সাসক্খরেন লিখিতং মাগধভাসক্খরেন লিখাহি, এৰং সতি অহং খমিস্সামীতি আহ.

বুদ্ধঘোসো চ পিতরং মিচ্ছাদিট্ঠিভাৰতো মোচেত্ৰা আচরিযস্স ৰচনং সিরসা পটিগ্গহেত্ৰা পিটকত্তযং লিখিতুং সীহল়দীপং নাৰায অগমাসি. তদা সমুদ্দমজ্ঝে তীহি দিৰসেহি তরন্তে বুদ্ধদত্তত্থেরো চ সীহল়দীপতো নাৰায আগচ্ছন্তো অন্তরামগ্গে দেৰান আনুভাৰেন অঞ্ঞমঞ্ঞং পস্সিত্ৰা কারণং পুচ্ছিত্ৰা জানি. জানিত্ৰা চ বুদ্ধদত্তত্থেরো এৰমাহ,- মযা আৰুসো কতো জিনালঙ্কারো অপ্পস্সারোতি মঞ্ঞিত্ৰা পিটকত্তযং পরিৰত্তিতুং লিখিতুং ওকাসং নাদাসুং, ত্ৰং পন পিটকত্তযং সংৰণ্ণেহীতি ৰত্ৰা অত্তনো সক্কেন দেৰানমিন্দেন দিন্নং হরিতকিফলং অযোমযলেখন দণ্ডং নিসিতসিলঞ্চ বুদ্ধঘোসত্থেরস্স অদাসি. এৰং তেসং দ্ৰিন্নং থেরানং অঞ্ঞমঞ্ঞং সল্লপন্তানংযেৰ নাৰা সযমেৰ অপনেত্ৰা গচ্ছিংসু.

বুদ্ধঘোসত্থেরো চ সীহল়দীপং পত্ৰা পঠমং সঙ্ঘপালত্থেরং পস্সিত্ৰা পিটকত্তযং মাগধভাসক্খরেন পরিৰত্তেতুং আগতোম্হীতি কারণং আরোচেত্ৰা সীহল়ভিক্খূ চ সীলে পতিট্ঠাযাতিআদিগাথং নিয্যাদেত্ৰা ইমিস্সা গাথায অত্থং পিটকত্তযং আলোলেত্ৰা সংৰণ্ণেহীতি উয্যোজেসুং, তস্মিংযেৰ দিৰসে সাযন্হকালতো পট্ঠায যথাৰুত্তগাথং পমুখং কত্ৰা ৰিসুদ্ধিমগ্গং অকাসি. কত্ৰা তং কম্মং নিপ্ফাদেত্ৰা তস্স ঞাণপ্পভৰং ৰীমংসেতুকামো দেৰানমিন্দো তঞ্চ গন্থং অন্তরধাপেসি. পুনাপি থেরো অকাসি ¶ . তথেৰ দেৰানমিন্দো অন্তরধাপেসি. পুনাপি থেরো অকাসি. এৰং তিক্খত্তুং কারাপেত্ৰা পুব্বগন্থেপি দস্সেসি. তিণ্ণম্পি গন্থানং অঞ্ঞমঞ্ঞং একপদমত্তেনপি ৰিসেসতা নত্থি সঙ্ঘপালত্থেরো চ তং আরাধযিত্ৰা পিটকত্তযং নিয্যাদেসি. এৰং ৰিসুদ্ধিমগ্গে সঙ্ঘপালত্থেরস্স যাচনং আরব্ভ ৰিসুদ্ধিমগ্গো কতোতি আগতং. বুদ্ধঘোসুপ্পত্তিকথাযং পন সঙ্ঘরাজত্থেরস্স আযাচনং আরব্ভাতি আগতং.

অযং বুদ্ধঘোসুপ্পত্তিকথাযং আগতনযেন দস্সিতবুদ্ধঘোসুপ্পত্তিকথাসঙ্খেপো.

চূল়ৰংসে পনেৰং আগতো. বুদ্ধঘোসত্থেরো নাম মহাবোধিরুক্খসমীপে একস্মিং ব্রাহ্মণগামে ৰিজাতো তিণ্ণম্পি ৰেদানং পারগূ অহোসি তেসু তেসু ৰাদেসু চ অতিছেকো. সো অঞ্ঞেহি চ সদ্ধিং পুচ্ছাব্যাকরণকম্মং কত্তুকামো জম্বুনীপতলে আহিণ্ডন্তো একং ৰিহারং পত্ৰা তস্মিং ৰা আগন্তুকভাৰেন নিসীদি. তস্মিঞ্চ ৰিহারে রেৰতো নাম থেরো ৰসি. তেন থেরেন সদ্ধিং ভল্লপন্তো সো ব্রাহ্মণমাণৰো তীসু ৰেদেসু অলোলেত্ৰা পঞ্হং পুচ্ছি. পুচ্ছিতং পুচ্ছিতং থেরো ব্যাকাসি. থেরস্স পন পুচ্ছিতং পঞ্হং মাণৰো ন সক্কা ব্যাকাতুং. অথ মাণৰো পুচ্ছি,–কো নামাযং ভন্তে মন্তোতি. বুদ্ধমন্তো নামাযন্তি ৰুত্তে উগ্গণ্হিতুকামো হুত্ৰা থেরস্স সন্তিকে পব্বজিত্ৰা পিটকত্তযং উগ্গণ্হি. অচিরনেৰ তিণ্ণম্পি পিটকানং পারগূ অহোসি. বুদ্ধস্সেৰ ঘোসো যস্স অত্থীতি বুদ্ধঘোসোতি নামেন পাকটো অহোসি.

বুদ্ধঘোসো চ আযস্মতো রেৰতস্স সন্তিকে নিসীদন্তো ঞাণোদযং নাম গন্থং অট্ঠস্সালিনিঞ্চ নাম গন্থং অকাসি. ততো পচ্ছা পরিত্তট্ঠকথং কত্তুকামো হুত্ৰা আরভি. তদা আচরিযো এৰমাহ,– জম্বুদীপে পন আৰুসো পাল়িমত্তংযেৰ অত্থি, অট্ঠকথা পন নত্থি, আচরিযৰাদো চ ¶ ভিন্নো হুত্ৰা অত্থি, তেনেৰ মহামহিন্ধত্থেরেন আনিতা অট্ঠকথা তীসু চ সঙ্গীতীসু আরুল়ো পাল়িযো সারিপুত্তত্থেরাদীহি দেসিতো কথামগ্গো সীহল়দীপে অত্থি, ত্ৰং গন্ত্ৰা মাগধভাসক্খরেন লিখেহীতি উয্যোজিযমানো বুদ্ধঘোসত্থেরো সীহল়দীপং গন্ত্ৰা অনুরাধপুরে মহাৰিহারং পৰিসিত্ৰা সঙ্ঘপালত্থেরস্স সন্তিকে সদ্ধিং সীহল়ট্ঠকথায থেরৰাদে সুত্ৰা অট্ঠকথং করিস্সমীতি আরোচেসি. সীহল়ভিক্খূ চ পুব্বে ৰুত্তনযেনেৰ সীলে পতিট্ঠাযাতিআদি গাথা নিয্যাদেসুং. বুদ্ধঘোসো চ সদ্ধিং অট্ঠকথায পিটকত্তযং সঙ্খিপিত্ৰা ৰিসুদ্ধিমগ্গং অকাসি.

পুব্বে ৰুত্তনযেনেৰ সক্কো অন্তরধাপেত্ৰা তিক্খত্তুং কারাপেসি. সঙ্ঘপালত্থেরোপি অরাধযিত্ৰা পিটকত্তযং নিয্যাদেসীতি.

কিঞ্চাপি নানা গন্থেসু নানাকারেহি বুদ্ধঘোসুপ্পত্তি আগতা, তথাপি বুদ্ধঘোসত্থেরস্স সীহল়দীপং গন্ত্ৰা পিটকত্তযস্স লিখনং অট্ঠকথানঞ্চ করণমেৰ পমাণন্তি মনোকিলিট্ঠং ন উপ্পাদেতব্বন্তি. বুদ্ধঘোসত্থেরো ৰিকটত্তযং লিখিত্ৰা জম্বুদীপং পচ্চাগমাসি.

ইচ্চেৰং পাল়িভাসায পরিযত্তিং পরিৰত্তিত্ৰা পচ্ছা আচরিযপরম্পরসিস্সানুসিস্সৰসেন সীহল়দীপে জিনচক্কং মজ্ঝন্তি কংসুমাসী ৰিয অতিদিব্বতি, অনেককোটিপ্পমাণেহি সোতাপন্নসকদাগামিঅনাগামিঅরহন্তেহি লঙ্কাদীপং অতিসোভতি, সব্বপালিফুল্লেন তিযোজনিকপারিচ্ছত্তকরুক্খেন তাৰতিংসভৰনং ৰিয সতপত্তপদুমাদীহি মহাপোক্খরণী ৰিয তেসু তেসু ঠানেসু মগ্গমহামগ্গআপকঘরদ্ৰারতিত্থৰনপব্বতগুহমন্দিরৰিহারসালাদীসু অলদ্ধমগ্গফলট্ঠানং নাম কিঞ্চি নত্থি, থোকং আগমেত্ৰা পিণ্ডায পতিট্ঠমানপদেসেপি মগ্গফলানি লভিংসুযেৰ.

মগ্গফলানি সচ্ছিকরোন্তানং পুগ্গলানং বাহুল্লতায অযং ¶ পুথুজ্জনো অযং পুথুজ্জনোতি অঙ্গুলিং পসারেত্ৰা দস্সেতব্বো হোতি. একস্মিং কালে সীহল়দীপে পুথুজ্জন ভিক্খু নাম নত্থি. তথা হি ৰুত্তং ৰিভঙ্গট্ঠকথাযং, একৰারং পুথুজ্জনভিক্খু নাম নত্থীতি.

অভিঞ্ঞালাভীনং কির মহিদ্ধিকানং গমনাগমনৰসেন সূরিযোস্সাসং অলভিত্ৰা ধঞ্ঞকোট্টকা মাতুগামা ধঞ্ঞকোট্টিতুং ওকাসং ন লভিংসু.

দেৰলোকতো সুমনসামণেরো দক্খিণক্খকং সীহল়দীপং অনেত্ৰা তস্স পাটিহারিযং দস্সনৰসেন উদ্ধকবিন্ধূহি তিযোজনসতং সকলম্পি লঙ্কাদীপং ব্যাপত্ৰা ভগৰতা পরিভুত্তচেতিযঙ্গণং ৰিয হুত্ৰা নৰায গচ্ছন্তা মহাসমুদ্দে উদকতো নাল়িকেরমত্তম্পি দিস্ৰা সকলঙ্কাদীপং পূজেন্তি, মহামহিন্দত্থেরস্স সন্তিকে অরিট্ঠত্থেরেন সদ্ধিং পঞ্চমত্তা ভিক্খুসতা পঠমং তাৰ ৰিনযপিটকং উগ্গণ্হিংসূতি ইমেহি কারণেহি লঙ্কাদীপং জিনচক্কস্স পতিট্ঠানং হুত্ৰা ৰরদীপন্তি নামং পটিলভি.

সীহল়দীপেযেৰ পিটকত্তযং পোত্থকারুল়ৰসেন পতিট্ঠাপেত্ৰা ততো পচ্ছা চোরনাগস্স নাম রঞ্ঞো কালে সকললঙ্কাদীপং দুব্ভিক্খভযেন পীল়েত্ৰা পিটকত্তযং ধারেন্তা ভিক্খূ জম্বুদীপং আগমংসু. অনাগন্ত্ৰা তত্থেৰ ঠিতাপি ভিক্খূ ছাতকভযেন পীল়েত্ৰা উদরপটলং বন্ধিত্ৰা কুচ্ছিং ৰালুকরাসিম্হি ঠপেত্ৰা পিটকত্তযং ধারেসুং.

কুট কণ্ণতিস্সস্স রঞ্ঞো কালেযেৰ দুব্ভিক্খভযং ৰূপসমিত্ৰা জম্বুদীপতো ভিক্খূ পুন গন্ত্ৰা সীহল়দীপে ঠিতেহি ভিক্খূহি সদ্ধিং মহাৰিহারে পিটকত্তযং অৰিরোধাপেত্ৰা সমসমং কত্ৰা ঠপেসুং. ঠপেত্ৰা চ পন সীহল়দীপেযেৰ সুট্ঠু ধারেসুং.

তত্থেৰ অট্ঠকথাযো বুদ্ধঘোসত্থেরো মাগধভাসায পরিৰত্তেত্ৰা ৰিরচি. পচ্ছা চ যেভুয্যেন তত্থেৰ অট্ঠকথাটীকাঅনুমধুলক্খণগণ্ঠিগন্থন্তরানি ¶ অকংসু. পুন সাসনং নভে রৰিন্দুৰ পাকটন্তি.

তত্থ বুদ্ধৰংসট্ঠকথং বুদ্ধদত্তত্থেরে অকাসি. ইতিৰুত্তোদানচরিযাপিটকথেরাথেরীৰিমানৰত্থুপেতৰত্থুনেত্তিঅট্ঠকথাযো আচরিযধম্মপালত্থেরো অকাসি. সো চ আচরিযধম্মপালত্থেরো সীহল়দীপস্স সমীপে দমিলরট্ঠে বদরতিত্থম্হি নিৰাসিতত্তা সীহল়দীপেযেৰ সঙ্গহেত্ৰা ৰত্তব্বো.

পটিসম্ভিদামগ্গট্ঠকথং মহানামো নাম থেরো আকাসি. মহানিদ্দেসট্ঠকথং উপসেনো নাম থেরো অকাসি. অভিধম্মটীকং পন আনন্দত্থেরো অকাসি. সা চ সব্বাসং টীকানং আদিভূতত্তা মূলটীকাতি পাকটা.

ৰিসুদ্ধিমগ্গস্স মহাটীকং দীঘনিকাযট্ঠকথায টীকং মজ্ঝিমনিকাযট্ঠকথায টীকং সংযুত্তনিকাযট্ঠকথায টীকঞ্হাতি ইমাযো আচরিযধম্মপালত্থেরো অকাসি.

সারত্থদীপনিং নাম ৰিনযটীকং অঙ্গুত্তরনিকাযটীকঞ্চ পরক্কমবাহুরঞ্ঞা যাচিতো সারিপুত্তত্থেরো অকাসি. ৰিমতিৰিনোদনিং নাম ৰিনযটীকং দমিলরট্ঠৰাসিকস্সপত্থেরো অকাসি.

অনুটীকং পন আচরিযধম্মপালত্থেরো. সা চ মূলটীকায অনুত্তানত্থানি উত্তানানি সংৰণ্ণিতত্তা অনুটীকা তিৰুচ্চতি.

ৰিসুদ্ধিমগ্গস্স চূল়টীকং মখুদীপনিঞ্চ অঞ্ঞেতরা থেরা অকংসু. সা চ মূলটীকায অত্থাৰসেসাতি চ অনুত্তানত্থাতি চ কত্ৰা মূলটীকায সদ্ধিং সংসন্দিত্ৰা কতত্তা মধুর সত্তা চ মধুদীপনিন্তি ৰুচ্চতি. মোহৰিচ্ছেদনিং পন লক্খণগন্থং কস্সপত্থেরো অকাসি.

আভিধম্মাৰতারং পন রুপারূপৰিভাগং ৰিনযৰিনিচ্ছযঞ্চ বুদ্ধ দত্তত্থেরো. ৰিনযসঙ্গহং সারিপুত্তত্থেরো. খুদ্দসিক্খং ধম্মসিরিত্থেরো ¶ . পরমত্থৰিনিচ্ছযং নামরূপপরিচ্ছেদং অভিধম্মত্থসঙ্গঞ্চ অনুরুদ্ধত্থেরো. সচ্চসঙ্খেপং ধম্মপালত্থেরো. খেমং খেমত্থেরো. তে চ সঙ্খেপতো সংৰণ্ণিতত্তা সুখেন চ লক্খণিযত্তা লক্খণগন্থাতি ৰুচ্চন্তি.

তেসং পন সংৰণ্ণনাসু অভিধম্মত্থসঙ্গহস্স পোরাণটীকং নৰৰিমলবুদ্ধিত্থেরো অকাসি. সচ্চংসঙ্খেপনামরূপপরিচ্ছেদখেমাঅভিধম্মাৰতারানং পোরাণটীকং ৰাচিস্সরমহাসামিত্থেরো. পরমত্থৰিনিচ্ছযস্স পোরাণটীকং মহাবোধিত্থেরো.

অভিধমত্থসঙ্গহাভিধম্মাৰতারাভিনৰ টীকাযো সুমঙ্গলসামিত্থেরো. সচ্চসঙ্খেপাভিনৰটীকং অরঞ্ঞৰাসিত্থেরো. নামরূপপরিচ্ছেদাভিনৰটীকং মহাসামিত্থেরো. পরমত্থৰিনিচ্ছযাভিনৰটীকং অঞ্ঞতরত্থেরো. ৰিনযৰিনিচ্ছযটীকং রেৰতত্থেরো. খুদ্দসিক্খায পুরাণটীকং মহাযসত্থেরো. তাযযেৰ অভিনৰটীকং সঙ্ঘরক্খিতত্থেরোতি.

ৰজিরবুদ্ধিং নাম ৰিনযগণ্ঠিপদত্থং ৰজিরবুদ্ধিত্থেরো. চূল়গণ্ঠিং মজ্ঝিমগণ্ঠিং মহাগণ্ঠিঞ্চ সীহল়দীপৰাসিনো থেরা. তে চ পদক্কমেন অসংৰণ্ণেত্ৰা অনুত্তানত্থাযেৰ সংৰণ্ণিতত্তা গণ্ঠিপদত্থাতি ৰুচ্চন্তি.

অভিধানপ্পদীপিকং পন মহামোগ্গলানত্থেরো. অত্থব্যক্খানং চূল়বুদ্ধত্থেরো. ৰুত্তোদযং সম্বন্ধচিন্তনং সুবোধালঙ্কারঞ্চ সঙ্ঘরক্খিতত্থেরো. ব্যাকরণং মোগ্গলানত্থেরো.

মহাৰংসং চূল়ৰংসং দীপৰংসং থূপৰংসং বোধিৰংসং ধাতুৰং সঞ্চ সীহল়দীপৰাসিনো থেরা. দাঠাধাতুৰংসং পন ধম্মকিত্তিত্থেরো অকাসি. এতে চ পাল়িমুত্তকৰসেন ৰুত্তত্তা গন্থন্তরাতি ৰুচ্চন্তি.

ইচ্চেৰং বুদ্ধঘোসাদযো থের ৰরা যথাবলং যথাসত্তিং পরিযত্তিং সাসনং উপত্থম্ভেত্ৰা বহূহি মূলেহি বহুহিসাখাহি বহূহি চ ৰিটপেহি উপত্থম্ভিযমানো ৰেপুল্লমা পজ্জমানো ¶ মহানিগ্রোধরুক্খো ৰিয থিরং হুত্ৰা চিরকালং তিট্ঠতীতি ৰেদিতব্বং.

ইদং সীহল়দীপে পোত্থকারুল়্হতো পচ্ছা সাসনস্স পতিট্ঠানং.

এতেপি চ মহাথেরো, যথাসত্তিং যথাবলং;

অট্ঠকথাদযো কত্ৰা, মচ্চুমুখং উপাগমুং.

সেয্যথাপি চ লোকস্মিং, ওভাসিত্ৰান চন্দিমা;

আৰহিত্ৰান সত্তানং, হিতং অত্থংৰ গচ্ছতি.

এৰমেৰ মহাথেরা, ঞাণোভাসেহি ভাসিয;

আৰহিত্ৰান সত্তানং, হিতং অত্থংৰ গচ্ছতি.

ইতি সাসনৰংসে সীহল়দীপিকসাসনৰংসকথামগ্গো

নাম দুতিযো পরিচ্ছেদো.

৩. সুৰণ্ণভূমিসাসনৰংসকথামগ্গো

৩. ইদানি যথাঠপিতমাতিকাৰসেন সুৰণ্ণভূমি রট্ঠে সাসনৰংসকথামগ্গস্স ৰত্থুং ওকাসো অনুপ্পত্থো, তস্মা সুৰণ্ণভূমিরট্ঠসাসনৰংসকথামগ্গং আরভিস্সামি.

তত্থ সুৰণ্ণভূমীতি তীসু রামঞ্ঞরট্ঠেসু একস্স নামং. তীণিহি রামঞ্ঞরট্ঠানি হোন্তি হংসাৰতীমুত্তিমসুৰণ্ণভূমিৰসেন একদেসেন সব্বম্পি রামঞ্ঞরট্ঠং গহেতব্বং. তত্থ পন উক্কলাপজনপদে তপুস্সভল্লিকে আদিং কত্ৰা ভগৰতো অভিসম্বুজ্ঝিত্ৰা সত্তসত্তাহেসু অতিক্কন্তেসুযেৰ আসাল়্হিমাসস্স জুণ্হপক্খপঞ্চমদিৰসতো পট্ঠায রামঞ্ঞরট্ঠে সাসনং পতিট্ঠতি.

ইদং রামঞ্ঞরট্ঠে পঠমং সাসনস্স পতিট্ঠানং.

ভগৰতো ¶ অভিসম্বুদ্ধকালতো পুব্বেযেৰ অপরণ্ণকরট্ঠে সুভিন্ননগরে তিস্সরঞ্ঞো কালে একস্স অমচ্চস্স তিস্সো জযো চাতি দ্ৰেপুত্তা অহেসুং. তে গিহিভাৰে সংৰেগং লভিত্ৰা মহাসমুদ্দস্স সমীপে গজ্জগিরিম্হি নাম পব্বতে ইত্থুসিপব্বং পব্বজিত্ৰা নিসীদিসুং. তদা নাগিযা ৰিজ্জাধরো সন্তৰং কত্ৰা দ্ৰে অণ্ডানি ৰিজাযিত্ৰা সা নাগী লজ্জায তানি ৰিজহিত্ৰা গচ্ছি.

তদা জেট্ঠো তিস্সকুমারো তানি লভিত্ৰা কনিট্ঠেন সদ্ধিং ৰিভজিত্ৰা একং একস্স সন্তিকে ঠপেসি. কালে অতিক্কন্তে তেহি অণ্ডেহি দ্ৰে মনুস্সা ৰিজাযিংসু. তে দস ৰস্সৰযে সম্পত্তে কনিট্ঠস্স অণ্ডতো ৰিজাযনদহরো কালং কত্ৰা মজ্ঝিমদেসে মিথিলনগরে গৰংপতি নাম কুমারো উপজ্জি. সো সত্তৰস্সিককালে বুদ্ধস্স ভগৰতো সন্তিকে নিয্যাদেত্ৰা পব্বাজেত্ৰা অচিরেনেৰ অরহা অহোসি.

জেট্ঠস্স পন অণ্ডতো ৰিজাযনদহরো দ্ৰাদসৰস্সিককালে সক্কো দেৰানমিন্দো আগন্ত্ৰা রামঞ্ঞরট্ঠে সুধম্মপুরং নাম নগরং মাপেত্ৰা সীহরাজাতি নামেন তত্থ রজ্জং কারাপেসি. সিলালোনে পন সিরিমাসোকোতি নামেনাতি ৰুত্তং. গৰংপতিত্থেরো চ অত্তনা মাতরং দট্ঠুকামো মিথিলনগরতো আগন্তুং আরভি. তদা দিব্বচক্খুনা মাতুযা কালঙ্কতভাৰং ঞত্ৰা ইদানি মে মাতা কুহিং উপ্পজ্জতীতি আৰজ্জন্তো বাহুল্লেন নেসাদকেৰট্টানং নিৰাসনট্ঠানভূতে দেসে উপ্পজ্জতীতি ঞত্ৰা সচাহং গন্ত্ৰা ন ওৰাদেয্যং, মাতা মে অপাযগমনিযং অপুঞ্ঞং ৰিচিনিত্ৰা চতূসু অপাযেসু উপ্পজ্জেয্যাতি চিন্তেত্ৰা ভগৰন্তং যাচিত্ৰা রামঞ্ঞরট্ঠং ৰেহাসমগ্গেন আগচ্ছি. রামঞ্ঞরট্ঠে সুধম্মপরং পত্ৰা অত্তনো ¶ ভাতুনা সীহরাজেন সদ্ধিং রট্ঠৰাসীনং ধম্মং দেসেত্ৰা পঞ্চসু সীলেসু পতিট্ঠাপেসি.

অথ সীহরাজা আহ, লোকেসু ভন্তে ত্ৰমসি অগ্গতরো পুগ্গলোতি. ন মহারাজ অহং অগ্গতরো, তীসু পন ভৰেসু সব্বেসং সত্তানং মকুটসঙ্কাসো গোতমো নাম ময্হং সত্থা অত্থি, ইদানি মজ্ঝিমদেসং রাজগহং পটিৰসতীতি. এৰং পন ভন্তে সতি তুম্হাকং আচরিযং মযং দট্ঠুং অরহাম ৰা নো ৰাতি পুচ্ছি. গৰংপতিত্থেরোচ আম মহারাজ অরহথ ভগৰন্তং দট্ঠুং, অহং যাচিত্ৰা আগচ্ছামীতি ৰত্ৰা ভগৰন্তং যাচি. ভগৰা চ অভিসম্বুজ্ঝিত্ৰা অট্ঠমে ৰস্সে সদ্ধিং অনেকসতভিক্খূহি রামঞ্ঞরট্ঠে সুখম্মপুরং আকাসেন আগমাসি. রাজৰংসে পঞ্চহি ভিক্খুসতেহি আগমাসীতি ৰুত্তং. সিলালেখনে পন ৰীসতিসহস্সমত্তেহি ভিক্খূহীতি ৰুত্তং. এত্থ চ যস্মা ভগৰা সপরিসোযেৰ আগচ্ছি, ন এককোতি এত্তকমেৰ ইচ্ছিতব্বং, তস্মা নানা ৰাদতং পটিচ্চ চিত্তস্সাকুলিতা ন উপ্পাদেতব্বাতি.

অথ আগন্ত্ৰা রতনমণ্ডপে নিসীদিত্ৰা সরাজিকানং রট্ঠৰাসীনং অমতরসং অদাসি. তীসু সরণেসু পঞ্চসু চ সীলেসু পতিট্ঠাপেসি. অথ ভগৰা দস্সনত্থায আগতানং ছন্নং তাপসানং ছ কেসধাতুযো পূজনত্থায অদাসি. ততো পচ্ছাসত্ততিংসৰস্সানি পূরেত্ৰা পরিনিব্বানকালেপি ভগৰতো অধিট্ঠানানুরূপেন চিতকট্ঠানতো তেত্তিংস দন্তে গহেত্ৰা গৰংপতিত্থেরো সুধম্মপুরং আনেত্ৰা সীহরঞ্ঞো দত্ৰা তেত্তিংসচেতিযানি পতিট্ঠাপেসি. এৰং ভগৰতো পরিনিব্বানতো অট্ঠমেযেৰ ৰস্সে গৰংপতিত্থেরো রামঞ্ঞ রট্ঠে সুধম্মপুরে সাসনং পতিট্ঠাপেসি.

ইদং রামঞ্ঞরট্ঠে দুতিযং সাসনস্স পতিট্ঠানং.

ভগৰতো ¶ পরিনিব্বুতপঞ্চতিংসাধিকানং দ্ৰিন্নং সতানং উপরিসুৰণ্ণভূমিং নাম রামঞ্ঞরট্ঠং আগন্ত্ৰা সোণত্থেরো উত্তরত্থেরোচাতি দ্ৰে থেরা পঞ্চৰগ্গকম্মারহেহি ভিক্খূহি সদ্ধিং সাসনং পতিট্ঠাপেসুং. তে চ থেরা মহামোগ্গলিপুত্ততিস্সত্থেরস্স সদ্ধিৰিহারিকাতি অট্ঠকথাযং আগতা.

তপুস্সভল্লিকে গৰংপতিত্থেরঞ্চ পটিচ্চ সাসনং তাৰ পতিট্ঠহি. তঞ্চ ন সব্বেন সব্বং ওগাহেত্ৰা যে যে পন সদ্ধা পসন্না, তে তে অত্তনো ইচ্ছাৰসেনেৰ সাসনং পসীদিংসু. পচ্ছা পন সোণুত্তরত্থেরা মহুস্সাহেন আচরিয আণত্তিযা সাসনস্স পতিট্ঠাপনত্থায উস্সুক্কং আপন্না পতিট্ঠাপেসুং. তেন অট্ঠকথাযং এতং রট্ঠং গন্ত্ৰা এত্থ সাসনং পতিট্ঠাপেহীতি কারিতপচ্চযৰসেন আণত্তিৰিভত্তিৰসেনচ ৰুত্তং.

তদা পন সুৰণ্ণভূমিরট্ঠে সুধম্মপুরে সিরিমাসোকো নাম রাজা রজ্জং কারেসি. তঞ্চ সুধম্মপুরং নাম কেলাসপব্বতমুদ্ধনি দক্খিণায অনুদিসায পুব্বড্ঢভাগেন পব্বতমুদ্ধনি অপরড্ঢভাগেন ভূমিতলে তিট্ঠতি. তংযেৰ গুল়পাচকানং মস্সানং গেহসদিসানি গেহানি যেভুয্যেন, তেনেৰ গোল়মিত্তিক নামেনাপি ৰোহারিযতি. তস্স পন নগরস্স মহাসমুদ্দসমীপে ঠিতত্তা দকযক্খিনী সব্বদা আগন্ত্ৰা রাজগেহে জাতে জাতে কুমারে খাদি.

সোণুত্তরত্থেরানং সম্পত্তদিৰসযেৰ রাজগেহে একং পুত্তং ৰিজাযি. দকযক্খিনীচ খাদিস্সামীতি সহ পঞ্চহি যক্খিনিসতেহি আগতা. তং দিস্ৰা মনুস্সা ভাযিত্ৰা মহাৰিরৰং রৰন্তি. তদা থেরা ভযানকং সীহসীসৰসেন একসীসসরীরদ্ৰযসম্বন্ধসণ্ঠানং মনুসীহরূপং মাপেত্ৰা দস্সেত্ৰা তং যক্খিনিং সপরিসং পলাপেসুং.

থেরা চ পুন যক্খিনিযা অনাগমনত্থায পরিত্তং অকংসুতস্মিঞ্চ সমাগমে আগতানং মনুস্সানং ব্রহ্মজালসুত্তং অদেসয্যুং ¶ . সট্ঠিমত্তসহস্সা সোতাপন্নাদিপরাযনা অহেসুং. কুলদারকানং অড্ঢুড্ঢানি সহস্সানি পব্বজিংসু. কুলধীতানং পন দিঘড্ঢসহস্সং. রাজকুমারানং পঞ্চসতাধিকসহস্সমত্তং পব্বজিংসু. অৰসেসাপি মনুস্সা সরণে পতিট্ঠহিংসু. এৰং সো তত্থ সাসনং পতিট্ঠাপেসীতি. ৰুত্তঞ্চ অট্ঠকথাযং,–

সুৰণ্ণভূমিং গন্ত্ৰান, সোণুত্তরা মহিদ্ধিকা;

পিসাচে নিদ্ধমিত্ৰান, ব্রহ্মজালে মদেসিসুন্তি.

ততো পট্ঠায রাজকুমারানং সোণুত্তরনামেহিযেৰ নামং অকংসু. অৰসেসদ্ৰারকানম্পি রক্খসভযতো ৰিমোচনত্থং তালপত্তভুজপত্তেসু থেরেহি মাপিতং মনুসীহরূপং দস্সেত্ৰা মত্থকে ঠপেসুং. মনুস্সাচ সিলামযং মনুসীহরূপং কত্ৰা সুধম্মপুরস্স এসন্নে পদেসে ঠপেসুং. তং যাৰজ্জতনা অত্থীতি. ইচ্চেৰং ভগৰতো পরিনিব্বানতো পঞ্চতিংসাধিকে দ্ৰিৰস্সসতে সম্পত্তে সোণুত্তরত্থেরা আগন্ত্ৰা সাসনং পতিট্ঠাপেত্ৰা সাসনং পতিট্ঠাপেত্ৰা অনুগ্গহং অকংসূতি.

ইদং রামঞ্ঞরট্ঠে ততিযং সাসনস্স পতিট্ঠানং.

ততো পচ্ছা ছসতাধিকে সহস্সে সম্পত্তে পুব্বে ৰুত্তেহি তীহি কারণেহি সাসনস্স উপ্পত্তিট্ঠানভূতং রামঞ্ঞরট্ঠং দামরিকচোরভযেন পজ্জররোগভযেন সাসনপচ্চত্থিকভযেনচাতি তীহি ভযেহি আকুলিতং অহোসি. তদা চ তত্থ সাসনং দুব্বলং অহোসি, যথা উদকে মন্দে তত্রজাতং উপ্পলং উপ্পলং দুব্বলন্তি. তত্থ ভিক্খূপি সাসনং যথা কামং পূরেতুং ন সক্কা.

সূরিযকুমারস্স নাম মনোহরিরঞ্ঞো পন কালে সাসনং অতিৰিয দুব্বলং অহোসি. জিনচক্কে একছসতাধিকে ৰস্সসহস্সে সম্পত্তে কলিযুগেচ একূনৰীসতাধিকে ¶ চতুৰস্সসতে সম্পত্তে অরিমদ্দননগরে অনুরুদ্ধা নাম রাজা ততো সহ পিটকেন ভিক্খুসঙ্ঘং আনেসি.

ততো পচ্ছা জিনচক্কে নৰাধিকে সত্তসতে সহস্সে চ সম্পত্তে লঙ্কাদীপে সিরিসঙ্ঘবোধিপরক্কমবাহুমহারাজা সাসনং সোধেসি.

ততো ছন্নং ৰস্সানং উপরি কলিযুগে দ্ৰত্তিংসাধিকে পঞ্চসতে সম্পত্তে উত্তরাজীৰো নাম থেরো সাসনে পাকটো অহোসি.

সো পন রামঞ্ঞরট্ঠৰাসিনো অরিযাৰংসত্থেরস্স সদ্ধিৰিহারিকো. অরিযাৰংসত্থেরো পন কপ্পুঙ্গনগরৰাসিনো মহাকাল়ত্থেরস্স সদ্ধিৰিহারিকো. মহাকাল়ত্থেরো পন সুধম্মপুরৰাসিনো প্রানদস্সিত্থেরস্স সদ্ধিৰিহারিকো. অযং পন উত্তরাজীৰছপ্পদত্থেরানং ৰংসদীপনত্থং ৰুত্তা.

সো পন প্রানদস্সিত্থেরো লোকিযাভিঞ্ঞাযো লভিত্ৰা নিচ্চং অভিণ্হং পাতোৰ মগধরট্ঠে উরুৰেলনিগমে মহাবোধিং গন্ত্ৰা মহাবোধিযঙ্গণং সম্মজ্জিত্ৰা পুন আগন্ত্ৰা সুধম্মপুরে পিণ্ডায চরি. ইদং থেরস্স নিবদ্ধৰত্তুং. অযঞ্চ অত্থো সুধম্মপুরতো মগধরট্ঠং গন্ত্ৰা উরুৰেলনিগমে ৰাণিজকম্মং করোন্তা তদাকারং পস্সিত্ৰা পচ্চাগমনকালে সুধম্মপুর ৰাসীনং কথেসুং, তস্মা ৰিঞ্ঞাযতি.

তস্মিঞ্চ কালে উত্তরাজীৰত্থেরো পরিপুণ্ণৰীসতিৰস্সেন ছপ্পদেন নাম সামণেরেন সদ্ধিং সীহল়দীপং গচ্ছি. সীহল়দীপৰাসিনো চ ভিক্খূ মযং মহামহিন্দত্থেরস্স ৰংসিকা ভৰাম, তুম্হেপি সোণুত্তরত্থেরানং ৰংসিকা ভৰথ, তস্মা মযং একৰংসিকা ভৰাম সমান ৰাদিকাতি ৰত্ৰা ছপ্পদসামণেরস্স উপসম্পদকম্মং অকংসু. ততো পচ্ছা চেতিয ৰন্দনাদীনি কম্মানি নিট্ঠাপেত্ৰা উত্তরাজীৰত্থেরো সদ্ধিং ভিক্খুসঙ্খেন অরিমদ্দননগরং পচ্চাগমাহি.

ছপ্পদস্স পন এতদহোসি,- সচাহং আচরিযেন সহ জম্বুদীপং ¶ গচ্ছেয্যং, বহূহি ঞাতিবলিবোধেহি পরিযত্তুগ্গহণে অন্তরাযো ভৰেয্য, তেন হি সীহল়দীপেযেৰ ৰসিত্ৰা পরিযত্তিমুগ্গহেত্ৰা পচ্চাগমিস্সামীতি.

ততো আচরিযস্স ওকাসং যাচিত্ৰা সীহল়দীপেযেৰ পটিৰসি. সীহল়দীপে ৰসিত্ৰা যাৰ লদ্ধত্থেরসম্মুতিকা পরিযত্তিং পরিযাপুণিত্ৰা পুন জম্বুদীপং পচ্চাগন্তুকামো অহোসি. অথ তস্স এতদহোসি,– অহং এককোৰ গচ্ছন্তো সচে মম আচরিযো নত্থি, সচেপি জম্বুদীপৰাসিনা ভিক্খুসঙ্ঘেন সদ্ধিং ৰিনযকম্মং কাতুং ন ইচ্ছেয্যং, এৰং সতি ৰিসুং কম্মং কাতুং ন সক্কূণেয্যং, তস্মা পিটকধরেহি চতূহি থেরেহি সদ্ধিং গচ্চেয্যং, ইচ্চেতং কুসলন্তি.

এৰং পন চিন্তেত্ৰা তামলিত্তিগামৰাসিনা সিৰলিত্থেরেন কম্বোজরঞ্ঞো পুত্তভূতেন তামলিন্দত্থেরেন কিঞ্চিপুরৰাসিনা আনন্দত্থেরেন রাহুলত্থেরেনচাতি ইমেহি চতূহি থেরেহি সদ্ধিং নাৰায পচ্চাগচ্ছি. তে চ থেরা পিটকধরা অহেসুং দক্খা থামসম্পন্না চ. তেসু ৰিসেসতো রাহুলত্থেরো থামসম্পন্নো. কুসিমনগরং সম্পত্তকালে উপকট্ঠৰস্সূপগমনকালো হুত্ৰা অরিমদ্দননগরে আচরিযস্স সন্তিকং অসম্পাপুণিত্ৰা কুসিমনগরযেৰ ৰস্সং উপগমিংসু. তেসং ৰস্সূপগমনৰিহারৰত্থু আরামপাকারো চ কুসিমনগরস্স দক্খিণদিসাসাগে যাৰজ্জতনা অত্থি.

ৰস্সংৰুট্ঠকালে পন মহাপৰারণায পৰারেত্ৰা তে পঞ্চ থেরা অরিমদ্দননগরং অগমংসু. উত্তরাজীৰত্থেরোচ অরিমদ্দননগর ৰাসীহি ভিক্খূহি ৰিসুং হুত্ৰা সঙ্ঘকম্মানি অকাসি. কিঞ্চাপি চেত্থ উত্তরাজীৰত্থেরাদযো সীহল়দীপতো পচ্চাগন্ত্ৰা অরিমদ্দননগরে ৰসিত্ৰা সাসনং অনুগ্গহেসুং, রামঞ্ঞরট্ঠে পন জাতত্তা পুব্বে চ তত্থ নিৰাসত্তা ইধ দস্সিতাতি দট্ঠব্বা.

তস্মিঞ্চ ¶ কালে দলনগরে পদীপজেয্যগামে জাতো সারিপুত্তো নাম মহল্লকস্সমণেরো একো অরিমদ্দননগরং গন্ত্ৰা আনন্দত্থেরস্স সন্তিকে উপসম্পজ্জিত্ৰা পরিযত্তি পরিযপুণি. সো বহুস্সুতো অহোসি দক্খো থামসম্পন্নো চ. তমত্থং সুত্ৰা নরপতিচঞ্ঞিসূরাজা চিন্তেসি,- সচেসো অঙ্গপচ্চঙ্গসম্পন্নো ভৰেয্য, আচরিযং কত্ৰা ঠপেস্সামি অনুগ্গহেস্সামীতি. রাজা এৰং চিন্তেত্ৰা রাজপুরিসে পেসেত্ৰা ৰীমংসাপেসি. রাজপুরিসা চ তস্স ছিন্নপাদঙ্গুট্ঠগ্গতং পস্সিত্ৰা তমত্থং রঞ্ঞো আরোচেসুং. রাজা তং সুত্ৰা এৰং ৰিকলঙ্গপচ্চঙ্গো ভৰেয্য, পধানাচরিযট্ঠানে ঠপেতুং ন যুত্তোতি কত্ৰা পধানাচরিযভাৰং ন অকাসি. পূজাসক্কা রমত্তেনেৰ অনুগ্গহং অকাসি. একস্মিঞ্চ কালে ধম্মৰিলাসোতি লঞ্ছং দত্ৰা রামঞ্ঞরট্ঠে সাসনং সোধেত্ৰা পরিসুদ্ধং করোহীতি রামঞ্ঞরট্ঠং পেসেসি.

সোচ রামঞ্ঞরট্ঠং গন্ত্ৰা দলনগরে বহুনং ভিক্খূনং ধম্ম ৰিনযং ৰাচেত্ৰা সাসনং পগ্গহেসি. তত্থ চ রামঞ্ঞমনুস্সা তস্স ধম্মৰিলাসত্থেরস্স সিস্সানুসিস্সা সীহল়ভিক্খু গণাতি ৰোহারন্তি. ইচ্চেৰং সীহল়দীপিকস্স আনন্দত্থেরস্স সিস্সং ধম্মৰিলাসং পটিচ্চ রামঞ্ঞরট্ঠে সীহল়দীপতো সাসনস্স আগতমগ্গোতি.

ইদং রামঞ্ঞরট্ঠে চতুত্থং সাসনস্স পতিট্ঠানং.

তস্মিঞ্চ কালে মুত্তিমনগরে অগ্গমহেসিযা আচরিযা বুদ্ধৰংসত্থেরমহানাগত্থেরা সীহল়দীপং গন্ত্ৰা মহাহারৰাসিগণৰংসভূতানং ভিক্খূনং সন্তিকে পুন সিক্খং গণ্হিত্ৰা মুত্তিমনগরং পচ্চাগন্ত্ৰা মুত্তিমনগরৰাসীতি ভিক্খূহি ৰিসুং হুত্ৰা সঙ্ঘকম্মানি কত্ৰা সাসনং পগ্গহেসুং. তেচ থেরে ¶ পটিচ্চ রামঞ্ঞরট্ঠে পুন সীহল়দীপতো সাসনং আগতন্তি.

ইদং রামঞ্ঞরট্ঠে পঞ্চমং সাসনস্স পতিট্ঠানং.

ততো পচ্ছাচ মুত্তিমনগরে সেতিভিন্দস্স রঞ্ঞো মাতুযা আচরিযো মেধঙ্করো নাম থেরো সীহল়দীপং গন্ত্ৰা সীহল়দীপে অরঞ্ঞৰাসীনং মহাথেরানং সন্তিকে পুন সিক্খং গহেত্ৰা পরিযত্তিং পরিযাপুণিত্ৰা সুৰণ্ণরজতমযে তিপুসীসচ্ছন্নে সেতিভিন্দস্স রঞ্ঞো মাতুযা কারাৰিতে ৰিহারে নিসিদিত্ৰা সাসনং অনুগ্গহেসি. লোকদীপকসারঞ্চ নাম গন্থং অকাসি. অথাপরিম্পি মুত্তিমনগরেযেৰ সুৰণ্ণসোভণো নাম থেরো সীহল়দীপং গন্ত্ৰা মহাৰিহারৰাসিগণৰংসভূতানং থেরানং সন্তিকে পুন সিক্খং গহেত্ৰা মুত্তিমনগরমেৰ পচ্চাগচ্ছি.

সো পন থেরো অরঞ্ঞেযেৰ ৰসি. ধুতঙ্গধরো চ অহোসি অপ্পিচ্ছো সন্তুট্ঠো লজ্জী কুক্কুচ্চকো সিক্খা কামো দক্খো থামসম্পন্নো চ. সীহল়দীপে কলম্বুম্হি নাম জাতস্সরে উদকুক্খেপসীমাযং অতিরেকপঞ্চৰগ্গেন ৰনরতনং নাম সঙ্ঘরাজং উপজ্ঝাযং কত্ৰা রাহুলভদ্দং নাম ৰিজযবাহুরঞ্ঞো আচরিযভূতং থেরং কম্মৰাচাচরিযং কত্ৰা উপসম্পজ্জি. সোচ থেরো পুনাগন্ত্ৰা মুত্তিমনগরেযেৰ ৰসিত্ৰা গণং ৰড্ঢেত্ৰা সাসনং অনুগ্গহেসি. এতে চ দ্ৰে থেরে পটিচ্চ রামঞ্ঞরট্ঠে সীহল়দীপতো সাসনং আগতং.

ইদং রামঞ্ঞরট্ঠে ছট্ঠং সাসনস্স পতিট্ঠানং.

ততো পচ্ছা সাসনৰসেন দ্ৰিৰস্সাধিকে দ্ৰিসহস্সে কলিযুগতো একাসীতিকে সম্পত্তে হংসাৰতীনগরে সিরিপরমমহাধম্মরাজাতি ¶ লদ্ধনামো ধম্মচেতিযরাজা কুসিমমণ্ডলে হংসাৰতীমণ্ডলে মুত্তিমমণ্ডলে চ রট্ঠৰাসিনো সপজংৰিয ধম্মেন সমেন রক্খিত্ৰা রজ্জং কারেসি. সো চ রাজা তীসু পিটকেসু চতূসু চ ৰেদেসু ব্যাকরণচ্ছন্দালঙ্কারাদীসু চ ছেকো সিক্খিতনানাসিপ্পো নানাভাসাসু চ পসুতো সদ্ধাসীলাদিগুণোপেতো কুমুদকুন্দসরদচন্দিকাসমানসিতপজপতিভূতো চ সাসনে চ অতিপ্পসন্নো অহোসি.

একস্মিং কালে সো চিন্তেসি, ভগৰতো সাসনং নাম পব্বজ্জউপসম্পদতাৰেন সম্বন্ধং, উপসম্পদভাৰো চ সীমপরিসৰত্থু ঞত্তিকম্মৰাচাসম্পত্তীহি সম্বন্ধোতি. এৰঞ্চ পন চিন্তেত্ৰা সীমৰিনিচ্ছযং তস্সং ৰণ্ণনং ৰিনযসঙ্গহং তস্সংৰণ্ণনং সীমালঙ্কার সীমসঙ্গহঞ্চ সদ্দতো অত্থতো চ পুনপ্পুনং উপপরিক্খিত্ৰা অঞ্ঞমঞ্ঞং সংসন্দিত্ৰা পুব্বাপরং তুলযিত্ৰা ভগৰতো অধিপ্পাযো ঈদিসো গন্থকারানং অধিপ্পাযো ঈদিসোতি পস্সিত্ৰা অম্হাকং রামঞ্ঞরট্ঠে বদ্ধনদীসমুদ্দজাতেস্সরাদযো সীমাযো বহুকাপি সমানা অযং পরিসুদ্ধাতি ৰৰত্থপেতুং দুক্করং, এৰং সতি সীমপরিসাপরিসুদ্ধা ভৰিতুং দুক্করাতি পটিভাতি.

ততো পচ্ছা রামঞ্ঞরট্ঠে তিপিটকধরব্যত্তপ্পটিবলত্থেরেহি মন্তেত্ৰা রঞ্ঞো পটিভানানুরূপং সীমপরিসা পরিসুদ্ধা ভৰিতুং দুক্করাতি থেরা ৰিনিচ্ছনিংসু.

অথ রাজা এৰম্পি চিন্তেসি,– অহোৰত সম্মাসম্বুদ্ধস্স সাসনং পঞ্চৰস্সসহস্সানি পতিট্ঠতিস্সতীতি গন্থেসু ৰুত্তোপি সমানো অভিসম্বুদ্ধতো চতুসট্ঠাধিকদ্ৰিসহস্সমত্তেনেৰ কালেন সাসনে মলং হুত্ৰা উপসম্পদকম্মে কঙ্খাট্ঠানং তাৰ উপ্পজ্জি, কথং পন পঞ্চৰস্সসহস্সানি সাসনস্স পতিট্ঠানং ভৰিস্সতীতি. এৰং ধম্মসংৰেগং উপ্পাদেত্ৰা পুনাপি এৰং চিন্তেসি,- এৰং এত্তকং সাসনে মলং দিস্সমানোপি ¶ সমানো উপসম্পদকম্মে কঙ্খাট্ঠানং দিস্সমানোপি সমানো পরিসুদ্ধত্থায অনারভিত্ৰা মাদিসো অপ্পোস্সুক্কো মজ্ঝত্তো নিসীদিতুং অযুত্তো, এৰঞ্হি সতি ভগৰতি সদ্ধো পসন্নোম্হীতি ৰত্তব্বতং অনাপজ্জেয্যং, তস্মা সাসনং নিম্মলং কাতুং আরভিস্সামীতি.

কুতো নুখো দানি সাসনং আহরিত্ৰা থিরং পতিট্ঠা পেয্যন্তি আৰজ্জন্তো এৰং চিন্তেসি,- ভগৰতো কির পরিনিব্বানতো ছত্তিংসাধিকে দ্ৰিসতে সম্পত্তে মহামোগ্গলি পুত্ততিস্সত্থেরো মহামহিন্দত্থেরং পেসেত্ৰা সীহল়দীপে সাসনং পতিট্ঠাপেসি, তদা দেৰানং পিযতিস্সরাজা মহাৰিহারং কারাপেত্ৰা অদাসি, সাসনৰরঞ্চ একাসিতাধিকানি দ্ৰিৰস্সসতানি ৰিমলং হুত্ৰা পতিট্ঠহি, ভিক্খুসঙ্ঘোপি মহাৰিহার ৰাসিগণৰসেন একতোৰ অট্ঠাসি, ততো পচ্ছা অভযগিরিৰাসিজে তৰনৰাসিৰসেন দ্ৰেধা হুত্ৰা ভিজ্জি, জিনচক্কে অট্ঠসত্তসতাধিকে সহস্সে সম্পত্তে সিরিসঙ্ঘবোধিপরক্কমবাহুমহারাজা উদুম্বরগিরিৰাসি মহাকস্সপত্থেরপ্পমুখং মহাৰিহার ৰাসিগণং অনুগ্গহেত্ৰা যথাৰুত্তে দ্ৰেগণে ৰিসোধেসি, সাসনং নিম্মলং অকাসি, ততো পচ্ছা ৰিজযবাহুপরক্কমবাহুরাজূনং দ্ৰিন্নং কালেপি সাসনং নিম্মলং হুত্ৰাযেৰ অট্ঠাসি, তেনেৰ ব্যত্তপ্পটিবলভিক্খূ আযাচিত্ৰা সীহল়দীপং গন্ত্ৰা পুন সিক্খং গণ্হা পেস্সামি, তেসং পন পরম্পরৰসেন পৰত্তানং ভিক্খূনং ৰসেন অম্হাকং রামঞ্ঞরট্ঠে সাসনং নিম্মলং হুত্ৰা পতিট্ঠহিস্সতীতি. এৰং পন চিন্তেত্ৰা মোগ্গলানত্থেরং সোমত্থেরঞ্চ সীহল়দীপং গমনত্থায যাচি. থেরাচ সাসনপ্পটিযত্তকম্মমিদন্তি মনসিকরিত্ৰা পটিঞ্ঞং অকংসু.

রাজা চ দাঠাধাতুপূজনত্থায ভিক্খুসঙ্ঘস্স পূজনত্থায ভূৰনেকবাহুরঞ্ঞো পণ্ণাকারত্থায দেয্যধম্মপণ্ণাকারৰত্থূনি পটিযাদেত্ৰা চিত্রদূতং রামদূতন্তি ইমে দ্ৰে অমচ্চে দ্ৰীসু নাৰাসু নাযকট্ঠানে ঠপেত্ৰা কলিযুগে সত্ততিংসাধিকে অট্ঠৰস্সসতে সম্পত্তে মাঘমাসস্স পুণ্ণমিতো একাদসমিযং সূরৰারে চিত্রদূতং সদ্ধিং মোগ্গলানত্থেরপ্পমুখেহি ভিক্খূহি একায নাৰায গমাপেসি. ফগ্গুণমাসস্স অট্ঠমিযং সীহল়দীপে কলম্বুতিত্থং পাযাসি.

রামদূতং পন তস্মিংযেৰ ৰস্সে মাঘমাসস্স পুণ্ণমিতো দ্ৰাদসমিযং চন্দৰারে সদ্ধিং সোমত্থেরপ্পমুখেহি ভিক্খূহি একায নাৰায গমাপেসি. উজুকং পন ৰাতং অলভিত্ৰা চিত্রমাসস্স জুণ্হপক্খনৰমিযং সীহল়দীপে ৰল্লিগামং পাযাসি.

ততো পচ্ছা তেপি দ্ৰে অমচ্চা দ্ৰীসু নাৰাসু আভতানি দাতব্বপণ্ণাকারৰত্থূনি সন্দেসপণ্ণানি চ ভূৰনেকবাহুরঞ্ঞো ভিক্খূসঙ্ঘস্স চ অদাসি. রঞ্ঞা পেসিতভিক্খূনঞ্চ সন্দেসপণ্ণে কথিতনিযামেনেৰ কল্যাণিযং নাম নদিযং উদকুক্খেপসীমাযং সামণেরভূমিযং পতিট্ঠাপেত্ৰা পুন উপসম্পদকম্মং অকংসু.

উপসম্পজ্জিত্ৰা চ ভূৰনেকবাহুরাজা নানাপ্পকারে ভিক্খূনং সারুপ্পে পরিক্খারে দত্ৰা ইদং পন আমিসদানং যাৰ জীৰিতপরিযোসানাযেৰ পরিভুঞ্জিতব্বং ভৰিস্সতি, নামলঞ্ছং পন ন জীরিস্সতীতি কত্ৰা রামদূতস্স নাৰায পখানভূতস্স সোমত্থেরস্স সিরিসঙ্ঘবোধিসামীতি নামং অদাসি. অৰসেসানং পন দসন্নং থেরানং কিত্তিসিরিমেঘসামি পরক্কমবাহুসামি বুদ্ধঘোসসামি সীহল়দীপৰিসুদ্ধসামি গুণরতনধরসামী জিনালঙ্কারসামি রতনমালিসামি সদ্ধম্মতেজসামি ধম্মরামসামি ভূৰনেকবাহুসামীতি নামানি অদাসি.

চিত্রদূতস্স ¶ নাৰায পখানভূতস্স মোগ্গলানত্থেরস্স ধম্মকিত্তিলোকগরুসামীতি নামং অদাসি. অৰসেসানং পন সিরিৰনরতনসামি মঙ্গলত্থেরস্সামি কল্যাণতিস্সস্সামি চন্দগিরিসামি সিরিদন্তধাতুসামি ৰনৰাসিতিস্সসামি রতনলঙ্কারসামি মহাদেৰসামি উদুম্বরগিরিসামি চূল়াভযতিস্সসামীতি নামানি অদাসি. বাৰীসতিযা পন পচ্ছা সমণানং নামং ন অদাসি. অভিনৰসিক্খং পন সব্বেসংযেৰ অদাসি.

ততো পচ্ছা চেতিযপূজনাদীনি কত্ৰা তংতংকিচ্চং নিপ্ফাদেত্ৰা পুন আগমংসু. ভূৰনেকবাহুরাজা চিত্রদূতং এৰমাহ, রামাধিপতিরঞ্ঞো পণ্ণাকারং পটিদাতুং ইচ্ছামি, পটিদূতঞ্চ পেসেতুং তাৰ ত্ৰং আগমেহীতি. এৰং পন ৰত্ৰা পচ্ছা আগমনকালে চণ্ডৰাতভযেন মহাসমুদ্দমজ্ঝে নাৰা অৰগচ্ছতি. তেন সীহল়রঞ্ঞা পেসিতনাৰায সব্বে সন্নিপতিত্ৰা আরুহিত্ৰা আগচ্ছন্তা তীণি দিৰসানি অতিক্কমিত্ৰা পুন চণ্ডৰাতভযেন অগম্ভীরট্ঠানে সিলায ঘট্টেত্ৰা লগ্গিত্ৰা গন্তুং অসক্কুণিত্ৰা একং উল়ুম্পং বন্ধিত্ৰা জঙ্ঘেনেৰ অগমংসু. সীহল়রঞ্ঞো চ দূতো পণ্ণাকারং দত্ৰা পচ্চাগমাসি. ভিক্খূসু চ ভিক্খূ অন্তরামগ্গেযেৰ মচ্চু আদায গচ্ছতি. অহো অনিচ্চা ৰত সঙ্খারাতি. হোন্তি চেত্থ,–

ইমেসং পন আরদ্ধং, ন কিচ্চং যাৰ নিট্ঠিতং;

ন তাৰ আদিযিস্সন্তি, মচ্চু নত্থি আপেক্খনা.

