📜

নমো তস্স ভগৰতো অরহতো সম্মাসম্বুদ্ধস্স

দীঘনিকাযে

মহাৰগ্গটীকা

১. মহাপদানসুত্তৰণ্ণনা

পুব্বেনিৰাসপটিসংযুত্তকথাৰণ্ণনা

১. যথাজাতানং ¶ ¶ ¶ করেরিরুক্খানং ঘনপত্তসাখাৰিটপেহি মণ্ডপসঙ্খেপেহি সঞ্ছন্নো পদেসো ‘‘করেরিমণ্ডপো’’তি অধিপ্পেতো. দ্ৰারেতি দ্ৰারসমীপে. দ্ৰারে ঠিতরুক্খৰসেন অঞ্ঞত্থাপি সমঞ্ঞা অত্থীতি দস্সেতুং ‘‘যথা’’তিআদি ৰুত্তং. কথং পন ভগৰা মহাগন্ধকুটিযং অৰসিত্ৰা তদা করেরিকুটিকাযং ৰিহাসীতি? সাপি বুদ্ধস্স ভগৰতো ৰসনগন্ধকুটি এৰাতি দস্সেন্তো ‘‘অন্তোজেতৰনে’’তিআদিমাহ. সলল়াগারন্তি দেৰদারুরুক্খেহি কতগেহং. পকতিভত্তস্স পচ্ছতোতি ভিক্খূনং পাকতিকভত্তকালতো পচ্ছা, ঠিতমজ্ঝন্হিকতো উপরীতি অত্থো. পিণ্ডপাততো পটিক্কন্তানন্তি পিণ্ডপাতভোজনতো অপেতানং. তেনাহ ‘‘ভত্তকিচ্চ’’ন্তিআদি.

মণ্ডলসণ্ঠানা ¶ মাল়সঙ্খেপেন কতা নিসীদনসালা ‘‘মণ্ডলমাল়’’ন্তি অধিপ্পেতাতি আহ ‘‘নিসীদনসালাযা’’তি. পুব্বেনিৰাসপটিসংযুত্তাতি এত্থ পুব্ব-সদ্দো অতীতৰিসযো, নিৰাস-সদ্দো কম্মসাধনো, খন্ধৰিনিমুত্তো চ নিৰসিতধম্মো নত্থি, খন্ধা চ সন্তানৰসেনেৰ পৰত্তন্তীতি আহ ‘‘পুব্বেনিৰুত্থক্খন্ধসন্তানসঙ্খাতেন পুব্বেনিৰাসেনা’’তি. যোজেত্ৰাতি ¶ ৰিসযভাৰেন যোজেত্ৰা. পৰত্তিতাতি কথিতা. ধম্মূপসংহিতত্তা ধম্মতো অনপেতাতি ধম্মী. তেনাহ ‘‘ধম্মসংযুত্তা’’তি.

উদপাদীতি ¶ পদুদ্ধারো, তস্স উপ্পন্না জাতাতি ইমিনা সম্বন্ধো. তং পনস্সা উপ্পন্নাকারং পাল়িযং সঙ্খেপতোৰ দস্সিতং, ৰিত্থারতো দস্সেতুং ‘‘অহো অচ্ছরিয’’ন্তিআদি আরদ্ধং. তত্থ কে অনুস্সরন্তি, কে নানুস্সরন্তীতি পদদ্ৰযে পঠমংযেৰ সপ্পপঞ্চনং, ন ইতরন্তি তদেৰ পুগ্গলভেদতো, কালৰিভাগতো, অনুস্সরণাকারতো, ওপম্মতো নিদ্দিসন্তেন ‘‘তিত্থিযা অনুস্সরন্তী’’তিআদি ৰুত্তং. অগ্গপ্পত্তকম্মৰাদিনোতি সিখাপ্পত্তকম্মৰাদিনো ‘‘অত্থি কম্মং অত্থি কম্মৰিপাকো’’তি (পটি. ম. ১.২৩৪) এৰং কম্মস্সকতাঞাণে ঠিতা তাপসপরিব্বাজকা. চত্তালীসংযেৰ কপ্পে অনুস্সরন্তীতি ব্রহ্মজালাদীসু (দী. নি. ১.৩৩) ভগৰতা তথা পরিচ্ছিজ্জ ৰুত্তত্তা. ততো পরং ন অনুস্সরন্তীতি তথাৰচনঞ্চ দিট্ঠিগতোপট্ঠকস্স তেসং ঞাণস্স পরিদুব্বলভাৰতো.

সাৰকাতি মহাসাৰকা তেসঞ্হি কপ্পসতসহস্সং পুব্বাভিনীহারো. পকতিসাৰকা পন ততো ঊনকমেৰ অনুস্সরন্তি. যস্মা ‘‘কপ্পানং লক্খাধিকং একং, দ্ৰে চ অসঙ্খ্যেয্যানী’’তি কালৰসেন এৰং পরিমাণো যথাক্কমং অগ্গসাৰকপচ্চেকবুদ্ধানং পুঞ্ঞঞাণাভিনীহারো, সাৰকবোধিপচ্চেকবোধিপারমিতাসম্ভরণঞ্চ, তস্মা ৰুত্তং ‘‘দ্ৰে অগ্গসাৰকা…পে… কপ্পসতসহস্সঞ্চা’’তি. যদি বোধিসম্ভারসম্ভরণকালপরিচ্ছিন্নো তেসং তেসং অরিযানং অভিঞ্ঞাঞাণৰিভৰো, এৰং সন্তে বুদ্ধানম্পিস্স সপরিচ্ছেদতা আপন্নাতি চোদনং সন্ধাযাহ ‘‘বুদ্ধানং পন এত্তকন্তি পরিচ্ছেদো নত্থি, যাৰতকং আকঙ্খন্তি, তাৰতকং অনুস্সরন্তী’’তি ‘‘যাৰতকং নেয্যং, তাৰতকং ঞাণ’’ন্তি (মহানি. ১৫৬; চূল়নি. ৮৫; পটি. ম. ৩, ৫) ৰচনতো. সব্বঞ্ঞুতঞ্ঞাণস্স ৰিয হি বুদ্ধানং অভিঞ্ঞাঞাণানম্পি সৰিসযে পরিচ্ছেদো নাম নত্থি, তস্মা যং ¶ যং ঞাতুং ইচ্ছন্তি, তে তং তং জানন্তি এৰ. অথ ৰা সতিপি কালপরিচ্ছেদে করুণূপাযকোসল্লপরিগ্গহাদিনা সাতিসযত্তা মহাবোধিসম্ভারানং পঞ্ঞাপারমিতায পৰত্তিআনুভাৰস্স পরিচ্ছেদো নাম নত্থি, কুতো তন্নিমিত্তকানং অভিঞ্ঞাঞাণানন্তি ৰুত্তং ‘‘বুদ্ধানং…পে… নত্থী’’তি.

খন্ধপটিপাটিযাতি ¶ ¶ যথাপচ্চযং অনুপুব্বপৰত্তমানানং খন্ধানং অনুপুব্বিযা. খন্ধপ্পৰত্তিন্তি ৰেদনাদিক্খন্ধপ্পৰত্তিং. তেসঞ্হি অনুভৰনাদিআকারগ্গহণমস্স সাতিসযং, তং সঞ্ঞাভৰে তত্থ তত্থ অনুস্সরণৰসেন গহেত্ৰা গচ্ছন্তা একৰোকারভৰে অলভন্তা ‘‘ন পস্সন্তী’’তি ৰুত্তা, জালে পতিতা ৰিয সকুণা, মচ্ছা ৰিয চাতি অধিপ্পাযো. কুণ্ঠা ৰিযাতি দন্ধা ৰিয. পঙ্গুল়া ৰিযাতি পীঠসপ্পিনো ৰিয. দিট্ঠিং গণ্হন্তীতি অধিচ্চসমুপ্পন্নিকদিট্ঠিং গণ্হন্তি. যট্ঠিকোটিহেতুকং গমনং যট্ঠিকোটিগমনং খন্ধপটিপাটিযা অমুঞ্চনতো.

এৰং সন্তেপীতি কামং বুদ্ধসাৰকাপি অসঞ্ঞভৰে খন্ধপ্পৰত্তিং ন পস্সন্তি, এৰং সন্তেপি তে বুদ্ধসাৰকা অসঞ্ঞভৰং লঙ্ঘিত্ৰা পরতো অনুস্সরন্তি. ‘‘ৰট্টে’’তিআদি তথা তেসং অনুস্সরণাকারদস্সনং. বুদ্ধেহি দিন্ননযে ঠত্ৰাতি ‘‘যত্থ পঞ্চকপ্পসতানি রূপপ্পৰত্তিযেৰ, ন অরূপপ্পৰত্তি, সো অসঞ্ঞভৰো’’তি এৰং সম্মাসম্বুদ্ধেহি দেসিতাযং ধম্মনেত্তিযং ঠত্ৰা. এৰঞ্হি অন্তরা চুতিপটিসন্ধিযো অপস্সন্তা পরতো অনুস্সরন্তি সেয্যথাপি আযস্মা সোভিতোতি (থেরগা. অট্ঠ. ১.২.১৬৪ সোভিতত্থেরগাথাৰণ্ণনা). সো কির পুব্বেনিৰাসে চিণ্ণৰসী হুত্ৰা অনুপটিপাটিযা অত্তনো নিব্বত্তট্ঠানং ¶ অনুস্সরন্তো যাৰ অসঞ্ঞভৰে অত্তনো অচিত্তকপটিসন্ধি তাৰ অদ্দস, ততো পরং পঞ্চকপ্পসতপরিমাণে কালে চুতিপটিসন্ধিযো অদিস্ৰা অৰসানে চুতিং দিস্ৰা ‘‘কিং নামেত’’ন্তি আৰজ্জযমানো নযৰসেন ‘‘অসঞ্ঞভৰো ভৰিস্সতী’’তি নিট্ঠং অগমাসি. অথ নং ভগৰা তং কারণং অট্ঠুপ্পত্তিং কত্ৰা পুব্বেনিৰাসং অনুস্সরন্তানং অগ্গট্ঠানে ঠপেসি. ‘‘চুতিপটিসন্ধিং ওলোকেত্ৰা’’তি ইদং চুতিপটিসন্ধিৰসেন তেসং ঞাণস্স সঙ্কমনদস্সনং, তেন সব্বসো ভৰে অনামসিত্ৰা গন্তুং ন সক্কোন্তীতি দস্সেতি.

তং তদেৰ পস্সন্তীতি যথা নাম সরদসমযে ঠিতমজ্ঝন্হিকৰেলায চতুরতনিকে গেহে চক্খুমতো পুরিসস্স রূপগতং সুপাকটমেৰ হোতীতি লোকসিদ্ধমেতং, সিযা পন তস্স সুখুমতরতিরোহিতাদিভেদস্স রূপগতস্স অগোচরতা. ন ত্ৰেৰ বুদ্ধানং ঞাতুং ইচ্ছিতস্স ঞেয্যস্স অগোচরতা, অথ খো তং ঞাণালোকেন ওভাসিতং হত্থতলে আমলকং ৰিয সুপাকটং সুৰিভূতমেৰ হোতি ¶ তথা ঞেয্যাৰরণস্স সুপ্পহীনত্তা. তেনাহ ‘‘বুদ্ধা পন অত্তনা ৰা পরেহি ৰা দিট্ঠকতসুতং, সূরিযমণ্ডলোভাসসদিস’’ন্তি চ আদি.

তথা সাৰকা চ পচ্চেকবুদ্ধা চাতি. এত্থ তথা-সদ্দেন ‘‘অত্তনা দিট্ঠকতসুতমেৰ অনুস্সরন্তী’’তি ¶ ইদং উপসংহরতি, তেন সপ্পদেসমেৰ নেসং অনুস্সরণং, ন নিপ্পদেসন্তি নিদস্সেতি.

খজ্জোপনকওভাসসদিসং ঞাণস্স অতিৰিয অপ্পানুভাৰতায. সাৰকানন্তি এত্থ পকতিসাৰকানং পাকতিকপদীপোভাসসদিসং. মহাসাৰকানং (থেরগা. অট্ঠ. ২.২১ ৰঙ্গীসেত্থরগাথাৰণ্ণনায ৰিত্থারো) মহাপদীপোভাসসদিসং. তেনাহ ৰিসুদ্ধিমগ্গে (ৰিসুদ্ধি. ২.৪০২) ‘‘উক্কাপভাসদিস’’ন্তি. ওসধিতারকোভাসসদিসন্তি ¶ উস্সন্না পভা এতায ধীযতি, ওসধীনং ৰা অনুবলপ্পদাযকত্তা ‘‘ওসধী’’তি এৰং লদ্ধনামায তারকায পভাসদিসং. সরদসূরিযমণ্ডলোভাসসদিসং সব্বসো অন্ধকারৰিধমনতো. অপটুভাৰহেতুকো ৰিসযগ্গহণে চঞ্চলভাৰো খলিতং, কুণ্ঠিভাৰহেতুকো ৰিসযস্স অনভিসমযো পটিঘাতো. আৰজ্জনপটিবদ্ধমেৰাতি আৰজ্জনমত্তাধীনং, আৰজ্জিতমত্তে এৰ যথিচ্ছিতস্স পটিৰিজ্ঝনকন্তি অত্থো. সেসপদদ্ৰযেপি এসেৰ নযো.

অসঙ্গঅপ্পটিহতং পৰত্তমানং ভগৰতো ঞাণং লহুতরেপি ৰিসযে, গরুতরে চ একসদিসমেৰাতি দস্সেতুং ‘‘দুব্বলপত্তপুটে’’তিআদিনা উপমাদ্ৰযং ৰুত্তং. ধম্মকাযত্তা ভগৰতো গুণং আরব্ভ পৰত্তা ‘‘ভগৰন্তংযেৰ আরব্ভ উপ্পন্না’’তি ৰুত্তং. তং সব্বম্পীতি তং যথাৰুত্তং সব্বম্পি পুব্বেনিৰাসপটিসংযুত্তং কথং. তিত্থিযানং, সাৰকানঞ্চ পুব্বেনিৰাসানুস্সরণং ভগৰতো পুব্বেনিৰাসানুস্সরণস্স হীনুদাহরণদস্সনৰসেনেত্থ কথিতং. এৰঞ্হি ভগৰতো মহন্তভাৰো ৰিসেসতো পকাসিতো হোতীতি. সঙ্খেপতোতি সমাসতো. যত্তকোপি পুব্বেনিৰাসানুস্সতিঞাণস্স পৰত্তিভেদো অত্তনো ঞাণস্স ৰিসযভূতো, তং সব্বং তদা যথাকথিতং তে ভিক্খূ সঙ্খিপিত্ৰা ‘‘ইতিপী’’তি আহংসু. তস্স চ অনেকাকারতায আমেডিতৰচনং, পি-সদ্দো সম্পিণ্ডনত্থো, ‘‘ইতি খো ভিক্খৰে সপ্পটিভযো বালো’’তিআদীসু (ম. নি. ৩.১২৪; অ. নি. ৩.১) ৰিয আকারত্থো ইতি-সদ্দোতি দস্সেন্তো ‘‘এৰম্পী’’তি তদত্থমাহ.

২-৩. ৰুত্তমেৰাতি ¶ এত্থ চ ইধ পাঠে যং ৰত্তব্বং তেন পাঠেন সাধারণং, তং ৰুত্তমেৰাতি অধিপ্পেতং, ন অসাধারণং অপুব্বপদৰণ্ণনায অধিকতত্তাতি তং দস্সেন্তো ¶ ‘‘অযমেৰ হি ৰিসেসো’’তিআদিমাহ. ‘‘অস্সোসী’’তি ইদং সৰনকিচ্চনিপ্ফত্তিযা ৰুত্তং সদ্দগ্গহণমুখেন তদত্থাৰবোধস্স সিদ্ধত্তা. তত্থ পন পাল়িযং ‘‘ইমং সংখিযধম্মং ৰিদিত্ৰা’’ ইচ্চেৰ (দী. নি. ১.২) ৰুত্তং. ইমে ভিক্খূ মম গুণে থোমেন্তি, কথং? মম পুব্বেনিৰাসঞাণং আরব্ভাতি যোজনা. নিপ্ফত্তিন্তি কিচ্চনিপ্ফত্তিং, তেন কাতব্বকিচ্চসিদ্ধন্তি অত্থো. নোতি পুচ্ছাৰাচী ¶ নু-ইতি ইমিনা সমানত্থো নিপাতোতি ৰুত্তং ‘‘ইচ্ছেয্যাথ নূ’’তি. নন্তি ভগৰন্তং. ‘‘যং ভগৰা’’তি এত্থ যং-সদ্দেন কিরিযাপরামসনভূতেন ‘‘ধম্মিং কথং কথেয্যা’’তি এৰং ৰুত্তং. ধম্মিকথাকরণং পরামট্ঠং ‘‘এতস্সা’’তি পদস্স অত্থোতি আহ ‘‘এতস্স ধম্মিকথাকরণস্সা’’তি, আদরৰসেন পন তং দ্ৰিক্খত্তুং ৰুত্তং.

৪. সুণাথাতি এত্থ ইতি-সদ্দো আদিঅত্থো, পকারত্থো ৰা, এতেন ‘‘মনসি করোথা’’তি পদং সঙ্গণ্হাতি. সোতাৰধানং সোতস্স ওদহনং, সুস্সূসাতি অত্থো. ছিন্নং উপচ্ছিন্নং ৰটুমং সংসারৰট্টং এতেসন্তি ছিন্নৰটুমকা, সম্মাসম্বুদ্ধা, অঞ্ঞে চ খীণাসৰা, ইধ পন সম্মাসম্বুদ্ধা অধিপ্পেতা. তেসঞ্হি সব্বসো অনুস্সরণং ইতরেসং অৰিসযো. তেনাহ ‘‘অঞ্ঞেসং অসাধারণ’’ন্তি. পচ্চত্তৰচনে দিস্সতি যং-সদ্দো কম্মত্থদীপনতো. উপযোগৰচনে দিস্সতি যং-সদ্দো পুচ্ছনকিরিযায কম্মত্থদীপনতো. তন্তি চ উপযোগৰচনমেৰ পুচ্ছতি-সদ্দস্স দ্ৰিকম্মকভাৰতো. যন্তি যেন কারণেনাতি অযমেত্থ অত্থোতি আহ ‘‘করণৰচনে দিস্সতী’’তি. ভুম্মেতি দট্ঠব্বোতি যথা যং-সদ্দো ন কেৰলং পচ্চত্তউপযোগেসু এৰ, অথ খো করণেপি দিস্সতি, এৰং ইধ ভুম্মেতি দট্ঠব্বো. দসসহস্সিলোকধাতুন্তি জাতিক্খেত্তভূতং দসসহস্সচক্কৰাল়ং. উন্নাদেন্তো উপ্পজ্জি ¶ অনেকচ্ছরিযপাতুভাৰপটিমণ্ডিতত্তা বুদ্ধুপ্পাদস্স.

কালস্স ভদ্দতা নাম তত্থ সত্তানং গুণৰিভূতিযা, বুদ্ধুপ্পাদপরমা চ গুণৰিভূতীতি তব্বহুলতা যস্স কপ্পস্স ভদ্দতাতি আহ ‘‘পঞ্চবুদ্ধুপ্পাদপটিমণ্ডিতত্তা সুন্দরকপ্পে’’তি, তথা সারভূতগুণৰসেন ‘‘সারকপ্পে’’তি ¶ . ‘‘ইমং কপ্পং থোমেন্তো এৰমাহা’’তি ৰত্ৰা ইমস্স কপ্পস্স তথা থোমেতব্বতা অনঞ্ঞসাধারণাতি দস্সেতুং ‘‘যতো পট্ঠাযা’’তিআদি ৰুত্তং. তত্থ যতো পট্ঠাযাতি যতো পভুতি অভিনীহারো কতোতি মনুস্সত্তাদিঅট্ঠঙ্গসমন্নাগতো অভিনীহারো পৰত্তিতো. সংসারস্স অনাদিভাৰতো ইমস্স ভগৰতো অভিনীহারতো পুরেতরং উপ্পন্না সম্মাসম্বুদ্ধা অনন্তা অপরিমেয্যাতি তেহি উপ্পন্নকপ্পে নিৰত্তেন্তো ‘‘এতস্মিং অন্তরে’’তি আহ. কামং দীপঙ্করবুদ্ধুপ্পাদে অযং ভগৰা অভিনীহারমকাসি, তস্স পন ভগৰতো নিব্বত্তি ইমস্স অভিনীহারতো পুরিমতরাতি ৰুত্তং ‘‘অম্হাকং…পে… নিব্বত্তিংসূ’’তি.

অসঙ্খ্যেয্যকপ্পপরিযোসানেতি মহাকপ্পানং অসঙ্খ্যেয্যপরিযোসানে. এস নযো ইতো পরেসুপি. ‘‘ইতো তিংসকপ্পসহস্সানং উপরী’’তি এতেন পদুমুত্তরস্স ভগৰতো, সুমেধস্স চ ভগৰতো অন্তরে একূনসত্ততিকপ্পসহস্সানি বুদ্ধসুঞ্ঞানি অহেসুন্তি দস্সেতি. ‘‘ইতো অট্ঠারসন্নং কপ্পসহস্সানং উপরী’’তি ইমিনা সুজাতস্স ভগৰতো, অত্থদস্সিস্স চ ভগৰতো অন্তরে ¶ একেনূনানি দ্ৰাদসকপ্পসহস্সানি বুদ্ধসুঞ্ঞানি অহেসুন্তি দস্সেতি. ‘‘ইতো চতুনৰুতে কপ্পে’’তি ইমিনা ধম্মদস্সিস্স ভগৰতো, সিদ্ধত্থস্স চ ভগৰতো অন্তরে ছাধিকনৰসতুত্তরানি সত্তরসকপ্পসহস্সানি বুদ্ধসুঞ্ঞানি অহেসুন্তি দস্সেতি. ‘‘একতিংসে কপ্পে’’তি ইমিনা ৰিপস্সিস্স ভগৰতো, সিখিস্স চ ভগৰতো অন্তরে সট্ঠি কপ্পানি বুদ্ধসুঞ্ঞানি অহেসুন্তি দস্সেতি. তে সব্বেপি পদুমুত্তরস্স ভগৰতো ওরং সুমেধাদীহি উপ্পন্নকপ্পেহি সদ্ধিং সমোধানিযমানা সতসহস্সা কপ্পা হোন্তি, যত্থ মহাসাৰকাদযো (থেরগা. অট্ঠ. ২.২১ ৰঙ্গীসত্থেরগাথাৰণ্ণনা) ৰিৰট্টূ পনিস্সযানি ¶ কুসলানি সম্ভরিংসু. বুদ্ধসুঞ্ঞেপি লোকে পচ্চেকবুদ্ধা উপ্পজ্জিত্ৰা তেসং পুরিসৰিসেসানং পুঞ্ঞাভিসন্দাভিবুদ্ধিযা পচ্চযা হোন্তি. ‘‘এৰময’’ন্তিআদি ৰুত্তমেৰত্থং নিগমনৰসেন ৰদতি.

‘‘কিং পনেত’’ন্তিআদি পুব্বনিমিত্তৰিভাৰনত্থায আরদ্ধং. তত্থ এতন্তি বুদ্ধানং উপ্পজ্জনং. কপ্পসণ্ঠানকালস্মিন্তি ৰিৰট্টকপ্পস্স সণ্ঠহনকালে. একমসঙ্খ্যেয্যন্তি সংৰট্টট্ঠাযিং সন্ধাযাহ. একঙ্গণং হুত্ৰা ঠিতেতি পব্বতরুক্খগচ্ছাদীনং, মেঘাদীনঞ্চ অভাৰেন ৰিৰটংঅঙ্গণং হুত্ৰা ঠিতে. লোকসন্নিৰাসেতি ¶ ভাজনলোকেন সন্নিৰিসিতব্বট্ঠানে. ৰীসতি যট্ঠিযো উসভং. ‘‘উসভমত্তা, দ্ৰে উসভমত্তা’’তিআদিনা পচ্চেকং মত্তা-সদ্দো যোজেতব্বো. যোজনসহস্সমত্তা হুত্ৰাতি পতমানাৰ উদকধারা যোজনসহস্সমত্তং আকাসট্ঠানং ফরিত্ৰা পৰত্তিযা যোজনসহস্সমত্তা হুত্ৰা. যাৰ অৰিনট্ঠব্রহ্মলোকাতি যাৰ আভস্সরব্রহ্মলোকা, যাৰ সুভকিণ্হব্রহ্মলোকা, যাৰ ৰেহপ্ফলব্রহ্মলোকাতি অত্থো.

ৰাতৰসেনাতি সট্ঠিসহস্সাধিকনৰযোজনসতসহস্সুব্বেধস্স সন্ধারকৰাতমণ্ডলস্স ৰসেন. মহাবোধিপল্লঙ্কোতি মহাবোধিপল্লঙ্কপ্পদেসমাহ. তস্স পচ্ছা ৰিনাসো, পঠমং সণ্ঠহনঞ্চ ধম্মতাৰসেন ৰেদিতব্বং. তত্থাতি তস্মিং পদেসে. পুব্বনিমিত্তং হুত্ৰাতি বুদ্ধপ্পাদস্স পুব্বনিমিত্তং হুত্ৰা. পুব্বনিমিত্তসন্নিস্সযো হি গচ্ছো নিস্সিতৰোহারেন তথা ৰুত্তো. তেনাহ ‘‘তস্সা’’তিআদি. কণ্ণিকাবদ্ধানি হুত্ৰাতি আবদ্ধকণ্ণিকা ৰিয হুত্ৰা. সুদ্ধাৰাসব্রহ্মানো অত্তমনা…পে… গচ্ছন্তীতি যোজনা. ৰেহপ্ফলেপি সুভকিণ্হে সঙ্গহেত্ৰা ‘‘নৰ ব্রহ্মলোকা’’তি ৰুত্তং. তথা হি তে ¶ চতুত্থিংযেৰ ৰিঞ্ঞাণট্ঠিতিং ভজন্তি. নিক্খমন্তেসূতি মহাভিনিক্খমনং অভিনিক্খমন্তেসু. অভিজাতি পনেত্থ জাতিভাৰসামঞ্ঞেন গব্ভোক্কন্তিযাৰ সঙ্গহিতা. নিমীযতি অনুমীযতি ফলং এতেনাতি নিমিত্তং, কারণং. ঞাপকম্পি হি কারণং দিস্ৰা তস্স অব্যভিচারীভাৰেন ফলং সিদ্ধমেৰ কত্ৰা গণ্হি, যথা তং অসিতো ইসি অভিজাতিযং মহাপুরিসস্স লক্খণানি দিস্ৰা তেসং অব্যভিচারীভাৰেন বুদ্ধগুণে সিদ্ধে এৰ কত্ৰা গণ্হি, এৰং ¶ পন গয্হমানং তন্নিমিত্তকং ফলং তদানুভাৰেন সিদ্ধং ৰিয ৰোহরীযতি তব্ভাৰে ভাৰতো. তেনাহ ‘‘তেসং নিমিত্তানং আনুভাৰেনা’’তিআদি. তথা চাহ ভগৰা ‘‘সো তেন লক্খণেন সমন্নাগতো…পে… রাজা সমানো কিং লভতি, বুদ্ধো সমানো কিং লভতী’’তি (দী. নি. ৩.২০২, ২০৪) চ এৰমাদি. ইমমত্থন্তি পঞ্চ বুদ্ধা ইমস্মিং কপ্পে উপ্পজ্জিস্সন্তীতি ইমমত্থং যাথাৰতো জানিংসু.

জাতিপরিচ্ছেদাদিৰণ্ণনা

৫-৭. কপ্পপরিচ্ছেদৰসেনাতি ¶ ‘‘ইতো সো একনৰুতে কপ্পে’’তিআদিনা যত্থ যত্থ কপ্পে তে তে বুদ্ধা উপ্পন্না, তস্স তস্স কপ্পস্স পরিচ্ছিন্দনৰসেন পরিজাননৰসেন. ‘‘ইদং ত’’ন্তি হি নিযমেত্ৰা পরিচ্ছিজ্জ জাননং পরিচ্ছিন্দনং পরিচ্ছেদো. পরিত্তন্তি ইত্তরং. লহুকন্তি সল্লহুকং, আযুনো অধিপ্পেতত্তা রস্সন্তি ৰুত্তং হোতি. তেনাহ ‘‘উভযমেতং অপ্পকস্সেৰ ৰেৰচন’’ন্তি.

‘‘অপ্পং ৰা ভিয্যো’’তি অৰিসেসজোতনং ‘‘ৰীসং ৰা তিংসং ৰা’’তিআদিনা অনিযমিতৰসেনেৰ যথালাভতো ¶ ৰৰত্থপেত্ৰা অযঞ্চ নযো অপচুরোতি দস্সেন্তো ‘‘এৰং দীঘাযুকো পন অতিদুল্লভো’’তি আহ. ইদং তং ৰিসেসৰৰত্থাপনং পুগ্গলেসু পক্খিপিত্ৰা দস্সেন্তো ‘‘তত্থ ৰিসাখা’’তিআদিমাহ.

যদি এৰং কস্মা অম্হাকং ভগৰা তত্তকম্পি কালং ন জীৰি, ননু মহাবোধিসত্তা চরিমভৰে অতিৰিযউল়ারতমেন পুঞ্ঞাভিসঙ্খারেন পটিসন্ধিং গণ্হন্তীতি? সচ্চমেতন্তি. তত্থ কারণং দস্সেতুং ‘‘ৰিপস্সীআদযো পনা’’তিআদি ৰুত্তং. তত্থ অভিজাতিযা মেত্তাঠানতায অভিসঙ্খারৰিঞ্ঞাণস্স মেত্তাপুব্বভাগতা. তদনুগুণঞ্হি তেসং ৰিসেসতো পটিসন্ধিৰিঞ্ঞাণং. তস্স ৰিসেসতো বহুলং খেমৰিতক্কূপনিস্সযতায সোমনস্সসহগততা, অনঞ্ঞসাধারণপরোপদেসরহিতঞাণৰিসেসূপনিস্সযতায ঞাণসম্পযুত্ততা, অসঙ্খারিকতা চ ৰেদিতব্বা, অসঙ্খ্যেয্যং আযু আধারৰিসেসতো, নিস্সযৰিসেসতো, পটিপক্খদূরীভাৰতো, পৰত্তিআকারৰিসেসতো চ অপরিমেয্যানুভাৰতায কারণস্স. তত্থ চিরতরং কালং সন্তানস্স পারমিতাপরিভাৰিততা আধারৰিসেসতা. অলোভজ্ঝাসযাদিআসযসম্পদা নিস্সযৰিসেসতা. লাভমচ্ছরিযাদিপাপধম্মৰিক্খম্ভনং পটিপক্খদূরীভাৰো. সব্বসত্তানং সকলৰট্টদুক্খনিস্সরণত্থায আযূহনা পৰত্তিআকারৰিসেসো ৰেদিতব্বো.

অযঞ্চ ¶ নযো সব্বেসং মহাবোধিসত্তানং চরিমভৰাভিনিব্বত্তককম্মাযূহনে সাধারণোতি তস্স ফলেনাপি একসদিসেনেৰ ভৰিতব্বন্তি ¶ আহ ‘‘ইতি সব্বে বুদ্ধা অসঙ্খ্যেয্যাযুকা’’তি, অসঙ্খ্যেয্যকালাৰত্থানাযুকাতি অত্থো. অসঙ্খ্যেয্যাযুকসংৰত্তনসমত্থং পরিচিতং কম্মং হোতি, বুদ্ধা পন তদা মনুস্সানং ¶ পরমাযুপ্পমাণানুরূপমেৰ কালং ঠত্ৰা পরিনিব্বাযন্তি ততো পরং ঠত্ৰা সাধেতব্বপযোজনাভাৰতো, ধম্মতাৰেসাতি ৰা ৰেদিতব্বা. অট্ঠকথাযং পন ততো পরং পন অট্ঠানস্স ‘‘উতুভোজনৰিপত্তিযা’’তি (দী. নি. অট্ঠ. ২.৫) কারণং ৰুত্তং, ‘‘তং লোকসাধারণং লোকে জাতসংৰুদ্ধানং তথাগতানং ন হোতী’’তি ন সক্কা ৰত্তুং. তথা হি নেসং রোগকিলমথাদযো হোন্তিযেৰ. উতুভোজনৰসেনাতি অসম্পন্নস্স, সম্পন্নস্স চ উতুনো, ভোজনস্স চ ৰসেন যথাক্কমং আযু হাযতিপি ৰড্ঢতিপি. আযূতি চ পরমাযু অধিপ্পেতং. তত্থ যং ৰত্তব্বং, তং ব্রহ্মজালাদিটীকাযং (দী. নি. টী. ১.৪০) ৰুত্তমেৰ.

ইদানি তমত্থং সমুদাগমতো পট্ঠায দস্সেতুং ‘‘তত্থ যদা’’তিআদি ৰুত্তং. ধম্মে নিযুত্তা ধম্মিকা, ন ধম্মিকা অধম্মিকা, হিংসাদিঅধম্মপসুতা. অধম্মিকমেৰ হোতি ইস্সরজনানং অনুৰত্তনেন, পরেসং দিট্ঠানুগতিআপজ্জনেন চ. উণ্হৰলাহকা দেৰতাতি উণ্হউতুনো পচ্চযভূতমেঘমালাসমুট্ঠাপকা দেৰপুত্তা. তেসং কির তথা চিত্তুপ্পাদসমকালমেৰ যথিচ্ছিতট্ঠানং উণ্হং ফরমানা ৰলাহকমালা নাতিবহলা ইতো চিতো নভং ছাদেন্তী ৰিতনোতি. এস নযো সীতৰলাহকৰস্সৰলাহকাসু. অব্ভৰলাহকা পন দেৰতা সীতুণ্হৰস্সেহি ৰিনা কেৰলং অব্ভপটলস্সেৰ সমুট্ঠাপকা ৰেদিতব্বা. তাসন্তি এত্থ ‘‘মিত্তা’’তি পদং আনেত্ৰা যোজনা. কামং হেট্ঠা ৰুত্তা সত্তৰিধাপি দেৰতা চাতুমহারাজিকাৰ তা পন তেন তেন ৰিসেসেন ৰত্ৰা ইদানি তদঞ্ঞে পঠমভূমিকে কামাৰচরদেৰে সামঞ্ঞতো গণ্হন্তো ‘‘চাতুমহারাজিকা’’তি আহ. তাসং অধম্মিকতাযাতি রাজূনং অধম্মিকভাৰমূলকেন উপরাজাদিঅধম্মিকভাৰপরম্পরাভতেন তাসং দেৰতানং অধম্মিকভাৰেন. ৰিসমং চন্দিমসূরিযা পরিহরন্তীতি ¶ বহ্ৰাবাধতাদি অনিট্ঠফলূপনিস্সযভূতস্স যথাৰুত্তঅধম্মিকতাসঞ্ঞিতস্স সাধারণস্স পাপকম্মস্স বলেন ৰিসমং ৰাযন্তেন ৰাযুনা পীল়িযমানা চন্দিমসূরিযা সিনেরুং পরিক্খিপন্তা ৰিসমং পরিৰত্তন্তি যথামগ্গেন নপ্পৰত্তন্তীতি ¶ . অস্সিদং যথা চন্দিমসূরিযানং ৰিসমপরিৰত্তনং ৰিসমৰাতসঙ্খোভহেতুকং, এৰং উতুৰস্সাদিৰিসমপ্পৰত্তীতি দস্সেতুং ‘‘ৰাতো যথামগ্গেন ন ৰাযতী’’তিআদি ৰুত্তং. দেৰতানন্তি সীতৰলাহকদেৰতাদিদেৰতানং. তেনাহ ‘‘সীতুণ্হভেদো উতূ’’তিআদি. তস্মিং অসম্পজ্জন্তেতি তস্মিং যথাৰুত্তে ৰস্সবীজভূতে উতুম্হি যথাকালং সম্পত্তিং অনুপগচ্ছন্তে.

‘‘ন ¶ সম্মা দেৰো ৰস্সতী’’তি সঙ্খেপতো ৰুত্তমত্থং ৰিৰরন্তো ‘‘কদাচী’’তিআদিমাহ. তত্থ কদাচি ৰস্সতীতি কদাচি অৰস্সনকালে ৰস্সতি. কদাচি ন ৰস্সতীতি কদাচি ৰস্সিতব্বকালে ন ৰস্সতি. কত্থচি ৰস্সতি, কত্থচি ন ৰস্সতীতি পদেসমাহ. ‘‘ৰস্সন্তোপী’’তিআদি ‘‘কদাচি ৰস্সতি, কদাচি ন ৰস্সতী’’তি পদদ্ৰযস্সেৰ অত্থৰিৰরণং. ৰিগতগন্ধৰণ্ণরসাদীতি আদি-সদ্দেন নিরোজতং সঙ্গণ্হাতি. একস্মিং পদেসেতি ভত্তপচনভাজনস্স একপস্সে. উত্তণ্ডুলন্তি পাকতো উক্কন্ততণ্ডুলং. তীহাকারেহীতি সব্বসো অপরিণতং, একদেসেন পরিণতং, দুপরিণতঞ্চাতি এৰং তীহাকারেহি. পচ্চতি পক্কাসযং উপগচ্ছতি. অপ্পাযুকাতি এত্থ ‘‘দুব্বণ্ণা চা’’তিপি ৰত্তব্বং. এৰং উতুভোজনৰসেন আযু হাযতি হেতুম্হি অপরিক্খীণেপি পচ্চযস্স পরিদুব্বলত্তা.

‘‘যদা পনা’’তিআদি সুক্কপক্খস্স অত্থো ৰুত্তৰিপরিযাযেন ৰেদিতব্বো.

ৰড্ঢিত্ৰা ¶ ৰড্ঢিত্ৰা পরিহীনন্তি ৰেদিতব্বং. কস্মা? ন হি একস্মিং অন্তরকপ্পে অনেকে বুদ্ধা উপ্পজ্জন্তি, একো এৰ পন উপ্পজ্জতীতি. ইদানি তমত্থং ৰিত্থারতো দস্সেতুং ‘‘কথ’’ন্তিআদি ৰুত্তং. চত্তারি ঠত্ৰাতি অচ্চন্তসংযোগে উপযোগৰচনং. যংযংআযুপরিমাণেসূতি যত্তকযত্তকপরমাযুপ্পমাণেসু. তেসম্পীতি বুদ্ধানং. তং তদেৰ আযুপরিমাণং হোতি, তত্থ কারণং হেট্ঠা ৰুত্তমেৰ.

জাতিপরিচ্ছেদাদিৰণ্ণনা নিট্ঠিতা

বোধিপরিচ্ছেদৰণ্ণনা

৮. মূলেতি ¶ মূলাৰযৰস্স সমীপে. তং পন তস্সা হেট্ঠাপদেসো হোতীতি আহ ‘‘পাটলিরুক্খস্স হেট্ঠা’’তি. তংদিৰসন্তি অত্তনা জাতদিৰসে, তংদিৰসন্তি ৰা তং ভগৰতো অভিসম্বোধিদিৰসে. সো কির বোধিরুক্খো সালকল্যাণী ৰিয পথৰিযা অব্ভন্তরে এৰ পুরেতরং ৰড্ঢেন্তো অভিসম্বোধিদিৰসে পথৰিং উব্ভিজ্জিত্ৰা উট্ঠিতো রতনসতং উচ্চো, তাৰদেৰ চ ৰিত্থতো হুত্ৰা নভং পূরেন্তো অট্ঠাসি. অযম্পি কিরেতস্স রুক্খভাৰেন ৰিয অঞ্ঞেহি ৰেমত্ততা. ঘনসংহতনাল়ৰণ্টতায কণ্ণিকবদ্ধেহি ৰিয পুপ্ফেহি. একসঞ্ছন্নাতি পুপ্ফানং নিরন্তরতায ¶ একজ্ঝং সঞ্ছন্না, তত্থ তত্থ নিবদ্ধ…পে… সমুজ্জলন্তি তহং তহং ওলম্বিতকুসুমদামেহি চেৰ তহং তহং খিত্তমালাপিণ্ডীহি চ ইতো চিতো ৰিপ্পকিণ্ণৰিৰিধৰণ্টমুত্তপুপ্ফেহি চ সম্মদেৰ উজ্জলং. অঞ্ঞমঞ্ঞং সিরীসম্পত্তানীতি অঞ্ঞমঞ্ঞস্স সিরিযা সোভায সম্পন্নানি. বুদ্ধগুণৰিভৰসিরিন্তি সম্মাসম্বুদ্ধেহি অভিগন্তব্বগুণৰিভূতিসোভং. পটিৰিজ্ঝমানোতি অধিগচ্ছন্তো.

সেতম্বরুক্খোতি সেতৰণ্ণফলো অম্বরুক্খো. তদেৰাতি ¶ পাটলিযা ৰুত্তপ্পমাণমেৰ. একতোতি একপস্সে. সুরসানীতি সুমধুররসানি.

একোৰ পল্লঙ্কোতি একোৰ পল্লঙ্কপ্পদেসো. সো সো রুক্খো ‘‘বোধী’’তি ৰুচ্চতি বুজ্ঝন্তি এত্থাতি কত্ৰা.

সাৰকযুগপরিচ্ছেদৰণ্ণনা

৯. সাৰকপরিচ্ছেদেতি সাৰকযুগপরিচ্ছেদে. ‘‘খণ্ডতিস্স’’ন্তি দ্ৰেপি একজ্ঝং গহেত্ৰা একত্তৰসেন ৰুত্তন্তি আহ ‘‘খণ্ডো চ তিস্সো চা’’তি, বুদ্ধানং সহোদরো, ৰেমাতিকোপি ৰা জেট্ঠভাতা ন হোতীতি ‘‘একপিতিকো কনিট্ঠভাতা’’তি ৰুত্তং. অৰসেসেহি পুত্তেহি. ‘‘পঞ্ঞাপারমিযা মত্থকং পত্তো’’তি ৰত্ৰা তস্স মত্থকপ্পত্তং গুণৰিসেসং দস্সেতুং ‘‘সিখিনা ভগৰতা’’তিআদি ৰুত্তং.

উত্তরোতি উত্তমো. পুন উত্তরোতি থেরং নামেন ৰদতি. পারন্তি পরকোটিমত্থকং. পঞ্ঞাৰিসযেতি পঞ্ঞাধিকারে. পৰত্তিট্ঠানৰসেন হি পৰত্তিং ৰদতি.

সাৰকসন্নিপাতপরিচ্ছেদৰণ্ণনা

১০. উপোসথন্তি ¶ আণাপাতিমোক্খং. দুতিযততিযেসূতি দুতিযে, ততিযে চ সাৰকসন্নিপাতে. এসেৰ নযোতি চতুরঙ্গিকতং অতিদিসতি. অভিনীহারতো পট্ঠায ৰত্থুং কথেত্ৰা পব্বজ্জা দীপেতব্বা, সা পন যস্মা মনোরথপূরণিযং অঙ্গুত্তরট্ঠকথাযং (অ. নি. অট্ঠ. ১.১.২১১) ৰিত্থারতো আগতা, তস্মা তত্থ ৰুত্তনযেনেৰ ৰেদিতব্বাতি.

উপট্ঠাকপরিচ্ছেদৰণ্ণনা

১১. নিবদ্ধুপট্ঠাকভাৰন্তি ¶ আরম্ভতো পট্ঠায যাৰ পরিনিব্বানা নিযতউপট্ঠাকভাৰং. অনিযতুউপট্ঠাকা পন ভগৰতো পঠমবোধিযং বহূ অহেসুং. তেনাহ ‘‘ভগৰতো হী’’তিআদি. ইদানি আনন্দত্থেরো যেন কারণেন সত্থু নিবদ্ধুপট্ঠাকভাৰং উপগতো, যথা চ উপগতো, তং দস্সেতুং ‘‘তত্থ একদা’’তিআদি ৰুত্তং. ‘‘অহং ইমিনা মগ্গেন গচ্ছামী’’তি আহ অনযব্যসনাপাদকেন কম্মুনা চোদিযমানো ¶ . অথ নং ভগৰা তমত্থং অনারোচেত্ৰাৰ খেমং মগ্গং সন্ধায ‘‘এহি ভিক্খু ইমিনা গচ্ছামা’’তি আহ. কস্মা পনস্স ভগৰা তমত্থং নারোচেসীতি? আরোচিতেপি অসদ্দহন্তো নাদিযিস্সতি. তঞ্হি তস্স হোতি দীঘরত্তং অহিতায দুক্খাযাতিতি. তেতি তে গমনং, ‘‘ত’’ন্তি ৰা পাঠো.

অন্ৰাসত্তোতি অনুবদ্ধো, উপদ্দুতো ৰা. ধম্মগারৰনিস্সিতো সংৰেগো ধম্মসংৰেগো ‘‘অম্হেসু নাম তিট্ঠন্তেসু ভগৰতোপি ঈদিসং জাত’’ন্তি. ‘‘অহং উপট্ঠহিস্সামী’’তি ৰদন্তো ধম্মসেনাপতি অত্থতো এৰং ৰদন্তো নাম হোতীতি ‘‘অহং ভন্তে তুম্হে’’তিআদি ৰুত্তং. অসুঞ্ঞাযেৰ মে সা দিসাতি অসুঞ্ঞাযেৰ মম সা দিসা. তত্থ কারণমাহ ‘‘তৰ ওৰাদো বুদ্ধানং ওৰাদসদিসো’’তি.

ৰসিতুং ন দস্সতীতি একগন্ধকুটিযং ৰাসং ন লভিস্সতীতি অধিপ্পাযো. পরম্মুখা দেসিতস্সাপি ধম্মস্সাতি সুত্তন্তদেসনং সন্ধায ৰুত্তং. অভিধম্মদেসনা পনস্স পরম্মুখাৰ পৰত্তা পগেৰ যাচনায. তস্সা ৰাচনামগ্গোপি সারিপুত্তত্থেরপ্পভৰো. কস্মা? সো নিদ্দেসপটিসম্ভিদা ৰিয ¶ থেরস্স ভিক্খুতো গহিতধম্মক্খন্ধপক্খিযো. অপরে পন ‘‘ধম্মভণ্ডাগারিকো পটিপাটিযা তিকদুকেসু দেৰসিকং কতোকাসো ভগৰন্তং পঞ্হং পুচ্ছি, ভগৰাপিস্স পুচ্ছিতপুচ্ছিতং নযদানৰসেন ৰিস্সজ্জেসি. এৰং অভিধম্মোপি সত্থারা পরম্মুখা দেসিতোপি থেরেন সম্মুখা পটিগ্গহিতোৰ অহোসী’’তি ৰদন্তি. সব্বং ৰীমংসিত্ৰা গহেতব্বং.

অগ্গুপট্ঠাকোতি উপট্ঠানে সক্কচ্চকারিতায অগ্গভূতো উপট্ঠাকো. থেরো হি উপট্ঠাকট্ঠানং লদ্ধকালতো পট্ঠায ভগৰন্তং দুৰিধেন উদকেন, তিৰিধেন দন্তকট্ঠেন, পাদপরিকম্মেন, গন্ধকুটিপরিৰেণসম্মজ্জনেনাতি এৰমাদীহি কিচ্চেহি উপট্ঠহন্তো ‘‘ইমায নাম ৰেলায সত্থু ইদং নাম লদ্ধুং ৰট্টতি, ইদং নাম কাতুং ৰট্টতী’’তি চিন্তেত্ৰা ¶ তং তং নিপ্ফাদেন্তো মহতিং দণ্ডদীপিকং গহেত্ৰা একরত্তিং গন্ধকুটিপরিৰেণং নৰ ৰারে অনুপরিযাযতি. এৰং হিস্স অহোসি ¶ ‘‘সচে মে থিনমিদ্ধং ওক্কমেয্য, ভগৰতি পক্কোসন্তে পটিৰচনং দাতুং নাহং সক্কুণেয্য’’ন্তি, তস্মা সব্বরত্তিং দণ্ডদীপিকং হত্থেন ন মুঞ্চতি. তেন ৰুত্তং ‘‘অগ্গুপট্ঠাকো’’তি.

১২. পিতুমাতুজাতনগরপরিচ্ছেদো পিতুমুখেন আগতত্তা ‘‘পিতিপরিচ্ছেদো’’তি ৰুত্তো.

ৰিহারং পাৰিসীতি গন্ধকুটিং পাৰিসি. এত্তকং কথেত্ৰাতি কপ্পপরিচ্ছেদাদিনৰৰারপটিমণ্ডিতং ৰিপস্সীআদীনং সত্তন্নং বুদ্ধানং পুব্বেনিৰাসপটিসংযুত্তং এত্তাৰতা দেসনং দেসেত্ৰা. কস্মা পনেত্থ ভগৰা ৰিপস্সীআদীনং সত্তন্নংযেৰ বুদ্ধানং পুব্বেনিৰাসং কথেসি, ন বুদ্ধৰংসদেসনাযং (বু. ৰং. ৬৪ গাথাদযো) ৰিয পঞ্চৰীসতিযা বুদ্ধানং, ততো ৰা পন ভিয্যোতি? অনধিকারতো, পযোজনাভাৰতো চ. বুদ্ধৰংসদেসনাযঞ্হি (বু. ৰং. ৭৫) –

‘‘কীদিসো তে মহাৰীর, অভিনীহারো নরুত্তম;

কম্হি কালে তযা ৰীর, পত্থিতা বোধিমুত্তমা’’তি. আদিনা –

পৰত্তং তং পুচ্ছং অধিকারং অট্ঠুপ্পত্তিং কত্ৰা যস্স সম্মাসম্বুদ্ধস্স পাদমূলে অত্তনা মহাভিনীহারো কতো, তং দীপঙ্করং ভগৰন্তং আদিং কত্ৰা যেসং চতুৰীসতিযা বুদ্ধানং সন্তিকা বোধিযা লদ্ধব্যাকরণো হুত্ৰা তত্থ তত্থ পারমিযো পূরেসি, তেসং পটিপত্তিসঙ্খাতো পুব্বেনিৰাসো, অত্তনো চ পটিপত্তি কথিতা, ইধ পন তাদিসো অধিকারো নত্থি ¶ , যেন দীপঙ্করতো পট্ঠায, ততো ৰা পন পুরতো বুদ্ধে আরব্ভ পুব্বেনিৰাসং কথেয্য. তস্মা ন এত্থ বুদ্ধৰংসদেসনাযং ৰিয পুব্বেনিৰাসো ৰিত্থারিতো. যস্মা চ বুদ্ধানং দেসনা নাম দেসনায ভাজনভূতানং পুগ্গলানং ঞাণবলানুরূপা, ন অত্তনো ঞাণবলানুরূপা, তস্মা তত্থ অগ্গসাৰকানং, মহাসাৰকানং, (থেরগা. অট্ঠ. ২.২১ ৰঙ্গীসত্থেরগাথাৰণ্ণনা) তাদিসানঞ্চ ¶ দেৰব্রহ্মানং ৰসেন দেসনা ৰিত্থারিতা. ইধ পন পকতিসাৰকানং, তাদিসানঞ্চ দেৰতানং ৰসেন পুব্বেনিৰাসং কথেন্তো সত্তন্নমেৰ বুদ্ধানং পুব্বেনিৰাসং কথেসি. তথা হি নে ভগৰা পলোভনৰসেন সমুত্তেজেতুং সপ্পপঞ্চতায কথায দেসনং মত্থকং অপাপেত্ৰাৰ গন্ধকুটিং পাৰিসি. তথা চ ইমিস্সা এৰ দেসনায অনুসারতো আটানাটিযপরিত্ত- (দী. নি. ৩.২৭৫) দেসনাদযো পৰত্তা.

অপিচেত্থ ¶ ভগৰা অত্তনো সুদ্ধাৰাসচারিকাৰিভাৰিনিযা উপরিদেসনায সঙ্গহত্থং ৰিপস্সীআদীনং এৰ সত্তন্নং সম্মাসম্বুদ্ধানং পুব্বেনিৰাসং কথেসি. তেসংযেৰ হি সাৰকা তদা চেৰ এতরহি চ সুদ্ধাৰাসভূমিযং ঠিতা, ন অঞ্ঞেসং পরিনিব্বুতত্তা. ‘‘সিদ্ধত্থতিস্সফুস্সানং কির বুদ্ধানং সাৰকা সুদ্ধাৰাসেসু উপপন্না উপপত্তিসমনন্তরমেৰ ইমস্মিং সাসনে উপকাদযো ৰিয অরহত্তং অধিগন্ত্ৰা নচিরস্সেৰ পরিনিব্বাযিংসু, ন তত্থ তত্থ যাৰতাযুকং অট্ঠংসূ’’তি ৰদন্তি. তথা যেসং সম্মাসম্বুদ্ধানং পটিৰেধসাসনং একংসতো নিচ্ছযে ন অজ্জাপি ধরতি, ন অন্তরহিতং, তে এৰ কিত্তেন্তো ৰিপস্সীআদীনংযেৰ ভগৰন্তানং পুব্বেনিৰাসং ইমস্মিং সুত্তে কথেসি ৰেনেয্যজ্ঝাসযৰসেন. অপুব্বাচরিমনিযমো পন অপরাপরং সংসরণকসত্তৰাসৰসেন একিস্সা লোকধাতুযা ইচ্ছিতোতি ন তেনেতং ৰিরুজ্ঝতীতি দট্ঠব্বং. নিরন্তরং মত্থকং পাপেত্ৰাতি অভিজাতিতো পট্ঠায যাৰ পাতিমোক্খুদ্দেসো যাৰ তা বুদ্ধকিচ্চসিদ্ধি, তাৰ মত্থকং সিখং পাপেত্ৰা. ন তাৰ কথিতোতি যোজনা.

তন্তিন্তি ধম্মতন্তিং, পরিযত্তিন্তি অত্থো. পুত্তপুত্তমাতুযানৰিহারধনৰিহারদাযকাদীনং সম্বহুলানং অত্থানং ৰিভাৰনৰসেন পৰত্তৰারো সম্বহুলৰারো.

সম্বহুলৰারৰণ্ণনা

কামঞ্চাযং ¶ পাল়িযং অনাগতো, অট্ঠকথাসু আগতত্তা পন আনেত্ৰা ¶ দীপেতব্বোতি তং দীপেন্তো ‘‘সব্ববোধিসত্তানঞ্হী’’তিআদিমাহ. কুলৰংসো কুলানুক্কমো. পৰেণীতি পরম্পরা. ‘‘কস্মা’’তি পুত্তুপ্পত্তিযা কারণং পুচ্ছিত্ৰা তং ৰিস্সজ্জেন্তো ‘‘সব্বঞ্ঞুবোধিসত্তানঞ্হী’’তিআদিমাহ, তেন তেসং জাতনগরাদি পঞ্ঞাযমানং একংসতো মনুস্সভাৰসঞ্জাননত্থং ইচ্ছিতব্বং, অঞ্ঞথা যথাধিপ্পেতবুদ্ধকিচ্চসিদ্ধি এৰ ন সিযাতি দস্সেতি, যতো মহাসত্তানং চরিমভৰে মনুস্সলোকে এৰ পাতুভাৰো, ন অঞ্ঞত্থ.

সম্বহুলপরিচ্ছেদৰণ্ণনা

চন্দাদীনং সোভাৰিসেসং রহেতি চজাপেতীতি রাহু, রাহুগ্গহো, ইধ পন রাহু ৰিযাতি রাহু. বন্ধনন্তি চ অনত্থুপ্পত্তিট্ঠানতং সন্ধায ৰুত্তং. তথা মহাসত্তেন ৰুত্তৰচনমেৰ গহেত্ৰা কুমারস্স ‘‘রাহুলো’’তি নামং অকংসু. অথাতি নিপাতমত্তং. রোচিনীতি রোচনসীলা, উজ্জলরূপাতি ¶ অত্থো. রুচগ্গতীতি রুচং পভাতং আগতিভূতা, গ-কারাগমং কত্ৰা ৰুত্তং. ইত্থিরতনভাৰতো মনুস্সলোকে সব্বাসং ইত্থীনং বিম্বপটিচ্ছন্নভূতাতি বিম্বা.

ঝানা ৰুট্ঠাযাতি পাদকজ্ঝানতো উট্ঠায.

অট্ঠঙ্গুলুব্বেধাতি অট্ঠঙ্গুলপ্পমাণবহলভাৰা. চূল়ংসেন ছাদেত্ৰাতি তিরিযভাগেন ঠপনৰসেন সব্বং ৰিহারট্ঠানং ছাদেত্ৰা. সুৰণ্ণযট্ঠিফালেহীতি ফালপ্পমাণাহি সুৰণ্ণযট্ঠীহি. সুৰণ্ণহত্থিপাদানীতি পকতিহত্থিপাদপরিমাণানি সুৰণ্ণখণ্ডানি. ৰুত্তনযেনেৰাতি চূল়ংসেনেৰ. সুৰণ্ণকট্টীহীতি সুৰণ্ণখণ্ডেহি. সলক্খণানন্তি লক্খণসম্পন্নানং সহস্সারানং.

বোধিপল্লঙ্কোতি অভিসম্বুজ্ঝনকালে নিসজ্জট্ঠানং. অৰিজহিতোতি ¶ বুদ্ধানং তথানিসজ্জায অনঞ্ঞত্থভাৰীভাৰতো অপরিচ্চত্তো. তেনাহ ‘‘একস্মিংযেৰ ঠানে হোতী’’তি. পঠমপদগণ্ঠিকাতি পচ্ছিমে সোপানফলকে ঠত্ৰা ঠপিযমানস্স দক্খিণপাদস্স পতিট্ঠহনট্ঠানং. তং পন যস্মা দল়্হং থিরং কেনচি অভেজ্জং হোতি, তস্মা ‘‘পদগণ্ঠী’’তি ৰুত্তং. যস্মিং ¶ ভূমিভাগে ইদানি জেতৰনমহাৰিহারো, তত্থ যস্মিং ঠানে পুরিমানং সব্ববুদ্ধানং মঞ্চা পঞ্ঞত্তা, তস্মিংযেৰ পদেসে অম্হাকম্পি ভগৰতো মঞ্চো পঞ্ঞত্তোতি কত্ৰা ‘‘চত্তারি মঞ্চপাদট্ঠানানি অৰিজহিতানেৰ হোন্তী’’তি ৰুত্তং. মঞ্চানং পন মহন্তখুদ্দকভাৰেন মঞ্চপঞ্ঞাপনপদেসস্স মহন্তামহন্ততা অপ্পমাণং, বুদ্ধানুভাৰেন পন সো পদেসো সব্বদা একপ্পমাণোযেৰ হোতীতি ‘‘চত্তারি মঞ্চপাদট্ঠানানি অৰিজহিতানেৰ হোন্তী’’তি ৰুত্তন্তি দট্ঠব্বং. ৰিহারোপি ন ৰিজহিতো যেৰাতি এত্থাপি এসেৰ নযো. পুরিমং ৰিহারট্ঠানং ন পরিচ্চজতীতি হি অত্থো.

ৰিসিট্ঠা মত্তা ৰিমত্তা, ৰিমত্তাৰ ৰেমত্তং, ৰিসদিসতাতি অত্থো. পমাণং আরোহো. পধানং দুক্করকিরিযা. রস্মীতি সরীরপ্পভা.

‘‘সত্তানং পাকতিকহত্থেন ছহত্থো মজ্ঝিমপুরিসো, ততো তিগুণং ভগৰতো সরীরপ্পমাণন্তি ভগৰা অট্ঠারসহত্থো’’তি ৰদন্তি. অপরে পন ভণন্তি ‘‘মনুস্সানং পাকতিকহত্থেন চতুহত্থো মজ্ঝিমপুরিসো, ততো তিগুণং ভগৰতো সরীরপ্পমাণন্তি ভগৰা দ্ৰাদসহত্থো উপাদিন্নকরূপধম্মৰসেন, সমন্ততো পন ব্যামমত্তং ব্যামপ্পভা ফরতীতি উপরি ছহত্থং অব্ভুগ্গতো, বহলতরপ্পভা রূপেন সদ্ধিং অট্ঠারসহত্থো হোতী’’তি.

অদ্ধনিযন্তি ¶ দীঘকালং.

অজ্ঝাসযপটিবদ্ধন্তি বোধিসম্ভারসম্ভরণকালে তথাপৰত্তজ্ঝাসযাধীনং, তথাপৰত্তপত্থনানুরূপং ৰিপুলং, ৰিপুলতরঞ্চ ¶ হোতীতি অত্থো. স্ৰাযমত্থো চরিযাপিটকৰণ্ণনাযং ৰুত্তনযেনেৰ ৰেদিতব্বো. এত্থ চ যস্মা সরীরপ্পমাণং, পধানং, সরীরপ্পভা চ বুদ্ধানং ৰিসদিসাতি ইধ পাল়িযং অনাগতা, তস্মা তেহি সদ্ধিং ৰেমত্ততাসামঞ্ঞেন আযুকুলানিপি ইধ আহরিত্ৰা দীপিতানি. পটিৰিদ্ধগুণেসূতি অধিগতসব্বঞ্ঞুগুণেসু. ননু চ বোধিসম্ভারেসু, ৰেনেয্যপুগ্গলপরিমাণে চ ৰেমত্তং নত্থীতি? সচ্চং নত্থি, তদুভযং পন বুদ্ধগুণগ্গহণেন গহিতমেৰ হোতীতি ন উদ্ধটং. যদগ্গেন হি সব্ববুদ্ধানং বুদ্ধগুণেসু ৰেমত্তং নত্থি, তদগ্গেন নেসং সম্বোধিসম্ভারেসুপি ৰেমত্তং নত্থীতি. কস্মা? হেতুঅনুরূপতায ফলস্স ¶ , একন্তেনেৰ ৰেনেয্যপুগ্গলপরিমাণে ৰেমত্তভাৰো ৰিভাৰিতো. মহাবোধিসত্তানঞ্হি হেতুঅৰত্থাযং সম্ভতূপনিস্সযিন্দ্রিযপরিপাকা ৰেনেয্যপুগ্গলা চরিমভৰে অরহত্তসম্পত্তিযা পরিপোসিতানি কমলৰনানি সূরিযরস্মিসম্ফস্সেন ৰিয তথাগতগুণানুভাৰসম্ফস্সেন ৰিবোধং উপগচ্ছন্তীতি দীপেসুং অট্ঠকথাচরিযা.

নিধিকুম্ভোতি চত্তারো মহানিধযো সন্ধায ৰদতি. জাতো চাতি. চ-সদ্দেন কতমহাভিনীহারো চাতি অযম্পি অত্থো সঙ্গহিতোতি দট্ঠব্বো. ৰুত্তং হেতং বুদ্ধৰংসে –

‘‘তারাগণা ৰিরোচন্তি, নক্খত্তা গগনমণ্ডলে;

ৰিসাখা চন্দিমাযুত্তা, ধুৰং বুদ্ধো ভৰিস্সতী’’তি. (বু. ৰং. ৬৫);

‘‘এতেনেৰ চ সব্ববুদ্ধানং ৰিসাখানক্খত্তেনেৰ মহাভিনীহারো হোতী’’তি চ ৰদন্তি.

১৩. অযং ¶ গতীতি অযং পৰত্তি পৰত্তনাকারো, অঞ্ঞে পুব্বেনিৰাসং অনুস্সরন্তা ইমিনা আকারেন অনুস্সরন্তীতি অত্থো, যস্মা চুতিতো পট্ঠায যাৰ পটিসন্ধি, তাৰ অনুস্সরণং আরোহনং অতীতঅতীততরঅতীততমাদিজাতিসঙ্খাতে পুব্বেনিৰাসে ঞাণস্স অভিমুখভাৰেন পৰত্তীতি কত্ৰা. তস্মা পটিসন্ধিতো পট্ঠায যাৰ চুতি, তাৰ অনুস্সরণং ওরোহনং পুব্বেনিৰাসে পটিমুখভাৰেন ঞাণস্স পৰত্তীতি আহ ‘‘পচ্ছামুখং ঞাণং পেসেত্ৰা’’তি. চুতিগন্তব্বন্তি যং পনিদং চুতিযা ঞাণগতিযা গন্তব্বং, তং গমনং বুজ্ঝনন্তি অত্থো. গরুকন্তি ভারিযং দুক্করং. তেনাহ ‘‘আকাসে পদং দস্সেন্তো ৰিযা’’তি. অপরম্পি কারণন্তি ¶ ছিন্নৰটুমানুস্সরণং পচ্ছামুখং ঞাণং পেসনতো অপরং অচ্ছরিযব্ভুতকারণং. যত্রাতি পচ্চত্তত্থে, নামাতি অচ্ছরিযত্থে নিপাতো, হি-সদ্দো অনত্থকো. তেনাহ ‘‘যো নাম তথাগতো’’তি. এৰঞ্চ কত্ৰা ‘‘যত্রা’’তি নিপাতৰসেন ৰিসুং যত্র-সদ্দগ্গহণং সমত্থিতং হোতি. পপঞ্চেন্তি সত্তসন্তানং সংসারে ৰিত্থারেন্তীতি পপঞ্চং. কম্মৰট্টং ৰুচ্চতীতি কিলেসৰট্টস্স পপঞ্চগ্গহণেন, ৰিপাকৰট্টস্স দুক্খগ্গহণেন গহিতত্তা. পরিযাদিন্নৰট্টেতি সব্বসো খেপিতৰট্টে. ‘‘মগ্গসীলেন ফলসীলেনা’’তি ৰত্ৰা তযিদং মগ্গফলসীলং লোকিযসীলপুব্বকং, বুদ্ধানঞ্চ ¶ লোকিযসীলম্পি লোকুত্তরসীলং ৰিয অনঞ্ঞসাধারণং এৰাতি দস্সেতুং ‘‘লোকিযলোকুত্তরসীলেনা’’তি ৰুত্তং. সমাধিপঞ্ঞাসুপি এসেৰ নযো. সমাধিপক্খাতি সমাধি চ সমাধিপক্খা চ সমাধিপক্খা, একদেসসরূপেকসেসো দট্ঠব্বো. তেনাহ ‘‘মগ্গসমাধিনা’’তিআদি, ‘‘ৰিহারো গহিতো ৰা’’তি চ. সমাধিপক্খা নাম ৰীরিযসতিআদযো.

সযন্তি অত্তনা. নীৰরণাদীহীতি নীৰরণেহি চেৰ তদেকট্ঠেহি চ পাপধম্মেহি, ৰিতক্কৰিচারাদীহি চ. ‘‘ৰিমুত্তত্তা ¶ ৰিমুত্তীতি সঙ্খ্যং গচ্ছন্তী’’তি ইমিনা ৰিমুত্তি-সদ্দস্স কম্মসাধনতং আহ অট্ঠসমাপত্তিআদিৰিসযত্তা তস্স. ৰিমুত্তত্তাতি চ ‘‘ৰিক্খম্ভনৰসেন ৰিমুত্তত্তা’’তিআদিনা যোজেতব্বং. তস্স তস্সাতি অনিচ্চানুপস্সনাদিকস্স. পচ্চনীকঙ্গৰসেনাতি পহাতব্বপটিপক্খঅঙ্গৰসেন. পটিপ্পস্সদ্ধন্তে উপ্পন্নত্তাতি কিলেসানং পটিপ্পস্সম্ভনং পটিপ্পস্সদ্ধং, সো এৰ অন্তো পরিযোসানভাৰতো, তস্মিং সাধেতব্বে নিব্বত্তত্তা, তংতংমগ্গৰজ্ঝকিলেসানং পটিপ্পস্সম্ভনৰসেন পৰত্তত্তাতি অত্থো. কিলেসেহি নিস্সটতা, অপগমো চ নিব্বানস্স তেহি ৰিৰিত্তত্তা এৰাতি আহ ‘‘দূরে ঠিতত্তা’’তি.

১৬. ধম্মধাতূতি ধম্মানং সভাৰো, অত্থতো চত্তারি অরিযসচ্চানি. সুপ্পটিৰিদ্ধাতি সুট্ঠু পটিৰিদ্ধা সৰাসনানং সব্বেসং কিলেসানং পজহনতো. এৰঞ্হি সব্বঞ্ঞুতা, দসবলঞাণাদযো চাতি সব্বে বুদ্ধগুণা ভগৰতা অধিগতা অহেসুং. অরহত্তং ধম্মধাতূতি কেচি. সব্বঞ্ঞুতঞাণন্তি অপরে. দ্ৰীহি পদেহীতি দ্ৰীহি ৰাক্যেহি. আবদ্ধন্তি পটিবদ্ধং তংমূলকত্তা উপরিদেসনায. দেৰচারিককোলাহলন্তি অত্তনো দেৰলোকে চারিকাযং সুদ্ধাৰাসদেৰানং কুতূহলপ্পৰত্তিং দস্সেন্তো সুত্তন্তপরিযোসানে (দী. নি. অট্ঠ. ২.৯১) ৰিচারেস্সতি, অত্থতো ৰিভাৰেস্সতীতি যোজনা. অযং দেসনাতি ‘‘ইতো সো ভিক্খৰে’’তিআদিনা (দী. নি. ২.৪) ৰিত্থারতো পৰত্তিতদেসনমাহ. নিদানকণ্ডেতিআদিতো দেসিতং উদ্দেসদেসনমাহ. সা হি ইমিস্সা দেসনায নিদানট্ঠানিযত্তা তথা ৰুত্তা.

বোধিসত্তধম্মতাৰণ্ণনা

১৭. ‘‘ৰিপস্সীতি ¶ তস্স নাম’’ন্তি ৰত্ৰা তস্স অন্ৰত্থতং দস্সেতুং ‘‘তঞ্চ খো’’তিআদি ৰুত্তং. ৰিৰিধে অত্থেতি তিরোহিতৰিদূরদেসগতাদিকে নীলাদিৰসেন ¶ নানাৰিধে, তদঞ্ঞে চ ইন্দ্রিযগোচরভূতে তে চ যথূপগতে, ৰোহারৰিনিচ্ছযে চাতি নানাৰিধে অত্থে. পস্সনকুসলতাযাতি দস্সনে নিপুণভাৰেন. যাথাৰতো ¶ ঞেয্যং বুজ্ঝতীতি বোধি, সো এৰ সত্তযোগতো বোধিসত্তোতি আহ ‘‘পণ্ডিতসত্তো বুজ্ঝনকসত্তো’’তি. সুচিন্তিতচিন্তিতাদিনা পন পণ্ডিতভাৰে ৰত্তব্বমেৰ নত্থি. যদা চ পনানেন মহাভিনীহারো কতো, ততো পট্ঠায মহাবোধিযং একন্তনিন্নত্তা বোধিম্হি সত্তো বোধিসত্তোতি আহ ‘‘বোধিসঙ্খাতেসূ’’তিআদি. মগ্গঞাণপদট্ঠানঞ্হি সব্বঞ্ঞুতঞাণং, সব্বঞ্ঞুতঞাণপদট্ঠানঞ্চ মগ্গঞাণং ‘‘বোধী’’তি ৰুচ্চতি. ‘‘সতো সম্পজানো’’তি ইমিনা চতুত্থায গব্ভাৰক্কন্তিযা ওক্কমীতি দস্সেতি. চতস্সো হি গব্ভাৰক্কন্তিযো ইধেকচ্চো গব্ভো মাতুকুচ্ছিযং ওক্কমনে, ঠানে, নিক্খমনেতি তীসু ঠানেসু অসম্পজানো হোতি, একচ্চো পঠমে ঠানে সম্পজানো, ন ইতরেসু, একচ্চো পঠমে, দুতিযে চ ঠানে সম্পজানো, ন ততিযে, একচ্চো তীসুপি ঠানেসু সম্পজানো হোতি. তত্থ পঠমা গব্ভাৰক্কন্তি লোকিযমহাজনস্স ৰসেন ৰুত্তা, দুতিযা অসীতিমহাসাৰকানং (থেরগা. অট্ঠ. ২.২১ ৰঙ্গীসত্থেরগাথাৰণ্ণনায ৰিত্থারো) ৰসেন, ততিযা দ্ৰিন্নং অগ্গসাৰকানং, পচ্চেকবুদ্ধানঞ্চ ৰসেন. তে কির কম্মজৰাতেহি উদ্ধংপাদা অধোসিরা অনেকসতপোরিসে পপাতে ৰিয যোনিমুখে খিত্তা তাল়চ্ছিগ্গল়েন হত্থী ৰিয সম্বাধেন যোনিমুখেন নিক্খমন্তা মহন্তং দুক্খং পাপুণন্তি, তেন নেসং ‘‘মযং নিক্খমামা’’তি সম্পজঞ্ঞং ন হোতি. চতুত্থা সব্বঞ্ঞুবোধিসত্তানং ৰসেন. তে হি মাতুকুচ্ছিম্হি পটিসন্ধিং গণ্হন্তাপি পজানন্তি, তত্থ ৰসন্তাপি পজানন্তি, নিক্খমনকালেপি পজানন্তি. ন হি তে কম্মজৰাতা উদ্ধংপাদে অধোসিরে কত্ৰা খিপিতুং সক্কোন্তি, দ্ৰে হত্থে পসারিত্ৰা অক্খীনি উম্মীলেত্ৰা ঠিতকাৰ নিক্খমন্তীতি. ঞাণেন পরিচ্ছিন্দিত্ৰাতি পুব্বভাগে পঞ্চমহাৰিলোকনঞাণেহি চেৰ ‘‘ইদানি চৰামী’’তি চুতিপরিচ্ছিন্দনঞাণেন চ অপরভাগে ‘‘ইধ মযা পটিসন্ধি গহিতা’’তি পটিসন্ধিপরিচ্ছিন্দনঞাণেন চ পরিচ্ছিজ্জ জানিত্ৰা.

পঞ্চন্নং ¶ মহাপরিচ্চাগানং, ঞাতত্থচরিযাদীনঞ্চ সতিপি পারমিযা পরিযাপন্নভাৰে সম্ভারৰিসেসভাৰদস্সনত্থং ৰিসুং গহণং. তত্থ অঙ্গপরিচ্চাগো, নযনপরিচ্চাগো, অত্তপরিচ্চাগো, রজ্জপরিচ্চাগো, পুত্তদারপরিচ্চাগোতি ইমে ¶ পঞ্চ মহাপরিচ্চাগা. তত্থাপি কামং অঙ্গপরিচ্চাগাদযোপি দানপারমীযেৰ, তথাপি পরিচ্চাগৰিসেসভাৰদস্সনত্থঞ্চেৰ সুদুক্করভাৰদস্সনত্থঞ্চ ¶ মহাপরিচ্চাগানং ৰিসুং গহণং. ততো এৰ চ অঙ্গপরিচ্চাগতোপি ৰিসুং নযনপরিচ্চাগগ্গহণং, পরিচ্চাগভাৰসামঞ্ঞেপি রজ্জপরিচ্চাগপুত্তদারপরিচ্চাগগ্গহণঞ্চ কতং. ঞাতীনং অত্থচরিযা ঞাতত্থচরিযা, সা চ খো করুণাযনৰসেন. তথা সত্তলোকস্স দিট্ঠধম্মিকসম্পরাযিকপরমত্থানং ৰসেন হিতচরিযা লোকত্থচরিযা. কম্মস্সকতাঞাণৰসেন, অনৰজ্জকম্মাযতনসিপ্পাযতনৰিজ্জাঠানৰসেন, খন্ধাযতনাদিৰসেন, লক্খণত্তযাদিতীরণৰসেন চ অত্তনো, পরেসঞ্চ তত্থ সতিপট্ঠানেন ঞাণচারো বুদ্ধচরিযা, সা পনত্থতো পঞ্ঞাপারমীযেৰ, ঞাণসম্ভারৰিসেসতাদস্সনত্থং পন ৰিসুং গহণং. বুদ্ধচরিযানন্তি বহুৰচননিদ্দেসেন পুব্বযোগপুব্বচরিযাধম্মক্খানাদীনং সঙ্গহো দট্ঠব্বো. তত্থ গতপচ্চাগতৰত্তসঙ্খাতায পুব্বভাগপটিপদায সদ্ধিং অভিঞ্ঞাসমাপত্তিনিপ্ফাদনং পুব্বযোগো. দানাদীসুযেৰ সাতিসযপটিপত্তি পুব্বচরিযা. ‘‘যাৰ চরিযাপিটকে সঙ্গহিতা অভিনীহারো পুব্বযোগো, কাযাদিৰিৰেকৰসেন একচরিযা পুব্বচরিযা’’তি কেচি. দানাদীনঞ্চেৰ অপ্পিচ্ছতাদীনঞ্চ সংসারনিব্বানেসু আদীনৰানিসংসানঞ্চ ৰিভাৰনৰসেন, সত্তানং বোধিত্তযে পতিট্ঠাপনপরিপাচনৰসেন ¶ চ পৰত্তকথা ধম্মক্খানং. কোটিং পত্ৰাতি পরং পরিযন্তং পরমুক্কংসং পাপুণিত্ৰা. সত্তমহাদানানীতি অট্ঠৰস্সিককালে ‘‘হদযমংসাদীনিপি যাচকানং দদেয্য’’ন্তি অজ্ঝাসযং উপ্পাদেত্ৰা দিন্নদানং, মঙ্গলহত্থিদানং, গমনকালে দিন্নং সত্তসত্তকমহাদানং, মগ্গং গচ্ছন্তেন দিন্নং অস্সদানং, রথদানং, পুত্তদানং, ভরিযাদানন্তি ইমানি সত্ত মহাদানানি (চরিযা. ৭৯) দত্ৰা.

‘‘ইদানেৰ মে মরণং হোতূ’’তি অধিমুচ্চিত্ৰা কালকরণং অধিমুত্তিকালকিরিযা, তং বোধিসত্তানংযেৰ, ন অঞ্ঞেসং. বোধিসত্তা কির দীঘাযুকদেৰলোকে ঠিতা ‘‘ইধ ঠিতস্স মে বোধিসম্ভারসম্ভরণং ন সম্ভৰতী’’তি কত্ৰা তত্থ ৰাসতো নিব্বিন্দমানসা হোন্তি, তদা ৰিমানং পৰিসিত্ৰা অক্খীনি নিমীলেত্ৰা ‘‘ইতো উদ্ধং মে জীৰিতং নপ্পৰত্ততূ’’তি চিত্তং অধিট্ঠায নিসীদন্তি, চিত্তাধিট্ঠানসমনন্তরমেৰ মরণং হোতি. পারমীধম্মানঞ্হি ¶ উক্কংসপ্পৰত্তিযা তস্মিং তস্মিং অত্তভাৰে অভিঞ্ঞাসমাপত্তীহি সন্তানস্স ৰিসেসিতত্তা অত্তসিনেহস্স তনুভাৰেন, সত্তেসু চ মহাকরুণায উল়ারভাৰেন অধিট্ঠানস্স তিক্খৰিসদভাৰাপত্তিযা বোধিসত্তানং অধিপ্পাযা সমিজ্ঝন্তি. চিত্তে, ৰিয কম্মেসু চ নেসং ৰসীভাৰো, তস্মা যত্থ উপপন্নানং পারমিযো সম্মদেৰ পরিব্রূহন্তি. ৰুত্তনযেন কালং কত্ৰা তত্থ উপপজ্জন্তি. তথা হি অম্হাকং মহাসত্তো ইমস্মিংযেৰ কপ্পে নানাজাতীসু অপরিহীনজ্ঝানো কালং কত্ৰা ব্রহ্মলোকে নিব্বত্তো, অপ্পকমেৰ কালং তত্থ ঠত্ৰা ততো চৰিত্ৰা মনুস্সলোকে নিব্বত্তো, পারমীসম্ভরণপসুতো অহোসি. তেন ৰুত্তং ‘‘বোধিসত্তানংযেৰ, ন ¶ অঞ্ঞেস’’ন্তি. ‘‘একেনঅত্তভাৰেন অন্তরেন পারমীনং সব্বসো পূরিতত্তা’’তি ইমিনা পযোজনাভাৰতো তত্থ ঠত্ৰা অধিমুত্তিকালকিরিযা ¶ নাম নাহোসীতি দস্সেতি. অপি চ তত্থ যাৰতাযুকট্ঠানং চরিমভৰে অনেকমহানিধিসমুট্ঠানপুব্বিকায দিব্বসম্পত্তিসদিসায মহাসম্পত্তিযা নিব্বত্তি ৰিয, বুদ্ধভূতস্স অসদিসদানাদিৰসেন অনঞ্ঞসাধারণলাভুপ্পত্তি ৰিয চ ‘‘ইতো পরং মহাপুরিসস্স দিব্বসম্পত্তিঅনুভৰনং নাম নত্থী’’তি উস্সাহজাতস্স পুঞ্ঞসম্ভারস্স ৰসেনাতি দট্ঠব্বং. অযঞ্হেত্থ ধম্মতা.

মনুস্সগণনাৰসেন, ন দেৰগণনাৰসেন. পুব্বনিমিত্তানীতি চুতিযা পুব্বনিমিত্তানি. অমিলাযিত্ৰাতি এত্থ অমিলাতগ্গহণেনেৰ তাসং মালানং ৰণ্ণসম্পদাযপি গন্ধসম্পদাযপি সোভাসম্পদাযপি অৰিনাসো দস্সিতোতি দট্ঠব্বং. বাহিরব্ভন্তরানং রজোজল্লানং লেপস্সপি অভাৰতো দেৰানং সরীরগতানি ৰত্থানি সব্বকালং পরিসুদ্ধপ্পভস্সরানেৰ হুত্ৰা তিট্ঠন্তীতি আহ ‘‘ৰত্থেসুপি এসেৰ নযো’’তি. নেৰ সীতং ন উণ্হন্তি যস্স সীতস্স পটিকারৰসেন অধিকং সেৰিযমানং উণ্হং, সযমেৰ ৰা খরতরং হুত্ৰা অভিভৰন্তং সরীরে সেদং উপ্পাদেয্য, তাদিসং নেৰ সীতং, ন উণ্হং হোতি. তস্মিং কালেতি যথাৰুত্তমরণাসন্নকালে. বিন্দুবিন্দুৰসেনাতি ছিন্নসুত্তায আমুত্তমুত্তাৰলিযা নিপতন্তা মুত্তগুল়িকা ৰিয বিন্দু বিন্দু হুত্ৰা. সেদাতি সেদধারা মুচ্চন্তি. দন্তানং খণ্ডিতভাৰো খণ্ডিচ্চং. কেসানং পলিতভাৰো পালিচ্চং. আদি-সদ্দেন ৰলিত্তচতং সঙ্গণ্হাতি. কিলন্তরূপো অত্তভাৰো হোতি, ন পন খণ্ডিচ্চপালিচ্চাদীতি ¶ অধিপ্পাযো. উক্কণ্ঠিতাতি অনভিরতি. সা নত্থি ¶ উপরূপরি উল়ারউল়ারানমেৰ ভোগানং ৰিসেসতো দুৰিজাননানং উপতিট্ঠহনতো. নিস্সসন্তীতি উণ্হং নিস্সসন্তি. ৰিজম্ভন্তীতি অনভিরতিৰসেন ৰিজম্ভনং করোন্তি.

পণ্ডিতা এৰাতি বুদ্ধিসম্পন্না এৰ দেৰতা. যথা দেৰতা সম্পতিজাতা ‘‘কীদিসেন পুঞ্ঞকম্মেন ইধ নিব্বত্তা’’তি চিন্তেত্ৰা ‘‘ইমিনা নাম পুঞ্ঞকম্মেন ইধ নিব্বত্তা’’তি জানন্তি, এৰং অতীতভৰে অত্তনা কতং, অঞ্ঞদাপি ৰা একচ্চং পুঞ্ঞকম্মং জানন্তিযেৰ মহাপুঞ্ঞাতি আহ ‘‘যে মহাপুঞ্ঞা’’তিআদি.

ন পঞ্ঞাযন্তি চিরতরকালত্তা পরমাযুনো. অনিয্যানিকন্তি ন নিয্যানাৰহং সত্তানং অভাজনভাৰতো. সত্তা ন পরমাযুনো হোন্তি নাম পাপুস্সন্নতাযাতি আহ ‘‘তদা হি সত্তা উস্সন্নকিলেসা হোন্তী’’তি. এত্থাহ – কস্মা সম্মাসম্বুদ্ধা মনুস্সলোকে এৰ উপ্পজ্জন্তি, ন দেৰব্রহ্মলোকেসূতি? দেৰলোকে তাৰ নুপ্পজ্জন্তি ব্রহ্মচরিযৰাসস্স অনোকাসভাৰতো, তথা অনচ্ছরিযভাৰতো ¶ . অচ্ছরিযধম্মা হি বুদ্ধা ভগৰন্তো, তেসং সা অচ্ছরিযধম্মতা দেৰত্তভাৰে ঠিতানং ন পাকটা হোতি যথা মনুস্সভূতানং, দেৰভূতে হি সম্মাসম্বুদ্ধে দিস্সমানং বুদ্ধানুভাৰং দেৰানুভাৰতো লোকো দহতি, ন বুদ্ধানুভাৰতো, তথা সতি ‘‘সম্মাসম্বুদ্ধো’’তি নাধিমুচ্চতি ন সম্পসীদতি, ইস্সরগুত্তগ্গাহং ন ৰিস্সজ্জেতি, দেৰত্তভাৰস্স চ চিরকালাধিট্ঠানতো একচ্চসস্সতৰাদতো ন পরিমুচ্চতি. ব্রহ্মলোকে নুপ্পজ্জন্তীতি এত্থাপি এসেৰ নযো. সত্তানং তাদিসগ্গাহৰিনিমোচনত্থঞ্হি বুদ্ধা ভগৰন্তো মনুস্সসুগতিযংযেৰ উপ্পজ্জন্তি, ন দেৰসুগতিযং. মনুস্সসুগতিযং উপ্পজ্জন্তাপি ওপপাতিকা ন হোন্তি, সতি চ ওপপাতিকূপপত্তিযং ৰুত্তদোসানতিৰত্তনতো, ধম্মৰেনেয্যানং ধম্মতন্তিযা ঠপনস্স ¶ ৰিয ধাতুৰেনেয্যানং ধাতূনং ঠপনস্স ইচ্ছিতব্বত্তা চ. ন হি ওপপাতিকানং পরিনিব্বানতো উদ্ধং সরীরধাতুযো তিট্ঠন্তি. মনুস্সলোকে উপ্পজ্জন্তাপি মহাবোধিসত্তা চরিমভৰে মনুস্সভাৰস্স পাকটভাৰকরণায পন দারপরিগ্গহম্পি করোন্তা যাৰ পুত্তমুখদস্সনা অগারমজ্ঝে তিট্ঠন্তি, পরিপাকগতসীলনেক্খম্মপঞ্ঞাদিপারমিকাপি ন অভিনিক্খমন্তীতি. কিং ৰা এতায ¶ কারণচিন্তায ‘‘সব্ববুদ্ধেহি আচিণ্ণসমাচিণ্ণা, যদিদং মনুস্সভূতানংযেৰ অভিসম্বুজ্ঝনা, ন দেৰভূতান’’ন্তি. অযমেত্থ ধম্মতা. তথা হি তদত্থো মহাভিনীহারোপি মনুস্সভূতানংযেৰ ইজ্ঝতি, ন দেৰভূতানং.

কস্মা পন সম্মাসম্বুদ্ধা জম্বুদীপে এৰ উপ্পজ্জন্তি, ন সেসদীপেসু? কেচি তাৰ আহু ‘‘যস্মা পথৰিযা নাভিভূতা, বুদ্ধানুভাৰসহিতা অচলট্ঠানভূতা বোধিমণ্ডভূমি জম্বুদীপে এৰ, তস্মা জম্বুদীপে এৰ উপ্পজ্জন্তী’’তি, তথা ‘‘ইতরেসম্পি অৰিজহিতট্ঠানানং তত্থেৰ লব্ভনতো’’তি. অযং পনেত্থ অম্হাকং খন্তি – যস্মা পুরিমবুদ্ধানং, মহাবোধিসত্তানং, পচ্চেকবুদ্ধানঞ্চ নিব্বত্তিযা সাৰকবোধিসত্তানং সাৰকবোধিযা অভিনীহারো, সাৰকপারমিযা সম্ভরণং, পরিপাচনঞ্চ বুদ্ধখেত্তভূতে ইমস্মিং চক্কৰাল়ে জম্বুদীপে এৰ ইজ্ঝতি, ন অঞ্ঞত্থ. ৰেনেয্যানং ৰিনযনত্থো চ বুদ্ধুপ্পাদোতি অগ্গসাৰকমহাসাৰকাদি ৰেনেয্যৰিসেসাপেক্খায এতস্মিং জম্বুদীপে এৰ বুদ্ধা নিব্বত্তন্তি, ন সেসদীপেসু. অযঞ্চ নযো সব্ববুদ্ধানং আচিণ্ণসমাচিণ্ণোতি. তেসং উত্তমপুরিসানং তত্থেৰ উপ্পত্তি সম্পত্তিচক্কানং ৰিয অঞ্ঞমঞ্ঞূপনিস্সযতো অপরাপরং ¶ ৰত্ততীতি দট্ঠব্বং, এতেনেৰ ইমং চক্কৰাল়ং মজ্ঝে কত্ৰা ইমিনা সদ্ধিং চক্কৰাল়ানং দসসহস্সস্সেৰ খেত্তভাৰো দীপিতো ইতো অঞ্ঞস্স বুদ্ধানং উপ্পত্তিট্ঠানস্স তেপিটকে বুদ্ধৰচনে অনুপলব্ভনতো. তেনাহ ‘‘তীসু দীপেসু বুদ্ধা ন নিব্বত্তন্তি, জম্বুদীপেযেৰ নিব্বত্তন্তীতি দীপং পস্সী’’তি. ইমিনা নযেন দেসনিযামেপি কারণং নীহরিত্ৰা ৰত্তব্বং.

ইদানি ¶ চ খত্তিযকুলং লোকসম্মতং ব্রাহ্মণানম্পি পূজনীযভাৰতো. ‘‘রাজা পিতা ভৰিস্সতী’’তি কুলং পস্সি পিতুৰসেন কুলস্স নিদ্দিসিতব্বতো.

‘‘দসন্নং মাসানং উপরি সত্ত দিৰসানী’’তি পস্সি, তেন অত্তনো অন্তরাযাভাৰং অঞ্ঞাসি, তস্সা চ তুসিতভৰে দিব্বসম্পত্তিপচ্চনুভৰনং.

তা দেৰতাতি দসসহস্সিচক্কৰাল়দেৰতা. কথং পন তা দেৰতা তদা বোধিসত্তস্স পূরিতপারমিভাৰং, কথং চস্স বুদ্ধভাৰং জানন্তীতি? মহেসক্খানং ¶ দেৰতানং ৰসেন, যেভুয্যেন চ তা দেৰতা অভিসমযভাগিনো. তথা হি ভগৰতো ধম্মদানসংৰিভাগে অনেকৰারং দসসহস্সচক্কৰাল়দেৰতাসন্নিপাতো অহোসি.

‘‘চৰামী’’তি জানাতি চুতিআসন্নজৰনেহি ঞাণসহিতেহি চুতিযা উপট্ঠিতভাৰস্স পটিসংৰিদিতত্তা. চুতিচিত্তং ন জানাতি চুতিচিত্তক্খণস্স ইত্তরভাৰতো. তথা হি তং চুতূপপাতঞাণস্সপি অৰিসযোৰ. পটিসন্ধিচিত্তেপি এসেৰ নযো. আৰজ্জনপরিযাযোতি আৰজ্জনক্কমো. যস্মা একৰারং আৰজ্জিতমত্তেন আরম্মণং নিচ্ছিনিতুং ন সক্কা, তস্মা তং এৰারম্মণং দুতিযং, ততিযঞ্চ আৰজ্জিত্ৰা নিচ্ছযতি. আৰজ্জনসীসেন চেত্থ জৰনৰারো গহিতো. তেনাহ ‘‘দুতিযততিযচিত্তৰারে এৰ জানিস্সতী’’তি. চুতিযা পুরেতরং কতিপযচিত্তৰারতো পট্ঠায ‘‘মরণং মে আসন্ন’’ন্তি ¶ জাননতো ‘‘চুতিক্খণেপি চৰামীতি জানাতী’’তি ৰুত্তং. পটিসন্ধিযা পন অপুব্বভাৰতো পটিসন্ধিচিত্তং ন জানাতি. নিকন্তিযা উপ্পত্তিতো পরতো ‘‘অসুকস্মিং মে ঠানে পটিসন্ধি গহিতা’’তি জানাতি. তস্মিং কালেতি পটিসন্ধিগ্গহণকালে. দসসহস্সিলোকধাতু কম্পতীতি এত্থ কম্পনকারণং হেট্ঠা ব্রহ্মজালৰণ্ণনাযং (দী. নি. টী. ১.১৪৯) ৰুত্তমেৰ. অত্থতো পনেত্থ যং ৰত্তব্বং, তং পরতো মহাপরিনিব্বানৰণ্ণনাযং (দী. নি. অট্ঠ. ২.১৭১) আগমিস্সতি. মহাকারুণিকা বুদ্ধা ভগৰন্তো সত্তানং হিতসুখৰিধানতপ্পরতায বহুলং সোমনস্সিকাৰ হোন্তীতি তেসং পঠমমহাৰিপাকচিত্তেন পটিসন্ধিগ্গহণং অট্ঠকথাযং (দী. নি. অট্ঠ. ২.১৭; ধ. স. অট্ঠ. ৪৯৮; ম. নি. অট্ঠ. ৪.২০০) ৰুত্তং. মহাসিৰত্থেরোপন যদিপি মহাকারুণিকা বুদ্ধা ভগৰন্তো সত্তানং হিতসুখৰিধানতপ্পরাৰ, ৰিৰেকজ্ঝাসযা পন ৰিসঙ্খারনিন্না সব্বসঙ্খারেসু অজ্ঝুপেক্খনবহুলাতি পঞ্চমমহাৰিপাকচিত্তেন পটিসন্ধিগ্গহণমাহ.

পুরে পুণ্ণমায সত্তমদিৰসতো পট্ঠাযাতি পুণ্ণমায পুরে সত্তমদিৰসতো পট্ঠায, সুক্কপক্খে ¶ নৰমিতো পট্ঠাযাতি অত্থো. সত্তমে দিৰসেতি নৰমিতো সত্তমে দিৰসে আসল়্হিপুণ্ণমাযং. ইদং সুপিনন্তি ইদানি ৰুচ্চমানাকারং. মজ্ঝিমট্ঠকথাযং পন ‘‘অনোতত্তদহং নেত্ৰা একমন্তং অট্ঠংসু. অথ নেসং দেৰিযো আগন্ত্ৰা মনুস্সমলহরণত্থং ন্হাপেত্ৰা’’তি ¶ (ম. নি. অট্ঠ. ৪.২০০) ৰুত্তং. তত্থ নেসং দেৰিযোতি মহারাজূনং দেৰিযো. চরিত্ৰাতি গোচরং চরিত্ৰা.

হরিতূপলিত্তাযাতি হরিতেন গোমযেন কতপরিভণ্ডায. ‘‘সো চ খো পুরিসগব্ভো, ন ইত্থিগব্ভো, পুত্তো তে ভৰিস্সতী’’তি এত্তকমেৰ ¶ তে ব্রাহ্মণা অত্তনো সুপিনসত্থনযেন কথেসুং. ‘‘সচে অগারং অজ্ঝাৰসিস্সতী’’তিআদি পন দেৰতাৰিগ্গহেন তমত্থং যাথাৰতো পৰেদেসুং.

ধম্মতাতি এত্থ ধম্ম-সদ্দো ‘‘জাতিধম্মানং ভিক্খৰে সত্তান’’ন্তিআদীসু (ম. নি. ১.১৩১; ৩.৩৭৩; পটি. ম. ১.৩৩) ৰিয পকতিপরিযাযো, ধম্মো এৰ ধম্মতা যথা দেৰো এৰ দেৰতাতি আহ ‘‘অযং সভাৰো’’তি, অযং পকতীতি অত্থো. স্ৰাযং সভাৰো অত্থতো তথা নিযতভাৰোতি আহ ‘‘অযং নিযামোতি ৰুত্তং হোতী’’তি. নিযামো পন বহুৰিধোতি তে সব্বে অত্থুদ্ধারনযেন উদ্ধরিত্ৰা ইধাধিপ্পেতনিযামমেৰ দস্সেতুং ‘‘নিযামো চ নামা’’তিআদি ৰুত্তং. তত্থ কম্মানং নিযামো কম্মনিযামো. এস নযো উতুনিযামাদীসু তীসু. ইতরো পন ধম্মো এৰ নিযামো ধম্মনিযামো, ধম্মতা.

কুসলস্স কম্মস্স. নিসেন্তো তিখিণং করোন্তো.

অরূপাদিভূমিভাগৰিসেসৰসেন উতুৰিসেসদস্সনতো উতুৰিসেসেন সিজ্ঝমানানং রুক্খাদীনং পুপ্ফফলাদিগ্গহণং ‘‘তেসু তেসু জনপদেসূ’’তি ৰিসেসেত্ৰা ৰুত্তং. তস্মিং তস্মিং কালেতি তস্মিং তস্মিং ৰসন্তাদিকালে.

মধুরতো বীজতো তিত্ততো বীজতোতি যোজনা.

১৮. ৰত্তমানসমীপে ৰত্তমানে ৰিয ৰোহরিতব্বন্তি ‘‘ওক্কমতী’’তি ৰুত্তন্তি আহ ‘‘ওক্কন্তো হোতীতি অযমেৰত্থো’’তি. এৰং হোতীতি এৰং ৰুত্তপ্পকারেনস্স সম্পজাননা হোতি. ন ওক্কমমানে পটিসন্ধিক্খণস্স দুৰিঞ্ঞেয্যতায. যথা চ ৰুত্তং ‘‘পটিসন্ধিচিত্তং ন জানাতী’’তি. দসসহস্সচক্কৰাল়পত্থরণেন ¶ ৰা অপ্পমাণো. অতিৰিয সমুজ্জলনভাৰেন উল়ারো ¶ . দেৰানুভাৰন্তি দেৰানং পভানুভাৰং. দেৰানঞ্হি পভং সো ওভাসো ¶ অভিভৰতি, ন তেসং আধিপচ্চং. তেনাহ ‘‘নিৰত্থৰত্থস্সা’’তিআদি.

