অঞ্ঞ > পকিণ্ণক-গন্থ-সঙ্গহো

তত্থ তেসং ৰত্থূন মুপ্পত্তিযো দ্ৰিধা ভৰন্তি জম্বুদীপে সীহল়দীপেচাতি, তত্থ জম্বুদীপে তাল়ীস, সীহল়দীপে তেসট্ঠি, তেসু তাৰ জম্বুদীপুপ্পত্তিৰত্থূনি আৰি ভৰিস্সন্তি, ততোপি ধম্মসোণ্ডকস্স ৰত্থু আদি, কথং, অম্হাকং কির ভগৰতো পুব্বে ইমস্মিংযেৰ ভদ্দকপ্পে কস্সপোনাম সত্থা লোকে উদপাদি, তস্স খো পন ভগৰতো সাসনন্তরধানতো ন চিরেনেৰ কালেন অম্হাকং বোধিসত্তো বারাণসীরঞ্ঞো অগ্গমহেসিযা কুচ্ছিস্মিং নিব্বত্তি, তস্সু প্পত্তি কালসমনন্তরমেৰ সব্বসত্তানং মনসি ধম্মসঞ্ঞা উদপাদি, তস্মাস্স ধম্মসোণ্ডোতিনাম মকংসু, সো পনেসো কুমারো মহন্তেন পরিৰারেন ৰড্ঢেন্তো সব্বসিপ্পেসু নিপ্ফত্তিং পত্ৰা পিতরা উপরজ্জেন পূজিতো হুত্ৰা দানাদযো দসকুসলকম্মপথে পূরেন্তো পিতুঅচ্চযেনামচ্চেহি ¶ রজ্জেনাভিসিঞ্চিতো অহোসি, সো পনেস ধম্মসোণ্ডকমহারাজা দেৰনগরসদিসে বারাণসীনগরে চক্কৰত্তিসদিসং বারাণসীরজ্জং কারেন্তো মাসদ্ধমাসচ্চযেন সিরিসযনগতো এৰং চিন্তেসি, মমেৰং রজ্জসিরিমনুভৰনং ন সোভতি ধম্মৰিযোগেন, দিৰাকর ৰিরহিতো নভো ৰিযাতিআদিনা নানাকারণং চিন্তেসি, তেনেত্থ.

সমিদ্ধিপত্তোস্মি মহিদ্ধিকোহং,

মা পজ্জিতুং যুত্তরূপন্তি ঞত্ৰা.

ন সোভতি যথাকাসং, জলং ধামপতিংৰিনা,

রজ্জকরণং তথা ময্হং, ৰিনা ধম্মা ন সোভতি.

ন সোভতি হথা রত্তি, নিসানাথং ৰিনা সদা,

রজ্জকরণং তথা ময্হং, ৰিনা ধম্মা ন সোভতি.

অলঙ্কতোপি ¶ চে হত্থী, ৰিনা দাঠা ন সোভতি,

রজ্জকরণং তথা ময্হং, ৰিনা ধম্মা ন সোভতি.

ধম্মমেৰ সুণিস্সামি, ধম্মে মে রমতী মনো,

ন হি ধম্মা পরং অত্থি, ধম্মমূলং তিসম্পদন্তি.

এৰং চিন্তেত্ৰা পাতোৰ সিরিগব্ভা নিক্খম্ম সুসজ্জিতে সমুস্সিতসেতচ্ছত্তে রাজপল্লেঙ্কে অমচ্চগণ পরিৰুতো নিসীদি দেৰরাজাৰিয ৰিরোচমানো, নিসিন্নো পন রাজা অমচ্চে এৰমাহ, যো পনেত্থ ভোন্তো বুদ্ধভাসিতেসু ধম্মেসু কিঞ্চিধম্মং জানাতি, সো ভাসতু, সোতুমিচ্ছামিধম্মন্তি, তে সব্বেপি মযং দেৰ ন জানামাতি আহংসু, তং সুত্ৰা অ ন ত্ত ম নো রাজা এৰং চিন্তেসি, যন্নূনাহং হত্থিক্খন্ধে সহস্সং ঠপেত্ৰা নগরে ভেরিংচরাপেয্যং, যং অপ্পেৰনাম কোচি ধনলোভেন চাতুপ্পদিকাযপি গাথায ধম্মং দেসেয্য. তং মে দীঘরত্তং হিতায সুখায ভৰিস্সতীতি, ততো সো তথা কত্ৰাপি ধম্মদেসকং অলভন্তো পুন দ্ৰিসহস্সং তিচতুপঞ্চসহস্সন্তিযাৰকোটিপ্পকোটিংদম্মীতি, ততো গাম নিগম জনপদে, ততো সেট্ঠিট্ঠানং সেনাপতি উপরাজট্ঠানা দযোপি, পুন সেতচ্ছত্তং দম্মি, রাজৰেসং পহায অত্তানং দাসং সাৰেত্ৰা ধম্মদেসেন্তস্স দম্মিতি ৰত্ৰা ভেরি চরাপেত্ৰাপি ধম্ম দেসকমলভিত্ৰা সংৰিগ্গো ¶ কিম্মে ধম্মৰিযোগেন রজ্জেনাতি অমচ্চানং রজ্জং নীয্যাতেত্ৰা সদ্ধম্মগৰেসকো ধম্মসোণ্ডকমহারাজা মহাৰনং পাৰিসি গাম নিগম রাজধানি পরম্পরায, তেনেত্থ.

রজ্জং নীয্যাতযিত্ৰান, অমচ্চানং মনোরমং,

ৰনং পাৰিসি সো রাজা, গৰেসং ধম্মমুত্তমন্তি.

মহাৰনং পৰিট্ঠক্খণে পন মহাসত্তস্স পুঞ্ঞতেজেন সক্কস্সাসনং উণ্হাকারং দস্সেসি, অথ দেৰরাজা চিন্তেসি অকামং মে পণ্ডুকম্বল সিলাসনং উণ্হমহোসি, কিন্নুখো কারণন্তি লোকং ওলোকেন্তো সক্কো দেৰরাজা ধম্মসোণ্ডক মহারাজানং সকলজম্বুদীপং ৰিচিনিত্ৰা সদ্ধম্মজ্ঝেসকং অলভিত্ৰা ৰনং পৰিট্ঠভাৰং অদ্দস, ধম্মসোণ্ডকমহারাজা সদ্ধম্মত্থায রজ্জ ধন বন্ধু জীৰিতম্পি পহায অরঞ্ঞং পৰিট্ঠো, ন সো ৰতাযং যোৰা সোৰা সত্তো, ইমস্মিংযেৰ কপ্পে বুদ্ধো ভৰিস্সতি, বুদ্ধবোধিসত্তো চাযং অজ্জেৰ মহারঞ্ঞং পৰিট্ঠো সদ্ধম্মং অলদ্ধা মহাদুক্খং পাপুণেয্য, ন চেতং যুত্তং, অজ্জ মযা তত্থ গন্থব্বং ধম্মামতরসেন তমভিসিঞ্চিত্ৰা রজ্জে পহিট্ঠাপেতুন্তি চিন্তেত্ৰা অত্তভাৰং ৰিজহিত্ৰা ভযানকং মহন্তং রক্খসৰেসং নিম্মিণিত্ৰা মহাসত্তাভিমুখো অৰিদূরে অত্তানং দস্সেসি, তেনেত্থ.

ব্যগ্ঘচ্ছসীহমহিসো ¶ রগহত্থিদীপি,

দিত্তগ্গিসঙ্কাস ৰিসালনেত্তং,

অথ মহাসত্তো অত্তনো অৰিদূরে ঠিতং রক্খসং অদ্দক্খি, তং দিস্ৰানাস্স ভযংৰা ছম্ভিতত্তংৰা চিত্থুত্রাসমত্তংৰা নাহোসি, কিমত্র চিন্তেসি, অপিনাম এৰরূপো পিরক্খসো ধম্মং ¶ জানেয্য, যন্নূনাহং তস্স সন্তিকে ধম্মং সুণিস্সামি, তম্মে দীঘরত্তং হিতায সুখায ভৰিস্সতীতি চিন্তেসি. চিন্তেত্ৰা চপন অজ্জ মযা তমুপসঙ্কম্ম পুচ্ছিতং ৰট্টতীতি গন্ত্ৰা রক্খসেন সদ্ধিং সল্লপন্তো আহ.

অস্মিং ৰনস্মিং তরুসণ্ড মণ্ডিতে;

দেসেহি ধম্মং সুগত প্পসত্থন্তি.

হন্ত্ৰা পিপাসং রুধিরং পিৰিত্ৰা;

পচ্ছা তু দেসেস্সসি কস্স ধম্মং;

এৰং ৰুত্তে সক্কো দেৰানমিন্দো সাধু মহারাজ অহমেৰ যুত্তং জানামীতি ৰত্ৰা তস্সাৰিদূরে তিগাৰুতুব্বেধং অঞ্জনৰণ্ণং মহন্তং পব্বতং মাপেত্ৰা মহারাজ ইমমারুয্হ পব্বতমুদ্ধনিট্ঠিতো মম মুখে পততু, অহং পতন্থস্স তে ধম্মং দেসেস্সামি, এৰং সন্তে তুয্হং ধম্মপটিলাভো, ময্হংচ মংসপটিলাভো ভৰিস্সতীতি. তং সুত্ৰা মহাসত্তো অনমতগ্গে সংসারে সংসরতো মে সীহব্যগ্ঘচ্ছমচ্ছকচ্ছপৰিহঙ্গাদীনং ভক্খভূতস্স জাতীসু পমাণং নত্তি, অজ্জ মযা সম্বুদ্ধস্স ধম্মত্থায জীৰিতং পরিচ্চজিতুং ৰট্টতীতি চিন্তেত্ৰা এৰমাহ.

ব্যগ্ঘচ্ছমচ্ছো রগকুচ্ছিযঞ্হি,

এৰঞ্চ পন ৰত্ৰা মহাসত্তো পব্বতমারুয্হ ঠিতো আহ, অহমজ্জ রজ্জেন সদ্ধিং জীৰিতঞ্চ সরীরমংসঞ্চ সদ্ধম্মত্থায দম্মীতি সোমনস্সপ্পত্তো হুত্ৰা সম্ম ধম্মং দেসেহীতি ৰত্ৰা তস্মিং মহাদাঠং মহামুখং ৰিৰরিত্ৰা ঠিতে তস্সাভিমুখো উপপতি. অথ সক্কো দেৰানমিন্দো সোমনস্সো অচ্ছরিযপ্পত্তো অত্তভাৰং ৰিজহিত্ৰা অলঙ্কতদিব্বত্তভাৰং মাপেত্ৰা আকাসে ¶ তরুণসুরিযো ৰিয ওভাসমানো আকাসতো পতন্তং মহাসত্তং উভোহি হত্থেহি দল়্হং পতিগণ্হিত্ৰা দেৰলোকং নেত্ৰা পণ্ডুকম্বল সিলাসনে নিসীদাপেত্ৰা দিব্বমযেহি গন্ধমালাদীহি পূজেত্ৰা সযং ধম্মং সুত্ৰা পসন্নো পসন্নাকারং কত্ৰা কস্সপদসবলেন দেসিতায অনিচ্চাদিপরিদীপিকায.

অনিচ্চাৰ ত সঙ্খারা, উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখোতি.

গাথায ধম্মদেসনেন তস্স মনোরথং মত্থকং পাপেত্ৰা দেৰলোকে মহন্তং সিরিৰিভৰং দস্সেত্ৰা আনেত্ৰা সকরজ্জেযেৰ পতিট্ঠাপেত্ৰা অপ্পমত্তো হোতি মহারাজাতি ওৰদিত্ৰা দেৰলোকমেৰ অগমাসীতি.

ইতি অমিতসিরিং ৰা জীৰিতং ৰাপি সন্তো,

ন সুমরিয পসত্থং ধম্মমেৰা চরন্তি;

তনুতর ৰিভৰানং অপ্পমাযূনমম্ভো,

ইহ কুসলপমাদো কো নু তুম্হাদিসানন্তি.

২. মিগলুদ্দকস্স ৰত্থুম্হি অযমানুপুব্বিকথা

ইতো কির এক তিংসতিমে কপ্পে সিখীনাম সম্মাসম্বুদ্ধো সমতিংস পারমিযো পূরেত্ৰা পরমাতিসম্বোধিং পত্ৰা সদেৰকং লোকং সংসারকন্তারা উত্তারেন্তো ধম্মরতনৰস্সং ৰস্সাপেন্তো ধম্মভেরিংপহরন্তো ধম্মকেতুং উস্সাপেন্তো একস্মিং সমযে ৰিৰেক মনুব্রূহন্তো অরঞ্ঞাযতনং পাৰিসি, ¶ পৰিসিত্ৰা চপন সুপুপ্ফিতনাগপুন্নাগাদিনানাতরুসণ্ডমণ্ডিতে সুফুল্লসুমনমালতিপ্পভুতিনানালতাকুলে অনেকৰিধদিপদচতুপ্পদসঙ্ঘনিসেৰিতে রমণীযে সীতলসিলাতলে চতুগ্গুণং সঙ্ঘাটিংপঞ্ঞপেত্ৰা নিসীদি ছব্বণ্ণরংসীহি দিসং পূরযন্তো, তদা তত্থ দেৰব্রহ্মনাগসুপণ্ণাদযো সন্নিপতিত্ৰা দিব্বমযেহি গন্ধমালাদীহি ভগৰন্তং পূজযমানা থোমযমানা নমস্সমানা অট্ঠংসু, তস্মিং পনসমাগমে ভগৰা মধুরস্সরং নিচ্ছারেন্তো ব্রহ্মঘোসেন চতুসচ্চপটিসংযুত্তং ধম্মং দেসেতি অমতৰস্সং ৰস্সাপেন্তোৰিয. তদা একো মিগলুদ্দকো ৰনং পৰিট্ঠো মিগসূকরে হন্ত্ৰা মংসং খাদন্তো তং ঠানং পত্ৰা অদ্দস ভগৰন্তং ধম্মং দেসেন্তং. দিস্ৰা একমন্তং ঠিতো ধম্মং সুত্ৰা চিত্তং পসাদেত্ৰা ততো চুতো দেৰলোকে নিব্বত্তিত্ৰা ছসু কামসগ্গেসু মনুস্সেসুচ অপরাপরং ইস্সরিযং অনুভৰন্তো ইমস্মিং বুদ্ধুপ্পাদে সাৰত্থিযং কুলগেহে নিব্বত্তিত্ৰা ৰিঞ্ঞুতং পত্তো ভগৰতো সাসনে পব্বজিত্ৰা একদিৰসং ধম্মং দেসেন্তস্স ভগৰতো চতুসচ্চপতি সংযুত্তং ধম্মকথং সুত্ৰা চতুপটিসম্ভিদাহি অরহত্তং পত্ৰা একদিৰসং ভিক্খুসঙ্ঘমজ্ঝগতো অত্তনো কতকম্মপ্পকাসনেন পীতিৰাচমুদাহরি.

জলন্তো দীপরুক্খোৰ, সূরিযোৰ নভ মুগ্গতো;

মেরুরাজাৰ সম্বুদ্ধো, জনেসগ্গো পতাপৰা.

পূরেত্ৰা ধম্মনাৰাযং, স নাথো সকলং পজং;

পতিট্ঠপেন্তো সংসার, কন্তারা সন্তিভূমিযং.

ধম্মকেতুং ¶ সমুস্সেন্তো, হনন্তো ধম্মদুন্দুভিং;

সত্তে দুক্খা পমোচেন্তো, ৰসী তত্থ জিনো ৰসী.

পুন্নাগনাগপূগাদি, নানাপাদপসংকুলং;

লতা লিঙ্গিতসাখাহি, সা মোদকুসুমাযুতং.

কুসুমা মোদসম্মত্ত, ছপ্পদালি নিসেৰিতং;

নানামিগ গণাকিণ্ণং, মযূরগণ নচ্চিতং.

সীতলচ্ছোদিকাসাধু, সুপতিত্থজলাসযং;

আসার সারধারাহি, নিজ্ঝরাসত সংকুলং.

দেৰা তত্থ সমাগন্ত্ৰা, পূজেসুং দ্ৰিপদুত্তমং;

দিব্বেহি গন্ধমালাহি, নচ্চেহি তুরিযেহিচ.

দেৰদেৰো তদা দেৰ, সঙ্ঘমজ্ঝে নিসীদিয;

চতুসচ্চ মদেসেসি, নিচ্ছরং মধুরং গিরং.

তদাহং লুদ্দকো আসিং, মিগসূকরমারকো;

মিগমংসেন জিৰামি, তেন পোসেমি দারকে [পোসেন্তোপুত্তদারকে ইতিকত্থচি].

চন্দংৰ তারকাকিণ্ণং, মেরুংৰণ্ণৰমজ্ঝগং;

ৰিরোচমান মাসীনং, চতুসচ্চপ্পকাসকং.

একপস্সে ঠিতো তত্থ, অস্সোসিং ধম্মমুত্তমং;

তত্থ চিত্তং পসাদেত্ৰা, সোমনস্সং পৰেদযিং.

সম্পত্তিমনুভুত্ৰান, ছকামগ্গে পরাপরং;

দেৰসঙ্ঘপরিব্বূল়্হো, ৰিমানে রতনামযে.

মনুস্সেসুচ যং অগ্গং, তস্স ভাগী ভৰামহং;

ভোগে মে ঊনতা নত্থি, সদ্ধম্মসৰণে ফলং.

মহতা পরিৰারেন, পত্তো ৰুদ্ধিংচ ৰিঞ্ঞুতং;

চারিকং চরমানোহং, পত্তো জেতৰনং ৰরং.

অদ্দসং সহ সিস্সেহি, নিসিন্নং সুগতং তদা;

অস্সোসিং মধুরং ধম্মং, চতুসচ্চপ্পকাসকং.

সুত্ৰান মধুরং ধম্মং, পব্বজিত্ৰান সাসনে;

অ জরা মরং সীতিভূতং, পত্তো নিব্বাণমুত্তমং.

সুতং ¶ একমুহুত্তং মে, তদা ধম্মং সুদেসিতং;

তেনম্হি চতুরাপাযে, ন জাতো ন কুতোভযং.

করমুক্খিপ্প ৰক্খামি, করোথে কগিরং মম;

মমো পমং করিত্ৰান, ধম্মং সুণাথ সাধুকন্তি.

এৰঞ্চ পন ৰত্ৰা সত্তে ধম্মসৰণে নিযোজেসীতি.

ইতি তনুতরকালং সাধু ধম্মং সুণিত্ৰা,

অধিগতৰিভৰানং আনুভাৰং সুণিত্ৰা;

ভৰৰিভৰসুখং ভো পত্থযন্তা কুসীতং,

জহথ সুণথ ধম্মং দুল্লভং দুল্লভস্সাতি.

৩. তিণ্ণংজনানং ৰত্থুম্হি অযমানুপুব্বীকথা

জম্বুদীপস্মিং কির পুব্বে মহানিদাঘো অহোসি, তদা নিদাঘসুরিযেন সকিরণকরা ৰাপি পোক্খরণি নদী গিরিকন্দরনিজ্ঝরাদীসু উদকং নিস্সেসং কত্ৰা পীতমিৰ উদকে পরিক্খীণে মচ্ছকচ্ছপাদযো যেভুয্যেন ৰিনাসং পত্তা. অথ মহারঞ্ঞভূমিযং রুক্খতিণলভাদযো অতীৰ মিলাতা অহেসুং. মিগপক্খিনোপিঘম্মাভিতত্তা পিপাসিতো মরীচিং তোযন্তিমঞ্ঞমানা ইতোচিতোচ ধাৰন্তা মহাদুক্খপ্পত্তা অহেসুং. তদা একো সুৰপোতকো পিপাসিতো তত্থ তত্থ পানীযং পরিযেসন্তো মহারঞ্ঞে একস্মিং পূতিপাদপে সট্ঠিরতনে নরকাৰাটে পানীযগন্ধং ঘাযিত্ৰা লোভেন পাতুং ওতিণ্ণো অতিপানেন ভারো তত্থেৰ পতিত্ৰা উগ্গন্তুং নাসক্খি. অথাপরোপি সপ্পোচ মনুস্সোচাতি দ্ৰে জনা তত্থেৰ পতিংসু, সপ্পানাম ৰিৰেকং লদ্ধাৰ অত্তং ৰিজহন্তি. তস্মাযং অলদ্ধা ¶ ৰিৰেকত্তং উগ্গন্তুং নাসক্খি. অনালম্বত্তা মনুস্সোপি. তে উগ্গন্তুং অসক্কোন্তা মরণভযভীতা অঞ্ঞমঞ্ঞ মৰিহেঠেন্তা তত্থেৰ ৰসিংসু. অথেকো বরাণসীৰাসিকো মনুস্সো ৰনং পৰিট্ঠো তথেৰ পানীযং পরিযেসমানো তং ঠানং পত্ৰা তে তযোপি দিস্ৰা কম্পমানহদযো ৰল্লিযা পিটকং বন্ধিত্ৰা সিক্কায পক্খিপিত্ৰা ওতারেত্ৰা তে তযোপি উদ্ধরি, অথানেন তে অম্হাকং জীৰিতং দিন্নন্তি সোমনস্সা তস্সেৰমাহংসু, সামি মযং তুম্হে নিস্সায জীৰিতং লভিম্হ, তুম্হে ইতো পট্ঠায অম্হাকং সহাযো, মযম্পি তে সহাযা, অম্হাকং ৰসনট্ঠানানি আগন্তুকামাতি ৰত্ৰা তেসু তাৰ সুৰপোতকো আহ, সামি বারাণসিযং দক্খিণদ্ৰারে মহানিগ্রোধো অত্থি, তত্থাহং ৰসামি, তৰ তথারূপে কিচ্চে সতি মম সন্তিকমাগম্ম সুৰাতি সদ্দংকরোহীতি ৰত্ৰা মেত্তিথিরং কত্ৰা পক্কামি, সপ্পোপি সম্মাহং তস্সেৰ নিগ্রোধস্সা ৰিদূরে মহন্তং ৰম্মিকং অত্থি, তত্থ ৰসামি, তৰত্থে সতি তত্থাগন্ত্ৰা দীঘাতিসদ্দং করোহীতি ৰত্ৰা তথেৰপক্কামি, মনুস্সোপি বারাণসিযং অসুকাযনাম ৰীথিযা অসুকগেহে ৰসামি, তৰত্থে সতি মম সন্তিকং আগচ্ছাতি ৰত্ৰা পক্কামি, অথা পরভাগে সো উপকারকো পুরিসো অত্তনো কিচ্চে সঞ্জাতে মম সহাযানং সন্তিকং গমিস্সামীতি সঙ্কেতানুসারেন গন্ত্ৰা নিগ্রোধমূলে ঠিতো সুৰস্স সদ্দমকাসি, তং সুত্ৰা সুৰপোতকো ৰেগেনাগন্ত্ৰা তেন সদ্ধিং পটিসম্মোদিত্ৰাসম্ম চিরেনা গতোসি, আগতকারণং মে আচিক্খাতি আহ. সোপাহ সম্মাহং জীৰিতু মসক্কোন্তো পুত্তদারকে ঞাতীনং পটিপাদেত্ৰা তৰ সন্তিকমাগতোম্হিতি, সুৰপোতকোপি সাধু সম্ম তযা কতং মম সন্তিকমাগচ্ছন্তেন, তযা মম জীৰিতং দিন্নং, মযাপি তৰ জীৰনুপাযং কাতুং ৰট্টতি, যাৰাহং আগচ্ছামি, তাৰেত্থ থোকং ৰিস্সমাতি ৰত্ৰা পক্কামি জীৰনুপাযং পরিযেসমানো, ¶ তস্মিং কির সমযে বারাণসীরাজা নগরতো নিক্খম্ম সুসজ্জিতুয্যানং পৰিসিত্ৰা সপরিসো কীল়িত্ৰা মজ্ঝন্তিকসমযে সুফুল্লিতং পঞ্চপদুমসঞ্ছন্ৰং মঙ্গলপোক্খরণিং দিস্ৰা নহাযিতুকামো সব্বাভরণানি ওমুঞ্চিত্ৰা রাজপুরিসে পটিপাদেত্ৰা নহাযিতুং ওতরি, তদা সুৰপোতকো তং ঠানং পত্তো সাখন্তরে নিলীনো রাজপুরিসানং পমাদং দিস্ৰা রঞ্ঞো মুত্তাহারং ডসিত্ৰা আকাসং পক্খন্দিত্ৰা ৰেগেনাগন্ত্ৰা অত্তনো সহাযস্স দত্ৰা অপ্পমত্তো ইমং ৰলঞ্জেহি সম্মাতি ৰত্ৰা অদাসি, ততো সো নং গহেত্ৰা ইমং কুহিং পটিসামেস্সামীতি চিন্তোন্তো মমেকো সহাযকো অন্তোনগরে ৰসতি, তস্মিং ঠপেস্সামীতি চিন্তেত্ৰা যথাসঙ্কেতমুপগম্ম তং দিস্ৰা পটিসন্থারং কত্ৰা সুৰপোতকেন কতো পকারং পকাসেত্ৰা ইমং মুত্তাহারং সাধুকং ঠপেহীতি ৰত্ৰা অদাসি, তংখণে রাজা নহাত্ৰানুলিত্তো আভরণানি পিলন্ধেন্তো মুত্তাহারং নাদ্দস. ততো রাজপুরিসা অন্তোচ বহিচ পরিজনে উপপরিক্খিত্ৰা মুত্তাহারং অপস্সন্তা নগরে ভেরিং চরাপেসুং, যো মুত্তাহারং পস্সতি, তস্স রাজা মহন্তং যসং দস্সতীতি. তং সুত্ৰা সো মিত্তদূভী এৰং চিন্তেসি, অহংচম্হি দুক্খিতো, যন্নূনাহং মুত্তাহারং রঞ্ঞো দস্সেত্ৰা সুখেন ৰসেয্যং, কিম্মে এতেনাতি তেন কতং তথারূপং উপকারং অসল্লক্খেন্তো মহামিত্তদূভী পুরিসো রাজপুরিসে উপসঙ্কম্ম মুত্তহারং অত্তনো সন্তিকে ঠপিতভাৰং কথেসি, ভো মম সন্তিকে একো পুরিসো মুত্তহারং ঠপেসীতি. এৰং অসপ্পুরিসসংসগ্গোতি, তথাহি.

যথা সংৰড্ঢিতো নিম্বো, মধুখীরো দসিঞ্চনা;

ন যাতি মধুরং তং ৰো, পকার মসতং কতং.

সীসেনু দক মাদায, ৰড্ঢিতোপি নুহীতরু;

ন যাতি মধুরং তংৰো, পকারমসতং কতং.

নিচ্চং ¶ খীরোদপানেন, ৰড্ঢিতো সিৰিসো যথা;

ৰিসংৰ পরিৰত্তেতি, তথা নীচোপকারকং.

যথাত্তনা কতো অগ্গি, সীতলং ন দদে খলু;

তথা নীচে কতং কারং, অগ্গীৰ দহতে তনুং.

তস্মা উপপরিক্খিত্ৰা, হাৰভাৰেন বুদ্ধিযা;

কাতব্বা মেত্তি জন্তূহি, নামিত্তো লভতেসুখন্তি.

অথস্স মিত্তদুভিনো ৰচনেন রাজপুরিসা মুত্তাহারংচতংচ গহেত্ৰা সভণ্ডকং পুরিসং দস্সেসুং. অথ রাজা সভণ্ডকং চোরং দিস্ৰা কুদ্ধো ইমং নেত্ৰা দক্খিণদ্ৰারে জীৰসূলে উত্তাসেথাতি আণাপেসি, রাজপুরিসা তস্স রাজাণং করোন্তো অগমংসু, তেহি নীযমানো পুরিসো দক্খিণদ্ৰারা নিক্খম্ম সপ্পসহাযং সরিত্ৰা অপ্পেৰনামে তস্স সন্তিকা কিঞ্চি সোত্থি ভৰেয্যাতি পুব্বে ৰুত্তসঙ্কেতা নুসারেন ৰম্মিকং দিস্ৰা সম্ম দীঘাতি সদ্দমকাসি, সো ৰম্মিকা নিক্খম্মতং তথা নিযমানং দিস্ৰা সংৰিগ্গো দুক্খপ্পত্তো সহাযস্সমে অজ্জ অৰস্সযেন উপত্থম্ভং ভৰিতুং ৰট্টতীতি তং সমস্সাসেত্ৰা অত্তভাৰং ৰিজহিত্ৰা অঞ্ঞতরৰেসেন রাজপুরিসে উপসঙ্কম্ম ইমং পুরিসং মুহুত্তংমা মারেথাতি দল়্হং ৰত্ৰা মুহুত্তেন রঞ্ঞো অগ্গমহেসিযা ৰসনট্ঠানং গন্ত্ৰা সপ্পৰণ্ণেন দেৰিং ডসিত্ৰা তায ৰিসেন মুচ্ছিতকালে মনুস্সৰণ্ণেন ৰজ্ঝপ্পত্তো ৰিসোসধং জানাতিতী ৰত্ৰা তংখণেৰ সহাযস্স সন্তিকং গন্ত্ৰা রঞ্ঞা তৰ পক্কো সিতকালে গন্ত্ৰা উদকপ্পসতেন দেৰিযা সরীরে পহরিত্ৰা নিব্বিসং করাহীতি ৰত্ৰা পক্কামি, অথ রাজা ৰিসৰেজ্জ পরিযেসন্তো তং পৰত্তিং সুত্ৰা ৰজ্ঝপ্পত্তং আনেথাতি আণাপেত্ৰা দেৰিযা নিব্বিসং করোথাতি আহ, সো নাগরাজেন ৰুত্তনযেন নিব্বিসমকাসি, সা সুখিতা অরোগা অহোসি, রাজা তং দিস্ৰা তুট্ঠো তস্স খেত্তৰত্থুযানৰাহনাদিদানেন ¶ মহাসক্কারমকাসি, অথ সো রাজানং উপসঙ্কম্ম অত্তনা কতং সব্বং পকাসেসি. তেন ৰুত্তং.

একদাহং মহারাজ, ৰনং কম্মেন কেনচি;

গতোদ্দসং মহাৰাটে, পতিতং সুৰপোতকং.

অদাসি জীৰমম্হাকং, উপকারোসি নো তুৰং;

তৰ কিচ্চে সমুপ্পন্নে, অম্হাকং এহি সন্তিকং.

এৰং তেহি পৰুত্তোহং, অগঞ্ছিং সুৰসন্তিকং;

তেন কতূপকারোহং, মনুস্সস্সাপি সন্তিকং.

তেনাহং মরণপ্পত্তো, অদ্দসং উরগাধিপং;

সোদাসি জীৰিতং ময্হং, অলত্থং [অলদ্ধ ইতিসব্বত্থ] ৰিপুলং ধনং.

সুজনো নাৰমন্তব্বো, খুদ্দকোতি নরাধিপ;

সুৰোচ উরগোচেতে, মিত্তধম্মে পতিট্ঠিতা.

অকস্মা দেৰ কুপ্পন্তি, পসীদন্তিনিমিত্ততো;

সীলং হেতমসাধূনং, বালানমৰিজানতং.

মনুস্সাপি মহারাজ, কেচি ৰিস্সাসিযা ন ৰে;

তিরচ্ছানাপি হোন্তেৰ, অজিম্হমনসাসঠাতি.

এৰং ¶ সো অত্তনো পৰত্তিং কথেসি, রাজা তং সুত্ৰা পসন্নো ইমস্স পুরিসস্স মহন্তং গেহং কত্ৰা মহাপরিহারং করোথাতি আণাপেসি, সো পন মম গেহং নিগ্রোধস্স চ ৰম্মিকস্স চ অন্তরে করোথাতি ৰত্ৰা তথা কারেত্ৰা তত্থ ৰসন্তো রাজূপট্ঠানং করোন্তো তেহি সহাযেহি সদ্ধিং সম্মোদমানো যাৰজীৰং ৰসিত্ৰা আযু পরিযোসানে তেহি সদ্ধিং যথাকম্মং গতোতি.

ইতি পতিতসুখম্হা অঙ্গতো ৰা ধনম্হা,

পরমতরপতিট্ঠা হোন্তি মিত্তা সখানং;

ৰিরহিতসখিনং ভো নত্থি যস্মাভিৰুদ্ধি,

চিণুথ কুসলধম্মং মিত্তৰন্তা মহন্তং.

৪. বুদ্ধেনিযা ৰত্থুম্হি অযমানুপুব্বীকথা

জম্বুদীপে কির পুব্বে পাটলিপুত্তনগরে সত্তাসীতীকোটিনিহিতধনং একং সেট্ঠিকুলং অহোসি, তস্স পন সেট্ঠিনো একাযেৰ ধীতা অহোসি নামেন বুদ্ধেনিনাম, তস্সা সত্তৰস্সিককালে মাতাপিতরো কালমকংসু, তস্মিং কুলে সব্বং সাপতেয্যং তস্সাযেৰ অহোসি, সা কির অভিরূপা পাসাদিকা পরমায ৰণ্ণপোক্খরতায সমন্নাগতা দেৰচ্ছরপটিভাগা পিযাচ অহোসি মনাপা, সদ্ধা পসন্না রতনত্তযমামিকা পটিৰসতি, তস্মিং পন নগরে সেট্ঠিসেনাপতিউপরাজাদযো তং অত্তনো পাদপরিচারিকং কামযমানা মনুস্সে পেসেসুং পণ্ণাকারেহি সদ্ধিং, সা তং সুত্ৰা চিন্তেসি, ময্হং মাতাপিতরো সব্বং ৰিভৰং পহায মতা, মযা পন তথা অগন্তব্বং, কিং মে পতিকুলেন, কেৰলং ¶ ৰিত্তৰিনাসায ভৰতি, মযা পনি মং ধনং বুদ্ধসাসনেযেৰ নিদহিতুং ৰট্টতীতি চিন্তেসি, চিন্তেত্ৰা চ পন তেসং ন ময্হং পতিকুলেনত্থোতি পটিক্খিপি, সা ততো পট্ঠায মহাদানং পৰত্তেন্তী সমণব্রহ্মণে সন্তপ্পেসি, তেনেত্থ.

অথাপরভাগে একো অস্সৰাণিজকো অস্স-ৰাণিজ্জায পুব্বন্তাপরন্তং গচ্ছন্তো আগম্ম ইমিস্সা গেহে নিৰাসং গণ্হি, অথ সো ৰাণিজো তং দিস্ৰা ধীতুসিনেহং পতি ট্ঠা পে ত্ৰা গন্ধমালৰত্থালঙ্কারাদীহি তস্সা উপকারকো হুত্ৰা গমনকালে অম্ম এতেসু অস্সেসু তৰ রুচ্চনকং অস্সং গণ্হাহীতি আহ, সাপি অস্সে ওলোকেত্ৰা একং সিন্ধৰপোতকং দিস্ৰা এতং মে দেহীতি আহ, ৰাণিজো অম্ম এসো সিন্ধৰপোতকো, অপ্পমত্তা হুত্ৰা পটিজগ্গাহীতি ৰত্ৰা তং পটিপাদেত্ৰা অগমাসি. সাপি তং পটিজগ্গমানা আকাসগামিভাৰং ঞত্ৰা সম্মা পটিজগ্গন্তী এৰং চিন্তেসি, পুঞ্ঞকরণস্স ¶ মে সহাযো লদ্ধোতি, অগতপুব্বাচ মে ভগৰতো সমারং মারবলং ৰিধমেত্ৰা বুদ্ধভূতস্স জযমহাবোধিভূমি, যন্নূনাহং তত্থ গন্ত্ৰা ভগৰতো জযমহাবোধিং ৰন্দেয্যন্তি চিন্তেত্ৰা ব হূ রজতসুৰণ্ণমালাদযো কারাপেত্ৰা একদিৰসং অস্স মভিরুয্হ আকাসেন গন্ত্ৰা বোধিমালকে ঠত্ৰা আগচ্ছন্তুঅয্যা সুৰণ্ণমালা পূজেতুংতি উগ্ঘোসেসি. তেনেত্থ.

যতো পট্ঠাযহং বুদ্ধ, সাসনে সুদ্ধমানসা;

পসন্না তেন সচ্চেন, মমানুগ্গহবুদ্ধিযা.

আগচ্ছন্তু নমস্সন্তু, বোধিং পূজেন্তু সাধুকং;

সোণ্ণমালাহি সম্বুদ্ধ, পুত্তা অরিযসাৰকা.

সুত্ৰা তং ৰচনং অয্যা, বহূ সীহল়ৰাসিনো;

আগম্ম নভসা তত্থ, ৰন্দিং সুচ মহিংসুচাতি.

ততো প্পতুতি সা কুমারিকা বুদ্ধসাসনে অতীৰ পসন্না নিচ্চমেৰ অস্স মভিরুয্হ আগন্ত্ৰা অরিযেহি সদ্ধিং মহাবোধিং সুৰণ্ণমালাহি পূজেত্ৰা গচ্ছতি, অথ পাটলিপুত্তনগরোপৰনে ৰনচরা তস্সা অভিণ্হং গচ্ছন্তিযা চ আগচ্ছন্তিযা চ রূপসম্পত্তিং দিস্ৰা রঞ্ঞো কথেসুং. মহারাজ এৰরূপা কুমারিকা অস্স মভিরুয্হ আগন্ত্ৰা নিবদ্ধং ৰন্দিত্ৰা গচ্ছতি. দেৰস্সানুরূপা অগ্গমহেসী ভৰিতুন্তি, রা জা তং সুত্ৰা তেনহি ভণে গণ্হথ নং কুমারিং, মম অগ্গমহেসিং করোমীতি পুরিসে পযোজেসি, তেন পযুত্তপুরিসা বোধিপূজং কত্ৰা আগচ্ছন্তিং গণ্হামাতি তত্থ নিলীনা গহণসজ্জা অট্ঠংসু, তদা সা কুমারিকা অস্স মভিরুয্হ মহাবোধিমণ্ডং গন্ত্ৰা ৰীতরোগেহি সদ্ধিং পুপ্ফপূজং কত্ৰা ৰন্দিত্ৰা নিৰত্তি, অথ তেসু একো ধম্মরক্খিত ত্থেরোনাম তস্সা এৰ মাহ, ভগিনি তং অন্তরামগ্গে চোরা গণ্হিতুকামা ঠিতা, অসুকট্ঠানং পত্ৰা অপ্পমত্তা ¶ সীঘং গচ্ছাতি, সাপি গচ্ছন্তী তং ঠানং পত্ৰা চোরেহি অনুবন্ধিতা অস্সস্স পণ্হিযা সঞ্ঞং দত্ৰা পক্কামি, চোরা পচ্ছতো পচ্ছতো অনুবন্ধিংসু. অস্সো ৰেগং জ নে ত্ৰা আকাস মুল্লঙ্ঘি, কুমারিকা ৰেগং সন্ধারেতুং অসক্কোন্তী অস্সস্স পিট্ঠিতো পরিগলিত্ৰা পতন্তী মযা কতূপকারং সর পুত্তাতি আহ, সো পতন্তিং দিস্ৰা ৰেগেনা গন্ত্ৰা পিট্ঠিযং নিসীদাপেত্ৰা আকাসতো নেত্ৰা স ক ট্ঠা নে যেৰ পতিট্ঠাপেসি. তস্মা.

তিরচ্ছানগতাপেৰং, সরন্তা উপকারকং;

ন জহন্তীতি মন্ত্ৰান, কতঞ্ঞূ হোন্তু পাণিনোতি.

ততো সা কুমারিকা সত্তা সীতিকোটিধনং বুদ্ধসাসনেযেৰ চজিত্ৰা যাৰজীৰং সীলং রক্খিত্ৰা উপোসথকম্মং ক ত্ৰা ত তো চুতা সুত্ত প্পবুদ্ধো ৰিয দেৰলোকে নিব্বত্তীতি.

ৰিৰিধকুসলকম্মং কত্ৰ সগ্গং ৰজন্তি;

কুসলফলমহন্তং মঞ্ঞমানা ভৰন্তা,

ভৰথ কথ মুপেক্খা দানমানাদিকম্মে.

৫. অহিতুণ্ডিকস্স ৰত্থুম্হি অযমানুপুব্বীকথা

ইমস্মিং কির ভদ্দকপ্পম্হি অম্হাকং কির ভগৰতো পুব্বে কস্সপোনাম সত্থা লোকে উপ্পজ্জিত্ৰা সদেৰকং লোকং সংসারসাগরা তারেত্ৰা সব্ববুদ্ধকিচ্চানি নিট্ঠপেত্ৰা অত্থং গতো দিৰসকরোৰিয সেতব্যম্হি অনুপাদিসেসায নিব্বাণধাতুযা পরিনিব্বাযি, তদা সকলজম্বুদীপৰাসিনো মনুস্সা সন্নিপতিত্ৰা ¶ একেকং সুৰণ্ণিট্ঠকং কোটিঅগ্ঘনকং রতনৰিচিত্তং বহিচিননত্থায একেকং অড্ঢকোটিঅগ্ঘনকং অব্ভন্তরূপপূরণত্থং মনোসিলায মত্তিকাকিচ্চং করোন্তা যোজনব্বেধং থূপং কত্ৰা মহন্তং সক্কারং করোন্তি. তদা একো অহিতুণ্ডিকো গামনিগমরাজধানীসু সপ্পে কীল়াপেত্ৰা জীৰিকং কপ্পেন্তো একং গামকং পত্ৰা তত্থ সপ্পে কীল়াপেত্ৰা সন্তুট্ঠেহি গামৰাসীহি দিন্নৰিৰিধোপাযনো খাদনীযভোজনীযং খা দি ত্ৰা ভুঞ্জিত্ৰা তত্থেৰ নিৰাসং গহেত্ৰা নিসীদি. তস্মিং কির গামকে মনুস্সা যেভুয্যেন রতনত্তযমামকা. তস্মা তে রত্তিভাগে সযন্তা ‘‘নমো বুদ্ধাযাতি’’ এৰমাদিং ৰদন্তি. সো পন অহিতুণ্ডিকো মিচ্ছাদিট্ঠিকো তিণ্ণং রতনানং গুণং ন জানাতি. তস্মা তেসং তং ৰচনং সুত্ৰা সযম্পি কে ল়িং কুরুমানো পরিহাসৰসেন ‘‘নমো বুদ্ধাযাতি’’ ৰদতি, অথেকদিৰসং সো অত্তনো কীল়াপনসমত্থং একং সপ্পং ভত্থ তত্থ পরিযেসমানো আহিণ্ডতি. তদা একো নাগরাজা কস্সপদসবলস্স থূ পং গ ন্ত্ৰা ৰন্দিত্ৰা একং ৰম্মিকং পৰিসতি. তং দি স্ৰা অহিতুণ্ডিকো ৰেগেনা গন্ত্ৰা নাগরাজং গণ্হিতুং মন্তং পরিজপি, সো মন্তং সুত্ৰা কুজ্ঝিত্ৰা তং মারেতুকামো অনুবন্ধি, তং দি স্ৰা অহিতুণ্ডিকো ৰে গে ন পলাযন্তো একস্মিং পাসাণে পক্খলিত্ৰা পতমানো পুব্বেৰুত্তপরিহাস ৰচনপরিচযেন ‘‘নমো বুদ্ধাযাতি’’ ৰদন্তো পতি. তস্স তং ৰচনং অনুবন্ধন্তস্স নাগরঞ্ঞো সোতপথে অমতংৰিয পতি. অথ সো রতনত্তযগারৰেন তস্মিং কোধং নিব্বাপেত্ৰা সম্ম মা ভাযি. অহং রতনত্তযমন্তানুভাৰপাসেন বদ্ধো. তস্মা তু ৰং ডসিতুং ময্হং অননুরূপং. অজ্জ ত যি পসন্নোম্হি, পণ্ণাকারং তেদম্মি, গণ্হাতি তীণি সুৰণ্ণপুপ্ফানি অদাসি. এৰং রতনত্তযং নাম ঘোরাসিৰিসানম্পি সপ্পানং মনং পীণেতি. হোন্তি চেত্থ.

বুদ্ধোতি ¶ ৰচনং সেট্ঠং, বুদ্ধোতি পদ মুত্তমং;

নত্থি তেন সমং লোকে, অঞ্ঞং সোতরসাযনং.

ধম্মোতিৰচনং সেট্ঠং, ধম্মোতি পদমুত্তমং;

নত্থি তেন সমং লোকে, অঞ্ঞং সোতরসাযনং.

সঙ্ঘোতি ৰচনং সেট্ঠং, সঙ্ঘোতি পদমুত্তমং;

নত্থি তেন সমং লোকে, অঞ্ঞং সোতরসাযনং.

তস্স মুখং মুখং নাম, যং ৰত্ততি মুখে সদা;

দুল্লভং বুদ্ধৰচনং, সব্বসম্পত্তিদাযকং.

তস্স মনো মনো নাম, যং চে মনসি ৰত্ততি;

দুল্লভং বুদ্ধৰচনং, সব্বসম্পত্তিদাযকং.

তমেৰ সুরভী ধেনু, তমেৰ সুরপাদপো.

তস্সেৰ সোতং সোতংৰ, যং সুণাতি জনো অযং

দুল্লভং বুদ্ধৰচনং, সব্বসম্পত্তিদাযকং.

এৰং ৰিধো রগো ঘোরো, হল়াহল়ৰিসো সদা;

বুদ্ধোতি ৰচনং সুত্ৰা, সন্তুট্ঠো দাসি জীৰিতং.

সোণ্ণপুপ্ফত্তযংচাপি, মহগ্ঘং বহলং অদা;

পস্স বুদ্ধোতি ৰাচায, আনুভাৰমহন্ততন্তি.

অথ নাগরাজা তস্স তানি সুৰণ্ণপুপ্ফানি দত্ৰা এৰমাহ. সম্ম এতেসু একং তৰ পুঞ্ঞত্তায একং মম পুঞ্ঞত্থায পূজেহি. ইতরেন যাৰজীৰং সুখেন জীৰন্তো পুত্তদারে পোসেন্তো দানাদীসু অপ্পমজ্জন্তো জীৰিকং কপ্পেহি. মা হীনকম্মে ব্যৰটো হোহি, মিচ্ছাদিট্ঠিঞ্চ পজহাতি ওৰদিত্ৰা পক্কামি. অহিতুণ্ডিকোপি সোমনস্সপ্পত্তো তেন ৰুত্তনযেনেৰ দ্ৰিহি পুপ্ফেহি চেতিযং পূজেত্ৰা একেন স হ স্সং লভিত্ৰা তে ন পুত্তদারে ¶ পোসেন্তো কপণদ্ধিকৰণিব্বকাদীনং দানং দেন্তো অহিতুণ্ডিককম্মং পহাহ কুসলমেৰ উপচিনন্তো আযুপরিযোসানে সগ্গপরাযনো অহোসি.

ইতি অৰিদিতসত্তো কিঞ্চি বুদ্ধানুভাৰং,

লভতি ধনৰিসেসং যস্স নামপ্পকাসা;

ৰিদিতজননিকাযো কিন্নু তস্সানুভাৰং,

ন লপতি জিননামং কিচ্চ মঞ্ঞপ্পহাযাতি.

৬. সরণত্থেরস্স ৰত্থুম্হি অযমানুপুব্বীকথা

সাৰত্থিযং কির সুমনো নামে কো গহপতি অহোসি. তস্স ভরিযা সুজম্পতিকা নাম. তে অগারং অজ্ঝাৰসন্তা অপরভাগে পুত্তংচ ধীতরংচ লভিংসু. অথ তেসং দহরকালেযেৰ মাতাপিতরো কালং করোন্তা জেট্ঠকংপক্কোসিত্ৰা মযং পুত্ত তুৰং পতিরূপে ঠানে নিৰেসিতুং নাসক্খিম্হ, যং নো ঘরে ৰিভৰং, সব্বং তং গণ্হ. ইমাযচ তে কণিট্ঠিকায ৰুদ্ধিংত্ৰমেৰ জানাহীতি ৰত্ৰা জেট্ঠকস্স হত্থে কণিট্ঠিকায হত্থং ঠপেত্ৰা কালমকংসু. অথ সো মাতাপিতুন্নং অচ্চযেন আল়াহনকিচ্চং কত্ৰা ৰসন্তো কালন্তরেন কণিট্ঠিকং পতিরূপেন কুলেন সম্বন্ধিত্ৰা সযম্পি দারপরিগ্গহমকাসি. অথাপরভাগে তস্স কণিট্ঠিকা গব্ভিনী হুত্ৰা একদিৰসং সামিকং আহ, সামি মম ভাতরং দট্ঠুকামাম্হীতি. সোপি সাধু ভদ্দেতি অনুরূপেন পণ্ণাকারেন তায সদ্ধিং নিক্খমি. তদা পন ভগৰা সুনিৰত্থো সুপারুতো ভিক্খুসঙ্ঘপরিৰুসো পিণ্ডায নগরং পাৰিসি ছব্বণ্ণঘনবুদ্ধরংসিযো ৰিস্সজ্জেন্তো, ত তো তে ভগৰন্তং দিস্ৰা পসন্নচিত্তা পঞ্চপতিট্ঠিতেন ¶ ৰন্দিত্ৰা অট্ঠংসু, অথ সত্তা তেসং জযম্পতিকানং উপনিস্সযসম্পত্তিংদিস্ৰা তে সরণেসুচ সীলেসুচ পতিট্ঠাপেত্ৰা এৰমাহ, কদাচি ৰো দুক্খে উপ্পন্নে তথাগতো অনুস্সরিতব্বোতি. তথাহি.

যংকিঞ্চি ভযমুপ্পন্নং, রাজচোরাদিসম্ভৰং;

তদা সরেয্য সম্বুদ্ধং, নিচ্ছন্তোত দুপদ্দৰং.

যং ৰে উপদ্দৰং হোতি, যক্খপেতা দিসম্ভৰং;

তদা সরেয্য সম্বুদ্ধং, নিচ্ছন্তো তদুপদ্দৰং.

সীহব্যগ্ঘতরচ্ছাদি, পুণ্ডরীকাদিসম্ভৰং;

তদা সরেয্য সম্বুদ্ধং, নিচ্ছন্তো তদুপদ্দৰং.

যমাতপগ্গি ৰাতাদি, উদকাসনিসম্ভৰং;

তদা সরেয্য সম্বুদ্ধং, নিচ্ছন্তো তদুপদ্দৰং.

পজ্জরাদীহি রোগেহি, ৰিসমো তুহিসম্ভৰং;

তদা সরেয্য সম্বুদ্ধং, নিচ্ছন্তো তদুপদ্দৰং.

মচ্চুনা চে যদা যুদ্ধং, করে তেনাপি জন্তুনা;

সরিতব্বো তদা বুদ্ধো, পত্থেন্তেনত্তনো জযন্তি.

ততো তে ভগৰতো ৰচনং পটিনন্দিত্ৰা ৰন্দিত্ৰা অগমংসু. অথ জেট্ঠকো আগতে তে দিস্ৰা যথানুরূপং সক্কার মকাসি. তস্সা সামিকো কতিপাহং তত্থ ৰসিত্ৰা ভরিযং জেট্ঠকস্স পটিপাদেত্ৰা মম গামে কিচ্চং অত্থীতি ৰত্ৰা পক্কামি. অথস্সা ভাতা ভরিযং পক্কোসিত্ৰা আহ ভদ্দে ইমিস্সা সব্বং কত্তব্বং করোহীতি. সা ততো পট্ঠায তস্সা উদকন্ন পানা দিনা ৰেয্যাৰচ্চং কুরুমানা এতিস্সা হত্থপাদগীৰূপগেসু আভরণেসু লোভং উপ্পাদেত্ৰা তং ৰূপসমেতুং অসক্কোন্তী আহারূ পচ্ছেদং কত্ৰা গিলানাৰিয মঞ্চকং উপগূহিত্ৰা নিপতি. অথ সো গেহং গন্ত্ৰা তং তথা সযিতং ¶ দিস্ৰা মঞ্চকে নিসিন্নো কিং ভদ্দে অফাসুকন্তি পুচ্ছি, সা তুণ্হী হুত্ৰা কতিপযৰারে পুচ্ছিতা ন সক্কা কথেতুন্তি আহ. পুন সামিকেন গাল়্হং নিবন্ধিতে সা চিন্তেসি, উজুকং মযা তস্সা পিল়ন্ধনং পত্থেমীতি ৰুত্তে ন প্পতিরুপং, তস্সা পঞ্চমধুর মংসং পত্থেমীতি ৰুত্তে তং মারেস্সতি, তদা পিল়ন্ধনানি ময্হমেৰাতি, ততো সামি তৰ কণিট্ঠিকায পঞ্চমধুরমংসং পত্থেমি, অলভমানায মে জীৰিতং নত্থীতি আহ, তং সুত্ৰা সো অনেকপরিযাযেন মনুস্সমারণং নাম ভারিযন্তি ৰত্ৰা নিৰারেন্তোপি নিৰারেতুং নাসক্খি, অথ তায পটিবদ্ধচিত্তো কামমুচ্ছিতো মোহমূল়্হো হুত্ৰা সাধু লভিস্সসীতি তস্সা ৰচনং সম্পটিচ্ছি. তথাহি.

