📜

সমন্তকূটৰণ্ণনা

নমো তস্স ভগৰতো অরহতো সম্মাসম্বুদ্ধস্স

.

সততৰিতত কিত্তিং ধস্তকন্দপ্পদপ্পং

তিভৰহিতৰিধানং সব্বলোকেককেতুং,

অমিতমতিমনগ্ঘং সন্তিদং মেরুসারং

সুগতমহমুদারং রূপসারং নমামি;

.

হতদুরিততুসারং মোহপঙ্কোপতাপং

মনকমলৰিকাসং জন্তুনং সেসকানং,

কুমতিকুমুদনাসং বুদ্ধপুব্বাচলগ্গা

উদিতমহমুদারং ধম্মভানুং নমামি;

.

সকলৰিমলসীলং ধুতপাপারিজালং

সুরনরমহনীযং পাহুনেয্যাহুনেয্যং,

উজুপথপটিপন্নং পুঞ্ঞখেত্তং জনানং

গণমহমভিৰন্দে সারদং সাদরেন;

.

ইতি কল়িত পণামা হন্ত্ৰ সব্বোপসগ্গে

সুগতৰিমল পাদম্ভোজসম্পাত পূতং,

সুমনসিখরিরাজং ৰণ্ণযিস্সং সুরানং

ৰসতি মতুলমেতং সাধুজন্তু সুণন্তু;

.

সৰণা লপনা চেৰ সতিযা চাপি ৰন্দনা,

যস্স সম্মা সুখী হোতী নিব্বাণঞ্চাধিগচ্ছতি;

.

তস্মা সপ্পুরিসেহে’দং পত্থেন্তেহি তিসম্পদং,

সৰণীযঞ্হি সাধূহি অচিক্খিত্তেন চেতসা;

.

যো লোকতিলকো নাথো পূরেত্ৰা দস পারমী,

জাতোসি তুসিতে কাযে সন্তুসিতো’তি ৰিস্সুতো;

.

আরাধিতো সুরাদীহি কালো মারিস তে অযং,

তিণ্ণো তারযিমং লোকং বহূ অপ্পরজক্খকা;

.

এতদত্থায তে ৰীর পূরিতা দস পারমী,

বাহুং পিতুস্স পুত্তো’ৰ লোকো আলম্বতে তুৰং;

১০.

তেসং তং ৰচনং সুত্ৰা মহাসত্তো মহামতী,

ৰিলোকনে ৰিলোকেত্ৰা পঞ্চামল ৰিলোচনো;

১১.

জম্বুদীপগ্গকমলে কণ্ণিকা’ৰ মনোরমা,

পুরী কপিল়ৰত্থূ’সি ৰিসাণা’ৰ সুধাসিনং;

১২.

সিঙ্গীনিক্খমযাভাস তুঙ্গসিঙ্গসমঙ্গিতা,

মণিসীহপঞ্জরাকিণ্ণ পাসাদা যত্থ ভাসরে;

১৩.

সঘনে গগনে নিচ্চং সতেরতসতানি’ৰ,

অনিলেরিতপজ্জোত সোণ্ণকেতু অহূ যহিং;

১৪.

জনানং নীলনেত্তেহি ৰদনেহি তু যা পুরী,

মধুপালিসমোনদ্ধ কঞ্জিনী সিরিমাৰহে;

১৫.

রঙ্গতুঙ্গতুরঙ্গেহি গজ্জিতেহি চ যা পুরী,

সঘোসুত্তুঙ্গকল্লোল লোলসাগরসন্তিভা;

১৬.

অৰ্হমানা’ৰ দেৰানং পুরলখ্যা ভুজা ইৰ,

মন্দানিলেরিতা তুঙ্গ নানারাগদ্ধজা যহিং;

১৭.

নানাৰেসধরা যস্মিং নানাভূসণ ভূসিতা,

নানাসম্পত্তিসংযুত্তা নানাৰিজ্জাসু পারগা;

১৮.

নৰযোব্বন উদ্দামা রূপেন চ মনোহরা,

সচ্চেসু নিরতা নিচ্চং অনক্কুট্ঠকুলা সিযুং;

১৯.

নিচ্চং কীল়া ৰিদদ্ধাহি নরনারীহি সেৰিতা,

যা পুরী সাধুরূপা’সি মধুরালাপিনীহি চ;

২০.

তস্মিং সদ্ধাদযোপেত ওক্কাককুলকেতুকো,

সুদ্ধোদনৰ্হযো আসী ৰিস্সুতো ভুৰনত্তযে;

২১.

যস্সঙ্ঘিকমলে সব্ব ভুভুজানং মহীতলে,

কিরীটমণিহিঙ্গালি কীল়ন্তী’ৰ নিরন্তরং;

২২.

যস্স পত্থটতেজেন পুরনেতাপি দিৰাকরো,

ৰহনীচ’ম্বরে লীলং ওসধীপতিনো দিৰা;

২৩.

যস্স দানপ্পৰাহো তু নানাযাচক জন্তুনং,

মনোদধীসু ৰেলন্তেতিক্কমন্তোৰ সত্ততং;

২৪.

মতিযা সুরমন্তীৰ ধনেন ধনদো ৰিয,

রূপেন কুসুমেসু’ৰ যো জুম্হতি মহীতলে;

২৫.

তস্সাভিসিত্তা রজ্জেন মহামাযাতি ৰিস্সুতা,

চন্দিকা ৰিয চন্দস্স গিরিরাজা’ৰ কপালিতো;

২৬.

লক্খী’ৰ ৰাসুদেৰস্স সীতা’ৰ রামরাজিনো,

মহেসীসি ৰরারোহা সুন্দরী সুন্দরাধরা;

২৭.

তস্সা কুচ্ছিকরণ্ডম্হি অনগ্ঘরতনং ৰিয,

খত্তিংসাহি নিমিত্তেহি ৰিম্হাপেন্তো সদেৰকং;

২৮.

সিতম্বুজকরো সন্তো সিতেভচ্ছাপকো ৰিয,

কত্ৰা পদক্খিণং মাতু পটিসন্ধিমগণ্হি সো;

২৯.

দসেকাদসমাসেন তস্সেৰং আসি চেতনা,

পস্সিতুং সকঞাতীনং গন্ত্ৰান নগরং তদা;

৩০.

নিৰেদেত্ৰা তমত্থং সা রঞ্ঞো তেন সুসজ্জিতে,

সপরিচ্ছদা তদা মগ্গে গচ্ছন্তি অন্তরাপথে;

৩১.

দেৰতানং মনোনন্দকর নন্দন সন্নিভং,

দিস্ৰান লুম্বিনিং নাম উয্যানং মননন্দনং;

৩২.

তস্মিং কীল়িতুমুস্সাহা পৰিসিত্ৰান তং ৰনং,

কীল়ন্তি উপগন্ত্ৰান মঙ্গলং সালপাদপং;

৩৩.

ৰিলোল পল্লৰাকিণ্ণং সুফুল্লকুসুমোনতং,

গহেত্ৰা সালসাখং সা সুরত্তকর পল্লৰা;

৩৪.

দেৰেহি গহিতা’রক্খা মহমানে সদেৰকে,

জনেসি তনযং মাযা তত্রট্ঠা লোকলোচনং;

৩৫.

ব্রহ্মানো লোকপালা চ মনুস্সা কমতো তদা,

সোণ্ণজালাজিনাদীহি গণ্হিংসু জননন্দনং;

৩৬.

মহিং পতিট্ঠিতো ধীরো পস্সিত্ৰান ততো দিসা,

উত্তরাভিমুখো সত্তপদং গণ্ত্ৰা’ম্বুজে ঠিতো;

৩৭.

দিসন্তমৰলোকেত্ৰা সুফুল্লম্বুজলোচনো,

নিচ্ছারেসাসভিং ৰাচং অগ্গো সেট্ঠো’তিআদিনা;

৩৮.

ব্রহ্মামরনরাদীহি পূজিতো চ নমস্সিতো,

কমেন অভিৰড্ঢন্তো জুণ্হপক্খে সসী যথা;

৩৯.

ব্রহ্মূনং ছত্তছাযায মন্দারকুসুমন্তরে,

সানন্দামন্দদেৰেহি ধুতচামরমজ্ঝগো;

৪০.

দিব্বেহি রূপসদ্দেহি গন্ধেহি চ রসেহি চ,

ফোট্ঠব্বেহি চ দিব্বেহি মোদমানো অনেকধা;

৪১.

দিব্বেহি রমণীযেহি নচ্চেহি ৰাদিতেহি চ,

পদানেকসহস্সেহি থূযমানগুণাকরো;

৪২.

পত্ৰা সোল়সমং ৰস্সং ঞাতিসঙ্ঘস্স মজ্ঝগো,

দস্সেত্ৰা’সেসসিপ্পং তং লোকে ৰিজ্জতি যং তদা;

৪৩.

ঞাতিসঙ্ঘং পমোদেন্তো দেৰে চ মনুজে’পি চ,

লদ্ধা যসোধরং দেৰিং’নুকূলং জাতিজাতিযং;

৪৪.

সোণ্ণদপ্পণসঙ্কাস সোম্মানন ৰিভুসিতং,

নীলনীরজসঙ্কাস ৰিসালাযত লোচনং;

৪৫.

সিঙ্গারমন্দিরদ্ৰারে ধজোপমভমুদ্ৰযং,

হেমকাহলসঙ্কাস নাসিকং রূপলক্খিযা

৪৬.

নীলৰেল্লিতধম্মিল্ল জিমুতোভয কোটিযং,

নিচ্চৰিজ্জুল্লতাচক্ক মনুঞ্ঞকণ্ণপাসকং;

৪৭.

সাতকুম্ভনিভাভাস পযোধরঘটদ্ৰং,

সুৰণ্ণদ্দিতটাযাত নিজ্ঝরাকারহারকং

৪৮.

দেহদেৰদ্দুমালম্ব পারোহাভভুজদ্ৰযং,

অঙ্গুলীপল্লৰন্তম্বু বিন্দুচারু নখাৰলিং;

৪৯.

দেহমালালিমালাভ রোমরাজিৰিরাজিতং,

রূপণ্ণৰতরঙ্গাহ ৰলিত্তয ৰিচিত্তকং;

৫০.

সোণ্ণরম্ভাসমাৰট্ট পিণোরুদ্ৰয সুন্দরং,

সন্নিরকলিকাকার চারুজঙ্ঘা ৰিভূসিতং;

৫১.

পচ্চক্খরূপলক্খিঞ্চ লীলানিচয সন্নিভং,

গুণানমাকরং সাধু ৰেলংৰ রতিসাগরে;

৫২.

কন্তো ৰসন্তরাজা’ৰ কন্দপ্পো’ৰ সুরূপৰা,

সসী’ৰ দস্সনীযো চ সূরিযো ৰিয তেজৰা;

৫৩.

অচলত্তেন মেরূৰ গম্ভীরেনণ্ণৰো ৰিয,

ব্রহ্মস্সরো পিযংৰাদী পঞ্গ্ঞায চ অনূপমো;

৫৪.

ৰসন্তো সো মহাৰীরো পুরস্মিং কপিলৰ্হযে,

দিস্ৰা নিমিত্তে চতুরো উয্যান গমনঞ্জসে;

৫৫.

পব্বজ্জাভিরতো নাথো গন্ত্ৰা উয্যানভূমিযং,

সুফুল্লচম্পকাসোক নাগাদা’গেহি মণ্ডিতং;

৫৬.

ফুল্লপঙ্কজ কল়্হার জলাজলয সতাকুলং,

মন্দমন্দানিলাযাত নানামোদেহি ৰাসিতং;

৫৭.

সরা সরং সমাযাত মধুব্বত নিসেৰিতং,

ফলপুপ্ফরসুদ্দাম দ্ৰিজ সঙ্ঘ নিকূজিতং;

৫৮.

নচ্চন্ত মত্তমোরানং নিচ্চং মণ্ডপসন্তিভং,

দিব্বন্ত মিগসগ্ঘানং কীল়ামণ্ডপ সন্নিভং;

৫৯.

সমীর সিসিরোদার ধারাসীকর ৰারিহি,

ধারামণ্ডপ পন্তীহি জনানন্দকরং ৰরং;

৬০.

উয্যানৰনমাগম্ম দেৰরাজাৰ নন্দনং,

কীল়ন্তো নিজপুত্তস্স সুত্ৰান জাতসাসনং;

৬১.

নিৰত্তো ৰিস্সকম্মেন সহস্সক্খোৰ ভূসিতো,

পুরং পৰিসমানোৰ কিসা গোতমি ভাসিতং;

৬২.

সুত্ৰান নিব্বুতপদং তদা চিত্তানুকূলকং,

সন্তুট্ঠো সানুরাগো চ লক্খগ্ঘং তারভাসুরং;

৬৩.

হারং তিস্সায পেসেত্ৰা গন্ত্ৰান সকমন্দিরং,

দেৰরাজৰিলাসেন নিসীদি পৰরাসনে;

৬৪.

অথাগম্ম তদা নেকনাটিকা পরিৰারযুং,

ৰজ্জন্তি ভেরিযো তাসু পগ্গয্হ কাচি নারিযো;

৬৫.

নানালযসমাকিণ্ণং গীতং গাযন্তি কাচি’পি,

ধমন্তি সুসিরং কাচি কাচি ৰাদেন্তি তন্তিযো;

৬৬.

চারু বিম্বাধরারম্ম পযোধরভরা সুভা,

ৰিসালাযত নীলক্খা সোমসোম্মাননা তদা;

৬৭.

নচ্চন্তি পুরতো তস্স ভেরিমণ্ডল মজ্ঝগা,

দেৰকঞ্ঞাৰ রঙ্গম্হী রসভাৰনিরন্তরং;

৬৮.

দিস্ৰান সো তমচ্ছরিযং ৰিরত্তো ৰিসযে তদা,

উরত্তাল়ঞ্চ অদ্দক্খি সব্বন্তং ভেরিতাল়নং;

৬৯.

পরিদেৰং’চুপট্ঠাসি গীতং সংসারসাগরে,

ৰাযুৰেগ ৰিকারং’ৰ নচ্চং চিন্তেসি নাযকো;

৭০.

’কদাহং ঘরমোস্সজ্জ পব্বজ্জাসিরি মুব্বহে?’

ইচ্চেৰং চিন্তযন্তো সো সুপন্তোৰ সযী তহিং;

৭১.

’যং নিস্সায মযং এত্থ নচ্চগীতেসু ৰ্যাৰটা,

সো’যং’দানি সুপী’ অম্হে কস্সদানি করোম তং?;

৭২.

ইতি চিন্তিয তে তত্থ তুরিযেসু সকে সকে,

আলম্বা সযিতা কঞ্ঞা সুসঞ্ঞাঞ্ঞমনিস্সিতা;

৭৩.

খাদন্তি কাচি দন্তানি কাচি লালা ৰহন্তিযো,

কাচি রুদন্তিযো তত্থ ৰিলপন্তি অথা’পরা;

৭৪.

কাকচ্ছন্তি’পি সেম্হম্পি গিলন্তি চ চমন্তি চ,

করোন্তি নাদং নাসায ঘরূ’তি চ খিপন্তি চ;

৭৫.

মুত্তযন্তি তদা কাচি রহস্সং ৰিচরন্তি চ,

দুগ্গন্ধং ৰাতি তং ঠানং সুসানং আমকং যথা;

৭৬.

পবুদ্ধো অড্ঢরত্তম্হি গতে তত্থ নিসীদিয,

অদ্দক্খি তাসং নেকানি ৰিকারানি তহিং তদা;

৭৭.

তস্সেৰং পেক্খমানস্স ভৰে সংৰিগ্গচেতসো,

আদিত্তংৰ উপট্ঠাসি মনে খলু ভৰত্তযং;

৭৮.

দাৰানল সমাদিত্ত মহারঞ্ঞাযথা গজো,

তথেৰাসি নরিন্দস্স গেহতো গমনে মতী;

৭৯.

ততো ৰুট্ঠায সযনা করোন্তো অভিনিক্খমং,

ৰিতক্কেসি মহারাজা পস্সিতুং সকমত্রজং;

৮০.

পৰিসিত্ৰা ততো গব্ভং সনিকং সন্তমানসো,

পস্সিত্ৰা সহ পুত্তেন নিদ্দাযন্তিং যসোধরং;

৮১.

চিরাগতং মহাপেমং ধারযং সকমানসে,

বুদ্ধো হুত্ৰাপি’মং সক্কা পস্সিতুং ইতি চিন্তিয;

৮২.

গতো নাথো ততো ঠানা বোধিযা বদ্ধমানসো

তদহেৰাসি বুদ্ধোতি কামুকো কো ন চিন্তযে;

৮৩.

সিনেরু মুদ্ধরন্তোৰ পাদুদ্ধরিয নিক্খমং,

ছন্নমাহূয আনীতং কন্থকং তুরগাধিপং;

৮৪.

অস্সরাজং তমারুয্হ সহ ছন্নেন রত্তিযং,

দেৰেহি ৰিৰটদ্ৰরা পটিপজ্জি মহাপথং;

৮৫.

চক্কৰাল়েসু নেকেসু দেৰতা সুসমাগতা,

দীপধূপদ্ধজেহে চ গন্ধমালেহি পূজযুং;

৮৬.

পুরতো সট্ঠীসহস্সানি দণ্ডদীপানি ধারযুং,

তথা দক্খিণপস্সম্হি ৰামপস্সে চ পচ্ছতো;

৮৭.

গগনা পুপ্ফৰস্সানি ৰস্সাপেসুং ছ দেৰতা,

মন্দারৰং কোকনদং সুগন্ধং চিত্তপাট লিং;

৮৮.

চম্পকা সোক পুন্নাগ নাগপূগাগ সম্ভৰং,

মালতীৰস্সিকীযাদী নানাৰল্লীহি সম্ভৰং;

৮৯.

পদুমুপ্পল কলহার কুমুদাদ্যাম্বু সম্ভৰং,

সুগন্ধমধু মত্তাহি ছপ্পদালীহি কূজিতং;

৯০.

পুপ্ফৰস্সং পৰস্সিত্থ তিংসযোজনমঞ্জসে,

পসত্তো তত্থ তুরগো দুক্খতো অগমী তদা;

৯১.

এৰং পূজাৰিধানেহি গন্ত্ৰা’নোমং মহানদিং,

সিতসেকত সঙ্কিণ্ণং বহুমীনকুলাকুলং;

৯২.

তীরট্ঠো পস্সি সো ধীরো গঙ্গানারিং রসাৰহং,

করোন্তিং ৰীচিবাভাতি এণেপুপ্ফোপহারকং;

৯৩.

অস্সেন তং মহানোমং লঙ্ঘাপেত্ৰা মহামতী,

পরতীরে পতিট্ঠাসি ৰিমলে ৰালুকা তলে;

৯৪.

পব্বজিতুং মযেত্থেৰ যুত্তং নো মে পপঞ্চিতুং,

ইতি চিন্তিয ওভায ধারিতাভরণানি সো;

৯৫.

ছন্নস্স পটিযাদেত্ৰা কন্থকঞ্চ হযাধিপং,

নিসিতং খগ্গমুগ্গয্হ সমোলিং ছিন্দি কুন্তলং;

৯৬.

এৰমাৰজ্জযং নাথো সচে’হং সুগতো ভৰে,

তিট্ঠতু গগনে গন্ত্ৰা ইতি উক্খিপি চ’ম্বরং;

৯৭.

ততো সক্কো মহগ্ঘেন মণিচঙ্গোটকেন তং,

পটিগ্গহেত্ৰা সিরসং নেত্ৰা দেৰপুরং চরং;

৯৮.

কারেত্ৰা মণিথূপং সো নীধেত্ৰা তং সিরোরুহং,

অত্থাহং পতিমানেতি সহদেৰেহি নেকধা;

৯৯.

মহাব্রহ্মোপনীতট্ঠপরিক্খারং মহামতী,

পটিগ্গহেত্ৰা কাসাৰং নিৰত্থো পারুতো তদা;

১০০.

পুব্বে ৰিযম্বরং গয্হ অম্বরে খিপি নাযকো,

পটিগ্গহেত্ৰা তং ব্রহ্মা নেত্ৰা ব্রহ্মপুরং চরং;

১০১.

দ্ৰাদসযোজনুব্বেধং কত্ৰা থূপৰরং সুভং,

তত্থ তং নিদহিত্ৰান পণিপাতেতি সব্বদা;

১০২.

সম্পুণ্ণ মনসঙ্কপ্পো পব্বজ্জাসিরি মুব্বহং,

ছাদেন্তো কামলেনেৰ মরুং চঙক্কমি নাযকো;

১০৩.

ততো অম্বৰনং গন্ত্ৰা ৰিন্দন্তো পীতিজং সুখং,

ৰীতিনামযি সত্তাহং রম্মে পাদপমণ্ডপে;

১০৪.

ততো রাজগহং গন্ত্ৰা পারুপিত্ৰা চীৰরং,

গহেত্ৰা মণিৰণ্ণং সো পত্তং করতলম্বুজা;

১০৫.

বত্তিংস লক্খণূপেতো অনুব্যঞ্জন মণ্ডিতো,

ব্রহ্মুজ্জুগত্তো ভগৰা পুরসেট্ঠমুপাগমি;

১০৬.

ৰিসিখন্তরেন গচ্ছন্তং লোকেকনযনং জনা,

দিস্ৰা এৰং ৰিচিন্তেসুং নাযং যো সো জনাধিপো;

১০৭.

কামং পুরৰধুসোম্ম ৰত্তসম্বন্ধকারণা,

চন্দো’যমাগতো অজ্জ সকৰেসেন নো মতি;

১০৮.

সুত্ৰান তং তদা কেচি হসন্তা ৰচনন্তরং,

নাযং সসী সসঙেকা সো ভানুমেসো’তি নো মতি;

১০৯.

বোধেতুমাগতো কামং পোরীনং ৰদনম্বুজে,

সকীযেনেৰ রূপেন ৰিম্হযং পোরিমানুসে;

১১০.

কিং ভো উম্মত্তকা অত্থ এৰং মা ৰদথা’ধুনা,

সতরংসী উণ্হরংসী ন সো এসো অৰিগ্গহো;

১১১.

কামেনালসজন্তুহি কীল়িতুং পুরমাগতো,

সরূপেন ন নো অত্থি সংসযো বলু মানসে;

১১২.

তেসং তং ৰচনং সুত্ৰা হসন্তা কেচি জন্তুনো,

তুম্হে খলূ ন জানাথ সবাণে সধনূ হি সো;

১১৩.

ইস্সরো কন্তরূপেন তুঙ্গমন্দিরতা পুরং,

কেলাসো ইতি সম্পত্তো জহাথ ৰিমতিং ইধ;

১১৪.

তেসম্পি ৰচনং সুত্ৰা হসন্তেকে জনা তদা,

নাযং হরো তিনেত্তো সো কেসৰেসো ইধাগতো;

১১৫.

ৰিচিণন্তো সিরিং অজ্জ পুরসেট্ঠমুপাগতং,

ৰেসেনঞ্ঞেন মঞ্ঞাম এত্থ নো নত্থি সংসযো;

১১৬.

পহরিত্ৰা করং কেচি সুত্ৰা তং ৰচনং নরা,

হসন্তেৰং তদাৰোচুং ৰাসুদেৰো ন ৰে অযং;

১১৭.

কামং সরোজনাভো সো ৰামনো কণ্হৰিগ্গহো,

অযমঞ্ঞতরচণ্ণেন আগতো পাকসাসনো;

১১৮.

পুরং দেৰপুরন্তেতং মঞ্ঞমানো মহাজুতিং,

পস্সিতুন্তি পটিঞ্ঞাতো মা ভোন্তো ৰিলপন্তু ৰে;

১১৯.

সুত্ৰা তেসং গিরং কেচি কেল়িং কত্ৰান নেকধা,

তুম্হে সক্কং ন জানাথ সো হি ভো ৰজিরাযুধো;

১২০.