নিক্কারুণিকো হি এস, বলক্কারেন আদিয;

রোদমানংৰ ঞাতীনং অনিচ্ছন্তংৰ গচ্ছতীতি.

রামাধিপতিরাজাচ তেসং ভিক্খূনং পত্তকালে হংসাৰতীনগরস্স পচ্ছিমস্মিং দিসাভাগে নরসূরেন নাম অমচ্চেন পরিভুত্তে গামখেত্তে পাল়িঅট্ঠকথাল়ীকাদযো পুনপ্পুনং পস্সিত্ৰা উপপরিক্খিত্ৰা সীমসমূহনসীমসম্মুতিকম্মানি কারপেসি. সীহল়দীপে ভগৰতা ন্হাযিতপুব্বায কল্যাণিযা নাম নদিযং উদকুক্খেপসীমং কত্ৰা তত্থ মহাৰিহারৰাসীনং ভিক্খূনং সন্তিকে উপলদ্ধউপসম্পদভাৰেহি ভিক্খূহি কতত্তা কল্যাণীসীমাতি সমঞ্ঞং অকাসি. ইচ্চেৰং রামাধিপতিরাজা পত্তলঙ্কে ভিক্খূ নিস্সায সাসনং সুট্ঠু পতিট্ঠিতং অকাসি. কলিযুগস্স অট্ঠতিংসাধিকঅট্ঠৰস্সসতকালতো যাৰ একচত্তালীসাধিকঅট্ঠৰস্সসতা তেসং ভিক্খূনং ৰংসে অসীতিমত্তা গণপামোক্খত্থেরা অহেসুং. তেসং সিস্সজাতানি পন ছব্বিসাধিকানি দ্ৰিসতানি চতুসহস্সানি দসসহস্সানি অহেসুং. এৰং ভগৰতো সাসনং রামঞ্ঞরট্ঠে ৰুড্ঢিং রামঞ্ঞরট্ঠে ৰুড্ঢিং ৰিরূল়িং ৰেপুল্লমাপজ্জিতি.

ইদং রামঞ্ঞরট্ঠে সত্তমং সাসনস্স পতিট্ঠানং.

যদা পন অরিমদ্দননগরে অনুরুদ্ধো নাম রাজা সুধম্মপুরং সরাজিকং অভিভৰিত্ৰা ৰিদ্ধংসি, তদা রামঞ্ঞরট্ঠং রাজসুঞ্ঞং হুত্ৰা পতিট্ঠহি. রামঞ্ঞরট্ঠে মুত্তিমনগরে সোণুত্তরৰংসো একো গণো, সিৰলিৰংসো একো, তামলিন্দৰংসো একো, আনন্দৰংসো একো, বুদ্ধৰংসো একো, মহানাগৰংসো একোতি ছগ্গণা ৰিসুং ৰিসুং হুত্ৰা অট্ঠংসু নানাসংৰাসকা নানানিকাযা.

ধম্মচেতিযরঞ্ঞা পন কারাপিতসাসনম্পি অভিজ্জমানং হুত্ৰা অট্ঠাসি. সমানসংৰাসো একনিকাযোযেৰ অহোসি. হংসাৰতীমুত্তিমসুৰসেন তীণিপি রামঞ্ঞরট্ঠানি সুনাপরন্ত সঙ্খাতেন একাবদ্ধানি হুত্ৰা তিট্ঠন্তি. পুব্বেচ মরম্মরট্ঠিন্দরাজূনং আণাপৰত্তনট্ঠানানি অহেসুং ¶ . তস্মা মরম্মরট্ঠতো একচ্চে ভিক্খূ রামঞ্ঞরট্ঠং গন্ত্ৰা কল্যাণীসীমাযং পুন সিক্খং গণ্হিংসু. ধম্মচেতিযরঞ্ঞাকারাৰিতসাসনং সকলং মরম্মরট্ঠম্পি ব্যাপেত্ৰা ওগাহেত্ৰা তিট্ঠতি.

রামঞ্ঞরট্ঠে সোণুত্তরত্থেরানং সাসনং পতিট্ঠাপিতকালতো পট্ঠায যাৰ সুধম্মপুরে মনোহরিরঞ্ঞা অরহন্তানং সংৰিজ্জমানতা ৰেদিতব্বা. ততো পচ্ছা পন উত্তরা জীৰারিযাৰংসমহাকাল়প্রানদস্সিত্থেরানং কালে লোকিযজ্ঝানাভিঞ্ঞালাভিযোযেৰ সংৰিজ্জংসূতি. অধুনা পন তীসুপি রামঞ্ঞরট্ঠেসু ধম্মচেতিযরঞ্ঞা কারাৰিতসাসনংযেৰ তিট্ঠতি. এত্থচ হেতুফলসম্বন্ধৰসেন আদিঅন্তৰসেনে চ সাসনৰংসং পঞ্ঞায তুলযিত্ৰা আদিতোৰ দস্সিতেহি তীহি নযেহি যথাপৰেণী ঘট্টিযতি, তথা গণ্হেয্যাতি. অযঞ্চ সাসনৰংসো লজ্জিপেসলসিক্খাকামানংযেৰ ৰসেন ৰুত্তো, নালজ্জীনং ৰসেনাতি দট্ঠব্বো.

তায চ থেরপরম্পরায মুত্তিমনগরৰাসিমেধঙ্করত্থেরো লোকদীপকসারং নাম গন্থং অকাসি. হংসাৰতীনগরৰাসী পন আনন্দত্থেরো মধুসারত্থদীপনিং নাম অভিধম্মটীকায সংৰণ্ণনং, হংসাৰতীনগরৰাসীযেৰ ধম্মবুদ্ধত্থেরো কৰিস্সারং নাম ছন্দোৰণ্ণনং, হংসাৰতীনগরৰাসীযেৰ সদ্ধম্মালঙ্কারত্থেরো পট্ঠানসারদীপনিং নাম পকরণং, তথেৰ অঞ্ঞতরো থেরো অফেগ্গুসারং নাম গন্থং অকাসি. এৰং অনেকপ্পকারানং গন্থকারানং মহাথেরানং ৰসনট্ঠানং হুত্ৰা সাসনং ওগাহেত্ৰা ৰিরূল়ট্ঠানংঅহোসীতি.

ইতি সাসনৰংসে সুৰণ্ণভূমিসাসনৰংসকথামগ্গা নাম

ততিযো পরিচ্ছেদো.

৪. যোনকরট্ঠসাসনৰংসকথামগ্গো

৪. ইদানি পন যোনকরট্ঠে সাসনস্সুপ্পত্তিং কথেস্সামি ¶ . ভগৰা হি ৰেনেয্যহিতাৰহো যোনকরট্ঠে মমসাসনং চিরকালং পভিট্ঠহিস্সতীতি আপেক্খিত্ৰা সদ্ধিং ভিক্খু সঙ্ঘেন দেসচারিকং আহিণ্ডন্তো লভুঞ্জং নাম নগরং অগমাসি. তদা একো নেসাদো হরিফলং দত্ৰা তং পরিভুঞ্জিত্ৰা হরিবীজে খিপিতে পথৰিযং অপতিত্ৰা আকাসেযেৰ পতিট্ঠাসি. তং দিস্ৰা সিতং পত্ৰাকাসি. তমত্থং দিস্ৰা আনন্দত্থেরো পুচ্ছি. অনাগতে খো আনন্দ ইমস্মিং ঠানে মম ধাতুচেতিযং পতিট্ঠহিস্সতি, সাসনং ৰিরূল়মাপজ্জিস্সতীতি ব্যাকাসি. ভগৰতা পন হরিফলস্স ভুঞ্জিতট্ঠানত্তাহরিভুঞ্জোতি তস্স রট্ঠস্স নামং অহোসি. দ্ৰিন্নং তাপসানং ঠপিতং জলসুত্তিকং পটিচ্চ যোনকানং ভাসায লভুঞ্জোতি নামং অহোসি.

তদা তত্থ মপিন্নায নাম একিস্সা মাতিকায সমীপে নিসিন্নো একো লৰকুলিকজেট্ঠকো অত্তনো পুত্তং সত্তৰস্সিকং ভগৰতো নিয্যাদেত্ৰা পব্বাজেসি. কম্মট্ঠানানুযোগৰসেন অচিরেনেৰ অরহত্তং পাপুণি. সত্তৰস্সি কস্সচ সামণেরস্স অরহত্তং সচ্ছিকতট্ঠানতং পটিচ্চ যোনকভাসায এতং ঠানং চঙ্গমঙ্ঘ ইতি ৰুচ্চতি. চিরকাল ৰসেন জঙ্গমঙ্ঘ ইতি ৰুচ্চতি. ততো পট্ঠাযযেৰ যোনকরট্ঠে সাসনং পতিট্ঠাতীতি.

ইদং যোনকরট্ঠে পঠমং সাসনস্স পতিট্ঠানং.

সাসনে পন পঞ্চতিংসাধিকে দ্ৰিৰস্সসতে সম্পত্তে মহারক্খিতত্থেরো যোনকরট্ঠং গন্ত্ৰা কম্বোজখেমাৰর হরিভুঞ্জাযুদ্ধযাদীসু অনেকেসু রট্ঠেসু সাসনং পতিট্ঠাপেতি. তানি হি সব্বানি রট্ঠানি সঙ্গহেত্ৰা দস্সেন্তেহি অট্ঠকথাচরিযেহি যোনকলোকন্তি ওকাসকালোকৰাচকেন সামঞ্ঞসদ্দেন ৰুত্তং. পকতি হেসা গন্থকারানং যেন ¶ কেনচাকারেন অত্থন্তরস্স ৰিঞ্ঞাপনাতি.

মহারক্খিতত্থেরো চ সদ্ধিং পঞ্চহি ভিক্খূহি পাটলিপুত্ততো অনিলপথমগ্গেন যোনকলোকং আগন্ত্ৰা কাল়কারামসুত্তেন যোনকে পসাদেসি. সত্ততিসহস্সাধিকপাণসতসহস্সং মগ্গফলালঙ্কারং অদাসি. সন্তিকে চস্স দসসহস্সানি পব্বজিংসু. এৰং সো তত্থসাসনং পতিট্ঠাপেসি. তথা চ ৰুত্তং অট্ঠকথাযং,–

যোনকরট্ঠং তদা গন্ত্ৰা, সো মহারক্খিতো ইসি;

কাল়কারামসুত্তেন, তে পসাদেসি যোনকেতি.

ততো পট্ঠায তেসং সিস্সপরম্পরা বহূ হোন্তি, গণনপথং ৰীতিৰত্তা.

ইদং যোনকরট্ঠে মহারক্খিতত্থেরাদযো পটিচ্চ

দুতিযং সাসনস্স পতিট্ঠানং.

যোনকরট্ঠে লকুন্ননগরে জিনচক্কে পঞ্চৰস্সসতে মণিমযং বুদ্ধপ্পটিমং মাপেত্ৰা ৰিসুকম্মদেৰপুত্তো নাগসেনত্থেরস্স অদাসি. নাগেসেনত্থেরো চ তস্মিং পটিমম্হি ধাতু আগন্ত্ৰা পতিট্ঠাতূতি অধিট্ঠাসি. অধিট্ঠানৰসেনেৰ সত্তধাতুযো আগন্ত্ৰা তত্থ পতিট্ঠহিত্ৰা পাটিহারিযং দস্সেসুন্তি রাজৰংসে ৰুত্তং.

তঞ্চ ৰচনং মম পরিনিব্বানতো পঞ্চৰস্সসতে অতিক্কন্তে এতে উপ্পজ্জিস্সন্তীতি মিলিন্দপঞ্হাযং ৰুত্তৰচনেন কালপরিমাণৰসেন চ সমেতি. যোনকরট্ঠে মিলিন্দরঞ্ঞো কালে জিনচক্কে পঞ্চৰস্সসতেযেৰ নাগসেনত্থেরং পটিস্স জিনচক্কং ৰিরূল়ং হুত্ৰা পতিট্ঠাসি.

ইদং যোনকরট্ঠে নাগসেনত্থেরং পটিচ্চ ততিযং

সাসনস্স পতিট্ঠানং.

কলিযুগে ¶ পঞ্চসট্ঠিৰস্সেলভুঞ্জনগরতো সঙ্কমিত্ৰা ক্যুঙ্গরনগরে মাপিকস্স বঞ্ঞাচোমঙ্গর নামকস্স রঞ্ঞো কালে মজ্ঝিমদেসতো কস্সপত্থেরো পঞ্চহি থেরেহি সদ্ধিং আগচ্ছি.

তদা সো রাজা ৰিহারং কত্ৰা তেসং অদাসি. সীহল়দীপতো চ ধাতুযো আনেত্ৰা একো থেরো আগচ্ছি. ধাতুতো পাটিহারিযং দিস্ৰা পসীদিত্ৰা লভুঞ্জচেতিয নিধানং অকাসি. তে চ থেরে পটিচ্চ যোনকরট্ঠে সাসন ৰংসো আগতো.

ইদং যোনকরট্ঠে চতুত্থং সাসনস্স পতিট্ঠানং.

কলিযুগে দ্ৰাসট্ঠাধিকে সত্তসতে সম্পত্থে চিনরট্ঠিন্দো রাজা অভিভৰিত্ৰা সকলম্পি যোনকরট্ঠং সঙ্খুব্ভিতং হোতি. তদা মহাধম্মগম্ভীরত্থেরো মহামেধঙ্করত্থে রোচাতি দ্ৰে থেরো যোনকরট্ঠতো সদ্ধিং বহূহি ভিক্খূহি সীহল়দীপং অগমংসু. তদা চ সীহল়দীপে দুব্ভিক্খভযেন অভিভূতো হুত্ৰা ততো স্যামরট্ঠে সোক্কতযনগরং পুন অগমংসু.

ততো পচ্ছা লকুন্ননগরং গন্ত্ৰা সাসনং পগ্গণ্হন্তানং লজ্জিপেসলানং ভিক্খূনং সন্তিকে পুন সিক্খং গণ্হিংসু. তে চ থেরো স্যামরট্ঠে যোনকরট্ঠে চ সব্বত্থ সাসনং পতিট্ঠাপেসুন্তি.

ইদং যোনকরট্ঠে পত্তলঙ্কে দ্ৰে থেরে পটিচ্চ পঞ্চমং

সাসনস্স পতিট্ঠানং.

কলিযুগে পঞ্চৰীসাধিকে অট্ঠৰস্সসতে সম্পত্তে সিরিসদ্ধম্মলোকপতিচক্কৰত্তিরাজা লভুঞ্জচেতিযং পুন মহন্তং কত্ৰা ¶ তস্স চেতিযস্স সমীপে চত্তারো ৰিহারে কারাপেত্ৰা মহামেধঙ্করত্থেরস্স সারিপুত্তত্থেরস্স চ অদাসি. তদাপি তে দ্ৰে থেরা সাসনং পরিসুদ্ধং কত্ৰা পতিট্ঠাপেসুন্তি.

ইদং যোনকরট্ঠে মহামেধঙ্করসারিপুত্তত্থেরে

পটিচ্চ ছট্ঠং সাসনস্স পতিট্ঠানং.

কলিযুগে তেচত্তালীসাধিকে নৰৰস্সসতে সম্পত্তে হংসাৰতীনগরে অনেকসেতিভিন্দো নাম রাজা যোনকরট্ঠং অভিভৰিত্ৰা অত্তনো হত্থগতং কত্ৰা বলি ভুঞ্জনত্থায জেট্ঠপুত্তস্স অনুরুদ্ধস্স নাম রাজকুমারস্স দত্ৰা বহূহি অমচ্চেহি সদ্ধিং তত্থ গন্ত্ৰা অনুরাজতাৰেন রজ্জং কারাপেসি. সাসনঞ্চ ৰিসোধাপেতুং সদ্ধম্মচক্কসামিত্থেরং তেন সদ্ধিং পহিণি.

অনেকসেতিভিন্নো কির রাজা যোনকরট্ঠং ৰিজযকালে পঠমং সাসনস্স পতিট্ঠানভূতমিদন্তি কত্ৰা তংরট্ঠৰাসিনো করমরানীতভাৰেন ন অগ্গহেসীতি.

যথাৰুত্তত্থেরৰংসেসু চ একো লকুন্ননগরে অরঞ্ঞৰাসী থেরো তত্থ নগরে অজ্জ অসুকস্মিং ঠানে একো মতোতি গিহীনং কথেত্ৰা যথাকথিতং ভূতং হুত্ৰা অযং অভিঞ্ঞালাভীতি পাকটো অহোসি.

তস্মিংযেৰ চ নগরে মহামঙ্গলো নাম থেরো অনেকসেতিভিন্দস্স রঞ্ঞো যুজ্ঝিতুং আগতকালে অনেকসেতিভিন্দো রাজা মং পক্কোসিস্সতি, সমানজাতিকং দূতং পেস্সেস্সতীতি পক্কোসিতকালতো পঠমমেৰৰদি. যথাৰুত্তনিযামেনেৰ পক্কোসনতো অযং অভিঞ্ঞা লাভীতি কিত্তি ঘোসো অহোসি.

তত্থ নগরে ঞাণৰিলাসত্থেরো সঙ্খ্যাপকাসকং নাম ¶ পকরণং অকাসি. তংল়ীকং পন পত্তলঙ্কত্থেরস্স ৰিহারে ৰসন্তো সিরিমঙ্গলোনাম থেরো অকাসি.

ৰিসুদ্ধিমগ্গদীপনিং পন সংঞ্ঞ্ৰত্তঅরঞ্ঞৰাসী উত্তরারামো নাম একো থেরো. মঙ্গলদীপনিং সিরিমঙ্গলত্থেরো. উপ্পাতসন্তিং অঞ্ঞতরো থেরো. তং কির উপ্পাতসন্তিং সজ্ঝাযিত্ৰা চীনরঞ্ঞো সেনং অজিনীতি. ইচ্চেৰং যোনকরট্ঠে অভিঞ্ঞালাভীনং গন্থকারানঞ্চ থেরানং আনুভাৰেন জিনসাসনং পরিসুদ্ধং হুত্ৰা পতিট্ঠাতি. এৰং হেতুফলসম্বন্ধৰসেন আদি অন্ত সম্বন্ধৰসেন চ যথাৰুত্তেহি তীহি নযেহি থেরপরম্পরা ঘট্টেত্ৰা গহেতব্বা.

ইতি সাসনৰংসে যোনকরট্ঠসাসনৰংসকথা

মগ্গো নাম চতুত্থো পরিচ্ছেদো.

৫. নৰৰাসীরট্ঠসাসনৰংসকথামগ্গো

৫. ইদানি ৰনৰাসীরট্ঠে সিরিখেত্তনগরসাসনৰংসং ৰক্খামি. জিনচক্কে হি একাধিকে ৰস্সসতে সম্পত্তে জটিলো সক্কো নাগো গরুল়ো কুম্ভণ্ডো চন্দী পরমীস্ৰরোচাতি ইমে সত্ত সিরিখেত্তং নাম নগরং মাপেসুং. তত্থ দ্ৰত্তপোঙ্কো নাম রাজা রজ্জং কারেসি. তস্স কির তীণি অক্খীনি সন্তীতি. তদা ভগৰতো সাৰকা অরহন্তা তিসহস্সমত্তা তত্থ ৰসিংসু. সো রাজা তেসং অরহন্তানং দেৰসিকং চতূহি পচ্চযেহি উপত্থম্ভি. ছ সরীরধাতুযো চ একেকং একেকস্মিং নিদহিত্ৰা ছ চেতিইযানি কারাপেসি. দক্খিণবাহুং পন নিদহিত্ৰা একম্পি চেতিযং কারাপেসি.

উণ্হীসধাতুং পন কঙ্গরন্নগরতো আনেত্ৰা একম্পি চেতিযং কারাপেসি. তং পন তাৰ ন নিট্ঠিতং. পচ্ছা অনুরুদ্ধরাজা গহেত্ৰা অরিমদ্দননগরং আনেত্ৰা চঞ্ঞিঙ্খু নাম চেতিযে নিধানং ¶ অকাসি. তস্মা রক্খিতত্থেরস্স আগমনতো পুব্বেপি সাসনং পতিট্ঠাসীতি দট্ঠব্বং. ততো পচ্ছা সাসনং দুব্বলং হুত্ৰা অট্ঠাসি.

ইদং ৰনৰাসীরট্ঠে পঠমং সাসনস্স পতিট্ঠানং.

মহামোগ্গলিপুত্ততিস্সত্থেরেন পন পেসিতো রক্খিতত্থেরো ৰনৰাসীরট্ঠং গন্ত্ৰা আকাসে ঠত্ৰা অনমতগ্গপরিযাযকথায ৰনৰাসিকে পসাদেসি. কথাপরিযোসানে পনস্স সট্ঠিসহস্সানং ধম্মাভিসমযো অহোসি. সত্ততিসহস্সমত্তা পব্বজিংসু. পঞ্চৰিহারসতানি পতিট্ঠাপেসুং. এৰং সো তত্থ সাসনং পতিট্ঠাপেসি. তেনেৰ অট্ঠ কথাযং –

গন্ত্ৰান রক্খিতত্থেরো,

ৰনৰাসিং মহিদ্ধিকো;

অন্তলিক্খে ঠিতো তত্থ,

দেসেসি অনমতগ্গিযন্তি ৰুত্তং.

এৰং ৰনৰাসীরট্ঠে পুব্বেযেৰ সাসনং ওগাহেত্ৰা পতিট্ঠহি. ন পন তাৰ সকলং ব্যাপেত্ৰা পতিট্ঠহি.

ইদং তাৰ ৰনৰাসীরট্ঠে সিরিখেত্তনগরে দুতিযং

সাসনস্স পতিট্ঠানং.

জিনচক্কে পন তেত্তিংসাধিকে চতুৰস্সসতে কুক্কুট সীসো নাম একো রাজা রজ্জং কারেসি. তস্স রঞ্ঞো কালে ভগৰতো সাৰকা অরহন্তা পঞ্চসতমত্তা অহেসুং. তেসম্পি সো রাজা দেৰসিকং চতূহি পচ্চযেহি উপত্থম্ভেসি. সোতাপন্নসকদাগামিঅনাগামিনো পন গণনপথং ¶ ৰীতিৰত্তা অহেসুং.

ইদং ৰনৰাসীরট্ঠে সিরিখেত্তনগরে পরম্পরাভতৰসেন

ততিযং সাসনস্স পতিট্ঠানং.

ইচ্চেৰং ৰনৰাসীরট্ঠে অনেকসতেহি অরহন্তত্থেরেহি সাসনং পুণ্ণিন্দুসঙ্কাসং হুত্ৰা অতিৰিয ৰিজ্জোতেসি. সাসনিক গন্থকারা পন মহাথেরা তত্থ ন সন্দিস্সন্তি. অরহন্তত্থেরা পন রাজূনং আযাচনং আরব্ভ ধম্মসত্থং একং ৰিরচযিংসূতি পোরাণা ৰদন্তীতি. ইচ্চেৰং–

তেচ থেরা মহাপঞ্ঞা,

পগ্গহেত্ৰান সাসনং;

সূরিযো ৰিয অত্থঙ্গো,

উপগা মচ্চুসন্তিকং.

তস্মা হি পণ্ডিতো পোসো,

যাৰ মচ্চু নচাগতো;

তাৰ পুঞ্ঞং করে নিচ্চং,

মা পমজ্জেয্য সব্বদাতি.

ইতি সাসনৰংসে ৰনৰাসীরট্ঠসাসনৰংসকথামগ্গো

নাম পঞ্চমো পরিচ্ছেদো.

৬. অপরন্তরট্ঠসাসনৰংসকথামগ্গো

৬. ইদানি পন মরম্মমণ্ডলে অপরন্তরট্ঠে সাসনৰংসং ৰক্খামি. অম্হাকঞ্হি মরম্মরট্ঠে সুপ্পাদকতিত্থে ৰাণিজগামে ৰসন্তে চূল়পুণ্ণ মহাপুণ্ণেদ্ৰে ভাতিকে পটিচ্চ ভগৰতো ধরমানস্সেৰ অতিরেকৰীসতিৰস্সকালতো পভুতি সাসনং পতিট্ঠাসি. ন পন তাৰ ব্যাপেত্ৰা পতিট্ঠাসি. তেনেৰ পুন সাসনস্স পতিট্ঠাপনত্থায মহামোগ্গলিপুত্ততিস্সত্থেরো ¶ যোনকধম্মরক্খিতত্থেরং পেসেসীতি.

ভগৰা পন লোহিতচন্দনৰিহারং পটিগ্গহেত্ৰা সত্তসত্তাহানি নিসীদিত্ৰা সমাগতানং দেৰমনুস্সানং ধম্মরসং অদাসি. সত্তাহেসু চ একস্মিং অহু চতুরাসীতিপাণসহস্সানং ধম্মাভিসমযো অহোসি. পঞ্চসতমত্তেহি চ পাসাদেহি আগচ্ছন্তো অন্তরামগ্গে সচ্চবন্ধপব্বতে নিসিন্নস্স সচ্চবন্ধস্স নাম ইসিনো ধম্মং দেসেত্ৰা ছহি অভিঞ্ঞাহি সদ্ধিং অরহত্তং পাপেসি. ৰাণিজগামে চ ইসিদিন্নসেট্ঠি আদীনম্পি ধম্মরসং পাযেসি. ইচ্চেৰং সচ্চবন্ধইসিদিন্নমহাপুণ্ণাদযো পটিচ্চ অম্হাকং মরম্মমণ্ডলে সাসনং পতিট্ঠাসি.

ইদং মরম্মমণ্ডলে অপরন্তরট্ঠে পঠমং সাসনস্স

পতিট্ঠানং.

ভগৰতো পরিনিব্বুততো পঞ্চতিংসাধিকে দ্ৰিৰস্সসতে সম্পত্তে ততিযসঙ্গীতিং সঙ্গাযিত্ৰা অৰসানে মহামোগ্গলিপুত্ততিস্সত্থেরো অত্তনো সদ্ধিৰিহারিকং যোনকধম্মরক্খিতত্থেরং সদ্ধিং চতূহি ভিক্খূহি অপরন্তরট্ঠং পেসেসি. অপরন্তরট্ঠঞ্চ নাম অম্হাকং মরম্মমণ্ডলে সুনাপরন্তরট্ঠমেৰ. তমত্থং পন হেট্ঠা অৰোচুম্হা.

যোনকধম্মরক্খিতত্থেরোপি অপরন্তরট্ঠং আগন্ত্ৰা অগ্গিক্খন্ধোপমসুত্তেন রট্ঠৰাসীনং পসাদেসি. সত্ততিমত্তানং পাণসহস্সানং ধম্মরসং পাযেসি. রট্ঠৰাসিনো চ বহৰো সাসনে পব্বজিংসু. রাজকুলতোপি সহস্সমত্তা পব্বজিংসু. ইত্থীনং পন অতিরেকসট্ঠিসহস্সমত্তা পব্বজিংসু. তঞ্চ ন অগ্গিক্খন্ধোপমসুত্তন্তং সুত্ৰা পব্বজন্তীনং ইত্থীনং ৰসেন ৰুত্তং, অথ খো আদিতো পট্ঠায যাৰচিরকালা সাসনং পসীদিত্ৰা পব্বজন্তীনং ইত্থীনং ৰসেন ৰুত্তন্তি দট্ঠব্বং. কস্মাতি চে, ইত্থীনং ভিক্খুনীনং সন্তিকেযেৰ পব্বজিতুং যুত্তত্তা যোনকধম্মরক্খিতত্থেরেন ¶ চ সদ্ধিং ভিক্খুনীনং অনাগতত্তা. এৰং চিরকালং অতিক্কমিত্ৰা পচ্ছা ভিক্খুনিযো আগন্ত্ৰা তাসং সন্তিকে পব্বজিতানং ৰসেন ৰুত্তন্তি দট্ঠব্বং. সীহল়দীপে অনুল়াদেৰিযো পব্বজিতকালে মহামহিন্দত্থেরস্স সঙ্ঘমিত্তাথেরিযা পক্কোসনতা ইধ ঞাপকাতি. এৰং যোনকধম্মরক্খিতত্থেরং পটিচ্চ অপরন্তরট্ঠে সত্তানং বহুপকারো অহোসি. তেনেৰট্ঠকথাযং–

অপরন্তং ৰিগাহিত্ৰা, যোনকো ধম্মরক্খিতো;

অগ্গিক্খন্ধূপমেনেত্থ, পসাদেসি জনে বহূতি.

তত্থাযং অধিপ্পায ৰিসেসো গহেতব্বো. কথং. অগ্গিক্খন্ধোপমসুত্তন্তং নাম ভিক্খূনং পটিপত্তিৰসেন ৰুত্তং, তং ভিক্খূনংযেৰ দেসেতুং ৰট্টতি, থেরোপি তত্থ তং দেসেসি, তস্মা পুণ্ণসচ্চবন্ধাদযো পটিচ্চ ভগৰতো ধরমানস্স ৰীসতিৰস্সকালেযেৰ সাসনং অপরন্তরট্ঠে পতিট্ঠহিত্ৰা কস্মিঞ্চি কস্মিঞ্চি ঠানে ভিক্খূনং সংৰিজ্জমানত্তা তেসং ভিক্খূনং সঙ্গহেত্ৰা দেসেতুং পচ্ছা আগতানঞ্চ ভিক্খূনং পরিসুদ্ধাচারতং ৰিঞ্ঞাপেতুং অগ্গিক্খন্ধোপমসুত্তং থেরো দেসেসীতি. এৰঞ্চ সতি অরিমদ্দননগরে সমণকুত্তকানং সংৰিজ্জমানভাৰং ৰক্খমানেন ৰচনেন সমেতি.

ইদং মরম্মমণ্ডলে অপরন্তরট্ঠে দুতিযং

সাসনস্স পতিট্ঠানং.

যস্মা পন বুদ্ধে, ভগৰা পুণ্ণত্থেরস্স যাচনমারব্ভ অপরন্তরট্ঠং আগন্ত্ৰা ৰাণিজে হি কারিতে চন্দনৰিহারে ৰসিত্ৰা একস্মিং সমযে আনন্দেন পচ্ছাসমণেন তম্বদীপরট্ঠম্পি দেসচারিকং আহিণ্ডি. আহিণ্ডিত্ৰা অরিমদ্দননগরট্ঠানসমীপং পত্ৰা পব্বতমুদ্ধনি ঠত্ৰা অনাগতে খো আনন্দ ইমস্মিং পদেসে সম্মুতি নাম রাজা অরিমদ্দনং নাম নগরং মাপেস্সতি ¶ , তস্মিঞ্চ নগরে মম সাসনং ৰিরূল়ং হুত্ৰা পতিট্ঠহিস্সতীতি ব্যাকাসি. অযমত্থো পোরাণৰেদপাত্থকেসু ৰুত্তো.

যোনকধম্মরক্খিতত্থেরো চ অপরন্তরট্ঠং আগন্ত্ৰা তম্বদীপরট্ঠম্পি আহিণ্ডিত্ৰা তম্বদীপরট্ঠৰাসীনম্পি ধম্মরসং পাযেসিযেৰ. অযমত্থো খত্তিযকুলতো এৰ পুরিসসহস্সানি পব্বজিংসূতি অট্ঠকথাযং ৰুত্তত্তা ৰিঞ্ঞাযতি. তদা হি অপরন্তরট্ঠে খত্তিযো নত্থি, তম্বদীপরট্ঠিন্দোযেৰ তং অনুসাসেত্ৰা অতি ৰসতি, খত্তিযে চ আসন্তে কুতো খত্তিযকুলানি ভৰিস্সন্তি, তেনেৰ তম্বদীপরট্ঠতো পুরিসসহস্সানি পব্বজিংসূতি ৰিঞ্ঞাতব্বং. তস্মা তম্বদীপিকসাসনৰংসম্পি ইধ ৰত্তুং যুজ্জতি.

তেনিদানি তম্বদীপিকাসাসনৰংসং পৰক্খামি. অম্হাকঞ্হি মরম্মমণ্ডলে তম্বদীপরট্ঠে অরিমদ্দননগরে সম্মুতিরাজা নাম ভূপালো রজ্জং করেসি. ততো পট্ঠায যাৰ অনুরুদ্ধরঞ্ঞা সমথি নামকে দেসে নিসিন্নানং তিংসমত্তানং সমণকুত্তকানং সট্ঠিসহস্সমত্তানং সিস্সানং ওৰাদং দত্ৰা চরিংসু.

তেসং পন সমণকুত্তকানং অযং ৰাদো,- সচে যো পাণাতিপাতং করেয্য, সো ঈদিসং পরিত্তং ভণন্তো তম্হা পাপকম্মা পরিমুচ্চেয্য, সচে পন যো মাতাপিতরং হন্ত্ৰা অনন্তরিযকম্মতো পরিমুচ্চিতুকামো ভৰেয্য, ঈদিসং পরিত্তং ভণেয্য, সচেপি পুত্তধিতানং আৰাহৰিৰাহকম্মং কত্তুকামো ভৰেয্য, আচরিযানং পঠমং নিয্যাদেত্ৰা আৰাহৰিৰাহকম্মং কাতব্বং, যো ইদং চারিত্তং অতিক্কমেয্য, বহু অপুঞ্ঞং পসৰেয্যাতি এৰমাদীহি মিচ্ছাৰাদেহি অত্তনো অত্তনো উপগতানং ওৰাদং অদংসু. তমত্থং সুত্ৰা অনুরুদ্ধরাজা পরিচিতপুঞ্ঞো তেসং ৰাদং ন রুচি. অযং তেসং মিচ্ছাৰাদোতি.

তদা ¶ চ অরিমদ্দননগরে অরহন্তো নাম থেরো আগন্ত্ৰা সাসনং পতিট্ঠাপেসি. অযং অরহন্তত্থেরস্স অট্ঠুপ্পত্তি,– রাজৰংসাগতপরিত্তনিদানাগতসাসনপ্পৰেণিযাগতৰসেন তিৰিধা হোতি.

তত্থাযং রাজৰংসাগতট্ঠুপ্পত্তি,– তদা হি সুনাপরন্ততম্বদীপরট্ঠেসু সব্বেন সব্বং সব্বদা থিরং সাসনং ন তাৰ পতিট্ঠাসি. তেনেৰ ভগৰতো ব্যাকতনিযামেন সাসনং পতিট্ঠাপেস্সামাতি চিন্তেত্ৰা মহাথেরা সক্কস্স দেৰানমিন্দস্স সন্তিকং গন্ত্ৰা সাসনং অনুগ্গহিতুং সমত্থং পুগ্গলং দেহীতি যাচিংসু. সক্কোচ দেৰানমিন্দো তাৰতিংসভৰনে একং দেৰপুত্তং যাচিত্ৰা একিস্সা ব্রাহ্মণিযা কুচ্ছিম্হি পটিসন্ধিং গণ্হাপেসি. দসমাসচ্চযেন ৰিজাযনকালে সীলবুদ্ধি নাম থেরো অনুরক্খিত্ৰা ৰযে সম্পত্তে পব্বাজেসি. তীসু পিটকেসু অতিৰিয ছেকো হুত্ৰা অরহত্তং পাপুণি. অরহন্তোতি নামেন পাকটো অহোসি.

সোচ থেরো মরম্মমণ্ডলে জিনসাসনং ৰিজ্জোতাপেতুং অরিমদ্দননগরং আগন্ত্ৰা নগরতো অৰিদূরে একস্মিং অরঞ্ঞে নিসীদি. তদা সক্কো দেৰানমিন্দো একং নেসাদং পলোভেত্ৰা তস্স থেরং দস্সেসি. অথ নেসাদস্স এতদহোসি,– অযং পন অমনুস্সো যক্খো ভৰেয্য, সচে পন মনুস্সো ভৰেয্য, এৰং সতি মিলক্খুজাতিকো ভৰেয্যাতি. এৰং পন চিন্তেত্ৰা রঞ্ঞো দস্সনত্থায নগরং আনেসি. থেরো চ অট্ঠপরিক্খারে গহেত্ৰা অনুগচ্ছি. নেসাদা চ থেরং আনেত্ৰা রঞ্ঞো দস্সেসি.

রাজা দিস্ৰা সন্তিন্দ্রিযো অযং, ন মিলক্খুজাতিকো, ইমস্স অব্ভন্তরে সারধম্মো অত্থি মঞ্ঞেতি লদ্ধসূরিযোভাসংৰিয পদুমং ফুল্লচিত্তং হুত্ৰা ৰীমংসেতুকামো থেরং আহ,– অত্তনো সারুপ্পং আসনং ঞত্ৰা নিসীদাহীতি.

থেরো চ রাজপল্লঙ্কং আরুহিত্ৰা নসীদি. রাজা চ অযং অগ্গাসনে ¶ নিসীদি, অৰস্সং অগ্গপুগ্গলো ভৰেয্যাতি চিন্তেত্ৰা ত্ৰং কস্স ঞাতি, কস্স ভিস্সো, কুতো আগতোসীতি পুচ্ছি. থেরো চ এৰমাহ,– লোকস্মিং যো নৰগুণসম্পন্নো ভগৰা সম্মাসম্বুদ্ধো, তস্সাহং ঞাতি, সোভগৰাযেৰ মমাচরিযো, ভিক্খুসঙ্ঘস্স নিসিন্নট্ঠানতো আগতোম্হীতি.

রাজা চ সোমনস্সপ্পত্তো হুত্ৰা আহ, তৰ আচরিযেন দেসিতং ধম্মং একদেসতো দেসেহীতি. অথ যথা সিরিধম্মাসোকরঞ্ঞো নিগ্রোধসামণেরেন অপ্পমাদধম্মো দেসিতো, এৰং অপ্পমাদধম্মংযেৰ থেরো দেসেসি.

রাজা চ পুন আহ,– কুহিং দানি সম্মাসম্বুদ্ধো নিসীদতি, তেন পন দেসিতো ধম্মো কতিপ্পমাণো, তস্স সাৰকা পন কতিপ্পমাণা, তুম্হাদিসা অঞ্ঞে অত্থি ৰা মা ৰাতি. ইদানি অম্হাকং আচরিযো সম্মাসম্বুদ্ধো পরিনিব্বুতো, ধাতুযোযেৰ ইদানি অত্থি, তেন পন দেসিতো ধম্মো চতুরাসীতিধম্মক্খন্ধসহস্সপ্পমাণো, সুধম্মপুরে পিটকত্তযং যুগল়ৰসেন তিংসৰিধা অত্থি, মযা অঞ্ঞো পরমত্থ সম্মুতিৰসেন দুৰিধোপি সঙ্ঘো অত্থীতি.

তং সুত্ৰা রাজা ভিয্যোসোমত্তায পসন্নো হুত্ৰা পুন আরোচেসি,– মম ভন্তে ইমস্মিং পচ্চক্খে নত্থি তযা অঞ্ঞো নাথো, অজ্জভগ্গে পাণুপেতং মং উপাসকোতি ধারেহি, তৰ ওৰাদং অহং সিরসা পটিগ্গণ্হিস্সামীতি.

ততো পচ্ছা অরঞ্ঞকঙ্গারহে ঠানে ৰিহারং কারাপেত্ৰা অদাসি. সমণকুত্তকানম্পি ৰাদং ভিন্দি, যথা পন সুৰণ্ণপাতিং লভিত্ৰা সুৰণ্ণভাজনং লভিত্ৰা মত্তিকাভাজনন্তি. সকলেপি চ রট্ঠে সমণকুত্তকানং ৰাদং জহাপেসি. তস্মিঞ্চ কালে সমণকুত্তকা হীনলাভা হুত্ৰা থেরস্স উপনাহং বন্ধিংসু. তে পন সমণকুত্তকা অরঞ্ঞে নিস্সামিকাৰিয ¶ কোলেযকা সুনখা অনাথা হুত্ৰা কাযিকচেতসিকদুক্খং লভিংসু.

রাজা চ তমত্থং ঞত্ৰা যথা সমণকুত্তকা নাভিভৰন্তি, তথা আরক্খং ঠপেসি. তে চ সমণকুত্তকে সেতৰত্থং নিৰাসাপেত্ৰা আৰুধগাহযোধভাৰেন রাজকম্মে নিযোজাপেসি. থেরো চ সাসনে পসন্নে জনে পব্বাজেত্ৰা উপসম্পাদেত্ৰা সাসনং ৰিসোধাপেসি. রাজা চ ইমস্মিং রট্ঠে পোরাণিকা রাজানো সমণকুত্তকানং ৰাদং গহেত্ৰা রজ্জং কারেসুং, সচে হি পন তেসং অনত্থকরজ্জং পুন গণ্হাপেতুং সক্কুণেয্যং, এৰং সতি অহং তেসং অনত্থকরজ্জং অপনেত্ৰা সাত্থকরজ্জং গণ্হাপেতুমিচ্ছামীতি অনুসোচীতি.

অযং পন পরিত্তনিদানাগতট্ঠুপ্পত্তি, –

সীহল়দীপে কির ৰিপ্পৰাসীনগরে নিসিন্নো একো ভিক্খুউপদ্ৰারাৰতীনগরং গন্ত্ৰা পরিযত্তিং উগ্গণ্হি. ততো পচ্ছা সুধম্ম পুরং গন্ত্ৰা পরিযত্তিং উগ্গণ্হি. তস্মিঞ্চ কালে সিরিখেত্তনগরে পাটলিরুক্খে একো গন্থো অত্থীতি সুত্ৰা সুধম্মপুরতো সিরিখেত্তনগরং অগমাসি. অন্তরামগ্গে লুদ্ধকো থেরং পস্সিত্ৰা অযং যক্খোতি মঞ্ঞিত্ৰা গহেত্ৰা অনুরুদ্ধরঞ্ঞো দস্সেসি.

তদা রাজা থেরং পুচ্ছি,– কো পন ত্ৰন্তি. অহং মহারাজ গোভমস্স সাৰকোতি. পুন রাজা পুচ্ছি,–তিণ্ণং পন রতনানং কীদিসোতি. থেরো আহ,– মহোসধপণ্ডিতোৰিয মহারাজ বুদ্ধো দট্ঠব্বো, উমঙ্গোৰিয ধম্মো, ৰিদেহসেনা ৰিয সঙ্ঘোতি. এৰং উপমাহি পকাসিতো রাজা পুন পুচ্ছি,–কিং নুখো ইমে গোতমস্স সাৰকাতি. ন খো মহারাজ ইমে গোতমস্স সাৰকা, ইমে পন অম্হেহি ৰিসভাগা সমণকুত্তকাযে ৰাতি. এৰং ৰুত্তে ততো পট্ঠায তে সমণকুত্তকে ৰিজহি, তিণং ৰিয নাতিমঞ্ঞি. পাটলিরুক্খসু সিরতোপি ¶ লদ্ধং তেসং গন্থং লদ্ধট্ঠানেযেৰ অগ্গিনা ঝাপেসি. তম্পি ঠানং যাৰজ্জতনা অগ্গিঝাপনথলন্তি পাকটন্তি.

থেরো চ ৰিমান ৰত্থুং রঞ্ঞো দেসেসি. রাজা চ পসীদিত্ৰা সিরিখেত্তনগরতো অরিমদ্দননগরং পচ্চাগমনকালে আনেসি.

ইদং পন পাটলিসুসিরে লদ্ধগন্থস্স কারণং,- তেসঞ্হি সমণকুত্তকানং অব্ভন্তরে একো উপাযচ্ছেকো সমণকুত্তকো অত্তনো ৰাদানুরূপং গন্থং কত্ৰা সিরিখেত্তনগরে দ্ৰত্তিংসরতনক্খন্ধস্স পাটলিরুক্খস্স সুসিরে পৰেসেত্ৰা পুনপ্পুনং উদকেন তেমেত্ৰা মত্তিকায লিম্পেত্ৰা পুন তচং উপ্পাদেত্ৰা উট্ঠাপেসি. তদা মযং সুপিনে পাটলিরুক্খে সারগন্থো অত্থব্যঞ্জনসম্পন্নো একো অত্থীতিই পস্সামাতি কোলাহলং উপ্পাদেসুং. তং সুত্ৰা রাজা সিরিখেত্তনগরং গন্ত্ৰা তং পাটলিরুক্খং ভিন্দিত্ৰা গৰেসেন্তো তং গন্থং লভি. গন্থে পন সকৰাদৰসেন সমণকুত্তকসামঞ্ঞতা ঈদিসাযেৰ, এতে গোতমাসাৰকা হোন্তিই, এতেসংযেৰ আচারো সগ্গমগ্গপথভূতোতি এৰমাদীহি কারণেহি ৰুত্তং. রাজা চ পসীদিত্ৰা সমণকুত্তকানং বহূনি দাতব্বানি অদাসি. ততো পচ্ছা থেরস্স ধম্মকথং সুত্ৰা তং অগ্গিনা ঝাপেসীতি এৰং সমণকুত্তকানং ৰচনং সুত্ৰা সিরিখেত্তনগরং গন্ত্ৰা অরিমদ্দননগরং পচ্চাগচ্ছন্তো থেরং আনেসীতি দট্ঠব্বং. অরিমদ্দননগরং সম্পত্তকালে জেতৰনং নাম ৰিহারং কারাপেত্ৰা অদাসি. থেরো চ তত্থ সাসানং ৰিসোধেত্ৰা নিসীদি. রাজা দেৰসিকং উদকং আনেত্ৰা অগ্গমহেসী পন দেৰসিকংযেৰ পিণ্ডপাতং আনেত্ৰা ভোজেসি. উপ্পন্নকঙ্খা কালেপি তংতংকঙ্খাট্ঠানং পুচ্ছীতি.

অযং পন সাসনপ্পৰেণিযাগতট্ঠুপ্পত্তি,–

সুধম্মপুরে হি সমাপত্তিলাভী অনোমদস্সী নাম থেরো ¶ সোণুত্তরত্থেরানং ৰংসানুরুক্খণৰসেন সদ্ধিং পঞ্চহি ভিক্খু সতেহি নিসীদি. তস্স পন পধানসিস্সো অধিসীলোনাম, তস্স পধানসিস্সো প্রানদস্সী নাম, তস্স পধানসিস্সো কাল়ো নাম, তস্স পধানসিস্সো অরহন্তো নাম, তস্স পধানসিস্সো অরিযৰংসো নামাতি.

ইদঞ্চ ৰচনং-কো পনেস উত্তরাজীৰমহাথেরোতি. অযঞ্হি থেরো রামঞ্ঞদেসিযপুত্তো অরিযৰংসত্থেরস্স সিস্সো. অরিযৰংসত্থেরো পন কপ্পুঙ্গনগরৰাসী মহাকাল়ত্থেরস্স সিস্সো. সো পন সুধম্মনগরৰাসিনো প্রানদস্সী মহাথেরস্স সিস্সোতি কল্যাণী সিলালেখনে ৰুত্তৰচনেন ন সমেতি. এৰম্পি সতি যথিচ্ছিত অধিপ্পাযো ন নস্সতীতি দট্ঠব্বং.

এৰং নানাচরিযানং ৰাদো নানাকারেন দিস্সমানোপি অরহন্তত্থেরস্স অরিমদ্দননগরে সাসনং অনুগ্গহেত্ৰা পতিট্ঠানতাযেৰেত্থ পমাণন্তি কত্ৰা নাৰমঞ্ঞিতব্বো. সব্বেসঞ্হি আচরিযানং ৰাদেপি অরহন্তত্থেরো অরিমদ্দননগরং আগন্ত্ৰা সাসনং পতিট্ঠাপেসীতি অত্থো ইচ্ছিতব্বোযেৰাতি.

অরহন্তত্থেরো পন মূলনামেন ধম্মদস্সীতি পাকটো সুধম্মপুরৰাসী সীলবুদ্ধিত্থেরস্স সিস্সোতি দট্ঠব্বো. সো চ থেরো পুব্বেৰ পব্বজ্জকালতো চতূসু ৰেদেসু সিক্খিতসিপ্পো. পব্বজিত্ৰা পন সাল়কথং পিটকত্তযং উগ্গণ্হিত্ৰা পারং গন্ত্ৰা সব্বত্থ পাকটো. সোক্কতযনগরং অনেত্ৰা মনুস্সা পূজেন্তি. তত্থ দসৰস্সানি ৰসিত্ৰা পুন সুধম্মপুরং আগন্ত্ৰা অরঞ্ঞৰাসং সমাদিযি.

ততো পচ্ছা জিনচক্কে একসট্ঠাধিকে পঞ্চসতে সহস্সেচ সম্পত্তে কলিযুগে একূনাসীতাধিকে তিসতে সম্পত্তে অনুরুদ্ধরাজা রজ্জং পাপুণি. তদা অরিমদ্দননগরে সমণকুত্তকা ¶ মযং গোতমসাৰকাতি ৰত্ৰা তিংসতিংসৰগ্গা হুত্ৰা নিসীদিংসু. ৰগ্গৰসেন কির সহস্সমত্তাতি. অনুরুদ্ধরাজা চ তেসং সমণকুত্তকানং আগারিযাব্রহ্মচরিযাদীনি সুত্ৰা ন পসীদি. এৰম্পি পৰেণিযা আগভত্তা ন পজহি. অরহন্তং পন থেরং পস্সিত্ৰা ততো পট্ঠায তেসং সমণকুত্তকানং নিবদ্ধৰত্তানি ভিন্দিত্ৰা সাসনে পসীদি.

ইদং মরম্মমণ্ডলে তম্বদীপরট্ঠে অরিমদ্দননগরে অরহন্তং.

নাম থেরং পটিচ্চ ততিযং সাসনস্স পতিট্ঠানং.

তস্মিঞ্চ কালে অরহন্তত্থেরো অনুরুদ্ধরাজানং আহ,-তীসু সাসনেসু পরিযত্তিসাসনে তিট্ঠন্তেযেৰ পটিপত্তি সাসনং তিট্ঠতি, পটিপত্তিসাসনে তিট্ঠন্তেযেৰ পটিৰেধসাসনং তিট্ঠতি, যথা হি গুন্নং সতেপি সহস্সেপি ৰিজ্জমানে পৰেণিপ,লিকায ধেনুযা অসতি সো ৰংসো সাপৰেণী ন ঘল়ীযতিই, এৰমেৰং ধুতঙ্গধরানং ভিক্খূনং সতেপি সহস্সেপি ৰিজ্জমানে পরিযত্তিযা অন্তরহিতায পটিৰেধো নাম ন হোতি, যথা পন নিমিকুম্ভিযো জাননত্থায পাসাণ পিট্ঠে অক্খরেসু ঠপিতেসু যাৰ অক্খরানি ধরন্তি, তাৰ নিধিকুম্ভিযো নট্ঠা নাম ন হোন্তি, এৰমেৰং পরিযত্তিযা ধরমানায সাসনং অনন্তরহিতং নাম হোতি, যথা চ মহতো তল়াকস্স পাল়িযা থিরায উদকং ন ঠস্সতীতি ন ৰত্তব্বং, উদকে সতি পদুমাদীনি পুপ্ফানি ন পুপ্ফিস্সন্তীতি ন ৰত্তব্বং, এৰমেৰং মহাতল়াকস্স থিরপাল়িসদিসে তেপিটকে বুদ্ধৰচনে সতি উদকসদিসা পটিপত্তিপূরকা কুলপুত্তা নত্থীতি ন ৰত্তব্বং, তেসু সতি পদুমাদিপুপ্ফসদিসো পটিৰেধো নত্থীতি ন ৰত্তব্বং, এৰং একন্ততো পরিযত্তিমেৰ পমাণং, তস্মা অন্তমসো দ্ৰীসু পাতিমোক্খসু ৰত্তমানেসুপি সাসনং অনন্তরহিতমেৰ, পরিযত্তিযা অন্তরহিতায সুপ্পটিপন্নস্সাপি ধম্মাভিসমযো নত্থি, অনন্তরহিতায এৰ ধম্মাভিসমযো অত্থি ¶ , ইদানিপি অম্হাকং পরিযত্তিসাসনং পরিপুণ্ণং নত্থি, সরীরধাতুযো চ নত্থি, তস্মা যত্থ পরিযত্তিসাসনং সরীরধাতুযো চ অত্থি, তত্থ পণ্ণাকারেন সদ্ধিং দূতং পেসেত্ৰা আনেতব্বা, এৰং সতি অম্হাকং রট্ঠে জিনসাসনং চিরকালং পতিট্ঠহিস্সতীতি.

এৰং পন ভন্তে সতি কত্থ যাচিস্সামাতি. সুৰণ্ণভূমিরট্ঠে মহারাজ সুধম্মপুরে তীহি ৰারেহি পিটকত্তযং লিখিত্ৰা ঠপেসি, সরীরধাতুযো চ বহূ তত্থ অত্থীতি. রাজা এৰং ভন্তেতি পটিগ্গণ্হিত্ৰা বহূ পণ্ণাকারে পটিযাদেত্ৰা রাজলেখনং লিখিত্ৰা অট্ঠঙ্গসমন্নাগতং একং অমচ্চং দূতং কত্ৰা পেসেসি.

সুধম্মপুরিন্দো মনোহরি নাম রাজাপি মচ্ছেরচিত্তো হুত্ৰা তুম্হাদিসানং মিচ্ছাদিট্ঠীনং ঠানে পিটকত্তযং সরীরধাতুযো চ পহিণিতুং ন যুত্তা, তিলোকগ্গস্স হি সম্মাসম্বুদ্ধস্স সাসনং সম্মাদিট্ঠীনং ঠানেযেৰ পতিট্ঠহিস্সতি, যথা নাম কেসরসীহরাজস্স ৰসা সুৰণ্ণপাতিযংযেৰ, ন মত্তিকাভাজনেতি.

দূতা পচ্চাগন্ত্ৰা অনুরুদ্ধরঞ্ঞো তমত্থং আরোচেসুং. তং সুত্ৰা অনুরুদ্ধরাজা কুজ্ঝি, তত্তককপালে পক্খিত্ততিলংৰিয তট তটাযি.

অথ রাজা নদীমগ্গেন নাৰানং অসীতিসতসহস্সেহি নাৰিকানং যোধানং অট্ঠকোটীহি সেনং ব্যূহিত্ৰা থলমগ্গেন সদ্ধিং চতূহি মহাযোধনাযকেহি হত্থীনং অসীতি সহস্সেহি অস্সানং নৰুতিইসতসহস্সেহি যোধানং অসীতিকোটিযা সেনং ব্যূহিত্ৰা সযমেৰ যুজ্ঝিতুং সুধম্মপরং গচ্ছি.

তং সুত্ৰা মনোহরিরাজা সীততসিতো হুত্ৰা অত্তনো ¶ বহূ যোধে সংৰিদহিত্ৰা সুধম্মপুরযেৰ পটিসেনং কত্ৰা নিসীদি.

অথ অথব্বণৰেদে আগতপ্পযোগৰসেন পুনপ্পুনং ৰাযমন্তাপি নগরমূলং উপসঙ্কমিতুং ন সক্কা. তদা রাজা ৰেদঞ্ঞুনো পুচ্ছি,–কস্মা পনেত্থ নগরমূলং উপসঙ্কমিতুং ন সক্কোমাতি. ৰেদঞ্ঞুনো আহংসু,-অথব্বণৰেদৰিধানং মহারাজ অত্থি মঞ্ঞেতি. অথ রাজা পথৰিযং নিদহিত্ৰা মতকল়েৰরং উদ্ধরিত্ৰা মহাসমুদ্দে খিপেসি.

একং কির মনুস্সং হিন্দুকুলং জেঙ্গুনামকং কীটং খাদাপেত্ৰা তং মারেত্ৰা হত্থপাদাদীনি অঙ্গপচ্চঙ্গানি গহেত্ৰা ছিন্নছিন্নানি কত্ৰা নগরস্স সামন্তা পথৰিযং নদহিত্ৰা ঠপেসি. তদা পন নগরং উপসঙ্কমিতুং সক্কা. নগরঞ্চ পৰিসিত্ৰা অনুরুদ্ধরাজা মনোহরিরাজানং জীৰগ্গাহং গণ্হি. সুধম্মপুরে পোরাণিকানং রাজূনং পৰেণীআগতৰসেন রতনমযমঞ্জূসাযং ঠপেত্ৰা পূজিতং সহধাতূহি পিটকত্তযং গহেত্ৰা মনোহরিরঞ্ঞো সন্তকানং দ্ৰত্তিংসহত্থীনং পিট্ঠিযং আরোপেত্ৰা আনেসি.