হাযন্তি ইধলোকত্থা, হাযন্তি পারলোকিকা;

হাযন্তি মহতা অত্থা, যে ইত্থীনং ৰসঙ্গতা.

এসা মাতা পিতা এসো, ভগিনী ভাতরো ইমে;

গরুতব্বে ন জানন্তি, যে ইত্থীনং ৰসঙ্গতা.

কারণাকারণন্তেতং, কত্তব্বংৰা ন ৰা ইদং;

কামন্ধত্তা ন জানন্তি, যে ইত্থীনং ৰসঙ্গতা.

পাণং ৰা অতিপাতেন্তি, হোন্তি ৰা পারদারিকা;

ভাসন্তি অলিকং ৰাচং, যে ইত্থীনং ৰসঙ্গতা.

সন্ধিচ্ছেদাদিকং থেয্যং, মজ্জপানংচ পেসুনং;

করোন্তি সাহসং সব্বং, যে ইত্থীনং ৰসঙ্গতা.

অহো অচ্ছরিযং লোকে, সরন্তানং ভযা ৰহং;

ভরিযায ৰসং গন্ত্ৰা, সোদরিংহন্তুমিচ্ছতীতি.

অথ সো সাহসিকো পুরিসো ভগিনি এৰ মাহ, এহি অম্ম অম্হাকং মাতাপিতুন্নং ইণং সাধেস্সাম, অপ্পেৰনাম নো দিস্ৰা ইণাযিকা ইণং দস্সন্তীতি, তং সুত্ৰা তায সম্পটিচ্ছিতে ¶ সুখযানকে নিসীদাপেত্ৰা ইণাযিকানং গামং গচ্ছন্তো ৰিয মহাঅটৰিংপত্ৰা যানং মগ্গা ওক্কম্ম ঠপেত্ৰা ৰিরৰন্তিমেৰ নং হত্থে গহেত্ৰা ছিন্দিস্সামীতি চিন্তেত্ৰা কেসে গহেত্ৰা ভূমিযং পাতেসি, তস্মিং খণে তস্সা কম্মজৰাতা চলিংসু. সা ভাতুলজ্জায সামি কম্মজৰাতা মে চলিংসু, যা ৰা হং ৰিজাযামি, তাৰ উপধারেহীতি ৰদন্তীপি অপনেতুং অসক্কোন্তী পুত্তং ৰিজাযি, অথ সো তং সমীপে ৰটরুক্খমূলে মারেস্সামীতি চিকুরে গহেত্ৰা আকড্ঢি, তস্মিং কালে সা সামি তৰ ভাগিনেয্যস্স মুখং ওলোকেত্ৰা তস্স সিনেহেনাপি মং ন মারেহীতি ৰদন্তী যাচি, অথ সো কক্খল়ো তস্সা তং কারুণিকৰচনং অসুণন্তো ৰিয মারেতুং উস্সহতেৰ, ততো সা কুমারিকা অত্তনো অসরণা চিন্তেসি, মম সদ্দেনা গন্ত্ৰা যো কোচি মম ভাতু অনযং করেয্য, তং ন প্পতিরূপন্তি ভাতুসিনেহেন নিস্সদ্দা অত্তনা গতিতসরণং আৰজ্জমানা নিপজ্জি, অথস্সা ভা ত রি মেত্তানুভাৰেনচ অনুস্সরিতসরণানুভাৰেনচ তস্মিং নিগ্রোধে অধিৰত্থা দেৰতা এৰরূপো মাতুগামো এত্থ মারিতা অভৰিস্সা, অদ্ধাহং দেৰসমাগমং পৰিসিতুং ন লভিস্সামীতি চিন্তেত্ৰা এতিস্সা সা মি কো ৰিয তং ত জ্জে ত্ৰা পলাপেত্ৰা ত্ৰং মা ভাযীতি সমস্সাসেত্ৰা যা ন কে স পু ত্তং কুমারিং নিসীদাপেত্ৰা তং দিৰসমেৰ সাৰত্থিমাগম্ম অন্তোনগরে সা লা য নং নিপজ্জাপেত্ৰা অন্তরধাযি. তথাহি.

সব্বসম্পত্তিদাতারং, সব্বলোকেকনাযকং;

মনসাপি যো ৰিভাৰেতি, তং ৰে পালেন্তি দেৰতা.

মুহুত্তম্পিচ যো মেত্তং, ভাৰেতি যদি সাধুকং;

তং ৰে পালেন্তি দেৰাপি, তোসযন্তি উপাযনাতি.

ততো ¶ তস্সা পন সামিকো নগরা নিক্খম্ম গচ্ছন্তো অত্তনো ভরিযং দিস্ৰা ত্ৰং কদা আগতা, কেনানীতাসীতি পুচ্ছি. সা দেৰতায আনীতভাৰং অজানন্তী কিং ত্ৰং ভণসি, ননু তযা আনীতাম্হীতি, সোপি কিংভোতি ভণসি, তৰ ভাতুগামে দিট্ঠকালতো প্পতুতি অজ্জ চত্তারো মাসা জাতা, এত্তকং কালং ত্ৰং ন দিট্ঠপুব্বা, কথং ত্ৰং মযা সদ্ধিংআগতাতি পুচ্ছি. সা তং সুত্ৰা তেনহি মাঞ্ঞস্স ইমং রহস্সং কথেহি সামীতি ৰত্ৰা ভা ত রা অত্তনো কতং সব্বং ৰিত্থারেন কথেসি. তং সুত্ৰা তস্স সামিকো সংৰিগ্গো ভযপ্পত্তো হুত্ৰা তং অত্তনো গেহং পাপেসি, ততো কতিপাহং তায ৰিস্সমিতে তে উভোপি সত্থারং নিমন্তেত্ৰা মহাদানং দত্ৰা ৰন্দিত্ৰা একমন্তে নিসীদিংসু, অথ সা ভগৰতো সরণসীলানুভাৰেন অত্তনো জীৰিতপটিলাভং পকাসেত্ৰা অত্তনো পুত্তং ভগৰন্তং ৰন্দাপেত্ৰা সরণোতিনামমকংসু, সত্থা তে সং অজ্ঝাসযং ঞত্ৰা তদনুরূপং ধম্মং দেসেসি, দেসনাৰসানে উভোপি সোতাপন্না অহেসুং, অথস্সা পুত্তো সরণকুমারো ৰীসতিমে ৰস্সে বুদ্ধসাসনে পব্বজিত্ৰা ৰিপস্সনং ৰড্ঢেত্ৰা অরহত্তং পত্তো সরণত্থেরোনাম পঞ্ঞাযীতি.

পরমতরপতিট্ঠং পাপুণন্তীতি মন্ত্ৰা;

ভৰগতি গুণরাসিং জানমানা জনা ভো;

ভজথ সরণসীলং সব্বথা সব্বকালন্তি.

৭. ৰেস্সামিত্তায ৰত্থুম্হি অযমানুপুব্বীকথা

জম্বুদীপে ¶ কির কোসম্বিনগরে কোসম্বিরঞ্ঞো ৰেস্সামিত্তানাম অগ্গমহেসী অহোসি. তদা ভগৰা কোসম্বিযং পটিৰসতি মহতা ভিক্খুসঙ্ঘেন সদ্ধিং চারিকং চরমানো. তস্মিং সমযে সা রঞ্ঞা সদ্ধিং ৰিহারং গন্ত্ৰা অনোপমায বুদ্ধলীল়ায মধুরেন সরেন দেসেন্তস্স ভগৰতো ধম্মং সুত্ৰা পসন্না সরণেসু পতিট্ঠায বুদ্ধমামিকা হুত্ৰা ৰিহরতি. অথা পরভাগে তস্স রঞ্ঞো রজ্জত্থায পচ্চন্তরাজা যুদ্ধসজ্জো রজ্জং ৰা দেতু, যুদ্ধংৰাতি পণ্ণং পহিণি. তং সুত্ৰা রাজা মহতিযা সেনায পরিৰুতো যুদ্ধভূমিং গচ্ছন্তো মহেসিযা সদ্ধিং গন্ত্ৰা খন্ধাৰারং নিৰাসেত্ৰা তস্সা এৰমাহ. ভদ্দে সঙ্গামসীসে জযপরাজযো নাম ন সক্কা ৰিঞ্ঞাতুং. সচে মে পরাজযো অভৰিস্স, পুরেতরমেৰ রত্তপতাকং উস্সাপেস্সামি, তেন অভিঞ্ঞাণেন ত্ৰং কোসম্বিমেৰ গচ্ছাহীতি অনুসাসিত্ৰা সঙ্গাম মণ্ডলং গন্ত্ৰা মহারণং করোন্তো অত্তনো পরাজযভাৰং ঞত্ৰা মাতুগামং সরিত্ৰা রত্তদ্ধজং উস্সাপেত্ৰা যুজ্ঝন্তো রণে পতি. অথ সা রত্তপতাকং দিস্ৰা পরাজিতো নূন মে সামিকোতি ভযেন পলাযিতুমারভি. অথ তং চোররঞ্ঞো মনুস্সা দিস্ৰা নূনাযং রঞ্ঞো অগ্গমহেসীতি ঞত্ৰা অত্তনো রাজানং দস্সেসুং, রাজা তং দিস্ৰা পটিবদ্ধচিত্তো মমেতং অভিসেকং করোথাতি অমচ্চে আণাপেসি. অমচ্চা তং অভিসেকত্থায যাচিংসু, সা ন মে ভণে অভিসেকেনত্থোতি ন ইচ্ছি. অমচ্চা তমত্থং রঞ্ঞো আরোচেসুং. রাজা নং পক্কোসাপেত্ৰা কস্মা ন ইচ্ছসীতি পুচ্ছি. সা এৰমাহ.

সুণোহি সাধুকং দেৰ, ভাসমানায মে ৰচো;

ভত্তা ময্হং মতো অজ্জ, সব্বসম্পত্তিদাযকো.

কত্ৰান ¶ সোভিসেকং মং, অত্তনো হদযং ৰিয;

পালেতি তং সরন্তস্সা, সোকগ্গি দহতে মনং.

মহারাজ সচঞ্ঞস্স, অস্স মগ্গমহেসিকা;

তম্হা দুক্খা ন মুচ্চামি, তেনাহং তং ন পত্থযে.

সোকগ্গিনা পদিত্তাহং, সোকে সোকং কথং খিপে;

জলন্তগ্গিম্হী কো নাম, পলালং পক্খিপে বুধো.

পিযৰিপ্পযোগদুক্খং, তং চিন্তযন্তী পুনপ্পুনং;

তম্হা দুক্খা ন মুচ্চামি, তস্মাহং তং ন পত্থযেতি.

তং সুত্ৰা রাজা কোধেনাভিভূতো সচে নাভিসিঞ্চিস্সসি, অগ্গিম্হি তং পক্খিপিস্সামীতি ৰত্ৰা মহন্তং দারুচিতকং কারাপেত্ৰা অগ্গিং দত্ৰা একপজ্জোতে জাতে এত্ত পৰিসাতি আহ. অথ সা যাচন্তী রাজানং আহ.

পাপো নিপ্পাপিনং রাজ, পাতনং খলু পাৰকে;

হোতি পাপফলং তস্স, পচ্চত্তেচ পরত্থচ.

পুরাতনেহি ভূপাল, সমণব্রহ্মণেসুচ;

মাতাপিতুসু বালেসু, রোগেনা তুরইত্থিসু;

নপ্পসত্থো ৰধো দেৰ, তস্মাহং ন ৰধারহাতি.

তং সুত্ৰাপি রাজা অসদ্দহন্তো মনুস্সে আণাপেসি. এতায হত্থপাদে গহেত্ৰা অগ্গিম্হি পক্খিপথাতি তে তথা করিংসু, অথ সা অগ্গিম্হি পক্খিপমানা নত্থেত্থ মে কোচি পটিসরণোতি সরণমেৰ সরণং করোমীতি চিন্তেত্ৰা ‘‘বুদ্ধং সরণং গচ্ছামি, ধম্মং সরণং গচ্ছামি, সঙ্ঘং সরণং গচ্ছামীতি’’ ৰদন্তী মনসাচ অনুস্সরন্তী অগ্গিম্হি পতি, তথাৰিধোপি অগ্গি তস্সা সরীরে লোমকূপমত্তম্পি উণ্হাকারং কাতুং নাসক্খি. পদুমগব্ভং পৰিট্ঠা ৰিয সীতিভূতসরীরা অহোসি. রাজা তং অচ্ছরিযং ¶ দিস্ৰা সংৰিগ্গো লোমহট্ঠজাতো ৰেগেন তং উপসঙ্কমিত্ৰা উভোহি হত্থেহি পগ্গয্হ উরে নিপজ্জাপেত্ৰা রাজাসনে নিসীদাপেত্ৰা অঞ্জলিং গগ্গয্হ ঠিতো কস্মা তে তং অগ্গি সরীরং মা পরিদহীতি পুচ্ছি. সা তং কারণং কথেন্তী এৰ মাহ.

মাতা পিতাচ ঞাতীচ, পরিৰারাচ সোহদা;

মন্তো সধাদযোচাপি, মহেসক্খাচ দেৰতা.

এতেচ ঞ্ঞেচ ভূপাল, সত্তানং ভয মাগতে;

রক্খিতুং নেৰ সক্কোন্তি, হিত্ৰান সরণত্তযং.

অগাহং বুদ্ধং সরণং, বুদ্ধো মে সরণং ইতি;

তেন তেজেন মং রাজ, জলন্তো অগ্গি নো দহি.

অগাহং ধম্মং সরণং, ধম্মো মে সরণং ইতি;

তেন তেজেন মং রাজ, জলন্তো অগ্গি নো দহি.

অগাহং সঙ্ঘং সরণং, সঙ্ঘো মে সরণং ইতি;

তেন তেজেন মং রাজ, জলন্তো অগ্গি নো দহি.

এৰং মহানুভাৰন্তং, পচ্চক্খং এহিপস্সিকং;

নানো পদ্দৰ ৰিদ্ধংসিং, নানাসম্পত্তিদাযকং.

সরণত্তযঞ্হি যো সত্তো, ন সমাদায গণ্হতি;

ইধৰা পরত্থৰা লোকে, সো সুখং নানুভোস্সতি.

সরণত্তযঞ্হি যো সত্তো, সুসমাদায গণ্হতি;

ইধৰাপরত্থৰা লোকে, সো সুখা ন ৰিহাযতি.

তস্মা তুৰম্পি ভূপাল, গণ্হাহি সরণত্তযং;

তং তে ভৰতি সব্বত্থ, তাণং লেণং পরাযণন্তি.

তং সুত্ৰা রাজা অতিৰিয পসন্নমানসো তং খমাপেত্ৰা মহন্তং সক্কারসম্মানং কত্ৰা অজ্জপ্পট্ঠায ত্ৰং মম মাতাতি তং মাতুট্ঠানে ঠপেত্ৰা সরণ মগমাসি. তস্মিং সন্নিপতিত্ৰা ঠিতমহাজনা তং পাটিহারিযং দিস্ৰা সরণেসুচ সীলেসুচ পতিট্ঠায দানাদীনি পুঞ্ঞকম্মানি কত্ৰা যথাকম্মং গতাতি.

ইতি ¶ সরণৰরং সা কেৰলং উগ্গহেত্ৰা,

ন লভথ ভৰভোগং নিব্বুতিঞ্চাপি অন্তেতি.

৮. মহামন্ধাতুৰত্থুম্হি অযমানুপুব্বীকথা

ইতো কির একনৰুতিকপ্পমত্থকে ৰিপস্সীনাম সম্মাসম্বুদ্ধো লোকে উপ্পজ্জিত্ৰা পৰত্তৰরধম্মচক্কো সদেৰকেহি লোকেহি পূজিযমানো বন্ধুমতীনগরে পটিৰসতি. তদা সো মন্ধাতা তস্মিং নগরে তুন্নকারো হুত্ৰা নিব্বত্তি. তুন্নকারকম্মেন জীৰিকং কপ্পেন্তো ৰিহরতি. তদা সকলনগরৰাসিনো বুদ্ধপমুখং ভিক্খুসঙ্ঘং নিমন্তেত্ৰা মহাদান মদংসু. অথ সো এৰং চিন্তেসি, সব্বেপিমে নগরৰাসিনো দানং দদন্তি. অহমেকোৰ সেসো দুগ্গতত্তা, যজ্জাহমজ্জ বীজং ন রোপেমি, ইমম্হা দুক্খা ন পরিমুচ্চিস্সামীতি. সো ৰেগেন তুন্নকারকম্মং পরিযেসিত্ৰা কিঞ্চিমূলং লভিত্ৰা তেন একস্সাপি দানং দাতুং ওকাস মলদ্ধা আপণং গন্ত্ৰা রাজমাসকে গহেত্ৰা চঙ্কোটকং পূরেত্ৰা আদায বুদ্ধপমুখস্স ভিক্খুসঙ্ঘস্স ভত্তগ্গং গন্ত্ৰা ঠিতো এৰং চিন্তেসি, নত্থি দানি ওকাসং একস্সাপি ভিক্খুনো পত্তে ওকিরিতুং, অদ্ধাহং ইমে আকাসে ৰিকিরিস্সামীতি অপ্পেৰনাম পতমানানং একস্সাপি ভিক্খুনো পত্তে একম্পি পতেয্য, তং মে ভৰিস্সতি দীঘরত্তং হিভায সুখাযাতি পসন্নমানসো উদ্ধং খিপি, ত তো পতমানা তে পরিৰারিকদেৰতানঞ্চ ভগৰতো আনুভাৰেনচ বহি অপতিত্ৰা ভগৰন্তমাদিং কত্ৰা সব্বেসং ভিক্খূনং ¶ পত্তেযেৰ পতিংসু. অথ সো তং অচ্ছরিযং দিস্ৰা পসন্নমানসো সিরসি অঞ্জলিং পগ্গয্হ ঠিতো এৰং পত্থনমকাসি.

ইমিনা মে অধিকারেন, পসাদেন যতিস্সরে;

কামভোগীনহং অগ্গো, ভৰেয্যং জাতিজাতিযং.

পহরিত্ৰা যদা পাণিং, ওলোকেমি নভোতলং;

সত্তরতনসম্পন্নং, ৰস্সং ৰস্সতু সব্বদাতি.

সো ততো পট্ঠায দেৰমনুস্সেসু সংসরন্তো মহন্তং দিব্বসম্পত্তিং অনুভৰিত্ৰা ইমস্মিং ভদ্দকপ্পে আদিম্হি মহাসম্মতো নাম রাজা অহোসি. তস্স পুত্তো রোজো নাম. তস্স পুত্তো ৰররোজো নাম, তস্স পুত্তো কল্যাণো নাম, তস্স পুত্তো ৰরকল্যাণো নাম. ৰরকল্যাণস্স পুত্তো উপোসথো নাম. উপোসথস্স পুত্তো মন্ধাতা নাম হুত্ৰা নিব্বত্তি. সো সত্তহি রতনেহি চতূহি চ ইদ্ধীহি সমন্নাগতো চক্কৰত্তিরজ্জং কারেসি, তস্স ৰামহত্থং সম্মিঞ্জিত্ৰা দক্খিণহত্থেন অপ্পোট্ঠিতে আকাসতো দিব্বমেঘা ৰিয জণ্ণুপ্পমাণং সত্তরতনৰস্সং ৰস্সতি. এৰরূপো অচ্ছরিযো অহোসি. সো চতুরাসীতিৰস্সসহস্সানি কুমারকীল়ং কীল়ি. চতুরাসীতিৰস্সসহস্সানি ওপরজ্জং কারেসি. চতুরাসীতিৰস্সসহস্সানি চক্কৰত্তিরজ্জং কারেসি, আযু পনস্স অসঙ্খ্যেয্যং অহোসি. সো একদিৰসং কামতণ্হং পূরেতুং অসক্কোন্তো উক্কণ্ঠিতাকারং দস্সেসি, অমচ্চা দেৰ কিন্নখো উক্কণ্ঠা সীতি পুচ্ছিংসু. সো ভণে ময্হং পুঞ্ঞকম্মে ওলোকিযমানে ইমং রজ্জং নপ্পহোতি, কতরন্নু খো ঠানং রমণীযন্তি. দেৰলোকো মহারাজাতি. সো চক্করতনং অব্ভুক্কিরিত্ৰা পরিসায সদ্ধিং চাতুমহারাজিকদেৰলোকং অগমাসি, অথস্স চত্তারো মহারাজানো দিব্বমালগন্ধ- হত্থা ¶ দেৰগণপরিৰুতা পচ্চুগ্গমনং কত্ৰা তং আদায চাতুমহারাজিকদেৰলোকং গন্ত্ৰা রজ্জং অদংসু, তস্স পরিসায পরিৰুতস্স তস্মিং রজ্জং করোন্তস্স দীঘো অদ্ধা ৰীতিৰত্তো. সো তত্থপি তণ্হং পূরেতু মসক্কোন্তো উক্কণ্ঠিতা কারং দস্সেসি. ততো চত্তারো মহারাজানো কিন্নুখো মহারাজ উক্কণ্ঠিতোতি পুচ্ছিংসু. ইমম্হা দেৰলোকা কতরন্নু খো ঠানং রমণীযন্তি, দেৰ পরেসং উপট্ঠাকমনুস্সসদিসা মযং. তাৰতিংসদেৰলোকো ইতো সতগুণেন রমণীযোতি. মন্ধাতা চক্করতনং অব্ভুক্কিরিত্ৰা অত্তনো পরিসপরিৰুতো তাৰতিংসাভিমুখো পাযাসি, অথস্স সক্কো দেৰরাজা দিব্বমালগন্ধহত্থো দেৰগণপরিৰুতো পচ্চুগ্গমনং কত্ৰা তং হত্থে গহেত্ৰা ইতো এহি মহারাজাতি আহ. ততো রঞ্ঞো দেৰগণপরিৰুতস্স গমনকালে পরিণাযকরতনং চক্করতনং আদায সদ্ধিংপরিসায মনুস্সপথং ওতরিত্ৰা অত্তনো ঘরং পাৰিসি. সক্কো মন্ধাতুং সক্কভৰনং নেত্ৰা দেৰতা দ্ৰে কোট্ঠাসে কত্ৰা অত্তনো রজ্জং মজ্ঝে ভিন্দিত্ৰা অদাসি. ততো পট্ঠায দ্ৰেপি রাজনো রজ্জং কারেসুং. এৰং কালে গচ্ছন্তে সক্কো সট্ঠিসতসহস্সাধিকানি তিস্সোচ ৰস্সকোটিযো আযুং খেপেত্ৰা চৰি. অঞ্ঞো সক্কো নিব্বত্তি, সোপি তথেৰ দেৰরজ্জং কারেত্ৰা আযুক্খযেন চৰি, এতেনু পাযেন ছত্তিংস সক্কা চৰিংসু, মন্ধাতা পন মনুস্সপরিহারেন দেৰরজ্জং কারেসিযেৰ, তস্সেৰং কালে গচ্ছন্তে ভীয্যোসো মত্তায কামতণ্হা উপ্পজ্জি, সো কিম্মে উপড্ঢরজ্জেন. সক্কং মারেত্ৰা একরজ্জং করিস্সামীতি চিন্তেসি. সক্কং পন মারেতুং ন সক্কা, কামতণ্হা পনেসা ৰিপত্তিমূলা. তথাহি.

ৰরমত্র সুখন্ত্যত্র, অত্রিচ্ছাৰিহতো নরো;

ইধৰা পরত্থৰা কিঞ্চি, ন সাতং ৰিন্দতে সদা.

তণ্হাদাসো নরো এত্থ, রাজচোরাদিসম্ভৰং;

হত্তচ্ছেদাদিকং দুক্খং, পাপুণাতি ৰিহঞ্ঞতি.

যেন লোভেন জাতেন, সদা জীযন্তি পাণিনো;

খেত্তং ৰত্থুং হিরঞ্ঞংচ, গৰাস্সং দাসপোরিসং;

সব্বত্থামেন সো লোভো, পহাতব্বোৰ ৰিঞ্ঞুনাতি.

ততো অত্রিচ্ছাৰিহতস্স তস্স আযুসঙ্খারো পরিহাযি, জরা সরীরং পহরি, মনুস্সসরীরঞ্হি নাম ন দেৰলোকেভিজ্জতি, তথ সো দেৰলোকা ভস্সিত্ৰা বন্ধুমতীনগরুয্যানং পাৰিসি, উয্যানপালো তস্স আগতভাৰং রাজকুলং নিৰেদেসি. রাজা রাজকুলা আগন্ত্ৰা উয্যানেযেৰ আসনং পঞ্ঞাপেসি. ততো মন্ধাতা উয্যানে পঞ্ঞত্তৰরাসনে নিপন্নো অনুট্ঠানসেয্যং কপ্পেসি. ততো অমচ্চা দেৰ তুম্হাকং পরতো কিন্নু কথেসামাতি পুচ্ছিংসু, মম পরতো তুম্হে ইমং সাসনং মহাজনস্স কথেয্যাথ, মন্ধাতুমহারাজা দ্ৰিসহস্সদীপপরিৰারেসু চতূসু মহাদীপেসু চক্কৰত্তিরজ্জং কারেত্ৰা চাতুমহারাজিকেসু রজ্জং কারেত্ৰা ছত্তিংসসক্কানং আযুপরিমাণেন দেৰলোকে রজ্জং কারেত্ৰা কালমকাসীতি. সো এৰং ৰত্ৰা কালংকত্ৰা যথাকম্মং গতোতি ইমমত্থং পকাসেতুং ভগৰা চতুমহাপরিসমজ্ঝে ইমা গাথাযো আহ.

যাৰতা চন্দিমসুরিযা, পরিহরন্তি দিসা ভন্তি ৰিরোচনা;

সব্বেৰ দাসা মন্ধাতা, যে পাণা পথৰিনিস্সিতা.

ন ¶ কহাপণৰস্সেন, তিত্তি কামেসু ৰিজ্জতি;

অপ্পস্সদা দুখা কামা, ইতি ৰিঞ্ঞায পণ্ডিতো.

অপি দিব্বেসু কামেসু, রতিংসো নাধিগচ্ছতি;

তণ্হাক্খযরতো হোতি, সম্মাসম্বুদ্ধসাৰকোতি.

তং সুত্ৰা বহূ সোতাপত্তিফলাদীনি পাপুণিংসূতি.

ইতি গতিনিযতানং বোধিযা উত্তমানং;

সকৰসমুপনেত্ৰা দেতি দুক্খাতিতণ্হা;

জহথ তমিতি মন্ত্ৰা ভো ভজৰ্হো তিৰত্থুংতি.

৯. বুদ্ধৰম্মৰাণিজকৰত্থুম্হি অযমানুপুব্বীকথা

জম্বুদীপে কির পাটলিপুত্তনগরে বুদ্ধৰম্মো নাম ৰাণিজকো অহোসি ৰাণিজককম্মেন জীৰমানো. সো অপরভাগে সত্থৰাহেহি সদ্ধিং গামনিগমজনপদ রাজধানীসু ৰাণিজ্জং পযোজযমানো ৰিচরতি, তস্মিং সমযে ভগৰানেকভিক্খুসহস্সপরিৰুতো জনপদচারিকং চরতি বহূ দেৰমনুস্সে সংসারকন্তারা উত্তারেন্তো. তদা সো ভগৰন্তং অদ্দস দ্ৰত্তিংসলক্খণানুব্যঞ্জনপতিমণ্ডিতং জলমানসুৰণ্ণমেরুং ৰিযৰিরোচমানং মহাভিক্খুসঙ্ঘপরিৰুতং, দিস্ৰা পরমপীতিযা ফুটসরীরো অঞ্জলিং পগ্গয্হ ভগৰন্তং উপসঙ্কমিত্ৰা ৰন্দিত্ৰা সাযণ্হে ভগৰন্তং ভত্তেন নিমন্তেসি বুদ্ধসাসনে অপরিচিতভাৰেন. অথস্স ভগৰা ৰিকালভোজনা পটিৰিরতা তথাগতাতি আহ. অথ সো ভগৰন্তং ৰন্দিত্ৰা কিং ভন্তে ভগৰন্তা ৰিকালে ভুঞ্জিস্সন্তীতি, অথস্স কথং পটিচ্চ ভগৰা ¶ অট্ঠৰিধং পানং তথাগতানং ৰিকালে ভুঞ্জিতুং কপ্পতি. সেয্যথিদং, অম্বপানং জম্বুপানং চোচপানং মোচপানং ফারুসকপানং মধুপানং মুদ্দিকপানং সালূকপানন্তি. তং সুত্ৰা ৰাণিজো সহসক্কারারসেহি মুদ্দিকপানং কত্ৰা বুদ্ধপমুখস্স ভিক্খুসঙ্ঘস্স অদাসি, সভিক্খুসঙ্ঘো সত্থা পরিভুত্তপানীযরসো তস্স ধম্মং দেসেত্ৰা জনপদচারিকং পক্কামি. সোপি পসন্নমানসো হুত্ৰা নিৰত্তো সদ্ধিং ৰাণিজকেহি তেসু তেসু জনপদেসু ৰাণিজ্জং পযোজেন্তো মহাৰত্তনীযংনাম কন্তারং পাপুণি, তত্ত তেসং সব্বেসুযেৰ সকটেসু পানীযং পরিক্খযমগমাসি. তত্থ সব্বমনুস্সানংচ বলীৰদ্দানংচ পানীযং নাহোসি. অথ সো ৰাণিজো পিপাসাভিভূতো তেসু তেসু সকটেসু পানীযং পরিযেসন্তো ৰিচরতি. অথেকস্মিং সকটে মনুস্সা তং দিস্ৰা কারুঞ্ঞেন এত্থাগচ্ছ, ইমস্মিং কোল়ম্বে থোকং পানীযং অত্থি পিৰাতি ৰদিংসু. ত তো সো গন্ত্ৰা পানীযং পিৰি. তস্স তং রসং মুদ্দিকপানরসসদিসং অহোসি, পিৰন্তোৰ সো এৰং চিন্তেসি. সম্মাসম্বুদ্ধস্স তদা মে দিন্নমুদ্দিকপানস্স নিস্সন্দো অজ্জ সম্পত্তো ভৰিস্সতীতি অচ্ছেরব্ভুতচিত্তো সোমনস্সজাতো গন্ত্ৰা সযমেৰ চাটিযা পিধানং ৰিৰরি. সকলাপি সা চাটি মুদ্দিকপানেন পরিপুণ্ণা অহোসি. ততো সো র সৰ ন্তং ওজৰন্তং অপরিক্খযং দিব্বপানসদিসং পানীযং দিস্ৰা পরমায পীতিযা ফুটসরীরো উগ্ঘোসেসি সব্বে পানীযং পিৰন্তূতি. তং সুত্ৰা সব্বে সন্নিপতিত্ৰা পানীযং দিস্ৰা অব্ভুতচিত্তা জাতা. ৰাণিজো তেসং মজ্ঝে বুদ্ধানুভাৰং পকাসেন্তো আহ.

পস্সথেদং ভৰন্তো ভো, আনুভাৰং মহেসিনো;

অচিন্তনীযমচ্ছেরং, সন্দিট্ঠিক মকালিকং.

পসন্নমনসা বুদ্ধে, দিন্নং পানীযকং মযা;

ৰিপচ্চতি ইদানেৰ, তং দানং মুনিৰাহসা.

ওজৰন্তং ¶ সুখন্নংৰ, সীতলং মধুরো দকং;

দিব্বপানংৰ দেৰানং, জাতমব্ভুতমক্খযং.

সীলৰন্তেসু কো নাম, ন দদেয্য ৰিচক্খণো;

ইধ লোকে পরত্তেচ, সুখদং দান মুত্তমং.

যথি চ্ছিতং গহেত্ৰান, পিৰন্তু মধুরো দকং;

ভাজনানিচ পূরেত্ৰা, যন্তু সব্বে যথিচ্ছিতন্তি.

এৰঞ্চ পন ৰত্ৰা সব্বে মনুস্সেচ বলীৰদ্দেচ মুদ্দিকরসেনেৰ সন্তপ্পেসি. ততো ততো আগতাপি পানীযং পিৰন্তোচ পানীযং অক্খযং অহোসি. ততো ৰাণিজো সত্থৰাহেহি সদ্ধিং ৰাণিজ্জং পযোজেত্ৰা সকনগরং আগচ্ছন্তো ভগৰন্তং পস্সিত্ৰা গমিস্সামীতি ৰেল়ুৰনং গন্ত্ৰা সত্থারং ৰন্দিত্ৰা কতানুঞ্ঞো একমন্তে নিসীদি. সত্থাপি তেন সদ্ধিং মধুরপটিসন্থারমকাসি. উপাসকোপি ভন্তে তুম্হাকং পাটিহারিযং দিস্ৰা পসন্নো ৰন্দিত্ৰা গমিস্সামীতি আগতোম্হি, এৰঞ্চে ৰঞ্চ পাটিহারিযন্তি ৰিত্থারেন কথেসি. অথস্স ভগৰা ধম্মং দেসেসি. সো ধম্মং সুত্ৰান সত্থারং স্ৰাতনায নিমন্তেত্ৰা মহাদানং দত্ৰা অত্তনো গেহমেৰ অগমাসি. সো ততো পট্ঠায দানাদীনি পুঞ্ঞানি কত্ৰা ততো চুতো দেৰলোকে দ্ৰাদসযোজনিকে কনকৰিমানে দেৰচ্ছরাপরিৰুতো দেৰিস্সরিযসমন্নাগতো নিব্বত্তি. তস্স পুব্বকম্মপকাসনত্থং তত্থ তত্থ রতনভাজনেসু দিব্বমযেহি মুদ্দিকপানেহি পরিপুণ্ণং অহোসি. পানীযং পিৰিত্ৰা দেৰা নচ্চন্তি ৰাদেন্তি কীল়ন্তীতি.

লভতি ৰিপুলভোগং তোযমত্তস্স দানা;

ৰিদিতগুণগণা ভো তীসু ৰত্থূসু তুম্হে,

লভথ খলু ৰিসেসং সীলৰন্তেসু দানাতি.

বুদ্ধৰম্মৰাণিজকস্স ৰত্থুং নৰমং.

১০. রূপদেৰিযা ৰত্থুম্হি অযমানুপুব্বীকথা

অতীতে ¶ কির ৰিপস্সিস্স ভগৰতো কালে তস্মিং নগরে একা গামদারিকা ৰিহারে আহিণ্ডন্তী একং গিলানভিক্খুং দিস্ৰা কম্পমানহদযা উপসঙ্কমিত্ৰা ৰন্দিত্ৰা ভন্তে কোতে আবাধো সরীরং পীল়েতীতি পুচ্ছি. তেনাপি ভগিনি খরাবাধো মে পীল়েতীতি ৰুত্তে সা তেনহি ভন্তে অহং তং রোগং ৰূপসমেস্সামীতি নিমন্তেত্ৰা গেহং গন্ত্ৰা তং পৰত্তিং মাতাপিতুন্নং কথেত্ৰা তেহি অনুঞ্ঞাতা পুন দিৰসে নানগ্গরসেন ভেসজ্জাহারং সম্পাদেসি, ততো সো ভিক্খু পুনদিৰসে চীৰরং পারুপিত্ৰা ভিক্খায চরন্তো তস্সা গেহং গন্ত্ৰা অট্ঠাসি. সা থেরং আগতং দিস্ৰা সোমনস্সজাতা পত্তং গহেত্ৰা আসনং পঞ্ঞাপেত্ৰা অদাসি. তত্থ নিসিন্নং তং আহারেন সাধুকং পরিৰিসিত্ৰা সক্কার মকাসি. অথস্সা সদ্ধাবলেন ভুত্তমত্তেযেৰ সো আবাধো ৰূপসমি. ততো সো ৰূপসন্তরোগো দুতিযদিৰসে তস্সা গেহং না গমাসি. অথ সা ৰিহারং গন্ত্ৰা তং ৰন্দিত্ৰা কস্মানাগতত্থাতি পুচ্ছিত্ৰা তেন মে ভগিনি ব্যাধি ৰূপসমি, তস্মা নাগতোস্মীতি ৰুত্তে সা সাধু ভন্তেতি সোমনস্সজাতা গেহমেৰ অগমাসি. সা তেন পুঞ্ঞকম্মেন কালং কত্ৰা দেৰলোকে নিব্বত্তি. তস্সা তত্থ দ্ৰাদসযোজনিকং কনকৰিমানং নিব্বত্তি. সা তত্থ দেৰিস্সরিযং অনুভৰন্তী ছবুদ্ধন্তরং খেপেত্ৰা অম্হাকং ভগৰতো কালে জম্বুদীপে দেৰপুত্তনগরে উদিচ্চব্রহ্মণকুলে জেট্ঠব্রাহ্মণস্স ভরিযায কুচ্ছিম্হি পটিসন্ধিং গণ্হি, সা পরিপাক মন্ৰায মাতুকুচ্ছিতো নিক্খমি. তস্সা মাতুকুচ্ছিতো নিক্খন্তকালতো পট্ঠায দিৰসে দিৰসে অট্ঠট্ঠনালিমত্তং তণ্ডুলং নিব্বত্ততি. তস্সা রূপসম্পত্তিং দিস্ৰা পসন্না মাতাপিতরো রূপদেৰীতি নাম মকংসু. পচ্ছা তং পতিরূপেন দারকেন নিযোজেসুং. অথস্সা তণ্ডুল- নালিমত্তং ¶ গহেত্ৰা পচিতুং আরদ্ধে ইচ্ছিতিচ্ছিতমংসাদিব্যঞ্জনঞ্জ সপ্পিনৰনীতদধিখীরাদিগোরসঞ্চ জীরমরিচাদিকটুকভণ্ডঞ্চ কদলিপনসমধুগুল়াদিউপকরণঞ্চ ভাজনানি পূরেত্ৰা নিব্বত্ততি, তায হত্থেন গহিতং কিঞ্চি খাদনীযং ভোজনীযংৰা পূতিভাৰং ন গচ্ছতি, ভত্তুক্খলিং গহেত্ৰা সকলনগরৰাসিনো ভোজেন্তিযাপি এককটচ্ছুমত্তং ভত্তং গহিতট্ঠানং ন পঞ্ঞাযতি. এৰং অপরিক্খযপুঞ্ঞা অহোসি, সকলদেৰপুত্তনগরে চন্দসুরিযাৰ পাকটা অহোসি, অথ সা পঞ্চসতভিক্খূ নিমন্তেত্ৰা নিচ্চং সকনিৰেসনেযেৰ ভোজেতি, তদা তেসং অন্তরে পটিসম্ভিদাপত্তো মহাসঙ্ঘরক্খিতত্থেরোনাম ইমিস্সা পুঞ্ঞানুভাৰং দিব্বচক্খুনা দিস্ৰা ন জানাতি এসা অত্থনা পুব্বে কতকম্মং. যন্নূনাহং অস্সা পকাসেয্যন্তি একদিৰসং তস্সা নিৰেসনে ভুঞ্জিত্ৰা অনুমোদনং করোন্তো জানাসি ভগিনি তযা পুব্বে কতকম্মন্তি পুচ্ছি, ন জানামি ভন্তে. সোতুমিচ্ছামীতি, অথস্সা সো পুব্বকম্মং পকাসেন্তো.

তদা তস্মিং পুরে রম্মে, আসি ত্ৰং গামদারিকা;

আহিণ্ডন্তী ৰিহারস্মিং, অদ্দক্খি জিনসাৰকং.

রোগাতুরং কিসং পণ্ডুং, অস্সসন্তং মুহুং মুহুং;

দিস্ৰান কম্পিতা চিত্তা, নিমন্তেত্ৰান তং মুনিং.

ভেসজ্জঞ্চেৰ ভত্তঞ্চ, অদা ত্ৰং তেন সো যতি;

অব্যাবাধো অনীঘোচ, অহোসি অনুপদ্দৰো.

ততো ত্ৰং তেন কম্মেন, সুকতেন ততো চুতা;

জাতাসি দেৰলোকস্মিং, সব্বকামসমিদ্ধিনী.

তত্থ ¶ তে পুঞ্ঞতেজেন, পাসাদো রতনামযো;

মণিথূপিসতাকিণ্ণো, কূটাগারেহি লঙ্কতো.

নেকগব্ভসতাকিণ্ণো, সযনাসনমণ্ডিতো;

অচ্ছরাসতসংকিণ্ণো, নচ্চগীতাদিসংকুলো.

রম্ভাম্বজম্বুসন্নীর, পূগপুন্নাগপাটলী;

নাগাদিতরুসণ্ডেহি, মণ্ডিতুয্যানপন্তিহি.

পদুমুপ্পলকল়ার, কুন্দকাননমণ্ডিতে;

মধুমত্তালিপালীহি, সারসীসরসংকুলে.

দেৰপুত্তেহি নেকেহি, তথা দেৰচ্ছরাহিচ;

নিচ্চুস্সৰে মহাভোগে, ৰিমানে মননন্দনে.

ত্ৰমেৰং দেৰলোকম্হি, ৰিন্দমানা মহাযসং;

অদ্ধানং ৰীতিনামেত্ৰা, নিব্বুতে গোতমে জিনে.

জম্বুদীপে ইদানি ত্ৰং, নিব্বত্তা উদিতে কুলে;

পুঞ্ঞপঞ্ঞাগুণাৰাসা, রূপেনগ্গা পিযংৰদা.

এতং তে দেৰলোকস্মিং, দেৰিস্সরিযমব্ভুতং,

ইমং তে ইধ লোকস্মিং, সব্বং মানুসিকং সুখং.

ৰিপস্সিমুনিনো কালে, ত্ৰং তস্সেকস্স ভিক্খুনো;

অদা দানং গিলানস্স, তস্স তং ফলমীদিসং.

কাতব্বঞ্হি সদা পুঞ্ঞং, ইচ্ছন্তেন সুখপ্পদং;

তস্মা ত্ৰং সব্বদা ভদ্দে, উস্সুক্কা কুসলে ভৰাতি.

এৰং সো তস্স পুরিমত্তভাৰে কতকম্মং পকাসেত্ৰা ইদানি পুঞ্ঞকম্মে অপ্পমাদা ভৰাতি অনুসাসি. সা থেরস্স ধম্মদেসনং সুত্ৰা পরমসোমনস্সা ততো পট্ঠায দানাদীসু নিরতা পুঞ্ঞানি করোন্তী তেনেৰ সোমনস্সেন সোতাপন্না অরিযসাৰিকা অহোসীতি.

ইতি ¶ তরুণকুমারী পুঞ্ঞকম্মেসু সারং,

অৰিদিতগুণমত্তা দত্ৰ ভিক্খুস্স দানং;

দিৰিমনুজসুখং সালত্থ তুম্হে ভৰন্তা,

ৰিদিতকুসলপাকা কিং ন লব্ভেথ সন্তিং.

১১. নন্দিযরাজস্স ৰত্থুম্হি অযমানুপুব্বীকথা

ইতো ¶ কির কপ্পসতসহস্সমত্থকে পদুমুত্তরো নাম সত্থা লোকে উদপাদি সদেৰকং লোকং সংসারকন্তারা উত্তারেন্তো. তস্মিং কির সমযে একো কুটুম্বিকো সত্থু ধম্মদেসনং সুত্ৰা পসন্নমানসো বুদ্ধপমুখং ভিক্খুসঙ্ঘং নিমন্তেত্ৰা মহাদানং সজ্জেত্ৰা অত্তনো ভৰনং দেৰভৰনমিৰ অলঙ্করিত্ৰা বুদ্ধারহং মহাসনং পঞ্ঞাপেত্ৰা গন্ত্ৰা ভগৰন্তং যাচি কালোযং ভন্তে ভগৰতো ভত্তগ্গস্স উপসঙ্কমনাযাতি. অথ ভগৰা ভিক্খুসঙ্ঘপরিৰুতো মহতা বুদ্ধানুভাৰেন গন্ত্ৰা নিসীদি পঞ্ঞত্তৰরবুদ্ধাসনে, ততো কুটুম্বিকো হট্ঠো উদগ্গো সপরিসো ভগৰন্তং পরিৰিসতি অনেকেহি মধুরন্নপানাদীহি. তদা তস্স ভগৰতো সাসনে ধুতঙ্গধরানং অগ্গো ৰসভত্থেরোনাম মহাসাৰকো সপদানৰত্তেন পিণ্ডায চরমানো তস্স কুটুম্বিকস্স গেহদ্ৰারে অট্ঠাসি, অথ সো থেরং দিস্ৰা ভন্তে সত্থা অন্তোগেহে নিসিন্নো, তুম্হেপি পৰিসথাতি যাচি, থেরো অপৰিসিত্ৰাৰ অগমাসি, কুটুম্বিকো ভগৰন্তং উপসঙ্কমিত্ৰা তমত্তং ৰত্ৰা কিং ভন্তে সদেৰকে লোকে ভগৰতাপি উত্তরিতরো গুণেন সংৰিজ্জতীতি আহ. অথস্স সত্থা পুত্তোপমং দস্সেত্ৰা থেরস্স গুণে ৰণ্ণেন্তো এৰমাহ.

পালেন্তি নিম্মলং কত্ৰা, পাতিমোক্খাদিসংৰরং;

সমাদিন্নধুতঙ্গাচ, অপ্পিচ্ছা মুনিসূনৰো.

নিচ্চ মন্তকযুদ্ধম্হি, নদ্ধা যোধাৰ দপ্পিতা;

পুঞ্ঞানং ৰত্থুভূতা তে, দেৰমানুসকা দিনং.

ধারেমহং ৰণ্ণৰন্তং, সীৰেয্যম্পিচ চীৰরং;

বুদ্ধপুত্তা মহানাগা ন ধারেন্তি তথাৰিধং.

ধারেন্তি ¶ তে পংসুকূলং, সঙ্ঘাটেত্ৰা পিলোতিকে;

ৰণচ্ছাদনচোলংৰ, ইচ্ছালোভ ৰিৰজ্জিতা.

সাদিযামি সদা হম্ভো, উপাসকনিমন্তনং;

নেৰ সাদেন্তি সম্বুদ্ধ, পুত্তো পাসকযাচনং.

সপদানেন যং লদ্ধং, লূখংৰাপি পণীতকং;

তেন তুস্সন্তি মে পুত্তা, রসগেধৰিৰজ্জিতা.

নিপজ্জামি অহং সাধু, সন্থতে সযনে সুভে;

ন তে সেয্যং পকপ্পেন্তি, সংসারভযভীরুকা.

ঠানা সনগমনেন, কপ্পেন্তি ইরিযাপথং;

নেকভূমিসমাকিণ্ণ, পাসাদেসু ৰসামহং.

বুদ্ধপুত্তা তথাচ্ছন্নং, ন কদা পৰিসন্তি তে;

রুক্খমূলে সুসানস্মিং, অব্ভোকাসে রমন্তি তে.

ভাৰেত্ৰা ভৰনাসায, হেতুং ভাৰনমুত্তমং;

অহং গামে ৰসিস্সামি, পাপেন্তো জনতং সিৰং.

রমন্তি মম পুত্তা তে, পন্তসেনাসনে ককা;

তেসং মহত্তরো সন্তো, থেরোযং ৰসভো মহা;

ধুতপাপো ধুতঙ্গগ্গো, ঞাতোযং মম সাসনেতি.

