অঞ্ঞ - ৰংস-গন্থ-সঙ্গহো

MMR Vol 0

Misc. Paragraph

মহাৰংসপাল়ি

পথমপরিচ্ছেদ

মোগ্গলিপুত্ততিস্সথেরাদযো

দেৰানংপিযতিস্সাভিসেকো

চেতিযপব্বতৰিহার পটিগ্গহকো

দ্ৰত্তিংসতিম পরিচ্ছেদ

তুসিতপুরগমনং

তেত্তিংসতিম পরিচ্ছেদ

দসরাজকো

চতুত্তিংসতিম পরিচ্ছেদ

একূনচত্তালীসতিম পরিচ্ছেদ

রাজদ্ৰযদীপনো

চত্তালীসতিম পরিচ্ছেদ

অট্ঠরাজকো

একচত্তালীসতিম পরিচ্ছেদ

দ্ৰিরাজকো

দ্ৰিচত্তালীসতিম পরিচ্ছেদ

ছ রাজকো

তেচত্তালীসতিম পরিচ্ছেদ

চতুরাজকো

চতুচত্তালীসতিম পরিচ্ছেদ

তিরাজকো

পঞ্চচত্তালীসতিম পরিচ্ছেদ

ছচত্তালীসতিম পরিচ্ছেদ

সত্তচত্তালীসতিম পরিচ্ছেদ

পঞ্চরাজকো

অট্ঠচত্তালীসতিম পরিচ্ছেদ

একরাজকো

একূনপঞ্ঞাসতিম পরিচ্ছেদ

দ্ৰিপঞ্ঞাসতিম পরিচ্ছেদ

তিরাজকোনাম

তিৰঞ্ঞাসতিম পচ্ছেদ

লংকাৰিলোপোনাম

চতুপঞ্ঞাসতিম পরিচ্ছেদ

ছ রাজকোনাম

পঞ্চপঞ্ঞাসতিম পরিচ্ছেদ

রোহণারাতি ৰিজযোনাম

ছপঞ্ঞাসতিম পরিচ্ছেদ

অনুরাধপুরাভিগমনো

সত্তপঞ্ঞাসতিম পরিচ্ছেদ

সংগহকরণোনাম

অট্ঠপঞ্ঞাসতিম পরিচ্ছেদ

নমো তস্স ভগৰতো অরহতো সম্মাসম্বুদ্ধস্স

নমস্সিত্ৰান ¶ সম্বুদ্ধং, সুসুদ্ধং সুদ্ধৰংসজং;

মহাৰংসং পৰক্খামি, নানানূনাধিকারিকং.

পোরাণেহি কতো’পেসো, অতিৰিত্থারিতো ক্ৰচি;

অতীৰ ক্ৰচি সংখিত্তো, অনেকপুনরুত্তকো.

ৰজ্জিতং তেহি দোসেহি, সুখগ্গহণধারণং;

পসাদসংৰেগকরং, সুতিতো চ উপাগতং.

পসাদজনকে ঠানে, তথা সংৰেগকারকে;

জনযন্তো পসাদঞ্চ, সংৰেগঞ্চ সুণাথ তং.

দীপঙ্করঞ্হি সম্বুদ্ধং, পস্সিত্ৰা নো জিনো পুরা;

লোকং দুক্খা পমোচেতুং, বোধায পণিধিং অকা.

ততো তঞ্চেৰ সম্বুদ্ধং, কোণ্ডঞ্ঞং মঙ্গলং মুনিং;

সুমনং রেৰতং বুদ্ধং, সোভিতঞ্চ মহামুনিং.

অনোমদস্সিং সম্বুদ্ধং, পদুমং নারদং জিনং;

পদুমুত্তরসম্বুদ্ধং, সুমেধঞ্চ তথাগতং.

সুজাতং পিযদস্সিঞ্চ, অত্থদস্সিঞ্চ নাযকং;

ধম্মদস্সিঞ্চ সিদ্ধত্থং, তিস্সং ফুস্সজিনং তথা.

ৰিপস্সিং সিখীসম্বুদ্ধং, সম্বুদ্ধং ৰেস্সভুং ৰিভুং;

ককুসন্ধঞ্চ সম্বুদ্ধং, কোণাগমনমেৰ চ.

কস্সপং সুগতঞ্চ’মে, সম্বুদ্ধে চতুৰীসতি;

আরাধেত্ৰা মহাৰীরো, তেহি বোধায ব্যাকতো.

পুরেত্ৰা ¶ পারমী সব্বা, পত্ৰা সম্বোধিমুত্তমং;

উত্তমো গোতমো বুদ্ধো, সত্তে দুক্খা পমোচযি.

মগধেসু রুৰেলাযং, বোধিমূলে মহামুনি;

ৰিসাখপুণ্ণমাযং সো, পত্তো সম্বোধিমুত্তমং.

সত্তাহানি তহিং সত্ত, সো ৰিমুত্তিসুখং পরং;

ৰিন্দন্তং মধুরত্তঞ্চ, দস্সযন্তো ৰসী ৰসি.

ততো বারাণসিং গন্ত্ৰা, ধম্মচক্কং পগত্তযি;

তত্থ ৰস্স ৰসন্তো’ৰ, সট্ঠিং অরহতং অকা.

তে ধম্মদেসনত্থায, ৰিস্সজ্জেত্ৰান ভিক্খৰো;

ৰিনেত্ৰা চ ততো তিংস-সহা যে ভদ্দৰগ্গিযে.

সহস্সজটিলে নাথো, ৰিনেতুং কস্সপাদিকে;

হেমন্তে উরুৰেলাযং, ৰসিতে পরিপাচযং.

উরুৰেলকস্সপস্স, মহাযঞ্ঞে উপট্ঠিতে;

তস্স’ত্তনো নাগমনে, ইচ্ছাচারং ৰিজানিয.

উত্তরকুরুতো ভিক্খং, আহরিত্ৰা রিমদ্দনো;

অনোতত্তদহে ভুত্ৰা, সাযন্হসমযে সযং.

বোধিতো নৰমে মাসে, ফুস্সপুণ্ণমিযং জিনো;

লঙ্কাদীপং ৰিসোধেতুং, লঙ্কাদীপমুপাগমি.

সাসনুজ্জোতনং ঠানং, লংকা ঞাতা জিনেন হি;

যক্খপুণ্ণায লঙ্কায, যক্খা নিব্বা সিযাতি চ.

ঞাতোৰ লঙ্কামজ্ঝম্হি, গঙ্গাভীরে মনোরমে;

তিযোজনায তে রম্মে, একযোজনৰিত্থতে.

মহানাগৰনুয্যানে, যক্খসঙ্গামভূমিযা;

লঙ্কাদীপট্ঠযক্খানং, মহাযক্খসমাগমো.

উপাগতো তং সুগতো, মহাযক্খসমাগমং;

সমাগমস্স মজ্ঝম্হি, তত্থ তেসং সিরোপরি.

মহিযঙ্গণথূপস্স, ঠানে ৰেহাযসং জিনো;

ৰুট্ঠিৰাতন্ধকারেসি, তেসং সংৰেজনং অকা.

তে ভযট্ঠা’ভযং যক্খা, অযাচুং অভযং জিনং;

জিনো অভযদো আহ, যক্খে তে’তি ভযদ্দীতে.

যক্খা ¶ ভযং ৰো দুক্খঞ্চ, হরিস্সামি ইদং অহং;

তুম্হে নিসজ্জঠানং মে, সমগ্গা দেথ নো ইধ.

আহু তে সুগতং যক্খা, দেম মারিস তে ইধ;

সব্বেপি সকলং দীপং, দেহি নো অভযং তুৰং.

ভযং সীতং তমং তেসং, হন্ত্ৰা তং দিন্নভূমিযং;

চম্মক্খন্ধং অত্থরিত্ৰা, তত্থা’ সীনো জিনো ততো.

চম্মক্খণ্ডং পসারেসি, আদিত্তং তং সমন্ততো;

ঘম্মাভিভূতা তে ভীতা, ঠিতা অন্তে সমন্ততো.

গিরিদীপং ততো নাথো, রম্মং তেসং ইধা’নযি;

তেসু তত্থ পৰিট্ঠেসু, যথাঠানে ঠপেসি চ.

নাথো তং সংখিপি ধম্মং, তদা দেৰা সমাগমুং;

তস্মিং সমাগমে তেসং, সত্থা ধম্ম মদেসযি.

নেকেসং পাণকোটীনং, ধম্মাভিসমযো অহু;

সরণেসু চ সীলেসু, ঠিতা আসুং অসংখিযা.

সোতাপত্তিফলং পত্ৰা, সেলে সুমনকূটকে;

মহাসুমনদেৰিন্দো, পূজিযং যাচি পূজিযং.

সিরং পরামসিত্ৰান, নীলামলসিরোরুহো;

পাণিমত্তেঅদা কেসে, তস্স পাণ হিতো জিনো.

সো তং সুৰণ্ণচঙ্কোট-ৰরেনাদায সত্থুনো;

নিসিন্নট্ঠানরচিতে, নানারতনসঞ্চযে.

সব্বতো সত্তরতনে, তে ঠপেত্ৰা সিরোরুহে;

সো ইন্দনীলথূপেন, পিদহেসি নমস্সি চ.

পরিনিব্বুতম্হি সম্বুদ্ধে, চিতকতো চ ইদ্ধিযা;

আদায জিনগীৰট্ঠিং, থেরো সরভূনামকো.

থেরস্স সারিপুত্তস্স, সিস্সো আনীয চেতিযে;

তস্মিংযেৰ ঠপেত্ৰান, ভিক্খূহি পরিৰারিতো.

ছাদাপেত্ৰা মেদৰণ্ণ-পাসাণেহি মহিদ্ধিকো;

থূপং দ্ৰাদসহত্থুচ্চং, কারাপেত্ৰান পক্কমি.

দেৰানংপিযতিস্সস্স, রঞ্ঞো ভাতুকুধারকো;

উদ্ধচূল়াভযো নাম, দিস্ৰা চেতিয মব্ভুতং.

তং ¶ ছাদযিত্ৰা কারেসি, তিংসহত্থুচ্চ চেতিযং;

মদ্দন্তো দমিল়ে রাজা, তত্রট্ঠো দুক্খগামণি.

অসীতিহত্থং কারেসি, তস্স কঞ্জুকচেতিযং;

মহিযঙ্গণথূপোয-মেসো এৰং পতিট্ঠিতো.

এৰং দীপমিমংকত্ৰা, মনুস্সারহমিস্সরো;

উরুৰেলমগা ধীরো, উরুৰীর পরক্কমোতি.

মহাকারুণিকো সত্থা, সব্বলোকহিতে রতো;

বোধিতো পঞ্চমে ৰস্সে, ৰসং জেতৰনে জিনো.

মহোদরস্স নাগস্স, তথা চূল়োদরস্স চ;

মাতুলভাগিনেয্যানং, মণিপল্লঙ্কহেতুকং.

দিস্ৰা সপারিসজ্জানং, সঙ্গামং পচ্চুপট্ঠিতং;

সম্বুদ্ধো চিত্তমাসস্স, কাল়পক্খে উপোসথে.

পাতোযেৰ সমাদায, পৰরং পত্তচীৰরং;

অনুকম্পায নাগানং, নাগদীপমুপাগমি.

মহাদরো’পিসো নাগো, তদা রাজা অহিদ্ধিকো;

সমুদ্দে নাগভৰনে, দসদ্ধসতযোজনে.

কণিট্ঠিকা তস্স কণ্হা, ৰড্ঢমানম্হি পব্বতে;

নাগরাজস্স দিন্না’সি, তস্স চূল়োদরো সুতো.

তস্স মাতা মহামাতু, মণিপল্লঙ্কমুত্তমং;

দত্ৰা কালকতা নাগী, মাতুলেন তথা হি সো.

অহোসি ভাগিনেয্যস্স, সঙ্গামো পচ্চুপট্ঠিতো;

পব্বতেয্যা’পি নাগা তে, অহেসুঞ্হি মহিদ্ধিকা.

সমিদ্ধিসুমনো নাম, দেৰো জেতৰনে ঠিতং;

রাজাযতনমাদায, অত্তনো ভৰনং সুভং.

বুদ্ধানুমতিযাযেৰ, ছত্তাকারং জিনোপরি;

ধারযন্তো উপাগঞ্ছি, ঠানং তং পুব্বৰুট্ঠকং.

দেৰো ¶ হি সো নাগদীপে, মনুস্সো’নন্তরে ভৰে;

অহোসি রাজাযতন-ঠিতঠানে স অদ্দস.

পচ্চেকবুদ্ধ ভুঞ্জন্তে, দিস্ৰা চিত্তং পসাদিয;

পত্তসোধনসাখাযো, তেসং পাদাসি তেন সো.

নিব্বত্তিতস্মিং রুক্খস্মিং, জেতুয্যানে মনোরমে;

দ্ৰারকোট্ঠকপস্সম্হি, পচ্ছা বহি অহোসি সো.

দেৰাতিদেৰো দেৰস্স, তস্স ৰুদ্ধিঞ্চ পস্সিয;

ইদং ঠান হিতত্থঞ্চ, তং সরুক্খং ইধানযি.

সঙ্গামমজ্ঝে আকাসে, নিসিন্নো তত্থ নাযকো;

তমং তমোনুদো তেসং, নাগানং হিংসনং অকা.

অস্সাসেন্তো ভযট্টে তে, আলোকং পৰিদ্ধংসযি;

তে দিস্ৰা সুগতং তুট্ঠা, পাদে ৰন্দিংসু সত্থুনো.

তেসং ধম্মমদেসেসি, সামগ্গিকরণং জিনো;

উভো’পি তে পতীতা তং, পল্লঙ্কং মুনিনো অদুং.

সত্থা ভূমিগতো তত্থ, পসীদিস্ৰান আসনে;

তেহি দিব্বন্নপানেহি, নাগরাজেহি তপ্পিতো.

তে জলট্ঠে তলট্ঠে চ, ভুজগে’সীতিকোটিযো;

সরণেসু চ সীলেসু, পতিট্ঠাপেসি নাযকো.

মহোদরস্স নাগস্স, মাতুলো মণিঅক্খিকো;

কল্যাণিযং নাগরাজা, যুদ্ধং কাতুং তহিং গতো.

বুদ্ধগামম্হি পঠমে, সুত্ৰা সদ্ধম্মদেসনং;

ঠিতো সরণসীলেসু, তত্থা’যাচি তথাগতং.

মহতী অনুকম্পানো, কতা নাথ তযা অযং;

তৰানাগমনে সব্বে, মযং ভস্মী ভৰামহে.

অনুকম্পা মহী পিতে, ৰিসুং হোতু মহোদয;

পুনরাগমনেনেত্থ, ৰাসভূমিং মমা মম.

অধিৰাসযিত্ৰা ভগৰা, তুণ্হিভাৰে নিধাগমং;

পতিট্ঠাপেসি তত্থেৰ, রাজাযতনচেতিযং.

তঞ্চপি ¶ রাজাযতনং, পল্লঞ্চঙ্ক মহারহং;

অপ্পেসি নাগরাজূনং, লোকনাথো নমস্সিতুং.

পরিভোগচেতিযং ময্হং, নাগরাজা নমস্সথ;

তং ভৰিস্সতি ৰোতাতা, হিতায চ সুখায চ.

ইচ্চেৰমাদিং সুগতো, নাগানং অনুসাসনং;

কত্ৰা জেতৰনং এৰ, গতো লোকানুকম্পকোতি.

বোধিতো অট্ঠমে ৰস্সে, ৰসং জেতৰনে জিনো;

নাথো পঞ্চহি ভিক্খূনং, সতেহি পরিৰারিতো.

দুতিযে দিৰসে ভত্ত-কালে আরোচিতে জিনো;

রম্মে ৰেসাখমাসম্হি, পুণ্ণমাযং মুনিস্সরো.

তত্থেৰ পারুপিত্ৰান, সঙ্ঘাটিং পত্তমাদিয;

আগা কল্যাণিদেসং তং, মণিঅক্খিনিৰেসনং.

কল্যাণি চেতিযঠানে, কতে রতনমণ্ডপে;

মহারহম্হি পল্লঙ্কে, সহসঙ্ঘেনু’পাৰিসি.

দিব্বেহি খজ্জভোজ্জেহি, সগণো সগণং জিনং;

নাগরাজা ধম্মরাজং, সন্তপ্পেসি সুমানসো.

তত্থ ধম্মং দেসযিত্ৰা, সত্থা লোনুকম্পকো;

উগ্গন্ত্ৰা সুমনে কূটে, পদং দস্সেসি নাযকো.

তস্মিং পব্বতপাদম্হি, সহসঙ্ঘো যথাসুখং;

দিৰা ৰিহারং কত্ৰান, দীঘৰাপি মুপাগমি.

তত্থ ¶ চেতিযঠানম্হি, সসঙ্ঘোৰ নিসীদিয;

সমাধিং অপ্পযী নাথো, ঠানাগারৰপত্তিযা.

ততো ৰুট্ঠায ঠানম্হা, ঠানাঠানেসু কোৰিদো;

মহাবোধিঠিতঠানে, নিসীদিত্ৰা সসাৰকো;

সমাধিং অপ্পযী নাথো, মহাথূপঠিতে তথা.

থূপারামম্হি থূপস্স, ঠিতঠানে তথেৰ চ;

সমাধিতো’থ ৰুট্ঠায, সিলাচেতিযঠানগো.

ততো জেতৰনং বুদ্ধো, বুদ্ধসব্বত্থকো অগা.

এৰং লঙ্কায নাথো, হিতমমিতমতী আযতিং পেক্খমানো;

তস্মিং কালম্হি লংকাসুরভুজগগণাদীনমত্থঞ্চ পস্সং;

আগা তিক্খত্তুমেতং অতিৰিপুলদযো লোকদীপো সুদীপং;

দীপো তেনাযমাসি সুজনবহুমনো ধম্মদীপাৰ ভাসীতি.

সুজনপ্পসাদসংৰেগত্থায কতে মহাৰংসে

মহাসম্মত ¶ রাজস্স, ৰংসজো হি মহামুনি;

কপ্পস্সাদিম্হি রাজা’সি, মহাসম্মতনামকো.

রোজো চ ৰররোজো চ, তথা কল্যাণকা দুৰে;

উপোসথো চ মন্ধাতা, চরকো’পচরা দুৰে.

চেতীযো মুচলো চেৰ, মহামূচলনামকো;

মুচলিন্দো সাগরো চেৰ, সাগরো দেৰ ৰনামকো.

ভরতো ভগীরথো চেৰ, রুচি চ সুরুচি পিচ;

পতাপো মহাপতাপো, পনাদা চ তথা দুৰে.

সুদস্সনো চ নেরু চ, তথা এৰ দুৰে দুৰে;

পচ্ছিমা চা’তি রাজানো, তস্স পুত্তপপুত্তকা.

অসংখিযাযুকা এতে, অট্ঠৰীসতি ভূমিপা;

কুসাৰতিং রাজগহং, মিথিলঞ্চাপি আৰসুং.

ততো সতঞ্চ রাজনো, ছপ্পঞ্ঞাস চ সট্ঠি চ;

চতুরাসীতি সহস্সানি, ছত্তিংসা চ ততো পরে.

দ্ৰত্তিংস অট্ঠৰীসা চ, দ্ৰাৰীসতি ততো পরে;

অট্ঠারস সত্তরস, পঞ্চদস চতুদ্দস.

নৰ সত্ত দ্ৰাদস চ, পঞ্চৰীস ততোপরে;

পঞ্চৰীসং দ্ৰাদস চ, দ্ৰাদসঞ্চ নৰা পিচ.

চতুরাসীতিসহস্সানি, মখাদেৰাদিকাপি চ;

চতুরাসীতিসহস্সানি, কল়ারাজনকাদযো.

সোল়স যাৰ ওক্কাতং, পপুত্তা রাসিতো ইমে;

ৰিসুং ৰিসুং পুরে রজ্জং, কমতো অনুসাসিসুং.

ওক্কামুখো জেট্ঠপুত্তো, ওক্কাকসা’সি ভূপতি;

নিপুরো চন্দীমা চন্দং-মুখো চ সিৰি সঞ্জযো.

ৰেস্সন্তর ¶ মহারাজা, জালী চ সীহৰাহনো;

সীহস্সরো চ ইচ্চেতে, তস্স পুত্ত প পুত্তকা.

দ্ৰেঅসীতি সহস্সানি, সীহস্সরস্স রাজিনো;

পুত্ত প পুত্ত রাজানো, জযসেনো তদন্তিমো.

এতে কপিলৰত্থুস্মিং, সক্যরাজাতি ৰিস্সুতা;

সীহহনু মহারাজা, জযসেনস্স অত্রজো.

জযসেনস্স ধীতা চ, নামেনা’সি যসোধরা;

দেৰদযে দেৰদহ-সক্কো নামা’সি ভূপতি.

অঞ্জনো চা’থ কচ্চানা, আসুং তস্স সুতা দুৰে;

মহেসীচা’সি কচ্চানা, রঞ্ঞো সীহহনুস্স সা.

আসী অঞ্জনসক্কস্স, মহেসী সা যসোধরা;

অঞ্জনস্স দুৰে ধীতা, মাযা চাথ পজাপতি.

পুত্তা দুৰে দণ্ডপাণী, সুপ্পবুদ্ধো চ সাকিযো;

পঞ্চ পুত্তা দুৰে ধীতা, আসুং সীহহনুস্সরে.

সুদ্ধোদনো ধোতোদনো, সক্কসুক্কমিতোদনো;

অমিতা পমিতাচা’তি, ইমে পঞ্চ ইমা দুৰে.

সুপ্পবুদ্ধস্স সক্কস্স, মহেসী অমিতা অহু;

তস্সা’সুং ভদ্দকচ্চানা, দেৰদত্তো দুৰে সুতা.

মাযা মহাপজাপতি চেৰ, সুদ্ধোদন মহেসীযো;

সুদ্ধোদন মহারঞ্ঞো, পুত্তো মাযায সো জিনো.

মহা সম্মতৰংসম্হি, অসম্ভিন্নে মহামুনি;

এৰং পৰত্তে সঞ্জাতো, সব্ব খত্থিয মুদ্ধনি.

সিদ্ধত্থস্স কুমারস্স, বোধিসত্তস্স সা অহু;

মহেসী ভদ্দকচ্চানা, পুত্তো তস্সা’সি রাহুলো.

বিম্বিসারো চ সিদ্ধত্থ-কুমারো চ সহাযকা;

উভিন্নং পিতরো চাপি, সহাযাএৰ তে অহুং.

বোধিসত্তো বিম্বিসারা, পঞ্চৰস্সাধিকো অহু;

একূনতিংসো ৰযসা, বোধিসত্তো’ভিনিক্খমি.

পদহিত্ৰান ¶ ছব্বস্সং, বোধিং পত্ৰা কমেন চ;

পঞ্চতিংসো থ ৰযসা, বিম্বিসারমুপাগমি.

বিম্বিসারো পন্নরস-ৰস্সো’থ পীতরং সযং;

অভিসিত্তো মহাপঞ্ঞো, পত্তো রজ্জস্স তস্স তু.

পত্তে সোল়সমে ৰস্সে, সত্থা ধম্মমদেসযি;

দ্ৰাপঞ্ঞাসেৰ ৰস্সানি, রজ্জং কারেসি সো পন.

রজ্জে সমা পন্নরস, পুব্বে জিনসমাগমা;

সত্ততিংস সমা তস্স, ধরমানে তথাগতে.

বিম্বিসারসুতো’জাত-সত্তুতং ঘাতীযা’মতি;

রজ্জং দ্ৰত্তিংসৰস্সানি, মহামিত্তদ্দুকারযী.

অজাতসত্তুনো ৰস্সে, অট্ঠমে মুনি নিব্বুতো;

পচ্ছা সো কারযী রজ্জং, ৰস্সানি চতুৰীসতি.

সুজনপ্পসাদসংৰেগত্থায কতে মহাৰংসে

পঞ্চনেত্তো ¶ জিনো পঞ্চ-চত্তালীসসমা’সমো;

ঠত্ৰা সব্বানি কিচ্চানি, কত্ৰা লোকস্স সব্বথা.

কুসিনারাযযমক-সালানমন্তরে ৰরে;

ৰেসাখপুণ্ণমাযং সো, দীপো লোকস্স নিব্বুতো.

সঙ্খ্যাপথমতিক্কন্তা, ভিক্খূ তত্থ সমাগতা;

খত্তিযা ব্রাহ্মণা ৰস্সা, সুদ্ধা দেৰা তথেৰ চ.

সত্তসতসহস্সানি, তেসু পামোক্খভিক্খৰো;

থেরো মহাকস্সপোৰ, সঙ্ঘত্থেরো তদা অহু.

সত্থুসরীরসারীর-ধাতুকিচ্চানি কারিয;

ইচ্ছন্তো সো মহাথেরো, সত্থু ধম্মচিরট্ঠিতিং.

লোকনাথে দসবলে, সত্তাহপরিনিব্বুতে;

দুব্ভাসিতং সুভদ্দস্স, বুদ্ধস্স ৰচনং সরং.

সরং চীৰরদানঞ্চ, সমত্তে ঠপনং তথা;

সদ্ধম্মঠপনত্থায, মুনিনা’নুগ্গহং কতং.

কাতুং সদ্ধম্মসংগীতিং, সম্বুদ্ধানমতে যতি;

নৰঙ্গসাসনধরে, সব্বঙ্গসমুপাগতে.

ভিক্খূ পঞ্চসতেযেৰ, মহাখীণাসৰে ৰরে;

সম্মন্নি একেনূনে তু, আনন্দত্থেরকারণা.

পুন আনন্দত্থেরা’পি, ভিক্খূহি অভিযাচিতো;

সম্মন্নি কাতুং সংগীতিং, সা ন সক্কা হি তং ৰিনা.

সাধুকীল়নসত্তাহং, সত্তাহং ধাতুভাজনং;

ইচ্চদ্ধমাসং খেপেত্ৰা, সব্বলোকানুকম্পকা.

ৰস্সং ৰসং রাজগহে, কস্সাম ধম্মসঙ্গহং;

নাঞ্ঞেহি তত্ত ৰত্থব্ব-মিতি কত্ৰান নিচ্ছযং.

সোকাতুরং ¶ তত্থ তত্থ, অস্সাসেন্তো মহাজনং;

জম্বুদীপম্হি তে থেরা, ৰিচরিত্ৰান চারিকং.

আসল়্হিসুক্কপক্খম্হি, সুক্কপক্খঠিতত্থিকা;

উপাগমুং রাজগহং, সম্পন্নচতুপচ্চযং.

তত্থেৰ ৰস্সূপগতা, তে মহাকস্সপাদযো;

থেরা থিরগুণূপেতা, সম্বুদ্ধমতকোৰিদা.

ৰস্সানং পঠমং মাসং, সব্বসেনাসনেসু’পি;

কারেসুং পটিসঙ্খারং, ৰত্ৰানা’জাতসত্তুনো.

ৰিহারপটিসঙ্খারে, নিট্ঠিতে অহু ভূপতি;

ইদানি ধম্মসংগীতিং, করিস্সামি মযং ইতি.

কত্তব্বং কিন্তিপুট্ঠস্স, নিসজ্জঠানমাদিসুং;

রাজা কত্থাতি পুচ্ছিত্ৰা, ৰুত্তঠানম্হি তেহি সো.

সীঘং ৰেভারসেলস্স, পস্সে কারেসি মণ্ডপং;

সত্তপণ্ণিগুহাদ্ৰারে, রম্মং দেৰসভোপমং.

সব্বথা মণ্ডযিত্ৰা তং, অত্থরাপেসি তত্থ সো;

ভিক্খূনং গণনাযেৰ, অনগ্ঘত্থরণানি চ.

নিস্সায দক্খিণং ভাগং, উত্তরামুখমুত্তমং;

থেরাসনং সুপঞ্ঞত্তং, আসি তত্থ মহারহং.

তস্মিং মণ্ডপমজ্ঝস্মিং, পুরত্থমুখমুত্তমং;

ধম্মাসনং সুপঞ্ঞত্তং, অহোসি সুগতারহং.

রাজা’রোচযি থেরানং, কম্মং নো নিট্ঠিতং ইতি;

তে থেরা থেরমানন্দ-মানন্দকরমব্রৰুং.

স্ৰে সন্নিপাতো আনন্দ, সেখেন গমনং তহিং;

ন যুত্তন্তে সদত্থে ত্ৰং, অপ্পমত্তো ততো ভৰ.

ইচ্চেৰং চোদিতো থেরো, কত্ৰান ৰীরিযং সমং;

ইরিযাপথতো মুত্তং, অরহত্তমপাপুণি.

ৰস্সানং দুতিযে মাসে, দুতিযে দিৰসে পন;

রুচিরে মণ্ডপে তস্মিং, থেরা সন্নিপতিংসু তে.

ঠপেত্ৰা’নন্দত্থেরস্স, অনুচ্ছৰিকমাসনং;

আসনেসু নিসীদিংসু, অরহন্তো যথারহং.

থেরো’রহত্তপত্তিং ¶ সো, ঞাপেতুং তেহি নাগমা;

কুহিং আনন্দত্থেরো’তি, ৰুচ্চমানে তু কেহিচি.

নিম্মুজ্জিত্ৰা পথৰিযা, গন্ত্ৰা জোতিপথেন ৰা;

নিসীদি থেরো আনন্দো, অত্তনো ঠপিতাসনে.

উপালিথেরো ৰিনযে, সেসধম্মে অসেসকে;

আনন্দত্থেরমকরুং, সব্বে থেরা ধুরন্ধরে.

মহাথেরো সকত্তানং, ৰিনযং পুচ্ছিতুং সযং;

সম্মন্নু’পালিথেরো চ, ৰিস্সজ্জেতুং তমেৰ তু.

থেরাসনে নিসীদিত্ৰা, ৰিনযং তমপুচ্ছি সো;

ধম্মাসনে নিসীদিত্ৰা, ৰিস্সজ্জেসি তমেৰ সো.

ৰিনযঞ্ঞূনমগ্গেন, ৰিস্সজ্জিতকমেন তে;

সব্বে সজ্ঝাযমকরুং, ৰিনযং নযকোৰিদা.

অগ্গং বহুস্সুতাদীনং, কোসারক্খং মহেসিনো;

সম্মন্নিত্ৰান অত্তানং, থেরো ধম্মমপুচ্ছি সো.

তথা সম্মন্নিয’ত্তানং, ধম্মাসনাগতো সযং;

ৰিস্সজ্জেসি তমানন্দ-ত্থেরো ধম্মমসেসতো.

ৰেদেহমুনিনা তেন, ৰিস্সজ্জিতকমেন তে;

সব্বে সজ্ঝাযমকরুং, ধম্মং ধম্মত্থকোৰিদা.

এৰং সত্তহি মাসেহি, ধম্মসংগীতি নিট্ঠিতা;

সব্বলোকহিতত্থায, সব্বলোকহি তেহি সা.

পঞ্চৰস্সসহস্সানি, সমত্থং ৰত্তনে কতং.

অতীৰ জাতপামোজ্জা, সন্ধারকজলন্তিকা;

সংগীতিপরিযোসানে, ছদ্ধাকম্পি মহামহী.

অচ্ছরিযানি চা’হেসুং, লোকেনেকানিনেকধা;

থেরেহেৰ কতত্তা চ, থেরিযাযং পরম্পরা.

পঠমং সঙ্গহং কত্ৰা, সব্বলোকহিতং বহুং;

তে যাৰতাযুকং ঠত্ৰা, থেরা সব্বেপি নিব্বুতা.

থেরা’পি ¶ তে মতিপদীপহতন্ধকারা,

তেনাপি জীৰিতমদং মতিমা জহেয্যাতি.

সুজনপ্পসাদংসংৰেগত্থায কতে মহাৰংসে

অজাতসত্তু পুত্তো তং, ঘাতেত্ৰা’দাযি ভদ্দকো;

রজ্জং সোল়সৰস্সানি, কারেসি মিত্তদূভিকো.

উদযভদ্দ পুত্তো তং, ঘাতেত্ৰা অনুরুদ্ধকো;

অনুরুদ্ধস্স পুত্তো তং, ঘাতেত্ৰা মুণ্ডনামকো.

মিত্তদ্দুনো দুম্মতিনো, তে’পি রজ্জমকারযুং;

তেসং উভিন্নং রজ্জেসু, অট্ঠৰস্সান’তিক্কমুং.

মুণ্ডস্স পুত্তো পিতরং, ঘাতেত্ৰা নাগদাসকো;

চতুৰীসতিৰস্সানি, রজ্জং কারেসি পাপকো.

পিতুঘাতকৰংসো’য, মীতিকুদ্ধা’থ নাগরা;

নাগদাসক রাজানং, অপনেত্ৰা সমাগতা.

সুসুনাগোতি পঞ্ঞাতং, অমচ্চং সাধুসম্মতং;

রজ্জে সমভিসিঞ্জিংসু, সব্বেসং হিতমানসা.

সো ¶ অট্ঠারসৰস্সানি, রাজা রজ্জমকারযি;

কাল়াসো কো তস্স পুত্তো, অট্ঠৰীসতি কারযি.

অতীতে দসমে ৰস্সে, কাল়াসোকস্স রাজিনো;

সম্বুদ্ধপরিনিব্বানা, এৰং ৰস্সসতং অহু.

তদা ৰেসালিযা ভিক্খূ, অনেকা ৰজ্জিপুত্তকা;

সিঙ্গীলোণং দ্ৰঙ্গুলঞ্চ, তথা গামন্তরম্মি চ.

আৰাসা’নুমতা’চিণ্ণং, অমথিতং জলোগি চ;

নিসীদনং অদসকং, জাতরূপাদিকং ইতি.

দসৰত্থূনি দীপেসুং, কপ্পন্তীতি অলজ্জীনো;

তং সুত্ৰান যসত্থেরো, এৰং ৰজ্জীসু চারিকং.

ছল়ভিঞ্ঞো বলপ্পত্তো, যসো কাকণ্ডকত্রজো;

তং সমেতুং সউস্সাহো, তত্থাগমি’মহাৰনং.

ঠপেত্ৰা’পোসথগ্গে তে, কংসপাতিং সহোধকং;

কহাপণাদিং সঙ্ঘস্স, দেথ’না’হু উপাসকে.

ন কপ্পতে তং মা দেথ, ইতি থেরো সৰারযি;

পটিসারণীযং কম্মং, যসত্থেরস্স তে করুং.

যাচিত্ৰা অনুদূতং সো, সহ তেন পুরং গতো;

অত্তনো ধম্মৰাদিত্তং, সঞ্ঞাপেত্ৰা’গ সাগরে.

অনুদূতৰচো সুত্ৰা, তমুক্খিপিতুমাগতা;

পরিক্খিপিয অট্ঠংসু, সরং থেরস্স ভিক্খৰো.

থেরো উগ্গম্ম নভসা, গন্ত্ৰা কোসম্বিযং ততো;

পাৰেয্যকা ৰন্তিকানং, ভিক্খূনং সন্তিকং লহুং.

ৰেসেসি দূতেতু সযং, গন্ত্ৰা’হো গঙ্গপব্বতং;

আহ সম্ভূতত্থেরস্স, তং সব্বং সাণৰাসিনো.

পাৰেয্যকা সট্ঠিথেরা, অসিতা’ৰন্তিকাপি চ;

মহাখীণাসৰা সব্বে, অহোগঙ্গম্হি ওতরুং.

ভিক্খৰো সন্নিপতিতা, সব্বে তত্থ ততো ততো;

আসুং নৰুতিসহস্সানি, মন্তেত্ৰা অখিলা’পি তে.

সোরেয্য ¶ রেৰতত্থেরং, বহুস্সুত মনাসৰং;

তং কালপমুখং ঞত্ৰা, পস্সিতুং নিক্খমিংসু তং.

থেরো তম্মন্তনং সুত্ৰা, ৰেসালিং গন্তুমেৰ সো;

ইচ্ছন্তো ফাসুগমনং, ততো নিক্খমি তঙ্খণং.

পাতো পাতোৰ নিক্খন্ত-ট্ঠানং তেন মহত্তনা;

সাযং সাযমুপেন্তানং, সহজোতিযমদ্দসুং.

তত্থ সম্ভূতত্থেরেন, যসত্থেরো নিযোজিতো;

সদ্ধম্মসৰনন্তে তং, রেৰতথের মুত্তমং.

উপেচ্চ দসৰত্থূনি, পুচ্ছি থেরো পটিক্খিপি;

সুত্ৰা’ধিকরণং তঞ্চ, নিসেধেমাতি অব্রৰি.

পাপাপি পক্খং পেক্খন্তা, রেৰতত্থের মুত্তমং;

সামণকং পরিক্খারং, পটিযাদিয তে বহুং.

সীঘং নাৰায গন্ত্ৰান, সহজাতিসমীপগা;

করোন্তি ভত্তৰিস্সগ্গং, ভত্তকালে উপট্ঠিতে.

সহজাতিং আৰসন্তো, সাল়থেরো ৰিচিন্তিযা;

পাৰেয্যকা ধম্মৰাদী, ইতি পস্সি অনাসৰো.

উপেচ্চ তং মহাব্রহ্মা, ধম্মে নিট্ঠাতি অব্রৰি;

নিচ্চং ধম্মে ঠিতত্তং সো, অত্তনো তস্স অব্রৰি.

তে পরিক্খারমাদায, রেৰতত্থেরমদ্দসুং;

থেরো ন গণ্হি তপ্পক্খ-গাহী সিস্সং পণামযী.

ৰেসালিং তে ততো গন্ত্ৰা, ততো পুপ্ফপুরং গতা;

ৰদিংসু কাল়াসোকস্স, নরিন্দস্স অলজ্জীনো.

সত্থুস্স নো গন্ধকুটিং, গোপযন্তো মযং তহিং;

মহাৰনৰিহারস্মিং, ৰসাম ৰজ্জীভূমিযং.

গণ্হিস্সাম ৰিহার’ন্তি, গামৰাসিকসিক্খৰো;

আগচ্ছন্তি মহারাজ, মটিসেধয তে ইতি.

রাজানং দুগ্গহিতং তে, কত্ৰা ৰেসালিমাগমুং;

রেৰতত্থের মূলম্হি, সহজাতিযমেত্থ তু.

ভিক্খূ ¶ সতসহস্সানি, একাদস সমাগতা;

নৰুতিঞ্চ সহস্সানি, অহু তং ৰত্থু সন্তিযা.

মূলট্ঠেহি ৰিনা ৰত্থু-সমনং নেৰ রোচযি;

থেরো সব্বেপি ভিক্খূ তে, ৰেসালিমাগমুং ততো.

দুগ্গহিতোৰ সো রাজা, তত্থামচ্চে অপেসযি;

মূল়া দেৰানুভাৰেন, অঞ্ঞত্থ অগমিংসু তে.

পেসেত্ৰা তে মহীপালো, তং রত্তিং সুপিনেনসো;

অপস্সি সকমত্তানং, পক্খিত্তং লোহকুম্ভিযং.

অতিভীতো অহু রাজা, তমস্সা সেতু মাগমা;

ভগিনী নন্দথেরী তু, আকাসেন অনাসৰা.

ভারিযং তে কতং কম্মং, ধম্মিকে’য্যে খমাপয;

পক্খো তেসং ভৰিত্ৰা ত্ৰং, কুরু সাসনপগ্গহং.

এৰং কতে সোত্থি তুয্হং, হেস্সতীতি অপক্কমি;

পসাতেযেৰ ৰেসালিং, গন্তুং নিক্খমি ভূপতি.

গন্ত্ৰা মহাৰনং ভিক্খূ-সঙ্ঘং সো সন্নিপাতিয;

সুত্ৰা উভিন্নং ৰাদঞ্চ, ধম্মপক্খঞ্চ রোচিয.

খমাপেত্ৰা ধম্মিকে তে, ভিক্খূ সব্বে মহীপতি;

অত্তনো ধম্মপক্খত্তং, ৰত্ৰা তুম্হে যথারুচি.

সম্পগ্গহং সাসনস্স, করোথাতি চ ভাসিয;

দত্ৰা চ তেসং আরক্খং, অগমাসি সকং পুরং.

নিচ্ছেতুং তানি ৰত্থূনি, সঙ্ঘো সন্নিপতী তদা;

অনগ্গানি তত্থ ভস্সানি, সঙ্ঘমজ্ঝে অজাযিসুং.

ততো সো রেৰতত্থেরো, সাৰেত্ৰা সঙ্ঘমজ্ঝগো;

উব্ভাহিকায তং ৰত্থুং, সমেতুং নিচ্ছযং অকা.

পাচিনকেচ চতুরো, চতুরো পাৰেয্যকেপি চ;

উব্ভাহিকায সম্মন্নি, ভিক্খূ তং ৰত্থু সন্তিযা.

সব্বকামী চ সাল়্হো চ, খুজ্জসোভিতনামকো;

ৰাসভগামিকো চাতি, থেরো পাচিনকা ইমে.

সমেতুং তানি ৰত্থূনি, অপ্পসদ্দং অনাকুলং;

অগমুং ৰালুকারামং, অট্ঠত্থেরা অনাসৰা.

দহরেনা’জি তে নেত্থ, পঞ্ঞত্তে আসনে সুভে;

নিসীদিংসু মহাথেরা, মহামুনি মতঞ্ঞুনো.

তেসু ৰত্থূসু একেকং, কমতো রেৰতো মহা;

থেরো থেরং সব্বকামিং, পুচ্ছি পুচ্ছাসু কোৰিদো.

সব্বকামী মহাথেরো, তেন পুট্ঠো’থ ব্যাকরি;

সব্বানি তানি ৰত্থূনি, ন কপ্পন্তীতি সুত্ততো.

নিহনিত্ৰা’ধিকরণং, তং তে তত্থ যথাক্কমং;

তথেৰ সঙ্ঘমজ্ঝেপি, পুচ্ছাৰিস্সজ্জনং করুং.

নিগ্গহং পাপভিক্খূনং, দসৰত্থুকদীপনং;

তেসং দসসহস্সানং, মহাথেরো অকংসু তে.

সব্বকামী পুথৰিযা, সঙ্ঘত্থেরো তদা অহু;

সো ৰীসং ৰস্সসতিকো, তদা’সি উপসম্পদা.

থেরা আনন্দত্থেরস্স, এতে সদ্ধিৰিহারিনো;

ৰাসভগামিকো চেৰ, সুমনো চ দুৰে পন.

থেরা’নুরুদ্ধত্থেরস্স, এতে সদ্ধিৰিহারিনো;

অট্ঠ থেরা’পি ধঞ্ঞা তে, দিট্ঠপুব্বা তথাগতং.

ভিক্খূ সতসহস্সানি, দ্ৰাদসাসুং সমাগতা;

সব্বেসং রেৰতত্থেরো, ভিক্খূনংপমুখোতদা.

ততো ¶ সো রেৰতত্থেরো, সদ্ধম্মট্ঠিতিযা চিরং;

কারেতুং ধম্মসংগীতিং, সব্বভিক্খুসমূহতো.

পভিন্নত্থাদিঞাণানং, পিটকত্তযধারিনং;

সতানি সত্তভিক্খূনং, অরহন্তানমুচ্চিনি.

তে সব্বে ৰালুকারামে, কাল়াসোকেন রক্খিতা;

রেৰতত্থেরপামোক্খা, অকরুং ধম্মসঙ্গহং.

পুব্বে কতং তথা এৰ, ধম্মং পচ্ছা চ ভাসিতং;

আদায নিট্ঠপেসুং তং, এতং মাসেহি অট্ঠহি.

এৰং দুতিযসংগীতিং, কত্ৰা তেপি মহাযসা;

থেরা দোসক্খযং পত্তা, পত্তাকালেন নিব্বুতিং.

ইতি পরমমতীনং পত্তিপত্তব্বকানং,

সুমরিযমরণং তং সঙ্খতা সারকত্তং,

পরিগণিযমসেসং অপ্পমত্তো ভৰেয্যাতি.

যা মহাকস্সপাদীহি ¶ , মহাথেরেহি আদিতো;

কতা সদ্ধম্ম সংগীতি, থেরিযা’তি পৰুচ্চতি.

একো’ৰ থেরৰাদো সো, আদিৰস্সসতে অহু;

অঞ্ঞাচরিযৰাদাতু, ততো ওরং অজাযিসুং.

তেহি সংগীতিকারেহি, থেরেহি দুতিযেহি তে;

নিগ্গহিতা পাপভিক্খূ, সব্বে দসসহস্সকা.

অকংসা’চরিযৰাদং তে, মহাসংগীতিনামকা;

ততো গোকুলিকা জাতা, একব্বোহারিকাপি চ.

গোকুলিকেহি পণ্ণত্তি-ৰাদা বাহুলিকাপি চ;

চেতিযৰাদা তেস্ৰেৰ, সমতাসঙ্ঘিকা ছ তে.

পুনাপি থেরৰাদেহি, মহিংসাসকভিক্খৰো;

ৰজ্জীপুত্তকভিক্খূ চ, দুৰে জাতা ইমে খলু.

জাতা’থ ধম্মুত্তরিযা, ভদ্রযানিকভিক্খৰো;

ছন্নাগারা সম্মিতিযা, ৰজ্জীপুত্তিযভিক্খূতি.

মহিংসাসকভিক্খূহি, ভিক্খূ সব্বত্থ ৰাদিনো;

ধম্মগুত্তিযভিক্খূ চ, জাতা খলু ইমে দুৰে.

জাতা সব্বত্থিৰাদীহি, কস্সপিযা ততো পন;

জাতা সঙ্কন্তিকা ভিক্খূ, সুত্তৰাদা ততো পন.

থেরৰাদেন সহ তে, হোন্তি দ্ৰাদসি’মেপি চ;

পুব্বে ৰুত্তছৰাদা চ, ইতি অট্ঠারসা খিলা.

সত্তরসাপি দুতিযে, জাতা ৰসস্সতে ইতি;

অঞ্ঞাচরিযৰাদা তু, ততো ওরমজাযিসুং.

হেমতা ¶ রাজগিরিযা, তথা সিদ্ধত্থিকাপি চ;

পুব্বসেলিযভিক্খূ চ, তথা অপরসেলিযা.

ৰাজিরিযা ছ এতেহি, জম্বুদীপম্হি ভিন্নকা;

ধম্মরুচি চ সাগলিযা, লংকাদীপম্হি ভিন্নকা.

কাল়াসোকস্স পুত্তা তু, অহেসুং দসভাতিকা;

বাৰীসতিং তে ৰস্সানি, রজ্জং সমনুসাসিসুং.

নৰ নন্দা ততো আসুং, কমেনেৰ নরাধিপা;

তে’পি বাৰীসৰস্সানি, রজ্জং সমনুসাসিসুং.

মোরিযানং খত্তিযানং, ৰংসে জাতং সিরিধরং;

চন্দগুত্তোতি পঞ্ঞাতং, চাণক্কো ব্রাহ্মণো ততো.

নৰমং ধননন্দং তং, ঘাতেত্ৰা চণ্ডকোধসা;

সকলে জম্বুদীপস্মিং, রজ্জে সমভিসিঞ্চী সো.

সো চতুৰীসৰস্সানিং, রাজা রজ্জমকারযি;

তস্স পুত্তো বিন্দুসারো, অট্ঠৰীসতি কারযি.

বিন্দুসারসুতা আসুং, সতং একো চ ৰিস্সুতা;

অসোকো আসি তেসং তু, পুঞ্ঞতেজোবলিদ্ধিকো.

ৰেমাতিকে ভাতরো সো, হন্ত্ৰা একূনকং সতং;

সকলে জম্বুদীপস্মিং, একরজ্জমপাপুণি.

জিননিব্বানতো পচ্ছা, পুরে তস্সাভিসেকতো;

সাট্ঠারসং ৰস্সসত-দ্ৰযমেৰং ৰিজানিয.

পত্ৰা চতূহি ৰস্সেহি, একরজ্জং মহাযসো;

পুরে পাটলিপুত্তস্মিং, অত্তানমভিসেচযি.

তস্সা’ভিসেকেন ¶ সমং, আকাসে ভূমিযং তথা;

যোজনে যোজনে আণা, নিচ্চং পৰত্তিতা অহু.

অনোতত্তো দকাকাজে, অট্ঠনেসুং দিনে দিনে;

দেৰা দেৰো অকা তেহি, সংৰিভাগং জনস্সচ.

নাগলতাদন্তকট্ঠং, আনেসুং হিমৰন্ততো;

অনেকেসং সহস্সানং, দেৰা এৰ পহোনকং.

ততো’ৰ অমপক্কঞ্চ, ৰণ্ণগন্ধরসুত্তমং.

পঞ্চৰণ্ণানি ৰত্থানি, তত্থপুঞ্জনপট্টকং;

পীতঞ্চ দিব্বপানঞ্চ, ছদ্দন্তদহতো মরু.

মরন্তা নগরে তস্মিং, মিগসূকরপক্খিনো;

আগন্ত্ৰান মহানসং, সযমেৰ মরন্তি চ.

গাৰো তত্থ চরাপেত্ৰা, ৰজমানেন্তি দীপিনো;

খেত্ত ৰত্থুতল়াকাদিং, পালেন্তি মিগসূকরা.

সুমনং পুপ্ফপটকং, অভুত্তং দিব্বমুপ্পলং;

ৰিলেপনং অঞ্জনঞ্চ, নাগানাগাৰিমানতো.

সালিৰাহসহস্সানি, নৰুতিং তু সুৰা পন;

ছদ্দন্তদহতোযেৰ, আহরিংসু দিনে দিনে.

তে সালিনিত্থুসকণে, অখণ্ডেত্ৰান তণ্ডুলে;

অকংসু মূসিকা তেহি, ভত্তং রাজকুলে অহু.

অকংসু সস্সতং তস্স, মধূনি মধুমক্খিকা;

তথা কম্মারসালাসু, অচ্ছাকূটানি পাতযুং.

করৰিকা সকুণিকা, মনুঞ্ঞমধুরস্সরা;

অকংসু তস্সা’গন্ত্ৰান, রঞ্ঞো মধুরৰস্সিতং.

কণিট্ঠং সংসোদরিযং, উপরজ্জে’ভিসেচযি.

পিতা ¶ সট্ঠিসহস্সানি, ব্রাহ্মণে ব্রহ্মপক্খিকে;

ভোজেসি সোপি তেযেৰ, তীণি ৰস্সানি ভোজযি.

দিস্ৰা’নুপসমং তেসং, অসোকো পরিৰেসনে;

ৰিচেয্য দানং দস্সন্তি, অমচ্চে সন্নিযোজিয.

আণাপযিত্ৰা মতিমা, নানাপাসণ্ডিকে ৰিসুং;

ৰীমংসিত্ৰা নিসজ্জায, ভোজাপেত্ৰা ৰিসজ্জযি.

কালে ৰাতাযনগতো, সন্তং রচ্ছাগতং যতিং;

নিগ্রোধসামণেরং সো, দিস্ৰা চিত্তং পসাদযি.

বিন্দুসারস্স পুত্তানং, সব্বেসং জেট্ঠভাতুনো;

সুমনস্স কুমারস্স, পুত্তো সো হি কুমারকো.

অসোকো পিতরা দিন্নং, রজ্জমুজ্জেনিযঞ্হি সো;

হিত্ৰা’গতো পুপ্ফপুরং, বিন্দুসারে গিলানকে.

কত্ৰা পুরং সকাযত্তং, মতে পিতরি ভাতরং;

ঘাতেত্ৰা জেট্ঠকং রজ্জং, অগ্গহেসি পুরে ৰরে.

সুমনস্স কুমারস্স, দেৰী তন্নামিকা ততো;

গব্ভিনী নিক্খমিত্ৰান, পাচিনদ্ৰারতো বহি.

চণ্ডালগাম মগমা, তত্থ নিগ্রোধদেৰতা;

তমালপিযনামেন, মা পত্ৰা ঘরকং অদা.

তদহে’ৰ ৰরং পুত্তং, ৰিজাযিত্ৰা সুতস্স সা;

নিগ্রোধোতি অকা নামং, দেৰতা নুগ্গহানুগা.

দিস্ৰা তং জেট্ঠচণ্ডালো, অত্তনো সামিনিং ৰিয;

মঞ্ঞন্তো তং উপট্ঠাসি, সত্তৰস্সানি সাধুকং.

তং মহাৰরুণো থেরো, তদা দিস্ৰা কুমারকং;

উপনিস্সয সম্পন্নং, অরহা পুচ্ছি মাতরং.

পব্বাজেসি খুরগ্গে সো, অরহত্তমপাপুণি;

দস্সনাযো’প গচ্ছন্তো, সো ততো মাতুদেৰিযা.

দক্খিণেন চ দ্ৰারেন, পৰিসিত্ৰা পুরুত্তমং;

তং গামগামিমগ্গেন, যাতি রাজঙ্গণে তদা.

সন্তায ¶ ইরিযা যস্মিং, পসীদি সমহীপতি;

পুব্বে’ৰ সন্নিৰাসেন, পেমং তস্মিং অজাযথ.

পুব্বে কির তযো আসুং, ভাতরো মধু ৰাণিজা;

একো মধুং ৰিক্কিণাতি, আহরন্তি মধুং দুৰে.

একো পচ্চেকসম্বুদ্ধো, ৰণরোগাতুরো অহু;

অঞ্ঞো পচ্চেকসম্বুদ্ধো, তদত্থং মধুৰত্থিকো.

পিণ্ডচারিকৰত্তেন, নগরং পাৰিসী তদা;

তিত্থং জলত্থং গচ্ছন্তি, একা চেটী তমদ্দস.

পুচ্ছিত্ৰা মধুকামত্তং, ঞত্ৰা হত্থেন আদিসি;

এসো মধ্ৰাপণো ভন্তে, তত্থ গচ্ছা’তি অব্রৰি.

তত্থ পত্তস্স বুদ্ধস্স, ৰাণিজো সো পসাদৰা;

ৰিস্সন্দযন্তো মুখতো, পত্তপুরং মধুং অদা.

পুণ্ণঞ্চ উপ্পতন্তঞ্চ, পতিতঞ্চ মহীতলে;

দিস্ৰা মধুং পসন্নো সো, এৰং পণিদহী তদা.

জম্বুদীপে একরজ্জং, দানেনা’নেন হোতু মে;

আকাসে যোজনে আণা, ভূমিযং যোজনেতি চ.

ভাতরে আগতে আহ, এদিসস্স মধুং অদং;

অনুমোদথ তুম্হে তং, তুম্হাকঞ্চ যতো মধু.

মজ্ঝো পচ্চেকবুদ্ধং তং, খিপপারণ্ণৰে ইতি;

পত্তিদানৰচো তস্স, সুত্ৰা তে চানুমোদিসুং.

আপণা দেসিকং যাতু, দেৰিত্তং তস্স পত্থযি;

আদিস্সমানসন্ধি চ, রূপং অতিমনোরমং.

অসোকো মধুদো’সন্ধি-মিত্তাদেৰী তু চেটিকা;

চণ্ডালৰাদী নিগ্রোধো, তিস্সো সো পারৰাদিকো.

চণ্ডালৰাদী চণ্ডাল-গামে আসি যতো তু সো;

পত্থেসি মোক্খং মোক্খঞ্চ, সত্ত ৰস্সোৰ পাপুণি.

নিৰিট্ঠপেমো ¶ তস্মিং সো, রাজা’তি তুরিতো ততো;

পক্কোসাপেসি তং সো তু, সন্তৰুত্তী উপাগমি.

নিসিদ তাতা’নুরূপে, আসনে তা’হ ভূপতি;

অদিস্ৰা ভিক্খুমঞ্ঞং সো, সীহাসনমুপাগমি.

তস্মিং পল্লঙ্কমাযাতে, রাজাইতি ৰিচিন্তযি;

অজ্জা’যং সামণেরো মে, ঘরে হেস্সতি সামিকো.

আলম্বিত্ৰা করং রঞ্ঞো, সো পল্লঙ্কে সমারুহি;

নিসীদি রাজপল্লঙ্কে, সেতচ্ছত্তস্স হেট্ঠতো.

দিস্ৰা তথা নিসিন্নং তং, অসোকো সো মহীপতি;

সম্ভাৰেত্ৰান গুণতো, তুট্ঠো’তীৰ তদা অহু.

অত্তনো পটিযত্তেন, খজ্জভোজ্জেন তপ্পিয;

সম্বুদ্ধদেসিতং ধম্মং, সামণেরমপুচ্ছিতং.

তস্স’প্পমাদৰগ্গং সো, সামণেরো অভাসথ;

তং সুত্ৰা ভূমিপালো সো, পসন্নো জিনসাসনে.

অট্ঠ তে নিচ্চভত্তানি, দম্মি তাতা’তি আহ তং;

উপজ্ঝাযস্স মে রাজ, তানি দম্মীতি আহ সো.

পুন অট্ঠসু দিন্নেসু, তান’দা চরিযস্স সো;

পুন অট্ঠসু দিন্নেসু, ভিক্খুসঙ্ঘস্স তান’দা.

পুন অট্ঠসু দিন্নেসু, অধিৰাসেসি বুদ্ধিমা;

দ্ৰত্তিংসভিক্খূ আদায, দুতিযদিৰসে গতো.

সহত্থা তপ্পিতো রঞ্ঞা, ধম্মং দেসিয ভূপতিং;

সরণেসু চ সীলেসু, ঠপেসি সমহাজনং.

ততো রাজা পসন্নো সো, দিগুণেন দিনে দিনে;

ভিক্খূ সট্ঠিসহস্সানি, অনুপুব্বেনু’পঠহি.

তত্থিযানং সহস্সানি, নিকড্ঢিত্ৰান সট্ঠিসো;

সট্ঠিভিক্খুসহস্সানি, ঘরে নিচ্চমভোজযি.

সট্ঠিভিক্খুসহস্সানি ¶ , ভোজেতুং তুরিতো হি সো;

পটিযাদাপযিত্ৰান, খজ্জভোজ্জং মহারহং.

ভূসাপেত্ৰান নগরং, গন্ত্ৰা সঙ্ঘং নিমন্তিয;

ঘরং নেত্ৰান ভোজেত্ৰা, দত্ৰা সামণকং বহুং.

সত্থারা দেসিতো ধম্মো, কিত্তকোতি অপুচ্ছথ;

ব্যাকাসি মোগ্গলিপুত্তো, তিস্সত্থেরো তদস্সতং.

সুত্ৰান চতুরাসীতি, ধম্মক্খন্ধা’তি সো’ব্রৰি;

পূজেমি তে’হং পচ্চেকং, ৰিহারেনা’তি ভূপতি.

দত্ৰা তদা ছন্নৰুতি-ধনকোটিং মহীপতি;

পুরেসু চতুরাসীতি-সহস্সেসু মহীতলে.

তত্থ তত্থে’ৰ রাজূহি, ৰিহারে আরভাপযি;

সযং অসোকারামং তু, কারাপেতুং সমারভি.

রতনত্তযনিগ্রোধ-গিলানানন্তি সাসনে;

পচ্চেকং সতসহস্সং, সো দাপেসি দিনে দিনে.

ধনেন বুদ্ধদিন্নেন, থূপপূজা অনেকধা;

অনেকেসু ৰিহারেসু, অনেকে অকরুং সদা.

ধনেন ধম্মদিন্নেন, পচ্চযে চতুরো ৰরে;

ধম্মধরানং ভিক্খূনং, উপনেতুং সদা নরা.

অনোতত্তোদকাজেসু, সঙ্ঘস্স চতুরো অদা;

তে পিটকানং থেরানং, সট্ঠিযে’কং দিনে দিনে.

একং অসন্ধিমিত্তায, দেৰিযা তু অদাপযি;

সযং পন দুৰেযেৰ, পরিভুঞ্জি মহীপতি.

সট্ঠিভিক্খুসহস্সানং, দন্তকট্ঠং দিনে দিনে;

সোল়সিত্থিসহস্সানং, অদা নাগলতাৰ্হযং.

অথেকদিৰসং রাজা, চতুসম্বুদ্ধদস্সিনং;

কপ্পাযুকং মহাকাল়ং, নাগরাজং মহিদ্ধিকং.

সুণিত্ৰা তমানেতুং, সোণ্ডসঙ্খলিবন্ধনং;

পেসযিত্ৰা তমানেত্ৰা, সেতচ্ছত্তস্স হেট্ঠতো.

পল্লঙ্কম্হি নিসীদেত্ৰা, নানাপুপ্ফেহি পূজিয;

সোল়সিত্থিসহস্সেহি, পরিৰারিয অব্রৰি.

সদ্ধম্মচক্কৰত্তিস্স ¶ , সম্বুদ্ধস্স মহেসিনো;

রূপং অনন্তঞাণস্স, দস্সেহি মম ভো ইতি.

দ্ৰত্তিংসলক্খণূপেতং, অসীতিব্যঞ্জনুজ্জলং;

ব্যামপ্পভাপরিক্খিত্তং, কেতুমালাহি সোভিতং.

নিম্মাসি নাগরাজা সো, বুদ্ধরূপং মনোহরং;

তং দিস্ৰা’তি পসাদস্স, ৰিম্হযস্স চ পূরিতো.

এতেন নিম্মিতং রূপং, ঈদিসং কীদিসং নুখো;

তথাগতস্স রূপন্তি, আসি পিতুন্নতুন্নতো.

অক্খিপূজন্তি সঞ্ঞাতং, তং সত্তাহং নিরন্তরং;

মহামহং মহারাজ, কারাপেসি মহিদ্ধিকো.

এৰং মহানুভাৰো চ, সদ্ধো চাপি মহীপতি;

থেরো চ মোগ্গলিপুত্তো, দিট্ঠা পুব্বে ৰসীহি তে.

দুতিযে সঙ্গহে থেরা, পেক্খন্তা’নাগতেহি তে;

সাসনোপদ্দৰং তস্স, রঞ্ঞো কালম্হি অদ্দসুং.

পেক্খান্তা সকলে লোকে, তদুপদ্দৰঘাতকং;

তিস্সব্রহ্মানমদ্দক্খুং, অচিরট্ঠাযি জীৰিতং.

তেসং সমুপসঙ্কম্ম, আযাচিংসু মহাপতিং;

মনুস্সেসু’পপজ্জিত্ৰা, তদুপদ্দৰঘাতনং.

অদা পটিঞ্ঞং তেসং সো, সাসনুজ্জোতনত্থিকো;

সিগ্গৰং চণ্ডৰজ্জিঞ্চ অৰোচুং দহরে যতি.

অট্ঠারসাদিকা ৰস্স-সতা উপরি হেস্সতি;

উপদ্দৰো সাসনস্স, ন সম্ভোস্সাম তং মযং.

ইমং তুম্হা’ধিকরণং, নোপগঞ্ছিত্থ ভিক্খৰো;

দণ্ডকম্মারহা তস্মা, দণ্ডকম্মপদঞ্হি ৰো.

সাসনুজ্জোতনত্থায, তিস্সব্রহ্মা মহাপতি;

মোগ্গলিব্রাহ্মণঘরে, পটিসন্ধিং গহেস্সতি.

কালে ¶ তুম্হেসু একো তং, পব্বাজেতু কুমারকং;

একো তং বুদ্ধৰচনং, উগ্গণ্হাপেতু সাধুকং.

অহু ৰেসালিযং পুব্বে-দাসকো নাম সোত্থিযো;

তিসিস্সসতজেট্ঠো সো, ৰসং আচরিযন্তিকে.

দ্ৰাদসৰস্সিকোযেৰ, ৰেদপারগতো চরং;

সসিস্সো ৰালিকারামে, ৰসন্তং কতসঙ্গহং.

উপালিথেরং পস্সিত্ৰা, নিসীদিত্ৰা তদন্তিকে;

ৰেদেসু গণ্ঠিঠানানি, পুচ্ছি সো তানি ব্যাকরি.

সব্বধম্মানুপতিতো, একধম্মো হি মাণৰ;

সব্বে ধম্মা ওসরন্তি, একধম্মো হি কো নু সো.

ইচ্চাহ নামং সন্ধায, থেরো মাণৰকো তু সো;

না’ঞ্ঞাসি পুচ্ছিতো মন্তো, বুদ্ধমন্তোতি ভাসিতো.

দেহীতি আহ সো আহ, দেম নো ৰেসধারিনো;

গুরুং আপুচ্ছি মন্তত্থং, মাতরং পিতরং তথা.

মাণৰানং সতেহে’স, তীহি থেরস্স সন্তিকে;

পব্বজিত্ৰান কালেন, উপসম্পজ্জি মাণৰো.

খীণাসৰসহস্সং সো, দাসকত্থেরজেট্ঠকং;

উপালিথেরো ৰাচেসি, সকলং পিটকত্তযং.

গণনা ৰীতিৰত্তা তে, সেসা’রিয পুথুজ্জনা;

পিটকানুগ্গহিতানি, যেহি থেরস্স সন্তিকে.

কাসীসু কোসলো নাম, সত্থৰাহসুতো অহু;

গিরিব্বজং ৰণিজ্জায, গতো মাতাপিতূহি সো.

অগা ৰেল়ুৰনং পঞ্চ-দসৰসো কুমারকো;

মাণৰং পঞ্চপঞ্ঞাস, পরিৰারিয তং গতা.

সগণং দাসকং থেরং, তত্থ দিস্ৰা পসীদিয;

পব্বজ্জং যাচি সো আহ, তৰা’পুচ্ছ গুরুং ইতি.

ভত্তত্তযমভুঞ্জিত্ৰা ¶ , সোণকো সো কুমারকো;

মাতাপিতূহি কারেত্ৰা, পব্বজ্জানুঞ্ঞমাগতো.

সদ্ধিং তেহি কুমারেহি, দাসকত্থেরসন্তিকে;

পব্বজ্জং উপসম্পজ্জ, উগ্গণ্হি পিটকত্তযং.

খীণাসৰসহস্সস্স, থেরসিস্স গণস্স সো;

অহোসি পিটকঞ্ঞুস্স, জেট্ঠকো সোণকো যতি.

অহোসি সিগ্গৰো নাম, পুরে পাটলিনামকো;

পঞ্ঞৰা’মচ্চতনযো, অট্ঠারসসমো তু সো.

পাসাদেসু ৰসং তীসু, ছল়ড্ঢউতুসাধুসু;

অমচ্চপুত্তং আদায, চণ্ডৰজ্জিং সহাযকং.

পুরিসানং দসদ্ধেহি, সতেহি পরিৰারিতো;

গন্ত্ৰান কুক্কুটারামং, সোণকত্থেরমদ্দস.

সমাপত্তিসমাপন্নং, নিসিন্নং সংৰুতিন্দ্রিযং;

ৰন্দি তেনালপন্তং তং, ঞত্ৰা সঙ্ঘমপুচ্ছিতং.

সমাপত্তিসমাপন্না, নালপন্তী’তি আহু তে;

কথন্নু ৰুট্ঠহন্তীতি, ৰুত্তা আহংসু ভিক্খৰো.

পক্কোসনায সত্থুস্স, সঙ্ঘপক্কোসনায চ;

যথা কালপরিচ্ছেদা, আযুক্খযৰসেন চ.

ৰুট্ঠহন্তীতি ৰত্ৰান, তেসং দিস্ৰো’পনিস্সযং;

পাহেসুং সঙ্ঘৰচনং, ৰুট্ঠায স তহিং অগা.

কুমারো পুচ্ছি কিং ভন্তে, নালপিত্থাতি আহ সো;

ভুঞ্জিম্হ ভুঞ্জিতব্বন্তি, আহ ভোজেথ নো অপি.

আহ অম্হাদিসে জাহে, সক্কা ভোজযিতুং ইতি;

মাতাপিতু অনুঞ্ঞায, সো কুমারোথ সিগ্গৰো.

চণ্ডৰজ্জী চ তেপঞ্চ-সতানি পুরিসাপি চ;

পব্বজ্জিত্ৰো’পসম্পজ্জুং, সোণত্থেরস্স সন্তিকে.

উপজ্ঝাযন্তিকেযেৰ, তে দুৰে পিটকত্তযং;

উগ্গহেসুঞ্চ কালেন, ছল়ভিঞ্ঞং লভিংসু চ.

ঞত্ৰা ¶ তিস্স পটিসন্ধিং, ততো পভুতি সিগ্গৰো;

থেরো সো সত্তৰস্সানি, তং ঘরং উপসঙ্কমি.

গচ্ছাতি ৰাচামত্তম্পি, সত্তৰস্সানি নালভি;

অলত্থ অট্ঠমে ৰস্সে, গচ্ছাতি ৰচনং তহিং.

তং নিক্খমন্তং পৰিসন্তো, দিস্ৰা মোগ্গলিব্রাহ্মণো;

কিঞ্চি লদ্ধং ঘরে নোতি, পুচ্ছি আমাতি সো’ব্রৰি.

ঘরং গন্ত্ৰান পুচ্ছিত্ৰা, দুতিযে দিৰসে ততো;

মুসাৰাদেন নিগ্গণ্হি, থেরং ঘরমুপাগতং.

থেরস্স ৰচনং সুত্ৰা, সো পসন্নমনো দ্ৰিজো;

অত্তনো পকতেন’স্স, নিচ্চং ভিক্খং পৰত্তযি.

কমেন’স্স পসীদিংসু, সব্বে’পি ঘরমানুসা;

ভোজাপেসি দিজো নিচ্চং, নিসীদাপিয তং ঘরে.

এৰং কমেন গচ্ছন্তো, কালে সোল়সৰস্সিকো;

অহু তিস্সকুমারো সো, তিৰেদোদধিপারগো.

থেরো কথাসমুট্ঠানং, হেস্সতে’ৰ ঘরে ইতি;

আসনানি ন দস্সেসি, ঠপেত্ৰা মাণৰাসনং.

ব্রহ্মলোকগতত্তাৰ, সুচিকামো অহোসি সো;

তস্মা সো তস্স পল্লঙ্কো, ৰাসযিত্ৰা লগীযতি.

অঞ্ঞাসনং অপস্সন্তো, ঠিতে থেরে সসম্ভমো;

তস্স তং আসনং তস্স, পঞ্ঞপেসি ঘরে জনো.

দিস্ৰা তত্থ নিসিন্নং তং, আগম্মা’চরিযন্তিকা;

কুজ্ঝিত্ৰা মাণৰো ৰাচং, অমনাপং উদীরযি.

থেরো মাণৰ কিং মন্তং, জানাসীতি তমব্রৰি;

তমেৰ পুচ্ছং থেরস্স, পচ্ছা রোচেসি মাণৰো.

জানামীতি পটিঞ্ঞায, থেরে থেরং অপুচ্ছিসো;

গণ্ঠিঠানানি ৰেদেসু, তস্স থেরো’থ ব্যাকরি.

যস্স চিত্তং উপ্পজ্জতি ন নিরুজ্ঝতি,

তস্স চিত্তং নিরুজ্ঝিস্সতি; ন উপ্পজ্জিস্সতি,

যস্স ৰা পন চিত্তং নিরুজ্ঝিসতি ন উপ্পজ্জিস্সতি;

তস্স চিত্তং উপ্পজ্জতি, ন নিরুজ্ঝতীতি.

তং চিত্তযমকে পঞ্হং, পুচ্ছি থেরো ৰিসারদো;

অন্ধকারো ৰিয অহু, তস্স সো তমৰোচ সো.

ভিক্খুকো নাম মন্তোতি, বুদ্ধ মন্তোতি সো ব্রৰি;

দেহীতি ৰুত্তে নোৰেস-ধারিনো দম্মি তং ইতি.

মাতাপিতূহি’নুঞ্ঞাতো, মন্তত্থায স পব্বজ্জি;

কম্মট্ঠানমদা থেরো, পব্বাজেত্ৰা যথারহং.

ভাৰনং অনুযুঞ্জন্তো, অচিরেন মহামতী;

সোতাফত্তিফলং পত্তো, থেরো ঞত্ৰান তং তথা.

পেসেসি চণ্ডৰজ্জিস্স, থেরস্সন্তিকমুগ্গহং;

কাতুং সুত্তাভিধম্মানং, সোতত্থা’কাতদুগ্গহং.

ততো সো তিস্সদহরো, আরভিত্ৰা ৰিপস্সনং;

ছল়ভিঞ্ঞো অহু কালে, থেরভাৰঞ্চ পাপুণি.

অতীৰ পাকটো আসি, চন্দো’ৰ সূরিযো’ৰসো;

লোকো তস্স ৰচো’মঞ্ঞী, সম্বুদ্ধস্স ৰচোপিয.

মোগ্গলিপুত্ততিস্সথেরোদযো নিট্ঠীতো.

একাহং ¶ উপরাজা সো, অদক্খি মিগৰং গতো;

কীল়মানে মিগে’রঞ্ঞে, দিস্ৰা এতং ৰিচিন্তযি.

মিগাপি এৰং কিল়ন্তি, অরঞ্ঞে তিণগোচরা;

ন কিল়িস্সন্তি কিং ভিক্খূ, সুখাহারৰিহারিনো.

অত্তনো চিন্তিতং রঞ্ঞো, আরোচেসি ঘরং গতো;

সঞ্ঞাপেতুং তু সত্তাহং, রজ্জং তস্স অদাসি সো.

অনুভোহি ইমে রজ্জং, সত্তাহং ত্ৰং কুমারক;

ততো তং ঘাতযিস্সামি, ইচ্চ’ৰোচ মহীপতি.

সত্তাহা’হং মরিস্সংতি, ত্ৰং ন কীল়ি ইমে কথং;

কীল়িস্সন্তি যতি তাত, সদা মরণসঞ্ঞিনো.

ইচ্চেৰং ভাকরা ৰুত্তো, সাসনস্মিং পসীদি সো;

কালেন মিগৰং গন্ত্ৰা, থেরমদক্খি সঞ্ঞতং.

নিসিন্নং রুক্খমূলস্মিং, সো মহাধম্মরক্খিতং;

সালসাখায নাগেন, বীজযন্ত মনাসৰং.

অযং থেরো ৰিযা’হম্পি, পব্বজ্জ জিন সাসনে;

ৰিহরিস্সং কদা রঞ্ঞে, ইতি চিন্তযি পঞ্ঞৰা.

আকাসে ঠপযিত্ৰান, চীৰরানি ৰরানি সো;

ওগাহিত্ৰা পোক্খরণী, গত্তানি পরিসিঞ্চথ.

তং ¶ ইদ্ধিং উপরাজা সো, দিস্ৰা’তীৰ পসীদিয;

অজ্জেৰ পব্বজিস্সংতি, বুদ্ধিংচা’কাসি বুদ্ধিমা.

উপসঙ্কম্ম রাজানং, পব্বজ্জং যাচি সাদরো;

নিৰারেতুমসক্কোন্তো, তমাদায মহীপতি.

পব্বজি সো মহাধম্ম-রক্খিতত্থেরসন্তিকে.

সদ্ধিং তেন চতুসত-সহস্সানি নরাপি চ;

অনুপব্বজিতানন্তু, গণনা চ ন ৰজ্জতি.

ভাগিনেয্যো নরিন্দস্স, অগ্গি ব্রহ্মাতি ৰিস্সুতো;

অহোসি রঞ্ঞো ধীতায, সঙ্ঘমিত্তায সামিকো.

উপরাজস্স পব্বজ্জা, তস্সা’সোকস্স রাজিনো;

চতুত্থে আসিৰস্সেসা, মহাজনহিতোদযা.

তত্থেৰ উপসম্পন্নো, সম্পন্নউপনিস্সযো;

ঘটেন্তো উপরাজা সো, ছল়’ভিঞ্ঞো’রহা অহু.

ৰিহারে তেসমারদ্ধে, সব্বে সব্বপুরেসুপি;

সাধুকং তীহি ৰস্সেহি, নিট্ঠাপেসুং মনোরমে.

থেরস্স ইন্দগুত্তস্স, কম্মাদিট্ঠাযকস্স তু;

ইদ্ধিযা চা’সু নিট্ঠাসি, অসোকারামসৰ্হযো.

জনেন পরিভুত্তেসু, ঠানেসু চ তহিং তহিং;

চেতিযানি অকারেসি, রমণীযানি ভূপতি.

পুরেহি চতুরাসীতি-সহস্সেহি সমন্ততো;

লেখে একাহমানেসুং, ৰিহারা নিট্ঠিতা ইতি.

লেখে সুত্ৰা মহারাজা, মহাতেজিদ্ধি ৰিক্কমো;

কাতুকামো সকিংযেৰ, সব্বারাম মহামহং.

পুরে ভেরিং চরাপেসি, সত্তমে দিৰসে ইতো;

সব্বারামমহো হোতু, সব্বদেসেসু একদা.

যোজনে ¶ যোজনে দেন্তু, মহাদানং মহীতলে;

করোন্তু গামারামানং, মগ্গানঞ্চ ৰিভূসনং.

ৰিহারেসু চ সব্বেসু, ভিক্খুসঙ্ঘস্স সব্বথা;

মহাদানানি ৰত্তেন্তু, যথাকালং যথাবলং.

দীপমালা পুম্ফমালা-লঙ্কারেহি তহিং তহিং;

তূরিযেহি চ সব্বেহি, উপহারং অনেকধা.

উপোসথঙ্গানা’দায, সব্বে ধম্মং সুণন্তু চ;

পূজাৰিসেসেন’নেকে চ, করোন্তু তদহেপি চ.

সব্বে সব্বত্থ সব্বথা, যথাণত্তাধিকাপি চ;

পূজা সম্পটিযাদেসুং, দেৰলোকমনোরমা.

তস্মিং দিনে মহারাজা, সব্বালঙ্কার ভূসিতো;

সহোরোধো সহামচ্চো, বলোঘ পরিৰারিতো.

অগমাসি সকারামং, ভিন্দন্তো ৰিয মেদিনিং;

সঙ্ঘমজ্ঝম্হি অট্ঠাসি, ৰন্দিত্ৰা সঙ্ঘমুত্তমং.

তস্মিং সমাগমে আসুং, অসীতি ভিক্খুকোটি যো;

অহেসুং সতসহস্সং, তেসু খীণাসৰা যতি.

নৰুতি ভিক্খুসহস্সানি, অহূ ভিক্খুনিযো তহিং;

খিণাসৰা ভিক্খুনিযো, সহস্সং আসু তাসু তু.

লোকৰিৰরণং নাম, পাটিহীরং অকংসু তে;

খীণাসৰা পসাদত্থং, ধম্মাসোকস্স রাজিনো.

চণ্ডাসোকোতি ঞাযিত্থ, পুব্বে পাপেন কম্মুনা;

ধম্মাসোকোতি ঞাযিত্থ, পচ্ছা পুঞ্ঞেন কম্মুনা.

সমুদ্দপরিযন্তং সো, জম্বুদীপং সমন্ততো;

পস্সি সব্বে ৰিহারে চ, নানাপূজা ৰিভূসিতে.

অতীৰ তুট্ঠো তে দিস্ৰা, সঙ্ঘং পুচ্ছি নিসীদিয;

কস্স ভন্তে পরিচ্চাগো, মহাসুগত সাসনে.

থেরো সো মোগ্গলিপুত্তো, রঞ্ঞো পঞ্হং ৰিযাকরি;

ধরমানে’পি সুগতে, নত্থি চাগী তযাসমো.

তং সুত্ৰা ৰচনং ভিয্যো, তুট্ঠো রাজা অপুচ্ছি তং;

বুদ্ধসাসন দাযাদো, হোতি খো মাদিসো ইতি.

থেরো ¶ তু রাজপুত্তস্স, মহিন্দস্সূ’পনিস্সযং;

তথেৰ রাজধীতায, সঙ্ঘমিত্তায পেক্খিয.

সাসনস্সা’ভি ৰুদ্ধিঞ্চ, তং হেতুকম ৰেক্খিয;

পচ্চাভাসথ রাজানং, সো সাসনধুরন্ধরো.

তাদিসো’পি মহাচাগী, দাযাদো সাসনস্স ন;

পচ্চযদাযকো’চ্চেৰ, ৰুচ্চতে মনুজাধীপ.

অথ সাসন দাযাদ-ভাৰমিচ্ছং মহীপতি;

মহিন্দং সঙ্ঘমিত্তঞ্চ, ঠিতে তত্র অপুচ্ছথ.

পব্বজিস্সথ কিং তাতা, পব্বজ্জা মহতী মতা;

পিতুনো ৰচনং সুত্ৰা, পিতরং তে অভাসিসুং.

অজ্জেৰ পব্বজিস্সাম, সচে ত্ৰং দেৰ ইচ্ছসি;

অম্হঞ্চ লাভো তুম্হঞ্চ, পব্বজ্জায ভৰিস্সতি.

উপরাজস্স পব্বজ্জ-কালভো পভুতীহি সো;

সা চাপি অগ্গিব্রহ্মস্স, পব্বজ্জা কতনিচ্ছযা.

উপরজ্জং মহীন্দস্স, দাতুকামো’পি ভূপতি;

ততো’পি অধিকাসা’তি, পব্বজ্জংযেৰ রোচযি.

পিযং পুত্তং মহিন্দঞ্চ, বুদ্ধিরূপবলোদিতং;

পব্বজ্জা পেসি সমহং, সঙ্ঘ মিত্তঞ্চ ধীতরং.

তদা ৰীসতিৰস্সো সো, মহিন্দো রাজনন্দনো;

সঙ্ঘমিত্তা রাজধীতা, অট্ঠারসসমা তদা.

তদহেৰ অহু তস্স, পব্বজ্জা উপসম্পদা;

পব্বজ্জা সিক্খাদানঞ্চ, তস্সা চ তদহু অহু.

উপজ্ঝাযো কুমারস্স, অহু মোগ্গলিসৰ্হযো;

পব্বাজেসি মহাদেৰ-ত্থেরো মজ্ঝন্তিকো পন.

কম্মৰাচং অকা তস্মিং, সো’পসম্পদমণ্ডলে;

অরহত্তং মহিন্দো সো, পত্তো সপটিসম্ভিদং.

সঙ্ঘমিত্তা’হু’পজ্ঝাযা ¶ , ধম্মপালাতি ৰিস্সুতা;

আচরিযা আযুপালি, কালে সা’সি অনাসৰা.

উভো সাসনপজ্জোতা, লংকাদীপোপকারিনো;

ছট্ঠে ৰস্সে পব্বজিংসু, ধম্মাসোকস্স রাজিনো.

মহামহিন্দো ৰস্সেহি, তীহি দীপপ্পসাদকো;

পিটকত্তযং মুগ্গণ্হি, উপজ্ঝাযস্স সন্তিকে.

সা ভিক্খুনী চন্দলেখা, মহিন্দো ভিক্খূ সূরিযো;

সম্বুদ্ধ সাসনাকাসং, তে সদা সোভযুং তদা.

ৰনে পাটলিপুত্তম্হা, ৰনে ৰনচরো চরং;

কুন্তকিন্নরিযা সদ্ধিং, সংৰাসং কপ্পযী কির.

মহাৰরুণত্থেরস্স, কালে পব্বজ্জ সন্তিকে;

অরহত্তং পাপুণিংসু, ছল়ভিঞ্ঞং গুণং উভো.

পাদে কীটৰিসেনা’সি, ফুট্ঠো জেট্ঠো সৰেদনো;

আহ পুট্ঠো কণিট্ঠেন, ভেসজ্জং পসতং ঘটং.

রঞ্ঞো নিৰেদনং থেরো, গিলানৰত্ততো’পি সো;

সপ্পিসত্থঞ্চ চরণং, পচ্ছাভত্তং পটিক্খিপি.

পিণ্ডায চে চরং সপ্পিং, লভসে ত্ৰং তমাহর;

ইচ্ছাহ তিস্সথেরো সো, সুমিত্তং থেরমুত্তমং.

পিণ্ডায চরতা তেন, ন লদ্ধং পসতং ঘতং;

সপ্পিকুম্ভসতেনাপি, ব্যাধিজাতো অসাধিযো.

তেনেৰ ব্যাধিনা থেরো, পত্তো আযুক্খযন্তিকং;

ওৰদিত্ৰাপ্পমাদেন, নিব্বাতুং মানসং অকা.

আকাসম্হি নিসীদিত্ৰা, তেজোধাতুৰসেন সো;

যথারুচি অধিট্ঠায, সরীরং পরিনিব্বুতো.

জালাসরীরা নিক্খম্ম, নিম্মংসছারিকং ডহি;

থেরস্স সকলং কাযং, অট্ঠিকানিতুনো ডহি.

সুত্ৰা ¶ নিব্বূতিমেতস্স, তিস্সথেরস্স ভূপতি;

অগমাসি সকারামং, জনোঘ পরিৰারিতো.

হত্তিক্খন্ধগতো রাজা, তানট্ঠিন’ৰরোপিয;

কারেত্ৰা ধাতুসক্কারং, সঙ্ঘং ব্যাধিমপুচ্ছিতং.

তং সুত্ৰা জাতসংৰেগো, পুরদ্ৰারেসু কারিয;

সুধাচিতা পোক্খরণী, ভেসজ্জানঞ্চ পূরিয.

পাপেসি ভিক্খুসঙ্ঘস্স, ভেসজ্জানি দিনে দিনে;

মা হোতু ভিক্খুসঙ্ঘস্স, ভেসজ্জং দুল্লভং ইতি.

সুমিত্তথেরো নিব্বাযি, চঙ্কমন্তো’ৰ চঙ্কমে;

পসীদি সাসনে’তীৰ, তেনাপি চ মহাজনো.

ততো পভুতি সঙ্ঘস্স, লাভো’তীৰ মহা অহু;

পচ্ছা পসন্না চ জনা, যস্মা লাভং পৰত্তযুং.

পহীনলাভসক্কারা, তিত্থিযা লাভকারণা;

সযং কাসাযমাদায, ৰসিংসু সহ ভিক্খূহি.

যথাসকঞ্চ তে ৰাদং, বুদ্ধৰাদো’তি দীপযুং;

যথাসকঞ্চ কিরিযা, অকরিংসু যথারুচি.

তস্সো’পসমনে কালং, দীঘদস্সী অৰেক্খিয;

দত্ৰা মহিন্দথেরস্স, মহাভিক্খুগণং সকং.

উদ্ধং গঙ্গায একো’ৰ, অহোগঙ্গম্হি পব্বতে;

ৰিহাসি সত্তৰস্সানি, ৰিৰেক মনুব্রূহযং.

তিত্থিযানং বহুচত্তা চ, দুব্বচ্চত্তা চ ভিক্খৰো;

তেসং কাতুং ন সক্খিংসু, ধম্মেন পটিসেধনং.

তেনেৰ ¶ জম্বুদীপম্হি, সব্বারামেসু ভিক্খৰো;

সত্তৰস্সানি নাকংসু, উপোসথ পৰারণং.

তং সুত্ৰা মহারাজা, ধম্মাসোকো মহাযসো;

একং অমচ্চং পেসেসি, অসোকারাম মুত্তমং.

গন্ত্ৰা’ধিকরণং এতং, ৰুপসম্ম উপোসথং;

কারেহি ভিক্খুসঙ্ঘেন, পমা’রামে তুৰং ইতি.

গন্ত্ৰান সন্নিপাতেত্ৰা, ভিক্খুসঙ্ঘং সদুম্মতি;

উপোসথং করোথাতি, সাৰেসি রাজসাসনং.

উপোসথং তিত্তিযেহি, ন করোম মযং ইতি;

অৰো চ ভিক্খুসঙ্ঘো তং, অমচ্চং মূল়্হমানসং.

সো’মচ্চো কতিপযানং, থেরানং পটিপাটিযা;

অচ্ছিন্দি অসিনা সীসং, কারেমীতি উপোসথং.

রাজভাতা তিস্সত্থেরো, তং দিস্ৰা কিরিযং লহুং;

গন্ত্ৰান তস্স আসন্নে, সাসনম্হি নিসিদি সো.

থেরং দিস্ৰা অমচ্চো সো, গন্ত্ৰা রঞ্ঞো নিৰেদযি;

সব্বং পৰত্তিং তং সুত্ৰা, জাতদাহো মহীপতি.

সীঘং গন্ত্ৰা ভিক্খুসঙ্ঘং, পুচ্ছি উব্বিগ্গমানসো;

এৰং কতেন কম্মেন, কস্স পাপং সিযা ইতি.

তেসং অপণ্ডিতা কেচি, পাপং তুয্হন্তি কেচি তু;

উভিন্নংচা’তি আহংসু, নত্থি তুয্হন্তি পণ্ডিতা.

তং সুত্ৰা’হ মহারাজা, সমত্থো অত্থি ভিক্খুন;

ৰিমতিং মে ৰিনোদেত্ৰা, কাতুং সাসনপগ্গহং.

ৰিসুং ভিক্খুসহস্সেন, চতুরো পরিৰারিতে;

থেরো নরসহস্সেন, অমচ্চে চতুরো তথা.

তদহেযেৰ পেসেসি, অত্তনো ৰচনেন সো;

থেরং আনেতু মে তেহি, তথা ৰুত্তে সনাগমি.

তং ¶ সুত্ৰা পুন অট্ঠ’ত্থ, থেরে’মচ্চে চ পেসযি;

ৰিসুং সহস্সপুরিসে, পুব্বে ৰিয সনাগমি.

রাজা পুচ্ছি কথং থেরো, আগচ্ছেয্য নু খো ইতি;

ভিক্খূ আহংসু থেরস্স, তস্স’গমনকারণং.

হোতি ভন্তে উপত্থম্ভো, কাতুং সাসনপগ্গহং;

ইতি ৰুত্তে মহারাজ, থেরো এস্সতি সো ইতি.

পুনাপি থেরো’মচ্চে চ, রাজা সোল়স সোল়স;

ৰিসুং সহস্স পুরিসে, তথা ৰত্ৰান পেসযি.

থেরো মহল্লত্তে’পি, নারোহিস্সতি যানকং;

থেরং গঙ্গায নাৰায, আনেথা’তি চ অব্রৰি.

জাণুমত্তং জলং রাজো’গহেত্ৰা দক্খিণং করং;

নাৰায ওতরন্তস্স, থেরস্সা’দাসি গারৰো.

দক্খিণং দক্খিণেয্যো সো, করং রঞ্ঞো’নুকম্পকো;

আলম্বিত্ৰা’নুকম্পায, থেরো নাৰায ওতরি.

রাজা থেরং নযিত্ৰান, উয্যানং রতিৰড্ঢনং;

থেরস্স পাদে ধোৰিত্ৰা, মক্খেত্ৰা চ নিসীদিয.

সমত্থভাৰং থেরস্স, ৰীমংসন্তো মহীপতি;

দট্ঠুকামো অহং ভন্তে, পাটিহীরন্তি অব্রৰি.

কন্তি ৰুত্তে মহীকম্পং, আহ তং পুন রাহসো;

সকলাযে’ক দেসায, কতরং দট্ঠুমিচ্ছসি.

কো দুক্করোতি পুচ্ছিত্ৰা, এক দেসায কম্পনং;

দুক্করন্তি সুণিত্ৰান, তং দুট্ঠুকামতং ব্রৰী.

রথং অস্সং মনুস্সঞ্চ, পাতিঞ্চোদক পূরিতং;

থেরো যোজন সীমায, অন্তরম্হি চতুদ্দিসে.

ঠপাপেত্ৰা ¶ তদড্ঢেহি, সহ তং যোজনং মহিং;

চালেসি ইদ্ধিযা তত্র, নিসিন্নস্স চ দস্সযি.

তেনা’মচ্চেন ভিক্খূনং, মরণেন’ত্তনোপি চ;

পাপস্স’ত্থিত্ত নত্থিত্তং, থেরং পুচ্ছি মহীপতি.

পটিচ্চ কম্মং নত্থীতি, কিলিট্ঠং চেতনং ৰিনা;

থেরো বোধেসি রাজানং, ৰত্ৰা তিত্তিরজাতকং.

ৰসন্তো তত্থ সত্তাহং, রাজুয্যানে মনোরমে;

সিক্খাপেসি মহীপালং, সম্বুদ্ধসমযং সুভং.

তস্মিংযেৰ চ সত্তা হে, দুৰে যক্খে মহীপতি;

পেসেত্ৰা মহিযং ভিক্খূ, অসেসে সন্নিপাতযি.

সত্তমে দিৰসে গন্ত্ৰা, সকারামং মনোরমং;

কারেসি ভিক্খুসঙ্ঘস্স, সন্নিপাতমসেসতো.

থেরেন সহ একন্তে, নিসিন্নো সাণিঅন্তরে;

একেকলদ্ধিকে ভিক্খু, পক্কোসিত্ৰান সন্তিকং.

কিংৰাদী সুগতো ভন্তে, ইতি পুচ্ছি মহীপতি;

তে সস্সতাদিকং দিট্ঠিং, ব্যাকরিংসু যথাসকং.

তে মিচ্ছাদিট্ঠিকে সব্বে, রাজা উপ্পব্বাজাপযী;

সব্বে সট্ঠিসহস্সানি, আসুং উপ্পব্বজাপিতা.

অপুচ্ছি ধম্মিকে ভিক্খূ, কিংৰাদী সুগতো ইতি;

ৰিভজ্জৰাদী তাহংসু, তং থেরং পুচ্ছি ভূপতি.

সঙ্ঘস্স রক্খং দত্ৰান, নগরং পাৰিসী সুভং;

সঙ্ঘো সমগ্গো হুত্ৰান, তদা’কাসি উপোসথং.

থেরো ¶ অনেক সঙ্খম্হা, ভিক্খুসঙ্ঘা ৰিসারদে;

ছল়ভিঞ্ঞে তেপিটকে, পভিন্নপটিসম্ভিদে.

ভিক্খুসহস্সং উচ্চিনি, কাতুং সদ্ধম্মং সঙ্গহং;

তেহি অসোকারামম্হি, অকা সদ্ধম্ম সঙ্গহং.

মহাকস্সপত্থেরো চ, যসত্থেরো চ কারযুং;

যথা তে ধম্ম সংগীতিং, তিস্সত্থেরোপি তং তথা.

তথাৰত্থুপ্পকরণং, পরৰাদপ্পমদ্দনং;

অভাসি তিস্সত্থেরো চ, তস্মিং সংগীতি মণ্ডলে.

এৰং ভিক্খুসহস্সেন, রক্খায’সোক রাজিনো;

অযং নৰহি মাসেহি, ধম্ম সংগীতি নিট্ঠিতা.

রঞ্ঞো সত্তরসে ৰস্সে, দ্ৰাসত্ততিসমো ইসি;

মহাপৰারণায’সো, সংগীতি তং সমাপযি.

সাধুকারং দদন্তীৰ, সাসনট্ঠিতি কারণং;

সংগীতি পরিযোসানে, অকম্মিত্থ মহামহী.

হিত্ৰা সেট্ঠং ব্রহ্মৰিমানম্পি মনুঞ্ঞং;

আগম্মা’কা সাসনকিচ্চং কতকিচ্চো;

কোনাম’ঞ্ঞো সাসনকিচ্চম্হি পমজ্জেতি.

সুজনপ্পসাদসংৰেগত্থায কতে মহাৰংসে

ৰঙ্গেসু ¶ ৰঙ্গনগরে, ৰঙ্গরাজা অহু পুরে;

কালিঙ্গরঞ্ঞো ধীতা’সি, মহেসী তস্স রাজিনো.

সো রাজা দেৰিযা তস্সা, একং অলভি ধীতরং;

নেমিত্তাব্যাকরুং তস্সা, সংৰাসং মগরাজিনা.

অতীৰ রূপিনিং আসি, অতীৰ কামগিদ্ধিনী;

দেৰেন দেৰিযা’চাপি, লজ্জাযা’সি জগুচ্ছিতা.

একাকিনী সা নিক্খম্ম, সেরীচারসুখত্থিনী;

সত্থেন সহ অঞ্ঞাতা, অগা মগধগামিনা.

লাল়রট্ঠে অটৰিযা, সীহো সত্থমভিদ্ধৰি;

অঞ্ঞত্থ সেসা ধাৰিংসু, সীহগতদিসন্তুসা.

গণ্হিত্ৰা গোচরং সীহো, গচ্ছং দিস্ৰা তমা’রতো;

রত্তো উপাগলালেন্তো, লঙ্গুলং পত্তকণ্ণকো.

সা তং দিস্ৰা সরিত্ৰান, নেমিত্তৰচনং সুতং;

অভীতা তস্স অঙ্গানি, রঞ্জযন্তি পরামসি.

তস্সা ফস্সেনা’তি রত্তো, পিট্ঠিং আরোপিযা’সুতং;

সীহো সকং গুহং নেত্ৰা, তায সংৰাসমাচরি.

তেন সংৰাসমন্ৰায, কালেন যমকে দুৰে;

পুত্তঞ্চ ধীতরঞ্চাতি, রাজধীতা জনেসি সা.

পুত্তস্স হত্থপাদা’সুং, সীহাকারা ততো অকা;

নামেন সীহবাহুং তং, ধীতরং সীহসীৰলিং.

পুত্তো সোল়সৰস্সো সো, মাতরং পুচ্ছি সংসযং;

তুৰং পিতা চ নো অম্ম, কস্মা ৰিসদিসা ইতি.

সা সব্বমব্রৰী তস্স, কিংনযামা’তি সো’ব্রৰি;

গুহং থকেতিতাতো তে, পাসাণেনাতি সা’ব্রৰি.

মহাগুহায ¶ থকনং, খন্ধেনা’দায সো অকা;

একাহেনে’ৰ পঞ্ঞাস-যোজনানি গতাগতং.

গোচরায গহে সীহে, দক্খিণস্মিঞ্হি মাতরং;

ৰামে কণিট্ঠিং কত্ৰান, তযো সীঘং অপক্কমী.

নিৰাসেত্ৰান সাখং তে, পচ্চন্তং গামমাগমুং;

তত্থাসি রাজিধীতায, মাতুলস্স সুতো তদা.

সেনাপতি ৰঙ্গরঞ্ঞো, ঠিতো পচ্চন্ত গামকো;

নিসিন্নোৰটমূললেসো, কম্মন্তং সংৰিধাযকং.

দিস্ৰা তে পুচ্ছিতে’ৰোচুং, অটৰী ৰাসিনো মযং;

ইতি সো দাপযী তেসং, ৰত্থানি ধজিনী পতি.

তানা’হেসুং উল়ারানি, ভত্তং পণ্ণেসু দাপযি;

সোৰণ্ণভাজননা’সুং, তেসং পুঞ্ঞেন তানি চ.

তেন সো ৰিম্হিতো পুচ্ছি, কে তুম্হেতি চমূপতি;

তস্স সা জাতিগোত্তানি, রাজধীতা নিৰেদযি.

পিতুচ্ছা ধীতরং তং সো, আদায ধজিনী পতি;

গন্ত্ৰান ৰঙ্গনগরং, সংৰাসং তায কপ্পযি.

সীহো সীঘং গুহং গন্ত্ৰা, তে অদিস্ৰা তযো জনে;

অট্টিতো পুত্তসোকেন, ন চ খাদি ন চা’পিৰি.

দারকে তে গৰেসন্তো, অগা পচ্চন্তগামকে;

উব্বাসীযতি সো সো’ৰ, যংযং গামমুপেতি সো.

পচ্চন্তৰাসিনো গন্ত্ৰা, রঞ্ঞো তং পটিৰেদযুং;

সীহো পিল়েতি তে রট্ঠং, তং দেৰ পটিসেধয.

অলকং নিসেধকং তস্স, হত্থিক্খন্ধগতং পুরে;

আদেতু সীহদাযীতি, সহস্সং সো পচারযি.

তথেৰ দ্ৰেসহস্সানি, তীণিচা’পি নরিস্সরো;

দ্ৰীসু ৰারেসু ৰারেসি, মাতা সীহভুজং হিতং.

অগ্গহি ততিযে ৰারে, সীহবাহু অপুচ্ছিয;

মাতরং তিসহস্সং তং, ঘাতেতুং পিতরং সকং.

রঞ্ঞো কুমারং দস্সেসুং, তং রাজা ইধ মব্রৰি;

গহিতো যদি সীহো তে, দম্মি রট্ঠং তদেৰ তে.

সো ¶ তং গন্ত্ৰা গুহাদ্ৰারং, সীহং দিস্ৰাৰ আরকা;

এন্তং পুত্তসিনেহেন, ৰিজ্ঝিতুং তং সরং খিপি.

সরো নল়াতমাহচ্চ, মেত্তচিত্তেন থস্স তু;

কুমারপাদমূলে’ৰ, নিৰত্তো পতি ভূমিযং.

তথা’সি যাৰ ততিযং, ততো কুজ্ঝিমিগামিপো;

ততো খিত্তো সরোতস্স, কাযং নিব্বিজ্জ নিক্খমি.

সকেসরং সীহসীসং, আদায সপুরং অগা;

মতস্স ৰঙ্গরাজস্স, সত্তাহানি তদা অহু.

রঞ্ঞো অপুত্তকত্তা চ, পতীতা চস্স কম্মুনা;

সুত্ৰা চ রঞ্ঞো নত্তুত্তং, সঞ্জানিত্ৰা চ মাতরং.

অমচ্চা সন্নিপতিতা, অখিলা একমানসা;

সীহবাহু কুমারস্স, রাজা হোহীতি অব্রৰুং.

সো রজ্জং সম্পটিচ্ছিত্ৰা, দত্ৰা মাতু পতিস্স তং;

সীহসীৰলিমাদায, জাতভূমিং গতো সযং.

নগরং তত্থ মাপেসি, অহু সীহপুরন্তি তং;

অরঞ্ঞে যোজনসতে, গামে চাপি নিৰেসযি.

লাল়রট্ঠে পুরে তস্মিং, সীহবাহুনরাধিপো;

রজ্জং কারেসি কত্ৰান, মহেসিং সীহসীৰলিং.

মহেসী সোল়সক্খত্তুং, যমকে চ দুৰে দুৰে;

পুত্তে জনযি কালেসা, ৰিজযো নাম জেট্ঠকো.

সুমিত্তো নাম দুতিযো, সব্বে দ্ৰত্তিংস পুত্তকা;

কালেন ৰিজযং রাজা, উপরজ্জে’ভি সেচযি.

ৰিজযো ৰিসমাচারো, আসি তম্পরিসাপি চ;

সাহসানি অনেকানি, দুস্সহানি করিংসুতে.

কুদ্ধো মহাজনো রঞ্ঞো, তমত্থং পটিৰেদযি;

রাজা তে সঞ্ঞপেত্ৰান, পুত্তং ওৰদি সাধুকং.

সব্বং তথেৰ দুতিযং, অহোসি ততিযং পন;

কুদ্ধো মহাজনো আহ, পুত্তং ঘাতেহি তে ইতি.

রাজা’থৰিজযং তঞ্চ, পরিৰারঞ্চ তস্স তং;

সত্তসতানি পুরিসে, কারেত্ৰা অদ্ধমুণ্ণকে.

নাৰায ¶ পক্খিপাপেত্ৰা, ৰিস্সজ্জাপেসি সাগরে;

তথা তেসং ভরিযাযো, তথেৰ চ কুমারকে.

ৰিসুং ৰিসুং তে ৰিস্সট্ঠা, পুরিসিত্থিকুমারকা;

ৰিসুং ৰিসুং দীপকস্মিং, ওক্কমিংসু ৰসিংসু চ.

নগ্গদীপোতি ঞাযিত্থ, কুমারোক্কন্তদীপকো;

ভরিযোক্কন্তদীপো তু, মহিন্দদীপকো ইতি.

সুপ্পারকে পট্টনম্হি, ৰিজযো পন ওক্কমি;

পরিসা সাহসেনে’ত্থ, ভীতো নাৰং পুনা’রুহি.

ওতিণ্ণো থিরমতি তম্বপণ্ণিদীপে;

সুজনপসাদসংৰে গত্থাযকতে মহাৰংসে

সব্বলোকহীতং ¶ কত্ৰা, পত্ৰা সন্তিকরং পদং;

পরিনিব্বানমঞ্চম্হি, নিপন্নো লোকনাযকো.

দেৰতাসন্নিপাতম্হি, মহন্তম্হি মহামুনি;

সক্ক তত্রসমীপট্ঠং, অৰোচ ৰদতং ৰরো.

ৰিজযো লাল়াৰিসযা, সীহবাহুনরিন্দজো;

এসলঙ্কাধনুপত্তো, সত্তভচ্চসতানুগো.

পতিট্ঠহিস্সতি দেৰিন্দং, লংকাযং মম সাসনং;

তস্মা সপরিৰারং তং, রক্খলংকঞ্চ সাধুকং.

তথাগতস্স দেৰিন্দো, ৰচো সুত্ৰাৰ সাদরো;

দেৰস্সুপ্পলৰণ্ণস্স, লংকারক্খং সমপ্পযি.

সক্কেন ৰুত্তমত্তোসো, লঙ্কামাগম্মসজ্জুকং;

পরিব্বাজক ৰেসেন, রুক্খমূল মূপৰিসিং.

ন সন্তি মনুজা হেত্থ, ন চ হেস্সতি ৰো ভযং;

ইতি ৰত্ৰা কুণ্ডীকায, তে জলেন নিসিঞ্চিয.

সুত্তঞ্চ তেসং হত্থেসু, লগেত্ৰানভসা’গমা;

দস্সেসি সোণিরূপেন, পরিৰারিকযক্খিনী.

একো তং ৰারিযন্তোপি, রাজপুত্তেন অন্ৰগা;

গামম্হি ৰিজ্জমানম্হি, ভৰন্তি সুনখা ইতি.

তস্সা চ সামীনী তত্থ, কুৰেণীনাম যক্খিনী;

নিসীদি রুক্খমূলম্হি, কন্তন্তি তাপসী ৰিয.

দিস্ৰান ¶ সো পোক্খরণী, নিসিন্নং তঞ্চ তাপসিং;

তত্থ ন্হাত্ৰা পিৰিত্ৰা চ, আদায চ মুলালিযো.

ৰারিঞ্চ পোক্খরেহেৰ, ৰুট্ঠাসি সাতমব্রৰি;

ভক্খো’সি মম তিট্ঠাতি, অট্ঠা বদ্ধো ৰসো নরো.

পরিত্তসুত্ত তেজেন, ভক্খিতুং সা ন সক্কুণী;

যাচিযন্তোপি তং সুত্তং, না’দাযক্খিনিযা নরো.

তং গহেত্ৰা সুরুঙ্গাযং, রুদন্তং যক্খিনী খিপি;

এৰং একেকসো তত্থ, খিপী সত্তসতানিপি.

অনাযন্তেসু সব্বেসু, ৰিজযো ভযসংকিতো;

নন্তপঞ্চাযুধো গন্ত্ৰা, দিস্ৰা পোক্খরণিং সুভং.

অপস্স মুত্তিণ্ণপদং, পস্সং তঞ্চেৰ তাপসিং;

‘‘ইমায খলু ভচ্চা মে, গহিতানু’’তি চিন্তিয.

যক্খিনী তাৰ জানাতি, মম জাতিন্তি নিচ্ছিতো;

সঙ্ঘং সনামং সাৰেত্ৰা, ধনুং সন্ধাযু’ পাগতো.

যক্খিং আদায গীৰায, নারা চ ৰলযেন সো;

ৰামহত্থেন কেসেসু, গহেত্ৰা দক্খিণে ন তু.

উক্খিপিত্ৰা অসিংআহ, ‘‘ভচ্চে মে দেহি দাসিতং;

মারেমী’’তি ভযট্টাসা, জীৰিতং যাচি যক্খিনী.

জীৰিতং দেহি মে সামি, রজ্জং দজ্জামি তে অহং;

করিস্সমি’ত্তি কিচ্চঞ্চ, কিচ্চং অঞ্ঞং যথিচ্ছিতং.

অদুব্ভাত্থায সপথং, সো তং যক্খিং অকারযি;

‘‘আনেহি ভচ্চে সীঘ’’ন্তি, ৰুত্তমত্তাৰ সা’নযি.

ভচ্চা ¶ তে সাধযিত্ৰান, ভত্তানি ব্যঞ্জনানিচ;

রাজা পুত্তং ভোজযিত্ৰা, সব্বেচাপি অভুঞ্জিসুং.

দাপিতং ৰিজযেন’গ্গং, যক্খী ভুঞ্জিয পীণিতা;

সোল়সৰস্সিকং রূপং, মাপযিত্ৰা মনোহরং.

রাজপুত্ত মুপগঞ্ছি, সব্বাভরণভূসিতা;

মাপেসি রুক্খমূলস্মিং, সযনঞ্চ মহারহং.

সাণিযা সুপরিক্খিত্তং, ৰিতানসমলঙ্কতং;

তং দিস্ৰা রাজতনযো, পেক্খং অত্থমনাগতং.

কত্ৰান তাযনাৰাযং, নিপজ্জ সযনে সুখং;

সাণী পরিক্খিপিত্ৰান, সব্বে ভচ্চা নিপজ্জিসুং.

রত্তিং তূরিযসদ্দঞ্চ, সুত্ৰা গীতরৰঞ্চ সো;

অপুচ্ছি সহসেমানং, কিং সদ্দো ইতি যক্খিনিং.

রজ্জঞ্চ সামিনো দেয্যং, সব্বে যক্খে চ ঘাতিয;

মনুস্সা ৰাসকরণা, যক্খা মং ঘাতযন্তিহি.

ইতি চিন্তিয যক্খী সা, অব্রৰি রাজনন্দনং;

সীরীসৰত্থুনা মেতং, সামি যক্খপুরং ইধ.

তত্থ জেট্ঠস্স যক্খস্স, লংকানগরৰাসিনী;

কুমারিকা ইধা’নীতা, তস্সা মাতা চ আগতা.

আৰাহ মঙ্গলে তত্থ, ইধাপি উস্সৰে মহা;

ৰত্ততে তত্থ সদ্দোযং, মহাহেস সমাগমো.

যত্থ সদ্দং করিস্সাম, তেন সদ্দেন ঘাতয;

আযুধং মে’নুভাৰেন, তেসং কাযে পতিস্সতি.

তস্সা সুত্ৰা তথা কত্ৰা, সব্বে যক্খে অঘাতযি;

সযম্পি লদ্ধৰিজযো, যক্খরাজ পসাধনং.

পসাধনেহি সেসেহি, তংতং ভচ্চং পসাধযি;

কতিপহং ৰসিত্ৰে’ত্থ, তম্বপণ্ণিমুপাগমি.

মাপযিত্ৰা ¶ তম্পপণ্ণি-নগরং ৰিজযো তহিং;

ৰসী যক্খিনিযা সদ্ধিং, অমচ্চ পরিৰারিতো.

নাৰায ভূমিমোতিণ্ণা, ৰিজযপমুখা তদা;

কিলন্তা পাণিনাভূমিং, আলম্বিয নিসীদিসুং.

তম্বভূমিরজোফুট্ঠো, তম্বোপাণি যতো অহুং;

সো দেসোচেৰ দীপো চ, তেন তন্নামকো অহু.

সীহবাহু নরিন্দো সো, সীহমাদিন্নৰা ইতি;

সীহল়ো তেন সম্বন্ধা, এতে সব্বেপি সীহল়া.

তত্থ তত্থ চ গামে তে, তস্সা’মচ্চা নিৰেসযুং;

অনুরাধগামং তন্নামো, কদম্ব নদীযন্তিকে.

গম্ভীরনদীযা তীরে, উপতিস্সো পুরোহিতো;

উপতিস্সগামং মাপেসি, অনুরাধস্স উত্তরে.

অঞ্ঞে তযো অমচ্চা তে, মাপযিংসু ৰিসুং ৰিসুং;

উজ্জেনিং উরুৰেলঞ্চ, ৰিজিতং নগরং তথা.

নিৰাসেত্ৰা জনপদং, সব্বে’মচ্চা সমচ্চতং;

অৰোচুং রাজতনযা, সামি রজ্জেভিসেচয.

ইতি ৰুত্তো রাজপুত্তো, ন ইচ্ছি অভিসেচনং;

ৰিনা খত্তিযকঞ্ঞায, অভিসেকং মহেসিযা.

অথামচ্চা সামিনো হে, অভিসেক কতা দরা;

দুক্করেসুপি কিচ্চেসু, তদত্থভিরুতা তিগা.

পণ্ণাকারে মহাসারে, মণিমুত্তাদিকে বহূ;

গাহাপযিত্ৰা পাহেসুং, দক্খিণং মধুরং পুরং.

পণ্ডুরাজস্স ধীতত্থং, সামিনো সামিভত্তিনো;

অঞ্ঞেসং চাপি ধীতত্থং, অমচ্চানং জনস্স চ.

সীঘং নাৰায গন্ত্ৰান, দূতা তে মধুরং পুরং;

পণ্ণাকারে চ লেখঞ্চ, তস্স রঞ্ঞো অদস্সযুং.

ততো রাজাঅমচ্চেহি, মন্তযিত্ৰা সধীতরং;

পাহেতুকামো’মচ্চানং, অঞ্ঞেসং চাপি ধীতরো.

লদ্ধা ঊনসতং কঞ্ঞা, অথভেরিং চরাপযি;

লংকায ধীতুগমনং, ইচ্ছমানা নরা ইধ.

নিৰাসযিত্ৰা ¶ দিগুণং, ঘরদ্ৰারেসু ধীতরো;

ঠপেন্তু তেন লিঙ্গেন, আদীযিস্সামিতা ইতি.

এৰং লদ্ধা বহূকঞ্ঞা, তপ্পযিত্ৰান তং কুলং;

সম্পন্নসব্বালঙ্কারং, ধীতরং সম্পটিচ্ছদং.

সব্বা তা লদ্ধসক্কারা, কঞ্ঞাযো চ যথারহং;

রাজারহে চ হত্থস্স-রথপেস্সিয কারকে.

অট্ঠারসন্নং সেণীনং, সহস্সঞ্চ কুলানি সো;

লেখং দত্ৰান পেসেসি, ৰিজযস্স জিতা’রিনো.

সব্বোসো’তরী নাৰাহি, মহাতিত্থে মহাজনো;

তেনেৰ পট্টনং তঞ্হি, মহাতিত্থংতি ৰুচ্চতি.

ৰিজযস্স সুতোধীতা, তস্সা যক্খিনিযা অহু;

রাজকঞ্ঞাগমং সুত্ৰা, ৰিজযো আহ যক্খিনিং.

‘‘গচ্ছ দানি তুৰং ভোতি, ঠপেত্ৰা পুত্তকে দুৰে;

মনুস্সা অমনুস্সেহি, ভাযিন্তীহি সদা’’ ইতি.

সুত্ৰা তং যক্খভযতো, ভীতং তং আহ যক্খিনিং;

মা চিন্তযি সাহস্সেন, দাপযিস্সামি তে বলিং.

পুনপ্পুনং তং যাচিত্ৰা, উভো আদায পুত্তকে;

ভীতাপি সা অগতিযা, লংকাপুরমুপাগমি.

পুত্তে বিহি নিসীদেত্ৰা, সযং পাৰিসি তং পুরং;

সঞ্জানিত্ৰান তং যক্খিং, ভীতা চোরীতি সঞ্ঞিতো.

সংখুভিংসু পুরে যক্খা, একো সাহসিকো পন;

একপাণিপ্পহারেন, ৰিলযং নযি যক্খিনিং.

তস্সাতু মাতুলো যক্খো, নিক্খম্ম নগরা বহি;

দিস্ৰা তে দারকে পুচ্ছি, তুম্হে কস্স সুতা ইতি.

কুৰেণিযা’তি সুত্ৰা’হ, মাতা ৰো মারিতা ইধ;

তুম্হেপি দিস্ৰা মারেয্যুং, পলাযথ লহুং ইতি.

আগুং সুমনকূটং তে, পলাযিত্ৰা ততো লহুং;

ৰাসং কপ্পেসি জেট্ঠো সো, ৰুদ্ধো তায কণিট্ঠিযা.

পুত্তধীতাহি ¶ ৰড্ঢিত্ৰা, রাজানুঞ্ঞায তে ৰসুং;

তত্থেৰ মলযে এসো, পুলিন্দানঞ্হি সম্ভৰো.

পণ্ডুরাজস্স দূতা তে, পণ্ণাকারং সমপ্পযুং;

ৰিজযস্স কুমারস্স, রাজাধিকারিকা চ তা.

কত্ৰা সক্কারসম্মানং, দূতানং ৰিজযো পন;

অদা যাথারহং কঞ্ঞা, অমচ্চানং জনস্স চ.

যথা ৰিধি চ ৰিজযং, সব্বে মচ্চাসমাগতা;

রজ্জেসমভিসিঞ্চিংসু, করিংসুচ মহাছণং.

ততো সো ৰিজযো রাজা, পণ্ডুরাজস্স ধীতরং;

মহতা পরিহারেন, মহেসিত্তে’ভিসেচযি.

ধনান’দা অমচ্চানং, অদাসি সসুরস্সতু;

অনুৰস্সং সঙ্খমুত্তং, সতসহস্স দ্ৰযারহং.

হিত্ৰা পুব্বাচরিতং ৰিসমং সমেন;

রজ্জং অকারযি সমা খলু অট্ঠতিংসা’তি.

সুজনপসাদসংৰে গত্থায কতে মহাৰংসে

ৰিজযো ¶ সো মহারাজা, ৰস্সে অন্তিমকে ঠিতো;

ইতি চিন্তযি ‘‘ৰুদ্ধো’হং, ন চ ৰিজ্জতি মে সুতো.

কিচ্ছেন ৰাসিতং রট্ঠং, নস্সেয্য মম অচ্চযে;

আণাপেয্যং রজ্জহেতু-সুমিত্তং ভাতরং মম.

অথা’মচ্চেহি মন্তেত্ৰা, লেখং তত্থ ৰিসজ্জযি;

লেখং দত্ৰান ৰিজযো, ন চিরেন দিৰঙ্গতো.

তস্মিং মতে অমচ্চা তে, পেক্খন্তা খত্তিযাগমং;

উপতিস্সগামে ঠত্ৰান, রট্ঠং সমুনুসাসিসুং.

মতে ৰিজযরাজম্হি, খত্তিযাগমনা পুরা;

একং ৰস্সং অযং লংকা-দীপো আসি অরাজকো.

তস্মিং সীহপুরে তস্স, সীহবাহুস্স রাজিনো;

অচ্চযেন সুমিত্তো সো, রাজা তস্স সুতো অহু.

তস্স পুত্তা তযো আসুং, মদ্দরাজস্স ধীতুযা;

দূতা সীহপুরং গন্ত্ৰা, রঞ্ঞো লেখং অদংসু তে.

লেখং সুত্ৰান সো রাজা, পুত্তে আমন্তযী তযো;

অহং মহল্লকো তাতা, একো তুম্হেসু গচ্ছতু.

লংকং নেকগুণং কন্তং, মম ভাতুস্স সন্তকং;

তস্স’চ্চ যেন তত্থেৰ, রজ্জং কারেতু সোভনং.

কণিট্ঠকো পণ্ডুৰাসু-দেৰো রাজকুমারকো;

‘‘গমিস্সামীতি চিন্তেত্ৰা, ঞত্ৰা সোত্থি গতম্পি চ.