এসো হি ভো মহাব্রহ্মা ব্রহ্মলোকা ইধাগতো,

পমত্তা কিন্নু ৰেদম্হী ব্রহ্মবন্ধু পুরে ইধ;

১২১.

অথেসং ৰচনং সুত্ৰা কেচি পণ্ডিতজাতিকা,

নেতে চন্দাদযো কামং মা মোহং ভো পকাসথ;

১২২.

চতুরাননো মহাব্রহ্মা সোমসোম্মাননো অযং,

সমন্তপোত্থকো ব্রহ্মা পত্তহত্থো’যমব্ভুতো;

১২৩.

কামং পারমিতাপুণ্ণ পসত্থো পুরিসো অযং,

নিচ্চং ৰন্দথ পূজেথ থোমেথেতং মহাজুতিং;

১২৪.

এৰং ৰদন্তা সব্বে তে নাগরা পুরিসুত্তমং,

গন্ধপুপ্ফেহি পুজেন্তা নমস্সন্তা তমন্ৰগুং;

১২৫.

নেত্তারিত্তেহি পাজেন্তা মুনিনো রূপসাগরে,

জন্তৰো মননাৰাযো পারং পস্সিংসু নো তদা;

১২৬.

তদা লোকেকনযনো সপদানেন ৰীথিযং,

চরং যাপনমত্তংৰ লদ্ধাগম্ম পুরা বহি;

১২৭.

পণ্ডৰং গিরিমাসজ্জ তস্সচ্ছাযায সো মুনি;

সঙ্ঘাটিং পঞ্ঞপেত্ৰান নিসজ্জ পুরিসাসভো;

১২৮.

অদিট্ঠপুব্বং দিস্ৰান পত্তে মিস্সকভোজনং,

সঞ্জাতপটিকূলো তং নুদিত্ৰা পচ্চৰেক্খণা;

১২৯.

অমতং ৰিয তং ভুত্ৰা ৰিক্খালেত্ৰা মুখং দকা,

পত্তে ৰত্তং চরিত্ৰান মুহুত্তং তত্থ ৰিস্সমি;

১৩০.

পৰত্তিং তং নিসামেত্ৰা বিম্বিসারো নরিস্সরো,

সীঘং তমুপগন্ত্ৰান কতানুঞ্ঞো নিসীদিয;

১৩১.

নিমন্তযিত্ৰা রজ্জেন অনিচ্ছন্তে যতিস্সরে,

অনুগ্গহায মে যুত্তং বুদ্ধভূতেনিধাগমং;

১৩২.

এৰং নিমন্তিতো তেনাধিৰাসেত্ৰা মহামতী,

অগমাসুরুৰেলায মতুলোরু পরক্কমো;

১৩৩.

পধানং পদহিত্ৰান ছব্বস্সমতিদুক্করং,

পকাসেত্ৰান লোকস্স মোক্খং নত্থিতি তেন সো;

১৩৪.

ততোপ্পভুতি ৰত্তন্তো মজ্ঝিমপ্পটি পত্তিযং,

কাযস্সানুগ্গহং কত্ৰা ততো সম্পিণিতি’ন্দ্রিযো;

১৩৫.

মূলে’জপালনিগ্রোধপাদপস্স মহামুনি,

নিসীদি নিজসোভাহি ওভাসেন্তো দিসোদিসং;

১৩৬.

তদা সেনানি নিগমে সুজাতা খীর দাযিকা,

সম্পুণ্ণমনসঙ্কপ্পা যাচিত্ৰা ৰটদেৰতং;

১৩৭.

ধীরং দেৰোতি মঞ্ঞন্তি তুট্ঠহট্ঠা পমোদিতা,

হেমপাতিং সপাযাসং দত্ৰান ইদম’ব্রুৰি;

১৩৮.

যথা ময্হং মহাদেৰ ইদ্ধা পত্থিত পত্থনা,

তথেৰ তৰ সঙ্কপ্পো খিপ্পমেৰ সমিজ্ঝতু;

১৩৯.

ইতি ৰত্ৰান ৰন্দিত্ৰা কত্ৰা চ নং পদক্খিণং,

পক্কন্তায সুজাতায ধীরো পাতিং সমাদিয;

১৪০.

উপগন্ত্ৰানাতিরম্মং নদিং সো নীলৰাহিনিং,

সুপ্পতিট্ঠিতনামম্হি নদীতিত্থে নিসীদিয;

১৪১.

ভুঞ্জিত্ৰা ঊনপণ্ণাস পিণ্ডং কত্ৰান ভোজনং,

ৰিস্সজ্জেত্ৰা ততো পাতিং পটিসোতং নরাসভো;

১৪২.

ততো সালৰনুয্যানে ৰিস্সমন্তো দিৰাদিনে,

দিস্ৰান সুপিনে পঞ্চ অত্থং তেসং ৰিচিন্তিয;

১৪৩.

আবোধিমূলতো মগ্গে দেৰেহি সমলঙ্কতে,

মণিতোরণপালীহি পুণ্ণকুম্ভদ্ধাজাদিহি;

১৪৪.

সাযণ্হসমযে নাথো গচ্ছন্তো বোধি সন্তিকং,

দিস্ৰান সোত্থিযং নাম থূযমানং দিজুত্তমং;

১৪৫.

তেন দিন্নট্ঠ মুট্ঠিন্তু গহেত্ৰা নীলসদ্দলং,

বোধিমূলমুপাগম্ম কত্ৰান তং পদক্খিণং;

১৪৬.

অকাসি তীণসন্থারং পাচীনাভিমুখং তদা,

ততো মহিং দ্ৰিধা কত্ৰা সমুট্ঠাসি মহাসনং;

১৪৭.

উচ্চং চুদ্দসহত্থেন নানা চিত্ত ৰিচিত্তিতং,

অভট্ঠনহিত্থ তত্রট্ঠো ইচ্চেৰং দল়্হমানসো;

১৪৮.

কামং তচো নহারূ চ অট্ঠি চ অৰসিস্সতু,

উপসুস্সতু মে গত্তে সব্বন্তং মংসলোহিতং;

১৪৯.

ন উট্ঠহামবুজ্ঝিত্ৰা ন জহে ৰীরিযং মম,

অধিট্ঠহিত্ৰা এৰং সো নিসীদি ৰজিরাসনে;

১৫০.

অনতিক্কমং ঠপেত্ৰান চরণং চরণুপরি,

কমলং কমলেনেৰ মণিবন্ধং ৰিধায সো;

১৫১.

বালাসোকদলাসত্ত পরং ৰা’সোকপল্লৰং,

নিধায নযনানত্দ পাণিং পাণিতলে জিনো;

১৫২.

যথা সঞ্ঝাঘনালীঢ তুঙ্গকঞ্চন পব্বতো,

সুরত্তচীৰরচ্ছন্ন চারিগত্ত ৰিরাজিতো;

১৫৩.

উদযাৰলকোটিম্হি দিপ্পন্তোৰ দিৰাকরো

কন্ধরোপরি দিপ্পন্ত মুখমণ্ডলমণ্ডিতো;

১৫৪.

যথা চামিকরব্যম্হে সুনীলং সীহপঞ্জরং,

অসম্পকম্পপম্হেহি পিহিতদ্ধসুলোচনো;

১৫৫.

নীলুপ্পলকলাপংচ জননেত্তালিপাতনং,

সজ্ঝুদণ্ডসমাবদ্ধ বোধিক্খন্ধমফস্সি সো;

১৫৬.

নিসিন্নো বোধিতো ছেজ্জ পৰাল়তরুণঙ্কুরা,

পতমানা সমন্তাসুং তেজং ৰিয কুবুদ্ধীনং;

১৫৭.

দেৰা তত্থ সমাগঞ্জুং খিপ্পং দসসহস্সিযং,

কমলাসনোরগা চেৰ সিদ্ধৰিজ্জাধরাদযো

১৫৮.

সহম্পতি মহাব্রহ্মা ব্রহ্মসেনাপুরক্খতো,

সিতাতপত্তং ধারেন্তো ঠীতো সম্বুদ্ধ সন্তিকে;

১৫৯.

ৰীসং রতন সতাযামং ৰিজযুত্তর নামকং,

সঙ্খং ধমেন্তো অট্ঠাসি সাদরো পাকসাসনো;

১৬০.

সুযামো সহ সেনায থোমযন্তো নরাধিপং,

মণিতালৰণ্টং পগ্গয্হ মন্দমন্দেন ৰীজতি;

১৬১.

জিতকিত্তি লতগ্গম্হি সস্স পুপ্ফংচ পুপ্ফীতং,

ৰাল়ৰিজনিমুগ্গয্হ অট্ঠা সন্তুসিতো তহিং;

১৬২.

বেলুৰং ৰীণমাদায গীতং নানালযানুগং,

পঞ্চসিখো ঠিতো তত্থ গাযমানো অনেকধা;

১৬৩.

মহাকালো’পি নাগিন্দো নাগসঙ্ঘপুরক্খতো,

থোমেন্তো তত্থ অট্ঠাসি নৰারহগুণাদিহি;

১৬৪.

রঙ্গভুমিং মাপযিত্ৰা গহেত্ৰান ৰরঙ্গনা,

উপহারং করোন্তট্ঠা তিম্বরূ সূরিযৰচ্চসা;

১৬৫.

আগন্ত্ৰা সহ সেনায সিতঙ্গো সিতভুসনো,

ধতরট্ঠো ঠিতো পুব্বে আরক্খং কুরুমানকো;

১৬৬.

পূরেন্তো সকসেনায দক্খিণস্সং ৰিরূল়্হকো,

আরক্খং কুরুমানট্ঠা নীলঙ্গো নীলভুসনো;

১৬৭.

ৰিরূপক্খো’পি অট্ঠাসি পালযং পচ্ছিমং দিসং,

রত্তঙ্গাভরণো ৰম্মী নিজসেনাপুরক্খতো;

১৬৮.

উত্তরস্সং সসেনায আরক্খং কুরুমানকো,

সোণ্ণৰণ্ণঙ্গাভরণো অট্ঠাসি নরৰাহনো;

১৬৯.

কিমেত্থ বহুলাপেন জাতিক্খেত্তম্হি দেৰতা,

নাগতা নেৰ ৰাহেসুং সব্বে এত্থে’ৰ ওসটা;

১৭০.

গগনাতোতিণ্ণকেতু পাদেহি পথৰীতলে,

নাগাদযো ন ধুতাসুং কেতুনং বহু কা কথা;

১৭১.

ন ধূতা ধজপাদেহি ৰাযুতুদ্দামৰুত্তিহি,

তারকা গগনে ব্রূমো কিন্নু তত্থ ধজালুতা;

১৭২.

পুব্বদিসা চক্কৰাল় সিলাযুগ্গতকেতুনং,

পাদানি পরভাগাদি চক্কৰাল়সিলন্ৰগুং;

১৭৩.

চক্কৰাল় মহামেরু যুগন্ধর নগাদযো,

পুপ্ফাৰতংসকা’ৰাসুং নানাৰণ্ণেহি সঙ্খতা;

১৭৪.

ৰামামন্দমকরন্দ বিন্দুসন্দোহ সুন্দরং,

উল্লোল পদুমাকিণ্ণ ৰিতানং ৰাসি অম্বরং;

১৭৫.

খিত্তসোগন্ধচুণ্ণানি দেৰব্রহ্মাদিনা তহিং,

ৰিতানং ৰিয খাযন্তি চক্কৰাল়গ্গমণ্ডপে;

১৭৬.

কপ্পূরাগরুধূপেহী তত্থ তত্থুগ্গতেহি মা,

কালব্ভকূটচ্ছন্নোৰ আসি মঞ্ঞং কথেমু কিং;

১৭৭.

জাতিক্খেত্তেসু দেৰেহি কতগ্ঘিকুসুমাদিনা,

নোসীনা ধরণী ভারা দিসেভানং বলং অহো;

১৭৮.

অম্বরালম্বমানানী পুপ্ফদামানি ভূতলং,

আকড্ঢনায দেৰেহি বদ্ধরজ্জুৰ ভাসরে

১৭৯.

অঞ্ঞোঞ্ঞকরমুগ্গয্হ গগনে সুরসুত্দরী,

পরিব্ভমন্তা গাযন্তি তত্থ তত্থ মনোরমং;

১৮০.

উভো ভুজে ৰিকাসেত্ৰা মণ্ডিতং সুরসুত্দরী,

ভমন্তি ভন্তভেণ্ডুৰ তত্থ তত্থম্বরে যুগা;

১৮১.

নীলুপ্পলকলাপাদী গহেত্ৰান সুরঙ্গনা,

ঠীতাসুং পরিৰারেত্ৰা পূজমানা নরিস্সরং;

১৮২.

রত্নপল্লৰকলহার কমলুপ্পল সঙ্গতে,

সন্নীরকুসুমাকিণ্ণে পুণ্ণেসোগন্ধৰারিহী;

১৮৩.

কঞ্চনাদিঘটে গয্হ অম্বরে সুরসুন্দরী,

কত্ৰান সুগতং মজ্ঝে পূজযিংসু সমন্ততো

১৮৪.

কঞ্চনাদাসহত্থা চ কাচী কঞ্ঞা তথা ঠিতা,

তালৰণ্টে গহেত্ৰান ঠীতাসুং কাচি দেৰতা;

১৮৫.

কাচি মঙ্গল সংযুত্ত ৰচনা তৰ পত্থনা,

সমিজ্ঝতুতি ঘোসেন্তী পরিৰারেত্ৰা ঠিতা জিনং;

১৮৬.

সিরিৰচ্ছাদি পগ্গয্হ অট্ঠমঙ্গলমুত্তমং,

ঠিতাসুং গগনে নারী পরিৰারেত্ৰা মুনিস্সরং;

১৮৭.

নচ্চন্তি কেচি কীল়ন্তি সেলেন্তি চ ললন্তি চ,

ৰাদেন্তি কেচি গাযন্তি ৰেলুক্খেপং করোন্তি চ;

১৮৮.

নেকপুপ্ফগ্ঘিপন্তী চ তথা দীপগ্ঘিপন্তি চ,

মণিচামীকরাসজ্ঝু অগ্ঘিকা পন্তিযো তথা;

১৮৯.

আব্রহ্মভৰনুগ্গম্ম চক্কৰাল়সমন্ততো,

তিট্ঠন্তি জলমানাযো বুদ্ধস্স মঙ্গলুস্সৰে;

১৯০.

সত্তরতনসম্ভুতা নানা তোরণপন্তীযো,

হেমরম্ভামযা চাপি তথা দুস্সমযা সিযুং;

১৯১.

নানাৰণ্ণেহি নেকেহি ছত্তেহি চ নিরন্তরং,

চক্কৰাল়োদরং আসি সরংচ কমলাকুলং;

১৯২.

তত্থ তত্থুজ্জলানেক যন্তদীপাৰলী মহী,

তারকাজালকাকিণ্ণ গগনঙ্গনসন্তিভা;

১৯৩.

ধজন্তরিত ছত্তা’সুং চক্কৰাল়গিরূপরি,

নিরন্তরা’সুং তত্থেৰ ঘটদীপা চ তোরণ;

১৯৪.

নানাতুরিযনাদেহি নানাসঙ্গীতিতাহি চ,

সাধুৰাদেহি নেকেহি চক্কৰাল়ো ফুটো অহূ;

১৯৫.

অহো মহন্ততা তস্স বুদ্ধস্স কতমঙ্গলে,

পূজাৰিসেসং তং কো হি মুখেনেকেন ভাসতী;

১৯৬.

চতুম্মুখো সহস্সক্খো দ্ৰিসহস্সনযনো ফণী,

দসকণ্ঠো’পি তং সব্বং নেৰ সক্কোন্তি ভাসিতুং;

১৯৭.

এৰং সুরাসুরব্রহ্ম ৰেনতেয্যোরগাদিহি,

নিরন্তরং কতানেক মহামহ সমাকুলে;

১৯৮.

তস্মিন্তু ৰাসরে মারো পস্সিত্ৰা ভুৰনং ইদং,

আমন্তেত্ৰা সানুৰরে আহেৰং সকুতূহলো;

১৯৯.

সব্বে দিব্বৰিমানা ভো সুঞ্ঞা দিস্সন্তি ছড্ডিতা,

পুরপালম্পহাপেত্ৰা ক্ৰ গতা’সুং সদেৰকা;

২০০.

কিম্ভো মার ন জানাসি মত্তো সুত্তো’সি অজ্জ কিং,

সুদ্ধোদনিয সিদ্ধত্থো মাযায তনযো অযং;

২০১.

পুরেত্ৰা পারমী সব্বা কত্ৰান অভিনিক্খমং,

বোধিমুলে নিসিন্নো সি অজ্জ বুদ্ধো ভৰামীতি;

২০২.

তস্স পূজাৰিধানত্থং দসসহস্সীসু দেৰতা,

সমাগতা হট্ঠতুট্ঠা করোন্তজ্জ মহামহং;

২০৩.

কিন্নু তে বধিরং সোতং কিন্নু পরিহাযি লোচনং,

ধজগ্গা তে ন দিস্সন্তি উল্লোলং তে ন সূযতি;

২০৪.

তেসং তং ৰচনং সুত্ৰা অন্তকো খলু পাপিমা,

দুক্খিতো দুম্মনো তেসং সোচন্তো ইদম্ব্রুৰি;

২০৫.

অহো ৰতা’তিপরিহানি সংসারস্স মহা অযং,

অসারো খলু সংসারো সিদ্ধত্থে ৰিভৰং গতে;

২০৬.

অহো ৰতা’তি নট্ঠম্হা তিৰট্টং পরিপুরিতং,

হোতি ভো দহনা দড্ঢৰনংৰাতি অলক্খিকং;

২০৭.

নিরালোকং তিলোকং ভো অসুরং ৰাসরং যথা,

পরিমোসরতনং হোতি রজ্জং ৰেদং জগত্তযং;

২০৮.

মমেস ৰিসযং হিত্ৰা যাতি সিদ্ধত্থদারকো,

তেন যাতেন মগ্গেন নিক্খমন্তি বহুজ্জনা;

২০৯.

ভৰন্তং ন করোতেসো যাৰ সুদ্ধোদনত্রজো,

এথ গচ্ছাম সিদ্ধত্থমসিদ্ধত্থং করোম ভো;

২১০.

মাপেথ ভেরৰং ৰণ্ণং বীভচ্ছং দুদ্দসং খরং,

সদ্দেনেৰ পলাপেথ তূলভট্টংৰ ৰাযুনা;

২১১.

তস্স তং ৰচনং সুত্ৰা মারসেনা সমাগমুং,

নানাৰেসধরা হুত্ৰা নানাযুধ সমঙ্গিনো;

২১২.

যোজনানং তদা মারো দিযড্ঢসতমুচ্চতো,

গিরিমেখলমারুয্হ সেনায সহসা’গমী;

২১৩.

দিস্ৰান দুরতো এত্তং দেৰা মারং সৰাহিনিং,

ভযট্টাপগমুং খিপ্পং ধাৰমানা দিসোদিসং;

২১৪.

সংখিপ্প খিপ্পং সচ্ছত্তং ব্রহ্মা ধাৰি পরম্মুখো,

কত্ৰান পিট্ঠিযং সঙ্খং সক্কো ধাৰি ৰিসঙ্কিতো;

২১৫.

মহাকালো’পি নাগিন্দো নিমুজ্জ মহিযং তদা,

ৰত্তদত্তকরো ভীরু সকে নিপতি মঞ্চকে;

২১৬.

সং সং পূজাৰিধানন্তু ছড্ডেত্ৰান সদেৰকা,

গতাসুং সুঞ্ঞকং আসি চক্কৰাল়মিদং তদা;

২১৭.

নিস্সিরীকং পদেসং তং অসোভং অসমঞ্জসং,

অহোসি পতিতানেক পূজাভণ্ডসমাকুলং;

২১৮.

একোৰ তত্থ সুগতো নিসীদি ৰজিরাসনে,

পজ্জলং নিজসিরিযা সূরিযোৰ যুগন্ধরে;

২১৯.

অকম্পো চ অসন্ত্রাসী লোমহংস ৰিৰজ্জিতো,

অভীতো সীহরাজাৰ মিগচ্ছাপানমগ্গতো;

২২০.

ততো ধম্মিস্সরস্সগ্গে দুন্নিমিত্তানি জাযরুং,

অন্ধকারং দিসা আসুং ধূমকেতু চ অম্বরে;

২২১.

দিনং দুদ্দিনকং আসি হতরংসি দিৰাকরো,

উক্কাপতো’পি পঞ্ঞাযি দিসাডাহোপপজ্জথ;

২২২.

অঘনে গগনে আসুং ইন্দচাপৰিরজ্জুতী,

অনলাসনিযো’দিত্তা তত্থ তত্থ পতন্তী চ

২২৩.

কাকোলসঙ্ঘা ৰস্সিংসু উণ্ণ সকুণকোসিযা,

চরিংসু অম্বরে’পেতা কবন্ধা চ ভযাৰহা;

২২৪.

সেনং সংৰিদহিত্ৰান ততো মারো অভিদ্দৰি,

আগন্ত্ৰা চক্কৰাল়ম্হি ঠিতো জিনমুদিক্খিয;

২২৫.

এককস্স মনুস্সস্স সন্তিকোপগমং মম,

ন যুত্তঞ্হি গজো যাতি গজং নো যাতি কোত্থুকং;

২২৬.

নেতং গরু পলাপেতুং কালো ইতি ৰিচিন্তিয,

মাপেসি কুপিতো খিপ্পং কপ্পনিল সমানিলং;

২২৭.

খিপন্তো গগনে খিপ্পং উদ্ধরিত্ৰা ৰনস্পতী,

কত্ৰান ৰনমুম্মূলং ৰিদ্ধংসেন্তো অসেসকং;

২২৮.

চালেত্ৰা তালসালাদিং লুঞ্চিত্ৰা গগনে খিপং,

পাতেন্তো চক্কৰাল়ন্তে ৰাজিসীহ গজাদযো;

২২৯.

পহরিত্ৰা ৰিৰত্তেত্ৰা গিরিকূটানি উক্খিপং,

ভমযন্তো নভোমজ্ঝে ধাৰতেৰ ততো ততো;

২৩০.

সিলাহি সিলাসঙ্ঘট্ট মহানাদং পৰত্তযং,

পাতেন্তো দহনঞ্চাপি ধূমমম্বর মুক্খিপং;

২৩১.

ভমযন্তো গহেত্ৰান অম্বরে ছদনিট্ঠিকা,

পাসাদে পরিৰত্তেত্ৰা পহরন্তো নগাদিসু;

২৩২.

খনন্তো পথৰিং পংসুং গহেত্ৰাম্বরমণ্ডলে,

বন্ধন্তোৰ পরং ভুমিং ভিন্দন্তো তুঙ্গপব্বতে;

২৩৩.

ভযানকেন সদ্দেন উপগম্ম মহামুনিং,

চালেতুং নেৰ সো সক্খি অংসুমত্তম্পি চীৰরে;

২৩৪.

তদাসি ৰিজযো তস্স সম্বুদ্ধস্স সিরীমতো,

পঠমে মারযুদ্ধম্হি মারস্সাসি পরাজযো;

২৩৫.

এৰং মহানুভাৰোতি মন্ত্ৰান নরসারথিং,

নিচ্চং ৰন্দথ পূজেথ সো হি ৰো সরণং সদা;

ইতি পঠমো ৰিজযো.

২৩৬.

দিস্ৰা নমুচি ধীরস্স মালুতেনানুপদ্দৰং,

দুক্খী চ দুম্মনো আসি কোধেনাতুরমানসো;

২৩৭.

হোতু দানি মহোঘেন পৰাহেমি ইমং যতিং,

মাপেত্ৰান মহামেঘং সোচনায অলং মম;

২৩৮.

ইতি চিন্তিয সো মারো মহামেঘমমাপযি,

দিসাসুম্পিহিতা সব্বা অন্ধকারো অৰত্থরি;

২৩৯.

উপরূপরি গুণা হুত্ৰা সহস্সানি সতানি’পি,

ধারাধরা মহাধারা ৰত্তযিংসু সমন্ততো;

২৪০.

