অঞ্ঞ > সিহল়-গন্থ-সঙ্গহো

তত্থ থূপস্স ৰংসং ৰক্খামীতি এত্থ তথাগতো অরহং সম্মা সম্বুদ্ধো থূপারহো, পচ্চেকবুদ্ধো থূপারহো, তথাগতস্স সাৰকো থূপারহো, রাজা চক্কৰত্তি থূপারহোতি ৰচনতো থূপারহানং বুদ্ধাদীনং ধাতুযো পতিট্ঠাপেত্ৰা কত চেতিযং অব্ভুনন তট্ঠেন ¶ থূপোতি ৰুচ্চতি, ইধ পন কঞ্চন মালিক মহাথূপো অধিপ্পেতো, সো কস্স ধাতুযো পতিট্ঠাপেত্ৰা কতোতি চে? যোদীপঙ্করাদীনং চতুৰীসতিযা বুদ্ধানং সন্তিকে লদ্ধৰ্যাকরণো সমতিংসপারমিযো পূরেত্ৰা পরমাভিসম্বোধিং পত্ৰা ধম্মচক্কপ্পৰত্তনতো পট্ঠায যাৰ সুহদ্দ পরিব্বাজক ৰিনযান সব্ব বুদ্ধকিচ্চানি নিট্ঠাপেত্ৰা অনুপাদিযেসায নিব্বানধাতুযা পরিনিব্বুতো তস্স ভগৰতো অরহতো সম্মা সম্বুদ্ধস্স ধাতুযো পতিট্ঠাপেত্ৰা কতো অযমেত্থ সঙ্খেপো, ৰিত্থারো পন ৰেদিতব্বো?

২. ইতো কির কপ্পসতসহস্সাধিকানং চতুন্নং অসঙ্খেয্যানং মত্থকে অমরৰতী নাম নগরং অহোসি. তত্থ সুমেধো নাম ব্রাহ্মণো পটিৰসতি. সো অঞ্ঞং কম্মং অকত্ৰা ব্রহ্মণসিপ্পমেৰ উগ্গণ্হি তস্স দহরকালেযেৰ মাতাপিতরো কালমকংসু. অথস্স রাসিৰড্ঢনকো অমচ্চো আয পোত্থকং আহরিত্ৰা সুৰণ্ণ রজত মণিমুত্তাদি ভরিতে গব্ভে ৰিৰরিত্ৰা এত্তকং তে কুমার মাতু সন্তকং, এত্তকং পিতুসন্তকং, এত্তকং অয্যক পয্যকানন্তি যাৰ সত্তমা কুলপরিৰট্টা ধকং আচিক্খিত্ৰা এতম্পটিজগ্গাহীতি আহ. সো সাধূতি সম্পটিচ্ছিত্ৰা অগারং অজ্ঝাৰসন্তো একদিৰসং চিন্তেসি.

৩. পুনব্ভৰে পটিসণ্ধিগহণং তাম দুক্খং, তথা নিব্বত্ত নিব্বত্তট্ঠানে সরীরভেদনং অহঞ্চ জানিধম্মো জরাধম্মো ৰ্যাধিধম্মো মরণধম্মো. এৰং ভূতেন মযা অজাতি অজরং অৰ্যাধিং অমরণং সুখং সীতলং নিব্বানং গৰেসিতুং ৰট্টতীতি নেক্খম্মকারণং চিন্তেত্ৰা পুন চিন্তেসি ইমং ধনং সব্বং ময্হং পিতু পিতামহাদযো পরলোকং গচ্ছন্তা এক কহাপণম্পি গহেত্ৰা নগতা মযা পন গহেত্ৰা গমনকারণং কাতুং ৰট্টতীতি নগরে ভেরিং চরাপেত্ৰা মহাজনস্স দানং দত্ৰা হিমৰন্তস্স পৰিসিত্ৰা তাপস পব্বজ্জং পব্বজিত্ৰা সত্তাহব্ভন্তরেযেৰ অভিঞ্ঞা চ সমাপত্তিযো চ নিব্বত্তেত্ৰ সমাপত্তিসুখেন ৰীতিনামেসি.

তদা দীপঙ্করো নাম সত্থা পরযাভিসম্বোধিং পত্ৰা সত্ত সত্তাহং বোধিসমীপেচেৰ ৰিতিনামেত্ৰা সুনণ্দারামে ধম্মচক্কং পৰত্তেত্ৰা কোটিসত্তানং দেৰমনুস্সানং ধম্মমতং পাযেত্ৰা চাতুদ্দীপিক মহামেঘো ৰিয ধম্মৰস্সং ৰস্সেন্তো চতূহি খীণাসয সতসহস্সেহি পরিৰুতো অনুপুব্বেন চারকং চরমানো রম্ম নগরং পত্ৰা সুদস্সন মহাৰিহারে পটিৰসতি তদা রম্মনগরৰাসিনো সপ্পি ফণিতাদীনি ভেসজ্জানি গহেত্ৰা পুপ্ফ ধূপ গণ্ধহত্থা যেন বুদ্ধো তেনপসঙ্কমিত্ৰা সত্থারং ৰন্দিত্ৰা পুপ্ফাদীহি পূজেত্ৰা একমন্তং নিসীদিত্ৰা ধম্মং সুত্ৰা স্ৰাতনায ভগৰন্তং নিমন্তেত্ৰা উট্ঠাযাসনা দসবলং পদক্খীনং কত্ৰা পক্কমিংসু.

তে ¶ পুন দিৰসে অসদিস মহাদানং সজ্জেত্ৰা দসবলস্স আগমন মগ্গং সোধেন্তি. তস্মিং কালে সুমেধতাপসো অত্তনো অস্সম পদতো উগ্গন্ত্ৰা রম্মনগরৰাসীনং তেসং মনুস্সানং উপরিভাগেন আকাসেন গচ্ছন্তা তে হট্ঠপহট্ঠে মগ্গং সোধেন্তে দিস্ৰা কিন্নু খো কারণন্তি চিন্তেন্তো সব্বেসং পস্সন্তানংযেৰ আকাসতো ওরু একমন্তে ঠত্থাযহ তে মনুস্সে পুচ্ছি.’হম্ভো কস্স পন ইমং মগ্গং সোধেথা’তি তে আহংসু ভন্তে সুমেধ তুম্হে কিং নং জানাথ, দীপঙ্করো নাম সত্থা পরমাভিসম্বোধিং পত্ৰা পৰত্তৰর ধম্মচক্কো জনপদ চারিকং চরমানো অনুক্কমেন অম্হাকং নগরং পত্ৰা সুদস্সন মহাৰিহারে পটিৰসতি. মযং তং ভগৰন্তং নিমন্তযিম্হ তস্স ভগৰতো আগমনমগ্গং সোধেমাতি. তং সুত্ৰা সুমেধপণ্ডিতো চিন্তেসি. বুদ্ধোতি খো পনেস ঘোসোপি দুল্লভো, পগেৰ বুদ্ধুপ্পাদো তেন হি মযাপি ইমেহি মনুস্সেহি সদ্ধিং দসবলস্স আগমনমগ্গং সোধেতুং ৰট্টতীতি সো তে মনুস্সে আহ, সচে ভো তুম্হে ইমং মগ্গ বুদ্ধস্স সোধেথ - সযহম্পি একং ওকাসং সম্পটিচ্ছত্ৰা অযং সুমেধপণ্ডিতো মহিদ্ধিকো মহানুভাৰোতি জানন্তা দুব্বিসোধনং উদকসম্ভিন্নং অতিৰিসমং একং ওকাসং সল্লক্খেত্ৰা ইমং হকাসং তুম্হে সোধেথ. অলঙ্করোথাতি অদংসু.

সুমেধপণ্ডিতো বুদ্ধারম্মণ পীতিং উপ্পাদেত্ৰা চিন্তেসি. অহম্পনিমং ওকাসং ইদ্ধীযা পরমদস্সনীয কাতুং পহোমি এৰং কতো পন মং ন পরিতোসেতি অজ্জ পন মযা কাযৰেয্যাৰচ্চং কাতুং ৰট্টতিতি পংসুং আহরিত্ৰা তং পহেসং পূরেনি, তস্স পন তস্মিং পদেসে অসোধিতে জযসুমন কুসুম সদিসি ৰণ্ণং দুপট্টচীৰরং তিমণ্ডলং পটিচ্ছাদেত্ৰা নিৰাসেত্ৰা তস্সুপরি যুণ্ণমাপঙ্গেন কুসুমকলাপং পরক্খিপন্তো ৰিয ৰিজ্জুল্লতা সস্সীরীকং কাযবণ্ধনং বণ্ধিত্ৰা কনক গিরিসিখর মত্থকে লাখারসং পরিসিঞ্চন্তে ৰিয সুৰণ্ণচেতিযং পৰাল়জালেন পরিক্খিপন্তো ৰিয সুৰণ্ণঙ্ঘকং রত্তকম্বলেন পটিমুঞ্চন্তো ৰিয সরদ সময রজনিকরং রত্তৰলাহকেন পটিচ্ছাদেন্তো ৰিয চ লাখারসেন তিন্ন কিং সুকক্সুমৰণ্ণং রত্তৰর পসুকূল চীৰরং পারিপিত্ৰা গণ্ধকূগিদ্ৰ রতো কনকগুহাতো সীহো ৰিয নিক্খমিত্ৰা জল়ভিঞ্ঞানংযেৰ চতূহি খীণাসৰ সতসহস্সেহি পরিৰুতো অমরগণ পরিৰুতো দসসতনযনো ৰিয ব্রহ্মগণপরিৰুতো মহা ব্রহ্মা ৰিয চ অপরিমিত সময সমুপচিতায কুসলবলজনিতায অনোপমযা বুদ্ধলীলায তারাগণপরিৰুতো ¶ সরদ সময রজনিকরো ৰিয গগনতলং অলঙ্গত পটিযত্তং মগ্গং পটিপজ্জি.

৫. সুমেধতাপসোপি তেন অলঙ্কত পটিযত্তেন মগ্গেন আগচ্ছন্তস্স দীপঙ্করস্স ভগৰতো দ্ৰত্তিংস ৰরলক্খণ পতিমণ্ডিতং অসতিযা অনুব্যঞ্জনেহি অনুব্যঞ্জিতং ব্যামপ্পহাপরিক্খেপ সস্সীরীকং ইণ্দনীলমণিসংকাসোআকাসে নানপ্পকারা ৰিজ্জুল্লতা ৰিয ছব্বণ্ণবুদ্ধরংসিযো ৰিস্সজ্জেন্তং রূপগ্গপ্পত্তং অত্তভাৰং ওলোকেত্ৰা অজ্জ মযা দসবলস্স জীৰিতপরিচ্চাগং কাতুং ৰট্টতি মা ভগৰা কললে অক্কমি মণিমযং লকসেতুং অক্কমন্তো ৰিয সদ্ধিং চতূহি খীণাসৰ সতসহস্সেহি মম পিট্ঠিং অক্কমন্তো গচ্ছতু তং মে ভৰিস্সতি দীঘরত্তং হিতায সুখাযাতি কেসে মোচেত্ৰা অজিনজটা ৰাকচীরানি কলেল পত্থরিত্ৰা তত্থেৰ কললপিট্ঠে নিপজ্জি নিপন্নো চ সচে অহং ইচ্ছেয্যং সব্বকিলেসে ঝাপেত্ৰা সঙ্ঘনৰকো হুত্ৰা রম্মনগরং পৰিসেয্যং অঞ্ঞাতকৰেসেন পন মে কিলেসে ণ্ধপেত্ৰা নিব্বানপত্তিযা কিচ্চং নত্থি, যংনূনাহং দীপঙ্কর দসবলো ৰিয পরমাভিসম্বোধিং পত্ৰা ধম্মনাৰং আরোপেত্ৰা মহাজনং সংসারসাগরা উত্তারেত্ৰা পচ্ছা পরিনিব্বাযেয্যং. ইদং মে পতিরুপন্তি চিন্তেত্ৰা অট্ঠধম্মে সমোধানেত্ৰা বুদ্ধভাৰায অভিনীহারং কত্ৰা নিপজ্জ.

দীপঙ্করোপি ভগৰা আগত্ত্ৰা সুমেধপণ্ডিতস্স সীসসাগে ঠত্ৰা কললপিট্ঠে নিপন্নং তাপসং দিস্ৰা অযং তাপসো বুদ্ধত্থায অভিনীহারং কত্ৰা নিপন্তো, ইজ্ঝিস্সতি নু খো এতস্স পত্থনা উদাহু নোতি উপধারেন্তো - অনাগতে গোতমো নাম বুদ্ধো ভৰিস্সতীতি ঞত্ৰা ঠিতকোৰ পরিস মজ্ঝে ৰ্যাকাসি, পস্সথ নো তুম্হে ভিক্খৰে ইমং উগ্গতপং তাপসং কললপিট্ঠে নিপন্নন্তি. এৰং ভন্তে, অযং যিদ্ধত্থায অভিনীহারং কত্ৰা নিপন্নো সমিজ্ঝিস্সতি ইমস্স পত্থতা কপ্পসত সহস্সাধিকানং চতুন্তং অসঙ্খেয্যানং মত্থকে গোতমো নাম বুদ্ধো ভৰিস্সতীতি সব্বং ৰ্যাকাসি.

দীপঙ্করো লোকৰিদূ - আহুতীনং পটিগ্গহো,

উস্সীসকে মং ঠত্ৰান - ইদং ৰচনমব্রৰি;

পস্সথ ইমং তাপসং - জটিল উগ্গতাপসং অপরিমেয্যে ইতো কপ্পে - অযং বুদ্ধো ভৰিস্সতি. অহু কপিলৰহযা রম্মা - নিক্খমিত্ৰা তথাগতো. পধানং পদহিত্ৰান - কত্ৰা দুক্কর কারিকং

অজপাল ¶ রুক্খমূলস্মিং - নিসীদিত্ৰা তথাগতো,

তত্থ পাযাসমগ্গয্হ - নেরঞ্জরমুপেহেতি;

নেরঞ্জরায তীরম্হি - পাযাসাদায সো জিনো,

পটিযত্তৰরমগ্গেন - বোধিমূলঞ্হি এহীতি;

ততো পদক্খিণং কত্ৰা - বোধিমণ্ডং অনুত্তরো

অস্সত্থরাক্খমূলম্হি - ৰুজ্ঝিস্সতি মহাযসো;

ইমস্সজনিকা মাতা - মাযা নাম ভৰিস্সতি, পিতা সুদ্ধোদনো নাম - অযং হেস্সতি গোতমো. অনাসৰা ৰীতরাগা - সন্তচিত্তা সমাহিতা,

কোলিতো উপতিস্সো চ - অগ্গা হেস্সন্তি সাৰকা;

আনণ্দো নামুপট্ঠাকো - উপট্ঠিস্সতী’মং জিনং;

খেমা উপ্পলৰণ্ণা চ - অগ্গা হেস্সন্তি সাৰিকা;

অনাসৰা ৰীতরাগা - সন্তচিত্তা সমাহিতা;

বোধি তস্স ভগৰতো অস্সত্থোতি পৰুচ্চতী’’তি.

৬. ততো দীপঙ্করো দসবলো বোধিসত্তং পসংসিত্ৰা অট্ঠহি পুপ্ফ মুট্ঠীহি পূজেত্ৰা পদক্খিণং কত্ৰা পক্কামি. তেপি চতূসত সহস্স খীণাসৰা বোধিসত্তং পুপ্ফেহি চ গণ্ধেহি চ পূজেত্ৰা পদপ্ফণং কত্ৰা পক্কমিংসু. দেৰমনুস্সা চ তথেৰ পূজেত্ৰা ৰন্দিত্ৰা অথ খো বোধিসত্তো দসবলস্স ৰ্যাকরণং সুত্ৰা বুদ্ধভাৰং করতলগতমিৰ মঞ্ঞমানো পমুদিত হদযো সব্বেসু পটিক্কন্তেসু সযনা ৰুট্ঠায পুপ্ফরাসি মত্থকে পল্লঙ্কং আভুজিত্ৰা নিসিন্নো বুদ্ধকারকধম্মে উপধারেন্তো কহননু খো বুদ্ধকারক ধম্মা, কিং উদ্ধং অধো দিসাসু ৰীদীযাসূতি অনুক্কমেন সকলং ধম্মধাতুং ৰিচিনন্তো পোরাণকবোধিসত্তেহি আসেৰিত নিসেৰিত পঠমং দানপারমিং দিস্ৰা তত্থ দল়ভিসমাদান কত্ৰা এৰং অনুক্কমেন সীল - নেক্খম্ম - পঞ্ঞা - ৰীরিয - খন্তি - সচ্চ - অধিট্ঠান - মেত্তা - উপেক্খা পারমিযোচ দিস্ৰা তত্থদল়্হ সমাদানং কত্ৰা দেৰতাহি অভিত্থুতো আকাসমবভুগ্গনত্ৰ হিম হিমৰন্তমেৰ অগমাসি.

দীপঙ্করোপি সত্থা চতূহি খীণাসৰ সতসহস্সেহি পরিৰুতো রম্মনগরৰাসীহি পূজীযমানো দেৰতাহি অভিনণ্দিযমানো অলঙ্কত পটিযত্তেন মগ্গেন রম্মনগরং পৰিসিত্ৰা পঞ্ঞত্তৰরবুদ্ধাসনে নিসীদি. ভিক্খুসঙ্ঘোপি অত্তনো অত্তনো পত্তাসনে নিসীদি. রম্মনগরৰাসিনোপি উপাসকা বুদ্ধপমুখস্স ভিক্খুসঙ্ঘস্স মহাদানং ¶ দত্ৰা ভগৰন্তং ভুত্তাৰিং ওনীত পত্তপাণিং মালাগণ্ধাদীহি পূজেত্ৰা দানানুমোদনং সোতুকামা নিসীদিংসু. ভগৰাপি তেসং অনুমোদনং করোন্তো দানকথং সীলকথং সগ্গিকথং কামানং আদীনৰং ওকারং সংকিলেসং নেক্খম্মে আনিসংসঞ্চ পকাসেত্ৰা অমত পরিযোসানং ধম্মকথং কথেসি.

এৰং তস্স মহজনস্স ধম্মং দেসেত্ৰা একচ্চে সরণেসু একচ্চে পঞ্চসু সীলেসু একচ্চে সোতাপত্তিফলে একচ্চে সকদাগামি ফলে একচ্চে অনাগামী ফলে একচ্চে চতুসুপি ফলেসু একচ্চে তীসু ৰিজ্জাসু একচ্চে ছল়ভিঞ্ঞাসু একচ্চে অট্ঠসু সমাপত্তিসু পতিট্ঠাপেত্ৰা উট্ঠাযাসনা রম্মনগরতো নিক্খমিত্ৰা সুদস্সন মহাৰিহারমেৰ পাৰিসি.

‘‘তদা তে ভোজযিত্ৰান - সসঙ্ঘং লোকনাযকং,

উফগছুঞ্ঞং সরণং তস্স - দীপঙ্করস্স সত্থুনো,

সরণাগমনে কঞ্চি - নিৰসেতি তথাগতো

কঞ্চি পঞ্চসু সীলেসু - সীলে দসৰিধে পরং;

কস্সচি দেতি সামঞ্ঞং - চতুরো ফলমুত্তমে,

কস্সচি অসথে ধম্মে - দেতি সো পটিসম্ভিদা;

কস্সচি ৰরসমাপত্তিযো - অট্ঠ দেতি নরাসভো,

তিস্সো কস্সচি ৰিজ্জাযো - ছল়ভিঞ্ঞ পৰেচ্ছতি;

তেন যোগেন জনকাযং - ওৰদেতি মহামুনি,

তেন ৰিত্থারিকং আসী - লোকনাথস্স সাসনং;

মহাহনূসভক্খণ্ধো - দীপঙ্করসনামকো,

বহূ জনে তারযতি - পরিমোচেতি দুগ্গতিং;

বোধনেয্যং জনং দিস্ৰা - সতসহস্সেপি যোজনে

খণেন উপগন্ত্ৰান - বোধেতি তং মহামুনী’’তি;

ইতি সো দীপঙ্করো সত্থা ৰস্সসত সহস্সানি ঠত্ৰা সত্তানং বণ্ধনমোক্খং কুরুমানো সব্ববুদ্ধকিচ্চানি নিট্ঠাপেত্ৰা নণ্দারামে অনুপাদিসেসায নিব্বানধাতুযা পরিনিব্বাযিনহেৰ ধাতুযো তস্স - সত্থুনো ৰিকিরিংসু তা. ঠিতা একঘনা হুত্ৰা - সুৰণ্ণপটিমা ৰিয সকলজম্বুদীপৰাসিনো মনুস্সা ঘনকোটিটিমসুৰণ্ণট্ঠিকাহি এৰং ছত্তিংস যোজনিকং মহাথূপমকংসু নিৰেদসি - কেচি.

‘‘দীপঙ্করো জিনো সত্থা - নণ্দারামম্হি নিব্বুতো,

তত্থেৰ তস্স জিনথূপো - ছত্তিংসুব্বেধ যোজনো‘‘;

‘‘পত্ত চীৰর পরিক্খার - পরিভোগঞ্জ সত্থুনো,

বোধিমূলে তদা থূপো - তীণি যোজনমুগ্গতো’’তি;

৭. দীপঙ্করস্স পন ভগৰতো অপরভাগো একং অসঙ্খেয্যং অতিক্কমিত্ৰা কোণ্ডঞ্ঞো নাম সত্থা উদপাদি. তদা বোধিসত্তো ৰিজিতাৰি নাম চক্কৰত্তি হুত্ৰা কোটিসতসহস্স সঙ্খস্স বুদ্ধ পমুখস্স ভিক্খুসঙ্ঘস্স মহাদানং অদাযি সত্থা বোধিসত্তং বুদ্ধো ভৰিস্সতীতি ৰ্যাকরিত্ৰা ধম্মং দেসেসি সো সত্থু ধম্মংকথং সুত্ৰা রজ্জি নিয্যাদেত্ৰা পব্বজি সো তীণি পিটকানি উগ্গহেত্ৰা অট্ঠ সমাপত্তিযো পঞ্চঅভিঞ্ঞাযোচ উপ্পাদেত্ৰা অপরিহীনজ্ঝানো ব্রহ্মলোকে নিব্বত্তি. সোপি বুদ্ধো ৰস্সসতসহস্সানি ঠত্ৰা সব্ববুদ্ধকিচ্চানি নিট্ঠাপেত্ৰা চণ্দারামে পরিনিব্বাযি তস্সাপি ভগৰতো ধাতুযা ন ৰিকিরিংসু সকলজম্বুদীপৰাসিনো মনুস্সা সমাগন্ত্ৰা সত্তযোজনিকাসত্তরতনমযং হরিতালমনোসিলাযমত্তিকাকিচ্চং তেল সপ্পীহি উদককিচ্চং কত্ৰা চেতিযং নিট্ঠাপেসুং

কোণ্ডঞ্ঞে কির সম্বুদ্ধো - চণ্দারামে মনোরমে,

নিব্বাযি চেতিযো তস্স - সত্তযোজনিকো কতোতি;

তস্স অপরভাগে একং অসংঙ্খয্যং অতিক্কমিত্ৰা একস্মিংযেৰ কপ্পে চত্তারো বুদ্ধা উপ্পজ্জিংসু - মঙ্গলো সুমনো রেৰতো যোহিতোতি. মঙ্গলস্স পন ভগৰতো কালে বোধিসত্তো সুরুচি নাম ব্রাহ্মণো হুত্ৰা সত্থারং নিমন্তেস্সামীতি উপসঙ্কমিত্ৰা মধুর ধম্মংকতং সুত্ৰা স্ৰাতনায নিমন্তেত্ৰা কোটিসতসহস্স সঙ্খস্স বুদ্ধপমুখস্স সঙ্ঘস্স সত্তাহং গৰপানং নাম দানমদাসি সত্থা অনুমোদনং করোন্তো মহাপুরিসং আমন্তেত্ৰা ত্ৰং কপ্পসতসহস্সাধিকানং দ্ৰন্নং অসঙ্খেয্যানং মত্থকে গোতমো নাম বুদ্ধো ভৰিস্সসীতি ৰ্যাকাসি মহাপুরিসো ৰ্যাকরণং সুত্ৰা অহং কির বুদ্ধো ভৰিস্সামি কো মে ঘরাৰাসেন অত্থো পব্বজিস্সমীতি চিন্তত্ৰা তথারূপং সম্পত্তিং কেল়পিণ্ডং ৰীয পহায সত্থু সন্তিকে পব্বজিত্ৰা বুদ্ধৰচনং উগ্গণ্হিত্ৰা অভিঞ্ঞা চ সমাপত্তিযো চ নিব্বত্তেত্ৰা আযুপরিযোসানে ব্রহ্মলোকে নিব্বত্তি, তস্মিম্পি বুদ্ধে পরিনিব্বুতে ধাতুযো ন ৰিকিরিংসু, জম্বুদীপৰাসিনো পুব্বে ৰিয তিংসযোজনকং থূপমকংসু.

তেন ¶ ৰুত্তং ‘‘উয্যানে ৰসভো নাম - বুদ্ধো নিব্বাযি মঙ্গলো, তত্থেৰ তস্স জিনথূপো - তিংসযোজনমুগ্গিতো’’তি.

তস্স অপরভাগে সুমনো নাম সত্থা উদপাদি তদা মহাসত্তো অতুলো নাম নাগরাজা হুত্ৰা নিব্বত্তি-মহিদ্ধিকো মহানুভাৰো সো বুদ্ধো উপ্পন্নোতি সুত্ৰা ঞাতিসঙ্ঘপরিৰুতো নাগভৰনা নিক্খমিত্ৰা কোটিসতসহস্স ভিক্খুপরিৰারস্স তস্স ভগৰতো দিব্বতুরিযেহি উপহারং কারেত্ৰা মহাদানং পৰত্তেত্ৰা পচ্চেকং দুস্সযুগানি দত্ৰা সরণেসু পতিট্ঠাসি সোপি নং সত্থা অনাগতে বুদ্ধো ভৰিস্সসীতি ৰ্যাকাসি তস্মিম্পি বুদ্ধে পরিনিব্বুতে ধাতুযো ন ৰিকিরিংসু জম্বুদীপৰাসনো পুব্বে ৰিয চতুযোজনিকং থূপমকংসু.

‘‘সুমনো যসধরো - বুদ্ধো অগ্গারামম্হ নিব্বুতো,

তত্থেৰ তস্স জিনথূপো - চতুযোজনমুগ্গতো’’তি;

তস্স অপরভাগে রেৰতো নাম সত্থা উদপাদি তদা বোধিসত্তো অতিদেৰো নাম ব্রাহ্মণো হুত্ৰা সত্থু ধম্মদেসন সুত্ৰা সরণেসু পতিট্ঠায সিরসি অঞ্জলিং পগ্গহেত্ৰা তস্স সত্থুনো কিলেসপ্পহানে ৰণ্ণং ৰত্ৰা উত্তরাসঙ্ঘেন পূজমকাসি. সোপি নং সত্থা বুদ্ধো ভৰিস্সতিতি ৰ্যাকাসি তস্মিং পন বুদ্ধে পরিনিব্বুতে ধাতুযো ৰিকিরিংসু.

‘‘রেৰতো পৰরো বুদ্ধো - নিব্বুতো সো মহাপুরে,

ধাতু ৰিত্থারিকং আসী - তেসু তেসু পদেসতো’’তি;

তস্স অপরভাগে সোভিতো নাম সত্থা উদপাদি তদা বোধিসত্তো অজিতো নাম ব্রাহ্মণো হুত্ৰা সত্থু ধম্মদেসনং সুত্ৰা সরণেসু পতিট্টায বুদ্ধপমুখস্স সঙ্ঘস্স মহাদানং অদাসি. সোপি নং সত্থা বুদ্ধো ভৰিস্সসীতি ৰ্যাকাসি তস্সাপি ভগৰতো ধাতুযো ৰিকিরিংসু.

‘‘সোভিতো ৰরসম্বুদ্ধো - সীহরামম্হি নিব্বুতো,

ধাতুৰিত্থারিকং আসী - তেসু তেসু পদেসতো’’তি;

তস্স অপরভাগে একমসঙ্খেয্যং অতিক্কমিত্ৰা একস্মিংযেৰ কপ্পে তযো বুদ্ধা নিব্বত্তিংসু - অনোমদস্সি পদুমো নারদোতি. অনোমদস্সিস্স ভগৰতো কালে বোধিসত্তো একো

যক্খ ¶ সেনাপতি অহোসি মহিদ্ধিকো মহানুভাৰো অনেক কোটিসতসহস্সানং যক্খানং অধিপতি. সো বুদ্ধো উপ্পন্নোতি সুত্ৰা আগন্ত্ৰা বুদ্ধপমুখস্স সঙ্ঘস্স মহাদানমদাসি সত্থাপি তং অনাগতে বুদ্ধো ভৰিস্সসীতি ৰ্যাকাসি. অনোমদস্সিম্হি পন ভগৰতি পরিনিব্বুতে ধাতুযো ন ৰিকিরিংসু জম্বুদীপৰাসিনো পঞ্চৰীসযোজনকং থূপং করিংসু

‘‘অনোমদস্সি জিনো সত্থা - ধম্মারামম্হি নিব্বুতো,

তত্থেৰ তস্স জিনথূপো - উব্বেধা পণ্ণুৰীসতী’তি;

তস্স অপরভাগে পদুমো নাম সত্থা উদপাদি তথাগতে অগামকারঞ্ঞে ৰিহরেন্তা বোধিসত্তো সীহো হুত্ৰা সত্থারং নিরোধসমাপত্তিযা সমাপন্নং দিস্ৰা পসন্নচিত্তো ৰন্দিত্ৰা পদক্খিণং কত্ৰা পীতিসোমনস্সজাতো তিক্খত্তুং সীহনাদং নদিত্ৰা সত্তাহং বুদ্ধারম্মণং পীতিং অৰিজহিত্ৰা পীতিসুখেনেৰ গোচরায অপক্কমিত্ৰা জিৰিতপরিচ্চাগং কত্ৰা পযিরুপাসমানো অট্ঠাসি সত্থা সত্তাহচ্চযেন নিরোধা ৰুট্ঠিতো সীহং ওলোকেত্ৰা ভিক্খুসঙ্ঘেপি চিত্তং পসাদেত্ৰা সঙ্ঘং ৰন্দিস্সতী‘‘তি ভিক্খুসঙ্ঘো আগচ্ছতূতি চিন্তেসি ভিক্খু তাৰদেৰ আগমিংসু সীহো সঙ্ঘে চিত্তং পসাদেসি. সত্থা তস্স মনং ওলোকেত্ৰা অনাগতে বুদ্ধো ভৰিস্সতীতি ৰ্যাকাসি তস্স পন ভগৰতো ধাতুযো ৰিকিরিংসু.

‘‘পদুমো জিনৰরো সত্থা - ধম্মারামম্হি নিব্বুতো,

ধাতু ৰিত্থারিকং আসি - তেসু তেসু পদেসতো’’তি;

তস্স অপরভাগে নারদো নাম সত্থা অহোসি তদা বোধিসত্তো, ইসিপব্বজ্জং পব্বজিত্ৰা পঞ্চসু অভিঞ্ঞাসু অট্ঠসুচ সমাপত্তিসুচিণ্ণৰসী হুত্ৰা বুদ্ধপমুখস্স সঙ্ঘস্স মহাদানং দত্ৰা লোহিত চণ্দনেন পূজমকাসি সোপি নং অনাগতো বুদ্ধো ভৰিস্সতীতি ৰ্যাকাসি নারদ পন ভগৰতো ধাতুযো একঘনা অহেসুং. সব্বে দেৰ মনুস্সা সন্নিপতিত্ৰা চতুযোজনিকং থূপং করিংসু.

‘‘নারদো জিনৰসভো - নিব্বুতো সুদস্সনে পুরে,

তত্থেৰ তস্স থূপৰরো - চতুযোজনমুগ্গতো’’তি;

তস্স অপরভাগে একমসঙ্খেয্যমতিক্কমিত্ৰা ইতো কপ্পসতসহস্স মত্থকে একস্মিং কপ্পে পদুমুত্তরো নাম সত্থা উদপাদি. তদা বোধিসত্তো জটিলো নাম মহারট্ঠিকো হুত্ৰা বুদ্ধপমুখস্স সঙ্ঘস্স চিৰরদানমদাসি. সোপি তং অনাগতো বুদ্ধো ভৰিস্সতীতি ৰ্যাকাসি. ¶ পদুমুত্তরস্সাপি ভগৰতো ধাতুযো একঘনা অহেসুং. সব্বে দেৰমনুস্সা সন্নিপতিত্ৰা দ্ৰাদস যোজনিকং মহাথূপমকংসু.

‘‘পদুমুত্তরো জিনো বুদ্ধো - নণ্দারামম্হি নিব্বুতো,

তত্থেৰ তস্স থূপৰরো - দ্ৰাদসুব্বেধযোজনো’’তি;

তস্স অপরভাগে তিংসকপ্প সহস্সানি অতিক্কমিত্ৰা সুমেধো সুজাতো চাতি একস্মিং কপ্পে দ্ৰে বুদ্ধা নিব্বত্তিংসু সুমেধস্স পন ভগৰতো কালে বোধিসত্তো উত্তরো নাম মানৰো হুত্ৰা নিদহিত্ৰা ঠপিতংযেৰ অসীতিকোটিধনং ৰিস্সজ্জেত্ৰা বুদ্ধপমুখস্স সঙ্ঘস্স মহাদানং দত্ৰা ধম্মং সুত্ৰা সরণেসু পতিট্ঠায নিক্খমিত্ৰা পব্বজি সোপি নং অনাগতে বুদ্ধো ভৰিস্সতীতি ৰ্যাকাসি. সুম্ধেস্স পন ভগৰতো ধাতুযো ৰিকিরিংসু

‘‘সুমেধো জিনৰরো বুদ্ধো - মেধারামম্হি নিব্বুতো,

ধাতুৰিত্থারিকং আসি - তেসু তেসু পদেসতো’’তি;

তস্স অপরভাগে সুজাতো নাম সত্থা উদপাদি. তদা বোধিসত্তোচক্কৰত্তিরাজা হুত্ৰা বুদ্ধো উপ্পন্নোতি সুত্ৰা উপসংকমিত্ৰা ধম্মং সুত্ৰা বুদ্ধপমুখস্স সঙ্ঘস্স সদ্ধিং সত্তহি রতনেহি চতুমহাদীপং রজ্জং দত্ৰা সত্থু সন্তিকে পব্বজি সকলরট্ঠৰাসিনো রট্ঠুপ্পাদং গহেত্ৰা আরামিক কিচ্চং সাধেন্তা বুদ্ধপমুখস্স সঙ্ঘস্স নিচ্চং মহাদানমদংসু. সোপি নং সত্থা অনাগতে বুদ্ধোভৰিস্সতীতি ৰ্যাকাসি সুজাতস্স পন ভগৰতো ধাতুযো একঘনা অহেসুং জম্বুদীপৰাসিনো তিগাৰুতং থূপমকংসু

‘‘সুজাতো জিনৰরো বুদ্ধো সীলারামম্হি নিব্বুতো,

তত্থেৰ চেতিযো তস্স - তীণি গাৰুতমুগ্গতো’’তি;

তস্স অপরভাগে অট্ঠারস কপ্পসতমত্থকে একস্মিং কপ্পে পিযদস্সি অত্থদস্সি ধম্মদস্সিতি তযো বুদ্ধা নিব্বত্তিংসু পিযদস্সি বুদ্ধকালে বোধিসত্তো কস্সপো নাম মাণৰো তিণ্ণং ৰেদানং পারগতো হুত্ৰা সত্থু ধম্মদেসনং সুত্ৰা কোটিসতসহস্স ধন পরিচ্চাগেন সঙ্ঘারামং কারেত্ৰা সরণেসু চ সীলেসু চ পতিট্ঠাসি অথ নং সত্থা অট্ঠারস কপ্প সতচ্চযেন বুদ্ধো ভৰিস্সতীতি ৰ্যাকাসি পিযদস্সিস্স ভগৰতোপি ধাতুযো একঘনাৰ অহেসুং জম্বুদীপৰাসিনো সন্নিপতিত্ৰা তিযোজনিকং মহাথূপমকংসু.

‘‘পিযদস্সি মুনিৰরো - সললারামম্হি নিব্বুতো,

তত্থেৰ তস্স জিনথূপো - তীণি যোজনমুগ্গতো’’তি;

তস্স অপরভাগে অত্থদস্সি নাম ভগৰা উদপাদি তদা বোধিসত্তো মহিদ্ধিকো মহানুভাৰো সুসিমো নাম তাপসো হুত্ৰা ভগৰতো সন্তিকে ধম্মং সুত্ৰা পসীদিত্ৰা দিব্বানি মণ্দারৰ পদুমপারিচ্ছত্তকাদীনি পুপ্ফানি আহরিত্ৰা চাতুদ্ৰীপিক মহামেঘো ৰিয পুপ্ফৰস্সং ৰস্সেত্ৰা সমন্ততো পুপ্ফমণ্ডপ পুপ্ফঅগঘিয তোরণাদীনি কত্ৰা মণ্দারৰ পুপ্ফচ্ছত্তেন দসবলং পূজেসি সোপি নং ভগৰা অনাগতো গোতমো নাম বুদ্ধো ভৰিস্সতীতি ৰাকাসি. তস্স পন ভগৰতো ধাতুযো ৰিকিরিংসু.

‘‘অত্থদস্সি জিনৰরো - অনোমারামম্হি নিব্বুতো,

ধাতুৰিত্থারিকং আসি - তেসু তেসু চ রট্ঠতো’’তি;

তস্স অপরভাগে ধম্মদস্সি নাম সত্থা উদপাদি. তদা বোধিসত্তো সক্কা দেৰরাজা দিব্বগণ্ধপুপ্ফেহি চ দিব্বতুরিযেহি চ পূজং অকাসি সোপি নং বুদ্ধো ভৰিস্সতীতি ৰ্যাকাসি. ধম্মদস্সিস্স পন ভগৰতো ধাতুযো একঘনা অহেসুং. জম্বুদীপৰাসিনো তিযোজনিকং থূপমকংসু.

‘‘ধম্মদস্সি মহাৰীরো-কেলাসারমম্হি নিব্বুতো,

তত্থেৰ থূপৰরো তস্স-তীণি যোজনমুগ্গতো’’তি;

তস্স অপরভাগে চতুনৰুতিকপ্প মত্থকে একস্মিং কপ্পে একোৰ সিদ্ধত্থো নাম সত্থা উদপাদি. তদা বোধিসত্তো উগ্গতেজো অভিঞ্ঞাবল সম্পন্নো মঙ্গলো নাম তাপসো হুত্ৰা মহাজম্বুফলং আহরিত্ৰা তথাগস্স অদাসি সত্থা তং ফলং পরিভুঞ্জিত্ৰা চতুনৰুতি কপ্পমত্থকে বুদ্ধো ভৰিস্সতীতি ৰ্যাকাসি তস্সাপি ভগৰতো ধাতুযো ন ৰিকিরিংসু, চতুযোজনিকং রতনমযং থূপমকংসু.

‘‘সিদ্ধত্তো মুনিৰরো বুদ্ধো অনোমারমম্হি নিব্বুতো,

তত্থেৰ তস্স থূপৰরো-চতুযোজনমুগ্গতো’’তি;

তস্স অপরভাগে ইতো দ্ৰানৰুতি কপ্পমত্থকে তিস্সো ফুস্সোতি একস্মিং কপ্পে দেৰ বুদ্ধা নিব্বত্তিংসু তিস্সস্স ভগৰতো কালে বোধিসত্তা মহাভোগো মহাযসো সুজাতো নাম খত্তিযো হুত্ৰা ইসিপব্বজ্জং পব্বজিত্ৰা মহিদ্ধিকভাৰং পত্ৰা বুদ্ধো ¶ উপ্পন্নোতি সুত্ৰা দিব্বমণ্দারৰ পদুম পারিচ্ছত্ত পুপ্ফানি আদায চতুপরিসমজ্ঝে গচ্ছন্তং তথাগতং পূজেসি. আকাসে পুপ্ফৰিতানমিৰ অট্ঠাসি সোপি নং সত্থা ইতো দ্ৰানৰুতি কপ্পমত্থকে বুদ্ধো ভৰিস্সতীতি ৰ্যাকাসি. তস্সাপি ভগৰতো ধাতুযো ন ৰিকিরিংসু ধাতুযো গহেত্ৰা তিযোজনিকং থূপমকংসু.

‘‘তিস্সো জিনৰরো বুদ্ধো-নণ্দারামম্হি নিব্বুতো

তত্থেৰ তস্স থূপৰরো-তীণি যোজনমুস্সিতো’’তি;

তস্স অপরভাগে ফুস্সো নাম বুদ্ধো উদপাদি তদা বোধিসত্তো ৰিজিতাৰি নাম খত্তিযো হুত্ৰা মহারজ্জং পহায সত্থু সন্তিকে পব্বজিত্ৰা তীণি পিটকানি উগ্গহেত্ৰা মহাজনস্স ধম্মকথং কথেত্ৰা সীলপারমিঞ্চ পূরেসি. সোপি নং বুদ্ধো তথেৰ ৰ্যাকাসি তস্স পন ভগৰতো ধাতুযো ৰিকিরিংসু.

‘‘ফুস্সো জিনৰরো সত্থা-সুনন্দারামম্হি নিব্বুতো

ধাতুৰিত্থারিকং আসি-তেসু তেসু পদেসতো’’তি;

তস্স অপরভাগে ইতো একনৰুতি কপ্পমত্থকে ৰিপস্সি নাম বুদ্ধো উদপাদি তদা বোধিসত্তো মহিদ্ধিকো মহানুভাৰো অতুলো নাম নাগরাজা হুত্ৰা সত্তরতন খচিতং সোৰণ্ণমহাপীঠং ভগৰতো অদাসি সোপি নং ইতো একনৰুতিকপ্পমত্থকে বুদ্ধো ভৰিস্সতীতি ৰ্যাকাসি তস্স পন ভগৰতো ধাতুযো ন ৰিকিরিংসু সব্বে দেৰমনুস্সা সন্তিপতিত্ৰা ধাতুযো গহেত্ৰা সত্তযোজনিকং থূপমকংসু.

‘‘ৰিপস্সি জিনৰরো ৰীরো-সুমিত্তারামম্হি নিব্বুতো,

তত্থেৰ সো থূপৰরো-সত্তযোজনিকো কতো’’তি;

তস্স অপরভাগে ইতো একতিংস কপ্পমত্থকে সিখী ৰেস্সভূতি দ্ৰে বুদ্ধা নিব্বত্তিংসু সিখিস্স ভগৰতো কালে বোধিসত্তো অরিণ্দমো নাম রাজা হুত্ৰা বুদ্ধপমুখস্স সঙ্ঘস্স সচিৰরং মহাদানং পৰত্তেত্ৰা সত্তরতন পতিমণ্ডিতং হত্থিরতনং দত্ৰা হত্থিপ্পমাণং কত্ৰা কপ্পিয ভণ্ডমদাসি সোপি নং ইতো একতিংস কপ্পে বুদ্ধো ভৰিস্সতীতি ৰ্যাকাসি, সিখিস্স ভগৰতো ধাতুযো একঘনা হুত্ৰা অট্ঠংসু, সকল জম্বুদীপৰাসিনো পন মনুস্সা ধাতুযো গহেত্ৰা তিযোজনুব্বেধং সত্তরতনমযং হিমগিরি সদিস সোভং থূপমকংসু.

সিখী ¶ মুনিৰরো বুদ্ধো-দুস্সারামম্হি নিব্বুতো,

তত্থেৰ তস্স থূপৰরো-তীণি যোজনমুগ্গতো’’তি;

তস্স অপরভাগে ৰেস্সভূ নাম সত্থা উদপাদি. তদা বোধিসত্তো সুদস্সনো নাম রাজা হুত্ৰা বুদ্ধপমুখস্স সঙ্ঘস্স সচীৰরমহাদানং দত্ৰা তস্স সন্তিকে পব্বজিত্ৰা আচারগুণসম্পন্নো বুদ্ধরতনে চিততীকার পীতি বহুলো অহোসি সেপি নং সত্থা ইতো একতিংসকপ্পে বুদ্ধো ভৰিস্সতীতি ৰ্যাকাসি ৰেস্সভুস্স পন ভগৰতো ধাতুযো ৰিকিরিংসু.

‘‘ৰেস্সভূ জিনৰরো সত্থা-খেমারামম্হি নিব্বুতো;

ধাতুৰিত্থারিকং আসি-তেসু তেসু পদেসতো’’তি;

তস্স অপরভাগে ইমস্মিং কপ্পে চত্তারো বুদ্ধা নিব্বত্তিংসু ককুসণ্ধো কোনাগমনো কস্সপো অম্হাকং ভগৰাতি কতুসণ্ধস্স পন ভগৰতো কালো বোধিসত্তো খেমো নাম রাজা হুত্ৰা বুদ্ধপমুখস্স সঙ্ঘস্স সপত্তচীৰরং দানঞ্চেৰ অঞ্জনাদি ভেসজ্জানি চ দত্ৰা সত্থু ধম্মদেসনং সুত্ৰা পব্বজি সোপি নং সত্থা ৰ্যাকাসি তস্স পন ভগৰতো ধাতুযো ন ৰিকিরিংসু সব্বে সন্নিপতিত্ৰা ধাতুযো গহেত্ৰা গাৰুতুব্বেধং থূপমকংসু.