লোকানং লোকধাতূনং অন্তরো ৰিৰরো লোকন্তরো, সো এৰ ইত্থিলিঙ্গৰসেন ‘‘লোকন্তরিকা’’তি ৰুত্তো. রুক্খগচ্ছাদিনা কেনচি ন হঞ্ঞন্তীতি অঘা, অসম্বাধা. তেনাহ ‘‘নিচ্চৰিৰটা’’তি. অসংৰুতাতি হেট্ঠা, উপরি চ কেনচি ন পিহিতা. তেন ৰুত্তং ‘‘হেট্ঠাপি অপ্পতিট্ঠা’’তি. তত্থ পি-সদ্দেন যথা হেট্ঠা উদকস্স পিধাযিকা পথৰী নত্থীতি অসংৰুতা লোকন্তরিকা, এৰং উপরিপি চক্কৰাল়েসু ৰিয দেৰৰিমানানং অভাৰতো অসংৰুতা অপ্পতিট্ঠাতি দস্সেতি. অন্ধকারো এত্থ অত্থীতি অন্ধকারা. চক্খুৰিঞ্ঞাণং ন জাযতি আলোকস্স অভাৰতো, ন চক্খুনো. তথা হি ‘‘তেন ওভাসেন অঞ্ঞমঞ্ঞং সঞ্জানন্তী’’তি ৰুত্তং. জম্বুদীপে ঠিতমজ্ঝন্হিকৰেলাযং পুব্বৰিদেহৰাসীনং অত্থঙ্গমনৰসেন উপড্ঢং সূরিযমণ্ডলং পঞ্ঞাযতি, অপরগোযানৰাসীনং উগ্গমনৰসেন, এৰং সেসদীপেসু পীতি আহ ‘‘একপ্পহারেনেৰ তীসু দীপেসু পঞ্ঞাযন্তী’’তি. ইতো অঞ্ঞথা পন দ্ৰীসু এৰ দীপেসু একপ্পহারেন পঞ্ঞাযন্তীতি. একেকায দিসায নৰ নৰ যোজনসতসহস্সানি অন্ধকারৰিধমনম্পি ইমিনাৰ নযেন দট্ঠব্বং. পভায নপ্পহোন্তীতি অত্তনো পভায ওভাসিতুং অনভিসম্ভুনন্তি. যুগন্ধরপব্বতপ্পমাণে আকাসে ৰিচরণতো ‘‘চক্কৰাল়পব্বতস্স ৰেমজ্ঝেন ৰিচরন্তী’’তি ৰুত্তং.

ৰাৰটাতি ¶ খাদনত্থং গণ্হিতুং উপক্কমন্তা. ৰিপরিৰত্তিত্ৰাতি ৰিৰত্তিত্ৰা. ছিজ্জিত্ৰাতি মুচ্ছাপত্তিযা ঠিতট্ঠানতো মুচ্চিত্ৰা, অঙ্গপচ্চঙ্গছেদনেন ৰা ছিজ্জিত্ৰা. অচ্চন্তখারেতি আতপসন্তাপাভাৰেন অতিসীতভাৰমেৰ সন্ধায অচ্চন্তখারতা ৰুত্তা সিযা. ন হি তং কপ্পসণ্ঠহনউদকং সম্পত্তিকরমহামেঘৰুট্ঠং পথৰিসন্ধারকং কপ্পৰিনাসকং উদকং ৰিয খারং ভৰিতুং অরহতি. তথা হি সতি পথৰীপি ৰিলীযেয্য, তেসং ৰা পাপকম্মবলেন পেতানং উদকস্স পুব্বখেল়ভাৰাপত্তি ৰিয তস্স উদকস্স তদা খারভাৰাপত্তি হোতীতি ৰুত্তং ‘‘অচ্চন্তখারে উদকে’’তি.

একযাগুপানমত্তম্পীতি পত্তাদিভাজনগতং যাগুং গল়োচিআদিউদ্ধরণিযা গহেত্ৰা পিৰনমত্তম্পি কালং. সমন্ততোতি সব্বভাগতো ছপ্পকারম্পি.

১৯. চতুন্নং ¶ মহারাজানং ৰসেনাতি ৰেস্সৰণাদিচতুমহারাজভাৰসামঞ্ঞেন.

যথাৰিহারন্তি ¶ যথাসকং ৰিহারং.

২০. পকতিযাতি অত্তনো পকতিযা এৰ. তেনাহ ‘‘সভাৰেনেৰা’’তি. পরস্স সন্তিকে গহণেন ৰিনা অত্তনো সভাৰেনেৰ সযমেৰ অধিট্ঠহিত্ৰা সীলসম্পন্না. বোধিসত্তমাতাপীতি অম্হাকং বোধিসত্তমাতাপি. কালদেৰিলস্সাতি যথা কালদেৰিলস্স সন্তিকে অঞ্ঞদা গণ্হাতি, বোধিসত্তে পন…পে… সযমেৰ সীলং অগ্গহেসি, তথা ৰিপস্সীবোধিসত্তমাতাপীতি অধিপ্পাযো.

২১. ‘‘মনুস্সেসূ’’তি ইদং পকতিচারিত্তৰসেন ৰুত্তং, ‘‘মনুস্সিত্থিযা নাম মনুস্সপুরিসেসু পুরিসাধিপ্পাযচিত্তং উপ্পজ্জেয্যা’’তি. বোধিসত্তস্স মাতুযা পন দেৰেসুপি তাদিসং চিত্তং নুপ্পজ্জতেৰ. যথা বোধিসত্তস্স আনুভাৰেন বোধিসত্তমাতু পুরিসাধিপ্পাযচিত্তং নুপ্পজ্জতি, এৰং তস্স আনুভাৰেনেৰ সা কেনচি পুরিসেন অনভিভৰনীযাতি আহ ‘‘পাদা ন ৰহন্তি দিব্বসঙ্খলিকা ৰিয বজ্ঝন্তী’’তি.

২২. পুব্বে ¶ ‘‘কামগুণূপসংহিতং চিত্তং নুপ্পজ্জতী’’তি ৰুত্তং, পুন ‘‘পঞ্চহি কামগুণেহি সমপ্পিতা সমঙ্গীভূতা পরিচারেতী’’তি চ ৰুত্তং. কথমিদং অঞ্ঞমঞ্ঞং ন ৰিরুজ্ঝতীতি আহ ‘‘পুব্বে’’তিআদি. ৰত্থুপটিক্খেপোতি অব্রহ্মচরিযৰত্থুপটিসেধো. তেনাহ ‘‘পুরিসাধিপ্পাযৰসেনা’’তি. আরম্মণপটিলাভোতি রূপাদিপঞ্চকামগুণারম্মণস্সেৰ পটিলাভো.

২৩. কিলমথোতি খেদো, কাযস্স গরুভাৰকথিনভাৰাদযোপি তস্সা তদা ন হোন্তি এৰ. ‘‘তিরোকুচ্ছিগতং পস্সতী’’তি ৰুত্তং. কদা পট্ঠায পস্সতীতি আহ ‘‘কললাদিকালং অতিক্কমিত্ৰা’’তিআদি. দস্সনে পযোজনং সযমেৰ ৰদতি. তস্স অভাৰতো কললাদিকালে ন পস্সতি. পুত্তেন দহরেন মন্দেন উত্তানসেয্যকেন সদ্ধিং. ‘‘যং তং মাতূ’’তিআদি পকতিচারিত্তৰসেন ৰুত্তং. চক্কৰত্তিগব্ভতোপি হি সৰিসেসং বোধিসত্তগব্ভো পরিহারং লভতি পুঞ্ঞসম্ভারস্স সাতিসযত্তা, তস্মা বোধিসত্তমাতা অতিৰিয সপ্পাযাহারাচারা চ হুত্ৰা সক্কচ্চং পরিহরতি. সুখৰাসত্থন্তি বোধিসত্তস্স সুখৰাসত্থং. পুরত্থাভিমুখোতি মাতু ¶ পুরিমভাগাভিমুখো. ইদানি তিরোকুচ্ছিগতস্স দিস্সমানতায অব্ভন্তরং, বাহিরঞ্চ কারণং দস্সেতুং ‘‘পুব্বে কতকম্ম’’ন্তিআদি ৰুত্তং. অস্সাতি দেৰিযা. ৰত্থুন্তি কুচ্ছিং. ফলিকঅব্ভপটলাদিনো ৰিয বোধিসত্তমাতুকুচ্ছিতচস্স পতনুভাৰেন আলোকস্স ৰিবন্ধাভাৰতো যথা বোধিসত্তমাতা কুচ্ছিগতং বোধিসত্তং পস্সতি, কিং এৰং বোধিসত্তোপি মাতরং, অঞ্ঞঞ্চ পুরতো ঠিতং রূপগতং পস্সতি, নোতি আহ ‘‘বোধিসত্তো পনা’’তিআদি. কস্মা ¶ পন সতি চক্খুম্হি, আলোকে চ ন পস্সতীতি আহ ‘‘ন হি অন্তোকুচ্ছিযং চক্খুৰিঞ্ঞাণং উপ্পজ্জতী’’তি. অস্সাসপস্সাসা ৰিয হি তত্থ চক্খুৰিঞ্ঞাণম্পি ন উপ্পজ্জতি তজ্জস্স সমন্নাহারস্স অভাৰতো.

২৪. যথা ¶ অঞ্ঞা ইত্থিযো ৰিজাতপ্পচ্চযা তাদিসেন রোগেন অভিভূতাপি হুত্ৰা মরন্তি, বোধিসত্তমাতু পন বোধিসত্তে কুচ্ছিগতে তস্স ৰিজাযননিমিত্তং, ন কোচি রোগো উপ্পজ্জতি, কেৰলং আযুপরিক্খযেনেৰ কালং করোতি, স্ৰাযমত্থো হেট্ঠা ৰুত্তো এৰ. ‘‘বোধিসত্তেন ৰসিতট্ঠানঞ্হী’’তিআদি তস্স কারণৰচনং. অঞ্ঞেসং অপরিভোগন্তি অঞ্ঞেহি ন পরিভুঞ্জিতব্বং, ন পরিভোগযোগ্যন্তি অত্থো. তথা সতি বোধিসত্তপিতু অঞ্ঞায অগ্গমহেসিযা ভৰিতব্বং, তথাপি বোধিসত্তমাতরি ধরন্তিযা অযুজ্জমানকন্তি আহ ‘‘ন চ সক্কা’’তিআদি. অপনেত্ৰাতি অগ্গমহেসিঠানতো নীহরিত্ৰা. অত্তনি ছন্দরাগৰসেনেৰ বহিদ্ধা আরম্মণপরিযেসনাতি ৰিসযিনিসারাগো সত্তানং ৰিসযেসু সারাগস্স বলৰকারণন্তি দস্সেন্তো আহ ‘‘সত্তানং অত্তভাৰে ছন্দরাগো বলৰা হোতী’’তি. অনুরক্খিতুং ন সক্কোতীতি সম্মা গব্ভপরিহারং নানুযুঞ্জতি. তেন গব্ভো বহ্ৰাবাধো হোতি. ৰত্থু ৰিসদং হোতীতি গব্ভাসযো ৰিসুদ্ধো হোতি. মাতু মজ্ঝিমৰযস্স ততিযকোট্ঠাসে বোধিসত্তগব্ভোক্কমনম্পি তস্সা আযুপরিমাণৰিলোকনেনেৰ সঙ্গহিতং ৰযোৰসেন উপ্পজ্জনকৰিকারস্স পরিৰজ্জনতো. ইত্থিসভাৰেন উপ্পজ্জনকৰিকারো পন বোধিসত্তস্স আনুভাৰেনেৰ ৰূপসমতি.

২৫. সত্তমাসজাতোতি পটিসন্ধিগ্গহণতো সত্তমে মাসে জাতো. সো সীতুণ্হক্খমো ন হোতি অতিৰিয সুখুমালতায. অট্ঠমাসজাতো ¶ কামং সত্তমাসজাততো বুদ্ধিৰযৰা, একচ্চে পন চম্মপদেসা ৰুদ্ধিং পাপুণন্তা ঘট্টনং ন সহন্তি, তেন সো ন জীৰতি. ‘‘সত্তমাসজাতস্স পন ন তাৰ তে জাতা’’তি ৰদন্তি.

২৭. দেৰা ¶ পঠমং পটিগ্গণ্হন্তীতি ‘‘লোকনাথং মহাপুরিসং সযমেৰ পঠমং পটিগ্গণ্হামা’’তি সঞ্জাতগারৰবহুমানা অত্তনো পীতিং পৰেদেন্তা খীণাসৰা সুদ্ধাৰাসব্রহ্মানো আদিতো পটিগ্গণ্হন্তি. সূতিৰেসন্তি সূতিজগ্গনধাতিৰেসং. একেতি অভযগিরিৰাসিনো. মচ্ছক্খিসদিসং ছৰিৰসেন. অট্ঠাসি ন নিসীদি, ন নিপজ্জি ৰা. তেন ৰুত্তং ‘‘ঠিতাৰ বোধিসত্তং বোধিসত্তমাতা ৰিজাযতী’’তি. নিদ্দুক্খতায ঠিতা এৰ হুত্ৰা ৰিজাযতি. দুক্খস্স হি বলৰভাৰতো তং দুক্খং অসহমানা অঞ্ঞা ইত্থিযো নিসিন্না ৰা নিপন্না ৰা ৰিজাযন্তি.

২৮. অজিনপ্পৰেণিযাতি ¶ অজিনচম্মেহি সিব্বিত্ৰা কতপৰেণিযা. মহাতেজোতি মহানুভাৰো. মহাযসোতি মহাপরিৰারো, ৰিপুলকিত্তিঘোসো চ.

২৯. ভগ্গৰিভগ্গাতি সম্বাধট্ঠানতো নিক্খমনেন ৰিভাৰিতত্তা ভগ্গা, ৰিভগ্গা ৰিয চ হুত্ৰা, তেন নেসং অৰিসদভাৰমেৰ দস্সেতি. অলগ্গো হুত্ৰাতি গব্ভাসযে, যোনিপদেসে চ কত্থচি অলগ্গো অসত্তো হুত্ৰা, যতো ‘‘ধমকরণতো উদকনিক্খমনসদিস’’ন্তি ৰুত্তং. উদকেনাতি গব্ভাসযগতেন উদকেন. অমক্খিতোৰ নিক্খমতি সম্মক্খিতস্স তাদিসস্স উদকসেম্হাদিকস্সেৰ তত্থ অভাৰতো. বোধিসত্তস্স হি পুঞ্ঞানুভাৰতো পটিসন্ধিগ্গহণতো পট্ঠায তং ঠানং পুব্বেপি ৰিসুদ্ধং ৰিসেসতো পরমসুগন্ধগন্ধকুটি ৰিয চন্দনগন্ধং ৰাযন্তং তিট্ঠতি.

উদকৰট্টিযোতি উদকক্খন্ধা.

৩১. মুহুত্তজাতোতি মুহুত্তেন জাতো হুত্ৰা মুহুত্তমত্তোৰ. অনুধারিযমানেতি ¶ অনুকূলৰসেন নীযমানে. আগতানেৰাতি তং ঠানং উপগতানি এৰ. অনেকসাখন্তি রতনমযানেকসতপতিট্ঠানহীরকং. সহস্সমণ্ডলন্তি তেসং উপরিট্ঠিতং অনেকসহস্সমণ্ডলহীরকং. মরূতি দেৰা. ন খো পন এৰং দট্ঠব্বং পদৰীতিহারতো পগেৰ দিসাৰিলোকনস্স ¶ কতত্তা. তেনাহ ‘‘মহাসত্তো হী’’তিআদি. একঙ্গণানীতি ৰিৰটভাৰেন ৰিহারঙ্গণপরিৰেণঙ্গণানি ৰিয একঙ্গণসদিসানি অহেসুং. সদিসোপি নত্থীতি তুম্হাকং ইদং ৰিলোকনং ৰিসিট্ঠে পস্সিতুং ‘‘ইধ তুম্হেহি সদিসোপি নত্থি, কুতো উত্তরিতরো’’তি আহংসু. অগ্গোতি পধানো, কেন পনস্স পধানতাতি আহ ‘‘গুণেহী’’তি. পঠম-সদ্দো চেত্থ পধানপরিযাযো. বোধিসত্তস্স পন পধানতা অনঞ্ঞসাধারণাতি আহ ‘‘সব্বপঠমো’’তি, সব্বপধানোতি অত্থো. এতস্সেৰাতি অগ্গসদ্দস্সেৰ. এত্থ চ মহেসক্খা তাৰ দেৰা তথা চ ৰদন্তি, ইতরে পন কথন্তি? মহাসত্তস্স আনুভাৰদস্সনাদিনা. মহেসক্খানঞ্হি দেৰানং মহাসত্তস্স আনুভাৰো ৰিয তেন সদিসানম্পি আনুভাৰো পচ্চক্খো অহোসীতি, ইতরে পন তেসং ৰচনং সুত্ৰা সদ্দহন্তা অনুমিনন্তা তথা আহংসু. পরিপাকগতপুব্বহেতুসংসিদ্ধায ধম্মতায চোদিযমানো ইমস্মিং…পে… ব্যাকাসি.

জাতমত্তস্সেৰ বোধিসত্তস্স ঠানাদীনি যেসং ৰিসেসাধিগমানং পুব্বনিমিত্তভূতানীতি তে নিদ্ধারেত্ৰা দস্সেন্তো ‘‘এত্থ চা’’তিআদিমাহ. তত্থ পতিট্ঠানং চতুরিদ্ধিপাদপটিলাভস্স পুব্বনিমিত্তং ইদ্ধিপাদৰসেন লোকুত্তরধম্মেসু সুপ্পতিট্ঠিতভাৰসমিজ্ঝনতো. উত্তরাভিমুখভাৰো ¶ লোকস্স ¶ উত্তরণৰসেন গমনস্স পুব্বনিমিত্তং. তেন হি ভগৰা সদেৰকস্স লোকস্স অভিভূতো, কেনচি অনভিভূতো অহোসি. তেনাহ ‘‘মহাজনং অজ্ঝোত্থরিত্ৰা অভিভৰিত্ৰা গমনস্স পুব্বনিমিত্ত’’ন্তি. তথা সত্তপদগমনং সত্তপদবোজ্ঝঙ্গসম্পন্নঅরিযমগ্গগমনস্স. সুৰিসুদ্ধসেতচ্ছত্তধারণং সুৰিসুদ্ধৰিমুত্তিছত্তধারণস্স. পঞ্চরাজককুধভণ্ডসমাযোগো পঞ্চৰিধৰিমুত্তিগুণসমাযোগস্স. অনাৰটদিসানুৰিলোকনং অনাৰটঞাণতায. ‘‘অগ্গোহমস্মী’’তিআদিনা অছম্ভিতৰাচাভাসনং কেনচি অৰিবন্ধনীযতায অপ্পৰত্তিযস্স সদ্ধম্মচক্কপ্পৰত্তনস্স. ‘‘অযমন্তিমা জাতী’’তি আযতিং জাতিযা অভাৰকিত্তনা অনুপাদি…পে… পুব্বনিমিত্তন্তি ৰেদিতব্বং তস্স তস্স অনাগতে লদ্ধব্বৰিসেসস্স তং তং নিমিত্তং অব্যভিচারীতি কত্ৰা. ন আগতোতি ইমস্মিং সুত্তে, অঞ্ঞত্থ চ ৰক্খমানায অনুপুব্বিযা ন আগতো. আহরিত্ৰাতি তস্মিং তস্মিং সুত্তে, অট্ঠকথাসু চ আগতনযেন আহরিত্ৰা দীপেতব্বো.

‘‘দসসহস্সিলোকধাতু ¶ কম্পী’’তি ইদং সতিপি ইধ পাল়িযং আগতত্তে ৰক্খমানানং অচ্ছরিযানং মূলভূতং দস্সেতুং ৰুত্তং, এৰং অঞ্ঞম্পি এৰরূপং দট্ঠব্বং. তন্তিবদ্ধা ৰীণা চম্মবদ্ধা ভেরিযোতি পঞ্চঙ্গিকতূরিযস্স নিদস্সনমত্তং, চ-সদ্দেন ৰা ইতরেসম্পি সঙ্গহো দট্ঠব্বো. ‘‘অন্দুবন্ধনাদীনি তঙ্খণে এৰ ছজ্জিত্ৰা পুন পাকতিকানেৰ হোন্তি, তথা জচ্চন্ধাদীনং চক্খুসোতাদীনি তথারূপকম্মপচ্চযা তস্মিংযেৰ খণে উপ্পজ্জিত্ৰা তাৰদেৰ ৰিগচ্ছন্তী’’তি ৰদন্তি. ছিজ্জিংসূতি চ পাদেসু বন্ধট্ঠানেসু ছিজ্জিংসু. ৰিগচ্ছিংসূতি ৰূপসমিংসু. আকাসট্ঠকরতনানি নাম তংতংৰিমানগতমণিরতনাদীনি. সকতেজোভাসিতানীতি ¶ অতিৰিয সমুজ্জলায অত্তনো পভায ওভাসিতানি অহেসুং. নপ্পৰত্তীতি ন সন্নিপাতো. ন ৰাযীতি খরো ৰাতো ন ৰাযি. মুদুসুখো পন সত্তানং সুখাৰহো ৰাযি. পথৰিগতা অহেসুং উচ্চট্ঠানে ঠাতুং অৰিসহন্তা. উতুসম্পন্নোতি অনুণ্হাসীততাসঙ্খাতেন উতুনা সম্পন্নো. অপ্ফোটনং ৰুচ্চতি ভুজহত্থসঙ্ঘট্টনসদ্দো, অত্থতো পন ৰামহত্থং উরে ঠপেত্ৰা দক্খিণেন পুথুপাণিনা হত্থতাল়নেন সদ্দকরণং. মুখেন উস্সেল়নং সদ্দস্স মুঞ্চনং সেল়নং. একদ্ধজমালা অহোসি নিরন্তরং ধজমালাসমোধানগতায. ন কেৰলঞ্চ এতানি এৰ, অথ খো অঞ্ঞানিপি ‘‘ৰিচিত্তপুপ্ফসুগন্ধপুপ্ফৰস্সদেৰোপৰস্সি সূরিযে দিস্সমানে এৰ তারকা ওভাসিংসু, অচ্ছং ৰিপ্পসন্নং উদকং পথৰিতো উব্ভিজ্জি, বিলাসযা চ তিরচ্ছানা আসযতো নিক্খমিংসু, রাগদোসমোহাপি তনু ভৰিংসু, পথৰিযং রজো ৰূপসমি, অনিট্ঠগন্ধো ৰিগচ্ছি, দিব্বগন্ধো ৰাযি, রূপিনো দেৰা সরূপেনেৰ মনুস্সানং আপাথং অগমংসু, সত্তানং চুতূপপাতা নাহেসু’’ন্তি এৰমাদীনি ¶ যানি মহাভিনীহারসমযে উপ্পন্নানি দ্ৰত্তিংসপুব্বনিমিত্তানি, তানি অনৰসেসতো তদা অহেসুন্তি.

তত্রাপীতি তেসুপি পথৰিকম্পাদীসু এৰং পুব্বনিমিত্তভাৰো ৰেদিতব্বো. ন কেৰলং সম্পতিজাতস্স ঠানাদীসু এৰাতি অধিপ্পাযো. সব্বঞ্ঞুতঞ্ঞাণপটিলাভস্স পুব্বনিমিত্তং সব্বস্স ঞেয্যস্স, তিত্থকরমতস্স চ চালনতো. কেনচি অনুস্সাহিতানংযেৰ ইমস্মিংযেৰ একচক্কৰাল়ে সন্নিপাতো কেনচি অনুস্সাহিতানংযেৰ একপ্পহারেনেৰ ¶ সন্নিপতিত্ৰা ধম্মপটিগ্গণ্হনস্স পুব্বনিমিত্তং. পঠমং দেৰতানং পটিগ্গহণং দিব্বৰিহারপটিলাভস্স, পচ্ছা মনুস্সানং পটিগ্গহণং তত্থেৰ ঠানস্স নিচ্চলসভাৰতো ¶ আনেঞ্জৰিহারপটিলাভস্স পুব্বনিমিত্তং. ৰীণানং সযং ৰজ্জনং পরূপদেসেন ৰিনা সযমেৰ অনুপুব্বৰিহারপটিলাভস্স পুব্বনিমিত্তং. ভেরীনং ৰজ্জনং চক্কৰাল়পরিযন্তায পরিসায পৰেদনসমত্থস্স ধম্মভেরিযা অনুসাৰনস্স অমতদুন্দুভিঘোসনস্স পুব্বনিমিত্তং. অন্দুবন্ধনাদীনং ছেদো মানৰিনিবন্ধভেদনস্স পুব্বনিমিত্তং. মহাজনস্স রোগৰিগমো তস্সেৰ সকলৰট্টদুক্খরোগৰিগমভূতস্স সচ্চপটিলাভস্স পুব্বনিমিত্তং. ‘‘মহাজনস্সা’’তি পদং ‘‘মহাজনস্স দিব্বচক্খুপটিলাভস্স, মহাজনস্স দিব্বসোতধাতুপটিলাভস্সা’’তিআদিনা তত্থ তত্থ আনেত্ৰা সম্বন্ধিতব্বং. ইদ্ধিপাদভাৰনাৰসেন সাতিসযঞাণজৰসম্পত্তিসিদ্ধীতি আহ ‘‘পীঠসপ্পীনং জৰসম্পদা চতুরিদ্ধিপাদপটিলাভস্স পুব্বনিমিত্ত’’ন্তি. সুপট্টনসম্পাপুণনং চতুপটিসম্ভিদাধিগমস্স পুব্বনিমিত্তং. অত্থাদিঅনুরূপং অত্থাদীসু সম্পটিপত্তিভাৰতো. রতনানং সকতেজোভাসিতত্তং যং লোকস্স ধম্মোভাসং দস্সেস্সতি, তেন তস্স সকতেজোভাসিতত্তস্স পুব্বনিমিত্তং.

চতুব্রহ্মৰিহারপটিলাভস্স পুব্বনিমিত্তং তস্স সব্বসো ৰেরৰূপসমনতো. একাদসঅগ্গিনিব্বাপনস্স পুব্বনিমিত্তং দুন্নিব্বাপননিব্বানভাৰতো. ঞাণালোকাদস্সনস্স পুব্বনিমিত্তং অনালোকে আলোকদস্সনভাৰতো. নিব্বানরসেনাতি কিলেসানং নিব্বাযনরসেন. একরসভাৰস্সাতি সাসনস্স সব্বত্থ একরসভাৰস্স, তঞ্চ খো অমধুরস্স ¶ লোকস্স সব্বসো মধুরভাৰাপাদনেন. দ্ৰাসট্ঠিদিট্ঠিগতভিন্দনস্স পুব্বনিমিত্তং সব্বসো দিট্ঠিগতৰাতাপনযনৰসেন. আকাসাদিঅপ্পতিট্ঠৰিসমচঞ্চলট্ঠানং পহায সকুণানং পথৰিগমনং তাদিসং মিচ্ছাগাহং পহায সত্তানং পাণেহি রতনত্তযসরণগমনস্স পুব্বনিত্তং. বহুজনকন্ততাযাতি চন্দস্স ৰিয বহুজনস্স কন্ততায. সূরিযস্স উণ্হসীতৰিৰজ্জিতউতুসুখতা পরিল়াহৰিৰজ্জিতকাযিকচেতসিকসুখপ্পত্তিযা পুব্বনিমিত্তং. দেৰতানং অপ্ফোটনাদীহি কীল়নং পমোদুপ্পত্তি ভৰন্তগমনেন, ধম্মসভাৰবোধনেন চ উদানৰসেন পমোদৰিভাৰনস্স পুব্বনিমিত্তং. ধম্মৰেগৰস্সনস্সাতি দেসনাঞাণৰেগেন ধম্মামতস্স ৰস্সনস্স ¶ পুব্বনিমিত্তং. কাযগতাসতিৰসেন লদ্ধং ঝানং পাদকং কত্ৰা উপ্পাদিতমগ্গফলসুখানুভৰো কাযগতাসতিঅমতপটিলাভো, তস্স পন কাযস্সাপি অতপ্পকসুখাৰহত্তা খুদাপিপাসাপীল়নাভাৰো পুব্বনিমিত্তং ৰুত্তো ¶ . অট্ঠকথাযংপন খুদং, পিপাসঞ্চ ভিন্দিত্ৰা ৰুত্তং. তত্থ পুব্বনিমিত্তানং ভেদো ৰিসেসসামঞ্ঞৰিভাগেন, গোবলীবদ্দঞাযেন চ গহেতব্বো. ‘‘সযমেৰা’’তি পদং ‘‘অট্ঠঙ্গিকমগ্গদ্ৰারৰিৰরণস্সা’’তি এত্থাপি আনেত্ৰা সম্বন্ধিতব্বং. ভরিতভাৰস্সাতি পরিপুণ্ণভাৰস্স. ‘‘অরিযদ্ধজমালামালিতাযাতি কাসাযদ্ধজমালাৰন্ততাযা’’তি কেচি, সদেৰকস্স লোকস্স পন অরিযমগ্গবোজ্ঝঙ্গদ্ধজমালাহি মালিভাৰস্স পুব্বনিমিত্তং. যং পনেত্থ অনুদ্ধটং, তং সুৰিঞ্ঞেয্যমেৰ.

এত্থাতি ‘‘সম্পতিজাতো’’তিআদিনা আগতে ইমস্মিং ৰারে. ৰিস্সজ্জিতোৰ, তস্মা অম্হেহি ইধ অপুব্বং ৰত্তব্বং নত্থীতি অধিপ্পাযো. তদা ¶ পথৰিযং গচ্ছন্তোপি মহাসত্তো আকাসেন গচ্ছন্তো ৰিয মহাজনস্স তথা উপট্ঠাসীতি অযমেত্থ নিযতি ধম্মনিযামো বোধিসত্তানং ধম্মতা তি ইদং নিযতিৰাদৰসেন কথনং. পুব্বে পুরিমজাতীসু তাদিসস্স পুঞ্ঞসম্ভারকম্মস্স কতত্তা উপচিতত্তা মহাজনস্স তথা উপট্ঠাসীতি ইদং পুব্বেকতকম্মৰাদৰসেন কথনং. ইমেসং সত্তানং উপরি ঈসনসীলতায যথাসকং কম্মমেৰ ইস্সরো নাম, তস্স নিম্মানং অত্তনো ফলস্স নিব্বত্তনং মহাপুরিসোপি সদেৰকং লোকং অভিভৰিতুং সমত্থেন উল়ারেন পুঞ্ঞকম্মেন নিব্বত্তিতো, তেন ইস্সরেন নিম্মিতো নাম, তস্স চাযং নিম্মানৰিসেসো, যদিদং মহানুভাৰতা, যায মহাজনস্স তথা উপট্ঠাসীতি ইদং ইস্সরনিম্মানৰসেন কথনং. এৰং তং তং বহুলং ৰত্ৰা কিং ইমায পরিযাযকথাযাতি অৰসানে উজুকমেৰ ব্যাকরি. সম্পতিজাতো পথৰিযং কথং পদসা গচ্ছতি, এৰং মহানুভাৰো আকাসেন মঞ্ঞে গচ্ছতীতি পরিকপ্পনৰসেন আকাসেন গচ্ছন্তো ৰিয অহোসি. সীঘতরং পন সত্তপদৰীতিহারেন গতত্তা দিস্সমানরূপোপি মহাজনস্স অদিস্সমানো ৰিয অহোসি. অচেলকভাৰো, খুদ্দকসরীরতা চ তাদিসস্স ইরিযাপথস্স ন অনুচ্ছৰিকাতি কম্মানুভাৰসঞ্জনিতপাটিহারিযৰসেন অলঙ্কতপটিযত্তো ৰিয, সোল়সৰস্সুদ্দেসিকো ৰিয চ মহাজনস্স উপট্ঠাসীতি ৰেদিতব্বং. মহাসত্তস্স পুঞ্ঞানুভাৰেন তদা তথা উপট্ঠানমত্তমেৰেতন্তি. পচ্ছা বালদারকোৰ অহোসি, ন তাদিসোতি. বুদ্ধভাৰানুচ্ছৰিকস্স বোধিসত্তানুভাৰস্স যাথাৰতো পৰেদিতত্তা পরিসা চস্স ব্যাকরণেন বুদ্ধেন ৰিয…পে… অত্তমনা অহোসি.

সব্বধম্মতাতি ¶ ¶ সব্বা সোল়সৰিধাপি যথাৰুত্তা ধম্মতা ¶ সব্ববোধিসত্তানং হোন্তীতি ৰেদিতব্বা পুঞ্ঞঞাণসম্ভারদস্সনেন নেসং একসদিসত্তা.

দ্ৰত্তিংসমহাপুরিসলক্খণৰণ্ণনা

৩৩. দুকূলচুম্বটকেতি দহরস্স নিপজ্জনযোগ্যতাৰসেন পটিসংহটদুকূলসুখুমে. ‘‘খত্তিযো ব্রাহ্মণো’’তি এৰমাদি জাতি. ‘‘কোণ্ডঞ্ঞো গোতমো’’তি এৰমাদি গোত্তং. ‘‘পোণিকা চিক্খল্লিকা সাকিযা কোল়িযা’’তি এৰমাদি কুলপদেসো. আদি-সদ্দেন রূপিস্সরিযপরিৰারাদিসব্বসম্পত্তিযো সঙ্গণ্হাতি. মহন্তস্সাতি ৰিপুলস্স, উল়ারস্সাতি অত্থো. নিপ্ফত্তিযোতি সিদ্ধিযো. গন্তব্বগতিযাতি গতি-সদ্দস্স কম্মসাধনতমাহ. উপপজ্জনৰসেন হি সুচরিতদুচ্চরিতেহি গন্তব্বাতি গতিযো, উপপত্তিভৰৰিসেসো. গচ্ছতি যথারুচি পৰত্ততীতি গতি, অজ্ঝাসযো. পটিসরণেতি পরাযণে অৰস্সযে. সব্বসঙ্খতৰিসংযুত্তস্স হি অরহতো নিব্বানমেৰ তংপটিসরণং. ত্যাহন্তি তে অহং.

দসৰিধে কুসলধম্মে, অগরহিতে চ রাজধম্মে (জা. ২ মহামংসজাতকে ৰিত্থারো) নিযুত্তোতি ধম্মিকো. তেন চ ধম্মেন সকলং লোকং রঞ্জেতীতি ধম্মরাজা. যস্মা চক্কৰত্তী ধম্মেন ঞাযেন রজ্জং অধিগচ্ছতি, ন অধম্মেন, তস্মা ৰুত্তং ‘‘ধম্মেন লদ্ধরজ্জত্তা ধম্মরাজা’’তি. চতূসু দিসাসু সমুদ্দপরিযোসানতায চতুরন্তা নাম তত্থ তত্থ দীপে মহাপথৰীতি আহ ‘‘পুরত্থিম…পে… ইস্সরো’’তি. ৰিজিতাৰীতি ৰিজেতব্বস্স ৰিজিতৰা, কামকোধাদিকস্স অব্ভন্তরস্স, পটিরাজভূতস্স বাহিরস্স চ অরিগণস্স ৰিজযি, ৰিজেত্ৰা ঠিতোতি অত্থো. কামং চক্কৰত্তিনো কেনচি যুদ্ধং নাম নত্থি, যুদ্ধেন পন সাধেতব্বস্স ৰিজযস্স সিদ্ধিযা ‘‘ৰিজিতসঙ্গামো’’তি ৰুত্তং. জনপদোৰ চতুব্বিধঅচ্ছরিযধম্মাদিসমন্নাগতে অস্মিং রাজিনি থাৰরিযং কেনচি অসংহারিযং দল়্হং ভত্তভাৰং পত্তো, জনপদে ¶ ৰা অত্তনো ধম্মিকায পটিপত্তিযা থাৰরিযং থিরভাৰং পত্তোতি জনপদত্থাৰরিযপ্পত্তো. মনুস্সানং উরে সত্থং ঠপেত্ৰা ইচ্ছিতধনহরণাদিনা পরসাহসকারিতায সাহসিকা.

রতিজননট্ঠেনাতি অতপ্পকপীতিসোমনস্সুপ্পাদনেন. সদ্দত্থতো পন রমেতীতি রতনং. ‘‘অহো মনোহর’’ন্তি চিত্তে কত্তব্বতায চিত্তীকতং ¶ . ‘‘স্ৰাযং চিত্তীকারো তস্স পূজনীযতাযা’’তি চিত্তীকতন্তি পূজনীযন্তি অত্থং ৰদন্তি. মহন্তং ৰিপুলং অপরিমিতং মূলং অগ্ঘতীতি মহগ্ঘং. নত্থি এতস্স তুলা উপমাতি অতুলং, অসদিসং. কদাচি এৰ উপ্পজ্জনতো দুক্খেন লদ্ধব্বত্তা ¶ দুল্লভদস্সনং. অনোমেহি উল়ারগুণেহেৰ সত্তেহি পরিভুঞ্জিতব্বতো অনোমসত্তপরিভোগং. ইদানি নেসং চিত্তীকতাদিঅত্থানং সৰিসেসং চক্করতনে লব্ভমানতং দস্সেত্ৰা ইতরেসুপি তে অতিদিসিতুং ‘‘চক্করতনস্স চা’’তিআদি আরদ্ধং. অঞ্ঞং দেৰট্ঠানং নাম ন হোতি রঞ্ঞো অনঞ্ঞসাধারণিস্সরিযাদিসম্পত্তিপটিলাভহেতুতো, সত্তানঞ্চ যথিচ্ছিতত্থপটিলাভহেতুতো. অগ্ঘো নত্থি অতিৰিয উল়ারসমুজ্জলসত্তরতনমযত্তা, অচ্ছরিযব্ভুতমহানুভাৰতায চ. যদগ্গেন মহগ্ঘং, তদগ্গেন অতুলং. সত্তানং পাপজিগুচ্ছনেন ৰিগতকাল়কো পুঞ্ঞপসুততায মণ্ডভূতো যাদিসো কালো বুদ্ধুপ্পাদারহো, তাদিসে এৰ চক্কৰত্তীনম্পি সম্ভৰোতি আহ ‘‘যস্মা চ পনা’’তিআদি. উপমাৰসেন চেতং ৰুত্তং, উপমোপমেয্যানঞ্চ ন অচ্চন্তমেৰ সদিসতা. তস্মা যথা বুদ্ধা কদাচি করহচি উপ্পজ্জন্তি, ন তথা চক্কৰত্তিনো, এৰং সন্তেপি চক্কৰত্তিৰত্তপরিপূরণস্সাপি দুক্করভাৰতোপি দুল্লভুপ্পাদাযেৰাতি ¶ , ইমিনা দুল্লভুপ্পাদতাসামঞ্ঞেন তেসং দুল্লভদস্সনতা ৰুত্তাতি ৰেদিতব্বং. কামং চক্করতনানুভাৰেন সিজ্ঝমানো গুণো চক্কৰত্তিপরিৰারসাধারণো, তথাপি ‘‘চক্কৰত্তী এৰ নং সামিভাৰেন ৰিসৰিতায পরিভুঞ্জতী’’তি ৰত্তব্বতং অরহতি তদত্থং উপ্পজ্জনতোতি দস্সেন্তো ‘‘তদেত’’ন্তিআদিমাহ. যথাৰুত্তানং পঞ্চন্নং, ছন্নম্পি ৰা অত্থানং ইতররতনেসুপি লব্ভনতো ‘‘এৰং সেসানিপী’’তি ৰুত্তং. হত্থিঅস্স-পরিণাযকরতনেহি অজিতৰিজযতো, চক্করতনেন চ পরিৰারভাৰেন, সেসেহি পরিভোগূপকরণভাৰেন সমন্নাগতো. হত্থিঅস্সমণিইত্থিরতনেহি পরিভোগূপকরণভাৰেন সেসেহি পরিৰারভাৰেনাতি যোজনা.

চতুন্নং মহাদীপানং সিরিৰিভৰন্তি তত্থ লদ্ধং সিরিসম্পত্তিঞ্চেৰ ভোগসম্পত্তিঞ্চ. তাদিসমেৰাতি ‘‘পুরেভত্তমেৰা’’তিআদিনা ৰুত্তানুভাৰমেৰ. যোজনপ্পমাণং পদেসং ব্যাপনেন যোজনপ্পমাণং অন্ধকারং. অতিদীঘতাদিছব্বিধদোসপরিৰজ্জিতং.

সূরাতি সত্তিৰন্তো, নিব্ভযাতি অত্থোতি আহ ‘‘অভীরুকা’’তি. অঙ্গন্তি কারণং. যেন কারণেন ‘‘ৰীরা’’তি ৰুচ্চেয্যুং, তং ৰীরঙ্গং. তেনাহ ‘‘ৰীরিযস্সেতং ¶ নাম’’ন্তি. যাৰ চক্কৰাল়পব্বতা চক্কস্স ৰত্তনতো ‘‘চক্কৰাল়পব্বতং সীমং কত্ৰা ঠিতসমুদ্দপরিযন্ত’’ন্তি ৰুত্তং. ‘‘অদণ্ডেনা’’তি ইমিনাৰ ধনদণ্ডস্স, সরীরদণ্ডস্স চ অকরণং ৰুত্তং. ‘‘অসত্থেনা’’তি ইমিনা পন সেনায যুজ্ঝনস্সাতি তদুভযং দস্সেতুং ‘‘যে কতাপরাধে’’তিআদি ৰুত্তং. ৰুত্তপ্পকারন্তি সাগরপরিযন্তং.

‘‘রঞ্জনট্ঠেন রাগো, তণ্হাযনট্ঠেন তণ্হা’’তি পৰত্তিআকারভেদেন ¶ লোভো এৰ দ্ৰিধা ৰুত্তো ¶ . তথা হিস্স দ্ৰিধাপি ছদনট্ঠো একন্তিকো. যথাহ ‘‘অন্ধতমং তদা হোতি, যং রাগো সহতে নর’’ন্তি, (নেত্তি. ১১, ২৭) ‘‘তণ্হাছদনছাদিতা’’তি (উদা. ৬৪) চ. ইমিনা নযেন দোসাদীনম্পি ছদনট্ঠো ৰত্তব্বো. কিলেসগ্গহণেন ৰিচিকিচ্ছাদযো সেসকিলেসা ৰুত্তা. যস্মা তে সব্বে পাপধম্মা উপ্পজ্জমানা সত্তসন্তানং ছাদেত্ৰা পরিযোনন্ধিত্ৰা তিট্ঠন্তি কুসলপ্পৰত্তিং নিৰারেন্তি, তস্মা তে ‘‘ছদনা, ছদা’’তি চ ৰুত্তা. ৰিৰট্টচ্ছদাতি চ ও-কারস্স আ-কারং কত্ৰা নিদ্দেসো.

৩৫. তাসন্তি দ্ৰিন্নম্পি নিপ্ফত্তীনং. নিমিত্তভূতানীতি ঞাপককারণভূতানি. তথা হি লক্খীযতি মহাপুরিসভাৰো এতেহীতি লক্খণানি. ঠানগমনাদীসু ভূমিযং সুট্ঠু সমং পতিট্ঠিতা পাদা এতস্সাতি সুপ্পতিট্ঠিতপাদো. তং পনস্স সুপ্পতিট্ঠিতপাদতং ব্যতিরেকমুখেন ৰিভাৰেতুং ‘‘যথা’’তিআদি ৰুত্তং. তত্থ অগ্গতলন্তি অগ্গপাদতলং. পণ্হীতি পণ্হিতলং. পস্সন্তি পাদতলস্স দ্ৰীসু পস্সেসু একেকং, উভযমেৰ ৰা পরিযন্তং পস্সং. ‘‘অস্স পনা’’তিআদি অন্ৰযতো অত্থৰিভাৰনং. সুৰণ্ণপাদুকতলমিৰ উজুকং নিক্খিপিযমানং. একপ্পহারেনেৰাতি একক্খণেযেৰ. সকলং পাদতলং ভূমিং ফুসতি নিক্খিপনে. একপ্পহারেনেৰ সকলং পাদতলং ভূমিতো উট্ঠহতীতি যোজনা. তস্মা অযং সুপ্পতিট্ঠিতপাদোতি নিগমনং. যং পনেত্থ ৰত্তব্বং অনুপুব্বনিন্নাদিঅচ্ছরিযব্ভুতং ¶ নিস্সন্দফলং, তং পরতো লক্খণসুত্তৰণ্ণনাযং (দী. নি. অট্ঠ. ৩.২০১) আৰিভৰিস্সতীতি.

নাভি দিস্সতীতি লক্খণচক্কস্স নাভি পরিমণ্ডলসণ্ঠানা সুপরিব্যত্তা হুত্ৰা দিস্সতি, লব্ভতীতি অধিপ্পাযো. নাভিপরিচ্ছিন্নাতি তস্সং নাভিযং পরিচ্ছিন্না পরিচ্ছেদৰসেন ঠিতা. নাভিমুখপরিক্খেপপট্টোতি পকতিচক্কস্স ¶ অক্খব্ভাহতপরিহরণত্থং নাভিমুখে ঠপেতব্বং পরিক্খেপপট্টো, তপ্পটিচ্ছন্নো ইধ অধিপ্পেতো. নেমিমণিকাতি নেমিযং আৰলিভাৰেন ঠিতমণিকালেখা. সম্বহুলৰারোতি বহুৰিধলেখঙ্গৰিভাৰনৰারো. সত্তীতি আৰুধসত্তি. সিরিৰচ্ছোতি সিরিঅঙ্গা. নন্দীতি দক্খিণাৰত্তং. সোৰত্তিকোতি সোৰত্তিঅঙ্গো. ৰটংসকোতি আৰেল়ং. ৰড্ঢমানকন্তি পুরিমহাদীসু দীপঙ্কং. মোরহত্থকোতি মোরপিঞ্ছকলাপো, মোরপিঞ্ছপটিসিব্বিতো ৰা বীজনীৰিসেসো. ৰাল়বীজনীতি চামরিৰালং. সিদ্ধত্থাদি পুণ্ণঘটপুণ্ণপাতিযো. ‘‘চক্কৰাল়ো’’তি ৰত্ৰা তস্স পধানাৰযৰে দস্সেতুং ‘‘হিমৰা সিনেরু…পে… সহস্সানী’’তি ৰুত্তং. ‘‘চক্কৰত্তিরঞ্ঞো পরিসং উপাদাযা’’তি ইদং হত্থিরতনাদীনম্পি তত্থ লব্ভমানভাৰদস্সনং. সব্বোতিসত্তিআদিকো যথাৰুত্তো অঙ্গৰিসেসো চক্কলক্খণস্সেৰ পরিৰারোতি ৰেদিতব্বো.

‘‘আযতপণ্হী’’তি ¶ ইদং অঞ্ঞেসং পণ্হিতো দীঘতং সন্ধায ¶ ৰুত্তং, ন পন অতিদীঘতন্তি আহ ‘‘পরিপুণ্ণপণ্হী’’তি. যথা পন পণ্হিলক্খণং পরিপুণ্ণং নাম হোতি, তং ব্যতিরেকমুখেন দস্সেতুং ‘‘যথা হী’’তিআদি ৰুত্তং. আরগ্গেনাতি মণ্ডলায সিখায. ৰট্টেত্ৰাতি যথা সুৰট্টং হোতি, এৰং ৰট্টেত্ৰা. রত্তকম্বলগেণ্ডুকসদিসাতি রত্তকম্বলমযগেণ্ডুকসদিসা.

‘‘মক্কটস্সেৰা’’তি দীঘভাৰং, সমতঞ্চ সন্ধাযেতং ৰুত্তং. নিয্যাসতেলেনাতি ছত্তিরিতনিয্যাসাদিনিয্যাসসম্মিস্সেন তেলেন, যং ‘‘সুরভিনিয্যাস’’ন্তিপি ৰদন্তি. নিয্যাসতেলগ্গহণঞ্চেত্থ হরিতালৰট্টিযা ঘনসিনিদ্ধভাৰদস্সনত্থং.

যথা সতক্খত্তুং ৰিহতং কপ্পাসপটলং সপ্পিমণ্ডে ওসারিতং অতিৰিয মুদু হোতি, এৰং মহাপুরিসস্স হত্থপাদাতি দস্সেন্তো ‘‘সপ্পিমণ্ডে’’তিআদিমাহ. তলুনাতি সুখুমালা.

চম্মেনাতি অঙ্গুলন্তরৰেঠিতচম্মেন. পটিবদ্ধঅঙ্গুলন্তরোতি একতো সম্বদ্ধঅঙ্গুলন্তরো ন হোতি. একপ্পমাণাতি দীঘতো সমানপ্পমাণা. যৰলক্খণন্তি অব্ভন্তরতো অঙ্গুলিপব্বে ঠিতং যৰলক্খণং. পটিৰিজ্ঝিত্ৰাতি তংতংপব্বানং সমানদেসতায অঙ্গুলীনং পসারিতকালেপি অঞ্ঞমঞ্ঞং ৰিজ্ঝিতানি ৰিয ফুসিত্ৰা তিট্ঠন্তি.

সঙ্খা ¶ ৰুচ্চন্তি গোপ্ফকা, উদ্ধং সঙ্খা এতেসন্তি উস্সঙ্খা, পাদা. পিট্ঠিপাদেতি পিট্ঠিপাদসমীপে. তেনাতি পিট্ঠিপাদে ঠিতগোপ্ফকভাৰেন বদ্ধা হোন্তীতি যোজনা. তযিদং ‘‘তেনা’’তি পদং উপরিপদদ্ৰযেপি যোজেতব্বং ¶ ‘‘তেন বদ্ধভাৰেন ন যথাসুখং পরিৰট্টন্তি, তেন যথাসুখং নপরিৰট্টনেন গচ্ছন্তানং পাদতলানিপি ন দিস্সন্তী’’তি. উপরীতি পিট্ঠিপাদতো দ্ৰিতিঅঙ্গুলিমত্তং উদ্ধং, ‘‘চতুরঙ্গুলমত্ত’’ন্তি চ ৰদন্তি. নিগূল়্হানি চ হোন্তি, ন অঞ্ঞেসং ৰিয পঞ্ঞাযমানানি. তেনাতি গোপ্ফকানং উপরি পতিট্ঠিতভাৰেন. অস্সাতি মহাপুরিসস্স. সতিপি দেসন্তরপ্পৰত্তিযং নিচ্চলোতি দস্সনত্থং নাভিগ্গহণং. ‘‘অধোকাযোৰ ইঞ্জতী’’তি ইদং পুরিমপদস্স কারণৰচনং. যস্মা অধোকাযোৰ ইঞ্জতি, তস্মা নাভিতো…পে… নিচ্চলো হোতি. ‘‘সুখেন পাদা পরিৰট্টন্তী’’তি ইদং পন পুরিমস্স, পচ্ছিমস্স চ কারণৰচনং. যস্মা সুখেন পাদা পরিৰট্টন্তি, তস্মা অধোকাযোৰ ইঞ্জতি, যস্মা সুখেন পাদা পরিৰট্টন্তি, তস্মা পুরতোপি…পে… পচ্ছতোযেৰাতি.

যস্মা এণিমিগস্স সমন্ততো একসদিসমংসা অনুক্কমেন উদ্ধং থূলা জঙ্ঘা হোন্তি, তথা ¶ মহাপুরিসস্সাপি, তস্মা ৰুত্তং ‘‘এণিমিগসদিসজঙ্ঘো’’তি. পরিপুণ্ণজঙ্ঘোতি সমন্ততো মংসূপচযেন পরিপুণ্ণজঙ্ঘো. তেনাহ ‘‘ন একতো’’তিআদি.

এতেনাতি ‘‘অনোনমন্তো’’তিআদিৰচনেন, জাণুফাসুভাৰদীপনেনাতি অত্থো. অৰসেসজনাতি ইমিনা লক্খণেন রহিতজনা. খুজ্জা ৰা হোন্তি হেট্ঠিমকাযতো উপরিমকাযস্স রস্সতায, ৰামনা ৰা উপরিমকাযতো হেট্ঠিমকাযস্স রস্সতায, এতেন ঠপেত্ৰা সম্মাসম্বুদ্ধং, চক্কৰত্তিনঞ্চ ইতরে সত্তা খুজ্জপক্খিকা, ৰামনপক্খিকা চাতি দস্সেতি.

কামং সব্বাপি পদুমকণ্ণিকা সুৰণ্ণৰণ্ণাৰ, কঞ্চনপদুমকণ্ণিকা পন পভস্সরভাৰেন ততো সাতিসযাতি ¶ আহ ‘‘সুৰণ্ণপদুমকণ্ণিকসদিসেহী’’তি. ওহিতন্তি সমোহিতং অন্তোগধং. তথাভূতং পন তং তেন ছন্নং হোতীতি আহ ‘‘পটিচ্ছন্ন’’ন্তি.

সুৰণ্ণৰণ্ণোতি সুৰণ্ণৰণ্ণৰণ্ণোতি অযমেত্থ অত্থোতি আহ ‘‘জাতিহিঙ্গুলকেনা’’তিআদি, স্ৰাযমত্থো আৰুত্তিঞাযেন চ ৰেদিতব্বো. সরীরপরিযাযো ইধ ৰণ্ণ-সদ্দোতি অধিপ্পাযো. পঠমৰিকপ্পং ৰত্ৰা ¶ তথারূপায পন রুল়্হিযা অভাৰং মনসি কত্ৰা ৰণ্ণধাতুপরিযাযমেৰ ৰণ্ণ-সদ্দং গহেত্ৰা দুতিযৰিকপ্পো ৰুত্তো. তস্মা পদদ্ৰযেনাপি সুনিদ্ধন্তসুৰণ্ণসদিসছৰিৰণ্ণোতি ৰুত্তং হোতি.

রজোতি সুখুমরজো. জল্লন্তি মলীনভাৰাৰহো রেণুসঞ্চযো. তেনাহ ‘‘মলং ৰা’’তি. যদি ৰিৰত্ততি, কথং ন্হানাদীনীতি আহ ‘‘হত্থধোৰনাদীনী’’তিআদি.

আৰট্টপরিযোসানেতি পদক্খিণাৰট্টনৰসেন পৰত্তস্স আৰট্টস্স অন্তে.

ব্রহ্মুনো সরীরং পুরতো ৰা পচ্ছতো ৰা অনোনমিত্ৰা উজুকমেৰ উগ্গতন্তি আহ ‘‘ব্রহ্মা ৰিয উজুগত্তো’’তি. সা পনাযং উজুগত্ততা অৰযৰেসু বুদ্ধিপ্পত্তেসু দট্ঠব্বা, ন দহরকালেতি ৰুত্তং ‘‘উগ্গতদীঘসরীরো ভৰিস্সতী’’তি. ইতরেসূতি ‘‘খন্ধজাণূসূ’’তি ইমেসু দ্ৰীসু ঠানেসু নমন্তা পুরতো নমন্তীতি আনেত্ৰা সম্বন্ধো. পস্সৰঙ্কাতি দক্খিণপস্সেন ৰা ৰামপস্সেন ৰা ৰঙ্কা. সূলসদিসাতি পোত্থকরূপকরণে ঠপিতসূলপাদসদিসা.

হত্থপিট্ঠিআদিৰসেন সত্ত সরীরাৰযৰা উস্সদা উপচিতমংসা এতস্সাতি সত্তুস্সদো. অট্ঠিকোটিযো ¶ পঞ্ঞাযন্তীতি যোজনা. নিগূল়্হসিরাজালেহীতি লক্খণৰচনমেতন্তি তেন নিগূল়্হঅট্ঠিকোটীহীতিপি ৰুত্তমেৰ হোতীতি. হত্থপিট্ঠাদীহীতি ¶ এত্থ আদি-সদ্দেন অংসকূটখন্ধকূটানং সঙ্গহে সিদ্ধে তং একদেসেন দস্সেন্তো ‘‘ৰট্টেত্ৰা…পে… খন্ধেনা’’তি আহ. ‘‘সিলারূপকং ৰিযা’’তিআদিনা ৰা নিগূল়্হঅংসকূটতাপি ৰিভাৰিতা যেৰাতি দট্ঠব্বং.

সীহস্স পুব্বদ্ধং সীহপুব্বদ্ধং, পরিপুণ্ণাৰযৰতায সীহপুব্বদ্ধং ৰিয সকলো কাযো অস্সাতি সীহপুব্বদ্ধকাযো. তেনাহ ‘‘সীহস্স পুব্বদ্ধকাযো ৰিয সব্বো কাযো পরিপুণ্ণো’’তি. সীহস্সেৰাতি সীহস্স ৰিয. দুস্সণ্ঠিতৰিসণ্ঠিতো ন হোতীতি দুট্ঠু সণ্ঠিতো, ৰিরূপসণ্ঠিতো চ ন হোতি, তেসং তেসং অৰযৰানং অযুত্তভাৰেন, ৰিরূপভাৰেন চ সণ্ঠিতি উপগতো ন হোতীতি অত্থো. সণ্ঠন্তীতি সণ্ঠহন্তি. দীঘেহীতি অঙ্গুলিনাসাদীহি. রস্সেহীতি গীৰাদীহি. থূলেহীতি ঊরুবাহুআদীহি ¶ . কিসেহীতি কেসলোমমজ্ঝাদীহি. পুথুলেহীতি অক্খিহত্থতলাদীহি. ৰট্টেহীতি জঙ্ঘহত্থাদীহি.

সতপুঞ্ঞলক্খণতায নানাচিত্তেন পুঞ্ঞচিত্তেন চিত্তিতো সঞ্জাতচিত্তভাৰো ‘‘ঈদিসো এৰ বুদ্ধানং ধম্মকাযস্স অধিট্ঠানং ভৰিতুং যুত্তো’’তি দসপারমীহি সজ্জিতো অভিসঙ্খতো, ‘‘দানচিত্তেন পুঞ্ঞচিত্তেনা’’তি ৰা পাঠো, দানৰসেন, সীলাদিৰসেন চ পৰত্তপুঞ্ঞচিত্তেনাতি অত্থো.

দ্ৰিন্নং কোট্টানং অন্তরন্তি দ্ৰিন্নং পিট্ঠিবাহানং ৰেমজ্ঝং পিট্ঠিমজ্ঝস্স উপরিভাগো. চিতং পরিপুণ্ণন্তি অনিন্নভাৰেন চিতং, দ্ৰীহি কোট্টেহি সমতলতায পরিপুণ্ণং. উগ্গম্মাতি উগ্গন্ত্ৰা, অনিন্নং সমতলং হুত্ৰাতি অধিপ্পাযো. তেনাহ ‘‘সুৰণ্ণফলকং ৰিযা’’তি.

নিগ্রোধো ৰিয পরিমণ্ডলোতি পরিমণ্ডলনিগ্রোধো ৰিয ¶ পরিমণ্ডলো, ‘‘নিগ্রোধপরিমণ্ডলপরিমণ্ডলো’’তি ৰত্তব্বে একস্স পরিমণ্ডল-সদ্দস্স লোপং কত্ৰা ‘‘নিগ্রোধপরিমণ্ডলো’’তি ৰুত্তো. তেনাহ ‘‘সমক্খন্ধসাখো নিগ্রোধো’’তিআদি. ন হি সব্বো নিগ্রোধো পরিমণ্ডলোতি, পরিমণ্ডলসদ্দসন্নিধানেন ৰা পরিমণ্ডলোৰ নিগ্রোধো গয্হতীতি একস্স পরিমণ্ডলসদ্দস্স লোপেন ৰিনাপি অযমত্থো লব্ভতীতি আহ ‘‘নিগ্রোধো ৰিয পরিমণ্ডলো’’তি. যাৰতকো অস্সাতি যাৰতক্ৰস্স ও-কারস্স ৰ-কারাদেসং কত্ৰা.

সমৰট্টিতক্খন্ধোতি সমং সুৰট্টিতক্খন্ধো. কোঞ্চা ৰিয দীঘগলা, বকা ৰিয ৰঙ্কগলা ¶ , ৰরাহা ৰিয পুথুলগলাতি যোজনা. সুৰণ্ণাল়িঙ্গসদিসোতি সুৰণ্ণমযখুদ্দকমুদিঙ্গসদিসো.

রসগ্গসগ্গীতি মধুরাদিভেদং রসং গসন্তি অন্তো পৰেসন্তীতি রসগ্গসা রসগ্গসানং অগ্গা রসগ্গসগ্গা, তা এতস্স সন্তীতি রসগ্গসগ্গী. তেনাতি ওজায অফরণেন হীনধাতুকত্তা তে বহ্ৰাবাধা হোন্তি.

হনূতি সন্নিস্সযদন্তাধারস্স সমঞ্ঞা, তং ভগৰতো সীহস্স হনু ৰিয, তস্মা ভগৰা সীহহনু. তত্থ যস্মা বুদ্ধানং রূপকাযস্স, ধম্মকাযস্স চ উপমা নাম হীনূপমাৰ, নত্থি সমানূপমা, কুতো অধিকূপমা, তস্মা অযম্পি হীনূপমাতি দস্সেতুং ‘‘তত্থা’’তিআদি ৰুত্তং. যস্মা মহাপুরিসস্স হেট্ঠিমানুরূপৰসেনেৰ উপরিমম্পি সণ্ঠিতং, তস্মা ৰুত্তং ¶ ‘‘দ্ৰেপি পরিপুণ্ণানী’’তি, তঞ্চ খো ন সব্বসো পরিমণ্ডলতায, অথ খো তিভাগাৰসেসমণ্ডলতাযাতি আহ ‘‘দ্ৰাদসিযা পক্খস্স চন্দসদিসানী’’তি. সল্লক্খেত্ৰাতি অত্তনো লক্খণসত্থানুসারেন ¶ উপধারেত্ৰা. দন্তানং উচ্চনীচতা অব্ভন্তরবাহিরপস্সৰসেনপি ৰেদিতব্বা, ন অগ্গৰসেনেৰ. তেনাহ ‘‘অযপট্টকেন ছিন্নসঙ্খপটলং ৰিযা’’তি. অযপট্টকন্তি ককচং অধিপ্পেতং. সমা ভৰিস্সন্তি, ন ৰিসমা, সমসণ্ঠানাতি অত্থো.

সাতিসযং মুদুদীঘপুথুলতাদিপ্পকারগুণা হুত্ৰা ভূতা জাতাতি পভূতা, ভ-কারস্স হ-কারং কত্ৰা পহূতা জিৰ্হা এতস্সাতি পহূতজিৰ্হো.

ৰিচ্ছিন্দিত্ৰা ৰিচ্ছিন্দিত্ৰা পৰত্তসরতায ছিন্নস্সরাপি. অনেকাকারতায ভিন্নস্সরাপি. কাকস্স ৰিয অমনুঞ্ঞসরতায কাকস্সরাপি. অপলিবুদ্ধত্তাতি অনুপদ্দুতৰত্থুকত্তা, ৰত্থূতি চ অক্খরুপ্পত্তিট্ঠানং ৰেদিতব্বং. অট্ঠঙ্গসমন্নাগতোতি এত্থ অঙ্গানি পরতো আগমিস্সন্তি. মঞ্জুঘোসোতি মধুরস্সরো.

অভিনীলনেত্তোতি অধিকনীলনেত্তো, অধিকতা চ সাতিসযং নীলভাৰেন ৰেদিতব্বা, ন নেত্তনীলভাৰস্সেৰ অধিকভাৰতোতি আহ ‘‘ন সকলনীলনেত্তো’’তিআদি. পীতলোহিতৰণ্ণা সেতমণ্ডলগতরাজিৰসেন. নীলসেতকাল়ৰণ্ণা পন তংতংমণ্ডলৰসেনেৰ ৰেদিতব্বা.

‘‘চক্খুভণ্ডন্তি অক্খিদল’’ন্তি কেচি. ‘‘অক্খিদলৰটুম’’ন্তি অঞ্ঞে. অক্খিদলেহি পন ¶ সদ্ধিং অক্খিবিম্বন্তি ৰেদিতব্বং. এৰঞ্হি ৰিনিগ্গতগম্ভীরজোতনাপি যুত্তা হোতি. ‘‘অধিপ্পেত’’ন্তি ইমিনা অযমেত্থ অধিপ্পাযো একদেসেন সমুদাযুপলক্খণঞাযেনাতি দস্সেতি. যস্মা পখুম-সদ্দো লোকে অক্খিদললোমেসু নিরুল়্হো, তেনেৰাহ ‘‘মুদুসিনিদ্ধনীলসুখুমপখুমাচিতানি অক্খীনী’’তি.

কিঞ্চাপি উণ্ণা-সদ্দো লোকে অৰিসেসতো লোমপরিযাযো, ইধ পন লোমৰিসেসৰাচকোতি আহ ‘‘উণ্ণা লোম’’ন্তি. নলাটৰেমজ্ঝে ¶ জাতাতি নলাটমজ্ঝগতা জাতা. ওদাততায উপমা, ন মুদুতায ¶ . উণ্ণা হি ততোপি সাতিসযং মুদুতরা. তেনাহ‘‘সপ্পি মণ্ডে’’তিআদি. রজতপুব্বুল়কন্তি রজতমযতারকমাহ.

দ্ৰে অত্থৰসে পটিচ্চ ৰুত্তন্তি যস্মা বুদ্ধা, চক্কৰত্তিনো চ পরিপুণ্ণনলাটতায, পরিপুণ্ণসীসবিম্বতায চ ‘‘উণ্হীসসীসা’’তি ৰুচ্চন্তি, তস্মা তে দ্ৰে অত্থৰসে পটিচ্চ ‘‘উণ্হীসসীসো’’তি ইদং ৰুত্তং. ইদানি তং অত্থদ্ৰযং মহাপুরিসে সুপ্পতিট্ঠিতন্তি ‘‘মহাপুরিসস্স হী’’তিআদি ৰুত্তং. সণ্হতমতায, সুৰণ্ণৰণ্ণতায, পভস্সরতায, পরিপুণ্ণতায চ রঞ্ঞো বন্ধউণ্হীসপট্টো ৰিয ৰিরোচতি. কপিসীসাতি দ্ৰিধাভূতসীসা. ফলসীসাতি ফলিতসীসা. অট্ঠিসীসাতি মংসস্স অভাৰতো অতিৰিয অট্ঠিতায, পতনুভাৰতো ৰা তচোনদ্ধঅট্ঠিমত্তসীসা. তুম্বসীসাতি লাবুসদিসসীসা. পব্ভারসীসাতি পিট্ঠিভাগেন ওলম্বমানসীসা. পুরিমনযেনাতি পরিপুণ্ণনলাটতাপক্খেন. উণ্হীসৰেঠিতসীসো ৰিযাতি উণ্হীসপট্টেন ৰেঠিতসীসপদেসো ৰিয. উণ্হীসং ৰিযাতি ছেকেন সিপ্পিনা ৰিরচিতউণ্হীসমণ্ডলং ৰিয.

ৰিপস্সীসমঞ্ঞাৰণ্ণনা

৩৭. তস্স ৰিত্থারোতি তস্স লক্খণপরিগ্গণ্হনে নেমিত্তকানং সন্তপ্পনস্স ৰিত্থারো ৰিত্থারকথা. গব্ভোক্কন্তিযং নিমিত্তভূত সুপিনপটিগ্গাহকসন্তপ্পনে ৰুত্তোযেৰ. নিদ্দোসেনাতি খারিকলোণিকাদিদোসরহিতেন. ধাতিযোতি থঞ্ঞপাযিকা ধাতিযো. তা হি ধাপেন্তি থঞ্ঞং পাযেন্তীতি ধাতিযো. ‘‘তথা’’তি ইমিনা ‘‘সট্ঠি’’ন্তি পদং উপসংহরতি ¶ , সেসাপীতি ন্হাপিকা, ধারিকা, পরিহারিকাতি ইমা তিৰিধা. তাপি দহন্তি ৰিদহন্তি ন্হানং দহন্তি ধারেন্তীতি ‘‘ধাতিযো’’ ত্ৰেৰ ৰুচ্চন্তি. তত্থ ধারণং উরসা, ঊরুনা, হত্থেহি ৰা সুচিরং ৰেলং সন্ধারণং. পরিহরণং ¶ অঞ্ঞস্স অঙ্কতো অত্তনো অঙ্কং, অঞ্ঞস্স বাহুতো অত্তনো বাহুং উপসংহরন্তেহি হরণং সম্পাপনং.

৩৮. মঞ্জুস্সরোতি সণ্হস্সরো. যো হি সণ্হো, সো খরো ন হোতীতি আহ ‘‘অখরস্সরো’’তি. ৰগ্গুস্সরোতি মনোরম্মস্সরো, মনোরম্মতা চস্স চাতুরিযনে পুঞ্ঞযোগতোতি আহ ‘‘ছেকনিপুণস্সরো’’তি. মধুরস্সরোতি সোতসুখস্সরো, সোতসুখতা চস্স অতিৰিয ইট্ঠভাৰেনাতি আহ ‘‘সাতস্সরো’’তি. পেমনীযস্সরোতি ¶ পিযাযিতব্বস্সরো, পিযাযিতব্বতা চস্স সুণন্তানং অত্তনি ভত্তিসমুপ্পাদনেনাতি আহ ‘‘পেমজনকস্সরো’’তি. করৰীকস্সরোতি. করৰীকসদ্দো যেসং সত্তানং সোতপথং উপগচ্ছতি, তে অত্তনো সরসম্পত্তিযা পকতিং জহাপেত্ৰা অৰসে করোন্তো অত্তনো ৰসে ৰত্তেতি, এৰং মধুরোতি দস্সেন্তো ‘‘তত্রিদ’’ন্তিআদিমাহ. তত্থ ‘‘করৰীকসকুণে’’তিআদি তস্স সভাৰকথনং. লল়িতন্তি পীতিৰেগসমুট্ঠিতং লীল়ং. ছড্ডেত্ৰাতি ‘‘সঙ্খরণম্পি মধুরসদ্দসৰনন্তরাযকর’’ন্তি তিণানি অপনেত্ৰা. অনিক্খিপিত্ৰাতি ভূমিযং অনিক্খিপিত্ৰা আকাসগতমেৰ কত্ৰা. অনুবদ্ধমিগা ৰাল়মিগেহি. ততো মরণভযং হিত্ৰা. পক্খে পসারেত্ৰাতি পক্খে যথাপসারিতে কত্ৰা অপতন্তা তিট্ঠন্তি.

সুৰণ্ণপঞ্জরং ৰিস্সজ্জেসি যোজনপ্পমাণে আকাসে অত্তনো আণায পৰত্তনতো. তেনাহ ‘‘সো রাজাণাযা’’তিআদি. লল়িংসূতি লল়িতং কাতুং আরভিংসু. তং পীতিন্তি ¶ তং বুদ্ধগুণারম্মণং পীতিং তেনেৰ নীহারেন পুনপ্পুনং পৰত্তং পীতিং অৰিজহিত্ৰা ৰিক্খম্ভিতকিলেসা থেরানং সন্তিকে লদ্ধধম্মস্সৰনসপ্পাযা উপনিস্সযসম্পত্তিযা পরিপক্কঞাণতায সত্তহি…পে… পতিট্ঠাসি. সত্তসতমত্তেন ওরোধজনেন সদ্ধিং পদসাৰ থেরানং সন্তিকং উপগতত্তা ‘‘সত্তহি জঙ্ঘসতেহি সদ্ধি’’ন্তি ৰুত্তং. ততোতি করৰীকসদ্দতো. সতভাগেন…পে… ৰেদিতব্বো অনেককপ্পকোটিসতসম্ভূতপুঞ্ঞসম্ভারসমুদাগতৰত্থুসম্পত্তিভাৰতো.

৩৯. কম্মৰিপাকজন্তি সাতিসযসুচরিতকম্মনিব্বত্তং পিত্তসেম্হরুহিরাদীহি অপলিবুদ্ধং দূরেপি আরম্মণং সম্পটিচ্ছনসমত্থং কম্মৰিপাকেন সহজাতং, কম্মস্স ৰা ৰিপাকভাৰেন জাতং পসাদচক্খু. দুৰিধঞ্হি দিব্বচক্খুং কম্মমযং, ভাৰনামযন্তি. তত্রিদং কম্মমযন্তি আহ ‘‘ন ভাৰনাময’’ন্তি. ভাৰনামযং পন বোধিমূলে উপ্পজ্জিস্সতি. অযং ‘‘সো’’তি সল্লক্খণং কামং মনোৰিঞ্ঞাণেন হোতি, চক্খুৰিঞ্ঞাণেন পন তস্স তথা ৰিভাৰিতত্তা মনোৰিঞ্ঞাণস্স তত্থ তথাপৰত্তীতি আহ ‘‘যেন নিমিত্তং…পে… সক্কোতী’’তি.

৪০. ৰচনত্থোতি ¶ ¶ সদ্দত্থো. নিমীলনন্তি নিমীলনদস্সনং নৰিসুদ্ধং, তথা চ অক্খীনি অৰিৰটানি নিমীলদস্সনস্স ন ৰিসুদ্ধিভাৰতো. তব্বিপরিযাযতো পন দস্সনং ৰিসুদ্ধং, ৰিৰটঞ্চাতি আহ ‘‘অন্তরন্তরা’’তিআদি.

৪১. নী-ইতি – জাননত্থং ধাতুং গহেত্ৰা আহ ‘‘পনযতি জানাতী’’তি. যতো ৰুত্তং ‘‘অনিমিত্তা ন নাযরে’’তি (ৰিসুদ্ধি. ১.১৭৪; সং. নি. অট্ঠ. ১.১.২০), ‘‘ৰিদূভি ¶ নেয্যং নরৰরস্সা’’তি (নেত্তি. সঙ্গহৰার) চ. নী-ইতি পন পৰত্তনত্থং ধাতুং গহেত্ৰা ‘‘নযতি পৰত্তেতী’’তি. অপ্পমত্তো অহোসি তেসু তেসু কিচ্চকরণীযেসু.

৪২. ৰস্সাৰাসো ৰস্সং উত্তরপদলোপেন, তস্মা ৰস্সং, ৰস্সে ৰা, সন্নিৰাসফাসুতায অরহতীতি ৰস্সিকো, পাসাদো. মাসা পন ৰস্সে উতুম্হি ভৰাতি ৰস্সিকা. ইতরেসূতি হেমন্তিকং গিম্হিকন্তি ইমেসু. এসেৰ নযোতি উত্তরপদলোপেন নিদ্দেসং অতিদিসতি.

নাতিউচ্চো হোতি নাতিনীচোতি গিম্হিকো ৰিয উচ্চো, হেমন্তিকো ৰিয নীচো ন হোতি, অথ খো তদুভযৰেমজ্ঝলক্খণতায নাতিউচ্চো হোতি, নাতিনীচো. অস্সাতি পাসাদস্স. নাতিবহূনীতি গিম্হিকস্স ৰিয ন অতিবহূনি. নাতিতনূনীতি হেমন্তিকস্স ৰিয ন খুদ্দকানি, তনুতরজালানি চ. মিস্সকানেৰাতি হেমন্তিকে ৰিয ন উণ্হনিযানেৰ, গিম্হিকে ৰিয চ ন সীতনিযানেৰ, অথ খো উভযমিস্সকানেৰ. তনুকানীতি ন পুথুলানি. উণ্হপ্পৰেসনত্থাযাতি সূরিযসন্তাপানুপ্পৰেসায. ভিত্তিনিযূহানীতি দক্খিণপস্সে ভিত্তীসু নিযূহানি. সিনিদ্ধন্তি সিনেহৰন্তং, সিনিদ্ধগ্গহণেনেৰ চস্স গরুকতাপি ৰুত্তা এৰ. কটুকসন্নিস্সিতন্তি তিকটুকাদিকটুকদ্রব্বূপসঞ্হিতং. উদকযন্তানীতি উদকধারাৰিস্সন্দযন্তানি. যথা জলযন্তানি, এৰং হিমযন্তানিপি তত্থ করোন্তি এৰ. তস্মা হেমন্তে ৰিয হিমানি পতন্তানিযেৰ হোন্তীতি চ ৰেদিতব্বং.

সব্বট্ঠানানিপীতি ¶ সব্বানি পটিকিরিযান্হানভোজনকীল়াসঞ্চরণাদিট্ঠানানিপি, ন নিৰাসট্ঠানানিযেৰ. তেনাহ ‘‘দোৰারিকাপী’’তিআদি. তত্থ কারণমাহ ‘‘রাজা কিরা’’তিআদি.

পঠমভাণৰারৰণ্ণনা নিট্ঠিতা.

জিণ্ণপুরিসৰণ্ণনা

৪৪. গোপানসিৰঙ্কন্তি ¶ ¶ ৰঙ্কগোপানসী ৰিয. ৰঙ্কানঞ্হি ৰঙ্কভাৰস্স নিদস্সনত্থং অৰঙ্কগোপানসীপি গয্হতি. আভোগ্গৰঙ্কন্তি আদিতো পট্ঠায অব্ভুগ্গতায কুটিলসরীরতায ৰঙ্কং. তেনাহ ‘‘খন্ধে’’তিআদি. দণ্ডপরং দণ্ডগ্গহণপরং অযনং গমনং এতস্সাতি দণ্ডপরাযনং, দণ্ডো ৰা পরং আযনং গমনকারণং এতস্সাতি দণ্ডপরাযনং. ঠানাদীসু দণ্ডো গতি অৰস্সযো এতস্স তেন ৰিনা অপ্পৰত্তনতোতি দণ্ডগতিকং, গচ্ছতি এতেনাতি ৰা গতি, দণ্ডো গতি গমনকারণং এতস্সাতি দণ্ডগতিকং. দণ্ডপটিসরণন্তি এত্থাপি এসেৰ নযো. জরাতুরন্তি জরায কিলন্তং অস্সৰসং. যদা রথো পুরতো হোতীতি দ্ৰেধাপথে সম্পত্তে পুরতো গচ্ছন্তে বলকাযে তত্থ একং সণ্ঠানং আরুল়্হো মজ্ঝে গচ্ছন্তো বোধিসত্তেন আরুল়্হো রথো ইতরং সণ্ঠানং গচ্ছন্তো যদা পুরতো হোতি. পচ্ছা বলকাযোতি তদা পচ্ছা হোতি সব্বো বলকাযো. তাদিসে ওকাসেতি তাদিসে ৰুত্তপ্পকারে মগ্গপ্পদেসে. তং পুরিসন্তি তং জিণ্ণপুরিসং. সুদ্ধাৰাসাতি সিদ্ধত্থাদীনং তিণ্ণং সম্মাসম্বুদ্ধানং সাসনে ব্রহ্মচরিযং চরিত্ৰা সুদ্ধাৰাসভূমিযং নিব্বত্তব্রহ্মানো. তে হি তদা তত্থ তিট্ঠন্তি. ‘‘কিং ¶ পনেসো জিণ্ণো নামা’’তি এসো তযা ৰুচ্চমানো কিং অত্থতো, তং মে নিদ্ধারেত্ৰা কথেহীতি দস্সেতি. অনিদ্ধারিতসরূপত্তা হি তস্স অত্তনো বোধিসত্তো লিঙ্গসব্বনামেন তং ৰদন্তো ‘‘কি’’ন্তি আহ. ‘‘যথা কিং তে জাত’’ন্তি দ্ৰযমেৰ হি লোকে যেভুয্যতো জাযতি ইত্থী ৰা পুরিসো ৰা, তথাপি তং লিঙ্গসব্বনামেন ৰুচ্চতি, এৰং সম্পদমিদং ৰেদিতব্বং. ‘‘কিং ৰুত্তং হোতী’’তিআদি তস্স অনিদ্ধারিতসরূপতংযেৰ ৰিভাৰেতি.

‘‘তেন হী’’তিআদি ‘‘অযঞ্চ জিণ্ণভাৰো সব্বসাধারণত্তা ময্হম্পি উপরি আপত্তিতো এৰা’’তি মহাসত্তস্স সংৰিজ্জনাকারৰিভাৰনং. রথং সারেতীতি সারথি. কীল়াৰিহারত্থং উয্যুত্তা যন্তি উপগচ্ছন্তি এতন্তি উয্যানং. অলন্তি পটিক্খেপৰচনং. নামাতি গরহণে নিপাতো ‘‘কথঞ্হিনামা’’তিআদীসু (পারা. ৩৯, ৪২, ৮৭, ৮৮, ৯০, ১৬৬, ১৭০; পাচি. ১, ১৩, ৩৬) ৰিয. জাতিযা আদীনৰদস্সনত্থং তংমূলস্স উম্মূলনং ৰিয হোতীতি, তস্স চ অৰস্সিতভাৰতো ‘‘জাতিযা মূলং ¶ খণন্তো নিসীদী’’তি আহ. সিদ্ধে হি কারণে ফলং সিদ্ধমেৰ হোতীতি. পীল়ং জনেত্ৰা অন্তোতুদনৰসেন সব্বপঠমং হদযং অনুপৰিস্স ঠিতত্তা পঠমেন সল্লেন হদযে ৰিদ্ধো ৰিয নিসীদীতি যোজনা.

ব্যাধিপুরিসৰণ্ণনা

৪৭. পুব্বে ¶ ৰুত্তনযেনেৰাতি ‘‘সুদ্ধাৰাসা কিরা’’তিআদিনা পুব্বে ৰুত্তেনেৰ নযেন. আবাধিকন্তি আবাধৰন্তং. দুক্খিতন্তি সঞ্জাতদুক্খং. অজাতন্তি অজাতভাৰো, নিব্বানং ৰা.

কালকতপুরিসৰণ্ণনা

৫০. ভন্তনেত্তকুপ্পলাদি ৰিৰিধং কত্ৰা লাতব্বতো ৰিলাতো, ৰয্হং, সিৰিকা চাতি আহ ‘‘ৰিলাতন্তি সিৰিক’’ন্তি. সিৰিকায দিট্ঠপুব্বত্তা মহাসত্তো চিতকপঞ্জরং ‘‘সিৰিক’’ন্তি আহ. ইতো পটিগতন্তি ইতো ভৰতো অপগতং ¶ . কতকালন্তি পরিযোসাপিতজীৰনকালং. তেনাহ ‘‘যত্তক’’ন্তিআদি.

পব্বজিতৰণ্ণনা

৫৩. ধম্মং চরতীতি ধম্মচরণো, তস্স ভাৰো ধম্মচরণভাৰোতি ধম্মচরিযমেৰ ৰদতি. এৰং একেকস্স পদস্সাতি যথা ‘‘সাধুধম্মচরিযাতি পব্বজিতো’’তি যোজনা, এৰং ‘‘সাধুসমচরিযাতি পব্বজিতো’’তিআদিনা একেকস্স পদস্স যোজনা ৰেদিতব্বা. সব্বানীতি ‘‘সাধুধম্মচরিযা’’তিআদীসু আগতানি সব্বানি ধম্মসমকুসলপুঞ্ঞপদানি. দসকুসলকম্মপথৰেৰচনানীতি দানাদীনি দসকুসলধম্মপরিযাযপদানি.

বোধিসত্তপব্বজ্জাৰণ্ণনা

৫৪. পব্বজিতস্স ধম্মিং কথং সুত্ৰাতি সম্বন্ধো. অঞ্ঞঞ্চ সঙ্গীতিঅনারুল়্হং তেন তদা ৰুত্তং ধম্মিং কথন্তি যোজনা. ‘‘ৰংসোৰা’’তি পদত্তযেন ধম্মতা এসাতি দস্সেতি. চিরস্সং চিরস্সং পস্সন্তি দীঘাযুকভাৰতো. তথা হি ৰুত্তং ‘‘বহূনং ৰস্সানং…পে… অচ্চযেনা’’তি. তেনেৰাতি ন চিরস্সং দিট্ঠভাৰেনেৰ. অচিরকালন্তরিকমেৰ পুব্বকালকিরিযং দস্সেন্তো ‘‘জিণ্ণঞ্চ দিস্ৰা…পে… পব্বজিতঞ্চ দিস্ৰা, তস্মা অহং পব্বজিতোম্হি রাজা’’তি আহ ¶ যথা ‘‘ন্হত্ৰা ৰত্থং পরিদহিত্ৰা গন্ধং ৰিলিম্পিত্ৰা মালং পিল়ন্ধিত্ৰা ভুত্তো’’তি.

মহাজনকাযঅনুপব্বজ্জাৰণ্ণনা

৫৫. ‘‘কস্মা ¶ পনেত্থা’’তিআদিনা তেসং চতুরাসীতিযা পাণসহস্সানং মহাসত্তে সংভত্ততং, সংৰেগবহুলতঞ্চ দস্সেতি, যতো সুতট্ঠানেযেৰ ঠত্ৰা ঞাতিমিত্তাদীসু কিঞ্চি অনামন্তেত্ৰা মত্তৰরৰারণো ৰিয অযোমযবন্ধনং ঘনবন্ধনং ছিন্দিত্ৰা পব্বজ্জং উপগচ্ছিংসু.

চত্তারো মাসে চারিকং চরি ন তাৰ ঞাণস্স পরিপাকং গতত্তা.

যদা পন ঞাণং পরিপাকং গতং, তং দস্সেন্তো ‘‘অযং পনা’’তিআদিমাহ. সব্বেৰ ইমে পব্বজিতা মম গমনং ¶ জানিস্সন্তি, জানন্তা চ মং অনুবন্ধিস্সন্তীতি অধিপ্পাযো. সন্নিসীৰেসূতি সন্নিসিন্নেসু. সণতেৰাতি সণতি ৰিয সদ্দং করোতি ৰিয.

অৰিৰেকারামানন্তি অনভিরতিৰিৰেকানং. অযং কালোতি অযং তেসং পব্বজিতানং মম গমনস্স অজাননকালো. নিক্খমিত্ৰাতি পণ্ণসালায নিগ্গন্ত্ৰা, মহাভিনিক্খমনং পন পগেৰ নিক্খন্তো. পারমিতানুভাৰেন উট্ঠিতং উপরি দেৰতাহি দিব্বপচ্চত্থরণেহি সুপঞ্ঞত্তম্পি মহাসত্তস্স পুঞ্ঞানুভাৰেন সিদ্ধত্তা তেন পঞ্ঞত্তং ৰিয হোতীতি ৰুত্তং ‘‘পল্লঙ্কং পঞ্ঞপেত্ৰা’’তি. ‘‘কামং তচো চ ন্হারু চ, অট্ঠি চ অৰসিস্সতূ’’তিআদি (ম. নি. ২.১৮৪; সং. নি. ২.২২, ২৩৭; অ. নি. ২.৫; ৮.১৩; মহানি. ১৭, ১৯৬) নযপ্পৰত্তং চতুরঙ্গৰীরিযং অধিট্ঠহিত্ৰা. ৰূপকাসন্তি ৰিৰেকৰাসং.

অঞ্ঞেনেৰাতি যত্থ মহাপুরিসো তদা ৰিহরতি, ততো অঞ্ঞেনেৰ দিসাভাগেন. কামং বোধিমণ্ডো জম্বুদীপস্স মজ্ঝে নাভিট্ঠানিযো, তদা পন ব্রহারঞ্ঞে ৰিৰিত্তে যোগীনং পটিসল্লানসারুপ্পো হুত্ৰা তিট্ঠতি, তদঞ্ঞো পন জম্বুদীপপ্পদেসো যেভুয্যেন বহুজনো আকিণ্ণমনুস্সো ইদ্ধো ফীতো অহোসি. তেন তে তং তং জনপদদেসং উদ্দিস্স গতা ‘‘অন্তো জম্বুদীপাভিমুখা চারিকং পক্কন্তা’’তি ৰুত্তা অন্তো জম্বুদীপাভিমুখা, ন হিমৰন্তাদিপব্বতাভিমুখাতি অত্থো.

বোধিসত্তঅভিনিৰেসৰণ্ণনা

৫৭. কামং ¶ ভগৰা বুদ্ধো হুত্ৰা সত্তসত্তাহানি তত্থেৰ ৰসি, সব্বপঠমং পন ৰিসাখপুণ্ণমং ¶ সন্ধায ‘‘একরত্তিৰাসং উপগতস্সা’’তি ৰুত্তং. রহোগতস্সাতি রহো জনৰিৰিত্তং ঠানং উপগতস্স, তেন গণসঙ্গণিকাভাৰেন মহাসত্তস্স কাযৰিৰেকমাহ. পটিসল্লীনস্সাতি ¶ নানারম্মণচারতো চিত্তস্স নিৰত্তিযা পতি সম্মদেৰ নিলীনস্স তত্থ অৰিসটচিত্তস্স, তেন চিত্তসঙ্গণিকাভাৰেনস্স পুব্বভাগিযং চিত্তৰিৰেকমাহ. দুক্খন্তি জাতিআদিমূলকং দুক্খং. কামং চুতূপপাতাপি জাতিমরণানি এৰ, মরণজাতিযোৰ ‘‘জাযতি মীযতী’’তি পন ৰত্ৰা ‘‘চৰতি উপপজ্জতী’’তি ৰচনং ন একভৰপরিযাপন্নানং নেসং গহণং, অথ খো নানাভৰপরিযাপন্নানং একজ্ঝং গহণন্তি দস্সেন্তো আহ ‘‘ইদং দ্ৰযং…পে… ৰুত্ত’’ন্তি. কস্মা পন লোকস্স কিচ্ছাপত্তিপরিৰিতক্কনে ‘‘জরামরণস্সা’’তি জরামরণৰসেন নিযমনং কতন্তি আহ ‘‘যস্মা’’তিআদি. জরামরণমেৰ উপট্ঠাতি আদিতোতি অধিপ্পাযো. অভিনিৰিট্ঠস্সাতি আরদ্ধস্স. পটিচ্চসমুপ্পাদমুখেন ৰিপস্সনারম্ভে তস্স জরামরণতো পট্ঠায অভিনিৰেসো অগ্গতো যাৰ মূলং ওতরণং ৰিযাতি আহ ‘‘ভৰগ্গতো ওতরন্তস্স ৰিযা’’তি.

উপাযমনসিকারাতি উপাযেন মনসিকরণতো মনসিকারস্স পৰত্তনতো. ইদানি তং উপাযমনসিকারপরিযাযং যোনিসোমনসিকারং সরূপতো, পৰত্তিআকারতো চ দস্সেতুং ‘‘অনিচ্চাদীনি হী’’তিআদি ৰুত্তং. যোনিসোমনসিকারো নাম হোতীতি যাথাৰতো মনসিকারভাৰতো. অনিচ্চাদীনীতি আদি-সদ্দেন দুক্খানত্তঅসুভাদীনং গহণং. অযন্তি ‘‘এতদহোসী’’তি এৰং ৰুত্তো ‘‘কিম্হি নু খো সতী’’তিআদিনযপ্পৰত্তো মনসিকারো. তেসং অঞ্ঞতরোতি তেসু অনিচ্চাদিমনসিকারেসু অঞ্ঞতরো একো. কো পন সোতি? অনিচ্চমনসিকারোৰ, তত্থ কারণমাহ ‘‘উদযব্বযানুপস্সনাৰসেন পৰত্তত্তা’’তি. যঞ্হি উপ্পজ্জতি চেৰ চৰতি চ, তং অনিচ্চং উদযৰযপরিচ্ছিন্নত্তা অদ্ধুৰন্তি কত্ৰা. তস্স পন তব্ভাৰদস্সনং যাথাৰমনসিকারতায যোনিসোমনসিকারো ¶ . ইতো যোনিসোমনসিকারাতি হেতুম্হি নিস্সক্কৰচনন্তি তস্স ইমিনা ‘‘উপাযমনসিকারেনা’’তি হেতুম্হি করণৰচনেন অত্থমাহ. সমাগমো অহোসীতি ¶ যাথাৰতো পটিৰিজ্ঝনৰসেন সঙ্গমো অহোসি. কিং পন তন্তি কিং পন তং জরামরণকারণন্তি আহ ‘‘জাতী’’তি. ‘‘জাতিযা খো’’তিআদীসু অযং সঙ্খেপত্থো – কিম্হি নু খো সতি জরামরণং হোতি, কিং পচ্চযা জরামরণ’’ন্তি জরামরণকারণং পরিগ্গণ্হন্তস্স বোধিসত্তস্স ‘‘যস্মিং সতি যং হোতি, অসতি চ ন হোতি, তং তস্স কারণ’’ন্তি এৰং অব্যভিচারিকারণপরিগ্গণ্হনে ‘‘জাতিযা খো সতি জরামরণং হোতি, জাতিপচ্চযা জরামরণ’’ন্তি যা জরামরণস্স কারণপরিগ্গাহিকা পঞ্ঞা উপ্পজ্জতি, তায উপ্পজ্জন্তিযা সমাগমো অহোসীতি. সব্বপদানীতি ‘‘কিম্হি নু খো সতি জাতি হোতী’’তিআদিনা আগতানি জাতিআদীনি ৰিঞ্ঞাণপরিযোসানানি নৰ পদানি.

দ্ৰাদসপদিকে ¶ পটিচ্চসমুপ্পাদে ইধ যানি দ্ৰে পদানি অগ্গহিতানি, তেসং অগ্গহণে কারণং পুচ্ছিত্ৰা ৰিস্সজ্জেতুকামো তেসং গহেতব্বাকারং তাৰ দস্সেন্তো ‘‘এত্থ পনা’’তিআদিমাহ. পচ্চক্খভূতং পচ্চুপ্পন্নভৰং পঠমং গহেত্ৰা তদনন্তরং অনাগতং ‘‘দুতিয’’ন্তি গহণে অতীতো ততিযো হোতীতি আহ ‘‘অৰিজ্জা সঙ্খারা হি অতীতো ভৰো’’তি. ননু চেত্থ অনাগতস্সাপি ভৰস্স গহণং ন সম্ভৰতি পচ্চুপ্পন্নৰসেন অভিনিৰেসস্স জোতিতত্তাতি? সচ্চমেতং, কারণে পন গহিতে ফলং গহিতমেৰ হোতীতি তথা ৰুত্তন্তি দট্ঠব্বং. অপি চেত্থ অনাগতোপি অদ্ধা অত্থতো সঙ্গহিতো এৰ, যতো পরতো ‘‘নামরূপপচ্চযা সল়াযতন’’ন্তিআদিনা অনাগতদ্ধসঙ্গহিকা দেসনা পৰত্তা. তেহীতি অৰিজ্জাসঙ্খারেহি আরম্মণভূতেহি. ন ঘটিযতি ন সম্বজ্ঝতি. মহাপুরিসো হি পচ্চুপ্পন্নৰসেন অভিনিৰিট্ঠোতি অঘটনে কারণমাহ. অদিট্ঠেহীতি অনৰবুদ্ধেহি, ইত্থম্ভূতলক্খণে চেতং করণৰচনং. সতি অনুবোধে পটিৰেধেন ভৰিতব্বন্তি আহ ‘‘ন ¶ সক্কা বুদ্ধেন ভৰিতু’’ন্তি. ইমিনাতি মহাসত্তেন. তেতি অৰিজ্জাসঙ্খারা. ভৰউপাদানতণ্হাৰসেনেৰাতি ভৰউপাদানতণ্হাদস্সনৰসেনেৰ. দিট্ঠা তংসভাৰতংসহগতেহি তেহি সমানযোগক্খমত্তা. ৰিসুদ্ধিমগ্গে (ৰিসুদ্ধি. ২.৫৭০) কথিতাৰ, তস্মা ন ইধ কথেতব্বাতি অধিপ্পাযো.

৫৮. পচ্চযতোতি হেতুতো, সঙ্খারতোতি অত্থো. ‘‘কিম্হি নু খো সতি জরামরণং হোতী’’তিআদিনা হি হেতুপরম্পরাৰসেন ফলপরম্পরায ৰুচ্চমানায ¶ ‘‘কিম্হি নু খো সতি ৰিঞ্ঞাণং হোতী’’তি ৰিচারণায ‘‘সঙ্খারে খো সতি ৰিঞ্ঞাণং হোতী’’তি ৰিঞ্ঞাণস্স ৰিসেসকারণভূতে সঙ্খারে অগ্গহিতে ততো ৰিঞ্ঞাণং পটিনিৰত্ততি নাম, ন সব্বপচ্চযতো. তেনেৰাহ ‘‘নামরূপে খো সতি ৰিঞ্ঞাণং হোতী’’তি (দী. নি. ২.৫৮), নামম্পি চেত্থ সহজাতাদিৰসেনেৰ পচ্চযভূতং অধিপ্পেতং, ন কম্মূপনিস্সযৰসেন পচ্চুপ্পন্নৰসেন অভিনিৰিসস্স জোতিতত্তা. আরম্মণতোতি অৰিজ্জাসঙ্খারসঙ্খাতআরম্মণতো, অতীতভৰসঙ্খাতআরম্মণতো ৰা. অতীতদ্ধপরিযাপন্না হি অৰিজ্জাসঙ্খারা. যতো পটিনিৰত্তমানং ৰিঞ্ঞাণং অতীতভৰতোপি পটিনিৰত্ততি নাম. উভযম্পীতি পটিসন্ধিৰিঞ্ঞাণম্পি ৰিপস্সনাৰিঞ্ঞাণম্পি. নামরূপং নাতিক্কমতীতি পচ্চযভূতং, আরম্মণভূতঞ্চ নামরূপং নাতিক্কমতি তেন ৰিনা অৰত্তনতো. তেনাহ ‘‘নামরূপতো পরং ন গচ্ছতী’’তি.

ৰিঞ্ঞাণে নামরূপস্স পচ্চযে হোন্তেতি ৰিঞ্ঞাণে নামস্স, রূপস্স, নামরূপস্স চ পচ্চযে হোন্তে. নামরূপে চ ৰিঞ্ঞাণস্স পচ্চযে হোন্তেতি তথা নামে, রূপে, নামরূপে চ ৰিঞ্ঞাণস্স ¶ পচ্চযে হোন্তেতি চতুৰোকারএকৰোকারপঞ্চৰোকারভৰৰসেন যথারহং যোজনা ৰেদিতব্বা, দ্ৰীসুপি অঞ্ঞমঞ্ঞপচ্চযেসু হোন্তেসূতি পন পঞ্চৰোকারভৰৰসেনেৰ. এত্তকেনাতি এৰং ৰিঞ্ঞাণ নামরূপানং ¶ অঞ্ঞমঞ্ঞং উপত্থম্ভনৰসেন পৰত্তিযা. জাযেথ ৰা…পে… উপপজ্জেথ ৰাতি ‘‘সত্তো জাযতি…পে… উপপজ্জতি ৰা’’তি সমঞ্ঞা হোতি ৰিঞ্ঞাণনামরূপৰিনিমুত্তস্স সত্তপঞ্ঞত্তিযা উপাদানভূতস্স ধম্মস্স অভাৰতো. তেনাহ ‘‘ইতো হী’’তিআদি. এতদেৰাতি ৰিঞ্ঞাণং, নামরূপন্তি এতং দ্ৰযমেৰ.

