📜
দাঠাৰংসো ¶
নমো তস্স ভগৰতো অরহতো সম্মাসম্বুদ্ধস্স
ৰিসারদং ৰাদপথাতি ৰত্তিনং,
তিলোকপজ্জোতমসয্হসাহিনং;
অসেস ঞেয্যাৰরণপ্পহাযিনং,
নমামি সত্থারমনন্তগোচরং.
২. ¶
তিলোক নাথপ্পভৰং ভযাপহং,
ৰিসুদ্ধৰিজ্জাচরণেহি সেৰিতং;
পপঞ্চ সংযোজনবন্ধনচ্ছিদং,
নমামি ধম্মং নিপুণং সুদুদ্দসং.
পসাদমত্তেন’পি যত্থ পাণিনো,
ফূসন্তি দুক্খক্খযমচ্চুতং পদং;
তমাহুণেয্যং সুসমাহিতিন্দ্রিযং,
নমামি সঙ্ঘং মুনিরাজসাৰকং.
ৰিভুসযং কাল়কনাগরন্ৰ যং,
পরক্কমো কারুণিকো চমূপতি;
গৰেসমানো জিনসাসনস্স যো,
ৰিরূল়্হিমত্থঞ্চ জনস্স পত্থযং.
৫. ¶
সুধামযূখামল পণ্ডুৰংসজং,
ৰিরূল়্হসদ্ধং মুনিরাজসাসনে;
পিযং ৰদং নীতিপথানুৰত্তিনিং,
সদা পজানং জনিকং’ৰ মাতরং.
পিযং পরক্কন্তিভুজস্স রাজিনো,
মহেসি মচ্চুন্নতখুদ্ধিসম্পদং;
ৰিধায লীলাৰতিমিচ্ছিতত্থদং,
অসেস লঙ্কাতলরজ্জলক্খিযং.
কুমারমারাধিতসাধুমন্তিনং,
মহাদযং পণ্ডুনরিন্দ ৰংসজং;
ৰিধায সদ্ধং মধুরিন্দনামকং,
সুসিক্খীতং পাৰচনে কলাসু চ.
৮. ¶
নরিন্দসুঞ্ঞং সুচিরং তিসীহল়ং,
ইতিপ্পতীতং অযসং অপানুদি;
চিরং পণীতেন চ চিৰরাদিনা,
সুসঞ্ঞতে সংযমিনো অতপ্পযি.
চিরট্ঠিতিং পাৰচনস্স ইচ্ছতা,
কতঞ্ঞুনা ৰিক্কম বুদ্দিসালিনা;
সতীমতা চন্দিম বন্ধুকিত্তিনা,
সগারৰং তেন’ভীযাচিতো অহং.
সদেস ভাসায কৰীহি সীহল়ে,
কতম্পি ৰংসং জিনদন্তধাতুযা;
নিরুত্তিযা মাগধিকায ৰুদ্ধিযা,
করোমি দীপন্তরৰাসিনং অপি.
১১. ¶
জীনো’যমিদ্ধে অমরৰ্হযে পুরে,
কদাচি হুত্ৰান সুমেধনামকো;
সৰেদৰেদঙ্গৰিভাগকোৰিদো,
মহদ্ধনে ৰিপ্পকুলম্হি মাণৰো.
অহঞ্হি জাতিব্যসনেন পীল়িতো,
জরাভিভুতো মরণেন ওত্থটো;
সিৰং পদং জাতিজরাদিনিস্সটং,
গৰেসযিস্সং’তি রহো ৰিচিন্তিয.
অনেকসঙ্খং ধনধঞ্ঞসম্পদং,
পতিট্ঠপেত্ৰা কপণেসি দুচ্চজং;
অনপ্পকে পেমভরানুবন্ধিনো,
ৰিহায মিত্তে চ সুতেচ বন্ধৰে.
১৪. ¶
পহায কামে নিখিলে মনোরমে,
ঘরাভিনিক্খম্ম হিমাচলন্তিকে;
মহীধরং ধম্মিকনাম ৰিস্সুতং,
উপেচ্চ নানাতরুরাজিভুসিতং.
মনোনুকূলে সুররাজনিম্মীতে,
অসম্মিগানং অগতিম্হি অস্সমে;
নিৰত্তচীরো অজিনক্খিপং ৰহং,
জটাধরো তাপস ৰেসমগ্গহী.
সুসঞ্ঞতত্তোপরিৰারি তিন্দ্রিযো,
ফলাফলাদীহি পৰত্তযং তনুং;
গতো অভিঞ্গ্ঞাসু চ পারমিং ৰসী,
তহিং সমাপত্তি সুখং অৰিন্দি সো.
১৭. ¶
সুসজ্জিতে রম্মপুরাধিৰাসিনা,
মহাজনেন’ত্তমনেন অঞ্জসে;
পথপ্পদেসে অভিযন্তমত্তনো,
অনিট্ঠিতেযেৰ সুমেধ তাপসো.
অগাধঞেয্যোদধীপারদস্সিনং,
ভৰন্তগুং নিব্বনথং ৰিনাযকং;
অনেকখীণাসৰলক্খসেৰিতং,
কদা চি দীপঙ্করবুদ্ধমদ্দস.
ততো সসঙ্ঘস্স তিলোকভত্তুনো,
পরিচ্চজিত্ৰান তনুম্পি জীৰিতং;
পসারযিত্ৰান জটাজিনাদিকং,
ৰিধায সেতুং তনুমেৰ পল্ললে.
২০. ¶
অনক্কমিত্ৰা কললং মহাদযে,
সভিক্খুকো গচ্চতু পিট্ঠিযা ইতি;
অধিট্ঠহিত্ৰান নিপন্নকো তহিং,
অনাথ মেতং তিভৰং সমেক্খিয.
দযায সঞ্চোদিতমানসো জনে,
ভৰণ্ণৰা উদ্ধরিতুং দুখদ্দিতে;
অকাসি সম্বোধিপদস্স পত্তিযা,
মহাভিনীহারমুদগ্গৰিক্কমো.
২২. ¶
অথো ৰিদিত্ৰা ৰসিনো তমাসযং,
অদাসি সো ৰ্যাকরণং মহামুনি;
ততো পুরং তম্হি তথাগতে গতে,
সযংৰসী সম্মসি পারমিগুণে.
ততো চ কপ্পানমলীনৰিক্কমো,
অসংখিযে সো চতুরো সলক্খকে;
তহিং তহিং জাতিসু বোধিপাচনে,
ৰিসুদ্ধসম্ভারগুণে অপূরযি;
অথাভিজাতো তুসিতে মহাযসো,
ৰিসুদ্ধসম্বোধিপদোপলদ্ধিযা;
উদিক্খমানো সমযং দযাধনো,
চিরং ৰিভুতিং অনুভোসি সব্বসো.
২৫. ¶
সহস্সসঙ্খা দসচক্কৰালতো,
সমাগতানেকসুরাধিপাদিহি;
উদগ্গুদগ্গেহি জিনত্তপত্তিযা,
সগারৰং সো অভিগম্ম যাচিতো.
ততো চৰিত্ৰা কপিল়ৰ্হযে পুরে,
সদা সতো সক্যকুলেককেতুনো;
অহোসি সুদ্ধোদনভুমিভত্তুনো,
মহাদিমাযায মহেসিযা সুতো.
২৭. ¶
ৰিজাতমত্তো’ৰ ৰসুন্ধরায সো,
পতিট্ঠহিত্ৰান দিসা ৰিলোকযী;
তদা অহেসুং ৰিৰটঙ্গনা দিসা,
অপূজযুং তত্থ চ দেৰমানুসা.
আধারযুং আতপৰারণাদিকং,
অদিস্সমানাৰ নভম্ভি দেৰতা;
পদানি সো সত্ত চ উত্তরামুখো,
উপেচ্চ নিচ্ছারযি ৰাচমাসভিং.
যথত্থসিদ্ধত্তকুমারনামকো,
মহব্বলো যোব্বনহারিৰিগ্গহো;
উতুত্তযানুচ্ছৰিকেসু তীসু সো,
নুভোসি পাসাদৰরেসু সম্পদং.
৩০. ¶
কদাচি উয্যানপথে জরাহতং,
তথাতুরং কালকতঞ্চ সংযমিং;
কমেন দিস্ৰান ৰিরত্তমানসো,
ভৰেসু সো পব্বজিতুং অকামযি.
সপুপ্ফদীপাদীকরেহি রত্তিযং,
পুরক্খতো সো তিদিৰাধিৰাসিহি;
সছন্নকো কন্তকৰাজিযানতো,
ততো মহাকারুণিকো’ভিনিক্খমি.
কমেন পত্ৰান অনোমমাপগং,
সুধোতমুত্তাফলহারিসেকতে;
পতিট্ঠহিত্ৰা ৰরমোল়িবন্ধনং,
সিতাসিলূনং গগনে সমুক্খিপী.
৩৩. ¶
পটিগ্গহেত্ৰা তিদসানমিস্সরো,
সুৰণ্নচঙ্গোটৰরেন তং তদা;
তিযোজনং নীলমণীহি চেতিযং,
অকাসি চূল়ামণিমত্তনো পুরে.
ততো ঘটীকারসরোজযোনিনা,
সমাহটং ধারযী চীৰরাদিকং;
অথো সকং ৰত্থযুগং নভত্থলে,
পসত্থৰেসগ্গহণো সমুক্খিপী.
পটিগ্গহেত্ৰান তমম্বুজাসনো,
মহিদ্ধিকো ভত্তিভরেন চোদিতো;
সকে ভৰে দ্ৰাদসযোজনং অকা,
মণীহি নীলাদিহি দুস্সচেতিযং.
৩৬. ¶
সুসঞ্ঞতত্তো সতিমা জিতিন্দ্রিযো,
ৰিনীতৰেসো রসগেধৰজ্জিতো;
ছহাযনানেৰ অনোমৰিক্কমো,
মহাপধানং পদহিত্থ দুক্করং.
ৰিসাখমাসস্সথ পুণ্ণমাসিযং,
উপেচ্চ মূলং সহজায বোধিযা;
তিণাসনে চুদ্দসহত্থসম্মিতে,
অধিট্ঠহিত্ৰা ৰীরিযং নিসজ্জি সো.
অৰত্থরন্তিং ৰসুধংচ অম্বরং,
ৰিরূপৰেসগ্গহণেন ভিংসনং;
পকম্পযন্তো সধরাধরং মহিং,
জিনো পদোসে’জিনি মারৰাহিণিং.
৩৯. ¶
সুরাসুরব্রহ্মগণেহি সজ্জিতে,
জগত্তযে পুপ্ফমযগঘিকাদিনা;
পৰত্তমানে সুরদুন্দুভিস্সরে,
অবুজ্ঝিবোধিং রজনীপরিক্খযে.
তদা পকম্পিংসু সসেলকাননা,
সহস্সসংখা দসলোকধাতুযো;
অগঞ্জি সো লোণপযোধি সাধুতং,
মহাৰভাসো ভুৰনেসু পত্থরী.
লভিংসু অন্ধা ৰিমলে ৰিলোচনে,
সুণিংসু সদ্দে বধিরাপি জাতিযা;
লপিংসু মূগা ৰচনেন ৰগ্গুনা,
চরিংসু খেলং পদসা’ৰ পঙ্গুলা.
ভৰিংসু খুজ্জা উজুসোম্মৰিগ্গহা,
সিখী’পি নিব্বাযি অৰীচিআদিসু;
অপাগমুং বন্ধনতো’পি জন্তৰো,
খুদাদিকং পেতভৰা অপক্কমী.
৪৩. ¶
সমিংসু রোগৰ্যসনানি পাণিনং,
ভযং তিরচ্চানগতে ন পীল়যী;
জনা অহেসুং সখিলা পিযংৰদা,
পৰত্তযুং কোঞ্চনদং মতঙ্গজা.
হযা চ হেসিংসু পহট্ঠমানসা,
নদিংসু সব্বা সযমেৰ দুন্দুভী;
রৰিংসু দেহাভরণানি পাণিনং,
দিসা পসীদিংসু সমা সমন্ততো.
পৰাযি মন্দো সুখসীতমারুতো,
পৰস্সি মেঘো’পি অকালসম্বৰো;
জহিংসু আকাসগতিং ৰিহঙ্গমা,
মহিং সমুভিজ্জজলং সমুট্ঠহী.
অসন্দমানা’ৰ ঠিতা সৰন্তিযো,
নভে ৰিরোচিংসু অসেসজোতিযো;
ভৰা অহেসুং ৰিৰটা সমন্ততো,
জনস্স নাসুং ৰচনূপপত্তিযো.
৪৭. ¶
সমেক্খতং নাৰরণা নগাদযো,
পৰাযি গন্ধো অপি দিব্বসম্মতো;
দুমা অহেসুং ফলপুপ্ফ ধারিনো,
অহোসি ছন্নো কমলেহি অণ্ণৰো.
থলেসু তোযেসু চ পুপ্ফমানকা,
ৰিচিত্তপুপ্ফা ৰিকসিংসু সব্বথা;
নিরন্তরং পুপ্ফসুগন্ধৰুট্ঠিযা,
অহোসি সব্বং ৰসুধম্বরন্নরং.
নিসজ্জ পল্লঙ্কৰরে তহিং জিনো,
সুখং সমাপত্তিৰিহারসম্ভৰং;
ততো’নুভোন্তো সুচিরাভিপত্থিতং,
দিনানি সত্তেৰ অতিক্কমাপযী.
৫০. ¶
সমুপ্পতিত্ৰা গগণঙ্গনং ততো,
পদস্সযিত্ৰা যমকং মহামুনি;
সপাটিহীরং তিদিৰাধিৰাসিনং,
জিনত্তনে সংসযিতং নিরাকরি.