‘‘ককুসণ্ধো জিনৰরো - খেমারামম্হি নিব্বুতো,

তত্থেৰ তস্স থূপৰরো-গাৰুতং নভমুগ্গতো’’তি;

তস্স অপরভাগে কোনাগমনো নাম সত্থা উদপাদি তদা বোধিসত্তো পব্বতো নাম রজা হুত্ৰা অমচ্চগণ পরিৰুতো সত্থু সন্তিকে গন্ত্ৰা ধম্মদেসনং সুত্ৰা বুদ্ধপমুখং ভিক্খুসঙ্ঘং নিমন্তেত্ৰা মহাদানং পৰত্তেত্ৰা পত্তুণ্ণচীনপট্ট কোসেয্য কম্বল দুকুলানি চেৰ সুৰণ্ণপট্টকঞ্চ দত্ৰা সত্থু সন্তিকে পব্বজি. সোপি নং সত্থা ৰ্যাকাসি তস্স ভগৰতো ধাতুযো ৰিকিরিংসু

‘‘কোনাগমনো সম্বুদ্ধো পব্বতারামম্হি নিব্বুতো,

ধাতু ৰিত্থারিকং আসি-তেসু তেসু পদেসতো’’তি;

তস্স অপরভাগে কস্সপো নাম সত্থা উদপাদি. তদা বোধিসত্তো জোতিপালো নাম মাণৰো হুত্ৰা তিণ্ণং ৰেদানং পারগুভূমিযঞ্চেৰ অন্তলিক্খেৰ পাকটো ঘটীকারস্স কুম্ভকারস্স মিত্তো অহোসি. সো তেন সদ্ধিং সত্থারং উপসঙ্কমিত্ৰা ধম্ম

কথং ¶ সুত্ৰা পব্বজিত্ৰা আরদ্ধৰীরিযো তীণি পিটকানি উগ্গহেত্ৰা ৰত্তা ৰত্তসম্পত্তিযা বুদ্ধসাসনং সোভেসি. সোপি নং সত্থা ৰ্যাকাসি. কস্সপস্স পন সত্থুনো ধাতুযো ন ৰিকিরিংসু সকল জম্বুদীপৰাসিনো মনুস্সা সন্নিপতিত্ৰা একেকং সুৰণ্ণট্ঠিকং কোটি অগ্ঘনকং রতনৰিচিত্তং বহি রচনত্থং একেকং অড্ঢকোটি অগ্ঘনকং অব্ভন্তর পূরণত্থং মনোসিলায মত্তিকাকিচ্চং তেলেন উদককিচ্চং করোন্তা যোজনুব্বেধং থুপমকংসু.

‘‘মহাকস্সপো জিনো সত্থা-সেতৰ্যাযঞ্হি নিব্বুতো,

তত্থেৰ তস্স জিনথুপো-যোজনুব্বেধমুগ্গতো’’তি;

দীপঙ্করো চ কোণ্ডঞ্ঞো-মঙ্গলো সুমনো তথা,

অনোমদস্সী বুদ্ধো চ-নারদো পদুমুত্তরো;

সুজাতো পিযদস্সী চ-ধম্মদস্সি নরুত্তমো,

সিদ্ধত্থবুদ্ধো তিস্সো চ-ৰিপস্সি চ সিখী তথা;

ককুসণ্ধো কস্সপো চাতি-সোল়সেতে মহেসযো,

থুপপ্পমাণমেতেসং পালিযংযেৰ দস্সিতং;

যস্মা তস্মা মযা সাধূ-তে সব্বেপি পকাসিতা,

থূপা সদ্ধা জনা সাধূ-তে ৰন্দেয্যথ সাদরং;

যেসানং পন অট্ঠন্নং - সুগতানং হিতেসিনং

ধাতু ৰিত্থারিকা আসুং - তেসু তেসু পদেসতোতি;

সাধুজন মনোপসাদনত্থায কতে থূপৰংসে ৰিজ্জমানথূপানং বুদ্ধানং থূপকথা চেৰ সব্বেসং সন্তিকে অভিনিহারকতাচে. সমত্তা.

কস্সপস্স পন ভগৰতো অপরভাগে ঠপেত্ৰা ইমং সম্মা সম্বুদ্ধং অঞ্ঞো বুদ্ধো নাম নত্থি. এৰং দীপঙ্করাদীনং চতুৰীসতিযা বুদ্ধানং সন্তিকে লদ্ধৰ্যাকরণো বোধিসত্তো পারমিযো পূরেত্ৰা ৰেস্সন্তরত্তভাৰে ঠিতো-

‘‘অচেতনাযং পথৰী-অৰিঞ্ঞায সুখং দুখং,

সাপি দানবলো ময্হং-সত্তক্কত্তুং পকম্পথা’’তি;

এৰং মহাপথৰি কম্পনানি পুঞ্ঞানি কত্ৰা আযুপরিযোসানে ততো চুতো তুসিতভৰনে নিব্বত্তি তত্থ অঞ্ঞে দেৰে দসহি ঠানেহি অধিগণ্হিত্ৰা যাৰতাযুকং দিব্বসম্পত্তিং অনুভৰন্তো মনুস্সগণনায ¶ সত্তহি দিৰসেহি আযুক্খযং পাপুণিস্সতিতি ৰত্থানি কিল়িস্সন্তি, মালা মিলাযন্তি, কচ্ছেহি সেদা মুচ্চন্তি, কাযেচেৰ দুব্বণ্ণিযং ওক্কমতি. দেৰো দেৰাসনে নাভিরমতীতি ইমেসু পঞ্চসু পুব্বনিমিত্তেসু উপ্পন্নেসু তানি দিস্ৰাসুঞ্ঞাৰত নো সগ্গা ভৰিস্সন্তিতি সংৰেগজাতাহি দেৰতাহি মহাসত্তস্স পারমিনং পূরিতভাৰং ঞত্ৰা ইমস্মিং ইদানি অঞ্ঞং দেৰলোকং অনুপগন্ত্ৰা মনুস্সলোকে উপ্পজ্জিত্ৰা বুদ্ধভাৰং পত্তে পুঞ্ঞানি কত্ৰা চুত চুতা দেৰলোকং পূরেস্সন্তীতি চিন্তেত্ৰা.

‘‘যতোহং তুসিতে কাযে-সন্তুসিতো নামহং তদা,

দসসহস্সি সমাগন্ত্ৰা-যাচন্তি পঞ্জলী মমং;

কালোযংতে মহাৰীর-উপ্পজ্জ মাতুকুচ্ছিযং,

সদেৰকং তারযন্তো-বুজ্ঝস্সু অমতং পদন্তি’’;

এৰং বুদ্ধভাৰত্থায আযাচিতো কালং-দীপং-দেসং কুলং-জনেত্তিযা আযুপ্পমাণন্তি ইমানি পঞ্চ মহাৰিলোকনানি ৰিলোকেত্ৰা কতসন্নিট্ঠানো ততো চুতো সক্যরাজকুলে পটিসণ্ধিংগহেত্ৰা তত্থ মহাসম্পত্তিযা পরিহরিযমানো অনুক্কমেন ভদ্দং যোব্বনং অনুপাপুণিত্ৰা তিণ্ণং উতূনং অনুচ্ছৰিকেসু তীসু পাসাদেসু দেৰলোকসিরিং ৰিয রজ্জসিরিং অনুভৰমানো উয্যানকীল়ায গমনসমযে অনুক্কমেন জিণ্ণ - ৰ্যাধি - মতসঙ্খাতে তযো দেৰদূতে দিস্ৰা সংজাত সংৰেগা নিৰত্তিত্ৰা চতুত্থে ৰারে পব্বজিতং দিস্ৰা সাধু পব্বজ্জাতি পব্বজ্জায রুচিং উপ্পাদেত্ৰা উয্যানং গন্ত্ৰা তত্থ দিৰসং খেপেত্ৰা মঙ্গল পোক্খরণিতীরে নিসিন্নো কপ্পক ৰেসং গহেত্ৰা আগতেন ৰিস্সকম্ম দেৰপুত্তেন অলঙ্কত পটিযত্তো রাহুলকুমারস্স পাতসাসনং সুত্ৰা পুত্তসিনেহস্স বলৰভাৰং ঞত্ৰা যাৰ ইমং বণ্ধনং ন ৰড্ঢতি তাৰদেৰনং ছিণ্দিস্সামীতি চিন্তেত্ৰা সাযং নগরং পৰিসন্তো-

‘‘নিব্বুতা নূন সা মাতা - নিব্বুতো নূন সো পিতা,

নিব্বুতা নূন সা নারী - যস্সাযং ঈদিসো পতি’’তি;

কিসাগোতমিযা নাম পিতুচ্ছা ধীতায ভাসিতং ইমং গাথা সুত্ৰা ইহং ইমায নিব্বুতপদং সাৰিতোতি গীৰতো সতসহস্সগ্ঘনকং মুত্তাহারং ওমুঞ্চিত্ৰা তস্সা পেসেত্ৰা অত্তনো ভৰনং পৰিসিত্ৰা সিরীসযনে নিপন্নো নিদ্দাৰস গতানং নাটকানং ৰিপ্পকারং দিস্ৰা নিব্বিন্নহদযো ছন্নং উট্ঠাপেত্ৰা কণ্থকং আহারাপেত্ৰা তং আরুয্হ ছন্নসহাযো দসসহস্স চক্কৰাল় দেৰতাহি কত পরিৰারো মহাভিনিক্খমনা নিক্খমিত্ৰা তেনেৰ রত্তাৰসেসেন তীণি রজ্জানি অতিক্কম্ম অনোমায নদিযা পরতীরং পত্ৰা অস্সাপিট্ঠিতো ওরুয্হ ¶ মুত্তরাসি সদিসে চালিকাপুলিণে ঠত্ৰা ছন্নত্ৰং ময্হং আভরণানি চেৰ কণ্থকঞ্চ আদায গচ্ছাহি আভরণানি চ কণ্থকঞ্চ পটিচ্ছাপেত্ৰা দক্খিণ হত্থেন মঙ্গলখগ্গমাদায ৰামহত্থেন মোলিযা সদ্ধিং চূল়ং ছিণ্দিত্ৰা সচে অহং বুদ্ধো ভৰিস্সামি আকাসে তিট্ঠতু নো চে ভূমিযং পততূতি আকাসে খিপি চুল়ামণী বণ্ধনং যোজনপ্পমাণং ঠানংগন্ত্ৰা আকাসে অট্ঠাসি অথ সক্কো দেৰরাজা যোজনিকেন রতনচঙ্গোটকেন পটিগ্গহেসি.

ৰেহাসযং উক্খিপি সক্যপুঙ্গযৰো,

পটিগ্গহেত্ৰা চ পন দেৰলোকং নেত্ৰা সুনেরু মুদ্ধনি তিযোজনপ্পমাণং ইণ্দনীলমণিমযং চুল়ামণি চেতিযং নাম অকাসি অথ কস্সপ বুদ্ধকালে পোরাণ সহাযকো ঘটিকার মহাব্রহ্মা একং বুদ্ধন্তরং ৰিনাৰাসভাৰপ্পত্তেন মত্তভাৰো চিত্তেসি. অজ্জ মে সহাযকো মহাভিনিক্খমনং নিক্খন্তো সমণ পরিক্খারমস্স গহেত্ৰা গচ্ছামীতি-

‘‘তিচীৰরঞ্চ পত্তো চ ৰাসি সূচি চ বণ্ধনং,

পরিস্সাৰন অট্ঠেতেন-যুত্তযোগস্স ভিক্খুনো’’তি;

ইমে সমণপরিক্খারে আহরিত্ৰা অদাসি মহাপুরিসো অরহদ্ধজং নিৰাসেত্ৰা উত্তমং পব্বজ্জাৰেসং গণ্হিত্ৰা সাটকযুগলং আকাসে খিপি তং ব্রহ্মা পটিগ্গহেত্ৰা ব্রহ্মলোকে দ্ৰাদসযোজনিকং সব্বরতনমযং দুস্সচেতিযমকাসি.

‘‘কিলেস অপ্পহীণেপি=মহাসত্তস্স তং খণে,

যস্সানুভাৰতো এৰং দুস্সচূল়া হি পূজিতা

তস্মা তম্ম মহাবোধি-সত্তানং পটিপত্তিযং,

ন করেয্য মহুস্সাহংৰ-কো হি নাম বুধো জনো’’তি;

৯. বোধিসত্তো পব্বজিত্ৰা অনুক্কমেন রাজগহং গন্ত্ৰা তত্থ পিণ্ডায চরিত্ৰা পণ্ডৰ পব্বতপব্ভারে নিসিন্নো মগধরাজেন রজ্জেন নিমন্তিযমানো তং পটিক্খিপিত্ৰা সব্বঞ্ঞুতং পত্ৰা তিস্সৰিজিতং আগমনত্থাযতেনগহিত পটিঞ্ঞো আল়ারং-উদ্দকঞ্চ উপসঙ্কমিত্ৰা ¶ তেসং সন্তিকে অধিগতৰিসেসেন অপরিতুট্ঠো ছব্বস্সানি মহাপধানং পদহিত্ৰা ৰিসাখ পুণ্ণম দিৰসে সেনানিনিগমে সুজাতায দিন্নপাযাসং পরিভুঞ্জিত্ৰা নেরঞ্জরায নদিযা সুৰণ্ণপাতিং পৰাহেত্ৰা নেরঞ্জরায তীরে মহাৰনসণ্ডে নানাসমাপত্তীহি দিৰাভাগং ৰিতিনামেত্ৰা সাযণ্হ সমযে সোত্থিযেন দিন্নং তিণমুট্ঠিং গহেত্ৰা কাল়েন নাগরাজেন অভিত্থুতগুণো বোধিমণ্ডং আরুয্হ তিণানি. সত্থরিত্ৰা ন তাৰীমং পল্লঙ্কং ভিণ্দিস্সামি যাৰ মে অনুপাদায আসৰেহি চিত্তং ৰিমুচ্চিস্সতী’’তি পটিঞ্ঞং কত্ৰা পাচীন দাসাভিমুখো নিসীদিত্ৰা-সূরিযে অনত্থমিতেযেৰ মারবলং ৰিধমেত্ৰা পঠমযামে পুব্বে নিৰাসঞাণং মজ্ঝিমযামে চুতূপপাতঞাণং পত্ৰা পচ্ছিমযামাৰসানে দসবল চতুৰেসারজ্জাদি সব্বগুণপতিমণ্ডিতংসব্বঞ্ঞুতঞাণং পটিৰিজ্ঝিত্ৰা সত্ত সত্তাহং বোধিসমীপেযেৰ ৰীতিনামেত্ৰা অট্ঠমে সত্তাহে অজপাল নিগ্রোধমূলে নিসিন্নো ধম্মগম্ভীরতা পচ্চৰেক্খনেন অপ্পোস্সুক্কতং আপজ্জমানো দসদহস্সী মহাব্রহ্ম পরিৰারেন সহম্পতি মহাব্রহ্মুনা আযাচিত ধম্মদেসনো বুদ্ধচক্খুনা লোকং ওলোকেন্তো ব্রহ্মুনো অজ্ঝেসনং আদায কস্স নু খো পঠমং ধম্মং দেসেয্যন্তি ওলোকেন্তো আল়ারুদ্দকানং কালকতভাৰং ঞত্ৰা পঞ্চৰগ্গীযানং ভিক্খুনং বহূপকারতং অনুস্সরিত্ৰা উট্ঠাযাসনা কাসিপুরং গচ্ছন্তো অন্তরামগ্গে উপকেন সদ্ধিং মন্তেত্ৰা আসাল়হিপুণ্ণম দিৰসে ইসিপতনে মিগদাযে পঞ্চ ৰগ্গিযানং ভিক্খুনং ৰসনট্ঠানং পত্ৰা তে অননুচ্ছৰিকেন আৰুসো ৰাদেন সমুদাচরন্তে অঞ্ঞাপেত্ৰা ধম্মচক্কং পৰত্তেন্তো অঞ্ঞাকোণ্ডঞ্ঞত্থেরপমুখে অট্ঠারস কোটিযো অমতপানং পাযেসি.

ততো পট্ঠায চত্তালীস সংৰচ্ছরানি ঠত্ৰা চতুরাসীতি ধম্মক্খণ্ধ সহস্সানি দেসেত্ৰা গণনপথমতীতে সত্তে ভৰকন্তারতো সন্তারেত্ৰা সব্ববুদ্ধকিচ্চানি নিট্ঠপেত্ৰা কুসিনারাযং উপৰত্তনে মল্লানং সালৰনে যমকসালান মন্তরে উত্তসীসকং পঞ্ঞত্তে মঞ্চকে ৰিসাখপুণ্ণম দিৰসে দক্খিণেন পস্সেন সতো সম্পজানো অনুট্ঠানসেয্যায নিপজ্জি. তদা কির ভগৰতো পূজায যমকসালা সব্বপালিফুল্লা মূলতো পট্ঠায যাৰ অগ্গা একচ্ছন্না অহেসুং. ন কেৰলঞ্চ যমকসালাযেৰ সব্বেপি রুক্খসাখা সব্বপালিফুল্লাৰ অহেসুং.

ন কেৰলঞ্চ তস্মিংযেৰ উয্যানে সকলেপি দসসহস্স চক্কৰাল়ে ফলুপগ রুক্খা ফলং গণ্হিংসু. সব্বরুক্খানং খণ্ধেসু খণ্ধ পদুমানি, ¶ ৰললীসু ৰললিপদুমানি. আকাসে উল্লোকপদুমানি, পথৰিতলং ভিণ্দিত্ৰা দণ্ডকপদুমানি পুপ্ফিংসু. সব্বো মহা সমুদ্দো পঞ্চৰণ্ণ পদুমসঞ্ছন্নো অহোসি তিযোজন সহস্সৰিত্থতো পন হিমৰা ঘনবদ্ধমোরপিঞ্ছকলাপো ৰিয নিরন্তরং মালাদামগৰক্খিতো ৰিয সুট্ঠু পীল়েত্ৰা আবদ্ধপুপ্ফৰটংসকো ৰিয সুপূরিত পুপ্ফচঙ্গেটকং ৰিয চ অতিরমণীযো অহোসি.

যমকসালা ভুম্মদেৰতানি সঞ্চালিতক্খৰিণ্ধটপা তথাগতসরীরস্স উপরিপুপ্ফানি ৰিকিরন্তি. দিব্বানিপি মণ্দারৰ পুপ্ফানি অন্তলিক্খা পতন্তি. তানি হোন্তি সুৰণ্ণ ৰণ্ণানি পণ্ণচ্ছত্তপ্পমাণানি মহাতুম্বমত্তং রেণু গণ্হন্তি ন কেৰলঞ্চ মণ্দারৰ পুপ্ফানেচ, অঞ্ঞানিপি সব্বানি পারিচ্ছত্তক পুপ্ফাদীনি সুৰণ্ণৰঙ্গোটকানি রজতচঙ্গোটকানি চ পূরেত্ৰা পূরেত্ৰা তিদস পুরেপি ব্রহ্মলোকেপি ঠিতাহি দেৰতাহি ৰিৰিধানি অন্তরা অৰিপ্পকিণ্ণানেৰ হুত্ৰা আগন্ত্ৰা পত্তকিংজক্খ রেণু চুণ্ণেহি তথাগতস্স সরীরমেৰ ওকীরন্তি ন কেৰলঞ্চ দেৰতানংযেৰ নাগ সুপণ্ণ মনুস্সানম্পি উপকপ্পন চণ্দন চুণ্ণানি ন কেৰলঞ্চ চণ্দনচুণ্ণানেৰ কাল়ানুসারী তগর লোহিতচণ্দনাদি সব্বগন্ধজাতচুণ্ণানি, হরিতালঞ্জন সুৰণ্ণ রজত চুণ্ণানি, সব্বগন্ধৰাস ৰিকতিযো সুৰণ্ণ রজতাদিসমুগ্গে পূরেত্ৰা চক্কৰাল় মুখৰট্টিআদিসু ঠিতাহি দেৰতাহি পৰিদ্ধা অন্তরা অৰিপ্পকিরিত্ৰা তথাগতস্সেৰ সরীরং ওকিরন্তি দিব্বানিপি তুরিযানি অন্তলিক্খে ৰজ্জন্তি. ন কেৰলঞ্চ তানিযেৰ সব্বানিপি তন্তিবদ্ধ চম্মপরিযোনদ্ধ সুসিরাদি ভেদানি দসসহস্সচক্কৰাল়ে দেৰ-নাগৰ-সুপণ্ণ-মনুস্সানং তুরিযানি একচক্কৰাল়ে সন্নিপতিত্ৰা অন্তলিক্খে ৰজ্জন্তি.

ৰরচারণদেৰতা কির নামেকা দীঘাযুকা দেৰতা মহাপুরিসো মনুস্সপথে নিব্বত্তিত্ৰা বুদ্ধো ভৰিস্সতীতি সুত্ৰ পটিসণ্ধিদিৰসে গণ্হিত্ৰা গমিস্সামাতি মালা গন্থিতুং আরভিংসু তা গণ্থমানাৰ মহাপুরিসে মাতুকুচ্ছিযং নিব্বত্তে তুম্ভে কস্স গণ্থথাতি ৰুত্তা ন তাৰ তিট্ঠাতি কুচ্ছিতো নিক্খমন দিৰসে গহেত্ৰা গমিস্সামাতি আহংসু পুন নিক্খেন্তোতি সুত্ৰা মহাভিনিক্খমনদিৰসে গমিস্সামাতি মহাভিনিক্খমনং নিক্খন্তোতি সুত্ৰা অভিসম্বোধি দিৰসে গমিস্সামাতি. অজ্জ অভিসম্বুদ্ধোতি সুত্ৰা ধম্মচক্কপ্পৰত্তনদিৰসে গমিস্সামাতি ধম্মচক্কং পৰত্তযীতি সুত্ৰা যমকপাটিহারিযদিৰসে গমিস্সামাতি. অজ্জ যমকপাটিহারিযং করীতি সুত্ৰা দেৰো রোহনদিৰসে গমিস্সামাতি. অজ্জ দেৰোরোহনং করীতি সুত্ৰা আযুসঙ্খারোস্সজ্জনে গমিস্সামাতি আযুসঙ্খারং ওস্সজীতি সুত্ৰা ন তাৰ নিট্ঠাতি পরিনিব্বানদিৰসে গমিস্সামাতি?

অজ্জ ¶ ভগৰা যমকসালানমন্তরে দক্খিণেন পস্সেন সতো সম্পজানো সীহসেয্যং উপগতো বলৰ পচ্চুসমযে পরিনিব্বাযিস্সতি তুম্হে কস্স গণ্থথাতি ৰুত্তা পন কিন্নামেতং অজ্জেৰ মাতুকুচ্ছিযং পটিসণ্ধিং গণ্হি অজ্জেৰ কুচ্ছিতো নিক্খন্তো, অজ্জেৰ মহাভিনিক্খমনং নিক্খমি. অজ্জেৰবুদ্ধো অহোসি অজ্জেৰ ধম্মচক্কং পৰত্তযি. অজ্জেৰ যমকপাটিহারিযং অকাসি. অজ্জেৰ দেৰলোকা ওতিনণ্ণা. অজ্জেৰ আযুসঙ্খরং ওস্সজি. অজ্জেৰ কির পরিনিব্বুতো. ননু নাম দুতিয দিৰসে যাগুপান কালমত্তম্পি ঠাতব্বং অস্স, দস পারমিযো পূরেত্ৰা বুদ্ধত্তং পত্তস্স নাম অননুচ্ছৰিকন্তি অপরি নিট্ঠিতাৰ মালাযো গহেত্ৰা আগম্ম অন্তো চক্কৰাল়ে ওকাসং আলভমানা চক্কৰাল় মুখৰট্টিযং লভিত্ৰা আধাৰন্তিযো হত্থেন হত্থং গীৰায গীৰং গহেত্ৰা তীণি রতনানি আরব্ভদ্ৰত্তিংসমহপুরিসলক্খণানি ছব্বণ্ণরংসিযো দসপারমিযো অদ্ধচ্ছট্ঠানি জাতকসতানি চুদ্দস্স বুদ্ধঞাণানি আরব্ভ গাযিত্ৰা তস্স তস্স অৰসানে সহায হে সহায হেতি ৰদন্তি. ইদমেতং পটিচ্চৰুত্তং-দিব্বানিপি সংগীতানি অন্তলিক্খে ৰত্তন্তিতি.

ভগৰা পন এৰং মহতিযা পূজায ৰত্তমানযা পঠমযামে মল্লানং ধম্মং দেসেসি মজ্ঝিমযামে সুভদ্দস্স ধম্মং দেসেত্ৰা তং মগ্গফলে পতিট্ঠাপেসি পচ্ছিমযামে ভিক্খু ওৰদিত্ৰা বলৰ পচ্চূস সমযে মহাপথৰিং কম্পেন্তো অনুপাদিসেসায নিব্বানধাতুযা পরিনিব্বাযি পরিনিব্বুতে পন ভগৰতি লোকনাথে আনণ্দত্থেরো মল্লরাজুনং তং পৰত্তিং আরোচেতি তে সুত্ৰাৰ গণ্ধমালং সব্বঞ্চ তালাৰচরং পঞ্চ চ দুস্সযুগসতানি আদায গন্ত্ৰা ভগৰতো সরীরং নচ্চেহি - গীতেহি - ৰাদিতেহি - মালেহি - গণ্ধেহি সক্করোন্তা গরুকরোন্তা মানেন্তা - পূজেন্তা চেলৰিতানানি করোন্তা মণ্ডল মালানি পটিযাদেন্তা এৰং তা দিৰসং ৰীতিনামেসুং.

অথ দেৰতানঞ্চ কোসিনারকানং মল্লানঞ্চ এতদহোসি-অতিৰিকালো খো অজ্জ ভগৰতো সরীর ঝাপেতুং, স্ৰেদানি ভগৰতো সরীরং ঝপেস্সামাতি তথা দুতিযম্পি দিৰসং ৰীতিনামেসুং. তথা ততিযং চতুত্থং পঞ্চমং ছট্ঠম্পি দিৰসং ৰীতিনামেসুং সত্ত মে দিৰসে দেৰতা চ দোসিনারকা মল্লা চ ভগৰতো সরীরং দিব্বেহি মানুসকেহি চ নচ্ছেহি - গীতেহি - ৰাদিতেহি - মালেহি - গণ্ধেহি সক্কারোন্তো গরুকরোন্তা মানেন্তা পূজেন্তা নগরমজ্ঝেন নীহরিত্ৰা যত্থ মকুটবণ্ধনং নাম মল্লানং চেতিযং তত্থ নিক্খিপিংসু

তেন খো পন সমযেন কুসিনারা যাৰ সন্ধিসমল সংকটীরাজন্নুমত্তেন ওধিনা মণ্দারৰ পুপ্ফেন সত্থতা হোতি অথ খো কোসিনারকা ¶ মল্লা ভগৰতো সরীরং চক্কৰত্তিস্স সরীরং ৰিয অহতেন ৰত্থেন ৰেঠেসুং অহতেন ৰত্থেন ৰেঠেত্ৰা ৰিহতেন কপ্পাসেন ৰেঠেসুং ৰিহতেন কপ্পাসেন ৰেঠেত্ৰা অহতেন ৰত্থেন ৰেঠেসুং. এতেনেৰ নযেন পঞ্চহিযুগসতেহি ৰেঠেত্ৰা আযসায তেলদোণিযা পক্খিপিত্ৰা অঞ্ঞিস্সা আযসায দোণিযা পটিকুজ্জেত্ৰা সব্বগন্ধানং চিতকং করিত্ৰা ভগৰতো সরীরং চিতকং আরোপেসুং. তেন খো পন সমযেন আযস্মা মহা কস্সপো পাৰায কুসিনারং অদ্ধানমগ্গ পটিপন্নো হোতি মহতাভিক্খুসঙ্ঘেন সদ্ধিং পঞ্চমত্তেহি ভিক্খুসতেহি তেন খো পন সমযেন থেরে চিত্তং পসাদেত্ৰা সগ্গে নিব্বত্তা দেৰতা তস্মিং সমাগমে থেরং অদিস্ৰা কুহিন্নু খো অম্হাকং কুলুপগ থেরোতি আৰজ্জেন্তো অন্তরামগ্গপটিপন্নং দিস্ৰা অম্হাকং কুলুপগ থেরে অৰণ্দিতে চিতকো মা পজ্জলিত্থাতি অধিট্ঠিহিংসু.

অথ খো চত্তারো মল্লপামোক্খা সীসং নহাতা অহতানি ৰত্থানি নিচত্থা ৰী সংরতনসতিকং চণ্দনচিতকং আলিম্পেস্সামাতি অট্ঠপি সোলসপি দ্ৰত্তিংসাপি জনা হুত্ৰা যমক উক্কযো গহেত্ৰা তালৰণেটহি ৰিজন্তা ভস্তানি ধমন্তা ন সক্কোন্তিযেৰ অগ্গিং গাহাপেতুং. অথ খো কোসিনারকা মল্লা চিতকস্স অপজ্জলন কারণং আযস্মন্তং অনুরুদ্ধং পুচ্ছিত্ৰং দেৰতানং অভিপ্পাযং সুত্ৰা মহাকস্সপো কির ভো পঞ্চহি ভিক্খুসতেহি সদ্ধিং দসবলস্স পাদে ৰন্দিস্সামীতি আগচ্ছতি তস্মিং কির অনাগতে চিতকো ন পজ্জলতি কীদিসো ভোসো ভিক্খু কালো ওদাতো দীঘো রস্সো এৰরূপে নাম ভো ভিক্খুম্হি ঠিতো কিং দসবলস্স পরিনিব্বানং নামাতি দেচি গণ্ধমালাদি হত্থা পটিপথং গচ্ছিংসু কেচি ৰীথিযো ৰিচিত্তা কত্ৰা আগমনমগ্গং ওলোকযমানা অট্ঠংসু. অথ খো আযস্মা মহাকস্সপো যেন কুসিনারা মকূটবণ্ধনং নাম মল্লানং চেতিযং, যেন ভগৰতো চিতকো তেনুপসঙ্কমি. উপসঙ্কমিত্ৰা একংসং চীৰরং কত্ৰা তিক্খত্তুং চিতকং পদক্খিণং কত্ৰা আৰজ্জেন্তোৰ সল্লক্খেসি-ইমস্মিং ঠানে পাদাতি ততে পাদসমীপে ঠত্ৰা অভিঞ্ঞাপাদকং চতুত্থজ্ঝানং সমাপজ্জিত্ৰা ৰুট্ঠায অরসহস্স পতিমণ্ডিতা দসবলস্স পাদা সদ্ধিং কপ্পাস পটলেহি পঞ্চদুস্সযুগসতানি সুৰণ্ণদোণিং ৰণ্দনচিতকঞ্চ দ্ৰেধা কত্ৰা ময্হং উত্তমঙ্গে সিরসি পতিট্ঠহন্তূতি অধিট্ঠাসি সহ অধিট্ঠান চিত্তেন তানি দুস্সযুগাদিনি দ্ৰেধা কত্ৰা ৰলাহকন্তরা পুণ্ণচণ্দো ৰিয পাদা নিক্খমিংসু.

থেরো ৰিকসিত রত্তপদুম সদিসে হত্থে পসারেত্ৰা সুৰণ্ণৰণ্ণে সত্থু পাদে যাৰ গোপ্ফকা বাল়্হং গহেত্ৰ অত্তনো সিরৰরে পতিট্ঠাপেসি মহাজনো তং অচ্ছরিযং দিস্ৰা একপ্পহারে নেৰ মহানাদং নদি. গণ্ধমালাদীহি পূজেত্ৰা যথারুচিং ৰণ্দি. এৰ পন ¶ থেরেন চ মহাজনেন চ তেহি চ পঞ্চহি ভিক্খুসতেহি ৰণ্দিত মত্তেথেরস্স হত্থতো মুঞ্চিত্ৰা অলত্তক ৰণ্ণানি ভগৰতো পাদতালানি দারুআদিসু কিঞ্চি অচালেত্ৰাৰ যথাট্ঠানে পতিট্ঠহিংসু. ভগৰতো পাদেসু নিক্খমন্তেসু ৰা পৰিসন্তেসু ৰা কপ্পাসঅংসু ৰা দসাতন্তু ৰা তেলবিণ্দু ৰা দারুখণ্ডং ৰা ঠানা চলিতং নাম নাহোসি. সব্বং যথাট্ঠানে ঠিতমেৰ অহোসি. উট্ঠহিত্ৰা পন অত্থঙ্গতে চণ্দে ৰিয সূরিযে ৰিয চ তথাগতস্স পাদেসু অন্তরহিতেসু মহাজনো মহাকণ্দিতং কণ্দি. পরিনিব্বুতকালতো অধিকতরং কারুঞ্ঞং অহোসি অথ খো দেৰাতানুভাৰেন পনেস চিতকে সমন্ততো একপ্পহারেনেৰ পজ্জলি. ঝাযমানস্স ভগৰতো সরীরস্স ছৰি চম্ম মংসাদীনং নেৰ ছারিকামত্তম্পি অন্তমসো পঞ্ঞাযিত্থ ন মসি, সুমন মকুল সদিসা পন ধোতমুত্ত সদিসা সুৰণ্ণসদিসা চ ধাতুযো অৰসিস্সিংসু.

দীঘাযুক বুদ্ধানঞ্হি সরীরং সুৰণ্ণক্খণ্ধসদিসং একঘনমেৰ হোতি. ভগৰা পন অহংন চিরং ঠত্ৰা ঠত্ৰা পরিনিব্বাযামি. ময্হং সাসনং ন তাৰ সব্বত্থ ৰিত্থারিতং, তস্মা পরিনিব্বুতস্সপি মে সাসসমত্তম্পি ধাতুং গহেত্ৰা অত্তনো অত্তনো ৰসনট্ঠানে চেতিযং কত্ৰা পরিচরন্তো মহাজনো সগ্গপরাযনো হোতিতি ধাতূনং ৰিকিরণং অধিট্ঠাসি. কতি পনস্স ধাতুযো ৰিপ্পকিণ্ণা, কতি ন ৰিপ্পকিণ্ণাতি চতস্সো দাট্ঠা, দ্ৰে অক্খকা, উণ্হীসন্তি ইমা সত্তধাতুযো ন ৰিপ্পকিণ্ণা. সেসা ৰিপ্পকিরিংসু. তত্থ সব্বখুদ্দকা ধাতু সাসপ বীজমত্তা অহোসি মহাধাতু মজ্ঝে ভিন্ন তণ্ডুলমত্তা. অতিমহতী মজ্ঝে ভিন্নমুগ্গ বীজমত্তা অহোসি.

দড্ঢে খো পন ভগৰতো সরীরে আকাসতো অগ্গবাহুমত্তাপি জঙ্ঘমত্তাপি তালক্খণ্ধমত্তাপি উদকধারা পতিত্ৰা চিতকং নিব্বাপেসি ন কেৰলং আকাসতোযেৰ পরিৰারেত্ৰা ঠিতসালরুক্খানম্পি সাখত্তর ৰিটপন্তরেহি উদকধারা নিক্খমিত্ৰা নিব্বাপেসুং, ভগৰতো চিতকো মহন্তো, সমন্তা পথৰিং ভিণ্দিত্ৰা তংঙ্গলসীসমত্তা উদকৰট্টি এল়িক ৰটংসক সদিসা গন্ত্ৰা চিতকমেৰ গণ্হি মল্লরাজানো চ সুৰণ্ণঘটে রজতঘটে চ পূরেত্ৰা আভত নানাগণ্ধোদকেন সুৰণ্ণ রজতমযেহি অট্ঠদন্তকেহি ৰিকিরিত্ৰা চণ্দনচিতকং নিব্বাপেসুং. তত্থ চিতকে ঝযমানে পরিৰারেত্ৰা ঠিত সালরুক্খানং সাখন্তরেহি ৰিটপন্তরেহি পত্তন্তরেহি চ জালে উগ্গচ্ছন্তে পত্তং ৰা সাখা ৰা দড্ঢা নাম নত্থি কিপিল্লিকাপি মক্কটকাপি পাণকাপি জালানং অন্তরে নেৰ ৰিচরন্তি.

আকাসতো পতিত উদকধারাসুপি সালরুক্খেহি নিক্খন্ত্ौদকধারাসুপি পথৰিং ভিণ্দিত্ৰা নিক্খন্ত উদকধারাসুপি ধম্মতাৰ পমাণং এৰং ¶ চিতকং নিব্বাপেত্ৰা পন মল্লরাজানো সন্থাগারে চতুজাতিগণ্ধ পরিভণ্ডং কারেত্ৰা লাজ পঞ্চমানি পুপ্ফানি ৰিকিরিত্ৰা উপরি চেলৰিতানং বণ্ধাপেত্ৰা সুৰণ্ণতারকাহি খচেত্ৰা তত্থ গণ্ধদাম মালাদাম রতনদামানি ওলম্বেত্ৰা সত্থাগারতো যাৰ মকুট বণ্ধন সঙ্খাতা সীসপ্পসাধন মঙ্গলসালা তাৰ উভোহি পস্সেহি সাণিকিলঞ্জ পরিক্খেপং কারেত্ৰা উপরি চেলৰিতানং বণ্ধাপেত্ৰা সুৰণ্ণতারকাহি খচেত্ৰা তত্থাপি গণ্ধদাম মালাদাম রতনদামানি ওলম্বেত্ৰা মণিদণ্ডেহি পঞ্চৰণ্ণধজে উস্সপেত্ৰা সমন্তা ধজপতাকা পিরিক্খিপিত্ৰা সিত্তসম্মট্ঠাসু ৰীথিসু কদলিযো পুণ্ণঘটে চ ঠপেত্ৰা দণ্ডদীপিকা জালেত্ৰা অলঙ্কত হত্থিক্খণ্ধে সহধাতূহি সুৰণ্ণদোণিং ঠপেত্ৰা মালাগণ্ধাদীহি পূজেত্ৰা সাধুকীল়ং কীল়ন্তা অন্তোনগরং পৰেসেত্ৰা সন্থাগারে সরভময পল্লঙ্কে ঠপেত্ৰা উপরি সেতচ্ছত্তং ধারযিত্ৰা সত্তি হত্থেহি পুরিসেহি পরিক্খিপাপেত্ৰা হত্থীহি কুম্ভেন কুম্ভং পহরন্তেহি পরিক্খিপাপেত্ৰা ততো অস্সেহি গীৰায গীৰং পহরন্তেহি ততো রথেহি আণিকোটিযা আণিকোটিং পহন্তেহি ততো যোধেহি বাহূহি বাহুং পহরন্তেহি তেসং পরিযন্তে কোটিযা কোটিং পহরমানেহি ধনূহি পরিক্খিপাপেসুং.

ইতি সমন্তা যোজনপ্পমাণং ঠানং সন্নাহগচ্ছিতং ৰিয কত্ৰা আরক্খং সংৰিদহিংসু. কস্মা পনেতে এৰমকংসূতি. ইতো পুরিমেসু দ্ৰীসু সত্তাহেসু তে ভিক্খুসঙ্ঘস্স ঠাননিসজ্জোকাসং করোন্তা খাদনীয ভোজনীযং সংৰিদহন্তা সাধুকীল়ায ওকাসং ন লভিংসু ততো তেসং অহোসি - ইমং সত্তাহং সাধুকীল়ং কীল়িস্সাম. ঠানং খো পনেতং ৰিজ্জতি যং অম্হাকং পমত্তভাৰং ঞত্ৰা কোচীদেৰ আগন্ত্ৰা ধাতুযো গণ্হয্য-তস্মা আরক্খং ঠপেত্ৰা কীল়িস্সামাতি তেন তে এৰমকংসু.

অথ খো অস্সোসি খো রাজা মাগধো অজাতসত্তু ভগৰা কির কুসিনারাযং পরিনিব্বুতোতি কথং অস্সোসি পঠমমেৰস্স অমচ্চা সুত্ৰা চিন্তযিংসু? সত্থা নাম পরিনিব্বুতো, ন সো সক্কা পুন আহরিংতু পোথুজ্জনিক সদ্ধায পন অম্হাকং রঞ্ঞা সদিসো নত্থি. সচে এস ইমিনাৰ নিযামেন সুণিস্সতি, হদযমস্স এল়িস্সতি রাজা খো পনম্ভেহি অনুরক্খিতব্বোতি তে তিস্সো সুৰণ্ণদোণিযো আহরিত্ৰা চতুমধুরস্স পূরেত্ৰা রঞ্ঞো সন্তিকং গন্ত্ৰা এতদৰোচুং. দ্ৰে অম্হেহি সুপিনকো দিট্ঠো তস্স পটিঘাতত্থং তুম্হেহি দুকূলপট্টং নিৰাসেত্ৰা যথা নাসাপুটমত্তং পঞ্ঞাযতি এৰং চতুমধুরদোণিযং নিপজ্জিতুং ৰট্টতীতি. রাজা অত্থৰরকানং ৰচনং সুত্ৰা এৰং হোতু তাতা’তি সম্পটিচ্ছিত্ৰা তথা অকাসি.

অথেকো ¶ অমচ্চো অলঙ্কারং ওমুঞ্চিত্ৰা কেসে পরিকিরিয যায দিসায সত্থা পরিনিব্বুতো তদভিমুখো হুত্ৰা অঞ্জলিম্পগ্গয্হ রাজানং আহ- দেৰমরণতো মুঞ্চনকসত্তো নাম নত্থি. অম্হাকং আযুৰদ্ধকেনা চেতিযট্ঠানং পুঞ্ঞক্খেত্তং অভিসেকপিট্ঠিকা ভগৰা সত্থা কুসিনারাযং পরিনিব্বুতোতি রাজা সুত্ৰা ৰিসঞ্ঞী জাতো চতুমধুরদোণি উসুমং মুঞ্চি রাজানং উক্খিপিত্ৰা দুতিযায দোণিযা নিপজ্জাপেসুং সো সঞ্ঞং লভিত্ৰা তাত কিং ৰদথাতি পুচ্ছি. সত্থা মহারাজ পরিনিব্বুতোতি, পুন ৰিসঞ্ঞি জাতো চতুমধুরদোণিং উসুমং মুঞ্চি. অথ নং ততোপি উক্খিপিত্ৰা ততিযায দোণিযা নিপজ্জাপেসুং সো পুন সঞ্ঞং পটিলভিত্ৰা তাত কিং ৰদথাতি পুচ্ছি সত্থা মহারাজ পরিনিব্বুতোতি. রাজা পুন ৰিসঞ্ঞী জাতো চ মধুরদোণি উসুমং মুঞ্চি.

অথ নং ততোপি উক্খিপিত্ৰা নহাপেত্ৰা মত্থকে ঘটেহি উদকং আসিঞ্চিংসু রাজা সঞ্ঞং পটিলভিত্ৰা আসনা উট্ঠায গণ্ধপরিভাৰীতে মণিৰণ্ণকেসে সুৰণ্ণফলক ৰণ্ণায পিট্ঠিযং পকিরিত্ৰা পৰাল়ঙ্গুরৰণ্ণাহি সুৰট্টিতঙ্গুলীহি সুৰণ্ণবিম্বক ৰণ্ণং উরং সংসিব্বন্তো ৰিয গহেত্ৰা পরিদেৰমানো উম্মত্তকৰেসেনেৰ অন্তরৰীথিং ওতিণ্ণো সো অলঙ্কত নাটক পরিৰুতো নগরা নিক্খম্ম জীৰকম্বৰনং গন্ত্ৰা যস্মিং ঠানে নিসিন্নেন ভগৰতা ধম্মো দেসিতো তং ওলোকেত্ৰা ভগৰা সব্বঞ্ঞু ননু মে ইমস্মিং ঠানে নিসীদিত্ৰা ধম্মং দেসযিত্থ তুম্হে সোকসল্লং ৰিনোদযিত্থ. তুম্হে ময্হং সোকসল্লং নীহরিত্থ. অহং তুম্হাকং সরণং গতো. ইদানি পন মে পটিৰচনম্পি ন দেথ ভগৰাতি পুনপ্পুন পরিদেৰিত্ৰা ননু ভগৰা অহং অঞ্ঞদা এৰরূপে কালে তুট্ঠে মহাভিক্খুসঙ্ঘপরিৰারা জম্বুদীপতলে চারিকং চরথাতি সুণাম ইদানি পন অহং তুম্হাকং অননুরূপং অযুত্তং পৰত্তিং সুণামীতি এৰমাদীনি চ ৰত্তা সট্ঠিমত্তাহি গাথাহি ভগৰতো গুণং অনুস্সরিত্ৰা চিন্তেসি মম পরিদেৰিতে নেৰ ন সিজ্ঝতি. দসবলস্স ধাতুযো আহরাপেস্সামিতি মল্লরাজুনং দূতঞ্চ পণ্ণঞ্চ পাহেসি.

ভগৰাপি খত্তিযো, অহম্পি খত্তিযো, অহম্পি অরহামি ভগৰতো সরীরানং থূপঞ্চ মহঞ্চ কারেতুন্তি পেসেত্ৰা পন সচে দস্সন্তি সুণ্দরং, নো চে দস্সন্তি আহরণুপাযেন আহরিস্সামীতি চতুরঙ্গিনিং সেনং সন্নয্হিত্ৰা সযম্পি নিক্খন্তোযেৰ যথা চ অজাতসত্তু এৰং ৰেসালিযং লিচ্ছৰিরাজানো কপিলৰত্থুম্হি সক্যরাজানো অল্লকপ্পকে বুলযো রামগামকে কোল়িযা ৰেঠদীপকে ব্রাহ্মণো পাৰাযঞ্চ মল্লা দূতং পেসেত্ৰা সযম্পি চতুরঙ্গিনিযা সেনায নিক্খমিংসুযেৰ তত্থ পাচেয্যকা সব্বেহি আসন্নতরা কুসিনারাতো ¶ তিগাৰুতন্তরে নগরে ৰসন্তি. ভগৰাপি পাৰং পৰিসিত্ৰা কুসিনারং গতো. মহাপরিহারা পনেতে রাজানো পরিহারা কারেংন্তাৰ পচ্ছতো জাতা. তে সব্বেপি সত্তনগরৰাসিনো আগত্ত্ৰা অম্হাকং ধাতুযো ৰা দেন্তু যুদ্ধং ৰাতি কুসিনারা নগরং পরিৰারযিংসু.