পঞ্চ পদানীতি ‘‘জাযেথ ৰা’’তিআদীনি পঞ্চ পদানি. ননু তত্থ পঠমততিযেহি চতুত্থপঞ্চমানি অত্থতো অভিন্নানীতি আহ ‘‘সদ্ধিং অপরাপরং চুতিপটিসন্ধীহী’’তি. পুন তং এত্তাৰতাতি ৰুত্তমত্থন্তি যো ‘‘এত্তাৰতা’’তি পদেন পুব্বে ৰুত্তো, তমেৰ যথাৰুত্তমত্থং ‘‘যদিদ’’ন্তিআদিনা নিয্যাতেন্তো নিদস্সেন্তো পুন ৰত্ৰা. অনুলোমপচ্চযাকারৰসেনাতি পচ্চযধম্মদস্সনপুব্বকং পচ্চযুপ্পন্নধম্মদস্সনৰসেন. পচ্চযধম্মানঞ্হি অত্তনো পচ্চযুপ্পন্নস্স ¶ পচ্চযভাৰো ইদপ্পচ্চযতা পচ্চযাকারো, সো চ ‘‘অৰিজ্জাপচ্চযা সঙ্খারা’’তিআদিনা ৰুত্তো. সংসারপ্পৰত্তিযা অনুলোমনতো অনুলোমপচ্চযাকারো. জাতিআদিকং সব্বং ৰট্টদুক্খং চিত্তেন সমিহিতেন কতং সমূহৰসেন গহেত্ৰা পাল়িযং ‘‘দুক্খক্খন্ধস্সা’’তি ৰুত্তন্তি আহ ‘‘জাতি…পে… দুক্খরাসিস্সা’’তি.

৫৯. দুক্খক্খন্ধস্স অনেকৰারং সমুদযদস্সনৰসেন ৰিঞ্ঞাণস্স পৰত্তত্তা ‘‘সমুদযো সমুদযো’’তি আমেডিতৰচনং অৰোচ. অথ ৰা ‘‘এৰং সমুদযো হোতী’’তি ইদং ন কেৰলং নিব্বত্তিনিদস্সনপদং, অথ খো পটিচ্চসমুপ্পাদ-সদ্দো ৰিয সমুপ্পাদমুখেন ইধ সমুদয-সদ্দো নিব্বত্তিমুখেন পচ্চযত্তং ৰদতি. ৰিঞ্ঞাণাদযো ভৰন্তা ইধ পচ্চযধম্মা নিদ্দিট্ঠা, তে সামঞ্ঞরূপেন ব্যাপনিচ্ছাৰসেন গণ্হন্তো ‘‘সমুদযো সমুদযো’’তি আহ, এৰঞ্চ কত্ৰা যং ৰক্খতি ‘‘ইমস্মিং সতি ¶ ইদং হোতীতি পচ্চযসঞ্জাননমত্তং কথিত’’ন্তি, (দী. নি. অট্ঠ. ২.৫৯) তং সমত্থিতং হোতি. যদি এৰং ‘‘উদযদস্সনপঞ্ঞা ৰেসা’’তি ইদং কথন্তি? নাযং দোসো পচ্চযতো উদযদস্সনমুখেন নিব্বত্তিলক্খণদস্সনস্স সম্ভৰতো. দস্সনট্ঠেন চক্খূতি সমুদযস্স পচ্চক্খতো দস্সনভাৰেন চক্খু ৰিযাতি চক্খু. ঞাতকরণট্ঠেনাতি যথা সমুদযো সম্মদেৰ ঞাতো হোতি অৰবুদ্ধো, এৰং করণট্ঠেন. পজাননট্ঠেনাতি ‘‘ৰিঞ্ঞাণাদিতংতংপচ্চযুপ্পত্তিযা এতস্স দুক্খক্খন্ধস্স সমুদযো হোতী’’তি পকারতো জাননট্ঠেন. নিব্বিজ্ঝিত্ৰা পটিৰিজ্ঝিত্ৰা উপ্পন্নট্ঠেনাতি অনিব্বিজ্ঝিত্ৰা পুব্বে উদযদস্সনপঞ্ঞায পটিপক্খধম্মে নিব্বিজ্ঝিত্ৰা ‘‘অযং সমুদযো’’তি পচ্চযতো, খণতো চ, সরূপতো পটিৰিজ্ঝিত্ৰা ¶ উপ্পন্নভাৰেন, নিব্বিজ্ঝনট্ঠেন পটিৰিজ্ঝনট্ঠেন ৰিজ্জাতি ৰুত্তং হোতি. ওভাসট্ঠেনাতি সমুদযসভাৰপটিচ্ছাদনকস্স মোহন্ধকারস্স চ কিলেসন্ধকারস্স চ ৰিধমনৰসেন অৰভাসকভাৰেন.

ইদানি যথাৰুত্তমত্থং পটিপাটিযা ৰিভাৰেতুং ‘‘যথাহা’’তিআদি ৰুত্তং. তত্থ চক্খুং উদপাদীতি পাল়িযং পদুদ্ধারো. কথং উদপাদীতি চেতি আহ ‘‘দস্সনট্ঠেনা’’তি. ‘‘সমুদযস্স পচ্চক্খতো দস্সনভাৰেনাতি ৰুত্তো ৰাযমত্থো. ইমিনা নযেন সেসপদেসুপি অত্থো ৰেদিতব্বো. চক্খুধম্মোতি চক্খূতি পাল়িধম্মো. দস্সনট্ঠো অত্থোতি দস্সনসভাৰো তেন ¶ পকাসেতব্বো অত্থো. সেসেসুপি এসেৰ নযো. এত্তকেহি পদেহীতি ইমেহি পঞ্চহি পদেহি. ‘‘কিং কথিত’’ন্তি পিণ্ডত্থং পুচ্ছতি. পচ্চযসঞ্জাননমত্তন্তি ৰিঞ্ঞাণাদীনং পচ্চযধম্মানং নামরূপাদিপচ্চযুপ্পন্নস্স পচ্চযসভাৰসঞ্জাননমত্তং কথিতং অৰিসেসতো পচ্চযসভাৰসল্লক্খণস্স জোতিতত্তা. সঙ্খারানং সম্মদেৰ ¶ উদযদস্সনস্স জোতিতত্তা ‘‘ৰীথিপটিপন্না তরুণৰিপস্সনা কথিতা’’তি চ ৰুত্তং.

৬১. অত্তনা অধিগতত্তা আসন্নপচ্চক্খতায ‘‘অয’’ন্তি ৰুত্তং, অরিযমগ্গাদীনং মগ্গনট্ঠেন মগ্গোতি. পুব্বভাগৰিপস্সনা হেসা. তেনাহ ‘‘বোধাযা’’তি. বোধপদস্স ভাৰসাধনতং সন্ধাযাহ ‘‘চতুসচ্চবুজ্ঝনত্থাযা’’তি. পরিঞ্ঞাপহানভাৰনাভিসমযা যাৰদেৰ সচ্ছিকিরিযাভিসমযত্থা নিব্বানাধিগমত্থত্তা ব্রহ্মচরিযৰাসস্সাতি ৰুত্তং ‘‘নিব্বানবুজ্ঝনত্থায এৰ ৰা’’তি. ‘‘নিব্বানং পরমং সুখ’’ন্তি (ম. নি. ২.২১৫, ২১৭; ধ. প. ২০৪) হি ৰুত্তং. বুজ্ঝতীতি চত্তারি অরিযসচ্চানি একপটিৰেধেন পটিৰিজ্ঝতি, তেন বোধ-সদ্দস্স কত্তুসাধনত্তমাহ. পচ্চত্তপদেহীতি পঠমাৰিভত্তিদীপকেহি পদেহি. নিব্বানমেৰ কথিতং ৰিঞ্ঞাণাদি নিরুজ্ঝতি এত্থাতি কত্ৰা. অনিব্বত্তিনিরোধন্তি সব্বসো পচ্চযনিরোধেন অনুপ্পাদনিরোধং অচ্চন্তনিরোধং.

৬২. সব্বেহেৰ এতেহি পদেহীতি ‘‘চক্খূ’’তিআদীহি পঞ্চহি পদেহি. নিরোধসঞ্জাননমত্তমেৰাতি ‘‘নিরোধো নিরোধোতি খো’’তিআদিনা নিরোধস্স সঞ্জাননমত্তমেৰ কথিতং পুব্বারম্ভভাৰতো, ন তস্স পটিৰিজ্ঝনৰসেন পচ্চক্খতো দস্সনং অরিযমগ্গস্স অনধিগতত্তা. সঙ্খারানং সম্মদেৰ নিরোধদস্সনং নাম সিখাপ্পত্তায ৰিপস্সনায ৰসেন ইচ্ছিতব্বন্তি ‘‘ৰুট্ঠানগামিনী বলৰৰিপস্সনা কথিতা’’তি চ ৰুত্তং.

৬৩. ৰিদিত্ৰাতি ¶ পুব্বভাগিযেন ঞাণেন জানিত্ৰা. ততো অপরভাগেতি ৰুত্তনযেন পচ্চযনিরোধজাননতো পচ্ছাভাগে. উপাদানস্স পচ্চযভূতেসূতি চতুব্বিধস্সপি উপাদানস্স আরম্মণপচ্চযাদিনা পচ্চযভূতেসু, উপাদানিযেসূতি অত্থো ¶ . ৰহন্তোতি পৰত্তেন্তো. ইদন্তি ‘‘অপরেন সমযেনা’’তিআদি ৰচনং. কস্মা ৰুত্তন্তি ‘‘যায পটিপত্তিযা সব্বেপি মহাবোধিসত্তা চরিমভৰে বোধায পটিপজ্জন্তি, ৰিপস্সনায মহাবোধিসত্তেন তথেৰ পটিপন্ন’’ন্তি কথেতুকম্যতাৰসেন পুচ্ছাৰচনং. তেনাহ ¶ ‘‘সব্বেযেৰ হী’’তিআদি. তত্থ পুত্তস্স জাতদিৰসে মহাভিনিক্খমনং, পধানানুযোগো চ ধম্মতাৰসেন ৰেদিতব্বো, ইতরং ইতিকত্তব্বতাৰসেন. তত্থাপি চিরকালপরিভাৰনায লদ্ধাসেৰনায মহাকরুণায সঞ্চোদিতমানসত্তা ‘‘কিচ্ছং ৰতাযং লোকো আপন্নো’’তিআদিনা (দী. নি. ২.৫৭; সং. নি. ২.৪, ১০) সংসারদুক্খতো মোচেতুং ইচ্ছিতস্স সত্তলোকস্স কিচ্ছাপত্তিদস্সনমুখেন জরামরণতো পট্ঠায পচ্চযাকারসম্মসনম্পি ধম্মতাৰ. তথা অত্তাধীনতায, কেনচি অনুপখতত্তা, অসেচনকসুখৰিহারতায, চতুত্থজ্ঝানিকতায চ আনাপানকম্মট্ঠানানুযোগো. পঞ্চসু খন্ধেসু অভিনিৰিসিত্ৰাতি ৰিঞ্ঞাণনামরূপাদিপরিযাযেন গহিতেসু পঞ্চসু উপাদানক্খন্ধেসু ৰিপস্সনাভিনিৰেসৰসেন অভিনিৰিসিত্ৰা পটিপত্তিং আরভিত্ৰা. অনুক্কমন্তি অনু অনু গামিতব্বতো পটিপজ্জিতব্বতো ‘‘অনুক্কম’’ন্তি লদ্ধনামং অনুপুব্বপটিপত্তিং. কত্ৰাতি পটিপজ্জিত্ৰা.

ইতি রূপন্তি এত্থ দুতিযো ইতি-সদ্দো নিদস্সনত্থো, তেন পঠমো ইতি-সদ্দো সরূপস্স, পরিমাণস্স চ বোধকো অনেকত্থত্তা নিপাতানং,আৰুত্তিআদিৰসেন ৰাযমত্থো ৰেদিতব্বো. অন্তোগধাৰধারণঞ্চ ৰাক্যং দস্সেন্তো ‘‘ইদং রূপং, এত্তকং রূপং, ইতো উদ্ধং রূপং নত্থী’’তিআদিমাহ ¶ . তত্থ ‘‘রুপ্পনসভাৰ’’ন্তি ইমিনা সামঞ্ঞতো রূপস্স সভাৰো দস্সিতো, ‘‘ভূতুপাদাযভেদ’’ন্তিআদিনা ৰিসেসতো, তদুভযেনপি ‘‘ইদং রূপ’’ন্তি পদস্স অত্থো নিদ্দিট্ঠো. তত্থ লক্খণং নাম তস্স তস্স রূপৰিসেসস্স অনঞ্ঞসাধারণো সভাৰো. রসো তস্সেৰ অত্তনো ফলং পতি পচ্চযভাৰো. পচ্চুপট্ঠানং তস্স পরমত্থতো ৰিজ্জমানত্তা যাথাৰতো ঞাণস্স গোচরভাৰো. পদট্ঠানং আসন্নকারণং, তেনস্স পচ্চযাযত্তৰুত্তিতা দস্সিতা. ‘‘অনৰসেসরূপপরিগ্গহো’’তি ইমিনা পন ‘‘এত্তকং রূপং, ইতো উদ্ধং’’ রূপং নত্থীতি পদদ্ৰযস্সাপি অত্থো নিদ্দিট্ঠো রূপস্স সব্বসো পরিযাদানৰসেন নিযামনতো. ‘‘ইতি রূপস্স সমুদযো’’তি এত্থ পন ইতি-সদ্দো ‘‘ইতি খো ভিক্খৰে সপ্পটিভযো বালো’’তিআদীসু (ম. নি. ৩.১২৪; অ. নি. ৩.১) ৰিয পকারত্থোতি আহ ‘‘ইতীতি এৰ’’ন্তি.

অৰিজ্জাসমুদযাতি ¶ অৰিজ্জায উপ্পাদা, অত্থিভাৰাতি অত্থো. নিরোধনিরোধী হি উপ্পাদো অত্থিভাৰৰাচকোপি হোতি, তস্মা পুরিমভৰসিদ্ধায ¶ অৰিজ্জায সতি ইমস্মিং ভৰে রূপসমুদযো, রূপস্স উপ্পাদো হোতীতি অত্থো. ‘‘তণ্হাসমুদযা’’তিআদীসুপি এসেৰ নযো. আহারসমুদযাতি এত্থ পন পৰত্তিপচ্চযেসু কবল়ীকারাহারস্স বলৰতায সো এৰ গহিতো. তস্মিং পন গহিতে পৰত্তিপচ্চযতাসামঞ্ঞেন উতুচিত্তানি গহিতানেৰ হোন্তীতি চতুসমুট্ঠানিকরূপস্স পচ্চযতো উদযদস্সনং ৰিভাৰিতমেৰাতি দট্ঠব্বং. ‘‘নিব্বত্তিলক্খণ’’ন্তিআদিনা কালৰসেন উদযদস্সনমাহ. তত্থ নিব্বত্তিলক্খণন্তি রূপস্স উপ্পাদসঙ্খাতং সঙ্খতলক্খণং. পস্সন্তোপীতি ন কেৰলং পচ্চযসমুদযমেৰ, অথ খো খণতো উদযং পস্সন্তোপি. অদ্ধাৰসেন হি পঠমং উদযং পস্সিত্ৰা ঠিতো পুন সন্ততিৰসেন দিস্ৰা অনুক্কমেন খণৰসেন পস্সতি. অৰিজ্জানিরোধা রূপনিরোধোতি অগ্গমগ্গেন ¶ অৰিজ্জায অনুপ্পাদনিরোধতো অনাগতস্স রূপস্স অনুপ্পাদনিরোধো হোতি পচ্চযাভাৰে অভাৰতো. তণ্হানিরোধা কম্মনিরোধোতি এত্থাপি এসেৰ নযো. আহারনিরোধাতি পৰত্তিপচ্চযস্স কবল়ীকারাহারস্স অভাৰেন. রূপনিরোধোতি তংসমুট্ঠানরূপস্স অভাৰো হোতি. সেসং ৰুত্তনযমেৰ. ‘‘ৰিপরিণামলক্খণ’’ন্তি ভঙ্গকালৰসেন হেতং ৰযদস্সনং, তস্মা তং অদ্ধাৰসেন পঠমং পস্সিত্ৰা পুন সন্ততিৰসেন দিস্ৰা অনুক্কমেন খণৰসেন পস্সতি. অযঞ্চ নযো পাকতিকৰিপস্সকৰসেন ৰুত্তো, বোধিসত্তানং পনেতং নত্থি. এস নযো উদযদস্সনেপি.

‘‘ইতি ৰেদনা’’তিআদীসুপি হেট্ঠা রূপে ৰুত্তনযানুসারেন অত্থো ৰেদিতব্বো. তেনাহ ‘‘অযং ৰেদনা, এত্তকা ৰেদনা’’তিআদি. তত্থ ৰেদযিত…পে… সভাৰন্তি এত্থ ‘‘ৰেদযিতসভাৰং…পে… ৰিজাননসভাৰ’’ন্তি পচ্চেকং সভাৰ- সদ্দো যোজেতব্বো. ৰেদযিতসভাৰন্তি অনুভৰনসভাৰং. সঞ্জাননসভাৰন্তি ‘‘নীলং পীত’’ন্তিআদিনা আরম্মণস্স সল্লক্খণসভাৰং. অভিসঙ্খরণসভাৰন্তি আযূহনসভাৰং. ৰিজাননসভাৰন্তি আরম্মণস্স উপলদ্ধিসভাৰং. সুখাদীতি আদি-সদ্দেন দুক্খসোমনস্সদোমনস্সুপেক্খাৰেদনানং সঙ্গহো রূপসঞ্ঞাদীতি আদি-সদ্দেন সদ্দসঞ্ঞাদীনং, ফস্সাদীতি আদি-সদ্দেন চেতনা ৰিতক্কাদীনং চক্খুৰিঞ্ঞাণাদীনন্তি আদি-সদ্দেন সব্বেসং লোকিযৰিঞ্ঞাণানং সঙ্গহো. যথা চ ৰিঞ্ঞাণে, এস নযো ৰেদনাদীসুপি. তেসন্তি ¶ ‘‘সমুদযো’’তি ৰুত্তধম্মানং. তীসু খন্ধেসূতি ৰেদনাসঞ্ঞাসঙ্খারক্খন্ধেসু. ‘‘ফুট্ঠো ৰেদেতি, ফুট্ঠো সঞ্জানাতি, ফুট্ঠো চেতেতী’’তি (সং. নি. ৪.৯৩) ৰচনতো ¶ ‘‘ফস্সসমুদযা’’তি ৰত্তব্বং. ‘‘নামরূপপচ্চযাপি ৰিঞ্ঞাণ’’ন্তি (ৰিভ. ২৪৬; দী. নি. ২.৯৭) ৰচনতো ৰিঞ্ঞাণক্খন্ধে ‘‘নামরূপসমুদযা’’তি ৰত্তব্বং. তেসং যেৰাতি ¶ তীসু খন্ধেসু ‘‘ফস্সস্স ৰিঞ্ঞাণক্খন্ধে নামরূপস্সা’’তি ফস্সনামরূপানংযেৰ ৰসেন অত্থঙ্গমপদম্পি যোজেতব্বং, অৰিজ্জাদযো পন রূপে ৰুত্তসদিসা এৰাতি অধিপ্পাযো.

সমপঞ্ঞাসলক্খণৰসেনাতি পচ্চযতো ৰীসতি খণতো পঞ্চাতি পঞ্চৰীসতিযা উদযলক্খণানং, পচ্চযতো ৰীসতি খণতো পঞ্চাতি পঞ্চৰীসতিযা এৰ ৰযলক্খণানং চাতি সমপঞ্ঞাসায উদযৰযলক্খণানং ৰসেন. তত্থ পঞ্চন্নং খন্ধানং উদযো লক্খীযতি এতেহীতি লক্খণানীতি ৰুচ্চন্তি অৰিজ্জাদিসমুদযোতি, তথা তেসং অনুপ্পাদনিরোধো লক্খীযতি এতেহীতি লক্খণানীতি ৰুচ্চন্তি অৰিজ্জাদীনং অচ্চন্তনিরোধো. নিব্বত্তিৰিপরিণামলক্খণানি পন সঙ্খতলক্খণমেৰাতি. এৰং এতানি সমপঞ্ঞাসলক্খণানি সরূপতো ৰেদিতব্বানি. যথানুক্কমেন ৰড্ঢিতেতি যথাৰুত্তউদযব্বযঞাণে তিক্খে সূরে পসন্নে হুত্ৰা ৰহন্তে ততো পরং ৰত্তব্বানং ভঙ্গঞাণাদীনং উপ্পত্তিপটিপাটিযা বুদ্ধিপ্পত্তে পরমুক্কংসগতে ৰিপস্সনাঞাণে. পগেৰ হি ছত্তিংসকোটিসতসহস্সমুখেন পৰত্তেন সব্বঞ্ঞুতঞ্ঞাণানুচ্ছৰিকেন মহাৰজিরঞাণসঙ্খাতেন সম্মসনঞাণেন সম্ভতানুভাৰং গব্ভং গণ্হন্তং পরিপাকং গচ্ছন্তং পটিপদাৰিসুদ্ধিঞাণং অপরিমিতকালে সম্ভতায পঞ্ঞাপারমিযা আনুভাৰেন উক্কংসপারমিপ্পত্তং অনুক্কমেন ৰুট্ঠানগামিনিভাৰং উপগন্ত্ৰা যদা অরিযমগ্গেন ঘটেতি, তদা অরিযমগ্গচিত্তং সব্বকিলেসেহি মগ্গপটিপাটিযা ৰিমুচ্চতি ¶ , ৰিমুচ্চন্তঞ্চ তথা ৰিমুচ্চতি, যথা সব্বঞেয্যাৰরণপ্পহানং হোতি. যং কিলেসানং ‘‘সৰাসনপ্পহান’’ন্তি ৰুচ্চতি, তযিদং পহানং অত্থতো অনুপ্পত্তিনিরোধোতি আহ ‘‘অনুপ্পাদনিরোধেনা’’তি. আসৰসঙ্খাতেহি কিলেসেহীতি ভৰতো আভৰগ্গং, ধম্মতো আগোত্রভুং সৰনতো পৰত্তনতো আসৰসঞ্ঞিতেহি রাগো, দিট্ঠি, মোহোতি ইমেহি কিলেসেহি. লক্খণৰচনঞ্চেতং, পাল়িযং যদিদং ‘‘আসৰেহী’’তি, তদেকট্ঠতায পন সব্বেহিপি ¶ কিলেসেহি সব্বেহিপি পাপধম্মেহি চিত্তং ৰিমুচ্চতি. অগ্গহেত্ৰাতি তেসং কিলেসানং লেসমত্তম্পি অগ্গহেত্ৰা.

মগ্গক্খণে ৰিমুচ্চতি নাম তংতংমগ্গৰজ্ঝকিলেসেহি ফলক্খণে ৰিমুত্তং নাম. মগ্গক্খণে ৰা ৰিমুত্তঞ্চেৰ ৰিমুচ্চতি চাতি উপরিমগ্গক্খণে হেট্ঠিমমগ্গৰজ্ঝেহি ৰিমুত্তঞ্চেৰ যথাসকং পহাতব্বেহি ৰিমুচ্চতি চ. ফলক্খণে ৰিমুত্তমেৰাতি সব্বস্মিম্পি ফলক্খণে ৰিমুত্তমেৰ, ন ৰিমুচ্চতি নাম.

সব্ববন্ধনাতি ওরম্ভাগিযুদ্ধম্ভাগিযসঙ্গহিতা সব্বস্মাপি ভৰসঞ্ঞোজনা, ৰিপ্পমুত্তো ৰিসেসতো পকারেহি মুত্তো. সুৰিকসিতচিত্তসন্তানোতি সাতিসযং ঞাণরস্মিসম্ফস্সেন সুট্ঠু সম্মদেৰ ¶ সম্ফুল্লচিত্তসন্তানো. ‘‘চত্তারি মগ্গঞাণানী’’তিআদি যেহি ঞাণেহি সুৰিকসিতচিত্তসন্তানো, তেসং একদেসেন দস্সনং. নিপ্পদেসতো দস্সনং পন পরতো আগমিস্সতি, তস্মা তত্থেৰ তানি ৰিভজিস্সাম. সকলে চ বুদ্ধগুণেতি অতীতংসে অপ্পটিহতঞাণাদিকে সব্বেপি বুদ্ধগুণে. যদা হি লোকনাথো অগ্গমগ্গং অধিগচ্ছতি, তদা সব্বে গুণে হত্থগতে করোতি নাম. ততো পরং ‘‘হত্থগতে কত্ৰা ঠিতো’’তি ৰুচ্চতি.

‘‘পরিপুণ্ণসঙ্কপ্পো’’তি ৰত্ৰা পরিপুণ্ণসঙ্কপ্পতাপরিদীপনং উদানং দস্সেতুং ‘‘অনেকজাতিসংসার’’ন্তিআদি ৰুত্তং. তত্থ আদিতো দ্ৰিন্নং গাথানমত্থো হেট্ঠা ব্রহ্মজালনিদানৰণ্ণনাযং (দী. নি. টী. ১.পঠমমহাসঙ্গীতিকথাৰণ্ণনা) ৰুত্তো এৰ. পরতো ¶ পন অযোঘনহতস্সাতি অযো হঞ্ঞতি এতেনাতি অযোঘনং, কম্মারানং অযোকূটং, অযোমুট্ঠি চ, তেন অযোঘনেন হতস্স পহতস্স. এৰ-সদ্দো চেত্থ নিপাতমত্তং. জলতো জাতৰেদসোতি জলযমানস্স অগ্গিস্স, অনাদরে ৰা এতং সামিৰচনং. অনুপুব্বূপসন্তস্সাতি অনুক্কমেন উপসন্তস্স ৰিক্খম্ভন্তস্স নিরুদ্ধস্স. যথা ন ঞাযতে গতীতি যথা তস্স গতি ন ঞাযতি. ইদং ৰুত্তং হোতি – অযোমুট্ঠিকূটাদিনা পহতত্তা অযোঘনেন হতস্স পহতস্স অযোগতস্স, কংসভাজনাদিগতস্স ৰা জলমানস্স অগ্গিস্স অনুক্কমেন উপসন্তস্স দসসু দিসাসু ন কত্থচি গতি পঞ্ঞাযতি পচ্চযনিরোধেন অপ্পটিসন্ধিকনিরুদ্ধত্তাতি. এৰং সম্মাৰিমুত্তানন্তি সম্মা হেতুনা ঞাযেন তদঙ্গৰিক্খম্ভনৰিমুত্তিপুব্বঙ্গমায ¶ সমুচ্ছেদৰিমুত্তিযা অরিযমগ্গেন চতূহিপি উপাদানেহি, আসৰেহি চ মুত্তত্তা সম্মা ৰিমুত্তানং, ততো এৰ কামবন্ধনসঙ্খাতং কামোঘভৰোঘাদিভেদং অৰসিট্ঠওঘঞ্চ তরিত্ৰা ঠিতত্তা কামবন্ধোঘতারীনং সুট্ঠু পটিপস্সম্ভিতসব্বকিলেসৰিপ্ফন্দিতত্তা কিলেসাভিসঙ্খারৰাতেহি অকম্পনীযতায অচলং নিব্বানসঙ্খাতং সঙ্খারূপসমং সুখং পত্তানং অধিগতানং খীণাসৰানং গতি দেৰমনুস্সাদিভেদাসু গতীসু ‘‘অযং নামা’’তি পঞ্ঞাপেতব্বতায অভাৰতো পঞ্ঞাপেতুং নত্থি ন উপলব্ভতি, যথাৰুত্তজাতৰেদো ৰিয অপঞ্ঞত্তিকভাৰমেৰ তে গচ্ছন্তীতি অত্থো. এৰং মনসি করোন্তোতি ‘‘এৰং অনেকজাতিসংসার’’ন্তিআদিনা (ধ. প. ১৫৩) অত্তনো কতকিচ্চত্তং মনসি করোন্তো বোধিপল্লঙ্কে নিসিন্নোৰ ৰিরোচিত্থাতি যোজনা.

দুতিযভাণৰারৰণ্ণনা নিট্ঠিতা.

ব্রহ্মযাচনকথাৰণ্ণনা

৬৪. যন্নূনাতি ¶ ¶ পরিৰিতক্কনত্থে নিপাতো, অহন্তি ভগৰা অত্তানং নিদ্দিসতীতি আহ ‘‘যদি পনাহ’’ন্তি. ‘‘অট্ঠমে সত্তাহে’’তিআদি যথা অম্হাকং ভগৰা অভিসম্বুদ্ধো হুত্ৰা ৰিমুত্তিসুখপটিসংৰেদনাদিৰসেন সত্তসু সত্তাহেসু পটিপজ্জি, ততো পরঞ্চ ধম্মগম্ভীরতাপচ্চৰেক্খণাদিৰসেন, এৰমেৰ সব্বেপি সম্মাসম্বুদ্ধা অভিসম্বুদ্ধকালে পটিপজ্জিংসু, তে চ সত্তাহাদযো তথেৰ ৰৰত্থপীযন্তীতি অযং সব্বেসম্পি বুদ্ধানং ধম্মতা. তস্মা ৰিপস্সী ভগৰা অভিসম্বুদ্ধকালে তথা পটিপজ্জীতি দস্সেতুং আরদ্ধং. তত্থ ‘‘অট্ঠমে সত্তাহে’’তি ইদং সত্তমসত্তাহতো পরং, সত্তাহতো ওরিমে চ পৰত্তায পটিপত্তিযা ৰসেন ৰুত্তং, ন পল্লঙ্কসত্তাহস্স ৰিয অট্ঠমস্স নাম সত্তাহস্স ৰৰত্থিতস্স লব্ভমানত্তা. অনন্তরোতি ‘‘অধিগতো খো ম্যাযং ধম্মো’’তিআদিকো ৰিতক্কো (দী. নি. ২.৬৭; ম. নি. ১.২৮১; ২.৩৩৭; সং. নি. ১.১৭২; মহাৰ. ৭, ৮).

পটিৰিদ্ধোতি সযম্ভুঞাণেন ‘‘ইদং দুক্খ’’ন্তিআদিনা পটিমুখং পটিৰিজ্ঝনৰসেন পৰত্তো, যথাভূতং অৰবুদ্ধোতি অত্থো. ধম্মোতি চতুসচ্চধম্মো তব্বিনিমুত্তস্স ¶ পটিৰিজ্ঝিতব্বধম্মস্স অভাৰতো. গম্ভীরোতি মহাসমুদ্দো ৰিয মকসতুণ্ডসূচিযা অঞ্ঞত্র সমুপচিতপরিপক্কঞাণসম্ভারেহি অঞ্ঞেসং ঞাণেন অলব্ভনেয্যপ্পতিট্ঠো. তেনাহ ‘‘উত্তানভাৰপটিক্খেপৰচনমেত’’ন্তি. অলব্ভনেয্যপ্পতিট্ঠো ওগাহিতুং অসক্কুণেয্যতায সরূপতো ৰিসেসতো চ পস্সিতুং ন সক্কাতি আহ ‘‘গম্ভীরত্তাৰ দুদ্দসো’’তি. দুক্খেন দট্ঠব্বোতি কিচ্ছেন কেনচি কদাচিদেৰ দট্ঠব্বো. যং পন দট্ঠুমেৰ ন সক্কা, তস্স ওগাহেত্ৰা অনু অনু বুজ্ঝনে কথা এৰ নত্থীতি আহ ‘‘দুদ্দসত্তাৰ দুরনুবোধো’’তি. দুক্খেন অৰবুজ্ঝিতব্বো অৰবোধস্স দুক্করভাৰতো. ইমস্মিং ঠানে ‘‘তং কিং মঞ্ঞথ ভিক্খৰে দুক্করতরং ৰা দুরভিসম্ভৰতরং ৰা’’তি (সং. নি. ৫.১১১৫) সুত্তপদং ¶ ৰত্তব্বং. সন্তারম্মণতায ৰা সন্তো. নিব্বুতসব্বপরিল়াহতায নিব্বুতো. পধানভাৰং নীতোতি ৰা পণীতো. অতিত্তিকরট্ঠেন অতপ্পকো সাদুরসভোজনং ৰিয. এত্থ চ নিরোধসচ্চং সন্তং আরম্মণন্তি সন্তারম্মণং, মগ্গসচ্চং সন্তং, সন্তারম্মণঞ্চাতি সন্তারম্মণং অনুপসন্তসভাৰানং কিলেসানং, সঙ্খারানঞ্চ অভাৰতো সন্তো নিব্বুতসব্বপরিল়াহত্তা নিব্বুতো, সন্তপণীতভাৰেনেৰ তদত্থায অসেচনকতায অতপ্পকতা দট্ঠব্বা. তেনাহ ‘‘ইদং দ্ৰযং লোকুত্তরমেৰ সন্ধায ৰুত্ত’’ন্তি. উত্তমঞাণস্স ৰিসযত্তা ন তক্কেন অৰচরিতব্বো, ততো এৰ নিপুণঞাণগোচরতায, সণ্হসুখুমসভাৰত্তা চ নিপুণো. বালানং অৰিসযত্তা পণ্ডিতেহি এৰ ৰেদিতব্বোতি পণ্ডিতৰেদনীযো. আলীযন্তি অভিরমিতব্বট্ঠেন ¶ সেৰীযন্তীতি আলযা, পঞ্চ কামগুণা. আলযন্তি অভিরমণৰসেন সেৰন্তীতি আলযা, তণ্হাৰিচরিতানি. আলযরতাতি আলযনিরতা. সুট্ঠু মুদিতা অতিৰিয মুদিতা অনুক্কণ্ঠনতো. রমতীতি রতিং ৰিন্দতি কীল়তি লল়তি. ইমে সত্তা যথা কামগুণে, এৰং রাগম্পি অস্সাদেন্তি অভিনন্দন্তি যেৰাতি ৰুত্তং ‘‘দুৰিধম্পী’’তিআদি.

ঠানং সন্ধাযাতি ঠান-সদ্দং সন্ধায. অত্থতো পন ‘‘ঠান’’ন্তি চ পটিচ্চসমুপ্পাদো এৰ অধিপ্পেতো. তিট্ঠতি এত্থ ফলং তদাযত্তৰুত্তিতাযাতি ঠানং, সঙ্খারাদীনং পচ্চযভূতা অৰিজ্জাদযো. ইমেসং সঙ্খারাদীনং পচ্চযাতি ইদপ্পচ্চযা, অৰিজ্জাদযোৰ. ইদপ্পচ্চযা এৰ ইদপ্পচ্চযতা যথা দেৰো এৰ দেৰতা ¶ , ইদপ্পচ্চযানং ৰা অৰিজ্জাদীনং অত্তনো ফলং পটিচ্চ পচ্চযভাৰো ¶ উপ্পাদনসমত্থতা ইদপ্পচ্চযতা, তেন পরমত্থপচ্চযলক্খণো পটিচ্চসমুপ্পাদো দস্সিতো হোতি. পটিচ্চ সমুপ্পজ্জতি ফলং এতস্মাতি পটিচ্চসমুপ্পাদো. পদদ্ৰযেনাপি ধম্মানং পচ্চযট্ঠো এৰ ৰিভাৰিতো. তেনাহ ‘‘সঙ্খারাদিপচ্চযানং অৰিজ্জাদীনমেতং অধিৰচন’’ন্তি. অযমেত্থ সঙ্খেপো, ৰিত্থারো পন ৰিসুদ্ধিমগ্গসংৰণ্ণনাসু (ৰিসুদ্ধি. ২.৫৭০) ৰুত্তনযেন ৰেদিতব্বো.

সব্বসঙ্খারসমথোতিআদি সব্বন্তি সব্বসঙ্খারসমথাদিপদাভিধেয্যং সব্বং, অত্থতো নিব্বানমেৰ. ইদানি তস্স নিব্বানভাৰং দস্সেতুং ‘‘যস্মা হী’’তিআদি ৰুত্তং. তন্তি নিব্বানং. আগম্মাতি পটিচ্চ অরিযমগ্গস্স আরম্মণপচ্চযহেতু. সম্মন্তীতি অপ্পটিসন্ধিকূপসমৰসেন সম্মন্তি. তথা সন্তা চ সৰিসেসং উপসন্তা নাম হোন্তীতি আহ ‘‘ৰূপসম্মন্তী’’তি, এতেন সব্বে সঙ্খারা সম্মন্তি এত্থাতি সব্বসঙ্খারসমথো, নিব্বানন্তি দস্সেতি. সব্বসঙ্খারৰিসংযুত্তে হি নিব্বানে সব্বসঙ্খারৰূপসমপরিযাযো ঞাযাগতো যেৰাতি. সেসেপদেসুপি এসেৰ নযো. উপধীযতি এত্থ দুক্খন্তি উপধি, খন্ধাদযো. পটিনিস্সট্ঠাতি সমুচ্ছেদৰসেন পরিচ্চত্তা হোন্তি. সব্বা তণ্হাতি অট্ঠসতপ্পভেদা সব্বাপি তণ্হা. সব্বে কিলেসরাগাতি কামরাগরূপরাগাদিভেদা সব্বেপি কিলেসভূতা রাগা, সব্বেপি ৰা কিলেসা ইধ কিলেসরাগাতি ৰেদিতব্বা, ন লোভৰিসেসা এৰ চিত্তস্স ৰিপরীতভাৰাপাদনতো. যথাহ ‘‘রত্তম্পি চিত্তং ৰিপরিণতং, দুট্ঠম্পি চিত্তং ৰিপরিণতং, মূল়্হম্পি চিত্তং ৰিপরিণত’’ন্তি (পারা. ২৭১) ৰিরজ্জন্তীতি ¶ অত্তনো সভাৰং ৰিজহন্তি. সব্বং দুক্খন্তি জরামরণাদিভেদং সব্বং ৰট্টদুক্খং. ভৰেন ভৰন্তি তেন তেন ভৰেন ভৰন্তরং. ভৰনিকন্তিভাৰেন সংসিব্বতি, ফলেন ৰা সদ্ধিং কম্মং সতণ্হস্সেৰ আযতিং পুনব্ভৰভাৰতো. ততো ৰানতো নিক্খন্তং তত্থ তস্স সব্বসো অভাৰতো. চিরনিসজ্জাচিরভাসনেহি পিট্ঠিআগিলাযনতালুগলসোসাদিৰসেন কাযকিলমথো চেৰ কাযৰিহেসা ¶ চ ৰেদিতব্বা. সা চ খো দেসনায অত্থং অজানন্তানং, অপ্পটিপজ্জন্তানঞ্চ ৰসেন, জানন্তানং, পন পটিপজ্জন্তানঞ্চ দেসনায কাযপরিস্সমোপি সত্থু অপরিস্সমোৰ. তেনাহ ভগৰা ‘‘ন চ মং ধম্মাধিকরণং ৰিহেসেসী’’তি (উদা. ১০). তথা হি ৰুত্তং ‘‘যা অজানন্তানং দেসনা নাম, সো মম কিলমথো অস্সা’’তি. উভযন্তি চিত্তকিলমথো, চিত্তৰিহেসা ¶ চাতি উভযং পেতং বুদ্ধানং নত্থি, বোধিমূলেযেৰ সমুচ্ছিন্নত্তা.

৬৫. অনুব্রূহনং সম্পিণ্ডনং. সোতি ‘‘অপিস্সূ’’তি নিপাতো. ৰিপস্সিন্তি পটি-সদ্দযোগেন সামিঅত্থে উপযোগৰচনন্তি আহ ‘‘ৰিপস্সিস্সা’’তি. ৰুদ্ধিপ্পত্তা অচ্ছরিযা ৰা অনচ্ছরিযা. ৰুদ্ধিঅত্থোপি হি অকারো হোতি যথা‘‘অসেক্খা ধম্মা’’তি (ধ. স. তিকমাতিকায ১১). কপ্পানং চত্তারি অসঙ্খ্যেয্যানি সতসহস্সঞ্চ সদেৰকস্স লোকস্স ধম্মসংৰিভাগকরণত্থমেৰ পারমিযো ¶ পূরেত্ৰা ইদানি সমধিগতধম্মরাজস্স তত্থ অপ্পোস্সুক্কতাপত্তিদীপনতা, গাথাত্থস্স অচ্ছরিযতা, তস্স ৰুদ্ধিপ্পত্তি চাতি ৰেদিতব্বা. অত্থদ্ৰারেন হি গাথানং অনচ্ছরিযতা. গোচরা অহেসুন্তি উপট্ঠহিংসু. উপট্ঠানঞ্চ ৰিতক্কেতব্বতাৰাতি আহ ‘‘পরিৰিতক্কযিতব্বতং পাপুণিংসূ’’তি.

যদি সুখাপটিপদাৰ কথং কিচ্ছতাতি আহ ‘‘পারমীপূরণকালে’’তিআদি. এৰমাদীনি দুপ্পরিচ্চজানি দেন্তস্স. হ-ইতি ৰা ব্যত্তন্তি এতস্মিং অত্থে নিপাতো, ‘‘একংসত্থে’’তি কেচি. হ ব্যত্তং, একংসেন ৰা অলং নিপ্পযোজনং এৰং কিচ্ছেন অধিগতস্স ধম্মস্স দেসেতুন্তি যোজনা. হলন্তি ‘‘অল’’ন্তি ইমিনা সমানত্থং পদং ‘‘হলন্তি ৰদামী’’তিআদীসু (সং. নি. টী. ১.১৭২) ৰিয. রাগদোসফুট্ঠেহীতি ফুট্ঠৰিসেন ৰিয সপ্পেন রাগেন, দোসেন চ সম্ফুট্ঠেহি অভিভূতেহি. রাগদোসানুগতেহীতি রাগদোসেহি অনুবন্ধেহি.

নিচ্চাদীনন্তি নিচ্চগ্গাহাদীনং. এৰং গতন্তি এৰং পৰত্তং অনিচ্চাদিআকারেন পৰত্তং. ‘‘চতুসচ্চধম্ম’’ন্তি ইদং অনিচ্চাদীসু, সচ্চেসু চ যথালাভৰসেন গহেতব্বং. এৰং গতন্তি ৰা এৰং ‘‘অনিচ্চ’’ন্তিআদিনা অভিনিৰিসিত্ৰা মযা, অঞ্ঞেহি চ সম্মাসম্বুদ্ধেহি গতং, ঞাতং পটিৰিদ্ধন্তি অত্থো. কামরাগেন, ভৰরাগেন চ রত্তা নীৰরণেহি নিৰুতচিত্ততায, দিট্ঠিরাগেন রত্তা ৰিপরীতাভিনিৰেসেন ন দক্খন্তি যাথাৰতো ইমং ধম্মং নপ্পটিৰিজ্ঝিস্সন্তি. এৰং গাহাপেতুন্তি ‘‘অনিচ্চ’’ন্তিআদিনা সভাৰেন যাথাৰতো ধম্মে ¶ জানাপেতুং. রাগদোসপরেততাপি নেসং সম্মূল়্হভাৰেনেৰাতি আহ ‘‘তমোখন্ধেন আৰুটা’’তি.

ধম্মদেসনায ¶ অপ্পোস্সুক্কতাপত্তিযা কারণং ৰিভাৰেতুং ‘‘কস্মা পনা’’তিআদিনা সযমেৰ চোদনং সমুট্ঠাপেতি. তত্থ যথাযং ইদানি ধম্মদেসনায ¶ অপ্পোস্সুক্কতাপত্তি সব্ববুদ্ধানং আচিণ্ণসমাচিণ্ণধম্মতাৰসেন, সব্ববোধিসত্তানং আদিতো ‘‘কিং মে অঞ্ঞাতৰেসেনা’’তিআদিনা (বু. ৰং. ২.৯৯) মহাভিনীহারে অত্তনো চিত্তস্স সমুস্সাহনং আচিণ্ণসমাচিণ্ণধম্মতা ৰাতি আহ ‘‘কিং মে’’তিআদি. তত্থ অঞ্ঞাতৰেসেনাতি সদেৰকং লোকং উন্নাদেন্তো বুদ্ধো অহুত্ৰা কেৰলং বুদ্ধানং সাৰকভাৰূপগমনৰসেন অঞ্ঞাতরূপেন. তিৰিধং কারণং অপ্পোস্সুক্কতাপত্তিযা পটিপক্খস্স বলৰভাৰো, ধম্মস্স পরমগম্ভীরতা, তত্থ চ ভগৰতো সাতিসযং গারৰন্তি তং দস্সেতুং ‘‘তস্স হী’’তিআদি আরদ্ধং. তত্থ পটিপক্খা নাম রাগাদযো কিলেসা সম্মাপটিপত্তিযা অন্তরাযকরত্তা. তেসং বলৰভাৰতো চিরপরিভাৰনায সত্তসন্তানতো দুব্বিসোধিযতায তে সত্তে মত্তহত্থিনো ৰিয দুব্বলং পুরিসং অজ্ঝোত্থরিত্ৰা অনযব্যসনং আপাদেন্তা অনেকসতযোজনাযামৰিত্থারং সুনিচিতং ঘনসন্নিৰেসং কণ্টকদুগ্গম্পি অধিসেন্তি. দূরপ্পভেদ দুচ্ছেজ্জতাহি দুব্বিসোধিযতং পন দস্সেতুং ‘‘অথস্সা’’তিআদি ৰুত্তং. তত্থ চ অন্তো আমট্ঠতায কঞ্জিকপুণ্ণলাবু চিরপরিৰাসিকতায তক্কভরিতচাটি স্নেহতিন্তদুব্বলভাৰেন ৰসাতেলপীতপিলোতিকা; তেলমিস্সিততায অঞ্জনমক্খিতহত্থা দুব্বিসোধনীযা ৰুত্তা. হীনূপমা ¶ চেতা রূপপ্পবন্ধভাৰতো, অচিরকালিকত্তা চ মলীনতায, কিলেসসংকিলেসো এৰ পন দুব্বিসোধনীযতরো অনাদিকালিকত্তা, অনুসযিতত্তা চ. তেনাহ ‘‘অতিসংকিলিট্ঠা’’তি. যথা চ দুব্বিসোধনীযতায এৰং গম্ভীরদুদ্দসদুরনুবোধানম্পি ৰুত্তউপমা হীনূপমাৰ.

গম্ভীরোপি ধম্মো পটিপক্খৰিধমনেন সুপাকটো ভৰেয্য, পটিপক্খৰিধমনং পন সম্মাপটিপত্তিপটিবদ্ধং, সা সদ্ধম্মসৰনাধীনা, তং সত্থরি, ধম্মে চ পসাদাযত্তং. সো ৰিসেসতো লোকে সম্ভাৰনীযস্স গরুকাতব্বস্স অভিপত্থনাহেতুকোতি পনাল়িকায সত্তানং ধম্মসম্পটিপত্তিযা ব্রহ্মযাচনাদিনিমিত্তন্তি তং দস্সেন্তো ‘‘অপিচা’’তিআদিমাহ.

৬৬. ‘‘অঞ্ঞতরো’’তি অপ্পঞ্ঞাতো ৰিয কিঞ্চাপি ৰুত্তং, অথ খো পাকটো পঞ্ঞাতোতি দস্সেতুং ‘‘ইমস্মিং চক্কৰাল়ে জেট্ঠকমহাব্রহ্মা’’তি ৰুত্তং. মহাব্রহ্মভৰনে জেট্ঠকমহাব্রহ্মা. সো হি সক্কো ৰিয ¶ কামদেৰলোকে, ব্রহ্মলোকে চ পাকটো পঞ্ঞাতো. উপক্কিলেসভূতং অপ্পং রাগাদিরজং এতস্সাতি অপ্পরজং, অপ্পরজং অক্খি পঞ্ঞাচক্খু যেসং তে তংসভাৰাতি কত্ৰা অপ্পরজক্খজাতিকাতি ইমমত্থং দস্সেতুং ‘‘পঞ্ঞামযে’’তিআদিমাহ. অপ্পং রাগাদিরজং যেসং তে তংসভাৰা অপ্পরজক্খজাতিকাতি এৰমেত্থ অত্থো ৰেদিতব্বো. অস্সৰনতাতি ‘‘সযং ¶ অভিঞ্ঞা’’তিআদীসু (দী. নি. ১.২৮, ৪০৫; ম. নি. ১.১৫৪, ৪৪৪) ৰিয করণে পচ্চত্তৰচনন্তি আহ ‘‘অস্সৰনতাযা’’তি. দসপুঞ্ঞকিরিযৰত্থুৰসেনাতি দানাদিদসৰিধৰিমুত্তিপরিপাচনীযপুঞ্ঞকিরিযৰত্থূনং ৰসেন. তেনাহ ‘‘কতাধিকারা’’তিআদি. পপঞ্চসূদনিযং পন ‘‘দ্ৰাদসপুঞ্ঞকিরিযৰসেনা’’তি ¶ (ম. নি. অট্ঠ. ২.২৮২) ৰুত্তং, তং দানাদীসু সরণগমনপরহিতপরিণামনদ্ৰয পক্খিপনৰসেন ৰুত্তং.

৬৯. গরুট্ঠানিযেসু গারৰৰসেন গরুকরপত্থনা অজ্ঝেসনা, সাপি অত্থতো পত্থনা এৰাতি ৰুত্তং ‘‘যাচন’’ন্তি. পদেসৰিসযঞাণদস্সনং হুত্ৰা বুদ্ধানংযেৰ আৰেণিকভাৰতো ইদং ঞাণদ্ৰযং ‘‘বুদ্ধচক্খূ’’তি ৰুচ্চতীতি আহ ‘‘ইমেসঞ্হি দ্ৰিন্নং ঞাণানং বুদ্ধচক্খূতি নাম’’ন্তি. তিণ্ণং মগ্গঞাণানন্তি হেট্ঠিমানং তিণ্ণং মগ্গঞাণানং ‘‘ধম্মচক্খূ’’তি নামং, চতুসচ্চধম্মদস্সনন্তি কত্ৰা দস্সনমত্তভাৰতো. যতো তানি ঞাণানি ৰিজ্জূপমাভাৰেন ৰুত্তানি, অগ্গমগ্গঞাণং পন ঞাণকিচ্চস্স সিখাপ্পত্তিযা দস্সনমত্তং ন হোতীতি ‘‘ধম্মচক্খূ’’তি ন ৰুচ্চতীতি. যতো তং ৰজিরূপমাভাৰেন ৰুত্তং. ৰুত্তনযেনেৰাতি ‘‘অপ্পরজক্খজাতিকা’’তি এত্থ ৰুত্তনযেনেৰ. যস্মা মন্দকিলেসা ‘‘অপ্পরজক্খা’’তি ৰুত্তা, তস্মা বহলকিলেসা ‘‘মহারজক্খা’’তি ৰেদিতব্বা. পটিপক্খৰিধমনসমত্থতায তিক্খানি সূরানি ৰিসদানি, ৰুত্তৰিপরিযাযেন মুদূনি. সদ্ধাদযো আকারাতি সদ্দহনাদিপ্পকারে ৰদতি. সুন্দরাতি কল্যাণা. সম্মোহৰিনোদনিযং পন ‘‘যেসং আসযাদযো কোট্ঠাসা সুন্দরা, তে স্ৰাকারা’’তি (ৰিভ. অট্ঠ. ৮১৪) ৰুত্তং, তং ইমায অত্থৰণ্ণনায অঞ্ঞদত্থু সংসন্দতি ¶ সমেতীতি দট্ঠব্বং. যতো সদ্ধাসম্পদাদিৰসেন অজ্ঝাসযস্স সুন্দরতাতি, তব্বিপরিযাযতো অসুন্দরতাতি. কারণং নাম পচ্চযাকারো, সচ্চানি ৰা. পরলোকন্তি সম্পরাযং. তং দুক্খাৰহং ৰজ্জং ৰিয ভযতো পস্সিতব্বন্তি ৰুত্তং ‘‘পরলোকঞ্চেৰ ৰজ্জঞ্চ ভযতো পস্সন্তী’’তি. সম্পত্তিভৰতো ৰা অঞ্ঞত্তা ৰিপত্তিভৰো ‘‘পরলোকো’’তি ৰুত্তং ‘‘পর…পে… পস্সন্তী’’তি.

অযং ¶ পনেত্থ পাল়ীতি এত্থ ‘‘অপ্পরজক্খা’’দিপদানং অত্থৰিভাৰনে অযং তস্স তথাভাৰসাধকপাল়ি. সদ্ধাদীনঞ্হি ৰিমুত্তিপরিপাচকধম্মানং বলৰভাৰো তপ্পটিপক্খানং পাপধম্মানং দুব্বলভাৰেনেৰ হোতি, তেসঞ্চ বলৰভাৰো সদ্ধাদীনং দুব্বলভাৰেনাতি ৰিমুত্তিপরিপাচকধম্মানং সৰিসেসং অত্থিতানত্থিতাৰসেন ‘‘অপ্পরজক্খা মহারজক্খা’’তি আদযো পাল়িযং (পটি. ম. ১.১১১) ৰিভজিত্ৰা দস্সিতা. ইতি সদ্ধাদীনং ৰসেন পঞ্চ অপ্পরজক্খা, অসদ্ধিযাদীনং ৰসেন পঞ্চ মহারজক্খা. এৰং তিক্খিন্দ্রিযমুদিন্দ্রিযাদযোতি ৰিভাৰিতা পঞ্ঞাস পুগ্গলা. সদ্ধাদীনং পন অন্তরভেদেন অনেকভেদা ৰেদিতব্বা. খন্ধাদযো এৰ ¶ লুজ্জনপলুজ্জনট্ঠেন লোকো, সম্পত্তিভৰভূতো লোকো সম্পত্তিভৰলোকো, সুগতিসঙ্খাতো উপপত্তিভৰো, সম্পত্তি সম্ভৰতি এতেনাতি সম্পত্তিসম্ভৰলোকো সুগতিসংৰত্তনিযো কম্মভৰো. দুগ্গতিসঙ্খাতউপপত্তিভৰদুগ্গতিসংৰত্তনিযকম্মভৰা ৰিপত্তিভৰলোকৰিপত্তিসম্ভৰলোকা.

পুন এককদুকাদিৰসেন লোকং ৰিভজিত্ৰা দস্সেতুং ‘‘একো লোকো’’তিআদি ৰুত্তং. আহারাদযো হি লুজ্জনপলুজ্জনট্ঠেন লোকোতি. তত্থ ‘‘একো লোকো সব্বে সত্তা আহারট্ঠিতিকা’’তি (দী. নি. ৩.৩০৩; অ. নি. ১০.২৭, ২৮; পটি. ম. ১.২, ১১২, ২০৮) যাযং পুগ্গলাধিট্ঠানায কথায সব্বসঙ্খারানং পচ্চযাযত্তৰুত্তিতা ৰুত্তা, তায সব্বো সঙ্খারলোকো একো একৰিধো পকারন্তরস্সাভাৰতো. ‘‘দ্ৰে লোকা’’তিআদীসুপি ইমিনা ¶ নযেন অত্থো ৰেদিতব্বো. নামগ্গহণেন চেত্থ নিব্বানস্স অগ্গহণং তস্স অলোকসভাৰত্তা. ননু চ ‘‘আহারট্ঠিতিকা’’তি এত্থ পচ্চযাযত্তৰুত্তিতায মগ্গফলানম্পি লোকতা আপজ্জতীতি? নাপজ্জতি পরিঞ্ঞেয্যানং দুক্খসচ্চধম্মানং ‘‘ইধ লোকো’’তি অধিপ্পেতত্তা. অথ ৰা ন লুজ্জতি ন পলুজ্জতীতি যো গহিতো, তথা ন হোতি, সো লোকোতি তংগহণরহিতানং লোকুত্তরানং নত্থি লোকতা. উপাদানানং আরম্মণভূতা খন্ধা উপাদানক্খন্ধা. অনুরোধাদিৰত্থুভূতা লাভাদযো অট্ঠ লোকধম্মা. দসাযতনানীতি দস রূপাযতনানি ৰিৰট্টজ্ঝাসযস্স অধিপ্পেতত্তা. তস্স চ সব্বং তেভূমককম্মং গরহিতব্বং, ৰজ্জিতব্বঞ্চ হুত্ৰা উপট্ঠাতীতি ৰুত্তং ‘‘সব্বে অভিসঙ্খারা ৰজ্জং, সব্বে ভৰগামিকম্মা ৰজ্জ’’ন্তি. যেসং ¶ পুগ্গলানং সদ্ধাদযো মন্দা, তে ইধ ‘‘অস্সদ্ধা’’তিআদিনা ৰুত্তা. ন পন সব্বেন সব্বং সদ্ধাদীনং অভাৰতোতি অপ্পরজক্খদুকাদীসু পঞ্চসু দুকেসু একেকস্মিং দস দস কত্ৰা ‘‘পঞ্ঞাসায আকারেহি ইমানি পঞ্চিন্দ্রিযানি জানাতী’’তি ৰুত্তং. অথ ৰা অন্ৰযতো, ব্যতিরেকতো চ সদ্ধাদীনং ইন্দ্রিযানং পরোপরিযত্তং জানাতীতি কত্ৰা তথা ৰুত্তং. এত্থ চ অপ্পরজক্খাদিৰসেন আৰজ্জন্তস্স ভগৰতো তে সত্তা পুঞ্জপুঞ্জাৰ হুত্ৰা উপট্ঠহন্তি, ন একেকা.

উপ্পলানি এত্থ সন্তীতি উপ্পলিনী, গচ্ছোপি জলাসযোপি, ইধ পন জলাসযো অধিপ্পেতোতি আহ ‘‘উপ্পলৰনে’’তি. যানি উদকস্স অন্তো নিমুগ্গানেৰ হুত্ৰা পুসন্তি ৰড্ঢন্তি, তানি অন্তোনিমুগ্গপোসীনী. দীপিতানীতি অট্ঠকথাযং পকাসিতানি, ইধেৰ ৰা ‘‘অঞ্ঞানিপী’’তিআদিনা দীপিতানি. উগ্ঘটিতঞ্ঞূতি উগ্ঘটনং নাম ঞাণুগ্ঘটনং, ঞাণে উগ্ঘটিতমত্তে এৰ জানাতীতি অত্থো. ৰিপঞ্চিতং ¶ ৰিত্থারমেৰমত্থং জানাতীতি ৰিপঞ্চিতঞ্ঞূ. উদ্দেসাদীহি নেতব্বোতি নেয্যো. সহ উদাহটৰেলাযাতি উদাহারে ধম্মস্স উদ্দেসে উদাহটমত্তে এৰ. ধম্মাভিসমযোতি চতুসচ্চধম্মস্স ঞাণেন সদ্ধিং অভিসমযো. অযং ৰুচ্চতীতি অযং ‘‘চত্তারো সতিপট্ঠানা’’তিআদিনা ¶ নযেন সঙ্খিত্তেন মাতিকায দীপিযমানায দেসনানুসারেন ঞাণং পেসেত্ৰা অরহত্তং গণ্হিতুং সমত্থো ‘‘পুগ্গলো উগ্ঘটিতঞ্ঞূ’’তি ৰুচ্চতি. অযং ৰুচ্চতীতি অযং সঙ্খিত্তেন মাতিকং ঠপেত্ৰা ৰিত্থারেন অত্থে ৰিভজিযমানে অরহত্তং পাপুণিতুং সমত্থো ‘‘পুগ্গলো ৰিপঞ্চিতঞ্ঞূ’’তি ৰুচ্চতি. উদ্দেসতোতি উদ্দেসহেতু, উদ্দিসন্তস্স, উদ্দিসাপেন্তস্স ৰাতি অত্থো. পরিপুচ্ছতোতি অত্থং পরিপুচ্ছন্তস্স. অনুপুব্বেন ধম্মাভিসমযো হোতীতি অনুক্কমেন অরহত্তপ্পত্তো হোতি. ন তায জাতিযা ধম্মাভিসমযো হোতীতি তেন অত্তভাৰেন মগ্গং ৰা ফলং ৰা অন্তমসো ঝানং ৰা ৰিপস্সনং ৰা নিব্বত্তেতুং ন সক্কোতি. অযং ৰুচ্চতি পুগ্গলো পদপরমোতি অযং পুগ্গলো ব্যঞ্জনপদমেৰ পরমং অস্সাতি ‘‘পদপরমো’’তি ৰুচ্চতি.

যেতি যে দুৰিধে পুগ্গলে সন্ধায ৰুত্তং ৰিভঙ্গে কম্মাৰরণেনাতি পঞ্চৰিধেন আনন্তরিযকম্মেন. ৰিপাকাৰরণেনাতি অহেতুকপটিসন্ধিযা. যস্মা দুহেতুকানম্পি অরিযমগ্গপটিৰেধো নত্থি, তস্মা দুহেতুকপটিসন্ধিপি ¶ ‘‘ৰিপাকাৰরণমেৰা’’তি ৰেদিতব্বা. কিলেসাৰরণেনাতি নিযতমিচ্ছাদিট্ঠিযা. অস্সদ্ধাতি বুদ্ধাদীসু সদ্ধা রহিতা. অচ্ছন্দিকাতি কত্তুকম্যতাকুসলচ্ছন্দরহিতা, উত্তরকুরুকা মনুস্সা অচ্ছন্দিকট্ঠানং পৰিট্ঠা. দুপ্পঞ্ঞাতি ভৰঙ্গপঞ্ঞায পরিহীনা, ভৰঙ্গপঞ্ঞায পন পরিপুণ্ণাযপি যস্স ভৰঙ্গং লোকুত্তরস্স পচ্চযো ন হোতি, সোপি দুপ্পঞ্ঞো এৰ নাম. অভব্বা নিযামং ওক্কমিতুং কুসলেসু ধম্মেসু সম্মত্তন্তি ¶ কুসলেসু ধম্মেসু সম্মত্তনিযামসঙ্খাতং অরিযমগ্গং ওক্কমিতুং অধিগন্তুং অভব্বা. ‘‘ন কম্মাৰরণেনা’’তিআদীনি ৰুত্তৰিপরিযাযেন ৰেদিতব্বানি.

‘‘রাগচরিতা’’তিআদীসু যং ৰত্তব্বং, তং পরমত্থদীপনিযং [পরমত্থমঞ্জূসাযং ৰিসুদ্ধিমগ্গসংৰণ্ণনাযন্তি ভৰিতব্বং –

‘‘সা এসা পরমত্থানং, তত্থ তত্থ যথারহং;

নিধানতো পরমত্থ-মঞ্জূসা নাম নামতো’’তি. (ৰিসুদ্ধিমগ্গমহাটীকায নিগমনে সযমেৰ ৰুত্তত্তা)] ৰিসুদ্ধিমগ্গসংৰণ্ণনাযং ৰুত্তনযেন ৰেদিতব্বং;

৭০. আরব্ভাতি অত্তনো অধিপ্পেতস্স অত্থস্স ভগৰতো জানাপনং উদ্দিস্সাতি অত্থো. সেলো পব্বতো উচ্চো হোতি থিরো চ, ন পংসুপব্বতো, মিস্সকপব্বতো ৰাতি আহ ‘‘সেলে যথা পব্বতমুদ্ধনী’’তি. ধম্মমযং পাসাদন্তি লোকুত্তরধম্মমাহ. সো হি পব্বতসদিসো চ হোতি সব্বধম্মে অতিক্কম্ম অব্ভুগ্গতট্ঠেন পাসাদসদিসো চ, পঞ্ঞাপরিযাযো ৰা ইধ ধম্ম-সদ্দো ¶ . সা হি অব্ভুগ্গতট্ঠেন পাসাদোতি অভিধম্মে (ধ. স. অট্ঠ. ১৬) নিদ্দিট্ঠা. তথা চাহ –

‘‘পঞ্ঞাপাসাদমারুয্হ, অসোকো সোকিনিং পজং;

পব্বতট্ঠোৰ ভূমট্ঠে, ধীরো বালে অৰেক্খতী’’তি. (ধ. প. ২৮);

‘‘যথা হী’’তিআদীসু যথা পব্বতে ঠত্ৰা রত্তন্ধকারে হেট্ঠা ওলোকেন্তস্স পুরিসস্স খেত্তে কেদারপাল়িকুটিযো, তত্থ সযিতমনুস্সা চ ন পঞ্ঞাযন্তি অনুজ্জলভাৰতো. কুটিকাসু পন অগ্গিজালা পঞ্ঞাযতি উজ্জলভাৰতো এৰং ধম্মপাসাদমারুয্হ সত্তলোকং ওলোকযতো ভগৰতো ঞাণস্স আপাথং নাগচ্ছন্তি অকতকল্যাণা সত্তা ঞাণগ্গিনা অনুজ্জলভাৰতো, অনুল়ারভাৰতো চ রত্তিং খিত্তা সরা ¶ ৰিয হোন্তি. কতকল্যাণা পন ভব্বপুগ্গলা দূরে ঠিতাপি ভগৰতো ঞাণস্স আপাথং আগচ্ছন্তি পরিপক্কঞাণগ্গিতায ¶ সমুজ্জলভাৰতো, উল়ারসন্তানতায হিমৰন্তপব্বতো ৰিয চাতি এৰং যোজনা ৰেদিতব্বা.

উট্ঠেহীতি ত্ৰং ধম্মদেসনায অপ্পোস্সুক্কতাসঙ্খাতসঙ্কোচাপত্তিতো কিলাসুভাৰতো উট্ঠহ. ৰীরিযৰন্ততাযাতি সাতিসয চতুব্বিধসম্মপ্পধানৰীরিযৰন্ততায. ৰীরস্স হি ভাৰো, কম্মং ৰা ৰীরিযং. কিলেসমারস্স ৰিয মচ্চুমারস্সপি আযতিং অসম্ভৰতো ‘‘মচ্চুকিলেসমারান’’ন্তি ৰুত্তং. অভিসঙ্খারমারৰিজযস্স অগ্গহণং কিলেসমারৰিজযেনেৰ তব্বিজযস্স জোতিতভাৰতো. ৰাহনসমত্থতাযাতি সংসারমহাকন্তারতো নিব্বানসঙ্খাতং খেমপ্পদেসং সম্পাপনসমত্থতায.

৭১. ‘‘অপারুতং তেসং অমতস্স দ্ৰার’’ন্তি কেচি পঠন্তি. নিব্বানস্স দ্ৰারং পৰিসনমগ্গো ৰিৰরিত্ৰা ঠপিতো মহাকরুণূপনিস্সযেন সযম্ভুঞাণেন অধিগতত্তা. সদ্ধং পমুঞ্চন্তূতি সদ্ধং পৰেদেন্তু, অত্তনো সদ্দহনাকারং উপট্ঠাপেন্তূতি অত্থো. সুখেন অকিচ্ছেন পৰত্তনীযতায সুপ্পৰত্তিতং. ন ভাসিং ন ভাসিস্সামীতি চিন্তেসি.

অগ্গসাৰকযুগৰণ্ণনা

৭৩. সল্লপিত্ৰাতি ‘‘ৰিপ্পসন্নানি খো তে আৰুসো ইন্দ্রিযানী’’তিআদিনা (মহাৰ. ৬০) আলাপসল্লাপং কত্ৰা. তঞ্হিস্স অপরভাগে সত্থু সন্তিকং উপসঙ্কমনস্স পচ্চযো অহোসি.

৭৫-৬. অনুপুব্বিং ¶ কথন্তি অনুপুব্বিযা অনুপুব্বং কথেতব্বং কথং. কা পন সাতি? দানাদিকথা. তত্থ দানকথা তাৰ পচুরজনেসু পৰত্তিযা সব্বসাধারণত্তা, সুকরত্তা, সীলে পতিট্ঠানস্স উপাযভাৰতো চ আদিতো কথিতা. পরিচ্চাগসীলো হি পুগ্গলো পরিগ্গহৰত্থূসু ¶ নিস্সঙ্গভাৰতো সুখেনেৰ সীলানি সমাদিযতি, তত্থ চ সুপ্পতিট্ঠিতো হোতি. সীলেন দাযকপটিগ্গাহকৰিসুদ্ধিতো পরানুগ্গহং ৰত্ৰা পরপীল়ানিৰত্তিৰচনতো, কিরিযধম্মং ৰত্ৰা অকিরিযধম্মৰচনতো, ভোগসম্পত্তিহেতুং ¶ ৰত্ৰা ভৰসম্পত্তিহেতুৰচনতো চ দানকথানন্তরং সীলকথা কথিতা, তঞ্চে দানসীলং ৰট্টনিস্সিতং, অযং ভৰসম্পত্তি তস্স ফলন্তি দস্সনত্থং, ইমেহি চ দানসীলমযেহি পণীতপণীততরাদিভেদভিন্নেহি পুঞ্ঞকিরিযৰত্থূহি এতা চাতুমহারাজিকাদীসু পণীতপণীততরাদিভেদভিন্না অপরিমেয্যা দিব্বভোগভৰসম্পত্তিযো হোন্তীতি দস্সনত্থং তদনন্তরং সগ্গকথং. ৰত্ৰা অযং সগ্গো রাগাদীহি উপক্কিলিট্ঠো, সব্বদা অনুপক্কিলিট্ঠো অরিযমগ্গোতি দস্সনত্থং সগ্গানন্তরং মগ্গকথা কথেতব্বা. মগ্গঞ্চ কথেন্তেন তদধিগমুপাযদস্সনত্থং সগ্গপরিযাপন্নাপি, পগেৰ ইতরে সব্বেপি কামা নাম বহ্ৰাদীনৰা, অনিচ্চা অধুৰা, ৰিপরিণামধম্মাতি কামানং আদীনৰো, হীনা, গম্মা, পোথুজ্জনিকা, অনরিযা, অনত্থসঞ্হিতাতি তেসং ওকারো লামকভাৰো, সব্বেপি ভৰা কিলেসানং ৰত্থুভূতাতি তত্থ সংকিলেসো, সব্বসো কিলেসৰিপ্পমুত্তং নিব্বানন্তি নেক্খম্মে আনিসংসো চ কথেতব্বোতি অযমত্থো মগ্গন্তীতি এত্থ ইতি-সদ্দেন আদিঅত্থজোতকেন বোধিতোতি ৰেদিতব্বং.

সুখানং নিদানন্তি দিট্ঠধম্মিকানং, সম্পরাযিকানং, নিব্বানপটিসংযুত্তানঞ্চাতি সব্বেসম্পি সুখানং কারণং. যঞ্হি কিঞ্চি লোকে ভোগসুখং নাম, তং সব্বং দাননিদানন্তি পাকটো যমত্থো. যং পন তং ¶ ঝানৰিপস্সনামগ্গফলনিব্বানপটিসংযুত্তং সুখং, তস্সাপি দানং উপনিস্সযপচ্চযো হোতিযেৰ. সম্পত্তীনং মূলন্তি যা ইমা লোকে পদেসরজ্জং সিরিস্সরিযং সত্তরতনসমুজ্জলচক্কৰত্তিসম্পদাতি এৰংপভেদা মানুসিকা সম্পত্তিযো, যা চ চাতুমহারাজিকচাতুমহারাজাদিভেদা দিব্বসম্পত্তিযো, যা ৰা পনঞ্ঞাপি সম্পত্তিযো, তাসং সব্বাসং ইদং দানং নাম মূলং কারণং. ভোগানন্তি ভুঞ্জিতব্বট্ঠেন ‘‘ভোগো’’তি লদ্ধনামানং মনাপিযরূপাদীনং, তন্নিস্সযানঞ্চ উপভোগসুখানং. অৰস্সযট্ঠেন পতিট্ঠা. ৰিসমগতস্সাতি ব্যসনপ্পত্তস্স. তাণন্তি রক্খা ততো পরিপালনতো. লেণন্তি ব্যসনেহি পরিপাচিযমানস্স ওলীযনপদেসো. গতীতি গন্তব্বট্ঠানং. পরাযণন্তি পটিসরণং. অৰস্সযোতি ৰিনিপতিতুং অদেন্তো নিস্সযো. আরম্মণন্তি ওলুব্ভারম্মণং.

রতনমযসীহাসনসদিসন্তি সব্বরতনমযসত্তঙ্গমহাসীহাসনসদিসং মহগ্ঘং হুত্ৰা সব্বসো ৰিনিপতিতুং ¶ অপ্পদানতো. মহাপথৰিসদিসং গতগতট্ঠানে ¶ পতিট্ঠায লভাপনতো. আলম্বনরজ্জুসদিসন্তি যথা দুব্বলস্স পুরিসস্স আলম্বনরজ্জু উত্তিট্ঠতো, তিট্ঠতো চ উপত্থম্ভো, এৰং দানং সত্তানং সম্পত্তিভৰে উপ্পত্তিযা, ঠিতিযা চ পচ্চযভাৰতো. দুক্খনিত্থরণট্ঠেনাতি দুগ্গতিদুক্খনিত্থরণট্ঠেন. সমস্সাসনট্ঠেনাতি ¶ লোভমচ্ছরিযাদিপটিসত্তুপদ্দৰতো সম্মদেৰ অস্সাসনট্ঠেন. ভযপরিত্তাণট্ঠেনাতি দালিদ্দিযভযতো পরিপালনট্ঠেন. মচ্ছেরমলাদীহীতি মচ্ছেরলোভদোসইস্সাৰিচিকিচ্ছাদিট্ঠি আদিচিত্তমলেহি. অনুপলিত্তট্ঠেনাতি অনুপক্কিলিট্ঠতায. তেসন্তি মচ্ছেরমলাদিকচৰরানং. এতেহি এৰ দুরাসদট্ঠেন. অসন্তাসনট্ঠেনাতি অনভিভৰনীযতায সন্তাসাভাৰেন. যো হি দাযকো দানপতি, সো সম্পতিপি কুতোচি ন ভাযতি, পগেৰ আযতিং. ধম্মসীসেন পুগ্গলো ৰুত্তো. বলৰন্তট্ঠেনাতি মহাবলৰতায. দাযকো হি দানপতি সম্পতি পক্খবলেন বলৰা হোতি, আযতিং পন কাযবলাদীহিপি. অভিমঙ্গলসম্মতট্ঠেনাতি ‘‘ৰড্ঢিকারণ’’ন্তি অভিসম্মতভাৰেন. ৰিপত্তিভৰতো সম্পত্তিভৰূপনযনং খেমন্তভূমিসম্পাপনং, ভৰসঙ্গামতো যোগক্খেমসম্পাপনঞ্চ খেমন্তভূমিসম্পাপনট্ঠো.

ইদানি দানং ৰট্টগতা উক্কংসপ্পত্তা সম্পত্তিযো ৰিয ৰিৰট্টগতাপি তা সম্পাদেতীতি বোধিচরিযভাৰেনপি দানগুণে দস্সেতুং ‘‘দানঞ্হী’’তিআদি ৰুত্তং. তত্থ সক্কমারব্রহ্মসম্পত্তিযো অত্তহিতায এৰ, চক্কৰত্তিসম্পত্তি পন অত্তহিতায, পরহিতায চাতি দস্সেতুং সা তাসং পরতো ৰুত্তা, এতা লোকিযা, ইমা পন লোকুত্তরাতি দস্সেতুং ততো পরং ‘‘সাৰকপারমীঞাণ’’ন্তিআদি ৰুত্তং. তত্থাপি উক্কট্ঠুক্কট্ঠতরুক্কট্ঠতমাতি দস্সেতুং কমেন ঞাণত্তযং ৰুত্তং. তেসং পন দানস্স পচ্চযভাৰো হেট্ঠা ৰুত্তো এৰ. এতেনেৰস্স ব্রহ্মসম্পত্তিযাপি পচ্চযভাৰো দীপিতোতি ৰেদিতব্বো.

দানঞ্চ নাম দক্খিণেয্যেসু হিতজ্ঝাসযেন ৰা পূজনজ্ঝাসযেন ৰা অত্তনো সন্তকস্স পরেসং পরিচ্চজনং, তস্মা দাযকো সত্তেসু একন্তহিতজ্ঝাসযো পুরিসপুগ্গলো, সো ‘‘পরেসং হিংসতি, পরেসং ৰা সন্তকং হরতী’’তি অট্ঠানমেতন্তি আহ ‘‘দানং দদন্তো সীলং সমাদাতুং সক্কোতী’’তি. সীলসদিসো অলঙ্কারো নত্থীতি অকিত্তিমং হুত্ৰা সব্বকালং সোভাৰিসেসাৰহত্তা. সীলপুপ্ফসদিসং পুপ্ফং নত্থীতি এত্থাপি ¶ এসেৰ নযো. সীলগন্ধসদিসো গন্ধো নত্থীতি এত্থ ‘‘চন্দনং ¶ তগরং ৰাপী’’তিআদিকা (ধ. প. ৫৫) গাথা, ‘‘গন্ধো ইসীনং চিরদিক্খিতানং, কাযা চুতো গচ্ছতি মালুতেনা’’তিআদিকা (জা. ২.১৭.৫৫) চ ৰত্তব্বা ¶ . সীলঞ্হি সত্তানং আভরণঞ্চেৰ অলঙ্কারো চ গন্ধৰিলেপনঞ্চ পরস্স দস্সনীযভাৰাৰহঞ্চ. তেনাহ ‘‘সীলালঙ্কারেন হী’’তিআদি.

‘‘অযং সগ্গো লব্ভতী’’তি ইদং মজ্ঝিমেহি ছন্দাদীহি আরদ্ধং সীলং সন্ধাযাহ. তেনাহ সক্কো দেৰরাজা –

‘‘হীনেন ব্রহ্মচরিযেন, খত্তিযে উপপজ্জতি;

মজ্ঝিমেন চ দেৰত্তং, উত্তমেন ৰিসুজ্ঝতী’’তি. (জা. ২.২২.৪২৯);

ইট্ঠোতি সুখো, কন্তোতি কমনীযো, মনাপোতি মনৰড্ঢনকো, তং পনস্স ইট্ঠাদিভাৰং দস্সেতুং ‘‘নিচ্চমেত্থ কীল়া’’তিআদি ৰুত্তং. নিচ্চন্তি সব্বকালং কীল়াতি কামূপসংহিতা সুখৰিহারা. সম্পত্তিযোতি ভোগসম্পত্তিযো. দিব্বন্তি দিব্বভৰং দেৰলোকপরিযাপন্নং. সুখন্তি কাযিকং, চেতসিকঞ্চ সুখং. দিব্বসম্পত্তিন্তি দিব্বভৰং আযুসম্পত্তিং, ৰণ্ণযসইস্সরিযসম্পত্তিং, রূপাদিসম্পত্তিঞ্চ. এৰমাদীতি আদি-সদ্দেন যামাদীহি অনুভৰিতব্বং দিব্বসম্পত্তিং ৰদতি.

অপ্পস্সাদাতি নিরস্সাদা পণ্ডিতেহি যথাভূতং পস্সন্তেহি তত্থ অস্সাদেতব্বতাভাৰতো. বহুদুক্খাতি মহাদুক্খা সম্পতি, আযতিঞ্চ ৰিপুলদুক্খানুবন্ধত্তা. বহুপাযাসাতি অনেকৰিধপরিস্সযা. এত্থাতি কামেসু. ভিয্যোতি বহুং. দোসোতি অনিচ্চতাদিনা, অপ্পস্সাদতাদিনা চ দূসিতভাৰো, যতো তে ৰিঞ্ঞূনং চিত্তং নারাধেন্তি. অথ ৰা আদীনং ৰাতি পৰত্ততীতি আদীনৰো, পরমকপণতা, তথা ¶ চ কামা যথাভূতং পচ্চৰেক্খন্তানং পচ্চুপতিট্ঠন্তি. লামকভাৰোতি নিহীনভাৰো অসেট্ঠেহি সেৰিতব্বত্তা, সেট্ঠেহি ন সেৰিতব্বত্তা চ. সংকিলিস্সনন্তি ৰিবাধেতব্বতা উপতাপেতব্বতা. নেক্খম্মে আনিসংসন্তি এত্থ যত্তকা কামেসু আদীনৰা, তপ্পটিপক্খতো তত্তকা নেক্খম্মে আনিসংসা. অপি চ ‘‘নেক্খম্মং নামেতং অসম্বাধং অসংকিলিট্ঠং, নিক্খন্তং কামেহি, নিক্খন্তং কামসঞ্ঞায, নিক্খন্তং কামৰিতক্কেহি, নিক্খন্তং কামপরিল়াহেহি, নিক্খন্তং ব্যাপাদতো’’তিআদিনা ¶ (সারত্থ. টী. ৩.২৬ মহাৰগ্গে) নযেন নেক্খম্মে আনিসংসে পকাসেসি, পব্বজ্জায, ঝানাদীসু চ গুণে ৰিভাৰেসি ৰণ্ণেসি.

ৰুত্তনযন্তি এত্থ যং অৰুত্তনযং ‘‘কল্লচিত্তে’’তিআদি, তত্থ কল্লচিত্তেতি কম্মনিযচিত্তে, হেট্ঠা ¶ পৰত্তিতদেসনায অস্সদ্ধিযাদীনং চিত্তদোসানং ৰিগতত্তা উপরিদেসনায ভাজনভাৰূপগমনেন কম্মক্খমচিত্তেতি অত্থো. অস্সদ্ধিযাদযো হি যস্মা চিত্তস্স রোগভূতা তদা তে ৰিগতা, তস্মা অরোগচিত্তেতি অত্থো. দিট্ঠিমানাদিকিলেসৰিগমনেন মুদুচিত্তে. কামচ্ছন্দাদিৰিগমেন ৰিনীৰরণচিত্তে. সম্মাপটিপত্তিযং উল়ারপীতিপামোজ্জযোগেন উদগ্গচিত্তে. তত্থ সদ্ধাসম্পত্তিযা পসন্নচিত্তে. যদা চ ভগৰা অঞ্ঞাসীতি সম্বন্ধো. অথ ৰা কল্লচিত্তেতি কামচ্ছন্দৰিগমেন অরোগচিত্তে. মুদুচিত্তেতি ব্যাপাদৰিগমেন মেত্তাৰসেন অকথিনচিত্তে. ৰিনীৰরণচিত্তেতি উদ্ধচ্চকুক্কুচ্চৰিগমেন ৰিক্খেপস্স ৰিগতত্তা তেন অপিহিতচিত্তে. উদগ্গচিত্তেতি থিনমিদ্ধৰিগমেন ¶ সম্পগ্গহিতৰসেন অলীনচিত্তে. পসন্নচিত্তেতি ৰিচিকিচ্ছাৰিগমেন সম্মাপটিপত্তিযং অধিমুত্তচিত্তে, এৰম্পেত্থ অত্থো ৰেদিতব্বো.

‘‘সেয্যথাপী’’তিআদিনা উপমাৰসেন নেসং সংকিলেসপ্পহানং, অরিযমগ্গুপ্পাদঞ্চ দস্সেতি. অপগতকাল়কন্তি ৰিগতকাল়কং. সম্মদেৰাতি সুট্ঠু এৰ. রজনন্তি নীলপীতাদিরঙ্গজাতং. পটিগ্গণ্হেয্যাতি গণ্হেয্য পভস্সরং ভৰেয্য. তস্মিংযেৰ আসনেতি তিস্সমেৰ নিসজ্জাযং, এতেন নেসং লহুৰিপস্সকতা, তিক্খপঞ্ঞতা, সুখপটিপদাখিপ্পাভিঞ্ঞতা চ দস্সিতা হোতি. ৰিরজন্তি অপাযগমনীযরাগরজাদীনং ৰিগমেন ৰিরজং. অনৰসেসদিট্ঠিৰিচিকিচ্ছামলাপগমনেন ৰীতমলং. পঠমমগ্গৰজ্ঝকিলেসরজাভাৰেন ৰা ৰিরজং. পঞ্চৰিধদুস্সীল্যমলাপগমনেন ৰীতমলং. ধম্মচক্খুন্তি ব্রহ্মাযুসুত্তে (ম. নি. ২.৩৮৩) হেট্ঠিমা তযো মগ্গা ৰুত্তা, চূল়রাহুলোৰাদে (ম. নি. ৩.৪১৬) আসৰক্খযো, ইধ পন সোতাপত্তিমগ্গো অধিপ্পেতো. ‘‘যং কিঞ্চি সমুদযধম্মং, সব্বং তং নিরোধধম্ম’’ন্তি তস্স উপ্পত্তিআকারদস্সনন্তি. ননু চ মগ্গঞাণং অসঙ্খতধম্মারম্মণং, ন সঙ্খতধম্মারম্মণন্তি? সচ্চমেতং. যস্মা তং নিরোধং আরম্মণং কত্ৰা কিচ্চৰসেন সব্বসঙ্খতং পটিৰিজ্ঝন্তং উপ্পজ্জতি, তস্মা তথা ৰুত্তং.

‘‘সুদ্ধং ৰত্থ’’ন্তি নিদস্সিতউপমাযং ইদং উপমাসংসন্দনং ৰত্থং ৰিয চিত্তং, ৰত্থস্স আগন্তুকমলেহি কিলিট্ঠভাৰো ৰিয চিত্তস্স রাগাদিমলেহি সংকিলিট্ঠভাৰো ¶ , ধোৰনসিলা ৰিয অনুপুব্বিকথা, উদকং ৰিয সদ্ধা, উদকে তেমেত্ৰা ঊসগোমযছারিকাভরেহি কাল়কপদেসে সমুচ্ছিন্দিত্ৰা ৰত্থস্স ধোৰনপযোগো ¶ ৰিয সদ্ধাসিনেহেন তেমেত্ৰা তেমেত্ৰা সতিসমাধিপঞ্ঞাহি দোসে সিথিলী কত্ৰা সুতাদিৰিধিনা চিত্তস্স সোধনে ৰীরিযারম্ভো, তেন পযোগেন ৰত্থে নানাকাল়কাপগমো ৰিয ৰীরিযারম্ভেন কিলেসৰিক্খম্ভনং, রঙ্গজাতং ৰিয অরিযমগ্গো, তেন সুদ্ধস্স ৰত্থস্স পভস্সরভাৰো ৰিয ৰিক্খম্ভিতকিলেসস্স চিত্তস্স মগ্গেন পরিযোদপনন্তি. ‘‘দিট্ঠধম্মা’’তি ¶ ৰত্ৰা দস্সনং নাম ঞাণদস্সনতো অঞ্ঞম্পি অত্থীতি তং নিৰত্তনত্থং ‘‘পত্তধম্মা’’তি ৰুত্তং. পত্তি চ ঞাণসম্পত্তিতো অঞ্ঞম্পি ৰিজ্জতীতি ততো ৰিসেসদস্সনত্থং ‘‘ৰিদিতধম্মা’’তি ৰুত্তং. সা পন ৰিদিতধম্মতা ধম্মেসু একদেসেনাপি হোতীতি নিপ্পদেসতো ৰিদিতভাৰং দস্সেতুং ‘‘পরিযোগাল়্হধম্মা’’তি ৰুত্তং, তেন নেসং সচ্চাভিসম্বোধিংযেৰ ৰিভাৰেতি. মগ্গঞাণঞ্হি একাভিসমযৰসেন পরিঞ্ঞাদিকিচ্চং সাধেন্তং নিপ্পদেসতোৰ চতুসচ্চধম্মং সমন্ততো ওগাহন্তং পটিৰিজ্ঝতীতি. সেসং হেট্ঠা ৰুত্তনযমেৰ.

৭৭. চীৰরদানাদীনীতি চীৰরাদিপরিক্খারদানং সন্ধাযাহ. যো হি চীৰরাদিকে অট্ঠ পরিক্খারে, পত্তচীৰরমেৰ ৰা সোতাপন্নাদিঅরিযস্স, পুথুজ্জনস্সেৰ ৰা সীলসম্পন্নস্স দত্ৰা ‘‘ইদং পরিক্খারদানং অনাগতে এহিভিক্খুভাৰায পচ্চযো হোতূ’’তি পত্থনং পট্ঠপেসি, তস্স চ সতি অধিকারসম্পত্তিযং বুদ্ধানং সম্মুখীভাৰে ইদ্ধিমযপরিক্খারলাভায সংৰত্ততীতি ৰেদিতব্বং. ৰস্সসতিকত্থেরা ৰিয আকপ্পসম্পন্নাতি অধিপ্পাযো.

সন্দস্সেসীতি সুট্ঠু পচ্চক্খং কত্ৰা দস্সেসি. ইধলোকত্থন্তি ইধলোকভূতং খন্ধপঞ্চকসঙ্খাতমত্থং. পরলোকত্থন্তি এত্থাপি এসেৰ নযো. দস্সেসীতি সামঞ্ঞলক্খণতো, সলক্খণতো চ দস্সেসি. তেনাহ ‘‘অনিচ্চ’’ন্তিআদি. তত্থ হুত্ৰা অভাৰতো অনিচ্চন্তি দস্সেসি. উদযব্বযপটিপীল়নতো দুক্খন্তি দস্সেসি. অৰসৰত্তনতো অনত্তাতি দস্সেসি. ইমে রুপ্পনাদিলক্খণা পঞ্চক্খন্ধাতি রাসট্ঠেন খন্ধে দস্সেসি. ইমে চক্খাদিসভাৰা ¶ নিস্সত্তনিজ্জীৰট্ঠেন অট্ঠারস ধাতুযোতি দস্সেসি. ইমানি চক্খাদিসভাৰানেৰ দ্ৰারারম্মণভূতানি দ্ৰাদস আযতনানীতি দস্সেসি. ইমে ¶ অৰিজ্জাদযো জরামরণপরিযোসানা দ্ৰাদস পচ্চযধম্মা পটিচ্চসমুপ্পাদোতি দস্সেসি. রূপক্খন্ধস্স হেট্ঠা ৰুত্তনযেন পচ্চযতো চত্তারি, খণতো একন্তি ইমানি পঞ্চ লক্খণানি দস্সেসি. তথাতি ইমিনা ‘‘পঞ্চ লক্খণানী’’তি পদং আকড্ঢতি. দস্সেন্তোতি ইতি-সদ্দো নিদস্সনত্থো, এৰন্তি অত্থো. নিরযন্তি অট্ঠমহানিরযসোল়সউস্সদনিরযপ্পভেদং সব্বসো নিরযং দস্সেসি. তিরচ্ছানযোনিন্তি অপদদ্ৰিপদচতুপ্পদবহুপ্পদাদিভেদং মিগপসুপক্খিসরীসপাদিৰিভাগং নানাৰিধং তিরচ্ছানলোকং. পেত্তিৰিসযন্তি খুপ্পিপাসিকৰন্তাসিকপরদত্তূপজীৰিনিজ্ঝামতণ্হিকাদিভেদভিন্নং নানাৰিধং পেতসত্তলোকং. অসুরকাযন্তি কালকঞ্চিকাসুরনিকাযং. এৰং তাৰ দুগ্গতিভূতং পরলোকত্থং ৰত্ৰা ইদানি সুগতিভূতং ৰত্তুং ‘‘তিণ্ণং কুসলানং ৰিপাক’’ন্তিআদি ৰুত্তং. ৰেহপ্ফলে সুভকিণ্ণেযেৰ সঙ্গহেত্ৰা অসঞ্ঞীসু, অরূপীসু চ সম্পত্তিযা দস্সেতব্বায অভাৰতো দুৰিঞ্ঞেয্যতায ‘‘নৰন্নং ব্রহ্মলোকান’’ন্ত্ৰেৰ ৰুত্তং.

গণ্হাপেসীতি ¶ তে ধম্মে সমাদিন্নে কারাপেসি.

সমুত্তেজনং নাম সমাদিন্নধম্মানং যথা অনুপকারকা ধম্মা পরিহাযন্তি, পহীযন্তি চ, উপকারকা ধম্মা পরিৰড্ঢন্তি, ৰিসুজ্ঝন্তি চ, তথা নেসং উস্সাহুপ্পাদনন্তি আহ ‘‘অব্ভুস্সাহেসী’’তি. যথা পন তং উস্সাহুপ্পাদনং হোতি, তং দস্সেতুং ‘‘ইধলোকত্থঞ্চেৰা’’তিআদি ৰুত্তং. তাসেত্ৰা তাসেত্ৰাতি পরিব্যত্তভাৰাপাদনেন তেজেত্ৰা তেজেত্ৰা. অধিগতং ৰিয কত্ৰাতি যেসং কথেতি, তেহি তমত্থং পচ্চক্খতো অনুভুয্যমানং ৰিয কত্ৰা. ৰেনেয্যানঞ্হি বুদ্ধেহি পকাসিযমানো ¶ অত্থো পচ্চক্খতোপি পাকটতরো হুত্ৰা উপট্ঠাতি. তথা হি ভগৰা এৰং থোমীযতি –

‘‘আদিত্তোপি অযং লোকো, একাদসহি অগ্গিভি;

ন তথা যাতি সংৰেগং, সম্মোহপলিগুণ্ঠিতো.

সুত্ৰাদীনৰসঞ্ঞুত্তং, যথা ৰাচং মহেসিনো;

পচ্চক্খতোপি বুদ্ধানং, ৰচনং সুট্ঠু পাকট’’ন্তি.

তেনাহ ‘‘দ্ৰত্তিংসকম্মকারণপঞ্চৰীসতিমহাভযপ্পভেদঞ্হী’’তিআদি. দ্ৰত্তিংসকম্মকারণানি ‘‘হত্থম্পি ছিন্দন্তী’’তিআদিনা (ম. নি. ১.১৭৮) দুক্খক্খন্ধসুত্তে আগতনযেন ¶ ৰেদিতব্বানি. পঞ্চৰীসতিমহাভযানি ‘‘জাতিভযং জরাভযং ব্যাধিভযং মরণভয’’ন্তিআদিনা (চূল়নি. ১২৩) তত্থ তত্থ সুত্তে আগতনযেন ৰেদিতব্বানি. আঘাতনভণ্ডিকা অধিকুট্টনকল়িঙ্গরং, যং ‘‘অচ্চাধান’’ন্তিপি ৰুচ্চতি.

পটিলদ্ধগুণেন চোদেসীতি ‘‘তংতংগুণাধিগমেন অযম্পি তুম্হেহি পটিলদ্ধো, আনিসংসো অযম্পী’’তি পচ্চক্খতো দস্সেন্তো ‘‘কিং ইতো পুব্বে এৰরূপং অত্থী’’তি চোদেন্তো ৰিয অহোসি. তেনাহ ‘‘মহানিসংসং কত্ৰা কথেসী’’তি.

তপ্পচ্চযঞ্চ কিলমথন্তি সঙ্খারপৰত্তিহেতুকং তস্মিং তস্মিং সত্তসন্তানে উপ্পজ্জনকপরিস্সমং সংৰিঘাতং ৰিহেসং. ইধাতি হেট্ঠা পঠমমগ্গাধিগমত্থায কথায. সব্বসঙ্খারূপসমভাৰতো সন্তং. অতিত্তিকরপরমসুখতায পণীতং. সকলসংসারব্যসনতো তাযনত্থেন ¶ তাণং. ততো নিব্বিন্দহদযানং নিলীযনট্ঠানতায লেণং. আদি-সদ্দেন গতিপটিসরণং পরমস্সাসোতি এৰমাদীনং সঙ্গহো.

মহাজনকাযপব্বজ্জাৰণ্ণনা

৮০. সঙ্ঘপ্পহোনকানং ভিক্খূনং অভাৰা ‘‘সঙ্ঘস্স অপরিপুণ্ণত্তা’’তি ৰুত্তং. দ্ৰে অগ্গসাৰকা এৰ হি তদা অহেসুং.

চারিকাঅনুজাননৰণ্ণনা

৮৬. ‘‘কদা ¶ উদপাদী’’তি পুচ্ছং ‘‘সম্বোধিতো’’তিআদিনা সঙ্খেপতো ৰিস্সজ্জেত্ৰা পুন তং ৰিত্থারতো দস্সেতুং ‘‘ভগৰা কিরা’’তিআদি ৰুত্তং. পিতু সঙ্গহং করোন্তো ৰিহাসি সম্বোধিতো ‘‘সত্ত সংৰচ্ছরানি সত্ত মাসে সত্ত দিৰসে’’তি আনেত্ৰা সম্বন্ধো, তঞ্চ খো ৰেনেয্যানং তদা অভাৰতো. কিলঞ্জেহি বহি ছাদাপেত্ৰা, ৰত্থেহি অন্তো পটিচ্ছাদাপেত্ৰা, উপরি চ ৰত্থেহি ছাদাপেত্ৰা, তস্স হেট্ঠা সুৰণ্ণ…পে… ৰিতানং কারাপেত্ৰা. মালাৰচ্ছকেতি পুপ্ফমালাহি ৰচ্ছাকারেন ৰেঠিতে. গন্ধন্তরেতি চাটিভরিতগন্ধস্স অন্তরে. পুপ্ফানীতি চাটিআদিভরিতানি জলজপুপ্ফানি চেৰ চঙ্কোতকাদিভরিতানি থলজপুপ্ফানি চ.

কামঞ্চাযং ¶ রাজা বুদ্ধপিতা, তথাপি বুদ্ধা নাম লোকগরুনো, ন তে কেনচি ৰসে ৰত্তেতব্বা, অথ খো তে এৰ পরে অত্তনো ৰসে ৰত্তেন্তি, তস্মা রাজা ‘‘নাহং ভিক্খুসঙ্ঘং দেমী’’তি আহ.

দানমুখন্তি দানকরণূপাযং, দানৰত্তন্তি অত্থো. ন দানি মে অনুঞ্ঞাতাতি ইদানি মে দানং ন অনুঞ্ঞাতা, নো ন অনুজানন্তীতি অত্থো.

পরিতস্সনজীৰিতন্তি দুক্খজীৰিকা দালিদ্দিযন্তি অত্থো.

সব্বেসং ভিক্খূনং পহোসীতি ভগৰতো অট্ঠসট্ঠি চ ভিক্খুসতসহস্সানং ভাগতো দাতুং পহোসি, ন সব্বেসং পরিযত্তভাৰেন. তেনাহ ‘‘সেনাপতিপি অত্তনো দেয্যধম্মং অদাসী’’তি. জেট্ঠিকট্ঠানেতি জেট্ঠিকদেৰিট্ঠানে.