অরিমদ্দননগরং পন পত্ৰা ধাতুযো রতনমযমঞ্জূসাযং ঠপেত্ৰা সিরিসযনগব্ভে রতনমঞ্চে সীসোপদেসস্স সমীপে ঠপেসি. পিটকত্তযম্পি রতনমযে পাসাদে ঠপেত্ৰা ভিক্খুসঙ্ঘস্স উগ্গহধারণাদিঅত্থায নিয্যাদেসি. ততো কির আনীতং পিটকত্তযং উগ্গণ্হন্তানং অরিযানং সহস্সমত্তং অহোসীতি.

সুধম্মনগরং ৰিজযিত্ৰা পিটকেন সদ্ধিং ভিক্খুসঙ্ঘং আনেত্ৰা সাসনস্স পতিট্ঠাপনং জিনচক্কে একাধিকে ছসতে ৰস্সসহস্সে কলিযুগে চ সোল়সাধিকে চতুসতে সম্পত্তেতি সিলালেখনেসু ৰুত্তং.

অনুরুদ্ধরঞ্ঞো কালে পুঞ্ঞানুভাৰেন তিইণ্ণং রতনানং পরিপুণ্ণত্তা ¶ পুণ্ণগামোতি সমঞ্ঞা অহোসি. চিরকালং অতিক্কন্তে ণ্ণকারং লোপৰসেন মকারস্স চ নিগ্গহিত ৰসেন পুগমীতি মরম্মভাসায ৰোহারীযতীতি অনাগতৰংসরাজৰংসেসু ৰুত্তং.

অনুরুদ্ধরাজাযেৰ চত্তারো মহাযোধে সীহল়দীপং পেসেত্ৰা ততোপি পিটকত্তযং আনেসি. সীহল়দীপতো আনীতপিটকত্তযেন সুধম্মপুরতো আনীতপিটকত্তযং অঞ্ঞমঞ্ঞং যোজেত্ৰা সংসন্দেত্ৰা অরহন্তত্থেরো ৰীমংসেসি. তদা গঙ্গাদকেনৰিয যমুনোদকং অঞ্ঞমঞ্ঞং অনূনং অনধিকং অহোসি. তেহি পিটকেহি অঞ্ঞানিপি ৰড্ঢেত্ৰা তিপিটকগব্ভে ঠপেত্ৰা পূজেসি. তেসু তেসু ঠানেসুপি পতিট্ঠাপেসি.

মনোহরিরাজানম্পি ম্রঙ্কপা নাম দেসে উপট্ঠাকেহি সহ ঠপেসি. তস্স চ কির রঞ্ঞো মুখং ৰিরৰিত্ৰা কথং সল্লাপেন্তস্স মুখতো ওভাসো পজ্জলিত্ৰা নিক্খমি. সো কদাচি কদাচি অনুরুদ্ধরঞ্ঞো সন্তিকং আগন্ত্ৰা গারৰৰসেন ৰন্দনাদীনি অকাসি. তদা অনুরুদ্ধরঞ্ঞো লোমহংসো উপ্পজ্জি উব্বিগ্গো চ. তস্মা তস্স রঞ্ঞো নিত্থেজত্থায বুদ্ধরূপস্স চেতিযস্স ভত্তং পূজেত্ৰা তং গহেত্ৰা মনোহরিরঞ্ঞো ভাজেসি. তদা তস্স তদানুভাৰো অন্তরধাযি. মনোহরিরাজা সংৰেগং আপজ্জিত্ৰা সংসারে সংসরন্তো যাৰ নিব্বানং ন পাপুণামি, তাৰ পরৰসে নানুৰত্তেয্যন্তি পত্থনং অকাসি. সুধম্মপুরতো আভতং অত্তনো সন্তকং মনোময মণিং একস্স সেট্ঠিনো সন্তিকে ৰিক্কিণিত্ৰা লদ্ধমূলেন পঞ্চৰাহরজতেন অভুজিতপল্লঙ্কৰসেন একং মহন্তং বুদ্ধ বিম্বং পরিনিব্বানাকারেন একন্তি দ্ৰে বুদ্ধপ্পটিবিম্বানি কারাপেসি. যাৰজ্জতনা তানি সন্তীতি. ইচ্চেৰং অনুরুদ্ধরাজা সুধম্মপুরতো ¶ সীহল়দীপতো চ সাসনং আনেত্ৰা অরিমদ্দননগরে পতিট্ঠাপেসীতি.

ইদং অম্হাকং মরম্মমণ্ডলে তম্বদীপরট্ঠে অরিমদ্দননগরে

অনুরুদ্ধরাজানং পটিচ্চ চতুত্থং সাসনস্স পতিট্ঠানং.

উত্তরাজীৰত্থেরোপি সোণুত্তরানং ৰংসতো সাসনং গহেত্ৰা সুধম্মপুরতো অরিমদ্দননগরং আগন্ত্ৰা সাসনং পতিট্ঠাপেসি.

ইদং অম্হাকং মরম্মমণ্ডলে তম্বদীপরট্ঠে অরিমদ্দননগরে উত্তরাজীৰত্থেরং পটিচ্চ পঞ্চমং সাসনস্স পতিট্ঠানং.

উত্তরাজীৰত্থেরস্স সীহল়দীপং গতকালে তেন সদ্ধিং গতং ছপ্পদং নাম সামণেরং সীহল়দীপেযেৰ সীহল়দীপিকা পব্বজিংসু. পব্বজিত্ৰা চ ছপ্পদসামণেরো পরিযত্তিং উগ্গণ্হিত্ৰা দসৰস্সং তত্থ ৰসিত্ৰা অরিমদ্দননগরং পচ্চাগচ্ছি. সিৰলিত্থেরঞ্চ তামলিন্দত্থেরঞ্চ আনন্দত্থেরঞ্চ রাহুলত্থে রঞ্চ অনেসি. তে পন থেরা তিপিটকধরা হোন্তি ব্যত্তা দক্খা চ. অযঞ্চত্থো ৰিত্থারেন হেট্ঠা ৰুত্তো.

অরিমদ্দননগরং পত্ৰা অরিমদ্দন ৰাসীহি ভিক্খূহি সদ্ধিং ৰিনযকম্মানি অকত্ৰা পুথু হুত্ৰা নিসীদিংসু. নরপতিরাজা চ তেসু থেরেসু অতিৰিয পসীদি. এরাৰতীনদিযং উল়ুম্পং বন্ধিত্ৰা তত্থেৰ উপসম্পদকম্মং কারাপেসি. চিরকালং অতিক্কমিত্ৰা সো গণো ৰুড্ঢি হুত্ৰা উপ্পজ্জি.

নরপতিরাজা চ তে থেরে সদ্ধিং সঙ্ঘেন নিমন্তেত্ৰা মহাদানং অদাসি. তদা ছণে আকপ্পসম্পন্নং রূপসোভগ্গপ্পক্কং একং নাটকিত্তিং দিস্ৰা রাহুলত্থেরো পটিবদ্ধচিত্তো লেপে লগ্গিতৰানরোৰিয কদ্দমে লগ্গিতমাতঙ্গোৰিয চ কাম গুণলেপকদ্দমেসু লগ্গিতো সাসনে ৰিরমিত্ৰা হী নাযাৰত্তীতুং আরভি. মরণন্তি করোগেন অভিভূতো ৰিয ¶ অতেকিচ্ছো হুত্ৰা সেসত্থেরেসু ওৰাদং দিন্নেসু পিনাদিযি. তদা সেসত্থেরা তং এৰমাহংসু,-মা ত্ৰং একং তং পটিচ্চ সব্বেপি অম্হে লজ্জাপেতুং ন অরহসি, মা ইধ হীনাযা ৰত্তেহি, মল্লারুদীপং গন্ত্ৰা যথারুচিং করোহীতি পেসেসুং. রাহুলত্থেরো চ কুসিমতিত্থতো নাৰং আরুয্হ মল্লারুদীপং অগমাসি. মল্লারুদীপং পত্তকালে মল্লারুরাজা ৰিনযং জানিতুকামো সহ টীকায খুদ্দসিক্খাপকরণং তস্স সন্তিকে উগ্গণ্হিত্ৰা একপত্তমত্তং মণিং অদাসি. সোচ তং লভিত্ৰা হীনাযাৰত্তীতি. হোন্তি চেত্থ,-

অতিদূরেৰ হোতব্বং, ভিক্খুনা নাম ইত্থিভি;

ইত্থিযো নাম ভিক্খূনং, ভৰন্তি ইধ ৰেরিনো.

তাৰ তিট্ঠন্তু দুপ্পঞ্ঞা, মযং পোরাণিকাপি চ;

মহাপঞ্ঞা ৰিনাসং, পত্তা হরিতচাদযো.

তস্মা হি পণ্ডিতো ভিক্খু, অন্তমসোৰ ইত্থিভি;

ৰিস্সাসং ন করে লোকে, রাগো চ দুপ্পৰারিতোতি.

সেসেসু চ থেরেসু ছপ্পদো নাম থেরো পঠমং কালঙ্কতো. সিৰলিতামলিন্দানন্দত্থেরাযেৰ তযো পরিযত্তিউগ্গহণধারণাদিৰসেন সাসনং উপত্থম্ভেত্ৰা অরিমদ্দননগরে নিসীদিংসু. একস্মিঞ্চ কালে রাজা তেসং তিণ্ণং থেরানং একেকং হত্থিং অদাসি. সিৰলিতামলিন্দত্থেরা পটিগ্গহেত্ৰা ৰনে ৰিস্সজ্জাপেসুং. আনন্দত্থেরো পন কিঞ্চিপুরনগরং পহিণিত্ৰা ঞাতকানং দেহীতি কুসিমতিত্থং গন্ত্ৰা নাৰং আরোপেসি. তং কারণং ঞত্ৰা সিৰলিতামলিন্দত্থেরাতং এৰমাহংসু,– মযং পন আৰুসো হত্থীনং সুখত্থায ৰনে ৰিস্সজ্জেম,ত্ৰং পন অধম্মিকং করোসীতি. কিন্নাম ভন্তে ঞাভকানং সঙ্গহো ন ৰট্টতি, ননু ঞাতকানঞ্চ সঙ্গহোতি ভগৰতা ৰুত্তন্তি.

থেরা ¶ আহংসু,-সচে ত্ৰং অম্হাকং ৰচনং নকরেয্যাসি,ভৰ ইচ্ছানুরূপং করোহি, মযং পন তযা সদ্ধিং সংৰাসং ন করিস্সামাতি ৰিসুং নিসীদিংসু.

ততো পট্ঠায দ্ৰে গণা ভিজ্জিংসু. ততো পচ্ছাকালে অতিক্কন্তে তামলিন্দত্থেরো বহুস্সুতানং ব্যত্তিবলানং সিস্সানং অনুগ্গহত্থায গহট্ঠানং সন্তিকে অযং বহুস্সুতো অযং মহাপঞ্ঞোতি এৰমাদিনা ৰচীৰিঞ্ঞত্তিং সমুট্ঠাপেতি, এৰং কতে কুলপুত্তা সুলভপচ্চযৰসেন সাসনস্স হিতং আৰহিভুংসক্খিস্সন্তীতি কত্ৰা. তং কারণং সুত্ৰা সিৰলিত্থেরো এৰমাহ,- কস্মা ত্ৰং ৰচীৰিঞ্ঞত্তিং সমুট্ঠাপেত্ৰা বুদ্ধপ্পটিকুচ্ছিতং কম্মং করোসীতি. ভগৰতা অত্তনো অত্থাযযেৰ ৰচীৰিঞ্ঞত্তিং পটিক্খিত্তা, অহং পন পরেসংযেৰ অত্থায ৰচীৰিঞ্ঞত্তিংসমুট্ঠাপেমি, নাত্তনো অত্থায, সাসনস্স হি ৰেপুল্লত্থায এৰং ৰচীৰিঞ্ঞত্তিংসমুট্ঠাপেমি. সিৰলিত্থেরোপি ন ত্ৰং মম ৰচনং করোসি, যং যং ত্ৰং ইচ্ছসি, তং তং করোহি, অহং পন তযা সদ্ধিং সংৰাসং নকরিস্সামীতি ৰিসুং হুত্ৰা সদ্ধিং সকপক্খেন নিসীদি. ততো পট্ঠায তযো গণা ভিজ্জিংসু.

এৰং অরিমদ্দননগরে অরহন্তত্থেরস্স একো ৰংসো, সিৰলিত্থেরস্স একো, তামলিন্দত্থেরস্স একো, আনন্দত্থেরস্স একোতি চত্তারো গণা অহেসুং.

তেসু অরহন্তত্থেরগণো সুধম্মপুরতো পঠমং আগতত্তা পুরিমগণোতি ৰোহারিযতি, অঞ্ঞে পন পচ্ছা আগতত্তা পচ্ছাগণাতি.

সিৰলিত্থেরো অরিমদ্দননগরে যাৰীজীৰং সাসনং পগ্গণ্হিত্ৰা কলিযুগে নৰুতাধিকে পঞ্চৰস্সসতে কালে কালমকাসি.

আনন্দত্থেরো পন অরিমদ্দননগরেযেৰ চতুচত্তালীস ৰস্সানি ¶ সাসনং পগ্গণ্হিত্ৰা ছনৰুতাধিকে পঞ্চৰস্সসতে কালে কালমকাসি.

তামলিন্দত্থেরোপি যাৰজীৰং সাসনং পগ্গণ্হিত্ৰা অট্ঠন ৰুতাধিকে পঞ্চৰস্সসতে কালে কালমকাসীতি. অহো সঙ্খারসভাৰোতি.

সেয্যথাজগরস্সেৰ, নাভিযা চক্কমণ্ডলে;

লগ্গো সসো সমিত্ৰাপি, দিসং গচ্ছতি তং মুখং.

তথেৰ সব্বসত্তাপি, মচ্চুচক্কেসু লগ্গিতা;

যাৰজীৰম্পি ধাৰিত্ৰা, মচ্চুমুখং উপাগমুন্তি.

ইচ্চেৰং অরিমদ্দনপুরে অরহন্তেহি চ গন্থকারেহি চ পুথুজ্জনেহি জিনসাসনং নভে চন্দোৰিয ৰিজ্জোততি.

তত্থ হি যদা অনুরুদ্ধরাজা সুধম্মপুরতো সাসনং আনেসি, তদা অরহন্তা ছসতসহস্সমত্তা আগতা, সোতাপন্নসকদাগামিঅনাগামিনো পন গণনপথং ৰীতি ৰত্তাতি.

ছত্তগুহিন্দস্স নাম রঞ্ঞো কালেপি হিমৰন্তে গন্ধমাদনপব্বততো অট্ঠ অরহন্তা পিণ্ডায রাজগেহং আগমংসু. রাজা চ পত্তং গহেত্ৰা পিণ্ডপাতেন ভোজেত্ৰা ইদানি কুতো আগতত্থাভি পুচ্ছি. হিমৰন্তে মহারাজ গন্ধ মাদনপব্বততোতি. অথ রাজা অতিপ্পসন্নো হুত্ৰা ইধ তেমাসং ৰস্সং উপগচ্ছথাতি যাচিত্ৰা ৰিহারং কারাপেত্ৰা অদাসি. তেমাসম্পি অন্তোগেহে নিমন্তেত্ৰা পিণ্ডপাতেন ভোজেসি.

একং সমযং অরহন্তানং গন্ধমাদনপব্বতে নন্দমূলগুহং ৰিয একং গুহং মাপেত্ৰা দস্সেহীতি যাচি. তে চ অরহন্তা নন্দমূলগুহংৰিয একং গুহং ইদ্ধিযা মাপেত্ৰা দস্সেসুং ¶ . রাজা চ তায গুহায সদিসং একং গুহং কারাপেসি. নন্দমূলগুহাকারেন পন কতত্তা নন্দাতি নামম্পি অকাসি. ইচ্চেৰং ছত্তগুহিন্দস্স রঞ্ঞো কালে গন্ধমাদনপব্বতে নন্দমূলগুহতো আগন্ত্ৰা অরহন্তা সাসনং পতিট্ঠাপেসুং.

অরহন্তভাৰো চ নামেস যথাভূতং জানিতুং দুক্করো, অনুপসম্পন্নানং উত্তরিমনুস্সধম্মদস্সনস্স পটিক্খিত্তত্তা, অরহত্তং ৰা পত্ৰাপি ৰাসনায অপ্পজহিতত্তা. অরহাপি হি সমানো অহং অরহাতি অনুপসম্পন্নানং কথেতুং ন ৰট্টতি, অরহত্তং পত্ৰাপি একচ্চো ৰাসনং পজহিতুং ন সক্কা, পিলিন্দৰচ্ছত্থেরৰত্থুচেত্থ ঞাপকং. এৰং লোকে অরহন্ত ভাৰো জানিতুং দুক্করো. তেনেৰ মহাকস্সপত্থেরস্স উপট্ঠাকো একো ভিক্খু অত্তনো উপজ্ঝাযস্স মহাকস্সপত্থেরস্স সন্তিকে ৰসিত্ৰাপি তস্স অরহন্ত ভাৰং ন জানি.

মহাকস্সপত্থেরঞ্হি একেন সদ্ধিৰিহারিকেন সদ্ধিং অরঞ্ঞৰিহারতো গামং পিণ্ডায চরন্তং অন্তরামগ্গে পত্তা দিপরিক্খারে গহেত্ৰা পচ্ছা গচ্ছন্তোযেৰ একোসদ্ধি ৰিহারিকো এৰমাহ,–লোকস্মিং ভন্তে অরহা অরহাতি পাকটো, সুতমত্তোৰাহং ভৰামি, ন কদাচি দিট্ঠপুব্বোতি. তং সুত্ৰা থেরো পচ্ছা পরিৰত্তত্ৰা ওলোকেন্তো পরিক্খারে আৰুসো গহেত্ৰা অরহন্তস্স পচ্ছাগচ্ছন্তোযেৰ অরহন্তভাৰং ন জানাতীতি আহাতি.

অরিমদ্দননগরেপি সীলবুদ্ধিপোল্লোঙ্কসুমেধত্থেরাদযোপি অরহন্তাযেৰ অহেসুং. নরপতিরাজা হি খণিত্তি পাদপব্বতং গন্ত্ৰা পচ্চাগমনকালে অন্তরামগ্গে একিস্সা মাতিকায মণোভাসং দিস্ৰা ইধ পুঞ্ঞং কারেতুকামো সক্কো দস্সেতি মঞ্ঞেতি মনসিকরিত্ৰা চেতিযং কারাপেস্সামীতি ¶ তত্থ রট্ঠৰাসীতি সমং ভূমিভাগং কারাপেসি.

অথ একো সীলবুদ্ধি নাম থেরো এৰমাহ,– পুঞ্ঞং মহারাজ করিস্সমীতি ইদং ভূমিপরিকম্মং কারাপেসি, এৰং কারাপেন্তস্স তে অপুঞ্ঞংযেৰ ভৰতি, নোপুঞ্ঞন্তি ৰত্ৰা বহূ সত্তা মা কিলমন্তূতি মনসিকত্ৰা রঞ্ঞো দণ্ডকম্মেন তজ্জনত্থায রঞ্ঞা দিন্নং পিণ্ডপাতং নভুঞ্জি. রাজা চ সচে ত্ৰং মযা দিন্নং পিণ্ডপাতং অভুঞ্জিতুকামো ভৰেয্যাসি, মম ৰিজিতে ৰসন্তোযেৰ ত্ৰং মম পিণ্ডপাতা ন মুচ্চেয্যাসি, রট্ঠৰাসীহিপি দিন্নপিণ্ডপাতো ময্হমেৰ সন্তকো, ননু নাম মম পিণ্ডপাতংযেৰ ত্ৰং ভুঞ্জসীতি আহ.

সীলবুদ্ধিত্থেরোপি সচে অহং এৰং ভৰেয্যামি, সীহল়দীপং গন্ত্ৰা ৰসিস্সামীতি চিন্তেত্ৰা অরঞ্ঞে ৰসি.

অথ তমত্থং জানিত্ৰা নগরদ্ৰারে আরক্খো একো যক্খো রঞ্ঞো আগতকালে অভিমুখং ঠিতোৰ ভযানকরূপং নিসীদি. অথ নানাৰিজ্জাকম্মেহি অপনেন্তোপি ন সক্কা অপনেতুং.

অথ রাজা নিমিত্তপাঠকে পক্কোসাপেত্ৰা পুচ্ছি,-কেন কারণেন অযং যক্খো ইধ নিসিন্নোতি. ত্ৰং মহারাজ সীলবুদ্ধিত্থেরং অগারৰৰসেন পুব্বে কথেসি, যক্খাপি থেরে অতিৰিয পসন্নাতি অম্হেহি সুতপুব্বা, তং পটিচ্চ যক্খো ভযানকরূপং দস্সেত্ৰা নিসিন্নো ভৰিস্সতীতি আহ.

রাজাপি অমচ্চে আণাপেসি থেরং পক্কাসথাতি. থেরো নাগচ্ছি. সীহল়দীপংযেৰ গমিস্সামীতি আরভি. তমত্থং সুত্ৰা রাজা একং চতুরঙ্গপচ্চযং নাম অমচ্চং পক্কোসাপেত্ৰা ত্ৰং গন্ত্ৰা থেরং পক্কোসাহীতি পেসেসি. চতুরঙ্গপচ্চযো চ ছেকতায একং সুৰণ্ণমযং বুদ্ধপ্পটিবিম্বং নাৰায ঠপেত্ৰা মহাসমুদ্দতিত্থং অগমাসি. অথ থেরং সম্পাপুণিত্ৰা ¶ ইদানি ইধ ভগৰা সম্মাসম্বুদ্ধো অগমাসি, সীলবুদ্ধিত্থেরো ভগৰতো সম্মাসম্বুদ্ধস্স দস্সনত্থায আগচ্ছতূতি দূতং পেসেসি. থেরোপি ভগৰতো সম্মাসম্বুদ্ধস্স দস্সনত্থায আগচ্ছতূতি ৰচনং পটিক্খিপিতুং বুদ্ধগারৰৰসেন অৰিসহতায আগচ্ছীতি.

পোরাণিকানংৰ থেরানং, বুদ্ধে সগারৰং ইধ;

পণ্ডিতো গারৰং বুদ্ধে, করে পসন্নচেতসাতি.

নাৰং অভিরূহিত্ৰা থেরো ভগৰতো সম্মাসম্বুদ্ধস্স ৰন্দনামানপূজাসক্কারদীনি অকাসি. থেরস্স এৰং ৰন্দনামানপূজাসক্কারাদীনি করোন্তস্সেৰ ৰেগেন নাৰং আনেত্ৰা গচ্ছি. অথ চতুরঙ্গপচ্চযো এৰমাহ,– ইদানি ভন্তে তুম্হাকং আচরিযস্স সম্মাসম্বুদ্ধস্স সাসনং পগ্গণ্হিতুং যুত্তোতি. রাজা চ অমচ্চেহি পরিৰারিতো পচ্চুগ্গচ্ছি. নাৰায থেরস্স হত্থে গহেত্ৰা রাজগেহং আনেসি. দ্ৰারং পত্তকালে যক্খো পথৰিযং নিসীদিত্ৰা থেরং ৰন্দি.

রাজা রাজগেহং পত্ৰা থেরং নানাভোজনেহি ভোজেসি. এৰঞ্চ অৰোচ,–অজ্জতগ্গে ভন্তে ত্ৰমসি মমাচরিযো, ভগৰতোৰ ওৰাদং সিরসা পটিগ্গহেত্ৰা অনুৰত্তিস্সামাতি অত্তনো পঞ্চপুত্তেপি থেরস্স অদাসি. তে চ পঞ্চকুমারা থেরেন সদ্ধিং অনুৰত্তিংসু. থেরো তে পক্কোসেত্ৰা ৰিহারং অগমাসি. অন্তরামগ্গে কপ্পিযপথৰিযং পঞ্চ পরিমণ্ডলাকারানি লিখিত্ৰা তেসং রাজকুমারানং দস্সেত্ৰা নিৰত্তাপেসি. রাজকুমারা পটিনিৰত্তিত্ৰা তং কারণং রঞ্ঞো আরোচেসুং. রাজা চ তুম্হাকং পুঞ্ঞং কারাপনত্থায দস্সেতীতি ৰত্ৰা তুলাৰসেন তেহি রাজকুমারেহি সুৰণ্ণং সমং কত্ৰা তেন সুৰণ্ণেন মূলং কত্ৰা ভগৰতো ধরমানকালে ¶ পস্সেনদিকোসলরঞ্ঞা কারাপিতং চন্দনপ্পটিবিম্বংৰিয ৰিসুং ৰিসুং পটিবিম্বং কারাপেসি.

তেসং নিধানট্ঠানভূতানি পঞ্চ চেতিযানিপি সক্কো কম্ম ৰিধাযকো হুত্ৰা পতিট্ঠাপেসি. এত্থ চ পুব্বে রঞ্ঞা পসীদিত্ৰা থেরস্স রাজকুমারা দিন্না, মূলং রতনত্তযস্স দত্ৰা পুন রাজকুমারে ভূজিস্সে কারেতুকামতায থেরো এৰং সঞ্ঞং অদাসীতি দট্ঠব্বং.

সো চ সীলবুদ্ধিত্থেরো অরহন্তগণৰংসোতি দট্ঠব্বো.

অরিমদ্দননগরেযেৰ নরপতি রঞ্ঞো কালে কস্সপো নাম থেরো দেসচারিকং চরমানো পোল্লোঙ্কনামকং দেসং, তদৰসরি. অথ দ্ৰে মহল্লকপোল্লোঙ্কা মনুস্সা থেরে অতিপ্পসন্নতায দ্ৰে পুত্তে উপট্ঠাকত্থায নিয্যাদেসুং.

পোল্লোঙ্কমনুস্সানং অতিপ্পসন্নতং পটিচ্চ থেরোপি পোল্লোঙ্কত্থেরোতি ৰোহারিযতি. যদা চ পন সো থেরো সীহল়দীপং গন্তুকামো অহোসি, তদা সক্কো দেৰানমিন্দো ব্যগ্ঘরূপং মাপেত্ৰা পিট্ঠিযা যাৰ মহাসমুদ্দতীরং আনেসি. মহাসমুদ্দতীরং পন পত্ৰা নাৰং অভিরূহিত্ৰা ৰাণিজেহি সদ্ধিং তরি.

মহাসমুদ্দমজ্ঝে পন পত্ৰা সা নাৰা ন গচ্ছি, নিচ্চলাৰ অট্ঠাসি. অথ ৰাণিজা মন্তেসুং,-অম্হাকং নাৰায অলক্খী পাপজনো অত্থি মঞ্ঞেতি. এৰং পন মন্তেত্ৰা সলাকাদানং অকংসু. যাৰ ততিযম্পি থেরস্সেৰ হত্থে সলাকা পুব্বে কতকম্মৰিপাকৰসেন নিপতি. ইদং পন থেরস্স পুব্বে কতকম্মং,-থেরো হি ততো অত্তভাৰতো সত্তমে ভৰে একস্মিং গামে কুলদারকো হুত্ৰা কীল়নত্থায একং সুনখং নদিযং ওতারেত্ৰা উদকে কীল়মাপেসি. এৰং কীল়মন্তং সুনখং সযমেৰ উরেন উগ্গহেত্ৰা তীরং আনেসীতি এৰং ¶ পুব্বে কতকম্মৰিপাকৰসেন থেরস্সেৰ হত্থে সলাকা নিপতি.

তদা ৰাণিজা উদকপিট্ঠে খিপিংসু. অথ সক্কো দেৰানমিন্দো কুম্ভীলরূপং মাপেত্ৰা পিট্ঠিযং আরোপেত্ৰা আনেসি. থেরো যক্খদীপং পত্ৰা অন্ধচক্খুকানং যক্খানং মেত্তানুভাৰেন চক্খুং লভাপেসি. যক্খা চ থেরস্স গুণং ঞত্ৰা দ্ৰে যক্খভাতিকে অদংসু. থেরো চ সীহল়দীপং গন্ত্ৰা মহাচেতিযরূপং লোহপাসাদরূপং সরীরধাতুং মহাবোধিবিজানি চ আনেত্ৰা পচ্চাগমাসীতি.

সুমেধত্থেরো চ হলঙ্কস্স নাম নগরস্স দক্খিণদিসাভাগে ম্হত্তিপামে পুরত্থিমায অনুদিসায দিন্ননামিকে ৰিহারে ৰসি. ঠানস্স পন নামৰসেন থেরস্সোপি দিন্নৰিহারো ত্ৰেৰ নামং অহোসি. সোপি থেরো পংসুকূলিকো লজ্জীপেসলো সিক্খাকামো ঝানলাভী অরহাযেৰ. সো হি দেৰসিকং দেৰসিকং অট্ঠনৰযোজনপ্পমাণে পাদচেতিযং গন্ত্ৰা ৰন্দি. চেতিযঙ্গণৰত্তঞ্চ অকাসি. ততো আগন্ত্ৰা ম্হত্তিগামে পিণ্ডায চরি. ইদং থেরস্স নিবদ্ধৰত্তং.

অপরানিপি ৰত্থূনি বহূনি সন্তি, সব্বানি পন তানি ৰিত্থারেত্ৰা ৰত্তব্বানিপি গন্থপারৰভযেন ন ৰক্খাম. সব্বানিপি হি ৰুচ্চমানানি অযং সাসনৰংসপ্পদীপিকা অতিপ্পপঞ্চা ভৰিস্সতি.

সম্মাসম্বুদ্ধস্স হি পরিনিব্বানতো যাৰজ্জতনা থেরানং পরম্পরৰসেন সঙ্ঘট্টেত্ৰা আনযনমেৰেত্থ অধিপ্পেতং. যথাৰুত্তানি পন ৰত্থূনি অধুনা অভিঞ্ঞালাভীনং পুগ্গলানং অখেত্তভাৰেন পসঙ্গঞাণপ্পটিবাহণত্থং অরিমদ্দননগরে চ বহূনং অভিঞ্ঞালাভীনং পুগ্গলানং নিৰাসট্ঠানতা দস্সনত্থং ৰুত্তানি. ৰুত্তঞ্চেতং ভিক্খুনীখন্ধকট্ঠকথাযং,–

পটিসম্ভিদাপত্তেহি ৰস্সসহস্সং সুক্খৰিপস্সকেহি ৰস্সসহস্সং ¶ অনাগামীহি ৰস্সসহস্সং সকদাগামীহি ৰস্সসহস্সং সোতাপন্নেহি ৰস্সসহস্সন্তি এৰং পঞ্চৰস্সসহস্সানি পটিৰেধধম্মো ঠস্সতীতি.

দীঘনিকাযট্ঠকথাযং পন সংযুত্তনিকাযট্ঠকথাযঞ্চ পটিসম্ভিদাপত্তেহি ৰস্সসহস্সং ছল়াভিঞ্ঞেহি ৰস্সসহস্সং তেৰিজ্জেহি ৰস্সসহস্সং সুক্খৰিপস্সকেহি ৰস্সসহস্সং পাতিমোক্খেন ৰস্সসহস্সন্তি ৰুত্তং.

অঙ্গুত্তরনিকাযট্ঠকথাযং পন ৰিভঙ্গকথাযঞ্চ বুদ্ধানং পরিনিব্বানতো ৰস্সসহস্সমেৰ পটিসম্ভিদা নিব্বত্তেতুং সক্কোন্তি, ততো পরং ছ অভিঞ্ঞা, ততোপি অসক্কোন্তা তিস্সো ৰিজ্জা নিব্বত্তিংসু. গচ্ছন্তে কালে তাপি নিব্বত্তেতুং অসক্কোন্তা সুক্খৰিপস্সকা হোন্তি. এতেনেৰ নযেন অনাগামিনো সকদাগামিনো সোতাপন্নাতি ৰুত্তং.

এৰং নানানযেহি অট্ঠকথাযপি আগতত্তা অধুনা লোকে অরিযপুগ্গলা ভৰিতুং ন সক্কাতি ন ৰত্তব্বং. অরিযানমেৰ খেত্তস্স অধুনাপি সম্ভৰতো, সচে আরদ্ধৰিপস্সকো ভৰেয্য সো অরহা ভৰিতুং সক্কাযেৰাতি নিট্ঠমেত্থাৰগন্তব্বং. অট্ঠকথাসু পন নানাভাণকত্থেরানং নানাৰাদৰসেন ৰুত্তন্তি দট্ঠব্বং. এত্তকেনেৰ পন নানাকারেন ৰাদো ভিন্নোপি সাসনং ভিজ্জতিযেৰ. সাসনস্স অভিন্নংযেৰ হি এত্থ পমাণন্তি.

এৰং মরম্মমণ্ডলে অরিমদ্দননগরে অনেকেহি অরহন্তসতেহি সাসনং ৰিজ্জোততি. ভগৰতো পন পরিনিব্বানতো তিংসাধিকানং নৰৰস্সসতানং উপরি পরম্মরট্ঠে সেঞিলঞ্ঞিক্রোধিনামেন রঞ্ঞা সমকালৰসেন সীহল়দীপে রজ্জং পত্তস্স মহানামরঞ্ঞো কালে বুদ্ধঘোসবুদ্ধদত্তত্থেরেহি পভুতি তেতেমহাথেরা তেতেগন্থে অকংসু.

ততো পচ্ছা সতিসমাধিপঞ্ঞামন্দৰসেন সুখাৰবোধনত্থং ¶ টীকাযো অকংসু. অরিমদ্দননগরে জিনচক্কেসত্তনৰুতাধিকে ছসতে সহস্সে চ সম্পত্তে তিণ্ণং পিটকানং মূলভূতেসু সদ্দনযেসু সোতারানং ছেকত্থায মহাসমুদ্দেৰিয আনন্দো নাম মহামচ্ছো তীসু পিটকেসু সাট্ঠকথেসু ৰিলোলেত্ৰা অগ্গৰংসো নাম থেরো সদ্দনীতিপ্পকরণং অকাসি. অরিমদ্দননগরে হি উত্তরাজীৰত্থেরাদীনং সীহল়দীপং গমনতো পুব্বেযেৰ তযো মহাথেরা পরিযত্তিৰিসারদা, মহাঅগ্গপণ্ডিতো, তস্স সদ্ধিৰিহারিকো দুতিযঅগ্গপণ্ডিতো, তস্স ভাগিনেয্যো ততিযঅগ্গপণ্ডিতোতি. ততিযঅগ্গপণ্ডিতো পন অগ্গৰংসোতিপি ৰোহারিযতি.

তস্মিঞ্চ কালে অরিমদ্দননগরৰাসিনো সদ্দকোৰিদা বহৰো সন্তীতি যাৰ লঙ্কাদীপা কিত্তিঘোসো পত্থরি. তস্মা সীহল়দীপিকা সদ্দকোৰিদা ৰীমংসেতুকামা হুত্ৰা অরিমদ্দননগরং আগমংসু. তদা অরিমদ্দননগরৰাসিনো ভিক্খূ সদ্দনীতিপ্পকরণং দস্সেসু.

সীহল়দীপিকা চ তং দিস্ৰা উপধারেন্তা সদ্দৰিসযে অযং গন্থোৰিয সীহল়দীপে গন্থো ইত্থি, ইমস্মিং পকরণে আগতৰিনিচ্ছযম্পি সকলং ন জানিম্হাতি নানাপ্পকারেহি থোমেসুন্তি যাৰজ্জভনা কথামগ্গো ন উপচ্ছিন্নোতি.

অরিমদ্দননগরে সীহল়দীপং গন্ত্ৰা পচ্চাগতো ছপ্পদো নাম সদ্ধম্মজোতিপালত্থেরো সদ্দনযে ছেকতায সুত্তনিদ্দেসং অকাসি. পরমত্থধম্মে চ ছেকতায সঙ্খেপৰণ্ণনং নামচারদীপকঞ্চ. ৰিনযে ছেকতায ৰিনযগূল়ত্থদীপনিং সীমালঙ্কারঞ্চ অকাসি. অত্তনা কথানং গন্থানং নিগমে সদ্ধম্ম জোতিপালোতি মূলনামেন ৰুত্তং. কুসিমনগরে পন ছপ্পদ গামে জাতত্তা ঠানস্স নামেন ছপ্পদোতি পাকটো.

কুখননগরে পন ছপ্পদোতি ৰোহারিতোপি একো থেরো অত্থি. সো অলজ্জী দুস্সীলো. একচ্চে পন নামসামঞ্ঞলেসমত্তেন পত্তলঙ্কং সীলৰন্তং পেসলং সিক্খাকামং ছপ্পদত্থেরং অলজ্জিদুস্সীলভাৰেন উপৰদন্তি, যথা নাম সামঞ্ঞলেসমত্তেন মল্লপুত্তং আযস্মন্তং দব্বং অসমাচারেনাতি.

অরিমদ্দননগরযেৰ অলোঙ্গচঞ্ঞিসূনামকস্স রঞ্ঞো কালে মহাৰিমলবুদ্ধিত্থেরো চূল়ৰিমলবুদ্ধিত্থেরোতি দ্ৰে থেরা পরিযত্তিৰিসারদা অহেসুং. তেসু মহাৰিমলবুদ্ধিত্থেরো কচ্চাযনস্স সংৰণ্ণনং ন্যাসগন্থমকাসি.

কেচি পন সীহল়দীপৰাসী ৰিমলবুদ্ধিত্থেরো তমকাসীতি ৰদন্তি. চূল়ৰিমলবুদ্ধিত্থেরো পন ৰুত্তোদযস্স পোরাণটীকমকাসি. ছন্দোসারত্থৰিকাসিনিং সদ্ধম্মঞাণত্থেরো অকাসি. ৰচনত্থজোতিং পন ৰেপুল্লত্থেরো অকাসি. ন্যাসগন্থস্সপোরাণটীকং নরপতিরঞ্ঞো কালে একো অমচ্চো অকাসি.

সো হি রঞ্ঞো একং ওরোধং পটিচ্চ জাতং একং ধীতরং দিস্ৰা ৰানরোৰিয লেপে লগ্গিতো তিস্সং পটিবন্ধচিত্তো হুত্ৰা লগ্গি. তমত্থং জানিত্ৰা রাজা এৰমাহ,– সচে এতং ইচ্ছেয্যাসি, একং গন্থং পরিপুণ্ণৰিনিচ্ছযং গূল়ত্থং করোহি, সচে ত্ৰং তাদিসং গন্থং কাতুং সক্কুণেয্যাসি, এতং লভিস্সসীতি. অথ সো ন্যাসস্স সংৰণ্ণনং পোরাণটীকং অকাসি.

ততো পচ্ছা হীনাযাৰত্তিত্ৰা ধীতরং দত্ৰা রজ্জুগ্গাহামচ্চট্ঠানে ঠপেসি, যং মরম্মৰোহারেন সংপ্যঙ্গইতি ৰুচ্চতি. তেন পন কতত্তা সোপি গন্থো তং নামেন ৰুচ্চতি. কারিকং তস্সা চ সংৰণ্ণনং ছত্তগুহিন্দস্স নাম রঞ্ঞো কালেধম্মসেনাপতিত্থেরো অকাসি. তেন কির কারপিতে নন্দগুহায সমীপে নন্দৰিহারে নিসীদিত্ৰা অকাসি.

তস্মিঞ্চকালে ¶ গন্থমাদনপব্বতে নন্দমূলগুহতো অরহন্তা আগন্ত্ৰা তস্মিং ৰিহারে ৰস্সং উপগচ্ছিংসু. তেসং সম্মুখে কতত্তা তে চ গন্থা পণ্ডিতেহি সারতো পচ্চেতব্বাতি আচরিযা ৰদন্তি.

ৰাচ্চৰাচকং পন ধম্মদস্সী নাম সামণেরো অকাসি.

সদ্দত্থভেদচিন্তং পন অরিমদ্দননগরসমীপে ঠিতস্স খণিত্তিপাদপব্বতস্স সমীপে একস্মিং গামে ৰসন্তো সদ্ধম্মসিরি নাম থেরো অকাসি. সোযেৰ থেরো ব্রহজং নাম ৰেদসত্থম্পি মরম্মভাসায পরিৰত্তেসি.

একক্খরকোসং পন সদ্ধম্মকিত্তিত্থেরো অকাসি. সো হি কলিযুগে সত্তাসীতাধিকে অট্ঠসতে সম্পত্তে মিচ্ছা দিট্ঠিকানং জলুমসঞ্ঞিতানং কুলানং ভযেন সকলেপি তম্বদীপরট্ঠে সাসনোভাসো মিলাযতি. বহূনিপি পোত্থকানি অগ্গিভযেন নস্সেসুং.

তদা তং পৰত্তিং পস্সিত্ৰা সচে পরিযত্তিধম্মোৰিনস্সেয্য, পটিপত্তিধম্মোপি নস্সিস্সতি, পটিপত্তিধম্মে নস্সন্তে কুতো পটিৰেধধম্মো ভৰিস্সতীতি সংৰেগং অপজ্জিত্ৰা ইমং গন্থং অকাসীতি তট্টিকাযং ৰুত্তং.

মুখমত্তসারং সাগরত্থেরো অকাসি.

কলিযুগে একাসীতাধিকে পঞ্চসতে সম্পত্তে একং দহরপুত্তং কালঙ্কতং পটিচ্চ সংৰেগং আপজ্জিত্ৰা পচ্চেকবুদ্ধত্তং পত্থযন্তস্স জেয্যসিঙ্খনামকস্স রঞ্ঞো পুত্তো ক্যচ্ৰানামকো রাজা রজ্জং কারেসি. ধম্মরাজাতিপি নামলঞ্ছং পটিগ্গণ্হি. তীসু পন পিটকেসু যথাভূতং ৰিজানকতায মরম্মৰোহারেন ক্যচ্ৰাতি ৰোহারিযতি.

সো চ কির রাজা পাল়িঅট্ঠকথাটীকাগন্থন্তরেসু অতিছেকতায পিটকত্তযে সাকচ্ছমত্তম্পি কাতুং সমত্থো ¶ নাম নত্থীতি উগ্গহিততিপিটকো হুত্ৰা ভিক্খুসঙ্ঘম্পি দিৰসে সত্তহি ৰারেহি গন্থং ৰাচেতি.

খণিত্তিপাদপব্বতস্স সমীপেপি একং তল়াকং কারাপেত্ৰা তত্থ রাজাগারং কারাপেত্ৰা তত্থ নিসীদিত্ৰা গন্থং ৰাচেতি. সব্বানি পন রাজূনং কিচ্চানি পুত্তস্সেৰ উপরাজস্স নিয্যাদেসি. গন্থং উগ্গণ্হন্তানং ওরোধানমত্থায সঙ্খেপতো সদ্দবিন্দুং নাম পকরণং পরমত্থবিন্দুঞ্চ নাম পকরণং অকাসি. তস্স হি চিত্তং পরিযত্তিযংযেৰ রমতি. অঞ্ঞং পন রাজকিচ্চং সুণিতুম্পি ন ইচ্ছি. অনুরুদ্ধরাজা অনাগতে অহং রাজা ভৰেয্যামি, তদাযেৰ ইমানি তাল়িবীজানি উট্ঠহন্তূতি অধিট্ঠহিত্ৰা রোপেসি. তানি তস্স রঞ্ঞো কালে উট্ঠহিংসু. তেনেৰ অনুরুদ্ধরাজাযেৰাযন্তি রট্ঠৰাসিনো সঞ্জানিংসু. সম্মুতিরাজা হি অনুরুদ্ধরাজা ক্যচ্ৰারাজাতি ইমে তযো একসন্তানাতি ৰদন্তি.

সো রাজা একম্পি চেতিযং অকাসি, ন তং নিট্ঠং অগমাসি, পরিযত্তিযংযেৰ পরিচারকত্তাতি রাজৰংসে আগতং. লোকসম্মুতিৰসেন কক্খল়দিনে ইট্ঠকানি কারাপেত্ৰা তস্মিংযেৰ দিনে ভূমিসমং কত্ৰা তস্মিংযেৰ দিনে অঞ্ঞম্পি সব্বং কারাপেসি. তেন মরম্মৰোহারেন প্রস্সদা চেতিযন্তি যাৰজ্জভনা পাকটং.

তস্স রঞ্ঞো একা ধিভা ৰিভত্যত্থং নাম গন্থং অকাসীতি.

পুব্বে কির অরিমদ্দননগরে উগ্গহধারণাদিৰসেন সাসনং অতিৰিয ৰিরূল়মাপজ্জি. অরিমদ্দননগরেযেৰ হি একো ৰুড্ঢপব্বজিতো ভিক্খু গন্থং লিখিতুং সিলালেখনদণ্ডেন ইচ্ছন্তো রাজগেহং পাৰিসি. রাজা কেন আগতোসীতি পুচ্ছি. গন্থং লিখিতুং সিলালেখনদণ্ডেন ইচ্ছন্তো আগতো ম্হীতি. এৰং মহল্লকো ত্ৰং গন্থং মহুস্সাহেন পরিযাপুণন্তোপি ¶ গন্থেসু ছেকস্স ওকাসং ন পস্সামি, সচে হিমুসলো অঙ্কুরং উট্ঠাপেত্ৰা রূহেয্য, এৰং সতি ত্ৰং গন্থেসু ছেকতং আপজ্জেয্যাসীতি আহ.

ততো পচ্ছা ৰিহারং গন্ত্ৰা দেৰসিকং দেৰসিকং একদন্তকট্ঠপ্পমাণত্তং লেখনং উগ্গহেত্ৰা কচ্চাযনঅভিধম্মেত্থসঙ্গহপ্পকরণং আদিং কত্ৰা আচরিযস্স সন্তিকে উগ্গণ্হি. সো অচিরেনেৰ গন্থেসু ছেকতং পত্ৰা মুসলে জম্বুরুক্খঙ্কুরং বন্ধিত্ৰা উস্সাপেত্ৰা রাজগেহং পাৰিসি.

অথ তং রাজা পুচ্ছি,-কেনআগতোসীতি. অযং মহারজ মুসলো অঙ্কুরং উট্ঠাপেত্ৰা রূহতীতি আচিক্খিতুং আগতোম্হীতি ৰুত্তে রাজা এতস্স গন্থেসু ছেকতং পত্তোম্হীতি ৰুত্তং হোতীতি জানাসি. তং সচ্চং ৰা অলিকং ৰাতি ৰীমংসনত্থায মহাথেরানং সন্তিকং পহিণি. মহাথেরাপি গূল়ট্ঠানং পুচ্ছিংসু. সোপি পুচ্ছিতং পুচ্ছিতং ব্যাকাসি.

অথ সো ভিক্খু মহাথেরে এৰমাহ,-তুম্হে ভন্তে মং বহূ পুচ্ছথ, অহম্পি তুম্হে পুচ্ছিতুং ইচ্ছামি, ওকাসং দেথাতি যাচিত্ৰা অঞ্ঞসমানচেতসিকন্তি এত্থ অঞ্ঞসদ্দস্স অৰধ্যাপেক্খত্তা অৰধিপদং উদ্ধরিত্ৰা দস্সেথাতি পুচ্ছি. মহাথেরাপি পুব্বে অমনসিকতত্তা সীঘং ৰিস্সজ্জিতুং ন সক্খিংসু. রাজা তমত্থং সুত্ৰা তুট্ঠচিত্তো হুত্ৰা দিসা পামোক্খনমেন আচরিযট্ঠানে ঠপেসি. সো পন ভিক্খু অগন্থকারকোপি গন্থকারকোৰিয পচ্ছিমানং জনতানং দিন্নোপদেসৰসেন উপকারং কত্ৰা সাসনে উপ্পজ্জীতি. হোন্তি চেত্থ,–

অহং মহল্লকো হোমি, দুপ্পঞ্ঞো পরিযত্তিকং;

উগ্গহং মহুস্সাহেন, ন সক্খিস্সামি জানিতুং.

এৰঞ্চ ¶ নাতিমঞ্ঞেয্য,

নাপ্পোস্সুক্কতমাপজ্জে;

সদ্ধম্মে ছেককামোৰ,

উস্সাহংৰ করে পোসো.

ৰুড্ঢপব্বজিতো ভিক্খু,

মহল্লকোপি দুপ্পঞ্ঞো;

আপজ্জি ছেকতং ধম্মে,

তমপেক্খন্তু সোতারোতি.

পুব্বে কির অরিমদ্দননগরে মাতুগামাপি গন্থং উগ্গণ্হিংসু. যেভুয্যেন উগ্গহধারণাদিৰসেন পরিযত্তিসাসনং পগ্গহেসুং. মাতুগামা হি অঞ্ঞমঞ্ঞং পস্সন্তা তুম্হে কিত্তকং গন্থং উগ্গণ্হথ, কিত্তকং গন্থং ৰাচুগ্গতং করোথাতি পুচ্ছি সুন্তি.

একো কির মাতুগামো একং মাতুগা,মং পুচ্ছি,-ত্ৰং ইদানি কিত্তকং গন্থং ৰাচুগ্গতং করোসীতি. অহং পন ইদানি দহরপুত্তেহি বলিবোধত্তা ব্যাকুলং পত্ৰা বহুং গন্থং ৰাচুগ্গতং কাতুং নসক্কা,সমন্তমহাপট্ঠানে পন কুসলত্তিকমত্তংৰ ৰাচুগ্গতং করোমীতি আহাতি.

ইদম্পি অরিমদ্দননগরৰাসীনং মাতুগামানম্পি পরিযত্তুগ্গহণে একং ৰত্থু,–

একং কির ভিক্খুং পিণ্ডায চরন্তং একা দ্ৰাদসৰস্সিকা দহরিত্থী পুচ্ছি,-কিন্নামোসি ত্ৰং ভন্তেতি. খেমানামাহন্তি. কথঞ্হি ভন্তে পুমাৰ সমানো ইত্থিলিঙ্গেন নামং অকাসীতি আহ. অথ অন্তোগেহে নিসিন্না মাতা সুত্ৰা ধীতরং আহ,-ত্ৰং রাজাদিগণস্স লক্খণং ন জানাসীতি. আম জানামি, অযং পন খেমসদ্দো ন রাজাদিগণপক্খং ভজতীতি. অথ ¶ মাতা এৰমাহ,-অযং পন খেমসদ্দো একদেসেনেৰ রাজাদিগণপক্খং ভজতীতি.

অযং পনেত্থ ধীতু অধিপ্পাযো,-ন রাজাদিসদ্দো কদাচি রাজোতি পচ্চত্তৰচনৰসেন ওকারন্তো দিস্সতি ৰিনা দেৰরাজোতিআদিসমাসৰিসযং, খেমসদ্দো পন কত্থচি খেমোতি চ খেমন্তি চ লিঙ্গন্তরৰসেন রূপন্তরং দিস্সতি, তেনেৰ খেমসদ্দো ন রাজাদিগণোতি ৰেদিতব্বোতি.

অযং পন মাতু অধিপ্পাযো,-খেমসদ্দো অভিধেয্যলিঙ্গত্তা তিলিঙ্গকো,যদা পন সঞ্ঞাসদ্দাধিকারে পচ্চত্তৰচনৰসেন খেমাতি আকারন্তো দিস্সতি, তদা একদেসেন খেমসদ্দো রাজাদিগণপক্খং ভজতীতি.

ইদম্পি একং ৰত্থু,–

অরিমদ্দননগরে কির একস্স কুটুম্বিকস্স একো পুত্তো দ্ৰে ধীতরো অহেসুং. একস্মিঞ্চ কালে ঘম্মাভিভূতত্তা গেহস্স উপরিতলে নহাযিত্ৰা নিসীদি. অথ একা দাসী গেহস্স হেট্ঠা ঠত্ৰা কিঞ্চি কম্মং করোন্তী তস্স কুটুম্বিকস্স গুয্হট্ঠানং ওলোকেসি. তমত্থং জানিত্ৰা কুটুম্বিকো সাখং ওলোকেসীতি একং ৰাক্যং বন্ধিত্ৰা পুত্তস্স দস্সেসি,ইমস্স অত্থযোজনং করোহীতি. অথ পুত্তো অত্থযোজনং অকাসি,-সাখং রুক্খসাখং ওলেকেসি উদিক্খতীতি. অথ পচ্ছা একায ধীতুযা দস্সেসি, ইমস্স অত্থযোজনং করোহীতি. সাপি অত্থযোজনং অকাসি,- সা সুনখো খং আকাসং ওলোকেসি উদিক্খতীতি. অথ পচ্ছা একায ধীতুযা দস্সেসি, ইমস্স অত্থ যোজনং করোহীতি. সাপি অত্থযোজনং অকাসি,-সা ইত্থী খং অঙ্গজাতং ওলোকেসি মুখং উদ্ধং কত্ৰা ওলোকেসীতি.

ইদম্পি একং ৰত্থু,–

একো কির সামণেরো রতনপূরৰাসী অরিমদ্দননগরে মাতুগামাপি ¶ সদ্দনযেসু অতিকোৰিদাতি সুত্ৰা অহং তত্থ গন্ত্ৰা জানিস্সামীতি অরিমদ্দননগরং গতো. অথ অন্তরামগ্গে অরিমদ্দননগরস্স সমীপে একং দহরিত্থিং কপ্পাসৰত্থুং রক্খিত্ৰা নিসিন্নং পস্সি. অথ সামণেরো তস্সা সন্তিকং মগ্গপুচ্ছনত্থায গচ্ছি. অথ দহরিত্থী সামণেরং পুচ্ছি,-কুতো আগতোসীতি.

সামণেরো আহ,-রতনপূরতো অহং আগচ্ছতীতি. কুহিং গতোসীতি ৰুত্তে অরিমদ্দননগরং গচ্ছতীতি আহ. অথ দহরিত্থী এৰমাহ,-ত্ৰং ভন্তে সদ্দযোগৰিনিচ্ছযং অনুপধারেত্ৰা কথেসি, অম্হযোগট্ঠানে হি ত্ৰং নাম যোগসদ্দেন যোজেত্ৰা কথেসি, ননু পণ্ডিতানং ৰচনেন নাম পরিপুণ্ণত্থেন অৰিরুদ্ধসদ্দনযেন পুণ্ণিন্দুসঙ্কাসেন ভৰিতব্বন্তি. অথ সামণেরো খেত্তৰত্থূনি রক্খন্তী দুগ্গতা দহরিত্থীপি তাৰ সদ্দনযকোৰিদা হোতি, কিমঙ্গং পন ভোগসম্পন্না মহল্লকিত্থিযোতি লজ্জিত্ৰা ততোযেৰ পটিনিৰত্তিত্ৰা পচ্চাগমাসীতি.

ইদং মরম্মমণ্ডলে তম্বদীপরট্ঠে অরিমদ্দননগরে থেরপরম্পরৰসেন সাসনস্স পতিট্ঠানং.

ইদানি মরম্মমণ্ডলেযেৰ জেয্যৰড্ঢনরট্ঠে কেতুমতীনগরে সাসনৰংসং ৰক্খামি.

কলিযুগে হি দ্ৰিসত্ততাধিকে অট্ঠৰস্সসতে সম্পত্তে জেয্যৰড্ঢনরট্ঠে কেতুমতীনগরে মহাসিরিজেয্যসূরো নাম রাজা রজ্জং কারেসি. একং অতিছেকং দেৰনাগ নামকং একং হত্থিং নিস্সায ৰিজিতং ৰিত্থারমকাসি. তস্স পন রঞ্ঞো কালে কলিযুগে দ্ৰিনৰুতাধিকে অট্ঠৰস্সসতে সম্পত্তে মহাপরক্কমো নাম থেরো সীহল়দীপতো নাৰায আগন্ত্ৰা কেতুমতীনগরং সম্পত্তো. রাজা চ দ্ৰারা ৰতীনগরস্স ¶ দক্খিণদিসাভাগে মহাৰিহারং কারাপেত্ৰা তস্স অদাসি নিচ্চভত্তম্পি. তস্মিঞ্চ ৰিহারে সীমং সম্মন্নিত্ৰা তিস্সং সীমাযং তুলাৰসেন অত্তনা সমং কত্ৰা লোহমযবুদ্ধপ্পটিবিম্বং কারাপেসি. তঞ্চ বুদ্ধপ্পটিবিম্বিং সম্পত্তলঙ্কাদীপন্তি নামেন পাকটং অহোসি.

