📜

তেলকটাহগাথা ¶

নমো তস্স ভগৰতো অরহতো সম্মাসম্বুদ্ধস্স

১.

লংকিস্সরো জযতু ৰারণরাজগামী

ভোগিন্দভোগ রুচিরাযত পীণ বাহু,

সাধুপচারনিরতো গুণসন্নিৰাসো

ধম্মে ঠিতো ৰীগতকোধমদাৰলেপো;

২.

যো সব্বলোকমহিতো করুণাধিৰাসো

মোক্খাকরো রৰিকুলম্বর পুণ্ণ চন্দো,

ঞেয্যোদধিং সুৰিপুলং সকলং ৰিবুদ্ধো

লোকুত্তমং নমথ তং সিরসা মুনিন্দং;

৩.

সোপানমালমমলং তিদসালযস্স

সংসার সাগরসমুত্তরণায সেতুং,

সব্বাগতীভয ৰিৰজ্জিত খেম মগ্গং

ধম্মং নমস্সথ সদা মুনিনা পণীতং;

৪. ¶

দেয্যং তদপ্পমপি যত্থ পসন্ন চিত্তা

দত্ৰা নরা ফলমুল়ারতরং লভন্তে,

তং সব্বদা দসবলেনপি সুপ্পসত্থং

সঙ্ঘং নমস্সথ সদামিতপুঞ্ঞখেত্তং;

৫.

তেজো বলেন মহতা রতনত্তযস্স

লোকত্তযং সমধিগচ্ছতি যেন মোক্খং,

রক্খা ন চত্থি চ সমা রতনত্তযস্স

তস্মা সদা ভজথ তং রতনত্তযং ভো;

৬.

লংকিস্সরো পরহিতেকরতো নিরাসো

রত্তিম্পি জাগররতো করুণাধিৰাসো,

লোকং ৰিবোধযতি লোকহিতায কামং

ধম্মং সমাচরথ জাগরিযানুযুত্তা;

৭. ¶

সত্তোপকার নিরতা কুসলে সহাযা

ভো দুল্লভা ভুৰি নরা ৰিহতপ্পমাদা,

লংকাধিপং গুণধনং কুসলে সহাযং

আগম্ম সংচরথ ধম্মমলং পমাদং;

৮.

ধম্মো তিলোক সরণো পরমো রসানং

ধম্মো মহগ্ঘরতনো রতনেসু লোকে,

ধম্মো ভৰে তিভৰদুক্খ ৰিনাসহেতু

ধম্মং সমাচরথ জাগরিযানুযুত্তা;

৯.

নিদ্দং ৰিনোদযথ ভাৰযথপ্পমেয্যং

দুক্খং অনিচ্চম্পি চেহ অনত্ততঞ্চ,

দেহে রতিং জহথ জ জজ্জরভাজনাভো

ধম্মং সমাচরথ জাগরিযানুযুত্তা;

১০. ¶

ওকাস মজ্জ মম নত্থি সুৰে করিস্সং

ধম্মং ইতীহলসতা কুসলপ্পযোগে,

না’লং তিযদ্ধসু তথা ভুৰনত্তযে চ

কামং ন চত্থি মনুজো মরণা পমুত্তো;

১১.

খিত্তো যথা নভসি কেনচিদেৰ লেড্ডু

ভূমিং সমাপত্তি ভারতযা খণেন,

জাতত্তমেৰ খলু কারণমেকমত্র

লোকং সদা ননু ধুৰং মরণায গন্তুং;

১২.

কামং নরস্স পততো গিরিমুদ্ধনাতো

মজ্ঝে ন কিঞ্চি ভযনিস্সরণায হেতু,

কামং ৰজন্তি মরণং তিভৰেসু সত্তা

ভোগে রতিং পজহথাপি চ জীৰিতে চ;

১৩. ¶

কামং পতন্তি মহিযা খলু ৰস্সধারা

ৰিজ্জুল্লতা ৰিততমেঘ মুখা পমুত্তা,

এৰং নরা মরণভীম পপাতমজ্ঝে

কামং পতন্তি নহি কোচি ভৰেসু নিচ্চো;

১৪.