এৰং ভগৰা হত্থং উক্খিপিত্ৰা চন্দমণ্ডলে পহরন্তো ৰিয থেরস্স গুণে পকাসেসি, ততো সো তস্স গুণকথং সুত্ৰা সযম্পিতং ঠানন্তরং কামযমানো যন্নূনাহং অনাগতে অঞ্ঞতরস্স সম্মাসম্বুদ্ধস্স সাসনে ধুতঙ্গধরানং অগ্গো ভৰিস্সামীতি তং ঠানন্তরং পত্থেন্তো ভগৰতো পাদমূলে নিপজ্জি, সত্থা তং কারণং উপপরিক্খিত্ৰা ইতো কপ্পসতসহস্সমত্থকে গোতমো নাম সত্থা উপ্পজ্জিস্সতি. ত্ৰং তদা ধুতঙ্গধরানং অগ্গো হুত্ৰা কস্স পোতি পঞ্ঞাযিস্সতীতি ব্যাকরণ ¶ মদাসি. ততো পট্ঠায সো সোমনস্সো পুঞ্ঞকম্মং কত্ৰা ততো চুতো দেৰমনুস্সেসু দেৰিস্সরিযং অনুভৰন্তো ৰিপস্সীসম্মাসম্বুদ্ধকালে একসাটকো নাম ব্রাহ্মণো হুত্ৰা মহাদানং অদাসি. ততো চুতো কস্সপসম্মাসম্বুদ্ধে পরিনিব্বুতে বারাণসীনগরে বারাণসীসেট্ঠি হুত্ৰা নিব্বত্তো দানাদীনি পুঞ্ঞানি কত্ৰা ততো চৰিত্ৰা সংসারে সংসরন্তো দসৰস্সসহস্সা যুকেসু মনুস্সেসু বারাণসিযং একো কুটুম্বিকো হুত্ৰা নিব্বত্তি. সো পনাযং কুটুম্বিকো অরঞ্ঞে জঙ্ঘাৰিহারং অনুৰিচরন্তো পচ্চন্তিমে জনপদে অরঞ্ঞাযতনে অঞ্ঞতরং পচ্চেকবুদ্ধং অদ্দস. সো চ পচ্চেকবুদ্ধো তত্থ চীৰরকম্মং করোন্তো অনুৰাতে অপ্পহোন্তে সংহরিত্ৰা ঠপেতুং আরদ্ধো. কুটুম্বিকো তং দিস্ৰা ভন্তে কিং করোথাতি পুচ্ছি. সো পচ্চেকবুদ্ধো অপ্পিচ্ছতায তেন পুট্ঠো ন কিঞ্চি ৰুত্তো হোতি. সো চীৰরদুস্সং নপ্পহোতীতি ঞত্ৰা অত্তনো উত্তরসাটকং পচ্চেকবুদ্ধস্স পাদমূলে ঠপেত্ৰা অগমাসি. পচ্চেকবুদ্ধো তং গহেত্ৰা অনুৰাতকং আরোপেন্তো চীৰরং কত্ৰা পারুপি. কুটুম্বিকো জীৰিতপরিযোসানে কালং কত্ৰা তাৰতিংসভৰনে নিব্বত্তিত্ৰা তত্থ যাৰতাযুকং দিব্বসম্পত্তিং অনুভৰিত্ৰা ততো চৰিত্ৰা বারাণসিতো তিযোজনমত্তকে ঠানে অঞ্ঞতরস্মিং নগরে নিব্বত্তি, তস্স মাতাপিতরো নন্দিযোতি [নন্দীতিনামং ইতিসব্বত্থ] নামং অকংসু, তস্স সত্ত ভাতরো অহেসুং, সেসা ছ ভাতরো নানাকম্মন্তেসু ব্যাৰটা মাতাপিতুন্নং পোসেন্তি. নন্দিযো পন অকম্মসীলো গেহেযেৰ ৰসতি. তস্মা তস্স সেসা কুজ্ঝন্তি. মাতাপিতরোপি নন্দিযং আমন্তেত্ৰা ওৰদন্তি. সো তুণ্হী হোতেৰ. অথাপরস্মিং সমযে গামে নক্খত্তং সঙ্ঘুট্ঠং, তদা সো মাতরং আহ. অম্ম সাটকং দেহি, নক্খত্তং কীল়িস্সামীতি, সা ধোত- ৰত্থং ¶ নীহরিত্ৰা অদাসি, অম্ম থূলং ইদন্তি, সা অঞ্ঞং নীহরিত্ৰা অদাসি, তম্পি পটিক্খিপি. অথ নং মাতা আহ. তাত যাদিসে মযং গেহে জাতা, নত্থি ইতো সুখুমতরস্স পটিলাভায পুঞ্ঞন্তি, লভনট্ঠানং গমিস্সামি অম্মাতি. পুত্ত অহং অজ্জেৰ তৰ বারাণসীনগরে রজ্জপটিলাভং ইচ্ছামীতি আহ. সো সাধু অম্মাতি মাতরং ৰন্দিত্ৰা পদক্খিণং কত্ৰা পক্কামি. মাতুযা পনস্স এৰং অহোসি. কহং সো গমিস্সতি, পুব্বেৰিয ইধৰা এত্থৰা গেহে নিসীদিত্ৰা আগচ্ছতীতি, সো পন পুঞ্ঞনিযামেন চোদিযমানো গামতো নিক্খমিত্ৰা বারাণসিং গন্ত্ৰা সেনগুত্তস্স গেহে পটিৰসতি, অথেকদিৰসং সো তস্স কম্মকারেহি সদ্ধিং সল্লপন্তো নিসীদিত্ৰা পচলাযন্তো সুপিনং অদ্দস. মুখেন অন্তং নিক্খমিত্ৰা সকলজম্বুদীপে পত্থরিত্ৰা অন্তোকুচ্ছিমেৰ পাৰিসি. পবুদ্ধো সো ভীতো মহাসদ্দমকাসি. অথ নং মহাসেনগুত্তো পুচ্ছি. নন্দিযো সুপিনং অদ্দসন্তি আহ. অথ তেন কীদিসন্তি পুট্ঠো কথেসি, ততো সেনগুত্তো তং অত্তনো কুলূপগং পরিব্বাজিকং পুচ্ছি কো তস্স ৰিপাকোতি. পরিব্বাজিকা যদি ভো ইত্থী পস্সতি. সত্তদিৰসব্ভন্তরেযেৰ অভিসেকং লভতি, যদি পুরিসো পস্সতি, তথেৰ রাজা হোতীতি কথেসি. সেনগুত্তো তস্সা তং কথং সুত্ৰা ইমং মম ঞাতিং করোমীতি অত্তনো সত্ত ধীতরে পক্কোসিত্ৰা পটিপাটিযা পুচ্ছি. নন্দিযস্স সন্তিকে ৰসথাতি, সেসা সব্বা ন ইচ্ছিংসু, ন মযং জানাম এতং অধুনাগতং কুলৰন্তং ৰা দুক্কুলৰন্তংৰাতি. অথ কণিট্ঠিকং পুচ্ছি. সা যস্স মং মাতাপিতরো দস্সন্তি. তেসং ৰচনং ন ভিন্দিস্সামীতি সম্পটিচ্ছি, অথ সেনগুত্তো নন্দিযং পক্কোসিত্ৰা অত্তনো ধীতরং দত্ৰা তস্স মহাসম্পত্তি মদাসি. ততো সত্তমে দিৰসে নন্দিযো তত্থ তত্থ আহিণ্ডন্তো রঞ্ঞো মঙ্গলুয্যানং পস্সিস্সামীতি গন্ত্ৰা ধঙ্গলসিলাপট্টেসসীসং পারুপিত্ৰা নিপজ্জি, সো চ বারাণসীরঞ্ঞো কালঙ্কতস্স সত্তমো ¶ দিৰসো হোতি. অমচ্চাচ পুরোহিতোচ রঞ্ঞো সরীরকিচ্চং কারেত্ৰা রাজঙ্গণে নিসীদিত্ৰা মন্তযিংসু. রঞ্ঞো একাৰ ধীতা অত্থি, পুত্তো পনস্স নত্থি. অরাজিকং রজ্জং ন তিট্ঠতি. ফুস্সরথং ৰিস্সজ্জেস্সামাতি. তে কুমুদপত্তৰণ্ণে চত্তারো সিন্ধৰে যোজেত্ৰা সেতচ্ছত্তপমুখংপঞ্চৰিধরাজককুধভণ্ডং রথস্মিংযেৰ ঠপেত্ৰা রথং ৰিস্সজ্জেত্ৰা পচ্ছতো তুরিযানি পগ্গণ্হাপেসুং. রথো পাচীদ্ৰারেন নিক্খমিত্ৰা উয্যানাভিমুখো অহোসি. পরিচযেন উয্যানাভিমুখো গচ্ছতি. নিৰত্তেমাতি কেচি আহংসু. পুরোহিতো মা নিৰারযিত্থাতি আহ. রথো কুমারকং পদক্খিণং কত্ৰা আরোহণসজ্জো হুত্ৰা অট্ঠাসি. পুরোহিতো পারুপণকণ্ণং অপনেত্ৰা পাদতলানি ওলোকেন্তো তিট্ঠতু অযং দীপো. দ্ৰিসহস্সদীপ পরিৰারেসু চতূসু মহাদীপেসু একরজ্জং কাতুং সমত্থোতিৰত্ৰা তস্স ধিতিং উপধারেতুং তিক্খত্তুং তুরিযানি পগ্গণ্হাপেসি. অথ কুমারো মুখং ৰিৰরিত্ৰা ওলোকেত্ৰা কেন কারণেন আগতত্থাতি আহ, দেৰ তুম্হাকং রজ্জং পাপুণাতীতি, রাজা কহন্তি, দেৰত্তং গতো সামীতি, কতি দিৰসা অতিক্কন্তাতি, অজ্জ সত্তমো দিৰসোতি. পুত্তো ৰা ধীতা ৰা নত্থীতি, ধীতা অত্থি দেৰ. পুত্তো ন ৰিজ্জতীতি, তেনহি করিস্সামি রজ্জন্তি, তে তাৰদেৰ অভিসেকমণ্ডপং কারেত্ৰা রাজধীতরং সব্বালঙ্কারেহি অলঙ্কারিত্ৰা উয্যানং নেত্ৰা কুমারস্স অভিসেকং অকংসু, অথস্স কতাভিসেকস্স সতসহস্সগ্ঘনকং ৰত্থং আনেসুং, সো কিমিদং তাতাতি আহ, নিৰাসনৰত্থং দেৰাতি, ননু তাতা থূলংতি, মনুস্সানং পরিভোগৰত্থেসু ইতো সুখুমতরং নত্থি দেৰাতি, তুম্হাকং রাজা এৰরূপং নিৰাসেসীতি, আম দেৰাতি. ন মঞ্ঞে পুঞ্ঞৰা তুম্হাকং রাজাতি ৰত্ৰা হন্দ সুৰণ্ণভিঙ্কারং আহরথ, লভিস্সাম ৰত্থন্তি, তে সুৰণ্ণভিঙ্কারং আহরিংসু, সো উট্ঠায হত্থে ধোৰিত্ৰা মুখং ৰিক্খালেত্ৰা হত্থেন উদকং আদায পুরত্থিমদিসায অব্ভুক্কিরি, ¶ তাৰদেৰ ঘনপথৰিং ভিন্দিত্ৰা সোল়সকপ্পরুক্খা উট্ঠহিংসু, পুন উদকং হত্থেন গহেত্ৰা দক্খিণং পচ্ছিমং উত্তরন্তি এৰং চতস্সোপি দিসা অব্ভুক্কিরি, সব্বদিসাসু সোল়স সোল়স হুত্ৰা চতুসট্ঠিকপ্পরুক্খা উট্ঠহিংসু, সো একং দিব্বদুস্সং নিৰাসেত্ৰা একং পারুপিত্ৰা নন্দিযরঞ্ঞো ৰিজিতে সুত্তকন্তিকা ইত্থিযো মা সুত্তং কন্তন্তূতি ভেরিং চরাপেথাতি ৰত্ৰা ছত্তং উস্সাপেত্ৰা অলঙ্কতপটিযত্তো হত্থিক্খন্ধৰরগতো নগরং পৰিসিত্ৰা পাসাদমভিরুয্হ মহাসম্পত্তিং অনুভৰি. অহো তদা পচ্চেকবুদ্ধস্স দিন্নানুৰাতকস্স ৰিপাকো. তেনাহু পোরাণা.

যথা সাসপমত্তম্হা, বীজা নিগ্রোধপাদপো;

জাযতে সতসাখড্ঢো, মহানীলম্বুদোপমো.

তথেৰ পুঞ্ঞকম্মম্হা, অণুম্হা ৰিপুলং ফলং;

হোতীতি অপ্পপুঞ্ঞন্তি, নাৰমঞ্ঞেয্য পণ্ডিতোতি.

এৰং গচ্ছন্তে কালে একদিৰসং দেৰী রঞ্ঞো সম্পত্তিং দিস্ৰা অহো তপস্সীতি কারুঞ্ঞাকারং দস্সেসি. কিমিদং দেৰীতি চ পুট্ঠা অতিমহতী তে দেৰ সম্পত্তি. অতীতমদ্ধানং কল্যাণং কতত্তা. ইদানি অনাগতস্সত্থায কুসলং করোথাতি আহ. কস্স দস্সাম. সীলৰন্তা নত্থীতি. অসুঞ্ঞো দেৰ জম্বুদীপো অরহন্তেহি, তুম্হে দানং সজ্জেথ, অহং অরহন্তে লচ্ছামীতি আহ. পুনদিৰসে রাজা মহারহং দানং সজ্জাপেসি. দেৰী সচে ইমিস্সা দিসায অরহন্তো অত্থি, ইধা গন্ত্ৰা অম্হাকং ভিক্খং গণ্হন্তূতি উত্তরহিমৰন্তাভিমুখী পুপ্ফানি উদ্ধং খিপিত্ৰা উরেন নিপজ্জি. অথ তানি পুপ্ফানি আকাসতো গন্ত্ৰা হিমৰন্তপদেসে ৰসন্তানং পদুমৰতিযা পুত্তানং পঞ্চসতানংপচ্চেকবুদ্ধানং জেট্ঠকমহাপদুমপচ্চেকবুদ্ধস্স পাদমূলে পতিংসু. তথাহি.

অহো ¶ পস্সথ ভো দানি, ৰিম্হযং পুঞ্ঞকম্মুনো;

অচেতনাপি পুপ্ফানি, দূতকিচ্চেসু ব্যাৰটা.

কত্তুকামেন লোকস্মিং, সকলং অত্তনো ৰসং;

সব্বত্থামেন কত্তব্বং, পুঞ্ঞং পঞ্ঞৰতা সদাতি.

ততো মহাপদুমপচ্চেকবুদ্ধো তং ঞত্ৰা সেসভাতরে আমন্তেসি. মারিসা নন্দিযরাজা তুম্হে নিমন্তেসি. অধিৰাসেথ তস্স নিমন্তনন্তি. তে অধিৰাসেত্ৰা তাৰদেৰ আকাসেনা গন্ত্ৰা উত্তরদ্ৰারে ওতরিংসু. মনুস্সা পঞ্চসতা দেৰ পচ্চেকবুদ্ধা আগতাতি রঞ্ঞো আরোচেসুং, রাজা সদ্ধিং দেৰিযা গন্ত্ৰা ৰন্দিত্ৰা পত্তে গহেত্ৰা পচ্চেকবুদ্ধে পাসাদং আরোপেত্ৰা তত্থ তেসং দানং দত্ৰা ভত্তকিচ্চাৰসানে রাজা সঙ্ঘত্থেরস্স দেৰী সঙ্ঘনৰকস্স চ পাদমূলে নিপজ্জিত্ৰা অয্যা পচ্চযেহি ন কিলমিস্সন্তু, মযং পুঞ্ঞেন ন হাযিস্সাম, অম্হাকং ইধ ৰাসায পটিঞ্ঞং দেথাতি পটিঞ্ঞং কারেত্ৰা উয্যানে নিৰাসট্ঠানাদযো কারেত্ৰা যাৰজীৰং পচ্চকবুদ্ধে উপট্ঠহিত্ৰা তেসু পরিনিব্বুতেসু সাধুকীল়নং কারেত্ৰা চন্দনা গরুআদীহি সরীরকিচ্চং কারেত্ৰা ধাতুযো গহেত্ৰা চেতিযং পতিট্ঠাপেত্ৰা এৰরূপানম্পি মহানুভাৰানং মহেসীনং মরণং ভৰিস্সতি, কিমঙ্গং পন মাদিসানন্তি সংৰেগজাতো জেট্ঠপুত্তং রজ্জে পতিট্ঠাপেত্ৰা সযং পব্বজং পব্বজি, দেৰীপি রঞ্ঞে পব্বজিতে অহং কিংকরিস্সামীতি পব্বজিত্ৰা দ্ৰেপি উয্যানে ৰসন্তা ঝানাভিঞ্ঞং নিব্বত্তেত্ৰা ঝানসুখেন ৰীতিনামেন্তা আযুপরিযোসানে ব্রহ্মলোকে নিব্বত্তিংসু. তে অম্হাকং ভগৰতো কালে ব্রাহ্মণকুলে নিব্বত্তিত্ৰা বুদ্ধসাসনে পব্বজিংসু, তদা নন্দিযরাজা ধুতঙ্গধরানং অগ্গো মহাকস্সপত্থেরোনাম হুত্ৰা চন্দো ৰিয সুরিযো ৰিযচ লোকে পাকটো হুত্ৰা ভগৰতি পরি- নিব্বুতে ¶ বুদ্ধসাসনং অতিৰিয সোভেতি. ভরিযাপিস্স ভদ্দকাপিল়ানী নাম অহোসীতি.

চিন্তামণিং কপ্পতরুংৰ সারন্তি.

১২. অঞ্ঞতরমনুস্সস্স ৰত্থুম্হি অযমানুপুব্বীকথা

অম্হাকং ভগৰতি পরিনিব্বুতে পাটলিপুত্তসমীপে অঞ্ঞতরস্মিং গামে অঞ্ঞতরো দুগ্গতমনুস্সো ৰসতি, সো পনেকদিৰসং অঞ্ঞতরং গামং গচ্ছন্তো দ্ৰে সাটকে নিৰাসেত্ৰা মহন্তং অটৰিংপাপুণি, তদেৰং গচ্ছন্তং দিস্ৰা এতস্স ৰত্থং গণ্হিস্সামীতি একো চোরো অনুবন্ধি, সো দূরতোৰ আগচ্ছন্তং চোরং দিস্ৰা চিন্তেসি, অহমেতস্মা পলাযিতুং ৰা তেন সদ্ধিংযুজ্ঝিতুং ৰা ন সক্কোমি, অযমাগন্ত্ৰা অৰস্সং অনিচ্ছন্তস্সাপি মে ৰত্থং গণ্হিস্সতি. মযাপিস্স নিরত্থকেন হরিতুং ন সক্কা, দানৰসেনস্স দস্সামীতি সন্নিট্ঠান মকাসি, অথ চোরো আগন্ত্ৰা ৰত্থকং পরামসি, অথ সো পুরিসো চিত্তং পসাদেত্ৰা ইমং মম ৰত্থদানং ভৰভোগসুখত্থায পচ্চযো হোতূতি ৰত্থং দত্ৰা দুচ্ছাদিতত্তা মহামগ্গং পহায অঞ্ঞেন জঙ্ঘামগ্গেন গচ্ছন্তো আসিৰিসেন দট্ঠো কালং কত্ৰা হিমৰন্তপ্পদেসে ¶ দ্ৰাদসযোজনিকে কনকৰিমানে নেকচ্ছরাসহস্সপরিৰুতো নিব্বত্তি. ৰিমানং পনস্স পরিৰারেত্ৰা তিযোজনিকে ঠানে কপ্পরুক্খা নিব্বত্তিংসু, সো মহন্তং দিব্বসম্পত্তিং দিস্ৰা সোমনস্সং পৰেদেন্তো আহ.

পরিণামিতমত্তেন, দানস্স সকসন্তকং;

দদাতি ৰিপুলং ভোগং, দিব্বমিস্সরিযং ৰরং.

দ্ৰাদসযোজনুব্বেধং, দুদ্দিক্খং চক্খুমূসনং;

কূটা গারৰরুপেতং, সব্বসোৰণ্ণযং সুভং.

মম পুঞ্ঞেন নিব্বত্তং, নেকরাগদ্ধজাকুলং,

তথেৰ পরিসুদ্ধেহি, ৰিতানেহি চ লঙ্কতং.

পাসাদপরিযন্তম্হি, দিব্বৰত্থানি লম্বরে;

ৰাতেরিতা তে সোভন্তি, অৰ্হেন্তাৰ সুধাসিনো.

পাসাদস্স সমন্তা মে, ভূমিভাগে তিযোজনে;

ইচ্ছিতিচ্ছিতদাতারো, জাতাসুং সুরপাদপা.

তত্থ নচ্চেহি গীতেহি, ৰাদেহি তুরিযেহি চ;

নে কচ্ছরাসহস্সেহি, মোদামি ভৰনে মম.

ন সম্মা দিন্নৰত্থস্স, অক্খেত্তে ফলমী দিসং;

খেত্তে সম্মা দদন্তস্স, কো ফলং ৰণ্ণযিস্সতীতি.

এৰং ৰিধম্পি কুসলং মনুজো করিত্ৰা,

পপ্পোতি দিব্বৰিভৰং মুনিৰণ্ণনীযং;

মন্ত্ৰান ভো দদথ দানৰরং সুসীলে,

সদ্ধায সুদ্ধমনসাস্স ৰিসেসভাগীতি.

অঞ্ঞতরমনুস্সস্স ৰত্থুং দুতিযং.

১৩. ৰিসমলোমকুমারস্স ৰত্থুম্হি অযমানুপুব্বীকথা

অতীতে ¶ কির ইমস্মিং জম্বুদীপে কস্সপো নাম সম্মাসম্বুদ্ধো পারমিযো পূরেত্ৰা সব্বঞ্ঞুতং পত্তো লোকস্স দুক্খাপনুদো সুখাৰহো পটিৰসতি লোকং নিব্বাণমহানগরৰরে পরিপূরেন্তো. তস্মিং সমযে অঞ্ঞতরো পুরিসো সত্থু ধম্মদেসনং সুত্ৰা পসন্নো ভিক্খুসঙ্ঘস্স দানং দেন্তো সীলং রক্খন্তো উপোসথকম্মং করোন্তো নানাৰিধানি পুঞ্ঞকম্মানি কত্ৰা সুত্তপ্পবুদ্ধোৰিয গন্ত্ৰা দেৰলোকে নিব্বত্তি সব্বরতনমযে দিব্বৰিধানে দেৰচ্ছরাসহস্সপরিৰুতো. তত্থ যাৰতাযুকং ঠত্ৰা ততো চুতো অম্হাকং ভগৰতি পরিনিব্বুতে জম্বুদীপে পাটলিপুত্তনগরে আণাচক্কৰত্তিধম্মাসোকমহানরিন্দস্স অগ্গমহেসিযা কুচ্ছিম্হি নিব্বত্তি. তস্স নামং করোন্তো সীসে লোমং ৰিসমং হুত্ৰা জাতত্থা ৰিসমলোমকুমারোতি সঞ্জানিংসু. সো কমেন ৰিঞ্ঞুতং পত্তো বলসম্পন্নো অহোসি. মহাথামো অভিরূপোচ অহোসি. দস্সনীযো পাসাদিকো যসপরিৰারসম্পন্নো পটিৰসতি. ততো অপরেন সমযেন ধম্মাসোকমহানরিন্দো চতুরাসীতিসহস্সরাজপরিৰুতো অনন্তবলৰাহনো কী ল়া প রো হিমৰন্তং গন্ত্ৰা যথাভিরন্তং কীল়িত্ৰা আগচ্ছন্তো চন্দভাগং নাম গঙ্গং সম্পাপুণি. সা পন যোজনৰিত্থতা তিগাৰুতগম্ভীরা অহোসি. তদা সা অধুনাগতেহি ওঘেহি মহাফেণসমাকুলা বহূমিযো উভোকূলে উত্তরন্তী মহাৰেগা [মহাৰেগাগচ্ছন্তী ইতিসব্বত্থ] গচ্ছন্তি. তদা রাজা গঙ্গং দিস্ৰা কো নামেত্থ পুরিসো এৰংৰিধং মহাগঙ্গং তরিতুং সমত্থো ভৰিস্সতীতি আহ. তং সুত্ৰা ৰিসমলোম কুমারো আগন্ত্ৰা ৰন্দিত্ৰা অহং দেৰ গঙ্গং তরিত্ৰা গন্তুঞ্চ আগন্তুঞ্চ সক্কোমীতি আহ. রাজা সাধূতি সম্পটিচ্ছি. অথ কুমারো গাল়্হং নিৰাসেত্ৰা মকরদন্তিযা ¶ কেসে বন্ধিত্ৰা গঙ্গাকূলে ঠিতো অট্ঠারসহত্থং অব্ভুগ্গন্ত্ৰা উসভমত্তট্ঠানে পতিত্ৰা তরিতু মারভি. ততো চণ্ডসোতং ছিন্দিত্ৰা তরন্তো গমনা গমনকালে গণ্হনত্থায আগতে চণ্ডসুংসুমারে পাণিনা পহরিত্ৰা চুণ্ণৰিচুণ্ণং করোন্তো ৰীসসতং মারেত্ৰা উত্তারেত্ৰা তলমুগ্গম্ম রাজানং ৰন্দিত্ৰা অট্ঠাসি. রাজা তং কারণং দিস্ৰা ভযপ্পত্তো এসো খো মং মারেত্ৰা রজ্জম্পি গহিতুং সমত্থো. এতং মারেতুং ৰট্টতীতি চিন্তেত্ৰা নগরং সম্পত্তো কুমারং পক্কোসাপেত্ৰা অমচ্চে আহ. ইমং ভণে বন্ধনাগারে করোথাতি. তে তথা করিংসু, অথস্স বন্ধনাগারে ৰসন্তস্স চত্তারো মাসা অতিক্কন্তা. ততো রাজা চতুমাসচ্চযেন দীঘতো সট্ঠিহত্থপ্পমাণে সট্ঠিৰেল়ুকলাপে আহরাপেত্ৰা গণ্ঠিযো সোধাপেত্ৰা অন্তো অযোসারং পূরেত্ৰা রাজঙ্গণে ঠপাপেত্ৰা ৰিসমলোমকুমারং বন্ধনাগারতো আহারাপেত্ৰা [আণাপেত্ৰা ইতিসব্বত্থ] অমচ্চে এৰমাহ. ভণে স্ৰাযং কুমারো ইমিনা খগ্গেন ইমে ৰেল়ুকলাপে চতুরঙ্গুলং কত্ৰা ছিন্দতু. নো চে ছিন্দিতুং সক্কোতি. তং মারেথাতি আহ, তং সুত্ৰা কুমারো অহং বন্ধনাগারে চি র ৰু ত্থো জিঘচ্ছাপীল়িতো আহারেন কিলমিং, যন্নূনাহং আহারং ভুঞ্চিত্ৰা ছিন্দেয্যন্তি. তে নত্থি দানি তুয্হং আহারন্তি আহংসু. তেনহি পোক্খরণিযা পানীযং পিৰিস্সামীতি আহ. তে সাধূতি পোক্খরণিং নেসুং. কুমারো পোক্খরণিং ওতরিত্ৰা নহাযিত্ৰা নিমুগ্গো যাৰদত্থং কললং ভুঞ্চিত্ৰা পানীযং পিৰিত্ৰা উট্ঠায অসিপত্তং গহেত্ৰা মহাজনানং [মহাজনানংপস্সন্তমেৰ ইতিসব্বত্থ] পস্সন্তানমেৰ অট্ঠাসীতিহত্থট্ঠানং আকাসং উল্লঙ্ঘিত্ৰা সব্বৰেল়ুকলাপে চতুরঙ্গুলমত্তেন খণ্ডাখণ্ডং কুরুমানো ওতরিত্ৰা মূলে থূলঅযসলাকং পত্ৰা কিণীতি সদ্দং সুত্ৰা অসিপত্তং ৰিস্সজ্জেত্ৰা রোদমানো অট্ঠাসি. ততো রাজপুরিসেহি কিমত্তং রোদসীতি ৰুত্তে ¶ এত্তকানং পুরিসানমন্তরে ময্হং একোপি সুহদো নত্তি. সচে ভৰেয্য, ইমেসং ৰেল়ুকলাপানমন্তরে অযো সারং অত্থিভাৰং কথেয্য, অহং পন জানমানো ইমে ৰেল়ু কলাপে অঙ্গুলঙ্গুলেসু ছিন্দেয্যন্তি আহ. ততো রাজা কুমারেন কতকম্মং ওলোকেত্ৰা পসন্নো উপরাজট্ঠানং বহুঞ্চ ৰিভৰং দাপেসি, এৰমস্স বলসম্পত্তিলাভো নাম ন জাতিগোত্তকুলপদেসাদীনং বলং. ন পাণাতিপাতাদিদুচ্চরিতানং বলং. কস্সেতং বলন্তি. কস্সপসম্মাসম্বুদ্ধকালে ভিক্খুসঙ্ঘস্স দিন্নদানাদিসুচরিতকম্মৰিপাকং. তেন ৰুত্তং.

কস্সপস্স মুনিন্দস্স, কালে অঞ্ঞতরো নরো;

সম্বুদ্ধমুপসংকম্ম, সুত্ৰা ধম্মং সুদেসিতং.

পটিলদ্ধসদ্ধো হুত্ৰা, সীলৰন্তান ভিক্খুনং;

মধুরন্নপানে পচুরে, অদাসি সুমনো তদা.

অদাসি চীৰরে পত্তে, তথেৰ কাযবন্ধনে;

অদা খীরসলাকঞ্চ, বহূ কত্তরযট্ঠিযো.

অদা সুপস্সযং দানং, মঞ্চপীঠাদিকং তথা;

পাৰার কম্বলাদীনি, অদা সীতনিৰারণে.

অদা ভেসজ্জদানানি, আরোগ্যত্থায ভিক্খুনং;

এৰং নানাৰিধং পুঞ্ঞং, কত্ৰান তিদিৰং গতো.

তত্থ দিব্বৰিমানম্হি, উপ্পন্নো সো মহিদ্ধিকো;

দেৰচ্ছরাপরিৰুতো, দেৰসেনাপুরক্খতো.

দিব্বেহি নচ্চগীতেহি, দিব্বৰাদিততন্তিহি;

মোদমানো অনেকেহি, দিব্বসম্পত্তিযা সহ.

যাৰতাযুং তহিং ঠত্ৰা, জম্বুদীপে মনোরমে;

পুরে পাটলিপুত্তম্হি, ধম্মাসোকস্স রাজিনো.

পুত্তো ¶ হুত্ৰান নিব্বত্তি, মহাথামো মহাবলো;

মহাযসো মহাভোগো, আসি বুদ্ধাদিমামকো.

কাতব্বং কুসলং তস্মা, ভৰসম্পত্তি মিচ্ছতা;

পালেতব্ব মথো সীলং, ভাৰেতব্বঞ্চ ভাৰনন্তি.

ততো কুমারো উপরাজট্ঠানং লভিত্ৰা সম্পত্তিংঅনুভৰমানো মোগ্গলিপুত্ততিস্সত্থেরমাদিং কত্ৰা মহাভিক্খুসঙ্ঘস্স চীৰরপিণ্ডপাতসেনাসনগিলানপচ্চযদানা দিৰসেন সক্কারং কত্ৰা সীলং রক্খিত্ৰা উপোসথকম্মং কত্ৰা আযুপরিযোসানে যথাকম্মং গতোতি.

এৰংৰিধং সুচরিতং সুমনো করিত্ৰা,

তুম্হেপি ভো সুচরিতং ৰিভৰানুরূপং,

কত্ৰান নিব্বুতিপদং করগং করোথাতি.

ৰিসমলোমকুমারস্স ৰত্থুং ততিযং.

১৪. কঞ্চনদেৰিযা ৰত্থুম্হি অযমানুপুব্বীকথা

জম্বুদীপে কির দেৰপুত্তনগরং নাম দস্সনীযং একং নগরং অহোসি. তস্মিং সমযে মনুস্সা যেভুয্যেন পত্তমহং নাম পূজং করোন্তি, ভগৰতা পরিভুত্তপত্তং গহেত্ৰা কতানেকপূজাৰিধানা উস্সৰং করোন্তি. তং পত্তমহন্তি ৰুচ্চতি. তস্মিং সমযে দেৰপুত্তনগরে রাজা সব্বরতনমযং রথং সব্বালঙ্কারেহি অলঙ্কারাপেত্ৰা কুমুদপত্তৰণ্ণে চত্তারো সিন্ধৰে যোজেত্ৰা সুসিক্খিতসিপ্পাচরিযেহি সত্তরতনপরিনিট্ঠিতে অসীতিহত্থৰেল়গ্গে সত্থুনা পরিভুত্তং সেলমযপত্তং মুত্তাজালাদীহি অলঙ্করিত্ৰা ৰেল়গ্গং আরোপেত্ৰা ৰেল়ুং ¶ রথে ঠপাপেত্ৰা নগরং দেৰনগরং ৰিয অলঙ্করিত্ৰা ধজপতাকাদযো উস্সাপেত্ৰা তোরণগ্ঘ কপন্তিযোচ পুণ্ণঘটদীপমালাদযোচ পতিট্ঠাপেত্ৰা অনেকেহি পূজাৰিধানেহি নগরং পদক্খিণং কারেত্ৰা নগরমজ্ঝে সুসজ্জিতরতনমণ্ডপে পত্তধাতুং ঠপেত্ৰা সত্তমে দিৰসে মহাধম্মসৰণং কারাপেসি. তদা তস্মিং জনপদে বহূ মনুস্সাচ দেৰতাচ যক্খরক্খসনাগসুপণ্ণাদযোচ মনুস্সৰেসেন যেভুয্যেন তং সমাগমং ওতরন্তি, এৰমচ্ছরিযং তং পূজাৰিধানং অহোসি.

তদা একো নাগরাজা উত্তমরূপধরং অগতপুব্বপুরিসং একং কুমারিকং ধম্মপরিসন্তরে নিসিন্নং দিস্ৰা তস্সা পটিবদ্ধচিত্তো অনেকাকারেহি তং যা চি ত্ৰা তস্সা অলদ্ধমানো কুজ্ঝিত্ৰা নাসাৰাতং ৰিস্সজ্জেসি ইমং মারেস্সামীতি. তং তস্সা সদ্ধাবলেন কিঞ্চি উপদ্দৰং কাতুং সমত্থো নাহোসি. অথস্সা নাগো পাদতো পট্ঠায যাৰসকলসরীরং ভোগেন ৰেঠেত্ৰা সীসে ফণং কত্ৰা ভাযাপেন্তো অট্ঠাসি. অনঞ্ঞৰিহিতায তায ধম্মসৰণবলেন অণুমত্তম্পি দুক্খং নাহোসি. পভাতায রত্তিযা তং দিস্ৰা মনুস্সা কিমেতন্তি কারণং পুচ্ছিংসু, সাপি তেসং কথেত্ৰা এৰং সচ্চকিরিযমকাসি. তথাহি.

ব্রহ্মচারী অহোসাহং, সঞ্জাতা ইধ মানুসে;

তেন সচ্চেন মং নাগো, খিপ্পমেৰ পমুঞ্চতু.

কামাতুরস্স নাগস্স, নোকাসমকরিংযতো;

তেন সচ্চেন মং নাগো, খিপ্পমেৰ মুঞ্চতু.

ৰিসৰাতেন খিত্তস্স, কুপিতস্সোরগস্সহং;

অকুদ্ধা তেন সচ্চেন, সো মং খিপ্পং পমুঞ্চতু.

সদ্ধম্মং সুণমানাহং, গরুগারৰভত্তিযা;

অস্সোসিং তেন সচ্চেন, খিপ্পং নাগো পমুঞ্চতু.

অক্খরংৰা ¶ পদংৰাপি, অৰিনাসেত্ৰাৰ আদিতো;

অস্সোসিং তেন সচ্চেন, খিপ্পং নাগো পমুঞ্চতূতি.

সচ্চকিরিযাৰসানে নাগরাজা তস্সা অতীৰ পসন্নো ভোগং ৰিনিৰেঠেত্ৰা ফণসতং মাপেত্ৰা তং ফণগব্ভে নিসীদাপেত্ৰা বহূহি নাগমানৰকেহি সদ্ধিং উদকপূজং নাম পূজ মকাসি, তং দিস্ৰা বহূ নগরৰাসিনো অচ্ছরিযব্ভুতজাতা অট্ঠারসকোটিধনেন পূজ মকংসু. তথাহি.

নত্থি সদ্ধাসমো লোকে, সুহদো সব্বকামদো;

পস্সথস্সা বলং সদ্ধা, পূজেন্তেৰং নরো রগা.

ইধ লোকেৰ সালত্থ, ভৰভোগ মনপ্পকং;

তস্মা সদ্ধেন কাতব্বং, রতনত্তযগারৰন্তি.

অথেৰং সা পটিলদ্ধমহাৰিভৰা যাৰজীৰং কোমারিয ব্রহ্মচারিণী হুত্ৰা আযুপরিযোসানে কালং কত্ৰা তস্মিংযেৰ নগরে রঞ্ঞো অগ্গমহেসিযা কুচ্ছিম্হি পটিসন্ধিং গণ্হিত্ৰা দসমাসচ্চযেন মাতুকুচ্ছিতো নিক্খমি. নিক্খন্তদিৰসে পনস্সা সকলদেৰপুত্তনগরে রতনৰস্সং ৰস্সি. তেনস্সা কঞ্জনদেৰীতি নামং করিংসু. সমন্তপাসাদিকা অহোসি. অভিরূপা দেৰচ্ছরপটিভাগা. মুখতো উপ্পলগন্ধো ৰাযতি. সরীরতো চন্দনগন্ধো ৰাযতি. সকলসরীরতো বালসুরিযো ৰিয রংসিযো নিচ্ছারেন্তী চতুরতনগব্ভে পদীপকিচ্চং নাম নত্থি. সব্বো গব্ভো সরীরা লোকেন একো ভাসো হোতি, তস্সা রূপসম্পত্তি সকলজম্বুদীপে পাকটা অহোসি. ততো সকলজম্বুদীপৰাসী রাজানো তস্সা অত্থায পিতুরঞ্ঞো পণ্ণাকারানি পহিণিংসু. সা পন পঞ্চকামে অননুলিত্তা পিতরং অনুজানাপেত্ৰা ভিক্খুনূ পস্সযং গন্ত্ৰা পব্বজিত্ৰা ৰিপস্সনং ৰড্ঢেত্ৰা সহ পটিসম্ভিদাহি অরহত্তং পাপুণীতি.

সুত্ৰান ¶ সাদরৰসেন কুমারিকেৰং;

ধম্মঞ্হি সীলমমলং পরিপালযন্তী;

মা ভো পমজ্জথ সদা কুসলপ্পযোগেতি.

১৫. ব্যগ্ঘস্স ৰত্থুম্হি অযমানুপুব্বীকথা

জম্বুদীপে চূলরট্ঠা সন্নে বারাণসীনগরে একং পংসুপব্বতং ৰিনিৰিজ্ঝিত্ৰা মহামগ্গো হোতি, তত্থ ৰেমজ্ঝে একো ব্যগ্ঘো অত্তনো অন্ধপিতরং পব্বতগুহাযং কত্ৰা পোসেন্তো ৰসতি. তস্সেৰ পব্বতস্স ৰনদ্ৰারে তুণ্ডিলো নাম একো সুৰপোতকো রুক্খস্মিং ৰসতি. তে উভোপি অঞ্ঞমঞ্ঞং পিযসহাযা অহেসুং, তস্মিং সমযে পচ্চন্তগামৰাসী একো মনুস্সো অত্তনো মাতুগামেন সদ্ধিং কলহং কত্ৰা বারাণসিং গচ্ছন্তো তং ৰনদ্ৰারং সম্পাপুণি. অথ সুৰপোতকো পরিহীনত্তভাৰং দুক্খিতং তং দিস্ৰা কম্পমানহদযো তং পক্কোসিত্ৰা ভো কুহিং গচ্ছসীতি আহ, তেন পরখণ্ডং গচ্ছামীতি ৰুত্তে তুণ্ডিলো ভো ইমস্মিং ৰনখণ্ডমজ্ঝে একো ব্যগ্ঘো ৰসতি. কক্খলো ফরুসো সম্পত্তসম্পত্তে মারেত্ৰা খাদতি. মা ত্ৰং তেন গচ্ছাতি আহ. স্ৰাযং দুব্ভগো মনুস্সো হিতকামস্স তস্স ৰচনং অনাদিযিত্ৰা গচ্ছামেৰাতি আহ. তুণ্ডিলো তেনহি সম্ম যদি অনিৰত্তমানো গচ্ছসি. এসো ব্যগ্ঘো মম সহাযো. মে ৰচনং তৰ সন্তিকা সুত্ৰা ন গণ্হাতীতি. তস্স তং অনাদিযন্তো সো সুৰরাজে পদুট্ঠচিত্তো মুগ্গরেন পহরিত্ৰা মারেত্ৰা অরণিং অগ্গিং কত্ৰা মংসং খাদি. অসপ্পুরিসসংসগ্গো নামে স ইধ লোকপরলোকেসু দুক্খাৰহোযেৰ. তথাহি.

মযা ¶ কতং ময্হমিদং, ইতি ৰেস্সানরং নরো;

সমালিঙ্গতি সপ্পেমো, দহতেৰস্স ৰিগ্গহং.

মধুখীরাদিদানেন, পেমসা পরিপালিতো;

সোরগো কুপিতোৰস্স, ডসতেৰস্স ৰিগ্গহং.

এৰং নিহীনজচ্চেন, পাপেন অকতঞ্ঞুনা;

নরা ধমেন দীনেন, কতোপি খণসঙ্গমো.

অসাধুকো অযংতেৰং, জানমানেন জন্তুনা;

মুহুত্তম্পি ন কাতব্বো, সঙ্গমো সো অনত্থদোতি.

ততো সো অসপ্পুরিসো মংসং খাদিত্ৰা গচ্ছন্তো ৰনখণ্ডমজ্ঝং সম্পাপুণি. অথ ব্যগ্ঘো তং দিস্ৰা মহানাদং করোন্তো গহণত্থায উট্ঠাসি. সো ব্যগ্ঘং দিস্ৰা ভযপ্পত্তো তুণ্ডিলস্স ৰচনং সরিত্ৰা অহং ভো তৰ সহাযতুণ্ডিলস্স সন্তিকা আগতোম্হীতি আহ, তং সুত্ৰা ব্যগ্ঘো অত্তমনো এহি সম্মাতি তং পক্কোসিত্ৰা অত্তনো ৰসনট্ঠানং নেত্ৰা খাদিতব্বাহারেন তং সন্তপ্পেত্ৰা পিতুসন্তিকে নিসীদাপেত্ৰা পুন ৰনখণ্ড মগমাসি. অথস্স পিতা পুত্তস্স গতকালে তেন সদ্ধিং সল্লপন্তো তস্স ৰচনানুসারেন তুণ্ডিলং মারেত্ৰা খাদিতভাৰং অঞ্ঞাসি. ততো সো পুত্তস্স আগতকালে তৰ সহাযো তেন মারিতোতি আহ. তং সুত্ৰা ব্যগ্ঘো অনত্তমনো ৰেগেন তস্স ৰসনট্ঠানং গন্ত্ৰা সম্ম তুণ্ডিলাতি সদ্দং কত্ৰা অপস্সন্তো লুঞ্চিতপত্তংচস্স দিস্ৰা নিস্সংসযং তেন মারিতো মে সহাযোতি সোচন্তো পরিদেৰন্তো আগঞ্ছি. অথ সো অসপ্পুরিসো তস্মিং তত্থ গতে তস্স পিতরং পাসাণেন পহরিত্ৰা মারেত্ৰা ব্যগ্ঘংচ দানি মারেস্সামীতি ব্যগ্ঘাগমনমগ্গং ওলোকেন্তো নিলীনো অট্ঠাসি. তস্মিং খণে ব্যগ্ঘোপি আগঞ্ছি. সো তস্সা গতকালে তস্স তেজেন ভীতো গন্ত্ৰা ¶ জীৰিতং মে সামি দেহীতি পাদমূলে উরেন নিপজ্জি, ব্যগ্ঘো পন তেন কতকম্মং দিস্ৰা তস্মিং চিত্তং নিব্বাপেত্ৰা মম সহাযস্স সাসনমাদাযাগতস্স দুব্ভিতুং ন যুত্তন্তি চিন্তেন্তো তং সমস্সাসেত্ৰা গচ্ছ সম্মাতি সুখং পেসেসি. এৰঞ্হি সপ্পুরিসসমাগমো নাম ইধ লোকপরলোকেসু সুখাৰহোযেৰ, ৰুত্তংহি.

সব্ভিরেৰ সমাসেথ, সব্ভি কুব্বেথ সন্থৰং;

সব্বত্থ সন্থৰো তেন, সেয্যো হোতি ন পাপিযো.

সুখাৰহো দুক্খনুদো, সদা সব্ভি সমাগমো;

তস্মা সপ্পুরিসেহেৰ, সঙ্গমো হোতু জন্তুনং.

ততো সো ব্যগ্ঘো তেন মেত্তচিত্তানুভাৰেন কালং কত্ৰা সগ্গে নিব্বত্তোতি.

ব্যগ্ঘো দযাযুপগতো সুগতিং সুমেধো;

তং ৰো দদাতি ৰিভৰঞ্চ ভৰেসু ভোগন্তি.

১৬. ফলকখণ্ডদিন্নস্স ৰত্থুম্হি অযমানুপুব্বীকথা

সাৰত্থিযং কিরেকো মনুস্সো উত্তরাপথং গচ্ছামীতি অদ্ধানমগ্গপটিপন্নো গিম্হানমাসে মজ্ঝণ্হে বহলাতপেন কিলন্তো হুত্ৰা রুক্খচ্ছাযং পৰিসিত্ৰা তম্বুলং খাদন্তো ফলকে নিসীদি. অথ উত্তরাপথেনাগচ্ছান্তো একো তথেৰ আতপেন কিলন্তো আগন্ত্ৰা পুরিমস্স সন্তিকে নিসীদিত্ৰা ভো পানীযং অত্থীতি পুচ্ছি. ইতরো পানীযং নত্থীতি আহ. অথস্স ¶ সো ময্হম্পি ভো তম্বুলং দেহি পিপাসিতোম্হিতি ৰত্ৰাপি ন লভি. চতুকহাপণেন একং তম্বুলপণ্ণং কিণিত্ৰা লদ্ধো তত্থেৰ নিসীদিত্ৰা খাদিত্ৰা পিপাসং ৰিনোদেত্ৰা তেন উপকারেন তস্স সিনেহং কত্ৰা অত্তনো গমনট্ঠান মগমাসি, অথা পরভাগে সো পট্টনং গন্ত্ৰা নাৰায ৰণিজ্জত্থায গচ্ছন্তো সমুদ্দমজ্ঝং পাপুণি. ততো সত্তমে দিৰসে নাৰা ভিজ্জি. মনুস্সা মচ্ছকচ্ছপানং ভক্খা জাতা. সো এৰ পুরিসো অরোগো হুত্ৰা একং ফলকখণ্ডং উরে কত্ৰা সমুদ্দং তরতি. অথে তরোপি তথেৰ নাৰায ভিন্নায সেসো হুত্ৰা সমুদ্দং তরন্তো পুরিমেন সমাগমি. অথ তে সত্তদিৰসং সমুদ্দে তরন্তা অঞ্ঞমঞ্ঞং সঞ্জানিংসু. তেসু কহাপণে দত্ৰা তম্বুলং গহিতো একং ফলকখণ্ডং উরে কত্ৰা তরতি. ইতরস্সেতং নত্থি. অথ সো কহাপণে গহেত্ৰা দিন্নতম্বুলমত্তস্সো পকারং সরিত্ৰা অত্তনো ফলকখণ্ডং তস্স অদাসি. সো তস্মিং সযিত্ৰা তরন্তো তং পহায অগমাসি, অপরো অনাধারকেন তরন্তো ওস্সট্ঠৰিরিযো উদকে ওসীদিতুমারতি. তস্মিং খণে সমুদ্দে অধিৰত্থা মণিমেখলা নাম দেৰধীতা ওসীদন্তং তং দিস্ৰা সপ্পুরিসোতি তস্স গুণানুস্সরন্তী ৰেগেনা গন্ত্ৰা তং অত্তনো আনুভাৰেন সমুদ্দতীরং পাপেসি. ইতরংপি সা এতস্সেৰ গুণানুভাৰেন তীরং পাপেসি. অথ ফলকেনোতিণ্ণপুরিসো তং দিস্ৰা ৰিম্হিতো কথং পুরতো অহোসি সম্মাতি পুচ্ছি. সো ন জানামি. অপিচ খো সুখেনেৰ তীরং পত্তোস্মীতি আহ. অথ দেৰধীতা দিস্সমানকসরীরেনেৰ অত্তনা আনীতভাৰং আরোচেন্তী আহ.

যো মাতরং পিতরংৰা, ধম্মেন ইধ পোসতি;

রক্খন্তি তং সদা দেৰা, সমুদ্দে ৰা থলেপি ৰা.

যো চে বুদ্ধঞ্চ ধম্মঞ্চ, সংঘঞ্চ সরণং গতো;

রক্খন্তি তং সদা দেৰা, সমুদ্দে ৰা থলেপি ৰা.

পঞ্চৰিধং ¶ অট্ঠৰিধং, পাতিমোক্খঞ্চ সংৰরং;

পালেতি যো তং পালেন্তি, দেৰা সব্বত্থ সব্বদা.

কাযেন ৰাচা মনসা, সুচরিত্তং চরতী ধ যো;

পালেন্তি তং সদা দেৰা, সমুদ্দে ৰা থলেপি ৰা.

যো সপ্পুরিসধম্মেসু, ঠিতো ধ কতৰেদিকো;

পালেন্তি তং সদা দেৰা, সমুদ্দে ৰা থলেপি ৰা.

নেৰ দানং অদাসাহং, ন সীলং পরিপালযিং;

কেন মে পুঞ্ঞকম্মেন, মমং রক্খন্তি দেৰতা;

পুচ্ছামি সংসযং তুয্হং, তং মে অক্খাহি দেৰতেতি.

অগাধা পারগে ভীমে, সাগরে দুরিতা করে;

ভিন্ননাৰো তরন্তো ত্ৰং, হদযে কত্ৰা কলিঙ্গরং.

ঠত্ৰা সপ্পুরিসে ধম্মে, অত্তান মনৰেক্খিয;

খণসন্থৰস্স পুরিসস্স, অদাসি ফলকং সকং.

তং তুয্হং মিত্তধম্মঞ্চ, দানঞ্চ ফলকস্স তে;

পতিট্ঠাসি সমুদ্দস্মিং, এৰং জানাহি মারিসাতি.

এৰঞ্চ ৰত্ৰা সা তে দিব্বাহারেন সন্তপ্পেত্ৰা দিব্বৰত্থালঙ্কারেহি অলঙ্করিত্ৰা অত্তনো আনুভাৰেন সাৰত্থিনগরেযেৰ তে পতিট্ঠাপেসি. ততো পট্ঠায তমেৰ আরম্মণং কত্ৰা তে দানং দদন্তা সীলং রক্খন্তা উপোসথকম্মং করোন্তা আযুপরিযোসানে সগ্গপরাযণা অহেসুং.

এৰং পরিত্তকুসলেনপি সাগরস্মিং,

সত্তা লভন্তি সরণং খলু দেৰতাহি;

তুম্হেপি সপ্পুরিসতং ন ৰিনাসযন্তা,

মা ভো পমজ্জথ সদা কুসলপ্পযোগেতি.

ফলকখণ্ডদিন্নস্স ৰত্থুং ছট্ঠমং.

১৭. চোরসহাযস্স ৰত্থুম্হি অযমানুপুব্বীকথা

অম্হাকং ¶ ভগৰতি পরিনিব্বুতে জম্বুদীপে দেৰদহনগরে একো মনুস্সো দুক্খিতো তত্থ তত্থ ৰিচরন্তো পচ্চন্তে অঞ্ঞতরং গামং গন্ত্ৰা তত্থ একস্মিং কুলগেহে নিৰাসং কপ্পেসি. তত্থ মনুস্সা তস্স যাগুভত্তং দত্ৰা পোসেসুং, ততো সো তত্থ মনুস্সেহি মিত্তসন্থৰং কত্ৰা কতিপাহং তত্থ ৰসিত্ৰা অঞ্ঞট্ঠানং গন্ত্ৰা অপরভাগে চোরকম্মং করোন্তো জীৰিকং কপ্পেতি. অথেকদিৰসং চোরেন্তং তং রাজপুরিসা গহেত্ৰা রঞ্ঞো দস্সেসুং. রাজা তং বন্ধনাগারে করোথাতি আণাপেসি, তে তং বন্ধনাগারং নেত্ৰা সঙ্খলিকাহি বন্ধিত্ৰা আরক্খকানং পটিপাদেত্ৰা অগমংসু, বন্ধনাগারে ৰসন্তস্স তস্স দ্ৰাদসসংৰচ্ছরানি অতিক্কন্তানি. ততো অপরভাগে তস্স পুব্বসহাযো পচ্চন্তগামৰাসী মনুস্সো কেনচি কম্মেন দেৰদহ মাগতো তত্থ তত্থ আহিণ্ডন্তো বন্ধনাগারে বদ্ধং তং অদ্দস. দিস্ৰা তস্স হদযং কম্পি, সো রোদিত্ৰা পরিদেৰিত্ৰা কিং তে মযা কত্তব্বং সম্মাতি পুচ্ছি. ততো তেন সম্ম বন্ধনাগারে ৰসন্তস্স মে ইদানি দ্ৰাদসসংৰচ্ছরানি অতিক্কন্তানি, এত্তকং কালং দুব্ভোজনাদিনা মহাদুক্খং অনুভোমি. যাৰাহং আহারং পরিযেসিত্ৰা ভুঞ্জিত্ৰা আগমিস্সামি. তাৰ মং ইতো মুঞ্চনুপাযং জানাহীতি ৰুত্তে সো সপ্পুরিসো.

রূপেন কিন্তু গুণসীলৰিৰজ্জিতেন,

মিচ্ছালযস্স কিতৰস্স ধিযা কিমত্থং;

মিত্তেন কিং ব্যসনকালপরম্মুখেনাতি.

এৰঞ্চ পন ৰত্ৰা সাধু সম্ম করোমি তে ৰচনন্তি আরক্খকানং সন্তিকং গন্ত্ৰা ভোন্তো যাৰেসো ভত্তং ভুঞ্জিত্ৰা আগচ্ছতি. তাৰাহং তস্স পাটিভোগো ভৰিস্সামি. ৰিস্সজ্জেথ ¶ নন্তি আহ, তেহি ন সক্কা ভো এতং ৰিস্সজ্জেতুং, অপি চ খো যাৰাযং আগচ্ছতি. তাৰ ত্ৰং অযসঙ্খলিকায বদ্ধো নিসীদিস্সসি, এৰং তং ৰিস্সজ্জেস্সাম, নো চে ন সক্কাতি আহংসু, সো এৰম্পি হোতু সম্মাতি ৰত্ৰা তস্স পাদতো সঙ্খলিকং মুঞ্চিত্ৰা অত্তনো পাদে কত্ৰা বন্ধনাগারং পৰিসিত্ৰা ইতরং মুঞ্চাপেসি. সোপি অসপ্পুরিসো বন্ধনা মুত্তো ন পুন তং ঠান মগমাসি, অহো অকতঞ্ঞুনো পকতিং ঞাতুং ভারিযং. যথাহ.

ৰারিপূরে যথা সোব্ভে, নেৰন্তো ৰিসমং সমং;

পঞ্ঞাযতেৰংসাধুস্স, ভাৰং মনসি সম্ভৰং.

ভাসন্তি মুখতো একং, চিন্তেন্তি মনসা পরং;

কাযেনেকং করোন্তেৰং, পকতাযমসাধুনং.

তেসং যো ভাৰমঞ্ঞাসি, সোৰ পণ্ডিতজাতিকো;

বহুস্সুতোপি সোযেৰ, পরচিত্তৰিদূপি সো.

অথস্স বন্ধনাগারে ৰসন্তস্স দ্ৰাদসসংৰচ্ছরানি অতিক্কন্তানি. এত্তকং কালং জিঘচ্ছাপীল়িতেন তেন আহারত্তায পরো ন যাচিতপুব্বো, অনুচ্ছিট্ঠাহারং লভনদিৰসতো অলভনদিৰসাযেৰ বহুতরা হোন্তি, অথ দ্ৰাদসসংৰচ্ছরাতিক্কমে রঞ্ঞো পুত্তো নিব্বত্তি. তদা রাজা অত্তনো ৰিজিতে সব্ববন্ধনাগারানি ৰিৰরাপেসি. অন্তমসো মিগপক্খিনোপি বন্ধনা মুঞ্চাপেসি. দ্ৰারে ৰিৰটমত্তেযেৰ বন্ধনাগারে মনুস্সা ইচ্ছিতিচ্ছিতট্ঠানং অগমংসু. সো পনেকোৰ তেহি সদ্ধিং অগন্ত্ৰা ওহীযি. আরক্খকেহি ত্ৰং ভো কস্মা ন গচ্ছসীতি ৰুত্তে অহং ভো পঞ্ঞাতভাৰেন ইদানি ন গমিস্সামি. অতীৰ পরিহীনগত্তোস্মি. অন্ধকারে গমিস্সামীতি ৰত্ৰা অন্ধকারে আগতে নিক্খম্ম অন্তোনগরে ৰিস্সাসিকানং অভাৰেন কুতো আহারং লভিস্সামীতি চিন্তেন্তো নিক্খম্ম রত্তন্ধকারে আমকসুসান ¶ মগমাসি. এত্থাহারং লভিস্সামীতি. তত্থ সো অধুনা নিক্খিত্তমতমনুস্সং দিস্ৰা মনুস্সট্ঠিনা মংসং ছিন্দিত্ৰা সীসকপালে পক্খিপিত্ৰা তীহি মনুস্সসীসেহি কতউদ্ধনে ঠপেত্ৰা চিতকতো ওমুক্কঅলাতেহি অগ্গিং কত্ৰা সুসানং নিব্বাপনত্থাযা ভতউদকেন মনুস্সট্ঠিনা আলোলেন্তো মংসং পচিত্ৰা ওতারেত্ৰা সাখাভঙ্গেন হিরিকোপীণং পটিচ্ছাদেত্ৰা নিৰত্থপিলোকিকং ৰাতাৰরণং কত্ৰানিসীদি. তস্মিং খণে তত্থ পিপ্পলীরুক্খে অধিৰত্থা দেৰতা তস্স তং কিরিযং দিস্ৰা পুচ্ছিস্সামি তাৰ নন্তি তং উপসঙ্কমিত্ৰা এৰমাহ. ভো ত্ৰং ঘনতরতিমিরাকুলে মহারত্তিযং তত্থ তত্থ ৰিকিণ্ণনরট্ঠিসমাকিণ্ণে সোণসিগালাদিকুণপাদকাকুলে মনুস্সমংসভক্খযক্খরক্খসাকুলে তত্থ তত্থ পজ্জলন্তানেকচিতকভযানকে সুসানে মনুস্সমংসং পচিত্ৰা কিংকরোসীতি পুচ্ছন্তী আহ.