পিতরা সমনুঞ্ঞাতো, দ্ৰত্তিংসামচ্চ দারকে;

আদায আরুহী নাৰং, পরিব্বাজকলিঙ্গৰা.

মহাকন্দরনজ্জা তে, মুখদ্ৰারম্হি ওতরং;

তে পরিব্বাজকে দিস্ৰা, জনো সক্করি সাধুকং.

পুচ্ছিত্ৰা ¶ নগরং এত্থ, উপযন্তং কমেন তে;

উপতিস্স গামং সম্পত্তা, দেৰতা পরিপালিতা.

অমচ্চা’নুমতো’মচ্চো, পুচ্ছি নেমিত্তকা তহিং;

খত্তিযা’গমনং তস্স, সো ব্যাকাসি পরংপি চ.

সত্তমে দীৰসেযেৰ, আগমিস্সতি খত্তিযো;

বুদ্ধসাসন মেতস্স, ৰংসজো’ৰ ঠপেস্সতি.

সত্তমে দিৰসেযেৰ, তে পরিব্বাজকে তহিং;

পত্তে দিস্ৰান পুচ্ছিত্ৰা, অমচ্চা তে ৰিজানিয.

তং পণ্ণুৰাসুদেৰং তে, লংকারজ্জেন অপ্পযুং;

মহেসিযা অভাৰাসো, ন তাৰ অভিসেচযি.

অমিতোদনসক্কস্স, পণ্ডুসক্কো সুতো অহু;

ঞত্ৰা ৰিনাসং সক্যানং, সো আদায সকং জনং.

গন্ত্ৰা অঞ্ঞাপদেসেন, গঙ্গাপারং তহিং পুরং;

মাপেত্ৰা তত্থ কারেসি, রজ্জং তস্স সুতে লভি.

ধীতা কণিট্ঠিতা আসি, ভদ্দকচ্চান নামিকা;

সব্বলক্খণসম্পন্না, সুরূপা অভিপত্থিতা.

তদত্থং সত্তরাজানো, পণ্ণাকারে মহারহে;

পেসেসুং রাজিনো তস্স, ভীতো রাজূহি সো পন.

ঞত্ৰান সোত্থিগমনং, অভিসেকফলম্পি চ;

সহদ্ৰত্তিংস ইত্থীহি, নাৰং আরোপিযা’সুতং.

গঙ্গায খিপি গণ্হাতু, পহু মে ধীতরং ইতি;

গহেতুং তে ন সক্খিংসু, নাৰাসাপন সীঘগা.

দুতিযে দিৰসেযেৰ, গোণাগামক পট্টনং;

পত্তাপব্বজিতা কারা, সব্বা তা তত্থ ওতরুং.

পুচ্ছিত্ৰা নগরং এত্থ, তা কমেনোপযন্তিযো;

উপতিস্সগামং সম্পত্তা, দেৰতা পরিপালিতা.

নেমিত্তকস্স ৰচনং, সুত্ৰা তত্থা’গতা তু তা;

দিস্ৰা অমচ্চো পুচ্ছিত্ৰা, ঞত্ৰা রঞ্ঞো সমপ্পযি.

তং পণ্ডুৰাসুদেৰং তে, অমচ্চা সুদ্ধবুদ্ধিনো;

রজ্জে সমভিসিঞ্চিংসু, পুণ্ণসব্বমনোরথং.

সুজনপ্পসাদ সংৰেগত্থায কতে মহাৰংসে

মহেসী জনযী পুত্তে, দস একঞ্চ ধীতরং;

সব্বজেট্ঠো’ভযো নাম, চিত্তানাম কনিট্ঠিকা.

পস্সিত্ৰা তং ৰিযাকংসু, ব্রাহ্মণা মন্তপারগা;

‘‘রজ্জহেতু সুতো অস্সা, ঘাতযিস্সতি মাতুলে’’.

ঘাতেস্সামি কনিট্ঠিন্তি, নিচ্ছিতে ভাতরা’ভযো;

ৰারেসি কালে ৰাসেসুং, গেহং তং একথুণিকে.

রঞ্ঞো চ সিরিগব্ভেন, তস্স দ্ৰারমকারযুং;

অন্তো ঠপেসুং একঞ্চ, দাসিং নরসতং বহি.

রূপেনু’ম্মাদযী নরে, দিট্ঠমত্তাৰ সাযতো;

ততো উম্মাদচিত্তা’তি, নামং সোপপদং লভি.

সুত্ৰান লংকাগমনং, ভদ্দকচ্চানদেৰিযা;

মাতরা চোদিতা পুত্তা, ঠপেত্ৰে’কঞ্চ আগমুং.

দিস্ৰান তে পণ্ডুৰাসু-দেৰং লঙ্কিন্দমাগতা;

দিস্ৰান তং কনিট্ঠিঞ্চ, রোদিত্ৰা সহ তায চ.

রঞ্ঞা সুকতসক্কারা, রঞ্ঞো’নুঞ্ঞায চারিকং;

চরিংসু লংকাদীপম্হি, নিৰসুঞ্চ যথারুচিং.

রামেন ¶ ৰুসিতঠানং, রামগোণন্তি ৰুচ্চতি;

উরুৰেলা’নুরাধানং, নিৰাসা চ তথা তথা.

তথা ৰিজিতদীঘাযু-রোহণানং নিৰাসকা;

ৰিজিতগামো দীঘাযু-রোহণন্তি চ ৰুচ্চতি.

কারেসি অনুরাধো সো, ৰাপিং দক্খিণতো ততো;

কারাপেত্ৰা রাজগেহং, তত্থ ৰাসমকপ্পযী.

মহারাজা পণ্ডুৰাসু-দেৰো জট্ঠসুতং সকং;

অভযং উপরজ্জম্হি, কালে সমভিসেচযি.

দীঘাযুস্স কুমারস্স, তনযো দীঘগামণি;

সুত্ৰা উম্মাদচিত্তং তং, তস্সং জাতকুতূহলো.

গহেত্ৰা’পতিস্স গামং, তং অপস্সি মনুজাধিপং;

অদা সহোপরাজেন, রাজুপট্ঠানমস্সসো.

গৰক্খাভিমুখট্ঠানে, তং উপেচ্চ ঠিতং তুসা;

দিস্ৰান গামিণিং চিত্তা, রত্তচিত্তা’হ দাসিকং.

গৰক্খম্হি ডসাপেত্ৰা, রত্তিং কক্কটযন্তকং;

আরুয্হ ছিন্দযিত্ৰান, কৰাটং তেন পাৰিসি.

তায সদ্ধিং ৰসিত্ৰান, পচ্চূসেযেৰ নিক্খমি;

এৰং নিচ্চং ৰসী তত্থ, ছিদ্দাভাৰা অপাকটো.

সা তেন অগ্গহী গব্ভং, গব্ভে পরিণতে ততো;

মাতু আরোচযী দাসী, মাতা পুচ্ছিয ধীতরং.

রঞ্ঞো আরোচযী রাজা, অমন্তেত্ৰা সুতে’ব্রহ্মা;

পোসিযোসো’পি অম্হেহি, দেৰ তস্সেৰ তং ইতি.

পুত্তো চে মারযিস্সাম, ত’ন্তি তস্স অদংসু তং;

সা সূতিকালসম্পত্তে, সূতি গেহঞ্চ পাৰিসিং.

সঙ্কিত্ৰা ¶ গোপকং চিত্তং, কালৰেলঞ্চ দাসকং;

তস্মিং কম্মে নিস্সাযা’তি, গামণি পরিচারকে.

তে পটিঞ্ঞং অদেন্তে তে, রাজপুত্তা অঘাতযুং;

যক্খা হুত্ৰান রক্খিংসু, উভো গব্ভে কুমারকং.

অঞ্ঞং উপৰিজঞ্ঞং সা, সল্লক্খা পেসি দাসিযা;

চিত্তা সা জনযী পুত্তং, সা ইত্থি পন ধীতরং.

চিত্তং সহস্সং দাপেত্ৰা, তস্সা পুত্তং সকম্পি চ;

আণাপেত্ৰা ধীতরং তং, নিপজ্জাপেসি সন্তিকে.

ধীতা লদ্ধা’তি সুত্ৰান, তুট্ঠা রাজসুতা অহুং;

মাতা চ মাতুমাতা চ, উভো পন কুমারকং.

মাতামহস্স নামঞ্চ, জেট্ঠস্স মাতুলস্স চ;

একং কত্ৰা তমকরুং, পণ্ডুকাভযনামকং.

লংকা পালো পণ্ডুৰাসু-দেৰো রজ্জমকারযি;

তিংস ৰস্সম্হি জাতম্হি, মতো সো পণ্ডুকাভযে.

তস্মিং মতস্মিং মনুজাধিপস্মিং,

সুজনপ্পসাদ সংৰেগত্থায কতে মহাৰংসে

উম্মাদচিত্তাযাণত্তা ¶ , দাসী আদায দারকং;

সমুগ্গে পক্খিপিত্ৰান, দ্ৰারমণ্ডল কে অগা.

রাজপুত্তা চ মিগৰং, গতা তুম্বরকন্দরে;

দিস্ৰা দাসিং কুহিং যাসি, কিং মে কন্তি চ পুচ্ছিসুং.

দ্ৰারমণ্ডলকং যামি, ধীতুমেগুল়পূৰকং;

ইচ্চাহ ওরোপেহীতি, রাজপুত্তং কমব্রৰুং.

চিত্তো চ কালৰেলো চ, তস্সা’রক্খায নিগ্গতা;

মহন্তং সূকরৰেসং, তং খণংযেৰ দস্সযুং.

তে তং সমনুবন্ধিংসু, সাসমাদায তত্র’গা;

দারকঞ্চ সহস্সঞ্চ, আযুত্তস্স অদারহো.

তস্মিংযেৰ দিনে তস্স, ভরিযা জনযী সুতং;

যমকে জনযী পুত্তে, ভরিযং মে’তি পোসিতং.

সো সত্তৰস্সিকো চা’সি, তং ৰিজানিয মাতুলা;

গন্তুং সরসি কীল়ন্তে, দারকে চ পযোজযুং.

জলট্ঠং রুক্খসুসিরং, জলচ্ছাদিতছিদ্দকং;

নিমুজ্জমানো ছিদ্দেন, পৰিসিত্ৰা চিরট্ঠিতো.

ততো তথেৰ নিক্খম্ম, কুমারে সেসদারকে;

উপচ্চ পুচ্ছিযন্তোপি, ৰঞ্চেত’ঞ্ঞৰচোহি সো.

মনুস্সেহা’গতেহেসো, নিৰাসেত্ৰান ৰত্থকং;

কুমারো ৰারিমো গয্হ, সুসিরম্হি ঠিতো অহু.

ৰত্থকানি গণেত্ৰান, মারেত্ৰা সেসদারকে;

গন্ত্ৰা আরোচযুং সব্বে, দারকা মারিতা ইতি.

গতেসু ¶ তেসু সো গন্ত্ৰা, আযুত্তকঘরং সকং;

ৰসং অস্সাসিতো তেন, অহূ দ্ৰাদসৰস্সিকো.

পুন সুত্ৰান জীৰন্তং, কুমারং তস্স মাতুলং;

তত্থ গোপালকে সব্বে, মারেতুং সন্নিযোজযুং.

তস্মিং অহনি গোপালা, লদ্ধা একং চতুপ্পদং;

অগ্গিং আহরিতুং গামং, পেসেতুং তং কুমারকং.

সো গন্ত্ৰা ঘরমাযুত্ত-পুত্তকংযেৰ পেসযি;

পাদা রুজন্তি মে তেহি, অগ্গিং গোপালসন্তিকং.

তস্মিং খণে পেসিতা তে, পরিক্খিপিয মারযুং;

সব্বে গোপে মারযিত্ৰা, মাতুলানং নিৰেদযুং.

তথো সোল়সৰস্সং তং, ৰিজানিংসু চ মাতুলা;

মাতা সহস্সঞ্চা’দাসি, তস্সা রক্খঞ্চ আদিসি.

আযুত্তো মাতুসন্দেসং, সব্বং তস্স নিৰেদিয;

দত্ৰা দাসং সহস্সঞ্চ, পেসেসি পণ্ডুলন্তিকং.

পণ্ডুলব্রাহ্মণো নাম, ভোগৰা ৰেদপারগো;

দক্খিণস্মিং দিসাভাগে, ৰসী পণ্ডুলগামকে.

কুমারো তত্থ গন্ত্ৰান, পস্সি পণ্ডুলব্রাহ্মণং;

‘‘ত্ৰং পণ্ডুকাভযো তাত’’, ইতি পুচ্ছিয ব্যাকতে.

তস্স কত্ৰান সক্কারং, আহ রাজা ভৰিস্সসি;

সমসত্ততিৰস্সানি, রজ্জং ত্ৰং কারযিস্সসি.

সিপ্পং উগ্গণ্হ তাতাতি, সিপ্পুগ্গহমকারযী;

চন্দেন তস্স পুত্তেন, খিপ্পং সিপ্পং সমাপিতং.

অদা সতসহস্সং সো, যোধসঙ্গহকারণা;

যোধেসু সঙ্গহিতেসু, তেন পঞ্চসতেসু সো.

সিযুং যায গযিতানি, পণ্ণানি কনকানি তং;

মহেসিং কুরুচন্দঞ্চ, মম পুত্তং পুরোহিতং.

ইভি ¶ ৰত্ৰা ধনং দত্ৰা, সযোধং নিহরি ততো;

সো নামং সাৰযিত্ৰান, ততো নিক্খম্ম পুঞ্ঞৰা.

লদ্ধবলো নগরকে, কাসপব্বত সন্তিকে;

সত্তসতানি পুরিসে, সব্বেসং ভোজনানি চ.

ততো নরসহস্সেন, দ্ৰিসতেন কুমারকো;

গিরিকণ্ড পব্বতং নাম, অগমা পরিৰারিতো.

গিরিকণ্ডসিৰো নাম, পণ্ডুকাভয মাতুলো;

তং পণ্ডুৰাসুদেৰেন, দিন্নং ভুঞ্জতি দেসকং.

সো করিসসতং পক্কং, তদা লাৰেতি খত্তিযো;

তস্স ধীতা রূপৰতী, পালী নামা’সি খত্তিযা.

সা মহাপরিৰারেন, যানমারুয্হ সোভনং;

পিতুভত্তং গাহযিত্ৰা, লাৰকানঞ্চ গচ্ছতি.

কুমারস্স মনুস্সানং, দিস্ৰা তত্থ কুমারিকং;

আরোচেসুং কুমারস্স, কুমারো সহসা’গতো.

দ্ৰেধা তং পরিসং কত্ৰা, সতং যানমপেসযি;

তদন্তিকং সপরিসা, কত্থ যাসীতি পুচ্ছিতং.

তায ৰুত্তেতু সব্বস্মিং, তস্সংসারত্ত মানসো;

অত্তনো সংৰিভাগত্থং, ভন্তেনা’যাচি খত্তিযো.

সাসমোরুয্হ যানম্হা, অদা সোৰণ্ণপাতিযা;

ভত্তং নিগ্রোধ মূলস্মিং, রাজপুত্তস্স খত্তিযা.

গণ্হি নিগ্রোধপণ্ণানি, ভোজেতুং সেসকে জনে;

সোৰণ্ণভাজনানা’সুং, তানি পণ্ণানি তং খণে.

তানি দিস্ৰা রাজপুত্তো, সরিত্ৰা দিজভাসিতং;

মহেসিভাৰ যোগ্গামে, কঞ্ঞালদ্ধাতি তুস্সিসো.

সব্বে ভোজাপযী তেসা, তং ন খীযিত্থ ভোজনং;

একস্স পটিৰিসো’ৰ, গহিতো তত্থ দিস্সথ.

এৰং পুঞ্ঞগুণূপেতা, সুকুমারী কুমারিকা;

সুৰণ্ণপালি নামেন, ততোপ্পভুত আসি সা.

তং ¶ কুমার গহেত্ৰান, যানমারুয্হ খত্তিযো;

মহব্বল পরিব্যূল়্হো, অনুসংণী অপক্কমি.

তং সুত্ৰান পিতা তস্সা, নরে সব্বে অপেসযি;

তে গন্ত্ৰা কলহং কত্ৰা, তজ্জিতা তেহি আগমুং.

তং সুত্ৰা ভাতরো তস্সা, পঞ্চযুদ্ধাযু’পাগমুং.

সব্বে তে পণ্ডুলসুতো, চন্দোযেৰ অঘাতযি;

লোহিত ৰাহখণ্ডোতি, তেসং যুদ্ধমহী অহু.

তত্থ চত্তারি ৰস্সানি, ৰসি তং তত্থ মাতুলা;

সুত্ৰা ঠপেত্ৰা রাজানং, তং যুদ্ধত্থমুপাগমুং.

খন্ধাৰারং নিৰেসেত্ৰা, ধূমরক্খাগ সন্তিকে;

ভাগিনেয্যেন যুজ্ঝিংসু, ভাগিনেয্যো তু মাতুলে.

অনুবন্ধী ওরগঙ্গং, মলাপেত্ৰা নিৰত্তিয;

তেসঞ্চ খন্ধাৰারম্হি, দুৰে ৰস্সানি সো ৰসী.

গন্ত্ৰো’পতিস্সগামং তে, তমত্থং রাজিনো’ব্রৰুং;

রাজালেখং কুমারস্স, সরহস্সং সপাহিণি.

‘‘পুঞ্জস্সু পারগঙ্গং ত্ৰং, মা’গা ওরংততো’’ইতি;

তং সুত্ৰা তস্স কুজ্জিংসু, ভাতরো নৰ রাজিনো.

উপত্থম্ভো ত্ৰমেৰা’সি, চিরং তস্স ইদানি তু;

রট্ঠং দদাসি তস্মা ত্ৰং, মারেস্সামা’তি অব্রৰুং.

সো তেসং রজ্জমপ্পেসি, তে তিস্সং নাম ভাতরং;

সব্বেৰ সহিতা’কংসু, রজ্জস্স পরিনাযকং.

এসো ৰীসতিৰস্সানি, অভযো’ভয দাযকো;

তত্থো’পতিস্সগামম্হি, রাজা রজ্জমকারযি.

ৰসন্তি ¶ ধূমরক্খাগে, সরে তুম্বরিযঙ্গণে;

চরতে ৰল়ৰা রুপা, যক্খী চেতিযনামিকা.

একো দিস্ৰান সেনঙ্গং, উত্তপাদং মনোরমং;

আরোচেসি কুমারস্স, ৰল়ৰে’ত্তী’দিসী ইতি.

কুমারো রস্মিমাদায, গহেতুং তং উপাগমি;

পচ্ছতো অগতং দিস্ৰা, ভীতা তেজেন তস্সসা.

ধাৰি’নন্তরধাযিত্ৰা, ধাৰন্তি মনুবন্ধিসো;

ধাৰমানা সরং হং সা, সত্তক্খত্তুং পরিক্খিপি.

ওতরিত্ৰা মহাগঙ্গং, উত্তরিত্ৰা ততো পন;

ধুমরক্খং পব্বতং তং, সত্তক্খত্তুং পরিক্খিপি.

তং সরং পুন তিক্খত্তুং, পরিক্খিপি ততো পুন;

গঙ্গং কচ্ছকতিত্থেন, সমোতরি তহিং তু সো.

গহেসিতং ৰালধিস্মিং, তালপত্তঞ্চ তোযগং;

তস্স পুঞ্ঞানুভাৰেন, সো অহোসি মহা অসি.

উচ্চারেসি অসিং দজ্জং, ‘‘মারোমী’’তি তমাহ সা;

রজ্জং গহেত্ৰা তে দজ্জং, সামি মামং অমারযি.

গীৰায তং গহেত্ৰা সো, ৰিজ্ঝিত্ৰা অসিকোটিযা;

নাসায রজ্জুযা বন্ধি, সা অহোসি ৰসানুগা.

গন্ত্ৰা তং ধুমরক্খং সো, তমারুয্হ মহব্বলো;

তত্থ চত্তারি ৰস্সানি, ধূমরক্খন গে ৰসি.

ততো নিক্খম্ম সবলো, আগম্মা’রিট্ঠপব্বতং;

সুদ্ধিকালমপেক্খন্তো, তত্থ সত্তসমাৰসি.

দ্ৰে মাতুলে ঠপেত্ৰান, তস্স সেসট্ঠমাতুলা;

যুদ্ধসজ্জা অরিট্ঠং তং, উপসঙ্কম্ম পব্বতং.

খন্ধাৰারং নগরকে, নিৰেসেত্ৰা চমূপতিং;

দত্ৰা পরিক্খিপাপেসুং, সমন্তা’রিট্ঠপব্বতং.

যক্খিনিযা মন্তযিত্ৰা, তস্সা ৰচনযুত্তিযা;

দত্ৰা রাজপরিক্খারং, পণ্ণাকারা যুৰানি চ.

‘‘গণ্হাথ ¶ সব্বানে’তানি, খমাপেস্সামি ৰো অহং’’;

ইতি ৰত্ৰান পেসেসি, কুমারো পুরতো বলং.

গণ্হিস্সামি পৰিট্ঠন্তি, ৰিস্সট্ঠেসু তু তেসু সো;

আরুয্হ যক্খৰল়ৰং, মহাবলপুরক্খতো.

যুদ্ধায পাৰিসি যক্খী, মহারাৰ মরাপিসা;

অন্তো বহিবলঞ্চস্স, উক্কুট্ঠিং মহতিং অকা.

কুমারপুরিসা সব্বে, পরসেনা নরে বহূ;

ঘাতেত্ৰা মাতুলে চ’ত্থ, সীসরাসিং অকংসু তে.

সেনাপতি পালযিত্ৰা, গুম্বট্ঠানং সপাৰিসি;

সেনাপতি গুম্বকো’তি, তেন এস পৰুচ্চতি.

উপরিট্ঠমাতুলসিরং, সীসরাসিং সপস্সিয;

লাবুরাসী’ৰ ইচ্ছাহ, তেনা’সি লাবুগামকো.

এৰং ৰিজিতসঙ্গামো, ততো সো পণ্ডুকাভযো;

অয্যকস্সা’নুরাধস্স, ৰসনঠানমাগমি.

অত্তনো রাজগেহং সো, তস্স দত্ৰান অয্যকো;

অঞ্ঞত্থৰাসং কপ্পেসি, সো তু তস্মিং ঘরে ৰসি.

পুচ্ছাপেত্ৰান নেমিত্তং, ৰত্থুৰিজ্জা’ৰিদুং তথা;

নগরং পৰরং তস্মিং, গামেযেৰ অমাপযি.

নিৰাসত্তা’নুরাধানং, অনুরাধপুরং অহু;

নক্খত্তেনা’নুরাধেন, পতিট্ঠাপিত তায চ.

আণাপেত্ৰা মাতুলানং, ছত্তং জাতস্সরে ইধ;

ধোৰাপেত্ৰা ধারযিত্ৰা, তং সরেযেৰ ৰারিনা.

অত্তনো অভিসেকং সো, কারেসি পণ্ডুকাভযো;

সুৰণ্ণপালিং দেৰিং তং, মহেসিত্তে ভিসেচযি.

অদা চন্দকুমারস্স, পোরোহিচ্চং যথাৰিধি;

ঠানন্তরানি সেসানং, ভচ্চানঞ্চ যথারহং.

মাতুযা উপকারত্তা, অত্তনো চ মহীপতিং;

অঘাতযিত্ৰা জেট্ঠং তং, মাতুলং অভযং পন.

রত্তিরজ্জং অদা তস্স, অহু নগরগুত্তিকো;

তদুপাদায নগরে, অহূ নগরগুত্তিকো.

সস্সুরং ¶ তং অঘাতেত্ৰা, গিরিকণ্ডসিৰম্পি চ;

গিরিকণ্ণদেসং তস্সে’ৰ, মাতুলস্স অদাসি সো.

সরং তঞ্চ খণাপেত্ৰা, কারাপেসি বহূ দকং;

জযে জলস্স গাহেন, জযৰাপীতি অহুতং.

কালৰেলং নিৰাসেসি, যক্খংপুর পুরত্থিমে;

যক্খং তু চিত্তরাজং তং, হেট্ঠো অভযৰাপিযা.

পুব্বোপকারিং দাসিং তং, নিব্বত্তং যক্খযোনিযা;

পুরস্স দক্খিণদ্ৰারে, সো কতঞ্ঞূ নিৰাসযি.

অন্তো নরিন্দৰত্থুস্স, ৰল়ৰামুখযক্খিনিং;

নিৰাসেসি বলিং তেসং, অঞ্ঞেসঞ্চানুৰস্সকং.

দাপেসি ছণকালে তু, চিত্তরাজেন সো সহ;

সমাসনে নিসীদিত্ৰা, দিব্বমানুসনাটকং.

কারেন্তো’ভিরমি রাজা, রতিখিড্ডা সমপ্পিতো;

দ্ৰারগামে চ চতুরো, ভযৰাপিঞ্চ কারযি.

মহাসুসানঘাতনং, পচ্ছিমরাজিনিং তথা;

ৰেস্সৰণস্স নিগ্রোধং, ব্যাধিদেৰস্স তালকং.

যোনসভাগ ৰত্থুঞ্চ, মহেজ্জঘরমেৰ চ;

এতানি পচ্ছিমদ্ৰার-দিসাভাগে নিৰেসযি.

পঞ্চসতানি চণ্ডাল-পুরিসে পুরসোধকে;

দুৰেসতানি চণ্ডাল-পুরিসে ৰচ্চসোধকে.

দিযড্ঢসতচণ্ডালে, মতনীহারকে’পি চ;

সুসান গোপচণ্ডালে, তত্তকেযেৰ আদিসি.

তেসং গামং নিৰেসেসি, সুসানা পচ্ছিমুত্তরে;

যথা ৰিহিতকম্মানি, তানি নিচ্চং অকংসুতে.

তস্স চণ্ডালগামস্স, পুব্বুত্তরদিসায তু;

নীচসুসানকং নাম, চণ্ডালানমকারযি.

তস্সুত্তরে সুসানস্স, পাসাণপব্বতন্তরে;

আৰাসপালিঝাধানং, তদা আসি নিৰেসিতা.

তদুত্তরে ¶ দিসাভাগে, যাৰ গামণি ৰাপিযা;

তাপসানং অনেকেসং, অস্সমো আসি কারিতো.

তস্সেৰ চ সুসানস্স, পুরত্থিমদিসায তু;

জোতিযস্স নিগণ্ঠস্স, ঘরং কারেসি ভূপতি.

তস্মিংযেৰ দেসস্মিং, নিগণ্ঠো গিরিনামকো;

নানাপাসণ্ডকা চেৰ, ৰসিংসু সমণা বহূ.

তত্থেৰ চ দেৰকুলং, অকারেসি মহীপতি;

কুভণ্ডস্স নিগণ্ঠস্স, তংনামকমহোসিতং.

ততো তু পচ্ছিমে ভাগে, ঝাধপালিপুরত্থিমে;

মিচ্ছাদিট্ঠিকুলানং তু, ৰসী পঞ্চসতং তহিং.

পরং জোতিযগেহম্হা, ওরং গামণি ৰাপিযা;

সো পরিব্বাজকারামং, কারাপেসি তথেৰ চ.

আজীৰকানং গেহঞ্চ, ব্রাহ্মণৰট্টমেৰ চ;

সিৰিকা সোত্থিসালা চ, অকারেসি তহিং তহিং.

দসৰস্সাভিসেকো সো, গামসীমা নিৰেসযি;

লংকাদীপম্হি সকলে, লংকিন্দো পণ্ডুকাভযো.

সো কালৰেলচিত্তেহি, দিস্সমানেহি ভূপতি;

সহা’নু ভোসি সম্পতিং, যক্খভূতসহায ৰা.

পণ্ডুকাভযরঞ্ঞো চ, অভযস্স চ অন্তরে;

রাজসুঞ্ঞানি ৰস্সানি, অহেসুং দসসত্ত চ.

সো পণ্ডুকাভযমহীপতি সত্ততিংস–

ৰস্সো’ধিগম্ম ধিতিমা ধরণী পতিত্তং;

রম্মে অনুনমনুরাধপুরে সমিদ্ধে;

সুজনপ্পসাদসংৰেগত্থায কতে মহাৰংসে

তস্সচ্চযে ¶ তস্স সুতো, মুটসিৰো’তি ৰিস্সুতো;

সুৰণ্ণপালিযা পুত্তো, পত্তো রজ্জমনাকুলং.

মহামেঘৰনুয্যানং, নামনুগগুণোদিতং;

ফলপুপ্ফতরুপেতং, সো রাজা কারযি সুভং.

উয্যানঠানগ্গহণে, মহামেঘো অকালজো;

পাৰস্সিতেন উয্যানং, মহামেঘৰনং অহু.

সট্ঠিৰস্সানি মুটসিৰো, রাজা রাজ্জমকারযি;

অনুরাধে পুরৰরে, লংকা ভুৰদনে সুভে.

তস্স পুত্তা দসা’হেসুং, অঞ্ঞমঞ্ঞহিতেসিনো;

দুৰে ধীতা চা’নুকুলা, কুলানুচ্ছৰিকা অহূ.

দেৰানং পিযতিস্সোতি, ৰিস্সুতো দুতিযো সুতো;

তেসু ভাতূসু সব্বেসু, পুঞ্ঞাপঞ্ঞাধিকো অহু.

দেৰানং পিযতিস্সো সো, রাজা’সি পিতুঅচ্চযে;

তস্সা’ভিসেকেন সমং, বহূন’চ্ছরিযান’হুং.

লংকাদীপম্হি সকলে, নিধযো রতনানি চ;

অন্তোঠিতানি উগ্গন্ত্ৰা, পথৰীতলমারুহুং.

লংকাদীপসমীপম্হি, ভিন্ননাৰাগতানি চ;

তত্রজাতানি চ থলং, রতনানি সমারুহুং.

ছাতপব্বতপাদম্হি, তিস্সো চ ৰেল়ুযট্ঠিযো;

তাসু একালতাযট্ঠি, রজতা’ভা তহিং লতা;

সুৰণ্ণাৰণ্ণারুচিরা, দিস্সন্তেতা মনোরমা.

একা কুসুমা যট্ঠীতু, কুসুমানি তহিং পন;

নানানি নানাৰণ্ণানি, দিস্সন্তে’তি ফুটানি চ.

একাসকুণযট্ঠিতু ¶ , তহিং পক্খিমিগা বহূ;

নানা চ নানাৰণ্ণা চ, সজীৰা ৰিয দিস্সরে.

ককুধফলাপাকতিকা, ইচ্চেতা অট্ঠজাতিযো.

মুত্তাসমুদা উগ্গন্ত্ৰা, তীরে ৰট্টি ৰিয ঠিতা;

দেৰানং পিযতিস্সস্স, সব্বং পুঞ্ঞৰিজম্ভিতং.

ইন্দনীলং ৰেল়ুরিযং, লোহিতঙ্কমণিধি’মে;

রজতানি পনে’তানি, মুত্তা তা তাৰযট্ঠিযো.

সত্তহব্ভন্তরেযেৰ, রঞ্ঞো সন্তিকমাহরুং;

তানি দিস্ৰা পতীতো সো, রাজা ইতি ৰিচিন্তযি.

রতনানি অনগ্ঘানি, ধম্মাসোকো ইমানিমে;

সহাযো’রহতেনা’ঞ্ঞো, তস্স দস্সং ইমান’তো.

দেৰানং পিযতিস্সো চ, ধম্মাসোকো চ তে ইমে;

দ্ৰে অদিট্ঠসহাযাহি, চিরপ্পভুতি ভূপতি.

ভাগিনেয্যং মহারিট্ঠং, অমচ্চং পমুখং ততো;

দিজং অমচ্চং গণতং, রাজা তে চতুরো জনে.

দূতো কত্ৰান পাহেসি, বলোঘপরিৰারিতে;

গাহা পেত্ৰা অনগ্ঘানি, রতনানি ইমানি সো.

মণিজাতী চ তিস্সো তা, তিস্সো চ রথযট্ঠিযো;

সঙ্খঞ্চ দক্খিণাৰত্তং, মুত্তা জাতী চ অট্ঠ তা.

আরুয্হ জম্বুকোলম্হি, নাৰং সত্তদিনেন তে;

সুখেন তিত্থং লদ্ধান, সত্তাহেন ততো পুন.

পাটলিপুত্তং গন্ত্ৰান, ধম্মাসোকস্স রাজিনো;

অদংসু পণ্ণাকারেতে, দিস্ৰা তানি পসীদি সো.

রতনানি’দিসানেত্থ, নত্থি মে ইতি চিন্তিয;

অদা সেনাপতিট্ঠানং, তুট্ঠো’রিট্ঠস্স ভূপতি.

পোরোহিচ্চব্রাহ্মণস্স, দণ্ডনাযতং পন;

অদাসি তস্সা’মচ্চস্স, সেট্ঠিত্তং গণকস্স তু.

তেসং অনপ্পকে ভোগে, দত্ৰা ৰাসঘরানি চ;

মহামচ্চেহি মন্তেন্তো, পস্সিত্ৰা পটিপাভতং.

ৰালবীজনী ¶ মুণ্হিসং, খগ্গং ছত্তঞ্চ পাদুকং;

মোল়িং ৰতং সপামঙ্গং, ভিঙ্কারং হরিচন্দনং.

অধোৰিমং ৰত্থকোটিং, মহগ্ঘং হত্থপুঞ্ছনিং;

নাগা’হটং অঞ্জনঞ্চ, অরুণাভঞ্চ মত্তিকং.

অনোতত্তোদকঞ্চেৰ, গঙ্গাসলিলমেৰ চ;

সঙ্খঞ্চ নন্দিযাৰট্টং, ৰড্ঢমানং কুমারিকং.

হেমভোজনকণ্ডঞ্চ, সিৰিকঞ্চ মহারহং;

সুকাহটানং সালীনং, সট্ঠিৰাহসতানি চ;

অভিসেকো পকরণং, পরিৰারৰিসেসিতং.

দত্ৰা কালে ভহাযস্স, পণ্ণাকারে নরিস্সরো;

দূতে পাহেসিসদ্ধম্ম-পণ্ণাকারমিমম্পিচ.

অহং বুদ্ধঞ্চ ধম্মঞ্চ, সঙ্ঘঞ্চ সরণং গতো;

উপাসকত্তং দেসেসিং, সক্যপুত্তস্স সাসনে.

ত্ৰম্পিমানি রতনানি, উত্তমানি নরুত্তম;

চিত্তং পসাদযিত্ৰান, সদ্ধায সরণং ৰজ.

‘‘করোথ মে সহাযস্স, অভিসেকং পুনো’’ ইতি;

ৰত্ৰা সহযা’মচ্চেতে, সক্করিত্ৰা চ পেসযি.

পঞ্চমাসে ৰসিত্ৰান, তে মচ্চা’তিৰসক্কতা;

ৰেসাখসুক্খপক্খাদি-দিনে দূতা ৰিনিগ্গতা.

তামলিত্তিযমারুয্হ, নাৰং তেজম্বুকোলকে;

ওরুয্হ কূপং পস্সিংসু, পত্ৰা দ্ৰাদসিযং ইধ.

অদংসু পণ্ণাকারে তে, দূতা লংকাদীপস্সতে;

তেসং মহন্তং সক্কারং, লংকাপতি অকারযি.

তে মগ্গসিরমাসস্স, আদিচন্দোদযেজিনে;

অভিসিত্তঞ্চ লংকিন্দং, অমচ্চা সামিভত্তিনো.

ধম্মাসোকস্স ৰচনং, ৰত্ৰা সামি হিতেরতা;

পুনোপি অভিসিঞ্চিংসু, লংকাহিতসুখেরতং.

অত্তানং জনসুখদো’ভিসেচযী সোতি.

সুজনপ্পসাদসংৰেগত্থায কতে মহাৰংসে

থেরো মোগ্গলিপুত্তো সো, জিনসাসন জোতকো;

নিট্ঠাপেত্ৰান সংগীতিং, পেক্খমানো অনাগতং.

সাসনস্স পতিট্ঠানং, পচ্চন্তেসু অৰেক্খিয;

পেসেসি কত্তিকে মাসে, তেতে থেরে তহিং তহিং.

থেরং কস্মীরগন্ধারং, মজ্ঝন্তিকমপেসযি;

অপেসযী মহাদেৰ-ত্থেরং মহিসমণ্ডলং.

ৰনৰাসিং অপেসযি, থেরং রক্খিতনামকং;

তথা’পরন্তকং যোন-ধম্মরক্খিতনামকং.

মহারট্ঠং মহাধম্ম-রক্খিতত্থের নামকং;

মহারক্খিত থেরং তং, যোন লোকমপেসযি.

পেসেসি মজ্ঝিমং থেরং, হিমৰন্তপদেসকং;

সুৰণ্ণভূমিং থেরে দ্ৰে, সোণমুত্তর মেৰ চ.

মহামহিন্দত্থেরং তং, থের ইট্টিযমুত্তিযং;

সম্বলং ভদ্দসালঞ্চ, সকে সদ্ধিৰিহারিকে.

লংকাদীপে ¶ মনুঞ্ঞম্হি, মনুঞ্ঞং জিনসাসনং;

পতিট্ঠাপেথ তুম্হে’তি, পঞ্চ থেরে অপেসযি.

তদা কস্মীরগন্ধারে, পক্কং সস্সং মহিদ্ধিকো;

অরৰালো নাগরাজা, ৰস্সং করকসঞ্ঞিতং.

ৰস্সা পেত্ৰা সমুদ্দস্মিং, সব্বং খিপতিদারুণো;

তত্র মজ্ঝন্তিকত্থেরো, খিপ্পং গন্ত্ৰা ৰিহাযসা.

অরৰালদহেৰারি-পিট্ঠে চঙ্কমনাদিকে;

অকাসি দিস্ৰা তংনাগা, রুট্ঠারঞ্ঞো নিৰেদযুং.

নাগরাজা’থরুট্ঠো সো, ৰিৰিধা ভিসিকা’করি;

ৰাতা মহন্তা ৰাযন্তি, মেঘো গজ্জতি ৰস্সতি.

ফলন্ত্য’সনিযো ৰিজ্জু, নিচ্ছরন্তি ততো ততো;

মহিরুহা পব্বতানং, কূটানি পপতন্তি চ.

ৰিরূপরূপা নাগা চ, ভিংসাপেন্তি সমন্ততো;

সযং ধুপাযতি জলতি, অক্কোসন্তো অনেকধা.

সব্বং তং ইদ্ধিযা থেরো, পটিবাহিয ভিংসনং;

অৰোচ নাগরাজং তং, দস্সেন্তো বলমুত্তমং.

সদেৰ কোপি চে লোকো, আগন্ত্ৰা তাসযেয্য মং;

ন মে পটিবলো অস্স, জনেতুং ভযভেরৰং.

সচে’পি ত্ৰং মহিং সব্বং, সসমুদ্দং সপব্বতং;

উক্খিপিত্ৰা মহানাগ, খিপেয্যাসি মমো’পরি.

নেৰ মে সক্কুণেয্যাসি, জনেতুং ভযভেরৰং;

অঞ্ঞদত্থু তৰে‘ৰ’স্স, ৰিঘাতো উরগাধিপ.

তংসুত্ৰা নিম্মদস্স’স্স, থেরো ধম্মমদেসযি;

ততো সরণসীলেসু, নাগরাজা পতিট্ঠহি.

তথেৰ চতুরাসীতি-সহস্সানি ভুজঙ্গমা;

হিমৰন্তেৰ গন্ধব্বা, যক্খা কুম্ভণ্ডকা বহূ.

পণ্ডকো নাম যক্খো তু, সদ্ধিংহারিত যক্খিযা;

পঞ্চসতেহি পুত্তেহি, ফলং পাপুণি আদিকং.

‘‘মা’’দানি ¶ কোধং জনিযিত্থ, ইতো উদ্ধং যথাপুরে;

সসঘাতঞ্চ মা’কত্থ, সুখকামাহি পাণিনো.

করোথ মেত্তং সত্তেসু, ৰসন্তু মনুজা সুখং;

ইতি তেনা’নুসিট্ঠা তে, তথেৰ পটিপজ্জিসুং.

ততো রতনপল্লঙ্কে, থেরং সো উরগাধিপো;

নিসীদাপিয অট্ঠাসি, বীজমানো তদন্তিকে.

তদা কস্মীরগন্ধার-ৰাসিনো মনুজা’গতা;

নাগরাজস্স পূজত্থং, মন্ত্ৰা থেরং মহিদ্ধিকং.

থেরমেৰা’ভি ৰাদেত্ৰা, একমন্তং নিসীদিসুং;

তেসং ধম্মমদেসেসি, থেরো আসিৰিসোপমং.

অসীতিযা সহস্সানং, ধম্মাভিসমযো অহু;

সতসহস্স পুরিসা, পব্বজুং থেরসন্তিকে.

ততোপ্পভুপতি কস্মির-গন্ধারং তে ইদানিপি;

আসুং কাসাৰ পজ্জোতা, ৰত্থুত্তযপরাযনা.

গন্ত্ৰা মহাদেৰত্থেরো, দেসং মহিসমণ্ডলং;

সুত্তন্তং দেৰদূতং সো, কথেসি জনমজ্ঝগো.

চত্তালীস সহস্সানি, ধম্মচক্খুং ৰিসোধযুং;

চত্তালীস সহস্সানি, পব্বজিংসু তদন্তিকে.

গন্ত্ৰা’থ রক্খিতত্থেরো, ৰনৰাসিং নভে ঠিতো;

সংযুত্তমনমতগ্গং, কথেসি জনমজ্ঝগো.

সট্ঠি নরসহস্সানং, ধম্মাভিসমযো অহু;

সত্ততিংস সহস্সানি, পব্বজিংসু তদন্তিকে.

ৰিহারানং পঞ্চসতং, তস্মিংদেসে পতিট্ঠহি;

পতিট্ঠাপেসি তত্থেৰং, থেরো সো জিনসাসনং.

গন্ত্ৰা’পরন্তকং থেরো, যোনকো ধম্মরক্খিতো;

অগ্গিক্খন্ধোপমং সুত্তং, কথেত্ৰা জনমজ্ঝগো.

সত্ততিংস সহস্সানি, পাণে তত্থ সমাগতে;

ধম্মামতমপাযেসি, ধম্মা ধম্মেসু কোৰিদো.

পুরিসানঞ্চ সহস্সঞ্চ, ইত্থিযো চ ততো’ধিকা;

খত্তিযানং কুলাযেৰ, নিক্খমিত্ৰান পব্বজুং.

মহারট্ঠমিসী ¶ গন্ত্ৰা, সো মহাধম্মরক্খিতো;

মহানারদকস্সপৰ্হং, জাতকং কথযী তহিং.

মগ্গফলং পাপুণিংসু, চতুরাসীতি সহস্সকা;

তেরসন্তু সহস্সানি, পব্বজিংসু তদন্তিকে.

গন্ত্ৰান যোনৰিসযং, সো মহাধম্মরক্খিতো ইসি;

কাল়কারাম সুত্তন্তং, কথেসি জনমজ্ঝগো.

পাণসত সহস্সানি, সহস্সানি চ সত্ততি;

মগ্গফলং পাপুণিংসু, দস সহস্সানি পব্বজুং.

গন্ত্ৰা চতূহি থেরেহি, দেসেসি মজ্ঝিমো ইসি;

হিমৰন্তপদেসস্মিং, ধম্মচক্কপৰত্তনং.

মগ্গফলপাপুণিংসু, অসীতিপাণ কোটিযো;

ৰিসুং তে পঞ্চরট্ঠানি, পঞ্চথেরা পসাদযুং.

পুরিসসতসহস্সানি, একেকস্সেৰ সন্তিকে;

পব্বজিংসু পসাদেন, সম্মাসম্বুদ্ধ সাসনে.

সদ্ধিং উত্তরথেরেন, সোণত্থেরো মহিদ্ধিকো;

সুৰণ্ণভূমিং অগমা, তস্মিং তু সমযে পন.

জাতে জাতে রাজগেহে, দারকে রুদ্দরক্খসী;

সমুদ্দতো নিক্খমিত্ৰা, ভক্খিত্ৰা পন গচ্ছতি.

ইতি চিন্তিয মারেতুং, সা যুৰা উপসঙ্কমুং;

‘‘কিমেতন্তি’’চ পুচ্ছিত্ৰা, থেরং তে এৰ মাহুতে.

সমণা মযং হিমৰন্তা, ন রক্খসি সহাযকা;

রক্খসী সা সপরিসা, নিক্খন্তা হোতি সাগরা.

তং দিস্ৰান মহারাৰং, ৰিরৰিংসু মহাজনা;

দিগুণে রক্খসে থেরো, মাপযিত্ৰা ভযানকে.

তং ¶ রক্খসিং সপরিসং, পরিক্খিপি সমন্ততো;

ইদং ইমেহি উদ্ধন্তি, মন্ত্ৰা ভীতা পলাযিসা.

তস্স দেসস্স আরক্খং, ঠপেত্ৰান সমন্ততো;

তস্মিং সমাগমে থেরো, ব্রহ্মজালমদেসযি.

সরণেসু চ সীলেসু, অট্ঠংসু বহৰো জনা;

সট্ঠিযা তু সহস্সানং, ধম্মাভিসমযো অহু.

অড্ঢুড্ঢানি সহস্সানি, পব্বজুং কুলদারকা;

পব্বজিংসু দিযড্ঢন্তু, সহস্সং কুলধীতরো.

ততোপ্পভুতি সঞ্জাতে, রাজগেহে কুমারকে;

নামং করিংসু রাজানো, সোণুত্তর সনামকে.

সুজনপ্পসাদ সংৰেগত্থায কতে মহাৰংসে

নানাদেসপসাদো নাম দ্ৰাদসমো পরিচ্ছেদো.

মহামহিন্দত্থেরো সো, তদা দ্ৰাদসৰস্সিকো;

উপজ্ঝাযেন আণত্তো, সঙ্ঘেন চ মহামতী.

তদন্তরে ¶ ঞাতিগণং, দট্ঠুং কত্ৰান মানসং;

উপজ্ঝাযঞ্চ সঙ্ঘঞ্চ, ৰন্দিত্ৰা পুচ্ছ ভূপতিং.

আদায চতুরো থেরে, সঙ্ঘমিত্তায অত্রজং;

সুমনং সামণেরঞ্চ, ছল়াভিঞ্ঞং মহিদ্ধিকং.

ঞাতীনং সঙ্গহং কাতুং, অগমা দক্খিণাগিরিং;

ততো তত্থ চরন্তস্স, ছম্মাসা সমতিক্কমুং.

কমেন ৰেদিসগিরিং, নগরং মাতুদেৰিযা;

সম্পত্ৰা মতরং পস্সি, দেৰী দিস্ৰা পিযং সুতং.

ভোজযিত্ৰা সপরিসং, অত্তনাযেৰ কারিতং;

ৰিহারং চেতিযগিরিং, থেরং আরোপযী সুভং.

অৰন্তিরট্ঠং ভুঞ্জন্তো, পিতরা দিন্নমত্তনো;

সো অসোক কুমারো হি, উজ্জেনীগমনা পুরা.

ৰেদিসে নগরে ৰাসং, উপগন্ত্ৰা তহিং সুভং;

দেৰিন্নাম লভিত্ৰান, কুমারিং সেট্ঠিধীতরং.

সংৰাসং তায কপ্পেসি, গব্ভং গণ্হিয তেন সা;

উজ্জেনিযং কুমারং তং, মহিন্দং জনযী সুভং.

ৰস্সদ্ৰযমতিক্কম্ম, সঙ্ঘমিত্তঞ্চ ধীতরং;

তস্মিং কালে ৰসতি সা, ৰেদিসে নগরে তহিং.

থেরো তত্থ নিসীদিত্ৰা, কালঞ্ঞূ ইতি চিন্তযি;

পিতরা মে সমাণত্তং, অভিসেক মহুস্সৰং.

দেৰানংপিযতিস্সো সো, মহারাজা’নুভোতু চ;

ৰত্থুত্তযগুণে চাপি, সুত্ৰা জানাতু দূহতো.

আরোহতু মিস্সনগং, জেট্ঠমাসস্সু’পোসথে;

তদহেৰ গমিস্সাম, লংকাদীপৰরং মযং.

মহিন্দো উপসঙ্কম্ম, মহিন্দত্থের মুত্তমং;

যাহি লংকং পসাদেতুং, সম্বুদ্ধেনা’সি ব্যাকতো.

মযম্পি তত্থুপত্থম্ভা, ভৰিস্সামা’তি অব্রৰি;

দেৰিযা ভগিনী ধীতু-পুত্তো ভণ্ডুক নামকো.

থেরেন দেৰিযা ধম্মং, সুত্ৰা দেসিতমেৰ তু;

অনাগামিফলং পত্ৰা, ৰসি থেরস্স সন্তিকে.

তত্থ ¶ মাসং ৰসিত্ৰান, জেট্ঠমাসস্সু’ পোসথে;

থেরো চতূহি থেরেহি, সুমনেনা’থ ভণ্ডুনা.

সদ্ধিং তেন গহট্ঠেন, ন রতো ঞাতিহেতুনা;

তস্মা ৰিহারা আকাসং, উগ্গন্ত্ৰা সো মহিদ্ধিকো.

খণেনেৰ ইধাগম্ম, রম্মে মিস্সক পব্বতে;

অট্ঠাসি ৰিলুকূটম্হি, রুচিরম্বত্থলে ৰরে.

লংকাহিতায মুনিনা সযিতেন অন্তে;

লংকায সত্থুসদিসো হিতহেতু তস্সা;

লংকামরূহি মহিতো’ভিনিসীদি তত্তাতি.

সুজনপ্পসাদসংৰেগত্থায কতে মহাৰংসে

দেৰানংপিযতিস্সো সো, রাজা সলিলকীল়িতং;

দত্ৰা নগরৰাসীনং, মিগৰং কীল়িতুং অগা.

চত্তালীসসহস্সেহি, নরেহি পরিৰারিতো;

ধাৰন্তো পদসাযেৰ, অগমা মিস্সকং নগং.

থেরে দস্সেতুমিচ্ছন্তো, দেৰো তস্মিং মহীধরে;

গুম্ভংভক্খযমানো’ৰ, অট্ঠা গোকণ্ণরূপৰা.

রাজা দিস্ৰা ‘‘পমত্তং তং, ন যুত্তং ৰিজ্ঝিতুং’’ ইতি;

জিযা সদ্দমকাধাপি, গোকণ্ণো পব্বতন্তরং.

রাজা’নুধাৰি ¶ সোধিং, থেরানং সন্তিকং গতো;

থেরে দিট্ঠে নরিন্দেন, সযমন্তরধাযিসো.

থেরো ‘‘বহূসু দিট্ঠেসু, অতিভাযিস্সতী’’ তিসো;

অত্তানমেৰ দস্সেসি, পস্সিত্ৰা তং মহীপতিং.

ভীতো অট্ঠাসি তং থেরো, ‘‘এহি তিস্সাতি অব্রৰি;

তিস্সা’তি ৰচনেনেৰ, রাজা যক্খো’’তি চিন্তযী.

সমণা মযং মহারাজ, ধম্মরাজস্স সাৰকা;

তমেৰ অনুকম্পায, জম্বুদীপা ইধাগতা.

ইচ্চাহ থেরো তং সুত্ৰা, রাজা ৰীতভযো অহু;

সরিত্ৰা সখীসন্দেসং, ‘‘সমাণা’’ ইতি নিচ্ছিতো.

ধনুং সরঞ্চ নিক্খিপ্প, উপসঙ্কম্ম তং ইসিং;

সম্মোদমানো থেরেন, সো নিসীদি তদন্তিকে.

তদা তস্স মনুস্সা তে, আগম্ম পরিৰারযুং;

তদা সেসে ছ দস্সেসি, মহাথেরো সহাগতে.

তে দিস্ৰা অব্রৰী রাজা, ‘‘কদা’’ মে আগতা ইতি;

‘‘মযা সদ্ধিং’’তি থেরেন, ৰুত্তে পুচ্ছি ইদং পুন.

‘‘সন্তি ঈদিসকা অঞ্ঞে, জম্বুদীপে যতী’’ ইতি;

আহ ‘‘কাসাৰপজ্জো তো, জম্বুদীপো তহিং পন.

তেৰিজ্জা ইদ্ধিপ্পত্তা চ, চেতোপরিযকোৰিদা;

‘‘দিব্বসোতা’রহন্তো চ, বহূ বুদ্ধস্স সাৰকা’’.

পুচ্ছি ‘‘কেনাগতত্থা’’তি, ন থলেন ন ৰারিনা;

আগতম্হা’’তি ৰুত্তে সো, ৰিজানি নভসাগমং.

ৰীমংসংসো মহাপঞ্ঞো, কণ্হং পঞ্হমপুচ্ছিতং;

পুট্ঠো পুট্ঠো ৰিযাকাসি, তংতং পঞ্হং মহীপতি.

রুক্খোযং রাজকিন্নামো, অঞ্ঞো নাম অযং তরু;

ইমং মুঞ্চিয অত্থ’ম্বো, সন্তি অম্বতরূ বহুং.

ইমঞ্চ অম্বং তেচ’ম্বে, মুঞ্চিযত্থি মহীরুহা;

সন্তি ভন্তে বহু রুক্খা, অনম্বাপন তে তরু.

অঞ্ঞে ¶ অম্বে অনম্বে চ, মুঞ্চিয’ত্থি মহীরুহা;

অযং ভন্তে অম্বরুক্খো, পণ্ডিতো’সি নরিস্সর.

সন্তি তে ঞাতকা রাজ, সন্তি ভন্তে বহুজ্জনা;

সন্তি অঞ্ঞাতকা রাজ, সন্তি তে ঞাতিতো বহূ.

ঞাতকে তে চ অঞ্ঞে চ, মুঞ্চিয’ঞ্ঞোপি অত্থি নু;

‘‘ভন্তে’’ হমেৰ সাধু ত্ৰং, পণ্ডিতো’সি নরিস্সর.

পণ্ডিতো’তি ৰিদিত্ৰান, চূল়হত্থিপদোপমং;

সুত্তন্তং দেসযী থেরো, মহীপস্স মহামতী.

দেসনাপরিযোসানে, সদ্ধিং তেহি নরেহি সো;

চত্তালীসসহস্সেহি, সরণেসু পতিট্ঠহি.

ভত্তা’ভীহারং সাযন্হে, রঞ্ঞো অভিহরুং তদা;

‘‘ন ভুঞ্জিস্স’’ন্তি দানি মে, ইতি জনম্মি ভূপতি.

পুচ্ছিতুংযেৰ যুত্তন্তি, ভত্তেনা’পুচ্ছিতে ইসি;

ন ভুঞ্জাম ইদানী’তি, ৰুত্তে কালঞ্চ পুচ্ছিসো.

কালং ৰুত্তে’ব্রৰি এৰং, ‘‘গচ্ছাম নগরং’’ইতি;

তুৰং গচ্ছ মহারাজ, ৰসিস্সাম মযং ইধ.

এৰং সতি কুমারো’যং, অম্হেহি সহ গচ্ছতু;

অযঞ্হি আগতফলো, রাজ ৰিঞ্ঞাতসাসনো.

অপেক্খমানো পব্বজ্জং, ৰসত’ম্হাকমন্তিকে;

ইদানি পব্বজেস্সাম, ইমং ত্ৰং গচ্ছ ভূমিপ.

পাতো রথং পেসযিস্সং, তুম্হে তত্থ ঠিতা পুরং;

যাথা’তি থেরে ৰন্দিত্ৰা, ভণ্ডুংনেত্ৰ’ক মন্তকং.

পুচ্ছি থেরাধিকারংসো, রঞ্ঞো সব্বমভাসি সো;

থেরং ঞত্ৰা’তি তুট্ঠোসো, ‘‘লাভা মে’’ইতি চিন্তযি.

ভণ্ডুস্স গীহিভাৰেন, গতাসঙ্কো নরিস্সরো;

অঞ্ঞাসি নরভাৰং সো, ‘‘পব্বাজেম ইমং’’ ইতি.

থেরো তং গামসীমাযং, তস্মিংযেৰ খণে অকা;

ভণ্ডুকস্স কুমারস্স, পব্বজ্জমুপসম্পদং.

তস্মিংযেৰ ¶ খণে সো চ, অরহত্তমপাপুণি;

সুমনং সামণেরং তং, থেরো আমন্তযী ততো.

ধম্মসৰনকালং ত্ৰং, ঘোসেহী’’তি অপুচ্ছিসো;

সাৰেন্তো কিত্তকং ঠানং, ভন্তে ঘোসেম’হং ইতি.

‘‘সকলং তম্বপণ্ণী’’তি, ৰুত্তে থেরেন ইদ্ধিযা;

সাৰেন্তো সকলং লংকং, ধম্মকালমঘোসযী.

রাজা নাগচতুত্তেসো, সোণ্ণিপস্সে নিসীদিয;

ভুঞ্জন্তো তং রৰং সুত্ৰা, থেরন্তিক মপেসযি.

‘‘উপদ্দৰো নু অত্থী’’তি, আহ নত্থি উদ্দৰো;

সোতুং সম্বুদ্ধৰচনং, কালো ঘোসাপিতো ইতি.

সামণের রৰং সুত্ৰা, ভুম্মাদেৰা অঘোসযুং;

অনুক্কমেন সো সদ্দো, ব্রহ্মলোকং সমারুহি.

তেন ঘোসেন দেৰানং, সন্নিপাতো মহা অহু;

সমচিত্তসুত্তং দেসেসি, থেরো তস্মিং সমাগমে.

অসংখিযানং দেৰানং, ধম্মাভিসমযো অহু;

বহূ নাগা সুপণ্ণা চ, সরণেসু পতিট্ঠযুং.

যথেদং সারিপুত্তস্স, সুত্তং থেরস্স ভাসতো;

তথা মহিন্দত্থেরস্স, অহু দেৰসমাগমো.

রাজা পভা তে পাহেসি, রথং সারথি সো গতো;

‘‘আরোহথ রথং যাম, নগরং’’ ইতি তে’ব্রৰি.

না’রোহাম রথং গচ্ছ, গচ্ছাম তৰ পচ্ছতো;

ইতি ৰত্ৰান পেসেত্ৰা, সারথিং সুমনোরথং.

ৰেহাসমব্ভুগন্ত্ৰা, তে নগরস্স পুরত্থতো;

পঠমত্থূপট্ঠানম্হি, ওতরিংসু মহিদ্ধিকা.

থেরেহি পঠমোতিণ্ণ-ঠানম্হি কতচেতিযং;

অজ্জাপি ৰুচ্চতে তেন, এৰং পঠমচেতিযং.

রঞ্ঞা থেরগুণং সুত্ৰা, সব্বা অন্তেপুরিত্থিযো;

থেরদস্সনমিচ্ছিংসু, যস্মা তস্মামহীপতি.

অন্তো’ৰ ¶ রাজৰত্থুস্স, রম্মং কারেসি মণ্ডপং;

সেতেহি ৰত্থপুপ্ফেহি, ছাদিতং সমলঙ্কতং.

উচ্চসেয্যাৰিরমণং, সুতত্তা থেরসন্তিকে;

কঙ্খী ‘‘উচ্চাসনে থেরো, নিসীদিদেয্যনুনোতি চ.

তদন্তরে সারথি সো, থেরে দিস্ৰা তহিং ঠিতে;

চীৰরং পারুপন্তে তে, অতিৰিম্হিত মানসো.

গন্ত্ৰা রঞ্ঞো নিৰেদেসি, সুত্ৰা সব্বং মহীমতি;

‘‘নিসজ্জং ন করিস্সন্তি, পীঠকেসূ’’তি নিচ্ছিতো.

‘‘সুসাধু ভুম্মত্থরণং, পঞ্ঞাপেথা’’তি ভাসিয;

গন্ত্ৰা পটিপথং থেরে, সক্কচ্চং অভিৰাদিয.

মহামহিন্দত্থেরস্স, হত্থতো পত্তমাদিয;

সক্কারপূজাৰিধিনা, পুরং থেরং পৰেসযি.

দিস্ৰা আসনপঞ্ঞত্তিং, নেমিত্তা ব্যাকরুং ইতি;

‘‘গহিতা পথৰী’মেহি, দীপে হেস্সন্তি ইস্সরা.

নরিন্দো পূজযন্তো তে, থেরে অন্তেপুরং নযি;

তত্থ তে দুস্সপীঠেসুং, নিসীদিংসু যথারহং.

তে যাগুখজ্জভোজ্জেহি, সযং রাজা অতপ্পযি;

নিট্ঠিতে ভত্তকিচ্চম্হি, সযং উপনিসীদিয.

কনিট্ঠস্সোপরাজস্স, মহানাগস্স জাযিকং;

ৰসন্তিং রাজগেহে’ৰ, পক্কোসা পেসিচা’নুলং.

আগম্ম অনুলাদেৰী, পঞ্চ ইত্থিসতেহি সা;

থেরেৰন্দিয পূজেত্ৰা, একমন্তমুপাৰিসি.

পেতৰত্থুং ৰিমানঞ্চ, সচ্চসংযুত্তমেৰ চ;

দেসেসি থেরো তা ইত্থী, পঠমং ফলমজ্ঝগুং.

হিয্যো দিট্ঠমনুস্সেহি, সুত্ৰা থেরগুণে বহূ;

থেরদস্সনমিচ্ছন্তা, সমাগন্ত্ৰান নাগরা.

রাজদ্ৰারে মহাসদ্দং, অকরুং তং মহীপতি;

সুত্ৰা পুচ্ছিয জানিত্ৰা, আহ তেসং হিতত্থিকো.

সব্বেসং ¶ ইধ সম্বাধো, সালামঙ্গলহত্থিনো;

সোধেথ তত্থ দক্খন্তি, থেরে’মে নাগরা’ইতি.

সোধেত্ৰা হত্থিসালং তং, ৰিতানাদীহি সজ্জুকং;

অলঙ্করিত্ৰা সযনে, পঞ্ঞপেসুং যথারহং.

সথেরো তত্থ গন্ত্ৰান, মহাথেরো নিসীদিয;

সো দেৰদূতসুত্তন্তং, কথেসী কথিকো মহা.

তং সুত্ৰান পসীদিংসু, নগরা তে সমাগতা;

তেসু পাণসহস্সংতু, পঠমং ফলমজ্ঝগা.

লংকাদীপে সো সত্থুকপ্পো অকপ্পো;

লংকাধিট্ঠানে দ্ৰীসু ঠানেসু থেরো;

সদ্ধম্মো তারং কারযী দীপদীপোতি.

সুজনপ্পসাদসংৰেগত্থায কতে মহাৰংসে

হত্থিসালাপি সম্বাধা, ইতি তত্থ সমাগতা;

তে নন্দনৰনে রম্মে, দক্খিণদ্ৰারতো বহি.

রাজুয্যানে ঘনচ্ছাযে, সীতলে নীলসদ্দলে;

পঞ্ঞাপেসুং আসনানি, থেরানং সাদরা নরা.

নিক্খম্ম দক্খিণদ্ৰারা, থেরো তত্থ নিসীদি চ;

মহাকুলীনা চা’গম্ম, ইত্থিযো বহুকা তহিং.

থেরং ¶ উপনিসীদিংসু, উয্যানং পূরযন্তিযো;

বালপণ্ডিতসুত্তন্তং, তাসং থেরো অদেসযি.

সহস্সং ইত্থিযো তাসু, পঠমং ফলমজ্ঝগুং;

এৰং তত্থেৰ উয্যানে, সাযণ্হসমযো অহু.

ততো থেরা নিক্খমিংসু, ‘‘যাম তং পব্বতং’’ ইতি;

রঞ্ঞো পটিনিৰেদেসুং, সীঘং রাজা উপাগমি.

উপাগম্মা’ব্রৰী থেরং, ‘‘সাযং দূরো চ পব্বতো;

ইধেৰ নন্দনুয্যানে, নিৰাসো ফাসুকো ইতি.

পুরস্স অচ্চাসন্নত্তা, ‘‘অসারুপ্প’’ন্তি ভাসিতে;

‘‘মহামেঘৰনুয্যানং, নাতিদূরাতি সন্তিকে.

রম্মং ছাযূদকূপেতং, নিৰাসো তত্থ রোচতু;

নিৰত্তিতব্বং ভন্তে’’ন্তি, থেরো তত্থ নিৰত্তযি.

তস্মিং নিৰত্তঠানম্হি, কদম্বনদিযন্তিকে;

নিৰত্তচেতিযং নাম, কতং ৰুচ্চতি চেতিযং.

তং নন্দনা দক্খিণেন, নযং থেরং রথেসভো;

মহামেঘৰনুয্যানং, পাচিনদ্ৰারকং নযি.

তত্থ রাজঘরে রম্মে, মঞ্চপীঠানি সাধুকং;

সাধূতি সন্থরাপেত্ৰা, ‘‘ৰসতে’ত্ত সুখং’’ ইতি.

রাজা থেরে’ভিৰাদেত্ৰা, অমচ্চপরিৰারিতো;

পুরং পাৰিসি থেরা তু, তং রত্তিং তত্থ তে ৰসুং.

পভাতেযেৰ পুপ্ফানি, গাহেত্ৰা ধরণীপতি;

থেরে উপচ্চ ৰন্দিত্ৰা, পূজেত্ৰা কুসুমেহি চ.

পুচ্ছি কচ্চি সুখং ৰুট্ঠং, উয্যানং ফাসুকং ইতি;

সুখং ৰুত্থং মহারাজ, উয্যানং যতি ফাসুকং.

আরামো কপ্পতে ভন্তে, সঙ্ঘস্সা’’তি অপুচ্ছি সো;

‘‘কপ্পতে’’ইতি ৰত্ৰান, কপ্পাকপ্পেসু কোৰিদো.

থেরো ৰেল়ুৰনারাম, পটিগ্গহণমব্রৰি;

তং সুত্ৰা অভিহট্ঠো সো, তুট্ঠহট্ঠো মহাজনো.

থেরানং ¶ ৰন্দনত্থায, দেৰী তু অনুলাগতা;

সদ্ধিং পঞ্চসতিত্থীহি, দুতিযং ফলমজ্ঝগা.

সা পঞ্চসতা দেৰী, অনুলা’হ মহীপতি;

‘‘পব্বজিস্সাম দেৰা’’তি, রাজা থেরমৰোচ সো.

পব্বাজেথ ইমাযো’’তি, থেরো আহ মহীপতিং;

‘‘ন কপ্পতি মহারাজ, পব্বাজেতুং থিযো হিনো.

অত্থি পাটলিপুত্তস্মিং, ভিক্খুনী মে কনিট্ঠিকা;

সঙ্ঘমিত্তাতি নামেন, ৰিস্সুতা সা বহুস্সুতা.

নরিন্দসমণিন্দস্স, মহাবোধিদুমিন্দতো;

দক্খিণং সাখমাদায, তথা ভিক্খুনিযো ৰরা.

আগচ্ছতূ’তি পেসেহি, রঞ্ঞো নো পিতু সন্তিকং;

পব্বাজেস্সতি সা থেরী, আগতা ইত্থিযো ইমা.

‘‘সাধু’’তি ৰত্ৰা গণ্হিত্ৰা, রাজা ভিঙ্কারমুত্তমং;

‘‘মহামেঘৰনুয্যানং, দম্মি সঙ্ঘস্সি’মং ইতি.

মহিন্দথেরস্স করে, দক্খিণোদকমা’কিরী;

মহিযা পতিতে তোযে, অকম্পিত্থ মহা মহী.

‘‘তস্মা কম্পতি ভূমী’’তি, ভূমিপালো অপুচ্ছি তং;

পতিট্ঠিতত্তা দীপম্হি, সাসনস্সা’তি সো ব্রৰি.

থেরস্স উপনামেসি, জাতিপুপ্ফানি জাতিমা;

থেরো রাজঘরং গন্ত্ৰা, তস্স দক্খিণতো ঠিতো.

রুক্খম্হি পিচুলে অট্ঠ, পুপ্ফমুট্ঠী সমোকিরী;

তত্থাপি পুথৰী কম্পি, পুট্ঠো তস্সা’হ কারণং.

অহোসি তিণ্ণং বুদ্ধানং, কালে’পি ইধ মালকো;

নরিন্দসঙ্ঘকম্মত্থং, ভৰিস্সতি ইদানিপি.

রাজগেহা উত্তরতো, চারুপোক্খরণিং অগা;

তত্তকা নেৰ পুপ্ফানি, থেরো তত্থাপি ওকিরি.

তত্থা’পি পুথুৰী কম্পি, পুট্ঠো তস্সা’হ কারণং;

‘‘জন্তঘর পোক্খরণী, অযং হেস্সতি ভূমিপ’’.

তস্সেৰ ¶ রাজগেহস্স, গন্ত্ৰান দ্ৰারকোট্ঠকং;

তত্তকেহে’ৰ পুপ্ফেহি, তং ঠানং পূজযী ইসি.

তত্থাপি পুথুৰীকম্পি, হট্ঠলোমো অতীৰসো;

রাজা তং কারণং পুচ্ছি, থেরো তস্সা’হ কারণং.

ইমম্হি কপ্পে বুদ্ধানং, তিণ্ণন্নং বোধিরুক্খতো;

আনেত্ৰা দক্খিণাসাখা, রোপিতা ইধ ভূমিপ.

তথাগতস্স অম্হাকং, বোধিসাখাপি দক্খিণা;

ইমস্মিংযেৰ ঠানম্হি, পতিট্ঠিস্সতি ভূমিপ.

ততো’গমা মহাথেরো, মহামুচলমালকং;

তত্তকানেৰ পুপ্ফানি, তস্মিং ঠানে সমোকিরি.

তথাপি পুথৰী কম্পি, পুট্ঠো তস্সা’হ কারণং;

সঙ্ঘস্সু পোসথা গারং, ইধ হেস্সতি ভূমিপ.

পঞ্হম্বমালকট্ঠানং, ততো’গমা মহীপতি;

সুপক্কং অম্বপক্কঞ্চ, ৰণ্ণগন্ধরসুত্তমং.

মহন্তং উপনামেসি, রঞ্ঞো উয্যানপালকো;

তং থেরস্সুপনামেসি, রাজা অতিমনোরমং.

থেরো নিসীদনাকারং, দস্সেসি জনতা হিতো;

অত্থরাপেসি তত্থেৰ, রাজা অত্থরণং ৰরং.

অদা তত্থ নিসিন্নস্স, থেরস্সম্বং মহীপতি;

থেরো তং পরিভুঞ্জিত্ৰা, রোপনত্থায রাজিনো.

অম্বট্ঠিকং অদা রাজা, তং সযং তত্থ রোপযি;

হত্থে তস্সোপরিথেরো, ধোৰি তস্স ৰিরুল়্হিযা.

তং খণংযেৰ বীজম্হা, তম্হা নিক্খম্ম অঙ্কুরো;

কমেনা’তি মহারুক্খো, পত্তপক্কধরো অহু.

তং পাটিহারিযং দিস্ৰা, পরিসা সা সরাজিকা;

নমস্সমানা অট্ঠাসি, থেরে হত্থতনুরুহা.

থেরো ¶ তদা পুপ্ফমুট্ঠি, অট্ঠ তত্থ সমোকিরি;

তথাপি পুথৰীকম্পি, পুট্ঠো তস্সা’হ কারণং.

সঙ্ঘস্সপ্পন্নলাভানং, অনেকেসং নরাধিপ;

সঙ্গম্মভাজনঠানং, ইদং ঠানং ভৰিস্সতি.

ততো গন্ত্ৰা চতুস্সাল-ঠানং তত্থ সমোকিরি;

তত্তকানেৰ পুপ্ফানি, কম্পি তত্থাপি মেদিনী.

তং কম্পকারণং পুচ্ছি, রাজা থেরো ৰিযাকরি;

তিণ্ণন্নং পুব্ববুদ্ধানং, রাজুয্যান পটিগ্গহে.

দান ৰত্থুনা’হটানি, দীপৰাসীহি সব্বতো;

ইধ ঠপেত্ৰা ভোজেসুং, সসঙ্ঘে সুগতে তযো.

ইদানি পন এত্থেৰ, চতুস্সালা ভৰিস্সতি;

সঙ্ঘস্স ইধ ভত্তগ্গং, ভৰিস্সতি নরাধিপ.

মহথূপঠিতঠানং, ঠানাঠানৰিদূততো;

অগমাসি মহাথেরো, মহিন্দো দীপদীপনো.

তদা অন্তোপরিক্খেপে, রাজুয্যানস্স খুদ্দিকা;

ককুধৰ্হা অহু ৰাপী, তস্সো’পরি জলন্তিকে.

থূপারহং থলঠানং, অহু থেরে তহিং গতে;

রঞ্ঞো চম্পকপুপ্ফানং, পুটকান’ট্ঠ আহরুং.

তানি চম্পকপুপ্ফানি, রাজা থেরস্সু’পানযি;

থেরো চম্পকপুপ্ফেহি, তেহি পূজেসি তং ফলং.

তত্থাপি পুথৰী কম্পি, রাজা তং কম্পকারণং;

পুচ্ছি থেরো’নু পুব্বেন, আহতং কম্পকারণং.

ইদং ঠানং মহারাজ, চতুবুদ্ধ নিসেৰিতং;

থূপারহং হিতত্থায, সুখত্থায চ পাণিনং.

ইমম্হি কপ্পে পঠমং, ককুসন্ধো জিনো অহু;

সব্ব ধম্মৰিদূ সত্থা, সব্বলোকানুকম্পকো.

মহাতিত্থৰ্হযং আসি, মহামেঘৰনং ইদং;

নগরং অভযং নাম, পুরত্থিমদিসায’হু.

কদম্ব নদিযা পারে, তত্থ রাজা’ভযো অহু;

ওজদীপোতি নামেন, অযং দীপো তদাঅহু.

রক্খসেহি ¶ জনস্সে’ত্থ, রোগো পজ্জরকো অহু;

ককুসন্ধো দসবলো, দিস্ৰান তদুপদ্দৰং.

তং গন্ত্ৰা সত্তৰিনযং, পৰত্তিং সাসনস্স চ;

কাতুং ইমস্মিং দীপস্মিং, করুণা বলচোদিতো.

চত্তালীসসহস্সেহি, তাদীহি পরিৰারিতো;

নভসা’গম্ম অট্ঠাসি, দেৰকূটম্হি পব্বতে.

সম্বুদ্ধস্সা’নুভাৰেন, রোগো পজ্জরকো ইধ;

উপসন্তো মহারাজ, দীপম্হি সকলে তদা.

কত্থ ঠিতো অধিট্ঠাসি, নরিস্সর মুনিস্সরো;

সব্বে মং অজ্জ পস্সন্তু, ওজদীপম্হি মানুসা.

আগন্তুকামা সব্বেৰ, মনুস্সা মম সন্তিকং;

আগচ্ছন্তু অকিচ্ছেন, খিপ্পঞ্চাপি মহামুনি.

ওভাসযন্তং মুনিন্দং তং, ওভাসন্তঞ্চ পব্বতং;

রাজা চ নাগরা চেৰ, দিস্ৰা খিপ্পং উপাগমুং.

দেৰতা বলিদানত্থং, মনুস্সা চ তহিং গতা;

দেৰতা ইতি মঞ্ঞিংসু, সসঙ্ঘং লোকনাযকং.

রাজা সো মুনিরাজং তং, অতিহট্ঠো’ভি ৰাদিয;

নিমন্তযিত্ৰা ভত্তেন, আনেত্ৰা পুরসন্তি কং.

সসঙ্ঘস্স মুনিন্দস্স, নিসজ্জারহমুত্তমং;

রমণীযমিদং ঠান-মসম্বাধন্তি চিন্তিয.

কারিতে মণ্ডপে রম্মে, পল্লঙ্কেসু ৰরে সুতং;

নিসীদাপেসি সম্বুদ্ধং, সসঙ্ঘং ইধ ভূপতি.

নিসিন্নম্পি চ পস্সন্তা, সসঙ্ঘং লোকনাযকং;

দীপে মনুস্সা আনেসুং, পণ্ণাকারে সমন্ততো.

অত্তনো খজ্জভোজ্জেহি, তেহি তেহা’ভতেহি চ;

সন্তপ্পেসি সসঙ্ঘং তং, রাজা সো লোকনাযকং.

ইধেৰ পচ্ছাভত্তং তং, নিসিন্নস্স জিনস্স সো;

মহা তিত্থকমুয্যানং, রাজা’দা দক্খিণং ৰরং.

অকালপুপ্ফা ¶ লঙ্কারে, মহাতিত্থৰনে তদা;

পটিগ্গহিতে বুদ্ধেন, অকম্পিত্থ মহামহী.

এত্থেৰ সো নিসীদিত্ৰা, ধম্মং দেসেসি নাযকো;

চত্তালীস সহস্সানি, পত্তা মগ্গফলং নরা.

দিৰাৰিহারং কত্ৰান, মহাতিত্থৰনে জিনো;

সাযণ্হসমযে গন্ত্ৰা, বোধিঠানারহং মহি.

নিসিন্নো তত্থ অপ্পেত্ৰা, সমাধিং ৰুট্ঠিতো ততো;

ইতি চিন্তযি সম্বুদ্ধো, হিতত্থং দীপৰাসিনং.

আদায দক্খিণং সাখং, বোধিতো মে সিরীসতো;

আগচ্ছতু রূপনন্দা, ভিক্খুনী সহভিক্খুনী.

তস্স তং চিত্তমঞ্ঞায, সা থেরী তদনন্তরং;

গহেত্ৰা তত্থ রাজানং, উপসঙ্কম্ম তং তরুং.

লেখং দক্খিণসাখায, দাপেত্ৰান মহিদ্ধিকা;

মনোসিলায ছিন্নং তং, ঠিতং হেমকটাহকে.

ইদ্ধিযা বোধিমাদায, সপঞ্চসত ভিক্খুনী;

ইধা’নেত্ৰা মহারাজ, দেৰতা পরিৰারিতা.

সসুৰণ্ণ কটাহং তং, সম্বুদ্ধেন পসারিতে;

ঠপেসি দক্খিণে হত্থে, তং গহেত্ৰা তথাগতো.

পতিট্ঠাপেতুং পাদাসি, বোধিং রঞ্ঞো’ভযস্স তং;

মহাতিত্থম্হি উয্যানে, পতিট্ঠাপেসি ভূপতি.

জনস্স ধম্মং দেসেসি, ধম্মাভিসমযো তহিং;

ৰীসতিযা সহস্সানং, পাণানং আসি ভূমিপ.

ততোপি উত্তরং গন্ত্ৰা, থূপরামমহিং জিনো;

নিসিন্নো তত্থ অপ্পেত্ৰা, সমাধিং ৰুট্ঠিতো ততো.

ধম্মং ¶ দেসেসি সম্বুদ্ধো, পরিসায তহিংপন;

দসপাণ সহস্সানি, পত্তমগ্গফলান’হুং.

অত্তনো ধম্মকরণং, মনুস্সানং নমস্সিতুং;

দত্ৰা সপরিৰারং তং, ঠপেত্ৰা ইধ ভিক্খুনিং.

সহ ভিক্খুসহস্সেন, মহাদেৰঞ্চ সাৰকং;

ঠপেত্ৰা ইধ সম্বুদ্ধো, ততো পাচিনতো পন.

ঠিতো রতনমালম্হি, জনং সমনুসাসিয;

সসঙ্ঘো নভমুগ্গন্ত্ৰা, জম্বুদীপং জিনো অগা.

ইমম্হি কপ্পে দুতিযং, কোণাগমন নাযকো;

অহু সব্বৰিদূ সত্থা, সব্বলোকানুকম্পকো.

মহানামৰ্হযং আসি, মহামেঘৰনং ইদং;

ৰড্ঢমানপুরং নাম, দক্খিণায দিসায’হু.

সমিদ্ধো নাম নামেন, তত্থ রাজা তদা অহু;

নামেন ৰরদীপো’তি, অযং দীপো তদা অহু.

দুব্বুট্ঠুপদ্দৰো এত্থ, ৰরদীপে তদা অহু;

জিনো সকোণাগমনো, দিস্ৰান তদুপদ্দৰং.

তং হুত্ৰা সত্তৰিনযং, পৰত্তিং সাসনস্স চ;

কাতুং ইমস্মিং দীপস্মীং, করুণা বলচোদিতো.

তিংস ভিক্খুসহস্সেহি, তাদীহি পরিৰারিতো;

নভসা’গম্ম অট্ঠাসি, নভে সুমনকূটকে.

সম্বুদ্ধস্সা’নুভাৰেন, দুব্বুট্ঠি সা খযং গতা;

সাসনান্তরধানত্তা, সুৰুট্ঠি চ তদাঅহু.

তত্ত ঠিতো অধিট্ঠাসি, নরিস্সরমুনিস্সরো;

সব্বেৰ অজ্জ পস্সন্তু, ৰরদীপম্হি মানুসা.

আগন্তুকামা সব্বেৰ, মনুস্সা মম সন্তিকং;

আগচ্ছন্তু অকিচ্ছেন, খিপ্পঞ্চা’তি মহামুনি.

মহাসত্তং মুনিন্দং তং, ওভাসন্তঞ্চ পব্বতং;

রাজা চ নাগরা চেৰ, দিস্ৰা খিপ্পমুপাগমুং.

দেৰতাবলিদানত্থং ¶ , মনুস্সা চ তহিং গতা;

দেৰতা ইতি মঞ্ঞিংসু, সসঙ্ঘং লোকনাযকং.

রাজা সো মুনিরাজং তং, অতিহট্ঠো’ভিৰাদিয;

নিমন্তযিত্ৰা ভত্তেন, আনেত্ৰা পুরসন্তিকং.

সসঙ্ঘস্স মুনিন্দস্স, নিসজ্জারহ মুত্তমং;

রমণীযমিদং ঠানং, অসম্বাধন্তি চিন্তিয.

কারিতে মণ্ডপে রম্মে, পল্লঙ্কেসু ৰরেসু তং;

নিসীদাপযি সম্বুদ্ধং, সসঙ্ঘং ইধ ভূপতি.

নিসিন্নম্পি’ধ পস্সন্তা, সসঙ্ঘং লোকনাযকং;

দীপে মনুস্সা আনেসুং, পণ্ণাকারে সমন্ততো.

ইধেৰ পচ্ছাভত্তং তং, নিসিন্নস্স জিনস্স সো;

মহানামকমুয্যানং, রাজা’দা দক্খিণং ৰরং.

অকালপুপ্ফালঙ্কারে, মহানামৰনে তদা;

পটিগ্গহিতে বুদ্ধেন, অকম্পিত্থ মহামহী.

এত্থেৰ সো নিসীদিত্ৰা, ধম্মং দেসেসি নাযকো;

তদা তিংস সহস্সানি, পত্তা মগ্গফলং নরা.

দিৰাৰিহারং কত্ৰান, মহানামৰনে জিনো;

সাযণ্হসমযে গন্ত্ৰা, পুব্বধোধিঠিতং মহিং.

নিসিন্নো তত্থ অপ্পেত্ৰা, সমাধিং ৰুট্ঠিতো ততো;

ইতি চিন্তেসি সম্বুদ্ধো, হিতত্থং দীপৰাসিনং.

আদায দক্খিণং সাখং, মমোদুম্বরবোধিতো;

আযাতু কনকদত্তা, ভিক্খুনী সহভিক্খুনী.

তস্স তং চিত্তমঞ্ঞায, সা থেরী তদনন্তরং;

গহেত্ৰা তত্থ রাজানং, উপসঙ্কম্ম তং তরুং.

লেখং ¶ দক্খিণসাখায, দাপেত্ৰান মহিদ্ধিকা;

মনোসিলায ছিন্নং তং, ঠিতং হেমকটাহকে.

ইদ্ধিযা বোধিমাদায, সপঞ্চসহভিক্খুনী;

ইধাগন্ত্ৰা মহারাজ, দেৰতাপরিৰারিতা.

সসুৰণ্ণকটাহং তং, সম্বুদ্ধেন পসারিতে;

ঠপেসি দক্খিণে হত্থে, তং গহেত্ৰা তথাগতো.

পতিট্ঠাপেতুং রঞ্ঞো’দা, সমিদ্ধস্স সতং তহিং;

মহানামম্হি উয্যানে, পতিট্ঠাপেসি ভূপতি.

ততো গন্ত্ৰান সম্বুদ্ধো, সিরীসমালকুত্তরে;

জনস্স ধম্মং দেসেসি, নিসিন্নো নাগমালকে.

তং ধম্মদেসনং সুত্ৰা, ধম্মাভিসমযো তহিং;

ৰীসতিযা সহস্সানং, পাণানং আসি ভূমিপ.

পুব্ববুদ্ধনিসিন্নং তং, ঠানং গন্ত্ৰা পুরুত্তরং;

নিসিন্নো তত্থ অপ্পেত্ৰা, সমাধিং ৰুট্ঠিতো ততো.

ধম্মং দেসেসি সম্বুদ্ধো, পরিসায তহিং পন;

দসপাণসহস্সানি, পত্তা মগ্গফলং অহুং.

কাযবন্ধনধাতুং সো, মনুস্সেহি নমস্সিতুং;

দত্ৰা সপরিৰারং তং, ঠপেত্ৰা ইধ ভিক্খুনিং.

সহ ভিক্খুসহস্সেন, মহাসুম্মঞ্চ সাৰকং;

ঠপেত্ৰা ইধ সম্বুদ্ধো, ওরং রতনমালতো.

ঠপেত্ৰা সুদস্সনে মালে, জনং সমনুসাসিয;

সসঙ্ঘো নভমুগ্গম্ম, জম্বুদীপং জিনো অগা.

ইমম্হি কপ্পে ততিযং, কস্সপো গোত্ততো জিনো;

অহু সব্বৰিদূ সত্থা, সব্বলোকানুকম্পকো.

ৰিসালং নাম নগরং, পচ্ছিমায দিসায’হু.

জযন্তো নাম নামেন, তত্থ রাজা তদা অহু;

নামেন মণ্ডদীপোতি, অযং দীপো তদা অহু.

তদা ¶ জযন্তরঞ্ঞো চ, রঞ্ঞো কনিট্ঠভাতু চ;

যুদ্ধং উপট্ঠিতং আসি, ভিংসনং সত্তহিংসনং.

কস্সপো সো দসবলো, তেন যুদ্ধেন পাণিনং;

মহন্তং ব্যসনং দিস্ৰা, মহাকারুণিকো মুনি.

তং হন্ত্ৰা সত্তৰিনযং, পৰত্তিং সাসনস্স চ;

কাতুং ইমস্মিং দীপস্মিং, করুণাবলচোদিতো.

ৰীসতিযা সহস্সেহি, তাদীহি পরিৰারিতো;

নভসা’গম্ম অট্ঠাসি, সুভকূটম্হি পব্বতে.

তত্রঠিতো অধিট্ঠাসি, নরিস্সর মুনিস্সরো;

‘‘সব্বে মং অজ্জ পস্সন্তু, মণ্ডদীপম্হি মানুসা.

আগন্তুকামা সব্বেৰ, মানুসা মম সন্তিকং;

আগচ্ছন্তু অকিচ্ছেন, খিপ্পঞ্চা’তি মহামুনি.

ওভাসন্তং মুনিন্দং তং, ওভাসন্তঞ্চ পব্বকং;

রাজা চ নাগরা চেৰ, দিস্ৰা খিপ্পং উপাগমুং.

অত্তনো অত্তনো পত্ত-ৰিজযায জনা বহূ;

দেৰতা বলিদানত্থং, তং পব্বতমুপাগতা.

দেৰতা ইতি মঞ্ঞিংসু, সসঙ্ঘং লোকনাযকং;

রাজা চ সো কুমারো চ, যুদ্ধমুজ্ঝিংসু ৰিম্হিতা.

রাজা সো মুনিরাজং তং, অতিহট্ঠো’ভিৰাদিয;

নিমন্তযিত্ৰা ভত্তেন, আনেত্ৰা পুরসন্তিকং.

সসঙ্ঘস্স মুনিন্দস্স, নিসজ্জারহমুত্তমং;

রমণীযমিদং ঠান-মসম্বাধন্তি চিন্তিয.

কারিতে মণ্ডপে রম্মে, পল্লঙ্কেসু ৰরেসু তং;

নিসীদাপেসি সম্বুদ্ধং, সসঙ্ঘং ইধ ভূপতি.

নিসিন্নম্পিধ পস্সন্তা, সসঙ্ঘং লোকনাযকং;

দীপে মনুস্সা আনেসুং, পণ্ণাকারে সমন্ততো.

অত্তনো খজ্জভোজ্জেহি, তেহি তেহা’ভতেহি চ;

সসন্তপ্পেসি সসঙ্ঘং তং, রাজা সো লোকনাযকং.

ইধে’ৰ পচ্ছাভত্তং তং, নিসিন্নস্স জিনস্স সো;

মহাসাগরমুয্যানং, রাজা’দা দক্খিণং ৰরং.

অকালপুপ্ফলঙ্কারে ¶ , মহাসাগরকাননে;

পটিগ্গহিতে বুদ্ধেন, অকম্পিত্থ মহামহী.

এত্থেৰ সো নিসীদিত্ৰা, ধম্মং দেসেসি নাযকো;

তদা ৰীসং সহস্সানি, সোতাপত্তিফলং নরা.

দিৰা ৰিহারং কত্ৰান, মহাসাগরকাননে;

সাযন্হে সুগতো গন্ত্ৰা, পুব্ববোধিট্ঠিতং মহিং.

নিসিন্নো তত্থ অপ্পেত্ৰা, সমাধিং ৰুট্ঠিতো ততো;

ইতি চিন্তেসি সম্বুদ্ধো, হিতত্থং দীপৰাসিনং.

আদায দক্খিণং সাখং, মম নিগ্রোধবোধিতো;

সুধম্মা ভিক্খুনী এতু, ইদানি সহভিক্খুনী.

তস্স তং চিত্তমঞ্ঞায, সা থেরী তদনন্তরং;

গহেত্ৰা তত্থ রাজানং, উপসঙ্কম্ম তং তরুং.

লেখং দক্খিণসাখায, দাপেত্ৰান মহিদ্ধিকা;

মনোসিলায ছিন্নং তং, ঠিতং হেমকটাযকে.

ইদ্ধিযা বোধিমাদায, সপঞ্চসতভিক্খুনী;

ইধানেত্ৰা মহারাজ, দেৰতাপরিৰারিতা.

সসুৰণ্ণকটাহং তং, সম্বুদ্ধেন পসারিতে;

ঠপেসি দক্খিণে হত্থে, তং গহেত্ৰা তথাগতো.

পতিট্ঠাপেতুং রঞ্ঞো’দা, জযন্তস্স সতং তহিং;

মহাসাগরমুয্যানে, পতিট্ঠাপেসি ভূপতি.

ততো গন্ত্ৰান সম্বুদ্ধো, নাগমাল়কউত্তরে;

ধনস্স ধম্মং দেসেসি, নিসিন্নো’সোকমাল়কে.

তং ধম্মদেসনং সুত্ৰা, ধম্মাভিসমযো তহিং;

অহু পাণসহস্সানং, চতুন্নং মনুজাধিপ.

পুব্ববুদ্ধনিসিতং তং, ঠানং গন্ত্ৰা পুনুত্তরং;

নিসিন্নো তত্থ অপ্পেত্ৰা, সমাধিং ৰুট্ঠিতো ততো.

ধম্মং দেসেসি সম্বুদ্ধো, পরিসায তহিং পন;

দসপাণসহস্সানি, পত্তমগ্গফলান’হুং.

জলসাটিকধাতুং ¶ সো, মনস্সেহি নমস্সিতুং;

দত্ৰা সপরিৰারং তং; ঠপেত্ৰা ইধ ভিক্খুনী.

সহ ভিক্খুসহস্সেন, সব্বনন্দিঞ্চ সাৰকং;

ঠপেত্ৰা নদীতো ওরং, সো সুদস্সনমাল়তো.

সোমনস্সে মাল়কস্মিং, জনং সমনুসাসিয;

সঙ্ঘেন নভমুগ্গন্ত্ৰা, জম্বুদীপং জিনো অগা.

অহু ইমস্মিং কপ্পস্মিং, চতুত্থং গোতমো জিনো;

সব্বধম্মৰিদূ সত্থা, সব্বলোকানুকম্পকো.

পঠমং সো ইধাগন্ত্ৰা, যক্খনিদ্ধমনং অকা;

দুতিযং পুনরাগম্ম, নাগানং দমনং অকা.

কল্যাণিযং মণিঅক্খি নাগেনা’ভিনিমন্তিতো;

ততিযং পুনরাগম্ম, সসঙ্ঘো তত্থ ভুঞ্জিয.

পুব্ববোধিঠিতঠানং, থূপঠানমিদম্পি চ;

পরিভোগধাতুঠানঞ্চ, নিসজ্জাযো’পভুঞ্জিয.

পুব্ববুদ্ধঠিতট্ঠানা, ওরং গন্ত্ৰা মহামুনি;

লংকাদীপে লোকদীপো, মনুস্সাভাৰতো তদা.

দীপট্ঠং দেৰসঙ্ঘঞ্চ, নাগে সমনুসাসিয;

সসঙ্ঘো নভমুগ্গন্ত্ৰা, জম্বুদীপং জিনো অগা.

এৰং ঠানমিদং রাজ, চতুবুদ্ধনিসেৰিতং;

তস্মিং ঠানে মহারাজ, থূপো হেস্সতি’নাগতে.

বুদ্ধসারীরধাতূনং, দোণধাতুনিধানৰা;

ৰীসংহত্থসতং উচ্চো, হেমমালী’তি ৰিস্সুতো.

অহমেৰ কারেস্সামি, ইচ্ছাহ পুথৰিস্সরো;

ইধ অঞ্ঞানি কিচ্চানি, বহূনি তৰ ভূমিপ.

তানি কারেহি নত্তাতে, কারেস্সতি ইমং পন;

মহানাগস্স তে ভাতু, উপরাজস্স অত্রজো.

সো যট্ঠালযতিস্সোতি, রাজা হেস্সত’নাগতে;

রাজা গোট্ঠাভযো নাম, তস্স পুত্তো ভৰিস্সতি.

তস্স ¶ পুত্তো কাকৰণ্ণ-তিস্সো নাম ভৰিস্সতি;

তস্স রঞ্ঞো সুতো রাজ, মহারাজা ভৰিস্সতি.

দুট্ঠগামণিসদ্দেন, পাকটো’ভযনামকো;

কারেস্সতী’ধ থূপং সো, মহা তেজিদ্ধিৰিক্কমো.

ইচ্চাহ থেরো থেরস্স, ৰচনে নে’ত্থ ভূপতি;

উস্সাপেসি সিলাথম্ভং, তং পৰত্তিং লিখাপিয.

রম্মং মহামেঘৰনং, তিস্সারামং মহামহী;

মহামহিন্দথেরো সো, পটিগ্গয্হ মহিদ্ধিকো.

অকম্পো কম্পযিত্ৰান, মহিং ঠানেসু অট্ঠসু;

পিণ্ডায পৰিসিত্ৰান, নগরং সাগরূপমং.

রঞ্ঞো ঘরে ভত্তকিচ্চং, কত্ৰা নিক্খম্ম মন্দিরং;

নিসজ্জ নন্দনৰনে, অগ্গিক্খন্ধোপমং তহিং.

সুত্তং জনস্স দেসেত্ৰা, সহস্সং মানুসে তহিং;

পাপযিত্ৰা মগ্গফলং, মহামেঘৰনে ৰসি.

ততিযে দিৰসে থেরো, রাজগেহম্হি ভুঞ্জিয;

নিসজ্জ নন্দনৰনে, দেসিযা’সিৰিসোপমং.

পাপযিত্ৰা’ভিসমযং, সহস্সপুরিসে ততো;

তিস্সারামং অগা থেরো, রাজা চ সুতদেসনো.

থেরং উপনিসীদিত্ৰা, সো পুচ্ছি জিনসাসনং;

পতিট্ঠিতন্নু ভন্তে’তি, ন তাৰ মনুজা’ধিপ.

উপোসথাদিকম্মত্থং, জিনা’ণায জনাধিপ;

সীমায ইধ বদ্ধায, পতিট্ঠিস্সতি সাসনং.

ইচ্চ’ব্রৰি মহাথেরো, তং রাজা ইদমব্রৰি;

সম্বুদ্ধা’ণায অন্তোহং, ৰস্সিস্সামি জুতিন্ধর.

তস্মা কত্ৰা পুরং অন্তো-সীমং বন্ধথ সজ্জুকং;

ইচ্চা’ব্রৰি মহারাজা, থেরো তং ইধমব্রৰি.

এৰং সতি তুৰংযেৰ, পজান পুথৰিস্সর;

সীমায গমনট্ঠানং, বন্ধিস্সাম মযং হিতং.

‘‘সাধূ’’তি ¶ ৰত্ৰা ভূমিন্দো, দেৰিন্দো ৰিয নন্দনা;

মহামেঘৰনারম্মা, পাৰিসি মন্দিরং সকং.

চতুত্থে দিৰসে থেরো, রঞ্ঞো গেহম্হি ভুঞ্জিয;

নিসজ্জ নন্দনৰনে, দেসেস’নমনগ্গিযং.

পাযেত্ৰা’মতপানং সো, সহস্সপুরিসে তহিং;

মহামেঘৰনারামং, মহাথেরো উপাগমি.

পাতো ভেরিং চরাপেত্ৰা, মণ্ডযিত্ৰা পুরং ৰরং;

ৰিহারগামিমগ্গঞ্চ, ৰিহারঞ্চ সমন্ততো.

রথেসভো রথট্ঠো সো, সব্বালঙ্কারভূসিতো;

সহামচ্চো সহোরোধো, সযোগ্গবলৰাহনো.

তত্থ থেরে উপগন্ত্ৰা, ৰন্দিত্ৰা ৰন্দনারহে.

সহ থেরেহি গন্ত্ৰান, নদিযো’পরিতিত্থকং;

ততো কসন্তো অগমি, হেমনঙ্গলমাদিয.

মহাপদুমো কুঞ্জরো চ, উভো নাগা সুমঙ্গলা;

সুৰণ্ণনঙ্গলে যুত্তা, পঠমে কুন্তমাল়কে.

চতুরঙ্গমহা সেনো, সহ থেরেহি খত্তিযো;

গহেত্ৰা নঙ্গলং সীতং, দস্সযিত্ৰা অরিন্দমো.

সমলঙ্কতং পুণ্ণঘটং, নানারাগং ধজং সুভং;

পাতিং চন্দনচুণ্ণঞ্চ, সোণ্ণরজত দণ্ডকং.

আদাসং পুপ্ফভরিতং, সমুগ্গং কুসুমগ্ঘিযং;

তোরণকদলীছত্তাদিং, গহিতিত্থি পরিৰারিতো.

নানাতুরিয সঙ্ঘুট্ঠো, বলোঘ পরিৰারিতো;

থুতিমঙ্গলগীতেহি, পূরযন্তো চতুদ্দিসং.

সাধুকার নিনাদেতি, চেলুক্খেপসতেহি চ;

মহতা ছণপুজায, কসন্তো ভূমিপো অগা.

ৰিহারঞ্চ পুরঞ্চেৰ, কুরুমানো পদক্খিণং;

সীমায গমনঠানং, নদিং পত্ৰা সমাপযি.

কেনকেন নিমিত্তেন, সীমা এত্থ গতাতি চে;

এৰং সীমাগতঠানং, ইচ্ছমানা নিবোধথ.

নজ্জাপাসাণতিত্থম্হি ¶ , পাসাণে কুড্ডৰাটকং;

ততো কুম্বলৰাটং তং, মহানিপং ততো অগা.

ততো কুকুধপাল়িঙ্গো, মহাঅঙ্গণগো ততো;

ততো খুজ্জমধুলঞ্চ, মরুত্তপোক্খরণিংততো.

ৰিজযারাম উয্যানে, উত্তরদ্ৰারকোট্ঠ গো;

গজকুম্ভক পাসাণং, থুসৰট্ঠিক মজ্ঝগো.

অভযে বলাকপাসাণং, মহাসুসান মজ্ঝগো;

দীঘপাসাণকং গন্ত্ৰা, কম্মারদেৰ গামতো.

নিগ্রোধ মঙ্গণং গন্ত্ৰা, হিযগল্লসমীপকে;

দিযাৰসব্রাহ্মণস্স, দেৰোকং পুব্বদক্খিণং.

ততো মরুম্বতিত্তঙ্গো, ততো উদ্ধং নিদিং অগা;

পঠম চেতিয পাচিনে, দ্ৰে কদম্বা অজাযিসুং.

সেনিন্দগুত্তরজ্জম্হি, দমিল়া দকসুদ্ধিকা;

নদিং দূরন্তি বন্ধিত্ৰা, নগরাসন্নমকংসু তং.

জীৰ মানকদম্বঞ্চ, অন্তোসীমগতং অহু;

মতক দম্বতীরেন, সীমাউদ্দকদম্বগা.

সীহসিনা নতিত্থেন, উগ্গন্ত্ৰা তীরতো ৰজং;

পাসাণতিত্থং গন্ত্ৰান, নিমিত্তং ঘট্টযি ইসি.

নিমিত্তেতু পনে’তস্মিং, ঘট্টিতে দেৰমানুসা;

সাধুকারং পৰত্তেসুং, সাসনং সুপ্পতিট্ঠিতং.

রঞ্ঞো দিন্নায সীতায, নিমিত্তে পরিকিত্তযি;

দ্ৰত্তিংসমাল়কত্থঞ্চ, থূপারামত্থমেৰ চ.

নিমিত্তে কিত্তযিত্ৰান, মহাথেরো মহামতি;

সীমন্তরনিমিত্তে চ, কিত্তযিত্ৰা যথাৰিধিং.

অবন্ধী ¶ সব্বা সীমাযো, তস্মিংযেৰ দিনেৰসী;

মহামহী অকম্পিত্থ, সীমাবন্ধে সমাপিতে.

পঞ্চমে দিৰসে থেরো, রঞ্ঞো গেহম্হি ভুঞ্জিয;

নিসজ্জ নন্দনৰনে, সুত্তন্তং খজ্জনীযকং.

মহাজনস্স দেসেত্ৰা, সহস্সং মানুসে তহিং;

পাযেত্ৰা অমতং পানং, মহামেঘৰনে ৰসী.

ছট্ঠেপি দিৰসে থেরো, রঞ্ঞোগেহম্হি ভুঞ্জিয;

নিসজ্জ নন্দনৰনে, সুত্ত গোময পিণ্ডিকং.

দেসযিত্ৰা দেসনঞ্ঞূ, মহস্সংযেৰ মানুসে;

পাপযিত্ৰা’ভিসমযং, মহা মেঘৰনে ৰসী.

সত্তমেপি দিনে থেরো, রাজগেহম্হি ভুঞ্জিয;

নিসজ্জ নন্দনৰনে, ধম্মচক্কপ্পৰত্তনং.

সুত্তন্তং দেসযিত্ৰান, সহস্সংযেৰ মানুসে;

পাপযিত্ৰা’ভিসমযং, মহা মেঘৰনে ৰসি.

এৰঞ্হি অট্ঠ নৰম-সহস্সানি জুতিন্ধরো;

কারযিত্ৰা’ভিসমযং, দিৰসেহেৰ সত্ততি.

তং মহানন্দনৰনং, ৰুচ্চতে তেন তাদিনা;

সাসনজোতিতট্ঠান-মীতি জোতিৰনং ইতি.

কাল়পাসাদ পরিৰেণ-মীতি সঙ্খমুপাগতং.

ততো মহাবোধিঘরং, লোহপাসাদ মেৰ চ;

সলাকগ্গঞ্চ কারেসি, ভত্তসালঞ্চ সাধুকং.

বহূনি ¶ পরিৰেণানি, সাধু পোক্খরণীপি চ;

রত্তিঠান দিৰাঠান-পভুতীনি চ কারযি.

তস্স নহানপাপস্স, ন্হানপোক্খরণীতটে;

সুনহাতপরিৰেণন্তি, পরিৰেণং পৰুচ্চতি.

তস্স চঙ্কমিতঠানে, দীপ দীপস্স সাধুনো;

ৰুচ্চতে পরিৰেণং তং, দীঘচঙ্কমনং ইতি.

অগ্গফলসমাপত্তিং, সমাপজ্জ যহিং তুসো;

ফলগ্গ পরিৰেণন্তি, এতং তেন পৰুচ্চতি.

অপস্সিয অপস্সেনং, থেরো তত্থ নিসীদিসো;

থেরা পস্সয পরিৰেণং, এতং তেন পৰুচ্চতি.

বহূ মরুগণা যত্থ, উপাসিংসু উপচ্চতং;

তেনেৰ তং মরুগণ-পরিৰেণন্তি ৰুচ্চতি.

সেনাপতিতস্স রঞ্ঞো, থেরস্স দীঘসন্দকো;

কারেসি চূল়পাসাদং, মহাথম্ভেহি অট্ঠহি.

দীঘসন্দ সেনাপতি-পরিৰেণন্তি তং তহিং;

ৰুচ্চতে পরিৰেণং তং, পমুখং পমুখাকরং.

আগম্মা মলমতিমেত্থকারযিত্থাতি.

সুজনপ্পসাদ সংৰেগত্থায কতে মহাৰংসে

পুরে ¶ চরিত্ৰা পিণ্ডায, করিত্ৰা জনসঙ্গহং;

রাজগেহম্হি ভুঞ্জন্তো, কারেন্তো রাজসঙ্গহং.

ছব্বসদিৰসে থেরো, মহামেঘৰনে ৰসী;

আসল়্হসুক্কপক্খস্স, তেরসে দিৰসে পন.

রাজগেহম্হি ভুঞ্জিত্ৰা, মহারঞ্ঞো মহামতি;

মহা’প্পমাদসুত্তন্তং, দেসযিত্ৰা ততো চ সো.

ৰিহারকরণং ইচ্ছং, তত্থ চেতিযপব্বতে;

নিক্খম্ম পুরিমদ্ৰারা, অগা চেতিযপব্বতং.

থেরং তত্থ গতং সুত্ৰা, রথং আরুয্হ ভূপতি;

দেৰিযো দ্ৰে চ আদায, থেরস্সানুপদং অকা.

থেরা নাগচতুক্কম্হি, নহাত্ৰা রহদে তহিং;

পব্বতারোহণত্থায, অট্ঠংসু পটিপাটিযা.

রাজা রথা তদো’রুয্হ, সব্বে থেরে’ভিৰাদযি;

উণ্হে কিলন্তে কিংরাজ, আগতোসী’তি অহুতে.

তুম্হাকং গমনাসঙ্কী, আগতোম্হী’তি ভাসিতে;

ইধেৰ ৰস্সং ৰসিতুং, আগতম্হা’তি ভাসিয.

তস্সূপনাযিকং থেরো, খন্ধকং খন্ধকোৰিদো;

কথেসি রঞ্ঞো তং সুত্ৰা, ভাগিনেয্যো চ রাজিনো.

মহারিট্ঠো মহামচ্চো, পঞ্চপঞ্ঞাসভাতুহি;

সদ্ধিং জেট্ঠকনিট্ঠেহি, রাজানমভিতো ঠিতো.

যাচিত্ৰা তদহু চেৰ, পব্বজুং থেরসন্তিকে;

পত্তারহত্তং সব্বেপি, তে খুরগ্গে মহামতী.

কন্তকচেতিযঠানে, পরিতো তদহেৰ সো;

কম্মানি আরভাপেত্ৰা, লেণানি অট্ঠসট্ঠিযো.

অগমাসি ¶ পুরং রাজা, থেরা তত্থেৰ তে ৰসুং;

কালে পিণ্ডায নগরং, পৰিসন্তা’নুকম্পকা.

নিট্ঠিতে লেণকম্মম্হি, আসল়্হিপুণ্ণমাসিযং;

গন্ত্ৰা অদাসি থেরানং, রাজা ৰিহারদক্খিণং.

দ্ৰত্তিংসমাল়কানঞ্চ, ৰিহারস্স চ তস্স খো;

সীমং সীমাতিগো থেরো, বন্ধিত্ৰা তদহেৰ সো.

তেসং পব্বজ্জাপেক্খানং, অকাসি উপসম্পদং;

সব্বেসং সব্বপঠমং, বদ্ধে তুম্বরুমাল়কে.

এতে দ্ৰাসট্ঠি অরহন্তো, সব্বে চেতিযপব্বতে;

তত্থ ৰস্সং উপগন্ত্ৰা, অকংসু রাজসঙ্গহং.

সুজনপসাদসংৰেগত্থায কতে মহাৰংসে

চেতিযপব্বতৰিহারপটিগ্গহকো নাম

ৰুত্থৰস্সো পৰারেত্ৰা, কত্তিকপুণ্ণমাসিযং;

অৰোচে’দং মহারাজং, মহাথেরো মহামতি.

চিরদিট্ঠো হি সম্বুদ্ধো, সত্থা নো মনুজাধিপ;

অনাথৰাসং অৰসিম্হ, নত্থি নো পূজিযং ইধ.

‘‘ভাসিত্থ ননু ভন্তেমে, সম্বুদ্ধো নিব্বুতো’’ ইতি;

আহ ধাতূসু দিট্ঠেসু, দিট্ঠো হোতি জিনো’’ ইতি.

ৰিদিতো ¶ ৰো অধিপ্পাযো, থূপস্স কারণে মযা;

কারেস্সামি অহং থূপং, তুম্হে জানাথ ধাতুযো.

মন্তেহি সুমনেনাতি, থেরো রাজানমব্রৰি;

রাজা’হ সামণেরং তং, কুতো লচ্ছাম ধাতুযো.

ৰিভূসযিত্ৰা নগরং, মগ্গঞ্চ মনুজাধিপ;

উপোসথী সপরিসো, হত্থিং আরুয্হ মঙ্গলং.

সেতচ্ছত্তং ধারযন্তো, তালাৰচরসংহিতো;

মহানাগৰনুয্যানং, সাযন্হসমযে ৰজ.

ধাতুভেদঞ্ঞুনো রাজ, ধাতুযো তত্থ লচ্ছসি;

ইচ্ছাহ সামণেরো সো, সুমনো তং সুমানসং.

থেরো’থ রাজকুলতো, গন্ত্ৰা চেতিযপব্বতং;

আমন্তিয সামণেরং, সুমনং সুমনো গতিং.

এহি ত্ৰং ভদ্র সুমন, গন্ত্ৰা পুপ্ফপুরং ৰরং;

অয্যকং তে মহারাজং, এৰং নো ৰচনং ৰদ.

সহাযো তে মহারাজ, মহারাজা মরুপ্পিযো;

পসন্নো বুদ্ধসমযে, থূপং কারেতুমিচ্ছতি.

মুনিনো ধাতুযো দেহি, পত্তং ভুত্তঞ্চ সত্থুনা;

সরীরধাতুযো সন্তি, বহৰো হি তৰন্তিকে.

পত্তপূরা গহেত্ৰা তা, গন্ত্ৰা দেৰপুরং ৰরং;

সক্কং দেৰানমিন্দং তং, এৰং নো ৰচনং ৰদ.

তিলোকদক্খিণেয্যস্স, দাঠাধাতু চ দক্খিণা;

তৰন্তিকম্হি দেৰিন্দ, দক্খিণক্খকধাতু চ.

দাঠং ত্ৰমেৰ পূজেহি, অক্খকং দেহি সত্থুনো;

লংকাদীপস্স কিচ্চেসু, মাপমজ্জ সুরাধিপ.

‘‘এৰং ভন্তে’’তি ৰত্ৰা সো, সামণেরো মহিদ্ধিকো;

তঙ্খণংযেৰ অগমা, ধম্মাসোকস্স সন্তিকং.

সালমূলম্হি ঠপিতং, মহাবোধিং তহিং সুতং;

কত্তিকচ্ছণপূজাহি, পূজিযং তঞ্চ অদ্দস.

থেরস্স ¶ ৰচনং ৰত্ৰা, রাজতো লদ্ধধাতুযো;

পত্তপূরং গহেত্ৰান, হিমৰন্তমুপাগমি.

হিমৰন্তে ঠপেত্ৰান, সধাতুং পত্তমুত্তমং;

দেৰিন্দসন্তিকং গন্ত্ৰা, থেরস্স ৰচনং ভণি.

চূল়ামণি চেতিযম্হা, গহেত্ৰা দক্খিণক্খকং;

সামণেরস্স পাদাসি, সক্কো দেৰানমিস্সরো.

তং ধাতুং ধাতুপত্তঞ্চ, আদায সুমনো ততো;

আগম্ম চেতিযগিরিং, থেরস্স’দাসি তং যতি.

মহানাগৰনুয্যানং, ৰুত্তেনা ৰিধিনা’গমা;

সাযন্হাসমযে রাজা, রাজসেনা পুরক্খতো.

ঠপেসি ধাতুযো সব্বা, থেরো তত্থেৰ পব্বতে;

মিস্সকং পব্বতং তস্মা, আহু চেতিয পব্বতং.

ঠপেত্ৰা ধাতুপত্তং তং, থেরো চেতিযপব্বতে;

গহেত্ৰা অক্খকং ধাতুং, সঙ্কেতং সগণো’গমা.

সচাযং মুনিনো ধাতু, ছত্তং নমতু মে সযং;

জণ্ণুকেহি করীধাতু, ধাতুচঙ্কোটকো অযং.

সিরস্মিং মে পতিট্ঠাতু, আগম্ম সহ ধাতুকো;

ইতি রাজা ৰিচিন্তেসি, চিন্তিতং তং তথা অহু.

অমতেনা’ভিসিত্তোৰ, অহু হট্ঠো’তি ভূপতি;

সীসতো তং গহেত্ৰান, হত্থিক্খন্ধে ঠপেসিতং.

হট্ঠো হত্তী কুঞ্চনাদং, অকা কম্পিত্থ মেদিনী;

ততো নাগো নিৰত্তিত্ৰা, সথের বলৰাহনো.

পুরত্থিমেন দ্ৰারেন, পৰিসিত্ৰা পুরং সুভং;

দক্খিণেন চ দ্ৰারেন, নিক্খমিত্ৰা ততো পুন.

থূপারামে চেতিযস্স, ঠানতো পচ্ছতো কতং;

পমোজৰত্থুং গন্ত্ৰান, বোধিঠানে নিৰত্তিয.

পুরত্থাৰদনো অঠা, থূপঠানং তদা হিতং;

কদম্বপুপ্ফআদারি-ৰল্লীহি চিতকং অহু.

মনুস্সদেৰো ¶ দেৰেহি, তং ঠানং রক্খিতং সুচিং;

সোধাপেত্ৰা ভূসযিত্ৰা, তঙ্খণংযেৰ সাধুকং.

ধাতুং ওরোপনত্থায, আরভী হত্থিক্খন্ধতো;

নাগো ন ইচ্ছিতং রাজা, থেরং পুচ্ছিত্থ তং মনং.

অত্তনো খন্ধসমকে, ঠানে ঠপনমিচ্ছতি;

ধাতুওরোপনং তেন, ন ইট্ঠমী’তি সো ব্রৰি.

অলঙ্করিত্ৰান বহুধা, রাজা তং ঠানমুত্তমং;

ওরোপেত্ৰা হত্থিক্খন্ধা, ধাতুং তত্থ ঠপেসিতং.

ধাতারক্খং সংৰিধায, ঠপেত্ৰা তত্থ হত্থিনং;

ধাতুথূপস্স করণে, রাজা তুরিতমানসো.

বহূ মনুস্সে যোজেত্ৰা, ইত্থিকাকরণে লহুং;

ধাতুকিচ্চং ৰিচিন্তেন্তো, সামচ্চো পাৰিসী পুরং.

মহামহিন্দত্থেরো তু, মহা মেঘৰনং সুভং;

সগণো অভিগন্ত্ৰান, তত্থ ৰাসমকপ্পযি.

রত্তিং নাগো’নুপরিযাতি, তং ঠানং সো সধাতু কং;

বোধিঠানম্হি সালায, দিৰাঠাতি সধাতুকো.

ৰত্থুস্স তস্সো’পরিতো, থূপং থেরমতানু গো;

জঙ্ঘামত্তং চিতাপেত্ৰা, কতিপাহেন ভূপতি.

তত্থ ধাতুপতিট্ঠানং, ঘোসাপেত্ৰা উপাগমি;

ততো ততো সমন্তো চ, সমাগমি মহাজনো.

তস্মিং সমাগমে ধাতু, হত্থিক্খন্ধা নগাগ্গতা;

সত্ততালপ্পমাণম্হি, দিস্সন্তি নভসিট্ঠিতা.

ৰিম্হাপযন্তি জনতং, যমকং পাটিহারিযং;

কণ্ণম্বমূলে বুদ্ধো’ৰ, অকরি লোমহংসনং.

ততো ¶ নিক্খন্তজালাহি, জলধারাহি চা’সকিং;

অযং ওভাসিতা’সিত্তা, সব্বালংকামহী মহু.

পরিনিব্বানমঞ্চম্হি, নিপন্নেন জিনেন হি;

কতং মহাঅধিট্ঠান-পঞ্চকং পঞ্চচক্খুনা.

গয্হমানা মহাবোধি সাখাসোকেন দক্খিণা;

ছিজ্জিত্ৰান সযংযেৰ, পতিট্ঠাতু কটাহকে.

পতিট্ঠহিত্ৰা সা সাখা, ছব্বণ্ণরস্মিযো সুভা;

রঞ্জযন্তী দিসা সব্বা, ফলপত্তেহি মুচ্চতু.

সসুৰণ্ণকটাহা সা, উগ্গন্ত্ৰান মনোরমা;

অদিস্সমানা সত্তাহং, হিমগব্ভম্হি তিট্ঠতু.

থূপারামে পতিট্ঠন্তং, মম দক্খিণঅক্খকং;

করোতু নভমুগ্গন্ত্ৰা, যমযং পাটিহারিযং.

লঙ্কা লঙ্কারভূতম্হি, হেমমালিকচেতিযে;

পতিট্ঠহন্তিযো ধাতু, দোণমত্তা পমাণতো.

বুদ্ধৰেসধরা হুত্ৰা, উগ্গন্ত্ৰা নভসিট্ঠিতা;

পতিট্ঠং তু করিত্ৰান, যমকং পাটিহারিযং.

অধিট্ঠানানি পঞ্চে’ৰ, অধিট্ঠাসি তথাগতো;

অকাসি তস্মা সা ধাতু, তদা তং পাটিহারিযং.

আকাসা ওতরিত্ৰা সা, অট্ঠাভূপস্স মুদ্ধনি;

অতীৰহট্ঠো তং রাজা, পতিট্ঠাপেসি চেতিযে.

পতিট্ঠিতায তস্সা চ, ধাতুযা চেতিযে তদা;

অহু মহাভূমিচালো, অব্ভুতো লোমহংসনো.

এৰং অচিন্তিযা বুদ্ধা, বুদ্ধধম্মা অচিন্তিযা;

অচিন্তিযে পসন্নানং, ৰিপাকো হোতি অচিন্তিযো.