ততো মল্লরাজানোএতদৰোচুং-ভগৰাঅম্হাকংগামক্খেত্তে পরিনিব্বুতো, ন মযং সত্থু সাসনং পহিণিম্হ ন গত্ত্ৰা আনযিম্হ. সত্থা পস সযমেৰ আগন্ত্ৰা সাসনং পেসেত্ৰা অম্হে পক্কোসপেসি তুম্হেপি খো পন যং তুম্হাকং গামক্খেত্তে রতনং উপ্পজ্জতি ন তং অম্হাকং দেথ সদেৰকে লোকে বুদ্ধরতনসমং রতনং নাম নত্থি, এৰরূপং. উত্তমং রতনং লভিত্ৰা মযং ন দস্সমাতি এৰং তে কলহং ৰড্ঢেত্ৰা ন খো পন তুম্হেহিযেৰ মাতু থনতো খিরং পীতং, অম্হেহিপি পীতং তুম্হেযেৰ পুরিসা অম্হে ন পুরিসা হোতু হোতূতি অঞ্ঞমঞ্ঞং অহংকারং কত্ৰা সাসন পটিসাসনং পেসেন্তা অঞ্ঞমঞ্ঞং মানগজ্জিতং গজ্জিংসু যুদ্ধে পন সতি কোসিনারকানংযেৰ জযো অভৰিস্স, কস্মা ধাতুপাসনত্থং আগতা দেৰতা তেসং পক্খাঅহেসুং.

ততো দোণো ব্রাহ্মণো ইমং ৰিৰাদং সুত্ৰা এতে রাজানো ভগৰতে পরিনিব্বুতট্ঠানে ৰিৰিদং করোন্তি ন খো পনেতং পতিরূপং অলং ইমিনা কলহেন চূপসমেস্সামি ন ন্তি উণ্ণতপ্পদেসে ঠত্ৰা দ্ৰেভাণৰারপরিমাণং দোণগজ্জিতং নাম অৰোচ তত্থ পট্ঠমকভাণৰারে তাৰ একপদম্পি তে ন জানিংসু দুতিযক ভাণৰার পরিযোসানে’আচরিযস্স ৰিয ভোসদ্দো, আচরিযস্স ৰিয ভো সদ্দো’তি সব্বে নী রৰা অহেসুং সকলজম্বুদীপতলে কির কুলঘরে জাতো যেভুয্যেন তস্স ন অন্তেৰাসিকো নাম নত্থি অথ সো তে অত্তনো ৰচনং সুত্ৰা তুণ্হীভূতে ৰিদিত্ৰা পুন এতদৰোচ

ৰিত্থারিকা হোন্তু দিসাযু থূপা

বহুজ্জনো চক্খুমতো পসন্নো’’তি;

তত্রাযমত্থো ‘‘অম্হাকং বুদ্ধো অহু খন্তিৰাদো‘‘তি বুদ্ধভূমিং অপ্পত্ৰাপি পারমিযো পূরেন্তো খন্তিৰাদ তাপসকালে ধম্মপালকুমার কালে ছদ্দন্তহত্থিকালে ভূরিদত্ত নাগরাজ কালে চম্পেয্য ¶ নাগরাজ কালে সঙ্খপাল নাগরাজ কালে মহাকপিকালে অঞ্ঞেসুপি বহূসু জাতকেসু পরেসু কোপং অকত্ৰা খন্তিমেৰ অকাসি. খন্তিমেৰ ৰণ্ণযি, কিমঙ্গ পন এতরহি ইট্ঠানিট্ঠেসু তাদিলক্খণং পত্তো সব্বথাপি অম্হাকং বুদ্ধো খন্তিৰাদো অহোসি.

তস্স এৰং ৰিধস্স ন হি সাধয উত্তমপুগ্গলস্স সরীরভঙ্গে সিযা সম্পহারো, ‘‘ন হি সাধযন্তি‘‘ন হি সাধু অযং, ‘‘সরীরভঙ্গেতি সরীর ভঙ্গনিমিত্তং ধাতুকোট্ঠাসহেতূতি অত্থো ‘‘সিযা সম্পহারো‘‘তি আযুধ সম্পহারো ন হি সাধু সিযাতি ৰুত্তং হোতি. ‘‘সব্বেৰ ভোন্তো সহিতা‘‘তি সব্বেৰ ভৰন্তো সহিতা ভোথ মা ভিজ্জিত্থ. ‘‘সমগ্গাতি‘‘ কাযেন ৰাচায চ একসন্নিপাতা একৰচনা সমগ্গা ভোথ ‘‘সম্মোদমানা‘‘তি চিত্তেনাপি অঞ্ঞমঞ্ঞং মোদমানা ভোথ.’করোমট্ঠভাগে‘‘তি ভগৰতা সরীরানি অট্ঠভাগে করোম. ‘‘চক্খুমতো‘‘তি পঞ্চহি চক্খুহী চক্খুতা বুদ্ধস্স, ন কেৰলং তুম্হেযেৰ বহুজ্জনো পসন্নো তেসু একোপি লদ্ধু অযুত্তো নাম নত্থিতি বহুং কারণং ৰত্ৰা সঞ্ঞাপেসি.

অথ সব্বেপি রাজানো এৰমাহংসু-তেন হি ব্রাহ্মণ ত্ৰঞ্ঞেৰ ভগৰতো সরীরানি অট্ঠধা সমং সুৰিভত্তং ৰিভজাহীতি. এৰং ভোতি খো দোণো ব্রাহ্মণো তেসং রাজূনং পটিস্সুত্ৰা ধাতুযো সমং সুৰিভত্তং ৰিভজি.

তত্রাযমনুক্কমো দোণো কির তেসং পটিস্সুত্ৰা সুৰণ্ণদোণিং ৰিৰরাপেসি. রাজানো আগন্ত্ৰা দোণিযং যেৰতা সুৰণ্ণৰণ্ণা ধাতুযো দিস্ৰা ভগৰা সব্বঞ্ঞু পুব্বে মযং তুম্হাকং দ্ৰত্তিংস লক্খণ পতিমণ্ডিতং ছব্বণ্ণবুদ্ধরস্মিখচিতং সুৰণ্ণৰণ্ণং সরীরং অদ্দসাম ইদানি পন সুৰণ্ণৰণ্ণা ধাতুযোৰ অৰসিট্ঠা জাতা, ন যুত্তমিদং ভগৰা তুম্হাকন্তি পরিদেৰিংসু. ব্রাহ্মণো তস্মিং সমযে তেসং পমত্তভাৰং ঞত্ৰা দক্খিণদাঠং গহেত্ৰা ৰেঠন্তরে ঠপেসি অথ পচ্ছা সমং সুৰিভত্তং ৰিভজি. সব্বাপি ধাতুযো পাকতিক নাল়িযা সোল়স নাল়িযো অহোসুং. একেক নগরৰাসিনো দ্ৰে দ্ৰে নাল়িযো লভিংসু.

ব্রাহ্মণস্স পন ধাতুযো ৰিভজন্তস্সেৰ সক্কো দেৰানমিন্দো কেন নু খো সদেৰকস্স লোকস্স কঙ্খাচ্ছেদনায চতুসচ্চকথায পচ্চযভূতা ভগৰতো দক্খিণদাঠা গহিতাতি ওলোকেন্তো ব্রাহ্মণেন গহিতাতি দিস্ৰা ব্রাহ্মণো দাঠায অনুচ্ছৰিকং সক্কারং কাতুং ন সক্খিস্সতি গণ্হামি নন্তি ৰেঠন্তরতো গহেত্ৰা সুৰণ্ণ চঙ্গোটকে ঠপেত্ৰা দেৰলোকং নেত্ৰা চুল়ামণী ¶ চেতিযে পতিট্ঠাপেসি ব্রাহ্মণোপি ধাতুযো ৰিভজিত্ৰা দাঠং অপস্সন্তো কেন মে ঠা গহিতাতি পুচ্ছিতুম্পি নাসক্খি. ননু তযা ধাতুযো ৰিভজিতা, কিং ত্ৰং পঠমংযেৰ অত্তনো ধাতূহি অত্থিভাৰং ন অঞ্ঞাসীতি, অত্তনি দোসারোপনং সম্পস্সমানো ময্হম্পি কোট্ঠাসং দেথাতি ৰত্তুম্পি নাসক্খি.

ততো অযং সুৰণ্ণকুম্ভোপি ধাতুগতিকোযেৰ যেন তথাগতস্স ধাতুযো মিনিতা. ইমস্সাহং থূপং করিস্সামীতি চিন্তেত্ৰা ইমং মে ভোন্তো কুম্ভং দদন্তূতি আহ ততো রাজানো ব্রাহ্মণস্স কুম্ভমদংসু পিপ্ফলিৰনিযাপি খো মোরিযা ভগৰতো পরিনিব্বুতভাৰং সুত্ৰা ভগৰাপি খত্তিযো, মযম্পি খত্তিযো মযম্পি, অরহাম লভিতুং ভগৰতো সরীরানং ভাগন্তি দূতং পেসেত্ৰা যুদ্ধ সজ্জা নিক্খমিত্ৰা আগতা তেসং রাজানো এৰমাহংসু - নত্থি ভগৰতো সরীরানং ভাগো, ৰিভত্তানি ভগৰতো সরীরানি ইতো অঙ্গারং গরথাতি. তে ততো অঙ্গারং হরিংসু.

অথ খো রাজা অজাতসত্তু কুসিনারায চ রাজগহস্স চ অন্তরে পঞ্চৰীসতি যোজনমগ্গং অট্ঠ উসভৰিত্থতং সমতলং কারেত্ৰা সাদিসং মল্লরাজানো মকুটবণ্ধনস্স চ সন্থাগারস্স চ অন্তরে পূজং কারেসুং তাদিসং পঞ্চৰীসতিযোজনেপি মগ্গে পূজা কারেত্ৰা লোকস্স অনুক্কণ্ঠনত্থং সব্বত্থ অন্তরাপণে পসারেত্ৰা সুৰণ্ণদোণিযং পক্খিত্তধাতুযো সত্তিপঞ্জরেন পরিক্খিপাপেত্ৰা অত্তনো ৰিজিতে পঞ্চযোজনসত পরিমণ্ডলে মনুস্সে সন্নিপাতাপেসি.

তে ধাতুযো গহেত্ৰা কুসিনারাতো ধাতুকীল়ং কীল়ন্তা নিক্খমিত্ৰা যত্থ যত্থ ৰণ্ণৰন্তানি পুপ্ফানি পস্সন্তি, তত্থ তত্থ ধাতুযো সত্তি অন্তরে ঠপেত্ৰা তেসং পুপ্ফানং খীণকালে গচ্ছন্তি. রথস্স ধুরট্ঠানং পচ্ছিমট্ঠানে সম্পত্তে সত্ত দিৰসে সাধুকীল়ং কীল়ন্তি এৰং ধাতুযো গহেত্ৰা আগচ্ছন্তানং সত্তৰস্সানি সত্তমাসানি সত্ত চ দিৰসানি ৰিতিৰত্তানি মিচ্ছাদিট্ঠিকা সমণস্স গোতমস্স পরিনিব্বুত কালতো পট্ঠায বলক্কারেন সাধুকীল়িকায উপদ্দুতম্হা, সব্বে নো কম্মন্তা নট্ঠাতি উজ্ঝাযন্তা মনং পদূসেত্ৰা ছল়াসীতিসহস্সমত্তা অপাযে নিব্বত্তা, খীণাসৰ আৰজ্জিত্ৰা মহাজনো মনং পদূসেত্ৰা অপাযে নিব্বত্তোতি সক্কং দেৰরাজানং দিস্ৰা ধাতু আহরণুপাযং করিস্সামাতি তস্স সন্তিকং গন্ত্ৰা তমত্থং আরোচেত্ৰা ধাতু আহরণুপাযং কারোহি মহারাজাতি আহংসু. সক্কো আহ ‘‘পুথুজ্জনো নাম অজাতসত্তুনা সমো সদ্ধো নত্থি, ন সো মম ৰচনং করিস্সতি অপি চ খো মারৰিভিসকসদিসং ৰিভীসকং দস্সেস্সামি যক্খ গাহক খিপনক অরোচকে করিস্সামি তুম্হে ¶ ’মহারাজ অমনুস্সা কুপিতা, ধাতুযো আহরাপেথাতি’. ৰদেয্যাথ এৰং সো আহরাপেস্সতীতি. অথ খো সক্কো তং সব্বং অকাসি.

থেরাপি রাজানং উপসঙ্কমিত্ৰা মহারাজ অমনুস্সা কুপিতং, ধাতুযো আহরাপেহীতি ভণিংসু রাজা ন তাৰ ভন্তে ময্হং চিত্তং তুস্সতি. এৰং সন্তেপি আহরতূতি আহ সত্তমে দিৰসে ধাতুযো আহরিংসু. এৰং আহতধাতুযো গহেত্ৰা রাজা রাজগহে থুপমকাসি ইতরেপি রাজানো অত্তনো অত্তনো বলানুরূপেন নীহরিত্ৰা সকসকট্ঠানে থূপমকংসু. দোণিপি ব্রাহ্মণো পিফ্ফলীৰনিযাপি মোরিযা সকসকট্ঠানে থূপমকংসূতি.

একো থূপো রাজগহে - একো ৰেসালিযা পুরে,

একো কপিলৰত্থুস্মিং - একো চ অল্লকপ্পকে;

একো থূপো রামগামে - একো চ ৰেঠদীপকে,

একো পাচেয্যকে মল্লে - একো চ কুসিনারকে;

যে তে সারীরিকা থূপা - জম্বুৰদীপে পতিট্ঠিতা;

অঙ্গারকুম্ভথূপেহি - দস থূপা ভৰন্তি তে;

নমস্সনেয্যাচ ভৰন্তি সব্বদাতি;

১০. এৰং পতিট্ঠিতেসু পন থূপেসু মহাকস্সপত্থেরো ধাতূনং অন্তরাযং দিস্ৰা অজাতসত্তুং উপসঙ্কমিত্ৰা মহারাজ একং ধাতুনিধানং কাতুং ৰট্টতিতি আহ সাধু ভন্তে নিধানকম্মং তাৰ মম হোতু, ধাতুযো পন কথং আহরাপেমিতি. ন মহারাজ ধাতু আহরণং তুয্হং ভারো, অম্হাকং ভারোতি. সাধু ভন্তে তুম্হে ধাতুযো আহরথ. অহং ধাতুনিধানং করিস্সামীতি. থেরো তেসং তেসং রাজকুলানং পরিচরণমত্তকমেৰ ঠপেত্ৰা সেসেধাতুযো আহরি.

রামগামে পন ধাতুযো নাগা গণ্হিংসু তাসং অন্তরাযো নত্থি, অনাগতে লঙ্কাদীপে মহাৰিহারে মহাচেতিযম্হি নিধিযিস্স নীতি. তা ন আহরিত্থ, সেসেহি সত্তহি নগরেহি আহরিত্ৰা রাজগহস্স পাচীন দক্খিন দিসাভাগে ঠপেত্ৰা ইমস্মিং ঠানে যো পাসাণো অত্থি, সো অন্তরধাযতু, পংসু সুৰিসুদ্ধা হোতু, উদকঞ্চ মা উট্ঠহতূতি অধিট্ঠাসি.

রাজা ¶ তং ঠানং খণাপেত্ৰা ততো উদ্ধট পংসুনা ইট্ঠিকা কারেত্ৰা অসীতি মহাসাৰকানং থূপে কারেতি ইধ রাজা কিং কারেহীতি পুচ্ছন্তানম্পি মহাসাৰকানংচেতিযা নীতি ৰদন্তি ন কোচি ধাতুনিধানভাৰং জানাতি অসীতিহত্থগম্ভীরে পন তস্মিং পদেসে জাতে হেট্ঠা লোভসত্থরং সত্থরাপেত্ৰা তত্থ থূপারামে চেতিয ঘরপ্পমাণং তম্বলোহমযং গেহং কারাপেত্ৰা অট্ঠট্ঠ হরি চণ্দনাদিমযে করণ্ডে চ থূপে চ কারাপেসি.

অথ খো ভগৰতো ধাতুযো হরিচণ্দন করণ্ডে পক্খিপিত্ৰা তং হরিচণ্দনং করণ্ডং অঞ্ঞস্মিং হরিচণ্দন করণ্ডে তম্পি অঞ্ঞস্মিন্তি এৰং অট্ঠ হরিচণ্দন করণ্ডে একতো কত্ৰা এতেনেৰ উপাযেন অট্ঠ করণ্ডে অট্ঠসু হরিচণ্দন থূপেসু অট্ঠ হরিচণ্দনথূপে অট্ঠসু লোহিতচণ্দন করণ্ডেসু, অট্ঠ লোহিতচণ্দনকরণ্ডে অট্ঠসু লোহিতচণ্দনথূপেসু, অট্ঠলোহিত চণ্দনথূপে অট্ঠসু দন্তকরণ্ডেসু, অট্ঠ দন্তকরণ্ডে অট্ঠসু দন্তথূপেসু, অট্ঠদন্তথূপে অট্ঠসুসব্ব রতনকরণ্ডেসু, অট্ঠ সব্ব রতনকরণ্ডে অট্ঠসু সব্বরতনথূপেসু, অট্ঠ সব্বরতন থূপে অট্ঠসু সুৰণ্ণকরণ্ডেসু. অট্ঠসুৰণ্ণকরণ্ডে অট্ঠসু সুৰণ্ণথূপেসু, অট্ঠসুৰণ্ণথূপে অট্ঠসুরজতকরণ্ডেসু, অট্ঠ রজতকরণ্ডে অট্ঠসু রজতথূপেসে অট্ঠ রজতথূপে অট্ঠসু মণিকরণ্ডেসু অট্ঠমণিকরেণ্ডঅট্ঠসুৰণ্ণথূপেসু, অট্ঠ মণিথূপে অট্ঠসু লোহিতঙ্ক করণ্ডেসু, অট্ঠলোহিতঙ্ক করণ্ডে অট্ঠসু লোহিতঙ্কথূপেসু, অট্ঠ লোহিতঙ্কথূপে অট্ঠসু মসারগল্লথূপেসু, অট্ঠ মসারগল্লথূপে অট্ঠসু ফলিক করণ্ডেসু, অট্ঠ ফল়িক করণ্ডে অট্ঠসু ফল়িকথূপেসু পক্খিপি সব্ব উপরিমং ফল়িকচেতিযং থূপারাম চেতিযপ্পমাণং অহোসি.

তস্স উপরিসব্বরতনমযং গেহং কারেসি তস্স উপরি সুৰণ্ণমযং, তস্স উপরি রজতমযং, তস্স উপরি তম্বলোহমযং গেহং কারেসি তত্থ সব্বরতনমযং ৰালুকং ওকিরিত্ৰা জলজ থলজ পুপ্ফানং সহস্সানি ৰিপ্পকিরিত্ৰা অদ্ধচ্ছট্ঠানি জাতকসতানি আসীতি মহাথেরে সুদ্ধোদন মহারাজানং মহামাযাদেৰিং সত্ত সহজাতে সব্বানেতানি সুৰণ্ণমযানেৰ কারেসি পঞ্চপঞ্চসতে সুৰণ্ণরজতমযে পুণ্ণঘটে ঠপাপেসি পঞ্চসুৰণ্ণধজসতে পঞ্চসতে সুৰণ্ণদীপকে চ কারাপেত্ৰা সুগণ্ধতেলস্স পূরেত্ৰা তেসু দুকূলৰট্টিযো ঠপেসি.

অথাযস্মা মহাকস্সপো মালা মা মিলাযন্তু. গণ্ধা মা ৰিনস্সন্তু, দীপা মা ৰিজ্ঝাযন্তূতি অধিট্ঠহিত্ৰা সুৰণ্ণপট্টঅক্খরানি ছিণ্দাপেসি. অনাগতে পিযদাসো নাম কুমারো ছত্তং উস্সাপেত্ৰা ¶ অসোকো নাম ধম্মরাজা ভৰিস্সতি সো ইমং ধাতুযো ৰিত্থারিকা করিস্সতীতি রাজা সব্বপসাধনেহি পূজেত্ৰা আদিতো পট্ঠায দ্ৰারং পিদহন্তো নিক্খমি তম্বলোহদ্ৰারং পিদহিত্ৰা আৰিঞ্জন রজ্জুযং কুঞ্চিকমুদ্দিকং বণ্ধি তত্থেৰ মহন্তং মণিক্খণ্ধং ঠপেসি অনাগতে দল়িদ্দরাজানো ইমং মণিং গহেত্ৰা ধাতূনং সক্কারং করোন্তূতি অক্খরানি ছিণ্দাপেসী.

সক্কো দেৰরাজা ৰিস্সকম্মং আমন্তেত্ৰা’তাত, অজাতসত্তুনা ধাতুনিধানং কতং. এত্থ আরক্খং ঠপেহি’তি পহিণি সো আগন্ত্ৰা ৰাল়সঙ্ঘাটযন্তং যোজেসি. কট্ঠরূপকানি তস্মিং ধাতুগব্ভে ফল়িকৰণ্ণ খগ্গে গহেত্ৰা ৰাতসদিসেন ৰেগেন অনুপরিযাযন্তং যোজেত্ৰা একায এৰ আণিৰা বণ্ধিত্ৰা সমন্ততো গিঞ্জক ৰসথাকারেন সিলাপরিক্খেপং কত্ৰা উপরি একায পিদহিত্ৰা পংসুং পক্খিপিত্ৰা ভূমিং সমং কত্ৰা তস্সুপরি পাসাণথূপং পতিট্ঠাপেসি.

১১. এৰং নিট্ঠিতে ধাতুনিধানে যাৰতাযুকং ঠত্ৰা থেরো পরিনিব্বুতো, রাজাপি যথাকম্মং গতো, তেপি মনুস্সা কালকতা, অপরভাগে পিযদাসো কুমারো ছত্তং উস্সাপেত্ৰা অসোকো নাম ধম্ম রাজা হুত্ৰা তা ধাতুযো গহেত্ৰা জম্বুদীপে চতুরাসীতিযা চেতিয সহস্সেসু পতিট্ঠাপেসি. কথং বিণ্দুসারস্স কির একসতং পুত্তা অহেসুং তে সব্বে অসোকো অত্তনা সদ্ধিং একমাতিকং তিস্স কুমারং ঠপেত্ৰা ঘাতেসি. ঘাতেন্তো চত্তারি ৰস্সানি অনভিসিত্তো রজ্জং কারেত্ৰা চতুন্নং ৰস্সানং অচ্চযেন তথাগতস্স পরিনিব্বানতো দ্ৰিন্নং ৰস্সসতানং উপরি অট্ঠারসমে ৰস্সে সকলজম্বুদীপে একরজ্জাভিসেকং পাপুণি.

অভিসেকানুভাৰেন ইমা রাজিদ্ধিযো আগতা মহাপথৰিযা হেট্ঠা যোজনপ্পমাণে আণা পৰত্তি, তথা উপরি আকাসে, অনোতত্তদহতো অট্ঠহি কাজেহি সোল়স পানীযঘটে দিৰসে দিৰসে দেৰতা আহরন্তি. যতো সাসনে উপ্পন্নসদ্ধো হুত্ৰা অট্ঠ ঘটে ভিক্খুসঙ্ঘস্স অদাসি দ্ৰে ঘটে সট্ঠিমত্তানং তিপিটক ভিক্খুনং দ্ৰেঘটে অগ্গমহেসিযা অসণ্ধিমিত্তায চত্তারো ঘটে অত্তনা পরিভুঞ্জি. দেৰতা এৰ হিমৰন্তে নাগলতা দন্তকট্ঠ নাম অত্থি সিনিদ্ধা মুদুকং রসৰন্তং, তং দিৰসে দিৰসে আভিরন্তি যেন রঞ্ঞো চ অগ্গমহেসিযা চ সোল়সন্নং নাটকসহস্সানং সট্ঠিমত্তানং ভিক্খুসহস্সানং দেৰসিকং দন্তপোণকিচ্চং নিপ্ফজ্জি.

দেৰসিকমেৰস্স ¶ দেৰতা অগদামলকং অগদহরীটকং সুৰণ্ণৰণ্ণঞ্চ গণ্ধসম্পন্নং অম্বপক্কং আহরন্তি তথা ছদ্দন্ত দহতো পঞ্চৰণ্ণং নিৰাসন পারুপণং, পীতকৰণ্ণং হত্থপুঞ্ছনক পট্টংদিব্বঞ্চজানকং আহরন্তি দেৰসিকমেৰ পনস্স অনুলেপগণ্ধং পারুপনত্থায অসুত্তমযিকং সুমনপুপ্ফপটং মহারহঞ্চ অঞ্জনং নাগভৰনতো নাগরাজানো আহরন্তি. ছদ্দন্তদহেযেৰ উট্ঠিতস্স সালিনো নৰ চাহ সহস্সানি দিৰসে দিৰসে সুৰা আহরন্তি. মূসিকা নিত্থুস কণে করোন্তি একোপি খণ্ডতণ্ডুলো ন হোতি. রঞ্ঞো সব্বট্ঠানেসু অযমেৰ তণ্ডুলো পরিভোগং গচ্ছতি. মধুমক্খিকা মধুং করোন্তি. কম্মারসালাসু অচ্ছা কূটং পহরন্তি. দীপিকা চম্মানি চালেন্তি করৰীক সকুণা আগত্ত্ৰা মধুরস্সরং ৰিকুজেন্তা রঞ্ঞো বলিকম্মং করোন্তি.

ইমাহি ইদ্ধীহি সমন্নাগতো রাজাএক দিৰসং সুৰণ্ণ সঙ্খলিক বণ্ধনং পেসেত্ৰা চতুন্নং বুদ্ধানং অধিগত রূপদস্সনং কপ্পাযুকং মহাকাল় নাগরাজানং আনযিত্ৰা সেতচ্ছত্তস্স হেট্ঠা মহারহে পল্লঙ্কে নিসীদাপেত্ৰা অনেক সতৰণ্ণেহি জলজ থলজ পুপ্ফেহি সুৰণ্ণপুপ্ফেহি চ পূজং কত্ৰা সব্বালঙ্কার পতিমণ্ডিতেহি চ সোল়সহি নাটক সহস্সেহি সমন্ততো পরিক্খিপিত্ৰা অনন্তঞাণস্স তাৰ মে সদ্ধম্মৰর চক্কৰত্তিনো সম্মাসম্বুদ্ধস্স রূপং ইমেসং অক্খীনং আপাথং করোহীতি নিব্বত্তাসীতি অনুব্যঞ্জন পতিমণ্ডিতং দ্ৰত্তিংস মহা পুরিস লক্খণ সস্সিরীকতায ৰিকসিত কমলুপ্ফল পুণ্ডরীক পতিমণ্ডিতমিৰ সলিলতলং তারাগণরংসিজাল ৰিসরৰিপ্ফুতসোভাসমুজ্জলমিৰগগনতলং নীল-পীত-লোহিতাদি ভেদ ৰিচিত্তৰণ্ণরংসি ৰিনদ্ধ ব্যামপ্পভা পরিক্খেপ ৰিলাসিতায সঞ্ঝপ্পভানুরাগ ইণ্দধনু ৰিজ্জুল্লতা পরিক্খিত্তমিৰ কনকগিরি সিখরং নানাৰিরাগ ৰিমলকেতুমালা সমুজ্জলিতচারুমত্থকসোভং নযনরসাযনমিৰ ব্রহ্মদেৰ-মনুজ নাগ-যক্খ গণানং বুদ্ধরূপং পস্সন্তো সত্তদিৰসং অক্খিপূজং নাম অকাসি

রাজা কির অভিসেকং পাপুণিত্ৰা তীণিযেৰ সংৰচ্ছরানি বাহিরক পাসণ্ডং পরিগণ্হি চতুত্থে সংৰচ্ছরে বুদ্ধসাসনে পসীদিনং ব্রাহ্মণ জাতিয পাসণ্ডানঞ্চ পণ্ডরঙ্গ পরিব্বাজকানঞ্চ সট্ঠিসহস্সমত্তানং নিচ্চভত্তং পট্ঠপেসি.

অসোকো পিতরা পৰত্তিতং দানং অত্তনো অন্তেপুরে তথেৰ দদমানো একদিৰসং সীহপঞ্জরে ঠিতো উপসম পরিবাহিরেন আচারেন ¶ ভুঞ্জমানে অসংযতিণ্দ্রিযে অৰিনিত ইরিযাপথে দিস্ৰা চিন্তেসি ঈদিসং দানং উপপরিক্খিত্ৰা যুত্তট্ঠানে দাতুং ৰট্টতিতি এৰং চিন্তেত্ৰা অমচ্চে আহ. গচ্ছথ ভণে অত্তনো অত্তনো সাধুসম্মতে সমণ ব্রাহ্মণে অন্তেপুরং অতিহরথ, দানং দস্সামাতি অমচ্চা সাধু দেৰাতি রঞ্ঞো পটিস্সুত্ৰা তে তে পণ্ডরঙ্গ পরিব্বাজকাজীৰক নিগণ্ঠাদযো আনেত্ৰা ইমে মহারাজ অম্হাকং অরহন্তোতি আহংসু.

অথ রাজা অন্তেপুরে উচ্চাৰচানি আসনানি পঞ্ঞাপেত্ৰ আগচ্ছন্তূতি ৰত্ৰা আগতাগতে আহ অত্তনো অত্তনো অনুরূপে আসনে নিসীদথাতি একচ্চে ভদ্দপীঠকে একচ্চে ফলকপীঠকেসে নিসীদিংসু. তং দিস্ৰা রাজা নত্থি এতেসং অন্তেসারোতি ঞত্ৰা তেসং অনুরূপং খাদনীযং ভোজনীযং দত্ৰা উয্যোজেসি.

এৰং গচ্ছন্তে কালে এক দিৰসং সীহপঞ্জরে ঠিতো অদ্দস নিগ্রোধ সামণেরং রাজঙ্গণেন গচ্ছন্তং দন্তং গুত্তং সন্তিন্দ্রিযং ইরিযাপথ সম্পন্নং. কো পনাযং নিগ্রোধো নাম, বিণ্দুসার রঞ্ঞো জেট্ঠপুত্তস্স সুমনরাজ কুমারস্স পুত্তো. তত্রাযং আনুপুব্বী কথা-বিণ্দুসার রঞ্ঞো কির দুব্বলকালেযেৰ অসোক কুমারো অত্তনা লদ্ধং উজ্জেনিরজ্জং পহায আগন্ত্ৰা সব্বং নগরং অত্তনো হত্থগতং কত্ৰা সুমন রাজকুমারং অগ্গহেসি.

তং দিৰসমেৰ সুমনস্স রাজকুমারস্স সুমনা নাম দেৰী পরিপুণ্ণগব্ভা অহোসি. সা অঞ্ঞাতকৰেসেন নিক্খমিত্ৰা অৰিদূরে অঞ্ঞতরং চণ্ডালগামং সন্ধায গচ্ছন্তি, জেট্ঠক চণ্ডালস্স গেহতো অৰিদূরে একস্মিং নিগ্রোধ রুক্খে অধিৰত্থায দেৰতায ইতো সুমনেতি ৰহন্তিযা সদ্দং সুত্ৰা তস্সা সমীপং গতা দেৰতা অত্তনো আনুভাৰেন একং সালং নিম্মিণিত্ৰা এত্থ ৰসাহিতি পদাসি. সা তং সালং পাৰিসি. গতদিৰসেযেৰ পুত্তং ৰিজাযি.

সা তস্স নিগ্রোধ দেৰতায পরিগ্গহিতত্তা নিগ্রোধোত্ৰেৰ নামং অকাসি. জেট্ঠক চণ্ডালো দট্ঠদিৰসতোপ্পভূতি তং অত্তনো সামিধীতরং ৰিয মঞ্ঞমানো নিবদ্ধং ৰট্টং পট্ঠপেসি. রাজধীতা তত্থ সত্ত ৰস্সানি ৰসি. নিগ্রোধকুমারোপি সত্তৰস্সিকো জাতো তদা মহাৰরুণত্থেরো নাম একো অরহা দারকস্স হেতুসম্পদং দিস্ৰা ৰিহরমানো সত্তৰস্সিকোদানি দারকো কালো নং পব্বাজেতুন্তি চিন্তেত্ৰা রাজধীতযা আরোচাপেত্ৰা নিগ্রোধকুমারং পব্বাজেসি. কুমারো খুরগ্গেযেৰ অরহত্তং পাপুণি. সো একদিৰসং পাতোৰ সরীরং পটিজগ্গিত্ৰা আচরিযুপজ্ঝানং ¶ ৰত্তং কত্ৰা পত্তচীৰরমাদায মাতুউপাসিকায গেহদ্ৰারং গচ্ছামীতি নিক্খমি মাতু নিৰেসনট্ঠানঞ্চস্স দক্খিণদ্ৰারেন নগরং পৰিসিত্ৰা নগরমজ্ঝেন গন্ত্ৰা পাচীনদ্ৰারেন নিক্খমিত্ৰা গন্তব্বং হোতি তেন চ সমযেন অসোকো ধম্মরাজা পাচীন দিসাভিমুখো সীহপঞ্জরে চঙ্কমতি.

তং খণংযেৰ সিগ্রোধো সামণেরো রাজঙ্গণং পাপুণি সন্তিন্দ্রিযো সন্তমানসো যুগমত্তং পেক্খমানো. তেন ৰুত্তং. একদিৰসং সীহপঞ্জরে ঠিতো অদ্দস নিগ্রোধসামণেরং রাজঙ্গণেন গচ্ছন্তং দন্তং গুত্তং সন্তিন্দ্রিযং ইরিযাপথ সম্পন্নন্তি. দিস্ৰা পনস্স এতদহোসি? অযং জনো সব্বোপি ৰিক্খিত্তচিত্তোহন্তমগপটিভাগো, অযম্পন দারকো অৰিক্খিত্তচিত্তো অতিৰিযস্স অলোকিত ৰিলোকিতং সম্মিঞ্জন পসারণঞ্চ সোভতি, অদ্ধা এতস্স অব্ভন্তরে লোকুত্তরধম্মো ভৰিস্সতীতি রঞ্ঞো সহদস্সনেনেৰ সামণেরে চিত্তং পসীদি. পেমং সণ্ঠহি কস্মা? পুব্বে কির পুঞ্ঞ করণকালে এস রঞ্ঞো জেট্ঠভাতা ৰাণিজকো অহোসি.

অথ রাজা সঞ্জাতপেমো সবহুমানো সামণেরং পক্কোসথাতি অমচ্চে পেসেসি অতিচিরাযতীতি পুন দ্ৰে তযো পেসেসি তুরিতং আগচ্ছতূতি সামরণেরো অত্তনো পকতিযা এৰ অগমাসি রাজা পতিরূপাসনং ঞত্ৰা নিসীদথাতি আহ. ইতো চিতো চ ওলোকেত্ৰা নত্থিদানি অঞ্ঞো ভিক্খুতি সমুস্সিত সেতচ্ছত্তং রাজপল়্লঙ্কং উপসঙ্কমিত্ৰা পত্তগহণত্থায রঞ্ঞো আকারং দস্সেসি. রাজা তং পল্লঙ্কং সমীপং গচ্ছন্তং দিস্ৰা এৰং চিন্তেসি. অজ্জেৰদানি অযং সামণেরো ইমস্স গেহস্স সামিকো ভৰিস্সতি. সামণেরো রঞ্ঞো হত্থে পত্তং দত্ৰা পল্লঙ্কং অভরুহিত্ৰা নিসীদি.

রাজা অত্তনো অত্থায সম্পাদিতং সব্বং যাগু-কজ্জক ভত্ত ৰিকতিং উপনামেসি. সামণেরো অত্তনো যাপনমত্তমেৰ সম্পটিচ্ছি. ভত্তকিচ্চাৰসানে রাজা আহ সত্থারা তুম্হাকং দিন্নোৰাদং জানাথাতি জানমি মহারাজ একদেসেনাতি. তাত, ময্হম্পি নং কথেহীতি সাধু মহারাজাতি রঞ্ঞো অনুরূপং ধম্মপদে অপ্পমাদ ৰগ্গং অনুমোদনত্থায অভাসি.

রাজা পন অপ্পমাদো অমতপদং, পমাদো মচ্চুনো পদন্তি সুত্ৰ চ, অঞ্ঞাতং তাত পরিযোসাপেহীতি আহ অনুমোদনাৰসানে দ্ৰত্তিংস ধুরভত্তানি লভিত্ৰা পুন দিৰসে দ্ৰত্তিংস ভিক্খু গহেত্ৰা রাজন্তেপুরং পৰিসিত্ৰা ভত্তকিচ্চমকাসি রাজা অঞ্ঞেপি দ্ৰত্তিংস ভিক্খু তুম্হেহি সদ্ধিংযেৰ ভিক্খং গণ্হন্তূতি এতেনেৰ উপাযেন দিৰসে দিৰসে ৰড্ঢাপেন্তে সট্ঠি ¶ সহস্সানং ব্রাহ্মণ পরিব্বাজকানং ভত্তং উপচ্ছিণ্দিত্ৰা অন্তো নিৰেসনে সট্ঠিসহস্সানং ভিক্খুনং নিচ্চভত্তং পট্ঠপেসি, নিগ্রোধত্থের গতেনেৰ পসাদেন, নিগ্রোধত্থেরোপি রাজানং সপরিসং তীসু সরণেসু পঞ্চসু চ সীলেসু পতিট্ঠাপেত্ৰা বুদ্ধসাসনে পোথুজ্জনিকেন পসাদেন অচলপ্পসাদং কত্ৰা পতিট্ঠাপেসি.

পুন রাজ অসোকারামং নাম মহাৰিহারং কারপেত্ৰা সট্ঠিসহস্সানং ভিক্খূনং ভত্তং পট্ঠপেসি. সকলজম্বুদীপে চতুরাসীতিযা নগরসহস্সেসু চতুরাসীতি ৰিহারসহস্সানি কারাপেসি. চতুরাসীতি চেতিযসহস্স পতিমণ্ডিতানি ধম্মেনেৰ নো অধম্মেন, একদিৰসং কির রাজা অসোকারামে মহাদানং দত্ৰা সট্ঠিসহস্স সঙ্খস্স ভিক্খুসঙ্ঘস্স মজ্ঝে নিসজ্জ সঙ্ঘং চতূহি পৰ্চযেহি পৰারেত্ৰা ইমং পঞ্হং পুচ্ছি ভন্তে ভগৰতো দেসিত ধম্মো নাম কিত্তকো হোতীতি. মহারাজ নৰ অঙ্গানি, খণ্দতো চতুরাসীতি ধম্মক্খণ্ধ সহস্সানীতি.

রাজা ধম্মে পসীদিত্ৰা একেকং ধম্মক্খণ্ধং একেকেন ৰিহারেন পূজেস্সামীতি একদিৰসমেৰ ছন্নৰুতি কোটিধনং ৰিস্সজ্জেত্ৰা অমচ্চে আণাপেসি. এথ ভণে একেকস্মিং নগরে একমেকং ৰিহারং কারেন্তা চতুরাসীতিযা নগরসহস্সেসু চতুরাসীতি ৰিহারসহস্সানি কারাপেথাতি সযঞ্চ অসোকারামে অসোক মহাৰিহারত্থায কম্মং পট্ঠপেসি.

সঙ্ঘো ইণ্দগুত্তত্থেরং নাম মহিদ্ধিযং মহানুভাৰং খীণাসৰং নৰকম্মাধিট্ঠাযকং অদাসি. থেরো যং যং ন নিট্ঠাতি তং তং অত্তনো আনুভাৰেন নিট্ঠাপেসি. এৰং তীহি সংৰচ্ছরেহি ৰিহারকম্মং নিট্ঠাপেসি. একদিৰসমেৰ সব্বনগরেহি পণ্ণানি আগমিংসু অমচ্চা রঞ্ঞো আরোচেসুং. নিট্ঠিতানি দেৰ চতুরাসীতি ৰিহারসহস্সানীতি অথ রাজা ভিক্খুসঙ্ঘং উপসঙ্কমিত্ৰা ভন্তে মযা চতুরাসীতি ৰিহারসহস্সানি কারিতানি ধাতুযোকুতো লভিস্সামীতি পুচ পুচ্ছি.

মহারাজ ধাতুনিধানং নাম অত্থীতি সুণোম. ন পন পঞ্ঞাযতি অসুকাট্ঠানেতি রাজা রাজগহে চেতিযং ভিণ্দাপেত্ৰা ধাতুং অপস্সন্তো পটিপাকতিযং কারেত্ৰা ভিক্খু-ভিক্খুনিযো-উপাসক-উপাসিকাযোতি চতস্সো পরিসা গহেত্ৰা ৰেসালিং গতো. তত্রাপি অলভিত্ৰা কপিল়ৰত্থুং, তত্রাপি অলভিত্ৰা রামগামং গতো, রামগামে নাগা চেতিযং ভিণ্দিতুং ন অদংসু. চেতিযে নিপতিত কুদ্দালো খণ্ডাখণ্ডং হোতি এৰং তত্রাপি অলভিত্ৰা অল্লকপ্পং-পাৰং-কুসিনারন্তি সব্বত্থ চেতিযাতি ভিণ্দিত্ৰা ধাতুং অলভিত্ৰা পটিপাকতিকানি ¶ কত্ৰা রাজগহং গন্ত্ৰা চতস্সো পরিসা সন্নিপাতেত্ৰা অত্থি কেনচি সুতপুব্বং অসুকট্ঠানে নাম ধাতু নিধানন্তি পুচ্ছি.

তত্থেকো ৰিসংৰস্স সতিকো থেরো অসুকট্ঠানে ধাতুনিধানন্তি ন জানামি. ময্হং পন পিতামহত্থেরো মযি সত্তৰস্সিককালে মালাচঙ্গোটকং গাহাপেত্ৰা এহি সামণের, অসুক গচ্ছন্তরে পাসানথূপো অত্থি, তত্থ গচ্ছামাতি গন্ত্ৰা পূজেত্ৰা ইমং ঠানং উপধারেতুং ৰট্টতি সামণেরোতি আহ. অহং এত্তকমেৰ জানামি মহারাজাতি আহ.

রাজা এতদেৰ ঠানন্তি ৰত্ৰা গচ্ছে হরাপেত্ৰা পাসাণথূপং পংসুঞ্চ অপনেত্ৰা হেট্ঠা সুধাভূমিং অদ্দস. ততো সুধঞ্চ ইট্ঠকাযো চ হরাপেত্ৰা অনুপুব্বেন পরিৰেণা ওরুয্হ সত্ত রতনৰালিকং অসীতি হত্থানি চ কট্ঠরূপানি সম্পরিৰত্তন্তানি অদ্দস. সো যক্খ দাসকে পক্কোসাপেত্ৰা বলিকম্মং কারেত্ৰাপি নেৰ অন্তং ন কোটিং পন্নন্তো দেৰতা নমস্সমানো অহং ইমা ধাতুযো গহেত্ৰা চতুরাসীতিযা ৰিহারসহস্সেসু নিদহিত্ৰা সক্কারং করোমি মা দেৰতা অন্তরাযং করেন্তূতি আহ.

সক্কো দেৰরাজা চারিকং চরন্তো তং দিস্ৰা ৰিস্সকম্মং আমন্তেত্ৰা আহ. তাত, অসোকো ধম্মরাজা ধাতুযো নীহরিস্সামীতি পরিৰেণং ওতিণ্ণো, গন্ত্ৰা কট্ঠরূপানি হারেহীতি সো পঞ্চচূল়গাম দারকৰেসেনাগন্ত্ৰা রঞ্ঞো পুরতো ধনুকহত্থো ঠত্ৰা হারেমি মহারাজাতি আহ. হর তাতাতি. সরং গহেত্ৰা সন্ধিম্হিযেৰ ৰিজ্ঝি, সব্বং ৰিপ্পকিরীযিত্থ.

অথ রাজা আচিঞ্জনে বদ্ধ কুঞ্চিক মুদ্দিকং গণ্হি, মণিক্খণ্ধং পস্সি, অনাগতে দল়িদ্দরাজানো ইমং মণিং গহেত্ৰা ধাতূনং সক্কারং করোন্তূতি পন অক্খরানি দিস্ৰা কুজ্ঝিত্ৰা মাদিসং নাম রাজানং দল়িদ্দরাজাতি চত্তু যুত্তন্তি পুনপ্পুন ঘটেত্ৰা দ্ৰারং ৰিচরিত্ৰা অন্তোগেহং পৰিট্ঠো. অট্ঠারস ৰস্সাধিকানং দ্ৰিন্নং ৰস্সসতানং উপরি আরোপিতদীপা তথেৰ পজ্জলন্তি নিলুপ্পল পুপ্ফানি তং খণং আহরিত্ৰা আরোপিতানি ৰিয, পুপ্ফসণ্থরো তং খণং সন্থতো ৰিয, গণ্ধা তং মুহুত্তং পিংসিত্ৰা ঠপিতা ৰিয.

রাজা সুৰণ্ণপট্টং গহেত্ৰা অনাগতে পিযদাসোনাম কুমারো ছত্তং উস্সাপেত্ৰা অসোকো নাম ধম্মরাজা ভৰিস্সতি সো ইমা ধাতুযো গহেত্ৰা ৰিত্থারিকা করিস্সতীতি ৰাচেত্ৰা দিট্ঠো’হং অয্যোন মহাকস্সপত্থেরেনাতি ৰত্ৰা ৰামহত্থং আভুজিত্ৰা দক্খিণহত্থেন অপ্পোঠেসি.

সো তস্মিং ঠানে পরিচরণক ধাতুমত্তকমেৰ ঠপেত্ৰা সেসধাতুযো সব্বা গহেত্ৰা ধাতুঘরং পুব্বে পিহিতনযেনেৰ পিদহিত্ৰা ¶ সব্বং যথা পকতিযাৰ কারেত্ৰা উপরি পাসাণচেতিযং পতিট্ঠাপেত্ৰা চতুরাসীতিযা ৰিহারসহস্সেসুধাতুযো পতিট্ঠাপেসি এৰং জম্বুদীপতলে অসোকো ধম্মরাজা চতুরাসিতি চেতিয সহস্সানি কারাপেসি.