ৰেলাতটে পটুতরোরু তরংগমালা

নাসং ৰজন্তি সততং সলিলালযস্স,

নাসং তথা সমুপযন্তি নরামরানং

পাণানি দারুণতরে মরণোদধিম্হি;

১৫.

রুদ্ধোপি সো রথৰরস্সগজাধিপেহি

যোধেহি চাপি সবলেহি চ সাযুধেহি,

লোকং ৰিৰংচিয সদা মরণূসভো সো

কামং নিহন্তি ভুৰনত্তয সালি দণ্ডং;

১৬. ¶

ভো মারুতেন মহতা ৰিহতো পদীপো

খিপ্পং ৰিনাস মুখমেতি মহপ্পভোপি,

লোকে তথা মরণচণ্ড সমীরণেন

খিপ্পং ৰিনস্সতি নরাযুমহা পদীপো;

১৭

রামজ্জুনপ্পভূতি ভূপতি পুংগৰা চ

সূরা পুরে রণমুখে ৰিজিতারি সঙ্ঘা,

তেপীহ চণ্ড মরণোঘ নিমুগ্গদেহা

নাসং গতা জগতি কে মরণা পমুত্তা?

১৮.

লক্খী চ সাগরপটা সধরাধরা চ

সম্পত্তিযো চ ৰিৰিধা অপি রূপসোভা,

সব্বা চ তা অপি চ মিত্তসুতা চ দারা

কে চাপি কং অনুগতা মরণং ৰজন্তং?

১৯. ¶

ব্রহ্মাসুরাসুরগণা চ মহানুভাৰা

গন্ধব্বকিন্নরমহোরগরক্খসা চ,

তে চা পরে চ মরণগ্গিসিখায সব্বে

অন্তে পতন্তি সলভা ইৰ খীণপুঞ্ঞা;

২০.

যে সারিপুত্তপমুখা মুনিসাৰকা চ

সুদ্ধা সদাসৰনুদা পরমিদ্ধিপত্তা,

তে চাপি মচ্চুৰল়ভা মুখ সন্নিমুগ্গা

দীপানিৰানলহতা খযতং উপেতা;

২১.

বুদ্ধাপি বুদ্ধকমলামলচারুনেত্তা

বত্তিংসলক্খণ ৰিরাজিত রূপসোভা,

সব্বাসচক্খযকরাপি চ লোকনাথা

সম্মদ্দিতা মরণমত্তমহাগজেন;

২২. ¶

রোগাতুরেসু করুণা ন জরাতুরেসু

খিড্ডাপরেসু সুকুমারকুমারকেসু,

লোকং সদা হনতি মচ্চু মহাগজিন্দো

দৰানলো ৰনমিৰাৰরতং অসেসং;

২৩.

আপুণ্ণতা ন সলিলে ন জলাসযস্স

কট্ঠস্স চাপি বহুতা ন হুতাসনস্স,

ভুত্ৰান সো তিভূৰনম্পি তথা অসেসং

ভো নিদ্দযো ন খলু পীতিমুপেতি মচ্চু;

২৪.

ভো মোহ মোহিততযা ৰিৰসো অধঞ্ঞো

লোকো পতত্যপিপি মচ্চুমুখে সুভীমে,

ভোগে রতিং সমুপযাতি নিহীনপঞ্ঞো

দোলা তরঙ্গচপলে সুপিনোপমেয্যে;

২৫. ¶

একোপি মচ্চুরভিহন্তুমলং তিলোকং

কিং নিদ্দযা অপি জরামরণানুযাযী,

কো ৰা করেয্য ৰিভসুৰেসু চ জীৰিতাসং

জাতো নরো সুপিন সংগম সন্নিভেসু;

২৬.

নিচ্চাতুরং জগদিদং সভযং সসোকং

দিস্ৰা চ কোধমদমোহজরাভিভূতং,

উব্বেগমত্তমপি যস্স ন ৰিজ্জতী চে

সো দারুণোন মরণং ৰত তং ধিরত্থু!