তং পাটিহারিযং দিস্ৰা, পসীদিংসু জনে জনা;

মত্তাভযো রাজপুত্তো, কনিট্ঠো রাজিনো পন.

মুনিস্সরে পসীদিত্ৰা, যাচিত্ৰান নরিস্সরং;

পুরিসানং সহস্সেন, সহ পব্বজিসাসনে.

চেতারিগামতো ¶ চাপি, দ্ৰারমণ্ডলতোপি চ;

ৰিহীরবীজতো চাপি, তথা গল্লকপিট্ঠিতো.

তথো’পতিস্সগামা চ, পঞ্চ পঞ্চ সতানি চ;

পব্বজুং দারকা হট্ঠা, জাতসদ্ধা তথাগতে.

এৰং পুরা বাহিরা চ, সব্বে পব্বজিতা তদা;

তিংস ভিক্খুসহস্সানি, অহেসুং জিনসাসনে.

থূপারামে থূপৰরং, নিট্ঠাপেত্ৰা মহীপতি;

রতনাদীহি’নেকেহি, সদা পূজমকারযি.

রাজোরোধা খত্তিযা চ, অমচ্চা নাগরা তথা;

সব্বে জনপদা চেৰ, পুজা’কংসু ৰিসুং ৰিসুং.

থূপপুব্বঙ্গমং রাজা, ৰিহারং তত্থ কারযি;

থূপারামোতি তেনে’স, ৰিহারো ৰিস্সুতো অহু.

বহুধা’কাসি ঠিতে জিনে কথাৰকাতি.

সুজনপ্পসাদসংৰেগত্থায কতে মহাৰংসে

মহাবোধিঞ্চ থেরিঞ্চ, আণাপেতুং মহীপতি;

থেরেন ৰুত্তৰচনং, সরমানো সকে ঘরে.

অন্তোৰস্সে’ক দিৰসং, নিসিন্নো থেরসন্তিকে;

সহা’মচ্চেহি মন্তেত্ৰা, ভাগিনেয্যং সযং সকং.

অরিট্ঠনামকা’মচ্চং ¶ , তস্মিং কম্মে নিযোজিতুং;

মন্ত্ৰা আমন্তযিত্ৰান, ইদং ৰচনমব্রৰি.

তা সক্খিস্সসি…, ধম্মাসোকস্স সন্তিকা;

মহাবোধিং সঙ্ঘমিত্তং, থেরিং আনযিতুং ইধ.

সক্খিস্সামি অহং দেৰ, আনেতুং তং দুৰে ততো;

ইধা’গতো পব্বজিতুং, সচে লচ্ছামি মানদ.

এৰং হোতূতি ৰত্ৰান, রাজা তং তত্থ পেসযি;

সো থেরস্স চ রঞ্ঞো চ, সাসনং গয্হ ৰন্দিয.

অস্সযুজসুক্কপক্খে, নিক্খন্তো দুতিযে’হনি;

সানুযুত্তো জম্বুকোলে, নাৰমারুয্হ পট্টনে.

মহোদমিং করিত্ৰান, থেরাধিট্ঠানযোগতো;

নিক্খন্তদিৰসেযেৰ, রম্মং পুপ্ফপুরং অগা.

তদা তু অনুলাদেৰী, পঞ্চকঞ্ঞাসতেহি চ;

অন্তেপুরিকইত্থীনং, সদ্ধিং পঞ্চসতেহি চ.

দসসীলং সমাদায, কাসায ৰসনা সুচি;

পব্বজ্জাপেক্খি নিসেখা, পেক্খন্তি থেরিযা’গমং.

নগরস্সে’কদেসম্হি, রম্মে ভিক্খুনুপস্সযে;

কারাপিতে নরিন্দেন, ৰাসং কপ্পেসি সুব্বতা.

উপাসিকাহি তাহে’স, ৰুত্তো ভিক্খুনুপস্সযো;

উপাসিকা ৰিহারোতি, তেন লংকায ৰিস্সুতো.

ভাগিনেয্যো মহা’রিট্ঠো, ধম্মাসোকস্স রাজিনো;

অপ্পেত্ৰা রাজসন্দেসং, থেরসন্দেস’মব্রৰি.

ভাতুজযা সহাযস্স, রঞ্ঞো তে রাজকুঞ্জর;

আকঙ্খমানা পব্বজ্জং, নিচ্চং ৰসতি সঞ্ঞতা.

সঙ্ঘমিত্তং ভিক্খুনিং তং, পব্বাজেতুং ৰিসজ্জয;

তায সদ্ধিং মহাবোধি-দক্খিণসাখমেৰ চ.

থেরিযা চ তমেৰত্থং, অব্রৰি থেরভাসিতং;

গন্ত্ৰা পিতুসমীপং সা, থেরী থেরমতং ব্রৰী.

আহ ¶ রাজা তুৰং অম্ম, অপস্সন্তো কথং অহং;

সোকং ৰিনোদযিস্সামি, পুত্তনত্তৰিযোগজং.

আহ সা মে মহারাজ, ভাতুনো ৰচনং গরু;

পব্বাজনীযা চ বহূ, গন্তব্বং তত্থ তেন মে.

‘‘সত্থঘাতমনারহা, মহাবোধিমহীরুহা;

কথন্নু সাখং গণিস্সং’’, ইতি রাজা ৰিচিন্তযী.

অমচ্চস্স মহাদেৰ-নামকস্স মতেন সো;

ভিক্খুসঙ্ঘং নিমন্তেত্ৰা, ভোজেত্ৰা পুচ্ছি ভূপতিং.

ভন্তে লংকং মহাবোধি, পেসেতব্বা নু খো ইতি;

থেরো মোগ্গলিপুত্তো সো, পেসেতব্বাতি ভাসিয.

কতং মহাঅধিট্ঠান-পঞ্চকং পঞ্চচক্খুনা;

আভাসি রঞ্ঞো তং সুত্ৰা, তুস্সিত্ৰা ধরণীপতি.

সত্তযোজনিকং মগ্গং, সো মহাবোধিগামিনং;

সোধাপেত্ৰান সক্কচ্চং, ভূসাপেতি অনেকধা.

সুৰণ্ণং নীহরাপেসি, কটাহকরণায চ;

ৰিস্সকম্মো চ আগন্ত্ৰা, সতুলাধাররূপৰা.

‘‘কটাহং কিং পমাণং নু, করোমী’তি অপুচ্ছিতং;

‘‘ঞত্ৰা পমাণং ত্ৰংযেৰ, করোহি’’ ইতি ভাসিয.

সুৰণ্ণা গহেত্ৰান, হত্থেন পরিমজ্জিয;

কটাহং তঙ্খণংযেৰ, নিম্মিনিত্ৰান পক্কমি.

নৰহত্থপরিক্খেপং, পঞ্চহত্থং গভীরতো;

তিহত্থৰিক্খম্ভযুতং, অট্ঠঙ্গুলঘনং সুভং.

যুৰস্স হত্থিনো সোণ্ড-পমাণমুখৰট্টিকং;

গাহা পেত্ৰান তং রাজা, বালসুরসমপ্পকং.

সত্তযোজনদীঘায, ৰিত্থতাযতি যোজনং;

সেনায চতুরঙ্গিন্যা, মহাভিক্খুগণেন চ.

উপগম্ম মহাবোধিং, নানালঙ্কারভূসিতং;

নানারতনচিত্তং তং, ৰিৰিধদ্ধজমালিনিং.

নানাকুসুমসংকিণ্ণং ¶ , নানাতুরিযঘোসিতং;

সেনায পরিৰারেত্ৰা, পরিক্খিপিয সাণিযা.

রঞ্ঞং পত্তাভিসেকানং, সহস্সেনা’ধিকেন চ.

অত্তানং পরিৰারেত্ৰা, মহাবোধিঞ্চ সাধুকং;

ওলোকেসি মহাবোধিং, পগ্গহেত্ৰান অঞ্জলিং.

তস্সা দক্খিণসাখায, চতুহত্থপমাণকং;

ঠানং খন্ধঞ্চ ৰজ্জেত্ৰা, সাখা অন্তরধাযিসুং.

তং পাটিহারিযং দিস্ৰা, পতীতো পুথৰীপতি;

‘‘পূজেম’হং মহাবোধিং, রজ্জেনা’হি উদীরিয.

অভিসিঞ্চি মহাবোধীং, মহারজ্জে মহীপতি;

পুপ্ফাদীহি মহাবোধিং, পূজেত্ৰান পদক্খিণং.

কত্ৰা অট্ঠসু ঠানেসু, ৰন্দিত্ৰান কতঞ্জলী;

সুৰণ্ণখচিতে পীঠে, নানারতনমণ্ডিতে.

স্ৰারোহে যাৰ সাউচ্চে, তং সুৰণ্ণকটাহকং;

ঠপাপেত্ৰান আরুয্হ, গহেতুং সাখমুত্তমং.

আদিযিত্ৰান সোৰণ্ণ তুলিকায মনোসিলং;

লেখং দত্ৰান সাখায, সচ্চক্রিযমকা ইতি.

‘‘লংকাদীপং যদি ইতো, গন্তব্বং উরুবোধিযা;

নিব্বেমতিকো বুদ্ধস্স, সাসনম্হি সচে অহং.

সযংযেৰ মহাবোধি-সাখাযং দক্খিণা সুভা;

ছিজ্জিত্ৰান পতিট্ঠাতু, ইধ হেমকটাহকে.

লেখঠানে মহাবোধি, ছিজ্জিত্ৰা সযমেৰ সা;

গন্ধকদ্দমপূরস্স, কটাহস্সো’পরিট্ঠিতা.

মূললেখায উপরি, তিযঙ্গুলতিযঙ্গুলে;

দদং মনোসিলা লেখা, পরিক্খিপি নরিস্সরো.

আদিযা থূলমূলানি, খুদ্দকানি’তরাহি তু;

নিক্খমিত্ৰা দস দস, জালীভূতা নিওতরুং.

তং ¶ পাটিহারিযং দিস্ৰা, রাজা’তীৰ পমোদিতো;

তত্থেৰা’কাসি উক্কুট্ঠিং, সমন্তা পরিসাপি চ.

ভিক্খুসঙ্ঘো সাধুকারং, তুট্ঠচিত্তো পমোদযি;

চেলুক্খেপসহস্সানি, পৰত্তিংসু সমন্ততো.

এৰং সতেন মূলানং, তত্থ সা গন্ধকদ্দমে;

পতিট্ঠাসি মহাবোধি, পসাদেন্তী মহাজনং.

তস্সা খন্ধো দসহত্থো, পঞ্চসাখা মনোরমা;

চতুহত্থা চতুহত্থা, দসড্ঢফলমণ্ডিতা.

সহস্সন্তু পসাখানং, সাখানং তাসমাসি চ;

এৰং আসি মহাবোধি, মনোহরসিরিধরা.

কটাহম্হি মহাবোধি-পতিট্ঠিতক্খণে মহী;

অকম্পি পাটিহীরানি, অহেসুং ৰিৰিধানি চ.

সযং নাদেহি তূরিযানং, দেৰেসু মানুসেসু চ;

সাধুকারনিনাদেতি, দেৰব্রহ্মগণস্স চ.

মেঘানং মিগপক্খিনং, যক্খাদীনং রৰেহি চ;

রৰেহিচমহীকম্পে, এককোলাহলং অহু.

বোধিযা ফলপত্তেহি, ছব্বণ্ণরস্মিযো সুভা;

নিক্খমিত্ৰা চক্কৰাল়ং, সকলা সোভযিংসু চ.

সকটাহা মহাবোধি, উগ্গন্ত্ৰান ততো নভং;

অট্ঠাসি হিমগব্ভম্হি, সত্তাহানি অদস্সনা.

রাজা ওরুয্হ পীঠম্হা, তং সত্তাহং তহিং ৰসং;

নিচ্চং মহাবোধিপূজং, অকাসি চ অনেকধা.

অতীতে তম্হি সত্তাহে, সব্বে হিমৰলাৰকা;

পৰিসিংসু মহাবোধিং, সব্বাকা রংসিযোপি চ.

সুদ্ধেনকদিসিস্সিত্থ, সাকটাহে পত্তিট্ঠিতা;

মহাজনস্স সব্বস্স, মহাবোধি মনোরমা.

পৰত্তম্হি মহাবোধি, ৰিৰিধে পাটিহারিযে;

ৰিম্হাপযন্তি জনতং, পথৰীতলমোরুহি.

পাটিহিরেহি’নেকেহি ¶ , তেহি সো পীণিতো পুন;

মহারাজা মহাবোধিং, মহারজ্জেন পূজযি.

মহাবোধিং মহারজ্জে-নাভিসিঞ্চিয পূজযং;

নানাপূজাহি সত্তাহং, পুন তত্থেৰ সো ৰসি.

অস্সযুজসুক্কপক্খে, পন্নরসউপোসথে;

অগ্গহেসি মহাবোধিং, দ্ৰিসত্তাহমচ্চযে ততো.

অস্সযুজকাল়পক্খে, চতুদ্দসউপোসথে;

রথে সুভে ঠপেত্ৰান, মহাবোধিং রথেসভো.

পূজেন্তো তং দিনংযেৰ, উপনেত্ৰা সকং পুরং;

অলঙ্করিত্ৰা বহুধা, কারেত্ৰা মণ্ডপং সুভং.

কত্তিকসুক্কপক্খস্স, দিনে পাটিপদে তহিং;

মহাবোধিং মহাসাল-মূলে পাচিনতে সুভে.

ঠপাপেত্ৰান কারেসি, পূজা’নেকা দিনে দিনে;

গাহতো সত্তরসমে, ৰিৰসে তু নৰঙ্কিরা.

সকিং যেৰঅজাযিংসু, তস্সা’নেকনরাধিপো;

তুট্ঠচিত্তো মহাবোধিং, পুন রজ্জেন পূজযি.

মহারজ্জে’ভি সিঞ্চিত্ৰা, মহাবোধিং মহিস্সরো;

কারেসি চ মহাবোধি-পূজা নানপ্পকারকং.

সুজনপ্পসাদসংৰেগত্থায কতে মহাৰংসে

মহাবোধিরক্খণত্থং ¶ , অট্ঠারস রথে সভো;

দেৰকুলানি দত্ৰান, অট্ঠামচ্চা কুলানি চ.

অট্ঠ ব্রাহ্মণকুলানি, অট্ঠ ৰস্সকুলানি চ;

গোপকানং তরচ্ছানং, কুলিঙ্গানং কুলানি চ.

তথেৰ পেসকারানং, কুম্ভকারানমেৰ চ;

সব্বে সঞ্চাপি সেনীনং, নাগযক্খানমেৰ চ.

হেমসজ্জুঘটেচেৰ, দত্ৰা অট্ঠট্ঠ মানদো;

আরোপেত্ৰা মহাবোধিং, নাৰং গঙ্গায ভূসিতং.

সঙ্ঘমিত্ত মহাথেরী, সহে কদস ভিক্খুনিং;

তথেৰা’রোপযিত্ৰান, অরিট্ঠপমুখেপি চ.

নগরা নিক্খমিত্ৰান, ৰিঞ্জাটৰিমতিচ্চসো;

তামলিত্থিং অনুপ্পত্তো, সত্তাহেনে’ৰ ভূপতি.

অচ্চুল়া রাহি পূজাযি, দেৰানাগানরাপি চ;

মহাবোধিং পূজযন্তা, সত্তাহেন’ৰুপাগমুং.

মহাসমুদ্দতীরম্হি, মহাবোধিং মহীপতি;

ঠপাপেত্ৰান পূজেসি, মহারজ্জেন সো পুন.

মহাবোধিং মহারজ্জে, অভিসিঞ্চীযকামদো;

অগ্গসির সুক্কপক্খে, দিনে পাটিপদে ততো.

উচ্চারেতুং মহাবোধিং, তেহিযেৰ’ট্ঠ অট্ঠহি;

সালমূলম্হি দিন্নেহি, ধাতুগ্গতকুলেহি সো.

উক্খিপিত্ৰা মহাবোধিং, গলমত্তং জলং তহিং;

ওগাহেত্ৰা সনাৰায, পতিট্ঠাপযি সাধুকং.

নাৰং ¶ আরোপযিত্ৰা তং, মহাথেরিং সথেরিকং;

মহারিট্ঠং মহামচ্চং, ইদং ৰচনমব্রৰি.

‘‘অহং রজ্জেন তিক্খত্তুং, মহাবোধিমপূজযিং;

এৰ মেৰা’ভি পূজেতু, রাজা রজ্জেন মে সখা’’.

ইদং ৰত্ৰা মহারাজা, তীরে পঞ্জলিকো ঠিতো;

গচ্ছমানং মহাবোধিং, পস্সং অস্সূনিৰত্তযি.

মহাবোধি সমারুল়্হা, নাৰাপক্খন্ধী তোযধিং;

সমন্তা যোজনে ৰিচী, সন্নিসীদি মহণ্ণৰে.

পুপ্ফিংসু পঞ্চৰণ্ণানি, পদুমানি সমন্ততো;

অন্তলিক্খে পৰজ্জিংসু, অনেক তূরিযানি চ.

দেৰতাহি অনেকাহি, পূজা’নেকা পৰত্তিতা;

গহেতুঞ্চ মহাবোধি, নাগা’কাসুং ৰিকুব্বনং.

সঙ্ঘমিত্তা মহাথেরি, অভিঞ্ঞাবলপারগা;

সুপণ্ণরূপা হুত্ৰান, তে তাসেসি মহোরগে.

তে তাসিতা মহাথেরিং, যাচিত্ৰান মহোরগা;

নযিত্ৰান মহাবেমধিং, ভুজঙ্গভৰনং ততো.

সত্তাহং নাগরজ্জেন, পূজাহি ৰিৰিধাহি চ;

পূজযিত্ৰান আনেত্ৰা, নাৰাযং ঠপযিংসু তে.

তদহেৰ মহাবোধি, জম্বুকোলমিধগমা;

দেৰানংপিযতিস্সো তু, রাজা লোকহিতে রতো.

সুমনা সামণেরম্হা, পুব্বে সুততদাগমো;

মগ্গসিরাদিদিনঘো, পভুতি ৰচসাদরো.

উত্তরদ্ৰারতো ¶ যাৰ, জম্বুকোলং মহাপথং;

ৰিভূসযিত্ৰা সকলং, মহাবোধিগতাসযো.

সমুদ্দাসনসালায, ঠানে ঠত্ৰা মহণ্ণৰে;

আগচ্ছন্তং মহাবোধিং, মহাথেরিদ্ধিযা’দ্দস.

তস্মিংঠানে কতা সালা, পকা সেতুং তমব্ভুতং;

সমুদ্দাসনসালাতি, নামেনা‘সি’ধ পাকটা.

মহাথেরানুভাৰেন, সদ্ধিং থেরেহি তেহি চ;

তদহেৰ’গমা রাজা, জম্বুকোলং স সেনকো.

মহাবোধা গমেপীতি-ৰেগেনু’ন্নো উদানযং;

গলপ্পমাণং সলিলং, ৰিগাহেত্ৰা সুৰিগ্গহো.

মহাবোধিং সোল়সহি, কুলেহি সহ মুদ্ধনা;

আদাযো’রোপযিত্ৰান, ৰেলাযং মণ্ডপে সুভে.

ঠপযিত্ৰান লংকিন্দো, লংকারজ্জেন পূজযি;

সোল়সন্নং সমপ্পেত্ৰা, কুলানং রজ্জমত্তনো.

সযং দোৰারিকঠানে, ঠত্ৰান দিৰসে তযো;

তত্থেৰ পূজং কারেসি, ৰিৰিধং মনুজাধিপো.

মহাবোধিং দসমিযং, আরোপেত্ৰা রথেসুভে;

আনযন্তো মনুস্সিন্দো, দুমিন্দং তং ঠপাপযি.

পাচিনস্স ৰিহারস্স, ঠানে ঠানৰিচক্খণো;

পাতরাসং পৰত্তেসি, সসঙ্ঘস্স জনস্স সো.

মহামহিন্দথেরে’ত্থ, কতং দসবলেন তং;

কথেসি নাগদমনং, রঞ্ঞো তস্স অসেসতো.

থেরস্স সুত্ৰা কারেত্ৰা, সঞ্ঞাণানি তহিং তহিং;

পরিভুত্তেসু ঠানেসু, নিসজ্জাদীহি সত্থুনা.

তিৰক্কস্স ব্রাহ্মণস্স, গামদ্ৰারে চ ভূপতি;

ঠপাপেত্ৰা মহাবোধিং, ঠানেসু তেসু তেসু চ.

সুদ্ধৰালুক সন্থারে, নানাপুপ্ফসমাকুলে;

পগ্গহিতধজে মগ্গে, পুপ্ফগ্ঘিকৰিভূসিতে.

মহাবোধিং ¶ পূজযন্তো, রত্তিন্দিৰ মতন্দিতো;

আনযিত্ৰা চুদ্দসিযং, অনুরাধ পুরন্তিকং.

ৰড্ঢমানকচ্ছাযায, পুরং সাধু ৰিভূসিতং;

উত্তরেন চ দ্ৰারেন, পূজযন্তো পৰেসিয.

দক্খিণেন চ দ্ৰারেন, নিক্খমিত্ৰা পৰেসিয;

মহা মেঘৰনারামং, চতুবুদ্ধনিসেৰিতং.

সুমনস্সেৰ ৰচসা, পদেসং সাধুসঙ্খতং;

পুব্ববোধিঠিতট্ঠানং, উপনেত্ৰা মনোরমং.

কুলেহি সো সোল়সহি, রাজা লঙ্কারধারিহি;

ওরোপেত্ৰা মহাবোধিং, পতিট্ঠা পেতু মোস্সজ্জি.

হত্থতো মুত্তমত্তসা, অসীতিরতনং নভং;

উগ্গন্ত্ৰান ঠিতা মুঞ্চি, ছব্বণ্ণা রস্মিযো সুভা.

দীপে পত্থরিযা’হচ্চ, ব্রহ্মলোকং ঠিতা অহু;

সূরিযত্থঙ্গমনাযাৰ, রস্মিযো তা মনোরমা.

পুরিসা দসসহস্সানি, পসন্না পাটিহারিযে;

ৰিপস্সিত্ৰানা’রহত্থং, পত্ৰান ইধ পব্বজুং.

ওরোহিত্ৰা মহাবোধি, সূরিযত্থঙ্গমে ততো;

রোহিণিযা পতিট্ঠাসি, মহিযং কম্পি মেদিনী.

মূলানি তানি উগ্গন্ত্ৰা, কটাহমুখৰট্টিতো;

ৰিনন্ধন্তা কটাহং তং, ওতরিংসু মহীতলং.

পতিট্ঠিতং মহাবোধিং, জনা সব্বে সমগতা;

গন্ধমালাদি পূজাহি, পূজযিংসু সমন্ততো.

মহামেঘো পৰস্সিত্থ, হিমগব্ভা সমন্ততো;

মহাবোধিং ছাদযিংসু, সীতলানি ঘনানি চ.

সত্তাহানি মহাবোধিং, তহিংযেৰ অদস্সনা;

হিমগব্ভে সন্নিসীদি, পসাদজননী জনে.

সত্তাহা তিক্কমে মেঘা, সব্বে অপগমিংসু তে;

মহাবোধি চ দিস্সিত্থ, ছব্বণ্ণা রংসিযোপি চ.

মহামহিন্দত্থেরোচ, সঙ্ঘমিত্তা চ ভিক্খুনী;

তত্থা’গঞ্ছুংসপরিসা, রাজা সপরিসোপি চ.

খত্তিযা ¶ কাজরগ্গামে, চন্দনগ্গাম খত্তিযা;

তিৰক্ক ব্রাহ্মণো চেৰ, দীপৰাসী জনাপি চ.

দেৰানুভাৰেনা’গঞ্ছুং, মহাবোধি মহুস্সুক্কা;

মহাসমাগমে তস্মিং, পাটিহারিযৰিম্হিতে.

পক্কং পাচিনসাখায, পেক্খতং পক্ক’মক্খতং;

থেরো পতন্তমাদায, রোপেতুং রাজিনো অদা.

পংসূনং গন্ধমিস্সানং, পুণ্ণে সোণ্ণ কটাহকে;

মহাসনস্স ঠানে তং, ঠপিতং রোপ’যিস্সরো.

পেক্খতংযেৰ সব্বেসং, উগ্গন্ত্ৰা অট্ঠ অঙ্কুরা;

জাযিংসু বোধিতরুণা, অট্ঠংসু চতুহত্থকা.

রাজা তে বোধিতরুণে, দিস্ৰা ৰিম্হিতমানসো;

সেতচ্ছত্তেন পূজেসি, অভিসেকমদাসি চ.

পতিট্ঠাপেসি অট্ঠন্নং, জম্বুকোলম্হি পট্টনে;

মহাবোধি ঠিত ঠানে, নাৰাযো রোহনে তদা.

তিৰক্কব্রাহ্মণগামে, থূপারামে তথেৰ চ;

ইস্সরসমণারামে, পঠমে চেতিযঙ্গণে.

চেতিয পব্বতা রামে, তথা কাজরগামকে;

চন্দনগামকে চাতি, একেকং বোধিলট্ঠিকং.

সেসা চতুপক্কজাতা, দ্ৰত্তিংস বোধিলট্ঠিযো;

সমন্তা যোজনঠানে, ৰিহারেসু তহিং তহিং.

দীপাৰাসী জনস্সেৰ, হিতত্থায পতিট্ঠিতে;

মহাবোধি দুমিন্দম্হি, সম্মাসম্বুদ্ধ তেজসা.

অনুলাসাস পরিসা, সঙ্ঘমিত্তায থেরিযা;

সন্তিকে পব্বজিত্ৰান, অরহত্তমপাপুণি.

অরিট্ঠো সো পঞ্চসত-পরিৰারো চ খত্তিযো;

থেরন্তিকে পব্বজিত্ৰা, অরহত্তমপাপুণি.

যানি সেট্ঠিকুলান’ট্ঠ-মহাবোধিমিধাহরুং;

বোধাহরকুলানীতি, তানি তেন পৰুচ্চরে.

উপাসিকা ৰিহারোতি, ঞাতে ভিক্খুনুপস্সযে;

সসঙ্ঘা সঙ্ঘমিত্তা সা, মহাথেরী তহিং ৰসি.

অগারত্তযপামোক্খে ¶ , অগারে তত্থ কারযি;

দ্ৰাদস তেসু একস্মিং, মহাগারে ঠপাপযি.

মহাবোধিসমেতায, নাৰায কূপযট্ঠিকং;

একস্মিং পিয মেকস্মিং, অরিত্তং তেহি তেৰিদুং.

জাতে অঞ্ঞনিকাযেপি, অগারা দ্ৰাদসাপি তে;

হত্থাল়ক ভিক্খুনীহি, ৰল়ঞ্জযিংসু সব্বদা.

রঞ্ঞো মঙ্গলহত্থি সো, ৰিচরন্তো যথাসুখং;

পুরস্স একপস্সম্হি, কন্দরন্তম্হি সীতলে.

কদম্বপুপ্ফগুম্বন্তে, অট্ঠাসি গোচরং চরং;

হত্থিং তত্থরতং ঞত্ৰা, অকংসু তত্থ আল়্হকং.

অথেক দিৰসং হত্থী, নগণ্হি কবল়ানি সো;

দীপপ্পসাদকং থেরং, রাজা সো পুচ্ছিতং মতং.

কদম্বপুপ্ফগুম্বস্মিং, থূপস্স করণং করী;

ইচ্ছতীতি মহাথেরো, মহারাজস্স অব্রৰি.

সধাতুকং তত্থ থূপং, থূপস্স ঘরমেৰ চ;

খিপ্পং রাজা অকারেসি, নিচ্চং জনহিতেরতো.

সঙ্ঘমিত্তা মহাথেরী, সুঞ্ঞাগারাভিলাসিনী;

আকিণ্ণত্তা ৰিহারস্স, ৰুস্সমানস্স তস্স সা.

ৰুদ্ধত্থিনী সাসনস্স, ভিক্খুনীনং হিতায চ;

ভিক্খুনুপস্সযং অঞ্ঞং, ইচ্ছমানা ৰিচক্খণা.

গন্ত্ৰা চেতিযগেহং তং, পৰিৰেকসুখং ভুসং;

দিৰাৰিহারং কপ্পেসি, ৰিহারকুসলা’মলা.

থেরিযা ৰন্দনত্থায, রাজা ভিক্খুনুপস্সযং;

গন্ত্ৰা তত্থ গতং সুত্ৰা, গন্ত্ৰান তত্থ ৰন্দিয.

সম্মোদিত্ৰা তায সদ্ধিং, তত্থাগমনকারণং;

তস্সা ঞত্ৰা অধিপ্পাযং, অধিপ্পায ৰিদূ ৰিদূ.

সমন্তা থূপগেহস্স, রম্মং ভিক্খুনুপস্সযং;

দেৰানংপিযতিস্সো সো, মহারাজা অকারযি.

হত্থাল়্হকসমীপম্হি ¶ , কতো ভিক্খুনুপস্সযো;

হত্থাল়্হকৰিহারোতি, ৰিস্সুতো আসি তেন সো.

সুমিত্তা সঙ্ঘমিত্তা সা, মহাথেরী মহামতী;

তস্মিঞ্হি ৰাসং কপ্পেসি, রম্মে ভিক্খুনুপস্সযে.

সংসোধেন্তো এস মহাবোধি দুমিন্দো;

লংকাদীপে রম্মে মহামেঘৰনস্মিং,

অট্ঠা সীঘং কালমনেকব্ভূতযুত্তোতি.

সুজনপ্পসাদসংৰেগত্থায কতে মহাৰংসে

অট্ঠারসম্হি ৰস্সম্হি, ধম্মাসোকস্স রাজিনো;

মহামেঘৰনারামে, মহাবোধি পতিট্ঠতি.

ততো দ্ৰাদসমে ৰস্সে, মহেসী তস্স রাজিনো;

পিযা অসন্ধীমিত্তা সা, মতা সম্বুদ্ধমামকা.

ততো চতুত্থে ৰস্সম্হি, ধম্মাসোকো মহীপতি;

তিস্সরক্খ মহেসিত্তে, ঠপেসি ৰিসমাসযং.

ততো তু ততিযে ৰস্সে, সাবালা রূপমানিনী;

‘‘মযাপি চ অযং রাজা, মহাবোধিং ম মাযতি’’.

ইতি কোধৰসং গন্ত্ৰা, অত্তনো’নত্থ কারিকা;

মণ্ডুকণ্টকযোগেন, মহাবোধি মঘা তযি.

ততো ¶ চ তুত্থেৰস্সম্হি, ধম্মা সোকো মহাযসো;

অনিচ্চ তাৰ সংপত্তো, সত্ততিংসসমা ইমে.

দেৰানং পিযতিস্সো তু, রাজা ধম্মগুণে রতো;

মহাৰিহারে নৰকম্মং, তথা চেতিযপব্বতে.

থূপারামে নৰকম্মং, নিট্ঠাপেত্ৰা যথারহং;

দীপপ্পসাদকং থেরং, পুচ্ছি পুচ্ছিতকোৰিদং.

কারাপেস্সমহং ভন্তে, ৰিহারেসু বহূ ইধ;

পতিট্ঠাপেতুং থূপেসু, কথং লচ্ছাম ধাতুযো.

সম্বুদ্ধপত্তং পূরেত্ৰা, সুমনেনা’হটা ইধ;

চেতিযপব্বতে রাজ, ঠপিতা অত্থি ধাতুযো.

হত্থিক্খন্ধে ঠপেত্ৰা তা, ধাতুযো ইধ আহর;

ইতি ৰুত্তো সথেরেন, তথা আহরি ধাতুযো.

ৰিহারে কারযিত্ৰান, ঠানে যোজনযোজনে;

ধাতুযো তত্থ থূপেসু, নিধাপেসি যথারহং.

সম্বুদ্ধভুত্তপত্তং তু, রাজৰত্থুঘরে সুভে;

ঠপযিত্ৰান পূজেসি, নানাপূজাহি সব্বদা.

পঞ্চসতেহি’স্সরেতি, মহাথেরস্স সন্তিকে;

পব্বজ্জৰসিতঠানে, ইস্সরসমণকো অহু.

পঞ্চসতেহি ৰস্সেহি, মহাথেরস্স সন্তিকে;

পব্বজ্জৰসিতঠানে, তথা ৰস্সগিরি অহু.

যা যা মহামহিন্দেন, থেরেন ৰসিতা গুহা;

সপব্বতৰিহারেসু, সা মহিন্দগুহা অহু.

মহাৰিহারং পঠমং, দুতিযং চেতিযৰ্হযং;

থূপারামং তু ততিযং, থূপপুব্বঙ্গমং সুভং.

চতুত্থং তু মহাবোধি-পতিট্ঠাপনমেৰ চ;

থূপঠানীযভূতস্স, পঞ্চমং পন সাধুকং.

মহাচেতিযঠানম্হি, সিলাথূপস্স চারুনো;

সম্বুদ্ধগীৰাধাতুস্স, পতিট্ঠাপনমেৰ চ.

ইস্সরসমণং ¶ ছট্ঠং, তিস্সৰাপিন্তুসত্তমং;

অট্ঠমং পঠমং থূপং, নৰমং ৰস্সগিরিৰ্হযং.

উপাসিকাৰ্হযং রম্মং, তথা হত্থাল়্হকৰ্হযং;

ভিক্খুনুপস্সকে দ্ৰে’মে, ভিক্খুনী ফাসুকারণা.

হত্থাল়্হকে ওসরিত্ৰা, ভিক্খুনীনং উপস্সযে;

গন্ত্ৰান ভিক্খুসঙ্ঘেন, ভত্তগ্গহণকারণা.

হত্তসালং সূপহারং, মহাপাল়িকনামকং;

সব্বুপকরণূপেতং, সম্পত্তপরিচারিকং.

তথা ভিক্খুসহস্সস্স, সপরিক্খারমুত্তমং;

পৰারণায দানঞ্চ, অনুৰস্সকমেৰ চ.

নাগদীপে জম্বুকোল-ৰিহারং ত ম্হিপট্টনে;

তিস্সমহাৰিহারঞ্চ, পাচীনারাম মেৰ চ.

ইতি এতানি কম্মানি, লংকাজনহিতত্থিকো;

দেৰানংপিযতিস্সো সো, লংকিন্দো পুঞ্ঞপঞ্ঞৰা.

পঠমেযেৰ ৰস্সম্হি, কারাপেসি গুণপ্পিযো;

যাৰ জীৰন্তুনেকানি, পুঞ্ঞকম্মানি আচিনি.

অযং দীপো অহু ঠিতো, ৰিজিতে তস্স রাজিনো;

ৰস্সানি চত্তালীসং সো, রাজা রজ্জমকারযি.

তস্স’চ্চ যে তং কনিট্ঠো, উত্তিযো ইতি ৰিস্সুতো;

রাজপুত্তো অপুত্তং তং, রজ্জং কারেসি সাধুকং.

মহামহিন্দত্থেরো তু, জিনসাসনমুত্তমং;

পরিযত্তিং পটিপত্তিং, পটিৰেধঞ্চ সাধুকং.

লংকাদীপম্হি দীপেত্ৰা, লংকাদীপো মহাগণি;

লংকাযসো সত্থু কপ্পো, কত্ৰা লংকাহিতং বহুং.

তস্স উত্তিযরাজস্স, জযৰস্সম্হি অট্ঠমে;

অন্তোৰস্সং সট্ঠিৰস্সো, চেতিযপব্বতে ৰসং.

অস্সযুজস্স মাসস্স, সুক্কপক্খঠমে দিনে;

পরিনিব্বাযিতে নেতং, দিনং তন্নামকং অহু.

[নিব্বুতস্স ¶ মহিন্দস্স, অট্ঠমিযং দিনে পন,

তেন তং দিৰসং নাম, অট্ঠমিযাতি সম্মতং.]

তং সুত্ৰা উত্তিযো রাজা, সোকসল্লসমপ্পিতো;

গন্ত্ৰান থেরং ৰন্দিত্ৰা কন্দিত্ৰা বহুধা বহুং.

আসিত্তগন্ধতেলায, বহুং সোৰণ্ণদোণিযা;

থেরদেভং খিপাপেত্ৰা, তং দোণিং সাধুফুস্সিতং.

সোৰণ্ণকূটাগারম্হি, ঠপাপেত্ৰা অলঙ্কতে;

কূটাগারং গাহযিত্ৰা, কারেন্তো সাধুকীল়িতং.

মহতা চ বলোঘেন, কারেন্তো পূজনাৰিধিং.

অলঙ্কতেন মগ্গেন, বহুধা’লঙ্কতং পুরং;

আনযিত্ৰান নগরে, চারেত্ৰা রাজৰীথিযো.

মহাৰিহারং আনেত্ৰা, এত্থ পঞ্হম্বমাল়কে;

কুটাগারং ঠপাপেত্ৰা, সত্তাহং সো মহীপতি.

তোরণদ্ধজপুপ্ফেহি, গন্ধপুণ্ণঘটেহি চ;

ৰিহারঞ্চ সমন্তা চ, মণ্ডিহং যোজনত্তযং.

অহু রাজানুভাৰেন, দীপন্তু সকলং পন;

আনুভাৰেন দেৰানং, তথেৰা’লঙ্কতং অহু.

নানাপূজং কারযিত্ৰা, সত্তাহং সো মহীপতি;

পুরত্থিমদিসাভাগে, থেরানং বদ্ধমাল়কে.

কারেত্ৰা গন্ধচিতকং, মহাথূপং পদক্খিণং;

করোন্তো তত্থ নেত্ৰা তং, কূটাগারং মনোরমং.

চিতকম্হি ঠপাপেত্ৰা, সক্কারং অন্তিমং অকা;

চেতিযঞ্চেত্থ কারেসি, গাহা পেত্ৰান ধাতুযো.

উপড্ঢধাতুং ¶ গাহেত্ৰা, চেতিযে পব্বতেপি চ;

সব্বেসু চ ৰিহারেসু, থূপে কারেসি খত্তিযো.

ইসিনো দেহনিক্খেপ-কতঠানঞ্হি তস্স তং;

ৰুচ্চতে বহুমানেন, ইসিভূমঙ্গনং ইতি.

ততো পভুত্য’রিযানং, সমন্তা যোজনত্তযে;

সরীরং আহরিত্ৰান, তম্হি দেসম্হি ডয্হতি.

সঙ্ঘমিত্তা মহাথেরী, মহা’ভিঞ্ঞা মহামতী;

কত্ৰা সাসনকিচ্চানি, তথা লোকহিতং বহুং.

একূনসট্ঠিৰস্সা সা, উত্তিযস্সে’ৰ রাজিনো;

ৰস্সম্হি নৰমে খেমে, হত্থাল়্হকউপস্সযে.

ৰসন্তী পরিনিব্বাযী, রাজা তস্সাপি কারযি;

থেরস্স ৰিয সত্তাহং, পূজাসক্কার মুত্তমং.

সব্বা অলঙ্কতা লংকা, থেরস্স ৰিয আসি চ;

কূটাগারগতং থেরি-দেহং সত্তদিনচ্চযে.

নিক্খামেত্ৰান নগরং, থূপরাম পুরত্থতো;

চিত্তসালা সমীপম্হি, মহাবোধিপ দস্সযে.

থেরিযা ৰুট্ঠঠানম্হি, অগ্গিকিচ্চ মকারযি;

থূপঞ্চ তত্থ কারেসি, উত্তিযো সো মহীপতি.

পঞ্চাপি তে মহাথেরা, থেরারিট্ঠাদযোপি চ;

তথা’নেক সহস্সানি, ভিক্খু খীণাসৰাপি চ.

সঙ্ঘমিত্তা পভুতিযো, তা চ দ্ৰাদসথেরিযো;

খীণাসৰা ভিক্খুনিযো, সহস্সানি বহূনি চ.

বহুস্সুতা মহাপঞ্ঞা, ৰিনযাদিজানাগমং;

জোতযিত্ৰান কালেন, পযাতা’নিচ্চতাৰসং.

দসৰস্সানি সো রাজা, রজ্জং কারেসি উত্তিযো;

এৰং অনিচ্চতা এসা, সব্বলোকৰিনাসিনী.

তং ¶ এতং অতিসাহসং অতিবলং ন ৰারিযং নরো;

জানন্তোপি অনিচ্চতং ভৰগতে নিব্বিন্দতেনেৰ চ;

নিব্বিন্দো ৰিরতিং রতিং ন কুরুতে পাপেহি পুঞ্ঞেহি চ;

তস্সে’সাঅতিমোহজালবলতাজানম্পি সম্মুয্হতীতি.

সুজনপ্পসাদসংৰেগত্থায কতে মহাৰংসে

উত্তিযস্স ¶ কনিট্ঠো তু, মহাসিৰো তদচ্চযে;

দস ৰস্সানি কারেসি, রজ্জং সুজন সেৰকো.

ভদ্দসালম্হি সো থেরে, পসীদিত্ৰা মনোরমং;

কারেসি পুরিমাযন্তু, ৰিহারং নগরঙ্গণং.

মহাসিৰকনিট্ঠো তু, সুরতিস্সো তদচ্চযে;

দসৰস্সানি কারেসি, রজ্জং পুঞ্ঞেসু সাদরো.

দক্খিণায দিসাযং সো, ৰিহারং নগরং গণং;

পুরিমায হত্থিক্খন্ধঞ্চ, গোকণ্ণগিরিমেৰ চ.

ৰঙ্গুত্তরে পব্বতম্হি, পাচিন পব্বতৰ্হযং;

রহেণকসমীপম্হি, তথা কোল়ম্বকাল়কং.

অরিট্ঠপাদে মং গুলকং, পুরিমায’চ্ছ গল্লকং;

গিরিনেলপনাযকণ্ডং, নগরস্সুত্থরায তু.

পঞ্চসতা ¶ নেৰ মাদি-ৰিহারে পুথৰী পতি;

গঙ্গায ওরপারঞ্হি, লংকাদীপে তহিং তহিং.

পুরে রজ্জা চ রজ্জে চ, সট্ঠীৰস্সানি সাধুকং;

কারেসি রম্মে ধম্মেন, রতনত্তয গারৰো.

সুৰণ্ণপিণ্ডতিস্সোতি, নামং রজ্জা তস্সা অহু;

সুরতিস্সোতি নামন্তু, তস্সা’পুরজ্জপত্তিযা.

অস্সনাৰিকপুত্তা দ্ৰে, দমিল়া সেনগুত্তিকা;

সুরতিস্সমহীপালং, তং গহেত্ৰা মহব্বলা.

দুৰে ৰীসতিৰস্সানি, রজ্জং ধম্মেন কারযুং;

তে গহেত্ৰা অসেলো তু, মুটসিৰস্স অত্রজো.

সোদরিযানং ভাতূনং, নৰমো ভতুকো ততো;

অনুরাধপুরে রজ্জং, দসৰস্সানি কারযি.

চোল়রট্ঠা ইধ গম্ম, রজ্জত্থং উজুজাতিকো;

এল়ারো নাম দমিল়ো, গহেত্ৰা’সেলভূপতিং.

ৰস্সানি চত্তারীসঞ্চ, চত্তারি চ অকারযি;

রজ্জং ৰোহারসমযে, মজ্ঝত্তো মিত্তসত্তুসু.

সযনস্স সিরোপস্সে, ঘণ্টং সুদীঘযোত্তকং;

লম্বাপেসি ৰীরাৰেতুং, ইচ্ছন্তেহি ৰিনিচ্ছযং.

একো পুত্তো চ ধীতা চ, অহেসুং তস্স রাজিনো;

রথেন তিস্সৰাপিং সো, গচ্ছন্তো ভূমিপালজো.

তরুণং ৰচ্ছকং মগ্গে, নিপন্নং সহধেনুকং;

গীৰং অক্কম্মচক্কেন, অসঞ্চিচ্চ অঘাতযি.

গন্ত্ৰান ধেনুঘণ্টং তং, ঘট্টেসি ঘট্টিতাসযা;

রাজা তেনেৰ চক্কেন, সীসং পুত্তস্স ছেদযি.

দিজপোতং তালরুক্খে, একো সপ্পো অভক্খযি;

তম্পোতমাতা সকুণী, গন্ত্ৰা ঘণ্টমঘট্টযি.

আণাপেত্ৰান তং রাজা, কুচ্ছিং তস্স ৰিদাল়িয;

পোতং তং নীহরাপেত্ৰা, তালে সপ্পমসপ্পযি.

রতনগ্গস্স ¶ রতন-ত্তযস্স গুণসারতং;

অজানন্তোপি সো রাজা, চারিত্তমনুপালযং.

চেতিযদব্বতং গন্ত্ৰা, ভিক্খুসঙ্ঘং পৰারিয;

আগচ্ছন্তো রথগতো, রথস্স যুগকোটিযা.

অসঞ্চিচ্চ কতে‘পে’স, রাজা ওরুয্হ সন্দনা;

‘‘চক্কেন মম সীসম্পি, ছিন্দথা’তি পথেসযি.

‘‘পরহিংসং মহারাজ, সত্থা নো নেৰ ইচ্ছতি;

থূপং পাকতিকং কত্ৰা, খমাপেহী’’তি আহু তং.

তে ঠপেতুং পঞ্চদস, পাসাণে পতিতে তহিং;

কহাপণ সহস্সানি, অদা পঞ্চদসে ৰসো.

অকা মহল্লিকা ৰীহিং, সো সেতুং আতপে খিপি;

দেৰো অকালে ৰস্সিত্ৰা, তস্সা ৰিহিং অতেমযি.

ৰীহিং গহেত্ৰা গন্ত্ৰা সা, ঘণ্টং তং সমঘট্টযি;

অকালৰস্সং সুত্ৰা তং, ৰিস্সজ্জেত্ৰা তমত্তিকং.

রাজা ধম্মম্হি ৰত্তন্তো, ‘‘কালে ৰস্সং লভে’’ইতি;

তস্সা ৰিনিচ্ছযত্থায, উপৰাসং নিপজ্জি সো.

বলিগ্গাহী দেৰপুত্তো, রঞ্ঞো তেজেন ওত্থটো;

গন্ত্ৰা চাতুমহারাজ-সন্তিকং তং নিৰেদযি.

তে তমাদায গন্ত্ৰান, সক্কস্স পটিৰেদযুং;

সক্কো পজ্জুন্নমাহুয, কালে ৰস্সং উপাদিযি.

বলিগ্গাহী দেৰপুত্তো, রাজিনো তং নিৰেদযি;

ততোপ্পভুতি তং রজ্জে, দিৰা দেৰো ন ৰস্সথ.

রত্তিং দেৰো’নু সত্তাহং, ৰস্সিযামম্হি মজ্ঝিমে;

পুণ্ণান’হেসুং সব্বত্থ, খুদ্দকা ৰাটকানিপি.

অগতিগমনদোসো ¶ মুত্তমত্তেন এসো,

অনুপহত কুদিট্ঠিপীদিসিং পাপুণী’দ্ধিং;

অগতিগমনদোসং সুদ্ধদিট্ঠিসমানো,

কথমিধহি মনুস্সো বুদ্ধিমা নো জহেয্যাতি.

সুজনপ্পসাদসংৰেগত্থায কতে মহাৰংসে

এল়ারং ঘাতযিত্ৰান, রাজা’হু দুট্ঠগামণি;

তদত্থ দীপনত্থায, অনুপুব্বকথা অযং.

দেৰানং পিযতিস্সস্স, রঞ্ঞো দুতিযভাতিকো;

উপরাজা মহানাগো, নামানু ভাতুনো পিযো.

রঞ্ঞো দেৰী সপুত্তস্স, বালা রজ্জাভিকামিনি;

উপরাজৰধত্থায, জাতচিত্তা নিরন্তরং.

ৰাপিং তরচ্ছনামং সা, কারাপেন্তস্স পাহিণি;

অম্বং ৰিসেন যোজেত্ৰা, ঠপেত্ৰা অম্বমত্থকে.

তস্সা পুত্তো সহগতো, উপরাজেন বালকো;

ভাজনে ৰিৰটেযেৰ, তং অম্বং খাদিযা’মরি.

রক্খিহুং সকমত্তানং, রোহণা’ভিমুখো অগা.

যট্ঠালয ৰিহারস্মিং, মহেসী তস্স গব্ভিনী;

পুত্তং জনেসি সো তস্স, ভাতু নাম মকারযি.

কারেসি সো নাগমহা-ৰিহারং সকনামকং;

উদ্ধকন্দরকাদী চ, পিহারে কারযী বহূ.

যট্ঠালয কতিস্সো সো, তস্স পুত্তো তদচ্চযে;

হত্থেৰ রজ্জং কারেসি, তস্স পুত্তো’ভযো তথা.

গোট্ঠাভযসুতো কাক-ৰণ্ণতিস্সোতি ৰিস্সুহো;

তদচ্চযে তত্থ রজ্জং, সো অকারেসি খত্তিযো.

ৰিহারদেৰি নামা’সি, মহেসী তস্স রাজিনো;

সদ্ধস্স সদ্ধাসম্পন্না, ধীতা কল্যাণি রাজিনো.

কল্যাণিযং নরিন্দো হি, তিস্সো নামাসি খত্তিযো;

দেৰিসঞ্ঞোগজনিত-কো পোতস্স কনিট্ঠকো.

ভীতো ততো পলাযিত্ৰা, অয্যউত্তিয নামকো;

অঞ্ঞত্থ ৰসি সো দেসো, তেন তং নামকো অহু.

দত্ৰা রহস্সলেখং সো, ভিক্খুৰেসধরং নরং;

পাহেসি দেৰিযা গন্ত্ৰা, রাজদ্ৰারে ঠিতো তুসো.

রাজ গেহে অরহতা, ভুঞ্জমানেন সব্বদা;

অঞ্ঞাযমানো থেরেন, রঞ্ঞো ঘরমুপাগমি.

থেরেন সদ্ধিং ভুঞ্জিত্ৰা, রঞ্ঞো সহ ৰিনিগ্গমে;

পাতেসি ভূমিযং লেখং, পেক্খমানায দেৰিযা.

সদ্দেন তেন রাজানং, নিৰত্তিত্ৰা ৰিলোকযং;

ঞত্ৰান লেখসন্দেসং, কুদ্ধো থেরস্স দুম্মতি.

থেরং তং পুরিসং তঞ্চ, মারাপেত্ৰান কোধসা;

সমুদ্দস্মিং খিপাপেসি, কুজ্ঝিত্ৰা তেন দেৰতা.

সমুদ্দেনো’ত্থরা পেসুং, তং দেসং সোতুভূপতি;

অত্তনো ধীতরং যুদ্ধং, দেৰিং নাম সুরুপিনিং.

লিখিত্ৰা রাজধীতাতি, সোৰণ্ণক্খলিযা লহুং;

নিসীদাপিয তত্থেৰ, সমুদ্দস্মিং ৰিস্সজ্জযি.

ওক্কন্তং ¶ তং ততো লংকে-কাকৰণ্ণো মহীপতি;

অভিসেচযি তেনা’সি, ৰিহারোপপদৰ্হযা.

তিস্স মহাৰিহারঞ্চ, তথা চিত্তলপব্বতং;

গমিত্থৰালিং কুটালিং, ৰিহারে এৰমাদিকে.

কারেত্ৰা সুপসন্নেন, মনসারতনত্তযে;

উপট্ঠহি তদা সঙ্ঘং, পচ্চযেহি চতূহি সো.

কোটিপব্বত নামম্হি, ৰিহারে সীলৰত্তিমা;

তদা অহু সামণেরো, নানাপুঞ্ঞকরো সদা.

সুখেনারোহণত্থায, অকাস চেতিযঙ্গণে;

ঠপেসি তীণি পাসাণে, পাসাণ ফলকানি সো.

অদা পানীয দানঞ্চ, ৰত্তং সঙ্ঘস্স চা’করি;

সদা কিলন্তকাযস্স, তস্সা’বোধো মহা অহু.

সিৰিকায কমানেত্ৰা, ভিক্খৰো কতৰেদিনো;

সিলাপস্সয পরিৰেণে, তিস্সারামে উপট্ঠহুং.

সদা ৰিহারদেৰীসা, রাজগেহে সুসঙ্খতে;

পুরেভত্তং মহাদানং, দত্ৰা সঙ্ঘস্স সঞ্ঞতা.

পচ্ছাভত্তং গন্ধমালং, ভেসজ্জৰসনানি চ;

গাহযিত্ৰা গতা’রামং, সক্করোতি যথারহং.

তদা তথেৰ কত্ৰা সা, সঙ্ঘত্থেরস্স সন্তিকে;

নিসীদি ধম্মং দেসেন্তো, থেরো তং ইধ মব্রৰি.

‘‘মহাসম্পত্তি তুম্হেহি, লদ্ধা’যং পুঞ্ঞকম্মুনা;

অপ্পমাদো’ৰ কাতব্বো, পুঞ্ঞকম্মে ইদানিপি’’.

এৰং ৰুত্তে তু সা আহ, ‘‘কিং সম্পত্তি অযং ইধ;

যেসং নো দারকা নত্থি, ৰঞ্ঝাসম্পত্তি তেন নো’’.

ছল়ভিঞ্ঞো মহাথেরো, পুত্তলাভমৰেক্খিয;

‘‘গিলানং সামণেরং তং, পস্সদেৰী’’তি অব্রৰি.

সা গন্ত্ৰা’সন্ন মরণং, সামণেরমৰোচ তং;

‘‘পত্থেহি মম পুত্তত্তং, সম্পত্তী মহতী হি নো’’.

ন ¶ ইচ্ছতীতি ঞত্ৰান, তদত্থং মহতিং সুভং;

পুপ্ফপূজং কারযিত্ৰা, পুন যাচি সুমেধসা.

এৰম্প’নিচ্ছমানস্স, অত্থাযু’পাযকোৰিদা;

নানা ভেসজ্জ ৰত্থানি, সঙ্ঘে দত্ৰা’থ যাচিতং.

পত্থেসি সো রাজকুলং, সা তং ঠানং অনেকধা;

অলঙ্করিত্ৰা ৰন্দিত্ৰা, যানমারুয্হ পক্কমি.

ততো চুতো সামণেরো, গচ্ছমানায দেৰিযা;

তস্সা কুচ্ছিম্হি নিব্বত্তি, তং জানিয নিৰত্তিসা.

রঞ্ঞো তং সাসনং দত্ৰা, রঞ্ঞা সহ পুনা’গমা;

সরীরকিচ্চং কারেত্ৰা, সামণেরস্সু’ভোপিতে.

তস্মিংযেৰ পরিৰেণে, ৰসন্তা সন্তমানসা;

মহাদানং পৰত্তেসুং, ভিক্খুসঙ্ঘস্স সব্বদা.

তস্সে’ৰং দোহল়ো আহি, মহা পুঞ্ঞায মাতুযা;

‘‘উসভমত্তং মধুগণ্ডং, কত্ৰা উস্সীসকে সযং.

ৰামেতরেন পস্সেন, নিপন্নাসযনে সুভে;

দ্ৰাদসন্নং সহস্সানং, ভিক্খূনং দিন্নসেসকং.

মধুং ভুঞ্জিতুকামা’সি, অথ এল়ার রাজিনো;

যোধান মগ্গযোধস্স, সীসচ্ছিন্নাসিদেৰনং.

তস্সেৰ সীসে ঠত্ৰান, পাতুঞ্চেৰ অকামযি;

অনুরাধ পুরস্সেৰ, উপ্পলক্খেত্ততো পন.

আনীতুপ্পলমালঞ্চ, অমিলা তং পিলন্ধিতুং;

তং দেৰী রাজিনো আহ, নেমিত্তে পুচ্ছি ভূপতি.

তং সুত্ৰা আহু নেমিত্তা, ‘‘দেৰিপুত্তো নিঘাতিয;

দমিল়ে কত্ৰে’করজ্জং, সাসনং জোতযিস্সতি’’.

এদিসং মধুগণ্ডং সো, দস্সেতি তস্স ঈদিসিং;

সম্পত্তিং দেতি রাজা’’তি, ঘোসাপেসি মহীপতি.

গোট্ঠসমুদ্দৰেলন্তে, মধুপুণ্ণং নিকুজ্জিতং;

নাৰং ঞত্ৰান আচিক্খি, রঞ্ঞো জনপদে নরো.

রাজা ¶ দেৰিং তহিং নেত্ৰা, মণ্ডপম্হি সুসঙ্খতে;

যথিচ্ছিথং তায মধুং, পরিভোগমকারযি.

ইতরে দোহল়ে তস্সা, সম্পাদেতুং মহীপতি;

ৰেল়ুসুমন নামং তং, যোধং তত্থ নিযোজযি.

সো’নুরাধপুরং গন্ত্ৰা, রঞ্ঞো মঙ্গলৰাজিনো;

গোপকেন অকা মেত্তিং, তস্স কিচ্চঞ্চ সব্বদা.

তস্স ৰিস্সত্থ তং ঞত্ৰা, পাতোৰ উপ্পলান’সিং;

কদম্বনদিযা তীরে, ঠপেত্ৰান অসঙ্কিতো.

অস্সং নেত্ৰা তমারুয্হ, গণ্হিত্ৰান উপ্পলান’সিং;

নিৰেদযিত্ৰান অত্তানং, অস্সৰেগেন পক্কমি.

সুত্ৰা রাজা গহেতুং তং, মহা যোধানপেসযি;

দুতিযং সম্মথং অস্সং, আরুয্হ সোনুধাপিতং.

সো গুম্বনিস্সিতো অস্স-পিট্ঠেযেৰ নিসীদিয;

এন্তস্স পিট্ঠিতো তস্স, উব্বয্হা’সিং পসারযি.

অস্সৰেগেনযন্তস্স, সীসং ছিজ্জ উভোহযে;

সীসঞ্চা’দায সাযং সো, মহাগামমুপাগমি.

দোহল়ে তে চ সা দেৰী, পরিভুঞ্জি যথারুচি;

রাজা যোধস্স সক্কারং, কারাপেসি যথারহং.

সা দেৰী সমযে ধঞ্ঞং, জনযী পুত্তমুত্তমং;

মহারাজকুলে তস্মিং, আনন্দো চ মহা অহু.

তস্স পুঞ্ঞানুভাৰেন, তদহেৰ উপাগমুং;

নানারতনসম্পুণ্ণা, সত্তনাৰা ততো ততো.

তস্সেৰ পুঞ্ঞতেজেন, ছদ্দন্তকুলতো করী;

হত্থিচ্ছাপং আহরিত্ৰা, ঠপেত্ৰা ইধ পক্কমি.

তং তিত্থসরতীরম্হি, দিস্ৰা গুম্বন্তরে ঠিতং;

কণ্ডুলৰ্হো বালিসিকো, রঞ্ঞো আচিক্খি তাৰদে.

পেসেত্ৰা’চরিযে রাজা, তমাণাপিয পোসযি;

কণ্ডুলো ইতি ঞাযিত্থ, দিট্ঠত্তা কণ্ডুলেন সো.

‘‘সুৰণ্ণভাজনাদীনং ¶ , পুণ্ণা নাৰা ইধাগতা’’;

ইতি রঞ্ঞো নিৰেদসুং, রাজা তানা’হরাপযি.

পুত্তস্স নামকরণে, মঙ্গলম্হি মহীপতি;

দ্ৰাদস সহস্সসঙ্খং, ভিক্খুসঙ্ঘং নিমন্তিয.

এৰং চিন্তেসি ‘‘যদিমে, পুত্তো লংকাতলে’খিলে;

রজ্জং গহেত্ৰা সম্বুদ্ধ-সাসনং জোতযিস্সতি.

অট্ঠুত্তরসহস্সঞ্চ, ভিক্খৰো পৰিসন্তু চ;

সব্বে তে উদ্ধপত্তঞ্চ, চীৰরং পারপন্তু চ.

পঠমং দক্খিণং পাদং, উম্মারন্তো ঠপেন্তু চ;

একচ্ছত্তযুতং ধম্ম-করণং নীহরন্তু চ.

গোতমো নাম থেরো চ, পতিগ্গণ্হাতু পুত্তকং;

সো চ সরণসিক্খা যো, দেতু’’ সব্বং তথা অহু.

সব্বং নিমিত্তং দিস্ৰান, তুট্ঠচিত্তো মহীপতি;

দত্ৰা সঙ্ঘস্স পাযাসং, নামং পুত্তস্স কারযি.

মহাগামে নাযকত্তং, পিতুনামঞ্চ একতো;

উভো কত্ৰান একজ্ঝং, গামণিঅভযো ইতি.

মহাগামং পৰিসিত্ৰা, নৰমে দিৰসে ততো;

সঙ্গমং দেৰিযা কাসি, তেন গব্ভমগণ্হি সা.

কালে জাতং সুতং রাজা, তিস্সনামং অকারযি;

মহতা পরিহারেন, উভতো ৰড্ঢিংসু দারকা.

সিত্থপ্পৰেসমঙ্গল-কালে দ্ৰিন্নম্পি সাদরো;

ভিক্খুসতানং পঞ্চনং, দাপযিত্ৰান পাযসং.

তেহি উপড্ঢে ভুত্তম্হি, গহেত্ৰা থোকথোককং;

সোৰণ্ণসরকেনে’সং, দেৰিযা সহ ভূপতি.

‘‘সম্বুদ্ধসাসনং তুম্হে, যদি ছড্ডেথ পুত্তকা;

মা জীরতু কুচ্ছিগতং, ইদং ৰো’’তি অপাপযি.

ৰিঞ্ঞায ভাসিতত্থং তে, উভো রাজকুমারকা;

পাযাসং তং অভুঞ্জিংসু, তুট্ঠচিত্তা’মতং ৰিয.

দস দ্ৰাদসৰস্সেসু, তেসু ৰীমংসনত্থিকো;

তথেৰ ভিক্খূ ভোজেত্ৰা, তেসং উচ্ছিট্ঠমোদনং.

গাহযিত্ৰা ¶ তট্টকেন, ঠপাপেত্ৰা তদন্তিকে;

তিভাগং কারযিত্ৰান, ইধ মাহ মহীপতি.

‘‘কুলদেৰতানং নো তাতা, ভিক্খূনং ৰিমুখা মযং;

ন হেস্সামা’’তি চিন্তেত্ৰা, ভাগং ভুঞ্জথি’মন্তি চ.

‘‘দ্ৰে ভাতরো মযং নিচ্চং, অঞ্ঞমঞ্ঞমদূভকা;

ভৰিস্সামা’’তি চিন্তেত্ৰা, ভাগং ভুঞ্জিথি’মন্তি চ.

অমতং ৰিয ভুঞ্জিংসু, তে দ্ৰে ভাগে উভোপি চ;

‘‘ন যুজ্ঝিস্সাম দমিল়েহি’’, ইতি ভুঞ্জথি’মং ইতি.

এৰং ৰুত্তেতু তিস্সো সো, পাণিনা খিপি ভোজনং;

গামণিভত্তপিণ্ডং তু, খিপিত্ৰা সযনং গতো.

সংকুচিত্ৰা হত্থপাদং, নিপজ্জি সযেন সযং;

দেৰী গন্ত্ৰা তোসযন্তী, গামণিং এতদব্রৰি.

পসারিতঙ্গো সযনে, কিং নসেসি সুখং সুত;

‘‘গঙ্গাপারম্হি দমীল়া, ইতো গোট্ঠমহোদধি.

কথং পসারিতঙ্গো’হং, নিপজ্জামী’তি সো ব্রৰি;

সুত্ৰান তস্সাধিপ্পাযং, তুণ্হী আসি মহীপতি.

সো কমেনা’ভিৰড্ঢন্তো, অহু সোল়সৰস্সিকো;

পুঞ্ঞৰা যসৰা ধীমা, তেজো বলপরক্কমো.

উপেন্তি পুঞ্ঞেন যথারুচিং গতিং;

ভৰেয্য পুঞ্ঞপচযম্হি বুদ্ধিমাতি.

সুজনপ্পসাদসংৰেগত্থায কতে মহাৰংসে

নন্দীমিত্তো সুরনিমিলো, মহাসোণো গোট্ঠযিম্বরো;

থেরপুত্তাভযো ভরণো, ৰেল়ুসুমনো তথেৰ চ.

খঞ্জদেৰো ফুস্সদেৰো, লভিয্য ৰসভোপি চ;

এতে দস মহাযোধা, তস্সা’হেসুং মহব্বলা.

অহু এল়াররাজস্স, মিত্তো নাম চমূপতি;

তস্স কম্মন্তগামম্হি, পাচীনখণ্ডরাজিযা.

চিত্তপব্বতসামন্তা, অহু ভগিনিযা সুতো;

কোসোহিতৰত্থগুয্হো, মাতুলস্সেৰ নামতো.

দূরম্পি পরিসপ্পন্তং, দহরং তং কুমারকং;

আবজ্ঝ নন্দিযা কট্যং, নিসদম্হি অবন্ধিসু.

নিসদং কড্ঢতো তস্স, ভূমিযং পরিসপ্পতো;

উম্মারাতিক্কমে নন্দি, সা ছজ্জতি যতো ততো.

নন্দিমিত্তোতি ঞাযিত্থ, দসনাগবলো অহু;

ৰুদ্ধো নগরমাগম্ম, সো উপট্ঠাসি মাতুলং.

থূপাদীসু অসক্কারং, করোন্তো দমিল়ে তদা;

ঊরুং অক্কম্মপাদেন, হত্থেন ইতরং তুসো.

গহেত্ৰা সম্পদালেত্ৰা, বহিক্খপতিং থামৰা;

দেৰা অন্তরধাপেন্তি, তেন খিত্তং কল়েৰরং.

দমিল়ানং খযং দিস্ৰা, রঞ্ঞো আরোচযিং সুতং;

‘‘সহোট্টং গণ্হথেতং’’তি, ৰুত্তং কাতুং ন সক্খিসুং.

চিন্তেসি ¶ নন্দিমিত্তো সো, ‘‘এৰম্পি করতো মম;

জনক্খযো কেৰলঞ্হি, নত্থি সাসনজোতনং.

রোহণে খত্তিযা সন্তি, পসন্নং রতনত্তযে;

তত্থ কত্ৰা রাজসেৰং, গণ্হিত্ৰা দমিল়ে’খিলে.

রজ্জং দত্ৰা খত্তিযানং, জোতেস্সং বুদ্ধসাসনং’’;

ইতি গন্ত্ৰা গামণিস্স, তং কুমারস্স সাৰযি.

মাতুযা মন্তযিত্ৰা সো, সক্কারং তস্স কারযি;

সক্কতো নন্দিমিত্তো সো, যোধো ৰসি তদন্তিকে.

কাকৰণ্ণো তিস্সরাজা, ৰারেতুং দমিল়িসদা;

মহাগঙ্গায তিত্থেসু, রক্খং সব্বেসু কারযি.

অহু দীঘাভযো নাম, রঞ্ঞো’ঞ্ঞ ভরিযা সুতো;

কচ্ছকতিত্থে গঙ্গায, তেন রক্খমকারযি.

সো রক্খাকরণত্থায, সমন্তা যোজনদ্ৰযে;

মহাকুলম্হা একেকং, পুত্তং আণাপযি তহিং.

কোট্ঠিৰালে জনপদে, গামে খণ্ডকৰিট্ঠিকে;

সত্তপুত্তো কুলপতি, সঙ্ঘো নামা’সি ইস্সরো.

তস্সাপি ধূতং পাহেসি, রাজপুত্তো সুতত্থিকো;

সত্তমো নিমিলো নাম, দসহত্থিবলো সুতো.

তস্স অকম্মসীলত্তা, খীযন্তা ছপি ভাতরো;

রোচযুং তস্স গমনং, ন তু মাতা পিতা পন.

কুজ্ঝিত্ৰা সেসভাতূনং, পাতোযেৰ তিযোজনং;

গন্ত্ৰা সুরগ্গমেযেৰ, রাজপুত্তং অপস্সিসো.

সো তং ৰিমংসনত্থায, দূরে কিচ্চে নিযোজযি;

চেতিয পব্বতা সন্নে, দ্ৰার মণ্ডলগামকে.

ব্রাহ্মণো কুণ্ডলো নাম, ৰিজ্জ তে মে সহাযকো;

সমুদ্দপারে ভণ্ডানি, তস্স ৰিজ্জন্তি সন্তিকে.

গন্ত্ৰা তং তেন দিন্নানি, ভণ্ডকানি ইধা’হর;

ইতি ৰত্ৰান ভোজেত্ৰা, লেখং দত্ৰা ৰিস্সজ্জযি.

ততো নৰ যোজনঞ্হি, অনুরাধপুরং ইদং;

পুব্বণ্হেযেৰ গন্ত্ৰান, সো তং ব্রাহ্মণ মদ্দস.

‘‘ন্হত্ৰা ¶ ৰাপিযং তাত, এহী’’তি আহ ব্রাহ্মণো;

ইধা’নাগত পুব্বত্তা, ন্হত্ৰান তিস্সৰাপিযং.

মহাবোধিঞ্চ পূজেত্ৰা, থূপারামে চ চেতিযং;

নগরং পৰিসিত্ৰান, পস্সিত্ৰা সকলং পুরং.

আপণা গন্ধমাদায, উত্তর দ্ৰারতো ততো;

নিক্খম্মুপ্পল খেত্তম্হা, গহেত্ৰা উপ্পলানি চ.

উপাগমি ব্রাহ্মণং তং, পুট্ঠো তেনা’হ সো গতিং;

সুত্ৰা সো ব্রাহ্মণো তস্স, পুব্বাগমমিধাগমং.

ৰিম্হিতো চিন্তযী এৰং, ‘‘পুরিসা জানীযো অযং;

সচে জানেয্য এল়ারো, ইমং হত্থে করিস্সতি.

তস্মা’যং দমিল়া’সন্নে, ৰাসেতুং নেৰ অরহতি;

রাজপুত্তস্স পিতুনো, সন্তিকে ৰাসমরহতি’’.

এৰ মেৰং লিখিত্ৰান, লেখং তস্স সমপ্পযি;

পুণ্ণৰড্ঢন ৰত্থানি, পণ্ণাকারে বহূপি চ.

দত্ৰা তং ভোজযিত্ৰা চ, পেসেসী সখিসন্তিকং;

সো ৰড্ঢমানচ্ছাযাযং, গত্ৰা রাজসুতন্তি কং.

লেখঞ্চ পণ্ণাকারে চ, রাজপুত্তস্স অপ্পযি;

তুট্ঠো আহ ‘‘সহস্সেন, পসাদেথ ইম’’ন্তি সো.

ইস্সং করিংসু তস্স’ঞ্ঞে, রাজপুত্তস্স সেৰকা;

সো তং দসসহস্সেন, পসাদাপেসি দারকং.

তস্স কেসং লিখাপেত্ৰা, গঙ্গাযেৰ নহাপিয;

পুণ্ণৰড্ঢন ৰত্থযুগং, গন্ধমালঞ্চ সুন্দরং;

অচ্ছাদেত্ৰা ৰিলিম্পেত্ৰা, মণ্ডযিত্ৰা সুরূপকং.

সীসং দুকূলপট্টেন, ৰেঠযিত্ৰা উপানযুং;

অত্তনো পরিহারেন, ভত্তং তস্স অদাপযি.

অত্তনো দসসহস্স-অগ্ঘনসযনং সুভং;

সযনত্থং অদাপেসি, তস্স যোধস্স খত্তিযো.

সো ¶ সব্বং একতো কত্ৰা, নেত্ৰা মাতাপিতন্তিকং;

মাতুযা দসসহস্সং, সযনং পিতুনো অদা.

তংযেৰ রত্তিং আগন্ত্ৰা, রক্খঠানে অদ্দস্সযি;

পভাতে রাজপুত্তো তং, সুত্ৰা তুট্ঠমনো অহু.

দত্ৰা পরিচ্ছদং তস্স, পরিৰারজনং তথা;

দত্ৰা দসসহস্সানী, পেসেসি পিতুসন্তিকং.

যোধো দসসহস্সানি, নেত্ৰা মাতাপিতন্তিকং;

তেসং দত্ৰা কাকৰণ্ণ-তিস্সো রাজা মুপাগমি.

সো গামণিকুমারস্স, তমপ্পেসি মহীপতি;

সক্কতো সুরনিমিলো, যোধো ৰসি তদন্তিকে.

সত্তৰস্সিককালেপি, তালগচ্ছে অলুঞ্চি সো;

দস ৰস্সিককালম্হি, তালে লুঞ্চিমহব্বলো.

গামণিস্স কুমারস্স, অদাসি পোসনত্থিকো;

তেন সো লদ্ধসক্কারো, যোধো ৰসি তদন্তিকে.

গিরিনামে জনপদে, গামে নিচ্ছেলৰিট্ঠিকে;

দসহত্থিবলো আসি, মহানাগস্স অত্রজো.

লকুণ্টকসরীরত্তা, অহু গোট্ঠক নামকো;

করোন্তি কেল়িপরিহাসং, তস্স জেট্ঠা ছ ভাতরো.

তে গন্ত্ৰা মাসখেত্তত্থং, কোট্টযিত্ৰা মহাৰনং;

তস্স ভাগং ঠপেত্ৰান, গন্ত্ৰা তস্স নিৰেদযুং.

সো ¶ গন্ত্ৰা তং খণংযেৰ, রুক্খে ইম্বরসঞ্ঞিতে;

লুঞ্চিত্ৰান সমং কত্ৰা, ভূমিং গন্ত্ৰা নিৰেদযি.

গন্ত্ৰান ভাতরো তস্স, দিস্ৰা কম্মন্ত মব্ভুতং;

তস্স কম্মং কিত্তযন্তা, আগচ্ছিংসু তদন্তিকং.

তদুপাদায সো আসি, গোট্ঠযিম্বরনামকো;

তথেৰ রাজা পাহেসি, তম্বি গামণিসন্তিকং.

কোটিপব্বতসামন্তা, কিত্তিগামম্হি ইস্সরো;

রোহণো নাম গহপতি, জাতং পুত্তকমত্তনো.

সমান নামং কারেসি, গোট্ঠকাহযরাজিনো;

দারকো সো বলী আসি, দসদ্ৰাদসৰস্সিকো.

অসক্কুণেয্যপাসাণে, উদ্ধত্তুং চতুপঞ্চহি;

কীল়মানো খিপি তদা, সো কীল়াগুল়কে ৰিয.

তস্স সোল়সৰস্সস্স, পিতা গদমকারযি;

অট্ঠতিংসঙ্গুলৰট্টং, সোল়সহত্থদীঘকং.

তথেৰ রাজা পাহেসি, তম্পি গামণিসন্তিকে;

উপট্ঠাকো মহাসুম্ম-থেরস্সা’সি পিতা পন.

সো মহাসুম্মথেরস্স, ধম্মং সুত্ৰা কুটুম্বিকো;

সোতাপত্তিফলং পত্তো, ৰিহারে কোল়পব্বতে.

সোতু সঞ্জাতসংৰেগো, আরোচেত্ৰান রাজিনো;

দত্ৰা কুটুম্বং পুত্তস্স, পব্বজি থেরসন্তিকে.

ভাৰনং অনুযুঞ্জিত্ৰা, অরহত্তমপাপুণি;

পুত্তো তেন’স্স পঞ্ঞাযি, থেরপুত্তাভযো ইতি.

কপ্পকন্দরগামম্হি, কুমারস্স সুতো অহু;

ভরণো নাম সো কালে, দসদ্ৰাদসৰস্সিকে.

দারকেহি ¶ ৰনং গন্ত্ৰা’-নুবন্ধিত্ৰা সসে বহূ;

পাদেন পহরিত্ৰান, দ্ৰিখণ্ডং ভূমিযং খিপি.

গামিকেহি ৰনং গন্ত্ৰা, সোল়সৰস্সিকো পন;

তথেৰ পাতেসি লহুং, মিগ গোকণ্ণসূকরে.

গিরিগামে জনপদে, কুটুম্বিযঙ্গণগামকে;

কুটুম্পিৰসভো নাম, অহোসি তত্থ সম্মতো.

ৰেল়ো জনপদো তস্স, সুমনো গিরিভোজকো;

সহাযস্স সুতে জাতে, পণ্ণাকারপুরস্সরা.

গন্ত্ৰা উভো সকং নামং, দারকস্স অকারযুং;

তং ৰুদ্ধং অত্তনো গেহে, ৰাসেসি সিরিভোজকো.

তস্সে’কো সিন্ধৰো পোসং, কঞ্চিনা রোহিতুং অদা;

দিস্ৰা তু ৰেল়ুসুমনং, অযং অরোহকো মম.

সো অস্সং আরুহিত্ৰা তং, সীঘং ধাৰযি মণ্ডলে;

মণ্ডলে সকলে অস্সো, একাবদ্ধো অদিস্সি সো.

নিসীদি ধাৰতো চ’স্স, ৰস্সহারো’ৰ পিট্ঠিযং;

মোচেতিপি উত্তরিযং, বন্ধতিপি অনাদরো.

তং দিস্ৰা পরিসা সব্বা, উক্কুট্ঠিং সম্পৰত্তযি;

দত্ৰা দসসহস্সানি, তস্স সো গিরিভোজকো.

রাজানুচ্ছৰিকো’যংতি, হট্ঠো রঞ্ঞো অদাসি তং;

রাজা তং ৰেল়ুসুমনং, অত্তনোযেৰ সন্তিকে.

কারেত্ৰা ¶ তস্স সক্কারং, ৰাসেসি বহুমানযং;

নকুলনগরকণ্ণিকাযং, গামে মহিন্দ দোণিকে.

অভযস্স’ন্তিমে পুত্তো, দেৰোনামা’সি থামৰা;

ঈসকং পন খঞ্জত্তা, খঞ্জদেৰোতি তং ৰিদুং.

মিগমং গামৰাসীহি, সহ গন্ত্ৰান সো তদা;

মহিসে অনুবন্ধিত্ৰা, মহন্তে উট্ঠিতুট্ঠিতে.

হত্থেন পাদে গণ্হিত্ৰা, ভমেত্ৰা সীসমত্থকে;

অসুম্হ ভূমিং চুণ্ণেতি, তেসং অট্ঠীনি মাণৰো.

তং পৰত্তিং সুণিত্ৰাৰ, খঞ্জদেৰং মহীপতি;

ৰাসেসি আহরাপেত্ৰা, গামণিস্সে’ৰ সন্তিকে.

চিত্তলপব্বতা’সন্নে, গামে কপিট্ঠনামকে;

উপ্পলস্স সুতো আসি, ফুস্সদেৰোতি নামকো.

গন্ত্ৰা সহ কুমারেহি, ৰিহারং সো কুমারকো;

বোধিযা পূজিতং সঙ্খং, আদায ধমিথামসা.

অসনীপাতসদ্দোৰ, সদ্দো তস্স মহা অহু;

উম্মত্তা ৰিয আসুং তে, ভীতা সব্বেপি দারকা.

তেন সো আসি উম্মাদ-ফুস্স দেৰোতি পাকটো;

ধনুসিপ্পং অকারেসি, তস্স ৰংসাগতং পিতা.

সদ্দৰেধি ৰিজ্জুৰেধী, ৰালৰেধী চ সো অহু;

ৰালুকাপুণ্ণসকটং, বদ্ধধম্মসতং তথা.

অসনো দুম্বরমযং, অট্ঠসোল়সঅঙ্গুলং;

তথা অযো লোহমযং, পট্টংদি চতুরঙ্গলি.

নিব্বেধযতিকণ্ণেন, কণ্ডো তেন ৰিসজ্জিতো;

থলে অট্ঠুসভং যাতি, জলে তু উসভং পন.

তং সুণিত্ৰা মহারাজা, পৰত্তিং পিতুসন্তিকা;

তম্পি আণাপযিত্ৰান, গামণিম্হি অৰাসযি.

তুলাধারনগাসন্নে, ৰিহারৰাপি গামকে;

মত্তকুটুম্বিস্স সুতো, অহু ৰসভনামকো.

তং ¶ সুজাতসরীরত্তা, লভিয ৰসভং ৰিদুং;

সো ৰীসতিৰস্সুদ্দেসম্হি, মহাকাযবলো অহু.

আদায সো কতিপযো, পুরিসেযেৰ আরভি;

খেত্তত্থিকো মহাৰাপিং, করোন্তো তং মহব্বলো.

দসহি দ্ৰাদসহি ৰা, ৰহিতব্বে ধুরেহিপি;

ৰহন্তো পংসুপিণ্ডে সো, লহুং ৰাপিং সমাপযি.

তেন সো পাকটো আসি, তম্পি আদায ভূমিপো;

দত্ৰা তং তস্স সক্কারং, গামণিস্স অদাসি তং.

ৰসভোদকৰারোতি, কং খেত্তং পাকটং অহু;

এৰং লভিযাৰসভো, ৰসি গামণিসন্তিকে.

মহাযোধানমেতেসং, দসন্নম্পি মহিপতি;

পুত্তস্স সক্কারসমং, সক্কারং কারযি তদা.

আমন্তেত্ৰা মহাযোধে, দসাপি চ দিসম্পতি;

‘‘যোধে দসদসে’কেকো, এসথা’তি উদাহরি.

তে তথেৰা’নযুং যোধে, তেসম্পাহ মহীপতি;

তস্স যোধসহস্সাপি, তথেৰ পরিযেসিতুং.

তথা তেপা’নযুং যোধে, তেসম্পাহং মহীপতি;

পুনযোধসহস্সস্স, তথেৰ পরিযেসিতুং.

তথা তেপা’নযুং যোধে, সব্বে সম্পিণ্ডিতা তু তে;

একাদসসহস্সানি, যোধাসতং তথা দস.

সব্বে তে লদ্ধসক্কারা, ভূমিপালেন সব্বদা;

গামণিং রাজপুত্তং তং, ৰসিংসু পরিৰারিয.

সুজনপ্পসাদসংৰেগত্থায কতে মহাৰংসে

হত্থস্স ¶ থরুকম্মস্স, কুসলো কতুপাসনো;

সো গামণিরাজসুতো, মহাগামে ৰসী তদা.

রাজা রাজসুতং তিস্সং, দীঘৰাপিম্হি ৰাসযি;

আরক্খিতুং জনপদং, সম্পন্ন বলৰাহনং.

কুমারো গামণিকালে, সম্পস্সন্তো বলং সকং;

‘‘যুজ্ঝিস্সং দমিল়েহী’’তি, পিতুরঞ্ঞো কথাপযী.

রাজা তং অনুরক্খন্তো, ‘‘ওরগঙ্গং অলং’’ ইতি;

ৰারেসি যাৰততিযং, সো তথেৰ কথাপযী.

পিতা মে পুরিসো হোন্তো, নে’ৰং ৰক্খতি তেনি’দং;

পিলন্ধতূতি পেসেসি, ইত্থালঙ্কারমস্স সো.

রাজা’হ তস্স কুজ্ঝিত্ৰা, ‘‘করোথ হেমসঙ্খলিং;

তায তং বন্ধযিস্সামি, না’ঞ্ঞথা রক্খিযো হি সো.

পলাযিত্ৰান মলযং, কুজ্ঝিত্ৰা পিতুনো অগা;

দুট্ঠত্তাযেৰ পিতরি, আহু তং দুট্ঠগামণি.

রাজা’থ আরভী কাতুং, মহামঙ্গলচেতিযং;

নিট্ঠিতে চেতিযে সঙ্ঘং, সন্নিপাতযি ভূপতি.

দ্ৰাদসা’সুং সহস্সানি, ভিক্খূ চিত্তলপব্বতা;

ততো ততো দ্ৰাদসেৰ, সহস্সানি সমাগমুং.

কত্ৰান চেতিযমহং, রাজা সঙ্ঘস্স সম্মুখা;

সব্বে যোধে সমানেত্ৰা, কারেসি সপথং তদা.

‘‘পুত্তানং কলহট্ঠানং, ন গচ্ছিস্সাম নো’’ইতি;

অকংসু সপথং সব্বে, তং যুদ্ধং তেন নাগমুং.

চতুসট্ঠি ৰিহারে সো, কারাপেত্ৰা মহীপতি;

তত্তকানেৰ ৰস্সানি, ঠত্ৰা মরিতহিং তদা.

রঞ্ঞো ¶ সরীরং গাহেত্ৰা, ছন্নযানেন রাজিনি;

নেত্ৰা তিস্স মহারামং, তং সঙ্ঘস্স নিৰেদযি.

সুত্ৰা তিস্সকুমারো তং, আগন্ত্ৰা দীঘৰাপিতো;

সরীরকিচ্চং কারেত্ৰা, সক্কচ্চং পিতুনো সযং.

মাতরং কণ্ডুলং হত্থিং, আদিযিত্ৰা মহব্বলো;

ভাতুভযা দীঘৰাপিং, অগমাসি লহুং ততো.

তং পৰত্তিং নিৰেদেতুং, দুট্ঠগামণি সন্তিকং;

লেখং দত্ৰা ৰিসজ্জেসুং, সচ্চেমচ্চা সমাগতা.

সো গুত্তহালমাগন্ত্ৰা, তত্থ চারে ৰিসজ্জিয;

মহাগামমুপগন্ত্ৰা, সযং রজ্জে’ভিসেচযি.

মাতত্থং কণ্ডূলত্থঞ্চ, ভাতুলেখং ৰিসজ্জযি;

অলদ্ধা যাৰততিযং, যুদ্ধায সমুপাগমি.

অহু দ্ৰিন্নং মহাযুদ্ধং, চূল়ঙ্গণিযপিট্ঠিযং;

তত্থ নেকসহস্সানি, পতিংসু রাজিনো নরা.

রাজা চ তিস্সামচ্চো চ, ৰল়ৰাদীঘুতুনিকা;

তযোযেৰ পলাযিংসু, কুমারো অনুবন্ধিতে.

উভিন্নমন্তরে ভিক্খূ, মন্তযিংসু মহীধরং;

তং দিস্ৰা ‘‘ভিক্খুসঙ্ঘস্স, কম্মং’’ ইতি নিৰত্তি সো.

কপ্পকন্দরনজ্জাসো, জৰমালিতিত্থমাগতো;

রাজা’হ তিস্সমচ্চং তং, ‘‘ছাতজ্ঝত্তা মযং’’ইতি.

সুৰণ্ণসরকে খিত্ত-ভত্তং নীহরিতস্স সো;

সঙ্ঘে দত্ৰা ভুঞ্জনতো, কারেত্ৰা চতুভাগকং.

থেরো পিযঙ্গু দীপট্ঠো, থেরং তত্থ নিযোজযি;

তিস্সং কুটুম্বিকসুতং, সো তত্থ নভসা’গমা.

তস্স তিস্সো করাপত্ত-আদাযা’দাসি রাজিনো;

সঙ্ঘস্স ভাগং সম্ভাগং, রাজা পত্তে খিপাপযি.

সম্ভাগং ¶ খিপি তিস্সো চ, সম্ভাগং ৰল়ৰাপি চ;

ন ইচ্ছিতস্সাভাগঞ্চ, তিস্সো পত্তম্হি পক্খিপি.

ভত্তস্স পুণ্ণপত্তং তং, অদাথেরস্স ভূপতি;

অদা গোতমথেরস্স, সো গন্ত্ৰা নভসা লহুং.

ভিক্খূনং ভুঞ্জমানানং, দত্ৰা আলোপভাগসো;

পঞ্চসতানং সো থেরো, লদ্ধেহি তু তদন্তিকা.

ভাগেহি পত্তং পূরেত্ৰা, আকাসে খিপি রাজিনো;

দিস্ৰা’ গতং গহেত্ৰা তং, তিস্সো ভোজিসি ভূপতিং.

ভুঞ্জিত্ৰান সযঞ্জাপি, ৰল়ৰঞ্চ অভোজযি;

সত্তাহং চুম্বটং কত্ৰা, রাজা পত্তং ৰিসজ্জযি.

গন্ত্ৰান সো মহাগামং, সমাদায বলং পুন;

সট্ঠিসহস্সং যুদ্ধায, গন্ত্ৰা যুজ্ঝি সভাতরা.

রাজা ৰল়ৰমারুয্হ, তিস্সো কণ্ডূল হত্থিনং;

দ্ৰে ভাতরো সমাগঞ্ছুং, যুজ্ঝমানা রণে তদা.

রাজা করিং করিত্ৰ’ন্তো, ৰল়ৰামণ্ডলং অকা;

তথাপি ছিদ্দং নো দিস্ৰা, লঙ্ঘা পেতুং মতিংঅকা.

ৰল়ৰং লঙ্ঘযিত্ৰান, হত্থিনং ভাতিকো’পরি;

তোমরং খিপি চম্মংৰ, যথা ছিজ্জতি পিট্ঠিযং.

অনেকানি সহস্সানি, কুমারস্স নরাতহিং;

পতিংসু যুদ্ধে যুজ্ঝন্তা, ভিজ্জ চেৰ মহব্বলং.

‘‘আরোহকস্স ৰেকল্লা, ইত্থী মং লঙ্ঘযী’’ইতি;

কুদ্ধোকরী তং চালেন্তো, রুক্খমেক মুপাগমি.

কুমারো আরুহী রুক্খং, হত্থী সামিমুপাগমি;

তমারুয্হ পলাযন্তং, কুমারো মনুবন্ধি সো.

পৰিসিত্ৰা ৰিহারং সো, মহাথের ঘরংগতো;

নিপজ্জহেট্ঠা মঞ্চস্স, কুমারো ভাতুনোভযা.

পসারযি মহাথেরো, চীৰরং তত্থ মঞ্চকে;

রাজা অনুপদং গন্ত্ৰা, ‘‘কুহিং তিস্সো’’তি পুচ্ছথ.

‘‘মঞ্চে ¶ তত্থ মহারাজ’’, ইতি থেরো অৰোচ তং;

হেট্ঠা মঞ্চেতি জানিত্ৰা, ততো নিক্খম্ম ভূপতি.

সমন্ততো ৰিহারস্স, রক্খং কারযি তং পন;

পঞ্চকম্হি নিপজ্জেত্ৰা, দত্ৰা উপরি চীৰরং.

মঞ্চপাদেসু গণ্হিত্ৰা, চত্তারো দহরা যতী;

মতভিক্খুনিযামেন, কুমারং বহি নীহরুং.

নীযমানন্তু তং ঞত্ৰা, ইধ মাহ মহীপতি;

‘‘তিস্স ত্ৰং কুলদেৰতানং, সীসে হুত্ৰান নিয্যাসি.

বলক্কারেন গহণং, কুলদেৰেহি নত্থি মে;

গুণং ত্ৰং কুলদেৰানং, সরেয্যাসি কদাচিপি’’.

ততোযেৰ মহাগামং, অগমাসি মহীপতি;

আণাপেসি চ তত্থেৰ, মাতরং মাতুগারৰো.

[ৰস্সানি অট্ঠসট্ঠিংসো, অট্ঠা ধম্মট্ঠমানসো;

অট্ঠসট্ঠিৰিহারে চ, কারাপেসি মহীপতি.]

নিক্খামিতো সো ভিক্খূহি, তিস্সোরাজ সুতো পন;

দীঘৰাপিং ততোযেৰ, অগম’ঞ্ঞতরো ৰিয.

কুমারো গোধগত্তস্স, তিস্সথেরস্স আহ সো;

‘‘সাপরাধো অহং ভন্তে, খমাপেস্সামি ভাতরং.

ৰেয্যাৰচ্চকরা কারং, তিস্সং পঞ্চসতানি চ;

ভিক্খুনমাদিযিত্ৰা সো, থেরো রাজ মুপাগমি.

রাজপুত্তং ঠপেত্ৰান, থেরো সোপান মত্থকে;

সসঙ্ঘো পাৰিসি সদ্ধো, নিসীদাৰিয ভূমিপো.

উপানযী যাগুআদিং, থেরো পত্তং ৰিধেসিসো;

‘‘কিন্তি ৰুত্তো’ব্রৰি তিস্সং, আদায অগতা’’ইতি.

‘‘কুহিং চোরো’’তি ৰুত্তো চ, ঠিতঠানং নিৰেদযি;

ৰিহারদেৰী গন্ত্ৰান, ছাদিযঠাসি পুত্তক.

জনক্খযং ৰিনাযেৰ, কলহো ন ভৰেয্য নো;

রাজা সঙ্ঘস্স দোসেসো, ভংঘে দণ্ডং করিস্সতি.

তত্থেৰ সঙ্ঘমজ্ঝম্হি, নিসিন্নো ভাতরা সহ;

ভুঞ্জিত্ৰা একতোযেৰ, ভিক্খু সঙ্ঘং ৰিসজ্জযি.

সস্সকম্মানি কারেতুং, তিস্সং তত্থেৰ পাহিণি;

সযম্পি ভেরিং চারেত্ৰা, সস্সকম্মানি কারযি.

সুজনপ্পসাদসংৰেগত্থায কতে মহাৰংসে

দুট্ঠগামণিরাজা’থ ¶ , কত্ৰান জনসঙ্গহং;

কুন্তে ধাতুং নিধাপেত্ৰা, সযোগ্গবলৰাহনো.

গন্ত্ৰা তিস্সমহারামং, ৰন্দিত্ৰা সঙ্ঘমব্রৰি;

‘‘পারগঙ্গং গমিস্সামি, জোতেতুং সাসনং অহং.

সক্কাতুং ভিক্খৰো দেথ, অম্হেহি সহগামিনো;

মঙ্গলঞ্চেৰ রক্খা চ, ভিক্খূনং দস্সনং হিনো.

অদাসি দণ্ডকম্মত্থং, সঙ্ঘো পঞ্চসতং যতী;

ভিক্খুসঙ্ঘতমাদায, ততো নিক্খম্ম ভূপতি.

সোধাপেত্ৰান মলযে, ইধাগমনমঞ্জসং;

কণ্ডুলং হত্থিমারুয্হ, যোধেহি পরিৰারিতো.

মহতা বলকাযেন, যুদ্ধায অভিনিক্খমি;

মহাগামেন সম্বদ্ধা, সেনাগা’গুত্তহালকং.

মহিযঙ্গণমাগম্ম, ছত্তং দমিল়মগ্গহী;

ঘাতেত্ৰা দমিল়ে তত্থ, আগন্ত্ৰা অম্বতিত্থকং.

গঙ্গা পরিখাসম্পন্নং, তিত্থম্বদমিল়ং পন;

যুজ্ঝং চতূহি মা সেহি, কতহত্থং মহব্বলং.

মাতরং দস্সযিত্ৰান, তেন লেসেন অগ্গহি;

ততোওরুয্হ দমিল়ে, সত্তরাজে মহব্বলে.

একাহেনেৰ গণ্হিত্ৰা, খেমং কত্ৰা মহব্বলো;

বলস্সা’দা ধনং তেন, খেমারামোতি ৰুচ্চতি.

মহাকোট্ঠন্তরে সোব্ভে, দোণো গৰরমগ্গহী;

হালকোলে ইস্সরিযং, নাল়িসোব্ভম্হি নাল়িকং.

দীঘাভযগল্লকম্হি, গণ্হি দীঘাভযম্পি চ;

কচ্ছিপিট্ঠে কপিসীসং, চতুমাসেন অগ্গহি.

কোটনগরে ¶ কোটঞ্চ, ততো হালৰহাণকং;

ৰহিট্ঠে ৰহিট্ঠদমিল়ং, গামণিম্হি চ গামণিং.

কুম্ভগামম্হি কুম্ভঞ্চ, নন্দিগামম্হি নন্দিকং;

গণ্হি খাণুং খাণুগামে, দ্ৰে তু তম্বুণ্ণমে পন.

মাতুলং ভাগিনেয্যঞ্চ, তম্বউণ্ণমনামকে;

জম্বুচগ্গহী সোসো চ, গামো’হু তং তদৰ্হযো.

‘‘অজানিত্ৰা সকংসেনং, ঘাতেন্তি সজনা’’ ইতি;

সুত্ৰান সচ্চকিরিযং, অকরী তত্থ ভূপতি.

রজ্জসুখায ৰাযামো, নাযং মম কদাচিপি;

সম্বুদ্ধ সাসনস্সেৰ, ঠপনায অযং মম.

তেন সচ্চেন মেসেনা-কাযোপগতভণ্ডিকং;

জালৰণ্ণংৰ হোতূতি, তং তথেৰতদা অহু.

গঙ্গাতীরম্হি দমিল়া, সব্বে ঘাতিতসেসকা;

ৰিজিতং নগরং নাম, সরণত্থায পাৰিসুং.

ফাসুকে অঙ্গণঠানে, খন্ধাৰারং নিৰেসযি;

তং খন্ধাৰার… ঠীতি, নামেনা’হোসি পাকটং.

ৰিজিতনগরগাহত্থং, ৰীমংসন্তো নরাধিপো;

দিস্ৰা’যন্তং নন্দিমিত্তং, ৰিসজ্জাপেসি কণ্ডুলং.

গণ্হিতুং আগতং হত্থিং, নন্দীমিত্তো করেহিতং;

উভো দন্তে পীল়যিত্ৰা, উক্কুটিকং নিসীদযি.

হত্থিনা নন্দিমিত্তো তু, যস্মা যত্থ অযুজ্ঝি সো;

তস্মা তত্থ ততো গামো, হত্থিপোরোতি ৰুচ্চতি.

ৰীমংসিত্ৰা উভো রাজা, ৰিজিতং নগরং অগা;

যোধানং দক্খিণদ্ৰারে, সঙ্গামো আসি ভিংসনো.

পুরত্থিমম্হি দ্ৰারম্হি, সো ৰেল়ুসুমনো পন;

অনেক সঙ্খে দমিল়ে, অস্সারুল়্হে অঘাতযি.

দ্ৰারং থকেসুং দমিল়া, রাজা যোধে ৰিসজ্জযি;

কণ্ণুলো নন্দিমিত্তো চ, সুরনিমিলো চ দক্খিণে.

নগরং তং তিপরিখং, উচ্চপাকার গোপিতং;

অযোকম্মকতদ্ৰারং, অরীহি দুপ্পধংসিযং.

জাণূহি ঠত্ৰা দাঠাহি, ভিন্দিত্ৰান সিলাযুধা;

ইট্ঠকা চেৰ হত্থি সো, অযোদ্ৰারমুপাগমি.

গোপুরট্ঠা তু দমিল়া, খিপিংসু ৰিৰিধা’যুধে;

পক্কং অযোগুল়ঞ্চেৰ, কথিকঞ্চ সিলেসিকং.

পিট্ঠিং খিত্তে সিলেসম্হি, ধূপাযন্তে’থ কণ্ডুলো;

ৰেদনট্টো’দকঠানং, গন্ত্ৰান তত্থ ওগহী.

ন ইদং সুরাপাণং তে, অযোদ্ৰার ৰিঘাটনং;

গচ্ছ দ্ৰারং ৰিঘাটেহি, ইচ্চাহগোট্ঠযিম্বরো.

সো মানং জনযিত্ৰান, কোঞ্চং কত্ৰা গজুত্তমো;

উদকা উট্ঠহিত্ৰান, থলে অট্ঠাসি দপ্পৰা.

হত্থিৰজ্জে ৰিযোজেত্ৰা, সিলেসং ওসধং অকা;

রাজা আরুয্হ হত্থিং তং, কুম্ভে ফুসিযপাণিনা.

‘‘লংকাদীপম্হি সকলে, রজ্জং তে তাত কণ্ডুল;

দম্মী’’তি তং তোসযিত্ৰা, ভোজেত্ৰা ৰরভোজনং.

ৰেঠযিত্ৰা সাটকেন, কারযিত্ৰা সুৰম্মিতং;

সত্তগুণং মাহিসচম্মং, বন্ধেত্ৰা চম্মপিট্ঠিযং.

তস্সো’ পরিতেলচম্মং, দাপেত্ৰা তং ৰিসজ্জযি;

অসনীৰিয গজ্জন্তো, সো গহেত্ৰা’পদ্দৰে সহ.

পদরং ৰিজ্ঝি দাঠাহি, উম্মারং পদসা’হনি;

সদ্ধারবাহং তং দ্ৰারং, ভূমিযং সরৰং পতি.

গোপুরে দব্বসম্ভারং, পতন্তং হত্তিপিট্ঠিযং;

বাহাহি পরিহরিত্ৰান, নন্দীমিত্তো পৰট্টযি.

দিস্ৰান ¶ তস্স কিরিযং, কণ্ডুলো তুট্ঠমানসো;

দাঠাপীঠনৰেরং তং, ছড্ঢেসি পঠমং কতং.

অত্থনো পিট্ঠিতোযেৰ, পৰেসত্থায কণ্ডুলো;

নিৰত্তিত্ৰান ওলোকি, যোধং তত্থ গজুত্তমো.

‘‘হত্থিনাকতমগ্গেন, নপ্পৰেক্খামহং’’ইতি;

নন্দীমিত্তো ৰিচিন্তেত্ৰা, পাকারং হনি বাহুনা.

সো অট্ঠারসহত্থুচ্চো, পতিঅট্ঠুসভো কির;

ওলোকি সুরনিমলং, অনিচ্ছং সোপি তং পথং.

হত্তী গহেত্ৰা রথচক্কং, মিত্তো সকটপঞ্জরং;

নাল়িকেরতরুং গোট্ঠো, নিম্মলো খগ্গমুত্তমং.

তালরুক্খং মহাসোণো, থেরপুত্তো মহাগদং;

ৰিসুং ৰিসুং ৰীথিগতা, দমিল়ে তত্থ চুণ্ণযুং.

ৰিজিতং নগরং ভেত্ৰা, চতুমাসেন খত্তিযো;

তথো গিরিলকং গন্ত্ৰা, গিরিযং দমিল়ং হনি.

গন্ত্ৰা মহেলনগরং, তিমহাপরিখং ততো;

কদম্ব পুপ্ফৰল্লীহি, সমন্তা পরিৰারিতং.

একদ্ৰারং দুপ্পৰেসং, চতুমাসে ৰসং তহিং;

গণ্হি মহেলরাজানং, মন্তযুদ্ধেন ভূমিপো.

ততো’নুরাধনগরং, আগচ্ছন্তো মহীপতি;

খন্ধাৰারং নিৰেসেসি, পরিতোকাসপব্বতং.

মাসম্হি জেট্ঠমূলম্হি, তল়াকং তত্থ কারিয;

জলং কীল়ি তহিং গামো, পোসোননগরৰ্হযো.

তং ¶ যুদ্ধাযাগতং সুত্ৰা, রাজানং দুট্ঠগামণিং;

অমচ্চে সন্নিপাতেত্ৰা, এল়ারো আহ ভূমিপো.

দীঘজত্তুপ্পভুতযো, যোধা এল়াররাজিনো;

‘‘সুৰে যুদ্ধং করিস্সামি’’, ইতি তে নিচ্ছযং করুং.

দুট্ঠগামণিরাজাপি, মন্তেত্ৰা মাতুযা সহ;

তস্সা মতেন কারেসি, দ্ৰত্তিংস বলকোট্ঠকে.

রাজচ্ছত্তধরে তত্থ, ঠপেসি রাজরূপকে;

অব্ভন্তরে কোট্ঠকে তু, সযং অট্ঠাসি ভূপতি.

এল়াররাজা সন্নদ্ধো, মহাপব্বত হত্থিনং;

আরুয্হ অগমা তত্থ, সযোগ্গ বলৰাহনো.

সঙ্গামে ৰত্তমানম্হি, দীঘজত্তু মহব্বলো;

আদায খগ্গফলকং, যুজ্ঝমানো ভযানকো.

হত্থে অট্ঠরসু’গ্গন্ত্ৰা, নভং তং রাজরূপকং;

ছিন্দিত্ৰা অসিনা ভিন্দি, পঠমং বলকোট্ঠকং.

এৰং সেসেপি ভিন্দিত্ৰা, মলকোট্ঠে মহব্বলো;

ঠিতং গামণিরাজেন, বলকোট্ঠমুপাগমি.

যোধো সো সুরনিমলো, গচ্ছন্তং রাজিনো’পরি;

সাৰেত্ৰা অত্তনো নামং, তমক্কোসি মহব্বলো.

ইতরো ‘‘তং ৰধিস্স’’ন্তি, কুদ্ধো আকাসমুগ্গমি;

‘‘ছিন্দা মেতং সফলকং’’, ইতি চিন্তিয সো পন;

ফলকং হনি খগ্গেন, তং মুঞ্চিযি’ তরোসযি.

কপ্পেন্তো মুত্তফলকং, দীঘজত্তু তহিং পতি;

উট্ঠায সূরনিমিলো, পতিতং সত্তিযা’হনি.

সঙ্খং ¶ ধমি ফুস্সদেৰো, সেনা ভিজ্জিত্থ দামিল়ি;

এল়রোপি নিৰত্তিত্থ, ঘাতেসুং দমিল়ে বহূ.

তত্থ ৰাপি জলং আসি, হতানং লোহিতা ৰিলং;

তস্মা কুলত্থৰা পীতি, নামতো ৰিস্সুতং অহু.

চরাপেত্ৰা তহিং ভেরিং, দুট্ঠগামণি ভূপতি;

‘‘ন হনিস্সতু এল়ারং, মংমুঞ্চিয পরো’’ইতি.

সন্নদ্ধো সযমারুয্হ, সন্নদ্ধং কণ্ডুলং করিং;

এল়ারং অনুবন্ধন্তো, দক্খিণদ্ৰারমাগমি.

পুরদক্খিণদ্ৰারম্হি, উভো যুজ্ঝিংসু ভূমিপা;

তোমরং খিপি এল়ারো, গামণি তমৰঞ্চযি.

ৰিজ্ঝাপেসি চ দন্তেহি, তং হত্থিং সকহত্থিনা;

তোমরং খিপি এল়ারং, সহত্থি তত্থ সো পতি.

ততো ৰিজিতসঙ্গামো, সযোগ্গবলৰাহনো;

লংকং একাতপত্তং সো, কত্ৰান পাৰিসি পুরং.

পুরম্হি ভেরিং চারেত্ৰা, সমন্তা যোজনে জনে;

সন্নিপাতিয কারেসি, পূজং এল়াররাজিনো.

তং দেহপতিতঠানে, কূটাগারেন ঝাপযি;

চেতিযং তত্থ কারেসি, পরিহারমদাসি চ.

অজ্জাপি লংকাপতিনো, তং পদেসসমীপগা;

তেনেৰ পরিহারেন, ন ৰাদাপেন্তি তূরিযং.

এৰং দ্ৰত্তিংস দমিল়, রাজানো দুট্ঠগামণি;

গণ্হিত্ৰা একচ্ছত্তেন, লংকারজ্জমকাসি সো.

ৰিজিতে নগরে ভিন্নে, যোধো সো দীঘজত্তুকো;

এল়ারস্স নিৰেদেত্ৰা, ভাগিনেয্যস্স যোধতং.

তস্স হল্লুক নামস্স, ভাগিনেয্যস্স অত্তনো;

পেসযী চাগমত্থায, তস্স সুত্ৰান হল্লুকো.

এল়ারদড্ঢদিৰসা, সত্তমে দিৰসে ইধ;

পুরিসানং সহস্সেহি, সট্ঠিযা সহ ওতরি.

ওতিণ্ণো সো সুণিত্ৰাপি, পতনং তস্স রাজিনো;

‘‘যুজ্ঝিস্সামী’’তি লজ্জায, মহাতিত্থং ইধাগমা.

খন্ধাৰারং ¶ নিৰেসেসি, গামে কোল়ম্বহালকে;

রাজা তস্সা’গমং সুত্ৰা, যুদ্ধায অভিনিক্খমি.

যুদ্ধসন্নহ সন্নদ্ধো, হত্থিমারুয্হ কণ্ডুলং;

হত্থস্স রথযো ধেহি, পন্তীহি চ অনুনকো.

উম্মাদফুস্সো দেৰো সো, দীপে অগ্গধনুগ্গহো;

দসড্ঢাযুধসনদ্ধো, সেসযোধা চ অন্ৰগুং.

পৰত্তে তুমূলে যুদ্ধে, সন্নদ্ধো ভল্লুকো তহিং;

রাজাভিমুখ মাযাসি, নাগরাজা তু কণ্ডুলো.

তং ৰেগমন্দিভাৰত্থং, পচ্চোসক্কি সনিং সনিং;

সেনাপি সদ্ধিং তেনেৰ, পচ্চোসক্কি সনিং সনিং.

রাজাহ ‘‘পুব্বে যুদ্ধেসু, অট্ঠৰীসতিযা অযং;

ন পচ্চোসক্কি কিং এতং, ফুস্সদেৰা’’তি আহ সো.

জযো নো পরমো দেৰ, জযভূমি মযং গজো;

পচ্চোসক্কতি পেক্খন্তো, জযঠানম্হি ঠস্সতি.

নাগো’থ পচ্চোসক্কিত্ৰা, ফুস্সদেৰস্স পস্সতো;

মহাৰিহারসীমন্তে, অট্ঠাসি সুপ্পতিট্ঠিতো.

তত্রট্ঠিতো নাগরাজা, ভল্লুকো দমিল়ো তহিং;

রাজাভিমুখমাগন্ত্ৰা, উপ্পণ্ডেসি মহীপতি.

মুখং পিধায খগ্গেন, রাজা অক্কোসি তং পন;

‘‘রঞ্ঞো মুখম্হি পাতেমি’’, ইতি কণ্ডঞ্চ সো খিপি.

আহচ্চ সো খগ্গতলং, কণ্ডো পপতি ভূমিযং;

‘‘মুখে ৰিদ্ধো’’তি সঞ্ঞায, উক্কট্ঠিং ভল্লুকো অকা.

রঞ্ঞো পচ্ছা নিসিন্নো ভো, ফুস্সদেৰো মহব্বলো;

কণ্ড খিপিমুখে তস্স, ঘট্টেন্তো রাজকুণ্ডলং.

রাজানং পাদতো কত্ৰা, পতমানস্স তস্স তু;

খিপিত্ৰা অপরং কণ্ডং, ৰিজ্ঝিত্ৰা তস্স জণ্ডুকং.

রাজানং সীসতো কত্ৰা, পাতেসী লহুহত্থকো;

ভল্লুকে পতিতে তস্মিং, জযনাদো পৰত্তথ.

ফুস্সদেৰো ¶ তহিংযেৰ, ঞাপেতুং দোস মত্তনো;

কণ্ডৰল্লিং সকং ছেত্ৰা, পসতং লোহিতং সযং.

রধঞ্ঞা দস্সেসি তং দিস্ৰা, রাজা তং পুচ্ছি‘‘কিং’’ইতি;

রাজ দণ্ডো কতো মেতি, সো অৰোচ মহীপতি.

ইতি ৰত্ৰা মহারাজা, কতঞ্ঞু ইধ মাহ চ;

‘‘কণ্ডানুচ্ছৰিকো তুয্হং, সক্কারো হেস্সতে মহা.

ঘাতেত্ৰা দমিল়ে সব্বে, রাজা লদ্ধজযো কতো;

পাসাদ তলমারুয্হ, সীহাসনগতো তহিং.

নাটকামচ্চ মজ্ঝম্হি, ফুস্সদেৰস্স তং সরং;

আণাপেত্ৰা ঠপাপেত্ৰা, পুংখেন উজুকং তলে.

কহাপণেহি কণ্ডং তং, আসিত্তে’যু পরূপরি;

ছাদাপেত্ৰা দাপেসি, ফুস্সদেৰস্স তং খণে.

নরিন্দপাসাদতলে, নরিন্দোথ অলঙ্কতে;

সুগন্ধদীপুজ্জলিতে, নানাগন্ধসমাযুতে.

নাটক জনযোগেন, অচ্ছরাহি চ ভূসিতে;

অনগ্ঘত্থরণত্থিণ্ণে, মুদুকে সযনে সুভে.

সযিতো সিরিসম্পত্তিং, মহতিং অপিপেক্খিয;

কতং অক্খোভিণিঘাতং, সরন্তো ন সুখং লভি.

যিযঙ্গুদীপে অরহন্তো, ঞত্ৰা তং তস্সতক্কিতং;

অট্ঠা’রহন্তে পাহেসুং, তমস্সাসেতুমিস্সরং.

আগম্ম তে মজ্ঝাযামে, রাজ দ্ৰারম্হি ওতরুং;

নিৰেদি তব্ভাগমনা, পাসাদ তলেমারুহুং.

ৰন্দিত্ৰা ¶ তে মহারাজ, নিসীদাপিয আসনে;

কত্ৰা ৰিৰিধসক্কারং, পুচ্ছি আগতকারণং.

পিযঙ্গুদীপে সঙ্ঘেন, পেসিতং মনুজাধিপ;

তমস্সা সযিতুং অম্হে, ইতি রাজা পুনা’হতে.

‘‘কথং নু ভন্তে অস্সাসো, মম হেস্সতি যেন মে;

অক্খোভিণিমহাসেন, ঘাতো কারাপিতো’’ইতি.

‘‘সগ্গমগ্গন্তরাযো চ, নত্থি তে তেন কম্মুনা;

দীযড্ঢমনুজা চে’ত্থ, ঘাতিতা মনুজাধিপ.

সরণেসু ঠিতো একো, পঞ্চসীলেপি চা’পরো;

মিচ্ছাদিট্ঠি চ দুস্সীলো, সেসা পসুসমামতা.

জোতযিস্সসি চেৰ ত্ৰং, বহুধা বুদ্ধসাসনং;

মনোৰিলেখং তস্মা ত্ৰং, ৰিনোদয নরিস্সর.

ইতি ৰুত্তো মহারাজা, তেহি অস্সাসমাগতো;

ৰন্দিত্ৰা তে ৰিসজ্জেত্ৰা, সযিতো পুন চিন্তযি.

ৰিনা সঙ্ঘেন আহারং, মাভুঞ্জেথ কদাচিপি’’;

ইতি মাতাপিতা’হারে, সপিংসু দহরে’ ৰনো.

অদত্ৰা ভিক্খুসঙ্ঘস্স, ভুত্তং অত্থি নুখো ইতি;

অদ্দস পাতরাসম্হি, একং মরিচৰট্টিকং.

সঙ্ঘস্স অট্ঠপেত্ৰাৰ পরিভুত্তং সতিং ৰিনা;

তদত্থং দণ্ডকম্মং মে, কত্তব্বন্তি চ চিন্তযি.

এতে তেনেককোটি ইধ মনুজগণে ঘাতিতে চিন্তযিত্ৰা,

কামানং হেতু এতং মনসি চ কযিরা সাধু আদীনৰং তং;

সব্বেসং ঘাতনিং তং মনসি চ কযিরা’ নিচ্চতং সাধু সাধু,

এৰং দুক্খা পমোক্খং সুভগতি মহৰা পাপুণেয্যা’চীরেনাতি.

সুজনপ্পসাদসংৰেগত্থায কতে মহাৰংসে

একচ্ছত্তং ¶ করিত্ৰান, লংকারজ্জং মহাযসো;

নানন্তরং সংৰিদহি, যোধানং সো যথারহং.

থেরপুত্তাভযো যোধো, দিয্যমানং ন ইচ্ছিতং;

পুচ্ছিতোৰ কিমত্থন্তি, যুদ্ধমত্থীতি অব্রৰি.

একরজ্জে কতে যুদ্ধং, কিনামত্তীতি পুচ্ছিতো;

যুদ্ধং কিলেস চোরেহি, করিস্সামি সুদুজ্জযং.

ইচ্চেৰ মাহ তং রাজা, পুনপ্পুনং নিসেধযি;

পুনপ্পুনং সোযাচিত্ৰা, রঞ্ঞোনুঞ্ঞায পব্বজি.

পব্বজিত্ৰা চ কালেন, অরহত্তমপাপুণি;

পঞ্চখীণাসৰসত-পরিৰাএরা অহোসি চ.

ছত্তমঙ্গল সত্তাহে, গতে গতভযো’ ভযো;

রাজা কতা ভিসেকোৰ, মহতা ৰিভৰেন সো.

তিস্সৰাপি’মগা কীল়-ৰিধিনা সমলঙ্ক তং;

কীল়িতুং অভিসিত্তানং, চারিত্তঞ্চা নুরক্খিতুং.

রঞ্ঞো পরিচ্ছদং সব্বং, উপাযনসতানি চ;

মরিচৰট্টিৰিহারস্স, ঠানম্হি ঠপযিংসু চ.

তত্থেৰ থূপঠানম্হি, সধাতুং কুন্তমুত্তমং;

ঠপেসুং কুন্তধরকা, উজুকং রাজমানুসা.

সহোরোধো মহারাজা, কীল়িত্ৰা সলিলে দিৰা;

সাযমাহং গমিস্সাম, কুন্তং ৰড্ঢেথ ভো’’ইতি.

চালেতুং তং ন সক্খিংসু, কুন্তং রাজাধিকারিকা;

গন্ধামালাহি পূজেসুং, রাজসেনাসমাগতা.

রাজা ¶ মহন্তং অচ্ছেরং, দিস্ৰা তং হট্ঠমানসো;

ৰিধায তত্থ আরক্খং, পৰিসিত্ৰা পুরং ততো.

কুন্তং পরিক্খিপাপেত্ৰা, চেতিযং তত্থ কারযি;

থূপং পরিক্খিপাপেত্ৰা, ৰিহারঞ্চ অকারযি.

তীহি ৰস্সেহি নিঠাসি, ৰিহারো সো নরিস্সরো;

সঙ্ঘং সসন্নিপাতেসি, ৰিহরমহাকারণা.

ভিক্খুনং সতসহস্সানি, তদা ভিক্খুনিযো পন;

নৰুতি চ সহস্সানি, অভৰিংসু সমাগতা.

তস্মিং সমাগমে সঙ্ঘং, ইদমাক মহীপতি;

‘‘সঙ্ঘং ভন্তে ৰিসরিত্ৰা, ভুঞ্জিং মরিচৰট্টিকং.

হস্সে’তং দণ্ডকম্মং মে, ভৰতূতি অকারযি;

সচেতিযং মরিচৰট্টি-ৰিহারং সুমনোহরং.

পতিগ্গণ্হাতু তং সঙ্ঘো, ইতি সো দক্খিণোদকং;

পাতিত্ৰা ভিক্খুসঙ্ঘস্স, ৰিহারং সুমনো অদা.

ৰিহারে তং সমন্তাপি, মহন্তং মণ্ডপং সুভং;

কারেত্ৰা তত্থ সঙ্ঘস্স, মহাদানং পৰত্তযি.

সত্তাহং অন্নপানাদিং, দত্ৰান মনুজাধিপো;

অদা সামণকং সব্বং, পরিক্খারং মহারহং.

অহু সতসহস্সগ্ঘো, পরিক্খারো স আদিকো;

অন্তে সহস্সগ্ঘনকো, সব্ব সঙ্ঘো চ তংলভি.

যুদ্ধে দানে চ সূরেন, সূরিনা রতনত্তযে;

পসন্নামলচিত্তেন, সাসনুজোত নত্থিনা.

রঞ্ঞা ¶ কতঞ্ঞুনা তেন, থূপকারাপনাদিতো;

ৰিহার মহনন্তানি, পূজেতুং রতনত্তযং.

পরিচ্চত্তধনানে’ত্থ, অনগ্ঘানি ৰিমুঞ্চিয;

সেসানি হোন্তি একায, ঊনৰীসতিকোটিযো.