সব্বে থূপা সব্বলোকেকদীপা সব্বেসং যে সগ্গমোক্খাৰহা চ, হিত্ৰা সব্বং কিচ্চমঞ্ঞং জনেন ৰণ্দয্যা তে সব্বথা সব্বকালন্তি.

১২. এৰং অসোকো ধম্মরাজা চতুরাসীতি ৰিহারসহস্সমহং কত্ৰা মহাথেরো ৰন্দিত্ৰা পুচ্ছি দাযাদোম্হি ভন্তে বুদ্ধসাসনে’তি. কিস্স দাযাদো ত্ৰং মহারাজ, বাহিরকো ত্ৰং সাসনস্সাতি. ভন্তে ছন্নৰুতিকোটিধনং ৰিস্সজ্জেত্ৰা চতুরাসীতি ৰিহারসহস্সানি সচেতিযানি কারাপেত্ৰা অহং ন দাযাদো, অঞ্ঞে কো দাযাদোতি, পচ্চয দাযকো নাম ত্ৰং মহারাজ, যো পন অত্তনো পুত্তঞ্চ ধীতরঞ্চ পব্বাজেতি, অযং সাসনে দাযাদো নামাতি.

এৰং ৰুত্তে অসোকো রাজা সাসনে দাযাদভাৰং পত্থযমানো অৰিদূরে ঠিতং মহিণ্দকুমারং দিস্ৰা সক্খিস্সসিত্ৰং তাত পব্বজিতুন্তি আহ. কুমারো পকতিযা পব্বজিতুকামো রঞ্ঞো ৰচনং সুত্ৰা অতিৰিয পামোজ্জজাতো পব্ব্জামি দেৰ, মং পব্বাজেত্ৰা সাসনে দাযাদো হোথাতি আহ তেন চ সমযেন রাজধীতা সঙ্ঘমিত্তাপি তস্মিং ঠানে ঠিতা হোতি তং দিস্ৰা আহ-’ত্ৰম্পি অম্ম পব্বজিতুং সক্খিস্সসী’তি, সাধু তাতাতি সম্পটিচ্ছি. রাজা পুত্ত ন মনং লভিত্ৰা পহট্ঠচিত্তো ভিক্খুসঙ্ঘং উপসঙ্কমিত্ৰা ভন্তে ইমে দারকে পব্বাজেত্ৰা মং সাসনে দাযাদং করোথাতি সঙ্ঘো রঞ্ঞো ৰচনং সম্পটিচ্ছিত্ৰা কুমারং মোগ্গলিপুত্ত তিস্সত্থেরেন উপজ্ঝাযেন মহাদেৰত্থেরেন চ আচরিযেন পব্বজ্জাপেসি. মজ্ঝন্তিকত্থেরেন আচরিযেন উপসম্পাদেসি উপসম্পদামালকেযেৰ সহপটিসম্ভিদাহি অরহত্তং পাপুণি.

সঙ্ঘমিত্তাযপি রাজধীতায আচরিযা আযুপালত্থেরি নাম, উপজ্ঝাযা পন ধম্মপালত্থেরী নাম অহোসি. অথ মহিণ্দত্থেরো উপসম্পন্ন কালতোপ্পভূতি অত্তনো উপজ্ঝাযস্সেৰ সন্তিকে ধম্মঞ্চ ৰিনযঞ্চ পরিযাপুণন্তো দ্ৰেপি সঙ্গিতিযো আরুল়্হং তিপিটক সঙ্গহীতং সাট্ঠকথং থেরৰাদং তিণ্ণং ৰস্সানং অব্ভন্তরে উগ্গহেত্ৰা অত্তনো উপজ্ঝাযস্স অন্তেৰাসিকানং সহস্সমত্তানং ভিক্খূনং পামোক্খং অহোসি.

তেন ¶ খো পন সমযেন মোগ্গলিপুত্ততিস্সত্থেরো কত্থ নু খো অনাগতে সাসনং সুপ্পতিট্ঠিতং গৰেয্যাতি উপপরিক্খন্তো পচ্চন্তিমেসু জনপদেসু সুপ্পতিট্ঠিতং ভৰিস্সতীতি ঞত্ৰা তেসং তেসং ভিক্খূনং ভারং কত্ৰা তে তে ভিক্খু তত্থ তত্থ পেসেসি.

মজ্ঝন্তিকত্থেরং কস্মীর গণ্ধার রট্ঠংপেসেসি ত্ৰং এতং রট্ঠং গন্ত্ৰা তত্থ সাসনং পতিট্ঠাপেহীতি মহাদেৰত্থেরং তথেৰ ৰত্ৰা মহিংসকমণ্ডলং পেসেসি. রক্খিতত্থেরংৰনৰাসীং, যোনকধম্মরক্খিতত্থেরং অপরন্তকং, মহাধম্মরক্খিতত্থেরং মহারট্ঠং মহারক্খিতত্থেরং যোনক লোকং. মজ্ঝিমত্থেরং হিমৰন্তদেস ভাগং, সোণত্থেরং-উত্তরত্থেরঞ্চ সুৰণ্ণভূমিং. অত্তনো সদ্ধিৰিহারিকং মহিণ্দত্থেরং ইট্টিযত্থেরেন উত্তিযত্থেরেন ভদ্দসালত্থেরেন সম্বলত্থেরেন চ সদ্ধিং তম্বপণ্ণিদীপং গন্ত্ৰা এত্থ সাসনং পতিট্ঠাপেথাতি. সব্বেপি তং তং দিসাভাগং গচ্ছন্তা অত্তপঞ্চমা অগমিংসু সব্বেপি থেরা গতগতট্ঠানে মনুস্সে পসাদেত্ৰা সাসনং পতিট্ঠাপেসুং.

মহিণ্দত্থেরো পন তম্বপণ্ণিদীপং গন্ত্ৰা সাসনং পতিট্ঠাপেহীতি উপজ্ঝাযেন ভিক্খুসঙ্ঘেন চ অজ্ঝিট্ঠো কালো নু খো মে তম্বপণ্ণিদীপং গন্তুং নোতি উপধারেন্তো মুটসীৰরঞ্ঞো মহল্লকভাৰং চিন্তেসি. অযং মহারাজা মহল্লকো, ন সক্কা ইমং গণ্হিত্ৰা সাসনং পগ্গহেতুং, ইদানি পনস্স পুত্তো দেৰানম্পিযতিস্সো রজ্জং কারেস্সতি. তং গণ্হিত্ৰা সক্কা ভৰিস্সতি সাসনং পগ্গহেতুং, হণ্দ যাৰ সো সমযো আগচ্ছতি তাৰ ঞাতকে ওলোকেম, পুন’দানি ইমং জনপদং আগচ্ছেয্যাম ৰা ন ৰাতি.

সো এৰং চিন্তেত্ৰা উপজ্ঝাযঞ্চ ভিক্খুসঙ্ঘঞ্চ ৰন্দিত্ৰা অসোকারামতো নিক্খম্ম তেহি ইট্টিযাদীহি চতূহি থেরেহি সঙ্ঘমিত্তায পুত্তেন সুমনসামণেরেন ভণ্ডুকেনক চ উপাসকেন সদ্ধিং রাজগহনগর উপৰত্তকে দক্খিণ গিরিজনপদে চারিকং চরমানো ঞাতকে ওলোকেন্তো ছ মাসে অতিক্কামেসি অথানুপুব্বেন মাতুনিৰেসনট্ঠানং ৰেটিস নগরং নাম সম্পত্তো সম্পত্তঞ্চ পন থেরং দিস্ৰা থেরমাতা দেৰী পাদে সিরসা ৰন্দিত্ৰা ভিক্খং দত্ৰা থেরং অত্তনা কতং ৰেটিসগিরি ৰিহারং নাম আরোপেসি.

থেরো তস্মিং ৰিহারে নিসন্নো চিন্তেসি অম্হাকং ইধ কত্তব্ব কিচ্চং নিট্ঠিতং. সমযো নু খো ইদানি লঙ্কাদিপং গন্তুন্তি. ততো চিন্তেসি-অনুভৰতু তাৰ মে পিতরা পেসিতং অভিসেকং ¶ দেৰানম্পিযতিস্সো রতনত্তযগুণঞ্চ সুণাতু, ছণত্থঞ্চ নগরতো নিক্খমিত্ৰা মিস্সকপব্বতং অভিরূহতু তদা তং তত্থ দক্খিস্সামাতি. অথাপরং একমাসং তত্থেৰ ৰাসং কপ্পেসি.

মাসাতিক্কমে সক্কো দেৰানমিন্দো মহিণ্দত্থেরং উপসঙ্কমিত্ৰা এতদৰোচ.’ কালকতো ভন্তে মুটসীৰরাজা, ইদানি দেৰানম্পিযতিস্স রাজা রজ্জং কারেতি. সম্মাসম্বুদ্ধেন চ তুম্হে ৰ্যাকতা অনাগতে মহিণ্দো নাম ভিক্খু তম্বপণ্ণিদীপং পসাদেস্সতী’তি. তস্মা তিহ ৰো ভন্তে কালো দীপৰরং গমনায, অহম্পি ৰো সহাযো ভৰিস্সামী.

থেরো তস্স ৰচনং সম্পটিচ্ছিত্ৰাঅত্তসত্তমো ৰেটিস পব্বতৰিহারা ৰেহাসং উপ্পতিত্ৰ অনুরাধপুরস্স পুরত্থিমায দিসায মিস্সকপব্বতে পতিট্ঠহি যং এতরহি চেতিযপব্বতোতিপি সঞ্জানন্তি তস্সমিং দিৰসে তম্বপণ্ণিদিপে জেট্ঠমূল নক্খত্তং নাম হোতি রাজা নক্খত্তং ঘোসাপেত্ৰা ছণং করোথাতি অমচ্চে আণাপেত্ৰা চত্তালীস পুরিস সহস্সপরিৰারো নগরম্ভা নিক্খমিত্ৰা যেন মিস্সকপব্বতো তেন পাযাসি মিগৰং কীল়িতুকামো অথ তস্মিং পব্বতে অধিৰত্থা দেৰতা রঞ্ঞো থেরে দস্সেস্সামীতি রোহিত মিগরূপং গহেত্ৰা অৰিদূরে তিণপণ্ণানি খাদমানা ৰিয চরতি.

রাজা দিস্ৰা অযুত্তং দানি পমত্তং ৰিজ্ঝিতুন্তি জীযং পোঠেসি. মগো অম্বত্থলমগ্গং গহেত্ৰা পলাযিতুং আরভি রাজাপি পিট্ঠিতো পিট্ঠিতো অনুবণ্ধন্তো অম্বত্থলমেৰ আরুহি. মিগো থেরানং অৰিদূরে অন্তরধাযি.

মহিণ্দত্থেরো রাজানং অৰিদূরে আগচ্ছন্তং’মমংযেৰ রাজা পস্সতু, মা ইতরে’তি অধিট্ঠহিত্ৰা’তিস্স! তিস্স! ইতো এহী’তি আহ. রাজা সুত্ৰা চিন্তেসি-ইমস্মিং তম্বপণ্ণিদীপে জাতো মং তিস্সোতি নামং গহেত্ৰা আলপিতুং সমত্থো নাম নত্থি. অযম্পন ছিন্নভিন্নপটধরো ভণ্ডুকাসাৰ ৰসনো মং নামেন আলপতি, কো নু খো অযং ভৰিস্সতি মনুস্সো ৰা অমনুস্সো ৰাতি. থেরো আহ.

সমণা মযং মহারাজ - ধম্মরাজস্স সাৰকা,

তৰেৰ অনুকম্পায - জম্বুদীপা ইধাগতাতি;

তেন সমযেন দেৰানম্পিযতিস্স রাজা চ অসোকধম্মরাজা চ অদিট্ঠ সহাযকা হোন্তি. দেৰানম্পিযতিস্স রঞ্ঞে চ পুঞ্ঞানুভাৰেন ছাতপব্বতপাদে একস্মিং ৰেল়ুগুম্বে তিস্সো ৰেল়ুযট্ঠিযো নিব্বত্তিংসু একা লতাযট্ঠি নাম, একা পুপ্ফযট্ঠি নাম একা সকুণযট্ঠি নাম. তাসু লতাযট্ঠি সযং রজতৰণ্ণা হোতি তং অলঙ্করিত্ৰা উপ্পন্নলতা কঞ্চন ৰণ্ণা খাযতি পুপ্ফযট্ঠিযং পন ¶ নীল-পীত-লোহিত-ওদাত-কাল়ৰণ্ণানি পুপ্ফানি সুচিভত্তৰণ্ট পত্ত কিঞ্জক্খা হুত্ৰা খাযন্তি সকুণযট্ঠিযং হংসকুক্কুট-জীৰংজীৰকাদযো সকুণা নানাপ্পকারানি চ চতুপ্পদানি সজীৰানি ৰিয খাযন্তি সমুদ্দতোপিস্স মুত্তা-মণি-ৰেল়ুরিযাদি অনেকৰিহিতং রতনং উপ্পজ্জি.

তম্বপণ্ণিযং পন অট্ঠমুত্তং উপ্পজ্জিংসু-ভযমুত্তা গজমুত্তা রথমুত্তা আমলকমুত্তা চলযমুত্তা অঙ্গুলীৰেঠকমুত্তা ককুধফলমুত্তা পাকতিকমুত্তাতি সো তা চ যট্ঠিযো তা চ মুত্তাযো অঞ্ঞ্চ বহুং রতনং অসোকস্স ধম্মরঞ্ঞো পণ্ণাকারত্থায পেসেসি. অসোকোপি পসীদিত্ৰা পঞ্চ রাজককুধভণ্ডানিচেৰ অঞ্ঞে চ অভিসেকত্থায বহূপণ্ণাকারে পহিণি. ন কেৰলঞ্চ এতং আমিস পণ্ণাকারং, ইমং কির ধম্ম পণ্ণাকারম্পি পেসেসি.

‘‘অহং বুদ্ধঞ্চ ধম্মঞ্চ-সঙ্ঘঞ্চ সরণং গতো,

উপাসকত্তং ৰেদেসিং-সক্যপুত্তস্স সাসনে,

ইমেসু তীসু ৰত্থূসু-উন্নমেসু নরুত্তম,

চিত্তং পসাদযিত্ৰান-সদ্ধায সরণং ৰজা’তি;’’

রাজা অৰিরসুতং সাসনপৰত্তিং অনুস্সরমানো থেরস্স তং ‘‘সমণামযং মহারাজ ধম্মরাজস্স সাৰকা‘‘তি ৰচনং সুত্ৰা অয্যা নু খো আগতাতি তাৰদেৰ আৰুধং নিক্খিপিত্ৰা একমন্তং নিসীদি সম্মোদনীযং কথং কথযমানো, সম্মোদনীযকথং কুরুমানেযেৰ তস্মিং তানিপি চত্তালীস পুরিসসহস্সানি আগন্ত্ৰা তং পরিৰারেসুং. তদা থেরো ইতরেপি জনে দস্সেসি.

রাজা দিস্ৰা ইমে কদা আগতাতি পুচ্ছি মযা সদ্ধিংযেৰ মহা রাজাতি. ইদানি পন জম্বুদীপে অঞ্ঞ্ঞোপি এৰরূপা সমণা সন্তীতি. মহারাজ এতরহি জম্বুদীপো কাসাৰ পজ্জোতো ইসিৰাতপরিৰাতো, তস্মিং-

‘‘তে ৰিজ্জা ইদ্ধিপত্তা চ চেতোপরিযায কোচিদা,

খীণাসাৰ অরহন্তো-বহূ বুদ্ধস্স সাৰকাতি’’;

অথ রাজা ভন্তে স্ৰে রথং পেসেস্সামি. তং অভিরূহিত্ৰা আগচ্ছেয্যাথাতি ৰত্ৰা পক্কাকমি থেরো অচিরপক্কন্তস্স রঞ্ঞো সুমণসামণেরং আমন্তেসি এহি ত্ৰং সুমন ধম্মসৰনকালং ঘোসেহীতি সামণেরো অভিঞ্ঞাপাদকং চতুত্থজ্ঝানং সমাপজ্জিত্ৰা ৰুট্ঠায অধিট্ঠহিত্ৰা সমাহিতেন চিত্তেন সকলতম্বপণ্ণিদীপং সাচেন্তো ধম্মসৰনকালং ঘোসেসি.

সামণেরস্স সদ্দং সুত্ৰা ভুম্মা দেৰতা সদ্দমনুস্সাৰেসু, এতেনুপাযেন যাৰ ব্রহ্মলোকা সদ্দো অব্ভুগ্গঞ্ছি. তেন সদ্দেন ¶ মহাদেৰতা সন্নিপাতো অহোসি থেরো মহন্তং দেৰতা সন্তিপাতং দিস্ৰা সমচিত্তসুত্তন্তং কথেসি. কথা পরিযোসানে অসঙ্খেয্যানং দেৰানং ধম্মাভিসমযো অহোসি. বহূ নাগ সুপণ্ণা চ সরণেসু পতিট্ঠহিংসু. অথ তস্সা রত্তিযা অচ্চযেন রাজা থেরানং রথং পেসেসি. থেরা ন মযং রথং আরুহাম. গচ্ছ ত্ৰং, পচ্ছা মযং আগচ্ছিস্সামাতি ৰত্ৰা ৰেহাসং অব্ভুগ্গন্ত্ৰা অনুরাধপুরস্স পচ্ছিমদিসায পঠমক চেতিযট্ঠানে ওতরিংসু.

রাজাপি সারথিং পেসেত্ৰা অন্তো নিৰেসনে মণ্ডপং পটিযাদেত্ৰা চিন্তেসি’ নিসীদিস্সন্তি নু খো অয্যা আসনে ন নিসীদিস্সন্তী‘‘তি. তস্সেৰং চিন্তযন্তস্সেৰ সারথি নগরদ্ৰারং পত্ৰা অদ্দস থেরে পঠমতরং আগন্ত্ৰা কাযবণ্ধনং বণ্ধিত্ৰা চীৰরং পারুপন্তে, দিস্ৰা অতিৰিয পসন্নমানসো হুত্ৰা আগন্ত্ৰা রঞ্ঞো আরোচেসি আগতা দেৰ থেরাতি.

রাজা রথং আরুল়্হাতি পুচ্ছি ন আরূল়্হা দেৰ, অপি চ পচ্ছতো নিক্খমিত্ৰা পঠমতরং আগন্ত্ৰা পাচীনদ্ৰারে ঠিতাতি. রাজা রথং ন আরুভিংসূতী সুত্ৰা তেন হি ভণে ভুম্মত্থরণ সঙ্খেপেন আসনানি পঞ্ঞাপেথাতি ৰত্ৰা পটিপথা আগমাসি অমচ্চা পথৰিযং তট্টিকং পঞ্ঞাপেত্ৰা উপরি কোজৰকাদীনি ৰিচিত্তত্থরণানি পঞ্ঞাপেসুং রাজাপি গন্ত্ৰা থেরে ৰন্দিত্ৰা মহিণ্দত্থেরস্স হত্থতো পত্তং গহেত্ৰা মহতিযা পূজায চ সক্কারেন চ থেরে পণীতেন খাদনীযেন ভোজনীযেন সহত্থা সন্তপ্পেত্ৰা অনুলাদেৰী পমুখা পঞ্চ ইত্থিসতানি থেরানং অভিৰাদনং পূজাসক্কারঞ্চ কারোনতূতি পক্কোসাপেত্ৰা একমন্তং নিসীদি. থেরো রঞ্ঞো সপরিজনস্স ধম্মরতনৰস্সং ৰস্সেন্তো পেতৰত্থুং-ৰিমানৰত্থুং-সচ্চসংযুত্তঞ্চ কথেসি. তং সুত্ৰা তানিপি পঞ্চ ইত্থিসতানি সোতাপত্তিফলং সচ্ছিকরিংসু.

তদা নাগরা থেরানং গুণে সুত্ৰা থেরে দট্ঠুং ন লভামাতি উপক্কোসন্তি অথ রাজা ইধ ওকাসো নত্থীতি চিন্তেত্ৰা,’গচ্ছথ ভণে হত্থিসালং পটিজগ্গিত্ৰা ৰালুকং ওকিরিত্ৰা পঞ্চৰণ্ণানি পুপ্ফানি ৰিকিরিত্ৰা ৰিতানং বণ্ধিত্ৰা মঙ্গল হত্থিট্ঠানে থেরানং আসনানি পঞ্ঞাপেথা’তি আহ, অমচ্চা তথা অকংসু.

থেরো তত্থ গন্ত্ৰা নিসীদিত্ৰা দেৰদূতসুত্তন্তং কথেসি কথা পরিযোসানে পাণসহস্সং সোতাপত্তিফলে পতিট্ঠহি তথা হত্থিসালা সম্বাধাতি দক্খিণদ্ৰারে নণ্দনুয্যানে আসনং পঞ্ঞাপেসুং. থেরো তত্থ নিসীদিত্ৰা আসিৰিসোপম সুত্তন্তং কথেসি. তম্পি সুত্ৰা পাণসহস্সং সোতাপত্তিফলং পটিলভি এৰং আগতদিৰসতো ¶ দুতিযদিৰসে অড্ঢতেয্যানং পাণসহস্সানং ধম্মাভিসমযো অহোসি.

থেরস্স নণ্দনৰনে আগতাগতাহি কুলিত্থীহি কুলসুণ্হাহি কুলকুমারীহি সদ্ধি সমোদমানস্সেৰ সাযণ্হসমযো জাতো, থেরো কালং সল্লক্খেত্ৰা গচ্ছামি’দানি মিস্সক পব্বতন্তি উট্ঠহি. অমচ্চা মহামেঘৰনুয্যানে থেরে ৰাসেসুং রাজাপি খো তস্সা রত্তিযা অচ্চযেন থেরস্স সমীপং গন্ত্ৰা সুখসযিতভাৰং পুচ্ছিত্ৰা কপ্পতি ভন্তে ভিক্খুসঙ্ঘস্স আরামোতি পুচ্ছি. থেরো কপ্পতি মহারাজাতি আহ.

রাজা তুট্ঠো সুৰণ্ণ ভিংকারং গহেত্ৰা থেরস্স হত্থে উদকং পাতেত্ৰা মহামেঘৰনুয্যানং অদাসি থেরো পুনদিৰসেপি রাজগেহেযেৰ ভুঞ্জিত্ৰা নণ্দনৰনে অনমতগ্গিযানি কথেসি. পুন দিৰসে অগ্গিক্খণ্ধোপম সুত্তন্তং কথেসি. এতেনেৰ উপাযেন সত্ত দিৰসানি কথেসি অড্ঢ নচমানং পাণসহস্সানং ধম্মাভিসমযো অহোসি. সত্তমে দিৰসে পন থেরো অন্তোপুরে রঞ্ঞো অপ্পমাদ সুত্তন্তং কথযিত্ৰা চেতিযগিরিমেৰ অগমাসি.

অথ খো রাজা থেরো আযাচিতো সযমেৰাগতো, তস্মা তস্স অনাপুচ্ছা গমনম্পি ভৰেয্যাতি চিন্তেত্ৰা রথং অভিরূহিত্ৰা, চেতিযগিরিং অগমাসি মহতা রাজানুভাৰেন গন্ত্ৰা থেরানং সন্তিকং উপসঙ্কমন্তো অতিৰিয কিলন্তরূপো হুত্ৰা উপসঙ্কমি. ততো নং থেরো আহ কস্মা ত্ৰং মহারাজ এৰং কিলম মানো আগতোতি. তুম্হে মম গাল়্হং ওৰাদং দত্ৰা ইদানি গন্তুকামা নুখোতি জাননত্থং ভন্তেতি. ন মযং মহারাজ গন্তুকামা, অপি চ ৰস্সুপনাযিক কালোনমাযং সমণেন নাম ৰস্সুপনাযিকং ঠানং ঞাতুং ৰট্টতীতি. রাজাপি খো তংখণংযেৰ করণ্ডক চেতিযঙ্গণং পরিক্খিপিত্ৰা অট্ঠসট্ঠিযা লেণেসু কম্মং পট্ঠপেত্ৰা নগরমেৰ অগমাসি.

তেপি থেরো মহাজনং ওৰদমানা চেতিযগিরিম্হি ৰস্সং ৰসিংসু. অথাযস্মা মহামহিণ্দো ৰুত্থৰস্সো পৰারেত্ৰা কত্তিকপুণ্ণমাযং উপোসথদিৰসে রাজানং এতদৰোচ চিরদিট্ঠো নো মহারাজ সম্মাসম্বুদ্ধো অভিৰাদন পচ্চুপট্ঠান অঞ্জলি কম্ম সামীচি কম্ম করণট্ঠানং নত্থি, তেনম্হং উক্কণ্ঠিতাতি তনু ভন্তে তুম্হে অৰোচুত্থ পরিনিব্বুতো সম্মাসম্বুদ্ধোতি কিঞ্চাপি মহারাজ পরিনিব্বুতো, অথস্স সরীরধাতুযো তিট্ঠন্তীতি. অঞ্ঞা তম্ভন্তে থূপং পতিট্ঠাপেমি ভূমিভাগং ৰিচিনথাতি. অপি চ ধাতুযো কুতো লচ্ছামীতি সুমনেন সদ্ধিং মন্তেহি মহারাজাতি রাজা সুমনং উপসঙ্কমিত্ৰা পুচ্ছি’কুতোদানি ভন্তেধাতুযো লচ্ছামা’তি সুমনো ¶ আহ-অপ্পোস্সুক্কো ত্ৰং মহারাজ, ৰীথিযো সোধাপেত্ৰা ধজ পতাক পুণ্ণঘটাদীহি অলঙ্কারাপেত্ৰা সপরিজ্জনো উপোসথং সমাদিযিত্ৰা সব্বতালাৰচরে উপট্ঠপেত্ৰা মঙ্গলহত্থিং সব্বালঙ্কারেহি পতিমণ্ডিতং কারেত্ৰা উপরি ৰস্স সেতচ্ছত্তং উস্সাপেত্ৰা সাযণ্হসমযে মহানাগৰনুয্যানাভিমুখো যা হি অদ্ধা তস্মিং ঠানে ধাতুযো লচ্ছসিতি, রাজা সাধূতি সম্পটিচ্ছি. থেরো চেতিযগিরিমেৰ অগমিংসু.

তত্রাযস্মা মহিণ্দত্থেরো সুমন সামণেরমাহ- গচ্ছ ত্ৰং সামণের জম্বুদীপে অয্যকং অসোকধম্মরাজানং উপসঙ্কমিত্ৰা মম ৰচনেন এৰং ৰদেহি’সহাযো তে মহারাজ দেৰানম্পিয তিস্সো বুদ্ধসাসনে পসন্নো থূপং পতিট্ঠাপেতুকামো তুম্হাকং কির হত্থে ভগৰতো পরিভুত্তপত্তো চেৰধাতু চ অত্থি, তম্মে দেথা’তি তং গহেত্ৰা সক্কং দেৰরাজানং উপসঙ্কমিত্ৰা তুম্হাকং কির মহারাজ হত্থে দ্ৰে ধাতুযো অত্থি দক্খিণদাঠা চ দক্খিণক্খকঞ্চ, ততোতুম্হে দক্খিণদাঠংপূজেথ, দক্খিণক্খকং পন ময্হং দেথাতি, এৰঞ্চ নং ৰদেহি কস্মা ত্ৰং মহারাজ অম্হে তম্বপণ্ণিদীপং পহিণিত্ৰা পমজ্জিত্থাতি.

সাধু ভন্তেতি খো সুমনো থেরস্স ৰচনং সম্পটিচ্ছিত্ৰা তাৰদেৰ পত্তচীৰরমাদায ৰেহাসমব্ভুগ্গন্ত্ৰা পাটলিপুত্তদ্ৰারে ওরুয্হ রঞ্ঞো সন্তিকং গন্ত্ৰা তমত্থং আরোচেসি রাজা তুট্ঠো সামণেরস্স হত্থতো পত্তং গহেত্ৰা ভোজেত্ৰা ভগৰতো পত্তং গণ্ধেহি উব্বট্টেত্ৰা ৰরমুত্তসদিসানং ধাতূনং পূরেত্ৰা অদাসি.

সো তুং গহেত্ৰা সক্কং দেৰরাজানং উপসঙ্কমি সক্কো দেৰারাজা সামণেরং দিস্ৰা কিং ভন্তে সুমন আহিণ্ডসীতি আহ. ত্ৰং মহারাজ অম্হে তম্বপণ্ণিদীপং পহিণিত্ৰা কস্মা পমজ্জসীতি, তপ্পমজ্জামি ভন্তে, ৰদেহি কিং করোমীতি. তুম্হাকং কির হত্থে দ্ৰে ধাতুযো অত্থি দক্খিণদাঠা চ দক্খিণক্খকঞ্চ, ততো তুম্হে দক্খিণদাঠং পূজেথ দক্খিণক্খকং পন ময্হং দেথাতি. সাধু ভন্তেতি খো সক্কো দেৰানমিণ্দো যোজনপ্পমানং মণিথূপং উগ্ঘাটেত্ৰা দক্খিণক্খকং নীহরিত্ৰা সুমনস্স অদাসি.

সো তং গহেত্ৰা চেতিযগিরিম্হিযেৰ পতিট্ঠাসি অথ খো মহিণ্দপমুখা সব্বে তে মহানাগা অসোকধম্মরাজেন দিন্ন ধাতুযো চেতিযগিরিযম্হিযেৰ পতিট্ঠাপেত্ৰা দক্খিণক্খকং আদায ৰড্ঢমানকচ্ছাযায মহানাগ ৰনুয্যানমগমংসু. রাজাপি খো সুমনেন ৰুত্তপ্পকারং পূজাসক্কারং কত্ৰা হত্থিক্খণ্ধৰরগতো সাযং মঙ্গলহত্থিমত্থকে সেতচ্ছত্তং ধারযমানো মহানাগ ৰনুয্যানং সম্পাপুণি.

অথস্স ¶ এতদহোসি- সচে অযং সম্মাসম্বুদ্ধস্স ধাতু, ছত্তং অপনমতু, মঙ্গলহত্থি জণ্ণুকেহি ভূমিযং পতিট্ঠাহতু, ধাতু চঙ্গোটকং ময্হং মত্থকে পতিট্ঠহতূতি সহ রঞ্ঞো চিত্তুপ্পাদেন ছত্তং অপনমি হত্থিজণ্ণুকেহি পতিট্ঠহি ধাতুচঙ্গোটকং রঞ্ঞো মত্থকে পতিট্ঠহি রাজা অমতেনেৰাভিসিত্তগত্তো পরমেন পীতিপামোজ্জেন সমন্নাগতো হুত্ৰা পুচ্ছি ধাতুং ভন্তে কিং করোমীতি. হত্থিকুম্ভিযেৰ তাৰ মহারাজ ঠপেহীতি. রাজা ধাতুৰঙ্গোটকং হত্থিকুম্ভে ঠপেসি. পমুদিতো নাগো কুঞ্চনাদং নদি মহামেঘো উট্ঠহিত্ৰা পোক্খরৰস্সং ৰসিসি উকদপরিযন্তং কত্ৰা মহাভূমিচালো অহোসি পচ্চন্তেপি নাম সম্মাসম্বুদ্ধস্স ধাতুযো পতিট্ঠহিস্সন্তীতি.

অথ সো হত্থিনাগো অনেক তালাৰচরপরিৰুতো অতিৰিয উল়ারেন পূজাসক্কারেন সক্করিযমানো পচ্ছিমদিসাভিমুখো হুত্ৰা অপসক্কন্তো যাৰ নগরস্স পুরত্থিম দ্ৰারং তাৰ গন্ত্ৰা পুরত্থিমেন দ্ৰারেন নগরং পৰিসিত্ৰা সকলনগরে উল়ারায পূজায কযিরামানায দক্খিণদ্ৰারেন নিক্খমিত্ৰা থূপারামস্স পচ্ছিমদিসাভাগে পভেজৰত্থু নাম কির অত্থি তত্থ গন্ত্ৰা পুন থূপারামাভিমুখো এৰ পটিনিৰত্তি. সো চ পুরিমকানং তিণ্ণং সম্মাসম্বুদ্ধানং ধম্মকরকং কাযবণ্ধনং উদকসাটীকং পতিট্ঠাপেত্ৰা কতচেতিযট্ঠানং হোতী. তদেতং ৰিনট্ঠেসুপি চেতিযেসু দেৰতানুভাৰেন কণ্টক সমাকিণ্ণসাখাহি নানাগচ্ছেহি পরিৰুতং তিট্ঠতি. মা নং কোচি উচ্চিট্ঠা সুৰিমল কচৰরেহি সন্দুসেসীতি.

অথ তস্স হত্থিনো পুরতো গন্ত্ৰা রাজপুরিসা সব্ব গচ্ছে ছিণ্দিত্ৰা ভূমিং সোধেত্ৰা তং হত্থতলসদিসং অকংসু. হত্থিনাগো গন্ত্ৰা তং ঠানং পুরতো কত্ৰা তস্স পচ্ছিমদিসাভাগে বোধিরুক্খট্ঠনে অট্ঠাসি. অথস্স মত্থকতো ধাতুং ওরোপেতুং আরভিংসু নাগো ওরোপেতুং ন দেতি. থেরং পুচ্ছি, কস্মা ভন্তে নাগো ধাতুং ওরোপেতুং ন দেতীতি

আরুল়্হং মহারাজ ওরোপেতুং ন ৰট্টতিতি. তস্মিঞ্চ কালে অভযৰাপিযা উদকং জিন্নং হোতি সমন্তা ভূমি ফলিতা সুউদ্ধরা মত্তিকপিণ্ডা. ততো মহাজনো সীঘসীঘং মত্তিকং আহরিত্ৰা হত্থকুম্ভপ্পমাণং ৰত্থুমকাসি. তাৰদেৰ থূপকরণত্থং ইট্ঠিকা কাতুং আরভিংসু. যাৰ ইট্ঠিকা পরিনিট্ঠন্তি তাৰ হত্থিনাগো কতিপাহং দিৰা বোধিরুক্খট্ঠানে হত্থিসালাযং তিট্ঠতি. রত্তিযং থূপপতিট্ঠান ভূমিযং পরিযাযতি.

অথ ৰত্থুং ৰিনাপেত্ৰা রাজা থেরং পুচ্ছি, কীদিসো ভন্তে থূপো কাতব্বোতি. ৰীহিরাসি সদিসো মহারাজাতি, সাধু ভন্তেতি রাজা জঙ্ঘপ্পমাণং ¶ থূপং চিনাপেত্ৰা ধাতুওরোপনত্থায মহাসক্কারং কারেসি.

ততো সকলনাগরা চ জানপদা চ ধাতুম্হ দস্সনত্থং সন্তিপতিংসু সন্নিপতিতে চ তস্মিং মহাজনে দসবলস্স ধাতু হত্থিকুম্ভতো সত্ততালপ্পমানং ৰেহাসমব্ভুগ্গন্ত্ৰা যমকপাটিহারিযং দস্সেসি. তেহি তেহি ধাতুপ্পদেসেহি ছব্বণ্ণরংসিযো উদকধরা চ অগ্গিক্খণ্ধা চ পৰত্তন্তি. সাৰত্থিযং গণ্ডম্বমূলে ভগৰতা দস্সিত পাটিহারিয সদিসং এৰ পাটিহারিযং অহোসি. তঞ্চ খো নেৰ থেরানুভাৰেনন দেৰতানুভাৰেন, অপি চ খো বুদ্ধানংযেৰ আনুভাৰেন ভগৰা কির ধরমানোৰ অধিট্ঠাসি - তম্বপণ্ণিদীপে অনুরাধপুরস্স দক্খিণদিসাভাগে পুরিমকানং তিণ্ণং বুদ্ধানং চেতিযট্ঠানে মম দক্খিণক্খকধাতু পতিট্ঠান দিৰসে যমকপাটিহারিযং হোতূতি.

এৰং অচিন্তিযা বুদ্ধা-বুদ্ধধম্মা অচিন্তিযা,

অচিন্তিযেসু পসন্নানং-ৰিপাকো হোতি অচিন্তিযোতি;

ধাতুসরীরতো নিক্খন্ত উদকফুসিতেহি সকলেহি তম্বপণ্ণিদীপতলে ন কোচি অফুট্ঠোকাসো নাম অহোসি. এৰমস্স তং ধাতু সরীরং উদকফুসিতেহি তম্বপণ্ণিত্থলস্স পরিদাহং ৰূপসমেত্ৰা মহাজনস্স পাটিহারিযং দস্সেত্ৰা ওতরিত্ৰা রঞ্ঞো মত্থকে পতিট্ঠাসি রাজা সফলং মনুস্সত্তপটিলাভং মঞ্ঞমানো মহন্তং সক্কারং কত্ৰা ধাতুং পতিট্ঠাপেসি. সহ ধাতুপতিট্ঠানেন মহাভূমিচালো অহোসি নিট্ঠিতে পন থূপে রাজা চ রাজা ভাতিকা চ দেৰিযো চ দে-নাগ-যক্খানং ৰিম্ভযকরং পচ্চেকং থূপমকংসু.

সাধুজন মনোপসাদনত্থায কতে থূপৰংসে থূপারাম কথা,

১৩. নিট্ঠিতায পন ধাতুপূজায পতিট্ঠিতে ধাতুৰরে মহিণ্দত্থেরো মহামেঘৰনুয্যানমেৰ গন্ত্ৰাৰাসং কপ্পেসি. তস্মিং খো পন সমযে অনুলাদেৰী পব্বজিতুকামা হুত্ৰা রঞ্ঞো আরোচেসি. রাজা তস্সা ৰচনং সুত্ৰা থেরং এতদৰোচ? ভন্তে অনুলাদেৰী পব্বজিতুকামা, পব্বাজেথ নন্ত ন মহারাজ অম্হাকং মাতুগামং পব্বাজেতুং কপ্পতি. পাটলিপুত্তে পন ময্হং ভগিনি সঙ্ঘমিত্তা থেরী নাম অত্থি, তং পক্কোসাপেহি মহারাজ, ইমস্মিঞ্চ দীপে পুরিমকানঞ্চ ¶ তিণ্ণং সম্মাসম্বুদ্ধানং বোধি পতিট্ঠংসি অম্হাকম্পি ভগৰতো সরস রংসিজাল ৰিস্সজ্জনকেন বোধিনা পতিট্ঠাতব্বং, তস্মা সাসনং পহিণেয্যসি যথা সঙ্ঘমিত্তা বোধিং গহেত্ৰা আগচ্ছেয্যাতি.

রাজা থেরস্স ৰচনং সম্পটিচ্ছিত্ৰা অমচ্চেহি সদ্ধিং মন্তেন্তো অরিট্ঠং নাম অত্তনো ভাগিনেয্যং আহ সক্খিস্সসি ত্ৰং তাত পাটলীপুত্তং গন্ত্ৰা মহাবোধিনা সদ্ধিং অয্যং সঙ্ঘমিত্তত্থেরিং আনেতুন্তি সক্খিস্সামি দেৰ সচে মে পব্বজ্জং অনুজানিস্সসীতি.

গচ্ছ তাত থেরিং আনেত্ৰা পব্বজ্জাহীতি. সো রঞ্ঞো চ থেরিস্স চ সাসনং গহেত্ৰা থেরস্স অধিট্ঠানৰসেন একদিৰসে ন জম্বুকোলপট্টনং গন্ত্ৰা নাৰং অভিরূহিত্ৰ সমুদ্দং অতিক্কমিত্ৰা পাটলীপুত্তং গন্ত্ৰা রঞ্ঞো সাসনং আচিক্খি-পুত্তো তে দেৰ মহিণ্দথেরো এৰমাহ. সহাযস্স কির তে দেৰানম্পিযতিস্সস্স ভাতুজাযা অনুলাদেৰী নাম পব্বজিতুকামা, তং পব্বাজেতুং অয্যং সঙ্ঘমিত্তত্থেরিং পহিণেয্যাথ, অয্যায এৰ চ সদ্ধিং মহাবোধিন্তি.

থেরস্স সাসনং আরোচেত্ৰা সঙ্ঘমিত্তত্থেরিং উপসঙ্কমিত্ৰা এৰমাহ. অয্যে তুম্হাকং ভাতা মহিণ্দত্থেরো মং তুম্হাকং সন্তিকং পেসেসি দেৰানম্পিযতিস্স রঞ্ঞো ভাতুজাযা অনুলাদেৰী নাম পঞ্চহি কঞ্ঞাসতেহি পঞ্চহি চ অন্তেপুরিসা সতেহি সদ্ধিং পব্বজিতুকামাতি, তং কির আগন্ত্ৰা পব্বাজেথাতি.

সা তাৰ দেৰ তুরিত তুরিতা গন্ত্ৰা রঞ্ঞা ত্ैমত্থং আরোচেত্ৰা গচ্ছামহং মহারাজ তম্বপণ্ণিদীপন্তি আহ.

তেন হি অম্ম মহাবোধিং গহেত্ৰা গচ্ছাহীতি ৰত্ৰা পাটলীপুত্ততো যাৰ মহাবোধি তাৰ মগ্গং পটিজগ্গাপেত্ৰা সত্তযোজনাযাময তিযোজন ৰিত্থতায মহতিযা সেনায পাটলিপুত্ততো নিক্খমিত্ৰা অরিযসঙ্ঘং আদায মহাবোধিসমীপং অগমাসি.

সেনায সমুস্সিত ধজপতাকং নানারতন ৰিচিত্তং অনেকালঙ্কার পতিমণ্ডিতং নানাৰিধ কুসুম সমাকিণ্ণং অনেক তুরিয সংঘ্রট্ঠং মহাবোধিং পরিক্খিপি ততো রাজা পুপ্ফ-গণ্ধ-মালাদীহি পূজেত্ৰা তিক্খত্তুং পদক্খিণং কত্ৰা অট্ঠসু ঠানেসু ৰন্দিত্ৰা উট্ঠায অঞ্জলিম্পগ্গয্হ ঠত্ৰা সচ্চৰচনকিরিযায বোধিং গণ্হিতুকামো রতনপীঠং আরুয্হ তুলিকং গহেত্ৰা মনোসিলায লেখং কত্ৰা যদি মহাবোধিনা লঙ্কাদীপে পতিট্ঠাতব্বং, যদি চাহং বুদ্ধসাসনে নিব্বেমতিকো ভৰেয্যং, মহাবোধি সযমেৰ ইমস্মিং সুৰণ্ণকটাহে পতিট্ঠহতূতি সচ্চকিরিযমকাসি সহ সচ্চকিরিযায ¶ বোধিসাখা মনোসিলায পরিচ্ছিন্নট্ঠানেহি ছিণ্দিত্ৰা গণ্ধ কলল পূরস্স সুৰণ্ণকটাহস্স উপরি অট্ঠাসি.

ততো রাজা মহাবোধিং বোধিমণ্ডতো মহন্তেন সক্কারেন পাটলীপুত্তং আনেত্ৰা সব্বপরিহারানি দত্ৰা মহাবোধিং গঙ্গায নাৰং আরোপেত্ৰা সযম্পি নগরতো নিক্খমিত্ৰা ৰিঞ্ঝাটৰিং সমতিক্কম্ম অনুপুব্বেন সত্তদিৰসেহি তামলিত্তিং অনুপ্পত্তো অন্তরমগ্গে দেৰ-নাগ-মনুস্সা উল়ারং মহাবোধি পূজমকংসু.

রাজাপি সমুদ্দতীরে সত্তদিৰসানি মহাবোধিং ঠপেত্ৰা মহন্তং সক্কারং কত্ৰা বোধিম্পি সংঙ্ঘমিত্তত্থেরিম্পি সপরিৰারং নাৰং আরোপেত্ৰা গচ্ছতি ৰতরে দসবলস্স সরস রংসিজালা মুঞ্চমানো মহাবোধি রুক্খোতি কণ্দিত্ৰা অঞ্জলিম্পগ্গহেত্ৰা অস্সূনি পৰত্তযমানো অট্ঠাসি সাপি খো মহাবোধি সমরূল়্হনাৰা পস্সতো পস্সতো মহারাজস্স মহাসমুদ্দতলং পক্খণ্দি মহাসমুদ্দেপি সমন্তা যোজনং ৰীচি ৰূপসন্তা পঞ্চৰণ্ণানি পদুমানি পুপ্ফিতানি অন্তলিক্খে দিব্বতুরিযানি ৰজ্জিংসু আকাসে জল থল সন্নিস্সিতাহি দেৰতাহি পৰত্তিতা অতিৰিয উল়ার পূজা অহোসি. এৰং মহতিযা পূজায সা নাৰা জম্বুকোলপট্টনং পাৰিসি.

দেৰানম্পিযতিস্স মহারাজাপি উত্তরদ্ৰারতো পট্ঠায যাৰ জম্বুকোলপট্টনা মগ্গং সোধাপেত্ৰা অলঙ্কারাপেত্ৰা নগরতো নিক্খমন দিৰসে উত্তরদ্ৰার সমীপে সদ্দসালাৰত্থুস্মিং ঠিতো তায ৰিভূতিযা মহাসমুদ্দে আগচ্ছন্তংযেৰ মহাবোধিং থেরস্সানুভাৰেন দিস্ৰা তুট্ঠমানসো নিক্খমিত্ৰা সব্বং মগ্গং পঞ্চৰণ্ণেহি পুপ্ফেহি ওকিরন্তো অন্তরন্তরা পুপ্ফঅগ্ঘিযানি ঠপেন্তো একাহেনেৰ জম্বুকোলপট্টনং গন্ত্ৰা সব্বতালাৰচর পরিৰুতো পুপ্ফ ধূপগণ্ধাদীহি পূজযমানো গলপ্পমংনং উদকং ওরুয্হ আগতো ৰত রেদসবলস্স সরস রংসিজালং ৰিস্সজ্জনকো বোধিরুক্খোতি পসন্নচিত্তো মহাবোধিং উক্খিপিত্ৰা উত্তমঙ্গে সিরস্মিং পতিট্ঠপেত্ৰা মহাবোধিং পরিৰারেত্ৰা আগতেহি সোল়সহি জাতিসম্পন্নকুলেহি সদ্ধিং সমুদ্দতো পচ্চুত্তরিত্ৰা সমুদ্দতীরে বোধিং ঠপেত্ৰা তীণি দিৰসানি সকল তম্বপণ্ণি রজ্জেন পূজেসি.