তস্স রঞ্ঞো কালে সুরামেরযসিক্খাপদং পটিচ্চ ৰিপাদো অহোসি. কথং. বীজতো পট্ঠাযাতি সম্ভারে পটিযা দেত্ৰা চাটিযং পক্খিত্তকালতো পট্ঠায তালনালিকেরাদীনং পুপ্ফরসো পুপ্ফতো গলিতাভিনৰকালতো পট্ঠায চ ন পাতব্বোতি কঙ্খাৰিতরণীটীকাদীসু ৰুত্তৰচনে অধিপ্পাযং ৰিপল্লাসতো গহেত্ৰা তালনালিকেরাদীনং রসো গলিতাভিনৰতো পট্ঠায পিৰিতুং ন ৰট্টতীতি একচ্চে ৰদন্তি. একচ্চে পন এৰং ৰদন্তি,–তালনালিকেরাদীনং রসো গলিতাভিনৰকালে পিৰিতুং ৰট্টতীতি.

তত্থ পুব্বপক্খে আচরিযানং অযমধিপ্পাযো,–

বীজতো পট্ঠাযাতি এত্থ সম্ভারে পটিযাদেত্ৰা চাটিযং পক্খিত্তকালতো পট্ঠায ন পাতব্বো. তালনালিকেরাদীনং পুপ্ফরসো চ গলিতাভিনৰকালতোযেৰ ন পাতব্বোতি.

অযং পন অপরপক্খে আচরিযানমধিপ্পাযো,–

বীজতো পট্ঠাযাতি এত্থ সম্ভারে পটিযাদেত্ৰা চাটিযং পক্খিত্তকালতো পট্ঠায ন পাতব্বো. তালনালিকেরাদীনং সম্ভারেহি পটিযাদিতো পুপ্ফরসো পুপ্ফতো গলিতাভিনৰকালতো ন পাতব্বোতি.

এৰং তালনালিকেরাদীনং রসো গলিতাভিনৰকালতো পট্ঠায পাতুং ৰট্টতি ন ৰট্টতীতি ৰিৰাদং করোন্তানং মজ্ঝে নিসীদিত্ৰা সম্পত্তলঙ্কো মহাপরক্কমত্থেরো তাদিসো পিৰিতুং ৰট্টতীতি ৰিনিচ্ছিন্দি, সুরাৰিনিচ্ছযঞ্চ নাম গন্থং অকাসি ¶ . এৰং কেতুমতীনগরং মাপেন্তং মহাসিরিজেয্যসূরং নাম রাজানং নিস্সায কেতুমতিযং সাসনং পতিট্ঠহি.

ইদং মরম্মমণ্ডলেযেৰ কেতুমতীনগরে

সাসনস্স পতিট্ঠানং.

ইদানি মরম্মমণ্ডলে তম্বদীপরট্ঠেযেৰ খন্ধপুরসাসনৰংসং ৰক্খামি.

কলিযুগে হি চতুসট্ঠাধিকে ছৰস্সসতে তযো ভাতিকা কিত্তিতরনামকং রাজানং রজ্জতো চাৰেত্ৰা খন্ধপুরনগরে রজ্জং কারেসুং. তদা কিত্তিতরনামকস্স রঞ্ঞো একো পুত্তো চীনরট্ঠিন্দরাজানং যাচিত্ৰা বহূহি সেনঙ্গেহি খন্ধপুরনগরং সম্পরিৰারেত্ৰা অট্ঠাসি. অথ তীসু পিটকেসু ছেকং একং মহাথেরং পক্কোসেত্ৰা মন্তেসুং. থেরো এৰমাহ,– জনপদাযত্তমিদং কম্মং সমণানং ন কপ্পতি ৰিচারেতুং, অহম্পি সমণো, নাটকেহি পন সদ্ধিং মন্তেথাতি. অথ নাটকে পক্কোসেত্ৰা মন্তেসুং. নাটকাপি সচে কারণং নত্থি, এৰং সতি ফলং ন ভৰেয্য, সচে পূতি নত্থি, মক্খিকা ন সন্নিপতেয্যুন্তি গীতং গাযিত্ৰা উদকে কীল়ন্তি.

অথ তেচ তযো ভাতিকা তং সুত্ৰা কিত্তিতরনামকং রাজানং বন্ধনাগারতো গহেত্ৰা মারেত্ৰা ইদানি যং রজ্জে ঠপযিস্সামাতি চিন্তেত্ৰা তুম্হে গচ্ছথ, অযং তস্স সীসো, ইদানি এস পরলোকং গতোতি সীসং দস্সেসুং. অথ চীনরট্ঠসেনাযোপি ইদানি রাজৰংসিকো নত্থি, তে নহি যুজ্ঝিতুং ন ইচ্ছাম, যং রজ্জে ঠপযিস্সামাতি কত্ৰা মযং আগতা, ইদানি সো নত্থীতি ৰত্ৰা নিৰত্তেত্ৰা অগমংসু.

সো চ থেরো নাটকেহি সদ্ধিং মন্তেথাতি এত্তকমেৰ ৰুত্তত্তা ভিক্খুভাৰতো ন মোচেতীতি দট্ঠব্বং. ৰুত্তঞ্চেতং,–

পরিযাযোচ আণত্তি, ততিযে দুতিযে পন;

আণত্তিযেৰ সেসেসু, দ্ৰযমেতং ন লব্ভতীতি.

তস্মিং পন খন্ধপুরে অরিমদ্দননগরে অরহন্তগণৰংসিকা ছপ্পদগণৰংসিকা আনন্দ গণৰংসিকা চ থেরা বহৰো ৰসন্তি. তেহি পন কতগন্থো নাম কোচি নত্থীতি.

ইদং খন্ধপুরে সাসনস্স পতিট্ঠানং.

ইদানি মরম্মমণ্ডলে তম্বদীপরেট্ঠেযেৰ ৰিজযপুরে সাসনৰংসং ৰক্খামি.

কলিযুগে হি চতুসত্ততাধিকে ছৰস্সসতে সীহসূরো নাম রাজা ৰিজযপুরং মাপেসি. ততো পচ্ছা দ্ৰীসু সংৰচ্ছরেসু অতিক্কন্তেসু চমুংনদিযং মতসেতিভং একং লভিত্ৰা একসেতিভিন্নোতি তস্স নামং পাকটং অহোসি. তস্স রঞ্ঞো কালে ৰিজযপুরে সীলৰন্তা লজ্জীপেসলা ভিক্খূ বহৰো নত্থি. অরিমদ্দননগরতো অনুরুদ্ধরাজকালে রাজভযেন নিলীযিত্ৰা অৰসেসা সমণকুত্তকাযেৰ বহৰো অত্থি. পচ্ছা চূল়অরহন্তত্থেরদিব্বচক্খুত্থেরানং আগতকালেযেৰ লজ্জীপেসলা ভিক্খূ বলৰন্তা হুত্ৰা গণং ৰড্ঢাপেসুং. রাজা চ দিব্বচক্খুত্থেরং অন্তেপুরং পৰেসেত্ৰা দেৰসিকং পিণ্ডপাতেন ভোজেসি. অনুরুদ্ধরঞ্ঞা তম্বুলমঞ্জূসাযং ঠপেত্ৰা পূজিতা সত্ত ধাতুযো লভিত্ৰা তাসং পঞ্চধাতুযো চঞ্ঞিঙ্খুচেতিযে নিধানং অকাসি. অৰসেসা পন দ্ৰে ধাতুযো পুঞ্ঞস্স নাম অমচ্চস্স পূজনত্থায নিয্যাদেসি. সোচ অমচ্চো জেয্যপুরে পুঞ্ঞচেতিযে নিধানং অকাসি.

তদা চ কির সমণকুত্তকা গহট্ঠাৰিয রাজরাজমহামত্তানং ¶ সন্তিকে উপট্ঠানং অকংসু. কলিযুগে চতুঅসীতাধিকে ছৰস্সসতে সম্পত্তে সীসসূররঞ্ঞো জেট্ঠ পুত্তো উজনো নাম রাজা রজ্জং কারেসি. সো পন অৰপঙ্ক্যা নামকে দেসে চম্পককট্ঠমযে সত্তৰিহারে কারাপেসি. দ্ৰি ৰস্সাধিকে সত্তৰস্সসতে কালে তে ৰিহারা নিট্ঠং অগমংসু.

তেসু ৰিহারেসু চম্পকং নাম পধানৰিহারং অমচ্চপুত্তস্স সুধম্মমহাসামিত্থেরস্স অদাসি. সো পন থেরো অরিমদ্দননগরে অরহন্তত্থেরস্স ৰংসিকোতি দট্ঠব্বো.

ৰেল়ূৰনং নাম পরিৰারৰিহারং পন আভিধম্মিকস্স ঞাণধজস্স নাম থেরস্স অদাসি. সোপি অরহন্তত্থেরস্স ৰংসিকো.

জেতৰনং নাম পরিৰারৰিহারং পন সকলৰিনযপিটকং ৰাচুগ্গতং করোন্তস্স গুণারামত্থেরস্স অদাসি. সো পন থেরো অরিমদ্দননগরেযেৰ আনন্দত্থেরস্স ৰংসিকো.

কুলৰিহারং নাম পরিৰারৰিহারং আদিচ্চরংসিনো নাম থেরস্স অদাসি. সোপি আনন্দত্থেরস্স ৰংসিকোযেৰ.

সুৰণ্ণৰিহারং নাম পরিৰারৰিহারং সুধম্মালঙ্কারস্স নাম থেরস্স অদাসি. সোপি আনন্দত্থেরৰংসিকোযেৰ.

নীচগেহং নাম পরিৰারৰিহারং ৰরপত্তস্স নাম থেরস্স অদাসি. সো পন সুধম্মমহাসামিত্থেরস্স অন্তেৰাসিকো.

দক্খিণকোটিং নাম পরিৰারৰিহারং সিরিপুঞ্ঞৰাসিনো নাম থেরস্স অদাসি. সোপি সুধম্মমহাসামিত্থেরস্স অন্তেৰাসিকোতি.

তেসং ৰিহারানং এসন্নট্ঠানে রাজা সযমেৰ হত্থেন গহেত্ৰা মহাবোধিরুক্খং রোপেসি. তেসং ৰিহারানং পটি জগ্গনত্থায বহূনিপি খেত্তৰত্থূনি অদাসি আরামগোপক কুলানি চ.

তেসং ¶ পন থেরানং সুধম্মপুরারিমদ্দনপুরভিক্খুৰংসিকত্তালজ্জিপেসলতা ৰিঞ্ঞাতব্বা. তেনেৰ ৰিজযপুরে সাসনং অতিৰিয পরিসুদ্ধং অহোসীতি দট্ঠব্বং.

তেসম্পি সিস্সপরম্পরা অনেকসহস্সপ্পমাণা অহেসুং. এৰং লজ্জীপেসলানংযো ভিক্খূনং সন্তিকা কেচি সদ্ধিৰিহারিকা কীটাগিরিম্হি অস্সজিপুনব্বসুকাৰিয অলজ্জী দুস্সীলা উপ্পজ্জিংসু, সেয্যথাপি নাম মধুরম্বরুক্খতো অম্বিলফলন্তি. তে পন বহুঅনাচারং চরিংসুযেৰ. ইদং পন তেসং মূলউপ্পত্তি দস্সনং.

রাজা হি তদা তেসং ৰিহারানং পটিজগ্গনত্থায বহূনি খেত্তৰত্থূনি অদাসি. তেসু খেত্তৰত্থূসু বলিৰিচারণত্থায সুধম্মমহাসামিত্থেরো একচ্চে ভিক্খূ আরক্খণট্ঠানে ঠপেসি. আরক্খণভিক্খূ পন ধম্মানুলোমৰসেন কস্সকানং ওৰাদাপেসি, খেত্তৰত্থুসামিভাগম্পি পটিগ্গণ্হাপেসি. তস্মিঞ্চ কালে খেত্তৰত্থূনি পটিচ্চ ভিক্খূ ৰিৰাদং অকংসু. অথ তং ৰিৰাদং সুত্ৰা সাসনধরত্থেরো চ দ্ৰে পরক্কমত্থেরা চ ততো নিক্খমিংসু. নিক্খমিত্ৰা সাসনধরত্থেরো খণিত্তি পাদপব্বতে নিসীদি. দ্ৰে পরক্কমত্থেরা চ চঙ্গকিঙ্গপব্বতকন্দরে নিসীদিংসু. তেসঞ্হি নিৰাসট্ঠানত্তা যাৰজ্জতনা তং ঠানং পরক্কমট্ঠানন্তি পাকটং অহোসি. তে পন থেরা একচারাতি ৰোহারিংসু. অৰসেসা পন ভিক্খূ গামৰাসীবহুচারাতি ৰোহারিংসু. ততো পট্ঠায অরঞ্ঞৰাসীগামৰাসীৰসেন ৰিসুং গণা হোন্তি. ৰিহারস্স নিন্নানং খেত্তৰত্থূনং বলিপ্পটিগ্গাহকভিক্খূনম্পি সঙ্ঘজাতিসমঞ্ঞা অহোসি.

কলিযুগে চতুৰস্সাধিকে সত্তসতে উজনস্স রঞ্ঞো ধরমানস্সেৰ কনিট্ঠভাতিকো ক্যেচ্ৰা নাম রাজা কুমারো রজ্জং গণ্হি.

অযং পন তস্স অট্ঠুপ্পত্তি,– উজনো নাম রাজা ত্ৰং সমুদ্দমজ্ঝং ¶ নাম গামং গন্ত্ৰা তত্থ নিসীদিত্ৰা তত্রুপ্পাদবলিং ভুঞ্জাহীতি নিয্যাদেসি. সো পন রাজকুমারো লুদ্দকম্মেসুযেৰ অভিরম্মণসীলো. একস্মিং সমযে পিগৰং গন্ত্ৰা পচ্চাগতকালে রত্তিযং সুপিনং পস্সি,– সক্কো দেৰানমিন্দো আগন্ত্ৰা উপোসথসীলং সমাদিযাহি, এৰং সতি অচিরেনেৰ সেতিভে লভিস্সসতীতি ৰত্ৰা তাৰতিংসভৰনং পুন গতোতি.

সোচ রাজকুমারো ততো পট্ঠায উপোসথসীলং সমাদিযি. পচ্ছা কালেপি অত্তনো হত্থে গুথেন কিলিন্নং ভৰতীতি পুন সুপিনং পস্সি. সো অচিরেনেৰ পঞ্চ সেতিভে লভি. অথ একো অমচ্চো গন্ত্ৰা রঞ্ঞো তমত্থং আরোচেসি. রাজা তুট্ঠচিত্তো হুত্ৰা মম কির ভোন্তো কনিট্ঠভাতিকো পঞ্চ সেতিভে লভীতি রাজপুরিসানং মজ্ঝে সংৰণ্ণেসি. অমচ্চো পুন রাজকুমারস্স সন্তিকং গন্ত্ৰা তমত্থং আরোচেসি. রাজকুমারোপি মম ভাতিকো রাজা অকথিতপুব্বং ৰাচাপেয্যং ৰদতীতি আরাধযিত্ৰা পুন গন্ত্ৰা তমত্থং রঞ্ঞো আরোচাপেসি. রাজাপি তথেৰ ৰদতীতি. তং সুত্ৰা রাজকুমারো ভিয্যোসো পসীদি.

কস্মা পন উজনো রাজা কিত্তিতরং নাম রাজকুমারং কনিট্ঠৰোহারেন ন ৰদতীতি. একসেতিভিন্দো হি রাজা অপরস্স রঞ্ঞো দেৰিং গব্ভিনিং আনেত্ৰা অগ্গমহেসিট্ঠানে ঠপেসি, ঠপেত্ৰা অচিরেনেৰ উজনং ৰিজাযি, তেনেৰ ন উজনো একসেতিভিন্দস্স পুত্তো, কিত্তিতরো নাম রাজকুমারোযেৰ একসেতিভিন্দস্স পুত্তো, তস্মা তং কারণং পটিচ্চ সো তং কনিট্ঠৰোহারেন ন ৰদতীতি.

কনিট্ঠো পঞ্চসেতিভে লভতীতি সুত্ৰা রাজা ভাযিত্ৰা কনিট্ঠস্স রজ্জং উপনিয্যাদেসি. রাজা রাজগেহস্স পচ্ছিমদ্ৰারেন নিক্খমি. কনিট্ঠো পুরিমদ্ৰারেন পাৰিসি. পঞ্চন্নং পন সেতিভানং লদ্ধত্তা পঞ্চসেতিভিন্দোতি পাকটো. মূলনামং পনস্স ¶ সীহসূরোতি দট্ঠব্বং. তস্স রঞ্ঞো কালে বহূ অলজ্জিনো গামসামন্ত ৰিহারে ৰসিত্ৰা অনেকৰিধং আনাচারং চরিংসু. সুধম্মপুরঅরিমদ্দনপুরতো পরম্পরৰসেন আগতা ভিক্খূপি বহূ লজ্জিনো সিক্খাকামা সন্তি.

অথ তস্স রঞ্ঞো ভত্তং পরিভুঞ্জনকালে একো সমণকুত্তকো অট্ঠ পরিক্খারে গহেত্ৰা আগন্ত্ৰা রঞ্ঞো সম্মুখে অট্ঠাসি. কিমত্থায আগতোসীতি পুচ্ছিতে পিণ্ডপাতত্থায আগতোম্হীতি আহ. অথ রাজা সযং ভুঞ্জিস্সামীতি আরভিত্ৰাপি অতিপ্পসন্নতায পন সুৰণ্ণপাতিযা পটিযাদিতং সকলম্পি ভত্তং অদাসি. অথ রাজা এৰং চিন্তেসি,– অযং ভিক্খু পিণ্ডপাতত্থায উপমজ্ঝন্তি কযেৰ আগন্ত্ৰা অট্ঠাসি, ন সো পুথুজ্জনভিক্খু, অথ খো অভিঞ্ঞালাভী অরহা ভৰেয্য, মম পুঞ্ঞত্থায আগতো ভৰেয্য মং অনুকম্পং উপাদাযাতি.

এৰং পন চিন্তেত্ৰা একং রাজপুরিসং আণাপেসি তস্স পচ্ছা অনুগন্ত্ৰা ওলোকেতুং. সো পন সমণকুত্তকো সযং অলজ্জিভূতত্তাৰ অত্তনো ভরিযা পচ্চুগ্গন্ত্ৰা পত্তং গণ্হি. তং দিস্ৰা রাজপুরিসো রঞ্ঞো সন্তিকং গন্ত্ৰা পঠমমেৰ এৰং চিন্তেসি,– সচে যথাভূতং আরোচেয্যং, রঞ্ঞো পসাদো ৰিনস্সেয্য, এৰং পন অনারোচেত্ৰা যথা রঞ্ঞো পস্সাদো ভিয্যোসোমত্তায ভৰেয্য, ময্হম্পি লাভো উপ্পজ্জেয্য, সমণকুত্তকোপি রাজপরাধতো ৰিমুচ্চেয্য, এৰং আরোচেস্সামীতি. এৰং পন চিন্তেত্ৰা অহং মহারাজ তং অনুগন্ত্ৰা ওলোকেসি, অথ মম এৰং ওলোকেন্তস্সৰ অন্তরধাযীতি আরোচেসি. রাজা ভিয্যোসোমত্তায পসীদিত্ৰা হত্থং পসারেত্ৰা যথাহং মঞ্ঞমি, তথা অৰিরজ্ঝনমেৰতন্তি তিক্খত্তুং ৰাচং নিচ্ছারেসি, রাজপুরিসস্স চ দাতব্বং অদাসি.

তস্মিংযেৰ দিৰসে একো অমচ্চো রঞ্ঞো পণ্ণাকারত্থায ¶ ৰেলাহকং নাম একং তুরঙ্গমং অদাসি. অথ রাজা মম পুঞ্ঞানুভাৰেন এস লদ্ধোতি সম্পহংসি. তং পন তুরঙ্গমং আরোহিত্ৰা একং হত্থারোহং পাজাপেসি. অথ মহাজনস্স ওলোকেন্তস্স হত্থারোহস্স সীসেৰেট্ঠনদুস্সংযেৰ পস্সিত্ৰা আকাসে পক্খন্ধো বকোৰিয পঞ্ঞাযতি. সো পন তুরঙ্গমো পাতোৰ ৰিজযপুরতো গচ্ছন্তো পব্বতব্ভন্তরনগরং সাযন্হসমযে পাপুণি. অব্ভ ৰিজব্ভনঅস্সোতিপি নামং অকাসি.

ইচ্চেৰং সমণকুত্তকা দারম্পি পোসেসুং, পগেৰ ইতরং অনাচারং. তেনেৰ তে সমণকুত্তকা রঞ্ঞো মল্লরঙ্গম্পি পৰিসিত্ৰা মল্লং যুজ্ঝেসুং. তেসু পন সমণকুত্তকেসু ওৰিচঙ্গাখুংসঙ্ঘজো নাম সমণকুত্তকো মল্লকম্মে অতিৰিয ছেকো অধিকো. সো কির সংৰচ্ছরে সংৰচ্ছরে রঞ্ঞো মল্লরঙ্গে জযিত্ৰা পন্নরস ৰা ৰীসতি ৰা অস্সে পটিলভীতি.

রতনপূরনগরে মল্লকম্মে অতিছেকো অধিকো একো কম্বোজকুলো অত্থি. সো রতনপূরনগরে জেয্যপুরনগর চ অত্তনা সমথামং মল্লপুরিসং অসভিত্ৰা ৰিজয পুরং আগন্ত্ৰা চম্পকৰিহারস্স দ্ৰারসমীপে মল্লসভামণ্ডপে পৰিসিত্ৰা মল্লকম্মং কাতুং ইচ্ছামীতি রঞ্ঞো আরোচেসি. অথ রাজা তং সঙ্ঘজং আমন্তেত্ৰা এৰমাহ,- ইদানি ভো ত্ৰং ইমিনা সদ্ধিং মল্লযুদ্ধং কাতুং সক্খিস্সসীতি. আমমহারাজ পুব্বে অহং দহরে হুত্ৰা কীল়নত্থাযযেৰ মল্লকম্মং অকাসিং, ইদানি পন একূনসত্ততিৰস্সো অহং ইতো পচ্ছা মল্লযুদ্ধং কাতুং সক্খিস্সামি ৰা মা ৰাতি ন জানামি, ইদানি পরপক্খং মল্লপুরিসং মল্লকম্মেন মারেস্সামীতি ৰদতি.

অথ রাজূনং মল্লকম্মং নাম কীল়নত্থাযযেৰ ভৰতি, মা মারেতুং উস্সাহং করোহীতি ৰত্ৰা অঞ্ঞমঞ্ঞং মল্লযুদ্ধং কারাপেসি ¶ . সপরিসস্স রঞ্ঞো ওলোকেন্তস্সেৰ তে মল্লাকারেন নচ্চিত্ৰা অঞ্ঞমঞ্ঞং সমীপং উপগচ্ছিংসু. অথ সঙ্ঘজো মল্লো কম্বোজমল্লস্স পাদেন পহরণাকারং দস্সেত্ৰা দক্খিণহত্থমুট্ঠিনা কপালে পহারং অদাসি. অথ কম্বোজমল্লস্স মুখং পচ্ছতো অহোসি. তদা সপরিসো রাজা ঈদিসা পন ৰিমুখতো মরণমেৰ সেয্যো ইদানি পন ইমং পস্সিতুং ন ৰিসহামীতি ৰদতি. পুন সঙ্ঘজো ৰামহত্থ মুট্ঠিনা পহারং অদাসি. অথ কম্বোজমল্লস্স মুখং পরিৰট্টেত্ৰা যথা পুব্বে, তথা পতিট্ঠাসি.

তস্মিঞ্চ কালে সপরিসো খত্তিযো তং অচ্ছরিযং দিস্ৰা দ্ৰে অস্সে তিংসমত্তানি ৰত্তানি সতকহাপণঞ্চ অদাসীতি. ইদঞ্চ ৰচনং পোরাণপোত্থকেসু আগতত্তা সাধুজনানঞ্চ সংৰেজনিযট্ঠানত্তা ৰুত্তং. ঠপেত্ৰা হি সংৰেগলাভং নত্থি অঞ্ঞং কিঞ্চি পযোজনন্তি.

কলিযুগে তেরসাধিকে সত্তৰস্সসতে ৰিজযপুরেযেৰ তস্স পুত্তো কিত্তিতরনামকো রাজা রজ্জং কারেসি. ৰিতরা সদিসনামৰসেনেৰ সীহসূরোতি নামং পটিগ্গণ্হি. পিতু রঞ্ঞো কালে লদ্ধেসু পঞ্চসু সেতিহেসু চতুন্নংযেৰ অৰসেসত্তা চতুসেতিভিন্দোতি নামং পাকটং. তেনে ৰাহ অভিধানপ্পদীপিকাটীকাযং চতুসেতিভিন্দোতি. তস্স রঞ্ঞো কালে চতুরঙ্গবলো নাম মহাঅমচ্চো গন্থকোৰিদো অভিধানপ্পদীপিকাসং ৰণ্ণনং অকাসি. সো পন সকলব্যাকরণৰনাসঙ্গঞাণাচারী অহোসি.

একস্মিঞ্চ সমযে রাজা একং মহন্তং ৰিহারং কারাপেত্ৰা অসুকরঞ্ঞা অযং ৰিহারো কারাপিতো, ইমস্মিং ৰিহারে সীলৰন্তাযেৰ নিসীদন্তূতি কোলাহলং উপ্পাদেসি. অথ সাচঞ্ঞিনামগামৰাসী একো থেরো আগন্ত্ৰা নিসীদি.

অযং ¶ পন তস্স থেরস্স অট্ঠুপ্পত্তি,–

সাচঞ্ঞিগামে কির একো গহপতি অত্তনো পুত্তং সিপ্পুগ্গহণত্থায ৰিহারে একস্স ভিক্খুস্স সন্তিকে নিয্যাদেসি. পুত্তস্স পন ৰিহারং অগন্তুকামস্স তজ্জনত্থায সকণ্টকগচ্ছস্স উপরি খিপতি. সো চ দহরো নিক্খমিত্ৰা গেহং অনাগত্ৰা ৰিহারেযেৰ নিসীদি. মাতাপিতূনং সন্তিকং অনাগন্ত্ৰা থোকং থোকং দূরং গন্ত্ৰা সামণের ভূমিতো উপসম্পদভূমিং পত্ৰা অরিমদ্দননগরং গচ্ছি. অতিপঞ্ঞৰন্ততায পন পত্তপ্পত্তট্ঠানে মহাথেরো সঙ্গণ্হিংসু. তেনেৰেস সকলমরম্মরট্ঠে পাকটো অহোসি. অথ মাতাপিতরো পুত্তস্স আগমনং অপেক্খিত্ৰাযেৰ নিসীদিংসু. তমত্থং পন সুত্ৰা এস অম্হাকং পুত্তো ভৰিস্সতি ৰা নো ৰাতি ৰীমংসিতুকামো পিতা অনুগচ্ছি. অরিমদ্দননগরে তং সম্পাপুণিত্ৰা উপট্ঠপেত্ৰা নিসীদি. সোপি ভিক্খু যথাউপট্ঠানেনেৰ সন্তপ্পেত্ৰা গন্থং উগ্গণ্হি. অপরস্মিং পন কালেসো ভিক্খু অজ্জ সূপো অপ্পলোণোতিআদিনা পুনপ্পুনং ভণতি.

অথ পিতা এৰমাহ,- ন পুব্বে পিযপুত্তক তযা ঈদিসং ৰচনং কথিতং, ইদানি পন ত্ৰং অভিণ্হং ঈদিসং ৰচনং ছণসি, কারণমেত্থ কিন্তি পুচ্ছি. পুব্বে গন্থেসু ছেকত্তং অপ্পত্ৰা গন্থেসু ছেকত্থং ব্যাপন্নচিত্ততায ন ৰুত্তং, ইদানি পন মযা ইচ্ছিতো অত্থো মত্থকং পত্তো, তস্মা কাযবলপরিগ্গহণত্থায মযা ঈদিসং ৰচনং ৰুত্তন্তি ৰদতি. তং ৰচনং সুত্ৰা পিতা মাতুযা সন্তিকং গমনত্থায ওকাসং যাচিত্ৰা পিতরা সদ্ধিং সকট্ঠানং আগচ্ছন্তো ৰিজযপুরং চেতিযৰন্দনত্থায পাৰিসি.

তদা রঞ্ঞা ৰুত্তৰচনং সুত্ৰা তস্মিং ৰিহারে অরুহিত্ৰা নিসীদি ¶ . আরক্খপুরিসা চ তং ভিক্খুং ৰিহারে নিসিন্নং দিস্ৰা তমত্থং রঞ্ঞো আরোচেসুং. রাজা চ চতুরঙ্গবলং অমচ্চং আণেপেসি,-গন্ত্ৰা তস্স ভিক্খুস্স ঞাণথামং উপধারেহীতি. চতুরঙ্গবলো চ গন্ত্ৰা তং ভিক্খুং গূল়গূল়ট্ঠানং পুচ্ছি. সোপি পুচ্ছিতং পুচ্ছিতং ৰিস্সজ্জেসি. চতুরঙ্গবলো চ তমত্থং রঞ্ঞো আরোচেসি. রাজা তুট্ঠচিত্তো হুত্ৰা তং ৰিহারং তস্স ভিক্খুস্স অদাসি. তস্স পন ভিক্খুস্স দহরকালে সকণ্টকগচ্ছে পিতুনো খিপনং পটিচ্চ কণ্ডকখিপত্থেরোতি সমঞ্ঞা অহোসি, মূলনামং পনস্স নাগিতোতি. সোতস্মিং ৰিহারে নিসীদিত্ৰা সদ্দসারত্থজলিনিং নাম গন্থং অকাসি. তস্স কির থেরস্স কালে তস্মিং নগরে আরদ্ধ ৰিপস্সনাধুরা মহল্লকা ভিক্খূ সহস্সমত্তা অহেসুং. আরদ্ধগন্থধুরা পন দহরভিক্খূ গণনপথং ৰীতিৰত্তা.

তস্স পন পিতরম্পি সেট্ঠিট্ঠানে ঠপেসি. তেনেৰ তং গামং সেট্ঠিগামোতি নামেন ৰোহরিংসু.

কচ্চাযনৰণ্ণনং পন ৰিজযপুরেযেৰ অভযগিরিপব্বতে নিসিন্নো মহাৰিজিতাপী নাম থেরো অকাসি. ৰাচকো পদেসম্পি সোযেৰ অকাসি. সদ্দৰুত্তিং পন সদ্ধম্মগুরুত্থেরো অকাসি.

ইচ্চেৰং ৰিজযপুরে অনেকেহি গন্থকারেহি সাসনং ৰিপুলং অহোসি.

কলিযুগে পন পঞ্চাসীতাধিকে ছৰস্সসতে সম্পত্তে অসঙ্খযাচোযোন্নামকো রাজা জেয্যপুরনগরং মাপেত্ৰা তত্থ রজ্জং কারেসি. তত্থ পন রাজূনং কালে থেরেহি কতগন্থো নাম নত্থি.

কলিযুগে ছব্বিসাধিকে সত্তৰস্সসতে ৰেসাখমাসে জেয্যপুরনগরং ৰিনস্সি. তস্মিংযেৰ সংৰচ্ছরে জেট্ঠমাসে ৰিজযপুরং ৰিনস্সি. তস্মিংযেৰ সংৰচ্ছরে ফগ্গুনমাসে সত্ৰিৰরাজা ¶ রতনপূরং নাম নগরং মাপেত্ৰা রজ্জং কারেসীতি.

ইদং ৰিজযপুরজেয্যপুরেসু সাসনস্স পতিট্ঠানং.

ইদানি মরম্মমণ্ডলে তম্বনীপরট্ঠেযেৰ রতনপূরনগরে সাসনৰংসং ৰক্খামি.

কলিযুগে হি অট্ঠাসীতাধিকে সত্তৰস্সসতে নরপতিরঞ্ঞো ধিতায সদ্ধিং অলোঙ্গচঞ্ঞিসূরঞ্ঞো পুত্তো আনন্দসূরিযো নাম সন্থৰং কত্ৰা একং (সিদ্ধিকং নাম পুত্তং ৰিজাযি. সো ৰযে সম্পত্তে রজ্জসম্পত্তিং লভি. ততো পভুতি যাৰ ম্রেনচোদিঘা রঞ্ঞা অরিমদ্দননগরে রজ্জং অকংসু). ততো পচ্ছা সিরিসুধম্মরাজাধিপতীতি লদ্ধনামো সত্ৰিৰরাজা রতনপূরনগরে রজ্জং কারেসি. তস্স রঞ্ঞো কালে কলিযুগে একনৰুতাধিকে সত্তৰস্সসতে সম্পত্তে লঙ্কাদীপতো সিরিসদ্ধম্মালঙ্কারত্থেরো সীহল়মহাসামিত্থেরোচাতি ইমে দ্ৰে থেরা পঞ্চ সরীরধাতুযো আনেত্ৰা নাৰায কুসিমতিত্থং পাপুণিত্ৰা রামঞ্ঞরট্ঠে বঞ্ঞারনি নামেন রঞ্ঞা নিৰারিতা অনিসীদিস্ৰা ততো সোযেৰ রাজা থেরে যাৰ সিরিখেত্তনগরা পহিণি. তমত্থং ঞত্ৰা রতনপূরিন্দো রাজা চত্তালীসায নাৰাহি যাৰ সিরিখেত্তনগরং পচ্চুগ্গন্ত্ৰা আনেসি. আনেত্ৰা চ মহানৰগামং পত্তকালে সহ ওরোধেহি অমচ্চেহি চ সযমেৰ রাজা পচ্চুগ্গচ্ছি. রতনপূরং প্পন পত্তকালে মহাপথৰী চলি, পটিনাদঞ্চ নদি. তদা রাজা সম্মাসম্বুদ্ধস্স তিলোকগ্গস্স সাসনং পগ্গণ্হিস্সামীতি চিন্তেত্ৰা সরীরধাতুং আনেত্ৰা ইধ পত্তকালে অযং মহাপথৰী চলতি, পটিনাদঞ্চ নদতি, ইদং ¶ অম্হাকং রট্ঠে জিনসাসনস্স চিরকালং পতিট্ঠানভাৰে পুব্বনিমিত্তন্তি সযমেৰ নিমিত্তপাঠং অকাসি.

তাৰ তিট্ঠতু জীৰমানস্স সম্মাসম্বুদ্ধস্স আনুভাৰো, অহোৰত সরীরধাতুযাযেৰ অনুভাৰোতি বহুরট্ঠ ৰাসিনো পসিদিংসু. হোন্তি চেত্থ, –

সরীরধাতুযা তাৰ, মহন্তোচ্ছরিযো হোতি;

কা কথা পন বুদ্ধস্স, জীৰমানস্স সেট্ঠস্স.

এৰং অনুস্সরিত্ৰান, উপ্পাদেয্য পসাদকং;

বুদ্ধগুণেসু বাহুল্লং, গারৰঞ্চং করে জনোতি.

কলিযুগে দ্ৰেনৰুতাধিকে সত্তৰস্সসতে তা পঞ্চ ধাতুযো নিদহিত্ৰা জেয্যপুরনগরতো পচ্ছিমদিসাভাগে সমভূমিভাগে চেতিযং পতিট্ঠাপেসি. তঞ্চ চেতিযং রতনচেতিযন্তি পঞ্ঞাপেসি, হত্থিরূপবাহুল্লতায পন অনেকিভিন্দোতি পাকটং হোতি. তীহি সিরিগব্ভেহি সত্তহি দ্ৰারেহী চ অলঙ্কতং নাম মহাৰিহারং কারাপেত্ৰা দ্ৰিন্নং সীহল়দীপিকত্থেরানং অদাসি. ততো পচ্ছা তেসু মহন্তত্থেরো সকৰিহারসমীপে পব্বতমুদ্ধনি অত্তনো সিস্সেপি অপ্পৰেসেত্ৰা লজ্জীপেসলবহুস্সুতসিক্খাকামেহি সব্বেহি তীহি থেরেহি সদ্ধিং সীমং সম্মন্নতি. ইচ্চেৰং সীমসম্মুতিপরিযত্তিৰাচনাদিকম্মেহি মরম্মরট্ঠে সাসনং ৰিরূল়ং কত্ৰা পতিট্ঠাপেসি.

ইদং মরম্মমণ্ডলে রতনপূরনগরে সীহল়দীপিকে

দ্ৰে থেরে পটিচ্চ পঠমং সাসনস্স পতিট্ঠানং.

কলিযুগে ছব্বীসাধিকে সত্তৰস্সসতে সম্পত্তে ফগ্গুনমাসে সত্ৰৰরাজা রতনপূরনগরং মাপেসি. তস্স রঞ্ঞো ¶ কালে জেয্যপুরনগরে একা পূপিকা ইত্থী অলজ্জিনো একস্স ভিক্খুস্স সন্তিকে ধনং উপনিদহি. অপরভাগেসা তং ধনং যাচি. অথ সো ভিক্খু তৰ ধনং অহং ন পটিগ্গণ্হামীতি মুসা ভণতি. এৰং ৰিৰাদং কত্ৰা তং কারণং রঞ্ঞো আরোচেসি. রাজা পক্কোসাপেত্ৰা সযমেৰ তং ভিক্খুং পুচ্ছি,-ত্ৰং ভন্তে তস্সা ইত্থিযা ধনং পটিগ্গণ্হাসি ৰা মা ৰাতি. অহং মহারাজ সমণো অলিকং ভণিতুং ন ৰট্টতি, ন পটিগ্গণ্হামীতি ৰদতি. তং কারণং রাজা চ পুনপ্পুনং পুচ্ছিত্ৰা ৰীমংসন্তো ভিক্খুস্স কেরাটিকভাৰং জানিত্ৰা তং সমণো সমানো ভগৰতো পঞ্ঞত্তং সিক্খাপদং অক্কমিত্ৰা মুসা ভণতীতি কুজ্ঝিত্ৰা সযমেৰ অপরাধানুরূপং সীযং ছিন্দিত্ৰা রাজগেহতো হেট্ঠা খিপি.

তঞ্চ কারণং সকলমরম্মরট্ঠে পাকটং. অলজ্জীভিক্খূপি অঞ্ঞে পাপকম্মং কাতুং ন ৰিসহিংসু. রঞ্ঞা ভাযিত্ৰাযেৰ সিক্খাপদং ন অক্কমেসুং.

কলিযুগে তিংসাধিকে সত্তৰস্সসতে সম্পত্তে মঙ্গক্রিচ্ৰাচোঙ্ক নাম রাজা রজ্জং কারেসি. সো পন রাজা রট্ঠৰাসীনং সুখত্থায নিমিত্তং গহেত্ৰা তালৰণ্টং গহেত্ৰা রাজগেহং পটিগ্গণ্হি. সো চ রাজা সক্করাজে পঞ্চচত্তালীসাধিকে সত্তৰস্সসতে সম্পত্তে চঞ্ঞিঙ্খুং নাম চেতিযং পতিট্ঠাপেসি. যঙ্গরনামকস্স সিলাপব্বতস্স সমীপে পোরাণিকং একং চেতিযং নদীউদকং ভিন্দি. তদা সকরণ্ডকা পঞ্চ ধাতুযো উদকে নিম্মুজ্জন্তিযো এরাপথো নাম নাগো গহেত্ৰা পচ্ছা চঞ্ঞিঙ্খুং নাম চেতিযং পতিট্ঠাপেস্সামীতি রঞ্ঞা আরদ্ধকালেযেৰ দাঠানাগস্স নাম থেরস্স সহ করণ্ডকেন পঞ্চ ধাতুযো নিয্যাদেসি. সো চ থেরো রঞ্ঞো অদাসি. রাজা দ্ৰে ধাতুযো মুট্ঠোচেতিযে নিধানং অকাসি. তিস্সো পন চঞ্ঞিঙ্খুং চেতিযেতি পোরাণপোত্থকেসু ৰুত্তং.

সো ¶ রাজা কুমারকালে সিক্খাপকস্স আচরিযস্স সেতচ্ছত্তং দত্ৰা সঙ্ঘনাযকট্ঠানং নিয্যাদেসি. খেমাচারো নাম একো থেরো রত্তিভাগে মজ্ঝন্তিককালে চেতিযঙ্গণে ওলম্বেত্ৰা ঠপিতং ভেরিং অনেকৰারং পহরি. অথ রাজা রাজগেহতোযেৰ সুত্ৰা যথাঠপিতন্তিযামৰসেন ৰিহারে কোচি ভিক্খু কালং কতো ভৰেয্যাতি মঞ্ঞিত্ৰা ৰিহারং গন্ত্ৰা পুচ্ছাহীতি দূতং পেসেসি. দূতো ৰিহারং গন্ত্ৰা কারণং পুচ্ছি. ভিক্খূ চ এৰমাহংসু,- ন অম্হেসু কালঙ্কতভিক্খু নাম অত্থি, অথ খো সক্কো দেৰানমিন্দো ইদানি কালঙ্কতোতি বহূনং মনুস্সানং ঞাপনত্থায ভেরিং পহরিম্হাতি. পুন রাজা ভিক্খূ পক্কোসাপেত্ৰা পুচ্ছি,-কস্মা পন ভন্তে তুম্হে সক্কস্স দেৰানমিন্দস্স কালঙ্কতভাৰং জানাথাতি. অথ ভিক্খূ এৰমাহংসু,-ভগলতো পরিনিব্বানকালে সাসনং রক্খিস্সামীতি সক্কো দেৰানমিন্দো পটিঞ্ঞং কত্ৰাপি ইদানি সাসনে ৰসন্তানং অম্হাকং অনুপালনকম্মং নাম কিঞ্চি ন অকাসি, সচে পন সক্কো দেৰানমিন্দো জীৰমানো ভৰেয্য, সম্মাসম্বুদ্ধস্স সন্তিকে পটিঞ্ঞং দল়ং কত্ৰা ইদানি অপ্পোস্সুক্কো ন ভৰেয্য. ইদানি পন সক্কস্স দেৰানমিন্দস্স আরক্খণকম্মং নাম কিঞ্চি ন দিস্সতি, তস্মা ইদানি সক্কো দেৰানমিন্দো কালঙ্কতোতি জানিম্হাতি.

রাজা তং সুত্ৰা খেমাচারত্থেরস্স পসীদিত্ৰা ৰিহারং কারাপেত্ৰা অদাসি. সো চ থেরো সুধম্মপুরৰাসীনং সীহল়ৰংসিকানং মহাথেরানং ৰংসে ভৰতি লজ্জী পেসলো হোতীতি.

রতনপূরনগরেযেৰ অধিকরঞ্ঞো কালে রতনপূরনগরস্স দক্খিণদিসাভাগে মহাসেতুং কারাপেসি. তস্স ¶ পন আচরিযো সঙ্ঘরাজা লজ্জীপক্খং ন ভজতি. তেনেৰ থেরপরম্পরায এস ন সঙ্গহিতব্বো.

তস্স রঞ্ঞো কালে ছসট্ঠাধিকে সত্তৰস্সসতে কলিযুগে রাজাধিরাজা নাম রামঞ্ঞরট্ঠিন্দো ভূপালোতি সহস্সপ্পমাণাসু নাৰাসু সট্ঠিসতসহস্সেহি যোধেহি সদ্ধিং নদীমগ্গেন যুজ্ঝনত্থায রতনপূরাভিমুখং আগতো.

অথ অধিকরাজা বহৰো অমচ্চেচ ভিক্খূ চ সন্নিপাতাপেত্ৰা মন্তেসি,-ইদানি রামঞ্ঞরট্ঠিনো রাজা যুজ্ঝনত্থায ইধ আগচ্ছতি, যুদ্ধং অকত্ৰা কেনুপাযেন তং পটিনিৰত্তাপেতুং সক্খিস্সামাতি. অথ সব্বে কিঞ্চি অকথেত্ৰা তুণ্হীভাৰেনেৰ নিসীদিংসু.

অথ জাতৰস্সেন একত্তিংসৰস্সিকো উপসম্পদাৰসেন পন একাদসৰস্সিকো একো ভিক্খু এৰমাহ,-একো পন রামঞ্ঞরট্ঠিন্দো রাজাধিরাজা তাৰ তিট্ঠতু, সচে সকলেপি জম্বুদীপে সব্বে রাজানো আগচ্ছেয্যুং, এৰম্পি কথাসল্লাপেনেৰ যুদ্ধং অকত্ৰা পটিনিৰত্তাপেসুং সক্কোমীতি.

অথ অধিকরাজা তুট্ঠচিত্তো হুত্ৰা আহ,- যথা ভন্তে ত্ৰং সক্কোসি রাজাধিরাজং যথাসল্লাপেন পটিনি ৰত্থাপেতুং, তথা করোহীতি.

অথ সো ভিক্খু মেত্তাসন্দেসপণ্ণং পেসেত্ৰা ওকাসং যাচি তস্স রাজাধিরাজস্স সন্তিকং পৰিসিতুকামো. রাজাধিরাজা চ তস্স ভিক্খুস্স মেত্তাসন্দেসপণ্ণং পস্সিত্ৰা তং ভিক্খুং সীঙ্ঘং আনেথাতি দূতং পেসেসি. দূতো আনেত্ৰা রঞ্ঞো দস্সেসি. অথ সো ভিক্খু রাজাধিরাজং ধম্মদেসনায ওৰাদং দত্ৰা সকট্ঠানং পটিনিৰত্তাপেসি. অযঞ্চ ¶ ভিক্খু অরিমদ্দননগরে চতূসু গণেসু অরহন্তগণৰংসো সিক্খাকামো লজ্জী পেসলো. অরিমদ্দননগরে চাগহে নাম দেসে পন জাতত্তা চাগ্রুহি ভিক্খূতি ৰোহারিযতি.

কলিযুগে অট্ঠাসীতাধিকে সত্তৰস্সসতে সম্পত্তে মিঞ্ঞ্হঙ্গ ধম্মরাজা রতনপূরেযেৰ রজ্জং সম্পত্তো. তস্স রঞ্ঞো কালে সীহল়দীপতো দ্ৰে মহাথেরা রতনপূরং আগন্ত্ৰা সাসনং অনুগ্গহেত্ৰা নিসীদিংসু.

তদা কলিযুগে অট্ঠসতে সম্পুণ্ণে পোরাণকং কলিযুগং অপনেত্ৰা অভিনৰং ঠপেতুং ওকাসো অনুপ্পত্তো. অথ চাগ্রিহি থেরো চ রাজৰিহারৰাসিত্থেরো চ এৰমাহংসু,- অপনীতব্বকালে মহারাজ সম্পত্তে অনপনেতুং ন ৰট্টতীতি.

অথ রাজা পুন এৰমাহ,-অপনীতব্বে সম্পত্তে অনপনেত্ৰা অজ্ঝুপেক্খিত্ৰা ৰসন্তস্স কো দোসোতি. সচে অপনীতব্বে সম্পত্তে অনপনেত্ৰা অজ্ঝুপেক্খিত্ৰা নিসীদেয্য, রট্ঠৰাসীনং দুক্খং ভৰিস্সতীতি ৰেদসত্থেসু আগতং, সক্করাজং অপনেন্তোপি রাজা তস্মিংযেৰ ৰস্সে দিৰঙ্গতো ভৰেয্যাতি আহংসু.

অথ রাজা সত্তানং সুখং লভীযমানতং জানন্তোযেৰ মাদিসো অত্তনো ভযং অপেক্খিত্ৰা অপনীতব্বং অনপনেত্ৰা নিসীদিতুং ন ৰট্টতি, কম্মং খীযিত্ৰাপি মম অগুণং লোকে পত্থরিত্ৰা পতিট্ঠহিস্সতীতি মনসিকরিত্ৰা সক্করাজে অট্ঠৰস্সসতে সম্পুণ্ণে বস্যুছিদ্রমুনিসখ্যং অপনেত্ৰা চম্মাৰসেসং ঠপেসি. অথ মহামণ্ডপং কারাপেত্ৰা মহাছণং কত্ৰা মহাদানম্পি অদাসি.

চাগ্রিহিথেরো রাজৰিহার ৰাসিত্থেরোচাতি অরিমদ্দন নগরে ¶ অরহন্তগণাংসিকো লজ্জী পেসলো সিক্খাকামো.

ঈদিসং পন ৰচনং সাসনপ্পটিযত্তত্তা চ রট্ঠৰাসিকাযত্তত্তা চ ধম্মানুলোমৰসেন ৰুত্তং.

কলিযুগে চতুৰস্সাধিকে অট্ঠসতে মহানরপতি রাজা রতনপূরনগরে রজ্জং কারেসি. সো চ রাজা থূপারামচেতিযং কারাপেসি. তস্স পন আচরিযো মহাসামিত্থেরো নাম. সো পন থেরো সীহল়দীপং গন্ত্ৰা সীহল়িন্দস্স রঞ্ঞো আচরিযস্স সারিপুত্তত্থেরস্স সন্তিকে সিক্খং গহেত্ৰা পচ্চাগতত্থেরৰংসিকোতি দট্ঠব্বো. তস্স রঞ্ঞো কালে রতনপূরনগরে মহাঅরিযৰংসো নাম একো থেরো অত্থি. সো পন পরিযত্তিৰিসারদো অরিমদ্দননগরে ছপ্পদগণতো আগতৰংসিকো.

একস্মিং সমযে জেয্যপুরনগরং গন্ত্ৰা রেঙ্গ ইতি পাকটস্স মহাথেরস্স সন্তিকে সদ্দনযং উগ্গণ্হিত্ৰা নিসীদি. সো পন কির মহাথেরো অঞ্ঞেহি সদ্ধিং যংৰা তংৰা কথং অসল্লপিতুকামতায মুখে উদকং ঠপেত্ৰা যেভুয্যেন নিসীদতি. তেনেৰেস মরম্মৰোহারেন রেঙ্গু ইতি পাকটো অহোসি.

সো কির অরিযৰংসত্থেরো রেঙ্গুং থেরস্স সন্তিকং গন্থং ৰাচাপেতু ওকাসং যাচিস্সামীতি উপগচ্ছন্তোপি কথাসল্লাপং অকত্ৰা দ্ৰে অহানি ৰত্তং পরিপূরেত্ৰাযেৰ পচ্চাগচ্ছি. ততিযদিৰসে পন চম্মখণ্ডং আকোটুনত্তা সদ্দং সুত্ৰা মুখতো উদকং উগ্গিরিত্ৰা কারণং পুচ্ছি. গন্থং উগ্গহণত্থায আগতভাৰং আরোচেসি.

অথ থেরো এৰমাহ,-অহং আৰুসো দিৰসে দিৰৰসে তিক্খত্তুং গন্থং ৰাচেমি, মজ্ঝন্তি কাতিক্কমকালেপি পঞ্ঞচেতিযং গন্ত্ৰা চেতিযঙ্গণে সম্মজ্জনকিচ্চং করোমি, ওকাসং ¶ ন লভামি, এৰম্পি ত্ৰং বহূগন্থে উগ্গহেত্ৰাপি আচরিযেহি দিন্নোপদেসং অলভিত্ৰা পুন মম সন্তিকং আগচ্ছসি, তস্মাযঙ্গণে সম্মজ্জনৰত্তং তাৰকালিকং ৰিকোপেত্ৰা গন্থুগ্গহণত্থায ওকাসং দস্সামীতি ৰত্ৰা অভিধম্মত্থৰিসাৰিনিং নাম লক্খণটীকং উগ্গণ্হাপেসি. নানানযেহি উপদেসং দত্ৰা ৰাচেসি. ৰাচেত্ৰা চ ততিযদিৰসে আচরিযস্স সন্তিকং নাগচ্ছি. মহাথেরোপি কারণং অকল্লতায অনাগতো ভৰেয্যাতি মঞ্ঞিত্ৰা পুচ্ছনত্থায ভিক্খূ পেসেসি.

অরিযৰংসত্থেরোচ আচরিযস্স সন্তিকং গমিস্সামীতি আগতো, অন্তরামগ্গেযেৰ দূতভিক্খূ পস্সিত্ৰা তেহি সদ্ধিং মহাথেরস্স সন্তিকং আগমংসু. আচরিযস্স সন্তিকং পত্ৰা আচরিযা অরিযৰংসত্থেরং পুচ্ছি,-কস্মা পন ত্ৰং ন উগ্গহণত্থায আগতোসীতি. অহং ভন্তে তুম্হেহি দিন্নোপদেসং নিস্সায ইদানি সব্বং নযং জানামীতি. অথ আচরিযো আহ, যং পন গন্থং নিস্সায ত্ৰং ছেকতং পত্তোসি, তস্স সংৰণ্ণনং কত্ৰা উপকারং করোহীতি. অথ অরিযৰংসত্থেরো আচরিযস্স ৰচনং সিরসা পটিগ্গহেত্ৰা অভিধম্মত্থৰিভাৰিনিযা মণিসারমঞ্জূসং নাম অনুসংৰণ্ণনং অকাসি. নিট্ঠিতনিট্ঠিতপাল়ং উপোসথদিৰসে উপোসথদিৰসে পুঞ্ঞচেতিযস্স চেতিযঙ্গণে ভিক্খুসঙ্ঘং সন্নিপাতাপেত্ৰা ভিক্খুসঙ্ঘস্স মজ্ঝে ৰাচাপেত্ৰা সুণাপেসি,- সচে কোচি দোসো অত্থি, তং ৰদথাতি.

অথ অরিমদ্দননগরতো চেতিযৰন্দনত্থায একো ভিক্খু আগন্ত্ৰা পরিসকোটিযং সুণিত্ৰা নিসীদি. অথ সো ভিক্খু দ্ৰে ৰারং এএইতি সদ্দং অকাসি. তং ঠানং সল্লক্খেত্ৰা ঠপেসি. নিৰাসনট্ঠানঞ্চ পুচ্ছি. অরিযৰংসত্থেরোপি সকৰিহারং পত্ৰা তস্মিং ঠানে উপধারোন্তো একস্মিং ঠানে একস্স অত্থস্স দ্ৰিক্খত্তুং ৰুত্তত্তা পুনরুত্তিদোসো দিস্সতি, একস্মিং ¶ ঠানে ইমং গন্থন্তি পুল্লিঙ্গরূপেন ৰত্তব্বট্ঠানে ইদং গন্থন্তি নপুংসকলিঙ্গেন ৰুত্তত্তা লিঙ্গৰিরোধিদোসো দিস্সতি.

অথ তং পুগ্গলং পক্কোসাপেত্ৰা এৰমাহ,-অহং আৰুসো ইমং গন্থং মহুস্সাহেন করোমি, তঞ্চ ৰিৰেককালে রত্তিভাগেযেৰ পোত্থকং পত্থরিত্ৰা লিখামি, এৰং মহুস্সাহেন করোন্তম্পি ত্ৰং অরুচ্চনাকারেন সদ্দং করোসি, কীদিসং পন দোসং সুত্ৰা এৰং করোসীতি পুচ্ছি. অথ সো ভিক্খু এৰমাহ,- তযো ভন্তে মহুস্সাহেন কতে গন্থে দোসৰসেন বহুৰত্তব্বট্ঠানং নত্থি, সদ্দতোচেৰ অত্থতো চ পরিপুণ্ণোযেৰেস গন্থো, অথ খো পন একস্মিং ঠানে একস্স অত্থস্স দ্ৰিক্খত্তুং ৰুত্তত্তা পুরনুত্তিদোসো দিস্সতি, একস্মিং পন ইমং গন্থন্তি পুল্লিঙ্গেন ৰত্তব্বট্ঠানে ইদং গন্থন্তি নপুংসকলিঙ্গেন ৰুত্তত্তা লিঙ্গৰিরোধিদোসো দিস্সতি, এৰং এত্তকংযেৰ দোসং দিস্ৰা ঈদিসং অরুচ্চনাকারং দস্সেমীতি.

অথ অরিযৰংসত্থেরো তুট্ঠচিত্তো হুত্ৰা অত্তনো সরীরপারুপিতং দুপট্টচীৰরং ইমিনাহং তৰ ঞাণং পূজেমীতি ৰত্ৰা অদাসি. পচ্ছাকালে অধিকরাজা তমত্থং সুত্ৰা নাম লঞ্ছং অদাসি.

সো চ অরিযৰংসত্থেরো মণিদীপং নাম গন্থং গন্থা ভরণঞ্চেৰ জাতকৰিসোধনঞ্চ পাল়িভাসায অকাসি. অনুটীকায পন অত্থযোজনং মরম্মভাসায অকাসি.