পঞ্ঞাৰিসেস সহিতেহি জনেহি পত্তা;

ইচ্চস্স সারগহণে মতিমাযতেয্যাতি.

সুজনপ্পসাদসংৰেগত্থায কতে মহাৰংসে

ততো রাজা ৰিচিন্তেসি, ৰিস্সুতং সুস্সুতং সুতং;

মহাপঞ্ঞো সদা পুঞ্ঞো, পঞ্ঞায কতনিচ্ছযো.

‘‘দীপপ্পসাদকো থেরো, রাজিনো অয্যকস্স মে;

এৰং কিরাহনত্তা তে, দুট্ঠগামণিভূপতি.

মহাপুঞ্ঞো মহাথূপং, সোণ্ণমালিং মনোরমং;

ৰীসংহত্থসতং উচ্চং, কারেস্সতি অনাগতে.

পুনো উপোসথাগারং, নানারতনমণ্ডিতং;

নৰভূমং করিত্ৰান, লোহপাসাদ মেৰ চ.

ইতি চিন্তিয ভূমিন্দো, লিখিত্ৰেৰং ঠপাপিতং;

পেক্খাপেন্তো রাজগেহে, ঠিতং এৰ করণ্ডকে.

সোৰণ্ণপট্টং লদ্ধান, লেখং তত্থ অৰাচযি;

‘‘চত্তালীসসতং ৰস্সং, অতিক্কম্ম অনাগতে.

কাকৰণ্ণসুতো ¶ দুট্ঠ-গামণিমনুজাধিপো;

ইদঞ্চিদঞ্চ এৰঞ্চ, কারেস্সতী’’তি ৰাচিতং.

সুত্ৰা হট্ঠো উদানেত্ৰা, অপ্পোট্ঠেসি মহীপতি;

ততো পাতো’ৰ গন্ত্ৰান, মহামেঘৰনং সুভং.

সন্নিপাতং কারযিত্ৰা, ভিক্খুসঙ্ঘস্স অব্রৰি;

‘‘ৰিমানতুল্যং পাসাদং, কারযিস্সামি ৰো অহং.

দিব্বং ৰিমানং পেসেত্ৰা, তদা লেখং অদাথ মে’’;

ভিক্খুসঙ্ঘো ৰিসজ্জেসি, অট্ঠ খীণাসৰে তহিং.

কস্সপমুনিনো কালে, অসোকো নাম ব্রাহ্মণো;

অট্ঠ সলাকভত্তানি, সঙ্ঘস্স পরিণামিয.

ভরণিং নাম দাসিং সো, ‘‘নিচ্চং দেহী’’তি অব্রৰি;

দত্ৰা সা তানি সক্কচ্চং, যাৰজীৰং ততো চুতা.

আকাসট্ঠৰিমানম্হি, নিব্বত্তিরুচিরে সুভে;

অচ্ছরানং সহস্সেন, সদা’সি পরিৰারিতা.

তস্সা রতনপাসাদো, দ্ৰাদসযোজনুগ্গতো;

যোজনানং পরিক্খেপো, চত্তালীসঞ্চ অট্ঠ চ.

কূটাগারসহস্সেন, মণ্ডিতো নৰভূমিকো;

সহস্সগব্ভসম্পন্নো, রাজমানো চতুম্মুখো.

সহস্সসঙ্খসংৰুত্তি, সীহপঞ্জর নেত্তৰা;

সকিঙ্কণিকজালায, সজ্জিতো ৰেদিকায চ.

অম্বলট্ঠিকপাসাদো, তস্স মজ্ঝে ঠিতো অহু;

সন্তমতো দিস্সমানো, পগ্গহিতধজাকুলো.

তাৰতিংসঞ্চ গচ্ছন্তা, দিস্ৰা থেরং তমেৰ তে;

হিঙ্গুলেন তদা লেখং, লেখযিত্ৰা পটে ততো.

নিৰত্তিত্ৰান আগন্ত্ৰা, পটং সঙ্ঘস্স দস্সযুং;

সঙ্ঘো পটং গহেত্ৰা তং, পাহেসি রাজসন্তিকং.

তং ¶ দিস্ৰা সুমনো রাজা, আগম্মারাম মুত্তমং;

আলেখতুল্যং কারেসি, লোহপাসাদ মুত্তমং.

কম্মারম্ভনকালেৰ, চতুদ্ৰারম্হি ভোগৰা;

অট্ঠসতসহস্সানি, হিরঞ্ঞানি ঠপাপযি.

পুটসহস্স ৰত্থানি, দ্ৰারে দ্ৰারে ঠপাপযি;

গুল় তেলসক্খরমধু-পুরা চানেক চাটিযো.

‘‘অমূলককম্ম মেত্থ, ন কাতব্ব’’ন্তি ভাসিয;

অগ্ঘাপেত্ৰা কতং কম্মং, তেসং মূলমদাপযি.

হত্থসতং হত্থসতং, আসি একেক পস্সতো;

উচ্চতো তত্তকোযেৰ, পাসাদো হি চতুম্মুখো.

তস্মিং পাসাদ সেট্ঠস্মিং, অহেসুং নৰভূমিযো;

একেকিস্সা ভূমিযা চ, কূটাগারসতানি চ.

কূটাগারানি সব্বানি, সজ্ঝুনা খচিতা ন’যুং;

পৰালৰেদিকা তেসং, নানারতন ভূসিতা.

নানারতন চিত্তানি, তাসং পদুমকানি চ;

সজ্ঝকিংকিণিকাপন্তি-পরিক্খিত্তাৰ তা অহু.

সহস্সং তত্থ পাসাদো, গব্ভা আসুং সুসঙ্খতা;

নানারতন খচিতা, সীহপঞ্জরনেত্তৰা.

নারিৰাহনযানন্তু, সুত্ৰা ৰেস্সৰণস্স সো;

তদা কারমকারেসি, মজ্ঝে রতনমণ্ডপং.

সীহব্যগ্ঘাদিরূপেহি, দেৰতা রূপকেহি চ;

অহু রতনমযোহে’স, থম্ভেহি চ ৰিভূসিতো.

মুত্তাজালপরিক্খেপো, মণ্ডপন্তে সমন্ততো;

পৰালৰেদিকা চেত্থ, পুব্বে ৰুত্তৰিধা অহু.

সত্তরতন চিত্তস্স, ৰেমজ্ঝে মণ্ডপস্স তু;

রুচিরো দন্তপল্লঙ্কো, রম্মো ফলিকসন্থরো.

দন্তমযাপস্সযে’ত্থ, সুৰণ্ণময সূরিযো;

সজ্ঝুমযে চন্দিমা চ, তারা চ মুত্তকা মযা.

নানারতন ¶ পদুমানি, তত্থ তত্থ যথারহং;

জাতকানি চ তত্থেৰ, আসুং সোণ্ণলতন্তরে.

মহগ্ঘপচ্চত্থরণে, পল্লঙ্কে’তি মনোরমে;

মনোহরা’সিট্ঠপিতা, রুচিরং দন্তবীজনী.

পৰালপাদুকা তত্থ, ফলিকম্হি পতিট্ঠিতা;

সেতচ্ছত্তং সজ্ঝুদণ্ডং, পল্লঙ্কো’পরিসোভথ.

সত্তরতন মযানেত্থ, অট্ঠমঙ্গলিকানি চ;

চতুপ্পদানং পন্তী চ, মণিমুত্তন্তরা অহুং.

রজতানঞ্চ ঘণ্টানং, পন্তী ভত্তন্তলম্বিতা;

পাসাদছত্তপল্লঙ্ক-মণ্ডপা’সুং অনগ্ঘিকা.

মহগ্ঘ পঞ্ঞপাপেসি, মঞ্চপীঠং যথারহং;

তথেৰ ভূমত্থরণং, কম্বলঞ্চ মহারহং.

আচাম কুম্ভিসোৰণ্ণা, উলুঙ্কো চ অহু তহিং;

পাসাদ পরিভোগেসু, সেসেসু চ কথা’ ৰকা.

নট্ঠিতে লোহপাসাদে, সো সঙ্ঘং সন্নিপাতযি;

রাজা সঙ্ঘো সন্নিপতি, মরিচৰট্টিমহে ৰিয.

পুথুজ্জনা’ৰ অট্ঠংসু, ভিক্খূ পঠমভূমিযং;

তেপিটকা দুতিযায, সোতাপন্নাদযো পন.

একে ¶ কেযেৰ অট্ঠংসু, ততিযাদীসু ভূমিসু;

অরহন্তো চ অট্ঠংসু, উদ্ধং চতূসু ভূমিসু.

সঙ্ঘস্স দত্ৰা পাসাদং, দক্খিণম্বুপুরস্সরং;

রাজা’দত্থ মহাদানং, সত্তাহং পুব্বকং পিয.

পাসাদ মহচত্তানি, মহাচাগেন রাজিনা;

অনগ্ঘানি ঠপেত্ৰান, অহেসুং তিংসকোটিযো.

সুজনপ্পসাদসংৰেগত্থায কতে মহাৰংসে

ততো সতসহস্সং সো, ৰিস্সজ্জেত্ৰা মহীপতি;

কারাপেসি মহাবোধি-পূজং সুল়ারমুত্তমং.

ততো পুরং পৰিসিন্তো, থূপঠানে নিৰেসিতং;

পস্সিত্ৰান সীলাযূপং, সরিত্ৰা পুব্বকং সুতিং.

‘‘কারেস্সামি মহাথূপং’’, ইতি হট্ঠো মহাতলং;

আরুয্হ রত্তিং ভুঞ্জিত্ৰা, সযিতো ইতি চিন্তযি.

‘‘দমিল়ে ¶ মদ্দমানেন, লোকো’যং পীল়িতো মযা;

ন সক্কা বলিমুদ্ধত্তুং, তং ৰজ্জিয বলিং অহং.

কারযন্তো মহাথূপং, কতং ধম্মেন ইট্ঠিকা;

উপ্পাদেস্সামি ‘‘ইচ্চেৰং, চিন্তযন্তস্স চিন্তিতং.

ছত্তম্হি দেৰতাজানী, ততো কোলাহলং অহু;

দেৰেসু ঞত্ৰা তং সক্কো, ৰিস্সকম্মান মব্রৰি.

‘‘ইট্ঠকত্তং চেতিযস্স, রাজা চিন্তেসি গামণি;

গন্ত্ৰা পুরা যোজনম্হি, গম্ভীর নদী যন্তিকে.

মাপেহি ইট্ঠিকা তত্তং’, ইতি সক্কে ন ভাসিতো;

ৰিস্সকম্মো ইধাগম্ম, মাপেসি তত্থ ইট্ঠিকা.

পভাতে লুদ্দকো তত্থ, সুনখেহি ৰনং অগা;

ৰোধারূপেন দস্সেসি, লুদ্দকং ভুম্মদেৰতা.

লুদ্দকো তং’নুবন্ধন্তো, গন্ত্ৰা দিস্ৰান ইট্ঠকা;

অন্তরহিতায গোধায, ইতি চিধন্তসি সো তহিং.

‘‘কারেতু কামো কির নো, মহাথূপং মহীপতি;

উপাযনমিদং তস্সং’, ইতি গন্ত্ৰা নিৰেদযি.

তস্স তং ৰচনং সুত্ৰা, পিযং জনহি তপ্পিযো;

রাজা কারেসি সক্কারং, মহন্তং তুট্ঠমানসো.

পুরাপুব্বুত্তরে দেসে, যোজনত্তয মত্থকে;

আচার ৰিট্ঠিগামম্হি, সোল়সকরীসে কলে.

সোৰণ্ণ বীজানু’ট্ঠিংসু, ৰিৰিধানি পমাণতো;

ৰিদত্থুক্কট্ঠ মাণানি, অঙ্গুলিমাণা নিহেঠতো.

সুৰণ্ণ পুণ্ণং তং ভূমিং, দিস্ৰা সঙ্গামৰাসিকা;

সুৰণ্ণ পাহিং আদায, গন্ত্ৰা রঞ্ঞো নিৰেদযুং.

পুরাপাচিন পস্সম্হি, সত্ত যোজন মত্থকে;

গঙ্গাপারে তম্বপিট্ঠে, তম্বলোহং সমুট্ঠহি.

তঙ্গামিকা তম্বলোহ-বীজমাদায পাতিযা;

রাজান মুপসঙ্কম্ম, তমত্থঞ্চ নিৰেদযুং.

পুব্বদক্খিণদেসম্হি, পুরতো চতুযোজনে;

সুমন ৰাপি গামম্হি, উট্ঠহিংসু মণীবহূ.

উপল ¶ কুরুৰিন্দেহি, মিস্সকানেৰ গামিকা;

আদায পাতিযাএৰ, গন্ত্ৰা রঞ্ঞো নিৰেদযুং.

পুরতো দক্খিণে পস্সে, অট্ঠযোজনমত্থকে;

অম্বট্ঠ কোললেণম্হি, রজতং উপপজ্জথ.

মলযা সিঙ্গীৰেরাদিং, আনেতুং মলযং গতো.

লেণস্স অৰিদূরম্হি, সকটানিট্ঠ পাপিয;

পতোদাদারুনিচ্ছন্তো, আরুল়্হো তং মহীধরং.

চাটিপ্পমাণ তং তত্থ, পক্কভারেন নামি তং;

দিস্ৰা পন সলট্ঠিঞ্চ, পাসাণট্ঠঞ্চ তং ফলং.

ৰণ্টে তং ৰাসিযা ছেত্ৰা, দস্সাম’গ্গন্তি চিন্তিয;

কালং ঘোসেসি সদ্ধায, চত্তারো’নাসৰাগমুং.

হট্ঠো সো তে’ভিৰাদেত্ৰা, নিসীদাপিয সাদরো;

ৰাসিযা ৰণ্টসামন্তা, তচং ছেত্ৰা অপস্সযং.

মুঞ্জিত্ৰা’ৰাট পুণ্ণং তং, যূসং পত্তেহী আদিয;

চত্তারো যূস পূরেতে, পত্তে তেসমদাসিসো.

তেসং পত্তে গহেত্ৰা সো, পত্তামিঞ্জহি পূরিয;

অদাসি তেসং পক্কামুং, তযো একো নপক্কমি.

রজতং তস্স দস্সেতুং, ওরোহিত্ৰা ততো হি সো;

নিসজ্জ লেণাসন্নম্হি, তামিঞ্জা পরিভুঞ্জথ.

সেসামিঞ্জা ৰাণিজো’পি, ভুঞ্জিত্ৰা যাৰদত্থকং;

ভণ্ডিকায গহেত্ৰান, সেসথেরপদানুগো.

অঞ্জসা ¶ ইমিনা ত্ৰম্পি, গচ্ছ দানী উপাসক;

গন্ত্ৰান থেরং পস্সিত্ৰা, ৰেয্যাৰচ্চ মহাসি চ.

থেরো চ লেণদ্ৰারেন, তস্স মগ্গ অমাপযি;

থেরং ৰন্দিয সো তেন, গচ্ছন্তো লেণমদ্দস.

লেণ দ্ৰারম্হি ঠত্ৰান, পস্সিত্ৰা রজতম্পি সো;

ৰাসিযা আহনিত্ৰান, রজততি ৰিজানিয.

গহেত্ৰেকং সজ্ঝুপিণ্ডং, গন্ত্ৰান সকটন্তিকং;

সকটানি ঠপাপেত্ৰা, সজ্ঝুপিণ্ডং তমাদিয.

লহুং অনুরাধ পুরং, আগম্ম ৰরৰাণিজো;

দস্সেত্ৰা রজতং রঞ্ঞো, তমত্থম্পি নিৰেদযি.

পুরতো পচ্ছিমে পস্সে, পঞ্চযোজন মত্থকে;

উরুৰেলপট্টনে মুত্তা, মহামলক মত্তিযো.

পৰালন্তরিকা সদ্ধিং, সমুদ্দাথলমোক্কমুং;

কেৰট্টা তা সমেক্খিত্ৰা, রাসিং কত্ৰান একতো.

পাতিযা আনযিত্ৰান, মুত্তা সহ পৰালকা;

রাজান মুপসঙ্কম্ম, তমত্থম্পি নিৰেদযুং.

পুরতো উত্তরে পস্সে, সত্ত যোজন মত্থকে;

পেল়িৰাপিক গামস্স, ৰাপিপক্খন্তকন্দরে.

জাযিংসু ৰালুকাপিট্ঠে, চত্তারো উত্তমা মণী;

নীসদ পোতপ্পমাণা, উম্মাপুপ্ফনিভাসুভা.

তে দিস্ৰা সুনখো লুদ্দো, অগন্ত্ৰা রাজসন্তিকং;

‘‘এৰরূপা মণীদিট্ঠো, মযা’’ইতি নিৰেদযি.

ইট্ঠকাদীনি এতানি মহাপুঞ্ঞো মহামতি;

মহাথূপত্থমুপ্পন্না-ন’স্সোসি তদহেৰ সো.

যথানুরূপং সক্কারং, তেসং কত্ৰা সুমানতো;

এতে ৰা রক্খকে কত্ৰা, সব্বানি আহরাপযি.

খেদম্পি ¶ কাযজমসয্হমচিন্তযিত্ৰা,

তস্মা পসন্নমনসো’ৰ করেয্য পুঞ্ঞন্তি.

সুজনপ্পসাদসংৰেগত্থায কতে মহাৰংসে

এৰং সমত্তে সম্ভারে, ৰেসাখপুণ্ণমাসীযং;

পত্তে ৰিসাখনক্খত্তে, মহাথূপত্থমারভি.

হারেত্ৰান তহিং থূপং, থূপঠানমখাণযি;

সত্থহত্থো মহীপালো, থিরী কাতুং মনেকধা.

যোধেহি আহরাপেত্ৰা, গুল়পাসাণকে তহিং;

কূটেহি আহনাপেত্ৰা, পাসাণে চুণ্ণিতে অথ.

চম্মৰনদ্ধ পাদেহি, মহাহত্থীহি মদ্দযি;

ভূমিযা থিরীভাৰত্থং, অত্থানত্থৰিচক্খণো.

আকাস গঙ্গাপতিত-ট্ঠানে সতততিন্তকে;

মত্তিকা সুখুমা তত্থ, সমন্তা তিং সযোজনে.

নৰনীত মত্তিকা’তেসা, সুখুমত্তা পপুচ্চতি;

খীণাসৰা সামণেরা, মত্তিকা আহরুং ততো.

মত্তিকা অত্থরাপেসি, তত্থ পাসাণকোট্টিমে;

ইট্ঠকা অত্থরাপেসি, মত্তিকো পরিইস্সরো.

তস্সো ¶ পরিখরসুধং, কুরুৰিন্দং ততোপরি;

তস্সো পরিঅযোজালং, মরুম্বন্তু ততোপরং.

আহটং সামণেরেহি, হিমৰন্তা সুগন্ধকং;

সন্থরাপেসি ভূমিন্দো, ফল়িকন্তু ততোপরি.

সীলাযো সন্থরাপেসিচ্ছ ফল়িকসন্থরো পরি;

সব্বত্থ মত্তিকাকিচ্চে, নৰনীতৰ্হযা অহু.

নিয্যাসেন কপিট্ঠস্স, সন্নিতেন রসোদকে;

অট্ঠঙ্গুলং বহলএতা, লোহপট্টং সীলোপরি.

মনোসিলাযতিলতে-লসন্নিতায ততো পরি;

সত্তঙ্গুলং সজ্জুপট্টং, সন্থরেসি রথেসভো.

মহাথূপ পতিট্ঠান-ঠানে এৰং মহীপতি;

কারেত্ৰা পরিকম্মানি, ৰিপ্পসন্নেন চেতসা.

আসল়্হী সুক্কপক্খস্স, দিৰসম্হি চতুদ্দসে;

কারেত্ৰা ভিক্খুসঙ্ঘস্স, সন্নিপাতমিদং ৰদি.

মহাচেতিয মত্থায, ভদন্তামঙ্গলিট্ঠকং;

পতিট্ঠাপেস্সং স্ৰে এত্থ, সব্বো সঙ্ঘো সমেতুনো.

বুদ্ধ পূজা পযোগেন, মহাজনহীতত্থিকো;

‘‘মহাজনো’ পোসথিকো, গন্ধমালাদিগণ্হিয.

মহাথূপ পতিট্ঠান-ঠানং যাতু সুৰে’’ইতি;

চেতিয ঠান ভূসায, অমচ্চে চ নিযোজযি.

আণাপিতা নরিন্দেন, মুনিনো পিযগারৰা;

অনেকেহি পকারেহি, তে তং ঠানমলঙ্করুং.

নগরং সকলঞ্চেৰ, মগ্গঞ্চেৰ ইধাগতং;

অনেকেহি পকারেহি, অলঙ্কারযি ভূপতি.

পভাতে চ চতুদ্ৰারে, নগরস্স ঠপাপযি;

নহাপিতে নহাপকে চ, অপ্পকে চ বহূতথা.

ৰত্থানি ¶ গন্ধমালা চ, অন্নানি মধুরানি চ;

মহাজনত্থং ভূমিন্দো, মহাজনহিতে রতো.

পটিযত্তানি এতানি, সাদিযিত্ৰা যথারুচি;

পোরাজানপদাচেৰ থূপঠানমুপাগমুং.

সুমণ্ডিতেহি নেকেহি, ঠানন্তর ৰিধানতো;

আরক্খিতো অমচ্চেহি, যথাঠানং মহীপতি.

সুমণ্ডিতাহি নেকাহি, দেৰকঞ্ঞূপমাহি চ;

নাটকীহি পরিব্বুল়্হো, সুমণ্ডিত পস্সাধিতো.

চত্তালীস সহস্সেহি, নরেহি পরিৰারিতো;

নানা তূরিয সঙ্ঘুট্ঠো, দেৰরাজ ৰিলাসৰা.

মহাথূপ পতিট্ঠানং, ঠানাঠান ৰিচক্খণো;

অপরণ্হে উপাগঞ্ছি, নন্দযন্তো মহাজনং.

অট্ঠুত্তরসহস্সং সো, সাটকানিট্ঠপাপিয;

পুটবদ্ধানি মজ্ঝম্হি, চতুপস্সে ততো পন.

ৰত্থানি রাসীংকারেসি, অনেকানি মহীপতি;

মধুসপ্পি গুল়াদীহি চ, মঙ্গলত্থং ঠপাপযি.

নানাদেসেহিপা’গঞ্ছুং, বহৰো ভিক্খৰো ইধ;

ইধ দীপট্ঠসঙ্ঘস্স, কা কথাৰ ইধাগমে.

থেরো’ সীতি সহস্সানি, ভিক্খূ আদায আগমা;

রাজগহস্স সামন্তা, ইন্দগুত্তো মহাগণী.

সহস্সানি’সিপতনা, ভিক্খূনং দ্ৰাদসা’দিয;

ধম্মসেনো মহাথেরো, চেতিযঠানমাগমা.

সট্ঠিভিক্খুসহস্সানি, আদায ইধমাগমা;

পীযদস্সী মহাথেরো, জেতারাম ৰিহারতো.

ৰেসালী মহাৰনতো, থেরোরু বুদ্ধরক্খিতো;

অট্ঠারস সহস্সানি, ভিক্খূ আদায আগমা.

কোসম্বী ঘোসিতারামা, থেরোরু ধম্মরক্খিতো;

তিংসভিক্খুসহস্সানি, আদায ইধ আগমা.

আদাযুজ্জেনীযং ¶ থেরো, দক্খিণ গিরিতো যতি;

চত্তারীস সহস্সানি, অগোরু সঙ্ঘরক্খিতো.

ভিক্খূনং সতসহস্সং, সট্ঠসহস্সানি চা’দিয;

পুপ্ফপুরে’সোকরামা, থেরো মিত্তিণ্ণ নামকো.

দুৰে সতসহস্সানি, সহস্সানি অসীতি চ;

ভিক্খূ গহেত্ৰানু’ত্তিণ্ণো, থেরো কস্মিরমণ্ডলা.

চত্তারীসত সহস্সানি, সহস্সানি চ সট্ঠি চ;

ভিক্খূ পল্লৰভোগম্হা, মহাদেৰো মহামতী.

যোননগরা’লসন্দাসো, যোন মহাধম্মরক্খিতো;

থেরো তিংস সহস্সানি, ভিক্খূ আদায আগমা.

ৰঞ্ঝাটৰিৰত্তনিযা, সেনাসনা তু উত্তরো;

থেরো সট্ঠিসহস্সানি, ভিক্খূ আদায আগমা.

চিত্তগুত্তো মহাথেরো, বোধিমণ্ডৰিহারতো;

তিংস ভিক্খুসহস্সানি, আদিযিত্ৰা ইধাগমা.

চন্দগুত্তো মহাথেরো, ৰনৰাসপদেসতো;

আগাসীতি সহস্সানি, আদিযিত্ৰা যতী ইধ.

সূরিযগুত্তোমহাথেরো, কেলাসম্হা ৰিহারতো;

ছন্নৰুতি সহস্সানি, ভিক্খূআদায আগমা.

ভিক্খূনং দীপৰাসিনং, আগতানঞ্চ সব্বসো;

গণনায পরিচ্ছেদো, পোরাণেহি ন ভাসিতো.

সমাগতানং সব্বেসং, ভিক্খুনং তং সমাগমে;

ৰুত্তা খীণাসৰাযেৰ, তে ছন্নৰুতিকোটিযো.

তে মহাচেতিযঠানং, পরিৰারেত্ৰা যথারহং;

মজ্ঝে ঠপেত্ৰা ওকাসং, রঞ্ঞো অট্ঠংসু ভিক্খৰো.

পৰিসিত্ৰা তহিং রাজা, ভিক্খুসঙ্ঘং তথা ঠিতং;

দিস্ৰা পসন্নচিত্তেন, ৰন্দিত্ৰা হট্ঠমানসো.

গন্ধমালাহি পূজেত্ৰা, কত্ৰান তিপদক্খিণং;

মজ্ঝে পুণ্ণঘটঠানং, পৰিসিত্ৰা সমঙ্গলং.

সুৰণ্ণখীলে ¶ পটিমুক্কং, পরিব্ভমনদণ্ডকং;

রাজতেন কতং সুদ্ধং, সুদ্ধপীতি বলোদযো.

গাহযিত্ৰা অমচ্চেন, মণ্ডিতেন সুজাতিনা;

অভিমঙ্গলভূতেন, ভূতভূতিপরাযণো.

মহন্তং চেতিযাৰট্টং, কারেতুং কতনিচ্ছযো;

ভমাপযিতু মারদ্ধো, পরিকম্মিত ভূমিযং.

সিদ্ধত্থো নাম নামেন, মহাথেরো মহিদ্ধিকো;

তথাকরোন্তং রাজানং, দীঘদস্সী নিৰারযি.

‘‘এৰং মহন্তং থূপঞ্চ, অযং রাজা’রভিস্সতি;

থূপে অনিট্ঠিতেযেৰ, মরণং অস্স হেস্সতি.

ভৰিস্সতি মহন্তো চ, থূপোদুপ্পটিসঙ্খরো;

ইতি সো নাগতং পস্সং, মহন্তত্তং নিৰারযি.

সঙ্ঘস্স চ অনুঞ্ঞায, থেরো সম্ভাৰনাযচ;

মহন্তং কত্তুকামো’পি, গণ্হিত্ৰা থেরভাসিতং.

থেরস্স উপদেসেন, তস্স রাজা অকারযি;

মজ্ঝিমং চেতিযাৰট্টং, পতিট্ঠাপেতুমিট্ঠিকা.

সোৰণ্ণরজতে চেৰ, ঘটে মজ্ঝেট্ঠপাপযি;

অট্ঠট্ঠ অট্ঠিতুস্সাহো, পরিৰারিয তে পন.

অট্ঠুত্তরসহস্সঞ্চ, ঠপাপেসি নৰে ঘটে;

অট্ঠুত্তরে অট্ঠুত্তরে, ৰত্থানং তু সতে পন.

ইট্ঠিকাপৰরা অট্ঠ, ঠপাপেসি ৰিসুং ৰিসুং;

সম্মতেন অমচ্চেন, ভূসিতেন অনেকধা.

ততো একং গাহযিত্ৰা, নানামঙ্গলসঙ্খতে;

পুরিত্থিমদিসাভাগে, পঠমং মঙ্গলিত্থিকং.

পতিট্ঠাপেসি সক্কচ্চং, মনুঞ্ঞে গন্ধকদ্দমে;

জাতিসুমন পুপ্ফেসু, পূজিতেসু তহিং পন.

অহোসি পুথৰীকম্পো, সেসা সত্তাপি সত্তহি;

পত্তিট্ঠাপেস’ মচ্চেহি, মঙ্গলানি চ কারযি.

এৰং ¶ অসাল়্হমাসস্স, সুক্কপক্খে’ভিসম্মতে;

উপোসথে পন্নরসে, পতিট্ঠাপেসি ইট্ঠিকা.

চতুদ্দিসং ঠিতে তত্থ, মহাথেরে অনাসৰে;

ৰন্দিত্ৰা পূজযিত্ৰা চ, সুপ্পতিতো কমেন সো.

পুব্বুত্তরং দিসং গন্ত্ৰা, পিযদস্সিং অনাসৰং;

ৰন্দিত্ৰান মহাথেরং, অট্ঠাসি তস্স সন্তিকে.

মঙ্গলং তত্থ ৰড্ঢেন্তো, তস্স ধম্মমভাসিসো;

থেরস্স দেসনা তস্স, জনস্সা’হোসি সাত্থিকা.

চত্তালীসসহস্সানং, ধম্মাভিসমযো অহু;

চত্তালীসসহস্সানং, সোতাপত্তিফলং অহু.

সহস্সং সকদাগামি, অনাগামি চ তত্তকা;

সহস্সংযেৰ অরহন্তো, তত্থ’হেসুং গিহীজনা.

অট্ঠারসসহস্সানি, ভিক্খূভিক্খুনিযো পন;

চুদ্দসেৰ সহস্সানি, অরহত্তে পতিট্ঠযুং.

এৰম্পপসন্নমতিমা রতনত্তযম্হি,

লোকত্থসিদ্ধি পরমা ভৰতীতি ঞত্ৰা,

সদ্ধাদিনেকগুণযোগ রতিং করেয্যাতি.

সুজনপ্পসাদসং ৰেগত্থায কতে মহাৰংসে

ৰন্দিত্ৰান ¶ মহারাজা, সব্বং সঙ্ঘং নিমন্তযি;

‘‘যাৰচেতিযনিট্ঠানা, ভিক্খং গণ্হথ মে’’ইতি.

সঙ্ঘো তং নাধিৰাসেসি, অনুপুব্বেন সো পন;

যাৰন্তো যাৰ সত্তাহং, সত্তাহমধিৰাসনং.

অলত্থো’পড্ঢভিক্খূহি, তে লদ্ধা সুমনো’ৰ সো;

অট্ঠারসসু ঠানেসু, থূপঠানসমন্ততো.

মণ্ডপে কারযিত্ৰান, মহাদানং পৰত্তযি;

সত্থাহং তত্থ সঙ্ঘস্স, ততো সঙ্ঘং ৰিস্সজ্জযি.

ততো ভেরিং চরাপেত্ৰা, ইট্ঠকা ৰড্ঢকী লহুং;

সন্নিপাতেসি তে আসুং, পঞ্চমত্তসতানি হি.

কথং করিস্সসি নে’কো, পুচ্ছিতো আহ ভূপতি;

‘‘পেস্সিযানং সতং লদ্ধা, পংসূনং সকটং অহং.

খেপযিস্সামি এক্কা’হং, তং রাজা পটিবাহযি;

ততো উপড্ঢুপড্ঢঞ্চ, পংসূ দ্ৰে অম্মণানি চ.

আহংসু রাজা পটিবাহি, চতুরো তেপি ৰড্ঢকী;

অথেকো পণ্ডিতো ব্যত্তো, ৰড্ঢকী আহ ভূপতিং.

‘‘উদুক্খলে কোট্টযিত্ৰা, অহং সুপ্পেহি ৰট্টিতং;

পিংসাপযিত্ৰা নিসদে, এতং পংসূনমম্মণং.

ইতি ৰুত্তো অনুঞ্ঞাসি, তিণাদিনেত্থনো সিযুং;

চেতিযম্হীতি ভূমিন্দো, ইন্দতুল্যপরক্কমো.

‘‘কং সণ্ঠানং চেতিযং তং, করিস্সসি তুৰং ইতি;

পুচ্ছিতং তংখণংযেৰ, ৰিস্সকম্মো তমাৰিসি.

সোৰণ্ণপাতিং তো যস্স, পুরাপেত্ৰাৰ ৰড্ঢকী;

পাণিনা ৰারিমাদায, ৰারিপিট্ঠিযমাহনী.

ফলিক ¶ লোলসদিসং, মহাফুব্বুল়মুট্ঠহি;

আহী’দিসং করিস্সতি, তুস্সিত্ৰান’স্স ভূপতি.

সহস্সগ্ঘং ৰত্থযুগং, তথা’লঙ্কার পাদুকা;

কহাপনানি দ্ৰাদস-সহস্সানি চ দাপপি.

‘‘ইট্ঠকা আহারাপেস্সং, অপীল়েন্তো কথং নরে’’;

ইতি রাজা ৰিচিন্তেসি, রত্তিংঞত্ৰান তং মরূ.

চেতিযস্স চতুদ্ধারে, আহরিত্ৰান ইট্ঠকা;

রত্তিং রত্তিং ঠপযিংসু, একেকাহপহোনকা.

তং সুত্ৰা সুমনোরাজা, চেতিযে কম্মমারভি;

অমূলমেত্থ কম্মঞ্চ, ন কাতব্বন্তি ঞাপযি.

একেকস্মিং দুৰারস্মিং, ঠপাপেসি কহাপণে;

সোল়সসতসহস্সানি, ৰত্থানিসু বহূনি চ.

ৰিৰিধঞ্চ অলঙ্কারং, খজ্জংভোজ্জং সপানকং;

গন্ধমালাগুল়াদিচ, মুখৰাসকপঞ্চকং.

‘‘যথারুচিতং গণ্হন্তু, কম্মং কত্ৰা যথারুচিং;

তে তথেৰ অপেক্খিত্ৰা, অদংসু রাজকম্মিকা.

থূপকম্মসহাযত্তং, একো ভিক্খুনিকামযং;

মত্তিকাপিণ্ডমাদায, অত্তনা অভিসঙ্খতং.

গন্ত্ৰান চেতিযট্ঠানং, ৰড্ঢেত্ৰা রাজকম্মিকে;

অদাসি তং ৰড্ঢকিস্স, গণ্হন্তোযেৰ জানিসো.

তস্সা কারং ৰিদিত্ৰান, তত্থাহোসি কুতূহলং;

কমেন রাজা সুত্ৰান, আগতো পুচ্ছি ৰড্ঢকী.

দেৰ একেন হত্থেন, পুপ্ফানা’দায ভিক্খৰো;

একেন মত্তিকাপিণ্ডং, দেন্তি ময্হং অহং পন.

অযং আগন্তুকো ভিক্খু, অযং নেৰাসিকো ইতি;

জানামিনেৰা’তি ৰচো, সুত্ৰা রাজাসমপ্পযি.

একোবলত্থং দস্সেতুং, মত্তিকা দাযকং যতিং;

সো বলতস্স দস্সেসি, সো তং রঞ্ঞো নিৰেদযি.

জাতিমকুলকুম্ভেসো ¶ , মহাবোধঙ্গণে তযো;

ঠপাপেত্ৰা বলত্থেন, রাজা দাপেসি ভিক্খুনো.

অজানিত্ৰা পূজযিত্ৰা, ঠিতস্সে’তস্স ভিক্খুনো;

বলত্থো তং নিৰেদেসি, তদা তং জানি সো যতি.

কেলিৰাতে জনপদে, পিযঙ্গল্লনিৰাসিকো;

থেরো চেতিযকম্মস্মিং, সহাযত্তং নিকামযং.

তস্সিত্থিকাৰড্ঢকিস্স, ঞাতকো ইধ আগতো;

তস্সিট্ঠিকা সমত্তেন, ঞাতো কত্ৰান ইট্ঠকং.

কম্মিযেৰড্ঢযিত্ৰান, ৰড্ঢকিস্স অদাসিতং;

সো তং তত্থ নিযোজেসি, কোলাহলমহোসি চ.

রাজা সুত্ৰাৰ’ তং আহ, ‘‘ঞাতুং সক্কা তমিট্ঠিকং’’;

জানন্তোপি ন সক্কাতি, রাজানং আহ ৰড্ঢকী.

বলত্থো তেন তং ঞত্ৰা, রাজানুঞ্ঞাযুপাগতো;

কট্ঠহালপরিৰেণে, থেরং পস্সিয মন্তিয.

থেরস্স মগমনাহঞ্চ, গতিঠানঞ্চ জানিয;

‘‘তুম্হেহি সহ গচ্ছামি, সকং গামং’’ন্তি ভাসিয.

রঞ্ঞো সব্বং নিৰেদেসি, রাজা তস্স অদাপযি;

ৰত্থযুগং সহস্সগ্ঘং, মহগ্ঘং রত্তকম্বলং.

সামণকে পরিক্খারে, বহুকে সক্খরম্পি চ;

সুগন্ধ তেলনাল়িঞ্চ, দাপেত্ৰা অনুসাসিতং.

থেরেন সহ গন্ত্ৰা সো, দিস্সন্তে পিযগল্লকে;

থেরং সীতায ছাযায, সোদকায নিসীদিয.

সক্খরপাণকং দত্ৰা, পাদে তেলেন মক্খিয;

উপাহনানি যোজেত্ৰা, পরিক্খারে উপানযি.

কুলূপগস্স ¶ থেরস্স, গহিতা মে ইমে মযা;

ৰত্থযুগংতু পুত্তস্স, সব্বে তানি দদামি ৰো.

ইতি ৰত্ৰান দত্ৰা তে, গহেত্ৰা গচ্ছতো পন;

ৰন্দিত্ৰা রাজৰচসা, রঞ্ঞো সন্দেসমাহ সো.

মহাথূপে কযিরমানে, সতিযাকম্মকারকা;

অনেকসঙ্খাহি জনা, পসন্না সুগতিং গতা.

চিত্তপ্পসাদমত্তেন, সুগতে গতিউত্তমা;

লব্ভতীতি ৰিদিত্ৰান, থূপপূজং করে বুধো.

এত্থেৰ ভতিযা কম্মং, করিত্ৰা ইত্থিযো দুৰে;

তাৰতিংসম্হি নিব্বত্তা, মহাথূপম্হি নিট্ঠিতে.

আৰজ্জিত্ৰা পুব্বকম্মং, দিট্ঠকম্মফলা উভো;

গন্ধমালা’দিযিত্ৰান, থূপং পূজেতুমাগতা.

গন্ধমালাহি পূজেত্ৰা, চেতিযং অভিৰন্দিসুং;

তস্মিং খণে ভাতিৰঙ্ক-ৰাসী থেরো মহাসিৰো.

রত্তিভাগে মহাথূপং, ৰন্দিস্সামীতি আগতো;

তাদিস্ৰান মহাসত্ত-পণ্ণিরুক্খম পস্সিতো.

অদস্সযিত্ৰা অত্তানং, পস্সং সম্পত্তিমব্ভুতং;

ঠত্ৰা তাসং ৰন্দনায, পরিযোসানে অপুচ্ছিতং.

মহাথূপে কতং কম্মং, তস্স আহংসু দেৰতা;

এৰং তথাগতে হেৰ, পসাদো হি মহপ্ফলো.

পুপ্ফধানত্তযং থূপে, ইট্ঠিকাহি চিতং চিতং;

সমং পথৰিযা কত্ৰা, ইদ্ধিমন্তো’ৰ সীদযুং.

নৰ ৰারে চিতং সব্বং, এৰং ওসীদযিংসু তে;

অথ রাজা ভিক্খুসঙ্ঘ-সন্নিপাত মকারযি.

তত্থাসীতিসহস্সানি ¶ , সন্নিপাতম্হি ভিক্খৰো;

রাজা সঙ্ঘমুপাগম্ম, পূজেত্ৰা অভিৰন্দিয.

ইট্ঠকোসিদনেহেতুং, পুচ্ছি সঙ্ঘো ৰিযাকরি;

‘‘নো সীদনত্থং থূপস্স, ইদ্ধিমন্তেহি ভিক্খূহি.

কতং এতং মহারাজ, ন ইদানি করিস্সতে;

অঞ্ঞথত্তমকত্ৰা তং, মহাথূপং সমাপয.

তং সুত্ৰা সুমনো রাজা, থূপকম্মমকারযি;

পুপ্ফাধানেসু দসসু, ইট্ঠিকা দসকোটিযো.

ভিক্খুসঙ্ঘো সামণেরে, উত্তরং সুমনম্পি চ;

‘‘চেভিয ধাতুগব্ভত্থং, পাসাণে মেঘৰণ্ণকে.

আহরথা’’তি যোজেসি, তে গন্ত্ৰা উত্তরং কুরুং;

অসীতি রতনাযাম, ৰিত্থারে রৰিভাসুরে.

অট্ঠঙ্গুলানি বহলে, গণ্ঠিপুপ্ফনিভে সুভে;

ছমেঘৰণ্ণপাসাণে, আহরিংসু খণেততো.

পুপ্ফধানস্স উপরি, মজ্ঝে একং নিপাতিয;

চতুপস্সম্হি চতুরো, মঞ্জূসং ৰিয যোজিয.

একং পিধানকত্থায, দিসাভাগে পুরত্থিমে;

অদস্সনং করিত্ৰা তে, ঠপযিংসু মহিদ্ধিকা.

মজ্ঝম্হি ধাতুগব্ভস্স, তস্স রাজা অকারযি;

রতনমযং বোধিরুক্খং, সব্বাকারমনোরমং.

অট্ঠারস রতনিকো, খন্ধো সাখাস্স পঞ্চ চ;

পৰালমযমূলো সো, ইন্দনীলে পতিট্ঠিতো.

সুসুদ্ধরজতক্খন্ধো, মণিপত্তেহি সোভিতো;

হেমমযপণ্ডুপত্ত, ফলো পৰাল়অঙ্কুরো.

অথ মঙ্গলিকা তস্স, খন্ধে পুপ্ফলতাপি চ;

চতুপ্পদানং পন্তীধ, হংসপন্তি চ সোভনা.

উদ্ধং চারুৰিতানন্তে, মুত্তা কিং কিণিজালকা;

সুৰণ্ণ ঘণ্টাপন্তীধ, দামানি চ তহিং তহিং.

ৰিতান ¶ চতুকোণম্হি, মুত্তাদামকলাপকো;

নৰসত সহস্সগ্ঘো, একে কো অসিলম্বিতো.

রৰিচন্দতার রূপানি, নানাপদুমকানি চ;

রতনেহি কতানেৰ, ধিতানে অপ্পিতান’যুং.

অট্ঠুত্তরসহস্সানি, ৰত্তানি ৰিৰিধানি চ;

মহগ্ঘনানারঙ্গানি, ৰিতানে লম্বিতান’যুং.

বোধিং পরিক্খিপিত্ৰান, নানারতনৰেদিকা;

মহামলক মুত্তাহি, সন্থারেতু তদন্তরে.

নানারতন পুপ্ফানং, চতুগন্ধূদকস্স চ;

পুণ্ণা পুণ্ণঘটপন্তি, বোধিমূলে কতান’যুং.

বোধি পাচিন পঞ্ঞত্তে, পল্লঙ্কেকোটিঅগ্ঘকে;

সোৰণ্ণ বুদ্ধপটিমং, নিসীদাপেসি ভাসুরং.

সরীরাৰযৰাতস্সা, পটিমায যথারহং;

নানাৰণ্ণেহি রতনেহি, কতা সুরুচিরা অহুং.

মহাব্রহ্মা ঠিতো তত্থ, রাজতচ্ছত্ত ধারকো;

ৰিজযুত্তরসঙ্খেন, সক্কো চ অভিসেকদো.

ৰিণাহত্থো পঞ্চসিখো, কাল়নাগো সনাটিকো;

সহস্সহত্থো মারো চ, সহত্তীসহ কিংকরো.

পাচিনপল্লঙ্কনিভা, তীসু সেসদিসাসু চ;

কোটিকোটিধনগ্ঘা চ, পল্লঙ্কা অত্থতা অহুং.

বোধিং উস্সিসকে কত্ৰা, নানারতনমণ্ডিতং;

কোটি ধনগ্ঘকংযেৰ, পঞ্ঞত্তং সযনং অহু.

সত্তসত্তাহ ঠানেসু, তত্থ তত্থ যথারহং;

অধিকারে অকারেসি, ব্রহ্মযাচনমেৰ চ.

ধম্মচক্কপ্পৰত্তঞ্চ, যসপব্বজনম্পি চ;

ভদ্দৰগ্গিয পব্বজ্জং, জটিলানং দমনম্পি চ.

বিম্বিসারাগমঞ্চাপি ¶ , রাজগেহপ্পৰেসনং;

ৰেল়ুৰনস্সগহনং, অসীতিসাৰকে তথা.

কপিল ৰত্থুগমনং, তথা রতন চঙ্কমং;

রাহুলানন্দপব্বজ্জং, গহণং জেতৰনস্স চ.

অম্বমূলে পাটিহীরং, তাৰতিংসম্হি দেসনং;

দেৰোরোহণপাটিহীরং, থেরপঞ্হসমাগমং.

মহাসময সুত্তন্তং, রাহুলোৰাদমেৰচ;

মহামঙ্গলসুত্তঞ্চ, ধনপালসমাগমং.

আল়ৰকঙ্গুলিমাল, অপলালদমনম্পি চ;

পারাযনকসমিতিং, আযুৰোস্সজ্জনং তথা.

সূকরমদ্দৰগ্গাহং, সিঙ্গীৰণ্ণযুগস্স চ;

পসন্নোদকপানঞ্চ, পরিনিব্বান মেৰ চ.

দেৰমনুস্স পরিদেৰং, থেরেন পাদৰন্দনং;

দহনং অগ্গিনিব্বানং, তত্থ সক্কার মেৰ চ.

ধাতুৰিতঙ্গ দোণেন, পসাদজনকানি চ;

যেভুয্যেন অকারেসি, জাতকানি সুজাতিমা.

ৰেস্সন্তর জাতকন্তু, ৰিত্থারেন অকারযি;

কুসিনাপুরতো যাৰ, বোধিমন্তি তথেৰ চ.

চতুদ্দিসং তে চত্তারো, মহারাজা ঠিতা অহুং;

তেত্তিংসদেৰ পুত্তা চ, বাত্তিংস চ কুমারিযো.

যক্খসেনাপতিঅট্ঠ, ৰীসতি চ ততো পরি;

অঞ্জলীপগ্গহাদেৰা, পুপ্ফপুণ্ণঘটা ততো.

নচ্চকা দেৰতাচেৰ, তূরিযৰাদক দেৰতা;

আদাসগাহকা দেৰা, পুপ্ফসাখা ধরা তথা.

পদুমাদিগাহকা দেৰা, অঞ্ঞে দেৰা চ নেকধা;

রতনগ্ঘিয পন্তি চ, ধম্মচক্কান মেৰ চ.

খগ্গধরাদেৰপন্তি, দেৰাপাতিধরা তথা;

তেসং সীসে পঞ্চহত্থা, গন্ধতেলস্স পূরিতা.

দুকূলৰট্টিকা ¶ পন্তি, সদাপঞ্জলিতা অহু;

ফলিকগ্ঘিযে চতুক্কণ্ণে, একেকো চ মহামণি.

সুৰণ্ণমণি মুত্তানং, রাসিযো ৰজিরস্স চ;

চতুক্কণ্ণেসু চত্তারো, কথা’হেসুং পভস্সরা.

মেদৰণ্ণকপাসাণ, ভিত্তিযংযেৰ উজ্জলা;

ৰিজ্জাতা অপ্পিতা আসুং, ধাতুগব্ভেৰিভূসিতা.

রূপকানেত্তসব্বানি, ধাতুগব্ভে মনোরমে;

ঘনকোট্টি মহেমস্স, কারাপেসি মহীপতি.

কম্মাধিট্ঠাযকো এত্থ, সব্বং সংৰিদহি ইমং;

ইন্দগুত্তো মহাথেরো, ছল়ভিঞ্ঞো মহামতী.

সব্বং রাজিদ্ধিযা এতং, দেৰতানঞ্চ ইদ্ধিযা;

ইদ্ধিযা অরিযানঞ্চ, অসম্বাধং পতিট্ঠিতং.

নিট্ঠন্তং সুগতঞ্চ পূজিযতমং লোকুত্তমং নিত্তমং;

ধাতু তস্স ৰিচুণ্ণিতং জনহিতং আসিংসতা পূজিয;

পুঞ্ঞং তং সমমিচ্চ’চেচ্চ মতিমা সদ্ধাগুণলঙ্কতো;

তিট্ঠন্তং সুগতং ৰিয’স্স মুনিনো ধাতু চ সম্বূজযে.

সুজনপ্পসাদসংৰেগত্থায কতে মহাৰংসে

ধাতুগব্ভম্হি ¶ কম্মানি, নিট্ঠাপেত্ৰা অরিন্দমো;

সন্নিপাতং কারযিত্ৰা, সঙ্ঘস্স ইধমব্রৰি.

ধাতুগব্ভম্হি কম্মানি, মযা নিট্ঠাপি তানি হি;

সুৰে ধাতুং নিধেস্সামি, ভন্তে জানাথ ধাতুযো’’.

ইদং ৰত্ৰা মহারাজা, নগরং পাৰিসী ততো;

ধাতু আহরকং ভিক্খুং, ভিক্খুসঙ্ঘো ৰিচিন্তিয.

সোণুত্তরং নামযতিং, পূজাপরিৰেণৰাসি কং;

ধাতাহরণ কম্মম্হি, ছল়ভিঞ্ঞং নিযোজযি.

চারিকং চরমানম্হি, নাথে লোকহিতাযহি;

নন্দুত্তরো’তি নামেন, গঙ্গাতীরম্হি মাণৰো.

নিমন্তেত্ৰা’ভিসম্বুদ্ধং, সহ সঙ্ঘং অভোজযি;

সত্থাপযোগপট্ঠানে, সসঙ্ঘোনাৰমারুহি.

তত্থ ভদ্দজিথেরো তু, ছল়ভিঞ্ঞো মহিদ্ধিকো;

জলপক্খলিতট্ঠানং, দিস্ৰা ভিক্খূ ইদং ৰদী.

‘‘মহা পনাদভূতেন, মযা ৰুত্তো সুৰণ্ণযো;

পাসাদো পতিতো এত্থ, পঞ্চৰীসতিযোজকো.

তং পাপুণিত্ৰা গঙ্গায, জলং পক্খিলি তং ইধ;

ভিক্খূ অসদ্দহন্তা তং, সত্থুনো তং নিৰেদযুং.

সত্থা’হ ‘‘কঙ্খং ভিক্খুনং, ৰিনোদেহী’’তিসোততো;

ঞাপেতুং ব্রহ্মলোকে’পি, ৰসৰত্তিসমত্থ তং.

ইদ্ধিযা নভমুগ্গন্ত্ৰা, সত্ততালসমে ঠিতো;

দূস্সথূপং ব্রহ্মলোকে, ঠপেত্ৰা ৰড্ঢিতে করে.

ইধা’নেত্ৰা ¶ দস্সযিত্ৰা, জনস্স পুন তং তহিং;

ঠপযিত্ৰা যথাঠানে, ইদ্ধিযা গঙ্গামাগতো.

পাদঙ্গুট্ঠেন পাসাদং, গহেত্ৰা থুপিকাযসো;

উস্সাপেত্ৰান দস্সেত্ৰা, জনস্স খিপি তং তহিং.

নন্দুত্তরো মাণৰকো, দিস্ৰা তং পাটিহারিযং;

পরাযত্তমহং ধাতুং, পহুআনযিতুং সিযং.

ইতি পত্থযি তেনেতং, সঙ্ঘো সোণুত্তরং যতিং;

তস্মিং কম্মে নিযোজেসি, সোল়সৰস্সিকং অপি.

‘‘আহরামি কুতো ধাতুং’’, ইতি সঙ্ঘমপুচ্ছিসো;

কথেসি সঙ্ঘো থেরস্স, তস্স তা ধাতুযো ইতি.

‘‘পরিনিব্বান মঞ্চম্হি, নিপন্নো লোক নাযকো;

ধাতূহিপিলোকহি তং, কাতুং দেৰিন্দ মব্রুৰি.

দেৰিন্দ’ট্ঠসু দোণেসু, মম সারিরধাথুসু;

একং দোণং রামগামে, কোল়িযেহি চ সক্কতং.

নাগলোকং ততো নিতং, ততো নাগেহি সক্কতং;

লংকাদিপে মহাথূপে, নিধানায ভৰিস্সতি.

মহাকস্সপত্থেরোপি, দীঘদস্সী মহাযতি;

ধম্মাসোক নরিন্দেন, ধাতুৰিত্থারকারকো.

রাজগহস্স সামন্তে, রঞ্ঞা অজাতসত্তুনা;

কারাপেন্তো মহাধাতুং, নিধানং সাধু সঙ্খতং.

সত্ত দোণানি ধাতূনং, আহরিত্ৰান কারযি;

রামগামম্হি দোণন্তু, সত্তুচিত্তঞ্ঞুন’গ্গহি.

মহাধাতুনিধানং তং, ধম্মাসোকোপি ভূপতি;

পস্সিত্ৰা অট্ঠমং দোণং, আণাপেতুংমকিং অকা.

মহাথূপে নিধানত্থং, ৰিহিতং তং জিনেনি’তি;

ধম্মাসোকং নিৰারেসুং, তত্থ খিণাসৰাযতি.

রামগামম্হি থূপোতু, গঙ্গাতীরে কতো ততো;

ভিজ্জিগঙ্গায ওঘেন, সোতু ধাতু করণ্ডকো.

সমুদ্দং ¶ পৰিসিত্ৰান, দ্ৰিধা ভিন্নে জলে তহিং;

নানারতনপিট্ঠম্হি, অট্ঠারস্মিং সমাকুলো.

নাগা দিস্ৰা করণ্ডং তং, কাল়নাগস্স রাজিনো;

মঞ্জেরিকনাগভৰনং, উপগম্ম নিৰেদযুং.

দসকোটিসহস্সেহি, গন্ত্ৰা নাগেহি সো তহিং;

ধাতূ তা অভিপূজেন্তো, নেত্ৰান ভৰনং সকং.

সব্বরতনমযং থূপং, তস্সোপরিঘরং তথা;

মাপেত্ৰা সহ নাগেহি, সদা পূজেসি সাদরো.

আরক্খামহতী তত্থ, গন্ত্ৰা ধাতুইধানয;

সুৰে ধাতুনিধানঞ্হি, ভূমিপালো করিস্সতি’’.

ইচ্চেৰং সঙ্ঘৰচনং, সুত্ৰা সাধূতি সো পন;

পত্তব্বকালং পেক্খন্তো, পরিৰেণ মগাসকং.

ভৰিস্সতি সুৰে ধাতু, নিধানন্তি মহীপতি;

চারেসি নগরে ভেরিং, সব্ব কিচ্চং ৰিধায তং.

নগরং সকলঞ্চেৰ, ইধাগামিঞ্চ অঞ্জসং;

অলঙ্কারযি সক্কচ্চং, নগরে চ ৰিভূসযি.

সক্কো দেৰানমিন্দো চ, লংকাদীপমসেসকং;

আমন্তেত্ৰা ৰিস্সকম্মং, অলঙ্কারযিনেকধা.

নগরস্স চতুদ্ৰারে, ৰত্তভত্তংহি নেকধা;

মহাজনোপভোগত্থং, ঠপাপেসি নরাধিপো.

উপোসথে পন্নরসে, অপরন্হে সুমানসো;

পণ্ডিতো রাজকিচ্চেসু, সব্বালঙ্কার মণ্ডিতো.

সব্বাহি নাটকত্থীহি, যোধেহি সাযুধেহি চ;

মহতা চ বলোঘেন, হত্থিৰা জিরথেহি চ.

নানাৰিধৰিভূসেহি, সব্বতো পরিৰারিতো;

আরুয্হ সুরথং অট্ঠা, সুসেত চ সুসিন্ধৰং.

ভূসিতং কণ্ডূলং হত্থিং, কারেত্ৰা পুরতোসুভং;

সুৰণ্ণচঙ্গোটধরো, সোতচ্ছত্তস্স হেট্ঠাতো.

অট্ঠুত্তর ¶ সহস্সানি, নাগরনারিযো সুভা;

সুপুণ্ণঘটভূসাযো, তং রট্ঠং পরিৰারযুং.

নানাপুপ্ফসমুগ্গানি, তথেৰ দণ্ডদীপিকা;

তত্তকা তত্তকা এৰ, ধারযিত্ৰান ইত্থিযো.

অট্ঠুত্তর সহস্সানি, দারকা সমলঙ্কতা;

গহেত্ৰা পরিৰারেসুং, নানাৰণ্ণধজে সুভে.

নানাতূরিযঘোসেহি, অনেকেহি তহিং তহিং;

হত্থসরথসদ্দেহি, ভিজ্জন্তে ৰিয ভূতলে.

যন্তো মহামেঘৰনং, সিরিযা সো মহাযসো;

যন্তে’ৰ নন্দনৰনং, দেৰরাজা অসোভথ.

রঞ্ঞো নিগ্গমনারম্ভে, মহাতূরিয রৰংপুরে;

পরিৰেণে নিসিন্নো’ৰ, সুত্ৰা সোণুত্তরো যতি.

নিমুজ্জিত্ৰা পুথুৰিযা, গন্ত্ৰান নাগমন্দিরং;

নাগরাজস্স পুরতো, তত্থ পাতূরহুলহুং.

ৰুট্ঠায অভিৰাদেত্ৰা, পল্লঙ্কে তং নিৰেসীল;

সক্করিত্ৰান নাগিন্দো, পুচ্ছি আগত দেসকং.

তস্মিং ৰুত্তে অথোপুচ্ছি, থেরাগমনকারণং;

পত্ৰা’ধিকারং সব্বং সো, সঙ্ঘ সন্দেস মব্রুৰি.

মহাথূপে নিধানত্থং, বুদ্ধেন ৰিহিতা ইধ;

তৰ হত্থগতা ধাতু, দেহিতা কির মে তুৰং.

তং সুত্ৰা নাগরাজাসো, অতীৰ দোমনস্সি তো;

‘‘পহূ অযঞ্হি সমণো, বলক্কারেন গণ্হিতুং.

তস্মা অঞ্ঞত্থ নেতব্বা, ধাতুযো’’ইতি চিন্তিয;

তত্থ ঠিতং ভাগিনেয্যং, আকারেন নিৰেদযি.

নামেন ৰাসুলদত্তো, জানিত্ৰা তস্স ইঙ্গিতং;

গন্ত্ৰা তং চেতিযঘরং, গিলিত্ৰান করণ্ডকং.

সিনেরুপাদং ¶ গন্ত্ৰান, কুণ্ডলাৰট্টকোসযি;

তিযোজনসতং দীঘো, ভোগোযোজনৰট্টৰা.

অনেকানি সহস্সানি, মাপেত্ৰান ফণানি চ;

ধূপাযতি পজ্জলতি, সযিত্ৰা সো মহিদ্ধিকো.

অনেকানি সহস্সানি, অত্তনা সদিসে অহি;

মাপযিত্ৰা সযাপেসি, সমন্তা পরিৰারিতে.

বহূ দেৰা চ নাগা চ, ওসরিংসু তহিং তদা;

‘‘যুদ্ধং উভিন্নং নাগানং, পসিস্সাম মযং’’ইতি.

মাতুলো ভাগিনেয্যেন, হটাতা ধাতুযো ইতি;

ঞত্ৰা’নহ থেরং তং, ধাতুনত্থি মে সন্তিকে ইতি.

আদিতোপ্পভুতিথেরো, তাসং ধাতূনমাগমং;

ৰত্ৰান নাগরাজং তং, ‘‘দেহি ধাতূ’’তি অব্রুৰি.

অঞ্ঞথা সঞ্ঞাপেতুং তং, থেরং সো উরগাধিপো;

আদায চেতিয ঘরং, গন্ত্ৰা তং তস্স ৰণ্ণযি.

অনেকধা অনেকেহি, রতনেহি সুসঙ্খতং;

চেতিযং চেতিযঘরং, পস্স ভিক্খু সুনিম্মিতং.

লংকাদীপম্হি সকলে, সব্বানি রতনানিপি;

সোপানন্তে পাটিকম্পি, নাগ্ঘন্ত’ঞ্ঞেসু কা কথা.

মহাসক্কারঠানম্হা, অপ্পসক্কারঠান কং;

ধাতূনং নযনং নাম, নযুত্তং ভিক্খুৰো ইদং.

‘‘সচ্চাভিসমযো নাম, তুম্হাকং হীন ৰিজ্জতি;

সচ্চাভিসমযঠানং, নেতুং যুত্তঞ্হি ধাতুযো’’.

‘‘সংসার দুক্খ মোক্খায, উপ্পজ্জন্তি তথাগতা;

বুদ্ধস্সাযমধিপ্পাযো, তেননেস্সাম ধাতুযো.

ধাতুনিধানং অজ্জে’ৰ, সো হি রাজা করিস্সতি;

তস্মা পপঞ্চমকরিত্ৰা, লহুং মে দেহি ধাতুযো’’.

নাগোআহসচে ভন্তে, তুৰং পস্সসি ধাতুযো;

গহেত্ৰা যাহি তং থেরো, তিক্খত্তুং তং ভণাপিয.

সুখুমং ¶ করং মাপযিত্ৰা, থেরো তত্রঠিতো’ৰসো;

ভাগিনেয্যস্স ৰদনে, হত্থং পক্খিপ্প তাৰদে.

ধাতুকরণ্ডং আদায, ‘‘তিট্ঠ নাগা’’তি ভাসিয;

নিমুজ্জিত্ৰা পথৰিযং, পরিৰেণম্হি উট্ঠহি.

নাগরাজা গতো ভিক্খু, অম্হেহি ৰঞ্চিতো’’ইতি;

ধাতু আনযনত্থায, ভাগিনেয্যস্স পাহিণি.

ভাগিনেয্যো’থ কুচ্ছিম্হি, অপস্সিত্ৰা করণ্ডকং;

পরিদেৰমানো আগন্ত্ৰা, মাতুলস্স নিৰেদযি.

তদা সো নাগরাজাপি, ‘‘ৰঞ্চিতম্হ মযং’’ইতি;

পরিদেৰি নাগা সব্বেপি, পরিদেৰিংসু পীল়িতা.

ভিক্খু নাগস্স ৰিজযে, তুট্ঠা দেৰা সমাগতা;

ধাতুযো পূজযন্তাতা, তেনেৰ সহ আগমুং.

পরিদেৰমানা আগন্ত্ৰা, নাগা সঙ্ঘস্স সন্তিকে;

বহুধা পরিদেৰিংসু, ধাতাহরণ দুক্খিতা.

তেসং সঙ্ঘো’নুকম্পায, থোকং ধাতুমদাপযি;

তে তেন তুট্ঠা গন্ত্ৰান, পূজা ভণ্ডানি আহরুং.

সক্কো রতনপল্লঙ্কং, সোণ্ণচঙ্কোটমেৰ চ;

আদায সহ দেৰেহি, তং ঠানং সমুপাগতো.

থেরস্স উগ্গতঠানে, কারিতে ৰিস্সকম্মুনা;

পতিট্ঠপেত্ৰা পল্লঙ্কং, সুভে রতনমণ্ডপে.

মাতুকরণ্ডমাদায, তস্স থেরস্স হত্থতো;

চঙ্কোটকে ঠপেত্ৰান, পল্লঙ্কে পৰরেঠপি.

ব্রহ্মা ছত্তমধারেসি, সন্তুস্সিতো ৰাল়বীজনিং;

মণিতালৰণ্টং সুযামো, সক্কো সঙ্খং তুসোদকং.

চত্তারো তু মহারাজা, অট্ঠংসু খগ্গপাণিনো;

সমুগ্গহত্থা তেত্তিংস, দেৰপুত্তা মহিদ্ধিকা.

পারিচ্ছত্তক পুপ্ফেহি, পূজযন্তা তহিংঠিতা;

কুমারিযোতু দ্ৰত্তিংস, দণ্ডদীপধরা ঠিতা.

পলাপেত্ৰা ¶ দুট্ঠযক্খে, যক্খসেনাপতি পন;

অট্ঠৰীসতি অট্ঠংসু, আরক্খং কুরুমানকা.

ৰীণং ৰাদযমানো’ৰ, অট্ঠা পঞ্চসিখো তহিং;

রঙ্গভূমিং মাপযিত্ৰা, তিম্পরুতুরিয ঘোসৰা.

অনেকদেৰপুত্তা চ, সাধুগীতপ্পযোজকা;

মহাকাল়ো নাগরাজা, থুযমানো অনেকধা.

দিব্বতূরিযানি ৰজ্জন্তি, দিব্বসংগীতি ৰত্ততি;

দিব্বগন্ধাদিৰস্সানি, ৰস্সপেন্তি চ দেৰতা.

সো ইন্দগুত্তথেরোতু, মারস্স পটিবাহনং;

চক্কৰাল়সমং কত্ৰা, লোহচ্ছত্তমমাপযি.

মাতূনং পুরতো চেৰ, তত্থ তত্থ চ পঞ্চসু;

ঠানেসু গণসজ্ঝাযং, করিংস্ৰ খিলভিক্খৰো.

তত্থা’গমা মহারাজা, পহট্ঠো দুট্ঠগামণি;

সীসেনা’দায আনীতে, চঙ্কোটম্হি সুৰণ্ণযে.

ঠপেত্ৰা ধাতু চঙ্কোটং, পতিট্ঠাপিয আসনে;

ধাতুং পূজীয ৰন্দিত্ৰা, ঠিতো পঞ্চলীকো তহিং.

দিব্বচ্ছত্তাদিকানেত্থ, দিব্বগন্ধাদিকানি চ;

পস্সিত্ৰা দিব্বতূরিযাদি-সদ্দে সুত্ৰা চ খত্তিযো.

অপস্সিত্ৰা ব্রহ্মদেৰো, তুট্ঠো অচ্ছরিযব্ভুতো;

ধাতুছত্তেন পূজেসি, লংকারজ্জে’ভিসিঞ্চি চ.

‘‘দিব্বচ্ছত্তং মানুসঞ্চ, ৰিমুত্তিচ্ছত্তমেৰ চ;

ইতি তিচ্ছিত্তধারিস্স, লোকনাথস্স সত্থুনো.

তিক্খত্তুমেৰ মে রজ্জং, দম্মী’তি হট্ঠমানসো;

তিক্খত্তুমেৰ ধাতূনং, লংকারজ্জমদাসিসো.

পূজযন্তো ধাতুযোতা, দেৰেহি মানুসেহি চ;

সহ চঙ্কোটকেহেৰ, সীসেনাদায খত্তিযো.

ভিক্খুসঙ্ঘ পরিব্যুল়্হো, কত্ৰা থূপং পদক্খিণং;

পাচিনতো আহরিত্ৰা, ধাতুগব্ভম্হি ওতরি.

অরহন্তো ছন্নৰুতি-কোটিযো থূপমুত্তমং;

সমন্তা পরিৰারেত্ৰা, অট্ঠংসু কতপঞ্জলী.

ওতরিত্ৰা ¶ ধাতুগব্ভং, মহগ্ঘে সযনেসুভে;

ঠপেস্সামিতি চিন্তেন্তে, পীতিপুণ্ণনরিস্সরে.

সধাতু ধাতুচঙ্কোটো, উগ্গন্ত্ৰা তস্স সীসতো;

সত্ততালপ্পমাণম্হি, আকাসম্হি ঠিতো ততো.

সযং করণ্ডো ৰিৰরি, উগ্গন্ত্ৰা ধাতুযো ততো;

বুদ্ধৰেসং গহেত্ৰান, লক্খণেব্যঞ্জনুজ্জলং.

গণ্ডম্বমূলে বুদ্ধো’ৰ, যমকং পাটিহারিযং;

অকংসু ধরমানেন, সুগতেন অধিট্ঠিতং.

তং পাটিহারিযং দিস্ৰা, পসন্নেকগ্গমানসা;

দেৰামনুস্সা অরহত্তং, পত্তা দ্ৰাদস কোটিযো.

সেসা ফলত্তযং পত্তা, অতীতা গণনাপথং;

হিত্ৰা’থ বুদ্ধৰেসং তা, করণ্ডম্হি পতিট্ঠযুং.

ততো ওরুয্হ চঙ্কোটো, রঞ্ঞো সীসে পতিট্ঠহি;

সহিন্দগুত্তথেরেন, নাটকীহি চ সো পন.

ধাতুগব্ভংপরিহরং, পত্ৰান সযনং সুভং;

চঙ্কোটং রতনপল্লঙ্কে, ঠপযিত্ৰা জুতিন্ধরো.

ধোৰিত্ৰান পুনোহত্থে, গন্ধৰাসিত ৰারিনা;

চতুজ্জাতিযগন্ধেন, উব্বতেত্ৰা সগারৰো.

করণ্ডং ৰিৰরিত্ৰান, তাগহেত্ৰান ধাতুযো;

ইতি চিন্তযি ভূমিন্দো, মহাজনহিতত্থিকো.

অনাকুলং কেহিচিপি, যদি হেস্সন্তি ধাতুযো;

জনস্স সরণং হুত্ৰা, যদি ঠস্সন্তি ধাতুযো.

সত্থুনিপন্নাকারেন, পরিনিব্বানমঞ্চকে;

নিপজ্জন্তু সুপঞ্ঞত্তে, সযনম্হি মহারহে.

ইতি চিন্তিয সো ধাতূ, ঠপেসি সযনুত্তমে;

তদা কারা ধাতুযো চ, সহিংসু সযনুত্তমে.

আসল়্হীসুক্কপক্খস্স, পন্নরসউপোসথে;

উত্তরাসল়্হনক্খত্তে, এৰং ধাতুপতিট্ঠিতা.

সহ ¶ ধাতুপতিট্ঠানা, অক্খম্পিত্থ মহামহী;

পাটিহীরানিনেকানি, পৰত্তিংসু অনেকধা.

রাজা পসন্নোধাতুতা, সেতচ্ছত্তেন পূজযি;

লংকায রজ্জং সকলং, সত্তাহানি অদাসি চ.

কাযে চ সব্বালঙ্কারং, ধাতুগব্ভম্হি পূজযি;

তথানাটকিযো’মচ্ছা, পরিসা দেৰতাপি চ.

ৰত্থগুল়ঘতাদীনি, দত্ৰা সঙ্ঘস্স ভূপতি;

ভিক্খূহি গণসজ্ঝাযং, কারেত্ৰা’খিলরত্তিযং.

পুনাহনি পুরেভেরিং, চারেসি ‘‘সকলা জনা;

ৰিন্দন্তু ধাতুসত্তাহং, ইমং’’তি জনতাহিতো.

ইন্দগুত্তো মহাথেরো, অদিট্ঠাসি মহিদ্ধিকো;

‘‘ধাতু ৰন্দিতুকামাযে, লংকাদীপম্হি মানুসা.

তঙ্খণংযেৰ আগন্ত্ৰা, ৰন্দিত্ৰা ধাতুযো ইধ;

যথা সকং ঘরং যন্তু’’, তং যথাধিট্ঠিতং অহু.

সো মহাভিক্খুসঙ্ঘস্স, মহারাজা মহাযসো;

মহাদানং পৰত্তেত্ৰা, তং সত্তাহং নিরন্তরং.

আচিক্খিধাতুগব্ভম্হি, কিচ্চং নিঠাপিতং মযা;

ধাতুগব্ভপিধানংতু, সঙ্ঘো জানিতুমরহতি.

সঙ্ঘো তে দ্ৰে সামণেরে, তস্মিং কম্মে নিযোজযি;

পিদহিংসু ধাতুগব্ভং, পাসাণেনা’হটেন তে.

‘‘মালেত্থ মা মিলাযন্তু, গন্ধাসুস্সন্তুমা ইমে;

মা নিব্বাযন্তু দীপাৰ, মা কিঞ্চাপি ৰিৰজ্জতু.

মেদৰণ্ণ ছ পাসাণা, সন্ধিযন্তুনিরন্তরা’’;

ইতি ঘীণাসৰা এত্থ, সব্বমেতং অধিট্ঠযুং.

আণাপেসি মহারাজা, ‘‘যথাসত্তিং মহাজনো;

ধাতুনিধানকানে’ত্থ, করোতূ’’তি হিতত্থিকো.

মহাধাতুনিধানস্স, পিট্ঠিম্হি চ মহাজনো;

অকা সহস্স ধাতুনং, নিধানানি যথাবলং.

পিদহাপিযতং সব্বং, রাজাথূপং সমাপযি;

চতুরস্স চ যঞ্চেত্থ, চেতিযম্হি সমাপযি.

পুঞ্ঞানি ¶ এৰমমলানি সযঞ্চসন্তো,

কুব্বন্তি সব্বৰিভৰুত্তমপত্তি হেতু;

কারেন্তি চাপিহি’খিলা পরিসুদ্ধচিত্তা,

নানাৰিসেসজানতা পরিৰারহেতূ’’তি.

সুজনপ্পসাদ সংৰেগত্থায কতে মহাৰংসে

অনিট্ঠিতে ছত্তকম্মে, সুধাকম্মে চ চেতিযে;

মারণন্তিকরোগেন, রাজা আসি গিলানকো.

তিস্সং পক্কোসযিত্ৰা সো, কনিট্ঠং দীঘৰাপিতো;

‘‘থূপে অনিট্ঠিতং কম্মং, নিট্ঠাপেহীতি অব্রৰি.

ভাতুনো দুব্বলত্তাসো, তুন্নৰাযেহি কারিয;

কঞ্চুকং সুদ্ধৰত্থেহি, তেন ছাদিয চেতিযং.

চিত্তকারেহি কারেসি, ৰেদিকং তত্থ সাধুকং;

পন্তিপুণ্ণঘটানঞ্চ, পঞ্চঙ্গুলকপন্তিকং.

ছত্তাকারেহি কারেসি, ছত্তং ৰেল়ুমযং তথা;

খরপত্তমযে চন্দ-সূরিযে মুদ্ধৰেদিযং.

লাখাকুঙ্কুমকেহে’তং, চিত্তযিত্ৰা সুচিত্তিতং;

রঞ্ঞো নিৰেদযি’’থূপে, কত্তব্বং নিট্ঠিতং’’ইতি.

সিৰিকায নিপজ্জিত্ৰা, ইধাগন্ত্ৰা মহীপতি;

পদক্খিণং করিত্ৰান, সিৰিকাযে’ৰ চেতিযং.

ৰন্দিত্ৰা ¶ দক্খিণদ্ৰারে, সযনে ভূমিসন্থতে;

সযিত্ৰা দক্খিণপস্সেন, সো মহাথূপ মুত্তমং.

সযিত্ৰা ৰামপস্সেস, লোহপাসাদ মুত্তমং;

পস্সন্তো সুমনো আসি, ভিক্খুসঙ্ঘপুরেক্খতো.

গিলানপুচ্ছনত্থায, আগতাহি ততো ততো;

ছন্নৰুতিকোটিযো ভিক্খূ, তস্মিং আসুং সমাগমে.

গণসজ্ঝাযমকরুং, ৰগ্গবন্ধেন ভিক্খৰো;

থেরপুত্তাভযং থেরং, তত্থা’দিস্ৰা মহীপতি.

অট্ঠৰীস মহাযুদ্ধং, যুজ্ঝন্তো অপরাজযং;

যো সো ন পচ্চুদাৰত্তো, মহাযোধো ৰসী মম.

মচ্চুযুদ্ধম্হি সম্পত্তে, দিস্ৰা মঞ্ঞে পরাজযং;

ইদানি সো মং নো পেতি, থেরো থেরপুত্তভযো.

ইতি চিন্তযি সোথেরো, জানিত্ৰা তস্স চিন্তিতং;

করিন্দনদিযা সিসে, ৰসং পঞ্জলিপব্বতে.

পঞ্চখীণাসৰসত-পরিৰারেন ইদ্ধিযা;

নভসাগম্ম রাজানং, অট্ঠাসি পরিৰারিয.

রাজা দিস্ৰা পসন্নো তং, পুরতো চ নিসীদিয;

তুম্হে দসমহাযোধে, গণ্হিত্ৰান পুরে অহং.

যুজ্ঝিং ইদানি একো’ৰ, মচ্চুনা যুদ্ধমারভিং;

মচ্চুসত্তুং পরাজেতুং, ন সক্কোমী’’তি আহ চ.

আহ থেরো ‘‘মহারাজ-মা ভাযি মনুজাধিপ;

কিলেসসত্তুং অজিত্ৰা, অজেয্যো মচ্চুসত্তুকো.

সব্বম্পি সঙ্খারগতং, অৰস্সংযেৰ ভিজ্জতি;

‘‘অনিচ্চা সব্বসঙ্খারা’’, ইতি ৰুত্তংহি সত্থুনা.

লজ্জা সারজ্জরহিতা, বুদ্ধেপে’তি অনিচ্চতা;

তস্মা অনিচ্চা সঙ্খারা, দুক্খা’নত্তাতি চিন্তয.

দুতিযে অত্তাভাৰেপি, ধম্মচ্ছন্দো মহাহিতে;

উপট্ঠিতে দেৰলোকে, হিত্ৰা দিব্বং সুখং তুৰং.

ইধাগম্ম বহুং পুঞ্ঞং, অকাসি চ অনেকধা;

করণম্পেকরজ্জস্স, সাসনুজ্জোতনাযতে.

মহাপুঞ্ঞকতং ¶ পুঞ্ঞং, যাৰজ্জদিৰসা তযা;

সব্বংনুস্সরমেৰং তে, সুখং সজ্জু ভৰিস্সতি.

থেরস্সৰচনং সুত্ৰা, রাজা অত্তমনো অহু;

‘‘অৰস্সযো মচ্চুযুদ্ধেপি, ত্ৰং মে সী’’তি অভাসিতং.

তদা চ আহরাপেত্ৰা, পহট্ঠো পুঞ্ঞ পোত্থকং;

ৰাচেতুং লেখকং আহ, সো তং ৰাচেসি পোত্থকং.

একূনসতৰিহারা, মহারাজেন কারিতা;

একূনৰীসকোটীহি, ৰিহারো মরিচ ৰট্টি চ.

মহাথূপম্হি সেসানি, কারিতানি সুবুদ্ধিনা;

কোটিসহস্সং অগ্ঘন্তি, মহারাজা’’তি ৰাচযি.

‘‘কোট্ঠনামম্হি মলযে, অক্খক্খাযিক ছাতকে;

কুণ্ডলানি মহগ্ঘানি, দুৰে দত্ৰান গণ্হিয.

খীণাসৰানং পঞ্চন্নং, মহাথেরান মুত্তমো;

দিন্নো পসন্নচিত্তেন, কঙ্গুঅম্বিলপিণ্ডকো.

চূল়ঙ্গনিয যুদ্ধম্হি, পরাজিত্ৰা পলাযতা;

কালং ঘোসাপযিত্ৰান, আগতস্স ৰিহাযসা.

খীণাসৰস্স যতিনো, অত্তানমনপেক্খিয;

দিন্নং সরকভত্ত’ন্তি, ৰুত্তে আহ মহীপতি.

ৰিহারমহসত্তাহে, পাসাদস্স মহেতথা;

থূপারম্ভে তু সত্তাহে, তথা ধাতুনিধানকে.

চাতুদ্দিসস্স উভতো, সঙ্ঘস্স উভতো মযা;

মহারহং মহাদানং, অৰিসেসং পৰত্তিতং.

মহাৰেসাখপূজা চ, চতুৰীসতি কারযি;

দীপে সঙ্ঘস্স তিক্খত্তুং, তিচীৰরমদাপযি.

সত্তসত্ত ¶ দিনানেৰ, দীপে রজ্জমহং ইমং;

পঞ্চক্খত্তুং সাসনম্হি, অদাসিং হট্ঠমানসো.

সততং দ্ৰাদসঠানে, সপ্পিনা সুদ্ধৰট্টিযা;

দীপসহস্সং জালেসিং, পূজেন্তো সুগতং অহং.

নিচ্চং অট্ঠারসঠানে, ৰজ্জেহি ৰিহিতং অহং;

গিলান ভত্তভেসজ্জং, গিলানানমদাপযিং.

চতুত্তালীসঠানম্হি, সঙ্খতং মধুপাযসং;

তত্তকেস্ৰেৰ ঠানেসু, তেলুল্লোপকমেৰ চ.

ঘতে পক্কে মহাজাল, পূৰে ঠানম্হি তত্তকে;

তথেৰ সহ ভত্তেহি, নিচ্চ এমৰ অদাপযিং.

উপোসথেসু দিৰসেসু, মাসে মাসে চ অট্ঠসু;

লংকাদীপে ৰিহারেসু, দীপ তেলমদাপযিং.

ধম্মদানং মহন্তন্তি, সুত্ৰা অমিসদানতো;

লোহ পাসাদতো হেট্ঠা, সঙ্ঘমজ্ঝম্হি আসনে.

‘‘ওসারেস্সামি সঙ্ঘস্স, মঙ্গলসুত্ত’’মিচ্চহং;

নিসিন্নো ওসারযিতুং, নাসক্খিং সঙ্ঘগারৰা.

ততোপ্পভুতি লংকায, ৰিহারেসু তহিং তহিং;

ধম্মকথং কথাপেসিং, সক্করিত্ৰান দেসকে.

ধম্মকথিক স্সেকস্স, সপ্পিফাণিতসক্খরং;

নাল়িং নাল়িমদাপেসিং, দাপেসিং চতুরঙ্গুলং.

মুট্ঠিকং যট্ঠিমধুকং, দাপেসিং সাটকদ্ৰযং;

সব্বংপিস্সরিযে দানং, নমে হাসেসি মানসং.

জীৰিতং অনপেক্খিত্ৰা, দুগ্গতেন সতা মযা;

দিন্ন দান দ্ৰযংযেৰ, তং মে হাসেসি মানসং.

তং সুত্ৰা অভযো থেরো, তং দানদ্ৰযমেৰ সো;

রঞ্ঞো চিত্তপ্পসাদত্থং, সং ৰণ্ণেসি অনেকধা.

তেসু পঞ্চসু থেরেসু, কঙ্গুঅম্বিলগাহকো;

মলিয দেৰ মহাথেরো, সুমনকূটম্হি পব্বতে.

নৰন্নং ¶ ভিক্খুসতানং, দত্ৰা তং পরিভুঞ্জি সো;

পথৰীচালকো ধম্ম, সুত্তথেরো তু তং পন.

কল্যাণিকৰিহারম্হি, ভিক্খূনং সংৰিভাজিয;

দসদ্ধস তসঙ্খানং, পরিভোগ মকাসযং.

তলঙ্গর ৰাসিকো ধম্ম, দিন্নত্থেরো পিযঙ্গুকে;

দীপে দসসহস্সানং, দত্ৰান পরিভুঞ্জিতং.

মঙ্গণৰাসিকো খুদ্দ, তিস্সত্থেরো মহিদ্ধিকো;

কেলাসে সট্ঠিসহস্সানং, দত্ৰান পরিভুঞ্জি তং.

মহাব্যগ্ঘো চ থেরো তং, উক্কনগরৰিহারকে;

দত্ৰা সতানং সত্তানং, পরিভোগমকাসযং.

সরকভত্তগাহী তু, থেরো পিযঙ্গুদীপকে;

দ্ৰাদস ভিক্খুসহস্সানং, দত্ৰান পরিভুঞ্জিতং.

ইতি ৰত্ৰা’ভযত্থেরো, রঞ্ঞো হাসেসি মানসং;

রাজা চিত্তং পসাদেত্ৰা, তং থেরং ইধ মব্রুৰি.

‘‘চতুৰীসতিৰস্সানি, সঙ্ঘস্স উপকারকো;

অহ মেৰং হোতু কাযো’পি, সঙ্ঘস্স উপকারকো.

মহাথূপ দস্সনঠানে, সঙ্ঘস্স কম্মমাল়কে;

সরীরং সঙ্ঘদাসস্স, তুম্হে ঝাপেথ মে’’ইতি.

কনিট্ঠং আহ ‘‘ভো তিস্স, মহাথূপে অনিট্ঠিতং;

নিট্ঠাপেহি তুৰং সব্বং, কম্মং সক্কচ্চ সাধুকং.

সাযং পাতো চ পুপ্ফানি, মহাথূপম্হি পূজয;

তিক্খত্তুং উপহারঞ্চ, মহাথূপস্স কারয.

পটিযাদিতঞ্চ যং ৰত্তং, মযা সুগত সাসনে;

সব্বং অপরিহাপেত্ৰা, তাত ৰত্তয তং তুৰং.

সঙ্ঘস্স তাত কিচ্চেসু, মা পমজ্জিত্থ সব্বদা’’;

ইতং তং অনুসাসিত্ৰা, তুণ্হী আসি মহীপতি.

তঙ্খণং ¶ গণসজ্ঝাযং, ভিক্খুসঙ্ঘো অকাসি চ;

দেৰতা ছ রথে চেৰ, ছহি দেৰেহি আনযুং.

যাচুং ৰিসুং ৰিসুং দেৰা, রাজানং তে রথে ঠিতা;

‘‘অম্হাকং দেৰলোকং ত্ৰং, এহি রাজমনোরমং’’.

রাজা তেসং ৰচো সুত্ৰা, ‘‘যাৰ ধম্মং সুণোমহং;

অধিৰাসেথ তাৰা’’তি, হত্থাকারেন ৰারযি.

ৰারেতি গণসজ্ঝায, মীভি মন্ত্ৰান ভিক্খৰো;

সজ্ঝাযং ঠপযুং রাজা, পুচ্ছিতং ঠানকারণং.

‘‘আগমেথা’’তি সঞ্ঞায, দিন্নত্তা’তি ৰদিংসু তে;

রাজা ‘‘নেতং তথা ভন্তে’’, ইতি ৰত্ৰান তং ৰদি.

তং সুত্ৰান জনা কেচি, ‘‘ভীতো মচ্চুভযা অযং;

লালপ্পতী’’তি মঞ্ঞিংসু, তেসং কঙ্খাৰিনোদনং.

কারেতুং অভযত্থেরো, রাজানং এৰমাহ সো;

‘‘জানাপেতুং কথং সক্কা, আনীতা তে রথা’’ইতি.

পুপ্ফদানং খিপাপেসি, রাজ নভসি পণ্ডিতো;

তানি লগ্গানি লম্বিংসু, রথীসাসু ৰিসুং ৰিসুং.

আকাসে লম্বমানানি, তানি দিস্ৰা মহাজনো;

কঙ্খং পটিৰিনোদেসি, রাজা থেরমভাসিতং.

বুদ্ধভাৰায সমযং, ওলোকেন্তো মহাদযো;

মেত্তেয্যো বোধিসত্তো হি, ৰসতে তুসিতে পুরে.

থেরস্স ৰচনং সুত্ৰা, মহারাজা মহামতী;

ওলোকেন্তো মহাথূপং, নিপন্নোৰ নিমীলযি.

চৰিত্ৰা তংখণংযেৰ, তুসিতা অহটে রথে;

নিব্বত্তিত্ৰা ঠিতোযেৰ, দিব্বদেহো অদিস্সথ.

কতস্স ¶ পুঞ্ঞকম্মস্স, ফলং দস্সেতুমত্তনো;

মহাজনস্স দস্সেন্তো, অত্তানং সমলঙ্কতং.

রথট্ঠোযেৰ তিক্খত্তুং, মহাথূপং পদক্খিণং;

কত্ৰান থূপং সঙ্ঘঞ্চ, ৰন্দিত্ৰা তুসিতং অগা.

নাটকিযো ইধাগন্ত্ৰা, মকুটং যত্থ মোচযুং;

‘‘মকুটমুত্তসালা’’তি, এত্থ সালা কতা অহু.

চিতকে ঠপিতে রঞ্ঞে, সরীরম্হি মহাজনো;

যত্থারৰি ‘‘রাৰৰট্টি-সালা’’নাম তহিং অহু.

রঞ্ঞো সরীরং ঝাপেসুং, যস্মিং নিস্সীমমাল়কে;

সো এৰ মাল়কো এত্থ, ৰুচ্চতে ‘‘রাজ মাল়কো’’.

দুট্ঠগামণিরাজা সো, রাজা নামারহো মহা;

মেত্তেয্যস্স ভগৰতো, হেস্সতি অগ্গসাৰকো.

সো সগ্গং সকলে রমি ৰো পযাতি তস্মা,

সপ্পঞ্ঞো স ততরতো ভৰেয্য পুঞ্ঞেতি.

সুজনপ্পসাদসংৰেগত্থায কতে মহাৰংসে

দুট্ঠগামণিরঞ্ঞো ¶ তু, রজ্জেঠিতা জনা অহূ;

সালিরাজকুমারোতি, হস্সাসি ৰিস্সুতো সুতো.

অতীৰ ধঞ্ঞো সো আসি, পুঞ্ঞকম্মরতো সদা;

অতীৰ চারুরুপায, সত্তো চণ্ডালিযা অহু.

অসোকমালাদেৰিংতং, সম্বন্ধং পুব্বজাতিযা;

রূপেনা’তি পিযাযন্তো, সো রজ্জং নেৰকামযি.

দুট্ঠগামণিভাতা’সো, সদ্ধাতিস্সো তদচ্ছযে;

রজ্জং কারেস্সা’ভিসিত্তো, অট্ঠারস্স সমা’সমো.

ছক্ককম্মং সুধাকম্মং, হত্থিপাকারমেৰ চ;

মহাথূপস্স কারেসি, সো সদ্ধাকতনামকো.

দীপেন লোহপাসাদো, উড্ডিয্হিত্থ সুসঙ্খতো;

কারেসি লোহপাসাদং, পুন সো সত্তভূমকং.

নৰুতিসতসহস্সগ্ঘো, পাসাদো আসি সো তদা;

দক্খিণগীরিৰিহারং, কল্লকলেণ মেৰ চ.

কুল়ুম্বালৰিহারঞ্চ, তথাপেত্তঙ্গ ৰালিকং;

ৰেলঙ্গৰট্টিকঞ্চেৰ, দুব্বলৰাপিতিস্সতং.

দুরতিস্সকৰাপিঞ্চ, তথামাতুৰিহারকং;

কারেসি আদীঘৰাপিং, ৰিহারংযোজন যোজনে.

দীঘৰাপিৰিহারঞ্চ, কারেসি সহচেতিযং;

নানারতনকচ্ছন্নং, তত্থ কারেসি চেতিযে.

সন্ধিযং সন্ধিযং তত্থ, রথচক্কপ্পমাণকং;

সোৰণ্ণমালং কারেত্ৰা, লগ্গাপেসি মনোরমং.

চতুরাসীতিসহস্সানং ¶ , ধম্মক্খন্ধানমিস্সরো;

চতুরাসীতিসহস্সানি, পূজাচাপি অকারযি.

এৰং পুঞ্ঞানি কত্ৰা সো, অনেকানি মহীপতি;

কাযস্সভেদা দেৰেসু, তুসিতেসু’পপজ্জথ.

সদ্ধাতিস্সপকারাজে, ৰসন্তে দীঘৰাপিযং;

লজ্জীতিস্সো জেট্ঠসুতো, গিরিকুম্ভিমনামকং.

ৰিহারং কারযি রম্মং, তংকনিট্ঠসুতো পন;

থুল্লত্থনো অকারেসি, ৰিহারং কন্দরৰ্হযং.

পিতরা থুল্লত্থনকো, ভাতুসন্তিকমাযতা;

সহেৰা’হ ৰিহারস্স, সঙ্ঘভোগত্থমত্তনো.

সদ্ধাতিস্সেউপরতে, সব্বে’মচ্চা সমাগতা;

থূপারামে ভিক্খুসঙ্ঘং, সকলং সন্নিপাতিয.

সঙ্ঘানুঞ্ঞাযরট্ঠস্স, রক্খণত্থং কুমারকং;

অভিসিঞ্চুং থুল্লত্থনং, তং সুত্ৰা লজ্জীতিস্সতো.

ইধাগন্ত্ৰা গহেত্ৰা তং, সযং রজ্জমকারযি;

মাসঞ্চেৰ দসাহঞ্চ, রাজা থুল্লত্থনো পন.

তিস্সোসমং লজ্জীতিস্সো, সঙ্ঘো হুত্ৰা অনাদরো;

‘‘ন জানিংসু যথাৰুড্ঢং’’ মীতি তং পরিভাসযি.

পচ্ছা সঙ্ঘং খমাপেত্ৰা, দণ্ডকম্মত্থমিস্সরো;

তীণি সতসহস্সানি, দত্ৰান উরুচেতিযে.

সিলামযানি কারেসি, পুপ্ফযানানি তীণিসো;

অথো সতসহস্সেন, চিতাপেসি চ অন্তরা.

মহাথূপথূপারামানং, ভূমিংভূমিস্সরো সমং;

থূপারামে চ থূপস্স, সিলাকঞ্চুক মুত্তমং.

থূপারামস্স পুরতো, সিলাথূপকমেৰ চ;

লজ্জীকাসনসালঞ্চ, ভিক্খুসঙ্ঘস্স কারযি.

কঞ্চুকং ¶ কণ্টকে থূপে, কারাপেসি সিলামযং;

দত্ৰান সতসহস্সং, ৰিহারে চেতিযৰ্হযে.

গিরিকুম্ভিলনামস্স, ৰিহারস্স মহম্হি সো;

সট্ঠিভিক্খুসহস্সানং, তিচীৰরমদাপযি.

অরিট্ঠৰিহারং কারেসি, তথাকন্দরহিনকং;

গামিকানঞ্চ ভিক্খূনং, ভেসজ্জানি অদাপযি.

কিমিচ্ছকং তণ্ডুলঞ্চ, ভিক্খুনীনমদাপযি;

সমানৰ’ঠমাসঞ্চ, রজ্জং সো কারযী ইধ.

মতে লজ্জিকতিস্সম্হি, কনিট্ঠো তস্স কারযি;

রজ্জং ছল়েৰ ৰস্সানি, খল্লাটনাগনামকো.

লোহপাসাদপরিৰারে, পাসাদে’তি মনোরমে;

লোহপাসাদসোভত্থং, এসো দ্ৰত্তিংসকারযি.

মহাথূপস্স পরিতো, চারুনো হেমমালিনো;

ৰালিকঙ্গণমরিযাদং, পাকারঞ্চ অকারযি.

সোৰকুরুন্দপাসকং, ৰিহারঞ্চ অকারযি;

পুঞ্ঞকম্মানিচঞ্ঞানি, কারাপেসি মহীপতি.

তং মহারত্ততোনাম, সেনাপতি মহীপতিং;

খল্লাটনাগরাজানং, নগরেযেৰ অগ্গহি.

তস্স রঞ্ঞো কনিট্ঠোতু, ৰট্টগামণিনামকো;

তং দুট্ঠসেনাপতিকং, হন্ত্ৰা রজ্জমকারযি.

খল্লাটনাগরঞ্ঞোসো, পুত্তকং সকভাতুনো;

মহাচূলিকনামানং, পুত্তঠানে ঠপেসি চ.

তম্মাতরং নুল়াদেৰিং, মহেসিঞ্চ অকাসিসো;

পীতিঠানে ঠিততা’স্স, পীতিরাজাতি অব্রৰুং.

এৰং রজ্জে’ভিসিত্তস্স, তস্স মাসম্হি পঞ্চমে;

রোহণে নকুলনগরে, একো ব্রাহ্মণচেটতো.

তিযো ¶ নাম ব্রাহ্মণস্স, ৰচো সুত্ৰা অপণ্ডিতো;

চোরো অসু মহাতস্স, পরিৰারো অহোসি চ.

সগণাসত্তদমিল়া, মহাতিত্থম্হি ওতরুং;

তদা ব্রাহ্মণতিযো চ, তে সত্তদমিল়াপিচ.

ছক্কত্থায ৰিসজ্জেসুং, লেখং ভূপতিসন্তিকং;

রাজা ব্রাহ্মণতিযস্স, লেখং পেসেসি নীতিমা.

‘‘রজ্জং তৰ ইদানেৰ, গণ্হ ত্ৰং দমিল়ে’’ ইতি;

সাধূতি সো দমিল়েহি, যুজ্ঝি গণ্হিংসু তে তু তং.

ততো তে দমিল়া যুদ্ধং, রঞ্ঞা সহ পৰত্তযুং;

কোল়ম্বালকসামন্তা, যুদ্ধে রাজা পরাজিতো.

তিত্থারামদুৰারেন, রথারুল়্হো পলাযতি;

পণ্ডুকাভযরাজেন, তিত্থারামোহি কারিতো;

ৰাসিতো চ তদা আসি, একৰীসতি রাজুসূ.

তং দিস্ৰা পলাযন্তং, নিগণ্ঠোগিরিনামকো;

‘‘পলাযতি মহাকাল়-সীহল়ো’’তি ভুসং রৰি.

তং সুত্ৰান মহারাজা, ‘‘সিদ্ধে মম মনোরথে;

ৰিহারং এত্থ কারেস্সং’’, ইচ্চেৰং চিন্তযী তদা.

সগব্ভং অনুলাদেৰিং, অগ্গহী রক্খিযা ইতি;

মহাচূল় মহানাগ-কুমারেচাপী রক্খিযে.

রথস্স লহুভাৰত্থং, ডত্ৰা চূল়ামণিংসুভং;

ওতারেসি সোমদেৰিং, তস্স’নুঞ্ঞায ভূপতি.

যুদ্ধাযগমনেযেৰ, পুত্তকে দ্ৰে চ দেৰিযো;

গাহযিত্ৰান নিক্খন্তো, সঙ্কিতো সো পরাজযে.

অসক্কুণিত্ৰা গাহেতুং, পত্তং ভুত্তং জিনেন তং;

পলাযিত্ৰা ৰেস্সগীরি-ৰনে অভিনিযিযিসো.

কুত্থিক্কুলমহাতিস্স-থেরো দিস্ৰা তহং তু তং;

ভত্তং পাদা অনামট্ঠং, পিণ্ডদানং ৰিৰজ্জিয.

অথ ¶ কেতকিপত্তম্হি, লিখিত্ৰা হট্ঠমানসো;

সঙ্ঘভোগং ৰিহারস্স, তস্স পাদামহীপতি.

ততো গন্ত্ৰা সিলাসোব্ভ-কণ্ডকম্হি ৰসী ততো;

গন্ত্ৰান মাতুৰেলঙ্গে, সালগলসমীপগো.

তত্থদ্দস দিট্ঠপুব্বং, থেরং থেরো মহীপতিং;

উপট্ঠাকস্স অপ্পেসি, তনসিৰস্স সাধুকং.

তস্স সো তনসিৰস্স, রট্ঠিকস্স’ন্তিকে তহিং;

রাজা চুদ্দসৰস্সানি, ৰসী তেন উপট্ঠিতো.

সত্তসু দমীল়েস্ৰে’কো, সোমাদেৰিং মদাৰহং;

রাগরত্তো গহেত্ৰান, পরতীরমগালহুং.

একোপত্তং দসবলস্স, অনুরাধপুরে ঠিতং;

আদায তেন সন্তুট্ঠো, পরতীরমগালহুং.

পুল়হত্থো তু দমিল়ো, তীণিৰস্সানি কারযি;

রজ্জং সেনাপতিং কত্ৰা, দমিল়ং বাহিযৰ্হযং.

পুল়হত্থং গহেত্ৰা তং, দূরে ৰস্সানি বাহীযো;

রজ্জং কারেসি তস্সা’সি, পণযমারো চমূপতি.

বাহীযং তং গহেত্ৰান, রাজা’সি পণযমারকো;

সত্তৰস্সানি তস্সা’সি, পিল়যমারো চমূপতি.

পণযমারং গহেত্ৰা সো, রাজাসি পীল়যমারকো;

সত্তমাসানি তস্সাসি, দাঠিযো তু চমূপতি.

পীল়যমারং গহেত্ৰা সো, দাঠিযো দমিল়ো পন;

রজ্জং’নুরাধনগরে, দুৰে ৰস্সানি কারযি.

এৰং দমিল়রাজূনং, তেসং পঞ্চন্নমেৰহি;

হোন্তি চুদ্দসৰস্সানী, সত্তমাসা চ উত্তরিং.

গতায তু নিৰাসত্থং, মলযে’নুলদেৰিযা;

ভরিযাকনসিৰস্স, পাদাপহরি পচ্ছিযং.

কুজ্ঝিত্ৰা রোদমানাসা, রাজানং উপসকিমি;

তং সুত্ৰা তনসিৰোসো, মনুমাদায নিক্খমি.

দেৰিযা ¶ ৰচনং সুত্ৰা, তস্স আগমনা পুরা;

দ্ৰিপুত্তং দেৰিমাদায, ততো রাজা’পি নিক্খমি.

ধনুং সন্ধায আযন্তং, সীৰং ৰিজ্ঝি মহাসীৰো;

রাজা নামং ভাৰযিত্ৰা, অকাসি জিনসঙ্গহং.

অলত্থ অট্ঠামচ্চেচ, মহন্তে যোধসম্মতে;

পরিৰারো মহাআসী, পরিহারো চ রাজিনো.

কুম্ভীলকমহাতিস্স-থের দিস্ৰা মহাযসো;

অচ্ছগল্লৰিহারম্হি, বুদ্ধপূজমকারযি.

ৰত্থুং সোধেতুমারুল়্হো, অকাসচেতিযঙ্গণং;

কৰিসীসে অমচ্চম্হি, ওরোহন্তোমহীপতি.

আরোহন্তো সদেৰিকো, দিস্ৰা মগ্গে নিসিন্নকং;

‘‘ন নিপন্নো’’তি কুজ্ঝিত্ৰা, কৰিসীসং অঘাতযি.

সেসা সত্তঅমচ্চাৰি, নিব্বিন্না তেন রাজিনা;

তস্স’ন্তিকা পলাযিত্ৰা, পক্কমন্তা যথারুচি.

মগ্গে ৰিলুত্তা চোরেহি, ৰিহারং হম্বুগল্লকং;

পৰিসিত্ৰান অদ্দক্খুং, তিস্সত্থেরং বহুস্সুতং.

চতুনেকাযিকো থেরো, যথালদ্ধানি দাপযি;

ৰত্থফাণিততেলানি, তণ্ডুলা পাহুণা তথা.

‘‘কারেতুং কেহি সক্কা নু, জিনসাসনপগ্গহং;

দমিল়েহি ৰা’থ রঞ্ঞা, ইতি পুট্ঠা তু তে পন.

‘‘রঞ্ঞো সক্কা’’তি আহংসু, সঞ্ঞাপেত্ৰান তে ইতি;

উভো তিস্স মহাতিস্স-থেরা আদায তে ততো.

রাজিনো সন্তিকং নেত্ৰা, অঞ্ঞমঞ্ঞং খমাপযুং;

রাজা চ তে অমচ্চা চ, থেরো এৰ মযাচযুং.

সিদ্ধে ¶ কম্মে পেসিতেনো, গন্তব্বং সন্তিকং ইতি;

থেরা দত্ৰা পটিঞ্ঞং তে, যথাঠানমগঞ্ছিসুং.

অনুরাধপুরং রাজা, আগন্ত্ৰান মহাযসো;

দাঠিকং দমিল়ং হন্ত্ৰা, সযং রজ্জমকারযি.

ততো নিগণ্ঠারামং তং, ৰিদ্ধংসেত্ৰা মহীপতি;

ৰিহারং কারযি তত্থ, দ্ৰাদস পরিৰেণকং.

মহাৰিহারপট্ঠানা, দ্ৰীসু ৰস্সস তেসু চ;

সত্তরসসু ৰস্সেসু, দসমাসা’মিকেসু চ.

তথা দিনেসু দসসু, অতিক্কন্তেসু সাদরো;

অভযগিরি ৰিহারংসো, পতিট্ঠাপেসি ভূপতি.

অক্কোসিযিত্ৰা তে থেরে, তেসু পুব্বুপকারিনো;

তং মহাতিস্স থেরস্স, ৰিহারং মানদো অদা.

গিরিস্স যস্মা গারামে, রাজা কারেসি সোভযো;

তস্মা’ভয গিরিত্ৰেৰ, ৰিহারো নামকো অহু.

রথা ওরোপিতা সা হি, তস্মিংঠানে ৰরঙ্গনা;

কদ্দম্বপুপ্ফ গুম্বম্হি, নিলিনা তত্থ অদ্দস.

মুত্তযন্তং সামণেরং, মগ্গং হত্থেন ছাদিয;

রাজা তস্স ৰচো সুত্ৰা, ৰিহারং তত্থ কারযি.

তেসু সত্তসু যোধেসু, উত্তিযো নাম কারযি;

নগরম্হা দক্খিণতো, ৰিহারং দক্খিণৰ্হযং.

তত্তেৰ ¶ মূলৰোকাস, ৰীহারং মূলনামকো;

অমচ্চো কারযী তেন, সোপি তংনামকো অহু.

কারেসি সালিযারামং, অমচ্চো সালিযৰ্হযো;

কারেসি পব্বতারামং, অমচ্চো পব্বতৰ্হযো.

উত্তরতিস্সরামন্তু, তিস্সামচ্চো অকারযি;

ৰিহারে নিট্ঠিতে রম্মে, তিস্সথের মুপচ্চতে.

‘‘তুম্হাকং পটিসন্থার, ৰসেন’ম্হেহি কারিতে;

ৰিহারে দেম তুম্হাকং, ইতি ৰত্ৰা অদংসু চ.

থেরো সব্বত্থৰাসেসি, তে তে ভিক্খূ যথা রহং;

অমচ্চা’দংসু সঙ্ঘস্স, ৰিৰিধে সমণারহে.

রাজা সকৰিহারম্হি, ৰসন্তে সমুপট্ঠহি;

পচ্চযেহি অনুনেহি, তেন তে বহৰো অহুং.

থেরং কুলেহী সংসট্ঠং, মহাতিস্সোতি ৰিস্সুতং;

কুলসংসট্ঠ দোসেন, সঙ্ঘো তং নীহরি ইতো.

ততোপ্পভুতি তে ভিক্খূ, মহাৰিহারনাগমুং;

এৰং তে’ভযগিরিকা, নিগ্গতা থেরৰাদতো.

পভিন্না’ভযগিরিকেহি, দক্খিণৰিহারিকাযতি;

এৰং তে থেরৰাদীহি, পভিন্না ভিক্খৰো দ্ৰিধা.

মহা অভযভিক্খূ তে, ৰড্ঢেতুং দীপৰাসিনো;

ৰট্টগামণিভূমিন্দো, পত্তিং নাম অদাসি সো.

ৰিহারপরিৰেণানি, ঘটাবদ্ধে অকারযি;

‘‘পটিসঙ্খরণং এৰং, হেস্সতীতি ৰিচিন্তিয.

পিটকত্তযপাল়িঞ্চ, তস্স অট্ঠকথম্পি চ;

মুখপাঠেন আনেসুং, পুব্বে ভিক্খূ মহামতি.

হানিং ¶ দিস্ৰান সত্তানং, তদা ভিক্খূ সমাগতা;

চিরট্ঠিতত্থং ধম্মস্স, পোত্থকেসু লিখাপযুং.

ৰট্টগামণি অভযো, রাজা রজ্জমকারযি;

ইতি দ্ৰাদসৰস্সানি, পঞ্চমাসেসু আদিতো.

সুজনপ্পসাদসংৰেগত্থায কতে মহাৰংসে

তদচ্চযে মহাচূলী-মহাতিস্সো অকারযি;

রজ্জং চুদ্দসৰস্সানি, ধম্মেন চ সমেন চ.

সহত্থেন কতং দানং, সো সুত্ৰান মহপ্ফলং;

পঠমেযেৰ ৰস্সম্হি, গন্ত্ৰা অঞ্ঞাতৰেসৰা.

কত্ৰান সালিলৰনং, লদ্ধায ভতিযা ততো;

পিণ্ডপাতং মহাসুম্ম-থেরস্সা’দা মহীপতি.

সোণ্ণগিরিম্হি পুন সো, তীণিৰস্সানি খত্তিযো;

গুল়যন্তম্হি কত্ৰান, ভতিংলদ্ধা গুল়ে ততো.

তে গুল়ে আহরাপেত্ৰা, পুরং আগম্ম ভূপতি;

ভিক্খুসঙ্ঘস্স পাদাসি, মহাদানং মহীপতি.

তিংসভিক্খুসহস্সস্স, অদা অচ্ছাদনানি চ;

দ্ৰাদসন্নং সহস্সানং, ভিক্খূনীনং তথেৰ চ.

কারযিত্ৰা ¶ মহীপালো, ৰিহারং সুপ্পতিট্ঠিতং;

সট্ঠিভিক্খু সহস্সস্স, তিচীৰরমদাপযি.

তিংস সহস্স সঙ্খানং, ভিক্খুনীনঞ্চ দাপযি;

মণ্ডৰাপি ৰিহারং সো, তথা অভযগল্লকং.

ৰঙ্গুপট্টঙ্গগল্লঞ্চ, দীঘবাহুকগল্লকং;

ৰালগাম ৰিহারঞ্চ, রাজা সোযেৰ কারযি.

এৰং সদ্ধায সো রাজা, কত্ৰা পুঞ্ঞানিনেকধা;

চতুদ্দসন্নং ৰস্সানং, অচ্চযেন দিৰং অগা.

ৰট্টগামণিনো পুত্তো, চোরনাগোতি ৰিস্সুতো;

মহাচূল়িস্সরজ্জম্হি, চোরো হুত্ৰা চরিতদা.

মহাচূল়ে উপরতে, রজ্জং কারযি আগতো;

অত্তনো চোরকালে সো, নিৰাসং যেসুনালভি.

অট্ঠরসৰিহারে তে, ৰিদ্ধংসাপেসি দুম্মতি;

রজ্জং দ্ৰাদসৰস্সানি, চোরনাগো অকারযি.

লোকন্তরিক নিরযং, পাপোসোউপপজ্জথ;

তদচ্চযে মহাচূল়্হি-রঞ্ঞো পুত্তো অকারযি.

রজ্জং তীণেৰ ৰস্সানি, রাজাতিস্সো’তি ৰিস্সুতো;

চোরনাগস্স দেৰীতু, ৰীসমং ৰীসমানুলা.

ৰীসং দত্ৰান মারেসি, বলত্থেরত্তমানসা;

তস্মিংযেৰবলত্থেসা, অনুলারত্তমানসা.

তিস্সং ৰীসেনঘাতেত্ৰা, তস্স রজ্জমদাসিসা;

সীৰো নাম বলত্থোসো, জেট্ঠদোৰারিকো তহিং.

কত্ৰা মহেসিং অনুলং, ৰস্সং মাসদ্ৰযা’চিকং;

রজ্জং কারেসি নগরে, ৰটুকে দমিল়ে’নুলা.

রত্তা ৰীসেন তং হন্ত্ৰা, ৰটুকে রজ্জমপ্পযি;

ৰটুকো দমিল়ো সো হি, পুরে নগরৰড্ঢকী.

মহেসিং অনুলং কত্ৰা, ৰস্সং মাসদ্ৰযাধিকং;

রজ্জং কারেসি নগরে, অনুলা তত্থ আগতং.

পস্সিত্ৰা দারুভতিকং, তস্মিং সারত্তমানসা;

হন্ত্ৰা ৰিসেন ৰটুকং, তস্স রজ্জং সমপ্পযি.

দারুভতিকতিস্সো ¶ সো, মহেসিং করিযানুলং;

একমাসাধিকং ৰস্সং, পুরে রজ্জমকারযি.

কারেসি সো পোক্খরণিং, মহামেঘৰনে লহুং;

নিলীযে নাম দমিল়ে, সা পুরোহিতব্রাহ্মণে.

রাগেন রত্তা অনুলা, তেন সংৰাসকামিনী;

দারুভতিকতিস্সংতং, ৰীসং দত্ৰান ঘাতিয.

নিলীযস্স অদা রজ্জং, সোপি নিলীযব্রাহ্মণো;

তং মহেসিং করিত্ৰান, নিচ্চং তায উপট্ঠিতো.

রজ্জং কারেসি ছম্মাসং, অনুরাধপুরে ইধ;

দ্ৰত্তিংসায বলত্থেহি, ৰত্থুকামা যথারুচিং.

ৰীসেন তং ঘাতযিত্ৰা, নিলীযং খত্তিযানুলা;

রজ্জং সা অনুলাদেৰী, চতুমাসমকারযি.

মহাচূল়িকরাজস্স, পুত্তো দুতিযকো পন;

কূটকণ্ণতিস্সো নাম, ভীতো সো’নুলদেৰিযা.

পলাযিত্ৰা পব্বজিত্ৰা, কালে পত্তবলো ইধ;

আগন্ত্ৰা ঘাতযিত্ৰা, তং অনুলং দুট্ঠমানসং.

রজ্জং কারেসি দ্ৰাৰীসং, ৰস্সানি মনুজাধিপো;

মহাউপোসথাগারং, অকা চেতিযপব্বতে.

ঘরস্স তস্স পুরতো, সিলাথূপমকারযি;

বোধিং রোপেসি তত্থেৰ, সোৰ চেতিযেপব্বতে.

পেলগামৰিহারঞ্চ, অন্তরগঙ্গায কারযি;

তত্থেৰ ৰণ্ণকং নাম, মহামাতিকমেৰ চ.

অম্বদুগ্গমহাৰাপিং, ভযোলুপ্পলমেৰ চ;

সত্তহত্থুচ্চপাকারং, পুরস্স পরিখং তথা.

মহাৰত্থুম্হি অনুলং, ঝাপযিত্ৰা অসঞ্ঞতং;

অপনীয ততো থোকং, মহাৰত্থুমকারযি.

পদুমস্সরৰনুয্যানং, নগরেযেৰ কারযি;

মতা’স্স দন্তে ধোৰিত্ৰা, পব্বজি জিনসাসনে.

কুলসন্তকে ¶ ঘরট্ঠানে, মাতুভিক্খুনুপস্সযং;

কারেসি দন্তগেহন্তি, ৰিস্সতো আসি তেন সো.

তদচ্চযে তস্স পুত্তো, নামকো ভাতিকাভযো;

অট্ঠৰীসতিৰস্সানি, রজ্জং কারেসি খত্তিযো.

মহাদাট্ঠিকরাজস্স, ভাতিকত্তামহীপতি;

দীপে ‘‘ভাতিকরাজা’’তি, পাকটো আসি ধম্মিকো.

কারেসি লোহপাসাদে, পটিসঙ্খারমেত্থসো;

মহাথূপে ৰেদিকা দ্ৰে, থূপৰ্হে’পোসথৰ্হযং.

অত্তনো বলিমুজ্ঝিত্ৰা, নগরস্স সমন্ততো;

রোপাপেত্ৰা যোজনম্হি, সুমনান’জ্জুকানি চ.

পাদৰেচিকতো যাৰ, ধুরচ্ছত্তানরাধিপো;

চতুরঙ্গলবহলেন, গন্ধেন উরুচেতিযং.

লিম্পাপেত্ৰান পুপ্ফানি, ৰণ্টেহি তত্থ সাধুকং;

নিৰেসিত্ৰান কোরেসি, থূপং মালাগুলোপমং.

পুনদ্ৰঙ্গুলবহলায, মনোসিলায চেতিযং;

লিম্পাপেত্ৰান কারেসি, তথেৰ কুসুমাচিতং.

পুন সোপানতো যাৰ, ধুরচ্ছত্তাৰ চেতিযং;

পুপ্ফেহি ওকিরাপেত্ৰা, ছাদেসি পুপ্ফরাসিনো.

উট্ঠাপেত্ৰান যন্তেহি, জলং অভযৰাপিতো;

জলেহি থূপং সেৰন্তো, বলপূজমকারযি.

সকটসতেন মুত্তানং, সদ্ধিং তেলেন সাধুকং;

মদ্দাপেত্ৰা সুধাপিণ্ডং, সুধাকম্মমকারযি.

পৰালজালং কারেত্ৰা, তং খিপাপিয চেতিযে;

সোৰণ্ণানি পদুমানি, চক্কমত্তানি সন্ধিসু.

লগ্গাপেত্ৰা ততো মুত্তা-কলাপে যাৰ হেট্ঠিমা;

পদুমা’লম্বযিত্ৰান, মহাথূপমপূজযি.

গণসজ্ঝাযসদ্দং ¶ সো, ধাতুগব্ভম্হিতাদিনি;

সুত্ৰা ‘‘অদিস্ৰা তংনা’হং, ৰুট্ঠহিস্সন্তি নিচ্ছিতো.

পাচিনাদিকমূলম্হি, অনাহারো নিপজ্জথ;

থেরা দ্ৰারং মাপযিত্ৰা, ধাতুগব্ভং নযিংসু তং.

ধাতুগব্ভৰিভূতিংসো, সব্বং দিস্ৰা মহীপতি;

নিক্খন্তো তাদিসেহেৰ, পোত্থরূপেহি পূজযি.

মধুগন্ধেহি গন্ধেহি, ঘটেহি সরসেহি চ;

অঞ্জনহরিতালেহি, তথামনোসিলাহি চ.

মনোসিলাসু ৰস্সেন, ভস্সিত্ৰা চেতিযঙ্গণে;

ঠিতাসু গোপ্ফমত্তাসু, রচিতে পু’প্পলেহি চ.

থূপঙ্গণম্হি সকলে, পুরিতে গন্ধকদ্দমে;

চিত্তকিলঞ্জছিদ্দেসু, রচিতে পু’প্পলেহি চ.

ৰারযিত্ৰা ৰারিমগ্গং, তথেৰ পুরিতে ঘটে;

দীপৰট্টিহি নেকানি, কতৰট্টিসিখাহি চ.

মধুকতেলম্হি তথা, তিলতেলে তথেৰ চ;

তথেৰ পট্টৰট্টীনং, সু বহূহি সিখাহি চ.

যথাৰুত্তেহি এতেহি, মহাথূপস্স খত্তিযো;

সত্তক্খত্তুং সত্তক্খত্তুং, পূজা’কাসি ৰিসুং ৰিসুং.

অনুৰস্সঞ্চ নিযতং, সুধামঙ্গলমুত্তমং;

বোধিসিনানপূজা চ, তথেৰ উরুবোধিযা.

মহাৰেসাখ পূজা চ, উল়ারা অট্ঠৰীসতি;

চতুরাসীতি সহস্সানি, পূজা চ অনুল়ারিকা.

ৰিৰিধং নটনচ্চঞ্চ, নানাতূরিযৰাদিতং;

মহাথূপে মহাপূজং, সদ্ধানুন্নো অকারযি.

দিৰসস্স চ তিক্খত্তুং, বুদ্ধুপ্পট্ঠানমাগমা;

দ্ৰিক্খত্তুং, পুপ্ফভেরিঞ্চ, নিযতং সো অকারযি.