অথ চতুত্থে দিৰসে মহাবোধিং আদায উল়ারং পূজং কুরুমানো অনুপুব্বেন অনুরাধপুরং সম্পত্তে অনুরাধপুরেপি মহাসক্কারং কত্ৰা চাতুদ্দসী দিৰসে ৰড্ঢমানকচ্ছাযায মহাবোধিং উত্তরদ্ৰারেন পৰেসেত্ৰা নগরমজ্ঝন অতিহরিত্ৰা দক্খিণদ্ৰারেন নিক্খমিত্ৰা দক্খিণদ্ৰারতো পঞ্চধনু সতিকে ঠানে যত্থ অম্হাকং ¶ সম্মাসম্বুদ্ধো নিরোধ সমাপত্তিং সমাপজ্জিত্ৰা নিসীদি. পুরিমকা চ তযো সম্মাসম্বুদ্ধা সমাপত্তিং অপ্পেত্ৰা নিসীদিংসু. যত্থ চ ককুসণ্ধস্স ভগৰতো সিরীসবোধি, কোনাগমনস্স ভগৰতো উদুম্বরবোধি, কস্সপস্স ভগৰতো নিগ্রোধবোধি, পতিট্ঠাপেসি -তস্মিং মহামেঘৰনুয্যানস্স তিলকভূতে কতভূমি পরিকম্মে রাজৰত্থুদ্ৰারকোট্ঠকট্ঠানে মহাবোধিং পতিট্ঠাপেসি.

এৰং লঙ্কাহিতত্থায-সাসনস্সচ ৰুদ্ধিযা,

মহামেঘৰনে রম্মে-মহাবোধি পতিট্ঠিতোতি;

১৪. অনুলাদেৰী পঞ্চহি কঞ্ঞাসতেহি পঞ্চহি অন্তেপুরিসা সতেহীতি মাতুগামসহস্সেন সদ্ধিং সঙ্ঘমিত্তত্থেরিযা সন্তিকে পব্বজিত্ৰা নচিরস্সেৰ সপরিৰারা অরহত্তে পতিট্ঠাসি. অরিট্ঠোপি খো রঞ্ঞো ভাগিনেয্যো পঞ্চহি পুরিস সতেহি সদ্ধিং থেরস্স সন্তিকে পব্বজিত্ৰা সপরিৰারো নচিরস্সেৰ অরহত্তে পতিট্ঠাসি. অথেকদিৰসং রাজা বোধিং ৰন্দিত্ৰা থেরেন সদ্ধিং থূপারামং গচ্ছতি. তস্স লোহপাসাদট্ঠানং সম্পত্তস্স পুরিসা পুপ্ফানি আহরিংসু রাজা থেরস্স পুপ্ফানি অদাসি. থেরো পুপ্ফেহি লোহপাসাদট্ঠানং পূজেসি পুপ্ফেসু ভূমিযা পতিত মত্তেসু মহাভূমিচালো অহোসি?

রাজা কস্মা ভন্তে ভূমি চলিতানি পুচ্ছি. ইমস্মিং মহারাজ ওকাসে অনাগতে সঙ্ঘস্স উপোসথাগারং ভৰিস্সতি. তস্সেতং পুব্বনিমিত্তন্তি আহ. পুন তস্স মহাচেতিযট্ঠানং সম্পত্তস্স চম্পক পুপ্ফানি অভিহরিংসু. তানিপি রাজা থেরস্স অদাসি. থেরো মহাচেতিযট্ঠানং পুপ্ফেহি পূজেত্ৰা ৰন্দি তাৰদেৰ মহাপথৰী সংকম্পি. রাজা ভন্তে কস্মা পথৰী কম্পিত্থাতি পুচ্ছি. মহারাজ ইমস্মিং ঠানে অনাগতে বুদ্ধস্স ভগৰতো অসদিসো মহাথূপো ভৰিস্সতি. তস্সেতং পুব্বনিমিত্তন্তি আহ. অহমেৰ করোমি ভন্তেতি. অলং মহারাজ তুম্হাকং অঞ্ঞং বহুং কম্মং অত্থি. তুম্হাকং পন নন্তা দুট্ঠগামণী অভযো নাম কারেস্সতীতি.

অথ রাজা সচে ভন্তে ময্হং নন্তা করিস্সতি. কতংযেৰ মযাতি দ্ৰাদসহত্থং পাসাণত্থম্হং আহরাপেত্ৰা দেৰানম্পিযতিস্স রঞ্ঞো নত্তা দুট্ঠগামণি অভযো নাম ইমস্মিং পদেসে থূপং করোতীতি অক্খরানি লিখাপেত্ৰা পতিট্ঠাপেসীতি অথ দেৰানম্পিযতিস্সরাজা চেতিযপপ্পতে নিহিতা সম্মাসম্বুদ্ধ ভুত্ত পত্ত পূরেত্ৰা আহটা ধাতুযোহত্থিক্খণ্ধেন আহরাপেত্ৰা সকলতম্বপণ্ণিদীপে ¶ যোজনে যোজনে থূপং কারেত্ৰা ধাতুযো পতিট্ঠাপেসি ভগৰতো পত্তং পন রাজ গেহেযৰ ঠপেত্ৰা পূজমকাসীতি.

নিধাপেত্ৰান সম্বুদ্ধ-ধাতুযো পত্তমত্তকা,

কারাপেসি মহারাজ-থূপে যোজন যোজনেতি;

অথ রাজা অঞ্ঞানি চ বহূনি পুঞ্ঞকম্মানি কত্ৰা চত্তালীস ৰস্সানি রজ্জং কারেসি. তস্স অচ্চযেন তং কনিট্ঠো উত্তিয রাজা দসৰস্সানি রজ্জং কারেসি. তস্স অচ্চযেন তং কনিট্ঠো মহাসীৰো দসৰস্সানেৰ রজ্জং কারেসি তস্স অচ্চযেন তস্সাপি কনিট্ঠো সূরতিস্সো দসৰস্সানেৰ রজ্জং কারেসি ততো অস্সনাৰিক পুত্তা দ্ৰে দমিল়া সূরতিস্সং গহেত্ৰা দ্ৰেৰীস ৰস্সানি ধম্মেন রজ্জং কারেসুং. তে গহেত্ৰা মুটসীৰস্স রঞ্ঞো পুত্তো অসেলো নাম দসৰস্সানি রজ্জং কারেসি অথ চোল়রট্ঠতো অগন্ত্ৰা এল়ারো নাম দমিলো অসেল ভূপতিং গহেত্ৰা চতুচত্তালীস ৰস্সানি রজ্জং কারেসি এল়ারং গহেত্ৰা দুট্ঠগামণি অভযো রাজা অহোসি.

১৫. দেৰানম্পিযতিস্স রঞ্ঞো কির দুতিযভাতিকো উপরাজা মহানাগো নাম অহোসি. অথ রঞ্ঞো দেৰী অত্তনো পুত্তস্স রজ্জং ইচ্ছন্তি তরচ্ছনাৰা ৰাপিং করোন্তস্স উপরাজস্সৰিসেন অম্বং যোজেত্ৰা অম্বমত্থকে ঠপেত্ৰা পেসেসি দেৰিযি পুত্তে, উপরাজেন সদ্ধিং গতো ভাজনে ৰিৰটে সযমেৰ অমবং গহেত্ৰা খাদিত্ৰা কালমকাসি উপরাজা তং কারণং ঞত্ৰা দেৰিযা ভীতো ততোযেৰ অত্তনো দেৰিঞ্চ বলৰাহনঞ্চ গহেত্ৰা রোহণং অগমাসি. তস্স অগ্গমহেসি অন্তরামগ্গে যট্টালৰিহারে নাম পুত্তং ৰিজাযি তস্স তিস্সোতি ভাতুনাম’মকংসি.

সো ততো গন্ত্ৰা মহাগামে ৰসন্তো রোহণে রজ্জং কারেসি তস্স অচ্চযেন তস্স পুত্তো যট্টালতিস্সো মহাগামেযেৰ রজ্জং কারেসি. তস্স অচ্চযেন তস্সাপি পুত্তো গোঠাভযো নাম তত্থেৰ রজ্জং কারেসি. গোঠাভযস্স পুত্তো কাকৰণ্ণতিস্সো নাম তত্থেৰ রজ্জং কারেসি. কাকৰণ্ণতিস্স রঞ্ঞো কির কল্যাণিতিস্স রঞ্ঞো ধীতা ৰিহারমহাদেৰী নাম অগ্গমহেসি অহোসি সা রঞ্ঞো পিযা অহোসি মনাপা. রাজা তায সদ্ধিং সমগ্গৰাসং ৰসন্তো পুঞ্ঞানি করোন্তো ৰিহাসি. অথেকদিৰসং দেৰী রাজগেহেযেৰ ভিক্খুসঙ্ঘস্স মহাদানং দত্ৰা সাযণ্হসমযে ¶ গণ্ধমালাদীনি গাহাপেত্ৰা ধম্মং সোতুং ৰিহারংগতা, তত্থ নিপন্নং বাল়্হগিলানং আসন্নমরণং সীলৰন্তং সামণেরং দিস্ৰা গণ্ধমালাদীহি পূজেত্ৰা অত্তনো সম্পত্তিং ৰণ্ণেত্ৰা মম পুত্তভাৰং পত্থেথ ভন্তেতি যাচি.

সো ন ইচ্ছি, যাপি পুনপ্পুন যাচিযেৰ. সামণেরোপি এৰং সন্তে সাসনানুগ্গহং কাতুং সক্কাতিসম্পটিচ্ছিত্ৰা গতিনিমিত্তৰসেন উপট্ঠিতম্পি দেৰলোকং ছড্ডেত্ৰা নিকন্তিৰসেন সুৰণ্ণ সিৰিকায গচ্ছন্তিযা দেৰিযা কুচ্ছিম্হি পটিসণ্ধিং গণ্হি.

সা দসমাসচ্চযেন পুত্তং ৰিজাযি. তস্স গামণি অভযোতি নামং করিংসু. অপরভাগে অপরম্পি তস্স তিস্সোতি নামং করিংসু. গামণি কুমারো কমেন ৰড্ঢেন্তো সোল়স ৰস্সিকো হুত্ৰা হত্থস্স থরা সিপ্পেসু কোৰিদো তেজোবল পরক্কম সম্পন্নো অহোসি. অথ খো কাকৰণ্ণতিস্স রাজা নণ্ধিমিত্তো-সুরনিম্মলো-মহাসেনো-গোঠযিম্বরো-থেরপুত্তাভ- যো-ভরণো-ৰেল়ুসুমনো-খঞ্চদেৰো-ফুস্সদেৰো-লভিয্যৰসভোতি ইমে দসামহাযোধে পুত্তস্স সন্তিকে ঠপেত্ৰা ৰাসেসি.

তেসং উপ্পত্তিকথা মহাৰংসতো গহেতব্বা রাজা দসমহাযোধানং পুত্তস্স সক্কারসমংসক্কারং কারেসি তিস্সকুমারং জনপদ রক্খনত্থায দীঘৰাপিযং ঠপেসি অথেকদিৰসং গামিণী কুমারো অত্তনো বলৰাহন সম্পত্তিং দিস্ৰা দমিল়েহি সদ্ধিং যুজ্ঝস্সামীতি রঞ্ঞো কথাপেসি. রাজা পুত্তং অনুরক্খন্তো অলং ওরগঙ্গন্তি নিৰারেসি. সো যাৰ ততিযং কথাপেসি রাজা কুজ্ঝিত্ৰা হেমসঙ্খলিকং করোথ বণ্ধিত্ৰা রক্খিস্সামীতি. অভযো পিতু রঞ্ঞো কুজ্ঝিত্ৰা পলাযিত্ৰা মলযং অগমাসি ততো পট্ঠায পিতরি দুট্ঠত্তা দুট্ঠগামণীতি পঞ্ঞাতো রাজা পুত্তানং কলহট্ঠানং আগমনত্থায যোধেহি সপথং কারেসি.

অথ কাকৰণ্ণতিস্স রাজা চতুসট্ঠিৰিহারে কারেত্ৰা চতুসট্ঠি সংৰচ্ছরানেৰ ঠত্ৰা কালমকাসি তিস্সকুমারো পিতুকালকতভাৰং সুত্ৰা দীঘৰাপিতো আগন্ত্ৰা পিতু সরীরকিচ্চং কারেত্ৰা মাতরং - কণ্ডুল হত্থিঞ্চ গহেত্ৰা ভাতু ভযা দীঘৰাপিং অগমাসি. অমচ্চা সন্নিপতিত্ৰা তং পৰত্তিং ৰত্ৰা দুট্ঠগামণিতিস্স সন্তিকং পেসেসুং. সো তং সাসনং সুত্ৰা ভুত্তসালং আগম্ম ভাতু সন্তিকং দূতে পেসেত্ৰা ততো মহাগামং আগন্ত্ৰা অভিসেকং পত্ৰা মাতরং কণ্ডুলহত্থিঞ্চ পেসেতূতি যাৰ ততিযং ভাতু সন্তিকং লেখা পেসেত্ৰা অপেসন ভাৰং ঞত্ৰা যুদ্ধায নিক্খমি. কুমারোপি যুদ্ধসজ্জোহুত্ৰানিক্খমি. চুল়ঙ্গণিয পিট্ঠিযং দ্ৰিন্নং ভাতূনং মহাযুদ্ধং অহোসি.

তে ¶ কির যোধা সপথস্স কতত্তা তেসং যুদ্ধে সহাযা ন ভৰিংসু. তদা রঞ্ঞো অনেকসহস্স মনুস্সা মরিংসু. রাজা পরজ্জিত্ৰা তিস্সামচ্চং দিঘতুণিকং ৰল়ৰঞ্চ গহেত্ৰা পলাযি. কুমারো পচ্ছতো পচ্ছতো অনুবণ্ধি. অন্তরে ভিক্খু পব্বতং মাপেসুং. তং দিস্ৰা কুমারো ভিক্খুসঙ্ঘস্স কম্মন্তি ঞত্ৰা নিৰত্তি রাজা পলাযিত্ৰা কপ্পণ্দকর নদিযা জলমালতিত্থং নাম গন্ত্ৰং ছাতোম্হিতি আহ. অমচ্চো সুৰণ্ণসরকে পক্খিত্তভত্তা নিহরিত্ৰা অদাসি.

রাজা কালং সল্লক্খেত্ৰা সঙ্ঘস্স দত্ৰা ভুঞ্জামিতি সঙ্ঘস্স-অমচ্চস্স-ৰল়ৰায-অত্তনো চাতি চতুভাগং কত্ৰা কালা ঘোসাপেসি তদা পিযঙ্গুদিপতো কুটুম্বিযতিস্সত্থেরো নাম আগন্ত্ৰা পুরতো অট্ঠাসি. রাজা থেরং দিস্ৰা পসন্নমানসো সঙ্ঘস্স ঠপিতভাগং অত্তনো ভাগঞ্চ থেরস্স পত্তে পক্খিপিং অমচ্চোপি অত্তনো ভাগং পক্খিপি ৰল়ৰাপি দাতুকামা অহোসি. তস্সাভিপ্পাযং ঞত্ৰা অমচ্চো তস্সাপি ভাগং পত্তে পক্খিপি.

ইতি সো রাজা থেরস্স পরিপুণ্ণ ভত্তপত্তং অদাসি. থেরো পত্তং গহেত্ৰা গন্ত্ৰা গোতমত্থেরস্স নাম অদাসি. সো পঞ্চসত ভিক্খু ভোজেত্ৰা পুন ততো লদ্ধেহি ভাগেহি পত্তপূরেত্ৰা আকাসে খিপি পত্তো গন্ত্ৰা রঞ্ঞো পুরতো অট্ঠাসি তিস্সো পত্তং গহেত্ৰা রাজানং ভোজেত্ৰা ততো সযং ভুঞ্জিত্ৰা ৰল়ৰং ভোজেসি. ততো রাজা সন্নাহং চুম্বটকং কত্ৰা পত্তং ৰিস্সজ্জেসি. ততো গন্ত্ৰা থেরস্স হত্থে পতিট্ঠাসি, রাজা পুন মহাগামং আগন্ত্ৰা সেনং সঙ্কড্ডিৰো সট্ঠিসহস্সবলা গহেত্ৰা পুন ভাতরা সদ্ধিং যুজ্ঝি তদা কুমারস্স অনেক সহস্সং মনুস্সা পতিংসু.

কুমারো পলাযিত্ৰা ৰিহারং পৰিসিত্ৰা মহাথেরস্স গেহং পাৰিসি.

রাজা পচ্ছতো পচ্ছতো অনুবণ্ধন্তো ৰিহারং পৰিট্ঠভাৰং ঞত্ৰা নিৰত্তি পচ্ছা থেরা তে উভো ভাতরো অঞ্ঞমঞ্ঞং খমাপেসুং. তদা রাজা সস্সকম্মানি কারেতুং তিস্সকুমারং দীঘৰাপিমেৰ পহিণিত্ৰা সযম্পি ভেরং চরাপেত্ৰা সস্সকম্মানি কারেসি. অথ মহাজনস্স সঙ্গহংকত্ৰা কুন্তে ধাতুং নিধাপেত্ৰা বলৰাহন পরিৰুতো তিস্সারামং গন্ত্ৰা সঙ্ঘং ৰন্দিত্ৰা ভন্তে সাসনং জোতেতুং পারগঙ্গং গমিস্সামি সক্কারেতুং অম্হেহি সহগামিনো ভিক্খু দেথাতি আহ.

সঙ্ঘো পঞ্চসতভিক্খু অদাসি. রাজা ভিক্খুসঙ্ঘং গহেত্ৰা কণ্ডুলহত্থিমারুয্হ যোধেহি পরিৰুতো মহতা বলকাযেন যুদ্ধায ¶ নিক্খমিত্ৰা মহিযঙ্গণং আগনন্ত্ৰা তত্থ দমিল়েহি সদ্ধিং যুজ্ঝন্তো মহিযঙ্গণে কঞ্চুক থূপং কারেসি. তস্স থূপস্স ৰিভাৰনত্থং অযমানুপুব্বকথা.

১৬. ভগৰা কির বোধিতে নৰমে মাসে ইমং দীপমাগন্ত্ৰা গঙ্গাতীরে তিযোজনাযতে যোজনৰিত্থতে মহানাগৰনুয্যানে যক্খসমাগমং আগন্ত্ৰা তেসং যক্খানং উপরিভাগে মহিযঙ্গণ থূপস্স ঠানে ৰেহাসযং ঠিতো ৰুট্ঠি ৰাতন্ধকারাদীহি যক্খে সন্তাসেত্ৰা তেহি অভযং যাচিতো তুম্হাকং অভযং দস্সামি তুম্হে সমগ্গা ময্হং নিসীদনট্ঠানং দেথাতি আহ.

যক্খা, মারিস তে ইমং সকলদীপং দেমি. অভযং নো দেহীতি আহংসু. ততো ভগৰা তেসং ভযং অপনুদিত্ৰা তেহি দিন্নভভূমিযং চম্মখণ্ডং পত্থরিত্ৰা তত্থ নিসিন্নো তেজোকসিণং সমাপজ্জিত্ৰা চম্মখণ্ডং সমন্ততো জালেত্ৰা ৰড্ঢেসি. তে চম্মখণ্ডেন অভিভূনা সমন্ততো সাগর পরিযন্তে রাসিভূতা অহেসুং ভগৰা ইদ্ধিবলেন গিরিদীপং নাম ইধানেত্ৰা তত্থ যক্খে পৰেসেত্ৰা দীপং যথাট্ঠানে ঠপেত্ৰা চম্মখণ্ডং সঙ্খিপি তদা দেৰতা সমাগমো অহোসি. তস্মিং সমাগমে ভগৰা ধম্মং দেসেসি-তদা.

‘‘নেকেসং পাণকোটীনং-ধম্মাভিসমযো অহূ,

সরণেসু চ সীলেসু-ঠিতা আসুং অসঙ্খিযা;

সোতাপত্তিফলং পত্ৰা-সেলে সুমনকূটকে,

মহাসুমন দেৰিণ্দো-পূজিযং যাচি পূছিযং;

সিরং পরামসিত্ৰান-নিলামলসিরোরুহে,

পাণিমত্তে অদা কেসে তস্স পাণিহিতো জিনো;

সো তং সুৰণ্ণিচঙ্গোটং-চরেনাদায সত্থুনো, নিসিন্নট্ঠান রচিতে-নানারতনসঞ্চযে.

উচ্চতো সত্তরতনে-ঠপেত্ৰান সিরোরুহে,

তং ইণ্দনীল থূপেন-পিদহেসি নমস্সি চ’’;

পরিনিব্বুতে পন ভগৰতি ধম্মসেনাপতি সারি পুত্তত্থেরস্স অন্তেৰাসিকো সরভূ নামেকো থেরো চিতকতো গীৰট্ঠিধাতু গহেত্ৰা ভিক্খু সঙ্ঘপরিৰুতো আগন্ত্ৰা তস্মিংযেৰ চেতিযে পতিট্ঠাপেত্ৰা মেঘৰণ্ণপাসাণেহি ছাদেত্ৰা দ্ৰাদস হত্থুব্বেধং থূপং কারেত্ৰা পক্কামি. অথ দেৰানম্পিযতিস্স রঞ্ঞো ভাতা চূল়াভযো নাম তং অব্ভুতং চেতিযং দিস্ৰা তিংসহত্থুব্বেধং চেতিযং কারেসি. ইদানি দুট্ঠগামণীপি অভযরাজা মহিযঙ্গণং আগন্ত্ৰা তত্থ দমিল়ে মদ্দন্তো অসিতিহত্থুব্বেধং কঞ্চুকচেতিযং কারেত্ৰা পূজমকাসি.

এৰমচ্চাযিকং ¶ কম্মং-করোন্তাপি গুণাকরা, করোন্তি পুঞ্ঞং সপ্পঞ্ঞা-সংসারভস ভীরুকাতি.

১৭. ততো রাজা দমিল়েহি সদ্ধিং যুজ্ঝিত্ৰা ছত্তদমিল়ং গণ্হিত্ৰা তত্র বহু দমিল়ে ঘাতেত্ৰা অম্বতিত্থং আগন্ত্ৰা অম্বদমিল়ং চতূহি মাসেহি গণ্হি. ততো ওরুয্হ মহব্বলে সত্তদমিল়ে একাহেনেৰ গণ্হি ততো অন্তরসোব্ভে মহাকোট্ঠ দমিল়ং-দোণগামে গৰর দমিল়ং-হালকোলে মহিস্সরিয দমিল়ং-নাল়িসোব্ভে নাল়িক দমিল়ং-দিঘাভসগল্লম্হি দিঘাভয দমিল়ং গণ্হি. ততো কচ্ছতিত্থে কিঞ্চিসীস দমিল়ং চতূহি মাসেহি গণ্হি ততো ৰেঠ নগরে তাল় দমিল়ং, ভাণকদমিল়ঞ্চ-ৰহিট্ঠে ৰহিট্ঠ দমিল়ং=গামণিম্হি গামণি দমিল়ং-কুম্বুগামম্হি কুম্বু দমিল়ং-নণ্দিক গামম্হি নণ্দিক দমিল়ং-খাণুগামম্হি খাণু দমিল়ং-তম্বুন্নগামকে মাতুল ভাগিনেয্যে দ্ৰে দমিল়ে গণ্হি তদা-

‘‘অজানিত্ৰা সকং সেনং-ঘাতেন্তি সজনা ইতি,

সুত্ৰান সচ্চকিরিযং-অকরি তত্থ ভুপতি;

রজ্জসুখায ৰাযামো-নাযং মম কদাপি চ,

সম্বুদ্ধসাসনস্সেৰ-ঠপনায অযং মম;

তেন সচ্চেন মে সেনা-কাযোপগত ভণ্ডকং,

জালৰণ্ণংৰ হোতূতি-তং তথেৰ তদা অহু;’’

এৰং রাজা গঙ্গাতীরে দমিল়ে ঘাতেসি. ঘাতিত সো সব্বে আগন্ত্ৰা ৰিজিত নগরে পৰিসিংসু. তদা রাজা ৰিজিত নগরং গণ্হিতুং ৰীমংসনত্থায আগচ্ছন্তং নণ্ধিমিত্তং দিস্ৰা কণ্ডুলং মুঞ্চেসি. কণ্ডুলোপি তং গণ্হিতুং আগঞ্ছি তদা নণ্ধিমিত্তো হত্থেতহি উভো দন্তে বাল়্হং গহেত্ৰা পীল়েত্ৰা উক্কুটিকং নিসীদাপেসি. রাজা উভো ৰিমংসেত্ৰা ৰিজিতনগরং আগতো. ততো দক্খিণদ্ৰারে যোধানং মহাসঙ্গামো অহোসি পুরত্থিমদ্ৰারে ৰেল়ুসুমনো অস্সং আরুয্হ বহূ দমিল়ে ঘাতেসি দমিল়া অন্তো পিৰিসিত্ৰা দ্ৰারং থকেসুং. ততো রাজা যোধে ৰিস্সজ্জেসি, কণ্ডুলহত্থি নণ্ধিমিত্তো সুরনিম্মলো চ দক্খিণদ্ৰারে কম্মং করিংসু মহাসোণো গোঠযিম্বরো থেরপুত্তাভযো চাতি ইমে তযো ইতরেসু তীসু দ্ৰারেসু কম্মং করিংসু.

তঞ্চ নগরং পরিখাত্তয পরিক্খিত্তং, দল়্হ পাকার গোপুরং, অযো দ্ৰারযুত্তং অহোসি কণ্ডুলো জাণুহি ঠত্ৰা সিলা সুধা ইট্ঠকা ভিণ্দিত্ৰা অযোদ্ৰারং পাপুণি তদা দমিল়া গোপুরে ঠত্ৰা নানাৰুধানি ¶ খিপিংসু পক্ক অযোগুল়ে চেৰপক্কট্ঠিত সিলেসঞ্চ হত্থিপিট্ঠিযং পক্খিপিংসু? তদা কণ্ডুলো ৰেদনট্টো উদকট্ঠানং গন্ত্ৰা উদকে ওগাহি. তদা গোঠযিম্বরো ন ইদং সুরাপানং ভৰতি. অযোদ্ৰার ৰিঘাটনং নাম, গচ্ছ দ্ৰারং ৰিঘাটেহীতি আহ. তং সুত্ৰা জাতাভিমাতো কুঞ্চনাদং কত্ৰা উদন উগ্গম্ম থলে অট্ঠাসি অথ হত্থিৰেজ্জো সিলেসং ধোৰিত্ৰা ওসধং অকাসি. ততো রাজা হত্থিং আরুয্হ পাণিনা কুম্ভে পরামসিত্ৰা সকল লঙ্কাতলে রজ্জং তৰ দম্মীতি তোসেত্ৰা ৰরভোজনং ভোজেত্ৰা ৰণং সাটকেন ৰেঠেত্ৰা সুৰম্মীতং কত্ৰা ৰম্মপিট্ঠিযং মহিসচম্মং সত্তগুণং কত্ৰা বণ্ধিত্ৰা তস্সুপরি তেলচম্মং বণ্ধিত্ৰা তং ৰিস্সজ্জেসি সো অসনি ৰিযগজ্জন্তো গন্ত্ৰা দাঠাহি পদরং ৰিজ্ঝিত্ৰা পাদেন উম্মারং হনি. দ্ৰারং বাহাহি সদ্ধিং অযোদ্ৰারং মহাসদ্দেন ভূমিযং পতি. গোপুরে দব্বসম্ভারং পন হত্থিপিট্ঠিযং পতন্তং দিস্ৰা নণ্ধিমিত্তো বাহাহি পহরিত্ৰা পৰট্টেসি তদা কণ্ডুলো দাঠাপীল়নৰেরং ছড্ঢেসি.

ততো কণ্ডুলো অত্তনো পিট্ঠিং আরূহনত্থায নণ্ধিমিত্তং ওলোকেসি. সো তযা কতমগ্গেন ন পৰিসিস্সামীতি অট্ঠারস হত্থুব্বেধং পাকারং বাহুনা পহরিত্ৰা অট্ঠুসহপ্পমাণং পাকারপ্পদেসং পাতেত্ৰা সুরনিম্মলং ওলোকেসি সোপি তেন কতমগ্গং অনিচ্ছন্তো পাকারং লড্ডীত্ৰা নগরব্ভন্তরে পতি গোঠযিম্বরোপি - সোণোপি - থেরপুত্তাভযোপি একেক দ্ৰারং ভিণ্দিত্ৰা পৰিসিংসু-ততো.

‘‘হত্থি গহেত্ৰা রথচক্কং-মিত্তো সকট পঞ্জরং,

নাল়িকেরতরুং গোঠো-নিম্মলো খগ্গমুত্তমং;

তালরুক্খং মহাসোণো-থেরপুত্তো মহাগদং,

ৰিসুং ৰিসুং ৰীথিগতা-দমিল়ে নত্থ চুণ্ণযুং’’;

এৰং ৰিজিতনগরং চতূহি মাসেহি ভিণ্দিত্ৰা দমিল়ে মারেত্ৰা ততো গরিলোকং নাম গন্ত্ৰা গিরিয দমিল়ং অগ্গহেসি. ততো মহেল নগরং গন্ত্ৰা চতূহি মাসেহি মহেল রাজানং গণ্হিং ততো রাজা অনুরুধপুরং গচ্ছন্তো পরিতোকাসপব্বতে নাম খণ্ধাৰারং নিৰাসেত্ৰা তত্থ তল়াকং কারেত্ৰা জেট্ঠমূলমাসম্হি উদককীল়ং কীল়ি. এল়ারোপি দুট্ঠগামণিস্স আগতভাৰং সুত্ৰা অমচ্চেহি সদ্ধিং মন্তেত্ৰা স্ৰে যুদ্ধং করিস্সামাতি নিচ্ছযং অকাসি পুনদিৰসে সন্নদ্ধো মহাপব্বত হত্থিং আরুয্হ মহা বলকায পরিৰুতো নিক্খমি. গামণীপি মাতরা সদ্ধিং মন্তেত্ৰা দ্ৰত্তিংস বল কোট্ঠকে কারেত্ৰা ছত্তধরে রাজরূপকে তত্থ তত্থ ঠপেসি. অব্ভন্তর কোট্ঠকে সযং অট্ঠাসি.

ততো ¶ সঙ্গামে ৰত্তমানে এল়ার রঞ্ঞো দীঘজত্তু নাম মহা যোধো খগ্গফলকং গহেত্ৰা ভূমিতো অট্ঠারস হত্থং নভমুগ্গন্ত্ৰা রাজরূপং ছিণ্দিত্ৰা পঠমং বল কোট্ঠকং ভিণ্দি এৰং সেসেপি বলকোট্ঠকে ভিণ্দিত্ৰা মহাগমণিনা ঠতং বলকোট্ঠকং আগমি. তদা সুরনিম্মলো রঞ্ঞো পরিগচ্ছন্তং দিস্ৰা অত্তনো নামং সাৰেত্ৰা তং অক্কোসি তং সুত্ৰা দীঘজন্তু পঠমং ইমং মারেমীতি কুজ্ঝিত্ৰা আকসমব্ভুগ্গন্ত্ৰা অত্তনোপরি ওতরন্তং দিস্ৰা সরনিম্মলো অত্তনো ফলকং উপনামেসি. ইতরোপি ফলকেন সদ্ধিং তং ভিণ্দিস্স মীতি চিন্তেত্ৰা ফলকং পহরি. ইতরো ফলকং মুঞ্চি, দীঘজন্তু ফলকং ছিণ্দন্তো ভূমিযং পতি. সুরনিম্মলো তং সত্তিযা পহরি, ফুস্সদেৰো তং খণে সঙ্খং ধমি, অসনিসদ্দো ৰিয অহোসি উম্মাদপ্পত্তা ৰিয মনুস্সা অহেসুং. ততো দমিল় সেনা ভিজ্জিত্থ, এল়ারো পলাযিত্থ তদাপি বহু দমিল়ে ঘাতেসুং.

‘‘তত্থ ৰাপিজলং আসি-হতানং লোহিতাৰিলং,

তস্মা কুলত্থৰাপীতি-নামতো ৰিস্সুতা অহূ;

চরাপেত্ৰা তহিং ভেরিং-দুট্ঠগামিণি ভূপতি,

ন হনিস্সতু এল়ারং-মং মুঞ্চিয পরো ইতি;

সন্নদ্ধো সযমারুয্হ-সন্নদ্ধং কণ্ডুলং করিং,

এল়ারং অনুবণ্ধন্তো-দক্খিণদ্ৰার মাগমি;

পুরে দক্খিণভাগম্হি-উভো যুজ্ঝিংসু ভূমিপা,

তোমরং খিপি এল়ারো-গামণি তং অৰঞ্চযি;

ৰিজ্ঝাপেসি চ দন্তেহি-তং হত্থিং সকহত্থিনা,

তোমরং খিপি এল়ারো-সহত্থি তত্থ সো পতি;

ততো ৰিজিত সঙ্গামো-সযোগ্গবলৰাহনো,

লঙ্কা একাতপত্তং সো-কত্ৰান পাৰিসি পুরং;’’

অথ রাজা নগরে ভেরিং চরাপেত্ৰা সমন্তা যোজনপ্পমাণে মনুস্সে সন্নিপাতেত্ৰা এল়ার রঞ্ঞো সরীরং মহন্তং সক্কারং কারেত্ৰা কূটাগারেন নেত্ৰা ঝাপেত্ৰা তত্থ তেচিযং কারেত্ৰা পরিহারমদাসি. অজ্জপি রাজানো তং পদেসম্পত্ৰা ভেরিং ন ৰাদাপেন্তি. এৰং দুট্ঠগামণি অভয মহারাজা দ্ৰত্তিংস দমিল় রাজানো মারেত্ৰা লঙ্কাদীপং একচ্ছত্তমকাসি.

যদা দুট্ঠগামণি ৰিজিতং নগরং গণ্হি তদা দীঘজন্তু যোধো এল়ারং উপসঙ্কমিত্ৰা অত্তনো ভাগিনেয্যস্স ভল্লুকস্স যোধ ভাৰং আচিক্খিত্ৰা ইধাগমনত্থায তস্স সন্তিকং পেসেসি. ভল্লুকোপি এল়ারস্স দড্ঢদিৰসতো সত্তমে দিৰসে সট্ঠিযা পুরিস ¶ সহস্সেহি সদ্ধিং ওতিণ্ণো রঞ্ঞো মতভাৰং সুত্ৰাপি লজ্জায যুজ্ঝিস্সামীতি মহাতিত্থতো নিক্খমিত্ৰা কোলম্বহালকে নাম গামে খণ্ধাৰারং নিৰেসেসি. রাজাপি তস্সা’গমনং সুত্ৰা সন্নদ্ধো কণ্ডুলং আরুয্হ যোধপরিৰুতো মহতা বলকাযেন অভিনিক্খমি. ফুস্সদেৰোপি পঞ্চাৰুধ সন্নদ্ধো রঞ্ঞো পচ্ছিমাসনে নিসীদি. ভল্লুকোপি পঞ্চাৰুধ সন্নদ্ধো হত্থিং আরুয্হ রাজাভিমুখো অগঞ্ছি. তদা কণ্ডুলো তস্স ৰেগমণ্দি ভাৰত্থং সনিকং সনিকং পচ্চোসককি সেনাপি হত্থিনা সদ্ধিং তথেৰ পচ্চোসককি.

রাজা ফুস্সদেৰং আহ অযং হত্থি পুব্বে অট্ঠৰীসতিযা যুদ্ধেসু অপচ্চোসককিত্ৰা ইদানি কস্মা পন পচ্চোসক্কতীতি. সো আহাদেৰ. অম্হাকমেৰ জযো অযং গজো জযভূমিং অৰেক্খন্তো পচ্চোসক্কতি জযভূমিং পত্ৰা ঠস্সতীতি? নাগোপি পচ্চোসককিত্ৰ পুর দেৰস্স পস্সে মহাৰিহার সীমন্তে অট্ঠাসি.

ততো ভল্লুকো রাজাভিমুখা আগন্ত্ৰা রাজানং উপ্পণ্ডেসি রাজাপি খগ্গতলেন মুখং পিধায তং অক্কোসি রঞ্ঞো মুখে ৰিজ্ঝিস্সামীতি সরং খিপি. সো খগ্গতল মাগচ্চভূমিযং পতি, ভল্লুকো মুখে ৰিদ্ধেস্মিতি সঞ্ঞায উক্কুট্ঠি, অকাসি তদা রঞ্ঞো পচ্ছিমাসনে নিসিন্নো ফুস্সদেৰো রঞ্ঞো কুণ্ডলং ঘটেন্তো তস্স মুখে কণ্ডং পাতেসি রঞ্ঞো পাদে কত্ৰা পতমানস্স জাণুম্হি অপরেন কণ্ডেন ৰিজ্ঝিত্ৰা রঞ্ঞো সীসং কত্ৰা পাতেসি. রাজা লদ্ধজযো নগরং আগন্ত্ৰা সরং আহরাপেত্ৰা পুঙ্খেন উজুকং ঠপাপেত্ৰা তং পমাণং কহাপণরাসিং কত্ৰা ফুস্সদেৰস্স অদাসি.

এৰং লঙ্কারজ্জং একচ্ছত্তং কত্ৰা রাজা যোধানং যথানুরূপং ঠানন্তরং অদাসি. থেরপুত্তাভযো পন দীযমানং ট্ঠানন্তরং ন গণ্হি কস্মা ন গণ্হসিতি পুচ্ছিনো যুদ্ধং অত্থি মহারাজাতি আহং. ইদানি একরজ্জে কতে কিং নাম যুদ্ধন্তি পুচ্ছিতে কিলেস চোরেহি যুজ্ঝিস্স মীতি আহ. রাজা পুনপ্পুনং নিৰারেসি সোপি পুনপ্পুন যাচিত্ৰা রাজানুঞ্ঞায পব্বজিত্ৰা ৰিপস্সনায কম্মং করোন্তো অরহত্তং পত্ৰা পঞ্চ খীণাসৰসত পরিৰারো অহোসি.

ততো রাজা অত্তনো পাসাদতলে সিরীসযনগতো মহতিং সম্পত্তিং ওলোকেত্ৰা অক্খোভিণি সেনাঘাতং অনুস্সরি. অনুস্সরন্তস্স রঞ্ঞো মহন্তং দেমনস্সং উপ্পজ্জি সগ্গ মগ্গন্তরাযো মে ভৰেয্যাতি.

তদা পিযঙ্গুদীপে অরহন্তো রঞ্ঞো পরিচিতক্কং ঞত্ৰা তং অস্সাসেতুং অট্ঠ অরহন্তে পেস্সে. তে আগন্ত্ৰা আগতভাৰা নিৰেদেত্ৰা ¶ পাসাদতলং অভিরুহিংসু রাজা থেরে ৰন্দিত্ৰা আসনে নিসীদাপেত্ৰা আগত কারণং পুচ্ছি. থেরাপি আগত কারণং ৰত্ৰা রঞ্ঞো তেন কম্মুনা সগ্গ-মোক্খন্তরাযভাৰং বোধেত্ৰ পক্কমিংসু রাজা তেসং ৰচনং সুত্ৰা অস্সাসং পটিলভিত্ৰা ৰন্দিত্ৰা (তে ৰিস্সজ্জেত্ৰা) সিরিসযনগতো পুন চিন্তেসি.

মাতিপিতরো খো পন মা চো কদাচিপি ৰিনা সঙ্ঘেন আহারং ভুঞ্জথাতি অম্হেহি সপথং কারেসুং ভিক্খুসঙ্ঘস্স অদত্ৰা ভুত্তং অত্থি নু খো নত্থিতি চিন্তযন্তো সতিসম্মোসেন সঙ্ঘস্স অদত্ৰা পাতরাসকালে পরিভুত্তং একংযেৰ মরিচৰট্টিং অদ্দস. দিস্ৰা চ অযুত্তং মযা কতং দণ্ডকম্মং মে কাতব্বন্তী চিন্তেসি অথ রাজা ছত্তমঙ্গল সত্তাহে ৰীতিৰত্তে মহতা রাজানুভাৰেন মহন্তেন কীল়াৰিধানেন উদককীল়ং কীল়িতুং অভিসিত্তানং রাজুনং চারিত্তানু পালনত্থঞ্চ তিস্সৰাপিং অগমাসি. রঞ্ঞো সব্বং পরিচ্ছদং উপাহনছত্তানি চ মরিচৰট্টি ৰিহারট্ঠানম্হি ঠপযিংসু.

তত্রাপি থূপট্ঠানে রাজপুরিসা রঞ্ঞো সধাতুকং কুন্তং উজুকং ঠপেসুং. রাজা দিৰসভাগং ওরোধ পরিৰুতো কীল়িত্ৰা সাযণ্হে জাতে নগরং গমিস্সাম কুন্তং ৰড্ঢেথাতি আহ. রাজপুরিসা কুন্তং গণ্হন্তা চালেতুং নাসক্খিংসু রাজসেন, তং অচ্ছরিযং দিস্ৰা সমাগন্ত্ৰা গণ্ধমালাদীহি পূজেসি রাজাপি মহন্তং অচ্ছরিযং দিস্ৰা হট্ঠমানসো সমন্তা আরক্খং সংৰিদহিত্ৰা নগরং পাৰিসি.

ততো রাজা কুন্তং পরিক্খিপাপেত্ৰা চেতিযং তং পরিক্খিপাপেত্ৰা ৰিহারঞ্চ কারেসি. ৰিহারো তীহি সংৰচ্ছরেহি নিট্ঠাসিং রাজা ৰিহারমহত্থায সঙ্ঘং সন্নিপাতেসি ভিক্খূনং সতসহস্সানি ভিক্খুনীনং নৰুতি সহস্সানি সন্নিপতিংসু তস্মিং সমাগমে রাজা সঙ্ঘং ৰন্দিত্ৰা এৰমাহ ভন্তে ৰিস্সরিত্ৰা ৰিনা সঙ্ঘেন মরিচৰট্টিকং পরিভুঞ্জিং তদত্থং দণ্ডকম্মং মে হোতূতি-সচেতিযং মরিচৰট্টিযং ৰিহারং কারেসিং পতিগণ্হাতু ভন্তে সঙ্ঘো সচেতিযং ৰিহারন্তি দক্খিণোদকং পাতেত্ৰা ভিক্খুসঙ্ঘস্স ৰিহারং অদাসি.

ৰিহারস্স সমন্ততো ভিক্খুসঙ্ঘস্স নিসীদনত্থায মহন্তং মণ্ডপং কারেসি মণ্ডপ পাদা অভযৰাপিযা জলে পতিট্ঠিতা অহেসুং. সেসোকাসে কথাচনত্থি. তত্থ ভিক্খুসঙ্ঘং নিসীদাপেত্ৰা সত্তাহং মহাদানং দত্ৰা সব্বপরিক্খারং অদাসি. তত্থ সঙ্ঘত্থেরেন লদ্ধ পরিক্খারো সতসহস্সগ্ঘনকো অহোসি.

‘‘যুদ্ধে দানে চ সূরেন-সূরিনা রতনত্তমে,

পসন্নামলচিত্তেন-সাসনুজ্জোতনত্থিনা;

রঞ্ঞা কতঞ্ঞুনা তেন-থূপকারাপনাদিতো,

ৰিহারমহনন্তানি - পূজেতুং রতনত্তযং;

পরিচ্চত্তধনানেত্থ-অনগ্ঘানি ৰিমুঞ্চিয,

সেসানি হোন্তি একায-ঊনা ৰিসতিকোটিযো;’’

১৮. ততো রাজা চিন্তেসি মহামহিণ্দত্থেরো কির মম অয্যকস্স দেৰানম্পিযতিস্স রঞ্ঞো এৰমাহ. নত্তা তে মহারাজ দুট্ঠগামণি অভযো ৰিসং হত্থসতিকং সোৰণ্ণমালিং থূপং কারেস্সতি. সঙ্ঘস্স চ উপোসথাগারভূতং নৰভূমকং লোহপাসাদং কারেস্সতীতি চিন্তেত্ৰা চ পন ওলোকেন্তো রাজগেহে করণ্ডকে ঠপিতং সুৰণ্ণপট্টলেখং দিস্ৰা তং ৰাচেসি. অনাগতে চত্তালীসং ৰস্সসতং অতিক্কম্ম কাকৰণ্ণতিস্সস্স পুত্তো দুট্ঠগামণি অভযো ইদঞ্চিদঞ্চ কারেস্সতীতি সুত্ৰা হট্ঠো উদগ্গো অপ্পোঠেসি-অয্যেন কির ৰতম্হি দিট্ঠো মহা মহিণ্দেনাতি.

ততো পাতোৰ মহামেঘৰনং গন্ত্ৰা ভিক্খুসঙ্ঘং সন্নিপাতেত্ৰা এতদৰোচ? ভন্তে ভিক্খুসঙ্ঘস্স উপোসথাগারং কত্ৰা দেৰৰিমান সদিসং পাসাদং কারেস্সামি দেৰলোকং পেসেত্ৰা পটে ৰিমানাকারং লিখাপেত্ৰা মে দেথাতি? সঙ্ঘো অট্ঠ খীণাসৰে পেসেসি. তে তাৰতিংসভৰনং গন্ত্ৰা দ্ৰাদসযোজনুব্বেধা অট্ঠচত্তালীস যোজন পরিক্খেপং কূটাগারং সহস্স পতিমণ্ডিতং নৰভূমকং সহস্সগব্ভং খীরণ দেৰধীতায পুঞ্ঞানুভাৰনিব্বত্তং আকাসট্ঠং রতনপাসাদং ওলোকেত্ৰা হিঙ্গুলকেন পটে তদাকারং লিখিত্ৰা আনেত্ৰা ভিক্খুসঙ্ঘস্স অদংসু সঙ্ঘো রঞ্ঞো পাহেসি.

