📜

নমো তস্স ভগৰতো অরহতো সম্মাসম্বুদ্ধস্স

সূরস্সতীনীতি

পঠমো ভাগো

পণামগাথা

১.

মুখম্হা ভগৰন্তস্স,

সুগন্ধকমলা সুভা;

সঞ্জাতং উত্তমং ৰাণিং,

ৰন্দামি ৰিত্তমানসা.

২.

সমজ্ঝিট্ঠো রচিস্সামি,

দক্খেন রাজমন্তিনা;

নামেন সন্তেন,

নীতিং লোকহিতাৰহং;

সালঙ্কারং সোপদেসং,

নামেনাহং স্ৰরস্সতিং.

৩.

পেক্খন্ত্ৰিমং নীতিং সন্তা,

মঞ্জূসরুক্খসন্নিভং;

নানোপদেসসংপুণ্ণং,

সদত্থকুসলা সদা.

সূরস্সতীনীতি

১.

কতঞ্ঞুতা চ সচ্চঞ্চ,

লোকসারা হি তে দুৰে;

লোকাপি তেহি তিট্ঠন্তি,

রট্ঠং অকংসু ইস্সরং.

২.

কাকাচ দুজ্জনা লোকে,

মলীভূতাৰ সব্বদা;

ইট্ঠং গুণং নাসযন্তি,

তে ৰে লোকস্স ৰেরিনো.

মিগানং সিঙ্গালো অন্তো,

পক্খীনং পন ৰাযসো.

অকারণৰেরী হোন্তি,

মচ্ছানং ধীৰরা যথা;

গুণীনং সজ্জনানঞ্চ,

দুজ্জনা নিচ্চৰেরিনো.

৩.

সিরিং ভোন্তো সুপোসেথ,

সিরি মূলা হি সম্পদা;

সিরিয ইধ জোতন্তি,

সিরী সা সব্বসিদ্ধিকা.

৪.

মুসা তমোকরা লোকে,

সচ্চং মীদিতিকারকং;

মুসাতমেন দুক্খন্তি,

সচ্চাভায সুখন্তিৰে.

সুৰিজানং সিঙ্গালানং,

সকুণানঞ্চ ৰস্সিতং;

মনুস্সৰস্সিতং রাজ,

দুব্বিজানতরং ততো.

৫.

কপ্পগ্গিসদিসা ইস্সা,

ঝাপেতি সব্বসম্পদং;

মুদিতা কপ্পমেঘোৰ,

রোপেতি সব্বসম্পদং.

৬.

যথা অসন্থিরা থম্ভা,

থুসরাসিম্হি উস্সিতা;

তথেৰ কপিচিত্তানং,

কম্মন্তা চঞ্চলঙ্গতা.

হলিদ্দিরাগং কপিচিত্তং;

পুরিসং রাগৰিরাগিনং,

এদিসং তাত মাসেৰি;

নিম্মনুস্সম্পি চে সিযা.

৭. [ক]

পুপ্ফচুম্বি চিত্তপত্তী,

সকৰণ্ণেন মজ্জিতো;

ৰিক্কমী পুপ্ফতো পুপ্ফং,

নস্সাগারং ন সঙ্গমো.

[খ]

কিপ্পিলিকা দুব্বণ্ণাপি,

সমগ্গাচ পরক্কমা;

মা হোথ পুপ্ফচুম্বীৰ,

হোথ ৰো পচিকা যথা.

১.

যে মরন্তি কীল়ন্তা তে,

স্ৰানা অঞ্ঞোঞ্ঞমোদিতা;

দিস্ৰান ছট্টিতং ভত্তং,

সীঘৰেরী ৰিহিংসরে.

২.

তথেকেপি জনা দানি,

সমগ্গা ঞ্ঞোঞ্ঞমোদিতা;

ধনহেতু ৰিহিংসন্তি,

ধীরত্থু সীঘৰেরিকা.

৯.

ৰসন্তে হেমন্তে গিম্হে;

নেৰ তালা ৰিসেসিনো;

থিরচিত্তা জনা সন্তা;

সুখদুক্খেসু নিচ্চলা.