নিযতঞ্চনদানঞ্চ, পৰারণাদানমেৰ চ;

তেলফাণিতৰত্থাদি-পরিক্খারং সমণারহং.

বহুং ¶ পাদাসি সঙ্ঘস্স, চেতিযখেত্তমেৰ চ;

চেতিযে পরিকম্মত্থং, অদাসি তত্থ খত্তিযো.

সদা ভিক্খুসহস্সস্স, ৰিহারে চেতিযপব্বতে;

সলাকৰত্তভত্তঞ্চ, সো দাপেসি চ ভূপতি.

চিন্তামণিমুচেলৰ্হে, উপট্ঠানত্তযে চ সো;

তথা পদুমঘরে ছত্ত-পাসাদে চ মনোরমে.

ভোজেন্তো পঞ্চঠানম্হি, ভিক্খূগন্থধুরে যুতে;

পচ্চযেহি উপট্ঠাসি, সদা ধম্মে সগারৰো.

পোরাণরাজনিযাতং, যংকিঞ্চি সাসনস্সিতং;

অকাসি পুঞ্ঞকম্মংসো, সব্বং ভাতিকভূপতি.

তস্স ভাভকরাজস্স, অচ্চযে তং কনিট্ঠকো;

মহাদাঠিমহানাগ-নামো রজ্জমকারযি.

দ্ৰাদসংযেৰ ৰস্সানি, নানাপুঞ্ঞপরাযনো;

মহাথূপম্হি কিঞ্জক্খ- পাসাণে অত্থরাপযি.

ৰালিকামরিযাদঞ্চ, কারেসি ৰিত্থতঙ্গণং;

দীপে সব্বৰিহারেসু, ধম্মাসনমদাপযি.

অম্বত্থল মহাথূপং, কারাপেসি মহীপতি;

চ যেঅনিট্ঠমানম্হি, সরিত্ৰা মুনিনো গুণং.

চজিত্ৰান সকং পাণং, নিপজ্জিত্ৰা সযং তহিং;

ঠপযিত্ৰা চযং তস্স, নিট্ঠাপেত্ৰান চেতিযং.

চতুদ্ৰারে ঠপাপেসি, চতুরো রতনগ্ঘিকে;

সুসিপ্পিকেহি সুৰিভত্তে, নানারতনজোতিতে.

চেতিযে পটিমোচেত্ৰা, নানারতনকঞ্চুকং;

কঞ্চন বুব্বুলঞ্চেত্থ, মুত্তোলম্বঞ্চ দাপযি.

চেতিয পব্বতাৰট্টে, অলঙ্করিয যোজনং;

যোজাপেত্ৰা চতুদ্ৰারং, সমন্তা চারুৰীথিকং.

ৰীথিযা উভতো পস্সে, আপণানি পসারিয;

ধজগ্ঘিক তো রণানি, মণ্ডযিত্ৰা তহিং তহিং.

দীপমালা ¶ সমুজ্জোতং, কারযিত্ৰা সমন্ততো;

নটনচ্চানি গীতানি, ৰাদিতানি চ কারযি.

মগ্গে কদম্বনদিতো, যাৰচেতিয পব্বতা;

গন্তুং ধোতেহি পাদেহি, কারযি’ত্থরণত্থতং.

সনচ্চগীতৰাদেহি, সমজ্জমকরুং তহিং;

নগরস্স চতুদ্ৰারে, মহা দানঞ্চ দাপযি.

অকাসি সকলে দীপে, দীপমালানিরন্তরং;

সলিলেপি সমুদ্দস্স, সমন্তা যোজনন্তরে.

চেতিযস্স মহেতেন, পূজা সা কারিতা সুভা;

গিরিভণ্ডা মহাপূজা, উল়ারা ৰুচ্চতে ইধ.

সমাগতানং ভিক্খূনং, তস্মিং পূজা সমাগমে;

দানং অট্ঠসু ঠানেসু, ঠপাপেত্ৰা মহীপতি.

তাল়যিত্ৰান তত্রট্ঠা, অট্ঠসোৰণ্ণভেরিযো;

চতুৰীসসহস্সানং, মহাদানং পৰত্তযি.

ছচীৰরানি পাদাসি, বন্ধমোক্খঞ্চ কারযি;

চতুদ্ৰারেন্ৰাপিতেহি, সদা কম্মমকারযি.

পুব্বরাজূহি ঠপিতং, ভাতরং ঠপিতং তথা;

পুঞ্ঞকম্মং অহাপেত্ৰা, সব্বং কারযিভূপতি.

অত্তানং দেৰিংপুত্তে দ্ৰে, হত্থিং অস্সঞ্চ মঙ্গলং;

ৰারিযন্তো’পি সঙ্ঘেন, সঙ্ঘস্সা’দাসি ভূপতি.

ছসত সহস্সগ্ঘকং, ভিক্খুসঙ্ঘস্স সো অদা;

সতসহস্সগ্ঘনকং, ভিক্খূনীনং গণস্স তু.

দত্ৰান কপ্পিযং ভণ্ডং, ৰিৰিধং ৰিধিকোৰিদো;

অত্তানঞ্চ’ৰ সেসে চ, সঙ্ঘতো অভিনীহরি.

কালাযন কণ্ণিকম্হি, মণিনাগ পব্বতৰ্হযং;

ৰিহারঞ্চ কল়ৰ্হযং, কারেসি মনুজাধিপো.

কুবু ¶ বন্ধনদীতীরে, সমুদ্দৰিহারমেৰ চ;

হুৰাৰকণ্ণিকে চূল়, নগপব্বতসৰ্হযং.

পাসাণদীপকৰ্হম্হি, ৰিহারে কারিতে সযং;

পানিযং উপনিতস্স, সামণেরস্স খত্তিযো.

উপচারে পসীদিত্ৰা, সমন্তা অট্ঠযোজনং;

সঙ্ঘভোগমদাতস্স, ৰিহারস্স মহীপতি.

মণ্ডৰাপি ৰিহারে চ, সামণেরস্স খত্তিযো;

তুট্ঠো ৰিহারং দাপেসি, সঙ্ঘে ভোগং তথেৰ সো.

ইতি ৰিভৰমনপ্পং সাধুপঞ্ঞা লভিত্ৰা,

অকরিযজনখেদং পুঞ্ঞকম্মাভিরামা,

ৰিপুলৰিৰিধপুঞ্ঞং সুপ্পন্নাকরোন্তীতি.

সুজনপ্পসাদসংৰেগত্থায কতে মহাৰংসে

আমণ্ডগামণ্যভযো, মহাদাঠিকঅচ্চযে;

নৰৰস্সনট্ঠমাসে, রজ্জং কারেসি তং সুতো.

ছত্তাতি ছত্তং কারেসি, মহাথূপে মনোরমে;

তথেৰ পাদৰেদিঞ্চ, মুদ্ধৰেদিঞ্চ কারযি.

তথেৰ লোহপাসাদ, থূপৰ্হে পোসথৰ্হযে;

কারেসি কুচ্ছিআজিরং, কুচ্ছিআল়িন্দমেৰ চ.

উভযত্থাপি ¶ কারেসি, চারুং রতনপণ্ডপং;

রজতলেণ ৰিহারঞ্চ, কারাপেসি নরাধিপে.

মহাগামেণ্ডৰাপিংসো, পস্সে কারিয দক্খিণে;

দক্খিণস্স ৰিহারস্স, অদাসি পুঞ্ঞদক্খিণো.

মাঘাতং সকলে দীপে, কারেসি মনুজাধিপো;

ৰল্লিফলানি সব্বানি, রোপাপেত্ৰা তহিং তহিং.

মং সকুভণ্ডকং নাম, আমণ্ডিয মহীপতি;

পত্তং পূরাপযিত্ৰান, কারেত্ৰা ৰত্থচুম্বটং.

দাপেসি সব্বসঙ্ঘস্স, ৰিপ্পসন্নেন চেতসা;

পত্তে পূরাপযিত্ৰা সো, আমণ্ড গামণিৰিদূ.

তঙ্কনিট্ঠোকণিরাজা-তিস্সো ঘাতিয তাতরং;

তীণি ৰস্সানি নগরে, রজ্জং কারেসি খত্তিযো.

উপোসথঘরট্টং এসা, নিচ্ছিনি চেকিযৰ্হযে;

রাজাপরাধকম্মম্হি, পুত্তে সট্ঠিতু ভিক্খৰো.

সহোড্ডে গাহযিত্ৰান, রাজা চেতিয পব্বতে;

খিপাপেসি কণিরৰ্হে, পব্ভারম্হি অসীলকে.

কণিরাজা অচ্চযেন, আমণ্ডগামণি সুতো;

চূল়াভযো ৰস্সমেকং, রজ্জং কারেসি খত্তিযো.

সো গোণকনদীতীরে, পুরপস্সম্হি দক্খিণে;

কারাপেসি মহীপালো, ৰিহারে চূল়গল্লকং.

চূল়াভযস্স’চ্চ যেন, সীৰলি তং কনিট্ঠিকা;

আমণ্ডধীতা চতুরো, মাসে রজ্জমকারযি.

আমণ্ড ভাগিনেয্যা তু, সীৰলিং অপনীযতং;

ইল়নাগোতি নামেন, ছত্তং উস্সাপযি পুরে.

তিস্সৰাপিং গতে তস্মিং, আদিৰস্সে নরাধিপে;

তং হিত্ৰা পুরমাগঞ্ছুং, বহৰোলম্বকণ্ণকা.

তহিং অদিস্ৰা তে রাজা, কুদ্ধো তেহি অকারযি;

মদ্দযং ৰাপিযা পস্সে, মহাথূপঞ্জসংসযং.

তেসং ¶ ৰিচারকে কত্ৰা, চণ্ডালে চ ঠপাপযি;

তেন কুদ্ধালম্বকণ্ণা, সব্বে হুত্ৰান একতো.

রাজানং তং গহেত্ৰান, রুন্ধিত্ৰান সকে ঘরে;

সযং রজ্জং ৰিচারেসুং, রঞ্ঞো দেৰী তদা সকং.

পুত্তং চন্দমুখসিৰং, মণ্ডযিত্ৰা কুমারকং;

দত্ৰান হত্থে ধাতীনং, মঙ্গলহত্থি সন্তিকে.

পেসেসি ৰত্ৰা সন্দেসং, নেত্ৰা তং ধাতিযো তহিং;

ৰদিংসু দেৰিসন্দেসং, সব্বং মঙ্গল হত্থিনো.

ত্ৰমেনং কির ঘাতেহি, ইদং দেৰিৰচো’’ইতি;

ৰত্ৰা তু সযাপেসুং, পাদমূলম্হি হত্থিনো.

দুক্খিতো সো রুদিত্ৰান, নাগো ভেত্ৰান আল়কং;

পৰিসিত্ৰা মহাৰত্থুং, দ্ৰারং পাতিয থামসা.

রঞ্ঞো নিসিন্নঙ্গণম্হি, উগ্ঘাটেত্ৰা কৰাটকং;

নিসীদাপিয তং খন্ধে, মহাতিত্থমুপাগমি.

নাৰং আরো পযিত্ৰান, রাজানং তত্থ কুঞ্জরো;

পচ্ছিমো দধিতীরেন, সযং মলয মারুহী.

পরতীরে ৰসিত্ৰা সো, তীণিৰস্সানি খত্তিযো;

বলকাযং গহেত্ৰান, আগা নাৰাতি রোহণং.

তিত্থে সক্খরসোব্ভম্হি, ওতরিত্ৰান ভূপতি;

অকাসি রোহণে তত্থ, মহন্তং বলসঙ্গহং.

রঞ্ঞো মঙ্গলহত্থিসো, দক্খিণং মলযং ততো;

রোহণংযে’ৰুপাগঞ্ছি, তস্স কম্মানি কাতৰে.

মহাপদুমনামস্স, তত্থ জাতকভাণিনো;

তুলাধারৰ্হৰাসিস্স, মহাথেরস্স সন্তিকে.

কপিজাতকং ¶ সুত্ৰান, বোধিসত্তে পসাদৰা;

নাগমহাৰিহারং সো, জিযামুত্তধনুস্সতং.

কত্ৰা কারেসি থূপঞ্চ, ৰড্ঢাপেসি যথাঠিতং;

তিস্সৰাপিঞ্চ কারেসি, তথা দুরৰ্হৰাপিকং.

সো গহেত্ৰা বলং রাজা, যুদ্ধায অভিনিক্খমি;

তং সুত্ৰা লম্বকণ্ণা চ, যুদ্ধায অভিসংযুতা.

পপল্লক্খন্ধদ্ৰারম্হি, খেত্তে হিঙ্করৰাপিকে;

যুদ্ধং উভিন্নং ৰত্তিত্থ, অঞ্ঞমঞ্ঞৰিহেসনং.

নাৰাকিলন্তদেহত্তা, পোসা সীদন্তি রাজিনো;

রাজা নামং সাৰযিত্ৰা, সযং পাৰিসি তেন সো.

তেন ভীতালম্বকণ্ণা, সযিংসু উদরেন সো;

তেসং সীসানি ছিন্দিত্ৰা, রতনাভিসমংকরি.

তিক্খত্তুমেৰন্তুকতে, করুণায মহীপতি;

‘‘অমারেত্ৰা’ৰ গণ্হাথ, জীৰগ্গাহ’ন্তি অব্রুৰি.

ততো ৰিজিতসঙ্গামো, পুরং আগম্ম ভূপতি;

ছত্তং উস্সাপযিত্ৰান তিস্সৰাপি ছণং অগা.

জলকীল়ায উগ্গন্ত্ৰা, সুমণ্ডিতপসাধিতো;

অত্তনো সিরিসম্পত্তিং, দিস্ৰা তস্সন্তরাযিকে.

লম্বকণ্ণে সরিত্ৰান, কুদ্ধো সো যোজযীরথে;

যুগপরম্পরা তেসং, পুরতো পাৰিসী পুরং.

মহাৰত্থুস্স উম্মারে, ঠত্ৰা রাজাণপেসি সো;

‘‘ইমেসং সীসমুম্মারে, অস্মিং ছিন্দথ ভো’’ইতি.

গোণা এতেরথে যুত্তা, তৰ হোন্তি রথেসভ;

সিঙ্গংখুরঞ্চ এতেসং, ছেদাপযত ভো’’ইতি.

মাতুযা অথ সঞ্ঞত্তো, সীসচ্ছেদং নিৰারিয;

নাসঞ্চ পাদঙ্গুট্ঠঞ্চ, তেসং রাজা অছেদযি.

হত্থিৰুত্থং জনপদং, অদা হত্থিস্স খত্তিযো;

হত্থিভোগো জনপদো, ইতি তেনাসি নামতো.

এৰং অনুরাধপুরে, ইল়ানাগো মহীপতি;

ছব্বস্সানি অনুনানি, রজ্জং কারেসি খত্তিযো.

ইল়নাগচ্চযে ¶ তস্স, পুত্তো চন্দমুখোসিৰো;

অট্ঠৰস্সং সত্তমাসং, রাজা রজ্জমকারযি.

মণিকারগামে ৰাপি, কারাপেত্ৰা মহীপতি;

ইস্সরসমণৰ্হস্স, ৰিহারস্স অদাসি সো.

তস্স রঞ্ঞো মহেসী চ, সঙ্গামে পত্তিমত্তনো;

তস্সেৰা’দা ৰিহারস্স, দমিল়দেৰীতি ৰিস্সুতা.

তং তিস্সৰাপী কীল়ায, হন্ত্ৰা চন্দমুখং সিৰং;

যসল়ালকতিস্সো’তি, ৰিস্সুতো তঙ্কনিট্ঠকো.

অনুরাধপুরে রম্মে, লঙ্কাভুৰদনে সুভে;

সত্তৰস্সানট্ঠমাসে, রাজা রজ্জমকারযি.

দোৰিরিকস্স দত্তস্স, পুত্থো দোৰারিকো সযং;

রঞ্ঞো সদিসরূপেন, অহোসি সুভনামৰা.

সুভং বলত্থং তং রাজা, রাজভূসায ভূসিয;

নিসিদাপিয পল্লঙ্কে, হাসত্থং যসল়ালকো.

সীসচোল়ং বলত্থস্স, সসীসে পটিমুঞ্চিয;

যট্ঠিং গহেত্ৰা হত্থেন, দ্ৰারমূলে ঠিতো সযং.

ৰন্দন্তেসু অমচ্চেসু, নিসিন্নং আসনম্হি তং;

রাজা হসতি এৰং সো, কুরুতে অন্তরন্তরা.

‘‘বলত্থো একদিৰসং, রাজানং হসমানকং;

অযং বলত্থো কস্মা মে, সম্মুখাহসতী’’তি সো.

মারাপযিত্ৰা রাজানং, বলত্থো সো সুভো ইধ;

রজ্জং কারেসি ছব্বস্সং, সুভরাজাতি ৰিস্সুতো.

দ্ৰিসু মহাৰিহারেসু, সুভরাজা মনোরমং;

পরিৰেণপন্তিং সুভ-নামকংযেৰ কারযি.

উরুৰেলসমীপম্হি, তথা ৰেল্লিৰিহারকং;

পুরত্থিমে একদ্ৰারং, গঙ্গন্তে নন্দিগামকং.

লম্বকণ্ণসুতো ¶ একো, উত্তরপস্সৰাসিকো;

সেনাপতিমুপট্ঠাসি, ৰসভো নাম মাতুলং.

হেস্সতি ৰসভো নাম, রাজা’তি সুতিযাসদা;

ঘাতেতি রাজাদীপম্হি, সব্বে ৰসভনামকে.

‘‘রঞ্ঞো দস্সাম ৰসতং, ইম’’ন্তি ভরিযায সো;

সেনাপতিমন্তযিত্ৰা, পাতো রাজকুলং অগা.

গচ্ছতো তেন সহসা, তম্বুলং চুণ্ণৰজ্জিতং;

হত্থম্হি ৰসভস্সা’দা, তং সাধু পরিরক্খিতুং.

রাজগেহস্স দ্ৰারম্হি, তম্বুলং চুণ্ণৰজ্জিতং;

সেনাপতি উদিক্খিত্ৰা, তং চুণ্ণত্থং ৰিসজ্জযি.

সেনাপতিস্স ভরিযা, চুণ্ণত্থং ৰসভং গতং;

ৰত্ৰা রহস্সং দত্ৰা চ, সহস্সং তং পলাপযি.

মহাৰিহারঠানং সো, গন্ত্ৰান ৰসভো পন;

তত্থ থেরেহি খিরন্ন-ৰত্থেহি কতসঙ্গহো.

ততো পরং কুট্ঠিনো চ, রাজভাৰায নিচ্ছিতং;

সুত্ৰান ৰচনংহট্ঠো, ‘‘চোরো হেস্স’’ন্তি নিচ্ছিতো.

লদ্ধসমত্থপুরিসে, গামঘাতং ততো পরং;

করোন্তো রোহণং গন্ত্ৰা, কপল্লপুৰোপদেসতো.

কমেন রট্ঠং কণ্হন্থো, সম্পত্তবলৰাহনো;

সো রাজা দ্ৰীহি ৰস্সেহি, আগম্ম পুরসন্তিকং.

সুভরাজং রণে হন্ত্ৰা, ৰসভো সো মহব্বলো;

উস্সাপযি পুরেভত্তং, মাতুলো’পি রণে পতি.

তং মাতুলস্স সরিরং, পুব্বভূতোপকারিকং;

অকাসি ৰসভো রাজা, মহেসিং মেত্তনামিকং.

সোহোরপাঠকং পুচ্ছি, আযুপ্পমাণমত্তনো;

‘‘আহ দ্ৰাদসৰস্সানি’’, রহোযেৰস্স সোপি চ.

রহস্সং রক্খণত্থায, সহস্সং তস্সা দাপিয;

সঙ্ঘং সো সন্নিপাতেত্ৰা, ৰন্দিত্ৰা পুচ্ছি ভূপতি.

‘‘সিযানু ¶ ভন্তে আযুস্স, ৰড্ঢনকারণং’’ইতি;

‘‘অত্থী’’তি সঙ্ঘো আচিক্খি, অন্তরাযৰিমোচনং.

পরিস্সাৰনদানঞ্চ, আৰাসদান মেৰ চ;

গিলানৰত্তদানঞ্চ, দাতব্বং মনুজাধিপ.

‘‘কাতব্বং জিণ্ণকাৰাস-পটিসঙ্খরণং তথা;

পঞ্চসীলসমাদানং, কত্ৰা তং সাধুরক্খিযং.

উপোসথূপৰাসো চ, কত্তব্বো’ পোসথে’’ইতি;

রাজা সাধূতি গন্ত্ৰান, তথা সব্বং মকাসি সো.

তিণ্ণং তিণ্ণঞ্চ ৰস্সানং, অচ্চযেন মহীপতি;

দীপম্হি সব্বসঙ্ঘস্স, তিচীৰরমদাপযি.

অনাগতানং থেরানং, পেসযিত্ৰান দাপযি;

দ্ৰত্তিংসাযহি ঠানেসু, দাপেসি মধুপাযসং.

চতুসট্ঠিযা চ ঠানেসু, মহাদানংতু মিস্সকং;

সহস্সৰট্টি চতুসু, ঠানেসু চ জলাপযি.

চেতিযপব্বতে চেৰ, থূপারামে চ চেতিযে;

মহাথূপে মহাবোধি-ঘরে ইতি ইমেসু হি.

চিত্তলকূটে কারেসি, দসথূপে মনোরমে;

দীপে’খিলম্হি আৰাসে, জিণ্ণে চ পটিসঙ্খরি.

ৰল্লিযেরৰিহারে চ, থেরস্স সো পসীদিয;

মহাৰল্লিগোত্তং নাম, ৰিহারঞ্চ অকারযি.

কারেসি অনুরারামং, মহাগামস্স সন্তিকে;

হেল়িগামট্ঠকরিস, সহস্সং তস্স দাপযি.

মুচেলৰিহারং কারেত্ৰা, সো তিস্সৰড্ঢমানকে;

আল়িসারোদকভাগং, ৰিহারস্স অদাপযি.

কলম্বতিত্থে থূপম্হি, কারেসিট্ঠিককঞ্চুকং;

কারেসুপোসথা গারং, ৰট্টিতেলত্থ মস্সতু.

সহস্সকরীসৰাপিংসো ¶ , কারাপেত্ৰা অদাসি চ;

কারেসুপোসথাগারং, ৰিহারে কুম্ভিগল্লকে.

সোযে’ৰু পোসথাগারং, ইস্সরসমণকে ইধ;

থূপারামেথূপঘরং, কারাপেসি মহীপতি.

মহাৰিহারে পরিৰেণ, পন্তিং পচ্ছিমপেক্খিনিং;

কারেসি চ চতুসালঞ্চ, জিণ্ণকং পটিসঙ্খরি.

চতুবুদ্ধপটিমারম্মং, পটিমানংঘরংতথা;

মহাবোধিঙ্গণে রম্মে, রাজা সোযেৰ কারযি.

তস্স রঞ্ঞো মহেসী সা, ৰুত্তনামা মনোরমং;

থূপং থূপঘরঞ্চেৰ, রম্মং তথেৰ কারযি.

থূপারামে থূপঘরং, নিট্ঠাপেত্ৰা মহীপতি;

তস্স নিট্ঠাপিতমহে, মহাদানমদাসি চ.

যুত্তানং বুদ্ধৰচনে, ভিক্খূনং পচ্চযম্পি চ;

ভিক্খূনং ধম্মকথিকানং, সপ্পিফাণিতমেৰ চ.

নগরস্স চতুদ্ৰারে, কপণৰট্টঞ্চ দাপযি;

গিলানানঞ্চ ভিক্খূনং, গিলানৰট্টমেৰ চ.

মযেত্তিং রাজুপ্পলৰাপিং, ৰহকোলম্বগামকং;

মহানিক ৰিত্তৰাপিং, মহারামোত্তি মেৰ চ.

কেহালং কাল়িৰাপিঞ্চ, চম্বুট্ঠিং ৰাতমঙ্গনং;

অভিৰড্ঢমানকঞ্চ, ইচ্চেকাদস ৰাপিযো.

দ্ৰাদস মাতিকা চেৰ, সুভিক্খত্থমকারযি;

গুত্তত্থ পুরপাকারং, চেৰ মুচ্চমকারযি.

গোপুরঞ্চ চতুদ্ৰারে, মহাৰত্থুঞ্চ কারযি;

সরং কারেসি উয্যানে, হংসেতত্থৰিসজ্জযি.

পুরে বহূ পোক্খরণী, কারাপেত্ৰা তহিং তহিং;

উম্মগ্গেন জলং তত্থ, পৰেসেসি মহীপতি.

এৰং ¶ নানাৰিধং পুঞ্ঞং, কত্ৰা ৰসভভূপতি;

হতন্তরাযো সো হুত্ৰা, পুঞ্ঞকম্মে সদাদরো.

চতুত্তাসীসৰস্সানি, পুরে রজ্জমকারযি;

চতুত্তালীসৰেসাখ, পূজা যো চ অকারযি.

সুভরাজা ধরন্তো সো, অত্তনো একধীতরং;

ৰসভেন ভযাসংকী, অপ্পেসি’ঠিক ৰড্ঢকিং.

অত্তনো কম্বলঞ্চেৰ, রাজা ভণ্ডানি চ’প্পযি;

ৰসভেন হতে তস্মিং, তমাদাসিট্ঠৰড্ঢকী.

ধীতিঠানে ঠপেত্ৰান, ৰড্ঢেতি অত্তনো ঘরে;

সকম্মং করতো তস্স, ভত্তং আহরি দারিকা.

সা নিরোধসমাপন্নং, তদম্বপুপ্ফ গুম্বকে;

সত্তমে দিৰসে দিস্ৰা, ভত্তং মেধাৰীনী অদা.

পুন ভত্তং রন্ধযিত্ৰা, পিতুনো ভত্তমাহরি;

পপঞ্চকারণং পুট্ঠা, তমত্থং পিতুনো ৰদি.

তুট্ঠো পুনপ্পুনঞ্চে’সো, ভত্তং থেরস্স দাপযি;

ৰিস্সত্থো’নাগতং দিস্ৰা, থেরো আহ কুমারিকং.

‘‘তৰইস্সরিযেজাতে, ইমং ঠানং কুমারিকে;

সরেয্যাসী’তি থেরো তু, তদা চ পরিনিব্বুতো.

সকে সো ৰসভো রাজা, ৰযপ্পত্তম্হি পুত্তকে;

ৰঙ্কনাসিকতিস্সম্হি, কঞ্ঞংতস্সানুরূপিকং.

গৰেসাপেসি পুরিসা, তং দিস্ৰান কুমারিকং;

ইট্ঠকৰড্ঢকীগামে, ইত্থিলক্খণ কোৰিদা.

রঞ্ঞো নিৰেদযুং রাজা, তমাণাপেতুমারভি;

তস্সাহ রাজধীতত্তং, ইট্ঠকৰড্ঢকী তদা.

সুভরঞ্ঞো তু ধীতত্তং, কম্বলাদীহি ঞাপযি;

রাজা তুট্ঠো সুতস্সা’দা, তং সাধু কতমঙ্গলং.

ৰসভস্সচ্চযে পুত্তো, ৰঙ্কনাসিক তিস্সকো;

অনুরাধপুরে রজ্জং, তীণি ৰস্সানি কারযি.

সো ¶ গোণনদিযা তীরে, মহামঙ্গলনামকং;

ৰিহারং কারযি রাজা, ৰঙ্কনাসিকতিস্সকো.

মহামত্তা তু দেৰী সা, সরন্তী থেরভাসিতং;

ৰিহারকারণত্থায, অকাসি ধনসঞ্চযং.

ৰঙ্কনাসিকতিস্সস্স, অচ্চযে কারযী সুতো;

রজ্জং বাৰীসৰস্সানি, গজ্জবাহুকগামণি.

সুত্ৰা সো মাতুৰচনং, মাতুদত্থায কারযি;

কদম্বপুপ্ফঠানম্হি, রাজমাতুৰিহারকং.

মাতা সতসহস্সং সা, ভূমিঅত্থোয পণ্ডিতা;

অদা মহাৰিহারস্স, ৰিহারঞ্চ অকার যি.

সযমেৰ অকারেসি, তত্থ থূপং সিলামযং;

সঙ্ঘভোগঞ্চ পাদাসি, কিণিত্ৰান ততো ততো.

অভযুত্তর মহাথূপং, ৰড্ঢাপেত্ৰা চিতাপযি;

চতুদ্ৰারে চ তত্থেৰ, আদিমুখমকারযি.

গামণিতিস্সৰাপিং সো, কারাপেত্ৰা মহীপতি;

অভযগিরি ৰিহারস্স, পাকৰট্টায’দাসি চ.

মরিচৰট্টিকথূপম্হি, কঞ্চুকঞ্চ অকারযি;

কিণিত্ৰা সতসহস্সেন, সঙ্ঘভোগমদাসি চ.

কারেসি পচ্ছিমে ৰস্সে, ৰিহারং রামকৰ্হযং;

গজবাহুস্সচ্চযেন, সসুরো তস্স রাজিনো;

রজ্জং মহল্লকো নাগো, ছব্বস্সানি অকারযি.

পুরত্থিমে পেজলকং, দক্খিণে কোটি পব্বতং;

পচ্ছিমে দকপাসাণে, নাগদীপে সালিপব্বতং.

বীজগামে তনৰেল়িং, রোহণে জনপদে পন;

তোব্বলনাগপব্বতঞ্চ, অন্তোট্ঠে গিরিহালিকং.

এতে ¶ সত্ত ৰিহারে সো, মহল্লনাগভূপতি;

পরিত্তেনপি কালেন, কারাপেসি মহামতী.

সুজনপ্পসাদসংৰেগত্থায কতে মহাৰংসে

মহল্লনাগচ্চযেন ¶ , পুত্তো ভাতিকতিস্সকো;

চতুৰীসতিৰস্সানি, লংকারজ্জমকারযি.

মহাৰিহারে পাকারং, কারাপেসি সমন্ততো;

গৰরতিস্সৰিহারং, সো কারযিত্ৰা মহীপতি.

মহাগামণিকং ৰাপিং, ৰিহারস্স’স্স’দাসি চ;

ৰিহারঞ্চ অকারেসি, ভাতিযতিস্স নামকং.

কারেসুপোসথাগারং, থূপারামে মনোরমে;

রন্ধকণ্ডকৰাপিঞ্চ, কারাপেসি মহীপতি.

সত্তেসু মুদুচিত্তোসো, সঙ্ঘম্হি তিব্বগারৰো;

উভতোসঙ্ঘে মহীপালো, মহাদানং পৰত্তযি.

ভাতিকতিস্সচ্চযেন, তস্স কনিট্ঠতিস্সকো;

অট্ঠৰীসসমারজ্জং, লংকাদীপে অকারযি.

ভূতারাম ¶ মহানাগ, থেরস্মিং সো পসীদিয;

কারেসি রতনপাসাদং, অভযগিরিম্হি সাধুকং.

অভযগিরিম্হি পাকারং, মহাপরিৰেণমেৰ চ;

কারেসি মণিসোমৰ্হে, মহাপরিৰেণমেৰ চ.

তত্থেৰ চেতিযঘরং, অম্বত্থলে তথেৰ চ;

কারেসি পটিসঙ্খারং, নাগদীপে ঘরে পন.

মহাৰিহারসীমংসো, মদ্দিত্ৰা তত্থ কারযি;

কুক্কুটগিরি পরিৰেণ, পন্তিং সক্কচ্চ ভূপতি.

মহাৰিহারে কারেসি, দ্ৰাদস মনুজাধিপো;

মহাচতুরস্সপাসাদে, দস্সনেয্যেমনোরমে.

দক্খিণৰিহার থূপম্হি, কঞ্চুকঞ্চ অকারযি;

ভত্তসালং মহামেঘ, ৰনাসিমঞ্চ মদ্দিয.

মহাৰিহারপাকারং, পস্সতো অপনীযসো;

মগ্গং দক্খিণৰিহার, গামিঞ্চাপি অকারযি.

ভূতারাম ৰিহারঞ্চ, রামগোণকমেৰ চ;

তথেৰ নন্দতিস্সস্স, আরামঞ্চ অকারযি.

পাচিনতো অনুল়াতিস্স, পব্বতং গঙ্গরাজিযং;

নিযেলতিস্সারামঞ্চ, পিল় পিট্ঠি ৰিহারকং.

রাজমহাৰিহারঞ্চ, কারেসি মনুজাধিপো;

সোযেৰ তীসু ঠানেসু, কারেসু’পোসথালযং.

কল্যাণীক ৰিহারে চ, মণ্ডলগিরিকে তথা;

দুব্বলৰাপিতিস্সৰ্হে, ৰিহারেসু ইমেসু হি.

কনিট্ঠতিস্সচ্চযেন, তস্স পুত্তো অকারযি;

রজ্জং দ্ৰেযেৰ ৰস্সানি, চূল়নাগোতি ৰিস্সুতো.

চূল়নাগকনিট্ঠোতু, রাজাঘাতিয ভাতিকং;

একৰস্সং কুড্ডনাগো, রজ্জং লংকায কারযি.

মহাপেল়ঞ্চ ৰড্ঢেসি, একনাল়িকছাতকে;

ভিক্খুসতানং পঞ্চন্নং, অব্ভোচ্ছিন্নং মহীপতি.

কুড্ডনাগস্স ¶ রঞ্ঞো তু, দেৰীযা ভাতুকো তদা;

সেনাপতি সিরিনাগো, চোরো হুত্ৰান রাজিনো.

বলৰাহন সম্পন্নো, আগম্ম নগরন্তিকং;

রাজবলেন যুজ্ঝন্তো, কুড্ডনাগং মহীপতিং.

পলাপেত্ৰা লদ্ধজযো, অনুরাধ পুরে ৰরে;

লংকারজ্জমকারেসি, ৰস্সানেকূনৰীসতি.

মহাথূপৰরে ছত্তং, কারাপেত্ৰান ভূপতি;

সুৰণ্ণকম্মং কারেসি, দস্সনেয্যং মনোরমং.

কারেসি লোহপাসাদং, সংখিত্তং পঞ্চভূমকং;

মহাবোধি চতুদ্ৰারে, সোপানং পুনকারযি.

কারেত্ৰা ছত্তপাসাদং, মহে পূজমকারযি;

কুলম্বণঞ্চ দীপস্মিং, ৰিস্সজ্জেসি দযাপরো.

সিরিনাগচ্চযে তস্স, পুত্তো তিস্সো অকারযি;

রজ্জং দ্ৰাৰীসৰস্সানি, ধম্মৰোহার কোৰিদো.

ঠপেসি সো হি ৰোহারং, হিংসা মুত্তং যতোইধ;

ৰোহারক তিস্সরাজা, ইতি নামং ততো অহু.

কম্বুগামকৰাসিস্স, দেৰত্থেরস্স সন্তিকে;

ধম্মং সুত্ৰা পটিকম্মং, পঞ্চাৰাসে অকারযি.

মহাতিস্সস্স থেরস্স, অনুরা রামৰাসিনো;

পসন্নো মুচেলপট্টনে, দান ৰট্টমকারযি.

তিস্সরাজ মণ্ডপঞ্চ, মহাৰিহারদ্ৰযেপি সো;

মহাবোধিঘরে পাচি, লোহরূপদ্ধযম্পি চ.

সত্তপণ্ণিকপাসাদং, কারেত্ৰা সুখৰাসকং;

মাসে মাসে সহস্সং সো, মহাৰিহারস্স দাপযি.

অভযগিরিৰিহারে, দক্খিণমূলসৰ্হযে;

মরিচৰট্টি ৰিহারম্হি, কুলালিতিস্সসৰ্হযে.

মহিযঙ্গণ ৰিহারম্হি, মহাগামকসৰ্হযে;

মহানাগতিস্সৰ্হম্হি, তথা কল্যাণীকৰ্হযে.

ইতি ¶ অট্ঠসু থূপেসু, ছত্তকম্মমকারযি;

মূকনাগসেনাপতি, ৰিহারে দক্খিণে তথা.

মরিচ ৰট্টি ৰিহারম্হি, পুত্তভাগৰ্হযে তথা;

ইস্সরসমণৰ্হম্হি, তিস্সৰ্হে নাগদীপকে.

ইতি ছসু ৰিহারেসু, পাকারঞ্চ অকারযি;

কারেসু’ পোসথাগারং, অনুরারামসৰ্হযে.

অরিযৰংসকথাঠানে, লংকাদীপেখিলেপি চ;

দান ৰট্টং ঠপাপেসি, সদ্ধম্মে গারৰেন সো.

তিণী সতসহস্সানি, দত্ৰান মনুজাধিপো;

ইণতো সযিকে ভিক্খূ, মোচেসি সাসনপ্পিযো.

মহা ৰেসাখ পূজং সো, কারেত্ৰা দীপৰাসিনং;

সব্বে সংযেৰ ভিক্খূনং, তিচীৰরমদাপযি.

ৰেতুল্লৰাদং মদ্দিত্ৰা, কারেত্ৰা পাপনিগ্গহং;

কপিলেন অমচ্চেন, সাসনং জোতযীচ সো.

ৰিস্সুতো’ভযনাগো’তি, কনিট্ঠো তস্সরাজিনো;

দেৰিযা তস্স সংসট্ঠো, ঞাতো ভীতো সভাতরা.

পলাযিত্ৰা হল্লতিত্থং, গন্ত্ৰান সহসেৰকো;

কুদ্ধো ৰিয মাতুলস্স, হত্থপাদঞ্চ ছেদযি.

রাজিনো রট্ঠতেদত্থং, ঠপেত্ৰান ইধেৰ তং;

সুনখোপমং দস্সযিত্ৰা, গহেত্ৰা’তি সিনিদ্ধকে.

তত্থেৰ নাৰং আরুয্হ, পরতীরমগাসযং;

সুভৰো মাতুলো তু, উপগম্ম মহীপতি.

সুহদো ৰিয হুত্ৰান, তস্মিং রট্ঠমভিন্দিসো;

অভযো তং জাননত্থং, দূতং ইধ ৰিসজ্জযি.

তং দিস্ৰা পূগরুক্খং সো, সমন্তা কুন্তনাল়িযা;

পরিব্ভমন্তো মদ্দিত্ৰা, কত্ৰা দুব্বলমূলকং.

বাহুনাযেৰ পাতেত্ৰা, তজ্জেত্ৰা তং পলাপযি;

দূতো গন্ত্ৰা অভযস্স, তং পৰত্তিং পৰেদযি.

ঞত্ৰা’ভযো ¶ তং দমিল়ে, আদায বসুকে ততো;

নগরন্তিকমাগঞ্ছি, ভাতরা সহ যুজ্ঝিতুং.

তং ঞত্ৰান পলাযিত্ৰা, অস্সমারুয্হদেৰিযা;

মলযং আগমা রাজা, তংকনিট্ঠো’নু বন্ধিয.

রাজানং মলযে হন্ত্ৰা, দেৰীমাদায আগতো;

কারেসি নগরে রজ্জং, অট্ঠৰস্সানি ভূপতি.

পাসাণৰেদিং কারেসি, মহাবোধিসমন্ততো;

লোহপাসাদঙ্গণম্হি, রাজা মণ্ডপমেৰ চ.

দ্ৰিহি সতসহস্সেহি, নেকৰত্থানি ভাগিয;

দীপম্হি ভিক্খুসঙ্ঘস্স, ৰত্থদানমদাসি সো.

অভযস্স’চ্চযে ভাতু, তস্সস্স তস্স অত্রজো;

দ্ৰেৰস্সানি সিরিনাগো, লংকারজ্জ মকারযি.

পটিসঙ্খরিয পাকারং, মহাবোধিসমন্ততো;

মহাবোধিঘরস্সেৰ, সোযেৰ ৰালিকাতলে.

মূচেলরুক্খপরতো, হংসৰট্টং মনোরমং;

মহন্তং মণ্ডপঞ্চেৰ, কারাপেসি মহীপতি.

ৰিজযকুমারকো নাম, সিরিনাগস্স অত্রজো;

পিতুনো অচ্চযে রজ্জং, একৰস্সমকারযি.

লম্বকণ্ণা তযো আসুং, সহাতা মহিযঙ্গণে;

সঙ্ঘতিস্সো সঙ্ঘবোধি, ততিযো গোট্ঠকাভযো.

তে তিস্সৰাপিমরিযাদ-গতো অন্ধো ৰিচক্খণো;

রাজুপট্ঠানমাযন্তে, পদসদ্দেন অব্রৰি.

‘‘পথৰীসামিনো এতে, তযো ৰহতিভূ’ইতি;

তং সুত্ৰা অভযো পচ্ছা, যন্তো পুচ্ছি পুনাহসো.

তে ¶ পুরং পৰিসিত্ৰান, তযো রঞ্ঞো’তি ৰল্লভো;

রাজকিচ্চানি সাধেন্তা, ৰসন্তা রাজসন্তিকে.

হন্ত্ৰা ৰিজযরাজানং, রাজগেহম্হি একতো;

সেনাপতিংসঙ্ঘতিস্সং, দুৰেরজ্জে’ভিসেচযুং.

এৰং সো অভিসিত্তোৰ, অনুরাধপুরুত্তমে;

রজ্জং চত্তারি ৰস্সানি, সঙ্ঘতিস্সো অকারযি.

মহাথূপম্হি ছত্তঞ্চ, হেমকম্মঞ্চ কারযি;

ৰিসুং সতসহস্সগ্ঘে, চতুরো চ মহামণি.

মজ্ঝে চতুন্নং সূরিযানং, ঠপাপেসি মহীপতি;

থূপস্স মুদ্ধনি তথা-নগ্ঘৰজিরচুম্বটং.

সো ছত্তমহপূজায, সঙ্ঘস্স মনুজাধিপো;

চত্তালীসসহস্সস্স, ছ চীৰরমদাপযি.

তং মহাদেৰথেরেন, দামগল্লক ৰাসিনো;

দেসিতং খন্ধকে সুত্তং, যাগানিসংস দীপনং.

সুত্ৰা পসন্নো সঙ্ঘস্স, যাগুদানমদাপযি;

নগরস্স চতুদ্ৰারে, সক্কচ্চঞ্চেৰ সাধু চ.

সো অন্তরন্তরে রাজা, জম্বুপক্কানি খাদিতুং;

সহোরোধো সহামচ্চো, অগাপাচিন দীপকং.

উপদ্দুতং’স্স গমনে, মনুস্সা পাচি ৰাসিনো;

ৰিসং ফলেসু যো জেসুং, রাজভোজ্জায জম্বুযা.

খাদিত্ৰা জম্বুপক্কানি, তানি তত্থেৰ সো মতো;

সেনাপতি সঙ্ঘধবাধীং-ভযো রজ্জে’ভিসেচযি.

রাজাসিরি সঙ্ঘ বোধি, ৰিস্সুতো পঞ্চসীলৰা;

অনুরাধপুরে রজ্জং, দুৰে ৰস্সানি কারযি.

মহাৰিহারে কারেসি, সলাকগ্গং মনোরমং;

তদাদীপে মনুস্সেসো, ঞত্ৰা দুব্বুট্ঠুপদ্দুতে.

করুণায কম্পিতমনো, মহাথূপঙ্গণে সযং;

নিপজ্জি ভূমিযং রাজা, কত্ৰান ইতি নিচ্ছযং.

‘‘পৰস্সিত্ৰান ¶ দেৰেন, জলেনুপলাৰিতে মযি;

নহেৰ ৰুট্ঠহিস্সামি, মরমানোপহং ইধ’’.

এৰং নিপন্নে ভূমিন্দে, দেৰো পাৰস্সি তাৰদে;

লংকাদীপম্হি সকলে, পিণযন্তো মহামহিং.

তথাপি নুট্ঠহতিসো, অপিলাপনতো জলে;

আৰরিংসু ততো’মচ্চা, জলনিগ্গমনাল়িযো.

ততো জলম্হি পিলৰং, রাজা ৰুট্ঠাসি ধম্মিকো;

করুণাযনুদি এৰং, দীপে দুব্বুট্ঠিকাভযং.

চোরাতহিং তহিং জাতা, ইতি সুত্ৰান ভূপতি;

চোরে আণাপযিত্ৰান, রহস্সেন পলাপীয.

আণাপেত্ৰা রহস্সেন, মতানং সো কলেৰরং;

অগ্গীহি উত্তাসেত্ৰান, হনিতং চোরুপদ্দৰং.

একো যক্খো ইধাগম্ম, রত্তক্খো ইতি ৰিস্সুতো;

করোতি রত্তান’ক্খীতি, মনুস্সানং তহিং তহিং.

অঞ্ঞমঞ্ঞমপেক্খিত্ৰা, ভাযিত্ৰা রত্তনেত্ততং;

নরামরন্তি তে যক্খো, সোভক্খেসি অসঙ্কিতো.

রাজা উপদ্দৰং তেসং, সুত্ৰা সন্তত্তমানসো;

একো’পৰাস গব্ভম্হি, হুত্ৰা অট্ঠঙ্গুপোসথি.

‘‘অপস্সিত্ৰান তং যক্খং, ন চুট্ঠামী’’তি সো সযি;

তস্স সো ধম্মতেজেন, অগা যক্খো তদন্তিকং.

তেন ‘‘কোসী’’তি পুট্ঠো চ, সো ‘‘অহ’’ন্তি পৰেদযি;

‘‘কস্মা পজং মে ভক্খেসি, মা খাদ’’ইতি সোব্রৰি.

‘‘একস্মিং মে জনপদে, নরে দেহী’’তি সোব্রৰি;

‘‘ন সক্কা ইতি ৰুত্তে সো, কমেনেকংতি অব্রৰি.

‘‘অঞ্ঞং ন সক্কা দাতুং মে, মং খাদ’’ ইতি সোব্রৰি;

‘‘ন সক্কা’’ইতি তং যাচি, গামে গামে বলিঞ্চ সো.

সাধূতি ৰত্ৰা ভূমিন্দো, দিপম্পি সকলেপি চ;

গামৰরে নিৰেসেত্ৰা, বলিংতস্স অদাপযি.

মহাসত্তেন ¶ তেনেৰ, সব্বভূতানুকম্পিনা;

মহারোগভযং জাতং, দীপদীপেন নাসিতং.

পরিস্সাৰনমাদায, রাজা দক্খিণদ্ৰারতো;

পরহিংসমরোচেন্তো, এককোৰ পলাযি সো.

পুটভত্তং গহেত্ৰান, গচ্ছন্তো পুরিতো পথি;

ভত্তভোগাযরাজানং, নিবন্ধিত্থ পুনপ্পুনং.

জলং পরিস্সাৰযিত্ৰা, ভুঞ্জিত্ৰান দযালুকো;

তস্সেৰং’নুগ্গহং কাতুং, ইদং ৰচনমব্রুৰি.

‘‘সঙ্ঘবোধি অহং রাজা, গহেত্ৰা মমভো সীরং;

গোট্ঠাভযস্স দস্সেহি, বহুং দস্সতি তে ধনং.

ন ইচ্ছিতো তথাকাতুং, তস্সত্থায মহীপতি;

নিসিন্নোযেৰ অমরি, সো সীসং তস্স আদিয.

গোট্ঠাভযস্স দস্সেসি, সোতু ৰিম্হিতমানসো;

দত্ৰা তস্স ধনং রঞ্ঞো, সক্কারং সাধুকারযি.

এৰং গোট্ঠাভযো এসো, মেঘৰণ্ণাভযো’তি চ;

ৰিস্সুতো তেরস সমা, লংকারজ্জমকারযি.

মহাৰত্থুং কারযিত্ৰা, ৰত্থুদ্ৰারম্হি মণ্ডপং;

কারযিত্ৰা মণ্ডযিত্ৰা, সো ভিক্খু তত্থ সঙ্ঘতো.

অট্ঠুত্তরসহস্সানি, নিসীদেত্ৰা দিনে দিনে;

যাগুখজ্জক ভোজ্জেহি, সাদূহি ৰিৰিধেহি চ.

সচীৰরেহি কপ্পেত্ৰা, মহাদানং পৰত্তযি;

একৰীসদিনা নেৰং, নিবদ্ধঞ্চস্স কারযি.

মহাৰিহারে কারেসি, সিলামণ্ডপ মুত্তমং;

লোহপাসাদথম্ভে চ, পরিৰত্তিয ঠাপযি.

মহাবোধি ¶ সিলাৰেদিং, উত্তরদ্ৰারতোরণং;

পতিট্ঠাপেসি থম্ভে চ, চকুকণ্ণে সচক্ককে.

তিস্সো সীলাপটিমাযো, তীসু দ্ৰারেসু কারযি;

ঠপাপেসি চ পল্লঙ্কং, দক্খিণম্হি সিলামযং.

পধানভূমিং কারেসি, মহাৰিহারপচ্ছতো;

দীপম্হি জিণ্ণকাৰাসং, সব্বঞ্চ পটিসঙ্খরি.

থূপারামে থূপঘরং, থেরম্বত্থলকে তথা;

আরামে মণিসোমৰ্হে, পটিসঙ্খারযি চ সো.

থূপারামে মণিসোমা-রামে মরিচৰট্টকে;

দক্খিণৰ্হ ৰিহারে চ, উপোসথঘরানি চ.

মেঘৰণ্ণাভযৰ্হঞ্চ, নৰৰিহারমকারযি;

ৰিহারমহপূজাযং, পিণ্ডেত্ৰা দীপৰাসীনং.

তিংসভিক্খুসহস্সানং, ছচীৰরমদাসি চ;

মহাৰেসাখপূজঞ্চ, তদা এৰং অকারযি.

অনুৰস্সঞ্চ সঙ্ঘস্স, ছচীৰরমদামযি;

পাপকানং নিগ্গহেন, সোধেন্তো সাসনং তু সো.

ৰেতুল্লৰাদিনো ভিক্খূ, অভযগিরিনিৰাসিনো;

গাহযিত্ৰাসট্ঠিমত্তে, জিনসাসনকণ্টকে.

কত্ৰান নিগ্গহং তেসং, পরতিরে খিপাপযি;

তত্থ খিত্তস্স থেরস্স, নিস্সিতো ভিক্খুচোল়িকো.

সঙ্ঘমিত্তো’তিনামেন, ভূতিৰিজ্জাদিকোৰিদো;

মহাৰিহারে ভিক্খুনং, কুজ্ঝিত্ৰান ইধগমা.

থূপারামে সন্নিপাতং, পৰিসিত্ৰা অসঞ্ঞতো;

সঙ্ঘপালস্স পরিৰেণ, ৰাসিত্থেরস্স তত্থ সো.

গোট্ঠাসযস্স থেরস্স, মাতুলস্স’স্স রাজিনো;

রঞ্ঞো নামেনা‘‘লপন্তো, ৰচনং পটিবাহিয.

রঞ্ঞো কুলূপগো আসি, রাজা তস্মিং পসীদিয;

জেট্ঠপুত্তং জেট্ঠতিস্সং, মহাসেনং কনিট্ঠকং.

অপ্পেসি ¶ তস্স ভিক্খুস্স, সো সঙ্গণ্হি দুতিযকং;

উপনন্ধি তস্মিং ভিক্খুস্মিং, জেট্ঠতিস্সো কুমারকো.

পিতুনো অচ্চযে জেট্ঠ, সিস্সো রাজাঅহোসিসো;

পিতু সারীর সক্কারে, নিগ্গন্তুং নিচ্ছমানকে.

দুট্ঠামচ্চে নিগ্গহেতুং, সযং নিক্খম্ম ভূপতি;

কনিট্ঠং পুরতো কত্ৰা, পিতুকাযং অনন্তরং.

ততো অমচ্চে কত্ৰান, সযং হুত্ৰান পচ্ছতো;

কনিট্ঠে পিতুকাযে চ, নিক্খন্তে তদনন্তরং.

দ্ৰারং সংৰরযিত্ৰান, দুট্ঠমচ্চে নিঘাতিয;

সূলে অপ্পেসি পিতুনো, চিতকাযসমন্ততো.

তেন’স্স কম্মুনা নামং, কক্খলোপপদংঅহু;

সঙ্ঘমিত্তোতু সো ভিক্খু, ভীতো তস্মিং নরাধিপা.

তস্সাভিসেকসমকালং, মহাসেনেন মন্তিয;

তস্সাভিসেকং পেক্খন্তো, পরতীরং গতো ইতো.

পিতরা সো ৰিপ্পকতং, লোহপাসাদ মুত্তমং;

কোটিধনং অগ্ঘনকং, কারেসি সত্তভূমকং.

সট্ঠিসতসহস্সগ্ঘং, পূজযিত্ৰা মণিংতহিং;

কারেসি জেট্ঠতিস্সোতং, মণিপাসাদনামকং.

মণি দুৰে মহগ্ঘে চ, মহাথূপে অপূজযি;

মহাবোধিঘরে তীণি, তোরণানি চ কারযি.

কারযিত্ৰা ৰিহারং সো, পাচিনতিস্স পব্বতং;

পঞ্চৰাসেসু সঙ্ঘস্স, অদাসি পুথুৰী পতি.

দেৰানংপিযতিস্সেন, সো পতিট্ঠাপিতং পুরা;

থূপারামে উরুসিলা, পটিমং চারুদস্সনং.

নেত্ৰান থূপারামৰ্হং, জেট্ঠতিস্সো মহীপহি;

পতিট্ঠাপেসি আরামে, পাচিনতিস্স পব্বতে.

কাল়মত্তিকৰাপিংসো, অদাচেতিয পব্বতে;

ৰিহার পাসাদ মহং, মহাৰেসাখমেৰ চ.

কত্ৰা ¶ তিংস সহস্সস্স, সঙ্ঘস্স’দা ছচীৰরং;

আল়ম্বগামৰাপিংসো, জেট্ঠতিস্সো অকারযি.

এৰং সো ৰিৰিধং পুঞ্ঞং, পাসাদকরণাদিকং;

কারেন্তো দসৰস্সানি, রাজা রজ্জমকারযি.

সুজনপ্পসাদ সংৰেগত্থায কতে মহাৰংসে

জেট্ঠতিস্সচ্চযে তস্স, মহাসেনো কনিট্ঠকো;

সত্তৰীসতিৰস্সানি, রাজা রজ্জমকারযি.

তস্সাভিসেকং কারেত্ৰা, অঞ্ঞং কিচ্চঞ্চনেকধা;

মহাৰিহার ৰিদ্ধংসং, কাতুকামো অসঞ্ঞতো.

অৰিনযৰাদিনো এতে, মহাৰিহারৰাসিনো;

ৰিনযৰাদী মযং রাজ, ইতি গাহিয ভূপভিং.

মহাৰিহারৰাসিস্স ¶ , আহারং দেতি ভিক্খুনো;

যো সো সতং দণ্ডিযো’তি, রঞ্ঞা দণ্ডং ঠপাপযি.

উপদ্দুতা তেহি ভিক্খূ, মহাৰিহারৰাসিনো;

মহাৰিহারং ছড্ডেত্ৰা, মলযং রোহণং অগুং.

তেন মহাৰিহারো’যং, নৰৰস্সানি ছড্ডিতো;

মহাৰিহারৰাসীহি, ভিক্খূহি আসি সুঞ্ঞকো.

‘‘হোতি অস্সামিকং ৰত্থু, পুতুৰিসামিনো’’ইতি;

রাজানং সঞ্ঞাপেত্ৰা সো, থেরো দুম্মতি দুম্মতিং.

মহাৰিহারং নাসেতুং, লদ্ধানুমতি রাজতো;

তথা কাতুং মনুস্সে সো, যোজেসি দুট্ঠমানসো.

সঙ্ঘমিত্তস্স থেরস্স, সেৰকো রাজৰল্লভো;

সোণামচ্চো দারণো চ, ভিক্খৰো চ অলজ্জিনো.

ভিন্দিত্ৰা লোহপাসাদং, সত্তভূমক মুত্তমং;

ঘরে নানপ্পকারে চ, ইতো’ভযগিরিং নযুং.

মহাৰিহারা নীতেহি, পাসাদেহি বহূহি চ;

অভযগিরিৰিহারোযং, বহুপাসাদকো অহু.

সঙ্ঘমিত্তং পাপমিত্তং, থেরং সোণঞ্চ সেৰকং;

আগম্ম সুবহুং পাপং, অকাসি সো মহীপতি.

মহাসিলাপটিমং সো, পাচিনতিস্সপব্বতা;

আনেত্ৰা’ভযগিরিম্হি, পতিট্ঠাপেসি ভূপতি.

পটিমাঘরং বোধিঘরং, ধাতুসালং মনোরমং;

চতুসালঞ্চ কারেসী, সঙ্খরী কুক্কুটৰ্হযং.

সঙ্ঘমিত্তেন থেরেন, তেন দারুণকম্মুনা;

ৰিহারো সো’ভযগিরি, দস্সনেয্যো অহু তদা.

মেঘৰণ্ণাভযো নাম, রঞ্ঞো সব্বত্থ সাখকো;

সখা অমচ্চো কুজ্ঝিত্ৰা, মহাৰিহারনাসনে.

চোরো হুত্ৰান মলযং, গন্ত্ৰা লদ্ধমহব্বলো;

খন্ধাৰারং নিৰেসেসি, দুরতিস্সকৰাপিযং.

তত্রা’গতং ¶ তং সুত্ৰা, সহাযং সো মহীপতি;

যুদ্ধাহ পচ্চুগ্গন্ত্ৰান, খন্ধাৰারং নিৰেসযি.

সাধুং পানঞ্চ মংসঞ্চ, লভিত্ৰা মলযাগতং;

‘‘ন সেৰিস্সং সহাযেন, ৰিনা রঞ্ঞা’’তি চিন্তিয.

আদায তং সযংযেৰ, রত্তিং নিক্খম্ম এককো;

রঞ্ঞো সন্তিকমাগম্ম, তমত্থং পটিৰেদযি.

তেনা’ভতং তেন সহ, ৰিস্সত্থো পরিভুঞ্জিয;

‘‘কস্মা চোরো অহু মে ত্ৰং, ‘‘ইতি রাজা অপুচ্ছিতং.

‘‘তযা মহাৰিহারস্স, নাসিতত্তা’’তি অব্রুৰি;

‘‘ৰিহারং ৰাসযিস্সামি, খেমমেতং মমচ্চযং.

ইচ্ছেৰ মব্রৰী রাজা, রাজানং সো খমাপযি;

তেন সঞ্ঞাপিতো রাজা, নগরংযেৰ আগমি.

রাজানং সঞ্ঞপেত্ৰা সো, মেঘৰণ্ণাভযো পন;

রঞ্ঞা সহ ন আগঞ্ছি, দব্বসম্ভারকারণা.

ৰলভা ভরিযা রঞ্ঞো, একং লেখকধীতিকা;

মহাৰিহারনাসম্হি, দুক্খিতং তং ৰিনাসকং.

থেরং মারাপযি কুদ্ধা, সংগহেত্ৰান ৰড্ঢকিং;

থূপারামং ৰিনাসেতুং, আগতং দুট্ঠমানসং.

মারাপেত্ৰা সঙ্ঘমিত্ত-ত্থেরং দারুণকারকং;

সোণামচ্চদারণঞ্চ, ঘাতযিংসু অসঞ্ঞকা.

আনেত্ৰা দব্বসম্ভারং, মেঘৰণ্ণাভযো তু সো;

মহাৰিহারেনেকানি, পরিৰেণানি কারযি.

অভযেনভযো তস্মিং, ৰূপসন্তে তু ভিক্খৰো;

মহাৰিহারং ৰাসেসুং, আগন্ত্ৰান ততো ততো.

রাজা মহাবোধিঘরে, পচ্ছিমায দিসায তু;

কারেত্ৰা লোহরূপানি, ঠপাপেসি দুৰে তু সো.

দক্খিণারামৰাসিম্হি, কুহকে জিম্হমানসে;

পসীদিত্ৰা পাপমিত্তে, তিস্সত্থেরে অসঞ্ঞতে.

মহাৰিহারসীমন্তে ¶ , উয্যানে জোতিনামকে;

জেতৰনৰিহারং সো, ৰারযন্তোপি কারযি.

ততো সীমং সমুগ্ঘাতুং, ভিক্খুসঙ্ঘমযাচিসো;

অদাতুকামা তং ভিক্খূ, ৰিহারম্হা অপক্কমুং.

ইধ সীমাসমুগ্ঘাতং, পরেহি করিযমানকং;

কোপেতুং ভিক্খৰো কেচি, নিলীযিংসু তহিং তহিং.

মহাৰিহারো নৰমাসে, এৰং ভিক্খূহি ৰজ্জিতো;

‘‘সমুগ্ঘাতং করিম্হা’’তি-পরে ভিক্খূ অমঞ্ঞিসুং.

ততো সীমাসমুগ্ঘাতে, ব্যাপারে পরিনিট্ঠিতে;

মহাৰিহারং ৰাসেসুং, ইধাগন্ত্ৰান ভিক্খৰো.

তস্স ৰিহারগাহিস্স, তিস্সত্থেরস্স চোদনা;

অন্তিমৰত্থুনা আসি, ভূতত্থং সঙ্ঘমজ্ঝগা.

ৰিনিচ্ছিয মহামচ্চো, তথা ধম্মিকসম্মতো;

উপ্পব্বাজেসি ধম্মেন, তং অনিচ্ছায রাজিনো.

সোযেৰ রাজা কারেসি, ৰিহারং মণিহীরকং;

তযো ৰিহারে কারেসি, দেৰালযং ৰিনাসিয.

গোকণ্ণং এরকাপিল্লং, কলন্দব্রাহ্মণগামকে;

মিগগামৰিহারঞ্চ, গঙ্গসেনকপব্বতং.

পচ্ছিমায দিসাযাথ, ধাতুসেনঞ্চ পব্বতং;

রাজা মহাৰিহারঞ্চ, কোকৰাতম্হি কারযি.

রূপারম্মৰিহারঞ্চ, চূল়ৰিট্টঞ্চ কারযি;

উত্তরাভযসৰ্হে চ, দুৰে ভিক্খূনুপস্সযে.

কালৰেল়কযক্খস্স, ঠানে থূপঞ্চ কারযি;

দীপম্হি জিণ্ণকাৰাসে, বহূ চ পটিসঙ্খরি.

সঙ্ঘত্থেরসহস্সস্স, সহস্সগ্ঘমদাসি সো;

থেরদানঞ্চ সব্বেসং, অনুৰস্সঞ্চ চীৰরং.

অন্নপানাদিদানস্স, পরিচ্ছেদো ন ৰিজ্জতি;

সুভিক্খত্থায কারেসি, সো’ৰ সোল়স ৰাপিযো.

মণিহীরমহাৰাপিং ¶ , জল্লুরং খাণুনামকং;

মহামণিং কোকৰাতং, মোরকপরকৰাপিকং.

কুব্বাহকং ৰাহকঞ্চ, রত্তমালকণ্ডকম্পি চ;

তিস্সৰড্ঢমানকঞ্চ, ৰেল়ঙ্গৰিট্ঠিকম্পি চ.

মহাগল্লচীরৰাপিং, মহাদারগল্লকম্পি চ;

কাল়পাসাণৰাপিঞ্চ, ইমা সোল়স ৰাপিযো.

গঙ্গায পব্বৰৰ্হংসো, মহামাতিঞ্চ কারযি;

এৰং পুঞ্ঞমপুঞ্ঞঞ্চ, সুবহুং সো উপাচিনীতি.

অসাধুসঙ্গমেনেৰং, যাৰজীৰং সুভাসুভং;

কত্ৰা গতো যথাকম্মং, সো মহাসেনভূপতি.

তস্মা অসাধুসংসগ্গং, আরকা পরিৰজ্জিয;

অহিং ৰা’সি ৰিসং খিপ্পং, করেয্য’ত্থহিতং বুধো.

অহু রাজা সিরিমেঘ-ৰণ্ণো তস্স সুতো ততো;

ৰন্ধাতা ৰিয লোকস্স, সব্বসম্পত্তিদাযকো.

মহাসেনেন পাপানং, ৰসগেন ৰিনাসিতে;

মহাৰিহারে সব্বেপি, সন্নিপাতিয ভিক্খৰো.

উপসঙ্কম্ম ৰন্দিত্ৰা, নিসিন্নো পুচ্ছি সাদরো;

‘‘পিতরা সঙ্ঘমিত্তস্স, সহাযেন ৰিনাসিতং.

কিং কিমেৰা’’তি আহংসু, ভিক্খৰো তং নরিস্সরং;

‘‘সীমাযুগ্ঘাটনং কাতুং, ৰাযমিত্ৰাপি তে পিতা.

নাসক্খি অন্তোসীমাযং, ভিক্খূনং ৰিজ্জমানতো;

ভূমিগব্ভনিলীনাহি, সত্তাসুং এত্থ ভিক্খৰো.

অমচ্চো সোণামচ্চো চ, সঙ্ঘমিত্তো চ পাপিযো;

রাজানং সঞ্ঞাপেত্ৰান, অপুঞ্ঞং তেন কারযুং.

ভিন্দিত্ৰা লোহপাসাদং, সত্তভূমকমুত্তমং;

ঘরে নানপ্পকারে চ, ইতো’ভযগিরিং নযুং.

মাসকে চতুবুদ্ধেহি, নিৰুত্থে চেতিযঙ্গণে;

ৰপাপেসুঞ্চ দুপ্পঞ্ঞা, পস্স বালসমাগমং’’.

তং ¶ সুত্ৰা পিতুকম্মং সো, নিব্বিন্নো বালসঙ্গমে;

পিতরা নাসিতং তত্থ, সব্বং পাকতিকং অকা.

লোহপাসাদমগদো’ৰ, কাসি পাসাদমুত্তমং;

রঞ্ঞো মহাপনাদস্স, দস্সেন্তো ৰিয ভূতলে.

পরিৰেণানি সব্বানি, নাসিতানি নিৰেসযি;

ভোগে আরামিকানঞ্চ, যথাঠানে ঠপেসি সো.

পিতরা পচ্চযানঞ্চ, পচ্ছিন্নত্তা ৰিবুদ্ধিনা;

ছিদ্দাৰাসং ঘনাৰাসং, ৰিহারং’কাসি বুদ্ধিমা.

কারিতে পিতরা জোতি ৰনেচে’সো ৰিহারকে;

কম্মং ৰিপ্পকতং সব্বং, নিট্ঠাপেসি নরিস্সরো.

থেরস্সা’থ মহিন্দস্স, সমণিন্দস্স সুনুনো;

সুত্ৰান মনুজিন্দো সো, পৰত্তিং সব্বমাদিতো.

পসীদিত্ৰা গুণে তস্স, রাজা দিপ্পপসাদকে;

‘‘ইস্সরো ৰত দীপস্স, থেরো’’ ইতি ৰিচিন্তিয.

পটিবিম্বং সুৰণ্ণস্স, কত্ৰা তম্মাণ নিস্সিতং;

পুব্বকত্তিকমাসস্স, পব্বপক্খে তু সত্তমে.

দিনে নেত্ৰা চেতিযম্ব-থলে থেরম্বসঞ্ঞিতে;

তত্রট্ঠমে নিৰাসেত্ৰা, ততো তু নৰমে পন.

মহাসেনং গহেত্ৰা সো, দেৰসেনা সমূপমং;

ওরোধে নগরে চেৰ, গেহরক্খণকে ৰিনা.

লংকাদীপে চ সকলে, সব্বে আদায ভিক্খৰো;

ৰিস্সজ্জেত্ৰা মনুস্সে চ, নগরে চারকট্ঠিতে.

পট্ঠপেত্ৰা মহাদানং, অযঞ্চাখিলপাণিনং;

পূজং সব্বোপহারেহি, করোন্তো চ অনূপমং.

পচ্চুগ্গমনমেতস্স, দীপসত্থুস্স সত্থুনো;

ৰরপুত্তস্স সো কত্ৰা, দেৰরাজা’ৰ সত্থুনো.

চেতিযম্বথলা যাৰ, নগরং সাধুসজ্জযি;

মগ্গং ৰেসালিতো যাৰ, সাৰত্থিনগরং যথা.

ৰিস্সজ্জেত্ৰা ¶ তহিং ভোগং, সব্বং থেরস্স সো পিতা;

রাজা মোগ্গলিপুত্তস্স, থেরস্সা’গমনে ৰিয.

দত্ৰা তত্থ মহাদানং, কপণদ্ধিৰনিব্বকে;

ভিক্খৰোপি চ তোসেত্ৰা, পচ্চযেহি চতূহি’পি.

থেরস্সা’গমনে এৰং, পস্সতূতি মহাজনে;

গহেত্ৰা তংমহন্তেন, সক্কারেন মহাযসো.

তম্হা ওরুয্হ সো মহা, সযং হুত্ৰা পুরেচরো;

ভিক্খৰো চাপি কত্ৰান, পরিৰারে সমন্ততো.

থেরস্স বিম্বং সোৰণ্ণং, খিরসাগরমজ্ঝগো;

সঞ্ঝা ঘনপরিক্খিত্তো, হেমমেরু’ৰ সোভথ.

ৰেসালিনগরং সুত্তং, দেসেতুং লোকনাযকো;

অগমা এৰমেৰাতি, দস্সেসি চ মহাজনং.

এৰং করোন্তো সক্কার-সম্মানং সো নরাসভো;

নগরস্স’স্স পাচিন-দ্ৰারপস্সে সযংকতং.

উপসঙ্কম্ম সাযণ্হে, ৰিহারং সোত্থিযা করং;

তীহং তত্থাপি ৰাসেসি, বিম্বং তং জিনসুনুনো.

নগরং সাধুসজ্জেত্ৰা, ততো দ্ৰাদসমে দিনে;

সত্থুস্সা’দিপ্পৰেসম্হি, পুরং রাজগহং যথা.

পটিমং নীহরিত্ৰা তং, ৰিহারং সোত্থিযা করং;

নগরে সাগরাকারে, ৰত্তমানে মহামহে.

মহাৰিহারং নেত্ৰান, তেমাসং বোধিযঙ্গণে;

নিৰাসেত্ৰা পৰেসেত্ৰা, তেনেৰ ৰিধিনা পুরং.

রাজগেহসমীপম্হি, পুব্বদক্খিণকোণকে;

পটিবিম্বস্স কারেসি, তস্স সাধুনিৰেসনং.

কারেত্ৰা ইদ্ধিযাদীনং, পটিমাযো ৰিসারদো;

থেরেন সহ তত্থে’ৰ, নিৰেসেসি মহাপতি.

আরক্খং পট্ঠপেত্ৰা, পূজায চ পরিব্বযং;

অনুসংৰচ্ছরং কাতুং, এৰমেৰ নিযোজযি.

তস্সাণমনুরক্খন্তা ¶ , রাজা তব্বংসিকা ইধ;

যাৰ’জ্জপরিরক্খন্তি, তং ৰিধিং ন ৰিনাসিয.

পৰারণাদিনে নেত্ৰা, ৰিহারং নগরা ততো;

কাতুং তেরসিযং পূজং, অনুৰস্সং নিযোজযি.

ৰিহারে অভযে তিস্স-ৰসভে বোধিপাদপে;

সিলাৰেদিঞ্চ কারেসি, পাকারঞ্চ মনোহরং.

নৰমে তস্স ৰস্সম্হি, দাঠাধাতুং মহেসিনো;

ব্রাহ্মণীকাচি আদিয, কালিঙ্গম্হা ইধানযি.

দাঠাধাতুস্স ৰংসম্হি, ৰুত্তেন ৰিধসনং;

গহেত্ৰা বহুমানেন, কত্ৰা সম্মা ন মুত্তমং.

পক্খিপিত্ৰা করণ্ডম্হি, ৰিসুদ্ধফলিকুম্ভৰ্হে;

দেৰানংপিযতিস্সেন, রাজৰত্থুম্হি কারিতে.

ধম্মচক্কৰ্হযে গেহে, ৰড্ঢযিত্থ মহীপতি;

ততো পট্ঠায তং গেহং, দাঠাধাতুঘরং অহু.

রাজা সতসহস্সানং, নৰকং পুণ্ণমানসো;

ৰিস্সজ্জেত্ৰা ততো’কাসি, দাঠাধাতু মহামহং.

অনুসংৰচ্ছরং নেত্ৰা, ৰিহারমভযুত্তরং;

তস্স পূজাৰিধিং কাতু, মেৰ রূপং নিযোজযি.

অট্ঠারস ৰিহারে চ, কারাপেসি মহীপতি;

অনুকম্পায পাণীনং, ৰাপিযো চ থিরোদিকা.

বোধি পূজাদি পুঞ্ঞানি, অপ্পমেয্যানি কারিয;

অট্ঠৰীসতিমে ৰস্সে, গভো সো তস্স যা গতি.

কুমারো জেট্ঠতিসো’থ, ভাতা তস্স কনিট্ঠকো;

ছত্তং লঙ্ঘেসি সংকাযং, দন্তসিপ্পম্হি কোৰিদো.

কত্ৰা কম্মানি চত্রানি, দুক্করানি মহীপতি;

সিপ্পাযতন মেতং সো, তিক্খাপেসি বহূজনে.

অণত্তো পিতুনা’কাসি, ইদ্ধিহি ৰিয নিম্মিতং;

বোধিসত্ত সরূপঞ্চ, রূপং সাধু মনোহরং.

অপসযঞ্চ ¶ পল্লঙ্কং, ছত্তং রতনমণ্ডপং;

চিত্রদন্তমযং কিঞ্চি, তস্স কম্মং তহিং তহিং.

কত্ৰা সো নৰৰস্সানি, লংকাদীপানুসাসনং;

অনেকানি চ পুঞ্ঞানি, যথাকম্মমুপাগমি.

বুদ্ধদাসো ততো তস্স, পুত্তো আসি মহীপতি;

গুণানং আকরো সব্ব-রতনানং’ৰ সাগরো.

সুখং সব্বপযোগেহি, করোন্তো দীপৰাসিনং;

রক্খমালকমন্দং’ৰ, পুরং ৰস্সৰণো ধনী.

পঞ্ঞা পুঞ্ঞগুণূপেতো, ৰিসুদ্ধকরুণালযো;

তথা দসহি রাজূনং, ধম্মেহি সমুগাগতো.

চতস্সো অগতি হিত্ৰা, কারযন্তো ৰিনিচ্ছযং;

জনং সঙ্গহৰত্থূহি, সঙ্গহেসি চতূহিপি.

চরিযং বোধিসত্তানং, দস্সেন্তো সক্খিপাণিনং;

পিতা’ৰ পুত্তে সো সত্তে, অনুকম্পিত্থ ভূপতি.

দল়িদ্দে ধনদানেনা-কাসি পুণ্ণমনোরথে;

সুখিতে সব্বভোগানং, জীৰিতস্স চ গুত্তিযা.

সাধৰো সঙ্গহেনা’থ, নিগ্গহেন অসাধৰো;

গিলানে ৰেজ্জকম্মেন, সঙ্গহেসি মহাপতি.

অথেক দিৰসং রাজা, হত্থিক্খন্ধৰরং গতো;

তিস্সৰাপিং নহানত্তং, গচ্ছমানো মহাপথে.

অদ্দসে’কং মহানাগং, কুচ্ছিরোগ সমপ্পিতং;

পুত্তভাগ ৰিহারস্স, পস্সে ৰম্মিকমত্থকে.

উত্তান মুদরে রোগং, দস্সেতুং গণ্ডসঞ্ঞিতং;

নিপন্নংসো’থ চিন্তেসি, ততো রোগীতি নিচ্ছযং.

অথো’রুয্হ মহানাগং, মহানাগ সমীপগো;

‘‘কারণং তে মহানাগ, ঞাতমাগমনে মযা;

কুম্হে খলু মহাতেজা, খিপ্পং কুপ্পিতসীলিনো.

তস্মা ফুসিত্ৰা তং কম্মং, কাতুং সক্কা ন তে মযা;

অফুসিত্ৰাপি নো সক্কা, কিন্নুকাতব্বমেত্থী’তি.

এৰং ¶ পুত্তে ফণিন্দো সো, কেৰলং ফণমত্তনো;

বিলস্স’ন্তো পৰেসেত্ৰা, নিপ্পজ্জিত্থ সমাহিতো.

অথে’ন মুপসঙ্কম্ম, উচ্ছঙ্গগতমত্তনো

সত্থং গহেত্ৰা ফালেত্ৰা, উদরং তস্স ভোগিনো.

নীহরিত্ৰা ততো দোসং, কত্ৰা ভেসজ্জ মুত্তমং;

সপ্পং তং তঙ্খণেনেৰ, অকাসি সুখিতং তদা.

অত্তান মেৰং থোমেসি, ‘‘মহাকারুঞ্ঞতং মম;

তিরচ্ছানাপি জানিংসু, সাধু রজ্জন্তি মে কতং.

দিস্ৰা সুখিতমত্তানং, পন্নগোসো মহীপতিং;

পূজেতুং তস্স পাদাসি, মহগ্ঘং মণিমত্তনো.

সিলামযায সম্বুদ্ধ-পটিমায অকারযি;

মিণিং তং নযনং রাজা, ৰিহারে অভযুত্তরে.

একোপি ভিক্খু ভিক্খন্তো, গামম্হি থুসৰিত্থিকে;

সুক্খং ভিক্খং লভিত্ৰান, খীরভিক্খায সঞ্চরং.

খীরং সপ্পাণকং লদ্ধা, পরিভুঞ্জিত্থ কুচ্ছিযং;

পাণকা বলৰো হুত্ৰা, উদরং তস্স খাদিসুং.

ততো সো উপসঙ্কম্ম, তং নিৰেদেসি রাজিনো;

রাহ ‘‘জাতো সুলো’যং, কদা হারেসি কীদিসং.

সো আহ’’ থুসৰিত্থিম্হি, গামে খীরেন ভোজনে;

ভুত্তে’তি রাজা অঞ্ঞাসি, খীরং সপ্পাণকং’’ইতি.

তদেৰ অস্সো একোপি, সিরাৰেধ তিকিচ্ছিযো;

রাজা তস্স সিরাৰেধং, কত্ৰা আদায লোহিতং.

পাযেত্ৰা সমণং আহ, মুহুত্তং ৰীতিনাময;

‘‘অস্সলোহিতমণ’’ন্তি, তং সুত্ৰা সমণোৰমি.

পাণকা লোহিতেনেৰ, নিক্খমিংভু সুখী অহু;

ভিক্খুং রাজা নিৰেদেসি, কুচ্ছিমেৰং পনত্তনো.

‘‘একসত্থপহারেন ¶ , পাণকা সমণো হযো;

কতা অরোগা সম্মমে, ৰেজ্জকম্ম মহো’’ইতি.

অন্তো তু দিত্থতুণ্ডেন, তেন দুক্খেন পীল়িতো;

রাজানং মগমা রাজা, নিদানং তস্স পুচ্ছিয.

অন্তো তু দিত্থতুণ্ডেন, তেন দুক্খেন পীল়িতো;

রাজানং মগমা রাজা, নিদানং তস্স পুচ্ছিয.

অএন্তা সপ্পো’তি ৰিঞ্ঞায, সত্তাহমুপৰাসিয;

সুন্হাতসু ৰিলিত্তঞ্চ, সযনে সাধু সন্থতে.

সযাপেসি ততো সো’তি, নিদ্দায মুখমত্তনো;

ৰিৰরিত্ৰা তদা সুত্তো, ততো তস্স মুখন্তিকে.

মংসপেসিং ঠপাপেসি, সরজ্জুং তস্স নিগ্গতো;

গন্ধেন তং ডংসিত্ৰান, অন্তো ৰিসিতুমারভি.

রজ্জুযা’থ গহেত্ৰান, সমাকড্ঢিক পাণিযং;

উদকে পাতযিত্ৰান, ইদং ৰচনমব্রৰি.

‘‘ৰেজ্জো অহোসি সম্মাস-ম্বুদ্ধস্স কির জীৰকো;

কম্মং ৰিজ্জতি লোকস্স, কতং কিংতেন দুক্করং.

ঈদিসং কসিরাসো’পি, কম্মং নত্থে’ত্থ সংসযো;

সব্বাদরেন কুব্বন্তো, অহো পুঞ্ঞো দযো মম.

তথা হেল্লোলিগামম্হি, চণ্ডালি মুল়্হগব্ভিনিং;

জাতং সত্তসু ৰারেসু, সগব্ভং সুখিতং অকা.

ৰাতবোধেন একো’পি, ভিক্খু উট্ঠাপিতো অহু;

গোপানসী গতেতম্হি, দুক্খামোচেসি বুদ্ধিমা.

পিৰন্তস্সাপি মণ্ডূক, জীবযুত্তং জলং লহুং;

নাসিকা বিলতো গন্ত্ৰা, বীজমারুয্হ মত্থকং.

ভিজ্জিত্ৰা আসি মণ্ডূকো, সো ৰুদ্ধো তত্থ গচ্ছতি;

মেঘস্সা’গমনে তেন, সো’নিব্বজ্জতি মাণৰো.

ফালেত্ৰা ¶ মত্থকং রাজা, মণ্ডূকমপনীয সো;

কপালানি ঘটেত্ৰান-কাসি পাকতিকং খণে.

হিতত্থং দীপাৰাসিনং, গামে গামে মহীপতি;

কারেত্ৰা ৰেজ্জসালাযো, ৰজ্জে তত্থ নিযোজযি.

সব্বেসং ৰজ্জসত্থানং, কত্ৰা সারত্থসঙ্গহং;

ঠপেসি ৰেজ্জে দীপস্স, তিকিচ্ছত্থমনাগতে;

যোজেসি ৰেজ্জ মেকেকং, রাজা গাম দ্ৰিপঞ্চকে.

অদা ৰিসদ্ধ খেত্তানং, ৰেজ্জানমুপজীৰনং;

ৰেজ্জেহত্থীনমস্সানং, বলস্স চ নিযোজযি.

পিট্ঠসপ্পিনমন্ৰানং, সালাযো চ তহিং তহিং;

কারেসি সহ ভোগেন, সালাযো চ মহাপথে.

নিচ্চমস্সোসি সদ্ধম্মং, সক্কত্ৰা ধম্মভাণকে;

ধম্মভাণকৰট্টঞ্চ, পট্ঠপেসি তহিং তহিং.

সাটকন্তরতো কত্ৰা, সত্থ ৰট্টিং মহাদযো;

দিট্ঠে দিট্ঠে পমোচেসি, দুক্খম্হা দুক্খিতে জনে.

অথেক দিৰসং রাজা, রাজাভরণ মণ্ডিতো;

সদ্ধিং গচ্ছতি সেনায, দেৰেহি ৰিয ৰাসৰো.

তং দিস্ৰা সিরিসোভগ্গ-মগ্গং পত্তং মহী পতিং;

রাজিদ্ধিহি ৰিরাজন্তং, বদ্ধৰেরো ভৰন্তরে.

কুট্ঠি একো পকুপ্পিত্ৰা, হট্ঠেনাহনিযা’ৰতিং;

পোথেন্তো তঞ্চ পোথেন্তো, ভূমিং কত্তরযট্ঠিযা.

অক্কোসেসি অনেকেহি, অক্কোসৰচনেহি চ;

ৰিপ্পকারংমিমং দিস্ৰা, দূরতো’ৰ মহীপতি.

‘‘নাহং সরামি সত্তস্স, কস্সা’পি কতমপ্পিযং;

পুব্বৰেরী অযং জাতু, নিব্বাপেস্সামিতং’’ ইতি.

অণাপেসি সমীপট্ঠং, পুরিসং ‘‘গচ্ছ কুট্ঠিনো;

অমুকস্সা’ভিজানাহি, চিত্তাচার’’ন্তি সো ততো.

সহাযো ¶ ৰিয কুট্ঠিস্স, সমীপম্হি নিসীদিয;

‘‘রুট্ঠো কিমত্থং ভো ত্ৰ’’ন্তি, পুচ্ছি সব্বমৰোচ সো.

‘‘দাসো মে বুদ্ধদাসো’যং, রাজাহু পুঞ্ঞকম্মুনা;

অৰমঞ্ঞায মং ময্হং, পরতো তো যাতি হত্থিনা.

জানাপেস্সামি অত্তানং, কতিপাহেন সোযদি;

হত্থং মে এতি কারেত্ৰা, সব্বং দাসান নিগ্গহং.

নো চে হত্থং মমা’যাতি, মারেত্ৰা গললোহিতং;

পিৰিস্সামি ন সন্দেহো, ন চিরেনেৰ পস্সসি’’.

সো গন্ত্ৰা নরপালস্স, পৰত্তিং তং নিৰেদযি;

‘‘পুব্বৰেরি মমাযন্তি, নিচ্ছিনিত্ৰা মহামতি.

ৰিনো দেতুমুপাযেন, পুত্তংৰেরন্তি ৰেরিনো;

‘‘সাধু সঙ্গণুতং ত্ৰ’’ন্তি, পুরিসং তং নিযেজযি.

সো কুট্ঠিমুপসঙ্কম্ম, সহাযো পিয আহতং;

‘‘রাজানং তং ৰিনাসেতুং, চেতেত্ৰা কালমেত্তকং.

অলভন্তো সহাযং মে, নাসক্খি তস্স ঘাতনে;

লদ্ধাতুম্হে নযিস্সামি, মত্থকং মে মনোরথং.

এথ গেহে ৰসিত্ৰা মে, হোথ মে অনুৰত্তকা;

অহমেৰ’স্স নাসেমি, কতিপাহেন জীৰিতং.

ইতি ৰত্ৰান তং কুট্ঠং, নেত্ৰা সো ঘরমত্তনো;

সুন্হাত সুৰিলিত্তঞ্চ, নিৰত্থসুখুমম্বরং.

সুভুত্তমধুরাহারং, যোব্বনিত্থিকথাদরং;

সযাপেসি মনুঞ্ঞম্হি, সযনে সাধু সন্থতে.

এতে নেৰ নিযামেন, কতিপাহং নীৰাসিয;

ঞত্ৰা তং জাতৰিস্সাসং, সুখিতং পিণিতিন্দ্রিযং.

‘‘রঞ্ঞো দিন্ন’’ন্তি ৰত্ৰান, খজ্জভোজ্জাদিকং অদা;

দ্ৰত্তিক্খত্তুং নিসেধেত্ৰা, তেন’জ্ঝিট্ঠো নমগ্গহি.

ভূপালেন কমেনা’সি, ৰিস্সত্থো’তিৰ ভূমিপো;

মতোতি সুত্ৰা তস্সা-সি হদযং ফলিতং দ্ৰিধা.

এৰং ¶ রোগে তিকিচ্ছেসি, রাজা সারীরমানসে;

ঠপেসি ৰেজ্জে দীপস্স, তিকচ্ছত্থ মনাগতে.

পঞ্চৰীসতিহত্থেন, পাসাদে নোপসোভিতং;

মহাৰিহারেমোরৰ্হ-পরিৰেণমকারযি.

সমণং গোল়পানুঞ্চ, অদা গামদ্ৰযং তহিং;

ধম্মঘাসক ভিক্খূনং, ভোগে কপ্পিযকারকে.

ৰিহারে পরিৰেণে চ, সম্পন্ন চতুপচ্চযে;

ৰাপিযো দানসালাযো, পটিমাযোচ কারযি.

তস্সেৰ রঞ্ঞো রজ্জম্হি, মহাধম্মকথীযতি;

সুত্তানি পরিৰত্তেসি, সীহল়াযনিরুত্তিযা.

অভীতি পুত্তা তস্সা’সুং, সূরাৰিরঙ্গরূপিনো;

অসীতিযা সাৰকানং, নামকাযিপদস্সনা.

সারিপুত্তাদিনামেহি, পুত্তেহি পরিৰারিতো;

বুদ্ধদাসো সসম্বুদ্ধ-রাজাৰিয ৰিরোচথ.

এৰং কত্ৰা হিতংদীপ-ৰীসীনং তিদিৰং গতো;

ৰস্সে একূনতিংসম্হি, বুদ্ধদাসো নরাধিপো.

ততো জেট্ঠসুতো তস্স, উপতিস্সো’সি ভূপতি;

সব্বরাজগুণোপেসো, নিচ্চসীলো মহাদযো.

দসাপুঞ্ঞক্রিযাহিত্ৰা, দসপুঞ্ঞক্রিযা’দীযি;

রাজধম্মেচ পূরেসি, রাজপারমিতা দস.

গণ্হি সঙ্গহৰত্থূহি, চথূহি চ চতুদ্দিসং;

মহাপাল়িম্হি দাপেসি, রাজারাজানুভোজনং.

উত্তরম্হি দিসাভাগে, চেতিযম্হা তু মঙ্গলা;

থূপঞ্চ পটিমাগেহং, পটিমঞ্চা’পি কারযি.

করোন্তো তঞ্চ সো রাজা, মাখিজ্জন্তু জনা ইতি;

কারাপেসি কুমারেহি, দাপেত্ৰা গুল়কণ্ডুলং.

রাজুপ্পলৰ্হযং ¶ গিজ্ঝ-কূটং পোক্খরপাসযং;

ৰালাহস্সঞ্চ অম্বুট্ঠিং, গোণ্ডিগোমম্হি ৰাপিকং.

ৰিহারং খণ্ডরাজিঞ্চ, ৰাপিযো চ থিরোদিকা;

অপ্পমাণানি পুঞ্ঞানি, কারাপেসি তহিং তহিং.

ৰস্সামানেপি সো ৰস্সে, সযনে সন্নিসিন্নকো;

কেৰলং পরিণামেসি, রত্তিং ‘‘খেদো জনস্সী’’তি.

ঞত্ৰা অমচ্চো তং নেত্ৰা, উয্যানং জাদযীঘরং;

এৰং পটিচ্চ অত্তানং, দুক্খং নাকাসি পাণিনং.

কালে তস্সা’সী দুক্খিত্ত-রোগদুক্খেহি পীল়িতো;

দীপো দীপো পমোপাপ-তমসো সো সুমানসো.

ভিক্খূ পুচ্ছিত্থ’’কিংভন্তে, দুব্ভিক্খাদিভযদ্দিতে;

লোকে লোকহিতং নত্থি, কতং কিঞ্চি মহেসীনা.

গহ্ঘারোহণসুত্তস্স, উপ্পত্তিংতস্স নিদ্দিসুং;

সুত্ৰা তং সব্বসোৰণ্ণং, বিম্বং সম্বুদ্ধধাতুনো.

কত্ৰা সত্থুসিলাপত্তং, সোদকং পাণিসম্পুটে;

ঠপেত্ৰা তস্স তে রূপ-মারোপেত্ৰা মহারথং.

সযং সীলং সমাদায, সমাদেত্ৰা মহাজনং;

মহাদানং পৰত্তেত্ৰা, অভযং তম্বপাণিনং.

অলঙ্কত্ৰা চ নগরং, দেৰলোকমনোহরং;

দীপৰাসীহি সব্বেহি, ভিক্খূহি পরিৰারিতো.

ওতরিত্থ মহাৰীথিং, ভিক্খূ তত্থ সমাগতা;

ভণন্তা রতনং সুত্তং, সিঞ্চমানা জলং তথা.

রাজগেহন্তিকে ৰীতি-মগ্গে পাকারসন্তিকে;

ৰিচরিংসু তিযামন্তে, কুরুমানা পদক্খিণং.

ভিজ্জমানে’রুণে ৰস্সি, মহামেঘো মহীতলে;

রোগাতুরাচ সব্বেপি, সুখিতাকংসু উস্সৰং.

‘‘যদা দুব্ভিক্খরোগাদি-ভযং দীপম্হি হেস্সতি;

এৰমেৰ করোন্তূ’’তি, নিযোজেসি নরাধিপো.

আরুল়্হো ¶ চেতিযং কুন্ত-কিপিল্লাদিমৰেক্খিয;

পুচ্ছিত্ৰা মোরপিঞ্চেন, ‘‘সণিকং যন্তুৰনংতি চ.

সঙ্খং সোদকমাদায, চরতা’সনধোৰনে;

দক্খিণপরিতোণম্হি, কারেত্ৰা রাজগেহতো.

উপোসথঘরং বুদ্ধ-পটিমাগেহ মেৰ চ;

পাকারেন পরিক্খিত্তং, উয্যানঞ্চ মনোরমং.

চাতুদ্দসিংপঞ্চদসিং, যা চ পক্খস্স অট্ঠমী;

পাটিহারিযপক্খঞ্চ, অট্ঠঙ্গসমুপাগতং.

উপোসথংসমাদায, সাপদানং তহং ৰসী;

যাৰজীৰঞ্চ সো ভুঞ্জি, মহাপাল়িম্হি ভোজনং.

চরন্তোচকলন্দান মুয্যানে ভত্তমত্তনো;

কত্ৰা নিৰাপং দাপেসি, তদজ্জাপি চ ৰত্ততি.

চোরং ৰজ্জমুপনীতং, দিস্ৰা সংৰিগ্গমানসো;

ছৰং সুসানং আনেত্ৰা, খিপিত্ৰা লোহকুম্ভিযং.

দত্ৰা ধমং পলাপেত্ৰা, চোরং রত্তিযমুগ্গতে;

সূরিযে কুজ্ঝিতো চোরং-ৰিযঝাপযি তং ছৰং.

অকা দীপম্হি সব্বেসং, চেতিযানং মহামহং;

থূপারামে চ থূপস্স, হেমচুম্বটকঞ্চুকং.

দ্ৰাচত্তালীসৰস্সানি, কত্ৰা ৰঞ্চুংখণম্পিসো;

কত্ৰা পুঞ্ঞমুপাগঞ্ছি, দেৰরাজসহব্যতং.

রঞ্ঞো তস্স কনিট্ঠেন, মহানামেন ৰল্লভা;

দেৰী সত্থং নিপাতেত্ৰা, তমঠানম্হি মারযি.

পব্বজিত্কা কনিট্ঠো সো, জীৰমানম্হি ভাতরি;

হতে রাজিনি ভীতায, আৰত্তিত্ৰা’সি ভূপতি.

মহেসিংঅত্তনো’কাসি, মহেসিং ভাতুঘাতিনিং;

গিলানসালা কারেসি, মহাপাল়িঞ্চ ৰড্ঢযি.

লোহদ্ৰার ¶ রলগ্গাম-কোটিপস্সৰনৰ্হযে;

তযো ৰিহারে কত্ৰা’দা, ভিক্খূনমভযুত্তরে.

ৰিহারং কারযিত্ৰান, ধুমরক্খম্হি পব্বতে;

মহেসিযা নযেনা’দা, ভিক্খূনং থেরৰাদীনং.

নৰকম্মঞ্চ জিণ্ণেসু, ৰিহারেসু সকারযি;

দানসীলরতো ৰত্থু-পূজকো চ অহু সদা.

বোধিমণ্ডসমীপম্হি, জাতো ব্রোহ্মণমাণৰো;

ৰিজ্জাসিপ্পকলাৰেদী, তীসু ৰেদেসু পারগো.

সম্মাৰিঞ্ঞাতসমযো, সব্বৰাদৰিসারদো;

ৰাদত্থি জম্বুদীপম্হি, আহিণ্ডন্তো পৰাদিকো.

ৰিহারমেকং আগম্ম, রত্তিং পাতঞ্জলং মতং;

পরিৰত্তেসি সম্পুণ্ণ-পদং সুপরিমণ্ডলং.

তত্থেকো রেৰতোনাম, মহাথেরো ৰিজানিয;

‘‘মহাপঞ্ঞো অযং সত্থো, দমেতুং ৰট্টতী’’তি সো.

‘‘কো নু গদ্রভরাৰেন, ৰিরৰন্তো’’তি অব্রৰি;

‘‘গদ্রভানং রৰে অত্থং, কিং জানাসী’’তি আহতং.

‘‘অহং জানে’’তি ৰুত্তোসো, ওতারেসি সকং মতং;

ৰুত্তং ৰুত্তং ৰিযাকাসি, ৰিরোধম্পি চ দস্সযি.

‘‘তেনহি ত্ৰং সকৰাদ-মোতারেহী’’তি চোদিতো;

পাল়িমাহা’ভিধম্মস্স, অত্থমস্স ন সো’মিগা.

আহ কস্সে’সমন্তো’তি, বুদ্ধমন্তো’তি সোব্রৰি;

‘‘দেহি মে ত’’ন্তি ৰুত্তেহি, ‘‘গণ্হু পব্বজ্জতং’’ইতি.

মন্তত্থী পব্বজিত্ৰাসো, উগ্গণ্হি পিটকত্তযং;

‘‘একাযনো অযং মগ্গো’’, ইতি পচ্ছা তমগ্গহি.

বুদ্ধস্স ৰিয গম্ভীর-ঘোসত্তাতং ৰিযাকরুং;

‘‘বুদ্ধঘোসো’’তি ঘোসোহি, বুদ্ধো ৰিয মহীতলে.

তত্থ ঞাণোদযং নাম, কত্ৰা মকরণং তদা;

ধম্মসঙ্গণীযা’কাসি, কচ্ছং সো অট্ঠসালিনিং.

পতিত্তট্ঠকথঞ্চেৰ ¶ , কারামারভিবুদ্ধিমা;

তং দিস্ৰা রেৰতো থেরো, ইদং ৰচনমব্রুৰি.

পাল়িমত্তইধানিতং, নত্থি অট্ঠকথা ইধ;

তথাচরিযৰাদা চ, ভিন্নরূপা ন ৰিজ্জরে.

সীহল়াট্ঠকথা সুদ্ধা, মহিন্দেন মতীমতা;

সংগীতিত্তযমারুল়ং, সম্মাসম্বুদ্ধদেসিতং.

সারিপুত্তাদিগীতঞ্চ, কথামগ্গং সমেক্খিয;

একা সীহল়ভাসায, সীহল়েসু পৰত্ততি.

তং তত্থ গন্ত্ৰা সুত্ৰা তং, মাগধানং নিরুত্তিযা;

পরিৰত্তেসি সা হোতি, সব্বলোকহিতা ৰহা.

এৰং ৰুত্তো পসন্নো সো, নিক্খমিত্ৰা ততোইমং;

দীপমাগা ইমস্সেৰ, রঞ্ঞোকালে মহামতি.

মহাৰিহারং সম্পত্তো, ৰিহারং সব্বসাধূনং;

মহাপধানঘরং গন্ত্ৰা, সঙ্ঘপালস্স সন্তিকা.

সীহল়ট্ঠকথা সুদ্ধা, থেরৰাদঞ্চ সব্বসো;

‘‘ধম্মসামিস্স এসোৰ, অধিপ্পাযো’’তি নিচ্ছিয.

তত্থ সঙ্ঘং সমানেত্ৰা, ‘‘কাতুমট্ঠকথামম;

পোত্থকে দেথ সব্বে’’তি, আহ ৰীমংসিতুং সতং.

সঙ্ঘো গাথাদ্ৰযং তস্সা-দাসি ‘‘সামত্তিযং তৰ;

এত্থ দস্সেহি তং দিস্ৰা, সব্বে দেমা’’তি পোত্থকে.

পিটকত্তযমেত্থেৰ, সদ্ধিমট্ঠকথায সো;

ৰিসুদ্ধিমগ্গ নামাকা, সঙ্গহেত্ৰা সমাসতো.

ততো সঙ্ঘং সমুহেত্ৰা, সম্বুদ্ধমতকোৰিদং;

মহাবোধিসমীপম্হি, সো তং ৰাচেতুমারভি.

দেৰতা তস্স নেপুঞ্ঞং, পকাসেতুং মহাজনে;

ছাদেসুং পোত্থকংসো’যি, দ্ৰত্তিক্খত্তুম্পি তং অকা.

ৰাচেতুং ততিযে ৰারে, পোত্থকে সমুদাহটে;

পোত্থকদ্ৰযমঞ্ঞম্পি, সণ্ঠাপেসুং তহিং মরূ.

ৰাচযিংসু ¶ তদাভিক্খূ, পোত্থকত্তয মেকতো;

গন্থতো অত্থতো চাপি, পুব্বাপরৰসেন ৰা.

থেরৰাদেহি পাল়িহি, পদেহি ব্যঞ্জনেহি চ;

অঞ্ঞত্থত্তমহূনেৰ, পোত্থত্থকেসুপি তীসুপি.

অথ উগ্ঘোসযি সঙ্ঘো, তুট্ঠহট্ঠো তিসেসতো;

‘‘নিস্সংসযা’যং মেত্তেয্যো’’, ইতি ৰত্ৰা পুনপ্পুনং.

সদ্ধিমট্ঠকথাযা’দা, পোত্থকে পিটকত্তযে;

গন্থকারে ৰসন্তো সো, ৰিহারে দুরসঙ্করে.

পরিৰত্তেসি সব্বাপি, সীহল়ট্ঠকথা তদা;

সব্বেসং মূলভাসায, মাগধায নিরুত্তিযা.

‘‘সত্তানং সব্বভাসানং, সা অহোসি হিতাৰহা;

থেরিযা চরিযাসব্বে, পাল়িংৰিয তমগ্গয্হং.

অথ কত্তব্বকিচ্চেসু, গহেতু পরিনিট্ঠিতিং;

ৰন্দিতুং সো মহাবোধিং, জম্বুদীপমুপাগমি.

সুত্ৰা দ্ৰাৰীসৰস্সানি, মহানামো মহামহিং;

কত্ৰা পুঞ্ঞানি চিত্রানি, যথা কম্মমুগাগমি.

সব্বে’পে তে ধরণীপতযো মচ্চুমচ্চেতুমন্তে,

নো সক্খিং সূপচিতসুখবলাসাধু সম্পন্নভোগো;

এৰং সব্বে নিধনৰসগা হোন্তি সত্তা’তি নিচ্চং,

রাগং সম্মা ৰিনযতুধনে জীৰিতে চাপি ধীমা.

সুজনপ্পসাদসংৰেগত্থায কতে মহাৰংসে

মহানাম ¶ সুতো আসি, দমিল়ী কুচ্ছিসম্ভৰো;

সোত্থিসেনো, তথাসঙ্ঘো-ধীতা চা’সি মহেসিযা.

সোত্থিসেনো তদা রজ্জং, পত্ৰা সঙ্ঘযনাসিতো;

তস্মিংযেৰ দিনে ভেরিং, চরাপেত্ৰা তদা তু সা.

অত্তনো সামিকস্সদা, ছত্তগ্গাহকজন্তুনো;

ছত্তগ্গাহকৰাপিং সো, কত্ৰা সংৰচ্ছরে মতো.

অথ মচ্চো মহাপঞ্ঞো, সহাযো তস্স তং মতং;

অন্তোৰত্থুম্হি ঝাপেত্ৰা, ৰীহিচোরং মহাবলং.

রজ্জযোগ্গোতি চিন্তেত্ৰা, কত্ৰা তং ভূপতিং রহো;

অন্তোযেৰ নিৰাসেত্ৰা, রাজা রোগাতুরো ইতি.

যসং রজ্জং ৰিচারেসি, ছণে পত্তে মহাজনা;

রাজা চে অত্থি অম্হেহি, সদ্ধিং মেতূতি ঘোসযুং.

তং সুত্ৰা নরপালো সো, সব্বলঙ্কারমণ্ডিতো;

সমানংতে মহানাগে, নেসযোগ্গা মমা’তিসো.

দাট্ঠাধাতুঘরঠানে, সুৰা নাগং সমাদিসি;

রঞ্ঞো আণাতি ৰুত্তে সো, অগা আরুয্হ তং পুরং.

কত্ৰা পদক্খিণং গন্ত্ৰা, পাচিনদ্ৰারতো বহি;

পঠমে চেতিযঠানে, ধাতুনাগং সমপ্পযি.

মহাচেতিত্তযে হত্থি-পাকারে’কাসি তোরণং;

মিত্তসেনো বহুং পুঞ্ঞং, কত্ৰা ৰস্সেন সো চুতো.

মিত্তসেনং রণে হন্ত্ৰা, দমিল়ো পণ্ডুনামকো;

আগতো পরতীরম্হা, লঙ্কারজ্জমকারযি.

জনা কুলীনা সব্বেপি, রোহণং সমুপাগতা;

ওরগঙ্গায ইস্সেরং, দমিল়া এৰ কপ্পযুং.

যে ¶ সুভস্স বলট্ঠস্স, ভীতামোরিযৰংসজা;

বলাযিত্ৰা নরাৰাসং, কপ্পযিংসু তহিং তহিং.

তেসমঞ্ঞতমো নন্দি-ৰাপি গামে কুটিম্বকো;

ধাতুসেনৰ্হযো আসি, দাঠানামো চ তং সুতো.

গামে অম্বিলযাগুম্হি, ৰসং পুত্তে দুৰে লভি;

ধাতুসেনং সিলাতিস্স-বোধিংচ সম্পজাতিকে.

মাতুসো দরিযো তেসং, সদ্ধো পব্বজ্জ ৰত্ততি;

দীঘসন্দকতাৰাসে, ধাতুসেনাপি মাণৰো.

সন্তিকে তস্স পব্বজ্জ-রুক্খমূলম্হি একদা;

সজ্ঝাযতি পৰিস্সিত্থ, মেঘো নাগোতুপস্সিয.

পরিক্খিপিত্ৰা ভোগেহি, ছাদযিত্ৰা ফণেন চ;

পোত্থকঞ্চ কুমারঞ্চ, রক্খিতং পস্সি মাতুলো.

সীসে আকিরি সঙ্কারং, তস্স রুট্ঠো পরোযতি;

তস্মিং চিত্তং ন দূসেসি, তম্পি দিস্ৰান মাতুলো.

উত্তমো ৰত’যং সত্তো, রাজা হেস্সতি নিচ্ছযং;

রক্খিতব্বো’তি আদায, তং ৰিহারমুপাগতো.

গোণিসাদি ৰিহারে’যং, কত্তব্বো নীতিমা ইতি;

সিক্খাপেসি কুমারং তং, পণ্ডুকো তং ৰিজানিয.

গণ্হথেতন্তিপেসেসি, সেৰকে তস্সারত্তিযং;

দিস্ৰান সুপিনং থেরো, নীহরিত্থ কুমারকং.

তস্মিং নিক্খন্তমত্তম্হি, সেৰকং পরিৰারিয;

পরিৰেণে ন পস্সিংসু, ততো নিক্খম্ম তে উভো.

দক্খিণস্মিং দিসাভাগে, গোণ নামং মহানদিং;

পত্ৰা সম্পুণ্ণমট্ঠংসু, গন্তুকামাপি ৰেগসা.

যথা নদিযং ৰারেতি, অম্হে তং ত্ৰম্পি ৰারয;

ৰাপিংগহেত্ৰা এত্থে’তি, ৰত্ৰা থেরো তদা নদিং.

ওতরিত্থকুমারেন, সদ্ধিং দিস্ৰান তে উভো;

নাগরাজা তদা একো, পিট্ঠিং পাদাসি তেন সো.

উত্তরিত্ৰা কুমারং তং, নেত্ৰা পচ্চন্তমাৰসং;

লদ্ধা খীরোদনং সুত্ৰা, সেসং পত্তেন তস্স’দা.

চিত্তকারেন ¶ থেরম্হি, ভত্তং পক্খিপ্প ভূমিযং;

ভুঞ্জি থেরোপি তং জানি, ভুঞ্জ তে যং মহিং ইতি.

পণ্ডুরাজাপি কত্ৰান, রজ্জং ৰস্সম্হি পঞ্চমে;

চুতো পুত্তো পিপারিন্দো, ততিযো তস্স ভাতুকো.

কণিট্ঠো খুদ্দপারিন্দো, কুব্বং রজ্জং মহামহিং;

ধাতুসেনানুগে সব্বে, ৰিহেঠেসি মহাজনে.

সঙ্গহেত্ৰা জনে সাধু-সেনো যুজ্জিত্থ রাজিনা;

সো সোল়সহি ৰস্সেহি, পুঞ্ঞপাপকরোমতো.

নিরিতরো ততো আসি, রাজামাসদ্ৰযেন তং;

ধাতুসেনো ৰিনাসেসি, তেন কত্ৰা মহাহৰং.

হতে তস্মিং মহীপালে, দাঠিযো দমিল়ো ততো;

রাজা ৰস্সত্থ যে হুত্ৰা, ধাতুসেনহতোততো.

পিট্ঠিযো দমিল়ো সত্ত-মাসেন নিধনং গতো;

ধাতুসেনেন যুজ্ঝিত্ৰা, ৰংসো পচ্ছিজ্জি দামিল়ো.

অথা’সি রাজালঙ্কাযং, ধাতুসেনো ইরাধিপো;

ভাতরা সহ দীপম্হি, দমিল়ে দীপঘাতকে.

উপাযেহি অনেকেযি, একৰীসপ্পমাণকে;

খন্ধৰারে নিৰেসেত্ৰা, কত্ৰা যুদ্ধমসেসতো.

সোধেত্ৰা মেদিনিং সাধু, কত্ৰা চ সুখিতংজনং;

সাসনঞ্চ যথাঠানে, ঠপেসি পরনাসিতং.

দমিল়ে যে’নুৰত্তিংসু, কুলীনা কুলগামৰা;

তে মং ৰা সাসনং ৰা নো, রক্খিংসূ’তি পকুপ্পিয.

তেসং গামে গহেত্ৰান, গামে স্ৰাকাসিরক্খকে;

রোহণা’গম্ম তে সব্বে, কুলীনা তমুপট্ঠহুং.

তেসং সক্কারসম্মানং, যথাযোগমকাসি সো;

অমচ্চে অত্তনো দুক্খ-সহাযেচা’ভি তোসযি.

বন্ধাপেত্ৰা মহাগঙ্গং, কেদারে’কা থিরোদকে;

মহাপাল়ম্হি ভিক্খূনং, সালিভত্তঞ্চ দাপযি.

পঙ্গুরোগা তুরট্টানং, সালাযোকাসি বুদ্ধিমা;

কাল়ৰাপিংচ গণ্হিত্ৰা, বন্ধি গোণং মহানদিং.

মহাৰিহারং ¶ কত্ৰান, পন্তিযুত্তমনাকুলং;

তথা বোধিঘরঞ্চেৰ, দস্সনেয্য মকারযি.

ভিক্খৰো পরিতোসেত্ৰা, পচ্চযেহি চতূহিপি;

ধম্মাসোকো’ৰ সোকাসি, সঙ্গহং পিটকত্তযে.

অট্ঠারসৰিহারে চ, থেরিযান মকারযি;

সম্পন্নভোগে দীপম্হি, অট্ঠারস চ ৰাপিযো.

কাল়ৰাপী ৰিহারো চ, কোটিপস্সাৰনামকো;

দক্খিণ গিরিনামো চ, ৰিহারো ৰড্ঢমানকো.

পণ্ণৰল্লকভূতো চ, ভল্লাতকসনামকো;

পাসাণসিন্নে দেসম্হি, ধাতুসেনো চ পব্বতো.

মং গনো থূপৰিট্ঠি চ, ধাতুসেনোপি উত্তরে;

পাচিন কম্বৰিট্ঠি চ, তথা অন্তরমে গিরি.

অন্তাল়ি ধাতুসেনো চ, কস্সপিট্ঠিক পুব্বকো;

রোহণেদাযগামো চ, সালৰাণো ৰিভীসনো.

ৰিহারো ভল্লিৰাণো চ, অট্ঠারসনরুত্তমো;

পাদূলকং হম্বলট্ঠি, মহাদত্থাদিৰাপি যো.

খুদ্দকে চ ৰিহারেসো, অট্ঠারসনরুত্তমো;

ৰাপীযো চ তথাকত্ৰা, তেসমেৰ তু দাপযি.

পঞ্চৰীসতি হত্থঞ্চ, মযূরপরিৰেণকং;

হরিত্ৰা’কাসিপাসাদ-মেকৰীসতি হত্থকং.

কুমারসেনস্স’পেত্ৰা, পুব্বভোগং ৰিসোধযি;

কাল়ৰাপিম্মিভাগদ্ধং, খেত্তানঞ্চ সতদ্ৰযং.

লোহ পাসদকে জিণ্ণে, নৰকম্মমকারযি;

মহাথূপেসু ছত্তানি, তীসু জিণ্ণানি কারযি.

দেৰানংপিযতিস্সেন, কতং বোধিমহং ৰিয;

সিন্হানপূজং বোধিস্স, ৰরবোধিস্স কারযি.

ধাৰনা লোভনাৰাযো, তত্থ পূজেসি সোল়স;

অলঙ্কারং মুনিন্দস্স, অভিসেকঞ্চ কারযি.

মহাবোধি পতিট্ঠানা, ওরং লঙ্কায ভূমিপা;

যাৰ দ্ৰাদসমং ৰস্সং, বোধিপূজমকারযুং.

মহামহিন্দত্থেরস্স ¶ , কারেত্ৰা পটিবিম্বকং;

থেরস্সা’লাহনং নেত্ৰা, কাতুং পূজং মহারহং.

দত্ৰা সহস্সং দীপেতুং, দীপৰংসং সমাদিসি;

ঠিতানং তত্থ ভিক্খূনং, দাতুঞ্চাণাপযিগুল়ং.

ভিক্খুস্স অত্তনো সীসে, সঙ্কারোকিরণং সরং;

লাভং নাদাসি ৰুত্থস্স, পরিৰেণস্স অত্তনো.

ফাতিকম্মং বহুং’কাসি, ৰিহারে অভযুত্তরে;

সিলাসত্থুস্স কারেসি, মন্দিরঞ্চ সমণ্ডপং.

বুদ্ধ দাসকতেনেত্তে, নট্ঠে’নগ্ঘমণি দ্ৰযং;

অকাসি নেত্তং সত্থুস্স, রংসি চূল়ামণিংতথা.

মণিহি ঘননীলেহি, কেসা ৰত্তং সুমুত্তমং;

হেমপট্টং তথেৰুণ্ণ-লোমং সোৰণ্ণ চীৰরং.

পাদজালং সুৰণ্ণস্স, পদুমং দীপমুত্তমং;

নানারাগম্বরং তত্থ, পূজযিত্থ অসংখিযং.

অকাসি পটিমা গেহে, বহুমঙ্গলচেতিযে;

বোধিসত্তে তথা’কাসি, কাল়সেলস্স সত্থুনো.

উপসুম্ভৰ্হযস্সাপি, লোকনাথস্স কারযি;

রংসীচূল়ামণিঞ্চেৰ, অভিসেকৰ্হযস্স চ.

বুদ্ধবিম্বস্স কারেসি, পুব্বে ৰুত্তং পিল়ন্ধনং;

ৰামপস্সম্হি বোধিস্স, বোধিসত্তঘরং তথা.

মেত্তেয্যস্স চ কারেসি, সব্বং রাজপিল়ন্ধনং;

সমন্তা যোজনে তস্স, তদা রক্খঞ্চ যোজযি.

কারাপেসি ৰিহারেসু, ধাতুরাজৰ্হপন্তিযো;

তথা সতসহস্সেন, মহাবোধিঘরং ৰরং.

থূপারমম্হি থূপস্স, পূজং জিণ্ণৰিসোধনং;

দাঠা ধাতুঘরেচাপি, জিণ্ণস্স পটিসঙ্খরং.

দাঠাধাতুকরুণ্ডঞ্চ, রংসিঞ্চ ঘনকোট্টিমং;

মহগ্ঘমনিসংকিণ্ণং, সুৰণ্ণ পদুমানি চ.

দাঠাধাতুম্হি পূজেসি, পূজাচাকা অসঙ্খিযা;

চীৰরাদীনি দাপেসি, ভিক্খূনং দীপৰাসিনং.

কারাপেত্ৰা ¶ ৰিহারেসু, নৰকম্মং তহিং তহিং;

পাকারে চ ঘরেত্ৰা’কা, সুধাকম্মং মনোহরং.

মহাচেতিত্তযে কত্ৰা, সুধাকম্মং মহারহং;

সুৰণ্ণছত্তং কারেসি, তথা ৰজিরচুম্বটং.

মহাৰিহারে পাপেন, মহাসেনেন নাসিতে;

ৰসিসুং ধম্মরুচিকা, ভিক্খূ চেতিযপব্বতে.

কত্ৰা অম্বত্থলং থের-ৰাদানং দাতু কামকো;

যাচিতো তেহি তেসং’ৰ, অদাসি ধরণী পতি.

দাতু পঠাননাৰঞ্চ, কারেত্ৰা কংসলোহজং;

দানৰট্টং পৰত্তেসি, অম্বণেভি দ্ৰিপঞ্চহি.

অন্তো বহি চ কারেত্ৰা, নগরস্স জিনালযে;

পটিমাযো চ পূজেসি, ধম্মাসোকসমো’সমো.

তস্স পুঞ্ঞানি সব্বানি, ৰত্থু পটিপদং নরো;

কো হি নাম সমত্থোতি, মুখমত্তং নিদস্সিতং.

তস্স পুত্তদুৰে আসুং, কস্সপো ভিন্নমাতিকো;

সমানমাতিকো চেৰ, মোগ্গল্লানো মহব্বলো.

তথা পাণসমা একা, দুহিতা চ মনোরমা;

ভাগিনেয্যস্স পাদাসি, সেনাপচ্চঞ্চ তঞ্চ সো.

ৰিনা দোসেন তাল়েসি, কসাযূরুসু সো’পিতং;

রাজা দিস্ৰান দুহিতু-ৰত্থং লোহিতমক্খিতং.

ঞত্ৰা তং মাতরং তস্স, নগ্গং ঝপেসি কুজ্ঝিয;

ততোপ্পভুতিসো বদ্ধ-ৰেরো সঙ্গম্ম কস্সপং.

রজ্জে নেতং পলোভেত্ৰা, ভিন্দিত্ৰা পিতুঅন্তরে;

সঙ্গহেত্ৰা জনং জৰ-গাহং গাহাপযী পতিং.

উস্সাপেসি ততো ছত্তং, কস্সপো পিতুপক্খিযে;

ৰিনাসেত্ৰা জনে লদ্ধ-সব্বপাপসহাযকো.

মহারজ্জ ¶ ৰিনাসেন, ৰিযোগেন চ সূনুনো;

বদ্ধনাগারৰাসেন, দুক্খিতম্পি দুরাধিপং.

দুক্খাপেতুমপঞ্ঞোসো, আহ কস্সপরাজকং;

নিধি রাজকুলেরাজ-গুত্ত তে পিতরা ইতি.

নে’তি গুত্তে ন জানাসি, চিত্তমেতস্স ভূমিপ;

মোগ্গল্লানস্স কাপেতি, নিধিংসোতি তদব্রূৰি.

সুত্ৰা তং কুপিতো দূতে, পাহেসী পিতুসন্তিকং;

আচিক্খতু নিধিঠান-মিতি ৰত্ৰা নরাধমো.

মারেতু অম্হে পাপস্স, তস্সুপাযো’তি চিন্তিয;

তুণ্হী অহোসি তে গন্ত্ৰা, রাজকস্স নিৰেদযুং.

ততো’তীৰ পকুপ্পিত্ৰা, পেসযিত্থ পুনপ্পুনং;

সাধু দিস্ৰা সহাযম্মে, ন্হত্ৰান কাল়ৰাপিযং.