অথোতরিত্ৰান জযাসনস্স সো,
ঠিতো’ৰ পুব্বুত্তরকণ্ণনিস্সিতো;
দিনানি সত্তানিমিসেন চক্খুনা,
তমাসনং বোধিতরুংচ’পূজযি.
অথ’ন্তরাল়ে মণিচঙ্কমে জিনো,
ঠিতপ্পদেসস্স চ আসনস্স চ;
মহারহে দেৰৰরাভিনিম্মিতে,
দিনানি সত্তেৰ অকাসি ৰঙ্কমং.
৫৩. ¶
ততো দিসাযং অপরায বোধিযা,
উপাৰিসিত্ৰা রতনালযে জিনো;
সমন্তপট্ঠাননযং ৰিচিন্তযং,
দিনানি সত্তেৰ সৰীতিনামযি.
ৰিনিগ্গতো সত্থুসরীরতো তদা,
জুতিপ্পবন্ধো পটিবন্ধৰজ্জিতো;
পমাণসুঞ্ঞাসু চ লোকধাতুসু,
সমন্ততো উদ্ধমধো চ পত্থরী.
ৰটস্স মূলে অজপালসঞ্ঞিনো,
সুখং ফুসন্তো পৰিৰেকসম্ভৰং;
ৰিনাযকো সত্ত ৰিহাসি ৰাসরে,
অনন্তদস্সী সুররাজপূজিতো.
৫৬. ¶
ৰিহাসি মূলে মুচলিন্দসাখিনো,
নিসজ্জ ভোগাৰলিমন্দিরোদরে;
ৰিকিণ্ণপুপ্ফে মুচলিন্দভোগিনো,
সমাধিনা ৰাসরসত্তকং জিনো.
দুমে’পি রাজাযতনে সমাধিনা,
ৰিহাসি রত্তিন্দিৰ সত্তকং মুনি;
সহস্সনেত্তো অথ দন্তপোণকং,
মুখোদকঞ্চাপি অদাসি সত্থুনো.
ততো মহারাজৰরেহি আভতং,
সিলামযং পত্ত চতুক্কমেককং;
ৰিধায মত্থং মধুপিণ্ডিকং তহিং,
পটিগ্গহেত্ৰান সৰাণিজাহটা.
৫৯. ¶
কতন্নকিচ্চো সরণেসু তে উভো,
পতিট্ঠপেত্ৰান তপস্সুভল্লিকে;
অদাসি তেসং অভিপূজিতুং সকং,
পরামসিত্ৰান সিরং সিরোরুহে.
ৰটস্সমুলে অজপালসঞ্ঞিনো,
সহম্পতীব্রহ্মৰরেন যাচিতো;
জনস্স কাতুং ৰরধম্মসঙ্গহং,
অগঞ্ছি বারাণসিমেককো মুনি.
৬১. ¶
গন্ত্ৰা সো ধম্মরাজা ৰনমিসিপতনং সঞ্ঞতানং নিকেতং,
পল্লঙ্কস্মিং নিসিন্নো তহিমৰিচলিতট্ঠানসম্পাদিতম্হি;
আসাল়্হে পুণ্ণমাযং সিতরুচিরুচিযা জোতিতে চক্কৰাল়ে,
দেৰব্রহ্মাদিকানং দুরিতমলহরং ৰত্তযি ধম্মচক্কং.
সুত্ৰা সদ্ধম্মমগ্গং তিভূৰনকুহরাভোগৰিত্থারিকং তং,
অঞ্ঞাকোণ্ডঞ্ঞনামদ্ৰিজমুনিপমুখাট্ঠারসব্রহ্মকোটী;
অঞ্ঞাসুং মগ্গধম্মং পরিমিতরহিতে চক্কৰাল়ে উল়ারো,
ওভাসো পাতুভুতো সপদি বহুৰিধং আসি অচ্ছেরকঞ্চ.
পঠমো পরিচ্ছেদো.
৬৩. ¶
ততো পট্ঠায সো সত্থা ৰিনেন্তো দেৰমানুসে,
বোধিতো ফুস্সমাসম্হি নৰমে পুণ্ণমাসিযং.
লঙ্কমাগম্ম গঙ্গায তীরে যোজনৰিত্থতে,
মহানাগৰনুয্যানে আযামেন তিযোজনে.
যক্খানং সমিতিং গন্ত্ৰা ঠত্ৰান গগনে তহিং;
ৰাতন্ধকারৰুট্ঠিহি কত্ৰা যক্খে ভযদ্দিতে.
লদ্ধাভযেহি যক্খেহি তেহি দিন্নায ভুমিযা;
চম্মখণ্ডং পসারেত্ৰা নিসীদিত্ৰান তঙ্খণে.
চম্মখণ্ডং পদিত্তগ্গি জালামালাসমাকুলং;
ইদ্ধিযা ৰড্ঢযিত্ৰান যাৰ সিন্ধুং সমন্ততো.
৬৮. ¶
জৰেন সিন্ধুৰেলায রাসিভুতে নিসাচরে;
গিরিদীপমিধানেত্ৰা পতিট্ঠাপেসি তে তহিং.
দেসযিত্ৰা জিনো ধম্মং তদা দেৰসমাগমে;
বহুন্নং পাণকোটীনং ধম্মাভিসমযং অকা.
মহাসুমনদেৰস্স সেলে সুমনকূটকে;
দত্ৰা নমস্সিতুং কেসে অগা জেতৰনং জিনো.
পতিট্ঠপেত্ৰা তে সত্থু নিসিন্নাসনভুমিযং;
ইন্দনীলমযং থূপং করিত্ৰা সো অপূজযি.
নিস্সায মণিপল্লঙ্কং পব্বতণ্ণৰৰাসিনো;
দিস্ৰা যুদ্ধত্থিকে নাগে চূল়োদর মহোদরে.
বোধিতো পঞ্চমে ৰস্সে চিত্তমাসে মহামুনি;
উপোসথে কালপক্খে নাগদীপমুপাগমী.
৭৪. ¶
তদা সমিদ্ধিসুমনো দেৰো জেতৰনে ঠিতং;
অত্তনো ভৰনংযেৰ রাজাযতনপাদপং.
ইন্দনীলদ্দিকূটং’ৰ গহেত্ৰাতুট্ঠমানসো;
ধারযিত্ৰা সহাগঞ্ছি ছত্তং কত্ৰান সত্থুনো.
উভিন্নং নাগরাজূনং ৰত্তমানে মহাহৰে;
নিসিন্নো গগনে নাথো মাপযিত্থ মহাতমং.
আলোকং দস্সযিত্ৰাথ অস্সাসেত্ৰান ভোগিনো;
সামগ্গিকরণং ধম্মং অভাসি পুরিসাসভো.
অসীতিকোটিযো নাগা অচলম্বুধিৰাসিনো;
পতিট্ঠহিংসু মুদিতা সীলেসু সরণেসু চ.
৭৯. ¶
দত্ৰান মণিপল্লঙ্কং সত্থুনো ভুজগাধিপা;
তত্থাসীনং মহাৰীরং অন্নপানেহি তপ্পযুং.
পতিট্ঠপেত্ৰা সো তত্থ রাজাযতনপাদপং;
পল্লঙ্কং তঞ্চ নাগানং অদাসি অভিপূজিতুং.
বোধিতো অট্ঠমে ৰস্সে ৰেসাখে পুণ্ণমাসিযং;
মণিঅক্খিকনামেন নাগিন্দেন নিমন্তিতো.
নাগরাজস্স তস্সেৰ ভৰনং সাধু সজ্জীতং;
কল্যাণিযং পঞ্চভিক্খূ সতেহি সহ আগমি.
কল্যাণিচেতিযট্ঠানে কতে রতন মণ্ডপে;
মহারহম্হি পল্লঙ্কে উপাৰিসি নরাসভো.
দিব্বেহি খজ্জভোজ্জেহি সসঙ্ঘং লোকনাযকং;
সন্তপ্পেসি ফণিন্দো সো ভুজঙ্গেহি পুরক্খতো.
৮৫. ¶
দেসযিত্ৰান সদ্ধম্মং সগ্গমোক্খসুখাৰহং;
সো সত্থা সুমনে কূটে দস্সেসি পদলঞ্ছনং.
ততো পব্বতপাদম্হি সসঙ্ঘো সো ৰিনাযকো;
দিৰাৰিহারং কত্ৰান দীঘৰাপিং উপাগমি.
থূপট্ঠানে তহিং বুদ্ধো সসঙ্ঘো’ভিনিসীদিয;
সমাপত্তি সমুবভুতং অৰিন্দি অসমং সুখং.
মহাবোধিতরুট্ঠানে সমাধিং অপ্পযি জিনো;
মহাথূপপ্পদেসে চ ৰিহরিত্থ সমাধিনা.
থূপারামম্হি থূপস্স ঠানে ঝানসুখেন সো;
সভিক্খুসঙ্ঘো সম্বুদ্ধো মুহুত্তং ৰীতিনামযী.
৯০. ¶
সিলাথুপপ্পদেসম্হি ঠত্ৰাকালাৰিদূ মুনি;
দেৰে সমনুসাসিত্ৰা ততো জেতৰনং অগা.
অগিদ্ধো লাভসক্কারে অসয্হমৰমাননং;
সহন্তো কেৰলং সব্ব লোকনিত্থরণত্থিকো.
সংৰচ্ছরানি ঠত্ৰান চত্তাল়ীসঞ্চ পঞ্চ চ;
দেসযিত্ৰান সুত্তাদি নৰঙ্গং সত্থুসাসনং.
তারেত্ৰা ভৰকন্তারা জনে সঙ্খ্যাতিৰত্তিনো;
বুদ্ধকিচ্চানি সব্বানি নিট্ঠাপেত্ৰান চক্খুমা.
৯৪. ¶
কুসিনারাপুরে রঞ্ঞং মল্লানমুপৰত্তনে;
সালৰনম্হি যমকসালরুক্খানমন্তরে.
মহারহে সুপঞ্ঞত্তে মঞ্চে উত্তরসীসকং;
নিপন্নো সীহসেয্যায ৰেসাখে পুণ্ণমাসিযং.
দেসেত্ৰা পঠমে যামে মল্লানং ধম্মমুত্তমং;
সুভদ্দং মজ্ঝিমে যামে পাপেত্ৰা অমতং পদং.
ভিক্খু পচ্ছিমযামম্হি ধম্মক্খন্ধে অসেসকে;
সঙ্গয্হ ওৰদিত্ৰান অপ্পমাদ পদেন চ.
পচ্চুসসমযে ঝানসমাপত্তিৰিহারতো;
উট্ঠায পরিনিব্বাযি সেসোপাদিৰিৰজ্জিতো.
৯৯. ¶
মহীকম্পাদযো আসুং তদা অচ্ছরিযাৰহা;
পূজাৰিসেসা ৰত্তিংসু দেৰমানুসকা বহূ.
পরিনিব্বাণসুত্তন্তে ৰুত্তানুক্কমতো পন;
পূজাৰিসেসো ৰিঞ্ঞেয্যো ইচ্ছন্তেহি অসেসতো.
অহতেহি চ ৰত্থেহি ৰেঠেত্ৰা পঠমং জিনং;
ৰেঠযিত্ৰান কপ্পাসপিচুনা ৰিহতেন চ.
এৰং পঞ্চসতক্খত্তুং ৰেঠযিত্ৰান সাধুকং;
পক্খিপিত্ৰা সুৰণ্ণায তেলপুণ্ণায দোণিযা.
ৰীসংহত্থসতুব্বেধং গন্ধদারূহি সঙ্খতং;
আরোপযিংসু চিতকং মল্লানং পমুখা তদা.
মহাকস্সপথেরেন ধম্মরাজে অৰন্দিতে;
চিতকং মা জলিত্থাতি দেৰধিট্ঠানতো পন.
১০৫. ¶
পামোক্খা মল্লরাজূনং ৰাযমন্তোপ’নেকধা;
চিতকং তং ন সক্খিংসু গাহাপেতুং হুতাসনং.
মহাকস্সপথেরেন অধিট্ঠানেন অত্তনো;
ৰত্থাদীনি মহাদোণিং চিতকঞ্চ মহারহং.
দ্ৰিধা কত্ৰান নিক্খম্ম সকসীসে পতিট্ঠিতা;
ৰন্দিতা সত্থুনো পাদা যথাট্ঠানে পতিট্ঠিতা.
ততো দেৰানুভাৰেন পজ্জলিত্থ চিতানলো;
ন মসি সত্থুদেহস্স দড্ঢস্সাসি ন ছারিকা.
ধাতুযো অৰসিস্সিংসু মুত্তাভা কঞ্চনপ্পভা;
অদিট্ঠানেন বুদ্ধস্স ৰিপ্পকিণ্ণা অনেকধা.
১১০. ¶
উণ্হীসং অক্খকা দ্ৰে চ চতস্সো দন্তধাতুযো;
ইচ্চেতা ধাতুযো সত্ত ৰিপ্পকিণ্ণা ন সত্থুনো.
আকাসতো পতিত্ৰাপি উগ্গন্ত্ৰাপি মহীতলা;
সমন্তা জলধারাযো নিব্বাপেসুং চিতানলং.
থেরস্স সারিপুত্তস্স অন্তেৰাসি মহিদ্ধিকো;
সরভুনামকো থেরো পভিন্ন পটিসম্ভিদো.
গীৰাধাতুং গহেত্ৰান চিততো মহিযঙ্গণে;
পতিট্ঠপেত্ৰা থূপম্হি অকা কঞ্চুকচেতিযং.
খেমৰ্হযো কারুণিকো খীণসংযোজনো মুনি;
চিতকা তো ততো ৰামদাঠাধাতুং সমগ্গহি.