সোদামিনীসহস্সেহি ৰিনদ্ধংৰ নভং অহূ,

তত্থ তত্থ দিসাভাগে ইন্দচাপা অৰত্তথ;

২৪১.

মহারজতরজ্জূহি সিব্বিতাৰ নভাৰনী,

ধরাধরোরুধারাহি নিরন্তরপৰত্তিহি;

২৪২.

তত্থ তত্থ পতন্তানি ঘোরাসনিসতা অহুং,

মহাভীম নভো ভেরিস্সনা আসুং তহিং তহিং;

২৪৩.

উদ্ধরন্তো মহাসেলে মহোঘো চ তদুব্ভৰে,

কেলাস সিখরাকার এণেপুঞ্জে সমুব্বহং;

২৪৪.

মহাথূপপ্পমাণাদি মহাবুব্বুলমুব্বহং,

গম্ভীরো পুথুলো চণ্ডো উপগম্ম জিনন্তিকং;

২৪৫.

সরীরে লোমমত্তম্পি তেমেতুমসমত্থকো,

গতো মহোঘো বুদ্ধস্স’ভো’নুভাৰমহন্ততা;

২৪৬.

তদাসি ৰিজযো তস্স সম্বুদ্ধস্স সিরীমতো,

দুতিযে মারযুদ্ধম্হি মারস্সাসী পরাজযো;

২৪৭.

এৰং মহানুভাৰোতি মন্ত্ৰান নর সারথিং,

নিচ্চং ৰন্দথ পূজেথ সো হি ৰো সরণং সদা;

দুতিযো ৰিজযো.

২৪৮.

ততো মারো অসক্কোন্তো ৰস্সোঘেন উপদ্দৰং,

কাতুং তস্স উসূযাদি কোপাকুলমনো তদা;

২৪৯.

ভৰতজ্জ কিমেতেন মারণে তস্স কিং গরু,

ইদানঙ্গারৰুট্ঠীহি ঝাপেমি সহসা ইমং;

২৫০.

ইতি চিন্তিয সো মারো মাপেত্ৰাঙ্গার ৰুট্ঠিযো,

পেসেসি নভসা তস্স সম্বুদ্ধস্স উপন্তিকং;

২৫১.

মহাপব্বতসঙ্কাস জলিতঙ্গার রাসযো,

ধাৰিংসু নহসা তত্থ অচ্চিমন্তো মহব্ভযা;

২৫২.

চিচ্চিটাযন সদ্দেহি পূরযন্তো দিসন্তরং,

ধূপাযন্তো ফুলিঙ্গেহি মারস্সাপি ভযাৰহা;

২৫৩.

উজ্জালেন্তা মহারুক্খে পব্বতে’পি চ সম্মুখে,

নরকোদরুগ্গতা অগ্গী রাসীৰাতি ভযাৰহা;

২৫৪.

উপগন্ত্ৰা মুহুত্তেন নিসিন্নং মুনিপুঙ্গৰং,

মধুমত্তালিঝঙ্কার নাদাকুলদিসামুখা;

২৫৫.

পাতেন্তি সততামন্দ মকরন্দজ বিন্দৰো,

মালাৰতংসকা হুত্ৰা পাদমুলে পতিংসু তা;

২৫৬.

তদাসি ৰিজযো তস্স সম্বুদ্ধস্স সিরীমতো,

ততিযে মার যুদ্ধম্হি মারস্সাসি পরাজযো;

২৫৭.

এৰং মহানুভাৰোতি মন্ত্ৰান নরসারথিং,

নিচ্চং ৰন্দথ পূজেথ সো হি ৰো সরণং সদা;

ততিযো ৰিজযো.

২৫৮.

তেনানুপদ্দুতং বুদ্ধং পস্সিত্ৰান পজাপতি,

দুক্খিতো দুম্মনো হুত্ৰা এৰং চিন্তেসি দুম্মতি;

২৫৯.

পাসাণৰস্সং মাপেত্ৰা চুণ্ণেত্ৰা পনিমং যতিং,

ৰিদ্ধংসেমীতি চিন্তেত্ৰা মাপেসূপলৰস্সকং;

২৬০.

তস্মিং ৰস্সে’তি বীভচ্ছা ধূমাযন্তা সজোতিকা,

জলিতঙ্গারসঙ্কাসা পাসাণুচ্চাৰচা বহূ;

২৬১.

করানঞ্ঞোঞ্ঞসঙ্ঘট্টা মহন্তং ভেরৰং রৰং,

দুদ্দিনং ধূমজালাহি কুরুমানা সমন্ততো;

২৬২.

সত্থূপগন্ত্ৰাভিমুখং সন্তমালাগুলা ৰিয,

পতিংসু সিরিপাদে তে অমন্দামোদৰাহিনো;

২৬৩.

তদাসি ৰিজযো তস্স সম্বুদ্ধস্স সিরীমতো,

চতুত্থে মারযুদ্ধম্হি মারস্সাসি পরাজযো;

২৬৪.

এৰং মহানুভাৰোতি মন্ত্ৰান নরসারথিং,

নিচ্চং ৰন্দথ পূজেথ সো হি ৰো সরণং সদা;

চতুত্থো ৰিজযো.

২৬৫.

দিস্ৰানত্তমনো মারো দিত্তো কোধগ্গিনা তদা,

মাপেত্ৰা’যুধৰস্সং সো পেসেসি তদুপন্তিকং;

২৬৬.

নেত্তিংসচ্ছূরিকা সত্তি হেণ্ডিৰাল গদাদযো,

তিণ্গধারা পজ্জলিতা অচিরজ্জুতি সন্নিভা;

২৬৭.

যথা পুপ্ফোপহারোপগন্ত্ৰান গগনঙ্গনা,

এৰং সম্বুদ্ধপাদেসু পতিংসু পরিৰত্তিতা;

২৬৮.

তদাসি ৰিজযো তস্স সম্বুদ্ধস্স সিরীমতো,

পঞ্চমে মারযুদ্ধম্হি মারস্সাসি পরাজযো;

২৬৯.

এৰং মহানুভাৰোতি মন্ত্ৰান নরসারথিং,

নিচ্চং ৰন্দথ পূজেথ সো হি ৰো সরণং সদা;

পঞ্চমো ৰিজযো.

২৭০.

তং দিস্ৰা পাপিমা কুদ্ধো যং যং তস্স করোম’হং,

তং তং’দানী ন সক্কোতি কিঞ্চি কাকুমু’পক্কমং;

২৭১.

মাপেসি কুক্কুলং ৰস্সং মারমীত’ধুনা মুনিং,

সো’গা’কাসা সম্পদিত্তো ধূমাযন্তোৰ পজ্জলং;

২৭২.

জিনস্সাভিমুখং গন্ত্ৰা কুক্কুলো পরিৰত্তিয,

চন্দনস্স সিতব্ভস্স ধূলী হুত্ৰান পগ্ঘরি;

২৭৩.

তদাসি ৰিজযো তস্স সম্বুদ্ধস্স সিরীমতো,

ছট্ঠে নমুচি যুদ্ধম্হি মারস্সাসী পরাজযো;

২৭৪.

এৰং মহানুভাৰোতি মন্ত্ৰান নরসারথিং,

নিচ্চং ৰন্দথ পূজেথ সো হি ৰো সরণং সদা;

ছট্ঠো ৰিজযো.

২৭৫.

ততো দিস্ৰান তং কণ্হো কণ্হসেনা পুরক্খতো,

সঙ্কুদ্ধো পেসযি তত্থ ৰস্সং সো সিকতামযং;

২৭৬.

খদীরঙ্গার সঙ্কাসা ৰালুকা গগনাগতা,

ভস্সন্তা জিনপাদন্তে ৰাসচুণ্ণত্তমাগতা;

২৭৭.

তদাসি ৰিজযো তস্স সম্বুদ্ধস্স সিরীমতো,

সত্তমে মারযুদ্ধম্হি মারস্সাসি পরাজযো;

২৭৮.

এৰং মহানুভাৰোতি মন্ত্ৰান নর সারথিং,

নিচ্চং ৰন্দথ পূজেথ সো হি ৰো সরণং সদা;

সত্তমো ৰিজযো.

২৭৯.

তম্পি দিস্ৰা অসজ্জন্তো অহিরী কোপকেতুকো,

মাপেত্ৰা পলিপন্দানি তত্থ ওসীদযামি তং;

২৮০.

ইতি চিন্তিয মাপেত্ৰা পেসেসি পলিপং ঘনং,

ধূপাযন্তো পজ্জলন্তো গন্ত্ৰা সো নভসা লহুং;

২৮১.

সম্বুদ্ধসিরিপাদম্হি সম্পত্তো নিব্বুতো ততো,

নানাসুগন্ধসম্ভুত গন্ধকদ্দমতং গতো;

২৮২.

তদাসি ৰিজযো তস্স সম্বুদ্ধস্স সিরীমতো,

অট্ঠমে মারযুদ্ধম্হি মারস্সাসি পরাজযো;

২৮৩.

এৰং মহানুভাৰোতি মন্ত্ৰান নরসারথিং,

নিচ্চং ৰন্দথ পূজেথ সো হি ৰো সরণং সদা;

২৮৪.

ওলোকেন্তো ততো মারো মারারিং সিরিযুজ্জলং,

দিস্ৰা চিত্তম্পসাদেতুমসক্কোন্তো’তি কোপৰা;

২৮৫.

অজ্জেতমন্ধকারস্মিং পক্খিপিত্ৰা পমোহিতুং,

ময্হং ভারোতি চিন্তেত্ৰা মাপেসি তিমিরং ঘনং;

২৮৬.

লোকন্তরেসু সম্ভুত তিমিসো’ৰ ভযাৰহো,

গন্ত্ৰান গগনা সো হি পত্ৰান মুনিসন্তিকং;

২৮৭.

যথা তিমিরমাযাতি ৰিনাসং সুরিযুগ্গতে,

এৰমাসি জিনগ্গম্হি অন্ধকারো তথাৰিধো;

২৮৮.

তদাসি ৰিজযো তস্স সম্বুদ্ধস্স সিরীমতো,

নৰমে মারযুদ্ধম্হি মারস্সাসি পরাজযো;

২৮৯.

এৰং মহানুভাৰোতি মন্ত্ৰান নরসারথিং,

নিচ্চং ৰন্দথ পূজেথ সো হি ৰো সরণং সদা;

নৰমো ৰিজযো.

২৯০.

এৰং নৰহি ৰুট্ঠিহি কত্ৰা মারো মহা ভৰং,

ন তস্সোপদ্দৰং দিস্ৰা দিত্তকোপানলাকুলো;

২৯১.

গহেত্ৰান ততো খিপ্পং ঠপিতং অত্তগুত্তিযা,

চক্কাযুধং মহাতেজং কুপিতো খিপি ৰেগসা;

২৯২.

ধারাধরং তমুগ্গয্হ কুদ্ধো পহরতে যদী,

কলীরংৰ অসজ্জন্তো ৰিখণ্ডেতি পজাপতি;

২৯৩.

তথেৰ সো মহিং কুদ্ধো মারো খিপতি ৰেগৰা,

ন ভৰন্তোসধা পাণা ৰিসুস্সন্তি সরাদযো;

২৯৪.

তথেৰ কুপিতো তেন খিপতে সো মহম্বুধিং,

ৰিলযং জলজা যন্তি সুস্সতে সো মহণ্ণৰো;

২৯৫.

এৰং মহানুভাৰো সো গচ্ছন্তো জলম্বরে,

পত্ৰান পতিতো নাথং হুত্ৰান পুপ্ফচুম্বটং;

২৯৬.

তদাসি ৰিজযো তস্স সম্বুদ্ধস্স সিরীমতো,

দসমে মারযুদ্ধম্হি মারস্সাসি পরাজযো;

২৯৭.

এৰং মহানুভাৰোতি মন্ত্ৰান নরসারথিং,

নিচ্চং ৰন্দথ পূজেথ সো হি ৰো সরণং সদা;

দসমো ৰিজযো.

২৯৮.

ইতি কোপগ্গিনা দিত্তমনং মারং তদা জিনো,

করুণাজলসেকেন নিব্বাপেন্তো নিসীদি সো;

২৯৯.

এৰং কত্ৰাপি সো কুদ্ধো অলদ্ধৰিজযো তদা,

আমন্তেসি সকং সেনং পলযানলভেরৰং;

৩০০.

এথাসু ৰত’রে ময্হং অস্সৰা মারকিঙ্করা,

নানাৰেসধরা হোথ ধারেথ ৰিৰিধাযুধে;

৩০১.

সদ্দেহেতং পলাপেথ যাথ গণ্হথ বন্ধথ,

পাদে গহেত্ৰা খিপথ চক্কৰাল়ন্তরং ইতো;

৩০২.

অথগা সহ ৰাচাহি ভিংসা সা মারৰাহিনী,

তুরঙ্গ ৰ্যগ্ঘ মাতঙ্গ সীহাদিরূপ ভিংসনা;

৩০৩.

সা মারস্সুভতো পস্সে চতুৰীসতিযোজনে,

ঠিতা পচ্ছিমভাগম্হী চক্কৰাল়সিলাৰধিং;

৩০৪.

বহলত্তেন সা আসি সম্পুণ্ণ নৰযোজনা,

যক্খ পেত পিসাচাদি ৰেসেহি ভযৰাহিনী;

৩০৫.

সংৰট্ট ৰাতসম্পাত খুভীতম্বুধিনো ৰিয,

উল্লোল ভিমঘোসো তু গতো ব্রহ্মপুরাৰধিং;

৩০৬.

দন্ত সঙ্ঘট্ট সঞ্জাত জালামালা সমাকুলা,

তেসংগারা’ৰ দিত্তাসুং কোধুম্মীলিত লোচনা

৩০৭.

ৰহন্তি ধূমক্খন্ধানি মুখকোটর কোটিহী,

নীহটা নীহটা জিৰ্হা সুভীমোরগতং গতা;

৩০৮.

উদ্ধরিত্ৰান তালাদি করিত্ৰান সরাসনে,

ভুজঙ্গে চ গুণে কেচি গাল়্হমাকড্ঢযন্তি চ;

৩০৯.

পুণ্ডরীকচ্ছ সীহাদী খিপন্তাভিমুখে তদা,

ধাৰন্তেকে সমুগ্গয্হ পুরতো দিত্তপব্বতে;

৩১০.

ভযানকাতি নেকানি সীসানেক কলেবরে,

মাপযিত্ৰান পুরতো ধাৰন্তি কেচি কিঙ্করা;

৩১১.

সীসেন সীহসঙ্কাসা গত্তেন মনুজোপমা,

বুদ্ধস্সাভিমুখং কেচি ধাৰন্তি মার কিঙ্করা;

৩১২.

কণ্ঠীরৰাকারদেহা মুখেন খলু রক্খসা,

হুত্ৰান অভিধাৰন্তি কেচিমারস্স কিঙ্করা;

৩১৩.

দণ্ডমানৰকা সীসভাগেনা’তিভযাৰহা,

গত্তেন রক্খসা হুত্ৰা কেচি ধাৰন্তি কিঙকরা;

৩১৪.

দীপচ্ছেভ তুরঙ্গানং ৰ্যগ্ঘ খগ্গৰিসাণিনং,

ৰরাহ মহিসাদীনং কণ্ণপাৰুর ভোগিনং;

৩১৫.

সীসাকার মহাসীসে তব্বিরুদ্ধে কলেবরে,

মাপেত্ৰা অভিধাৰন্তি কেচি মারস্স কিঙ্করা;

৩১৬.

আকড্ঢেন্তা কপোলানং করসাখাহি সম্মুখে,

দস্সযন্তা মহাদাঠং কেচেন্তি মারকিঙ্করা;

৩১৭.

তিখিণগ্গনখা কেচি ফালযন্তা সকোদরে,

অন্তে গলে পিলন্ধিত্ৰা ধাৰন্তি কিঙ্করাপরে;

৩১৮.

গিলন্তা কেচি ফণিনো উগ্গিরন্তা তথেৰ চ,

সীস কন্ধর কণ্ণন্ত বাহু অঙ্গুলি আদিসু;

৩১৯.

সকলেসু সরীরেসু ৰিসধূমগ্গি সঙ্কুলে,

ধারেন্তা’সিৰিসে কেচি ধাৰন্ত্যগ্গে ভযাৰহা;

৩২০.

পদিত্তাযোগুলে গয্হ খিপন্তেকে অনেকধা,

দিত্তপব্বতমুদ্ধচ্চ কেচি অগ্গিকপালকে,

খিপন্না অভিধাৰন্তি দট্ঠোট্ঠা ভীমলোচনা;

৩২১.

লালযন্তা সকা জিৰ্হা খন্ধে কত্ৰান মুগ্গরে,

মত্তভুজঙ্গ ৰেসেন ধাৰন্তি অপরে ভটা;

৩২২.

পিবন্তা লোহিতানেকে খাদন্তা পিসিতে পরে,

পিসাচাৰ’চরুং কেচি মুনিরাজস্স অগ্গতো;

৩২৩.

উল্লঙ্ঘন্তা চ সেলেন্তা ধাৰন্তা জলিতাযুধা,

ভিমৰেসধরা যক্খা কেচেন্তি ভকুটীমুখা;

৩২৪.

পণুণ্ণ সরৰস্সেহি কুন্ততোমর ৰুট্ঠিহি,

ভেণ্ডিৰালা’সিচক্কেহি নিব্ভরাসি দিগন্তরং;

৩২৫.

যং দিট্ঠ সুত মত্তেন মরণং চিত্ত ৰিব্ভমং,

যাতি লোকো কথং কো তং নিস্সেসং ভাসতে নরো;

৩২৬.

নেকদন্তসহস্সেহি নিক্খন্তগ্গিসিখাযুতং,

দাননিজ্ঝরসম্পাতং ভীমগজ্জনগজ্জিতং;

৩২৭.

নেকসত করগ্গেহি ধতাযোলগুল়াদিকং,

সন্নদ্ধং কৰচাদীহি গিরিংচ গিরিমেখলং;

৩২৮.

আরূল়্হো পাপিমা তত্থ উস্সাপেত্ৰা জযদ্ধজং,

ৰিসালাৰত্ত দাঠগ্গো চিপিটগ্গ ভগ্গ নাসিকো;

৩২৯.

দট্ঠোট্ঠ ভীমৰদনো ভকুটী ৰলি ললাটকো,

কোধানলেহি সন্দিদ্ধ মহক্খো তম্বদাঠীকো;

৩৩০.

নীলপব্বত সঙ্কাস ৰিসমঙ্গো মহোদরো,

গোনসোরগ সপ্পাদি অঙ্গীকত সুভিংসনো;

৩৩১.

সহস্সবাহুং মাপেত্ৰা ছূরিকা যট্ঠি সত্তি চ,

কোদণ্ডচণ্ডবাণে চ চক্ক কুন্তগদাদি চ;

৩৩২.

সঙ্কু ৰেতালিকা ফরসু পাসমুগ্গর অঙ্কুসে,

গহেত্ৰা কণযঞ্চাথ তিসূল ৰজিরাযুধে;

৩৩৩.

পরিৰত্তেসি আকাসে তেসমঞ্ঞোঞ্ঞ ঘট্টনা,

উগ্গতেহি ফুলিঙ্গেহি ধাৰন্তেহি সমন্ততো;

৩৩৪.

অগ্গি চক্কপরীতংচ কুরুমানো নিজং তনুং,

আৰহন্তো ভযং ব্রহ্ম সুর সিদ্ধাদীনং তদা,

স মারসেনো সো মারো ভগৰন্তমুপাগমি;

৩৩৫.

উদযাৰলকূটম্হি ভাসন্তোৰ পভাকরো,

সুপ্পতিট্ঠিতমেরূ’ৰ তিকূটাচল মুদ্ধনি;

৩৩৬.

কত্ৰান পিট্ঠিতো বোধিং ভূরুহং ৰজিরাসনে,

নিসিন্নো ভগৰা’তীৰ নিচ্চলো অতিরোচতি;

৩৩৭.

অকম্পো সো মুনী এৰমগ্গে’কাসি নিজং বলং,

সম্মপ্পধানসংযুত্তো দযামেত্তো মহেসিকো;

৩৩৮.

চতুবুদ্ধভুমিসঙ্খাত জযভুমিমুদিক্খিয,

চতুস্সঙ্গহৰত্থূনং যোজেত্ৰা দ্ৰারকোট্ঠকে;

৩৩৯.

যোজেত্ৰান থিরং তত্থ সদ্ধাদিবলকোট্ঠকে,

সতিপট্ঠানপাকারে অভেজ্জিন্দ্রিয গোপুরে;

৩৪০.

থিরঞাণযুধাকিণ্ণে মেত্তা সন্নাহ ৰম্মিতো,

অভীত ভারতী ভুরি ভেরিসঙ্খ পুরক্খতো;

৩৪১.

চতুরঙ্গৰিরিযুত্তুঙ্গ মাতঙ্গক্খন্ধসঙ্গতো,

পুঞ্ঞসম্ভারভারেন কম্পযং ৰসুধাতলং;

৩৪২.

চরিযত্তয সঙ্খাত’মুস্সাপিত জযদ্ধজো,

এৰং ৰিধায মারারি মারসঙ্গাম মণ্ডলং;

৩৪৩.

দানাদযো মহাযোধে আহূয সহজাতকে,

সুণাথ ভো গিরং ময্হং ভৰতজ্জ মহা ভৰো;

৩৪৪.

এথ যাথ সমগ্গত্থ ন ওস্সক্কথ সুজ্ঝথ,

ৰিজেতুং মারযুদ্ধম্হী ন সক্কা’সেসজন্তুহি;

৩৪৫.

অজ্জ গচ্ছতি নিট্ঠানং সো ভো পারমিতাভটা,

সহুস্সাহা মমগ্গম্হি দস্সেথ ৰীরিযং সকং;

৩৪৬.

অথ দানভটো আহ অপ্ফোটং দিগুণং ভুজং,

পস্সদানি মহাৰীর বলং মে মারধংসনে;

৩৪৭.

পরমত্থপারমি যোধং তথে’ৰ উপপারমিং,

উভো পস্সে করিত্ৰান সসেনো ধাৰি দপ্পৰা;

৩৪৮.

তথেৰ সীলনামৰ্হো পারমীভট’মুত্তমো,

নিক্খম্ম সহ সেনায মারসেনমভিদ্দৰী;

৩৪৯.

তথানেক্খম্মনামোপি সন্নদ্ধো’সভটো ভটো,

মারসেনামিগে হন্তুং ধাৰি দীপী’ৰ সাহসো;

৩৫০.

পঞ্ঞাযোধো’পি গচ্ছন্তো সাটোপো ধাৰি দপ্পৰা,

মারমেরুমহা অজ্জ সসেনুম্মূলযামিতি;

৩৫১.

ৰীরিযপারমিতা যোধো দট্ঠোট্ঠো ভীমগজ্জনো,

সোসেমি মম তেজেন ৰদং’গা মার সাগরং;

৩৫২.

খন্তিসচ্চৰ্হযা চেৰ ততো’ধিট্ঠানকো ভটো,

আসু ধাৰিংসু পাতেতুং মারস্স মকরদ্ধজং;

৩৫৩.

মেত্তানামো মহাযোধো মারো ময্হমলন্তি’গা,

উপেক্খকো’পী সো যোধো মারসেনং পদালিতুং;

৩৫৪.

পেসেত্ৰেৰং জিনো সেনং’সরীরং দল়্হৰিক্কমং,

নিসিদি তস্স তেজেন নিরুস্সাহাসি সা চমূ;

৩৫৫.

অহো ভো ৰিম্হযং দানি সুণাথ মুনিনো মম,

জেতি একো নিসিন্নোৰ সমারং মারৰাহিনিং;

৩৫৬.

কোপানলেন সন্দিত্তং দুট্ঠ রুট্ঠং পজাপতিং,

অদুট্ঠো জেতি সম্বুদ্ধো আনুভাৰো হি তাদিসো;

৩৫৭.