তং দিস্ৰা রাজা তুট্ঠমানসো তদা তং লেখতুল্যং লোহপাসাদং কারেসি. কম্মন্তারম্ভ কালে পন চতুসু দ্ৰারেসু অট্ঠসতসহস্সানি হিরঞ্ঞানি ঠপাপেসি তদা চতুসু দ্ৰারেসু সহস্স সহস্সং ৰত্থপুটানি চেৰ গুল়-তেল-সক্খর-মধুপুরা অনেকসহস্সচাটিযো চ ¶ ঠপাপেসি. পাসাদে অমূলকেন কম্মং ন কাতব্বন্তি ভেরিং চারপেত্ৰা অমূলকেন কতকম্মং অগ্ঘাপেত্ৰা কারকানং মূলং দাপেসি. পাসাদো একেকেন পস্সেন হত্থসত হত্থসতপ্পমাণো অহোসি তথা উব্বেধন, নৰভূমাযো চস্স অহেসুং একেকিস্সা ভূমিযা সতং সতং কূটাগারানি, তানি সব্বানিপি রতনখচিতানি চেৰ সুৰণ্ণ কিঙ্কিণিকাপন্তি পরিক্খিত্তানি চ অহেসুং তেসং কূটাগারানি নানারতন ভূসিকা পৰাল় ৰেদিকা চেৰ, তাসং পদুমানি চ নানারতন ৰিচিত্তানেৰ অহেসুং. তথা সহস্সগব্ভা চ নানারতন খচিতা সীযপঞ্জর ৰিভূসিতা চ. ৰেস্সৰনস্স নারিৰাভনযানং সুত্ৰা তদাকারং মজ্ঝে রতন মণ্ডপং কারেসি.

সো অনেকেহি রতনত্থম্ভেহি সীহৰ্যগ্ঘাদি রূপেহি দেৰতা রূপেহি চ পতিমণ্ডিতো সমন্ততো ওলম্বক মুত্তা জালেন চ পরিক্খিত্তো অহোসি পৰাল়ৰেদিকা চস্স পুব্বে ৰুত্তপ্পকারাৰ সত্তরতন ৰিচিত্তমণ্ডপ মজ্ঝে পন এল়িকময ভূমিযা দন্তময পল্লঙ্কো অহোসি অপস্সেনম্পি দন্তমযমেৰ, সো সুৰণ্ণসূরিযমণ্ডলেহি রজত চণ্দ মণ্ডলেহি মুত্তাময তারকাহি চ ৰিচিত্তো তত্থ তত্থ যথারহং নানারতনময পদুমানি চেৰ পসাদ জনকানি চ জাতকানি অন্তরন্তরা সুৰণ্ণলতাযো চ কারেসি. তত্থ মহগ্ঘং পচ্চত্থরণং অত্থরিত্ৰা মনুঞ্ঞং দন্ত ৰিজনিং ঠপেসি. পৰাল়ময পাদুকা কারেসি. তথা পল্লঙ্কস্সোপরি এল়িকভূমিযা পতিট্ঠিতং রজতমযদণ্ডং সেতচ্চত্তং কারেসি. তত্থ সত্তরতনমযানি অট্ঠমঙ্গলানি অন্তরন্তরা চ মণিমুত্তামযা চতুপ্পাদ পন্তিযো চ কারেসি. ছত্তন্তে চস্স রতনময ঘণ্টাপন্তিযো ওলম্বিংসু.

পাসাদো ছত্তং পল্লঙ্কো মণ্ডপো চাতি চত্তারো অনগ্ঘা অহেসুং মহগ্ঘানি মঞ্চপীঠানি পঞ্ঞত্ৰো তত্থ মহগ্ঘানি কম্বলানি ভুম্মত্থরণানি অত্থরাপেসি আৰমন কুম্হি উল়ুঙ্কো চ সোৰণ্ণমযাযেৰ অহেসুং. সেস পরিভোগ ভণ্ডেসু ৰত্তব্বমেৰ নত্থি দ্ৰারকোট্ঠকোপি মনোহর পাকারেন পরিক্খিত্তো. তম্বলোহিট্ঠিকাভি পন ছাদিতত্তা পাসাদস্স লোহপাসাদোতি ৰোহারো অহোসি.

এৰং তাৰতিংসভৰনে দেৰসভা ৰিয পাসাদং নিট্ঠাপেত্ৰা সঙ্ঘং সন্নিপাতেসি. মরিচৰট্টি ৰিহারমগে ৰিয সঙ্ঘো সন্নিপতি. পঠমভূমিযং পুথুজ্জনাযেৰ অট্ঠংসু দুতিযভূমিযা তেপিটকা, ততিযাদিসু তীসু ভূমিসু কমেন সোতাপন্ন - সকদাগামি - অনাগামিনো, উপরি চতুসু ভূমিসু খীণাসৰাযেৰ অট্ঠংসু. এৰং সঙ্ঘং সন্নিপাতেত্ৰা সঙ্ঘস্স পাসাদং দত্ৰা মরিচৰট্টি ৰিহারমহে ৰিয সত্তাহং মহাদানমদাসীতি.

‘‘পাসাদহেতু ¶ চত্তানি-মহাচাগেন রাজিনা,

অনগ্ঘানি ঠপেত্ৰান-অহেসুং তিংসকোটিযো;’’

পহায গমনীযন্তং-দত্ৰান ধনসঞ্চযং,

অনুগামিধনং দানং-এৰং কুব্বন্তি পণ্ডিতা;

১৯. অথেকদিৰসং রাজা সতসহস্সং ৰিস্সজ্জেত্ৰা মহাবোধি পূজং কারেত্ৰা নগরং পৰিসন্তো থূপট্ঠানে পতিট্ঠিতং সিলাথূপং দিস্ৰা মহিণ্দত্থেরেন ৰুত্তৰচনং অনুস্সরিত্ৰা মহাথূপং কারেস্সামীতি কতসন্নিট্ঠানো নগরং পৰিসিত্ৰা মহংতলং আরুয্হ সুভোজনং ভুঞ্জিত্ৰা সিরিসযনগতো এৰং চিন্তেসি মযা দমিল়ে মদ্দমানেন অযং লোকো অতিৰিয পীল়িতো, কেন নু খো উপাযেন লোকস্স পিল়নং অকত্ৰা ধম্মেন সমেন মহা চেতিযস্স অনুচ্ছৰিকং ইট্ঠকা উপ্পাদেস্সামীতি তং চিন্তিতং ছত্তং অধিৰত্থা দেৰতা জানিত্ৰা রাজা এৰং চিন্তেসীতি উগ্ঘোসেসি.

পরম্পরায দেৰলোকেপি কোলাহলমহোসি তং ঞত্ৰা সক্কো দেৰরাজং ৰিস্সকম্মং আমন্তেত্ৰা’তাত! ৰিস্স কম্ম! দুট্ঠগামণি অভয মহারাজা মহা চেতিযস্স ইট্ঠকত্থায চিন্তেসি. ত্ৰং গন্ত্ৰা উত্তরপস্সে নগরতো যোজনপ্পমাণে ঠানে গম্ভির নদিযা তীরে ইট্ঠকা মাপেত্ৰা এহি’তি পেসেসি.

তং ঞত্ৰা ৰিস্সকম্ম দেৰপুত্তো আগন্ত্ৰা তত্থেৰ মহাচেতিযানুচ্ছৰিকং ইট্ঠকা মাপেত্ৰা দেৰপুরমেৰ গতো. পুন দিৰসে একো সুনখলুদ্দো সুনখে গহেত্ৰা অরঞ্ঞং গন্ত্ৰা তত্থ তত্থ ৰিচরন্তো তং ঠানং পত্ৰা ইট্ঠকা অদিস্ৰা চ নিক্খমি. তস্মিং খণে একা ভুম্মা দেৰতা তস্স ইট্ঠকা দস্সেতুং মহন্তং গোধাৰণ্ণং গহেত্ৰা লুদ্দস্স সুনখানঞ্চ অত্তানং দস্সেত্ৰা তেহি অনুবদ্ধো ইট্ঠকাভিমুখং অত্ত্ৰা অন্তরধাযি.

সুনখলুদ্দো ইট্ঠকা দিস্ৰা অম্হাকং রাজা থূপং কারেতুকামো, মহন্তো ৰত নো পণ্ণাকারো লদ্ধোতি হট্ঠমানসো পুন দিৰসে পাতোচ আগন্ত্ৰা অত্তনা দিট্ঠং ইট্ঠক পণ্ণাকারং রঞ্ঞো নিৰেদেসি. রাজা তং সাসনং সুত্ৰা অত্তমনো হুত্ৰা তস্স মহন্তং সক্কারং কারেত্ৰা তংযেৰ ইট্ঠক গোপনং কারেসি. ততো রাজা অহমেৰ ইট্ঠকোলোকনত্থায গচ্ছামি - কুন্তং ৰড্ঢেথাতি আহ.

তস্মিংযেৰ খণে পুন অঞ্ঞং সাসনং আহরিংসু. নগরতো তিযোজনমত্থকে ঠানে পুব্বুত্তরকণ্ণে আচার ৰিট্ঠিগামে তিযামরত্তিং অভিপ্পৰট্টে দেৰে সোল়স করীসপ্পমাণে পদেসে সুৰণ্ণবীজানি উট্ঠহিংসু. তানি পমাণতো উক্কট্ঠানি ৰিদত্থিপ্পমাণানি. ওমকানি অট্ঠঙ্গুলপ্পমাণানি অহেসুং, অথ ৰিভাতায রত্তিযা ¶ গামৰাসিনো সুৰণ্ণবিজানি দিস্ৰা রাছা’রহং ৰত ভণ্ডং উপ্পন্নন্তি সমন্ততো আরক্খা সংৰিদহিত্ৰা সুৰণ্ণবীজানি পাতিযং পূরেত্ৰা আগন্ত্ৰা রঞ্ঞো দস্সেসুং রাজা তেসম্পি যথারহং সক্কারং কারেত্ৰা তেযেৰ সুৰণ্ণ গোপকে অকাসি.

অথ তস্মিংযেৰ খণে অঞ্ঞং সাসনং আহরিংসু. নগরতো পাচীনপস্সে সত্তযোজন মত্থকো ঠানে পারগঙ্গায তম্বৰিট্ঠি নাম জনপদে তম্বলোহং উপ্পজ্জি. গামিকা পাতিং পূরেত্ৰা তম্বলোহং গহেত্ৰা আগন্ত্ৰা রঞ্ঞো দস্সেসুং রাজা যথানুরূপং সক্কারং তেসম্পি কারেত্ৰা তেযেৰ গোপকে অকাসি.

তদনন্তরং অঞ্ঞং সাসনং আহরিংসু. পুরতো চতুযোজনমত্থকো ঠানে পুব্বদক্খিণ কণ্ণে সুমনৰাপিগামে উপ্পলকুরুৰিণ্দ মিস্সকা বহূ মণযো উপ্পজ্জিংসু গামিকা পাতিং পূরেত্ৰা আগন্ত্ৰা মানযো রঞ্ঞো দস্সেসুং. রাজা তেসম্পি সক্কারং কারেত্ৰা তেযেৰ গোপকে অকাসি.

তদনন্তরং অঞ্ঞম্পি সাসনং আহরিংসু. নগরতো দক্খিণ পস্সে অট্ঠযোজন মত্থকে ঠানে অম্বট্ঠকোল জনপদে একস্মিং লেণে রজতং উপ্পজ্জি তস্মিং সমযে নগরৰাসিকো একো ৰাণিজো বহূহি সকটেহি হল়িদ্দি সিঙ্গিৰেরাদীনমত্থায মলযং গতো, লেণস্স অৰিদূরে সকটানি মুঞ্চিত্ৰা পতোদদারুং পরিযেসন্তো তং পব্বতং অভিরূল়্হো একং পণসযট্ঠিং অদ্দস.

তস্স মহন্তং চাটিপ্পমাণং একমেৰ পণস ফলং নরুণযট্ঠিং নামেত্ৰা হেট্ঠা পাসাণপিট্ঠিযং অট্ঠাসি. সো তং ফলভারেন নমিতং দিস্ৰা উপগন্ত্ৰা হত্থেন পরামসিত্ৰা পক্কভাৰং ঞত্ৰা ৰণ্টং ছিণ্দি পণসযট্ঠি উগ্গন্ত্ৰা যটাট্ঠানং অট্ঠাসি ৰাণিজো অগ্গং দত্ৰা ভুঞ্জিস্সামীতি চিন্তেত্ৰা কালং ঘোসেসি. তদা চত্তারো খীণাসৰ আগন্ত্ৰা তস্স পুরতো পাতুরহেসুং. ৰাণিজো তে দিস্ৰা অত্তমনো পাদে ৰন্দিত্ৰা নিসীদাপেত্ৰা তস্স ফলস্স ৰণ্টাসমন্তা ৰাসিযা তচ্ছেত্ৰা অপস্সযং লুঞ্চিত্ৰা অপনামেসি. সমন্ততো যুসং ওতরিত্ৰা অপস্সযানিতং আৰাটং পূরেসি ৰাণিজো মনোসিলোদকৰণ্ণ পণসযুসং পত্তে পূরেত্ৰা অদাসি. তে খীণাসৰা তস্স পস্সন্তস্সেৰ আকাসমব্ভুগ্গন্ত্ৰা পক্কমিংসু.

সো পুন কালংঘোসেসি অঞ্ঞে চত্তরো খীণাসৰা আগমিংসু. তেসম্পি হত্থতো পত্তে গহেত্ৰা সুৰণ্ণৰণ্ণেহি পন সমিঞ্জেহি পূরেত্ৰা অদাসি তেসু তযো থেরা আকাসেন পক্কমিংসু ইতরো ইণ্দগুত্তত্থেরো নাম খীণাসৰো তস্স তং রজতং ¶ দস্সেতুকামো উপরি পব্বতা ওতরিত্ৰা তস্স লেণস্স অৰিদূরে নিসীদিত্ৰা পণস মিঞ্জং পরিভুঞ্জতি উপাসকো থেরস্স গতকালে অৰসেস মিঞ্জং অত্তনাপি খাদিত্ৰা সেসকং ভণ্ডিকং কত্ৰা আদায গচ্ছন্তো থেরং দিস্ৰা উদকঞ্চ পত্তধোৰনসাখঞ্চ অদাসি.

থেরোপি লেণদ্ৰারেন সকট সমীপগামি মগ্গং মাপেত্ৰা ইমিনা মগ্গেন গচ্ছ উপাসকাতি আহ. সো থেরং ৰন্দিত্ৰা তেন মগ্গেন গচ্ছন্তো লেণদ্ৰারং পত্ৰা সমন্তা লেণং ওলোকেন্তো তং রজতরাসিং দিস্ৰা রজতপিণ্ডং গহেত্ৰা চাসিযা ছিণ্দিত্ৰা রজতভাৰং ঞত্ৰা মহন্তং সজ্ঝপিণ্ডং গহেত্ৰা সকট সন্তিকং গন্ত্ৰা তিণোদক সম্পন্নে ঠানে সকটানি নিৰেসেত্ৰা লহুং অনুরাধপুরং গন্ত্ৰা রঞ্ঞ্ঞো দস্সেত্ৰা তমত্থং নিৰেদেসি রাজা তস্সাপি যথারহং সক্কারং কারেসি.

তদন্তরং অঞ্ঞম্পি সাসনং আহরিংসু নগরতো পচ্ছিম দিসাভাগে পঞ্চ যোজন মত্থকে ঠানে উরুৰেল পব্বত মহামলকমত্তা পচাল় মিস্সকা সট্ঠি সকটপ্পমাণমুত্তা সমুদ্দতো থলমুগ্গমিংসু কেৰট্টা দিস্ৰা রাজারহং ৰত ভণ্ডং উপ্পন্নন্তি রাসিং কত্ৰা আরক্খং দত্ৰা পাতিং পূরেত্ৰা আগন্ত্ৰা রঞ্ঞো দস্সেত্ৰা তমত্থং নিৰেদেসুং. রাজা তেসম্পি যথারহং সক্কারং কারেসি.

পুন অঞ্ঞং সাসনং আহরিংসু নগরতো পচ্ছিমুত্তর কণ্ণে সত্তযোজন মত্থকে ঠানে পেল়িৰাপি গামস্স ৰাপিযা ওতিণ্ণ কণ্দরে পুলিন পুট্ঠে নিসদপোতপ্পমাণ দীঘতো ৰিদত্থিচতুরঙ্গুলা উম্মাপুপ্ফৰণ্ণা চত্তারো মহামণি উপ্পজ্জিংসু. অথেকো মত্তো নাম সুনখলুদ্দো সুনখে গহেত্ৰা তত্থ ৰিচরন্তো তং ঠানং পত্ৰা দিস্ৰা রাজারহং ৰত ভণ্ডন্তি ৰালিকাহি পটিচ্ছাদেত্ৰা আগন্ত্ৰা রঞ্ঞো নিৰেদেসি. রাজা তস্সাপি যথারহং সক্কারং কারেসি. এৰং রাজা থূপত্থায উপ্পন্নানি ইট্ঠকাদীনি তদহেৰ অস্সোসি ইট্ঠক রজতানং উপ্পন্নট্ঠানং তেনেৰ নামং লভি.

২০. অথ রাজা থূপত্থায উপ্পন্নানি সুৰণ্ণাদীনি আহরাপেত্ৰা ভণ্ডাগারেসু রাসিং কারেসি ততো সব্বসম্ভারে সমত্তে ৰিসাখ পুণ্ণমুপোসথদিৰসে পত্ত ৰিসাখ নক্খত্তে মহাথূপকরণত্থায ভূমিপরিকম্মং আরভি. রাজা থুপট্ঠানে পতিট্ঠাপিতং সিলাথূপং হরাপেত্ৰা থিরভাৰত্থায সমন্ততো হত্থিপাকার পরিযন্তং গম্ভীরতো সতরতনপ্পমাণং ভূমিং খনাপেত্ৰা পংসুং অপনেত্ৰা ¶ যোধেহি গুল়পাসাণে অত্থরাপেত্ৰা কম্মারকূটেহি আহনাপেত্ৰা চুণ্ণৰিচুণ্ণে কারেসি.

ততো চম্মৰিনদ্ধেহি পাদেহি মহা হত্থীহি মদ্দাপেত্ৰা পাসাণকোট্টিমস্সুপরি নৰনীত মত্তিকং অত্থরাপেসি. আকাস গঙ্গাযহি তিপতিতট্ঠানে উদকবিন্দূনি উগ্গন্ত্ৰা সমন্তা তিংস যোজনপ্পমাণপদেসে পতন্তি যত্থ সযঞ্জাতসালী উপ্পজ্জত্তি তং ঠানং নিচ্চমেৰ তিন্তত্তা নিন্তসীসকোল়ং নাম ছাতং. তত্থ মত্তিকা সুখুমুত্তা নৰনীত মত্তিকাতি ৰুচ্চতি.

তং ততো খীণসৰা সামণেরা আহরন্তি তায সব্বত্থ মত্তিকাকিচ্চন্তি ঞাতব্বং. মত্তিকোপরি ইট্ঠকা অত্থরাপেসি. ইট্ঠকোপরি খরসুকম্মং, তস্সোপরিকুরুৰিণ্দপাসাণং, তস্সোপরিঅযোজালং, তস্সোপরি খীণাসৰ সামণেরেহি হিমৰন্ততো আহটং সুগণ্ধমারুম্বং, তস্সোপরি খীরপাসাণং, তস্সোপরি এল়িকপাসাণং, তস্সোপরি সীলং অত্থরাপেসি. সব্বমত্তিকাকিচ্চে নৰনীতমত্তিকা এৰ অহোসি.

সিলাসত্থারোপরি রসোদক সন্তিন্তেন কপিত্থ নিয্যাসেন অট্ঠঙ্গুলবহলতম্বলোহপট্টং, তস্সোপরি তিলতেলযন্তিন্তায মনোসিলায সত্তঙ্গুল বহলং রজতপট্টং অত্থরাপেসি এৰং রাজা সব্বাকারেন ভূমিপরিকম্মং কারাপেত্ৰা আসাল়হি সুক্কপক্খস্স চাতুদ্দস দিৰসে ভিক্খুসঙ্ঘা সন্নিপাতেত্ৰা এৰমাহ. স্ৰে পুণ্ণমুপোসথদিৰসে উত্তরাসাল়্হ নক্খত্তেন মহাচেতিযে মঙ্গলিট্ঠকং পতিট্ঠাপেস্সামি স্ৰে থূপূট্ঠানে সব্বো সঙ্ঘো সন্তিপততূতি নগরে ভেরিং চরাপেসি মহাজনো উপোসথিকো হুত্ৰা গণ্ধমালাদীনি গহেত্ৰা থূপট্ঠানে সন্নিপততূতি.

ততো ৰিসাখসিরি দেৰনামকে দ্ৰে অমচ্চে আণাপেসি. তুম্হে গন্ত্ৰা মহা চেতিযট্ঠানং অলঙ্করোথাতি. তে গন্ত্ৰা সমন্ততো রজতপট্টৰণ্ণৰালুকং ওকীরাপেত্ৰা লাজপঞ্চমকানি পুপ্ফানি ৰিকিরিত্ৰা কদলিতোরণং উস্সাপেত্ৰা পুণ্ণঘটে ঠপাপেত্ৰা মণিৰণ্ণে ৰেল়ুম্হি পঞ্চপণ্ণধজং বণ্ধাপেত্ৰা গণ্ধসম্পন্নানি নানাৰিধ কুসুমানিসণ্থরাপেত্ৰা নানাপ্পকারেহি তং ঠানং অলঙ্করিংসু.

অথ রাজা সকলনগরঞ্চ ৰিহারগামি মগ্গঞ্চ অলঙ্কারাপেসি পভাতায রত্তিযা নগরে চতুসু দ্ৰারেসু মস্সু কম্মত্থায নহাপিতে, নহাপনত্থাযনহাপনকে, অলঙ্কারত্থায কপ্পকেৰ নানাৰিরাগ ৰত্থ গণ্ধমালাদীনি চ সূপৰ্যঞ্জন সম্পন্নানি মধুরভত্তানি চ ঠপাপেত্ৰা সব্বে নগরা চ জানপদা চ যথারুচিং মস্সূকম্মং কারেত্ৰা নহাত্ৰা ভুঞ্জিত্ৰা ৰত্থাভরণাদীহি অলঙ্করিত্ৰা মহাচেতিযট্ঠানং আগচ্ছন্তূতি আযুত্তকেহি আরোচাপেসি.

সযম্পি ¶ সব্বাভরণ ৰিভূসিতো চত্তালীস পুরিস সহস্সেহি সদ্ধিং উপোসকো হুত্ৰা অনেকেহি সুমণ্ডিত পসাধিতেহি অমচ্চেহি গহিতারক্খো অলঙ্কতাহি দেৰকঞ্ঞ পমাহি নাটকিত্থিহি পরিৰুতো অমরগণ পরিৰুতো দেৰরাজা ৰিয অত্তনো সিরিসম্পত্তিহা মহাজনং তোসযন্তো অনেকেহি তুরিয সঙ্ঘুট্ঠেহি ৰত্তমানেহি অপরণ্হে মহাথূপট্ঠানং উপগঞ্জি. মহা চেতিযট্ঠান মঙ্গলত্থায পুটবদ্ধানি ৰত্থানি অট্ঠুত্তর সহস্সং ঠপাপেসি. চতুসু পস্সেসু ৰত্থরাসিং কারেসি তেল-মধু-সক্কর-ফাণিতাদীনি চ ঠপাপেসি.

অথ নানাদেসতো বহূ ভিক্খূ আগমিংসু রাজগহা সমন্তা ইণ্দিগুত্তত্থেরো নাম অসীতি ভিক্খুসহস্সানি গহেত্ৰা আকাসেনাগঞ্ছি তথা বারাণসিযং ইসিপতনে মহা ৰিহারতো ধম্মসেনত্থেরো নাম দ্ৰাদস ভিক্খুসহস্সানি. সাৰত্থিযং জেতৰন ৰিহারতো পিযদস্সি নাম থেরো সট্ঠি ভিক্খু সহস্সানি ৰেসালিযং মহা ৰনতো বুদ্ধরক্খিতত্থেরো অট্ঠারস ভিক্খু সহস্সানি, কোসম্বিযং ঘোসিতারামতো মহাধম্মরক্খিতত্থেরো তিংস ভিক্খুসহস্সানি. উজ্জেনিযং দক্খিণগিরি মহা ৰিহারতো ধম্মরক্খিতত্থেরো চত্তালীস ভিক্খুসহস্সানি-পাটলিপুত্তে অসোকারামতো মিত্তিণ্ণত্থেরো ভিক্খূনং সতসহস্সানি সট্ঠিঞ্চ সহস্সানি গণ্ধার রট্ঠতো অত্তিন্ন থেরো নাম ভিক্খূনং দ্ৰে সতসহস্সানি অসীতিঞ্চ সহস্সানি. মহাপল্লৰ ভোগতো মহাদেৰত্থেরো ভিক্খূনং চত্তারি সতসহস্সানি সট্ঠিঞ্চ সহস্সানি যোনকরট্ঠে অলসণ্দা নগরতো যোনক ধম্মরক্খিতত্থেরো তিংস ভিক্খু সহস্সানি. ৰিঞ্ঝাটৰিৰত্তনিয সেনাসনতো উত্তরত্থেরো অসীতি ভিক্খুসহস্সানি. মহাবোধিমণ্ড ৰিহারতো চিত্তগুত্তত্থেরো তিংস ভিক্খুসহস্সানি ৰনৰাসিভোগতো চণ্দগুত্তত্থেরো অসীতি ভিক্খুসহস্সানি. কেলাস মহাৰিহারতো সুরিভগুত্তত্থেরো ছন্নৰুতি সহস্সানি গহেত্ৰা আকাসেনাগঞ্ছি.

‘‘ভিক্খূনং দীপৰাসীনং-আগতানঞ্চ সব্বসো,

গণনায পরিচ্ছেদো-পোরাণেহি ন ভাসিতো;

সমাগতানং ভিক্খূনং-সব্বেসং তং সমাগমে,

ৰুত্তা খীণাসৰাযেৰ-তে ছন্নৰুতি কোটিযো;’’

অথ সঙ্ঘো পরিক্খিত্ত পৰাল়ৰেদিকা ৰিয মজ্ঝে রঞ্ঞো ওকাসে ঠপেত্ৰা অঞ্ঞমঞ্ঞং অঘট্টেত্ৰা অট্ঠাসি. পাচিনপস্সে বুদ্ধরক্খিতনামকো খীণাসাৰত্থেরো অত্তনাসদিসনামকে পঞ্চসতখীণাসৰে গহেত্ৰা অট্ঠাসি. তথা দক্খিণপস্সে পচ্ছিমপস্সে উত্তরপস্সে ¶ চ ধম্মরক্খিত - সঙ্ঘরক্খিত - আনণ্দ নামকা খীণাসৰত্থেরা অত্তনা সদিসনামকে পঞ্চপঞ্চসত খীণাসৰে গহেত্ৰা অট্ঠংসু পিযদস্সি নাম খীণাসৰত্থেরো মহাভিক্খুসঙ্ঘং গহেত্ৰা পুব্বুত্তর কণ্ণে অট্ঠাসি.

রাজা কির সঙ্ঘমজ্ঝং পৰিসন্তোযেৰ সচে মযা কযিরমানং চেতিযকম্মং অনন্তরাযেন নিট্ঠং গচ্ছতি পাচিন-দক্খিণ-পচ্ছিম-উত্তরপস্সেসু বুদ্ধরক্খিত-চম্মরক্খিত-সঙ্ঘরক্খিত-আনণ্দ নামকা থেরা অত্তনাসদিসনামকে পঞ্চপঞ্চসতভিক্খু গহেত্ৰা তিট্ঠন্তু পিযদস্সি নাম থেরো পুব্বুত্তরকণ্ণে ভিক্খুসঙ্ঘং গহেত্ৰা তিট্ঠতূতি চিন্তেসি. থেরাপি রঞ্ঞো অধিপ্পাযং ঞত্ৰা তথা ঠিতাতি ৰদন্তী সিদ্ধত্থেরো পন মঙ্গলো-সুমনো-পদুমো-সীৰলি-চণ্দগুত্তো-সূরিযগুত্তো-ইণ্দগু- ত্তো-সাগরো-চিত্তসেনো -জযসেনো-অচলোতি ইমেহি একাদসহি থেরেহি পরিৰুতো পুণ্ণঘটে পূরতো কত্ৰা পুরত্থাভিমুখো অট্ঠাসি.

অথ রাজা তথা ঠিতং ভিক্খুসঙ্ঘং দিস্ৰা পসন্নচিত্তো গণ্ধমালাদীহি পূজেত্ৰা পদক্খিণং কত্ৰা চতূসু ঠানেসু ৰন্দিত্ৰা পুণ্ণসটট্ঠানং পৰিসিত্ৰা সুযণ্ণখীলে পটিমুক্কংরজতমযং পরিব্ভমন দণ্ডং ৰিজ্জমানমাতাপিতূনং উভতো সুজাতেন সুমণ্ডিত পসাধিতেন অভিমঙ্গল সম্মতেন অমচ্চপুত্তেন গাহাপেত্ৰা মহন্তং চেতিযাৰট্টং কারেতুং আরভি. তথা কারেন্তং পন সিদ্ধত্থত্থেরো নিৰারেসি. এৰং কিরস্স অহোসি - যদি মহারাজা মহন্তং চেতিযং করোতি, অনিট্ঠিতেযেৰ মরিস্সতি অনাগতে দুপ্পরিহরিযঞ্চ ভৰিস্সতীতি. তস্মিং খণে ভিক্খুসঙ্ঘো মহা রাজ থেরো পাণ্ডিতো, থেরস্স ৰচনং কাতুং ৰট্টতীতি আহ.

রাজা ভিক্খুসঙ্ঘস্স অধিপ্পাযং ঞত্ৰা থেরো করোতীতি মঞ্ঞমানো কীদিসং ভন্তে পমাণং করোমীতি আহ. থেরো মম গতগতট্ঠানতো চেতিযাৰট্টং করোহীতি ৰত্ৰা উপদিসন্তো আৰিজ্ঝিত্ৰা অগমাসি. রাজা থেরস্স ৰুত্তনযেন চেতিযাৰট্টং কারেত্ৰা থেরং উপসঙ্কমিত্ৰা নামং পুচ্ছিত্ৰা গণ্ধমালাদীহি পূজেত্ৰা ৰম্বত্ৰা পরিৰারেত্ৰা ঠিতে সেস একাদস থেরে চ উপসঙ্কমিত্ৰা পূজেত্ৰা ৰন্দিত্ৰা তেসং নামানি চ পুচ্ছিত্ৰা পরিব্ভমন দণ্ডগাহকস্স অমচ্চ পুত্তস্স তাম পুচ্ছি.

অহং দেৰ সুপ্পতিট্ঠিত ব্রহ্মা নামাতি ৰুত্তে তৰ পিতা কিং নামোতি পুচ্ছিত্ৰান নণ্দিসেনো নামাতি ৰুত্তে মাতুনামং পুচ্ছি. সুমনাদেৰী নামাতি ৰুত্তে সব্বেসং নামানি অভিমঙ্গলসম্মতানি, মযা কযরমানং চেতিযকম্মং অৰস্সং নিট্ঠানং গচ্ছতিতি হট্ঠো অহোসি, ততো রাজা মজ্ঝে অট্ঠ সুৰণ্ণঘটে ¶ রজতঘটে চ ঠপাপেত্ৰা তে পরিৰারেত্ৰা অট্ঠুত্তরসযস্স পুণ্ণঘটে ঠপাপেসি.

অথ অট্ঠ সুৰণ্ণিট্ঠকা ঠপাপেসি. তাসু একেকং পরিৰারেত্ৰা অট্ঠুত্তরসত অট্ঠুত্তরসত রজতিট্ঠকাযো. অট্ঠুত্তরসত অট্ঠুত্তরসত ৰত্থানি চ ঠপাপেসি. অথ সুপ্পতিট্ঠিত ব্রহ্মনামেন অমচ্চপুত্তেন একং সুৰণ্ণিট্ঠকং গাহাপেত্ৰা তেন সদিস নামেহি চ জীৰমানক মাতাপিতূহি সত্তহি অমচ্চপুত্তেহি সেস সত্তিট্ঠকাযো গাহাপেসি.

তস্মিং খণে মিত্তত্থেরো নাম পুরত্থিম দিসাভাগে পরিব্ভমিত লেখায ভূমিযং গণ্ধপিণ্ডং ঠপেসি. জযসেনত্থেরো নাম উদকং আসিঞ্চিত্ৰা সন্তিন্তেত্ৰা সমং অকাসি. সুপ্পতিট্ঠিতব্রহ্মা ভদ্দ নক্খত্তেন এৰং নানাৰিধ মঙ্গলানিসঙ্খটট্ঠানে পঠমং মঙ্গলিকট্ঠকং পতিট্ঠাপেসি. সুমনত্থেরোনাম জাতিসুমনপুপ্ফেহি তং পূজেসি. তস্মিং খণে উদকপরিযন্তং কত্ৰা মহাপথৰি কম্পো অহোসি. এতেনেৰ নযেন সেস সত্তিট্ঠকাযোপি পতিট্ঠাপেসুং.

ততো রাজা রজতিট্ঠকাযোপি পতিট্ঠাপেত্ৰা গণ্ধমালাদীহি পূজেত্ৰা মঙ্গলৰিধানং নিট্ঠাপেত্ৰা সুৰণ্ণপেলাযপুপ্ফানি গাহাপেত্ৰা পাচীনপস্সে ভিক্খুসঙ্ঘস্স পুরতো ঠিতং মহা বুদ্ধরক্খিতত্থেরং উপসঙ্কমিত্ৰা গণ্ধমালাদীহি পূজেত্ৰা ৰন্দিত্ৰা থেরস্স পরিৰারেত্ৰা ঠিত ভিক্খূনঞ্চ নামানি পুচ্ছিত্ৰা ততো দক্খিণপস্সে ঠিতং মহাধম্মরক্খিতত্থেরং পচ্ছিমপস্সে ঠিতং মহাসঙ্ঘরক্খিতত্থেরং উত্তরপস্সে ঠিতং আনণ্দত্থেরঞ্চ উপসঙ্কমিত্ৰা গণ্ধমালাদীহি পূজেত্ৰা পঞ্চপতিট্ঠিতেন ৰন্দিত্ৰা তথেৰ নামানি পুচ্ছিত্ৰা পুব্বুত্তর কণ্ণং গন্ত্ৰা তত্থ ঠিতং পিযদস্সি মহাথেরং ৰন্দিত্ৰা পূজেত্ৰা নামানি পুচ্ছিত্ৰা সন্তিকে অট্ঠাসি.

থেরো মঙ্গলং ৰড্ঢেন্তো রঞ্ঞো ধম্মং দেসেসি. মঙ্গলপরিযোসানে সম্পত্ত গিহিপরিসাসু চত্তালীস সহস্সানি অরহন্তো পতিট্ঠহিংসু. চত্তালীস সহস্সানি সোতাপত্তিফলো সহস্সং সকদাগামিফলে, সহস্সং অনাগামিফলে, ভিক্খূনং পন অট্ঠারসসহস্সানি অরহত্তং পাপুণিংসু. ভিক্খুনীনং চতুদ্দস সহস্সানীতি.

২১. ততো রাজা ভিক্খুসঙ্ঘং ৰন্দিত্ৰা যাচ মহাচেতিযং নিট্ঠাতিনাৰ মে ভিক্খুসঙ্ঘো ভিক্খং গণ্হাতূতি আহ. ভিক্খূ নাধিৰাসেসু, অনুপুব্বেন যাচন্তো উপল্লভিক্খূনং সত্তাহং অধিৰাসনং লভিত্ৰা থূপট্ঠানস্স সমন্ততো অট্ঠারসসু ঠানেসু মণ্ডপে কারযিত্ৰা ¶ ভিক্খুসঙ্ঘং নিসীদাপেত্ৰা সত্তাহং মহাদানং দত্ৰা সব্বেসংযেৰ তেল-মধু-পাণিতাদি ভেসজ্জং দত্ৰা ভিক্খুসঙ্ঘং ৰিস্সজ্জেসি ততো নগরে ভেরিংচারাপেত্ৰা সব্বে ইট্ঠক ৰড্ঢকি সন্তিপাতেসি. তে পঞ্চসতমত্তা অহেসুং.

তেসু একো অহং রঞ্ঞো চিত্তং আরাধেত্ৰা মহাচেতিযং কাতুং সক্কোমীতি রাজানং পস্সি রাজা কথং করোসীতি পুচ্ছি. অহং দেৰ পেসিকানং সতং গহেত্ৰা একাহং একং পংসুসকটং খেপেত্ৰা কম্মং করোমীতি আহ. রাজা এৰং সতি পংসুরাসিকং ভৰিস্সতি. তিণরুক্খাদীনি উপ্পজ্জিস্সন্তি অদ্ধানং নপ্পৰত্ততীতি তং পটিবাহি.

অঞ্ঞো অহং পুরিসসতং গহেত্ৰা একাহং একং পংসুগুম্বং খেপেত্ৰা কম্মং করোমীতি আহ.

অঞ্ঞো পংসূনং পঞ্চম্মণানি খেপেত্ৰা কম্মং করোমীতি আহ.

অঞ্ঞো দ্ৰে অম্মণানি খেপেত্ৰা কম্মং করোমীতি আহ. তেপি রাজা পটিবাহিযেৰ.

অথ অঞ্ঞো পণ্ডিতো ইট্ঠক ৰড্ঢকী অহং দেৰ উদুক্খলে কোট্টেত্ৰা সুপ্পেহি ৰট্টেত্ৰা নিসদেপিংসিত্ৰা পংসূনং একম্মণং একাহেনেৰ খেপেত্ৰা পেসিকানং সতং গহেত্ৰা কম্মং করোমীতি আহ.

রাজা এৰং সতি মহাচেতিযে তিণাদীনি ন ভৰিস্সন্তি চিরট্ঠিতিকঞ্চ ভৰিস্সতিতি সম্পটিচ্ছিত্ৰা পুন পুচ্ছি-কিং সণ্ঠানং পন করিস্সসীতি.

তস্মিং খণে ৰিস্সকম্ম দেৰপুত্তো ৰড্ঢকিস্স সরীরে অধিমুচ্চি. ৰড্ঢকী সুৰণ্ণপাতিং পূরেত্ৰা উদকমাহরাপেত্ৰা পাণিনা উদকং গহেত্ৰা উদকপিট্ঠিযং আহনি. এল়িকঘট সদিসং মহন্তং উদকবুব্বুলং উঠ্ঠাসি. দেৰ ঈদিসং করোমীতি আহ.

রাজা সাধূতি সম্পটিচ্ছিত্ৰা তস্স সহস্সগ্ঘনকং সাটক যুগলং, সহস্সগ্ঘনকংযেৰ পুণ্ণকং নাম সুৰণ্ণালঙ্কারং সহস্সগ্ঘনকা পাদুকা, দ্ৰাদস কহাপন সহস্সানি চ দত্ৰা অনুরূপট্ঠানে গেহঞ্চ খেত্তঞ্চ দাপেসি.

ততো রাজারত্তিভাগে চিন্তেসি কথং নাম মনুস্সে অপীলেত্ৰা ইট্ঠকা আহরাপেয্যন্তি দেৰতা রঞ্ঞো চিত্তং ঞত্ৰা চেতিযস্স চতুসু দ্ৰারেসু একেকদিৰসপ্পহোণকং কত্ৰা তস্সাযেৰ রত্তিযা ইট্ঠকারাসিং অকংসু ৰিহাতায রত্তিযা মনুস্সা দিস্ৰা রঞ্ঞো আরোচেসুং. রাজা তুস্সিত্ৰা ৰড্ঢকিং কম্মে পট্ঠপেসি. দেৰতা এতেনেৰ নযেন যাৰ মহাচেতিযস্স নিট্ঠানং তাৰ একেকস্স ¶ দিৰসস্স পহোণকং কত্ৰা ইট্ঠকা আহরিংসু. সকলদিৰসভাগে কম্মং কতট্ঠানে মত্তিকা ইট্ঠক চুণ্ণং ৰাপি ন পঞ্ঞাযতি. রত্তিযং দেৰতা অন্তরধাপেন্তি.

অথ রাজা মহাচেতিযেকম্মকারাযচতুপরিসাযহত্থ কম্মমূলত্থংচতুসু দ্ৰারেসু একেকস্মিং দ্ৰারে সোল়স কহাপন সহস্সানি ৰত্থালঙ্কার-গন্ধ-মাল-তেল-মধু-ফাণিত-পঞ্চকটুক ভেসজ্জানি নানাৰিধ সূপৰ্যঞ্জন সংযুত্তং ভত্তং যাগুখজ্জকাদীনি অট্ঠৰিধ কপ্পিযয পানকানি পঞ্চৰিধ মুখৰাস সহিত তাম্বূলানি চ ঠপাপেত্ৰা মহাচেতিযে কম্মং করোন্তাগহট্ঠা ৰা পব্বজিতা ৰা যথাজ্ঝাসযং গণ্হন্তু মুলং অগহেত্ৰা কম্মং করোন্তানং কাতুং ন দেথাতি আণাপেসি.

অথেকো থেরো চেতিযকম্মে সহায ভাৰং ইচ্ছন্তো কম্মকরণট্ঠানে মত্তিকা সদিসং কত্ৰা অত্তানং অভিসঙ্খটং মত্তিকা পিণ্ডং একেন হত্থেন গহেত্ৰা অঞ্ঞেন মালা গহেত্ৰা মহাচেতিযঙ্গণং আরুয্হ রাজকম্মিকে ৰঞ্চেত্ৰা ৰড্ঢকিস্স অদাসি. সো গণ্হন্তোৰ পকতিমত্তি কা না ভৰতীতি ঞত্ৰা থেরস্স মুখং ওলোকেসি তস্সাকারং ঞত্ৰা তত্থ কোলাহল মহোসি অনুক্কমেন রাজা সুত্ৰা আগন্ত্ৰা ৰড্ঢকিং পুচ্ছি-তুয্হং কির ভণে একো ভিক্খু অমূলক মত্তিকাপিণ্ডং অদাসীতি.

সো এৰমাহ-যেভুয্যেন অয্যা একেন হত্থেন পুপ্ফং একেন মত্তিকাপিণ্ডে গহেত্ৰা আহরিত্ৰা দেন্তি তেনাহং অজানিত্ৰা কম্মে উপনেসিং ‘‘অযং পন আগন্তুকো, অযং নেৰাসিকোতি এত্তকং জানামীতি.‘‘তেন হি তং থেরং ইমস্স দস্সেহীতি একং মহল্লক বলত্থং ৰড্ঢকিস্স সন্তিকে ঠপেসি ৰড্ঢকী পুন আগতকালে তং থেরং বলত্থস্স দস্সেসি সো তং সঞ্জানিত্ৰা রঞ্ঞো আরোচেসি.

রাজা তস্স সঞ্ঞং অদাসি. তো ত্ৰং তযো জাতিসুমন মকুলকুম্ভে মহাবোধি অঙ্গণে রাসিং কত্ৰা গণ্ধঞ্চ ঠপেত্ৰা মহাবোধি অঙ্গণং গত কালে আগন্তুকস্স থেরস্স পূজনত্থায রঞ্ঞো দাপিতং গণ্ধমালান্তি ৰত্ৰা দেহীতি. বলত্থো রঞ্ঞো ৰুত্তনযেনেৰ তস্স বোধি অঙ্গণং গত কালে তং গণ্ধমালং অদাসি.

সোপি সোমনস্সপ্পত্তো হুত্ৰা সেলসণ্থরং ধোৰিত্ৰা গণ্ধেন পরিভণ্ডং কত্ৰা সিলাসন্থরং কত্ৰা পুপ্ফং পূজেত্ৰা চতুসু ঠানেসু ৰন্দিত্ৰা পাচীনদ্ৰারে অঞ্জলিং পগ্গয্হ পীতিং উপ্পাদেত্ৰা পুপ্ফ পূজং ওলোকেন্তো অট্ঠাসি.

বলত্থো তস্মিং কালে তং থেরং উপসঙ্কমিত্ৰা ৰন্দিত্ৰা এৰমাহ. ভন্তে তুম্হাকং চেতিযকম্মে সহাযভাৰত্থায দিন্নস্স অমূলক ¶ মত্তিকাপিণ্ডস্স মূলং দিন্নভাৰং রাজা জানাপেতি অত্তনো ৰন্দনেন ৰন্দাপেতীতি. তং সুত্ৰা থেরো অনত্তমনো অহোসি. বলত্থো তিট্ঠন্তু ভন্তে তযো সুমন মকুল কুম্ভাতত্তকানেৰ সুৰণ্ণপুপ্ফানিপি এতং মত্তিকপিণ্ডং নাগ্ঘন্তি. চিত্তং পসাদেথ ভন্তেতি পক্কামি.

তদা কোট্ঠিৰালজনপদে পিযঙ্গল্ল ৰিহারৰাসী একো থেরো ইট্ঠকৰড্ঢকিস্স ঞাতকো অহোসি. সো আগন্ত্ৰা ৰড্ঢকিনা সদ্ধিং মন্তেত্ৰা দীঘ বহল কিরিযতো ইট্ঠকপ্পমাণং জানিত্ৰা গন্ত্ৰা সহত্থেনেৰ সক্কচ্চং মত্তিকং মদ্দিত্ৰা ইট্ঠকং কত্ৰা পচিত্ৰা পত্তত্থৰিকায পক্খিপিত্ৰা পচ্চাগন্ত্ৰা একেন হত্থেন রঞ্ঞো ইট্ঠকং একেন পুপ্ফং গহেত্ৰা অত্তনো ইট্ঠকাস সদ্ধিং রঞ্ঞো ইট্ঠকং অদাসি. ৰড্ঢকী গহেত্ৰা কম্মে উপনেসি.