ভো ভো ন পস্সথ জরাসিধরঞ্হি মচ্চু

মাহঞ্ঞমানমখিলং সততং তিলোকং,

কিং নিদ্দযা নযথ ৰীতভযা তিযামং

ধম্মং সদা’সৰনুদং চরথ’প্পমত্তা;

২৮. ¶

ভাৰেথ ভো মরণমারৰিৰজ্জনায

লোকে সদা মরণ সঞ্ঞমিমং যতত্তা,

এৰঞ্হি ভাৰনরতস্স নরস্স তস্স

তণ্হা পহীযতি সরীরগতা অসেসা;

২৯.

রূপং জরা পিযতরং মলিনীকরোতি

সব্বং বলং হরতি অত্তনি ঘোররোগো,

নানূপভোগ পরিরক্খিত মত্তভাৰং

ভো মচ্চু সংহরতি কিং ফলমত্তভাৰে?

৩০.

কম্মানিলাপহতরোগতরংগভংগে

সংসার সাগর মুখে ৰিততে ৰিপন্না,

মা মাপমাদমকরিত্থ করোথ মোক্খং

দুক্খোদযো ননু পমাদমযং নরানং;

৩১. ¶

ভোগা চ মিত্তসুতপোরিস বন্ধৰা চ

নারী চ জীৰিতসমা অপি খেত্তৰত্থু,

সব্বানি তানি পরলোকমিতো ৰজন্তং

নানুব্বজন্তি কুসলাকুসলংৰ লোকে;

৩২.

ভো ৰিজ্জুচংচলতরে ভৰসাগরম্হি

খিত্তা পুরা কতমহাপৰনেন তেন,

কামং ৰিভিজ্জতি খণেন সরীরনাৰা

হত্থে করোথ পরমং গুণহত্থসারং;

৩৩.

নিচ্চং ৰিভিজ্জতিহ আমক ভাজনংৰ

সংরক্খিতোপি বহুধা ইহ অত্তভাৰো,

ধম্মং সমাচরথ সগ্গপতিপ্পতিট্ঠং

ধম্মো সুচিণ্ণমিহমেৰ ফলং দদাতি;

৩৪. ¶

রন্ত্ৰা সদা পিযতরে দিৰি দেৰরজ্জে

নম্হা চৰন্তি ৰিবুধা অপি খীণপুঞ্ঞা,

সব্বং সুখং দিৰি ভুৰীহ ৰিযোগনিট্ঠং

কো পঞ্ঞৰা ভৰসুখেসু রতিং করেয্য?

৩৫.

বুদ্ধো সসাৰকগণো জগদেকনাথো

তারাৰলীপরিৰুতোপি চ পুণ্ণচন্দো,

ইন্দোপি দেৰমকুটংকিত পাদকঞ্জো

কো ফেণপিণ্ড-ন-সমো তিভৰেসু জাতো?

৩৬.

লীলাৰতংসমপি যোব্বন রূপসোভং

অত্তূপমং পিযজনেন চ সম্পযোগং,

দিস্ৰাপি ৰিজ্জুচপলং কুরুতে পমাদং

ভো মোহমোহিতজনো ভৰরাগরত্তো;

৩৭. ¶

পুত্তো পিতা ভৰতি মাতু পতীহ পুত্তো

নারী কদাচি জননী চ পিতা চ পুত্তো,

এৰং সদা ৰিপরিৰত্ততি জীৰলোকো

চিত্তে সদাতিচপলে খলু জাতিরঙ্গে;

৩৮.

রন্ত্ৰা পুরে ৰিৰিধফুল্ললতাকুলেহি

দেৰাপি নন্দনৰনে সুরসুন্দরীহি,

তে ৰে’কদা ৰিততকণ্টকসংকটেসু

ভো কোটিসিম্বলিৰনেসু ফুসন্তি দুক্খং;

৩৯.