দিত্তাযুধে খিপন্তে’পি ৰিজ্ঝন্তে ৰসৰত্তিনী,

নিরাযুধো’ৰ তং জেতি আনুভাৰো হি তাদিসো;

৩৫৮.

সহাটোপং সহঙকারং মারং সাডম্বরং তদা,

নিচ্চলো জেতি সম্বুদ্ধো আনুভাৰো হি তাদিসো;

৩৫৯.

হত্থস্স রথপত্তীহি ধাৰন্তং তমিতোচিতো,

নিসিন্নোৰ জিনো জেতি আনুভাৰো হি তাদিসো;

৩৬০.

ভাসন্তং নেকধা কণ্ণ কঠোর গিরমন্তকং,

নিস্সদ্দো জেতি সম্বুদ্ধো আনুভাৰো হি তাদিসো;

৩৬১.

মারোপাগম্ম অট্ঠাসি লঙ্ঘিতুং অসমত্থকো,

বুদ্ধতেজগ্গি পাকারং দিত্তমব্ভুগ্গতং থিরং;

৩৬২.

তদাহ নমুচি কুদ্ধো ভুজমুক্খিপ্প’মীদিসং,

খিপ্পং সিদ্ধত্থ হে গচ্ছ সন্তকেদং মমাসনং;

৩৬৩.

নো চে গচ্ছসি তে হদযং ফালেমি নখসত্তিহি,

ৰিচুণ্ণেমি তুৰং পাদে গহেত্ৰা পথৰীতলে;

৩৬৪.

পস্স মে মহতিং সেনং পস্স আযুধসঞ্চযং,

তেন তং অভিমদ্দামি তুৰটং গচ্ছিদং মম;

৩৬৫.

অথস্স ৰচনং সুত্ৰা জিনো’হ মধুরঙ্গিরো,

কদা তে পূরিতা মার পল্লঙ্কত্থায পারমী;

৩৬৬.

কদা অদাসি সীসাদী দানং সীলং কথং তৰ,

তদত্থায কথাপেহি কে তে পচ্চক্খকারকা;

৩৬৭.

অথা’হ ফরুসো মারো নেতং গরু মুনে মম,

অযং সা পরিসা সব্বা তস্স পচ্চক্খকারকং;

৩৬৮.

উগ্ঘোসেসি মহাসেনা পক্খী’হন্তি ৰিসুং ৰিসুং,

ভুমুদ্রিযন মত্তোৰ ততো কোলাহলো অহু;

৩৬৯.

অথাহ মারো সমণ অহং সক্খি কথাপযিং,

তৰ কো সক্খি যজ্জত্থি কথাপেহি লহুং মম;

৩৭০.

অথাহ ভগৰা তস্স গম্ভীরং মধুরং গিরং,

নিচ্ছারেন্তা মযূরস্স সুনাদং ফণিনো যথা;

৩৭১.

তৰেৰ মে ন সন্তীধ পচ্চক্খত্থং সচেতনা,

অচেতনাৰ মেদানি সন্তি পচ্চক্খৰাদিনো;

৩৭২.

ইতি ৰত্ৰান মারারি সঞ্ত্ধা জিমূত গব্ভতো,

নিক্খন্ত ৰিজ্জুসঙ্কাসং করং চামীকরজ্জুতিং;

৩৭৩.

রত্ত চীৰরগব্ভম্হা নীহরিত্ৰা জিনো তদা,

ধরণ্যভিমুখং’কাসি উদ্দিস্স ভুমিকামিনিং;

৩৭৪.

দানমানাদিকম্মে মে কম্পন্তী জাতিজাতিযং,

কিমজ্জ নিস্সণাসী’তি জিনো ৰাচমুদাহরী;

৩৭৫.

সক্খি’হন্তি ৰদন্তীৰ ততো ভুমিৰরঙ্গনা,

সল়িলাৰনিপরিযন্তা গজ্জন্তি নচ্চি তাৰদে;

৩৭৬.

মহী সাগর ঊমী’ৰ উট্ঠাপেন্তি মহূমিযো,

ছদ্ধা কম্পি কুলালস্স চক্কংৰাতি পরিব্ভমি;

৩৭৭.

হিমৰা গিরিরাজা চ যুগন্ধর নগাদযো,

কূটবাগা সমুক্খিপ্প নচ্চিংসু নটকা ৰিয;

৩৭৮.

দিস্ৰা সুত্ৰা তমচ্ছেরং গযেনুব্বিগ্গ মানসা,

মারসেনা পভিন্নাসি ভিন্নৰেলোৰ সাগরো;

৩৭৯.

ভযেনট্টস্সরা ভন্তা পতন্তঞ্ঞোঞ্ঞ ঘট্টনা,

ৰিকিরিত্ৰা কচে পিট্ঠে ধাৰিংসু মারকিঙ্করা;

৩৮০.

গহিতাযুধানি ছড্ডেন্তা পিদহন্তাননং করা,

নিৰত্থৰত্থমত্তে’পি ধাৰিংসু অনপেক্খকা;

৩৮১.

অঙ্গুলিযো মুখে কেচি পক্খিপন্তি রুদন্তি চ,

কেচি ৰন্দন্তি যাৰন্তি অভযং সামি দেহি নো;

৩৮২.

সিদ্ধত্থো’যং জিতো কিন্নু নিস্সাসা রুদ্ধভাসনা,

পিট্ঠিপস্সমুদিক্খন্তি ধাৰিংসু চকিতা পরে;

৩৮৩.

গিরিমেখলো’পি নাগিন্দো জন্নুকেন পতী তদা,

মারো’পি পতিতো খিপ্পং ধাৰিত্ৰা’দস্সনং গতো;

৩৮৪.

তঙ্কণে উগ্গতো আসি সত্থু কিত্তি জযদ্ধজো,

অৰহেন্তোৰ সুরাদীনং ব্রহ্মলোকাৰধিং গতো;

৩৮৫.

তদাসি ৰিজযো তস্স সম্বুদ্ধস্স সিরীমতো,

চরিমে মারযুদ্ধম্হি মারস্সাসি পরাজযো;

৩৮৬.

এৰং মহানুভাৰোতি মন্ত্ৰান নরসারথিং,

নিচ্চং ৰন্দথ পূজেথ সো হি ৰো সরণং সদা;

একাদসমো ৰিজযো.

৩৮৭.

লদ্ধাভিৰিজযে বুদ্ধে নিসিন্নে ৰজিরাসনে,

পরিৰারযুং গতাগম্ম পুরে ৰিয সুরাদযো;

৩৮৮.

দেৰা তে নিখিলা নেত্ৰা নানাপূজাৰিধিং ততো,

সন্তুট্ঠা মুনিনো’কাসুং মহন্তং জযমঙ্গলং;

৩৮৯.

সম্পত্তাথ নিসাকন্তা মানেতুংচ মুনিস্সরং,

পুব্বাপরম্বরে লগ্গ সসীণক্কণ্ণ ভুসণ;

৩৯০.

সুনীলাকাস ধম্মিল্লে ধত্ত তারালিমালিকা,

ৰীজেন্তীৰ দিসা বাহা ফুল্লচূতক চামরে;

৩৯১.

মল্লিকা মুকুলাসত্ত সম্মত্তালিগণা তদা,

ধমেন্তা ৰিয সঙ্খানি কূজেন্তি মধুরং গিরং;

৩৯২.

সামোদ মকরন্দেহি মন্দমন্দানিলাগতা,

সজুণ্হা জিনবিম্বম্হি উতুং গাহেন্তি সীতলং;

৩৯৩.

অৰিজ্জাদি মহামূলং তিৰট্টত্থির খন্ধকং,

সংসার ৰিসরুক্খং সো আরদ্ধুম্মুলিতুং তদা;

৩৯৪.

ভাৰেন্তো পুরিমে যামে সরন্তো খন্ধসন্ততিং,

পুব্বেনিৰাসানুস্সতি ঞাণং লদ্ধা নরিস্সরো;

৩৯৫.

তথা মজ্ঝিম যামম্হি দিব্বচক্খু ৰিসোধনা,

চুতুপপাত ঞাণঞ্চ অধিগংত্ৰান সব্বসো;

৩৯৬.

রত্তিযা পচ্ছিমে যামে চিন্তযন্তো জরাদযো,

ৰিপস্সিত্ৰা নামরূপে আরোপেত্ৰা তিলক্খণং;

৩৯৭.

সম্মসন্তো কিলেসেহি ৰিৰেচেত্ৰা সকং মনং,

আসৰানং খযে ঞাণা লদ্ধা অগ্গফলং তদা;

৩৯৮.

পত্তো নিব্বাণনগরং বোজ্ঝঙ্গ রতনিস্সরো,

সদ্ধম্মরাজা হুত্ৰান পীতিৰাচমুদাহরী;

৩৯৯.

অনেকজাতি সংসারং সন্ধাৰিস্সং অনিব্বিসং,

গহকারকং গৰেসন্তো দুক্খা জাতি পুনপ্পুনং;

৪০০.

গহকারক দিট্ঠোসি পুন গেহং ন কাহসি,

সব্বা তে ফাসুকা ভগ্গা গহকূটং ৰিসঙ্খিতং,

ৰিসঙ্খারগতং চিত্তং তণ্হানং খযমজ্ঝগা;

৪০১.

ইচ্চেৰ মগ্গমতদানৰিধিপ্পৰীণ,

কারুঞ্ঞপুঞ্ঞহদযেন মহোদযেন,

পত্ৰা ভৰণ্ণৰমপারমনন্তদুক্খং,

যেনোচিতা পরমপারমিতা জিনেন;

৪০২.

যোচেৰ সব্বৰিভৰং পণুদিত্ৰ রজ্জং

নিক্খম্ম পত্ৰ চলপত্তমহীরুহস্স,

মূলে নিসজ্জ সবলং পবলঞ্চ মারং,

পাপারযো চ ৰিজিতো স দদাতু সন্তিং;

অভিসম্বোধি কথা.

৪০৩.

তিলোকনাথো সুগতো ততো তদা

উদানৰাচং সমুদাহরিত্ৰা,

পল্লঙ্কমাভুজ্জ দুমিন্দমূলে

চিন্তেসি এৰং ৰজিরাসনস্মিং;

৪০৪.

দানাদযো পারমিতা চিনিত্ৰা

অসঙ্খকপ্পানি চ খেপযিত্ৰা,

অস্সেৰ পল্লঙ্কৰরস্স হেতু

সন্ধাৰিতং তং ভজিতং ৰযজ্জ;

৪০৫.

যাৰস্সু পুণ্ণ মম চেতনাযো

তাৰেত্থ অচ্ছামি ন ৰুট্ঠহামি,

মংত্ৰান সো নেকসহস্সসঙ্খা

জিনো সমাপত্তি ৰলঞ্জি তত্থ;

৪০৬.

দেৰাতিদেৰো তিভৰেকনাথো

হতাৰকাসো জিতপঞ্চমারো,

পিতামহাদীহি মহীযমানো

খেপেসি সত্থা দিৰসানি সত্ত;

ইতি পঠম সত্তাহং.

৪০৭.

যস্মাসনং নেৰ জহাতি তস্মা

তিসন্ধিযুত্তেন নিসীদিতেৰ,

অজ্জাপি কত্তব্বমনেন অত্থি

দেৰানমিচ্ছাসি মনম্হি কঙ্খা;

৪০৮.

তেসং মনং সো মনসা ৰিদিত্ৰা

ৰিনোদনত্থং ৰিমতিন্তু তেসং,

উট্ঠায তম্হা নভমুপ্পতিত্ৰা

দস্সেসি তেসং মুনিপাটিহেরং;

৪০৯.

ৰিনোদযিত্ৰা সুগতো তদেৰং

সুধাসিনং চেতসি কঙ্খরাসিং,

পল্লঙ্কতো উত্তরপুব্বকণ্ণং

আকাসতোরুয্হ জলং রৰীৰ;

৪১০.

জিনো দুমিন্দস্স চ আসনস্স

বহূপকারত্তমনুস্সরন্তো,

ঠিতো পদং কিঞ্চি অকোপযন্তো

ইতো চিতো লোক ন মুজ্জহন্তো;

৪১১.

নীলাযতক্খামলকন্তিতোয

ধারানিপাতেন দুমিন্দরাজং,

নিসিঞ্চমানো দিৰসানি সত্ত

পূজেসি তং’নিমিসলোচনেহি;

৪১২.

অজ্জাপি তস্মিং ধরণিপ্পদেসে

কতস্স থূপস্স তদেৰ নামং,

অহোসি দেৰা চ নরো’রগা চ

মহেন্তি তে তেন দিৰং পযন্তি;

ইতি দুতিয সত্তাহং.

৪১৩.

দেৰা ততো দেৰৰরস্স তস্স

সুচঙ্কমং’কংসু মণীহি নানা,

পল্লঙ্কতো ঠানৰরস্স মজ্ঝে

পুব্বাপরাসাযনমন্তরালে;

৪১৪.

নরিন্দ নাগিন্দ সুরিন্দ পূজিতো

ছব্বণ্ণরংসীহি সমুজ্জলন্তো,

নীলম্বরে তারকিতো সসী’ৰ

সো চঙ্কমী সত্ত অহানি তত্থ;

৪১৫.

অজ্জাপি তস্মিং ধরণিপ্পদেসে

কতস্স থূপস্স তদেৰ নামং,

অহোসি দেৰা চ নরোরগা চ

মহেন্তি তে তেন দিৰং পযন্তি;

ইতি ততিয সত্তাহং.

৪১৬.

ততো দুমিন্দস্স সুরাসুরিন্দা

মহীতলে পচ্ছিমোত্তরাযং,

মাপিংসু নানারতনালযগ্গং

নিসজ্জ পল্লঙ্কৰরে তহিং সো;

৪১৭.

সুদুদ্দসাগাধমপারপারং

সমন্তপট্ঠানতরঙ্গভঙ্গিং,

ধম্মোদধিং ঞাণসুমেরুমত্থা

সালোলযং খেপযহানি সত্ত;

৪১৮.

অজ্জাপি তস্মিং ধরণিপ্পদেসে

কতস্স থূপস্স তদেৰ নামং,

অহোসি দেৰা চ নরোরগা চ

মহেন্তি তে তেন দিৰং পযন্তি;

ইতি চতুত্থ সত্তাহং.

৪১৯.

ততো জিনো গন্ত্ৰ’জপালমূলে

ৰিমুত্তিজং সাদুফলং’নুভোন্তো,

সত্তাহমত্তং অতিৰত্তযী সো

দেৰাতিদেৰো করুণাগুণগ্গো;

৪২০.

তদাগতা মারৰধূ মুনিত্দং

পলোভিতুং যা পিতুনো সকাসা,

তাসং পযোগম্পিধ বিন্দুমত্তং

কথীযতে তং সমুপাগতত্তা;

৪২১.

তদা স মারো সমরে জিনেন

পরাজিতো সোচনকো’পগংত্ৰা,

পজ্ঝাযমানো’থ অধোমুখো’চ

নিসীদি তুণ্হী ৰিলিখং ছমাযং;

৪২২.

পরাজযং ময্হ মমেৰ দোসো

ন তস্স কস্মাহমযং’চ নাসিং,

সীসক্খিমংসাদি চ পুত্তদারে

নাদন্তি এৰং মনসী করোন্তো;

৪২৩.

পৰত্তিমেতং মকরদ্ধজস্স

সুত্ৰান তণ্হা অরতী রগা চ,

যত্থচ্ছি মারো পরিসোচযন্তো

তত্থাগমুং তা চকিতা খণেন;

৪২৪.

দিস্ৰান তং তত্থ তথা নিসিন্নং

নিস্সাসরুদ্ধং গিরমুগ্গিরন্তী,

তুসার বিন্দুনিৰহেহি’সার

পঙ্কেরুহাকার ৰিসালনেত্তা;

৪২৫.

হা তাত হা তাত কিমাসি তেদং

নট্ঠন্নু তে কিং ৰদ পত্থসী কিং,

কো তে দিসো কেন পরাজিতো’সি

কিমানযিস্সাম হনাম কং নো;

৪২৬.

কিম্হোতিযোদানি ন পস্সথেতং

সুদ্ধোদনীযং ততকিত্তিঘোসং,

মুখম্হি ময্হং মসিমক্খযন্তং

অতিচ্চ যন্তং ৰিসযং পসয্হ;

৪২৭.

ন ভারিযা তাত মনুস্সভূতং

কত্তুং ৰসং কো ৰসমেতি নাম্হং,

তং রাগপাসেন গজং’ৰ মত্তং

সুবন্ধকং বন্ধিয আনযেম;

৪২৮.

ন রাগপাসেন হি আননীযো

মারস্স ধেয্যং সমতিক্কমীৰ,

অপেতরাগো অরহা অকম্পো

সোৰাম তস্মা সুভগা তনুজা;

৪২৯.

সচেতনো সো হি মনুস্সভুতো

অচেতনঞ্চে সমুপাগমাম,

করোম তং নো ৰসগং কিমেত্থ

চিত্তং বলং পস্সথ নো খণেন;

৪৩০.

রূপেন নেত্তং সুমনোহরেন

গন্ধেন ঘাণং সৰণং সরেন,

ফস্সেন গত্তং রসসা রসঞ্ঞং

মনঞ্চ পাসেন চ কামজেন

৪৩১.

সুবাহুপাসেন চ তস্স গীৰং

বাহুদ্ৰযং ধারিতমালদামা,

বন্ধিত্ৰদানেৰ তমা’নযাম

বলঞ্হি নো পস্সথ তাত’দানি;

৪৩২.

ৰত্ৰান এৰং ৰচনং পিতুস্স

পণম্ম পাদানি পগব্ভিতন্তা,

যত্থচ্ছি মারারি ৰিরোচমানো

তত্থা’গমুং খিপ্পমুদগ্গচিত্তা;

৪৩৩.

সামোদমালাকুলকেসভার

পযোধরা কুঙক্কুমহারিহারা,

বিম্বাধরা চারুসভা পভাসা

উম্মাদযন্তী জনমানসানি;

৪৩৪.

মুদ্ধেন মিস্সং মধুরে নিমুগ্গং

স্নেহেন তিন্তং রসতো’নুৰিদ্ধং,

ভাসিংসু ৰাচং হদযঙ্গমন্তা

ৰিলোকনেনেৰ ধিতিং হরন্তী;

৪৩৫.

ৰসন্তকন্তো নৰযোব্বনো’সি

সুৰণ্ণৰণ্ণো হদযঙ্গমো’সি

একো নিসিন্নো’সি ৰটস্স মূলে

সিমন্তিনী সামি কুহিন্নু তুয্হং;

৪৩৬.

তরঙ্গহীনো’পি তরঙ্গমালী

সসঙ্কহীনা রজনী চ সামী,

হংসা’লিহীনা সরসী সুফুল্লা

নাভাতি কন্তা ৰিরতো ধৰো’পি;

৪৩৭.

ৰসন্তকালো চ ৰনং সুফুল্লং

নিসাকরাভা ভমরালিগীতং,

সুগন্ধমন্দোপগতা সমীরা

ৰিরোচসি ত্ৰম্পি চ যোব্বনেন;

৪৩৮.

মযম্পি চেত্থেৰ সমাগতম্হ

মনো’নুকূলা চ মনুঞ্ঞরূপা,

করোতি কিংত্ৰ’জ্জ সকামদাহো

কামাকরো’দানি সমাগতো নো;

৪৩৯.

মা তেদিসং যোব্বনরূপসারং

সুৰিগ্গহং ছাদয চীৰরেন,

তেনেৰ নো নেত্তমনম্হি সামি

মা দেহি দাহং তৰ দাসিভুতে;

৪৪০.

নখংসু সুত্তে’রুণপানিপাদে

নেত্তিন্দনীলানি’ৰ আৰুণন্তো,

ত্ৰমচ্ছি নো সামি মুখম্বুজেসু

ন এন্তি কিন্তে নযনালিমালা;

৪৪১.

সুধাসিলাগীঞ্জক লোহদারু

জাতেহি ত্ৰং ধীর ন নিম্মিতো’সি,

রূপী’সি সোম্মো’সি তথাপি সামি

কিং কামরাগং মনসা নুদেসি;

৪৪২.

অযঞ্চ বালা চতুরা রতীসু

বালেতি কঙ্খং জহ মানসম্হি,

কিং মঞ্জরী ভিজ্জতি সম্পফুল্লা

মত্তালিরাজে পরিচুম্বমানে;

৪৪৩.

অযঞ্চ রামা রমণীযরূপা

পীণোরুগণ্ডা কুৰমণ্ডলা চ,

তং কামিনিং কাময ফুল্লকঞ্জে

হংসো যথা কেসর সম্পগিদ্ধো;

৪৪৪.

চিন্তামণিং ভদ্দঘটঞ্চ কপ্প

তরুং সমাপজ্জ দল়িদ্দভাৰা,

নাপেন্তি সত্তা খলু দুব্ভগত্তা

তথেৰ নো’সী তৰ পাদসেৰা;

৪৪৫.

এৰঞ্হি তা রঞ্জনমঞ্জুভাসা

সহস্সমেকঞ্চ সতানি অট্ঠ,

ৰেসানি সম্মা অভিনিম্মিণিত্ৰা

পলোভযুন্তং বহূধা মুনিন্দং;

ততো তণ্হা?.

৪৪৬.

যক্খোসি মত্তোসি সিলামযোসি

অচেতনোসা’থ অযোমযোসি,

অৰীতরাগঞ্হি সচেতনঞ্চে

অনেনুপাযেনু’পসঙ্কমাম;

৪৪৭.

ফলেয্য খীপ্পং হদযঞ্হি তস্স

উণ্হংৰ রত্তং মুখতু’গ্গমেয্য,

সিযাৰ খিপ্পং অপি চিত্তখেপং

উম্মাদভাৰংচ স পাপুণেয্য;

৪৪৮.

যথা পলুত্তো হরিতোপলম্হি

খিত্তো নল়ো সুস্সতি আতপেন,

এৰং ৰিসুস্সেতি ৰিসাদমেতি

সো মুচ্ছতি মুয্হতি দুক্খমেতি;

৪৪৯.

সোকাৰকিণ্ণে নু ৰনম্হি ঝাযসি

ৰিত্তন্নু জিতো উদ পত্থযানো,

আগুন্নূ গামস্মিং অকাসি কিঞ্চি

জনেন কস্মা ন করোসি সক্খিং;

সত্থা?.

৪৫০.

অত্থস্স পত্তিং হদযস্স সন্তিং

ছেত্ৰান সেনং পিযসাতরূপং

একো’হং ঝাযং সুখমনুবোধিং

জনেন তস্মা ন করোম সক্খিং;

ইমা দ্ৰে পালিযং?.

৪৫১.

পলুট্ঠগত্তং দহনেন মক্কটিং

সুসানপেতিঞ্চ জিগুচ্ছনীযং,

জেগুচ্ছিযং জঙ্গম মীল়্হরাসিং

দিস্ৰান কো তং ৰরযে সপঞ্ঞো;

অথ অরতি?.

৪৫২.

কথং ৰিহারী বহুলো চ ভিক্খু

পঞ্চোঘতিণ্ণে অতরীধ ছট্ঠং,

কথং ঝাযিং বহুলং কামসঞ্ঞা

পরিবাহিরা হোন্তি অলদ্ধ যো তং;

সত্থা?.

৪৫৩.

পস্সদ্ধকাযো সুৰিমুত্তচিত্তো

অসঙ্খরানো সতিমা অনোকো,

অঞ্ঞায ধম্মং অৰিতক্ক ঝাযী

ন কুপ্পতী নস্সরতী ন থীনো;

৪৫৪.

এৰং ৰিহারী বহুলো চ ভিক্খু

পঞ্চোঘতিণ্ণে অতরীধ ছট্ঠং,

এৰং ঝাযিং বহুলং কামসঞ্ঞা

পরিবাহিরা হোন্তি অলদ্ধ যো তং;

অথ রগা?.

৪৫৫.