১০.

যথা পৰট্টমানম্হি,

সুট্ঠু তিট্ঠতি গেণ্ঠুকে;

অপ্পৰট্টে ভূম্যং সেতি,

তথেৰ গেণ্ঠুকো জনো.

১১.

অগ্ঘাপেতুং নসক্কোন্তি,

কালঞ্হি কালিকা জনা;

ৰজিরাদিঞ্চ সক্কোন্তি,

তেন কালো অনগ্ঘিকো.

১২. [ক]

অসনো হি দীঘদ্ধানো,

সারসারো সুগন্ধিকো;

নিগ্গন্ধো ত্ৰেৰ নিস্সারো,

দীঘদ্ধানোপি সিম্বলী.

[খ]

তথেৰেকে জনা লোকে,

দীঘদ্ধানা সুসারকা;

নিস্সারা কেচি ফেগ্গূৰ,

দীঘদ্ধানাপি গোযথা.

১৩.

উপকারো চাপকারো,

যস্মিং গচ্ছতি নট্ঠতং;

পাসাণহদযস্সস্স,

জীৰতীত্যা ভিধামুধা.

পসাদো নিপ্ফলো যস্স,

কোপোচাপি নিরত্থকো;

ন তং সঙ্গন্তু মিচ্ছেয্য,

থীপুমাৰ নপুংসকং.

১৪.

উপচারো হি কাতব্বো,

ন যাৰ সোহদং ভৰে;

উপচারো সুমিত্তম্হি,

মাযা চ হোতি কোটিলং.

১৫.

কমেন অগ্গতো উচ্ছু,

রসো সাদুতরো যথা;

তথেৰ সুমিত্তো লোকে,

দুম্মিত্তো পন নেদিসো.

১৬.

সোকারাতি পরিত্তাণং,

ৰিস্সাসপীতিভাজনং;

রতনাভিরতনং ইচ্ছে,

সুমিত্তং অক্খরত্তযং.

১৭.

দম্পতীনং সুমিত্তানং,

মুখং অঞ্ঞোঞ্ঞদপ্পণং,

সুখে সুখং দুক্খে দুক্খং,

পটিচ্ছাযেৰ দপ্পণে.

কথং নু তাসং হদযং,

সুখরাৰত ইত্থিযো;

যাসামিকে দুক্খিতম্হি,

সুখমিচ্ছন্তি অত্তনো.

১৮.

নিৰাতঞ্চ পুরে কত্ৰা,

মানং কত্ৰান পচ্ছতো;

সকত্থং ধারযে ধীরো,

অত্থভঞ্জো হি মুল়্হতা.

১৯.

পুরেচারং সতিং কত্ৰা,

সদ্ধং করেয্য পচ্ছতো;

তুরং ন সদ্দহে ধীরো,

সীঘসদ্ধো হি মন্দকো.

২০.

ৰনে ০.০০৯৯ বহূনি কট্ঠানি;

দুল্লভং রত্তচন্দনং;

তথা জনা বহূ লোকে;

পুমা জঞ্ঞো সুদুল্লভো.

২১.

তিণকট্ঠপলাসেহি;

সুক্খেহি দয্হতে ৰনং;

এতাদীহি অসারেহি;

লোকো জনেহি দয্হতে.

২২.

অন্তোৰস্সে তিমাসম্হি,

পুঞ্ঞকম্মেন মোদিতা;

সুখং ৰসিংসু পোরাণা,

বুদ্ধসাসনমামকা.

২৩.

মিগমদেন একেন,

তং ৰনং সুরভিগন্ধিকং;

তথা জনেন তং রট্ঠং,

গুণিনা হি সিরীমতা.

সরীরং খণৰিদ্ধংসী,

কপ্পন্তট্ঠাযিনো গুণা.

২৪.

খরানং সীহব্যগ্ঘানং,

সঙ্গমো নো হিসব্বদা;

তথেৰ ব্যগ্ঘচিত্তানং,

সজাতিকা খযোনতা.

২৫.