একং সমযং অধিকরাজা ৰিহারং গন্ত্ৰা ধম্মং সুণি. থেরো ধম্মং দেসেত্ৰা নিট্ঠিতকালে যানবলিং সুখত্থায যাচি. রাজা অদত্ৰা নাৰং অভিরূহিত্ৰা পচ্চাগচ্ছি. অন্তরামগ্গে নাৰায ফিযং একো সংসুমারো মুখেন গণ্হিত্ৰা নিচ্চলং কত্ৰা ঠপেসি. থেরেন যাচিতং যানবলিং দদামীতি মহাসদ্দং কত্ৰা রাজপুরিসে তিক্খত্তুং নিচ্ছারেসি. অথ সংসুমারো নাৰং মুঞ্চিত্ৰা গচ্ছি. একস্মিঞ্চ কালে রাজা ৰিহারং নিক্খমি. অথ ¶ একো হত্থিনী ৰিহারসমীপে বন্ধিত্ৰা ঠপেসি. সা বোধিরুক্খসাখং ছিন্দিত্ৰা খাদি. সা তত্থেৰ ভূমিযং পতি. অথ থেরো সচ্চকিরিযং কত্ৰা মেত্তাভাৰনং ভাৰেত্ৰা মেত্তোদকেন ভিঞ্চি. তং খণঞ্ঞেৰ সা উট্ঠহি. রাজা চ তং অচ্ছরিযং দিস্ৰা তস্সা অগ্ঘনকমূলং দত্ৰা ৰিহারতো নদী তিত্থং গমনমগ্গে সিলাপট্টং চিনিত্ৰা সেতুং অকাসীতি.

সদ্ধম্মকিত্তিত্থেরো পন অরিযৰংসত্থেরস্স সদ্ধিৰিহারিকো জেতৰনৰিহারৰাসী. তে পন থেরা ছপ্পদগণৰংসিকাতি দট্ঠব্বা.

কলিযুগে দ্ৰেচত্তালীসাধিকে অট্ঠৰস্সসতে সম্পত্তে রতনপূরনগরেযেৰ সিরিসুধম্মরাজাধিপতি নাম দুতিযাধিকরাজা রজ্জং কারেসি. তস্মিঞ্চ কালে পব্বতব্ভন্তরনগরতো মহাসীলৰংসো নাম থেরো পঞ্চচত্তালীসাধিকে অট্ঠৰস্সসতে সম্পত্তে সুমেধকথং কব্যালঙ্কারৰসেন বন্ধিত্ৰা বুদ্ধালঙ্কারঞ্চ নাম কব্যালঙ্কারং পব্বতব্ভন্তরপ্পটিসংযুত্তঞ্চেৰ কব্যালঙ্কারং বন্ধিত্ৰা তে গহেত্ৰা রতনপূরনগরং আগচ্ছি.

অথ রাজা থূপারামচেতিযস্স এসন্নট্ঠানে রতনৰিমানৰিহারে নিসীদাপেসি. সো চ থেরো তত্থ সোতারানং পরিযত্তিং ৰাচেত্ৰা নিসীদি. সো চ থেরো তত্থ নিসিন্নানং থেরানং অট্ঠমকো হোতি. সো চ মহাসীলৰংসত্থেরো কলিযুগস্স পন্নরসাধিকে অট্ঠৰস্সসতে জাতো. তিংসৰস্সকালে রতনপূরনগরং আগতোতি পোরাণপোত্থকেসু ৰুত্তং. সো পন থেরো নেত্তিপাল়িযা অত্থ যোজনং মরম্মভাসায অকাসি পারাযনৰত্থুঞ্চ.

রতনপূরনগরেযেৰ রট্ঠসারো নাম একো থেরো অত্থি, মহাসীলৰংসত্থেরেন সমঞ্ঞাণথামো. সো পন রতনপূরনগরেযেৰ ¶ কলিযুগস্স তিংসাধিকে অট্ঠৰস্সসতে কালে জাতো. ভূরিদত্তজাতকং হত্থিপালজাতকং সংৰরজাতকঞ্চ কব্যালঙ্কারৰসেন বন্ধি অঞ্ঞঞ্চ অনেকৰিধং কব্যালঙ্কারং. তে পন দ্ৰে থেরা কব্যালঙ্কারকা রকাতি থেরপরম্পরায পৰেসেত্ৰা ন গণেন্তি পোরাণা.

এত্থ চ কিঞ্চাপি সমণানং উপোসথিকানঞ্চ কব্যালঙ্কারং বন্ধিতুং ৰাচেতুং ৰা কপ্পাকপ্পৰিচারণং ৰত্তুং ওকাসো লদ্ধো, সাসনৰংসং পন ৰত্তুং ওকাসস্স অতিৰিত্থারোৰসেসত্তা তং অৰত্ৰা অজ্ঝুপেক্খিস্সাম. উপোসথৰিনিচ্ছযে পন নচ্চগীতাদিসিক্খাপদস্স ৰিসযে ৰিত্থারেন মযং অৰোচুম্হা.

কলিযুগস্স গতে তেসট্ঠাধিকে অট্ঠৰস্সসতে রতনপূরনগরেযেৰ সিরিত্রিভৰনাদিত্যনরপতিপৰরমহাধম্ম রাজাধিপতিরাজা রজ্জং কারেসি. তস্স রঞ্ঞো কালেতিসাসনধজো নাম ভিক্খু সদ্ধম্মকিত্তিত্থেরস্স সন্তিকে গন্থং উগ্গণ্হি. অথ অরিমদ্দননগরতো একো মহাথেরোসোতুনং ৰাচিত্ৰা রতনপূরনগরে নিসীদিস্সামীতি আগতো. অথ সদ্ধম্মকিত্তিত্থেরস্স গন্থং ৰাচেন্তস্সেৰ ৰিহারস্স হেট্ঠা নিসীদিত্ৰা সো মহাথেরো সদ্দং সুণিত্ৰা এৰং চিন্তেসি,-এতস্স সন্তিকে অহং নৰকট্ঠানে ঠত্ৰা থোকং গন্থং উগ্গণ্হিস্সামীতি. অথ সো মহাথেরো সদ্ধম্মকিত্তিত্থেরস্স সন্তিকং পৰিসিত্ৰা গন্থং ৰাচাপেতুং ওকাসং যাচি. অথ সদ্ধম্মকিত্তিত্থেরো ৰস্সপমাণং পুচ্ছিত্ৰা ত্ৰং ভন্তে মযা ৰুড্ঢতরোসীতি আহ. অহং তযা ৰুড্ঢতরোপি সমানো নৰকট্ঠানে ঠত্ৰা গন্থং উগ্গণ্হিস্সামীতি আহ. অথ সদ্ধম্মকিত্তিত্থেরো তস্স গন্থং ৰাচেসি. অতিপসীদিত্ৰা পন তং মহাথেরং মহাসাধুজ্জনোতি নামেন ৰোহারতি.

অথ ¶ পচ্ছা মরম্মরট্ঠং কলিযুগস্স পঞ্চাসীতাধিকঅট্ঠসতকালতো পট্ঠায যাৰ অট্ঠাসীতাধিকঅট্ঠসতৰস্সকালং নানাভযেহি সঙ্খুব্ভিতং অহোসি. তদা কম্বোজরট্ঠতো সিহনিস্ৰা নাম ভিন্নকুতো আগন্ত্ৰা রতন পূরনগরে রজ্জং গণ্হি. অথ সো এৰং চিন্তেসি,- ভিক্খূ অদারা অপুত্তিকা হুত্ৰা পুন সিস্সে পোসেত্ৰা পরিৰারং গৰেসন্তি, সচে ভিক্খূ পরিৰারং ৰিচিনিত্ৰা রাজভাৰং গণ্হেয্যুং, এৰং সতি রজ্জং গহেতুং সক্খিস্সন্তি, ইদানেৰ ভিক্খূ গহেত্ৰা মারেতুং ৰট্টতীতি. এৰং পন চিন্তেত্ৰা তোৰিসীলূ নামকে খেত্তৰনে বহূ মণ্ডপে কারাপেত্ৰা গোমহিসকুক্কুটসূকরাদযো মারাপেত্ৰা ভিক্খূ ভোজেস্সামীতি ৰত্ৰা জেয্যপুরৰিজযপুররতনপূরনগরেসু সব্বে মহাথেরে বহূহি অন্তেৰাসিকেহি সদ্ধিং পক্কোসাপেত্ৰা তেসু মণ্ডপেসু নিসীদাপেত্ৰা হত্থিঅস্সাদিসেনঙ্গেহি পরিৰারেত্ৰা মারেসি. তদা কির তিসহস্সপ্পমাণা ভিক্খূ মরিংসূতি. ভিক্খূ চ মারেত্ৰা বহূপি পোত্থকে অগ্গিনা ঝাপেসি, চেতিযানিপি ভেদাপেসি. অহোৰত পাপজনস্স পাপকম্মন্তি. হোন্তি চেত্থ,-

সাসনং নাম রাজানং, নিস্সায তিট্ঠতে ইধ;

মিচ্ছাদিট্ঠিকরাজানো, সাসনং দূসেন্তি সত্থুনো.

সম্মাদিট্ঠী চ রাজানো, পগ্গণ্হন্তেৰ সাসনং;

এৰঞ্চ সতি আকাসে, উলূরাজাৰ দিব্বতীতি.

অথ কলিযুগে একৰস্সাধিকে নৰৰস্সসতে সম্পত্তে আকাসে বহূহি তারকাহি ধূমা নিক্খমিংসু. চঞ্ঞিঙ্খুচেতিযেপি বুদ্ধপ্পটিবিম্বস্স অক্খিকূপতো উদকধারানেত্তজলানিৰিয নিক্খমিংসূতি রাজৰংসে ৰুত্তং.

অথ ¶ সদ্ধম্মকিত্তিত্থেরো সদ্ধিং মহাসাধুজ্জনতিসায নধজত্থেরেহি কেতুমতীনগরং অগমাসি. রট্ঠসারত্থেরোপি সিরিখেত্তনগরং সযমেৰ অগমাসীতি পোরাণপোত্থকেসু ৰুত্তং. তং পন রাজৰংসে সিরিখেত্তনগরিন্দো সত্ৰ ৰরাজা তং আনেসীতি ৰুত্তৰচনেন ন সমেতি.

সদ্ধম্মকিত্তিত্থেরোপি কেতুমতীনগরে কালঙ্কতো. ততো পচ্ছা থোকং কালং অতিক্কমিত্ৰা মহাসাধুজ্জনত্থেরো তত্থেৰ কালমকাসি.

তিসাসনধজত্থেরো পন কলিযুগে দ্ৰাদসাধিকে নৰৰস্সসতে সম্পত্তে হংসাৰতীনগরে অনেকসেতিভিন্দস্স রঞ্ঞো কালে কেতুমতীনগরতো হংসাৰতীনগরং অগমাসি.

ততো পচ্ছা তিচত্তালীসৰস্সিকো হুত্ৰা কলিযুগে তেরসাধিকে নৰৰস্সসতে মিঙ্ঘ ব্রহ্মনরপতিরঞ্ঞোকালে পুন জেয্যপুরনগরং সম্পত্তো হুত্ৰা জেতৰনৰিহারসমীপে একিস্সং গুহাযং দিসীদি. মহাঅরিযৰংসগণিকস্স জেতৰনত্থেরস্স সন্তিকে উপসঙ্কমি.

তস্মিঞ্চ কালে জেতৰনত্থেরো গিলানো হুত্ৰা মযি কালঙ্কতে মম ঠানং অধুনা হংসাৰতীনগরতো আগতো তিসাসনধজো নাম থেরো পরিগ্গণ্হিতুং সমত্থো ভৰিস্সতি, তস্স নিয্যাদেস্সামীতি চিন্তেসি. তস্মিং খণে তিসাসনধজত্থেরো পুরিমযামে সুপিনং মস্সি,– মতকল়েৰরং সমীপং আগচ্ছতীতি, মজ্ঝিমযামে পন তং মতকল়েৰরং গুহাযং পৰিসতীতি, পচ্ছিমযামে মতকল়েৰরস্স মংসং সত্থেন ছিন্দতীতি. অথ সুপিনং পস্সিতভাৰং অত্তনো সমীপে সযন্তস্স একস্স সামণেরস্স আরোচেসি. আরোচেত্ৰা চ পরিত্তং ভণেত্ৰা নিসীদন্তস্সেৰ জেতৰনত্থেরো তং পক্কোসিত্ৰা জেতৰনৰিহারং তস্স নিয্যাদেসি. তিসাসনধজত্থেরো চ জেতৰনৰিহারে নিসীদিত্ৰা ¶ গন্থং ৰাচেত্ৰা নিসীদি. মিঙ্ঘ ব্রহ্মনরপতিরাজা চ তস্স অনুগ্গহিতং অকাসি.

পচ্ছা কলিযুগে সোল়সাধিকে নৰৰস্সসতে সম্পত্তে হংসাৰতীনগরিন্দো অনেকসেতিভিন্দো নাম রাজা রতনপূরনগরং ৰিজযিত্ৰা একং ৰিহারং কারাপেত্ৰা তস্স অদাসি.

সো চ তিসাসনধজত্থেরো অরিমদ্দননগরে অরহন্ত গণৰংসিকোতি দট্ঠব্বো.

তস্স পন সিস্সা অনেকসতপ্পমাণা লজ্জিনো অহেসুং. তেসু পন সিস্সেসু ৰরবাহুত্থেরো ভূমিনিখানেন গরৰাসিত্থেরো মহারট্ঠগামৰাসিনো তযো মহাথেরাতি ইমে পঞ্চ থেরা ৰিসেসতো পরিযত্তিকোৰিদাতি.

তিসাসনধজত্থেরো চ মহল্লককালে অনাপান সতিকম্মট্ঠানং গহেত্ৰা অরঞ্ঞং পৰিসিত্ৰা ৰিৰেকট্ঠানং গণ্হি. তদা জেতৰনগণাদযো অরহন্ত গণৰংসাযেৰ. অপরভাগেযেৰ তেসং সিস্সানুসিস্সপরম্পরাসু কেচি ভিক্খূ সিরচ্ছাদনং নানাৰণ্ণপ্পটিমণ্ডিতঞ্চ তালৰণ্টং গহেত্ৰা আচারৰিকারং আপজ্জিংসু.

কলিযুগে একৰস্সাধিকে সহস্সে সম্পত্তে উক্কংসিকো নাম রাজা ৰিহারং কারাপেত্ৰা তিসাসনধজত্থেরস্স সিস্সভূতস্স ৰরবাহুত্থেরস্স সিস্সভূতস্স মহারতনাকরস্স নাম থেরস্স অদাসি.

সো চ মহারতনাকরত্থেরো উক্কংসিকরঞ্ঞো সিরিসুধম্মরাজামহাধিপতীতি নামলঞ্ছং ছন্দালঙ্কারসদ্দনেত্তি নযেহি অলঙ্করিত্ৰা দস্সিতং রজিন্দরাজনামাভিধেয্যাদীপনিং নাম গন্থং অকাসি.

তঞ্চ গন্থং পরিৰিসোধনত্থায তিরোপব্বতাভিধেয্যস্স মহাথেরস্স নিয্যাদেসি. তিসাসনধজত্থেরস্স সিস্সভূতেসু ¶ মহারট্ঠগামৰাসীসু তীসু ভাতিকত্থেরেসু জেট্ঠো তিংসগুহাসুৰসন্তো পরিযত্তিং ৰাচেত্ৰা নিসীদি. সত্ৰৰরাজা চ তস্মিং থেরে অতিৰিয পসন্নো অহোসি. ঞ্ঞোঙ্করমি নামকস্স রঞ্ঞো কালেপি চূল়পিতা একং ৰিহারং কারাপেত্ৰা তস্সেৰ অদাসি. উক্কংসিকরঞ্ঞো কালেপি মঙ্গৰংনামকে পব্বতে ৰিহারং কারাপেত্ৰা তস্সেৰ অদাসি.

তেসু মহারট্ঠগামৰাসিত্থেরেসু মজ্ঝিমত্থেরোপি তিসাসনধজত্থেরস্স জেট্ঠভাতিকত্থেরস্স চ নিৰাসট্ঠানভূতে জেতৰনৰিহারেযেৰ গন্থং ৰাচেত্ৰা নিসীদি. কনিট্ঠত্থেরোপি তেসং নিৰাসট্ঠানভূতেসুযেৰ ৰিহারেসু গন্থং ৰাচেত্ৰা নিসীদি. এত্থ চ তিসাসনধজত্থেরো নাম লজ্জিঅলজ্জিৰসেন দুব্বিধো. যথাৰুত্তত্থেরো পন লজ্জীযে ৰাতি দট্ঠব্বো. অলজ্জী পন ইমস্মিং থেরপরম্পরাদস্সনে ন ইচ্ছি তব্বো. অলজ্জীভূতস্স পন তিসাসনধজত্থেরস্স ৰত্থুং ইধ অৰত্ৰা অজ্ঝুপেক্খিস্সাম, পযোজনাভাৰা গন্থস্স চ পপঞ্চূপগমনত্তাতি.

যোগিরঙ্গ নামকস্স রঞ্ঞো কালে জেয্যপুরে সুৰণ্ণগুহৰাসী মহাথেরো দক্খিণারামৰিহারৰাসী মহাথেরো চতুভূমিকৰিহারৰাসী মহাথেরো তোঙ্গভীলূ ৰিহারৰাসী মহাথেরো চ তিসাসনধজমহাথেরস্স সদ্ধিৰিহারিকাযেৰ. তেসং পন ৰত্থুম্পি গন্থৰিত্থারভযেন ন ৰদাম. লজ্জিগণৰংসিকা এতেতি ৰিজাননমেৰ হেত্থ পমাণন্তি.

কলিযুগে একসট্ঠাধিকে নৰৰস্সসতে সম্পত্তে ফগ্গুনমাসস্স জুণ্হপক্খদুতিযদিৰসে সুক্কৰারে রতনপূরনগরং দুতিযং মাপেত্ৰা ঞ্ঞোগীরঙ্গ নাম রাজা রজ্জং কারেসি. সীহসূরধম্মরাজাতিপি নামলঞ্ছং পটিগ্গণ্হি. তোচভীলূ ৰিহারৰাসীমহাথেরং ¶ উদ্দিস্স চতুভূমিকৰিহারং কারাপেসি. চত্তারি মহামুনিচেতিযানিপি কারাপেসি. ৰিহার চেতিযেসু অনিট্ঠিতেসুযেৰ সিন্নীনগরং নিক্খমিত্ৰা তত্থ ৰেরং ৰূপসমাপেত্ৰা পচ্চাগতকালে সঙ্খারসভাৰং অনতিক্কমনতো দিৰঙ্গতো অহোসি. অহোৰত সঙ্খারধম্মাতি. হোন্তি চেত্থ,–

সেয্যথা ৰাণিজানংৰ, ঘরগোল়িকরূপকং;

তংতংদিসং ভমিত্ৰাৰ, সীসং ঠপেতি উত্তরং;

এৰং লোকম্হি সত্তা চ, সন্ধিচুতীনমন্তরে;

যথা তথা ভমিত্ৰাৰ, অন্তে ঠপেন্তি সন্তনুন্তি;

কলিযুগে সত্তসট্ঠাধিকে নৰৰস্সসতে ফগ্গুনমাসস্স কাল়পক্খতেরসমিযং তস্স জেট্ঠপুত্তো পিতু সন্তকং রজ্জং গণ্হি. মহাধম্মরাজাতি নামলঞ্ছম্পি পটিগ্গণ্হি. পিতু কালে অনিট্ঠিতানি চেতিযানি পুন কারাপেসি. চতুভূমিকৰিহারঞ্চ নিট্ঠং গমাপেত্ৰা তোৰিভীলূ মহাথেরস্স পরলোকং গন্ত্ৰা অৰিজ্জমানতায চতুভূমিকৰিহারৰাসী মহাথেরস্স দস্সামীতি অন্তেপুরং পক্কোসাপেসি. থেরো দ্ৰে ৰারানি পক্কোসিযমানোপি নাগচ্ছি. ততিয ৰারে পন বহূ সদ্ধিৰিহারিকা অন্তেপুরং গন্ত্ৰা পৰিসথ, ন হি সক্কা রঞ্ঞা পক্কোসিতে পটিক্খিপিতুন্তি আহংসু.

অথ থেরো এৰমাহ,- অহং আৰুসো রট্ঠপীল়নপিণ্ডপাতং ভুঞ্জিতুং ন ইচ্ছামি, এৰম্পি সচে তুম্হে ইচ্ছথ রঞ্ঞো সন্তিকং গন্তুং, এৰং সতি ইদানি রঞ্ঞো সন্তিকং অহং গমিস্সামীতি অন্তেপুরং পাৰিসি. পৰিসিত্ৰা রঞ্ঞা সদ্ধিং সল্লাপং কত্ৰা অযং ৰিহারো অরঞ্ঞৰাসীনং ভিক্খূনং অসপ্পাযোতি পটিক্খিপি. এৰং পন ভন্তে সতি তস্মিং ৰিহারে নিসীদিযমানং থেরং উপদিস্সথাতি ¶ . খণিত্তিপাদৰিহারৰাসী মহারাজ থেরো পরিযত্তিৰিস্সারদো সিক্খাকামো, তস্স দাতুং ৰট্টতীতি. অথ রাজা তস্স ৰিহারং অদাসি. মহাসঙ্ঘনাথোতি নামলঞ্ছম্পি অদাসি. সো তত্থ পরিযত্তিং ৰাচেত্ৰা নিসীদি.

তস্স পন ৰিহারস্স পরিৰারভূতেসু চত্তালীসায ৰিহারেসু উত্তরায অনুদিসায একস্মিং ৰিহারে ৰসন্তো ৰরাভিসঙ্ঘনাথো নাম থেরো মণিকুণ্ডলৰত্থুং মরম্মভাসায অকাসি. পচ্ছিমায অনুদিসায একস্মিং ৰিহারে ৰসন্তো একো থেরো সত্তরাজধম্মৰত্থুং অকাসি.

তস্মিঞ্চ কালে ভামঅঙ্ক্যো আচারঅঙ্ক্যোতি দ্ৰিন্নং ভিক্খূনঞ্চ লোকধম্মেসু ছেকতায দ্ৰে ৰিহারে কত্ৰা অদাসি. তে পন দ্ৰে থেরা ৰেদসত্থকোৰিদা, পরিযত্তিপটিপত্তীসু পন মন্দা, রামঞ্ঞরট্ঠতো আগতা. তে পন থেরপরম্পরায ন গণন্তি পোরাণা.

কলিযুগে তিসত্ততাধিকে নৰৰস্সসতে সম্পত্তে মহামুনিচেতিযস্স পুরত্থিমদিসাভাগে চত্তারো ৰিহারে কারাপেত্ৰা চতুন্নং থেরানং অদাসি. তে চ থেরা তত্থ নিসীদিত্ৰা সাসনং পগ্গণ্হিংসু.

তস্মিংযেৰ কালে বদরৰনৰাসী নাম একোপি থেরো অত্থি. সোপি পরিযত্তিৰিসারদো ছপ্পদৰংসিকো. সো চ থেরো যাৰজীৰং যথাবলং সাসনং পগ্গণ্হিত্ৰা দুতিযভৰে চলঙ্গনগরে একিস্সা ইত্থিযা কুচ্ছিম্হি পটিসন্ধিং গণ্হি. দসমাসচ্চযেন কলিযুগে চত্তালীসাধিকে নৰৰস্সসতে সম্পত্তে বুধৰারে ৰিজাযিত্ৰা তেরসৰস্সিককালে সাসনে পব্বজিত্ৰা পরিযত্তিং উগ্গণ্হি. সিরিখেত্তনগরিন্দো রাজা সিরিখেত্তনগরং আনেত্ৰা সিরিখেত্তনগরে সামণেরোতি নামেন পাকটো হুত্ৰা কলিযুগে চতুপণ্ণাসাধিকে ¶ নৰৰস্সসতে সম্পত্তে পন্নরসৰস্সিককালে ৰেস্সন্তরজাভকং কব্যালঙ্কারৰসেন বন্ধি. পরিপুণ্ণৰীসতিৰস্সকালে সিরিখেত্তনগরেযেৰ সিরিখেত্তনগরিন্দো ৰেরৰিজযো নাম রাজা অনুগ্গহেত্ৰা উপসম্পদভূমিযং পতিট্ঠাতি. পচ্ছিমপক্খাধিকো নাম রাজা সিরিখেত্তনগরং অত্তনো হত্থগতং অকাসি. তস্মিঞ্চ কালে তং থেরং আনেত্ৰা রতনপূরনগরে ৰসাপেসি. সূরকিত্তি নাম রঞ্ঞো কনিট্ঠভাতিকো এরাৰতীনদীতীরে চতুভূমিকৰিহারং কারাপেত্ৰা তস্স থেরস্স অদাসি. রাজা চ তিপিটকালঙ্কারোতি নামলঞ্ছং অদাসি.

কলিযুগে ৰস্সসহস্সে সম্পত্তে ফগ্গুনমাসস্স পুণ্ণমিযং সট্ঠিৰস্সিকো হুত্ৰা তিরিযপব্বতং গন্ত্ৰা অরঞ্ঞৰাসং ৰসি. দ্ৰে ৰস্সাধিকে ৰস্সসহস্সে রাজা তস্মিং ৰিহারং কারাপেত্ৰা তস্সেৰ থেরস্স অদাসি. সো পন তিপিটকালঙ্কারত্থেরো সিরিখেত্তনগরে নৰঙ্গকন্দরে পত্তলঙ্কস্স অতুলৰংসত্থেরস্স ৰংসিকো. সিরিখেত্তনগরে নৰঙ্গকন্দরে সুৰণ্ণৰিহারে ৰসন্তস্স থেরস্স কিত্তিঘোসো সব্বত্থ পত্থরি. জেয্যপুরে এরাৰতীনদীতীরে চতুভূমিকৰিহারে ৰসনকালে অট্ঠসালিনিযা আদিতো ৰীসতি গাথানং সংৰণ্ণনং অকাসি. সূরকিত্তিনামকস্স কনিট্ঠভাতিকস্স যাচনমারব্ভ যসৰড্ঢনৰত্থুঞ্চ অকাসি. তিরিযপব্বতে ৰসনকালে ৰিনযালঙ্কারটীকং অকাসি. পচ্ছিমপক্খাধিকরঞ্ঞো কালে মহাসঙ্ঘনাথত্থেরং সঙ্ঘরাজভাৰে ঠপেসি. সো চ সঙ্ঘরাজা অতিৰিয পরিযত্তি ৰিসারদো. তস্মিঞ্চ কালে রতনপূরনগরেপি অরিযালঙ্কারত্থরো নাম একো অত্থি. সো পন তিপিটকালঙ্কারত্থেরেন সমঞ্ঞাণথামো. ৰযসাপি সমানৰস্সিকা.

তেসু তিপিটকালঙ্কারত্থেরো গন্থন্তরবহুস্সুতট্ঠানে ¶ অধিকো, অরিযালঙ্কারত্থেরো পন ধাতুপচ্চযৰিভাগট্ঠানে অধিকোতি দট্ঠব্বো. পচ্ছা পন উক্কংসিকরঞ্ঞোকালে তেপি দ্ৰে থেরা রঞ্ঞো আচরিযা হুত্ৰা সাসনং পগ্গণ্হিংসু. তেসু অরিযালঙ্কারত্থেরো অপরভাগে কালঙ্করিত্ৰা তস্স থেরস্স সদ্ধিৰিহারিকস্স দুতিযারিযালঙ্কারত্থেরস্স রাজমণিচূল়চেতিযস্স সমীপে দক্খিণৰনারামং নাম ৰিহারং কারাপেত্ৰা অদাসি.

উক্কংসিকো নাম রাজা পন সাসনে বহুপ্পকারো. সো চ কলিযুগে ছনৰুতাধিকে নৰৰস্সসতে রজ্জং পত্তো. রজ্জং পন পত্ৰা সিরিধম্মাসোকরাজাৰিয চত্তারি ৰস্সানি অতিক্কমিত্ৰা মুদ্ধাভিসেকং পটিগ্গহেত্ৰা সিরিসুধম্ম রাজামহাধিপতীতি নামলঞ্ছম্পি পটিগ্গণ্হি. একস্মিং পন সমযে হংসাৰতীনগরং গন্ত্ৰা তত্থ নিসীদি. অথ রামঞ্ঞরট্ঠৰাসিনো এৰমাহংসু,- মরম্মিকভিক্খূ নাম পরিযত্তিকোৰিদা ৰেদসত্থঞ্ঞুনো নত্থীতি. তং সুত্ৰা রাজা চতুভূমিকৰিহারৰাসিত্থেরস্স সন্তিকং সাসনং পেসেসি,-তিংসৰস্সিকা চত্তালীসৰস্সিকা ৰা পরিযত্তিকোৰিদা ৰেদসত্থঞ্ঞুনো ভিক্খূ রামঞ্ঞরট্ঠং মম সন্তিকং পেসেথাতি. অথ চতুভূমি কৰিহারৰাসিত্থেরো তিপিটকালঙ্কারং তিলোকালঙ্কারং তিসাসনালঙ্কারঞ্চ সদ্ধিং তিংসমত্থেহি ভিক্খূহি পেসেসি. হংসাৰতীনগরং পন পত্ৰা মোধোচেতিযস্স পুরত্থিমভাগে ৰিহারে কারাপেত্ৰা তেসং অদাসি.

উপোসথদিৰসেসু সুধম্মসালাযং রামঞ্ঞরট্ঠৰাসিনো পরিযত্তিকোৰিদে ৰেদসত্থঞ্ঞুনো সন্নিপাতাপেত্ৰা তেহি তীহি থেরেহি সদ্ধিং কথাসল্লাপং কারাপেসি. অথ রামঞ্ঞরট্ঠৰাসিনো ভিক্খূ এৰমাহংসু,– পুব্বে পন মযং মরম্মরট্ঠে পরিযত্তিকোৰিদা ৰেদসত্তঞ্ঞুনো নত্থীতি মঞ্ঞাম, ইদানি মরম্মরট্ঠৰাসিনো অতিৰিয পরিযত্তি কোৰিদা ¶ ৰেদসত্থঞ্ঞুনোতি. অপরভাগে কলিযুগে ছনৰুতাধিকে নৰৰস্সসতে সম্পত্তে রাজা রতনপূরনগরং পচ্চাগচ্ছি.

তেপি থেরা পচ্চাগন্তুকামা রামঞ্ঞরট্ঠে পধানভূতস্স তিলোকগরূতি নামধেয্যস্স মহাথেরস্স সন্তিকং ৰন্দনত্থায অগমংসু.

তদা তিলোকগরুত্থেরোপি তেহি সদ্ধিং সল্লাপং কত্ৰা এৰমাহ,-তুম্হেসু পন তিপিটকালঙ্কারত্থেরো পঠমং আৰাসৰিহারং লভিস্সতীতি. কস্মা পন ভন্তে এৰম ৰোচাতি ৰুত্তে অযং পন পিণ্ডায চরন্তোপি অন্তরামগ্গে ৰেল়ুৰেত্তাদীনি লভিত্ৰা গহেত্ৰা ৰিহারে পটিসঙ্খরণং অকাসি, তস্মাহং এৰং ৰদামি, লোকে ৰিহারে পটিসঙ্খরণসীলা ভিক্খূ সীঘমেৰ আৰাসৰিহারং লভন্তীতি হি পোরাণত্থেরা আহংসূতি আহ.

তেপি রতনপূরনগরং পচ্চাগচ্ছিংসু. তিলোকগরুত্থেরস্স ৰচনানুরূপমেৰ তিপিটকালঙ্কারত্থেরো সব্বপঠমং আৰাসৰিহারং লভীতি.

কলিযুগে পন নৰৰস্সাধিকে ৰস্সসহস্সে সম্পত্তে রঞ্ঞো কনিট্ঠো কালমকাসি. অথং রঞ্ঞো পুত্তো উচ্চনগরভোজকো বালজনেহি সন্থৰং কত্ৰা তেসং ৰচনং আদিযিত্ৰা পচ্চূসকালে পিতরং ঘাতেতুকামো অন্তেপুরং সহসা পাৰিসি.

রাজাৰ অনগ্ঘং মুদ্দিকং গহেত্ৰা নন্দজেয্যেন নাম অমচ্চেন রাজযোধেন নাম অমচ্চেনচ সদ্ধিং অঞ্ঞতরৰেসেন নগরতো নিক্খমিত্ৰা রজতৰালুকনদিং সম্পত্তো.

তস্মিঞ্চ কালে একো সামণেরো মাতাপিতূনং গেহে পিণ্ডপাতং আনেস্সামীতি খুদ্দকনাৰায নদিযং আগচ্ছি. অথ ¶ তং সামণেরং দিস্ৰা রাজা এৰমাহ,- অম্হে ভন্তে পরতীরং নাৰায আনেহীতি. সামণেরো চ আহ,-সচে উপাসক তুম্হে পরতীরং আনেয্যং, ভত্তকালং অতিক্কমেয্যন্তি. অথ রাজা অম্হেযেৰ সীঘং আনেহি, ইমং মুদ্দিকং দস্সামীতি অস্সাসেত্ৰা আনেতুং ওকাসং যাচি. অথ সামণেরো কারুঞ্ঞপ্পত্তং ৰচনং সুত্ৰা পরতীরং আনেসি.

অথ চতুভূমিকৰিহারং পত্ৰা তস্মিং ৰিহারে থেরস্স সব্বম্পি কারণং আরোচেত্ৰা এৰমাহ,-সচে ভন্তে অম্হে গণ্হিতুং আগচ্ছয্য, তে নিৰারেথাতি. থেরোচ মযং মহারাজ সমণা ন সক্কা এৰং নিৰারেতুং, এৰম্পি একো উপাযো অত্থি,-নিসিন্নৰিহারৰাসিত্থেরো পন গিহিকম্মেসু অতিৰিয ছেকো, তং পক্কোসেত্ৰা কারণং চিন্তেতুং যুত্তন্তি. অথ তং পক্কোসেত্ৰা তমত্থং আরোচেত্ৰা রাজা ইদমৰো চ,- সচে ভন্তে অম্হে গণ্হিতুং আগচ্ছেয্যুং, অথ কেনচিদেৰ উপাযেন তে নিৰারেথাতি. অথ সো থেরো এৰমাহ,-তেন হি মহারাজ মা কিঞ্চি সোচি মাভাযি ৰিহারমজ্ঝে সিরিগব্ভং পৰিসিত্ৰা নিসীদথাতি ৰত্ৰা পিণ্ডায অচরন্তে ভিক্খুসামণেরে সন্নিপাতাপেত্ৰা ৰিসুং ৰিসুং দণ্ডহত্থা হুত্ৰা একস্সপি পুরিসস্স ৰিহারং পৰিসিতুং ওকাসং মা দেথাতি ৰত্ৰা সেনংৰিয ব্যূহেসি. সামন্তৰিহারেসুপি ৰসন্তে ভিক্খুসামণেরে পক্কোসি. তদা কির আগন্ত্ৰা সন্নিপাতানং ভিক্খুসামণেরানং অতিরেকসহস্সমত্তং অহোসি. থেরো তে ৰিহারে দ্ৰারকোট্ঠকেসু আগতমগ্গে চ ৰিসুং ৰিসুং দণ্ডহত্থা হুত্ৰা আরক্খণত্থায ঠপেসি, যথা ৰড্ঢকী সূকরো ব্যগ্ঘস্স নিৰারণত্থায ৰিসুং ৰিসুং সূকরে সংৰিধায ঠপেসীতি. অথ পুত্তস্স যোধাপি রাজানং গহেতুং ন সক্কা, ভিক্খু সামণেরানং ¶ গারৰৰসেন বলক্কারেন মারেত্ৰা পৰিসিতুং ন ৰিসহন্তি, ভিক্খু সামণেরানং বাহুল্লতায চ.

তস্মিংযেৰ সংৰচ্ছরে অস্সযুজমাসস্স কাল়পক্খপঞ্চমিতো যাৰ কত্তিকমাসস্স কাল়পক্খপঞ্চমী ৰিহারেযেৰ রাজা নিলীযিত্ৰা নিসীদি. অথ অন্তেপুরৰাসিকা অমচ্চা পুত্তং অপনেত্ৰা রাজানং আনেত্ৰা রজ্জে ঠপেসুং. রাজা চ পুন রজ্জং পত্ৰা ৰিহারে নিসিন্নকালে মা ভাযি মহারাজ ত্ৰং জিনেস্সতীতি রঞ্ঞো আরোচেন্তস্স ৰেদসত্থঞ্ঞুনো একস্স ভিক্খুস্স চঞ্ঞিঙ্খুচেতিযস্স এসন্নট্ঠানে একং ৰিহারং কারাপেত্ৰা অদাসি. ধম্মনন্দরাজগুরূতি নামলঞ্ছম্পি অদাসি. তস্স পন ৰিজাতট্ঠানভূতং গামং নিস্সায মরম্মৰোহারেন ‘যে নে না সে যাং ৰ’ ইতি সমঞ্ঞা অহোসি.

রাজা চ পুন রজ্জং পত্ৰা তস্মিংযেৰ সংৰচ্ছরে কত্তিকমাসস্স কাল়পক্খচুদ্দসমিযং সব্বেপি মহাথেরে নিমন্তেত্ৰা রাজগেহং পৰেসেত্ৰা পিণ্ডপাতেন ভোজেসি. অথ রাজা এৰমাহ,-চতুভূমিকৰিহারৰাসিত্থেরো সম্পরাযিকত্থাৰহো আচরিযো, নিসিন্নৰিহারৰাসিত্থেরো পন দিট্ঠধম্মিকত্থাৰহোতি এৰং রাজাৰংসে ৰুত্তং. পোরাণপোত্থকেসু পন চতুভূমিকৰিহার ৰাসিত্থেরো একন্তসমণো আচরিযো, নিসিন্নৰিহারৰাসিত্থেরো পন যোধারহো যোধকম্মে ছেকোতি রাজা অহাতি ৰুত্তং. রাজা কির সম্পরাযিকত্থং অনুপেক্খিত্ৰা দিন্নকালে নিসিন্নৰিহারত্থেরস্স ন অদাসি, কদাচি কদাচি পন দিট্ঠধম্মিকত্থং অনুপ্পেক্খিত্ৰা তস্স ৰিসুং অদাসীতি. এত্থ চ যস্মা নিসিন্নৰিহার ৰাসিত্থেরো রঞ্ঞো ভীযেহি নিৰারণত্থায আরক্খং অকাসি, ন পরেসং ৰিহেঠনত্থায, আণত্তিকপ্পযোগা চ ন দিস্সতি, তস্মা নত্থি আপত্তিদোসো. সদ্ধাতিস্সরঞ্ঞো ভযেহি ¶ নিৰারণত্থং অরহন্তেহি থেরেহি কতপ্পযোগোৰিয দট্ঠব্বো.

চতুভূমিকৰিহার ৰাসিত্থেরো পন খণিত্তিপাদগামে জাতো, অরিমদ্দনপুরে অরহন্তত্থেরগণপ্পভৰো, যত্থ কত্থচি গন্ত্ৰা অঞ্ঞেসং ভিক্খূনং আচারং যথাভূতং জানিত্ৰা তেহি চতুপচ্চযসম্ভোগো ন কভপুব্বো, অন্তমসো উদকম্পি ন পিৰিতপুব্বো, তংতংট্ঠানম্পি চম্মখণ্ডং গহেত্ৰাযেৰ গমনসীলো. উক্কংসিকরাজা পন সিরিখেত্তনগরে দ্ৰত্তপোঙ্করঞ্ঞা কারাৰিতচেতিযসণ্ঠানং গহেত্ৰা রাজমণিচূল়ং নাম চেতিযং অকাসি. তং পন চেতিযং পরিমণ্ডলতো তিহত্থসতপ্পমাণং, উব্বেধতোপি এত্তকমেৰ. তস্স পন চেতিযস্স চতূসু পস্সেসু চত্তারো ৰিহারেপি কারাপেসি, পুরত্থিমপস্সে পুব্বৰনারামো নাম ৰিহারো, দক্খিণপস্সে পন দক্খিণৰনারামো নাম, পচ্ছিমপস্সে পচ্ছিমৰনারামো নাম, উত্তরপস্সে উত্তরৰনারামো নাম. তেসু চতূসু ৰিহারেসু উত্তরৰনারামো নাম ৰিহারো অসনিপাভগ্গিনা ডয্হিত্ৰা ৰিনস্সি. অৰসেসে পন তযো ৰিহারে পরিযত্তিকোৰিদানং তিণ্ণং মহাথেরানং অদাসি. নাম লঞ্ছম্পি তেসং অদাসি. পচ্ছিমস্স রঞ্ঞো কালেযেৰ উত্তরপস্সে ৰিহারং কারাপেসি.

তস্মিং পন চেতিযে ছত্তং অনারোপেত্ৰাযেৰ সো রাজা দিৰঙ্গতো. তেসু পন চতূসু ৰিহারেসু নিসিন্নানং থেরানং দক্খিণৰনারামৰিহারৰাসীমহাথেরো কচ্চাযনগন্থস্স অত্থং ছব্বিধেহি সংৰণ্ণনানযেহি অলঙ্করিত্ৰা মরম্মভাসায সংৰণ্ণেসি. পচ্ছিমৰনারামৰিহার ৰাসিত্থেরো পন ন্যাসস্স সংৰণ্ণনং ছহি নযেহি অলঙ্করিত্ৰা অকাসি.

কলিযুগে পন দসৰস্সাধিকে সহস্সে সম্পত্তে তস্স ¶ রঞ্ঞো পুত্তো সিরিনন্দসুধম্মরাজাপৰরাধীপতি রজ্জং কারেসি. পিতুনো রাজগেহং ভিন্দিত্ৰা ৰিহারং কারাপেত্ৰা তিলোকালঙ্কারস্স নাম মহাথেরস্স অদাসি. তিলোকালঙ্কারত্থেরো চ নাম তিপিটকালঙ্কারত্থেরেন সমঞ্ঞাণথামস্স অরিযালঙ্কারত্থেরস্স সিস্সোতি দট্ঠব্বো. অযঞ্চত্থো হেট্ঠা দস্সিতো. জেয্যপুরে চতুভূমিকঅতুলৰিহারং কারাপেত্ৰা দাট্ঠানাগরাজগুরুত্থেরস্স অদাসি. সো চ থেরো নিরুত্তিসারমঞ্জূসং নাম ন্যাসসংৰণ্ণনং অকাসী.

কলিযুগে দ্ৰাদসাধিকে ৰস্সসহস্সে সম্পত্তে ফগ্গুনমাসে সোতাপন্না নাম আরক্খদেৰতা অঞ্ঞত্থ গমিস্সামাতি আহংসূতি নগরা সুপিনং পস্সন্তা হুত্ৰা বহূসন্নিপতিত্ৰা দেৰপূজং অকংসু. দেৰতানং পন সঙ্কমনং নাম নত্থি, পুব্বনিমিত্তমেৰতন্তি দট্ঠব্বং.

তস্মিঞ্চ কালে চিনরঞ্ঞো যোধা আগন্ত্ৰা মরম্মরট্ঠং দূসেসুং. সাসনং অব্ভপ্পটিচ্ছন্নো ৰিয চন্দো দুব্বলং অহোসি.

কলিযুগে তেৰীসাধিকে ৰস্সসহস্সে সম্পত্তে তস্স রঞ্ঞো কনিট্ঠো মহাপৰরধম্মরাজালোকাধিপতি নাম রাজা রজ্জং কারেসি. তস্মিঞ্চ কালে লোকসঙ্কেতৰসেন পুঞ্ঞং মন্দং ভৰিস্সতীতি ৰেদসত্থঞ্ঞূহি আরোচিতত্তা লোকসঙ্কেতৰসেনেৰ অভিনৰপুঞ্ঞুপ্পাদনত্থং খন্ধৰারগেহং কারাপেত্ৰা তাৰকালিকৰসেন সঙ্কমিত্ৰা নিসীদি. ততো অপরভাগে উত্তরগেহং ভিন্দিত্ৰা তস্মিংযেৰ ঠানে ৰিহারং কারাপেত্ৰা একস্স মহাথেরস্স অদাসি.

দক্খিণগেহং পন নগরস্স পুরত্থিমদিসাভাগে ৰিহারং কারাপেত্ৰা অগ্গণম্মালঙ্কারত্থেরস্স অদাসি. সো চ থেরো কচ্চাযনগন্থস্সচেৰ অভিধম্মত্থসঙ্গহস্স চ মাতিকাধাতুকথাযমকপট্ঠানানঞ্চ ¶ অত্থং মরম্মভাসায যোজেসি.

উপরাজা চ মহাসেতুনো পমুখে ঠানে সোৰণ্ণমযৰিহারং কারাপেত্ৰা উত্তরগেহৰিহার ৰাসিত্থেরস্স অন্তেৰাসিকস্স জিনারামত্থেরস্স অদাসি. তস্মিংযেৰ ঠানে নানারতনৰিচিত্রং ৰিহারং কারাপেত্ৰা তস্সেৰ থেরস্স অন্তেৰাসিকস্স গুণগন্ধত্থেরস্স অদাসি.

সো পন থেরো ‘ছিন ৰ্ডিন’ গামে ৰিজাতো. ৰযে পন সম্পত্তে রতনপূরনগরং গন্ত্ৰা পরিযত্তিং উগ্গণ্হিত্ৰা ততো পুন নিৰত্তিত্ৰা বদুননগরে বদরগামে নিসীদিত্ৰা পচ্ছা ‘ছিন ৰ্ডিন’ গামে চতূহি পচ্চযেহি কিলমথো হুত্ৰা ৰসতি. তস্মিঞ্চ কালে গামে মোক্খস্স নাম পুরিসস্স সন্তিকে একং অনগ্ঘং মণিং রাজা লভিত্ৰা অতিৰ মমাযি. ‘ছিন ৰ্ডিন’ মোক্খমণীতি পাকটো অহোসি.

অথ উত্তরগেহৰিহারৰাসিত্থেরো আহ,- ‘ছিন ৰ্ডিন’ গামকে ন মণিযেৰ অনগ্ঘং, অথ খো একোপি থেরো গুণগন্ধো নাম পরিযত্তিকোৰিদো অনগ্ঘোযেৰাতি.

অথ তং সুত্ৰা রাজা তং পক্কোসেত্ৰা চতূহি পচ্চযেহি উপত্থম্ভেত্ৰা পূজং অকাসি.

সহস্সোরোধগামে গুণসারো নাম থেরো পলিণগামে সুজাতো নাম থেরো চ গুণগন্ধত্থেরস্স সিস্সাযেৰ অহেসুং.

একস্মিঞ্চ কালে তিরিযপব্বতৰিহারৰাসীমহাথেরো ভিক্খুসঙ্ঘমজ্ঝে অগ্গধম্মালঙ্কারত্থেরং কীল়নৰসেন এৰমাহ,- অম্হেসু আৰুসো অন্তরধারযমানেসু ত্ৰং লোকে একো গন্থকোৰিদত্থেরো ভৰিস্সসি মঞ্ঞেতি. অথ অগ্গধম্মালঙ্কারো চ এৰমাহ,-তুম্হেসু ভন্তে অন্তরধারযমানেসু মযং গন্থকোৰিদান ভৰেয্যামকো নাম ¶ পুগ্গলো লোকে গন্থকোৰিদো ভৰিস্সতীতি. পোরাণপোত্থকেসু পন অরিযালঙ্কারত্থেরো ননু পনিদানি মযং গন্থকোৰিদা ন তাৰ ভৰামাতি এৰমাহাতি ৰুত্তং. সো অগ্গধম্মালঙ্কারত্থেরোযেৰ রঞ্ঞা যাচিতো রাজৰংস. সঙ্খেপম্পি অকাসি. সো প্পন থেরো অমচ্চপুত্তো.

একস্মিঞ্চ কালে হীনাযাৰত্তকো একো মহাঅমচ্চো রঞ্ঞো সন্তিকা অত্তনা উপলদ্ধপরিভোগং সব্বং গহেত্ৰা ৰিহারং আগন্ত্ৰা অগ্গধম্মালঙ্কারত্থেরেন সদ্ধিং সল্লাপং অকাসি. সল্লাপং পন কত্ৰা সব্বং পরিভোগং থেরস্স দস্সেত্ৰা সচে ভন্তে ত্ৰং গিহি ভৰেয্যাসি, এত্তকং পরিভোগং লভিস্সতীতি আহ. থেরোপি এৰমাহ,-তুম্হাকং পন এত্তকো পরিভোগো অম্হাকং সমণানং ৰচ্চকুটিং অসুভভাৰনং ভাৰেত্ৰা পৰিসন্তানং পুঞ্ঞং কলং নাগ্ঘতি সোল়সিন্তি. কিঞ্চাপি ইদঞ্চ পন ৰচনং সাসনৰংসে অপ্পধানং হোতি, পুব্বাচরিযসীহেহি পন ৰুত্ত ৰচনং যাৰ অপাণকোটিকা সরিতব্বমেৰাতি মনসিকরোন্তেন ৰুত্তন্তি.

কলিযুগে পন চতুত্তিংসাধিকে ৰস্সসহস্সে সম্পত্তে তস্স পুত্তো নরাৰরো নাম রাজা রজ্জং কারেসি. মহাসীহসূরধম্মরাজাতি নামলঞ্ছং পটিগ্গণ্হি. তস্স রঞ্ঞো কালে ‘সী খোং’ চেতিযস্স সমীপে জেতৰনৰিহারে গন্থং উগ্গণ্হন্তো একো দহরভিক্খু গন্থছেকোপি সমানো বালকালে বালচিত্তেন আকুলিতো হুত্ৰা ৰচ্চকূপে ৰাতাতপেহি বহিসুক্খভাৰেন পটিচ্ছাদিতে দণ্ডেন আলুলিত্ৰা দুগ্গন্ধোৰিয চিত্তসন্তানে পরিযত্তিৰাতাতপেহি বহিসুক্খভাৰেন পটিচ্ছাদিতে কেনচিদেৰ রূপারম্মণাদিনা আলুলিত্ৰা কিলেসসত্তিসঙ্খাতো দুগ্গন্ধো ৰাযিত্ৰা হীনাযাৰত্তিস্সামীতি চিন্তেত্ৰা গিহিৰত্থানি গহেত্ৰা সদ্ধিং সহাযভিক্খুহি নদীতিত্থং অগমাসি. অন্তরামগ্গে ¶ তাৰ ভিক্খুভাৰেনেৰ চেতিযং ৰন্দিস্সামীতি গিহিৰত্থানি সহাযকানং হত্থে ঠপেত্ৰা চেতিযপ্পমুখে লেণং পৰিসিত্ৰা ৰন্দিত্ৰা নিসীদি. অথ একা দহরিত্থী চেতিযঙ্গণং আগন্ত্ৰা বহি লেণং নিসীদিস্ৰা উদকং সিঞ্চিত্ৰা পত্থনং অকাসি,-ইমিনা পুঞ্ঞকম্মেন সব্বেহি অপাযাদিনুক্খেহি মোচেয্যামি, ভৰে ভৰে চ হীনাযাৰত্তকস্স পুরিসস্স পাদচারিকা ন ভৰেয্যামীতি.

অথ তং সুত্ৰা দহরভিক্খু এৰং চিন্তেসি,-ইদানি অহংহীনাযাৰত্তিস্সামীতি চিন্তেত্ৰা আগতো, অযম্পি দহরিত্থী হীনাযাৰত্তকস্স পুরিসস্স পাদচারিকা ন ভৰেয্যা মীতি পত্থনং অকাসি, ইদানি তং দহরিত্থিং কারণং পুচ্ছিস্সামীতি. এৰং পন চিন্তেত্ৰা বহি লেণং নিক্খমিত্ৰা তং দহরিত্থিংকারণং পুচ্ছি,-কস্মা পন ত্ৰং হীনাযাৰত্তকস্স পুরিসস্স পাদচারিকা ন ভৰেয্যামীতি পত্থনং করোসীতি. হীনাযাৰত্তকস্স ভন্তে পুরিসস্স পাদচারিকা ন ভৰেয্যামীতি ৰুত্তৰচনং বালপুরিসস্স পাদচারিকা ন ভৰেয্যামীতি ৰুত্তৰচনেন নানা ন হোতি, সদিসত্থকমেৰাতি ননু হীনাযা ৰত্তকো বালোযেৰ নাম, সচে পন ভন্তে হীনাযাৰত্তকো বালো নাম ন ভৰেয্য, কো নাম লোকে বালো ভৰেয্য, ভিক্খু নাম হি পরেহি দিন্নং চীৰরপিণ্ডপাতসেনাসনং পরিভুঞ্জিত্ৰা সুখং ৰসতি, সচে গন্থং উগ্গণ্হিতু কামো ভৰেয্য, যথাকামংযেৰ গন্থং উগ্গণ্হিতুং ওকাসং লভতি, এৰং পন অহুত্ৰা অলসিকোযেৰ ভুঞ্জিত্ৰা সযিত্ৰা নিসীদিতুং ইচ্ছেয্য, এৰম্পি যথাকামং ভুঞ্জিতুং সযিতুং ওকাসং লভতি, এৰম্পি সমানো পরস্স দাসো ভৰিস্সামি, দারস্স কিংকরো ভৰিস্সামীতি অকথেন্তোপি কথেন্তোৰিয হুত্ৰা হীনাযাৰত্তেয্য, সো লোকে অঞ্ঞেহি বালেহি অধিকো বালোতি অহং মঞ্ঞামি, সচে পন বালতরস্স ভরিযা ভৰেয্য, অহং বালতরী ভৰেয্যন্তি ¶ ৰুত্তে সো দহরভিক্খু সংৰেগং আপজ্জিত্ৰা বহিনগরদ্ৰারং নিক্খমিত্ৰা ৰানরগণেন ৰিনা ঝাযন্তোৰিয ৰানরো ঝাযিত্ৰা নিসীদি.

অথ সহাযকা আগন্ত্ৰা গিহিৰত্থানি গণ্হাহীতি পক্কোসিংসু. তস্মিং কালে সো দহরভিক্খু আগচ্ছথ ভৰন্তোতি ৰত্ৰা সব্বং কারণং তেসং আচিক্খিত্ৰা ইদানি পন ভৰন্তো হীনাযাৰত্তেহীতি সচে যো কোচি আগন্ত্ৰা মম সীসং মুগ্গরেন পহারেয্য, এৰং সন্তেপি হীনাযাৰত্তিতুং ন ইচ্ছামি, ইতো পট্ঠায যাৰ জীৰিতপরিযন্তা হীনাযাৰত্তিতুং মনসাপি ন চিন্তযিস্সামীতি ৰত্ৰা এরাৰতীনংদিং তরিত্ৰা জেয্যপুরং অগমাসি. তদা কির দহরিত্থী দেৰলাভৰয্য, ন মনুস্সিত্থীতি ৰদন্তি পণ্ডিতাতি.

জেয্যপুরং পন পত্ৰা পরিযত্তিকোৰিদানং মহাথেরানং সন্তিকে নযং গহেত্ৰা পুঞ্ঞচেতিযস্স দক্খিণদিসাভাগে একস্মিং ৰিহারে নিসীদি. পরিযত্তিং ৰাচেত্ৰা অথ কমেন তংতংদিসাহি ভিক্খুসামণেরা আগন্ত্ৰা তস্স সন্তিকে পরিযত্তিং উগ্গণ্হিংসু. আৰাসং পন অলভিত্ৰা কেচি ভিক্খুসামণেরা ছত্তানিপি ছাদিত্ৰা নিসীদিংসু.

একস্মিং কালে রাজা নিক্খমিত্ৰা পুঞ্ঞচেতিযং ৰন্দিস্সামীতি চেতিযঙ্গণং পাৰিসি. অথ ছত্তানি ছাদেত্ৰা নিসিন্নে ভিক্খূ দিস্ৰা গুহায সদ্ধিং ৰিহারং কারাপেত্ৰা তস্স ভিক্খুস্স অদাসি. তিলোকগরূতিপি নামলঞ্ছং অদাসি. সুখৰোহারত্থং পন ককারলোপং কত্ৰা তিলোগরূতি ৰোহরিংসু.

তস্স পন সদ্ধিৰিহারিকো সত্তৰস্সিকো তেজোদীপো নাম ভিক্খু পরিত্তটীকং অকাসি. অপরভাগে পন তিলোকালঙ্কারোতি নামলঞ্ছং অদাসি. এৰং তেজেদীপো নাম ভিক্খু নরাৰররঞ্ঞো কালে পরিত্তটীকং অকাসীতি দট্ঠব্বং. কেচি পন পচ্ছিমপক্খাধিকরঞ্ঞো কালেতি ৰদন্তি.