ভুত্ৰা সুধন্নমপি কঞ্চনভাজনেসু

সগ্গে পুরে সুরৰরা পরমিদ্ধিপত্তা,

তে চাপি পজ্জলিতলোহগুলং গিলন্তি

কামং কদাচি নরকালয ৰাসভূতা;

৪০. ¶

ভুত্ৰা নরিস্সরৰরা চ মহিং অসেসং

দেৰাধিপা চ দিৰি দিব্বসুখং সুরম্মং,

ৰাসং কদাচি খুরসঞ্চিতভূতলেসু

তে ৰা মহারথগণানুগতা দিৰীহ;

৪১.

দেৰঙ্গনা ললিতভিন্নতরঙ্গমালে

রঙ্গে মহিস্সরজটামকুটানুযাতে,

রন্ত্ৰা পুরে সুরৰরা পমদাসহাযা

তে চাপি ঘোরতরৰেতরণিং পতন্তি;

৪২.

ফুল্লানি পল্লৰলতাফলসংকুলানি

রম্মানি নন্দনৰনানি মনোরমানি,

দিব্বচ্ছরাললিতপুণ্ণদরীমুখানি

কেলাসমেরুসিখরানি চ যন্তি নাসং;

৪৩. ¶

দোলা’নিলা’নলতরংগসমা হি ভোগা

ৰিজ্জুপ্পভাতিচপলানি চ জীৰিতানি,

মাযামরীচিজলসোমসমং সরীরং

কো জীৰিতে চ ৰিভৰে চ করেয্য রাগং?

৪৪.

কিং দুক্খমত্থি ন ভৰেসু চ দারুণেসু

সত্তোপি তস্স ৰিৰিধস্স ন ভাজনো কো,

জাতো যথা মরণরোগজরাভিভূতো

কো সজ্জনো ভৰরতিং পিহযেয্য’বালো?

৪৫.

কে ৰাপি পজ্জলিতলোহগুলং গিলন্তি

সক্কা কথঞ্চিদপি পাণিতলেন ভীমং,

দুক্খোদযং অসুচিনিস্সৰনং অনন্তং

কো কামযেথ খলু দেহমিমং অবালো?

৪৬. ¶

লোকে ন মচ্চুসমমত্থি ভযং নরানং

ন ৰ্যাধিদুক্খসমমত্থি চ কিংচি দুক্খং,

এৰং ৰিরূপকরণং ন জরাসমানং

মোহেন ভো রতিমুপেতি তথাপি দেহে;

৪৭.

নিস্সারতো নলকলীকদলীসমানং

অত্তানমেৰ পরিহঞ্ঞতি অত্তহেতু,

সম্পোসিতোপি কুসহায ইৰাকতঞ্ঞূ

কাযো ন যস্স অনুগচ্ছতি কালকেরা;

৪৮.

তং ফেণপিণ্ডসদিসং ৰিসসূলকপ্পং

তোযা’নিলা’নলমহীউরগাধিৰাসং,

জিণ্ণালযংৰ পরিদুব্বলমত্তভাৰং

দিস্ৰা নরো কথমুপেতি রতিং সপঞ্ঞো?

৪৯. ¶

আযুক্খযং সমুপযাতি খণে খণেপি

অন্ৰেতি মচ্চু হননায জরাসিপাণী,

কালং তথা ন পরিৰত্ততি তং অতীতং

দুক্খং ইদং ননু ভৰেসু অচিন্তনীযং?

৫০.

অপ্পাযুকস্স মরণং সুলভং ভৰেসু

দীঘাযুকস্স চ জরা ৰ্যসনং চ’নেকং,

এৰং ভৰে উভযতোপি চ দুক্খমেৰ

ধম্মং সমাচরথ দুক্খৰিনাসনায;

৫১.