ততো দেৰতা তং তথা হোতু, ইমিনা পিলোতিকেন ৰাতাৰরণং করোসি. কিমত্থমেতন্তি পুচ্ছন্তী.

ফুসাতি [ফুসাতিসাসঙ্গতিমজ্জদানি ইতিকত্তচি] তং ৰাযু মমা ৰিসিত্ৰা;

পরিৰজ্জিতুং বদ্ধমিমং কুচেলন্তি.

সম্ফং গিরং ধুত্তজনেহি [অক্খধুত্তাদিযোগং ইতিকত্থচি] যোগং.

অপাযিকং [অপাযিকং ইতিকত্থচি] দুক্খমনন্ত মঞ্ঞং;

ৰত্ৰা অত্তনা অসপ্পুরিসসংসগ্গেনানুভূতং সব্বং দুক্খং কথেসি, ততো দেৰতা অহম্পি ভো সত্থুনো মঙ্গলসুত্তদেসনাদিৰসে ইমস্মিংযেৰ রুক্খে নিসিন্নো.

অসেৰনা চ বালানং, পণ্ডিতানঞ্চ সেৰনা;

পূজা চ পূজনীয্যানং, এতং মঙ্গল মুত্তমন্তি.

গাথায বালস্স দোসে অস্সোসিংতি ৰত্ৰা তস্স পসন্নো তং অত্তনো ৰিমানং নেত্ৰা নহাপেত্ৰা দিব্বৰত্থালঙ্কারেহি অলঙ্করিত্ৰা দিব্বন্নপানং দত্ৰা মহন্তং সক্কারসম্মানং কত্ৰা অত্তনো আনুভাৰেন তস্মিং নগরে রজ্জে অভিসিঞ্চাপেসি. সো তত্থ রজ্জং করোন্তো দানাদীনি পুঞ্ঞানি কত্ৰা আযুপরিযোসানে যথাকম্মং গতোতি.

সঞ্চজ্জ সাধুসুচিসজ্জনসঙ্গমেন;

সগ্গা পৰগ্গৰিভৰং অভিসম্ভুনাথাতি.

১৮. মরুত্তব্রাহ্মণস্স ৰত্থুম্হি অযমানুপুব্বীকথা

জম্বুদীপে চন্দভাগা নাম গঙ্গাতীরে হোমগামং নাম অত্থি. তস্মিং একো মরুত্তো নাম ব্রাহ্মণো পটিৰসতি. তদা সো ৰোহারত্থায তক্কসীলং গন্ত্ৰা গেহং আগচ্ছন্তো অন্তরামগ্গে একায সালায কুট্ঠরোগা তুরং সুনখং দিস্ৰা তস্মিং কারুঞ্ঞেন নীলৰল্লিতক্কম্বিলেন মদ্দিত্ৰা পাযেসি. সুনখো ৰূপসন্তরোগো পাকতিকো হুত্ৰা ব্রাহ্মণেন অত্তনো কতূপকারং সল্লক্খেন্তো তেনেৰ সদ্ধিং অগমাসি. অপরভাগে ব্রাহ্মণস্স ভরিযা গব্ভং পটিলভি, পরিপুণ্ণগব্ভায তায ৰিজাযনকালে দারকো তিরিযম্পতিত্ৰা অন্তোগব্ভেযেৰ মতো. তদা তং সত্থেন খণ্ডাখণ্ডিকং ছিন্দিত্ৰা নীহরিংসু, অথ ব্রাহ্মণো তং দিস্ৰা নিব্বিন্দহদযো ঘরাৰাসং পহায ইসিপব্বজ্জং পব্বজিত্ৰা অরঞ্ঞে ৰিহরতি. অথস্স ভরিযা অঞ্ঞেন সদ্ধিং সংৰসন্তী অযং মং পহায পব্বজিতোতি ব্রাহ্মণে পদুট্ঠচিত্তা ভো ব্রাহ্মণং মারেহীতি সামিকেন সদ্ধিং মন্তেসি. তেসং মন্তনং সুনখো সুত্ৰা ব্রাহ্মণেনেৰ সদ্ধিং চরতি. অথেকদিৰসং তস্সা সামিকো তা প সং মারেস্সামীতি ধনু কলাপং গহেত্ৰা নিক্খমি, তদা তাপসো ফলাফলত্থায অরঞ্ঞং গতো. সু ন খো অস্সমেযেৰ ও হী যি. পুরিসো তাপসস্সাগমনমগ্গং ওলোকেন্তো গচ্ছন্তরে ¶ নিলীনো অচ্ছি. সুনখো তস্স পমাদং ওলোকেত্ৰা ধনুনো গুণং খাদিত্ৰা ছিন্দি. সো পুন গুণং পাকতিকং কত্ৰা আরোপেসি. এৰং সো আরোপিতং আরোপিতং খাদতেৰ, অথ সো পাপপুরিসো তাপসস্সাগমনং ঞত্ৰা তং মারেস্সামীতি ধনুনা সদ্ধিং অগমাসি. অথস্স সুনখো পাদে ডসিত্ৰা পাতেত্ৰা তস্স মুখং খাদিত্ৰা দুব্বলং কত্ৰা ভুঙ্কারমকাসি, এৰঞ্হি সপ্পুরিসা অত্তনো উপকারকানং পচ্চুপকারং করোন্তি. ৰুত্তঞ্হি.

উপকারং করোন্তো সো, সুনখো কতৰেদিকো;

সত্তূপঘাতকং কত্ৰা, ইসিনো দাসি জীৰিতং.

তিরচ্ছানাপি জানন্তি, গুণমত্তনি কতং সদা;

ইতি উত্ৰান মেধাৰী, কতঞ্ঞূ হোন্তু পাণিনোতি.

ততো তাপসো সুনখস্স সদ্দেনা গন্ত্ৰা তস্স তং ৰিপ্পকারং দিস্ৰা কারুঞ্ঞেন পটিজিগ্গিত্ৰা ৰূপসন্তৰণং বলপ্পত্তং পোসেত্ৰা তত্থেৰ ৰসন্তো ঝানাভিঞ্ঞং নিব্বত্তেত্ৰা আযুপরিযোসানে ব্রাহ্মলোকপরাযণো অহোসীতি.

মেত্তিংদিসস্স পকতং ইসিনা চ সুত্ৰা;

তং সব্বদা ভৰতি ৰো ভৰভোগহেতূতি.

মরুত্তব্রাহ্মণস্স ৰত্থুং অট্ঠমং.

১৯. পানীযদিন্নস্স ৰত্থুম্হি অযমানুপুব্বীকথা

জম্বুদীপে ¶ অঞ্ঞতরস্মিং জনপদে কিরে কো মনুস্সো রট্ঠতো রট্ঠং জনপদতো জনপদং ৰিচরন্তো অনুক্কমেন চন্দভাগানদীতীরং পত্ৰা নাৰং অভিরুহিত্ৰা পরতীরং গচ্ছতি. অথাপরা গব্ভিনিত্থী তায এৰ নাৰায গচ্ছতি, অথ নাৰা গঙ্গামজ্ঝপ্পত্তকালে তস্সা কম্মজৰাতা চলিংসু. ততো সা ৰিজাযিতুমসক্কোন্তী কিলন্তা পানীযং মে দেথ, পিপাসিতাম্হিতি মনুস্সে যাচি. তে তস্সা ৰচনং অসুণন্তা ৰিয পানীযং নাদংসু, অথ সো জানপদিকো তস্সা করুণাযন্তো [করুণাযপানীযং, করুণাযন্তোপানীযং, করুণাযতোযং ইতিচকত্থচি] তোযং গহেত্ৰা মুখে আসিঞ্চি, তস্মিং খণে সা লদ্ধস্সাসা সুখেন দারকং ৰিজাযি, অথ তে তীরং পত্ৰা কতিপযদিৰসেন অত্তনো অত্তনো ঠানং পাপুণিংসু. অথাপরভাগে সো জানপদিকো অঞ্ঞতরকিচ্চং পটিচ্চ তস্সা ইত্থিযা ৰসননগরং পত্ৰা তত্থ তত্থ আহিণ্ডন্তো নিৰাসনট্ঠানং অলভিত্ৰা নগরদ্ৰারে সালং গন্ত্ৰা তত্থ নিপজ্জি. তস্মিংযেৰ দিৰসে চোরা নগরং পৰিসিত্ৰা রাজগেহে সন্ধিং ছিন্দিত্ৰা ধনসারং গহেত্ৰা গচ্ছন্তা রাজপুরিসেহি অনুবন্ধা গন্ত্ৰা তাযেৰ সালায ছড্ডেত্ৰা পলাযিংসু. অথ রাজপুরিসা আগন্ত্ৰা চোরে অপস্সন্তা তং জানপদিকং দিস্ৰা অযং চোরোতি গহেত্ৰা পচ্ছাবাহং গাল়্হং বন্ধিত্ৰা পুন দিৰসে রঞ্ঞো দস্সেসুং. রঞ্ঞা কস্মা ভণে চোরকম্ম মকাসীতি পুচ্ছিতো নাহং দেৰ চোরো, আগন্তুকোম্হীতি ৰুত্তে রাজা চোরে পরিযেসিত্ৰা অলভন্তো অযমেৰ চোরো, ইমং মারেথাতি আণাপেসি. রাজপুরিসেহি তং গাল়্হং বন্ধিত্ৰা আঘাতনং নীতে সা ইত্থী তং তথা নীযমানং দিস্ৰা সঞ্জানিত্ৰা কম্পমানহদযা মুহুত্তেন রঞ্ঞো সন্তিকং গন্ত্ৰা ৰন্দিত্ৰা দেৰ এসো ¶ ন চোরো আগন্তুকো মুঞ্চথেতং দেৰাতি আহ. রাজা তস্সা কথং অসদ্দহন্তো যজ্জেতং মোচেতু মিচ্ছসি. তস্সগ্ঘনকং ধনং দত্ৰা মুঞ্চাপেহীতি, সা সামি মম গেহে ধনং নত্থি. অপিচ মম সত্তপুত্তেহি সদ্ধিং মং দাসিং করোহি, এতং মুঞ্চ দেৰাতি আহ, অথ রাজা ত্ৰং এতং অধুনাগতোতি ৰদসি. এতং নিস্সায পুত্তেহি সদ্ধিং অত্তানং দাসত্তং সাৰেসি. কিমেসো তে ঞাতি ৰা, উদাহু উপকারকোতি পুচ্ছন্তো আহ.

কিংতে ভোতি অযং পোসো, তুৰং পুচ্ছামি সংসযং;

ভাতা ৰা তে পিতা হোতি, পতি ৰা দেৰরো তৰ.

ঞাতি সালোহিতো কিন্নু, উদাহু ইণদাযকো;

অথোপকারকো কিন্নু, কস্মাস্স দেসি জীৰিতংতি.

এসো মে পুরিসো দেৰ, কতপুব্বোপকারকো;

অতাণমেকিকং [অত্তানমেকিকং ইতিকত্থচি] চেসো, দুক্খিতং মরণে ঠিতং.

ৰিজাযিতু মসক্কোন্তিং, গব্ভিনিং দুক্খৰেদিনিং;

তোযেন মং উপট্ঠাসি, তেনাহং সুখিতা তদা.

ভঙ্গকল্লোলমালায, উত্তরন্তং মহণ্ণৰং;

পহায পাতুং কূপস্স, যাতি লোকো পিপাসিতো.

তথেৰ ৰিজ্জমানেসু, জনেসু মনুজাধিপ,

একস্সেৰ মনস্মিংহি, গুণং তিট্ঠতি সাধুকং.

পহত্ৰান মতং হত্থিং, মংসত্থী কেচি জন্তুনো;

অনুবন্ধন্তি মংসত্থং, সসং ধাৰন্ত মেককং.

তথেৰ ¶ ৰিজ্জমানেসু, জনেসু মনুজাধিপ;

গুণৰন্ত মনুবন্ধন্তি, সপ্পুরিসং কতৰেদিকং.

তস্মা সপ্পুরিসে ধম্মে, পতিট্ঠাস্মি নরাধিপ;

অনুস্সরন্তি এতেন, কতপুব্বূ পকারকং.

অহঞ্চ মম পুত্তা চ, এতেনম্হ সুখাপিতা;

জীৰিতম্পি পরিচ্চজ্জ, মুচ্চনীযো অযং মযাতি.

ততো রাজা দোৰারিকং পক্কোসিত্ৰা তম্পি পুচ্ছিত্ৰা অধুনাগতভাৰং ঞত্ৰা তস্সা সপ্পুরিসধম্মে সন্তুট্ঠো তেসং উভিন্নম্পি মহন্তং যসং অনুপ্পদাসি. তে লদ্ধযসা ত তো পট্ঠায দানাদীনি পুঞ্ঞকম্মানি কত্ৰা সগ্গপরাযণা অহেসুন্তি.

ধম্মে পতিট্ঠিতমনা অপি মাতুগামা,

ধম্মঞ্চ সাধুচরিতং মনসীকরোন্তো,

ধম্মেসু ৰত্তথ সদা সুচিসজ্জনাতি.

২০. সহাযস্স পরিচ্চত্তজীৰিতকস্স ৰত্থুম্হি অযমানুপুব্বীকথা

ভগৰতি পরিনিব্বুতে সাৰত্থিযং সোমব্রাহ্মণো সোমদত্তব্রাহ্মণোতি দ্ৰে ব্রাহ্মণা ৰসন্তি. তত্থ সোমদত্তব্রাহ্মণেন সদ্ধিং সোমব্রাহ্মণো যেভুয্যেন দূতং কীল়তি. অথেকদিৰসং সোমদত্তো সোমব্রাহ্মণং তেন পরাজেত্ৰা তস্স উত্তরাসঙ্গঞ্চ লঞ্ছনমুদ্দিকঞ্চ গহেত্ৰা অত্তনো গেহং গচ্ছন্তো সোমব্রাহ্মণস্স এহি গেহং গচ্ছা- মাতি ¶ আহ. ততো সোমো নাহং সম্ম একসাটকো হুত্ৰা অন্তরৰীথিং ওতরিতুং সক্কোমি. গমনতো এত্থেৰ মে ঠানং ৰরতরন্তি আহ, সোমদত্তেন এৰং সতি সম্ম ইমং উত্তরাসঙ্গং গণ্হাতি তস্স তং দত্ৰা ইদানি সম্ম এহীতি ৰুত্তোপি নাগচ্ছতি. পুন তেন ভো কস্মা নাগচ্ছসীতি পুট্ঠো সম্ম মম হত্থে মুদ্দিকং অপস্সন্তা মে পুত্তদারাদযো মযা সদ্ধিং কলহং করোন্তীতি আহ, অথ সো এৰং সন্তে যদা তে পহোতি. তদা ময্হং দেহীতি মুদ্দিকম্পি দত্ৰা তং গহেত্ৰা গেহং অগমাসি. অথ তে এত্তকেন সহাযা অহেসুং. অপরভাগে সোমদত্তব্রাহ্মণং অযং পরদারকম্মং অকাসীতি মনুস্সা গহেত্ৰা রঞ্ঞো দস্সেসুং. রাজা তস্স রূপসম্পত্তিং দিস্ৰা রাজাণং অকত্ৰা মা ভো পুন এৰমকাসীতি ওৰদিত্ৰা ৰিস্সজ্জেসি. রাজা নং যাৰততিযৰারং ওৰদন্তো ৰিস্সজ্জেত্ৰা চতুত্থেৰারে গচ্ছথেতং আঘাতনং নেত্ৰা মারেথাতি আণাপেসি. এৰং পাপকম্মে নিরতা অনেকাকারেন ওৰদন্তাপি ন সক্কা নিৰারেতুং. তথাহি.

সোণা চেৰ সিগালা চ, ৰাযসা নীলমক্খিকা;

ইচ্চেতে কুণপে সত্তা, ন সক্কা তে নিসেধিতুং.

তথা পাণাতিপাতেসু, পরদারে সুরায চ;

মুসাৰাদেসু থেয্যেসু, সত্তসত্তা ন ৰারিযাতি.

ততো রাজপুরিসা তং বন্ধিত্ৰা পক্কমিংসু. তদা সোমব্রাহ্মণো সোমদত্তং তথা নীযমানং দিস্ৰা কম্পমানহদযো রাজপুরিসানং সন্তিকং গন্ত্ৰা ইমং ভো মুহুত্তং মা মারেথ. যাৰ রাজানং জানাপেস্সামীতি ৰত্ৰা রঞ্ঞো সন্তিকং গন্ত্ৰা ৰন্দিত্ৰা ঠিতো দেৰ মম জীৰিতং সোমদত্তস্স ব্রাহ্মণস্স দস্সামি. এতং মুঞ্চথ. যদি মারেতুকামা, মং মারেথাতি আহ. রাজা তুণ্হী [তুট্ঠো ইতিকত্থচি] অহোসি, রাজপুরিসা সোমদত্তং মুঞ্চিত্ৰা ¶ সোমব্রাহ্মণং আঘাতনং নেত্ৰা মারেসুং, অহো কতঞ্ঞুনো কতৰেদিতা.

ককূপকার মত্তানং, সরন্তা কেচি মানুসা;

জীৰিতং দেন্তি সোমোৰ, সোমদত্তস্স অত্তনোতি.

সো তেন জীৰিতদানেন দেৰলোকে নিব্বত্তিত্ৰা মহন্তে কনকৰিমানে দেৰচ্ছরাসহস্সপরিৰুতো দিব্বসম্পত্তিমনুভোন্তো পটিৰসতি. তদা সোমদত্তব্রাহ্মণো এসো মং মরণপ্পত্তং মোচেসীতি ৰত্ৰা তস্সত্থায দানং দত্ৰা পত্তিং অদাসি. তাৰদেৰস্স ততো বহুতরং দেৰিস্সরিযং অহোসি দেৰানুভাৰঞ্চ. ততো সো সোমদেৰো অত্তনো দেৰিস্সরিযং ওলোকেন্তো সহাযস্স অত্তনো জীৰিতদানং অদ্দস. দিস্ৰা অত্তভাৰং ৰিজহিত্ৰা মাণৰকৰণ্ণেন সোমদত্তব্রাহ্মণং উপসঙ্কমিত্ৰা পটিসন্থারং কত্ৰা অত্তানং দেৰলোকে নিব্বত্তভাৰং পকাসেত্ৰা তং গহেত্ৰা অত্তনো আনুভাৰেন দেৰলোকং নেত্ৰা যথাকামং সম্পত্তি মনুভৰাতি ৰত্ৰা সত্তাহং দেৰস্সরিযং দত্ৰা সত্তমে দিৰসে নেত্ৰা তস্স গেহেযেৰ পতিট্ঠাপেসি. তত্থ হি দিব্বসম্পত্তি মনুভূতস্স মনুস্সসম্পত্তি পটিক্কুলা হোতি. ততো সো দিব্বসম্পত্তিমনুস্সরন্তো কিসো দুব্বলো উপ্পণ্ডুপ্পণ্ডুকজাতো অহোসি. অথেকদিৰসং দেৰপুত্তো তং ওলোকেন্তো তথা দুক্খপ্পত্তং দিস্ৰা ন সক্কা মনুস্সেন দিব্বসম্পত্তিমনুভৰিতুন্তি ইচ্ছিতিচ্ছিতসম্পত্তিদাযকং একং চিন্তামণিং দত্ৰা তস্স ভরিযম্পি অত্তনো আনুভাৰেন রূপৰন্থং যসৰন্তং ৰণ্ণৰন্তং অতিক্কন্তমনুস্সিত্থিৰণ্ণং অকাসি, অপরভাগে তে জযম্পতিকা পচ্চক্খতো দিট্ঠদিব্বসম্পত্তিৰিভৰা দানং দত্ৰা সীলং রক্খিত্ৰা সহাযদেৰপুত্তস্স সন্তিকেযেৰ নিব্বত্তিংসূতি.

পাণম্পি দেন্তি সুজনা ইতি চিন্তযিত্ৰা;

মিত্তদ্দু মা ভৰথ ভো উপকারকস্স;

পাসংসিযা ভৰথ সাধুজনেহি নিচ্চংতি.

সহাযস্স পরিচ্চত্তজীৰিতকস্স ৰত্থুং দসমং.

২১. যক্খৰঞ্চিত ৰত্থুম্হি অযমানুপুব্বীকথা

ভগৰতি ¶ পরিনিব্বুতম্হি কোসলরঞ্ঞো কির জনপদে তুণ্ডগামোনাম অহোসি. তত্থেকো বুদ্ধদাসো নাম মনুস্সো ‘‘যাৰজীৰং বুদ্ধং সরণং গচ্ছামি. বুদ্ধো মে সরণং তাণং লেণং পরাযণন্তি’’ এৰং জীৰিতপরিযন্তং বুদ্ধং সরণং গতো পটিৰসতি, তস্মিং সমযে একো জনপদৰাসিকো তত্থ তত্থ আহিণ্ডন্তো তং তুণ্ডগামং পত্ৰা তস্সেৰ ঘরে নিৰাসং কপ্পেসি, তস্স পন জানপদিকস্স সরীরে একো যক্খো আৰিসিত্ৰা পীল়েতি, তদা তস্স গামস্স পৰিসনকালে যক্খো বুদ্ধদাসো পাসকস্স গুণতেজেন তস্স গেহং পৰিসিতুং অসক্কোন্তো তং মুঞ্চিত্ৰা বহিগামে সত্তাহং অট্ঠাসি তস্সাগমনং ওলোকেন্তো. ততো সো জানপদিকো সত্তদিৰসং তত্থ ৰসিত্ৰা সত্তমে দিৰসে সকরট্ঠং গন্তুকামো গামা নিক্খমি. অথ তং তথা নিক্খন্তং দিস্ৰা যক্খো অগ্গহেসি, অথ সো তং এত্তকং কালং কুহিংগতোসীতি পুচ্ছি. যক্খো ভো তৰত্থায এত্থ ৰসন্তস্স মে সত্তাহং অতিক্কন্তন্তি. ততো সো কো তে মযা অত্থো, কিং তে দম্মীতি, অথ যক্খেন ভো অহং খুদায পীল়িতো ভত্তেন মে অত্থোতি ৰুত্তো সো এৰং সতি কস্মা মং অন্তোগেহে ৰসন্তং ন গণ্হীতি আহ. যক্খেন ভো তস্মিং ঘরে বুদ্ধং সরণং গতো একো উপসকো অত্থি, তস্স সীলতেজেন গেহং পৰিসিতুমসক্কোন্তো অট্ঠাসিন্তি ৰুত্তো জানপদিকো সরণং নাম কিন্তি অজানন্তো কিন্তি ৰত্ৰা সো সরণং অগ্গহেসীতি যক্খং পুচ্ছি. যক্খো ‘‘বুদ্ধং সরণং গচ্ছামী’’তি ৰত্ৰা সরণং অগ্গহেসীতি আহ. তং সুত্ৰা জানপদিকো ইদানি ইমং ৰঞ্চেস্সামীতি চিন্তেত্ৰা তেনহি যক্খ অহম্পি বুদ্ধং সরণং গচ্ছামীতি আহ. এৰং ৰুত্তমত্তেযেৰ যক্খো মহাসদ্দং করোন্তো ভ যে ন ভমন্তো ¶ পলাযি, এৰং সম্মাসম্বুদ্ধস্স সরণং ইধলোকে ভযো পদ্দৰ নিৰারণত্থং হোতি, পরলোকে সগ্গমোক্খাৰহং. তথাহি.

বুদ্ধোতি ৰচনং এতং, অমনুস্সানং ভযাৰহং;

বুদ্ধভত্তিকজন্তূনং, সব্বদা মুদমাৰহং.

সব্বোপদ্দৰনাসায, পচ্চক্খদিব্বমোসধং;

দিব্বমন্তং মহাতেজং, মহাযন্তং মহব্ভুতং.

ভমন্তো ধাৰিতং দিস্ৰা, তিমিরোৰ সুরিযুগ্গতে,

সিম্বলিতূলভট্ঠংৰ, চণ্ডৰাতেন খণ্ডিতং.

যং দুক্খং রাজচোরারি, যক্খপেতা দিসম্ভৰং;

নিচ্ছন্তেন মনুস্সেন, গন্তব্বং সরণত্তযংতি.

ততো জানপদিকো সরণাগমনে মহাগুণং মহানিসংসং ওলোকেত্ৰা বুদ্ধে সগারৰো সপ্পেমো ‘‘জীৰিতপরিযন্তং বুদ্ধং সরণং গচ্ছামী’’তি সরণং গন্ত্ৰা তেনেৰ সরণাগমনানুভাৰেন জীৰিতপরিযোসানে সুত্তপ্পবুদ্ধোৰিয দেৰলোকে নিব্বত্তীতি.

২২. মিচ্ছদিট্ঠিকস্স ৰত্থুম্হি অযমানুপুব্বীকথা

ভগৰতি ¶ ধরমানে রাজগহনগরে কির একো ব্রহ্মভত্তিকো মিচ্ছাদিট্ঠিকো পটিৰসতি, তত্থেৰ সম্মাদিট্ঠিকোপি. তেসং উভিন্নম্পি দ্ৰে পুত্তা অহেসুং. তে একতো কীল়ন্তা ৰড্ঢন্তি. অথাপরভাগে গুল়কীল়ংকীল়ন্তানং সম্মাদিট্ঠিকস্স পুত্তো ‘‘নমো বুদ্ধযা’’তি ৰত্ৰা গুল়্হং খিপন্তো দিৰসে দিৰসে জিনাতি. মিচ্ছাদিট্ঠিকস্স পুত্তো ‘‘নমো ব্রহ্মুনো’’তি ৰত্ৰা খিপন্তো পরাজেতি, ততো মিচ্ছাদিট্ঠিকস্স পুত্তো নিচ্চং জিনন্তং সম্মাদিট্ঠিকং কুমারং দিস্ৰা সম্ম ত্ৰং নিচ্চমেৰ জিনাসি, কিং ৰত্ৰা গুল়ং খিপসীতি পুচ্ছি. সোহং সম্ম ‘‘নমো বুদ্ধাযা’’তি ৰত্ৰা খিপামীতি আহ. সোপি ততো পট্ঠায ‘‘নমো বুদ্ধাযা’’তি ৰত্ৰা খিপতি, অথ তে যেভুয্যেন দূতে সমসমাৰ হোন্তি. অপরভাগে মিচ্ছাদিট্ঠিকস্স পুত্তো পিতরা সদ্ধিং দারূনমত্থায ৰনং গন্ত্ৰা সকটেন দারুং গহেত্ৰা আগচ্ছন্তো নগরদ্ৰারসমীপে সকটং ৰিস্সজ্জেত্ৰা তিণে খাদনত্থায গোণে ৰিস্সজ্জেসি, গোণা তিণং খাদন্তো অঞ্ঞেহি গোরূপেহি সদ্ধিং অন্তোনগরং পৰিসিংসু. অথস্স পিতা গোণে পরিযেসন্তো সকটং ওলোকেহীতি পুত্তং নিৰত্তেত্ৰা নগরং পৰিট্ঠো অহোসি, অথ সাযণ্হে জাতে মনুস্সা নগরদ্ৰারং পিদহিংসু, ততো কুমারো বহিনগরে দারুসকটস্স হেট্ঠা সযন্তো নিদ্দূপগতো অহোসি. অথ তস্সা রত্তিযা সম্মাদিট্ঠিকো চ মিচ্ছাদিট্ঠিকো চাতি দ্ৰে যক্খা গোচরং পরিযেসমানা সকটস্স হেট্ঠা নিপন্নং কুমারং অদ্দসংসু, তেসু মিচ্ছাদিট্ঠিকো ইমং খাদামীতি আহ. অথাপরো মা এৰ মকাসি, ‘‘নমো বুদ্ধাযা’’তি ৰাচকো এসোতি, খাদামেৰেতন্তি ৰত্ৰা ইতরেন যাৰততিযং ৰারিযমানোপি গন্ত্ৰা তস্স পাদে গহেত্ৰা আকড্ঢি. তস্মিং খণে দারকো পুব্বপরিচযেন ‘‘নমো বুদ্ধাযা’’তি আহ তং সুত্ৰা যক্খো ভযপ্পত্তো লোমহট্ঠো ¶ হত্থং ৰিস্সজ্জেত্ৰা পটিক্কম্ম অট্ঠাসি. অহো অচ্ছরিযং বুদ্ধানুভাৰং অব্ভুতং, এৰং অত্তং অনীয্যাতেত্ৰা পরিচযেন ‘‘নমো বুদ্ধাযা’’তি ৰুত্তস্সপি ভযং ছম্ভিতত্তং উপদ্দৰং ৰা ন হোতি. পগেৰ অত্তং নীয্যাতেত্ৰা যাৰজীৰং বুদ্ধং সরণং গতস্সাতি. ৰুত্তঞ্হি.

যথাপি সিখিনো নাদং, ভুজঙ্গানং ভযাৰহং;

এৰং বুদ্ধোতি ৰচনং, অমনুস্সানং ভযাৰহং.

যথা মন্তস্স জপ্পেন, ৰিলযং যাতি কিব্বিসং;

এৰং বুদ্ধোতি ৰচনেন, অপযন্তি [পহাযন্তি ইতিসব্বত্থ] পিসাচকা.

অগ্গিং দিস্ৰা যথা সিত্থং, দূরতোৰ ৰিলীযতি;

দিস্ৰানেৰং সরণগতং, পেতা পেন্তিৰ [পেতাপেন্তাৰ ইতিকত্থচি] দূরতো.

পৰরং বুদ্ধইচ্চেত, মক্খরদ্ৰযমব্ভুতং;

সব্বো পদ্দৰনাসায, থিরপাকার মুগ্গতং.

সত্তরতনপাসাদং, তমেৰ ৰজিরং গুহং;

তমেৰ নাৰং দীপং তং, তমেৰ কৰচং সুভং.

তমেৰ সিরসি ভাসন্তং, কিরীটং রতনামযং;

ললাটে তিলকং রম্মং, কপ্পূরং নযনদ্ৰযে.

তাডঙ্কং কণ্ণযুগলে, সোণ্ণমালা গলে সুভা;

একাৰল়ি তারহার, ভারা জত্তুসু লঙ্কতা.

অঙ্গদং বাহুমূলস্স, করগ্গে ৰলযং তথা;

অঙ্গুলিস্ৰঙ্গুলিযঞ্চ, খগ্গং মঙ্গলসম্মতং.

সোণ্ণা তপত্ত মুণ্হীসং, সবাণংৰ সরাসনং;

তমেৰ সব্বালঙ্কারং, তমেৰ দুরিতাপহং.

নমোতি ৰচনং পুব্বং, বুদ্ধাযেতি গিরং তদা;

সুপন্তেন কুমারেন, মিচ্ছাদিট্ঠিকসূনুনা.

সুত্ৰা ৰুত্তং পিসা চাপি, মনুস্সকুণপে রতা;

ন হিংসন্তি অহো বুদ্ধ, গুণসারমহন্ততাতি.

অথ সম্মাদিট্ঠিকযক্খো মিচ্ছাদিট্ঠিকস্স যক্খস্স এৰমাহ, অযুত্তং ভো তযা কতং. বুদ্ধগুণে পহারো দিন্নো, দণ্ডকম্মং তযা কাতব্বংতি, তেন কিংমযা সম্ম কাতব্বন্তি ৰুত্তে বুভুক্খিতস্স আহারং দেহীতি আহ. ততো সো সাধূতি ৰত্ৰা যাৰাহং আগচ্ছামি, ত্ৰং তাৰেত্থ ৰচ্ছাহীতি ৰত্ৰা বিম্বিসাররঞ্ঞো কঞ্চনতট্টকে ৰড্ঢিতং রসভোজনং আহরিত্ৰা কুমারস্স পিতুৰণ্ণেন দারকং ভোজেত্ৰা পুন কুমারেন ৰুত্তবুদ্ধৰচনঞ্চ অত্তনা কতৰাযামং চাতি সব্বং তট্টকে লিখিত্ৰা ইদং রঞ্ঞোযেৰ পঞ্ঞাযতূতি অধিট্ঠায অগমংসু, অথ পভাতায রত্তিযা রঞ্ঞো ভোজনকালে রাজপুরিসা তত্থ তট্টকং অদিস্ৰা নগরং উপপরিক্খন্তা সকটে দারকঞ্চ তট্টকঞ্চ দিস্ৰা তট্টকেন সদ্ধিং তং গহেত্ৰা রঞ্ঞো দস্সেসুং. রাজা তট্টকে অক্খরাদীনি দিস্ৰা ৰাচেত্ৰা তস্স গুণে পসন্নো মহন্তেন যসেন সদ্ধিং সেট্ঠিট্ঠানমদাসি.

মিচ্ছাদিট্ঠিকস্স ৰত্থুং দুতিযং.

২৩. পাদপীঠিকায ৰত্থুম্হি অযমানুপুব্বীকথা

জম্বুদীপে ¶ মহাবোধিতো কির দক্খিণপস্সে এতং পচ্চন্তনগরং অহোসি. তত্থ সদ্ধাসম্পন্নো রতনত্তযমামকো একো উপাসকো পটিৰসতি. তদা একো খীণাসৰো ভগৰতা পরিভুত্তং পাদপীঠং থৰিকায পক্খিপিত্ৰা গতগতট্ঠানে পূজেন্তো অনুক্কমেন তং নগরং সম্পাপুণিত্ৰা সুনিৰত্থো সুপারুতো পত্তং গহেত্ৰা অন্তরৰীথিং পটিপজ্জি যুগমত্তদসো পব্বজ্জালীলায জনং পরিতোসেন্তো. অথ সো উপাসকো তথা গচ্ছন্তং থেরং দিস্ৰা পসন্নমানসো উপগন্ত্ৰা পঞ্চপতিট্ঠিতেন ৰন্দিত্ৰা পত্তং গহেত্ৰা ভোজেত্ৰা নিবদ্ধং মম গেহং আগমনমিচ্ছামি, মমানুকম্পায এত্থেৰ ৰসথ সামীতি যাচিত্ৰা নগরাসন্নে রমণীযে ৰনসণ্ডে নদীকূলে পণ্ণসালং কত্ৰা থেরস্স তং নীয্যাতেত্ৰা চতুপচ্চযেহি পটিজগ্গন্তো মানেন্তো পূজেন্তো ৰসতি. থেরোপি তত্থ ফাসুকট্ঠানে ভগৰতা পরিভুত্তপাদপীঠধাতুং নিধায ৰালুকাহি থূপং কত্ৰা নিচ্চং গন্ধধূপদীপপুপ্ফপূজাদীহি পূজযমানো ৰাসং কপ্পেতি. তস্মিং সমযে তস্সো পাসকস্স অনন্তরগেহৰাসিকো একো ইস্সরভত্তিকো অত্তনো দেৰতং নিবদ্ধং নমস্সতি. তং দিস্ৰাস্স উপাসকো বুদ্ধগুণে ৰত্ৰা অখেত্তে সম্ম মা ৰিরিযং করোহি. পজহেতং দিট্ঠিংতি আহ. ততো সো কেরাটিকো ইস্সরভত্তিকো কো তে সত্থু গুণানুভাৰো, অম্হাকং ইস্সরস্স গুণোৰ মহন্তোতি ৰত্ৰা তস্স অগুণং গুণন্তি কথেন্তো আহ.

তিপুরং সো ৰিনাসেসি, ললাটনযনগ্গিনা;

অসুরেচ ৰিনাসেসি, তিসূলেন মহিস্সরো.

জটাকলাপমাৰত্তং, নচ্চতী দিনসন্ধিযং;

ৰাদেতি ভেরিৰীণাদিং, গীতংচাপি স গাযতি.

ভরিযাযো ¶ তস্স তিস্সো, জটাযেকং সমুব্বহে;

একমেকেন পস্সেন, পস্সমানো চরেককং.

হত্থিচম্মম্বরধরো, তেনেৰ ৰারিতা তপো;

অসাদিসেহি পুত্তেহি, রূপেন চ সুপাকটো.

রতিযা চ মধুপানে চ, ব্যাৰটো সব্বদা চ সো;

মনুস্সট্ঠিধরো সীস, কপালেনেস ভুঞ্জকি.

ন জাতো ন ভযং তস্স, মরণং নত্থি সস্সতো;

ঈদিসো মে মহাদেৰো, নত্থঞ্ঞস্সীদিসো গুণোতি.

তং সুত্ৰা উপাসকো সম্ম তুয্হং ইস্সরস্স এতে গুণা নাম তাৰ হোন্তু. অগুণা নাম কিত্তকা হোন্তীতি ৰত্ৰা ভগৰতো সকলগুণে সংহরিত্ৰা কথেন্তো আহ.

লোকে সব্বসৰন্তীনং, আধারো সাগরো যথা;

সব্বেসং গুণরাসীনং, আধারোৰ তথাগতো.

চরাচরানং সব্বেসং, আধারাৰ ধরা অযং;

তথা গুণানং সব্বেসং, আধারোৰ তথাগতো.

এৰং সন্তো ৰিযত্তোচ [ৰিযন্তো ইতিকত্থচি], এৰং সো করুণাপরো;

এৰ মিদ্ধিৰিধা তস্স, এৰমেৰং গুণা ইতি.

বুদ্ধোপি সক্কোতি ন যস্স ৰণ্ণে,

ৰত্তুং ন হানন্তগুণস্স ৰণ্ণন্তি.

এৰং ৰদন্তা পন তে উভোপি অম্হাকং দেৰো উত্তমো অম্হাকং দেৰো উত্তমোতি কলহং ৰড্ঢেত্ৰা রঞ্ঞো সন্তিকমগমংসু, রাজা ¶ তেসং কথং সুত্ৰা তেনহি তুম্হাকং দেৰতানং মহন্তভাৰং ইদ্ধিপাটিহারিযেন জানিস্সাম. দস্সেথ তেহি নো ইদ্ধিংতি নগরে ভেরিং চরাপেসি. ইতো কির সত্তাহচ্চযেন ইমেসং দ্ৰিন্নং সত্থারানং পাটিহারিযানি ভৰিস্সন্তি. সব্বে সন্নিপতন্তূতি তং সুত্ৰা নানাদিসাসু বহূ মনুস্সা সমাগমিংসু, অথ মিচ্ছাদিট্ঠিকা অজ্জ অম্হাকং দেৰস্স আনুভাৰং পস্সামাতি মহন্তং পূজং করোন্তো তত্থ সারং নাদ্দসংসু, সম্মাদিট্ঠিকাপি অজ্জ অম্হাকং ভগৰতো আনুভাৰং পস্সিস্সামাতি ৰাল়ুকাথূপং গন্ত্ৰা গন্ধমালাদীহি পূজেত্ৰা পদক্খিণং কত্ৰা অঞ্জলিম্পগ্গয্হ অট্ঠংসু. অথ রাজাপি বলৰাহনপরিৰুতো একমন্তে অট্ঠাসি. নানাসমযৰাদিনোপি অজ্জ তেসং পাটিহারিযং পস্সিস্সামাতি মঞ্চাতিমঞ্চং কত্ৰা অট্ঠংসু. তেসং সমাগমে সম্মাদিট্ঠিকা ৰাল়ুকাথূপ মভিমুখং কত্ৰা অঞ্জলিম্পগ্গয্হ সামি অম্হাকং ভগৰা সব্ববুদ্ধকিচ্চানি নিট্ঠাপেত্ৰা অনুপাদিসেসায নিব্বাণধাতুযা পরিনিব্বাযি. সারিপুত্তমহামোগ্গল্লানাদযো অসীতিমহাসাৰকাপি পরিনিব্বাযিংসু, নত্থেত্থ অম্হাকং অঞ্ঞং পটিসরণন্তি ৰত্ৰা সচ্চকিরিযং করোন্তা আহংসু.

আপাণকোটিং বুদ্ধস্স, সরণং নো গতা যদি;

তেন সচ্চেন যং ধাতু, দস্সেতু পাটিহারিযং.

আপাণকোটিং ধম্মস্স, সরণং নো গতা যদি;

তেন সচ্চেন যং ধাতু, দস্সেতু পাটিহারিযং.

আপাণকোটিং সঙ্ঘস্স, সরণং নো গতা যদি;

তেন সচ্চেন যং ধাতু, দস্সেতু পাটিহারিযং.

রামকালে মুনিন্দস্স, পাদুকা চাসি অব্ভুতা;

তেন সচ্চেন যং ধাতু, দস্সেতু পাটিহারিযং.

ছদ্দন্তকালে ¶ মুনিনো, দাঠা ছরংসিরঞ্জিতা;

তেন সচ্চেনযং ধাতু, নিচ্ছারেতু ছ রংসিযো.

জাতমত্তো তদা বুদ্ধো, ঠিতো পঙ্কজমুদ্ধনি;

নিচ্ছারেসাসভিংৰাচং, অগ্গো সেট্ঠোতিআদিনা;

তেন সচ্চেনযং ধাতু, দস্সেতু পাটিহারিযং.

নিমিত্তে চতুরো দিস্ৰা, নিক্খন্তো অভিনিক্খমং;

তেন সচ্চেন যং ধাতু, দস্সেতু পাটিহারিযং.

মারসেনং পলাপেত্ৰা, নিসিন্নো বুজ্ঝি বোধিযং;

তেন সচ্চেন যং ধাতু দস্সেতু পাটিহারিযং.

ধম্মচক্কং পৰত্তেসি, জিনো সিপতনে তদা;

তেন সচ্চেন যং ধাতু, দস্সেতু পাটিহারিযং.

নন্দোপনন্দভোগিন্দং, নাগং নালাগিরিৰ্হযং;

আল়ৰকা দযো যক্খে, ব্রহ্মানো চ বকা দযো.

সচ্চকাদিনিগণ্ঠেচ, কূটদন্তা দযো দ্ৰিজে;

দমেসি তেন সচ্চেন, দস্সেতু পাটিহারিযংতি.

এৰঞ্চ পন ৰত্ৰা উপাসকা অম্হাকং অনুকম্মং পটিচ্চ মহাজনস্স মিচ্ছাদিট্ঠিভেদনত্তং পাটিহারিযং দস্সেথ সামীতি আরাধেসুং. অথ বুদ্ধানুভাৰঞ্চ থেরানুভাৰঞ্চ উপাসকানং সচ্চকিরিযানুভাৰঞ্চ পটিচ্চ ৰাল়ুকাথূপং দ্ৰিধা ভিন্দিত্ৰা পাদপীঠধাতু আকাস মব্ভুগ্গন্ত্ৰা ছব্বণ্ণরংসিযো ৰিস্সজ্জেন্তী ৰিলাসমানা অট্ঠাসি. অথ মহাজনা চেলুক্খেপসহস্সানি পৰত্তেন্তা সাধুকীল়্হং কীল়ন্তা মহানাদং পৰত্তেন্তা মহন্তং পূজমকংসু. মিচ্ছাদিট্ঠিকাপি ইমং অচ্ছরিযং দিস্ৰা ৰিম্হিতমানসা মিচ্ছাদিট্ঠিং ভিন্দিত্ৰা রতনত্তযপরাযণা সরণ মগমংসূতি.

২৪. উত্তরসামণেরস্স ৰত্থুম্হি অযমানুপুব্বীকথা

সো কির পুরিমবুদ্ধেসু [পুরিমবুদ্ধে ইতিসব্বত্থ] কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো সুমেধস্স ভগৰতো কালে ৰিজ্জাধরো হুত্ৰা হিমৰতি পটিৰসতি. তদা সুমেধো নাম সম্মাসম্বুদ্ধো ৰিৰেক মনুব্রূহন্তো হিমৰন্তং গন্ত্ৰা রমণীযে পদেসে পল্লঙ্কং আভুজিত্ৰা নিসীদি. তদা ৰিজ্জাধরো আকাসেন গচ্ছন্তো ছব্বণ্ণরংসীহি ৰিরাজমানং ভগৰন্তং দিস্ৰা তীহি কণিকারপুপ্ফেহি পূজেসি, পুপ্ফানি বুদ্ধানুভাৰেন সত্থু উপরি ছত্তাকারেন অট্ঠংসু, সো তেন ভীয্যোসো মত্তায পসন্নচিত্তো হুত্ৰা অপরভাগে কালংকত্ৰা তাৰতিংসভৰনে নিব্বত্তিত্ৰা উল়ারং দিব্বসম্পত্তিমনুভৰন্তো যাৰতাযুকং তত্থ ঠত্ৰা ততো চুতো দেৰমনুস্সেসু সংসরন্তো ইমস্মিং বুদ্ধুপ্পাদে রাজগহনগরে ব্রাহ্মণমহাসালস্স পুত্তো হুত্ৰা নিব্বত্তি. উত্তরোতিস্স নামং অহোসি. সো উত্তমরূপধরো ৰিঞ্ঞুতং পত্তো ব্রাহ্মণৰিজ্জাসু নিপ্ফত্তিং পত্ৰা জাতিযা রূপেন ৰিজ্জায সীলাচারেন চ লোকস্স মহনীযো জাতো, তস্স তং পঞ্ঞাসম্পত্তিংদিস্ৰা ৰস্সকারো মগধমহামত্তো অত্তনো ধীতরং দাতুকামো হুত্ৰা অত্তনো অধিপ্পাযং পৰেদেসি. সো নিস্সরণজ্ঝাসযতায তং পটিক্খিপিত্ৰা কালেনকালং ধম্মসেনাপতিং পযিরুপাসন্তো তস্স ¶ সন্তিকে ধম্মং সুত্ৰা পটিলদ্ধসদ্ধো পব্বজিত্ৰা ৰত্তসম্পন্নো হুত্ৰা থেরং উপট্ঠহতি. তেন চ সমযেন থেরস্স অঞ্ঞতরো আবাধো উপ্পন্নো হোতি, তস্স ভেসজ্জত্থায উত্তরসামণেরো পাতোৰ পত্তচীৰর মাদায ৰিহারতো নিক্খম্ম অন্তরামগ্গে তল়াকস্স তীরে পত্তং ঠপেত্ৰা উদকসমীপং গন্ত্ৰা মুখং ধোৰতি, তদা অঞ্ঞতরো উম্মগ্গচোরো কতকম্মো আরক্খপুরিসেহি অনুবদ্ধো অগ্গদ্ৰারেনেৰ নগরতো নিক্খমিত্ৰা পলাযন্তো অত্তনা গহিতং রতনভণ্ডিকং সামণেরস্স পত্তে পক্খিপিত্ৰা পলাযি. সো সামণেরোপি পত্তসমীপং [সত্তুসমীপং ইতিপি কত্থচি] উপগতো হোতি, চোরং অনুবন্ধন্তা রাজপুরিসা সামণেরস্স পত্তে ভণ্ডিকং দিস্ৰা অযং চোরো, ইমিনা চোরিযং কতন্তি সামণেরং পচ্ছাবাহং বন্ধিত্ৰা ৰস্সকারস্স ব্রাহ্মণস্স দস্সেসুং. ৰস্সকারো চ তদা রঞ্ঞো ৰিনিচ্ছযে নিযুত্তো হুত্ৰা ছেজ্জভেজ্জং অনুসাসতি. সো এসো পুব্বে মম ৰচনং নাদিযি. সুদ্ধপাসণ্ডিযেসু পব্বজীতি চ বদ্ধাঘাতত্তা তং কম্মং অসোধেত্ৰাৰ জীৰন্তমেৰেতং সূলে উত্তাসেথাতি আণা পেসি, রাজপুরিসা তং নিম্বসূলে উত্তাসেসুং. সামণেরো সূলগ্গে নিসিন্নো উপজ্ঝাযস্স মে কো ভেসজ্জং আহরিস্সতীতি সারিপুত্তত্থেরং সরি. ততো থেরো তং পৰত্তিং ঞত্ৰা সম্মাসম্বুদ্ধস্স কথেসি, ভগৰাপি মহাসাৰকপরিৰুতো তস্স ঞাণপরিপাকং ওলোকেত্ৰা তং ঠানমগমাসি. ততো ভগৰতো নিক্খন্তভাৰা সকলনগরে কোলাহলং অহোসি, মহাজনকাযো সন্নিপতি. অথ ভগৰা ৰিপ্ফুরন্তহত্থতলে নখমণিমযূখসম্ভিন্নপীতাভাসতায পগ্ঘরন্তজাতিহিঙ্গুলকসুৰণ্ণরসধারাৰিয জালাৰগুণ্ঠিতমুদুতলুনঙ্গুলং হত্থং উত্তরস্স সীসে ঠপেত্ৰা উত্তর ইদং তে পুব্বে কতপাপকম্মস্স ফলং উপ্পন্নং, তত্থ তযা পচ্চৰেক্খণবলেন অধিৰাসনা কাতব্বাতি আহ. তেনেৰ আহ.

অতীতে ¶ কির একস্মিং, গামে ত্ৰ মসি দারকো;

দারেকেহি সমাগম্ম, কীল়ন্তো কেল়িমণ্ডলে.

গহেত্ৰা সুখুমং সূকং, তদা ত্ৰং নিম্বজল্লিযা;

উত্তাসেসি তত্থ সূলে, জীৰমানকমক্খিকং.

অপরম্পি তে পাপকম্মং, পৰক্খামি সুণোহি মে;

ওৰদন্তিং হিতেন ত্ৰং, অতীতে সকমাতরং.

জীৰসূলে নিসীদাতি, কোপেনাভিসপী তুৰং;

ইমেহি দ্ৰীহি পাপেহি, সরং সংসারসাগরে.

পঞ্চজাতিসতে অচ্ছি, জীৰসূলম্হি নিম্বজে;

অযং তে চরিমা জাতি, এত্থাপিচ ৰিপচ্চি সোতি.

এৰমাদিনা নযেন তস্স অজ্ঝাসযানুরূপেন ধম্মং দেসেসি, উত্তরো অমতাভিসেকসদিসেন সত্থুনো হত্থসম্ফস্সসঞ্জাতপসাদসোমনস্সতায উল়ারং পীতিপামোজ্জং পটিলভিত্ৰা যথাপরিচিতং ৰিপস্সনামগ্গং সমারূল়্হো ঞাণস্স পরিপাকং গতত্তা সত্থু দেসনাৰিলাসেন মগ্গপটিপাটিযা সব্বকিলেসে খেপেত্ৰা ছল়ভিঞ্ঞো অহোসি. ধম্মং সুত্ৰা তত্থ সমাগতানং দেৰমনুস্সানং চতুরাসীতিপাণসহস্সানং ধম্মাভিসমযো অহোসীতি ৰদন্তি. উত্তরো পন ছল়ভিঞ্ঞো হুত্ৰা সূলতো উট্ঠহিত্ৰা আকাসে ঠত্ৰা পাটিহারিযং দস্সেসি. মহাজনা অচ্ছরিযব্ভুতচিত্তা জাতা অহেসুং. তাৰদেৰস্স ৰণোরুন্ধি, সো ভিক্খূহি আৰুসো তাদিসং দুক্খং অনুভৰন্তো কথং ত্ৰং ৰিপস্সনং অনুযুঞ্জিতুং সক্খীতি পুট্ঠো পগেৰ মে আৰুসো সংসারে আদীনৰো সঙ্খারানঞ্চ সভাৰো সুদিট্ঠো. তস্মাহং তাদিসং দুক্খং অনুভৰন্তোপি অসক্খিং ৰিপস্সনং ৰড্ঢেত্ৰা ৰিসেসং অধিগন্তুংতি আহ. অথাপরভাগে সো ভিক্খুসঙ্ঘমজ্ঝে অত্তনো পুব্বচরিতা পদানং পকাসেন্তো ইমা গাথা অভাসি.

সুমেধো ¶ নাম সম্বুদ্ধো, দ্ৰত্তিংসৰরলক্খণো;

ৰিৰেককামো সম্বুদ্ধো, হিমৰন্ত মুপাগমি.

অজ্ঝোগহেত্ৰা হিমৰন্তং, অগ্গো কারুণিকো মুনি;

পল্লঙ্কং আভুজিত্ৰান, নিসীদি পুরিসুত্তমো.