তথেৰ ¶ কত্ৰাতি চরপুরিসে ঠপেত্ৰা. সুচিন্তি সুদ্ধং. পণীতন্তি উল়ারং, ভাৰনপুংসকঞ্চেতং ‘‘একমন্ত’’ন্তিআদীসু (পারা. ২) ৰিয. ভঞ্জিত্ৰাতি মদ্দিত্ৰা, পীল়েত্ৰাতি ¶ অত্থো. জাতিসপ্পিখীরাদীহিযেৰাতি অন্তোজাতসপ্পিখীরাদীহিযেৰ, অম্হাকমেৰ গাৰিআদিতো গহিতসপ্পিআদীহিযেৰাতি অত্থো.

৯০. পরাপৰাদং, পরাপকারং, সীতুণ্হাদিভেদঞ্চ গুণাপরাধং খমতি সহতি অধিৰাসেতীতি খন্তি. সা পন যস্মা সীলাদীনং পটিপক্খধম্মে সৰিসেসং তপতি সন্তপতি ৰিধমতীতি পরমং উত্তমং তপো. তেনাহ ‘‘অধিৰাসনখন্তি নাম পরমং তপো’’তি. ‘‘অধিৰাসনখন্তী’’তি ইমিনা ধম্মনিজ্ঝানক্খন্তিতো ৰিসেসেতি. তিতিক্খনং খমনং তিতিক্খা.অক্খরচিন্তকা হি খমাযং তিতিক্খা-সদ্দং ৰণ্ণেন্তি. তেনেৰাহ ‘‘খন্তিযা এৰ ৰেৰচন’’ন্তিআদি. সব্বাকারেনাতি সন্তপণীতনিপুণসিৰখেমাদিনা সব্বপ্পকারেন. সো পব্বজিতো নাম ন হোতি পব্বাজিতব্বধম্মস্স অপব্বাজনতো. তস্সেৰ ততিযপদস্স ৰেৰচনং অনত্থন্তরত্তা.

‘‘ন হী’’তিআদিনা তং এৰত্থং ৰিৰরতি. উত্তমত্থেন পরমন্তি ৰুচ্চতি পর-সদ্দস্স সেট্ঠৰাচকত্তা, ‘‘পুগ্গলপরোপরঞ্ঞূ’’তিআদীসু (অ. নি. ৭.৬৮; নেত্তি. ১১৮) ৰিয. পরন্তি অঞ্ঞং. ইদানি পর-সদ্দং অঞ্ঞপরিযাযমেৰ গহেত্ৰা অত্থং দস্সেতুং ‘‘অথ ৰা’’তিআদি ৰুত্তং. মলস্সাতি পাপমলস্স. অপব্বাজিতত্তাতি অনীহটত্তা অনিরাকতত্তা ¶ . সমিতত্তাতি নিরোধিতত্তা তেসং পাপধম্মানং. ‘‘সমিতত্তা হি পাপানং সমণোতি পৰুচ্চতী’’তি হি ৰুত্তং.

অপিচ ভগৰা ভিক্খূনং পাতিমোক্খং উদ্দিসন্তো পাতিমোক্খকথায চ সীলপধানত্তা সীলস্স চ ৰিসেসতো দোসো পটিপক্খোতি ¶ তস্স নিগ্গণ্হনৰিধিং দস্সেতুং আদিতো ‘‘খন্তী পরমং তপো’’তি আহ, তেন অনিট্ঠস্স পটিহননূপাযো ৰুত্তো, তিতিক্খাগহণেন পন ইট্ঠস্স, তদুভযেনপি উপ্পন্নং রতিং অভিভুয্য ৰিহরতীতি অযমত্থো দস্সিতোতি. তণ্হাৰানস্স ৰূপসমনতো নিব্বানং পরমং ৰদন্তি বুদ্ধা. তত্থ খন্তিগ্গহণেন পযোগৰিপত্তিযা অভাৰো দস্সিতো, তিতিক্খাগহণেন আসযৰিপত্তিযা অভাৰো. তথা খন্তিগ্গহণেন পরাপরাধসহতা, তিতিক্খাগহণেন পরেসু অনপরজ্ঝনা দস্সিতা. এৰং কারণমুখেন অন্ৰযতো পাতিমোক্খং দস্সেত্ৰা ইদানি ব্যতিরেকতো তং দস্সেতুং ‘‘ন হী’’তিআদি ৰুত্তং, তেন যথা সত্তানং জীৰিতা ৰোরোপনং, পাণিলেড্ডুদণ্ডাদীহি ৰিবাধনঞ্চ ‘‘পরূপঘাতো, পরৰিহেঠন’’ন্তি ৰুচ্চতি, এৰং তেসং মূলসাপতেয্যাৰহরণং, দারপরামসনং, ৰিসংৰাদনং, অঞ্ঞমঞ্ঞভেদনং, ফরুসৰচনেন মম্মঘট্টনং, নিরত্থকৰিপ্পলাপো ¶ , পরসন্তকগিজ্ঝনং, উচ্ছেদৰিন্দনং, মিচ্ছাভিনিৰেসনঞ্চউপঘাতো, ৰিহেঠনঞ্চ হোতীতি যস্স কস্সচি অকুসলস্স কম্মপথস্স, কম্মস্স চ করণেন পব্বজিতো, সমণো চ ন হোতীতি দস্সেতি.

সব্বাকুসলস্সাতি সব্বস্সাপি দ্ৰাদসাকুসলচিত্তুপ্পাদসঙ্গহিতস্স সাৰজ্জধম্মস্স. করণং নাম তস্স অত্তনো সন্তানে উপ্পাদনন্তি তপ্পটিক্খেপতো অকরণং ‘‘অনুপ্পাদন’’ন্তি ৰুত্তং. ‘‘কুসলস্সা’’তি ইদং ‘‘এতং বুদ্ধান সাসন’’ন্তি ৰক্খমানত্তা অরিযমগ্গধম্মে, তেসঞ্চ সম্ভারভূতে তেভূমককুসলধম্মে সম্বোধেতীতি আহ ‘‘চতুভূমককুসলস্সা’’তি. উপসম্পদাতি উপসম্পাদনং, তং পন তস্স সমধিগমোতি আহ ‘‘পটিলাভো’’তি. চিত্তজোতনন্তি চিত্তস্স পভস্সরভাৰকরণং সব্বসো পরিসোধনং. যস্মা ¶ অগ্গমগ্গসমঙ্গিনো চিত্তং সব্বসো পরিযোদপীযতি নাম, অগ্গফলক্খণে পন পরিযোদপিতং হোতি পুন পরিযোদপেতব্বতায অভাৰতো, ইতি পরিনিট্ঠিতপরিযোদপনতং সন্ধাযাহ ‘‘তং পন অরহত্তেন হোতী’’তি. সব্বপাপং পহায তদঙ্গাদিৰসেনেৰাতি অধিপ্পাযো. ‘‘সীলসংৰরেনা’’তি হি ইমিনা তেভূমকস্সাপি সঙ্গহে ইতরপ্পহানানম্পি সঙ্গহো হোতীতি, এৰঞ্চ কত্ৰা সব্বগ্গহণং সমত্থিতং হোতি ¶ . সমথৰিপস্সনাহীতি লোকিযলোকুত্তরাহি সমথৰিপস্সনাহি. সম্পাদেত্ৰাতি নিপ্ফাদেত্ৰা. সম্পাদনঞ্চেত্থ হেতুভূতাহি ফলভূতস্স সহজাতাহিপি, পগেৰ পুরিমসিদ্ধাহীতি দট্ঠব্বং.

কস্সচীতি হীনাদীসু কস্সচি সত্তস্স কস্সচি উপৰাদস্স, তেন দৰকম্যতাযপি উপৰদনং পটিক্খিপতি. উপঘাতস্স অকরণন্তি এত্থাপি ‘‘কস্সচী’’তি আনেত্ৰা সম্বন্ধো. কাযেনাতি চ নিদস্সনমত্তমেতং মনসাপি পরেসং অনত্থচিন্তনাদিৰসেন উপঘাতকরণস্স ৰজ্জেতব্বত্তা. কাযেনাতি ৰা এত্থ অরূপকাযস্সাপি সঙ্গহো দট্ঠব্বো, ন চোপনকাযকরজকাযানমেৰ. প অতিমোক্খন্তি পকারতো অতিৰিয সীলেসু মুখ্যভূতং. ‘‘অতিপমোক্খ’’ন্তি তমেৰ পদং উপসগ্গব্যত্তযেন ৰদতি. এৰং ভেদতো পদৰণ্ণনং কত্ৰা তত্ৰতো ৰদতি ‘‘উত্তমসীল’’ন্তি. ‘‘পাতি ৰা’’তিআদিনা পালনতো রক্খণতো অতিৰিয মোক্খনতো অতিৰিয মোচনতো পাতিমোক্খন্তি দস্সেতি. ‘‘পাপা অতি মোক্খেতীতি অতিমোক্খো’’তি নিমিত্তস্স কত্তুভাৰেন উপচরিতব্বতো. যো ৰা নন্তি যো ৰা পুগ্গলো নং পাতিমোক্খসংৰরসীলং পাতি ¶ সমাদিযিত্ৰা অৰিকোপেন্তো রক্খতি, তং ‘‘পাতী’’তি লদ্ধনামং পাতিমোক্খসংৰরসীলে ঠিতং মোক্খেতীতি পাতিমোক্খন্তি অযমেত্থ সঙ্খেপো, ৰিত্থারতো পন পাতিমোক্খপদস্স অত্থো ৰিসুদ্ধিমগ্গসংৰণ্ণনাযং (ৰিসুদ্ধি. টী. ১.১৪) ৰুত্তনযেন ৰেদিতব্বো.

মত্তঞ্ঞুতাতি ¶ ভোজনে মত্তঞ্ঞুতা, সা পন ৰিসেসতো পচ্চযসন্নিস্সিতসীলৰসেন গহেতব্বাতি আহ ‘‘পটিগ্গহণপরিভোগৰসেন পমাণঞ্ঞুতা’’তি. আজীৰপারিসুদ্ধিসীলৰসেনাপি গয্হমানে ‘‘পরিযেসনৰিস্সজ্জনৰসেনা’’তিপি ৰত্তব্বং. সঙ্ঘট্টনৰিরহিতন্তি জনসঙ্ঘট্টনৰিরহিতং, নিরজনসম্বাধং ৰিৰিত্তন্তি অত্থো. চতুপচ্চযসন্তোসো দীপিতো পচ্চযসন্তোসতাসামঞ্ঞেন ইতরদ্ৰযস্সাপি লক্খণহারনযেন জোতিতভাৰতো. ‘‘অট্ঠসমাপত্তিৰসিভাৰাযা’’তি ইমিনা পযোজনদস্সনৰসেন যদত্থং ৰিৰিত্তসেনাসনসেৰনং ইচ্ছিতং, সো অধিচিত্তানুযোগো ৰুত্তো. অট্ঠ সমাপত্তিযো চেত্থ ৰিপস্সনায পাদকভূতা অধিপ্পেতা, ন যা কাচীতি সকলস্সাপি অধিচিত্তানুযোগস্স জোতিতভাৰো ৰেদিতব্বো.

দেৰতারোচনৰণ্ণনা

৯১. এত্তাৰতাতি ¶ এত্তকেন সুত্তপদেসেন. তত্থাপি চ ইমিনা…পে… কথনেন সুপ্পটিৰিদ্ধভাৰং পকাসেত্ৰাতি যোজনা. চ-সদ্দো ব্যতিরেকত্থো, তেন ইদানি ৰুচ্চমানত্থং উল্লঙ্গেতি. একমিদাহন্তি একং অহং. ইদং-সদ্দো নিপাতমত্তং. আদি-সদ্দেন ‘‘ভিক্খৰে সময’’ন্তি এৰমাদি পাঠো সঙ্গহিতো. অহং ভিক্খৰে একং সমযন্তি এৰং পেত্থ পদযোজনা.

সুভগৰনেতি সুভগত্তা সুভগং, সুন্দরসিরিকত্তা ¶ , সুন্দরকামত্তা ৰাতি অত্থো. সুভগঞ্হি তং সিরিসম্পত্তিযা, সুন্দরে চেত্থ কামে মনুস্সা পত্থেন্তি. বহুজনকন্ততাযপি তং সুভগং. ৰনযতীতি ৰনং, অত্তসম্পত্তিযা অত্তনি সিনেহং উপ্পাদেতীতি অত্থো. ৰনুতে ইতি ৰা ৰনং, অত্তসম্পত্তিযা এৰ ‘‘মং পরিভুঞ্জথা’’তি সত্তে যাচতি ৰিযাতি অত্থো. সুভগঞ্চ তং ৰনঞ্চাতি সুভগৰনং, তস্মিং সুভগৰনে. অট্ঠকথাযংপন কিং ইমিনা পপঞ্চেনাতি ‘‘এৰং নামকে ৰনে’’তি ৰুত্তং. কামং সালরুক্খোপি ‘‘সালো’’তি ৰুচ্চতি, যো কোচি রুক্খোপি ৰনপ্পতি জেট্ঠকরুক্খোপি. ইধ পন পচ্ছিমো এৰ অধিপ্পেতোতি আহ ‘‘ৰনপ্পতিজেট্ঠকস্স মূলে’’তি. মূলসমুগ্ঘাতৰসেনাতি অনুসযসমুচ্ছিন্দনৰসেন.

ন ৰিহাযন্তীতি অকুপ্পধম্মতায ন ৰিজহন্তি. ‘‘ন কঞ্চি সত্তং তপন্তীতি অতপ্পা’’তি ইদং তেসু তস্সা সমঞ্ঞায নিরুল়্হতায ৰুত্তং, অঞ্ঞথা সব্বেপি সুদ্ধাৰাসা ন কঞ্চি সত্তং তপন্তীতি অতপ্পা নাম সিযুং. ‘‘ন ৰিহাযন্তী’’তিআদিনিব্বচনেসুপি এসেৰ নযো. সুন্দরদস্সনাতি দস্সনীযাতি অযমত্থোতি আহ ‘‘অভিরূপা’’তিআদি. সুন্দরমেতেসং দস্সনন্তি ¶ সোভনমেতেসং চক্খুনা দস্সনং, ৰিঞ্ঞাণেন দস্সনং পীতি অত্থো. সব্বে হেৰ…পে… জেট্ঠা পঞ্চৰোকারভৰে ততো ৰিসিট্ঠানং অভাৰতো.

সত্তন্নং বুদ্ধানং ৰসেনাতি সত্তন্নং সম্মাসম্বুদ্ধানং অপদানৰসেন. অৰিহেহি অজ্ঝিট্ঠেন একেন অৰিহাব্রহ্মুনা কথিতা তেহি সব্বেহি কথিতা নাম হোন্তীতি ৰুত্তং ‘‘তথা অৰিহেহী’’তি. এসেৰ নযো সেসেসুপি. তেনাহ ভগৰা ‘‘দেৰতা মং এতদৰোচু’’ন্তি. যং পন পাল়িযং ‘‘অনেকানি দেৰতাসতানী’’তি ৰুত্তং, তং সব্বং ¶ পচ্ছা অত্তনো সাসনে ¶ ৰিসেসং অধিগন্ত্ৰা তত্থ উপ্পন্নানং ৰসেন ৰুত্তং. অনুসন্ধিদ্ৰযম্পীতি ধম্মধাতুপদানুসন্ধি, দেৰতারোচনপদানুসন্ধীতি দুৰিধং অনুসন্ধিং. নিয্যাতেন্তোতি নিগমেন্তো. যং পনেত্থ অত্থতো অৰিভত্তং, তং সুৰিঞ্ঞেয্যমেৰাতি.

মহাপদানসুত্তৰণ্ণনায লীনত্থপ্পকাসনা.

২. মহানিদানসুত্তৰণ্ণনা

নিদানৰণ্ণনা

৯৫. জনপদিনোতি ¶ ¶ ¶ জনপদৰন্তো, জনপদস্স ৰা ইস্সরসামিনো রাজকুমারা গোত্তৰসেন কুরূ নাম. তেসং নিৰাসো যদি একো জনপদো, কথং বহুৰচনন্তি আহ ‘‘রুল়্হিসদ্দেনা’’তি. অক্খরচিন্তকা হি ঈদিসেসু ঠানেসু যুত্তে ৰিয ঈদিসলিঙ্গৰচনানি ইচ্ছন্তি. অযমেত্থ রুল়্হি যথা অঞ্ঞত্থাপি ‘‘অঙ্গেসু ৰিহরতি, মল্লেসু ৰিহরতী’’তি চ. তব্বিসেসনেপি জনপদসদ্দে জাতিসদ্দে একৰচনমেৰ. অট্ঠকথাচরিযা পনাতি পন-সদ্দো ৰিসেসত্থজোতনো, তেন ‘‘পুথুঅত্থৰিসযতায এৰেতং পুথুৰচন’’ন্তি ‘‘বহুকে পনা’’তিআদিনা ৰক্খমানং ৰিসেসং জোতেতি. সুত্ৰাতি মন্ধাতুমহারাজস্স আনুভাৰদস্সনানুসারেন পরম্পরানুগতং কথং সুত্ৰা. অনুসংযাযন্তেনাতি অনুৰিচরন্তেন. এতেসং ঠানন্তি চন্দিমসূরিযমুখেন চাতুমহারাজিকভৰনমাহ. তেনাহ ‘‘তত্থ অগমাসী’’তিআদি. সোতি মন্ধাতুমহারাজা. তন্তি চাতুমহারাজিকরজ্জং. গহেত্ৰাতি সম্পটিচ্ছিত্ৰা. পুন পুচ্ছি পরিণাযকরতনং.

দোৰারিকভূমিযং তিট্ঠন্তি সুধম্মায দেৰসভায, দেৰপুরস্স চ চতূসু দ্ৰারেসু আরক্খায অধিগতত্তা. ‘‘দিব্বরুক্খসহস্সপটিমণ্ডিত’’ন্তি ¶ ইদং ‘‘চিত্তলতাৰন’’ন্তিআদীসুপি যোজেতব্বং.

পথৰিযং পতিট্ঠাসীতি ভস্সিত্ৰা পথৰিযা আসন্নট্ঠানে অট্ঠাসি. ন হি চক্করতনং ভূমিযং পততি, তথাঠিতঞ্চ নচিরস্সেৰ অন্তরধাযি তেনত্তভাৰেন চক্কৰত্তিইস্সরিযস্স অভাৰতো. ‘‘চিরতরং কালং ঠত্ৰা’’তি অপরে. রাজা এককোৰ অগমাসি অত্তনো আনুভাৰেন. মনুস্সভাৰোতি মনুস্সগন্ধসরীরনিস্সন্দাদিমনুস্সভাৰো. পাতুরহোসীতি দেৰলোকে পৰত্তিৰিপাকদাযিনো অপরাপরিযায ৰেদনীযস্স কম্মস্স কতোকাসত্তা সব্বদা সোল়সৰস্সুদ্দেসিকতা মালামিলাযনাদি দিব্বভাৰো পাতুরহোসি. তদা মনুস্সানং অসঙ্খেয্যাযুকতায ¶ সক্করজ্জং কারেত্ৰা. ‘‘কিং মে ইমিনা উপদ্ধরজ্জেনা’’তি অত্রিচ্ছতায অতিত্তোৰ. মনুস্সলোকে উতুনো কক্খল়তায ৰাতাতপেন ফুট্ঠগত্তো কালমকাসি.

অৰযৰেসু ¶ সিদ্ধো ৰিসেসো সমুদাযস্স ৰিসেসকো হোতীতি একম্পি রট্ঠং বহুৰচনেন ৰোহরিযতি.

দ-কারেন অত্থং ৰণ্ণযন্তি নিরুত্তিনযেন. কম্মাসোতি কম্মাসপাদো ৰুচ্চতি উত্তরপদলোপেন যথা ‘‘রূপভৰো রূপ’’ন্তি. কথং পন সো ‘‘কম্মাসপাদো’’তি ৰুচ্চতীতি আহ ‘‘তস্স কিরা’’তিআদি. দমিতোতি এত্থ কীদিসং দমনং অধিপ্পেতন্তি আহ ‘‘পোরিসাদভাৰতো পটিসেধিতো’’তি. ‘‘ইমে পন থেরাতি মজ্ঝিমভাণকা’’তি কেচি. অপরে পন ‘‘অট্ঠকথাচরিযা’’তি, ‘‘দীঘভাণকা’’তি ৰদন্তি. উভযথাপি চূল়কম্মাসদম্মং সন্ধায তথা ৰদন্তি. যক্খিনিপুত্তো হি কম্মাসপাদো অলীনসত্তুকুমারকালে (চরিযা. ২.৭৫) বোধিসত্তেন তত্থ দমিতো. সুতসোমকালে (জা. ২.২১.৩৭১) পন বারাণসিরাজা পোরিসাদভাৰপটিসেধনেন যত্থ দমিতো, তং মহাকম্মাসদম্মং নাম. ‘‘পুত্তো’’তি ৰত্ৰা ‘‘অত্রজো’’তি ৰচনং ওরসপুত্তভাৰদস্সনত্থং.

যেহি আৰসিতপ্পদেসো ‘‘কুরুরট্ঠ’’ন্তি নামং লভি, তে উত্তরকুরুতো আগতমনুস্সা তত্থ রক্খিতনিযামেনেৰ পঞ্চ সীলানি রক্খিংসু. তেসং দিট্ঠানুগতিযা পচ্ছিমজনতাতি সো দেসধম্মৰসেন অৰিচ্ছেদতো পৰত্তমানো কুরুৰত্তধম্মোতি ¶ পঞ্ঞাযিত্থ. অযঞ্চ অত্থো কুরুধম্মজাতকেন দীপেতব্বো. সো অপরভাগে পঠমং যত্থ সংকিলিট্ঠো জাতো, তং দস্সেতুং ‘‘কুরুরট্ঠৰাসীন’’ন্তিআদি ৰুত্তং. যত্থ ভগৰতো ৰসনোকাসভূতো কোচি ৰিহারো ন হোতি, তত্থ কেৰলং গোচরগামকিত্তনং নিদানকথায পকতি যথা তং সক্কেসু ৰিহরতি দেৰদহং নাম সক্যানং নিগমোতি ইমমত্থং দস্সেন্তো ‘‘অৰসনোকাসতো’’তিআদিমাহ.

‘‘আযস্মা’’তি ৰা ‘‘দেৰানং পিযা’’তি ৰা ‘‘তত্র ভৰ’’ন্তি ৰা পিযসমুদাহারো এসোতি আহ ‘‘আযস্মাতি পিযৰচনমেত’’ন্তি. তযিদং পিযৰচনং গরুগারৰৰসেন ৰুচ্চতীতি আহ ‘‘গারৰৰচনমেত’’ন্তি.

অতিদূরঅচ্চাসন্নৰজ্জনেন নাতিদূরনাচ্চাসন্নং নাম গহিতং, তং পন অৰকংসতো উভিন্নং পসারিতহত্থানং ¶ সঙ্ঘট্টনেন ৰেদিতব্বং. চক্খুনা চক্খুং আহচ্চ দট্ঠব্বং হোতি, তেনাপি অগারৰমেৰ কতং হোতি. গীৰং পরিৰত্তেত্ৰাতি পরিৰত্তনৰসেন গীৰং পসারেত্ৰা.

কুলসঙ্গহত্থাযাতি ¶ কুলানুদ্দযতাৰসেন কুলানং অনুগ্গণ্হনত্থায সহস্সভণ্ডিকং নিক্খিপন্তো ৰিয ভিক্খপটিগ্গণ্হনেন তেসং মহতো পুঞ্ঞাভিসন্দস্স জননেন. পটিসম্মজ্জিত্ৰাতি অন্তেৰাসিকেহি সম্মজ্জনট্ঠানং সক্কচ্চকারিতায পুন সম্মজ্জিত্ৰা. তিক্খত্তুন্তি ‘‘আদিতো পট্ঠায অন্ত’’ন্তিআদিনা ৰুত্তচতুরাকারূপসঞ্হিতে তযো ৰারে, তেনস্স দ্ৰাদসক্খত্তুং সম্মসিতভাৰমাহ.

অম্হাকং ভগৰতো গম্ভীরভাৰেনেৰ কথিতত্তা সেসবুদ্ধেহিপি এৰমেৰ কথিতোতি ধম্মন্ৰযে ঠত্ৰা ৰুত্তং ‘‘সব্ববুদ্ধেহি…পে… কথিতো’’তি. সালিন্দন্তি সপরিভণ্ডং. ‘‘সিনেরুং উক্খিপন্তো ৰিযা’’তি ¶ ইমিনা তাদিসায দেসনায সুদুক্করভাৰমাহ. সুত্তমেৰ ‘‘সুত্তন্তকথ’’ন্তি আহ ধম্মক্খন্ধভাৰতো. যথা ৰিনযপণ্ণত্তিভূমন্তরসমযন্তরানং ৰিজাননং অনঞ্ঞসাধারণং সব্বঞ্ঞুতঞাণস্সেৰ ৰিসযো, এৰং অন্তদ্ৰযৰিনিমুত্তস্স কারকৰেদকরহিতস্স পচ্চযাকারস্স ৰিভজনং পীতি দস্সেতুং ‘‘বুদ্ধানঞ্হী’’তিআদি আরদ্ধং. তত্থ ঠানানীতি কারণানি. গজ্জিতং মহন্তং হোতীতি তং দেসেতব্বস্সেৰ অনেকৰিধতায, দুৰিঞ্ঞেয্যতায চ নানানযেহি পৰত্তমানং দেসনাগজ্জিতং মহন্তং ৰিপুলং, বহুভেদঞ্চ হোতি. ঞাণং অনুপৰিসতীতি ততো এৰ দেসনাঞাণং দেসেতব্বধম্মে ৰিভাগসো কুরুমানং অনু অনু পৰিসতি, তেন অনুপৰিস্স ঠিতং ৰিয হোতীতি অত্থো. বুদ্ধঞাণস্স মহন্তভাৰো পঞ্ঞাযতীতি এৰংৰিধস্স নাম ধম্মস্স দেসকং, পটিৰেধকঞ্চাতি বুদ্ধানং দেসনাঞাণস্স, পটিৰেধঞাণস্স চ উল়ারভাৰো পাকটো হোতি. এত্থ চ কিঞ্চাপি ‘‘সব্বং ৰচীকম্মং বুদ্ধস্স ভগৰতো ঞাণপুব্বঙ্গমং ঞাণানুপরিৰত্ত’’ন্তি (মহানি. ৬৯, ১৬৯; চূল়নি. ৮৫; পটি. ম. ৩.৫; নেত্তি. ১৪) ৰচনতো সব্বাপি ভগৰতো দেসনা ঞাণরহিতা নত্থি, সীহসমানৰুত্তিতায সব্বত্থ সমানপ্পৰত্তি. দেসেতব্বৰসেন পন দেসনা ৰিসেসতো ঞাণেন অনুপৰিট্ঠা, গম্ভীরতরা চ হোতীতি দট্ঠব্বং. কথং পন ৰিনযপঞ্ঞত্তিং পত্ৰা দেসনা তিলক্খণব্ভাহতা সুঞ্ঞতপটিসংযুত্তা হোতীতি? তত্থাপি সন্নিসিন্নপরিসায অজ্ঝাসযানুরূপং পৰত্তমানা দেসনা সঙ্খারানং অনিচ্চতাদিৰিভাৰনং, সব্বধম্মানং অত্তত্তনিযতাভাৰপ্পকাসনঞ্চ হোতি. তেনেৰাহ ‘‘অনেকপরিযাযেন ¶ ধম্মিং কথং কত্ৰা’’তিআদি.

আপজ্জাতি ¶ পত্ৰা যথা ঞাণকোঞ্চনাদং ৰিস্সজ্জেতি, এৰং পাপুণিত্ৰা.

পমাণাতিক্কমেতি ¶ অপরিমাণত্থে ‘‘যাৰঞ্চিদং তেন ভগৰতা’’তিআদীসু (দী. নি. ১.৪) ৰিয. অপরিমেয্যভাৰজোতনো হি অযং যাৰ-সদ্দো. তেনাহ ‘‘অতিগম্ভীরো অত্থো’’তি. অৰভাসতীতি ঞাযতি উপট্ঠাতি. ঞাণস্স তথা উপট্ঠানঞ্হি সন্ধায ‘‘দিস্সতী’’তি ৰুত্তং. ননু এস পটিচ্চসমুপ্পাদো একন্তগম্ভীরোৰ, তত্থ কস্মা গম্ভীরাৰভাসতা জোতিতাতি? সচ্চমেতং, একন্তগম্ভীরতাদস্সনত্থমেৰ পনস্স গম্ভীরাৰভাসগ্গহণং. তস্মা অঞ্ঞত্থ লব্ভমানং চতুকোটিকং ব্যতিরেকমুখেন নিদস্সেত্ৰা তং এৰস্স একন্তগম্ভীরতং ৰিভাৰেতুং ‘‘একঞ্হী’’তিআদি ৰুত্তং. এতং নত্থীতি অগম্ভীরো, অগম্ভীরাৰভাসো চাতি এতং দ্ৰযং নত্থি, তেন যথাদস্সিতে চতুকোটিকে পচ্ছিমা এক কোটি লব্ভতীতি দস্সেতি. তেনাহ ‘‘অযঞ্হী’’তিআদি.

যেহি গম্ভীরভাৰেহি পটিচ্চসমুপ্পাদো ‘‘গম্ভীরো’’তি ৰুচ্চতি, তে চতূহি উপমাহি উল্লিঙ্গেন্তো ‘‘ভৰগ্গগ্গহণাযা’’তিআদিমাহ. যথা ভৰগ্গং হত্থং পসারেত্ৰা গহেতুং ন সক্কা দূরভাৰতো, এৰং সঙ্খারাদীনং অৰিজ্জাদিপচ্চযসম্ভূতসমুদাগতট্ঠো পাকতিকঞাণেন গহেতুং ন সক্কা. যথা সিনেরুং ভিন্দিত্ৰা মিঞ্জং পব্বতরসং পাকতিকপুরিসেন নীহরিতুং ন সক্কা, এৰং পটিচ্চসমুপ্পাদগতে ধম্মত্থাদিকে পাকতিকঞাণেন ভিন্দিত্ৰা ৰিভজ্জ পটিৰিজ্ঝনৰসেন জানিতুং ন সক্কা. যথা মহাসমুদ্দং পাকতিকপুরিসস্স বাহুদ্ৰযেন পধারিতুং ন সক্কা, এৰং ৰেপুল্লট্ঠেন মহাসমুদ্দসদিসং পটিচ্চসমুপ্পাদং পাকতিকঞাণেন দেসনাৰসেন পধারিতুং ন সক্কা. যথা মহাপথৰিং পরিৰত্তেত্ৰা ¶ পাকতিকপুরিসস্স পথৰোজং গহেতুং ন সক্কা, এৰং ‘‘ইত্থং অৰিজ্জাদযো সঙ্খারাদীনং পচ্চযা হোন্তী’’তি তেসং পচ্চযভাৰো পাকতিকঞাণেন নীহরিত্ৰা গহেতুং ন সক্কাতি. এৰং চতুব্বিধগম্ভীরতাৰসেন চতস্সো উপমা যোজেতব্বা. পাকতিকঞাণৰসেন চাযমত্থযোজনা কতা দিট্ঠসচ্চানং তত্থ পটিৰেধসভাৰতো, তথাপি যস্মা সাৰকানং, পচ্চেকবুদ্ধানঞ্চ তত্থ সপ্পদেসমেৰ ঞাণং, বুদ্ধানংযেৰ নিপ্পদেসং, তস্মা ৰুত্তং ‘‘বুদ্ধৰিসযং পঞ্হ’’ন্তিআদি.

উস্সাদেন্তোতি ¶ পঞ্ঞায উক্কংসেন্তো, উগ্গণ্হন্তোতি অত্থো. অপসাদেন্তোতি নিব্ভচ্ছন্তো, নিগ্গণ্হন্তোতি অত্থো.

উস্সাদনাৰণ্ণনা

তেনাতি মহাপঞ্ঞাভাৰেন. তত্থাতি থেরস্স সতিপি উত্তানভাৰে, পটিচ্চসমুপ্পাদস্সঅঞ্ঞেসং ¶ গম্ভীরভাৰে. সুভোজনরসপুট্ঠস্সাতি সুন্দরেন ভোজনরসেন পোসিতস্স. কতযোগস্সাতি নিবদ্ধপযোগেন কতপরিচযস্স. মল্লপাসাণন্তি মল্লেহি মহব্বলেহেৰ উক্খিপিতব্বপাসাণং. কুহিং ইমস্স ভারিযট্ঠানন্তি কস্মিং পস্সে ইমস্স পাসাণস্স গরুতরপ্পদেসোতি তস্স সল্লহুকভাৰং দীপেন্তো ৰদতি.

তিমিরপিঙ্গলেনেৰ দীপেন্তি তস্স মহাৰিপ্ফারভাৰতো. তেনাহ ‘‘তস্স কিরা’’তিআদি. পক্কুথতীতি পক্কুথন্তং ৰিয পরিৰত্ততি পরিতো ৰিৰত্ততি. লক্খণৰচনঞ্হেতং. পিট্ঠিযং সকলিনপদকাপিট্ঠং. কাযূপপন্নস্সাতি মহতা কাযেন উপেতস্স, মহাকাযস্সাতি অত্থো.

পিঞ্ছৰট্টীতি পিঞ্ছকলাপো. সুপণ্ণৰাতন্তি নাগগ্গহণাদীসু পক্খপপ্ফোটনৰসেন উপ্পজ্জনকৰাতং.

পুব্বূপনিস্সযসম্পত্তিকথাৰণ্ণনা

‘‘পুব্বূপনিস্সযসম্পত্তিযা’’তিআদিনা উদ্দিট্ঠকারণানি ৰিত্থারতো ৰিৰরিতুং ‘‘ইতো কিরা’’তিআদি ৰুত্তং. তত্থ ইতোতি ইতো কপ্পতো ¶ . সতসহস্সিমেতি সতসহস্সমে. হংসাৰতী নাম নগরং অহোসি জাতনগরং. ধুরপত্তানীতি বাহিরপত্তানি, যানি দীঘতমানি.

কনিট্ঠভাতাতি ৰেমাতিকভাতা কনিট্ঠো যথা অম্হাকং ভগৰতো নন্দত্থেরো. বুদ্ধানঞ্হি সহোদরা ভাতরো নাম ন হোন্তি. কথং জেট্ঠা তাৰ ন উপ্পজ্জন্তি, কনিট্ঠানং পন অসম্ভৰো এৰ. ভোগন্তি ৰিভৰং. উপসন্তোতি চোরজনিতসঙ্খোভৰূপসমেন উপসন্তো জনপদো.

দ্ৰে সাটকে নিৰাসেত্ৰাতি সাটকদ্ৰযমেৰ অত্তনো কাযপরিহারিকং কত্ৰা ইতরং সব্বসম্ভারং অত্ততো মোচেত্ৰা.

পত্তগ্গহণত্থন্তি অন্তোপক্খিত্তউণ্হভোজনত্তা অপরাপরং হত্থে পরিৰত্তেন্তস্স পত্তগ্গহণত্থং. উত্তরিসাটকন্তি অত্তনো উত্তরিসাটকং. এতানি ¶ পাকটট্ঠানানীতি এতানি যথাৰুত্তানি ভগৰতো দেসনায পাকটানি থেরস্স পুঞ্ঞকরণট্ঠানানি.

পটিসন্ধিং ¶ গহেত্ৰাতি অম্হাকং মহাবোধিসত্তস্স পটিসন্ধিগ্গহণদিৰসে এৰ পটিসন্ধিং গহেত্ৰা.

তিত্থৰাসাদিৰণ্ণনা

উগ্গহণং পাল়িযা উগ্গণ্হনং. সৰনং অত্থসৰনং. পরিপুচ্ছনং গণ্ঠিট্ঠানেসু অত্থপরিপুচ্ছনং. ধারণং পাল়িযাপি পাল়িঅত্থস্সপি চিত্তে ঠপনং. সব্বঞ্চেতং ইধ পটিচ্চসমুপ্পাদৰসেন ৰেদিতব্বং.

সোতাপন্নানঞ্চ…পে... উপট্ঠাতিতত্থ সম্মোহৰিদ্ধংসনেন ‘‘যং কিঞ্চি সমুদযধম্মং, সব্বং তং নিরোধধম্ম’’ন্তি (দী. নি. ১.২৯৮; সং. নি. ৫.১০৮১; মহাৰ. ১৬; চূল়নি. ৪, ৭, ৮) অত্তপচ্চক্খৰসেন উপট্ঠানতো. নামরূপপরিচ্ছেদোতি সহ পচ্চযেন নামরূপস্স পরিচ্ছিজ্জ অৰবোধো.

পটিচ্চসমুপ্পাদগম্ভীরতাৰণ্ণনা

‘‘অত্থগম্ভীরতাযা’’তিআদিনা সঙ্খেপতো ৰুত্তমত্থং ৰিৰরিতুং ¶ ‘‘তত্থা’’তিআদি আরদ্ধং. জাতিপচ্চযসম্ভূতসমুদাগতট্ঠোতি জাতিপচ্চযতো সম্ভূতং হুত্ৰা সহিতস্স অত্তনো পচ্চযানুরূপস্স জরামরণস্স উদ্ধং উদ্ধং আগতভাৰো, অনুপৰত্তত্থোতি অত্থো. অথ ৰা সম্ভূতট্ঠো চ সমুদাগতট্ঠো চ সম্ভূতসমুদাগতট্ঠো. ‘‘ন জাতিতো জরামরণং ন হোতি,’’ ন চ জাতিং ৰিনা ‘‘অঞ্ঞতো হোতী’’তি হি জাতিপচ্চযসম্ভূতট্ঠো ৰুত্তো, ইত্থঞ্চ জাতিতো সমুদাগচ্ছতীতি জাতিপচ্চযসমুদাগতট্ঠো, যা যা জাতি যথা যথা পচ্চযো হোতি, তদনুরূপপাতুভাৰোতি অত্থো. সো অনুপচিতকুসলসম্ভারানং ঞাণস্স তত্থ অপ্পতিট্ঠতায অগাধট্ঠেন গম্ভীরো. সেসপদেসুপি এসেৰ নযো.

অৰিজ্জায সঙ্খারানং পচ্চযট্ঠোতি যেনাকারেন যদৰত্থা অৰিজ্জা সঙ্খারানং পচ্চযো হোতি. যেন হি পৰত্তিআকারেন, যায চ অৰত্থায অৰত্থিতা অৰিজ্জা তেসং তেসং সঙ্খারানং পচ্চযো হোতি, তদুভযস্সপি দুরৰবোধনীযতো অৰিজ্জা সঙ্খারানং নৰহি আকারেহি পচ্চযট্ঠো ¶ অনুপচিতকুসলসম্ভারানং ঞাণস্স তত্থ অপ্পতিট্ঠতায অগাধট্ঠেন গম্ভীরো. এস নযো সেসপদেসুপি.

কত্থচি ¶ অনুলোমতো দেসীযতি, কত্থচি পটিলোমতোতি ইধ পন পচ্চযুপ্পাদা পচ্চযুপ্পন্নুপ্পাদসঙ্খাতো অনুলোমো, পচ্চযনিরোধা পচ্চযুপ্পন্ননিরোধসঙ্খাতো চ পটিলোমো অধিপ্পেতো. আদিতো পন পট্ঠায অন্তগমনং অনুলোমো, অন্ততো চ আদিগমনং পটিলোমোতি অধিপ্পেতো. আদিতো পট্ঠায অনুলোমদেসনায, অন্ততো পট্ঠায পটিলোমদেসনায চ তিসন্ধি চতুসঙ্খেপো. ‘‘ইমে ভিক্খৰে চত্তারো আহারা কিং নিদানা’’তিআদিকায (সং. নি. ২.১১) চ ৰেমজ্ঝতো পট্ঠায পটিলোমদেসনায, ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং, তিণ্ণং সঙ্গতি ফস্সো, ফস্সপচ্চযা ৰেদনা’’তিআদিকায (সং. নি. ২.৪৩, ৪৫) অনুলোমদেসনায চ দ্ৰিসন্ধি তিসঙ্খেপো. ‘‘সংযোজনিযেসু ¶ ভিক্খৰে ধম্মেসু অস্সাদানুপস্সিনো ৰিহরতো তণ্হা পৰড্ঢতি, তণ্হাপচ্চযা উপাদান’’ন্তিআদীসু (সং. নি. ২.৫৩, ৫৭) একসন্ধি দ্ৰিসঙ্খেপো. একঙ্গো হি পটিচ্চসমুপ্পাদো দেসিতো. লব্ভতেৰ হি সো ‘‘তত্র ভিক্খৰে সুতৰা অরিযসাৰকো পটিচ্চসমুপ্পাদংযেৰ সাধুকং যোনিসো মনসি করোতি ‘ইতি ইমস্মিং সতি ইদং হোতি…পে… নিরুজ্ঝতী’তি. সুখৰেদনিযং ভিক্খৰে ফস্সং পটিচ্চ উপ্পজ্জতি সুখৰেদনা’’তি (সং. নি. ২.৬২) ইমস্স সুত্তস্স ৰসেন ৰেদিতব্বো. ইতি তেন তেন কারণেন তথা তথা পৰত্তেতব্বত্তা পটিচ্চসমুপ্পাদো দেসনায গম্ভীরো. তেনাহ ‘‘অযং দেসনাগম্ভীরতা’’তি. ন হি তত্থ সব্বঞ্ঞুতঞাণতো অঞ্ঞং ঞাণং পতিট্ঠং লভতি.

‘‘অৰিজ্জায পনা’’তিআদীসু জাননলক্খণস্স ঞাণস্স পটিপক্খভূতো অৰিজ্জায অঞ্ঞাণট্ঠো. আরম্মণস্স পচ্চক্খকরণেন দস্সনভূতস্স পটিপক্খভূতো অদস্সনট্ঠো. যেনেসা অত্তনো সভাৰেন দুক্খাদীনং যাথাৰসরসং পটিৰিজ্ঝিতুং ন দেতি ছাদেত্ৰা পরিযোনন্ধিত্ৰা তিট্ঠতি, সো তস্সা সচ্চাসম্পটিৰেধট্ঠো. অভিসঙ্খরণং সংৰিধানং, পকপ্পনন্তি অত্থো. আযূহনং সম্পিণ্ডনং, সম্পযুত্তধম্মানং অত্তনো কিচ্চানুরূপতায রাসীকরণন্তি অত্থো. অপুঞ্ঞাভিসঙ্খারেকদেসো সরাগো. অঞ্ঞো ৰিরাগো. রাগস্স ৰা অপ্পটিপক্খভাৰতো রাগপ্পৰড্ঢকো, রাগুপ্পত্তিপচ্চযো ¶ চ সব্বোপি অপুঞ্ঞাভিসঙ্খারো সরাগো. ইতরো তব্বিদূরভাৰতো ৰিরাগো. ‘‘দীঘরত্তং হেতং ভিক্খৰে অস্সুতৰতো পুথুজ্জনস্স অজ্ঝোসিতং মমাযিতং পরামট্ঠং ‘এতং মম, এসোহমস্মি, এসো মে অত্তা’তি’’ (সং. নি. ২.৬১) অত্তপরামাসস্স ¶ ৰিঞ্ঞাণং ৰিসেসতো ৰত্থু ৰুত্তন্তি ৰিঞ্ঞাণস্স সুঞ্ঞতট্ঠো গম্ভীরো. অত্তা ৰিজানাতি সংসরতীতি সব্যাপারতাসঙ্কন্তিঅভিনিৰেসবলৰতায অব্যাপারঅসঙ্কন্তিপটিসন্ধিপাতুভাৰট্ঠা চ গম্ভীরা. নামরূপস্স পটিসন্ধিক্খণে একতোৰ উপ্পাদো একুপ্পাদো, পৰত্তিযং ৰিসুং ৰিসুং যথারহং একুপ্পাদো. নামস্স রূপেন, রূপস্স চ নামেন অসম্পযোগতো ৰিনিব্ভোগো নামস্স নামেন ¶ , রূপস্স চ রূপেন একচ্চস্স একচ্চেন অৰিনিব্ভোগো (নামস্স নামেন অৰিনিব্ভোগো ৰিভ. মূলটী. ২৪২) যোজেতব্বো. একুপ্পাদেকনিরোধেহি অৰিনিব্ভোগে অধিপ্পেতে সো রূপস্স চ এককলাপপৰত্তিনো রূপেন লব্ভতীতি. অথ ৰা একচতুৰোকারভৰেসু নামরূপানং অসহৰত্তনতো অঞ্ঞমঞ্ঞং ৰিনিব্ভোগো, পঞ্চৰোকারভৰে সহৰত্তনতো অৰিনিব্ভোগো চ ৰেদিতব্বো.

নামস্স আরম্মণাভিমুখং নমনং নমনট্ঠো. রূপস্স ৰিরোধিপচ্চযসমৰাযে ৰিসদিসুপ্পত্তি রুপ্পনট্ঠো. ইন্দ্রিযপচ্চযভাৰো অধিপতিযট্ঠো. ‘‘লোকোপেসো, দ্ৰারাপেসা, খেত্তং পেত’’ন্তি ৰুত্তলোকাদিঅত্থো চক্খাদীসু পঞ্চসু যোজেতব্বো. মনাযতনস্স পন লুজ্জনতো, মনোসম্ফস্সাদীনং দ্ৰারখেত্তভাৰতো চ এতে অত্থা ৰেদিতব্বা. আপাথগতানং রূপাদীনং পকাসনযোগ্যতালক্খণং ওভাসনং চক্খাদীনং ৰিসযিভাৰো, মনাযতনস্স ৰিজাননং. সঙ্ঘট্টনট্ঠো ৰিসেসতো চক্খুসম্ফস্সাদীনং পঞ্চন্নং, ইতরে ছন্নম্পি যোজেতব্বা. ফুসনঞ্চ ফস্সস্স সভাৰো. সঙ্ঘট্টনং রসো, ইতরে উপট্ঠানাকারা. আরম্মণরসানুভৰনট্ঠো রসৰসেন ৰুত্তো, ৰেদযিতট্ঠো লক্খণৰসেন. সুখদুক্খম অজ্ঝত্তভাৰো ¶ যথাক্কমং তিস্সন্নং ৰেদনানং সভাৰৰসেন ৰুত্তো. ‘‘অত্তা ৰেদযতী’’তি অভিনিৰেসস্স বলৰভাৰতো নিজ্জীৰট্ঠো ৰেদনায গম্ভীরো. নিজ্জীৰায ৰা ৰেদনায ৰেদযিতং নিজ্জীৰৰেদযিতং, সো এৰ অত্থোতি নিজ্জীৰৰেদযিতট্ঠো.

সপ্পীতিকতণ্হায ¶ অভিনন্দিতট্ঠো. বলৰতরতণ্হায গিলিত্ৰা পরিনিট্ঠাপনং অজ্ঝোসানট্ঠো. ইতরে পন জেট্ঠভাৰওসারণসমুদ্দদুরতিক্কমঅপারিপূরিৰসেন ৰেদিতব্বা. আদানগ্গহণাভিনিৰেসট্ঠা চতুন্নম্পি উপাদানানং সমানা, পরামাসট্ঠো দিট্ঠুপাদানাদীনমেৰ, তথা দুরতিক্কমট্ঠো. ‘‘দিট্ঠিকন্তারো’’তি (ধ. স. ৩৯২) হি ৰচনতো দিট্ঠীনং দুরতিক্কমতা. দল়্হগ্গহণত্তা ৰা চতুন্নম্পি দুরতিক্কমট্ঠো যোজেতব্বো. যোনিগতিঠিতিনিৰাসেসুখিপনন্তি সমাসে ভুম্মৰচনস্স অলোপো দট্ঠব্বো. এৰঞ্হি তেন আযূহনাভিসঙ্খরণপদানং সমাসো হোতি. যথা তথা জাযনং জাতিঅত্থো. তস্সা পন সন্নিপাততো জাযনং সঞ্জাতিঅত্থো. মাতুকুচ্ছিং ওক্কমিত্ৰা ৰিয জাযনং ওক্কন্তিঅত্থো. সো জাতিতো নিব্বত্তনং নিব্বত্তিঅত্থো. কেৰলং পাতুভৰনং পাতুভাৰট্ঠো.

জরামরণঙ্গং মরণপ্পধানন্তি তস্স মরণট্ঠা এৰ খযাদযো গম্ভীরাতি দস্সিতা. উপ্পন্নউপ্পন্নানঞ্হি নৰনৰানং খযেন কমেন খণ্ডিচ্চাদিপরিপক্কপৰত্তিযং লোকে জরাৰোহারোতি ¶ . খযট্ঠো ৰা জরায ৰুত্তোতি দট্ঠব্বো. নৰভাৰাপগমো হি ‘‘খযো’’তি ¶ ৰত্তুং যুত্তোতি ৰিপরিণামট্ঠো দ্ৰিন্নম্পি ৰসেন যোজেতব্বো, সন্ততিৰসেন ৰা জরায খযৰযভাৰা, সম্মুতিখণিকৰসেন মরণস্স ভেদৰিপরিণামট্ঠা যোজেতব্বা. অৰিজ্জাদীনং সভাৰো পটিৰিজ্ঝীযতীতি পটিৰেধো. ৰুত্তঞ্হেতং নিদানকথাযং ‘‘তেসং তেসং ৰা তত্থ তত্থ ৰুত্তধম্মানং পটিৰিজ্ঝিতব্বো সলক্খণসঙ্খাতো অৰিপরীতসভাৰো পটিৰেধো’’তি. (দী. নি. অট্ঠ. পঠমমহাসঙ্গীতিকথা; অভি. অট্ঠ. নিদানকথা) সো হি অৰিজ্জাদীনং সভাৰো মগ্গঞাণেনেৰ অসম্মোহপটিৰেধৰসেন পটিৰিজ্ঝিতব্বতো অঞ্ঞাণস্স অলব্ভনেয্যপতিট্ঠতায অগাধট্ঠেন গম্ভীরো. সা সব্বাপীতি সা যথাৰুত্তা সঙ্খেপতো চতুব্বিধা ৰিত্থারতো অনেকপ্পভেদা সব্বাপি পটিচ্চসমুপ্পাদস্স গম্ভীরতা থেরস্স উত্তানকা ৰিয উপট্ঠাসি চতূহি অঙ্গেহি সমন্নাগতত্তা. উদাহু অঞ্ঞেসম্পীতি ‘‘ময্হং তাৰ এস পটিচ্চসমুপ্পাদো উত্তানকো হুত্ৰা উপট্ঠাতি, কিং নু খো অঞ্ঞেসম্পি এৰং উত্তানকো হুত্ৰা উপট্ঠাতী’’তি মা এৰং অৰচ মযাৰ দিন্ননযে চতুসচ্চকম্মট্ঠানৰিধিম্হি ঠত্ৰা.

অপসাদনাৰণ্ণনা

ওল়ারিকন্তি ¶ ৰত্থুৰীতিক্কমসমত্থতাৰসেন থূলং. কামং কামরাগপটিঘাযেৰ অত্থতো কামরাগপটিঘসংযোজনানি, কামরাগপটিঘানুসযা চ, তথাপি অঞ্ঞোযেৰ সংযোজনট্ঠো বন্ধনভাৰতো, অঞ্ঞো অনুসযনট্ঠো অপ্পহীনভাৰেন সন্তানে থামগমনন্তি কত্ৰা, ইতি কিচ্চৰিসেসৰিসিট্ঠভেদে গহেত্ৰা ‘‘চত্তারো কিলেসে’’তি চ ৰুত্তং. এসেৰ নযো ইতরেসুপি. অণুসহগতেতি অণুসভাৰং উপগতে. তব্ভাৰত্থো হি অযং সহগত-সদ্দো ‘‘নন্দিরাগসহগতা’’তিআদীসু (দী. নি. ২.৪০০; ম. নি. ১.৯১, ১৩৩, ৪৬০; ৩.৩৭৪; সং. নি. ৫.১০৮১; মহাৰ. ১৪; ৰিভ. ২০৩; পটি. ম. ১.৩৪; ২.৩০) ৰিয.

যথা উপরিমগ্গাধিগমনৰসেন সচ্চসম্পটিৰেধো ¶ পচ্চযাকারপটিৰেধৰসেন, এৰং সাৰকবোধিপচ্চেকবোধিসম্মাসম্বোধিঅধিগমনৰসেনপি সচ্চসম্পটিৰেধো পচ্চযাকারপটিৰেধৰসেনেৰাতি দস্সেতুং ‘‘কস্মা চা’’তিআদি ৰুত্তং. সব্বথাৰাতি সব্বপ্পকারেনেৰ কিঞ্চিপি পকারং অসেসেত্ৰাতি অত্থো. যে কতাভিনীহারানং মহাবোধিসত্তানং ৰীরিযস্স উক্কট্ঠমজ্ঝিমমুদুতাৰসেন বোধিসম্ভারসম্ভরণে কালভেদা ইচ্ছিতা, তে দস্সেন্তো ‘‘চত্তারি, অট্ঠ, সোল়স ৰা অসঙ্খ্যেয্যানী’’তি আহ, স্ৰাযমত্থো চরিযাপিটকৰণ্ণনায গহেতব্বো. সাৰকো পদেসঞাণে ¶ ঠিতোতি সাৰকো হুত্ৰা সেক্খভাৰতো তত্থাপি পদেসঞাণে ঠিতো. বুদ্ধানং কথায ‘‘তং তথাগতো অভিসমেতী’’তিআদিকায পচ্চনীকং হোতি. অনঞ্ঞসাধারণস্স হি ৰসেন বুদ্ধানং সীহনাদো, ন অঞ্ঞসাধারণস্স.

‘‘ৰাযমন্তস্সেৰা’’তি ইমিনা ৰিসেসতো ঞাণসম্ভারসম্ভরণং পঞ্ঞাপারমিতাপূরণং ৰদতি. তস্স চ সব্বম্পি পুঞ্ঞং উপনিস্সযো.

‘‘এস দেৰমনুস্সানং, সব্বকামদদো নিধি;

যং যদেৰাভিপত্থেন্তি, সব্বমেতেন লব্ভতী’’তি. (খু. পা. ৮.১০) –

হি ৰুত্তং. তস্মা মহাবোধিসত্তানং সব্বেসম্পি পুঞ্ঞসম্ভারো যাৰদেৰ ঞাণসম্ভারত্থো সম্মাসম্বোধিসমধিগমসমত্থত্তাতি আহ ‘‘পচ্চযাকারং ¶ …পে… নত্থী’’তি. ইদানি পচ্চযাকারপটিৰেধস্সেৰ ৰা মহানুভাৰতাদস্সনমুখেন পটিচ্চসমুপ্পাদস্সেৰ পরমগম্ভীরতং দস্সেতুং ‘‘অৰিজ্জা’’তিআদি ৰুত্তং. নৰহি আকারেহীতি উপ্পাদাদীহি নৰহি আকারেহি. অৰিজ্জা হি সঙ্খারানং উপ্পাদো হুত্ৰা পচ্চযো হোতি, পৰত্তং হুত্ৰা নিমিত্তং, আযূহনং, সংযোগো, পলিবোধো, সমুদযো, হেতু, পচ্চযো হুত্ৰা পচ্চযো হোতি. এৰং সঙ্খারাদযো ৰিঞ্ঞাণাদীনং. ৰুত্তঞ্হেতং পটিসম্ভিদামগ্গে ‘‘কথং ¶ পচ্চযপরিগ্গহে পঞ্ঞা ধম্মট্ঠিতিঞাণং? অৰিজ্জা সঙ্খারানং উপ্পাদট্ঠিতি চ পৰত্তট্ঠিতি চ নিমিত্তট্ঠিতি চ আযূহনট্ঠিতি চ সঞ্ঞোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ ইমেহি নৰহাকারেহি অৰিজ্জাপচ্চযা সঙ্খারা পচ্চযসমুপ্পন্না’’তিআদি (পটি. ম. ১.৪৫).

তত্থ নৰহাকারেহীতি নৰহি পচ্চযভাৰূপগমনাকারেহি. উপ্পজ্জতি এতস্মা ফলন্তি উপ্পাদো, ফলুপ্পত্তিযা কারণভাৰো. সতি চ অৰিজ্জায সঙ্খারা উপ্পজ্জন্তি, নাসতি, তস্মা অৰিজ্জা সঙ্খারানং উপ্পাদো হুত্ৰা পচ্চযো হোতি. তথা অৰিজ্জায সতি সঙ্খারা পৰত্তন্তি, নীযন্তি চ. যথা চ ভৰাদীসু খিপন্তি, এৰং তেসং অৰিজ্জা পচ্চযো হোতি. তথা আযূহন্তি ফলুপ্পত্তিযা ঘটেন্তি, সংযুজ্জন্তি অত্তনো ফলেন. যস্মিং সন্তানে সযং উপ্পন্না, তং পলিবুন্ধন্তি. পচ্চযন্তরসমৰাযে উদযন্তি উপ্পজ্জন্তি. হিনোতি চ সঙ্খারানং কারণভাৰং গচ্ছতি. পটিচ্চ অৰিজ্জং সঙ্খারা অযন্তি পৰত্তন্তীতি এৰং অৰিজ্জায সঙ্খারানং কারণভাৰূপগমনৰিসেসা উপ্পাদাদযো ৰেদিতব্বা. তত্থ তথা সঙ্খারাদীনং ৰিঞ্ঞাণাদীসু উপ্পাদট্ঠিতিআদীসুপি. তিট্ঠতি এতেনাতি ঠিতি, কারণং. উপ্পাদো এৰ ঠিতি উপ্পাদট্ঠিতি ¶ . এসেৰ নযো সেসেসুপি. ‘‘পচ্চযো হোতী’’তি ইদং ইধ লোকনাথেন তদা পচ্চযপরিগ্গহস্স আরদ্ধভাৰদস্সনং. সো চ আরম্ভো ঞাযারুল়্হো ‘‘যথা চ পুরিমেহি মহাবোধিসত্তেহি বোধিমূলে পৰত্তিতো, তথেৰ চ পৰত্তিতো’’তি. অচ্ছরিযৰেগাভিহতা দসসহস্সিলোকধাতু সঙ্কম্পি সম্পকম্পীতি দস্সেন্তো ‘‘দিট্ঠমত্তেৰা’’তিআদিমাহ.

এতস্স ধম্মস্সাতি এতস্স পটিচ্চসমুপ্পাদসঞ্ঞিতস্স ¶ ধম্মস্স. সো পন যস্মা অত্থতো হেতুপভৰানং হেতু. তেনাহ ‘‘এতস্স পচ্চযধম্মস্সা’’তি, জাতিআদীনং জরামরণাদিপচ্চযতাযাতি অত্থো. নামরূপপরিচ্ছেদো, তস্স চ পচ্চযপরিগ্গহো ন পঠমাভিনিৰেসমত্তেন হোতি ¶ , অথ খো তত্থ অপরাপরং ঞাণুপ্পত্তিসঞ্ঞিতেন অনু অনু বুজ্ঝনেন, তদুভযাভাৰং পন দস্সেন্তো ‘‘ঞাতপরিঞ্ঞাৰসেন অননুবুজ্ঝনা’’তি আহ. নিচ্চসঞ্ঞাদীনং পজহনৰসেন ৰত্তমানা ৰিপস্সনা ধম্মে চ পটিৰিজ্ঝন্তী এৰ নাম হোতি পটিপক্খৰিক্খম্ভনেন তিক্খৰিসদভাৰাপত্তিতো, তদধিট্ঠানভূতা চ তীরণপরিঞ্ঞা, অরিযমগ্গো চ পরিঞ্ঞাপহানাভিসমযৰসেন পৰত্তিযা তীরণপহানপরিঞ্ঞাসঙ্গহো চাতি তদুভযপটিৰেধাভাৰং দস্সেন্তো ‘‘তীরণ…পে… অপ্পটিৰিজ্ঝনা’’তি আহ. তন্তং ৰুচ্চতি ৰত্থৰীননত্থং তন্তৰাযেহি দণ্ডকে আসঞ্জিত্ৰা পসারিতসুত্তপট্টী তনীযতীতি কত্ৰা. তং পন সুত্তসন্তানাকুলতায নিদস্সনভাৰেন আকুলমেৰ গহিতন্তি আহ ‘‘তন্তং ৰিয আকুলকজাতা’’তি. সঙ্খেপতো ৰুত্তমত্থং ৰিত্থারতো দস্সেতুং ‘‘যথা নামা’’তিআদি ৰুত্তং. সমানেতুন্তি পুব্বেন পরং সমং কত্ৰা আনেতুং, অৰিসমং উজুং কাতুন্তি অত্থো. তন্তমেৰ ৰা আকুলং তন্তাকুলং, তন্তাকুলং ৰিয জাতা ভূতাতি তন্তাকুলজাতা. মজ্ঝিমং পটিপদং অনুপগন্ত্ৰা অন্তদ্ৰযপতনেন পচ্চযাকারে খলিতা আকুলা ব্যাকুলা হোন্তি. তেনেৰ অন্তদ্ৰযপতনেন তংতংদিট্ঠিগাহৰসেন পরিব্ভমন্তা উজুকং ধম্মট্ঠিতি কথং পটিপজ্জিতুং ন জানন্তি. তেনাহ ‘‘ন সক্কোন্তি তং পচ্চযাকারং উজুং কাতু’’ন্তি. দ্ৰে বোধিসত্তেতি পচ্চেকবোধিসত্তমহাবোধিসত্তে. অত্তনো ধম্মতাযাতি অত্তনো সভাৰেন, পরোপদেসেন ৰিনাতি অত্থো. তত্থ তত্থ গুল়কজাতন্তি তস্মিং তস্মিং ঠানে জাতগুল়কম্পি গণ্ঠীতি ¶ সুত্তগণ্ঠি. ততো এৰ গণ্ঠিবদ্ধং বদ্ধগণ্ঠিকং. পচ্চযেসু পক্খলিত্ৰাতি অনিচ্চদুক্খানত্তাদিসভাৰেসু পচ্চযধম্মেসু নিচ্চাদিগ্গাহৰসেন পক্খলিত্ৰা. পচ্চযে উজুং কাতুং অসক্কোন্তাতি তস্সেৰ নিচ্চাদিগ্গাহস্স অৰিস্সজ্জনতো পচ্চযধম্মনিমিত্তং অত্তনো দস্সনং উজুং কাতুং অসক্কোন্তা ইদংসচ্চাভিনিৰেসকাযগন্থৰসেন গণ্ঠিকজাতা হোন্তীতি আহ ‘‘দ্ৰাসট্ঠি…পে… গণ্ঠিবদ্ধা’’তি. যে হি কেচি সমণা ৰা ব্রাহ্মণা ৰা সস্সতদিট্ঠিআদিদিট্ঠিযো নিস্সিতা অল্লীনা.

ৰিননতো ¶ ‘‘কুলা’’তি ইত্থিলিঙ্গৰসেন লদ্ধনামস্স তন্তৰাযস্স গণ্ঠিকং নাম আকুলভাৰেন অগ্গতো ৰা মূলতো ৰা দুৰিঞ্ঞেয্যাযেৰ খলিততন্তসুত্তন্তি আহ ‘‘কুলাগণ্ঠিকং ৰুচ্চতি পেসকারকঞ্জিযসুত্ত’’ন্তি. সকুণিকাতি কুলাৰকসকুণিকা. সা হি রুক্খসাখাসু ওলম্বনকুলাৰকা ¶ হোতি. তঞ্হি সা কুলাৰকং ততো ততো তিণহীরাদিকে আনেত্ৰা তথা ৰিনন্ধতি, যথা তেসং পেসকারকঞ্জিযসুত্তং ৰিয অগ্গেন ৰা অগ্গং মূলেন ৰা মূলং সমানেতুং ৰিৰেচেতুং ৰা ন সক্কা. তেনাহ ‘‘যথা হী’’তিআদি. তদুভযম্পীতি ‘‘কুলাগণ্ঠিক’’ন্তি ৰুত্তং কঞ্জিযসুত্তং, কুলাৰকঞ্চ. পুরিমনযেনেৰাতি ‘‘এৰমেৰ সত্তা’’তিআদিনা পুব্বে ৰুত্তনযেনেৰ.

কামং মুঞ্জপব্বজতিণানি যথাজাতানিপি দীঘভাৰেন পতিত্ৰা অরঞ্ঞট্ঠানে অঞ্ঞমঞ্ঞং ৰিনন্ধিত্ৰা আকুলব্যাকুলানি হুত্ৰা তিট্ঠন্তি, তানি পন ন তথা ¶ দুব্বিৰেচিযানি, যথা রজ্জুভূতানীতি দস্সেতুং ‘‘যথা তানী’’তিআদি ৰুত্তং. সেসমেত্থ হেট্ঠা ৰুত্তনযমেৰ.

অপাযাতি অৰড্ঢিতা, সুখেন, সুখহেতুনা ৰা ৰিরহিতাতি অত্থো. দুক্খস্স গতিভাৰতোতি আপাযিকস্স দুক্খস্স পৰত্তিট্ঠানভাৰতো. সুখসমুস্সযতোতি অব্ভুদযতো. ৰিনিপতিতত্তাতি ৰিরূপং নিপতিতত্তা যথা তেনত্তভাৰেন সুখসমুস্সযো ন হোতি, এৰং নিপতিতত্তা. ইতরোতি সংসারো. ননু ‘‘অপায’’ন্তিআদিনা ৰুত্তোপি সংসারো এৰাতি? সচ্চমেতং, নিরযাদীনং পন অধিমত্তদুক্খভাৰদস্সনত্থং অপাযাদিগ্গহণং. গোবলীবদ্দঞাযেনাযমত্থো ৰেদিতব্বো. খন্ধানঞ্চ পটিপাটীতি পঞ্চন্নং খন্ধানং হেতুফলভাৰেন অপরাপরং পৰত্তি. অব্বোচ্ছিন্নং ৰত্তমানাতি অৰিচ্ছেদেন পৰত্তমানা. তং সব্বম্পীতি তং ‘‘অপায’’ন্তিআদিনা ৰুত্তং সব্বং অপাযদুক্খঞ্চেৰ ৰট্টদুক্খঞ্চ. ‘‘মহাসমুদ্দে ৰাতুক্খিত্তনাৰা ৰিযা’’তি ইদং পরিব্ভমট্ঠানস্স মহন্তদস্সনত্থঞ্চেৰ পরিব্ভমনস্স অনৰট্ঠিততাদস্সনত্থঞ্চ ‘‘উপমায. যন্তেসু যুত্তগোণো ৰিযা’’তি ইদং পন অৰসভাৰদস্সনত্থঞ্চেৰ দুপ্পমোক্খভাৰদস্সনত্থঞ্চাতি ৰেদিতব্বং.

পটিচ্চসমুপ্পাদৰণ্ণনা

ইমিনা তাৰাতি এত্থ তাৰ-সদ্দো কমত্থো, তেন ‘‘তন্তাকুলকজাতা’’তি পদস্স অনুসন্ধি পরতো আৰিভৰিস্সতীতি দীপেতি. অত্থি ইদপ্পচ্চযাতি এত্থ অযং পচ্চযোতি ইদপ্পচ্চযো, তস্মা ইদপ্পচ্চযা, ইমস্মা পচ্চযাতি অত্থো. ইদং ৰুত্তং হোতি – ‘‘ইমস্মা নাম পচ্চযা জরামরণ’’ন্তি ¶ এৰং ৰত্তব্বো অত্থি নু খো জরামরণস্স পচ্চযোতি. তেনাহ ¶ ‘‘অত্থি নু খো…পে… ভৰেয্যা’’তি. এত্থ হি ‘‘কিং পচ্চযা জরামরণং? জাতিপচ্চযা জরামরণ’’ন্তি উপরি জাতিসদ্দপচ্চযসদ্দসমানাধিকরণেন ¶ কিং-সদ্দেন ইদং-সদ্দস্স সমানাধিকরণতাদস্সনতো কম্মধারযসমাসতা ইদপ্পচ্চযসদ্দস্স যুজ্জতি. ন হেত্থ ‘‘ইমস্স পচ্চযা ইদপ্পচ্চযা’’তি জরামরণস্স, অঞ্ঞস্স ৰা পচ্চযতো জরামরণসম্ভৰপুচ্ছা সম্ভৰতি ৰিঞ্ঞাতভাৰতো, অসম্ভৰতো চ, জরামরণস্স পন পচ্চযপুচ্ছা সম্ভৰতি. পচ্চযসদ্দসমানাধিকরণতাযঞ্চ ইদং-সদ্দস্স ‘‘ইমস্মা পচ্চযা’’তি পচ্চযপুচ্ছা যুজ্জতি.

সা পন সমানাধিকরণতা যদিপি অঞ্ঞপদত্থসমাসেপি লব্ভতি, অঞ্ঞপদত্থৰচনিচ্ছাভাৰতো পনেত্থ কম্মধারযসমাসো ৰেদিতব্বো. সামিৰচনসমাসপক্খে পন নত্থেৰ সমানাধিকরণতাসম্ভৰোতি. ননু চ ‘‘ইদপ্পচ্চযতা পটিচ্চসমুপ্পাদো’’তি এত্থ ইদপ্পচ্চয-সদ্দো সামিৰচনসমাসো ইচ্ছিতোতি? সচ্চং ইচ্ছিতো উজুকমেৰ তত্থ পটিচ্চসমুপ্পাদৰচনিচ্ছাতি কত্ৰা, ইধ পন কেৰলং জরামরণস্স পচ্চযপরিপুচ্ছা অধিপ্পেতা, তস্মা যথা তত্থ ইদং-সদ্দস্স পটিচ্চসমুপ্পাদৰিসেসনতা, ইধ চ ‘‘পুচ্ছিতব্বপচ্চযত্থতা সম্ভৰতি, তথা তত্থ, ইধ চ সমাসকপ্পনা ৰেদিতব্বা. কস্মা পন তত্থ কম্মধারযসমাসো ন ইচ্ছিতোতি? হেতুপ্পভৰানং হেতু পটিচ্চসমুপ্পাদোতি ইমস্স অত্থস্স কম্মধারযসমাসে অসম্ভৰতোতি ইমস্স, অত্তনো পচ্চযানুরূপস্স অনুরূপো পচ্চযো ইদপ্পচ্চযোতি এতস্স চ অত্থস্স ইচ্ছিতত্তা. যো পনেত্থ ইদং-সদ্দেন গহিতো অত্থো, সো ‘‘অত্থি ইদপ্পচ্চযা জরামরণ’’ন্তি জরামরণগ্গহণেনেৰ গহিতোতি ইদং-সদ্দো পটিচ্চসমুপ্পাদতো পরিচ্চজনতো অঞ্ঞস্স অসম্ভৰতো পচ্চযে ¶ অৰতিট্ঠতি, তেনেত্থ কম্মধারযসমাসো. তত্থ পন ইদং-সদ্দস্স ততো পরিচ্চজনকারণং নত্থীতি সামিৰচনসমাসো এৰ ইচ্ছিতো. অট্ঠকথাযংপন যস্মা জরামরণাদীনং পচ্চযপুচ্ছামুখেনাযং পটিচ্চসমুপ্পাদদেসনা আরদ্ধা, পটিচ্চসমুপ্পাদো চ নাম অত্থতো হেতুপ্পভৰানং হেতূতি ৰুত্তো ৰাযমত্থো, তস্মা ‘‘ইমস্স জরামরণস্স পচ্চযো’’তি এৰমত্থৰণ্ণনা কতা.

পণ্ডিতেনাতি একংসব্যাকরণীযাদিপঞ্হাৰিসেসজাননসমত্থায পঞ্ঞায সমন্নাগতেন. তমেৰ হিস্স পণ্ডিচ্চং দস্সেতুং ‘‘যথা’’তিআদি ৰুত্তং ¶ . যাদিসস্স জীৰস্স দিট্ঠিগতিকো সরীরতো অনঞ্ঞত্তং পুচ্ছতি ‘‘তং জীৰং তং সরীর’’ন্তি, সো এৰং পরমত্থতো নুপলব্ভতি, কথং তস্স ৰঞ্ঝাতনযস্স ৰিয দীঘরস্সতা সরীরতো অঞ্ঞতা ৰা অনঞ্ঞতা ৰা ব্যাকাতব্বা সিযা, তস্মাস্স পঞ্হস্স ঠপনীযতা ৰেদিতব্বা. তুণ্হীভাৰো নামেস পুচ্ছতো অনাদরো ৰিহেসা ¶ ৰিয হোতীতি ‘‘অব্যাকতমেত’’ন্তি পকারন্তরমাহ. এৰং অব্যাকরণকারণং ঞাতুকামস্স কথেতব্বং হোতি, কথিতে চ জানন্তস্স পমাদোপি এৰং সিযা, কথনৰিধি পন ‘‘যাদিসস্সা’’তিআদিনা দস্সিতো এৰ. এৰং অপ্পটিপজ্জিত্ৰাতি এৰং ঠপনীযপঞ্হে ৰিয তুণ্হীভাৰাদিং অনাপজ্জিত্ৰা এৰ. ‘‘অপ্পটিপজ্জিত্ৰা’’তি ৰচনং নিদস্সনমত্তমেতং. ‘‘কিং সব্বং অনিচ্চ’’ন্তি ৰুত্তে ‘‘কিং সঙ্খতং সন্ধায পুচ্ছসি, উদাহু অসঙ্খত’’ন্তি পটিপুচ্ছিত্ৰা ব্যাকাতব্বং হোতি ‘‘কিং খন্ধপঞ্চকং পরিঞ্ঞেয্য’’ন্তি পুট্ঠে ‘‘অত্থি তত্থ পরিঞ্ঞেয্যং, অত্থি ন পরিঞ্ঞেয্য’’ন্তি ৰিভজ্জ ব্যাকাতব্বং হোতি, এৰং অপ্পটিপজ্জিত্ৰাতি চ অযমেত্থ অত্থো ইচ্ছিতোতি. পুব্বে যস্স পচ্চযস্স অত্থিতামত্তং ¶ চোদিতন্তি অত্থিতামত্তং ৰিস্সজ্জিতং. পুচ্ছাসভাগেন হি ৰিস্সজ্জনন্তি. ইদানি তস্সেৰ সরূপপুচ্ছা করীযতীতি ‘‘পুন কি’’ন্তি ৰুত্তং. ইধাপি ‘‘যথা’’তিআদি সব্বং আনেত্ৰা ৰত্তব্বং.

‘‘এস নযো সব্বপদেসূ’’তি অতিদেসৰসেন উস্সুক্কং কত্ৰা ‘‘নামরূপপচ্চযা’’তিআদিনা তত্থ অপৰাদো আরদ্ধো. যস্মা দস্সেতুকামো, তস্মা ইদং ৰুত্তন্তি যোজনা. ছন্নং ৰিপাকসম্ফস্সানংযেৰ গহণং হোতি ৰিঞ্ঞাণাদি ৰেদনাপরিযোসানা ৰিপাকৰিধীতি কত্ৰা অনেকেসু সুত্তপদেসু, (ম. নি. ৩.১২৬; উদা. ১) অভিধম্মে (ৰিভ. ২২৫) চ যেভুয্যেন তেসংযেৰ গহণস্স নিরুল়্হত্তা. ইধাতি ইমস্মিং সুত্তে. চ-সদ্দো ব্যতিরেকত্থো, তেনেত্থ ‘‘গহিতম্পী’’তিআদিনা ৰুচ্চমানংযেৰ ৰিসেসং জোতেতি. পচ্চযভাৰো নাম পচ্চযুপ্পন্নাপেক্খো তেন ৰিনা তস্স অসম্ভৰতো. তস্মা সল়াযতনপ্পচ্চযাতি ‘‘সল়াযতনপচ্চযা ফস্সো’’তি ইমিনা পদেনাতি যোজনা. অৰযৰেন ৰা সমুদাযোপলক্খণমেতং ‘‘সল়াযতনপচ্চযা’’তি, তস্মা ‘‘সল়াযতনপচ্চযা ফস্সো’’তি ইমিনা পদেনাতি ৰুত্তং হোতি. গহিতম্পীতি ছব্বিধং ৰিপাকফস্সম্পি. অগ্গহিতম্পীতি অৰিপাকফস্সম্পি কুসলাকুসলকিরিযাফস্সম্পি. পচ্চযুপ্পন্নৰিসেসং দস্সেতুকামোতি ¶ যোজনা. ন চেত্থ পচ্চযুপ্পন্নোৰ উপাদিন্নো ইচ্ছিতো, অথ খো পচ্চযোপি উপাদিন্নো ইচ্ছিতোতি অজ্ঝত্তিকাযতনস্সেৰ সল়াযতনগ্গহণেন গহণন্তি কত্ৰা ৰুত্তং ‘‘সল়াযতনতো…পে… দস্সেতুকামো’’তি. ন হি ফস্সস্স চক্খাদিসল়াযতনমেৰ পচ্চযো, অথ খো ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং, তিণ্ণং সঙ্গতি ফস্সো’’তিআদি (ম. নি. ৩.৪২১, ৪২৫, ৪২৬; সং. নি. ২.৪৪, ৪৫; ২.৪.৬০; কথা. ৪৬৫, ৪৬৭) ৰচনতো রূপাযতনাদিরূপঞ্চ চক্খুৰিঞ্ঞাণাদিনামঞ্চ পচ্চযো, তস্মা ইমং চক্খাদিসল়াযতনতো অতিরিত্তং ¶ আৰজ্জনাদি ৰিয সাধারণং অহুত্ৰা, তস্স তস্স ফস্সস্স সাধারণতায অঞ্ঞং ৰিসেসপচ্চযং পি-সদ্দেন অৰিসিট্ঠং সাধারণপচ্চযং পিদস্সেতুকামো ভগৰা, ‘‘নামরূপপচ্চযা ¶ ফস্সো’’তি ইদং ৰুত্তন্তি যোজনা. অভিধম্মভাজনীযেপি ইমমেৰ পচ্চযং সন্ধায ‘‘নামরূপপচ্চযা ফস্সো’’তি ৰুত্তন্তি তদট্ঠকথাযং (ৰিভ. অট্ঠ. ২৪৩) ‘‘পচ্চযৰিসেসদস্সনত্থঞ্চেৰ মহানিদানদেসনাসঙ্গহত্থঞ্চা’’তি অত্থৰণ্ণনা কতা. পচ্চযানন্তি জাতিআদীনং পচ্চযধম্মানং. নিদানং কথিতন্তি জরামরণাদিকস্স নিদানত্তং কথিতং একংসিকো পচ্চযভাৰো কথিতো. তঞ্হি তেসং পচ্চযভাৰে অব্যভিচারীতি দস্সেতুং ‘‘ইতি খো পনেত’’ন্তিআদিনা উপরি দেসনা পৰত্তা. নিজ্জটেতি নিজ্জালকে. নিগ্গুম্বেতি নিক্খেপে. পদদ্ৰযেনাপি আকুলাভাৰমেৰ দস্সেতি, তস্মা অনাকুলং অব্যাকুলং মহন্তং পচ্চযনিদানমেত্থ কথিতন্তি মহানিদানং সুত্তং অঞ্ঞথাভাৰস্স অভাৰতো.

৯৮. তেসং তেসং পচ্চযানন্তি তেসং তেসং জাতিআদীনং পচ্চযানং. যস্মা পচ্চযভাৰো নাম তেহি তেহি পচ্চযেহি অনূনাধিকেহেৰ তস্স তস্স ফলস্স সম্ভৰতো তথো তচ্ছো, তপ্পকারো ৰা সামগ্গিউপগতেসু পচ্চযেসু মুহুত্তম্পি তথো নিব্বত্তনধম্মানং অসম্ভৰাভাৰতো. অৰিতথো অৰিসংৰাদনকো ৰিসংৰাদনাকারৰিরহিতো অঞ্ঞধম্মপচ্চযেহি অঞ্ঞধম্মানুপ্পত্তিতো. ‘‘অনঞ্ঞথা’’তি ৰুচ্চতি অঞ্ঞথাভাৰস্স অভাৰতো. তস্মা ‘‘তথং অৰিতথং অনঞ্ঞথং পচ্চযভাৰং দস্সেতু’’ন্তি ৰুত্তং. পরিযাযতি ¶ অত্তনো ফলং পরিগ্গহেত্ৰা ৰত্ততীতি পরিযাযো, হেতূতি আহ ‘‘পরিযাযেনাতি কারণেনা’’তি. সব্বেন সব্বন্তি দেৰত্তাদিনা ¶ সব্বভাৰেন সব্বা জাতি. সব্বথা সব্বন্তি তত্থাপি চাতুমহারাজিকাদিসব্বাকারেন সব্বা, নিপাতদ্ৰযমেতং, নিপাতঞ্চ অব্যযং, তঞ্চ সব্বলিঙ্গৰিভত্তিৰচনেসু একাকারমেৰ হোতীতি পাল়িযং ‘‘সব্বেন সব্বং সব্বথা সব্ব’’ন্তি ৰুত্তং. অত্থৰচনে পন তস্স তস্স জাতিসদ্দাপেক্খায ইত্থিঅত্থৰুত্তিতং দস্সেতুং ‘‘সব্বাকারেন সব্বা’’তিআদি ৰুত্তং. ইমিনাৰ নযেনাতি ইমিনা জাতিৰারে ৰুত্তেনেৰ নযেন. দেৰাদীসূতি আদি-সদ্দেন গন্ধব্বযক্খাদিকে পাল়িযং (দী. নি. ২.৯৮) আগতে, তদন্তরভেদে চ সঙ্গণ্হাতি.

ইধ নিক্খিত্তঅত্থৰিভজনত্থেতি ইমস্মিং ‘‘কস্সচি কিম্হিচী’’তি অনিযমতো উদ্দেসৰসেন ৰুত্তত্থস্স নিদ্দিসনত্থে জোতেতব্বে নিপাতো, তদত্থজোতনং নিপাতপদন্তি অত্থো. তস্সাতি তস্স পদস্স. তেতি ধম্মদেসনায সম্পদানভূতং থেরং ৰদতি. সেয্যথিদন্তি ৰা তে কতমেতি চেতি অত্থো. যে হি ‘‘কস্সচী’’তি, ‘‘কিম্হিচী’’তি চ অনিযমতো ৰুত্তো অত্থো, তে কতমেতি. কথেতুকম্যতাপুচ্ছা হেসা. দেৰভাৰাযাতি দেৰভাৰত্থং. খন্ধজাতীতি খন্ধপাতুভাৰো, যথা খন্ধেসু উপ্পন্নেসু ‘‘দেৰা’’তি সমঞ্ঞা হোতি, তথা তেসং উপ্পাদোতি অত্থো. তেনাহ ‘‘যাযা’’তি আহ. সব্বপদেসূতি ‘‘গন্ধব্বানং গন্ধব্বত্থাযা’’তিআদীসু সব্বেসু জাতিনিদ্দেসপদেসু ¶ , ভৰাদিপদেসু চ. যেন হি নযেন সচে হি জাতীতি অযমত্থযোজনা কতা, জাতিনিদ্দেসপদেসোৰ ‘‘ভৰো’’তিআদিনা ভৰাদিপদেসুপি সো কাতব্বোতি. দেৰাতি উপপত্তিদেৰা চাতুমহারাজিকতো পট্ঠায যাৰ ভৰগ্গা দিব্বন্তি কামগুণাদীহি কীল়ন্তি লল়ন্তি ৰিহরন্তি জোতন্তীতি কত্ৰা. গন্ধং অব্বন্তি পরিভুঞ্জন্তীতি গন্ধব্বা, ধতরট্ঠস্স ¶ মহারাজস্স পরিৰারভূতা. যজন্তি ৰেস্সৰণসক্কাদিকে পূজেন্তীতি যক্খা, তেন তেন ৰা পণিধিকম্মাদিনা যজিতব্বা পূজেতব্বাতি যক্খা, ৰেস্সৰণস্স মহারাজস্স পরিৰারভূতা. অট্ঠকথাযং পন ‘‘অমনুস্সা’’তি অৰিসেসেন ৰুত্তং. ভূতাতি কুম্ভণ্ডা, ৰিরূল়্হকস্স মহারাজস্স পরিৰারভূতা. অট্ঠকথাযং পন ‘‘যে কেচি নিব্বত্তসত্তা’’তি অৰিসেসেন ৰুত্তং. অট্ঠিপক্খা ভমরতুপ্পল়াদযো. চম্মপক্খা জতুসিঙ্গালাদযো. লোমপক্খা হংসমোরাদযো. সরীসপা অহিৰিচ্ছিকসতপদিআদযো.

‘‘তেসং ¶ তেস’’ন্তি ইদং ন যেৰাপনকনিদ্দেসো ৰিয অৰুত্তসঙ্গহত্থং ৰচনং, অথ খো অযেৰাপনকনিদ্দেসো ৰিয ৰুত্তসঙ্গহত্থন্তি. আদি-সদ্দেনেৰ চ আমেডিতত্থো সঙ্গয্হতীতি আহ ‘‘তেসং তেসং দেৰগন্ধব্বাদীন’’ন্তি. তদত্তাযাতি তংভাৰায, যথারূপেসু খন্ধেসু পৰত্তমানেসু ‘‘দেৰা গন্ধব্বা’’তি লোকসমঞ্ঞা হোতি, তথারূপতাযাতি অত্থো. তেনাহ ‘‘দেৰগন্ধব্বাদিভাৰাযা’’তি. ‘‘নিরোধো, ৰিগমো’’তি চ পটিলদ্ধত্তালাভস্স ভাৰো ৰুচ্চতি, ইধ পন অচ্চন্তাভাৰো অধিপ্পেতো ‘‘সব্বসো জাতিযা অসতী’’তি অৰত্ৰা ‘‘জাতিনিরোধা’’তি ৰুত্তত্তাতি আহ ‘‘অভাৰাতি অত্থো’’তি.

ফলত্থায হিনোতীতি যথা ফলং ততো নিব্বত্ততি, এৰং হিনোতি পৰত্ততি, তস্স হেতুভাৰং উপগচ্ছতীতি অত্থো. ইদং গণ্হথ নন্তি ‘‘ইদং মে ফলং, গণ্হথ ন’’ন্তি এৰং অপ্পেতি ৰিয নিয্যাতেতি ৰিয. ‘‘এস নযো’’তি অৰিসেসং অতিদিসিত্ৰা ৰিসেসমত্তস্স অত্থং দস্সেতুং ‘‘অপিচা’’তিআদি ৰুত্তং. ননু চাযং জাতি পরিনিপ্ফন্না, সঙ্খতভাৰা চ ন হোতি ৰিকারভাৰতো, তথা জরামরণং, তস্স কথং সা হেতু হোতীতি চোদনং সন্ধাযাহ ¶ ‘‘জরামরণস্স হী’’তিআদি. তব্ভাৰে ভাৰো, তদভাৰে চ অভাৰো জরামরণস্স জাতিযা উপনিস্সযতা.

৯৯. ওকাসপরিগ্গহোতি পৰত্তিট্ঠানপরিগ্গহো. উপপত্তিভৰে যুজ্জতি উপপত্তিক্খন্ধানং যথাৰুত্তট্ঠানতো অঞ্ঞত্থ অনুপ্পজ্জনতো. ইধ পনাতি ইমস্মিং সুত্তে ‘‘কামভৰো’’তিআদিনা আগতে ইমস্মিং ঠানে. কম্মভৰে যুজ্জতি কামভৰাদিজোতনা ৰিসেসতো তস্স জাতিযা পচ্চযভাৰতোতি. তেনাহ ‘‘সো হি জাতিযা উপনিস্সযকোটিযাৰ পচ্চযো’’তি. ননু চ উপপত্তিভৰোপি ¶ জাতিযা উপনিস্সযৰসেন পচ্চযো হোতীতি? সচ্চং হোতি, সো পন ন তথা পধানভূতো, কম্মভৰো পন পধানভূতো পচ্চযো জনকভাৰতোতি. ‘‘সো হি জাতিযা’’তিআদি ৰুত্তং কামভৰূপগং কম্মং কামভৰো. এস নযো রূপারূপভৰেসুপি. ওকাসপরিগ্গহোৰ কতো‘‘কিম্হিচী’’তি ইমিনা সত্তপরিগ্গহস্স কতত্তা.

১০০. তিণ্ণম্পি কম্মভৰানন্তি কামকম্মভৰাদীনং তিণ্ণম্পি কম্মভৰানং. তিণ্ণঞ্চ উপপত্তিভৰানন্তি কামুপপত্তিভৰাদীনং তিণ্ণঞ্চ উপপত্তিভৰানং. তথা ¶ সেসানিপীতি দিট্ঠুপাদানাদীনি সেসুপাদানানিপি তিণ্ণম্পি কম্মভৰানং, তিণ্ণঞ্চ উপপত্তিভৰানং পচ্চযোতি অত্থো. ইতীতি এৰং ৰুত্তনযেন. দ্ৰাদস কম্মভৰা দ্ৰাদস উপপত্তিভৰাতি চতুৰীসতিভৰা ৰেদিতব্বা. যস্মা কম্মভৰস্স পচ্চযভাৰমুখেনেৰ উপাদানং উপপত্তিভৰস্স পচ্চযো নাম হোতি, ন অঞ্ঞথা, তস্মা উপাদানং কম্মভৰস্স উজুকমেৰ পচ্চযভাৰোতি আহ ‘‘নিপ্পরিযাযেনেত্থ দ্ৰাদস কম্মভৰা লব্ভন্তী’’তি. তেসন্তি কম্মভৰানং. সহজাতকোটিযাতি অকুসলস্স কম্মভৰস্স সহজাতং উপাদানং সহজাতকোটিযা, ইতরং অনন্তরূপনিস্সযাদিৰসেন উপনিস্সযকোটিযা, কুসলস্স কম্মভৰস্স পন ¶ উপনিস্সযকোটিযাৰ পচ্চযো. এত্থ চ যথা অঞ্ঞমঞ্ঞনিস্সযসম্পযুত্তঅত্থিঅৰিগতাদিপচ্চযানং সহজাতপচ্চযেন একসঙ্গহতং দস্সেতুং ‘‘সহজাতকোটিযা’’তি ৰুত্তং, এৰং আরম্মণূপনিস্সযঅনন্তরূপনিস্সযপকতূপনিস্সযানং একজ্ঝং গহণৰসেন ‘‘উপনিস্সযকোটিযা’’তি ৰুত্তন্তি দট্ঠব্বং.

১০১. উপাদানস্সাতি এত্থ কামুপাদানস্স তণ্হা উপনিস্সযকোটিযাৰ পচ্চযো, সেসুপাদানানং সহজাতকোটিযাপি উপনিস্সযকোটিযাপি ৰিঞ্ঞাণাদি চ ৰেদনাপরিযোসানা ৰিপাকৰিধীতি কত্ৰা.

১০২. যদিদং ৰেদনাতি এত্থ ৰিপাকৰেদনাতি তমেৰ তাৰ উপনিস্সযকোটিযা পচ্চযো ইতরকোটিযা অসম্ভৰতো. অঞ্ঞাতি কুসলাকুসলকিরিযৰেদনা. অঞ্ঞথাপীতি সহজাতকোটিযাপি.

১০৩. এত্তাৰতাতি জরামরণাদীনং পচ্চযপরম্পরাদস্সনৰসেন পৰত্তায এত্তকায দেসনায. পুরিমতণ্হন্তি পুরিমভৰসিদ্ধং তণ্হং. ‘‘এস পচ্চযো তণ্হায, যদিদং ৰেদনা’’তি ৰত্ৰা তদনন্তরং ‘‘ফস্সপচ্চযা ৰেদনাতি ইতি খো পনেতং ৰুত্ত’’ন্তিআদিনা ৰেদনায পচ্চযভূতস্স ফস্সস্স উদ্ধরণং অঞ্ঞেসু সুত্তেসু আগতনযেন পটিচ্চসমুপ্পাদস্স দেসনামগ্গো ¶ , তং পন অনোতরিত্ৰা সমুদাচারতণ্হাদস্সনমুখেনেৰ তণ্হামূলকধম্মে দেসেন্তো আচিণ্ণদেসনামগ্গতো ওক্কমন্তো ৰিয, তঞ্চ দেসনং পস্সতো অপ্পৰত্তন্তি পসয্হ বলক্কারেন দেসেন্তো ৰিয চ হোতীতি আহ ‘‘ইদানী’’তিআদি. দ্ৰে তণ্হাতি ইধাধিপ্পেততণ্হা এৰ ¶ দ্ৰিধা ভিন্দন্তো আহ. এসনতণ্হাতি ভোগানং পরিযেসনৰসেন পৰত্ততণ্হা. এসিততণ্হাতি পরিযিট্ঠেসু ভোগেসু উপ্পজ্জমানতণ্হা. সমুদাচারতণ্হাযাতি পরিযুট্ঠানৰসেন পৰত্ততণ্হায. দুৰিধাপেসা ৰেদনং পটিচ্চ তণ্হা ¶ নাম ৰেদনাপচ্চযা চ অপ্পটিলদ্ধানং ভোগানং পটিলাভায পরিযেসনা, লদ্ধেসু চ তেসুপাতব্যতাপত্তিআদি হোতীতি.

পরিতস্সনৰসেন পরিযেসতি এতাযাতি পরিযেসনা. আসযতো, পযোগতো চ পরিযেসনা তথাপৰত্তো চিত্তুপ্পাদো. তেনাহ ‘‘তণ্হায সতি হোতী’’তি. রূপাদিআরম্মণপটিলাভোতি সৰত্থুকানং রূপাদিআরম্মণানং গৰেসনৰসেন, পৰত্তিযং পন অপরিযিট্ঠংযেৰ লব্ভতি, তম্পি অত্থতো পরিযেসনায লদ্ধমেৰ নাম তথারূপস্স কম্মস্স পুব্বেকতত্তা এৰ লব্ভনতো. তেনাহ ‘‘সো হি পরিযেসনায সতি হোতী’’তি. সুখৰিনিচ্ছযন্তি সুখং ৰিসেসতো নিচ্ছিনোতীতি সুখৰিনিচ্ছযো, সুখং সভাৰতো, সমুদযতো, অত্থঙ্গমনতো, নিস্সরণতো চ যাথাৰতো জানিত্ৰা পৰত্তঞাণং, তং সুখৰিনিচ্ছযং. জঞ্ঞাতি জানেয্য. ‘‘সুভসুখ’’ন্তিআদিকং আরম্মণে অভূতাকারং ৰিৰিধং নিন্নভাৰেন নিচ্ছিনোতি আরোপেতীতি ৰিনিচ্ছযো. অস্সাদানুপস্সনতণ্হাদিট্ঠিযাপি এৰমেৰ ৰিনিচ্ছযভাৰো ৰেদিতব্বো. ইমস্মিং পন সুত্তে ৰিতক্কোযেৰ আগতোতি যোজনা. ইমস্মিং পন সুত্তেতি সক্কপঞ্হসুত্তে. (দী. নি. ২.৩৫৮) তত্থ হি ‘‘ছন্দো খো, দেৰানং ইন্দ, ৰিতক্কনিদানো’’তি আগতং. ইধাতি ইমস্মিং মহানিদানসুত্তে. ‘‘ৰিতক্কেনেৰ ৰিনিচ্ছিনাতী’’তি এতেন ‘‘ৰিনিচ্ছীযতি এতেনাতি ৰিনিচ্ছযো’’তি ৰিনিচ্ছয-সদ্দস্স করণসাধনমাহ. ‘‘এত্তক’’ন্তিআদি ৰিনিচ্ছযনাকারদস্সনং.

ছন্দনট্ঠেন ছন্দো, এৰং রঞ্জনট্ঠেন রাগো, স্ৰাযং অনাসেৰনতায মন্দো হুত্ৰা পৰত্তো ইধাধিপ্পেতোতি আহ ‘‘দুব্বলরাগস্সাধিৰচন’’ন্তি. অজ্ঝোসানন্তি তণ্হাদিট্ঠিৰসেন অভিনিৰিসনং. ‘‘ময্হং ¶ ইদ’’ন্তি হি তণ্হাগাহো যেভুয্যেন অত্তগ্গাহসন্নিস্সযোৰ হোতি. তেনাহ ‘‘অহং মম’’ন্তি, ‘‘বলৰসন্নিট্ঠান’’ন্তি চ তেসং গাহানং থিরভাৰপ্পত্তিমাহ. তণ্হাদিট্ঠিৰসেন পরিগ্গহকরণন্তি ‘‘অহং মম’’ন্তি বলৰসন্নিট্ঠানৰসেন অভিনিৰিট্ঠস্স ¶ অত্তত্তনিযগ্গাহৰত্থুনো অঞ্ঞাসাধারণং ৰিয কত্ৰা পরিগ্গহেত্ৰা ঠানং, তথাপৰত্তো লোভসহগতচিত্তুপ্পাদো. অত্তনা পরিগ্গহিতস্স ৰত্থুনো যস্স ৰসেন পরেহি সাধারণভাৰস্স অসহমানো ¶ হোতি পুগ্গলো, সো ধম্মো অসহনতা. এৰং ৰচনত্থং ৰদন্তি নিরুত্তিনযেন. সদ্দলক্খণে পন যস্স ধম্মস্স ৰসেন মচ্ছরিযযোগতো পুগ্গলো মচ্ছরো, তস্স ভাৰো, কম্মং ৰা মচ্ছরিযং, মচ্ছেরো ধম্মো. মচ্ছরিযস্স বলৰভাৰতো আদরেন রক্খণং আরক্খোতি আহ ‘‘দ্ৰার…পে… সুট্ঠু রক্খণ’’ন্তি. অত্তনো ফলং করোতীতি করণং, যং কিঞ্চি কারণং, অধিকং করণন্তি অধিকরণং, ৰিসেসকারণং. ৰিসেসকারণঞ্চ ভোগানং আরক্খদণ্ডাদানাদিঅনত্থসম্ভৰস্সাতি ৰুত্তং ‘‘আরক্খাধিকরণ’’ন্তিআদি. পরনিসেধনত্থন্তি মারণাদিনা পরেসং ৰিবাধনত্থং. আদীযতি এতেনাতি আদানং, দণ্ডস্স আদানং দণ্ডাদানং, অভিভৰিত্ৰা পরৰিহেঠনচিত্তুপ্পাদো. সত্থাদানেপি এসেৰ নযো. হত্থপরামাসাদিৰসেন কাযেন কাতব্বকলহো কাযকলহো. মম্মঘট্টনাদিৰসেন ৰাচায কাতব্বকলহো ৰাচাকলহো. ৰিরুজ্ঝনৰসেন ৰিরূপং গণ্হাতি এতেনাতি ৰিগ্গহো. ৰিরুদ্ধং ৰদতি এতেনাতি ৰিৰাদো. তুৰং তুৰন্তি অগারৰৰচনসহচরণতো তুৰং তুৰং, সব্বেতে তথাপৰত্তা দোসসহগতচিত্তুপ্পাদা ৰেদিতব্বা. তেনাহ ভগৰা ‘‘অনেকে পাপকা অকুসলা ধম্মা সম্ভৰন্তী’’তি (দী. নি. ২.১০৪).