দুক্খগ্গিনা সুমহতা পরিপীল়িতেসু

লোকত্তযস্স ৰসতো ভৰৰারকেসু,

সব্বত্ততা সুচরিতস্স পমাদকালো

ভো ভো ন হোতি পরমং কুসলং চিণাথ;

৫২. ¶

অপ্পং সুখং জললৰং ৰিয ভো তিণগ্গে

দুক্খন্তু সাগরজলং ৰিয সব্বলোকে,

সংকপ্পনা তদপি হোতি সভাৰতো হি

সব্বং তিলোকমপি কেৰলদুক্খমেৰ;

৫৩.

কাযো ন যস্স অনুগচ্ছতি কাযহেতু

বালো অনেকৰিধমাচরতীহ দুক্খং,

কাযো সদা কলি মলাকলিলঞ্হি লোকে

কাযে রতো’নৰরতং ৰ্যসনং পরেতি

৫৪.

মীল়্হাকরং কলিমলাকরমামগন্ধং

সূল়াসিসল্লৰিসপন্নগরোগভূতং,

দেহং ৰিপস্সথ জরামরণাধিৰাসং

তুচ্ছং সদা ৰিগতসারমিমং ৰিনিন্দ্যং;

৫৫. ¶

দুক্খং অনিচ্চমসুভং ৰত অত্তভাৰং

মা সংকিলেসয ন ৰিজ্জতি জাতু নিচ্চো,

অম্ভো ন ৰিজ্জতি হি অপ্পমপীহ সারং

সারং সমাচরথ ধম্মমলং পমাদং;

৫৬.

মাযামরীচিকদলীনলফেণপুঞ্জ-

গংগাতরঙ্গজলবুব্বুলসন্নিভেসু,

খন্ধেসু পঞ্চসু ছল়াযতনেসু তেসু

অত্তা ন ৰিজ্জতি হি কো ন ৰদেয্য’বালো?

৫৭.

ৰঞ্ঝাসুতো সসৰিসাণমযে রথে তু,

ধাৰেয্য চে চিরতরং সধুরং গহেত্ৰা,

দীপচ্চিমালমিৰ তং খণভঙ্গভূতং

অত্তাতি দুব্বলতরন্তু ৰদেয্য দেহং;

৫৮. ¶

বালো যথা সলিলবুব্বুলভাজনেন

আকণ্ঠতো ৰত পিবেয্য মরীচিতোযং,

অত্তানি সাররহিতং কদলীসমানং

মোহা ভণেয্য খলু দেহমিমং অনত্তং;

৫৯.

যো’দুম্বরস্স কুসুমেন মরীচিতোযং

ৰাসং যদিচ্ছতি স খেদমুপেতি বালো,

অত্তানমেৰ পরিহঞ্ঞতি অত্তহেতু

অত্তা ন ৰিজ্জতি কদাচিদপীহ দেহে;

৬০.

পোসো যথা হি কদলী সুৰিনিব্ভুজন্তো

সারং তদপ্পম্পি নোপলভেয্য কামং,

খন্ধেসু পংচসু ছল়াযতনেসু তেসু

সুঞ্ঞেসু কিঞ্চিদপি নোপলভেয্য সারং;

৬১. ¶

সুত্তং ৰিনা ন পটভাৰমিহত্থি কিংচি

দেহং ৰিনা ন খলু কোচি মিহত্থি সত্তো,

দেহো সভাৰরহিতো খণভংগযুত্তো,

কো অত্তহেতু অপরো ভুৰি ৰিজ্জতীহ?

৬২.

দিস্ৰা মরীচিসলিলঞ্হি সুদূরতো ভো

বালো মিগো সমুপধাৰতি তোযসঞ্ঞী,

এৰং সভাৰরহিতে ৰিপরীতসিদ্ধে

দেহে পরেতি পরিকপ্পনযা হি রাগং;

৬৩.

দেহে সভাৰরহিতে পরিকপ্পসিদ্ধে

অত্তা ন ৰিজ্জতি হি ৰিজ্জুমিৰন্তলিক্খে,

ভাৰেথ ভাৰনরতা ৰিগতপ্পমাদা

সব্বাসৰপ্পহননায অনত্তসঞ্ঞং;

৬৪. ¶

লালাকরীসরুধিরস্সুৰসানুলিত্তং

দেহং ইমং কলিমলাকলিলং অসারং,

সত্তা সদা পরিহরন্তি জিগুচ্ছনীযং

নানাসুচীহি পরিপুণ্ণঘটং যথেৰ;

৬৫.