থেরো সঞ্জাত পীতি সোমনস্সো মহাচেতিযে কম্মং করোন্তো ইট্ঠ কসালপরিৰেণে ৰসতি তস্স তং কম্মং পাকটং অহোসি. রাজা ৰড্ঢকিং পুচ্ছি-ভণে একেন কির অয্যেন অমূলিক ইট্ঠকা দিন্নাতি. সচ্চং দেৰ, একেন অয্যেন দিন্ন ইট্ঠকা অম্হাকং ইট্ঠকায সদিসাতি কম্মে উপনেসিন্তি আহ. পুন তং ইট্ঠকং সঞ্জানাসীতি রঞ্ঞা ৰুত্তে ঞাতকানুগ্গহেন ন জানামীতি আহ.

রাজা যদি এৰং তং ইমস্স দন্নেহীতি বলত্থং ঠপেসি সো তং পুব্বে ৰিয বলত্থস্স দস্সেসি. বলত্থো পরিৰেণং গন্ত্ৰা সন্তিকে নিসীদিত্ৰা পটিসণ্থারং কত্ৰা ভন্তে তুম্হে আগন্তুকা নেৰাসিকাতি পুচ্ছি. আগন্তুকোম্হী উপাসকাতি. কতর রট্ঠৰাসিকো ভন্তেতি কোট্ঠিৰালজনপদে পিযঙ্গল্ল ৰিহারৰাসিম্হি উপাসকাতি ইধেৰ ৰসথ গচ্ছথাতি. ইধ ন ৰসাম অসুকদিৰসে গচ্ছামাতি আহ. বলত্থোপি অহম্পি তুম্হেহি সদ্ধিং আগমিস্সামি. ময্হম্পি গামো এতস্মিংযেৰ জনপদে অসুক গামো নামাতি আহ. থেরো সাধূতি সম্পটিচ্ছি. বলত্থো তং পৰত্তিং রঞ্ঞো নিৰেদেসি.

রাজা বলত্থস্স সহস্সগ্ঘনকং ৰত্থযুগলং মহগ্ঘং রত্তকম্বলং উপাহনযুগং সুগণ্ধতেলনাল়িং অঞ্ঞ্চ বহুং সমণপরিক্খারং থেরস্স দেহীতি দাপেসি সোপি পরিক্খারং গহেত্ৰা পরিৰেণং গন্ত্ৰা থেরেন সদ্ধিং রত্তিং ৰসিত্ৰা পাতো সদ্ধিংযেৰ নিক্খমিত্ৰা অনুপুব্বেন গন্ত্ৰা পিযঙ্গল্ল ৰিহারস্স দিস্সমানে ঠানে সীতচ্ছাযায থেরং নিসীদাপেত্ৰা পাদে ধোৰিত্ৰা গণ্ধতেলেন মক্খেত্ৰা গুল়োদকং পাযেত্ৰা উপাহনং পটিমুঞ্চিত্ৰা ইদং মে পরিক্খারং কুলূপগথেরস্সত্থায গহিতং, ইদানি তুম্হাকং দম্মি, ইদং পন সাটকযুগং মম পুত্তস্স মঙ্গলত্থায গহিতং, ¶ তুম্হে চীৰরং কত্ৰা পারুপথাতি ৰত্ৰা থেরস্স পাদমূলে ঠপেসি.

থেরো সাটকযুগং পত্তত্থৰিকায পক্খিপিত্ৰা সেসপরিক্খারং ভণ্ডিকং কত্ৰা উপাহনং আরুয্হং কত্তযট্ঠিং গহেত্ৰা মগ্গং পট্পজ্জি. বলত্থো তেন সদ্ধিং থোকং গন্ত্ৰা ‘‘তিট্ঠথ ভন্তে, ময্হং অযং মগ্গো‘‘তি ৰত্ৰা পুব্বে ৰুত্তনযেনেৰ রঞ্ঞো সাসনং থেরস্স আরোচেসি

থেরো তং সুত্ৰা মহন্তেন পরক্কমেন কতকম্মং অকতং ৰিয জাতন্তি দোমনস্সপ্পত্তো হুত্ৰা অস্সুধারং পৰত্তেত্ৰা’উপাসক তৰ পরিক্খারং ত্ৰমেৰ গণ্হাহী‘‘তি ঠিতকোৰ সব্বাপরিক্খারং ছড্ডেসি বলত্থো কিং নাম ভন্তে ৰদথ এস রাজা তুয্হং ভৰগ্গপ্পমাণং কত্ৰা পচ্চযং দেন্তোপি তৰ ইট্ঠকানুরূপং কাতুং ন সক্কোতি. কেৰলং পন মহাচেতিযে কম্মং অঞ্ঞেসং অপত্তকং কত্ৰা করোমীতি অধিপ্পাযেন এৰং কারেতি তুম্হে পন ভন্তে অত্তনা লদ্ধপরিক্খারং গহেত্ৰা চিত্তং পসাদেথাতি ৰত্ৰা থেরং সঞ্ঞাপেত্ৰা পক্কামি. ইমস্মিং পন চেতিযে ভতিযা কম্মং কত্ৰা চিত্তং পসাদেত্ৰা সগ্গে নিব্বত্ত সত্তানং পমাণং নত্থি.

তাৰতিংস ভৰনে কির নিব্বত্ত দেৰধীতরো অত্তনো সম্পত্তিং ওলোকেত্ৰা কেন নু কো কম্মেন ইমং সম্পত্তিং লভিম্হাতি আৰজ্জমানা মহাচেতিযে ভতিযা কম্মং কত্ৰা লদ্ধভাৰং ঞত্ৰা ভতিযা কতকম্মস্সাপি ফলং ঈদিসং, অত্তনো সন্তকেন কম্মফলং সদ্দহিত্ৰা কতকম্মস্স ফলং কীদিসং ভৰিস্সতীতি চিন্তেত্ৰা দিব্বগণ্ধমালং আদায রত্তিভাগে আগন্ত্ৰা পূজেত্ৰা চেতিযং ৰন্দন্তি.

তস্মিং খণে ভাতিৰঙ্কৰাসী মহাসীৰত্থেরো নাম চেতিযং ৰন্দনত্থায গতো, তা ৰন্দন্তিযো দিস্ৰা মহাসত্তপণ্ণিরুক্খসমীপে ঠিতো তাসং যথারুচিং ৰন্দিত্ৰা গমনকালে পুচ্ছি? তুম্হাকং সরীরালোকেন সকলতম্বপণ্ণিদিপো একালোকো, কিং কম্মং করিত্থাতি ভন্তে অম্হাকং সন্তকে কতকম্মং নাম নত্থি ইমস্মিং চেতিযে মনং পসাদেত্ৰা ভতিযা কম্মং করিম্হাতি আহংসু এৰং বুদ্ধসাসনে পসন্নচিত্তেন ভতিযা কতকম্মম্পি মহপ্ফলং হোতি. তস্মা-

‘‘চিত্তপ্পসাদমত্তেন-সুগতে গতি উত্তমা,

লব্ভতীতি ৰিদিত্ৰান-থূপপূজং করে বুদ্ধো’’তি;

এৰং রাজা চেতিযকম্মং কারাপেন্তো পুপ্ফধানত্তযং নিট্ঠাপেসি. তং খীণাসৰ থিরভাৰত্থায ভূমিসমং কত্ৰা ওসীদাপেসুং, এৰং নৰৰারে চিতং চিতং ওসীদাপেসুং. রাজা কারণং অজানন্তো অনত্তমনো ¶ হুত্ৰা ভিক্খুসঙ্ঘং সন্নিপাতেসি. অসীতি ভিক্খুসহস্সানি সন্নিপতিংসু রাজা ভিক্খুসঙ্ঘং গণ্ধমালাদীহি পূজেত্ৰা ৰন্দিত্ৰা পুচ্ছি’ভন্তে মহাচেতিযে পুপ্ফধানত্তযং নৰৰারে ন জানামী’তি ভিক্খুসঙ্ঘো আহ মহারাজ তুয্হং কম্মস্স ৰা জীৰিতস্স ৰা অন্তরাযো নত্থি. অনাগতে থিরভাৰত্থায ইদ্ধিমন্তেহি ওসীদাপিতং, ইতো পট্ঠায ন ওসীদাপেস্সন্তি. ত্ৰং অঞ্ঞথত্তং অকত্ৰা মহাথূপং সমাপেহীতি. তং সুত্ৰা হট্ঠো রাজা থূপকম্মং কারেসি.

দসপুপ্ফধানানি দসহি ইট্ঠকাকোটীহি নিট্ঠনং গমিংসু পুন পুপ্ফধানত্তযে নিট্ঠিতে ভিক্খুসঙ্ঘো উত্তর-সুমন নামকে দ্ৰে খীণাসৰ সামণেরে আণাপেসি. তুম্হে সমচতুরস্সং অট্ঠরতন বহলং একেক পস্সতো অসীতি অসিতি হত্থপ্পমাণং ছমেদক ৰণ্ণপাসাণে আহরথাতি. তে সাধূতি সম্পটিচ্ছিত্ৰা উত্তরকুরুং গন্ত্ৰা চুত্তপ্পকারপ্পমাণে ভণ্ডিপুপ্ফনিহেছ মেদৰণ্ণপাসাণে আহরিত্ৰা একং পাসাণং ধাতুগব্ভস্স ভূমিযং অত্থরিত্ৰা চত্তারো পাসাণে চতুসু পস্সেসু সংৰিধায অপরং ধাতুগব্ভং পিদহনত্থায পাচীন দিসাভাগে ৰালুক পাকার সমীপে অদিস্সমানং কত্ৰা ঠপেসুং.

২২. ততো রাজা ধাতুগব্ভস্স মজ্ঝে সব্বরতনমযং সব্বাকারসম্পন্নং মনোহরং বোধিরুক্খং কারেসি সো হি ইণ্দনীলমণিভূমিযং পতিট্ঠিতো, তস্সমূলানি পচাল়মযানি, খণ্ধো সিরিৰচ্ছাদীহি অট্ঠমঙ্গলিকেহি পুপ্ফপন্তি লতাপন্তি চতুপ্পদ হংসপন্তিহি চ ৰিচিত্তো অট্ঠারস হত্থুব্বেধো রজতমযো অহোসি.

পঞ্চমহাসাখাপি অট্ঠারসহত্থাচ, পত্তাপি মণিমযানি, পণ্ডুপত্তানি, হেমমযানি, ফলা পৰাল়মযানি. তথা অঙ্কুরোপরি চেলৰিতানং বণ্ধাপেসি. তস্স অন্তে সমন্নতো মুত্তময কিঙ্কিণিকজালং ওলম্বতি. স্ৰণ্ণঘণ্টাপন্তি চ সুৰণ্ণদামানি চ তহিং তহিং ওলম্বন্তি ৰিতানস্স চতুসু কণ্ণেসু নৰসতসহস্সগ্ঘনকো একেকো মুত্তাকলাপো ওলম্বতি. তত্থ যথানুরূপং নানারতন কতানেৰ চণ্দ-সূরিয-তারকারূপানি পদুমানি চ অপ্পিতানি অহেসুং. মহগ্ঘানি অনেকৰণ্ণানি অট্ঠুত্তর সহস্সানি ৰত্থানি ওলম্বিংসু.

ততো বোধিরুক্খস্স সমন্ততো সত্ত রতনময ৰেদিকা কারেত্ৰা মহামলক মুত্তা অত্থরাপেসি মুত্তা ৰেদিকানং অন্তরে গণ্ধোদক পুণ্ণ সত্তরতনময পুণ্ণঘট পন্তিযো ঠপাপেসি. তাসু সুৰণ্ণঘটে পৰাল়মযানি পুপ্ফানি অহেসুং. পৰাল়ঘটে সুৰণ্ণমযানি পুপ্ফানি. মণিঘটে রজতমযানি পুপ্ফানি ¶ রজতঘটে মণিমযানিপুপ্ফাতি. সত্তরতনঘটে সত্তরতনমযানি পুপ্ফানি অহেসুং.

বোধিরুক্খস্স পাচীন দিসাভাগে রতনমযে কোটিঅগ্ঘনকে পল্লঙ্কে ঘনকোট্টিম সুৰণ্ণমযং বুদ্ধপটিমং নিসীদাপেসি. তস্সা পটিমায ৰীসতি নখা অক্খিনং সেতট্ঠানানি চ ফল়কমযানি. হত্থতল পাদতল দন্তাৰরণানি অক্খীনং রত্তট্ঠাতানি চ পৰাল়মযানি কেস ভমুকানি অক্খিনং কাল়কট্ঠানানি চ ইণ্দনীল মণিমযানি উণ্ণালোমং পনং রজতমযং অহোসি. ততো সহম্পতি মহা ব্রহ্মানং রজতচ্ছত্তং ধারেত্ৰা ঠিনং কারেসি. ততা দ্ৰীসু দেৰলোকেসু দেৰতাহি সদ্ধিং ৰিজযুত্তরসঙ্খং গহেত্ৰা অভিসেকং দদমানং সক্কং দেৰরাজানং পঞ্চসিখ দেৰপুত্তং বেল়ুৰ পণ্ডু ৰীণমাদায গণ্ধব্বং কুরুমানং. মহাকাল় নাগরাজানং নাগকঞ্ঞাপরিৰুতং নানাৰিধেনথুতিঘোসেন তথাগতং ৰণ্ণেন্তং কারেসি.

ৰসৰত্তিমারম্পন বাহুসহস্সং মাপেত্ৰা তিসূল মুগ্গরাদি নানাৰুধানি গহেত্ৰা সহস্সকুম্ভং গিরিমেখল হত্থিক্খণ্ধ মারুয্হ মারবলং পরিৰারেত্ৰা বোধিমণ্ডং আগন্ত্ৰা অনেক ভিংসনকং কুরুমানং কারেসি. সেসাসু দিসাসু পাচীন দিসাভাগে পল্লঙ্কসদিসে কোটি কোটি অগ্ঘনকে তযো পল্লঙ্কে অত্থরাপেত্ৰা দন্তমযং দণ্ডং পৰাল়ৰীজনিং ঠপাপেসি. বোধিক্খণ্ধং উস্সীসকে কত্ৰা নানারতনং মণ্ডিতং কোটিঅগ্ঘনকং রজত সযনং অত্থরাপেসি.

দসবলস্স অভিসম্বোধিম্পত্ৰা অনিমিসেন চক্খুনা বোধিপল্লঙ্কং ওলোকিতট্ঠানং সত্তাহমেৰ রতনচঙ্কমে চঙ্কমিতট্ঠানং ওলোকিতট্ঠানং সত্তাহমেৰ রতনচঙ্কমে চঙ্কমিতট্ঠানং রতনঘরং পৰিসিত্ৰা ধম্মসম্মসিতট্ঠানং মুচলিণ্দমূলং গন্ত্ৰা নিসিন্নস্স মুচলিণ্দেন নাগেন সত্তক্খত্তুং ভোগেহি পরিক্খিপিত্ৰা উপরি ফণং কত্ৰা ঠিতট্ঠানং, ততো অজপাল নিগ্রোধ মূলং গন্ত্ৰা নিসিন্নট্ঠানং, ততো রাজাযতনং ভোজনে উপনীতে চতুমহারাজেহি উপনীত পত্তপটিগ্গহণং কারেসি.

ততো ব্রহ্মাযাচনং ধম্মচক্কপ্পৰত্তনং সসপব্বজ্জং, ভদ্দৰগ্গিয পব্বজ্জং, তেভাতিক জটিল দমনং, লট্ঠিৰনুয্যানে বিম্বিসারোপগমণং, রাজগহপ্পৰেসনং, ৰেল়ুৰন পটিগ্গহণং অসীতি মহাসাৰকে চ কারেসি ততো কপিলৰত্থুগমনং রতনচঙ্কমে ঠতট্ঠানং, রাহুলপব্বজ্জং, নণ্দ্রপব্বজ্জং জেতৰনপটিগ্গহণং, গণ্ডম্বমূলে যমক পাটিহারিকং দেৰলোকে.

অভিধম্ম ¶ দেসনা দেৰোরোহণ পাটীহীরং থেরপঞ্হ সমাগমঞ্চ কারেসি.

তথা মহাসমযসুত্ত-রাহুলোৰাদ সুত্ত-মঙ্গসুত্তপারাযন সুত্ত সমাগমং ধনপাল-আল়ৰক-অঙ্গুলিমাল-অপলাল দমনং আযুসঙ্খার ৰোস্সজ্জনং সূকরমদ্দৰ পরিগ্গহণং সিঙ্গিৰণ্ণ ৰত্থযুগ পটিগ্গহণং পসন্নোদকপানং পরিনিব্বানং দেৰমনুস্স পরিদেৰনং মহাকস্সপত্থেরস্সভগৰতোপাদৰণ্দনং সরীর ঙহনং অগ্গিনিব্বানং আল়াহনসক্কারং দেণেন ব্রাহ্মণেন কতধাতু ৰিভাগঞ্চ কারেসি.

তথা অদ্ধচ্ছট্ঠানি জাতকসতানি কারেসি. ৰেস্সন্তরজাতকং পন কারেন্তো সঞ্জয মহারাজং ফুসতীদেৰিং মদ্দিদেৰিং জালিয কুমারং কণ্হাজিনঞ্চ কারেসি. ততো পণ্ডৰ হত্থিদানং সত্ত সতক মহাদানং নগর ৰিলোকনং সিন্ধৰদানং দেৰতাহি রোহিতথ ৰণ্ণেন রথস্স ৰহনং রথদানং সযমেৰোণত দুমতো ফলং গহেত্ৰা দারকানং মধুমংস দিন্ন নেসাদস্স সুৰণ্ণ সূচিদানং ৰঙ্কপব্বতকুচ্ছিম্হি পব্বজ্জাৰেসেন ৰসিতট্ঠানং পূজকস্স দারকদানং সক্কব্রাহ্মণস্স ভরিযংদানং পূজকস্স দেৰতানুভাৰেক দারকে গহেত্ৰা গন্ত্ৰা সঞ্জয নরিণ্দস্স পুরতো গতট্ঠানং ততো ৰঙ্কপব্বতকুচ্ছিযং ছন্নং খত্তিযানং সমাগমং ৰেস্সন্তরস্স মদ্দিযা চ অভিসেকং পত্তট্ঠানং নকরম্পৰিট্ঠে সত্তরতনৰস্সং ৰস্সিতট্ঠানং ততো চৰিত্ৰা তুসিতপুরে নিব্বত্তট্ঠানঞ্চ সব্বং ৰিত্থারেন কারেসি.

ততো দস সহস্স চক্কৰাল়দেৰতাহি বুদ্ধ ভাৰায আযাচিতট্ঠানং অপুনরাৰত্তনং মাতুকুচ্ছিওক্কমনং মহামাযাদেৰিং সুদ্ধোদন মহারাজং লুম্বিনীৰনে জাতট্ঠানং অন্তলিক্খতো দ্ৰিন্নং উদকধারানং পতনং উত্তরাভিমুখং সত্তপদৰীতিহার গমনং কাল়দেৰল়স্স জটামত্থকে মহাপুরিসস্স পাদপতিট্ঠান অনতিৰত্তমানায জম্বুচ্ছাযায ধাতীনং পমাদং দিস্ৰা সিরিসযনে পল্লঙ্কে নিসীদিত্ৰা ঝানসমাপন্নট্ঠানঞ্চ কারেসি.

ততো রাহুল মাতরং রাহুল ভদ্দকঞ্চ কারেসি ততো একূন তিংসৰস্সকালে উয্যানে কীল়তত্থায গমন সমযে জিণ্ণ ৰ্যাধিত মত সঙ্খ্যাতে তযো দেৰদূতে দিস্ৰা নিৰত্তনট্ঠানং চতুত্থৰারে পব্বজিতরূপং দিস্ৰা সাধুপব্বজ্জাতি চিত্তং উপ্পাদেত্ৰা উয্যানং গন্ত্ৰা উয্যানসিরিং অনুভৰিত্ৰা সাযণ্হ সমযে নহাত্ৰা মঙ্গল সিলাপট্টে নিসিন্নমত্ত ৰিস্সকট্ঠানা অলঙ্করণট্ঠাণং ততো মজ্ঝিমরত্তিযং নাটকানং ৰিপ্পকারং দিস্ৰা কণ্থক হয ৰরমারুয্হ) মহাভিনিক্খমণং নিক্খমিতট্ঠানং দস সহস্স) চক্কৰাল় দেৰতাহি কত পূজাৰিধিং কণ্থকনিৰত্তন চেতিযট্ঠানং ¶ অনোমা নদীতীরে পব্বজ্জং রাজগহপ্পৰেসনং পণ্ডৰ পব্বতচ্ছ যায রঞ্ঞো বিম্বিসারম্ম রজ্জকরণত্থায আযাচনং সুজাতায দিন্ন খীরপাযাস পটিগ্গহণং নেরঞ্জরায নদিযা তীরে পাযাস পরিভোগং নদিযা পাতিৰিস্সট্ঠং পাটিহারিযং সালৰনে দিৰাৰিহার গতট্ঠানং সোত্থিযেন দিন্ন কুসতিণপটিগ্গহণং বোধিমণ্ডং আরুয্হ নিসিন্নট্ঠানঞ্চ সব্বং ৰিত্থারেন কারেসি.

ততো মহিণ্দত্থের পমুখে সত্ত সহ আগতে চ কারাপেসি. চতুসু দিসাসু খগ্গহত্থে চত্তারো মহারাজানো কারেসি ততো দ্ৰত্তিংস দেৰপুত্তে ততো সুৰণ্ণ দণ্ড দীপকধারা দ্ৰত্তিংস দেৰকুমারিযো ততো অট্ঠৰীসতি যক্খসেনাপতিনো ততো অঞ্জলিং পগ্গয্হ ঠিত দেৰতাযো ততো রতনময পুপ্পকলাপে গহেত্ৰা ঠিত দেৰতাযো ততো সুৰণ্ণঘটে গহেত্ৰা ঠিতি দেৰতাযো ততো নচ্চনক দেৰতাযো ততো তুরিযৰাদক দেৰতাযো ততো পচ্চেক সতসহস্সগ্ঘনকে দসহত্থপ্পমাণে আদাসে গহেত্ৰা ঠিত দেৰতাযো ততো তথেৰ সতসহস্সগ্ঘনক পুপ্ফ সাখাযো গহেত্ৰা ঠিতদেৰতাযো ততো চণ্দমণ্ডলে গহেত্ৰা ঠিতদেৰতাযো সূরিযমণ্ডলে গহেত্ৰা ঠিতদেৰতাযো ততো পদুমানি গহেত্ৰা ঠিত দেৰতাযো ততো ছত্তানি গহেত্ৰা ঠিতদেৰতাযো ততো ৰিচিত্তৰেসধরে মল্লদেৰপুত্তে ততো দুস্সপোঠন দেৰতাযো ততো রতনগ্ঘিকে গহেত্ৰা ঠিতদেৰতাযো ততো ধম্মচক্কাকি গহেত্ৰা ঠিতদেৰতাযো ততো খগ্গধরা দেৰতাযো ততো পঞ্চহত্থপ্পমাণ গণ্ধিতেলপূরিতা দুকূলৰট্টিযং পজ্জলিত দীপকঞ্চনন পাতিযো সীসেহি ধারেত্ৰা ঠিতদেৰতাযো চ কারাপেসি.

ততো চতুসুকণ্ণেসুফল়িকমযঅগ্ঘিয মত্থকে চত্তারোমহামণ ঠপাপেসি চতুসু কণ্ণেসু সুৰণ্ণ-মণি-মুত্ত-ৰজিরানং চত্তারো রাসিযো কারেসি ততো মেঘৰণ্ণ পাসাণভিত্তিযং ৰিজ্জুল্লতা কারেসি ততো রতন লতাযো ততো চাল়ৰিজতিযো ততো নিলুপ্পলে গহেত্ৰা ঠিত নাগমণৰিকাযো কারেসি.

রাজা এক্তিকানি রূপকানি ঘনকোট্টিম সুৰণ্ণেহেৰ কারেসি. অৰসেসম্পি পূজাৰিধিং সত্তরতনেহেৰ কারেসীতি. এত্থ চ ৰুত্তপ্পকারম্পন পূজনীযভণ্ডং অনন্তমপরিমাণং হোতি তথা হি অম্বপাসানৰাসী চিত্তগুত্তত্থেরোনাম হেট্ঠা লোহপাসাদে সন্নিপতিতানং দ্ৰাদসন্নং ভিক্খুসহস্সানং ধম্মং কথেন্তো রথৰিনীতসুত্তং আরভিত্ৰা মহা ধাতুনিধানং ৰণ্ণেন্তো একচ্চে ন সদ্দহিস্সন্তীতি মঞ্ঞমানো ওসক্কিত্ৰা কথেসি. তস্মিং খণে কোটপব্বতৰাসী মহাতিস্সত্থেরো ¶ নাম খীণাসৰো অৰিদূরে নিসীদিত্ৰা ধম্মং সুণন্তো আৰুসো ধম্মকথিক তৰ কথাতো পরিহীনম্পি অত্থি. অপচ্চো সককিত্ৰা ৰিত্থারেন কথেহীতি আহ. অথ ইমস্মিংযেৰ দীপে ভাতিয মহারাজা নাম সদ্দো পসন্নো অহোসি সো সাযং পাতং মহচেতিযং ৰন্দিত্ৰাৰ ভুঞ্জতি. একদিৰসং ৰিনিচ্ছযে নিসীদিত্ৰ দুব্বীনিচ্ছিতং অট্টং ৰিনিচ্ছিনন্তো অতিসাযং ৰুট্ঠিতো থূপৰণ্দনং ৰিস্সরিত্ৰা ভোজনে উপনীতে হত্থং ওতারেত্ৰা মনুস্সে পুচ্ছিঅজ্জ মযা অয্যকো ৰন্দিতো ন ৰন্দিতোতি. পোরাণক রাজানো হি সত্থারং অয্যকোতি ৰদন্তি. মনুস্সা ন ৰন্দিতো দেৰাতি আহংসু.

তস্মিং খণে রাজা হত্থেন গহিত ভত্তপিণ্ডং পাতিযং পাতেত্ৰা উট্ঠায দক্খিণদ্ৰারং ৰিৰরাপেত্ৰা আগন্ত্ৰা পাচীন দ্ৰারেন মহাচেতিযঙ্গণং আরুয্হ ৰন্দন্তো অন্তো ধাতুগব্ভে খীণাসৰানং ধম্মং ওসারণসদ্দং সুত্ৰা দক্খিণদ্ৰারেতি মঞ্ঞমানো তত্থ গন্ত্ৰা অদিস্ৰা এতেনেৰ নযেন ইতরানিপি দ্ৰারানি গন্ত্ৰা তত্থাপি অদিস্ৰা অয্যা ধম্মং ওসারেন্তো ৰিচরন্তীতি মঞ্ঞমানো ওলোকনত্থায চতুসু দ্ৰারেসু মনুস্সে ঠপেত্ৰা সযং পুন ৰিচরিত্ৰা অপস্সন্তো মনুস্সে পুচ্ছিত্ৰা বহিদ্ধা নত্থি ভাৰং ঞত্ৰা অন্তো ধাতুগব্ভে ভৰিস্সতিতি সন্নিট্ঠানং কত্ৰা পাচীনদ্ৰারে আসন্নতরে মহা চেতিযাভিমুখো হত্থপাদে পসারেত্ৰা জীৰিতুং পরিচ্চজিত্ৰা দল়্হসমাদানং কত্ৰা নিপজ্জি. সচে মা অয্যা ধাতুগব্ভং ন ওলোকাপেন্তি-সত্তাহং নিরাহারো হুত্ৰা সুস্সমানো ভূসমুট্ঠি ৰিয ৰিপ্পকিরিযমানোপি ন উট্ঠহিস্সামীতি. তস্স গুণানুভাৰেন সক্কস্স ভৰনং উণ্হাকারং দস্সেসি.

সক্কো আৰজ্জন্তো তং কারণং ঞত্ৰা অগন্ত্ৰা ধম্মং ওসারেন্তানং থেরানং এৰমাহ. অযং ভন্তে রাজা ধম্মিকো বুদ্ধসাসনে পসন্নো ইমস্মিং ঠানে সজ্ঝাযন সদ্দং সুত্ৰা ধাতুগব্ভং অপস্সিত্ৰা ন উট্ঠহিস্সামীতি দল়্হসমাদানং কত্ৰা নিপন্নো সচে ধাতুগব্ভং ন পস্সতি তত্থেৰ মরিস্সতি. তং পৰেসেত্ৰা ধাতু গব্ভং ওলোকাপেথাতি. থেরাপি তস্স অনুকম্পায ধাতুগব্ভং দস্সেতুং একং থেরং আণাপেসুং রাজানং আনেত্ৰা ধাতুগব্ভা ওলোকাপেত্ৰা পেসেহীতি. সো রঞ্ঞো হত্থে গহেত্ৰা ধাতুগব্ভং পৰেসেত্ৰা যথারুচিং ৰন্দাপেত্ৰা সব্বং সল্লক্খিতকালে পেসেসি রাজা নগরং গন্ত্ৰা অপরেন সমযেন ধাতুগব্ভে অত্তনা দিট্ঠরূপকেসু একদেসানি সুৰণ্ণখচিতানি কারেত্ৰা রাজঙ্গণে মহন্তং মণ্ডপং কারেত্ৰা তস্মিং মণ্ডপে ¶ তানি রূপকানি সংৰিদহাপেত্ৰা নগরে সন্নিপাতেত্ৰা ধাতুগব্ভে মযা দিট্ঠানি সুৰণ্ণরূপকানি ঈদিসানি আহ. তেসং রূপকানং নিযামেন কতত্তা নিযামক রূপকানি নাম জাতানি.

রাজা সংৰচ্ছরে সংৰচ্ছরে তানি রূপকানি নীহরাপেত্ৰা নাগরানং দস্সেসি পঠমং দস্সিতকালে নাগরা পসীদিত্ৰা একেক কুলতো একেকং দারকং নীহরিত্ৰা পব্বাজেসুং. পুন রাজা অয্যা এতং পকারং অজাননকা বহূ তেসম্পি আরোচেস্সামীতি ৰিহারং গন্ত্ৰা হেট্ঠা লোহপাসাদে ভিক্খুসঙ্ঘং সন্নিপাতেত্ৰা সযং ধম্মাসনগতো তিযাম রত্তিং ধাতুগব্ভে অধিকারং কথেত্ৰা পরিযোসাপেতুমসক্কান্তোসেৰ উট্ঠাসি. তত্থেকো ভিক্খু রাজানং পুচ্ছি-মহারাজ ত্ৰং পাতরাসভত্তং ভূত্ৰা আগতোসি. তিযাম রত্তিং ৰণ্ণেন্তো ধাতুগব্ভে পূজাৰিধিম্পি পরিযোসাপেতুং নাসক্খি অঞ্ঞম্পি বহুং অত্থিতি.

রাজা কিং কথেত ভন্তে, তুম্হাকং মযা কথিতং দসভাগেসু একভাগম্পি নপ্পহোতি. অহম্পন মযা সল্লক্খিত মত্তমেৰ কথেসিং. অনন্তং ভন্তে ধাতুগব্ভে পূজাৰিধানন্তি আহ এৰং অনন্তং পূজনীযভণ্ডং সমচতুরস্সে একেক পস্সতো অসীতি অসীতি হত্থপ্পমাণে ধাতুগব্ভে নিরন্তরং কত্ৰা পুরেতুম্পি ন সুকরং, পগেৰ যথারহং সংৰিধাতু তিট্ঠতু তাৰ ধাতুগব্ভো যাৰ মহাচেতিযে ৰালুক পাকার পরিচ্ছেদা নিরন্তরং পুরেতুম্পি ন সক্কা. তস্মা তং সব্বং পূজনীযভণ্ডং তত্থ কথং গণ্হীতি যদেত্থ ৰত্তব্বং পোরাণেহি ৰুত্তমেৰ.

নিগ্রো ধপিট্ঠি তেপিটক মহাসীৰত্থেরো কির রাজগেহে নিসিদিত্ৰা রঞ্ঞো দসবল সীহনাদসুততং কথেন্তো ধাতুনিধানং ৰণ্ণেত্ৰা সুত্তন্তং ৰিনিৰট্টেসি. রাজা থেরস্স এৰমাহ-অযং ভন্তে ধাতুগব্ভা সমচতুরস্সো, একেকপস্সতো অসীতি অসীতি হত্থপ্পমাণে এত্তকানি পূজনীয ভণ্ডানি এত্থ ট্ঠিতানীতি কো সদ্দহেস্সতিতি. থেরো আহ. ইণ্দসালগুহাকিত্তকপ্পমাণাতি তযা সুতপুব্বাতি. রাজা খুদ্দক মঞ্চকপ্পমাণা ভন্তেতি আহ. ততো থেরো আহ, মহারাজ অম্হাকং সত্থারা সক্কসস সক্ক পঞ্হসুত্তন্তং কথনদিৰসে গুহায কিত্তকা পরিসা ওসটাতি সুতপুব্বাতি. রাজা দ্ৰীসু ভন্তে দেৰলোকেসু দেৰতাতি আহ. এৰং সন্তে তম্পি অসদ্দহেয্যং নু মহারাজাতি থেরেন ৰুত্তে রাজা তং পন দেৰানং দেৰিদ্ধিযা অহোসি দেৰিদ্ধি নাম অচিন্তেয্যা ভন্তেতি আহ.

ততো থেরো মহারাজ তং একাযযেৰ দেৰিদ্ধিযা অহোসি. ইদং পন রঞ্ঞো রাজিদ্ধিযা দেৰানং দেৰিদ্ধিযা অরিযানং অরিযিদ্ধিযাতি ইমাহি ¶ তীহি ইদ্ধীহি জাতন্তি অৰোচ. রাজা থেরস্স ৰচনং সাধূতি সম্পটিচ্ছিত্ৰা থেরং সেতচ্ছত্তেন পূজেত্ৰা মত্থকে ছত্তং ধারেন্তো মহা ৰিহারং আনেত্ৰা পুন মহাচেতিযস্স সত্তাহং ছত্তং দত্ৰা জাতি সুমনপুপ্ফ পূজং অকাসীতি. এতস্সত্থস্স সাধনত্থমেৰ অঞ্ঞানিপি বহূনি ৰত্থূনি দস্সিতানি তানি কিন্তেহীতি অম্হে উপেক্খিতানি এত্থ চ রাজা মহেসক্খো মহানুভাৰো পূরিতপারমি কতাভিনীহারোতি তস্সৰসেন রাজিদ্ধিৰেদিতব্বা সক্কেন আণত্তেন ৰিস্সকম্মুনা দেৰপুত্তেন আদিতো পট্ঠায আৰিসিত্ৰা কতত্তা তস্স ৰসেন দেৰিদধি ৰেদিতব্বা, কম্মাধিট্ঠাযক ইণ্দগুত্তত্থেরো খুদ্দানুখুদ্দকং কম্মং অনুৰিধাযন্তো কারেসি ন কেৰলংথেরোযেৰ, সব্বেপি অরিযা অত্তনা অত্তনা কত্তব্ব কিচ্চেসু উস্সুক্কমাপন্নাযেৰ অহেসুন্তি ইমাহি তীহি ইদ্ধীহি কতন্তি ৰেদিতব্বং.

ইণ্দগুত্ত মহাথেরো-ছল়ভিঞ্ঞো মহামতি,

কম্মাধিট্ঠাযকো এত্থ-সব্বং সংৰিদহি ইমং;

সব্বং রাজিদ্ধিযা এতং দেৰতানঞ্চ ইদ্ধিযা;

ইদ্ধিযা অরিযানঞ্চ-অসম্বাধা পতিট্ঠিত’’ন্তি;

২৩. এৰং রাজা ধাতুগব্ভে কত্তব্ব কম্মং নিট্ঠাপেত্ৰা চাতুদ্দসি দিৰসে ৰিহারং গন্ত্ৰা ভিক্খুসঙ্ঘং সন্নিপাতেসি, সন্নিপত্তি ভিক্খূ তিংস সহস্সানি অহেসুং রাজা ভিক্খুসঙ্ঘং ৰন্দিত্ৰা এৰমাহ. ধাতুগব্ভে মযা কত্তব্বকম্মং নিট্ঠাপিতং, স্ৰে আসাল়ভিমুপোসথ দিৰসে উত্তরসাল়্হ নক্খত্তেন ধাতুনিধানং ভৰিস্সতি ধাতুযো জনাথ ভন্তেতি ভিক্খুসঙ্ঘস্স ভারং কত্ৰা নগরমেৰাগঞ্জি.

অথ ভিক্খুসঙ্ঘো ধাতু আহরণকং ভিক্খুং গৰেসন্তো পূজা পরিৰেণ ৰাসিকং সোল়স ৰস্সুদ্দেসিকং ছল়ভিঞ্ঞং সোণুত্তরং নাম সামণেরং দিস্ৰা তং পক্কোসাপেত্ৰা আৰুসো সোণুত্তর রাজা ধাতুগব্ভং নিট্ঠাপেত্ৰা ধাতু আভরণং ভিক্খুসঙ্ঘস্স ভারমকাসি. তস্মা তযা ধাতুযো আহরিতব্বাতি আহরামি ভন্তে ধাতুযো কুতো লচ্ছামীতি পুচ্ছি তস্স ভিক্খুসঙ্ঘো এৰমাহ. আৰুসো সোণুত্তর ততাগতো মরণমঞ্চে নিপন্নো সক্কং দেৰরাজানং আমন্তেত্ৰা ময্হং অট্ঠদোণপ্পমাণেসু সারীরিক ধাতুসু একং দোণং কোল়িযরাজুহি সক্কতং, অনাগতে তম্বপণ্ণি দীপে মহাচেতিযে পতিট্ঠহিস্সতীতি আহ.

অথ ¶ ভগৰতি পরিনিব্বুতে দোণ ব্রাহ্মণো ধাতুযো অট্ঠ কোট্ঠাসে কত্ৰা অট্ঠন্নং নগরৰাসীনং অদাসি তে অত্তনো অত্তনো নগরে চেতিযং কারেত্ৰা পরিহরিংসু তেসু রামগামে কোল়িযেহি কতচেতিযে মহোঘেন ভিন্নে ধাতুকরণ্ডকো সমুদ্দং পৰিসিত্ৰা রতনৰালুকা পিট্ঠে ছব্বণ্ণরংসি সমাকিণ্ণো অট্ঠাসি.

নাগা দিস্ৰা মঞ্জেরিক নাগ ভৰনং গন্ত্ৰা মহাকাল় নাগ রঞ্ঞো আরোচেসুং সো দসকোটি নাগ সহস্স পরিৰুতো আগন্ত্ৰা গণ্ধমালাদীহি পূজেত্ৰা সুৰণ্ণ-পৰাল়-মিণি-রজতধজে উস্সাপেত্ৰা পঞ্চঙ্গিক তুরিয পগ্গহীত নানাৰিধ নাগ নাটকানং মজ্ঝহতো ধাকুকরণ্ডং মণিচঙ্গোটকে ঠপেত্ৰা সীসেনাদায মহাসক্কার সম্মানং করোন্তো নাগভৰনং নেত্ৰা ছন্নৰুতি কোটিধনে পূজেত্ৰা সব্বরতনেহি চেতিযঞ্চ চেতিযঘরঞ্চ মাপেত্ৰা ধাতুযো পরিহরতি. মহাকস্সপত্থেরো অজাতসত্তুনো ধাতুনিধানং করোন্তো রামগামে ধাতুযো ঠপেত্ৰা সেস ধাতুযো আহরিত্ৰা অদাসি রাজা রামগামে ধাতুযো কস্মা নাহটাতি পুচ্ছি.

থেরো মহারাজ তাসং অন্তরাযো নত্থি অনাগতে তম্বপণ্ণিদীপে মহাচেতিযে পতিট্ঠহিস্সন্তীতি আহ. অসোকো ধম্মরাজাপি ধাতুনিধানং উগ্ঘাটেত্ৰা ওলোকেন্তো অট্ঠমং ধাতুদোণং অদিস্ৰা অপরং ধাতুং দোণং কত্থ ভন্তেতি পুচ্ছি মহারাজ তং কোল়িযেহি গঙ্গাতীরে কত চেতিযে পতিট্ঠিতং, মহোঘেন চেতিযে ভিন্নে মহাসমুদ্দং পাৰিসি.

তং নাগা দিস্ৰা অত্তনো নাগভৰনং নেত্ৰা পরিহরন্তীতি খীণাসৰা আহংসু রাজা নাগভৰনং নাম মম আণাপৰত্তনট্ঠানং, তম্পি আহরামি ভন্তেতি আহ. মহারাজ তা ধাতুযো অনাগতে তম্বপণ্ণিদীপে মহাচেতিযে পতিট্ঠহিস্সন্তিতি নিৰারেসুং. তস্মা ত্ৰং মঞ্ছেরিক নাগ ভৰনং গন্ত্ৰা তং পৰত্তিং নাগ রঞ্ঞো নিৰেদেত্ৰা ধাতুযো আহর, স্ৰে ধাতু নিধানং ভৰিস্সতীতি. সোণুত্তরো সাধূতি সম্পটিচ্ছিত্ৰা অত্তনো পরিৰেণং অগমাসি.

রাজাপি নগরং অন্ত্ৰা নগরে ভেরিং চরাপেসি- স্ৰে ধাতুনিধানং ভৰিস্সতি নাগরা অত্তনো অত্তনো ৰিভৰানুরূপেন অলঙ্করিত্ৰা গণ্ধমালাদীনি গহেত্ৰা মহাচেতিযঙ্গণং ওতরন্তুতি. সক্কোপি ৰিস্সকম্মং আণাপেসি-স্ৰে মহাচেতিযে ধাতুনিধানং ভৰিস্সতি. সকল তম্পপণ্ণিদীপং অলঙ্করোহীতি. সো পুনদিৰসে একূনযোজনসতিকং তম্বপণ্ণিদীপং কসীণমণ্ডলং ৰিয সমং কত্ৰা রজতপট্টসদিসং ৰালুকাকিণ্ণংপঞ্চৰণ্ণপুপ্ফসমাকূলং কত্ৰা ¶ সমন্ততো পুণ্ণঘটপন্তিযো ঠপাপেত্ৰা সাণীহি পরিক্খিপিত্ৰা উপরি চেলৰিতানং বণ্ধিত্ৰা পথৰিতলে থলপদুমানি আকাসে ওলম্বক পদুমানি দস্সেত্ৰা অলঙ্কত দেৰসভং ৰিয সজ্জেসি. মহাসমুদ্দঞ্চ সন্নিসিন্নং পঞ্চৰিধ পদুমসঞ্চন্নং অকাসি.

ধাতু আনুভাৰেন সকল চক্কৰাল়ং গব্ভোক্কমনাভিসম্বোধিকালাদিসু ৰিয সজ্জিতং অহোসি নাগরাপ নগর ৰীথিযো সম্মজ্জিত্ৰা মুত্তাফল সদিসং ৰালুকং ওকিরিত্ৰা লাজপঞ্চমক পুপ্ফানি সমোকিরিত্ৰা নানাৰিরাগ ধজপটাকাযো উস্সাপেত্ৰা সুৰণ্ণঘট কদলিতোরণ মালগঘিকাদীহি অলঙ্করিত্ৰা নগরং সজ্জেসু. রাজা নগরস্স চতুসু দ্ৰারেসু অনাথানং মনুস্সানং পরিভোত্থায নানাপ্পকার খাদনীয ভোজনীয গণ্ধমাল ৰত্থাভরণ পঞ্চৰিধি মুধৰাস সহিত তাম্বুলানি চ ঠপাপেসি.

অথ রাজা সব্বাভরণ ৰিভূসিতো কুমুদ পন্নৰণ্ণ চতুসিণ্ধৰযুত্ত রথৰরমারুয্হ অলঙ্কতং কণ্ডুলং হত্থিং পুরতো কত্ৰা সুৰণ্ণচঙ্গোটকং সীসে কত্ৰা সেতচ্ছত্তস্স হেট্ঠা অট্ঠাসি. তস্মিং খণে সক্কং দেৰরাজানং দেৰচ্ছরা ৰিয নানাভরণৰিভূসিতা দেৰকঞ্ঞুপমা অনেক সহস্স নাটকিত্থিযো চেৰ দসমহাযোধা চ চতুরঙ্গিনী সেনা চ রাজানং পরিৰারেসুং.

তথা অট্ঠুত্তর সহস্স ইত্থিযো চ পুণ্ণঘটে গরহত্ৰা পরিৰারেসুং. অট্ঠুত্তর সহস্স অট্ঠুত্তর সরস্সপ্পমাণেযেৰ পুরিসা চেৰ ইত্থিযো চ পুপ্ফসমুগ্গানি দণ্ডদীপিকা নানাৰণ্ণ ধজে চ গহেত্ৰা পরিৰারেসুং. এৰং রাজা মহন্তেন রাজানুভাৰেন নণ্দনৰনং নিক্খন্ত দেৰরাজা ৰিয নিক্খমি. তদা নানাৰিধ তুরিয ঘোসেহি চেৰ হত্থস্স রথ সদ্দেহি চ মহাপথৰিভিজ্জনাকারপ্পত্তা ৰিয অহোসি.