অট্ঠন্নমথ রাজুনং ধাতুঅত্থায সত্থুনো;
উপ্পন্নং ৰিগ্গহং দোণো সমেত্ৰান দ্ৰিজুত্তমো.
১১৬. ¶
কত্ৰান অট্ঠ কোট্ঠাসে ভাজেত্ৰা সেসধাতুযো;
অদাসি অট্ঠরাজূনং তং তং নগরৰাসিনং.
হট্ঠতুট্ঠা গহেত্ৰান ধাতুযো তা নরাধিপা;
গন্ত্ৰা সকে সকে রট্ঠে চেতিযানি অকারযুং.
একা দাঠা সুরিন্দেন একা গন্ধারৰাসিহি;
একা ভুজঙ্গরাজূহি আসি সক্কতপূজিতা.
দন্তধাতুং ততো খেমো অত্তনা গহিতং অদা;
দন্তপুরে কলিঙ্গস্স ব্রহ্মদত্তস্স রাজিনো.
দেসযিত্ৰান সো ধম্মং ভেত্ৰা সব্বা কুদিট্ঠিযো;
রাজানং তং পসাদেসি অগ্গম্ভী রতনত্তযে.
১২১. ¶
অজ্ঝোগাল়্হো মুনিন্দস্স ধম্মামতমহণ্ণৰং;
সো নরিন্দোপৰাহেসি মলং মচ্ছরিযাদিকং.
পাৰুস্সকো যথা মেঘো নানা রতনৰস্সতো;
দাল়িদ্দিযনিদাঘং সো নিব্বাপেসি নরুত্তমো.
সুৰণ্ণখচিতালম্ব মুত্তাজালেহি সোভিতং;
কূটাগারসতাকীণ্ণং তরুণাদিচ্চসন্নিভং.
নানারতনসোভায দুদিক্খং চক্খুমূসনং;
যানং সগ্গাপৰগ্গস্স পসাদাতিসযাৰহং.
কারযিত্ৰান সো রাজা দাঠাধাতুনিৰেসনং;
ধাতুপীঠঞ্চ তত্থেৰ কারেত্ৰা রতনুজ্জলং.
তহিং সমপ্পযিত্ৰান দাঠাধাতুং মহেসিনো;
পূজাৰত্থূহি পূজেসি রত্তিন্দিৰমতন্দিতো.
১২৭. ¶
ইতি সো সঞ্চিনিত্ৰান পুঞ্ঞসম্ভার সম্পদং;
জহিত্ৰা মানুসং দেহং সগ্গকাযমলঙ্করি.
অনুজাতো ততো তস্স কাসিরাজৰ্হযো সুতো;
রজ্জং লদ্ধা অমচ্চানং সোকসল্লমপানুদী.
পুপ্ফগন্ধাদিনা দন্তধাতুং তমভিপূজিয;
নিচ্চং মণিপ্পদীপেহি জোতযি ধাতুমন্দিরং.
ইচ্চেৰমাদিং সো রাজা কত্ৰা কুসলসঞ্চযং;
জহিত্ৰান নিজং দেহং দেৰিন্দপুরমজ্ঝগা.
সুনন্দো নাম রাজিন্দো আনন্দজননো সতং;
তস্স’ত্রজো ততো আসি বুদ্ধসাসনমামকো.
সম্মানেত্ৰান সো দন্তধাতুং ঞেয্যন্তদস্সিনো;
মহতা ভত্তিযোগেন অগা দেৰসহৰ্যতং.
১৩৩. ¶
ততো পরঞ্চ অঞ্ঞে’পি বহৰো ৰসুধাধিপা;
দন্তধাতুং মুনিন্দস্স কমেন অভিপূজযুং.
গুহসীৰৰ্হযো রাজা দুরতিক্কম সাসনো;
ততো রজ্জসিরিং পত্ৰা অনুগণ্হি মহাজনং.
সপরত্থানভিঞ্ঞে সো লাভসক্কারলোলুপে;
মাযাৰিনো অৰিজ্জন্ধে নিগন্ঠে সমুপট্ঠহি.
ৰস্সারত্তে যথা চন্দো মোহক্খন্ধেন আৰটো;
নাসক্খী গুণরংসীহি জলিতুং সো নরাসভো.
ধম্মমগ্গা অপেতে’পি পৰিট্ঠে দিট্ঠিকাননং;
তস্মিং সাধুপথং অঞ্ঞে নাতিৰত্তিংসু পাণিনো
১৩৮. ¶
হেমতোরণমালাহি ধজেহি কদলিহি চ;
পুপ্ফগঘিযেহি’নেকেহি সজ্জেত্ৰা নাগরা পুরং
মঙ্গলত্থুতি ঘোসেহি নচ্চগীতাদিকেহি চ;
হেমরূপিযপুপ্ফেহি গন্ধচুণ্ণাদিকেহি চ.
পূজেন্তা মুনিরাজস্স দাঠাধাতুং কুদাচনং;
অকংসু একনিগ্ঘোসং সংৰট্টম্বুধিসন্নিভং.
উগ্ঘাটেত্ৰা নরিন্দো সো পাসাদে সিহপঞ্জরং;
পস্সন্তো জনমদ্দক্খী পূজাৰিধিপরাযণং.
অথামচ্চসভামজেত্ধ রাজা ৰিম্ভীত মানসো;
কোতুহলাকুলো হুত্ৰা ইদং ৰচনমব্রৰী.
অচ্ছেরকং কিমেতন্নু কীদিসং পাটিহারিযং;
মমেতং নগরং কস্মা ছণনিস্সিতকং ইতি.
১৪৪. ¶
ততো অমচ্চো আচিক্খি মেধাৰী বুদ্ধমামকো;
রাজিনো তস্স সম্বুদ্ধানুভাৰমৰিজানতো.
সব্বাভিভুস্সবুদ্দস্স তন্হাসঙ্কযদস্সিনো;
এসা ধাতু মহারাজ খেমত্থেরেন আহটা.
তং ধাতুং পূজযিত্ৰান রাজানো পুব্বকা ইধ;
কল্যাণমিত্তে নিস্সায দেৰকাযমুপাগমুং.
নাগরাপি ইমে সব্বে সম্পরায সুকত্থিকা;
পূজযন্তি সমাগম্ম ধাতুং তং সত্থুনো ইতি.
তস্সামচ্চস্স সো রাজা সুত্ৰা ধম্মং সুভাসিতং;
দুল্লদ্ধীমলমুজ্ঝিত্ৰা পসীদি রতনত্তযে.
১৪৯. ¶
ধাতুপূজং করোন্তো সো রাজা অচ্ছরিযা ৰহং;
তিত্থিযে দুম্মনে’কাসি সুমনে চেতরে জনে.
ইমে অহিরিকা সব্বে সদ্ধাদিগুণৰজ্জিতা;
থদ্ধা সঠা চ দুপ্পঞ্ঞা সগ্গমোক্খৰিবন্ধকা.
ইতি সো চিন্তযিত্ৰান গুহসীৰো নরাধিপো;
পব্বাজেসি সকা রট্ঠা নিগণ্ঠে তে অসেসকে.
ততো নিগ্ণ্ঠা সব্বে’পি ঘতসিত্তানলা যথা;
কোধগ্গিজলিতা’গঞ্ছুং পুরং পাটলিপুত্তকং.
তত্থ রাজা মহাতেজো জম্বুদীপস্স ইস্সরো;
পণ্ডুনামো তদা আসি অনন্তবলৰাহণো.
১৫৪. ¶
কোধন্ধাথ নিগণ্ঠা তে সব্বে পেসুঞ্ঞকারকা;
উপসঙ্কম্ম রাজানং ইদং ৰচনমব্রৰূং.
সব্বদেৰমনুস্সেহি ৰন্দনীযে মহিদ্ধিকে;
সিৰব্রহ্মাদযো দেৰে নিচ্চং তুম্হে নমস্সথ.
তুয্হং সামন্তভুপালো গুহসীৰো পনাধুনা;
নিন্দন্নো তাদিসে দেৰে ছৰট্ঠিং ৰন্দতে ইতি.
সুত্ৰান ৰচনং তেসং রাজা কোধৰসানুগো;
সূরং সামন্তভূপালং চিত্তযানমথ’ব্রৰী.
কলিঙ্গরট্ঠং গন্ত্ৰান গুহসীৰমিধানয;
পূজিতং তং ছৰট্ঠিঞ্চ তেন রত্তিন্দিৰং ইতি.
চিত্তযানো ততো রাজা মহতিং চতুরঙ্গিনিং;
সন্নযহিত্ৰা সকং সেনং পুরা তম্হাভিনিক্খমি.
১৬০. ¶
গন্ত্ৰান সো মহীপালো সেনঙ্গেহি পুরক্খতো;
দন্তপুরস্সাৰিদূরে খন্ধাৰারং নিৰেসযি.
সুত্ৰা আগমনং তস্স কলিঙ্গো সো মহিপতি;
গজিন্দপাভতাদিহি তং তোসেসি নরাধিপং.
হিতজ্ঝাসযতং ঞত্ৰা গুহসীৰস্স রাজিনো;
দন্তপুরং চিত্তযানো সদ্ধিং সেনায পাৰিসি.
পাকারগোপুরট্টালপাসাদগঘিকচিত্তিতং;
দানসালাহি সো রাজা সমিদ্ধং পুরমদ্দস.
ততো সো সুমনো গন্ত্ৰা পৰিট্ঠো রাজমন্দিরং;
গুহসীৰস্স আচিক্খি পণ্ডুরাজস্স সাসনং.
১৬৫. ¶
সুত্ৰান সাসনং তস্স দারুণং দুরতিক্কমং;
পসন্নমুখৰণ্ণো’ৰ চিত্তযানং সমব্রৰী.
সব্বলোকহিতত্থায মংসনেত্তাদিদানতো;
অনপ্পকপ্পে সম্ভারে সম্ভরিত্ৰা অতন্দিতো.
জেত্ৰা নমুচিনো সেনং পত্ৰা সব্বাসৰক্খযং;
অনাৰরণঞাণেন সব্বধম্মেসু পারগু.
দিট্ঠধম্মসুকস্সাদং অগণেত্ৰান অত্তনো;
ধম্মনাৰায তারেসি জনতং যো ভৰণ্ণৰা.
দেৰাতিদেৰং তং বুদ্ধং সরণং সব্বপাণিনং;
জনো হি অৰজানন্তো অদ্ধা সো ৰঞ্চিতো ইতি.
১৭০. ¶
ইচ্চেৰমাদিং সুত্ৰান সো রাজা সত্থুৰণ্ণনং;
আনন্দস্সুপ্পবন্ধেহি পৰেদেসি পসন্নতং.
গুহসীৰো পসন্নং তং চিত্তযানং উদিক্খিয;
তেন সদ্ধিং মহগ্ঘং তং অগমা ধাতুমন্দিরং.
হরিচন্দনসম্ভুতং দ্ৰারবাহাদিকেহি চ;
পৰাল়ৰাল়মালাহি লম্বমুত্তালতাহি চ.
ইন্দনীলকৰাটেহি মণিকিঙ্কিণিকাহি চ;
সোৰণ্ণকণ্ণমালাহি সোভিতং মণিথূপিকং.
উচ্চং ৰেলুরিযুব্ভাসি ছদনং মকরাকুলং;
ধাতুমন্দিরমদ্দক্খি রতনুজ্জল পীঠকং.
ততো সেতাতপত্তস্স হেট্ঠা রতনচিত্তিতং;
দিস্ৰা ধাতুকরন্ডঞ্চ তুট্ঠো ৰিম্ভযমজ্ঝগা.
১৭৬. ¶
ততো কলিঙ্গনাথো সো ৰিৰরিত্ৰা করণ্ডকং;
মহীতলে নিহন্ত্ৰান দক্খিণং জানুমণ্ডলং.
অঞ্জলিং পগ্গহেত্ৰান গুণে দসবলাদিকে;
সরিত্ৰা বুদ্ধসেট্ঠস্স অকাসি অভিযাচনং.
গণ্ডম্বরুক্খমূলম্হি তযা তিত্থীযমদ্দনে;
যমকং দস্সযন্তেন পাটিহারিযমব্ভুতং.
পুব্বকাযাদিনিক্খন্তজলানলসমাকুলং;
চক্কৰাল়ঙ্গণং কত্ৰা জনা সব্বে পসাদিতা.
দেসেত্ৰান তযো মাসে অভিধম্মং সুধাসিনং;
নগরং ওতরন্তেন সঙ্কস্সং তাৰতিংসতো.
১৮১. ¶
ছত্তৰামরসঙ্খাদিগাহকেহি অনেকধা;
ব্রহ্মদেৰাসুরাদীহি পূজিতেন তযা পন.
ঠত্ৰান মণিসোপাণে ৰিস্সকম্মাভিনিম্মিতে;
লোকৰিৰরণং নাম দস্সিতং পাটিহারিযং.
তথানেকেসু ঠানেসু মুনিরাজ তযাপুন;
বহূনি পাটিহিরানি দস্সিতানি সযম্ভুনা.
পাটিহারিযমজ্জাপি সগ্গমোক্খসুখাৰহং;
পস্সন্তানং মনুস্সানং দস্সনীযং তযা ইতি.
১৮৫. ¶
অব্ভুগ্গন্ত্ৰা গগণ কুহরং চন্দলেখাভিরামা,
ৰিস্সজ্জেন্তি রজত ধৰলা রংসিযো দন্তধাতু;
ধূপাযন্তি সপদি বহুধা পজ্জলন্তী মুহুত্তং,
নিব্বাযন্তী নযনসুভগং পাটিহীরং অকাসি.