ণহাত্ৰা জলঞ্হি সকলং চতুসাগরস্স

মেরুপ্পমাণমপি গন্ধমনুত্তরঞ্চ,

পপ্পোতি নেৰ মনুজো হি সুচিং কদাচি

কিং ভো ৰিপস্সথ গুণং কিমু অত্তভাৰে?

৬৬.

দেহো স এৰ ৰিৰিধাসুচিসন্নিধানো

দেহো স এৰ ৰধবন্ধনরোগভূতো,

দেহো স এৰ নৰধা পরিভিন্নগণ্ডো

দেহং ৰিনা ভযকরং ন সুসানমত্থি;

৬৭. ¶

অন্তোগতং যদিৰ মুত্তকরীসভাগো

দেহা বহিং অতিচরেয্য ৰিনিক্খমিত্ৰা,

মাতা পিতা ৰিকরুণা চ ৰিনট্ঠপেমা

কামং ভৰেয্যু কিমু বন্ধুসুতা চ দারা?

৬৮.

দেহং যথা নৰমুখং কিমিসঙ্ঘগেহং

মংসট্ঠিসেদরুধিরাকলিলং ৰিগন্ধং,

পোসেন্তি যে ৰিৰিধপাপমিহাচরিত্ৰা

তে মোহিতা মরণধম্মমহো ৰতেৰং!

৬৯.

গণ্ডূপমে ৰিৰিধরোগ নিৰাসভূতে

কাযে সদা রুধিরমুত্তকরীসপুণ্ণে,

যো এত্থ নন্দতি নরো সসিগালভক্খে

কামঞ্হি সোচতি পরত্থ স বালবুদ্ধি;

৭০. ¶

ভো ফেণপিণ্ডসদিসো ৰিয সারহীনো

মীল়্হালযো ৰিয সদা পটিকূলগন্ধো,

আসীৰিসালযনিভো সভযো সদুক্খো

দেহো সদা সৰতি লোণঘটোৰ ভিন্নো;

৭১.

জাতং যথা ন কমলং ভুৰি নিন্দনীযং

পঙ্কেসু ভো অসুচিতোয সমাকুলেসু,

জাতং তথা পরহিতম্পি চ দেহভূতং

তং নিন্দনীযমিহ জাতু ন হোতি লোকে;

৭২.

দ্ৰত্তিংসভাগপরিপূরতরো ৰিসেসো

কাযো যথা হি নরনারি গণস্স লোকে,

কাযেসু কিং ফলমিহত্থি চ পণ্ডিতানং

কামং তদেৰ ননু হোতি পরোপকারং;

৭৩. ¶

পোসোন পণ্ডিততরেন তথাপি দেহো

সব্বত্তনা চিরতরং পরিপালনীযো,

ধম্মং চরেয্য সুচিরং খলু জীৰমানো

ধম্মে হৰে মণিৰরো ইৰ কামদো ভো

৭৪.

খীরে যথা সুপরিভাৰিতমোসধম্হি

স্নেহেন ওসধবলং পরিভাসতেৰ,

ধম্মো তথা ইহ সমাচরিতো হি লোকে

ছাযাৰ যাতি পরলোক মিতো ৰজন্তং;

৭৫.

কাযস্স ভো ৰিরচিতস্স যথানুকূলং

ছাযা ৰিভাতি রুচিরামলদপ্পণে তু,

কত্ৰা তথেৰ পরমং কুসলং পরত্থ

সম্ভূসিতা ইৰ ভৰন্তি ফলেন তেন;

৭৬. ¶

দেহে তথা ৰিৰিধদুক্খ নিৰাসভূতে

মোহা পমাদৰসগা সুখসঞ্ঞমূল়্হা,

তিক্খে যথা খুরমুখে মধুলেহমানো

বাল়্হঞ্চ দুক্খমনুগচ্ছতি হীনপঞ্ঞো;

৭৭.