পরিস্সামীতি চিন্তেত্ৰা, আহ দূতে সচে মমং;

কাল়ৰাপিংসমাপেতি, সক্কা ঞাতুন্তি তে গতা.

রঞ্ঞো আহংসু রাজাপি, তুট্ঠহট্ঠো ধনত্থিকো;

পেসেসি দূতে দত্ৰান, রথং জিণ্ণেন ৰাজিনা.

এৰং গচ্ছতি ভূপালে, পাজেন্তো রথিকো রথং;

খাদন্তো লাজমস্সাপি, কিঞ্চি মত্তং অদাসি সো.

তং খাদিত্ৰা পসীদিত্ৰা, তস্মিং পাণমদা তদা;

মোগ্গল্লানস্স তং কাতুং, সঙ্গহং দ্ৰারনাযকং.

এৰং সম্পত্তিযো নাম, চলা ৰিজ্জুল্লতোপমা;

তস্মা তাসু পমজ্জেয্য, কো হি নাম সচেতনো.

রাজা এতীতিসুত্ৰান, থেরো সো তস্স সোহ দো;

লদ্ধা মাসোদনং মংসং, সাণুণঞ্চ ৰরং সরং.

রাজা রোচেতি এতন্তি, গোপযিত্ৰা উপাৰিসি;

গন্ত্ৰা রাজাপি ৰন্দিত্ৰা, একমন্তমুপাৰিসী.

এৰং নিসিন্না সম্পত্ত-রজ্জা ৰিয উভোপি তে;

অঞ্ঞমঞ্ঞা’ভিলাপেন, নিব্বাপেসুং মহাদরং.

ভোজযিত্ৰান তং থেরো, ওৰদিত্ৰা অনেকধা;

অপ্পমাদে নিযোজেসি, দস্সেত্ৰা লোকধম্মতং.

ততো ¶ ৰাপী মুপগম্ম, ওগ্গয্হিত্ৰা যথা সুখং;

ন্হযিত্ৰা পিৰিত্ৰা চ, আহেৰং রাজসেৰকে.

এত্তকং মে ধনং ভো’তি, সুত্ৰা তং রাজসেৰকা;

আপরিত্ৰা পুরংরঞ্ঞো, নিৰেদেসুং নিরিস্সরো.

ধনং রক্খতি পুত্তস্স, দীপে ভিন্দতি মানুসে;

জীৰন্তো’যংতী কুজ্ঝিত্ৰা, আণাপেসি চমূপতিং.

মারেহি পিতরং মেতি, দিট্ঠা পিট্ঠীতি ৰেরিনো;

হট্ঠতুট্ঠো তিরুট্ঠোসো, সব্বালঙ্করমণ্ডিতো.

রাজানমুপসঙ্কম্ম, পুরতো চ’স্স চঙ্কমি;

রাজাদিস্ৰা চ চিন্তেসি, পাপিযো’যং মতং মম.

কাযং ৰিয দুক্খাপেত্ৰা, নরকং হেতু মিচ্ছতি;

রোসুপ্পাদেন তস্সেৰ, কিংপুরেমি মনোরথং.

ইতি মেত্তাযমানো তং, আহ সেনাপতিং পতি;

মোগ্গল্লানে ত্ৰযিচেৰ, একচিত্তো অহং ইতি.

হসংচালেসি সীসংসো, দিস্ৰা তং জানিভূপতি;

‘‘নূন মারেতি অজ্জা’’তি, তদা সাহসিকোপি সো.

নগ্গং কত্ৰান রাজানং, সসঙ্খলিক বন্ধনং;

পুরত্থাভিমুখং কত্ৰা, অন্তোবন্ধিয ভিত্তিযং.

মত্তিকায ৰিলিম্পেসি, এৰং দিস্ৰাপি পণ্ডিতো;

কো হি রজ্জেয্য ভোগেসু, জীৰিতেপি যসেপি ৰা.

ধাতুসেনো নরিন্দো সো, এৰং পুত্তহতো গতো;

অট্ঠারসহি ৰস্সেহি, দেৰরাজস্স সন্তিকং.

কাল়ৰাপী মযং রাজা, কারাপেন্তো সমাহিতং;

পস্সিত্ৰা ভিক্খুমেতন্তু, ৰুট্ঠাপেতুং সমাধিতো.

অসক্কোন্তো খিপাপেসি, পংসুং ভিক্খুস্স মত্থকে;

সন্ধিট্ঠিকো ৰিপাকোযং, তস্স কম্মস্স দীপিতো.

সুজনপ্পসাদসংৰেগত্থায কতে মহাৰংসে

ততো কস্সপনামো সো, পাপকো নরপালকো;

অস্স গো পঞ্চসূদঞ্চ, পেসযিত্ৰান ভাতিকং.

মারাপেতুং অসক্কোন্তো, ভীতো সীহগিরিং গতো;

দুরারোহং মনুস্সেহি, সোধাপেত্ৰা সমন্ততো.

পাকারেন পরিক্খিপ্প, সীহাকারেন কারযি;

তত্থ নিস্সেণি গেহানি, তেন তং নামকো অহূ.

সংহরিত্ৰা ধনং তত্থ, নিদহিত্ৰা সুগোপিতং;

অত্তনো নিহিতানং সো, রক্খং দত্ৰা তহিং তহিং.

কত্ৰা রাজঘরং তত্থ, দস্সনেয্যং মনোরমং;

দুতিযালকমন্দংৰ, কুৰেরোৰ তহিং ৰসি.

মিগারো নাম কারেসি, সেনাপতি সনামকং;

পরিৰেণং তথাগেহ-মভিসেকজিনিস্স চ.

তস্সাভিসেকং যাচিত্ৰা, সিলাসম্বুদ্ধতো’ধিরং;

অলদ্ধাসামি নো রজ্জে, জানিস্সামীতি সণ্ঠহি.

হুত্ৰা ৰিপ্পটিসারী সো, অত্তনা কতকম্মনা;

মুচ্চিস্সামি কতং নু’তি, পুঞ্ঞং কাসি অনপ্পকং.

মহা ¶ ৰত্থুনি কারেসি, দ্ৰারেসু নগরস্স সো;

অম্বুয্যানে চ কারেসি, দীপে যোজন যোজনে.

ইস্সরসমণারামং, কারেত্ৰা পুব্বৰত্থুতো;

অধিকং ভোগগামে চ, অধিকং তস্স দাপযি.

বোধি উপ্পলৰণ্ণা চ, তস্সাসুং ধীতরো দুৰে;

ৰিহারস্স’স্স কারেসি, নামং তাসঞ্চ অত্তনো.

দেন্তে তস্মিং ন ইচ্ছিংসু, সমণা থেরৰাদিনো;

‘‘পিতুঘাতিস্স কম্ম’’ন্তি, লোকগারয্হ ভীরুনো.

দাতুকামোস তেসং’ৰ, সম্বুদ্ধ পটিমায’দা;

ভিক্খৰে অধিৰাসেসুং, ভোগো নো সত্থুনো ইতি.

কথা নিয্যন্তি উয্যানে, সমীপে পব্বতস্স সো;

কারাপেসি ৰিহারং সো, তেসং নামো ততো অহু.

অদা ধম্মরুচিনং তং, সম্পত্ত চতুপচ্চযং;

ৰিহারঞ্চেৰ উয্যানং, দিসাভাগম্হি উত্তরে.

ভত্তং সনীরপক্কং সো, ভুঞ্জিত্ৰা দিন্নমিত্থিযা;

সপ্পিযুত্তং মনুঞ্ঞেহি, সূপেহি অভিসঙ্খতং.

মনুঞ্ঞমিদময্যানং, দস্সমেৰন্তি তাদিসং;

ভত্তং পাদাসি ভিক্খূনং, সব্বেসঞ্চ সচীৰরং.

উপোসথমধিট্ঠাসি, অপ্পমঞ্ঞঞ্চ ভাৰযি,

সমাদিযি ধুতঙ্গে চ, লিখাপেসি চ পোত্থকে.

পটিমাদান সালাদিং, কারাপেসি অনপ্পকং;

ভিতো সো পরলোকম্হা, মোগ্গল্লানা চ ৰত্ততি.

ততো অট্ঠারসে ৰস্সে, মোগ্গল্লানো মহাভটো;

আদেসেন নিগণ্ঠানং, দ্ৰাদসগ্গসহায ৰা.

জম্বুদীপা ইধাগম্ম, দেসে অম্বট্ঠকোলকে;

কুল়ারী নামে বন্ধিত্থ, ৰিহারে বলসঞ্চযং.

রাজা সুত্ৰা গহেত্ৰা তং, ভঞ্জিস্সামিতি নিক্খমি;

নেমিত্তেহি ন সক্কাতি, ৰদন্তেপি মহাবলো.

মোগ্গল্লানোপি সন্নদ্ধ বলো সূরসহায ৰা;

গচ্ছন্তো সুরসঙ্গামং, দেৰো ৰিয সুজম্পতি.

অঞ্ঞমঞ্ঞং ¶ উপাগম্ম, ভিন্নৰেলাৰ সাগরা;

আরভিংসু মহাযুদ্ধং, বলকাযা উভোপি তে.

কস্সপো পুরতো দিস্ৰা, মহন্তং কদ্দমাসযং;

গন্তুমঞ্ঞেন মগ্গেন, পরিৰত্তেসি দন্তিনং.

দিস্ৰা তং সামিকোনো’যং, পলাযতি ভণে ইতি;

বলকাযো পভিজ্জিত্থ, ‘‘দিট্ঠং পিঠ’’ন্তি ঘোসযুং.

মোগ্গলান বলারাজা, ছেত্ৰা নিকরণেন সো;

সীসং উক্খিপিযা’কাসং, ছুরিকং কোসিযং খিপি.

কত্ৰা’ল়াহন কিচ্চং সো, তস্স কম্মে পসীদিয;

সব্বংসো ধনমাদায, আগঞ্ছি নগরং ৰরং.

ভিক্খূ সুত্ৰা পৰত্তিং তং, সুনিৰত্থা সুপারুতা;

সম্মজ্জিত্ৰা ৰিহারঞ্চ, অট্ঠংসু পটিপাটিযা.

মহামেঘৰনং পত্ৰা, দেৰরাজাৰ নন্দনং;

মহাসেন নিৰত্তেত্ৰা, হত্থিপাকারতো বহি.

উপসঙ্কম্ম ৰন্দিত্ৰা, সঙ্ঘে তস্মিং পসীদিয;

ছত্তত্তেন সঙ্ঘং পূজেসি, সঙ্ঘো তস্সেৰ তং অদা.

তং ঠানং ছত্তৰড্ঢীতি, ৰোহরিংসু তহিং কতং;

পরিৰেণম্পি তং নামং, অহোসি পুরমাগতো.

ৰিহারে দ্ৰেপি গন্ত্ৰান, সঙ্ঘং তত্থা’ভিৰন্দিয;

পাপুণিত্ৰা মহারজ্জং, লোকং ধম্মেন পালযি.

কুদ্ধো নীহরি দাঠংসো, ঘাতকং পিতুনো মম;

অনুৰত্তিত্ৰা মচ্চাতি, তেন রক্খস নাম ৰা.

অতিরেকসহস্সং সো, অমচ্চানং ৰিনাসযি;

কণ্ণনাসাদি ছেদেসি, পব্বাজেসি তথা বহূ.

ততো সুত্ৰান সদ্ধম্ম-মুপসন্নো সুমানসো;

মহাদানং পৰত্তেসি, মেঘো ৰিয মহীতলে.

ফুস্সপুণ্ণমীযং দান-মনুৰস্সং পৰত্তযি;

ততো পট্ঠায তং দানং, দীপে অজ্জাপি ৰত্ততি.

সোপি সারথিকো লাজ-দাযকো পিতুরাজিনো;

আনেত্ৰা পিতুসন্দে সং, মোগ্গল্লানস্স দস্সযি.

তং ¶ দিস্ৰা পরিদেৰিত্ৰা, পিতুনো পেম মত্তনী;

ৰণ্ণেত্ৰা তস্স পাদাসি, দ্ৰারনাযকতং ৰিভূ.

সেনাপতি মিগারোহি, নিৰেদেত্ৰা যথা ৰিধিং;

অভিসেক জিনস্সা’কা, অভিসেকং যথারুচিং.

সীহা’চলে দল়্হনামং, দাঠা কোণ্ডঞ্ঞকম্পি চ;

ৰিহারং ধম্মরুচিনং, সাগলিনঞ্চ দাপযি.

পব্বতন্তু ৰিহারংসো, কত্ৰা থেরস্স দাপযি;

মহানামসনামস্স, দীঘসণ্ড ৰিহারকে.

রাজিনিনামকঞ্চেৰ, কত্ৰা ভিক্খুনুপস্সযং;

অদা সাগলিকানং সো, ভিক্খুনীনং মহামতি.

লম্বকণ্ণকগোত্তোপি, দাঠা পভুতি নামকো;

কস্সপস্স উপঠানে, কোচি নিব্বিন্ন মানসো.

সোপি কস্সপতো ভীতো, ঞাতকেন সহ’ত্তনো;

মোগ্গল্লানেন গন্ত্ৰান, জম্বুদীপতলং ইতো.

বোধিপণ্ডৰিহারম্পি, পব্বজ্জং সমুপাগতো;

করোন্তো সঙ্ঘকিচ্চানি, সাদরো সো সুপেসলো.

অম্মং সঙ্ঘস্স পাদাসি, সঙ্ঘো তস্মিং পসীদিয;

আহ’ম্ব সামণেরো’তি, তেন তং নামকো অহু.

সো কেসধাতুৰংসম্হি, ৰুত্তেন ৰিধিনা ততো;

কেসধাতুং লভিত্ৰান, তস্স রজ্জে ইধা’নযি.

তস্স কত্ৰান সক্কারং, গহেত্ৰা কেস ধাতুযো;

মহগ্ঘে নিদহিত্ৰান, করণ্ডে ফলিকুম্ভৰ্হে.

দীপঙ্করস্স নাথস্স, পটিমায ঘরে ৰরে;

ৰড্ঢেত্ৰা পরিহারেন, মহাপূজং পৰত্তযি.

মাতুলং ভরিযঞ্চ’স্স, কত্ৰা সোৰণ্ণযং তহিং;

ঠপেসি পটিমাযো চ, অস্স বিম্বঞ্চ চারুকং.

কেসধাতুকরণ্ডঞ্চ ¶ , ছত্তং রতনমণ্ডপং;

সাৰকগ্গযুংগং ৰাল়-বীজনিঞ্চ সকারযি.

পরিহারঞ্চ তস্স’দা, রাজা অধিকমত্তনো;

সিলাকাল় মসিগ্গাহং, কত্ৰা রক্খায যোজযি.

অসিগ্গাহসিলাকাল়ো, ইতি তেনা’সি ৰিস্সুতো;

ভগিনিঞ্চ’স্স পাদাসি, সদ্ধিং ভোগেন ভূমিপো.

ৰুত্তো’যমতি সঙ্খেপো, ৰিত্থারো পন সব্বসো;

কেসধাতুকৰংসম্হা, গহেতব্বো ৰিভাৰিনা.

বন্ধিত্ৰা সাগরা রক্খং, দীপঞ্চ কাসিনিব্ভযং;

ধম্মকম্মন সোধেসি, সধম্মং জিনসাসনং.

সেনাপতিস নামং’কা, পধানঘর মুত্তরো;

কত্ৰা’ট্ঠারসমে ৰস্সে, সো পুঞ্ঞানি খযং গতো.

কস্সপতো জিতো অতিবলি পুঞ্ঞক্খযে সঙ্খতে;

জেতুং নো ৰিসহিত্থ মচ্চুমুপগং সো যেৰদাসোৰিয;

তস্মা মচ্চুবলং নিহচ্চ সুখিনো হেস্সন্তি মেধাৰিনো;

নিব্বানং পরমচ্চুতং সিৰপদং পত্তব্বমত্তঞ্ঞুনা.

সুজনপ্পসাদ সংৰেগত্থায কতে মহাৰংসে

তস্সচ্চযে কুমারাদি-ধাতুসেনোতি ৰিস্সুতো;

অহু তস্স সুতো রাজা, দেৰরূপো মহাবলো.

কারিতে পিতরা’কাসি, ৰিহারে নৰকম্মকং;

কারেত্ৰা ধম্মসঙ্গীতিং পরিসোধেতি সাসনং.

সন্তপ্পেসি ¶ মহাসঙ্ঘং, পচ্চযেহি চতূহিপি;

কত্ৰা পুঞ্ঞানি’নেকানি, নৰমে হাযনে’তিগা.

তিত্তিসেনো সুতো তস্স, রাজা হুত্ৰা অনেকধা;

কত্ৰা পুঞ্ঞানি রজ্জং তং, মাসম্পি নৰমে জহি.

সিৰো তং মাতুলো হন্ত্ৰা, হুত্ৰা রাজা অনপ্পকং;

পুঞ্ঞং কত্ৰো’পতিস্সেন, পঞ্চৰীস দিনে হতো.

উপতিস্সো ততো আসি, রাজা হন্ত্ৰান সীৰকং;

মোগ্গল্লানস্স ভগিনী, সামিকো ধজিনীপতি.

রাজা ঠানন্তরাদীহি, কত্ৰান জনসঙ্গহং;

সীলাকাল়স্স পাদাসি, সহ ভো কনধীৰরং.

একো পুত্তো অহু রঞ্ঞো, উপতিস্সস্স কস্সপো;

সসোল়স সহাযেহি, সূরো সূপেহি সঞ্ঞুতো.

এক ৰুত্তিসহাযেহি, দানমান মহাধনো;

ধম্মট্ঠো ৰীরিযাজীৰি, সাধু জেট্ঠপচাযকো.

সিলা কাল়োততো রজ্জ-লোভৰঞ্চিত মানসো;

দক্খিণং মলযং গন্ত্ৰা, সঙ্গণ্হিত্ৰা মহা বলং.

ৰিলুম্পমানো পচ্চন্তি, সম্পত্তো নগরন্তিকং;

তং সুত্ৰা কস্সপো জেট্ঠো, ৰরমারুয্হ কুঞ্জরং.

অস্সা সেত্ৰান পিতরং, সমাদায সহাযকে;

নিক্খম্ম নগরা গচ্ছি, সিলাকালস্স দস্সনং.

এৰং সত্ত’ট্ঠ ৰারেসু, পলাতো লীনৰুত্তিকো;

হত্থে কত্ৰা উপাযেন, দেসে পাচিন পচ্ছিমে.

যুজ্ঝিতুং পুন পাচিন-তিস্স পব্বতমাগমি;

কস্সপোপি সহাযেহি, সদ্ধিমারুয্হ দন্তিনং.

তত্থ গন্ত্ৰা পলাপেত্ৰা, চোরং পব্বতমত্থকং;

আরোপেসি মহানাগং, তেনা’সি গিরিকস্সপো.

মানত্থদ্ধো সিলাকাল়ো, ভিয্যো রট্ঠং পভিন্দিয;

সব্বং হত্থগতং কত্ৰা, অজেয্য বলৰাহনো.

আগম্ম নগরং রুন্ধি, সত্থাহং রাজসেৰকা;

যুজ্ঝিত্ৰা ৰিরলা আসুং, ততো চিন্তেসি কস্সপো.

এতে ¶ নগররোধেন, সব্বে ভিজ্জন্তি পাণিনো;

পরিহীনং বলং রাজা, অন্ধকো চ মহল্লকো.

মেরুকন্দরকে কত্ৰা, মাতরং পিতরঞ্চ মে;

অঙ্গহেত্ৰা বলং পচ্ছা, চোরো নিগ্গণ্হি যো ইতি.

রত্তিযং সো সহাযে চ, রাজসাধনমেৰচ;

আদায পিতরো চেৰ, মলযং গন্তুমারভি.

তদা মগ্গমজানন্তা, সম্মূল়া মগ্গদেসকা;

নগরস্স সমীপেৰ, সম্ভমিংসু ইতো ততো.

সিলাকাল়ো পৰত্তিং তং, সুত্ৰা সঙ্গম্ম ৰেগসা;

পরিৰারেসি সঙ্গামো, তত্থ ভিংসনকো অহু.

দেৰাসুররণাকারে, ৰত্তমানে মহাহৰে;

পতিতেসু সহাযেসু, সীদমানে মহাগজে.

হত্থারোহস্স দত্ৰা, ছিন্দিত্ৰা সীসমত্তনো;

পুঞ্ছিত্ৰা লোহিতং কত্ৰা, কোসিযং অসি পুত্তিকং.

হত্থিকুম্ভে উভো হত্থে, ঠপেত্ৰান অৰত্থরি;

উপতিস্সোপি তং সুত্ৰা, সোকসল্লাহতো মরি.

এৰং দিযড্ঢৰস্সেন, উপতিস্সে দিৰংগতে;

রাজা’হোসি সিলাকাল়ো, পুব্বনামেন একতো.

তং অম্বসামণেরাদি-সিলাকাল়োতি ৰোহরুং;

তিত্থং তেরসৰস্সানি, দিপং ধম্মেন পালযি.

মহাপাল়িম্হি দাপেসি, পচ্চগ্ঘং রাজভোজনং;

ৰেজ্জসালাসু ভোগে চ, ৰড্ঢেসি জনতাহিতো.

অন্ৰহং পূজযি বোধিং, পটিমাযো চ কারযি;

সব্বেসং দীপৰাসীনং, ভিক্খূনং’দা তিচীৰরং.

মাঘাতং কারযিদীপে, সব্বেসংযেৰ পাণিনং;

আনিতং অত্তনা কেস-ধাতুং সম্মা অপূজযি.

রহেরদকৰারঞ্চ, অদাসি অভযুত্তরে;

পুরত্থিমা থেরীযানং, ৰিহারকুন্থনাম সো.

আনেত্ৰা আসনং তত্থ, ঠপেসি দুমরাজকে;

যাৰজীৰং পৰত্তেসি, পুঞ্ঞকম্মমসঙ্খিযং.

মোগ্গল্লানো ¶ তথা দাঠা, পভুতি চো’পতিস্সকো;

পুত্তো তস্সা’সুমগ্গস্স, দেসং দত্ৰা পুরত্থিমং.

দত্ৰা ঠানন্তরঞ্চাদি-পাদসঞ্ঞং ৰিসজ্জযি;

গন্ত্ৰা তত্থ ৰসাহীতি, সোপি গন্ত্ৰা তহিং ৰসি.

ঠানং মলযরাজগ্গং, দেসং দত্ৰান দক্খিণং;

রক্খণত্থং সমুদ্দস্স, মজ্ঝিমং তু নিযোজযি.

উপতিস্সং তু ৰাসেসি, সন্তিকেযেৰ অত্তনো;

ৰিসেসেন মমাযন্তো, যূনং কল্যানদস্সনং.

তস্স দ্ৰাদসমে ৰস্সে, ইতো কাসি পুরং গতো;

ধম্মাতু মিধা’নেসি, ততো ৰাণিজ মাণৰো.

রাজা দিস্ৰা’সমত্থো সো, ধম্মাধম্মৰিচারণে;

হেমসঞ্ঞায দীপম্হি, পতন্তো সলভো ৰিয.

বুদ্ধধম্মোতি সঞ্ঞায, তং গহেত্ৰান সাধুকং;

কত্ৰা সক্কারসম্মানং, গেহে রাজঘরন্তিকে.

ঠপেত্ৰা অনুৰস্সং তু, নেত্ৰা জেতৰনং মহং;

কাতুং কারেসি চারিত্তং, হিতং মন্ত্ৰান পাণিনং.

এৰং কত্ৰা সিলাকাল়ো, পুঞ্ঞকম্মমনপ্পকং;

পত্তে তেরসমে ৰস্সে, যথাকম্মমুপাগমি.

দাঠপ্পভুতিকো রজ্জং, গহেত্ৰা ভাতরংসকং;

অক্কমোতি নিৰারেন্তং, মারাপেসি ৰিবুদ্ধিকো.

মোগ্গল্লানো’থ তং সুত্ৰা, অপ্পত্তং রজ্জমগ্গহি;

অকারণে মে মারেসি, কণিট্ঠং ধম্মৰাদীনং.

কারাপেস্সামহম্পজ্জ, রজ্জন্তি পরিকুপ্পিয;

সমাদায মহাসেনং, অগারাহের পব্বতং.

রাজাপি সুত্ৰা সন্নদ্ধ-বলকাযো করিন্দকে;

পব্বতে সিৰিরং বন্ধি, মোগ্গল্লানো নিসম্মতং.

সাপরাধান তে মে ৰা, মনুস্সা দীপৰাসিনো;

একস্মিঞ্চ মতে রজ্জ-মুভিন্নংযেৰ নোসিযা.

তস্মা অঞ্ঞেন যুজ্ঝন্তু, উভোযেৰ মযং ইধ;

হত্থিযুদ্ধং করোমাতি, রঞ্ঞো পেসেসি সাসনং.

সোপি ¶ সাধূতি ৰত্ৰান, বদ্ধপঞ্চাযুধো গজং;

আরুয্হ মুনিনো মারো ৰিয ওত্থরি তাৰদে.

মোগ্গল্লানোপি সন্নদ্ধো, আরুয্হ করীনং ৰরং;

তত্থা’গো অঞ্ঞমঞ্ঞং তে, পাপুণিংসু মহাগজা.

সদ্দো সূযিত্থ সঙ্ঘট্টে, অসনিরাৰ সন্নিভো;

দন্তঘাতেন উট্ঠাসি, জালা ৰিজ্জুল্লতা ৰিয.

সঞ্ঝাঘনসভাগা’সুং, গজা লোহিতমক্খিতা;

মোগ্গল্লানগজাৰিদ্ধো, রঞ্ঞোওসক্কি কুঞ্জরো.

রাজা আরভি তং দিস্ৰা, ছিন্দিতুং সীসমত্তনো;

মোগ্গল্লানো’থ ৰন্দন্তো, যাচি’মে’ৰং কিরীইতি.

যাচমানেপি সোমানং, মানেন্তো ছিন্দিকন্ধরং;

ছড্ডেসি ছহি সো রজ্জং, মাসেহি দিৰসেহি চ.

মোগ্গল্লানো ততো রাজা, আসি দীপে মহাবলো;

মাতুলঞ্চ পটিচ্চেমং, চূলনামেন ৰোহরুং.

আসাধারণকাৰেয্যো, ৰত্থুত্তয পরাযণো;

দানসংযম সোচেয্যো, সোরচ্চাদিগুণালযো.

দানেন পিযৰাচায, অত্থস্স চরিযায চ;

সমানত্তস্সভাৰেন, সঙ্গহেসি মহাজনং.

পিণ্ডপাতৰিহারেহি, ভেসজ্জচ্ছাদনেহি চ;

ভিক্খুসঙ্ঘঞ্হি সঙ্গণ্হি, ধম্মিকায চ গুত্তিযা.

অতিরেকায পূজায, পূজেত্ৰা ধম্মভাণকে;

পিটকে তীণি ৰাচেসি, সদ্ধিমট্ঠকথায সো.

কুমারে উপলালেত্ৰা, নিৰাপেন যথারুচিং;

সজ্ঝাপেসি সদা ধম্মং, ধম্মদীপো মহামতি.

ধম্মদীপঞ্চ সো কত্ৰা, কুঞ্জরসেখরেনি সা;

ধম্মাৰাসানে ৰাচেসি, পুরম্হি পুরিসুত্তমো.

বন্ধাপেসি কদম্বঞ্চ, নদিংপব্বতমজ্ঝতো;

পত্তপসাণৰাপিঞ্চ, ধনৰাপিং গরিতরং.

গণ্হাপেসি সদীঘাযু-হেতু কম্মন্তি সাদরো;

লিখাপেসি চ সদ্ধম্মং, ৰত্থুপূজঞ্চ কারযি.

লোকং ¶ সো অনুকম্পিত্ৰা, মাতাপুত্তংৰ ওরসং;

দত্ৰা ভুত্ৰা যথাকামং, ৰস্সে ৰীসতিমে মরি.

মহেসী তস্স ঘাতেত্ৰা, ৰিসযোগেন ঞাতকে;

পুত্তং রজ্জে’ভিসিঞ্চিত্ৰা, সযং রজ্জং ৰিচারযি.

তথাভিসিত্তো সো কিত্তি-সিরিমেঘো নরাধিপো;

তিপুপত্তেহি ছাদেসি, দুমিন্দধরমাদিতো.

কপণদ্ধিৰণিব্বানং, মহাদানং পৰত্তযি;

মগ্গপালো তথাকারো, অহু সব্বোপভোগিযো.

মহেসী সা সদা আসি, পধানা সব্বকম্মসু;

রজ্জং তস্সা’সি তেনেৰ, হেট্ঠুপরিযৰত্তিকং.

রাজাপাদা মহামচ্চা’-হেসুং লঞ্চপরাযনা;

দুব্বলে চ ৰিহেঠেসুং, বলী জানপদা নরা.

সিলাকাল়স্স কালম্হি, গামে সঙ্গিল্লনামকে;

ভযৰসীৰ্হযো পোসো, অহু মোরিযৰংসজো.

অহোসি পুত্তো সীৰস্স, অগ্গবোধি সনামকো;

ভাগিনেয্যোপি তস্সাসি, মহানাগোতি ৰিস্সুতো.

ভাগিনেযো মহানাগো, অগ্গবোধি চ সুন্দরো;

উল়ারজ্ঝাসযত্তা সো, মহানাগো মহব্বলো.

হিত্ৰা কস্সককম্মানি, চোরকম্মমকা ৰনে;

গোধং লদ্ধান পেসেসি, মাতুলানিয সন্তিকং.

গোধং দিস্ৰা’ৰসা ঞত্ৰা, ধঞ্ঞপচ্ছিমপেসযি;

কম্মারস্সা’পি পেসেসি, সসং সোপি তথেৰকা.

বীজং ভগিনী মাযাচি, বীজগাহঞ্চ তস্স সা;

দাসঞ্চ ঞত্ৰা পেসেসি, অন্নপানাদিনা রহো.

তদা দুব্ভিক্খকালম্হি, একো মন্তধরো নরো;

ভিক্খালাভায সদ্ধেহি, ভিক্খুৰেসেন ভিক্খতি.

তং গামং পৰিসিত্ৰা সো, অলদ্ধা কিঞ্চি ভোজনং;

অভিভূতো জিঘচ্ছায, কম্পমানো নিগচ্ছতি.

তং দিস্ৰা করুণাযন্তো, মহানাগো মহাদযো;

পত্তমাদায গামন্ত-মাহিণ্ডিত্ৰাপি সব্বসো.

যাগুমত্তম্পি ¶ নালত্থ, ততো উত্তরসাটকং;

দত্ৰা আহরি আহারং, সো তং ভুত্ৰা পসীদিয.

রজ্জারহমিমং দীপে, করিস্সামীতি চিন্তিয;

তমাদায খণেনা’গা, গোকণ্ণকমহণ্ণৰং.

অথ তত্থ নিসীদিত্ৰা, সঞ্জপন্তো যথাৰিধিংম;

মন্তোনা’নেসি নাগিন্দং, ফুস্সপুণ্ণমরত্তিযং.

মহানাগং ফুসাহীতি, মহানাগং নিযোজযি;

সো ভীতো পুরিমে যামে, আগতং তং ন সম্ভুসী.

তথা মজ্ঝিমযামেপি, পচ্ছিমে পন নঙ্গলে;

গহেত্ৰা খিপি তীহেৰ, অঙ্গুলীহি সতং ছুপি.

সো তং ব্যাকাসি তং দিত্ৰা, সবলং মে পরিস্সমং;

তীহি রাজূহি যুজ্ঝিত্ৰা, চতুত্থং ত্ৰং নিঘাতিয.

ৰুড্ঢো তীণেৰ ৰস্সানি, রাজা হুত্ৰা ন জীৰসি;

তথা হেস্সন্তি রাজানো, তযো তে ৰংসজা নরা.

গন্ত্ৰা সেৰস্সু রাজানং, পচ্ছা পস্সসি মেখলং;

ইতি ৰত্ৰান পেসেসি, সোপি গন্ত্ৰা নরিস্সরং.

পস্সিত্ৰা তমুপট্ঠাসি, রাজা রোহণকম্মিকং;

তং অকাসি তদুট্ঠানং, ভণ্ডমাহরি সো বহুং.

রাজা তস্মিং পসীদিত্ৰা, অন্ধসেনাপতিৰ্হযং;

দত্ৰা ঠানন্তরং তস্স, গন্তুং তত্থেৰ যোজযি.

ভযসীৰস্স পুত্তঞ্চ, ভাগিনেয্যঞ্চ অত্তনো;

আদায গন্ত্ৰা তং দেসং, পরিৰত্তেসি সব্বসো.

পচ্চেকভোগং কত্ৰান, রোহণং তত্থ সো ৰসং;

দাঠপ্পভূতিনা কাতুং, যুদ্ধংগন্ত্ৰা মহব্বলো.

মোগ্গল্লানভযা গন্ত্ৰা, রোহণঞ্চ তহিং ৰসী;

সুত্ৰা কিত্তিসিরীমেঘৰণ্ণ-রঞ্ঞো রজ্জে সমঞ্জসং.

রজ্জং গহেতুং কালোতি, সীঘং আগম্ম রোহণা;

একূনৰিসে দিৰসে, মারযিত্ৰা মহীপতিং.

সযং হুত্ৰা মহীপালো, দেসং কত্ৰা যথা পুরে;

ভাগিনেয্যস্স পাহেসি, পণ্ণমাগচ্ছতূতি সো.

আগচ্ছন্তো ¶ নিমিত্তেন, নিৰত্তিত্ৰা মরিত্থ সো;

ততো মাতুলপুত্তং’কা, উপরজ্জং কতঞ্ঞুকো.

আলৰালং দুমিন্দস্স, কত্ৰা হেমমযং ঘরং;

ছাদাপেসি মুনিন্দস্স, পটিমাযো চ সন্দহি.

মহাচেতিত্তযে কাসি, সুধাকম্মঞ্চ চুম্বটং;

হত্থিৰেদিঞ্চ কারেত্ৰা, চিত্তকম্মমকারযি.

পেসকারকগামং সো, জম্বেলৰ্হযমুত্তরে;

মহাৰিহারেচাবন্ধি, গামং তিন্তিণিকৰ্হযং.

উদ্ধগামম্হি ৰসভ-গামং জেতৰনস্স’দা;

ৰত্থদানং নিকাযেসু, তীসু চেৰ পৰত্তযি.

খেত্তানং হিসতং দত্ৰা, ৰিহারে জেতনামকে;

যাগুং তত্থ পৰত্তেসি, ভিক্খূনং সব্বকালিকং.

সহস্স দূরতিস্সৰ্হা, খেত্তং দত্ৰা তপস্সিনং;

মহাৰিহারৰাসীনং, যাগুং নিচ্চং পৰত্তযি.

চিরমাতিকৰারঞ্চ, তত্থেৰ’দা গুণে রতো;

কাসিখণ্ডে মহাদেৰ-রত্তকুরৰনামকে;

ৰিহারে অনুরারামং, জিণ্ণঞ্চ পটিসঙ্খরী.

কমং সোৰগ্গিকং কত্ৰা, এৰমাদিং নরিস্সরো;

অগমা তীহি ৰস্সেহি, দেৰরাজসহব্যতং.

অট্ঠেতে কুট্ঠচিত্তা’পরিমিতৰিভৰা রাজরাজেনরূপা;

রাজানো রাজমানা নরকরিতুরগাসূরসেনারথেহি;

অন্তে হিত্ৰা’খিলং তং ৰিগতপরিজনা’ল়াহনং সঙ্খতাসুং;

সপ্পঞ্ঞো তং সরন্তো ভৰতু ভৰসুখং ৰন্তুকামো হিতেসী.

সুজনপ্পসাদসংৰেগত্থায কতে মহাৰংসে

মহানাগনরিন্দস্স ¶ , ভাগিনেয্যো সুভাগিযো;

সো অগ্গবোধিরাজাসি, অগ্গবোধিগতাসযো.

তেজেন বাহুং সোম্মেন, চন্দং সম্পুণ্ণমণ্ডলং;

সুমেরুমচলন্তেন, গম্ভিরেন মহোদধিং.

ৰসুন্ধরা পকম্পেন, মারুতং সম্পৰুত্তিযা;

বুদ্ধিযামরমন্তারং, সুদ্ধিযা সরদম্বরং.

কামভোগেন দেৰিন্দ, মত্থেন চ নরিস্সরং;

ধম্মেন সুদ্ধৰাসেট্ঠং, ৰিক্কমেন মিগাধিপং.

রাজধম্মেহি রজ্জেহি, চক্কৰত্তিনরিস্সরং;

ৰেস্সন্তরঞ্চ দানেন, অনুগন্ত্ৰা জনে সুতো.

মাতুলং উপরাজৰ্হে, ভাতরং যুৰরাজকে;

ভাগিনেয্যঞ্চ মলয-রাজঠানে ঠপেসি সো.

ঠানন্তরে যথাযোগং-সেট্ঠামচ্চে ঠপেসি চ;

জনং সঙ্গহৰত্থূহী, রাজধম্মেহি চগ্গহি.

দেসং সযোগ্গং পাদাসি, যুৰরাজস্স দক্খিণং;

ৰসং তত্থ সিরীৰড্ঢ-মানৰাপিং সগাহযি.

কত্ৰা গিরিৰিহারঞ্চ, সঙ্ঘিকং তস্স দাপযি;

খেত্তানং দ্ৰিসতং সঙ্ঘ-ভোগত্থায মহামতি.

অদা মলযরাজস্স, দাঠানামং সধীতরং;

পরিৰেণং সীরিসঙ্ঘ-বোধিনামঞ্চ কারযি.

মহাসিৰস্স কারেসি, পরিৰেণং সনামকং;

পরিৰারো’পি তস্সাসি, এৰং পুঞ্ঞপরাযনো.

কত্ৰা সাধুপচারেন, পোরাণং সঙ্গহং ৰিধিং;

অন্তরাযং ৰিসোধেতুং, জিণ্ণঞ্চ পটিসঙ্খরি.

কৰযো ¶ তস্স রজ্জম্হি, সীহল়ায নিরুত্তিযা;

কাৰেয্যে বহুকে’কাসুং, ৰিচিত্রনযাসালিনো.

ৰিহারে দক্খিণে কাসি, পাসাদং সুমনোহরং;

অকা নৰহি ৰস্সেহি, দিপে কণ্টকসোধনং.

কুরুন্দনামং কারেত্ৰা, ৰিহারং সব্বসঙ্ঘিকং;

ৰাপিং তন্নামকং নাল়ি-কেরারামং তিযোজনং.

মহাসিৰৰ্হযে চেৰ, সস্সং কারযিতুং অদা;

লাভসক্কারসম্মান-মারামিকসতং তদা.

ৰিহারং তং সমীপম্হি, কত্ৰা অম্বিলপস্সৰং;

গামং তন্নামকং চাদা, থেরিযানং তপস্সীনং.

উত্তরৰল্লিৰিহারস্স, রতনং দীঘৰণ্ণিতং;

দত্ৰা গামং পতিট্ঠেসি, সত্থুবিম্বং সিলামযং.

কেল়িৰাতে চ কারেসি, সুমনং নাম পব্বতং;

মহাতেলৰটংবোধি-ঘরে পাসাণৰেদিকং.

কারেত্ৰা লোহপাসাদং, পাসাদমহনে অদা;

ছত্তিংসানং সহস্সানং, ভিক্খূনং সো তিচীৰরং.

গামং দত্ৰা নিযোজেসি, আরক্খং ধীতু নামকং;

হত্থিকুচ্ছিৰিহারেপি, পাসাদং কাসি বুদ্ধিমা.

দাঠা সিৰস্স ঠত্ৰান, ওৰাদে সাধু ভিক্খুনো;

সমাচরন্তো ধম্মেন, সক্কচ্চং তমুপট্ঠহি.

মূগসেনাপতিং চাকা, ৰিহারং সো ৰিসালকং;

গামং লজ্জিকমেতস্স, দাস ভোগায’দাসি চ.

মহানাগস্স পুঞ্ঞত্থং, রঞ্ঞো তংনামকং অকা;

মহাথেরস্স তঞ্চা’দা, রাজা তেপিটকস্স সো.

অত্তনো সদিসানঞ্চ, যোগীনং ৰিগতালযো;

ভিক্খূনং চতুসট্ঠীনং, ৰিহারং তং তদা অদা.

কত্ৰা তস্সেৰ মহা-পরিৰেণনিৰাসিনো;

ভিন্নোরুদীপং দত্ৰান, ৰট্টকাকারপিট্ঠিতো.

দক্খিণগীরিদল়্হৰ্হে, মহানাগে চ পব্বতে;

কাল়ৰাপাদিকে চা’কা, ৰিহারে পোসথালযে.

ৰিহারে ¶ অভযে’কাসি, মহাপোক্খরণিং তথা;

চেতিযপব্বতে চাকা, নাগসোণ্ডিং থিরোদিকং.

মহিন্দতটৰাৰিঞ্চ, কারাপেত্ৰান সাধুকং;

এতিস্সা মরিযাদায, থেরং নেতুং নিযোজযি.

মহামহিন্দ থেরম্হি, তংঠানসমুপাগতো;

তরচ্ছা এৰ নেতুন্তি, কতিকঞ্চেৰ কারযি.

ছত্তং সোণ্ণঞ্চ কারেসি, নিকাযেসুপি তীসু সো;

সত্তাট্ঠনৰ ৰারেসু, মহগ্ঘরতনেহি চ.

মহাতূপে চতুব্বীস-ভারং ছত্তং সুৰণ্ণযং;

তত্থ তত্থ চ পূজেসি, মহগ্ঘং রতনুত্তমং.

দাঠাধাতুঘরং কত্ৰা, ৰিচিত্ররতনুজ্জলং;

কাসি হেমকরণ্ডঞ্চ, লোহনাৰঞ্চ পাল়িযং.

মণিমেখলনামঞ্চ, বন্ধাপেসি সবন্ধনং;

মহামাতিঞ্চ গণ্হেসি, মণিহীরকৰাপিযং.

তদা একো মহাথেরো, জোতিপালকনামকো;

পরাজেসি ৰিৰাদেন, দীপে ৰেতুল্লৰাদিনো.

দাঠাপভুতিনামো’থ, আদিপাদো’তিলজ্জিতো;

হত্থমুক্খিপ্পি তং হন্তুং, গণ্ডো সঞ্জাযি তংখণে.

রাজা তস্মিং পসীদিত্ৰা, ৰিহারেযেৰ ৰাসযি;

মানেন তং অনাগম্ম, দাঠাপভূমতো কির.

দত্ৰা মহাদিপাদত্তং, ভাগিনেয্যগ্গবোধিনো;

রক্খিতুং তং নিযোজেসি, থেরং সোপি তমাচরি.

নীলগেহপরিচ্ছেদং, কত্ৰা তস্সেৰ সো অদা;

কত্ৰেৰং বহুধা পুঞ্ঞং, চতুত্তিংসে সমে মতো.

অগ্গবোধি ততো আসি, রাজা পুব্বস্স রাজিনো;

মহল্লকত্তানং খুদ্দ-নামেন পরিদীপযুং.

সো দীপং পরিপালেসি, পুব্বচারিত্তকোৰিদো;

অকাসি চ মহেসিং সো, মাতুলধীতুমত্তনো.

সঙ্ঘভদ্দং অসিগ্গাহং, কাসি বন্ধুং মহেসিযা;

কত্ৰা ¶ ৰেল়ুৰনং রাজা, সাগলীনং নিযোজযী;

জম্বুরন্তরগল্লঞ্চ, কাসি মাতিকপিট্ঠিকং.

রঞ্ঞো তস্সে’ৰ রজ্জম্হি, কালিঙ্গেসু মহীপতি;

সত্তানং মরণং যুদ্ধে, দিস্ৰা সংৰিগ্গমানসো.

ইমং দীপমুপাগম্ম, পব্বজ্জা কতনিচ্ছযো;

জোতিপালম্হি পব্বজি, রাজা সক্কাসি তং চিরং.

পধানঠানং তস্স’কা, ৰিহারে মত্তপব্বতে;

তস্সামচ্চো মহেসী চ, তথেৰা’গম্ম পব্বজুং.

রঞ্ঞো মহেসী সুত্ৰান, তস্স পব্বজ্জমুত্তমং;

সক্কচ্চং তমুপট্ঠাসি, রতনৰ্হঞ্চ কারযি.

অদা রাজা অমচ্চস্স, পাচীনকণ্ডরাজিযং;

ৰেত্তৰাসৰিহারঞ্চ, সো’দা সঙ্ঘস্স তং যতি.

রাজত্থেরেমতে রাজা, সোচিত্ৰা পরিদেৰিয;

পধানঠানং কারেসি, চূল়গল্লৰিহারকে.

পলংনগরগঞ্চেৰ, তস্স ঠানঞ্হি কারযি;

এৰং তদত্থং পুঞ্ঞানি, বহূনি’পি মহীপতি.

জোতিপালিত থেরম্হি, তূপারামম্হি চেতিযং;

ৰন্দমানে পভিজ্জিত্ৰা, ভাগো তং পুরতো পতি.

পক্কোসিত্ৰান রাজানং, থেরো দস্সেসি দুক্খিতো;

রাজা দিস্ৰাৰ সংৰিগ্গো, কম্মং পট্ঠপি তংখণে.

দক্খিণক্খকধাতুং সো, লোহপাসাদকুচ্ছিযং;

সারক্খং ঠপযিত্ৰান, রত্তিন্দিৰমপূজযি.

নৰকম্মে চিরাযন্তে, থূপারামম্হি দেৰতা;

সুপিনং তস্স দস্সেসুং, রত্তিমারামিকা ৰিয.

সচে রাজা পপঞ্চেতি, কাতুং ধাতুঘরং মযং;

ধাতুং গহেত্ৰা গচ্ছাম, যত্থতত্থা’তি তংখণে.

রাজা পবুদ্ধো সংৰিগ্গো, ন চিরেনেৰ কারযি;

কম্মং ধাতুঘরেসব্বং, চিত্তকম্মাদিসঞ্ঞুত্তং.

চতস্সো পটিমাযো চ, পল্লঙ্কে চ সিলামযে;

হেমচ্ছত্তং সিলাদন্ত-কম্মং গেহম্হি সব্বসো.

মহামচ্চাদযো’কংসু ¶ , করণ্ডানং সতং নৰ;

দেৰানংপিযতিস্সস্স, কম্মঞ্চ নিখিলং নৰং.

সব্বুস্সাহেন কারেত্ৰা, মহাপূজং যথারহং;

আনেত্ৰা লোহপাসাদা, ধাতুং সব্বাদরেন সো.

জোতিপালং মহাথেরং, সসঙ্ঘং পরিৰারিয;

পরিহারেন ৰড্ঢেসি, ধাতুং ধাতুকরণ্ডকে.

ধাতুগেহস্স পাদাসি, লঙ্কাদীপং সহত্তনা;

লাভগ্গাম-মদা তস্সা, রক্খকানং মহেসিযা.

নাগদীপম্হি গেহঞ্চ, রাজাযতনধাতুযা;

উণ্ণলোমঘরঞ্চেৰ, ছত্তমামলচেতিযে.

তত্থ গামং ৰিহারস্স, যাগুদানায’দাসি চ;

ৰিহারস্স’ভযস্সা’দা, গামমঙ্গণসালকং.

নামং কত্ৰান সো’কাসি, অত্তনো চ মহেসিযা;

দাঠগ্গবোধিমাৰাসং, ৰিহারে অতযুত্তরে.

দেৰী কপালনাগং সা, ৰিহারং সাধুকারিয;

তস্সে’ৰাদা ৰিহারস্স, সম্পন্নচতুপচ্চযং.

গেহং জেতৰনে কাসি, রাজা রাজতচুম্বটং;

উদপানং মণাপেসি, সোৰ বোধিঘরন্তিকে.

গঙ্গাতটং ৰলাহস্সং, ৰাপিং গিরিতটঞ্চকা;

মহাপাল়িংপি ৰড্ঢেসি, ভতনাৰঞ্চ কারযি.

ভিক্খূনীনং মহেসী চ, ভত্তৰংসং সমাদিসি;

এৰং পুঞ্ঞানি কত্ৰা সো, দিৰং’গা দসমে সমে.

এৰং পুঞ্ঞরতা নরাধিপতযো সম্পন্নভোগা গমুং;

মচ্চুস্সেৰ ৰসং ততোহি মতিমা সম্মা ভৰস্সীদিসং;

পস্সন্তো নিযমং ৰিহায ৰিধিনা সব্বং ভৰে সঙ্গতিং;

নিব্বানাভিমুখো চরেয্য ধিতিমা পব্বজ্জমজ্ঝূপগো.

সুজনপ্পসাদসংৰেগত্থায কতে মহাৰংসে

সঙ্ঘতিস্সো ¶ ততো আসি, অসিগ্গাহো মহীপতি;

সাসনস্স চ রট্ঠস্স, ৰুদ্ধিকামো নযে রতো.

ঠানন্তরং যথারহং, দত্ৰা সঙ্গণ্হিসো জনং;

তদা খুদ্দকরাজস্স, মোগ্গল্লানো চমূপতি.

ৰসন্তো রোহণে সুত্ৰা, সঙ্ঘতিস্সস্স রাজতং;

খন্ধৰারং সযুদ্ধত্থং, মহাগল্লে নিৰেসযি.

সঙ্ঘতিস্সো চ সুত্ৰা তং, বলকাযমপেসযি;

যুজ্ঝিতুং তেন তজ্জেসি, মোগ্গল্লানো মহব্বলো.

ততো হত্থস্সমাদায, গন্ত্ৰা রত্তিৰিহারকং;

বলং সো সন্নিপাতেন্তো, ৰাসং তত্থেৰ কপ্পযি.

রাজা সুত্ৰা পুনা’গন্ত্ৰা, কদল্লাদীনিৰাতকে;

যুজ্ঝিত্ৰা তং পলাপেত্ৰা, পেসেত্ৰা বলমত্তনো.

সযং পুরমুপাগঞ্ছি, সোপি নট্ঠং সৰাহিনিং;

পুন পাকতিকং কত্ৰা, করেহেরমুপাগমি.

রঞ্ঞো সেনাপতি পুত্তং, পেসেত্ৰা চোরসন্তিকং;

যেন কেনচি লেসেন, সযং দুক্খিৰ দুম্মনো.

আতুরো ৰিয বাল়্হং সো, হোসি মঞ্চপরাযনো;

রাজা সুত্ৰা পৰত্তিতং, উপসঙ্কম্ম তঙ্খণে.

মা ত্ৰং সোচি কুমারস্স, সম্মানেত্ৰানুসাসিয;

হন্দ ত্ৰং নগরং রক্খ, নতে সক্কা মযা সহ.

যুদ্ধমণ্ডলমাগন্তুং, গিলানত্তাতি যোজযি;

উব্বাসিতে জনে সব্বে, ৰিচ্ছিন্নে রাজভোজনে.

মহাপাল়িম্হি সম্পক্কং, রঞ্ঞো ভোজনমাহরুং;

রাজা দ্ৰিস্ৰা’তি নিবিন্নো, যাৰ মন্দো ন হেস্সতি.

এক্কো ¶ পীতি ৰিচিন্তেত্ৰা, যুদ্ধায সমাসা’গমা;

সদ্ধিং পুত্তেন আরুয্হ, হত্থিংসন্নদ্ধৰাহনো.

থোকেনেৰ বলেনাগা, পাচিনতিস্সপব্বতং;

এৰং উভযতো চূল়-সঙ্গামে পচ্চুপট্ঠিতে.

সেনাপতিসমিত্তদ্দু, যুদ্ধমারভি পচ্ছতো;

পুত্তো দিস্ৰা নরিন্দস্স, ঘাতেস্সামি ইমং ইতি.

আহ রাজা নিৰারেসি, মা তে রুচ্চি বলং ইদং;

নেৰ সক্কা’ধিৰাসেতুং, অতিমন্দং হনিস্সতি.

দুৰিন্নং বলকাযানং, রাজামজ্ঝগতো অহু;

ততো সেনা দ্ৰিধা’হোসি, চোরসেনাপতীপতি.

রঞ্ঞো নাগো মধুকৰ্হ রুক্খচ্ছাযং সমাৰিসি;

তদা ছত্তং পতিতস্স, সাখমাহচ্চ ভূমিযং.

চোরস্স সেনা তং দিত্ৰা, হরিত্ৰা সামিনো অদা;

সো তং উস্সাপযিছত্তং, ঠত্ৰাপব্বতমুদ্ধনি.

তদা রাজবলং রাজা, নুনমেসোতি চিন্তিয;

গন্ত্ৰা তং পরিৰারেসি, রাজা আসি তদেককো.

হত্থিক্খন্ধা তদোরুয্হ-পুত্তং’মচ্চঞ্চ সোহদং;

উপাৰিসি সমীপম্হি, মেরুমজ্জরকাননং.

মোগ্গল্লানো ততো লদ্ধ-জযো ৰাহনমাদিয;

সেনাপতিংচ মিত্তদ্দুং, তস্স পুত্তঞ্চ পাপিনং.

উপাগম্ম পুরং রাজা, আসী লঙ্কা তলাধিপো;

ততো চিন্তেসি জীৰন্তে, সত্তুম্হি ন সুখং ইতি.

সো সুত্ৰা পুব্বরাজস্স, পুত্তো এত্থাতি কুজ্ঝিয;

আণাপেসি চ তস্সা’সু, হত্থপাদানি ছিন্দিতুং.

উপক্কমি তদা রঞ্ঞা, আণত্তো পুরিসো খণে;

ছিন্দিতুং হত্থপাদং সো, কুমারো রোদি দুম্মনো.

পূৰখাদকহত্থং মে, ছিন্দেয্যং চে তদা অহং;

খাদিসং তেন পূৰেতি, হং সুত্ৰা রাজকম্মিকো.

রোদিত্ৰা পরিদেৰিত্ৰা, রাজাণায দুখদ্দিতো;

ৰামং হত্থঞ্চ পাদঞ্চ, তস্স ছিন্দি নরাধমো.

জেট্ঠতিস্সো ¶ পলাযিত্ৰা, রঞ্ঞো পুত্তো’পরো অগা;

অঞ্ঞতো মলযং দেসং, মেরুকন্দরনামকং.

রাজা’থ সসুতা’মচ্চো, গন্ত্ৰা ৰেল়ুৰনং রহো;

চোদিতো তত্থ ভিক্খূহি, কাসাৰানি সমাদিযি.

ভিক্খুৰেসং গহেত্ৰান, রোহণং গন্তুমানসো;

মণিহীরং সমাগঞ্ছি, তত্রঠা রাজসেৰকা.

সঞ্জানিত্ৰা তযোপেতে, তেসং পাদেৰরুজ্ঝিয;

সাসনং তস্স পেসেসুং, রাজা সুত্ৰা ৰিসেসতো.

তুট্ঠো আণাপযি গন্ত্ৰা, সীঘমাদায তেজনে;

ততো সীহগিরিংনেত্ৰা, তিস্সঙ্কং নিরুপদ্দৰং.

সীসং গণ্হথ তত্থেৰ, রঞ্ঞো চ তনযস্স চ;

অমচ্চং পন জীৰন্ত-মানেয্যাথ মম’ন্তিকং.

মনুস্সা এৰমাণত্তা, তে গহেত্ৰা তযোজনে;

নেত্ৰা সীহগিরিংকাতুং, যথাৰুত্তমুপক্কমুং.

ততো রাজসুতো আহ, পুরিসে কম্মকারকে;

সীসং মে পঠমং ছেত্ৰা, দেথ ময্হং সুখং ইতি.

রাজপোসা তথা’কাসুং, পচ্ছাছিন্দিংসু রাজিনো;

সীসং পস্সথ বালানং, কম্মং কম্মৰিদূজনা.

এৰং অনিচ্চা ভোগাহি, অধুৰা অসযংৰসী;

তত্থ লগ্গা কথং নিচ্চং, সুখং ভো ন গৰেসথ.

রঞ্ঞো সাসনমাহংসু, অমচ্চস্স হিতেসিনো;

তং সুত্ৰান হসিত্ৰান, ইদং ৰচনমব্রৰি.

ছিন্নসীসো মযা দিট্ঠো, মযি জীৰতি সামিকো;

ঠপেত্ৰা হম্পি সেৰামি, অহো অঞ্ঞঞ্হি সামিকং.

ইধ তং মারযিত্ৰান, ছাযং তস্স হরিস্সথ;

অহো অঞ্ঞাণকা তুম্হে, মঞ্ঞে উম্মত্তকা ইতি.

ইতি ৰত্ৰান সো পাদে, গহেত্ৰা সামিনো সযি;

তস্স তে হরণোপাযং, অপস্সন্তা যথা তথা.

তস্সাপি সীসং ছেত্ৰান, মচ্চা আদায তীণি’পি;

রঞ্ঞো দস্সেতুমাহচ্চ, রাজা তুসিত্থ নিব্ভযো.

দুট্ঠসেনা ¶ পতিস্সা’দা, ততো মলযরাজতং;

অসিগ্গাহকঠানম্হি, তস্স পুত্তং ঠপেসি চ.

থূপত্তযম্পি ছাদেসি, ৰত্থেহি অহতেহি সো;

তথা লঙ্কাতলে সব্বে, থূপেকাসি মহুস্সৰং.

কেসধাতুঞ্চ নাথস্স, দাঠাধাতুং তথেৰ চ;

মহাবোধিং সসক্কচ্চং, মহাপূজায সক্করি.

সব্বং ৰেসাখপূজাদিং, চারিত্তংনুগতং অকা;

ধম্মকম্মেন সোধেসি, সব্বং সুগতসাসনং.

পিটকানঞ্চ সজ্ঝাযং, মহাপূজায কারযি;

লাভং দত্ৰা তিরেকেন, পূজযিত্থ বহুস্সুতে.

ভিক্খূনং দীপৰাসীনং, সব্বেসং চীৰরং অগা;

আৰাসেসু চ সব্বেসু, কথিনং অত্থরাপযি.

পটিমাযো চ কারেসি, জিণ্ণঞ্চ পটিসঙ্খরি;

লোণক্খেত্তঞ্চ পাদাসি, সঙ্ঘস্স তিসতাধিকং.

কারপিট্ঠিম্হি কারেসি, মোগ্গল্লান ৰিহারকং;

ৰিহারা পিট্ঠিগামঞ্চ, সগামং ৰটগামকং.

তথা চেতিযগেহঞ্চ’-কাসি রক্খৰিহারকে;

ৰিহারং নং বহুন্নং সো, ভোগগামে বহূ অদা.

এৰং পুঞ্ঞানী সো’কাসি, অপ্পমেয্যানি ভূমিপো;

সম্পত্তীনমনিচত্তং, সরন্তো পুব্বরাজিনো.

তদা কেনচি দোসেন, কুদ্ধোমলযরাজিনো;

সরিত্ৰা পুব্বরাজস্স, কতং তেন ৰিরূপকং.

উপাযেন গহেত্ৰান, হত্থপাদঞ্চ ছেদযি;

তং সুত্ৰা সো অসিগ্গাহো, সপুত্তো রোহণংগতো.

ৰসন্তো তত্থ সো কত্ৰা, হত্থে জনপদং লহুং;

জেট্ঠসিস্সমুপগঞ্ছি, নিলীনং মলযে ঠিতং.

সদ্ধিং তেনসঘাতেন্তো, রট্ঠং জনপদং খণে;

দোল়পব্বতমাগম্ম, খন্ধাৰারং নিৰেসযি.

রাজা সুত্ৰান তং সব্বং, সন্নদ্ধবলৰাহনো;

খন্ধাৰারং নিৰেসেসি, গন্ত্ৰা তস্সেৰ সন্তিকং.

তদা ¶ পজ্জররোগেন, মনুস্সারাজিনো বহূ;

উপদ্দুতা মতা আসুং, তং সুত্ৰা সো অসিগ্গহো.

যুদ্ধমারভিৰেগেন, রঞ্ঞো সেনাতিদুব্বলা;

পভিজ্জিত্ৰা পলাযিত্থ, রাজাপচ্ছা পলাযি সো.

দিস্ৰা একাকিনং যন্তং, সীহপব্বতসন্তিকে;

অসিগ্গাহো মহারাজং, মারযিত্থ সপরিসং.

ওহীনং পচ্ছতো জেট্ঠ-তিস্সম্পি পন মারিতুং;

সাসনং তস্স পেসেসি, এহি রাজা ভৰাহীতি.

সো তঞ্ঞত্ৰা পলাযিত্ৰা, নিৰত্তো মলযং অগা;

কথঞ্হি লদ্ধং কিচ্ছেন, রজ্জংসো দেতি মে ইতি.

এৰং খো দল্লনামং সো, মোগ্গল্লানং নরিস্সরং;

মারেত্ৰা ছহি ৰস্সেহি, সম্পত্তবলৰাহনো.

অথা’গন্ত্ৰা অসিগ্গাহো, অনুরাধপুরং ৰরং;

রাজা হুত্ৰা পৰত্তেসি, আণাচক্কং মহীতলে.

স সিলামেঘৰণ্ণৰ্হো, সঙ্ঘং বোধিঞ্চ ৰন্দিয;

থূপত্তযঞ্চ সক্কাসি, মহাপাল়িঞ্চ ৰড্ঢযি.

পাযাসং’দাসি সঙ্ঘস্স, সপ্পিফাণিতসঙ্খতং;

ছাতকে অতিকিচ্ছম্হি, পরিস্সাৰনমেৰ চ.

সব্বদানেন সঙ্গণ্হী, কপণদ্ধিৰণিব্বকে;

পূৰমূলধনংচা’দা, কুমারানং মহাদযো.

ৰিহারে অভযে বুদ্ধং, পূজযিত্থ সীলামযং;

জিণ্ণঞ্চ গেহং তস্সা’কা, নানারতনচিত্তিকং.

কোলৰাপিঞ্চ দত্ৰান, আরক্খত্থং জিনস্স সো;

পূজং সব্বোপহারেহি, সব্বকালং পৰত্তযি.

এৰং তস্মিং মহীপালে, ৰসন্তে পুঞ্ঞভাজনে;

নাযকো সিরিনাগৰ্হো, জেট্ঠতিস্সস্স মাতুলো.

গন্ত্ৰান পরতীরং সো, আদায দমিল়ে বহূ;

আগন্ত্ৰা উত্তরং দেসং, গণ্হিতুং তমুপক্কমি.

রাজাপি সুত্ৰা তং গন্ত্ৰা, যুজ্ঝিত্ৰা রাজমিত্তকে;

গামে হন্ত্ৰান তং তেন, দমিল়ে সদ্ধিমাগতে.

হতসেসে ¶ গহেত্ৰান, কত্ৰা পরিভৰং বহুং;

অদাসি দাসে কত্ৰান, ৰিহারেসু তহিং তহিং.

এৰংসম্পত্তৰিজযে, পুরমাগম্মভূমিপে;

সব্বং রট্ঠং ৰিসোধেত্ৰা, ৰসন্তে অকুতো ভযে.

ভিক্খুবোধী সনামো’থ, ৰিহারে অভযুত্তরে;

দুস্সীলে বহুলে দিস্ৰা, পব্বজ্জায নৰোপি সো.

রাজানমুপসঙ্কম্ম, ধম্মকম্মমযাচথ;

রাজা তে নেৰ কারেসি, ধম্মকম্মং ৰিহারকে.

দুস্সীলা নিহটা তেন, সব্বে মন্তিয একতো;

রহো তং মারযিত্ৰান, তং কম্মং পটিবাহয্যুং.

রাজা সুত্ৰা তদা কুদ্ধো, সব্বেগণ্হিয একতো;

অকা পোক্খরণী পালে, ছিন্নহত্থে সবন্ধনে.

অঞ্ঞে তত্থ সতং ভিক্খূ, জম্বুদীপে খিপাপযি;

সরন্তো তস্স উস্সাহং, পরিসোধেসি সাসনং.

ভিক্খূ থেরিযৰাদে সো, কাতুং তেহি উপোসথং;

আরাধেত্ৰা পটিক্খিত্তো, পকুপ্পিত্ৰা অনাদরো.

অক্কোসিত্ৰা চ ভাসিত্ৰা, ৰাচাহি ফরুসাহি সো;

ভিক্খূ তে অক্খমাপেত্ৰা, দক্খিণং দেসমজ্ঝগা.

তস্স সো মহতা ফুট্ঠো, রোগেন মরিসজ্জুকং;

এৰং নৰহি ৰস্সেহি, পরিচ্চজি মহীতলং.

তস্স পুত্তো ততো অগ্গ-বোধি নামো কুমারকো;

আসি রাজাসিরিসঙ্ঘ-বোধিনামেন ৰিসুতো.

কণিট্ঠং ভাতরং মাণং, ওপরজ্জে’ভিসঞ্চিয;

তস্সা’দা দক্খিণং দেসং, সযোগ্গবলৰাহনং.

রাজা সো পুব্বরাজূনং, পৰত্তং ন ৰিনাসিয;

রট্ঠং ধম্মেন পালেসি, সঙ্ঘঞ্চ বহুমানযি.

জেট্ঠতিস্সো’থ তং সব্বং, সুণিত্ৰা মলযে ঠিতো;

অরিট্ঠং গিরিমাগম্ম, সঙ্গহেসি মহাজনং.

কত্ৰা হত্থগতে পুব্ব-দক্খিণে সুসমানসে;

কমেন পুরমাগন্তু-মারভিত্থ মহাবলো.

দাঠাসিৰ ¶ মমচ্চঞ্চ, গহেতুং পচ্ছিমং দিসং;

পেসযিত্ৰা সযং গামে, ৰসিত্থ সিরিপিট্ঠিকে.

রাজা নিসম্ম তংসব্বং, উপরাজং ৰিসজ্জযি;

সবলং পচ্ছিমং দেসং, সো গন্ত্ৰা তং পলাপযি.

পোতকংৰ কুলাৰম্হি, সক্কা হন্তুন্তি দারকং;

মাযেত্তং আগতং রাজা, কুমারা’মচ্চ মগ্গহী.

জেট্ঠতিস্সংপি এতংৰ, গণ্হিস্সামীতি চিন্তিয;

থোকেনেৰ বলেনাগা, নিরাসঙ্কোতিৰিক্কমো.

জেট্ঠসিস্সোপি তং সুত্ৰা, সন্নদ্ধবলৰাহনো;

সাগরো ভিন্নৰেলোৰ, রাজসেনং সমোত্থরি.

রাজসেনা পভিজ্জিত্থ, রাজা আরুয্হ কুঞ্জরং;

একো অঞ্ঞাতৰেসেন, পলাযিত্ৰা খণেন সো.

ছট্ঠে মাসম্হি রজ্জম্হা, নাৰমারুয্হ সজ্জুকং;

জম্বুদীপমগাহিত্ৰা, ধনং দেসঞ্চ ঞাতকে.

জেট্ঠতিস্সো ততো হুত্ৰা, পুরে রাজাযথা পুরে;

সব্বং কিচ্চং পৰত্তেসি, পরিপালেসি সাসনং.

মহাদারগিরিং সো’দা, ৰিহারে অভযুত্তরে;

মহাৰিহারস্সা’দাসি, মহামেত্তৰ্হবোধিকং.

গোণ্ডিগামঞ্চ পাদাসি, রাজা জেতৰনস্স সো;

মাতুলঙ্গণকঞ্চেৰ, গামঞ্চো দুম্বরঙ্গণং.

মহানাগস্স পাদাসি, পধানঘরকস্স সো;

কস্সপস্স গিরিস্সাপি, আহারং অম্বিলাপিকং.

গামং কক্খলৰিত্থিঞ্চ, অদাৰেল়ুৰনস্স সো;

গঙ্গামাতি ৰিহারস্স, কেহেতং গামকং অদা.

অন্তরাগঙ্গসৰ্হস্স, চুল্লমাতিকগামকং;

মযেত্তিকস্সপাৰাসে, সহন্ন নগরং অদা.

কাল়ৰাপি ৰিহারস্স, উদৰ্হং গামমাদিসি;

এতে চঞ্ঞেচ সো ভোগ-গামেহি পরিপূরযি.

জিণ্ণং সতসহস্সেহি, তীহি সো পটিসঙ্খরি;

ভিক্খূনং দীপৰাসীনং, তিচীৰরমদাসি চ.

জম্বুদীপগতস্সা’সুং ¶ , রঞ্ঞো সোদরিযা নরা;

তত্থ তত্থ নিলীনা তে, দেসং হন্তুমুপক্কমুং.

সুত্ৰা তং জেট্ঠতিস্সো’থ, কাল়ৰাপিংউপচ্চ সো;

যুজ্ঝন্তো তেহি তত্থেৰ, ৰাসং’কাসি সৰাহনো.

পরতীরং গতো রাজা, গহেত্ৰা দমিল়ং বলং;

কাল়ৰাপিমুপাগম্ম, কাতুং যুদ্ধমুপক্কমি.

জেট্ঠতিস্সোপি সন্নদ্ধ বলকাযো ধনাযুধো;

জম্বুদীপং গমাপেত্ৰা, অমচ্চং দাঠসিৰকং.

ৰম্মিতং গজমারুয্হ, যুজ্ঝন্তো অত্তনো বলং;

ওহীযমানং দিস্ৰান, আরুল়্হং অত্তনা সহ.

মহামচ্চৰচো ৰেদং, সন্দেসং মে মহেসিযা;

আরোচেহি যথাকামং, পচ্ছা তৰ করিস্সতি.

পব্বজিত্ৰা মহাদেৰী, সজ্ঝাযিত্ৰা চ আগমং;

অভিধম্মং কথেত্ৰান, পত্তিং দেহীতি রাজিনো.

ইচ্চেতং সাসনং দত্ৰা, দমিল়ে আগতাগতে;

যাৰ যুদ্ধং নিহন্ত্ৰান, আযুম্হি খযমাগতে.

ৰেল়ুপ্পদমিল়ং নাম, দিস্ৰা যুজ্ঝিতুমাগতং;

তম্বুলত্থৰিযং হত্থে, রক্খন্তো ছুরিকং তদা.

ততো নিক্করণিং সম্মা, গহেত্ৰা সীসমত্তনো;

ছেত্ৰা হত্থিম্হি অপ্পেত্ৰা, ছুরিকং কোসিযং খিপি.

উগ্ঘোসযি মহাসেনা, মহামচ্চোপি সো তদা;

গন্ত্ৰা’ভিযোগং ৰত্ৰান, সীসচ্ছেদম্হি রাজিনো.

সন্দেসং দেৰিযা ৰত্ৰা, তায পব্বজ্জসাসনে;

সমাপিতো ভিধম্মম্হি, সদ্ধিমট্ঠকথায হি.

ধম্মাসনা সমোরুয্হ, নিসীদিয মহীতলে;

এহি রঞ্ঞো মহাকারং, দস্সেহী’তি নিযোজিতো.

নিসজ্জ পুরতো তস্সা, ছিন্দিত্ৰা সীসমত্তনো;

খিপিত্ৰা ছুরিকং আহ, এৰং দেৰো মতো ইতি.

সা তং দিস্ৰা-তিসোকেন, ফালেত্ৰা হদযং মতা;

এৰং পঞ্চহি মাসেহি, রাজা সো তিদিৰং গতো.

এৰং ¶ ৰিজিতসঙ্গামো, সত্তৰো অভিমদ্দিয;

রজ্জং পাকতিকং কত্ৰা, ৰিহরন্তো পুরে ৰরে.

উপরাজস্স নামেন, কারিতস্স পন’ত্তনা;

মহল্লরাজা সৰ্হস্স, পধানঘরকস্স সো.

অদ্ধা গামদ্ৰযং রাজা, হঙ্কারং সামুগামকং;

কেহেল্লরাজভাগঞ্চ, সব্বেপি পরিচারকে.

তথা জেতৰনস্স’দা, মহামণিকগামকং;

মযেত্তিকস্সপাৰাসং, সালগামেন পূজযি.

অম্বিল্লপদরং চা’দা, চেতিযস্স গিরিস্স সো;

পুলত্থিনগরে কাসি, মহাপানাদি দীপকং.

অমচ্চা তস্স মারেসুং, মাণৰ্হং যুৰরাজকং;

অন্তোপুরে’পরজ্ঝিত্ৰা, দত্ৰাপি সমমেত্তিকং.

ততো কস্সপনামং সো, কণিট্ঠং সকভাতরং;

পালেন্তো সন্ততিং রাজা, ওপরজ্জে’ভিসেচযি.

মাণস্স মরণং সুত্ৰা, গহেত্ৰা দমিল়ে লহুং;

দাঠাসিৰো সমাগঞ্ছি, গামং তিন্তিণী নামকং.

তস্সাগমনমঞ্ঞাম, নিক্খমিত্ৰা সৰাহনো;

যুজ্ঝন্তো দ্ৰারসে ৰস্সে, জম্বুদীপং পলাতৰা.

পহায সব্বং গচ্ছন্তো, সঞ্ঞাণত্থায অত্তনো;

একাৰলিং গহেত্ৰাৰ, একাকী সো হি নিক্খমি.

একাৰলিং ৰিনাচেৰ, রাজা হুত্ৰা যথাৰিধিং;

অহু দাঠোপতিস্সোতি, ৰিসুতো ধরণী তলে.

ইতরো লদ্ধওকাসো, রজ্জমগ্গহি যুজ্ঝিয;

অঞ্ঞমঞ্ঞং পলাপেসুং, এৰং তে অন্তরন্তরা.

এৰং উভিন্নং রাজূনং, সঙ্গামেনা’ভিপীল়িতো;

লোকো উপদ্দুতো-সব্বো ৰিহীনধনধঞ্ঞৰা.

দাঠোপতিস্সো নাসেসি, সব্বং পুব্বকরাজূনং;

গণ্হী তীসু নিকাযেসু, সারং ধাতুঘরেসু চ.

সুৰণ্ণপটিমাযো সো, সুৰণ্ণং গণ্হি ভিন্দিয;

সোণ্ণমালাদিকং সব্বং, পূজাভণ্ডং নিরাকরি.

থূপারামে ¶ তথাগণ্হি, সোৰণ্ণং থুপিকং ঘরে;

মহগ্ঘরতনাকিণ্ণং, ছত্তং ভিন্দিত্থ চেতিযে.

মহাপাল়িম্হি নাৰাযো, দমিল়ানং সদাপযি;

রাজগেহা নিঝাপেসুং, সদ্ধিং ধাতুঘরেন তে.

পচ্ছা ৰিপ্পটিসারী সো, দেসেতুং, পাপমত্তনো;

কারেসি সহ ভোগেন, সাকৰত্থুৰিহারকং.

ভাগিনেয্যোপি রতন-দাঠো ইতি জনে সুতো;

মহাদীপাদো হুত্ৰান, সভোগো তমুপট্ঠহি.

অগ্গবোধিম্হি সম্পত্তে, রজ্জং যুদ্ধবলেন চ;

কস্সপো যুৰরাজা সো, সেনং রক্খিতুমত্তনো.

দুপ্পঞ্ঞো সহসা ভেত্ৰা, থূপারামম্হি চেতিযং;

দেৰানংপিযতিস্সেন, খুদ্দরাজেন চেৰ হি.

পুব্বকেহিচ রাজূহি, পূজিতংধনসারকং;

অগ্গহেসি দুন্নিতীহি, পাপকেহি পুরক্খতো.

দক্খিণস্স ৰিহারস্স, চেতিযং পরিভিন্দিয;

অগ্গহেসি ধনং সারং, এৰমঞ্ঞেপি ভিন্দযি.

এৰং করোন্তং তং রাজা, দুন্নিতিকপুরক্খতং;

নাসক্খি কির ৰারেতুং, অহো পাপা নিৰারিযা.

তং ৰারেতু মসক্কোন্তো, থূপারামম্হি চেতিযং;

ভিন্নং তেন সকারেসি, সহস্সেন সমঙ্গলং.

তদা দাঠোপতিস্সেন, অগ্গবোধি নরিস্সরো;

জিতো রোহণমেৰা’গা, সজ্জেতুং বলৰাহনং.

তত্র ঠিতো সোল়সমে, ৰস্সে ব্যাধিহতো মতো;

তদা তস্স কণিট্ঠো সো, যুৰরাজাপি কস্সপো.

দাঠোপতিস্স রাজানং, জম্বুদীপং পলাপিয;

একরজ্জমকাদেসং, মকুটন্তু ন ধারযি.

সাধূনং সঙ্গমেনে’স, হুত্ৰা ৰিপ্পটিসারকো;

নাসং পাপস্স কম্মস্স, করিস্সামীতি চিন্তিয.

পুপ্ফারামে ফলারামে, ৰাপিযো’পি চ কারযি;

মহাচেতিত্তযঞ্চাপি, মহাপূজাহি সক্করি.

থূপারামঞ্চ ¶ পূজেত্ৰা, একংগামঞ্চ তস্সদা;

সব্বাগমিযভিক্খূহি, ধম্মংদেসাপযিত্থ চ.

কত্ৰা মরিচৰট্টিম্হি, পাসাদং সুত্থিরং তহিং;

ৰাসযিত্থ মহাথেরং, নাগসাল নিৰাসিতং.

তত্রট্ঠং তমুপট্ঠায, পচ্চযেতি চতূহি’পি;

অভিধম্মং কথাপেসি, সদ্ধিমট্ঠকথায সো.

নাগসালকমাৰাসং, কত্ৰা তস্সেৰ’দাসি সো;

মহানিট্ঠিলগামঞ্চ, পচ্চযত্থায তস্স’দা.

অথ দাথোপতিস্সো সো, জম্বুদীপা ইধাগতো;

মহন্তং বলমাদায, করোন্তো তেন আহৰং.

কস্সপেন সুসন্নদ্ধ-ৰাহনেন ততো মরি;

দ্ৰাদসাসুং কিরেতস্স, রাজভূতস্স হাযনা.

তস্স দাঠোপতিস্সস্স, ভাগিনেয্যো সনামকো;

জম্বুদীপং পলাযিত্থ, ভীতো তম্হা মহারণে.

সুজনপ্পসাদসংৰেগত্থায কতে মহাৰংসে

ততো ¶ ৰিজিতসঙ্গামো, কস্সপো পুরিতাসযো;

মহাপাল়িম্হি সঙ্ঘস্স, সমিদ্ধং ভোজনং অকা.

নাগসালা নিৰাসিং সো, মহাধম্মকথিং যতিং;

মহাপূজায পূজেত্ৰা, সদ্ধম্মং তেন ৰাচযি.

ৰসন্তং ভাতুআৰাসে, সমুদ্দিস্স লিখাপযি;

কটন্ধকারৰাসিং সো, পাল়ি সব্বং সসঙ্গহং.

জিণ্ণং সঙ্খরিকম্মঞ্চ, নৰং কারেসি চেতিযে;

সঙ্ঘভোগমনেকঞ্চ, তত্থ তত্থ পৰত্তযি.

নানামণিসমুজ্জোতং, কাসি চূল়মণিত্তযং;

সতং পণ্ডুপলাসানং, ৰত্থদানেন তপ্পযি.

তস্সাসুং বহৰো পুত্তা, জেট্ঠো তেসঞ্চ মাণকো;

সব্বে তে ন ৰযপ্পত্তা, বালাৰিগতবুদ্ধিনো.

ততো সো ব্যাধিনা ফুট্ঠো, অতেকিচ্ছেন কেনচি;

পুত্তা মে বালকা সব্বে, নে’তে রজ্জক্খমা ইতি.

ৰসন্তং রোহণে দেসে, ভাগিনেয্যং মহামতিং;

আহুয সব্বং পাদাসি, রজ্জং পুত্তেহি অত্তনো.

গন্ধমালাদিপূজাহি, পূজযিত্ৰান চেতিযে;

ভিক্খুসঙ্ঘং খমাধপসি, দত্ৰান চতুপচ্চযং.

এৰং ধম্মং চরিত্ৰান, মিত্তামচ্চজনেসু চ;

গতো নৰহি ৰস্সেহি, যথাকম্মং নরাধিপো.

কত্ৰা কত্তব্বকিচ্চং সো, মাতুলস্স সগারৰো;

সঙ্গহন্তো জনং মাণো, দমিল়ে নীহরাপযি.

একতো দমিল়া হুত্ৰা, নিব্বাসেম ইমং ইতি;

তস্মিং ঠিতে বহিদ্ধাৰ, অগ্গহেসুং পুরং সযং.

হত্ত ¶ দাঠস্স পেসেসি, জম্বুদীপগতস্স তে;

আগন্তুংতৰ কালোতি, সাসনং রজ্জগাহণে.

মাণো’পি সঙ্ঘং পেসেসি, সাসনং পিতুরোহণং;

পিতা সুত্ৰান তং আগা, ন চীরেনেৰ রোহণা.

উভে তে মন্তযিত্ৰান, অকংসু সন্ধিলেসকং;

উমিল়েহি ততো জাতা, সব্বে তে সমৰুত্তিনো.

ততো সো পিতরং রজ্জে, অভিসিঞ্চিত্থ মাণকো;

সো’ভিসিত্তো নিকাযানং, সহস্সানং তযং অদা.

সঙ্ঘং রট্ঠঞ্চ সঙ্গয্হ, সব্বং রাজকুলট্ঠিতং;

ভণ্ডং পেসেসি সত্তূহি, রক্খণত্থায রোহণং.

হত্থদাঠোপি সুত্ৰান, দমিল়ানং তু সাসনং;

খণেনা’গা ইমং দীপং, গহেত্ৰা দমিল়্হং বলং.

তদা তে দমিল়া সব্বে, পরিভূতা ইধ ঠিতা;

আযন্তমেৰ তং গন্ত্ৰা, পরিৰারেসু মঞ্জসে.

মাণোপি সুত্ৰা তং সব্বং, নাযং কালোতি যুজ্ঝিতুং;

পেসেত্ৰা পিতুরাজানং, সদ্ধিং সারেন রোহণং.

পুব্বদেসং সযং গন্ত্ৰা, সঙ্গণ্হন্তো জনং ৰসী;

লদ্ধা দমিল়পক্খং সো, গহেত্ৰা রাজকং পুরং.

দাঠোপতিস্সো রাজাতি, নামং সাৰেতি অত্তনো;

মাতুলং ৰিয তং লোকো, তেন নামেন ৰোহরি.

পিতুচ্ছপুত্তমানেত্ৰা, অগ্গবোধি সনামকং;

ঠপেত্ৰা যুৰরাজত্তে, দেসঞ্চা’দাসি দক্খিণং.

ঠানন্তরঞ্চ পাদাসি, নিস্সিতানং যথারহং;

সাসনস্স চ লোকস্স, সব্বং কত্তব্বমাচরি.

মহাপাল়িম্হি দাপেসি, সৰত্থং দধিভত্তকং;

খীরং পাযাসকঞ্চেৰ, ধম্মং সুণি উপোসথি.

কারেত্ৰা সব্বপূজাযো, দেসা পেত্ৰান দেসনং;

এৰমাদীহি পুঞ্ঞেহি, অত্তানং’কাসি ভদ্দকং.

কস্সপস্স ৰিহারস্স, দত্ৰাসেনৰ্হগামকং;

মহাগল্লঞ্চ পাদাসি, পধানঘরকস্স সো.

পরিৰেণস্স ¶ মোরস্স, অকাসি সকগামকং;

থূপারামস্স পুণ্ণোল়িং, দত্ৰা সক্কাসি চেতিযং.

কপ্পূরপরিৰেণং সো, কারেসি অভযুত্তরে;

ৰিহারং তিপুথুল্লৰ্হং, কত্ৰা তস্সেৰ দাপযি.

তস্মিং করোন্তে ৰারেসুং, সীমাযন্তো’তি ভিক্খৰো;

থেরিযা তে কিবাহেত্ৰা, বলং তথেৰ কারযি.

অথ তে তে থেরিযা ভিক্খূ, দুম্মঞ্ঞূ তত্থ রাজিনি;

অস্সদ্ধং তং ৰিদিত্ৰান, পত্তনিক্কুজ্জনং করুং.

ৰুত্তঞ্হি মুনিনা তেন, অস্সদ্ধো যো উপাসকো;

অলাভায চ ভিক্খূনং, চেতেত’ক্কোসতি চ তে.

পত্তনিকুজ্জনং তস্স, কত্তব্বন্তি ততো হি তে;

তস্স তং কম্মমকরুং, লোকো মঞ্ঞিত্থ অঞ্ঞথা.

আদাযু কুজ্জিতং পত্তং, চরন্তো ভিক্খুভিক্খকং;

নিকুজ্জেয্য ঘরদ্ৰারে, তস্সা’তি কথিকং করুং.

তস্মিং সো সমযে ফুট্ঠো, ব্যাধিনা মহতামরি;

ৰস্সম্হি নৰমে রাজা, সম্পত্তো জীৰিতক্খযং.

দপ্পুলোপি ততো রাজা, গতো রোহণকং সকং;

ৰাসং কপ্পেসি তত্থেৰ, করোন্তো পুঞ্ঞসঞ্চযং.

ইতো পট্ঠায ৰক্খাম, তস্স ৰংসমনাকুলং;

ৰুচ্চমানম্হি এত্থেৰ, তস্মিং হোতি অসঙ্করো.

জাতো ওক্কাকৰংসম্হি, মহাতিস্সোতি ৰিস্সুতো;

আসি একো মহাপুঞ্ঞো, সমাকিণ্ণগুণাকরো.

তস্সে’কা ভরিযা আসি, সঙ্ঘপিৰাতি ৰীস্সুতা;

ধঞ্ঞপুঞ্ঞগুণূপেতা, ধীতা রোহণসামিনো.

তস্সাপুত্তা তযো আসুং, পঠমো অগ্গবেধিকো;

দুতিযো দপ্পুলো নাম, ততিযো মণিঅক্খিকো.

একাৰ ধীতা তস্সাসি, রাজনমগমা চ সা;

জেট্ঠো রোহণনামস্স, দেসস্সা’সি সযং ৰসী.

মহাপাল়িং স কারেসি, মহাগামে মহাধনো;

দাঠগ্গবোধিনামঞ্চ, পরিৰেণং তহি ৰংসো.

কাণগামম্হি ¶ কাণানং, গিলানানঞ্চ সালকে;

ৰিহারে পটিমাৰ্হে চ, মহন্তং পটিমাঘরং.

পতিট্ঠপেসি কত্ৰান, বুদ্ধতত্থ সিলামযং;

মহন্তনামং সপ্পঞ্ঞো, ইদ্ধীহি ৰিয নিম্মিতং.

সালৰাণঞ্চ কারেসি, ৰিহারং অত্তনামকং,

পরিৰেণৰিহারঞ্চ, তথা কাজরগামকং.

নৰকম্মানি কারেত্ৰা, ধম্মসালৰিহারকে;

সযং ৰচ্চকুটী এস, তত্থ সোধেসি বুদ্ধিমা.

উচ্চিট্ঠং ভিক্খুসঙ্ঘস্স, ভোজনং পরিভুঞ্জিয;

মণ্ডগামঞ্চ সঙ্ঘস্স, গামং’দাসি মসাদৰা.

পুঞ্ঞানে’তানিচঞ্ঞানি, কত্ৰা তস্মিং দিৰঙ্গতে;

আসী তস্সা’নুজো তত্থ, সামি দপ্পুলনামকো.

ইস্সেরং তত্থ ৰত্তেসি, সম্পমদ্দিয সত্ত ৰো;

মহাদানং পৰত্তেসি, নিস্সঙ্কং রোহণং অগা.

তস্স তুট্ঠো জনো আহ, মহাসামীতি এসনো;

ততো পট্ঠায তং লোকো-মহাসামীতি ৰোহরি.

সুত্ৰান তং সিলাদাঠো, নরিন্দো সকধীতরং;

তস্স পাদাসি সন্তুট্ঠো, গুণেহি বহুকেহি চ.

যুজরাজত্তমস্সাদা, রজ্জযোগ্গোতি মানিতুং;

মাণৰম্মাদযো তস্স, পুত্তা আসুং মহাসযা.

পাসাণদিপৰাসিস্স, মহাথেরস্স সন্তিকে;

ধম্মং সুত্ৰা পসীদিত্ৰা, তস্মিং তং বহুমানিতুং.

ৰিহারং রোহণে কত্ৰা, তস্স পাদাসি সোপি তং;

চাতুদ্দিসিযসঙ্ঘস্স, পরিভোগায ৰিস্সজ্জি.

অম্বমালা ৰিহারাদি, ৰিহারে কারযি বহূ;

খদিরালিৰিহারঞ্চ, কত্ৰা দেৰ মপূজযি.

পাসাদমনুরারামং, মুত্তোলম্বং সুজিণ্ণকং;

সীরিৰড্ঢঞ্চ পাসাদং, তথা তক্কম্বিলং পরং.

সোধেত্ৰা ভিক্খৰো তত্থ, দ্ৰত্তিংস পরিৰাসযি;

সব্বপচ্চযদানেন, সন্তপ্পেত্ৰা মহীমতি.

অদা ¶ কেৰট্টগম্ভীরং, গামং নাগৰিহারকে;

তথা রাজৰিহারস্স, গোন্নগামং সমাদিযি.

অদা তীসৰিহারস্স, তথাকন্তিকপব্বকং;

চিত্তলপব্বতস্সা’দা, গামং সো গোন্নৰিট্ঠিকং.

দত্ৰা রিযাকরস্সেস, গামং সোমালৰত্থুকং;

অকাসি পটিমাগেহং, তথেৰ সুমনোহরং.

তত্রট্ঠস্স জিনস্সা’কা, উণ্ণলোমং মহগ্ঘিযং;

হেমপট্টঞ্চ কারেসি, সব্বং পূজাৰিধিং স’কা.

চেতিযে পরিজিণ্ণে সো, সুধাকম্মেন রঞ্জযি;

তিপঞ্চহত্থং কারেসি, মেত্তেয্যং সুগতং পরং.

এৰমাদিনি পুঞ্ঞানি, অপ্পমেয্যানি সো ৰিভূ;

অকাসি চ সযং সাধু, পরিৰারেহী কারযি.

পরিৰারা চ তস্সাসুং, বহূপুঞ্ঞকরা নরা;

ৰিহারা নেককা আসুং, কতা তেহি সপ্পচ্চযা.

কদাচি মগ্গং গচ্ছং সো, অরঞ্ঞম্হি অগামকে;

সেনং সংৰিদহিত্ৰান, ৰাসং কপ্পেসি রত্তিযং.

সুনহাতৰিল্লিত্তো সো, সুভুত্তোসযনে সুখে;

নিপন্নেসু ঘরে রম্মে, নিদ্দাযিতুমুপক্কমি.

অলভন্তো তদা নিদ্দং, কিন্নু খো ইতি কারণং;

পৰত্তিং উপধারেন্তো, দিৰসে সব্বমত্তনো.

অদিস্ৰা কারণং অন্তো, অৰস্সং বহি হেস্সতি;

ইতি চিন্তিয যোজেসি, মনুস্সেতং গৰেসিতুং.

এৰমাহ চ নিস্সঙ্কং, অয্যকা মম রত্তিযং;

তেমেন্তা রুক্খমূলস্মিং, ঠিতা আনেথ তে ইতি.

তেপি গন্ত্ৰা গৰেসন্তা, দীপহত্থা মহাজনা;

মহাগামা’গতে ভিক্খূ, রুক্খমূলগতে তদা.

তে গন্ত্ৰা সাসনং রঞ্ঞো, আরোচেসুং পধাৰিসো;

দিস্ৰা চ ভিক্খু সন্তুট্ঠো, নেত্ৰা ৰাসঘরং সকং.

নিচ্চদানায ভিক্খূনং, ঠপিতে রত্তচীৰরে;

তেসং দত্ৰান তিন্তানি, চীৰরানি সমাদিয.

সুক্খাপিয ¶ চ কত্ৰান, পাদধোৰনকাদিকং;

নিসীদাপিয তে সব্বে, সযনে সাধু সন্থতে.

ভেসজ্জং পটিযাদেত্ৰা, সযমেৰো’পনামিয;

পচ্চূসেপি চ কত্ৰান, কত্তব্বং ভোজনাদিকং.

দত্ৰা কপ্পিয কারে’থ, ৰিস্সজ্জেসি যথারুচিং;

এৰং পুঞ্ঞরতস্সেৰ, তস্সা’সি দিৰসং গতং.

এৰং পুঞ্ঞপরেতস্মিং, ৰসমানে নরুত্তমে;

রট্ঠং জনপদং সব্বং, যোজেত্ৰা পুঞ্ঞকম্মেসু.

মাণো পাচিনদেসম্হি, ৰসন্তো বলসঙ্গহং;

কত্ৰান পিতুনো সেনং, ধনং চেৰা হরাপিয.

কাতুং সঙ্গামমাগঞ্ছি, তিপুচুল্লসগামকং;

দাঠোপতিস্সো তং সুত্ৰা, তম্বলংগা মহাবলো.

তত্থা’কংসু মহাযুদ্ধং, অঞ্ঞমঞ্ঞং সমাগতা;

যোধা দাঠো পতিস্সস্স, মাণং সঙ্গংৰ মারযুং.

তং সুত্ৰা দপ্পুলো সোপি, সোকসল্লহতো মরি;

সত্তাহ মনুরাধম্হি, ৰসং রজ্জমকারযি.

রোহণে তীণি ৰস্সানি, এস রজ্জমকারযি;

তস্মা তস্স কথা আসি, রোহণম্হি ইধাপি চ.

সুজনপ্পসাদসংৰেগত্থায কতে মহাৰংসে

অচ্চযে ¶ হত্থদাঠস্স, অগ্গবোধিকুমারকো;

কণিট্ঠো রাজিনো আসি, সিরিসঙ্ঘাদি বোধিকো.

ধম্মরাজা অযং আসি, সম্মা দস্সনসঞ্ঞুতো;

তস্মা সো পুঞ্ঞকম্মানি, অপ্পমেয্যানি ৰত্তযি.

নিকাযত্তযৰাসীনং, ভত্তগ্গমৰলোকযি;

মহাপাল়িঞ্চ ৰড্ঢেসি, মাঘাতঞ্চেৰ কারযি.

ঠানন্তরঞ্চ দাপেসি, যথারহ মনালযো;

সিপগোত্তাদিযোগ্গেহি, সংগতেহি চ সংগহি.

যত্থ কত্থচি দিস্ৰাপি, ভিক্খৰো সো মহামতি;

সক্কত্ৰা সোভণাপেসি, পরিত্তং সাসনোগধং.

থেরং সো উপসঙ্কম্ম, নাগসালনিৰাসিনং;

দাঠাসিৰং মহাপঞ্ঞং, সীলৰন্তং বহুস্সুতং.

সক্কচ্চ নং ততো সুত্ৰা, সম্মাসম্বুদ্ধসাসনং;

ধম্মে’তীৰপসীদিত্ৰা, সব্বসন্তিকরো ইতি.

সুত্ৰা থেরিযৰাদানং, পুব্বঞাতীনমত্তনো;

পাপানং দুট্ঠচিত্তানং, অপকারে কতে বহূ.

ৰিহারে পরিৰেণে চ, জিণ্ণেপাকতিকে অকা;

ভোগগামে চ দাপেসি, তত্থ তত্থ বহূদযে.

ৰিচ্ছিন্নপচ্চযে চাকা, তদাত্যং কুরিতে ৰিয;

দাসকেপি চ সঙ্ঘস্স, যথাঠানে ঠপাপযি.

পধানঘর মেতস্স, থেরস্স’কাসনামকং;

পটিগ্গহেত্ৰা তং সো’পি, সঙ্ঘস্সা’দা মহামতী.

ভোগগামে চ তস্সা’দা, ভরত্তালং কিহিম্বিলং;

কতকঞ্চ তুলাধারং, অন্ধকারকমেৰ চ.

অন্ধকারং ¶ অন্তুরেল়িং, বালৰং দ্ৰারনাযকং;

মহানিকড্ঢিকঞ্চেৰ, পেল়হাল়ং তথাপরং.

এতে অঞ্ঞে চ সো দত্ৰা, ভোগগামে নরিস্সরো;

দাসি আরামিকে চেৰ, অত্তনো কির ঞাতকে.

তথা দ্ৰিন্নং নিকাযানং, ৰিহারে মন্দপচ্চযে;

দিস্ৰাপি চ সুত্ৰা ৰা, ভোগগামে বহূ অদা.

বহুনা কিন্তুৰুত্তেন, নিকাযেসু’পি তীসু’পি;

অদা গামসহস্সং সো, বহুপ্পাদং নিরাকুলং.

অনুস্সরন্তো সো তিণ্ণং, রতনানং গুণে ৰরে;

একাৰলিং গহেত্ৰান, অক্খমাল মকা কির.

এৰং সব্বপ্পযোগেহি, সো’হু ধম্মপরাযনো;

সব্বে তমনুসিক্খন্তা, হেসু ধম্মকরা নরা.

দমিল়ো পোত্থকুট্ঠৰো, তস্স কম্মকরো তদা;

মাটম্বিযৰ্হং কারেসি, পধানঘরমব্ভুতং.

বূককল্লে অম্বৰাপিং, তন্তৰাযিকচাটিকং;

গামং নিট্ঠিলৰেট্ঠিঞ্চ, তস্সা’দা সো সদা সকং.

কপ্পূরপরিৰেণে চ, কুরুন্দপিল্লকে তথা;

মহারাজঘরে চেৰ, পাসাদে সো’ৰ কারযি.

অঞ্ঞত্থা’দা তযো গামে, ৰিহারেসু মহাধনো;

পোত্থসাতৰ্হযো পঞ্ঞো, ৰিহারে জেতনামকে.

সেনাপতিরাজনামং, পরিৰেণং সমাপযি;

মহাকন্দো চ দমিল়ো, পরিৰেণং সনামকং.

চুল্লপন্থং তথা একো, সেহালউপরাজকং;

উপরাজা সকারেসি, সঙ্ঘতিস্সো’পি রাজিনো.

অঞ্ঞেসু বহৰো আসুং, ৰিহারে এৰমাদিকে;

ভস্স রঞ্ঞো’ নুৰত্তন্তা, এৰং ধম্মীহি পাণিনো.

জেট্ঠনামা ¶ মহাপুঞ্ঞা, মহেসী তস্স রাজিনো;

জেট্ঠারামঞ্চ কারেসি, ভিক্খূনীনমুপস্সযং.

তস্সা’দাসি চ দ্ৰে গামে, পক্কপাসাণভূমিযং;

তম্বুদ্ধং ভেলগামঞ্চ, আরামিকসতং তথা.

অকা মলযরাজাপি, ধাতুগেহং মহারহং;

মণ্ডলগিরিৰিহারম্হি, চেতিযস্স মহাধনো.

লোহপাসাদকে সো’ৰ, ছাদেসি মজ্ঝকূটকং;

বোধিতিস্সৰিহারঞ্চ, বোধিতস্সো মহাযসো.

দীপে মণ্ডলিকা সব্বে, তত্থ তত্থ যথাবলং;

ৰিহারে পরিৰেণে চ, কারযিংসু অনপ্পকে.

তস্স কালো নরিন্দস্স, পুঞ্ঞকম্মমযো ইধ;

অতিৰিত্থারভীতেন, সব্বসো ন ৰিচারিতং.

পুব্বকোপি কথামগ্গো, আকুলো ৰিয ভাতিমে;

যথাপধানং কথিতং, হেতূনং উপলক্খণং.

অথাপরেন কালেন, পুলত্থিনগরং গতো;

ৰাসং তত্থেৰ কপ্পেসি, করোন্তো পুঞ্ঞসঞ্চযং.

অতেকিচ্ছিযরোগেন, সম্ফুট্ঠো কালমত্তনো;

মরণস্স ৰিদিত্ৰান, তমাহুযমহাজনং.

ওৰদিত্ৰান ধম্মেন, মরণং সো উপাগমি;

মহাজনো মতে তস্মিং, বাল়্হসোকো পরোদিয.

কত্ৰা আল়হণে তস্স, কিচ্চং সব্বমসেসতো;

তস্সাল়াহণভস্মম্পি, কত্ৰা ভেসজ্জমত্তনো.

রাজা ভণ্ডঞ্চ তং সব্বং, সব্বঞ্চ বলৰাহনং;

সম্মা আদায গোপেত্ৰা, নগরং সমুপাগমি.

এৰং সোল়সমে ৰস্সে, রাজা আসি দিৰঙ্গতো;

পোত্থকুট্ঠোপি দমিল়ো, রজ্জং তস্স ৰিচারযি.

উপরাজং গহেত্ৰান, দাঠাসিৰং খিপাপযি;

চারকো ৰিহিতুং সম্মা, রক্খাৰরণ মাদিসি.

ৰিনা রঞ্ঞা ন সক্কাতি, মেদিনিং পরিভুঞ্জিতুং;

আনেত্ৰা দত্তনামকং, ধনপিট্ঠপ্পধানকং.

উপ্পন্নং ¶ রাজৰংসম্হি, রজ্জে তং অভিসিঞ্চিয;

তস্স নামং ঠপেত্ৰান, সযং সব্বং ৰিচারযি.

দন্তো সো ধনপিট্ঠিম্হি, ৰিহারং সকনামকং;

কারযিত্ৰান পুঞ্ঞানি, অঞ্ঞানিপি সমাচিনি.

সমকন্তু সো ঠত্ৰা’ৰ, ৰস্সদ্ৰয মহুমতো;

পোত্থকুট্ঠো মতেতস্মিং, পুন অঞ্ঞম্পি মাণৰং.

হত্থদাঠং সমাহূয, উণ্হা নগরসম্ভৰং;

তম্পি রজ্জে ভিসিঞ্চিত্ৰা, যথা পুব্বং সযংৰসী.

কাল়দীঘাৰিকং কত্ৰা, পধানঘরকং তথা;

পুঞ্ঞমঞ্ঞং ছমাসেহি, সো’পি মচ্চুৰসং গতো.

সুজনপ্পসাদসংৰেগত্থায কতে মহাৰংসে

রঞ্ঞো তস্সচ্চযে রাজা, মাণৰম্মো অহোসি সো;

কিং গোত্তো কস্স পুত্তো চ, কথং রজ্জমপাপুণি.

মহাসম্মতৰংসম্হি, জাতো জাতিগুণাৰহো;

পুত্তো কস্সপনামস্স, থূপারামস্স ভেদিনো.

ধীতা মলযরাজস্স, সঙ্ঘনামস্স রাজিনো;

তং লভিত্ৰা ৰসং দেসে, উত্তরে লীনৰুত্তিকো.

হত্থদাঠনরিন্দেন, তস্মিং অত্থেৰ ধারিতে;

জম্বুদীপমুপাগম্ম, নরসীহং মহীপতি.

গন্ত্ৰা ৰত্ৰা ¶ সকং নামং, সেৰিতুং তমুপক্কমি;

আরাধেসি চ সব্বেহি, পযোগেহি নরাধীপং.

ৰিদিত্ৰা তস্স সোহজ্জং, নেত্ৰা ভরিযমত্তনো;

ৰাসং তত্থেৰ কপ্পেসি, সেৰমানো দিৰানিসং.

সোপি আরাধিতো তেন, কণ্ডুৰেট্ঠি নরুত্তমো;

সব্বং নেন্তোৰ তং রজ্জং, মহাভোগমদাপযি.

তেন সংৰাসমন্ৰায, ভরিযা সঙ্ঘনামিকা;

চতস্সো ধীতরো পুত্তে, চত্তারোপি ৰিজাযথ.

অথেকদিৰসং রাজা, হত্থিক্খন্ধৰরং গতো;

সঞ্চরন্তো যথাকামং, মাণৰম্মেন একতো.

নাল়িকেরং পিৰিত্ৰান, তত্রট্ঠোৰ পিপাসিতো;

মাণৰম্মস্স পাদাসি, মঞ্ঞন্তো অঞ্ঞমেৰ তং.

সো তং গহেত্ৰা চিন্তেসি, সখং পেস নরাধিপো;

উচ্ছিট্ঠং নাম কিং হোতি, সত্তানং পরমত্থতো.

তস্মা যুত্তং মযাপাতু-মীতি চিন্তিয তং পিৰি;

এৰং হোন্তি মহুস্সাহা, দেতুকামাহি বুদ্ধিনো.

রাজাপি দিস্ৰা তং ভীতো, তস্সপী তাৰ সেসকং;

সযং পিৰি তথাহোতি, কম্মং পুঞ্ঞৰতং সদা.

ঠপেসি সকৰেসেৰ, ততো পট্ঠায অত্তনো;

ভোজনে সযনে চেৰ, পরিহারে চ ৰাহনে.

এৰং তেসু ৰসন্তেসু, যুদ্ধত্থাযমুপক্কমি;

ৰল্লভো নরসীহেন, নরসীহো ৰিচিন্তযি.

অযং খো মম সেৰায, রজ্জং ৰংস গতং সকং;

লভিস্সামীতি সেৰেতি, রত্তিং দিৰ মতন্দিতো.

সচে সোপি মযা গন্ত্ৰা, যুজ্ঝন্তো মরণং গতো;

তক্কিতং তস্স ময্হঞ্চ, সব্বং তমফলং ভৰে.

এৰং চিন্তিযতং রাজা, নিৰত্তেত্ৰা সকে পুরে;

সযং ৰল্লভরাজেন, কাতুং সঙ্গামমারসি.

মাণৰম্মোপি চিন্তেসি, সচে’যং মযি জীৰিতি;

রাজা মীযতি যুদ্ধম্হি, কিং ফলং মম জীৰিতে.

ৰিস্সাসো ¶ দুক্কতো তেন, ভৰিস্সতি তথাসতি;

সঙ্গহেসি কিমত্থং মং, সমানত্তেন অত্তনো.

তস্মা যুত্তং মযা গন্তুং, সহসঙ্গাম মণ্ডলং;

সুখঞ্হি সদ্ধিং তেনেত্থ, জীৰিতং মরণংপি ৰা.

এৰং চিন্তিয সন্নদ্ধ-বলো হত্থিৰরং গতো;

গন্ত্ৰা দস্সেসি অত্তানং, সো তং সঙ্গাম মণ্ডলে.

নরসীহোৰ তং দিস্ৰা, হট্ঠতুট্ঠো সমুগ্গিরি;

সহো সন্থৰমেতস্মিং, কত্তব্বং মে কতং ইতি.

ততো মানস্স সেনা চ, সেনা চেৰস্সরাজিনো;

সেনং ৰল্লভরাজস্স, ৰিদ্ধংসেসি সমাগতা.

মাণৰম্মোপি দস্সেসি, তহিং সুরত্তমত্তনো;

পরক্কমন্তো দেৰানং, রণে নারাযণো ৰিয.

নরসীতোপি সন্তুট্ঠো, মাণৰম্মস্স ৰিক্কমে;

আলিঙ্গত্ৰা সিনেহেন, ত্ৰং খো মে জযদো ইতি.

অত্তনো পুরমাগম্ম, কত্ৰা ৰিজযমঙ্গলং;

মাণৰম্মস্স সেনায, কত্তব্বং সব্বমাচরি.

অথেৰং চিন্তযি রাজা, কত্তব্বং মে সহাযকো;

অত্তনা’কাসি সব্বঞ্চ, অনণো সো মমজ্জতো.

ইণং মমাপি সোধেমি, কত্ৰা কত্তব্বমত্তনা;

কত্তঞ্ঞূ কতৰেদীহি, পুরিসা’তীৰদুল্লভা.

অমচ্চে সন্নিপাতেত্ৰা, ইদং ৰচনমব্রৰি;

সহাযস্স মমেতস্স, কম্মে তুম্হেপি সক্খিনো.

মযাপি তস্স কত্তব্বং, কম্মং সাধু সুখাৰহং;

উপকারো হি সাধূনং, ধম্মো পুব্বোপকারিনো.

এৰং ৰুত্তে অমচ্চা তে, পচ্চাহংসু মহীপতি;

যং যমিচ্ছতি দেৰোহি, তং তং রুচ্চতি নো ইতি.

অথ সো মাণৰম্মস্স, সেনং দত্ৰা সৰাহনং;

সব্বোপকরণঞ্চেৰ, সব্বকম্মকরেপি চ.

গচ্ছাতি ৰত্ৰা তং যন্তং, সহসেনাযপেক্খিয;

পরিদেৰিত্থ ভূমিন্দো, ৰিপ্পৰুত্থং’ৰ পুত্তকং.

মাণৰম্মোপি ¶ আরুয্হ, নাৰাযো জলধীতটে;

ন চিরেনেৰ আগম্ম, সমত্তিক্কম্ম ৰেগসা.

সহ সেনায মদ্দন্থো, লঙ্কাদীপমুপৰিসী;

তং সুত্ৰান পলাযিত্থ, রাজা দাঠোপতিস্সকো.

মাণৰম্মো পুরং গন্ত্ৰা, অহুত্ৰাৰ নরাধিপো;

পলাতমনুবন্ধিত্থ, পদানুপদমুগতো.

তদা সা দমিল়ি সেনা, অস্সোসি কির সামিকো;

মহারোগা’ভিভূতোতি, সুত্ৰা তং সা অপক্কমি.

সুত্ৰা দাঠোপতিস্সো তং, সমাদায মহাবলং;

মাণৰম্মং উপাগম্ম, কাতুমারভি সংযুধং.

মাণৰম্মো চ চিন্তেসি, সব্বা সেনা গতা মম;

মতে মযি সমিজ্ঝেয্য, ৰেরিনো মে মনোরথং.

জম্বুদীপংৰ তস্মা’হং, গন্ত্ৰা’দাস বলং ততো;

পুন রজ্জং গহেস্সংতি, তস্মা এৰমকাসি সো.

গন্ত্ৰা পুন’পি দিস্ৰান, সহাযং নরসীহকং;

আরাধহন্তো নিপুণং, সক্কচ্চং তমুপট্ঠহি.

যাৰ রাজচতুক্কংসো, মাণাম্মো তহিং ৰসি;

নরসীহো’থ চিন্তেসি, মানত্থদ্ধো যসোধনো.

রজ্জত্থং মে সহা যো মং, সেৰন্তোযেৰ অদ্ধগো;

ৰুদ্ধো হেস্সতি তং পস্সং, কথং রজ্জং করোমহং.

ইমস্মিং পন ৰারস্মিং, পেসযিত্ৰা বলং মম;

রজ্জং তং ন গহেস্সামি, কো অত্থো জীৰিতেন মে.

এৰং চিন্তিয সো সেনং, সন্নিপাতিয অত্তনো;

সন্নাহেত্ৰা যথা যোগং, দাপেত্ৰান যথারুচিং.

নাৰাযো চিত্তরূপাযো, কারযিত্ৰা থিরা বহূ.

অমচ্চে আহ ‘‘এতেন, সদ্ধিং গচ্ছথ ভো’’ইতি;

নাৰং আরোহিতুং সব্বে, ন ইচ্ছিংসু তদা জনা.

তদা সীহো ৰিচিন্তেত্ৰা, সযং হুত্ৰা তিরোহিতো;

অত্তনো পরিহারং সো, রাজলক্খণসম্মতং.

সব্বং ¶ তস্সেৰ দত্ৰান, অলঙ্কারম্পি অত্তনো;

আরোপেত্ৰান তং নাৰং, গচ্ছ ঠত্ৰান সাগরে.

ইমং ভেরিংচ ৰাদেহি, কোট্ঠনামন্তি যোজযী;

সো’পি সব্বং তথাকাসি, রাজানো অগমা ইতি.

আরুহিংসু জনা নাৰং, একং কত্ৰা নরাধিপং;

সো তং সেনঙ্গমাদায, মাণো গন্তুং সমারভি.

কেৰলো’পি সমুদ্দো সো, অহোভি নগরূপমো;

অথ সো পট্টনং পত্ৰা, ওতরিত্ৰা সৰাহনো.

ৰিস্সামেত্ৰা বলং তত্থ, ৰসং কতিপযে দিনে;

উত্তরং দেসমাদায, কত্ৰা হত্থগতং জনং.

অক্খোব্ভিয মহাসেনো, নগরং গন্তুমারভি;

পোত্থকুট্ঠোপি তং সুত্ৰা, পচ্চুগ্গঞ্ছি মহাবলো.

সংগচ্ছিংসু উভো সেনা, ভিন্নৰেলা’ৰ সাগরা;

মাণৰম্মো ততো হত্থি-মারুয্হ গহিতাযুধো.

পোত্থকুট্ঠঞ্চ রাজানং, দ্ৰেধা কত্ৰা পলাপযি;

হত্থদাঠং পলাযন্তং, দিস্ৰা জনপদা নরা.

সীসমস্স গহেত্ৰান, মাণৰম্মস্স দস্সযুং;

পোত্থকুট্ঠোপলাযিত্ৰা, মেরুকন্দরমাগমি.

ততো তং সামিকো দিস্ৰা, সহাযো মে অযংচিরং;

তস্মা ন সক্কা চড্ডেতুং, আপদে সরণাগতং.

সামিনো চ সহাযস্স, নিদ্দোসোহং কথং ভৰে;

ইতি চিন্তিয পূৰং সো, সৰিসং খাদিযা’মরি.

কুট্ঠকোপি চ তেনেৰ, খাদিত্ৰা পূৰকং মতো;

মাণৰম্মস্স তস্সেৰং, দীপো আসি অকণ্টকো.

মাণৰম্মো ততো দীপে, ছত্তং উস্সাপযি তদা;

ৰারেন্তো ৰিয তেনেৰ, দুক্খং দীপে জনস্স সো.

পুঞ্ঞকম্মানি সো’কাসি, অনগ্ঘানি বহূনি চ;

সমত্থো কোহি তং সব্বং, ৰত্তুং পটিপদং নরো.

কপ্পগামৰ্হযঞ্চেৰ, তথা সেপণ্ণিনামকং;

পধানরক্খে চ সিরিং, সিরীসঙ্ঘাদি বোধিকে.

পাসাদং ¶ সোৰ কারেসি, পসাদাৰহমুত্তমো;

ছাদেসি লোহপাসাদং, থূপারামঘরং তথা.

থূপারামে চ পাসাদং কত্ৰা’দা পংসুকূলিনং;

জিণ্ণকং পটিসঙ্খাসি ছত্তং চেতিযমুদ্ধনি;

বহৰো জিণ্ণকাৰাসে তত্থেৰ পটিসঙ্খরি.

[এত্থ মাণৰম্মস্স রজ্জকথায ঊনতা দিস্সতি. ইতো পট্ঠায অগ্গবোধিস্স রজ্জপটিবদ্ধা কথা ৰির খাযতি.]

দাসি ধম্মরুচিনং সো, রাজিনী দীপকম্পি চ.

কারেত্ৰান পরিচ্ছেদং, মহানেত্তাদি পাদিকং;

তেসমেৰ অদা কোল়ু-ৰাতে সো দেৰতিস্সকং.

ৰহত্থলে চ সো কত্ৰা, কদম্বগোননামকং;

দেৰপাল়িম্হি কত্ৰান, গীরিৰ্হনগরং তথা.

কত্ৰা অন্তরসোব্ভম্হি, দেৰনামং ৰিহারকং;

রাজমাতিকমারামং, কত্ৰা’দা পংসুকূলিনং.

গোকণ্ণকৰিহারে’কা, পধানঘরমেৰ চ;

জিণ্ণগেহঞ্চ কারেসি, ৰড্ঢমানকবোধিযা.

সঙ্ঘমিত্তৰ্হযে চেৰ, অঞ্ঞত্থ চ মহাযসো;

তত্থ তত্থ ৰিহারেসু, নৰকম্মমকারযি.

ছব্বীসতি সহস্সানি, সুৰণ্ণানং সমপ্পিয;

জিণ্ণানি পটিসঙ্খাসি, রাজা চেতিযপব্বতে.

তালৰত্থুৰিহারঞ্চ, কারেত্ৰা পণ্ণভত্তকং;

ৰিহারস্স মহাসেন-নরিন্দৰ্হস্স দাপযি.

গোণ্ডিগামিকৰাপিঞ্চ, ছিন্নং বন্ধি যথা পুরা;

দানভণ্ডঞ্চ সো সব্বং, সব্বেসং দাসি পাণিনং.

উপোসথং ¶ উপৰসতি, সদ্ধিং দীপজনেহি সো;

ধম্মঞ্চ তেসং দেসেতি, দাতুং লোকুত্তরং সুখং.

কম্মং সোৰগ্গিযং তস্স, রজ্জে সব্বো সমাচরি;

যং করোতি মহীপালো, তং তস্স কুরুতে জনো.

তস্মা রাজা মহাপঞ্ঞো, ধম্মমেৰ সমাচরে;

সো নিৰুত্থনিৰুত্থম্হি, ঠানে হোতি মহাযসো.

সম্পত্তপরিৰারো চ, অন্তে গচ্ছতি নিব্বুতিং;

অত্তত্থঞ্চ পরত্থঞ্চ, তস্মা পস্সেয্য বুদ্ধিমা.

অত্তনা যদি একেন, ৰিনিতেন মহাজনা;

ৰিনযং যন্তি সব্বেপি, কোতং নাসেয্য পণ্ডিতো.

পযোগো যো হি সত্তানং, লোহদ্ৰয হিতাৰহো;

সো তেন অকতো নত্থি, রত্তন্দিৰমতন্দিনা.

অত্তনো সো নিৰত্থানি, ৰত্থানি সুখুমানি চ;

পংসূকূলিকভিক্খূনং, চীৰরত্থায দাপযি.

অট্ঠানৰিনিযোগোপি, সঙ্গহো ৰা ৰিরূপকো;

সাৰজ্জো পরিভোগো ৰা, তস্স নাহোসি সব্বসো.

যে যে সত্তা যদা হারা, তেসং তং তং সদাপযি;

যে যেন সুখী হোন্তি, তে তে তেন সুখাপযী.

এৰং পুঞ্ঞানি কত্ৰান, ছব্বস্সানি নরাধিপো;

অগমা দেৰরাজস্স, সন্তিকং সন্তিযাৰহো.

অথ তস্স নুজো রাজা, কস্সপো হোতি খত্তিযো;

সমত্থো রজ্জভারস্স, ৰহিতুং পুব্বৰুত্তিনো.

পিতা ৰিয নিযং পুত্তং, সো সঙ্গণ্হি মহাজনং;

দানেন পেয্যৰজ্জেন, অত্থস্স চরিযায চ.

ঠানন্তরঞ্চ দাপেসি, তস্স তস্স যথারহং;

সযং ভুঞ্জিত্থ ভোগেপি, সব্বদুক্খৰিৰজ্জিতো.

গীহিনঞ্চেৰ ভিক্খূনং, ব্রহ্মণানঞ্চ খত্তিযো;

ৰত্তাপযি সকাৰারে, মাঘাতঞ্চেৰ কারযি.

মচ্ছতিত্থে দুৰে চেৰ, আৰাসং হেল়িগামকং;

ৰণিজ্জগামমারামং, কস্সপাদীগিরিং তথা.

তথা ¶ অম্বতনৰ্হঞ্চ, পধানঘর মুত্তমং; ভোগগামঞ্চ…

[এত্থকস্সপস্স রজ্জপটিবদ্ধায কথায ঊনতা দিস্সতি.]