১১২. দেসনং নিৰত্তেসীতি ‘‘তণ্হং পটিচ্চ পরিযেসনা’’তিআদিনা অনুলোমনযেন পৰত্তিতং দেসনং পটিলোমনযেন ¶ পুন ‘‘আরক্খাধিকরণ’’ন্তি আরভন্তো নিৰত্তেসি. পঞ্চকামগুণিকরাগৰসেনাতি আরম্মণভূতা পঞ্চ কামগুণা এতস্স অত্থীতি পঞ্চকামগুণিকো, তত্থ রঞ্জনৰসেন অভিরমণৰসেন পৰত্তরাগো, তস্স ৰসেন উপ্পন্না রঞ্জনৰসেন তণ্হাযনৰসেন পৰত্তা রূপাদিতণ্হাৰ কামেসু তণ্হাতি কামতণ্হা. ভৰতি অত্থি সব্বকালং তিট্ঠতীতি পৰত্তা ভৰদিট্ঠি উত্তরপদলোপেন ভৰো, তংসহগতা তণ্হা ভৰতণ্হা. ৰিভৰতি ৰিনস্সতি উচ্ছিজ্জতীতি পৰত্তা ৰিভৰদিট্ঠি ৰিভৰো উত্তরপদলোপেন, তংসহগতা তণ্হা ৰিভৰতণ্হাতি আহ ‘‘সস্সতদিট্ঠী’’তিআদি. ইমে দ্ৰে ধম্মাতি ¶ ‘‘এস পচ্চযো উপাদানস্স, যদিদং তণ্হা’’তি (দী. নি. ২.১০১) এৰং ৰুত্তা ৰট্টমূলতণ্হা চ ‘‘তণ্হং পটিচ্চ পরিযেসনা’’তি (দী. নি. ২.১০৩) এৰং ৰুত্তা সমুদাচারতণ্হা চাতি ইমে দ্ৰে ধম্মা. ৰট্টমূলসমুদাচারৰসেনাতি ৰট্টমূলৰসেন চেৰ সমুদাচারৰসেন চ. দ্ৰীহি কোট্ঠাসেহীতি দ্ৰীহি ভাগেহি. দ্ৰীহি অৰযৰেহি সমোসরন্তি নিব্বত্তনৰসেন সমং ৰত্তন্তি ইতোতি সমোসরণং, পচ্চযো, একং সমোসরণং এতাসন্তি একসমোসরণা. কেন পন একসমোসরণাতি আহ ‘‘ৰেদনাযা’’তি. দ্ৰেপি হি তণ্হা ৰেদনাপচ্চযা এৰাতি. তেনাহ ‘‘ৰেদনাপচ্চযেন একপচ্চযা’’তি. ততো ততো ওসরিত্ৰা আগন্ত্ৰা সমৰসনট্ঠানং ওসরণ সমোসরণং. ৰেদনায ¶ সমং সহ একস্মিং আরম্মণে ওসরণকপৰত্তনকা ৰেদনা সমোসরণাতি আহ ‘‘ইদং সহজাতসমোসরণং নামা’’তি.

১১৩. সব্বেতি উপ্পত্তিদ্ৰারৰসেন ভিন্দিত্ৰা ৰুত্তা সৰিপাকফস্সা এৰ ৰিঞ্ঞাণাদি ৰেদনাপরিযোসানা ৰিপাকৰিথীতি ¶ কত্ৰা. পটিচ্চসমুপ্পাদকথা নাম ৰট্টকথাতি আহ ‘‘ঠপেত্ৰা চত্তারো লোকুত্তরৰিপাকফস্সে’’তি. বহুধাতি বহুপ্পকারেন. অযঞ্হি পঞ্চদ্ৰারে চক্খুপসাদাদিৰত্থুকানং পঞ্চন্নং ৰেদনানং চক্খুসম্ফস্সাদিকো ফস্সো সহজাতঅঞ্ঞমঞ্ঞনিস্সযৰিপাকআহারসম্পযুত্তঅত্থিঅৰিগতৰসেন অট্ঠধা পচ্চযো হোতি. সেসানং পন একেকস্মিং দ্ৰারে সম্পটিচ্ছনসন্তীরণতদারম্মণৰসেন পৰত্তানং কামাৰচরৰিপাকৰেদনানং চক্খুসম্ফস্সাদিকো ফস্সো উপনিস্সযৰসেন একধাৰ পচ্চযো হোতি. মনোদ্ৰারেপি তদারম্মণৰসেন পৰত্তানং কামাৰচরৰিপাকৰেদনানং সহজাতমনোসম্ফস্সো তথেৰ অট্ঠধা পচ্চযো হোতি, তথা পটিসন্ধিভৰঙ্গচুতিৰসেন পৰত্তানং তেভূমকৰিপাকৰেদনানং. যা পন তা মনোদ্ৰারে তদারম্মণৰসেন পৰত্তা কামাৰচরৰেদনা, তাসং মনোদ্ৰারাৰজ্জনসম্পযুত্তো মনোসম্ফস্সো উপনিস্সযৰসেন একধাৰ পচ্চযো হোতীতি এৰং ফস্সো বহুধা ৰেদনায পচ্চযো হোতীতি ৰেদিতব্বং.

১১৪. ৰেদনাদীনন্তি ৰেদনাসঞ্ঞাসঙ্খারৰিঞ্ঞাণানং. অসদিসভাৰাতি অনুভৰনসঞ্জাননাভিসঙ্খরণৰিজাননভাৰা. তে হি অঞ্ঞমঞ্ঞৰিধুরেন ৰেদযিতাদিরূপেন আকিরিযন্তি পঞ্ঞাযন্তীতি আকারাতি ৰুচ্চন্তি. তেযেৰাতি ¶ ৰেদনাদীনং তে এৰ ৰেদযিতাদিআকারা. সাধুকং দস্সিযমানাতি সক্কচ্চং পচ্চক্খতো ৰিয পকাসিযমানা. তং তং লীনমত্থং গমেন্তীতি ‘‘অরূপট্ঠো আরম্মণাভিমুখনমনট্ঠো’’তি এৰমাদিকং তং তং লীনং অপাকটমত্থং গমেন্তি ঞাপেন্তীতি লিঙ্গানি. তস্স তস্স সঞ্জাননহেতুতোতি তস্স তস্স অরূপট্ঠাদিকস্স সল্লক্খণস্স কারণত্তা. নিমীযন্তি অনুমীযন্তি এতেহীতি নিমিত্তানি. তথা তথা অরূপভাৰাদিপ্পকারেন, ৰেদযিতাদিপ্পকারেন চ উদ্দিসিতব্বতো কথেতব্বতো উদ্দেসা. তস্মাতি ‘‘অসদিসভাৰা’’তিআদিনা ৰুত্তমেৰত্থং কারণভাৰেন পচ্চামসতি. যস্মা ৰেদনাদীনং অঞ্ঞমঞ্ঞঅসদিসভাৰা যথাৰুত্তেনত্থেন আকারাদযো, তস্মা অযং ইদানি ৰুচ্চমানো এত্থ পাল়িপদে অত্থো.

নামসমূহস্সাতি আরম্মণাভিমুখং নমনট্ঠেন ‘‘নাম’’ন্তি লদ্ধসমঞ্ঞস্স ¶ ৰেদনাদিচতুক্খন্ধসঙ্খাতস্স অরূপধম্মপুঞ্জস্স. পঞ্ঞত্তীতি ‘‘নামকাযো অরূপকলাপো অরূপিনো ¶ খন্ধা’’তিআদিকা পঞ্ঞাপনা হোতি. চেতনাপধানত্তা সঙ্খারক্খন্ধধম্মানং ‘‘সঙ্খারানং চেতনাকারে’’তিআদি ৰুত্তং. তথা হি সুত্তন্তভাজনীযে সঙ্খারক্খন্ধৰিভজনে ‘‘যা চেতনা সঞ্চেতনা সঞ্চেতযিতত্ত’’ন্তি (ৰিভ. ২৪৯ অভিধম্মভাজনীযে) চেতনাৰ নিদ্দিট্ঠা. অসতীতি অসন্তেসু. ৰচনৰিপল্লাসেন হি এৰং ৰুত্তং. চত্তারো খন্ধে ৰত্থুং কত্ৰাতি ৰেদনা সঞ্ঞা চিত্তং চেতনাদযোতি ইমে চতুক্খন্ধসঞ্ঞিতে নিস্সযপচ্চযভূতে ধম্মে ৰত্থুং কত্ৰা. অযঞ্চ নযো পঞ্চদ্ৰারেপি সম্ভৰতীতি ‘‘মনোদ্ৰারে’’তি ৰিসেসিতং. অধিৰচনসম্ফস্সৰেৰচনোতি অধিৰচনমুখেন পঞ্ঞত্তিমুখেন গহেতব্বত্তা ‘‘অধিৰচনসম্ফস্সো’’তি লদ্ধনামো. সোতি মনোসম্ফস্সো. পঞ্চৰোকারে চ হদযৰত্থুং নিস্সায লব্ভনতো রূপকাযে পঞ্ঞাযতেৰ, অযং পন নযো ইধ ন ইচ্ছিতো ৰেদনাদিপটিক্খেপৰসেন অসম্ভৰপরিযাযস্স জোতিতত্তাতি ‘‘পঞ্চপসাদে ৰত্থুং কত্ৰা উপ্পজ্জেয্যা’’তি অত্থো ৰুত্তো. ন হি ৰেদনাসন্নিস্সযেন ৰিনা পঞ্চপসাদে ৰত্থুং কত্ৰা মনোসম্ফস্সস্স সম্ভৰো অত্থি. উপ্পত্তিট্ঠানে অসতি অনুপ্পত্তিট্ঠানতো ফলস্স উপ্পত্তি নাম কদাচিপি নত্থীতি ইমমত্থং যথাধিগতস্স অত্থস্স নিদস্সনৰসেন দস্সেন্তো ‘‘অম্বরুক্খে’’তিআদিমাহ ¶ . রূপকাযতোতি কেৰলং রূপকাযতো. তস্সাতি মনোসম্ফস্সস্স.

ৰিরোধিপচ্চযসন্নিপাতে ৰিভূততরা ৰিসদিসুপ্পত্তি, তস্মিং ৰা সতি অত্তনো সন্তানে ৰিজ্জমানস্সেৰ ৰিসদিসুপ্পত্তিহেতুভাৰো রুপ্পনাকারো. সো এৰ রুপ্পনাকারো ৰত্থুসপ্পটিঘাদিকং তং তং লীনমত্থং গমেতীতি লিঙ্গং. তস্স তস্স সঞ্জাননহেতুতো নিমিত্তং. তথা তথা উদ্দিসিতব্বতো উদ্দেসোতি এৰমেত্থ আকারাদযো অত্থতো ¶ ৰেদিতব্বা. ৰত্থারম্মণানং অঞ্ঞমঞ্ঞপটিহননং পটিঘো, ততো পটিঘতো জাতো পটিঘসম্ফস্সো. তেনাহ ‘‘সপ্পটিঘ’’ন্তিআদি. নামকাযতোতি কেৰলং নামকাযতো. তস্সাতি পটিঘসম্ফস্সস্স. সেসং পঠমপঞ্হে ৰুত্তনযমেৰ.

উভযৰসেনাতি নামকাযো রূপকাযোতি উভযসন্নিস্সযস্স অধিৰচনসম্ফস্সো পটিঘসম্ফস্সোতি উভযসম্ফস্সস্স ৰসেন.

ৰিসুং ৰিসুং পচ্চযং দস্সেত্ৰাতি ব্যতিরেকমুখেন পচ্চেকং নামকাযরূপকাযসঞ্ঞিতং পচ্চযং দস্সেত্ৰা. তেসন্তি ফস্সানং. অৰিসেসতোতি ৰিসেসং অকত্ৰা সামঞ্ঞতো. দস্সেতুন্তি ব্যতিরেকমুখেনেৰ দস্সেতুং. এসেৰ হেতূতি এস ছসুপি দ্ৰারেসু পৰত্তো নামরূপসঙ্খাতো হেতু যথারহং দ্ৰিন্নম্পি ফস্সানং. ইদানি তং যথারহং পৰত্তিং ৰিভজিত্ৰা দস্সেতুং ‘‘চক্খুদ্ৰারাদীসু হী’’তিআদি ৰুত্তং.

সম্পযুত্তকা ¶ খন্ধাতি ফস্সেন সম্পযুত্তা ৰেদনাদযো খন্ধা. আৰজ্জনস্সাপি সম্পযুত্তক্খন্ধগ্গহণেনেৰেত্থ গহণং দট্ঠব্বং তদৰিনাভাৰতো. পরতো মনোসম্ফস্সেপি এসেৰ নযো. পঞ্চৰিধোপীতি চক্খুসম্ফস্সাদিৰসেন পঞ্চৰিধোপি. সো ফস্সোতি পটিঘসম্ফস্সো. বহুধাতি বহুপ্পকারেন. তথা হি ৰিপাকনামং ৰিপাকস্স অনেকভেদস্স মনোসম্ফস্সস্স সহজাতঅঞ্ঞমঞ্ঞনিস্সযৰিপাকসম্পযুত্তঅত্থিঅৰিগতৰসেন সত্তধা পচ্চযো হোতি. যং পনেত্থ আহারকিচ্চং, তং আহারপচ্চযৰসেন. যং ইন্দ্রিযকিচ্চং, তং ইন্দ্রিযপচ্চযৰসেন পচ্চযো হোতি. অৰিপাকং পন নামং অৰিপাকস্স মনোসম্ফস্সস্স ঠপেত্ৰা ৰিপাকপচ্চযং ইতরেসং ৰসেন পচ্চযো হোতি. রূপং পন চক্খাযতনাদিভেদং চক্খুসম্ফস্সাদিকস্স পঞ্চৰিধস্স ফস্সস্স নিস্সযপুরেজাতইন্দ্রিযৰিপ্পযুত্তঅত্থিঅৰিগতৰসেন ¶ ¶ ছধা পচ্চযো হোতি. রূপাযতনাদিভেদং তস্স পঞ্চৰিধস্স আরম্মণপুরেজাতঅত্থিঅৰিগতৰসেন চতুধা পচ্চযো হোতি. মনোসম্ফস্সস্স পন তানি রূপাযতনাদীনি, ধম্মারম্মণঞ্চ তথা চ আরম্মণপচ্চযমত্তেনেৰ পচ্চযো হোতি. ৰত্থুরূপং পন মনোসম্ফস্সস্স নিস্সযপুরেজাতৰিপ্পযুত্তঅত্থিঅৰিগতৰসেন পঞ্চধা পচ্চযো হোতি. এৰং নামরূপং অস্স ফস্সস্স বহুধা পচ্চযো হোতীতি ৰেদিতব্বং.

১১৫. পঠমুপ্পত্তিযং ৰিঞ্ঞাণং নামরূপস্স ৰিসেসপচ্চযোতি ইমমত্থং ব্যতিরেকমুখেন দস্সেতুং পাল়িযং ‘‘মাতুকুচ্ছিম্হি ন ওক্কমিস্সথা’’তিআদি ৰুত্তং. গব্ভসেয্যকপটিসন্ধি হি বাহিরতো মাতুকুচ্ছিং ওক্কমন্তস্স ৰিয হোন্তীপি অত্থতো যথাপচ্চযং খন্ধানং তত্থ পঠমুপ্পত্তিযেৰ. তেনাহ ‘‘পৰিসিত্ৰা…পে… ন ৰত্তিস্সথা’’তি. সুদ্ধন্তি কেৰলং ৰিঞ্ঞাণেন অমিস্সিতং ৰিরহিতং. ‘‘অৰসেস’’ন্তি ইদং নামাপেক্খং, তস্মা অৰসেসং নামরূপন্তি ইমং ৰিঞ্ঞাণং ঠপেত্ৰা অৰসেসং নামরূপং ৰাতি অত্থো. পটিসন্ধিৰসেন ওক্কন্তন্তি পটিসন্ধিগ্গহণৰসেন, মাতুকুচ্ছিং ওক্কমন্তস্স ৰা পঠমাৰযৰভাৰেন ওতিণ্ণং. ৰোক্কমিস্সথাতি সন্ততিৰিচ্ছেদং ৰিনাসং উপগমিস্সথ, তং পন মরণং নাম হোতীতি আহ ‘‘চুতিৰসেনা’’তি. অস্সাতি ৰিঞ্ঞাণস্স, তঞ্চ খো ৰিঞ্ঞাণসামঞ্ঞৰসেন ৰুত্তং. তেনাহ ‘‘তস্সেৰ চিত্তস্স নিরোধেনা’’তি, পটিসন্ধিচিত্তস্সেৰ নিরোধেনাতি অত্থো. ততোতি পটিসন্ধিচিত্ততো. পটিসন্ধিচিত্তস্স, ততো দুতিযততিযচিত্তানং ৰা নিরোধেন চুতি ন হোতীতি ৰুত্তমত্থং যুত্তিতো ৰিভাৰেতুং ‘‘পটিসন্ধিচিত্তেন হী’’তিআদি ৰুত্তং. এতস্মিং অন্তরেতি এতস্মিং সোল়সচিত্তক্খণে কালে. অন্তরাযো নত্থীতি এত্থ দারকস্স তাৰ মরণন্তরাযো মা হোতু তদা চুতিচিত্তস্স অসম্ভৰতো, মাতু পন কথং তদা মরণন্তরাযাভাৰোতি? তং তং কালং অনতিক্কমিত্ৰা ¶ তদন্তরেযেৰ ¶ চৰনধম্মায গব্ভগ্গহণস্সেৰ অসম্ভৰতো. তেনাহ ‘‘অযঞ্হি অনোকাসো নামা’’তি, চুতিযাতি অধিপ্পাযো.

পটিসন্ধিচিত্তেন সদ্ধিং সমুট্ঠিতরূপানীতি ওক্কন্তিক্খণে উপ্পন্নকম্মজরূপানি ৰদতি. তানি হি নিপ্পরিযাযতো পটিসন্ধিচিত্তেন সদ্ধিং সমুট্ঠিতরূপানি নাম, ন উতুসমুট্ঠানানি পটিসন্ধিচিত্তস্স উপ্পাদতো পচ্ছা সমুট্ঠিতত্তা. চিত্তজাহারজানং ¶ পন তদা অসম্ভৰো এৰ. যানি পটিসন্ধিচিত্তেন সদ্ধিং সমুট্ঠিতরূপানি, তানি তিৰিধানি তস্স উপ্পাদক্খণে সমুট্ঠিতানি, ঠিতিক্খণে সমুট্ঠিতানি, ভঙ্গক্খণে সমুট্ঠিতানীতি. তেসু উপ্পাদক্খণে সমুট্ঠিতানি সত্তরসমস্স ভৰঙ্গস্স উপ্পাদক্খণে নিরুজ্ঝন্তি, ঠিতিক্খণে সমুট্ঠিতানি ঠিতিক্খণে নিরুজ্ঝন্তি, ভঙ্গক্খণে সমুট্ঠিতানি ভঙ্গক্খণে নিরুজ্ঝন্তি. তত্থ ‘‘ভঞ্জমানো ধম্মো ভঞ্জমানস্স ধম্মস্স পচ্চযো হোতী’’তি ন সক্কা ৰত্তুং, উপ্পাদে, পন ঠিতিযঞ্চ ন ন সক্কাতি ‘‘সত্তরসমস্স ভৰঙ্গস্স উপ্পাদক্খণে, ঠিতিক্খণে চ ধরন্তানং ৰসেন তস্স পচ্চযম্পি দাতুং ন সক্কোন্তী’’তি ৰুত্তং. রূপকাযূপত্থম্ভিতস্সেৰ হি নামকাযস্স পঞ্চৰোকারে পৰত্তীতি. তেহি রূপধম্মেহি তস্স চিত্তস্স বলৰতরং সন্ধাযাহ ‘‘সত্তরসমস্স…পে… পৰত্তি পৰত্ততী’’তি. পৰেণী ঘটিযতীতি অট্ঠচত্তালীসকম্মজস্স ¶ রূপপৰেণী সম্বন্ধা হুত্ৰা পৰত্ততি. পঠমঞ্হি পটিসন্ধিচিত্তং, ততো যাৰ সোল়সমং ভৰঙ্গচিত্তং, তেসু একেকস্স উপ্পাদঠিতিভঙ্গৰসেন তযো তযো খণা. তত্থ একেকস্স চিত্তস্স তীসু তীসু খণেসু সমতিংস সমতিংস কম্মজরূপানি উপ্পজ্জন্তি. ইতি সোল়সতিকা অট্ঠচত্তালীসং হোন্তি. এস নযো ততো পরেসুপি. তং সন্ধায ৰুত্তং ‘‘অট্ঠচত্তালীসকম্মজস্স রূপপৰেণী সম্বন্ধা হুত্ৰা পৰত্ততী’’তি. সচে পন ন সক্কোন্তীতি পটিসন্ধিচিত্তেন সদ্ধিং সমুট্ঠিতরূপানি সত্তরসমস্স ভৰঙ্গস্স পচ্চযং দাতুং সচে ন সক্কোন্তি. যদি হি পটিসন্ধিচিত্ততো সত্তরসমং চুতিচিত্তং সিযা, পটিসন্ধিচিত্তস্স ঠিতিভঙ্গক্খণেসুপি কম্মজরূপং ন উপ্পজ্জেয্য, পগেৰ ভৰঙ্গচিত্তক্খণেসু. তথা সতি নত্থেৰ তস্স চিত্তস্স পচ্চযলাভোতি পৰত্তি নপ্পৰত্ততি, পৰেণী ন ঘটিযতেৰ, অঞ্ঞদত্থু ৰিচ্ছিজ্জতি. তেনাহ ‘‘ৰোক্কমতিতি নাম হোতী’’তিআদি.

ইত্থত্তাযাতি ইত্থংপকারতায. যাদিসো গব্ভসেয্যকস্স অত্তভাৰো, তং সন্ধাযেতং ৰুত্তং. তস্স চ পঞ্চক্খন্ধা অনূনা এৰ হোন্তীতি আহ ‘‘এৰং পরিপুণ্ণপঞ্চক্খন্ধভাৰাযা’’তি. উপচ্ছিজ্জিস্সথাতি সন্তানৰিচ্ছেদেন ৰিচ্ছিন্দেয্য. সুদ্ধং নামরূপমেৰাতি ৰিঞ্ঞাণৰিরহিতং কেৰলং নামরূপমেৰ. অৰযৰানং পারিপূরি ৰুড্ঢি. থিরভাৰপ্পত্তি ৰিরূল়্হি. মহল্লকভাৰপ্পত্তি ৰেপুল্লং. তানি ¶ চ যথাক্কমং পঠমাদিৰযৰসেন হোন্তীতি ৰুত্তং ‘‘পঠমৰযৰসেনা’’তিআদি. ৰা-সদ্দো অনিযমত্থো, তেন ৰস্সসহস্সদ্ৰযাদীনং সঙ্গহো দট্ঠব্বো.

ৰিঞ্ঞাণমেৰাতি ¶ নিযমৰচনং, ইতো বাহিরকপ্পিতস্স অত্তনো, ইস্সরাদীনঞ্চ পটিক্খেপপদং, ন অৰিজ্জাদিফস্সাদিপটিক্খেপপদং পটিযোগীনিৰত্তনপদত্তা অৰধারণস্স. তেনাহ ‘‘এসেৰ হেতূ’’তিআদি. অযঞ্চ নযো হেট্ঠাপি সব্বপদেসু যথারহং ৰত্তব্বো. ইদানি ৰিঞ্ঞাণমেৰ নামরূপস্স পধানকারণন্তি ইমমত্থং ওপম্মৰসেন ৰিভাৰেতুং ‘‘যথা হী’’তিআদি ৰুত্তং. পচ্চেকং ৰিয সমুদিতস্সাপি নামরূপস্স ৰিঞ্ঞাণেন ৰিনা অত্তকিচ্চাসমত্থতং দস্সেতুং ‘‘ত্ৰং নামরূপং নামা’’তি একজ্ঝং গহণং. পুরেচারিকেতি পুব্বঙ্গমেৰ. ৰিঞ্ঞাণঞ্হি ¶ সহজাতধম্মানং পুব্বঙ্গমং. তেনাহ ভগৰা ‘‘মনোপুব্বঙ্গমা ধম্মা’’তি. (ধ. প. ১; নেত্তি. ৯০, ৯২; পেটকো. ১৩, ৮৩) বহুধাতি অনেকপ্পকারেন পচ্চযো হোতি.

কথং? ৰিপাকনামস্স হি পটিসন্ধিযং অঞ্ঞং ৰা ৰিঞ্ঞাণং সহজাতঅঞ্ঞমঞ্ঞনিস্সযৰিপাকআহারইন্দ্রিযসম্পযুত্তঅত্থিঅৰিগতপচ্চযেহি নৰধা পচ্চযো হোতি. ৰত্থুরূপস্স পটিসন্ধিযং সহজাতঅঞ্ঞমঞ্ঞনিস্সযৰিপাকআহারইন্দ্রিযৰিপ্পযুত্তঅত্থিঅৰিগতপচ্চযেহি নৰধা পচ্চযো হোতি. ঠপেত্ৰা পন ৰত্থুরূপং সেসরূপস্স ইমেসু নৰসু অঞ্ঞমঞ্ঞপচ্চযং অপনেত্ৰা সেসেহি অট্ঠহি পচ্চযেহি পচ্চযো হোতি. অভিসঙ্খারৰিঞ্ঞাণং পন অসঞ্ঞসত্তরূপস্স, পঞ্চৰোকারে ৰা কম্মজস্স সুত্তন্তিকপরিযাযতো উপনিস্সযৰসেন একধাৰ পচ্চযো হোতি. অৰসেসঞ্হি পঠমভৰঙ্গতো পভুতি সব্বম্পি ৰিঞ্ঞাণং তস্স নামরূপস্স যথারহং পচ্চযো হোতীতি ৰেদিতব্বং. অযমেত্থ সঙ্খেপো, ৰিত্থারতো পন পচ্চযনযে দস্সিযমানে সব্বাপি মহাপকরণকথা আনেতব্বা হোতীতি ন ৰিত্থারিতা. কথং পনেতং পচ্চেতব্বং ‘‘পটিসন্ধিনামরূপং ৰিঞ্ঞাণপচ্চযা হোতী’’তি? সুত্ততো, যুত্তিতো চ. পাল়িযঞ্হি ‘‘চিত্তানুপরিৰত্তিনো ধম্মা’’তিআদিনা (ধ. স. মাতিকা ৬২) নযেন বহুধা ৰেদনাদীনং ৰিঞ্ঞাণপচ্চযতা আগতা. যুত্তিতো পন ইধ চিত্তজেন রূপেন দিট্ঠেন অদিট্ঠস্সাপি রূপস্স ৰিঞ্ঞাণং পচ্চযো হোতীতি ৰিঞ্ঞাযতি. চিত্তেহি পসন্নে, অপ্পসন্নে ৰা তদনুরূপানি রূপানি উপ্পজ্জমানানি দিট্ঠানি, দিট্ঠেন চ অদিট্ঠস্স অনুমানং হোতীতি. ইমিনা ইধ ‘‘দিট্ঠেন চিত্তজরূপেন অদিট্ঠস্সাপি পটিসন্ধিরূপস্স ৰিঞ্ঞাণং পচ্চযো হোতী’’তি পচ্চেতব্বমেতং ¶ . কম্মসমুট্ঠানস্সাপি হি রূপস্স চিত্তসমুট্ঠানস্স ৰিয ৰিঞ্ঞাণপচ্চযতা পট্ঠানে আগতাতি.

১১৬. ইধ ¶ ¶ সমুদয-সদ্দো সমুদায-সদ্দো ৰিয সমূহপরিযাযোতি আহ ‘‘দুক্খরাসিসম্ভৰো’’তি. এককোতি অসহাযো রাজপরিসারহিতো. পস্সেয্যাম তে রাজভাৰং অম্হেহি ৰিনাতি অধিপ্পাযো. যথারহং পরিসং রঞ্জেতীতি হি রাজা. অত্থতোতি অত্থসিদ্ধিতো অৰদন্তম্পি ৰদতি ৰিয. ‘‘হদযৰত্থু’’ন্তি ইমিনাৰ তন্নিস্সযোপি গহিতো ৰাতি দট্ঠব্বং. আনন্তরিযভাৰতো নিস্সযনিস্সযোপি ‘‘নিস্সযো’’ ত্ৰেৰ ৰুচ্চতীতি. পটিসন্ধিৰিঞ্ঞাণং নাম ভৰেয্যাসি, নেতং ঠানং ৰিজ্জতীতি অত্থো. তেনাহ ‘‘পস্সেয্যামা’’তিআদি. বহুধাতি অনেকধা পচ্চযো হোতি. কথং? নামং তাৰ পটিসন্ধিযং সহজাতঅঞ্ঞমঞ্ঞনিস্সযৰিপাকসম্পযুত্তঅত্থিঅৰিগতপচ্চযেহি সত্তধা ৰিঞ্ঞাণস্স পচ্চযো হোতীতি. কিঞ্চি পনেত্থ হেতুপচ্চযেন, কিঞ্চি আহারপচ্চযেনাতি এৰং অঞ্ঞথাপি পচ্চযো হোতি. অৰিপাকং পন নামং যথাৰুত্তেসু পচ্চযেসু ঠপেত্ৰা ৰিপাকপচ্চযং ইতরেহি ছহি পচ্চযেহি পচ্চযো হোতি. কিঞ্চি পনেত্থ হেতুপচ্চযেন, কিঞ্চি আহারপচ্চযেনাতি অঞ্ঞথাপি পচ্চযো হোতি, তঞ্চ খো পৰত্তিযংযেৰ, ন পটিসন্ধিযং. রূপতো পন হদযৰত্থু পটিসন্ধিযং ৰিঞ্ঞাণস্স সহজাতঅঞ্ঞমঞ্ঞনিস্সযৰিপ্পযুত্তঅত্থি অৰিগতপচ্চযেহি ছধাৰ পচ্চযো হোতি. পৰত্তিযং পন সহজাতঅঞ্ঞমঞ্ঞপচ্চযৰজ্জিতেহি পঞ্চহি পুরেজাতপচ্চযেন সহ তেহেৰ পচ্চযেহি পচ্চযো হোতি. চক্খাযতনাদিভেদং পন পঞ্চৰিধম্পি রূপং যথাক্কমং চক্খুৰিঞ্ঞাণাদিভেদস্স ৰিঞ্ঞাণস্স নিস্সযপুরেজাতইন্দ্রিযৰিপ্পযুত্তঅত্থিঅৰিগতপচ্চযেহি পচ্চযো হোতীতি এৰং নামরূপং ৰিঞ্ঞাণস্স বহুধা পচ্চযো হোতীতি ৰেদিতব্বং.

য্ৰাযমনুক্কমেন ৰিঞ্ঞাণস্স নামরূপং, পটিসন্ধিনামরূপস্স ¶ , চ ৰিঞ্ঞাণং পতি পচ্চযভাৰো, সো কদাচি ৰিঞ্ঞাণস্স সাতিসযো, কদাচি নামরূপস্স, কদাচি উভিন্নং সদিসোতি তিৰিধোপি সো ‘‘এত্তাৰতা’’তি পদেন একজ্ঝং গহিতোতি দস্সেন্তো ‘‘ৰিঞ্ঞাণে…পে… পৰত্তেসূ’’তি ৰত্ৰা পুন যমিদম্পি ৰিঞ্ঞাণং নামরূপসঞ্ঞিতানং পঞ্চন্নং খন্ধানং অঞ্ঞমঞ্ঞনিস্সযেন পৰত্তানং এত্তকেন সব্বা সংসারৰট্টপ্পৰত্তীতি ইমমত্থং দস্সেন্তো ‘‘এত্তকেন…পে… পটিসন্ধিযো’’তি আহ. তত্থ এত্তকেনাতি এত্তকেনেৰ, ন ইতো অঞ্ঞেন কেনচি কারকৰেদকসভাৰেন অত্তনা, ইস্সরাদিনা ৰাতি অত্থো. অন্তোগধাৰধারণঞ্হেতং পদং.

ৰচনমত্তমেৰ ¶ অধিকিচ্চাতি দাসাদীসু সিরিৰড্ঢকাদি-সদ্দা ৰিয অতথত্তা ৰচনমত্তমেৰ অধিকারং কত্ৰা পৰত্তস্স. তেনাহ ‘‘অত্থং অদিস্ৰা’’তি. ৰোহারস্সাতি ৰোহরণমত্তস্স. পথোতি পৰত্তিমগ্গো পৰত্তিযা ৰিসযো. যস্মা সরণকিরিযাৰসেন পুগ্গলো ‘‘সতো’’তি ৰুচ্চতি, সম্পজাননকিরিযাৰসেন ‘‘সম্পজানো’’তি, তস্মা ৰুত্তং ‘‘কারণাপদেসৰসেনা’’তি. কারণং ¶ নিদ্ধারেত্ৰা উত্তি নিরুত্তীতি. একমেৰ অত্থং ‘‘পণ্ডিতো’’তিআদিনা পকারতো ঞাপনতো ‘‘পঞ্ঞত্তী’’তি ৰদন্তি. সো এৰ হি ‘‘পণ্ডিতো’’তি চ ‘‘ব্যত্তো’’তি চ ‘‘মেধাৰী’’তি চ পঞ্ঞাপীযতীতি. পণ্ডিচ্চপ্পকারতো পন পণ্ডিতো, ৰেয্যত্তিযপ্পকারতো ব্যত্তোতি পঞ্ঞাপীযতীতি এৰং পকারতো পঞ্ঞাপনতো পঞ্ঞত্তি. যস্মা ইধ অধিৰচননিরুত্তিপঞ্ঞত্তিপদানি সমানত্থানি. সব্বঞ্চ ৰচনং অধিৰচনাদিভাৰং ভজতি, তস্মা কেসুচি ৰচনৰিসেসেসু ৰিসেসেন পৰত্তেহি অধিৰচনাদিসদ্দেহি সব্বানি ৰচনানি পঞ্ঞত্তিঅত্থপ্পকাসনসামঞ্ঞেন ৰুত্তানীতি ইমিনা অধিপ্পাযেন অযমত্থযোজনা কতাতি ৰেদিতব্বা.

অথ ৰা অধি-সদ্দো উপরিভাৰে, উপরি ৰচনং অধিৰচনং. কস্স উপরি? পকাসেতব্বস্স অত্থস্সাতি পাকটো যমত্থো. অধীনং ৰা ৰচনং অধিৰচনং. কেন অধীনং? অত্থেন. তথা তংতংঅত্থপ্পকাসেন ¶ নিচ্ছিতং, নিযতং ৰা ৰচনং নিরুত্তি. পথৰীধাতুপুরিসাদিতংতংপকারেন ঞাপনতো পঞ্ঞত্তীতি এৰং অধিৰচনাদিপদানং সব্বৰচনেসু পৰত্তি ৰেদিতব্বা, অঞ্ঞথা সিরিৰড্ঢকধনৰড্ঢকপ্পকারানমেৰ নিরুত্তিতা, ‘‘পণ্ডিতো ৰিযত্তো’’তি এৰং পকারানমেৰ একমেৰ অত্থং তেন তেন পকারেন ঞাপেন্তানং পঞ্ঞত্তিতা চ আপজ্জেয্যাতি. এৰং তীহিপি নামেহি ৰুত্তস্স ৰোহারস্স পৰত্তিমগ্গোপি সহ ৰিঞ্ঞাণেন নামরূপন্তি এত্তাৰতাৰ ইচ্ছিতব্বো. তেনাহ ‘‘ইতী’’তিআদি. পঞ্ঞায অৰচরিতব্বন্তি পঞ্ঞায পৰত্তিতব্বং, ঞেয্যন্তি অত্থো. তেনাহ ‘‘জানিতব্ব’’ন্তি. ৰট্টন্তি কিলেসৰট্টং, কম্মৰট্টং, ৰিপাকৰট্টন্তি তিৰিধম্পি ৰট্টং. ৰত্ততীতি পৰত্ততি. তযিদং ‘‘জাযেথা’’তিআদিনা পঞ্চহি পদেহি ৰুত্তস্স অত্থস্স নিগমনৰসেন ৰুত্তং. আদি-সদ্দেন ইত্থীতিপুরিসাতিআদীনম্পি সঙ্গহো দট্ঠব্বো. নামপঞ্ঞত্তত্থাযাতি খন্ধাদিফস্সাদিসত্তাদিইত্থাদিনামস্স পঞ্ঞাপনত্থায. ৰত্থুপি এত্তাৰতাৰ. তেনাহ ‘‘খন্ধপঞ্চকম্পি এত্তাৰতাৰ পঞ্ঞাযতী’’তি. এত্তাৰতা এত্তকেন, সহ ৰিঞ্ঞাণেন নামরূপপ্পৰত্তিযাতি অত্থো.

অত্তপঞ্ঞত্তিৰণ্ণনা

১১৭. অনুসন্ধিযতি ¶ এতেনাতি অনুসন্ধি, হেট্ঠা আগতদেসনায অনুসন্ধানৰসেন পৰত্তা উপরিদেসনা, সা পঠমপদস্স দস্সিতা, ইদানি দুতিযপদস্স দস্সেতব্বাতি তমত্থং দস্সেন্তো ‘‘ইতি ভগৰা’’তিআদিমাহ. রূপিন্তি রূপৰন্তং. পরিত্তন্তি ন ৰিপুলং, অপ্পকন্তি অত্থো. যস্মা অত্তা নাম কোচি পরমত্থতো নত্থি. কেৰলং পন দিট্ঠিগতিকানং পরিকপ্পিতমত্তং ¶ , তস্মা যত্থ নেসং অত্তসঞ্ঞা, যথা চস্স রূপিভাৰাদিপরিকপ্পনা হোতি, তং দস্সেন্তো ‘‘যো’’তিআদিমাহ. রূপিং পরিত্তন্তি অত্তনো উপট্ঠিতকসিণরূপৰসেন রূপিং, তস্স অৰড্ঢিতভাৰেন পরিত্তং. পঞ্ঞপেতি নীলকসিণাদিৰসেন নানাকসিণলাভী. তন্তি অত্তানং ¶ . অনন্তন্তি কসিণনিমিত্তস্স অপ্পমাণতায পরিচ্ছেদস্স অনুপট্ঠানতো অন্তরহিতং. উগ্ঘাটেত্ৰাতি ভাৰনায অপনেত্ৰা. নিমিত্তফুট্ঠোকাসন্তি তেন কসিণনিমিত্তেন ফুট্ঠপ্পদেসং. তেসূতি চতূসু অরূপক্খন্ধেসু. ৰিঞ্ঞাণমত্তমেৰাতি ‘‘ৰিঞ্ঞাণমযো অত্তা’’তি এৰংৰাদী.

১১৮. ‘‘এতরহী’’তি সাৰধারণমিদং পদন্তি তদত্থং দস্সেন্তো ‘‘ইদানেৰা’’তি ৰত্ৰা অৰধারণেন নিৰত্তিতমত্থং আহ ‘‘ন ইতো পর’’ন্তি. তত্থ তত্থেৰ সত্তা উচ্ছিজ্জন্তীতি উচ্ছেদৰাদী, তেনাহ ‘‘উচ্ছেদৰসেনেতং ৰুত্ত’’ন্তি. ভাৰিন্তি সব্বং সদা ভাৰিং অৰিনস্সনকং. তেনাহ ‘‘সস্সতৰসেনেতং ৰুত্ত’’ন্তি. অতথাসভাৰন্তি যথা পরৰাদী ৰদন্তি, ন তথা সভাৰং. তথভাৰাযাতি উচ্ছেদভাৰায ৰা সস্সতভাৰায ৰা. অনিযমৰচনঞ্হেতং ৰুত্তং সামঞ্ঞজোতনাৰসেন. সম্পাদেস্সামীতি তথভাৰং অস্স সম্পন্নং কত্ৰা দস্সযিস্সামি, পতিট্ঠাপেস্সামীতি অত্থো. তথা হি ৰক্খতি ‘‘সস্সতৰাদঞ্চ জানাপেত্ৰা’’তিআদি. (দী. নি. অট্ঠ. ২.১১৮) ইমিনাতি ‘‘অতথং ৰা পনা’’তিআদি ৰচনেন, অনুচ্ছেদসভাৰম্পি সমানং সস্সতৰাদিনো মতিৰসেনাতি অধিপ্পাযো. উপকপ্পেস্সামীতি উপেচ্চ সমত্থযিস্সামি.

এৰং সমানন্তি এৰং ভূতং সমানং. রূপকসিণজ্ঝানং রূপং উত্তরপদলোপেন, অধিগমনৰসেন তং এতস্স অত্থীতি রূপীতি আহ ‘‘রূপিন্তি রূপকসিণলাভি’’ন্তি. পরিত্তত্তানুদিট্ঠীতি এত্থ রূপী-সদ্দোপিআৰুত্তিআদিনযেন আনেত্ৰা ৰত্তব্বো, রূপীভাৰম্পি হি সো দিট্ঠিগতিকো পরিত্তভাৰং ৰিয ¶ অত্তনো অভিনিৰিস্স ঠিতোতি. অরূপিন্তি এত্থাপি এসেৰ নযো. ‘‘পত্তপলাসবহুলগচ্ছসঙ্খেপেন ঘনগহনজটাৰিতানা ¶ নাতিদীঘসন্তানা ৰল্লি, তব্বিপরীতা লতা’’তি ৰদন্তি. অপ্পহীনট্ঠেনাতি মগ্গেন অসমুচ্ছিন্নভাৰেন. কারণলাভে সতি উপ্পজ্জনারহতা অনুসযনট্ঠো.

অরূপকসিণং নাম কসিণুগ্ঘাটিং আকাসং, ন পরিচ্ছিন্নাকাসকসিণং. ‘‘উভযম্পি অরূপকসিণমেৰা’’তি কেচি. অরূপক্খন্ধগোচরং ৰাতি ৰেদনাদযো অরূপক্খন্ধা ‘‘অত্তা’’তি অভিনিৰেসস্স গোচরো এতস্সাতি অরূপক্খন্ধগোচরো, দিট্ঠিগতিকো, তং অরূপক্খন্ধগোচরং. ৰা-সদ্দো ৰুত্তৰিকপ্পত্থো. সদ্দযোজনা পন অরূপং অরূপক্খন্ধা গোচরভূতা এতস্স অত্থীতি অরূপী, তং অরূপিং. লাভিনো চত্তারোতি রূপকসিণাদিলাভৰসেন তং তং দিট্ঠিৰাদং সযমেৰ পরিকপ্পেত্ৰা ¶ তং আদায পগ্গয্হ পঞ্ঞাপনকা চত্তারো দিট্ঠিগতিকা. তেসং অন্তেৰাসিকাতি তেসং লাভীনং ৰাদং পচ্চক্খতো, পরম্পরায চ উগ্গহেত্ৰা তথেৰ নং খমিত্ৰা রোচেত্ৰা পঞ্ঞাপনকা চত্তারো. তক্কিকা চত্তারোতি কসিণজ্ঝানস্স অলাভিনো কেৰলং তক্কনৰসেনেৰ যথাৰুত্তে চত্তারো দিট্ঠিৰাদে সযমেৰ অভিনিৰিস্স পগ্গয্হ ঠিতা চত্তারো. তেসং অন্তেৰাসিকা পুব্বে ৰুত্তনযেন ৰেদিতব্বা.

নঅত্তপঞ্ঞত্তিৰণ্ণনা

১১৯. আরদ্ধৰিপস্সকোপীতি সম্পরাযিকৰিপস্সকোপি, তেন বলৰৰিপস্সনায ঠিতং পুগ্গলং দস্সেতি. ন পঞ্ঞপেতি এৰ অবহুস্সুতো পীতি অধিপ্পাযো. তাদিসো হি ৰিপস্সনায আনুভাৰো. সাসনিকোপি ঝানাভিঞ্ঞালাভী ‘‘ন পঞ্ঞপেতী’’তি ন ৰত্তব্বোতি সো ইধ ন উদ্ধটো. ইদানি নেসং অপঞ্ঞাপনে কারণং দস্সেতি ‘‘এতেসঞ্হী’’তিআদিনা. ইচ্চেৰ ঞাণং হোতি, ন ৰিপরীতগ্গাহো তস্স কারণস্স দূরসমুস্সারিতত্তা. অরূপক্খন্ধা ইচ্চেৰ ঞাণং হোতীতি যোজনা.

অত্তসমনুপস্সনাৰণ্ণনা

১২১. দিট্ঠিৰসেন সমনুপস্সিত্ৰা, ন ঞাণৰসেন. সা চ সমনুপস্সনা অত্থতো দিট্ঠিদস্সনৰসেন.

‘‘ৰেদনং ¶ অত্ততো সমনুপস্সতী’’তি এৰং ¶ আগতা ৰেদনাক্খন্ধৰত্থুকা সক্কাযদিট্ঠি. ইট্ঠাদিভেদং আরম্মণং ন পটিসংৰেদেতীতি অপ্পটিসংৰেদনোতি ৰেদকভাৰপটিক্খেপমুখেন সঞ্জাননাদিভাৰোপি পটিক্খিত্তো হোতি তদৰিনাভাৰতোতি আহ ‘‘ইমিনা রূপক্খন্ধৰত্থুকা সক্কাযদিট্ঠি কথিতা’’তি. ‘‘অত্তা মে ৰেদিযতী’’তি ইমিনা অপ্পটিসংৰেদনত্তং পটিক্খিপতি. তেনাহ ‘‘নোপি অপ্পটিসংৰেদনো’’তি. ‘‘ৰেদনাধম্মো’’তি পন ইমিনা ‘‘ৰেদনা মে অত্তা’’তি ইমং ৰাদং পটিক্খিপতি. ৰেদনাসঙ্খাতো ধম্মো এতস্স অত্থীতি হি ৰেদনাধম্মোতি ৰেদনায সমন্নাগতভাৰং তস্স পটিজানাতি. তেনাহ ‘‘এতস্স চ ৰেদনাধম্মো অৰিপ্পযুত্তসভাৰো’’তি. সঞ্ঞাসঙ্খারৰিঞ্ঞাণক্খন্ধৰত্থুকা সক্কাযদিট্ঠি কথিতাতি আনেত্ৰা সম্বন্ধো. ‘‘ৰেদনাসম্পযুত্তত্তা ৰেদিযতী’’তি তংসম্পযোগতো তংকিচ্চকতমাহ যথা চেতনাযোগতো চেতনো পুরিসোতি. সব্বেসম্পি তং সারম্মণধম্মানং আরম্মণানুভৰনং লব্ভতেৰ, তঞ্চ খো একদেসতো ফুট্ঠতামত্ততো ¶ , ৰেদনায পন ৰিস্সৰিতায সামিভাৰেন আরম্মণরসানুভৰনন্তি. তস্সা ৰসেন সঞ্ঞাদযোপি তংসম্পযুত্তত্তা ‘‘ৰেদিযতী’’তি ৰুচ্চন্তি. তথা হি ৰুত্তং অট্ঠসালিনিযং ‘‘আরম্মণরসানুভৰনট্ঠানং পত্ৰা সেসসম্পযুত্তধম্মা একদেসমত্তকমেৰ অনুভৰন্তী’’তি, (ধ. স. অট্ঠ. ১ ধম্মুদ্দেসকথা) রাজসূদনিদস্সনেন ৰাযমত্থো তত্থ ৰিভাৰিতো এৰ. এতস্সাতি সঞ্ঞাদিক্খন্ধত্তযস্স. ‘‘অৰিপ্পযুত্তসভাৰো’’তি ইমিনা অৰিসংযোগজনিতং কঞ্চি ৰিসেসং ঠানং দীপেতি.

১২২. তত্থাতি তেসু ৰারেসু. তীসু দিট্ঠিগতিকেসূতি ‘‘ৰেদনা মে অত্তা’’তি, ‘‘অপ্পটিসংৰেদনো মে অত্তা’’তি, ‘‘ৰেদনাধম্মো মে অত্তা’’তি চ এৰংৰাদেসু ¶ তীসু দিট্ঠিগতিকেসু. তিস্সন্নং ৰেদনানং ভিন্নসভাৰত্তা সুখং ৰেদনং ‘‘অত্তা’’তি সমনুপস্সতো দুক্খং, অদুক্খমসুখং ৰা ৰেদনং ‘‘অত্তা’’তি সমনুপস্সনা ন যুত্তা. এৰং সেসদ্ৰযে পীতি আহ ‘‘যো যো যং যং ৰেদনং অত্তাতি সমনুপস্সতী’’তি.

১২৩. ‘‘হুত্ৰা অভাৰতো’’তি ইমিনা উদযব্বযৰন্ততায অনিচ্চাতি দস্সেতি, ‘‘তেহি তেহী’’তিআদিনা অনেককারণসঙ্খতত্তা সঙ্খতাতি. তং তং পচ্চযন্তি ‘‘ইন্দ্রিযং, আরম্মণং, ৰিঞ্ঞাণং, সুখ, ৰেদনীযো ফস্সো’’তি ¶ এৰং আদিকং তং তং অত্তনো কারণং পটিচ্চ নিস্সায সম্মা সস্সতাদিভাৰস্স, উচ্ছেদাদিভাৰস্স চ অভাৰেন ঞাযেন সমকারণেন সদিসকারণেন অনুরূপকারণেন উপ্পন্না. খযসভাৰাতি খযধম্মা, ৰযসভাৰাতি ৰযধম্মা ৰিরজ্জনসভাৰাতি ৰিরাগধম্মা, নিরুজ্ঝনসভাৰাতি নিরোধধম্মা, চতূহিপি পদেহি ৰেদনায ভঙ্গভাৰমেৰ দস্সেতি. তেনাহ ‘‘খযোতি…পে… খযধম্মাতিআদি ৰুত্ত’’ন্তি.

ৰিগতোতি সভাৰৰিগমেন ৰিগতো. একস্সেৰাতি একস্সেৰ দিট্ঠিগতিকস্স. তীসুপি কালেসূতি তিস্সন্নং ৰেদনানং পৰত্তিকালেসু. এসো মে অত্তাতি ‘‘এসো সুখৰেদনাসভাৰো, দুক্খঅদুক্খমসুখৰেদনাসভাৰো মে অত্তা’’তি কিং পন হোতী, একস্সেৰ ভিন্নসভাৰতং অনুম্মত্তকো কথং পচ্চেতীতি অধিপ্পাযেন পুচ্ছতি. ইতরো এৰম্পি তস্স ন হোতি যেৰাতি দস্সেন্তো ‘‘কিং পন ন ভৰিস্সতী’’তিআদিমাহ. ৰিসেসেনাতি সুখাদিৰিভাগেন. সুখঞ্চ দুক্খঞ্চাতি এত্থ চ-সদ্দেন অদুক্খমসুখং সঙ্গণ্হাতি, সুখসঙ্গহমেৰ ৰা তেন কতং সন্তসুখুমভাৰতো. অৰিসেসেনাতি অৰিভাগেন ৰেদনাসামঞ্ঞেন. ৰোকিণ্ণন্তি সুখাদিভেদেন ৰোমিস্সকং. তং তিৰিধম্পি ৰেদনং এস ¶ দিট্ঠিগতিকো একজ্ঝং গহেত্ৰা অত্তাতি সমনুপস্সতি. একক্খণে চ বহূনং ৰেদনানং উপ্পাদো আপজ্জতি অৰিসেসেন ৰেদনাসভাৰত্তা. অত্তনো হি তস্মিং ¶ সতি সদা সব্বৰেদনাপৰত্তিপ্পসঙ্গতো দিট্ঠিগতিকো অগতিযা একক্খণেপি বহূনম্পি ৰেদনানং উপ্পত্তিং পটিজানেয্যাতি তস্স অৰসরং অদেন্তো ‘‘ন একক্খণে বহূনং ৰেদনানং উপ্পত্তি অত্থী’’তি আহ, পচ্চক্খৰিরুদ্ধমেতন্তি অধিপ্পাযো. এতেন পেতং নক্খমতীতি এতেন ৰিরুদ্ধত্তসাধনেনপি সব্বেন সব্বং অত্তনো অভাৰেনপি পণ্ডিতানং ন রুচ্চতি, এতং দস্সনং ধীরা নক্খমন্তীতি অত্থো.

১২৪. ইন্দ্রিযবদ্ধেপি রূপপ্পবন্ধে ৰাযোধাতুৰিপ্ফারৰসেন কাচি কিরিযা নাম লব্ভতীতি সুদ্ধরূপক্খন্ধেপি যত্থ কদাচি ৰাযোধাতুৰিপ্ফারো লব্ভতি, তমেৰ নিদস্সনভাৰেন গণ্হন্তো ‘‘তালৰণ্টে ৰা ৰাতপানে ৰা’’তি আহ. ৰেদনাধম্মেসূতি ৰেদনাধম্মৰন্তেসু. ‘‘অহমস্মী’’তি ইমিনা তযোপি খন্ধে একজ্ঝং গহেত্ৰা অহংকারস্স উপ্পজ্জনাকারো ৰুত্তোতি. ‘‘অযমহমস্মী’’তি পন ইমিনা তত্থ একং একং গহেত্ৰা অহংকারস্স উপ্পজ্জনাকারো ৰুত্তো. তেনাহ ‘‘একধম্মোপী’’তিআদি ¶ . তন্তি ‘‘অহমস্মী’’তি অহংকারুপ্পত্তিং. সা হি চতুক্খন্ধনিরোধেন অনুপলব্ভমানসন্নিস্সযা সসৰিসাণতিখিণতা ৰিয ন ভৰেয্যাৰাতি.

এত্তাৰতাতি ‘‘কিত্তাৰতা চ আনন্দা’’তিআদিনা ‘‘তন্তাকুলকজাতা’’তি পদস্স অনুসন্ধিদস্সনৰসেন পৰত্তেন এত্তকেন দেসনাধম্মেন. কামং হেট্ঠাপি ৰট্টকথাৰ কথিতা, ইধ পন দিট্ঠিগতিকস্স ৰট্টতো সীসুক্খিপনাসমত্থতাৰিভাৰনৰসেন মিচ্ছাদিট্ঠিযা মহাসাৰজ্জভাৰদীপনিযকথা পকাসিতাতি তং দস্সেন্তো ‘‘ৰট্টকথা কথিতা’’তি আহ. ননু ৰট্টমূলং অৰিজ্জা তণ্হা, তা অনামসিত্ৰা ততো অঞ্ঞথা কস্মা ইধ ৰট্টকথা কথিতাতি আহ ‘‘ভগৰা ¶ হী’’তিআদি. অৰিজ্জাসীসেনাতি অৰিজ্জং উত্তমঙ্গং কত্ৰা, অৰিজ্জামুখেনাতি অত্থো. কোটি ন পঞ্ঞাযতীতি ‘‘অসুকস্স নাম সম্মাসম্বুদ্ধস্স, চক্কৰত্তিনো ৰা কালে অৰিজ্জা উপ্পন্না, ন ততো পুব্বে অত্থী’’তি অৰিজ্জায আদি মরিযাদা অপ্পটিহতস্স মম সব্বঞ্ঞুতঞ্ঞাণস্সাপি ন পঞ্ঞাযতি অৰিজ্জমানত্তা এৰাতি অত্থো. অযং পচ্চযো ইদপ্পচ্চযো, তস্মা ইদপ্পচ্চযা, ইমস্মা আসৰাদিকারণাতি অত্থো. ভৰতণ্হাযাতি ভৰসংযোজনভূতায তণ্হায. ভৰদিট্ঠিযাতি সস্সতদিট্ঠিযা. ‘‘তত্থ তত্থ উপপজ্জন্তো’’তি ইমিনা ‘‘ইতো এত্থ এত্তো ইধা’’তি এৰং অপরিযন্তং অপরাপরুপ্পত্তিং দস্সেতি. তেনাহ ‘‘মহাসমুদ্দে’’তিআদি.

১২৬. পচ্চযাকারমূল়্হস্সাতি ভূতকথনমেতং, ন ৰিসেসনং. সব্বোপি হি দিট্ঠিগতিকো পচ্চযাকারমূল়্হো এৰাতি. ৰিৰট্টং কথেন্তোতি ৰট্টতো ৰিনিমুত্তত্তা ৰিৰট্টং, ৰিমোক্খো, তং কথেন্তো ¶ . কারকস্সাতি সত্থুওৰাদকারকস্স, সম্মাপটিপজ্জন্তস্সাতি অত্থো. তেনাহ ‘‘সতিপট্ঠানৰিহারিনো’’তি. সো হি ৰেদনানুপস্সনায, ধম্মানুপস্সনায চ সম্মাপটিপত্তিযা ‘‘নেৰ ৰেদনং অত্তানং সমনুপস্সতী’’তিআদিনা ৰত্তব্বতং অরহতি. তেনাহ ‘‘এৰরূপো হী’’তিআদি. সব্বধম্মেসূতি সব্বেসু তেভূমকধম্মেসু. তে হি সম্মসনীযা. ন অঞ্ঞন্তি ৰেদনায অঞ্ঞং সঞ্ঞাদিধম্মং অত্তানং ন সমনুপস্সতীতি. ‘‘খন্ধলোকাদযো’’তি রূপাদিধম্মা এৰ ৰুচ্চন্তি, তেসং সমূহোতি দস্সেতুং ‘‘রূপাদীসু ধম্মেসূ’’তি ৰুত্তং. ন উপাদিযতি দিট্ঠিতণ্হাগাহৰসেন. ‘‘সেয্যোহমস্মী’’তিআদিনা (সং. নি. ৪.১০৮; মহানি. ২১, ১৭৮; ধ. স. ১১২১; ৰিভ. ৮৩২, ৮৬৬) পৰত্তমানমঞ্ঞনাপি ¶ তণ্হাদিট্ঠিমঞ্ঞনা ৰিয পরিতস্সনরূপা এৰাতি আহ ‘‘তণ্হাদিট্ঠিমানপরিতস্সনাযপী’’তি.

সা এৰং দিট্ঠীতি সা অরহতো এৰংপকারা দিট্ঠীতি যো ৰদেয্য ¶ , তদকল্লং, তং ন যুত্তন্তি অত্থো. এৰমস্স দিট্ঠীতি এত্থাপি এৰংপকারা অস্স অরহতো দিট্ঠীতিআদিনা যোজেতব্বং. এৰঞ্হি সতীতি যো ৰদেয্য ‘‘হোতি তথাগতো পরং মরণা ইতিস্স দিট্ঠী’’তি, তস্স চে ৰচনং তথেৰাতি অত্থো. ‘‘অরহা ন কিঞ্চি জানাতী’’তি ৰুত্তং ভৰেয্য জানতো তথা দিট্ঠিযা অভাৰতো. তেনেৰাতি তথা ৰত্তুমযুত্তত্তা এৰ. চতুন্নম্পি নযানন্তি ‘‘হোতি তথাগতো’’তিআদিনা আগতানং চতুন্নং ৰারানং. আদিতো তীসু ৰারেসু সঙ্খিপিত্ৰা পরিযোসানৰারে ৰিত্থারিতত্তা ‘‘অৰসানে ‘তং কিস্স হেতূ’তিআদিমাহা’’তি ৰুত্তং. ‘‘আদিতো তীসু ৰারেসু তথেৰ দেসনা পৰত্তা, যথা পরিযোসানৰারে, পাল়ি পন সঙ্খিত্তা’’তি কেচি.

ৰোহারোতি ‘‘সত্তো ইত্থী পুরিসো’’তিআদিনা, ‘‘খন্ধাআযতনানী’’তিআদিনা, ‘‘ফস্সো ৰেদনা’’তিআদিনা চ ৰোহারিতব্বৰোহারো. তস্স পন ৰোহারস্স পৰত্তিট্ঠানং নাম সঙ্খেপতো ইমে এৰাতি আহ ‘‘খন্ধা আযতনানি ধাতুযো’’তি. যস্মা নিব্বানং পুব্বভাগে সঙ্খারানং নিরোধভাৰেনেৰ পঞ্ঞাপিযতি চ, তস্মা তস্সাপি খন্ধমুখেন অৰচরিতব্বতা লব্ভতীতি ‘‘পঞ্ঞায অৰচরিতব্বং খন্ধপঞ্চক’’ন্তি ৰুত্তং. তেনাহ ভগৰা ‘‘ইমস্মিংযেৰ ব্যামমত্তে কল়েৰরে সসঞ্ঞিম্হি সমনকে লোকঞ্চ পঞ্ঞপেমি লোকসমুদযঞ্চ লোকনিরোধঞ্চ লোকনিরোধগামিনিঞ্চ পটিপদ’’ন্তি. (সং. নি. ১.১০৭; অ. নি. ৪.৪৫) পঞ্ঞাৰচরন্তি ৰা তেভূমকধম্মানমেতং গহণন্তি ‘‘খন্ধপঞ্চক’’ন্ত্ৰেৰ ৰুত্তং, তস্মা ‘‘যাৰতা পঞ্ঞা’’তি এত্থাপি লোকিযপঞ্ঞায এৰ গহণং দট্ঠব্বং. ৰট্টকথা হেসাতি. তথা হি ‘‘যাৰতা ৰট্টং ৰট্টতি’’ ইচ্চেৰ ৰুত্তং. তেনেৰাহ ‘‘তন্তাকুলকপদস্সেৰ অনুসন্ধি দস্সিতো’’তি. যস্মা ভগৰা দিট্ঠিসীসেনেত্থ ৰট্টকথং কথেত্ৰা যথানুসন্ধিনাপি ৰট্টকথং কথেসি, তস্মা ‘‘তন্তাকুলকপদস্সেৰ ¶ ¶ অনুসন্ধি দস্সিতো’’তি সাৰধারণং কত্ৰা ৰুত্তং. পটিচ্চসমুপ্পাদকথা পনেত্থ যাৰদেৰ তস্স গম্ভীরভাৰৰিভাৰনত্থায ৰিত্থারিতা, ৰিৰট্টকথাপি সমানা ইধ পচ্চামট্ঠাতি দট্ঠব্বং.

সত্তৰিঞ্ঞাণট্ঠিতিৰণ্ণনা

১২৭. গচ্ছন্তো ¶ গচ্ছন্তোতি সমথপটিপত্তিযং সুপ্পতিট্ঠিতো হুত্ৰা ৰিপস্সনাগমনেন, মগ্গগমনেন চ গচ্ছন্তো গচ্ছন্তো. উভোহি ভাগেহি মুচ্চনতো উভতোভাগৰিমুত্তো নাম হোতি. সো ‘‘এৰং অসমনুপস্সন্তো’’তি ৰুত্তো ৰিপস্সনাযানিকোতি কত্ৰা ‘‘যো চ ন সমনুপস্সতীতি ৰুত্তো সো যস্মা গচ্ছন্তো গচ্ছন্তো পঞ্ঞাৰিমুত্তো নাম হোতী’’তি ৰুত্তং. হেট্ঠা ৰুত্তানন্তি ‘‘কিত্তাৰতা চ, আনন্দ, অত্তানং ন পঞ্ঞপেন্তো ন পঞ্ঞাপেতী’’তিআদিনা (দী. নি. ২.১১৯), ‘‘যতো খো, আনন্দ, ভিক্খু নেৰ ৰেদনং অত্তানং সমনুপস্সতী’’তিআদিনা (দী. নি. ২.১২৫ আদযো) চ হেট্ঠা পাল়িযং আগতানং দ্ৰিন্নং পুথুজ্জনভিক্খূনং. নিগমনন্তি নিস্সরণং. নামন্তি পঞ্ঞাৰিমুত্তাদিনামং.

পটিসন্ধিৰসেন ৰুত্তাতি নানত্তকাযনানত্তসঞ্ঞিতাৰিসেসৰিসিট্ঠপটিসন্ধিৰসেন ৰুত্তা সত্ত ৰিঞ্ঞাণট্ঠিতিযো. তংতংসত্তনিকাযং পতি নিস্সযতো হি নানত্তকাযাদিতা তংপরিযাপন্নপটিসন্ধিসমুদাগতাতি দট্ঠব্বা তদভিনিব্বত্তককম্মভৰস্স তথা আযূহিতত্তা. চতস্সো আগমিস্সন্তীতি রূপৰেদনাসঞ্ঞাসঙ্খারক্খন্ধৰসেন চতস্সো ৰিঞ্ঞাণট্ঠিতিযো আগমিস্সন্তি ‘‘রূপুপাযং ৰা আৰুসো ৰিঞ্ঞাণং তিট্ঠমানং তিট্ঠতী’’তিআদিনা (দী. নি. ৩.৩১১). ৰিঞ্ঞাণপতিট্ঠানস্সাতি পটিসন্ধিৰিঞ্ঞাণস্স এতরহি ¶ পতিট্ঠানকারণস্স. অত্থতো ৰুত্তৰিসেসৰিসিট্ঠা পঞ্চৰোকারে রূপৰেদনাসঞ্ঞাসঙ্খারক্খন্ধা, চতুৰোকারে ৰেদনাদযো তযো খন্ধা ৰেদিতব্বা. সত্তাৰাসভাৰং উপাদায ‘‘দ্ৰে চ আযতনানীতি দ্ৰে নিৰাসট্ঠানানী’’তি ৰুত্তং. নিৰাসট্ঠানপরিযাযোপি আযতনসদ্দো হোতি যথা ‘‘দেৰাযতনদ্ৰয’’ন্তি. সব্বন্তি ৰিঞ্ঞাণট্ঠিতি আযতনদ্ৰযন্তি সকলং. তস্মা গহিতং তত্থ একমেৰ অগ্গহেত্ৰাতি অধিপ্পাযো. পরিযাদানং অনৰসেসগ্গহণং ন গচ্ছতি ৰট্টং ৰিঞ্ঞাণট্ঠিতিআযতনদ্ৰযানং অঞ্ঞমঞ্ঞঅন্তোগধত্তা.

নিদস্সনত্থে নিপাতো, তস্মা সেয্যথাপি মনুস্সাতি যথা মনুস্সাতি ৰুত্তং হোতি. ৰিসেসো হোতিযেৰ সতিপি বাহিরস্স কারকস্স অভেদে অজ্ঝত্তিকস্স ভিন্নত্তা. নানত্তং কাযে এতেসং, নানত্তো ¶ ৰা কাযো এতেসন্তি নানত্তকাযা, ইমিনা নযেন সেসপদেসুপি ¶ অত্থো ৰেদিতব্বো. নেসন্তি মনুস্সানং. নানত্তা সঞ্ঞা এতেসং অত্থীতি নানত্তসঞ্ঞিনো. সুখসমুস্সযতো ৰিনিপাতো এতেসং অত্থীতি ৰিনিপাতিকা সতিপি দেৰভাৰে দিব্বসম্পত্তিযা অভাৰতো, অপাযেসু ৰা গতো নত্থি নিপাতো এতেসন্তি ৰিনিপাতিকা. তেনাহ ‘‘চতুঅপাযৰিনিমুত্তা’’তি. ধম্মপদন্তি সতিপট্ঠানাদিধম্মকোট্ঠাসং. ৰিজানিযাতি সুতমযেন তাৰ ঞাণেন ৰিজানিত্ৰা. তদনুসারেন যোনিসোমনসিকারং পরিব্রূহন্তো সীলৰিসুদ্ধিআদিকং সম্মাপটিপত্তিং অপি পটিপজ্জেম. সা চ পটিপত্তি হিতায দিট্ঠধম্মিকাদিসকলহিতায অম্হাকং সিযা. ইদানি তত্থ সীলপটিপত্তিং তাৰ ৰিভাগেন দস্সেন্তো ‘‘পাণেসু চা’’তি গাথমাহ.

ব্রহ্মকাযে পঠমজ্ঝাননিব্বত্তে ব্রহ্মসমূহে, ব্রহ্মনিকাযে ৰা ভৰাতি ব্রহ্মকাযিকা. মহাব্রহ্মুনো পরিসায ভৰাতি ব্রহ্মপারিসজ্জা তস্স পরিচারকট্ঠানে ঠিতত্তা. মহাব্রহ্মুনো পুরোহিতট্ঠানে ঠিতাতি ব্রহ্মপুরোহিতা ¶ . আযুৰণ্ণাদীহি মহন্তো ব্রহ্মানোতি মহাব্রহ্মুনো. সতিপি তেসং তিৰিধানম্পি পঠমেন ঝানেন অভিনিব্বত্তভাৰে ঝানস্স পন পৰত্তিভেদেন অযং ৰিসেসোতি দস্সেতুং ‘‘ব্রহ্মপারিসজ্জা পনা’’তিআদি ৰুত্তং. পরিত্তেনাতি হীনেন, সা চস্স হীনতা ছন্দাদীনং হীনতায ৰেদিতব্বা, পটিলদ্ধমত্তং ৰা হীনং. কপ্পস্সাতি অসঙ্খ্যেয্যকপ্পস্স. হীনপণীতানং মজ্ঝে ভৰত্তা মজ্ঝিমেন, সা চস্স মজ্ঝিমতা ছন্দাদীনং মজ্ঝিমতায ৰেদিতব্বা, পটিলভিত্ৰা নাতিসুভাৰিতং ৰা মজ্ঝিমং. উপড্ঢকপ্পোতি অসঙ্খ্যেয্যকপ্পস্স উপড্ঢকপ্পো. ৰিপ্ফারিকতরোতি ব্রহ্মপারিসজ্জেহি পমাণতো ৰিপুলতরো, সভাৰতো উল়ারতরো চ হোতি. সভাৰেনপি হি উল়ারতরোৰ, তং পনেত্থ অপ্পমাণং. তথা হি পরিত্তাভাদীনং, পরিত্তসুভাদীনঞ্চ কাযে সতিপি সভাৰৰেমত্তে একত্তৰসেনেৰ ৰৰত্থাপীযতীতি ‘‘একত্তকাযা’’ ত্ৰেৰ ৰুচ্চন্তি. পণীতেনাতি উক্কট্ঠেন, সা চস্স উক্কট্ঠতা ছন্দাদীনং উক্কট্ঠতায ৰেদিতব্বা, সুভাৰিতং ৰা সম্মদেৰ ৰসিভাৰং পাপিতং পণীতং পধানভাৰং নীতন্তি কত্ৰা, ইধাপি কপ্পো অসঙ্খ্যেয্যকপ্পৰসেনেৰ ৰেদিতব্বো পরিপুণ্ণস্স মহাকপ্পস্স অসম্ভৰতো. ইতীতি এৰং ৰুত্তপ্পকারেন. তেতি ‘‘ব্রহ্মকাযিকা’’তি ৰুত্তা তিৰিধাপি ব্রহ্মানো. সঞ্ঞায একত্তাতি তিহেতুকভাৰেন সঞ্ঞায একত্তসভাৰত্তা ¶ . ন হি তস্সা সম্পযুত্তধম্মৰসেন অঞ্ঞোপি কোচি ভেদো অত্থি.

এৰন্তি ইমিনা নানত্তকাযএকত্তসঞ্ঞিনোতি দস্সেতি.

দণ্ডউক্কাযাতি দণ্ডদীপিকায. সরতীতি ধাৰতি ৰিয. ৰিস্সরতীতি ৰিপ্পকিণ্ণা ৰিয ধাৰতি ¶ . দ্ৰে কপ্পাতি দ্ৰে মহাকপ্পা. ইতো পরেসুপি এসেৰ নযো. ইধাতি ইমস্মিং সুত্তে. উক্কট্ঠপরিচ্ছেদৰসেন আভস্সরগ্গহণেনেৰ সব্বেপি তে পরিত্তাভা, অপ্পমাণাভাপি গহিতা.

সোভনা পভা সুভা, সুভায কিণ্ণা সুভাকিণ্ণাতি ৰত্তব্বে আ-কারস্স রস্সত্তং, অন্তিম-ণ-কারস্স হ-কারঞ্চ কত্ৰা ‘‘সুভকিণ্হা’’তি ৰুত্তা, অট্ঠকথাযংপন নিচ্চলায একগ্ঘনায পভায সুভোতি পরিযাযৰচনন্তি ¶ ‘‘সুভেন ওকিণ্ণা ৰিকিণ্ণা’’তি অত্থো ৰুত্তো, এত্থাপি অন্তিম-ণ-কারস্স হ-কারকরণং ইচ্ছিতব্বমেৰ. ন ছিজ্জিত্ৰা ছিজ্জিত্ৰা পভা গচ্ছতি একগ্ঘনত্তা. চতুত্থৰিঞ্ঞাণট্ঠিতিমেৰ ভজন্তি কাযস্স, সঞ্ঞায চ একরূপত্তা. ৰিপুলসন্তসুখাযুৰণ্ণাদিফলত্তা ৰেহপ্ফলা. এত্থাতি ৰিঞ্ঞাণট্ঠিতিযং.

ৰিৰট্টপক্খে ঠিতা নপুনরাৰত্তনতো. ‘‘ন সব্বকালিকা’’তি ৰত্ৰা তমেৰ অসব্বকালিকত্তং ৰিভাৰেতুং ‘‘কপ্পসতসহস্সম্পী’’তিআদি ৰুত্তং. সোল়সকপ্পসহস্সচ্চযেন উপ্পন্নানং সুদ্ধাৰাসব্রহ্মানং পরিনিব্বাযনতো, অঞ্ঞেসঞ্চ তত্থ অনুপ্পজ্জনতো বুদ্ধসুঞ্ঞে লোকে সুঞ্ঞং তং ঠানং হোতি, তস্মা সুদ্ধাৰাসা ন সব্বকালিকা, খন্ধাৰারট্ঠানসদিসা হোন্তি সুদ্ধাৰাসভূমিযো. ইমিনা সুত্তেন সুদ্ধাৰাসানং সত্তাৰাসভাৰদীপনেনেৰ ৰিঞ্ঞাণট্ঠিতিভাৰো দীপিতো, তস্মা সুদ্ধাৰাসাপি সত্তসু ৰিঞ্ঞাণট্ঠিতীসু চতুত্থৰিঞ্ঞাণট্ঠিতিং নৰসু সত্তাৰাসেসু চতুত্থসত্তাৰাসংযেৰ ভজন্তি.

সুখুমত্তাতি সঙ্খারাৰসেসসুখুমভাৰপ্পত্তত্তা. পরিব্যত্তৰিঞ্ঞাণকিচ্চাভাৰতো নেৰ ৰিঞ্ঞাণং, সব্বসো অৰিঞ্ঞাণং ন হোতীতি নাৰিঞ্ঞাণং, তস্মা পরিপ্ফুটৰিঞ্ঞাণকিচ্চৰন্তীসু ৰিঞ্ঞাণট্ঠিতীসু অৰত্ৰা.

১২৮. তঞ্চ ৰিঞ্ঞাণট্ঠিতিন্তি পঠমং ৰিঞ্ঞাণট্ঠিতিং. হেট্ঠা ৰুত্তনযেন সরূপতো, মনুস্সাদিৰিভাগতো, সঙ্খেপতো, ‘‘নামঞ্চ রূপঞ্চা’’তি ভেদতো ¶ চ পজানাতি. তস্সা সমুদযঞ্চাতি তস্সা পঠমায ৰিঞ্ঞাণট্ঠিতিযা পঞ্চৰীসতিৰিধং সমুদযঞ্চ পজানাতি. অত্থঙ্গমেপি এসেৰ নযো. অস্সাদেতব্বতো, অস্সাদতো চ অস্সাদং. অযং অনিচ্চাদিভাৰো আদীনৰো. ছন্দরাগো ৰিনীযতি এতেন, এত্থ ৰাতি ছন্দরাগৰিনযো, সহ মগ্গেন নিব্বানং. ছন্দরাগপ্পহানন্তি এত্থাপি এসেৰ নযো. মানদিট্ঠীনং ৰসেনাহন্তি ৰা, তণ্হাৰসেন মমন্তি ৰা অভিনন্দনাপি মানস্স পরিতস্সনা ৰিয দট্ঠব্বা. সব্বত্থাতি সব্বেসু সেসেসু অট্ঠসুপি ৰারেসু ¶ . তত্থাতি উপরি তীসু ৰিঞ্ঞাণট্ঠিতীসু দুতিযাযতনেসু. তত্থ হি রূপং নত্থি. পুন তত্থাতি পঠমাযতনে. তত্থ হি একো রূপক্খন্ধোৰ. এত্থাতি ¶ চ তমেৰ সন্ধায ৰুত্তং. তত্থ হি রূপস্স কম্মসমুট্ঠানত্তা আহারৰসেন যোজনা ন সম্ভৰতি.

যতো খোতি এত্থ তো-সদ্দো দা-সদ্দো ৰিয কালৰচনো ‘‘যতো খো, সারিপুত্ত, ভিক্খুসঙ্ঘো’’তিআদীসু (পারা. ২১) ৰিযাতি ৰুত্তং ‘‘যদা খো’’তি. অগ্গহেত্ৰাতি কঞ্চিপি সঙ্খারং ‘‘এতং মমা’’তিআদিনা অগ্গহেত্ৰা. পঞ্ঞাৰিমুত্তোতি অট্ঠন্নং ৰিমোক্খানং অনধিগতত্তা সাতিসযস্স সমাধিবলস্স অভাৰতো পঞ্ঞাবলেনেৰ ৰিমুত্তো. তেনাহ ‘‘অট্ঠ ৰিমোক্খে অসচ্ছিকত্ৰা পঞ্ঞাবলেনেৰা’’তিআদি. অপ্পৰত্তিন্তি আযতিং অপ্পৰত্তিং কত্ৰা. পজানন্তো ৰিমুত্তোতি ৰা পঞ্ঞাৰিমুত্তো, পঠমজ্ঝানফস্সেন ৰিনা পরিজাননাদিপ্পকারেহি চত্তারি সচ্চানি জানন্তো পটিৰিজ্ঝন্তো তেসং কিচ্চানং মত্থকপ্পত্তিযা নিট্ঠিতকিচ্চতায ৰিসেসেন মুত্তোতি ৰিমুত্তো. সো পঞ্ঞাৰিমুত্তো. সুক্খৰিপস্সকোতি সমথভাৰনাসিনেহাভাৰেন সুক্খা লূখা, অসিনিদ্ধা ৰা ৰিপস্সনা এতস্সাতি সুক্খৰিপস্সকো. ঠত্ৰাতি পাদককরণৰসেন ঠত্ৰা. অঞ্ঞতরস্মিন্তি চ অঞ্ঞতরঅঞ্ঞতরস্মিং, একেকস্মিন্তি অত্থো. এৰঞ্হিস্স পঞ্চৰিধতা সিযা. ‘‘ন হেৰ খো অট্ঠ ৰিমোক্খে কাযেন ফুসিত্ৰা ৰিহরতী’’তি ইমিনা সাতিসযস্স সমাধিবলস্স অভাৰো দীপিতো. ‘‘পঞ্ঞায চস্স দিস্ৰা’’তিআদিনা সাতিসযস্স পঞ্ঞাবলস্স ভাৰো. পঞ্ঞায চস্স দিস্ৰা আসৰা পরিক্খীণা হোন্তীতি ন আসৰা পঞ্ঞায পস্সন্তি, দস্সনকারণা পন পরিক্খীণা ‘‘দিস্ৰা পরিক্খীণা’’তি ৰুত্তা. দস্সনাযত্তপরিক্খযত্তা এৰ হি দস্সনং আসৰানং খযস্স পুরিমকিরিযা হোতি.

অট্ঠৰিমোক্খৰণ্ণনা

১২৯. একস্স ¶ ভিক্খুনোতি সত্তসু অরিযপুগ্গলেসু একস্স ভিক্খুনো. ৰিঞ্ঞাণট্ঠিতিআদিনা পরিজাননাদিৰসপ্প ৰত্তনিগ্গমনঞ্চ ¶ পঞ্ঞাৰিমুত্তনামঞ্চ. ইতরস্সাতি উভতোভাগৰিমুত্তস্স. ইমে সন্ধায হি পুব্বে ‘‘দ্ৰিন্নং ভিক্খূন’’ন্তি ৰুত্তং. কেনট্ঠেনাতি কেন সভাৰেন. সভাৰো হি ঞাণেন যাথাৰতো অরণীযতো ঞাতব্বতো ‘‘অত্থো’’তি ৰুচ্চতি, সো এৰ ত্থ-কারস্স ট্ঠ-কারং কত্ৰা ‘‘অট্ঠো’’তি ৰুত্তো. অধিমুচ্চনট্ঠেনাতি অধিকং সৰিসেসং মুচ্চনট্ঠেন, এতেন সতিপি সব্বস্সাপি রূপাৰচরজ্ঝানস্স ৰিক্খম্ভনৰসেন পটিপক্খতো ৰিমুত্তভাৰে যেন ভাৰনাৰিসেসেন তং ঝানং সাতিসযং পটিপক্খতো ৰিমুচ্চিত্ৰা পৰত্ততি, সো ভাৰনাৰিসেসো দীপিতো. ভৰতি হি সমানজাতিযুত্তোপি ভাৰনাৰিসেসেন পৰত্তিআকারৰিসেসো, যথা তং সদ্ধাৰিমুত্ততা দিট্ঠিপ্পত্তস্স. তথা পচ্চনীকধম্মেহি সুট্ঠু ৰিমুত্ততায ¶ , এৰং অনিগ্গহিতভাৰেন নিরাসঙ্কতায অভিরতিৰসেন সুট্ঠু অধিমুচ্চনট্ঠেনপি ৰিমোক্খো. তেনাহ ‘‘আরম্মণে চা’’তিআদি. অযং পনত্থোতি অযং অধিমুচ্চনট্ঠো পচ্ছিমে ৰিমোক্খে নিরোধে নত্থি, কেৰলো ৰিমুত্তট্ঠো এৰ তত্থ লব্ভতি, তং সযমেৰ পরতো ৰক্খতি.

রূপীতি যেনাযং সসন্ততিপরিযাপন্নেন রূপেন সমন্নাগতো, তং যস্স ঝানস্স হেতুভাৰেন ৰিসিট্ঠং রূপং হোতি, যেন ৰিসিট্ঠেন রূপেন ‘‘রূপী’’তি ৰুচ্চেয্য রূপী-সদ্দস্স অতিসযত্থদীপনতো, তদেৰ সসন্ততিপরিযাপন্নরূপৰসেন পটিলদ্ধং ঝানং ইধ পরমত্থতো রূপীভাৰসাধকন্তি দট্ঠব্বং. তেনাহ ‘‘অজ্ঝত্ত’’ন্তিআদি. রূপজ্ঝানং রূপং উত্তরপদলোপেন. রূপানীতি পনেত্থ পুরিমপদলোপো দট্ঠব্বো. তেন ৰুত্তং ‘‘নীলকসিণাদিরূপানী’’তি. রূপে কসিণরূপে সঞ্ঞা রূপসঞ্ঞা, সা এতস্স অত্থীতি রূপসঞ্ঞী, সঞ্ঞাসীসেন ঝানং ৰদতি. তপ্পটিক্খেপেন ¶ অরূপসঞ্ঞী. তেনাহ ‘‘অজ্ঝত্তং ন রূপসঞ্ঞী’’তিআদি.

‘‘অন্তো অপ্পনাযং সুভন্তি আভোগো নত্থী’’তি ইমিনা পুব্বাভোগৰসেন তথা অধিমুত্তি সিযাতি দস্সেতি. এৰঞ্হেত্থ তথাৰত্তব্বতাপত্তিচোদনা সমত্থিতা হোতি. যস্মা সুৰিসুদ্ধেসু নীলাদীসু ৰণ্ণকসিণেসু তত্থ কতাধিকারানং অভিরতিৰসেন সুট্ঠু অধিমুচ্চনট্ঠো সম্ভৰতি ¶ , তস্মা অট্ঠকথাযং তথা ততিযো ৰিমোক্খো সংৰণ্ণিতো, যস্মা পন মেত্তাৰসেন পৰত্তমানা ভাৰনা সত্তে অপ্পটিকূলতো দহন্তি তেসু ততো অধিমুচ্চিত্ৰাৰ পৰত্ততি, তস্মা পটিসম্ভিদামগ্গে (পটি. ম. ২১২) ‘‘ব্রহ্মৰিহারভাৰনা সুভৰিমোক্খো’’তি ৰুত্তা, তযিদং উভযম্পি তেন তেন পরিযাযেন ৰুত্তত্তা ন ৰিরুজ্ঝতীতি দট্ঠব্বং.

সব্বসোতি অনৰসেসতো. ন হি চতুন্নং অরূপক্খন্ধানং একদেসোপি তত্থ অৰস্সিস্সতি. ৰিসুদ্ধত্তাতি যথাপরিচ্ছিন্নকালে নিরোধিতত্তা. উত্তমো ৰিমোক্খো নাম অরিযেহেৰ সমাপজ্জিতব্বতো, অরিযফলপরিযোসানত্তা দিট্ঠেৰ ধম্মে নিব্বানপ্পত্তিভাৰতো চ.

১৩০. আদিতো পট্ঠাযাতি পঠমসমাপত্তিতো পট্ঠায. যাৰ পরিযোসানা সমাপত্তি, তাৰ. অট্ঠত্ৰাতি কত্থচি সমাপত্তিযং অট্ঠিতো এৰ, নিরন্তরমেৰ পটিপাটিযা, উপ্পটিপাটিযা চ সমাপজ্জতেৰাতি অত্থো. তেনাহ ‘‘ইতো চিতো চ সঞ্চরণৰসেন ৰুত্ত’’ন্তি. ইচ্ছতি সমাপজ্জিতুং. তত্থ ‘‘সমাপজ্জতি পৰিসতী’’তি সমাপত্তিসমঙ্গীপুগ্গলো তং তং পৰিট্ঠো ৰিয হোতীতি কত্ৰা ৰুত্তং.

দ্ৰীহি ¶ ভাগেহি ৰিমুত্তোতি অরূপজ্ঝানেন ৰিক্খম্ভনৰিমোক্খেন, মগ্গেন সমুচ্ছেদৰিমোক্খেনাতি দ্ৰীহি ৰিমুচ্চনভাগেহি, অরূপসমাপত্তিযা রূপকাযতো, মগ্গেন নামকাযতোতি দ্ৰীহি ৰিমুচ্চিতব্বভাগেহি চ ৰিমুত্তো. তেনাহ ‘‘অরূপসমাপত্তিযা’’তিআদি ¶ . ৰিমুত্তোতি হি কিলেসেহি ৰিমুত্তো, ৰিমুচ্চন্তো চ কিলেসানং ৰিক্খম্ভনসমুচ্ছিন্দনেহি কাযদ্ৰযতো ৰিমুত্তোতি অযমেত্থ অত্থো. গাথায চ আকিঞ্চঞ্ঞাযতনলাভিনো উপসিৰব্রাহ্মণস্স ভগৰতা ‘‘নামকাযা ৰিমুত্তো’’তি উভতোভাগৰিমুত্তো মুনি অক্খাতো. তত্থ অত্থং পলেতীতি অত্থং গচ্ছতি. ন উপেতি সঙ্খন্তি ‘‘অসুকং নাম দিসং গতো’’তি ৰোহারং ন গচ্ছতি. এৰং মুনি নামকাযা ৰিমুত্তোতি এৰং অরূপং উপপন্নো সেক্খমুনি পকতিযা পুব্বেৰ রূপকাযা ৰিমুত্তো, তত্থ চ চতুত্থমগ্গং নিব্বত্তেত্ৰা নামকাযস্স পরিঞ্ঞাতত্তা পুন নামকাযাপি ৰিমুত্তো. উভতোভাগৰিমুত্তো খীণাসৰো হুত্ৰা অনুপাদায পরিনিব্বানসঙ্খাতং ¶ অত্থং পলেতি ন উপেতি সঙ্খং, ‘‘খত্তিযো ব্রাহ্মণো’’তি এৰং আদিকং সমঞ্ঞং ন গচ্ছতীতি অত্থো.

‘‘অঞ্ঞতরতো ৰুট্ঠাযা’’তি ইদং কিং আকাসানঞ্চাযতনাদীসু অঞ্ঞতরলাভীৰসেন ৰুত্তং, উদাহু সব্বারুপ্পলাভীৰসেনাতি যথিচ্ছসি, তথা হোতু, যদি সব্বারুপ্পলাভীৰসেন ৰুত্তং, ন কোচি ৰিরোধো. অথ তত্থ অঞ্ঞতরলাভীৰসেন ৰুত্তং, ‘‘যতো খো, আনন্দ, ভিক্খু ইমে অট্ঠ ৰিমোক্খে অনুলোমম্পি সমাপজ্জতী’’তিআদিৰচনেন ৰিরুজ্ঝেয্যাতি? যস্মা অরূপাৰচরজ্ঝানেসু একস্সাপি লাভী ‘‘অট্ঠৰিমোক্খলাভী’’ ত্ৰেৰ ৰুচ্চতি অট্ঠৰিমোক্খে একদেসস্সাপি তংনামদানসমত্থতাসম্ভৰতো. অযঞ্হি অট্ঠৰিমোক্খসমঞ্ঞা সমুদাযে ৰিয তদেকদেসেপি নিরুল়্হাপত্তিসমঞ্ঞা ৰিযাতি. তেন ৰুত্তং ‘‘আকাসানঞ্চাযতনাদীসু অঞ্ঞতরতো ৰুট্ঠাযা’’তি. ‘‘পঞ্চৰিধো হোতী’’তি ৰত্ৰা ছব্বিধতংপিস্স কেচি পরিকপ্পেন্তি, তং তেসং মতিমত্তং, নিচ্ছিতোৰাযং পঞ্হো পুব্বাচরিযেহীতি দস্সেতুং ‘‘কেচি পনা’’তিআদি ৰুত্তং. তত্থ কেচীতি উত্তরৰিহারৰাসিনো, সারসমাসাচরিযা চ. তে হি ‘‘উভতোভাগৰিমুত্তোতি ¶ উভযভাগৰিমুত্তো সমাধিৰিপস্সনাতো’’তি ৰত্ৰা রূপাৰচরসমাধিনাপি সমাধিপরিপন্থতো ৰিমুত্তিং মঞ্ঞন্তি. এৰং রূপজ্ঝানভাগেন, অরূপজ্ঝানভাগেন চ উভতো ৰিমুত্তোতি পাযসমানো. ‘‘তাদিসমেৰা’’তি ইমিনা যাদিসং অরূপাৰচরজ্ঝানং কিলেসৰিক্খম্ভনে, তাদিসং রূপাৰচরচতুত্থজ্ঝানং পীতি ইমমত্থং উল্লঙ্গেতি. তেনাহ ‘‘তস্মা’’তিআদি.

উভতোভাগৰিমুত্তপঞ্হোতি উভতোভাগৰিমুত্তস্স ছব্বিধতং নিস্সায উপ্পন্নপঞ্হো. ৰণ্ণনং নিস্সাযাতি তস্স পদস্স অত্থৰচনং নিস্সায. চিরেনাতি থেরস্স অপরভাগে চিরেন কালেন. ৰিনিচ্ছযন্তি ¶ সংসযছেদকং সন্নিট্ঠানং পত্তো. তং পঞ্হন্তি তমত্থং. ঞাতুং ইচ্ছিতো হি অত্থো পঞ্হো. ন কেনচি সুতপুব্বন্তি কেনচি কিঞ্চি ন সুতপুব্বং, ইদং অত্থজাতন্তি অধিপ্পাযো. কিঞ্চাপি উপেক্খাসহগতং, কিঞ্চাপি কিলেসে ৰিক্খম্ভেতীতি পচ্চেকং কিঞ্চাপি-সদ্দো যোজেতব্বো. সমুদাচরতীতি পৰত্ততি. তত্থ কারণমাহ ‘‘ইমে হী’’তিআদিনা, তেন রূপাৰচরভাৰনতো আরুপ্পভাৰনা সৰিসেসং কিলেসে ৰিক্খম্ভেতি রূপৰিরাগভাৰনাভাৰতো ¶ , উপরিভাৰনাভাৰতো চাতি দস্সেতীতি. এৰঞ্চ কত্ৰা অট্ঠকথাযং আরুপ্পভাৰনানিদ্দেসে যং ৰুত্তং ‘‘তস্সেৰং তস্মিং নিমিত্তে পুনপ্পুনং চিত্তং চারেন্তস্স নীৰরণানি ৰিক্খম্ভন্তি সতি সন্তিট্ঠতী’’তিআদি, (ৰিসুদ্ধি. ১.২৮১) তং সমত্থতং হোতীতি. ইদং সুত্তন্তি পুগ্গলপঞ্ঞত্তিপাঠমাহ (পু. প. নিদ্দেস ২৭). সব্বঞ্হি বুদ্ধৰচনং অত্থসূচনাদিঅত্থেন সুত্তন্তি ৰুত্তো ৰাযমত্থো. যং পন তত্থ ¶ ৰত্তব্বং, তং হেট্ঠা ৰুত্তমেৰ. অট্ঠন্নং ৰিমোক্খানং অনুলোমাদিতো সমাপজ্জনেন সাতিসযং সন্তানস্স অভিসঙ্খতত্তা, অট্ঠমঞ্চ উত্তমং ৰিমোক্খং পদট্ঠানং কত্ৰা ৰিপস্সনং ৰড্ঢেত্ৰা অগ্গমগ্গাধিগমেন উভতোভাগৰিমুচ্চনতো চ ইমায উভতোভাগৰিমুত্তিযা সব্বসেট্ঠতা ৰেদিতাতি দট্ঠব্বা.

মহানিদানসুত্তৰণ্ণনায লীনত্থপ্পকাসনা.

৩. মহাপরিনিব্বানসুত্তৰণ্ণনা

১৩১. পূজনীযভাৰতো ¶ ¶ , ¶ বুদ্ধসম্পদঞ্চ পহায পৰত্ততা মহন্তঞ্চ তং পরিনিব্বানঞ্চাতি মহাপরিনিব্বানং; সৰাসনপ্পহানতো মহন্তং কিলেসক্খযং নিস্সায পৰত্তং পরিনিব্বানন্তিপি মহাপরিনিব্বানং; মহতা কালেন মহতা ৰা গুণরাসিনা সাধিতং পরিনিব্বানন্তিপি মহাপরিনিব্বানং; মহন্তভাৰায, ধাতূনং বহুভাৰায পরিনিব্বানন্তিপি মহাপরিনিব্বানং; মহতো লোকতো নিস্সটং পরিনিব্বানন্তিপি মহাপরিনিব্বানং; সব্বলোকাসাধারণত্তা বুদ্ধানং সীলাদিগুণেহি মহতো বুদ্ধস্স ভগৰতো পরিনিব্বানন্তিপি মহাপরিনিব্বানং; মহতি সাসনে পতিট্ঠিতে পরিনিব্বানন্তিপি মহাপরিনিব্বানন্তি বুদ্ধস্স ভগৰতো পরিনিব্বানং ৰুচ্চতি, তপ্পটিসংযুত্তং সুত্তং মহাপরিনিব্বানসুত্তং. গিজ্ঝা এত্থ ৰসন্তীতি গিজ্ঝং, গিজ্ঝং কূটং এতস্সাতি গিজ্ঝকূটো, গিজ্ঝং ৰিয ৰা গিজ্ঝং, কূটং, তং এতস্সাতি গিজ্ঝকূটো, পব্বতো, তস্মিং গিজ্ঝকূটে. তেনাহ ‘‘গিজ্ঝা’’তিআদি. অভিযাতুকামোতি এত্থ অভি-সদ্দো অভিভৰনত্থো, ‘‘অভিৰিজানাতূ’’তিআদীসু (দী. নি. ২.২৪৪; ৩.৮৫; ম. নি. ৩.২৫৬) ৰিযাতি আহ ‘‘অভিভৰনত্থায যাতুকামো’’তি. ৰজ্জিরাজানোতি ‘‘ৰজ্জেতব্বা ইমে’’তিআদিতো পৰত্তং ৰচনং উপাদায ‘‘ৰজ্জী’’তি লদ্ধনামা রাজানো, ৰজ্জীরট্ঠস্স ৰা রাজানো ৰজ্জিরাজানো. ৰজ্জিরট্ঠস্স পন ৰজ্জিসমঞ্ঞা তন্নিৰাসিরাজকুমারৰসেন ৰেদিতব্বা. রাজিদ্ধিযাতি রাজভাৰানুগতেন সভাৰেন. সো পন সভাৰো নেসং ¶ গণরাজূনং মিথো সামগ্গিযা লোকে পাকটো, চিরট্ঠাযী চ অহোসীতি ‘‘সমগ্গভাৰং কথেসী’’তি ৰুত্তং. অনু অনু তংসমঙ্গিনো ভাৰেতি ৰড্ঢেতীতি অনুভাৰো, অনুভাৰো এৰ আনুভাৰো, পতাপো, সো পন নেসং পতাপো হত্থিঅস্সাদিৰাহনসম্পত্তিযা, তত্থ চ সুসিক্খিতভাৰেন লোকে পাকটো জাতোতি ‘‘এতেন…পে… কথেসী’’তি ৰুত্তং. তাল়চ্ছিগ্গলেনাতি কুঞ্চিকাছিদ্দেন. অসনন্তি সরং. অতিপাতযিস্সন্তীতি অতিক্কামেন্তি. পোঙ্খানুপোঙ্খন্তি পোঙ্খস্স অনুপোঙ্খং, পুরিমসরস্স পোঙ্খপদানুগতপোঙ্খং ইতরং সরং কত্ৰাতি অত্থো. অৰিরাধিতন্তি অৰিরজ্ঝিতং. উচ্ছিন্দিস্সামীতি উম্মূলনৰসেন কুলসন্ততিং ছিন্দিস্সামি. অযনং ¶ ৰড্ঢনং অযো, তপ্পটিক্খেপেন অনযোতি আহ ‘‘অৰড্ঢিযা এতং নাম’’ন্তি. ৰিক্খিপতীতি ৰিদূরতো খিপতি, অপনেতীতি অত্থো.

গঙ্গাযন্তি ¶ গঙ্গাসমীপে. পট্টনগামন্তি সকটপট্টনগামং. আণাতি আণা ৰত্ততি. অড্ঢযোজনন্তি চ তস্মিং পট্টনে অড্ঢযোজনট্ঠানৰাসিনো সন্ধায ৰুত্তং. তত্রাতি তস্মিং পট্টনে. বলৰাঘাতজাতোতি উপ্পন্নবলৰকোধো.

মেতি ময্হং. গতেনাতি গমনেন.