একস্মিং ¶ পন কালে তিরিযপব্বতৰিহারৰাসীমহাথেরো পাদচেতিযং ৰন্দনত্থায গন্ত্ৰা পচ্চাগতকালে কুখননগরে সুৰণ্ণগুহাযং জম্বুধজত্থেরস্স সন্তিকং পৰিসিত্ৰা তেন সদ্ধিং সল্লাপং অকাসি. তে চ মহাথেরা অঞ্ঞমঞ্ঞং পস্সিত্ৰা সল্লপিত্ৰা অতিৰিয পমোদিংসু. লোকস্মিঞ্হি বালো বালেন পণ্ডিতো পণ্ডিতেন সদ্ধিং অতিৰিয পমোদতীতি. তে চ দ্ৰে থেরা সমানৰস্সিকা. তিরিযপব্বতৰিহার ৰাসীমহাথেরো তেন সদ্ধিং সল্লাপং কত্ৰা পচ্চাগচ্ছি. জম্বুধজত্থেরো চ মগ্গং অচিক্খিতুং অনুগচ্ছি. অথ তিরিযপব্বতৰিহারৰাসীমহাথেরো জম্বুধজত্থেরং আহ,- অহং ভন্তে রাজৰল্লভো হোমি রাজগুরু,ত্ৰংযেৰ মম পুরতো গচ্ছাহীতি. অথ জম্বুধজত্থেরোপি তিরিযপব্বতৰিহারৰাসিত্থেরং আহ,-ত্ৰং ভন্তে রাজৰল্লভো ভৰসিরাজগুরু, লোকে রাজগুরু নাম পধানভাৰে ঠিতো, তস্মা ত্ৰংযেৰ মম পুরতো গচ্ছাহীতি. এত্থ চ দ্ৰেপি মহাথেরা অঞ্ঞমঞ্ঞং গারৰৰসেন লোকৰত্তং অপেক্খিত্ৰা এৰমাহংসূতি দট্ঠব্বং. তিরিযপব্বতৰিহারৰাসীমহাথেরোপি রতনপূরনগরং পত্ৰা রাজৰংসপব্বতং গন্ত্ৰা অরঞ্ঞৰাসং ৰসি.

অথ উক্কংসিকরাজা কনিট্ঠেন সূরকিত্তিনামেন সদ্ধিং মন্তেসি,-সচে ত্ৰং ৰনে থেরং পঠমং পস্সসি, ত্ৰংযেৰ ৰিহারং কারাপেত্ৰা থেরস্স দদাহি, সচে পনাহং পঠমং পস্সেয্য, অহং ৰিহারং কারাপেত্ৰা দদামীতি.

অথ কনিট্ঠা পঠমং পস্সিত্ৰা তিরিযপব্বতকন্দরে জেতৰনং নাম ৰিহারং কারাপেত্ৰা অদাসি. ইদঞ্চ ৰচনং সাধুজ্জনানং গুণং এৰকারং পীতিসোমনস্সং উপ্পজ্জি, তেন পুঞ্ঞকম্মেন তেন পীতিসোমনস্সেন সত্তক্খত্তুং দেৰরজ্জসম্পত্তিং সত্তক্খত্তুং মনুস্সরজ্জসম্পত্তিং পটিলভীতি ৰুত্তত্তা সাধুজ্জনানং গুণং অনুস্সরিত্ৰা পুঞ্ঞৰিসেসলাভত্থায ৰুত্তং.

তিরিযপব্বতৰিহারৰাসীমহাথেরো চ জম্বুধজত্থেরস্স ¶ গুণং উক্কংসিকরঞ্ঞো আরোচেসি. রাজা চ অতিৰিয পসীদিত্ৰা জম্বুধজোতি মূলনামে দীপসদ্দেন যোজেত্ৰা জম্বুদীপধজোতি নামলঞ্ছং অদাসি.

জম্বুধজত্থেরো চ নাম ধম্মনন্দত্থেরস্স সদ্ধিৰিহারিকা. ধম্মনন্দত্থেরো চ জোতিপুঞ্ঞত্থেরস্স সদ্ধিৰিহারিকো. তে চ থেরা অরহন্তগণৰংসিকা.

জম্বুধজত্থেরো পন ৰিনযপাল়িযা অট্ঠকথায চ অত্থ যোজনং মরম্মভাসায অকাসি. মণিরতনো নাম পন থেরো অট্ঠসালিনীসম্মোহৰিনোদনীকঙ্খাৰিতরণীঅট্ঠকথানং অভিধম্মত্থৰিভাৰনীসঙ্খপৰণ্ণনাল়ীকানঞ্চ অত্থং মরম্ম ভাসায যোজেসি.

মূলাৰাসগামে চ পুব্বারামৰিহারৰাসিত্থেরো গূল়ত্থ দীপনিং নাম গন্থং ৰিসুদ্ধিমগ্গগণ্ঠিপদত্থঞ্চ মূলভাসায অকাসি, নেত্তিপাল়িযা চ অত্থং মরম্মভাসায যোজেসি. সো পন থেরো পুব্বে গামৰাসী হুত্ৰা সীসৰেঠনতালপত্তানি গহেত্ৰা আচরিযপ্পৰেণীৰসেন ৰিনযৰিলোমাচারং চরি. পচ্ছা পন তং আচারং ৰিস্সজ্জিত্ৰা অরঞ্ঞৰাসং ৰসি. সোপি থেরো গম্ভীরঞাণিকো সদ্দত্থনযেসু অতিৰিয ছেকো.

কলিযুগে পন পঞ্চতিংসাধিকে ৰস্সসহস্সে সম্পত্তে কনিট্ঠো সিরিপৰরমহাধম্মরাজা নাম ভূপালো রজ্জং কারেসি. দব্বিমুখজাতস্সরে পন গেহং কারাপেত্ৰা নিসীদনতো দব্বিমুখজাতস্সরোতি নামং পাকটং অহোসি. তস্মিং পন জাতস্সরে জেয্যভূমিকিত্তিং নাম ৰিহারং কারাপেত্ৰা সিরিসদ্ধম্মপালত্থেরস্স অদাসি. বহূনম্পি গামৰাসী অরঞ্ঞৰাসী ভিক্খূনং অনুগ্গহং অকাসি. রতনপূরনগরস্মিঞ্হি দসসু ‘ঞ্য্ौং যাং’ রাজাংসেসু প্পচ্ছিমা পঞ্চ রাজানো অৰিচিনিত্ৰাযেৰ অলজ্জীলজ্জীমিস্সকৰসেন সাসনং পগ্গণ্হিংসু. তদা ¶ জিনসাসনং অব্ভন্তরে চন্দোৰিয অতিপরিসুদ্ধং ন অহোসি. এৰম্পি লজ্জিনো অত্তনো অত্তনো ৰংসানুরক্খণৰসেন ধম্মং পূরেতুং অনিৰারিতত্তা লজ্জীগণৰংসো ন ছিজ্জতি. তথা অলজ্জিনোপি অত্তনো অত্তনো আচরিযপ্পৰেণীৰসেন ৰিচরিংসু, তেন অলজ্জীগণৰংসোপি ন ছিজ্জতীতি দট্ঠব্বং. তস্স রঞ্ঞো কালে দেৰচক্কোভাসো নাম একো থেরো অত্থি, ৰেদসত্থঞ্ঞূ পিটকেসু পন মন্দোতি.

কলিযুগে পন অট্ঠতিংসাধিকে ৰস্সসহস্সে সম্পত্তে ৰেসাখমাসস্স কাল়পক্খঅট্ঠমিতো পট্ঠায লোকসঙ্কেতৰসেন উপ্পজ্জমানং ভযং নিৰারেতুং নৰগুহাযং তেন দেৰচক্কোভাসত্থেরেন কথিতনিযামেন পঠমং মরম্মিকভিক্খূ পট্ঠানপ্পকরণং ৰাচাপেসি. ততো পচ্ছা জেট্ঠমাসস্স জুণ্হপক্খপাটিপদদিৰসতো রামঞ্ঞরট্ঠৰাসিকে ভিক্খূ পট্ঠানপ্পকরণং ৰাচাপেসি. মহাছণঞ্চ কারাপেসি. রট্ঠৰাসিনোপি বহুপূজাসক্কারং কারাপেসি. তস্স কির রঞ্ঞো কালে পোত্থকং অট্ঠিভল্লিকরুক্খনিয্যাসেহি পরিমট্ঠং কত্ৰা মনোসিলায লিখিত্ৰা সুৰণ্ণেন লিম্পেত্ৰা পিটকং পতিট্ঠাপেসি. ততো পট্ঠায যাৰজ্জতনা ইদং পোত্থককম্মং মরম্মরট্ঠে অকংসূতি.

কলিযুগে সট্ঠাধিকে ৰস্সসহস্সে সম্পত্তে (অস্সযুজমাসস্স কাল়পক্খছট্ঠমিযং অঙ্গারৰারে) তস্স পুত্তো রজ্জং কারেসি. সিরিহাসীহসূরসুধম্মরাজাতি নামলঞ্ছম্পি পটিগ্গণ্হি. পিতু রঞ্ঞো গেহট্ঠানে চেতিযং কারাপেসি. তস্স পন মারজেয্যরতনন্তি সমঞ্ঞা অহোসি. তস্স পন রঞ্ঞো কালে সল্লাৰতিযা নাম নদিযা পচ্ছিমভাগে তুন্ননামকে গামে গুণাভিলঙ্কারো নাম থেরো সামণেরানং গামগ্গৰেসনকালে একংসং উত্তরাসঙ্গং কারাপেত্ৰা ¶ সীসৰেঠনতালপত্তানি পন ন গণ্হাপেত্ৰা তালৰণ্টমেৰ গণ্হাপেসি. একো গণো হুত্ৰা সপরিৰারেন সদ্ধিং তুন্নগামে নিসীদি. তুন্নগণোতি তস্স সমঞ্ঞা অহোসি. সো পন থেরো পাল়িঅট্ঠকথাটীকাগন্থন্তরেসু অধিপ্পাযং যথাভূতং ন জানাতি, অভিধম্মপিটকংযেৰ সিস্সানং ৰাচেত্ৰা নিসীদি.

তস্মিঞ্চ কালে কেতুমতীনগরে নিসিন্না বদ্ধন্না বুদ্ধঙ্কুরত্থের চিত্তত্থেরা, দীপযঙ্গনগরে উল়ুগামে নিসিন্নো সুনন্দত্থেরো, তলুপ্পনগরে জেয্যবহুঅন্ধগামে কল্যাণত্থেরোতি ইমে চত্তারো থেরা সামণেরানং গামপ্পৰেসনকালে একংসং উত্তরাসঙ্গং অকারাপেত্ৰা সীসৰেঠনতালপত্তানি অগ্গণ্হাপেত্ৰা চীৰরং পারুপাপেত্ৰা তালৰণ্টং গণ্হাপেত্ৰা সকলকগণং ওৰাদং কত্ৰা নিসীদিংসু. তে পন থেরা পাল়িঅট্ঠকথাটীকাগন্থন্তরেসু অধিপ্পাযং যথাভূভং জানিংসু, তীসুপি পিটকেসু কোৰিদা অহেসুং. ইচ্চেৰং সিরিমহাসীহসূরসুধম্মরঞ্ঞো কালে পারুপনভিক্খূহি নানা হুত্ৰা ৰিরূপং আপজ্জিত্ৰা একংসিকগণো নাম ৰিসুং ভিজ্জি, যথা পন অযমলং অযতো উট্ঠহিত্ৰা ৰিসদিসং হুত্ৰা ৰিরুদ্ধং হোতীতি. এৰং ভিজ্জমানাপি গণা রাজা পমাদো অনুস্সুক্কো হুত্ৰা অত্তনো অত্তনো রুচিৰসেনেৰ চরিত্ৰা নিসীদিংসু.

তেসু চ দ্ৰীসু গণেসু পারুপনগণে থেরা পাল়িঅট্ঠকথাটীকাগন্থন্তরেসু নীতত্থৰসেন ৰুত্তং ৰচনং নিস্সায নিক্কঙ্খা নিদ্দোসাৰ হুত্ৰা নিসীদিংসু. একংসিকগণে পন থেরা অত্তনো অত্তনো ৰাদো ন পাল়িযং ন চ অট্ঠকথাসু নেৰ টীকাসু নাপি গন্থন্তেরেসু দিস্সতি, ইমমত্থং অজানন্তা ইদমেৰ সচ্চং মোঘমঞ্ঞন্তি ৰত্ৰা কেচি পন সকসকসিস্সানং ওৰাদং অদংসু. এৰরূপাপি সিস্সা ওৰাদং পটিগ্গণ্হিংসু.

কেচি পন পাল়িযাদীসু সকৰাদস্স অনাগতভাৰং ঞত্ৰাযেৰ ¶ অপরিসুদ্ধচিত্তা হুত্ৰা সম্মাসম্বুদ্ধস্স ভগৰতো মুখং অনোলোকেত্ৰা সম্মাসম্বুদ্ধস্সেৰ ভগৰতো গুণং অনুস্সরিত্ৰা সকৰাদে আকাসে পসারিত হত্থোৰিয অপ্পতিট্ঠানোতি জানিত্ৰাযেৰ অম্হাকং ৰাদো সম্পত্তলঙ্কস্স সদ্ধম্মচারিত্থেরস্স ৰংসপ্পভৰোতি অনিস্সাযভূভম্পি নিস্সযং অকংসু. অভূতেন মহাথেরং সীলৰন্তং অব্ভাচিক্খিংসু. ফ্যসীনামকে গামে দিট্ঠধম্মিকসম্পরাযি কত্থং অনপেক্খন্তস্স হীনাযাৰত্তকস্স দুস্সীলস্স উপাসকস্স লঞ্জং দত্ৰা অম্হাকং ৰাদানুরূপং একং গন্থং করোহীতি উয্যোজেত্ৰা অনাগতে অনুভৰিযমানদুক্খতো অভাযিত্ৰা নিস্সযং গৰেসিংসূতি.

তস্মিংঞ্চ কালে নিগ্রোধপাল়িসুৰণ্ণৰিহারৰাসিত্থেরো গামৰাসীভিক্খু গণং সমিতিং কত্ৰা তস্স নাযকো হুত্ৰা সীসৰেঠনং অধারেন্তা অমঙ্গলভিক্খূ সাসনে মাতিট্ঠন্তূতি অরঞ্ঞৰাসীনং ভিক্খূনং গন্থং ৰিকোপেত্ৰা ততো ততো পব্বজেসুং. অথ হত্থিসালগামস্স পুরত্থিমায অনুদিসায সেট্ঠিতল়াকস্স দক্খিণায অনুদিসায ৰিহারে নিসিন্নে অতিরেকপণ্ণাসভিক্খূপি পব্বাজেস্সামাসি চিন্তেত্ৰা গামৰাসীভিক্খূ সন্নহিত্ৰা অগমাসি. অথ রাজা তমত্থং সুত্ৰা গামৰাসীগণোপি একো, অরঞ্ঞৰাসীগণোপি একো, গামৰাসীভিক্খূ অরঞ্ঞৰাসীভিক্খূ ৰিহেঠেসুং ন সক্কা, সকসকৰাদৰসেন সকসকট্ঠানে নিসীদি তব্বন্তি রাজলেখনং পেসেসি. অথ অরঞ্ঞৰাসীভিক্খূ সুখং ৰসিতুং ওকাসং লভিংসু.

কলিযুগে ছসত্ততাধিকে ৰস্সসহস্সে সম্পত্তে তস্স রঞ্ঞো পুত্তো মহাসীহসূরধম্মরাজাধিরাজা নাম রজ্জং কারেসি. সোযেৰ সূরজ্জরাজাতি চ সেতিভিন্দোতি চ ৰোহারিযতি.

তস্স ¶ রঞ্ঞো কালে সুৰণ্ণযানোলোকনগামৰাসীউক্কংসমালং নাম থেরং অন্তোযুধনাযকো একো অমচ্চো আনেত্ৰা রতনপূরনগরং পত্ৰা সুৰণ্ণকুক্কুটাচলে ৰিহারং কারাপেত্ৰা ঠপেসি.

সো পাল়িঅট্ঠকথাটীকাগন্থন্তরেসু অতিৰিয ছেকো. ৰণ্ণবোধনং নাম লিখননযঞ্চ অকাসি. তস্স গামস্স রাজূহি দিন্নৰসেন চেতিযজগ্গনকম্মে যুত্তকুলত্তা পন রঞ্ঞো আচরিযট্ঠানে অট্ঠপেত্ৰা অন্তোযুধনায কস্সেৰ পূজনত্থায নিয্যাদেসি. তস্সাপি রঞ্ঞো কালে সামণেরেহি গামপ্পৰসনকালে পারুপেত্ৰা পৰিসিতব্বন্তি একচ্চে ৰদিংসু. একচ্চে পন একংসং উত্তরাসঙ্গং কত্ৰা পৰিসিতব্বন্তি ৰদিংসু. এৰং অঞ্ঞমঞ্ঞং কলহং অকংসু.

তত্থ উক্কংসমালানামকো থেরো পারুপনগণে পধানো হুত্ৰা নানাগন্থেসু পারুপনৰত্তমেৰ আগতন্তি পকাসিংসু. একংসিকগণে পন তিরিযপব্বতৰিহারৰাসীমহাথেরা আচরিযপ্পৰেণীদস্সনৰসেন পারুপনৰাদং পটিক্খিপিংসু.

অথ রাজা চ ফলিকখচিতৰিহারৰাসিত্থেরং মেঘুচ্চনৰিহারৰাসিত্থেরং সুহত্থত্থেরং বুদ্ধঙ্কুরত্থেরঞ্চাতি ইমে চত্তারো থেরে ৰিনযৰিনিচ্ছকট্ঠানে ঠপেত্ৰা দ্ৰে পক্খা অত্তনো অত্তনো ৰাদং দস্সেন্তূতি আহ.

তে চ চত্তারো থেরা পাল়িঅট্ঠকথাটীকাগন্থন্তরেসু অকোৰিদা. তেসঞ্হি ঠপেত্ৰা রাজৰল্লভমত্তং অঞ্ঞো কোচি গুণৰিসেসো নত্থি রাজগুরুভাৰত্থায, যথা ব্যগ্ঘা রুক্খগচ্ছলতাদিপ্পটিচ্ছন্নে দুগ্গট্ঠানে নিসিন্নে মিগে খুদ্দকত্তা দুব্বলেপি গণ্হেতুং ন সক্কোন্তি, এৰমেৰ তে একংসিকত্থেরে ¶ রাজানং নিস্সায ঠিতে গন্থেসু অনাগতত্তা দুব্বলেপি ৰাদৰসেন অভিভৰিতুং ন সক্খিংসু. তেনেৰ পরসেনায বলৰতং জানিত্ৰা নিপচ্চকারং দস্সেত্ৰা ৰেরং সমেত্ৰা নিসিন্নো পণ্ডিতযোধোৰিয ৰাদং নিট্ঠং অপ্পাপেত্ৰাযেৰ পারুপনগণা নিসীদিংসূতি.

কলিযুগে পন পঞ্চনৰুতাধিকে ৰস্সসহস্সে সম্পত্তে তস্স পুত্তো মহারাজাধিপতি নাম রজ্জং কারেসি. পচ্ছা পন কালে তেরসাধিকে সতে ৰস্সসহস্সে চ সম্পত্তে রামঞ্ঞরট্ঠিনো রাজা তং অভিভৰিত্ৰাৰ অনীতত্তা পত্তহংসাৰতীতি পাকটং অহোসি.

তস্স রঞ্ঞো কালে কুখননগরে জালযুত্ত গামতো ঞাণৰরং নাম থেরং আনেত্ৰা আচরিযট্ঠানে ঠপেসি. সো পন থেরো পাল়িঅট্ঠকথাটীকাগন্থন্তরেসু অতিৰিয ছেকো. সুধম্মসভাযং পরিযত্তিৰাচকানং সোতারানং অত্থায অভিধম্মত্থসঙ্গহপ্পকরণস্স গণ্ঠিপদত্থং পঠমং অকাসি. ততো পচ্ছা অট্ঠসালিনিযং গণ্ঠিপদত্থং সুরাৰিনিচ্ছযঞ্চ অকাসি. ততো পচ্ছা তেন রঞ্ঞা যাচিতো অভিধানপ্পটীপিকায অত্থং মরম্মভাসায যোজেসি. রঞ্ঞো নামলঞ্ছং ছন্দোলঙ্কারসদ্দনেত্তিৰিদগ্গদণ্ডীব্যঞ্জীননযেহি অলঙ্করিত্ৰা রাজাধিরাজনামত্থপ্পকাসিনিং নাম গন্থম্পি অকাসি.

রাজা হত্থিসালনামকে দেসে কারাপিতগেহং ভিন্দিত্ৰা সতপ্পমাণে ৰিহারে কারাপেত্ৰা সব্বেসম্পি ৰিহারানং কিত্তিজেয্যৰাসট্ঠাপনন্তি নামানি পঞ্ঞাপেত্ৰা তস্সেৰ থেরস্স অদাসি. ৰিহারনামেনেৰ চ থেরস্সাপি তংসমঞ্ঞা অহোসি.

তস্মিঞ্চ কালে অক্যকরঞ্ঞো পিতুরঞ্ঞো চ কালে তেসং ¶ দ্ৰিন্নং গণানং ৰিৰাদৰসেন অৰিপ্পকতৰচনং পুন ৰিৰাদস্স ৰূপসমনত্থায অত্তনো অত্তনো ৰাদং কথাপেসি. পারুপনগণে সো থেরো পধানো হুত্ৰা একংসিকগণে পন পাসংসত্থেরো পধানো হুত্ৰা যথাযুদ্ধং অকাসি. অথ রাজা অতিৰিয রাজৰল্লভং জেয্যভূমিসুৰণ্ণৰিহারৰাসিত্থেরং তেসং ৰাদস্স ৰিনিচ্ছিন্দনত্থায ৰিনযচরেট্ঠানে ঠপেসি.

কিঞ্চাপি সো পন থেরো পাল়িঅট্ঠকথাটীকাগন্থন্তরেসু থোকংযেৰ জানকত্তা পরিযত্তিকোৰিদেসু অব্বোহারিকোযেৰ অহোসি, রাজৰল্লভত্তা পন রাজা যথাভূতং অজানিত্ৰা ৰিনযধরট্ঠানে ঠপেসি. যথা পন অযং পুরত্থিমদিসা, অযং পন পচ্ছিমদিসাভি এৰমাদিনা দিসাৰৰত্থানমত্তংযেৰ কাতুং সমত্থং নঙ্গলকোটিযা সংৰড্ঢন্তং পরিসুং রাজাগারে ধম্মৰিনিচ্ছকামপচ্চট্ঠানে ঠপেতি, এৰমেৰ রাজা অযং ঈদিসো অযং ঈদিসোতি অজানিত্ৰা ৰিনযধরট্ঠানে ঠপিতত্তা সো জেয্যভূমিসুৰণ্ণৰিহারৰাসিত্থেরো তেসং দ্ৰিন্নং পক্খানং দ্ৰীসু ৰাদেসু অযং ভূতো অযং অভূতোতি ৰত্তুং ন সক্কা, অদ্ৰারঘরে পৰিট্ঠকালেৰিয তদা অহোসি. সেয্যথাপি নাম মহিসো অত্তনো সমীপে ঠত্ৰা দেৰগীতং গাযিত্ৰা দেৰৰীণং ৰাদেন্তস্স দেৰগন্ধব্বস্স ৰেল়ুসলাকং পহরন্তস্স চ গামদারকস্স সদ্দেসু কিঞ্চি ৰিসেসং ন জানাতি, এৰমিদং সম্পদং দট্ঠব্বং. অথ রাজা মম ৰিজিতে যেযেভিক্খূ যংযংইচ্ছন্তি, তেতেভিক্খূ তংতংচরিত্ৰা যথাকম্মং নিসীদন্তূতি রাজলেখনং ঠপেসি. তেসং ৰিৰাদো তদা ন ৰূপসমি.

অপরভাগে তেরসাধিকে সতে সহস্সে চ সম্পত্তে রতনপূরনগরং ৰিনস্সি.

ততো পচ্ছা দুতিযে সংৰচ্ছরে রতনসিখনগরমাপকো রাজা রামঞ্ঞরট্ঠিন্দস্স রঞ্ঞো সেনং যৰখেত্ততো চাতকসকুণংৰিয ¶ অত্তনো পুঞ্ঞনুভাৰেন মরম্মরট্ঠতো নীহরিত্ৰা সকলম্পি রামঞ্ঞরট্ঠং অত্তনো হত্থগতং কত্ৰা রজ্জং কারেসি.

তস্মিঞ্চ কালে সকলমরম্মরট্ঠৰাসীনং চিত্তং পসাদেসি, যথা নাম সূরিযাতপেন মিলাযন্তানং কুমুদানং অনোতত্তোদকেন সিঞ্চিত্ৰা হরিতত্তং পাপেতি, এৰমেৰ রামঞ্ঞরট্ঠিন্দস্স সেনাবলাতপেহি দুক্খপ্পত্তানং মরম্মরট্ঠৰাসীনং গহট্ঠানঞ্চেৰ ভিক্খূনঞ্চ অত্তনো পুঞ্ঞানোতত্তোদকেন ছিঞ্চিত্ৰা কাযিকচেতসিকৰসেন দুৰিধম্পি সুখং উপ্পাদেসি.

সকলমরম্মরট্ঠৰাসিনো চ অযং অম্হাকং রাজা বোধিসত্তোতি ৰোহারিংসু. অথ একস্মিং মাসে চতূসু উপোসথদিৰসেসু ভিক্খুসঙ্ঘং নিমন্তেত্ৰা অন্তেপুরে পৰেসেত্ৰা পিণ্ডপাতেন ভোজেসি. রাজোরোধামচ্চেহি সদ্ধিং উপোসথং উপৰসি. সব্বেসম্পি রাজোরোধামচ্চানং গুণত্তযপাঠং সহ অত্থযোজনানযেন ৰাচগ্গতং কারাপেসি.

অথ বেলুৰগামৰাসীযসত্থেরং অনেত্ৰা অত্তনো আচরিযট্ঠানে ঠপেসি. মহাঅতুলযসধম্মরাজগুরূতি নামলঞ্ছম্পি অদাসি. ততো পট্ঠায পন অতুলত্থেরোতি নামেন পাকটো অহোসি. তস্মিঞ্চ কালে পারুপনগণপক্খাপলিণগামৰাসীসুজাতত্থেরাদযো সামণেরানং গামপ্পৰেসনকালে চীৰরং পারুপিত্ৰা পৰিসিতব্বন্তি অক্খরং লিখিত্ৰা রঞ্ঞো সন্তিকং সন্দেসপণ্ণং পৰেসেতি.

অথ একংসিকগণপক্খাপি অতুলত্থেরাদযো পুব্বেসং রাজূনং কালে অধিকরণং ৰূপসমি, ইদানি ৰূপসমিতকম্মং পুন ন উপ্পাদেতব্বন্তি লেখনং লিখিত্ৰা রঞ্ঞো সন্তিকং পেসেসি.

অথ রাজা দ্ৰিন্নং পক্খানং সকসকৰাদং কথেতুকামোপি ¶ ইদানি রাজপ্পটিসংযুত্তং কম্মং বহু অত্থি, তিট্ঠসু তাৰ সাসনপ্পটিসংযুত্তং কম্মং, রাজপ্পটিসংযুত্তমেৰ কম্মং পঠমং আরভিস্সামি, পচ্ছা সাসনপ্পটিসংযুত্তং কম্মং করিস্সামীতি রাজলেখনং ঠপেসি. অপরভাগে পন রাজা এৰং আণং ঠপেসি,-ইদানি মম ৰিজিতে সব্বেপি ভিক্খূ মম আচরিযস্স মতিং অনুৰত্তিত্ৰা চরন্তূতি.

অথ পারুপনগণভিক্খূপি একংসিকগণং অনুৰত্তেসুং রঞ্ঞো আণাৰসেন. সহস্সোরোধগামে পন দ্ৰে মহাথেরা অত্তনো পরিসং পারুপনৰসেনেৰ গামপ্পৰেসনৰত্তং পরিপূরিতব্বন্তি ওৰদিত্ৰা নিসীদিংসু.

তদা রঞ্ঞো আচরিযো যসত্থেরো তমত্থং সুত্ৰাতে পক্কোসাপেসি. তে চ আগন্ত্ৰা নগরং সম্পত্তকালে একো উপাসকো পসন্নো হুত্ৰা তেসং থেরানং পিণ্ডপাতেন উপট্ঠহি. অথ অতুলত্থেরো তে মহাথেরে দূরট্ঠানতো ৰালুকং আনেত্ৰা তস্স উপাসকস্স গেহসমীপে ওকিরাপেসি. ইদং ৰিনযধম্মস্স অননুলোমৰসেন চরন্তানং দণ্ডকম্মন্তি কোলাহলম্পি উপ্পাদেসি. অথ তেসং ৰালুকং আহরন্তানংযেৰ অঞ্ঞমঞ্ঞং সল্লপেসুং,-ইদানি ভন্তে ৰিনযধম্মানুলোমৰসেন আচরন্তানং অম্হাকং ঈদিসং কম্মং অসারুপ্পং, অহো অচ্ছরিযধম্মো লোকোতি একো থেরো আহ. অথ পন একো থেরো এৰমাহ,-ইদানি আৰুসো লোকপালা দেৰা ঈদিসং অধম্মকম্মং দিস্ৰাযেৰ অজ্ঝুপেক্খিত্ৰা অপ্পোস্সুকা নিসীদিতুং ন সক্কা, ইদানি লোকপালা দেৰা পমজ্জিত্ৰা নিসীদন্তি মঞ্ঞেতি.

তস্মিংযেৰ খণে ৰেগেন মেঘো উট্ঠহিত্ৰা অতুলত্থেরস্স ৰিহারে রাজগেহে চ একক্খণে অসনিযো নিপতিংসু. এৰং সমানোপি সো থেরো অতিমানথদ্ধতায সতিং ন লভি.

পুন ¶ রাজা ইদানি মম ৰিজিতে সব্বেপি ভিক্খূ মম আচরিযস্স মতিং অনুৰত্তন্তি ৰা মা ৰাতি অমচ্চে পুচ্ছি. অমচ্চাপি এৰং রঞ্ঞো আরোচেসুং,-ইদানি মহারাজ কুখননগরে নীপগামে নিসিন্নো একো মহাথেরো মুনিন্দঘোসো নাম অত্থি, সো পারুপনৰসেন অত্তনো পরিসং ওৰাদেত্ৰা বহুগুণং উপ্পাদেত্ৰা নিসীদতীতি.

অথ রাজা এৰমাহ,-তং পক্কোসেত্ৰা সুধম্মসসাযং মহাথেরে সন্নিপাভাপেত্ৰা তস্স থেরস্স ৰিনয পণ্ণত্তিং যথাভূতং অজানন্তস্স যথাভূতং সভাৰং দস্সেত্ৰা ওৰাদেন্তূতি.

অথ অমচ্চা তথা অকংসু. মহাথেরা চ সুধম্মসস্সযং সন্নিপতিত্ৰা তং পক্কোসেত্ৰা ওৰদিংসু. তেসু পন মহাথেরেসু একো থেরো ভূপালস্স সঙ্ঘরঞ্ঞো চ মুখং ওলোকেত্ৰা ভগৰতো পন সম্মাসম্বুদ্ধস্স মুখং অনোলোকেত্ৰা মুনিন্দঘোসত্থেরং এৰমাহ,- ইদানি আৰুসো ইমস্মিং মরম্মরট্ঠে সব্বেপি ভিক্খূ ভূপালস্স সঙ্ঘস্স রঞ্ঞো চ আণং অনুৰত্তিত্ৰা একংসিকাযেৰ অহেসুং, ত্ৰংযেৰ একো সদ্ধিং পরিসায পারুপনৰত্থং চরিত্ৰা নিসীদসি, কস্মা পন ত্ৰং মানথদ্ধো হুত্ৰা ঈদিসং অনাচারং অৰিজহিত্ৰা তিট্ঠসীতি.

অথ মুনিন্দঘোসত্থেরো তস্স থেরস্স মুখং উজুকং ওলোকেত্ৰা এৰমাহ,- ত্ৰং লজ্জীপেসলো সিক্খাকামোতি পুব্বে মযা সুতপুব্বো, ঈদিসো পন পুগ্গলো ঈদিসং ৰচনং ৰত্তুনং যুত্তো,ঈদিসস্স হি পুগ্গলস্স ঈদিসং ৰচনং অস্সারুপ্পং, সচে ত্ৰং অযং অপ্পপুঞ্ঞো নিত্তেজো অনাথোতি মং মঞ্ঞিত্ৰা অগারৰৰসেন ৰত্তুং ইচ্ছেয্যাসি, এৰং সন্তেপি মমাচরিযস্স মুখং ওলোকেত্ৰা মমাচরিযস্স গুণং জানিত্ৰা তস্স সিস্সোযন্তি অনুস্সরিত্ৰা ঈদিসং ৰচনং অধম্মিকং ৰত্তুং ন সক্কাতি.

অথ ¶ সো থেরো তং পুচ্ছি,-কো পন তৰাচরিযোতি. অথ সুখম্মসভাযং ঠপিতং বুদ্ধরূপং ৰদ্দিত্ৰা অযং মমাচরিযোতি আহ. মমাসরিযোতি ৰত্ৰা পন ভিক্খুসঙ্ঘমজ্ঝে উট্ঠহিত্ৰা একংসং উত্তরাসঙ্গং কত্ৰা উক্কুটিকং নিসীদিত্ৰা অঞ্জলিং পগ্গহেত্ৰা অহং ভন্তে যাৰ জীৰিতপরিযোসানা মম জীৰিতংযেৰ পরিচ্চজিস্সামি, ভগৰতো পনতি লোকগ্গস্স সিক্খাপদং ন ৰিজহিস্সামীতি আরোচেসি.

অথ রাজা তমত্থং সুত্ৰা মানথদ্ধো এসো মম ৰিজিতে নিসীদাপেতুং ৰট্টতি, রট্ঠন্তরং পব্বাজেতব্বোতি রাজাণায রট্ঠন্তরং পেসেসি.

রাজপুরিসা চ তং পক্কোসেত্ৰা রট্ঠন্তরং আনেসি. বহঙ্গং নাম দেসং পত্ৰা বহঙ্গনাযকো পুরিসো রাজপুরিসানং লঞ্জং দত্ৰা এৰমাহ,- অযং পন ভোন্তো মরম্মরট্ঠস্স পরিযন্তপ্পদেসো, ইধেৰ ঠপেত্ৰা তুম্হে নিৰত্তথাতি.

রাজ পুরিসাপি লঞ্জং গহেত্ৰা তত্থেৰ ঠপেত্ৰা নিৰত্তিংসু. থেরোপি চতূহি দিসাহি আগতানং ভিক্খুসামণেরানং পারুপনৰসেন ওৰাদং দত্ৰা পরিযত্তিং ৰাচেত্ৰা তত্থ নিসীদি. অভিধম্মত্থসঙ্গহগন্থস্স অত্থযোজনম্পি মরম্মভাসায অকাসি.

অপরভাগে রাজা তমত্থং সুত্ৰা ইদানি সো থেরো মম ৰিজিতপরিযন্তেযেৰ নিসীদিত্ৰা অম্হেহি অনিচ্ছিতং নিৰারিতং কম্মং কত্ৰা নিসীদি, তং পক্কোসথাতি আহ.

রাজদূতা চ তত্থ গন্ত্ৰা পক্কোসিংসু. থেরো চ ইদানি মং রাজা মারেতুকামোতি মঞ্ঞিত্ৰা সিক্খং পচ্চক্খিত্ৰা গিহিৰত্থং নিৰাসেত্ৰা তেহি সদ্ধিং আগচ্ছি. নগরং পন আগন্ত্ৰা পত্তকালে রঞ্ঞো সন্তিকং আনেসি.

অথ রাজা এৰমাহ,-ত্ৰং ভিক্খু হুত্ৰা গণং ৰড্ঢাপেত্ৰা নিসীদসীতি মযা সুতং, কস্মা পনিদানি গিহি ভৰসীতি. সচে ¶ ত্ৰং মহারাজ মং মারেতুকামো পক্কোসেয্যাসি, এৰং সতি যদি সিক্খং অপ্পচ্চক্খায ঠিতং মং মারেয্যাসি, তৰ ভারিযং কম্মং ভৰিস্সতীতি মনসিকরিত্ৰা তৰ কম্মস্স অভারিযত্থায সিক্খং পচ্চক্খিত্ৰা আগতোম্হি, সচে মং মারেতুকামোসি, মারেহীহি. রাজা চ তং বন্ধনাগারে ঠপেত্ৰা স্যামরট্ঠং যুজ্ঝনত্থাযগচ্ছি. যজ্ঝনত্থায পন গন্ত্ৰা পচ্চাগতকালে অন্তরামগ্গেৰ দিৰঙ্গতো অহোসীতি.

কলিযুগে পন দ্ৰাৰীসাধিকে ৰস্সসতে সহস্সে চ সম্পত্তে তস্স জেট্ঠপুত্তো সিরিপৰরমহাধম্মরাজা নাম রজ্জং কারেসি. রতনসিখনগরতো সঙ্কমেত্ৰা জেয্যপুরং দুতিযং মাপিতত্তা জেয্যপুরমাপেকো রাজাতিপি তস্স সমঞ্ঞা অহোসি. তস্মিঞ্চ কালে মহাপব্বতব্ভন্তরনগরৰাসিং ঞাণত্থেরং আনেত্ৰা আচরিযট্ঠানে ঠপেসি. সোকির থেরো গম্ভীরপঞ্ঞো একস্মিং দিৰসে নৰ ৰা দস ৰা ভাণৰারে ৰাচুগ্গতং কাতুং সমত্থো অহোসি. অভিনৰোপসম্পন্নকালেযেৰ পদৰিভাগগন্থং ন্যাসসং ৰণ্ণনং যমকসংৰণ্ণনং মহাপট্ঠানসংৰণ্ণনঞ্চ মরম্মভাসায অকাসি. রাজা মহাভূমিরম্মণিযৰিহারং নাম কারাপেত্ৰা তস্সেৰ অদাসি. ঞাণালঙ্কারমহাধম্মরাজগুরূ তিপি নামলঞ্ছং অদাসি.

তস্মিঞ্চ কালে পারুপনগণে থেরা এৰং চিন্তেসুং,- ইদানি পন অম্হাকং পক্খিকো থেরো রঞ্ঞো আচরিযো অহোসি, ইদানি মযং পতিট্ঠানং লভামাতি. এৰং পন চিন্তেত্ৰা সামণেরানং গামপ্পৰেসনকালে চীৰরং পারুপেত্ৰা পৰিসিতব্বন্তি সন্দেসপণ্ণং রঞ্ঞো সন্তিকং পৰেসেসি. অথ অতুলত্থেরো পুব্বে ৰুত্তনযেন ৰূপসমিতং কম্মমিদন্তি সন্দেসপণ্ণং রঞ্ঞো সন্তিকং পৰেসেসি. তেনেৰ অঞ্ঞমঞ্ঞং পটিৰচনৰসেন দস্সেতুং ওকাসং ন লভিংসূতি.

ততো পচ্ছা কলিযুগে পঞ্চৰীসৰস্সাধিকে সতে সহস্সে ¶ চ সম্পত্তে তস্স রঞ্ঞো সিরিপৰরসুধম্মমহারাজিন্দাধিপতি নাম রজ্জং কারেসি. রতনপূরং পন ততিযং মাপকত্তা রতনপূরমাপকোতি একস্স পন ছদ্দন্তনাগরাজস্স সামিভূতত্তা সেতিভিন্দোতি চ সমঞ্ঞা অহোসি. চরচ্চ গামৰাসীচন্দাৰরং নাম থেরং আনেত্ৰা অত্তনো আচরিযট্ঠানে ঠপেসি. সূমিকিত্তিঅতুলং নাম ৰিহারং কারাপেত্ৰা তস্স অদাসি. জম্বুদীপঅনন্তধজমহাধম্মরাজগুরূতিপি নামলঞ্ছং অদাসি. তস্স রঞ্ঞো কালে একচ্চে মনুস্সা দিট্ঠিৰিপল্লাসা অহেসুং, তেপি পক্কোসাপেত্ৰা সম্মাদিট্ঠিং গণ্হাপেসি. তস্স পন রঞ্ঞো কালে একংসিকগণং অভিভৰিতুং ওকাসং ন লভিংসূতি.

ততো পচ্ছা কলিযুগে অট্ঠতিংসাধিকে ৰস্সসতে সহস্সে চ সম্পত্তে তস্স রঞ্ঞো পুত্তো মহাধম্মে রাজাধিরাজা নাম রজ্জং কারেসি. নগরস্স দক্খিণদিসাভাগে পঞ্চভূমিকৰিহারং কারাপেত্ৰা জেয্যভূমিৰাসাতুলনামেন পঞ্ঞাপেত্ৰা মারাৰট্টনস্স নাম থেরস্স অদাসি. গুণমুনিন্দাভিসাসনধজমহাধম্মরাজাধিরাজগুরূতিপি নামলঞ্ছং অদাসি.

তস্মিঞ্চ কালে নন্দমালো নাম থেরো চলঙ্গনগরস্স পুরত্থিমদিসাভাগে ৰিহারে নিসীদিত্ৰা বহূনং ভিক্খুসামণেরানং গন্থং ৰাচেসি. সামণেরানং গামপ্পৰেসনকালে পারুপনৰত্তমেৰ পরিপূরেত্ৰা পৰিসিতব্বং, একংসিকৰত্তং পন নেৰ পাল়িযং ন অট্ঠকথাযং ন চ টীকাসু নাপি গন্থন্তরেসু দিস্সতি, ন ধম্মানুলোমন্তি ওৰাদং অভিণ্হং অদাসি. পাল়িঅট্ঠকথাদীসু আগতৰিনিচ্ছযং দস্সেত্ৰা একম্পিগন্থং অকাসি.

অথ একংসিকগণিকা ভিক্খূ তং গন্থং রঞ্ঞো সন্তিকং পৰেসিংসু দোসাৰিকরণত্থায. তস্মিঞ্চ কালে রাজা এৰরূপং সুপিনং পস্সি, -সক্কো হি দেৰরাজা সেতৰত্থং নিৰাসেত্ৰা ¶ সেতালঙ্কারেহি অলঙ্করিত্ৰা সেতকুসুমানি পিলন্দিত্ৰা রঞ্ঞো সন্তিকং আগন্ত্ৰা এৰমাহ,- অপরন্তরট্ঠেহি মহারাজ নম্পদানদীতীরে পাদচেতিযে বহূনি তিণানি উট্ঠহিত্ৰা অঞ্ঞমঞ্ঞং মূলেন মূলং খন্ধেন খন্ধং পত্তেন পত্তং সম্পন্ধিত্ৰা পটিচ্ছাদেত্ৰা ঠিতানি, তানি পন পুব্বরাজূহি যথাভূতং অজানন্তেহি অৰিসোধিতানি, ইদানি পন তযা যথাভূতং জানন্তেন পরিসুদ্ধং কত্তুকামেন ৰিসোধিতব্বানি, তত্থচ একো ভিক্খু আগন্ত্ৰা উপদেসনযং দস্সতীতি.

এৰং পন সুপিনং পস্সিত্ৰা নন্দমালং নাম থেরং পক্কোসাপেত্ৰা রতনপূরনগরস্স এসন্নট্ঠানে উদককীল়নত্থায কারাপিতে রাজগেহে ৰসাপেসি.

অথ থেরো সামণেরানং গামপ্পৰেসনকালে পারুপনৰসেন পৰিসিতব্বন্তি পাল়িঅট্ঠকথাটীকাগন্থন্তরেহি রাজানং জানাপেসি, যথা মহামোগ্গলিপুত্ততিস্সত্থেরো সিরিধম্মাসোকরাজানং সম্মাৰাদন্তি. অথ রাজা পরিচিত পারমীপুঞ্ঞসম্ভারো মহাঞাণো জানাসি,-পারুপনৰাদোযেৰ পাল়িঅট্ঠকথাটীকাগন্থন্তরেসু আগতো, একংসিকৰাদো পন তেসু কত্থচিপি ন আগতোতি. এৰং পন জানিত্ৰা রঞ্ঞো গেহে দ্ৰে পক্খে থেরে সন্নিপাতাপেত্ৰা অত্তনো অত্তনো ৰাদং কথাপেসি.

অথ একংসিকত্থেরো এৰমাহংসু,-তুম্হাকং পারুপনৰাদো কত্থ আগতোতি. তদা পারুপনত্থেরা পরিমণ্ডলং পারুপিস্সামীতিআদিনা নযেন পাল়িঅট্ঠকথাটীকাগন্থন্তরেসু পারুপনৰাদো আগতোতি আহংসু. ততো পচ্ছা পারুপনত্থেরা এৰমাহংসু,-তুম্হাকং পন একংসিকৰাদো কত্থ আগতোতি. তদা তে একংসিকত্থেরা অদ্ৰারঘরং পৰিট্ঠকালোৰিয রত্তিভাগে মহাৰনমগ্গে গমনকালোৰিয চ হুত্ৰা কিঞ্চি ৰত্তুং ন সক্কা. মুখং নাম কথনত্থায ভুঞ্জনত্থায হোতীতি ¶ ৰুত্তত্তা যং ৰা তং ৰা ৰদন্তাপি রাজানং আরাধেতুং ন সক্খিংসু.

রাজা চ থেরং নিস্সায ৰিনযে কোসল্লতায পাল়িযং ঈদিসোযেৰ আগতো, অট্ঠকথাদীসু ঈদিসোযেৰাতি ৰত্ৰা তুম্হাকং একংসিকৰাদো পাল়িঅট্ঠকথাটীকাগন্থন্তরেসু ন দিস্সতি, এৰম্পি সমানা কস্মা ঈদিসং ৰত্তং অকংসূতি পুচ্ছি. অথ তে একংসিকত্থেরা চতুহত্থগব্ভে সহোড্ডেন গহিতচোরাৰিয মনুস্সেহি গতিতকাকাৰিয চ কিঞ্চি ৰত্তুং অসক্কুণেয্যতায সব্বদিসাসু ওলোকেত্ৰাযেৰ অম্হাকং চারিত্তং পাল়িআদীসু ন দিট্ঠপুব্বং, অথ খো পন আচরিযপ্পৰেণীৰসেনেৰ চরিম্হাতি ৰত্ৰা পরাজযং পত্ৰা পারুপনপক্খেযেৰ পৰিসিংসূতি. রাজা চ ইতো পট্ঠায ভিক্খূ পারুপনৰত্তমেৰ কারাপেতুং সামণেরানং ওৰদন্তূতি রাজাণং ঠপেসি. ততো পট্ঠায একংসিকপক্খাথেরা অরুণুগ্গমনকালে কোসিযাৰিয সীসং উট্ঠহিতুম্পি ন সক্কাতি.

সোকসরভূমহাচেতিযস্স পুরত্থিমদিসাভাগে দ্ৰীহি পাসাদেহি অলঙ্কতং চতুভূমিকং ভূমিকিত্তিৰিরামং নাম ৰিহারং কারাপেত্ৰা নন্দমালত্থেরস্স অদাসি, নরিন্দাভিধজমহাধম্মরাজাধিরাজগুরূতি নামলঞ্ছম্পি অদাসি. সো পন থেরো ছপ্পদৰংসিকোতি দট্ঠব্বো. অভিনৰোপসম্পন্নকালেযেৰ ৰিনযৰিনিচ্ছযস্স সুত্তসঙ্গহস্স মহাৰগ্গট্ঠকথায চ অত্থযোজনং মরম্মভাসায অকাসি, সাসনসুদ্ধিদীপিকং নাম গন্থম্পি অকাসীতি.

ততো পচ্ছা কলিযুগে তেচত্তালীসাধিকে ৰস্সসতে সহস্সে চ সম্পত্তে ফগ্গুনমাসস্স কাল়পক্খপন্ন রসমিযং রতনসিখমাপকস্স রঞ্ঞো মজ্ঝিমপুত্তো রজ্জং কারেসি ¶ .

তদা রাজা এৰং চিন্তেসি,-একংসিকপারুপনৰসেন উপ্পন্নো ৰিৰাদো পুব্বেসং রাজূনং কালে ৰূপসমিতুং ন সক্কা, সিরিপৰরসুধম্মমহারাজিন্দাধিপতিনো কালেপি রাজগেহে সন্নিপাতাপেত্ৰা রঞ্ঞো সম্মুখে কথাপিতত্তা ৰিস্সট্ঠেন কথেতুং ওকাসস্স অলদ্ধত্তা যথাকামং ৰত্তুং অৰিসহত্তা পরাজযো অহোসীতি লেসং ওড্ডতুং ওকাসো ভৰেয্যময্হং পন কালে ঈদিসং অকত্ৰা তেসং তেসং থেরানং ৰিহারে দূতং পেসেত্ৰা সকসকৰাদং কথা পেস্সামি, এৰঞ্হি সতি তেতেথেরা ৰিস্সট্ঠা হুত্ৰা কথেস্সন্তীতি.

এৰং পন চিন্তেত্ৰা অন্তোযুধনাযকং অমচ্চং পধানং কত্ৰা তেসং তেসং থেরানং সন্তিকং গন্ত্ৰা আরোচাপেসি,-সকসকৰাদং ৰিস্সট্ঠা হুত্ৰা ৰদথাতি. অথ একংসিকগণিকা থেরা অম্হেহি ৰুত্তৰচনং পাল়িআদীসু ন দিস্সতি, অথ খো পন আচরিযপ্পৰেণীৰসেনেৰ মযং চরিম্হাতি অনুজানিংসু.

মহারাজা চ এৰং থেরানং অনুজাননে সতি কিঞ্চি কত্তব্বং নত্থি, ইদানি পরিমণ্ডলসুপ্পটিচ্ছন্নসিক্খাপদানি অৰিকোপেত্ৰা সামণেরা গামং পৰিসন্তূতি রাজলেখনং তত্থ তত্থ পেসেসি.

অপরভাগে পন সহস্সোরোধগামতো উপসম্পদা ৰস্সেন সত্তৰস্সিকং ঞাণং নাম ভিক্খুং আনেত্ৰা অন্তোযুধৰিহারং নাম কারাপেত্ৰা তস্স অদাসি, ঞাণাভিসাসনধজমহাধম্মরাজগুরূতি নামলঞ্ছম্পি অদাসি. অথ রঞ্ঞা যাচিতো রাজাভিসেকগন্থং পরিসোধেত্ৰা মরম্মভাসায অত্থং যোজেসি.

অপরভাগে ভগৰা ধরমানোযেৰ আগন্ত্ৰা চতুন্নং যক্খানং দমেত্ৰা তেহি দিন্নং মংসোদনং পটিগ্গহেত্ৰা পব্বতসামন্তদেসং ¶ গন্ত্ৰা পরিভুঞ্জিত্ৰা তং ঠানং ওলোকেত্ৰা সিতং পাত্ৰাকাসি. অথ আনন্দত্থেরো কারণং পুচ্ছি. অনাগতে খো আনন্দ ইমস্মিং দেসে মহানগরং ভৰিস্সতি, চত্তারো চ ইমে যক্খা তস্মিং নগরে রাজানো ভৰিস্সন্তীতি ব্যাকাসি.

যথাব্যাকতনিযামেনেৰ কলিযুগে চতুচত্তালীসাধিকে ৰস্সসতে সহস্সে চ সম্পত্তে মাঘমাসস্স কাল়পক্খদ্ৰাদসমিযং অঙ্গারৰারে উত্তরফগ্গুনীনক্খত্তেন যোগে অমরপুরং নাম মহারাজট্ঠানীনগরং মাপেসি.

সিরিপরৰিজযানন্তযসত্রিভৰনাদিত্যাধিপতিপণ্ডিতমহাধম্মরাজাধিরাজাতি নামলঞ্ছম্পি পটিগ্গণ্হি.

অগ্গমহেসিযা কারাপিতং জেয্যভূমিৰিহারকিত্তিনামকং ৰিহারং গুণাভিলঙ্কারসদ্ধম্মমহাধম্মরাজাধিরাজগুরুত্থেরস্স অদাসি, যো ‘মে ও সযাডো’ ইতি ৰুচ্চতি.

কন্নীনগরভোজকায রাজকঞ্ঞায কারাপিতং ৰিহাররমণীযৰিরামং নাম ৰিহারং গুণমুনিন্দাধিপতি মহাধম্মরাজাধিরাজগুরুত্থেরস্স অদাসি, যো ‘মাং লে সযাডো’ ইতি ৰুচ্চতি.

উপরঞ্ঞো দেৰিযা কারাপিতং মঙ্গলাৰিরামং নাম ৰিহারং তিপিটকসদ্ধম্মসামিমহাধম্মরাজাধিরাজগুরুত্থেরস্স অদাসি, যো ‘সোং ঠা সযাডো’ ইতি ৰুচ্চতি.

মজ্ঝিমগেহৰাসিদেৰিযা কারাপিতং মঙ্গলাৰাসাতুলং নাম ৰিহারং ঞাণজম্বুদীপঅনন্তধজমহাধম্মরাজাধিরাজগুরুত্থেরস্স অদাসি, যো ‘মেং জ্ৰা সযাডো’ ইতি ৰুচ্চতি.

ইমে প্পন চত্তারো মহাথেরে সঙ্ঘরাজট্ঠানে ঠপেসি.

উত্তরগেহৰাসিদেৰিযা কারাপিতং মঙ্গলভূমিকিত্তিং নাম ¶ ৰিহারং কৰিন্দাভিসদ্ধম্মধরধজমহাধম্মরাজগুরুত্থেরস্স অদাসি, যো ‘ঞ্যোং কাং সযাডো’ ইতি ৰুচ্চতি.

সিরিখেত্তনগরভোজকেন রাজকুমারেন কারাপিতং অতুলভূমিৰাসং নাম ৰিহারং কৰিন্দাভিসদ্ধম্মপৰরমহাধম্ম রাজগুরুত্থেরস্স অদাসি, যো ‘স্ৰে টোং সযাডো’ ইতি ৰুচ্চতি.

অন্তোঅমচ্চেন একেন কারাপিতং ৰিহারং ঞাণালঙ্কারসদ্ধম্মধজমহাধম্মরাজগুরুত্থেরস্স অদাসি, যো ‘সেং টে সযাডো’ ইতি ৰুচ্চতি.

ৰামবলনাযকেনামচ্চেন কারাপিতং ৰিহারং পরমসিরিৰংসধজমহাধম্মরাজগুরুত্থেরস্স অদাসি, যো ‘মে ঠী সযাডো’ ইতি ৰুচ্চতি.

ধম্মৰিনিচ্ছকেন একেনামচ্চেন কারাপিতং ৰিহারং কৰিন্দ সারধজমহাধম্মরাজাধিরাজগুরুত্থেরস্স অদাসি, যো ‘লোকা ম্হাং কেং সযাডো’ ইতি ৰুচ্চতি.

ইচ্চেৰং পরিযত্তিকোৰিদানং অনেকানং মহাথেরানং সদ্ধিং নামলঞ্ছেন ৰিহারং দত্ৰা অনুগ্গহং অকাসি. যস্মা পন সব্বেসং থেরানং নামং উদ্ধরিত্ৰা ৰিসুং ৰিসুং কথিতে অযং সাসনৰংসপ্পদীপিককথা অতিপ্পপঞ্চা ভৰিস্সতি, তস্মা ইধ অজ্ঝুপেক্খিত্ৰা ৰত্তব্বমেৰ ৰক্খামাতি.

পচ্ছাভাগে চত্তারো মহাথেরা রাজাদুব্বলতায যথাকামং সাসনং ৰিসোধেতুং সক্খিস্সন্তীতি মঞ্ঞিত্ৰা পুন অট্ঠ থেরে এতেহি চতূহি মহাথেরেহি সদ্ধিং সাসনং ৰিসোধাপেতুং সঙ্ঘনাযকট্ঠানে ঠপেসি. সেয্যথিদং, কৰিন্দাভিসদ্ধম্মপৰরমহাধম্মরাজগুরুত্থেরো, তিপিটকালঙ্কারধজমহাধম্মরাজগুরুত্থেরো, চক্কিন্দাভিধজমহাধম্মরাজগুরুত্থেরা, পরমসিরিৰংসধজমহাধম্মরাজগুরুত্থেরো, জনিন্দাভিপৰরমহাধম্মরাজগুরুত্থেরো, মহাঞাণাভিধজমহাধম্মরাজগুরুত্থেরো ¶ , ঞাণালঙ্কারসদ্ধম্মধজমহাধম্মরাজগুরুথেরো, ঞাণাভিসাসনধজমহাধম্মরাজগুরুত্থেরোতি.

অথ অরহাপি সমানো নিস্সযমুচ্চকঙ্গৰিকলো ৰিনানিস্সযাচরিযেন ৰসিতুং ন ৰট্টতীতি জানিত্ৰা নিস্সযা চরিযপ্পহোনকানং থেরানং নিস্সযঙ্গানি নিস্সযমুচ্চকারহানং নিস্সযমুচ্চকঙ্গানি পরিপূরাপেত্ৰা নিস্সিতকানং নিস্সযং গণ্হিত্ৰাৰ নিসীদাপেসি.