ৰিজ্জাধরো তদা আসিং, অন্তলিক্খচরো অহং;

তিসূলং সুকতং গয্হ, গচ্ছামি অম্বরে তদা.

পব্বতগ্গে যথা অগ্গি, পুণ্ণমাসেৰ চন্দিমা;

ৰনং ওভাসতে বুদ্ধো, সালরাজাৰ ফুল্লিতো.

ৰনগ্গা নিক্খমিত্ৰান, বুদ্ধরংসী ৰিধাৰরে;

নলগ্গিৰণ্ণসঙ্কাসা, দিস্ৰা চিত্তং পসাদযিং.

ৰিচিনং অদ্দসং পুপ্ফং, কণিকারং দেৰগন্ধিকং;

তীণি পুপ্ফানি আদায, বুদ্ধসেট্ঠং অপূজযিং.

বুদ্ধস্স আনুভাৰেন, তীণি পুপ্ফানি মে তদা;

উদ্ধৰণ্টা অধোপত্তা, ছাযং কুব্বন্তি সত্থুনো.

তেন কম্মেন সুকতেন, চেতনাপণিধীহিচ;

জহিত্ৰা মানুসং দেহং, তাৰতিংসমগঞ্ছহং.

তত্থ মে সুকতং ব্যম্হং, কণিকারীতি ঞাযতি;

সট্ঠিযোজন মুব্বেধং, তিংসযোজনৰিত্থতং.

সহস্সখণ্ডং সতভেণ্ডু, ধজালু হরিতামযং;

সতসহস্সানি ব্যূহানি, ব্যম্হে পাতুরহংসু মে.

সোণ্ণমযা মণিমযা, লোহিতঙ্কমযা পিচ;

ফলিকা পিচ পল্লঙ্কা, যদিচ্ছক যদিচ্ছকা.

মহারহঞ্চ সযনং, তূলিকং ৰিকতীযকং;

উদ্দলোমিকএকন্তং, বিম্বোহনসমাযুতং.

ভৰনা ¶ নিক্খমিত্ৰান, চরন্তো দেৰচারিকং;

যদা ইচ্ছামি গমনং, দেৰসংঘপুরক্খতো.

পুপ্ফস্স হেট্ঠা তিট্ঠামি, উপরিচ্ছদনং মম;

সমন্তা যোজনসতং, কণিকারেহি ছাদিতং.

সট্ঠিতুরিযসহস্সানি, সাযং পাতং উপট্ঠহুং;

পরিৰারেন্তি মং নিচ্চং, রত্তিন্দিৰমতন্দিতা.

তত্থ নচ্চেহি গীতেহি, তালেহি ৰাদিতেহি চ;

রমামি খিড্ডারতিযা, মোদামি কামকামহং.

তত্থ ভুত্ৰা চ পিত্ৰা চ, মোদামি তিদসে তদা;

নারীগণেহি সহিতো, মোদামি ব্যম্হমুত্তমে.

সতানং পঞ্চক্খত্তুঞ্চ, দেৰরজ্জ মকারযিং;

সতানং তীণিক্খত্তুংচ, চক্কৰত্তী অহোসহং;

পদেসরজ্জং ৰিপুলং, গণনাতো অসংখিযং.

ভৰাভৰে সংসরন্তো, মহাভোগং লভামহং;

ভোগে মে ঊনতা নত্থি, বুদ্ধপূজাযি দং ফলং.

দ্ৰে মে ভৰে সংসরামি, দেৰত্তে অথ মানুসে;

অঞ্ঞং গতিং ন জানামি, বুদ্ধপূজাযিদং ফলং.

দ্ৰে মে কুলে পজানামি, খত্তিযে চাপি ব্রাহ্মণে;

নীচে কুলে ন জানামি, বুদ্ধপূজাযিদং ফলং.

হত্থিযানং অস্সযানং, সিৰিকং সন্দমানিকং;

লভামি সব্বমেৰে তং, বুদ্ধপূজাযিদং ফলং.

দাসীগণং দাসগণং, নারিযো চ অলঙ্কতা;

লভামি সব্ব মেৰে তং, বুদ্ধপূজাযিদং ফলং.

কোসেয্যকম্বলিযানি, খোমকপ্পাসিকানিচ;

লভামি সব্বমেৰেতং, বুদ্ধপূজাযিদং ফলং.

ইমং খাদ ইমং ভুঞ্জ, ইমম্হি সযনে সয;

লভামি সব্বমেৰেতং, বুদ্ধপূজাযিদং ফলং.

সব্বত্থ পূজিতো হোমি, যসো অচ্চুগ্গতো মম;

মহেসক্খো ঘদা হোমি, অভেজ্জপরিসো সদা;

ঞাতীনং উত্তমো হোমি, বুদ্ধপূজাযিদং ফলং.

সীতং উণ্হং ন জানামি, পরিল়াহো ন ৰিজ্জতি;

অথো চেতসিকং দুক্খং, হদযে মে ন ৰিজ্জতি.

সুৰণ্ণৰণ্ণো হুত্ৰান, সংসরামি ভৰাভৰে;

ৰেৰণ্ণিযং ন জানামি, বুদ্ধপূজাযিদং ফলং.

দেৰলোকা চৰিত্ৰান, সুক্কমূলেন চোদিতো;

সাৰত্থিযং পুরে জাতো, মহাসালে সুঅড্ঢকে.

পঞ্চকামগুণে হিত্ৰা, পব্বজিংঅনগারিযং;

জাতিযা সত্তৰস্সোহং, অরহত্তমপাপুণিং.

উপসম্পাদযী বুদ্ধো, গুণমঞ্ঞায চক্খুমা;

তরুণোৰ পূজনীযো হং, বুদ্ধপূজাযিদং ফলং.

দিব্বচক্খুং ৰিসুদ্ধং মে, সমাধিকুসলো অহং;

অভিঞ্ঞাপারমিপ্পত্তো, বুদ্ধপূজাযিদং ফলং.

পটিসম্ভিদা অনুপ্পত্তো, ইদ্ধিপাদেসু কোৰিদো;

সদ্ধম্মে পারমিপ্পত্তো, বুদ্ধপূজাযিদং ফলং.

তিংসকপ্পসহস্সম্হি, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

স্ৰাগতং ¶ ৰত মে আসি, বুদ্ধসেট্ঠস্স সন্তিকং;

তিস্সো ৰিজ্জা অনুপ্পত্তো, কতং বুদ্ধস্স সাসনং.

পটিসম্ভিদা চতস্সো চ, ৰিমেক্খা পিচ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনংতি;

তং সুত্ৰা বহূ কুসলকম্মপরাযণা অহেসুং.

উত্তরসামণেরস্স ৰত্থুং চতুত্থং.

২৫. কৰীরপট্টন ৰত্থুম্হি অযমানুপুব্বীকথা

জম্বুদীপে কির চোল়রট্ঠে কাৰীরপট্টনং নাম অহোসি. তত্থ মাহিস্সরিকা বহূ মিচ্ছাদিট্ঠিকা ৰসন্তি. তত্থেকস্মিং দেৰালযে চিত্তকম্মং করোন্তা একস্মিং ফলকে ইস্সরস্স ওনমিত্ৰা ৰন্দনাকারং ভগৰতো রূপং অকংসু. তস্মিং সমযে তত্থ বহূ উপাসকা তং দেৰকুলং গন্ত্ৰা তত্থ তত্থ চিত্তকম্মানি ওলোকেন্তা তস্মিং ফলকে তং চিত্তকম্মং অদ্দসংসু. দিস্ৰান তে অহো অম্হেহি অপস্সিতব্বং পস্সিতং. সদেৰকে লোকে সমারকে সব্রহ্মকে সস্সমণব্রাহ্মণিযাসদেৰমনুস্সায পজায চ অপরিমাণেসু চক্কৰাল়েসু ভগৰতো উত্তরিতরং ঠপেত্ৰা সমসমোপি নত্থি. সকলেহি সত্তনিকাযেহি ৰন্দনীযো পূজনীযো ভগৰা. অননুরূপং তস্স এতেহি কতংতি রোদন্তা পরিদেৰন্তা রাজদ্ৰারং গন্ত্ৰা উগ্ঘোসেসুং, তং সুত্ৰা রাজা তে পক্কোসাপেত্ৰা কস্মা তুম্হে ¶ উগ্ঘোসেথাতি পুচ্ছি, তে এৰ মাহংসু. দেৰ অম্হাকং ভগৰা দেৰাতিদেৰো সক্কাতিসক্কো ব্রহ্মাতিব্রহ্মা মেরুৰ অচলো সাগরো গম্ভীরো আকাসোৰ অনন্তো পথৰীৰ পত্থটোতিআদীহি ভগৰতো গুণং ৰণ্ণেসুং. তেন ৰুত্তং অপদানে.

বত্তিংসলক্খণধরো, সুনক্খত্তোৰ চন্দিমা;

অনুব্যঞ্জনসম্পন্নো, সালরাজাৰ ফুল্লিতো.

রংসিজালপরিক্খিত্তো, দিত্তোৰ কনকাচলো;

ব্যামপ্পভাপরিৰুতো, সতরংসি দিৰাকরো.

সোণ্ণা ননো জিনৰরো, সমণীৰ সিলুচ্চযো;

করুণাপুণ্ণহদযো, ৰিৰট্টো ৰিয সাগরো.

লোকৰিস্সুতকিত্তীৰ, সিনেরুৰ নগুত্তমো;

যসসা ৰিততো ধীরো, আকাসসদিসো মুনি.

অসঙ্গচিত্তো সব্বত্থ, অনিলো ৰিয নাযকো;

পতিট্ঠা সব্বভূতানং, মহীৰ মুনিসুত্তমো.

অনূপলিত্তো লোকেন, তোযেন পদুমং যথা;

কুৰাদগচ্ছদহনো, অগ্গিক্খন্ধোৰ সোভতি.

অগদো ৰিয সব্বত্থ, কিলেসৰিসনাসকো;

গন্ধমাদনসেলোৰ, গুণগন্ধৰিভূসিতো.

গুণানং আকরো ধীরো, রতনানংৰ সাগরো;

সিন্ধূৰ ৰনরাজীনং, কিলেসমলহারকো.

ৰিজযীৰ মহাযোধো, মারসেনপ্পমদ্দনো;

চক্কৰত্তীৰ সো রাজা, বোজ্ঝঙ্গরতনিস্সরো.

মহাভিসক্কসঙ্কাসো, দোসব্যাধিতিকিচ্ছকো;

সল্লকত্তো যথা ৰেজ্জা, দিট্ঠিগণ্ডৰিফালকো.

সত্থা ¶ নো ভগৰা দেৰ, মহাব্রহ্মেহি ৰন্দিতো;

দেৰিন্দসুরসিদ্ধেহি, ৰন্দনীযো সদা দরা.

সব্বেসু চক্কৰাল়েসু, যে অগ্গা যে চ পূজিতা;

তেসমগ্গো মহারাজ, ভগৰা নো পতাপৰাতি.

অযুত্তং দেৰ দেৰকুলেহি কতংতি আহংসু. তং সুত্ৰা রাজা ভো সব্বেপি মনুস্সা অত্তনো অত্তনো দেৰতানং মহন্তভাৰং কথেন্তি. তুম্হাকং পন সত্থুনো মহন্তভাৰং কথং অম্হাকং জানাপেথাতি, উপাসকা ন গরু ত্ৰং মহারাজ ফলকং আহরাপেত্ৰা সুদ্ধৰত্থেন ৰেঠেত্ৰা তং অত্তনো মুদ্দিকায লঞ্ছিত্ৰা সুরক্খিতসুগোপিতে একস্মিং দেৰকুলে ঠপেত্ৰা সত্তাহচ্চযেন আহরাপেত্ৰা তং ওলোকেথ, তদা নো সত্থুনো মহন্তানুভাৰং জানাথাতি আহংসু, অথ রাজা তেসং ৰুত্তনিযামেনেৰ কারাপেত্ৰা অন্তোদেৰকুলে ঠপেত্ৰা সব্বদ্ৰারানি পিদহিত্ৰা লঞ্ছেত্ৰা রক্খেয্যাথাতি নিযোজেসি. ততো তে উপাসকা সব্বে সন্নিপতিত্ৰা সত্তাহং দানং দেন্তা সীলং রক্খন্তা উপোসথকম্মং করোন্তা সব্বসত্তেসু মেত্তিং ভাৰেন্তা সব্বসত্তানং অত্তনা কতপুঞ্ঞেসু পত্তিং দেন্তা তিণ্ণং রতনানং পূজং করোন্তা এৰং উগ্ঘোসেসুং. অম্হাকং কতকুসলনিস্সন্দেন লোকে মহিদ্ধিকা মহানুভাৰা সব্বে দেৰা চ লোকং পালেন্তা চত্তারো মহারাজানো চ অম্হাকং সত্থুনো উপট্ঠানায [উপট্ঠায ইতিসব্বত্থ] ঠিতভাৰং দস্সেন্তূতি সচ্চকিরিযং অকংসু. অথ তেসং পুঞ্ঞানুভাৰেন তস্মিং খণে সক্কস্স দেৰরঞ্ঞো পণ্ডুকম্বলসিলাসনং উণ্হাকারং দস্সেসি. ততো সো মনুস্সলোকং ওলোকেন্তো মিচ্ছাদিট্ঠীহি কতং তং ৰিপ্পকারং দিস্ৰা সংৰিগ্গো আগন্ত্ৰা ইস্সরং ভগৰতো পাদে ৰন্দিত্ৰা সযিতাকারং ¶ কত্ৰা তং পৰত্তিং উপাসকানং কথেত্ৰা সকট্ঠানমেৰ অগমাসি. ততো সত্তমে দিৰসেপাতোৰ তে সব্বেপি রঞ্ঞো সন্তিকং গন্ত্ৰা ৰন্দিত্ৰা এৰমাহংসু. দেৰ ইস্সরো অম্হাকং ভগৰতো পাদে সিরসা ৰন্দিত্ৰা নিপন্নোতি. অথ রাজা তেসং কথং সুত্ৰা নগরে ভেরিং চরাপেত্ৰা মহাজনে সন্নিপাতেত্ৰা তেহি পরিৰুতো দেৰকুলং গন্ত্ৰা লঞ্ছং ভিন্দাপেত্ৰা দ্ৰারং ৰিৰরিত্ৰা ফলকং আহরাপেত্ৰা ৰেঠিতসাটকে মোচাপেসি. অথ রাজা চ মহাজনো চ তং মহন্তং পাটিহারিযং দিস্ৰা মিচ্ছাদিট্ঠিং পহায সব্বে সত্থুনো সরণ মগমংসু. অথ রাজা তং দেৰকুলং ভিন্দাপেত্ৰা মহন্তং রমণীযং ৰিহারং কারাপেত্ৰা যাৰজীৰং পুঞ্ঞকম্মং কত্ৰা দেৰলোকে নিব্বত্তি.

করোন্তি দিস্ৰা কুসলানি ইদ্ধিং;

যে তং মুনিন্দে পরিনিব্বুতম্হি,

করোন্তি পুঞ্ঞানি মহব্ভূতং যেতি.

২৬. চোরঘাতকৰত্থুম্হি অযমানুপুব্বীকথা

একস্মিং কির সমযে অম্হাকং ভগৰা সাৰত্থিযং উপনিস্সায জেতৰনে ৰিহরতি ধম্মদেসনায মহাজনস্স সগ্গমোক্খসম্পদং দদমানো. তস্মিংসমযে পঞ্চসতা চোরা অটৰিতো নগরং আগন্ত্ৰা রত্তিভাগে চোরকম্মং কত্ৰা তেন পুত্তদারে পোসেন্তি. অথেকদিৰসং চোরা চোরকম্মত্থায নগরং পৰিসন্তা নগরদ্ৰারে একং দুক্খিতং জনপদমনুস্সং পস্সিত্ৰা হম্ভো ¶ কত্থ ৰসতীতি পুচ্ছিংসু, সো অত্তজনা জনপদৰাসিভাৰং পকাসেসি. অথস্স তে কস্মা ভো ইমিনা দুক্খৰাসেন ৰসিস্সসি, এহি অম্হেহি সদ্ধিং চোরকম্মং করোন্তো ৰত্থালঙ্কারসম্পন্নো পুত্তদারং পোসেহি. ইমিনা কপণৰাসেন ন ৰসাতি আহংসু. সো পনিমে যুত্তং কথেন্তীতি তেসং ৰচনং সম্পটিচ্ছি. অথ তে এৰং সতি অম্হেহি সদ্ধিং আগচ্ছাহীতি ৰত্ৰা নং গহেত্ৰা অন্তোনগরং পৰিট্ঠা তত্থ তত্থ ৰিলুম্পন্তা চোরকম্মং অকংসু. তদা জানপদিকো লদ্ধৰিভৰো ইমমেৰ ৰরতরন্তি তেহি সদ্ধিং চোরকম্মং করোন্তো জীৰিকং কপ্পেসি, অথেকদিৰসং রাজপুরিসা কতকম্মে তে সব্বেৰ গহেত্ৰা পচ্ছাবাহং গাল়্হং বন্ধিত্ৰা কোসলরঞ্ঞো দস্সেসুং, রাজা তে দিস্ৰা এৰমাহ, ভণে তুম্হাকং অন্তরে যো এতেসং মারেত্ৰা জীৰিতক্খযং পাপেস্সতি, তস্স জীৰিতদানং দম্মীতি, তং সুত্ৰা তে চোরা সব্বে অঞ্ঞমঞ্ঞঞাতিসুহদসম্বন্ধভাৰেন তং ন ইচ্ছিংসু. সো পন জনপদৰাসী মনুস্সো অহমেতে সব্বে মারেস্সামীতি রঞ্ঞো ৰত্ৰা তেনানুঞ্ঞাতো তে সব্বে মারেসি. তং দিস্ৰা তুট্ঠো রাজা তস্স চোরঘাতকম্মং অদাসি. সো চোরে চ ৰজ্ঝপ্পত্তে চ মারেন্তো পঞ্চৰীসতিৰস্সানি ৰসন্তো অপরভাগে মহল্লকো অহোসি. অথ সো মন্দবলত্তা কতিপযপহারেনাপি চোরং মারেতুং ন সক্কোতি, রাজা তং ঞত্ৰা অঞ্ঞস্স চোরঘাতকম্মং অদাসি. অথ সো চোরঘাতকম্মা [চোরঘাতকম্ম ইতিপিকত্থচি] পরিহীনো অত্তনো গেহে ৰসতি. তদা অঞ্ঞতরো মনুস্সো মন্তং পরিৰত্তেত্ৰা নাসাৰাতেন মনুস্সমারণকমন্তং জানাতি. তথাহি হত্থপাদকণ্ণনাসসীসাদীসু যংকিঞ্চি ছেজ্জভেজ্জং কত্তুকামো মন্তং পরিৰত্তেত্ৰা নাসাৰাতং ৰিস্সজ্জেতি. তং তং ঠানং ছিজ্জতি ভিজ্জতি, এৰং মহানুভাৰো সো মন্তো, অথ সো তং পুরিসং উপট্ঠহিত্ৰা মন্তং লভিত্ৰা রঞ্ঞো সাসনং পেসেসি ¶ . অহং ইতো পুব্বে মহল্লকত্তা চোরানং হত্থপাদাদযো দুক্খেন ছেজ্জ ভেজ্জং করোমি, মারেতব্বেপি দুক্খেন মারেমি. ইদানি পনাহং তথা ন করোমি, মম মন্তানুভাৰেন ছেজ্জভেজ্জকম্মং করিস্সামীতি. রাজা তং সাসনং সুত্ৰা সাধূতি তং পক্কোসাপেত্ৰা ঠানন্তরং তস্সেৰ পাকতিক মকাসি. সো ততো পট্ঠায তং কম্মং করোন্তো পুন পঞ্চৰস্সানি অতিক্কামেসি. সো মহল্লকো খীণাযুকো দুব্বলো মরণমঞ্চপরাযণো হুত্ৰা মরণৰেদনাদুক্খেন মহন্তেন ভযানকেন সদ্দেন ৰিস্সরং ৰিরৰন্তো নিমীলিতেন চক্খুনা ভযানকং নরকগ্গিজালাপজ্জলন্তঅযকূটমুগ্গরধরে নিরযপালে চ পস্সন্তো নিপন্নো হোতি, ততো তস্স পটিৰিস্সকগেহে মনুস্সা তস্স ভযানকসদ্দসৰণেন গেহং ছট্টেত্ৰা পলাযিংসু. তস্মিং কির দিৰসে মহাসারিপুত্তত্থেরো দিব্বচক্খুনা লোকং ওলোকেন্তা তং চোরঘাতকং তদহেৰ কালংকত্ৰা নিরযে নিব্বত্তমানং দিস্ৰা মযি তত্থ গতে পনেস মযি পসাদেন সগ্গে নিব্বত্ততীতি ঞত্ৰা অজ্জ মযা তস্সানুগ্গহং কাতুং ৰট্টতীতি পুব্বণ্হসমযং নিৰাসেত্ৰা তস্স ঘরদ্ৰার মগমাসি. অথ সো থেরং দিস্ৰা কুদ্ধো কোপেন তটতটাযমানদেহো অজ্জ তং ৰিজ্ঝিত্ৰা ফালেত্ৰা মারেস্সামীতি নিপন্নোৰ মন্তং পরিৰত্তেত্ৰা নাসাৰাতং ৰিস্সজ্জেসি, থেরো তস্মিং খণে নিরোধসমাপন্নো নিরোধা ৰুট্ঠায সুরিযো ৰিয ৰিরোচমানো অট্ঠাসি, অথ সো থেরস্স তযো ৰারে তথেৰ কত্ৰা কিঞ্চি কাতুং অসক্কোন্তো অতিৰিয ৰিম্হিতচিত্তো থেরে চিত্তং পসাদেত্ৰা অত্তনো পটিযত্তং পাযসং থেরস্স দাপেসি, থেরো মঙ্গলং ৰড্ঢেত্ৰা ৰিহারমেৰ অগমাসি, চোরঘাতকো থেরস্স দিন্নদানং অনুস্সরন্তো তস্মিং খণে কালং কত্ৰা সগ্গে নিব্বত্তি. অহো ৰীতরাগানং বুদ্ধপুত্তানং আনুভাৰো. এৰং নরকে নিব্বত্তমানোপিস্স বলেন সগ্গে নিব্বত্তোতি. তথাহি.

দানং ¶ তাণং মনুস্সানং, দানং দুগ্গতিৰারণং;

দানং সগ্গস্স সোপানং, দানং সন্তিকরং পরং.

ইচ্ছিতিচ্ছিতদানেন, দানং চিন্তামণী ৰিয;

কপ্পরুক্খোৰ সত্তানং, দানং ভদ্দঘটোৰিয.

সীলৰন্তস্স দানেন, চক্কৰত্তিসিরিম্পি চ;

লভন্তি সক্কসম্পত্তিং, তথা লোকুত্তরং সুখং.

পাপকম্মেসু নিরতো, ঠিতোযং নরকাযনে [নরকাৰনে ইতিপিকত্থচি];

সারিপুত্তস্স থেরস্স, পিণ্ডপাতস্স ৰাহসা.

অপাযং পরিৰজ্জেত্ৰা, নেকদুক্খসমাকুলং;

দেৰসঙ্ঘপরিব্বূল়্হো, গতো দেৰপুরং ৰরং.

তস্মা সুখেত্তে সদ্ধায, দেথ দানানি কামদং;

দানং দেন্তেহি সীলম্পি, পালনীযংতিসুন্দরন্তি [পালনংচাতিসুন্দরং ইতিপিকত্থচি].

অথ ভিক্খূ ধম্মসভাযং সন্নিপতিত্ৰা নিসিন্না ভগৰন্তং পুচ্ছিংসু, কিংভন্তে সো পাপো চতূসু অপাযেসু কতরস্মিং নিব্বত্তোতি. অথ সত্থা অজ্জেস ভিক্খৰে সারিপুত্তস্স দিন্নদানানুভাৰেন দেৰলোকে নিব্বত্তো, তস্সেৰ নিস্সন্দেন অনাগতে পচ্চেকবুদ্ধো ভৰিস্সতীতি ব্যাকাসীতি.

২৭. সদ্ধোপাসকস্স ৰত্থুম্হি অযমানুপুব্বীকথা

অতীতে ¶ কির কস্সপদসবলস্স কালে একো পুরিসো সদ্ধো রতনত্তযেসু পসন্নো উচ্ছুযন্তকম্মেন জীৰিকং কপ্পেন্তো পটিৰসতি. অথ সো একং গিলানভিক্খুং দিস্ৰা তস্স উল়ুঙ্কমত্তং সপ্পিং অদাসি, তথেৰেকস্স ভিক্খুস্স একং গুল়পিণ্ডং অদাসি, অথাপরস্মিংদিৰসে একং ছাতজ্ঝত্তং সুনখং দিস্ৰা তস্স ভত্তপিণ্ডেন সঙ্গহ মকাসি, অথেকস্স ইণট্ঠকস্স একং কহাপণং অদাসি, অথেকদিৰসং ধম্মং সুণমানো ধম্মদেসকস্স ভিক্খুস্স সাটকং পূজেসি, সো এত্তকং পুঞ্ঞকম্মং কত্ৰা ভৰেসু চরমানোহং সমুদ্দপব্বতাদীসুপি যং যং ইচ্ছামি. তং তং সমিজ্ঝতূতি পত্থনং অকাসি, সো অপরভাগে কালং কত্ৰা তেহেৰ কুসলমূলেহি সুত্তপ্পবুদ্ধো ৰিয দেৰলোকে নিব্বত্তিত্ৰা তত্থ মহন্তং দিব্বসম্পত্তিং অনুভৰিত্ৰা ততো চুতো অম্হাকং ভগৰতো কালে সাৰত্থিযং মহদ্ধনে মহাসালকুলে নিব্বত্তিত্ৰা ততো সো ৰিঞ্ঞুতং পত্তো কালেন কালং ধম্মং সুণন্তো ঘরাৰাসে আদীনৰং পব্বজ্জায চ আনিসংসং সুত্ৰা পব্বজিতো ন চিরেনেৰ অরহত্তং পাপুণি. সো অপরভাগে সত্থারং ৰন্দিত্ৰা পঞ্চসতভিক্খুপরিৰারো উগ্গনগরং অগমাসি, তত্থ সেট্ঠিনো ভরিযা সদ্ধা অহোসি পসন্না. সা থেরং পঞ্চহি ভিক্খুসতেহি সদ্ধিং ভিক্খায চরন্তং দিস্ৰা তুরিততুরিতা গন্ত্ৰা থেরস্স পত্তং গহেত্ৰা সদ্ধিং পঞ্চসতেহি ভিক্খূহি ভোজেত্ৰা থেরং তত্থ নিবদ্ধৰাসত্থং যাচিত্ৰা পঞ্চসতকূটাগারানি কারাপেত্ৰা অলঙ্করিত্ৰা পঞ্চসতভিক্খূ তত্থ ৰাসেন্তী নিবদ্ধং চতুপচ্চযেহি উপট্ঠানমকাসি. ততো থেরো তং পঞ্চসু সীলেসু পতিট্ঠাপেত্ৰা তত্থ যথাভিরন্তং ৰিহরিত্ৰা অঞ্ঞত্ত গন্তুকামো অনুপুব্বেন পট্টনগামং অগমাসি, তত্থ ৰসিত্ৰা ততো নাৰং অভিরুয্হ পঞ্চসতভিক্খূহি পরিৰুতো সমুদ্দপিট্ঠেন গচ্ছতি, সমুদ্দং তরন্তস্স ¶ তস্স সাগরমজ্ঝে উদরৰাতো সমুট্ঠহিত্ৰা পীল়েতি, তং দিস্ৰা ভিক্খূ ভন্তে ইদং পুব্বে কেন ৰূপসমেস্সতীতি পুচ্ছিংসু, থেরো পুব্বে মে আৰুসো উলুঙ্কমত্তে সপ্পিপীতে রোগো ৰূপসম্মতীতি আহ, ভিক্খূ ভন্তে সমুদ্দপিট্ঠে কথং সপ্পিং লভিস্সাম, অধিৰাসেথাতি আহংসু, তং সুত্ৰা থেরেন [থেরোননোআযস্মন্তা ইতিসব্বত্থ] ন নো আযস্মন্তা সপ্পি দুল্লভা, মম পত্তং গহেত্ৰা সমুদ্দোদকং উদ্ধরিত্ৰা আনেথাতি ৰুত্তে ভিক্খূ তথা অকংসু. উদ্ধটমত্তমেৰ তংউদকং পরিৰত্তেত্ৰা সপ্পি অহোসি, অথ ভিক্খূ তং দিস্ৰা অচ্ছরিযব্ভুতচিত্তা জাতা থেরস্স সপ্পিং উপনামেসুং, থেরেন সপ্পিনো [সপ্পিনা ইতিসব্বত্থ] পীতমত্তে সো আবাধো ৰূপসমি, অথস্স ভিক্খূহি কি মেতং ভন্তে অচ্ছরিযং, ন নো ইতো পুব্বে এৰরূপং দিট্ঠপুব্বংতি ৰুত্তে থেরো তেনহি কতপুঞ্ঞানং পুঞ্ঞৰিপাকং পস্সিস্সথাতি ৰত্ৰা সমুদ্দং ওলোকেসি ইদং সপ্পি হোতূতি. অথস্স চক্খুপথে সমুদ্দে সব্বোদকং পরিৰত্তেত্ৰা সপ্পি অহোসি. অথস্স ভিক্খূ অব্ভুতচিত্তা অঞ্ঞম্পি ঈদিসং পুঞ্ঞং অত্থি ভন্তেতি পুচ্ছিংসু, ততো থেরো তেনহি পস্সথাযস্মন্তা মম পুঞ্ঞন্তি ৰত্ৰা সমন্তা তত্থ তত্থ ঘনসেলপব্বতে ওলোকেসি, সব্বানি তানি গুল়পিণ্ডানি অহেসুং, ততো চক্খুপথে সমন্তা ভত্তভাজনানি দস্সেসি সব্যঞ্জনং সোপকরণং. ততো হিমৰন্তং ওলোকেসি, সব্বং তং সুৰণ্ণমযং অহোসি. অথাভিমুখট্ঠানে মহন্তং ৰনসণ্ডং ওলোকেসি, সকলৰনসণ্ডংনানাৰিরাগৰত্থেহি সঞ্ছন্নং অহোসি, ভিক্খূ তং তং পাটিহারিযং দিস্ৰা অতীৰ ৰিম্হিতা ভন্তে কেন তে পুঞ্ঞকম্মেন এতাদিসানি পাটিহারিযানি ভৰিস্সন্তীতি পুচ্ছিংসু, থেরো কস্সপদসবলস্স কালে অত্তনা কতং সব্বং তং কুসলং পকাসেসি. তেনেত্থ.

ইমস্মিং ¶ ভদ্দকে কপ্পে, কস্সপো নাম নাযকো;

সব্বলোকহিতত্থায, লোকে উপ্পজ্জি চক্খুমা.

তদাহং উচ্ছুযন্তম্হি, নিযুত্তো গুল়কারকো;

তেন কম্মেন জীৰামি, পোসেন্তো পুত্তদারকে.

কিলন্তিন্দ্রিযমদ্দক্খিং, ভিক্খুং রোগাতুরং তদা;

ভিক্খাচারকৰত্তেন, ঘতত্থং [ঘতমত্তমুপাগতং ইতিসব্বত্থ] সমুপাগতং.

উলুঙ্কমত্তং সপ্পিস্স, অদদং তস্স ভিক্খুনো;

সদ্দহন্তো দানফলং, দযাযু দগ্গমানসো.

তেন কম্মেন সংসারে, সংসরন্তো ভৰাভৰে;

যত্থিচ্ছামি ঘতং তত্থ, উপ্পজ্জতি অনপ্পকং.

ইচ্ছামহং সমুদ্দস্মিং, ফলম্পি ঘতমত্তনো;

তং তং সব্বং ঘতং হোতি, ঘতদানস্সিদং ফলং.

সুণাথ ময্হং অঞ্ঞম্পি, পুঞ্ঞকম্মং মনোরমং;

তদা দিস্ৰানহং ভিক্খুং, রোগেন পরিপীল়িতং.

গুল়পিণ্ডং গহেত্ৰান, পত্তে তস্স সমাকিরিং;

তেন সো সুখিতো আসি, রোগং ব্যপগতং তদা.

তেন মে গুল়দানেন, সংসরং দেৰমানুসে;

যত্থত্থোস্মি গুল়েনাহং, তত্থ তং সুলভং মম.

সেলাচ ৰিপুলা ময্হং, হোন্তি চিত্তানুৰত্তকা;

মহন্তগুল়পিণ্ডাৰ, গুল়দানে ইদং ফলং.

অথাপি মে কতং পুঞ্ঞং, সুণাথ সাধু ভিক্খৰো;

ছাতজ্ঝত্তং ফন্দমানং, দিস্ৰান সুনখং তদা.

ভত্তপীণ্ডেন ¶ সঙ্গণ্হিং, তম্পি দানং ফলাৰহং;

ততো পট্ঠায নাহোসি, অন্নপানেন ঊনতা.

সুলভন্নপানো সুখিতো, অহোসিংজাতিজাতিযং;

অজ্জাপি যদি ইচ্ছামি, ভোজনেন পযোজনং.

চক্খুপথে সমন্তা মে, জাযন্তুক্খলিযো বহূ;

অথাপরম্পি কুসলং, অকাসিংতং সণাথ মে.

ইণট্ঠকস্স পোসস্স, অদাসেকং কহাপণং;

তেন মে পুঞ্ঞকম্মেন, অনোমভৰসম্পদং.

পচুরং জাতরূপঞ্চ, লভামি জাতিজাতিযং;

সচজ্জ ধনকামোহং, ঘনসেলোপি পব্বতো;

হোতি হেমমযং সব্বং, ইণতো মোচনে ফলং.

অঞ্ঞম্পি মম পুঞ্ঞং ভো, সুণাথ সুতিসোভনং;

কস্সপস্স ভগৰতো, সাসনেকং বহুস্সুতং.

দেসেন্তং মুনিনো ধম্মং, সুত্ৰা পীণিতমানসো;

পূজেসিংসাটকং ময্হং, ধম্মস্স ধম্মসামিনো.

তেনাহং পুঞ্ঞকম্মেন, সংসরং দেৰমানুসে;

লভামি পচুরং ৰত্থং, যং লোকস্মিং ৰরং পরং.

ইচ্ছমানো সচে অজ্জ [জানমানোপহংঅজ্জ; জানধানোচহংঅজ্জ ইতিকত্থচি], হিমৰন্তম্পি পব্বতং;

নানাৰিরাগৰত্থেহি, ছাদযিস্সং সমন্ততো.

সচে ইচ্ছামি অজ্জেৰ, ৰত্থেনচ্ছাদযা মিতে;

জন্তৰো চতুদীপস্মিং, ৰত্থদানস্সিদং ফলং.

এতেসং পুঞ্ঞকম্মানং, ৰাহসা কামভূমিযং;

সম্পত্তি মনুভুত্ৰান, সাৰত্থিপুর মুত্তমে.

লোকুত্তরং অগ্গরসং, ভুঞ্চন্তো মুনিৰাহসা;

কিলেসে পজহিত্ৰান, অরহত্তমপাপুণিং.

কুসলং না ৰমন্তব্বং, খুদ্দকন্তি কদাচিপি;

অনন্তফলদং হোতি, নিব্বাণম্পি দদাতি তং.

অথস্স ধম্মদেসনং সুত্ৰা ভিক্খূ চ মহাজনো চ দানাদিকুসলকম্মং কত্ৰা যেভুয্যেন সগ্গপরাযণা অহেসুংতি.

২৮. কপণস্স ৰত্থুম্হি অযমানুপুব্বীকথা

অম্হাকং ভগৰতি পরিনিব্বুতে বারাণসীনগরৰাসী একো দুগ্গতপুরিসো পরগেহে ভতিংকত্ৰা জীৰিকং কপ্পেতি, তস্মিং সমযে নগরৰাসিনো যেভুয্যেন তস্মিং তস্মিং ঠানে মণ্ডপাদযো কারাপেত্ৰা মহাদানং দেন্তি, তং দিস্ৰা দুগ্গতো এৰং চিন্তেসি, অহং পুব্বে অকতপুঞ্ঞত্তা পরগেহে ভতিং কত্ৰা কিচ্ছেন কসিরেন জীৰামি. নিৰাসনপারুপনম্পি ৰাসট্ঠানমত্তম্মি দুক্খতো লভামি. ইদানি বুদ্ধুপ্পাদো ৰত্ততি ভিক্খুসঙ্ঘোপি.

সব্বে ¶ ইমে দানং দত্ৰা সগ্গমগ্গং সোধেন্তি. মযাপি দানং দাতুং ৰট্টতি. তম্মে দীঘরত্তং হিতায সুখায ভৰিস্সতি. অপি চ ময্হং তণ্ডুলনালিমত্তম্পি নত্থি, অকতৰীরিযেন তং মত্থকং পাপেতুং ন সক্কা, এতদত্থাযাহং উয্যোগং কত্ৰা দানং দস্সামীতি চিন্তেত্ৰা ততো পট্ঠায ভতিং পরিযেসমানো গন্ত্ৰা তত্থ তত্থ ভতিং কত্ৰা লদ্ধনিৰাপে চ ভিক্খাচরিযায লদ্ধতিলতণ্ডুলাদযো চ একত্থ সংহরিত্ৰা মনুস্সে সমাদাপেত্ৰা তস্মিং মণ্ডপং কারাপেত্ৰা ৰনকুসমাদীহি তং অলঙ্করিত্ৰা ভিক্খূ নিমন্তেত্ৰা মণ্ডপে নিসীদাপেত্ৰা সব্বেসং পাযসং [পাযাসং ইতিসব্বত্থ] পটিযাদেত্ৰা ভোজেসি. অথ সো মরণকালে অত্তনা কতং তং দানৰরং অনুস্সরি. সো তেন কুসলকম্মেন সুত্তপ্পবুদ্ধো ৰিয দেৰলোকে নিব্বত্তি. তস্মিং তেন কতপুঞ্ঞানুরূপং মহন্তং কনকৰিমানং নিব্বত্তি. সমন্তা তিগাৰুতট্ঠানে দেৰতা নানা ৰিধানি তুরিযানি গহেত্ৰা উপহারং করোন্তি. নিচ্চং দেৰচ্ছরাসহস্সানি [দেৰচ্ছরাসহস্সং ইতিসব্বত্থ] তং পরিৰারেত্ৰা তিট্ঠন্তি. এৰং সো মহন্তং সম্পত্তিং অনুভৰতি. অথেকদিৰসং সুৰণ্ণসেলৰিহারৰাসী মহাসঙ্ঘরক্খিতত্থেরো পত্তপটিসম্ভিদো দেৰচারিকং চরমানো তং দেৰপুত্তং অনুপমায দেৰসম্পত্তিযা ৰিরোচমানং দিস্ৰা উপসঙ্কম্ম ঠিতো তেন কতকম্মং পুচ্ছি. সোপিস্স যথাভূতং ব্যাকাসি, তেনত্থ.

সব্বসোৰণ্ণযো আসি, পাসাদো রতনামযো;

সোণ্ণসিঙ্গসতাকিণ্ণো, দুদ্দিক্খো চ পভস্সরো.

কূটাগার সতাকিণ্ণো, সোণ্ণমালাসমাকুলো;

মুত্তাকলাপালম্বন্তি, তত্থ তত্থ মনোরমা.

নেকগব্ভসতাকিণ্ণো, সযনাসনমণ্ডিতো;

ৰিভত্তো ভব্বভাগেহি, পুঞ্ঞৰড্ঢকিনা কতো.

নচ্চন্তি ¶ পমদা তত্থ, ভেরিমণ্ডলমজ্ঝগা;

গাযন্তি কাচি কীল়ন্তি, ৰাদেন্তি কাচি তন্তিযো.

ততো তিগাৰুতে ঠানে, পাসাদস্স সমন্ততো;

সহচ্ছরা দেৰপুত্তা, গহেত্ৰা আততাদযো.

মোদন্তি পরিৰারেত্ৰা, নচ্চগীতাদিনা সদা;

উল্লঙ্ঘন্তিচ সেলেন্তি, সিলাঘন্তি সমন্ততো.

এৰং মহিদ্ধিকো দানি, তুৰং ৰন্দোৰ ভাসতি;

পুচ্ছামি তং দেৰপুত্ত, কিং কম্মমকরী পুরা.

অহোসিং দুগ্গতো পুব্বে, বারাণসীপুরুত্তমে;

দানং দেন্তি নরা তত্থ, নিমন্তেত্ৰান ভিক্খৰো.

জীৰন্তো ভতিযা সোহং, দানং দেন্তে মহাজনে;

তুট্ঠহট্ঠে পমুদিতে, এৰং চিন্তেসহং তদা.

সম্পন্নৰত্থালঙ্কারা, দানং দেন্তি ইমে জনা;

পরত্থপি পহট্ঠাৰ, সম্পত্তিমনুভোন্তি তে.

বুদ্ধুপ্পাদো অযং দানি, ধম্মো লোকে পৰত্ততি;

সুসীলা দানি ৰত্তন্তি, দক্খিণেয্যা জিনোরসা.

অনাৰট্ঠিতো [অৰট্ঠিতোচ; অন্ধট্ঠিতোচ ইতিপিকত্তচি] সংসারো, অপাযা খলু পূরিতা;

কল্যাণৰিমুখা সত্তা, কামং গচ্ছন্তি দুগ্গতিং.

ইদানি দুক্খিতো হুত্ৰা, জীৰামি কসিরেনহং;

দলিদ্দো কপণো দীনো, অপ্পভোগো অনালযো.

ইদানি বীজং রোপেমি, সুখেত্তে সাধুসম্মতে;

অপ্পেৰনাম তেনাহং, পরত্থ সুখিতো সিযা.

ইতি চিন্তিয ভিক্খিত্ৰা, ভতিং কত্ৰান নেকধা;

মণ্ডপং তত্থ কারেত্ৰা, নিমন্তেত্ৰান ভিক্খৰো.

আযাসেন ¶ অদাসাহং, পাযসং অমতায সো;

তেন কম্মৰিপাকেন, দেৰলোকে মনোরমে.

জাতোম্হি দিব্বকামেহি, মোদমানো অনেকধা;

দীঘাযুকো ৰণ্ণৰন্তো, তেজস্সীচ অহোসহন্তি.

এৰং দেৰপুত্তো অত্তনা কতপুঞ্ঞকম্মং ৰিত্তারেন কথেসি, থেরোপি মনুস্সলোকং আগন্ত্ৰা মনুস্সানং অত্তনা পচ্চক্খতো দিট্ঠদিব্বসম্পত্তিং পকাসেসি. তং সুত্ৰা মহাজনো কুসলকম্মং কত্ৰা যেভুয্যেন সগ্গে নিব্বত্তোতি.

২৯. দেৰপুত্তস্স ৰত্থুম্হি অযমানুপুব্বীকথা

ইতো পুব্বে নারদস্স কির সম্মাসম্বুদ্ধস্স কালে অযং দীপো অঞ্ঞতরেন নামেন পাকটো অহোসি, সো পনেকস্মিং কালে দুব্ভিক্খো অহোসি দুস্সস্সো, মহাছাতকভযং সত্তে পীল়েতি. তস্মিং সমযে নারদস্স ভগৰতো একো সাসনিকো সাৰকো অঞ্ঞতরস্মিং গামে পিণ্ডায চরিত্ৰা যথা ধোতপত্তোৰ নিক্খমি. অথঞ্ঞতরস্মিং গেহে মনুস্সা একং তণ্ডুলনাল়িংপোটলিকায বন্ধিত্ৰা উদকে পক্খিপিত্ৰা পচিত্ৰা উদকং গহেত্ৰা পিৰন্তো জীৰন্তি, তদা থেরং দিস্ৰা ৰন্দিত্ৰা পত্তং গহেত্ৰা তেন তণ্ডুলেন ভত্তং পচিত্ৰা পত্তে পক্খিপিত্ৰা থেরস্স অদংসু. অথ ¶ তেসং সদ্ধাবলেন সা উক্খলি ভত্তেন পরিপুণ্ণা অহোসি, তে তং অব্ভুতং দিস্ৰা অয্যস্স দিন্নদানে ৰিপাকো অজ্জেৰ নো দিট্ঠোতি সোমনস্সজাতা মহাজনং সন্নিপাতেত্ৰা তে ভত্তং ভোজেত্ৰা পচ্ছা সযং ভুঞ্জিংসু. ভত্তস্স গহিতগহিতট্ঠানং পূরতেৰ. ততো পট্ঠায তে সম্পত্তমহাজনস্স দানং দদন্তা আযুপরিযোসানে দেৰলোকে নিব্বত্তিংসু, অথ সো থেরো ভত্তং আদায গন্ত্ৰা অঞ্ঞতরস্মিং রুক্খমূলে নিসীদিত্ৰা ভুঞ্জিতুমারতি. তস্মিং কির রুক্খে নিব্বত্তো একো দেৰপুত্তো আহারেন কিলন্তো ভুঞ্জমানং থেরং দিস্ৰা অত্তভাৰং ৰিজহিত্ৰা মহল্লকৰেসেন তস্স সমীপে অট্ঠাসি. থেরো অনাৰজ্জিত্ৰাৰ ভুঞ্জতি. দেৰপুত্তো চরিমালোপং ঠপেত্ৰা ভুত্তকালে উক্কাসিত্ৰা অত্তানং ঠিতভাৰং জানাপেসি. থেরো তং দিস্ৰা ৰিপ্পটিসারি হুত্ৰা চরিমং ভত্থপিণ্ডং তস্স হত্থে ঠপেসি, ততো সো ভত্তপিণ্ডং গহেত্ৰা ঠিতো চিন্তেসি. ইতো কির মযা পুব্বে সমণব্রাহ্মণানং ৰা কপণদ্ধিকানং ৰা অন্তমসো কাকসুনখা দীনম্পি আহারং অদিন্নপুব্বং ভৰিস্সতি, তেনৰাহং দেৰো হুত্ৰাপি ভত্তং ন লভামি. হন্দাহং ইমং ভত্তপিণ্ডং থেরস্সেৰ দস্সামি, তং মে ভৰিস্সতি দীঘরত্তং হিতায সুখায চাতি. এৰঞ্চ পন চিন্তেত্ৰা ভত্তপিণ্ডে আসং পহায থেরং উপসঙ্কম্ম সামি দাসস্স ৰো অলং ইধ লোকেন সঙ্গহং. পরলোকেন মে সঙ্গহং করোথাতি ৰত্ৰা তস্স পত্তে ওকিরি. অথস্স ভত্থপিণ্ডং [ভত্থপিণ্ডং ইতিসব্বত্থ] পত্তে পতিতমত্তেযেৰ তিগাৰুতট্ঠানে দিব্বমযানি ভত্তভাজনানিপঞ্ঞাযিংসু. দেৰপুত্তো থেরং পঞ্চপতিট্ঠিতেন ৰন্দিত্ৰা ততো দিব্বভোজনং গহেত্ৰা পথমং দানং দত্ৰা পচ্ছা সযং ভুঞ্চি. ততো দেপুত্তো দুতিযদিৰসতো পট্ঠায থেরস্স চ সম্পত্তমহাজনস্স চ মহাদানং দেন্তো আযুপরিযোসানে ¶ ০ দেৰলোকে নিব্বত্তিত্ৰা ছসু কামসগ্গেসু অপরাপরং দিব্বসম্পত্তি মনুভৰমানো পদুমুত্তরস্স ভগৰতো কালে ততো চুতো বারাণসিযং অনেকৰিভৰস্স মিচ্ছাদিট্ঠিকস্স কুটুম্বিকস্স গেহে নিব্বত্তি. দেৰোতিস্স নামং অকংসু. অপরভাগে ৰিঞ্ঞুতং পত্তস্স তস্স মাতাপিতরো কালমকংসু. সোৰণ্ণমণিমুত্তাদিপূরিতকোট্ঠাগারাদযো ওলোকেত্ৰা মম মাতাপিতরো মিচ্ছাদিট্ঠিকত্তা ইতো দানাদিকিঞ্চিকম্মং অকরিত্ৰা পরলোকং গচ্ছন্তা কাকণিকমত্তম্পি অগহেত্ৰা গতা, অহং পন তং গহেত্ৰাৰ গমিস্সামীতি সন্নিট্ঠানং কত্ৰা ভেরিং চরাপেত্ৰা কপণদ্ধিকৰনিব্বকে সন্নিপাতেত্ৰা সত্তাহব্ভন্তরে সব্বং সাপতেয্যং দানমুখেন দত্ৰা অরঞ্ঞং পৰিসিত্ৰা ইসিপ্পব্বজ্জং পব্বজিত্ৰা কসিণপরিকম্মং কত্ৰা পঞ্চ ভিঞ্ঞা অট্ঠ সমাপত্তিযো নিব্বত্তেত্ৰা আকাসচারী অহোসি. অথ তস্মিংসমযে পদুমুত্তরো নাম ভগৰা হংসৰতীনগরে পটিৰসন্তো দেৰব্রহ্মাদিপরিৰুতো চতুসচ্চপটিসংযুত্তং ধম্মং দেসেন্তো নিসিন্নো হোতি, তদা সো তাপসো আকাসেন গচ্ছন্তো মহাজনসমাগমঞ্চ ভগৰতো সরীরতো নিক্খন্তছব্বণ্ণরংসিযো চ দিস্ৰা কিমেতংতি ৰিম্হিতো আকাসা ওতরিত্ৰা মহতিযা বুদ্ধলীল়ায নিসীদিত্ৰা ধম্মং দেসেন্তং ভগৰন্তং দিস্ৰা পসন্নমানসো পরিসন্তরে নিসিন্নো ধম্মং সুত্ৰা ভগৰন্তং ৰন্দিত্ৰা অত্তনো অস্সমমেৰ অগমাসি. অথ সো তত্থ যাৰতাযুকং ঠত্ৰা আযুপরিযোসানে তাৰতিংসভৰনে নিব্বত্তো তিংসকপ্পে দিব্বসম্পত্তিমনুভৰন্তো ছসু কামসগ্গেসু অপরাপরিযৰসেন সংসরি. একপঞ্ঞাসঅত্তভাৰে সক্কো দেৰরাজা অহোসি, এককৰীসতিঅত্তভাৰে চক্কৰত্তি হুত্ৰা মনুস্সসম্পত্তি মনুভৰিত্ৰা ইমস্মিংবুদ্ধুপ্পাদে ভগৰতি পরিনিব্বুতে সাৰত্থিযং অঞ্ঞতরস্মিং কুলগেহে নিব্বত্তিত্ৰা সত্তৰস্সিকো একং ভিক্খুং ধম্মং দেসেন্তং অদ্দস. দিস্ৰা তং উপসঙ্কমিত্ৰা ধম্মং সুত্ৰা অনিচ্চসঞ্ঞং ¶ পটিলভিত্ৰা তত্থ নিসিন্নোৰ অরহত্তং পাপুণি, ততো সো পত্তপটিসম্ভিদো অত্তনা কতপুঞ্ঞকম্মং ওলোকেন্তো তং পুব্বচরিযং ভিক্খূনং মজ্ঝে পকাসেন্তো আহ. তস্মা.

নারদো কির সম্বুদ্ধো, পুব্বে আসি নরুত্তমো;

লোকং দুক্খা পমোচেন্তো, দদন্তো অমতং পদং.

তস্মিং তু সমযে তস্স, সাৰকো ছিন্নবন্ধনো;

ভিক্খিত্ৰা দীপকে লদ্ধ, মাহারং পরিভুঞ্জিতুং.

রুক্খমূল মুপা গঞ্ছি, তত্থাসিং রুক্খদেৰতা;

বুভুক্খিতা উদিক্খন্তী, অট্ঠাসিং তস্স সন্তিকে.

অদাসি মে ভত্তপিণ্ডং, করুণাপূরিতন্তরো;

গহেত্ৰান ঠিতো পিণ্ডং, সহমানো খুদং তদা.

অদিন্নত্তা মযা পুব্বে, কিঞ্চি দানং সুপেসলে;

জিঘচ্ছাপীল়িতো হোমি, জাতোপি দেৰযোনিযং.

অজ্জ খেত্তং সুলদ্ধংমে, দেয্যধম্মোপি ৰিজ্জতি;

বীজমেত্থ চ রোপেমি, ভৰতো পরিমুত্তিযা.

ইতি চিন্তিয ৰন্দিত্ৰা, দাসস্স সামি ৰো অলং;

সঙ্গহং ইধ লোকস্মিং, করোথ পারলোকিকং.

ইতি ৰত্ৰা অদাসাহং, ভুঞ্চি সোপি দযাপরো;

তেনাহং পুঞ্ঞকম্মেন, সুধন্নমলভিং খণে.

ততো চুতো ছদেৰেসু, ৰিন্দন্তো মহতিংসিরিং;

চিরকালং ৰসিং তত্থ, দেৰিদ্ধীহি সমঙ্গিতা.