রাজঅপরিহানিযধম্মৰণ্ণনা

১৩৪. সীতং ৰা উণ্হং ৰা নত্থি, তাযং ৰেলাযং পুঞ্ঞানুভাৰেন বুদ্ধানং সব্বকালং সমসীতুণ্হাৰ উতু হোতি, তং সন্ধায তথা ৰুত্তং. অভিণ্হং সন্নিপাতাতি নিচ্চসন্নিপাতা, তং পন নিচ্চসন্নিপাততং দস্সেতুং ‘‘দিৰসস্সা’’তিআদি ৰুত্তং. সন্নিপাতবহুলাতি পচুরসন্নিপাতা. ৰোসানন্তি সঙ্কোচং. ‘‘যাৰকীৰ’’ন্তি একমেৰেতং পদং অনিযমতো পরিমাণৰাচী, কালো চেত্থ অধিপ্পেতোতি আহ ‘‘যত্তকং কাল’’ন্তি. ‘‘ৰুদ্ধিযেৰা’’তিআদিনা ৰুত্তমত্থং ব্যতিরেকমুখেন ¶ দস্সেতুং ‘‘অভিণ্হং অসন্নিপতন্তা হী’’তিআদি ৰুত্তং. আকুলাতি খুভিতা, ন পসন্না. ভিজ্জিত্ৰাতি ৰগ্গবন্ধতো ৰিভজ্জ ৰিসুং ৰিসুং হুত্ৰা.

সন্নিপাতভেরিযাতি সন্নিপাতারোচনভেরিযা. অড্ঢভুত্তা ৰাতি সামিভুত্তা চ. ওসীদমানেতি হাযমানে.

পুব্বে অকতন্তি পুব্বে অনিব্বত্তং. সুঙ্কন্তি ভণ্ডং গহেত্ৰা গচ্ছন্তেহি পব্বতখণ্ড নদীতিত্থগামদ্ৰারাদীসু রাজপুরিসানং দাতব্বভাগং. বলিন্তি নিপ্ফন্নসস্সাদিতো ছভাগং, সত্তভাগন্তিআদিনা লদ্ধকরং. দণ্ডন্তি দসৰীসতিকহাপণাদিকং অপরাধানুরূপং গহেতব্বধনদণ্ডং. ৰজ্জিধম্মন্তি ৰজ্জিরাজধম্মং. ইদানি অপঞ্ঞত্তপঞ্ঞাপনাদীসু তপ্পটিক্খেপ আদীনৰানিসংসে ৰিত্থারতো দস্সেতুং ‘‘তেসং অপঞ্ঞত্ত’’ন্তিআদি ৰুত্তং. পারিচরিযক্খমাতি উপট্ঠানক্খমা.

কুলভোগইস্সরিযাদিৰসেন মহতী মত্তা পমাণং এতেসন্তি মহামত্তা, নীতিসত্থৰিহিতে ৰিনিচ্ছযে ¶ ঠপিতা মহামত্তা ৰিনিচ্ছযমহামত্তা, তেসং. দেন্তীতি নিয্যাতেন্তি. সচে চোরোতি এৰংসঞ্ঞিনো সচে হোন্তি. পাপভীরুতায অত্তনা কিঞ্চি অৰত্ৰা. দণ্ডনীতিসঞ্ঞিতে ৰোহারে নিযুত্তাতি ৰোহারিকা, যে ‘‘ধম্মট্ঠা’’তি ৰুচ্চন্তি. সুত্তধরা নীতিসুত্তধরা ¶ , ঈদিসে ৰোহারৰিনিচ্ছযে নিযমেত্ৰা ঠপিতা. পরম্পরাভতেসু অট্ঠসু কুলেসু জাতা অগতিগমনৰিরতা অট্ঠমহল্লকপুরিসা অট্ঠকুলিকা.

সক্কারন্তি উপকারং. গরুভাৰং পচ্চুপট্ঠপেত্ৰাতি ‘‘ইমে অম্হাকং গরুনো’’তি তত্থ গরুভাৰং পতি পতি উপট্ঠপেত্ৰা. মানেন্তীতি সম্মানেন্তি, তং পন সম্মাননং তেসু নেসং অত্তমনতাপুব্বকন্তি আহ ‘‘মনেন পিযাযন্তী’’তি. নিপচ্চকারন্তি পণিপাতং. দস্সেন্তীতি ‘‘ইমে অম্হাকং পিতামহা ¶ , মাতামহা’’তিআদিনা নীচচিত্তা হুত্ৰা গরুচিত্তাকারং দস্সেন্তি. সন্ধারেতুন্তি সম্বন্ধং অৰিচ্ছিন্নং কত্ৰা ঘটেতুং.

পসয্হাকারস্সাতি বলক্কারস্স. কামং ৰুদ্ধিযা পূজনীযতায ‘‘ৰুদ্ধিহানিযো’’তি ৰুত্তং, অত্থো পন ৰুত্তানুক্কমেনেৰ যোজেতব্বো, পাল়িযং ৰা যস্মা ‘‘ৰুদ্ধিযেৰ পাটিকঙ্খা, নো পরিহানী’’তি ৰুত্তং, তস্মা তদনুক্কমেন ‘‘ৰুদ্ধিহানিযো’’তি ৰুত্তং.

ৰিপচ্চিতুং অলদ্ধোকাসে পাপকম্মে, তস্স কম্মস্স ৰিপাকে ৰা অনৰসরোৰ দেৰতোপসগ্গো, তস্মিং পন লদ্ধোকাসে সিযা দেৰতোপসগ্গস্স অৰসরোতি আহ ‘‘অনুপ্পন্নং…পে… ৰড্ঢেন্তী’’তি. এতেনেৰ অনুপ্পন্নং সুখন্তি এত্থাপি অত্থো ৰেদিতব্বো. ‘‘বলকাযস্স দিগুণতিগুণতাদস্সনং, পটিভযভাৰদস্সন’’ন্তি এৰং আদিনা দেৰতানং সঙ্গামসীসে সহাযতা ৰেদিতব্বা.

অনিচ্ছিতন্তি অনিট্ঠং. আৰরণতোতি নিসেধনতো. যস্স ধম্মতো অনপেতা ধম্মিযাতি ইধ ‘‘ধম্মিকা’’তি ৰুত্তা. মিগসূকরাদিঘাতায সুনখাদীনং কড্ঢিত্ৰা ৰনচরণং ৰাজো, মিগৰা, তত্থ নিযুত্তা, তে ৰা ৰাজেন্তি নেন্তীতি ৰাজিকা, মিগৰধচারিনো. চিত্তপ্পৰত্তিং পুচ্ছতি. কাযিকৰাচসিকপযোগেন হি সা লোকে পাকটা পকাসভূতাতি.

১৩৫. দেৰাযতনভাৰেন চিতত্তা, লোকস্স চিত্তীকারট্ঠানত্তা চ চেতিযং অহোসি.

কামংকারৰসেন কিঞ্চিপি ন করণীযাতি অকরণীযা. কামংকারো পন হত্থগতকরণৰসেনাতি ¶ আহ ‘‘অগ্গহেতব্বাতি অত্থো’’তি. অভিমুখযুদ্ধেনাতি অভিমুখং উজুকমেৰ সঙ্গামকরণেন. উপলাপনং ¶ সামং দানঞ্চাতি দস্সেতুং ‘‘অল’’ন্তিআদি ৰুত্তং. ভেদোপি ইধ উপাযো এৰাতি ৰুত্তং ‘‘অঞ্ঞত্র মিথুভেদাযা’’তি. যুদ্ধস্স পন অনুপাযতা ¶ পগেৰ পকাসিতা. ইদন্তি ‘‘অঞ্ঞত্র উপলাপনায, অঞ্ঞত্র মিথুভেদা’’তি চ ইদং ৰচনং. কথায নযং লভিত্ৰাতি ‘‘যাৰকীৰঞ্চ…পে… নো পরিহানী’’তি ইমায ভগৰতো কথায নযং উপাযং লভিত্ৰা.

অনুকম্পাযাতি ৰজ্জিরাজেসু অনুগ্গহেন. অস্সাতি ভগৰতো.

কথন্তি ৰজ্জীহি সদ্ধিং কাতব্বযুদ্ধকথং. উজুং করিস্সামীতি পটিরাজানো আনেত্ৰা পাকারপরিখানং অঞ্ঞথাভাৰাপাদনেন উজুভাৰং করিস্সামি.

পতিট্ঠিতগুণোতি পতিট্ঠিতাচরিযগুণো. ইস্সরা সন্নিপতন্তু, মযং অনিস্সরা, তত্থ গন্ত্ৰা কিং করিস্সামাতি লিচ্ছৰিনো ন সন্নিপতিংসূতি যোজনা. সূরা সন্নিপতন্তূতি এত্থাপি এসেৰ নযো.

বলভেরিন্তি যুদ্ধায বলকাযস্স উট্ঠানভেরিং.

ভিক্খুঅপরিহানিযধম্মৰণ্ণনা

১৩৬. অপরিহানায হিতাতি অপরিহানিযা, ন পরিহাযন্তি এতেহীতি ৰা অপরিহানিযা, তে পন যস্মা অপরিহানিযা কারকা নাম হোন্তি, তস্মা ৰুত্তং ‘‘অপরিহানিকরে’’তি. যস্মা পন তে পরিহানিকরানং উজুপটিপক্খভূতা, তস্মা আহ ‘‘ৰুদ্ধিহেতুভূতে’’তি. যস্মা ভগৰতো দেসনা উপরূপরি ঞাণালোকং পসাদেন্তী সত্তানং হদযন্ধকারং ৰিধমতি, পকাসেতব্বে চ অত্থে হত্থতলে আমলকং ৰিয সুট্ঠুতরং পাকটে কত্ৰা দস্সেতি, তস্মা ৰুত্তং ‘‘চন্দসহস্সং…পে… কথযিস্সামী’’তি.

যস্মা ভগৰা ‘‘তস্স ব্রাহ্মণস্স সম্মুখা ৰজ্জীনং অভিণ্হসন্নিপাতাদিপটিপত্তিং কথেন্তোযেৰ অযং অপরিহানিযকথা অনিয্যানিকা ৰট্টনিস্সিতা, ময্হং পন সাসনে তথারূপী কথা কথেতব্বা, সা হোতি নিয্যানিকা ৰিৰট্টনিস্সিতা, যায সাসনং ময্হং পরিনিব্বানতো পরম্পি ¶ অদ্ধনিযং অস্স চিরট্ঠিতিক’’ন্তি চিন্তেসি, তস্মা ভিক্খূ সন্নিপাতাপেত্ৰা তেসং অপরিহানিযে ধম্মে দেসেন্তো তেনেৰ নিযামেন দেসেসি. তেন ৰুত্তং ‘‘ইদং ৰজ্জিসত্তকে ৰুত্তসদিসমেৰা’’তি. এৰং সঙ্খেপতো ৰুত্তমত্থং ¶ ৰিত্থারতো দস্সেন্তো ‘‘ইধাপি চা’’তিআদিমাহ. তত্থ ‘‘ততো’’তিআদি ¶ দিসাসু আগতসাসনে ৰুত্তং তং কথনং. ৰিহারসীমা আকুলা যস্মা, তস্মা উপোসথপৰারণা ঠিতা.

ওলীযমানকোতি পাল়িতো, অত্থতো চ ৰিনস্সমানো. উক্খিপাপেন্তাতি পগুণভাৰকরণেন, অত্থসংৰণ্ণনেন চ পগ্গণ্হন্তা.

সাৰত্থিযং ভিক্খূ ৰিয পাচিত্তিযং দেসাপেতব্বোতি (পারা. ৫৬৫ ৰিত্থারৰত্থু). ৰজ্জিপুত্তকা ৰিয দসৰত্থুদীপনেন (চূল়ৰ. ৪৪৬ ৰিত্থারৰত্থু). ‘‘গিহিগতানীতি গিহিপটিসংযুত্তানী’’তি ৰদন্তি. গিহীসু গতানি, তেহি ঞাতানি গিহিগতানি. ধূমকালো এতস্সাতি ধূমকালিকং চিতকধূমৰূপসমতো পরং অপ্পৰত্তনতো.

থিরভাৰপ্পত্তাতি সাসনে থিরভাৰং অনিৰত্তিতভাৰং উপগতা. থেরকারকেহীতি থেরভাৰসাধকেহি সীলাদিগুণেহি অসেক্খধম্মেহি. বহূ রত্তিযোতি পব্বজিতা হুত্ৰা বহূ রত্তিযো জানন্তি. সীলাদিগুণেসু পতিট্ঠাপনমেৰ সাসনে পরিণাযকতাতি আহ ‘‘তীসু সিক্খাসু পৰত্তেন্তী’’তি.

ওৰাদং ন দেন্তি অভাজনভাৰতো. পৰেণীকথন্তি আচরিযপরম্পরাভতং সম্মাপটিপত্তিদীপনং ধম্মকথং. সারভূতং ধম্মপরিযাযন্তি সমথৰিপস্সনামগ্গফলসম্পাপনেন সারভূতং বোজ্ঝঙ্গকোসল্লঅনুত্তরসীতীভাৰঅধিচিত্তসুত্তাদিধম্মতন্তিং.

পুনব্ভৰদানং পুনব্ভৰো উত্তরপদলোপেন. ইতরেতি যে ন পচ্চযৰসিকা ন আমিসচক্খুকা, তে ন গচ্ছন্তি তণ্হায ৰসং.

আরঞ্ঞকেসূতি অরঞ্ঞভাগেসু অরঞ্ঞপরিযাপন্নেসু. ননু যত্থ কত্থচিপি তণ্হা সাৰজ্জা এৰাতি চোদনং সন্ধাযাহ ‘‘গামন্তসেনাসনেসু হী’’তিআদি, তেন ‘‘অনুত্তরেসু ৰিমোক্খেসু পিহং উপট্ঠাপযতো’’তি এত্থ ৰুত্তসিনেহাদযো ৰিয আরঞ্ঞকেসু সেনাসনেসু সালযতা সেৰিতব্বপক্খিযা এৰাতি দস্সেতি.

অত্তনাৰাতি ¶ ¶ সযমেৰ, তেন পরেহি অনুস্সাহিতানং সরসেনেৰ অনাগতানং পেসলানং ভিক্খূনং আগমনং, আগতানঞ্চ ফাসুৰিহারং পচ্চাসিসন্তীতি দস্সেতি. ইমিনা নীহারেনাতি ইমায পটিপত্তিযা. অগ্গহিতধম্মগ্গহণন্তি ¶ অগ্গহিতস্স পরিযত্তিধম্মস্স উগ্গহণং. গহিতসজ্ঝাযকরণন্তি উগ্গহিতস্স সুট্ঠু অত্থচিন্তনং. চিন্তনত্থো হি সজ্ঝাযসদ্দো.

এন্তীতি উপগচ্ছন্তি. নিসীদন্তি আসনপঞ্ঞাপনাদিনা.

১৩৭. আরমিতব্বট্ঠেন কম্মং আরামো. কম্মে রতা, ন গন্থধুরে, ৰাসধুরে ৰাতি কম্মরতা, অনুযুত্তাতি তপ্পরভাৰেন পুনপ্পুনং পসুতা. ইতি কাতব্বকম্মন্তি তং তং ভিক্খূনং কাতব্বং উচ্চাৰচকম্মং চীৰরৰিচারণাদি. তেনাহ ‘‘সেয্যথিদ’’ন্তিআদি. উপত্থম্ভনন্তি দুপট্টতিপট্টাদিকরণং. তঞ্হি পঠমপটলাদীনং উপত্থম্ভনকারণত্তা তথা ৰুত্তং. যদি এৰং কথং অযং কম্মরামতা পটিক্খিত্তাতি আহ ‘‘একচ্চো হী’’তিআদি.

করোন্তো যেৰাতি যথাৰুত্ততিরচ্ছানকথং কথেন্তোযেৰ. অতিরচ্ছানকথাভাৰেপি তস্স তত্থ তপ্পরভাৰদস্সনত্থং অৰধারণৰচনং. পরিযন্তকারীতি সপরিযন্তং কত্ৰা ৰত্তা. ‘‘পরিযন্তৰতিং ৰাচং ভাসিতা’’তি (দী. নি. ১.৯, ১৯৪) হি ৰুত্তং. অপ্পভস্সো ৰাতি পরিমিতকথোযেৰ একন্তেন কথেতব্বস্সেৰ কথনতো. সমাপত্তিসমাপজ্জনং অরিযো তুণ্হীভাৰো.

নিদ্দাযতিযেৰাতি ¶ নিদ্দোক্কমনে অনাদীনৰদস্সী নিদ্দাযতিযেৰ. ইরিযাপথপরিৰত্তনাদিনা ন নং ৰিনোদেতি.

এৰং সংসট্ঠো ৰাতি ৰুত্তনযেন গণসঙ্গণিকায সংসট্ঠো এৰ ৰিহরতি.

দুস্সীলা পাপিচ্ছা নামাতি সযং নিস্সীলা অসন্তগুণসম্ভাৰনিচ্ছায সমন্নাগতত্তা পাপা লামকা ইচ্ছা এতেসন্তি পাপিচ্ছা.

পাপপুগ্গলেহি মেত্তিকরণতো পাপমিত্তা. তেহি সদা সহ পৰত্তনেন পাপসহাযা. তত্থ নিন্নতাদিনা তদধিমুত্ততায পাপসম্পৰঙ্কা.

১৩৮. সদ্ধা এতেসং অত্থীতি সদ্ধাতি আহ ‘‘সদ্ধাসম্পন্না’’তি. আগমনীযপটিপদায আগতসদ্ধা ¶ আগমনীযসদ্ধা, সা সাতিসযা মহাবোধিসত্তানং পরোপদেসেন ৰিনা সদ্ধেয্যৰত্থুং অৰিপরীততো ওগাহেত্ৰা ¶ অধিমুচ্চনতোতি আহ ‘‘সব্বঞ্ঞুবোধিসত্তানং হোতী’’তি. সচ্চপটিৰেধতো আগতসদ্ধা অধিগমসদ্ধা সুরবন্ধাদীনং (দী. নি. অট্ঠ. ৩.১১৮; ধ. প. অট্ঠ. ১.সুপ্পবুদ্ধকুট্ঠিৰত্থু; উদা. অট্ঠ. ৪৩) ৰিয. ‘‘সম্মাসম্বুদ্ধো ভগৰা’’তিআদিনা বুদ্ধাদীসু উপ্পজ্জনকপসাদো পসাদসদ্ধা মহাকপ্পিনরাজাদীনং (অ. নি. অট্ঠ. ১.১.২৩১; ধ. প. অট্ঠ. ১.মহাকপ্পিনত্থেরৰত্থু; থেরগা. অট্ঠ. ২.মহাকপ্পিনত্থেরগাথাৰণ্ণনা, ৰিত্থারো) ৰিয. ‘‘এৰমেত’’ন্তি ওক্কন্তিত্ৰা পক্খন্দিত্ৰা সদ্দহনৰসেন কপ্পনং ওকপ্পনং. দুৰিধাপীতি পসাদসদ্ধাপি ওকপ্পনসদ্ধাপি. তত্থ পসাদসদ্ধা অপরনেয্যরূপা হোতি সৰনমত্তেন পসীদনতো. ওকপ্পনসদ্ধা সদ্ধেয্যৰত্থুং ওগাহেত্ৰা অনুপৰিসিত্ৰা ‘‘এৰমেত’’ন্তি পচ্চক্খং করোন্তী ৰিয পৰত্ততি. তেনাহ ‘‘সদ্ধাধিমুত্তো ৰক্কলিত্থেরসদিসো হোতী’’তি. তস্স হীতি ওকপ্পনসদ্ধায সমন্নাগতস্স. হিরী এতস্স অত্থীতি হিরি, হিরি মনো এতেসন্তি হিরিমনাতি আহ ‘‘পাপ…পে… চিত্তা’’তি. পাপতো ওত্তপ্পেন্তি উব্বিজ্জন্তি ভাযন্তীতি ওত্তপ্পী.

বহু সুতং সুত্তগেয্যাদি এতেনাতি বহুস্সুতো, সুতগ্গহণং চেত্থ নিদস্সনমত্তং ধারণপরিচযপরিপুচ্ছানুপেক্খনদিট্ঠিনিজ্ঝানানং ¶ পেত্থ ইচ্ছিতব্বত্তা. সৰনমূলকত্তা ৰা তেসম্পি তগ্গহণেনেৰ গহণং দট্ঠব্বং. অত্থকামেন পরিযাপুণিতব্বতো, দিট্ঠধম্মিকাদিপুরিসত্থসিদ্ধিযা পরিযত্তভাৰতো চ পরিযত্তি, তীণি পিটকানি. সচ্চপ্পটিৰেধো সচ্চানং পটিৰিজ্ঝনং. তদপি বাহুসচ্চং যথাৰুত্তবাহুসচ্চকিচ্চনিপ্ফত্তিতো. পরিযত্তি অধিপ্পেতা সচ্চপটিৰেধাৰহেন বাহুসচ্চেন বহুস্সুতভাৰস্স ইধ ইচ্ছিতত্তা. সোতি পরিযত্তিবহুস্সুতো. চতুব্বিধো হোতি পঞ্চমস্স পকারস্স অভাৰতো. সব্বত্থকবহুস্সুতোতি নিস্সযমুচ্চনকবহুস্সুতাদযো ৰিয পদেসিকো অহুত্ৰা পিটকত্তযে সব্বত্থকমেৰ বাহুসচ্চসব্ভাৰতো সব্বস্স অত্থস্স কাযনতো কথনতো সব্বত্থকবহুস্সুতো. তে ইধ অধিপ্পেতা পটিপত্তিপটিৰেধসদ্ধম্মানং মূলভূতে পরিযত্তিসদ্ধম্মে সুপ্পতিট্ঠিতভাৰতো.

আরদ্ধন্তি পগ্গহিতং. তং পন দুৰিধম্পি ৰীরিযারম্ভৰিভাগেন দস্সেতুং ‘‘তত্থা’’তিআদি ৰুত্তং. তত্থ এককাতি একাকিনো, ৰূপকট্ঠৰিহারিনোতি অত্থো.

পুচ্ছিত্ৰাতি ¶ পরতো পুচ্ছিত্ৰা. সম্পটিচ্ছাপেতুন্তি ‘‘ত্ৰং অসুকনামো’’তি ৰত্ৰা তেহি ‘‘আমা’’তি পটিজানাপেতুন্তি অত্থো. এৰং চিরকতাদিঅনুস্সরণসমত্থসতিনেপক্কানং অপ্পকসিরেনেৰ ¶ সতিসম্বোজ্ঝঙ্গভাৰনাপারিপূরিং গচ্ছতীতি দস্সনত্থং ‘‘এৰরূপে ভিক্খূ সন্ধাযা’’তি ৰুত্তং. তেনেৰাহ ‘‘অপিচা’’তিআদি.

১৩৯. বুজ্ঝতি এতাযাতি ‘‘বোধী’’তি লদ্ধনামায সম্মাদিট্ঠিআদিধম্মসামগ্গিযা অঙ্গোতি বোজ্ঝঙ্গো, পসত্থো, সুন্দরো ৰা বোজ্ঝঙ্গো সম্বোজ্ঝঙ্গো. উপট্ঠানলক্খণোতি কাযৰেদনাচিত্তধম্মানং অসুভদুক্খানিচ্চানত্তভাৰসল্লক্খণসঙ্খাতং আরম্মণে উপট্ঠানং লক্খণং এতস্সাতি উপট্ঠানলক্খণো. চতুন্নং অরিযসচ্চানং পীল়নাদিপ্পকারতো ৰিচযো উপপরিক্খা লক্খণং এতস্সাতি পৰিচযলক্খণো. অনুপ্পন্না কুসলানুপ্পাদনাদিৰসেন চিত্তস্স ¶ পগ্গহো পগ্গণ্হনং লক্খণং এতস্সাতি পগ্গহলক্খণো. ফরণং ৰিপ্ফারিকতা লক্খণং এতস্সাতি ফরণলক্খণো. উপসমো কাযচিত্তপরিল়াহানং ৰূপসমনং লক্খণং এতস্সাতি উপসমলক্খণো. অৰিক্খেপো ৰিক্খেপৰিদ্ধংসনং লক্খণং এতস্সাতি অৰিক্খেপলক্খণো. লীনুদ্ধচ্চরহিতে অধিচিত্তে পৰত্তমানে পগ্গহনিগ্গহসম্পহংসনেসু অব্যাৰটত্তা অজ্ঝুপেক্খনং পটিসঙ্খানং লক্খণং এতস্সাতি পটিসঙ্খানলক্খণো.

চতূহি কারণেহীতি সতিসম্পজঞ্ঞং, মুট্ঠস্সতিপুগ্গলপরিৰজ্জনা, উপট্ঠিতস্সতিপুগ্গলসেৰনা, তদধিমুত্ততাতি ইমেহি চতূহি কারণেহি. ছহি কারণেহীতি পরিপুচ্ছকতা, ৰত্থুৰিসদকিরিযা, ইন্দ্রিযসমত্তপটিপাদনা, দুপ্পঞ্ঞপুগ্গলপরিৰজ্জনা, পঞ্ঞৰন্তপুগ্গলসেৰনা, তদধিমুত্ততাতি ইমেহি ছহি কারণেহি. মহাসতিপট্ঠানৰণ্ণনাযং পন ‘‘সত্তহি কারণেহী’’ (দী. নি. অট্ঠ. ২.৩৮৫; ম. নি. অট্ঠ. ১.১১৮) ৰক্খতি, তং গম্ভীরঞাণচরিযাপচ্চৰেক্খণাতি ইমং কারণং পক্খিপিত্ৰা ৰেদিতব্বং. নৰহি কারণেহীতি অপাযভযপচ্চৰেক্খণা, গমনৰীথিপচ্চৰেক্খণা, পিণ্ডপাতস্স অপচাযনতা, দাযজ্জমহত্তপচ্চৰেক্খণা, সত্থুমহত্তপচ্চৰেক্খণা, সব্রহ্মচারীমহত্তপচ্চৰেক্খণা, কুসীতপুগ্গলপরিৰজ্জনা, আরদ্ধৰীরিযপুগ্গলসেৰনা, তদধিমুত্ততাতি ইমেহি নৰহি কারণেহি. মহাসতিপট্ঠানৰণ্ণনাযং (দী. নি. অট্ঠ. ২.৩৮৫; ম. নি. অট্ঠ. ১.১১৮) পন ¶ আনিসংসদস্সাৰিতা, জাতিমহত্তপচ্চৰেক্খণাতি ইমেহি সদ্ধিং ‘‘একাদসা’’তি ৰক্খতি. দসহি কারণেহীতি বুদ্ধানুস্সতি, ধম্মানুস্সতি, সঙ্ঘসীলচাগদেৰতাউপসমানুস্সতি, লূখপুগ্গলপরিৰজ্জনা, সিনিদ্ধপুগ্গলসেৰনা, তদধিমুত্ততাতি ইমেহি দসহি. মহাসতিপট্ঠানৰণ্ণনাযং (দী. নি. অট্ঠ. ২.৩৮৫; ম. নি. অট্ঠ. ১.১১৮) পন পসাদনিযসুত্তন্তপচ্চৰেক্খণায সদ্ধিং ‘‘একাদসা’’তি ৰক্খতি. সত্তহি কারণেহীতি পণীতভোজনসেৰনতা ¶ , উতুসুখসেৰনতা, ইরিযাপথসুখসেৰনতা, মজ্ঝত্তপযোগতা, সারদ্ধকাযপুগ্গলপরিৰজ্জনতা ¶ , পস্সদ্ধকাযপুগ্গলসেৰনতা, তদধিমুত্ততাতি ইমেহি সত্তহি. দসহি কারণেহীতি ৰত্থুৰিসদকিরিযা, ইন্দ্রিযসমত্তপটিপাদনা, নিমিত্তকুসলতা, সমযে চিত্তস্স পগ্গহণং, সমযে চিত্তস্স নিগ্গহণং, সমযে চিত্তস্স সম্পহংসনং, সমযে চিত্তস্স অজ্ঝুপেক্খনং, অসমাহিতপুগ্গলপরিৰজ্জনং, সমাহিতপুগ্গলসেৰনং, তদধিমুত্ততাতি ইমেহি দসহি কারণেহি. মহাসতিপট্ঠানৰণ্ণনাযং (দী. নি. অট্ঠ. ২.৩৮৫; ম. নি. অট্ঠ. ১.১১৮) পন ‘‘ঝানৰিমোক্খপচ্চৰেক্খণা’’তি ইমিনা সদ্ধিং ‘‘একাদসহী’’তি ৰক্খতি. পঞ্চহি কারণেহীতি সত্তমজ্ঝত্ততা, সঙ্খারমজ্ঝত্ততা, সত্তসঙ্খারকেলাযনপুগ্গলপরিৰজ্জনা, সত্তসঙ্খারমজ্ঝত্তপুগ্গলসেৰনা, তদধিমুত্ততাতি ইমেহি পঞ্চহি কারণেহি. যং পনেত্থ ৰত্তব্বং, তং মহাসতিপট্ঠানৰণ্ণনাযং (দী. নি. অট্ঠ. ২.৩৮৫; ম. নি. অট্ঠ. ১.১১৮) আগমিস্সতি. কামং বোধিপক্খিযধম্মা নাম নিপ্পরিযাযতো অরিযমগ্গসম্পযুত্তা এৰ নিয্যানিকভাৰতো. সুত্তন্তদেসনা নাম পরিযাযকথাতি ‘‘ইমিনা ৰিপস্সনা…পে… কথেসী’’তি ৰুত্তং.

১৪০. তেভূমকে সঙ্খারে ‘‘অনিচ্চা’’তি অনুপস্সতি এতাযাতি অনিচ্চানুপস্সনা, তথা পৰত্তা ৰিপস্সনা, সা পন যস্মা অত্তনা সহগতসঞ্ঞায ভাৰিতায ৰিভাৰিতা এৰ হোতীতি ৰুত্তং ‘‘অনিচ্চানুপস্সনায সদ্ধিং উপ্পন্নসঞ্ঞা’’তি. সঞ্ঞাসীসেন ৰাযং ৰিপস্সনায এৰ নিদ্দেসো. অনত্তসঞ্ঞাদীসুপি এসেৰ নযো. লোকিযৰিপস্সনাপি হোন্তি, যস্মা ‘‘অনিচ্চ’’ন্তিআদিনা তা পৰত্তন্তীতি. লোকিযৰিপস্সনাপীতি পি-সদ্দেন মিস্সকাপেত্থ সন্তীতি অত্থতো আপন্নন্তি অত্থাপত্তিসিদ্ধমত্থং নিদ্ধারেত্ৰা সরূপতো দস্সেতুং ‘‘ৰিরাগো’’তিআদি ৰুত্তং. তত্থ আগতৰসেনাতি তথা আগতপাল়িৰসেন ‘‘ৰিরাগো নিরোধো’’তি হি তত্থ ¶ নিব্বানং ৰুত্তন্তি ইধ ¶ ‘‘ৰিরাগসঞ্ঞা, নিরোধসঞ্ঞা’’তি ৰুত্তসঞ্ঞা নিব্বানারম্মণাপি সিযুং. তেন ৰুত্তং ‘‘দ্ৰে লোকুত্তরাপি হোন্তী’’তি.

১৪১. মেত্তা এতস্স অত্থীতি মেত্তং, চিত্তং. তংসমুট্ঠানং কাযকম্মং মেত্তং কাযকম্মং. এস নযো সেসদ্ৰযেপি. ইমানিপি মেত্তাকাযকম্মাদীনি ভিক্খূনং ৰসেন আগতানি তেসং সেট্ঠপরিসভাৰতো. যথা পন ভিক্খূসুপি লব্ভন্তি, এৰং গিহীসুপি লব্ভন্তি চতুপরিসসাধারণত্তাতি তং দস্সেন্তো ‘‘ভিক্খূনঞ্হী’’তিআদিমাহ. কামং আদিব্রহ্মচরিযকধম্মস্সৰনেনপি মেত্তাকাযকম্মানি লব্ভন্তি, নিপ্পরিযাযতো পন চারিত্তধম্মস্সৰনেন অযমত্থো ইচ্ছিতোতি দস্সেন্তো ‘‘আভিসমাচারিকধম্মপূরণ’’ন্তি আহ. তেপিটকম্পি বুদ্ধৰচনং পরিপুচ্ছনঅত্থকথনৰসেন পৰত্তিযমানং হিতজ্ঝাসযেন পৰত্তিতব্বতো.

আৰীতি ¶ পকাসং, পকাসভাৰো চেত্থ যং উদ্দিস্স তং কাযকম্মং করীযতি, তস্স সম্মুখভাৰতোতি আহ ‘‘সম্মুখা’’তি. রহোতি অপ্পকাসং, অপ্পকাসতা চ যং উদ্দিস্স তং কাযকম্মং করীযতি, তস্স পচ্চক্খাভাৰতোতি আহ ‘‘পরম্মুখা’’তি. সহাযভাৰগমনং তেসং পুরতো. উভযেহীতি নৰকেহি, থেরেহি চ.

পগ্গয্হাতি পগ্গণ্হিত্ৰা উচ্চং কত্ৰা.

কামং মেত্তাসিনেহসিনিদ্ধানং নযনানং উম্মীলনা, পসন্নেন মুখেন ওলোকনঞ্চ মেত্তং কাযকম্মমেৰ, যস্স পন চিত্তস্স ৰসেন নযনানং মেত্তাসিনেহসিনিদ্ধতা, মুখস্স চ পসন্নতা, তং সন্ধায ৰুত্তং ‘‘মেত্তং মনোকম্মং নামা’’তি.

লাভসদ্দো কম্মসাধনো ‘‘লাভাৰত, লাভো লদ্ধো’’তিআদীসু ৰিয, সো চেত্থ ‘‘ধম্মলদ্ধা’’তি ৰচনতো অতীতকালিকোতি আহ ‘‘চীৰরাদযো লদ্ধপচ্চযা’’তি. ধম্মতো ¶ আগতাতি ধম্মিকা. তেনাহ ‘‘ধম্মলদ্ধা’’তি. ইমমেৰ হি অত্থং দস্সেতুং ‘‘কুহনাদী’’তিআদি ৰুত্তং. চিত্তেন ৰিভজনপুব্বকং কাযেন ৰিভজনন্তি মূলমেৰ দস্সেতুং ‘‘এৰং চিত্তেন ৰিভজন’’ন্তি ৰুত্তং, তেন চিত্তুপ্পাদমত্তেনপি পটিৰিভাগো ন কাতব্বোতি দস্সেতি. অপ্পটিৰিভত্তন্তি ভাৰনপুংসকনিদ্দেসো, অপ্পটিৰিভত্তং ৰা লাভং ভুঞ্জতীতি কম্মনিদ্দেসো এৰ.

তং ¶ তং নেৰ গিহীনং দেতি অত্তনো আজীৰসোধনত্থং. ন অত্তনা ভুঞ্জতীতি অত্তনাৰ ন পরিভুঞ্জতি ‘‘ময্হং অসাধারণভোগিতা মা হোতূ’’তি. ‘‘পটিগ্গণ্হন্তো চ…পে… পস্সতী’’তি ইমিনা তস্স লাভস্স তীসুপি কালেসু সাধারণতো ঠপনং দস্সিতং. ‘‘পটিগ্গণ্হন্তো চ সঙ্ঘেন সাধারণং হোতূ’’তি ইমিনা পটিগ্গহণকালো দস্সিতো, ‘‘গহেত্ৰা…পে… পস্সতী’’তি ইমিনা পটিগ্গহিতকালো, তদুভযং পন তাদিসেন পুব্বাভোগেন ৰিনা ন হোতীতি অত্থসিদ্ধো পুরিমকালো. তযিদং পটিগ্গহণতো পুব্বে ৰস্স হোতি ‘‘সঙ্ঘেন সাধারণং হোতূতি পটিগ্গহেস্সামী’’তি. পটিগ্গণ্হন্তস্স হোতি ‘‘সঙ্ঘেন সাধারণং হোতূতি পটিগ্গণ্হামী’’তি. পটিগ্গহেত্ৰা হোতি ‘‘সঙ্ঘেন সাধারণং হোতূতি পটিগ্গহিতং মযা’’তি এৰং তিলক্খণসম্পন্নং কত্ৰা লদ্ধলাভং ওসানলক্খণং অৰিকোপেত্ৰা পরিভুঞ্জন্তো সাধারণভোগী, অপ্পটিৰিভত্তভোগী চ হোতি.

ইমং পন সারণীযধম্মন্তি ইমং চতুত্থং সরিতব্বযুত্তধম্মং. ন হি…পে… গণ্হন্তি, তস্মা ¶ সাধারণভোগিতা এৰ দুস্সীলস্স নত্থীতি আরম্ভোপি তাৰ ন সম্ভৰতি, কুতো পূরণন্তি অধিপ্পাযো. ‘‘পরিসুদ্ধসীলো’’তি ইমিনা লাভস্স ধম্মিকভাৰং দস্সেতি. ‘‘ৰত্তং অখণ্ডেন্তো’’তি ইমিনা অপ্পটিৰিভত্তভোগিতং, সাধারণভোগিতঞ্চ দস্সেতি. সতি পন তদুভযে সারণীযধম্মো পূরিতো এৰ হোতীতি আহ ‘‘পূরেতী’’তি. ‘‘ওদিস্সকং ¶ কত্ৰা’’তি এতেন অনোদিস্সকং কত্ৰা পিতুনো, আচরিযুপজ্ঝাযাদীনং ৰা থেরাসনতো পট্ঠায দেন্তস্স সারণীযধম্মোযেৰ হোতীতি. সারণীযধম্মো পনস্স ন হোতীতি পটিজগ্গনট্ঠানে ওদিস্সকং কত্ৰা দিন্নত্তা. তেনাহ ‘‘পলিবোধজগ্গনং নাম হোতী’’তিআদি. যদি এৰং সব্বেন সব্বং সারণীযধম্মপূরকস্স ওদিস্সকদানং ন ৰট্টতীতি? নো ন ৰট্টতি যুত্তট্ঠানেতি দস্সেন্তো ‘‘তেন পনা’’তিআদিমাহ. গিলানাদীনং ওদিস্সকং কত্ৰা দানং অপ্পটিৰিভাগপক্খিকং ‘‘অসুকস্স ন দস্সামী’’তি পটিক্খেপস্স অভাৰতো. ব্যতিরেকপ্পধানো হি পটিৰিভাগো. তেনাহ ‘‘অৰসেস’’ন্তিআদি. অদাতুম্পীতি পি-সদ্দেন দাতুম্পি ৰট্টতীতি দস্সেতি, তঞ্চ খো করুণাযনৰসেন, ন ৰত্তপূরণৰসেন.

সুসিক্খিতাযাতি সারণীযধম্মপূরণৰিধিম্হি সুট্ঠু সিক্খিতায, সুকুসলাযাতি অত্থো. ইদানি তস্সা কোসল্লং দস্সেতুং ‘‘সুসিক্খিতায হী’’তিআদি ¶ ৰুত্তং. ‘‘দ্ৰাদসহি ৰস্সেহি পূরতি, ন ততো ওর’’ন্তি ইমিনা তস্স দুপ্পূরণং দস্সেতি. তথা হি সো মহপ্ফলো মহানিসংসো, দিট্ঠধম্মিকেহিপি তাৰ গরুতরেহি ফলানিসংসেহি চ অনুগতো. তংসমঙ্গী চ পুগ্গলো ৰিসেসলাভী অরিযপুগ্গলো ৰিয লোকে অচ্ছরিযব্ভুতধম্মসমন্নাগতো হোতি. তথা হি সো দুপ্পজহং দানমযস্স, সীলমযস্স চ পুঞ্ঞস্স পটিপক্খধম্মং সুদূরে ৰিক্খম্ভিতং কত্ৰা সুৰিসুদ্ধেন চেতসা লোকে পাকটো পঞ্ঞাতো হুত্ৰা ৰিহরতি, তস্সিমমত্থং ব্যতিরেকতো, অন্ৰযতো চ ৰিভাৰেতুং ‘‘সচে হী’’তিআদি ৰুত্তং, তং সুৰিঞ্ঞেয্যমেৰ.

ইদানি যে সম্পরাযিকে, দিট্ঠধম্মিকে চ আনিসংসে দস্সেতুং ‘‘এৰ’’ন্তিআদি ৰুত্তং. নেৰ ইস্সা, ন মচ্ছরিযং হোতি চিরকালভাৰনায ৰিধুতভাৰতো. মনুস্সানং পিযো হোতি পরিচ্চাগসীলতায ৰিসুদ্ধত্তা. তেনাহ ‘‘দদং পিযো হোতি ভজন্তি নং বহূ’’তিআদি ¶ (অ. নি. ৫.৩৪). সুলভপচ্চযো হোতি দানৰসেন উল়ারজ্ঝাসযানং পচ্চযলাভস্স ইধানিসংসভাৰতো দানস্স. পত্তগতং অস্স দিয্যমানং ন খীযতি পত্তগতৰসেন দ্ৰাদসৰস্সিকস্স মহাপত্তস্স অৰিচ্ছেদেন পূরিতত্তা. অগ্গভণ্ডং লভতি দেৰসিকং দক্খিণেয্যানং অগ্গতো পট্ঠায দানস্স দিন্নত্তা. ভযেৰা…পে… আপজ্জন্তি দেয্যপটিগ্গাহকৰিকপ্পং ¶ অকত্ৰা অত্তনি নিরপেক্খচিত্তেন চিরকালং দানপূরতায পসাদিতচিত্তত্তা.

তত্রাতি তেসু আনিসংসেসু ৰিভাৰেতব্বেসু. ইমানি তং দীপনানি ৰত্থূনি কারণানি. অলভন্তাপীতি অমহাপুঞ্ঞতায ন লাভিনো সমানাপি. ভিক্খাচারমগ্গসভাগন্তি সভাগং তব্ভাগিযং ভিক্খাচারমগ্গং জানন্তি.

অনুত্তরিমনুস্সধম্মত্তা, থেরানং সংসযৰিনোদনত্থঞ্চ ‘‘সারণীযধম্মো মে ভন্তে পূরিতো’’তি আহ. তথা হি দুতিযৰত্থুস্মিম্পি থেরেন অত্তা পকাসিতো. মনুস্সানং পিযতায, সুলভপচ্চযতাযপি ইদং ৰত্থুমেৰ. পত্তগতাখীযনস্স পন ৰিসেসং ৰিভাৰনতো ‘‘ইদং তাৰ…পে… এত্থ ৰত্থু’’ন্তি ৰুত্তং.

গিরিভণ্ডমহাপূজাযাতি ¶ চেতিযগিরিম্হি সকললঙ্কাদীপে, যোজনপ্পমাণে সমুদ্দে চ নাৰাসঙ্ঘাটাদিকে ঠপেত্ৰা দীপপুপ্ফগন্ধাদীহি করিযমানমহাপূজাযং. পরিযাযেনপীতি লেসেনপি. অনুচ্ছৰিকন্তি সারণীযধম্মপূরণতোপি ইদং যথাভূতপ্পৰেদনং তুম্হাকং অনুচ্ছৰিকন্তি অত্থো.

অনারোচেত্ৰাৰ পলাযিংসু চোরভযেন. ‘‘অত্তনো দুজ্জীৰিকাযা’’তি চ ৰদন্তি.

ৰট্টিস্সতীতি কপ্পিস্সতি. থেরী সারণীযধম্মপূরিকা অহোসি, থেরস্স পন সীলতেজেনেৰ দেৰতা উস্সুক্কং আপজ্জি.

নত্থি ¶ এতেসং খণ্ডন্তি অখণ্ডানি. তং পন নেসং খণ্ডং দস্সেতুং ‘‘যস্সা’’তিআদি ৰুত্তং. তত্থ উপসম্পন্নসীলানং উদ্দেসক্কমেন আদি অন্তা ৰেদিতব্বা. তেনাহ ‘‘সত্তসূ’’তিআদি. অনুপসম্পন্নসীলানং পন সমাদানক্কমেনপি আদি অন্তা লব্ভন্তি. পরিযন্তে ছিন্নসাটকো ৰিযাতি ৰত্থন্তে, দসন্তে ৰা ছিন্নৰত্থং ৰিয, ৰিসদিসূদাহরণং চেতং ‘‘অখণ্ডানী’’তি ইমস্স অধিগতত্তা. এৰং সেসানিপি উদাহরণানি. খণ্ডিতভিন্নতা খণ্ডং, তং এতস্স অত্থীতি খণ্ডং, সীলং. ‘‘ছিদ্দ’’ন্তিআদীসুপি এসেৰ নযো. ৰেমজ্ঝে ভিন্নং ৰিনিৰিজ্ঝনৰসেন ৰিসভাগৰণ্ণেন গাৰী ৰিযাতি সম্বন্ধো. সবলরহিতানি অসবলানি. তথা অকম্মাসানি. সীলস্স তণ্হাদাসব্যতো মোচনং ৰিৰট্টূপনিস্সযভাৰাপাদনং. যস্মা চ তংসমঙ্গীপুগ্গলো সেরী সযংৰসী ভুজিস্সো নাম হোতি, তস্মাপি ভুজিস্সানি. তেনেৰাহ ‘‘ভুজিস্সভাৰকারণতো ¶ ভুজিস্সানী’’তি. সুপরিসুদ্ধভাৰেন পাসংসত্তা ৰিঞ্ঞুপসত্থানি. ইমিনাহং সীলেন দেৰো ৰা ভৰেয্যং, দেৰঞ্ঞতরো ৰা, তত্থ ‘‘নিচ্চো ধুৰো সস্সতো’’তি, ‘‘সীলেন সুদ্ধী’’তি চ এৰং আদিনা তণ্হাদিট্ঠীহি অপরামট্ঠত্তা. ‘‘অযং তে সীলেসু দোসো’’তি চতূসুপি ৰিপত্তীসু যায কাযচি ৰিপত্তিযা দস্সনেন পরামট্ঠুং অনুদ্ধংসেতুং. সমাধিসংৰত্তনপ্পযোজনানি সমাধিসংৰত্তনিকানি.

সমানভাৰূপগতসীলাতি সীলসম্পত্তিযা সমানভাৰং উপগতসীলা সভাগৰুত্তিকা. কামং পুথুজ্জনানঞ্চ চতুপারিসুদ্ধিসীলে নানত্তং ন সিযা, তং ¶ পন ন একন্তিকং, ইদং একন্তিকং নিযতভাৰতোতি আহ ‘‘নত্থি মগ্গসীলে নানত্ত’’ন্তি. তং সন্ধাযেতং ৰুত্তন্তি মগ্গসীলং সন্ধায এতং ‘‘যানি তানি সীলানী’’তিআদি ৰুত্তং.

যাযন্তি যা অযং ময্হঞ্চেৰ তুম্হাকঞ্চ পচ্চক্খভূতা ¶ . দিট্ঠীতি মগ্গসম্মাদিট্ঠি. নিদ্দোসাতি নিধুতদোসা, সমুচ্ছিন্নরাগাদিপাপধম্মাতি অত্থো. নিয্যাতীতি ৰট্টদুক্খতো নিস্সরতি নিগচ্ছতি. সযং নিয্যন্তস্সেৰ হি ‘‘তংসমঙ্গীপুগ্গলং ৰট্টদুক্খতো নিয্যাপেতী’’তি ৰুচ্চতি. যা সত্থু অনুসিট্ঠি, তং করোতীতি তক্করো, তস্স, যথানুসিট্ঠং পটিপজ্জনকস্সাতি অত্থো. সমানদিট্ঠিভাৰন্তি সদিসদিট্ঠিভাৰং সচ্চসম্পটিৰেধেন অভিন্নদিট্ঠিভাৰং. ৰুদ্ধিযেৰাতি অরিযৰিনযে গুণেহি ৰুড্ঢিযেৰ, নো পরিহানীতি অযং অপরিহানিযধম্মদেসনা অত্তনোপি সাসনস্স অদ্ধনিযতং আকঙ্খন্তেন ভগৰতা ইধ দেসিতা.

১৪২. আসন্নপরিনিব্বানত্তাতি কতিপযমাসাধিকেন সংৰচ্ছরমত্তেন পরিনিব্বানং ভৰিস্সতীতি কত্ৰা ৰুত্তং. এতংযেৰাতি ‘‘ইতি সীল’’ন্তিআদিকংযেৰ ইতি সীলন্তি এত্থ ইতি-সদ্দো পকারত্থো, পরিমাণত্থো চ একজ্ঝং কত্ৰা গহিতোতি আহ ‘‘এৰং সীলং এত্তকং সীল’’ন্তি. এৰং সীলন্তি এৰং পভেদং সীলং. এত্তকন্তি এতং পরমং, ন ইতো ভিয্যো. চতুপারিসুদ্ধিসীলন্তি মগ্গস্স সম্ভারভূতং লোকিযচতুপারিসুদ্ধিসীলং. চিত্তেকগ্গতা সমাধীতি এত্থাপি এসেৰ নযো. যস্মিং সীলে ঠত্ৰাতি যস্মিং লোকুত্তরকুসলস্স পদট্ঠানভূতে ‘‘পুব্বেৰ খো পনস্স কাযকম্মং ৰচীকম্মং আজীৰো সুপরিসুদ্ধো হোতী’’তি (ম. নি. ৩.৪৩১; কথা. ৮৭৪) এৰং ৰুত্তসীলে পতিট্ঠায. এসোতি মগ্গফলসমাধি. পরিভাৰিতোতি তেন সীলেন সব্বসো ভাৰিতো সম্ভাৰিতো. মহপ্ফলো হোতি মহানিসংসোতি মগ্গসমাধি তাৰ সামঞ্ঞফলেহি মহপ্ফলো, ৰট্টদুক্খৰূপসমেন মহানিসংসো. ইতরো পটিপ্পস্সদ্ধিপ্পহানেন মহপ্ফলো, নিব্বুতিসুখুপ্পত্তিযা মহানিসংসো. যম্হি সমাধিম্হি ¶ ঠত্ৰাতি যস্মিং লোকুত্তরকুসলস্স ¶ পদট্ঠানভূতে পাদকজ্ঝানসমাধিম্হি চেৰ ৰুট্ঠানগামিনিসমাধিম্হি চ ঠত্ৰা. সাতি মগ্গফলপঞ্ঞা. তেন পরিভাৰিতাতি তেন যথাৰুত্তসমাধিনা সব্বসো ভাৰিতা পরিভাৰিতা. মহপ্ফলমহানিসংসতা সমাধিম্হি ৰুত্তনযেন ৰেদিতব্বা. অপি চ তে বোজ্ঝঙ্গমগ্গঙ্গঝানঙ্গপ্পভেদহেতুতায মহপ্ফলা সত্তদক্খিণেয্যপুগ্গলৰিভাগহেতুতায ¶ মহানিসংসাতি ৰেদিতব্বা. যায পঞ্ঞায ঠত্ৰাতি যাযং ৰিপস্সনাপঞ্ঞাযং, সমাধিৰিপস্সনাপঞ্ঞাযং ৰা ঠত্ৰা. সমথযানিকস্স হি সমাধিসহগতাপি পঞ্ঞা মগ্গাধিগমায ৰিসেসপচ্চযো হোতিযেৰ. সম্মদেৰাতি সুট্ঠুযেৰ যথা আসৰানং লেসোপি নাৰসিস্সতি, এৰং সব্বসো আসৰেহি ৰিমুচ্চতি. অগ্গমগ্গক্খণঞ্হি সন্ধাযেতং ৰুত্তং.

১৪৩. লোকিযত্থসদ্দানং ৰিয অভিরন্ত-সদ্দস্স সিদ্ধি দট্ঠব্বা. অভিরন্তং অভিরতং অভিরতীতি হি অত্থতো একং. অভিরন্ত-সদ্দো চাযং অভিরুচিপরিযাযো, ন অস্সাদপরিযাযো. অস্সাদৰসেন হি কত্থচি ৰসন্তস্স অস্সাদৰত্থুৰিগমেন সিযা তস্স তত্থ অনভিরতি, যদিদং খীণাসৰানং নত্থি, পগেৰ বুদ্ধানন্তি আহ ‘‘বুদ্ধানং…পে… নত্থী’’তি. অভিরতিৰসেন কত্থচি ৰসিত্ৰা তদভাৰতো অঞ্ঞত্থ গমনং নাম বুদ্ধানং নত্থি. ৰেনেয্যৰিনযনত্থং পন কত্থচি ৰসিত্ৰা তস্মিং সিদ্ধে ৰেনেয্যৰিনযনত্থমেৰ ততো অঞ্ঞত্থ গচ্ছন্তি, অযমেত্থ যথারুচি. আযামাতি এত্থ আ-সদ্দো ‘‘আগচ্ছা’’তি ইমিনা সমানত্থোতি আহ ‘‘এহি যামা’’তি. অযামাতি পন পাঠে অ-কারো নিপাতমত্তং. সন্তিকাৰচরত্তা থেরং আলপতি, ন পন তদা সত্থু সন্তিকে ৰসন্তানং ভিক্খূনং অভাৰতো. অপরিচ্ছিন্নগণনো হি তদা ভগৰতো সন্তিকে ভিক্খুসঙ্ঘো ¶ . তেনাহ ‘‘মহতা ভিক্খুসঙ্ঘেন সদ্ধি’’ন্তি. অম্বলট্ঠিকাগমনন্তি অম্বলট্ঠিকাগমনপটিসংযুত্তপাঠমাহ. পাটলিগমনেতি এত্থাপি এসেৰ নযো. উত্তানমেৰ অনন্তরং, হেট্ঠা চ সংৰণ্ণিতরূপত্তা.

সারিপুত্তসীহনাদৰণ্ণনা

১৪৫. ‘‘আযস্মা সারিপুত্তো’’তিআদি পাঠজাতং. সম্পসাদনীযেতি সম্পসাদনীযসুত্তে (দী. নি. ৩.১৪১) ৰিত্থারিতং পোরাণট্ঠকথাযং, তস্মা মযম্পি তত্থেৰ নং অত্থতো ৰিত্থারযিস্সামাতি অধিপ্পাযো.

দুস্সীলআদীনৰৰণ্ণনা

১৪৮. আগন্ত্ৰা ¶ ৰসন্তি এত্থ আগন্তুকাতি আৰসথো, তদেৰ অগারন্তি আহ ‘‘আৰসথাগারন্তি আগন্তুকানং আৰসথগেহ’’ন্তি. দ্ৰিন্নং ¶ রাজূনন্তি লিচ্ছৰিরাজমগধরাজূনং. সহাযকাতি সেৰকা. কুলানীতি কুটুম্বিকে. সন্থতন্তি সন্থরি, সব্বং সন্থরি সব্বসন্থরি, তং সব্বসন্থরিং. ভাৰনপুংসকনিদ্দেসো চাযং. তেনাহ ‘‘যথা সব্বং সন্থতং হোতি, এৰ’’ন্তি.

১৪৯. দুস্সীলোতি এত্থ দু-সদ্দো অভাৰত্থো ‘‘দুপ্পঞ্ঞো’’তিআদীসু (ম. নি. ১.৪৪৯; অ. নি. ৫.১০) ৰিয, ন গরহত্থোতি আহ ‘‘অসীলো নিস্সীলো’’তি. ভিন্নসংৰরোতি এত্থ যো সমাদিন্নসীলো কেনচি কারণেন সীলভেদং পত্তো, সো তাৰ ভিন্নসংৰরো হোতি. যো পন সব্বেন সব্বং অসমাদিন্নসীলো আচারহীনো, সো কথং ভিন্নসংৰরো নাম হোতীতি? সোপি সাধুসমাচারস্স পরিহানিযস্স ভেদিতত্তা ভিন্নসংৰরো এৰ নাম. ৰিস্সট্ঠসংৰরো সংৰররহিতোতি হি ৰুত্তং হোতি.

তং তং সিপ্পট্ঠানং. মাঘাতকালেতি ‘‘মা ঘাতেথ পাণিনো’’তি এৰং মাঘাতাতি ঘোসনং ঘোসিতদিৰসে.

অব্ভুগ্গচ্ছতি পাপকো কিত্তিসদ্দো.

অজ্ঝাসযেন মঙ্কু হোতিযেৰ ৰিপ্পটিসারিভাৰতো.

তস্সাতি ¶ দুস্সীলস্স. সমাদায পৰত্তিট্ঠানন্তি উট্ঠায সমুট্ঠায কতকারণং. আপাথং আগচ্ছতীতি তং মনসো উপট্ঠাতি. উম্মীলেত্ৰা ইধলোকন্তি উম্মীলনকালে অত্তনো পুত্তদারাদিদস্সনৰসেন ইধ লোকং পস্সতি. নিমীলেত্ৰা পরলোকন্তি নিমীলনকালে গতিনিমিত্তুপট্ঠানৰসেন পরলোকং পস্সতি. তেনাহ ‘‘চত্তারো অপাযা’’তিআদি. পঞ্চমপদন্তি ‘‘কাযস্স ভেদা’’তিআদিনা ৰুত্তো পঞ্চমো আদীনৰকোট্ঠাসো.

সীলৰন্তআনিসংসৰণ্ণনা

১৫০. ৰুত্তৰিপরিযাযেনাতি ৰুত্তায আদীনৰকথায ৰিপরিযাযেন. ‘‘অপ্পমত্তো তং তং কসিৰাণিজ্জাদিং ¶ যথাকালং সম্পাদেতুং সক্কোতী’’তিআদিনা ‘‘পাসংসং সীলমস্স অত্থীতি সীলৰা. সীলসম্পন্নোতি সীলেন সমন্নাগতো. সম্পন্নসীলো’’তি এৰমাদিকং পন অত্থৰচনং সুকরন্তি অনামট্ঠং.

১৫১. পাল়িমুত্তকাযাতি ¶ সঙ্গীতিঅনারুল়্হায ধম্মিকথায. তত্থেৰাতি আৰসথাগারে এৰ.

পাটলিপুত্তনগরমাপনৰণ্ণনা

১৫২. ইস্সরিযমত্তাযাতি ইস্সরিযপ্পমাণেন, ইস্সরিযেন চেৰ ৰিত্তূপকরণেন চাতি এৰং ৰা অত্থো দট্ঠব্বো. উপভোগূপকরণানিপি হি লোকে ‘‘মত্তা’’তি ৰুচ্চন্তি. পাটলিগামং নগরং কত্ৰাতি পুব্বে ‘‘পাটলিগামো’’তি লদ্ধনামং ঠানং ইদানি নগরং কত্ৰা. মাপেন্তীতি পতিট্ঠাপেন্তি. আযমুখপচ্ছিন্দনত্থন্তি আযদ্ৰারানং উপচ্ছেদনায. ‘‘সহস্সসেৰা’’তি ৰা পাঠো, সহস্সসো এৰ. তেনাহ ‘‘একেকৰগ্গৰসেন সহস্সং সহস্সং হুত্ৰা’’তি. ঘরৰত্থূনীতি ঘরপতিট্ঠাপনট্ঠানানি. চিত্তানি নমন্তীতি তংতংদেৰতানুভাৰেন তত্থ তত্থেৰ চিত্তানি নমন্তি ৰত্থুৰিজ্জাপাঠকানং, যত্থ যত্থ তাহি ৰত্থূনি পরিগ্গহিতানি. সিপ্পানুভাৰেনাতি সিপ্পানুগতৰিজ্জানুভাৰেন. নাগগ্গাহোতি নাগানং নিৰাসপ্পরিগ্গহো. সেসদ্ৰযেসুপি এসেৰ নযো. পাসাণোতি অপ্পলক্খণপাসাণো. খাণুকোতি যো কোচি খাণুকো ¶ . সিপ্পং জপ্পিত্ৰা তাদিসং সারম্ভট্ঠানং পরিহরিত্ৰা অনারম্ভে ঠানে তাহি ৰত্থুপরিগ্গাহিকাহি দেৰতাহি সদ্ধিং মন্তযমানা ৰিয তংতংগেহানি মাপেন্তি উপদেসদানৰসেন. নেসন্তি ৰত্থুৰিজ্জাপাঠকানং, সব্বাসং দেৰতানং. মঙ্গলং ৰড্ঢাপেস্সন্তীতি মঙ্গলং ব্রূহেস্সন্তি. পণ্ডিতদস্সনাদীনি হি উত্তমমঙ্গলানি. তেনাহ ‘‘অথ ময’’ন্তিআদি.

সদ্দো অব্ভুগ্গচ্ছতি অৰযৰধম্মেন সমুদাযস্স অপদিসিতব্বতো যথা ‘‘অলঙ্কতো দেৰদত্তো’’তি.

অরিযকমনুস্সানন্তি অরিযদেসৰাসিমনুস্সানং. রাসিৰসেনেৰাতি ‘‘সহস্সং সতসহস্স’’ন্তিআদিনা রাসিৰসেনেৰ, অপ্পকস্স পন ভণ্ডস্স কযৰিক্কযো অঞ্ঞত্থাপি লব্ভতেৰাতি ‘‘রাসিৰসেনেৰা’’তি ৰুত্তং. ৰাণিজায পথো পৰত্তিট্ঠানন্তি ৰণিপ্পথোতি পুরিমৰিকপ্পে অত্থো দুতিযৰিকপ্পে পন ৰাণিজানং পথো পৰত্তিট্ঠানন্তি, ৰণিপ্পথোতি ইমমত্থং দস্সেন্তো ¶ ‘‘ৰাণিজানং ৰসনট্ঠান’’ন্তি আহ. ভণ্ডপুটে ভিন্দন্তি মোচেন্তি এত্থাতি পুটভেদনন্তি অযমেত্থ অত্থোতি আহ ‘‘ভণ্ডপুটে…পে… ৰুত্তং হোতী’’তি.

চ-কারত্থো ¶ সমুচ্চযত্থো ৰা-সদ্দো.

১৫৩. কাল়কণ্ণী সত্তাতি অত্তনা কণ্হধম্মবহুলতায পরেসঞ্চ কণ্হৰিপাকানত্থনিব্বত্তিনিমিত্ততায ‘‘কাল়কণ্ণী’’তি লদ্ধনামা পরূপদ্দৰকরা অপ্পেসক্খসত্তা. তন্তি ভগৰন্তং. পুব্বণ্হসমযন্তি পুব্বণ্হে একং সমযং. গামপ্পৰিসননীহারেনাতি গামপ্পৰেসন নিৰসনাকারেন. কাযপটিবদ্ধং কত্ৰাতি চীৰরং পারুপিত্ৰা, পত্তং হত্থেন গহেত্ৰাতি অত্থো.

এত্থাতি ¶ এতস্মিং ৰা সকপ্পিতপ্পদেসে. সঞ্ঞতেতি সম্মদেৰ সঞ্ঞতে সুসংৰুতকাযৰাচাচিত্তে.

পত্তিং দদেয্যাতি অত্তনা পসুতং পুঞ্ঞং তাসং দেৰতানং অনুপ্পদজ্জেয্য. ‘‘পূজিতা’’তিআদীসু তদেৰ পত্তিদানং পূজা, অনাগতে এৰ উপদ্দৰে আরক্খসংৰিধানং পটিপূজা. ‘‘যেভুয্যেন ঞাতিমনুস্সা ঞাতিপেতানং পত্তিদানাদিনা পূজনমাননাদীনি করোন্তি ইমে পন অঞ্ঞাতকাপি সমানা তথা করোন্তি, তস্মা নেসং সক্কচ্চং আরক্খা সংৰিধাতব্বা’’তি অঞ্ঞমঞ্ঞং সম্পৰারেত্ৰা দেৰতা তত্থ উস্সুক্কং আপজ্জন্তীতি দস্সেন্তো ‘‘ইমে’’তিআদিমাহ. বলিকম্মকরণং মাননং, সম্পতি উপ্পন্নপরিস্সযহরণং পটিমানন্তি দস্সেতুং ‘‘এতে’’তিআদি ৰুত্তং.

সুন্দরানি পস্সতীতি সুন্দরানি ইট্ঠানি এৰ পস্সতি, ন অনিট্ঠানি.

১৫৪. আণিযো কোট্টেত্ৰাতি লহুকে দারুদণ্ডে গহেত্ৰা কৰাটফলকে ৰিয অঞ্ঞমঞ্ঞং সম্বন্ধে কাতুং আণিযো কোট্টেত্ৰা. নাৰাসঙ্খেপেন কতং উল়ুম্পং, ৰেল়ুনল়াদিকে সঙ্ঘরিত্ৰা ৰল্লিআদীহি কলাপৰসেন বন্ধিত্ৰা কত্তব্বং কুল্লং.

উদকট্ঠানস্সেতং অধিৰচনন্তি যথাৰুত্তস্স যস্স কস্সচি উদকট্ঠানস্স এতং ‘‘অণ্ণৰ’’ন্তি অধিৰচনং, সমুদ্দস্সেৰাতি অধিপ্পাযো. সরন্তি ইধ নদী অধিপ্পেতা সরতি সন্দতীতি ¶ কত্ৰা. গম্ভীরৰিত্থতন্তি অগাধট্ঠেন গম্ভীরং, সকললোকত্তযব্যাপিতায ৰিত্থতং. ৰিসজ্জাতি অনাসজ্জ অপ্পত্ৰা. পল্ললানি তেসং অতরণতো. ৰিনাযেৰ কুল্লেনাতি ঈদিসং উদকং কুল্লেন ঈদিসেন ৰিনা এৰ তিণ্ণা মেধাৰিনো জনা, তণ্হাসরং পন অরিযমগ্গসঙ্খাতং সেতুং কত্ৰা নিত্তিণ্ণাতি যোজনা.

পঠমভাণৰারৰণ্ণনা নিট্ঠিতা.

অরিযসচ্চকথাৰণ্ণনা

১৫৫. মহাপনাদস্স ¶ ¶ রঞ্ঞো. পাসাদকোটিযং কতগামোতি পাসাদস্স পতিতথুপিকায পতিট্ঠিতট্ঠানে নিৰিট্ঠগামো. অরিযভাৰকরানন্তি যে পটিৰিজ্ঝন্তি, তেসং অরিযভাৰকরানং নিমিত্তস্স কত্তুভাৰূপচারৰসেনেৰ ৰুত্তং. তচ্ছাৰিপল্লাসভূতভাৰেন সচ্চানং. অনুবোধো পুব্বভাগিযং ঞাণং, পটিৰেধো মগ্গঞাণেন অভিসমযো, তত্থ যস্মা অনুবোধপুব্বকো পটিৰেধো অনুবোধেন ৰিনা ন হোতি, অনুবোধোপি একচ্চো পটিৰেধেন সম্বন্ধো, তদুভযাভাৰহেতুকঞ্চ ৰট্টেৰ সংসরণং, তস্মা ৰুত্তং পাল়িযং ‘‘অননুবোধা…পে… তুম্হাকঞ্চা’’তি. পটিসন্ধিগ্গহণৰসেন ভৰতো ভৰন্তরূপগমনং সন্ধাৰনং, অপরাপরং চৰনুপপজ্জনৰসেন সঞ্চরণং সংসরণন্তি আহ ‘‘ভৰতো’’তিআদি. সন্ধাৰিতসংসরিতপদানং কম্মসাধনতং সন্ধাযাহ ‘‘মযা চ তুম্হেহি চা’’তি পঠমৰিকপ্পে. দুতিযৰিকপ্পে পন ভাৰসাধনতং হদযে কত্ৰা ‘‘মমঞ্চেৰ তুম্হাকঞ্চা’’তি যথারুতৰসেনেৰ ৰুত্তং. নযনসমত্থাতি পাপনসমত্থা, দীঘরজ্জুনা বদ্ধসকুণং ৰিয রজ্জুহত্থো পুরিসো দেসন্তরং তণ্হারজ্জুনা বদ্ধং সত্তসন্তানং অভিসঙ্খারো ভৰন্তরং নেতি এতাযাতি ভৰনেত্তি, তণ্হা, সা অরিযমগ্গসত্থেন সুট্ঠু হতা ছিন্নাতি ভৰনেত্তিসমূহতা.

অনাৰত্তিধম্মসম্বোধিপরাযণৰণ্ণনা

১৫৬. দ্ৰে গামা ‘‘নাতিকা’’তি এৰং লদ্ধনামো, ঞ-কারস্স চাযং ন-কারাদেসেন নিদ্দেসো ‘‘অনিমিত্তা ন নাযরে’’তিআদীসু (ৰিসুদ্ধি. ১.১৭৪; জা. অট্ঠ. ২.২.৩৪) ৰিয. তেনাহ ‘‘ঞাতিগামকে’’তি ¶ . গিঞ্জকা ৰুচ্চন্তি ইট্ঠকা, গিঞ্জকাহি এৰ কতো আৰসথোতি গিঞ্জকাৰসথো ¶ . সো কির আৰাসো যথা সুধাপরিকম্মেন সম্পযোজনং নত্থি, এৰং ইট্ঠকাহি এৰ চিনিত্ৰা ছাদেত্ৰা কতো. তেন ৰুত্তং ‘‘ইট্ঠকামযে আৰসথে’’তি. তুলাদণ্ডকৰাটফলকানি পন দারুমযানেৰ.

১৫৭. ওরং ৰুচ্চতি কামধাতু, পচ্চযভাৰেন তং ওরং ভজন্তীতি ওরম্ভাগিযানি, ওরম্ভাগস্স ৰা হিতানি ওরম্ভাগিযানি. তেনাহ ‘‘হেট্ঠাভাগিযান’’ন্তিআদি. তীহি মগ্গেহীতি হেট্ঠিমেহি তীহি মগ্গেহি. তেহি ¶ পহাতব্বতায হি নেসং সংযোজনানং ওরম্ভাগিযতা. ওরম্ভঞ্জিযানি ৰা ওরম্ভাগিযানি ৰুত্তানি নিরুত্তিনযেন. ইদানি ব্যতিরেকমুখেন নেসং ওরম্ভাগিযভাৰং ৰিভাৰেতুং ‘‘তত্থা’’তিআদি ৰুত্তং. ৰিক্খম্ভিতানি সমত্থতাৰিঘাতেন পুথুজ্জনানং, সমুচ্ছিন্নানি সব্বসো অভাৰেন অরিযানং রূপারূপভৰূপপত্তিযা ৰিবন্ধায ন হোন্তীতি ৰুত্তং ‘‘অৰিক্খম্ভিতানি অসমুচ্ছিন্নানী’’তি. নিব্বত্তৰসেনাতি পটিসন্ধিগ্গহণৰসেন. গন্তুং ন দেন্তি মহগ্গতগামিকম্মাযূহনস্স ৰিনিবন্ধনতো. সক্কাযদিট্ঠিআদীনি তীণি সংযোজনানি কামচ্ছন্দব্যাপাদা ৰিয মহগ্গতূপপত্তিযা অৰিনিবন্ধভূতানিপি কামভৰূপপত্তিযা ৰিসেসপচ্চযত্তা তত্থ মহগ্গতভৰে নিব্বত্তম্পি তন্নিব্বত্তিহেতুকম্মপরিক্খযে কামভৰূপপত্তিপচ্চযতায মহগ্গতভৰতো আনেত্ৰা পুন ইধেৰ কামভৰে এৰ নিব্বত্তাপেন্তি, তস্মা সব্বানিপি পঞ্চপি সংযোজনানি ওরম্ভাগিযানি এৰ. পটিসন্ধিৰসেন অনাগমনসভাৰাতি পটিসন্ধিগ্গহণৰসেন তস্মা লোকা ইধ ন আগমনসভাৰা. বুদ্ধদস্সনথেরদস্সনধম্মস্সৰনানং পনত্থাযস্স আগমনং অনিৰারিতং.

কদাচি করহচি উপ্পত্তিযা সৰিরল়াকারতা ¶ পরিযুট্ঠানমন্দতায অবহলতাতি দ্ৰেধাপি তনুভাৰো. অভিণ্হন্তি বহুসো. বহলবহলাতি তিব্বতিব্বা. যত্থ উপ্পজ্জন্তি, তং সন্তানং মদ্দন্তা, ফরন্তা, সাধেন্তা, অন্ধকারং করোন্তা উপ্পজ্জন্তি, দ্ৰীহি পন মগ্গেহি পহীনত্তা তনুকতনুকা মন্দমন্দা উপ্পজ্জন্তি. ‘‘পুত্তধীতরো হোন্তী’’তি ইদং অকারণং. তথা হি অঙ্গপচ্চঙ্গপরামসনমত্তেনপি তে হোন্তি. ইদন্তি ‘‘রাগদোসমোহানং তনুত্তা’’তি ইদং ৰচনং. ভৰতনুকৰসেনাতি অপ্পকভৰৰসেন. তন্তি মহাসিৰত্থেরস্স ৰচনং পটিক্খিত্তন্তি সম্বন্ধো. যে ভৰা অরিযানং লব্ভন্তি, তে পরিপুণ্ণলক্খণভৰা এৰ. যে ন লব্ভন্তি, তত্থ কীদিসং তং ভৰতনুকং, তস্মা উভযথাপি ভৰতনুকস্স অসম্ভৰো এৰাতি দস্সেতুং ‘‘সোতাপন্নস্সা’’তিআদি ৰুত্তং. অট্ঠমে ভৰে ভৰতনুকং নত্থি অট্ঠমস্সেৰ ভৰস্স সব্বস্সেৰ অভাৰতো. সেসেসুপি এসেৰ নযো.

কামাৰচরলোকং ¶ সন্ধায ৰুত্তং ইতরস্স লোকস্স ৰসেন তথা ৰত্তুং অসক্কুণেয্যত্তা. যো হি সকদাগামী দেৰমনুস্সলোকেসু ৰোমিস্সকৰসেন নিব্বত্ততি, সোপি কামভৰৰসেনেৰ পরিচ্ছিন্দিতব্বো. ভগৰতা চ কামলোকে ঠত্ৰা ‘‘সকিদেৰ ইমং লোকং আগন্ত্ৰা’’তি ¶ ৰুত্তং, ‘‘ইমং লোকং আগন্ত্ৰা’’তি চ ইমিনা পঞ্চসু সকদাগামীসু চত্তারো ৰজ্জেত্ৰা একোৰ গহিতো. একচ্চো হি ইধ সকদাগামিফলং পত্ৰা ইধেৰ পরিনিব্বাযতি, একচ্চো ইধ পত্ৰা দেৰলোকে পরিনিব্বাযতি, একচ্চো দেৰলোকে পত্ৰা তত্থেৰ পরিনিব্বাযতি, একচ্চো দেৰলোকে পত্ৰা ইধূপপজ্জিত্ৰা পরিনিব্বাযতি, ইমে চত্তারো ইধ ন লব্ভন্তি. যো পন ইধ পত্ৰা দেৰলোকে যাৰতাযুকং ৰসিত্ৰা পুন ইধূপপজ্জিত্ৰা পরিনিব্বাযতি, অযং ইধ অধিপ্পেতো. অট্ঠকথাযং পন ইমং লোকন্তি কামভৰো অধিপ্পেতোতি ইমমত্থং ৰিভাৰেতুং ‘‘সচে হী’’তিআদিনা অঞ্ঞংযেৰ চতুক্কং দস্সিতং.

চতূসু ¶ …পে… সভাৰোতি অত্থো অপাযগমনীযানং পাপধম্মানং সব্বসো পহীনত্তা. ধম্মনিযামেনাতি মগ্গধম্মনিযামেন. নিযতো উপরিমগ্গাধিগমস্স অৰস্সংভাৰিভাৰতো. তেনাহ ‘‘সম্বোধিপরাযণো’’তি.

ধম্মাদাসধম্মপরিযাযৰণ্ণনা

১৫৮. তেসং তেসং ঞাণগতিন্তি তেসং তেসং সত্তানং ‘‘অসুকো সোতাপন্নো, অসুকো সকদাগামী’’তিআদিনা তংতংঞাণাধিগমনং. ঞাণূপপত্তিং ঞাণাভিসম্পরাযন্তি ততো পরম্পি ‘‘নিযতো সম্বোধিপরাযণো, সকিদেৰ ইমং লোকং আগন্ত্ৰা দুক্খস্সন্তং করিস্সতী’’তিআদিনা চ ঞাণসহিতং উপ্পত্তিপচ্চযভাৰং. ওলোকেন্তস্স ঞাণচক্খুনা পেক্খন্তস্স কাযকিলমথোৰ, ন তেন কাচি ৰেনেয্যানং অত্থসিদ্ধীতি অধিপ্পাযো. চিত্তৰিহেসাতি চিত্তখেদো, সা কিলেসূপসংহিতত্তা বুদ্ধানং নত্থি. আদীযতি আলোকীযতি অত্তা এতেনাতি আদাসং, ধম্মভূতং আদাসং ধম্মাদাসং, অরিযমগ্গঞাণস্সেতং অধিৰচনং, তেন অরিযসাৰকা চতূসু অরিযসচ্চেসু ৰিদ্ধস্তসম্মোহত্তা অত্তানম্পি যাথাৰতো ঞত্ৰা যাথাৰতো ব্যাকরেয্য, তপ্পকাসনতো পন ধম্মপরিযাযস্স সুত্তস্স ধম্মাদাসতা ৰেদিতব্বা. যেন ধম্মাদাসেনাতি ইধ পন মগ্গধম্মমেৰ ৰদতি.

অৰেচ্চ যাথাৰতো জানিত্ৰা তন্নিমিত্তউপ্পন্নপসাদো অৰেচ্চপসাদো, মগ্গাধিগমেন উপ্পন্নপসাদো ¶ , সো পন যস্মা পাসাণপব্বতো ৰিয নিচ্চলো, ন চ কেনচি কারণেন ৰিগচ্ছতি, তস্মা ৰুত্তং ‘‘অচলেন অচ্চুতেনা’’তি.

‘‘পঞ্চসীলানী’’তি ¶ গহট্ঠৰসেনেতং ৰুত্তং তেহি একন্তপরিহরণীযতো. অরিযানং পন সব্বানি সীলানি কন্তানেৰ. তেনাহ ‘‘সব্বোপি পনেত্থ সংৰরো লব্ভতিযেৰা’’তি.

সব্বেসন্তি ¶ সব্বেসং অরিযানং. সিক্খাপদাৰিরোধেনাতি যথা ভূতরোচনাপত্তি ন হোতি, এৰং. যুত্তট্ঠানেতি কাতুং যুত্তট্ঠানে.

অম্বপালীগণিকাৰত্থুৰণ্ণনা

১৬১. তদা কির ৰেসালী ইদ্ধা ফীতা সব্বঙ্গসম্পন্না অহোসি ৰেপুল্লপ্পত্তা, তং সন্ধাযাহ ‘‘খন্ধকে ৰুত্তনযেন ৰেসালিযা সম্পন্নভাৰো ৰেদিতব্বো’’তি. তস্মিং কির ভিক্খুসঙ্ঘে পঞ্চসতমত্তা ভিক্খূ নৰা অচিরপব্বজিতা অহেসুং ওসন্নৰীরিযা চ. তথা হি ৰক্খতি ‘‘তত্থ কির একচ্চে ভিক্খূ ওসন্নৰীরিযা’’তিআদি (দী. নি. অট্ঠ. ২.১৬৫). সতিপচ্চুপট্ঠানত্থন্তি তেসং সতিপচ্চুপট্ঠাপনত্থং. সরতীতি কাযাদিকে যথাসভাৰতো ঞাণসম্পযুত্তায সতিযা অনুস্সরতি উপধারেতি. সম্পজানাতীতি সমং পকারেহি জানাতি অৰবুজ্ঝতি. অযমেত্থ সঙ্খেপো, ৰিত্থারো পন পরতো সতিপট্ঠানৰণ্ণনাযং (দী. নি. অট্ঠ. ২.৩৭৩; ম. নি. অট্ঠ. ১.১০৬) আগমিস্সতি.

সব্বসঙ্গাহকন্তি সরীরগতস্স চেৰ ৰত্থালঙ্কারগতস্স চাতি সব্বস্স নীলভাৰস্স সঙ্গাহকং ৰচনং. তস্সেৰাতি নীলাতি সব্বসঙ্গাহকৰসেন ৰুত্তঅত্থস্সেৰ. ৰিভাগদস্সনন্তি পভেদদস্সনং. যথা তে লিচ্ছৰিরাজানো অপীতাদিৰণ্ণা এৰ কেচি ৰিলেপনৰসেন পীতাদিৰণ্ণা খাযিংসু, এৰং অনীলাদিৰণ্ণা এৰ কেচি ৰিলেপনৰসেন নীলাদিৰণ্ণা খাযিংসূতি ৰুত্তং ‘‘ন তেসং পকতিৰণ্ণো নীলো’’তিআদি. নীলো মণি এতেসূতি নীলমণি, ইন্দনীলমহানীলাদিনীলরতনৰিনদ্ধা অলঙ্কারা. তে কির সুৰণ্ণৰিরচিতে হি মণিওভাসেহি একনীলা ৰিয খাযন্তি. নীলমণিখচিতাতি নীলরতনপরিক্খিত্তা. নীলৰত্থপরিক্খিত্তাতি নীলৰত্থনীলকম্পলপরিক্খেপা. নীলৰম্মিকেহীতি নীলকঘটপরিক্খিত্তেহি. সব্বপদেসূতি ‘‘পীতা হোন্তী’’তিআদিসব্বপদেসু. পরিৰট্টেসীতি ¶ পটিঘট্টেসি. আহরন্তি ইমস্মা রাজপুরিসা বলিন্তি আহারো, তপ্পত্তজনপদোতি আহ ‘‘সাহারন্তি সজনপদ’’ন্তি. অঙ্গুলিফোটোপি অঙ্গুলিযা চালনৰসেনেৰ ¶ ¶ হোতীতি ৰুত্তং ‘‘অঙ্গুলিং চালেসু’’ন্তি. অম্বকাযাতি মাতুগামেন. উপচারৰচনং হেতং ইত্থীসু, যদিদং ‘‘অম্বকা মাতুগামো জননিকা’’তি.

অৰলোকেথাতি অপৰত্তিত্ৰা ওলোকনং ওলোকেথ. তং পন অপৰত্তিত্ৰা ওলোকনং অনু অনু দস্সনং হোতীতি আহ ‘‘পুনপ্পুনং পস্সথা’’তি. উপনেথাতি ‘‘যথাযং লিচ্ছৰিরাজপরিসা সোভাতিসযেন যুত্তা, এৰং তাৰতিংসপরিসা’’তি উপনযং করোথ. তেনাহ ‘‘তাৰতিংসেহি সমকে কত্ৰা পস্সথা’’তি.

‘‘উপসংহরথ ভিক্খৰে লিচ্ছৰিপরিসং তাৰতিংসসদিস’’ন্তি নযিদং নিমিত্তগ্গাহে নিযোজনং, কেৰলং পন দিব্বসম্পত্তিসদিসা এতেসং রাজূনং ইস্সরিযসম্পত্তীতি অনুপুব্বিকথায সগ্গসম্পত্তিকথনং ৰিয দট্ঠব্বং. তেসু পন ভিক্খূসু একচ্চানং তত্থ নিমিত্তগ্গাহোপি সিযা, তং সন্ধায ৰুত্তং ‘‘নিমিত্তগ্গাহে উয্যোজেতী’’তি. হিতকামতায তেসং ভিক্খূনং যথা আযস্মতো নন্দস্স হিতকামতায সগ্গসম্পত্তিদস্সনং. তেনাহ ‘‘তত্র কিরা’’তিআদি. ওসন্নৰীরিযাতি সম্মাপটিপত্তিযং অৰসন্নৰীরিযা, ওস্সট্ঠৰীরিযা ৰাতি অত্থো. অনিচ্চলক্খণৰিভাৰনত্থন্তি তেসং রাজূনং ৰসেন ভিক্খূনং অনিচ্চলক্খণৰিভূতভাৰত্থং.

ৰেল়ুৰগামৰস্সূপগমনৰণ্ণনা

১৬৩. সমীপে ৰেল়ুৰগামোতি পুব্বণ্হং ৰা সাযন্হং ৰা গন্ত্ৰা নিৰত্তনযোগ্যে আসন্নট্ঠানে নিৰিট্ঠা পরিৰারগামো. সঙ্গম্মাতি সম্মা গন্ত্ৰা. অস্সাতি ভগৰতো.

১৬৪. ফরুসোতি কক্খল়ো, গরুতরোতি অত্থো. ৰিসভাগরোগোতি ¶ ধাতুৰিসভাগতায সমুট্ঠিতো বহলতররোগো, ন আবাধমত্তং. ঞাণেন পরিচ্ছিন্দিত্ৰাতি ৰেদনানং খণিকতং, দুক্খতং, অত্তসুঞ্ঞতঞ্চ যাথাৰতো ঞাণেন পরিচ্ছিজ্জ পরিতুলেত্ৰা. অধিৰাসেসীতি তা অভিভৰন্তো যথাপরিমদ্দিতাকারসল্লক্খণেন অত্তনি আরোপেত্ৰা ৰাসেসি, ন তাহি অভিভুয্যমানো. তেনাহ ‘‘অৰিহঞ্ঞমানো’’তিআদি. অদুক্খিযমানোতি চেতোদুক্খৰসেন অদুক্খিযমানো ¶ , কাযদুক্খং পন ‘‘নত্থী’’তি ন সক্কা ৰত্তুং. অসতি হি তস্মিং অধিৰাসনায এৰ অসম্ভৰোতি. অনামন্তেত্ৰাতি অনালপিত্ৰা. অনপলোকেত্ৰাতি অৰিস্সজ্জিত্ৰা. তেনাহ ‘‘ওৰাদানুসাসনিং অদত্ৰাতি ৰুত্তং হোতী’’তি. পুব্বভাগৰীরিযেনাতি ফলসমাপত্তিযা পরিকম্মৰীরিযেন. ফলসমাপত্তিৰীরিযেনাতি ফলসমাপত্তিসম্পযুত্তৰীরিযেন. ৰিক্খম্ভেত্ৰাতি ¶ ৰিনোদেত্ৰা. যথা নাম পুপ্ফনসমযে চম্পকাদিরুক্খে ৰেখে দিন্নে যাৰ সো ৰেখো নাপনীযতি, তাৰস্স পুপ্ফনসমত্থতা ৰিক্খম্ভিতা ৰিনোদিতা হোতি, এৰমেৰ যথাৰুত্তৰীরিযৰেখদানেন তা ৰেদনা সত্থু সরীরে যথাপরিচ্ছিন্নং কালং ৰিক্খম্ভিতা ৰিনোদিতা অহেসুং. তেন ৰুত্তং ‘‘ৰিক্খম্ভেত্ৰাতি ৰিনোদেত্ৰা’’তি. জীৰিতম্পি জীৰিতসঙ্খারো কম্মুনা সঙ্খরীযতীতি কত্ৰা. ছিজ্জমানং ৰিরোধিপচ্চযসমাযোগেন পযোগসম্পত্তিযা ঘটেত্ৰা ঠপীযতি. অধিট্ঠাযাতি অধিট্ঠানং কত্ৰা. তেনাহ ‘‘দসমাসে মা উপ্পজ্জিত্থাতি সমাপত্তিং সমাপজ্জী’’তি. তং পন ‘‘অধিট্ঠানং, পৰত্তন’’ন্তি চ ৰত্তব্বতং অরহতীতি ৰুত্তং ‘‘অধিট্ঠহিত্ৰা পৰত্তেত্ৰা’’তি.

খণিকসমাপত্তীতি তাদিসং পুব্বাভিসঙ্খারং অকত্ৰা ঠানসো সমাপজ্জিতব্বসমাপত্তি. পুন সরীরং ৰেদনা অজ্ঝোত্থরতি সৰিসেসপুব্বাভিসঙ্খারস্স অকতত্তা. রূপসত্তকঅরূপসত্তকানি ৰিসুদ্ধিমগ্গসংৰণ্ণনাসু ¶ (ৰিসুদ্ধি. টী. ২.৭০৬, ৭১৭) ৰিত্থারিতনযেন ৰেদিতব্বানি. সুট্ঠু ৰিক্খম্ভেতি পুব্বাভিসঙ্খারস্স সাতিসযত্তা. ইদানি তমত্থং উপমায ৰিভাৰেতুং ‘‘যথা নামা’’তিআদি ৰুত্তং. অপব্যূল়্হোতি অপনীতো. চুদ্দসহাকারেহি সন্নেত্ৰাতি তেসংযেৰ রূপসত্তকঅরূপসত্তকানং ৰসেন চুদ্দসহি পকারেহি ৰিপস্সনাচিত্তং, সকলমেৰ ৰা অত্তভাৰং ৰিসভাগরোগসঞ্জনিতলূখভাৰনিরোগকরণায সিনেহেত্ৰা ন উপ্পজ্জিযেৰ সম্মাসম্বুদ্ধেন সাতিসযসমাপত্তিৰেগেন সুৰিক্খম্ভিতত্তা.

গিলানো হুত্ৰা পুন ৰুট্ঠিতোতি পুব্বে গিলানো হুত্ৰা পুন ততো গিলানভাৰতো ৰুট্ঠিতো. মধুরকভাৰো নাম সরীরস্স থম্ভিতত্তং, তং পন গরুভাৰপুব্বকন্তি আহ ‘‘সঞ্জাতগরুভাৰো সঞ্জাতথদ্ধভাৰো’’তি. ‘‘নানাকারতো ন উপট্ঠহন্তী’’তি ইমিনা দিসাসম্মোহোপি মে অহোসি ¶ সোকবলেনাতি দস্সেতি. সতিপট্ঠানাদিধম্মাতি কাযানুপস্সনাদযো অনুপস্সনাধম্মা পুব্বে ৰিভূতা হুত্ৰা উপট্ঠহন্তাপি ইদানি ময্হং পাকটা ন হোন্তি.

১৬৫. অব্ভন্তরং করোতি নাম অত্তনিযেৰ ঠপনতো. পুগ্গলং অব্ভন্তরং করোতি নাম সমানত্ততাৰসেন ধম্মেন পুব্বে তস্স সঙ্গণ্হতো. দহরকালেতি অত্তনো দহরকালে. কস্সচি অকথেত্ৰাতি কস্সচি অত্তনো অন্তেৰাসিকস্স উপনিগূহভূতং গন্থং অকথেত্ৰা. মুট্ঠিং কত্ৰাতি মুট্ঠিগতং ৰিয রহসিভূতং কত্ৰা. যস্মিং ৰা নট্ঠে সব্বো তংমূলকো ধম্মো ৰিনস্সতি, সো আদিতো মূলভূতো ধম্মো, মুস্সতি ৰিনস্সতি ধম্মো এতেন নট্ঠেনাতি মুট্ঠি, তং তথারূপং মুট্ঠিং কত্ৰা পরিহরিত্ৰা ঠপিতং কিঞ্চি নত্থীতি দস্সেতি.

অহমেৰাতি ¶ অৰধারণং ভিক্খুসঙ্ঘপরিহরণস্স অঞ্ঞসাধারণিচ্ছাদস্সনত্থং, অৰধারণেন পন ৰিনা ‘‘অহং ভিক্খুসঙ্ঘ’’ন্তিআদি ভিক্খুসঙ্ঘপরিহরণে অহংকারমমংকারাভাৰদস্সনন্তি দট্ঠব্বং. উদ্দিসিতব্বট্ঠেনাতি ‘‘সত্থা’’তি উদ্দিসিতব্বট্ঠেন. মা ৰা ¶ অহেসুং ভিক্খূতি অধিপ্পাযো. ‘‘মা ৰা অহোসী’’তি ৰা পাঠো. এৰং ন হোতীতি ‘‘অহং ভিক্খুসঙ্ঘং পরিহরিস্সামী’’তিআদি আকারেন চিত্তপ্পৰত্তি ন হোতি. ‘‘পচ্ছিমৰযঅনুপ্পত্তভাৰদীপনত্থং ৰুত্ত’’ন্তি ইমিনা ৰযো ৰিয বুদ্ধকিচ্চম্পি পরিযোসিতকম্মন্তি দীপেতি. সকটস্স বাহপ্পদেসে দল়্হীভাৰায ৰেঠদানং বাহবন্ধো. চক্কনেমিসন্ধীনং দল়্হীভাৰায ৰেঠদানং চক্কবন্ধো.

তমত্থন্তি ৰেঠমিস্সকেন মঞ্ঞেতি ৰুত্তমত্থং. রূপাদযো এৰ ধম্মা সৰিগ্গহো ৰিয উপট্ঠানতো রূপনিমিত্তাদযো, তেসং রূপনিমিত্তাদীনং. লোকিযানং ৰেদনানন্তি যাসং নিরোধনেন ফলসমাপত্তি সমাপজ্জিতব্বা, তাসং নিরোধা ফাসু হোতি, তথা বাল়্হৰেদনাভিতুন্নসরীরস্সাপি. তদত্থাযাতি ফলসমাপত্তিৰিহারত্থায. দ্ৰীহি ভাগেহি আপো গতো এত্থাতি দীপো, ওঘেন পরিগতো হুত্ৰা অনজ্ঝোত্থটো ভূমিভাগো, ইধ পন চতূহিপি ওঘেহি, সংসারমহোঘেনেৰ ৰা অনজ্ঝোত্থটো অত্তা ‘‘দীপো’’তি অধিপ্পেতো. তেনাহ ‘‘মহাসমুদ্দগতা’’তিআদি. অত্তস্সরণাতি অত্তপ্পটিসরণা. অত্তগতিকা ৰাতি অত্তপরাযণাৰ ¶ . মা অঞ্ঞগতিকাতি অঞ্ঞং কিঞ্চি গতিং পটিসরণং পরাযণং মা চিন্তযিত্থ. কস্মা? অত্তা নামেত্থ পরমত্থতো ধম্মো অব্ভন্তরট্ঠেন, সো এৰং সম্পাদিতো তুম্হাকং দীপং তাণং গতি পরাযণন্তি. তেন ৰুত্তং ‘‘ধম্মদীপা’’তিআদি. তথা চাহ ‘‘অত্তা হি অত্তনো নাথো, কো হি নাথো পরো সিযা’’তি (ধ. প. ১৬০, ৩৮০) উপদেসমত্তমেৰ ¶ হি পরস্মিং পটিবদ্ধং, অঞ্ঞা সব্বা সম্পত্তি পুরিসস্স অত্তাধীনা এৰ. তেনাহ ভগৰা ‘‘তুম্হেহি কিচ্চং আতপ্পং, অক্খাতারো তথাগতা’’তি (ধ. প. ২৭৬). তমগ্গেতি তমযোগস্স অগ্গে তস্স অতিক্কন্তাভাৰতো. তেনেৰাহ ‘‘ইমে অগ্গতমা’’তিআদি. মমাতি মম সাসনে. সব্বেপি তে চতুসতিপট্ঠানগোচরা ৰাতি চতুব্বিধং সতিপট্ঠানং ভাৰেত্ৰা ব্রূহেত্ৰা তদেৰ গোচরং অত্তনো পৰত্তিট্ঠানং কত্ৰা ঠিতা এৰ ভিক্খূ অগ্গে ভৰিস্সন্তি.

দুতিযভাণৰারৰণ্ণনা নিট্ঠিতা.

নিমিত্তোভাসকথাৰণ্ণনা

১৬৬. অনেকৰারং ¶ ভগৰা ৰেসালিযং ৰিহরতি, তস্মা ইমং ৰেসালিপ্পৰেসনং নিযমেত্ৰা দস্সেতুং ‘‘কদা পাৰিসী’’তি পুচ্ছিত্ৰা আগমনতো পট্ঠায তং দস্সেন্তো ‘‘ভগৰা কিরা’’তিআদিমাহ. আগতমগ্গেনেৰাতি পুব্বে যাৰ ৰেল়ুৰগামকা আগতমগ্গেনেৰ পটিনিৰত্তেন্তো. যথাপরিচ্ছেদেনাতি যথাপরিচ্ছিন্নকালেন. ততোতি ফলসমাপত্তিতো. অযন্তি ইদানি ৰুচ্চমানাকারো. দিৰাট্ঠানোলোকনাদি পরিনিব্বানস্স একন্তিকভাৰদস্সনং. ওস্সট্ঠোতি ৰিস্সট্ঠো আযুসঙ্খারো ‘‘সত্তাহমেৰ মযা জীৰিতব্ব’’ন্তি.

জেট্ঠকনিট্ঠভাতিকানন্তি সব্বেৰ সব্রহ্মচারিনো সন্ধায ৰদতি.

পটিপাদেস্সামীতি মগ্গপটিপত্তিযা নিযোজেস্সামি. মণিফলকেতি মণিখচিতে পমুখে অত্থতফলকে. তং পঠমং ¶ দস্সনন্তি যং ৰেল়ুৰনে পরিব্বাজকরূপেন আগতস্স সিদ্ধং দস্সনং, তং পঠমদস্সনং. যং ৰা অনোমদস্সিস্স ভগৰতো ৰচনং সদ্দহন্তেন তদা অভিনীহারকালে পচ্চক্খতো ¶ ৰিয তুম্হাকং দস্সনং সিদ্ধং, তং পঠমদস্সনং. পচ্চাগমনচারিকন্তি পচ্চাগমনত্থং চারিকং.

সত্তাহন্তি অচ্চন্তসংযোগে উপযোগৰচনং. থেরস্স জাতোৰরকগেহং কির ইতরগেহতো ৰিৰেকট্ঠং, ৰিৰটঙ্গণঞ্চ, তস্মা দেৰব্রহ্মানং উপসঙ্কমনযোগ্যন্তি ‘‘জাতোৰরকং পটিজগ্গথা’’তি ৰুত্তং. সোতি উপরেৰতো. তং পৰত্তিন্তি তত্থ ৰসিতুকামতায ৰুত্তং তং.

‘‘জানন্তাপি তথাগতা পুচ্ছন্তী’’তি (পারা. ১৬, ১৬৫) ইমিনা নীহারেন থেরো ‘‘কে তুম্হে’’তি পুচ্ছি. ‘‘ত্ৰং চতূহি মহারাজেহি মহন্ততরো’’তি পুট্ঠো অত্তনো মহত্তং সত্থু উপরি পক্খিপন্তো ‘‘আরামিকসদিসা এতে উপাসিকে অম্হাকং সত্থুনো’’তি আহ. সাৰকসম্পত্তিকিত্তনম্পি হি অত্থতো সত্থু সম্পত্তিংযেৰ ৰিভাৰেতি.

সোতাপত্তিফলে পতিট্ঠাযাতি থেরস্স দেসনানুভাৰেন, অত্তনো চ উপনিস্সযসম্পত্তিযা ঞাণস্স পরিপক্কত্তা সোতাপত্তিফলে পতিট্ঠহিত্ৰা.