অচ্ছেরং তং পরম রুচিরং চিত্তযানো নরিন্দো,
দিস্ৰা হট্ঠো চিরপরিচিতং দিট্ঠিজালং জহিত্ৰা;
গন্ত্ৰা বুদ্ধং সরণমসমং সব্বসেণীহি সদ্ধিং,
অগ্গং পুঞ্ঞং পসৰি বহুধা ধাতুসম্মাননায.
দুতিযো পরিচ্ছেদো
১৮৭. ¶
ততো কলিঙ্গাধিপতিস্স তস্সসোচিত্তযানোপরমপ্পতীতো;
তং সাসনং পণ্ডুনরাধিপস্স ঞাপেসি ধীরো দুরতিক্কমং’তি.
রাজাততো দন্তপুরং ধজেহি পুপ্ফেহি ধূপেহি চ তোরণেহি;
অলঙ্করিত্ৰান মহাৰিতান নিৰারিতাদিচ্চমরীচিজালং.
অস্সুপ্পবন্ধাৰুতলোচনেহি পুরক্খতো নেগম নাগরেহি;
সমুব্বহন্তো সিরসা নিজেন মহারহং ধাতুকরণ্ডকং তং.
সমুস্সিতোদার সিতাতপত্তং সঙ্খোদরোদাত তুরঙ্গযুত্তং;
রথং নৰাদিচ্চসমানৰণ্ণ মারুয্হ চিত্তত্থরণাভিরামং.
অনেকসঙ্খেহি বলেহি সদ্ধিং ৰেলাতিৰত্তম্বুধিসন্নিভেহী;
নিৰত্তমানস্স বহুজ্জনস্স ৰিনাপি দেহং মনসানুযাতো
১৯২. ¶
সুসন্থতং সব্বধিৰালুকাহি সুসজ্জিতং পুণ্ণ ঘটাদিকেহি;
পুপ্ফাভিকিণ্ণং পটিপজ্জি দীঘং সুৰিত্থতং পাটলিপুত্তমগ্গং.
কলিঙ্ঘনাথো কুসুমাদিকেহি নচ্চেহি গীতেহি চ ৰাদিতেহি;
দিনে দিনে অদ্ধনি দন্তধাতুং পূজেসি সদ্ধিং ৰনদেৰতাহি.
সুদুগ্গমং সিন্ধুমহীধরেহি কমেন মদ্ধানমতিক্কমিত্ৰা;
আদায ধাতুং মনুজাধিনাথো অগা পুরং পাটলি পুত্তনামং.
রাজাধিরাজো’থ সভায মজ্ঝে দিস্ৰান তং ৰীতভযং ৰিসঙ্কং;
কলিঙ্গরাজং পটিঘাভিভুতো অভাসি পেসুঞ্ঞকরে নিগণ্ঠে
দেৰে জহিত্ৰান নমস্সনীযে ছৰট্ঠিমেতেন নমস্সিতং’তং;
অঙ্গাররাসিম্হি সজোতিভূতে নিক্খিপ্প খিপ্পং দহথাধুনেতি.
১৯৭. ¶
পহট্ঠচিত্তা’ৰততো নিগণ্ঠারাজঙ্গণে তে মহতিং গভীরং;
ৰীতচ্চিকঙ্গারক রাসি পুণ্ণং অঙ্গারকাসুং অভিসঙ্খরিংসু.
সমন্ততো পজ্জলিতায তায সজোতিযা রোরুৰভেরৰায;
মোহন্ধভুতা অথ তিত্থিযা তে তং দন্তধাতুং অভিনিক্খিপিংসু.
তস্সানুভাৰেন তমগ্গীরাসিং হেত্ৰা সরোজং রথচক্কমত্তং;
সমন্ততো উগ্গতরেণুজাল মুট্ঠাসি কিঞ্জক্খ ভরাভিরামং.
তস্মিং খণে পঙ্কজ কণ্ণিকায পতিট্ঠহিত্ৰা জিনদন্তধাতু;
কুন্দাৰদাতাহি পভাহি সব্বা দিসা পভাসেসি পভস্সরাহি.
২০১. ¶
দিস্ৰান তং অচ্ছরিযং মনুস্সা পসন্নচিত্তা রতনাদিকেহি;
সম্পূজযিত্ৰা জিনদন্তধাতুং সকং সকং দিট্ঠিমৰোস্সজিংসু.
সো পণ্ডুরাজা পন দিট্ঠিজালং চিরানুবদ্ধং অপরিচ্চজন্তো;
পতিট্ঠপেত্ৰা’ধিকরঞ্ঞমেতং কুটেন ঘাতাপযি দন্তধাতুং.
তস্সং নিমুগ্গা’ধিকরঞ্ঞমেসা উপড্ঢভাগে নচ দিস্সমানা;
পুব্বাচলট্ঠো’ৰ সুধামরীচি জোতেসি রংসীহি দিসা সমন্তা.
দিস্ৰানুভাৰং জিনদন্তধাতু যাপজ্জি সো ৰিম্ভয মগ্গরাজা;
একো’থ ইস্সাপসুতো নিগণ্ঠো তং রাজরাজানমিদং অৰোচ.
রামাদযো দেৰ জনদ্দনস্স নানাৰতারা ভুৰনে অহেসুং;
তস্সেকদেসো’চ ইদং ছৰট্ঠিনোচে’নুভাৰোকথমীদিসোতি.
২০৬. ¶
অদ্ধা মনুস্সত্তমুপাগতস্স দেৰস্স পচ্ছা তিদিৰং গতস্স;
দেহেকদেসো ঠপিতো হিতত্থমেতন্তি সচ্চংৰচনংভৰেয্য.
সংৰণ্ণযিত্ৰান গুণে পহূতে নারাযণস্স’স্সমহিদ্ধিকস্স;
নিমুগ্গমেত্তা’ধিকরঞ্ঞমেতংসম্পস্সতো মেবহিনীহরিত্ৰা.
সম্পাদযিত্ৰান মহাজনানং মুখানি পঙ্কেরুহসুন্দরানি;
যটিচ্ছিতং গণ্হথ ৰত্থুজাতং ইচ্চাহ রাজা মুখরে নিগণ্ঠে.
তে তিত্থিযা ৰিণহুসুরং গুণেহি ৰিচিত্ত রূপেহি অভিত্থৰিত্ৰা;
তোযেন সিঞ্চিংসু সঠা তথাপি ঠিতপ্পদেসা ন চলিত্থ ধাতু.
জিগুচ্ছমানো অথ তে নিগণ্ঠে সো ধাতুযানীহরণে উপাযং;
অন্ৰেসমানো ৰসুধাধিনাথো ভেরিং চরাপেসি সকে পুরম্হি.
২১১. ¶
নিমুগ্গমেত্থা’ধিকরঞ্ঞমজ্জি যো ধাতুমেতং বহি নীহরেয্য;
লদ্ধান সো ইস্সরিযং মহন্তং রঞ্ঞোসকাসাসুখমেস্সতীতি
সুত্ৰা ন তং ভেরিরৰংউল়ারংপুঞঞ্ঞত্থিকোবুদ্ধবলেপসন্নো;
তস্মিং পুরে সেট্ঠিসুতো সুভদ্দো পাৰেক্খিরঞ্ঞো সমিতিং পগব্ভো.
তমগ্গরাজং অথ সো নমিত্ৰা সামাজিকানং হদযঙ্গমায;
ভাসায সব্বঞ্ঞুগুণপ্পভাৰং ৰণ্ণেসি সারজ্জৰিমুত্ত চিত্তো.
ভুমিং কিণিত্ৰা মহতা ধনেন মনোরমং জেতৰনং ৰিহারং;
যো কারযিত্ৰান জিনস্স দত্ৰা উপট্ঠহি তং চতুপচ্চযেহি.
২১৫. ¶
অনাথপিণ্ডিপ্পদসেট্ঠিসেট্ঠোসোদিট্ঠধম্মোপপিতামহোমে;
তিলোকনাথে মম ধম্মরাজে তুম্হে’ধুনাপস্সথভত্তিভারং.
ইত্থং নদিত্ৰান পহূতপঞেঞ্ঞা কত্ৰান একংসমথুত্তরীযং;
মহীতলং দক্খিণজানুকেন আহচ্চ বদ্ধঞ্জলিকো অৰোচ.
ছদ্দন্তনাগো সৰিসেন ৰিদ্ধো সল্লেন যো লোহিতমক্খি তঙ্গো;
ছব্বণ্ণরংসীহি সমুজ্জলন্তে ছেত্ৰান লুদ্দায অদাসি দন্তে.
সসো’পি হুত্ৰান ৰিসুদ্ধসীলো অজ্ঝত্তদানাভিরতো দ্ৰিজায;
যো’দজ্জিদেহম্পি সকং নিপচ্চ অঙ্গাররাসিম্হি বুভুক্খিতায.
২১৯. ¶
যো বোধিযা বাহিরৰত্থুদানা অতিত্তরূপো সিৰিরাজ সেট্ঠো;
অদাসি চক্খূনি পভস্সরানি দ্ৰিজায জিণ্ণায অচক্খুকায.
যোখন্তিৰাদী’পি কলাবুরাজে ছেদাপযন্তে’পি সহত্থপাদং;
পরিপ্লুতঙ্গোরুধিরে তিতিক্খিমেত্তাযমানো যসদাযকে’ৰ.
যো ধম্মপালো অপি সত্তমাস জাতোপদুট্ঠে জনকেসকম্হি;
কারাপযন্তে অসিমালকম্মং চিত্তং ন দূসেসি পতাপরাজে.
সাখামিগো যো অসতা পুমেন ৰনে পপাতা সযমুদ্ধটেন;
সিলায ভিন্নে’পি সকে ললাটে তং খেমভুমিং অনযিত্থমূল়্হং.
রুট্ঠেন মারেন’ভিনিম্মিতম্পি অঙ্গারকাসুং জলিতং ৰিহিজ্জ;
সমুট্ঠিতে সজ্জুমহারৰিন্দে ঠত্ৰান যো সেট্ঠি অদাসি দানং.
২২৪. ¶
মিগেন যেনাপেৰিজঞ্ঞমেকং ভীতংৰধামোচযিতুংকুরঙ্গিং;
আঘাতনে অত্তসিরংঠপেত্ৰাপমোচিতা’ঞ্ঞ্ঞপিপাণিসঙ্ঘা.
যো সত্তৰস্সো ৰিসিখায পংসু কীল়াপরো সম্ভৰনামকো’পি;
সব্বঞ্ঞুলীল়্হায নিগুল়্হপঞ্হং পুট্ঠো ৰিযাকাসি সুচীরতেন.
হিত্ৰা নিকন্তিং সকজীৰিতে’পি বদ্ধাসকুচ্ছিম্হি চ ৰেত্তৰল্লিং;
সাখামিগে নেকসহস্সসঙ্খে ৰধাপমোচেসি কপিস্সরোযো.
সন্তপ্পযং ধম্মসুধারসেন যো মানুসে তুণ্ডিলসূকরো’পি;
ইসী’ৰ কত্ৰা অথ ঞাযগন্থং নিজং পৰত্তেসি চিরায ধম্মং.
২২৮. ¶
পচ্চত্থিকং পুণ্ণকযক্খমুগ্গং মহিদ্ধিকং কামগুণেসু গিদ্ধং;
যো তিক্খপঞ্ঞোৰিধুরাভিধানোদমেসি কাল়াগিরিমত্তকম্হি.
কুলাৰসাযি অৰিরূল়্হপক্খো যো বুদ্ধিমা ৰট্টকপোতকো’পি;
সচ্চেন দাৰগ্গিমভিজ্জলন্তং ৰস্সেন নিব্বাপযি ৰারিদো’ৰ.
যো মচ্ছরাজাপি অৰুট্ঠিকালেদিস্ৰানমচ্ছে তসিতেকিলন্তে;
সচ্চেনৰাক্যেনমহোঘপুণ্ণংমুহুত্তমত্তেনঅকাসিরট্ঠং.
ৰিচিত্তহত্থস্স রথাদিকানি ৰসুন্ধরা কম্পন কারণানি;
পুত্তে’নুজাতে সদিসেচদারেযো’দজ্জিৰেস্সন্তরজাতিযম্পি.
২৩২. ¶
বুদ্ধো ভৰিত্ৰা অপি দিট্ঠধম্ম সুখানপেক্খো করুণানুৰত্তী;
সব্বং সহন্তো অৰমাননাদিং যোদুক্করং লোকহিতংঅকাসি.
বলেন সদ্ধিং চতুরঙ্গিকেন অভিদ্দৰন্তং অতিভিংসনেন;
অজেয্যসত্থং পরমিদ্ধিপত্তং দমেসি যো আলৰকম্পী যক্খং.
দেহাভিনিক্খন্ত হুতাসনচ্চি মালাকুলং ব্রহ্মভৰং করিত্ৰা;
ভেত্ৰান দিট্ঠিং সুচিরানুবদ্ধং দমেসি যো ব্রহ্মৰরং মুনিন্দো.
অচ্চঙ্কুসং দানসুধোত গণ্ডং নিপাতিতট্ঠালক গোপুরাদিং;
ধাৰন্তমগ্গে ধনপালহত্থিং দমেসি যো দারুণমন্তকং’ৰ.
২৩৬. ¶
মনুস্সরত্তারুণপাণিপাদমুক্খিপ্প খগ্গং অনুবন্ধমানং;
মহাদযো দুপ্পসহং পরেহি দমেসি যো অঙ্গুলিমালচোরং.
যো ধম্মরাজা ৰিজিতারিসঙ্ঘো পৰত্তযন্তো ৰরধম্মচক্কং;
সদ্ধম্ম সঞ্ঞং রতনাকরঞ্চ ওগাহযী সং পরিসং সমগ্গং.