সক সাধুপি নো সাধূ,

যো চেঞ্ঞ দুট্ঠকারকো;

বহূনং সাধূ পাযেন,

স ৰে সাধূতি ৰুচ্চতে.

২৬.

বহূদকে সমুদ্দেপি,

জলং নত্থেৰ পাতৰে;

খুদ্দকে খতকূপম্হি,

সাদুং অত্থি বহুং দকং.

২৭.

মা সীঘং ৰিৰরেয্যাথ,

নিন্দিতুঞ্চ পসংসিতুং;

মুখঞ্হি ৰো কথাদ্ৰারং,

নিরুন্ধেয্যাথ সব্বদা.

২৮.

মা সীঘং ৰিৰরেয্যাথ,

চক্খুং ৰো দস্সিতুং পিযং;

সণিকঞ্হি পিযলাভং,

ধনলাভং তুরং করে.

২৯.

অনারম্ভো হি কম্মানং,

পঠমং বুদ্ধিলক্খণং;

নিট্ঠঙ্গতং আরদ্ধস্স,

দুতিযং বুদ্ধিলক্খণং.

অসমেক্খিতকম্মন্তং,

তুরিতাভিনিপাতিনং;

সানি কম্মানি তপ্পেন্তি,

উণ্হং ৰজ্ঝোহটং মুখে.

৩০.

অফলানি দুরন্তানি,

জনতা নিন্দিতানি চ;

অসক্যানি চ কম্মানি,

নারভেথ ৰিচক্খণো.

৩১.

অতিৰিরোধভীতানং,

সঙ্কিতানং পদে পদে;

পরপ্পৰাদতাসানং,

দূরতো যন্তি সম্পদা.

সদ্দমত্তং ন ভেতব্বং,

লোকো সদ্দস্স গোচরো;

যো চ সদ্দপরিত্তাসো,

ৰনে ভন্তমিগো হি সো.

৩২.

দ্ৰিন্নং তণ্ডুলথূসানং,

ৰিসেসো সুট্ঠু খাযতি;

রন্ধিতোপি সিনিদ্ধো নো,

থুসো ৰিরসফারুসো;

তণ্ডুলং সিনিদ্ধং রসং,

এৰং লোকেপি ঞাযতে.

৩৩.

এরণ্ডং নিস্সিতা ৰল্লি,

রুহতে কিং যথাবলং;

মহাসালং সুনিস্সায,

রুহতে ব্রহতং গতা.

৩৪.

মেত্তা হি সীমসম্ভেদা,

পক্খপাত ৰিঘাতিকা;

পক্খপাতেন দুক্খন্তি,

নিপ্পক্খো ৰসতে সুখং.

৩৫.

নরা পঞ্ঞা চ লঙ্কারা,

যথাঠানে নিযুজ্জরে;

নো হি চূল়ামণি পাদে,

পাদুকা চ সিরোপরি.

উক্কুট্ঠে সূর মিচ্ছন্তি;

মন্তীসু অকুতূহলং;

ৰিযঞ্চ অন্নপানম্হি;

অত্থে জাতে চ পণ্ডিতং.

৩৬.

পমাদো হি তমো লোকে,

কালো চোরো ভযানকো;

কাযগেহং বহুছিদ্দং,

কালচোরস্স চোরিতং.

৩৭.

চঞ্চলো কালদাসো হি,

ধীতিমা কালইস্সরো;

কালিস্সরো রট্ঠিস্সরং,

অতিৰত্ততি সব্বসো.

৩৮.

ৰিলুপ্পন্তি ৮ ধনং একে,

কালমেকে অনেক্খকা;

তেসু কালৰিলোপাৰ,

ভযানকা তিকক্খল়া.

৩৯.

রঞ্ঞা রট্ঠহিতং কত্তা,

রঞ্ঞো হিতং জনেহি ৰে;

দেস্সো অত্তহিতং দস্সী,

গারয্হো কিন্নু কারকো.

অত্তদত্থং পরত্থেন;

বহুনাপি ন হাপযে.

৪০.

যস্স উপকারো দিন্নো,

উপকারং দদে পুন;

ততো পকারং নিচ্ছেয্য,

কতঞ্ঞূ দুল্লভো ইধ.