অযন্তি ¶ যথাৰুত্তা. এত্থাতি ‘‘ৰেসালিং পিণ্ডায পাৰিসী’’তি এতস্মিং ৰেসালীপৰেসে. অনুপুব্বীকথাতি অনুপুব্বদীপনী কথা.

১৬৭. উদেনযক্খস্স চেতিযট্ঠানেতি উদেনস্স নাম যক্খস্স আযতনভাৰেন ইট্ঠকাহি চিতে মহাজনস্স চিত্তীকতট্ঠানে. কতৰিহারোতি ভগৰন্তং উদ্দিস্স কতৰিহারো. ৰুচ্চতীতি পুরিমৰোহারেন ‘‘উদেনচেতিয’’ন্তি ৰুচ্চতি. গোতমকাদীসুপীতি ‘‘গোতমকচেতিয’’ন্তি এৰং আদীসুপি. এসেৰ নযোতি চেতিযট্ঠানে কতৰিহারভাৰং অতিদিসতি. ৰড্ঢিতাতি ¶ ভাৰনাপারিপূরিৰসেন পরিব্রূহিতা. পুনপ্পুনং কতাতি ভাৰনায বহুলীকরণেন অপরাপরং পৰত্তিতা. যুত্তযানং ৰিয কতাতি যথা যুত্তং আজঞ্ঞযানং ছেকেন সারথিনা অধিট্ঠিতং যথারুচি পৰত্ততি, এৰং যথারুচিপৰত্তিরহতং গমিতা. পতিট্ঠানট্ঠেনাতি অধিট্ঠানট্ঠেন. ৰত্থু ৰিয কতাতি সব্বসো উপক্কিলেসৰিসোধনেন ইদ্ধিৰিসযতায পৰত্তিট্ঠানভাৰতো সুৰিসোধিতপরিস্সযৰত্থু ৰিয কতা. অধিট্ঠিতাতি পটিপক্খদূরীভাৰতো সুভাৰিতভাৰেন তংতংঅধিট্ঠানযোগ্যতায ঠপিতা ¶ . সমন্ততো চিতাতি সব্বভাগেন ভাৰনুপচযং গমিতা. তেনাহ ‘‘সুৰড্ঢিতা’’তি. সুট্ঠু সমারদ্ধাতি ইদ্ধিভাৰনায সিখাপ্পত্তিযা সম্মদেৰ সংসেৰিতা.

অনিযমেনাতি ‘‘যস্স কস্সচী’’তি অনিযমৰচনেন. নিযমেত্ৰাতি ‘‘তথাগতস্সা’’তি সরূপদস্সনেন নিযমেত্ৰা. আযুপ্পমাণন্তি পরমাযুপ্পমাণং ৰদতি, তস্সেৰ গহণে কারণং ব্রহ্মজালসুত্তৰণ্ণনাযং (দী. নি. অট্ঠ. ১.৪০; দী. নি. টী. ১.৪০) ৰুত্তনযেনেৰ ৰেদিতব্বং. মহাসিৰত্থেরো পন ‘‘মহাবোধিসত্তানং চরিমভৰে পটিসন্ধিদাযিনো কম্মস্স অসঙ্খ্যেয্যাযুকতাসংৰত্তনসমত্থতং হদযে ঠপেত্ৰা বুদ্ধানং আযুসঙ্খারস্স পরিস্সযৰিক্খম্ভনসমত্থতা পাল়িযং আগতা এৰাতি ইমং ভদ্দকপ্পমেৰ তিট্ঠেয্যা’’তি অৰোচ. ‘‘খণ্ডিচ্চাদীহি অভিভুয্যতী’’তি এতেন যথা ইদ্ধিবলেন জরায ন পটিঘাতো, এৰং তেন মরণস্সপি ন পটিঘাতোতি অত্থতো আপন্নমেৰাতি. ‘‘ক্ৰ সরো খিত্তো, ক্ৰ চ নিপতিতো’’তি অঞ্ঞথা ৰুট্ঠিতেনাপি থেরৰাদেন অট্ঠকথাৰচনমেৰ সমত্থিতন্তি দট্ঠব্বং ¶ . তেনাহ ‘‘সো ন রুচ্চতি…পে… নিযমিত’’ন্তি.

পরিযুট্ঠিতচিত্তোতি যথা কিঞ্চি অত্থানত্থং সল্লক্খেতুং ন সক্কা, এৰং অভিভূতচিত্তো. সো পন অভিভৰো মহতা উদকোঘেন অপ্পকস্স উদকস্স অজ্ঝোত্থরণং ৰিয অহোসীতি ৰুত্তং ‘‘অজ্ঝোত্থটচিত্তো’’তি. অঞ্ঞোপীতি থেরতো, অরিযেহি ৰা অঞ্ঞোপি যো কোচি পুথুজ্জনো. পুথুজ্জনগ্গহণঞ্চেত্থ যথা সব্বেন সব্বং অপ্পহীনৰিপল্লাসো মারেন পরিযুট্ঠিতচিত্তো কিঞ্চি ¶ অত্থং সল্লক্খেতুং ন সক্কোতি, এৰং থেরো ভগৰতা কতং নিমিত্তোভাসং সব্বসো ন সল্লক্খেসীতি দস্সনত্থং. তেনাহ ‘‘মারো হী’’তিআদি. চত্তারো ৰিপল্লাসাতি অসুভে ‘‘সুভ’’ন্তি সঞ্ঞাৰিপল্লাসো, চিত্তৰিপল্লাসো, দুক্খে ‘‘সুখ’’ন্তি সঞ্ঞাৰিপল্লাসো, চিত্তৰিপল্লাসোতি ইমে চত্তারো ৰিপল্লাসা. তেনাতি যদিপি ইতরে অট্ঠ ৰিপল্লাসা পহীনা, তথাপি যথাৰুত্তানং চতুন্নং ৰিপল্লাসানং অপ্পহীনভাৰেন. অস্সাতি থেরস্স. মদ্দতীতি ফুসনমত্তেন মদ্দন্তো ৰিয হোতি, অঞ্ঞথা তেন মদ্দিতে সত্তানং মরণমেৰ সিযা. কিং সক্খিস্সতি, ন সক্খিস্সতীতি অধিপ্পাযো. কস্মা ¶ ন সক্খিস্সতি, ননু এস অগ্গসাৰকস্স কুচ্ছিং পৰিট্ঠোতি? সচ্চং পৰিট্ঠো, তঞ্চ খো অত্তনো আনুভাৰদস্সনত্থং, ন ৰিবাধনাধিপ্পাযেন. ৰিবাধনাধিপ্পাযেন পন ইধ ‘‘কিং সক্খিস্সতী’’তি ৰুত্তং হদযমদ্দনস্স অধিগতত্তা. নিমিত্তোভাসন্তি এত্থ ‘‘তিট্ঠতু ভগৰা কপ্প’’ন্তি সকলকপ্পং অৰট্ঠানযাচনায ‘‘যস্স কস্সচি আনন্দ চত্তারো ইদ্ধিপাদা ভাৰিতা’’তিআদিনা অঞ্ঞাপদেসেন অত্তনো চতুরিদ্ধিপাদভাৰনানুভাৰেন কপ্পং অৰট্ঠানসমত্থতাৰসেন সঞ্ঞুপ্পাদনং নিমিত্তং, তথা পন পরিযাযং মুঞ্চিত্ৰা উজুকংযেৰ অত্তনো অধিপ্পাযৰিভাৰনং ওভাসো. জানন্তোযেৰ ৰাতি মারেন পরিযুট্ঠিতভাৰং জানন্তো এৰ. অত্তনো অপরাধহেতুতো ¶ সত্তানং সোকো তনুকো হোতি, ন বলৰাতি আহ ‘‘দোসারোপনেন সোকতনুকরণত্থ’’ন্তি. কিং পন থেরো মারেন পরিযুট্ঠিতচিত্তকালে পৰত্তিং পচ্ছা জানাতীতি? ন জানাতি সভাৰেন, বুদ্ধানুভাৰেন পন অনুজানাতি.

মারযাচনকথাৰণ্ণনা

১৬৮. অনত্থে নিযোজেন্তো গুণমারণেন মারেতি, ৰিরাগৰিবন্ধনেন ৰা জাতিনিমিত্ততায তত্থ তত্থ জাতং জাতং মারেন্তো ৰিয হোতীতি ‘‘মারেতীতি মারো’’তি ৰুত্তং. অতিৰিয পাপতায পাপিমা. কণ্হধম্মেহি সমন্নাগতো কণ্হো. ৰিরাগাদিগুণানং অন্তকরণতো অন্তকো. সত্তানং অনত্থাৰহপটিপত্তিং ন মুচ্চতীতি নমুচি. অত্তনো মারপাসেন পমত্তে বন্ধতি, পমত্তা ৰা বন্ধূ এতস্সাতি পমত্তবন্ধু. সত্তমসত্তাহতো পরং সত্ত অহানি সন্ধাযাহ ‘‘অট্ঠমে সত্তাহে’’তি ন পন পল্লঙ্কসত্তাহাদি ৰিয নিযতকিচ্চস্স অট্ঠমসত্তাহস্স নাম লব্ভনতো. সত্তমসত্তাহস্স হি পরতো অজপালনিগ্রোধমূলে মহাব্রহ্মুনো, সক্কস্স চ দেৰরঞ্ঞো পটিঞ্ঞাতধম্মদেসনং ভগৰন্তং ঞত্ৰা ‘‘ইদানি সত্তে ধম্মদেসনায মম ৰিসযং অতিক্কমাপেস্সতী’’তি সঞ্জাতদোমনস্সো হুত্ৰা ঠিতো চিন্তেসি ‘‘হন্দ দানাহং নং উপাযেন পরিনিব্বাপেস্সামি, এৰমস্স মনোরথো অঞ্ঞথত্তং গমিস্সতি, মম চ মনোরথো ইজ্ঝিস্সতী’’তি ¶ . এৰং পন চিন্তেত্ৰা ভগৰন্তং উপসঙ্কমিত্ৰা একং অন্তং ঠিতো ‘‘পরিনিব্বাতু দানি ভন্তে ভগৰা’’তিআদিনা পরিনিব্বানং যাচি, তং সন্ধায ৰুত্তং ‘‘অট্ঠমে সত্তাহে’’তিআদি. তত্থ অজ্জাতি আযুসঙ্খারোস্সজ্জনদিৰসং সন্ধাযাহ. ভগৰা চস্স অভিসন্ধিং জানন্তোপি ¶ তং অনাৰিকত্ৰা পরিনিব্বানস্স অকালভাৰমেৰ পকাসেন্তো যাচনং পটিক্খিপি. তেনাহ ‘‘ন তাৰাহ’’ন্তিআদি.

মগ্গৰসেন ৰিযত্তাতি সচ্চসম্পটিৰেধৰেয্যত্তিযেন ব্যত্তা. তথেৰ ৰিনীতাতি মগ্গৰসেন কিলেসানং সমুচ্ছেদৰিনযনেন ৰিনীতা. তথা ৰিসারদাতি অরিযমগ্গাধিগমেনেৰ সত্থুসাসনে ৰেসারজ্জপ্পত্তিযা ৰিসারদা ¶ , সারজ্জকরানং দিট্ঠিৰিচিকিচ্ছাদিপাপধম্মানং ৰিগমেন ৰিসারদভাৰং পত্তাতি অত্থো. যস্স সুতস্স ৰসেন ৰট্টদুক্খতো নিস্সরণং সম্ভৰতি, তং ইধ উক্কট্ঠনিদ্দেসেন ‘‘সুত’’ন্তি অধিপ্পেতন্তি আহ ‘‘তেপিটকৰসেনা’’তি. তিণ্ণং পিটকানং সমূহো তেপিটকং, তীণি ৰা পিটকানি তিপিটকং, তিপিটকমেৰ তেপিটকং, তস্স ৰসেন. তমেৰাতি যং তং তেপিটকং সোতব্বভাৰেন ‘‘সুত’’ন্তি ৰুত্তং, তমেৰ. ধম্মন্তি পরিযত্তিধম্মং. ধারেন্তীতি সুৰণ্ণভাজনে পক্খিত্তসীহৰসং ৰিয অৰিনস্সন্তং কত্ৰা সুপ্পগুণসুপ্পৰত্তিভাৰেন ধারেন্তি হদযে ঠপেন্তি. ইতি পরিযত্তিধম্মৰসেন বহুস্সুতধম্মধরভাৰং দস্সেত্ৰা ইদানি পটিৰেধধম্মৰসেনপি তং দস্সেতুং ‘‘অথ ৰা’’তিআদি ৰুত্তং. অরিযধম্মস্সাতি মগ্গফলধম্মস্স, নৰৰিধস্সাপি ৰা লোকুত্তরধম্মস্স. অনুধম্মভূতন্তি অধিগমায অনুরূপধম্মভূতং. অনুচ্ছৰিকপটিপদন্তি চ তমেৰ ৰিপস্সনাধম্মমাহ, ছব্বিধা ৰিসুদ্ধিযো ৰা. অনুধম্মন্তি তস্সা যথাৰুত্তপটিপদায অনুরূপং অভিসল্লেখিতং অপ্পিচ্ছতাদিধম্মং. চরণসীলাতি সমাদায পৰত্তনসীলা. অনু মগ্গফলধম্মো এতিস্সাতি ৰা অনুধম্মা, ৰুট্ঠানগামিনিৰিপস্সনা, তস্সা চরণসীলা. অত্তনো আচরিযৰাদন্তি অত্তনো আচরিযস্স সম্মাসম্বুদ্ধস্স ৰাদং. সদেৰকস্স লোকস্স আচারসিক্খাপনেন আচরিযো, ভগৰা. তস্স ৰাদো, চতুসচ্চদেসনা.

আচিক্খিস্সন্তীতি আদিতো কথেস্সন্তি, অত্তনা উগ্গহিতনিযামেন পরে উগ্গণ্হাপেস্সন্তীতি অত্থো. দেসেস্সন্তীতি ৰাচেস্সন্তি, পাল়িং সম্মা পবোধেস্সন্তীতি অত্থো. পঞ্ঞাপেস্সন্তীতি পজানাপেস্সন্তি, সঙ্কাপেস্সন্তীতি অত্থো. পট্ঠপেস্সন্তীতি পকারেহি ঠপেস্সন্তি, পকাসেস্সন্তীতি অত্থো. ৰিৰরিস্সন্তীতি ৰিৰটং করিস্সন্তি. ৰিভজিস্সন্তীতি ৰিভত্তং করিস্সন্তি. উত্তানিং করিস্সন্তীতি ¶ অনুত্তানং গম্ভীরং উত্তানং পাকটং করিস্সন্তি. সহ ধম্মেনাতি এত্থ ধম্ম-সদ্দো কারণপরিযাযো ‘‘হেতুম্হি ঞাণং ধম্মপটিসম্ভিদা’’তিআদীসু ¶ (ৰিভ. ২৭০) ৰিযাতি আহ ‘‘সহেতুকেন সকারণেন ৰচনেনা’’তি. সপ্পাটিহারিযন্তি সনিস্সরণং ¶ , যথা পরৰাদং ভঞ্জিত্ৰা সকৰাদো পতিট্ঠহতি, এৰং হেতুদাহরণেহি যথাধিগতমত্থং সম্পাদেত্ৰা ধম্মং কথেস্সন্তি. তেনাহ ‘‘নিয্যানিকং কত্ৰা ধম্মং দেসেস্সন্তী’’তি, নৰৰিধং লোকুত্তরধম্মং পবোধেস্সন্তীতি অত্থো. এত্থ চ ‘‘পঞ্ঞাপেস্সন্তী’’তিআদীহি ছহি পদেহি ছ অত্থপদানি দস্সিতানি, আদিতো পন দ্ৰীহি পদেহি ছ ব্যঞ্জনপদানি. এত্তাৰতা তেপিটকং বুদ্ধৰচনং সংৰণ্ণনানযেন সঙ্গহেত্ৰা দস্সিতং হোতি. ৰুত্তঞ্হেতং নেত্তিযং ‘‘দ্ৰাদসপদানি সুত্তং, তং সব্বং ব্যঞ্জনঞ্চ অত্থো চা’’তি (নেত্তি. সঙ্খারে).

সিক্খত্তযসঙ্গহিতন্তি অধিসীলসিক্খাদিসিক্খত্তযসঙ্গহণং. সকলং সাসনব্রহ্মচরিযন্তি অনৰসেসং সত্থুসাসনভূতং সেট্ঠচরিযং. সমিদ্ধন্তি সম্মদেৰ ৰড্ঢিতং. ঝানস্সাদৰসেনাতি তেহি তেহি ভিক্খূহি সমধিগতঝানসুখৰসেন. ৰুদ্ধিপ্পত্তন্তি উল়ারপণীতভাৰগমনেন সব্বসো পরিৰুদ্ধিং উপগতং. সব্বপালিফুল্লং ৰিয অভিঞ্ঞাসম্পত্তিৰসেন অভিঞ্ঞাসম্পদাহি সাসনাভিৰুদ্ধিযা মত্থকপ্পত্তিতো. পতিট্ঠিতৰসেনাতি পতিট্ঠানৰসেন, পতিট্ঠপ্পত্তিযাতি অত্থো. পটিৰেধৰসেন বহুনো জনস্স হিতন্তি বাহুজঞ্ঞং. তেনাহ ‘‘বহুজনাভিসমযৰসেনা’’তি. পুথু পুথুলং ভূতং জাতং, পুথু ৰা পুথুত্তং ভূতং পত্তন্তি ¶ পুথুভূতং. তেনাহ ‘‘সব্বাকার…পে… পত্ত’’ন্তি. সুট্ঠু পকাসিতন্তি সুট্ঠু সম্মদেৰ আদিকল্যাণাদিভাৰেন পৰেদিতং.

আযুসঙ্খারওস্সজ্জনৰণ্ণনা

১৬৯. সতিং সূপট্ঠিতং কত্ৰাতি অযং কাযাদিৰিভাগো অত্তভাৰসঞ্ঞিতো দুক্খভারো মযা এত্তকং কালং ৰহিতো, ইদানি পন ন ৰহিতব্বো, এতস্স অৰহনত্থং চিরতরং কালং অরিযমগ্গসম্ভারো সম্ভতো, স্ৰাযং অরিযমগ্গো পটিৰিদ্ধো, যতো ইমে কাযাদযো অসুভাদিতো সম্মদেৰ পরিঞ্ঞাতা, চতুব্বিধম্পি সম্মাসতিং যথাতথং ৰিসযে সুট্ঠু উপট্ঠিতং কত্ৰা. ঞাণেন পরিচ্ছিন্দিত্ৰাতি যস্মা ইমস্স অত্তভাৰসঞ্ঞিতস্স দুক্খভারস্স ৰহনে পযোজনভূতং অত্তহিতং তাৰ মহাবোধিমূলে এৰ পরিসমাপিতং, পরহিতং পন বুদ্ধৰেনেয্যৰিনযনং পরিসমাপিতব্বং, তং ¶ ইদানি মাসত্তযেনেৰ পরিসমাপনং পাপুণিস্সতি, তস্মা অভাসি ‘‘ৰিসাখপুণ্ণমাযং পরিনিব্বাযিস্সামী’’তি, এৰং বুদ্ধঞাণেন পরিচ্ছিন্দিত্ৰা সব্বভাগেন নিচ্ছযং কত্ৰা. আযুসঙ্খারং ৰিস্সজ্জীতি আযুনো জীৰিতস্স অভিসঙ্খারকং ফলসমাপত্তিধম্মং ‘‘ন সমাপজ্জিস্সামী’’তি ৰিস্সজ্জি তংৰিস্সজ্জনেনেৰ তেন অভিসঙ্খরিযমানং জীৰিতসঙ্খারং ‘‘নপ্পৰত্তেস্সামী’’তি ৰিস্সজ্জি. তেনাহ ‘‘তত্থা’’তিআদি. ঠানমহন্ততাযপি পৰত্তিআকারমহন্ততাযপি মহন্তো পথৰীকম্পো. তত্থ ঠানমহন্ততায ভূমিচালস্স মহত্তং দস্সেতুং ¶ ‘‘তদা কির…পে… কম্পিত্থা’’তি ৰুত্তং. সা পন জাতিক্খেত্তভূতা দসসহস্সী লোকধাতু এৰ, ন যা কাচি, যা মহাভিনীহারমহাজাতিআদীসুপি কম্পিত্থ. তদাপি তত্তিকায এৰ কম্পনে কিং কারণং ¶ ? জাতিক্খেত্তভাৰেন তস্সেৰ আদিতো পরিগ্গহস্স কতত্তা. পরিগ্গহকরণং চস্স ধম্মতাৰসেন ৰেদিতব্বং. তথা হি পুরিমবুদ্ধানম্পি তাৰতকমেৰ জাতিক্খেত্তং অহোসি. তথা হি ৰুত্তং ‘‘দসসহস্সী লোকধাতূ, নিস্সদ্দা হোন্তি নিরাকুলা…পে… মহাসমুদ্দো আভুজতি, দসসহস্সী পকম্পতী’’তি চ আদি (বু. ৰং. ৮৪-৯১). উদকপরিযন্তং কত্ৰা ছপ্পকারপৰেধনেন অৰীতরাগে ভিংসেতীতি ভিংসনো, সো এৰ ভিংসনকোতি আহ ‘‘ভযজনকো’’তি. দেৰভেরিযোতি দেৰদুন্দুভিসদ্দস্স পরিযাযৰচনমত্তং. ন চেত্থ কাচি ভেরী ‘‘দেৰদুন্দুভী’’তি অধিপ্পেতা, অথ খো উপ্পাতভাৰেন লব্ভমানো আকাসগতো নিগ্ঘোসসদ্দো. তেনাহ ‘‘দেৰো’’তিআদি. দেৰোতি মেঘো. তস্স হি অচ্ছভাৰেন আকাসস্স ৰস্সাভাৰেন সুক্খগজ্জিতসঞ্ঞিতে সদ্দে নিচ্ছরন্তে দেৰদুন্দুভিসমঞ্ঞা. তেনাহ ‘‘দেৰো সুক্খগজ্জিতং গজ্জী’’তি.

পীতিৰেগৰিস্সট্ঠন্তি ‘‘এৰং চিরতরং কালং ৰহিতো অযং অত্তভাৰসঞ্ঞিতো দুক্খভারো, ইদানি ন চিরস্সেৰ নিক্খিপিস্সতী’’তি সঞ্জাতসোমনস্সো ভগৰা সভাৰেনেৰ পীতিৰেগৰিস্সট্ঠং উদানং উদানেসি. এৰং পন উদানেন্তেন অযম্পি অত্থো সাধিতো হোতীতি দস্সনত্থং অট্ঠকথাযং ‘‘কস্মা’’তিআদি ৰুত্তং.

তুলীযতীতি তুলন্তি তুল-সদ্দো কম্মসাধনোতি দস্সেতুং ‘‘তুলিত’’ন্তি ৰুত্তং. অপ্পানুভাৰতায পরিচ্ছিন্নং. তথা হি তং পরিতো খণ্ডিতভাৰেন ‘‘পরিত্ত’’ন্তি ৰুচ্চতি. পটিপক্খৰিক্খম্ভনতো দীঘসন্তানতায, ৰিপুলফলতায ¶ চ ন তুলং ন পরিচ্ছিন্নং. যেহি কারণেহি পুব্বে অৰিসেসতো মহগ্গতং ‘‘অতুল’’ন্তি ৰুত্তং, তানি কারণানি ¶ রূপাৰচরতো আরুপ্পস্স সাতিসযানি ৰিজ্জন্তীতি ‘‘অরূপাৰচরং অতুল’’ন্তি ৰুত্তং, ইতরঞ্চ ‘‘তুল’’ন্তি, অপ্পৰিপাকং তীসুপি কম্মেসু যং তনুৰিপাকং হীনং, তং তুলং. বহুৰিপাকন্তি যং মহাৰিপাকং পণীতং, তং অতুলং. যং পনেত্থ মজ্ঝিমং, তং হীনং, উক্কট্ঠন্তি দ্ৰিধা ভিন্দিত্ৰা দ্ৰীসু ভাগেসু পক্খিপিতব্বং. হীনত্তিকৰণ্ণনাযং ৰুত্তনযেনেৰ অপ্পবহুৰিপাকতং নিদ্ধারেত্ৰা তস্স ৰসেন তুলাতুলভাৰো ৰেদিতব্বো. সম্ভৰতি এতস্মাতি সম্ভৰোতি আহ ‘‘সম্ভৰস্স হেতুভূত’’ন্তি. নিযকজ্ঝত্তরতোতি সসন্তানধম্মেসু ৰিপস্সনাৰসেন, গোচরাসেৰনায চ নিরতো. সৰিপাকং সমানং পৰত্তিৰিপাকমত্তদাযিকম্মং সৰিপাকট্ঠেন সম্ভৰং. ন চ তং কামাদিভৰাভিসঙ্খারকন্তি ততো ৰিসেসনত্থং ‘‘সম্ভৰ’’ন্তি ৰত্ৰা ‘‘ভৰসঙ্খার’’ন্তি ৰুত্তং. ওস্সজ্জীতি অরিযমগ্গেন অৰস্সজ্জি ¶ . কৰচং ৰিয অত্তভাৰং পরিযোনন্ধিত্ৰা ঠিতং অত্তনি সম্ভূতত্তা অত্তসম্ভৰং কিলেসঞ্চ অভিন্দীতি কিলেসভেদসহভাৰিকম্মোস্সজ্জনং দস্সেন্তো তদুভযস্স কারণং অৰোচ ‘‘অজ্ঝত্তরতো সমাহিতো’’তি.

তীরেন্তোতি ‘‘উপ্পাদো ভযং, অনুপ্পাদো খেম’’ন্তিআদিনা ৰীমংসন্তো. ‘‘তুলেন্তো তীরেন্তো’’তিআদিনা সঙ্খেপতো ৰুত্তমত্থং ৰিত্থারতো দস্সেতুং ‘‘পঞ্চক্খন্ধা’’তি আদিং ৰত্ৰা ভৰসঙ্খারস্স অৰস্সজ্জনাকারং সরূপতো দস্সেসি. ‘‘এৰ’’ন্তিআদিনা পন উদানৰণ্ণনাযং আদিতো ৰুত্তমত্থং নিগমনৰসেন দস্সেসি.

মহাভূমিচালৰণ্ণনা

১৭১. যন্তি করণে ৰা অধিকরণে ৰা পচ্চত্তৰচনন্তি অধিপ্পাযেন আহ ‘‘যেন সমযেন, যস্মিং ৰা সমযে’’তি. উক্খেপকৰাতাতি ¶ উদকসন্ধারকৰাতং উপচ্ছিন্দিত্ৰা ঠিতট্ঠানতো খেপকৰাতা. ‘‘সট্ঠি…পে… বহল’’ন্তি ইদং তস্স ৰাতস্স উব্বেধপ্পমাণমেৰ গহেত্ৰা ৰুত্তং, আযামৰিত্থারতো পন দসসহস্সচক্কৰাল়প্পমাণম্পি উদকসন্ধারকৰাতং উপচ্ছিন্দতিযেৰ. আকাসেতি পুব্বে ৰাতেন পতিট্ঠিতোকাসে. পুন ৰাতোতি উক্খেপকৰাতে তথাকত্ৰা ৰিগতে উদকসন্ধারকৰাতো পুন আবন্ধিত্ৰা ¶ গণ্হাতি যথা তং উদকং ন ভস্সতি, এৰং উত্থম্ভেন্তং আবন্ধনৰিতানৰসেন বন্ধিত্ৰা গণ্হাতি. ততো উদকং উগ্গচ্ছতীতি ততো আবন্ধিত্ৰা গহণতো তেন ৰাতেন উত্থম্ভিতং উদকং উগ্গচ্ছতি উপরি গচ্ছতি. হোতিযেৰাতি অন্তরন্তরা হোতিযেৰ. বহলভাৰেনাতি মহাপথৰিযা মহন্তভাৰেন. সকলা হি মহাপথৰী তদা ওগ্গচ্ছতি, উগ্গচ্ছতি চ, তস্মা কম্পনং ন পঞ্ঞাযতি.

ইজ্ঝনস্সাতি ইচ্ছিতত্থসিজ্ঝনস্স. অনুভৰিতব্বস্সইস্সরিযসম্পত্তিআদিকস্স. পরিত্তাতি পটিলদ্ধমত্তা নাতিসুভাৰিতা. তথা চ ভাৰনা বলৰতী ন হোতীতি আহ ‘‘দুব্বলা’’তি. সঞ্ঞাসীসেন হি ভাৰনা ৰুত্তা. অপ্পমাণাতি পগুণা সুভাৰিতা. সা হি থিরা দল়্হতরা হোতীতি আহ ‘‘বলৰা’’তি. ‘‘পরিত্তা পথৰীসঞ্ঞা, অপ্পমাণা আপোসঞ্ঞা’’তি দেসনামত্তমেৰ, আপোসঞ্ঞায পন সুভাৰিতায পথৰীকম্পো সুখেনেৰ ইজ্ঝতীতি অযমেত্থ অধিপ্পাযো ৰেদিতব্বো. সংৰেজেন্তো দিব্বসম্পত্তিযা পমত্তং সক্কং দেৰরাজানং. ৰীমংসন্তো ৰা তাৰদেৰ সমধিগতং অত্তনো ইদ্ধিবলং. মহামোগ্গল্লানত্থেরস্স পাসাদকম্পনং পাকটন্তি তং অনামসিত্ৰা সঙ্ঘরক্খিতসামণেরস্স পাসাদকম্পনং দস্সেতুং ‘‘সো কিরাযস্মা’’তিআদি ৰুত্তং. পূতিমিস্সো ¶ গন্ধো এতস্সাতি পূতিগন্ধো, তেন পূতিগন্ধেনেৰ ¶ অধিগতমাতুকুচ্ছিসম্ভৰং ৰিয গন্ধেনেৰ সীসেন, অতিৰিয দারকো এৰাতি অত্থো.

আচরিযন্তি আচরিযূপদেসং. ইদ্ধাভিসঙ্খারো নাম ইদ্ধিৰিধপ্পটিপক্খাদীভাৰেন ইচ্ছিতব্বো, সো চ উপাযে কোসল্লস্স অত্তনা ন সম্মা উগ্গহিতত্তা ন তাৰ সিক্খিতোতি আহ ‘‘অসিক্খিত্ৰাৰ যুদ্ধং পৰিট্ঠোসী’’তি. ‘‘পিলৰন্ত’’ন্তি ইমিনা সকলমেৰ পাসাদৰত্থুং উদকং কত্ৰা অধিট্ঠাতব্বপাসাদোৰ তত্থ পিলৰতীতি দস্সেতি. অধিট্ঠানক্কমং পন উপমায দস্সেন্তো ‘‘তাত…পে… জানাহী’’তি আহ. তত্থ কপল্লকপূৰন্তি আসিত্তকপূৰং, তং পচন্তা কপালে পঠমং কিঞ্চি পিট্ঠং ঠপেত্ৰা অনুক্কমেন ৰড্ঢেত্ৰা অন্তন্তেন পরিচ্ছিন্দন্তি পূৰং সমন্ততো পরিচ্ছিন্নং কত্ৰা ঠপেন্তি, এৰং ‘‘আপোকসিণৰসেন ‘পাসাদেন পতিট্ঠিতট্ঠানং উদকং হোতূ’তি অধিট্ঠহন্তো সমন্ততো পাসাদস্স যাৰ পরিযন্তা যথা উদকং হোতি, তথা অধিট্ঠাতব্ব’’ন্তি উপমায উপদিসতি.

মহাপদানে ¶ ৰুত্তমেৰাতি ‘‘ধম্মতা এসা, ভিক্খৰে, যদা বোধিসত্তো তুসিতা কাযা চৰিত্ৰা মাতুকুচ্ছিং ওক্কমতী’’তি (দী. নি. ২.১৮) ৰত্ৰা ‘‘অযঞ্চ দসসহস্সী লোকধাতু সঙ্কম্পতি সম্পকম্পতি সম্পৰেধতী’’তি (দী. নি. ২.১৮), তথা ‘‘ধম্মতা এসা, ভিক্খৰে, যদা বোধিসত্তো মাতুকুচ্ছিম্হা নিক্খমতী’’তি (দী. নি. ২.৩০) ৰত্ৰা ‘‘অযঞ্চ দসসহস্সী লোকধাতু সঙ্কম্পতি সম্পকম্পতি সম্পৰেধতী’’তি (দী. নি. ২.৩২) চ ¶ মহাবোধিসত্তস্স গব্ভোক্কন্তিযং, অভিজাতিযঞ্চ ধম্মতাৰসেন মহাপদানেপথৰীকম্পস্স ৰুত্তত্তা ইতরেসুপি চতূসু ঠানেসু পথৰীকম্পো ধম্মতাৰসেনেৰাতি মহাপদানেঅত্থতো ৰুত্তং এৰাতি অধিপ্পাযো.

ইদানি নেসং পথৰীকম্পনং কারণতো, পৰত্তিআকারতো চ ৰিভাগং দস্সেতুং ‘‘ইতি ইমেসূ’’তিআদি ৰুত্তং. ধাতুকোপেনাতি উক্খেপকধাতুসঙ্খাতায ৰাযোধাতুযা পকোপেন. ইদ্ধানুভাৰেনাতি ঞাণিদ্ধিযা ৰা কম্মৰিপাকজিদ্ধিযা ৰা পভাৰেন, তেজেনাতি অত্থো. পুঞ্ঞতেজেনাতি পুঞ্ঞানুভাৰেন, মহাবোধিসত্তস্স পুঞ্ঞবলেনাতি অত্থো. ঞাণতেজেনাতি পটিৰেধঞাণানুভাৰেন. সাধুকারদানৰসেনাতি যথা অনঞ্ঞসাধারণেন পটিৰেধঞাণানুভাৰেন অভিহতা মহাপথৰী অভিসম্বোধিযং অকম্পিত্থ, এৰং অনঞ্ঞসাধারণেন দেসনাঞাণানুভাৰেন অভিহতা মহাপথৰী অকম্পিত্থ, তং পনস্সা সাধুকারদানং ৰিয হোতীতি ‘‘সাধুকারদানৰসেনা’’তি ৰুত্তং.

যেন ¶ পন ভগৰা অসীতিঅনুব্যঞ্জনপটিমণ্ডিতদ্ৰত্তিংসমহাপুরিসলক্খণ- (দী. নি. ২.৩৩; ৩.১৯৮; ম. নি. ২.৩৮৫) ৰিচিত্ররূপকাযো সব্বাকারপরিসুদ্ধসীলক্খন্ধাদিগুণরতনসমিদ্ধিধম্মকাযো পুঞ্ঞমহত্তথামমহত্তযসমহআইদ্ধিমহত্তপঞ্ঞামহত্তানং পরমুক্কংসগতো অসমো অসমসমো অপ্পটিপুগ্গলো অরহং সম্মাসম্বুদ্ধো অত্তনো অত্তভাৰসঞ্ঞিতং খন্ধপঞ্চকং কপ্পং ৰা কপ্পাৰসেসং ৰা ঠপেতুং সমত্থোপি সঙ্খতধম্মং পটিজিগুচ্ছনাকারপ্পৰত্তেন ঞাণৰিসেসেন তিণাযপি অমঞ্ঞমানো আযুসঙ্খারোস্সজ্জনৰিধিনা নিরপেক্খো ওস্সজ্জি. তদনুভাৰাভিহতা মহাপথৰী আযুসঙ্খারোস্সজ্জনে অকম্পিত্থ, তং পনস্সা কারুঞ্ঞসভাৰসণ্ঠিতা ৰিয হোতীতি ৰুত্তং ‘‘কারুঞ্ঞসভাৰেনা’’তি ¶ . যস্মা ভগৰা পরিনিব্বানসমযে চতুৰীসতিকোটিসতসহস্সসঙ্খ্যা সমাপত্তিযো ¶ সমাপজ্জি অন্তরন্তরা ফলসমাপত্তিসমাপজ্জনেন, তস্স পুব্বভাগে সাতিসযং তিক্খং সূরং ৰিপস্সনাঞাণঞ্চ পৰত্তেসি, ‘‘যদত্থঞ্চ মযা এৰং সুচিরকালং অনঞ্ঞসাধারণো পরমুক্কংসগতো ঞাণসম্ভারো সম্ভতো, অনুত্তরো চ ৰিমোক্খো সমধিগতো, তস্স ৰত মে সিখাপ্পত্তফলভূতা অচ্চন্তনিট্ঠা অনুপাদিসেসনিব্বানধাতু অজ্জ সমিজ্ঝতী’’তি ভিয্যো অতিৰিয সোমনস্সপ্পত্তস্স ভগৰতো পীতিৰিপ্ফারাদিগুণৰিপুলতরানুভাৰো পরেহি অসাধারণঞাণাতিসযো উদপাদি, যস্স সমাপত্তিবলসমুপব্রূহিতস্স ঞাণাতিসযস্স আনুভাৰং সন্ধায ইদং ৰুত্তং ‘‘দ্ৰেমে পিণ্ডপাতা সমসমফলা সমসমৰিপাকা’’তিআদি (উদা. ৭৫), তস্মা তস্স আনুভাৰেন সমভিহতা মহাপথৰী অকম্পিত্থ. তং পনস্সা তস্সং ৰেলাযং আরোদনাকারপ্পত্তি ৰিয হোতীতি ‘‘অট্ঠমো আরোদনেনা’’তি ৰুত্তং.

ইদানি সঙ্খেপতো ৰুত্তমত্থং ৰিৰরন্তো ‘‘মাতুকুচ্ছিং ওক্কমন্তে’’তিআদিমাহ. অযং পনত্থোতি ‘‘সাধুকারদানৰসেনা’’তিআদিনা ৰুত্তো অত্থো. পথৰীদেৰতায ৰসেনাতি এত্থ সমুদ্দদেৰতা ৰিয মহাপথৰিযা অধিদেৰতা কির নাম অত্থি. তাদিসে কারণে সতি তস্সা চিত্তৰসেন অযং মহাপথৰী সঙ্কম্পতি সম্পকম্পতি সম্পৰেধতি, যথা ৰাতৰলাহকদেৰতানং চিত্তৰসেন ৰাতা ৰাযন্তি, সীতুণ্হঅব্ভৰস্সৰলাহকদেৰতানং চিত্তৰসেন সীতাদযো ভৰন্তি. তথা হি ৰিসাখপুণ্ণমাযং অভিসম্বোধিঅত্থং বোধিরুক্খমূলে নিসিন্নস্স লোকনাথস্স অন্তরাযকরণত্থং উপট্ঠিতং মারবলং ৰিধমিতুং –

‘‘অচেতনাযং ¶ পথৰী, অৰিঞ্ঞায সুখং দুখং;

সাপি দানবলা ময্হং, সত্তক্খত্তুং পকম্পথা’’তি. (চরিযা. ১.১২৪) –

ৰচনসমনন্তরং ¶ মহাপথৰী ভিজ্জিত্ৰা সপরিসং মারং পরিৰত্তেসি. এতন্তি সাধুকারদানাদি. যদিপি নত্থি অচেতনত্তা, ধম্মতাৰসেন পন ৰুত্তনযেন সিযাতি সক্কা ৰত্তুং. ধম্মতা পন অত্থতো ধম্মসভাৰো, সো পুঞ্ঞধম্মস্স ৰা ঞাণধম্মস্স ৰা আনুভাৰসভাৰোতি. তযিদং সব্বং ৰিচারিতমেৰ, এৰঞ্চ কত্ৰা –

‘‘ইমে ¶ ধম্মে সম্মসতো, সভাৰসরসলক্খণে;

ধম্মতেজেন ৰসুধা, দসসহস্সী পকম্পথা’’তি. (বু. ৰং. ১.১৬৬);

আদি ৰচনঞ্চ সমত্থিতং হোতি.

নিদ্দিট্ঠনিদস্সনন্তি নিদ্দিট্ঠস্স অত্থস্স নিয্যাতনং, নিগমনন্তি অত্থো. এত্তাৰতাতি পথৰীকম্পাদিউপ্পাদজননেন চেৰ পথৰীকম্পস্স ভগৰতো হেতুনিদস্সনেন চ. ‘‘অদ্ধা অজ্জ ভগৰতা আযুসঙ্খারো ওস্সট্ঠো’’তি সল্লক্খেসি পারিসেসঞাযেন. এৰঞ্হি তদা থেরো তমত্থং ৰীমংসেয্য নাযং ভূমিকম্পো ধাতুপ্পকোপহেতুকো তস্স অপঞ্ঞাযমানরূপত্তা, বাহিরকোপি ইসি এৰং মহানুভাৰো বুদ্ধকালে নত্থি, সাসনিকোপি সত্থু অনারোচেত্ৰা এৰং করোন্তো নাম নত্থি, সেসানং পঞ্চন্নং ইদানি অসম্ভৰো, এৰং ভূমিকম্পো চাযং মহাভিংসনকো সলোমহংসো অহোসি, তস্মা পারিসেসতো আহ ‘‘অজ্জ ভগৰতা আযুসঙ্খারো ওস্সট্ঠোতি সল্লক্খেসী’’তি.

অট্ঠপরিসৰণ্ণনা

১৭২. ওকাসং অদত্ৰাতি ‘‘তিট্ঠতু ভন্তে ভগৰা কপ্প’’ন্তিআদি (দী. নি. ২.১৭৮) নযপ্পৰত্তায থেরস্স আযাচনায অৰসরং অদত্ৰা. অঞ্ঞানিপি অট্ঠকানি সম্পিণ্ডেন্তো হেতুঅট্ঠকতো অঞ্ঞানি পরিসাভিভাযতনৰিমোক্খৰসেন ¶ তীণি অট্ঠকানি সঙ্গহেত্ৰা দস্সেন্তো ‘‘অট্ঠ খো ইমা’’তিআদিমাহ. ‘‘আযস্মতো আনন্দস্স সোকুপ্পত্তিং পরিহরন্তো ৰিক্খেপং করোন্তো’’তি কেচি সহসা ভণিতে বলৰসোকো উপ্পজ্জেয্যাতি.

সমাগন্তব্বতো, সমাগচ্ছতীতি ৰা সমাগমো, পরিসা. বিম্বিসারপমুখো সমাগমো বিম্বিসারসমাগমো. সেসদ্ৰযেপি এসেৰ নযো. বিম্বিসার…পে… সমাগমাদিসদিসং খত্তিযপরিসন্তি যোজনা. অঞ্ঞেসু চক্কৰাল়েসুপি লব্ভতেযেৰ সত্থু খত্তিযপরিসাদিউপসঙ্কমনং. আদিতো তেহি সদ্ধিং সত্থু ভাসনং আলাপো. কথনপটিকথনং সল্লাপো. ধম্মুপসঞ্হিতা পুচ্ছা পটিপুচ্ছা ¶ ধম্মসাকচ্ছা. সণ্ঠানং পটিচ্চ কথনং সণ্ঠানপরিযাযত্তা ¶ ৰণ্ণ-সদ্দস্স ‘‘মহন্তং হত্থিরাজৰণ্ণং অভিনিম্মিনিত্ৰা’’তিআদীসু (সং. নি. ১.১৩৮) ৰিয. ‘‘তেস’’ন্তি পদং উভযপদাপেক্খং ‘‘তেসম্পি লক্খণসণ্ঠানং ৰিয সত্থু সরীরসণ্ঠানং, তেসং কেৰলং পঞ্ঞাযতি এৰা’’তি. নাপি আমুক্কমণিকুণ্ডলো ভগৰা হোতীতি যোজনা. ছিন্নস্সরাতি দ্ৰিধাভূতস্সরা. গগ্গরস্সরাতি জজ্জরিতস্সরা. ভাসন্তরন্তি তেসং সত্তানং ভাসতো অঞ্ঞং ভাসং. ৰীমংসাতি চিন্তনা. ‘‘কিমত্থং…পে… দেসেতী’’তি ইদং ননু অত্তানং জানাপেত্ৰা ধম্মে কথিতে তেসং সাতিসযো পসাদো হোতীতি ইমিনা অধিপ্পাযেন ৰুত্তং? যেসং অত্তানং অজানাপেত্ৰাৰ ধম্মে কথিতে পসাদো হোতি, ন জানাপেত্ৰা, তাদিসে সন্ধায সত্থা তথা করোতি. তত্থ পযোজনমাহ ‘‘ৰাসনত্থাযা’’তি. এৰং সুতোপীতি এৰং অৰিঞ্ঞাতদেসকো অৰিঞ্ঞাতাগমনোপি সুতো ধম্মো অত্তনো ধম্মসুধম্মতাযেৰ অনাগতে পচ্চযো হোতি সুণন্তস্স.

‘‘আনন্দা’’তিআদিকো সঙ্গীতিঅনারুল়্হো পাল়িধম্মো এৰ তথা দস্সিতো. এস নযো ইতো পরেসুপি এৰরূপেসু ঠানেসু.

অট্ঠঅভিভাযতনৰণ্ণনা

১৭৩. অভিভৰতীতি ¶ অভিভু, পরিকম্মং, ঞাণং ৰা. অভিভু আযতনং এতস্সাতি অভিভাযতনং, ঝানং. অভিভৰিতব্বং ৰা আরম্মণসঙ্খাতং আযতনং এতস্সাতি অভিভাযতনং. আরম্মণাভিভৰনতো অভিভু চ তং আযতনঞ্চ যোগিনো সুখৰিসেসানং অধিট্ঠানভাৰতো, মনাযতনধম্মাযতনভাৰতো ৰাতিপি সসম্পযুত্তং ঝানং অভিভাযতনং. তেনাহ ‘‘অভিভৰনকারণানী’’তিআদি. তানি হীতি অভিভাযতনসঞ্ঞিতানি ঝানানি. ‘‘পুগ্গলস্স ঞাণুত্তরিযতাযা’’তি ইদং উভযত্থাপি যোজেতব্বং. কথং? পটিপক্খভাৰেন পচ্চনীকধম্মে অভিভৰন্তি পুগ্গলস্স ঞাণুত্তরিযতায আরম্মণানি অভিভৰন্তি. ঞাণবলেনেৰ হি আরম্মণাভিভৰনং ৰিয পটিপক্খাভিভৰো পীতি.

পরিকম্মৰসেন অজ্ঝত্তং রূপসঞ্ঞী, ন অপ্পনাৰসেন. ন হি পটিভাগনিমিত্তারম্মণা অপ্পনা অজ্ঝত্তৰিসযা সম্ভৰতি, তং পন অজ্ঝত্তপরিকম্মৰসেন লদ্ধং ¶ কসিণনিমিত্তং অৰিসুদ্ধমেৰ হোতি, ন বহিদ্ধাপরিকম্মৰসেন লদ্ধং ৰিয ৰিসুদ্ধং.

পরিত্তানীতি ¶ যথালদ্ধানি সুপ্পসরাৰমত্তানি. তেনাহ ‘‘অৰড্ঢিতানী’’তি. পরিত্তৰসেনেৰাতি ৰণ্ণৰসেন আভোগে ৰিজ্জমানেপি পরিত্তৰসেনেৰ ইদং অভিভাযতনং ৰুত্তং. পরিত্ততা হেত্থ অভিভৰনস্স কারণং. ৰণ্ণাভোগে সতিপি অসতিপি অভিভাযতনভাৰনা নাম তিক্খপঞ্ঞস্সেৰ সম্ভৰতি, ন ইতরস্সাতি আহ ‘‘ঞাণুত্তরিকো পুগ্গলো’’তি. অভিভৰিত্ৰা সমাপজ্জতীতি এত্থ অভিভৰনং, সমাপজ্জনঞ্চ উপচারজ্ঝানাধিগমসমনন্তরমেৰ অপ্পনাঝানুপ্পাদনন্তি আহ ‘‘সহ নিমিত্তুপ্পাদেনেৰেত্থ অপ্পনং পাপেতী’’তি. সহ নিমিত্তুপ্পাদেনাতি চ অপ্পনাপরিৰাসাভাৰস্স লক্খণং ৰচনমেতং. যো ‘‘খিপ্পাভিঞ্ঞো’’তি ৰুচ্চতি, ততোপি ঞাণুত্তরস্সেৰ অভিভাযতনভাৰনা. এত্থাতি এতস্মিং নিমিত্তে. অপ্পনং পাপেতীতি ভাৰনং অপ্পনং নেতি.

এত্থ ¶ চ কেচি ‘‘উপ্পন্নে উপচারজ্ঝানে তং আরব্ভ যে হেট্ঠিমন্তেন দ্ৰে তযো জৰনৰারা পৰত্তন্তি, তে উপচারজ্ঝানপক্খিকা এৰ, তদনন্তরঞ্চ ভৰঙ্গপরিৰাসেন, উপচারাসেৰনায চ ৰিনা অপ্পনা হোতি, সহ নিমিত্তুপ্পাদেনেৰ অপ্পনং পাপেতী’’তি ৰদন্তি, তং তেসং মতিমত্তং. ন হি পরিৰাসিতপরিকম্মেন অপ্পনাৰারো ইচ্ছিতো, নাপি মহগ্গতপ্পমাণজ্ঝানেসু ৰিয উপচারজ্ঝানে একন্ততো পচ্চৰেক্খণা ইচ্ছিতব্বা, তস্মা উপচারজ্ঝানাধিগমনতো পরং কতিপযভৰঙ্গচিত্তাৰসানে অপ্পনং পাপুণন্তো ‘‘সহ নিমিত্তুপ্পাদেনেৰেত্থ অপ্পনং পাপেতী’’তি ৰুত্তো. সহ নিমিত্তুপ্পাদেনেৰাতি চ অধিপ্পাযিকমিদং ৰচনং, ন নীতত্থং, অধিপ্পাযো ৰুত্তনযেনেৰ ৰেদিতব্বো, ন অন্তোসমাপত্তিযং তদা তথারূপস্স আভোগস্স অসম্ভৰতো. সমাপত্তিতো ৰুট্ঠিতস্স আভোগো পুব্বভাগভাৰনাযৰসেন ঝানক্খণে পৰত্তং অভিভৰনাকারং গহেত্ৰা পৰত্তোতি দট্ঠব্বং. অভিধম্মট্ঠকথাযং পন ‘‘ইমিনা তস্স পুব্বাভোগো কথিতো’’তি (ধ. স. অট্ঠ. ২০৪) ৰুত্তং. অন্তোসমাপত্তিযং তথা আভোগাভাৰে কস্মা ‘‘ঝানসঞ্ঞাযপী’’তি ৰুত্তন্তি আহ ‘‘অভিভৰন…পে… অত্থী’’তি.

ৰড্ঢিতপ্পমাণানীতি ¶ ৰিপুলপ্পমাণানীতি অত্থো, ন একঙ্গুলদ্ৰঙ্গুলাদিৰসেন ৰড্ঢিং পাপিতানীতি তথা ৰড্ঢনস্সেৰেত্থ অসম্ভৰতো. তেনাহ ‘‘মহন্তানী’’তি. ভত্তৰড্ঢিতকন্তি ভুঞ্জনভাজনং ৰড্ঢেত্ৰা দিন্নভত্তং, একাসনে পুরিসেন ভুঞ্জিতব্বভত্ততো উপড্ঢভত্তন্তি অত্থো.

রূপে সঞ্ঞা রূপসঞ্ঞা, সা অস্স অত্থীতি রূপসঞ্ঞী, ন রূপসঞ্ঞী অরূপসঞ্ঞী, সঞ্ঞাসীসেন ঝানং ৰদতি. রূপসঞ্ঞায অনুপ্পাদনং এৰেত্থ অলাভিতা.

বহিদ্ধাৰ ¶ ¶ উপ্পন্নন্তি বহিদ্ধা ৰত্থুস্মিংযেৰ উপ্পন্নং. অভিধম্মে পন ‘‘অজ্ঝত্তং অরূপসঞ্ঞী বহিদ্ধা রূপানি পস্সতি পরিত্তানি সুৰণ্ণদুব্বণ্ণানি…পে… অপ্পমাণানি সুৰণ্ণদুব্বণ্ণানী’’তি (ধ. স. ২২০) এৰং চতুন্নং অভিভাযতনানং আগতত্তা অভিধম্মট্ঠকথাযং (ধ. স. অট্ঠ. ২০৪) ‘‘কস্মা পন ‘যথা সুত্তন্তে অজ্ঝত্তং রূপসঞ্ঞী একো বহিদ্ধা রূপানি পস্সতি পরিত্তানীতিআদি ৰুত্তং, এৰং অৰত্ৰা ইধ চতূসুপি অভিভাযতনেসু অজ্ঝত্তং অরূপসঞ্ঞিতাৰ ৰুত্তা’তি চোদনং কত্ৰা ‘অজ্ঝত্তরূপানং অনভিভৰনীযতো’তি কারণং ৰত্ৰা, তত্থ ৰা হি ইধ ৰা বহিদ্ধা রূপানেৰ অভিভৰিতব্বানি, তস্মা তানি নিযমতো ৰত্তব্বানীতি তত্রাপি ইধাপি ৰুত্তানি. ‘অজ্ঝত্তং রূপসঞ্ঞী’তি ইদং পন সত্থু দেসনাৰিলাসমত্তমেৰা’’তি ৰুত্তং. এত্থ চ ৰণ্ণাভোগরহিতানি, সহিতানি চ সব্বানি পরিত্তানি ‘‘পরিত্তানি সুৰণ্ণদুব্বণ্ণানী’’তি ৰুত্তানি, তথা অপ্পমাণানি ‘‘অপ্পমাণানি সুৰণ্ণদুব্বণ্ণানী’’তি. অত্থি হি সো পরিযাযো পরিত্তানি অভিভুয্য তানি চে কদাচি ৰণ্ণৰসেন আভুজিতানি হোন্তি, সুৰণ্ণদুব্বণ্ণানি অভিভুয্যাতি. পরিযাযকথা হি সুত্তন্তদেসনাতি. অভিধম্মে (ধ. স. ২২২) পন নিপ্পরিযাযদেসনত্তা ৰণ্ণাভোগরহিতানি ৰিসুং ৰুত্তানি, তথা সহিতানি. অত্থি হি উভযত্থ অভিভৰনৰিসেসোতি. তথা ইধ পরিযাযদেসনত্তা ৰিমোক্খানম্পি অভিভৰনপরিযাযো অত্থীতি ‘‘অজ্ঝত্তং রূপসঞ্ঞী’’তিআদিনা পঠমদুতিযঅভিভাযতনেসু পঠমৰিমোক্খো, ততিযচতুত্থঅভিভাযতনেসু দুতিযৰিমোক্খো, ৰণ্ণাভিভাযতনেসু ততিযৰিমোক্খো চ অভিভৰনপ্পৰত্তিতো সঙ্গহিতো. অভিধম্মে পন নিপ্পরিযাযদেসনত্তা ৰিমোক্খাভিভাযতনানি অসঙ্করতো দস্সেতুং ৰিমোক্খে ৰজ্জেত্ৰা অভিভাযতনানি কথিতানি ¶ ; সব্বানি চ ৰিমোক্খকিচ্চানি ঝানানি ৰিমোক্খদেসনাযং ৰুত্তানি. তদেতং ¶ ‘‘অজ্ঝত্তং রূপসঞ্ঞী’’তি আগতস্স অভিভাযতনদ্ৰযস্স অভিধম্মে অভিভাযতনেসু অৰচনতো ‘‘রূপী রূপানি পস্সতী’’তিআদীনঞ্চ সব্বৰিমোক্খকিচ্চসাধারণৰচনভাৰতো ৰৰত্থানং কতন্তি ৰিঞ্ঞাযতি. ‘‘অজ্ঝত্তরূপানং অনভিভৰনীযতো’’তি ইদং কত্থচিপি ‘‘অজ্ঝত্তং রূপানি পস্সতী’’তি অৰত্ৰা সব্বত্থ যং ৰুত্তং ‘‘বহিদ্ধা রূপানি পস্সতী’’তি, তস্স কারণৰচনং, তেন যং অঞ্ঞহেতুকং, তং তেন হেতুনা ৰুত্তং. যং পন দেসনাৰিলাসহেতুকং অজ্ঝত্তং অরূপসঞ্ঞিতায এৰ অভিধম্মে (ধ. স. ২২৩) ৰচনং, ন তস্স অঞ্ঞং কারণং মগ্গিতব্বন্তি দস্সেতি. অজ্ঝত্তরূপানং অনভিভৰনীযতা চ তেসং বহিদ্ধা রূপানং ৰিয অভূতত্তা. দেসনাৰিলাসো চ যথাৰুত্তৰৰত্থানৰসেন ৰেদিতব্বো ৰেনেয্যজ্ঝাসযৰসেন ৰিজ্জমানপরিযাযকথাভাৰতো. ‘‘সুৰণ্ণদুব্বণ্ণানী’’তি এতেনেৰ সিদ্ধত্তা ন নীলাদি অভিভাযতনানি ৰত্তব্বানীতি চে? তং ন, নীলাদীসু কতাধিকারানং নীলাদিভাৰস্সেৰ অভিভৰনকারণত্তা. ন হি তেসং পরিসুদ্ধাপরিসুদ্ধৰণ্ণানং ¶ পরিত্ততা, অপ্পমাণতা ৰা অভিভৰনকারণং, অথ খো নীলাদিভাৰো এৰাতি. এতেসু চ পরিত্তাদিকসিণরূপেসু যং যং চরিতস্স ইমানি অভিভাযতনানি ইজ্ঝন্তি, তং দস্সেতুং ‘‘ইমেসু পনা’’তিআদি ৰুত্তং.

সব্বসঙ্গাহকৰসেনাতি সকলনীলৰণ্ণনীলনিদস্সননীলনিভাসানং সাধারণৰসেন. ৰণ্ণৰসেনাতি সভাৰৰণ্ণৰসেন. নিদস্সনৰসেনাতি পস্সিতব্বতাৰসেন চক্খুৰিঞ্ঞাণাদিৰিঞ্ঞাণৰীথিযা গহেতব্বতাৰসেন. ওভাসৰসেনাতি সপ্পভাসতায অৰভাসনৰসেন. উমাপুপ্ফন্তি অতসিপুপ্ফং. নীলমেৰ হোতি ৰণ্ণসঙ্করাভাৰতো. বারাণসিসম্ভৰন্তি বারাণসিযং সমুট্ঠিতং.

একচ্চস্স ইতো বাহিরকস্স অপ্পমাণং অতিৰিত্থারিতং কসিণনিমিত্তং ¶ ওলোকেন্তস্স ভযং উপ্পজ্জেয্য ‘‘কিং নু খো ইদং সকলং লোকং অভিভৰিত্ৰা অজ্ঝোত্থরিত্ৰা গণ্হাতী’’তি, তথাগতস্স পন তাদিসং ভযং ৰা সারজ্জং ৰা নত্থীতি অভীতভাৰদস্সনত্থমেৰ আনীতানি.

অট্ঠৰিমোক্খৰণ্ণনা

১৭৪. উত্তানত্থাযেৰ ¶ হেট্ঠা অত্থতো ৰিভত্তত্তা. একচ্চস্স ৰিমোক্খোতি ঘোসোপি ভযাৰহো ৰট্টাভিরতভাৰতো, তথাগতস্স পন ৰিমোক্খে উপসম্পজ্জ ৰিহরতোপি তং নত্থীতি অভীতভাৰদস্সনত্থমেৰ আনীতানি.

আনন্দযাচনকথাৰণ্ণনা

১৭৮. বোধীতি সব্বঞ্ঞুতঞ্ঞাণং. তঞ্হি ‘‘চতুমগ্গঞাণপটিৰেধ’’ন্ত্ৰেৰ ৰুত্তং সব্বঞ্ঞুতঞ্ঞাণপ্পটিৰেধস্স তংমূলকত্তা. এৰং ৰুত্তভাৰন্তি ‘‘আকঙ্খমানো আনন্দ তথাগতো কপ্পং ৰা তিট্ঠেয্যা’’তি (দী. নি. ২.১৬৬) এৰং ৰুত্তভাৰং.

১৭৯. তম্পি ওল়ারিকনিমিত্তং কতং তস্স মারেন পরিযুট্ঠিতচেতসো ন পটিৰিদ্ধং ন সল্লক্খিতং.

১৮৩. আদিকেহীতি এৰমাদীহি মিত্তামচ্চসুহজ্জাহি. পিযাযিতব্বতো পিযেহি. মনৰড্ঢনতো ¶ মনাপেহি. জাতিযাতি জাতিঅনুরূপগমনেন. নানাভাৰো ৰিসুংভাৰো অসম্বদ্ধভাৰো. মরণেন ৰিনাভাৰোতি চুতিযা তেনত্তভাৰেন অপুনরাৰত্তনতো ৰিপ্পযোগো. ভৰেন অঞ্ঞথাভাৰোতি ভৰন্তরগ্গহণেন পুরিমাকারতো অঞ্ঞাকারতা ‘‘কামাৰচরসত্তো রূপাৰচরো হোতী’’তিআদিনা, তত্থাপি ‘‘মনুস্সো দেৰো হোতী’’তিআদিনাপি যোজেতব্বো. কুতেত্থ লব্ভাতি কুতো কুহিং কিস্মিং নাম ঠানে এত্থ এতস্মিং খন্ধপ্পৰত্তে ‘‘যং তং জাতং…পে… মা পলুজ্জী’’তি লদ্ধুং সক্কা. ন সক্কা এৰ তাদিসস্স কারণস্স অভাৰতোতি আহ ‘‘নেতং ঠানং ৰিজ্জতী’’তি. এৰং অচ্ছরিযব্ভুতধম্মং তথাগতস্সাপি সরীরং, কিমঙ্গং পন অঞ্ঞেসন্তি অধিপ্পাযো. ‘‘পচ্চাৰমিস্সতী’’তি নেতং ঠানং ¶ ৰিজ্জতি সতিং সূপট্ঠিতং কত্ৰা ঞাণেন পরিচ্ছিন্দিত্ৰা আযুসঙ্খারানং ওস্সট্ঠত্তা, বুদ্ধকিচ্চস্স চ পরিযোসাপিতত্তা. ন হেত্থ মাসত্তযতো পরং বুদ্ধৰেনেয্যা লব্ভন্তীতি.

১৮৪. সাসনস্স চিরট্ঠিতি নাম সসম্ভারেহি অরিযমগ্গধম্মেহি কেৰলেহীতি আহ ‘‘সব্বং লোকিযলোকুত্তরৰসেনেৰ কথিত’’ন্তি লোকিযাহি ¶ সীলসমাধিপঞ্ঞাহি ৰিনা লোকুত্তরধম্মসমধিগমস্স অসম্ভৰতো.

ততিযভাণৰারৰণ্ণনা নিট্ঠিতা.

নাগাপলোকিতৰণ্ণনা

১৮৬. নাগাপলোকিতন্তি নাগস্স ৰিয অপলোকিতং, হত্থিনাগস্স অপলোকনসদিসং অপলোকনন্তি অত্থো. আহচ্চাতি ফুসিত্ৰা. অঙ্কুসকলগ্গানি ৰিযাতি অঙ্কুসকানি ৰিয অঞ্ঞমঞ্ঞস্মিং লগ্গানি আসত্তানি হুত্ৰা ঠিতানি. একাবদ্ধানীতি অঞ্ঞমঞ্ঞং একতো আবদ্ধানি. তস্মাতি গীৰট্ঠীনং একগ্ঘনানং ৰিয একাবদ্ধভাৰেন, ন কেৰলং গীৰট্ঠীনংযেৰ, অথ খো সব্বানিপি তানি বুদ্ধানং ঠপেত্ৰা বাহুসন্ধিআদিকা দ্ৰাদস মহাসন্ধিযো, অঙ্গুলিসন্ধিযো চ ইতরসন্ধীসু একাবদ্ধানি হুত্ৰা ঠিতানি, যতো নেসং পকতিহত্থীনং কোটিসহস্সবলপ্পমাণং কাযবলং হোতি. ৰেসালিনগরাভিমুখং অকাসি কণ্টকপরিৰত্তনে ৰিয কপিলনগরাভিমুখং. যদি এৰং কথং তং নাগাপলোকিতং নাম জাতং? তদজ্ঝাসযং উপাদায. ভগৰা ¶ হি নাগাপলোকিতৰসেনেৰ অপলোকেতুকামো জাতো, পুঞ্ঞানুভাৰেন পনস্স পতিট্ঠিতট্ঠানং পরিৰত্তি, তেন তং ‘‘নাগাপলোকিতং’’ ত্ৰেৰ ৰুচ্চতি.

‘‘ইদং পচ্ছিমকং আনন্দ তথাগতস্স ¶ ৰেসালিযা দস্সন’’ন্তি নযিদং ৰেসালিযা অপলোকনস্স কারণৰচনং অনেকন্তিকত্তা, ভূতকথনমত্তং পনেতং. মগ্গসোধনৰসেন তং দস্সেত্ৰা অঞ্ঞদেৰেত্থ অপলোকনকারণং দস্সেতুকামো ‘‘ননু চা’’তিআদিমাহ. তং তং সব্বং পচ্ছিমদস্সনমেৰ অনুক্কমেন কুসিনারং গন্ত্ৰা পরিনিব্বাতুকামতায ততো ততো নিক্খন্তত্তা. ‘‘অনচ্ছরিযত্তা’’তি ইমিনা যথাৰুত্তং অনেকন্তিকত্তং পরিহরতি, তযিদং সোধনমত্তং. ইদং পনেত্থ অৰিপরীতং কারণন্তি দস্সেতুং ‘‘অপিচা’’তিআদি ৰুত্তং. ন হি ভগৰা সাপেক্খো ৰেসালিং অপলোকেসি, ‘‘ইদং পন মে গমনং অপুনরাগমন’’ন্তি দস্সনমুখেন বহুজনহিতায বহুজনসুখায লোকানুকম্পায অপলোকেসি. তেনাহ ‘‘অপিচ ৰেসালিরাজানো’’তিআদি.

অন্তকরোতি ¶ সকলৰট্টদুক্খস্স সকসন্তানে, পরসন্তানে চ ৰিনাসকরো অভাৰকরো. বুদ্ধচক্খুধম্মচক্খুদিব্বচক্খুমংসচক্খুসমন্তচক্খুসঙ্খাতেহি পঞ্চহি চক্খূহি চক্খুমা. সৰাসনানং কিলেসানং সমুচ্ছিন্নত্তা সাতিসযং কিলেসপরিনিব্বানেন পরিনিব্বুতো.

চতুমহাপদেসৰণ্ণনা

১৮৭. মহাওকাসেতি মহন্তে ওকাসে. মহন্তানি ধম্মস্স পতিট্ঠাপনট্ঠানানি. যেসু পতিট্ঠাপিতো ধম্মো নিচ্ছীযতি অসন্দেহতো, কানি পন তানি? আগমনৰিসিট্ঠানি সুত্তোতরণাদীনি. দুতিযৰিকপ্পে অপদিসন্তীতি অপদেসা, ‘‘সম্মুখা মেতং আৰুসো ভগৰতো সুত’’ন্তিআদিনা কেনচি আভতস্স ‘‘ধম্মো’’তি ৰিনিচ্ছিননে কারণং. কিং পন তন্তি? তস্স যথাভতস্স সুত্তোতরণাদি এৰ. যদি এৰং কথং চত্তারোতি? যস্মা ধম্মস্স দ্ৰে সম্পরাযা সত্থা, সাৰকা চ, তেসু চ সাৰকা সঙ্ঘগণপুগ্গলৰসেন তিৰিধা ¶ , এৰং ‘‘তুম্হাকং মযা যং ধম্মো পটিগ্গহিতো’’তি অপদিসিতব্বানং ভেদেন চত্তারো. তেনাহ ‘‘সম্মুখা মে তং আৰুসো ভগৰতো সুত’’ন্তিআদি. তথা চ ৰুত্তং নেত্তিযং ‘‘চত্তারো মহাপদেসা বুদ্ধাপদেসো সঙ্ঘাপদেসো সম্বহুলত্থেরাপদেসো একত্থেরাপদেসো. ইমে চত্তারো মহাপদেসা’’তি (নেত্তি. ১৮) বুদ্ধো অপদেসো এতস্সাতি বুদ্ধাপদেসো. এস নযো সেসেসুপি. তেনাহ ‘‘বুদ্ধাদযো…পে… মহাকারণানী’’তি.

১৮৮. নেৰ ¶ অভিনন্দিতব্বন্তি ন সম্পটিচ্ছিতব্বং. গন্থস্স সম্পটিচ্ছনং নাম সৰনন্তি আহ ‘‘ন সোতব্ব’’ন্তি. পদব্যঞ্জনানীতি পদানি চ ব্যঞ্জনানি চ, অত্থপদানি, ব্যঞ্জনপদানি চাতি অত্থো. পজ্জতি অত্থো এতেহীতি পদানি, অক্খরাদীনি ব্যঞ্জনপদানি. পজ্জিতব্বতো পদানি, সঙ্কাসনাদীনি অত্থপদানি. অট্ঠকথাযংপন ‘‘‘পদসঙ্খাতানি ব্যঞ্জনানী’তি ব্যঞ্জনপদানেৰ ৰুত্তানী’’তি কেচি, তং ন, অত্থং ব্যঞ্জেন্তীতি ব্যঞ্জনানি, ব্যঞ্জনপদানি, তেহি ব্যঞ্জিতব্বতো ব্যঞ্জনানি, অত্থপদানীতি উভযসঙ্গহতো. ইমস্মিং ঠানেতি তেনাভতসুত্তস্স ইমস্মিং পদেসে. পাল়ি ৰুত্তাতি কেৰলো পাল়িধম্মো পৰত্তো. অত্থো ৰুত্তোতি পাল়িযা অত্থো পৰত্তো নিদ্দিট্ঠো. অনুসন্ধি কথিতোতি যথারদ্ধদেসনায, উপরি দেসনায চ অনুসন্ধানং কথিতং সম্বন্ধো কথিতো ¶ . পুব্বাপরং কথিতন্তি পুব্বেনাপরং অৰিরুজ্ঝনঞ্চেৰ ৰিসেসাধানঞ্চ কথিতং পকাসিতং. এৰং পাল়িধম্মাদীনি সম্মদেৰ সল্লক্খেত্ৰা গহণং সাধুকং উগ্গহণন্তি আহ ‘‘সুট্ঠু গহেত্ৰা’’তি. সুত্তে ওতারেতব্বানীতি ¶ ঞাণেন সুত্তে ওগাহেত্ৰা তারেতব্বানি, তং পন ওগাহেত্ৰা তরণং তত্থ ওতরণং অনুপ্পৰেসনং হোতীতি ৰুত্তং ‘‘সুত্তে ওতারেতব্বানী’’তি. সংসন্দেত্ৰা দস্সনং সন্দস্সনন্তি আহ ‘‘ৰিনযে সংসন্দেতব্বানী’’তি.

কিং পন তং সুত্তং, কো ৰা ৰিনযোতি ৰিচারণায আচরিযানং মতিভেদমুখেন তমত্থং দস্সেতুং ‘‘এত্থ চা’’তিআদি ৰুত্তং. ৰিনযোতি ৰিভঙ্গপাঠমাহ. সো হি মাতিকাসঞ্ঞিতস্স সুত্তস্স অত্থসূচনতো ‘‘সুত্ত’’ন্তি ৰত্তব্বতং অরহতি. ৰিৰিধনযত্তা, ৰিসিট্ঠনযত্তা চ ৰিনযো, খন্ধকপাঠো. এৰন্তি এৰং সুত্তৰিনযেসু পরিগ্গয্হমানেসু ৰিনযপিটকম্পি ন পরিযাদীযতি পরিৰারপাল়িযা অসঙ্গহিতত্তা. সুত্তন্তাভিধম্মপিটকানি ৰা সুত্তং অত্থসূচনাদিঅত্থসম্ভৰতো. এৰম্পীতি ‘‘সুত্তন্তাভিধম্মপিটকানি সুত্তং, ৰিনযপিটকং ৰিনযো’’তি এৰং সুত্তৰিনযৰিভাগে ৰুচ্চমানেপি. ন তাৰ পরিযাদীযন্তীতি ন তাৰ অনৰসেসতো পরিগ্গয্হন্তি, কস্মাতি আহ ‘‘অসুত্তনামকঞ্হী’’তিআদি. যস্মা ‘‘সুত্ত’’ন্তি ইমং নামং অনারোপেত্ৰা সঙ্গীতম্পি জাতকাদিবুদ্ধৰচনং অত্থি, তস্মা ৰুত্তনযেন তীণি পিটকানি ন পরিযাদিণ্ণানীতি. সুত্তনিপাতউদানইতিৰুত্তকাদীনি দীঘনিকাযাদযো ৰিয সুত্তনামং আরোপেত্ৰা অসঙ্গীতানীতি অধিপ্পাযে পনেত্থ জাতকাদীহি সদ্ধিং তানিপি গহিতানি. বুদ্ধৰংসচরিযাপিটকানং পনেত্থ অগ্গহণে কারণং মগ্গিতব্বং, কিং ৰা তেন মগ্গনেন? সব্বোপাযং ৰণ্ণনানযো থেরৰাদং দস্সনমুখেন পটিক্খিত্তো এৰাতি.

অত্থীতি কিং অত্থি, অসুত্তনামকং বুদ্ধৰচনং নত্থি এৰাতি দস্সেতি. তথা হি নিদানৰণ্ণনাযং ¶ (দী. নি. টী. ১.পঠমমহাসঙ্গীতিকথাৰণ্ণনা; সারত্থ. টী. ১.পঠমমহাসঙ্গীতিকথাৰণ্ণনা) অম্হেহি ৰুত্তং ¶ ‘‘সুত্তন্তি সামঞ্ঞৰিধি, ৰিসেসৰিধযো পরে’’তি. তং সব্বং পটিক্খিপিত্ৰা ‘‘সুত্তন্তি ৰিনযো’’তিআদিনা ৰুত্তং সংৰণ্ণনানযং ‘‘নাযমত্থো ইধাধিপ্পেতো’’তি পটিসোধেত্ৰা. ৰিনেতি এতেন কিলেসেতি ৰিনযো, কিলেসৰিনযনূপাযো, সো এৰ চ নং করোতীতি কারণন্তি আহ ‘‘ৰিনযো পন কারণ’’ন্তি.

ধম্মেতি ¶ পরিযত্তিধম্মে. সরাগাযাতি সরাগভাৰায কামরাগভৰরাগপরিব্রূহনায. সঞ্ঞোগাযাতি ভৰসংযোজনায. আচযাযাতি ৰট্টস্স ৰড্ঢনত্থায. মহিচ্ছতাযাতি মহিচ্ছভাৰায. অসন্তুট্ঠিযাতি অসন্তুট্ঠিভাৰায. সঙ্গণিকাযাতি কিলেসসঙ্গণগণসঙ্গণৰিহারায. কোসজ্জাযাতি কুসীতভাৰায. দুব্ভরতাযাতি দুপ্পোসতায. ৰিরাগাযাতি সকলৰট্টতো ৰিরজ্জনত্থায. ৰিসঞ্ঞোগাযাতি কামভৰাদীহি ৰিসংযুজ্জনত্থায. অপচযাযাতি সব্বস্সাপি ৰট্টস্স অপচযনায, নিব্বানাযাতি অত্থো. অপ্পিচ্ছতাযাতি পচ্চযপ্পিচ্ছতাদিৰসেন সব্বসো ইচ্ছাপগমায. সন্তুট্ঠিযাতি দ্ৰাদসৰিধসন্তুট্ঠিভাৰায. পৰিৰেকাযাতি পৰিৰিত্তভাৰায, কাযৰিৰেকাদিতদঙ্গৰিৰেকাদিৰিৰেকসিদ্ধিযা. ৰীরিযারম্ভাযাতি কাযিকস্স চেৰ, চেতসিকস্স চ ৰীরিযস্স পগ্গহণত্থায. সুভরতাযাতি সুখপোসনত্থায. এৰং যো পরিযত্তিধম্মো উগ্গহণধারণপরিপুচ্ছামনসিকারৰসেন যোনিসো পটিপজ্জন্তস্স সরাগাদিভাৰপরিৰজ্জনস্স কারণং হুত্ৰা ৰিরাগাদিভাৰায সংৰত্ততি, একংসতো এসো ধম্মো. এসো ৰিনযো, সম্মদেৰ ¶ অপাযাদীসু অপতনৰসেন ধারণতো, কিলেসানং ৰিনযনতো, সত্থু সম্মাসম্বুদ্ধস্স ওৰাদানুসিট্ঠিভাৰতো এতং সত্থুসাসনন্তি ধারেয্যাসি জানেয্যাসি, অৰবুজ্ঝেয্যাসীতি অত্থো. চতুসচ্চস্স সূচনং সুত্তন্তি আহ ‘‘সুত্তেতি তেপিটকে বুদ্ধৰচনে’’তি. তেপিটকঞ্হি বুদ্ধৰচনং সচ্চৰিনিমুত্তং নত্থি. রাগাদিৰিনযনকারণং তথাগতেন সুত্তপদেন পকাসিতন্তি আহ ‘‘ৰিনযেতি এতস্মিং রাগাদিৰিনযকারণে’’তি.

সুত্তে ওসরণঞ্চেত্থ তেপিটকে বুদ্ধৰচনে পরিযাপন্নতাৰসেনেৰ ৰেদিতব্বং, ন অঞ্ঞথাতি আহ ‘‘সুত্তপটিপাটিযা কত্থচি অনাগন্ত্ৰা’’তি. ছল্লিং উট্ঠপেত্ৰাতি অরোগস্স মহতো রুক্খস্স তিট্ঠতো উপক্কমেন ছল্লিযা সকলিকায, পপটিকায ৰা উট্ঠপনং ৰিয অরোগস্স সাসনধম্মস্স তিট্ঠতো ব্যঞ্জনমত্তেন তপ্পরিযাপন্নং ৰিয হুত্ৰা ছল্লিসদিসং পুব্বাপরৰিরুদ্ধতাদিদোসং উট্ঠপেত্ৰা পরিদীপেত্ৰা, তাদিসানি পন একংসতো গুল়্হৰেস্সন্তরাদিপরিযাপন্নানি হোন্তীতি আহ ‘‘গুল়্হৰেস্সন্তর…পে…পঞ্ঞাযন্তীতি অত্থো’’তি ¶ . রাগাদিৰিনযেতি রাগাদীনং ৰিনযনত্থে. তদাকারতায ন পঞ্ঞাযমানানি ন দিস্সমানানি ছড্ডেতব্বানি ৰজ্জিতব্বানি ন গহেতব্বানি. সব্বত্থাতি সব্বৰারেসু.

ইমস্মিং ¶ পন ঠানেতি ইমস্মিং মহাপদেসনিদ্দেসট্ঠানে. ‘‘সুত্তে চত্তারো মহাপদেসা’’তিআদিনা ৰুত্তম্পি অৰুত্তেন সদ্ধিং গহেত্ৰা পকিণ্ণককথায মাতিকং উদ্দিসতি. ঞাতুং ¶ ইচ্ছিতো অত্থো পঞ্হো, তস্স ৰিস্সজ্জনানি পঞ্হাব্যাকরণানি, অত্থসূচনাদিঅত্থেন সুত্তং, পাল়ি, তং সুত্তং অনুলোমেতি অনুকূলেতীতি সুত্তানুলোমং, মহাপদেসো. আচরিযা ৰদন্তি সংৰণ্ণেন্তি পাল়িং এতেনাতি আচরিযৰাদো অট্ঠকথা. তস্স তস্স থেরস্স অত্তনো এৰ মতি অধিপ্পাযোতি অত্তনোমতি. ধম্মৰিনিচ্ছযে পত্তেতি ধম্মে ৰিনিচ্ছিনিতব্বে উপট্ঠিতে. ইমেতি অনন্তরং ৰুত্তা চত্তারো মহাপদেসা. পমীযতি ধম্মো পরিচ্ছিজ্জতি ৰিনিচ্ছীযতি এতেনাতি পমাণং. তেনাহ ‘‘যং এত্থ সমেতী’’তিআদি. ইতরন্তি মহাপদেসেসু অসমেন্তং. পুন ইতরন্তি অকপ্পিযং অনুলোমেন্তং কপ্পিযং পটিবাহন্তং সন্ধাযাহ.

একংসেনেৰ ব্যাকাতব্বো ৰিস্সজ্জেতব্বোতি একংসব্যাকরণীযো. ৰিভজ্জাতি পুচ্ছিতমত্থং অৰধারণাদিভেদেন ৰিভজিত্ৰা. পটিপুচ্ছাতি পুচ্ছন্তং পুগ্গলং পটিপুচ্ছিত্ৰা. ঠপনীযোতি তিধাপি অৰিস্সজ্জনীযত্তা ঠপনীযো ব্যাকরণং অকত্ৰা ঠপেতব্বো. ‘‘চক্খুং অনিচ্চ’’ন্তি পঞ্হে উত্তরপদাৰধারণং সন্ধায ‘‘একংসেনেৰ ব্যাকাতব্ব’’ন্তি ৰুত্তং নিচ্চতায লেসস্সাপি তত্থ অভাৰতো. পুরিমপদাৰধারণে পন ৰিভজ্জব্যাকরণীযতা চক্খুসোতেসু ৰিসেসত্থসামঞ্ঞত্থানং অসাধারণভাৰতো. দ্ৰিন্নং তেসং সদিসতাচোদনা পটিপুচ্ছনমুখেনেৰ ব্যাকরণীযা পটিক্খেপৰসেন, অনুঞ্ঞাতৰসেন চ ৰিস্সজ্জিতব্বতোতি আহ ‘‘যথা চক্খু, তথা সোতং…পে… অযং পটিপুচ্ছাব্যাকরণীযো পঞ্হো’’তি. তং জীৰং তং সরীরন্তি জীৰসরীরানং অনঞ্ঞতাপঞ্হো. যস্স যেন অনঞ্ঞতাচোদিতা, সো এৰ পরমত্থতো ¶ নুপলব্ভতীতি ৰঞ্ঝাতনযস্স মত্তেয্যতাকিত্তনসদিসোতি অব্যাকাতব্বতায ঠপনীযো ৰুত্তোতি. ইমানি চত্তারি পঞ্হব্যাকরণানি পমাণং তেনেৰ নযেন তেসং পঞ্হানং ব্যাকাতব্বতো.

ৰিনযমহাপদেসো কপ্পিযানুলোমৰিধানতো নিপ্পরিযাযতো অনুলোমকপ্পিযং নাম, মহাপদেসভাৰেন পন তংসদিসতায সুত্তন্তমহাপদেসেসুপি ‘‘অনুলোমকপ্পিয’’ন্তি অযং অট্ঠকথাৰোহারো. যদিপি তত্থ তত্থ ভগৰতা পৰত্তিতপকিণ্ণকদেসনাৰ অট্ঠকথা, সা পন ধম্মসঙ্গাহকেহি পঠমং তীণি পিটকানি সঙ্গাযিত্ৰা তস্স অত্থৰণ্ণনানুরূপেনেৰ ¶ ৰাচনামগ্গং আরোপিতত্তা ‘‘আচরিযৰাদো’’তি ৰুচ্চতি আচরিযা ৰদন্তি সংৰণ্ণেন্তি পাল়িং এতেনাতি. তেনাহ ¶ ‘‘আচরিযৰাদো নাম অট্ঠকথা’’তি. তিস্সো সঙ্গীতিযো আরুল়্হো এৰ চ বুদ্ধৰচনস্স অত্থসংৰণ্ণনাভূতো কথামগ্গো মহিন্দত্থেরেন তম্বপণ্ণিদীপং আভতো পচ্ছা তম্বপণ্ণিযেহি মহাথেরেহি সীহল়ভাসায ঠপিতো নিকাযন্তরলদ্ধিসঙ্করপরিহরণত্থং. অত্তনোমতি নাম থেরৰাদো. নযগ্গাহেনাতি সুত্তাদিতো লব্ভমাননযগ্গহণেন. অনুবুদ্ধিযাতি সুত্তাদীনিযেৰ অনুগতবুদ্ধিযা. অত্তনো পটিভানন্তি অত্তনো এৰ তস্স অত্থস্স ৰুত্তনযেন উপট্ঠানং, যথাউপট্ঠিতা অত্থা এৰ তথা ৰুত্তা. সমেন্তমেৰ গহেতব্বন্তি যথা সুত্তেন সংসন্দতি, এৰং মহাপদেসতো অত্থা উদ্ধরিতব্বাতি দস্সেতি. পমাদপাঠৰসেন আচরিযৰাদস্স কদাচি পাল়িযা অসংসন্দনাপি সিযা, সো ন গহেতব্বোতি দস্সেন্তো আহ ‘‘আচরিযৰাদোপি সুত্তেন সমেন্তোযেৰ গহেতব্বো’’তি. সব্বদুব্বলা পুগ্গলস্স সযং পটিভানভাৰতো. তথা চ সাপি গহেতব্বা, কীদিসী? সুত্তেন সমেন্তা যেৰাতি যোজনা. তাসূতি তীসু সঙ্গীতীসু. ‘‘আগতমেৰ পমাণ’’ন্তি ইমিনা মহাকস্সপাদীহি সঙ্গীতমেৰ ‘‘সুত্ত’’ন্তি ইধাধিপ্পেতন্তি তদঞ্ঞস্স ¶ সুত্তভাৰমেৰ পটিক্খিপতি. তদত্থা এৰ হি তিস্সো সঙ্গীতিযো. তত্থাতি গারয্হসুত্তে. ন চেৰ সুত্তে ওসরন্তি, ন চ ৰিনযে সন্দিস্সন্তীতি ৰেদিতব্বানি তস্স অসুত্তভাৰতো তেন ‘‘অনুলোমকপ্পিযং সুত্তেন সমেন্তমেৰ গহেতব্ব’’ন্তি ৰুত্তং এৰত্থং নিগমনৰসেন নিদস্সেতি. সব্বত্থ ‘‘ন ইতর’’ন্তি ৰচনং তত্থ তত্থ গহিতাৰধারণফলদস্সনং দট্ঠব্বং.

কম্মারপুত্তচুন্দৰত্থুৰণ্ণনা

১৮৯. সূকরমদ্দৰন্তি ৰনৰরাহস্স মুদুমংসং. যস্মা চুন্দো অরিযসাৰকো সোতাপন্নো, অঞ্ঞে চ ভগৰতো, ভিক্খুসঙ্ঘস্স চ আহারং পটিযাদেন্তা অনৰজ্জমেৰ পটিযাদেন্তি, তস্মা ৰুত্তং ‘‘পৰত্তমংস’’ন্তি. তং কিরাতি ‘‘নাতিতরুণস্সা’’তিআদিনা ৰুত্তৰিসেসং. তথা হি তং ‘‘মুদু চেৰ সিনিদ্ধঞ্চা’’তি ৰুত্তং. মুদুমংসভাৰতো হি অভিসঙ্খরণৰিসেসেন চ ‘‘মদ্দৰ’’ন্তি ৰুত্তং. ওজং পক্খিপিংসু ‘‘অযং ভগৰতো পচ্ছিমকো আহারো’’তি পুঞ্ঞৰিসেসাপেক্খায, তং পন তথাপক্খিত্তদিব্বোজতায গরুতরং জাতং.

অঞ্ঞে ¶ যং দুজ্জীরং, তং অজানন্তা ‘‘কস্সচি অদত্ৰা ৰিনাসিত’’ন্তি উপৰদেয্যুন্তি পরূপৰাদমোচনত্থং ভগৰা ‘‘নাহং ত’’ন্তিআদিনা সীহনাদং নদতি.

১৯০. কথং পনাযং সীহনাদো ননু তং ভগৰতোপি সম্মাপরিণামং ন গতন্তি? নযিদং এৰং দট্ঠব্বং, যস্মা ‘‘সম্মদেৰ তং ভগৰতো পরিণামং গত’’ন্তি ৰত্তুং অরহতি তপ্পচ্চযা উপ্পন্নস্স ¶ ৰিকারস্স অভাৰতো, অঞ্ঞপচ্চযস্স চ ৰিকারস্স মুদুভাৰং আপাদিতত্তা. তেনাহ ‘‘ন পন ভুত্তপ্পচ্চযা’’তিআদি. ন হি ভগৰা, অঞ্ঞে ৰা পন খীণাসৰা নৰৰেদনুপ্পাদনৰসেন আহারং পরিভুঞ্জন্তি অট্ঠঙ্গসমন্নাগতমেৰ কত্ৰা আহারস্স উপভুঞ্জনতো. যদি এৰং কস্মা পাল়িযং ‘‘ভত্তং ভুত্তাৰিস্স খরো আবাধো উপ্পজ্জী’’তিআদি ৰুত্তং? তং ভোজনুত্তরকালং ¶ উপ্পন্নত্তা ৰুত্তং. ‘‘ন পন ভুত্তপচ্চযা’’তি ৰুত্তো ৰাযমত্থো অট্ঠকথাযং. কতুপচিতস্স লদ্ধোকাসস্স কম্মস্স ৰসেন বলৰতিপি রোগে উপ্পন্নে গরুসিনিদ্ধভোজনপ্পচ্চযা ৰেদনানিগ্গহো জাতো, তেনাহ ‘‘যদি হী’’তিআদি. পত্থিতট্ঠানেতি ইচ্ছিতট্ঠানে, ইচ্ছা চস্স তত্থ গন্ত্ৰা ৰিনেতব্বৰেনেয্যাপেক্খা দট্ঠব্বা. গাথাযম্পি ‘‘সুত’’ন্তি ইমিনা সুতমত্তং, পরেসং ৰচনমত্তমেতং, ন পন ভোজনপ্পচ্চযা আবাধং ফুসি ধীরোতি দস্সেতি.

পানীযাহরণৰণ্ণনা

১৯১. পসন্নভাৰেন উদকস্স অচ্ছভাৰো ৰেদিতব্বোতি আহ ‘‘অচ্ছোদকাতি পসন্নোদকা’’তি. সাদুরসত্তা সাততাতি আহ ‘‘মধুরোদকা’’তি. তনুকমেৰ সলিলং ৰিসেসতো সীতলং, ন বহলন্তি আহ ‘‘তনুসীতলসলিলা’’তি. নিক্কদ্দমাতি সেতভাৰস্স কারণমাহ. পঙ্কচিক্খল্লাদিৰসেন হি উদকস্স ৰিৰণ্ণতা, সভাৰতো পন তং সেতৰণ্ণং এৰাতি.

পুক্কুসমল্লপুত্তৰত্থুৰণ্ণনা

১৯২. ধুরৰাতেতি পটিমুখৰাতে. দীঘপিঙ্গলোতি দীঘো হুত্ৰা পিঙ্গলচক্খুকো. পিঙ্গলক্খিকো হি সো ‘‘আল়ারো’’তি পঞ্ঞাযিত্থ. এৰরূপন্তি দক্খতি করিস্সতি ভৰিস্সতীতি ঈদিসং. ঈদিসেসূতি যত্র যংচাতি এৰরূপনিপাতসদ্দযুত্তট্ঠানেসু.

১৯৩. ৰিচরন্তিযো ¶ মেঘগব্ভতো নিচ্ছরন্তিযো ৰিয হোন্তীতি ৰুত্তং ‘‘নিচ্ছরন্তীসূতি ৰিচরন্তীসূ’’তি. নৰৰিধাযাতি নৰপ্পকারায. নৰসু হি পকারেসু একৰিধাপি অসনি তপ্পরিযাপন্নতায ‘‘নৰৰিধা’’ ত্ৰেৰ ৰুচ্চতি. ঈদিসী হি এসা রুল়্হি অট্ঠৰিমোক্খপত্তিপি সমঞ্ঞা ৰিয. অসঞ্ঞং করোতি, যো তস্সা সদ্দেন ¶ , তেজসা চ অজ্ঝোত্থটো. একং চক্কন্তি একং মণ্ডলং. সঙ্কারং তীরেন্তী পরিচ্ছিজ্জন্তী ৰিয দস্সেতীতি সতেরা. গগ্গরাযমানাতি গগ্গরাতিসদ্দং করোন্তী, অনুরৰদস্সনঞ্হেতং. কপিসীসাতি কপিসীসাকারৰতী. মচ্ছৰিলোলিকাতি ¶ উদকে পরিপ্ফন্দমানমচ্ছো ৰিয ৰিলুল়িতাকারা. কুক্কুটসদিসাতি পসারিতপক্খকুক্কুটাকারা. নঙ্গলস্স কস্সনকালে কস্সকানং হত্থেন গহেতব্বট্ঠানে মণিকা হোতি, তং উপাদায নঙ্গলং ‘‘দণ্ডমণিকা’’তি ৰুচ্চতি, তস্মা দণ্ডমণিকাকারা দণ্ডমণিকা. তেনাহ ‘‘নঙ্গলসদিসা’’তি. দেৰে ৰস্সন্তেপি সজোতিভূততায উদকেন অতেমেতব্বতো মহাসনি ‘‘সুক্খাসনী’’তি ৰুত্তা. তেনাহ ‘‘পতিতট্ঠানং সমুগ্ঘাটেতী’’তি.

ভুসাগারকেতি ভুসমযে অগারকে. তত্থ কির মহন্তং পলালপুঞ্জং অব্ভন্তরতো পলালং নিক্কড্ঢিত্ৰা সালাসদিসং পব্বজিতানং ৰসনযোগ্গট্ঠানং কতং, তদা ভগৰা তত্থ ৰসি, তং পন খলমণ্ডলং সালাসদিসন্তি আহ ‘‘খলসালায’’ন্তি. এত্থাতি হেতুম্হি ভুম্মৰচনন্তি আহ ‘‘এতস্মিং কারণে’’তি, অসনিপাতেন ছন্নং জনানং হতকারণেতি অত্থো. সো ত্ৰং ভন্তেতি অযমেৰ ৰা পাঠো.

১৯৪. সিঙ্গী নাম কির উত্তমং অতিৰিয পভস্সরং বুদ্ধানং ছৰিৰণ্ণোভাসং দেৰলোকতো আগতসুৰণ্ণং. তেনেৰাহ ‘‘সিঙ্গীসুৰণ্ণৰণ্ণ’’ন্তি. ‘‘কিং পন থেরো তং গণ্হী’’তি সযমেৰ পুচ্ছং সমুট্ঠাপেত্ৰা তত্থ কারণং দস্সেন্তো ‘‘কিঞ্চাপী’’তিআদিমাহ. তেনেৰ কারণেনাতি উপট্ঠাকট্ঠানস্স মত্থকপ্পত্তি, পরেসং ¶ ৰচনোকাসপচ্ছেদনং, তেন ৰত্থেন সত্থু পূজনং, সত্থু অজ্ঝাসযানুৰত্তনন্তি ইমিনা তেনেৰ যথাৰুত্তেন চতুব্বিধেন কারণেন.

১৯৫. থেরো চ তাৰদেৰ তং সিঙ্গীৰণ্ণং মট্ঠদুস্সং ভগৰতো উপনামেসি ‘‘পটিগ্গণ্হতু মে ভন্তে ভগৰা ইমং মট্ঠদুস্সং, তং মমস্স দীঘরত্তং হিতায সুখাযা’’তি. পটিগ্গহেসি ভগৰা, পটিগ্গহেত্ৰাৰ নং পরিভুঞ্জি ¶ . তেন ৰুত্তং ‘‘ভগৰাপি ততো একং নিৰাসেসি, একং পারুপী’’তি. তাৰদেৰ কির তং ভিক্খূ ওৰট্টিকরণমত্তেন তুন্নকম্মং নিট্ঠাপেত্ৰা থেরস্স উপনেসুং, থেরো ভগৰতো উপনামেসি. হতচ্চিকং ৰিযাতি পটিহতপ্পভং, ৰিয-সদ্দো নিপাতমত্তং. ভগৰতো হি সরীরপ্পভাহি অভিভুয্যমানা তস্স ৰত্থযুগস্স পভস্সরতা নাহোসি. অন্তন্তেনেৰাতি অন্তো অন্তো এৰ, অব্ভন্তরতো এৰাতি অত্থো. তেনাহ ‘‘বহিপনস্স পভা নত্থী’’তি.

‘‘পসন্নরূপং সমুট্ঠাপেতী’’তি এতেনেতস্স আহারস্স ভুত্তপ্পচ্চযা ন সো রোগোতি অযমত্থো দীপিতো. দ্ৰীসু কালেসু এৰং হোতি দ্ৰিন্নং নিব্বানধাতূনং সমধিগমসমযভাৰতো. উপৰত্তনে অন্তরেন যমকসালানন্তি এত্থ ৰত্তব্বং পরতো আগমিস্সতি.

১৯৬. সব্বং ¶ সুৰণ্ণৰণ্ণমেৰ অহোসি অতিৰিয পরিসুদ্ধায পভস্সরায একগ্ঘনায ভগৰতো সরীরপ্পভায নিরন্তরং অভিভূতত্তা.

ধম্মেতি পরিযত্তিধম্মে. পৰত্তাতি পাৰচনভাৰেন দেসেতা. পুরতোৰ নিসীদি ওৰাদপ্পটিকরণভাৰতো.

১৯৭. দানানিসংসসঙ্খাতা ¶ লাভাতি ৰণ্ণদানবলদানাদিভেদা দানস্স আনিসংসসঞ্ঞিতা দিট্ঠধম্মিকা, সম্পরাযিকা চ লাভা ইচ্ছিতব্বা. তে অলাভাতি তে সব্বে তুয্হং অলাভা, লাভা এৰ ন হোন্তি. দিট্ঠেৰ ধম্মে পচ্চক্খভূতে ইমস্মিংযেৰ অত্তভাৰে ভৰা দিট্ঠধম্মিকা. সম্পরেতব্বতো পেচ্চ গন্তব্বতো ‘‘সম্পরাযো’’তি লদ্ধনামে পরলোকে ভৰা সম্পরাযিকা. দিট্ঠধম্মিকা চ সম্পরাযিকা চ দিট্ঠধম্মিকসম্পরাযিকা. দানানিসংসসঙ্খাতা লাভাতি দানানিসংসভূতা লাভা. সব্বথা সমমেৰ হুত্ৰা সমং ফলং এতেসং ন একদেসেনাতি সমসমফলা. পিণ্ডপাতাতি তব্বিসযং দানমযং পুঞ্ঞমাহ.