তস্সেৰ সদ্ধম্ম ৰরাধিপস্সতথাগতস্স’প্পটিপুগ্গলস্স;
অনন্তঞাণস্স ৰিসারদস্স এসা মহাকারুণিকস্স ধাতু.
অনেন সচ্চেন জিনস্স ধাতু খিপ্পং সমারুয্হ নভন্তরাল়ং;
সুধংসুলেখেৰ সমুজ্জলন্তি কঙ্খং ৰিনোদেতু মহাজনস্স.
২৪০. ¶
তস্মিং খণে সা জিনদন্তধাতু নভং সমুগ্গম্ম পভাসযন্তী;
সব্বা দিসা ওসধিতারকা’ৰ জনং পসাদেসি ৰ্তিণ্ণকঙ্খং.
অথোতরিত্ৰা গগনঙ্গণম্হা সা মত্থকে সেট্ঠিসুতস্স তস্স;
পতিট্ঠহিত্ৰান সুধাভিসিত্তগত্তং’ৰ তং পীণযি ভত্তিতিন্নং.
দস্ৰান তং অচ্ছরিযং নিগণ্ঠা ইচ্চব্রৰুং পণ্ডুনরাধিপং তং;
ৰিজ্জাবলং সেট্ঠিসুতস্স এতং ন ধাতুযা দেৰ অযম্পভাৰো.
নিসম্ম তেসং ৰচনং নরিন্দো ইচ্চব্রৰী সেট্ঠিসুতং সুভদ্দং;
যথা চ এতে অভিসদ্দহেয্যুং তথাৰিধং দস্সয ইদ্ধিমঞ্ঞং.
ততো সুভদ্দো তপনীযপত্তে সুগন্ধিসীতোদকপূরিতম্হি;
ৰড্ঢেসি ধাতুং মুনিপুঙ্গৰস্স অনুস্সরন্তো চরিতব্ভুতানি.
২৪৫. ¶
সা রাজহং সী’ৰ ৰিধাৰমানা সুগন্ধিতোযম্হি পদক্খিণেন;
উম্মুজ্জমানা চ নিমুজ্জমানা জনে পমোদস্সুধরে অকাসি.
ততো চ কাসুং ৰিসিখাযমজ্ঝে কত্ৰা তহিং ধাতুমভিক্খিপিত্ৰা;
পংসূহি সম্মা অভিপূরযিত্ৰা বহূহি মদ্দাপযি কুঞ্জরেহি.
ভেত্ৰা মহিংউট্ঠহি চক্কমত্তং ৰিরাজমানং মণিকণ্ণিকায;
পভস্সরং রূপিযকেসরেহি সরোরুহং কঞ্চনপত্তপাল়িং.
পতিট্ঠভিত্ৰান তহিং সরোজে মন্দানিলাৰত্তিতরেণু জালে;
ওভাসযন্তি’ৰ দিসা পভাহি দিট্ঠা মুহুত্তেন জিনস্সধাতু.
খিপিংসু ৰত্থাভরণানি মচ্চা পৰস্সযুং পুপ্ফমযঞ্চ ৰস্সং;
উক্কুট্ঠিসদ্দেহি চ সধুকারনাদেহি পুণ্ণং নগরং অকংসু.
২৫০. ¶
তে তিত্থিযা তং অভিৰঞ্চনং’তি রাজাধিরাজং অথ সঞ্ঞপেত্ৰা;
জিগুচ্ছনীযে কুণপাদিকেহি খিপিংসু ধাতুং পরিখায পিট্ঠে.
তস্মিং খণে পঞ্চৰিধম্বুজেহিসঞ্ছাদিতাহংসগণোপভুত্তা;
মধুব্বতালী ৰিরুতাভিরামা অহোসি সা পোক্খরণী’ৰ নন্দা.
গজাধিপা কোঞ্ঞ্চরৰং রৰিংসু করিংসু হেসানিনদং তুরঙ্গা;
উক্কুট্ঠিনাদং অকরিংসু মচ্চা সুৰাদিতা দুন্দুভিআদযো’পি.
থোমিংসু মচ্চা থুতিগীতকেহি নচ্চিংসু ওত্তপ্পৰিভুসনা’পি;
ৰত্থানি সীসে ভমযিংসু মত্তা ভুজানি পোঠেসুমুদগ্গচিত্তা.
২৫৪. ¶
ধূপেহি কালাগরুসম্ভৰেহি ঘনাৰনদ্ধং’ৰ নভং অহোসি;
সমুস্সিতানেকধজাৰলীহি পুরং তদা ৰত্থমযং’ৰ আসি.
দিস্ৰা তমচ্ছেরমচিন্তনীযং আমোদিতামচ্চগণা সমগ্গা;
অত্থে নিযোজেতু মুপেচ্চ তস্স ৰদিংসু পণ্ডুস্স নরাধিপস্স.
দিস্ৰান যো ঈদিসকম্পি রাজ ইদ্ধানুভাৰং মুনিপুঙ্গৰস্স;
পসাদমত্তম্পি করেয্য নোচে কিমত্থিযা তস্স ভৰেয্য পঞ্ঞা.
পসাদনীযেসু গুণেসু রাজ পসাদনং সাধুজনস্স ধম্মো;
পুপ্ফন্তি সব্বে সযমেৰ ৰন্দে সমুগ্গতে কোমুদকাননানি.
২৫৮. ¶
ৰাচায তেসং পন দুম্মতীনং মা সগ্গমগ্গং পজহিত্থ রাজ;
অন্ধে গহেত্ৰা ৰিচরেয্য কো হি অন্ৰেসমানো সুপথং অমূল়্হো.
নরাধিপা কপ্পিণ বিম্বিসার সুদ্ধোদনাদি অপি তেজৰন্তা;
তং ধম্মরাজং সরণং উপেচ্চ পিৰিংসু ধম্মামতমাদরেন.
সহস্সনেত্তো তিদসাধিপো’পি খীণাযুকো খিণভৰং মুনিন্দং;
উপেচ্চ ধম্মং ৰিমলং নিসম্ম অলত্থ আযুং অপি দিট্ঠধম্মো.
তুৰম্পি তস্মিং জিতপঞ্চমারে দেৰাতিদেৰে ৰরধম্মরাজে;
সগ্গাপৰগ্গাধিগমায খিপ্পং চিত্তং পসাদেহি নরাধিরাজ.
২৬২. ¶
সুত্ৰানতেসং ৰচনং নরিন্দো ৰিকিণ্ণকঙ্খো রতনত্তযম্হি;
সেনাপতিং অত্থৰরং অৰোচ পহট্ঠভাৰো পরিসায মজ্ঝে.
অসদ্দহানো রতনত্তযস্স গুণে ভৰচ্ছেদনকারণস্স;
চিরায দুল্লদ্ধিপথে চরন্তো ঠিতো সরজ্জে অপি ৰঞ্চিতোহং.
মোহেন খজ্জোপনকং ধমেসিং সীতদ্দিতো ধুমসিখে জলন্তে;
পিপাসিতো সিন্ধুজলং পহায পিৰিং পমাদেন মরীচিতোযং.
পরিচ্চজিত্ৰা অমতং চিরায জিৰত্থিকো তিক্খৰিসং অখাদিং;
ৰিহায’হং চম্পকপুপ্ফদামং অধারযিং জত্তুসু নাগভারং.
২৬৬. ¶
গন্ত্ৰান খিপ্পং পরিখা সমীপং আরাধযিত্ৰা জিনদন্তধাতুং;
আনেহি পূজাৰিধিনা করিস্সং পুঞ্ঞানি সব্বত্থ সুখাৰহানি.
গন্ত্ৰাততেসোপরিখাসমীপং সেনাধিনাথো পরমপ্পতীতো;
ধাতুং মুনিন্দস্স নমস্সমানো অজ্ঝেসি রঞ্ঞো হিতমা চরন্তো
চিরাগতং দিট্ঠিমলং পহায অলত্থ সদ্ধং সুগতে নরিন্দো;
পাসাদমাগম্ম পসাদমস্স ৰড্ঢেহি রঞ্ঞো রতনত্তযম্হি.
তস্মিং খণে পোক্খরণী ৰিচিত্তা ফুল্লেহি সোৰণ্ণসরোরুহেহি;
অলঙ্করোন্তী গগনং অহোসি মন্দাকিনীৰাভিনৰাৰতারা.
হংসঙ্গণেৰাথ মুনিন্দধাতু সা পঙ্কজা পঙ্কজমোক্কমন্তি;
কুন্দাৰদাতাহি পভাহি সব্বং খিরোদকুচ্ছিং’ৰ পুরং অকাসি.
২৭১. ¶
ততো সুরত্তঞ্জলিপঙ্কজম্হি পতিট্ঠহিত্ৰান চমুপতিস্স;
সন্দিস্সমানা মহতা জনেন মহপ্ফলং মানুসকং অকত্থ.
সুত্ৰান ৰুত্তন্তমিমং নরিন্দো পহট্ঠভাৰোপদসা’ৰ গন্ত্ৰা;
সংসূচযন্তো দিগুণং পসাদং সুৰিম্হিতোপঞ্জলিকোঅৰোচ.
ৰোহারদক্খা মনুজা মুনিন্দ সঙ্ঘট্টযিত্ৰা নিকসোপলম্হি;
করোন্তিঅগ্ঘং ৰরকঞ্চনস্স এসোহি ধম্মো চরিতোপুরাণো.
মণিং পসত্থাকরসম্ভৰম্পি হুতাসকম্মেহভীসঙ্খরিত্ৰা;
পাপেন্তিরাজঞ্ঞকিরীটকোটিং ৰিভুসনত্তং ৰিদুনোমনুস্সা.
২৭৫. ¶
ৰীমংসনত্থায তৰাধুনাপি মযা কতং সব্বমিদং মুনিন্দ;
আগুং মহন্তং খম ভুরিপঞ্ঞ খিপ্পং মমালঙ্কুরু উত্তমঙ্গং.
পতিট্ঠিতা তস্স ততো কিরীটে মণিপ্পভা ভাসিনি দন্তধাতু;
অমুঞ্চি রংসী ধৰলা পজাসু সিনেহজাতা ইৰ খীরধারা.
সো দন্তধাতুং সিরসাৰহন্তো পদক্খিণংতংনগরং করিত্ৰা;
সম্পূজযন্তো কুসুমাদিকেহি সুসজ্জিতন্তে পুরমাহরিত্থ.
সমুস্সিতোদারসিতাতপত্তে পল্লঙ্কসেট্ঠে রতনুজ্জলম্হি;
পতিট্ঠপেত্ৰান জিনস্স ধাতুং পূজেসি রাজা রতনাদিকেহি.
বুদ্ধাদিৰত্থুত্তযমেৰ রাজা আপাণকোটিং সরণং উপেচ্চ;
হিত্ৰা ৰিহিংসং করুণাধিৰাসো আরাধযী সব্বজনং গুণেহি.
২৮০. ¶
কারেসি নানারতনপ্পভাহি সহস্সরংসীং’ৰ ৰিরোচমানং;
নরাধিপো ভত্তিভরানুরূপং সুচিত্তিতং ধাতুনিৰেসনম্পি.
ৰড্ঢেসি সো ধাতুঘরম্হি ধাতুং অলঙ্করিত্ৰা সকলং পুরম্পি;
সেসেন পূজাৰিধিনা অতিত্তো পূজেসি রট্ঠং সধনং সভোগ্গং.
আমন্তযিত্ৰা গুহসীৰরাজং সম্মানিতং অত্তসমং করিত্ৰা;
দানাদিকং পুঞ্ঞমনেকরূপং সদ্ধাধনো সঞ্চিণিরাজসেট্ঠো.
ততো সো ভুপালো কুমতিজনসংসগ্গমনযং,
নিরাকত্ৰা মগ্গে সুগতৰচনুজ্জোতসুগমে;
পধাৰন্তো সম্মা সপরহিতসম্পত্তিচতুরো,
পসত্থং লোকত্থং অচরি চরিতাৰজ্জিতজনো.
ততিযো পরিচ্ছেদো.
২৮৪. ¶
চরতি ধরণি পালে রাজধম্মেসু তস্মিং,
সমরচতুরসেনো খীরধারো নরিন্দো;
নিজভুজবললীলা’রাতিদপ্পপ্পমাথী,
ৰিভৰজনিতমানো যুদ্ধসজ্জো’ভিগঞ্ছি.
করিৰরমথ দিস্ৰা সো গুহাদ্ৰারযাতং,
পটিভযরহিতত্তো সীহরাজা’ৰ রাজা;
নিজনগরসমীপাযাতমেতং নরিন্দং,
অমিতবলমমহোঘেনোত্থরন্তা’ভিযাযি.
উদিতবহল়ধূলীপাল়িরুদ্ধন্তল়িক্খো,
সমদৰিৰিধযোধারাৰসংরম্ভভীমে;
নিসিতসরসতালীৰস্সধারাকরাল়ে,
অজিনি মহতি যুদ্ধে পণ্ডুকো খীরধারং.
২৮৭. ¶
অথ নরপতিসেট্ঠো সঙ্গহেত্ৰান রট্ঠং,
নিজ তনুজ ৰরস্মিং রজ্জভারং নিধায;
সুগত দসন ধাতুং সম্পটিচ্ছাপযিত্ৰা,
পহিণি চ গুহসীৰং সক্করিত্ৰা সরট্ঠং.
সুৰিরমৰনীপালো সঞ্ঞমং অজ্ঝুপেতো,
ৰিৰিধ ৰিভৰ দানাযাচকে তপ্পযিত্ৰা;
তিদসপুর সমাজং দেহভেদা পযাতো,
কুসল ফলমনপ্পং পত্থিতং পচ্চলত্থ.