সচ্চং কিরেৰ মাহংসু,

নরা একচ্চিযা ইধ;

কট্ঠং নিপ্লৰিতং সেয্যো,

নত্ৰেৰে কচ্চিযো নরো.

৪১.

কারুকো সকপঞ্ঞায,

মহগ্ঘং দারুকং করে;

তথা জনোপি অত্তানং,

মহগ্ঘো লোকমানিতো.

৪২.

অপ্পগ্ঘো হি অযো হেমং,

মহগ্ঘং ছিন্দতে যথা;

নিগ্গুণো সগুণং লোকে,

অলক্খীচ সিরিং তথা.

সূরস্সতীনীতি

দুতিযো ভাগো

১.

ধনস্স দুব্বিধং কিচ্চং,

পাপেতি উণ্ণতং ধনিং;

অধনিং ওণতং লোকে,

সঞ্চিনে তেন তং ধনং.

২.

ৰট্টতে সততং সীঘং,

কালচক্কং অৰারিতং;

তেন ঘটী দিনং মাসো,

ৰস্সো ভৰত্য চীরতো.

৩.

সত্তুনা ন হি সন্ধেয্য,

একদা সো ভযং করো;

সুতত্তমপি পানীযং,

সমযতে নু পাৰকং.

৪.

ৰিজহং পকতিং যো হি,

ৰিকতিং পুন গচ্ছতি;

সভাৰেন আকারেন,

ৰিপ্পল্লাসং স গচ্ছতি;

সংসুমার গতা গোধা,

যথা থী পুমৰেসিকা.

৫.

পক্খং লদ্ধান উড্ডেন্তি,

উপচিকা হি ৰম্মিকা;

নিক্খন্তা মরণং যন্তি,

উপ্পতা নিপ্পতং গতা.

৬.

সব্বংপিযস্স দজ্জেয্য,

নিস্সেসং পিযমানসং;

সদ্ধাচিত্তং তু নো ৰিঞ্ঞূ,

সদ্ধাযিকো পক্খলিতো.

৭.

সক্কোতি লঙ্ঘিতুং ব্যামং,

মহুস্সাহেন যো হি সো;

তদড্ঢং অনুস্সাহেন,

নোস্সাহো তেসু থোমিতো;

মহুস্সাহো দুক্খো লোকে,

অনুস্সাহো সদা সুখো.

৮.

দুক্খমং অক্খমন্তো যো,

পিট্ঠিকারীচ দুক্করং,

কদা লভেয্য সো লোকে,

সুখমং সুকরং মুধা;

পচ্চক্খঞ্হি সো করেয্য,

দুক্খমঞ্চাপি দুক্করং.

৯.

অনগ্ঘো মনুস্সো লোকে,

তোসনাপোসনাদিনা;

তেন সো মহগ্ঘং কম্মং,

করে লোকহিতাযুতং.

১০.

ৰাতেন নপ্পভিজ্জন্তি,

নিন্না ৰেল়ূ কসা নল়া;

যথাৰাতং নগচ্ছন্তি,

তথা চরে জনে কদা.

১১.

পুরতো চ পচ্ছতো চে,

নিস্সযো নত্থি পস্সতো;

অধিকং ৰীরিযং হোতি,

অত্তনাথো তদা ভৰে.

১২.

খণং আখুবিলং সীহো,

পাসাণসকলাকুলং;

পপ্পোতি নখভঙ্গংৰা,

ফলংৰা মূসিকো ভৰে.

১৩.

মগ্গমুল়্হা জনা অন্ধা,

অমগ্গা মগ্গসঞ্ঞিনো;

তথেৰ দুপ্পঞ্ঞা মুল়্হা,

তথত্থং নাৰ বুজ্ঝরে.

১৪.

পিযরূপং ৰীররূপং,

দুৰিধা রূপসম্পদা,

নারিং ইচ্ছে পিযরূপিং,

পুরিসং ৰীররূপকং.

১৫.