তেসং সব্বকনিট্ঠোপি, মহিন্দো নাম খত্তিযো;

সম্পত্তরজ্জো নাহোসি, রাজা রজ্জ ধুরন্ধরো.

তস্সপি কির নিলৰ্হো, সহাযো চীরসত্থুতো;

মতো পুব্বেৰ তস্মা, সো সরন্তো তং ন ইচ্ছিতং.

অহোরজ্জম্পি দীপম্হি, ন মঞ্ঞিত্থ সুখাৰহং;

অভাৰেন সহাযস্স, সহাযা’তীৰ দুল্লভা.

তেনেৰ ৰুত্তং মুনিনা, ধম্মা যেকেচি লোকিযা;

তথা লোকুত্তরা চেৰ, ধম্মা নিব্বানগামিনো.

কল্যাণমিত্তং আগম্ম, সব্বে তে হোন্তি পাণিনং;

তস্মা কল্যাণমিত্তেসু, কত্তব্বো’তি সদা দরো.

আদিপাদোৰ সো তস্মা, হুত্ৰা রজ্জং ৰিচারযি;

পালেতুংযেৰ দীপম্হি, জিৰন্তো ৰিয পাণিনো.

কস্সপস্স সভাতুস্স, পুত্তং সো অগ্গবোধিকং;

ঠপেত্ৰা ওপরজ্জম্হি, দত্ৰা ভোগমনপ্পকং.

দেসং দত্ৰান পাচিনং, ৰসিতুং তত্থ পেসিয;

দেসং দক্খিণমাদাসি, রাজ পুত্তস্স অত্তনো.

মহাপাল়িম্হি দানঞ্চ, দাপেসি দসৰাহণং;

সব্বে ভোগে সমে’কাসি, যাচনানং সহ’ত্তনা.

অদত্ৰা যাচকানং সো, নু কিঞ্চি পরিভুঞ্জতি;

ভুত্তং ৰা সতিযা দেতি, দ্ৰি গুণং অত্তভুত্ততো.

সকনামং সকারেসি, ভিক্খুনী ন মুপস্সযং;

পাদানগরগল্লঞ্চ, আরাম মরিযাদকং.

মহিন্দতটমারামং, সম্পত্ত চতুপচ্চযং;

অঞ্ঞম্পি বহুধা কাসি, পুঞ্ঞং পুঞ্ঞগুণেরতো.

তিণী ৰস্সানি কারেত্ৰা, রজ্জমেৰ মহামতি;

গৰেসন্তো সহাযং’ৰ, দেৰলোকমুপাগমি.

ৰসন্তো ¶ দক্খিণে দেসে, অগ্গবোধি কুমারকো;

তস্মিং তত্থ ৰসন্তম্হি, আদিপাদো মহিন্দকো;

মতো আসি ততো তস্স, রজ্জং হত্থগতং অহু.

সো তং হত্থগতং কত্ৰা, সণ্ঠপেত্ৰান সাসনং;

পাচিন দেসপতিনো, অগ্গবোধিস্স পেসযি.

স আগন্ত্ৰা অহু রাজা, সিলামেঘোতি সঞ্ঞিতো;

ওপরজ্জে কুমারঞ্চ, অভিসিঞ্চিত্থ ভূপতি.

সো রাজা নং নিযোজেত্ৰা, চিন্তা ভারং ৰিমুঞ্চিয;

ভোগে ভুঞ্জথ তুম্হেতি, সযং রজ্জং ৰিচারযি.

যথাযোগং জনস্সেস-কাসি নিগ্গহসংগহে;

দেসে উব্বিনযং সব্বং, মগ্গং পাপেসি চক্খুমা.

এৰং তেসু ৰসন্তেসু, ওতারং পাপকম্মিনো;

ন লভন্তা ৰিচিন্তেসুং, ভিন্দিতব্বা ইমে ইতি.

রাজানমুপসঙ্কম্ম, অৰোচুং পিসুনং রহো;

তুৰং রাজাসি নামেন, রাজা অঞ্ঞো সভাৰহো.

উপরাজা অযং রজ্জং, গণ্হিস্সতি মহাজনং;

সঙ্গয্হ ন চিরেনেৰ, হোতি রাজা ন সংসযো.

তং সুত্ৰান মহীপালো, পরিভিজ্জি কুমারকে;

কুমারোপি ৰিধিত্ৰা তং, চোরো হুত্ৰান রাজিন্দো.

পলাযিত্ৰা সকং দেসং, সঙ্গণ্হিত্ৰা তহিং জনে;

মহন্তং বলমাদায, কাতুং সঙ্গাম মারভি.

কদল্যাদিনিৰাতম্হি, সঙ্গামো ভিংসনো অহু;

গতো তত্থ পরাজিত্ৰা, কুমারো মলযং ৰসো.

ততো রাজা কতঞ্ঞূ সো, উপকারং সভাতুনো;

চিন্তেত্ৰা রজ্জদানাদিং, পরিদেৰিত্থ পাকটং.

কুমারোপি চ তং সুত্ৰা, অহোসি মুদুচিত্তকো;

এৰং তে অঞ্ঞমঞ্ঞস্স, সিনিদ্ধন্তং পকাসযুং.

রাজা গন্ত্ৰা সযংযেৰ, মলযং এককো ৰংসো;

কুমারং তং সমাদায, আগমিত্থ সকং পুরং.

হোতি ¶ নিস্সংসযং [এৰংপি চিত্তো] অতীৰ সো;

ৰিৰাহং তেন কারেসি, ধীতরং সঙ্ঘনামিকং.

তায সদ্ধিং ৰসন্তো সো, ৰিস্সত্থো তেন রাজিনা;

পহারং তায পাদাসি, দুট্ঠো দোসম্হি কিস্মিংচি.

পিতরং সা উপাগম্ম, করুণং রোদিতম্পতি;

অকারণে মং মারেতি, দিন্নো ৰো সামিকো ইতি.

সোপি তং সুতমত্তেৰ, দুক্কতং ৰত মে ইতি;

পব্বাজেসি লহুং গন্ত্ৰা, ভিক্খূনী ন মুপস্সযং.

অগ্গবোধিসনামোথ, তস্সা মাতুল পুত্তকো;

সুচিরেনেৰ কালেন, তস্সং সা রত্তমানসো.

কালো’যন্তি ৰিদিত্ৰান, তমাদায পলাযিতুং;

অঞ্ঞতো তং গহেত্ৰান, গতো একোৰ রোহণং.

অগ্গবোধিং নরিন্দো সো, অগ্গবোধি নমাদিয;

অগ্গবোধিং নিহন্তুং তং, রোহণং তমুপাৰীসি.

অগ্গবোধি নিসেধেত্ৰা, অগ্গবোধিং সভাতরং;

অপরে পব্বতে হন্তু-মগ্গবোধিং সযং গতো.

কসিণং রোহণং হত্থ-গতং কত্ৰা মহা বলো;

যুজ্ঝিত্ৰা তেন তং গণ্হি, ভরিযং সঙ্ঘমত্তনো.

ততো পট্ঠায সুখিতা, সমগ্গা তে তযো জনা;

ৰিস্সট্ঠা অঞ্ঞমঞ্ঞেসু, ৰিহরিংসু যথারুচিং.

ৰাপারনিং অকারামং, তথা মাণগ্গবোধিকং;

সভত্তুদ্দেসভোগঞ্চ, ৰিহারে অতিযুত্তরে.

হত্থি কুচ্ছিৰিহারে চ, ৰিহারে পুন পিট্ঠিকে;

মহাদীপরিৰেণে চ, পাসাদে ৰাহদীপকে.

থূপারামম্হি গেহস্স, দ্ৰারে চ পরিজিণ্ণকে;

কাসি পাকতিকং তত্থ, থম্ভে চ পরিৰত্তযি.

এৰং কত্ৰান পুঞ্ঞানি, পুঞ্ঞানি চ যথাবলং;

চত্তালীসতিমে ৰস্সে, যথাকম্ম মুপাগমি.

অথোপরাজা রাজা’সি, অগ্গবোধি সিরীধরো;

তনযো সো মহিন্দস্স, আদিপাদস্স ধীমতো.

সাসনম্পি ¶ চ লোকঞ্চ, সঙ্গণিত্থ যথারহং;

ওপরজ্জে’ভিসিঞ্চত্থ, মহিন্দং পুত্তমত্তনো.

মহাবোধিস্স কারেসি, ঘরং জিণ্ণং নৰং থিরং;

আরামে দ্ৰে চ কারেসি, কল়ন্দং মল্লৰাতকং.

ধম্মকম্মেহি সক্কচ্চং, সোধেসি জিনসাসনং;

ৰিনিচ্ছনন্তো ধম্মেন, ছিন্দি কূটট্টকারকে.

ভেসজ্জঞ্চ গিলানানং, মঙ্গলং চাৰমঙ্গলং;

লঙ্কাদীপম্হি সকলে, সযমেৰ ৰিচারযী.

সলাকভত্তং দাপেসি, নিকাযত্তয ৰাসিনং;

ভোজনং পংসুকূলীনং, অত্তযোগ্গং মহারহং.

এৰমাদীনি কত্ৰান, পুঞ্ঞানি সসযং ৰসী;

চুতো’সি ছহি ৰস্সেহি, পুলত্থিনগরে ৰসং.

ততো পুব্বেৰ তস্সাসি, পুত্তো সো যুৰরাজকো;

মতো কির ততো রজ্জং, অপুত্তং তং তদা অহু.

পুত্তো মহিন্দো নামা’সি, সিলা মেঘস্স রাজিনো;

রজ্জযোগ্গো মহাপুঞ্ঞো, লোকসঙ্গণ্হ নক্খমো.

তস্স জাতদিনেযেৰ, রাজা নক্খত্তপাঠকে;

পুচ্ছিত্ৰা রজ্জযোগ্গোতি, সুত্ৰা তেহি ৰিযাকতং.

দত্ৰা তেসং ধনং সাধু, পৰত্তিং তং নিগূহযি;

অথ নং সো ৰযপ্পত্তং, কত্ৰা সেনাপতিংসকং.

রজ্জং ৰস্সেৰ কত্ৰান, সব্বং হত্থে সযংৰসী;

সো ধম্মেন ৰিচারেসি, রাজ কিচ্চং মহামতি.

মতেপি তস্মিং তস্মা সো, অগ্গবোধাভিধানিনো;

সেনাপচ্চং ন গণ্হিত্থ, নযঞ্ঞূ তস্স হত্থকো.

তদা কেনচি গন্ত্ৰা সো, করণীযেন রাজিনো;

সমুদ্দতীরে ৰসতি, মহাতিত্থম্হি পট্টনে.

সুত্ৰা সো চূল়পিতুনো, মরণং ৰেগসা’গমা;

চোরা রজ্জং গহেত্ৰান, নাসেয্যুং নগরং ইতি.

ততো উত্তরদেসম্হি, মণ্ডলীকা সরট্ঠিযা;

অচ্ছিন্দিত্ৰান তং দেসং, ছিন্নরাজকরং করুং.

সো ¶ তং সুত্ৰা মহাসেনো, গন্ত্ৰা উত্তরদেসকং;

সব্বে নিম্মথযিত্ৰান, মণ্ডলী কেসরট্ঠিযে.

গন্ত্ৰা রঞ্ঞো মতঠানং, দিস্ৰা দেৰিং পরোদিয;

অস্সাসেত্ৰা যথাকালং, ইদং ৰচনমব্রৰি.

মাচিন্তেসি মহাদেৰী, মতো মে সামিকো ইতি;

রক্খিস্সামি অহং দীপং, তুম্হে রজ্জং করিস্সথ.

তুণ্হিভূতা’ধিৰাসেত্ৰা, পিযসা পাপবুদ্ধিকা;

রহো যোজযী তং হন্তুং, ৰত্থুকামা যথারুচিং.

সেনাপতি তং ঞত্ৰান, তস্সা’রক্খং ৰিধায সো;

তং পক্খিযেহি যুজ্ঝিত্ৰা, পলাপেসি মহাজনং.

ততো দেৰিং সবন্ধেত্ৰা, পক্খিপিত্ৰান যানকে;

আদায তং পুরং গন্ত্ৰা, রজ্জং গণ্হি সসাধনং.

সো সেনং সন্নিপাতেত্ৰা, ৰসন্তো কাল়ৰাপিযং;

কাতুং সঙ্গাম মাগঞ্ছি, সঙ্গগামপ্পদেসকং.

সেনাপতি পৰত্তিং তং, সুত্ৰা সম্পন্নৰাহনো;

দেৰিঞ্চ তং সমাদায, অগমা তত্থ সজ্জুকং.

তেসং তত্থসি সঙ্গামো, উভিন্নং লোমহংসনো;

আদিপাদো তদাসেনং, ওহীযন্তং সমেক্খিয.

পলাযিত্ৰা আরুহিত্থ, অচ্ছসেলং সৰাহনো;

পলাপেত্ৰান তং তত্থ, সেনাপতি সুখং ৰসি.

সুঞ্ঞংতি নগরং সুত্ৰা, মণ্ডলীকাপি উত্তরে;

দেসে সব্বে সমাগম্ম, অগ্গহেসুং পুরং তদা.

সো হি তে পটিবাহেসি, সূরো ধীরপরক্কমো;

অথাগম্ম পুরং রজ্জং, ৰিচারেসি যথানযং.

ভিক্খুসঙ্ঘস্স লোকস্স, মচ্ছানং মিগপক্খিনং;

ঞাতীনং বলকাযস্স, কত্তব্বং সব্বমাচরি.

পচ্ছা ¶ অনু বলপ্পত্তো, দপ্পুলো মলযং গতো;

ভাগিনেয্যো দুৰে চেৰ, পক্কোসিত্ৰান রোহণা.

রট্ঠে জনপদে সব্বে, আদায বহুৰাহনো;

রত্তিযং পুরমাগম্ম, সমুদ্দো ৰিয ওত্থরি.

বলকাযো পুরং রুন্ধি, উগ্ঘোসেন্তো সমন্ততো;

হেসিতেন তুরঙ্গানং, কোঞ্চনাদে নদন্তিনং.

তাল়াৰচর সদ্দানং, কাহল়ানং রৰেন চ;

গজ্জিতেন ভটানঞ্চ, আকাসং ন তদা ফলি.

তদা সেনাপতি দিস্ৰা, মহাসেনং পমোদিয;

আরোচেসি অৰত্তিং তং, বলকাযস্স অত্তনো.

রাজপুত্তা তযো এতে, মহন্তং বলমাদিয;

নগরং নো’পরুন্ধিংসু, কিন্তু কত্তব্ব মেত্থ ৰো.

এৰং ৰুত্তা তমাহংসু, সূরা তস্স রণত্থিনো;

দেৰাসেৰা দিনেযেৰ, সেৰকানং ন জীৰিতং.

এৰং ভূতে সচে কালে, ওহীনা জীৰিভত্থিনো;

পোসেসি সামি কিং কাল-মেত্তকং নো যথা সুখং.

ৰুত্তে এৰং সউস্সাহো, বলং সজ্জিয রত্তিযং;

উগ্গতে অরুণে হত্থি-মারুয্হ কতকম্মকং.

দ্ৰারেনে’কেন নিক্খম্ম, পতন্তো অসনী ৰিয;

সদ্ধিং যো ধসহস্সেহি, সঙ্গামং কাসি দুস্সহং.

বলং তং আদিপাদস্স, নিপ্ফোটেত্ৰা ততো ততো;

সন্নিপাতিয একজ্ঝং, নিযত্তিং সম্পৰেদযি.

হতাৰসেসে আদায, আদিপাদোপি দপ্পুল়ো;

পুব্বণ্হেৰ পরাজিত্ৰা, পলাযিত্ৰা’গ রোহণং.

রাজপুত্তে দুৰে চেৰ, রোহণম্হা তদা গতে;

জীৰগ্গাহং সগাহেত্ৰা, তে আদায পুরং গতো.

এৰং পত্তজযো সূরো, দীপে জাতে নিরাকুলে;

পাচিনদেসং সাধেতুং, পেসযিত্থ সৰাহনে.

তেপি গন্ত্ৰান দেসং তং, উত্তরং দেসমেৰ চ;

সাধযিত্ৰা’চিরেনেৰ, সঙ্গহেসুং মহাবলং.

রাজাপি ¶ তং মহাদেৰিং, ভরিযং কাসি অত্তনো;

পরিচ্চত্তুঞ্চ মারেতুং, ন সক্কাযন্তি চিন্তিয.

তেসং সংৰাসমন্ৰায, গব্ভো আসি পতিট্ঠিতো;

পুত্তং ৰিজাযি সাধঞ্ঞ-পুঞ্ঞলক্খণসঞ্ঞুত্তং.

রঞ্ঞো সা’তিপিযা আসি, ততো পট্ঠায সোপি খো;

পুত্তস্স তস্স পাদাসি, ওপরজ্জং সভোগিযং.

ঠিতা পাচিনদেসম্হি, আদিপাদা নিসম্মতং;

ৰিনা সো’যন্তি অম্হাকং, উভো হুত্ৰান একতো.

দ্ৰীসু পস্সেসু সেনঞ্চ, সমাদায মহাধনং;

সন্ধিংভাতরমাহূয, কত্ৰারোহণ দেসতো.

গঙ্গাতীরম্হি ৰাসং তে, কপ্পযিংসু মহব্বলা;

রাজা সব্বং নিসম্মে’তং, মণ্ডলীকে তহিং তহিং.

আরাধেত্ৰা গহেত্ৰান, দুট্ঠে মারিয কেচন;

রক্খং দত্ৰান নগরে, কত্তব্বং সাধুযোজিয.

মহাসেনঙ্গমাদায, মহেসিঞ্চ তমাদিয;

খন্ধাৰারং নিৰেসেতি, মহুম্মারম্হি গামকে.

তস্সাগমনমঞ্ঞায, আদিপাদাপি তে তযো;

কোৰিল়ারৰ্হযে গামে, মহাযুদ্ধং পৰত্তযুং.

অথ রাজা মহাসেনো, সমুগ্ঘাতেসি তং বলং;

দপ্পুল়ো সো পলাযিত্থ, আদি পাদা দুৰে হতা.

তত্থাপি লদ্ধৰিজযো, পুরমাগম্মভূমিপো;

রাজকিচ্চং ৰিচারেসি, মহাদানং পৰত্তযি.

মহাবোধি দুমিন্দস্স, মহাচেতিত্তযস্স চ;

ধাতূনম্পি চ সক্কচ্চং, মহাপূজামকারযী.

রোহণং সমুপাগম্ম, দপ্পুল়ো সো তমাগতো;

বলং সম্পটিপাদেসি, যুজ্ঝিতুং পুন রাজিনা.

রাজা সো পুত্তনত্তানং, দেসং কাতুং নিরাকুলং;

থূপারামম্হি সব্বেপি, সন্নিপাতিয ভিক্খৰো.

অঞ্ঞেপি চ মহাপঞ্ঞে, যুত্তা যুত্তিৰিসারদে;

রাজধম্মেসু সব্বেসু, নিপুণো নযকোৰিদো.

আরোচেত্ৰা ¶ পৰত্তিং তং, তেহি সম্মা পকাসিতো;

চতুরঙ্গমহাসেনো, সব্বূপকরণানুগো.

দীপে সব্বত্থ যোজেত্ৰা, কত্তব্বং নগরেপি চ;

নিক্খন্তো ন চিরেনেৰ, অগমা মারপব্বতং.

সম্মদ্দিত্ৰান তং দেসং, খিপ্পং পব্বতমারুহী;

তং দিস্ৰা রোহণে সব্বে, ভীতা তং ৰসমাগমুং.

ততো সন্ধিং করিত্ৰান, দপ্পুল়েন সদপ্পকো;

হত্থী অস্সে চ মণযো, গহেত্ৰা তস্স হত্থতো.

গাল়্হগঙ্গঞ্চ কত্ৰান, সীমং রোহণভোগিনং;

দীপমেৰং মহাতেজো, কত্ৰা ৰিগতকণ্টকং;

একাতপত্তো আগম্ম, পুরং ৰসি যথাসুখং.

পরিৰেণং সকারেসি, রাজা দামৰিহারকং;

তথা সন্নিরতিত্থঞ্চ, পুলত্থিনগরে ৰিভূ.

মহালেখঞ্চ কারেসি, পরিৰেণমভযা চলে;

অনেকভূমং কারেত্ৰা, ৰেজযন্তমিৰাপরং;

তথা সতসহস্সেহি, তীহি চেৰ মহাধনো.

জম্বোনদতুৰণ্ণস্স, সহস্সেহি চ সট্ঠিহি;

বিম্বং সত্থুস্স কারেত্ৰা, নগ্ঘং চূল়ামণিযুতং.

পূজং সব্বোপহারেন, কারেত্ৰান মহারহং;

পাসাদমহনে সব্বং, রজ্জং ওস্সজ্জি অত্তনো.

বোধিসত্তঞ্চ কারেত্ৰা, রাজানং সুমনোহরং;

সণ্ঠপিত্থসিলা মেঘে, চারুং ভিক্খূনুপস্সযে.

থূপারামম্হি থুপস্স, কাসি সোৰণ্ণকঞ্চুকং;

পট্টং কত্ৰা ৰিচিতত্থং, রজতং অন্তরন্তরা.

তস্মিংযেৰ চ পাসাদং, পরিজিণ্ণং সকারযি;

অভিধম্মং কথাপেসি, কারাপেত্ৰা মহামহং.

মহাথেরেন সতিমা, হেমসালিনিৰাসিনা;

তত্থ পোক্খরণিঞ্চস্স, পরিভোগায কারযি.

জিণ্ণে ¶ দেৰকূলে কত্ৰা, বহুকে তত্থ তত্থ সো;

দেৰানং পটিমাযো চ, কারযিত্থ মহারহা.

ব্রাহ্মণানঞ্চ দত্ৰান, পচ্চগ্ঘং রাজভোজনং;

পাযেসি খীরং সোৰণ্ণ-তট্টকেহি সসক্খরং.

উসভে পঙ্গুলানঞ্চ, জীৰিকঞ্চ সদাপযী;

দমিল়ানন্তু পাদাসি, অস্সে গোণে অগণ্হতং.

অনাথা যে সলজ্জা চ, তে চ সঙ্গণ্হি সো রহো;

অসংগহিতো দীপম্হি, নত্থি তেন যথারহং.

দাতব্বোতি কথং গুন্ন-মহারো সো ৰিচিন্তিয;

সস্সে খীরগতে’দাসি, তেসং খেত্তসহস্সকে.

কাল়ৰাপিম্হি সো ৰারি-সম্পাতং কারযি থিরং;

পুঞ্ঞমেৰং ৰিধং তস্স, অপ্পমেয্যং বহুং কির.

তস্স পুত্তো তদা আসি, যুৰরাজা দিৰঙ্গতো;

জাতো সেনাপতি কালে, অপরো অত্থি দারকো.

তং রাজা রাজপুত্তেহি, ভীতো রাজারহো ইতি;

মারেতুং তং ন সক্কোন্তি, ৰড্ঢপেসি যথা তথা.

অরীহি নগরে রুদ্ধে, পিতরং সো কিরেকদা;

উপসঙ্কম্ম যাচিত্থ, সঙ্গমাৰচরং গজং.

সো দাপেসি মহানাগং, ঘোরং মারকরূপমং;

কতহত্থং বলঞ্চেৰ, সব্বাযুধ ৰিসারদং.

কালোযমীতি মন্ত্ৰা সো, বন্ধিত্ৰা ছুরিকং তদা;

কুঞ্জরং ৰরমারুয্হ, নিক্খম্ম নগরা বহি.

ৰিদ্ধংসেত্ৰা বলং সব্বং, দুজ্জযং জযমগ্গহী;

রাজা দিস্ৰা পসন্নো তং, সেনাপচ্চঞ্চ তস্স’দা.

এসোৰ কির গন্ত্ৰান, সবলো দেসমুত্তরং;

পলাপেসি সসেনং তং, আদিপাদঞ্চ দপ্পুলং.

বদ্ধৰেরো ততো’হোসি, দপ্পুল়ো তম্হি সাধুকং;

মহাউম্মারযুদ্ধম্হি, দিস্ৰা তমতীকোধৰা.

সীঘং পেসেসি তং হন্তুং, হত্থিমারুল়্হমত্তনা;

ওৰিজ্ঝিয পলাপেসি, তমেস সকদন্তীনা.

দিস্ৰা ¶ তমতিসন্তুট্ঠো, অঞ্ঞেসঞ্চ অভাৰতো;

রজ্জযোগে অদা তস্স, উপরাজত্তমত্তনো.

এৰং ৰীসতি ৰস্সানি, দীপমেতং সুভুঞ্জিয;

ৰিপাকং পুঞ্ঞকম্মস্স, ভুঞ্জিতুঞ্চ দিৰঙ্গতো.

সুজনপ্পসাদসংৰেগত্থায কতে মহাৰংসে

অচ্চযে ¶ পিতুনো রাজা, উপরাজা অহোসি সো;

সমত্থো সক্কুমিত্তানং, কাতুং নিগ্গহ সংগহে.

সেনা নামসি সপ্পঞ্ঞা, মহেসী তস্স রাজিনো;

খুদ্দপুত্তা পীযা’তীৰ, রঞ্ঞো কল্যাণদস্সনা.

অদাসি যুৰরাজত্তং, জেট্ঠপুত্তস্স অত্তনো;

আদিপাদে’পরেকাসি, রাজিনীপি চ ধীতরো.

দত্ৰা ঠানন্তরং রাজা, তেসং তেসং যথারহং;

জনং সঙ্গহৰত্থূহি, সঙ্গহেসি চতূহিপি.

অথ কেনাপি সো গন্ত্ৰা, হেতুনা মণিহীরকং;

ৰসন্তো কির অস্সোসি, পচ্চন্তো কুপিতো ইতি.

ততো সেনাপতিঞ্চেৰ, জেট্ঠপুত্তঞ্চ অত্তনো;

গন্ত্ৰা সাধেথ তং দেস-মীতি পেসেসি সজ্জুকং.

তেসু তত্থোপযাতেসু, পিসুনা ভেদচিন্তকা;

ৰত্ৰা যংকিঞ্চি ভিন্দিংসু, তে উভোপি নরাধিপে.

ততো ¶ দ্ৰে ৰেরিনো হুত্ৰা, দেসং গণ্হিতুমারভুং;

রাজা সুত্ৰা খণেনেৰ, দুরতিস্স মুপাগমি.

তে উভো তত্থ ঘাতেত্ৰা, তেসং সব্বং সমাদিয;

হন্ত্ৰা তং পক্খিযে সব্বে, পুল়ত্থিনগরং গমি.

তদা রোহণদেসম্হি, ভোগাধিপতিনো সুতো;

দাঠাসিৰাদিপাদস্স, মহিন্দো নাম খত্তিযো.

পিতুনো সো’পরিজ্ঝিত্ৰা, রঞ্ঞো সন্তিকমাগমা;

দিস্ৰা রাজাপি সন্তুট্ঠো, তং সঙ্গণ্হি যথারহং.

তেন মেত্তিং থিরং কাতুং, ধীতরং দেৰ নামিকং;

তস্স দত্ৰান পাহেসি, বলং রোহণমেৰসো.

সো গন্ত্ৰা রাজসেনায, মদ্দাপেত্ৰান রোহণং;

জম্বুদীপং পলাপেত্ৰা, পিতরং রোহণং লভি.

মহাৰিহারে কারেসি, সলাকগ্গং থিরং সুভং;

খোলক্খিযমুনিন্দস্স, পরিহারায দাপযি.

মহানামৰ্হযং গামং, পূজযিত্ৰা যথাবলং;

ৰড্ঢমানদুমিন্দস্স, জিণ্ণং গেহঞ্চ কারিয.

রুক্খণত্থায তস্সা;দা, কোট্ঠাগামং বহুদযং;

নীলারামস্স পাদাসি, কাল়ুস্সং নাম গামকং.

লোহরূপস্স পাদাসি, আরামস্স চ গামকং;

জিণ্ণঞ্চ পটিসঙ্খাসি, পটিমাযো চ কারযি.

পাসাদে চেতিযো চেৰ, ৰিহারে চ অনপ্পকে;

পুল়ত্থিনগরে’কাসি, ৰেজ্জসালং মহাদযো.

তথা পণ্ডা ৰিযঞ্চেৰ, ভোগগামসমাযুতং;

পিট্ঠসপ্পিনমন্ধানং, সালাযো চ তহিং তহিং.

পোত্থকেসু লিখাপেত্ৰা, অট্টে সম্মা ৰিনিচ্ছিতে;

রাজগেহে ঠপাপেসি, উক্কোটনভযেন সো.

নাগৰড্ঢননামস্স, ভোগগামে বহূ অদা;

লেখে’পুব্বে ন ৰারেত্ৰা, পালেত্ৰা পুব্বসাসনং.

পিতরা ¶ চ মহাদানং, পুঞ্ঞমঞ্ঞম্পি ৰা কতং;

সব্বং তমৰিনাসেত্ৰা, নিচ্চং সো রক্খি সাদরো.

মহেসী চ মহারঞ্ঞো, পুঞ্ঞানি বহুকারযি;

কণ্টকং চেতিযং কাসি, দেৰী চেতিযপব্বতে.

কারেত্ৰা জযসেনঞ্চ, পব্বতং গামিকস্সদা;

ভিক্খুসঙ্ঘস্স সা গামং, মহুম্মারঞ্চ তস্স দা.

সিলামেঘৰ্হযং কত্ৰা, ভিক্খুনীনমুপস্সযং;

সিলামেঘৰ্হযে দাসি, ভিক্খুনীনঞ্চ পচ্চযে.

গামাযে’সুং পুরাকীতা, ৰিহারো তত্থ সাধনং;

দত্ৰা তে মে চযিত্ৰান, ৰিহারস্সেৰ দাপযি.

ছাদযিত্ৰা মহারুক্খে, সব্বে চেতিযপব্বতে;

নানারাগে ধজে চেৰ, পটাকাযো চ পূজযি.

পুব্বারামকভাগম্পি, পাসাদং পটিসঙ্খরি;

উস্সানৰিট্ঠিং দুব্ভোগং, সুভোগং তস্স কারযি.

ৰিহারং গিরিভণ্ডঞ্চ, নট্ঠং পাকতিকং করি;

ভোগগামে চ দাপেসি, ভিক্খূনং তন্নিৰাসিনং.

অম্বুয্যানম্হি আৰাসং, কত্ৰা দপ্পুল়পব্বতং;

ভিক্খূনং তিসতস্সা’দা, সম্পন্নচতুপচ্চযং.

কারেত্ৰা নীলগল্লঞ্চ, আরামং সো মনোরমং;

দকৰারং বহুপ্পাদং, তস্স দাপেসি কারিয.

অরিকারি ৰিহারে চ, পটিসঙ্খাসি জিণ্ণকং;

সলাকগ্গঞ্চ পাসাদং, অপুব্বংযেৰ কারযি.

ৰাহদীপে সকারেসি, সেনগ্গবোধিপব্বতং;

ধম্মং তীসু নিকাযেসু, ৰাচযিত্থ বহুস্সুতে.

গণ্হাপেসি চ ভিক্খূনং, অযোপত্তেসু গণ্ঠিকে;

পুঞ্ঞন্তি ৰুত্তং সব্বং সো, ন কিঞ্চি পরিৰজ্জযি.

কুলীনানমনাথানং, ইত্থীনং’দা পিল়ন্ধনং;

ভোজনং ভোজনত্থীনং, বহু সো দাসি রত্তিযং.

গুন্নং সস্সানি পাদাসি, কাকাদীনঞ্চ ভত্তকং;

তণ্ডুলঞ্চ কুমারানং, মধুফাণিতসংযুত্তং.

এৰং ¶ পুঞ্ঞানি কত্ৰান, নরিন্দো সো সপারিসো;

ভুত্ৰা পঞ্চসু ৰস্সেসু, মেদিনিং সম্পরিচ্চজি.

ততো তস্স সুতো আসি, সীহল়ানং রথেসতো;

সব্বরূপগুণোপেতো, মহিন্দো নাম খত্তিযো.

সো ধম্মিকসীলামেঘো, ইচ্চাসি ধরণীতলে;

ধম্মদীপো ধম্মধজো, সুদ্ধধম্মপরাযনো.

পুব্বকেহি নরিন্দেহি, কতং ধম্মপথানুগং;

সব্বং কাসি অহাপেত্ৰা, অধম্মং তু ৰিৰজ্জযি.

রাজারতনপাসাদে, কাতুং সো নৰকম্মকং;

সব্বকালেসু দাপেসি, গেট্ঠুম্বদকৰারকং.

জিণ্ণঞ্চ পটিসঙ্খাসি, পুঞ্ঞকম্মমকাসি চ;

রজ্জং কত্ৰান চতূসু, ৰস্সেসু নিধনং গতো.

অগ্গবোধি ততো রাজা, ছত্তং উস্সাপযি পুরে;

কারেন্তো সব্বসত্তানং, হিতং সুখমসেসতো.

ধাতুপূজং সকারেসি, সত্থুসব্বগুণারহং;

পিতামহকতস্সা’পি, সম্বুদ্ধস্স মহামহং.

উদযগ্গাদিবোধিঞ্চ, পরিৰেণং সকারযি;

নামং গহেত্ৰা পিতুনো, অত্তনো চ নরাধিপো.

সভোগং পরিৰেণঞ্চ, কত্ৰা তং ভূতনামকং;

সকাচরিযকস্সা’দা, ভিক্খূনং তিসতস্স চ.

রাজসালায দাপেসি, চূল়ৰাপিযগামকং;

গামদ্ৰযঞ্চ দাপেসি, কাল়ূলমল্লৰাতকে.

পৰেসং ৰিনিৰারেসি, উপোসথদিনেসু সো;

মচ্ছমংসসুরাদীনং, অন্তোনগরমত্তনো.

ভিক্খূ ৰা চেতিযে ৰা সো, ৰন্দিত্ৰা নিক্খমং ততো;

ৰালুকা হা ৰিনস্সন্তু, ইতি পাদেসু ৰোধযী.

যং যং সোৰগ্গিযং কম্মং, কম্মং নিস্সরণৰহং;

ৰত্থুত্তযে পসন্নো সো, কম্মং তং সব্বমাচরি.

মাতুপট্ঠাননিরতো, রত্তিন্দিৰমহোসিসো;

গন্ত্ৰা তস্সা উপট্ঠানং, পাতোৰ কির ভূপতি.

সীসং ¶ তেলেন মক্খেত্ৰা, উব্বট্টেত্ৰান জল্লিকং;

নখে ৰিসুদ্ধে কত্ৰান, নহাপেত্ৰান সাদরং.

অচ্ছাদেত্ৰা নৰং ৰত্থং, সুখসম্ফস্সমত্তনো;

ৰত্থং ছড্ডিতমাদায, পেল্লেত্ৰা সযমেৰ তং.

তস্স তোযেন সিঞ্চিত্ৰা, সীসং সমকুটং সকং;

গন্ধমালাহি তং সম্মা, চেতিযং ৰিহ পূজিয.

নমস্সিত্ৰান তিক্খত্তুং, কত্ৰা তং সো পদক্খিণং;

দাপেত্ৰা পরিসায’স্সা, ৰত্থাদীনি যথারুচিং.

সহত্থেনেৰ ভোজেত্ৰা, ভোজনং তং মহারহং;

ভুত্থাৰসেসং ভুঞ্জিত্ৰা, সমাকিরিযমত্থকে.

ভোজেত্ৰা পরিসং তস্সা, রাজভোজনমুত্তমং;

সজ্জেত্ৰা ৰাসগেহঞ্চ, সুগন্ধপরিৰাসিতং.

সহত্থা পঞ্ঞপেত্ৰান, সযনং তত্থ সাধুকং;

পাদে ধোৰিয মক্খেত্ৰা, গন্ধতেলেন সণ্হকং.

সম্বাহেন্তো নিসীদিত্ৰা, কত্ৰা নিদ্দমুপেতকং;

কত্ৰা পদক্খিণং মঞ্চং, তিক্খত্তুং সাধুৰন্দিয.

আরক্খকে নিযোজেত্ৰা, দাসেকম্মকরেপি চ;

তস্সা পিট্ঠিমকত্ৰান, অপক্কমেৰ পিট্ঠিতো.

ঠত্ৰা অদস্সনে ঠানে, তিক্খত্তুং পুন ৰন্দিয;

সন্তুট্ঠো তেন কম্মেন, সরন্তো তং পুনপ্পুনং.

গেহং যাতি সজীৰন্তং, এৰমেৰ উপট্ঠহি;

একদা দাসৰাদেন, ৰন্দিত্ৰা দাসমত্তনো.

তেনত্তনো কথাপেসি, খমাপেতুং সযং ৰচো;

অত্তানং ভিক্খুসঙ্ঘস্স, দাপযিত্ৰান মাতরা.

ধনমত্থগ্ঘনং ঞত্ৰা, ভুজিস্সো আসি বুদ্ধিমা;

এৰং পুঞ্ঞপরো হুত্ৰা, কত্ৰা দীপস্স সঙ্গহং.

একাদসহি ৰস্সেহি, দেৰলোকমুপাগমি;

তস্সানুজো দপ্পুল়ো’থ, রাজা হোসি তদচ্চযে.

সব্বং পুব্বকরাজূনং, চরিযং সো সমাচরি;

তদা মহিন্দনামস্স, পুত্তারোহণসামিনো.

পিতরা ¶ নিহটা’গঞ্ছুং, রাজানং মাতুলং সকং;

সো তে দিস্ৰা পৰত্তিং তং, সুত্ৰা দত্ৰা মহাবলং.

পাহেসি পিতরা যুদ্ধং, কাতুং বন্ধু হিতে রতে;

মহিন্দোপি তথাভাৰং, ৰিদিত্ৰা রোহণাধিপো.

যুদ্ধং পটিপদেযেৰ, তেসং’কাসি মহাবলো;

তে উভোপি পলাযিংসু, দত্ৰা সেনায নাযকং.

পুনাগন্ত্ৰা মহীপালং, সেৰমানা ইধা’ৰসুং;

পিতাপি তেন সন্তুট্ঠো, অঞ্ঞেন সকবন্ধুনা.

যুজ্ঝন্তো মরণং গঞ্ছি, ঞাতিসোপি মতো কির;

তদা’দা ভাগিনেয্যস্স, রাজা কিত্তগ্গবোধিনো.

সব্বরূপগুণোপেতং, ধিতরং দেৰ নামিকং;

সো দপ্পুল়ং ঠপেত্ৰান, সেৰত্থং তস্স রাজিনো.

সযং সেনঙ্গমাদায, রোহণং সমুপাগমি;

রোহণাধিপতি হুত্ৰা, সব্বাকারসমপ্পিতো.

পুত্তধীতাহি ৰড্ঢেন্তো, ৰাসং তত্থেৰ কপ্পযি;

রাজাকাসি দুমিন্দস্স, ঘরং জিণ্ণং নৰং থিরং.

সোৰণ্ণখচিতং কম্মং, মঙ্গলেন চ তস্স সো;

অত্তনো রাজভাৰস্স, সত্থুপারমিতায চ.

সম্মানুচ্ছৰিকং কত্ৰা, মহাপূজং পৰত্তযি;

জিণ্ণং কারেসি পাসাদং, হত্থিকুচ্ছিৰিহারকে.

ৰাহদীপস্স আরামং, লাৰরাৰঞ্চ পব্বতং;

ৰিহারে জেতনামে চ, কত্ৰা সোৰণ্ণযং মুনিং.

ৰড্ঢেত্ৰা বোধিগেহম্হি, পূজংকাসি অচিন্তিযং;

অনুসংৰচ্ছরং দীপে, ৰত্থদানং পৰত্তযি.

মহাপাল়িঞ্চ ৰড্ঢেসি, ভত্তগ্গমৰলোকযী;

তুলাভারঞ্চ দাপেসি, জিণ্ণঞ্চ পটিসঙ্খরি.

চারিত্তং পুব্বরাজূনং, পালেসি মনৰজ্জিযং;

তস্সা’সি ৰজিরো নাম, সেনাপতি মহাপতি.

কচ্ছৰালং সকারেসি, আরামং পংসুকূলিনং;

থূপারামম্হি থূপস্স, ঘরং ছাদেসি সাধুকং.

ইট্ঠকাহি ¶ সুৰণ্ণাহি, হেমদ্ৰারে চ কারযি;

এৰং সোল়সৰস্সানি, কত্ৰা রজ্জং নরাধিপো.

অগমা সব্বসত্তানং, গন্তব্বং দেসমেৰ সো;

তস্মিং রাজিনি সম্পত্তে, দেৰলোকং তদা অহু.

অগ্গবোধিসনামো’থ, আণাভেরিং চরাপযি;

পিতা তস্স সভাতুস্স, পুত্তং মহিন্দনামকং.

রজ্জত্থং সকপুত্তানং, আদিপাদং ন কারযী;

আদরং সো সবন্ধূনং, কনিট্ঠানম্পি কাতৰে.

অসহন্তো পলাযিত্থ, পরতীরং সমাকুলো;

তে সমাগমনং সুত্ৰা, পেসযিত্ৰা মহাবলং.

কারেত্ৰা যুদ্ধমেতেহি, সীসং তেসং সগণ্হযি;

নিকাযেসু ৰিচারেত্ৰা, কত্তব্বং সব্বমেৰ সো.

দীপে’পি সকলে কাসি, পাপাচারনিৰারণং;

ভিক্খূ চূল়ৰিহারেসু, যাগুং গণ্হন্তি সব্বদা.

মহাৰিহারে তং সুত্ৰা, রাজা নিব্বিন্নমানসো;

কণ্ঠপিট্ঠিমহাগামং তথা যাবালগামকং.

তেলগামং বহুদঞ্চ, দকৰারং পদাপিয;

যাগুং গহেতুং যোজেসি, ৰিহারেসু’পি ভিক্খৰো.

ততো পট্ঠায তং যাগুং, সব্বে গণ্হিংসু সাদরা;

দীপে ভেরিংচ রাপেত্ৰা, সন্নিপাতিয যাচকে.

সুৰণ্ণং সোপদাপেসি, যথিচ্ছং দিৰসত্তযং;

এৰমাদিং স কত্ৰান, পুঞ্ঞৰং ৰস্সেহি তীহি চ.

ৰত্থুত্তযপসাদস্স, ফলং পস্সিতুমত্তনো;

রাজা দিব্বেন যানেন, গচ্ছন্তো ৰিয সো মরি.

সুজনপ্পসাদসংৰেগত্থায কতে মহাৰংসে

ততো ¶ তস্সা’নুজো সেনো, ছত্তং উস্সাপযী পুরে;

পিযং’ৰ পুত্তং পস্সন্তো, সত্তে সব্বে মহাধনো.

চরিযং পুব্বরাজূনং, সমাচরি যথাভতং;

অপুব্বম্পি চ ৰত্তেসি, চরিযং ধম্মসংহিতং.

ভিক্খূনং ভিক্খূনীনঞ্চ, ঞাতীনং দীপৰাসিনং;

মচ্ছানং মিগপক্খীনং, কত্তব্বং স সমাচরি.

মহিন্দং পরতীরং সো, গতং যোজিযমারযি;

এৰং সো সুৰিসোধেসি, রজ্জপচ্চত্থিকে’খিলে.

মহাদানং পৰত্তেসি, যাচকানং ধনেসিনং;

ভিক্খূনং ব্রাহ্মণানঞ্চ, মনুঞ্ঞং রাজভোজনং.

অহেসুং অনুজাতস্স, মহিন্দো কস্সপো তথা;

উদযোতি তযো তেসু, মহিন্দো যুৰরাজকো.

হুত্ৰা তস্সানুৰত্তন্তো, সক্কচ্চং তমুপট্ঠহি;

সঙ্ঘানামাসি রাজস্স, ভরিযা তস্স রাজিনী.

কীল়নত্থং সমুদ্দস্স, গতে রাজিনি পট্টনং;

উদযো আদিপাদোসো, ওহীনো নগরে তদা.

নালনামং গহেত্ৰান, ধীতরং মাণিলানিযা;

রক্খিতং রাজরক্খায, পুল়ত্থিনগরং অগা.

রাজা তস্মিং অকুজ্ঝিত্ৰা, সন্ধিং কত্ৰা অকুপ্পিযং;

মহাদীপাদং পেসেত্ৰা, তোসত্ৰা তং ইধানযি.

এৰং সমগ্গা তে আসুং, ততো পট্ঠায খত্তিযা;

রক্খন্তা সাসনং লোকং, ৰসিংসু সুসমাহিতা.

ততো কেনচি কালেন, পণ্ডুরাজা মহাবলো;

জম্বুদীপা ইধা’গম্ম, দীপ গণ্হিতুমারভি.

রাজা ¶ সুত্ৰা মহাসেনং, পেসুযিত্থ তদন্তিকং;

অমচ্চানং ৰিৰাদেন, থদ্ধোতারো নারাধিপো.

পণ্ডুরাজা ৰিনাসেন্তো, সব্বং তং দেসমুত্তরং;

খন্ধাৰারং নিৰেসেসি, মহাতালিতগামকে.

ৰসন্তা দমিল়া এত্থ, বহৰো যে তহিং তহিং;

সব্বে তং পক্খিযাহেসুং, ততো সো বলৰা অহু.

তত্থ গন্তা মহাসেনা, রঞ্ঞো যুজ্ঝিতুমারভি;

হত্থিক্খন্ধগতো পণ্ডু-রাজাপি সমুপাৰিসি.

অহু দমিল়সেনাসা, পস্সন্তি সামিনো মুখং;

সম্পত্তবলহুস্সাহা, তদত্থে চত্তজীৰিতা.

দীপসেনা তু সামিন-মভাৰেন নিরুস্সুক্কা;

যুজ্ঝন্তি পরিভিন্দিত্ৰা, পলাযিত্থ ততো ততো.

ওতরিত্থমহাসেনা, পণ্ডুরাজাস্স তঙ্খণে;

মারসেনাৰ গচ্ছন্তি, ৰিচুণ্ণেন্তি মহাজনং.

রাজা সেনায ভিন্নত্তং, সুক্কা সব্বং সমাদিয;

হত্থসারং পুরং হিত্ৰা, মলযাভিমুখো গতো.

ততো হত্থিং সমারুয্হ, যুৰরাজা মহিন্দকো;

যুজ্ঝন্তো সকসেনায, পলাতত্তং সমেক্খিয.

একেনমে ন সক্কা ৰে, সব্বে এতেহি মারিতুং;

এতেসং ন চ নীচানং, হত্থেসু মরণং সুখং.

তস্মা ৰরং মে মরণং, মযা এৰেতি চিন্তিয;

হত্থিক্খন্ধগতোযেৰ, ছিন্দি সো সীসমত্তনো.

তং দিস্ৰা বহৰো সীসে, তত্থ ছিন্দিংসু সেৰকা;

তং দিস্ৰা দমিল়ী সেনা, হট্ঠতুট্ঠা পমোদিসা.

এতং সব্বং সমেক্খিত্ৰা, আদাপাদো সকস্সপো;

তুরঙ্গৰরমারুয্হ, সুসন্নদ্ধো মহাযুধো.

ৰিহারমুপসঙ্কম্ম, অভযং এককোৰ সো;

তাদিসম্পি মহাসেনং, ওগাহেত্ৰা ৰিদারযি.

সুপণ্ণো ৰিয গণ্হন্তো, ভূজগেন সলিলাল যে;

সো তং সব্বং নিৰত্তেসি, অত্তানঞ্চ সুগোপযি.

অস্সো ¶ একোৰ দিস্সিত্থ, তুরঙ্গাৰলিসন্নিভো;

অত্তনো সো জনং কঞ্চি, অপস্সন্তো’নুগামিনং.

কিং মে একেন ৰেরিনং, পূরিতেন মনোরথং;

কালন্তরেহং জীৰন্তো, পূরেস্সং মে মনোরথং.

তস্মা গন্তুংৰ যুত্তন্তি, নিম্ফোটেত্ৰা মহাবলং;

নিব্ভযোৰ মহাযোধো, কোণ্ডিৰাতমুপাগমি.

পণ্ডুরাজা মহাসেনা, অগ্গহেসি ততো পুরং;

সীসং তং যুৰরাজস্স, পণ্ডুরাজস্স দস্সযুং.

সো তং দিস্ৰা চ ঝাপেত্ৰা, রাজূনং পণ্ডুদেসিনং;

সব্বমাল়াহনে কিচ্চং, তস্স কাতুং নিযোজযি.

সব্বং সারং হরাপেসি, ভণ্ডাগারম্হি রাজিনো;

অগ্গণ্হিত্থ গহেতব্বং, ৰিহারে নগরেপি চ.

পাসাদে রতনে সব্বে, সোৰণ্ণংসত্থুবিম্বকং;

সিলাময মুনিন্দস্স, চক্খুভূক মণিদ্ৰযং.

তথা সোৰণ্ণপট্টে চ, থূপারামম্হি চেতিযে;

সুৰণ্ণ পটিমাযো চ, ৰিহারেসু তহিং তহিং.

সব্বং গহেত্ৰা নিস্সারং, লঙ্কাদীপ মকাসি সো;

ছড্ডযিত্থ পুরং রম্ম, যক্খভক্খিত রূপকং.

রাজা’পি রক্খং দত্ৰান, মহামগ্গে তহিং তহিং;

গঙ্গাদ্ৰয মুখে ৰাসং, কপ্পেসি পরিসঙ্কিতো.

পণ্ডুরাজা ততো সদ্ধিং, কাতুং সীহল়সামিনা;

অমচ্চে তত্থ পেসেসি, দিস্ৰা তে সীহলাধিপো.

সুণিত্ৰা সাসনং তেসং, সব্বং তং সম্পটিচ্ছিয;

দূতানং কারযিত্ৰান, যথাকামেন সঙ্গহং.

হত্থিদ্ৰযং সদত্ৰান, সব্বমাভরণম্পি চ;

তস্স পেসেসি দূতেসো, অত্তনোপি হিতাৰহে.

পণ্ডুরাজা সিতং সব্বং, দিস্ৰা সন্তুট্ঠমানসো;

নিয্যাতেত্ৰান দূতানং, তদহেৰ মহাপুরং.

নিক্খমিত্ৰা পুরা গন্ত্ৰা, ন চিরেনেৰ পট্টনং;

তত্থ আরুয্হ নাৰং সো, সক দেস মুপাগমি.

ততো ¶ আগম্ম নগরং, সীলামেঘো মহীপতি;

যথাঠানে ঠপেত্ৰান, দীপং ৰসি সমাহিতো.

ভাতরং দুতিযং কত্ৰা, উদযং নাম খত্তিযং;

মহাদীপাদং তস্সা’দা, সোগত্থং দক্খিণং দিসং.

সোপি খো ন চিরেনেৰ, কত্ৰা পুঞ্ঞং যথারহং;

রোগেনেকেন সম্ফুট্ঠো, পৰিট্ঠো মচ্চুনো মুখং.

কস্সপো আদিপাদোপি, পুলত্থিনগরে ৰসং;

যোজেত্ৰা পণ্ডুরাজেন, অহোসি কির মারিতো.

তদা কস্সপনামস্স, পুত্তা আসুং মহারহা;

আদিপাদস্স চত্তারো, ধঞ্ঞলক্খণ সঞ্ঞুতা.

যো সেনং সব্বপঠমো, সেনো নাম কুমারকো;

সূরো ৰীরো মহুস্সাহো, রাজভারক্খমো সমো.

রাজা মহাদীপাদত্তং, তস্স দত্ৰা যথাৰিধিং;

ভোগত্থং দক্খিণং দেসং, সৰাহন মুপাদিসি.

রোহণাধিপতিস্সা’সুং, পুত্তা কিত্তগ্গবোধিতো;

চত্তারো ধীতরো তিস্সো, দস্সনেয্যা মনোরমা.

তদা জেট্ঠসুতং তস্স, মহিন্দং নাম খত্তিযং;

পিতুচ্ছা মারযিত্ৰান, দেসং গণ্হি সসাধনং.

রাজাপি দিস্ৰা তেতীৰ, মমাযন্তো দযালুকো;

সব্বে দেৰকুমারেৰ, সুখং ৰড্ঢেসি পেমৰা.

ততো কস্সপনামং সো, তেসং জেট্ঠং নরিস্সরো;

দেসং তং গণ্হ যাহীতি, দত্ৰা বলমপেসযি.

সো’পি গন্ত্ৰান তং হন্ত্ৰা, রোহণং কসিণম্পি তং;

কত্ৰা হত্থগতং তত্থ, ৰসিত্থ নিরুপদ্দৰো.

অথ সো ভাতরো দ্ৰে’পি, সেনঞ্চ উদযং তথা;

পক্কোসিত্ৰান, ভাজেত্ৰা, দেসং তেহি সহাৰসি.

রাজা ¶ তা সাধু ৰড্ঢেত্ৰা, ৰযপত্তাসু তীসু সো;

রাজকঞ্ঞাসু ধঞ্ঞাসু, দেৰচ্ছরসূ রূপিসু.

ঠপেত্ৰা রাজিনি ঠানে, উপরাজস্স দাপযি;

সঙ্ঘনামং মহাভোগং, দত্ৰা রজ্জসরিক্খকং.

কণিট্ঠো উপরাজস্স, মহিন্দো নাম ভাতুকো;

অত্থি সব্বগুণোপেতো, সব্বসত্থৰিসারদো.

তস্সা’দাসি দুৰে রাজা, রাজকঞ্ঞা মনোহরা;

তিস্সৰ্হকিত্ত নামঞ্চ, দত্ৰা ভোগং যথারুচিং.

এৰং করোন্তো ঞাতীনং, সংগহং সো যথারহং;

আরাধেন্তো চ দানাদি-সঙ্গহেহি মহাজনং.

রাজা দসযি রাজূনং, ধম্মেহি সমুপাগতো;

সমাচরন্তো পুঞ্ঞানি, পরিভুঞ্জিত্থ মেদিনিং.

পংসুকূলিক ভিক্খূনং, কত্ৰা’রিট্ঠম্হি পব্বতে;

মহাভোগং অদারামং, নিম্মিতং ৰিয ইদ্ধিযা.

পরিহারঞ্চ তস্সদা, রাজারহমসেসতো;

আরামিকে চ বহৰো, দাসে কম্মকরেপি চ.

পাসাদং সোৰ কারেসি, ৰিহারে জেতনামকে;

অনেকভূমিং ভূমিন্দো, বুদ্ধভূমিগতাসযো.

ৰড্ঢেত্ৰা তত্থ কারেত্ৰা, সব্ব সোৰণ্ণযং জিনং;

সণ্ঠপেত্ৰা মহাভোগং, ৰসাপেসি চ ভিক্খৰো.

মহাদি পরিৰেণম্হি, কারেসি সুমনোহরং;

পাসাদ মগ্গিসন্দংড্ঢং, তস্মিংযেৰ ৰিহারকে.

কত্ৰা ৰীরঙ্কুরারামং, ৰিহারে অভযুত্তরে;

মহাসঙ্ঘিক ভিক্খূনং, থেরিযানঞ্চ দাপযি.

পুব্বারামঞ্চ কারেসি, সম্পন্ন চতুপচ্চযং;

সদ্ধিং সো সঙ্ঘনামায, দেৰিযাপি চ অত্তনো.

মহাৰিহারেতাযেৰ, সদ্ধিং কারেসি ভূমিপো;

আৰাসং সঙ্ঘসেনৰ্হং, মহাভোগং মহামতি.

কারেত্ৰা সব্বসোৰণ্ণং, কেসধাতু করণ্ডকং;

মহাপূজং পৰত্তেসি, রজ্জং ৰিস্সজ্জি উত্তমো.

চেতিযস্স ¶ গীরিস্সাদা, কাণৰাপিং বহুদযং;

ভিক্খূনং দিপৰাসীনং, দাপেসি চ তিচীৰরং.

পুলত্থি নগরে কাসি, ৰাপিযো থুসৰাপিযা;

সেনগ্গবোধিমাৰাসং, গামারামিক সঞ্ঞুতং.

তস্মিংযেৰ চ কারেসি, মহাপাল়িং সুভোজনং;

মহাপাল়িঞ্চ সব্বেসং, মহানেত্তম্পি পব্বতে.

ৰেজ্জসালম্পি কারেসি, নগরস্স চ পচ্ছিমে;

অনাথানং পৰত্তেসি, যাগুদানং সখজ্জকং.

পংসুকূলিক ভিক্খূনং, পচ্চেকঞ্চ মহানসং;

কত্ৰা দাপেসি সক্কচ্চং, নিচ্চং ভোজনমুত্তমো.

হুত্ৰা মহাদিপাদো’যং, কপ্পূর পরিৰেণকে;

উত্তরাল়্হে চ কারেসি, পরিচ্ছেদে সনামকে.

তুলাভারঞ্চ পাদাসী, তিক্খত্তুং সো মহাধনে;

পুঞ্ঞমঞ্ঞম্পি সো’কাসি, রাজা নানপ্পকারকং.

সঙ্ঘনামাপি সা দেৰী, উত্তরম্হি ৰিহারকে;

কত্ৰা মহিন্দসেনৰ্হা-ৰাসং ৰাসেসি ভিক্খৰো.

আরদ্ধো দপ্পুলৰ্হস্স, কালে রাজস্স ধীমভো;

মহাদেৰেন সো আসি, রম্মো দপ্পুল পব্বতো.

দারুকস্সপনামেন, তথা কস্সপরাজিকং;

উভোপি তে ৰিপ্পকতে, রাজা সো ৰসমাপযি.

ভদ্দো সেনাপতি তস্স, ভদ্দসেনাপতি’ৰ্হযং;

পরিৰেণম্পি কারেসি, দাসভোগসমাযুতং.

উত্তরো চ অমচ্চো’কা, ৰিহারে অভযুত্তরে;

ৰাসমুত্তরসেনৰ্হং, রম্ম মুত্তরপচ্চযং.

ৰজিরো নাম তত্থেৰা-ৰাসং ৰজিরসেনকং;

কাসি রক্খসনামোচা-ৰাসং রক্খসনামকং.

ততো ৰীসতি ৰস্সেসু, পুলত্থি নগরে ৰসং;

পণ্ডুরাজকতং কারং, সরন্তো সরদস্সনো.

দদন্তো ৰিয সেনস্স, সূরস্সাৰসরঞ্চসো;

পহায দীপং দীপো’ৰ, মহাৰাত হতো গতো.

সুজনপ্পসাদসংৰেগত্থায কতে মহাৰংসে

এৰং তস্মিং মতে তস্স, কাতব্বং সাধুকারিয;

মহাদীপাদো সেনৰ্হো, আদায বলৰাহনং.

আগম্ম নগরং রাজা, অহোসি ধরণী তলে;

আদিকপ্পম্হি রাজূনং, দস্সন্তো চরিযং পিয.

সদ্ধো মহাধনো সূরো, মুত্তচাগী নিরালযো;

যাচযোগো মহাভোগো, সম্পন্নবলৰাহনো.

কিত্তিযা’মলভূতায, তথা তেজো গুণেন চ;

সন্নিপাতংৰ সো চন্দ-সূরিযানং নিদস্সযি.

অসঙ্কিণ্ণ গুণাকিণ্ণো, সুৰিচিণ্ণ গুণাগুণো;

নিত্থিণ্ণপাপো নিব্বিণ্ণ-সংসারো সারদস্সনো.

ভরিযা তস্স যা আসি, সঙ্ঘাতং সো ভিসেচযি;

মহেসীভাৰে দত্ৰান, পরিহারং যথাভতং.

মহিন্দং নাম সপ্পঞ্ঞং, কণিট্ঠং ভাতরং সকং;

দত্ৰা দক্খিণভাগং সো, ওপরজ্জে’ভিসেচযি.

অন্তেপুরে’পরজ্ঝিত্ৰা, সো রঞ্ঞা অৰধারিতে;

সপুত্তদারো ৰুট্ঠায, অঞ্ঞাতো মলযং অগা.

উপ্পজ্জিত্থ ¶ তদা পুত্তো, রঞ্ঞো সঙ্ঘায দেৰিযা;

দস্সেন্তো’ৰ পনাদস্স, কুমার রূপমত্তনো.

রাজা তং জাতমত্তং’ৰ, দিস্ৰা সন্থুট্ঠমানুসো;

সিদ্ধত্থং লুম্বিনীজাতং, রাজা সুদ্ধোদনো ৰিয.

ধঞ্ঞপুঞ্ঞগুণূপেতো, ঠপেত্ৰা দীপমেককং;

জম্বুদীপে’পি কসিণে, রজ্জযোগ্গোতি মে সুতো.

নামদান দিনেযেৰ, পরিহারেন সব্বসো;

ওপরজ্জে ভিসিঞ্চিত্ৰা, দক্খিণং দেসমস্স’দা.

যুৰরাজাপি মলযে, ৰসন্তো’ৰ মহীপতিং;

আরাধেত্ৰা উপাযেন, অনুঞ্ঞতো সভাতরা.

নিকাযত্তয ৰা সীহি, সদ্ধিং ভিক্খূহি আগতো;

দিস্ৰা রাজানমেত্থেৰ, সন্ধীং’কাসি অকুপ্পিযং.

যা তস্স যুৰরাজস্স, ভরিযা তিস্সা নামিকা;

রাজিনী সা ৰিজাযিত্থ, ধীতরং সঙ্ঘনামিকং.

কিত্তিনামা’পরাযা চ, ভরিযা সাপি খো পন;

ৰিজাযি পুত্তে চত্তারো, তথা একঞ্চ ধীতরং.

তদা রাজাপি চিন্তেত্ৰা, এৰং সতি কণিট্ঠকো;

নিস্সঙ্কো মযি হোতীতি, সম্মা মন্তীহি মন্তিয.

ধীতরং যুৰরাজস্স, সুরূপিং রূপনামিকং;

কস্সপস্স’ত্ত পুত্তস্স, ৰিৰাহং কারযি বুধো.

দক্খিণং দেসমস্সেৰ, কণিট্ঠস্স সদাপযি;

রাজপুত্তস্স পাদাপি, পচ্চেকং ভোগমত্তনো.

রজ্জম্হি সব্বং তস্সেৰ, পরিভোগায দাপযি;

কেৰলন্তু ৰিচারেসি, দীপং দীপ হিতাৰহো.

তেসং সংৰাসমন্ৰায, উভিন্নং পুঞ্ঞকম্মিনং;

ধঞ্ঞপুঞ্ঞগুণূপেতা, ৰিজাতা পুত্তধীতরো.

কত্ৰা সব্বোপহারেন, দাঠাধাতু মহামহং;

আরুয্হ ৰরপাসাদং, রতনৰ্হং মহীপতি.

তদা সোৰণ্ণযস্সাপি, সম্বুদ্ধস্স পুরা ঠিতং;

সুঞ্ঞং পিট্ঠং সযং দিস্ৰা, কস্মা এৰন্তি সংৰদি.

ততো ¶ অমচ্চা আহংসু, নাজানাসি মহীপতি;

মহাপিতুনরিন্দস্স, কালে তৰ নরিস্সরং.

পণ্ডুরাজা ইধাগম্ম, দীপমেতং ৰিনাসিয;

সব্বং সারগতং দীপে, সমাদায গতো ইতি.

তং সুত্ৰা লজ্জিতো রাজা, সযং ৰিয পরাজিতো;

তদহেৰ নিযোজেসি, অমচ্চে বলসঙ্গহে.

তদা’ৰ কির আগঞ্ছি, পণ্ডুরাজকুমারকো;

পরিভূতো সরাজেন, রজ্জত্থং কত নিচ্ছযো.

রাজা দিস্ৰা’তি সন্তুট্ঠো, কত্তব্বং তস্স কারিয;

মহাতিত্থ মুপাগম্ম, পট্টনং সেমত্রসো.

মহন্তং বলকাযঞ্চ, তস্সোপকরণানি চ;

অনুনং পটিযাদেত্ৰা, দেৰসেনংৰ সজ্জিতং.

পণ্ডুরাজকুমারেন, সদ্ধিং সেনাপতি সকং;

গন্ত্ৰা তং পণ্ডুরাজানং, হন্ত্ৰানিকমিতো পুরা.

রতনং সব্বমাদায, দত্ৰা রজ্জং ইমস্স চ;

ন চিরেনেৰ এহীতী, উয্যোজেসি মহাযসো.

সোপি এৰং করোমীতি, পটিস্সুত্ৰা মহীপতিং;

ৰিন্দিত্ৰা বলমাদায, নামমারুয্হ তং খণে.

পরতীরং ততো গন্ত্ৰা, সংৰুল়হ বলৰাহনো;

ৰিনাসযন্তো পচ্চন্তং, ৰারেসি মধুরং পুরং.

দ্ৰারানি পিদহিত্ৰান, পচ্ছিন্দিত্থ গতাগতং;

ততো অগ্গিং খিপাপেসি, গোপুরট্টাল কোট্ঠকে.

এৰং সীহল়সেনায, পৰিট্ঠায সকং পুরং;

সব্বং ৰিলুম্পমানায, সেনঙ্গং ঘাতযন্তিযা.

পণ্ডুরাজা নিসম্মেতং, সমাদায সকং বলং;

ৰেগসা তং সমাগম্ম, যুদ্ধং কাতুং সমারভি.

অসম্পুণ্ণ বলত্তা সো, ৰিদ্ধো সল্লেন ভূপতি;

হত্থিক্খন্ধগতোযেৰ, ৰিহায পুরমত্তনো.

পলাযিত্ৰা গতঠানে, জীৰিতং নিজমেস্সজি;

ভরিযাৰ’স্স তেনাসি, সম্পত্তা জীৰিতক্খযং.

ততো ¶ সীহল়সেনাসা, পৰিট্ঠা নিব্ভযা পুরং;

তত্থ সব্বং ৰিলুম্পিত্থ, দেৰা’সিরপুরং যথা.

সেনাপতি ততো রাজ-গেহে ভত্তং সমেক্খিয;

দীপানিতমিমম্হা চ, তত্রট্ঠঞ্চ মহারহং.

সারং সব্বংসমাদায, দেসে চ নগরে ঠিতং;

কত্ৰা ইস্সরিযং তত্থ, ৰসেৰত্তিয অত্তনো.

পণ্ডুরাজ কুমারং তু, তত্থ রজ্জে’ভি সিঞ্চিয;

কারেত্ৰা পরিহারঞ্চ, দেসং তস্স সমপ্পিয.

যথারুচিং গহেত্ৰান, হত্থিঅস্সে নরে’পি চ;

তত্থ তত্থ যথা কামং, ৰসন্তো অকুতো ভযো.

সমুদ্দ তটমাগম্ম, ঠত্ৰা তত্থ যথাসুখং;

কীল়ন্তো ৰিয নাৰং সো, সমারুয্হ ৰিসারদো.

মহাতিত্থ মুপাগম্ম, ৰন্দিত্ৰা ধরণী পতিং;

তং সাসনং নিৰেদেত্ৰা, সারং দস্সেসি আহটং.

রাজা সাধূতি ৰত্ৰান, কারেত্ৰা তস্স সঙ্গহং;

সদ্ধিং সেনায আগন্ত্ৰা, পকট্ঠায সকং পুরং.

জযপানং পিৰিত্ৰান, কত্ৰা ৰিজযমঙ্গলং;

মহাধাগং পৰত্তেত্ৰা, যাচকানং যথা রুচিং.

সব্বং পাকতিকং কাসি, সারং দীপে নিরালযো;

সোৰণ্ণ পটিমাযো চ, যথাঠানে ঠপাপযি.

সুঞ্ঞং রতনপাসাদে, পিট্ঠং পূরেসি সত্থুনো;

কাসি রক্খপিধানেন, নিব্ভযং ধরণীতলং.

ততো পট্ঠায দীপংসো, অরীনং দুপ্পধংসিযং;

কত্ৰা ৰড্ঢেসি ভোগেহি, উত্তরাদিকুরুং পিয.

খিন্না পুব্বস্স রাজস্স, কালে দীপম্হি পাণিনো;

নিব্বুতা তং সমাগম্ম, ঘম্মা ৰিয ৰলাহকা.

তস্স ৰীসতিমে ৰস্সে, ৰিহারে অভযুত্তরে;

নিক্খমিত্ৰা গতা হেসুং, পংসুকূলিক ভিক্খৰো.

যুৰরাজা মহিন্দো সো, ধুমরাজস্স সত্থুনো;

কারাপযি ঘরং রম্মং, দস্সনেয্যং মনোরমং.

বোধিগেহং ¶ করোন্তো তং, দিস্ৰা ৰড্ঢকীনো তদা;

ৰংসেন সাখং আহচ্চ, ভিজ্জন্তং ৰরবোধিযা.

কিন্তু কাতব্বমেত্থাতি, যুৰরাজং নিৰেদযুং;

সো তং তং মুপসংকম্ম, মহাপূজায পূজিয.

সচে সত্থা, হিতত্থায, সম্ভূতো সব্বপাণিনং;

লদ্ধুং পুঞ্ঞস্স’নগ্ঘস্স, ঘরস্স করণেতি’ধ.

সাখা গচ্ছং তু উদ্ধংৰ, কাতুং সক্কা যথাঘরং;

এৰমারাধযিত্ৰান, ৰন্দিত্ৰা সঙ্ঘরং গতো.

তদা সাখা দুমিন্দস্স, রত্তিযং উদ্ধমুগ্গমি;

ততো কম্মকরা সব্বং, আরোচেসুং সসামিনো.

যুৰরাজা’তি সন্তুট্ঠো, ভাতুরঞ্ঞো নিৰেদিয;

মহাপূজায পূজেসি, ৰিস্সজ্জিয বহুধনং.

তথা মহিন্দসেনৰ্হং, পরিৰেণঞ্চ কারিয;

সঙ্ঘস্সা’দা সভোগং সো, পুঞ্ঞা পুঞ্ঞানিচাচীনি.

অদা সপরিসং ভত্তং, ৰত্থং ছত্তমুপাহনং;

তথা গমিযভত্তঞ্চ, নহানঞ্চ সভত্তকং.

এৰং খুদ্দানু খুদ্দানি, কত্ৰা পুঞ্ঞানি সো ৰিভূ;

রঞ্ঞো তেত্তিংসৰস্সম্হি, যথাকম্মমুপাগমি.

অথ রাজা মতেতস্মিং, কণিট্ঠমুদযং সকং;

তস্স ঠানে ঠপেত্ৰান, সব্বং তস্সেৰ তস্সদা.

তুলাভারস্স দানেন, দীনানাথে সতপ্পযি;

ধম্মকম্মেন সোধেসি, নিকাযত্তযমেকতো.

সোণ্ণথালীসহস্সং সো, মুত্তাহি পরিপূরিয;

ঠপেত্ৰা মণিমেকেকং, তস্সোপরি মহারহং.

ব্রাহ্মণানং সহস্সস্স, সুদ্ধে রতনভাজনে;

ভোজেত্ৰা খীরপাযাসং, দাপেত্ৰা হেমসুত্তকং.

তথা নৰেহি ৰত্থেহি, অচ্ছাদেত্ৰা যথারুচিং;

সন্তপ্পেসি মহন্তেন, পরিহারেন পুঞ্ঞৰা.

ভিক্খূনং দীপৰাসীনং, অদাসি চ তিচীৰরং;

অদা সব্বাসমিত্থীনং, ৰত্থঞ্চ সুমনোহরং.

কারেত্ৰা ¶ লোহপাসাদং, ৰেজযন্তসরিক্খকং;

ৰড্ঢেসি পটিমং তত্থ, সুৰণ্ণঘটকোট্টিমং.

সুত্ৰা উপোসথাগার-ভাৰং সব্ব মহেসীনং;

তুচ্ছো যং নেৰ হোতূতি, ৰাসং সঙ্ঘস্স তং অকা.

ভোগগামে চ তস্সদা, রক্খকে চ নিযোজযি;

ভিক্খূ দ্ৰত্তিংসমত্তাহি, ৰসন্তূতি নিযামযি.

গঙ্গায মরিযাদং সো, কারেসি মণিমেখলং;

তোযনিদ্ধমনঞ্চাকা, মণিহীরকৰাপিযা.

কট্ঠুন্তনগরে চেৰ, কাণৰাপিংচ বন্ধযি;

ৰেজ্জসালঞ্চ কারেসি, চেতিযম্হি গিরিম্হি সো.

বুদ্ধগামৰিহারঞ্চ, ৰিহারং মহিযঙ্গণং;

কূটতিস্স ৰিহারঞ্চ, ভোগগামে ন ৰড্ঢযি.

মণ্ডলস্স গিরিস্সা’দা, ৰিহারস্স সগামকে;

উত্তরাল়্হে চ কারেসি, পাসাদং পরিৰেণকে.

মহাসেনস্স বুদ্ধস্স, গামং দত্ৰান রক্খকে;

দাসি সোব্ভৰিহারে চ, কারেসি পটিমাঘরং.

বোধিসত্তে চ ৰড্ঢেসি, পাসাদে মণিমেখলে;

সীলামযমুনিন্দস্স, জিণ্ণগেহম্পি কারযি.

রাজ তং বোধিসত্তঞ্চ, সঘরং তত্থ সন্নহি;

আলৰালং দুমিন্দস্স, গন্ধিত্ৰা কা মহামহং.

লিখিত্ৰা হেমপট্টম্হি, সব্বরতনসুত্তকং;

মহাপূজমকা তস্স, অভিধম্মং কথাপযি.

আনন্দপটিমং নেত্ৰা, পুরং কত্ৰা পদক্খিণং;

পরিত্তং ভিক্খুসঙ্ঘেন, ভণাপেত্ৰা যথাৰিধিং.

পরিত্তোদকসেকেন, জনং কত্ৰা নিরাতুরং;

রাজা রোগভযং পেৰং, নীহরিত্থ সদেসতো.

অভিসেকং গহেত্ৰান, হেমৰালুক চেতিযে;

অনুসংৰচ্ছরং কাতুং, তং চারিত্তং লিখাপযি.

অদা মাসস্স চতূসু, উপোসথদিনেসু সো;

চতুন্নঞ্চ সহস্সানং, ৰত্থদানং সভত্তকং.

ৰেসাখকীল়ং ¶ কীল়িত্থ, সদ্ধিং দুগ্গতকেহি সো;

অন্নং পানঞ্চ ৰত্থঞ্চ, তেসং দত্ৰা যথারুচিং.

ভিক্খুসঙ্ঘস্স দীপম্হি, নিচ্চদানং পৰত্তযি;

সন্তপ্পেসি চ দানেন, কপণদ্ধিকৰণিব্বকে.

তস্স রঞ্ঞো মহেসী চ, সঙ্ঘনামা অকারযি;

পব্বতং সঙ্ঘসেনৰ্হং, সভোগমভযুত্তরে.

নীলচূল়ামণিঞ্চাকা, সিলাময মহেসিনো;

পূজং সব্বোপহারেহি, কাসি সত্থুস্স সব্বদা.

তস্স সেনাপতিচা’কা, সেনসেনাপতিৰ্হযং;

পরিৰেণং মহাভোগং, সূরো তুট্ঠকনামকো.

এৰং সপরিসো কত্ৰা, সপুঞ্ঞানি মহাযসো;

পঞ্চতিংসতিমে ৰস্সে, দেৰলোকমুপাগমি.

ততো তস্সা’নুজো আসি, উদযো নাম খত্তিযো;

রাজা সব্বপ্পযোগেহি, হিতেসী দীপৰাসীনং.

হুত্ৰা সো সযং রাজা, কণিট্ঠং সকভাতরং;

মহাদীপাদঠানম্হি, ঠপি কস্সপনামকং.

রাজা চিন্তিয ঞাতীনং, কাতব্বো সঙ্গহো ইতি;

এৰং কস্সপনামস্স, ভাতুপুত্তস্স ধীতরং.

যুৰরাজস্স তস্সা’কা, ভরিযং সেননামিকং;

ধারেসিচ সযং রাজা, অপরং তিস্সসৰ্হযং.

মহিন্দস্সুপরাজস্স, রাজধীতায কিত্তিযা;

পুত্তো কিত্তগ্গবোধীতি, আদিপাদো ৰিবুদ্ধিকো.

চোরো হুত্ৰা মহারঞ্ঞো, নিক্খমিত্ৰান রত্তিযং;

একো অঞ্ঞাতৰেসেন, সমুপাগম্মরোহণং.

জনং হত্তগতং কত্ৰা, দেসং সব্বং ৰিনাসিয;

ঘাতাপযিত্থ তত্রট্ঠং, সো তং মাতুলমত্তনো.

তং সুত্ৰা ধরণীপালো, তস্মিং’তীৰ পকুপ্পিয;

আনেতুং তমুপাযং সো, গৰেসন্তো তথা তথা.

ভাতুপুত্তং তমাহুয, যুৰরাজং সকস্সপং;

আমন্তেসি মহাপুঞ্ঞ, সহাযো হোতি মে ইতি.

কিং ¶ মে কত্তব্ব’মিচ্চাহ, পচ্চাহ ধরণীপতি;

পুত্তো তৰ মহিন্দো সো, ৰুদ্ধিপ্পত্তো মহাবলো.

লাভী রোহণদেসস্স, মাতিতো পিতিতো’পি চ;

সূরো সব্বসহো ৰীরো, কুসলো কতূপাসনো.

সঙ্গামযোগ্গো মতিমা, নিপুণো নযকোৰিদো;

তং পেসেত্ৰা নযিস্সাম, পাপং মাতুলঘাতকং.

তং সুত্ৰা ৰচনং রঞ্ঞো, কস্সপো ভাসি সাদরো;

দেৰ দেৰেন ৰুত্তো’হং, গচ্ছেয্যং কিন্তু মে সুতো.

ৰংসো মে পালিতো হোতি, পসাদো চ তৰাধিপ;

তস্মা কালমহাপেত্ৰা, যং ইচ্ছসি তথা কুরু.

সুত্ৰা অতীৰসন্তুট্ঠো, নরিন্দো তস্স তং ৰচো;

মহন্থং বলকাযং সো, সব্বসো পটিযাদিয.

মহতা পরিহারেন, মহিন্দং রাজপোতকং;

রক্খিতুং তং নিযোজেত্ৰা, ৰজিরগ্গঞ্চ নাযকং.

তুচ্ছং ৰিয পুরং কত্ৰা, সব্বঞ্চ বলৰাহনং;

সব্বোপকরণঞ্চেৰ, অনূনং তস্স দাপিয.

সযং তমনুগচ্ছন্তো, পদসা’ৰ নরিস্সরো;

উয্যোজেসি মহাপুঞ্ঞ, গচ্ছ রুক্খাতি মেদিনিং.

মহিন্দো সো মহিন্দো’ৰ, দেৰসেনা পুরক্খতো;

গচ্ছন্তো সুৰীরোচিত্থ, দেৰাসুরমহাহৰং.

ততো গন্ত্ৰা ন চিরেন, গুত্তসালমুপাগমি;

ততো জানপদা সব্বে, মণ্ডলিকা চ রট্ঠিযা.

তেন মাতুলঘাতেন, পাপকেন উপদ্দুতা;

গন্ত্ৰা তং পরিৰারেসুং, লদ্ধো নো সামিকো ইতি.

পতন্তো সোপি খো চোরো, ঠিতোৰ গিরিমণ্ডলে;

সব্বং হত্থগতং কত্ৰা, রাজভণ্ডং মহগ্ঘিযং.

হত্থী অস্সেচ আদায, গন্ত্ৰা মলযমারুহি;

মহিন্দসেনা ঘাতেন্তী, তস্স সেনং তহিং তহিং.

পদানুপদমস্সে’ৰ, গচ্ছন্তি হত্থিঅস্সকে;

দিস্ৰা মলযপাদম্হি, গহেত্ৰা এত্থ সো ইতি.

তত্থ ¶ পাৰিসিমদ্দন্তী, সব্বং মলযকাননং;

নদীযো পল্ললে চেৰ, করোন্তি মগ্গসাদিসে.

বালকোৰ জনং দিস্ৰা, সব্বং রতনমত্তনো;

কোধাভিভূতো ছড্ডেসি, নদী সোব্ভতটাদীসু.

এককোৰ নিলীযিত্থ, ৰনে পব্বতকন্দরে;

গৰেসন্তো জনো দিস্ৰা, তমগ্গহি নরাধম্মং.

তমাদায’তি তুট্ঠো সো, জনো আগম্ম সজ্জুকং;

মহিন্দমুপদস্সেসি, নিসিন্নং গুত্তসালকে.

সযং সেনং সমাদায, মহাগামমুপাগতো;

রোহণা ধিপতি হুত্ৰা, করোন্তো লোকসঙ্গহং.

জনং পাকতিকং কত্ৰা, বালকেন ৰিবাধিতং;

সাসনঞ্চ যথাঠানে, ঠপেত্ৰা তেন নাসিতং.

পুপ্ফারামে ফলারামে, কারযিত্ৰা তহিং তহিং;

ৰাপিযো’পি চ গণ্হিত্ৰা, বন্ধাপেত্ৰা মহানদিং.

সব্বত্থ সুলভং কত্ৰা, সঙ্ঘস্স চতুপচ্চযং;

দুট্ঠে চ পটিবাহেত্ৰা, মণ্ডলীকে চ রট্ঠিযে.

চোরে চ পরিসোধেত্ৰা, কত্ৰা ৰিগতকণ্টকং;

তোসযন্তো’খিলং লোকং, চাগভোগসমপ্পিতো.

উপাসনিযো ৰিঞ্ঞূহি, সেৰনীযো ধনত্থীহি;

কপ্পরুক্খূপমো সব্ব-যাচকানং হিতাৰহো.

হিত্ৰা দুব্বিনযং দেসে, পুব্বকেহি পৰত্তিতং;

সমাচরন্তো ধম্মঞ্চ, ৰাসং তত্থেৰ কপ্পযি.

আদিপাদং গহেত্ৰান, ৰজিরগ্গো ৰিনাযকো;

অনুরাধমুপাগম্ম, রাজানমভিদস্সযি.

রাজাপি দিস্ৰা তং কুদ্ধো, খিপ্পং পক্খিপ্প চারকে;

রক্খাৰরণমস্সাদা, ৰিহেঠেসি চ সব্বাসো.

অদাসি ¶ চ তুলাভারং, তিক্খত্তুং সো মহাযসো;

থূপারামম্হি থূপঞ্চ, হেমপট্টেন ছাদযি.

কত্ৰা তত্থেৰ পাসাদং, ভিক্খুসঙ্ঘং নিৰাসিয;

ৰিহারে নগরে চেৰ, পটিসঙ্খাসি জিণ্ণকং.

কদম্বনদীযা’কাসি, নিজ্ঝরং থিরবন্ধনং;

মরিযাদং পৰড্ঢেসি, ৰাপিযং সো মযেত্তিযং.

তত্থ নিদ্ধমনংচা’কা, অনুৰস্সম্পি ভূমিপো;

চীৰরত্থং সুৰত্থানি, সুসণ্হানি চ দাপযি.

দুব্ভিক্খে দানসালাযো, কারেত্ৰা সব্বপাণিনং;

মহাদানং পৰত্তেসি, মহাপাল়িঞ্চ ৰড্ঢযি.

দধিভত্তঞ্চ দাপেসি, নিকাযত্তযৰাসিনং;

নিচ্চং দুগ্গতভত্তঞ্চ, যাগুঞ্চেৰ সখজ্জকং.

এৰমাদীনি পুঞ্ঞানি, কত্ৰা সোৰগ্গিযানি সো;

একাদসহি ৰস্সেহি, গতো দেৰসহব্যতং.

তস্সেকাদসৰস্সেসু, ৰিস্সট্ঠং সোণ্ণমেৰ তু;

অহু সতসহস্সানং, তযো দসহি সম্মিতং.

সুজনপ্পসাদ সংৰেগত্থায কতে মহাৰংসে

ততো ¶ রজ্জে পতিট্ঠায, কস্সপো দক্খিণং দিসং;

অদা কস্সপনামস্স, যুৰরাজস্স ধীমতো.

অগ্গাভিসেকং দাপেসি, যুৰরাজস্স ধীতুযা;

রাজকঞ্ঞায তিস্সায, ভরিযাযে’ৰ অত্তনো.

যাচকানঞ্চ সিপ্পীনং, আগতানং ততো ততো;

দানং দণ্ডিস্সরং নাম, সদা দাপেসি ভূপতি.

তং সুত্ৰা কুপিতো রাজা, বলং পেসেসি অত্তনো;

যুজ্ঝিত্ৰা তং পরাজেসি, মহিন্দো সো মহাভটো.

ততো রাজা নিৰত্তেতুং, পিতরং তস্স পেসযি;

কস্সপং যুৰরাজং তং, সো গন্ত্ৰা পুত্তসন্তিকং.

নানাধম্মকথোপেতং, ৰত্ৰা যুত্তিমনেকধা;

সঙ্ঘামতো নিৰত্তেত্ৰা, পুত্তং সো পুনরাগমি.

আদিপাদো তু সো পচ্ছা, ঘাতেত্ৰা মণ্ডলাধিপে;

কুদ্ধেজনপদে দিস্ৰা, অগমাসি পুরন্তিকং.

ভিক্খুসঙ্ঘো তমানেত্ৰা, দস্সেসি ৰসুধাধিপং;

দত্ৰা সো ধীতরং তস্সা, পেসেসি পুন রোহণং.

নীহরিত্ৰান দুস্সীলে, নিকাযত্তযৰাসীসু;

গাহাপেসি নৰে ভিক্খূ, আৰাসে তত্থ তত্থ সো.

দ্ৰযাভিসেকজাতেন, আদিপাদেন সুনুনা;

মহাৰিহারে বোধিম্হি, পংসুং ৰড্ঢেসি পূজযং.

অকাসি ¶ চ নিকাযেসু, তীসু বিম্বে সিলামযে;

সোৰণ্ণযে রংসিজালে, ছত্তং চূল়ামণিং তথা.

অভযগিরিৰিহারম্হি, পাসাদং সকনামকং;

কত্ৰা তত্থ নিৰাসেত্ৰা, ভিক্খু গামমদাপযি.

মহিযঙ্গণৰিহারস্মিং, গামং সো চেতিযস্স’দা;

সৰত্থং পটিমাভত্তং, সব্বভিক্খূন দাপযি.

থলে জলে চ সত্তানং, অদাসি অভযং তদা;

চারিত্তপুব্বরাজূনং, পরিপালেসি সব্বদা.

তস্স সেনাপতি সেনো, ইলঙ্গোরাজৰংসজো;

থেরিযানং অকা’ৰাসং; থূপারামস্স পচ্ছতো.

ধম্মারুচিকভিক্খূনং, ধম্মারামমকারযি;

তথা সাগলিকানঞ্চ, কস্সপসেননামকং.

হদযুণ্হাভিধানং সো, কত্ৰা চেতিযপব্বতে;

পরিৰেণং অদাধম্ম-রুচিকানঞ্চ ভিক্খূনং.

আরামিকানং ভিক্খূনং, আরামেসু তহিং তহিং;

একমেকং কুটিং কত্ৰা, দাপেসি চ চমূপতি.

রত্তমালগিরিস্মিং সো, কত্ৰা রম্মং তরং সুভং;

কুচিং অদা সাসনস্স, সামিকানং তপস্সিনং.

মহাৰিহারে কারেত্ৰা, পৰিৰেণং ৰরং অদা;

পংসুকূলিকভিক্খূনং, সমুদ্দগিরিনামকং.

ৰাসং অরঞ্ঞে কারেত্ৰা, অত্তনো ৰংসনামকং;

মহাৰিহারে ভিক্খূনং, ৰনে নিৰাসতং অদা.

ৰিহারেসূ চ জিণ্ণেসু, নৰকম্মমকারযি;

দাপেসি অগ্গলং সব্ব-ভিক্খূনং জিণ্ণচীৰরে.

তিস্সারামং করিত্ৰান, ভিক্খূনীনমুপস্সযং;

মরিচৰট্টিমহাবোধি, পরিহারে নিৰেসযি.

অনুরাধপুরে চেৰ, পুলত্থিনগরেপি চ;

উপসগ্গরোগনাসায, ৰেজ্জসালাপি কারযি.

অত্তনা কতৰাসনং, ভোগগামে চ দাপযি;

তথারামিকগামে চ, পটিমাভরণঞ্চ সো.

ভেসজ্জগেহং ¶ কারেসি, নগরে তত্থ তত্থ সো;

পংসুকূলিকভিক্খূনং, ভত্তং ৰত্থঞ্চ দাপযি.

খন্ধীকতে অমোচেসি, তিরচ্ছানগতে বহূ;

কপণানঞ্চ দাপেসি, মহাদানং চমূপতি.

ৰিচিত্তং ব্যঞ্জনং ভত্তং, যাগুং ৰিৰিধখজ্জকং;

কত্ৰা সূকররূপঞ্চ, গুল়ং ভিক্খূনং দাপযি.

এৰামাদীনি পুঞ্ঞানি, কত্ৰা সেনায নাযকো;

সেনো কিত্তিন্দুপাদেহি, সব্বা ওভাসযী দিসা.

তস্সেৰ ঞাতকো কত্ৰা, নাযকো রক্খসৰ্হযো;

সৰারকম্হি গামম্হি, ৰিহারং সুমনোহরং.

মহাৰিহারৰাসীনং, সারানং পটিপত্তিযা;

ভিক্খূনং সো অদা সাধু, ঠপেত্ৰা ৰত্তমুত্তমং.

সেনো নাম মহালেখো, মহালেখকপব্বতং;

মহাৰিহারে কারেসি, ভিক্খূনং ৰাসমুত্তমং.

চোল়রাজাভিধানো, চ, অমচ্চো তস্স রাজিনো;

পরিৰেণং অকারম্মং, নট্ঠং তং সুপ্পতিট্ঠিতং.

রাজা তীসু নিকাযেসু, রূপকম্মমনোরমং;

মণ্ডপানি ৰিচিত্তানি, ৰেজযন্তো পমানি চ.

কারেত্ৰা ধাতুপূজাযো, কত্ৰা জনমনোহরা;

যথা কম্মং গতো ঠত্ৰা, ৰস্সানি দসসত্ত চ.

দ্ৰযাভিসেকসঞ্জাতো, যুৰরাজাথ কস্সপো;

আসি লদ্ধাভিসেকো সো, লংকারজ্জেকমাগতে.

সদ্ধো আগতমগ্গোৰ, সাভিঞ্ঞো ৰিয পঞ্ঞৰা;

ৰত্তা সো মরমন্তিৰ, চাগৰা ধনদো ৰিয.

বহুস্সুতো ধম্মকথী, সব্বসিপ্পৰিসারদো;

যুত্তাযুত্তৰিচারায, নিপুণো নযকোৰিদো.

অচলো ইন্দলীলো’ৰ, ঠিতো সুগতসাসনে;

পরপ্পৰাদিৰাতেহি, সব্বেহি’পি অকম্পিযো.

মাযাসাঠেয্যমানাদি, পাপানঞ্চ অগোচরো;

গুণানং আকরো সব্ব-রতনানং ৰসাগরো.

ভূমিচন্দো ¶ নরিন্দো সো, ৰংসে জাতস্স অত্তনো;

দপ্পুল়স্সাদীপাদস্স, যুৰরাজপদং অদা.

রজ্জং দসহি ধম্মেহি, চতুসঙ্গহৰত্থূহি;

করোন্তো পরিপালেসি, লোকং নেত্তংৰ অত্তনো.

সো ধেত্ৰা সাসনং সব্বং, ধম্মকম্মেন সত্থুনো;

গহেত্ৰা নৰকে ভিক্খূ, অকাসা’ৰাসপূরণং.

দুট্ঠগামণিরাজেন, কতং মরিচৰট্টিকং;

নট্ঠং ৰিহারং কারেত্ৰা, নানাআৰাস ভূসিতং.

থেরৰংসজভিক্খূনং, অদা কত্ৰা মহামহং;

তেসং পঞ্চসতানঞ্চ, ভোগগামে চ দাপযি.

তত্থ সো তুসিতে রম্মে, দেৰসঙ্ঘপুরক্খতং;

মেত্তেয্যং লোকনাথং তং, দেসেন্তং ধম্মমুত্তমং.

দস্সেন্তো ৰিয লোকস্স, ৰিহারে সব্বসজ্জিতে;

নিসিন্নো মণ্ডপে রম্মে, নানারতনভূসিতে.

নগরেহি চ সব্বেহি, ভিক্খূহি পরিৰারিতো;

বুদ্ধলিলায লংকিন্দো, অভিধম্ম মভাসযি.

সোণ্ণপট্টে লিখাপেত্ৰা-ভিধম্মপিটকং তদা;

ধম্মসঙ্গণিকং পোত্থং, নানারতন ভূসিতং.

কত্ৰা নগরমজ্ঝম্হি, কারেত্ৰা হেমমুত্তমং;

তং তত্থ ঠপযিত্ৰান, পরিহারমদাপযি.

সক্কসেনাপতিট্ঠানং, দত্ৰা পুত্তস্স অত্তনো;

পরিহারে নিযোজেসি, তত্থ তং ধম্মপোত্থকে.

অনুসংৰচ্ছরং রাজা, পুরং দেৰপুরী ৰিয;

ৰিভূসিতায সেনায, সজ্জেত্ৰা পরিৰারিতো.

দেৰরাজাৰ সোভন্তো, সব্বাভরণভূসিতো;

হত্থিখণ্ডে নিসীদিত্ৰা, চরন্তো পুরৰীথিযং.

মহতা পরিহারেন, নেত্ৰা তং ধম্মসঙ্গহং;

অত্তনা কারিতং রম্মং, ৰিহারং সব্বসজ্জিতং.

তত্থ ধাতুগতে রম্মে, নানারতনভূসিতে;

মণ্ডপে ধাতুপিঠস্মিং, পতিট্ঠাপিয পূজযি.

গন্থাকরপরিৰেণং ¶ , মহামেঘৰনে অকা;

নগরে ৰজ্জসালা চ, তেসং গামে চ দাপযি.

ভণ্ডিকপরিৰেণঞ্চ, সিলামেঘঞ্চ পব্বতং;

কত্ৰা’ভযগিরিস্মিং সো, তেসং গামমদাপযি.

জোতিৰনৰিহারস্মিং, রাজা লঙ্কায নাযকো;

ভত্তগ্গস্স অদা গামং, তথা’ভযগিরিম্হি চ.

দক্খিণগিরিনামস্স, ৰিহারস্স চ দাপযি;

গামং কতঞ্ঞুভাৰেন, রাজা পরমধম্মিকো.

সক্কসেনাপতি রম্মং, পরিৰেণং সুমাপিয;

অদাসি সহগামেহি, থেরিযানং সনামিকং.

ভরিযা ৰজিরা তস্স, তেসংযেৰ অদাপযি;

পরিৰেণং করিত্ৰান, সগামং সকনামকং.

উপস্সযং করিত্ৰান, সা এৰ পদলঞ্ছনে;

ভিক্খূনীনং অদা থের-ৰংসে সব্বত্থ পূজিতে.

সক্কসেনাপতি মাতা, দেৰা’রঞ্ঞক ভিক্খূনং;

থেরৰংসপ্পদীপানং, অকা’ৰাসং সনামকং.

সা এৰ পটিবিম্বস্স, সত্থু মরিচৰট্টিযং;

চূল়ামণিং পাদজলং, অকা ছত্তঞ্চ চীৰরং.

রাজা রাজালযেযেৰ, রাজৰংসং সনামকং;

অকাসি পাল়িকং নাম, পাসাদং সুমনো হরং.

পূজেসি রাজিনী নাম, রাজিনো ভরিযা’পরা;

পট্টকঞ্চুকপূজায, হেমমালিক চেতিযং.

তস্সা পুত্তোসি সিদ্ধত্থো, নাম ইস্সরিযে ঠিতো;

সুতো মলযরাজাতি, রূপেন মকরদ্ধজো.

রাজা তস্মিং মতে কত্ৰা, সালং ভিক্খুনমুত্তমং;

দানৰট্টং পট্ঠপেত্ৰা, তস্স পত্তিমদা তদা.

এৰং ধম্মেন কারেন্তে, রজ্জং লঙ্কাদীপে তদা;

চোল়রাজেন যুজ্ঝিত্ৰা, পণ্ডুরাজা পরাজিতো.

পণ্ণাকারানি নেকানি, বলং সন্ধায পেসযি;

রাজালংকিস্সরো সদ্ধিং, মন্তেত্ৰা সচিৰেহি সো.

সন্নয্হ ¶ বলকাযং সো, সক্কসেনাপতিং সকং;

বলস্স নাযকং কত্ৰা, মহাযিত্থমুপাগমি.

ৰিজযং পুব্বরাজূনং, ৰত্ৰা ৰেলাতটে ঠিতো;

উস্সাহং জনযিত্ৰান, নাৰং আরোপযী বলং.

বলকাযং সমাদায, সক্কসেনাপতিং তদা;

সুখেন সাগরং তিণ্ণো, পণ্ডুদেসমুপাগমি.

দিস্ৰা বলঞ্চ তঞ্চেৰ, পণ্ডুরাজা সুমানসো;

একচ্ছত্তং করিস্সামি, জম্বুদীপন্তি অব্রৰি.

বলদ্ৰযং গহেত্ৰান, রাজা সো চোল়ৰংসজং;

জেতুং অসক্কুণিত্ৰান যুদ্ধমুজ্ঝিয নিক্খমি.

যুজ্ঝিস্সামীতি গন্তান, সক্কসেনাপতী পুন;

নিসিন্নো উপসগ্গেন, মতো পাপেন পণ্ডুতো.

লংকিস্সরো বলস্সাপি, তেন রোগেন নানসং;

সুত্ৰা দযালুভাৰেন, সেনং আণাপযী ততো.

সক্ক সেনাপতিট্ঠানং, তস্স পুত্তস্স’দা তদা;

ৰড্ঢেসি তেন তং পুত্তং, কত্ৰা সেনায নাযকং.

নিকাযত্তযৰাসীহি, পরিত্তং নগরে তদা;

কারেত্ৰা রোগদুব্বুট্ঠি-ভযং নাসেসি জন্তুনং.

সাসনস্স চ লোকস্স, সন্তিং কত্ৰা অনেকধা;

রাজা সো দসমে ৰস্সে, সুখেন তিদিৰং গতো.

লংকারজ্জেপি ঠত্ৰা কথিততিপিটকো সব্বৰিজ্জাপদীপো,

ৰত্তাৰাদী কৰী সো সতিধীতিৰিসদো দেসকো ভাৰকো চ;

পঞ্ঞাসদ্ধাদযা ৰা পরহিতনিরতো লোকৰেদীৰদঞ্ঞূ;

রাজিন্দো কস্সপো’যং ৰিয ৰিমলগুণো হোতুলোকোপি সব্বো.

সুজনপ্পসাদসংৰেগত্থায কতে মহাৰংসে

যুৰরাজা ¶ তদা হুত্ৰা, রাজা দপ্পুল়নামকো;

ঠপেসি ওপরজ্জম্হি, আদিপদং সনামকং.

মরিচৰট্টিৰিহারস্স, গামং দত্ৰা ততো পুরে;

চারিত্তং পুব্বরাজূনং, রক্খিত্ৰান মহিং ইমং.

অভুত্ৰা দীঘকালঞ্হি, পুব্বকম্মেন অত্তনো;

রাজা সো সত্তমে মাসে, পৰিট্ঠো পচ্চুনো মুখং.

উপরাজা অহুরাজা, দপ্পুল়ো তদনন্তরং;

উদযস্সাদিপাদস্স, যুৰরাজপদং অদা.

তদা চোল়ভযা পণ্ডু-রাজং জনপদং সকং;

চজিত্ৰা নাৰমারুয্হ, মহাতিত্থমুপাগমি.

আণাপেত্ৰান তং রাজা, দিস্ৰা সন্তুট্ঠমানসো;

মহাভোগং অদা তস্স, নিৰাসেসি পুরা বহি.

চোল়রাজেন যুজ্ঝিত্ৰা, গহেত্ৰা পট্টনদ্ৰযং;

পণ্ডুরাজস্স দম্মীতি, সন্নদ্ধে লঙ্করাজিনি.

কেনা’পি করণীযেন, খত্তিযা দীপৰাসিনো;

অকংসু ৰিগ্গহং ঘোরং, পাপকম্মেন পণ্ডুনো.

পণ্ডুরাজে’ত্থ ৰাসেন, কম্মং নত্থীতি চিন্তিয;

ঠপেত্ৰা মকুটাদীনি, গতো কেরল়সন্তিকং.

ৰিগ্গহে নিট্ঠিতে রাজা, মহামেঘৰনে তদা;

মহাবোধিঘরস্সা’দা, গামং নগরসন্তিকে.

আৰাসং রক্খকো নাম, তস্স সেনাপতী অকা;

থূপারামসমীপম্হি, ইল়ঙ্গো রাজনামকং.

কতং তং পুব্বরাজেহি, রাজা সো পরিপালিয;

পত্তো দ্ৰাদসমং ৰস্সং, যথাকম্মমুপাগমি.

উদযো ¶ যুৰরাজা’সি, লংকাৰাসীনমিস্সরো;

সেননামাদিপাদং সো, ওপরজ্জে’ভিসেচযি.

রঞ্ঞো ভীতা তদামচ্চা, পৰিসিংসু তপোৰনং;

রাজোপরাজা গন্ত্ৰান, তেসং সীসানি ছেদযুং.

তেন কম্মেন নিব্বিন্না, যতযো তন্নিৰাসিনো;

হিত্ৰা জনপদং রঞ্ঞো, তদাগচ্ছিংসু রোহণং.

তদা জানপদা চেৰ, নাগরা চ বলানি চ;

কুপিতা চণ্ডুৰাতেন, সাগরো ৰিয কম্পিতো.

রতনপাসাদমারুয্হ, ৰিহারে অভযুত্তরে;

সন্তাসেত্ৰান রাজানং, দস্সেত্ৰান ৰিভীসিকং.

উপত্থম্ভকমচ্চানং, ৰিগ্গহস্স তপোৰনে;

তদা সীসানি ছিন্দিত্ৰা, কৰাতেন নিপাতযুং.

তং সুত্ৰা যুৰরাজা চ, আদিপাদো চ তং সখা;

উল্লঙ্ঘিত্ৰান পাকারং, সীঘং গচ্ছিংসু রোহণং.

বলকাযোনুবন্ধিত্ৰা, যাৰ কণ্হনদীতটা;

অলাভেন চ নাৰানং, তিণ্ণত্তা তেসমাগমি.

রাজপুত্তাগতা তত্থ, ৰনে অভযভেদিনো;

যতীনং পুরতো তেসং, নিপজ্জিত্ৰা উরেন তে.

অল্লৰত্থা’ল্লকেসা চ, পরিদেৰিত্থ’নেকধা;

কন্দীত্ৰা রোদনং কত্ৰা, খমাপেসুং তপস্সিনো.

খন্তিমেত্তানুভাৰেন, তেসং সাসনসামিনং;

পুঞ্ঞোদযো অহু তেসং, উভিন্নং দীপসামিনং.

যুৰরাজবলঞ্চেৰ, নিকাযত্তযৰাসিনো;

গমিংসু তেসমানেতুং, সন্তিভূতে মহাবলে.

রাজপুত্তা উভো ব্যত্তা, পণ্ডিতা পংসুকূলিনো;

যাচিত্ৰা তেসমাদায, অগমংসু সকং পুরং.

ভিক্খূনং পুরতো মগ্গং, রাজাগন্তা খমাপযি;

আদায তে ৰনং তেসং, নেত্ৰা রাজঘরং গতো.

ততো পট্ঠায চারিত্থং, পালেত্ৰা পুব্বরাজুনং;

রাজা সো ততিযে ৰস্সে, যথাকম্মমুপাগমি.

লংকাভিসেকং ¶ পত্ৰান, সেনো সো মতিমা ততো;

উদযং আদিপাদং তং, যুৰরাজং অকা সখং.

কহাপণসহস্সং সো, দুগ্গতানং উপোসথে;

হোতু’পোসথিকো দত্ৰা, যাৰজীৰং নরাধিপো.

পটিমা ভত্তৰত্থানি, ভিক্খূনং ধরণী পতি;

অদা দণ্ডিস্সরং দানং, যাচকানঞ্চ সিপ্পীনং.

ঠানে কত্থচি সিপ্পীনং, পাসাদেসু মনোহরে;

কারেত্ৰা ভোগগামে চ, অদাপেসি মহামতি.

কহাপণসহস্সং ৰা, দত্ৰা পঞ্চসতানি ৰা;

লঙ্কাযং জিণ্ণকাৰাসে, নৰকম্মমকারযী.

চত্তালীসসহস্সানি, অভযুত্তরচেতিযে;

সিলাপত্থরণত্থায, দাপেসি চ মহীপতি.

মহাৰাপীসু লংকাযং, জিণ্ণনিদ্ধমনে অকা;

নৰকম্মঞ্চ মরিযাদং, থিযং পাসাণপংসুনা.

অকা রাজঘরে রম্মং, মালাগেহং মহারহং;

ঠপিতং পুনরাজূহি, দানং সম্মাপৰত্তযি.

কতং মলযরাজেন, অমচ্চেন’গ্গ বোধিনা;

পরিৰেণং নাগসালং, দিস্ৰা গাম মদা তদা.

কত্ৰা চতুৰিহারেসু, রূপকম্মানি সাধুকং;

মণ্ডপানি চ রম্মানি, ধাতুপূজং অকা সদা.

এৰমাদীনি পুঞ্ঞানি, অনেকানি অনেকধা;

কত্ৰা সো নৰমে ৰস্সে, যথাকম্মমুপাগমি.

লংকাভিসেকং পত্ৰান, যুৰরাজোদযো ততো;

সেননামাদিপাদং সো, ওপরজ্জে’ভি সেচযি.

নিদ্দালু মজ্জপো আসি, রাজা পাপেন জন্তুনং;

চোল়ো পমত্ততং তস্স, সুত্ৰা সন্তুট্ঠমানসো.

পণ্ডুদেসাতিসেকং সো, পত্তুকা মেত্থ পেসযি;

মকুটাদীনমত্থায, ঠপিতানংৰ পণ্ডুনা.

তানি নাদাসি সো রাজা, তেন চোল়ো মহব্বলো;

বলং সন্নয্হ পেসেসি, বলক্কারেন গণ্হিতুং.

তদা ¶ সেনাপতি এত্থ, পচ্চন্তে কুপিতে গতো;

আণাপেত্ৰান তং রাজা, যুজ্ঝনত্থায পেসযি.

হতো সেনাপতি তত্থ, যুজ্ঝি ন রণে মতো;

ককূটাদীনি আদায, রাজা সো রোহণং অগা.

গন্ত্ৰা চোল়বলং তত্থ, অলভিত্ৰা পৰেসনং;

নিৰত্তিত্ৰা সকং রট্ঠং, অগমাসি ইধতা ভযা.

ততো সেনাপতিট্ঠানে, ৰিদুরগ্গং তু নাযকং;

ঠপেসি রাজা লংকিন্দো, তেজৰন্তং মহামতিং.

পচ্চন্তং চোল়রাজস্স, ঘাতেত্ৰা সো চমূপতি;

আণাপেসি ইতো নীতং, দস্সেত্ৰান ৰিভীসিতং.

ততো দাপেসি সো সব্ব-পরিক্খারং মহারহং;

পংসুকূলিকভিক্খূনং, সব্বেসং দীপৰাসিনং.

মহাৰিহারে লংকিন্দো, পটিবিম্বস্স সত্থুনো;

জলন্তং মণিরংসীহি, অকা চূল়ামণিং তদা.

ওরোধা ৰিদুরা তস্স, পাদজালেন পূজযি;

মণীহি পজ্জলন্তেহি, পটিমং তং সিলামযং.

ঝাপিতং চোল়রাজস্স, বলেন মণিনামকং;

পাসাদং কাতুমারদ্ধো, চুতো ৰস্সম্হি অট্ঠমে.

পঞ্চেতে ৰসুধাধিপা ৰসুমহিং একাতপত্তঙ্কিতং;

ভুত্ৰা নিগ্গহসঙ্গহেহি সকলং লোকং ৰসে ৰত্তিয;

যা তা মচ্চুৰসং সপুত্তৰণিতা সামচ্চমিত্তানুগা;

ইচ্চেৰং সততং সরন্তু সুজনা হাতুং পমাদং মদং.

সুজনপ্পসাদসংৰেগত্থায কতে মহাৰংসে

ততো ¶ লঙ্কাভিসেকং সো, পত্ৰা সেনো কমাগতং;

মহিন্দস্সাদিপাদস্স, যুৰরাজপদং অদা.

পঞ্ঞো মহাকৰী ব্যত্তো, মজ্ঝত্তো মিত্তসত্তুসু;

যুত্তো দযায মেত্তায, রাজা সো সব্বদা অহু.

কালং দেৰো’নতিক্কম্ম, সম্মা ধারাভিৰস্সতি;

রট্ঠে তস্মিং ৰসন্তা’সুং, সুখিতা নিব্ভযা সদা.

সুত্তন্তং লোহপাসাদে, নিসিন্নো ৰণ্ণযী তদা;

নিকাযত্তযৰাসীহি, রাজা সো পরিৰারিতো.

দাঠধাতুকরণ্ডং সো, নানারতনভূসিতং;

অকা চতুৰিহারেসু, ধাতুপূজা চ’নেকধা.

পরিৰেণং সিত্থগামং, কারেত্ৰা ৰুত্থমত্তনা;

লোকং পুত্তংৰ পালেত্ৰা, তিৰস্সেন দিৰঙ্গতো.

যুৰরাজা মহিন্দো সো, রাজাসি তদনন্তরং;

মহাপুঞ্ঞো মহাতেজো, মহাসেনো মহাযসো.

একচ্ছত্তং অকা লঙ্কং, ঘাতেত্ৰা চোরুপদ্দৰং;

অকংসু তমুপট্ঠানং, নিচ্চমণ্ডলনাযকং.

ৰিজ্জমানেপি লঙ্কাযং, খত্তিযানং নরাধিপো;

কালিঙ্গচক্কৰত্তিস্স, ৰংসে জাতং কুমারিকং.

আণাপেত্ৰান তং অগ্গ-মহেসিং অত্তনো অকা;

তস্সা পুত্তা দুৰে জাতা, ধীতা একা মনোরমা.

আদিপাদে অকা পুত্তে, ধীতরং চোপরাজিনিং;

ইতি সীহল়ৰংসঞ্চ, পট্ঠপেসি সভূপতি.

বলকাযং ইমং দেসং, মদ্দনত্থায ৰল্লভো;

পেসেসি নাগদীপং সো, সুত্ৰা তং ভূপতি ইধ.

বলং ¶ দত্ৰান সেনৰ্হ-রাজসেনাপতিং তদা;

ৰল্লভস্স বলেনে’স, যুজ্ঝিতুং তত্থ পেসযি.

গন্ত্ৰা সেনাপতী তত্থ, বলেনে’তস্স রাজিনো;

যুজ্ঝিত্ৰা তং ৰিনাসেত্ৰা, গণ্হি সো যুদ্ধমণ্ডলে.

অসক্কেন্তো ইমং জেতুং, রাজা নং ৰল্লভাদযো;

রাজানো মিত্তসম্বন্ধং, লংকিন্দেন অকংসু তে.

ইচ্ছেৰং রাজিনো তেজো, জম্বুদীপমৰত্থরি;

পত্থরিত্ৰান লংকাযং, উল্লঙ্ঘিত্ৰান সাগরং.

সদ্ধম্মং কথাযন্তানং, কত্ৰা সম্মা ন মুত্তমং;

ধম্মং সুত্ৰান সো রাজা, পসন্নো বুদ্ধসাসনে.

রাজা সো সন্নিপাতেত্ৰা, পংসুকূলিকভিক্খৰো;

যাচিত্ৰা অত্তনো গেহং, আণাপেত্ৰান সাধুকং.

আসনং পঞ্ঞপেত্ৰান, নিসীদাপিয ভোজনং;

দাপেসি ৰিপুলং সুদ্ধং, সদা একদিনে ৰিয.

অনেকব্যঞ্জনং রাজা-রঞ্ঞকানং তপস্সিনং;

পেসেসি ভোজনং সুদ্ধং, মহগ্ঘং ৰিপুলং সদা.

ৰেজ্জেৰ পেসযিত্ৰান, ৰিলানানং তপস্সিনং;

সন্তিকং সো দযাৰাসো, তিকিচ্ছাপেসি নিচ্চসো.

গুল়ানি ঘনপাকানি, লসুণানং রসানি চ;

তম্বুলমুখৰাসঞ্চ, পচ্ছভত্তে অদা সদা.

পত্তেসু পূরযিত্ৰান, লসুণং মরিচম্পি চ;

পিপ্ফলিসঙ্গীৰেরানি, গুল়ানি তিফলানি চ.

ঘতং তেলং মধুঞ্চায, পাপুরত্থরণানি চ;

পংসুকূলিকভিক্খূনং, পচ্চেকং সব্বদা অদা.

চীৰরাদীনি সব্বানি, পরিক্খারানি ভূপতি;

কারাপেত্ৰান দাপেসি, ভিক্খূনং পংসুকুলিনং.

রাজা মহাৰিহারস্মিং, একেকস্স হি ভিক্খুনো;

পচ্চেকং নৰৰত্থানি, চীৰরত্থায দাপযি.

নিকাযত্তযৰাসীনং, ভিক্খূনং লাভৰাসিনং;

তুলাভারমদা দ্ৰীসু, ৰারেসু সমহীপতি.

কথাপেত্ৰান বুদ্ধস্স, সরণানি গুণেনৰ;

অনাথেহি চ তেসঞ্চ, ভত্তৰত্থানি দাপযি.

দানসালং করিত্ৰান, হত্থিসালকভূমিযং;

যাচকানং অদা দানং, তেসঞ্চ সযনাসনং.

ৰেজ্জসালাসু সব্বাসু, ভেসজ্জং মঞ্চকঞ্চ সো;

চোরানং বন্ধনাগারে, নিচ্চং ভত্তানি দাপযি.

ৰানরানং ৰরহানং, মিগানং সুনখান চ;

ভত্তং পূৰঞ্চ দাপেসি, দযাৰাসো যথিচ্ছকং.

রাজা চতুৰিহারেসু, কত্ৰা সো ৰীহিরাসযো;

যথিচ্ছিতেন গণ্হন্তু, অনাথা ইতি দাপযি.

নানাপূজাহি পূজেত্ৰা, কত্ৰা মঙ্গলমুত্তমং;

কথাপেসি চ ভিক্খূহি, ব্যত্তেহি ৰিনযং তদা.

থেরেন ধম্মমিত্তেন-সিত্থগামকৰাসিনা;

পূজযিত্ৰান কারেসি, অভিধম্মস্স ৰণ্ণনং.

দাঠানাগা’ভিধানেন, থেরেনা’রঞ্ঞৰাসিনা;

লংকালংকারভূতেন, অভিধম্মং কথাপযি.

পট্টকঞ্চুকপূজাহি, হেমমালিকচেতিযং;

নচ্চগীতেহি গন্ধেহি, পুপ্ফেহি ৰিৰিধেহি চ.

দীপমালাহি ধূপেহি, পূজযিত্ৰান’নেকধা;

তস্স ৰত্থানি ভাজেত্ৰা, ভিক্খূনং দাপযী সযং.

সদা সো অত্তনো রজ্জে, উয্যানেসু তহিংতহিং;

আণাপেত্ৰান পুপ্ফানি, পূজেসি রতনত্তযং.

পাসাদং চন্দনং নাম, কাতুং মরিচৰট্টিযং;

অকারম্ভঞ্চ ভিক্খূনং ভোগগামে চ দাপযি.

কেসধাতুং নিধাপেত্ৰা, করণ্ডং রতনেহি সো;

কারযিত্ৰান পূজেসি, ঠপেত্ৰা তত্থ ভূপতি.

সোণ্ণরজতপট্টেহি ¶ , থূপারামম্হি চেতিযং;

ছাদাপেত্ৰা যথারজ্জং, পূজং কারেসি ভূপতি.

তস্মিং ধাতুঘরে রাজা, সোণ্ণদ্ৰারমকারযি;

পজ্জলন্তং সিনেরুংৰ, রংসীহি সূরিযস্স সো.

ঝাপিতং চোল়রাজস্স, বলেন পদলঞ্ছনে;

চতুন্নং চেতিযানং সো, রমনীযং ঘরং অকা.

ঝাতং নগরমজ্ঝম্হি, দাঠাধাতুঘরং অকা;

ধম্মসঙ্গণীগেহঞ্চ, মহাপাল়িঞ্চ ভূপতি.

তম্বূলমণ্ডপং কত্ৰা, তত্থ সুঙ্কং মহীপতি;

ভিক্খূনং থেরৰংসে সো, ভেসজ্জত্থায দাপযি.

উপস্সযং করিত্ৰান, মহামঙ্গলনামকং;

থেরৰংসম্হি জাতানং, ভিক্খুনীনং অদাপযি.

মাতুলোদযরাজেন, আরদ্ধং সাধুনা তদা;

নিট্ঠাপেসি মহীপালো, পাসাদং মণিনামকং.

পরিৰেণানি চত্তারি, তস্মিং জেতৰনে তদা;

কারাপযিংসু চত্তারো, অমচ্চা তস্স রাজিনো.

রঞ্ঞো কিত্তিসমাদেৰী, কিত্তিনামা মনোরমা;

পরিৰেণং অকারামং, থূপারামস্স পচ্ছতো.

সা তস্মিং পরিৰেণে চ, অকা কপ্পাসগামকে;

চীৰরচেতিযে চেৰ, তিস্সো পোক্খরণী সুচি.

দ্ৰাদসরতনাযামং, ধজং সোণ্ণমযঞ্চ সা;

পূজেসি পুঞ্ঞসম্ভারং, হেমমালিক চেতিযে.

গিহীনং ৰজ্জসালঞ্চ, পুত্তো তস্সা পুরেঅকা;

গুণৰাসক্কসেনানী, ভিক্খূনঞ্চ পুরাবহি.

রাজা চতুৰিহারেসু, দিব্বপাসাদসন্নিভে;

মণ্ডপে কারযিত্ৰান, ধাতুপূজা অনেকধা.

ৰস্সমেকমতিক্কম্ম, কারাপেত্ৰা মহীপতি;

চারিত্তং পুব্বরাজূনং, পরিপালেসি সাধুকং.

এৰমাদীনি পুঞ্ঞানি, উল়ারানি অনেকধা;

কত্ৰা সোল়সমে ৰস্সে, রাজা সো তিদিৰং গতো.

জাতো ¶ পটিচ্চ তং রাজং, সেনা দ্ৰাদসৰস্সিকো;

কালিঙ্গদেৰিযা পুত্তো, পত্তরজ্জো তদা অহু.

উদযস্স কনিট্ঠস্স, যুৰরাজপদং অদা;

পিতু সেনাপতি সেনো, তস্স সেনাপতি অহু.

পচ্চন্তং বলমাদায, গতে সেনাপতিম্হি সো;

মাতরা সহ ৰত্তন্তং, কণিট্ঠং তস্স ভাতরং.