নরপতি গুহসীৰো তং মুনিন্দস্স ধাতুং,
সকপুরমুপনেত্ৰা সাধু সম্মানযন্তো;
সুগতি গমন মগ্গে পাণিনো যোজযন্তো,
সুচরিত মভিরূপং সঞ্চিণন্তো ৰিহাসি.
২৯০. ¶
অগণিতমহিমস্সুজ্জে নিরঞ্ঞো তনূজো,
পুরিম ৰযসি যেৰারদ্ধসদ্ধাভিযোগো;
দসবল তনুধাতুং পূজিতুং তস্স রঞ্ঞো,
পুরৰর মুপাযাতো দন্তনামো কুমারো.
গুণজনিত পসাদং তং কলিঙ্গাধিনাথং,
নিখিল গুণ নিৰাসো সো কুমারো করিত্ৰা;
ৰিৰিধ মহৰিধানং সাধুসম্পাদযন্তো,
অৰসি সুগতধাতুং অন্ৰহং ৰন্দমানো.
অভৰি চ গুহসীৰস্সাৰনীসস্স ধিতা,
ৰিকচ কুৰলযক্খী হংসকন্তাভিযাতা;
ৰদন জিত সরোজা হারিধম্মিল্লভারা,
কুচভরনমিতঙ্গি হেম মালাভিধানা.
২৯৩. ¶
অখিলগুণনিধানং বন্ধুভাৰানুরূপং,
সুৰিমলকুলজাতং তং কুমারং ৰিদিত্ৰা;
নরপতি গুহসীৰো অত্তনো ধীতরং তং,
অদদি সবহুমানং রাজপুত্তস্স তস্স.
মনুজপতি কুমারং ধাতুরক্খাধিকারে,
পচুরপরিজনং তং সব্বথা যোজযিত্ৰা;
গৰ মহিস সহস্সাদীহি সম্পীণযিত্ৰা,
সক ৰিভৰ সরিক্খে ইস্সরত্তে ঠপেসি.
সমরভুৰি ৰিনট্ঠে খীরধারে নরিন্দে,
মলযৰনমুপেতা ভাগিনেয্যা কুমারা;
পবল মতি মহন্তং সংহরিত্ৰা বলগ্গং,
উপপুরমুপগঞ্ছুং ধাতুযা গণ্হনত্থং.
অথ নগরসমীপে তে নিৰেসং করিত্ৰা,
সৰণকটুকমেতং সাসনং পেসযিংসু;
সুগতদসনধাতুং দেহি ৰা খিপ্পমম্হং,
যসসিরিজননিং ৰা কীল় সঙ্গামকেল়িং.
২৯৭. ¶
সপদি ধরণিপালো সাসনং তং সুণিত্ৰা,
অৰদি রহসি ৰাচং রাজপুত্তস্স তস্স;
নহি সতি মম দেহে ধাতুমঞ্ঞস্স দস্সং,
অহমপি যদি জেতুং নেৰ তে সক্কুণেয্যং.
সুরনর নমিতং তং দন্তধাতুং গহেত্ৰা,
গহিত দিজৰিলাসো সীহল়ং যাহি দীপং;
ইতি ৰচনমুদারং মাতুলস্সাথ সুত্ৰা,
তমৰচ গুহসীৰং দন্তনামো কুমারো.
তৰচ মমচ কো ৰা সীহল়ে বন্ধুভূতো,
জিনৰরণসরোজে ভত্তিযুত্তো চ কোৰা;
জলনীধিপরতীরে সীহল়ং খুদ্দদেসং,
কথমহমতিনেস্সং দন্তধাতুং জিনস্স.
৩০০. ¶
তমৰদি গুহসীৰো ভাগিনেয্যং কুমারং,
দসবলতনুধাতু সণ্ঠিতা সীহল়স্মিং;
ভৰভযহতিদক্খো ৰত্ততে সত্থুধম্মো,
গণনপথমতীতা ভিক্খৰো চাৰসিংসু.
মম চ পিযসহাযো সো মহাসেন রাজা,
জিনচরণসরোজদ্ৰন্দসেৰাভিযুত্তো;
সলিলমপি চ ফুট্ঠং ধাতুযা পত্থযন্তো,
ৰিৰিধরতনজাতং পাভতং পেসযিত্থ.
পভৰতি মনুজিন্দো সব্বদা বুদ্ধিমা সো,
সুগতদসনধাতুং পূজিতুং পূজনেয্যং;
পরিচিতৰিসযম্হা ৰিপ্পৰুত্থং ভৰন্তং,
ৰিৰিধৰিভৰদানা সাধু সঙ্গণ্হিতুঞ্চ.
৩০৩. ¶
নিজ দুহিতুপতিং তং ইত্থমারাধযিত্ৰা,
নরপতি গুহসীৰো সঙ্গহেত্ৰান সেনং;
রণধরণিমুপেতো সো কুমারেহি সদ্ধিং,
মরণপরৰসত্তং অজ্ঝগা যুজ্ঝমানো.
অথ নরপতি পুত্তো দন্তনামো সুণিত্ৰা,
সৰণ কটুকমেতং মাতুলস্সপ্পৰত্তিং;
গহিত দিজৰিলাসো দন্তধাতুং গহেত্ৰা,
তুরিত তুরিত ভূতো সো পুরম্হা পল়াযি.
সরভস মুপগন্ত্ৰা দক্খিণং চাথ দেসং,
অৰিচলিতসভাৰো ইদ্ধিযা দেৰতানং;
নদিমতিমহতিং সো উত্তরিত্ৰান পুণ্ণং,
নিদহি দসনধাতুং ৰালুকারাসিমজ্ঝে.
পুন পুরমুপগন্ত্ৰা তং গহীতঞ্ঞৰেসং,
ভরিযমপি গহেত্ৰা আগতো তত্থ খিপ্পং;
সুগতদসনধাতুং ৰালুকাথুপকুচ্ছিং,
ঠপিতমুপচরন্তো অচ্ছি গুম্বন্তরস্মিং.
৩০৭. ¶
সপদি নভসি থেরো গচ্ছমানো পনেকো,
ৰিৰিধকিরণজালং ৰালুকারাসিথূপা;
অৰিরল়িতমুদেন্তং ধাতুযা তায দিস্ৰা,
পণমি সুগতধাতুং ওতরিত্ৰান তত্থ.
মুনিসুতমথ দিস্ৰা জম্পতী তে পতীতা,
নিজগমনৰিধানং সব্বমারোচযিংসু;
দসবলতনুজো সো ধাতুরক্খা নিযুত্তো,
পরহিতনিরতত্তো তে উভো অজ্ঝভাসি.
দসবলতনুধাতুং সীহল়ং নেথ তুম্হে,
অগণিত তনুখেদা ৰীতসারজ্জমেতং;
অপি চ গমনমগ্গে জাতমত্তে ৰিঘাতে,
সরথ মমমনেকোপদ্দৰচ্ছেদদক্খং.
৩১০. ¶
ইতি সুগতননূজো জম্পতীনং কথেত্ৰা,
পুন’পি তদনুরূপং দেসযিত্ৰান ধম্মং;
পুথুতরমপনেত্ৰা সোকসল্লঞ্চ গাল়্হং,
সকৰসতিমুপেতো অন্তলিক্খেন ধীরো.
ভুজগভৰনৰাসী নিন্নগাযাথ তস্সা,
ভুজগপতি মহিদ্ধি পণ্ডুহারাভিধানো;
সকপুরপৰরম্হা নিক্খমিত্ৰা চরন্তো,
সমুপগমি তদা তং ঠানমিচ্ছাৰসেন.
ৰিমলপুলিনথূপা সো সমুগ্গচ্ছমানং,
সসিরুচিরমরীচিজ্জালমালোকযিত্ৰা;
ঠিতমথ মুনিধাতুং ৰালুকারসিগব্ভে,
কিমিদমিতি সকঙ্খং পেক্খমানো অৰেদি.
৩১৩. ¶
সপদি সবহুমানো সো অসন্দিস্সমানো,
রতনমযকরণ্ডং ধাতুযুত্তং গিলিত্ৰা;
ৰিততপুথুলদেহো ভোগমালাহি তুঙ্গং,
কণকসিখরিরাজং ৰেঠযিত্ৰা সযিত্থ.
সলিলনিধিসমীপং জম্পতী গন্তুকামা,
পুলিনতলগতং তং দন্তধাতুং অদিস্ৰা;
নযনসলিলধারং সোকজাতং কিরন্তা,
সুগতসুতৰরং তং তঙ্খণে’নুস্সরিংসু.
অথ সুগতসুতো সো চিন্তিতং সংৰিদিত্ৰা,
অগমি সৰিধমেসং সোকদিনাননানং;
অসুণি চ জিনধাতুং ৰালুকারাসিমজ্ঝে,
নীহিতমপি অদিট্ঠং পূজিতং জম্পতীহি.
সযিতমথ যতীসো দিব্বচক্খুপ্পভাৰা,
রতনগিরিনিকুঞ্জে নাগরাজং অপস্সি;
ৰিহগপতিসরীরং মাপযি তম্মুহুত্তে,
ৰিততপুথুলপক্খেন’ন্তল়িক্খং থকেন্তং.
৩১৭. ¶
জলধিমতিগভীরং তং দ্ৰিধা সো করিত্ৰা,
পবলপৰনৰেগেন’ত্তনো পক্খজেন;
সরভস মহিধাৰং ভীমসংরম্ভযোগা,
অভিগমি ভুজগিন্দং মেরুপাদে নিপন্নং.
জহিতভুজগৰেসো তঙ্খণে সো ফণিন্দো,
পটিভযচকিতত্তো সংখিপিত্ৰান ভোগে;
সরভস মুপগন্ত্ৰা তস্স পাদে নমিত্ৰা,
ৰিনযমধুরমিত্থং তং মুনীসং অৰোচ.
সকলজনহিতত্থং এৰ জাযন্তি বুদ্ধা,
ভৰতি জনহিতত্থং ধাতুমত্তস্স পূজা;
অহমপি জিনধাতুং পূজযিত্ৰা মহগ্ঘং,
কুসলফলমনপ্পং সঞ্চিণিস্সং’তি গণ্হিং.
৩২০. ¶
অথ মনুজগণানং সচ্চবোধারহানং,
ৰসতিভৰনমেসা নীয্যতে সীহল়ং তং;
মুনিৰরতনুধাতুং তেন দেহীতি ৰুত্তো,
ভুজগপতি করণ্ডং ধাতুগব্ভং অদজ্জি.
ৰিহগপতিতনুং তং সংহরিত্ৰান থেরো,
জলচরসতভীমা অণ্ণৰা উপ্পতিত্ৰা;
সকলপথৰিচক্কে রজ্জলক্খিং’ৰ ধাতুং,
নরপতিতনুজানং জম্পতীনং অদাসি.
ইতি কতবহুকারে সংযমিন্দে পযাতে,
সুগতদসনধাতুং মুদ্ধনা উব্বহন্তা;
মহতি ৰিপিনদেৰাদীহি মগ্গে পযুত্তে,
ৰিৰিধমহৰিধানে তে ততো নিক্খমিংসু.
৩২৩. ¶
মুদুসুরভীসমীরো কণ্টকাদিৰ্যপেতো,
ৰিমলপুলিনহারী আসী সব্বত্থ মগ্গো;
অযনমুপগতে তে দন্তধাতুপ্পভাৰা,
নিগমনগরৰাসী সাধু সম্মানযিংসু.
কুসুমসুরভিচুণ্ণাকিণ্ণহত্থাহি নিচ্চা,
সকুতুকমনুযাতা কাননে দেৰতাহী;
অচলগহণদুগ্গং খেপযিত্ৰান মগ্গং,
অগমুমতুরিতা তে পট্টনং তামলিত্তিং.
অচলপদরবদ্ধং সুট্ঠিতোদারকূপং,
উদিতপুথুলকারং দক্খনীযামকঞ্চ;
সযমভিমতলঙ্কাগামিনিং নাৰমেতে,
সপদি সমুপরূল়্হং অদ্দসুং ৰাণিজেহি.
৩২৬. ¶
অথ দিজপৰরা তে সীহল়ং গন্তুমিচ্ছং,
সরভস মুপগন্ত্ৰা নাৰিকস্সাৰদিংসু;
সুতিসুখৰচসা সো সাধুৰুত্তেন চেসং,
পমুদিতহদযো তে নাৰমারোপযিত্থ.
জলনিধিমভিরূল়্হেস্ৰেসু আদায ধাতুং,
সমভৰুমুপসন্না লোলকল্লোলমালা;
সমসুরভিমনুঞ্ঞো উত্তরো ৰাযি ৰাতো,
ৰিমলরুচিরসোভা সব্বথা’সুং দিসা’পি.
নভসি অসিতসোভে ৰেনতেয্যো’ৰ নাৰা,
পবলপৰনৰেগা সত্ততং ধাৰমানা;
নযনৰিসযভাৰাতীততীরাচলাদিং,
পৰিসি জলধিমজ্ঝং ফেণপুপ্ফাভিকিণ্ণং.
৩২৯. ¶
অথ অভৰি সমুদ্দো ভীমসংৰট্টৰাতা,
ভীহতসিখরিকূটাকারৰীচিপ্পবন্ধো;
সৰনভিদুরঘোরারাৰরুন্ধন্তলিক্খো,
ভযচকিতমনুস্সক্কন্দিতো সব্বরত্তিং.
উদযসিখরিসীসং নূতনাদিচ্চবিম্বে,
উপগতৰতি তস্সা রত্তিযা অচ্চযম্হি;
সলিলনিধিজলং তং সন্তকল্লোলমালং,
অসিতমণিৰিচিত্তং কোট্টিমং’ৰাৰভাসি.