পজ্জলন্তি হি খজ্জোতা,

পক্খচালনকম্মুনা;

কুসিতা সুপিতা নেতে,

তথা জনাপি কম্মিকা.

১৬.

কুম্মসঙ্কোচমোপম্য,

নিগ্গহমপি সংখমে;

পত্তকালে তু নীতিঞ্ঞো,

কণ্হসপ্পোৰ উট্ঠহে.

১৭.

ভক্খসেসং নখাদন্তি,

সীহা উন্নতচেতসা;

পরংপি নপণামেন্তি,

ৰুদ্ধিকামা তথা চরে.

১৮.

ন ৰ ৰস্সো সমুপ্পন্নো,

খীণো পুরাণহাযনো;

নৰৰস্সে নৰা মেত্তা,

ভাৰিতব্বা হিতেসিনা.

১৯.

সন্তাপযন্তি কমযাপ্যভুজং ন রোগা,

দুম্মন্তিনং কমুপযন্তি ন নীতিদোসা;

কং স্রী ন মানযতি কং ন চ হন্তি মচ্চু,

কং থীকতা ন ৰিসযা পরিপীল়যন্তি.

(ৰসন্ততিলকাগাথা.)

২০.

(ক) ব্যামমত্তেন দণ্ডেন,

যোলুম্ব্য উদকং মিনে;

অগম্ভীরং গম্ভীরংৰা,

অগাধে মঞ্ঞি গম্ভীরং.

(খ)

তথা মন্দো সঞ্ঞাণেন,

অগাধে মঞ্ঞি পণ্ডিতং;

সমাসমং ন জানাতি,

বহ্ৰপ্পং তিক্খমন্দতং.

২১.

দুট্ঠকম্মে সঙ্গমন্তি,

ছেককম্মে চ নো ইধ;

মচ্চুং ৰহন্তি সীসেন,

তে মুল়্হা মুল়্হসঙ্গমা.

২২.

দুৰিধো সঙ্গমো লোকে,

উজুকো কুটিলো ভৰে;

উজুকোৰ পসংসেয্যো,

নোহ্যঞ্ঞো সাজসঙ্গমো.

তে ইমিনা উপাযেন সমগ্গা সম্মোদমানা মহা ভিত্তিপিট্ঠিকায ৰসন্তি. (মহোসধজাতক অট্ঠকথা)

২৩.

যূথিকা পুপ্ফতে নোহি,

সিঞ্চিতাপি পুনপ্পুনং;

পুপ্ফতে সম্পত্তে কালে,

এৰং ধারেথ ৰীরিযং.

২৪.

ধনুচ্চযো ধনক্খেপো,

দুৰিধা হি ধনাকতি;

ধনুচ্চযে নযো অত্থি,

ধনক্খেপম্হি নো ইধ.

২৫.

অমাতা পিতরসং ৰড্ঢং,

জূতকারঞ্চ চঞ্চলং;

নালপেয্য ৰিসেসঞ্ঞূ,

যদিচ্ছে সিদ্ধি মত্তনো.

হলিদ্দিরাগং কপিচিত্তং,

পুরিসং রাগৰিরাগিনং;

এদিসং তাত মাসেৰি,

নিম্মনুস্সংপি চে সিযা.

২৬.

গুণা গুণঞ্ঞূসু গুণা ভৰন্তি,

তে নিগ্গুণং পত্ৰা ভৰন্তি দোসা;

আসাদ্যতোযা পভৰন্তি নজ্জো,

সমুদ্রমাসজ্জ ভৰন্ত্যপেয্যা.

(উপজাতিগাথা)

২৭.

সিলারূপং নিম্মিনন্তি,

কোট্টেত্ৰান পুনপ্পুনং;

কোট্টকোৰ তথা বালা,

সাধুং ওৰজ্জ নিম্মিতা.

চাণক্যনীতিলা গাথা

লালনে বহৰো দোসা,

তাল়নে বহৰো গুণা;

তস্মা পুত্তঞ্চ সিস্সঞ্চ,

তাল়যে ন চ লালযে.

২৮.