অচ্ছেচ্ছি তণ্হং গণসঙ্ঘচারী

অদ্ধা তরিস্সন্তী বহূ চ সদ্ধা,

বহুং ৰতাযং জনত’মনোকো

অচ্ছিজ্জ নেস্সতি মচ্চুরাজস্স পারং;

সত্থা?.

৪৫৬.

নযন্তি ৰে মহাৰীরা সদ্ধম্মেন তথাগতা,

ধম্মেন নযমানানং কা উসূযা ৰিজানতং;

ইমা পঞ্চ পালিযং?.

৪৫৭.

সুত্ৰান তং ধম্মৰরং জিনস্স

পমত্তবন্ধুস্স রগাদিরামা,

পলোভিতুং নে’ৰ সমত্থকা তং

অগংসু খিপ্পং পিতুনো সকাসং;

৪৫৮.

মারো তদারা’ৰ সমেক্খমানো

দিস্ৰাগতা কেৰলমেৰ তাযো,

মা কত্থ কামং মম ভাসিতানি

কামত্থ পাতুং মিগতণ্হিকাপং;

৪৫৯.

বালা কুমুদনাল়েহি পব্বতং অভিমন্থথ,

গিরিং নখেন খণথ অযো দন্তেহি খাদথ;

৪৬০.

সেলংৰ সিরসি ঊহচ্চ পাতালে গাধমেসথ,

খানুংৰ উরসা’সজ্জ নিব্বিজ্জাপেথ গোতমা;

ইমা দ্ৰে পালিযং?.

৪৬১.

ৰত্ৰান এৰং ৰিমনো স মারো

সটীতুকো সম্ভৰনং পযাসি,

সত্থাথ রাগা পরিমুত্তচিত্তো

জহাসি তস্মিং দিৰসানি সত্ত;

৪৬২.

অজ্জাপি তং সাখিৰরম্পিতেন

’নুভুতমত্তেন মহেন্তি সব্বে,

তেনেৰ তে সগ্গগতা ৰিমানে

মোদন্তি কামেহি অনূপমেহি;

ইতি পঞ্চম সত্তাহং.

৪৬৩.

ততো মুনিন্দো মুচলিন্দমূলে

নিসীদি গন্ত্ৰা পৰরাসনম্হি,

যুগন্ধরে বালরৰী’ৰ রংসি

জালাহি লোকং পরিপূরযন্তো;

৪৬৪.

অথান মেঘো জলদা সতেহি

পপূরযং খং থনযং সৰিজ্জু,

সসীতৰাতো কিরমম্বুধারং

ৰিরোচমানো ৰিসকণ্ঠিকাহি;

৪৬৫.

অমন্দনণ্দো মুচলিন্দভোগী

দিস্ৰা মুনিন্দং মুচলিন্দমূলে,

পরিক্খিপিত্ৰান ৰিসালভোগা

ছাদেত্ৰ সম্মা সফণো ফণেন;

৪৬৬.

অজ্ঝেসি সো তস্স অনুগ্গহায

নিসীদি গন্ত্ৰা ভুজগা’সনম্হি,

সত্থা তদা রূপিযমন্দিরেৰ

সত্তামহত্তং সুৰিমুত্তচিত্তো;

৪৬৭.

অজ্জাপি তং সাখিৰরম্পি তেন

’নুভুতমত্তেন মহেন্তি সব্বে,

তেনেৰ তে সগ্গগতা ৰিমানে

মোদন্তি কামেহি অনূপমেহি;

ইতি ছট্ঠম সত্তাহং.

৪৬৮.

ততো’পগন্ত্ৰা যতিরাজ রাজা

নিসীদি রাজাযতনস্স মূলে,

ৰিমুত্তিজং পীতিসুখং’নুভোন্তো

সত্তাহমত্তং করুণাগুণগ্গো;

৪৬৯.

অজ্জাপি তং সাখিৰরম্পি তেন

’নুভুতমত্তেন মহেন্তী সব্বে,

তেনেৰ তে সগ্গগতা ৰিমানে

মোদন্তি কামেহি অনূপমেহি;

ইতি সত্তম সত্তাহং.

৪৭০.

আহার কিচ্চাদি ৰিৰজ্জিতস্স

সুখানুভোন্তস্স ৰিমুত্তিজানি,

সম্পীণিতঙ্গস্স জিনস্স তস্স

ইচ্চচ্চগুং সত্তদিনানি সত্ত;

৪৭১.

দেৰানমিন্দেন ততো’পনীত

মুখোদকাদিম্পরিভুঞ্জিযান,

নিসিন্নমত্তে যতিরাজ রাজে

তত্থা’গমুং দ্ৰে ৰাণিজা খণেন;

৪৭২.

উস্সাহিতা দেৰৰরেন সম্মা

সালোহিতা তস্স তপুস্স-ভল্লিকা,

মন্থঞ্চ সাদুং মধুপিণ্ডিকঞ্চ

আদায নাথং ইদমব্রুৰুন্তে;

৪৭৩.

ইদঞ্হি নো ধীর অনুগ্গহায

পটিগ্গহেত্ৰ পরিভুঞ্জ দানং,

হিতায তং হোতি সুখায চেৰ

অনপ্পকপ্পেসু অনাগতেসু;

৪৭৪.

পটিগ্গহেত্ৰা মুনি দেৰদিন্ন

পত্তেন পচ্চগ্ঘসিলামযেন,

ভুত্ৰান তেসং অনুমোদনত্থং

দেসেসি ধম্মং ৰরদং পসত্থং;

৪৭৫.

দ্ৰে ভাতিকা ৰাণীজকা জিনস্স

ধম্মং সুণিত্ৰান পসন্নচিত্তা,

দ্ৰে ৰাচিকোপাসকতং গতাসুং

যাচিংসু তে তং পুন পূজনীযং;

৪৭৬.

পরামসিত্ৰান সিরং ততো সো

অদা জিনো কুন্তল ধাতুমুট্ঠিং,

তে তেন তুট্ঠা সুমনা পতীতা

মহিংসু নেত্ৰা ৰিভৰানুরূপং;

৪৭৭.

সত্থা’থ গন্ত্ৰা অজপালমূলে

সহস্স রংসীৰ যুগন্ধরম্হি,

নিসজ্জ লোকং অনুলোকযন্তো

ৰিতক্কি এৰং মনসা ৰিতক্কং;

৪৭৮.

মযজ্ঝপন্নো ৰরধম্মসারো

সসস্স সিন্ধূ’ৰ অগাধপারো,

অবুদ্ধসত্তেহি তমজ্জ কস্স

পকাসযিস্সঞ্হি জল়ো হি লোকো;

৪৭৯.

দেসেমি চে ধম্মৰরং পণীতং

কিলন্তভাৰোৰ মমস্স অস্মা,

কিমত্তদুক্খে নিতি চিন্তযন্তো

নুয্যামমাকা মুনি দেসনম্হি;

৪৮০.

সহম্পতী নাম ততো ৰিধাতা

সচেতসা তস্স মনং ৰিদিত্ৰা,

ৰিনস্সতীদং খলু সব্বলোকং

অদেসিতে তেনি’তি কম্পমানো;

৪৮১.

সকাসমাগম্ম জিনস্স তস্স

সগারৰো ব্রহ্মগণেন তত্থ,

নিহচ্চ জানুং পথৰীতলম্হি

নমস্সমানো ইদমব্রূৰী সো;

৪৮২.

ত্ৰং দেৰদেৰো স সুমেধকালে

পলোকিতং লোকমুদিক্খমানো,

ৰিহায দীপঙ্করপাদমূলে

লদ্ধা’মতং তং করুণাগুণেন;

৪৮৩.

পৰিস্স সংসারৰনং ৰিদুগ্গং

মংসক্খিসীসাদিম’দাসি দানং,

ৰেদেসি দুক্খং অমিতং অসয্হং

তং তে পরত্থং’ৰ ন অত্তহেতুং;

৪৮৪.

সন্তীধ সত্তা খলু মন্দরাগা

ঞাতুং সমত্থা সুগতস্স ধম্মং,

আরাধিতো মে করুণাগুণগ্গো

দেসেহি ধম্মং অনুকম্পমানো;

৪৮৫.

কালে ৰিকাসন্তি খরংসু মিস্সা

থলম্বুজাতা কুসুমানি নানা,

তথে’ৰ তে ধম্মকরাভিফুট্ঠা

ৰিকাসমাযন্তী জনা অনেকা

৪৮৬.

সম্পন্ন ৰিজ্জাচরণো সতীমা

জুতিন্ধরো অন্তিমদেহধারী,

পটিগ্গহেত্ৰাস্স নিমন্তণং সো

জনেসি সত্তে করুণা মনস্মিং;

৪৮৭.

অপারুতা তেসং অমতস্স দ্ৰারা

যে সোতৰন্তো পমুঞ্চন্তু সদ্ধং,

ৰিহিংসসঞ্ঞী পগুণং ন ভাসিং

ধম্মং পণীতং মনুজেসু ব্রহ্মে;

৪৮৮.

পটিগ্গহেসীতি উদগ্গচিত্তো

অজ্ঝেসনং মে চতুরাণনো সো,

নত্ৰান নাথং সহপারিসজ্জো

পক্কামি তম্হা ভৰনং খণেন;

৪৮৯.

ততো জিনো তেন গহিতনুঞ্ঞো

দেসেমি কস্সেতি উদিক্খমানো,

আল়ার-উদ্দে সমুদিক্খ ধীরো,

মন্ত্ৰান তেসং অচিরচ্চুতিত্তং;

৪৯০.

কহন্নুখো’হং ৰরধম্মচক্কং

অঞ্ঞেন কেনাপি অৰত্তনীযং,

লোকস্স চিন্তামণিসন্তিভগ্গং

পৰত্তযিস্সন্তী ৰিচিন্তযন্তো;

৪৯১.

দিস্ৰান ভিক্খূ মুনি পঞ্চৰগ্গে

আদায পত্তঞ্চ তিচীৰরঞ্চ,

বারাণসীযং মিগদাযমেন্তো

অদ্ধানমগ্গং পটিপজ্জি সত্থা;

৪৯২.

তত্থামরব্রহ্মগণেহি পূত

পথে ফণী পক্খি চতুপ্পদা চ,

আরঞ্ঞদেৰা তরুপব্বতা চ

মহিংসু নেকেহি সুৰিম্হযেহি;

৪৯৩.

ততোপগা সো মিগদাযমগ্গে

দিস্ৰা যতীসং যতযো’পগন্ত্ৰা,

অকংসু ৰত্তং পটিপত্তিসারা

পৰত্তযী তত্থ স ধম্মচক্কং;

৪৯৪.

অঞ্ঞাদিকোণ্ডঞ্ঞৰসিপ্পধানা

কোটীনমট্ঠারস কঞ্জযোনী,

অসীতিকোটী’পি সুধাসি সঙ্ঘা

অঞ্ঞাসুমগ্গং কমতো তদা তে;

৪৯৫.

অতিচ্চযাতম্হি নিদাঘকালে

ৰস্সানকালে সমুপাগতস্মিং,

তত্থেৰ ৰস্সং উপগম্ম ধীরো

তেমাসমত্তং অৰসী ৰসীসো;

৪৯৬.

ততো যসং তস্স সহাযকেপি

পতিট্ঠপেত্ৰা অরহত্তমগ্গে,

ভুতিং জনানং অনুব্রূহযন্তো

ৰস্সস্স অন্তং অকরী তহিং সো;

৪৯৭.

ৰস্সচ্চযে লোকৰিদূ মুনিন্দো

আমন্তযী তে যতযো সপুত্তে,

তে’থাগমুং নিব্বণথা কতঞ্জলী

’দমব্রুৰি তেসম’নন্ত পঞ্ঞো;

৪৯৮.

উগ্ঘোসযন্তা মম ধম্মঘোসং

সমাহনন্তা মম ধম্মভেরিং,

সাধুং ধমেন্তা মম ধম্মসঙ্খং

চরাথ তুম্হে সনরামরানং;

৪৯৯.

জযদ্ধজং মে ভুৰনুক্খিপন্তা

উস্সাপযন্তা মম ধম্মকেতুং,

অথুক্খিপন্তা মম ধম্মকুন্তং

চরাথ লোকেসু সদেৰকেসু;

৫০০.

সুসজ্জিতত্তং অমতস্স মগ্গং

সকণ্টকত্তং নরকাযনস্স,

মারাননস্মিং মসিমক্খিতত্তং

কথেথ লোকস্স সদেৰকস্স;

৫০১.

বুদ্ধন্তরং সুপ্পিহিতং অচারং

পুরস্স মোক্খস্স ৰিসালদ্ৰারং,

অৰাপুরী নো ভগৰা’ধুনা ভো

যথজ্জ সব্বেতী নিৰেদযৰ্হো;

৫০২.

উপ্পন্নভাৰং ভুৰনে মমজ্জ

তথেৰ ধম্মস্স চ পাতুভাৰং,

উপ্পন্নভাৰঞ্চ মমোরসানং

পকাসযন্তা জগতিং চরাথ;

৫০৩.

ৰনম্হি পন্তে গিরিগব্ভরাযং

রুক্খস্স মূলে’পি চ সুঞ্ঞা’গারে,

ৰসং যতত্তা মম ধম্মমগ্গং

দেসেথ লোকে সনরামরানং;

৫০৪.

ৰত্ৰান এৰং যতযো দিসাসু

পেসেত্ৰ নাথো উরুৰেলগামী,

পটিপজ্জি মগ্গং অথ অন্তরালে

কপ্পাসিকৰ্হং ৰিপিনং পৰিস্স;

৫০৫.

তস্মিং রমন্তে সমতিংসমত্তে

রাজোরসে সো পৰরো ৰিনেত্ৰা,

দত্ৰা’মতং ধম্মমথুদ্দিসিত্ৰা

অগোরুৰেলং গজরাজগামী;

৫০৬.

তত্থোরুৰেলাধিককস্সপোতি

পসিদ্ধনামস্স সসিস্সকস্স,

অগ্গং ফলং সো পরিপাৰযন্তো

ৰসী ৰসন্তে ৰসীনং ৰরিট্ঠো;

৫০৭.

তদাহরুং নেগম নাগরা চ

যঞ্ঞং মহাকস্সপ তাপসস্স,

জিনো ৰিদিত্ৰাস্স মনং মনেন

ৰসী ৰিসুং তস্স পসাদ হেতু;

কথং?

৫০৮.

গন্ত্ৰান উত্তরকুরুং ভগৰা তদানি

পিণ্ডঞ্চরিত্ৰ রমণীয হিমালযদ্দিং,

আগম্ম সাদুরস নীর ভরাভিরামে

’নোতত্তকে মুনিৰরো পরিভুঞ্জিযান;

৫০৯.

চিন্তেসি এৰমহমপ্পতরংৰ কালং

ঠস্সামি সাসন মমঞ্হি অনাগতেসু,

লঙ্কাতলে ভৰতি তত্থ ইদানি যক্খ

সম্বাধমত্থি মম তত্থ গতেসু’দানি;

৫১০.

সব্বা’মনুস্সজ ভযং পৰিনস্সতী’তি

মন্ত্ৰা ততো যতিৰরো করুণায সত্তে,

সঞ্ঝাঘনেহি পরিনদ্ধ রৰীৰ রত্ত

নিগ্রোধপক্ক সদিসং চরপংসুকূলং;

৫১১.

ধারেত্ৰ সেলময সুন্দর পত্তহত্থো

ছব্বণ্ণরংসি নিৰহং দিসি পূরযন্তো,

সম্বোধিতো নৰম ফুস্সজ পুণ্ণমাযং

লঙ্কাতলং ৰিজযিতুং নভসা’গমাসি;

৫১২.

ব্রহ্মাসুরামর ফণি গরুল়া চ সিদ্ধ

ৰিজ্জাধরাদি জনতা সহপারিসজ্জা,

কেতা’তপত্ত ঘট দীপুরু তোরণেহি

পূজং অকংসু মহতিং গগনাযনম্হি;

৫১৩.

লঙ্কঙ্গনা উরসি ভাসুর তার হার

সঙ্কাস সীতল মনোহর নীর পূরা,

তস্মিং মহাদিপদ ৰালুক নাম গঙ্গা

ভুমজ্ঝগাসি জন নেত্ত হরাভিরামা;

৫১৪.

তস্সাৰিদূর সুচি রম্মতরে পদেসে

আযামতো মিততিযোজন ৰিত্থতেন,

চত্তারি গাৰুতমিতং নযনাভিরামং

আসার সীতজল নিজ্ঝর ভুরিঘোসং;

৫১৫.

মত্তালিপালি খগ গীতিজ মিস্সরাগং

সম্মত্ত চিত্ত মিগসঙ্ঘ নিসেৰিতং তং,

নচ্চন্ত নেকসিখি সঙ্গত পাদপিণ্ডং

উয্যানমাসি উরুনাগৰনাভিধানং;

৫১৬.

রম্মে তদা রতনদীপৰরম্হি লঙ্কা

লোকাভিধান হরিকণ্ডক যক্খদাসে,

ওদুম্বরে সুমনকূটক তণ্ডুলেয্যে

সেলেসু মারগিরি মিস্সকরিট্ঠনামে;

৫১৭.

যে’ঞ্ঞেপি সন্তি গিরযো ৰনরামণেয্যা

গঙ্গা নদী গিরিগুহা সিকতাতলা চ,

তত্থাৰসন্তি রহসা ফরুসানিরুদ্দা

পাণাতিপাত নিরতা সঠকূট যক্খা;

৫১৮.

সঙ্গম্ম তে মহতি নাগৰনম্হি তম্হি

সম্মন্তযিংসু সভটা সহ পারিসজ্জা,

ত্ৰং কো’সি রে! ইতি পরো অপরং খরেন

তিক্খেন ৰাদকণযেন অরুন্তুদন্তা;

৫১৯.

কুজ্ঝিংসু তে অথিতরীতর কারণেন

ৰাক্যেন যুদ্ধ পরিরদ্ধ পগব্ভিতত্তা,

সঙ্খাভিতাপগ পতীৰ’নৰট্ঠচিত্তা

সারম্ভগব্বিতমনা পরিরাৰযন্তি;

৫২০.

তস্মিং খণে’ভিমতদো সুগতো নভম্হি

আগম্ম তেস’মনুকম্পিত মানসেন,

গোপানসী সম মনোহর রংসিমালি

তত্থচ্ছি খে গুণমণী মণিকণ্ণিকাৰ;

৫২১.

তেসং জিনো কলহৰূপসমায হেতু

মাপেসি ৰুট্ঠি তিমিরা’নিলসীতভীতিং,

তত্থাসি গজ্জিতঘনো সুরচাপখিত্ত

ধারাসরেহি ৰিতুদং নিসিৰার সঙ্ঘং;

৫২২.

অন্ধাৰ তে ঘনতরে তিমিরে নিমুগ্গা

মুল়্হা দিসঞ্চ ৰিদিসং ন ৰিদিংসু ভীতা,

চণ্ডানিলুদ্ধট মহা গিরিকূটরুক্খ

সম্পাত ভীত রুদিতা গতিমেসযন্তি;

৫২৩.

সীতেন তে অথ দিজে পরিকোটযন্তা

অঞ্ঞোঞ্ঞগত্তমৰলম্ব পরোদযিংসু,

রূপানি নেকভযদানি চ ঘোসণানি

ৰত্তিংসু তেন ৰিৰিধং ভযমাসি তেসং;

৫২৪.

বুদ্ধাপি দুক্খিতমনা পরদুক্খকেন

কস্মা করোন্তি অনযং’তি ন চিন্তনীযং,

লোকো হনাতি ৰিটপি ফলদান হেতু

সত্থেন সোম রিপুগাহক ৰাসরম্হি;

৫২৫.

সত্থা ততো তমনুদো সভযে সসোকে

দিস্ৰান গুয্হক জনে করুণাযিতত্তো,

ৰুট্ঠিং তমঞ্চ পৰনং পণুদিত্ৰ সব্বং

দস্সেসি অত্তমখিলং দুমণীৰ খম্হি;

৫২৬.

দিস্ৰান তে মুনিৰর’ঞ্জলি পঙ্কজেহি

সজ্জেত্ৰ সীস সরসী ইদম’ব্রুৰিংসু,

যাচাম নো’ভযপদং ভৰতো সকাসা

দাসেসু ধীর করুণং করণীযমেৰ;

৫২৭.

এৰং তদা’ৰচ জিনো মধুরস্সরেন

আমন্ত তে নিসিচরে’ৰনতে সমেক্খ,

তুম্হে দদাথ যদি ঠানমমেকদেসং

সব্বে অপেন্তী ঘনৰাতজ সীতদুক্খা;

৫২৮.

যজ্জেৰমীতিম’পযাতি করোম ভো তং

গণ্হাহি ধীর যদি ইচ্ছসি সব্বদীপং,

ৰত্ৰান তেহি পরিদিন্ন ছমায মগ্গো

ওগম্ম তত্থ পুথু পত্থরি চম্ম কণ্ডং;

৫২৯.

তস্মিং নিসজ্জ কসিণং সমাপজ্জ তেজো

জালাকুলং জলিত মগ্গীমমাপযী সো,

সো ধূমকেতু গগনুগ্গত তুঙ্গসিঙ্গো

সন্দড্ঢযং গিরিৰনানু’রুঘোসযন্তো;

৫৩০.

রুক্খেহি রুক্খৰন পব্বত লঙ্ঘনেন

সাখামিগে চ ৰিহগে অনুবন্ধযং’ৰ,

ৰেস্সানরো ৰনমরূ মিগসূকরে’পি

সন্ধাৰি গুয্হক জনে ইতি চিন্তযন্তো;

৫৩১.

দিস্ৰান তত্থ পচুরাতন ৰিপ্ফুলিঙ্গ

সম্মিস্স জাল দহনং গুহকা সমেচ্চ,

ধাৰুং ৰিকিণ্ণকচ বপ্পজল’দ্দনেত্তা

দারত্তজেহি সহিতা গতিমেসমানা;

৫৩২.

সম্বুদ্ধতেজ পরিদড্ঢ সরীরচিত্তা

আহচ্চ সাগরতটং পরিধাৰমানা,

তস্মিম্পি তে পৰিসিতুং সরণং ন লদ্ধা

ছম্হি ততো সপদি সন্নিপতিংসু সব্বে;

৫৩৩.

দিস্ৰান তে মুনিৰরো সহযে সসোকে

রম্মং তদা জলধিমজ্ঝগতং মহন্তং,

ইদ্ধীহি সেহি গিরিদীপমি’ধানযিত্ৰা

আরোপযিত্ৰ নিখিলে পুন তত্থ’কাসি;

৫৩৪.

কত্ৰেৰমে’সমসমো’পসমন্ত’মীতিং

তত্থেৰ ভাসুরতরো ভগৰা নিসীদি,

ব্রহ্মামরা’সুরফণী গরুল়াদি সিদ্ধা

সঙ্গম্ম’কংসু মহতিং মহম’গ্গরূপং;

৫৩৫.

দেসেসি সংসদি জিনো সুতিসাধু ধম্মং

তস্মিং সদাসৰনুদং সিৰদং জনানং,

সুত্ৰান নেকসতকোটি পমাণ পাণা

লদ্ধা তদা সমভৰুং চরধম্মচক্খুং;

৫৩৬.

তস্মিং দিনে সুমনকূট ৰরাধিৰাসো

তেজিদ্ধিবুদ্ধিৰিভৰো সুমনাভিধানো,

দেৰো পসন্নহদযো রতনত্তযম্হি

সম্পাপুণিত্থ পঠমং ফলমুত্তমং সো;

৫৩৭.

উট্ঠায তুট্ঠৰদনো কতপঞ্জলীকো

মুগ্গো জিনগ্গ নখরংসি পযোদধিম্হি

ৰন্দিত্ৰ এৰমৰচা’তুল ৰীর ধীর

লোকগ্গ পুগ্গল ৰরং দদ সামি ধীস;

৫৩৮.