অথ ৰিততফণালী ভিংসনা কেচি নাগা,
সুরভিকুসুমহত্থা কেচি দিব্বত্তভাৰা;
রুচিরমণিপদীপে কেচি সন্ধারযন্তা,
নিজসিরসি করোন্তা কেচি কণ্ডুপ্পলানী.
৩৩২. ¶
ফুটকুমুদকলাপে জত্তুনেকে ৰহন্তা,
কণককলসমালা উক্খিপত্তা চ কেচি;
পৰনচলিতকেতুগ্গাহকা কেচি একে,
রুচির কণক চুণ্ণাপুণ্ণচঙ্গোটহত্থা.
সলল়িতরমণিযং কেচি নচ্চং করোন্তা,
সলযমধুরগীতং গাযমানা’ৰ কেচি;
পচুরতুরিযভণ্ডে আহনন্তা’ৰ একে,
মুনিৰরতনুধাতুং পূজিতুং উট্ঠহিংসু.
রুচিরকচকলাপা রাজকঞ্ঞায তস্সা,
মুনিৰরদসনং তং নিগ্গতেৰিন্দুলেখা;
উজুরজতসলাকা সন্নিভে মুঞ্চি রংসী.
৩৩৫. ¶
অতুলিতমনুভাৰং ধাতুযা পেক্খতং তং,
পমুদিতহদযানং তঙ্খণে পন্নগানং;
পটিরৰহরিতানং সাধুৰাদাদিকানং,
গগনমপরিযন্তং’ৰাসি ৰিত্থারিতানং.
পৰিসি সুগত দাঠাধাতু সা মোল়িগব্ভং,
পুন গগনতলম্হা ওতরিত্ৰান তস্সা;
ফণধরনিৰহা তে তং তরিং ৰারযিত্ৰা,
মহমকরুমুদারং সত্তরত্তিন্দিৰংহি.
অচলমিৰ ৰিমানং অন্তলিক্খম্হি নাৰং,
গতিৰিরহিতমম্হোরাসিমজ্ঝম্হি দিস্ৰা;
ভযৰিলুলিতচিত্তা জম্পতী তে সমগ্গা,
দসবলতনুজং তং ইদ্ধিমন্তং সরিংসু.
সপদি মুনিসুতো সো চিত্তমেসং ৰিদিত্ৰা,
নভসি জলধরালী মদ্দমানো’ভিগন্ত্ৰা;
ৰিহগপতিসরীরং মাপযিত্ৰা মহন্তং,
ভযচকিতভুজঙ্গে তে পল়াপেসি খিপ্পং.
৩৩৯. ¶
ইত্থং বুদ্ধিসুতে ভুজঙ্গজনিতং ভীতিং সমেত্ৰা গতে,
সা নাৰা পৰনা পকম্পিতধজা তুঙ্গং তরঙ্গাৰলিং;
ভীন্দন্তী গতিৰেগসা পুথুতরং মেঘাৰলীসন্নিভং,
লঙ্কাপট্টনমোতরিত্থ সহসা থেরস্স তস্সিদ্ধিযা.
চতুত্থো পরিচ্ছেদো.
সংৰচ্ছরম্হি নৰমম্হি মহাদিসেন,
পুত্তস্স কিত্তিসিরিমেঘনরাধিপস্স;
তে জম্পতী তমথ পট্টনমোতরিত্ৰা,
দেৰালযে পটিৰসিংসু মনোভিরামে.
৩৪১. ¶
দিস্ৰান তে দ্ৰিজৰরো পথিকে নিসাযং,
সন্তপ্পযিত্থ মধুরাসনপানকেহি;
রত্তিক্খযে চ অনুরাধপুরস্স মগ্গং,
ছাযাপতীনমথ সো অভিৰেদযিত্থ.
আদায তে দসনধাতুৰরং জিনস্স,
সম্মানিতা দ্ৰিজৰরেন’থ পট্টনম্হা;
নিক্খম্ম দূরতরমগ্গমতিক্কমিত্ৰা,
পদ্ৰারগামমনুরাধপুরস্স’গঞ্ছুং.
যং ধম্মিকং নরৰরং অভিতক্কযিত্ৰা,
জাযাপতী ৰিসযমেতমুপাগমিংসু;
তং ৰ্যাধিনা সমুদিতেন মহাদিসেন,
লঙ্কিস্সরংসুচিরকালকতং সুণিংসু.
সোকেন তে সিখরিনেৰ সমুগ্গতেন,
অজ্ঝোত্থটা বহুতরং ৰিলপীংসু মুল়্হা;
কাযিংসু তেসমথ মুচ্ছিতমানসানং,
সব্বা দিসা চ ৰিদিসা চ ঘনন্ধকারা
৩৪৫. ¶
সুত্ৰান কিত্তিসিরিমেঘনরাধিপস্স,
রজ্জেঠিতস্স রতনত্তযমামকত্তং;
ৰস্সেন নিব্বুতমহাদহনা’ৰ কচ্ছা,
তে জম্পতী সমভৰুং হতসোকতাপা.
সুত্ৰান মেঘগিরিনামমহাৰিহারে,
ভিক্খুস্স কস্সচি নরাধিপৰল্লভত্তং;
তস্স’ন্তিকং সমুপগম্ম কতাতিথেয্যা,
ধাতুপ্পৰত্তিমৰদিংসু উভো সমেচ্চ.
সুত্ৰান সো মুনিৰরো দসনপ্পৰত্তিং,
হট্ঠো যথামতরসেন’হিসিত্তগত্তো;
গেহে সকে সপদি পট্টৰিতানকেহি,
ৰড্ঢেসি ধাতুমমলং সমলঙ্কতম্হি.
৩৪৮. ¶
তেসঞ্চ জানিপতিকানমুভিন্নমেসো,
কত্ৰান সঙ্গহমুল়ারতরং যথিচ্ছং;
ৰুত্তন্তমেতমভিৰেদযিতুং পসত্থং,
লঙ্কাধিপস্স সৰিধং পহিণিত্থ ভিক্খুং.
রাজা ৰসন্তসমযে সহ কামিনীহি,
উয্যানকেল়িসুখ মেকদিনে’নুভোন্তো;
আগচ্ছমানমথ তত্থ সুদুরতো’চ,
তং ৰিপ্পসন্নমুখৰণ্ণমপস্সি ভিক্খুং.
সো সংযমি সমুপগম্ম নরাধিপং তং,
ৰুত্তন্তমেতমভিৰেদযি তুট্ঠচিত্তো;
সুত্ৰান তং পরমপীতিভরং ৰহন্তো,
সম্পত্তচক্করতনো’ৰ অহোসি রাজা.
৩৫১. ¶
লঙ্কিস্সরো দ্ৰিজৰরা জিনদন্তধাতু,
মাদায জানিপতযো উভযে সমেচ্চ;
এস্সন্তি লঙ্কমচিরেন ইতীরিতং তং,
নেমিত্তিকস্স ৰচনঞ্চ তথং অমঞ্ঞি.
রাজা ততো মহতিযা পরিসায সদ্ধিং,
তস্সানুরাধনগরস্স পুরুত্তরায;
আসায তং সপদি মেঘগিরিং ৰিহারং,
সদ্ধো অগঞ্ছি পদসা’ৰ পসন্নচিত্তো.
দিস্ৰা ততো সুগতধাতুমলব্ভনেয্যং,
আনন্দজস্সুনিৰহেহি চ তারহারং;
সিঞ্চং ৰিধায পণিধিং বহুমানপুব্বং,
রোমঞ্চকঞ্চুকধরো ইতি চিন্তযিত্থ.
৩৫৪. ¶
সো’হং অনেকরতনুজ্জলমোল়িধারিং,
পূজেয্যমজ্জ যদি দুচ্চজমুত্তমঙ্গং;
লোকত্তযেকসরণস্স তথাগতস্স,
নো ধাতুযা মহমনুচ্ছৰিকং করেয্যং.
এতং পহূতরতনং সধনং সভোগ্গং,
সম্পূজযং অপি ধরাৰলযং অসেসং;
পূজং করোমি তদনুচ্ছৰিকং অহং’তি,
চিন্তেয্য কোহি ভুৰনেসু অমূল়্হতিত্তো.
লঙ্কাধিপচ্চমিদমপ্পতরং মমাসি,
বুদ্ধো গুণেহি ৰিৰিধেহি পমাণ সুঞ্ঞো;
সো’হং পরিত্তৰিভৰো তিভৰেকনাথং,
তং তাদিসং দসবলং কথমচ্চযিস্সং.
৩৫৭. ¶
ইত্থং পুনপ্পুন তদেৰ ৰিচিন্তযন্তো,
আপজ্জি সো ধিতিযুতো’পি ৰিসঞ্ঞিভাৰং;
সংৰীজিতো সপদি চামরমারুতেন,
খিন্নেন সেৰকজনেন অলত্থ সঞ্ঞং.
থোকম্পি বীজমথ ৰা অভিরোপযন্তা,
মেধাৰিনো মহতিযা’পি মসুন্ধরায;
কালেন পত্ত তৰ পুপ্ফফলদিকানি,
ৰিন্দন্তি পত্থিতফলানি অনপ্পকানি.
এৰং গুণেহি ৰিৰিধেহি’পি অপ্পমেয্য,
ধম্মিস্সরম্হি মহমপ্পতরম্পি কত্ৰা;
কালচ্চযেন পরিণাম ৰিসেসরম্মং,
সগ্গাপৰগ্গসুখমপ্পটিমং লভিস্সং.
৩৬০. ¶
ইত্থং ৰিচিন্তিয পমোদভরাতিরেক,
সম্পুণ্ণচন্দিমসরিক্খমুখো নরিন্দো;
সব্বঞ্ঞুনো দসনধাতুৰরস্স তস্স,
পূজেসি সব্বমপি সীহল়দীপমেতং.
ভিক্খূ’পি তেপিটক জাতকভাণকাদি,
তক্কগমাদি কুসলা অপি বুদ্ধিমন্তো;
ৰত্থুত্তযেকসরণা অপি পোরৰগ্গা,
কোতুহলা সপদি সন্নিপতিংসু তত্থ.
রাজা ততো মহতিয পরিসায মজ্ঝে,
ইচ্চব্রুৰী মুনিৰরো হি সুসুক্কদাঠো;
দাঠা জিনস্স যদি ওসধিতারকা’ৰ,
সেতা ভৰেয্য কিমযং মলিনাৰভাসা.
৩৬৩. ¶
তস্মিং খণে দসনধাতু মুনিস্সরস্স,
পক্খে পসারিয দুৰে ৰিয রাজহংসী;
ৰিত্থারিতং’সুনি ৰহা গগনঙ্গনম্হি,
আৰট্টতো ছৰি জৰেন মুহুত্তমত্তং.
পচ্চগ্ঘমত্থরণকং সিতমত্থরিত্ৰা,
ভদ্দাসনম্হি ৰিনিধায মুনিন্দধাতুং;
তং জাতিপুপ্ফনিকরেন থকেসি রাজা,
ৰস্সচ্চযম্বুধরকূটসমপ্পভেন.
উগ্গম্ম খিপ্পমথ ধাতু মুনিস্সরস্স,
সা পুপ্ফরাসিসিখরম্হি পতিট্ঠহিত্ৰা;
রংসীহি দুদ্ধধৰলেহি ৰিরোচমানা,
সম্পস্সতং অনিমিসে নযনে অকাসি.
৩৬৬. ¶
তং ধাতুমাসনগতম্হি পতিট্ঠপেত্ৰা,
খীরোদএণেপটলপ্পটিমে দুকুল়ে;
ছাদেসি সাটকসতেহি মহারহেহি,
ভিয্যো’পি সো উপপরিক্খিতুকামতায.
অব্ভুগ্গতা সপদি ৰত্থসতানি ভেত্ৰা,
সেতম্বুদোদরৰিনিগ্গতচন্দিমা’ৰ;
ঠত্ৰান সা উপরি তেসমভাসযিত্থ,
রংসীহি কুন্দৰিসদেহি দিসা সমন্তা
তস্মিং খণে ৰসুমতী সহ ভূধরেহি,
গজ্জিত্থ সাধুৰচনং’ৰ সমুগ্গিরন্তী;
তং অব্ভূতং ৰিয সমেক্খিতুমম্বুরাসি,
সো নিচ্চলো অভৰি সন্ততরঙ্গবাহু.
৩৬৯. ¶
মত্তেভকম্পিতসুপুপফিতসালতো’ৰ,
ভস্সিংসু দিব্বকুসুমানি’পি অন্তল়িক্খা;
নচ্চেসু চাতুরিযযমচ্ছরিযং জনস্স,
সন্দস্সযিংসু গগনে সুরসুন্দরী’পি.
আনন্দসঞ্জনিততাররৰাভিরামং,
গাযিংসু গীতমমতাসনগাযকা’পি;
মুঞ্চিংসু দিব্বতুরিযানি’পি ৰাদিতানি,
গম্ভীরমুচ্চমধুরং দ্ৰিগুণং নিনাদং.
সংসিব্বিতং রজতরজ্জুসতানুকারী,
ধারাসতেহি ৰসুধম্বরমম্বুদেন;
সব্বা দিসা জলদকুটমহগঘিযেসু,
দিত্তাচিরজ্জুতিপদীপসতাৰভাসা.
৩৭২. ¶
আধুযমান মলযাৰল কাননন্তো,
সমথুল্ল পুপ্ফজ পরাগহরাভিহারি;
সেদোদ বিন্দুগণ সংহরণপ্পৰীণো,
মন্দং অৰাসি সিসিরো অপি গন্ধৰাহো.