অতীতস্স হি মিত্তস্স,

যো চে দোসং পকাসযে;

সো হৰে পচ্চুপ্পন্নস্স,

দোসং ভাসেতি ঞাযতি.

২৯.

লতাৰিয সেৰকা তে,

যে নিস্সযং পলম্বরে;

নিস্সযস্স ৰিনাসেন,

ভূম্যং সেন্তি অনাথকা.

৩০.

দোসসিঙ্গেহি ৰিজ্ঝন্তো,

মানখূরেহি অক্কমং;

ভযং করোতি লোকম্হি,

গোৰ বালো ৰিহিংসকো.

৩১.

আদো উপরি লোকোযং,

উজুলেখায তিট্ঠতি;

মুসাৰাতেহি তংলোকং,

নিপাতেসি অনজ্জৰং.

৩২.

সুঘটং কুম্ভকারেন,

নারহো পরিভুঞ্জিতুং;

তথূপমায ৰেক্খেয্য,

সকম্মপরকম্মনি.

৩৩.

অনন্তরংসী সূরোপি,

নসক্কোতি ঘনং তমং;

ৰিজ্ঝিতুং রংসিযা লোকে,

তথা মদনমোহিতা;

নসক্কোন্তি মদং ভেত্ৰা,

পঞ্ঞাভায পভাসিতুং.

৩৪.

খেদৰেরং দলিদ্দম্হি,

ভোগিম্হি রোগুপদ্দৰং;

দেস্সৰেরঞ্চ আণিম্হি,

পস্সে লোকস্স ৰেরিতং.

৩৫.

সংলদ্ধেন সুভোগেন,

জীৰং সুদ্ধং করে নিজং;

সেট্ঠো সো তেন জীৰেন,

জেগুচ্ছো মলজীৰিকো.

৩৬.

ৰজির পুপ্ফরাগানং,

ৰিসেসং যো নবুজ্ঝতি;

কথঞ্হি সো ৰিক্কীণেয্য,

কীণেয্য ৰা যথাতথং.

৩৭.

কিপ্পীলি কোপি চিন্তেত্ৰা,

পব্বতং ভেত্তু মুস্সহং;

অবলা তনুমজ্ঝত্তা,

চিন্তা হস্যাৰ সা মুধা.

৩৮.

জাতমত্তং ন যো সত্তুং,

রোগঞ্চূপসমং নযে;

মহাবলোপি তেনেৰ,

ৰুদ্ধিংপত্ৰা স হঞ্ঞতে.

৩৯.

সজীৰমংসভক্খেহি,

সদাঠীহি মুখেহি ভো;

বিল়ারব্যগ্ঘসীহানং,

নিহীনানি অনেকধা;

তিক্খানি খরৰাদানি,

মনুস্সানং মুখানি ৰে.

৪০.

ৰিলুপ্পন্তা ৰিধাৰন্তি,

সজীৰৰুত্তিকম্মুনা;

জনা তেন ৰিহঞ্ঞন্তি,

চরন্তি ধম্মৰেমুখা.

৪১.

সুলভং লোকিযং লোকে,

সাসনীযংৰ দুল্লভং;

দুল্লভং তং ৰমঞ্ঞন্তো,

এসো বালতমো ভৰে.

৪২.

যো পতিত্থ অগ্যাৰাটং,

মোহা তং উপকারিতুং;

অঞ্ঞোরোহি তদা ৰাটং,

দুতীযো মুল়্হমুল়্হকো.

৪৩.

ব্যগ্ঘো আৰুধৰিদ্ধো হি,

অকা দুট্ঠানি নিন্নদং;

তথেৰ সাধুসত্থেন,

ৰিদ্ধো বালো পকুপ্পিতো.

৪৪.

পিৰন্তি লোহিতং ডংসা,

অন্তো তুণ্ডেন মক্খিকা;

বহিদ্ধা পরিৰারেন্তি,

জনো তেন ডংসাযযে.

৪৫.

অধনস্স খণো অপ্পো,

সদ্ধম্মো অপ্পকালিনো;

অপ্পকো তেন যুঞ্জেয্যুং,

খণং বহুং লভেতৰে.