দাসোস্মি তে চরণ পঙ্কজ পূজকোহং

সদ্ধাদযাদি ৰিভৰো তনযো’হমস্মি,

তুম্হে ৰিনা খণলৰং ৰসিতুং ন ইচ্ছে

তস্মা দদাতু ভগৰা মম পূজনীযং;

৫৩৯.

সুত্ৰান তং ধিতিমতী পরিমজ্জ সীসং

সংসত্ত ছপ্পদ সরোরুহ সন্নিভেন,

হত্থেন নীল সক কুন্তল ধাতুমুট্ঠিং

দজ্জাথ সো মণিমযেন করণ্ডকেন;

৫৪০.

পগ্গয্হ বাহুযুগলেন ঠীতো নমিত্ৰা

মুদ্ধা দধাসি মকুটং ৰিয পীণিতত্তো,

কত্ৰা’থ সো ৰর মহং তিদিৰেহি সদ্ধি

’মপ্পেত্ৰ ধীর ফরিভুত্ত ৰসুন্ধরাযং;

৫৪১.

সো’কাসি নীলরতনেহি মহারহেহি

উব্বেধতো রতন সত্ত পমাণ থূপং,

নাথে ধরন্তসমযেৰ পতিট্ঠহী সো

থূপো তিলোকসুখদো মণি কামদো’ৰ;

৫৪২.

পচ্ছা তিলোকসরণে পরিনিব্বুতম্হি

খীণা সৰো সমহিমো সরভু যতিন্দো,

আদায তং চিতকতো জিনগীৰধাতুং

তস্মিং নিধায’করি বারস হত্থথূপং;

৫৪৩.

চূল়াভযহ্ৰৰনিপো সমযে’পরস্মিং

বত্তিংস হত্থম’করিযত্থ ৰরোরুথূপং,

দুট্ঠাদিগামণি নুপো দমিল়ে হনন্তো

কারেসি কঞ্চুকমথো চতুসট্ঠিহত্থং;

৫৪৪.

এৰং স সীহলমহাসরমজঝরূল়্হং

সেতম্বুজং’ৰ মধুপাৰলি সেৰনীযং,

ভুমঙ্গনা করতলে সিতৰিত্থলীলো

থূপো দদাতু মসমোপসমং জনানং;

৫৪৫.

লঙ্কোপসগ্গম’ৰধূয ৰিধায খেমং

লঙ্কং নিজায ৰরকুন্তল ধাতুযা তং,

কত্ৰান ভাসুরতরং মুনি মঙ্গলায

পাযাসি তারক পথে’নুরুৰেলমেৰ;

৫৪৬.

তস্মিং ৰিধায বহুৰিম্হিত পাটিহেরং

ভেত্ৰা সসিস্সকি’সিনো পুন দিট্ঠিজালং,

দত্ৰান নিব্বুতিপদং সহসিস্সকস্স

নিব্বাণ সুন্দর পুরং পরিপূরযিত্থ;

৫৪৭.

তম্হা ৰিকাসিত কুসেসয কাননাভ

ৰীতাসৰেহি নিৰুতো সুগতেভগামী,

পাযাসি রাজগহ গামী’মুদারমগ্গং

ৰেনেয্য জন্তু কমলাকর ভানুরূপো;

৫৪৮.

তস্মিং গতে জিনৰরে ৰর বিম্বিসারো

পূজং অকাসি মহতিং সহ দেৰতাহি,

তস্মিঞ্হি সংসদি লভিংসু অনপ্পপাণা

মগ্গে ফলে চ সরণে চ পতিট্ঠহিংসু

৫৪৯.

রাজা ততো ৰিপুল ৰেলুৰনাভিরামং

সালঙ্কতং ৰিৰিধ পাদপ মণ্ডপেহি,

পাদাসি দক্খিণকরে জলপাতনেন

কত্ৰা ধরাধরধরং হিমৰঞ্চ কম্পং;

৫৫০.

তস্মিং সমন্তনযনো নযনাভিরামো

ভুতিং জনস্স সততং অভিৰড্ঢযন্তো,

ধম্মম্বু ৰুট্ঠি নিকরং পরিৰস্সযন্তো

ৰস্সং ৰসী অদুতিযো দুতিযম্হি ৰস্সে;

৫৫১.

দেৰিন্দ মোলি সমলঙ্কত পাদপিট্ঠো

লোকস্স অত্থচরণে সততাভিযুত্তো,

তত্থেৰ সো হি ততিযে’পি চতুত্থৰস্সে

ৰাসং অকাসি সুগতো সিরিসন্তিৰাসো;

৫৫২.

লোকস্স ধম্ম ম’মলং সততং ৰহন্তো

সাৰত্থিযং রুচির জেতৰনে’ভিরামে,

ৰাসং অকাসি সুখদো মুনিপঞ্চমস্মিং

ৰেনেয্য সত্তসমযং সমুদিক্খমানো;

ইতি লঙ্কায পঠমা’গমনং.

৫৫৩.

অথ ভগৰতি তস্মিং জেতনামে ৰনস্মিং

নিৰসতি সতিলঙ্কা মঙ্গলা’ৰাসরূপা,

উপৰনমিৰ নাকে নন্দনং দেৰতানং

অমর উরগৰাসা রম্মরূপা বভূৰ;

৫৫৪.

তহিমতি রুচিরস্মিং ৰড্ঢমানাদি সেলে

মধুর সলিলৰাহে রম্মকল্যাণিকাদো,

উদধি ভুজগৰাসে নাগদীপন্তিকে চ

মহতি মহিম যুত্তা নাগসঙ্ঘা ৰসন্তি;

৫৫৫.

পচুর মহিম যুত্তো ৰড্ঢমানাচলস্মিং

অধিপতি ভুজগানং আসি চূলোদরৰ্হো,

মহুদর ইতি নামো নাগদীপোদধিম্হি

নিৰসতি অথ তেসং পব্বতেয্যো’রগিন্দো;

৫৫৬.

ইতর ভুজগ রঞ্ঞো ধীতরং নাগকঞ্ঞং

পিযতরম’ভিরূপং’কাসি দারং তদা হি,

অথ চ দুহিতুযা সো দীযমানং দদন্তো

রুচির মণীমযগ্ঘং আসনঞ্চাপদাসি;

৫৫৭.

দুহিতরি মতকালে তে’থ পল্লঙ্কহেতু

জলজ থলজ নাগা যুদ্ধসজ্জা অহেসুং,

অথ থলজ ভুজঙ্গা ভঙ্গকল্লোলমালা

সদিস লূলিত চিত্তা গব্বিতেৰং রৰন্তি;

৫৫৮.

কিমু’দধিজ ফণীনং কিত্তি সম্পত্তিযা নো

অপি যসপরিৰারা কিং বলেনিদ্ধিযা কিং,

অহমহমীতি গব্বা কিং কিমিস্সায তেসং

ভৰতি তিমির’রীনং ভানুমগ্গুন্নতী কা;

৫৫৯.

অথ জলজ’লগদ্দা গজ্জনং গজ্জযন্তা

ভযজনক পগব্ভা ফোটযন্তা ভূজানং,

অহমহ পভূ রে!রে! পব্বতেয্যান’মেতং

পটুতরডসিতোট্ঠা কক্খ’ল়েৰং রৰন্তি;

৫৬০.

পটুতর গরুনাদা তাৰ গজ্জন্তি দন্তী

নযন পথমু’পেন্তে যাৰ কণ্ঠিরৰানং,

তথরিৰ থলজাতা জুম্হযন্তা সমগ্গা

নযন পথগতা নো সুঞ্ঞদপ্পা ভৰন্তি;

৫৬১.

ইতি তদুভযসেনা ঘট্টযন্তা’ঞ্ঞমঞ্ঞং

ৰিৰিধ পহরণ্হো উগ্গিরন্তী গিরন্তি,

সতত খুভিত ৰেলা সাগরূমীৰ ভন্তা

লুলিত লুলিত চিত্তা যুদ্ধনিন্না ঠিতাসুং;

৫৬২.

অথ তদহু মুনিন্দো যামিনীযাম’মন্তে

পতিনিয মতিজালং লোকমোলোকযন্তো,

সমর ৰসগতানং ভোগীনং ভাৰিভুতিং

তদুপরি চ’ভিৰুদ্ধিং পস্সি লঙ্কাতলস্স;

৫৬৩.

অথ মুনি মধুমাসে’পোসথে কালপক্খে

কত নিখিল ৰিধানো গয্হ সঙ্ঘাটিকাদিং,

অনুগতিকমুদিক্খং পঞ্চনেত্তো সমন্তা

সুমন সুমন নামং পস্সি দেৰং সমিদ্ধিং;

৫৬৪.

তদহু সুমনদেৰো জেতনামে সুরম্মে

অধিৰসতি ৰিহারে দ্ৰারকোট্ঠোপকট্ঠে,

ঠিত ৰিটপ সমিদ্ধে খীরিকাপাদপস্মিং

সুগত মভিনমন্তো অন্ৰহং পূজযন্তো;

৫৬৫.

তমসম্মুনি দিস্ৰা’মন্তযিত্ৰা’গতে তং

ইদমৰচ মযা ভো সদ্ধিমাগচ্ছ লঙ্কং,

সহ তৰ ভৰনম্হা পুব্বৰুত্থপ্পদেসে

তৰ ভৰতি পতিট্ঠা ভোগিনঞ্জা’ভিৰুদ্ধি;

৫৬৬.

অথ মুনিৰচনং সো মুদ্ধনাম’গ্গহেত্ৰা

সমুদিতহদযো তং রুক্খমুদ্ধচ্চ মূলা,

সুগতমুপরি কত্ৰা ধারযন্তো সুফুল্লং

বরিহি বরিহি ছত্তাকারমাগা নভম্হী;

৫৬৭.

দসবল তনুভা’ভিস্সঙ্গমা সো দুমন্দো

তরল মণীৰ নানা’ভাহি সম্ভাৰনীযো,

ৰিলসিত ইৰ সব্বে রুক্খসেলাদযো’পি

অপগত সকৰণ্ণাৰণ্ণৰন্তা ৰিরেজুং;

৫৬৮.

খগ ভুজগ সুরাদি মস্সিতা ছপ্পভাহি

নিজপতি নিজজাযা স্ৰঞ্ঞমঞ্ঞাসু মুয্হুং,

অসিত গগন মজ্ঝে সোভমানো মুনিন্দো

ৰিতত ৰিৰিধ রংসী রংসিমালীৰ গঞ্ছি;

৫৬৯.

জলদ পটল সণ্ডে ৰজ্ঝমুদ্দাল়যিত্ৰা

বহি ৰিলসিতকাযো সোম্মদোসাকরো,ৰ

কতুপরি তরুছাযো জোতমানো সমানো

উরগ সমরঠানং গন্থ্ৰা’কাসে নিসজ্জ;

৫৭০.

ঘনতর তিমিরং সো ইদ্ধিযা সঙ্ঘরিত্ৰা

তহিমতিরৰ ভীমং ঘোরসংরম্ভৰন্তং,

অসনি সত নিপাতং ৰস্সধারা করালং

উরুতর তত মেঘং মাপযী সীতৰাতং;

৫৭১.

ইতি তিভুৰননাথো দপ্পিতে নাগসঙ্ঘে

ৰিমদ করণ হেতু দস্সযী ভেরৰানী,

অথ’পগত পগব্ভে তে ৰিদিত্ৰান সত্থা

অপনুদি ভযজাতং তঙ্খণংযেৰ তত্থ;

৫৭২.

তরুণ তরণিসোভা কেতুমালাৰিলাসিং

সুভরুচি মুখৰন্দং লক্খণাকিণ্ণগত্তং,

তিভৰ ৰিভৰদাযিং তং ৰিদিত্ৰান নাগা

চুতপহরণ হত্থা ৰন্দমানা মহিংসু;

৫৭৩.

সিরসী নিহিতপাণী রত্তপঙ্কেরুহেহি

ৰিকচ ৰদন নেত্তা’মন্দ কঞ্জুপ্পলেহি,

সক সক ধত নানাৰণ্ণ ৰম্মাদিকেহি

ৰিৰিধ কুসুমৰত্থা’মন্দ দীপদ্ধজেহি;

৫৭৪.

উরগ ভৰনৰাসা নাগকঞ্ঞা সমেচ্চ

কুচ কলস সহস্সং ধারযন্তি সলীলং,

ললিত কণক ৰল্লি লীলমাধত্ত গত্তা

থুতি মুখর মুখা তা সাধু কীল়ং অকংসু;

৫৭৫.

অথ মুনি উরগানং ৰিগ্গহং তং সমেতুং

সুতিমন কমনীযং নিচ্ছরং ব্রহ্মঘোসং,

অজরমমর মগ্গং সুপ্পসত্থং সুধিহি

ৰরমতি ৰরধম্মং দেসযী নং ফণীনং;

৫৭৬.

ন ভো ভো সংসারে খলু ভৰতি সারং লৰম্পি

ৰিসেসা তং সীতং জলিত দহনে ৰিজ্জতি কদা,

সদা রাগং রোগং ব্যধতি জনতং নেকদুরিতং

তথাপা’যুং পাতো রৰিরভিমুখুস্সাৰ সদিসং;

৫৭৭.

সরীরো’যং বত্তিংস ৰিধ কুণপো সার রহিতো

পরিত্তং যোব্বঞ্ঞং কুসুম সদিসং নিগ্গতসিরি,

পহন্ত্ৰা গন্তব্বং ভৰজ ৰিভৰং সম্ভতমিদং

অথেৰং সন্তে ভো ৰরযতি ভৰং কো নু হি বুধো;

৫৭৮.

পলাসী মক্খী কোধূপহ মতো মানৰিভৰো

জনো’তীতো’তো ভো পযতি নরকং দারুণতরং,

ফণী মজ্জারো সা গুহক কপযো ভূয বহুসো

ৰধেন্তঞ্ঞোঞ্ঞং তে ননুভৰমিদং দুক্খম’নিসং;

৫৭৯.

পুরে কাকো’লুকা অথ ৰনভৰা ফন্দন ইসা

করিত্ৰা’ট্ঠানে’ঘং চিরমনুভৰুং দুক্খমনিসং,

অহো কপ্পট্ঠন্তং সরথ দুরিতং ৰেরজমিদং

ন হেত্থস্সাদো ভো’ণুমপি কলহে মেত্তিম’মতং;

৫৮০.

বলং বালানং ভো সক সক ৰধাযেৰ ভৰতি

অতীতেকা খুদ্দা লটুকিকদিজা নট্ঠতনযা,

গজং বালং মত্তং পৰিধি ন বলং হোতি সরণং

অথট্ঠানে কিং ভো কুরুথ ৰীরিযং ভুতি হননং;

৫৮১.

ন দুক্খং তেসং যে ৰিগত কলহা একমনসা

অতীতে ভো লাপা অঘটিত মানা পেয্যৰচনা,

সুখং ৰাসং’কাসুং যদহনি ভৰুং তে’থ ৰিধুরা

ৰসং ৰ্যাধস্সাগুং তদহনি অহো!মেধগ বলং;

৫৮২.

ইতি তিখিণ সুধিমা কত্তুমেতে সমগ্গে

অৰদি পৰর ধম্মং সাধু ৰিঞ্ঞুপ্পসত্থং,

অথ মুদিতমনা তে পীণিতা তস্স নাগা

মণিমযম’তুলং তং আসনং পূজযিংসু;

৫৮৩.

অথ মুনি গগনম্বোরুয্হ ভুমিপ্পদেসং

তরুণ রৰিৰ তস্মিং আসনে আসি ভাসং,

অথ ভুজগগণা তে দিব্ব খজ্জাদিকেহি

পরিৰিসিয মুনিন্দং সাধু ধম্মং সুণিংসু;

৫৮৪.

অথ জল থলজানং তত্থ যুদ্ধা’গতানং

অগণিত ভূজগানং’সীতিকোটী ভুজঙ্গা,

ৰিমল সরণসীলে সুপ্পতিট্ঠা সুতুট্ঠা

অকরু’মতিমুল়ারং সত্থু পূজাৰিধানং;

৫৮৫.

অথ মহুদর রঞ্গ্ঞো মাতুলো নাগরাজা

মনিনযনকনামো রম্মকল়্যাণদেসা,

উরগ সমর হেতূ আগতো নাগদীপং

সুগতৰর সরীরং দিস্ৰ নত্ৰালপেৰং;

৫৮৬.

যদি সুগত! ইমং ত্ৰং নাগতো অস্স ঠানং

মযমপগত পাণা হোম ঝত্ৰা’ঞ্ঞমঞ্ঞং,

রুধিরৰহ ৰিকিণ্ণো অস্স ভুমিপ্পদেসো

পসমি দহন দিত্তং অম্বুদেনেৰ তং ত্ৰং;

৫৮৭.

মম ভগৰ! পুরামে দিট্ঠপুব্বং তৰেতং

রুচির সিরিসরীরং রংসিজালা’ভিকিণ্ণং,

অপি সুমধুর ধম্মং দেসযন্তে সুরানং

দসবল সুতপুব্বং আনুভাৰঞ্চ তুয্হং;

৫৮৮.

অহমসম পুরে তে ৰিস্সুতোযেৰ দাসো

যদি মনসি দযা তে হোতি দাসে পুনা’পি,

পৰর রতনদীপে হোতি কল়্যাণিগঙ্গা

মম ৰসতি তহিং তং দট্ঠুকামো’ভিযাচে;

৫৮৯.

ইতি যতিপতি তস্সা’রাধনং পগ্গহেত্ৰা

সক পরিচিত ভুম্যা চেতিযত্থং ৰিধায,

মণিময পরিভুত্তং আসনং চা’পি তেসং

স সুমন তরু রাজং পূজনত্থং ৰিধায;

৫৯০.

দসবল পরিভুত্তং সব্বমেতং ভুজঙ্গা

মণিরিৰ রুচীদং তে ধাতুযোযেৰ তস্মা,

মহথ নমথ নিচ্চং মংৰ সগ্গা’পৰগ্গং

দদতি ইতি চ ৰত্ৰা ওৰদিত্ৰান সত্থা;

৫৯১.

নভতল’মু’পগন্ত্ৰা দেৰনাগে মহেন্তে

দিসি দিসি ৰিসরন্তো নীলপীতাদি রংসি,

মন নযন হরন্তো জন্তুনং লোকসারো

অগমি রৰি’ৰ খম্হা জেতনামং ৰিহারং;

৫৯২.

অথ মনুজমরানং নত্তসিদ্ধাদিকানং

সতত’মমত ধম্মং দেসযন্তো ফণীনং,

ৰনভৰন সুরম্মে মঙ্কুলৰ্হে নগিন্দে

অকরি মুনি নিৰাসং ছট্ঠমে হাযনম্হি;

৫৯৩.

সুরপুরুপৰনে’থো পারিজাতস্স মূলে

অরুণ মুদুসিলাযং ভাসমানো মুনিন্দো

সুনিপুণ’মভিধম্মং দেসযন্তো সুরানং

অকরি ৰরনিৰাসং সত্তমে তত্থ ৰস্সে;

৫৯৪.

অথ সুখদ মুনিন্দো জেতনামে ৰিহারে

অৰসি ৰিমলপঞ্ঞো অট্ঠমে সারদস্মিং,

অজর’মমর সন্তিং ফসমানো পরেসং

ৰিৰিধ নয ৰিচিত্তং দেসনং দেসযন্তো;

ইতি লঙ্কায দুতিযাগমনং.

৫৯৫.

এৰং জিনো জেতৰনে ৰসন্তো

নীস্সায সাৰত্থিপুরং ৰিহাসি,

সা কিদিসী আসি পুরী তদানী

তং কীদিসং জেতৰনং ৰিহারং;

৫৯৬.

ভূমঙ্গনাযাহিত উত্তমঙ্গে

ভাসন্ত নানারতনাভিরামা,

ৰিসালমোলীৰ ৰিসালভোগা

সা জম্বুদীপম্হী বভুৰ রম্মা;

৫৯৭.

সিরীনিকেতে সিরিমাৰহন্তী

ৰিরাজতে যা ৰসুধা তলস্মিং,

সা দেৰরাজস্স’মরাৰতী’ৰ

রঞ্ঞো কুৰেরস্স’লকাৰ রম্মা;

৫৯৮.

সা পুঞ্ঞপঞ্ঞালু জনাধিৰুত্থা

সোণ্ণাদি পুণ্ণাপনাকিণ্ণৰীথী,

উত্তুঙ্গ মাতঙ্গ তুরঙ্গ রঙ্গা

সা রাজতে কঞ্চন মন্দিরালী;

৫৯৯.

ররাজ সা ভাসুর রাজপুত্তা

পুঞ্ঞঙ্গনালাস ৰিলাসযন্তী,

ৰেদঙ্গপারঙ্গত ৰিপ্পচারা

দ্ৰিপঞ্চ সদ্দেহি চ নিচ্চঘোসা;

৬০০.

অনেকসিপ্পী সত সম্পকিণ্ণা

নানাদিসাহা’গত সত্থৰাহা,

পহুতখীণাসৰপাদপূতা

বভাস সা মঙ্গল মন্দিরং’ৰ;

৬০১.

ভৰন্তরে যো চরিযং চরন্তো

সুৰো’পনিস্সায ৰসং গুণেন,

যঞ্ঞঙ্গসাখিং মতসীনপত্তং

অকা সমিদ্ধং ফলপল্লৰেহি;

৬০২.

ইদানি পত্ৰান ভৰস্স অন্তং

নিস্সায যং সো ৰসতে মুনিন্দো,

তস্সা গুণং কো হি অসেসযিত্ৰা

কথেতি সা ৰস্সূ’পমায তস্সা;

৬০৩.

তস্সোপকট্ঠে রতনংৰ’নগ্ঘং

মনোহরো উত্তমসত্তসেৰি,

জনানমাকখিঙতদো ৰিহারো

বভুৰ জেতাদি ৰনৰ্হযেন;

৬০৪.

সমফুল্ল পুপ্ফরস মোদিত ছপ্পদালী

ঝঙ্কার নাদ পরিৰাদিত তন্তিনাদা,

সম্মত্ত’নন্ত দিজ কুজিত গীতৰন্তা

তিট্ঠন্তি যত্থ তরৰো নটকাৰ ছেকা;

৬০৫.

খীরণ্ণৰাহরিয ধোৰিয খীরনীরা

সোসেত্ৰ সজ্ঝুমলযে সসিকন্তি মস্সং

যত্থোকিরিত্ৰ তনিতা ৰিয ৰালুকাযো

সা মালকাৰলি বভাস পযোদধি’ৰ;

৬০৬.

ৰিজ্জোতমান রতনপ্পমুখাননম্হি

সোপান মাল পদগণ্ঠিদুজেহি হাসং,

কত্ৰেৰ দেৰভৰনানমহং ৰিরাগ

ৰন্তী’তি গন্ধকুটি যত্থ পহাসযিত্থ;

৬০৭.

কম্মার গগ্গরি মুখো’পরি সম্পপুণ্ণা

অঙ্গার কন্তর ৰিনিগ্গত জালকাৰ,

সম্বুদ্ধদেহ পরিনিগ্গত রংসিমালা

দাযগ্গ নিগ্গত করা ৰিসরন্তি যস্মিং;

৬০৮.

তুম্হে সরাগ জনসঙ্গমতো’তি গীতা

ধঞ্ঞা মযন্তী ৰিমলেহী সমঙ্গিতত্তা,

তুট্ঠাৰ হাস মকরা সুরপাদপানং

রাজেন্তি যত্থ যতিনিস্সিত পাদপিন্দা;

৬০৯.

পুন্নাগ নীপ ৰকুল’জ্জুন রাজরুক্খ

নাগা’গ চূত যুগপত্তক চম্পকানং,

পুপ্ফাভিকিণ্ণ ধরণী রতনেহি নানা

পচ্ছন্ন দিব্বভৰনং ৰিয ভাতি যত্থ;

৬১০.

ব্রহ্মাসুরাসুর নরোরগ লিঙ্গিসিদ্ধ

ৰিজ্জাধরাদি জনতা কতৰন্দনেহি,

তেহেৰ ঘুট্ঠ থুতিমঙ্গল গীতিকাহি

যত্থোপগান মননেত্তগণা মুদেন্তি;

৬১১.