সতসহস্সে ইতো কপ্পে, পদুমুত্তরনামকো;

উপ্পজ্জি লোকনাযকো, ধম্মরাজা তথাগতো.

মহিদ্ধিকো ¶ তদা আসিং, তাপসো কাননে ৰনে;

সম্পত্তপঞ্চা ভিঞ্ঞাণো, আকাসেন চরামহং.

তদা কাসেন গচ্ছন্তো, রম্মে হংসৰতীপুরে;

বুদ্ধরংসিপরিক্খিত্তং, কেতুমালাৰিলাসিতং.

দেৰসঙ্ঘপরিব্বূল়্হং, দেসেন্তং অদ্দসং জিনং;

সো তং দিস্ৰান নভসা, ঠিতোহং পরিসন্তরে.

ধম্মং সুত্ৰা উদগ্গোহং, কালং কত্ৰান সত্থুনো;

ততো চুতো পপন্নোস্মি, তাৰতিংসে মনোরমে.

তিংসকপ্পসহস্সানি, চরন্তো দেৰমানুসে;

দুগ্গতিং নাভিজানামি, লভামি ৰিপুলং সুখং.

একপঞ্ঞাসতিক্খত্তুং, দেৰরজ্জমকারযিং;

অথেকৰীসতিক্খত্তুং, চক্কৰত্তী অহোসহং.

পদেসরজ্জং কাসাহং, বহুক্খত্তুং তহিং তহিং;

ইমস্মিং ভদ্দকে কপ্পে, নিব্বুতেতু [নিব্বুতেসু ইতিসব্বত্থ] তথাগতে.

চোদিতো পুঞ্ঞকম্মেন, সাৰত্থিপুরমুত্তমে;

উপ্পজ্জিত্ৰা কুলে সেট্ঠে, জাতিযা সত্তৰস্সিকো.

সুত্ৰা ধম্মং কথেন্তস্স, ভিক্খুস্সঞ্ঞতরস্সহং;

ভৰস্সন্তং করিত্ৰান, অরহত্তমপাপুণিং.

সুদিন্নং মে তদা দানং, সুস্সুতং ধম্মমুত্তমং;

দুক্খস্সন্তং অকাসাহং, তস্স কম্মস্স ৰাহসাতি.

এৰঞ্চ পন ৰত্ৰা বহূ জনে কুসলকম্মে নিযোজেসীতি.

লভন্তি সত্তা তিৰিধম্পি সম্পদং,

৩০. সীৰলিত্থেরস্স ৰত্থুম্হি অযমানুপুব্বীকথা

ইতো কির কপ্পসতসহস্সমত্থকে পদুমুত্তরো নাম সত্থা লোকে উদপাদি ধম্মদেসনায সত্তে অমতমহানিব্বাণং পাপেন্তো, তস্মিং সমযে ভগৰা হংসাৰতিযং সরাজিকায পরিসায মজ্ঝে একং ভিক্খুং লাভীনং অগ্গট্ঠানে ঠপেসি. তদা রাজা তং দিস্ৰা তং ঠানং কামযমানো বুদ্ধপমুখস্স সঙ্ঘস্স মহাদানং দত্ৰা ভগৰতো পাদমূলে সিরসা নিপজ্জি, তদাস্স ভগৰা অনাগতে গোতমস্স ভগৰতো সাসনে তং ঠানং লভিস্সসীতি ৰত্ৰা ব্যাকাসি. তং সুত্ৰা মুদিতো রাজা পুঞ্ঞানি কত্ৰা দেৰলোকে নিব্বত্তি. ততো অপরভাগে বারাণসিযং সেট্ঠিপুত্তো হুত্ৰা পচ্চেকবুদ্ধসহস্সং চতুপচ্চযদানেন যাৰজীৰং পটিজগ্গিত্ৰা দেৰলোকে নিব্বত্তো মহন্তং সম্পত্তি মনুভৰিত্ৰা ততো চুতো ৰিপস্সিস্স ভগৰতো কালে বন্ধুমতীনগরে অঞ্ঞতরস্মিং কুলগেহে নিব্বত্তি. সো তস্মিং সমযে সেনগুত্তট্ঠানে ঠত্ৰা রঞ্ঞো কম্মং করোতি, তদা নগরৰাসিনো উপাসকগণা ৰিপস্সীসম্মাসম্বুদ্ধং উপসঙ্কম্ম ৰন্দিত্ৰা ভগৰা ভন্তে সসাৰকো অম্হাকং অনুগ্গহং করোতূতি স্ৰাতনায নিমন্তেত্ৰা মহাদানং দত্ৰা সব্বে একচ্ছন্দা ভগৰন্ত মুদ্দিস্স মহারহং মহাপরিৰেণং কারাপেত্ৰা পরিৰেণমহে মহাদানং দদন্তা দানগ্গে অসুকং নাম ¶ নত্থীতি ন ৰত্তব্বন্তি ৰত্ৰা দানং পটিযাদেত্ৰা দানগ্গং ওলোকেন্তা নৰদধিঞ্চ পটলমধুঞ্চ অপস্সন্তা পুরিসে পক্কোসিত্ৰা সহস্সং দত্ৰা দধিমধুং খিপ্পং পরিযেসিত্ৰা আনেথাতি পেসেসুং, তে সহস্সং গহেত্ৰা দধিমধুং উপধারেতুং তত্থ তত্থ ৰিচরন্তা দ্ৰারন্তরে অট্ঠংসু, তদা অযং সেনগুত্তো রঞ্ঞো সভত্তং দধিমধুং আদায গচ্ছন্তো মহাদ্ৰারং সম্পাপুণি, অথ তে দধিমধুং দিস্ৰা ভো কহাপণং গহেত্ৰা ইমং দেহীতি যাচিংসু. তেন [তেনদস্সামি ইতিপিকত্তচি] ন দস্সামীতি ৰুত্তে যাৰসহস্সং ৰড্ঢেত্ৰা যাচিংসু. ততো সেনগুত্তো ইমং অপ্পগ্ঘং সহস্সেন যাচথ, কি মনেন করোথাতি পুচ্ছি, তেহি সম্বুদ্ধত্থাযাতি ৰুত্তে তেনহি অহমেৰ দস্সামীতি জীরমরিচাদীহি সক্খরমধুফাণিতাদযো যোজেত্ৰা দানগ্গং উপনামেসি. তং সত্থু আনুভাৰেন বুদ্ধপমুখস্স অট্ঠসট্ঠিভিক্খুসতসহস্সস্স পহোণকং অহোসি. ততো সো তেন পুঞ্ঞকম্মেন দেৰমনুস্সলোকেসু সম্পত্তি মনুভৰিত্ৰা অপরভাগে অম্হাকং ভগৰতো কালে কোলিযনগরে মহালিলিচ্ছৰিরঞ্ঞো উপনিস্সায সুপ্পিযায নাম অগ্গমহেসিযা কুচ্ছিস্মিং পটিসন্ধিং গণ্হি. সো সত্তমাসসত্তসংৰচ্ছরানি মাতুকুচ্ছিযং ৰসিত্ৰা সত্তদিৰসানি মূল়্হগব্ভো দুক্খমনুভৰি. মাতুকুচ্ছিতো নিক্খমন্তস্স তস্স মাতাপিতরো সীৰলীতি নাম মকংসু. এৰং মহাপুঞ্ঞস্স এত্তকং কালং মাতুকুচ্ছিম্হি দুক্খানুভৰনং অত্তনাৰ কতেন পাপবলেন অহোসি, সো কির অতীতে রাজা হুত্ৰা অত্তনো সপত্তরঞ্ঞা সদ্ধিং সঙ্গামেন্তো মাতরা সদ্ধিং মন্তেসি. সা নগরং রুন্ধিত্ৰা অমিত্তে গণ্হিতুং সক্কাতি উপায মদাসি, সোপি তস্সা ৰচনেন নগরং রুন্ধিত্ৰা সত্তমে দিৰসে অগ্গহেসি, তেন পাপকম্মবলেন মাতাপুত্তানং এৰং মহন্তং দুক্খং অহোসীতি. ততো ¶ সা পুত্তং ৰিজাযনকালে সত্তমে দিৰসে ভগৰন্তং অনুস্সরিত্ৰা সুখেন ভারং মুঞ্চি. তুট্ঠা সা সত্তমে দিৰসে বুদ্ধপমুখস্স ভিক্খুসঙ্ঘস্স মহাদানং অদাসি, অথস্সা পুত্তো সত্তৰস্সিককালে গেহা নিক্খম্ম সত্থারং দিস্ৰা পব্বজ্জং যাচি. সত্থা সারিপুত্তত্থেরস্স নিযোজেসি, ততো সারিপুত্তত্থেরেন উপজ্ঝাযেন মোগ্গল্লানমাচরিযং কত্ৰা পব্বজি, অথ সো খুরগ্গেযেৰ অরহত্তং পত্ৰা বুদ্ধসাসনং সোভেসি, সো পুব্বে কতপুঞ্ঞানুভাৰেন মহাপুঞ্ঞো অহোসি লাভীনঞ্চ অগ্গো. অথেকস্মিং সমযে ভগৰা রেৰতত্থেরং দস্সনায খদিরৰনৰিহারং গচ্ছন্তো তিংসভিক্খুসহস্সেহি সদ্ধিং তিংসযোজনিকং ছট্টিতকন্তারং সম্পাপুণি নিরূদকং অপ্পভক্খং. যেভুয্যেন দেৰতা সীৰলিত্থেরে পসন্না. তস্মা ভগৰা সীৰলিত্থেরং পুরতো চারিকং কত্ৰা দেৰতাহি কারাপিতে ৰিহারে ৰসন্তো দেৰতাহি সজ্জিতদানং পরিভুঞ্জন্তো রেৰতত্থেরং সংপাপুণিত্ৰা গতকম্মং নিট্ঠাপেত্ৰা জেতৰনমাগম্ম লাভীনং অগ্গট্ঠানে তং ঠপেসীতি. তেন ৰুত্তং অপদানে.

পদুমুত্তরো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

সীলং তস্স অসঙ্খ্যেয্যং, সমাধি ৰজিরূপমো [ৰজিরূপমা ইতিকত্থচি];

অসংখিযং ঞাণৰরং, ৰিমুত্তি চ অনোপমা.

মনুজামরনাগানং, ব্রহ্মানঞ্চ সমাগমে;

সমণব্রাহ্মণাকিণ্ণে, ধম্মং দেসেতি নাযকো.

সসাৰকং মহালাভিং, পুঞ্ঞৰন্তং জুতিন্ধরং,

ঠপেসি এতদগ্গম্হি, পরিসাসু ৰিসারদো.

তদাহং ¶ খত্তিযো আসিং, পুরে হংসৰতীৰ্হযে [হংসাৰতৰ্হযে ইতিসব্বত্থ];

সুত্ৰা জিনস্স তং ৰাক্যং, সাৰকস্স গুণং বহুং.

নিমন্তযিত্ৰা সত্তাহং, ভোজযিত্ৰা সসাৰকং;

মহাদানং দদিত্ৰান, তং ঠানমভিপত্থযিং.

তদা মং ৰিনতং পাদে, দিস্ৰান পুরিসাসভো;

সো সরেন মহাৰীরো, ইমং ৰচনমব্রৰী.

ততো জিনস্স ৰচনং, সোতুকামা মহাজনা;

দেৰদানৰগন্ধব্বা, ব্রহ্মানোচ মহিদ্ধিকা.

সমণব্রাহ্মণা চাপি, নমস্সিসুং কতঞ্জলী;

নমো তে পুরিসাজঞ্ঞ, নমো তে পুরিসুত্তম.

খত্তিযেন মহাদানং, দিন্নং সত্তাহকম্পি [সত্তাহকংপিতো ইতিপিকত্থচি] নো;

সোতুকামা ফলং তস্স, ব্যাকরোহি মহামুনে.

অপ্পমেয্যম্হি বুদ্ধস্মিং, গুণম্হি সুপ্পতিট্ঠিতা.

দক্খিণা দাযকং পত্ৰা, অপ্পমেয্যফলাৰহা;

অপি চে স মহাভোগো, ঠানং পত্থেতি মুত্তমং.

লাভী ৰিপুললাভীনং, যথা ভিক্খু সুদস্সনো;

তথাহংপি ভৰেয্যন্তি, লচ্ছতে তং অনাগতে.

সতসহস্সিতো কপ্পে, ওক্কাককুলসম্ভৰো;

গোতমোনাম নামেন, সত্থা লোকে ভৰিস্সতি.

তস্স ধম্মেসু দাযাদো, ওরসো ধম্মনিম্মিতো;

সীৰলি নাম নামেন, হেস্সতি সত্থুসাৰকো.

তেন ¶ কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসূপগো অহং.

ততোপরস্মিংসমযে, বারাণসিপুরুত্তমে;

সেট্ঠিপুত্তো অহং আসিং, অড্ঢপ্পত্তো মহাধনো.

সহস্সমত্তে পচ্চেক, নাযকে চ নিমন্তিয;

মধুরেনন্নপানেন, সন্তপ্পেসিংতদাদরো.

ততো চুতো ছকামগ্গে, অনুভোসিংমহাযসং;

দেৰচ্ছরাপরিৰুতো, পাসাদে রতনামযে.

এৰং অচিন্তিযা বুদ্ধা, বুদ্ধধম্মা অচিন্তিযা;

অচিন্তিযে পসন্নানং, ৰিপাকোপি অচিন্তিযো.

একনৰুতিতো কপ্পে, ৰিপস্সীনাম নাযকো;

উপ্পজ্জি চারুনযনো, সব্বধম্মৰিপস্সকো.

তদাহং বন্ধুমতিযা, কুলস্সঞ্ঞতরস্স চ;

দযিতো পত্থিতো পুত্তো, আসিং কম্মন্তব্যাৰটো.

তদা অঞ্ঞতরো পূগো, ৰিপস্সিস্স মহেসিনো;

পরিৰেণং অকারেসি, মহন্ত মিতি ৰিস্সুতং.

নিট্ঠিতে চ মহাদানং, দদং খজ্জকসংযুতং;

নৰং দধি মধুঞ্চেৰ, ৰিচিনং ন চ মদ্দস.

তদাহং তং গহেত্ৰান, নৰং দধি মধুম্পিচ,

কম্মসামিঘরং গচ্ছং, তমেনং [তমেসং ইতিসব্বত্থ] দান মদ্দসং.

সহস্সম্পি চ দত্ৰান, ন লতিংসু চ তং দ্ৰযং;

ততো এৰং ৰিচিন্তেসিং, নেতং হেস্সতি ওরকং.

যথা ¶ ইমে জনা সব্বে, সক্করোন্তি তথাগতং;

অহম্পি কারং কস্সামি, সসঙ্ঘে লোকনাযকে.

তদাহমেৰং চিন্তেত্ৰা, দধিংমধুঞ্চ একতো;

যোজেত্ৰা লোকনাথস্স, সসঙ্ঘস্স অদাসহং.

তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংস মগঞ্ছহং.

পুনাহং বারাণসিযং, রাজা হুত্ৰা মহাযসো;

সত্তুকস্স তদা রুদ্ধো, দ্ৰাররোধং অকারযিং.

ততো সপত্তিনো [সম্পত্তিনো; সপত্তানো ইতিচকত্থচি] রুদ্ধা, একাহং রক্খিতা অহুং;

ততো তস্স ৰিপাকেন, পাপুণিং নিরযং ভুসং.

পচ্ছিমে চ ভৰে দানি, জাতোহং কোলিযে পুরে;

সুপ্পৰাসা চ মে মাতা, মহালি লিচ্ছৰী পিতা.

খত্তিযে পুঞ্ঞকম্মেন, দ্ৰাররোধস্স ৰাহসা;

সত্তমাসে সত্তৰস্সে, ৰসিংকুচ্ছিম্হি দুক্খিতো.

সত্তাহং দ্ৰারমূল়্হোহং, মহাদুক্খসমপ্পিতো;

মাতা মে ছন্দদানেন, এৰ মাসি সুদুক্খিতা.

সুৰত্থিতোহং নিক্খন্তো, বুদ্ধেন অনুকম্পিতো;

নিক্খন্তদিৰসেযেৰ, পব্বজিং অনগারিযং.

উপজ্ঝা সারিপুত্তো মে, মোগ্গল্লানো মহিদ্ধিকো;

কেসে ওরোপযন্তো মে, অনুসাসি মহামতি.

কেসেসু ছিজ্জমানেসু [ছন্নমনেসু ইতিপিকত্থচি], অরহত্তমপাপুণীং;

দেৰো নাগা মনুস্সা চ, পচ্চযানু পনেন্তি মে.

পদুমুত্তরনামঞ্চ, ৰিপস্সিংচ ৰিনাযকং;

সংপূজযিং পমুদিতো, পচ্চযেহি ৰিসেসতো.

ততো ¶ তেসং ৰিপাকেন, কম্মানং ৰিপুলুত্তমং;

লাভং লভামি সব্বত্থ, ৰনে গামে জলে থলে.

রেৰতং দস্সনত্থায, যদা যাতি ৰিনাযকো;

তিংসভিক্খুসহস্সেহি, সহ লোকগ্গনাযকো.

তদা দেৰো পনীতেহি [পণীতেহি ইতিসব্বত্থ], মমত্থায মহামতি;

পচ্চযেহি মহাৰীরো, সসঙ্ঘো লোকনাযকো.

উপট্ঠিতো মযা বুদ্ধো, গন্ত্ৰা রেৰতমদ্দস;

ততো জেতৰনং গন্ত্ৰা, এতদগ্গে ঠপেসিমং.

লাভীনং সীৰলি অগ্গো, মম সিস্সেসু ভিক্খৰো;

সব্বেলোকহিতো সত্থা, কিত্তযী পরিসাসুমং.

কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

স্ৰাগতং ৰত মে আসি, বুদ্ধসেট্ঠস্স সন্তিকং;

তিস্সো ৰিজ্জা অনুপ্পত্তো, কতং বুদ্ধস্স সাসনং.

পটিসম্ভিদা চতস্সোপি, ৰিমোক্খা পিচ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনন্তি.

ইত্থং সুদং আযস্মা সীৰলিত্থেরো ইমা গাথাযো অভাসিত্থাতি.

পুঞ্ঞানুভাৰঞ্চ সিরিং সিরীমতং;

৩১. মহাসেনরঞ্ঞো ৰত্থুম্হি অযমানুপুব্বীকথা

ভগৰতি ¶ পরিনিব্বুতে পাটলিপুত্তনগরে মহাসেনো নাম রাজা রজ্জং কারেসি ধম্মিকো ধম্মরাজা. সো পন পিতুপিতামহাদীনং ধনরাসিং ওলোকেত্ৰা ইমে ইমং সাপতেয্যং পহায মচ্চুনো মুখমুপগতা. অহো সংসারিকানং অঞ্ঞাণতা. ধনং ঠপেত্ৰা অত্তনো ৰিনাসঞ্চ অত্তানং ঠপেত্ৰা ধনৰিনাসঞ্চ ন জানন্তীতি সম্পত্তিযা অধিগমঞ্চ ৰিনাসং চাতি সব্বং চিন্তেত্ৰা ধম্মঞ্চ সুত্ৰা পটিলদ্ধসদ্ধো দিৰসে দিৰসে দসসহস্সানং ভিক্খূনং মধুরেন অন্নপানেন সন্তপ্পেন্তো অনেকানি পুঞ্ঞানি উপচিনন্তো একদিৰসং রহো পটিসল্লিনো এৰং চিন্তেসি. এৰং রাজনিযোগেন জনস্স পীল়নং কত্ৰা দিন্নদানতো সহত্থেন কম্মং কত্ৰা লদ্ধেন দিন্নদানং মহপ্ফলং মহানিসংসং ভৰিস্সতি, এৰং মযা কাতব্বন্তি সো সুহদা মচ্চস্স রজ্জং নীয্যাতেত্ৰা অত্তনো কণিট্ঠিকং আদায কিঞ্চি অজানাপেত্ৰা অঞ্ঞতরৰেসেন নগরা নিক্খম্ম উত্তরমধুরং নাম নগরং অগমাসি, তত্থ মহাৰিভৰো একো সেট্ঠি পটিৰসতি, তে সেট্ঠিনো সমীপ মুপগম্ম ঠিতা. তেন কিমত্থাযাগতাতি ৰুত্তে রাজা তৰ গেহে ভতিযা কম্মং করিস্সামীতি ৰত্ৰা তেনানুঞ্ঞাতো তীণি ৰস্সানি কম্ম মকাসি, ততো একদিৰসং সেট্ঠি তে দিস্ৰা পক্কোসিত্ৰা অতীৰ তুম্হে সুখুমালতরা. তথাপি ইমস্মিং গেহে কম্মকরণেন চিরং ৰসিত্থ, এত্তকং কালং কিস্মিঞ্চি কম্মেপি কুসীতত্তং ন পঞ্ঞাযতি. পগেৰ অনাচারম্পি, যাগুভত্তং ঠপেত্ৰা অঞ্ঞং উপকারম্পি মম সন্তিকা নত্থি, কেনত্থেন কম্মং করোথাতি পুচ্ছি. রাজা তস্স ৰচনং সুত্ৰা ইমস্মিং জনপদে সালিনো মনাপভাৰো বহুসো সূযতি. তস্মা সালীনমত্থায ইধা গতম্হাতি আহ, তং সুত্ৰা তেসং তুট্ঠো সেট্ঠি সালীনং সকটসহস্সং অদাসি, রাজা সালিংলভিত্ৰা সেট্ঠিনো ¶ এৰমাহ, ভো ইমং অম্হাকং নগরং পাপেথাতি, তং সুত্ৰা সেট্ঠি সাধূতি ৰত্ৰা সালিপরিপুণ্ণসকটসহস্সং রঞ্ঞো নগরং পাপেসি, রাজা নগরং গন্ত্ৰা সেট্ঠিস্স নানাৰণ্ণৰত্থহিরঞ্ঞসুৰণ্ণাদীহি সকটে পূরেত্ৰা পটিপেসেত্ৰা মেত্তিং থিরং কত্ৰা আভতৰীহযো রাজগেহে সন্নিচযমকাসি, অথ রাজা কতিপাহচ্চযেন মুসলং পগ্গয্হ সহত্থেনেৰ ৰীহিং কোট্টেতি, কোট্টিতকোট্টিতং কণিট্ঠিকা পপ্ফোটেতি. এৰং উভোপি তণ্ডুলানং মহন্তং রাসিং কত্ৰা দারূদকাদযো আহরিত্ৰা অম্বিলভত্তং পচিত্ৰা রাজগেহে পঞ্চসতআসনানি পঞ্ঞাপেত্ৰা কালং উগ্ঘোসেসুং, আগচ্ছন্তু অয্যা অনুকম্পং উপাদায মম গেহে ভুঞ্জন্তূতি. তং সুত্ৰা পঞ্চসতা ভিক্খূ আকাসেন আগমিংসু, রাজা তে যাৰদত্থং পরিৰিসি, ততো তেসং অন্তরে পিযংগুদীপৰাসী একো মহাসিৰত্থেরো নাম ভত্তং গহেত্ৰা এতে মং পস্সন্তূতি অধিট্ঠহিত্ৰা আকাসেন পিযংগুদীপং গন্ত্ৰা ভত্তং পঞ্চসতানং ভিক্খূনং দত্ৰা পরিভুঞ্চি. তং তস্সানুভাৰেন সব্বেসং যাৰদত্থং অহোসি. এৰং অপ্পকেনাপি দেয্যধম্মেন সপ্পুরিসা দাযকানং মনং পসাদেত্ৰা পতিট্ঠং করোন্তীতি. ৰুত্তঞ্হি.

অপ্পকেনপি মেধাৰী, দাযকানং মনং পতি;

সদ্ধং ৰড্ঢেন্তি চন্দোৰ, রংসিনা খীরসাগরং.

অট্ঠানে ন নিযোজেন্তা, করোন্তা নেৰ সন্নিধিং;

পরিভোগ মকত্ৰান, নেৰ নাসেন্তি পচ্চযং.

ন পাপেন্তাচ থেয্যস্স, ন করোন্তা তথেৰিণং;

ৰিভজন্তি সুসীলেসু, সযং ভুত্ৰান সীলৰাতি.

অথ রাজা কণিট্ঠিকায সদ্ধিং থত্থেৰ ঠিতো পিযংগুদীপে পরিভুঞ্জন্তে পঞ্চসতভিক্খূ দিস্ৰা হট্ঠো উদগ্গো অহোসি. অথ ¶ তে অপরভাগে অত্তনা কতং দানৰরং অনুস্সরন্তা ন চিরেনেৰ উভোপি সোতাপন্না অহেসুংতি.

ন গণেন্তাত্তনো দুক্খং, ৰিহায মহতিং সিরিং;

আযতিংভৰমিচ্ছন্তা, সুজনেৰং সুভে রতা.

আযাসেন কতং পুঞ্ঞং, মহন্তফলদাযকং;

ইতি মন্ত্ৰান মেধাৰী, সহত্থেনেৰ তং করেতি.

৩২. সুৰণ্ণতিলকায ৰত্থুম্হি অযমানুপুব্বীকথা

লঙ্কাদীপে কির অনুরাধপুরনগরে একো মাতুগামো [একামাতুগামাতিৰা একামাতুগামোতিৰা কত্থচি] সদ্ধাসম্পন্না নিচ্চং অভযুত্তরচেতিযে পুপ্ফপূজং করোতি, অথেকদিৰসং সা অত্তনো ধীতুযা সদ্ধিং তস্মিং চেতিযে পুপ্ফপূজনত্থায [পুপ্ফপূজত্থায ইতিকত্থচি] গন্ত্ৰা পুপ্ফাসনসালায উদকং অপস্সন্তী ধীতু হত্থে পুপ্ফচঙ্গোটকং ঠপেত্ৰা ঘট মাদায পোক্খরণিং অগমাসি, ততো সা দারিকা মাতরি অনাগতাযযেৰ [অনাগতেযেৰ ইতিসব্বত্থ] অধোতাসনে পুপ্ফমুট্ঠিংগহেত্ৰা মণ্ডলং কত্ৰা পূজেত্ৰা এৰং পত্থনমকাসি. তথা হি.

মহাৰীরস্স ধীরস্স, সযম্ভুস্স মহেসিনো;

তিলোকগ্গস্স নাথস্স, ভগৰন্তস্স সত্থুনো.

য মহং পূজযিং পুপ্ফং, তস্স কম্মস্স ৰাহসা;

রূপীনং পৰরা হেস্সং, আরোহপরিণাহৰা.

মং ¶ দিস্ৰা পুরিসা সব্বে, মুচ্ছন্তু কামমুচ্ছিতা;

নিচ্ছরন্তু সরীরা মে, রংসিমালীৰ রংসিযো.

হদযঙ্গমা কণ্ণসুখা, মঞ্জুভাণী সুভা মম;

কিন্নরানং যথা ৰাণী, এৰমেৰ পৰত্ততূতি.

অথস্সা মাতা আগম্ম অধোতাসনে পূজিতানি পুপ্ফানি দিস্ৰা কস্মা চণ্ডালী অধোতাসনে ভগৰতো পুপ্ফানি পূজেসি, অযুত্তং তযা কতন্তি আহ, তং সুত্ৰা সা মাতুযা কুজ্ঝিত্ৰা ত্ৰং চণ্ডালীতি অক্কোসি, সা এত্তকং পুঞ্ঞাপুঞ্ঞং কত্ৰা অপরভাগে ততো চুতা জম্বুদীপে উত্তরমধুরাযং একস্স চণ্ডালগন্ধব্বব্রাহ্মণস্স ধীতা হুত্ৰা নিব্বত্তি, উত্তমরূপধরা অহোসি, তস্সা সরীরতো মেঘমুখতো ৰিজ্জুল্লতাৰিয রংসিযো নিচ্ছরন্তি. সমন্তা চতুহত্থট্ঠানে সরীরপ্পভায অন্ধকারে ৰিধমতি. মুখতো উপ্পলগন্ধো ৰাযতি, কাযতো চন্দনগন্ধো, তস্সা দ্ৰিন্নং থনান মন্তরে সুৰণ্ণৰণ্ণং একং তিলকং অহোসি, তেন বালসুরিযস্স ৰিয পভা নিচ্ছরতি. দিট্ঠদিট্ঠা যেভুয্যেন উম্মত্তা ৰিয কামমদেন ৰিসঞ্ঞিনো হোন্তি, অহো কুসলাকুসলানং আনুভাৰো. তথা হি.

যেন সা কোধসামাতু, চণ্ডালী ইতি ভাসিতা;

তেন সা আসি চণ্ডালী, জেগুচ্ছা হীনজাতিকা.

সল্লক্খেত্ৰান সম্বুদ্ধ, গুণং পূজেসি যং তদা;

তেন পুঞ্ঞানুভাৰেন, সা ভিরূপী মনোরমা.

যেন যেন পকারেন, পুঞ্ঞপাপানি যো করে;

তস্স তস্সানুরূপেন, মোরোৰ লভতে ফলং.

পাপেন চ তিরচ্ছানে, জাযন্তি কুসলেন তে;

ৰণ্ণপোক্খরতা হোতি, মোরানং কম্ম মীদিসন্তি.

ততো ¶ তস্সা মাতাপিতরো সুৰণ্ণতিলকাতি নাম মকংসু. তস্মিংকির নগরে মনুস্সা তস্সা রুপদস্সনেনচ সৰণেনচ সম্পত্তাপি চণ্ডালধীতা অযন্তি পরিভৰভযেন আৰাহং ন করোন্তি. অথ তস্মিং নগরে জেট্ঠচণ্ডালব্রাহ্মণস্স পুত্তো এতমত্থায তস্সা মাতাপিতুন্নং সন্তিকং ৰত্থাভরণগন্ধমালাদযো পেসেসি সুৰণ্ণতিলকং অম্হাকং দদন্তূতি, তে তং পৰত্তিং তস্সা আরোচেসুং. সাস্স জিগুচ্ছন্তী পরিহাস মকাসি. ততো ব্রাহ্মণস্স পুত্তো লজ্জিতো রঞ্ঞো সন্তিকং গন্ত্ৰা ৰীণং মুঞ্চেত্ৰা গাযমানো এৰমাহ.

এৰঞ্চ পন ৰত্ৰা দেৰ ইমস্মিংনগরে সুৰণ্ণতিলকা নামেকা চণ্ডালধীতা অত্থি, সা সমানজাতিকেহি পেসিতপণ্ণাকারং ন গণ্হাতি, কুলৰন্তেযেৰ পত্থেতি, কদা নাম কাকী সুৰণ্ণহংসেন সমাগচ্ছতি দেৰাতি. রাজা তং সুত্ৰা তস্সা পিতরং পক্কোসাপেত্ৰা তমত্থং ৰত্ৰা সচ্চং ভণেতি পুচ্ছি, সোপি সচ্চং দেৰ, সা জাতিসম্পন্নমেৰ কামেতীতি আহ. রাজা এৰং সতি ভণে পঞ্চমধুরনগরে উদ্দাল়ব্রাহ্মণো নাম অত্থি, সো জাতিসম্পন্নো মাতিতোচ পিতিতোচ অনুপক্কুট্ঠো ¶ , জেগুচ্ছা পটিক্কূলা এতাতি মাতুগামেন সদ্ধিং ন সংৰসতি. অত্তনো গেহতো রাজগেহং গচ্ছন্তোচ আগচ্ছন্তো চ সোল়সখীরোদকঘটেহি মগ্গে সিঞ্চাপেসি. মাতুগামে দিস্ৰা কালকণ্ণী মযা দিট্ঠাতি খীরোদকেন মুখং ধোৰতি. তৰ ধীতা সক্কোন্তী তেন সদ্ধিং সংৰসতু, এতমত্থং তৰ ধীতরং কথেহীতি আহ, সোপি তং সুত্ৰা গেহং গন্ত্ৰা ধীতরং পক্কোসিত্ৰা রঞ্ঞা ৰুত্তনিযামেনেৰ তস্সা কথেসি. তায তং সুত্ৰা সক্কোন্তী অহং উদ্দাল়ব্রাহ্মণেন সদ্ধিং ৰসিস্সামি, মা তুম্হে চিন্তেথ, পপঞ্চম্পি মা করোথ, পাতোৰ গমিস্সামীতি ৰুত্তে পিতা পনস্সা সাধূতি সহস্সগ্ঘনকচিত্তকম্বলকঞ্চুকেন ধীতু সরীরং পারুপাপেত্ৰা ৰীণাদিতুরিযভণ্ডানি গাহাপেত্ৰা ধীতুযা সদ্ধিং অদ্ধানমগ্গং পটিপজ্জি. গচ্ছন্তো অন্তরামগ্গে অঞ্ঞতরস্মিং নগরে রঞ্ঞো গন্ধব্বং করোন্তো ধীতরং পিট্ঠিপস্সে নিসীদাপেত্ৰা গন্ধব্বমকাসি. অথস্স পিট্ঠিপস্সনিসিন্না সুৰণ্ণতিলকা নযনকোটিযা দিট্ঠিং পাপেন্তী সরসেন তং ওলোকেত্ৰা পারুতকঞ্চুকং কিঞ্চি অপনেত্ৰা সরীরপ্পভং পঞ্ঞাপেসি, রাজা পনস্সা সরীরপ্পভংচ রূপসম্পদংচ দিস্ৰা কামাতুরো ৰিগতসঞ্ঞো সম্মূল়্হো হুত্ৰা মুহুত্তেন পটিলদ্ধস্সাসো তস্সা সস্সামিকাস্সামিকভাৰং পুচ্ছিত্ৰা চণ্ডালধীতাতি সুত্ৰা পরিভৰভযেন তং আনেতু মসক্কোন্তো এৰরূপং ৰণ্ণপোক্খরসম্পন্নং ইত্থিরতনং অলভন্তস্স মে কো অত্থো জীৰিতেনাতি সোচন্তো পরিদেৰন্তো কামমুচ্ছিতো কত্তব্বা কত্তব্বং অজানন্তো অসিং গহেত্ৰা অত্তনো সীসং সযমেৰ ছিন্দিত্ৰা কাল মকাসি. এৰমেৰ অন্তরামগ্গে পঞ্চরাজানো তস্সা রূপসম্পত্তিমদমত্তা অসিনা ছিন্নসীসা জীৰিতক্খযং পাপুণিংসু. তথা হি সত্তা হিরঞ্ঞসুৰণ্ণদাসিদাস পুত্তদারাদীসু [পুত্তদারাদীহি ইতিসব্বত্থ] পিযং নিস্সায কামেন মুচ্ছিতা অনযব্যসনং পাপুণন্তীতি. ৰুত্তঞ্হেতং ভগৰতা.

ততো সো অনুক্কমেন পঞ্চমধুরনগরং গন্ত্ৰা অত্তনো আগতভাৰং রঞ্ঞা কথাপেত্ৰা তেন অনুঞ্ঞাতো গন্ত্ৰা রাজানং অদ্দস. তদা উদ্দাল়ব্রাহ্মণো রঞ্ঞো অৰিদূরে কম্বলভদ্দপীঠে নিসিন্নো হোতি, গন্ধব্বব্রাহ্মণোপি ধীতুযা সদ্ধিং গন্ধব্বং কুরুমানো নিসীদি. তস্মিংখণে পিতু পিট্ঠিপস্সে নিসিন্না সুৰণ্ণতিলকা উদ্দাল়ব্রাহ্মণো কতমোতি পুচ্ছিত্ৰা এতস্মিং ভদ্দপীঠে নিসিন্নোং এসোতি সুত্ৰা নিলামললোচনেহি তং ওলোকন্তি দসনরংসিনা সম্ভিন্নসুরত্তাধরেন মন্দহসিতং ¶ করোন্তী তং ওলোকেত্ৰা পারুতকঞ্চুকং অপনেত্ৰা সরীরপ্পভং ৰিস্সজ্জেসি. তং দিস্ৰা ব্রাহ্মণো উম্মত্তো সোকেন পরিদড্ঢগত্তো উণ্হৰাতেন পূরিতমুখনাসো অস্সুনা কিলিন্ননেত্তো ৰিসঞ্ঞী অহোসি. ততো সো মুহুত্তেন লদ্ধস্সাসো রোগীৰিয রঞ্ঞো সকাসা অপসরন্তো অত্তনো গেহং গন্ত্ৰা সুহদে পক্কোসিত্ৰা তেসং এৰমাহ. ভৰন্তেত্থ.

যো গুণং ভাসতে যস্স, অগুণঞ্চ নিগূহতি;

পটিসেধেত্য [পটিসেধেতিকত্তব্বা ইতিসব্বত্থ] কত্তব্বা, সো মিত্তো সোচ ঞাতকো.

সুৰণ্ণতিলকানাম, ললনা কামলালযা;

নীলক্খিচণ্ডকণ্ডেহি, ৰিখণ্ডেসি মনো মম.

তস্সা মুখম্বুজে সত্তা, মম নেত্তমধুব্বতা,

অপ্পম্পিন সরন্তামং, তত্থেৰা ভিরমন্তি তে.

সহেৰ তেহি মে চিত্তং, গতং উল্লংঘিযুদ্ধতো;

লজ্জাগম্ভীরপরিখং, ধিতিপাকারমুগ্গতং.

সম্মুয্হামি পমুয্হামি, সব্বা মুয্হন্তি মে দিসা;

তস্স মে সরণং হোথ, করোথ মম সঙ্গহন্তি.

যং ত্ৰমাচরিয পত্থেসি, চণ্ডালী সা অসঙ্গমা;

কিন্নু মীল়্হেন সংযোগো, চন্দনস্স কদা সিযা.

অগম্মগমনা ¶ যাতি, নরানং দূরতো সিরী;

কিত্তিচাযু বলং বুদ্ধি, অযসংচ স গচ্ছতীতি.

ন পরিচ্চজতি লোকোযং, অমেজ্ঝে মণিমুত্তমং;

থীরতনং যুৰাণী চ, দুক্কুলা অপি গাহিযাতি.

এৰঞ্চ পন ৰত্ৰা তস্সা সস্সামিকাস্সামিকভাৰং ঞত্ৰা আনেথাতি আহ, তে তথা অকংসু. ততো ব্রাহ্মণো তায গেহং আগতকালতো পট্ঠায চত্তারো মাসে রঞ্ঞো উপট্ঠানং নেৰ অগমাসি. তস্স পন ব্রহ্মণস্স সন্তিকে পঞ্চসতরাজকুমারা নানাৰিধানি সিপ্পানি উগ্গণ্হন্তি. তে তং কারণং ঞত্ৰা সুৰণ্ণতিলকায ৰিজ্জমানায অম্হাকং সিপ্পুগ্গহণস্স অন্তরাযো ভৰিস্সতি, যেন কেনচি উপাযেন এতং মারেতুং ৰট্টতীতি, চিন্তেত্ৰা তে হত্থা চরিযং পক্কোসিত্ৰা লঞ্জং দত্ৰা এৰমাহংসু, হত্থিং সুরায মত্তং কত্ৰা সুৰণ্ণতিলকং মারেহীতি. ততো তে সব্বে রাজঙ্গণে সন্নিপতিত্ৰা দূতং পাহেসুং, আচরিযং দট্ঠুকামম্হাতি. ততো ব্রাহ্মণেন আগন্ত্ৰা নিসিন্নেন পটিসন্থারং কত্ৰা আচরিয আচরিযানিং পস্সিতুকামম্হাতি আহংসু. অথ সো সুৰণ্ণতিলকং গহেত্ৰা আগচ্ছথাতি মনুস্সে পেসেসি. তে তথা করিংসু, অথ তস্সা ৰীথিমজ্ঝং সম্পত্তকালে হত্থিং ৰিস্সজ্জাপেসুং. সো সোণ্ডায ভূমিযং পহরন্তো [পহরন্তোউপধাৰিত্ৰা ইতিকত্থচি] গচ্ছন্তো উপধাৰিত্ৰা সোণ্ডেন তং উক্খিপিত্ৰা কুম্ভে নিসীদাপেসি. ততো রাজানো তথা তং মারাপেতু মসক্কোন্তা পুন দিৰসে মনুস্সে পযোজেত্ৰা রত্তিযং মারাপেসুং. ব্রাহ্মণোপি এৰরূপং ইত্থিং অলসিত্ৰা জীৰনতো মতমেৰ [মতংমেসেয্যো ইতিকত্থচি] সেয্যোতি সোচন্তো পরিদেৰন্তো রাজঙ্গণে দারুচিতকং কারাপেত্ৰা অগ্গিংপৰিসিত্ৰা ¶ মতোতি. এৰং মাতুগামৰসঙ্গতা মহন্তং অনযব্যসনঞ্চ মরণঞ্চ পাপুণন্তীতি. ৰুত্তঞ্হেতং ভগৰতা.

মাযাৰেসা [মাযাচেসা ইতিকত্থচি] মরীচীৰ,

ধীসম্পযুত্তং [ধিতিসম্পযুত্তং ইতিকত্থচি] কুসলং করোন্তা,

৩৩. কপণায ৰত্থুম্হি অযমানুপুব্বীকথা

ভগৰতি পরিনিব্বুতে জম্বুদীপে তত্থ তত্থ ভিক্খুভিক্খুণিযো চ উপাসকউপাসিকাযো চ জযমহাবোধিং ৰন্দিস্সামীতি যেভুয্যেন গন্ত্ৰা ৰন্দন্তি. অথা পরভাগে বহূ ভিক্খূ সঙ্গম্ম মহাবোধিং ৰন্দনত্থায গচ্ছন্তা অঞ্ঞতরস্মিং গামকে ভিক্খায চরিত্ৰা আসনসালং গন্ত্ৰা কতভত্তকিচ্চা থোকং ৰিস্সমিংসু, তদা তত্থ একা কপণা দুগ্গতিত্থী তথা নিসিন্নভিক্খূ দিস্ৰা উপসঙ্কমিত্ৰা পঞ্চপতিট্ঠিতেন ৰন্দিত্ৰা একমন্তে ঠিতা অয্যা কুহিং গচ্ছন্তীতি পুচ্ছি. ভিক্খূ তং সুত্ৰা জযমহাবোধিস্স আনুভাৰঞ্চ তং ৰন্দনত্থায অত্তানং গমনঞ্চ কথেন্তা এৰমাহংসু.

যত্থাসীনো ¶ জিনো জেসি, সসেনং মকরদ্ধজং;

হন্ত্ৰা কিলেসসেনঞ্চ, বুদ্ধো আসি নিরুত্তরো.

যং পূজেসি মহাৰীরো, ঠিতো পদ মকোপযং;

সত্তরত্তিন্দিৰং নেত্ত, নীলনীরজরংসিনা.

সুরাসুরনরাদীনং, নেত্তালি পাল়িপাতনা;

মেচকাকারপত্তেহি, সিখণ্ডীৰিয ভাতি যো.

সুরপাদপোৰ সত্তানং, যং তিট্ঠতি মহীতলে;

ইহ লোকে পরত্তে চ, দদন্তো ইচ্ছিতিচ্ছিতং.

যস্স পুরাণপণ্ণম্পি, পতিতং যো নরো ইধ;

পূজেতি তস্স সো দেতি, ভৰভোগং মহীরুহো.

গন্ধমালেহি সলিলেহি, যমুপাসতি সদা নরো;

অজ্ঝত্তঞ্চ বহিদ্ধা চ, দুরিতং সো নিহঞ্ঞতি.

তং সুত্ৰা উদগ্গা সোমনস্সজাতা ভিক্খূনং এৰমাহ. অহং ভন্তে পরকুলে ভতিযা কম্মং করোন্তী দুক্খেন কসিরেন জীৰিকং কপ্পেমি. স্ৰাতনায মে তণ্ডুলনালিপি [ভণ্ডুলনাম্প ইতিসব্বত্থ] নত্থি, পগেৰ অঞ্ঞং ধনং, ইমং ৰিনা অঞ্ঞং সাটকম্পি নত্থি, কস্মা পুব্বে অকতপুঞ্ঞত্তা, তস্মা ইমং ভন্তে সাটকং মমানুগ্গহায বোধিম্হি ধজং বন্ধথাতি যাচিত্ৰা সাটকং ধোৰিত্ৰা তেসং অদাসি. ভিক্খূপি তস্সানুগ্গহায তং গহেত্ৰা অগমংসু. সা সাটকং দত্ৰা পীতিপামোজ্জমানসা গেহং গন্ত্ৰা তদহেৰ রত্তিযা মজ্ঝিমযামে সত্থকৰাতেন উপহতা কালং কত্ৰা তেসং ¶ ভিক্খূনং গমনমগ্গে একস্মিং রমণীযে ৰনসণ্ডে ভুম্মদেৰতা হুত্ৰা নিব্বত্তী, অথস্সা পুঞ্ঞানুভাৰেন তিযোজনিকে ঠানে দিব্বকপ্পরুক্খা পাতুরহংসু, তত্ত তত্ত নানাৰিরাগধজপতাকা ওলম্বন্তি. দেৰপুত্তা চ দেৰধীতরো চ সব্বাভরণৰিভূসিতা তথেৰ ধজপতাকাদযো গহেত্ৰা কীল়ন্তি. নচ্চগীতাদিনেকানি অচ্ছরিযানি পযোজেন্তি. অথ দুতিযদিৰসে তেপি ভিক্খূ বোধিমণ্ডলং গচ্ছন্তা সাযণ্হে তং ঠানং পত্ৰা অজ্জ ইমস্মিং ৰনসণ্ডে ৰসিত্ৰা গমিস্সামাতি তত্থ ৰাসং উপগমিংসু, ততো তে রত্তিভাগে নানাৰণ্ণধজে চ দেৰতাহি পযোজিযমানা গীতৰাদিতাদযো চ তিযোজনট্ঠানে কপ্পরুক্খানি চ ইদং সব্বং দেৰিস্সরিযং তস্সানুভাৰেন নিব্বত্তভাৰং দিস্ৰা ৰিম্হিতমানসা দেৰধীতরং আমন্তেত্ৰা ত্ৰং কেন কম্মেন ইধ নিব্বত্তাতি পুচ্ছিংসু. সা ভিক্খূ ৰন্দিত্ৰা অঞ্জলিং পগ্গয্হ ঠিতা ভন্তে মং ন সঞ্জানিত্থাতি আহ. ভিক্খূহি ন মযং সঞ্জানাম ভগিনীতি ৰুত্তে সা অত্তনো সভাৰং কথেন্তী এৰমাহ.

হীয্যো আসনসালায, নিসীদিত্থ সমাগতা;

তুম্হকং সন্তিকং গম্ম, যা ৰরাকীভিৰাদযি.

যা বোধিং পূজনত্থায, ৰত্থকং পটিপাদযি;

সাহং হীয্যো চুতা আসিং, রত্তিযং ব্যাধিপীল়িতা.

নানাসম্পত্তিসংযুত্তা, নানাভূসনভূসিতা;

ৰিমানে রতনা কিণ্ণে, জাতাহং এত্থ কাননে.

হীয্যো পস্সিত্থ মে গত্তং, রজোজল্লেহি সংকুলং;

অজ্জ পস্সথ মে গত্তং, ৰণ্ণৰন্তং পভস্সরং.

হীয্যো পস্সিত্থ মে ভন্তে, নিৰত্থং মলিনম্বরং;

অজ্জ পস্সথ মে ভন্তে, দিব্বমম্বরমুত্তমং.

ৰিকিণ্ণফলিতগ্গেহি ¶ , কেসেহি ৰিরলা কুলং;

ঊকাগূথপটিক্কূলং, হীয্যো আসিসিরং মম.

অজ্জ তং পরিৰত্তিত্ৰা, মম পুঞ্ঞানুভাৰতো;

সুনীলমুদুধম্মিল্লং, কুসুমা ভরণভূসিতং.

পুরা মে সকসীসেন, ৰহিতং দারূ দকাদিকং;

পুঞ্ঞেনাহং অজ্জ মালা, ভারং সীসে সমুব্বহে.

ধজত্থায মযা হীয্যো, পদিন্নং থূলসাটকং;

অজ্জ নিব্বত্তি মে ভোন্তো, মহন্তং দিব্বসম্পদং.

জানমানেন কত্তব্বং, দানাদীসু মহপ্ফলং;

দেৰলোকে মনুস্সেসু, সুখদং দান মুত্তমন্তি.

তং সুত্ৰা সব্বে ভিক্খূ অচ্ছরিযব্ভুতচিত্তা অহেসুং. সা দেৰতা তস্সা রত্তিযা অচ্চযেন ভিক্খূ নিমন্তেত্ৰা দিব্বেহি খজ্জভোজ্জেহি সহত্থা সন্তপ্পেত্ৰা তেহি সদ্ধিং আগচ্ছন্তী অন্তরামগ্গে দানং দদমানা মহাবোধিং গন্ত্ৰা সব্বেহি ধজপতাকা দীহি চ নানাৰিধৰণ্ণগন্ধসম্পন্নপুপ্ফেহি চ দীপধূপেহি চ বোধিং পূজেত্ৰা ভিক্খূনং চীৰরত্থায দিব্বৰত্থানি দত্ৰা আগম্ম তস্মিংযেৰ ৰনসণ্ডে ৰসন্তী নানাৰিধানি পুঞ্ঞানি কত্ৰা তাৰতিংসভৰনে নিব্বত্তি. ভিক্খূপি তং অচ্ছরিযং তত্থ তত্থ পকাসেন্তা বহূজনে পুঞ্ঞকম্মে নিযোজেসুংতি.

পূজেত্ৰ দিব্বৰিভৰং অলভীতি ঞত্ৰা,

পূজাপরা ভৰথ ৰত্থুসু তীসু সম্মাতি.

৩৪. ইন্দগুত্তত্থেরস্স ৰত্থুম্হি অযমানুপুব্বীকথা

অম্হাকং ভগৰতো পরিনিব্বাণতো ওরভাগে জম্বুদীপে কির পাটলিপুত্তং নাম নগরং অহোসি. তত্থ ধম্মাসোকো নাম মহিদ্ধিকো মহানুভাৰো আণাচক্কৰত্তি রাজা রজ্জং কারেতি. উদ্ধং আকাসতো হেট্ঠা পথৰিযা যোজনপ্পমাণে সকলজম্বূদীপে তস্স আণা পৰত্ততি, তদা সকলজম্বুদীপৰাসিনো চ চতুরাসীতি নগরসহস্সে রাজানো চ অত্তনো অত্তনো বলৰাহনে গহেত্ৰা আগম্ম ধম্মাসোকমহারঞ্ঞো উপট্ঠানং করোন্তি. তস্মিং সমযে দেৰপুত্তনগরে দেৰপুত্তো নাম মহারাজা অত্তনো বলৰাহনং গহেত্ৰা রঞ্ঞো উপট্ঠানং অগমাসি. ধম্মাসোকো দেৰপুত্তমহারাজানং দিস্ৰা মধুরপটিসন্থারং কত্ৰা তুম্হাকং রট্ঠে বহুস্সুতা আগতাগমা মহাগুণৰন্তা অয্যা অত্থীতি পুচ্ছি. তং সুত্ৰা দেৰপুত্তরাজা অত্থি দেৰ তস্মিং নগরে সীহকুম্ভকং নাম মহাৰিহারং. তত্থ অনেকসহস্সভিক্খূ ৰিহরন্তি সীলৰন্তা অপ্পিচ্ছা সন্তুট্ঠা ৰিৰেককামিনো. তেসু সাট্ঠকথাতিপিটকধরো ইন্দগুত্তত্থেরো নাম তেসং পামোক্খো অহোসি. সো অনেকপরিযাযেন সনরামরানং ভিক্খূনং ধম্মংৰণ্ণেতি. গুণৰা অত্তনো গুণং নিস্সায লোকে পাকটোতি. তং সুত্ৰা রাজা তুট্ঠমানসো থেরং পস্সিতুকামো হুত্ৰা সম্ম ত্ৰমেৰ গন্ত্ৰা থেরং যাচিত্ৰা ইধা নেহীতি আহ. তং সুত্ৰা দেৰপুত্তরাজা অত্তনো হত্থস্সবলৰাহনা দিমহা সেনঙ্গপরিৰুতো ইন্দগুত্তত্থেরস্স সন্তিকং গন্ত্ৰা ৰন্দিত্ৰা অয্য অয্যং ধম্মাসোকমহারাজা দট্ঠুকামোতি আহ. থেরেন সাধূতি সম্পটিচ্ছিতে রাজা থেরেন সম্পটিচ্ছিতভাৰং ধম্মাসোকমহারাজিনো পেসেসি. ততো ধম্মাসোকমহারাজা সোমনস্সপ্পত্তো অত্তনো আণাপৰত্তিতট্ঠানে রাজূনং সাসনং পেসেসি. সব্বেৰ থেরাগমনমগ্গং ¶ অলঙ্করোন্তূতি. অথ তে রাজানো তুট্ঠপহট্ঠা অত্তনো অত্তনো নগরে ভেরিং চরাপেত্ৰা দেৰপুত্তনগরতো যাৰ পাটলিপুত্তনগরং এত্থন্তরে পঞ্চপণ্ণাসযোজনিকং মগ্গং ৰিসমং সমং করোন্তো দেৰতানং দিব্বৰীথিমিৰ অলঙ্করিত্ৰা ধম্মাসোকমহানরিন্দস্স এৰং সাসনং পেসেসুং. ভৰন্তেত্থ.