সংকপ্পরাগৰিগতে নিরতত্তভাৰে

দুক্খং সদা সমধিগচ্ছতি অপ্পপঞ্ঞো,

মূল়্হস্স চেৰ সুখসঞ্ঞমিহত্থিলোকে

কিংপক্কমেৰ ননু হোতি ৰিচারমানে;

৭৮.

সব্বোপভোগ ধনধঞ্ঞৰিসেসলাভী

রূপেন ভো স মকরদ্ধজসন্নিভোপি,

যো যোব্বনেপি মরণং লভতে অকামং

কামং পরত্থপরপাণহরো নরো হি;

৭৯.

সো যাচকো ভৰতি ভিন্নকপালহত্থো

মুণ্ডো ধিগক্খরসতেহি চ তজ্জযন্তো,

ভিক্খং সদারিভৰনে সকুচেলৰাসো

দেহে পরত্থি পরচিত্তহরো নরো যো;

৮০. ¶

ইত্থী নমুঞ্চতি সদা পুন ইত্থিভাৰা

নারী সদা ভৰতি সো পুরিসো পরত্থ,

যো আচরেয্য পরদারমলঙ্ঘনীযং

ঘোরঞ্চ ৰিন্দতি সদা ৰ্যসনঞ্চ নেকং;

৮১.

দীনো ৰিগন্ধৰদনো চ জল়ো অপঞ্ঞো

মূগো সদা ভৰতি অপ্পিযদস্সনো চ,

পপ্পোতি দুক্খমতুলঞ্চ মনুস্সভূতো

ৰাচং মুসা ভণতি যো হি অপঞ্ঞসত্তো;

৮২.

উম্মত্তকা ৰিগতলজ্জগুণা ভৰন্তি

দীনা সদা ৰ্যসনসোকপরাযণা চ,

জাতা ভৰেসু ৰিৰিধেসু ৰিরূপদেহা

পীত্ৰা হলাহলৰিসংৰ সুরং ৰিপঞ্ঞা;

৮৩.

পাপানি যেন ইহ আচরিতানি যানি

যো ৰস্সকোটিনহুতানি অনপ্পকানি,

লদ্ধান ঘোরমতুলং নরকেসু দুক্খং

পপ্পোতি চেত্থ ৰিৰিধৰ্যসনঞ্চ নেকং;

৮৪. ¶

লোকত্তযেসু সকলেসু সমং ন কিংচি

লোকস্স সন্তিকরণং রতনত্তযেন,

তংতেজসা সুমহতা জিতসব্বপাপো

সোহং সদাধিগতসব্বসুখো ভৰেয্যং;

৮৫.

লোকত্তযেসু সকলেসু চ সব্বসত্তা

মিত্তা চ মজ্ঝরিপুবন্ধুজনা চ সব্বে,

তে সব্বদা ৰিগতরোগভযা ৰিসোকা

সব্বং সুখং অধিগতা মুদিতা ভৰন্তু;

৮৬.

কাযো করীসভরিতো ৰিয ভিন্নকুম্ভো

কাযো সদা কলিমলৰ্যসনাধিৰাসো,

কাযে ৰিহঞ্ঞতি চ সব্বসুখন্তি লোকো

কাযো সদা মরণরোগজরাধিৰাসো;

৮৭. ¶

সো যোব্বনোতি থৰিরোতি চ বালকোতি

সত্তে ন পেক্খতি ৰিহঞ্ঞতিরেৰ মচ্চু,

সোহং ঠিতোপি সযিতোপি চ পক্কমন্তো

গচ্ছামি মচ্চুৰদনং নিযতং তথা হি;

৮৮.

এৰং যথা ৰিহিতদোসমিদং সরীরং

নিচ্চংৰ তগ্গতমনা হদযে করোথ,

মেত্তং পরিত্তমসুভং মরণস্সতিঞ্চ

ভাৰেথ ভাৰনরতা সততং যতত্তা;

৮৯.