নিগ্ঘোসিতামল সুসীতল নিজ্ঝরেহি

সম্মত্ত নেকদিজ ঘুট্ঠ জলাসযেহি,

কিঞ্জক্খ পত্ত পরিকিণ্ণ সিলাতলেহি

তুস্সন্তি যত্থ সততং যতীনং মনাতি;

৬১২.

যো নেক কপ্প সত সঞ্চিত পুঞ্ঞরাসি

হিত্ৰা’মিতং কপিলৰত্থু মহাসিরিম্পি,

আগম্ম যত্থ নীরতো সুগতো মহেসি

কো তত্থ ভুতি মতুলং কথিকো কথেতি;

৬১৩.

তস্মিং জিনো ৰসতি জেতৰনে ৰিহারে

ইন্দো যথা রুচির নন্দন কাননম্হি,

ব্রহ্মা’ৰ ব্রহ্মভৰনে সপিতামহেহি

তারাৰলী পরিৰুতো গগনে’ৰ ৰন্দো;

৬১৪.

তদাগম্ম মহানাগো মণি অক্খিকনামকো,

লঙ্কাতো জিনপাদস্মিং ফণিং পচ্চেদ’মব্রুৰি;

৬১৫.

সম্বুদ্ধা ধীর লোকস্মিং লোকস্সত্থাভিৰুদ্ধিযা,

জাযন্তি সামি তুম্হাকং দযাযন্তো’গধা মযং;

৬১৬.

তেন মে দাসভুতস্স সংসারন্দুঘরা থিরা,

মুত্তিং যদিচ্ছসে ময্হং গহণীযং নিমন্তণং;

৬১৭.

সুত্ৰান তং মহানাগো মহানাগ নিমন্তণং,

পটিগ্গহেসি তং তুণ্হীভাৰেন করুণায সো;

৬১৮.

ঞত্ৰা তং সুমনো নাগো লহুমাগম্ম সীহলং,

কল়্যাণাপগপস্সম্হি মনোনন্দন ভুতলে;

৬১৯.

সজ্ঝু কম্বুমণি মুত্ত পৰাল ৰজিরামযে,

ৰহারহে মহাথূনে ঘটকাদিং নিধাপিয;

৬২০.

দত্ৰা তুলাদযো সেস মন্দিরঙ্গে তথেৰ চ,

ৰিটঙ্ক ৰ্যাল সীহাদি পন্তিযো’পি তথেৰহি;

৬২১.

সাতকুম্হমযা’নেক চিত্তেহি সাধু চিত্তিতং,

নিম্মায গোপানসিযো পক্খপাসে চ কণ্ণিকং;

৬২২.

সিঙ্গি নিক্খেন সিঙ্গঞ্চ ছদনিন্দমণীহি চ,

সোণ্ণ কিঙ্কিণি মালাযো কণ্ণমালা চ মাপিয;

৬২৩.

চিত্তৰিতানং বন্ধিত্ৰা মুত্তোলম্বে তহিং তহিং,

কত্ৰান গন্ধদামেহি পুপ্ফদামেহি সঙ্কুলং;

৬২৪.

ইন্দনীলমযং ভুমি মজ্ঝে’নগ্ঘ মহাসনং,

মাপেসি পরিতো সেস ভিক্খূনঞ্চ সুভাসনে;

৬২৫.

রতনেহে’ৰাপস্সযে ৰেদিকা এল়িকামযে,

মুত্তা ৰালুক সঙ্কিণ্ণং মালকঞ্চ মনোরমং;

৬২৬.

সত্ত রতন সম্ভুত তোরণূ’পরি তোরণে,

সন্তীর কুসুমা’কিণ্ণ হাটকাদি ঘটাকুলং;

৬২৭.

নেক রাগদ্ধজাকিণ্ণ ৰিতান সমলঙ্কতং,

দীপ ধূপালি সঙ্কিণ্ণ গন্ধপুপ্ফ সমাকুলং;

৬২৮.

এৰমাদিহি নেকেহি ৰণ্ণেহি সমলঙ্কতং,

মাপেত্ৰা মণ্ডপং সেট্ঠং দেৰমণ্ডপ সন্তিভং;

৬২৯.

সীত ৰালুক সঞ্ছন্নং মুদু পাদপটত্থতং,

মাপেত্ৰেৰং মহামগ্গং সুরঞ্জস সমঞ্জসং;

৬৩০.

সঞ্চিনিত্ৰান তে নাগা খজ্জ ভোজ্জ ফলাফলে,

দিব্বন্নপানে পচুরে পটিমগ্গং গমুং তদা;

৬৩১.

ততো কারুণিকো নাথো বোধিতো অট্ঠমে সমে,

ৰেসাখ পুণ্ণমাসিম্হি সন্নিপাতিয সাৰকে;

৬৩২.

এথজ্জ ভিক্খৰো লঙ্কং নাগানং’নুগ্গহায ভো,

মণিঅক্খিকো নিমন্তেসি পসন্নো বুদ্ধসাসনে;

৬৩৩.

সুত্ৰান ৰচনং তস্স সম্বুদ্ধস্স সিরীমতো,

অস্সৰা পেসলা ভিক্খূ পচ্চস্সোসুং সমাহিতা;

৬৩৪.

সারিপুত্তো ততো থেরো পঞ্ঞায’গ্গ ধুরন্ধরো,

পত্তচীৰরমা’দায অগমা জিনু’পন্তিকং;

৬৩৫.

মোগ্গল্লানো মহাথেরো দুতিযো অগ্গসাৰকো,

পত্তচীৰরমাদায সোপাগ জিন সন্তিকং;

৬৩৬.

ধূতপাপো ধুতঙ্গগ্গো মহাকস্সপ নামকো,

পত্তচীৰরমাদায আগমা জিনসন্তিকং;

৬৩৭.

সাসনে ৰিনযঞ্ঞ নমগ্গো’ পালিৰ্হযো যত,

পত্তচীৰরমাদায জিনন্তিকমু’পাগমি;

৬৩৮.

দিব্বচক্খূনমগ্গো যো রুদ্ধপাপারি দপ্পকো,

থেরো’নুরুদ্ধো ৰরদো সোপাগ মুনিসন্তিকং;

৬৩৯.

মণিৰ কামদো কামমু’পৰানো’তি ৰিস্সুতো,

ঞাণী গণী দক্খিণেয্যো থেরোপাগ জিনন্তিকং;

৬৪০.

বক্কুলো ৰিমলো সীল সমাধাদি গুণাকরো,

আগতো সপরিক্খারো ভিক্খূনং সমিতিং তদা;

৬৪১.

বুদ্ধসাসন ধোরয্হো থেরো অঙ্গুলিমালকো,

সহা’গন্তুং মুনিন্দেন সন্নদ্ধো সহসা গতো;

৬৪২.

সাসনোদয সেলগ্গে সূরিযো ৰিয ভাতি যো,

সো’যং রাহুলথেরো’পি লহু’গা পিতু সন্তিকং;

৬৪৩.

ভদ্দাচারো ভদ্দিযৰ্হো থেরো ভদ্দঘটো ৰিয,

পাকটো ভুৰনে সো’পি গতো সম্বুদ্ধ সন্তিকং;

৬৪৪.

দেৰদ্দুমো’ৰ লোকস্স যো দদাতি’চ্ছিতি’চ্ছিতং,

জিনোরসোপি সেলৰ্হো গতো সম্বুদ্ধসন্তিকং;

৬৪৫.

যামিনী সামিকো’ৰাতি ভাতি যো সাসনম্বরে,

মহানাম মহাথেরো সোপাগ মুনিসন্তিকং;

৬৪৬.

মনোসিলাতলগ্গম্হি জুম্হমানো’ৰ কেসরী,

সুভুতিৰ্হ মহাথেরো বুদ্ধুপন্তিক মাগতো;

৬৪৭.

বুদ্ধসাসন ছদ্দন্ত সরসী সারসো ৰিয,

ৰিস্সুতো তিস্সথেরো’পি গতো ভিক্খুসমাগমং;

৬৪৮.

জিনসাসন সম্ফুল্লসরসীরুহ মজ্ঝগো,

মধুব্বত নিভো রাধথেরো’পি সহসা গতো;

৬৪৯.

ভগু দব্বোপ’সেনো চ কোণ্ডঞ্ঞ’স্সজি সীৰলি,

এতে জিনত্রজা থেরা গতাসুং মুনিসন্তিকং;

৬৫০.

কুমারকস্সপো পুণ্ণোসোণোসোভিত রেৰতা,

থেরাপেতে অভিঞ্ঞাতা গতাসুং সত্থুসন্তিকং;

৬৫১.

ৰঙ্গীসো সাগতো নন্দো ভারদ্ৰাজো গৰম্পতি,

পত্তচীৰরমাদায গতাসুং জিনসন্তিকং;

৬৫২.

এৰমাদি মহানাগা পঞ্চসত জিনোরসা,

সমাগঞ্ছুং সহাগন্তুং মুনিনা লোকসামিনং;

৬৫৩.

ততো সো জগদানন্দো করুণাযাভিরাধিতো,

মেরুং পরিক্খিপন্তোৰ অনেকজ্জুতি ৰিজ্জুযা;

৬৫৪.

নিৰাসেত্ৰা সুদ্ধরংসি ৰিসরন্তরৰাসকং,

তস্সূপরি জিনো রত্তং বন্ধিত্ৰা কাযবন্ধং;

৬৫৫.

অচ্চুগ্গতং মহাথূপং চারু চামীকরজ্জুতিং,

পটিচ্ছাদযমানোৰ রত্তকম্বল কঞ্চুনা;

৬৫৬.

ৰণ্ণ নিগ্রোধপক্কংৰ সুরত্তং পংসুকুলিকং,

সঙ্ঘাটিযা করিত্ৰান সগুণং উত্তরীযকং;

৬৫৭.

হুত্ৰান সুপটিচ্ছন্তো পারুপিত্ৰান সাধুকং,

পত্তত্থায পসারেসি জালাকুলকরঞ্জিনো;

৬৫৮.

লোকনাথপ্পভাৰেন ততো পত্তমধুব্বতো,

পাণি সরোরুহস্সন্তো সম্পত্তোসি তমগ্গহি;

৬৫৯.

ততো সসিস্সকো নাথো উগ্গন্ত্ৰা গগনঙ্গনং,

নানাৰণ্ণম্বুদে তত্থ মদ্দন্তো গন্তুমারহভি;

৬৬০.

ততো সম্বুদ্ধ দেহস্মা নিক্খন্তাসুং ছ রংসিযো,

হেমকণ্ণিকতো যাত মণিগোপানসী যথা;

৬৬১.

বাণিন্দীৰর পুপ্ফেহি মেৰ’কিন্দমণিহি চ,

ছাদেন্তি ৰিয নক্খত্তা নীলং’সু মুনিদেহতো;

৬৬২.

চম্পকুদ্দালমালাভী হেমচুণ্ণম্বরেহি চ,

পূরযন্তি ৰিযাসঙ্গ পীতংসূ জিনদেহতো;

৬৬৩.

ভণ্ডীপুপ্ফকদম্বেহি লোহিতঙ্কমণিহি চ,

লোহিতাভা পপূরেন্তি দিসা’গা মুনিদেহতো;

৬৬৪.

হার মল্লিক মালাহি সোমংসু ফলিকাদিহি,

পূরযন্তি ৰিযাসঙ্গ ওদাতা মুনিদেহতো;

৬৬৫.

পিঞ্জুমঞ্জেট্ঠরাসীহি পদুমাভমণীহি চ,

দিসং ছাদযমানাগা মঞ্জিট্ঠাভা জিনঙ্গতো;

৬৬৬.

নেকিন্দচাপ কিণ্ণংৰ দিৰসং রতনুত্থতং,

চিত্তপটংৰ মুঞ্চন্তং মিস্সাভাগা জিনঙ্গতো;

৬৬৭.

গিরিকূট কূটাগার মত্তা ছব্বণ্ণ রংসিযো,

আৰেলৰেলা ধাৰন্তি দিপ্পমানেতরেতরা;

৬৬৮.

গচ্ছমানা’হনিত্ৰান চক্কৰাল় সিলুচ্চযে,

উগ্গন্ত্ৰা পরতো যন্তী নীর নিজ্ঝর সন্নীভা;

৬৬৯.

সম্মুখে সম্মুখে তাযো রুক্খপব্বত আদযো,

কারযন্তা সকং ৰণ্ণং ধাৰন্তা’পি চ সিন্ধৰো;

৬৭০.

উদ্ধমুগ্গতরংসীহি রঞ্জিতা জলদা তদা,

নানাৰণ্ণে পুনেৰাসি নূতনো রৰিমণ্ডলো;

৬৭১.

জিনপ্পহা পৰাহেসু নিমুগ্গা দেৰতা গতা,

পূজেতুংৰ নিজত্তেহি নানাৰণ্ণা সিযুং তদা;

৬৭২.

পৰিট্ঠা বুদ্ধরংসীনমন্তরং দেৰধীতরো,

অসঞ্জানীয মুয্হিংসু মুহুত্তং অত্তনো ধৰং;

৬৭৩.

সুরা সুরোরগ ব্রহ্ম সিদ্ধ ৰিজ্জাধরাদযো,

চামরচ্ছত্তকেতুহি পূজযন্তা জিনন্ত্ৰগুং;

৬৭৪.

অগ্ঘিকং পন্তিযো কেচি তোরণূপরি তোরণে,

ঘটদীপালিযো তন্থ করোন্তি অভিতো’ভিতো;

৬৭৫.

পাদপটে পত্থরন্তি ৰিতত্ৰন্তি ৰিতানকে,

তত্থূপরি অনেকানী কুসুমানো’কিরন্তি চ;

৬৭৬.

কতমং দেৰলোকন্নুযাতি লোকগ্গনাযকো,

যাতি কিং বুহ্মলোকন্নু অম্হাকং ভৰনন্নু খো;

৬৭৭.

কত্থ নু খো দেৰদেৰো কস্সনুগ্গহবুদ্ধীযা,

যাতী’তি কঙ্খিতা কেচি সংসরন্তি ইতোচিতো;

৬৭৮.

মাপেত্ৰা অভিতো মগ্গে মণ্ডপে রতনামযে,

সযনাসনং পঞ্ঞপেত্ৰা কাচি তিট্ঠন্তি দেৰতা;

৬৭৯.

তহিং তহিং পট্ঠপেন্তা সুধন্ত মধুরোদকং,

যাৰমানা জিনং কেচি তিট্ঠন্তি চ মহন্তি চ;

৬৮০.

এৰং মহামহে নাথো ৰত্তমানে অনূপমে,

জলং সম্বুদ্ধসিরিযা নূতনো সূরিযো ৰিয;

৬৮১.

ব্রহ্মসেনাভিতো যান ব্রহ্মাৰাথ সহম্পতি,

সুরসেনাভিতো যান সক্কোৰ সমলঙ্কতো;

৬৮২.

গগালিমভিতো যান গহঙ্গা মণি সন্নিভো,

ধতরট্ঠখগিন্দোৰ হংসসেনালি পুব্বগো;

৬৮৩.

অপেত রাগদোসেহি ৰীতমোহেহি সব্বসো,

পটিসম্ভিদত্ত সম্পত্ত সাৰকেহি অনুগ্গতো;

৬৮৪.

যেসং যেসং মনস্মিং যং যমত্থি কিঞ্চি সংসযং,

তেসং তং তং পণুদেন্তো দেসনায সুধাসিনং;

৬৮৫.

তত্থ তত্থানুরূপেন পাটিহারিয কম্বুনা,

লোকস্স নযনালী সো তোসস্সুসু নিমুজ্জযং;

৬৮৬.

সম্পত্তো’লঙ্কতং লঙ্কমথাগু ফণিনো তদা,

পটিমগ্গং করোন্তা তে তত্থ তত্থ মহামহং;

৬৮৭.

উরগানমন্তরে দেৰা ব্রহ্মাসুং তেসমন্তরে,

এৰং সম্মিস্সকো লোকে ব্রহ্মলোকা পপূরযি;

৬৮৮.

যে পস্সন্তি জিনং তত্থ সসিস্সং সিরিযা জলং,

সুলদ্ধা তেহি নেত্তানি তেসমক্খীনি লোচনা;

৬৮৯.

যে সুণন্তি তদা ধম্মং ধম্মিস্সর পভাৰিতং,

সুলদ্ধা তেহি সোতানি তেসং সোতানি সোতকা;

৬৯০.

যে লপন্তি তদা বুদ্ধগুণঞ্হি গুণভূসণা,

সুলদ্ধা তেহি ৰে জিৰ্হা তেসং জিৰ্হা রসঞ্ঞকা

৬৯১.

যে ৰন্দন্তি জিনং যন্তং সসঙ্ঘং গগনঙ্গনে,

সুলদ্ধা তেহি হত্থানি তেসংযেৰ ভুজা ভুজা;

৬৯২.

তদা তথাগতং দিস্ৰা যে সন্তুট্ঠা তথাগতং,

তথাগতানং সব্বেসং যো তোসো হোতু সব্বদা;

৬৯৩.

গতো কল্যাণীযং নাথো মহেন্তেৰং সদেৰকে,

তেসং পূজাৰিধানং কো মুখেনেকেন ভাসতি;

৬৯৪.

ততো গঙ্গা মনুঞ্ঞঞ্হি সম্পত্তং তং সপুত্তকং,

তরঙ্গ মুদু বাহাহি গহেত্ৰা চরণম্বুজে;

৬৯৫.

পাদে পক্খালযি সম্মা ফেণ পুপ্ফুপহারিকা,

ততো ততোতুং গণ্হিত্ৰা অকা দেহস্সনুগ্গহং;

৬৯৬.

ততো সো যাচিতো সত্থা নাগসঙ্ঘেহি ৰন্দিয,

অগমা মণ্ডপং রম্মং মনোনন্দনমাৰহং;

৬৯৭.

গন্ত্ৰা মণ্ডপ মজ্ঝম্হি বুদ্ধারহ মহাসনে,

নিসীদোভাসযং আসা রৰীৰ উদযাৰলে;

৬৯৮.

ততো ভিক্খু নিসীদিংসু পত্ত পত্তাসনে তদা,

বভাস মণ্ডপং’তীৰ সরংৰ পদুমাকুলং;

৬৯৯.

জননেত্তালিনো’গম্ম ৰসী সোম্মমুখম্বুজে,

পতন্তা কুসলামোদে গণ্হন্তা তিত্তিনো গতা;

৭০০.

তথা সভিক্খুকা নাগা মুনিনো রূপসাগরে,

নেত্তিন্দ মণিনাৰাহি পারং গন্তুং ন তে পভু;

৭০১.

ততো সসঙ্ঘং সুগতং সজনো মণি অক্খিকো,

সক্কচ্চং সকহত্থেহি অন্নপানেন তপ্পযী;

৭০২.

অথোনীত পত্তপাণিম’চ্চযিত্ৰা তথাগতং,

ভত্তিনিন্নো নিমন্তেসি দেসনত্থানুমোদনং;

৭০৩.

ততো ব্রহ্মস্সরো সত্থা নিচ্ছরং ব্রহ্মঘোসনং,

ৰিঞ্ঞাপেন্তো জনে সব্বে সকসদ্দেন দেসনং;

৭০৪.

দেসেস্ৰেৰং জিনো ধম্ম’মনিলাসনকাদিনং,

পীতিপামোজ্জ জননং নিব্বাণামত’মাৰহং;

৭০৫.

ভো ভো সুণাথ ভুজগা ভৰসাগরম্হি

পাপারিনক্কমকরাকুল দুগ্গমম্হি,

মগ্গা জনা খলু লভন্তি কদা পতিট্ঠং,

ওহায বুদ্ধথিরসারতরিং ৰিসালং;

৭০৬.

লদ্ধান দুল্লভতরং মুনিপাতুভূত

কালং চিরেন ভুজগা ন পমাদযিত্থ,

জাতী জরা মরণ দুক্খ পরিদ্দৰা চ

সংসারিকস্স ন ততোপ’গতস্স হোতি;

৭০৭.

তারুঞ্ঞমম্বুজসিরিংৰ পরিত্তকালং

পাণং তুসারলৰ’সারতরং জনানং,

ভোগং দধাতি জলধিম্হি তরঙ্গভঙ্গিং

নিচ্চং মনো দহতি সোকসিখীভি নানা;

৭০৮.

কত্ৰান রাগমিসযো’পি খগা দুপঞ্ঞা

থিরূপি নারিকুসুমেসুপি রূপগিদ্ধা,

পত্তা’নযং খলু পুরে পরিহীন ঝানা

রূপে ন রজ্জথ ততো খলু সাধুপঞ্ঞা;

৭০৯.

সদ্দানুরাগমনুগোপি পুরে সিখণ্ডী

সুত্ৰান মোরি মধুরং গিরমঞ্জিতঙ্গো,

ৰ্যাধস্স হত্থমগমাসি ভৰেসু তস্মা

নত্থেৰ সদ্দসমদুক্খকরং জনানং;

৭১০.

ওহায নেককুসুমেসু পরাগরাগং

মত্তেভকুম্ভ মগমা মদগন্ধলুদ্ধো,

ভিঙ্গো পভগ্গ তনুকো করিকণ্ণতালা

নত্থেৰ গন্ধসদিসং তিভৰেসু পাসং;

৭১১.

গম্ভীর নীরধিভৰো পৰুরাসনো’পি

মিচ্ছো গিলিত্ৰ বলিসং রসগেধহেতু,

পপ্পোতি দুক্খমতুলং ন রসেসু সাত

মত্থিতি মন্ত্ৰ পজভাথ রসেসু গেধং;

৭১২.

ভো বুহ্মলোকা’গত সুদ্ধসত্তো

বুদ্ধত্তমেৰ নিযতো অপি বোধিসত্তো,

থিসঙ্গমায পরিহাযি সরজ্জতো’পি

তস্মা হি ফস্সসদিসো অনযো নৰত্থি;

৭১৩.

ভেরণ্ড পেলক কপু’দ্দক হেতুহীন

সত্তাপি দানরুচি দানমণিপ্পভাৰা,

পত্তা’পৰগ্গ ৰরসারপুরং ভুজঙ্গা

কো নপ্পদাতি ধনিকো সিৰ’মেসমানো;

৭১৪.

পালেত্ৰ সীলম’মলং ৰিসকণ্ঠিকাপি

ইন্দস্স নন্দনৰনে’সি পিযা মহেসী,

তস্মা পসত্থৰিভৰং যদি পত্থযৰ্হো

পালেথ সীলম’মলং খলু জিৰিতং’ৰ;

৭১৫.

সগ্গো ৰিসাল রতনালয সম্পকিণ্ণো

সানন্দ’মন্দ সুরসুন্দরি সুন্দরো সো,

ফুল্লম্বুজাকর ৰনাদিহি নন্দনীযো

তত্থামরা ৰিয’মরা’ৰিরতং রমন্তি;

৭১৬.

তম্হাপি ভো রুচির ব্রহ্মনিকায ভুতি

রম্মা ততোপি মহিতং অমতং ৰরিট্ঠং,

তস্মাত্তকাম নিরতা জনতা সপঞ্ঞা

তণ্হক্খযায সততং ৰীরিযং করোথ;

৭১৭.

এৰং সদ্ধম্মমগ্গং ৰরমতি সুগতো দেসযি পন্নগানং

সুত্ৰা তে সম্পহট্ঠা মহমহমকরুং নিজ্জরাদীহি সদ্ধিং,

তেসং ৰে দেসনাযং সুরৰিটপি সমা সাত্থিকা তত্থ জাতা

সো নাথো তঞ্চ ধম্মং ভগৰতি তনযা তে চ ৰো পালযন্তু

কল্যাণি দেসাগমনং.

৭১৮.

নগাধিরাজে সুমনাভিধানে

ৰসং সুমেধো সুমনাভিধানো,

দেৰো তদা’গম্ম সপারিসজ্জো

কল্যাণিযং তত্থ ফণীহি সদ্ধিং;

৭১৯.