ইন্দগুত্তমহাথের, সামিনো গমনায নো;

মগ্গং অলঙ্করোন্তূতি, মহারাজেন পেসিতং.

ততো তে অপনেত্ৰান, পাসাণকণ্টকাদিকং;

ৰিসমং সমং করিত্ৰান, সম্মজ্জিত্ৰান সাধুকং.

ধোতমুত্তা সমাভাসা, ওকিরিত্ৰান ৰালুকা;

উস্সাপিতা তত্থ তত্থ, দুস্সতোরণপন্তিযো.

কলধোতহেমরম্ভাদি, নানাতোরণপন্তিযো;

তথা পুপ্ফমযা নেক, তোরণূপরিতোরণা.

তেসু তেসুচ ঠানেসু, সঙ্খতা কুসুমগ্ঘিকা;

তথেৰ গন্ধতেলেহি, দীপিতা দীপপন্তিযো.

পদুমুপ্পলসন্নীর, পুপ্ফপল্লৰ লঙ্কতা;

ঠপিতা ঘটমালাযো, পুণ্ণা সোগন্ধৰারিহি.

নিলপীতা দিসম্ভিন্ন, পতাকাহি ধজেহি চ;

মগ্গস্স উভতো পস্সে, ৰনমাসি সমাকুলং.

কেতৰো উগ্গতা তত্থ, মন্দমন্দসমীরণা;

অৰ্হযন্তাৰ সোভন্তি, ব্রহ্মোরগসুরাদযো.

নাগচম্পপুন্নাগ, কেতকীৰকুলাদিহি;

পদুমুপ্পলা দিজলজেহি, মালতী কুসুমা দিহি.

মালাদামেহি ¶ নেকেহি, মগ্গমাসি ৰিচিত্তকং;

পত্থরিত্ৰা পাদপটে, সিত্তসম্মত্তভূমিযং.

লাজাদিপঞ্চপুপ্ফানি, ৰিকিরিংসু মনোরমং;

অলঙ্করিত্ৰা হত্তস্সা, কুসুমা ভরণাদিহি.

মগ্গালঙ্করণত্থায, ঠপিতাসুং ততো ততো;

তেসু তেসু চ ঠানেসু, ভেরিমণ্ডলমজ্ঝগা.

নচ্চন্তি চাতুরা নারী, রসভাৰনিরন্তরা;

কংসৰংসাদিপগ্গয্হ, ৰজ্জেন্তানেকতন্তিযো.

গাযন্তি মধুরং গীতং, গাযন্তেত্থ লযান্ৰিতং;

মগ্গোসো সাধুৰাদেহি, ভেরিতন্তিনদেহিচ.

করীনং কোঞ্চনাদেহি, হযানং হেসিতেহি চ;

নেকৰিটঙ্কসঙ্ঘেহি, সো করীহি সমাকুলো.

মগ্গস্স উভতো পস্সে, দেৰকঞ্ঞূপমা সুভা;

মালাকলাপে পগ্গয্হ, তিট্ঠন্তি তুট্ঠমানসা.

তথা পুণ্ণঘটে গয্হ, পদুমুপ্পলসংকুলে,

অট্ঠমঙ্গলমুগ্গয্হ, তিট্ঠন্তি পমদা তহিং.

সীতলূদকসম্পন্ন, পপাহি সমলঙ্কতা;

সিনানত্থং খতা আসুং, পোক্খরঞ্ঞো তহিংতহিং.

তহিংতহিংকতা আসুং, দানসালা মনোরমা;

নিচিতাসুমনেকানি, দানোপকরণা তহিং.

এৰং নেকৰিধা পূজা, অম্হেহি পটিপাদিতা;

ঠপেত্ৰান মহাগঙ্গং, তং জানাতু মহীপতীতি.

তং সুত্ৰা অসোকমহারাজা গঙ্গং অলঙ্করোথাতি সোল়সযক্খে পেসেসি, তে সপরিৰারা তত্থ গন্ত্ৰা অত্তনো ¶ আনুভাৰেন গঙ্গায অন্তো তিগাৰুতট্ঠানে উদুক্খলপাসাণে ঠপেসুং. ঠপেত্ৰা থম্ভে উস্সাপেত্ৰা তুলাসংঘাটে দত্ৰা হিমৰন্ততো রত্তচন্দনসারে আহরিত্ৰা পদরে সন্থরিত্ৰা অনেকেহি পূজাৰিধানেহি অলঙ্করিত্ৰা রঞ্ঞো এৰং সাসনং পেসেসুং. ভৰন্তেত্থ.

যমত্থায মযং সব্বে, মহারাজেন পেসিতা;

অম্হেহি দানি তং সব্বং, কতমেৰ সুণোথ তং.

গাৰুতত্তযগম্ভীরং, গঙ্গং যোজনৰিত্থতং;

থম্ভে পতিট্ঠপেত্ৰান, অনগ্ঘং রত্তচন্দনং.

হিমৰন্ততো হরিত্ৰান, সেতুং তত্থ সুমাপিতং;

তোরণা চ উভো পস্সে, রতনেহি সুনিম্মিতা.

পুণ্ণকুম্ভদ্ধজা চেৰ, পদীপাৰলিযো তথা;

উভো পস্সেসু রতনানি, মাপেত্ৰালম্বনানিচ.

সুৰণ্ণমণিমুত্তাদি, দামেহি সমলঙ্কতা;

ৰালুকত্থায ওকিণ্ণা, ধোতমুত্তা পভস্সরা.

তেসু তেসু চ ঠানেসু, ঠপিতাসুং মহামণী;

নানারাগৰিতানেহি, সোভিতা সেতুনো পরি.

ওলম্বিতাসুং তত্থেৰ, দিব্বাদিকুসুমাদযো;

নিট্ঠিতং ইধ কাতব্ব, যুত্তং পূজাৰিধিংতু নো;

দেৰোতং পটিজানাতু, ইতি ৰত্ৰান পেসযুংতি.

তম্পি সুত্ৰা অসোকো মহারাজা তুম্হেৰ থেরং ইধানেথাতি তেসংযেৰ সাসনং পটিপেসেসি, তে সাধূতি ইন্দগুত্তত্থেরস্স সন্তিকং গন্ত্ৰা ৰন্দিত্ৰা ভন্তে পাটলিপুত্তনগরস্স গমনায কালোতি আহংসু, ততো থেরো সট্ঠিসহস্সমত্তেহি ¶ ভিক্খুসঙ্ঘেহি পরিৰুতো পঞ্চপণ্ণাসযোজনমগ্গং পটিপজ্জি. অথাপরং দেৰপুত্তনগরৰাসিনো অনেকৰিধমালাগন্ধৰাসচুণ্ণদ্ধজপতাকাদীহি অনেকেহি তালাৰচরেহি নচ্চগীতৰাদিতেহি পূজেত্ৰা অগমংসু. অথ থেরো মহন্তেন পূজাৰিধানেন জম্বুদীপৰাসীহি পূজিযমানো অনুক্কমেন চন্দভাগায গঙ্গায সেতুং পত্ৰা তত্থ মহন্তং পূজাৰিধানং ওলোকেন্তো এৰং চিন্তেসি, এৰং উল়ারং পূজাৰিধানং ইদানি জম্বুদীপে নাঞ্ঞস্স হোতি, ময্হমেৰেতং কতং. অহমেৰেত্ত উত্তমো অপ্পটিমোতি এৰং সেয্যস্স সেয্যোহমস্মীতি মানং উপ্পাদেত্ৰা অট্ঠাসি. তস্মিং খণে একো খীণাসৰত্থেরো তং মানেনুপত্থদ্ধচেতসা ঠিতং দিব্বচক্খুনা দিস্ৰা উপসঙ্কমিত্ৰা ৰন্দিত্ৰা থেরস্স ওৰদন্তো এৰমাহ. তস্মা.

মা মানস্স ৰসী হোথ, মানো ভন্তে ৰসংগতং [মানংভন্তেৰসীকতং ইতিসব্বত্থ];

অনত্থদো সদা হোতি, পাতেত্ৰান ভৰা ৰটে.

মানো পলালিতো সত্তো, তণ্হাপটিঘসঙ্গতো;

মক্কটোরগসোণাদি, হুত্ৰা জাযতি জাতিসু.

মা মানং সামি পূরেহি, অত্তানং পরিসোধয;

অপরিসুদ্ধা সযো ভিক্খু, দাযকং ন পরিতোসতি.

দদন্তানং সরন্তানং, পূজেন্তানং সচে তুৰং;

মহপ্ফলং মহাভূতিং, কামত্থ হোথ নিব্বণাতি [নিম্মনা ইতিকত্তচি].

তং সুত্ৰা থেরো সংসারে নিব্বিন্দো তত্থেৰ ঠিতো তিলক্খণং পট্ঠপেত্ৰা করজকাযং সম্মসন্তো সহপটি সম্ভিদাহি অরহত্তং পত্ৰাৰ নিক্খমি. ততো ধম্মাসোকমহারাজা বলৰাহনপরিৰুতো মহন্তেন পূজাৰিধানেন পটিমগ্গং আগম্ম ৰন্দিত্ৰা ¶ ততো দিগুণং পূজাসক্কারং কুরুমানো মহাভিক্খুসঙ্ঘেন সদ্ধিং থেরং অত্তনো নগরং নেত্ৰা তস্স ধম্মকথং সুত্ৰা পসন্নমানসো পঞ্চসীলে পতিট্ঠায মহন্তং ৰিহারং কারেত্ৰা থেরেন সহাগতানং সট্ঠিসহস্সানং ভিক্খূনং চতুপচ্চযেহি উপট্ঠান মকাসি, অথ থেরো সাট্ঠকথং পিটকত্তযং পকাসেন্তো তস্মিং চিরং ৰসিত্ৰা তত্থেৰ পরিনিব্বাযি. ততো রাজা সপরিসো তস্স সরীরনিক্খেপং কারেত্ৰা ধাতুযো গহেত্ৰা মহন্তং চেতিযং কারাপেসীতি.

ইন্দগুত্তত্থেরস্স ৰত্থুং চতুত্থং.

৩৫. সাখমালপূজিকায ৰত্থুম্হি অযমানুপুব্বীকথা

অম্হাকং ভগৰা দসপারমিযো পূরেত্ৰা অনুক্কমেন তুসিতভৰনে নিব্বত্তো দেৰেহি আরাধিতো সক্করাজকুলে পটিসন্ধিং গহেত্ৰা মাতুকুচ্ছিতো নিক্খন্তো অনুক্কমেন পরমাভিসম্বোধিং পত্ৰা ততো পট্ঠায পঞ্চচত্তালীসসংৰচ্ছরানি ঠত্ৰা চতুরাসীতিধম্মক্খন্ধসহস্সানি দেসেত্ৰা গণনপথমতীতে সত্তে ভৰকন্তারতো সন্তারেত্ৰা সব্ববুদ্ধকিচ্চানি নিট্ঠাপেত্ৰা কুসিনারাযং উপৰত্তনে মল্লানং সালৰনে যমকসালান মন্তরে উত্তরসীসকং পঞ্ঞত্তে মঞ্চকে ৰেসাখপুণ্ণদিৰসে দক্খিণেন পস্সেন সতো সম্পজানো অনুট্ঠানসেয্যায নিপন্নো পচ্ছিমযামে ভিক্খূ ওৰদিত্ৰা বলৰপচ্চূ-স ¶ সমযে মহাপথৰিংকম্পেন্তো অনুপাদিসেসায নিব্বাণধাতুযা পরিনিব্বাযি, নিব্বুতে পন ভগৰতি লোকনাথে আনন্দত্থেরো মল্লরাজূনং এতং পৰত্তিং আরোচেসি. ততো কোসিনারকা চ দেৰব্রহ্মাদযো চ সন্নিপতিত্ৰা নচ্চগীতৰাদিতেহি মালাগন্ধাদীহি চ সক্করোন্তা গরুকরোন্তা মানেন্তা পূজেন্তা চেলৰিতানাদযো করোন্তা ভগৰতো সরীরং নগরমজ্ঝে যত্থ মকুটবন্ধনং নাম মল্লানং চেতিযং, তত্থ নেত্ৰা চক্কৰত্তিস্স সরীরং ৰিয অহতেন ৰত্থেন ৰেঠেত্ৰা ততো ৰিহতেন কপ্পাসেন ৰেঠেত্ৰাতি এৰং পঞ্চদুস্সযুগসতেহি ৰেঠেত্ৰা আযসায তেলদোণিযা পক্খিপিত্ৰা অঞ্ঞিস্সায আযসায দোণিযা পটিকুজ্জিত্ৰা সব্বগন্ধানং চিতকং করিত্ৰা ভগৰতো সরীরং চিতকং আরোপেসুং. অথ মহাকস্সপত্থেরেন ভগৰতো পাদে সিরসা ৰন্দিতে দেৰতানুভাৰেন চিতকো সমন্তা একপ্পহারেনেৰ পজ্জলি. ভগৰতো পন সরীরে দড্ঢে সুমনমকুল়সদিসা ধাতুযো অৰসিস্সিংসু. তস্মিং কির সমযে কোসলরঞ্ঞো জনপদে অঞ্ঞতরা গামৰাসিকা ইত্থী ভগৰতি পরিনিব্বুতে সাধুকীল়্হং আগচ্ছমানা অন্তরামগ্গে অত্তনো সরীরে উপ্পন্নৰাতরোগেন উপদ্দুতা সাধুকীল়্হং সম্পাপুণিতুং অসক্কোন্তী সত্থু আল়াহনং গন্ত্ৰা ভগৰতো ধাতুসরীরে তীণি সাখপুপ্ফানি পূজেত্ৰা পসন্নমানসা পঞ্চপতিট্ঠিতেন ৰন্দিত্ৰা গতা তায এৰ রত্তিযা মজ্ঝিমযামে কালং কত্ৰা তাৰতিংসভৰনে তিংসযোজনিকে কনকৰিমানে নিব্বত্তি. তস্সা পুব্বকম্মপকাসনত্থং চক্কমত্তানি সাখপুপ্ফানি তত্ত তত্থ ওলম্বন্তি. তেহেৰ সব্বং ৰিমানং একোভাসী [একোভাসি ততো ইতিসব্বত্থ] অহোসি. ততো সুগন্ধকরণ্ডকং ৰিয চ অহোসি, সা পন অত্তনো সোভগ্গপ্পত্তং অত্তভাৰঞ্চ ৰিমানসম্পদঞ্চ পরিৰারসম্পত্তিযো চ দিস্ৰা ৰিম্হিতমানসা পুব্বে কতেন [পুব্বেকিস্সমে. পুব্বেকতেনমে ইতিচকত্থচি] ¶ কেন মে পুঞ্ঞকম্মেনা যং লদ্ধাতি ওলোকন্তী ভগৰতো ধাতুসরীরস্মিং পূজিতানি তীণি সাখপুপ্ফানি দিস্ৰা পসন্নমানসা মহাচক্কপ্পমাণং সাখমালং হত্থেন ধারেন্তী ধাতুপূজনত্থায অগমাসি. তদা তত্থ সন্নিপতিতা মনুস্সা তস্সা রূপসম্পদঞ্চ হত্তে মহন্তং সাখমালঞ্চ দিস্ৰা ৰিম্হিতমানসা অম্ম ত্ৰং কত্থ ৰাসিকা. কত্থ পনিমং পুপ্ফং পটিলদ্ধন্তি পুচ্ছিংসু, তং সুত্ৰা দেৰধীতা অত্তনা ভগৰতো ধাতুসরীরস্স পূজিতসাখমালত্তযানুভাৰেন পটিলদ্ধসম্পত্তিযো চ দিব্বৰিমানঞ্চ পুব্বে মতকলেৰরং চাতি সব্বং তেসং দস্সেত্ৰা ধম্মদেসনাৰসানে আহ.

সমাগতা ভৰন্তা ভো, পস্সন্তু মম সম্পদং;

কতমপ্পেন কারেন, সম্মাসম্বুদ্ধধাতুযা.

সাখমালানি তীণেৰ, হীয্যোহং মুনিধাতুযা;

পূজযিত্ৰান সন্তুট্ঠা, নিৰত্তা তায রত্তিযা.

মরন্তী খরৰাতেন, তমহং সুচরিতং সরিং;

তেনাহং পুঞ্ঞকম্মেন, তাৰতিংসূপগাঅহুং.

তত্থ মে আসি পাসাদো, তিংসযোজনমুগ্গতো;

কূটাগারৰরাকিণ্ণো, সাখমালাতি [সাধমালো ইতিপিকত্থচি], ৰিস্সুতো.

যথা সব্বসুগন্ধেহি, করণ্ডং পরিভাৰিতং;

তথা দিব্বসুগন্ধেহি, গন্ধিতং ভৰনং মম.

চক্কমত্তা সাখপুপ্ফা, তত্থ তত্থূপলম্বরে [ততৰত্থুপলব্বরে ইতিপিকত্থচি];

দিব্বগন্ধা পৰাযন্তি, মধুব্বভনিসেৰিতা.

ভস্সন্তি একপুপ্ফস্মা, তুম্বমত্তা হি রেণৰো;

তেহি পিঞ্জরিতা দেৰা, কীল়ন্তি চ ললন্তিচ.

পীল়ন্ধিত্ৰান ¶ মালাধযা, সুদিব্বা ভরণানিচ;

সহচ্ছরা দেৰপুত্তা, নচ্চগীতাদিব্যাৰটা.

পস্সথেমং ভুজঙ্গা ভো, সত্তা মোহেন পারুতা;

হীয্যো মতং পৰিদ্ধং মে, পূতিভূতং কলেৰরং.

পুল়ৰেহি সমাকিণ্ণং, মক্খিকাগণকীল়িতং;

কাকসোণাদিসত্তান, মাহারং কুণপালযং.

পত্থেন্তি পুরিসা পুব্বে, অনেকোপাযনেন তং;

দট্ঠুম্পিদানি নিচ্ছন্তি, তণ্হাযঞ্ঞাণতা অহো.

লোকপজ্জোতকস্সাহং, ৰিমলস্স যসস্সিনো;

ধাতুং হীয্যো মহিং সম্মা, অজ্জ সগ্গে পতিট্ঠিতা.

হিত্ৰানে তাদিসং কাযং, লদ্ধংদানি মমেদিসং;

দিব্বত্তভাৰং সোভাহি, ভাসমান মুদিক্খথ.

ভাসমানায মে ৰাচং, সুণোথেত্থ সমাগতা;

নত্থেৰাকতপুঞ্ঞস্স, অণুমত্তং ভৰে সুখং.

বিন্দুমত্তম্পি যো পুঞ্ঞ, বীজং রোপেতি সাসনে;

ন হা নত্থফলং [নহপনন্তফলং ইতিপিকত্থচি] হোতি, যাৰ নিব্বাণপত্তিযাতি.

এৰং সা দেৰতা অত্তনা পটিলদ্ধদিব্বৰিভৰং দস্সেত্ৰা জনকাযং ওৰদিত্ৰা দিব্বসাখপুপ্ফেহি জিনধাতুং পূজেত্ৰা মনুস্সানং পস্সন্তানংযেৰ সদ্ধিং ৰিমানেন দেৰলোকমেৰ অগমাসি. তং দিস্ৰা মহাজনো দানাদীনি পুঞ্ঞানি কত্ৰা দেৰলোকং পূরেসীতি.

তুম্হেপি ভোন্তো তিদিৰেসু সাতং,

কামত্থ চে কত্থ পুঞ্ঞানি সাধুংতি.

৩৬. মোরিযব্রহ্মণস্স ৰত্থুম্হি অযমানুপুব্বীকথা

অম্হাকং ভগৰতি পরিনিব্বুতে মগধরট্ঠে মচলং নাম মহাগামং অহোসি. তত্থ মোরিযোনাম ব্রাহ্মণো পটিৰসতি সদ্ধো পসন্নো, তস্স সেনানামে কা ভরিযা অত্থি. সাপি সদ্ধা পসন্না রতনত্তযেসু. তে উভোপি সমগ্গা সম্মোদমানা ভিক্খুসঙ্ঘং নিমন্তেত্ৰা নিচ্চং দানং পৰত্তেন্তা চীৰরাদিচতুপচ্চযেহি উপট্ঠহন্তা সীলং রক্খন্তা উপোসথকম্মং করোন্তা দিৰসং ৰীতিনামেন্তি. অথস্স গেহে ৰিভৰং যেভুয্যেন দানাদীসু পরিক্খযমগমাসি. ততো ব্রাহ্মণী সামি নো গেহে ধনং পরিক্খীণং. কথং দানং পৰত্তেয্যামাতি ব্রাহ্মণস্স আরোচেসি, ততো ব্রাহ্মণো মা ভদ্দে চিন্তেসি. যেনকেনচি উপাযেন দানং পতিট্ঠপেস্সামাতি ৰত্ৰা তস্মিংযেৰ অত্তনো সউস্সাহতং পকাসোন্তো আহ.

জানমানো হি লোকস্মিং, দানস্সেদং ফলং ইতি;

ন দজ্জা কো সুসীলেসু, অপ্পম্পি দিৰসম্পতি.

সগ্গলোকনিদানানি, দানানি মতিমা ইধ;

কোহিনাম নরো লোকে, ন দদেয্য হিতে রতোতি.

এৰঞ্চ পন ৰত্ৰা ভদ্দে ৰনং পৰিসিত্ৰা অনেকৰিধানি পণ্ণানি চ ফলানি চ পচ্ছিপূরং আহরিত্ৰা ৰিক্কিণিত্ৰাপি দানং ন উপচ্ছিন্দিস্সামাতি ¶ ৰত্ৰা ততো পট্ঠায ৰনং গন্ত্ৰা পণ্ণানি চ ফলানি চ আহরিত্ৰা ৰিক্কিণিত্ৰা দানং দেন্তো পটিৰসতি. অথেকদিৰসং ব্রাহ্মণো ৰনং পৰিট্ঠো পণ্ণেহি চ ফলেহি চ পচ্ছিং পূরেত্ৰা সীসেনা দায গেহং আগচ্ছন্তো পুপ্ফফলপল্লৰেহি ৰিনতং নেকতরুগণনিচিতং সম্মত্তানেকচাতকচতুপ্পদনিসেৰিতং ৰিপ্পকিণ্ণানন্তপুপ্ফপত্তকিঞ্জক্খচ্ছন্নৰাল়ুকাতলং সন্দমানসীতলা মলজলপ্পৰাহং অকদ্দমানিন্নসুপতিত্তেহি সুন্দরং কন্দরং দিস্ৰা পচ্ছিং তীরে ঠপেত্ৰা ওতিণ্ণো নহাযতি, তস্মিং খণে তত্থ একস্মিং রুক্খে অধিৰত্থো দেৰপুত্তো তং তত্থ নহাযন্তং দিস্ৰা কিন্নু খো এস কল্যাণজ্ঝাসযো ৰা উদাহু পাপজ্ঝাসযো সত্তোতি দিব্বচক্খুনা উপধারন্তো অচ্ছরিযপুরিসো এসো দুগ্গতোপি হুত্ৰা অত্তনো দানপ্পৰেণিযা উপচ্ছিজ্জনভযেন ৰনং গন্ত্ৰা পণ্ণানি চ ফলানি চ আহরিত্ৰা দুক্খেন কসিরেন জীৰিকং কপ্পেন্তো দানধম্মং ন উপচ্ছিন্দতীতি চিন্তেত্ৰা তস্স গুণাদযো পটিচ্চ পচ্ছিযং ঠপিতপণ্ণানি চ ফলানি চ সব্বানি সুৰণ্ণানি হোন্তূতি অধিট্ঠাসি. অথস্সানুভাৰেন সব্বং সুৰণ্ণং অহোভি, অথ সো সুৰণ্ণপুণ্ণপচ্ছিযং উপরি সুৰণ্ণরাসিমত্থকে সব্বকামদদং মহন্তং মণিরতনং ঠপেত্ৰা অন্তরহিতো পটিক্কম্ম অট্ঠাসি, ততো ব্রাহ্মণো নহাত্ৰা উত্তিণ্ণো পচ্ছিযং সম্পুণ্ণসুৰণ্ণৰণ্ণরংসিনা সম্ভিন্নৰিজ্জোতমানমণিরতনং দিস্ৰা কিমেতংতি আসঙ্কিতপরিসঙ্কিতো পচ্ছিসমীপং গন্ত্ৰা হত্থং পসারেতুং অৰিসহন্তো অট্ঠাসি. তং দিস্ৰা দেৰপুত্তো দিস্সমানসরীরেন ঠত্ৰা মা ত্ৰং ভাযি ব্রাহ্মণ. মযা এতানি নিম্মিতানি, গহেত্ৰা গচ্ছাহীতি আহ, অথ ব্রাহ্মণো দেৰপুত্তস্স কথং সুত্ৰা অযং দেৰপুত্তো ইমং মযা নিম্মিতং, গহেত্ৰা গচ্ছাতি ৰদতি. কিন্নু খো সো অত্তনো আনুভাৰেন দেতি, উদাহু মযা কতপুঞ্ঞেনাতি পুচ্ছিস্সামি তংতি পঞ্জলিকোৰ দেৰপুত্তং পুচ্ছন্তো আহ.

পুচ্ছামি ¶ পঞ্জলী দানি, দেৰপুত্ত মহিদ্ধিক;

দদাসি মে সুৰণ্ণঞ্চ, কামদং মণিমুত্তমং.

কেন তপেন সীলেন, কেনাচারগুণেন চ;

যেন দজ্জাসি মে দেৰ, কিং মে সুচরিতং চিতং.

কিন্নু পুরাতনং কম্মং, কেন কম্মেন দস্সসি;

অথৰা তৰিদ্ধিযা দেসি, তং মে অক্খাহি পুচ্ছিতোতি.

ততো দেৰপুত্তো ন খো পনাহং ব্রাহ্মণ দেৰোতি পরেসং কিঞ্চি দাতুং সক্কোমি, তযা পুব্বে কতসুচরিতানুভাৰেন নিব্বত্ততীতি ৰত্ৰা দিব্বচক্খুনা তস্স পুব্বকম্মং দিস্ৰা তস্স পকাসেন্তো আহ.

কস্সপে লোকপজ্জোতে, সম্বুদ্ধে পরিনিব্বুতে;

সব্বত্থ পত্থটং আসি, তস্স বুদ্ধস্স সাসনং.

তদা পচ্চন্তিমে গামে, ত্ৰমাসি কুলদারকো;

সদ্ধো আসি পসন্নো চ, দাযকো কুসলে রতো.

তদা পব্বজিতো একো, গচ্ছন্তো অন্তরাপথে;

চোরেহি অনুবদ্ধোসি, অচ্ছিন্নপত্তচীৰরো.

সাখাভঙ্গং নিৰাসেত্ৰা, পারুপিত্ৰা তথেৰ তং;

অন্তোগামং পৰিট্ঠোসি, এসমানো পিলোতিকে.

ততো ত্ৰং চরমানং তং, দিস্ৰা কম্পিতমানসো;

ৰত্থযুগং অদাসি ত্ৰং, সদ্দহং দানতো ফলং.

পত্থোদনেন ¶ তং ভিক্খুং, পরিৰিসিত্ৰা যথাবলং;

পেসেসি অভিৰাদেত্ৰা, সদ্ধায সুদ্ধমানসো.

ইমং ত্ৰং অকরী পুঞ্ঞং, তুয্হেতং চরিতং ইমং;

তস্স তে পুঞ্ঞকম্মস্স, অমুখ্যফল মীদিসংতি.

এৰঞ্চ পন ৰত্ৰা ইদং তে ব্রাহ্মণ ধনং রাজাদীহি মযা অনাহরণীযং কতং, ত্ৰং অপরিসঙ্কন্তো গহেত্ৰা যথাধিপ্পাযং করোহি, ইমং খো পন মণিরতনং ইচ্ছিতিচ্ছিতং পসৰতি, তেনাপি আনুভাৰেন তৰ দানং অনুপচ্ছিন্দন্তো পুত্তদারাদযো পোসেহীতি অনুসাসি, তং সুত্ৰা ব্রাহ্মণো তেন ৰুত্তনিযামেনেৰ ভিক্খুসঙ্ঘস্স মহাদানং দদন্তো সীলং রক্খন্তো চিরং ৰসিত্ৰা অপরভাগে ততো চুতো দেৰলোকে নিব্বত্তীতি.

তস্মা হি ভোন্তো সতি দেয্যধম্মে,

মোরিযব্রাহ্মণস্স ৰত্থুং ছট্ঠমং.

৩৭. পুত্তৰত্থুম্হি অযমানুপুব্বীকথা

একস্মিং কির সমযে লঙ্কাদীপৰাসিনো সট্ঠিমত্তা ভিক্খূ জযমহাবোধিং ৰন্দিতুকামা একতো মন্তেত্ৰা মহাতিত্থেন নাৰং আরুয্হ জম্বুদীপং পত্ৰা তামলিত্তিপট্ঠেনে [তমলিত্তপট্টনে ইতিকত্থচি] ওতরিত্ৰা অনুক্কমেন পাটলিপুত্তনগরং পাপুণিংসু. অথ তস্মিং ¶ নগরে পিণ্ডায চরন্তে তে ভিক্খূ একো দুগ্গতমনুস্সো দিস্ৰা চিরেন [চিরেনাহংদিট্ঠা ইতিসব্বত্থ] মযা দিট্ঠা বুদ্ধপুত্তাতি সোমনস্সো ভরিযং পক্কোসিত্ৰা ভদ্দে ইমেসং অয্যানং দানং দাতুকামোম্হি, পুব্বে নো অকতপুঞ্ঞত্তা ইদানি দুগ্গতা জাতা, ইমেসু পুঞ্ঞক্খেত্তেসু বীজং নো চে রোপেস্সাম, পুনপি এৰমেৰ ভৰিস্সামাতি ৰত্ৰা কিং মে গেহে দেয্যধম্মং অত্থীতি পুচ্ছি. সা তং সুত্ৰা ঘরে নো সামি অয্যানং কিঞ্চি দাতব্বং ন পস্সামি. অপি চ মম পুত্তং মারেত্ৰা দানং দাতুং সক্কাতি. সো তস্সা কথং সুত্ৰা ভদ্দে পুত্তং মারেত্ৰা কিং দানং দেমাতি আহ. তায তং সুত্ৰা সামি কিং ন জানাসি, পুত্তে নো মতে সন্দিট্ঠসম্ভত্তা ঞাতিমিত্তসুহজ্জা চ অম্হাকং সন্তিকং আগচ্ছান্তা কিঞ্চি পণ্ণাকারং গহেত্ৰা আগচ্ছন্তি. মযং তেন পণ্ণাকারেন দানং দস্সামাতি ৰুত্তে উপাসকো সাধু তথা করোহীতি মাতুযা এৰ ভারমকাসি, সা পুত্তং মারেতুং অৰিসহন্তী আহ. তথা হি.

কিচ্ছা লদ্ধং পিযং পুত্তং, অম্মম্মাতি পিযং ৰদং;

সুনীলনেত্তং সুভমুং, কো পক্কমিতুমিচ্ছতি.

মাতরা মারিযন্তোপি, মাতরমেৰ রোদতি;

মারেতুং তং ন সক্কোমি, হদযং মে পৰেধতীতি.

এৰঞ্চ পন ৰত্ৰা অহং সামি ন সক্কোমি পুত্তং মারেতুং. ত্ৰং মারেহীতি পুত্তং পিতুসন্তিকং পেসেসি. অথ সোপি তং মারেতু মসক্কোন্তো এৰমাহ. ৰুত্তঞ্হি.

তাযন্তি পিতুনো দুক্খং, পুত্তা পুত্তাতি কিত্তিতা;

পিতু দুক্খং সুখং পুত্তা, দাযাদা হোন্তি সব্বদা.

তস্মা ¶ মে সদিসং পুত্তং, পিল্লকং মঞ্জুভাসনং;

ন সক্কোমি অহং ভদ্দে, জীৰিতা তং ৰিযোজিতুং.

অযসঞ্চ অকিত্তিঞ্চ, পপ্পোতি পুত্তঘাতকো;

পাণাতিপাতকম্মম্পি, কামং সো ফুসতে নরোতি.

এৰঞ্চ পন ৰত্ৰা সো ত্ৰমেৰ তৰ পুত্তং মারেহীতি পেসেসি, এৰং তেন ৰুত্তে পুত্থস্স মারপাণূপাযং পরিযেসন্তা এৰমাহংসু, অম্হে পনিমং মারেতুং ন সক্কোমি, অম্হাকং পচ্ছাগেহে মহন্তো ৰম্মিকো অত্থি, তস্মিং একো নাগরাজা পটিৰসতি. কুমারং তত্থ পেসেস্সাম, সো তং ডসিত্ৰা মারেস্সতীতি. ইচ্চেতে এসো খো উপাযো এৰাতি চিন্তেত্ৰা কুমারং পক্কোসিত্ৰা অঞ্চনা ৰলিৰলযাদীহি মণ্ডেত্ৰা তস্স হত্থে গেণ্ডুং [তেণ্ডুং ইতিসব্বত্থ] ঠপেত্ৰা তাত পচ্ছাগেহে ৰম্মিকসমীপং গন্ত্ৰা কীল়াতি পেসেসুং. ততো দারকো গন্ত্ৰা গেণ্ডুকেন কীল়ন্তো ৰম্মিকবিলে গেণ্ডুকং পাতেসি. অথ সো গেণ্ডুকং গণ্হিস্সামীতি ৰম্মিকসুসিরে হত্থং পৰেসেসি. ততো সপ্পো কুজ্ঝিত্ৰা সুসূতিসদ্দং করোন্তো মহন্তং ফণং কত্ৰা বিলতো সীসং উক্খিপিত্ৰা ওলোকেন্তো অট্ঠাসি কুমারস্স হত্থতো পরিগলিতপাসংৰিয. অথস্স কুমারো কিঞ্চি অজানন্তো সপ্পস্স গীৰং দল়্হং গণ্হি. অথস্স মাতাপিতুন্নং সদ্ধাবলেন নাগরাজা কুমারস্স করতলে অট্ঠংসং ইচ্ছাদাযকং কণ্ঠমণিরতনং পাতেসি. কুমারস্স মাতাপিতরো দ্ৰারং নিস্সায ঠিতা তস্স কিরিযং ওলোকেন্তো তং মণিরতনং দিস্ৰা সীঘং গন্ত্ৰা পুত্তং উক্খিপিত্ৰা হত্থতো মণিরতনং গণ্হিংসু. ততো তে তং মণিরতনং পরিসুদ্ধাসনে ঠপেত্ৰা উপচারং কত্ৰা অম্হাকং ইদঞ্চিদঞ্চ দেথাতি অব্ভুক্কিরিংসু. অথ তে মণিরতনানুভাৰেন গেহদ্ৰারে মহন্তং মণ্ডপং কারেত্ৰা ৰিতানাদিনা মণ্ডপং ¶ অলঙ্করিত্ৰা ভিক্খূনং আসনানি পঞ্ঞাপেত্ৰা তে সট্ঠিমত্তে ভিক্খূ নিসীদাপেত্ৰা মহাদানং অদংসু. ততো নগরৰাসিনো মণিরতনানুভাৰং সুত্ৰা সন্নিপতিংসু. অথ তে তেসং মজ্ঝে অত্তনো সদ্ধাবলেন মণিরতনস্স লাভং পকাসেত্ৰা ইমঞ্হি দানত্থাযেৰ পরিচ্চজ্জামাতি একস্মিং ঠানে পতিট্ঠাপেত্ৰা তেনানুভাৰেন যাৰজীৰং দানং দদন্তা সীলং রক্খন্তা আযুপরিযোসানে দেৰলোকে নিব্বত্তিংসূতি.

৩৮. তেভাতিকমধুৰাণিজকানং ৰত্থুম্হি অযমানুপুব্বীকথা

অতীতে কির বারাণসিযং তে ভাতিকা একতো হুত্ৰা মধুং ৰিক্কিণন্তা পুত্তদারে পোসেন্তি. ততো তেসু একো পচ্চন্তং গন্ত্ৰা মলযৰাসীনং [মলৰাসীনং ইতিপিকত্থচি] হত্থতো মধুং কিণিত্ৰা [ৰক্কিণিত্ৰা ইতিসব্বত্থ] গণ্হাতি, একো গহিতগহিতমধুং নগরং আহরতি. একো তেন আহটাহটমধূনি বারাণসিযং নিসীদিত্ৰা ৰিক্কিণাতি. তস্মিং সমযে গন্ধমাদনপব্বতে একো পচ্চেকবুদ্ধো ৰণরোগেনা তুরো অহোসি. অথঞ্ঞতরো পচ্চেকবুদ্ধো তস্স মধুনা ফাসু ভৰিস্সতীতি ঞত্ৰা গন্ধমাদনপব্বতেযেৰ ঠিতো ¶ চীৰরং পারুপিত্ৰা আকাসেনা গন্ত্ৰা নগরদ্ৰারে ওতরিত্ৰা কত্থ মধুং লভামীতি [লব্ভতি ইতিসব্বত্থ] ওলোকেন্তো অট্ঠাসী, তদা তস্মিংপরকুলে ভতিং কত্ৰা জীৰমানা একা চেটিকা ঘটমাদায উদকত্থং তিত্থং গচ্ছন্তী মগ্গা ওক্কম্ম ঘটং ঠপেত্ৰা ৰন্দিত্ৰা একমন্তং অট্ঠাসি, তদা পচ্চেকবুদ্ধো ভগিনী এত্থ ভিক্খায চরন্তানং কতরস্মিং ঠানে মধু লব্ভতীতি পুচ্ছি. সা তস্স কথং সুত্ৰা মধুআপণস্স পঞ্ঞাযনট্ঠানে ঠত্ৰা হত্থং পসারেত্ৰা এস ভন্তে মধুআপণোতি দস্সেত্ৰা যজ্জাযং পচ্চেকবুদ্ধো আপণতো মধুং ন লভতি. মম নিৰত্থৰত্থকং দত্ৰাপি মধুং দস্সামীতি চিন্তেত্ৰা ওলোকেন্তী তত্থেৰ অট্ঠাসি, অথ পচ্চেকবুদ্ধো অনুপুব্বেন ৰিচরন্তো [চরন্তো ইতিপিকত্থচি] মধুআপণং সম্পাপুণি, ততো কুটিম্বিকো [কুটিম্ব কো ইতিপিকত্থচি] তং দিস্ৰা হত্থতো পত্তং গহেত্ৰা আধারকে ঠপেত্ৰা মধুঘটং আদায পত্তস্স উপনামেন্তো সহসা নিক্কুজ্জি. ততো মধু পত্তং পূরেত্ৰা উত্তরন্তো পুন ভূমিযং পগ্ঘরি. তং দিস্ৰা সোমনস্সো ৰাণিজো এৰং পত্থনমকাসি.

তত্থ পত্তস্স বুদ্ধস্স, ৰাণিজো সো পসাদৰা;

ৰিস্সন্দযন্তো মুখতো, পত্তপূরং মধুং অদা.

পুণ্ণঞ্চ উপ্পতীতঞ্চ, পতিতঞ্চ মহীতলে;

দিস্ৰা মধুং পসন্নো সো, এৰং পণিদহী তদা.

জম্বুদীপে একরজ্জং, দানেনানেন হোতু মে;

আকাসে যোজনে আণা, ভূমিযং যোজনেপিতি.

এৰঞ্চ পন ৰত্ৰা পত্তং অদাসি, পচ্চেকবুদ্ধো পত্তং পটিগ্গহেত্ৰা তত্থেৰ ঠিতো.

ইচ্ছিতং ¶ পত্থিতং তুয্হং, খিপ্পমেৰ সমিজ্ঝতু;

পূরেন্তু চিত্থসংকপ্পা, চন্দো পণ্ণরসো যথা.

ইচ্ছিতং পত্থিতং তুয্হং, সব্বমেৰ সমিজ্ঝতু;

পূরেন্তু চিত্তসংকপ্পা, মণিজোতিরসো যথাতি.

ৰত্ৰা মঙ্গলং ৰড্ঢেত্ৰা অগমাসি. অথন্তরামগ্গে ঠিতা ঘটচেটিকা পচ্চেকবুদ্ধাভিমুখং গন্ত্ৰা মধুং লভিত্থ ভন্তেতি পুচ্ছি. তেন লদ্ধং ভগিনীতি ৰুত্তে কিং ৰত্ৰা সো অদাসীতি পুচ্ছি. পচ্চেকবুদ্ধো সব্বং কথেসি. সা তং সুত্ৰা থোকং ভন্তে ইধেৰ হোথ দাসিযা অনুগ্গহত্থাযাতি সীঘং গেহং গন্ত্ৰা নিৰত্থপিল়োতিকা অত্তনো সাটকং ধোৰিত্ৰা আহরিত্ৰা চুম্বটকং কত্ৰা পচ্চেকবুদ্ধস্স অদাসি, যদা সো ভন্তে মধুদাযকো সকলজম্বুদীপে একরজ্জং কারেতি. তদাহং তস্স অগ্গমহেসী ভৰেয্যংতি ৰত্ৰা পত্থনং করোন্তীএৰমাহ.

যদা তে মধুদো ভন্তে, ভূভুজো হোতি ভূতলে;

তস্স হেস্সং তদা ভন্তে, পিযা অগ্গমহেসিকা.

সুরূপাচ সুৰাণীচ, সুযসা সুব্বতা সুভা;

অস্সং তস্স পিযাচাথ, মনাপা ইচ্ছদা [ইচ্ছিদা ইতিপিকত্থচি] সদাতি.

তস্সাপি তদা পচ্চেকবুদ্ধো তথেৰ হোতূতি মঙ্গলং ৰত্ৰা আকাসেন গন্ধমাদনমেৰ অগমাসি, অথাপরভাগে তে তযোপি একতো হুত্ৰা মধুলোকনং করোন্তা তং মধুঘটং কুহিংতি পুচ্ছিংসু, সো তেনত্তনা কতকম্মং ৰত্ৰা সচে তুম্হে তস্মিং পত্তিং অনুমোদেয্যাথ, তং সাধু. নো চে. মধুঅগ্ঘনকং মম হত্থতো গণ্হথাতি ৰত্ৰা তেহি ততো ন নো অত্থো [ননোহত্থো ইতিসব্বত্থ] মধুনা, কীদিসস্সেতং অদাসীতি ৰুত্তে তং সুত্ৰা ইতরো পচ্চেকবুদ্ধা নামে তে গন্ধমাদনে ৰসন্তি কাসাৰং ¶ পারুপিত্ৰা কুলে কুলে ভিক্খং চরন্তি, সন্তো এতে সীলৰন্তাতি কথেসি, অথ তেসু জেট্ঠো ব্রাহ্মণচণ্ডালকাপি কাসাৰং পরিদহিত্ৰা চরন্তি. নূনাযং চণ্ডালকোতি মঞ্ঞামীতি আহ, মজ্ঝিমো কুজ্ঝিত্ৰা তৰ পচ্চেকবুদ্ধং পরসমুদ্দে খিপাহীতি অৰোচ, অথ তেসং কথং সুত্ৰা মধুদাযকো মা ভো তুম্হে অরিযানং মহেসক্খানং মহানুভাৰানং পচ্চেকবুদ্ধানং ফরুসং কথেথ. নিরযদুক্খা ন ভাযথাতিআদিনা অনেকা কারেন নিৰারেত্ৰা তেসং গুণং পকাসেসি, তং সুত্ৰা তে উভোপি সাধূতি পসন্নাচিত্তা অনুমোদিংসু, অপরভাগে তে কালং কত্ৰা দেৰমনুস্সেসু সংসরন্তা তত্থ তত্থ মহাসম্পত্তিযো অনুভৰিত্ৰা অম্হাকং সত্থু পরিনিব্বাণতো দ্ৰিন্নং ৰস্সসতানং অচ্চযেন অত্তনো অত্তনো সম্পত্তট্ঠানে নিব্বত্তিংসু. তেন ৰুত্তং.

অসোকো মধুদো সন্ধি, মিত্তাদেৰী তু চেটিকা;

চণ্ডালৰাদী নিগ্রোধো, তিস্সো সো পারৰাদিকোতি.

তেসু চণ্ডালৰাদী জেট্ঠৰাণিজো বিন্দুসাররঞ্ঞো জেট্ঠপুত্তস্স সুমনরাজকুমারস্স পুত্তো হুত্ৰা নিব্বত্তি. তস্সাযমানুপুব্বীকথা. বিন্দুসাররঞ্ঞো কির দুব্বলকালেযেৰ অসোককুমারো অত্তনা লদ্ধং উজ্জেনিযা রজ্জং পহায আগন্ত্ৰা সব্বনগরং অত্তনো হত্থগতং কত্ৰা সুমনরাজকুমারং অগ্গহেসি. তং দিৰসমেৰ সুমনস্স রাজকুমারস্স সুমনা নাম দেৰী পরিপুণ্ণগব্ভা অহোসি. সা অঞ্ঞাতকৰেসেন নিক্খমিত্ৰা অৰিদূরে অঞ্ঞতরং চণ্ডালগামং সন্ধায গচ্ছন্তী জেট্ঠকচণ্ডালস্স গেহতো অৰিদূরে নিগ্রোধো অত্থি, তস্মিং রুক্খে অধিৰত্থায দেৰতায ইতো এহি সুমনেতি ৰদন্তিযা সদ্দং সুত্ৰা তস্সা সমীপং গতা, দেৰতা অত্তনো আনুভাৰেন একং সালং নিম্মিণিত্ৰা এত্থ ৰসাহীতি পাদাসি. সা ¶ তং সালং পাৰিসি, গতদিৰসেযেৰ সা পুত্তং ৰিজাযি. সা তস্স নিগ্রোধদেৰতায পরিগ্গহিতত্তা নিগ্রোধোত্ৰেৰ নামং অকাসি. জেট্ঠকচণ্ডালো দিট্ঠদিৰসতোপ্পভুতি তং অত্তনো সামিধীতরং ৰিয মঞ্ঞমানো নিবদ্ধৰত্তং পট্ঠপেসি. রাজধীতা তত্থ সত্তৰস্সানি ৰসি, নিগ্রোধকুমারোপি সত্তৰস্সিকো জাতো, তদা মহাৰরুণত্থেরো নাম একো অরহা দারকস্স হেতুসম্পদং দিস্ৰা ৰিহরমানো সত্তৰস্সিকো দানি দারকো. কালো নং পব্বাজেতুংতি চিন্তেত্ৰা রাজধীতায আরোচাপেত্ৰা নিগ্রোধকুমারং পব্বাজেসি, কুমারো খুরগ্গেযেৰ অরহত্তং পাপুণি. তেন ৰুত্তং মহাৰংসে.

তং মহাৰরুণো থেরো, তদা দিস্ৰা কুমারকং;

উপনিস্সযসম্পন্নং, অরহা পুচ্ছি মাতরং;

পব্বাজেসি খুরগ্গে সো, অরহত্তমপাপুণীতি.

সো কির একদিৰসং পাতোৰ সরীরং পটিজগ্গিত্ৰা আচরিযুপজ্ঝাযৰত্তং কত্ৰা পত্তচীৰর মাদায মাতুউপাসিকায গেহদ্ৰারং গচ্ছামীতি নিক্খমি. মাতুনিৰাসট্ঠানঞ্চস্স দক্খিণদ্ৰারেন নগরং পৰিসিত্ৰা নগরমজ্ঝেন গন্ত্ৰা পাচীনদ্ৰারেন নিক্খমিত্ৰা গন্তব্বং হোতি. তেন চ সমযেন অসোকো ধম্মরাজা পাচীনদিসাভিমুখো সীহপঞ্জরে চঙ্কমতি. তং খণংযেৰ নিগ্রোধো রাজঙ্গণং সম্পাপুণি সন্তিন্দ্রিযো সন্তমানসো যুগমত্তং পেক্খমানো, তেন ৰুত্তং একদিৰসং সীহপঞ্জরে ঠিতো অদ্দস নিগ্রোধং সামণেরং রাজঙ্গণেন গচ্ছন্তং দন্তং গুত্তং সন্তিন্দ্রিযং ইরিযাপথসম্পন্নন্তি. দিস্ৰা পনস্স এতদহোসি. অযং জনো সব্বোপি ৰিক্খিত্তচিত্তো ভন্তমিগপটিভাগো. অযং পন দহরকো অৰিক্খিত্তো অতিৰিযস্স আলোকিতৰিলোকিতং সম্মিঞ্জনপসারণঞ্চ সোভতি. অদ্ধা এতস্সব্ভন্তরে লোকুত্তরধম্মো ভৰিস্সতীতি রঞ্ঞো সহ ¶ দস্সনেনেৰ সামণেরে চিত্তং পসীদি, পেমং সণ্ঠহি, কস্মা. পুব্বে কির পুঞ্ঞকরণকালে রঞ্ঞো জেট্ঠকভাতা ৰাণিজকোযং.

পুব্বেৰ [পুব্বেন ইতিকত্থচি] সন্নিৰাসেন, পচ্চুপ্পন্নহিতেন ৰা;

এৰং তং জাযতে পেমং, উপ্পলংৰ যথোদকেতি.

অথ রাজা সঞ্জাতপেমো সবহুমানো সামণেরং পক্কোসথাতি অমচ্চে পেসেসি, তে অতিচিরাযন্তীতি পুন দ্ৰে তযো পেসেসি তুরিতং আগচ্ছতূতি. সামণেরো অত্তনো পকতিযা এৰ অগমাসি. রাজা পতিরূপাসনং ঞত্ৰা নিসীদথাতি আহ. সো ইতোচিতো চ ৰিলোকেত্ৰা নত্থি দানি অঞ্ঞো ভিক্খূতি সমুস্সিতসেতচ্ছত্তং রাজপল্লঙ্কং উপসঙ্কমিত্ৰা পত্তং গণ্হনত্থায রঞ্ঞো আকারং দস্সেসি. রাজা তং পল্লঙ্কসমীপং গচ্ছন্তং এৰ দিস্ৰা চিন্তেসি অজ্জেৰ দানি অযং সামণেরো ইমস্স গেহস্স সামিকো ভৰিস্সতীতি, সামণেরো রঞ্ঞো হত্থে পত্তং দত্ৰা পল্লঙ্কং অভিরুহিত্ৰা নিসীদি. রাজা অত্তনো অত্থায সম্পাদিতং সব্বং যাগুখজ্জকভত্তৰিকতিং উপনামেসি. সামণেরো অত্তনো যাপনমত্তমেৰ সম্পটিচ্ছি. ভত্তকিচ্চাৰসানে রাজা আহ সত্থারা তুম্হাকং দিন্নওৰাদং জানাথাতি. জানামি মহারাজ একদেসেনাতি. তাত ময্হম্পী নং কথেহীতি. সাধু মহারাজাতি রঞ্ঞো অনুরূপং ধম্মপএদ অপ্পমাদৰগ্গং অনুমোদনত্থায অভাসি. রাজা পন অপ্পমাদো অমতপদং, পমাদো মচ্চুনো পদংতি সুত্ৰাৰ অঞ্ঞাতং তাত, পরিযোসাপেহীতি আহ. সামণেরো অনুমোদনা ৰসানে দ্ৰত্তিংসধুৰভত্তানি [দ্ৰিত্তিংসধুরভত্তানি ইতিসব্বত্থ] লভিত্ৰা পুন দিৰসে দ্ৰত্তিংসভিক্খূ গহেত্ৰা রাজন্তোপুরং পৰিসিত্ৰা ভত্তকিচ্চ মকাসি. রাজা অঞ্ঞেপি দ্ৰত্তিংসভিক্খূ তুম্হেহি সদ্ধিংস্ৰে ভিক্খং গণ্হন্তূতি এতেনেৰ উপাযেন দিৰসে ¶ দিৰসে ৰড্ঢাপেন্তো সট্ঠিসহস্সানং ব্রাহ্মণপরিব্বাজকানং ভত্তং উপচ্ছিন্দিত্ৰা অন্তোনিৰেসনে সট্ঠিসহস্সানং ভিক্খূনং নিচ্চভত্তং পট্ঠপেসি নিগ্রোধত্থেরগতেনেৰ পসাদেন. নিগ্রোধত্থেরোপি রাজানং সপরিসং তীসু সরণেসু পঞ্চসু সীলেসু পতিট্ঠাপেত্ৰা বুদ্ধসাসনে পোথুজ্জনিকেন পসাদেন অচলপ্পসাদং কত্ৰা পতিট্ঠাপেসি. রাজাপি অসোকারামং নাম মহাৰিহারং কারাপেত্ৰা সট্ঠিসহস্সানং ভিক্খূনং নিচ্চভত্তং পট্ঠপেসি. সকলজম্বুদীপে চতুরাসীতিযা নগরসহস্সেসু চতুরাসীতিৰিহারসহস্সানি কারাপেসি. তেন ৰুত্তং.