ততো পচ্ছা কলিযুগে পঞ্ঞাসাধিকে ৰস্সসতে সহস্সেৰ সম্পত্তে ঞাণাভিসাসনধজমহাধম্মরাজগুরুত্থেরংযেৰ একং সঙ্ঘরাজট্ঠানে ঠপেসি. ততো পট্ঠায সোযেৰ একো সঙ্ঘনাযকো হুত্ৰা সাসনং ৰিসোধযি.

ততো পচ্ছা একপণ্ণাসাধিকে ৰস্সসতে সহস্সে চ সম্পত্তে ফগ্গুনমাসে মহামুনিচেতিযস্স দক্খিণদিসাভাগে দ্ৰীহি ইট্ঠকমযেহি পাকারেহি পরিক্খিত্তং পঞ্চভূমিকং অসোকারামে রতনভূমিকিত্তিং নাম ৰিহারং অতিমহন্তং কারাপেত্ৰা ঞাণাভিসাসনধজমহাধম্মরাজগুরুত্থেরস্স অদাসি. ঞাণাভিৰংসধম্মসেনাপতিমহাধম্মরাজাধিরাজগুরূতি নামলঞ্ছম্পি পুন অদাসি. ততো অঞ্ঞানি জেয্যভূমিৰিহারকিত্তিমঙ্গলৰিরামাদযো অনেকেপি ৰিহারে তস্সেৰ অদাসি.

সো পন তেসু ৰিহারেসু ৰারেন নিসীদিত্ৰা পরিযত্তিং ৰাচেসি. উভতোৰিভঙ্গানিপি ৰাচুগ্গতং অকাসি. নিচ্চংযেৰ একাসনিকধুজঙ্গং সমাদিযি.

সো পন থেরো উপসম্পদাৰস্সেন পঞ্চৰস্সিকো হুত্ৰা পুব্বেৰ সঙ্ঘরাজভাৰতো পেটকালঙ্কার নাম নেত্তিসংৰণ্ণনং অভিনৰটীকং অকাসি. অট্ঠৰস্সিইককালে সঙ্ঘরাজা অহোসি. সঙ্ঘরাজা হুত্ৰা সাধুজ্জনৰিলাসিনিং নাম ¶ দীঘনিকাযটীকং অকাসি. অরিযৰংসালঙ্কারং নাম গন্থঞ্চ অকাসি. মহাধম্মরঞ্ঞা যাচিতো জাতকট্ঠকথায অত্থযোজনং চতুসামণেরৰত্থুং রাজোৰাদৰত্থুং তিগুম্ভথোমনং ছদ্দন্তনাগরাজুপ্পত্তিকথং রাজাধিরাজ ৰিলাসিনিং নাম গন্থঞ্চাতি এৰমাদযোপি অকাসি.

কলিযুগে পন দ্ৰাসট্ঠাধিকে ৰস্সসতে সহস্সে চ সম্পত্তে সীহল়দীপতো অম্পগহপতিস্সো, মহাদম্পো, কোচ্ছ গোধো, ব্রাহ্মণৰত্তো, ভোগহৰত্তো, ৰাতুরগম্মোতি ইমে ছ সামণেরা দস ধাতুযো ধম্মপণ্ণা কারত্থায আনেত্ৰা অমরপুরং নাম মহারাজট্ঠানীনগরং আগতা সদ্ধিং একেন উপাসকেন.

অথ ঞাণাভিৰংসধম্মসেনাপতিমহাধম্মরাজাধিরাজগুরুনা সঙ্ঘরঞ্ঞা উপজ্ঝাযেন কৰিন্দাভিসদ্ধম্মধরধজমহাধম্মরাজগুরুত্থেরেন জনিন্দাভিধজমহাধম্মরাজগুরুত্থেরেন মুনিন্দঘোসমহাধম্মরাজগুরুত্থেরেনাতি এৰমাদীহি রাজগুরুত্থে রেহি কম্মৰাচরিযেহি হত্থিরজ্জুসুৰণ্ণগুহসীমাযং উপসম্পদকম্মং কারাপেসি, উপাসকঞ্চ সামণেরভূমিযং পতিট্ঠাপেসি, ততো পচ্ছা চ অনেকৰারং আগতানং ভিক্খূনং পুন সিক্খং গণ্হাপেসি, সামণেরানঞ্চ উপসম্পদকম্মং কারাপেসি, উপাসকানঞ্চ পব্বজ্জকম্মন্তি.

অপরভাগে পন কলিযুগে ছচত্তালীসাধিকে ৰস্সসতে সহস্সে চ সম্পত্তে পিতুরঞ্ঞো আচরিযপুব্বো অতুলো নাম থেরো চীৰরপটলং উপরিসঙ্ঘাটিং কত্ৰা উরবন্ধনৰত্থং বন্ধিতব্বন্তি চূল়গণ্ঠিপদে ৰুত্তত্তা সামণেরানং গামপ্পৰসেনকালে একংসং উত্তরাসঙ্গং কত্ৰা উরবন্ধনৰত্থং বন্ধিত্ৰাযেৰ পৰিসিতব্বন্তি দল়ং কত্ৰা রঞ্ঞো সন্তিকং লেখনং পৰেসেসি.

অথ রাজা তং সুত্ৰা মহাথেরে সুধম্মসভাযং সন্নিপাতাপেত্ৰা ¶ অতুলত্থেরেন সদ্ধিং সাকচ্ছং কারাপেসি. অথ অতুলত্থেরো চীৰরপটলং উপরিসঙ্ঘাটিং কত্ৰা উরবন্ধনৰত্থং বন্ধিতব্বন্তি চূল়গণ্ঠিপদে আগতপাঠং দস্সেত্ৰা সামণেরানং গামপ্পৰেসনকালে একংসং উত্তরাসঙ্গং কত্ৰা উরবন্ধনৰত্থং বন্ধিত্ৰা পৰিসিতব্বন্তি আহ.

অথ মহাথেরা তং পুচ্ছিংসু,-ঈদিসো অধিপ্পাযো অঞ্ঞত্থ দিস্সতি ৰা মা ৰাতি. অথ অতুলত্থেরো এৰমাহ,-অঞ্ঞত্থ পন ঈদিসো অধিপ্পাযো ন দিস্সতীতি. এৰং হোতু, অযং গন্থো কেন কতোতি. সীহল়দীপে অনুরাধপুরস্স দক্খিণদিসাভাগে পোক্কন্তি গামে অরহন্তেন মোগ্গলানত্থেরেনাতি. অযমত্থো কথং জানিতব্বোতি. পিটকত্তযলক্খণগন্থে আগতত্তাতি. অযঞ্চ পিটকত্তয লক্খণগন্থো কুতো লদ্ধোতি. বুদ্ধঘোসত্থেরেন কির সীহল়দীপতো আনীতত্তা ততো, অযঞ্হি গন্থো সীহল়দীপতো অত্তনা আনীতেসু গন্থেসু অসুকো গন্থো অসুকেন থেরেন কতোতি ৰিঞ্ঞাপনত্থায বুদ্ধঘোসত্থেরেন কতো, ইদানাযং গন্থো অম্হাকং হত্থে সংৰিজ্জতীতি. সচে ইদানাযং গন্থো তুম্হাকং হত্থে সংৰিজ্জতি, অম্হাকং দস্সেহীতি. পস্সথাৰুসো অযমম্হাকং হত্থে গন্থোতি দস্সেসি. অথ মহাথেরেহি সঙ্ঘরাজপ্পমুখেহি তস্মিং গন্থে পস্সিতে ৰিনযগণ্ঠিপদং সীহল়দীপে পরক্কমবাহুরঞ্ঞো কালে মোগ্গলানত্থেরো অকাসীতি আগতং, ন চূল়গণ্ঠিপদং সীহল়দীপে অনুরাধপুরস্সদক্খিণদিসাভাগে পোক্কন্তিগামে অরহা মোগ্গলানত্থেরো অকাসীতি.

অথ থেরা এৰমাহংসু,-কস্মা পন পিটকত্তযলক্খণগন্থে অনাগতম্পি আগতংৰিয কত্ৰা মুসা ৰদথ, ন নু তুম্হাকম্পি একংসিকভিক্খূনং মুসাৰাদসিক্খাপদং অত্থীতি. অথ অতুলত্থেরো উত্তরিং ৰত্তুং অসক্কুণেয্যত্তা লুদ্দকস্স ¶ ৰাকুরে বন্ধমিগোৰিয ফন্দমানো হুত্ৰা অট্ঠাসি, সহোড্ডেন গহিতোৰিয চোরো সহমুসাৰাদকম্মেন সো থেরো গহিতো অহোসীতি.

ইদং ইমস্স অত্থস্স আৰিভাৰত্থায ৰত্থু, –

ইমস্মিং কির রট্ঠে একো জনপদৰাসীপুরিসো কেনচিদেৰ করণীযেন অমরপুরং নাম মহারাজট্ঠানীনগরং আগচ্ছি. আগন্ত্ৰা চ পচ্চাগতকালে অন্তরামগ্গে পাথেয্যং খযং অহোসি. অথস্স এতদহোসি,- ইদানি মম পাথেয্যং খযং অহোসি, ইমস্মিং কির রট্ঠে সহস্সোরোধগামে লদ্ধৰরো নাম মহাসেট্ঠি সব্বত্থ ভূতলে অতিৰিয পাকটো. তস্সাহং ঞাতীতি ৰঞ্চেত্ৰা কথেস্সামি, এৰং সতি তেন মহাসেট্ঠিনা মিত্তসন্থৰং কাতুং তেতেগামিকা মনুস্সা মম বহু লাভং দস্সন্তি, তদা পাথেয্যেন অকিচ্ছো ভৰিস্সামীতি. এৰং পন চিন্তেত্ৰা অন্তরামগ্গে সম্পত্তসম্পত্তগামেসু মহাভোগানং গেহং ৰিচিনেত্ৰা মহাভোগানং সন্তিকং পৰিসিত্ৰা কথাসল্লাপং অকাসি.

অথ তেতেগামিকা ত্ৰং কুতো আগতো, কুহিং গমিস্সসি, কস্স ঞাতি,কো ৰা ত্ৰন্তি পুচ্ছিংসু. অমরপূরমহারাজট্ঠানীনগরতো আগতো, সহস্সোরোধগামং গমিস্সামি, সহস্সোরোধগামে লদ্ধৰরস্স নাম মহাসেট্ঠিনো জামাতা ধনৰড্ঢকো নামাহন্তি আহ.

অথ তেতেগামিকা লদ্ধৰরেন মহাসেট্ঠিনা মিত্তসন্থৰং কাতুং নানাভোজনেহি ভোজেসুং. অঞ্ঞেহিপি বহূহি পণ্ণাকারেহি সঙ্গহং অকংসু. ইমিনাৰ নযেন সম্পত্ত সম্পত্তগামেসু ৰঞ্চেত্ৰা অত্তনো গুণং কথেত্ৰা অদ্ধান মগ্গং তরি. পচ্ছা পন সহস্সোরোধগামং সম্পত্তো. সো সহস্সোরোধগামং ন সম্পত্তপুব্বো. লদ্ধৰরো মহাসেট্ঠি তেন ন দিট্ঠপুব্বো. সহস্সোরোধগামং সম্পত্তেযেৰ অযং কিং নাম গামোতি অপুচ্ছিত্ৰাযেৰ তস্মিং গামে মহাভোগতরস্স ¶ মহাগেহং ৰিচিনন্তো তস্সেৰ লদ্ধৰরস্স সেট্ঠিনো মহন্তং গেহং পস্সিত্ৰা লদ্ধৰরস্স সেট্ঠিনো সন্তিকং পৰিসিত্ৰা তেন সদ্ধিং কথাসল্লাপং অকাসি.

অথ মহাসেট্ঠি তং পুচ্ছি,-ত্ৰং কুতো আগতো, কুহিং গমিস্সসি, কস্স ঞাতি,কো ত্ৰন্তি. অমরপুরমহারাজট্ঠানীনগরতো সামি আগতো, সহস্সোরোধগামং গমিস্সামি, সহস্সোরোধগামে লদ্ধৰরস্স নাম মহাসেট্ঠিনো জামাতা, ধনৰড্ঢকো নামাহন্তি আহ.

অথ মহাসেট্ঠি তস্স মুখং উজুং ওলোকেত্ৰা অযং মাণৰ সহস্সোরোধগামোযেৰ, অহম্পি লদ্ধৰরো নাম মহাসেট্ঠি, মম ধীতরো সন্তি, তাপি সস্সামিকাযেৰ হোন্তি, ইদানি তা সকসকস্সামিকানংযেৰ সন্তিকে ৰসন্তি, ন ত্ৰং কদাচি মযা দিট্ঠপুব্বো, কেন কারণেন কুতো আগন্ত্ৰা মম জামাতা ভৰসীতি পুচ্ছি.

অথ সো ম্মনুস্সেহি অনুবন্ধিযমানোৰিয মিগো সকলম্পি কাযং ফন্দাপেত্ৰা কিঞ্চি ৰত্তব্বং ৰচনং অজানিত্ৰা অলদ্ধপ্পতিট্ঠানতায এৰং সতি কুতো আগতো, কুহিং গমিস্সামি, কস্স ঞাতি, কো ৰা অহন্তি ইদানি ন জানামি, সব্বদিসা সম্মুয্হামি, খমাহি মম অপরাধং, ইতো পট্ঠায যাৰ জীৰিতপরিযোসানা ন ৰঞ্চেস্সামি, ৰঞ্চেতুং ন ৰিসহামি, ইদানি অতিৰিয ভাযামি, মা কিঞ্চি দণ্ডকম্মং করোহীতি ৰত্ৰা ৰেগেন উট্ঠহিত্ৰা পলাযীতি.

ইচ্চেৰং অতুলত্থেরো দুম্মুখো হুত্ৰা যংৰাতংৰা মুখারূল়ং ৰিলপিত্ৰা সঙ্ঘমজ্ঝে নিসীদি.

অযং অতুলত্থেরস্স পঠমো পরাজযো.

ততো পচ্ছা খলিত্ৰা কদ্দমে পতিতং পুরিসং পুন উপরি অক্কমন্তাৰিয পুন মহাথেরা এৰং পুচ্ছিংসু,-ইদং ভন্তে তৰ চূল়গণ্ঠিপদং নাম তীসু ৰিনযমহাটীকাসু সাধকৰসেন দস্সিতং ¶ চূল়গণ্ঠিপদং উদাহু অপরন্তি. তীসু ৰিনযমহাটীকাসু সাধকৰসেন দস্সিতং চূল়গণ্ঠিপদংযেৰ ইদন্তি. এৰংসতি কস্মা তৰ চূল়গণ্ঠিপদেযেৰ ৰুত্তঞ্হি ৰজিরবুদ্ধিটীকাযং, ৰুত্তঞ্হি সারত্থদীপনীটীকাযং, তথা হি ৰুত্তং ৰিমতি ৰিনোদনীটীকাযন্তি তাসং ৰিনযমহাটীকানং পচ্ছা হুত্ৰা তিস্সো ৰিনযমহাটীকাযো সাধকৰসেন দস্সিতাতি. এৰং পন পুচ্ছন্তো সো মযা পুব্বে ৰুত্তং তীসু ৰিনযমহাটীকাসু সাধকৰসেন দস্সিতং চূল়গণ্ঠিপদংযেৰ ইদন্তি ৰচনং সচ্চমেৰাতি মুখাসুঞ্ঞত্থায পুনপ্পুনং ৰদি.

ইদঞ্চ ইমস্স অত্থস্স আৰিভাৰত্থায ৰত্থু, –

একো কির পুরিসো একেন সহাযেন সদ্ধিং পুত্তদারপোসনত্থায রঞ্ঞো ভতিং গহেত্ৰা যুদ্ধকম্মং কাতুং সঙ্গামং গচ্ছতি. অথ পরসেনায যুজ্ঝিত্ৰা পরসেনা অভিভৰিত্ৰা সব্বে মনুস্সা অত্তনো অত্তনো অভিমুখট্ঠানং পলাযিংসু. অথ সোপি পুরিসো তেন সহাযেন সদ্ধিং অত্তনো অভিমুখট্ঠানং পলাযি. তোকং পলাযিত্ৰা অন্তরামগ্গে পরসেনাহি পহরিতদণ্ডেন মুচ্ছিতো হুত্ৰা সো পুরিসো তেন সদ্ধিং গন্তুং ন সক্কা, অন্তমসো নিসীদিতুম্পি ন সক্কা.

অথ সহাযস্স এতদহোসি,-ইদানি অযং অতিৰিয বাল়গিলানো হোতি মরণাসন্নো, সচাহং তস্স উপট্ঠহিত্ৰা ইধেৰ নিসীদেয্যং, ৰেরিনো আগন্ত্ৰা মং গণ্হিস্সন্তীতি. এৰং পন চিন্তেত্ৰা গিলানস্স সন্তকানি কহাপণৰত্থাদীনি গহেত্ৰা তং তত্থেৰ ঠপেত্ৰা গচ্ছতি. সকট্ঠানসমীপং পন পত্তস্স তস্স এতদহোসি,- সচে তং অন্তরামগ্গে ঠপেত্ৰা আগচ্ছামীতি ৰদেয্যং, তস্স ঞাতকা মম উপরি দোসং রোপেস্সন্তি, ইদানি সো মরিত্ৰা অহং এককোৰ আগচ্ছামীতি ৰদিস্সামীতি. সকট্ঠানং পন পত্ৰা তস্স ভরিযা তস্স সন্তিকং আগন্ত্ৰা ময্হং পন সামিকো ¶ কুহিং গতো, কত্থ ঠপেত্ৰা ত্ৰং এককোৰ আগচ্ছসীতি পুচ্ছি. তৰ অয্যে সামিকো পরেসং আৰুধেন পহরিত্ৰা কালঙ্কতো, ইমানি তৰ সামিকস্স সন্তকানীতি ৰত্ৰা কহাপণৰত্থাদীনি দত্ৰা মা সোচি মা পরিদেৰি, ইদানি মতকভত্তং দত্ৰা পুঞ্ঞভাগংযেৰ ভাজেহীতি সমস্সাসেসি. অথ সা তানি গহেত্ৰা রোদিত্ৰা মতকভত্তং দত্ৰা পুঞ্ঞভাগং ভাজেসি.

অপরভাগে পন থোকং কালং অতিক্কন্তে গিলানা ৰুট্ঠিতো সকগেহং আগচ্ছতি. ভরিযাপি তং ন সদ্দহি. অহং ন কালঙ্কতো, গিলানংযেৰ মং ঠপেত্ৰা সো মম সন্তকানি গহেত্ৰা গতো, সচে মং ত্ৰং ন সদ্দহসি, অহং অন্তোগব্ভে নিলীযিত্ৰা নিসীদিস্সামি, তং পক্কোসেত্ৰা পুচ্ছাহীতি আহ.

অথ সা তং পক্কোসেত্ৰা বহি গব্ভে নিসীদিত্ৰা পুচ্ছি,-মম সামি সামিকো কালঙ্কতোতি তং সচ্চং ৰা অলিকং ৰাতি. সচ্চমেৰেতং, যং তৰ সামিকো কালঙ্কতোতি.

অথ সো পুরিসো বহি গব্ভং নিক্খমিত্ৰা অঙ্গুলিং পসারেত্ৰা ন ইদানি ভোসম্ম অহং কিঞ্চি মত্তোপি মরামি, কস্মা পন অমরন্তংযেৰ মং মতো এসোতি ৰদেসীতি. অথ কিঞ্চি ৰত্তব্বস্স কারণস্স অদিস্সনতো মুখাসুঞ্ঞত্থায অঙ্গুলিং পসারেত্ৰা উজুং ওলোকেত্ৰা ইদানি ত্ৰং ইধ আগন্তুং সমত্থোপি মতোযেৰ, মতোতি মযা ৰুত্ত ৰচনং সচ্চংযেৰ, নাহং কিঞ্চি অলিকং ৰদামীতি আহ. এৰং সো পুনপ্পুনং ৰদন্তোপি জীৰমানকস্স সংৰিজ্জমানত্তা পচ্চক্খেযেৰ চ তস্স ঠিতত্তা কোচিপি তস্স ৰচনং ন সদ্দহি, পরাজযংযেৰ সো পত্তোতি.

ইচ্চেৰং ¶ অতুলত্থেরো মুখাসুঞ্ঞত্থায ৰদন্তোপি কোচি ন সদ্দহি, পরাজযংযেৰ সো পত্তোতি.

অযং অতুলত্থেরস্স দুতিযো পরাজযো.

পুনপি সেয্যথাপি লুদ্দকো কুঞ্জরং দিস্ৰা একেন ৰারেন উসুনা ৰিজ্ঝিত্ৰা পতন্তম্পি কুঞ্জরং পুন অনুট্ঠাহনত্থায কতিপযৰারেহি উসূহি ৰিজ্ঝতি, এৰমেৰ একৰারেনেৰ পরাজযং পত্তং পন ৰাদস্স অনুক্খিপনত্থায কতিপযৰারেহি পরাজযং পাপেতুং পারুপনৰাদিনো মহাথেরা এৰমাহংসু,- তৰ চূল়গণ্ঠিপদেযেৰ সামণেরানং পরিমণ্ডলসুপ্পটিচ্ছন্নাদীনি ৰত্তানি অভিন্দিত্ৰাযেৰ পৰিসিতব্বোতি পুব্বে ৰত্ৰা চীৰরপটলউপরিসঙ্ঘাটিং কত্ৰা উরবন্ধনৰত্থং বন্ধিতব্বন্তি পন ৰুত্তং, কস্মা পন পুব্বেন অপরং অসংসন্দিত্ৰা ৰুত্তং, তুম্হাকং ৰাদে পটিসরণভূতানং পাল়িঅট্ঠকথাটীকাগন্থন্তরানং নত্থিতায অম্হাকং পটিসরণভূতং চূল়গণ্ঠিপদন্তি ৰদথ, তুম্হাকং পটিসরণভূতা চূল়গণ্ঠিপদতোযেৰ ভযং উপ্পজ্জতীতি ৰত্ৰা সহ নিলীযনট্ঠানেন গহিতং চোরং ৰিয সহ নিস্সযেন অধম্মৰাদিনো গণ্হিংসু.

ইদং ইমস্স অত্থস্স অৰিভাৰত্থায ৰত্থু, –

অতীতে কির বারাণসিতো অৰিদূরে নদীতীরে গামকে পাটলি নাম নটমচ্চো ৰসতি. সো একস্মিং উস্সৰ দিৰসে ভরিযমাদায বারাণসিং পৰিসিত্ৰা নচ্চিত্ৰা ৰীণং ৰাদিত্ৰা গাযিত্ৰা ধনং লভিত্ৰা উস্সৰপরিযোসানে বহু সুরাভত্তং গাহাপেত্ৰা অত্তনো গামং গচ্ছন্তো নদীতীরং পত্ৰা নৰোদকং আগচ্ছন্তং দিস্ৰা ভত্তং ভুঞ্জন্তো সুরং ৰিৰন্তো নিসীদিত্ৰা মত্তো হুত্ৰা অত্তনো বলং অজানন্তো মহাৰীণং গীৰায বন্ধিত্ৰা নদিং ওতরিত্ৰা গমিস্সামীতি ভরিযং হত্থে গহেত্ৰা নদিং ওতরি. ৰীণাছিদ্দেহি উদকং ¶ পাৰিসি. অথ নং সা পীণা উদকে ওসীদাপেসি. ভরিযা পনস্স ওসীদনভাৰং ঞত্ৰা তং ৰিস্সজ্জিত্ৰা উত্তরিত্ৰা নদীতীরে অট্ঠাসি. নটপাটলি সকিং উম্মুজ্জতি, সকিং নিম্মুজ্জতি, উদকং পৰিসিত্ৰা উদ্ধুমাতউদরো অহোসি. অথস্স ভরিযা চিন্তেসি,-ময্হং সামিকো ইদানি মরিস্সতি, একং গীতং যাচিত্ৰা পরিসমজ্ঝে তং গাযন্তী জীৰিতং কপ্পেস্সামীতি চিন্তেত্ৰা সামি ত্ৰং উদকে নিম্মুজ্জসি, একং মে গীতং দেহি, তেন জীৰিতং কপ্পেস্সামীতি ৰত্ৰা–

বহুস্সুতং চিত্তকথং, গঙ্গা ৰহতি পাটলিং;

ৰুয্হমানকং ভদ্দন্তে, একং মে দেহি গাথকন্তি.

অথ নং নটপাটলি ভদ্দে কথং তৰ গীতং দস্সামি, ইদানি মহাজনস্স পতিসরণভূতং উদকং মং মারেতীতি ৰত্ৰা–

যেন সিঞ্চন্তি দুক্খিতং, যেন সিঞ্চন্তি আতুরং;

তস্স মজ্ঝে মরিস্সামি, জাতং সরণতো ভযন্তি.

অথ অতুলত্থেরো অত্তনো পতিসরণভূতা চূল়গণ্ঠিপদতো ভযং উপ্পজ্জিত্ৰা কিঞ্চি ৰত্তব্বং অজানিত্ৰা অধোমুখো হুত্ৰা পরাজাযং পত্তোতি.

অযং অতুলত্থেরস্স ততিযো পরাজযো.

অথ রাজা তেসং দ্ৰিন্নং পক্খানং ৰচনং সুত্ৰা চূল়গণ্ঠিপদস্স পুব্বাপরৰিরোধিদোসহি আকুলত্তা সুত্তসুত্তানুলোমাদীসু অপ্পৰিট্ঠত্তা আগমসুদ্ধিযা চ অভাৰতো পরোৰস্সসতং চিরং ঠিতস্স গেহস্সৰিয অতিদুব্বলৰসেন অথিরতং জানিত্ৰা ইদানি সাসনং পরিসুদ্ধং ভৰিস্সতীতি সোমনস্সপ্পত্তো হুত্ৰা মম ৰিজিতে সব্বেপি ভিক্খূ পারুপনৰসেন সমানৰাদিকা হোন্তূতি আণং ঠপেসি. ততো ¶ পট্ঠায যাৰজ্জতনা সকলেপি মরম্মরট্ঠে পারুপনৰসেন সমানৰাদিকা ভৰন্তীতি.

অযমেত্থ সঙ্খেপো,-তেসঞ্হি দ্ৰিন্নং পক্খানং সন্নিপতিত্ৰা ৰচনপ্পটিৰচন ৰসেন ৰিৰাদকথা ৰিত্থারেন ৰুচ্চমানা ছপঞ্চসাণৰারমত্তম্পি পত্ৰা নিট্ঠং ন পাপুণেয্য. যস্মা পন সব্বং অনৰসেসেত্ৰা ৰুচ্চমানং অযং সাসনৰংসপ্পটীপিকা অতিপ্পপঞ্চা ভৰিস্সতি, তস্মা এত্থ ইচ্ছিতমত্তমেৰ দস্সযিত্ৰা অজ্ঝুপেক্খামাতি.

ঞাণাভিৰংসধম্মসেনাপতিমহাধম্মরাজাধিরাজ গুরু পন সঙ্ঘরাজা মহাথেরো সীহল়দীপে অমরপুরনিকাযিকানং ভিক্খূনং আদিভূতো আচরিযো বহূপকারো. অমরপুরনিকাযোতি তত্থেরপ্পভৰোতি.

কলিযুগে পন একাসীতাধিকে ৰস্সসতে সহস্সে চ সম্পত্তে তস্স রঞ্ঞো নত্তা সিরিত্রিভৰনাদিত্যপৰরপণ্ডিতমহাধম্মরাজাধিরাজা নাম রজ্জং কারেসি. সো পন অমরপুরতো সঙ্কমিত্ৰা রতনপূরং চতুত্থং মাপেসি. তস্স রঞ্ঞো কালে গুণমুনিন্দাধিপতিমহাধম্মরাজাধিরাজগুরুত্থেরস্স সীস্সং সজীৰগামৰাসিং সীলাচারং নাম থেরং অরঞ্ঞৰাসীনং ভিক্খূনং পামোক্খট্ঠানে ঠপেসি. রাজাগারনামকে দেসে ৰিহারং কারাপেত্ৰা তস্সেৰ অদাসি.

কলিযুগে একাসীতাধিকে ৰস্সসতে সহস্সে চ সম্পত্তে চলঙ্গপুরতো পঞ্ঞাসীহং নাম থেরং আনেত্ৰা অসোকারামে রতনভূমিকিত্তিৰিহারে পতিট্ঠাপেসি, মুনিন্দাভিসিরিসদ্ধম্মধজমহাধম্মরাজাধিরাজগুরূতি নামলঞ্ছম্পি অদাসি.

কলিযুগে চতূসীসাধিকে ৰস্সসতে সহস্সে চ সম্পত্তে মুনিন্দাভিৰংসধম্মসেনাপতিমহাধম্মরাজাধিরাজগুরূতি নামলঞ্ছং দত্ৰা মহাজেয্যভূমিৰিহাররম্মণীযং নাম ৰিহারং ¶ দত্ৰা তংযেৰ মহাথেরং সঙ্ঘরাজট্ঠানে ঠপেসি.

একস্মিঞ্চ সমযে মহাথেরে রাজা পুচ্ছি,-চতস্সো দাঠা নাম চত্তালীসায দন্তেসু অন্তোগধা ৰা, উদাহু চত্তালীসায দন্তেহি ৰিসুং ভূতাতি পুচ্ছি.

অথ একচ্চে থেরা এৰমাহংসু,-চতস্সো দাঠা নাম চত্তালীসায দন্তেসু অন্তোগধাতি. একচ্চে পন চতস্সো দাঠা নাম চত্তালীসায দন্তেহি ৰিসুং ভূতাতি আহংসু. অথ রাজা গন্থং আহরথাতি আহ. অথ অন্তোগধৰাদিকা থেরা গন্থং আহরিংসু,- অঞ্ঞেসং পরিপুণ্ণদন্তানম্পি দ্ৰত্তিংসদন্তা হোন্তি, ইমস্স পন চত্তালীসং ভৰিস্সন্তীতি চ.

দন্তাতি পরিপুণ্ণদন্তস্স দ্ৰত্তিংসদন্তট্ঠিকানি. তেপি ৰণ্ণতো সেতা, সণ্ঠানতো অনেকসণ্ঠানা. তেসঞ্হি হেট্ঠিমায তাৰ দন্তপাল়িযা মজ্ঝে চত্তারো দন্তা মত্তিকাপিণ্ডে পটিপাটিযা ঠপিতআলাবুবীজসণ্ঠানা, তেসং উভোসু পস্সেসু একেকো একমূলকো এককোটিকো মল্লিকমকুল়সণ্ঠানো, ততো একেকো দ্ৰিমূলকো দ্ৰিকোটিকো যানকউপত্থম্ফিনিসণ্ঠানো, ততো দ্ৰে দ্ৰে তিমূলকা তিকোটিকা, ততো দ্ৰে দ্ৰে চতুমূলকা চতুকোটিকাতি. উপরিমায দন্তপাল়িযাপি এসেৰ নযোতি চ.

তস্স কির উত্তরোট্ঠঅপ্পকতায তিরিযং ফালেত্ৰা অপনীতদ্ধংৰিয খাযতি, চত্তারো দন্তে দ্ৰে চ দাঠা ন ছাদেতি, তেন নং ওট্ঠদ্ধোতি ৰোহরন্তীতি চ.

তত্থ তস্সাতি লিচ্ছৰিনো নাম রাজকুমারস্স, উত্তরোট্ঠঅপ্পকতাযাতি উপরি ওট্ঠস্স অপ্পকতায. অপনীতদ্ধং ৰিযাতি উপরি ওট্ঠস্স উপড্ঢভাগং অপনীতং ৰিয খাযতীতি অত্থো. ন ছাদেতীতি উপরি ওট্ঠস্স উপড্ঢভাগে পন ন পটিচ্ছাদেতি. তেনাহি যেন চত্তারো দন্তে দ্ৰে চ দাঠা ন ছাদেতি, তেন নং লিচ্ছৰীরাজকুমারং ওট্ঠদ্ধোতি ৰোহরন্তীতি ¶ . এৰং অন্তোগধৰাদেহি থেরেহি গন্থং আহরিত্ৰা দস্সিতে সব্বেপি তস্মিং ৰাদে পতিট্ঠহিংসূতি.

একস্মিঞ্চ কালে রাজা মন্তিনিং অমচ্চং পুচ্ছি,-পুব্বরাজূহি ৰিহারস্স চেতিযস্স ৰা দিন্নানি খেত্তৰত্থুআদীনি পচ্ছিমরাজূনং কালে যথাদিন্নং তানি পতিট্ঠহন্তি ৰা মা ৰাতি.

অথ মন্তিনিআমচ্চো এৰং কথেসি,- সঙ্ঘিকায ভূমিযা পুগ্গলিকানি বীজানি রোপযন্তি, ভাগং দত্ৰা পরিভুঞ্জিতব্বানীতি দসকোট্ঠাসে কত্ৰা একো কোট্ঠাসো ভূমিস্সামিকানং দাতব্বোতি চ ৰিনযপাল়িঅট্ঠকথাসু ৰুত্তত্তা পুব্বে একেন রঞ্ঞা দিন্নানি খেত্তৰত্থুআদীনি পচ্ছা একস্স রঞ্ঞো কালে যথাদিন্নং ঠিতানি. এত্থ হি সঙ্ঘিকায ভূমিযাতি ৰুত্তত্তা লাভসীমাযংৰিয বলিংযেৰ অদত্ৰা সহ ভূমিযা দিন্নত্তা পৰেণীৰসেন সঙ্ঘিকা ভূমি অত্থীতি ৰিঞ্ঞাযতি. এত্থচ পটিগ্গাহকেসু মতেসু তদঞ্ঞো চতুদ্দিসসঙ্ঘো অনাগতসঙ্ঘো চ ইস্সরো, তস্স সন্তকো, তেন ৰিচারেতব্বোতি.

চেতিয পদীপত্থায পটিসঙ্খারণত্থায ৰা দিইন্নআরামোপি জগ্গিতব্বো, ৰেত্তনং অত্ৰাপি জগ্গাপেতব্বোতি চেতিযে ছত্তং ৰা ৰেদিকং ৰা জিণ্ণং ৰা পটিসঙ্খরোন্তেন সুধাকম্মাদীনি ৰা করোন্তেন চেতিযস্স উপনিক্খেপতো কারেতব্বন্তি চ অট্ঠকথাযং ৰুত্তত্তা পুব্বরাজূহি চেতিযস্স দিন্নানি খেত্তৰত্থুআদীনি পচ্ছিমরাজূনং কালেপি চেতিযসন্তকসাৰেনেৰ ঠিতানীতি ৰেদিতব্বানি.

অথাপরম্পি পুচ্ছি,- কদা কস্স রঞ্ঞো কালে আদিং কত্ৰা খেত্তৰত্থুআদীনি ৰিহারস্স চেত্যস্স ৰা দিন্নানীতি.

অথ মন্তিনমচ্চো এৰমাহ,-পুরিমকপ্পেসু পুরিমানং রাজূনং কালেপি ৰিহারস্স চেতিযস্স ৰা দিন্নানীতি ৰেদিতব্বানি, তেনেৰ সুজাতস্স নাম ভগৰতো অম্হাকং বোধিসত্তো ¶ চক্কৰত্তিরাজা সদ্ধিং সত্তহি রতনেহি দ্ৰিসহস্সে খুদ্দকদীপে চত্তারো মহাদীপে চ অদাসি, রট্ঠৰাসিনো চ আরামগোপককিচ্চং কারাপেসীতি গন্থেসু আগতং, তস্মা চিরকালতোযেৰ পট্ঠায পুব্বরাজূহি খেত্তৰত্থুআদিনি দিন্নানীতি ৰেদিতব্বানি.

রাজৰংসেসুপি ভগৰতো পরিনিব্বানতো ৰস্সসতানং উপরি সিরিখেত্তনগরে একায আপূপিকায পঞ্চকরীস মত্তং খেত্তং একস্স থেরস্স দিন্নং, তং দ্ৰত্তপোঙ্কো নাম রাজা ৰিলুম্পিত্ৰা গণ্হি. অথ পহারঘণ্টভেরিযো পহরিতাপি সদ্দং ন অকংসু. রঞ্ঞো কুন্তচক্কম্পি যথা পুব্বে, তথা পেসিতট্ঠানং ন গচ্ছি. অথ তং কারণং ঞত্ৰা আপূপিকায যথাদিন্নমেৰ থেরস্স নিয্যাদেসীতি.

কলিযুগে পন নৰনৰুতাধিকে ৰস্সসতে সহস্সে চ সম্পত্তে তস্স কনিট্ঠো সিরিপৰরাদিত্যলোকাপেতি ৰিজযমহাধম্মরাজাধিরানা রজ্জং কারেসি, সো পন রাজা রতনপূরতো সঙ্কমিত্ৰা অমরপুরং দুতিযং মাপেসি. তস্স রঞ্ঞো রজ্জং পত্তসংৰচ্ছরেযেৰ জেট্ঠমাসস্স জুণ্হপক্খপঞ্চমিযং রতনপূরনগরে মারৰিজযরতনসুধম্মায নাম পিটকসালায সূরিযৰংসস্স নাম থেরস্স পরিসমজ্ঝে রাজলেখনং ৰাচাপেত্ৰা সঙ্ঘরজ্জং নিয্যাদেসি. সূরিযৰংসাভিসিরিপৰরালঙ্কারধম্মসেনাপতিমহাধম্মরাজাধিরাজগুরূতি না মলঞ্ছম্পি অদাসি.

সো পন থেরো কলিযুগে পঞ্চৰীসাধিকে ৰস্সসতে সহস্সে চ সম্পত্তে মিগসিরমাসস্স জুণ্হপক্খসত্তমিযং সুত্তৰারে ৰালুকৰাপিগামে পটিসন্ধিযা ৰিজাতোতিসত্ততিৰযং সম্পত্তে সঙ্ঘরজ্জং পত্তো সন্তিন্দ্রিযো খন্তী ধম্মো সিক্খাকামো পরিযত্তিৰিহারদো তিপিটকালঙ্কারমহাধম্মরাজগুরুত্থেরস্স সিস্সো. সো পন কলিযুগে পন্নরসাধিকে ¶ দ্ৰিৰস্সসতে সহস্সেচ সম্পত্তে তস্স রঞ্ঞো কালেযেৰ মচ্চুৰসং পত্তো.

অথ রাজা অনেকসহস্সেহি পাসাদেহি অভূতপুব্বেহি অচ্ছরিযকম্মেহি সরীরঝাপনকিচ্চং অকাসি. অথ কলিযুগে সেল়সাধিকে ৰস্সসতে সহস্সেচ সম্পত্তে তস্স মহাথেরস্স সিস্সং ঞেয্যধম্মং নাম থেরং পুন সঙ্ঘরাজট্ঠানে ঠপেসি. পঠমং ঞেয্যধম্মালঙ্কারধম্ম সেনাপতিমহাধম্মরাজাধিরাজগুরূতি নামলঞ্ছং অদাসি. ততো পচ্ছা দুতিযং ঞেয্যধম্মাভিৰংসসিরিপৰরালঙ্কারধম্মসেনাপতিমহাধম্মরাজাধিরাজ- গুরূতি নামলঞ্ছং অদাসি.

সো পন থেরো কলিযুগে একসট্ঠাধিকে ৰস্সসতে সহস্সেচ দেৰসূরগামে পটিসন্ধিযা ৰিজাতো হুত্ৰা অসীতাধিকে ৰস্সসতে সহস্সেচ পঠমআসাল়িমাসস্স জুণ্হপক্খচুদ্দসমিযং উপসম্পদভূমিং পত্তো.

তস্স রঞ্ঞো কালে কলিযুগে নৰনৰুতাধিকে ৰস্সসতে সহস্সেচ সম্পত্তে সীহল়দীপতো পঞ্ঞাতিস্সো নাম থেরো সদ্ধিং সুনন্দেন নাম ভিক্খুনা ইন্দসারেন নাম সামণেরেন একেন উপাসকেন একেন দারকেনচ অমরপুরং নাম নগরং সম্পত্তো. অথ সঙ্ঘরাজা তেসং পচ্চযানুগ্গহেন ধম্মানুগ্গহেচ অনুগ্গহেসি. তেসু অপরভাগে কলিযুগে দ্ৰিৰস্সাধিকে দ্ৰিসতে ৰস্সসহস্সেচ সম্পত্তে পঞ্ঞাতিস্সত্থেরো জররোগেন অভিভূতত্তা সঙ্খারধম্মানং সভাৰং অনতিৰত্তত্তা কালমকাসি. তস্স পুন সিক্খং গণ্হিস্সামীতি পরিৰিতক্কো মত্থকং অপ্পত্তো হুত্ৰা ৰিনস্সযি. তেনাহভগৰা, –

অচিন্তিতম্পি ¶ ভৰতি, চিন্তি তম্পি ৰিনস্সতি;

ন হি চিন্তামযা ভোগা, ইত্থিযা পুরিসস্স ৰাতি.

ইমস্মিং পন লোকে পণ্ডিতো পুঞ্ঞং কত্তুকামো অভিত্থরেৰ করেয্য. কো নাম জঞ্ঞা অজ্জে ৰা সুৰে ৰা পরসুৰে ৰা মরণং ভৰিস্সভীতি. তেনাহ ভগৰা, –

অভিত্থরেথ কল্যাণে, পাপা চিত্তং নিৰারযে;

দন্দঞ্হি করতো পুঞ্ঞং, পাপস্মিং রমতী মনোতি.

অথ মহারাজা তস্স সরীরঝাপনকিচ্চং বহূহি সাধুকীল়নসভাযেহি অকাসি. ততো পচ্ছা সুনন্দস্স নাম ভিক্খুস্স পুন সিক্খং অদাসি. সামণেরং পন উপসম্পদভূমিযং পতিট্ঠাপেসি. দারকঞ্চ সামণেরভূমিযন্তি.

তে পন মহারাজা কলিযুগে তিৰস্সাধিকে দ্ৰিসতে সহস্সেচ সম্পত্তে মাঘমাসে বহূহি পচ্চযেহি উপত্থম্ভেত্ৰা তানিতানি সব্বানি কম্মানি তীরেত্ৰা কুসিমনগরজেট্ঠস্স একস্স অমচ্চস্স ভারং কত্ৰা তস্সেৰ সব্বানি কিচ্চানি নিয্যাদেত্ৰা সীহল়দীপং পহিণীতি.

সঙ্ঘরাজামহাথেরো পন সাসনস্স চিরট্ঠিতত্থায সোতারানং সুখপ্পটিবোধনত্থায নানাগন্থেহি পাঠং ৰিসোধেত্ৰা সদ্ধম্মপ্পজ্জোতিকায নাম মহানিদ্দেসট্ঠকথায অত্থযোজনং মরম্মভাসায অকাসি. বহূনং সিস্সানং পরিযত্তিৰাচনৰসেন জিনসাসনস্স অনুগ্গহং অকাসীতি.

অপরভাগে কলিযুগে অট্ঠৰস্সাধিকে দ্ৰিসকে সহস্সেচ সম্পত্তে মিগসিরমাসস্স জুণ্হপক্খঅট্ঠমিযং তস্স পুত্তো সীরিপৰরাদিত্যৰিজযানন্তযসমহাধম্মরাজাধিরাজা নাম রজ্জং কারেসি. তদা সূরিযৰংসাভিসিরিপৰরালঙ্কারধম্মসেনাপতিমহাধম্মরাজাধিরাজগুরু- মহাথেরস্স সিস্সং পঞ্ঞাজোতাভিধজমহাধম্মরাজাধিরাজগুরুত্থেরং ¶ সঙ্ঘরাজট্ঠানে ঠপেসি.

সোপি সীলৰা পরিযত্তিকোৰিদো সিক্খাকামো লজ্জীপেসলো. অঙ্গুত্তরনিকাযপাল়িযা তদট্ঠকথাযচ অত্থ যোজনং মরম্মভাসায অকাসি.

তস্স রঞ্ঞো কালে ঞেয্যধম্মাভিৰংসসিরিপৰরালঙ্কারধম্মসেনাপতিমহাধম্মরাজাধিরাজ- গুরুত্থেরো সদ্ধম্মৰিলাসিনিযা নাম পটিসম্ভিদামগ্গট্ঠকথায অত্থযোজনং মরম্মভাসায অকাসি.

মণিজোতসদ্ধম্মালঙ্কারমহাধম্মরাজাধিরাজগুরুত্থেরোসংযুত্ত- নিকাযপাল়িযা তদট্ঠকথাযচ অত্থযোজনং মরম্মভাসায অকাসি.

মেধাভিৰংসসদ্ধম্মধজমহাধম্মরাজাধিরাজগুরুত্থেরো দীঘনিকাযপাল়িযা তদট্ঠকথাযচ অত্থযোজনং মরম্মভাসায অকাসি.

ঞেয্যধম্মাভিৰংসসিরিপৰরালঙ্কারধম্মসেনাপতিমহা ধম্মরাজাধিরাজগুরুত্থেরস্স সিস্সো উপসম্পদাৰসেন পঞ্চৰস্সিকো পঞ্ঞাসামি নামাহং সদ্দত্থভেদচিন্তানামকস্সগন্থস্স গণ্ঠিপদত্থৰণ্ণনং মরম্মভাসায অকাসিং. দসৰস্সিককালে পন অভিধানপ্পদীপিকাসংৰণ্ণনায অত্থযোজনং মরম্মভাসায অকাসিং. তস্সাচ পাঠং বহূহি গন্থেহি সংসদ্দিত্ৰা ৰিসোধেসিন্তি.

অপরভাগে সক্করাজে চুদ্দসাধিকে দ্ৰিসতে সহস্সেচ সম্পত্তে অযং অম্হাকং ধম্মিকো রাজা অনেকসতজাতীসু উপচিতপুঞ্ঞানুভাৰেন জিনসাসনস্স পগ্গণ্হনত্থায সম্মাদেৰলোকপালেহি উয্যোজিযনোৰিযরজ্জসম্পত্তিং পটিলভি. দসবলস্সসাসনং পগ্গণ্হিতুকামস্স ধম্মরাজস্স মনোরথো মত্থকং পত্তো অহোসি. মরিযাদং ভিন্দিত্ৰা দিন্নকতমগ্গংৰিয উদকং লদ্ধোকাসতায সদ্ধা মহোঘো ¶ অৰত্থরিত্ৰা তিট্ঠতি. চত্তারিচ ৰস্সানি অতিক্কমিত্ৰা বেসাখমাসে পঞ্চককুধভণ্ডাদীহি অনেকেহি রাজভোগ্গভণ্ডেহি পরিৰারেত্ৰা উদুম্বরভদ্দপিট্ঠে সদ্ধিং মহেসিযা অভিসেকং পত্তো. তেনাৰোচুম্হা নাগরাজুপ্পত্তিকথাযং,-

মহাপুঞ্ঞোৰ রাজাযং, কট্ঠটঘেৰ আগতে;

সক্করাজে হি সম্পত্তিং, পত্ৰা দানে রতো ৰতে.

তদা চত্তারি ৰস্সানি, অতিক্কমিত্ৰা ৰিসাধিকে;

সদ্ধিং মহেসিযা সেকং, পত্তো হুত্ৰা মহাতলে.

জিনচক্কঞ্চ জোতেসি, মহাসোকাদযো যথা;

অলজ্জিনোচ নিগ্গয্হ, পগ্গহেত্ৰান লজ্জিনো.

রট্ঠেচ দানসীলেসু, ভাৰনাযাভিযুঞ্চযে;

নিমিরাজাদযো যথাতি.

তদা যস্মা অলজ্জিনো নিগ্গহিতব্বপুগ্গলে অৰীচিনরকে নিক্খিপন্তোৰিয নিগ্গহকম্মং অকাসি, তস্মা তে অলদ্ধোকাসা নিলীযন্তি, যথা অরুণুগ্গমনকালে কোসিযাতি. তেনাৰোচুম্হা নাগরাজুপ্পত্তিকথাযং,-

তদা পন জিনচক্কং, নভে চন্দোৰ পাকটং;

অলজ্জিনো নিলীযন্তি, অরুণুগ্গেৰ কোসিযাতি.

যস্মাচ লজ্জিনো পগ্গহিতব্বপুগ্গলে ভৰগ্গেউক্খিপন্তোৰিয পগ্গহকম্মং করোতি, তস্মা তে লদ্ধোকাসা উট্ঠিতসীসা নিরাসঙ্কা হুত্ৰা তিট্ঠন্তি, যথা চন্দিমসূরিযালোকানং পটিলদ্ধকালে আদিকপ্পিকাতি. তেনাৰোচুম্হা, –

তদাপিচ ¶ জিনচক্কং, খে ভাণুমাৰ পাকটং;

লজ্জিনোপি উট্ঠহন্তি, ওভালদ্ধেৰ কপ্পিকাতি.

তেপিটকম্পি নৰঙ্গং বুদ্ধৰচনং চিরট্ঠিতিকং কত্তুকামো পরিযত্তিৰিস্সরদেহি মহাথেরেহি ৰিসোধাপেত্ৰা লেখকানং ভতিং দত্ৰা কণ্ঠজমুদ্ধজাদিৰিধানং সিথিলধনিতাদিৰিধানঞ্চ পুনপ্পুনং ৰিচারেত্ৰা অন্তমসো পরিচ্ছেদলেখমত্তম্পি অৰিরাধেত্ৰা অন্তেপুরং পৰিসেত্ৰা সুৰণ্ণমযেসু লোহমযেসুচ পোত্থকেসু লিখাপেসি. ঞাণথামসম্পন্নেচ ভিক্খূ ৰিচিনেত্ৰা যথাবলং ৰিনযপিটকং ৰিসুং ৰিসুং ধারেতি ৰাচুগ্গতং কারাপেতি. অগ্গমহেসিং আদিং কত্ৰা সকল ওরোধাদযো বহূ রাজসেৰকা অমচ্চাদযো নাগরিকেচ যথাবলং সুত্তন্তপিটকং অভিধম্মপিটকঞ্চ ৰিসুং ৰিসুং একেকসুত্তমাতিকাপদভাজনীচিত্তৰারাদিৰসেন ৰিভাজেত্ৰা ধারেতি ৰাচুগ্গতং কারাপেতি. সযঞ্চ অনত্তলক্খণাদিকং অনেকৰিধং সুত্তং দেৰসিকং সজ্ঝাযং করোতি. জিনসাসনস্স চিরট্ঠিতত্থাযসকলৰিজিতেচ অরঞ্ঞৰাসীনং ভিক্খূনং অস্সমস্স সমন্ততো পঞ্চধনুসতপ্পমাণে ঠানেথলদকচরানং সব্বেসং সত্তানং অভযং অদাসি. পরিযত্তি ৰিসারদানঞ্চ থেরানুথেরানং মাতাপিতাদযো ঞাতকে সব্বরাজকিচ্চতো বলিকম্মতোচ মোচাপেত্ৰা যথাসুখং ৰসাপেতি. একাহেনেৰাপি সহস্সমত্তে কুলপুত্তে পব্বজূপসম্পদভূমীসু পতিট্ঠাপেত্ৰা সাসনং পগ্গণ্হি. অঞ্ঞানিপি বহূনি পুঞ্ঞকম্মানি করোতি. কত্ৰাচ ৰিৰট্টমেৰ পত্থেতি, নো ৰট্টং. অঞ্ঞেচ ওরোধাদযো তুম্হে যানি কানিচি পুঞ্ঞকম্মানি কত্ৰা ৰিৰট্টমেৰ পত্থেত, মা ৰট্টন্তি অভিণ্হং ওৰদতি. অনিচ্চলক্খণাদিসংযুত্তায ধম্মকথায নিচ্চং ওৰদতি. সযম্পি সমথৰিপস্সনাসু নিচ্চারদ্ধং অকাসি. রাজূনং পন রট্ঠসামিকানং ধম্মতায কিচ্চবাহুল্লতায কদাচি কদাচি ওকাসং ন লভতি কম্মট্ঠানমনুযুঞ্জিতুং, এৰম্পি সমানো সরীরমলপরিজগ্গনকালেপি কম্মট্ঠানমনুযুঞ্জতিযেৰ, ন মোঘৰসেন কালং খেপেতি. লোকে হি অমঙ্গলসম্মতানিপি মনুস্সসীসকপালট্ঠিআদীনি সুসাসনতো আনেত্ৰা দন্তকট্ঠাদীনি ৰা তংসদিসানি কারাপেত্ৰা অত্তনো সমীপে ঠপেত্ৰা অট্ঠিকাদিভাৰনামযপুঞ্ঞং ৰিচিনাতি.

তদা পন অম্হাকং আচরিযৰরং পরিযত্তিৰিসারদং তিক্খ জৰনগচ্ছিরাদিঞাণোপেতং ৰিচিত্রধম্মদেসনাকথং সকল মরম্মিকভিক্খূনং ওনমিতট্ঠানভূতং ৰুদ্ধাপচাযিং রূপসোভগ্গপত্তং যুত্তৰাদিকং ঞেয্যধম্মাভিমুনিৰরঞাণকিত্তিসিরিধজধম্মসেনাপতি- মহাধম্মরাজাধিরাজগুরূতি ততিযং লদ্ধলঞ্ছং তং ভিক্খুসঙ্ঘানং সকলরট্ঠৰাসীনং পামোক্খভাৰে পতিট্ঠাপেসি অসোকমহারাজাৰিয মহামোগ্গলিপুত্ততিস্সত্থেরং. তেনাৰোচুম্হা নাগরাজুপ্পত্তিকথাযং,–

তদাচ ভিক্খুসঙ্ঘানং, থেরং পামোক্খভাৰকে;

ঞেয্যাদিলদ্ধলঞ্ছং তং, পতিট্ঠাপেসি সাধুকন্তি.

তদাচ অম্হাকং ধম্মিকমহারাজা সক্করাজে একূনৰীসতাধিকে সহস্সে দ্ৰিসতেচ সম্পত্তে মন্তলাখ্যাতাচলস্স সমীপে সুভূমিলক্খণোপেতং একনিপাততিত্থমিৰ বহুজননযনৰিহঙ্গানং সব্বনগরালঙ্কারেহি পরিক্খিত্তং মনুস্সানং চক্খুলোলতাজনকং নানারতনেহি সম্পুণ্ণং নানা ৰেরজ্জৰাণিজানং পুটভেদনট্ঠানভূতং রতনপুণ্ণনামকং মহারাজট্ঠানিকং মাপেসি, মন্ধাতুৰিয রাজগহং, সুদস্সনো ৰিযচ কুসাৰতীনগরন্তি. তেনাৰোচুম্হা নাগরাজুপ্পত্তিকথাযং,–

তদা কট্ঠটঝে সম্পত্তে, মন্তলাখ্যাচলস্সচ;

এরাৰতীতি নামায, মাপেসি সমীপে নগরং.

সুভূমিলক্খণোপেতং ¶ , রতনপুণ্ণনামকং;

রাজগহংৰ মন্ধাতু, অকিরম্মণিযং সুভন্তি.

সেয্যথাপি নাম লোকে আলোকত্থিকানং সত্তানং পীতিসোমনস্সং উপ্পাদেন্তো উপকরোন্তো উদযপব্বততো সহস্সরংসী দিৰাকরো উট্ঠহতি, এৰমেৰং মরম্মরট্ঠিকানং লজ্জীপেসলানং সিক্খাকামানং ভিক্খূনং গিহীনঞ্চ পীতিসোমনস্সং উপ্পাদেন্তো উপকারোন্তো অযং ধম্মিকোরাজা ইমস্মিং মরম্মরট্ঠে উপ্পজ্জতি.

ইমঞ্চ ধম্মিকরাজানং নিস্সায মরম্মরট্ঠে সম্মাসম্বুদ্ধস্স সাসনং অতিৰিয জোতেতি. ৰুড্ঢিং ৰিরূল়িং ৰেপুল্লং আপজ্জতি.

সাসনঞ্চ নামেতং রাজানং নিস্সায তিট্ঠতীতি. অযং ধম্মিকরাজাযেৰ ন সাসনস্সূপকারো ধম্মচারী ধম্মমানী, অপিচ খো ধম্মিকরাজানং নিস্সিতাপি সব্বরট্ঠৰাসিকা সাসনস্সূপকারাযেৰ ধম্মচারিনো ধম্মমানিনো রাজানুগতা হুত্ৰা. তেনেৰাহ মহাবোধিজাতকাদীসু, –

গৰঞ্চে তরমানানং, উজুং গচ্ছতি পুঙ্গৰো;

সব্বা গাৰী উজুং যন্তি, নেত্তে উজুং গতে সতি.