মারাপেত্ৰা মহামল্লং, অকা সেনাপতিং তদা;

তং সুত্ৰা কুপিতো হুত্ৰা, সেনো সেনাপতি তদা;

বলমাদায আগঞ্ছি, গণ্হিস্সামীতি সত্তৰো.

সুত্ৰান তং মহীপালো, কতৰন্তং ৰাচমত্তনো;

রক্খামি তং অমচ্চন্তি, গতো নিক্খম্ম রোহণং.

তস্স মাযা নিৰত্তিত্ৰা, যুৰরাজঞ্চ রাজিনিং;

আদায কুপিতা তেন আণাপেসি চমূপতিং.

তায সো সঙ্গহীতোৰ, দমিল়ে সন্নিপাতিয;

দত্ৰা জনপদং তেসং, পুটত্থিনগরে ৰসী.

যুজ্ঝিতুং তেন সো রাজা, বলং পেসেসি রোহণা;

সেনাপতি ৰিনাসেসি, সব্বং তং রাজিনো বলং.

দমিল়া তে জনপদং, পীল়েত্ৰা রক্খসা ৰিয;

ৰিলুম্পিত্ৰান গণ্হন্তি, নরানং সন্তকং তদা.

খিত্তা মনুস্সা গন্ত্ৰান, রোহণং রাজসন্তিকং;

নিৰেদেসুং পৰত্তিং তং, মন্তেত্ৰা সচীৰেহি সো.

রক্খিতুং সাসনং রট্ঠং, তম্পহায চমূপতিং;

সন্ধিং কত্ৰান সেনেন, পুল়ত্থিনগরং অগা.

মহেসিং অত্তজং কত্ৰা, পালেতুং ৰংসমত্তনো;

পুত্তং উপ্পাদযিত্ৰান, কস্সপং নাম উত্তমং.

ৰসন্তে তত্থ লংকিন্দে, অহিতা ৰল্লভা জনা;

অলভন্তা সুরং পাতু-মারিযা তস্স সন্তিকে.

মজ্জপানে গুণং ৰত্ৰা, পাযেসুং তং মহীপতিং;

পিৰিত্ৰা মজ্জপানং সো, মত্তব্যাল়ো অহু তদা.

আহারানং ¶ খযং পত্ৰা, চজিত্ৰা দুল্লভং পদং;

মতো সো দসমে ৰস্সে, তরুণোযেৰ ভূপতি.

সুজনপ্পসাদসংৰেগত্থায কতে মহাৰংসেতি রাজকো নাম

মহিন্দো তং কণিট্ঠো সো, রাজপুত্তো তদচ্চযে;

উস্সাপিয সেতচ্ছত্ত-মনুরাধপুরে ৰরে.

সেন সেনানীনা’নীত দেসন্তরজনা কুলে;

তত্থ ৰাসমকপ্পেসি, কিচ্ছেন দসৰচ্ছরে.

অপেতনীতি মগ্গস্স, মুদুভূতস্স সব্বসো;

উপ্পাদভাগং নাদংসু, তস্স জানপদা তদা.

অচ্চন্তং খীণচিত্তো সো, ৰস্সম্হি দসমে ৰিভূ;

ৰুত্তিদানেন নাসক্খি, সঙ্গহেতুং সকং বলং.

অলদ্ধ ৰুত্তিনো সব্বে, কেরল়া সহিতা ততো;

ন ৰুত্তিদানং নো যাৰ, হোতি মাতাৰ ভুঞ্জতু.

ইতি রাজঘরদ্ৰারে, সাহসেকরসা ভুসং;

চাপহতা নিসীদিংসু, সন্নদ্ধছুরিকাযুধা.

হত্থসারং সমাদায, তে ৰিৰঞ্চিয ভূপতি;

উম্মগ্গতো ৰিনিগ্গম্ম, তুরিতো রোহণং অগা.

সীদুপব্বতগামম্হি ¶ , খন্ধৰারং নিবন্ধিয;

ভাতু জাযম্ম হেসিত্তে, ঠপেত্ৰা সো তহিং ৰসী.

ন চিরস্সেৰ তস্সায, মতা যসমহীপতি;

মহেসিত্তে নিৰেসেসি, সকভাতুস্স ধীতরং.

দেৰিযা তায সঞ্জাতে, সুতে কস্সপনামকে;

অজ্ঝাৰুত্তং ৰিহাযা’থ, খন্ধাৰারং মহীমতি.

কারযিত্ৰান নগরং, কপ্পগল্লকগামকে;

অধিপচ্চং পৰত্তেন্তো, রোহণে সুচিরং ৰসী.

ততো সেসেসু ঠানেসু, কেরল়া সীহল়া তদা;

কণ্ণাটা চ যথাকাম-মাধিপচ্চং পৰত্তযুং.

অথস্স ৰাণিজো একো, পরতীরং ইধাগতো;

গন্ত্ৰা পৰত্তিং লংকায, চোল়রঞ্ঞো নিৰেদযি.

সোতং সুণিত্ৰা পেসেসি, লংকাগহণমানসো;

বলং মহন্তং বলৰা, তং খিপ্পং লংকমোতরি.

পট্ঠাযো তিণ্ণঠানম্হা, ৰিহেঠেন্তং বহূ জনে;

অনুক্কমেন তং চোল়-বলং রোহণমজ্ঝগা.

ছত্তিংসে রাজিনো ৰস্সে, মহেসিং রতনানি চ;

মকুটঞ্চ কমাযাতং, সব্বমাভরণং তথা.

অমূলিকঞ্চৰজির-ৰলযং দেৰদত্তিযং;

অচ্ছেজ্জচ্ছুরিকং ছিন্ন-পট্টিকা ধাতুকঞ্চ তে.

পৰিট্ঠং ৰনদুগ্গম্হি, ভযাতঞ্চ মহীপতিং;

জীৰগ্গাহমগণ্হিংসু, সন্ধিলেসম্পদস্সিয.

মহীপালং ধনং তঞ্চ, সব্বং হত্থগতং ততো;

পেসযিংসু লহুং চোল়-মহীপালস্স সন্তিকং.

নিকাযত্তিতযে ধাতু-গব্ভে লংকাতলে খিলে;

মহারহে সুৰণ্ণাদি-পটিবিম্বে চ’নপ্পকে.

ভিন্দিত্ৰা সহসা সব্বে, ৰিহারে চ তহিং তহিং;

যথো জোহারিনো যক্খা, লঙ্কাযং সারমগ্গহুং.

তে চোল়া রাজরট্ঠং তং, পুলত্থিপুরনিস্সিতা;

রক্খপাসাণকণ্ডৰ্হ, ঠানাৰধিমভুঞ্জিসুং.

তং ¶ কুমারকমাদায, কস্সপং রট্ঠৰাসিনো;

ৰড্ঢেন্তি চোল়ভযতো, গোপযন্তা সুসাদরা.

চোল়রাজা কুমারং তং, সুত্ৰা দ্ৰাদসৰস্সিকং;

গহণত্থায পেসেসি, মহামচ্চে মহাবলে.

ঊনং পঞ্চসহস্সেন, যোধলক্খং সমাদিয;

সব্বং তে রোহণং দেসং, সঙ্খোভেসু মিতো ততো.

কিত্তিনামো’থ সচিৰো, মক্খকুদ্রূসৰাসিকো;

মুদ্ধনামো তথামচ্চো, মারগল্লকৰাসিকো.

উভোপি তে মহাৰীরা, যুদ্ধোপাযৰিচক্খণা;

চোল়সেনং ৰিনাসেতু-মচ্চন্তকতনিচ্ছযা.

পলুট্ঠগিরিনামম্হি, ঠানে দুগ্গে নিৰেসিয;

কত্ৰা ছমাসং সঙ্গামং, হনিংসু দমিল়ে বহূং.

হতাৰসিট্ঠা চোল়াতা, রণে তস্মিং ভযদ্দিতা;

পলাযিত্ৰা যথাপুব্বং, পুলত্তিপুরমাৰসুং.

কুমারো জযিতো দিস্ৰা, উভো তে সচিৰে তদা;

হট্ঠতুট্ঠো ‘‘ৰরং তাতা, গণ্হথা’’তি স চব্রৰী.

বুদ্ধো পৰেণিগামং সো, ৰরং যাচিত্থ কিত্তিকো;

সঙ্ঘিকং গহিতং ভাগং, ৰিস্সজ্জেতুং ৰরং ৰরি.

রাজপুত্তৰরালদ্ধ-ৰরা’মচ্চৰরা তদা;

নিদ্দরা সাদরা ৰীরা, পাদে ৰন্দিংসু তস্স তে.

রাজা দ্ৰাদসৰস্সানি, ৰসিত্ৰা চোল়মণ্ডলে;

অট্ঠতালীসৰস্সম্হি, মহিন্দো সো দিৰংগতো.

সুজনপ্পসাদসংৰেগত্থায কতে মহাৰংসে

কত্ৰা ¶ ৰিক্কম্ম বাহূ’তি, নাম ভূপালসূনুতো;

তস্সাণায পৰত্তিংসু, সাদরং সীহল়া খিলা.

সো রাজা দমিল়ে হন্তুং, ধনং সঞ্চিয’নেকাধা;

সঙ্গহং সেৰকানঞ্চ, কুরুমানো যথোচিতং.

অলঙ্কারকিরীটানি, ছত্তসীহাসনানি চ;

কারযিত্ৰা’ভিসেকত্থং, সচিৰেহা’ভিযাচিতো.

ন যাৰ রাজরট্ঠস্স, গহণং হোতি তাৰ মে;

ছত্তুস্সাপনকম্মেন, কিং তেনা’তি ৰিৰারিয.

সতং নরসহস্সানং, সঙ্কলেত্ৰা মহব্বলো;

সঙ্গামারব্ভ কালম্হি, ৰাতরোগাভিপীল়িতো.

যুজ্ঝিতুং সমযো নেতি, দ্ৰাদসে ৰচ্ছরে লহুং;

উপেচ্চ দেৰনগরং, গঞ্ছিদেৰসহব্যতং.

কিত্তিনামো চ সচিৰো, সেনাপচ্চমধিট্ঠিতো;

রজ্জত্থিকো দিনানট্ঠ, নিজাণং সম্পৰত্তযি.

ঘাতেত্ৰা তং মহালান-কিত্তিনামো মহব্বলো;

পত্ৰা’ভিসেকং ভুঞ্জন্তো, দেসং তং রোহণৰ্হযং.

সংৰচ্ছরম্হি ততিযে, চোল়যুদ্ধে পরাজিতো;

সহত্থেন সকং সীসং, ছিন্দিত্ৰা সহসা মরি.

তদাপিতে কিরীটাদি-ধনসারং সমাদিয;

পেসেসুং দমিল়া চোল়-মহীপালস্স সন্তিকং.

ভযা সরট্ঠং হিত্ৰা’থ, দুট্ঠদেসে ৰসং তদা;

একো ৰিক্কমপণ্ডূতি, ৰিস্সুতো পত্থিৰত্তজো.

ৰিঞ্ঞাতলঙ্কাৰুত্তন্তো, দেসমাগম্ম রোহণং;

কাল়তিত্থে ৰসং ৰস্স-মেকং রজ্জমকারযি.

রামন্ৰযসমুব্ভূতো ¶ , তদাযুজ্ঝ পুরাগতো;

জগতী পালনামেন, ৰিস্সুতো ভূভুজত্তজো.

রণে ৰিক্কমপণ্ডুতং, ঘাতাপেত্ৰা মহব্বলো;

ততো চত্তারি ৰস্সানি, রজ্জং কারেসি রোহণে.

তম্পি চোল়ারণে হন্ত্ৰা, মহেসিং ধীতরা সহ;

ৰিত্তসারঞ্চ সাকলং, চোল়রট্ঠমপেসযুং.

রাজা পরক্কমো নাম, পণ্ডুরাজসুতো ততো;

অকা ৰস্সদ্ৰযং চোল়া, ঘাতেসুং তম্পি যুজ্ঝিয.

সুজনপ্পসাদসংৰেগত্থায কতে মহাৰংসে

লোকনামো চমূনাথো, মক্খকুদ্রূসৰাসিকো;

সচ্চপটিঞ্ঞো ধীতিমা, চোল়দপ্পৰিঘাতনো.

অভিভূয জনে পত্ৰা, রজ্জং রোহণমণ্ডলে;

ৰসী কাজরগামম্হি, চারিত্তৰিধিকোৰিদো.

অহু তদা কিত্তিনামো, রাজপুত্তো মহব্বলো;

তস্স ৰংসাদিসম্পত্তী, নুপুব্বেন পৰুচ্চতে.

সুতো কস্সপভূপস্স, মাণনামেন ৰিস্সুতো;

আদিপাদো অহু ধীরো, সদাচারৰিভূসিতো.

তস্সা’থ ¶ জেট্ঠকো ভাতা, মাণৰম্মো মহামতি;

গোকণ্ণকসমীপট্ঠ-নদীতীরে নিসীদিয.

কতমন্তুপচারো সো, যথাৰিধিমসেসতো;

অক্খমালং গহেত্ৰান, মন্তং জপ্পিতুমারভি.

কুমারো কির ভত্তগ্গে, পাতুরাসি সৰাহনো;

সিখণ্ডি মুখতুণ্ডেন, বলিপট্টং ৰিখণ্ডিয.

সচ্ছিদ্দকে নাল়িকের-কপালে ৰিচ্চুনোদকে;

লূখে জলমপস্সন্তো, জপন্তস্স মুখংগতো.

ততো ভাৰিনিং সিদ্ধি, মপেক্খং নযনং সকং;

তস্সোপনেসি, নিব্ভিজ্জ, সোপি তং সহসাপিচি.

কুমারো তস্স সন্তুট্ঠো, কুমারস্সাভিপত্থিতং;

ভিন্নেকনযনং দিস্ৰা, সচিৰাতং পরো দিসুং;

ৰরলাভং পকাসেত্ৰা, সমস্সাসেসি সো জনে.

ততো সো সচিৰাতস্স, সন্তুট্ঠারাধযিংসু তং;

অনুরাধপুরং পত্ৰা, ভিসেকো কারিযো ইতি.

অত্থো কো মমরজ্জেন, ৰিকলঙ্গস্স সম্পতি;

তপোকম্মং করিস্সামি, পব্বজ্জমুপগম্মহং.

কণিট্ঠো মাণনামো চ, লঙ্কারজ্জং কমাগতং;

পালেতু ইতি সো রজ্জং, সম্পত্তং সম্পটিক্খিপি.

ৰিঞ্ঞাতচিত্তসঞ্চারা, সচিৰা তস্স সব্বথা;

ৰত্তুমেতং কণিট্ঠস্স, পেসেসুং পুরিসে তদা.

সুত্ৰা তং সীঘমাগম্ম, পস্সিত্ৰা সকভাতরং;

পতিত্ৰা পাদমূলম্হি, বহুং কন্দিয রোদিয.

জেট্ঠেন ভাতরা সদ্ধি-মনুরাধপুরং গতো;

মকুটং তত্থ ধারেসি, জেট্ঠচিত্তানুৰত্তকো.

ততো’ভযগিরিং গন্ত্ৰা, পব্বজ্জং সকভাতুনো;

যত যো তত্থ যাচিত্থ, বহুমানপুরস্সরং.

ততো তে যতযো তস্স, পব্বজ্জমুপসম্পদং;

অকংসু ৰিকলঙ্গস্স, সিক্খাপদনিরাদরা.

পরিৰেণমুত্তরোল়-মুল়ারং ¶ তস্স কারিয;

কত্ৰা তং পরিৰেণস্স, সামিকং ধরণী পতি.

ভিক্খূনং ছসতং তত্থ, ৰিধায তদধীনকং;

পরিহারে অদা তস্স, পেস্সৰগ্গে চ পঞ্চ সো.

সমপ্পেসি চ সো নানা-সিপ্পকম্মৰিচক্খণে;

জনে চাকা তদাযত্তে, সো দাঠাধাতুরক্খিযে.

তস্সেৰাদকরা’হেসুং, ভিক্খূ’ভযগিরিম্হি তে;

রাজা চ লোকং পালেসি, সম্মা তস্সানুসিট্ঠিযা.

জনা তব্বংসজা কেচি, তং রজ্জনিরপেক্খকা;

নিৰসিংসু যথাকামং, মহাসামি পদংসিতা.

এতস্স মাণৰম্মস্স, রঞ্ঞো ধম্মনযঞ্ঞুনো;

অগ্গবোধিকুমারাদি-পুত্তনত্তুক্কমাগতে.

ৰংসে ৰিসুদ্ধে জাতস্স, ভূপালন্ৰযমুদ্ধনি;

সমাসোল়সকঙ্কাযং, সম্মা রজ্জানুসাসিনো.

মহীপস্স মহিন্দস্স, দুৰে মাকুলধীতরো;

দেৰলা লোকিকা চাতি, নামতো ৰিস্সুতা সুভা.

এতাসু দ্ৰীসু ধীতাসু, লোকিকা মাতুলত্তজং;

পটিচ্চ রাজতনযং, সুভং কস্সপনামকং.

সা মোগ্গল্লান লোকৰ্হে, পুত্তে দ্ৰে লভি সোভনে;

তেসু জেট্ঠসুতো লোক-সাসনাধারকোৰিদো.

মহাসামীতি পঞ্ঞাতো, সঙ্ঘুপাসনপালযো;

নেকসারগুণাৰাসো, ৰাসং কপ্পেসি রোহণে.

দাঠোপতিস্স রাজস্স, নত্তা সুগতসাসনে;

পব্বজ্জূপগতো সদ্ধো, ধুতৰা সীলসংৰুতো.

পহিতত্তো ৰিচিত্তোসো, পন্তসেনাসনে ৰসী;

গুণং সব্বত্থ ৰণ্ণেসুং, তস্মিং দেৰা পসীদিয.

গুণং সুণিত্ৰা লংকিন্দো, তদা সব্বত্থ পত্থটং;

উপসঙ্কম্ম তং নত্ৰা, কাতুমত্তানুসাসনং.

আরাধযমনিচ্ছন্তং, যাচিত্ৰান পুনপ্পুনং;

আনীয ৰাসযিত্ৰা তং, পাসাদে সাধুকারিতে.

যতিস্সরস্স ¶ ৰসতো, কত্থ রাজাগুণপ্পিযো;

তস্সানুসিট্ঠিমগ্গট্ঠো, লোকং ধম্মেন পালযি.

উদ্দিস্সারাধনং সম্মা, লংকিন্দেন কতং তদা;

সেলন্তরাভিনিক্খম্ম, যতিন্দো সো দযানুগো.

যতো ভিক্খূ সমূহেত্ৰা, ৰাসং কপ্পেসি যত্থ সো;

সেলন্তরসমূহো’তি, ৰিক্খ্যাতিং সো ততো গতো.

ততো পট্ঠায ৰাসেত্ৰা, রত্তিযং দেৰপল্লিযং;

দেৰতানুমতং ভিক্খুং, মূলঠানে ঠপেন্তি হি.

মূলত্তমাৰসন্তানং, যতীনমনুসাসনা;

লংকিস্সরা পৰত্তন্তি, পালেন্তা লোকসাসনং.

তস্স দাঠোপতিস্সস্স, ৰংসজং রাজপুত্তকং;

বোধিং পটিচ্চ তব্বংসা, বুদ্ধনামা কুমারিকা.

অলত্থ লোকিতং নাম, ধীতরং ৰরলক্খণং;

কালেন সা পদিন্না’সি, মোগ্গল্লানস্স ধীমতো.

সা তং পটিচ্চ কিত্তিঞ্চ, মিত্তং নাম কুমারিকং;

মহিন্দং রক্খিতং চাপি, লতিত্থ চতুরো পজা.

অহু জেট্ঠসুতো ধীরো, ৰীরো তেরসৰস্সিকো;

কতহত্থো ৰিসেসেন, ধনুসিপ্পম্হি সো ততো.

কথং লঙ্কং গহেস্সামি, দূরেত্ৰা’রাতি কণ্টকং;

ইতি চিন্তাপরোগামে, মূলসালৰ্হযে ৰসী.

একো মহাবলো ৰীরো, বুদ্ধরাজোতি ৰিস্সুতো;

ৰিলোমৰত্তী হুত্ৰান, লোকসেনানিনো তদা.

পলাতো চুণ্ণসালৰ্হং, খিপ্পং জনপদং তহিং;

কিত্তাদিকে জনে নেকে, ৰসে ৰত্তিয সব্বথা.

সদ্ধিং বন্ধূহি সঙ্গাম-সূরেহি বহুকেহি সো;

মলযাচলপাদেসু, ৰসী দুপ্পসহো তদা.

তস্স’ন্তিকমুপাগম্ম, সংৰচ্ছরিকনাযকো;

সঙ্ঘো নাম কুমারস্স, সরূপং সাধুৰং ব্রৰি.

মহাসামিস্স তনযো, জেট্ঠো কিত্তি সনামকো;

ধঞ্ঞলক্খণসম্পন্নো, সম্পন্নমতিৰিক্কমো.

জম্বুদীপেপি ¶ তং রজ্জং, কত্তুমেকাতপত্তকং;

সমত্থোতি ৰিচিন্তেপি, লঙ্কাদীপম্হি কা কথা.

তস্স সো ৰচনং সুত্ৰা, সেৰিতব্বো কুমারকো;

ইতি নিচ্ছিয পেসেসি, কুমারস্স’ন্তিকং জনে.

সুণিত্ৰা সো ৰচো তেসং, নিৰত্তনভযা ৰিভূ;

অজানহং পিতুন্নং সো, ৰীরো ধনুসহাযকো.

গেহা নিক্খম্ম পস্সন্তো, সুনিমিত্তানিনেকধা;

অগালহুং সরীৰগ্গ-পিট্ঠিগামং মহামতি.

তহিং সো নিৰসং ৰীরো, পেসযিত্ৰা সসেৰকে;

ৰিপক্খাধিট্ঠিতং জেসি, বোধিৰালৰ্হগামকং.

ততো’ভিমানী সেনানী, সেনং সো তত্থ পেসযি;

সা পরিক্খিপতং গামং, সঙ্গামায সমারভী.

কুমারো তেহি যুজ্ঝন্তো, সুভটো পটুৰিক্কমো;

দিসাসু ৰিকিরীসব্বে, তুলং চণ্ডোৰ মাল়ুতো.

চুণ্ণসালং জনপদং, গন্ত্ৰা ঠানৰিদূ তদা;

তহিং ৰসং ৰসেকাসি, সব্বং মলযমণ্ডলং.

তদাপি সেনং সেনিন্দো, পেসেত্ৰা অসকিং সকং;

অভিভূতিমসক্কোন্তো, কাতুং দুম্মনতং গতো.

মক্খকুদ্রুসৰাসিস্স, সচিপস্সাথ কিত্তিনো;

সুতো মহব্বলো দেৰ-মল্লোতি ৰিদিতো তদা.

সহিতো বন্ধুমিত্তেহি, বহূ রোহণৰাসিনো;

সমাদাযা’ভিগন্ত্ৰান, কুমারং পস্সি সাদরো.

বন্ধিয ছুরিকং ছেকো, সো পন্নরসৰস্সিকো;

আদিপাদপদং তত্থ, সম্পাপুণি মহাযসো.

ততো হিরঞ্ঞমলয, মুপাগম্ম মহব্বলো;

তহিং রেমুণসেলম্হি, খন্ধাৰারং নিবন্ধযি.

তত্থাপি সেনং পেসেত্ৰা, সঙ্গামেন্তো চমূপতি;

অলদ্ধৰিজযো ছন্দং, পুনযুদ্ধে জহিততো.

লোকনামো চমূনাথো, লোকং হিত্ৰা সকং তদা;

অহু ৰস্সম্হি ছট্ঠেসো, পরলোকপরাযনো.

তদা ¶ কস্সপনামেকো, কেসধাতুকনাযকো;

জনে’ভিভূযৰত্তেসি, নীজাণং রোহণে তদা.

সুত্ৰা তং চোল়সামন্তো, পুল়ত্থিনগরা তদা;

নিক্খম্ম যুদ্ধসনদ্ধো, গন্ত্ৰা কাজরগামকং.

কেসাধাতু ততো যুদ্ধে, ভিন্দিত্ৰা দমিল়ং বলং;

রক্খপাসাণসীমাযং, ঠপেত্ৰা রক্খিযে জনে.

পটিলদ্ধজযুদ্দামো, মহাসেনা পুরক্খতো;

পুনরাগম্ম পাৰেক্খি, ৰীরো কাজরগামকং.

তদাদিপাদো সুত্ৰান, সব্বং সুত্থীরধাতুকো;

কেসধাতুং নিঘাতেতুং, বলং সন্নয্হি ৰেগসা.

পৰত্তিং তং সুণিত্ৰা সো, সাভিমানো ভুসংততো;

সমত্তং বলমাদায, সিপ্পত্থলকমাগমা.

পঞ্চযোজনরট্ঠাদি-ৰাসিকেসু বহূজনে;

সমাদায সমাসন্নে, রাজপুত্তে সুদুজ্জযে.

ৰিরত্ততঞ্চ সো ঞত্ৰা, বহুন্নং রট্ঠৰাসিনং;

দুক্করং এত্থ যুদ্ধন্তি, গতো সো খদিরঙ্গণিং.

মহাসেনায ভূপাল সুতো সোল়সৰস্সীকো;

খিপ্পং ৰাপেক্খি সো ৰীত-দরো কাজরগামকং.

ছম্মাসমনুভোত্ৰান, রোহণং রুট্ঠমানসো;

কেসধাতুকনাথোপি, সঙ্গামত্থায তত্থগা.

রাজপুত্তস্স সেনা’থ, ৰত্তেন্তি সমরং খরং;

কেসধাতুকনাথস্স, সীসং গণ্হি মহব্বলা.

সব্বত্থ পত্থটমহাযসকিত্তিতেজো;

সুমাদিনেক ৰিধিযোগৰিসেসদক্খো;

সুজনপ্পসাদসংৰেগত্থায কতে মহাৰংসে

যুৰরাজপদে ¶ তস্স, ঠিতস্সা’থ নযঞ্ঞুনো;

অহূ ৰিজযবাহূতি, নামং সব্বত্থ পাকটং.

মহাঞ্ঞণো নিজাণায, তত্থ ভেরিং চরাৰিয;

ঠপেন্তো সচিৰে’নেকে, পতিরূপে পদন্তরে.

চোল়ানং মদ্দনত্থায, রাজরট্ঠাধিৰাসিনং;

চতুরো চতুরোপাযে, যো জযং তত্থ সো ৰসী.

চোল়রাজা সুণিত্ৰা তং, পুল়ত্থিনগরে ঠিতং;

সেনাপতিম পেসেসি, দত্ৰান বলৰাহনং.

সেনিন্দং কাজরগ্গাম-সমীপং সমুপাগতং;

দুপ্পসয্হং ৰিদিত্ৰান, গিরিদুগ্গমগা ততো.

সেনিন্দো কাজরগ্গামং, ৰিলুম্পিত্ৰান ৰেগসা;

তত্থ ৰত্থুমসক্কোন্তো, সদেসং পুন রাগমি.

ততো মহাদিপাদো’পি, আগম্ম মলযা লহুং;

মহতা বলকাযেন, সিপ্পত্থলকমাৰসি.

রাজা রামঞ্ঞৰিসযে, রাজিনো সন্তিকং জনে;

পেসেসি বহুকেসারং, ধনজাতঞ্চ’নপ্পকং.

ৰিচিত্তৰত্থকপ্পূর-চন্দনাদীহি ৰত্থূহি;

পরিপুণ্ণা চ নাৰাযো, নেকাতিত্থে সমোসটা.

ধনজা তেহি নেকেহি, করোন্তো ভটসঙ্গহং;

ততো তম্বলগামম্হি, নিৰসিত্থ মহব্বলো.

অঞ্ঞমঞ্ঞৰিরুদ্ধত্তা, রাজারট্ঠাধিৰাসিনো;

উপগ্গম্ম জনা সব্বে, করং নো দেন্তি সব্বসো.

ৰিপক্খাচোল়রাজস্স, ভিন্দন্তা’ণং মদুদ্ধতা;

আযুত্তকে ৰিহিংসেন্তো, যথাকামং চরন্তি চ.

তং ¶ সুত্ৰা চোল়ভূপালো, সম্পকোপৰসীকতো;

সেনং মহন্তিং দত্ৰান, পেসেসি সচিৰং নিজং.

মহাতিত্থে’ৰহিণ্ণো সো, তত্থ তত্থ বহূজনে;

ঘাতেন্তো সৰসে কত্ৰা, রাজারট্ঠাধিৰাসিনো.

অনুক্কমেন গন্ত্ৰান, খরাণো রোহণং তদা;

অজ্ঝোত্থরি সসেনো স, ভিন্নো ৰেলোৰসাগরো.

রঞ্ঞো পচ্চত্থিকা হুত্ৰা, রৰিদেৰচলৰ্হযা;

উভো দমিল়সেনিন্দ-ৰসং যাতা মহব্বলা.

মহাপক্খবলোপেতে, তে পস্সিয চমূপতি;

রোহণং সকলং খিপ্পং, মঞ্ঞিত্থ সকহত্থগং.

একাদসম্হি সো ৰস্সে, রাজা চোল়াভিভূতিযা;

পলুট্ঠপব্বতে দুগ্গং, পৰিধায তহিং ৰসী.

চোল়সেনা তদাসেলং, সমন্তা সম্পরিক্খিপি;

তত্থো’ভযেসং সেনান-মহূ ভিংসনকং রণং.

রঞ্ঞো ভটা ৰিনাসেত্ৰা, সব্বং তং দমিল়ং বলং;

পলাযন্তং মহাচোল়-সামন্তঞ্চানুবন্ধিয.

গহেত্ৰান সিরং তস্স, গামস্মিং তম্বৰিট্ঠিকে

সদ্ধিং ৰাহনযানেহি, সারভূতধনেহি চ.

তহিং তং সকলং ভণ্ডং, নেত্ৰা রঞ্ঞো পদস্সিয;

পুল়ত্থিনগরং গন্তুং, কালো ইতি সমব্রৰুং.

মহীপালোপি তং সুত্ৰা, সচিৰানং ৰচো তদা;

মহতা বলকাযেন, পুলত্থিনগরং গতো.

পৰত্তিমেতং সকলং, সুত্ৰা চোল়নরিস্সরো;

তিব্বকোপৰসংযাতো, ভূপালগহণত্থিকো.

সামং খিপ্পং সমাগম্ম, ৰীরো সাগরপট্টনং;

ভিয্যোপি মহতিং সেনং, লংকাদীপমপেসযী.

তং ৰিজানিয ভূমিন্দো, সেনিন্দং পেসযী সকং;

বলং মহন্তং দত্ৰান, চোল়সেনায যুজ্ঝিতুং.

গচ্ছমানো চমূনাথো, সো’নুরাধপুরন্তিকে;

সদ্ধিং দমিল়সেনায, ৰত্তেসি তুমুলং রণং.

পতিংসু ¶ তস্মিং সঙ্গামে, ভূপালস্স নরা বহূ;

ভিয্যোপি দমিল়াযত্তা, জাতা তং রট্ঠৰাসিনো.

ৰিহায ধরণীপালো, পুলত্থিনগরং তদা;

ৰিল্লিকাবাণকং রট্ঠং, সম্পাপুণিয ৰেগসা.

নিহচ্চামচ্চযুগলং, তং রট্ঠাধিট্ঠিতং তদা;

তহিং ৰাসমকপ্পেসি, সভটে সন্নিপাতযং.

অত্তানমনুবন্ধন্তং, সুত্ৰা চোল়চমূপতিং;

গন্ত্ৰা ৰাতগিরিং নাম, সমযঞ্ঞূ সিলুচ্চযং.

উপচ্চকায সেলস্স, তত্থ দুগ্গং নিৰেসিয;

রণং করোন্তো তেমাসং, দমিল়ে পটিবাহযি.

কেসধাতুকনাথস্স, মারিতস্স পুরারণে;

ভাতা কণিট্ঠো সম্পত্ত, মহাপক্খবলো তদা.

মারণং সকভাতুস্স, সরন্তো রুট্ঠমানসো;

সকলং পরিৰত্তেসি, গুত্তহালকমণ্ডলং.

অথো লংকিস্সরো তত্থ, খিপ্পং গন্ত্ৰা মহব্বলো;

ঠানে মচ্চুত্থলে নাম, খন্ধাৰারং নিবন্ধিয.

খদিরঙ্গণিদুগ্গম্হা, পলাপেত্ৰান তং রণে;

ঠানা কুবুলগল্লা চ, যুজ্ঝন্তো তং পলাপযি.

ৰিহায পুত্তদারাদি-সব্বং নেকধনং বলং;

পলাযমানো সো রট্ঠং, চোল়াযত্ত মগালহুং.

তদা নরিস্সরো তত, তস্স সব্বং সমাদিয;

গন্ত্ৰা তম্বলগামম্হি, নৰং দুগ্গং নিৰেসিয.

অনুক্কমেন গন্ত্ৰান, মহানাগহুলৰ্হযে;

পুরেৰসী সুসজ্জেন্তো, বলং চোল়েহি যুজ্ঝিতুং.

ততো রাজা সমৰ্হায, সচীৰে দ্ৰে মহব্বলে;

পেসেসি দিক্খিণং পস্সং, ৰসং নেতুং তহিং জনে.

সম্পেসেসি মহামচ্চ-যুগলং কক্খলং ৰিভূ;

চোল়দপ্পৰিনাসায, ততো ৰেলা মহাপথে.

পেসিতা দক্খিণং পস্সং, অমচ্চা’মে মহব্বলা;

মুহুন্নরুগ্গমদুগ্গং, বদল়ত্থলমেৰ চ.

ৰাপীনগরদুগ্গঞ্চ ¶ , বুদ্ধগামকমেৰ চ;

তিলগুল্লং মহাগল্লং, মণ্ডগল্লকমেৰ চ.

অনুরাধপুরঞ্চাতি, গহেত্ৰান কমেন তে;

ৰত্তেন্তা সৰসে রট্ঠং, মহাতিত্থমুপাগতা.

পেসিতা সচিৰাদ্ৰেতু, ততো ৰেলা মহাপথে;

ৰিলুম্পন্তা ছগামাদি-খন্ধাৰারে তহিং তহিং.

পুলত্থিনগরাসন্নং, কমেনা’গম্ম পেসযুং;

দূতে রাজন্তিকখিপ্প-মাগন্তুং ৰট্টতীতিহ.

দিসাসা দ্ৰীসু যানেহি, সচিৰেহি পৰত্তিতং;

ৰিক্কমাতি সযং সুত্ৰা, কালঞ্ঞূ সো মহীপহি.

সীঘং সন্নয্হ সেনঙ্গং, সমগ্গং ৰিদিকোৰিদো;

উম্মূলনাযচোল়ানং, পুরাতম্হা’ভিনিক্খমি.

গচ্ছং গঙ্গায মহিয-ঙ্গণথূপন্তিকে ৰিভূ;

সেনানিৰেসং কারেত্ৰা কঞ্চিকালং তহিং ৰসী.

কমেনাগম্ম ঠানঞ্ঞূ, পুল়ত্থিনগরন্তিকে;

বন্ধাপেসি মহাৰীরো, খন্ধাৰারং থিরং ৰরং.

তত্থ তত্থ ঠিতা সূরা, চোল়া যে কক্খলা’খিলা;

পুলত্থিনগরে যুদ্ধং, কাতুং সন্নিপতিংসু তে.

নিক্খম্ম নগরা গন্ত্ৰা, চোল়া বহি মহারণং;

কত্ৰা পরাজিতা ভীতা, পৰিস্স নগরং সকং.

গুত্তা সেসপুরদ্ৰারা, গোপুরট্টালনিস্সিতা;

মহাহৰং বহুস্সাহা, পৰত্তেসুং ভযাৰহং.

দিযড্ঢমাসং যুজ্ঝন্তি, নগরং তমুপরুন্ধিয;

সাধেতুং নেৰসা’সক্খি, ভূপালস্স মহাচমূ.

মহারঞ্ঞো মহাৰীরা, মহাসূরা মহব্বলা;

উল্লঙ্ঘিত্ৰান পাকারং, পৰিস্স সহসা পুরং;

খণেন দমিল়ে সব্বে, মূলঘচ্চমঘাতযুং.

এৰং লদ্ধজযো রাজা, তদা ৰিজযবাহুসো;

চরাপেসি নিজাণায, ভেরিং ভূরিমতিপুরে.

তং ¶ সুত্ৰা সকসেনায, ৰিনাসং চোল়ভূপতি;

সীহল়া বলৰন্তোতি, ভিয্যো সেনং ন পাহিণি.

ৰীরো অসেসনিহতুদ্ধট চোল়সেট্ঠো;

ৰিঞ্ঞূ সুসাধুট্ঠপিতাখিলরাজরট্ঠো;

ইট্ঠন্নুরাধপুরসেট্ঠমতীৰ হট্ঠো;

ৰস্সম্হি পঞ্চদসমে গমি রাজসেট্ঠো.

সুজনপ্পসাদসংৰেগত্থায কতে মহাৰংসে

লঙ্কারক্খায সচিৰে, বলিনো যোধসম্মতে;

পটিপাটিং সমুদ্দিস্স, সমন্তা সন্নিযোজযি.

অভিসেকমঙ্গলত্থায, পাসাদাদিমনেকতং;

কিচ্চং সম্পাদনীযন্তি, সচিৰং সন্নিযোজিয.

ৰন্দনীযে’ভিৰন্দন্তো, পদেসেনেককেতহিং;

নেত্ৰা মাসত্তযং গঞ্ছি, পুলত্থিনগরং পুন.

ৰিস্সুতো আদিমলয-নামেন বলনাযকো;

উজুপচ্চত্থিকো হুত্ৰা, মহীপালস্স সব্বসো.

গঙ্গা মত্থযু’পাগঞ্ছি, বলং সব্বং সমাদিয;

অন্দূতি ৰিস্সুতং মন্দ-পঞ্ঞো গামং পুরন্তিকে.

লংকিস্সরো তহিং গন্ত্ৰা, উদ্ধরিত্ৰা তমুদ্ধতং;

পুলত্থিনগরং গঞ্ছি, ৰসে ৰত্তিয তং বলং.

যুৰরাজপদংযেৰ, সিতো সন্তো লিখাপযি;

সো সত্তরসৰস্সানি, সপ্পঞ্ঞো নরসত্তমো.

ততো’নুরাধনগর-মভিগম্ম ¶ যথাৰিধিং;

অনুভোত্ৰা ৰিধানঞ্ঞূ, অভিসেকমহুস্সৰং.

অট্ঠিতো পাপধম্মেসু, সুট্ঠিতো সেট্ঠকম্মনি;

সো অট্ঠারসমং ৰস্সং, লিখাপযি সুসণ্ঠিতো.

ততো আগম্ম নিৰসি, পুলত্থিনগরে ৰরে;

সো সিরীসঙ্ঘবোধী’তি, নামধেয্যেন ৰিস্সুতো.

অনুজং সো ৰীরবাহু-মোপরজ্জে নিৰেসিয;

দত্ৰান দক্খিণং দেসং, তং সঙ্গণ্হি যথাৰিধিং.

কণিট্ঠস্সাথ ভাতুস্স, জযবাহুস্স ভূভুজো;

আদিপাদপদং দত্ৰা, রট্ঠং চা’দাসি রোহণং.

ঠানন্তরানি সব্বেস-মমচ্চানং যথারহং;

দত্ৰা রজ্জে যথাঞাযং, করং যোজেসি গণ্হিতুং.

চিরস্সং পরিহীনং সো, দযাৰাসো মহীপতি;

পৰত্তেসি যথাধম্মং, ঠিতধম্মো ৰিনিচ্ছযং.

এৰং সমুদ্ধটানেক, রিপুকণ্টকসঞ্চযে;

নিচ্চং রজ্জং পসাসেন্তে, লঙ্কংসম্মানরিস্সরে.

ছত্তগ্গাহকনাথো চ, ধম্মগেহকনাযকো;

তথেৰ সেট্ঠিনাথো চ, ইচ্চেতে ভাতরো তযো.

রঞ্ঞো ৰিরোধিতং যাতা, ফলাতা জম্পুদীপকং;

লঙ্কং ৰীসতিমে ৰস্সে, একেনূনে সমোতরুং.

তে সব্বে রোহণং রট্ঠং, সব্বং মলযমণ্ডলং;

সব্বং দক্খিণপস্সঞ্চ, সহসা পরিৰত্তযুং.

নিপুণো রোহণং গন্ত্ৰা, তথা মলযমণ্ডলং;

নিঘাতেন্তো বহূ তত্থ, তত্থ পচ্চত্থিকে জনে.

সম্মাৰুপসমেত্ৰা তং, ঠপেত্ৰা সচিৰে তহিং;

দক্খিণো দক্খিণং দেসং, সযং গন্ত্ৰা মহব্বলো.

পেসেত্ৰা সমণীভাতু-ৰংসজং সচিৰং তদা;

গাহেত্ৰা সমরেঘোরে, ৰীরো তে সকৰেরিনো.

সমারোপিযসূলম্হি, লঙ্কং ৰিগতকণ্টকং;

কারেত্ৰান নিরাতঙ্কং, পুলত্থিপুরমাগমি.

ৰসন্তী ¶ চোল়ৰিসযে, জগতিপালরাজিনী;

চোল়হত্থা পমুঞ্চিত্ৰা, সদ্ধিং ধীতু কুমারিযা.

লীলাৰত্যাভিধানায, নাৰামারুয্হ ৰেগসা;

লংকাদীপম্হি ওতিণ্ণা, পস্সি লংকিস্সরং তদা.

সুত্ৰা ৰংসক্কমং তস্সা, সো ঞত্ৰা সুদ্ধৰংসতং;

লীলাৰতিং মহিসিত্তে, অভিসিঞ্চি নরিস্সরো.

সা তং পটিচ্চ রাজানং, মহেসী ধীতরং লভি;

নামং যসোধরাতি’স্সা, অকাসি ধরণী পতি.

মেরুকন্দররট্ঠেন, সদ্ধিং রাজা সধীতরং;

ৰীরৰম্মস্স পাদাসি, সা লভি ধীতরো দুৰে.

সমাননামিকা জেট্ঠা, সা মাতা মহিযা অহু;

সুগলা নামিকা আসি, তাসু দ্ৰীসু কণিট্ঠিকা.

কালিঙ্গধরণীপাল-ৰংসজং চারুদস্সনং;

তিলোকসুন্দরং নাম, সুকুমারং কুমারিকং.

কালিঙ্গরট্ঠতো রাজা, আণাপেত্ৰা চিরট্ঠিতিং;

নিজৰংসস্স ইচ্ছন্তো, মহেসিত্তে’ভি সেচযি.

সুভদ্দা চ সুমিত্তা চ, লোকনাথৰ্হযাপি চ;

রতনাৰলী রূপৰতী, ইতিমা পঞ্চ ধীতরো.

পুত্তং ৰিক্কমবাহুঞ্চ, সা লভী ধঞ্ঞলক্খণং;

সম্পত্তা সা পজৰুদ্ধিং, হরন্তি রাজিনো মতং.

ইত্থাগারেসু সেসেসু, ৰীতা সমকুলঙ্গনা;

গব্ভো জাতুমহীপালং, তং পটিচ্চ ন সণ্ঠহি.

অথেকদিৰসং রাজা, অমচ্চগণমজ্ঝগো;

পিলোকিযঠিভা সব্বা, ধীতরো পটিপাটিযা.

ধীতু নৰমৰসেসানং, ঠপেত্ৰা রতনাৰলিং;

ধঞ্ঞলক্খণসম্পন্ন-পুত্তস্সুপ্পত্তিসুচকং.

লক্খণং লক্খণঞ্ঞূ সো, অপস্সং পেমচেগৰা;

রতনাৰলিমাহূয, তস্সা মুদ্ধনি চুম্বিয.

তেজোগুণেহি ¶ চাগেহি, ধিযা সূরত্তনেন চ;

ভূতে চ ভাৰিনো চেৰ, সব্বে ভূপে’তিসাযিনো.

নিচ্চং লঙ্কং নিরাসঙ্ক-মেকচ্ছত্তকমেৰ চ;

পৰিধাতুং সমত্থস্স, সম্মাসাসনতাযিনো.

সোভনানেকৰত্তস্স, ইমিস্সা কুচ্ছিহেস্সতি;

পুত্তস্সুপ্পত্তিঠানন্তি, মুদুতো সো সমব্রৰি.

যাৰন্তস্সাপিখোচোল়-মহীপালস্স নেকসো;

কুলাভিমানী রাজা সো, অদত্ৰান কণীযসিং.

আণাপেত্ৰা পণ্ডুরাজং, ৰিসুদ্ধত্ৰযসম্ভৰং;

অনুজং রাজিনিং ৰস্স, মিত্তৰ্হযমদাসিসো.

সামাণভরণং কিত্তি, সিরী মেঘাভিধানকং;

সিরিৰল্লভনামঞ্চ, জনেসি তনযে তযো.

সুভদ্দ ৰীরবাহুস্স, সুমিত্তং জযবাহুনো;

মহতা পরিহারেন, পাদাসি ধরণী পতি.

অদাসি মাণাভরণে, ধীতরং রতনাৰলিং;

লোকনাথৰ্হযং কিত্তি সিরিমেঘস্স’দাসিসো.

রূপত্যভিধানায, ধীতুযো পরতাযহি;

সরীরিৰল্লভসাদা, সুগলৰ্হ কুমারিকং.

মধুকণ্ণৰভীমরাজ, বলক্কার সনামকে;

মহেসী বন্ধৰেরাজ-পুত্তে সীহপুরাগতে.

পস্সিত্ৰান পহীপালো, তদা সঞ্জাতপীতিকো;

তেসং পাদাসি পচ্চেকং, ৰুত্তিং সো অনুরূপকং.

তে সব্বে লদ্ধসক্কার সম্মানাধরণীপতিং;

আরাধযন্তা সসতং, নিৰসিংসু যথারুচিং.

এতেসং রাজপুত্তানং, সুন্দরিৰ্হং কণিট্ঠকং;

অদা ৰিক্কমবাহুস্স, নিজৰংসঠিতট্ঠিকো.

ভিয্যো ¶ ৰিক্কমবাহুস্স, ততো লীলাৰতিং সতিং;

সহ ভোগেন পাদাসি, তদা বন্ধু হিতেরতো.

সুজনপ্পসাদসংৰেগত্থায কতে মহাৰংসে

ৰিচিনিত্ৰা কুলীনে সো, জনে সব্বে সমাদিয;

সকারক্খায যোজেসি, যথাচারং মহীপতি.

উচ্চং পুলত্থিনগরে, পাকারং কারযী থিরং;

নেকগোপুরসংযুত্তং, যুধাকম্মসুরঞ্জিতং.

সমন্তাযতৰিত্থিণ্ণ-গম্ভীরপরিখাযুতং;

উচ্চপত্থণ্ডিলোপেতং, দুপ্পধংসমরাতিহি.

উপসম্পদকম্মস্স, গণপূরকভিক্খূনং;

অপ্পহোনেকভাৰেন, সাসনঠিতিমানসো.

অনুরুদ্ধনরিন্দস্স, সহাযস্সাথ সন্তিকং;

রামঞ্ঞৰিসযং দূতে, পেসেত্ৰা সহপাভতে.

ততো আণাপযিত্ৰান, পিটকত্তযপারগে;

সো সীলাদিগুণাৰাসে, ভিক্খৰো থেরসম্মতে.

তে উল়ারাহি পূজাহি, পূজযিত্ৰা নরিস্সরো;

পব্বজ্জা উপসম্পত্তি, কারযিত্ৰা অনেকসো.

পিটকত্তযঞ্চ বহুসো, কথাপেত্ৰা সৰণ্ণনং;

লঙ্কাযো’সক্কমানং সো, জোতযী জিনসাসনং.

পুতত্থিনগরস্সন্তো ¶ , পদেসস্মিং তহিং তহিং;

ৰিহারে কারযিত্ৰান, বহুকে সুমনোহরে.

ভিক্খৰো তত্থ ৰাসেত্ৰা, নিকাযত্তযৰাসিনো;

পচ্চযেহি উল়ারেহি, সন্তপ্পেসি চতূহিপি.

ফলিকত্থম্ভকচারু-পাকারপরিখাযুতং;

পঞ্চভূমকপাসাদ-পৰরে নো’পসোভিতং.

সমসন্তা ৰাসপন্তীহি, সুভাহি সুৰিরাজিতং;

নিরকিণ্ণমসম্বাধ ৰরভাসুর গোপুরং.

ৰিহারং কারযিত্ৰান, ৰত্থুত্তযপরাযনো;

নিকাযত্তযৰাসিস্স, ভিক্খুসঙ্ঘস্স’দাসিসো.

সঙ্ঘস্স পাকৰট্টত্থং, রট্ঠং দত্ৰা’ল়িসারকং;

সকলং সন্নিৰাসীহি, নেত্তিকেহি সহেৰ সো.

নেকসতানিভিক্খূনং, ৰাসযিত্ৰান তত্থ সো;

সততং সম্পৰত্তেসি, উল়ারং চতুপচ্চযং.

দাট্ঠাধাতুঘরংচারু, কারযিত্ৰা মহারহং;

দাঠাধাতুস্স নিচ্চং সো, মহামহমকারযি.

গণসঙ্গণিকা’পেতো, পোত্থকং ধম্মসঙ্গণিং;

পরিৰত্তেসি সোপাতো, সুন্দরে ধম্মমন্দিরে.

নচ্চাদিগন্ধমালাদি-নেকপূজম্পৰত্তিয;

সীরেন সদ্ধাসম্বন্ধো, সম্বুদ্ধমভিৰন্দতি.

জম্বুদীপাগতে চাগ, সূরো সো ভুৰিরিসূরযো;

তপ্পেসি ধনদানেন, দানিযেনেক সো ৰিভূ.

সদ্ধম্মকথিকানং সো, পূজা কত্ৰান নেকসো;

দেসাপেসিচ সদ্ধম্মং, সদাধম্মগুণে রতো.

তিক্খত্তুং সো তুলাভার-দানং দিনেসু দাপযি;

উপোসথং ৰোপৰসি, সুৰিসুদ্ধমুপোসথে.

অদা দণ্ডিস্সরং দান-মনুসংৰচ্ছরং ৰিভূ;

পিটকত্তযং লিখাপেত্ৰা, ভিক্খুসঙ্ঘস্স দাপযি.

মহগ্ঘমণিমুত্তাদি-রতনানি ¶ সপেসিয;

জম্বুদীপে মহাবোধিং-নেকক্খত্তুম পূজযি.

কণ্ণাটভূমিপালেন, চোল়রঞ্ঞা চ পেসিতা;

দূতামহন্তমাদায, পণ্ণাকারমিধাগতা.

অদ্দসংসু মহীপালং, ততো সো তুট্ঠমানসো;

তেসং উভিন্নং দূতানং, কত্তব্বং সাধুকারিয.

তেসু আদো’ৰ কণ্ণাট-দূতেহি সহ পেসিয;

দূতে সকীযে কণ্ণাট-নিকটং সারপাভতে.

অত্তনো ৰিসযং পত্তে, চোল়ো সীহল় দূতকে;

সহসা কণ্ণনাসাসু, পাপযিংসু ৰিরূপতং.

সম্পত্তৰিপ্পকারাকে, ইধাগন্ত্ৰান রাজিনো;

কথযিংসু তদা সব্বং, চোল়েন কতমত্তনি.

উদ্দিপিতাভিমানো সো, সকলামচ্চমজ্ঝগো;

অৰ্হায দমিল়ে দূতে, ইতি চোল়স্স সন্দিসি.

সেনং ৰিনা’ৰ একস্মিং, দীপে মজ্ঝে মহণ্ণৰে;

বাহাবলপরিক্খাৰা, হোতুনো দ্ৰন্দযুদ্ধতো.

বলং সন্নয্হ সকলং, রজ্জে তুয্হং মমা’থ ৰা;

তৰা’ভিমত দোসম্হি, সঙ্গামো ৰা করীযতং.

মযা ৰুত্তক্কমেনেৰ, ৰত্তব্বো ৰো জনাধিপো;

ইতি ৰত্ৰান তে দূতে, ইত্থলঙ্কার মণ্ডিতে.

ৰিস্সজ্জিয লহুংচোল়-মহীপালস্স সন্তিকং;

ততো সেনঙ্গমাদায, অনুরাধ পুরং গমি.

মত্তিকাৰাটতিত্থে চ, মহাতিত্থে চ পেসযী;

চোল়রট্ঠং’ৰ গন্ত্ৰান, যুজ্ঝিতুং দ্ৰে চমূপতি.

সজ্জন্তেসু চমূপেসু, নাৰাপাথেয্যকানি চ;

যুদ্ধত্থায বলং চোল়-রট্ঠপেসনকারণা.

তদা তিংসতিমে ৰস্সে, ৰেল়ক্কারসনামকা;

বলকাযা তহিংগন্তু-মনিচ্ছন্তা ৰিরোধিনো.

মারেত্ৰান উভো সেনা-নাথে মত্তগজাৰিয;

সমন্ততো ৰিলুম্পিংসু, পুলত্থিপুরমুদ্ধতা.

পুত্তেহি ¶ তীহি সহিতং, রাজিনো চ কণীযসিং;

গণিত্ৰা সহসা রাজ-পাসাদং চাপি ঝাপযুং.

রাজা নিক্খম্ম খিপ্পং সো, গন্ত্ৰা দক্খিণপস্সকং;

সেলে ৰাতগিরিৰ্হস্মিং, সারং ভণ্ডং ঠপাপিয.

ৰীরবাহুপরাজেন, সীহৰিক্কমসালিনা;

মহতা চ বলোঘেন, সমন্তা পরিৰারিতো.

পুলত্থিপুরমাগম্ম, ৰত্তেন্তো দারুণং রণং;

পলাপেসি খণেনেৰ, বলকাযে সমাগতে.

মারিতান চমূপান-মট্ঠিসঙ্ঘাটধিট্ঠিতং;

পরিক্খিপিত্ৰা চিতকং, ৰেরিভূতে বলাধিপে.

বন্ধযিত্ৰান খাণুম্হি, পচ্ছা বাহং সুবন্ধনং;

পরিতো ৰিপ্ফুরন্তীহি, অগ্গিজালাহি ঝাপযি.

ঘাতেত্ৰা তত্থ মানীতং, গামানি ধরণীপতি;

অকাসি লঙ্কাৰসুধং, সব্বথা ৰীতকণ্টকং.

যুজ্ঝিতুং সহ চোল়েন, রাজা অত্তকতাৰধিং;

অনতিক্কম্ম সো পঞ্চ-চত্তালীসম্হি ৰচ্ছরে.

সন্নদ্ধং বলমাদায, গন্ত্ৰা সাগরপট্টনং;

তস্সাভিগমনং পস্সং, কঞ্চিকালং তহিং ৰসং.

অনাগতত্তা চোল়স্স, তস্স দূতে ৰিস্সজ্জিয;

পুনাগন্ত্ৰা ৰসীরাজা, পুলত্থিনগরে চিরং.

মহাহেল়ি সরেহরু, মহাদত্তিকনামিকা;

কটুন্নরূপণ্ডৰাপী, কল্লগল্লিক নামিকা.

এরণ্ডেগল্লৰাপী চ, দীঘৰত্থুকৰাপিকা;

মণ্ডৰাটকৰাপী, চ, কিত্তগ্গবোধিপব্বতা.

ৰলাহস্স মহাদারু, গল্লকুম্ভীলসোব্ভকা;

পত্তপাসাণৰাপী চ, ৰাপী চ কাণনামিকা.

এতা চঞ্ঞা চ সো ছিন্ন-মরিযাদা ৰাপিযো বহূ;

বন্ধাপেসি সদাদীন-সত্তে বদ্ধ হিতাসযো.

ভূমিন্দো ¶ কন্দরা-গঙ্গা-নদীসু চ তহিং তহিং;

সুভিক্খং কারযী রট্ঠং, বন্ধেত্ৰা’ৰরণানি সো.

ৰিহারা’ভযচারিত্ত-ভেদিনিং মহিসংসক;

পরিহারে সব্বসোচ্ছিজ্জ-গাহযিত্ৰা গলম্হি তং.

পুরম্ভা বহি কারেত্ৰা, মহাসঙ্ঘং খমাপিয;

পকাসেসি চ লোকস্স, সঙ্ঘগারৰমত্তনো.

মহাগামে নিকাযানং, তিতযে চোল়নাসিতে;

ধাতুগব্ভে চ বন্ধেসি, থূপারামদ্ৰযে’পি চ.

মাতুযা’ল়াহণঠানে, তথেৰ পিতুনোপি চ;

অকা পঞ্চ মহাৰাসে, তথা বুদলৰিট্ঠিযং.

পণ্ডৰাপী চ পাঠীনো, রক্খচেতিযপব্বতো;

তথেৰ মণ্ডলগিরি-মধুত্থলৰিহারকো.

উরুৰেলৰ্হযো দেৰ-নগরে চ ৰিহারকো;

মহিযঙ্গণৰিহারো চ, সীতলগ্গামলেণকং.

জম্বুকোলৰিহারো চ, তথেৰ গিরিকণ্ডকো;

কুরুন্দিযৰিহারো চ, জম্বুকোলকলেণকং.

ভল্লাতকৰিহারো চ, তথেৰ পরগামকো;

কাসগল্লৰ্হযো চন্দ-গিরিৰ্হয ৰিহারকো.

ৰেলগামৰিহারো চ, মহাসেনৰ্হগামকো;

ৰিহারো চা’নুরাধম্হি, পুরে বোধিঘরং তথা.

ইচ্চেৰমাদযোনেকে, ৰিহারে চ বহূ ৰিভূ;

পটিসঙ্খরিজিণ্ণে সো, গামে চা’দা ৰিসুং ৰিসুং.

সমন্তকূট সেলত্থং, মুনিন্দপদলঞ্জনং;

পণমত্থায গচ্ছন্তা, মনুস্সা দুগ্গমঞ্জসে.

সব্বে মা কিলমন্তূ’তি, দানৰট্টায দাপযি;

সালিক্খেত্তাদিসম্পন্নং, গিলীমলযনামকং.

কদলীগামমগ্গে চ, হূৰরল়ঞ্জসে তথা;

গামে দত্ৰান পচ্চেকং, সালাযো চাপি কারযি.

অনাগতে তং ভূপালা, মা গণ্হন্তূ’তি লেখিয;

অক্খরানি সিলাথম্ভে, পতিট্ঠাপেসি ভূমিপো.

গামং ¶ অন্তরৰিট্ঠিঞ্চ, তথা সঙ্ঘাটগামকং;

সিরিমণ্ডগলারামঞ্চ, অদাসো লাভৰাসিনং.

ৰনজীৰকভিক্খূন-মদা সো চতুপচ্চযে;

বন্ধূনম্পি চ সো তেসং, ভোগগামে পদাপযি.

পাৰারগ্গিকপল্লানি, ৰিৰিধে ওসধেপি চ;

সীতে উতুম্হি বহুসো, ভিক্খুসঙ্ঘস্স দাপযি.

অদা সব্বপরিক্খারে, পরিক্খারে তথাত্থ সো;

নেকৰারেসু সক্কচ্চং, ভিক্খুসঙ্ঘস্স বুদ্ধিমা.

সঙ্ঘস্স পাকৰট্টত্থং, ভিক্খূনং লাভৰাসিনং;

ৰেয্যাৰচ্চকরানঞ্চ, পূজেতুং চেতিযাদিকং.

পদিন্না পুব্বরাজূহি, যে গামা রোহণে বহূ;

তেপি সব্বে অনূনে সো, যথাপুব্বং ঠপেসি চ.

অদাসি পিঠসপ্পীন-মুসভে বলিনো বহি;

ভত্তং চা’দাসি সো কাক সোণাদীনং দযাপরো.

অদাসিনেকতা ৰেয্য-কারকানং মহাকৰী;

সদ্ধিং পৰেণিগামেহি, ৰিত্তজাতমনপ্পকং.

রাজামচ্চাদিপুত্তানং, সিলোকে রচিতে সুণং;

যথানুরূপং পাদাসি, ধনং তেসং কৰিস্সরো.

অন্ধানং পঙ্গুলানঞ্চ, গামে চা’দা ৰিসুং ৰিসুং;

নানাদেৰকুলানঞ্চ, দিন্নং পুব্বং ন হাপযি.

পত্তি ৰো সো কুলিত্থীন-মনাথানং যথারহং;

ৰিধৰানমদাগামে, ভত্তঅচ্ছাদনানি চ.

রাজা সীহল়কা ৰেয্য-করণে সো মহাপতি;

অগ্গো সীহল়কাৰেয্য-কারকানমহোসি চ.

সুভে বদ্ধাদরো বদ্ধ গুণৰ্হয ৰিহারকে;

বন্ধেসি উপরাজা সো, চেতিযং চোল়নাসিতং.

মুত্তচাগী ততো তস্স, ৰিহারপৰরস্স সো;

দত্ৰা গামৰরে নিচ্চং, পূজাযো সম্পৰত্তযি.

সোৰ তস্স ৰিহারস্স, উপচারৰনন্তিকে;

বন্ধাপেসি মহাৰাপিং, থীরীভূতমহোদকং.

কপ্পূরমূলাযতনে ¶ , রঞ্ঞো ধীতা যসোধরা;

অকারেসি থিরং রম্মং, মহন্তং পটিমাঘরং.

সেলন্তরসমূহস্মিং, রাজিনো রাজিনো সকা;

কারেসি চারুপাসাদং, পসাদাৰহমুগ্গতং.

তদা নেকে চ সচিৰা, তস্সো রোধজনাপি চ;

সমাচিনিংসু পুঞ্ঞানি, অনেকানি অনেকসো.

এৰং সমনুসাসন্তে, লংকং লংকা নরিস্সরে;

উপরাজা ৰসংনীতো, ৰিনীতো ঘেরমচ্চুনা.

তস্স কত্তব্বকিচ্চানি, সকলানি সমাপিয;

জযবাহুস্সোপরজ্জং, ভিক্খূনং মতিযা অদা.

অথাদিপাদপদৰিং, দত্ৰা ৰিক্কমবাহুনো;

গজবাহূ’তি ৰিদিতে, তস্স জাতে সুতে ততো.

মহামচ্চেহি মন্তেত্ৰা, রাজাপুত্তহিতত্থিকো;

রোহণং কসিণং দত্ৰা, তহিং ৰাসায পেসযি.

ততো সো তত্থ গন্ত্ৰান, মহানাগহুলং পুরং;

রাজধানিং করিত্ৰান, তত্থ ৰাসমকপ্পযী.

এৰং পঞ্ঞাসৰস্সানি’হ ৰিজযভুজো ৰত্তযিত্ৰান সম্মা,

আণাচক্কং জনিন্দো প্যপগতখলনং এস পঞ্চাধিকানি;

ৰড্ঢেত্ৰা সাসনং তং খলদমিল়ভযো পদ্দুতঞ্চাপিলোকং,

সগ্গং লোকং সপুঞ্ঞপ্পভৰমুরুফলং পস্সিতুং চা’রু রোহ.

সুজনপ্পসাদ সংৰেগত্থায কতে মহাৰংসে

তদারঞ্ঞো ¶ নুজামিত্তা, তস্স পুত্তা তযো’পি চ;

মহামচ্চা চযতযো, তথা যতনৰাসিনো.

তব্বেতে আদিপাদস্স, রোহণে ৰসতো সতো;

অনারোচাপযিত্ৰান, ভূপালমতসাসনং.

সম্ভূযমন্তযিত্ৰান, সমানচ্ছন্দতং গতা;

অদংসু যুৰরাজস্স, লঙ্কারজ্জাভিসেচনং.

ওপরজ্জে নিৰেসেসুং, মানভরণনামকং;

কুমারং পুব্বচারিত্ত-মগ্গং লঙ্ঘিত্থ তে’খিলা.

তযো’থ ভাতরো সব্বে, তে মাণভরণাদযো;

মুত্তামণিপ্পভূতিকং, রতনং সারসম্মতং;

সব্বং হত্থগতং কত্ৰা, ৰাহনঞ্চ গজাদিকং.

সকলং বলমাদায, পুলত্থিনগরা তদা;

খিপ্পং তং ৰিক্কমভুজং, গণ্হিসামা’তি নিক্খমুং.

সুত্ৰা পৰত্তিং সকলং, ইমং ৰিক্কমবাহুসো;

তা তস্সন্তিমসক্কারং, ৰিধাতুং হন্দনো লভিং.

ইদানি খিপ্পং গন্ত্ৰান, পুলত্থিনগরং তহিং,

তা তস্সাল়াহনট্ঠান দস্সনে নেৰ সো অহং.

সোকভারং ৰিনোদেস্সং, মম চেতো গতং ইতি;

কতদল়্হ ৰৰত্থানো, ৰিনিগ্গম্ম ততো পুরা.

পুলত্থিপুরমাগচ্ছং, আদিপাদো’তি সাসসো;

সত্তট্ঠসতসঙ্খেন, বলেন পরিৰারিতো.

অন্তরালপথেযেৰ, গুত্তহালকমণ্ডলে;

গামে পন সমুক্কৰ্হে, দিস্ৰা সেনঙ্গমাগতং.

মহন্তং ¶ যুদ্ধসন্নদ্ধং, একৰীরো ভযাতিকো;

যুজ্ঝিত্ৰা তে পলাপেসি, খণেনেৰ দিসোদিসং.

তযো তে ভাতরো তত্থ, সম্পত্তাৰ জযা ততো;

অভিমানুদ্ধতা খিপ্পং, অন্নয্হ বলৰাহনং.

আদিপাদকজম্বূতি, ৰিস্সুতম্হি পদেসকে;

সঙ্গামেসুং পরাজেসি, ভিয্যো যুজ্ঝিত্থ সো তযো.

ততিযং কটগামস্মিং, কাল়ৰাপ্যং চতুত্থকং;

পঞ্চমং উদ্ধটদ্ৰারে, ছট্ঠংসো পঙ্কৰেলকে.

তেহি যুদ্ধং করিত্ৰান, গহীতৰিজযো সদা;

পুলত্থিপুরমাগঞ্চি, সহামচ্চ পরিজ্জনো.

সচিন্তিতক্কমেনেৰ, পস্সিত্ৰাল়াহনং পিতু;

ৰিদূরিতমহাসেকো, লদ্ধস্সাসো পুরেৰসং.

দুক্খে সহায ভূতান-মত্তনো সো যথারহং;

অমচ্চানমদা সব্ব-ভোগে ঠানন্তরে হি সো.

ভটানঞ্চাপি সব্বেসং, সহাযাতানমত্তনো;

অনুরূপমদা ৰুত্তিং, সরং দুক্খসহাযতং.

মাণাভরণভূপোপি, সদ্ধিং সেসেহি ভাতূহি;

করিত্ৰা রোহণং পস্সং, রোহণঞ্চ সহত্থগং.

ততো কিত্তিসিরীমেঘে, সদ্ৰাদসসহস্সকং;

রট্ঠং দত্ৰান ৰসিতুং, তহিংযেৰ সমাদিসি.

আণত্তো ভাতরাকিত্তি-সিরীমেঘো জনাধিপো;

গন্ত্ৰা ৰসি পুরেতত্থ, মহানাগহুলৰ্হযে.

সিরীৰল্লভনামস্স, কুমারস্সাপি চাদিসি;

দেসমট্ঠসহস্সৰ্হং, দত্ৰান ৰসিতুং তহিং.

তথেৰ সোপি গন্ত্ৰান, উদ্ধনদ্ৰারনামকং;

গামং কত্ৰা রাজদানিং, ৰসন্তো অনুসাসিতং.

সযঞ্চ সহসেনায, গন্ত্ৰা দক্খিণপস্সকং;

ৰীরবাহূতি পঞ্ঞাতো, পুঙ্খগামং সমাৰসি.

মাতা চ তিণ্ণং ভাতূনং, জযবাহু চ ভূমিপো;

নিৰসিংসু তদা কিত্তি-সিরিমেঘস্স সন্তিকে.

ততো ¶ সংৰচ্ছরে’তীতে, তে মাণভরণাদযো;

তেনত্তনি কতং যুদ্ধে, সব্বং ৰিক্কমবাহুনা.

দুরারোহং মহন্তং তং, পরাজযতরাভৰং;

অনুস্সরন্তবহুসো, অভিমানসমুন্নতা.

মুদ্ধাভিসিত্তরাজূন-মেকাকীরাজরট্ঠকং;

ৰিনাযমভিসেকেন, কথং নামানুভোস্সতি.

ইতি ইস্সা পরত্তঞ্চ, যাতা সঙ্গয্হসাৰকে;

ভিয্যো সম্ভূযসঙ্গাম-করণত্থায নিক্খমুং.

সুত্ৰা তমত্থং দূতেহি, সো ৰিক্কমভুজোপি চ;

অগা তেসংৰ ৰিসযং, মহাসেনাপুরক্খতো.

দেসে দক্খিণকে বোধি-সেনপব্বতগামকে;

যুজ্ঝিত্ৰা তে পরাজেসি, তযো ৰিক্কমবাহুসো.

রিপৰো দানি মে সব্বে, উম্মূলেস্সামহং ইতি;

পলাযন্তে নুবন্ধিত্থ, পদানুপদিকং’ৰ তে.

তে চ দুগ্গং পলাযিংসু, পঞ্চযোজনরট্ঠকে;

খিপ্পং পাৰেক্খি কল্যাণিং, সো’পি তে গহণত্থিকো.

ৰীরো অরিযদেসিযো, ৰীরদেৰোতি পাকটো;

পল়ন্দীপিস্সরো একো, ভূসং সহসিকো তদা.

সদ্ধিং সূরেহি যোধেহি, মহাতিত্থম্হি ওতরি;

কাতুং হত্থগহং সক্কা, লংকাদীপন্তি চিন্তিয.

সো ৰিক্কমভুজো সুত্ৰা, পৰত্তিং ভূভুজো তদা;

যাৰতা নাত্র লংকাযং, লদ্ধোগাহো ভৰিস্সতি.

তাৰ উম্মূলনীযোতি, কল্যাণিম্হা ৰিনিগ্গতো;

মহাতিত্থম্হি মন্নার-নামকং গামকং গতো.

কত্ৰান ৰীরদেৰো’পি, সঙ্গামং তেন রাজিনা;

অনীকঙ্গাদযো রাজ-পুত্তে দ্ৰে ভাতরোপি চ.

সেনাধিনাযকঞ্চেৰ, কিত্তিনামপ্পকাসিতং;

ঘাতেত্ৰা সহসা ৰীর-সম্মতে চ বহূজনে.

গাহেত্ৰা জীৰগ্গাহংসো, রক্খকঞ্চ চমূপতিং;

সবলং তং পরাজেত্ৰা, অনুবন্ধি পদাপদং.

পলাযমানো ¶ সো ভীতো, আগন্ত্ৰান নিজং পুরং;

হত্থসারং সমাদায, কোট্ঠসারং গতো লহুং.

পচ্ছতো পচ্ছতো ৰীর-দেৰো তমনুবন্ধিয;

আগন্ত্ৰান পুরেৰাসং, কতিপাহং ৰিধাযসো.

গণ্হিতুং ৰিক্কমভুজং, তত্থেৰ তুরিতং অগা;

পেসযিত্ৰা সকং সোপি, মহন্তং সকলং বলং.

যুজ্ঝাপেত্ৰান ঘাতেত্ৰা, গামে অন্তরৰিট্ঠিকে;

মহাকদ্দমদুগ্গম্হি, ৰীরদেৰং মহব্বলো.

অভিসেকং ৰিনাযেৰ, পুলত্থি নগরে ৰসং;

অকাসি রাজরট্ঠস্স, পসাসনৰিধিং ৰিভূ.

অপনীযরণে ছন্দং, ভাতরোপি তযো ততো;

আৰসিংসু যথাপুব্বং, গন্ত্ৰা রট্ঠং সকং সকং.

চতুরোপি মহীপালা, যতমানা চিরং তহিং;

একচ্ছত্তঙ্কিতং কাতুং, নেৰ সক্খিংসু সব্বসো.

অনিসম্মকারিভাৰেন, কুলীনে পরিহাপযুং;

ঠপেসুঞ্চ মহন্তত্তে, হীনে সাভিমতে জনে.

ৰড্ঢিতংনেকধা সম্মা, রঞ্ঞা ৰিজযবাহুনা;

সাসনঞ্চ তথালোকং, হাপযিংসু সুবুদ্ধিনো.

কুলীনানং মনুস্সান-মভাৰেপি চ তাদিসে;

দোসে ৰিত্তং তদাযত্তং, পসয্হাৰহরিংসু চ.

পীল়েতুং সকলং লোক-মুদ্ধরন্তাধিকং বলিং;

উচ্ছূৰ উচ্ছুযন্তেতে, খীণকো সাধনেসিনো.

উদ্ধরিত্ৰান বুদ্ধাদি-সন্তকে ভোগগামকে;

সো ৰিক্কমভুজো রাজা, সেৰকেসু সমপ্পযী.

পুলত্থিনগরে নেক-ৰিহারে ধাতুমণ্ডিতে;

সোৰ দেসন্তরীযানং, ভটানং ৰসিতুং অদা.

সদ্ধেহি পত্তধাতুস্স, দাঠাধাতুৰরস্স চ;

পূজনত্থায দিন্নানি, মণিমুত্তাদিকানি চ.

চন্দনাগরুকপ্পুরং, সুৰণ্ণাদিমযা বহূ;

পটিমাযো চ অচ্ছিজ্জ, যথাকামং ৰযং নযী.

সাসনস্স ¶ চ লোকস্স, ক্রিযমানমুপদ্দৰং;

পস্সন্তা বহুসো তস্মিং, তদা নিব্বন্নমানসা.

অট্ঠমূলৰিহারেসু, যতযো গরুসম্মতা;

পংসুকূলিকভিক্খূ চ, কোট্ঠাসদ্ৰযনিস্সিতা.

এৰং তিত্থিযতুল্যানং, সাসনোপদ্দৰং বহুং;

করোন্তানং সকা সম্ভা-পযাতং পৰরং ইতি.

দাঠাধাতুৰরং পত্ত-ধাতুমাদায রোহণং;

গন্ত্ৰা ৰাসমকপ্পেসুং, ফাসুঠানে তহিং তহিং.

তথেৰ ফাসুঠানেসু, ৰিপ্পকিণ্ণা তহিং তহিং;

তে কুলীনা নিলীনা’ৰ, হুত্ৰা ৰাসমকপ্পযুং.

পক্খদ্ৰযমহীপাল-গয্হাসীমা সুঠাপিতা;

সামন্তা অঞ্ঞমঞ্ঞেহি, করোন্তো বহুসো রণং.

সুসমিদ্ধেসু নেকেসু, গামেসু নিগমেসু চ;

অগ্গিং দেন্তা তল়াকে চ, ছিন্দন্তা জলপূরিতে.

নাসেন্তা সব্বথা সব্ব-মাতিকাৰরণানি চ;

ছিন্দন্তা নাল়িকেরাদি, সো পকারে চ ভূরুহে.

যথা পোরাণকগ্গাম-ঠানন্তিপি ন ঞাযতে;

ৰিনাসেসুং তথা রট্ঠং, অঞ্ঞমঞ্ঞৰিরোধিনো.

তে চ ভূমি পতীগাম-ৰিলোপং পত্থমোসনং;

কারেন্তা নিজচারেহি, আচরুং লোকুপদ্দৰং.

কুলীনানং মনুস্সানং, দাসকম্মকরাপি চ;

সসামিনো’তি ৰত্তন্তা, নিস্সঙ্কা ৰীতভীতিকা.

হুত্ৰা যুধীযা রাজূনং, অব্ভন্তরপৰত্তিনো;

বলৰন্ততরা জাতা, লদ্ধঠানন্তরা তদা.

জনা সমন্তকূটাদি-নেকদুগ্গনিৰাসিনো;

অদেন্তা ভূমিপালানং, পুব্বপট্ঠপিতং করং.

রাজাণমগণেন্তা তে, গতা দামরিকত্তনং;

সকং সকং’ৰ ৰিসয-মাৰসিংসু সমুদ্ধতা.

অনত্থে নিচিতা নাম, পরিৰত্তন্তি সব্বতা;

ইতি ৰত্তব্ব তংযেৰ, যাতং লঙ্কাতলং তদা.

এৰং ¶ গামকভোজকা ৰিয ভুসংতেজো ৰিহীনা সদা;

অচ্চন্তং ব্যসনাতি সত্তহদযা রাজাভিমানুজ্ঝিতা.

নিচ্চং অত্তপরত্থসিদ্ধিৰিধুরাসঙ্গা ৰিহীনাসযা;

সব্বে তে ৰিহরিংসু ভূমিপতযো চারিত্তমগ্গাতিগা.

সুজনপ্পসাদসংৰেগত্থায কতে মহাৰংসে

রোহণে নিৰসিত্থা’ৰ, জযবাহুমহীপতি;

মিত্তাৰ্হা রাজিনী চেৰ, তদা কালমকংসু তে.

সিরীৰল্লভজাযা’থ, জনেসি সুগলা দুৰে;

মাণভরণকং পুত্তং, পুত্তিং লীলাৰতিম্পি চ.

মাণাভরণভূপাল-দেৰী’পি রতনাৰলী;

মিত্তং পভাৰতিঞ্চাপি, অলভী ধীতরো দুৰে.

পস্সন্তস্স উভো তাযো, ধীতরো ৰীরবাহুনো;

তদা মহাদিপাদস্স, এৰং আসি ৰিতক্কিতং.

লোকাভিসম্মতে সব্ব-ভূপালন্ৰযমুদ্ধনি;

ৰিসুদ্ধে সোমৰংসম্হি, অভিজাতা মযং পন.

পিহনীযতরাকারা, সব্বসত্তিসমুন্নতা;

নানাৰিজ্জাসু নিপুণা, হত্থিঅস্সাদিসুক্খমা.

তথা পেকাকিনা ৰে’তে, তযো ৰিক্কমবাহুনা;

পরাজযং পরিভৰং, পাপিতা বহুসো রণে.

সূনুনো সুসমত্থস্স, ৰিসোধেতু মিমং মলং;

ন দিস্সতে পাতুভাৰো, অহো নো অপ্পপুঞ্ঞতা.

জনৰাদকিলিট্ঠেন ¶ , রাজত্তেনাপি কিং মম;

ইদানি ৰিসযাসঙ্গং, হিত্ৰা কল্যাণকম্মসু.

অপ্পমত্তস্স সততং, নেতব্বা ৰাসরা’ইতি;

নিয্যাতেত্ৰা অমচ্চানং, সব্বং রজ্জৰিচারণং.

তহিং সত্ত’ট্ঠমাসঞ্হি, ৰসং রত্তিযমেকদা;

দেৰরাজঘরেসেয্যং, কপ্পেসি সীলসংযতো.

ততো পচ্চূসকালম্হি, দেৰপুত্তং মহিদ্ধিকং;

ৰিচিত্তৰত্থাভরণং, গন্ধমালাৰিভূসিতং.

উল়ারতররূপেন, দেহোভাসেন অত্তনো;

ওভাসেন্তং অসেসা’সা, সূরিযঞ্চ ন ভুগ্গতং.

ৰদন্তং সুপিনে এৰং, অদক্খি দরণীপতি;

পসীদস্সু মহাভাগ, পিতোভৰ মহিপতি.

ধঞ্ঞলক্খণসম্পন্নো, ইচ্ছিতত্থস্সসাধকো;

ৰিনীতো লোককুহর-ব্যাপিতেজো পরক্কমো.

আণবলযসোকিত্তি-ভাসুরো সগ্গুণাকরো;

লোকসাসনসংৰুদ্ধি-করো পুত্তৰরো তৰ.

লব্ভীস্সতে মহারাজ, ন চিরস্সেৰ সম্পতি;

পুত্তদারাধিৰুত্থং তং, পুরং খিপ্পং পযাহীতি.

পবুজ্ঝিত্ৰান সঞ্জাত-পীতিৰেগোথ রত্তিযা;

ৰিভাতায ততোপোঙ্খ-গামং গঞ্ছিনরুত্তমো.

যথা দিট্ঠপ্পকারন্তং, কথেসি সুপিনং সুভং;

মহেসী পমুখানং সো, অমচ্চানং মহীপতি.

সদ্ধিং মহেসিযা তত্থ, পত্থেন্তো পুত্তমুত্তমং;

চিন্তোন্তো দানসীলাদিং, সুভং নানপ্পকারকং.

অথেকদিৰসংকালে, পচ্চূসে সুপিনে পন;

সব্বলক্খণসম্পন্নং, সব্বসেতং মনোহরং.

দন্তীপোতৰরং দন্তং, কণ্ণে গণিযপেমতো;

পৰিসন্তমিৰত্তানং, সেয্যাগব্ভং মহেসিযা.

সম্পস্সিয পবুজ্ঝিত্ৰা, উট্ঠায সযনাৰরা;

সঞ্জাতপীতিপামোজ্জ-ৰেগপীণিতমানসো.

তাযং ¶ ৰেলাযমেদাসু-সেয্যাগব্ভং মহেসিযা;

পৰিস্সসুপিনং তস্সা, যথাদিট্ঠং পকাসযী.

অহম্পি তাদিসং হত্থি-পোতকং সযনং মম;

পদক্খিণং করিত্ৰান, ঠিতং সোণ্ডে সমাদিয.

আকড্ঢিত্ৰান সযনং, সমারোপিয পেমতো;

আলিঙ্গিং সুপিনম্হীতি, দেৰী চাপি তমব্রৰী.

উভো তে অঞ্ঞমঞ্ঞস্স, দিট্ঠমেৰং পকাসিয;

উট্ঠাপেসুং পহট্ঠাৰ, ৰীতনিদ্দারুণং তদা.

ততো পাতো উপট্ঠাতু, মুপযাতং পুরোহিতং;

নেমিত্তকে চ পুচ্ছিংসু, সুনিত্ৰা তে পমোদিতা.

ন চিরস্সেৰ পুত্তস্স, ধঞ্ঞলক্খণসালিনো;

উপ্পত্তিযা অৰস্সং’ৰ, ভৰংতব্বন্তি কিত্তযুং.

তং সুণিত্ৰা অমচ্চা চ, তথা নগরৰাসিনো;

অৰিন্দিংসু জনিন্দো চ, সব্বেপীতি মহুস্সৰং.

ততো পট্ঠায সোত্থানং, পত্থযং পত্থিৰোভুসং;

ভিক্খুসঙ্ঘেন বহুসো, ভণাপেসি পরিত্তকং.

মণিমুত্তাদিকং চিত্তং, মহগ্ঘমনুৰাসরং;

পরিচ্চজি দানমুখে, যাচকানমনেকসো.

পুরোহিতাদিৰিপ্পেহি, ৰেদৰেদঙ্গৰিঞ্ঞূহি;

ৰত্তাপেসি চ হোমাদি-ৰিধানং সোত্থি সম্মতং.

সুৰিনট্ঠে ৰিহারে চ, ধাতুগব্ভে চ ৰাপিযো;

জিণ্ণা চ পটিসঙ্খত্তুং, যোজযী রাজকপ্পিকে.

দিনং নযন্তে কল্যাণ-কম্মেনে’ৰং নরিস্সরে;

ন চিরং সণ্ঠহি গব্ভ-ৰরো কুচ্ছিম্হি দেৰিযা.

ততোৰগম্ম তং হট্ঠ-পহট্ঠো সো নরিস্সরো;

মহন্তং দেৰিযা গব্ভ-পরিহারমদাপযি.

পরিপক্কগব্ভা দেৰী, কমেন জনযীসুকং;

সমযে ভদ্দনক্খত্ত-মুহুত্তেনভিলক্খিতে.

সুপ্পসন্না অসেসা চ, দিসাযো তংখণে অহু;

সমীরণে চ ৰাসিংসু, সুগন্ধিমুদুসীতলা.

দন্তীনং ¶ কোঞ্চনাদেন, হযানং হেসিতেন চ;

রাজঙ্গণং তদাজাতং, মহাকোলাহলা কূলং.

অচ্ছেরাতিসযে এৰং, পাতুভূতে অনেকধা;

দিস্ৰা তং ৰিম্হযপ্পত্তো, মাণভরণভূপতি.

সুত্ৰা নিজস্স পুত্তস্স, তদা সঞ্জাতসাসনং;

অমতেনাভিসিত্তোৰ, পীতিপুণ্ণমনোরথো.

মোচাপেত্ৰা তদা কারা-ঘরে বদ্ধে বহূজনে;

দানং উল়ারং সমণ-ব্রাহ্মণানং পদাপযি.

অমচ্চপমুখা চাপি, জনাপুরনিৰাসিনো;

কদলীতোরণাদীহি, রাজধানী মনেকধা.

অলঙ্করিত্ৰা সকলং, সুমণ্ডিতপসাধিতা;

ছণং মহন্তং ৰত্তেসুং, কতিপাহং মনোরমং.

ৰেদে ৰুত্তৰিধানেন, জাতকম্মাদিকং ৰিধিং;

সব্বং সমাপযিত্ৰান, কুমারস্সা’ৰনীপতি.

পুরোহিতাদযো ৰিপ্পে, ততো লক্খণপাঠকে;

আণাপেত্ৰান সক্কার-সম্মানৰিধিপুব্বকং.

নিযোজেসি কুমারস্স, লক্খণানং পটিগ্গহে;

সাধকং সকলং তস্স, যত্থপাদাদিলক্খণং.

উপধারিয মহামচ্চ-গণমজ্ঝগতস্স তে;

রাজিনো দেৰিযা চাপি, পকাসেসুং পমোদিতা.

লঙ্কাদীপং ঠপেত্ৰান, জম্বুদীপতলম্পি চ;

একচ্ছত্তঙ্কিতং কত্ৰা-নুভোত্তুং নিপুণো ইতি.

তে সন্তপ্পিয ভোগেহি, ভিয্যো পুচ্ছিত্থ সাদরং;

সন্দিস্সমানং যংকিঞ্চি, অরিট্ঠং অত্থি নত্থী’তি.

দীঘাযুকো কুমারো’যং, কিঞ্চি পঞ্ঞাযতে ৰত;

জনকারিট্ঠযোগো’তি, তে মহীপতিনো’ব্রৰুং.

তস্সারিজনসম্মদ্দি-পতাপভুজযো গতো;

সো পরক্কমবাহূ’তি, অন্ৰত্থনামমগ্গহী.

কণ্ণৰে ধমহঞ্চেৰ, অন্নুপাসনমঙ্গলং;

কারাপিয ৰিধানঞ্ঞূ, যথাৰিধিমসেসতো.

রঞ্ঞো ¶ ৰিক্কমবাহুস্স, সপুত্তুপ্পত্তিসাসনং;

ৰত্তুং সদূতে পেসেসি, পুলত্থিনগরং তদা.

তেহিসো ভাগিনেয্যস্স, মহাভাগত্তনম্পি চ;

জনকারিট্ঠযোগঞ্চ, সুত্ৰা ৰিক্কমবাহুসো.

ধঞ্ঞং ৰিজযরাজাদি-রাজমালায নাযকং;

মণিংৰ ভাসুরং ময্হং, ভাগিনেয্যং জনেসিসো.

হানি যাকাচিসততং, যথা তস্স ন হেস্সতি;

তথা মমন্তিকেযেৰ, কুমারো এত্থ ৰড্ঢতং.

অলদ্ধং লভিতুং লাভং, লদ্ধঞ্চ পরিরক্খিতুং;

সব্বথা ন সমত্থোযং, পুত্তো গজবাহু মম.

সূরভাৰাদিযুত্তো’পি, মহিন্দৰ্হপরোসুতো;

নিহীনো মাতুগোত্তেন, ন রজ্জস্স রহো মম.

ঠিতস্স ৰিক্কজাতেন, নেকসো সঞ্চিতেন মে;

রজ্জস্স ভাগিনেয্যো’ৰ, কামং ভাগী ভৰিস্সতি.

ইতিপেসেসি দূতে সো, আনেতুং তং কুমারকং;

কুমারা ভরণং দত্ৰা, সেসং সারঞ্চুপাযনং.

সব্বং দূতমুখা সুত্ৰা, ৰীরবাহু মহীপতি;

তস্সেতং ৰচনং যুত্তং, ৰুত্তং মেহিত বুদ্ধিযা.

তথাপি চ নিজারিট্ঠ-পটিকারত্থমীদিসং;

ওরসং পুত্তরতনং, পেসেতুং না’নুরূপকং.

কিঞ্চ তত্থ কুমারম্হি, নীতে ৰিক্কম বাহুনো;

পক্খো লদ্ধমহাৰাহ-বলো ৰিয হুতাসনো.

অচ্চুন্নতেন মহতা, তেজসা সঞ্জলিস্সতি;

হানিরেৰ ৰতম্হাকং, মহতী হেস্সতে ভুসং.

ইতি হত্থে গতানং সো, দূতানং থনযং সকং;

অপেসেত্ৰা ৰিসজ্জেসি, পসাদিয মনেন সো.

সুজনপ্পসাদসংৰে গত্থায কতে মহাৰংসে

সুত্ৰা দ্ৰে ভাতরো অঞ্ঞে, জেট্ঠস্সো পরতিংসদা;

খিপ্পং সরট্ঠা আগম্ম, কারেসুং অন্তিমং ৰিধিং.

অথ কিত্তিসিরিমেঘো, রট্ঠং জেট্ঠস্স ভাতুনো;

অত্তাধীনং করিত্ৰান, আমন্তিয কণিট্ঠকং.

দত্ৰা রট্ঠদ্ৰযং অঞ্ঞং, ৰত্থুং তত্থেৰ আদিসি;

সো’পি জেট্ঠস্স ভাতুস্স, ৰচনং সম্পটিচ্ছিয.

সমাদায কুমারঞ্চ, দেৰিঞ্চ রতনাৰলিং;

ধীতরো দ্ৰে চ গন্তান, মহা নামহুলং পুরং.

সমগ্গা নিৰসং তত্থ, কুমারস্স সিখামহং;

কারেত্ৰা পরিহারেন, ৰড্ঢেসি মহতা সদা.

ততো সো দেৰিযা জেট্ঠং-ধীতরং মিত্তনামিকং;

দাতুকামো সপুত্তস্স, সহামচ্চেহি মন্তযি.

কালিঙ্গন্ৰযসম্ভূতা, পাযেনখলু ভূমিপা;

সামিভাৰং গতা অস্মিং, লঙ্কাদীপম্হী ভূযসো.

কালিঙ্গগোত্ত সম্ভূত, গজবাহুস্স দাতৰে;

গূল়রূপেন দেৰী’যং, যদি পেসেয্য ধীতরং.

ভিয্যো ¶ ৰিৰাহসম্বদ্ধো, বলৰা সো ভৰিস্সতি;

ময্হং এসো নিরালম্বো, পুত্তো হেহীতি সব্বথা.

তস্মা মে সুনূনো এসা, দাতুং যুত্তা কুমারিকা;

এৰং সতি ৰতম্হাকং, ৰড্ঢিযে’ৰ সিযা ‘‘ইতি’’.

দেৰীপি সুত্ৰা তং সব্ব-মাদিচ্চন্ৰয মণ্ডনা;

সব্বথা তমনিচ্ছন্তি, ইদমাহ মহীপতিং.

ঘাতেত্ৰা সকলে যক্খে, কুমারো ৰিজযৰ্হযো;

লংকাদীপমিমং’কাসি, মনুস্সাৰাসকং সদা.

ততো পভুতি অম্হাকং, ঘটেসুং ৰিজযন্ৰযং;

কালিঙ্গৰংসজেহেৰ, সম্বন্ধং কত্ৰ পুব্বকং.

অঞ্ঞভূপাল সম্বন্ধো, সুতপুব্বো পিনত্থিনো;

সোমৰংস সমুম্ভূতে, ঠপেত্ৰা ধরণিস্সরে.

তুয্হং জাতোতি অম্হাকং, সম্বন্ধো সো কথং সিযা;

অরিযন্ৰয সম্ভূত, কুমারেন সহামুনা.

এৰং সো দেৰিযা তায, নেকসো ৰারযন্তিযা;

পসয্হসক পুত্থস্স, তং কুমারিমদাপযি.

সো অনেকগুণোদার- ভরিযানুগতো ততো;

রঞ্জযন্তো জনে সব্বে, জনকসন্তিকে ৰসি.

একৰীসতিং ৰস্সানি, রজ্জং ৰিক্কম বাহুসো;

অনুভোত্ৰা যথাকম্মং, কাযভেদা গতো পরং.

ততো গজভুজো ঠিতং, সম্পন্নবলৰাহনং;

রজ্জং হত্থগতং কত্ৰা, পুলত্তিনগরে ৰসী.

ততো কিত্তিসিরীমেঘ, সিরীৰল্লভ ভূমিপা;

ৰুত্তন্ত মেতং ৰিঞ্ঞায, এৰং সমনুচিন্তযুং.

তস্স ৰিক্কম বাহুস্স, ৰুদ্ধভাৰেন নেকধা;

মূলরজ্জাধিপচ্চং তং, অম্মং নিন্দাকরং ন হি.

তদত্থজস্স বালস্স, মূলরজ্জং পসাসনো;

উপেক্খণং পনম্হাকং, নেৰানুচ্ছৰিকং ৰত.

তে সোযাৰ সরজ্জম্হি, বদ্ধমূলো ভৰিস্সতি;

পসয্হ তাৰ তং রজ্জং, ৰট্টতি গণ্হিতুং ইতি.

ৰেলক্কার ¶ বলং সব্বং, ভিন্দিংসু ধন দানতো;

ঠপেত্ৰা সেৰকে কেচি, তস্সব্ভন্তরিকে তদা.

গজবাহু মহীপালে, ৰিরত্তা রট্ঠৰাসিনো;

উভিন্নং রাজূনং দূতে, পেসযুং নেকসো ততো.

রজ্জং সাধেত্ৰা দস্সাম, একীভূতা মযং পন;

উপত্থম্ভকভাৰো’ৰ, কাতব্বো কেৰলং ইতি.

ততো দ্ৰে ভাতুকা সেনং, সকং সন্নয্হ ৰেগসা;

উভতো মুখতো তস্স, রট্ঠমজ্ঝমুপাগমুং.

পহিণিংসু চ তে দূতে, ততো গজবোহুৰ্হযো;

ভূমিপালো নিজামচ্চে, সন্নিপাতিয মন্তযি.

ৰেল়ক্কারবলং সব্ব-মুজুপচ্চত্তিকং অহু;

রাজানো দ্ৰে চ নো রট্ঠং, সঙ্গামত্থমুপাগতা.

পঠমং তেসু পক্খস্স, একস্স বলিনো ভুসং;

মুখভঙ্গে কতে খিপ্পং, ততো অঞ্ঞে সুসাধিযা.

ইতি নিচ্ছিয সেনঙ্গং, সব্বমাদায অত্তনো;

সিরিৰল্লভরাজাভি-মুখং যুদ্ধা’যুপাগমি.

সিরিৰল্লভরাজাপি, সঙ্গাম মহিভিংসনং;

পাতো পট্ঠায সাযন্হ-কালং যাৰ পৰত্তযং.

অসক্কুণন্তো’ভিভৰং, ৰিধাতুং তস্স কঞ্চিপি;

ততোৰ সো নিৰত্তিত্ৰা, সকং রট্ঠং গতো লহুং.

গজবাহুস্সগোকণ্ণ-সচিৰেন পরাজিতো;

অগা রট্ঠং সকং কিত্তি-সিরিমেঘো’পি ভূপতি.

গজবাহুনরিন্দোপি, সঙ্গামে তম্হি কিঞ্চিপি;

পরিহানিমসম্পত্তো, পুনা’গম্ম পুরন্তিকং.

বলনাথে ৰিনিগ্গয্হ, সাপরাধে বহূ বলী;

রট্ঠং ৰূপসমেত্ৰান, পাৰেক্খি নগরং সকং.

রট্ঠে সকে সকেযেৰ, ততো পভূতি ভূমিপা;

অঞ্ঞোঞ্ঞমিত্তে সম্বন্ধং, ৰিধায ৰিহরিংসু তে.

ততো পরক্কমভুজো, ধরণী পালনন্দনো;

মেধাৰীনেকসিপ্পেসু, সিক্খমানো সুসাধুকং.

ৰিচারক্খমপঞ্ঞত্তা ¶ , কিচ্চা কিচ্চেসু নেকসো;

অচ্চুল়ারাসযত্তা চ, মহাভাগত্তনেন চ.

অত্তনো মাতুভগিনী, সহৰাস সুখম্হি চ;

অলগ্গমানসোনেক, বলাকীল়ারসেসু চ.

সূরভাৰাদিসংযুত্তা, রাজপুত্তা তু মাদিসা;

পচ্চন্তে ঈদিসে দেসে, কথং নাম ৰসিস্সরে.

জাতদেসঞ্চ মে দানি, যুৰরাজপভোগিযং;

গমিস্সামীতি নিগ্গঞ্ছি, তম্হা পরিজনত্থিতো.

কমেন সন্তিকং সঙ্খ-নাযকত্থলিসঞ্ঞিনো;

গামস্সাগা অহিং কিত্তি-সিরিমেঘো নিসম্ম তং.

অভাৰা রজ্জ দাযাদ-সমানস্স’ত্রজস্স মে;

একাকী’হন্তি যো চিত্ত-সন্তাপো সন্ততং গতো.

জেট্ঠংৰ ভাতরং ময্হং, তং দেহপটিবিম্বকং;

দট্ঠুং মে সত্ততং পুঞ্ঞং, মহন্তমুদিতংতিচ.

পামুজ্জৰেগৰসগো, নগরং তং মনোহরং;

অলঙ্কারা পযিত্ৰান, তোরণাদীহি নেকধা.

গন্ত্ৰা পটিপথংযেৰ, বলোঘপরিৰারিতো;

নরিন্দো তিথিনক্খত্ত-ৰিসেসে সুভসম্মতে.

অনঞ্ঞসাধারণতং, সম্পত্তেহি গুণেহি চ;

লক্খণেহি চ সব্বেহি, কল্যাণেযি সুসংযুতং.

দিস্ৰা কুমারং সন্তুট্ঠো, আলিঙ্গিত্ৰান পেমতো;

উরে কত্ৰান চুম্বিত্ৰা, মত্থকম্হি পুনপ্পুনং.

জনস্স বলতো তস্স, পস্সতো লোচনেহি সো;

সন্তোস অস্সুধারাযো, ৰস্সাপেন্তো নিরন্তরং.

মনুঞ্ঞমেক মারুয্হ, ৰাহনং সহ সূনুনা;

ভেরিনি দেন পূরেন্তো, দিসা দস সমন্ততো.

পৰিসিত্ৰা পুরং তত্থ, অলঙ্কারে মনোরমে;

দস্সযন্তো সপুত্তস্স, পাৰিসি রাজমন্দিরং.

সুজনপ্পসাদসংৰেগত্থায কতে মহাৰংসে

অত্তনাভিমতস্সা’সু, জাতদেসস্স পত্তিযা;

সম্পুণ্ণমনসঙ্কপ্পো, দুস্সঙ্কপৰিৰজ্জিতো.

ৰজিরূপমোরুপঞ্ঞা, বলেন গুরুসন্তিকে;

লহুং বহুঞ্চ গণ্হন্তো, সিপ্পজাতমনেক কং.

জিনাগমেসু নেকেসু, কোটিল্লা দীসু নীতিসু;

সদ্দসত্থে চ কাৰেয্যে, সনিঘণ্ডুক কেটুভে.

নচ্চগীতেসু সত্থেসু, হত্থিসিপ্পাদিকেসু চ;

ধনু খগ্গাদিনেকেসু, সত্থেসু চ ৰিসেসতো.

পারপ্পত্তো ৰিনীতত্তো, পিতু রঞ্ঞো সমাচরি;

অধিপ্পাযানুকুলং’ৰ, সদা ভত্তিপুরস্সরো.

তদা সদা দরাচার-গুণারাধিতমানসো;

পিযেন ৰিয মিত্তেন, তেন সদ্ধিং মহীপতি.

উয্যানজলকীল়াদি-সুখং নানপ্পকারকং;

অনুভোত্ৰা সদেসস্মিং, সঞ্চরন্তো তহিং তহিং.

একদাসঙ্খসেনাধি-পতিনা দল়্হভত্তিনা;

সরট্ঠসীমা রক্খায, যো জিতেন বলীযসা.

অজ্ঝাৰুত্থস্স ¶ চ বলত্থ-লিনমস্স চ সন্তিকং;

গামসা’গঞ্ছি সুত্ৰান, তমত্থং ধজিনীপতি.

গামং তং সাধুকং সজ্জু, সজ্জাপেত্ৰা সপুত্তকং;

পচ্চুগ্গন্ত্ৰা মহীপালং, পণমিত্ৰা ঠিতো তদা.

পিতা পুত্তো উভো তস্স, সম্ভাসিয পিযং ৰচো;

নেকধা’রাধিতা তেন, তং গামং সমুপাগগুং.

তহিং কতিচি ভূপালো, ৰাসরে ৰীতিনামিয;

সেনাপতিং সমাহূয, ইদং ৰচনং মব্রৰি.

পুত্তো মে দানিৰযসি, ঠিতো’ পনযনারহে;

তস্সোপনযনং কাতুং, মহোপকরণং লহুং.

সজ্জেতব্বন্তি তং সুত্ৰা, সোপি সেনাধিনাযকো;

সব্বুপকরণং খিপ্পং, মঙ্গলত্থং সুসজ্জযি.

সুগন্ধ দীপপুপ্ফাদি-ৰত্থূহি দিৰসত্তযং;

পুব্বকারং করিত্ৰান, মহন্তং রতনত্তযে.

ৰেদিকাচারদক্খেহি, দ্ৰিজেহি পুথুৰীপতি;

সম্পভাৰানু রূপংৰ, মঙ্গলং তং সমাপিয.

পরক্কমকুমারেন, তেন সদ্ধিং সমারভি;

ৰসন্তকীল়ং মহতিং, সামচ্চো কীল়িতুং তদা.

রাজা কিত্তি সিরীমেঘো-রোহণে ৰসতো তদা;

সিরীৰল্লভনামস্স, সভাতু মরণম্পি চ.

মাণভরণনামস্স, রজ্জলাভঞ্চ দেৰিযা;

মিত্তায পটিলাভঞ্চ, সিরীৰল্লভসূনু নো.

রোহণাগতদূতেহি, সুণিত্ৰা সকভাতুনো;

কালক্রিযায সঞ্জাত-সোকৰেগং সুদুস্সহং.

মিত্তাযতনযুপ্পত্তি পৰত্তিং সৰণেন তং;

ৰিনেয্য ৰিরতো তম্হা, ৰসন্তসমযুস্সৰা.

নিৰত্তেত্ৰান তত্থেৰ, সেনানিং সঙ্খনামকং;

পুত্তেন সহ সো সঙ্খ-ত্থলি নামং পুরং গমি.

পরক্কমকুমারেন, তেন সদ্ধিং তহিং সুখং;

ৰসতো তস্স ভূপস্স, ৰস্সমেকমতিক্কমি.

মাণাভরণভূপস্স ¶ , দেৰী চাপি পভাৰতী;

লভিত্থ দুতিযা কিত্তি-সিরী মেঘৰ্হযং সুতং.

সুণিত্ৰা তঞ্চ সো অম্হং, ৰংসো জাতো মহা’’ইতি;

অহু কিত্তিসিরীমেঘো, তদা অত্তমনো ভুসং.

লংকাদীপোপভোগেক-হেতুনা মহতা সতা;

অসাধারণভূভেন, চোদিতো পুঞ্ঞকম্মুনা.

কুমারো সো’থ পিতরা, পিযমিত্তে ৰিযত্তনি;

করিযমানং সস্নেহং, মহন্তং চো’পলালনং.

সচিৰানমনেকেসং, ভযভত্তী পুরস্সরং;

ক্রিযমানমুপট্ঠানং, ন মঞ্ঞন্তো তিণাযপি.

লংকাদীপমিমং সব্ব মেকচ্ছত্তো পসোভিতং;

খিপ্পং কারেতুকামো সো, সযং ইতি ৰিচিন্তযি.

কেস অক্খক গীৰট্ঠি-দাঠা পত্তান মেৰ চ;

পদচেত্য মহাবোধি-সাখানঞ্চাপি সত্থুনো.

চতুরাসীতিসহস্সানং, ধম্মক্খন্ধান মেৰ চ;

সম্মাসম্বুদ্ধকপ্পানং, আধারত্তা চ নিচ্চসো.

আকরত্তা চ নেকেসং, মণিমুত্তাদিৰত্থূনং;

সম্মতোপি ৰিসিট্ঠোতি, দীপোনাতি মহা অযং.

তযো মে পিতরো ভূপা, মাতুলোপি চ সব্বথা;

একচ্ছত্তেন ৰত্তেতু, মসমত্থা ৰিভজ্জি’মং.

ভুঞ্জন্তা এত্তকেনেৰ, কতকিচ্চা মযং ইতি;

মঞ্ঞন্তা ৰিগতচ্ছন্দা’ভিসেকম্হি কুলোচিতে.

রট্ঠেসকে সকেযেৰ, ইস্সেরং সম্পৰত্তযুং;

কসিকম্মাদিকং গাম-ভোজকা ৰিয নিস্সিতা.

তেসু কিত্তিসিরি মেঘং, পেত্তেয্যং মে ঠপেত্ৰ তে;

অগমংসু যথাকম্মং, সেসা ভূপতযো তযো.

মচ্চানং পরমং আযু, ৰতে’দানি পরিত্তকং;

বালাযুৰানো ৰুদ্ধা চ, ইমে সত্তা’নুপুব্বসো.

পাপুণিস্সন্তি মরণ-মীতি’যং নিযমোপি চ;

ন হেৰ অস্মিং লোকস্মিং, সংৰিজ্জতি কদাচিপি.

তস্মা ¶ সরীরকে অস্মিং, ভঙ্গুরে সারৰজ্জিতে;

হীল়িতে সারদস্সীহি, অপেক্খং হিত্ৰা সব্বথা.

পিহনিযে যসোদেহে, চিরট্ঠাযিম্হি সব্বদা;

অম্হাদিসেহি কত্তব্বো, রাজপুত্তেহি আদরো.

উম্মগ্গজাতকাদীসু, চারিত্তঞ্চাপি ভূমিসু;

ৰিহিতং বোধিসত্তেন, ৰীরভাৰাদিনিস্সিতং.

রামাযণভারতাদি-লোকিযাসু কথাসুপি;

রামস্স ৰিক্কমঞ্চেৰ, তস্স রাৰণঘাতিনো.

দুযোধনাদিরাজানো, হন্ত্ৰাযুদ্ধে পৰত্তিতং;

ৰিক্কমাতি সযঞ্চেৰ, পঞ্চন্নং পণ্ডুসূনূনং.

ইতিহাসকথাযঞ্চ, দেৰাসুররণে পুরা;

দুস্সন্তাদিমহীপেহি, কতঞ্চ চরিতব্ভূতং.

উম্মূলিতৰতো তস্স, নন্দৰংসনরিস্সরে;

চারক্কদ্ৰিজসেট্ঠস্স, সুত্ৰা বুদ্ধিবলম্পি চ.

সব্বা নেতানি লোকম্হি, যাৰজ্জদিৰসা ভুৰি;

তেসং অসন্নিধানেপি, সুপ্পসিদ্ধিং গতানি হি.

সুলদ্ধং জীৰিতং তেসং, অসাধারণমীদিসং;

চরিতাতিসযং কত্তুং, সমত্থা হোন্তি যে ভুৰি.

জাযিত্ৰা খত্তৰংসম্হি, খত্তৰীরৰরোধিতং;

যদিহং ন করিস্সামি, মোঘা মে জাতি হেস্সতি.

তেসমব্ভধিকা কাল-সম্পদাযেৰ কেৰলং;

মযা তে অধিকা কিন্তু, পঞ্ঞাদীহীতি চিন্তিয.

পিতুরাজা চ মে’দানি, পচ্ছিমে ৰযসিট্ঠিতো;

যদিদং পেত্তিকং রজ্জং, মম হত্থগতব্ভৰে.

রাজলক্খিৰ সো পেত-চেতসো মে পমাদতো;

যথিচ্ছিতঞ্চে ন ভৰে, মহতী জানি মে ভুসং.

এত্থেৰ নিৰসন্তো’হং, চরাপিয সকে ৰরে;

পরমণ্ডলৰুত্তন্তং, জানেয্যং যদি তত্তনো.

রন্ধং পচ্চত্থিকানন্তু, পকাসেতুং রথাতথং;

অধিপ্পাযানুরূপং মে, সমত্থা ৰা ন ৰাচরা.

যে ¶ কেচি’ধ জনা সন্তি, সব্বে তে মম সম্মুখা;

বলীযত্তং’ৰ সত্তূনং, কথযন্তি অনেকসো.

পচ্চেকরট্ঠসামীহি, পিতুভূপেহি তিহিপি;

একীভূয করিত্ৰান, সত্তক্খত্তুং মহাহৰং.

সাধেতুং দুক্করং রট্ঠং, ভৰতে কাকিনা কথং;

সিসুনা গণ্হিতুং সক্কা, খুদ্দরজ্জো পভোগিনা.

সুকরং মূলভূতস্স, তস্স রজ্জস্স সাধনং;

ইতি দুচ্চিন্তংতং তুয্হং, দূরে তব্বমিদং’’ইতি.

কণ্ণে তত্থসলাকাযো, পৰেসেন্তা’ৰ নেকসো;

মহন্তত্তং কথেন্তে’ৰং, বহুধা পরমণ্ডলে.

অজাননং যথাভূতং, ৰদন্তানং কুবুদ্ধিনং;

সব্বমেতং ৰচো জাতু, সদ্ধাতব্বং সিযা ন হি.

লেসেনেকেন গন্ত্ৰান, খিপ্পং’ৰ পরমণ্ডলং;

সরূপং তত্থ উস্সামি, অহমেৰেতি চিন্তযি.

যদি মে পীতুভূপালো, ৰিঞ্ঞাযেতং ৰিতক্কিতং;

অভিজাতস্স পুত্তস্স, ৰংসজোতিকরস্স মে.

গতস্স সত্থু ৰিসয-মনত্থোপি সিযা ইতি;

অনুকম্পাধিযা ময্হং, গমনং ৰারযিস্সতি.

মনোরথস্স সংসিদ্ধি, সব্বথা মেন হেস্সতি;

তস্মা নিগুল়রূপেন, গমনং ভদ্দকং ইতি.

লদ্ধান রত্তিযম থেকদিনং খণঞ্ঞূ,

গেহা’ভিনিক্খমিতথা চতুরো কুমারো.

সুজনপ্পসাদসংৰেগত্থায কতে মহাৰংসে

নিজাযুধদুতিযস্স ¶ , নিক্খমন্তস্স তস্স হি;

তং খণং পুরতো কো’পি, সঙ্খসদ্দো সমুগ্গতো.

ততো নেকনিমিত্তঞ্ঞূ, কুমারো তং সুণি ত্ৰ সো;

নিপ্ফজ্জিস্সতি সঙ্কপ্পো, খিপ্পং যেৰেতি মোদৰা.

তত্থ তত্থ নিযুত্তানং, রক্খকানমজানতং;

নিক্খমিত্ৰা পুরাৰীত-ভযো সীহপরক্কমো.

ৰেগেন মগ্গং গন্ত্ৰান, পঞ্চগাৰুতমত্তকং;

বদলত্থলগামস্স, পদেসেনাতি দূরকে.

গাম মেকমুপাগঞ্চি, পিলিং ৰত্থূতি সঞ্ঞিতং;

জনানং সন্নিপাতায, নিজানং সো কতাৰধি.

নিজাগমনতো পুব্বং, পটিমগ্গে নিসীদিতুং;

পটিলদ্ধনিযোগানং, যেচি দেৰাগতে তদা.

তহিং ঠিতে সো পস্সিত্ৰা, এত্তকা কিন্নু আগতা;

ইতি পুচ্ছি কুমারোথ, তেপি তং ইদ মব্রৰুং.

লোকপ্পৰত্তিং সকলং, জানন্তেনাপি সামিনা;

কিমেৰ মুচ্চতে মচ্চু-ভযং কেসং ন ৰিজ্জতি.

বালাতানুগতো সামি, ঠিতো ৰযসি ঈদিসে;

অজ্জাপি হি মুখে তুয্হং, খীরগন্ধো পৰাযতি.

ন হেৰত্থি ৰিসুং ৰিত্ত-জাতং সঙ্গহিতং তৰ;

তদঞ্ঞা চোপকরণ-সামগ্গী নেৰ ৰিজ্জতে.

চিরম্পরিচিতত্তেহি, দল়্হং সারুল়ভত্তিহি;

ৰিনা’ম্হেহি ৰিসুং কেৰা’নুগন্তারো জনাতুৰং.

কিঞ্চাগতানমম্হাকং, পিতা তুয্হং নরিস্সরো;

কারেস্সতি ইদং নাম, সব্বথা নেৰ ঞাযতে.

অম্হাকমন্তরামগ্গে ¶ , সঙ্খো নাম চমূপতি;

মহব্বলো মহাৰীরো, রজ্জসীমং তমাৰসং.

পচ্চত্থিতে ঠপেত্ৰঞ্ঞে, এতে কতিপযা মযং;

অঞ্ঞমঞ্ঞম্হি নিযত-মাসঙ্কী হদযা ভুসং.

অরুণুগ্গমৰেলা চ, সমাসন্নতরাধুনা;

ইতি ভীতিং পকাসেসুং, পচ্চেকং হদযস্সিতং.

নিসম্ম তেসং ৰচনং, ৰিধায মধুরং সিতং;

ৰীতসঙ্কো কুমারো সো, মুখানে’সং ৰিলোকিয.

চরিত্ৰাপি মযা সদ্ধি-মেতে’হো কালমেত্তকং;

ন জানিংসু মমং সব্বে, যেসঞ্হি ভযমিদিসং.

ইতি ৰত্ৰা ভযং তেসং, ৰিনোদেতু মুপট্ঠিতং;

সীহনাদং তদা’কাসি, মহন্তং সীহৰিক্কমো.

তিট্ঠন্তু মানুসা সব্বে, মযি হত্থগতাযুধে;

সক্কো দেৰানমিন্দোপি, কুপিতো কিং করিস্সতি.

বালোতি মং চিন্তয তং, জাতা ৰো কুমতীদিসী;

পরিক্খীযতি তে জাণা, নৰযো’তি ন কিং সুতং.

অজ্জেৰ কাতুমেকেন, কম্মুনা চিন্তিতেন মে;

সদেসপর দেসট্ঠা, ভযভত্তী যথামযি.

করিস্সন্তি যথা ৰেদং, ভযং তুম্হে জহিস্সথ;

তথা রত্তিযমেতায, ৰিভাতাময খণেন মে.

উন্নতে দস্সযিস্সামি, বুদ্ধি সাহসৰিক্কমে;

অনুধাৰতি মং তাত, সেতেহি যদি ৰো ভযং.

পুরতো হোথ তুম্হেহি, ৰত্ৰা তে গহিতাযুধো;

সাহসেকরসো ৰীরো, তম্হা নিক্খম্ম গামতো.

উদযা’চলসীসট্ঠং, জেতুমাদিচ্চমণ্ডলং;

অপরং রৰি বিম্বংৰ, পচ্ছিমা সা মুখোদিতং.

তেজসা পসরন্তেন, জনানং পৰিকাসযং;

নেতম্বুজৰনং পাতো, বদলত্থলিমাগমি.

জঘসঙ্খস্সরেনা’থ, সেনা নাথো পবুজ্ঝিয;

সঞ্জাতসম্ভমো ঞত্ৰা, রাজপুত্তমুপাগতং.

সদ্ধিং ¶ বলেন মহতা, পধুগ্গম্মকতাদরো;

পণামমুচিতং কত্তু-মানতো ৰসুধাতলে.

অম্হাকমেসজীৰন্তো, কিং নামত্থং করিস্সতি;

মারেতব্বো’ধুনেৰেতি, পস্সন্তে সমুখং ভটে.

নেৰা’দিট্ঠাপরাধস্স, মরণং পুরিসো চিতং;

ৰধো ৰিরোধে সক্কা’তি, ইঙ্গিতেন নিৰারিয.

সেনাপতিস্স সো হত্থং, গহেত্ৰা সীহসন্নিভো;

ভাসন্তো মধুরং ৰাচং, তস্সেৰা’গঞ্ছি মন্দিরং.

অথস্স গমনং রঞ্ঞো, ভৰিতব্বমজানতা;

সরূপং যাৰ জানামি, তাৰস্সেতে সহাগতা.

যথা ন সহিতা হোন্তি, ঠপেতব্বা ৰিসুং ৰিসুং;

কুমারো’ৰ মমাগারে, ৰসতূ’তি ৰিচিন্তিয.

তথা সেনাপতি কত্ৰা, ৰঞ্চেতুং তং মহামতিং;

দস্সেত্ৰা’তি থীসক্কারং, রঞ্ঞো দূতে স পেসযি.

কুমারো’থ ৰিদিত্ৰান, তেন তং ৰঞ্চনং কতং;

কত্তব্বমেত্থা’কত্ৰাহ, মুদাসীনো ভৰে যদি.

ইচ্ছিতত্থস্স নিপ্ফত্তি, ন মে জাতু ভৰিস্সতি;

অযং তাৰা’ধুনাৰস্সং, মারেতব্বোতি চিন্তিয.

সহাগতং পযোজেত্ৰা, ঘাতাপযি চমূপতিং;

হতো সেনাধিনাথো’তি, মহন্তং খুভিতং অহু.

সেনানাথভটো একো, সুত্ৰা সেনাপতিং হতং;

মারণং সামিনো ময্হং, কিং নিমিত্তমীতি ব্রৰি.

নেত্তিং সপাণী সহসা, কুমারং ঠিতমেককং;

অভিদাৰি সসামিস্স, পরিচত্তত্তজীৰিনো.

কুমারস্স মুখং দিস্ৰা, ৰেধমানো ভযেন সো;

পুরে ঠাতুমসক্কোন্তো, পাদমূলে ততো সযি.

গণ্হথে’তন্তিৰচনা-কুমারস্স ¶ পুরেতরং;

তস্সেৰেকো সহচরো, ভটমেতং ৰিঘাতযি.

নিযোগং মে ৰিনা তেন, কতং কম্মং ন যুজ্জতি;

ইতি দণ্ডনমেতস্স, কারাপেসিযথোচিতং.

অথ তং কালযম্ভূত-সঙ্খোভমতিভিংসনং;

ভমুক্খিপনমত্তেন, রাজপুত্তো সমং নযি.

সেনিন্দসঞ্চিতমনপ্পধনং ভটানং;

সব্বং ৰিসজ্জযি যথারুচিযা গহেতুং.

সুজনপ্পসাদসংৰেগত্থায কতে মহাৰংসে