রাজা তমব্ভুতমৰেক্খিয পাটিহীরং,
লোকুস্সৰং বহুতরঞ্চ অদিট্ঠপুব্বং;
চিপ্ফারিতক্খিযুগলো পরমপ্পমোদা,
পূজং করিত্থ মহতিং রতনাদিকেহি.
সো ধাতুমত্তসিরসা’থ সমুব্বহন্তো,
ঠত্ৰা সমুস্সিত সিতাতপৰারণম্হি;
চিত্তত্থরে রথৰরে সিতৰাজিযুত্তে,
লক্খিনিধাননুরাধপুরং পৰেক্খি.
৩৭৫. ¶
দেৰিন্দ মন্দির সমে সমলঙ্কতম্হি,
রাজা সকম্হি ভৰনে অতুলানুভাৰো;
সীহাসনে পটিক কোজৰ সন্থতম্হি,
ধাতুং ঠপেসি মুনিনো সসিতাতপত্তে.
অন্তো’ৰ ভুমিপতি ধাতুঘরং মহগ্ঘং,
কত্ৰান তত্থ ৰিনিধায মুনিন্দধাতুং;
সম্পূজযিত্থ ৰিৰিধেহি উপাযনেহি,
রত্তীন্দিৰং তিদিৰমোক্খ সুখাভিকঙ্খী.
তেসঞ্চ জানিপতিকানমুভিন্নমেৰ,
তুট্ঠো বহূনি রতনাভরণাদিকানি;
গামেচ ইস্সরকুলেক নীৰাসভুতে,
দত্ৰান সঙ্গহমকাসি তিসীহল়িন্দো.
৩৭৮. ¶
সঙ্গম্ম জানপদ নেগম নাগরাদী,
উক্কণ্ঠিতা সুগতধাতুমপস্সমানা;
লোকুত্তমস্স চরিতানি অভিত্থৰন্তা,
উগ্ঘোসযিংসু ধরণীপতিসন্নিধানি;
ধম্মিস্সরো সকললোকহিতায লোকে,
জাযিত্থ সব্বজনতাহিতমাচরিত্থ;
ৰিত্থারিতা বহুজনস্স হিতায ধাতু,
ইচ্ছাম ধাতুমভিপূজযিতুং মযম্পি.
সো সন্নিপাতিয মহীপতি ভিক্খুসঙ্ঘ,
মারামৰাসিমনুরাধপুরোপকণ্ঠে;
অজ্ঝাসযং তমভিৰেদযি সত্থুধাতু,
পূজায সন্নিপতিতস্স মহাজনস্স.
৩৮১. ¶
থেরো তহিং মহতি ভিক্খুগণে পনেকো,
মেধাবলেন অসমো করুণাধিৰাসো;
এৰং তিসীহল়পতিস্স মহামতিস্স,
লোকত্থচারচতুরস্স নিৰেদযিত্থ.
যো আচরেয্য অনুজীৰিজনস্স অত্থং,
এসো ভৰে’নুচরিতো মহতং সভাৰো;
ধাতুং ৰসন্তসমযে বহি নীহরিত্ৰা,
দস্সেহি পুঞ্ঞমভিপত্থযতং জনানং.
সুত্ৰান সংযমিৰরস্স সুভাসিতানি,
পুচ্ছিত্থ সো নরৰরো পুন ভিক্খুসঙ্ঘং;
ধাতুং নমস্সিতুমনেন মহাজনেন,
ঠানং কিমেত্থ রমণীযতরং সিযা’তি.
৩৮৪. ¶
সব্বে’পি তে অথ নিকায নিৰাসি ভিক্খূ,
ঠানং সকং সকম ৰণ্ণযুমাদরেন;
অঞ্ঞোঞ্ঞভিন্নৰচনেসু চ তেসু রাজা,
নেৰাভিনন্দি ন পটিক্খিপি কিঞ্চিৰাক্যং.
মজ্ঝত্ততানুগতমানসতায কিন্তু,
রাজা অৰো চ পুন ভিক্খুগণস্স মজ্ঝে;
অত্তানুরূপমযমেৰ মুনিন্দধাতু,
ঠানং খণেন সযমেৰ গমিস্সতীতি.
রাজা ততো ভৰনমেৰ সকং উপেচ্চ,
ধাতুপ্পণামমভিপত্থযতং জনানং;
খিপ্পংমুখম্বুজৰনানী ৰিকাসযন্তো,
সজ্জেতুমাহ নগরঞ্চ ৰিহারমগ্গং.
সম্মজ্জিতা সলিল সেৰন সন্তধূলী,
রচ্ছা তদা’সি পুলিনত্থরণাভিরামা;
উস্সাপিতানি কণকাদিৰিচিত্তিতানি,
ৰ্যগ্ঘাদি রূপখচিতানি চ তোরণানি.
৩৮৮. ¶
ছাযা নিৰারিত ৰিরোচন রংসিতাপা,
নচ্চং’ৰ দস্সযতি ৰাতধূতা ধজালি;
ৰীথি ৰসন্তৰনরাজি সমানৰণ্ণা,
জাতা সুজাতকদলীতরুমালিকাহি.
সংসূচযন্তি চ সতং নৰপুণ্ণকুম্ভা,
সগ্গাপৰগ্গসুখমিচ্ছিতমিজ্ঝতীতি;
কপ্পুরসারতগরাগরুসম্ভৰেহি,
ধূপেহি দুদ্দিনমথো সুদিনং অহোসি.
ওলম্বমানসিতমুত্তকজালকানি,
সজ্জাপিতানি ৰিৰিধানি চ মণ্ডপানি;
সম্পাদিতানি চ তহিং কুসুমগঘিকানি,
আমোদ লুদ্ধ মধুপাৰলি কুজিতানি.
৩৯১. ¶
গচ্ছিংসু কেচি গহিতুস্সৰ ৰেসসোভা,
একে সমুগ্গপরিপুরিতপুপ্ফহত্থা;
অঞ্ঞে জনা সুরভিচুণ্ণভরং ৰহন্তা,
তত্থেতরে ধতৰিচিত্তমহাতপত্তা.
লঙ্কিস্সরো’থ সসিপণ্ডরৰাজিযুত্তে,
উজ্জোতিতে রথৰরে রতনপ্পভাহি;
ধাতুং তিলোকতিলকস্স পতিট্ঠপেত্ৰা,
এতং অৰোচ ৰচনং পণিপাতপুব্বং.
সম্বোধিযা ইৰ মুনিস্সর বোধিমণ্ডং,
গণ্ডম্বরুক্খমিৰ তিত্থিযমদ্দনায;
ধম্মঞ্চ সংৰিভজিতুং মিগদাযমজ্জ,
পূজানুরূপমুপগচ্ছ সযং পদেসং.
৩৯৪. ¶
রাজা ততো সমুচিতাচরণেসু দক্খো,
ৰিস্সজ্জি ফুস্সরথমট্ঠিতসারথিং তং;
পচ্ছা সযং মহতিযা পরিসায সদ্ধিং,
পূজাৰিসেসমসমং অগমা করোন্তো.
উক্কুট্ঠিনাদৰিসরেন মহাজনস্স,
হেসারৰেন ৰিসটেন তুরঙ্গমানং;
ভেরীরৰেন মহতা করি গজ্জিতেন,
উদ্দামসাগর সমং নগরং অহোসি.
আমোদিতা উভযৰীথিগতা কুলিত্থি,
ৰাতাযনেহি কনকাভরণে খিপিংসু;
সব্বত্থকং কুসুমৰস্সমৰস্সযিংসু,
চেলানিচেৰ ভমযিংসুনিজুত্তমঙ্গে.
৩৯৭. ¶
পাচীনগোপুরসমীপমুপাগতম্হি,
তস্মিং রথে জলধিপিট্ঠিগতে’ৰ পোতে;
তুট্ঠা তহিং যতিগণা মনুজা চ সব্বে,
সম্পুজযিংসু ৰিৰিধেহি উপাযনেহি.
কত্ৰা পদক্খিণমথো পুরমুত্তরেন,
দ্ৰারেন সো রথৰরো বহি নিক্খমিত্ৰা;
ঠানে মহিন্দমিনুধম্মকথাপৰিত্তে,
অট্ঠাসি তিত্থগমিতা ইৰ ভণ্ডনাৰা.
ঠানে তহিং দসনধাতুৰরং জিনস্স,
লঙ্কিস্সরো রতনৰিত্তকরণ্ডগব্ভা;
সঞ্ঝাঘনা ইৰ ৰিধুং বহিনীহরিত্ৰা,
দস্সেসি জানপদ নেগম নাগরানং.
৪০০. ¶
তস্মিং জনে সপদি আভরণাদিৰস্স,
মচ্চন্তপীতিভরিতে অভিৰস্সযন্তে;
সানন্দিৰন্দিজনমঙ্গলগীতকেহি,
সম্পাদিতেসু মুখরেসু দিসামুখেসু.
হত্থারৰিন্দনিৰহেসু মহাজনস্স,
চন্দোদযে’চ মুকুলত্তনমাগতেসু;
ব্রহ্মামরাদিজনিতামিত সাধুৰাদে,
তারাপথম্হি ভুৰনোদর মোত্থরন্তে.
সাদন্তধাতু সসিখণ্ড সমানৰণ্ণা,
রংসীহি কুন্দ নৰচন্দন পণ্ডরেহি;
পাসাদ গোপুর সিলুচ্চয পাদপাদিং,
নিদ্ধোত রূপিযমযং’ৰ অকা খণেন.
তং পাটিহারিয মচিন্তিয মচ্চুল়ারং,
দিস্ৰান কে তহীমহেসু মহট্ঠলোমা;
কেৰা’নযুং সকসকাভরণানি গেহং,
কেৰা ন অত্তপটিলাভমৰণ্ণযিংসু.
৪০৪. ¶
কে নোজহিংসু সকদিট্ঠিমলানুবদ্ধং,
কে ৰা ন বুদ্ধমহিমং অভিপত্থযিংসু;
কে নাম মচ্ছরিযপাসৰসা অহেসুং,
ৰত্থুত্তযঞ্চ সরণং নগমিংসু কেৰা.
লঙ্কিস্সরো’পি নৰলক্খ পরিব্বযেন,
সব্বঞ্ঞুধাতুমতুলং অভিপূজযিত্ৰা;
তং দন্তধাতুভৰনং পুন ৰড্ঢযিত্ৰা,
অন্তেপুরম্হি পটিৰাসরমচ্চযিত্থ.
ধাতুং ৰিহারমহযুত্তরমেৰ নেত্ৰা,
পূজং ৰিধাতুমনুৰচ্ছরমেৰরূপং;
রাজা’থ কিত্তিসিরিমেঘসমৰ্হযো সো,
ৰারিত্তলেখ মভিলেখযি সচ্চসন্ধো.
৪০৭. ¶
ৰারিত্তমেতমিতরে’পি পৰত্তযন্তা,
তে বুদ্ধদাসপমুখা ৰসুধাধিনাথা;
সদ্ধাদযাধিকগুণাভরণাভিরামা,
তং সক্করিংসু বহুধা জিনদন্তধাতুং.
সত্থারা সম্ভতত্থং পুরিমতরভৰে সম্পজানং পজানং,
সম্বোধিং তস্স সব্বাসৰৰিগমকরিং সদ্দহন্তো’দহন্তো;
সোতং তস্স’গ্গধম্মে নিপুণমতি সতং সঙ্গমেসঙ্গমেসং,
নিব্বাণং সন্তমিচ্ছে তিভৰভযপরিচ্চাগহেতুং গহেতুং.
পঞ্চমো পরিচ্ছেদো.
৪০৯. ¶
যো চন্দগোমি রচিতেৰরসদ্দসত্থে,
টীকং পসত্থমকরিত্থ চ পঞ্চিকায;
বুদ্ধপ্পভাৰজন নিংচ অকা সমন্ত,
পাসাদিকায ৰিনযট্ঠকথায টীকং.
অঙ্গুত্তরাগমৰরট্ঠকথায টীকং,
সম্মোভৰিব্ভম ৰিঘাতকরিং অকাসি;
অত্থায সংযমিগণস্স পধানিকস্স,
গন্থং অকা ৰিনযসঙ্গহনামধেয্যং.
সন্তিন্দ্রিযস্সপটিপত্তি পরাযণস্স,
সল্লেখ ৰুত্তি নিরতস্স সমাহিতস্স;
অপ্পিচ্ছতাদি গুণযোগ ৰিভুসনস্স,
সম্বুদ্ধসাসনমহোদযকারণস্স.
৪১২. ¶
সব্বেসুআচরিযতং পরমং গতস্স,
সত্থেসু সব্বসমযন্তর কোৰিদস্স;
সিস্সেনসারিতনুজস্স মহাদিসামি.
সুদ্ধন্ৰযেন করুণাদিগুণোদযেন,
তক্কাগমাদি কুসলেন ৰিসারদেন;
সব্বত্থ পত্থট সুধাকররংসিজাল,
সঙ্কাসকিত্তিৰিসরেন পরিক্খকেন.
৪১৪. ¶
সদ্ধাধনেন সখিলেন চ ধম্মকিত্তি,
নামেন রাজগরুনা চরিযেন এসো;
সোতুপ্পসাদজননো জিনদন্তধাতু,
ৰংসো কতো নিখিলদস্সিপভাৰদীপো.
ধম্মো পৰত্ততু চিরায মুনিস্সরস্স,
ধম্মে ঠিতা ৰসুমতীপতযো ভৰন্তু;
কালে পৰস্সতু ঘনো নিখিলা পজা’পি,
অঞ্ঞোঞ্ঞমেত্তিপটিলাভসুখং লভন্তু.