আসে সো [অসেসো ইতিপিকত্থচি] হি অনাসৰোতি.

মধুদাযকো পন ৰাণিজো দেৰলোকতো চৰিত্ৰা পুপ্ফপুরে রাজকুলে উপ্পজ্জিত্ৰা পিযদাসো নাম কুমারো হুত্ৰা ছত্তং উস্সাপেত্ৰা সকলজম্বুদীপে একরজ্জং অকাসি. কথং.

বিন্দুসাররাজস্স একসতপুত্তা অহেসুং. তে সব্বে অসোকো অত্তনা সদ্ধিং একমাতিকং তিস্সকুমারং ঠপেত্ৰা ঘাতেসি. ঘাতেন্তো চত্তারি ৰস্সানি অনভিসিত্তোৰ রজ্জং কারেত্ৰা চতুন্নং ৰস্সানং অচ্চযেন তথাগতস্স পরিনিব্বাণতো দ্ৰিন্নং ৰস্সসতনং উপরি অট্ঠারসমে ৰস্সে সকলজম্বুদীপে একরজ্জাভিসেকং পাপুণি. অথ তং সকলজম্বুদীপে চতুরাসীতিনগরসহস্সে রাজানো আগন্ত্ৰা উপট্ঠহিস্সন্তি. তিণ্ণং উতূনং অনুচ্ছৰিকা তযো পাসাদা অহেসুং. একো মহাসপ্পিকো ¶ , একো মোরগীৰো, একো মঙ্গলো নাম, তেসু নেকনাটকসহস্সপরিৰুতো পটিৰসতি. যাস্স মধুআপণং দস্সেসি, সা অসন্ধিমিত্তা নাম দেৰচ্ছরপরিভাগা রাজধীতা হুত্ৰা সট্ঠিসহস্সানং ইত্থীনং জেট্ঠিকা ধম্মাসোকরঞ্ঞো অগ্গমহেসী অহোসি. অভিসেকানন্তরং তস্স ইমা রাজিদ্ধিযো আগতা, পথৰিযা চ হেট্ঠা যোজনপ্পমাণে আণা পৰত্ততি. তথা উপরি আকাসে. অনোতত্তদহতো অট্ঠহি কাজেহি সোল়সপানীযঘটে দিৰসে দিৰসে দেৰতা আহরন্তি. যতো সাসনে উপ্পন্নসদ্ধো হুত্ৰা অট্ঠঘটে ভিক্খুসঙ্ঘস্স অদাসি. দ্ৰে ঘটে সট্ঠিমত্তানং তেপিটকভিক্খূনং দ্ৰে ঘটে অগ্গমহেসিযা অসন্ধিমিত্তায. চত্তারো ঘটে অত্তনা পরিভুঞ্চি দেৰতা [দেৰতাএৰং ইতিসব্বত্থ], এৰ হিমৰন্ততো নাগলতাদন্তকট্ঠং সিনিদ্ধং মুদুকং রসৰন্তং দিৰসে দিৰসে আহরন্তি, তেন রঞ্ঞো চ মহেসিযা চ সোল়সন্নং নাটকসহস্সানঞ্চ সট্ঠিমত্তানঞ্চ ভিক্খুসহস্সানং দেৰসিকং দন্তপোণকিচ্চং নিপ্ফজ্জতি. দেৰসিকমেৰস্স দেৰতা অগদামলকং অগদহরীটকং সুৰণ্ণৰণ্ণঞ্চ গন্ধরসসম্পন্নং অম্বপক্কং আহরন্তি. ছদ্দন্তদহতো পঞ্চৰণ্ণং নিৰাসনপারুপনং পীতকৰণ্ণং হত্থপুঞ্ছনকপটং [হত্থপুচ্ছনকপট্টং ইতিসব্বত্থ] দিব্বঞ্চ পানং আহরন্তি. দেৰসিকমেৰস্স অনুলেপনগন্ধং পারুপনত্থায অসুত্তমযিকং সুমনপুপ্ফপটং মহারহঞ্জ অঞ্জনং নাগভৰনতো নাগরাজানো আহরন্তি. ছদ্দন্তদহতোযেৰ উট্ঠিতস্স সালিনো নৰৰাহসহস্সনি দিৰসে দিৰসে সুৰা আহরন্তি. তে মূসিকা নিত্থুসকানি করোন্তি. একোপি খণ্ডতণ্ডুলো নাহোসি. রঞ্ঞো সব্বট্ঠানেসু অযমেৰ তণ্ডুলো পরিভোগং গচ্ছতি. মধুমক্খিকা মধুং করোন্তি. কম্মারসালাসু অচ্ছা কূটং পহরন্তি. করৰীকসকুণা আগন্ত্ৰা মধুরস্সরং ৰিকূজেন্তা রঞ্ঞো বলিকম্মং করোন্তি. ইমাহি ইদ্ধীহি সমন্নাগতো রাজা একদিৰসং সুৰণ্ণসঙ্খলিকবন্ধনং ¶ পেসেত্ৰা চতুন্নং বুদ্ধানং অধিগতরূপদস্সনং কপ্পা যুকং মহাকালনাগরাজানং আনযিত্ৰা সেতচ্ছত্তস্স হেট্ঠা মহারহে পল্লঙ্কে নিসীদাপেত্ৰা অনেকসত ৰণ্ণেহি জলজথলজপুপ্ফেহি সুৰণ্ণপুপ্ফেহি চ পূজং কত্ৰা সব্বা লঙ্কারপতিমণ্ডিতেহি সোল়সহি নাটকসহস্সেহি সমন্ততো পরিক্খিপিত্ৰা অনন্তঞাণস্স তাৰ মে সদ্ধম্মৰরচক্কৰত্তিনো সম্মাসম্বুদ্ধস্স [সম্মাসম্বুদ্ধরূপং ইতিসব্বত্থ] রূপং ইমেসং অক্খীনং আপাথং করোহীতি ৰত্ৰা তেন নিম্মিতং সকলসরীরে ৰিপ্পকিণ্ণপুঞ্ঞপ্পভাৰনিব্বত্তাসীতি অনুব্যঞ্জনপতিমণ্ডিত দ্ৰত্তিংস মহাপুরিসলক্খণ সস্সিরীকতায ৰিকচকমলুপ্পলপুণ্ডরীকপতিমণ্ডিতমিৰ সলিলতলং তারাগণরংসিজালৰিসরৰিপ্ফুরিতসোভাসমুজ্জলমিৰ গগনতলং নীলপীতলোহিতা দিভেদং ৰিচিত্তৰণ্ণরংসিৰিনদ্ধব্যামপ্পভাপরিক্খেপৰিলাসিতায সঞ্চ্যাপ্পভানুরাগইন্দধনুৰিজ্জুল্লতাপরিক্খিত্তমিৰ কণকগিরিসিখরং নানাৰিরাগৰিমলকেতুমালাসমুজ্জলিতচারুমত্থকসোভনং নযনরসাযনমিৰ চ ব্রহ্মদেৰমনুজনাগযক্খগণানং বুদ্ধরূপং পস্সন্তো সত্তদিৰসানি অক্খিপূজং নাম অকাসি. রাজা কির অভিসেকং পাপুণিত্ৰা তীণিযেৰ সংৰচ্ছরানি বাহিরকপাসণ্ডং পরিগণ্হি, চতুত্থে সংৰচ্ছরে বুদ্ধসাসনে পসীদি, তস্স পন পিতা বিন্দুসারো ব্রাহ্মণভত্তো অহোসি. সো ব্রাহ্মণানঞ্চ ব্রাহ্মণজাতিপাসণ্ডানং পণ্ডরঙ্গপরিব্বাজকানঞ্চ সট্ঠিসহস্সমত্তানং নিচ্চভত্তং পট্ঠপেসি. অসোকোপি পিতরা পৰত্তিতং দানং অত্তনো অন্তোপুরে [অন্তেপুরে ইতিসব্বত্থ] তথেৰ দদমানো একদিৰসং সীহপঞ্জরে ঠিতো তে উপসমপরিবাহিরেন আচারেন ভুঞ্জমানে অসংযতিন্দ্রিযে অৰিনীতইরিযাপথে দিস্ৰা চিন্তেসি, ঈদিসং দানং উপপরিক্খিত্ৰা যুত্তট্ঠানে দাতুং ৰট্টতীতি. এৰং চিন্তেত্ৰা অমচ্চে আহ, গচ্ছথ ভণে অত্তনো অত্তনো সাধুসম্মতে সমণব্রাহ্মণে অন্তোপুরং অভিহরথ দানং দস্সামীতি, অমচ্চা সাধু দেৰাতি রঞ্ঞো ¶ পটিস্সুত্ৰা তে তে পণ্ডরঙ্গপরিব্বাজকা জীৰক নিগণ্ঠাদযো আনেত্ৰা ইমে মহারাজ অম্হাকং অরহন্তোতি আহংসু, অথ রাজা অন্তোপুরে উচ্চাৰচানি আসনানি পঞ্ঞাপেত্ৰা আগচ্ছন্তূতি ৰত্ৰা আগতাগতে আহ অত্তনো অনুরূপে আসনে নিসীদথাতি, একচ্চে ভদ্দপীঠকেসু একচ্চে ফলকপীঠকেসু নিসীদিংসু, তং দিস্ৰা রাজা নত্থি এতেসং অন্তো সারোতি ঞত্ৰা তেসং অনুরূপং খাদনীযভোজনীযং দত্ৰা উয্যোজেসি. এৰং গচ্ছন্তে কালে একদিৰসং সীহপঞ্জরে ঠিতো নিগ্রোধসামণেরং দিস্ৰা তস্মিং গতেন পসাদেন বুদ্ধসাসনে পসন্নো সট্ঠিসহস্সমত্তে পাসণ্ডিযে অপনেত্ৰা সট্ঠিসহস্সমত্তে ভিক্খূ ভোজেন্তো বুদ্ধসাসনে পসীদিত্ৰা অসোকারামং কারেত্ৰা তত্থ তে ৰসাপেন্তো একদিৰসং অসোকারামে সট্ঠিসহস্সভিক্খূনং দানং দত্ৰা তেসং মজ্ঝে নিসজ্জ সঙ্ঘং চতূহি পচ্চযেহি পৰারেত্ৰা ইমং পঞ্হং পুচ্ছি, ভন্তে ভগৰতা দেসিতধম্মো নাম কিত্তকো হোতীতি, মহারাজ নৰ অঙ্গানি, খন্ধতো চতুরাসীতিধম্মক্খন্ধসহস্সানীতি. রাজা ধম্মে পসীদিত্ৰা একেকং ধম্মক্খন্ধং একেকৰিহারেন পূজেস্সামীতি একদিৰসমেৰ ছন্নৰুতিকোটিখনং ৰিস্সজ্জেত্ৰা অমচ্চে আণাপেসি, একমেকস্মিং নগরে একমেকং ৰিহারং কারেন্তা চতুরাসীতিযা নগরসহস্সেসু চতুরাসীতিৰিহারসহস্সানি কারাপেথাতি, সযঞ্চ অসোকারামে অসোকমহাৰিহারত্থায [সযংচঅসোকহোৰিহারত্থায ইতিপিকত্থচি] কম্মং পট্ঠপেসি, সঙ্ঘো ইন্দগুত্তত্থেরং নাম মহিদ্ধিকং মহানুভাৰং খীণাসৰং নৰকম্মাধিট্ঠাযকং অদাসি, থেরো যং যং ন নিট্ঠাতি, তং তং অত্তনো আনুভাৰেন নিট্ঠাপেসি, এৰংপিতীহি সংৰচ্ছরেহি ৰিহারকম্মং নিট্ঠাপেসি, একদিৰসমেৰ সব্বনগরেহি পণ্ণানি আগমিংসু, অমচ্চা রঞ্ঞো আরোচেসুং নিট্ঠিতানি দেৰ চতুরাসীতিমহাৰিহারসহস্সানীতি. অথ রাজা ¶ ভিক্খুসঙ্ঘং উপসঙ্কমিত্ৰা ভন্তে মযা চতুরাসীতিৰিহারসহস্সানি কারিতানি, ধাতুযো কুতো লচ্ছামীতি পুচ্ছি, মহারাজ ধাতুনিধানং নাম অত্থীতি সুণোম, ন পন পঞ্ঞাযতি অসুকট্ঠানেতি. রাজা রাজগহে চেতিযং ভিন্দাপেত্ৰা ধাতুং অপস্সন্তো পটিপাকতিকং কারাপেত্ৰা ভিক্খুভিক্খুণিযো উপাসকউপাসিকাযোতি চতস্সো পরিসা গহেত্ৰা ৰেসালিযং গতো. তত্রাপি অলভিত্ৰা কপিলৰত্থুং গতো, তত্রাপি অলভিত্ৰা রামগামং গতো, রামগামে নাগা চেতিযং ভিন্দিতুং নাদংসু. চেতিযে নিপতিতকুদ্দালো খণ্ডাৰণ্ডং হোতি, এৰং তত্রাপি অলভিত্ৰা অল্লকপ্পং পাৰং কুসিনারংতি সব্বচেতিযানি ভিন্দিত্ৰা ধাতুং অলভিত্ৰা পটিপাকতিকানি কত্ৰা রাজগহং গন্ত্ৰা চতস্সো পরিসা সন্নিপাতাপেত্ৰা অত্থি কেনচি সুতপুব্বং অসুকট্ঠানে ধাতুনিধানংতি পুচ্ছি. তত্থেকো ৰীসংৰস্স সতিকো থেরো অসুকট্ঠানে ধাতুনিধানংতি ন জানামি, ময্হং পন পিতামহত্থেরো মযি সত্তৰস্সিকালে মালাচঙ্গোটকং গাহাপেত্ৰা এহি সামণের অসুকগচ্ছন্তরে পাসাণথূপো অত্থি. তত্থ গচ্ছামাতি গন্ত্ৰা পূজেত্ৰা ইমং ঠানং উপধারেতুং ৰট্টতি সামণেরাতি আহ. অহং এতমেৰ জানামি মহারাজাতি আহ. রাজা এতদেৰ ঠানংতি ৰত্ৰা গচ্ছে হরাপেত্ৰা পাসাণথূপং পংসুংচ অপনেত্ৰা হেট্ঠা সুধাভূমিং অদ্দস, ততো সুধা চ ইট্ঠকাযো চ হরাপেত্ৰা অনুপুব্বেন পরিৰেণং ওরুয্হ সত্তরতনৰালিকং অসিহত্থানি চ কট্ঠরূপকানি সম্পরিৰত্তন্তানি অদ্দস, সো যক্খদাসকে পক্কোসাপেত্ৰা বলিকম্মং কারাপেত্ৰাপি নেৰ অন্তং পস্সন্তো দেৰতা নমস্সমানো অহং ইমা ধাতুযো গহেত্ৰা চতুরাসীতিৰিহারসহস্সে নিদহিত্ৰা সক্কারং করোমি. মা মে দেৰতা অন্তরাযং করোন্তূতি আহ, সক্কো দেৰরাজা চারিকং চরন্তো তং দিস্ৰা ৰিস্সকম্মং আমন্তেত্ৰা তাত অসোকধম্মরাজা ধাতুযো ¶ নীহরিস্সামীতি পরিৰেণং ওতিণ্ণো. গন্ত্ৰা কট্ঠরূপানি নীহরাপেহীতি. সো পঞ্চচূলকগামদারকৰেসেন গন্ত্ৰা রঞ্ঞো পুরতো ধনুকহত্থো ঠত্ৰা হারেমি মহারাজাতি আহ, হর তাতাতি সরং গহেত্ৰা সন্ধিম্হিযেৰ ৰিজ্ঝি, সব্বং ৰিপ্পকিরীযিত্থ, অথ রাজা আৰিঞ্জনে [অৰিঞ্চিনে ইতিপিকত্থচি] বন্ধকুঞ্চিকমুদ্দিকং গণ্হি, মণিক্খন্ধং পস্সিত্ৰা অনাগতে দল়িদ্দরাজানো ইমং মণিং গহেত্ৰা ধাতূনং সক্কারং করোন্তূতি পণ্ণে অক্খরানি দিস্ৰা কুজ্ঝিত্ৰা মাদিসানং পন রাজূনং [রাজানং ইতিসব্বত্থ] দল়িদ্দরাজাতি ৰত্তুং অযুত্তংতি পুনপ্পুনং ঘটেত্ৰা দ্ৰারং ৰিৰরিত্ৰা অন্তোগেহং পৰিট্ঠো অট্ঠারসৰস্সাধিকানং দ্ৰিন্নং ৰস্সসতানং উপরি আরোপিতদীপা তথেৰ পজ্জলন্তি, নীলুপ্পলপুপ্ফানি তংখণংযেৰ আহরিত্ৰা আরোপিতানি ৰিয পুপ্ফসন্থারো তং খণং সন্থতো ৰিয গন্ধা তং মুহুত্তং পিংসিত্ৰা ঠপিতা ৰিয অহেসুং. রাজা সুৰণ্ণপট্টং গহেত্ৰা অনাগতে পিযদাসো নাম কুমারো ছত্তং উস্সাপেত্ৰা অসোকো নাম ধম্মরাজা ভৰিস্সতি, সো ইমা ধাতুযো ৰিত্থারিতা করিস্সতীতি ৰাচেত্ৰা দিট্ঠোহং অয্যেন মহাকস্সপত্থেরেনাতি ৰত্ৰা ৰামহত্থং আভুজিত্ৰা দক্খিণহত্থেন অপ্ফোটেসি. সো তস্মিং ঠানে পরিচরণকধাতুমত্তমেৰ ঠপেত্ৰা সেসধাতুযো সব্বা গহেত্ৰা ধাতুঘরং পুব্বে পিহিতনযেনেৰ পিদহিত্ৰা সব্বা যথা পকতিযাযেৰ কারেত্ৰা উপরিপাসাণচেতিযং পতিট্ঠাপেত্ৰা চতুরাসীতিযা ৰিহারসহস্সেসু ধাতুযো পতিট্ঠাপেসি. অথেকদিৰসং রাজা ৰিহারং গন্ত্ৰা ভিক্খুসংঘং ৰন্দিত্ৰা একমন্তে নিসিন্নো যদি ভন্তে ছন্নৰুতিকোটিধনং ৰিস্সজ্জেত্ৰা চতুরাসীতিৰিহারসহস্সানিসচেতিযানি কারাপেত্ৰাপি অহং ন দাযাদো. অঞ্ঞো কো দাযাদোতি, পচ্চযদাযকো নাম ত্ৰং মহারাজ, যো পন অত্তনো পুত্তঞ্চ ধীতরঞ্চ পব্বাজেতি, অযং সাসনে দাযাদো নামাতি এৰং ৰুত্তে ¶ অসোকো রাজা সাসনে দাযাদভাৰং পত্থযমানো অৰিদূরে ঠিতং মহিন্দকুমারং দিস্ৰা সক্খিস্সসি তাত ত্ৰং পব্বজিতুংতি আহ. কুমারো পকতিযা পব্বজিতুকামো রঞ্ঞো ৰচনং সুত্ৰা অতিৰিয পামোজ্জজাতো পুব্বজামি [পব্বজ্জামি ইতিসব্বত্থ] দেৰ. মং পব্বাজেত্ৰা সাসনে দাযাদো হোথাতি আহ. তেন চ সমযেন রাজধীতা সংঘমিত্তাপি তস্মিং ঠানে ঠিতা হোতি. তং দিস্ৰা আহ ত্ৰম্পি অম্ম পব্বজিতুং সক্খিস্সসীতি, সাধু তাতাতি সম্পটিচ্ছি. রাজা পুত্তানং মনং লভিত্ৰা পহট্ঠচিত্তো ভিক্খুসংঘং উপসঙ্কমিত্ৰা ভন্তে ইমে দারকে পব্বাজেত্ৰা মং সাসনে দাযাদং করোথাতি. সঙ্ঘো রঞ্ঞো ৰচনং সম্পটিচ্ছিত্ৰা কুমারং মোগ্গলিপুত্ততিস্সত্থেরেন উপজ্ঝাযেন মহাদেৰত্থেরেন আচরিযেন পব্বজাপেসি [পব্বজ্জাপেসি ইতিসব্বত্থ]. মজ্ঝন্তিকত্থেরেন আচরিযেন উপসম্পাদেসি, সো উপসম্পদামালকেযেৰ সহ পটিসম্ভিদাহি অরহত্তং পাপুণি. সঙ্ঘমিত্তাযপি রাজধীতায আচরিযাণী আযুপালত্থেরী নাম [অচারিযা আযুপালত্থেরীনাম ইতিসব্বত্থ]. উপজ্ঝাযা ধম্মপালত্থেরী নাম অহোসি. রাজা পন অনেকাকারেন বুদ্ধসাসনং সোভেত্ৰা মোগ্গলিপুত্ততিস্সত্থেরস্স সহাযেন [সহয্যেন. সাহায্যেন. সাহয্যেন ইতিপিকত্থচি] সট্ঠিসহস্সমত্তে দুস্সীলে তিত্থিযে বুদ্ধসাসনা উপ্পব্বাজেত্ৰা ততিযধম্মসংগীতিং নিট্ঠাপেসি. তস্মিং কির সমাগমে ভিক্খুভিক্খুণিযো কিত্তকাতি [কিত্তকানীতি ইতিসব্বত্থ], ৰুত্তঞ্হি.

তস্মিং সমাগমে আসুং, অসীতিভিক্খুকোটিযো;

অহেসুং সতসহস্সানি, তেসু খীণাসৰা যতী.

নৰুতিসতসহস্সানি, অহূ ভিক্খুণিযো তহিং;

খীণাসৰা সিক্খুণিযো, সহস্সং আসু তাসু চাতি.

এৰং ¶ সো অসোকো ধম্মরাজা সকলজম্বুদীপে অগ্গরাজা হুত্ৰা বুদ্ধসাসনং সোভেন্তো ৰিহাসি. অযং পনেত্থ সঙ্খেপো, ৰিত্থারো পন মহাৰংসে ৰুত্তোতি. ৰুত্তঞ্হি.

সম্পুণ্ণত্তা অযং তিস্সো, চেতনাযো মধুপ্পদো;

সব্বত্থ সব্বদা সব্ব, সম্পত্তিমভিসম্ভুণীতি.

মজ্ঝিমো পন ৰাণিজো অত্তনো পারৰাদিদোসেন পরসমুদ্দে লঙ্কাযং নিব্বত্তি. তস্সেৰং কথাপটিপাটি ৰেদিতব্বা. তম্বপণ্ণিদীপে কির মুটসীৰো নাম রাজা সট্ঠিৰস্সানি রজ্জং কারেসি, তস্স পুঞ্ঞপঞ্ঞাগুণোপেতা অঞ্ঞমঞ্ঞং হিতেসিনো দস পুত্তা অহেসুং. দ্ৰে চ ধীতরো. সব্বে তে সমগ্গা সম্মোদমানা ৰসন্তি. অথাপরস্মিং সমযে অমচ্চা মুটসীৰরঞ্ঞে কালকতে দেৰানংপিযতিস্সকুমারং অভিসিঞ্চিংসু, অভিসেকসমকালমেৰস্স অনেকানি অচ্ছরিযানি অহেসুং. তানি পকাসেন্তা মহাৰংসকথাচরিযা আহংসু.

দেৰানংপিযতিস্সোতি, ৰিস্সুতো দুতিযো সুতো;

তেসু [অহোসিমুটসীৰস্স, দসপুত্তেসুপুঞ্ঞৰা ইতিকত্থচি] ভাতুসু সব্বেসু, পুঞ্ঞপঞ্ঞাধিকো অহু.

দেৰানংপিযতিস্সো সো, রাজাসি পিতুঅচ্চযে;

তস্সাভিসেকেন সমং, বহূনচ্ছরিযানহূ.

লঙ্কাদীপম্হি সকলে, নিধযো রতনানিচ;

অন্তোঠিতানি উগ্গন্ত্ৰা, পথৰীতলমারুহুং.

লঙ্কাদীপসমীপম্হি, ভিন্ননাৰা গতানি চ;

তত্র জাতানি চ থলং, রতনানি সমারুহুং.

ছাতপব্বতপাদম্হি, তিস্সো চ ৰেল়ুযট্ঠিযো;

জাতা রথপতোদেন, সমানা পরিমাণতো.

তাসু ¶ একা লতাযট্ঠি, রজতাভা তহিং লতা;

সুৰণ্ণৰণ্ণা রুচিরা; দিস্সন্তেতা মনোরমা.

একা কুসুমযট্ঠীতু; কুসুমানি তহিংপন;

নানানি নানাৰণ্ণানি; দিস্সন্তেতিফুটানি চ.

একা সকুণযট্ঠী তু, তহিংপক্খিমিগা বহূ;

নানা চ নানাৰণ্ণা চ, সজীৰাৰিয দিস্সরে.

হযগজরথা মলক্যা, ৰলযঙ্গুলিৰেঠকা চেৰ;

ককুধফলা পাকতিকা, ইচ্চে তা অট্ঠ জাতিযা.

মুত্তা সমুদ্দা উগ্গন্ত্ৰা; তীরে ৰট্টিৰিযট্ঠিতা;

দেৰানংপিযতিস্সস্স; সব্বং পুঞ্ঞৰিজম্ভিতং.

ইন্দনীলং ৰেল়ুরিযং, লোহিতঙ্কমণী চি মে;

রতনানি পনে তানি, মুত্তা তা তাচ যট্ঠিযো;

সত্তাহব্ভন্তরেযেৰ, রঞ্ঞো সন্তিকমাহরুংতি.

তেন চ সমযেন দেৰানংপিযতিস্সমহারাজা চ অসোকো ধম্মরাজা চ অদ্দিট্ঠসহাযা হোন্তি. তস্মা সো এতানি রতনানি চ অঞ্ঞানি বহূনি উপাযনানি মম সহাযস্স দেথাতি ধম্মাসোকমহানরিন্দস্স পণ্ণাকারত্থায পেসেসি. সোপি তং দিস্ৰা পসীদিত্ৰা পঞ্চরাজককুধভণ্ডানি চ অঞ্ঞঞ্চ বহুপণ্ণাকারঞ্চ অভিসেকত্থায পেসেসি. ময্হং সহাযং অভিসেকং করোন্তূতি. ন কেৰলঞ্চেতং আমিসপণ্ণাকারং. ইমং কির ধম্মপণ্ণাকারম্পি পেসেসি.

অহং বুদ্ধংচ ধম্মংচ; সংঘংচ সরণং গতো;

উপসকত্তং ৰেদেসিং; সক্যপুত্তস্স সাসনে.

ইমেসু তীসু ৰত্থূসু; উত্তমেসু নরুত্তম;

চিত্তং পসাদযিত্ৰান, সদ্ধায সরণং ৰজাতি.

অমচ্চা ¶ পুন লঙ্কমাগম্ম রাজানং অভিসিঞ্চিংসু, তেন খো পন সমযেন মোগ্গলিপুত্ততিস্সত্থেরো কত্থ নুখো অনাগতে সাসনং সুপ্পতিট্ঠিতং ভৰেয্যাতি উপপরিক্খন্তো পচ্চন্তিমে সুপ্পতিট্ঠিতং ভৰিস্সতীতি ঞত্ৰা তে তে থেরে তত্থ তত্থ পেসেত্ৰা মহামহিন্দত্থেরং গন্ত্ৰা তম্বপণ্ণিদীপং পসাদেহীতি নিযোজেসি, সক্কো চ দেৰানমিন্দো মহামহিন্দত্থেরং উপসংকমিত্ৰা কালকতো ভন্তে মুটসীৰো রাজা. ইদানি দেৰানংপিযতিস্সমহারাজা রজ্জং কারেতি. সম্মাসম্বুদ্ধেন চ তুম্হে ব্যাকতা অনাগতে মহিন্দো নাম ভিক্খু তম্বপণ্ণিদীপং পসাদেস্সতীতি. তস্মা তিহ খো ভন্তে কালো দীপৰরং গমনায, অহম্পি সহাযো ভৰিস্সামীতি, থেরো তস্স ৰচনং সম্পটিচ্ছিত্ৰা অত্তসত্তমো চেতিযপব্বতৰিহারতো ৰেহাসং উপ্পতিত্ৰা অনুরাধপুরস্স পুরত্থিমদিসায মিস্সকপব্বতে পতিট্ঠহি, ইমং এতরহি চেতিযপব্বতোতিপি সঞ্জানন্তি. তদা তম্বপণ্ণিযং উস্সৰদিৰসো হোতি, রাজা ছণং করোথাতি অমচ্চে আণাপেত্ৰা চত্তাল়ীসসহস্সপুরিসেহি পরিৰারিতো নগরম্হা নিক্খমিত্ৰা মিস্সকপব্বতং পাযাসি মিগৰং কীল়িতুকামো. অথ তস্মিং পব্বতে অধিৰত্থা একা দেৰতা রঞ্ঞো থেরে দস্সেস্সামীতি রোহিতমীগৰণ্ণেন অৰিদূরে তিণপণ্ণানি খাদমানা ৰিয চরতি, রাজা অযুত্তং দানি পমত্তং ৰিজ্ঝিতুংতি জিযং পোঠেসি, মিগো অম্বত্থলমগ্গং গহেত্ৰা পলাযিতুং আরভি, রাজা তং অনুবন্ধন্তো অম্বত্থলমেৰ অভিরুহি, মিগোপি থেরানং অৰিদূরে অন্তরধাযি, মহিন্দত্থেরো রাজানং অৰিদূরে আগচ্ছন্ত মংযেৰ রাজা পস্সতু, মা ইতরেতি অধিট্ঠহিত্ৰা তিস্স তিস্স ইতো এহীতি আহ, রাজা তং সুত্ৰা চিন্তেসি. ইমস্মিং তম্বপণ্ণিদীপে জাতো মং তিস্সোতি নামং গহেত্ৰা আলপিতুং সমত্থো নাম নত্থি. অযং পন ছিন্নভিন্নপটধরো ভণ্ডুকাসাৰ ৰসনো মং নামেনা লপতি, কো নুখো যং ভৰিস্সতি মনুস্সো অমনুস্সো ৰাতি. থেরো আহ.

সমণা ¶ মযং মহারাজ, ধম্মরাজস্স সাৰকা;

তৰেৰ অনুকম্পায, জম্বুদীপা ইধাগতাতি.

রাজা ধম্মাসোকনরিন্দেন পেসিতসাসনানুসারেন অনুস্সরমানো অয্যা নুখো আগতাতি তাৰদেৰ আযুধং নিক্খিপিত্ৰা একমন্তং নিসীদি সম্মোদনীযং কথং কথযমানো সারণীযং [সম্মোদনীযং-ইতিসব্বত্থ] কথং কুরুমানো. তস্মিং তানিপি চত্তাল়ীসপুরিসসহস্সানি আগন্ত্ৰা তং পরিৰারেসুং, তদা থেরো ইতরেপি জনে দস্সেসি, রাজা দিস্ৰা ইমে কদা আগতাতি পুচ্ছি, মযা সদ্ধিংযেৰ মহারাজাতি. ইদানি পন জম্বুদীপে অঞ্ঞেপি এৰরূপা সমণা সন্তীতি. মহারাজ এতরহি জম্বুদীপো কাসাৰপজ্জোতো ইসিৰাতপটিৰাতো, তস্মিং.

তেৰিজ্জা ইদ্ধিপ্পত্তা চ, চেতোপরিঞ্ঞকোৰিদা;

খীণাসৰা অরহন্তো, বহূ বুদ্ধস্স সাৰকাতি.

রাজা তং সুত্ৰা পসন্নো অহোসি, অথ থেরো রুক্খোপমাদিনা তস্স পঞ্ঞাৰেয্যত্তিযং ঞত্ৰা ধম্মং দেসেসি সনরামরেহি সাধুকারং কারযমানো. তেন ৰুত্থং.

পণ্ডিতোতি ৰিদিত্ৰান, চুল্লহত্থিপদোপমং;

সুত্তন্তং দেসযী থেরো, মহীপস্স মহামতি [মহীমতী ইতিপিকত্থচি].

দেসনাপরিযোসানে সো সদ্ধিং তেহি নরেহি চত্তাল়ীসসহস্সেহি সরণেসু পতিট্ঠহীতি. অথস্স রাজা স্ৰে ভন্তে মম গেহে ভিক্খং গণ্হাথাতি যাচিত্ৰা গন্ত্ৰা নগরঞ্চ রাজগেহঞ্চ অলঙ্করিত্ৰা থেরে নিসীদাপেত্ৰা পণীতেনাহারেন পরিৰিসিত্ৰা অনুল়াদেৰিপ্পমুখাহি পঞ্চসতইত্থীহি সদ্ধিং একমন্তং নিসীদি. অথ থেরো ধম্মরতন ৰস্সং ৰস্সাপেসি. ততো ¶ তা পঞ্চসতইত্থিযো সোতাপত্তিফলং পাপুণিংসু. ততো হত্থিসালাযং সহস্সং, নন্দনৰনে সহস্সংতি এৰং দুতিযদিৰসে অড্ঢতেয্যানি পাণসহস্সানি সোতাপত্তিফলে পতিট্ঠাপেসি. ততিযদিৰসে অড্ঢনৰপ্পমাণং পাণসহস্সংতি এৰং অনেকসতানং অনেকসহস্সানং অনেকসত সহস্সানং ধম্মা মতং পাযেসি. ৰুত্তঞ্হি.

মহামহিন্দসুরিযো, লঙ্কাৰেহাসমজ্ঝগো;

বোধনেয্যম্বুজে কাসি, ৰিকাসং ধম্মরংসিনা.

মহামহিন্দচন্দো সো, লঙ্কাৰেহাসমজ্ঝগো;

বোধেসি ধম্মরংসীহি, ৰেনেয্যকুমুদাকরে.

মহামহিন্দমেঘো সো, ৰস্সং ধম্মম্বুৰুট্ঠিযা;

সাধূনং চিত্তবীজেসু, জনেসি কুসলঙ্কুরেতি.

অথ রাজা সুমনসামণেরেন ধম্মাসোকস্স হত্থতো সম্মাসম্বুদ্ধপরিভুত্তপত্তপূরধাতুযো চ সক্কস্স সন্তিকা দক্খিণক্খকধাতুংচ আহরাপেত্ৰা [আহারিত্ৰা-ইতিসব্বত্থ] চেতিযপব্বতে থূপং আদিংকত্ৰা সকললঙ্কাদীপে যোজনে যোজনে থূপানি কারেত্ৰা দক্খিণকধাতুং নিদহিত্ৰা থূপারামথূপঞ্চ পতিট্ঠাপেসি. অথ সঙ্ঘমিত্তায থেরিযা আনীতং জযমহাবোধিনো দক্খিণমহাসাখং পতিট্ঠাপেত্ৰা পূজং কারেসি. সব্বো পনেত্থ কথাৰিত্থরো মহাৰংসতো ৰেদিতব্বো.

পারৰাদিকদোসেন, জাতেৰং পরসাগরে;

পত্তানুমোদনা এৰং, লঙ্কাযং আসি ইস্সরো.

গন্ত্ৰান যে যত্থ ন সোচযন্তীতি.

তেভাতিকমধুৰাণিজকানং ৰত্থুং অট্ঠমং.

৩৯. বোধিরাজধীতুযা [বোধিরাজধীতায ইতিসব্বত্থ] ৰত্থুম্হি অযমানুপুব্বীকথা

ভগৰতি পরিনিব্বুতে লঙ্কাযং সাসনে সুপ্পতিট্ঠিতে তত্থ হকুরেল়ীতি একো গামো অহোসি, তত্থেকা দারিকা গামাদারিকাহি সদ্ধিং তত্থ তত্থ কীল়ন্তী ৰিহরতি, তদা গামসমীপে মহাসোব্ভং হোতি. তত্থেকো মরুত্থরুক্খো সব্বদা পাল়িফুল্লোৰ তিট্ঠতি. মনুস্সা বুদ্ধপূজনত্থং পুপ্ফানি ৰিচিণন্তা উদকং ওগহেত্ৰা রুক্খমভিরুয্হ পুপ্ফানি ওচিণন্তি, কুমারিকা তে দিস্ৰা মনুস্সা সুখেন গন্ত্ৰা পুপ্ফানি ওচিণন্তূতি একং সুক্খপালিভদ্দদণ্ডকং আহরিত্ৰা সেতুং কত্ৰা ঠপেসি, ততো পট্ঠায মনুস্সা তেনগন্ত্ৰা পুপ্ফানি ওচিণন্তি. অথ সা ততো চুতা তেনেৰ কুসলকম্মেন জম্বুদীপে পাটলিপুত্তনগরে সোমদত্তরঞ্ঞো ধীতা হুত্ৰা নিব্বত্তি, উত্তমরূপধরা দেৰচ্ছরপটিভাগা অহোসি. মাতাপিতরো পনস্সা বোধিরাজকুমারিকাতি ৰোহরিংসু. পুব্বে কতসেতুআনুভাৰেন তস্সা সুৰীরকো নামেকো আকাসগামী সিন্ধৰপোতকো নিব্বত্তি. রাজধীতুযা পন পিতা বুদ্ধমামকো ধম্মমামকো সঙ্ঘমামকো হুত্ৰা মহন্তং পুঞ্ঞং পসৰন্তো সিন্ধৰপোতকং দিস্ৰা পুঞ্ঞকরণস্স মে সহাযো লদ্ধোতি তুট্ঠমানসো অস্সং অভিরুহিত্ৰা দিৰসস্স তিক্খত্তুং গন্ত্ৰা মহাবোধিং ¶ ৰন্দতি. রাজধীতা নং দিস্ৰা পিতুসন্তিকং গন্ত্ৰা অভিণ্হং তাত কুহিং গচ্ছসীতি পুচ্ছি. রাজা ন কিঞ্চি কথেসি, অথ সা পুনপ্পুনং পিতরং নিবন্ধন্তী পুচ্ছি. ততো রাজা তস্সাৰি করোন্তো এৰমাহ.

অম্হাকং ভগৰা পুব্বে, পূরেন্তো দসপারমী;

অদাসি সীসরত্তক্খি, মংসং জীৰিতমেৰ চ.

পুত্তদারে চ রজ্জে চ, পত্ৰা [দত্ৰা ইতিপিকত্থচি] পারমিমত্থকং;

অনপ্পকপ্পকোটীনং, খেপেত্ৰা কপিলৰুযে.

সক্করাজকুলে জাতো, লোকে অপ্পটিপুগ্গলো;

সম্পত্তচক্কৰত্তিত্তং, পহন্ত্ৰান নরাধিপো.

দিস্ৰা নিমিত্তে চতুরো, নিক্খম্ম অভিনিক্খমং;

বোধিমূলমুপাগম্ম, নিসিন্নো ৰজিরাসনে.

সহস্সবাহুং মাপেত্ৰা, নানাযুধসমাকুলং [নানাৰুধসমাকুলং-ইতিসব্বত্থ];

মহাভীতিকরং ৰেসং, কাল়পব্বতসাদিসং.

মাপেত্ৰান সমারুয্হ, গিরিমেখলৰারণং;

মারসেনং সমানেত্ৰা, আগতং মকরদ্ধজং.

পারমিতাবলেন তং, মারসেনং পলাপিয;

যত্থাসীনো কিলেসারি, সহস্সং ঘাতযী জিনো.

নযনং সুজলসেকেহি, সত্তাহং জিনসেৰিতং;

পূজিতং দেৰব্রহ্মেহি, সিদ্ধোরগনরাদিহি;

ৰন্দিতুং জযবোধিংতং, গচ্ছামি সততং অহং.

উপাসতি সদা গন্ত্ৰা, যো নরো বোধিপাদপং;

গন্ধোদদীপধূপাদি, নানাপূজাহি সাধুকং.

স নরো নিরামযো হোতি, পচ্চত্তে চ পরত্থ চ;

পূজিতো মানিতো হোতি, দীঘাযু বলৰা সুখী.

তদত্থং পত্থযন্তেন, অত্থকামেন জন্তুনা;

উপাসনীযং সদ্ধায, নিচ্চং তং বোধিপাদপংতি.

তং সুত্ৰা কুমারিকা পীতিযা ফুটসরীরা পিতরং ৰন্দিত্ৰা অহম্পি তাত গচ্ছামীতি আহ. রাজা পনস্সা উপদ্দৰভযেন গমনং ন ইচ্ছি. ততো সা যাৰততিযং পিতরং যাচিত্ৰা রঞ্ঞা অনুঞ্ঞাতা. ততো পট্ঠায পিতরা সদ্ধিং সিন্ধৰমারুয্হ বোধিং ৰন্দিতুং সততং গচ্ছতি. অথাপরভাগে রাজা মরণমঞ্চে নিপন্নো চিন্তেসি. ধীতা মে নিরন্তরং বোধিউপট্ঠানংগচ্ছতি, এতিস্সা অনাগতে যংকিঞ্চি ভযং উপ্পজ্জমানং ততো উপ্পজ্জতি. তত্থ মে কিং কাতব্বন্তি. ততো সিন্ধৰং পক্কোসাপেত্ৰা তস্স কণ্ণমূলে মন্তেন্তো এৰমাহ, তাত মম ধীতা অভিণ্হং তৰ সহাযং কত্ৰা বোধিং ৰন্দিতুং গচ্ছতি. তত্থস্সা যংকিঞ্চি ভযং ভৰেয্য. তং নপ্পতিরূপং. তত্থ গমনাগমনে মম ধীতরং রক্খেয্যাসীতি তস্স ধীতরং পটিপাদেত্ৰা কালমকাসি. ততো রাজধীতা পিতুসরীরকিচ্চং কারেত্ৰা দিৰসস্স তিক্খত্তুং অস্সমভিরুয্হ বোধিউপট্ঠানং গচ্ছতি. মনুস্সা পনস্সা রূপসম্পত্তিং দিস্ৰা ৰিম্হিতমানসা রাজারহং ৰত নো ইদং পণ্ণাকারং দিট্ঠং. গন্ত্ৰা রঞ্ঞো আচিক্খিস্সাম. অপ্পেৰ নাম রাজা সো কিঞ্চি নো দদেয্যাতি চিন্তেত্ৰা রঞ্ঞো সন্তিকং গন্ত্ৰা ৰন্দিত্ৰা ঠিতা এৰমাহংসু.

বোধিমণ্ডং সমাগম্ম, অভিণ্হং তুট্ঠমানসা;

ৰন্দন্তী যাতি কঞ্ঞেকা, ৰিজ্জূৰ সিরিযা জলং.

নীলধম্পিল্লভারা সা, ৰিসালাযতলোচনা;

সোণ্ণদোলাভসৰণা, সামা সুভপযোধরা.

সতরংসীহি সম্মিস্স, সঞ্চ্যাম্বুদসমাধরা;

তুঙ্গনাসা নীলভমু, হাসভাসা মনোরমা.

ঈদিসং ¶ নো মহারাজা [মহারাজদিট্ঠপুব্ব ইতিপিকত্থচি], দিট্ঠপুব্বং কুদাচনং;

এহি তস্সা সিরিংদেৰ, বোধিমণ্ডম্হি দক্খসীতি.

তং সুত্ৰা রাজা সৰণসংসগ্গেনেৰ তায পটিবদ্ধচিত্তো চতুরঙ্গিনিংসেনং গহেত্ৰা রাজধীতরং বোধিৰন্দনত্থায আগতকালে বহিপাকারে সেনং পরিক্খিপাপেত্ৰা গণ্হথেতন্তি মনুস্সে নিযোজেসি. ততো সেনাপি তং গহণসজ্জা অট্ঠাসি. রাজধীতা তে দিস্ৰা সীঘং সিন্ধৰং উপসঙ্কমিত্ৰা তস্স পিট্ঠিযং নিসিন্না পণ্হিযা সঞ্ঞং অদাসি. সো তং গহেত্ৰা ৰেগেন আকাসং পক্খন্দি. সা পন দুন্নিসিন্নভাৰেন অস্সস্স ৰেগং সন্ধারেতুমসক্কোন্তী অস্সপিট্ঠিতো পরিগলি. সিন্ধৰো রাজধীতরং পতমানং দিস্ৰা রাজোৰাদং সরমানো ৰেগেনাগন্ত্ৰা তস্সা কেসে ডংসিত্ৰা উক্খিপিত্ৰা পতমানায তস্সা পিট্ঠিংদত্ৰা নিসীদাপেত্ৰা আকাসেন তং নেত্ৰা পাটলিপুত্তনগরেযেৰ পতিট্ঠাপেসি [পাতলিপুত্তনগরেযেৰতং পৰিঠাপেসিইতিপিকত্থচি].

তিরচ্ছানগতাপেৰং, সরন্তা উপকারকং;

ন জহন্তীতি মন্ত্ৰান, কতঞ্ঞূ হোন্তু [হোন্তিপাণিনো-ইতিপিকত্থচি] পাণিনোতি.

ততো পট্ঠায সা পুঞ্ঞকম্মং কত্ৰা সগ্গপরাযনা অহোসীতি.

৪০. কুণ্ডলিযা ৰত্থুম্হি অযমানুপুব্বীকথা

লঙ্কাদীপে ¶ রোহণজপদে মহাগামো নাম অহোসি, তত্থ তিস্সৰিহারং নাম অনেকসতভিক্খূহি সমাকিণ্ণং অনেকপরিৰেণপতিমণ্ডিতং ৰিহারং অহোসি. তত্থেকো তিস্সো নাম সামণেরো পটিৰসতি. সো একস্মিংসমযে জনপদচারিকং চরন্তো পাসাণৰাপিগামে ভিক্খং চরিত্ৰা যাপনমত্তং ভত্তং সপ্পিনা সদ্ধিং লভিত্ৰা নিক্খম্ম গামদ্ৰারং পত্ৰা মহাগামাভিমুখো গচ্ছন্তো মনুস্সে উদকফাসুকট্ঠানং পুচ্ছি. তেহি ভন্তে তুম্হাকং অভিমুখে অৰিদূরট্ঠানে ককুবন্দকন্দরং নাম সন্দমানসীতলোদকং ধৰলৰালুকাতলং তত্থ তুম্হে গন্ত্ৰা নহাত্ৰা সীতলচ্ছাযায ৰালুকাতলে নিসিন্নো ভত্তকিচ্চং কত্ৰা গচ্ছথাতি ৰুত্তে সামণেরো ¶ সাধূতি ৰত্ৰা তত্থ গন্ত্ৰা ফাসুকট্ঠানে নিসিন্নো ভত্তং ভুঞ্জিতুমারভি. তদা একেন ৰনকম্মিকেন সদ্ধিংঅরঞ্ঞং গতা একা সুনখী তস্মিং কন্দরে একস্মিং পব্ভারট্ঠানে দারকে ৰিজাযিত্ৰা ছাতজ্ঝত্তা পৰেধমানগত্তা দারকানং সমীপেনিপন্না সামণেরস্স পত্তে আহারগন্ধং ঘাযিত্ৰা নিপন্নট্ঠানতো ৰুট্ঠায পৰেধমানা তস্স সমীপং আগম্ম নঙ্গুট্ঠং চালেন্তী অট্ঠাসি, সামণেরো তং দিস্ৰা কম্পিতমানসো অত্তনো ভোজনত্থায ৰট্টিতং পথমালোপং তস্সা পুরতো ঠপেসি, ততো সা সোমনস্সা তং ভুঞ্জি. তং দিস্ৰা তুট্ঠো পুনপ্পুনং আলোপং করোন্তো তস্সা ভত্তং দত্ৰা পত্তং ধোৰিত্ৰা থৰিকায পক্খিপিত্ৰা অগমাসি. ততো সা সুনখী সামণেরগতেন পসাদেন ততো চুতা জম্বুদীপে দেৰপুত্তনগরে রাজানং পটিচ্চ তস্স মহেসিযা কুচ্ছিম্হি পটিসন্ধিং গণ্হিত্ৰা দসমাসচ্চযেন মাতুকুচ্ছিতো নিক্খমি, অথস্সা সিখামঙ্গলদিৰসে সম্পত্তে মাতাপিতরো পনস্সা কুণ্ডলাৰট্টকেসত্তা কুণ্ডলাতি নাম মকংসু. সা অনুক্কমেন সোল়সৰস্সুদ্দেসিকা অহোসি, তস্মিং কির সমযে তিস্সো সামণেরো মহাবোধিং ৰন্দিস্সামীতি নাৰং অভিরুয্হ জম্বুদীপং গন্ত্ৰা অনুপুব্বেন দেৰপুত্তনগরং পত্ৰা সুনিৰত্থো সুপারুতো যুগমত্তদসো ভিক্খায চরন্তো মহাৰীথিং সম্পাপুণি. রাজধীতা সীহপঞ্জরং উগ্ঘাটেত্ৰা অন্তরৰীথিং ওলোকেন্তী ভিক্খন্তং সামণেরং দিস্ৰা পুব্বসিনেহং পটিলভি, তস্মিংখণে তস্সা জাতিস্সরঞাণং অহোসি. সা কির পুব্বে ভিক্খুণী হুত্ৰা পণ্ণসূচিযা সদ্ধিং পোত্থকঞ্চ পদীপিযতেলঞ্চ দত্ৰা জাতিস্সরা ভৰেয্যংতি পত্থনং ঠপেসি, ততো সাজাতিং অনুস্সরন্তী সামণেরেন অত্তনো কতূপকারং দিত্ৰা সোমনস্সা নং পক্কোসাপেত্ৰা রাজগেহে আসনং পঞ্ঞাপেত্ৰা তত্থ নিসিন্নং নানগ্গরস ভোজনেন পরিৰিসিত্ৰা ওনীতপত্তপাণিং সামণেরং উপসঙ্কমিত্ৰা ৰন্দিত্ৰা একমন্তং নিসিন্না তেন সদ্ধিং সল্লপন্তী এৰমাহ.

ন সঞ্জানাসি মং ধীর, পুব্বেহং তৰ দাসিকা;

তেনাহং সুখিতা আসিং, তস্মা ত্ৰমসি ইস্সরোতি.

নত্থি মে তাদিসী দাসী, ন সঞ্জানামি তং অহং;

কাসি ত্ৰং কস্স ৰা ধীতা, তং মে অক্খাহি পুচ্ছিতাতি.

সারাপেমি তুৰং অজ্জ, যথা জানাসিমং ইসে;

বুজ্ঝস্সু বোধিতো দানি, মযা জাতিংসরন্তিযা.

পাসাণৰাপিগামম্হি, তম্বপণ্ণিম্হি রোহণে;

ভিক্খিত্ৰান তুৰং ভন্তে, যদা ককুবন্দকন্দরে.

নিসীদিত্ৰান ত্ৰং ভত্তং, ভুত্তকালং সরিস্সসি;

তদাহং সুনখী আসিং, ৰিজাতা লদ্ধগোচরা.

দারকে ¶ খাদিতুং ময্হ, মাসন্না খুদপীল়িতা;

পৰেধমানসব্বঙ্গা, অট্ঠাসিং তৰ সন্তিকে.

দিস্ৰা তং মং তদা ভন্তে, ৰেধমানং বুভুক্খিতং;

ছিন্নভত্তো তুৰং হুত্ৰা, মমং ভত্তেন তোসযী.

তদাহং মুদুচিত্তেন, চিত্তং তযি পসাদযিং;

তেনাহং পুঞ্ঞকম্মেন, দুতিযে অত্তসম্ভৰে.

ইধ রাজকুলে জাতা, সব্বকামসমিদ্ধিনী;

চিত্তপ্পসাদমত্তেন, লোকনাথস্স সাসনে.

তদহুপব্বজিতস্সাপি, ঈদিসা হোন্তি সম্পদা;

কীদিসং হোতি সম্বুদ্ধে, পসাদেন ফলং অহো.

অঞ্ঞানি পন কিচ্চানি, পহাযাত্তহিতে রতো;

অতন্দিতো দিৰারত্তিং, সরাতু রতনত্তযংতি.

এৰং সামণেরেন কতূপকারং সারাপেত্ৰা ভন্তে তৰ দাসিযা অনুগ্গহং পটিচ্চ ইধেৰ ৰসথাতি নিমন্তিত্ৰা তেন সম্পটিচ্ছিতে মহন্তং ৰিহারং কারাপেত্ৰা সামণেরং আদিং কত্ৰা অনেকভিক্খুসতে নিমন্তেত্ৰা ৰিহারে ৰসাপেত্ৰা সুলভং কত্ৰা চতুপচ্চযেহি উপট্ঠাসি. সামণেরোপি সুনখিযা দিন্নদানং অনুস্সরিত্ৰা তুট্ঠো বুদ্ধানুস্সতিং মনসিকরোন্তো ন চিরেনৰ অরহত্তং পত্ৰা তস্মিংযেৰ ৰিহারে ৰসন্তো আযুপরিযোসানে তত্থেৰ পরিনিব্বাযীতি.

তিযদ্ধেসু তিলোকস্মিং, নত্থি ৰত্থুত্তযং ৰিনা;

সত্তান মঞ্ঞ মিচ্ছত্থ, দাযকং সুরপাদপং.

এত্তাৰতা জম্বুদীপুপ্পত্তিকথা সমত্তা.