তস্মিং খণে সোণুত্তরো অত্তনো পরিৰেণেযেৰ নিসিন্নো তুরিয ঘোসেন রঞ্ঞো নিক্খন্তভাৰং ঞত্ৰা অভিঞ্ঞাপাদকং চতুত্থজ্ঝানং সমাপজ্জিত্ৰা অধিট্ঠযা পথৰিযং নিমুজ্জিত্ৰা মঞ্জেরিক নাগভৰনে মহাকাল়ানাগরঞ্ঞো পুরতো পাতুরহোসি. নাগরাজা সোণুত্তরং দিস্ৰা উট্ঠাযাসনা অভিৰাদেত্ৰা গণ্ধোদকেন পাদে ধোৰিত্ৰা ৰণ্ণ গণ্ধ সম্পন্ন কুসুমেহি পূজেত্ৰা একামন্তং নিসীদিত্ৰা কুতো আগতত্থ ভন্তেতি পুচ্ছি তম্বপণ্ণি দীপতো আগতম্হাহি ৰুত্তে কিমত্থাযাতি পুচ্ছি.

মহারাজ তম্বপণ্ণিদীপে দুট্ঠগামণি অভয মহারাজা মহা চেতিযং কারেন্তো ধাতুযো ভিক্খুসঙ্ঘস্স ভারমকাসি. মহাৰিহারে তিংসমত্তানি ভিক্খুসহস্সানি সন্নিপতিত্ৰা মহাথূপত্থায ঠপিতধাতুযো ¶ মহাকাল় নাগ রঞ্ঞো সন্তিকে ঠিতা, তস্স তং পৰত্তিং কথেত্ৰা ধাতুযো আহরাতি মং পেসেসুং, তস্মা ইধাগতোম্হীতি আহ.

তং সুত্ৰা নাগরাজা পব্বতেন ৰিয অজ্ঝোত্থটো মহন্তেন মদামনস্সেন অভিভূতো এৰং চিন্তেসি মযং পন ইমা ধাতুযো পূজেত্ৰা অপাযতো মুঞ্চিত্ৰা সগ্গে নিব্বত্তিস্সমাতি অমঞ্ঞিম্হ. অযং পন ভিক্খু মহিদ্ধিকো মহানুভাৰো, সচে ইমা ধাতুযো ইমস্মিং ঠানে ঠিতো ভৰেয্যুং, অম্হে অভিভৰিত্ৰাপি গণ্হিতুং সক্কুণেয্য. ধাতুযো অপনেতুং ৰট্টতীতি চিন্তেত্ৰা পরিসং ওলোকেন্তো পরিস পরিযন্তে ঠিতং ৰাসুলদত্তং নাম অত্তনো ভাগিনেয্যং দিস্ৰা তস্স সঞ্ঞমদাসি সো মাতুলস্স অধিপ্পাযং ঞত্ৰা চেতিযঘরং গন্ত্ৰা ধাতুকরণ্ডকং আদায গিলিত্ৰা সিনেরুপব্বত পাদমূলং গন্ত্ৰা-

যোজনসতামাৰট্টং দীঘং তিসত যোজনং,

ফণানেকসহস্সানি-মাপিসিত্ৰা মহিদ্ধিকো,

সিনেরু পাদমূলম্হি-ধুমাযন্তো চ পজ্জলং,

আভুজিত্ৰান সো ভোগে-নিপজ্জি ৰালুকাতলে;

‘‘অনেকানি সহস্সানি-অত্তনা সদিসে অহি,

মাপযিত্ৰা সযাপেসি-সমন্তা পরিৰারিতে,

বহূ দেৰা চ নাগা চ-ওসরিংসু তহিং তদা,

যুদ্ধং উভিন্নং নাগানং-সস্সিস্সাম মযং ইতি;’’

ততো নাগরাজা ভাগিনেয্যেন ধাতুযো অপনীতভাৰং ঞত্ৰা এৰমাহ- মম সন্তিকে ধাতুযো নত্থি, তুম্হে ইধ পপঞ্চ অকত্ৰা সীঘং গন্ত্ৰা ভিক্খুসঙ্ঘস্স তং পৰত্তিং আরোচেথ ভিক্খুসঙ্ঘো অঞ্ঞতো ধাতুং পরিযেসিস্সতীতি সামণেরো আদিতে পট্ঠায ধাতু আগমনং ৰত্ৰা ধাতুযো তৰ সন্তিকেযেৰ, পপঞ্চং অকত্ৰা দেহীতি চোদেসি.

ততো নাগরাজা সামণেরেন মূলম্হি গহিতভাৰং ঞত্ৰা যেন কেনচি পরিযাযেন ধাতুযো অদত্ৰাৰ পেসিতুং ৰট্টতীতি চিন্তেত্ৰা সামণেরং ধাতুঘরং নেত্ৰা চেতিযঞ্চ চেতিযঘরঞ্চ দস্সেসি. তং পন চেতিযঞ্চ চেতিযঘরঞ্চ সব্বরতনমযমেৰ অহোসি.

‘‘অনেকধা অনেকেহি রতনেহি সুসঙ্খতং,

চেতিযং চেতিযঘরং-পস্স ভিক্খু সুনিম্মিত’’ন্তি;

দস্সেত্ৰা চ পন চেতিযঘরতো ওরুয্হ অদ্ধচণ্দকপাসাণে পৰাল়পদুমম্হি ঠত্ৰা ইমস্স চেতিযস্স চেতিযঘরস্স চ অগ্ঘং করোহি ¶ ভন্তেতি আহ সামণেরো ন সক্কোম মহারাজ অগ্ঘং কাতুং, সকলেপি তম্ভপণ্ণিদীপে রতনানি ইমং অদ্ধচণ্দক পাসাণং নাগ্ঘতীতি আহ.

নাগরাজা এৰং সন্তে মহাসক্কারট্ঠানতো অপ্পসক্কারট্ঠানং ধাতূনং নযনং অযুত্তং ননু ভিক্খূতি আহ. সামণেরো এৰমাহমহারাজ বুদ্ধা নাম ধম্মগরুকা, ন আমিস গরুকং, তুম্হেসু চক্কৰাল়প্পমাণং রতনঘরং মাপেত্ৰা সব্বরতনস্স পূরেত্ৰা ধাতুযো পরিহরন্তেসুপি একনাগোপি ধম্মাভিসমযং কাতুং সমত্থো নাম নত্থি যস্মা-

‘‘সচ্চাভিসমযো নাগ-তুম্হাকম্পি ন ৰিজ্জতি. সচ্চাভিসমযট্ঠানং-নেতুং যুত্তঞ্হি ধাতুযো. সংসারদুক্খমোক্খায-উপ্পজ্জন্ত তথাগতা, বুদ্ধস্স ৰেত্থাদীপ্পাযো-তেন নেস্সামি ধাতুযো. ধাতুনিধানং অজ্জেৰ-সো হি রাজা করিস্সতি.

তস্মা পপঞ্চমকরিত্ৰা-লহুং মে দেহি ধাতুযে’’তি-আহ. এৰং ৰুত্তে নাগরাজা অপ্পটিহানো যুত্ৰা অত্তনো ভাগিনেয্যেন ধাতুযো গোপিতোতি মঞ্ঞমানো এৰমাহ. তুম্হে ভন্তে চেতিযে ধাতূনং অত্থিভাৰং ৰা নত্থিভাৰং ৰা অজানন্তা দেহি দেহীতি ৰদথ. অহং নত্থীতি ৰদামি. সচে পস্সথ গহেত্ৰা গচ্ছথাতি. গণ্হামি মহারাজাতি, গণ্হ ভিক্খূতি. গণ্হামি মহারাজাতি, গণ্হ ভিক্খূতি তিক্খত্তুং পটিঞ্ঞং গহেত্ৰা.

‘‘সুখুমং করং মাপযিত্ৰা-থিক্খূ তত্র ঠিতোচ সো,

ভাগিনেয্যস্স ৰদনে-হত্থম্পক্খিপ্প তাৰদে,

ধাতুকরণ্ডমদায-তিট্ঠ নাগাতি ভাসিহ,

নিমুজ্জিত্ৰা পথৰিযং-পরিৰেণম্হি উট্ঠহি;’’

তদা সামণেরস্স নাগেন সদ্ধিং যুদ্ধং পস্সিস্সামাতি সমাগতা দেৰ-নাগ পরিসাপ ভিক্খুনাগস্স ৰিজযং দিস্ৰা হট্ঠা পমোদিতো ধাতুযো পূজযন্তাৰ তেনেৰ সহ আগমুং, নাগরাজা সামণেরস্স গত কালে ভিক্খুং ৰঞ্চেত্ৰা পেসিতোম্হীতি হট্ঠতুট্ঠো ধাতুযো গহেত্ৰা আগমত্থায ভাগিনেয্যস্স সাসনং পেসেসি.

‘‘ভাগিনেয্যো’থ কুচ্ছিম্হি-অপস্সিত্ৰা করণ্ডকং,

পরিদেৰমানো আগন্ত্ৰা-মাতুলস্স নিৰেদযি;

তদা সো নাগরাজাপি-ৰঞ্চিতম্হ মযং ইতি,

পরিদেৰি নাগা সব্বেপি-পরিদেৰিংসু পিণ্ডিতা;’’

ততো ¶ নাগভৰনে সব্বে নাগা সমাগন্ত্ৰা কেসে মুঞ্চিত্ৰা উভোহি হত্থেহি হদযে গহেত্ৰা নীলুপ্পল সদিসেহি নেত্তেহি ৰিলীন সোকমিৰ অস্সুধারং পৰত্তযমানা-

‘‘পরিদেৰমানা আগন্ত্ৰা-নাগা সঙ্ঘস্স সন্তিকে,

বহুধা পরিদেৰিংস-ধাতাহরণ দুক্খিতা’’তি;

পরিদেৰিত্ৰা চ ভিক্খুসঙ্ঘস্স এৰমাহংসু- ভন্তে কস্সচি পীল়ং অকত্ৰা অম্হাকং পুঞ্ঞানুভাৰেন লভিত্ৰা চীরপরিহট ধাতুযো কস্মা অনৰসেসং কত্ৰা অহরাপেথ অম্হাকং সগ্গমোক্খন্তরাযং করোথাতি.

’তেসং সঙ্ঘো’নুকম্পায-থোকং ধাতুমদাপযি,

তে তেন তুট্ঠা গন্ত্ৰান-পূজাভণ্ডানি আহরুং;

ততো সক্কো দেৰানমিণ্দো ৰিস্সকম্মং আমন্তেত্ৰা সামণেরস্স উট্ঠিতট্ঠানে সত্তরতনমযং মণ্ডপং মাপেহীতি আহ. সো তস্মিযেৰ খণে মণ্ডপং মাপেসি অথ সক্কো দ্ৰীসু দেৰলোকেসু দেৰপরিসায পরিৰুতো সুৰণ্ণচঙ্গোটকেন সদ্ধিং রতন পল্লঙ্কমাদায আগন্ত্ৰা তস্মিং মণ্ডপে পতিট্ঠাপেত্ৰা সামণেরস্স হত্থতো ধাতুকরণ্ডকং গহেত্ৰা তস্মিং পল্লঙ্কে পতিট্ঠাপেসি. তদা-

’ব্রহ্মা ছত্তমধারেসি-সন্তুসিতো ৰালৰিজনিং,

মণিতালৰণ্টং সুযামো-সক্কো সঙ্খন্তু সোদকং;

চত্তারো তু মহারাজ-অট্ঠংসু খগ্গপাণিনো,

সমুগ্গহত্থা দ্ৰত্তিংসা-দেৰপুত্তা মহিদ্ধিকা;

পারিচ্ছত্তক পুপ্ফেহি পূজযন্তা তহিং ঠিতা,

কুমারিযোপি দ্ৰত্তিংসা-দণ্ডিদীপধরা ঠিতা;

পলাপেত্ৰা দুট্ঠযক্খে-যক্খসেনাপতি পন

অট্ঠৰীসতি অট্ঠংসু-আরক্খং কুরুমানকা;

ৰীণং ৰাদযমানোৰ-অট্ঠা পঞ্চসিখো তহিং,

রঙ্গভূমিং মাপযিত্ৰা-তিম্বরূ তুরিযঘোসৰা;

অনেকা দেৰপুত্তা চ-সাধুগীতপ্পযোজকা,

মহাকালো নাগরাজা-থূযমানো অনেকধা;

দিব্বতুরিযানি ৰজ্জন্তি-দিব্বসঙ্গিতি ৰত্ততি,

দিব্বগণ্ধা চ ৰস্সানি-ৰস্সাপেন্তি চ দেৰতা;

তদা ইণ্দগুত্তত্থেরো মারস্স পটিবাহনত্থায চক্কৰাল়পরিযন্তং কত্ৰা আকাসে লোহছত্তং মাপেসি. পঞ্চনিকাযিক থেরা ¶ ধাতুযো পরিৰারেত্ৰা পঞ্চসু ঠানেসু নিসীদিত্ৰা গণসজ্ঝাযমকংসু. তস্মিং কালে রাজা তং ঠনং আগন্ত্ৰা সিসতো সুৰণ্ণ চঙ্গোটকং ওতারেত্ৰা ধাতু চঙ্গোটকং অত্তনো চঙ্গোটকে ঠপেত্ৰা পল্লঙ্কে পতিট্ঠাপেত্ৰা গণ্ধমালাদীহি পূজেত্ৰা পঞ্চপতিট্ঠিতেন ৰন্দিত্ৰা সিরসি অঞ্জলিং পগ্গয্হ অক্খীনি উম্মীলেত্ৰা ওলোকেন্তো অট্ঠাসি. তস্মিং খণে ধাতুমত্থকে সেতচ্ছত্তং দিস্সতি ছত্তগাহক ব্রহ্মা ন দিস্সতি. তথা তালৰণ্ট ৰিজনি আদযো দিস্সন্তি গাহকা ন দিস্সন্তি দিব্বতুরিযঘোস সঙ্গিতিযো সুয্যন্তি গণ্ধব্ব দেৰতা ন দিস্সন্তি. রাজা এতং অচ্ছরিযং দিস্ৰা ইণ্দগুত্তত্থেরং এৰমাহ-দেৰতা দিব্বছত্তেন পূজেসুং অহং মানুস কচ্ছত্তেন পূজেমি ভন্নেতি. থেরো যুত্তং মহারাজাতি আহ. রাজা অত্তনো সুৰণ্ণপিণ্ডিকে সেতচ্ছত্তেন পূজেত্ৰা সুৰণ্ণভিংকারং গহেত্ৰা অভিসেকোদকং দত্ৰা তং দিৰসং সকলতম্বপণ্ণি দীপে রজ্জং অদাসি.

ততো সব্বতুরিযানি পগ্গণ্হিংসু, গণ্ধমালাদীহি পূজেত্ৰ মহন্তং সক্কারমকংসু পুন রাজা থেরং পুচ্ছি - অম্হাকং সত্থা দিব্বমানুসকানি দ্ৰে ছত্তানি ধারেসি ভন্তে. ন দ্ৰে ছত্তানি তীণি ছত্তানি মহারাজাতি. অঞ্ঞং ছত্তং নপস্সামি ভন্নেতি. সীলপতিট্ঠং সমাধিদণ্ডকং ইণ্দ্রিযসলাকং বলমালং মগ্গফলপত্ত সঞ্ছন্নং ৰিমুত্তিৰরসেতচ্ছত্তং উস্সাপেত্ৰা ঞাণাভিসেকম্পত্তো ধম্মরতন চক্কং পৰত্তেত্ৰা দসসহস্স চক্কৰাল়েসু বুদ্ধরজ্জং হত্থগতং কত্ৰা রজ্জং কারেসীতি রাজা তীণিচ্ছত্ত ধারকস্স সত্থুনো তিক্খত্তুং রজ্জং দম্মীতি তিক্খত্তুং ধাতুযো রজ্জেন পূজেসি.

ততো রাজা দেৰমনুস্সেসু দিব্বগণ্ধমালাদীহি পূজেন্তেসু অনেকেসু তুরিযঘোস সঙ্গিতেসু ৰত্তমানেসু ধাতুকরণ্ডকং সীসেনাদায রতনমণ্ডপতো নিক্খমিত্ৰা ভিক্খুসঙ্ঘ পরিৰুতো মহাচেতিযং পদক্খিণং কত্ৰা পাচীনদ্ৰারেনারুয্হ ধাতুগব্ভং ওতরি. ততো মহাচেতিযং পরিৰারেত্ৰা ছন্নৰুতি কোটিপ্পমাণ অরহন্তো অট্ঠংসু.

রাজা সীসতো ধাতুকরণ্ডকং ওতারেত্ৰা মহারহে সযনপিট্ঠে ঠপেস্সামীতি চিন্তেসি তস্মিং খণে ধাতুকরণ্ডকো রঞ্ঞো সীসতো সত্ত তালপ্পমাণে ঠানে গন্ত্ৰা সযমেৰ ৰিচরি ধাতুযো আকাসমুগ্গন্ত্ৰা দ্ৰত্তিংস মহা পুরিসলক্খণ অসিতি অনুব্যঞ্জনা ব্যামপ্পভা পতিমণ্ডিতং কেতুমালোপ সোভিতং নিল-পীত-লোহিতাদি ভেদ ৰিচিত্র রংসিজালা সমুজ্জলং বুদ্ধৰেসং গহেত্ৰা গণ্ডম্বমূলে ¶ যমক পাটিহারিযং সদিস যমক পাটিহারিযং অকংসু. তং ধাতুপাটিহারিযং দিস্ৰা পসীদিত্ৰা অরহত্তম্পত্তা দেৰমনুস্সা দ্ৰাদসকোটিযো অহেসুং. সেসফলত্তযং পত্তা গণনপথমতীতা অহেসুং. এৰং ধাতুযো অনেকধা পাটিহারিযং দস্সেত্ৰা বুদ্ধৰেসং ৰিস্সজ্জেত্ৰা করণ্ডকং পৰিসিত্ৰা তেন সদ্ধিং ওতরিত্ৰা রঞ্ঞো সীসে পতিট্ঠহিংসু.

রাজা অমতেন ৰিয অভিসিত্তো সফলং মনুস্সত্ত পটিলাভং মঞ্ঞমানো উভোহি হত্থেহি ধাতুকরণ্ডকং গহেত্ৰা নাটক পরিৰুতো অলঙ্কত সযন সমীপং গন্ত্ৰা ধাতুচঙ্গোটকং রতনপল্লঙ্কে ঠপেত্ৰা গণ্ধৰাসিতোদকেন হত্থে ধোৰিত্ৰা ৰতুজাতিয গণ্ধেন উব্বট্টেত্ৰা রতনকরণ্ডকং ৰিচরিত্ৰা ধাতুযো গহেত্ৰা এৰং চিন্তেসি.

‘‘অনাকুলা কেহিচিপি যদি হেস্সস্তি ধাতুযো,

জনস্স সরণং হুত্ৰা যদি ঠস্সন্তি ধাতুযো;

সত্থুনিপন্না কারেন পরিনিব্বান মঞ্চকে,

নিপজ্জন্তু সুপঞ্ঞত্তে-সযনম্হি মহারহে’’তি;

এৰং চিন্তেত্ৰা পন ৰরসযনপিট্ঠে ধাতুযো ঠপেসি তস্মিং খণে ধাতুযো রঞ্ঞা চিন্তিত নিযামেনেৰ মহারহে সযনে বুদ্ধৰেসেন সযিংসু.

‘‘আসাল়হি সুক্কপক্খস্স পন্নরস উপোসথে,

উত্তরাসাল়্হ নক্খত্তে এৰং ধাতু পতিট্ঠিতা;

সহ ধাতু পতিট্ঠানা অকম্পিত্থ মহামহী, পাটিহীরানি নেকানি পৰত্তিংসু অনেকধা.’’

তদহি উদকপরিযন্তং কত্ৰা অযং মহাপথৰী সঙ্কম্পি সম্পকম্পি সম্পৰেধি, মহাসমুদ্দো সঙ্খূভি, আকাসে ৰিজ্জুল্লতা নিচ্ছরিংসু. খণিকৰস্সং ৰস্সি, ছ দেৰলোকা এককোলাহল মহোসি রাজা এতং অচ্ছরিযং দিস্ৰা পসন্নো অত্তনো কঞ্চন মালিক সেতচ্ছত্তেন ধাতুযো পূজেত্ৰা তম্বপণ্ণিদিপে রজ্জং সত্তাহং দত্ৰা তিংস সতসহস্সগ্ঘনকং অলঙ্কার ভণ্ডং ওমুঞ্চিত্ৰা পূজেসি. তথা সব্বাপি নাটকিত্থিযো অমচ্চা সেস মহাজনো দেৰা চ সব্বাভরণানি পূজেসুং তস্মা-

তিট্ঠন্তং সুগতং তিলোকমহিতং যো পূজযে সাদরং,

যো ৰা সাসপ বীজমত্তম্পি তং ধাতুং নরো পূজযে;

তেসং পুঞ্ঞফলং সমানমীতি তং চিত্তপ্পসাদে সমে,

ঞত্ৰা তং পরিনিব্বুতেপি সুগতে ধাতুং বুধো পূজযে’তি;

ততো ¶ রাজা চীৰরৰত্থানি চেৰ গুল়-সপ্পি আদি ভেসজ্জানি চ সঙ্ঘস্স দত্ৰা সব্বরত্তিং গণসজ্ঝাযং কারেসি পুন দিৰসে নগরে ভেরিং চরাপেসি মহাজনো ইমং সত্তাহং গণ্ধমালাদীনি আদিয গন্ত্ৰা ধাতুযো ৰন্দতূতি ইণ্দগুত্তত্থেরোপি সকল তম্বপণ্ণি দীপে মনুস্সা ধাতুযো ৰন্দিতুকামা, তং খণংযেৰ আগন্ত্ৰা ৰন্দিত্ৰা যথাট্ঠানং গচ্ছন্তূতি অধিট্ঠাসি.

তে তথেৰ ধাতুযো ৰন্দিত্ৰা গমিংসু রাজা সত্তাহং সঙ্ঘস্স মহাদানং পৰত্তেত্ৰা সত্তাহস্স অচ্চযেন ধাতুগব্ভে মযা কত্তব্বকিচ্চং নিট্ঠাপিতং, ধাতুগব্ভং পিদহথ ভন্তেতি সঙ্ঘস্স আরোচেসি. সঙ্ঘো উত্তরসুমন সামণেরে আমন্তেত্ৰা তুম্হেহি পুব্বে আহট মেদৰণ্ণ পাসাণেন ধাতু গব্ভং পিদহথাতি আহ. তে সাধূতি সম্পটিচ্ছিত্ৰা ধাতুগব্ভং পিদহিংসু.

ততো খীণাসৰা ধাতুগব্ভে গণ্ধা মা সুসন্তু মালা মা মিলাযন্তু. দীপা মা নিব্বাযন্তু রতনানি মা ৰিৰণ্ণানি হোন্তু পূজনীযভণ্ডানি মা নস্সন্তু. মেদৰণ্ণ পাসাণা সন্ধীযন্তু, পচ্চত্থিকানং ওকাসো মা হোতূতি অধিট্ঠহিংসু.

এৰং রাজা ধাতু নিধাপেত্ৰা পুন নগরে ভেরিং চরাপেসি মহা চেতিযে ধাতুং নিধাপেত্ৰা ধাতুং আহরিত্ৰা নিধানং করোন্তূতি. মহাজনো অত্তনো অত্তনো বলানুরূপেন সুৰণ্ণ রজতাদি করণ্ডে কারাপেত্ৰা তত্থ ধাতুযো পতিট্ঠাপেত্ৰা ধাতুনিধানস্সুপরি মেদৰণ্ণ পাসাণ পিট্ঠিযং নিদহিংসু. সব্বেহি সন্নিহিত ধাতুযো সহস্সমত্তা অহেসুন্তি.

ইতি সাধুজন মনোপসাদনত্থায কতে থূপৰংসে ধাতুনিধান কথা নিট্ঠিতা.

২৪. ততো রাজা তং সব্বং পিদহেত্ৰা চেতিযং করোন্তো উদরেন সদ্ধিং চতুরস্স কোট্ঠকং নিট্ঠাপেসি অথ ছত্তকম্মে সুধাকম্মে চ অনিট্ঠিতেযেৰ মারণন্তিক রোগেন গিলানো হুত্ৰা দীঘৰাপিতো কনিট্ঠভাতরং পক্কোসাপেত্ৰা চেতিযে অনিট্ঠিতং ছত্তকম্মং সুধাকম্মঞ্চ সীঘং নিট্ঠাপেত্ৰা মং তোসেহি তাতাতি আহ. সো রঞ্ঞো দুব্বলভাৰং ঞত্ৰা অন্তরে অনিট্ঠিতকম্মং কাতুং ন সক্কাতি সুদ্ধৰত্থেহি কঞ্চুকং কারেত্ৰা চেতিযে পটিমুঞ্চাপেত্ৰা চিত্তকারেহি কঞ্চুক মত্থকে ৰেদিকা চ পুণ্ণঘট পঞ্চঙ্গুলি পন্তিযো চ কারাপেসি.

নল়কারেহি ৰেল়ুময ছত্তং কারেত্ৰা খরপত্তমযে চণ্দসূরিযমণ্ডলে মুদ্ধনি ৰেদিকা কারেত্ৰা লাখাকুকুট্ঠকেহি তং ৰিচিত্তং কত্ৰা থূপকম্মং নিট্ঠিতন্তি রঞ্ঞো অরোচেসি রাজা তেন হি মং ¶ মহাচেতিযং দস্সেহীতি ৰত্ৰা সিৰিকায নিপজ্জিত্ৰা চেতিযা পদক্খিণং কত্ৰা দক্খিণদ্ৰারে ভূমিসযনং পঞ্ঞাপেত্ৰা তত্থ নিপন্নো দক্খিণেন পস্সেন সযিত্ৰা মহাথূপং ৰামপস্সেন সযিত্ৰা লোহপাসাদং ওলোকেন্তো পসন্ন চিত্তো অহোসি. তদা রঞ্ঞো সাসনস্স বহূপকারভাৰং সল্লক্খেত্ৰা গিলান পুচ্ছনত্থায ততো ততো আগতা ভিক্খু ছন্নৰুতি কোটিযো রাজানং পরিৰারেত্ৰা অট্ঠংসু. ততো সঙ্ঘো ৰগ্গ ৰগ্গা হুত্ৰা গণসজ্ঝাযং অকাসি.

রাজা তস্মিং সমাগমে থেরপুত্তাভযত্থেরং অদিস্ৰা এৰং চিন্তেসি. সো মযি দমিল়েহি সদ্ধিং অট্ঠৰীসতি মহাযুদ্ধে কযিরমাসে অপচ্চোসককিত্ৰা ইদানি মরণযুদ্ধে ৰত্তমাণে ময্হং পরাজযং দিস্ৰা মঞ্ঞে নাগচ্ছতীতি. তদা থেরো করিণ্দ নদী সীসে পজ্জলিত পব্বতে ৰসন্তো রঞ্ঞো পরিৰিতক্কং ঞত্ৰা পঞ্চসত খীণাসৰ পরিৰুসেতা আকাসেনাগন্ত্ৰা রঞ্ঞো পুরতো পাতুরহোসি.

রাজা থেরং দিস্ৰা অত্তনো পুরতো নিসীদাপেত্ৰা এৰমাহ ভন্তে তুম্হেহি সদ্ধিং দসমহা যোধে গহেত্ৰা দমিল়েহি সদ্ধি যুজ্ঝিং. ইদানি এককোৰ মচ্চূনা সদ্ধিং যুজ্ঝিতুং আরভিং. মচ্চু সত্তুম্পন পরাজেতুং ন সক্কোমীতি. ততো-

থেরপুত্তাভযত্থেরো মা ভাযি মনুজাধিপ,

কিলেস সত্তুং অজিনিত্ৰা অজেয্যো মচ্চূসত্তুকো;

ইতি ৰত্ৰা এৰং অনুসাসি. মহারাজ সব্বোযেৰ লোক সন্নিৰাসে জাতিযা অনুগতো, জরায অনুসটো, ৰ্যাধিনা অভিভূতো, মরণেন অব্ভাহতো. তেতাহ-

‘‘যথাপি সেলা ৰিপুলা-নহং আহচ্চ পব্বতা,

সমন্তা অনুপরিযেয্যুং-নিপ্পোথেন্তা চতুদ্দিসং;

এৰং জরা চ মচ্চু চ-অধিৰত্তন্তি পাণিনো,

খত্তিযো ব্রাহ্মণে ৰেস্সে সুদ্দে চণ্ডাল পুক্কুসে,

ন কিঞ্চি পরিৰজ্জেতি-সব্বমেৰাভিমদ্দতি;

ন তত্থ হত্থিনং ভূমি-ন রথানং ন পত্তিযা,

ন চাপি মন্তযুদ্ধেন-সক্কা জেতুং ধনেন ৰা’’তি;

তস্মা ইদং মরণং নাম মহাযসানং মহাসম্মতাদীনং মহা পুঞ্ঞানং জোতিযাদীনং মহাথামানং বলদেৰাদীনং ইদ্ধিমন্তানং মহামোগ্গল্লানাদীনং পঞ্ঞাৰন্তানং সারিপুত্তাদীনং সযম্ভূঞাণেন অধিগত সচ্চানং, পচ্চেকবুদ্ধানং সব্বগুণসমন্নাগতানং সম্মাসম্বুদ্ধানম্পি উপরি নিরাসঙ্কমেৰ পততি কিমঙ্গপনঞ্ঞেসু সত্তেসু.

মহাযসা রাজৰরা গতা তে সব্বে মহাসম্মত আদযোপি,

অনিচ্চভাৰং বলদেৰ আদি মহাবলা চেৰ তথা গমিংসু;

যে পুঞ্ঞৰন্তানি গতা পসিদ্ধিং মহদ্ধনং জোতিযমেণ্ডকাদী,

উপাৰিসিং ৰচ্চুমুখং সভোগা সব্বেপি তে রাহুমুখং সসীৰ;

যো ইদ্ধিমন্তেসু তথাগতস্স পুত্তেসুসেট্ঠো ইতি ৰিস্সুতোপি,

থেরো মহারাজসহেৰ ইদ্ধিবলেন সো মচ্চুমুখং পৰিট্ঠো;

সব্বেসু সত্তেসু জিনং ঠপেত্ৰা নেৰত্থি পঞ্ঞায সমোপি যেন,

সো ধম্মসেনাপতি সাৰকোপি গতো মহারাজ অনিচ্চতং’চ;

সযম্ভূঞাণস্স বলেন সন্তিং গতা মহারাজ সযম্ভূনোপি,

সব্বেপি তে ঞাণবলূপ পন্না অনিচ্চতং নেৰ অতিক্কমিংসু;

তিলোকনাথো পুরিসুত্তমো সো অনিচ্চভাৰং সমতিক্কমিত্ৰা,

নাসক্খি গন্তুং সুগতোপি রাজ অঞ্ঞেসু সত্তেসু কথাৰ নত্থি;

তস্মা মহারাজ ভৰেসু সত্তা সব্বেপি নাসুং মরণা ৰিমুত্তা,

সব্বম্পি সঙ্খারগতং অনিচ্চং দূক্খং অনত্তাতি ৰিচিন্তযস্সু;

‘‘দুতিযে অত্তভাৰেপি ধম্মচ্ছণ্দো মহা হি তে,

উপট্ঠিতে দেৰলোকে হিত্ৰা দিব্বসুখং তুৰং;

ইধাগম্ম বহুং পুঞ্ঞং অকাসি চ অনেকধা,

করণম্পেক রজ্জস্স সাসনজ্জোতনায তে;

মহা রাজ কতং পুঞ্ঞং যাৰজ্জ দিৰসা তযা,

সব্বং অনুস্সরেথেৰ সুখং সজ্জু ভৰিস্সতি;

তং সুত্ৰা তুট্ঠমানসো রাজা ভন্তে তুম্হে মচ্চুযুদ্ধেপি অপস্সযাতি ৰত্ৰা লদ্ধস্সাসো পুঞ্ঞপোত্থকং ৰাচেতুং আণাপেসি লেখকো পুঞ্ঞপোত্থকং এৰং ৰাচেসি.

‘‘একূনসতৰিহারা মহারাজেন কারিতা,

একূনসতকোটীহি ৰিহারো মরিচট্টি চ;

উত্তমো লোহপাসাদো তিংসকোটীহি কারিতো,

মহাথূপে অনগ্ঘানি কারিতা চতুৰীসতি;

মহাথূপম্হি সেসানি করিতানি সুবুদ্ধিনা,

কোটিসহস্সং অগ্ঘন্তি মহারাজ তযা পুন;

কোল়ম্ব নাম মলেয অক্খক্খাযিক ছাতকে,

কুণ্ডলানি মহগ্ঘানি দুৰে দত্ৰান গণ্হিয;

খীণাসৰানং ¶ পঞ্চন্নং মহাথেরানমুত্তমো,

দিন্নো পসন্নচিত্তেন কঙ্গু অম্বিল পিণ্ডকো;

চূল়ঙ্গণিয যুদ্ধম্হি পরজ্ঝিত্ৰা পলাযতা,

কালং ঘোসাপযিত্ৰান আগতস্স ৰিহাযসা;

খীণাসৰস্স যতিনো অত্তানমনপেক্খিয,

দিন্নং সরক ভত্তন্তি পুঞ্ঞপোত্থং অৰাচযি;

২৫. তং সুত্ৰা রাজা তুস্সিত্ৰা ঠপেহি ঠপেহি ভণেতি ৰত্ৰা এৰমাহ. মরিচৰট্টি ৰিহারমহসত্তাহে থূপারম্হসত্তাহে চ চাতুদ্দিস উভতো সঙ্ঘস্স মহারহং মহাদানং পৰত্তেসিং. চতুৰীসতি মহাৰিসাখপূজা কারেসিং তম্বপণ্ণিদীপে মহাভিক্খুসঙ্ঘস্স তিক্খত্তুং চীৰরমদাসিং সত্ত সত্ত দীনানি লঙ্কা রজ্জং সাসনস্স পঞ্চক্খত্তুং অদাসিং সপ্পি সন্নিত্ত সুপরিসুদ্ধ ৰট্টিযা দ্ৰাদসঠানেসু, সত্তং দীপসহস্সং জালেসিং অট্ঠারস্সু ঠানেসু গিলানানং ৰেজ্জেহি ভেসজ্জঞ্চ ভত্তঞ্চ নিচ্চং দাপেসি. চতুচত্তালীস ঠানেসু তেলুল্লোপকঞ্চ অদাসিং. তত্তকেসুযেৰ ঠানেসু ঘতপক্কজালপূৰে ভত্তেন সদ্ধিং নিচ্চং দাপেসিং.

মাসে মাসে অট্ঠসু উপোসথদিৰসেসু লঙ্কাদীপে সব্বৰিহারেসু দীপতেলং দাপেসিং. আমিস দানতো ধম্মদানং মহন্তন্তি সুত্ৰা হেট্ঠং লোহপাসাদে ধম্মাসনে নিসীদিত্ৰা মঙ্গল সুত্তং ওসারেতুং আরভিত্ৰাপি সঙ্ঘ গারৰেন ওসারেতুং নাসক্খিং. ততো পট্ঠায ধম্মদেসকে সক্করিত্ৰা সব্বৰিহারেসু ধম্মকথং কথাপেসিং একেকস্স ধম্মকথিকস্স নাল় নাল়িপ্পমাণানি সপ্পিফাণিত সক্খরানি চতুরঙ্গুল মুট্ঠিপ্পমাণং যট্ঠিমধুকং সাটকদ্ৰযঞ্চ মাসস্স অট্ঠসু উপোসথ দিসেসু দাপেসিং. এতং সব্বম্পি ইস্সরিযে ঠত্ৰা দিন্নত্তা মম চিত্তং স আরাধেতি. জীৰিতং পন অনপেক্খিত্ৰা দুগ্গতেন মযা দিন্নদানদ্ৰযমেৰ আরাধেতীতি.

তং সুত্ৰা অভযত্থেরো মহারাজ পসাদনীযট্ঠানেযেৰ পসাদং অকাসি তং পন পিণ্ডপাতদ্ৰযং পরিস্স পীল়ং অকত্ৰা লদ্ধ ধম্মিক পচ্চযত্তা অত্তানং অনৰলোকেত্ৰা অসজ্জমানেন দিন্নত্তা পটিগ্গাহকানং যাৰদত্থং কত্ৰা দিন্নত্তা পীতিপামোজ্জংজনযিত্ৰা বলৰ সদ্ধায দিন্নত্তা দেয্যধম্মস্স নিরৰসেসং পরিভোগং গতত্তাতি ইমেহি পঞ্চহি কারণেহি মহন্তত্তি ৰত্ৰা মহারাজ কঙ্গু অম্বিলি পিণ্ডগাহকত্থেরেসু মলিযমহাদেৰত্থেরো সমন্তকূটে পঞ্চন্নং ভিক্খুসতানং দত্ৰা পরিভুঞ্জি পথৰি চালনক ধম্মগুত্তত্থেরো কল্যাণীয ৰিহারে পঞ্চন্নং ভিক্খুসতানং দত্ৰা পরিভুঞ্জি.

তলঙ্গরৰাসী ¶ ধম্মগুত্তত্থেরোপি পিযঙ্গুদীপে দ্ৰাদসন্নং ভিক্খুসহস্সানং দত্ৰা পরিভুঞ্জি. মঙ্গণৰাসী চুল়তিস্সত্থেরো কেলাসকূটে ৰিহারে সট্ঠিসহস্সানং ভিক্খূনং দত্ৰা পরিভুঞ্জি মহাভগ্গত্থেরোপি উক্কানগর ৰিহারে সত্তসতানং ভিক্খূনং দত্ৰা পরিভুঞ্জি সরক ভত্তগাহকত্থেরো পন পিযঙ্গুদীপে দ্ৰাদসন্নং ভিক্খুসহস্সানং দত্ৰা পরিভোগমকাসীতি ৰত্ৰা রঞ্ঞো চিত্তং হাসেসি.

রাজা চিত্তং পসাদেত্ৰা এৰমাহ-অহম্ভন্তে চতুৰীসতি ৰস্সানি রজ্জং কারেন্তো ভিক্খুসঙ্ঘস্স পহূপকারো অহোসিং. কাযোপি মে সঙ্ঘস্স উপকারকো হোতু সঙ্ঘদাসস্স মে সরীরং মহাচেতিযস্স দস্সনট্ঠানে সঙ্ঘস্স কম্মমালকে ঝাপেথাতি. ততো কনিট্ঠং আমন্তেত্ৰা’তাত! তিস্স! মহাথূপে অনিট্ঠিতং কম্মং সাধুকং নিট্ঠাপেসি. সাযং পাতো চ মহাথূপে পুপ্ফপূজং কারেত্ৰা তিক্খত্তুং উপহারং কারেহি. মযা ঠপিতং দানৰট্টং সব্বং অপরিহাপেত্ৰা সঙ্ঘস্স কত্তব্বকিচ্চেসু সদা অপ্পমত্তো হোহী’তি অনুসাযিত্ৰা তুণ্হি অহোসি.

তস্মিং খণে ভিক্খু গণসজ্ঝাযং আরভিংসু দেৰতা পন ছদেৰ লোকতো ছ রথে গহেত্ৰা আদায পটিপাটিযা ঠপেত্ৰা মহারাজ অম্হাকং দেৰলোকো রমণীযো, অম্হাকং দেৰলোকো রমণীযোতি ৰত্ৰা অত্তনো অত্তনো দেৰলোকং আগমনত্থায যাচিংসু রাজা তেসং ৰচনং সুত্ৰা যাৰাহং ধম্মং সুণামি- তাৰ অধিৰাসেথাতি তে হত্থসঞ্ঞায নিৰারেসি সঙ্ঘো গণসজ্ঝাযং নিৰারেসীতি মঞ্ঞিত্ৰা সজ্ঝাযং ঠপাপেসি.

রাজা কস্মা ভন্তে গণসজ্ঝাযং ঠপেথাতি আহ. মহারাজ তযা হত্থসঞ্ঞায নিৰারিতত্তাতি. ভন্তে তুম্হাকং সঞ্ঞং নাদাসিং. দেৰতা ছদেৰলোকতো ছ রথে আনেত্ৰা অত্তনো অত্তনো দেৰলোকং গন্তুং যাচন্তি তস্মা তেসং যাৰাহং ধম্মং সুণামি তাৰ আগমেথাতি সঞ্ঞং অদাসিন্তি তং সুত্ৰা কেচি অযং রাজা মরণভযভিতো ৰিপ্পলপতি, মরণতো অভাযনক সত্তো নাম নত্থীতি মঞ্ঞিংসু.

ততো অভযত্থেরো আহ কথং মহারাজ সদ্দহিতুং সক্কা ছ দেৰলোকতো ছ রথা আনীতাতি তং সুত্ৰা রাজা আকাসে পুপ্ফদামানি খিপাপেসি. তানি গন্ত্ৰা ৰিসুং রথধুরে ওলম্বিংসু মহাজনো আকাসে ওলম্বন্তানি পুপ্ফদামানি দিস্ৰা নিক্কঙ্খো অহোসি.

ততো রাজা থেরং পুচ্ছি-কতমো পন ভন্তে দেৰলোকো রমণীযোতি. তুসিতভৰনং পন মহারাজ রমণীযং, বুদ্ধভাৰায সমযং ওলোকেন্তো মেত্তেয্যো বোধিসত্তোপি তস্মিংযেৰ ৰসতীতি আহ.

তং ¶ সুত্ৰা রাজা তস্মিং আলযং কত্ৰা মহাথূপং ওলোকেন্তো নিপন্নোৰ চৰিত্ৰা সুত্তপ্পবুদ্ধো ৰিয তুসিত ভৰনতো আহট. রথে নিব্বত্তিত্ৰা অত্তনো কতপুঞ্ঞস্স থলং মহাজনস্স পাকটং কাতুং রথেযেৰ ঠত্ৰা দিব্বাভরণ ৰিভূসিতো মহাজনস্স পস্সন্তস্সেৰ তিক্খত্তুং মহাথূপং পদক্খিণং কত্ৰা ভিক্খুসঙ্ঘঞ্চ ৰন্দিত্ৰা তুসিতভৰনং অগমাসি.

এৰং অসারে নিচযে ধনানং অনিচ্চসঙ্ঘং সত্তং সপঞ্ঞা,

কত্ৰন চাগং রতনত্তযমহি আদায সারং সুগতিং ৰজন্তি;

রঞ্ঞো নাটকত্থিযো মতভাৰং ঞত্ৰা যত্থ ঠিতা মকুল়ং মোচযিংসু তত্থং ঠানে কতসালা মকুল়মুত্তসালানামজাতা. রঞ্ঞো সরীরস্মিং চিতকং আরোপিতে যত্থ মহাজনো হত্থে পগ্গহেত্ৰা ৰিরচি. তত্থ কতসালা ৰিরচিত্থসালা নাম জাতা. রঞ্ঞো সরীরং যত্থ ঝাপেসুং - সো সীমামালকো রাজমালকো নাম জাতো. অথ রঞ্ঞো কনিট্ঠভাতা সদ্ধাতিস্সমহারাজা নাম হুত্ৰা চেতিযে অনিট্ঠতং জত্তকম্মং সুধাকম্মঞ্চ নিট্ঠাপেত্ৰা থূপমকাসীতি

ইতি সাধুজন মনোপসাদনত্থায কতে থূপৰংসে মহাচেতিযে কতা নিট্ঠিতা.

২৬. এতরহি দুট্ঠগামণি অভয মহারাজস্স পিতা কাকৰণ্ণতিস্স রাজা মেত্তেয্যস্স ভগৰতো পিতা ভৰিস্সতি. ৰিহারমহাদেৰী মাতা ভৰিস্সতি. দুট্ঠগামিণি অভযো অগ্গসাৰকো ভৰিস্সতি. কনিট্ঠো দুতিয সাৰকো ভৰিসসতি. রঞ্ঞো পিতুচ্ছা অনুল়াদেৰী অগ্গমহেসী ভৰিস্সতি. রঞ্ঞো পুত্তো সালি রাজকুমারো পুত্তো ভৰিস্সতি. ভণ্ডাগারিক সঙ্ঘামচ্চো অগ্গুপট্ঠাকো ভৰিস্সতি তস্সামচ্চস্স ধীতা অগ্গুপট্ঠাযিকা ভৰিস্সতীতি এৰং সব্বেপি কতাধিকারা হেতু সম্পন্না তস্স ভগৰতো ধম্মং সুত্ৰা দুক্খস্সন্তং করিত্ৰা অনুপাদিসেসায নিব্বানধাতুযা পরিনিব্বাযিস্সন্তীতি.

মহিণ্দসেন নামম্হি ৰসন্তো পরিৰেণকে,

পত্তচীৰরপাদো? যো পিটকত্তয পারগো;

সদ্ধাসিলগুণুপেতো সব্বসত্তহিতে রতো,

তেন সাধু সমজ্ঝিট্ঠো যমহং কাতুমারভিং;

সোদানি নিট্ঠং সম্পত্তো থূপৰংসো অনাকুলো,

পরিপুণ্ণো সঙ্খথা সাধু পণ্ডিতেহি পসংসিতো;

যং ¶ পত্তং কুসলং কম্মং করোন্তেন ইমং মযং,

তেন এতেন পুঞ্ঞেন সত্তা গচ্ছন্তু নিব্বুতিং;

পরিসম্ভিদামগ্গস্স যেন লীলত্থ দীপনি

টীকা ৰিরচিতা সাধু সদ্ধম্মোদয কামিনা;

তথা পকরণে সচ্চসঙ্খেপে অত্থদীপনা,

ধীমতা সুকতা যেন সুট্ঠু সীহল় ভাসতো

ৰিসুদ্ধিমগ্গ সঙ্খেপে যেন অত্থপ্পকাসনা,

যোগী নমুপকারায কতা সীহল়ভাসতো;

পরক্কম নরিণ্দস্স সব্বভূপান কেতুনো,

ধম্মাগারে নিযুত্তো যো পিটকত্তয পারগো;

সাসনং সুট্ঠিতং যস্স অন্তেৰাসিক ভিক্খুসু,

তেন ৰাচিস্সরত্থের পাদেন লিখিতো অযন্তি;