দত্ৰা’পৰগ্গস্স নিদানদানং

সুত্ৰান ধম্মং সুতিসীতিভুতং,

পহট্ঠচিত্তো উপগম্ম বুদ্ধং

নত্ৰাহ এৰং কতপঞ্জলীকো;

৭২০.

ন ৰে ফণীনং নপি মানুসানং

নানিম্মিসানং ন পিতামহানং,

হিতত্থ মেৰাখিল লোকনাথা

জাযন্তী লোকে করুণাগুণগ্গা;

৭২১.

অন্তোগধা নূন মযম্পি তুয্হং

দযায তস্মা ফণীনং ৰিমেসং,

করোহি ময্হং ভৰনম্হি ধীর

পাদং’সুনা’তীৰ পৰিত্তরূপং;

৭২২.

যো’যং নগো দিস্সতি’তো পুরত্থ

ভুমঙ্গনা মোলিসিরিং ৰহন্তো,

সমন্তকূটোতি সমন্তচক্খু

জানাতি লোকো ৰসতিং মমেতং;

৭২৩.

যো নীল নানা ৰনরাজি রাজিতো

আসার ধারা গিরি নিজ্ঝরাকুলো,

আপীত নীলারুণ পল্লৰাৰলী

জিমূতকূটো ৰিয ভাতি উগ্গতো;

৭২৪.

যো সিন্ধুৰারিং উরসা পভেজ্জ

আগম্ম তে পাদপণাম হেতু,

ৰিজ্জোতমানো ৰিযচক্কপাণি

মহাতি তুঙ্গগ্গ ধরাধরিন্দো;

৭২৫.

গঙ্গাৰধূ কুটকিরীটধারী

সামন্ত সেলিন্দ চমূপতীকো,

যো’যং ধরাধার মহামহীপো

র রাজ লঙ্কা নগরঙ্গণম্হি;

৭২৬.

পারোহ দন্তো চিতকূট কুম্ভো

অনেক সোণ্ডিক্খ সৰন্তি হত্থো,

যো নিজ্ঝরাসার মদপ্পৰাহো

গজোরিৰা’ভাতি সুরাধিপস্স;

৭২৭.

সম্ফূল্ল পুপ্ফত্থবকা’নপত্তা

সত্ধত্ত রত্তঙ্কুরমোলিমালা,

কন্তালতা’লিঙ্গিত খন্ধদেহা

তিট্ঠন্তি ভূপাৰ যহিং কুজিন্দা;

৭২৮.

সিদ্ধঙ্গনা রত্তপদম্বুজালী

সম্হিন্ন হত্থাভরণালি যুত্তা,

কেকীকলাপুপ্পল মালমালী

সিলাতলাকঞ্জ নিভন্তি যত্থ;

৭২৯.

মঙ্গুর পাঠীন সৰঙ্ক সিঙ্গু

রোহিচ্চ মুঞ্জা?মর পাৰুসেহি,

কুলীরনক্কাদ’নিমেসকেহি

নিকীল়ীতং দদ্দর রত্তপেহি;

৭৩০.

নিচ্চঞ্হি সংরাৰ ৰিরাচিতানং

বলাক কাদম্ব কদম্বকানং,

আপানসালা ৰিয সারসানং

হংসালিনং মঙ্গল ৰাসভূতং;

৭৩১.

নিরন্তরামোদ মুদাৰগেহি

সুফুল্ল কোকাস’রৰিন্দকেহি,

সোগন্ধি’কিন্দীৰর কেরৰেহি

কিঞ্জক্খ ছন্নণ্ণতলেহি চিত্তং;

৭৩২.

সীতচ্ছ সাতোদক সম্পপুণ্ণ

সরোজিনী লঙ্কত ভুমিভাগো,

যো’যং পুরে ভাতি মনুঞ্ঞরূপো

সমন্তকূটো স সমন্তকূটো;

৭৩৩.

দলিত ৰিপিনসণ্ডা যত্থ সেলে সমন্তা

সমুপগত জনানং চিত্তমামোদযন্তি,

মধুক ৰট করেরি বোধি জম্বীর ভল্লি

খদির’ভয কদম্বা ফুল্ল সেল্লূ পলাসা;

৭৩৪.

পণস’মত পিলক্খা কণ্হৰণ্ট’ক্খ চিঞ্চা

লবুজ বদরি নীপা ফন্দনি’ন্দীৰরাৰ

মকুল’সন পিযালা গদ্দভণ্ড’জ্জুনা চ

কমুক সল্ল তিন্দু’দুম্বরম্বস্স’কণ্ণা;

৭৩৫.

পুন্নাগ চম্পক দুমুপ্পল দাডিমা চ

খজ্জূরি তাল গিরিমল্লিক’সোক তালা,

হিন্তাল নাগ নিৰুলা যুগপত্ত’রিট্ঠ

সেতম্ব এরৰতকাপি চ কেতকা চ

৭৩৬.

সমফুল্লভণ্ডি সুমন’জ্জক যূথিকা চ

ৰাসন্তি চিত্তক জপা রৰিমালতী চ,

কুন্দস্স’মারক কুরণ্ডক বীজপূর

সেফালিকা চ তিণসূল সমীরণা চ;

৭৩৭.

ৰোচু’চ্জু কীচক হলিদ্দি ৰিল়ঙ্গি বিম্বি

নীলী ৰচা’তিৰিসালাবু চ নাগৰল্লী,

ৰল্লীহ সারদ’পরাজিতৰারু’সীরা

ফলাদি নেক ৰনরাজি ৰিরাজিতো সো;

৭৩৮.

তিট্ঠন্তি কেচি তরৰো সুরভিং কিরন্তা

তত্থেৰ কেচি ফলিতা মধুরপ্ফলানি,

অন্দোলিতা ফলিতপল্লৰিতা লতাযো

সন্ধারযং ৰিটপ জত্তুসু ভন্তি কেচি;

৭৩৯.

সামন্তগে জনগণে সততং দুমিন্দা

সম্পীণযন্তি দলিতা ফলিনো চ যস্মিং,

তে অৰ্হযন্তি ৰিয লোচন গোচরেহি

ৰাতে’রিতেহি তরুণারুণ পল্লৰেহি;

৭৪০.

তস্মিং ৰনে ৰনসুরা নিজৰসুন্দরীহি

রম্মে সিলাতলদহে সিকতাতলে চ,

নচ্চন্তি তন্তি তুরিযানি চ ৰাদযন্তি

গাযন্তি মালভরিনো সততং পতীতা;

৭৪১.

সিদ্ধা চ সিদ্ধৰনিতা হি তহিং তহিং তে

দিব্বন্তি পুপ্ফফল পত্তরসাহিনন্দি,

অচ্ছন্তি তত্থ গিরিপাদপ রামণেয্যে

যোগেহি সঙ্গত মনা বহিতাপসাপি;

৭৪২.

তস্মিং ৰনে হরিণ রোহিত পুণ্ডরীক

গোকণ্ণ সল্ল সস জম্বুক সূকরা চ,

সাখামিগে’ণিৰগ বব্বু রুরূ কুরুঙ্গ

গোধা’খু পম্পক কপী গৰযা চ’নেকা;

৭৪৩.

তে ৰগ্গ ৰগ্গ চরিনো হযমারকাদী

নানা চতুপ্পদগণা মুদিতা ৰসন্তি,

পক্খীপি কোসিয কপোতক নীলগীৰ

ধঙ্কা’ট লাপ পরপুট্ঠ মধুব্বতাৰ;

৭৪৪.

নিজ্জিৰ্হ দিন্দিহ চকোরক সাল়িকা চ

চক্কৰ্হ কীর কুররা কুললা চ কঙ্কা,

চিত্রচ্ছদা মধুর কূজক নেকপক্খী

সঙ্গম্ম যত্থ নিৰসন্তি মনুঞ্ঞরূপা;

৭৪৫.

তেসং ৰনন্তমথ নাটকমণ্ডলা’চ

গীতালযং ৰিয অহোসি চ গাযকানং,

আপানভুমি সদিসং মিগপক্খিকানং

নিচ্চুস্সৰং রতিকরং নযনাভিরামং;

৭৪৬.

এৰং ৰিধো ৰিপিনরাজি ৰিরাজিতেহি

কূটেহি নেকসুর সুন্দরি মণ্ডিতেহি,

অত্যুচ্চ নীলসিখিগীৰ সমান ৰণ্ণো

এসো সমন্তগিরি মে ৰসতী মুনিন্দ;

৭৪৭.

এৰং পতীত মনসো সুমনাভিধানো

ৰত্ৰান নত্ৰমসমং গমনোপযুত্তং,

কাসাথ সোপি মুনি তস্স ৰচং পটিচ্চ

সব্ভিক্খু নিক্খমি জিনো গগনাযনম্হি;

৭৪৮.

নিচ্চেতনাপি গিরিপাদপ আদযোপি

নাগা সুপণ্ণ মিগ পক্খিক হেতুকাপি,

ৰিজ্জাধরামর’সুরা চতুরাণনাপি

সঙ্গম্ম’কংসু সুমনা মহমব্ভুতং তে;

৭৪৯.

মুনিন্দে পযন্তে সমিদ্ধং তিলোকং

গিরিন্দাভিনন্দা দুমিন্দা পবুদ্ধা,

মিগিন্দা সুতুট্ঠা খগিন্দা সুঘুট্ঠা

পৰুট্ঠো মহিন্দো পণট্ঠো নিদাঘো;

৭৫০.

গচ্ছন্তে গগনাযনেন সুগতে ভানু’সি সন্তো তদা

ৰারেসুং সূরিযাতপঞ্চ জলদা সিঞ্জিংসু ভুম্যা জলং,

মন্দামন্দ সুগন্ধ মুদ্ধ পৰনো পাপেতি সিতং সুখং,

দেৰাদি ধজ ছত্ত চামরকরা পূজেন্তি মানেন্তি চ;

৭৫১.

সন্নীর হিন্তাল’গ সিন্দি পূগ

তালম্বসালাদি মহীরুহিত্দা,

তিট্ঠন্তি তে চামরহত্থকা’ৰ

পুপ্ফেহি ছন্নো গগনঙ্গনোপি;

৭৫২.

অনেন ৰিধিনা জগদেক নাথো

পৰত্তমানেসু মহামহেসু,

দিসঞ্চ ৰিদিসং পরিপূরযন্তো

জব্বণ্ণরংসীহি অগা নগিন্দং;

৭৫৩.

তস্মিং সমন্তনগমুদ্ধনি লোকনাথো

ছব্বণ্ণরংসি নিকরং দিসি পত্থরন্তো,

ভিক্খূহি সো পরিৰুতো পরসাগরন্তং

ওলোকযং ঠিতিমকাসি অঅনোমৰণ্ণো;

৭৫৪.

লঙ্কাৰধূ সুমনকূট কিরীট কূটং

সজ্জেসি’নগ্ঘ জন রাজ মণী মহন্তো,

ইচ্ছত্থদং সিৰদমপ্পটিমং তিলোকে

তং’দানি ভো ভজথ সেৰথ সব্বকালং;

৭৫৫.

কাসুং তদা সুরৰরা সুরসুন্দরীহি

লঙ্কায সেলসিখরেসু মহাসমজ্জং,

ৰজ্জিংসু ভেরি ৰিকতী সযমেৰ সব্বা

ভস্সিংসু দিব্বকুসুমাভরণা নভম্হা;

৭৫৬.

লঙ্কম্বরং নিখিলমাসি চ ছত্তছত্তং

নানা ৰিরাগ ধজ কেতু সমাকুলঞ্চ,

নানাসুগন্ধ কুসুমাদি দিসন্তরালং,

নানগ্ঘিকাৰলি ৰিরাজিত মন্তল়িক্খং;

৭৫৭.

তস্মিং দিনে’সি রতনং মণিতোরণেহি

দীপালি পুণ্ণঘটপন্তীহি দস্সনীযং,

সম্বুদ্ধ দেহপরিতোগত ছপ্পভাহি

রত্তং নভাৰনি চরাচর সব্বদব্বং;

৭৫৮.

মালাৰতংস সমকা গিরযো সমন্তা

হুত্ৰা নমন্তি চ ভমন্তি সচেতনা’ৰ,

সব্বেপি তত্থ তরৰোচ লতাদযো চ

নচ্চন্তি দিব্বনটকা ৰিয ওনতগ্গা;

৭৫৯.

এৰং তদা মহত ৰিম্হয পাটিহেরে

বুদ্ধানুভাৰ জনিতে ইধ ৰত্তমানে,

তত্ৰান ধীরচরণং সমনো সুধাসী

এৰং ৰদী পরম পিতিমনো উদগ্গো;

৭৬০.

যে তে মুদু কোমল রত্তপাদা

সুরত্ত ফুল্লম্বুরুহোপমানা,

ৰট্টানুপুব্বাযত অঙ্গুলিকা

সুতম্বতুঙ্গগ্গ নখাৰলীকা;

৭৬১.

সুৰণ্ণকুম্মু’ন্নত পাদপিট্ঠি

নিগুল়্হ গোপ্ফাযত পণ্হিভাগা

সমচ্ছমাযং সকলং পতিট্ঠিতা

ন লিম্পতে সুচ্ছৰিতা রজাদি;

৭৬২.

সম্মত্ত হত্থোসভ হংস সীহ

সমান লীলায যহিং পযাতি,

নিন্নুন্নতা ভেরিতলা’ৰ ভুমি

হোতাথ পুপ্ফাদি সুমণ্ডিতা চ;

৭৬৩.

অপেন্তি মগ্গা সযমেৰ খাণু

সকণ্টমূলা কঠলা চ সব্বে,

গম্ভীর নীরাপগ পঙ্কদুগ্গা

হিত্ৰা সভাৰং রমণীযমেন্তি;

৭৬৪.

ৰজন্তি ভুমিং গিরযো পুরত্থ

পসারিতে পাদৰরে জিনস্স,

নিব্বাতি অগ্গী নরকোদরেপি

গণ্হন্তি পাদে পদুমাদযো চ;

৭৬৫.

ইদঞ্হি তে পাদতলে যতীস

সনাভি নেমি ঘটিকাৰলীহি,

সুসণ্ঠিতং চা’রসহস্সৰন্তং

সন্দিস্সতে চক্কৰরং মহন্তং;

৭৬৬.

তমেৰ চক্কং পরিৰারযিত্ৰা

সিরিৰচ্ছ সোৰত্থি’ৰতংসকা চ,

পাসাদ ভদ্রাসন পুণ্ণপাতি

সিতাতপত্তাসি মযূরহত্থা;

৭৬৭.

নীলাদিভেদা কমলুপ্পলা চ

সমেরু সত্তদ্দি মহাসমুদ্দা,

সত্তাপগা সত্ত মহাসরা চ

হিমালযো চক্কৰাল়দ্দিকো চ;

৭৬৮.

চন্দক্কতারা চ ছদেৰলোকা

পিতামহাৰাস মনুস্সলোকং,

সুৰণ্ণ নাৰা সিৰিকা চ সঙ্খং

কেলাসসেলং ধজতোরণা চ;

৭৬৯.

চিন্তামণুণ্হীস সৰচ্ছ ধেনূ

মীনদ্ৰযং চক্কৰত্তি সসেনো,

সীহ’স্স মাতঙ্গ ৰিযগ্ঘরাজা

হংসোসভো কিম্পুরিসো মযূরো;

৭৭০.

কোঞ্চা চ এরাৰণ হত্থিরাজা

সচক্কৰাকা মকরাদযো চ,

নানা মহামঙ্গল লক্খণা তে

ৰিরোচমানা ৰিলসন্তি নিচ্চং;

৭৭১.

জাতক্খণে যস্স মহিং পভেজ্জ

ৰিসাল সত্তুদ্দয পঙ্কজানি,

পটিগ্গহেসুং চরণানি যানি

তে তানিমানচ্ছরিযানি লোকে;

৭৭২.

ৰন্দাপনত্থাযু’পনীতকালে

পিতূহি তে দেৰল তাপসিন্দং,

পাদানি গন্ত্ৰান জটাসু তস্স

আসুং তৰে’তঙ্ঘিযুগং অহো ভো;

৭৭৩.

সুদ্ধোদনৰ্হস্স নরাধিপস্স

সন্তোস তোযেহি পপূরিতস্স,

সিরো ৰিসুদ্ধম্বু রুহাকরস্স

সরোরু হাসুং চরণানি তুয্হং;

৭৭৪.

যে চঙ্কমে চঙ্কমণাৰসানে

ওনম্ম মেরূদয পব্বনিণ্দা,

পটিগ্গহেসুং চরণানি যানি

তে তানিমা’নচ্ছরিযানি লোকে;

৭৭৫.

যং ৰন্দমানো তিদিৰাধিপো সো

যস্সানুভাৰেন গতাযুকোপি,

সকিযঠানে’সিনপুনাপি তে’ৰং

পাদম্বুজং ধীর!মহানুভাৰং;

৭৭৬.

দেহীনমগ্গোপি নিসাকরারি

মানুন্নতো সো সযিতস্স তুয্হং,

পাদস্স অন্তম্পি ন সক্খি দট্ঠুং

অচ্ছের রূপং ইদমঙ্ঘিকঞ্জং;

৭৭৭.

গঙ্গায গঙ্গাপতি সন্নিধানে

তীরে তদা নম্মদ জিম্হগস্স,

পাদস্স লঞ্ছং অকরী মুনিন্দ

ময্হং’পি হোতং করুণা তৰেসা;

৭৭৮.

আরাধিতো সচ্চক তাপসেন

অকা তুৰং সচ্চক বদ্ধসেলে,

পাদস্স লঞ্ছং জগতো হিতায

ময্হম্পি হোতং তমনুগ্গহন্তে;

৭৭৯.

সুত্ৰান নাথো গিরমেতমস্স

পস্সং মহাভুতি’মনাগতেসু,

লোকস্স লোকেহি মহীয মানো

অকাসি ৰামেন পদেন লঞ্ছং;

৭৮০.

সম্বোধিতো অট্ঠম সারদস্মিং

ৰেসাখমাসে মুণি পুণ্ণমাযং,

পাদস্স’ভিঞ্ঞাণমকা’পরণ্হে

সদেৰকে সস্সমণে মহেন্তে;

৭৮১.

পতঙক্গিকা সিত্থক মত্থকম্হি

যথঙ্কিতা খত্তিয মুদ্দিকায,

আসেৰ’মেৰং জিনপাদলঞ্ছং

সমন্তকূটম্হি নমস্সনীযং;

৭৮২.

অকালমেঘো চ ততো পৰস্সি

ৰস্সিংসু নানারতনানি খম্হা,

তথা পরিতো কুসুমম্বরানি

সুৰণ্ণচুণ্ণানি জিনেকৰণ্ণা;

৭৮৩.

ততো’পগন্ত্ৰা সুগতেভগামী

তস্মিং নিতম্বে গিরিগব্ভরাযং,

দিৰাৰিহারায নিসীদি যত্থ

সুপাকটং তং ভগৰাগুহা’তি;

৭৮৪.

ততোরহন্তা সুগতোরসা তে

গন্ধাদিনা সাধু মহেত্ৰ সব্বে,

ৰন্দিত্ৰ কত্ৰান পদক্খিণন্তং

তহং তহং’কংসু দিৰাৰিহারং;

৭৮৫.

লতঙ্গনাযো ৰিটপীধৰান

মালম্ব সাখাপুথুলং’সপস্সে,

সুফুল্ল নমঞ্জূকর মঞ্জরীহি

নমস্সমানা’ৰ সদোনতগ্গা;

৭৮৬.

তিট্ঠন্তি রুক্খা নটকা’ৰ তত্থ

সুফুল্ল সাখাকর’মুক্খিপিত্ৰা,

নমস্সমানা ৰিয ওনতগ্গা

ৰত্তন্তি মানচ্ছরিযানি নিচ্চং;

৭৮৭.

তথেৰ উচ্চাৰচ পব্বতা চ

নমস্সমানা ৰিয পাদলঞ্ছং,

তিট্ঠন্তি নিন্নগ্গ সিখা সমন্তা

ইদম্পি নিচ্চবভুতমেৰ তত্থ;

৭৮৮.

তস্মিং নগে পাদৰরঙ্কিতস্মিং

খলমণ্ডলোকাস পদেসমত্তে,

সমোসরন্তে বহুকে জনেপি

হোতেৰ ওকাসম,হো পদঙ্কং;

৭৮৯.

সমোসরিত্ৰান মহেত্ৰ সত্তে

নিক্খন্তমত্তে জলদা সমেচ্চ,

সোধেন্তি মাল’ম্বুৰহেহি সাধু

ইদম্পি নিচ্চব্ভুতমেৰ তত্থ;

৭৯০.

পাদেন ফুট্ঠস্স সিলাতলস্স

এতাদিসানচ্ছরিযানি হোন্তি,

লোকেকনাথস্স অনাসৰস্স

মহব্ভুতং কোনু কথং ভণেয্য;

৭৯১.

দিৰাৰিহারং ভগৰা সসঙ্ঘো

কত্ৰান তস্মিং পন কিঞ্চিকালং,

মহীযমানেসু সদেৰকেসু

ততো গতো রোহণমম্বরম্হা;

৭৯২.

তস্মিং সসঙ্ঘো মুনি দীঘৰাপিযং

থূপস্স ঠানে পরমায ভুমিযা,

গরুং করোন্তো পন তং মহীতলং

নিরোধভাৰেন নিসীদি সত্রজো;

৭৯৩.

ততো’নুরাধং ভগৰা নভম্হা

গন্ত্ৰান বোধিট্ঠিতভুমিযা চ,

ঠানে মহামঙ্গলচেতিযস্স

তথেৰ অক্খন্তিনহিতস্স ঠানে;

৭৯৪.

নিসীদি পত্ৰান নিরাধপীতিং

সসাৰকো পেক্খম’নাগতদ্ধং,

পতিট্ঠিতা মে পন বোধিধাতু

করোন্তি লোকে’তি জনস্স ৰুদ্ধিং;

৭৯৫.

ৰুট্ঠায তুট্ঠো ভগৰা নিরোধা

গতো সিলাথূপৰরস্স ঠানং,

ঠিতো তহিং ধম্মমথুদ্দিসিত্ৰা

গতো নভা জেতৰনং সুরম্মং;

৭৯৬.

এৰং সো ধম্মরাজা জনহিতৰিহিতো ৰীত দোসারিৰগ্গো

লঙ্কারামায রম্মে সুমনগিরিসিরে’কাসি যং পাদলঞ্ছং

তং ৰো সগ্গা’পৰগ্গং দদতি মুনিসমং চিত্ত মত্তে পসন্নে

তস্মা ভো!ভো! পহট্ঠা নমথ মহথ তং সাধু সাধুপ্পসত্থং;

ইতি সমন্তকূট ৰণ্ণনা নিট্ঠিতা.

গ্রন্থ সমাপ্তিয.

.

অনন্তরা সমত্তাযং সুমণদ্দিসু ৰণ্ণনা,

তথেৰ সাধূ সঙ্কপ্পা খিপ্পং পপ্পোন্তু পাণিনং;

.

যো যাচিতো’রঞ্ঞৰাসী গুণাধার সুধীমতা,

রাহুলত্থেরনামেন ৰিস্সুতেন মহীতলে;

.

ভুৰনোদরম্হি পঞ্ঞাতো রৰীৰম্বর মণ্ডলে,

অরঞ্ঞরতনানন্দ মহাথেরো মহাগণী;

.

জীৰিতং ৰিয যো সত্থুসাসনস্স মহাকৰী,

সারো সুপ্পটিপত্তীসু সত্থসাগর পারগো;

.

তস্স সিস্সো’সি যো ৰিপ্পগাম ৰংসেক কেতুকো

ঞাতাগমো’রঞ্ঞৰাসী সীলাদি গুণভূসণো;

.

যো’কা সীহলভাসায সীহলং সদ্দলক্খণং,

তেন ৰেদেহথেরেন কতাযম্পিযসীলিনা;

সিদ্ধিরত্থু.