এৰমেৰ মনুস্সেসু, যো হোতি সেট্ঠসম্মতো;

সো চেপি ধম্মং চরতি, পগেৰ ইতরা পজা;

সব্বরট্ঠং সুখং সেতি, রাজা চে হোতি ধম্মিকোতি.

ৰিসেসতো পন দুতিযং অমরপুরং মাপেন্তস্স মহাধম্মরঞ্ঞো অগ্গমহেসিযা অজ্জৰমদ্দৰসোহজ্জাদিগুণযুত্তায ধিতা অম্হাকং রঞ্ঞো অগ্গমহেসী সম্মাচারিনী পতিব্বতা. সব্বনারীনং অগ্গভাৰং পত্তাপি সমানা কামগুণসঙ্খাতেন সুরামদেন অপ্পমজ্জিত্ৰা পুঞ্ঞকম্মেসু অপ্পমাদৰসেন নিচ্চারদ্ধৰীরিযা হোতি. নিচ্চং পরিযত্তিযা উগ্গহণং অকাসি. ৰেদপারগূচ ¶ অহোসি. সম্মাসম্বুদ্ধসাসনে অতিৰিয পসন্না অঞ্ঞাপি ওরোধাদযো মহাধম্মরঞ্ঞো ওৰাদে ঠত্ৰা ধম্মং চরিংসু. সাসনং পসীদিংসুযেৰ. উপরাজাপি মহাধম্মরাজস্স একমাতাপীতিকো মহাধম্মরাজিচ্ছায অৰিরোধেত্ৰাযেৰ সকলরট্ঠৰাসীনং গিহীনং ভিক্খূনঞ্চ অত্থহিতমাৰহতি, সেয্যথাপি চক্কৰত্তিরঞ্ঞো সন্তিকে জেট্ঠপুত্তো থামজৰসম্পন্নো অতিসূরো উট্ঠানৰীরিযো. অঞ্ঞেপি অমচ্চা অনেকসহস্সপ্পমাণা মহাধম্মরঞ্ঞা লদ্ধেসু লদ্ধেসু ঠানন্তরেসু ঠিতা মহাধম্মরঞ্ঞো তং তং কিচ্চমাৰহন্তি পুঞ্ঞকম্মেসু অভিরমন্তি. সকলরট্ঠৰাসিনোচ মনুস্সা দানসীলভাৰনাসুযেৰ চিত্তং ঠপেন্তি. ভিক্খূচ সঙ্ঘরাজপ্পমুখাদযো থেরনৰমজ্ঝিমা গন্থধুরৰিপস্সনাধুরেসু অভিযুঞ্জন্তি.

এৰমেকস্স সাধুজ্জনস্স গুণং মহন্তেন উস্সাহেন কথেন্তোপি দুক্করংতাৰ নিট্ঠং পাপেতুং, ভগৰতো পন তিলোকগ্গস্স অনেকসহস্সপারমিতানুভাৰেন পৰত্তং গুণং কো নাম পুগ্গলো সক্খিস্সতি নিট্ঠং পাপেত্ৰা কথেতুন্তি. এৰং মহাধম্মরাজস্সচ অগ্গমহেসিযাচেৰ উপরাজাদীনঞ্চ গুণে ৰিস্সট্ঠেন ৰিত্থারতো কথিযমানে ইমিস্সা সাসনৰংসপ্পদীপিকায অনেকসতভাণৰারমত্তম্পি পত্ৰা পরিযন্তো ন পঞ্ঞাযেয্য, যস্মাচ অতিপ্পপঞ্চা ভৰেয্য, তস্মা সঙ্খেপেনেৰাযং কথিতা সাধুজ্জনানং মহাপুঞ্ঞমযায পীতিযা অনুমোদনত্থায. ইদঞ্হি সুণন্তেহি সাধুজ্জনেহি অনুমোদিতব্বং,- অসুকস্মিং কির কালে অসুকস্মিং রট্ঠে অসুকো নাম রাজা সাসনং পগ্গণ্হিত্ৰা ৰুড্ঢিং ৰিরূল়িং ৰেপুল্লমাপজ্জি, সেয্যথাপি নাম রুক্খো ভূমোদকানং নিস্সায ৰুড্ঢিং ৰিরূল়িং ৰেপুল্লমাপজ্জীতি.

ইমস্স রঞ্ঞো কালে ঞেয্যধম্মাভিমুনিৰরঞ্ঞাণকিত্তি সিরিধজধম্মসেনাপতিমহাধম্মরাজাধিরাজগুরু নাম সঙ্ঘরাজা ¶ মহাথেরো রঞ্ঞা অভিযাচিতো সুরাজমগ্গদীপনিং নাম গন্থং অকাসি. মজ্ঝিমনিকাযট্ঠকথায অত্থং সিস্সানং ৰাচেত্ৰা যথাৰাচিতনিযামেন অত্থযোজনানযং পোত্থকে আরোপাপেসি.

মেধাভিৰংসসদ্ধম্মধজমহাধম্মরাজাধিরাজগুরু নাম মহাথেরো জাতকপাল়িযা অত্থযোজনানযং মরম্মভাসায অকাসি.

সঙ্ঘরাজস্স সিস্সো পঞ্ঞাসামিসিরিকৰিধজমহাধম্মরাজাধিরাজগুরূতি রঞ্ঞা লদ্ধনামলঞ্ছো সোযেৰাহং ধম্ম রঞ্ঞা অগ্গমহেসিযাচ অভিযাচিতো সীলকথং নাম গন্থং উপাযকথং নাম গন্থঞ্চ অকাসিং. রঞ্ঞো আচরিযভূতেন দিসাপামোক্খেন নাম উপাসকেন অভিযাচিতো সোযেৰাতং অক্খরৰিসোধনিং নাম গন্থং আপত্তিৰিনিচ্ছযং নাম গন্থঞ্চ. তথা সঙ্ঘরঞ্ঞা চোদিতো সোযে ৰাহং নাগরাজুপ্পতিকথং ৰোহারত্থভেদঞ্চ ৰিৰাদৰিনিচ্ছযঞ্চ অকাসিং. তথা পঞ্চজম্বুগামভোজকেন লেখকামচ্চেন দ্ৰীহিচ আরোচনলেখকামচ্চেহি অভিযাচিতো সো যেৰাহং রাজসেৰকদীপনিং নাম গন্থং অকাসিং. তথা দীঘনাৰানগরভোজকেন মহাঅমচ্চেন অভিযাচিতো সোযেৰাহং নিরযকথাদীপকং নাম গন্থং অকাসিং. তথা সিলালেড্ডুকনামকেন উপাসকেন অভিযাচিতো সোযেৰাহং উপোসথৰিনিচ্ছযং নাম গন্থং অকাসিং. তথা বহূহি সোতুজনেহি অভিযাচিতো সোযেৰাহং সদ্দনীতিযা সংৰণ্ণনং পাল়িভাসায অকাসিন্তি.

একস্মিঞ্চ সমযে কলিযুগে ৰীসাধিকে দ্ৰিসতে সহস্সেচ সম্পত্তে রঞ্ঞো এতদহোসি,- ইদানি বুদ্ধস্স ভগৰতো সাসনে কেসঞ্চি ভিক্খূনং সামণেরানঞ্চ কুলদূসনাদিঅসারুপ্পকম্মেহি উপ্পাদিতা চত্তারো পচ্চযা বহূ দিস্সন্তি ¶ , কেচিপি অলজ্জী পুগ্গলা জাতরূপাদিনিস্সগ্গিযৰত্থুম্পিসাদিযন্তি, কেচিপি ৰিনা পচ্চযং ৰিকালে তম্বুলং খাদন্তি, সন্নিধিঞ্চ কত্ৰা ধূমানিচ পিৰন্তি, অগিলানা হুত্ৰা সউপাহনা গামং পৰিসন্তি, ছত্তং ধারেন্তি, অঞ্ঞেপি অৰিনযানুলোমাচারে চরন্তি, ইদানি ভিক্খূনং সামণেরানঞ্চ বুদ্ধস্স সম্মুখে বুদ্ধং সক্খিং কত্ৰা ইমে অনাচারে ন চরিস্সামাতি পটিঞ্ঞং কারাপেত্ৰা ভগৰতো সিক্খাপদানি রক্খাপেতুং ৰট্টতি, এৰঞ্চ সতি ভিক্খূ সামণেরাচ মযং বুদ্ধস্স সম্মুখে এৰং পটিঞ্ঞং করোম, পটিঞ্ঞঞ্চ কত্ৰা ৰিকারং আপজ্জন্তানং অম্হাকং ইমস্মিংযেৰ অত্তভাৰে ইমস্মিংযেৰ পচ্চক্খে কিঞ্চি ভযং উপ্পজ্জেয্যাতি পচ্চক্খভযং অপেক্খিত্ৰা তে সিক্খাপদং রক্খিস্সন্তীতি. এৰং পন চিন্তেত্ৰা ভিক্খূনং সামণেরানঞ্চ এৰং পটিঞ্ঞং কারাপেতুং যুজ্জতি ৰা মা ৰাতি মযং ন জানাম, ইদানি সঙ্ঘরাজাদযো মহাথেরে সন্নিপাতাপেত্ৰা পুচ্ছিস্সামীতি পুন চিন্তেসি.

অথ সব্বেপি মহাথেরে সঙ্ঘরাজস্স ৰিহারে সন্নিপাতাপেত্ৰা ইমং কারণং পুচ্ছথাতি অমচ্চে আণাপেসি. অথ অমচ্চা মহাথেরে সন্নিপাতাপেত্ৰা পুচ্ছিংসু,-ইদানি ভন্তে সাসনে ভিক্খূনং সামণেরানঞ্চ অৰিনযানুলোমাচারানি দিস্ৰা বুদ্ধস্স সম্মুখে বুদ্ধং সক্খিং কত্ৰা রাজা যথা ইমে অনাচারে ন চরিস্সামাতি পটিঞ্ঞং কারাপেত্ৰা ভগৰতো সিক্খাপদানি রক্খাপেতুং ইচ্ছতি, তথা কারাপেতুং যুজ্জতি ৰা মা ৰাতি.

অথ সঙ্ঘরাজপ্পমুখাদযো মহাথেরা এৰমাহংসু,- যস্মা সাসনস্স পরিসুদ্ধভাৰং ইচ্ছন্তো এৰং করোতি, তস্মা তথা কারাপেতুং যুজ্জতীতি.

পণ্ডিতাভিধজমুনিন্দঘোসমহাধম্মরাজগুরুত্থেরাদযো পন কতিপযত্থেরা এৰমাহংসু, – ইদানি ভিক্খূ নাম সদ্ধাবলাদীনং ¶ থোকতায ভগৰতো আণাসঙ্খাতং সচিত্তকাচিত্তকাপত্তিইং আপজ্জিত্ৰা ভগৰতাযেৰ অনুঞ্ঞাতেহি দেসনাৰুট্ঠানকম্মেহি পটিকরিত্ৰা সীলং পরিসুদ্ধং কত্ৰা লজ্জীপেসলভাৰং করোন্তি, ন কদাচি আপত্তিং অনাপজ্জিত্ৰা, তস্মা ভগৰতা পটিক্খিত্তং কম্মং সঞ্চিচ্চন ৰীতিক্কমিস্সামাতি বুদ্ধস্স সম্মুখে পটিঞ্ঞাকরণং অতিভারিযং হোতি, সচেপি পুব্বে পটিঞ্ঞং কত্ৰা পচ্ছা ৰিসংৰাদেয্য, এৰং সতি পটিস্সৰৰিসংৰাদে সুদ্ধচিত্তস্স দুক্কটং পটিস্সৰক্খণেএৰ পাচিত্তি ইতরস্সচাতি ৰচনতো তং তং আপত্তিং পটিস্সৰৰিসংৰাদনদুক্কপেত্তিযা সহেৰ আপজ্জেয্য, অথ পটিঞ্ঞাকরণতোযেৰ আপত্তিবহুলতা ভৰেয্য, যথা পন রোগং ৰূপসমিতুং অসপ্পাযভেসজ্জং পটিসেৰতি, অথস্স রোগো অৰূপসমিত্ৰা অতিক্কমেয্য, এৰং আপত্তিং অনাপজ্জিতুকামো বুদ্ধস্স সম্মুখে পটিঞ্ঞং করোতি, অথস্স আপত্তিবহুলাযেৰ ভৰেয্যাতি, কিঞ্চ ভিয্যো অভযদস্সাৰিনো ভিক্খূ অনেকসতবুদ্ধস্স সম্মুখে অনেকসতৰারানিপি পটিঞ্ঞং কত্ৰা সিক্খাপদং ৰীতিক্কমিতুং ৰিসহিস্সন্তিযেৰাতি.

অথ সঙ্ঘরাজা মহাথেরো অত্তনো সিস্সং পঞ্ঞাসামিসিরিকৰিধজমহাধম্মরাজাধিরাজগুরুং নাম মং উয্যোজেসি, তস্স থেরস্স ৰচনে পটিৰচনং দাতুং.

অথাহং এৰং ৰদামি,- দ্ৰে পুগ্গলা অভব্বা সঞ্চিচ্চ আপত্তিং আপজ্জিতুং ভিক্খূচ ভিক্খুনিযোচ অরিযা পুগ্গলা, দ্ৰে পুগ্গলা সব্বা সঞ্চিচ্চ আপত্তিং আপজ্জিতুং ভিক্খূচ ভিক্খুনিযোচ পুথুজ্জনাতি পরিৰারপাল়িযং ৰুত্তত্তা অরিযপুগ্গলানংৰিয পুথুজ্জনানং ৰিস্সট্ঠেন পটিঞ্ঞং কাতুং ন ৰট্টতীতি মনসিকরিত্ৰা পুথুজ্জনভিক্খূনং পটিঞ্ঞাকরণং অতিভারিযন্তি ৰেদেয্যচে, সব্বেহিপি অরিযপুথুজ্জনেহি ভিক্খূহি উপসম্পদামাল়কে আদিতোৰ ¶ চত্তারি অকরণীযানি আচিক্খিতব্বানীতি ৰুত্তেসু চতূসু অকরণীযেসু অন্তমসো তিণসলাকং উপাদায যো ভিক্খু পাদং ৰা পাদারহং ৰা অতিরেকপাদং ৰা অদিন্নং থেয্যসঙ্খাতং আদিযতি, অস্সমণো হোতি অসক্যপুত্তিযোতি, অন্তমসো কুন্তকিপিল্লিকং উপাদায যো ভিক্খু সঞ্চিচ্চ মনুস্সৰিগ্গহং জীৰিতং ৰোরোপেসি, অন্তমসো গব্ভপাতনং উপাদায অস্সমণো হোতি অসক্যপুত্তিযোতি, অন্তমসো সুঞ্ঞাগারে অভিরমামীতি যো ভিক্খুপাপিচ্ছো ইচ্ছাপকতো অসন্তং অভূতং উত্তরিমনুস্সধম্মং উল্লপতি, অস্সমণো হোতি অসক্যপুত্তিযোতিচ উপজ্ঝাচরিযেন ওৰদিযমানেহি অভিনৰোপসম্পন্নেহি আম ভন্তেতি পটিঞ্ঞাকথাযেৰ. সামণেরেহিপি পব্বজ্জক্খণেযেৰ উপজ্ঝাযস্স সন্তিকে পাণাতিপাতাৰেরমণিসিক্খাপদং সমাদিযামীতিআদিনা পঠমং পটিঞ্ঞা কতাযেৰ. তথা ভিক্খূহি তংতংআপত্তিং আপজ্জিত্ৰা দেসনায পটিকরণকালে সাধু সুট্ঠু ভন্তে সংৰরিস্সামীতি অভিণ্হং পটিঞ্ঞা কতাযেৰ. সামণেরেহিপি উপজ্ঝাচরিযস্স সন্তিকে সিক্খাগ্গহণকালেপি পাণাতিপাতাৰের মণিসিক্খাপদং সমাদিযামীতিআদিনা অভিণ্হং পটিঞ্ঞা কতাযেৰ. তাহি পন পটিঞ্ঞাহি অভাযিত্ৰা ইতোযেৰ ভাযামীতি ৰুত্তৰচনং অচ্ছরিযংৰিয হুত্ৰা খাযতি. ইমায হি পটিঞ্ঞায তাসং পটিঞ্ঞানং ৰিসেসতা ন দিস্সতীতি.

অযং পনেত্থ সন্নিট্ঠানত্থো,- পটিস্সৰদুক্কটাপত্তি নাম সাৰত্থিযং পস্সেনদিকোসলরঞ্ঞা ইমস্মিং ৰিহারে ৰস্সং উপগচ্ছাহীতি আযাচিতে সাধূতি পটিজানিত্ৰা লাভবহুলতং পটিচ্চ অন্তরামগ্গে অঞ্ঞস্মিং ৰিহারে ৰস্সং উপগন্ত্ৰা পটিস্সৰৰিসংৰাদনপচ্চযা উপনন্দং নাম ভিক্খুং আরব্ভ পঞ্ঞত্তা. সমন্তপাসাদিকঞ্চ নাম ৰিনযট্ঠকথায ৰস্সূপনাযিকক্খন্ধকৰণ্ণনাযং ¶ পটিস্সৰেচ আপত্তি দুক্কটস্সাতি এত্থ ন কেৰলং ইমং তেমাসং ইধ ৰস্সং ৰসথাতি এতস্সেৰ পটিস্সৰে আপত্তি, ইমং তেমাসং ভিক্খং গণ্হথ, উভোপি মযং ৰস্সং ৰসিস্সাম, একতো উদ্দিস্সাপেস্সামাতি এৰমাদিনাপি তস্স তস্স পটিস্সৰে দুক্কটং, তঞ্চ খো পঠমং সুদ্ধচিত্তস্স পচ্ছা ৰিসংৰাদনপচ্চযা, পঠমম্পি অসুদ্ধ চিত্তস্স পন পটিস্সৰে পাচিত্তিযন্তি ৰুত্তং.

ইচ্চেৰং ভিক্খূনং অঞ্ঞমঞ্ঞং দাযকেহিচ সদ্ধিং পটিজানিত্ৰা ৰিসংৰাদনপচ্চযা অঞ্ঞেসং অত্থহিতভেদেযেৰ দুক্কটাপত্তি ৰুত্তা, ন অত্তনো ইচ্ছাৰসেন সযমেৰ অহং ভুঞ্জিস্সামি সযিস্সামীতি এৰমাদিনা ৰত্ৰা যথাৰুত্তানুরূপং অকত্ৰা ৰিসংৰাদনেতি. সচে পন ভিক্খুসামণেরানং পঠমমেৰ আম ভন্তেতিআদিনা পটিঞ্ঞং কত্ৰা পচ্ছা কেনচিদেৰ করণীযেন তংতংআপত্তিং আপজ্জন্তো সহ পটিস্সৰৰিসংৰাদেন দুক্কটাপত্তিযা আপজ্জেয্য, এৰং সতি তত্থ তত্থ সিক্খাপদেসু দ্ৰে দ্ৰে আপত্তিযো পঞ্ঞাপেয্য, ন চ এৰম্পি পঞ্ঞত্তা, তেনেৰ পটিস্সৰদুক্কটাপত্তি নাম পরেসং সন্তিকে পরেসং মতিং গহেত্ৰা পটিজানিত্ৰা ৰিসংৰাদনট্ঠানেযেৰ পঞ্ঞত্তাতি দট্ঠব্বা.

ইদানি রাজা সাসনস্স সুদ্ধিং ইচ্ছন্তো ইমিনা উপাযেন ভিক্খুসামণেরানং সীলং সংৰরাপেন্তো পচ্চক্খসম্পরাযিকভযং অনুপেক্খিত্ৰা সংৰরং আপজ্জেয্যুন্তি চিন্তেত্ৰা বুদ্ধস্স সম্মুখে পটিঞ্ঞং কারাপিতত্তা ন কোচি দোসো দিস্সতি. ভিক্খুসামণেরানম্পি ভিয্যোসোমত্তাযসীলং সংৰরিত্ৰা সীলপরিসুদ্ধি ভৰেয্যাতি. অথ রাজা সব্বেসং ভিক্খুসামণেরানং বুদ্ধস্স সম্মুখে পটিঞ্ঞং কারাপেত্ৰা সীলং রক্খাপেসীতি.

ইচ্চেৰং ইমস্স রঞ্ঞো কালে পুব্বে অলজ্জিনোপি সমানা ভযং অনুপেক্খিত্ৰা যেভুয্যেন লজ্জিনোৰ ভৰন্তীতি.

বুদ্ধস্স ¶ ভগৰতো পরিনিব্বানতো তিসতাধিকানং দ্ৰিৰস্সসহস্সানং উপরি নৰুতিমে সংৰচ্ছরে বহিনদীতীরে গামসীমতো পট্ঠায যাৰ অন্তোউদকুক্খেপা, তাৰ কম্মং করোন্তানং ভিক্খূনং সুখেন গমনত্থায গহট্ঠা গামসীমায উদকুক্খেপসীমং সম্বন্ধিত্ৰা সেতুং অকংসু.

অথ তত্থ ঞাণালঙ্কারসুমনমহাধম্মরাজগুরুগণা চরিযনামকো থেরো উপসম্পদাদিৰিনযকম্মানি কতিপয ৰস্সেসু অকাসি.

ধীরানন্দত্থেরো পন তত্থ সঙ্করদোসো হোতীতি কম্মং কাতুং ন ইচ্ছতি. তথা পট্ঠায যে যে ঞাণালঙ্কারসুমনমহাধম্মরাজগুরুগণাচরিযস্স মতিং রুচ্চন্তি, তে তে তস্স পক্খিকা ভৰন্তি. যে যে পন ধীরানন্দত্থেরস্সমতিং রুচ্চন্তি, তেতে তস্স পক্খিকা ভৰন্তি. এৰংলঙ্কাদীপে অমরপুরনিকাযিকা ভিক্খূ. দ্ৰেধা ভিন্দিত্ৰা তিট্ঠন্তি.

অথ ধীরানন্দপক্খে ভিক্খু তপ্পক্খিকস্স সীলক্খন্ধত্থেরস্স সিস্সে ধম্মক্খন্ধৰনরতনভিক্খূ অম্হাকং জম্বুদীপে রতনপুণ্ণনগরং পেসেসুং সঙ্ঘরাজমহাথেরস্স সন্তিকে ওৰাদস্স পটিগ্গাহণত্থায. তে চ কলিযুগে অট্ঠারসাধিকে দ্ৰিৰস্সসতে সহস্সেচ সম্পত্তে কত্তিকমাসস্স জুণ্হপক্খঅট্ঠমিযং সীহল়দীপতো নিক্খমিত্ৰা আগচ্ছন্তা একূনৰীসাধিকে দ্ৰিৰস্সসতে সহস্সেচ সম্পত্তে ফগ্গুনমাসস্স জুণ্হপক্খসত্তমিযং রতনপুণ্ণনগরং সম্পত্তা.

অথ ধম্মরাজা সঙ্ঘরাজস্স আরামে চতুভূমিকং ৰিহারং কারাপেত্ৰা তত্থ তে ৰসাপেসি. চতূহি পচ্চযেহিচ সঙ্গহং অকাসি. সঙ্ঘরাজাচ তেসং দ্ৰিন্নং পক্খিকানং ৰচনং সুত্ৰা বহূহি গন্থেহি সংসন্দিত্ৰা ৰিৰাদং ৰিনিচ্ছিন্দি. তাদিসে ঠানে সঙ্করদোসস্স অত্থিভাৰং পকাসেত্ৰা সন্দেসপণ্ণম্পি তেসং অদাসি.

মহাধম্মরাজাচ ¶ তেসং পুন সিক্খং সঙ্ঘরাজস্স সন্তিকে গণ্হাপেত্ৰা পিটকত্তযপোত্থকাদীনি দাতব্বৰত্থূনি দত্ৰা তস্মিংযেৰ সংৰচ্ছরে পঠমআসাল়িমাসস্স কাল়পক্খদসমিযং নাৰায তে পেসেসি.

ততো পচ্ছাচ ঞাণালঙ্কারসুমনমহাধম্মরাজগুরুগণাচরিযপক্খে ভিক্খূপি তপ্পক্খিকস্স পঞ্ঞামোলিত্থেরস্স সিস্সে ৰিমলজোতিধম্মনন্দভিক্খূ পেসেসুং সদ্ধিং অরিযালঙ্কারেন নাম সামণেরেন চতূহিচ উপাসকেহি. তেচ কলিযুগে ৰীসাধিকে দ্ৰিসতে সহস্সেচ সম্পত্তে কত্তিকমাসস্স জুণ্হপক্খপঞ্চমিযং সম্পত্তা.

তদাপি সঙ্ঘরাজস্স আরামেযেৰ একং ৰিহারং কারাপেত্ৰা তে ৰসাপেসি. চতূহি পচ্চযেহিচ সঙ্গহং অকাসি. সঙ্ঘরাজাপি পুন ৰিনিচ্ছযং অদাসি যথাৰুত্তনযেন. ধম্মরাজা তেসম্পি ভিক্খূনং সঙ্ঘরাজস্স সন্তিকে পুন সিক্খং গণ্হাপেত্ৰা সামণেরঞ্চ উপসম্পাদেত্ৰা চতূহি পচ্চযেহি সঙ্গহং কত্ৰা পহিণি.

ততো পচ্ছাচ কলিযুগে বাৰীসাধিকে দ্ৰিৰস্সসতে সহস্সেচ সম্পত্তে মাঘমাসস্স কাল়পক্খএকাদসমিযং সীহল়দীপতোযেৰ দ্ৰে ভিক্খূ তযো সামণেরা চত্তারো উপাসকা সরজতসুৰণ্ণকরণ্ডকং সরজতসুৰণ্ণচেতিযদাতুং হত্থিদন্তমযং বুদ্ধরূপং মহাবোধিপত্তানি মহাবোধিতচং মহাবোধিপতিট্ঠানসূমিং সীহল়দক্খিণসাখাবোধিপত্তানি দুতিযসত্তাহঅনিমিসট্ঠানভূমিঞ্চ ধম্মপণ্ণাকারত্থায গহেত্ৰা রতনপুণ্ণং নাম মহারাজট্ঠানীনগরং সম্পত্তা. তেসম্পি ধম্মরাজা চতূহি পচ্চযেহি সঙ্গহং কত্ৰা সঙ্ঘরঞ্ঞো আরামে ৰসাপেসি. ভিক্খুনঞ্চ পুন সিক্খং গণ্হাপেসি. সামণেরানঞ্চ উপসম্পদকম্মং গহট্ঠানঞ্চ পব্বজ্জকম্মং গণ্হাপেসি.

ইচ্চেৰং মরম্মরট্ঠে ভগৰতো পরিনিব্বানতো পট্ঠায যাৰজ্জতনা ¶ সাসনস্স থেরপরম্পরৰসেন পতিট্ঠানতা ৰেদিতব্বা.

ইচ্চেৰং মরম্মমণ্ডলে অরিমদ্দনপুরে অরহন্তত্থেরগণো উত্তরাজীৰত্থেরছপ্পদত্থেরগণো সিৰলিত্থেরগণো আনন্দত্থেরগণো তামলিন্দত্থেরগণোতি পঞ্চ গণা অহেসুং.

ইদানি অরিমদ্দননগরে পঞ্চগণতো পট্ঠায ৰিজযপুরজেয্যপুররতনপূরেসু থেরপরম্পরৰসেন সাসনস্স অনুক্কমেন আগতভাৰং দস্সযিস্সামি. সিরিখেত্তনগরে হি ‘সো যাং নোং’ নাম রাজা পরক্কমৰংসিকস্স সারদস্সিত্থেরস্স অন্তেৰাসিকং সদ্ধম্মট্ঠিতিত্থেরং অত্তনো আচরিযং কত্ৰা পূজেসি.

কলিযুগস্স চতুৰস্সাধিকঅট্ঠসতকালে সিরিখেত্তনগরতো আগন্ত্ৰা সো রতনপূরে রজ্জং কারেসি. অথ অত্তনো পুত্তং অনেকিভং নাম রাজকুমারং মহারাজ নামেন সিরিখেত্তনগরং ভুঞ্জাপেসি. দক্খিণদিসাভাগে ‘কূ ৰ্ঠে ট-যো মো’ নগরং, পচ্ছিমদিসাভাগে ‘ফো খোং’ নাম ঠানং, উত্তরদিসাভাগে ‘ম লোং’ নগরং, পুরত্থিমদিসাভাগে ‘কোং খোং’ নাম ঠানং, এত্থন্তরে নিসিন্নানং গিহীনং মম পুত্তস্স আণা পৰত্ততু, ভিক্খূনং মমাচরিযস্স সদ্ধম্মট্ঠিতিত্থেরস্স আণা পৰত্ততূতি নিয্যাদেসি.

তস্সচ সদ্ধম্মট্ঠিতিত্থেরস্স অরিযৰংসত্থেরো মহাসামিত্থেরোতি দ্ৰে সিস্সা অহেসুং. তেসু মহাসামিত্থেরো পুব্বে ৰুত্তনযেন সাসনৰংসং আনেস্সামীতি সীহল়দীপং গন্ত্ৰা সীহল়দীপতো সদ্ধিং পঞ্চহি ভিক্খূহি সদ্ধম্মচারিং নাম থেরং আনেত্ৰা অভিনৰসিক্খং গণ্হিত্ৰা সিরিখেত্তনগরে সীহল়দীপৰংসিকং সাসনং ৰড্ঢাপেত্ৰা নিসীদি. তস্স মহাসারিত্থেরস্স সিস্সো অতুলৰংসো নাম থেরো চতূসু দিসাসু অহিণ্ডিত্ৰা পরিযত্তিং উগ্গণ্হিত্ৰা সিরিখেত্তনগরেযেৰ ¶ তম্বুলভুঞ্জমাতিকাসমীপে সাসনং পগ্গণ্হিত্ৰা নিসীদি. তস্স অতুলৰংসত্থেরস্স সিস্সো রতনরংসী নাম থেরোচ পরিযত্তিৰেসারজ্জং পত্ৰা সিরিখেত্তনগরেযেৰ সাসনং পগ্গণ্হিত্ৰা নিসীদি. তস্সচ রতনরং সিত্থেরস্স সিস্সো সত্ৰৰধম্মরাজস্স আচরিযো অভিসঙ্কেতো নাম থেরো পরিযত্তিৰেসারজ্জং পত্ৰা সিরিখেত্তনগরযেৰ সাসনং পগ্গণ্হিত্ৰা নিসীদি. তস্স পন সিস্সো মুনিন্দঘোসো নাম থেরো অত্থি. কলিযুগে সত্ততাধিকে নৰসতে সম্পত্তে পচ্ছিমপক্খাধিকরাজা সিরিখেত্তনগরং অভিভৰিত্ৰা নন্দযোধেন নাম অমচ্চেন সদ্ধিং তং মুনিন্দঘোসত্থেরং আনেত্ৰা রতনপূরে পতিট্ঠাপেসি.

সো কির পচ্ছিমপক্খাধিকরাজা এৰং কথেসি,- অহং সিরিখেত্তনগরং লভিত্ৰা একংযেৰ ভিক্খুং একংযেৰ গিহিং লভামীতি.

সো পন থেরো সামণেরনামেন মুনিন্দঘোসো নাম. উপসম্পন্নকালে পন মাতুলভূতস্স থেরস্স নামেন উপালি নাম. দিন্ননামেন পন তিপিটকালঙ্কারো নাম. তিরিযপব্বতৰিহারে পন ৰাসত্তা ঠাননামেন তিরিযপব্বতত্থেরো নাম.

সো কির এরাৰতীনদীতীরে চতুভূমিকৰিহারে পঠমং নিসীদিত্ৰা পচ্ছা কলিযুগস্স ৰস্সসহস্সে কালেসট্ঠিৰস্সাযুকো হুত্ৰা তিরিযপব্বতৰিহারে নিসীদি. সামণেরকালে সো জলুমস্যামভযেন রতনপূরতো নিক্খমিত্ৰা কেতুমতীনগরং পত্ৰা তত্থ তিসাসনধজত্থেরস্স সিস্সভূতস্স ধম্মরাজগুরুত্থেরস্স সন্তিকে গন্থং উগ্গণ্হিং. পাল়িঅট্ঠকথাটীকাসু অতিছেকতায দহরকালেযেৰচ ৰেস্সন্তরজাতকং কব্যালঙ্কারেন বন্ধিত্ৰা কথনতো অতিৰিয পাকটো অহোসি. তস্স পন ¶ থেরস্স সিস্সো উচ্চনগরৰাসী মহাতিস্সত্থেরোতি সঙ্গিরজনপদে অরঞ্ঞৰাসং ৰসিত্ৰা পরিযত্তিং ৰাচেত্ৰা সাসনং পগ্গণ্হি. তস্স পন সিস্সো রেমিনগামে গামৰাসী চন্দত্থেরো নাম. তস্স সিস্সো তংগামৰাসী গুণসিরিত্থেরো নাম. তস্স সিস্সো তংগামৰাসী কল্যাণধজত্থরো নাম. সো পন থেরো পদুমনগরে সহস্সোরোধবোধোদধিগামেসু পরিযত্তিং ৰাচেত্ৰা নিসীদি. তস্স সিস্সো বোধোদধিগামৰাসিনো ইন্দোভাসকল্যাণচক্কৰিমলাচারত্থেরা সহস্সোরোধগামৰাসিনো গুণসারচন্দসারত্থেরা ৰংতুমগামৰাসী ৰরএসিত্থেরো কন্নিনগরে জররাজগাম ৰাসী গুণসিরিত্থেরোচাতি ইমে থেরা কল্যাণধজত্থেরস্স সন্তিকে পুন সিক্খং গহেত্ৰা পরিযত্তিং উগ্গণ্হিত্ৰা কোৰিদা অহেসুং.

তস্সেৰ কল্যাণধজত্থেরস্স সিস্সো সঙ্গিরজনপদে সমিৰনগামে নিসিন্নো ধম্মধরো নাম থেরো মহল্লককালে পদুমনগরে কুসুমমূলগামে নিসীদিত্ৰা গন্থং ৰাচেত্ৰা সাসনং পগ্গণ্হি.

তেসু গুণসিরিত্থেরো অমরপুরমাপকস্স রঞ্ঞো কালে গুণাভিলঙ্কারসদ্ধম্মমহারাজাধিরাজগুরূতি নামলঞ্ছং গণ্হিত্ৰা জেয্যভূমিৰাসকিত্তিৰিহারে পটিৰসি.

তস্স পন থেরস্স সিস্সো ঞাণাভিৰংসধম্মসেনাপতিমহাধম্মরাজাগুরু নাম মহাথেরো. তস্সেৰ রঞ্ঞো কালে সঙ্ঘরাজা অহোসি. সো পন থেরো সীহল়দীপে অমরপুরনিকাযিকানং পভৰো. গুণাভিলঙ্কারসদ্ধম্মমহাধম্মরাজাধিরাজগুরুত্থেরস্সেৰ সিস্সো তিপিটকালঙ্কারমহাধম্মরাজগুরু নাম থেরো. তস্স সিস্সো সূরিযৰংসাভিসিরিপৰরালঙ্কারধম্মসেনাপতি মহাধম্মরাজাধিরাজগুরু নাম থেরো অমরপুরদুতিযমাপকস্স রঞ্ঞো কালে ¶ সঙ্ঘরাজা অহোসি. তস্স পন সিস্সো ঞেয্য ধম্মাভিৰংসমুনিৰরঞাণকিত্তিসিরিপৰরালঙ্কারধম্মসেনাপতি- মহাধম্মরাজাধিরাজগুরু মহাথেরো দুতিযং অমরপুরমাপকস্স রতনপুণ্ণমাপকস্সচ রঞ্ঞো কালেসু সঙ্ঘ রাজা অহোসি. সো পন ঞাণাভিৰংসধম্মসেনাপতিমহাধম্মরাজাধিরাজগুরুত্থেরস্স সঙ্ঘরঞ্ঞো সিস্সোপি ৰরএসিত্থেরস্স সিস্সোচ অহোসি.

অযং সীহল়দীপতো সব্বপচ্ছিমাগতেহি সদ্ধম্মচারীমহাসামিত্থেরেহি যাৰ অম্হাকং আচরিযা থেরপরম্পরা দস্সনকথা.

অযম্পি অপরা থেরপরম্পরা ৰেদিতব্বা. ছপ্পদত্থেরৰংসিকো সদ্ধম্মকিত্তি নাম থেরো জেয্যপুরং আগন্ত্ৰা চতুদীপভূমিট্ঠানে নিসীদিত্ৰা মহাঅরিযৰংসত্থেরস্স সন্তিকে পরিযত্তিং উগ্গণ্হিত্ৰা ততো পচ্ছা জেতৰনৰিহারং সঙ্কমিত্ৰা তত্থ নিসীদিত্ৰা পরিযত্তিং ৰাচেত্ৰা সাসনং পগ্গণ্হি.

তস্স সদ্ধম্মকিত্তিত্থেরস্স সিস্সো তিসাসনধজো নাম. তস্স সিস্সো ধম্মরাজগুরু নাম. তস্স সিস্সো মুনিন্দঘোসো নাম. তস্স সিস্সো মহাতিস্সো নাম. তস্স সিস্সো চন্দপঞ্ঞো নাম. তস্স সিস্সো গুণসিরি নাম. তস্স সিস্সো ঞাণধজো নাম. তস্স সিস্সো ধম্মধরো নাম. তস্স সিস্সো ইন্দোভাসো নাম. ততো পট্ঠায কল্যাণচক্ক ৰিমলাচার গুণসার চন্দসার ৰরএসী গুণসিরি ঞাণাভিৰংস ঞেয্যধম্মাভিৰংসত্থেরানং ৰসেন সাসনৰংসো ৰেদিতব্বোতি.

অযং পত্তলঙ্কস্স ছপ্পদত্থেরস্স সিস্সভূতা সদ্ধম্মকিত্তিত্থেরতো পট্ঠায থেরপরম্পরদস্সনকথা.

ইদং রতনপুণ্ণনগরে সাসনস্স পতিট্ঠানং.

এৰং অপরন্তরট্ঠসঙ্খাতেন একদেসেন সকলম্পি মরম্মরট্ঠং ¶ গহেত্ৰা সাসনৰংসো দস্সেতব্বো. ভগৰাপি হি অপরন্তরট্ঠে চন্দনৰিহারে ৰসিত্ৰা তম্বদীপরট্ঠে তংতংদেসম্পি ইদ্ধিযা চরিত্ৰা সত্তানং ধম্মং দেসেসিযেৰাতি.

ইতি সাসনৰংসে অপরন্তরট্ঠসাসনৰংসকথামগ্গো

নাম ছট্ঠো পরিচ্ছেদো.

৭. কস্মিরগন্ধাররট্ঠসাসনৰংসকথামগ্গো

৭. ইদানি যথাৰুত্তমাতিকাৰসেন কস্মীরৰন্ধাররট্ঠসাসনৰংসকথামগ্গং ৰত্তুং ওকাসো অনুপ্পত্তো, তস্মা তং ৰক্খামি.

ততিযসঙ্গীতাৰসানে হি মহামোগ্গলিপুত্ততিস্সত্থেরো মজ্ঝন্তি কত্থেরং কস্মীরগন্ধাররট্ঠং পেসেসি,-ত্ৰং এতং রট্ঠং গন্ত্ৰা এত্থ সাসনং পভিট্ঠাপেহীতি. এত্থ চ কস্মীরগন্ধাররট্ঠং নাম চীনরট্ঠসমীপে তিট্ঠতি. তেনেৰ হি অধুনা কস্মীরগন্ধাররট্ঠৰাসিনো চিনরট্ঠৰাসিনোচ মনুস্সা অরৰাল়স্স নাম নাগরাজস্স উপ্পজ্জনকালতো পট্ঠায যাৰজ্জতনা নাগরূপং কত্ৰা মানেন্তি পূজেন্তি সক্করোন্তি, ৰত্থভাজনাদীসুপি নাগরূপমেৰ তে যেভুয্যেন করোন্তীতি.

সোচ মজ্ঝন্তিকত্থেরোপি চতূহি ভিক্খূহি সদ্ধিং অত্থ পঞ্চমো হুত্ৰা পাটলিপুত্ততো ৰেহাসং অব্ভুগ্গন্ত্ৰা হিমৰতি অরৰাল়দহস্স উপরি ওতরি. তেন খো পন সমযেন কস্মীরগন্ধাররট্ঠে সস্সপাকসমযে অরৰাল়ো নাম নাগরাজা অরৰাল়দহে নিসীদিত্ৰা করকৰস্সং নাম ৰস্সাপেত্ৰা সস্সং হরাপেত্ৰা মহাসমুদ্দং পাপেসি. তেরোচ অরৰাল়দহস্স উপরি ওতরিত্ৰা অরৰাল়দহপিট্ঠিকং চঙ্কমতিপি তিট্ঠতিপি নিসীদতিপি সেয্যম্পি কপ্পেতি. নাগমাণৰকা তং দিস্ৰা অরৰাল়স্স নাগরাজস্স আরোচেসুং, - মহারাজ একো ছিন্নভিন্নপটধরো ভণ্ডুকাসাৰৰসনো অম্হাকং উদকং দূসেতীতি. তদা পন থেরো অত্তানংযেৰ ¶ নাগানং দস্সেতি. নগরাজা তাৰদেৰ কোধাভিভূতো নিক্খমিত্ৰা থেরং দিস্ৰা মক্খং অস্সহমানো অন্তলিক্খে অনেকানি ভিংসনকানি নিম্মিনি. ততো ততো ভুসাৰাতা ৰাযন্তি, রুক্খা ছিজ্জন্তি, পব্বতকূটা পতন্তি মেঘাগজ্জন্তি, ৰিজ্জুংলতা নিচ্ছরন্তি, অসনিযো ফলন্তি, ভিন্নং ৰিয গগনং উদকং পগ্ঘরতি, ভযানকরূপা নাগকুমারা সন্নিপতন্তি, সযম্পি ধূমাযতি পজ্জলতি, পহরণৰুট্ঠিযো ৰিস্সজ্জেতি, কো অযংমুণ্ডকো ছিন্নভিন্নপটধরোতিআদীহি ফরুসৰচনেহি থেরং সন্তজ্জেতি, এথ গণ্হথ হনথ নিদ্ধমথ ইমং সমণন্তি নাগবলং আণাপেসি.

থেরো সব্বং তং ভিংসনকং অত্তনো ইদ্ধিবলেন পটিবাহিত্ৰা নাগরাজানং আহ,–

সদেৰকোপি চে লোকো, আগন্ত্ৰা তাসযেয্য মং;

ন মে পটিবলো অস্স, জনেতুং ভযভেরৰং.

সচেপি ত্ৰং মহিং সব্ব, সসমুদ্দং সপব্বতং;

উক্খিপিত্ৰা মহানাগ, খিপেয্যাসি মমূপরি.

নেৰ মে সক্কুণেয্যাসি, জনেতুং ভযভেরৰং;

অঞ্ঞদত্থু তৰেৰস্স, ৰিঘাতো উরগাধিপাতি.

এৰং ৰুত্তে নাগরাজা ৰিহতানুভাৰো নিপ্ফলৰাযামো দুক্খী দুম্মনো অহোসি.

তং থেরো তঙ্খণানুরূপায ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা তীসু সরণেসু পঞ্চসুচ সীলেসু পতিট্ঠাপেসি সদ্ধিং চতুরাসীতিযা নাগসহস্সেহি. অঞ্ঞেপি বহূ হিমৰন্তৰাসিনো যক্খাচ গন্ধব্বাচ কুম্ভণ্ডাচ থেরস্স ধম্মকথং সুত্ৰা সরণেসুচ সীলেসুচ পতিট্ঠহিংসু. পঞ্চকোপি যক্খো সদ্ধিং ভরিযায যক্খিনিযা পঞ্চহিচ পুত্তসতেহি পঠমে ¶ ফলে পতিট্ঠিতো. অথাযস্মা মজ্ঝন্তি কত্থেরো সব্বেনাগযক্খরক্খসে আমন্তেত্ৰা এৰমাহ,-

মাদানি কোধং জনযিত্থ, ইতো উদ্ধং যথা পুরে;

সস্সঘাতঞ্চ মা কত্থ, সুখকামা হি পাণিনো;

করোথ মেত্তং সত্তেসু, ৰসন্তু মনুজা সুখন্তি.

তে সব্বেপি সাধু ভন্তেতি থেরস্স ৰচনং পটিস্সুণিত্ৰা যথানুসিট্ঠং পটিপজ্জিংসু. তং দিৰসমেৰ নাগরাজস্স পূজাসমযো হোতি. অথ নাগরাজা অত্তনো রতনমযং পল্লঙ্কং আহরাপেত্ৰা থেরস্স পঞ্ঞপেসি. নিসীদি থেরো পল্লঙ্কে. নাগরাজাপি থেরং বীজযমানো সমীপে অট্ঠাসি. তস্মিং খণে কস্মীরগন্ধাররট্ঠৰাসিনো আগন্ত্ৰা থেরং দিস্ৰা অম্হাকং নাগরাজতোপি থেরো মহিদ্ধিকতরোতি থেরমেৰ ৰন্দিত্ৰা নিসিন্না. থেরো তেসং আসিৰিসোপমসুত্তং কথেসি. সুত্তপরিযোসানে অসীতিযাপাণসহস্সানং ধম্মাভিসমযো অহোসি. কুলসতসহস্সঞ্চ পব্বজি. ততো পভুতি চ কস্মীরগন্ধারো যাৰজ্জেতনা কাসাৰপজ্জোতা ইসিৰাতপটিৰাতাএৰ.

গন্ত্ৰা কস্মীরগন্ধারং, ইসি মজ্ঝন্তিকো তদা;

দুট্ঠং নাগং পসাদেত্ৰা, মোচেসি বন্ধনা বহূতি.

অধুনা পন কস্মীরগন্ধাররট্ঠে সাসনস্স অত্থঙ্গতস্সৰিয সূরিযস্স ওভাসো ন পঞ্ঞাযতি, তস্মা তত্থ সাসনস্স পতিট্ঠানে ৰিত্থারেন ৰত্তব্বকিচ্চং নত্থীতি.

ইতি সাসনৰংসে কস্মীরগন্ধাররট্ঠসাসনৰংসকথামগ্গো

নাম সত্তমো পরিচ্ছেদো.

৮. মহিংসকরট্ঠস্সাসনৰংসকথামগ্গো

৮. ইদানি ¶ যথাৰুত্তমাতিকাৰসেন মহিংসকরট্ঠসাসনৰংসকথামগ্গং ৰত্তুং ওকাসো অনুপ্পত্তো, তস্মা তং ৰক্খামি.

ততিযসঙ্গীতাৰসানে হি মহামোগ্গলিপুত্ততিস্সত্থেরো মহারেৰত্থেরং মহিংসকমণ্ডলং পেসেসি,- ত্ৰং এতং রট্ঠং গন্ত্ৰা এত্থ সাসনং পতিট্ঠাপেহীতি.

সোচ অত্তপঞ্চমো হুত্ৰা মহিংসকমণ্ডলং অগমাসি পচ্চন্তিমেসু জনপদেসু পঞ্চৰগ্গো গণো অলং উপসম্পদকম্মাযাতি মঞ্ঞমানো. থেরো মহিংসকমণ্ডলং গন্ত্ৰা দেৰদূতসুত্তং কথেসি. সুত্তপরিযোসানে চত্তালীসপাণসহস্সানি ধম্মচক্খুং প্পটিলভিংসু. চত্তালীসংযেৰ পাণসহস্সানি পব্বজিংসু.

গন্ত্ৰান রট্ঠং মহিংসং, মহারেৰো মহিদ্ধিকো;

চোদেত্ৰা দেৰদূতেহি, মোচেসি বন্ধনা বহূতি.

অধুনা পন তত্থ সাসনস্স অব্ভেহিৰিয পটিচ্ছন্নস্স সূরিযস্স ওকাসো দুব্বলো হুত্ৰা পঞ্ঞাযতি.

ইতি সাসনৰংসে মহিংসকরট্ঠসাসনৰংসকথামগ্গো

নাম অট্ঠমো পরিচ্ছেদো.

৯. মহারট্ঠসাসনৰংসকথামগ্গো

৯. ইতো পরং মহারট্ঠসাসনৰংসকথামগ্গং কথযিস্সামি যথাৰুত্তমাতিকাৰসেন.

ততিযসঙ্গীতাৰসানে হি মহামোগ্গলিপুত্ততিস্সত্থেরো মহাধম্মরক্খিত্থেরং মহারট্ঠং পেসেসি,-ত্ৰং এতং রট্ঠং গন্ত্ৰা এত্থ সাসনং পতিট্ঠাপেসীতি.

মহাধম্মরক্খিতত্থেরোচ অত্তপঞ্চমো হুত্ৰা মহারট্ঠং গন্ত্ৰা মহানারদকস্সপজাতককথায মহারট্ঠকে পসাদেত্ৰা ¶ চতুরাসীতিপাণসহস্সানি মগ্গফলেসু পতিট্ঠাপেসি. তেরসসহস্সানি পব্বজিংসু. এৰং সো তত্থ সাসনং পতিট্ঠাপেসি.

মহারট্ঠং ইসি গন্ত্ৰা, সো মহা ধম্মরক্খিতো;

জাতকং কথযিত্ৰান, পসাদেসি মহাজনন্তি.

তত্থ কির মনুস্সা পুব্বে অগ্গিহুতাদিমিচ্ছাকম্মং যেভুয্যেন অকংসু. তেনেৰ থেরো মহানারদকস্সপজাতককথং দেসেসি. ততো পট্ঠায তত্থ মনুস্সা জাতক কথং যেভুয্যেন সোতুং অতিৰিয ইচ্ছন্তি. ভিক্খূচ যেভুয্যেন গহট্ঠানং জাতককথংযেৰ দেসেন্তি. ৰিসেসতো পন ৰস্সন্তরজাতককথং তে মনুস্সা বহূহি দাতব্বৰত্থূহি পূজেত্ৰা সুণন্তি.

তঞ্চ মহারট্ঠং নাম স্যামরট্ঠসমীপে ঠিতং, তেনেৰ স্যামরট্ঠৰাসিনোপি ভিক্খূ গহট্ঠাচ যেভুয্যেন সোতুং ইচ্ছন্তীতি. মহাধম্মরক্খিতত্থেরোপি মহারট্ঠৰাসীহি সদ্ধিং সকলস্যামরট্ঠৰাসীনং ধম্মং দেসেসি, অমতরসং পাযেসি, যথা যোনকধম্মরক্খিতত্থেরো অপরন্তরট্ঠং গন্ত্ৰা সকলমরম্মরট্ঠৰাসীনন্তি.

যং পন যোনকরট্ঠসাসনৰংসকথাযং ৰুত্তং, তম্পি সব্বং এত্থাপি দট্ঠব্বংযেৰ, তেহি তস্স একসদিসত্তেন ঠিতত্তাতি. তথা হি নাগসেনত্থেরোপি যোনকরট্ঠে ৰসিত্ৰা স্যামরট্ঠাদীসুপি সাসনং পতিট্ঠাপেসি. যোনকরট্ঠৰাসিনো মহাধম্মগম্ভীরত্থেরমহামেধঙ্করত্থেরাচ সদ্ধিং বহূহি ভিক্খূহি সীহল়দীপং গন্ত্ৰা ততো পুনাগন্ত্ৰা স্যামরট্ঠে সোক্কতযনগরং পত্ৰা তত্থ নিসীদিত্ৰা সাসনং পগ্গণ্হিত্ৰা পচ্ছা লকুন্ননগরে নিসীদিত্ৰা সাসনং পগ্গণ্হি. এৰং যোনকরট্ঠে সাসনং ঠিতং স্যামাদীসুপি ঠিতংযেৰাতি দট্ঠব্বং.

বুদ্ধস্স ভগৰতো পরিনিব্বানতো দ্ৰিসতাধিকানং দ্ৰিন্নং ৰস্সসহস্সানং ¶ উপরি নৰুতিমে ৰস্স সীহল়দীপে রজ্জং পত্তস্স কিত্তিস্সিরিরাজসীহমহারাজস্স অভিসেকতো ততিযে ৰস্সে তেনেৰ কিত্তিস্সিরিরাজসীহমহারঞ্ঞা পহিতপণ্ণাকারসাসনং আগম্ম সরামাধিপতিধম্মিকমহারাজাধিরাজেনাণত্তেহি লঙ্কাদীপং আগতেহি উপালিত্থে রাদীহি পতিট্ঠাপিতো ৰংসো উপালিৰংসোতি পাকটো. সোচ দুৰিধো পুব্বারামৰিহারৰাসীঅভযগিরিৰিহারৰাসীৰসেনাতি. এৰং মহানগরযোনকল্যামরট্ঠেসু সাসনং থিরং হুত্ৰা তিট্ঠতীতি ৰেদিতব্বন্তি.

ইতি সাসনৰংসে মহারট্ঠসাসনৰংসকথামগ্গো নাম

নৰমো পরিচ্ছেদো.

১০. চিনরট্ঠসাসনৰংসকথামগ্গো

১০. ততো পরং পৰক্খামি চীনরট্ঠসাসনৰংসকথামগ্গং যথাট্ঠৰিতমাতিকাৰসেন.

ততিযসঙ্গীতাৰসানে হি মহামোগ্গলিপুত্ততিস্সত্থেরো মজ্ঝিমত্থেরং চিনরট্ঠং পেসেসি,-ত্ৰং এতং রট্ঠং গন্ত্ৰা এত্থ সাসনং পতিট্ঠাপেহীতি.

মজ্ঝিমত্থেরোচ কস্সপগোত্তরেন অল়করেৰত্থেরেন দুন্দভিযত্থেরেন মহারেৰত্থেরেনচ সদ্ধিং হিমৰন্তপ্পদেসে পঞ্চচীনরট্ঠং গন্ত্ৰা ধম্মচক্কপ্পৰত্তনসুত্তন্তকথাযতং দেসং পসাদেত্ৰা অসীতিপাণকোটিযো মগ্গফলরতনানি পটিলাভেসি. পঞ্চপিচ তে থেরা পঞ্চরট্ঠানি পসাদেসুং. একমেকস্স সন্তিকে সহস্সমত্তা পব্বজিংসু. এৰং তে তত্থ সাসনং পতিট্ঠাপেসুং.

গন্ত্ৰা মজ্ঝিমত্থেরো, হিমৰন্তং পসাদযি;

যক্খসেনং পকাসেন্তো, ধম্মচক্কপ্পৰত্তনন্তি.

তত্থ কির মনুস্সা যেভুয্যেন চন্দীপরমীস্ৰারানং যক্খানং পূজং ¶ করোন্তি. তেনেৰ তে পঞ্চ থেরা তেসং যক্খসেনং পকাসযিত্ৰা ধম্মং দেসেসুং. কস্মীরগন্ধাররট্ঠং পন কদাচি কদাচি চীনরট্ঠিন্দস্স ৰিজিতং হোতি, কদাচি কদাচি পন ৰিসুং হোতি. তদা পন ৰিসুংযেৰ অহোসীতি দট্ঠব্বং.

চীরনট্ঠে পন ভগৰতো সাসনং দুব্বলংযেৰ হুত্ৰা অট্ঠাসি, ন থিরং হুত্ৰা. তেনেৰ ইদানি তত্থ কত্থচিযেৰ সাসনং ছাযামত্তংৰ পঞ্ঞাযতি, ৰাতৰেগেন ৰিকিণ্ণঅব্ভংৰিয তিট্ঠতীতি.

ইতি সাসনৰংসে চীনরট্ঠসাসনৰংসকথামগ্গো নাম

দসমো পরিচ্ছেদো.

এৰং সব্বেন সব্বং সাসনৰংসকথামগ্গো নিট্ঠিতো.

এত্তাৰতাচ –

লঙ্কাগতেন সন্তেন, চিত্রঞাণেন ভিক্খুনা;

সরণঙ্করনামেন, সদ্ধম্মট্ঠিতিকামিনা.

দূরতোযেৰ দীপম্হা, সুমঙ্গলেন জোতিনা;

ৰিসুদ্ধসীলিনাচেৰ, দীপন্তরট্ঠভিক্খুনা.

অঞ্ঞেহিচাভিযাচিতো, পঞ্ঞাসামীতি নামকো;

অকাসিং সুট্ঠুকং গন্থং, সাসনৰংসপ্পদীপিকং.

দ্ৰিসতেচ সহস্সেচ, তেৰীসাধিকে গতে;

পুণ্ণাযং মিগসীরস্স, নিট্ঠং গতাৰ সব্বসো.

কোচি এত্থেৰ দোসো চে, পঞ্ঞাযতি সুচিত্তকা;

তং খমন্তু চ সুদ্ধিযা, গণ্হন্তু যুত্তিকং হৰেতি.