দানাদি পুঞ্ঞকিরিযানি সুখুদ্রযানি

কত্ৰা চ তম্ফলমসেস মিহপ্পমেয্যং,

দেয্যং সদা পরহিতায সুখায চেৰ

কিম্ভো তদেৰ ননু হত্থগতঞ্হি সারং?

৯০.

হেতুং ৰিনা ন ভৰতী হি চ কিংচি লোকে

সদ্দোৰ পাণিতলঘট্টনহেতুজাতো,

এৰঞ্চ হেতুফল ভাৰৰিভাগভিন্নো

লোকো উদেতি চ ৰিনস্সতি তিট্ঠতী চ;

৯১. ¶

কম্মস্স কারণামযঞ্হি যথা অৰিজ্জা

ভো কম্মনা সমধিগচ্ছতি জাতিভেদং,

জাতিং পটিচ্চ চ জরামরণাদিদুক্খং

সত্তা সদা পটিলভন্তি অনাদিকালে;

৯২.

কম্মং যথা ন ভৰতীহ চ মোহনাসা

কম্মক্খযাপি চ ন হোতি ভৰেসু জাতি,

জাতিক্খযা ইহ জরামরণাদিদুক্খং

সব্বক্খযো ভৰতি দীপেৰানিলেন;

৯৩.

যো পস্সতীহ সততং মুনিধম্মকাযং

বুদ্ধং স পস্সতি নরো ইতি সো অৰোচ,

বুদ্ধঞ্চ ধম্মমমলঞ্চ তিলোকনাথং

সম্পস্সিতুং ৰিচিনথা’পি চ ধম্মতং ভো;

৯৪. ¶

সল্লংৰ ভো সুনিসিতং হদযে নিমুগ্গং

দোসত্তযং ৰিৰিধপাপমলেন লিত্তং,

নানাৰিধব্যসনভাজনমপ্পসন্নং

পঞ্ঞামযেন বলিসেন নিরাকরোথ;

৯৫.

নাকম্পযন্তি সকলাপি চ লোকধম্মা

চিত্তং সদাপগতপাপকিলেসসল্লং,

রূপাদযো চ ৰিৰিধা ৰিসযা সমগ্গা

ফুট্ঠংৰ মেরুসিখরং মহতানিলেন;

৯৬.

সংসারদুক্খমগণেয্য যথা মুনিন্দো

গম্ভিরপারমিত সাগরমুত্তরিত্ৰা,

ঞেয্যং অবোধি নিপুণং হতমোহজালো

তস্মা সদা পরহিতং পরমং চিণাথ;

৯৭.

ওহায সো’ধিগতমোক্খসুখং পরেসং

অত্থায সংচরি ভৰেসু মহব্ভযেসু,

এৰং সদা পরহিতং পুরতো করিত্ৰা

ধম্মো মযানুচরিতো জগদত্থমেৰ;

৯৮. ¶

লদ্ধান দুল্লভতরঞ্চ মনুস্সযোনিং

সব্বং পপঞ্চরহিতং খণসম্পদঞ্চ,

ঞত্ৰান আসৰনুদেকহিতঞ্চ ধম্মং

কো পঞ্ঞৰা অনৰরং ন ভজেয্য ধম্মং?

৯৯.

লদ্ধান বুদ্ধসমযং অতিদুল্লভংচ

সদ্ধম্ম মগ্গমসমং সিৰদং তথেৰ,

কল্যাণমিত্তপৰরে মতিসম্পদঞ্চ

কো বুদ্ধিমা অনৰরং ন ভজেয্য ধম্মং?

১০০.

এৰম্পি দুল্লভতরং ৰিভৰে সুলদ্ধা

মচ্ছেরদোস ৰিরতা উভযত্থকামা,

সদ্ধাদিধম্মসহিতা সততপ্পমত্তা

ভো! ভো! করোথ অমতাধিগমায পুঞ্ঞং;