যদি খেত্তৰসেন নেসং সমফলতা অধিপ্পেতা, সতিপি একসন্তানভাৰে পুথুজ্জনঅরহন্তভাৰসিদ্ধং ননু তেসং খেত্তং ৰিসিট্ঠন্তি দস্সেতুং ‘‘ননু চা’’তিআদিমাহ. পরিনিব্বানসমতাযাতি কিলেসপরিনিব্বানখন্ধপরিনিব্বানভাৰেন পরিনিব্বানসমতায. ‘‘পরিভুঞ্জিত্ৰা পরিনিব্বুতো’’তি এতেন ¶ যথা পণীতপিণ্ডপাতপরিভোগূপত্থম্ভিতরূপকাযসন্নিস্সযো ধম্মকাযো সুখেনেৰ কিলেসে পরিচ্চজি, ভোজনসপ্পাযসংসিদ্ধিযা এৰং সুখেনেৰ খন্ধে পরিচ্চজীতি এৰং কিলেসপরিচ্চাগস্স, খন্ধপরিচ্চাগস্স চ সুখসিদ্ধিনিমিত্ততায উভিন্নং পিণ্ডপাতানং সমফলতা জোতিতা. ‘‘পিণ্ডপাতসীসেন চ পিণ্ডপাতদানং জোতিত’’ন্তি ৰুত্তো ৰাযমত্থো. যথা হি সুজাতায ‘‘ইমং আহারং নিস্সায ময্হং দেৰতায ৰণ্ণসুখবলাদিগুণা সম্মদেৰ সম্পজ্জেয্যু’’ন্তি উল়ারো অজ্ঝাসযো তদা অহোসি, এৰং চুন্দস্সপি কম্মারপুত্তস্স ‘‘ইমং আহারং নিস্সায ভগৰতো ৰণ্ণসুখবলাদিগুণা সম্মদেৰ সম্পজ্জেয্যু’’ন্তি উল়ারো অজ্ঝাসযোতি এৰম্পি নেসং উভিন্নং সমফলতা ৰেদিতব্বা. সতিপি চতুৰীসতিকোটিসতসহস্সসমাপত্তীনং দেৰসিকং ৰল়ঞ্জনসমাপত্তিভাৰে যথা পন অভিসম্বুজ্ঝনদিৰসে অভিনৰৰিপস্সনং পট্ঠপেন্তো রূপসত্তকাদি (ৰিসুদ্ধি. টী. ২.৭০৭ ৰিত্থারো) ৰসেন চুদ্দসহাকারেহি ¶ সন্নেত্ৰা মহাৰিপস্সনামুখেন তা সমাপত্তিযো সমাপজ্জি, এৰং পরিনিব্বানদিৰসেপি সব্বা তা সমাপজ্জীতি এৰং সমাপত্তিসমতাযপি তেসং সমফলতা. চুন্দস্স তাৰ অনুস্সরণং উল়ারতরং হোতু ভগৰতো দিন্নভাৰেন অঞ্ঞথত্তাভাৰতো, সুজাতায পন ¶ কথং দেৰতায দিন্নন্তি? এৰংসঞ্ঞিভাৰতোতি আহ ‘‘সুজাতা চা’’তিআদি. অপরভাগেতি অভিসম্বোধিতো অপরভাগে. পুন অপরভাগেতি পরিনিব্বানতো পরতো. ধম্মসীসন্তি ধম্মানং মত্থকভূতং নিব্বানং. মে গহিতন্তি মম ৰসেন গহিতং. তেনাহ ‘‘ময্হং কিরা’’তিআদি.

অধিপতিভাৰো আধিপতেয্যন্তি আহ ‘‘জেট্ঠভাৰসংৰত্তনিযক’’ন্তি.

সংৰরেতি সীলসংৰরে. ৰেরন্তি পাণাতিপাতাদিপঞ্চৰিধং ৰেরং. তঞ্হি ৰেরিধম্মভাৰতো, ৰেরহেতুতায চ ‘‘ৰের’’ন্তি ৰুচ্চতি. কোসল্লং ৰুচ্চতি ঞাণং, তেন যুত্তো কুসলোতি আহ ‘‘কুসলো পন ঞাণসম্পন্নো’’তি. ঞাণসম্পদা নাম ঞাণপারিপূরী, সা চ অগ্গমগ্গৰসেন ৰেদিতব্বা, অগ্গমগ্গো চ নিরৰসেসতো কিলেসে পজহতীতি আহ ‘‘অরিযমগ্গেন…পে… জহাতী’’তি. ইমং পাপকং জহিত্ৰাতি দানেন তাৰ লোভমচ্ছরিযাদিপাপকং, সীলেন পাণাতিপাতাদিপাপকং জহিত্ৰা তদঙ্গৰসেন পহায ততো সমথৰিপস্সনাধম্মেহি ৰিক্খম্ভনৰসেন, ততো মগ্গপটিপাটিযা সমুচ্ছেদৰসেন অনৰসেসং পাপকং পহায. তথা ¶ পহীনত্তা এৰ রাগাদীনং খযা কিলেসনিব্বানেন সব্বসো কিলেসৰূপসমেন নিব্বুতো পরিনিব্বুতোতি সউপাদিসেসায নিব্বানধাতুযা দেসনায কূটং গণ্হন্তো ‘‘ইতি চুন্দস্স…পে… সম্পস্সমানো উদানং উদানেসী’’তি.

চতুত্থভাণৰারৰণ্ণনা নিট্ঠিতা.

যমকসালৰণ্ণনা

১৯৮. এৰং ¶ তং কুসিনারাযং হোতীতি যথা অনুরাধপুরস্স থূপারামো দক্খিণপচ্ছিমদিসাযং, এৰং তং উয্যানং কুসিনারায দক্খিণপচ্ছিমদিসাযং হোতি. তস্মাতি যস্মা নগরং পৰিসিতুকামা উয্যানতো উপেচ্চ ৰত্তন্তি গচ্ছন্তি এতেনাতি ‘‘উপৰত্তন’’ন্তি ৰুচ্চতি, তং সালপন্তিভাৰেন ঠিতং সালৰনং. অন্তরেনাতি ৰেমজ্ঝে. তস্স কির মঞ্চকস্সাতি তত্থ পঞ্ঞপিযমানস্স তস্স মঞ্চকস্স. তত্রাপি…পে… একো পাদভাগস্স, তস্মা ‘‘অন্তরেন যমকসালান’’ন্তি ৰুত্তং. সংসিব্বিত্ৰাতি অঞ্ঞমঞ্ঞআসত্তৰিটপসাখতায সংসিব্বিত্ৰা ৰিয. ‘‘ঠিতসাখা’’তিপি ৰুত্তং অট্ঠকথাযং. যং পন পাল়িযং ‘‘উত্তরসীসকং মঞ্চকং ¶ পঞ্ঞপেহী’’তি ৰুত্তং, তং পচ্ছিমদস্সনং দট্ঠুং আগতানং দেৰতানং দট্ঠুং যোগ্যতাৰসেন ৰুত্তং. কেচি পন ‘‘উত্তরদিসাৰিলোকনমুখং পুব্বদিসাসীসকং কত্ৰা মঞ্চকং পঞ্ঞপেহীতি অত্থো’’তি ৰদন্তি, তং তেসং মতিমত্তং.

এতে নাগানমুত্তমাতি এতে গোত্ততো গোচরিআদিনামকা হত্থিনাগেসু বলেন সেট্ঠতমা. মজ্ঝিমট্ঠকথাযং (ম. নি. অট্ঠ. ১.১৪৮) পন কেচি হত্থিনো ইতো অঞ্ঞথা আগতা, সো পন নেসং নামমত্তকতো ভেদো দট্ঠব্বো.

পরিভুত্তকালতো পট্ঠায…পে… পরিক্খযং গতং, ‘‘ন পন পরিভুত্তপ্পচ্চযা’’তি হেট্ঠা ৰুত্তনযেনেৰ অত্থো দট্ঠব্বো. চঙ্গৰারেতি ঊমিযং. কতোকাসস্স কম্মস্স ৰসেন যথাসমুট্ঠিতো রোগো আরোগ্যং অভিমদ্দতীতি কত্ৰা এতমত্থং দস্সেন্তো ‘‘ৰিযা’’তি ৰুত্তং. যস্মা ভগৰা হেট্ঠা ৰুত্তনযেন ¶ কপ্পং, কপ্পাৰসেসং ৰা ঠাতুং সমত্থো এৰ, তত্তকং কালং ¶ ঠানে পযোজনাভাৰতো আযুসঙ্খারে ওস্সজ্জিত্ৰা তাদিসস্স কম্মস্স ওকাসং অদাসি, তস্মা এতমত্থং দস্সেন্তো ‘‘ৰিযা’’তিপি ৰত্তুং যুজ্জতিযেৰ.

কুসলং কাতব্বং মঞ্ঞিস্সন্তি ‘‘এৰং মহপ্ফলং, এৰং মহানিসংসং, মহানুভাৰঞ্চ তং কুসল’’ন্তি.

একস্সাপি সত্তস্স ৰট্টদুক্খৰূপসমো বুদ্ধানং গরুতরো হুত্ৰা উপট্ঠাতি অতিদুল্লভভাৰতো, তস্মা ‘‘অপরম্পি পস্সতী’’তিআদি ৰুত্তং, স্ৰাযমত্থো মাগণ্ডিযসুত্তেন (সু. নি. ৮৪১) দীপেতব্বো.

ততিযং পন কারণং সত্তানং উপ্পজ্জনকঅনত্থপরিহরণন্তি তং দস্সেন্তো পুন ‘‘অপরম্পি পস্সতী’’তিআদিমাহ.

সীহসেয্যন্তি. এত্থ সযনং সেয্যা, সীহস্স ৰিয সেয্যা সীহসেয্যা, তং সীহসেয্যং. অথ ৰা সীহসেয্যন্তি সেট্ঠসেয্যং, যদিদং অত্থদ্ৰযং পরতো আগমিস্সতি.

‘‘ৰামেন পস্সেন সেন্তী’’তি এৰং ৰুত্তা কামভোগিসেয্যা, দক্খিণপস্সেন সযানো নাম নত্থি দক্খিণহত্থস্স সরীরগ্গহণাদিযোগক্খমতো, পুরিসৰসেন চেতং ৰুত্তং.

একেন ¶ পস্সেন সযিতুং ন সক্কোন্তি দুক্খুপ্পত্তিতো.

অযং সীহসেয্যাতি অযং এৰং ৰুত্তা সীহসেয্যা. ‘‘তেজুস্সদত্তা’’তি ইমিনা সীহস্স অভীরুভাৰং দস্সেতি. ভীরুকা হি সেসমিগা অত্তনো আসযং পৰিসিত্ৰা সন্তাসপুব্বকং যথা তথা সযন্তি, সীহো পন অভীরুভাৰতো সতোকারী ভিক্খু ৰিয সতিং উপট্ঠাপেত্ৰাৰ সযতি. তেনাহ ‘‘পুরিমপাদে’’তিআদি. দক্খিণে পুরিমপাদে ৰামস্স পুরিমপাদস্স ঠপনৰসেন দ্ৰে পুরিমপাদে একস্মিং ঠানে ঠপেত্ৰা. পচ্ছিমপাদেতি দ্ৰে পচ্ছিমপাদে. ৰুত্তনযেনেৰ ইধাপি একস্মিং ঠানে পাদট্ঠপনং ৰেদিতব্বং, ঠিতোকাসসল্লক্খণং অভীরুভাৰেনেৰ. ‘‘সীসং পন উক্খিপিত্ৰা’’তিআদিনা ৰুত্তা সীহকিরিযা অনুত্রাসপবুজ্ঝনং ¶ ৰিয অভীরুভাৰসিদ্ধা ধম্মতাৰসেনেৰাতি ৰেদিতব্বা. সীহৰিজম্ভিতৰিজম্ভনং অতিৰেলং একাকারেন ঠপিতানং সরীরাৰযৰানং গমনাদিকিরিযাসু যোগ্যভাৰাপাদনত্থং. তিক্খত্তুং সীহনাদনদনং অপ্পেসক্খমিগজাতপরিহরণত্থং.

সেতি ¶ অব্যাৰটভাৰেন পৰত্ততি এত্থাতি সেয্যা, চতুত্থজ্ঝানমেৰ সেয্যা চতুত্থজ্ঝানসেয্যা. কিং পন তং চতুত্থজ্ঝানন্তি? আনাপানচতুত্থজ্ঝানং, ততো হি ৰুট্ঠহিত্ৰা ৰিপস্সনং ৰড্ঢেত্ৰা ভগৰা অনুক্কমেন অগ্গমগ্গং অধিগন্ত্ৰা তথাগতো জাতোতি. ‘‘তযিদং পদট্ঠানং নাম, ন সেয্যা, তথাপি যস্মা ‘চতুত্থজ্ঝানা ৰুট্ঠহিত্ৰা সমনন্তরা ভগৰা পরিনিব্বাযী’তি (দী. নি. ২.২১৯) ৰক্খতি, তস্মা লোকিযচতুত্থজ্ঝানসমাপত্তি এৰ তথাগতসেয্যা’’তি কেচি, এৰং সতি পরিনিব্বানকালিকাৰ তথাগতসেয্যাতি আপজ্জতি, ন চ ভগৰা লোকিযচতুত্থজ্ঝানসমাপজ্জনবহুলো ৰিহাসি. অগ্গফলৰসেন পৰত্তং পনেত্থ চতুত্থজ্ঝানং ৰেদিতব্বং. তত্থ যথা সত্তানং নিদ্দুপগমনলক্খণা সেয্যা ভৰঙ্গচিত্তৰসেন হোতি, সা চ নেসং পঠমজাতিসমন্ৰযা যেভুয্যৰুত্তিকা, এৰং ভগৰতো অরিযজাতিসমন্ৰযং যেভুয্যৰুত্তিকং অগ্গফলভূতং চতুত্থজ্ঝানং ‘‘তথাগতসেয্যা’’তি ৰেদিতব্বং. সীহসেয্যা নাম সেট্ঠসেয্যাতি আহ ‘‘উত্তমসেয্যা’’তি.

নত্থি এতিস্সা উট্ঠানন্তি অনুট্ঠানা, সেয্যা, তং অনুট্ঠানসেয্যং. ‘‘ইতো উট্ঠহিস্সামী’’তি মনসিকারস্স অভাৰতো ‘‘উট্ঠানসঞ্ঞং মনসি করিত্ৰা’’তি ন ৰুত্তং. এত্থাতি এতস্মিং অনুট্ঠানসেয্যুপগমনে. কাযৰসেন অনুট্ঠানং, ন চিত্তৰসেন, চিত্তৰসেন চ অনুট্ঠানং নাম নিদ্দুপগমনন্তি ¶ তদভাৰং দস্সেতুং ‘‘নিদ্দাৰসেনা’’তিআদি ৰুত্তং. ভৰঙ্গস্সাতি নিদ্দুপগমনলক্খণস্স ভৰঙ্গস্স.

সব্বপালিফুল্লাতি ¶ সব্বত্থকমেৰ ৰিকসনৰসেন ফুল্লা, ন একদেসৰিকসনৰসেন. তেনাহ ‘‘সব্বে সমন্ততো পুপ্ফিতা’’তি. একচ্ছন্নাতি সম্ফুল্লপুপ্ফেহি একাকারেন সব্বত্থেৰ ছাদিতা. উল্লোকপদুমানীতি হেট্ঠা ওলোকেন্তানি ৰিয তিট্ঠনপদুমানি. মোরপিঞ্ছকলাপো ৰিয পঞ্চৰণ্ণপুপ্ফসঞ্ছাদিতত্তা.

নন্দপোক্খরণীসম্ভৰানীতি নন্দপোক্খরণীতীরসম্ভৰানি. মহাতুম্বমত্তন্তি আল়্হকমত্তং. পৰিট্ঠানীতি খিত্তানি. সরীরমেৰ ওকিরন্তীতি সরীরমেৰ অজ্ঝোকিরন্তি.

দেৰতানং ¶ উপকপ্পনচন্দনচুণ্ণানীতি সট্ঠিপি পঞ্ঞাসম্পি যোজনানি ৰাযনকসেতৰণ্ণচন্দনচুণ্ণানি. দিব্বগন্ধজালচুণ্ণানীতি দিব্বগন্ধদিব্বচুণ্ণানি. হরিতালঅঞ্জনচুণ্ণাদীনিপি দিব্বানি পরমসুগন্ধানি এৰাতি ৰেদিতব্বানি. তেনেৰাহ ‘‘সব্বদিব্বগন্ধৰাসৰিকতিযো’’তি.

একচক্কৰাল়ে সন্নিপতিত্ৰা অন্তলিক্খে ৰজ্জন্তি মহাভিনিক্খমনকালে ৰিয.

তাতি দেৰতা. গন্থমানা ৰাতি মালং রচন্তিযো এৰ. অপরিনিট্ঠিতা ৰাতি যথাধিপ্পাযং পরিযোসিতা এৰ. হত্থেন হত্থন্তি অত্তনো হত্থেন পরস্স হত্থং. গীৰায গীৰন্তি কণ্ঠগাহৰসেন অত্তনো গীৰায পরস্স গীৰং. গহেত্ৰাতি আমসিত্ৰা. মহাযসো মহাযসোতি আমেডিতৰসেন অঞ্ঞমঞ্ঞং আলাপৰচনং.

১৯৯. মহন্তং উস্সাহন্তি তথাগতস্স পূজাসক্কারৰসেন পৰত্তিযমানং মহন্তং উস্সাহং দিস্ৰা.

সাযেৰ ¶ পন পটিপদাতি পুব্বভাগপটিপদা এৰ. অনুচ্ছৰিকত্তাতি অধিগন্তব্বস্স নৰৰিধলোকুত্তরধম্মস্স অনুরূপত্তা.

সীলন্তি চারিত্তসীলমাহ. আচারপঞ্ঞত্তীতি চারিত্তসীলং. যাৰ গোত্রভুতোতি যাৰ গোত্রভুঞাণং, তাৰ পৰত্তেতব্বা সমথৰিপস্সনা সম্মাপটিপদা. ইদানি তং সম্মাপটিপদং ব্যতিরেকতো, অন্ৰযতো চ ৰিভাৰেতুং ‘‘তস্মা’’তিআদি ৰুত্তং. জিনকাল়সুত্তন্তি জিনমহাৰড্ঢকিনা ঠপিতং ৰজ্জেতব্বগহেতব্বধম্মসন্দস্সনকাল়সুত্তং সিক্খাপদমরিযাদং, উপাসকোপাসিকাৰারেসু ¶ ‘‘গন্ধপূজং মালাপূজং করোতী’’তি ৰচনং চারিত্তসীলপক্খে ঠপেত্ৰা করণং সন্ধায ৰুত্তং, তেন ভিক্খুভিক্খুনীনম্পি তথাকরণং অনুঞ্ঞাতমেৰাতি দট্ঠব্বং.

অযঞ্হীতি ধম্মানুধম্মপটিপদং সন্ধায ৰদতি.

উপৰাণত্থেরৰণ্ণনা

২০০. অপনেসীতি ঠিতপ্পদেসতো যথা অপগচ্ছতি, এৰমকাসি, ন পন নিব্ভচ্ছি. তেনাহ ‘‘আনন্দো’’তিআদি. ৰুত্তসদিসা ৰাতি সমচিত্তপরিযাযদেসনাযং (অ. নি. ২.৩৭) ৰুত্তসদিসা এৰ. আৰারেন্তোতি ছাদেন্তো.

যস্মা ¶ কস্সপস্সবুদ্ধস্স চেতিযে আরক্খদেৰতা অহোসি, তস্মা থেরোৰ তেজুস্সদো, ন অঞ্ঞে অরহন্তোতি আনেত্ৰা যোজনা.

ইদানি আগমনতো পট্ঠায তমত্থং ৰিত্থারতো দস্সেতুং ‘‘ৰিপস্সিম্হি কির সম্মাসম্বুদ্ধে’’তিআদি আরদ্ধং. ‘‘চাতুমহারাজিকা দেৰতা’’তি ইদং গোবলীবদ্দঞাযেন গহেতব্বং ভুম্মদেৰতাদীনম্পি তপ্পরিযাপন্নত্তা. তেসং মনুস্সানং.

তত্থাতি কস্সপস্স ভগৰতো চেতিযে.

২০১. অধিৰাসেন্তীতি রোচেন্তি.

ছিন্নপাতো ৰিয ছিন্নপাতো, তং ছিন্নপাতং, ¶ ভাৰনপুংসকনিদ্দেসো যং. আৰট্টন্তীতি অভিমুখভাৰেন ৰট্টন্তি. যত্থ পতিতা, ততো কতিপযরতনট্ঠানং ৰট্টনৰসেনেৰ গন্ত্ৰা পুন যথাপতিতমেৰ ঠানং ৰট্টনৰসেন আগচ্ছন্তি. তেনাহ ‘‘আৰট্টন্তিযো পতিতট্ঠানমেৰ আগচ্ছন্তী’’তি. ৰিৰট্টন্তীতি যত্থ পতিতা, ততো ৰিনিৰট্টন্তি. তেনাহ ‘‘পতিতট্ঠানতো পরভাগং ৰট্টমানা গচ্ছন্তী’’তি. পুরতো ৰট্টনং আৰট্টনং, ইতরং তিৰিধম্পি ৰিৰট্টনন্তি দস্সেতুং ‘‘অপিচা’’তিআদি ৰুত্তং. দেৰতা ধারেতুং ন সক্কোতি উদকং ৰিয ওসীদনতো. তেনাহ ‘‘তত্থা’’তিআদি. তত্থাতি পকতিপথৰিযং. দেৰতা ওসীদন্তি ধাতূনং সণ্হসুখুমালভাৰতো. পথৰিযং ¶ পথৰিং মাপেসুন্তি পকতিপথৰিযং অত্তনো সরীরং ধারেতুং সমত্থং ইদ্ধানুভাৰেন পথৰিং মাপেসুং.

কামং দোমনস্সে অসতিপি একচ্চো রাগো হোতিযেৰ, রাগে পন অসতি দোমনস্সস্স অসম্ভৰো এৰাতি তদেকট্ঠভাৰতোতি আহ ‘‘ৰীতরাগাতি পহীনদোমনস্সা’’তি. সিলাথম্ভসদিসা ইট্ঠানিট্ঠেসু নিব্বিকারতায.

চতুসংৰেজনীযট্ঠানৰণ্ণনা

২০২. অপারগঙ্গাযাতি গঙ্গায ওরম্ভাগে. ‘‘সঙ্কারছড্ডকসম্মজ্জনিযো গহেত্ৰা’’তিআদি অত্তনো অত্তনো ৰসনট্ঠানে ৰত্তকরণাকারদস্সনং. ‘‘এৰং দ্ৰীসু কালেসূ’’তিআদি নিদস্সনত্থং পচ্চামসনং, তং হেট্ঠা অধিগতং.

কম্মসাধনো ¶ সম্ভাৰনত্থো ভাৰনীয-সদ্দোতি আহ ‘‘মনসা ভাৰিতে সম্ভাৰিতে’’তি. দুতিযৰিকপ্পে পন ভাৰনং, ৰড্ঢনঞ্চ পটিপক্খপহানতোতি আহ ‘‘যে ৰা’’তিআদি.

বুদ্ধাদীসু তীসু ৰত্থূসু পসন্নচিত্তস্স, ন কম্মফলসদ্ধামত্তেন. সা চস্স সদ্ধাসম্পদা এৰং ¶ ৰেদিতব্বাতি ফলেন হেতুং দস্সেন্তো ‘‘ৰত্তসম্পন্নস্সা’’তি আহ. সংৰেগো নাম সহোত্তপ্পঞাণং, অভিজাতিট্ঠানাদীনিপি তস্স উপ্পত্তিহেতূনি ভৰন্তীতি আহ ‘‘সংৰেগজনকানী’’তি.

চেতিযপূজনত্থং চারিকা চেতিযচারিকা. সগ্গে পতিট্ঠহিস্সন্তিযেৰ বুদ্ধগুণারম্মণায কুসলচেতনায সগ্গসংৰত্তনিযভাৰতো.

আনন্দপুচ্ছাকথাৰণ্ণনা

২০৩. এত্থাতি মাতুগামে. অযং উত্তমা পটিপত্তি, যদিদং অদস্সনং, দস্সনমূলকত্তা তপ্পচ্চযানং সব্বানত্থানং. লোভোতি কামরাগো. চিত্তচলনা পটিপত্তিঅন্তরাযকরো চিত্তক্খোভো. মুরুমুরাপেত্ৰাতি সঅট্ঠিকং কত্ৰা খাদনে অনুরৰদস্সনং. অপরিমিতং কালং দুক্খানুভৰনং অপরিচ্ছিন্নদুক্খানুভৰনং. ৰিস্সাসোতি ৰিসঙ্গো ঘট্টনাভাৰো. ওতারোতি তত্থ চিত্তস্স ¶ অনুপ্পৰেসো. অসিহত্থেন ৰেরীপুরিসেন, পিসাচেনাপি খাদিতুকামেন. আসীদেতি অক্কমনাদিৰসেন বাধেয্য. অস্সাতি মাতুগামস্স. পব্বজিতেহি কত্তব্বকম্মন্তি আমিসপটিগ্গহণাদি পব্বজিতেহি কাতব্বং কম্মং. সতীতি ৰা কাযগতাসতি উপট্ঠাপেতব্বা.

২০৪. অতন্তিবদ্ধাতি অভারৰহা. পেসিতচিত্তাতি নিব্বানং পতি পেসিতচিত্তা.

২০৫. ৰিহতেনাতি কপ্পাসৰিহননধনুনা পব্বজটানং ৰিজটনৰসেন হতেন. তেনাহ ‘‘সুপোথিতেনা’’তি, অসঙ্করণৰসেন সুট্ঠু পোথিতেনাতি অত্থো, দস্সনীযসংৰেজনীযট্ঠানকিত্তনেন চ ৰসনট্ঠানং কথিতং.

আনন্দঅচ্ছরিযধম্মৰণ্ণনা

২০৭. থেরং অদিস্ৰা আমন্তেসীতি তত্থ অদিস্ৰা আৰজ্জন্তো থেরস্স ঠিতট্ঠানং, পৰত্তিঞ্চ ঞত্ৰা আমন্তেসি.

কাযকম্মস্স ¶ ¶ হিতভাৰো হিতজ্ঝাসযেন পৰত্তিতত্তাতি আহ ‘‘হিতৰুদ্ধিযা কতেনা’’তি. সুখভাৰো কাযিকদুক্খাভাৰো, চেতসিকসুখভাৰো চেতসিকসুখসমুট্ঠিতত্তা চাতি ৰুত্তং ‘‘সুখসোমনস্সেনেৰ কতেনা’’তি. আৰিরহোৰিভাগতো অদ্ৰযভাৰতো অদ্ৰযেনাতি ইমমত্থং দস্সেতুং ‘‘যথা’’তিআদি ৰুত্তং. সত্থু খেত্তভাৰসম্পত্তিযা, থেরস্স অজ্ঝাসযসম্পত্তিযা চ ‘‘এত্তকমিদ’’ন্তি পমাণং গহেতুং অসক্কুণেয্যতায পমাণৰিরহিতত্তা তস্স কম্মস্সাতি আহ ‘‘চক্কৰাল়ম্পী’’তিআদি.

এৰং পৰত্তিতেনাতি এৰং ওদিস্সকমেত্তাভাৰনায ৰসেন পৰত্তিতেন. ৰিৰট্টূপনিস্সযভূতং কতং উপচিতং পুঞ্ঞং এতেনাতি কতপুঞ্ঞো, অরহত্তাধিগমায কতাধিকারোতি অত্থো. তেনাহ ‘‘অভিনীহারসম্পন্নোসীতি দস্সেতী’’তি.

২০৮. কত্থচি সঙ্কুচিতং হুত্ৰা ঠিতং মহাপথৰিং পত্থরন্তো ৰিয, পটিসংহটং হুত্ৰা ঠিতং আকাসং ৰিত্থারেন্তো ৰিয, চতুসট্ঠাধিকযোজনসতসহস্সুব্বেধং চক্কৰাল়গিরিং অধো ওসারেন্তো ৰিয, অট্ঠসট্ঠাধিকসহস্সযোজনসতসহস্সুব্বেধং সিনেরুং উক্খিপেন্তো ৰিয, সতযোজনাযামৰিত্থারং মহাজম্বুং খন্ধে গহেত্ৰা চালেন্তো ৰিযাতি পঞ্চ হি উপমা হি থেরস্স গুণকথা ¶ মহন্তভাৰদস্সনত্থঞ্চেৰ অঞ্ঞেসং দুক্কটভাৰদস্সনত্থঞ্চ আগতাৰ. এতেনেৰ চাতি চ-সদ্দেন ‘‘অহং এতরহি অরহং সম্মাসম্বুদ্ধো’’ (দী. নি. ২.৪), ‘‘সদেৰকস্মিং লোকস্মিং নত্থি মে পটিপুগ্গলো’’তি (ম. নি. ১.২৮৫; ২.৩৪১; মহাৰ. ১১; কথা. ৪০৫; মি. প. ৫.১১) চ এৰং আদীনং সঙ্গহো দট্ঠব্বো. ব্যত্তোতি ¶ খন্ধকোসল্লাদিসঙ্খাতেন ৰেয্যত্তিযেন সমন্নাগতো. মেধাৰীতি মেধাসঙ্খাতায সম্মাভাৰিতায পঞ্ঞায সমন্নাগতো.

২০৯. পটিসন্থারধম্মন্তি পকতিচারিত্তৰসেন ৰুত্তং, উপগতানং পন ভিক্খূনং ভিক্খুনীনঞ্চ পুচ্ছাৰিস্সজ্জনৰসেন চেৰ চিত্তরুচিৰসেন চ যথাকালং ধম্মং দেসেতিযেৰ, উপাসকোপাসিকানং পন উপনিসিন্নকথাৰসেন.

মহাসুদস্সনসুত্তদেসনাৰণ্ণনা

২১০. খুদ্দক-সদ্দো ¶ পতিরূপৰাচী, ক-সদ্দো অপ্পত্থোতি আহ ‘‘খুদ্দকনগরকেতি নগরপতিরূপকে সম্বাধে খুদ্দকনগরকে’’তি. ধুপরৰিসালসণ্ঠানতায তং ‘‘উজ্জঙ্গলনগরক’’ন্তি ৰুত্তন্তি আহ ‘‘ৰিসমনগরকে’’তি. অঞ্ঞেসং মহানগরানং একদেসপ্পমাণতায সাখাসদিসে. এত্থ চ ‘‘খুদ্দকনগরকে’’তি ইমিনা তস্স নগরস্স অপ্পকভাৰো ৰুত্তো, ‘‘উজ্জঙ্গলনগরকে’’তি ইমিনা ভূমিৰিপত্তিযা নিহীনভাৰো, ‘‘সাখানগরকে’’তি ইমিনা অপ্পধানভাৰো. সারপ্পত্তাতি ৰিভৰসারাদিনা সারমহত্তং পত্তা.

কহাপণসকটন্তি এত্থ ‘‘দ্ৰিকুম্ভং সকটং. কুম্ভো পন দসম্বণো’’তি ৰদন্তি. দ্ৰে পৰিসন্তীতি দ্ৰে কহাপণসকটানি দ্ৰে আযৰসেন পৰিসন্তি.

সুভিক্খাতি সুলভাহারা, সুন্দরাহারা চ. তেনাহ ‘‘খজ্জভোজ্জসম্পন্না’’তি. সদ্দং করোন্তেতি রৰসারিনা তুট্ঠভাৰেন কোঞ্চনাদং করোন্তে. অৰিৰিত্তাতি অসুঞ্ঞা, কদাচি রথো পঠমং গচ্ছতি, তং অঞ্ঞো অনুবন্ধন্তো গচ্ছতি, কদাচি দুতিযং ৰুত্তরথো পঠমং গচ্ছতি, ইতরো তং অনুবন্ধতি এৰং অঞ্ঞমঞ্ঞং অনুবন্ধমানা. এত্থাতি কুসাৰতীনগরে. তস্স মহন্তভাৰতো চেৰ ইদ্ধাদিভাৰতো চ নিচ্চং পযোজিতানেৰ ভেরিআদীনি তূরিযানি, সম্ম ¶ সম্মাতি ৰা অঞ্ঞমঞ্ঞং পিযালাপসদ্দো সম্ম-সদ্দো. কংসতাল়াদিসব্বতাল়াৰচরসদ্দো তাল়-সদ্দো, কূটভেরি-সদ্দো কুম্ভথূণসদ্দো.

এৰরূপা ¶ সদ্দা হোন্তি কচৰরাকিণ্ণৰীথিতায, অরঞ্ঞে কন্দমূলপণ্ণাদিগ্গহণায, তত্থ দুক্খজীৰিকতায চাতি যথাক্কমং যোজেতব্বং. ইধ ন এৰং অহোসি দেৰলোকে ৰিয সব্বসো পরিপুণ্ণসম্পত্তিকতায.

মহন্তং কোলাহলন্তি সদ্ধাসম্পন্নানং দেৰতানং, উপাসকানঞ্চ ৰসেন পুরতো পুরতো মহতী উগ্ঘোসনা হোতি. তত্থ ভগৰন্তং উদ্দিস্স কতস্স ৰিহারস্স অভাৰতো, ভিক্খুসঙ্ঘস্স চ মহন্তভাৰতো তে আগন্ত্ৰা…পে… পেসেসি. পেসেন্তো চ ‘‘কথঞ্হি নাম ভগৰা পচ্ছিমে কালে অত্তনো পৰত্তিং অম্হাকং নারোচেসি, নেসং দোমনস্সং মা অহোসী’’তি ‘‘অজ্জ খো ৰাসেট্ঠা’’তিআদিনা সাসনং পেসেসি.

মল্লানং ৰন্দনাৰণ্ণনা

২১১. অঘং ¶ দুক্খং আৰেন্তি পকাসেন্তীতি অঘাৰিনো, পাকটীভূতদুক্খাতি আহ ‘‘উপ্পন্নদুক্খা’’তি. ঞাতিসালোহিতভাৰেন কুলং পরিৰত্ততি এত্থাতি কুলপরিৰত্তং. তং তংকুলীনভাগেন ঠিতো সত্তনিকাযো ‘‘কুলপরিৰত্তসো’’তি ৰুত্তন্তি আহ ‘‘কুলপরিৰত্ত’’ন্তি. তে পন তংতংকুলপরিৰত্তপরিচ্ছিন্না মল্লরাজানো তস্মিং নগরে ৰীথিআদিসভাগেন ৰসন্তীতি ৰুত্তং ‘‘ৰীথিসভাগেন চেৰ রচ্ছাসভাগেন চা’’তি.

সুভদ্দপরিব্বাজকৰত্থুৰণ্ণনা

২১২. কঙ্খা এৰ কঙ্খাধম্মো. একতো ৰাতি ভূমিং অৰিভজিত্ৰা সাধারণতোৰ. বীজতো চ অগ্গং গহেত্ৰা আহারং সম্পাদেত্ৰা দানং বীজগ্গং. গব্ভকালেতি গব্ভধারণতো পরং খীরগ্গহণকালে. তেনাহ ‘‘গব্ভং ফালেত্ৰা খীরং নিহরিত্ৰা’’তিআদি. পুথুককালেতি সস্সানং নাতিপক্কে পুথুকযোগ্যফলকালে. লাযনগ্গন্তি পক্কস্স সস্সস্স লৰনে লৰনারম্ভে দানং অদাসি. লুনস্স ¶ সস্সস্স ৰেণিৰসেন বন্ধিত্ৰা ঠপনং ৰেণিকরণং. তস্স আরম্ভে দানং ৰেণগ্গং. ৰেণিযো পন একতো কত্ৰা রাসিকরণং কলাপো. তত্থ অগ্গদানং কলাপগ্গং. কলাপতো নীহরিত্ৰা মদ্দনে অগ্গদানং খলগ্গং. মদ্দিতং ওফুণিত্ৰা ধঞ্ঞস্স রাসিকরণে অগ্গদানং খলভণ্ডগ্গং. ধঞ্ঞস্স খলতো কোট্ঠে পক্খিপনে অগ্গদানং কোট্ঠগ্গং. উদ্ধরিত্ৰাতি কোট্ঠতো উদ্ধরিত্ৰা.

‘‘নৰ ¶ অগ্গদানানি অদাসী’’তি ইমিনা ‘‘কথং নু খো অহং সত্থু সন্তিকে অগ্গতোৰ মুচ্চেয্য’’ন্তি অগ্গগ্গদানৰসেন ৰিৰট্টূপনিস্সযস্স কুসলস্স কতূপচিতত্তা, ঞাণস্স চ তথা পরিপাকং গতত্তা অগ্গধম্মদেসনায তস্স ভাজনভাৰং দস্সেতি. তেনাহ ‘‘ইমং অগ্গধম্মং তস্স দেসেস্সামী’’তিআদি. ওহীযিত্ৰা সঙ্কোচং আপজ্জিত্ৰা.

২১৩. অঞ্ঞাতুকামোৰ ন সন্দিট্ঠিং পরামাসী. অব্ভঞ্ঞিংসূতি সন্দেহজাতস্স পুচ্ছাৰচনন্তি কত্ৰা জানিংসূতি অত্থমাহ. তেনাহ পাল়িযং ‘‘সব্বেৰ ন অব্ভঞ্ঞিংসূ’’তি. নেসন্তি পূরণাদীনং. সা পটিঞ্ঞাতি ‘‘করোতো খো মহারাজ কারযতো’’তিআদিনা (দী. নি. ১.১৬৬) পটিঞ্ঞাতা, সব্বঞ্ঞুপটিঞ্ঞা ¶ এৰ ৰা. নিয্যানিকাতি সপ্পাটিহারিযা, তেসং ৰা সিদ্ধন্তসঙ্খাতা পটিঞ্ঞা ৰট্টতো নিস্সরণট্ঠেন নিয্যানিকাতি. সাসনস্স সম্পত্তিযা তেসং সব্বঞ্ঞুতং, তব্বিপরিযাযতো চ অসব্বঞ্ঞুতং গচ্ছতীতি দট্ঠব্বং. তেনাহ ‘‘তস্মা’’তিআদি. অত্থাভাৰতোতি সুভদ্দস্স সাধেতব্বঅত্থাভাৰতো. ওকাসাভাৰতোতি তথা ৰিত্থারিতং কত্ৰা ধম্মং দেসেতুং অৰসরাভাৰতো. ইদানি তমেৰ ওকাসাভাৰং দস্সেতুং ‘‘পঠমযামস্মি’’ন্তিআদি ৰুত্তং.

২১৪. যেসং ¶ সমণভাৰকরানং ধম্মানং সম্পাদনেন সমণো, তে পন উক্কট্ঠনিদ্দেসেন অরিযমগ্গধম্মাতি চতুমগ্গসংসিদ্ধিযা পাল়িযং চত্তারো সমণা ৰুত্তাতি তে বাহিরসমযে সব্বেন সব্বং নত্থীতি দস্সেন্তো ‘‘পঠমো সোতাপন্নসমণো’’তিআদিমাহ. পুরিমদেসনাযাতি ‘‘যস্মিঞ্চ খো, সুভদ্দ, ধম্মৰিনযে’’তিআদিনা ৰুত্তায দেসনায. ব্যতিরেকতো, অন্ৰযতো চ অধিপ্পেতো অত্থো ৰিভাৰীযতীতি পঠমনযোপেত্থ ‘‘পুরিমদেসনাযা’’তি পদেন সঙ্গহিতো ৰাতি দট্ঠব্বো. অত্তনো সাসনং নিযমেন্তো আহ ‘‘ইমস্মিং খো’’তি যোজনা. আরদ্ধৰিপস্সকেহীতি সমাধিকম্মিকৰিপস্সকেহি, সিখাপ্পত্তৰিপস্সকে সন্ধায ৰুত্তং, ন পট্ঠপিতৰিপস্সনে. অপরে পন ‘‘বাহিরকসমযে ৰিপস্সনারম্ভস্স গন্থোপি নত্থেৰাতি অৰিসেসৰচনমেত’’ন্তি ৰদন্তি. অধিগতট্ঠানন্তি অধিগতস্স কারণং, তদত্থং পুব্বভাগপটিপদন্তি অত্থো, যেন সোতাপত্তিমগ্গো অধিগতো, ন উপরিমগ্গো, সো সোতাপত্তিমগ্গে ঠিতো অকুপ্পধম্মতায তস্স, তত্থ ৰা সিদ্ধিতো ঠিতপুব্বো ভূতপুব্বগতিযাতি সোতাপত্তিমগ্গট্ঠো সোতাপন্নো, ন সেসঅরিযা ভূমন্তরুপ্পত্তিতো. সোতাপন্নো হি অত্তনা অধিগতট্ঠানং সোতাপত্তিমগ্গং অঞ্ঞস্স কথেত্ৰা সোতাপত্তিমগ্গট্ঠং করেয্য, ন অট্ঠমকো অসম্ভৰতো. এস নযো সেসমগ্গট্ঠেসূতি এত্থাপি ইমিনাৰ নযেন অত্থো ৰেদিতব্বো. পগুণং কম্মট্ঠানন্তি অত্তনো পগুণং ৰিপস্সনাকম্মট্ঠানং, এতেনেৰ ‘‘অৰিসেসৰচন’’ন্তি ৰাদো পটিক্খিত্তোতি দট্ঠব্বো.

সব্বঞ্ঞুতঞ্ঞাণং ¶ অধিপ্পেতং. তঞ্হি সব্বঞেয্যধম্মাৰবোধনে ‘‘কুসলং ছেকং নিপুণ’’ন্তি ৰুচ্চতি তত্থ ¶ অসঙ্গঅপ্পটিহতং পৰত্ততীতি কত্ৰা. সমধিকানি ¶ একেন ৰস্সেন. ঞাযন্তি এতেন চতুসচ্চধম্মং যাথাৰতো পটিৰিজ্ঝন্তীতি ঞাযো, লোকুত্তরমগ্গোতি আহ ‘‘অরিযমগ্গধম্মস্সা’’তি. পদিস্সতি এতেন অরিযমগ্গো পচ্চক্খতো দিস্সতীতি পদেসো, ৰিপস্সনাতি ৰুত্তং ‘‘পদেসে ৰিপস্সনামগ্গে’’তি. সমণোপীতি এত্থ পি-সদ্দো ‘‘পদেসৰত্তী’’তি এত্থাপি আনেত্ৰা সম্বন্ধিতব্বোতি আহ ‘‘পদেসৰত্তি…পে… নত্থীতি ৰুত্তং হোতী’’তি.

২১৫. সোতি তথাৰুত্তো অন্তেৰাসী. তেনাতি আচরিযেন. অত্তনো ঠানে ঠপিতো হোতি পরপব্বাজনাদীসু নিযুত্তত্তা.

সক্খিসাৰকোতি পচ্চক্খসাৰকো, সম্মুখসাৰকোতি অত্থো. ভগৰতি ধরমানেতি ধরমানস্স ভগৰতো সন্তিকে. সেসদ্ৰযেপি এসেৰ নযো. সব্বোপি সোতি সব্বো সো তিৰিধোপি. অযং পন অরহত্তং পত্তো, তস্মা পরিপুণ্ণগতায মত্থকপ্পত্তো পচ্ছিমো সক্খিসাৰকোতি.

পঞ্চমভাণৰারৰণ্ণনা নিট্ঠিতা.

তথাগতপচ্ছিমৰাচাৰণ্ণনা

২১৬. তন্তি ভিক্খুসঙ্ঘস্স ওৰাদকঙ্গং দস্সেতুং…পে… ৰুত্তং ধম্মসঙ্গাহকেহীতি অধিপ্পাযো. সুত্তাভিধম্মসঙ্গহিতস্স ধম্মস্স অতিসজ্জনং সম্বোধনং দেসনা, তস্সেৰ পকারতো ঞাপনং ৰেনেয্যসন্তানে ঠপনং পঞ্ঞাপনন্তি ‘‘ধম্মোপি দেসিতো চেৰ ¶ পঞ্ঞত্তো চা’’তি ৰুত্তং. তথা ৰিনযতন্তিসঙ্গহিতস্স কাযৰাচানং ৰিনযনতো ‘‘ৰিনযো’’তি লদ্ধাধিৰচনস্স অত্থস্স অতিসজ্জনং সম্বোধনং দেসনা, তস্সেৰ পকারতো ঞাপনং অসঙ্করতো ঠপনং পঞ্ঞাপনন্তি ‘‘ৰিনযোপি দেসিতো চেৰ পঞ্ঞত্তো চা’’তি ৰুত্তং. অধিসীলসিক্খানিদ্দেসভাৰেন সাসনস্স মূলভূতত্তা ৰিনযো পঠমং সিক্খিতব্বোতি তং তাৰ অযমুদ্দেসং সরূপতো দস্সেন্তো ‘‘মযা হি ৰো’’তিআদিমাহ. তত্থ সত্তাপত্তিক্খন্ধৰসেনাতি সত্তন্নং আপত্তিক্খন্ধানং অৰীতিক্কমনীযতাৰসেন ¶ . সত্থুকিচ্চং সাধেস্সতি ‘‘ইদং ৰো কত্তব্বং, ইদং ৰো ন কত্তব্ব’’ন্তি কত্তব্বাকত্তব্বস্স ৰিভাগেন অনুসাসনতো.

তেন ¶ তেনাকারেনাতি তেন তেন ৰেনেয্যানং অজ্ঝাসযানুরূপেন পকারেন. ইমে ধম্মেতি ইমে সত্ততিংসবোধিপক্খিযধম্মে. তপ্পধানত্তা সুত্তন্তদেসনায ‘‘সুত্তন্তপিটকং দেসিত’’ন্তি ৰুত্তং. সত্থুকিচ্চং সাধেস্সতি তংতংচরিযানুরূপং সম্মাপটিপত্তিযা অনুসাসনতো. কুসলাকুসলাব্যাকতৰসেন নৰ হেতূ. ‘‘সত্ত ফস্সা’’তিআদি সত্তৰিঞ্ঞাণধাতুসম্পযোগৰসেন ৰুত্তং. ধম্মানুলোমে তিকপট্ঠানাদযো ছ, তথা ধম্মপচ্চনীযে, ধম্মানুলোমপচ্চনীযে, ধম্মপচ্চনীযানুলোমেতি চতুৰীসতি সমন্তপট্ঠানানি এতস্সাতি চতুৰীসতিসমন্তপট্ঠানং, তং পন পচ্চযানুলোমাদিৰসেন ৰিভজিযমানং অপরিমাণনযং এৰাতি আহ ‘‘অনন্তনযমহাপট্ঠানপটিমণ্ডিত’’ন্তি. সত্থুকিচ্চং সাধেস্সতীতি খন্ধাদিৰিভাগেন ঞাযমানং চতুসচ্চসম্বোধাৰহত্তা সত্থারা সম্মাসম্বুদ্ধেন কাতব্বকিচ্চং নিপ্ফাদেস্সতি.

ওৰদিস্সন্তি অনুসাসিস্সন্তি ওৰাদানুসাসনীকিচ্চনিপ্ফাদনতো.

চারিত্তন্তি সমুদাচারা, নৰেসু পিযালাপং ৰুড্ঢেসু ¶ গারৰালাপন্তি অত্থো. তেনাহ ‘‘ভন্তেতি ৰা আযস্মাতি ৰা’’তি. গারৰৰচনং হেতং যদিদং ভন্তেতি ৰা আযস্মাতি ৰা, লোকে পন ‘‘তত্র ভৰ’’ন্তি, ‘‘দেৰানং পিযা’’তি চ গারৰৰচনমেৰ.

‘‘আকঙ্খমানো সমূহনতূ’’তি ৰুত্তে ‘‘ন আকঙ্খমানো ন সমূহনতূ’’তিপি ৰুত্তমেৰ হোতীতি আহ ‘‘ৰিকপ্পৰচনেনেৰ ঠপেসী’’তি. বলন্তি ঞাণবলং. যদি অসমূহননং দিট্ঠং, তদেৰ চ ইচ্ছিতং, অথ কস্মা ভগৰা ‘‘আকঙ্খমানো সমূহনতূ’’তি অৰোচাতি? তথারূপপুগ্গলজ্ঝাসযৰসেন. সন্তি হি কেচি খুদ্দানুখুদ্দকানি সিক্খাপদানি সমাদায সংৰত্তিতুং অনিচ্ছন্তা, তেসং তথা অৰুচ্চমানে ভগৰতি ৰিঘাতো উপ্পজ্জেয্য, তং তেসং ভৰিস্সতি দীঘরত্তং অহিতায দুক্খায, তথা পন ৰুত্তে তেসং ৰিঘাতো ন উপ্পজ্জেয্য ‘‘অম্হাকং এৰাযং দোসো, যতো অম্হেসু এৰ কেচি সমূহননং ন ইচ্ছন্তী’’তি. কেচি ‘‘সকলস্স পন সাসনস্স সঙ্ঘাযত্তভাৰকরণত্থং তথা ৰুত্ত’’ন্তি ৰদন্তি. যঞ্চ কিঞ্চি সত্থারা সিক্খাপদং পঞ্ঞত্তং, তং সমণা সক্যপুত্তিযা সিরসা সম্পটিচ্ছিত্ৰা জীৰিতং ৰিয রক্খন্তি. তথা হি তে ‘‘খুদ্দানুখুদ্দকানি সিক্খাপদানি আকঙ্খমানো সঙ্ঘো সমূহনতূ’’তি ¶ ৰুত্তেপি ন সমূহনিংসু, অঞ্ঞদত্থু ‘‘পুরতো ৰিয তস্স অচ্চযেপি রক্খিংসু এৰা’’তি সত্থুসাসনস্স ¶ , সঙ্ঘস্স চ মহন্তভাৰদস্সনত্থম্পি তথা ৰুত্তন্তি দট্ঠব্বং. তথা হি আযস্মা আনন্দো, অঞ্ঞেপি ৰা ভিক্খূ ‘‘কতমং পন ভন্তে খুদ্দকং, কতমং অনুখুদ্দক’’ন্তি ন পুচ্ছিংসু সমূহনজ্ঝাসযস্সেৰ অভাৰতো.

ন তং এৰং গহেতব্বন্তি ‘‘নাগসেনত্থেরো খুদ্দানুখুদ্দকং জানাতী’’তিআদিনা ৰুত্তং তং নেসং ৰচনং ইমিনা ৰুত্তাকারেন ন গহেতব্বং অধিপ্পাযস্স অৰিদিতত্তা. ইদানি তং অধিপ্পাযং ৰিভাৰেতুং ‘‘নাগসেনত্থেরো ¶ হী’’তিআদি ৰুত্তং. যস্মা নাগসেনত্থেরো (মিলিন্দপঞ্হে অভেজ্জৰগ্গে ৰিত্থারো) পরেসং ৰাদপথোপচ্ছেদনত্থং সঙ্গীতিকালে ধম্মসঙ্গাহকমহাথেরেহি গহিতকোট্ঠাসেসু চ অন্তিমকোট্ঠাসমেৰ গহেত্ৰা মিলিন্দরাজানং পঞ্ঞাপেসি. মহাকস্সপত্থেরো পন একসিক্খাপদম্পি অসমূহনিতুকামতায তথা কম্মৰাচং সাৰেতি, তস্মা তং তেসং ৰচনং তথা ন গহেতব্বং.

২১৭. দ্ৰেল়্হকন্তি দ্ৰিধাগাহো, অনেকংসগ্গাহোতি অত্থো. ৰিমতীতি সংসযাপত্তি. তেনাহ ‘‘ৰিনিচ্ছিতুং অসমত্থতা’’তি. তং ৰো ৰদামীতি তং সংসযৰন্তং ভিক্খুং সন্ধায ৰো তুম্হে ৰদামি.

নিক্কঙ্খভাৰপচ্চক্খকরণঞাণং যেৰাতি বুদ্ধাদীসু তেসং ভিক্খূনং নিক্কঙ্খভাৰস্স পচ্চক্খকারিযাভাৰতো তমত্থং পটিৰিজ্ঝিত্ৰা ঠিতং সব্বঞ্ঞুতঞ্ঞাণমেৰ. এত্থ এতস্মিং অত্থে.

২১৮. অপ্পমজ্জনং অপ্পমাদো, সো পন অত্থতো ঞাণূপসঞ্হিতা সতি. যস্মা তত্থ সতিযা ব্যাপারো সাতিসযো, তস্মা ‘‘সতিঅৰিপ্পৰাসেনা’’তি ৰুত্তং. অপ্পমাদপদেযেৰ পক্খিপিত্ৰা অদাসি তং অত্থতো, তস্স সকলস্স বুদ্ধৰচনস্স সঙ্গণ্হনতো চ.

পরিনিব্বুতকথাৰণ্ণনা

২১৯. ঝানাদীসু, চিত্তে চ পরমুক্কংসগতৰসীভাৰতায ‘‘এত্তকে কালে এত্তকা সমাপত্তিযো সমাপজ্জিত্ৰা পরিনিব্বাযিস্সামী’’তি কালপরিচ্ছেদং কত্ৰা সমাপত্তি সমাপজ্জনং ‘‘পরিনিব্বানপরিকম্ম’’ন্তি অধিপ্পেতং. থেরোতি অনুরুদ্ধত্থেরো.

অযম্পি ¶ চাতি যথাৰুত্তপঞ্চসট্ঠিযা ঝানানং সমাপন্নভাৰকথাপি সঙ্খেপকথা এৰ, কস্মা ¶ ? যস্মা ভগৰা তদাপি দেৰসিকং ৰল়ঞ্জনসমাপত্তিযো সব্বাপি অপরিহাপেত্ৰা সমাপজ্জি এৰাতি দস্সেন্তো ‘‘নিব্বানপুরং পৰিসন্তো’’তিআদিমাহ.

ইমানি দ্ৰেপি সমনন্তরানেৰ পচ্চৰেক্খণাযপি যেভুয্যেনানন্তরিযকতায ঝানপক্খিকভাৰতো, যস্মা ¶ ভৰঙ্গচিত্তং সব্বপচ্ছিমং, ততো ভৰতো চৰনতো ‘‘চুতী’’তি ৰুচ্চতি, তস্মা ন কেৰলং অযমেৰ ভগৰা, অথ খো সব্বেপি সত্তা ভৰঙ্গচিত্তেনেৰ চৰন্তীতি দস্সেতুং ‘‘যে হি কেচী’’তিআদি ৰুত্তং.

২২০. পটিভাগপুগ্গলৰিরহিতোতি সীলাদিগুণেহি অসদিসতায সদিসপুগ্গলরহিতো.

২২১. সঙ্খারা ৰূপসমন্তি এত্থাতি ৰূপসমোতি এৰংসঙ্খাতং ঞাতং কথিতং নিব্বানং.

২২২. যন্তি পচ্চত্তে উপযোগৰচনন্তি আহ ‘‘যো কালং অকরী’’তি.

সুৰিকসিতেনেৰাতি পীতিসোমনস্সযোগতো সুট্ঠু ৰিকসিতেন মুদিতেন. ৰেদনং অধিৰাসেসি অভাৰসমুদযো কতো সুট্ঠু পরিঞ্ঞাতত্তা. অনাৰরণৰিমোক্খো সব্বসো নিব্বুতভাৰতো.

২২৩. আকরোন্তি অত্তনো ফলানি সমানাকারে করোন্তীতি আকারা, কারণানি. সব্বাকারৰরূপেতেতি সব্বেহি আকারৰরেহি উত্তমকারণেহি সীলাদিগুণেহি সমন্নাগতেতি অত্থো.

২২৫. কথংভূতাতি কীদিসাভূতা.

চুল্লকদ্ধানন্তি পরিত্তং কালং দ্ৰত্তিনাডিকামত্তং ৰেলং.

বুদ্ধসরীরপূজাৰণ্ণনা

২২৭. কংসতাল়াদি তাল়ং অৰচরতি এত্থাতি ‘‘তাল়াৰচর’’ন্তি ৰুচ্চতি আততাদিতূরিযভণ্ডং. তেনাহ ‘‘সব্বং তূরিযভণ্ড’’ন্তি.

দক্খিণদিসাভাগেনেৰাতি ¶ ¶ অঞ্ঞেন দিসাভাগেন অনাহরিত্ৰা যমকসালানং ঠানতো দক্খিণদিসাভাগেনেৰ, ততোপি দক্খিণদিসাভাগং হরিত্ৰা নেত্ৰা.

জেতৰনসদিসেতি সাৰত্থিযা জেতৰনসদিসে ঠানে, ‘‘জেতৰনসদিসে ঠানে’’তিপি পাঠো.

২২৮. পসাধনমঙ্গলসালাযাতি ¶ অভিসেককালে অলঙ্করণমঙ্গলসালায.

২২৯. দেৰদানিযোতি তস্স চোরস্স নামং.

মহাকস্সপত্থেরৰত্থুৰণ্ণনা

২৩১. পাৰাযাতি পাৰা নগরতো. আৰজ্জনপটিবদ্ধত্তা জাননস্স অনাৰজ্জিতত্তা সত্থু পরিনিব্বানং অজানন্তো ‘‘দসবলং পস্সিস্সামী’’তি থেরো চিন্তেসি, সত্থু সরীরে ৰা সত্থুসঞ্ঞং উপ্পাদেন্তো তথা চিন্তেসি. তেনেৰাহ ‘‘অথ ভগৰন্তং উক্খিপিত্ৰা’’তি. ‘‘ধুৰং পরিনিব্বুতো ভৰিস্সতী’’তি চিন্তেসি পারিসেসঞাযেন. জানন্তোপি থেরো আজীৰকং পুচ্ছিযেৰ, পুচ্ছনে পন কারণং সযমেৰ পকাসেতুং ‘‘কিং পনা’’তিআদি আরদ্ধং.

অজ্জ সত্তাহপরিনিব্বুতোতি অজ্জ দিৰসতো পটিলোমতো সত্তমে অহনি পরিনিব্বুতো.

২৩২. নাল়িযা ৰাপকেনাতি নাল়িযা চেৰ থৰিকায চ.

মঞ্জুকেতি মঞ্জুভাণিনে মধুরস্সরে. পটিভানেয্যকেতি পটিভানৰন্তে. ভুঞ্জিত্ৰা পাতব্বযাগূতি পঠমং ভুঞ্জিত্ৰা পিৰিতব্বযাগু.

তস্সাতি সুভদ্দস্স ৰুড্ঢপব্বজিতস্স.

আরাধিতসাসনেতি সমাহিতসাসনে. অলন্তি সমত্থো. পাপোতি পাপপুগ্গলো. ওসক্কাপেতুন্তি হাপেতুং অন্তরধাপেতুং.

পঞ্হৰারাতি পঞ্হা ৰিয ৰিস্সজ্জনানি ‘‘যস্মিং সমযে কামাৰচরং কুসলং চিত্তং উপ্পন্নং ¶ হোতী’’তিআদিনা, (ধ. স. ১.১) ‘‘যস্মিং সমযে রূপূপপত্তিযা মগ্গং ভাৰেতী’’তিআদিনা ¶ ¶ (ধ. স. ১.২৫১) চ পৰত্তানি একং দ্ৰে ভূমন্তরানি. মূলে নট্ঠে পিসাচসদিসা ভৰিস্সামাতি যথা রুক্খে অধিৰত্থো পিসাচো তস্স সাখাপরিৰারে নট্ঠে খন্ধং নিস্সায ৰসতি, খন্ধে নট্ঠে মূলং নিস্সায ৰসতি, মূলে পন নট্ঠে অনিস্সযোৰ হোতি, তথা ভৰিস্সামাতি অত্থো. অথ ৰা মূলে নট্ঠেতি পিসাচেন কির রুক্খগচ্ছাদীনং কঞ্চিদেৰ মূলং ছিন্দিত্ৰা অত্তনো পুত্তস্স দিন্নং, যাৰ তং তস্স হত্থতো ন ৰিগচ্ছতি, তাৰ সো তং পদেসং অদিস্সমানরূপো ৰিচরতি. যদা পন তস্মিং কেনচি অচ্ছিন্নভাৰেন ৰা সতিৰিপ্পৰাসৰসেন ৰা নট্ঠে মনুস্সানম্পি দিস্সমানরূপো ৰিচরতি, তং সন্ধাযাহ ‘‘মূলে নট্ঠে পিসাচসদিসা ভৰিস্সামা’’তি.

মং কাযসক্খিং কত্ৰাতি তং পটিপদং কাযেন সচ্ছিকতৰন্তং তস্মা তস্সা দেসনায সক্খিভূতং মং কত্ৰা. পটিচ্ছাপেসি তং পটিচ্ছাপনং কস্সপসুত্তেন দীপেতব্বং.

২৩৩. চন্দনঘটিকাবাহুল্লতো চন্দনচিতকা.

তং সুত্ৰাতি তং আযস্মতা অনুরুদ্ধত্থেরেন ৰুত্তং দেৰতানং অধিপ্পাযং সুত্ৰা.

২৩৪. দসিকতন্তং ৰাতি পলিৰেঠিতঅহতকাসিকৰত্থানং দসঠানেন তন্তুমত্তম্পি ৰা. দারুক্খন্ধং ৰাতি চন্দনাদিচিতকদারুক্খন্ধং ৰা.

২৩৫. সমুদাযেসু পৰত্তৰোহারানং অৰযৰেসু দিস্সনতো সরীরস্স অৰযৰভূতানি অট্ঠীনি ‘‘সরীরানী’’তি ৰুত্তানি.

ন ৰিপ্পকিরিংসূতি সরূপেনেৰ ঠিতাতি অত্থো. ‘‘সেসা ৰিপ্পকিরিংসূ’’তি ৰত্ৰা যথা পন তা ৰিপ্পকিণ্ণা অহেসুং, তং দস্সেতুং ‘‘তত্থা’’তিআদি ৰুত্তং.

উদকধারা নিক্খমিত্ৰা নিব্বাপেসুন্তি দেৰতানুভাৰেন. এৰং মহতিযো বহূ উদকধারা কিমত্থাযাতি আহ ¶ ‘‘ভগৰতো চিতকো মহন্তো’’তি. মহা হি সো ৰীসরতনসতিকো. অট্ঠদন্তকেহীতি নঙ্গলেহি অট্ঠেৰ হি নেসং দন্তসদিসানি পোত্থানি হোন্তি, তস্মা ‘‘অট্ঠদন্তকানী’’তি ৰুচ্চতি.

ধম্মকথাৰ ¶ ¶ পমাণন্তি অতিৰিয অচ্ছরিযব্ভুতভাৰতো পস্সন্তানং, সুণন্তানঞ্চ সাতিসযং পসাদাৰহভাৰতো, সৰিসেসং বুদ্ধানুভাৰদীপনতো. পরিনিব্বুতস্স হি বুদ্ধস্স ভগৰতো এৰরূপো আনুভাৰোতি তং পৰত্তিং কথেন্তানং ধম্মকথিকানং অত্তনো ঞাণবলানুরূপং পৰত্তিযমানা ধম্মকথা এৰেত্থ পমাণং ৰণ্ণেতব্বস্স অত্থস্স মহাৰিসযত্তা, তস্মা ৰণ্ণনাভূমি নামেসাতি অধিপ্পাযো. চতুজ্জাতিযগন্ধপরিভণ্ডং কারেত্ৰাতি তগরকুঙ্কুমযৰনপুপ্ফতমালপত্তানি পিসিত্ৰা কতগন্ধেন পরিভণ্ডং কারেত্ৰা. খচিত্ৰাতি তত্থ তত্থ ওলম্বনৰসেন রচেত্ৰা, গন্ধৰত্থূনি গহেত্ৰা গন্থিতমালা গন্ধদামানি রতনাৰল়িযো রতনদামানি. বহিকিলঞ্জপরিক্খেপস্স, অন্তোসাণিপরিক্খেপস্স করণেন সাণিকিলঞ্জপরিক্খেপং কারেত্ৰা. ৰাতগ্গাহিনিযো পটাকা ৰাতপটাকা. সরভরূপপাদকো পল্লঙ্কো সরভমযপল্লঙ্কো, তস্মিং সরভমযপল্লঙ্কে.

সত্তিহত্থা পুরিসা সত্তিযো তংসহচরণতো যথা ‘‘কুন্তা পচরন্তী’’তি, তেহি সমন্ততো রক্খাপনং পঞ্চকরণন্তি আহ ‘‘সত্তিহত্থেহি পুরিসেহি পরিক্খিপাপেত্ৰা’’তি. ধনূহীতি এত্থাপি এসেৰ নযো. সন্নাহগৰচ্ছিকং ৰিয কত্ৰা নিরন্তরাৰট্ঠিতআরক্খসন্নাহেন গৰচ্ছিজালং ৰিয কত্ৰা.

সাধুকীল়িতন্তি ¶ সপরহিতং সাধনট্ঠেন সাধূ, তেসং কীল়িতং উল়ারপুঞ্ঞপসৰনতো, সম্পরাযিকত্থাৰিরোধিকং কীল়াৰিহারন্তি অত্থো.

সরীরধাতুৰিভজনৰণ্ণনা

২৩৬. ইমিনাৰ নিযামেনাতি যেন নীহারেন মহাতলে নিসিন্নো কঞ্চি পরিহারং অকত্ৰা কেৰলং ইমিনা নিযামেনেৰ. সুপিনকোতি দুস্সুপিনকো. দুকূলদুপট্টং নিৰাসেত্ৰাতি দ্ৰে দুকূলৰত্থানি একজ্ঝং কত্ৰা নিৰাসেত্ৰা. এৰঞ্হি তানি সোকসমপ্পিতস্সাপি অভস্সিত্ৰা তিট্ঠন্তি.

অভিসেকসিঞ্চকোতি রজ্জাভিসেকে অভিসেকমঙ্গলসিঞ্চকো উত্তমমঙ্গলভাৰতো. ৰিসঞ্ঞী জাতো যথা তং ভগৰতো গুণৰিসেসামতরসঞ্ঞুতায অৰট্ঠিতপেমো পোথুজ্জনিকসদ্ধায পতিট্ঠিতপসাদো কতূপকারতায সঞ্জনিতচিত্তমদ্দৰো.

সুৰণ্ণবিম্বিসকৰণ্ণন্তি ¶ ¶ সুৰিরচিত অপস্সেনসদিসং.

কস্মা পনেত্থ পাৰেয্যকা পাল়িযং সব্বপচ্ছতো গহিতা, কিং তে কুসিনারায আসন্নতরাপি সব্বপচ্ছতো উট্ঠিতা? আম, সব্বপচ্ছতো উট্ঠিতাতি দস্সেতুং ‘‘তত্থ পাৰেয্যকা’’তিআদি ৰুত্তং.

ধাতুপাসনত্থন্তি সত্থু ধাতূনং পযিরুপাসনায. নেসং পক্খা অহেসুং ‘‘ঞাযেন তেসং সন্তকা ধাতুযো’’তি.

২৩৭. দোণগজ্জিতং নাম অৰোচ সত্থু অৰত্থত্তযূপসংহিতং. এতদত্থমেৰ হি ভগৰা মগ্গং গচ্ছন্তো ‘‘পচ্ছতো আগচ্ছন্তো দোণো ব্রাহ্মণো যাৰ মে পদৰল়ঞ্জং পস্সতি, তাৰ মা ৰিগচ্ছতূ’’তি অধিট্ঠায অঞ্ঞতরস্মিং রুক্খমূলে নিসীদি. দোণোপি খো ¶ ব্রাহ্মণো ‘‘ইমানি সদেৰকে লোকে অগ্গপুগ্গলস্স পদানী’’তি সল্লক্খেন্তো পদানুসারেন সত্থু সন্তিকং উপগচ্ছি, সত্থাপিস্স ধম্মং দেসেসি, তেনপি সো ভগৰতি নিৰিট্ঠসদ্ধো অহোসি. এতদৰোচ, কিং অৰোচাতি আহ ‘‘সুণন্তু…পে… অৰোচা’’তি.

কাযেন একসন্নিপাতা ৰাচায একৰচনা অভিন্নৰচনা এৰং সমগ্গা হোথ. তস্স পনিদং কারণন্তি আহ ‘‘সম্মোদমানা’’তি. তেনাহ ‘‘চিত্তেনাপি অঞ্ঞমঞ্ঞং সম্মোদমানা হোথা’’তি.

২৩৮. ততো ততো সমাগতসঙ্ঘানন্তি ততো ততো অত্তনো ৰসনট্ঠানতো সমাগন্ত্ৰা সন্নিপতিতভাৰেন সমাগতসঙ্ঘানং. তথা সমাপতিতসমূহভাৰেন সমাগতগণানং. ৰচনসম্পটিচ্ছনেন পটিস্সুণিত্ৰা.

ধাতুথূপপূজাৰণ্ণনা

২৩৯. যক্খগ্গাহো দেৰতাৰেসো. খিপিতকং ধাতুক্খোভং উপ্পাদেত্ৰা খিপিতকরোগো. অরোচকো আহারস্স অরুচ্চনরোগো.

সত্তমদিৰসেতি ¶ সত্তৰস্সসত্তমাসতো পরতো সত্তমে দিৰসে. বলানুরূপেনাতি ৰিভৰবলানুরূপেন.

পচ্ছা সঙ্গীতিকারকাতি দুতিযং ততিযং সঙ্গীতিকারকা. ধাতূনং অন্তরাযং দিস্ৰাতি তত্থ তত্থ চেতিযে যথাপতিট্ঠাপিতভাৰেনেৰ ঠিতানং ¶ ধাতূনং মিচ্ছাদিট্ঠিকানং ৰসেন অন্তরাযং দিস্ৰা, মহাধাতুনিধানেন সম্মদেৰ রক্খিতানং অনাগতে অসোকেন ধম্মরঞ্ঞা ততো উদ্ধরিত্ৰা ৰিত্থারিতভাৰে কতে সদেৰকস্স লোকস্স হিতসুখাৰহভাৰঞ্চ দিস্ৰাতি অধিপ্পাযো. পরিচরণমত্তমেৰাতি গহেত্ৰা পরিচরিতব্বধাতুমত্তমেৰ. রাজূনং হত্থে ঠপেত্ৰা, ন চেতিযেসু. তথা হি পচ্ছা অসোকমহারাজা চেতিযেসু ধাতূনং ন লভতি.

পুরিমং ¶ পুরিমং কতস্স গণ্হনযোগ্যং পচ্ছিমং পচ্ছিমং কারেন্তো অট্ঠ অট্ঠ হরিচন্দনাদিমযে করণ্ডে চ থূপে চ কারেসি. লোহিতচন্দনমযাদীসুপি এসেৰ নযো. মণিকরণ্ডেসূতি লোহিতঙ্কমসারগল্লফলিকমযে ঠপেত্ৰা অৰসেসমণিৰিচিত্তকেসু করণ্ডেসু.

থূপারামচেতিযপ্পমাণন্তি দেৰানংপিযতিস্সমহারাজেন কারিতচেতিযপ্পমাণং.

মালা মা মিলাযন্তূতি ‘‘যাৰ অসোকো ধম্মরাজা বহি চেতিযানি কারেতুং ইতো ধাতুযো উদ্ধরিস্সতি, তাৰ মালা মা মিলাযন্তূ’’তি অধিট্ঠহিত্ৰা. আৰিঞ্ছনরজ্জুযন্তি অগ্গল়াৰিঞ্ছনরজ্জুযং. কুঞ্চিকমুদ্দিকন্তি দ্ৰারৰিৰরণত্থং কুঞ্চিকঞ্চেৰ মুদ্দিকঞ্চ.

ৰাল়সঙ্ঘাতযন্তন্তি কুক্কুলং পটিভযদস্সনং অঞ্ঞমঞ্ঞপটিবদ্ধগমনাদিতায সঙ্ঘাটিতরূপকযন্তং যোজেসি. তেনাহ ‘‘কট্ঠরূপকানী’’তিআদি. আণিযা বন্ধিত্ৰাতি অনেককট্ঠরূপৰিচিত্তযন্তং অত্তনো দেৰানুভাৰেন একায এৰ আণিযা বন্ধিত্ৰা ৰিস্সকম্মো দেৰলোকমেৰ গতো. ‘‘সমন্ততো’’তিআদি পন তস্মিং ধাতুনিদানে অজাতসত্তুনো কিচ্চৰিসেসানুট্ঠানদস্সনং.

‘‘অসুকট্ঠানে নাম ধাতুনিধান’’ন্তি রঞ্ঞা পুচ্ছিতে ‘‘তস্মিং সন্নিপাতে ৰিসেসলাভিনো নাহেসু’’ন্তি কেচি. ‘‘অত্তানং নিগূহিত্ৰা তস্স ৰুড্ঢতরস্স ৰচনং নিস্সায ৰীমংসন্তো জানিস্সতীতি ন কথেসু’’ন্তি অপরে. যক্খদাসকেতি উপহারাদিৰিধিনা দেৰতাৰেসনকে ভূতাৰিগ্গাহকে.

ইমং ¶ ¶ পদন্তি ‘‘এৰমেতং ভূতপুব্ব’’ন্তি দুতিযসঙ্গীতিকারেহি ঠপিতং ইমং পদং. মহাধাতুনিধানম্পি তস্স অত্থং কত্ৰা ততিযসঙ্গীতিকারাপি ঠপযিংসু.

মহাপরিনিব্বানসুত্তৰণ্ণনায লীনত্থপ্পকাসনা.

৪. মহাসুদস্সনসুত্তৰণ্ণনা

কুসাৰতীরাজধানীৰণ্ণনা

২৪২. সোৰণ্ণমযাতি ¶ ¶ ¶ সুৰণ্ণমযা. অযং পাকারোতি সব্বরতনমযো পাকারো. তযো তযোতি অন্তো চ তযো, বহি চ তযোতি তযো তযো.

এসিকত্থম্ভো ইন্দখীলো নগরসোভনো অলঙ্কারত্থম্ভো. অঙ্গীযতি ঞাযতি পুথুলভাৰো এতেনাতি অঙ্গং, পরিক্খেপো. তিপোরিসং অঙ্গং এতিস্সাতি তিপোরিসঙ্গা. তেনাহ ‘‘তেনা’’তিআদি. তেন পঞ্চহত্থপ্পমাণেন তিপোরিসেন. পণ্ণফলেসুপীতি সব্বরতনমযানং তালানং পণ্ণফলেসুপি. এসেৰ নযোতি ‘‘পণ্ণেসু একং পত্তকং সোৰণ্ণমযং, একং রূপিযমযং. ফলেসুপি একো লেখাভাৰো সোৰণ্ণমযো, একো রূপিযমযো’’তিআদিকো অযমত্থো অতিদিট্ঠো. পাকারন্তরেতি দ্ৰিন্নং দ্ৰিন্নং পাকারানং অন্তরে. একেকা হুত্ৰা ঠিতা তালপন্তি.

ছেকোতি পটু সুৰিসদো, সো চস্স পটুভাৰো মনোসারোতি আহ ‘‘সুন্দরো’’তি. রঞ্জেতুন্তি রাগং উপ্পাদেতুং. খমতেৰাতি রোচতেৰ. ন বীভচ্ছেতীতি ন তজ্জেতি, সোতসুখভাৰতো পিযাযিতব্বো চ হোতি. কুম্ভথুণদদ্দরিকাদি একতলং তূরিযং. উভযতলং পাকটমেৰ. সব্বতো পরিযোনদ্ধং চতুরস্সঅম্বণকং, পণৰাদি চ. ৰংসাদীতি আদি-সদ্দেন সঙ্খাদিকং সঙ্গণ্হাতি. সুমুচ্ছিতস্সাতি সুট্ঠু পরিযত্তস্স. পমাণেতি নাতিদল়্হনাতিসিথিলতাসঙ্খাতে মজ্ঝিমে মুচ্ছনপ্পমাণে ¶ . হত্থং ৰা পাদং ৰা চালেত্ৰাতি হত্থলযপাদলযে সজ্জেত্ৰা. নচ্চন্তাতি সাখানচ্চং নচ্চন্তা.

চক্করতনৰণ্ণনা

২৪৩. উপোসথং ¶ ৰুচ্চতি অট্ঠঙ্গসমন্নাগতং সব্বদিৰসেসু গহট্ঠেহি রক্খিতব্বসীলং, সমাদানৰসেন তং তস্স অত্থীতি উপোসথিকো, তস্স উপোসথিকস্স. তেনাহ ‘‘সমাদিন্নউপোসথঙ্গস্সা’’তি. তদাতি তস্মিং ¶ কালে. কস্মিং পন কালেতি? যস্মিং কালে চক্কৰত্তিভাৰসংৰত্তনিযদানসীলাদিপুঞ্ঞসম্ভারসমুদাগমসম্পন্নো পূরিতচক্কৰত্তিৰত্তো কালদীপদেসৰিসেসপচ্চাজাতিযা চেৰ কুলরূপভোগাধিপতেয্যাদিগুণৰিসেসসম্পত্তিযা চ তদনুরূপে অত্তভাৰে ঠিতো হোতি, তস্মিং কালে. তাদিসে হি কালে চক্কৰত্তিভাৰী পুরিসৰিসেসো যথাৰুত্তগুণসমন্নাগতো রাজা খত্তিযো মুদ্ধাৰসিত্তো ৰিসুদ্ধসীলো অনুপোসথং সতসহস্সৰিস্সজ্জনাদিনা সম্মাপটিপত্তিং পটিপজ্জতি, ন যদা চক্করতনং উপ্পজ্জতি, তদা এৰ. ইমে চ ৰিসেসা সব্বচক্কৰত্তীনং সাধারণৰসেন ৰুত্তা. তেনাহ ‘‘পাতোৰ…পে… ধম্মতা’’তি. বোধিসত্তানং পন চক্কৰত্তিভাৰাৰহগুণাপি চক্কৰত্তিগুণাপি সাতিসযাৰ হোন্তি.

ৰুত্তপ্পকারপুঞ্ঞকম্মপচ্চযন্তি চক্কৰত্তিভাৰাৰহদানদমসংযমাদিপুঞ্ঞকম্মহেতুকং. নীলমণিসঙ্ঘাতসদিসন্তি ইন্দনীলমণিসঞ্চযসমানং. দিব্বানুভাৰযুত্তত্তাতি দস্সনেয্যতা, মনুঞ্ঞঘোসতা, আকাসগামিতা, ওভাসৰিস্সজ্জনা, অপ্পটিঘাততা, রঞ্ঞো ইচ্ছিতত্থনিপ্ফত্তিকারণতাতি এৰমাদীহি দিব্বসদিসেহি আনুভাৰেহি সমন্নাগতত্তা, এতেন দিব্বং ৰিযাতি দিব্বন্তি দস্সেতি. ন হি তং দেৰলোকপরিযাপন্নং. সহস্সং অরা এতস্সাতি ৰা সহস্সারং. সব্বেহি আকারেহীতি সব্বেহি সুন্দরেহি পরিপুণ্ণাৰযৰে লক্খণসম্পন্নে চক্কে ইচ্ছিতব্বেহি আকারেহি. পরিপূরন্তি পরিপুণ্ণং, সা চস্সা পারিপূরিং ইদানেৰ ৰিত্থারেস্সতি.

পনাল়ীতি ছিদ্দং. সুদ্ধসিনিদ্ধদন্তপন্তিযা নিব্বিৰরাযাতি ¶ অধিপ্পাযো. তস্সা পন পনাল়িযা সমন্ততো পস্সস্স রজতমযত্তা সাররজতমযা ৰুত্তা. যস্মা চস্স চক্কস্স রথচক্কস্স ৰিয অন্তোভাৰো নাম নত্থি, তস্মা ৰুত্তং ‘‘উভোসুপি বাহিরন্তেসূ’’তি. কতপরিক্খেপা হোতি পনাল়ীতি যোজনা. নাভিপনাল়িপরিক্খেপপট্টেসূতি নাভিপরিক্খেপপট্টে চেৰ নাভিযা পনাল়িপরিক্খেপপট্টে চ.

তেসন্তি অরানং. ঘটকা নাম অলঙ্কারভূতা খুদ্দকপুণ্ণঘটা. তথা মণিকা নাম মুত্তাৰল়িকা. পরিচ্ছেদলেখা তস্স তস্স পরিচ্ছেদদস্সনৰসেন ঠিতা পরিচ্ছিন্নলেখা. আদি-সদ্দেন ¶ মালাকম্মাদিং সঙ্গণ্হাতি. সুৰিভত্তানেৰাতি অঞ্ঞমঞ্ঞং অসংকিণ্ণত্তা সুট্ঠু ৰিভত্তানি.

‘‘সুরত্তা’’তিআদীসু ¶ সুরত্তগ্গহণেন মহানামৰণ্ণতং পটিক্খিপতি, সুদ্ধগ্গহণেন সংঙ্কিলিট্ঠতং, সিনিদ্ধগ্গহণেন লূখতং. কামং তস্স চক্করতনস্স নেমিমণ্ডলং অসন্ধিকমেৰ নিব্বত্তং, সব্বত্থকমেৰ পন কেৰলং পৰাল়ৰণ্ণেন চ সোভতীতি পকতিচক্কস্স সন্ধিযুত্তট্ঠানে সুরত্তসুৰণ্ণপট্টাদিমযাহি ৰট্টপরিচ্ছেদলেখাহি পঞ্ঞাযমানাহি সসন্ধিকা ৰিয দিস্সন্তীতি আহ ‘‘সন্ধীসু পনস্সা’’তিআদি.

নেমিমণ্ডলপিট্ঠিযন্তি নেমিমণ্ডলস্স পিট্ঠিপদেসে. আকাসচারিভাৰতো হিস্স তত্থ ৰাতগ্গাহী পৰাল়দণ্ডো হোতি. দসন্নং দসন্নং অরানং অন্তরেতি দসন্নং দসন্নং অরানং অন্তরে সমীপে পদেসে. ছিদ্দমণ্ডলখচিতোতি মণ্ডলসণ্ঠানছিদ্দৰিচিত্তো. সুকুসলসমন্নাহতস্সাতি সুট্ঠু কুসলেন সিপ্পিনা পহতস্স, ৰাদিতস্সাতি অত্থো. ৰগ্গূতি মনোরমো. রজনীযোতি সুণন্তানং রাগুপ্পাদকো. কমনীযোতি কন্তো. সমোসরিতকুসুমদামাতি ওলম্বিতসুগন্ধকুসুমদামা. নেমিপরিক্খেপস্সাতি ¶ নেমিপরিযন্তপরিক্খেপস্স. নাভিপনাল়িযা দ্ৰিন্নং পস্সানং ৰসেন ‘‘দ্ৰিন্নম্পি নাভিপনাল়ীন’’ন্তি ৰুত্তং. একা এৰ হি সা পনাল়ি. যেহীতি যেহি দ্ৰীহি মুখেহি. পুন যেহীতি যেহি মুত্তকলাপেহি.

ওধাপযমানন্তি সোতুং অৰহিতানি কুরুমানং.

চন্দো পুরতো চক্করতনং পচ্ছাতি এৰং পুব্বাপরিযেন পুব্বাপরভাৰেন.

অন্তেপুরস্সাতি অনুরাধপুরে রঞ্ঞো অন্তেপুরস্স. উত্তরসীহপঞ্জরসদিসেতি তদা রঞ্ঞো পাসাদে তাদিসস্স উত্তরদিসায সীহপঞ্জরস্স লব্ভমানত্তা ৰুত্তং. সুখেন সক্কাতি কিঞ্চি অনারুহিত্ৰা, সরীরঞ্চ অনুল্লঙ্ঘিত্ৰা যথাঠিতেনেৰ হত্থেন পুপ্ফমুট্ঠিযো খিপিত্ৰা সুখেন সক্কা হোতি পূজেতুং.

নানাৰিরাগরতনপ্পভাসমুজ্জলন্তি নানাৰিধৰিচিত্তৰণ্ণরতনোভাসপভস্সরং. আকাসং অব্ভুগ্গন্ত্ৰা পৰত্তেতি আগন্ত্ৰা ঠিতট্ঠানতো উপরি আকাসং অব্ভুগ্গন্ত্ৰা পৰত্তে.

২৪৪. রাজাযুত্তাতি ¶ রঞ্ঞো কিচ্চে আযুত্তকপুরিসা.

সিনেরুং ¶ ৰামপস্সেন কত্ৰা তস্স ধুরতরং গচ্ছন্তো ‘‘ৰামপস্সেন সিনেরুং পহাযা’’তি ৰুত্তং.

ৰিনিব্বেধেনাতি তিরিযং ৰিনিৰিজ্ঝনৰসেন. সন্নিৰেসক্খমোতি খন্ধাৰারসন্নিৰেসযোগ্যো. সুলভাহারুপকরণোতি সুখেনেৰ লদ্ধব্বধঞ্ঞগোরসদারুতিণাদিভোজনসাধনো.

পরচক্কন্তি পরস্স রঞ্ঞো সেনা, আণা ৰা.

আগমননন্দনোতি আগমনেন নন্দিজননো. গমনেন সোচেতীতি গমনসোচনো. উপকপ্পেথাতি উপরূপরি কপ্পেথ, সংৰিদহথ উপনেথাতি অত্থো. উপপরিক্খিত্ৰাতি হেতুতোপি সভাৰতোপি ফলতোপি দিট্ঠধম্মিকসম্পরাযিকাদিআদীনৰতোপি ¶ ৰীমংসিত্ৰা. ৰিভাৰেন্তি পঞ্ঞায অত্থং ৰিভূতং করোন্তীতি ৰিভাৰিনো, পঞ্ঞৰন্তো. অনুযন্তাতি অনুৰত্তকা, অনুৰত্তকভাৰেনেৰ, পন রঞ্ঞো চ মহানুভাৰেন তে জিগুচ্ছনৰসেন পাপতো অনোরমন্তাপি একচ্চে ওত্তপ্পৰসেন ওরমন্তীতি ৰেদিতব্বং.

ওগচ্ছমানন্তি ওসীদন্তং. যোজনমত্তন্তি ৰিত্থারতো যোজনমত্তং পদেসং. গম্ভীরভাৰেন পন যথা ভূমি দিস্সতি, এৰং ওগচ্ছতি. তেনাহ ‘‘মহাসমুদ্দতল’’ন্তিআদি. অন্তে চক্করতনং উদকেন সেনায অনজ্ঝোত্থরণত্থং. পুরত্থিমো মহাসমুদ্দো পরিযন্তো এতস্সাতি পুরত্থিমমহাসমুদ্দপরিযন্তো, তং পুরত্থিমমহাসমুদ্দপরিযন্তং, পুরত্থিমমহাসমুদ্দং পরিযন্তং কত্ৰাতি অত্থো.

চাতুরন্তাযাতি চতুসমুদ্দন্তায, পুরত্থিমদিসাদিচতুকোট্ঠাসন্তায ৰা. সোভযমানং ৰিযাতি ৰিয-সদ্দো নিপাতমত্তং. অত্তনো অচ্ছরিযগুণেহি সোভন্তমেৰ হি তং তিট্ঠতি. পাল়িযম্পি হি ‘‘উপসোভযমানং’’ ত্ৰেৰ ৰুত্তং.

হত্থিরতনৰণ্ণনা

২৪৬. হরিচন্দনাদীহীতি আদি-সদ্দেন চতুজ্জাতিযগন্ধাদিং সঙ্গণ্হাতি. আগমনং চিন্তেথাতি ¶ ৰদন্তি চক্কৰত্তিৰত্তস্স পূরিততায পরিচিতত্তা. কাল়তিলকাদীনং অভাৰেন ৰিসুদ্ধসেতসরীরো. সত্তপতিট্ঠোতি ভূমিফুসনকেহি ৰালধি, ৰরঙ্গং, হত্থোতি ইমেহি চ তীহি, চতূহি পাদেহি চাতি ¶ সত্তহি অৰযৰেহি পতিট্ঠিতত্তা সত্তপতিট্ঠো. সব্বকনিট্ঠোতি সব্বেহি ছদ্দন্তকুলহত্থীহি হীনো. উপোসথকুলা সব্বজেট্ঠোতি উপোসথকুলতো আগচ্ছন্তো তত্থ সব্বপ্পধানো আগচ্ছতীতি যোজনা. ৰুত্তনযেনাতি ‘‘মহাদানং দত্ৰা’’তিআদিনা ৰুত্তেন নযেন. চক্কৰত্তীনং, চক্কৰত্তিপুত্তানঞ্চ চক্কৰত্তিং উদ্দিস্স চিন্তযন্তানং আগচ্ছতি. অপনেত্ৰাতি অত্তনো আনুভাৰেন অপনেত্ৰা. গন্ধমেৰ হি তস্স ইতরে হত্থী ন সহন্তি.

ঘরধেনুৰচ্ছকো ৰিযাতি ঘরে পরিচিতধেনুযা তত্থেৰ ¶ জাতসংৰদ্ধৰচ্ছকো ৰিয. সকলপথৰিন্তি সকলং জম্বুদীপসঞ্ঞিতং পথৰিং.

অস্সরতনৰণ্ণনা

২৪৭. সিন্ধৰকুলতোতি সিন্ধৰস্সাজানীযকুলতো.

মণিরতনৰণ্ণনা

২৪৮. সকটনাভিসমপরিণাহন্তি পরিণাহতো মহাসকটস্স নাভিযা সমপ্পমাণং. উভোসু অন্তেসূতি হেট্ঠা, উপরি চাতি দ্ৰীসু অন্তেসু. কণ্ণিকপরিযন্ততোতি দ্ৰিন্নং কঞ্চনপদুমানং কণ্ণিকায পরিযন্ততো. মুত্তাজালকে ঠপেত্ৰাতি সুৰিসুদ্ধে মুত্তমযে জালকে পতিট্ঠাপেত্ৰা. অরুণুগ্গমনৰেলা ৰিযাতি অরুণুগ্গমনসীসেন সূরিযউদযক্খণং উপলক্খেতি.

ইত্থিরতনৰণ্ণনা

২৪৯. ‘‘ইত্থিরতনং পাতুভৰতী’’তি ৰত্ৰা কুতস্সা পাতুভাৰোতি দস্সেতুং ‘‘মদ্দরাজকুলতো’’তিআদি ৰুত্তং. মদ্দরট্ঠং কির জম্বুদীপে অভিরূপানং ইত্থীনং উপ্পত্তিট্ঠানং. তথা হি ‘‘সিঞ্চযমহারাজস্স দেৰী, ৰেস্সন্তরমহারাজস্স দেৰী, ভদ্দকাপিলানী’’তি এৰমাদি ইত্থিরতনং মদ্দরট্ঠে এৰ উপ্পন্নং. পুঞ্ঞানুভাৰেনাতি চক্কৰত্তিরঞ্ঞো পুঞ্ঞতেজেন.

সণ্ঠানপারিপূরিযাতি হত্থপাদাদিসরীরাৰযৰানং সুসণ্ঠিতায. অৰযৰপারিপূরিযা হি সমুদাযপারিপূরিসিদ্ধি ¶ . রূপন্তি সরীরং ‘‘রূপং ত্ৰেৰ সঙ্খং গচ্ছতী’’তিআদীসু (ম. নি. ১.৩০৬) ৰিয. দস্সনীযাতি সুরূপভাৰেন পস্সিতব্বযুত্তা. তেনাহ ¶ ‘‘দিস্সমানাৰা’’তিআদি. সোমনস্সৰসেন চিত্তং পসাদেতি যোনিসো চিন্তেন্তানং কম্মফলসদ্ধায ৰসেন. পসাদাৰহত্তাতি কারণৰচনেন যথা পাসাদিকতায ৰণ্ণপোক্খরতাসিদ্ধি ৰুত্তা, এৰং দস্সনীযতায পাসাদিকতাসিদ্ধি, অভিরূপতায চ দস্সনীযতাসিদ্ধি ৰত্তব্বাতি নযং দস্সেতি. পটিলোমতো ৰা ৰণ্ণপোক্খরতায ¶ পাসাদিকতাসিদ্ধি, পাসাদিকতায দস্সনীযতাসিদ্ধি, দস্সনীযতায অভিরূপতাসিদ্ধি যোজেতব্বা. এৰং সরীরসম্পত্তিৰসেন অভিরূপতাদিকে দস্সেত্ৰা ইদানি সরীরে দোসাভাৰৰসেনপি তে দস্সেতুং ‘‘অভিরূপা ৰা’’তিআদি ৰুত্তং. তত্থ যথা পমাণযুত্তা, এৰং আরোহপরিণাহযোগতো চ পাসাদিকা নাতিদীঘতাদযো, এৰং মনুস্সানং দিব্বরূপতাসম্পত্তিপীতি ‘‘অপ্পত্তা দিব্বৰণ্ণ’’ন্তি ৰুত্তং.

আরোহসম্পত্তি ৰুত্তা উব্বেধেন পাসাদিকভাৰতো. পরিণাহসম্পত্তি ৰুত্তা কিসথূলদোসাভাৰতো. ৰণ্ণসম্পত্তি ৰুত্তা ৰিৰণ্ণতাভাৰতো. কাযৰিপত্তিযাতি সরীরদোসস্স. সতৰারৰিহতস্সাতি সত্তক্খত্তুং ৰিহতস্স, ‘‘সতৰারৰিহতস্সা’’তি চ ইদং কপ্পাসপিচুৰসেন ৰুত্তং, তূলপিচুনো পন ৰিহননমেৰ নত্থি. কুঙ্কুমতগরতুরুক্খযৰনপুপ্ফানি চতুজ্জাতি. ‘‘তমালতগরতুরুক্খযৰনপুপ্ফানী’’তি অপরে.

অগ্গিদড্ঢা ৰিযাতি আসনগতেন অগ্গিনা দড্ঢা ৰিয. পঠমমেৰাতি রাজানং দিস্ৰাপি কিচ্চন্তরপ্পসুতা অহুত্ৰা কিচ্চন্তরতো পঠমমেৰ, দস্সনসমকালং এৰাতি অত্থো. রঞ্ঞো নিসজ্জায পচ্ছা নিপাতনং নিসীদনং সীলং এতিস্সাতি পচ্ছানিপাতিনী. তং তং অত্তনা রঞ্ঞো কাতব্বকিচ্চং ‘‘কিং করোমী’’তি পুচ্ছিতব্বতায কিং করণং পটিসাৰেতীতি কিংকারপটিস্সাৰিনী.

মাতুগামো নাম যেভুয্যেন সঠজাতিকো, ইত্থিরতনস্স পন তং নত্থীতি দস্সেতুং ‘‘স্ৰাস্সা’’তিআদি ৰুত্তং.

গুণাতি রূপগুণা চেৰ আচারগুণা চ. পুরিমকম্মানুভাৰেনাতি কতস্স পুরিমকম্মস্সানুভাৰেন ইত্থিরতনস্স ¶ তব্ভাৰসংৰত্তনিযস্স পুরিমকম্মস্স আনুভাৰেন. চক্কৰত্তিনোপি পরিৰারসম্পত্তিসংৰত্তনিযং পুঞ্ঞকম্মং তাদিসস্স ফলৰিসেসস্স উপনিস্সযো হোতিযেৰ. তেনাহ ‘‘চক্কৰত্তিনো ¶ পুঞ্ঞং উপনিস্সাযা’’তি, এতেন সেসেসুপি সৰিঞ্ঞাণকরতনেসু অত্তনো ¶ কম্মৰসেন নিব্বত্তেসুপি তেসং তেসং ৰিসেসানং তদুপনিস্সযতা ৰিভাৰিতা এৰাতি দট্ঠব্বা. পুব্বে একদেসৰসেন লব্ভমানা পারিপূরী রঞ্ঞো চক্কৰত্তিভাৰূপগমনতো পট্ঠায সব্বাকারপরিপূরা জাতা.

গহপতিরতনৰণ্ণনা

২৫০. পকতিযা ৰাতি সভাৰেনেৰ চক্করতনপাতুভাৰতো পুব্বেপি. যাদিসং রঞ্ঞো চক্কৰত্তিস্স পুঞ্ঞবলং নিস্সায যথাৰুত্তা চক্করতনানুভাৰনিব্বত্তি, তাদিসং এতস্স পুঞ্ঞবলং নিস্সায গহপতিরতনস্স কম্মৰিপাকজং দিব্বচক্খুং নিব্বত্তেতীতি আহ ‘‘চক্করতনানুভাৰসহিত’’ন্তি. কারণস্স হি একসন্ততিপতিততায, ফলস্স চ সমানকালিকতায তথাৰচনং.

পরিণাযকরতনৰণ্ণনা

২৫১. ‘‘অযং ধম্মো, অযং অধম্মো’’তিআদিনা কম্মস্সকতাৰবোধনসঙ্খাতস্স পণ্ডিতভাৰস্স অত্থিতায পণ্ডিতো. বাহুসচ্চব্যত্তিযা ব্যত্তো. সভাৰসিদ্ধায মেধাসঙ্খাতায পকতিপঞ্ঞায অত্থিতায মেধাৰী. অত্তনো যাথাৰবুদ্ধমত্থং পরেসং ৰিভাৰেতুং পকাসেতুং সমত্থতায ৰিভাৰী. ৰৰত্থপেতুন্তি নিচ্ছিতুং.

চতুইদ্ধিসমন্নাগতৰণ্ণনা

২৫২. ৰিপচ্চনং ৰিপাকো, ৰিপাকো এৰ ৰেপাকো যথা ‘‘ৰিকতমেৰ ৰেকত’’ন্তি. সমং নাতিসীতনাচ্চুণ্হতায অৰিসমং ভুত্তস্স ৰেপাকো এতিস্সা অত্থীতি সমৰেপাকিনী, তায সমৰেপাকিনিযা.

ধম্মপাসাদপোক্খরণিৰণ্ণনা

২৫৩. জনরাসিং কারেত্ৰা তেন জনরাসিনা খণিত্ৰা ন মাপেসি. কিঞ্চরহীতি আহ ‘‘রঞ্ঞো পনা’’তিআদি. তত্থ কারণং পরতো আগমিস্সতি. একায ৰেদিকায পরিক্খিত্তা পোক্খরণিযো ¶ . পরিৰেণপরিচ্ছেদপরিযন্তেতি এত্থ পরিৰেণং নাম সমন্ততো ৰিৰটঙ্গণভূতং পোক্খরণিযা ¶ তীরং, তস্স পরিচ্ছেদভূতে পরিযন্তে একায ৰেদিকায ¶ পরিক্খিত্তা পোক্খরণিযো. এতদহোসীতি এতং ‘‘যংনূনাহং ইমাসু পোক্খরণীসূ’’তিআদিকং অহোসীতি. সব্বোতুকন্তি সব্বেসু উতূসু পুপ্ফনকং. নানাৰণ্ণউপ্পলবীজাদীনীতি রত্তনীলাদিনানাৰণ্ণপুপ্ফেন পুপ্ফনকউপ্পলবীজাদীনি. জলজথলজমালন্তি জলজথলজপুপ্ফমালং.

২৫৪. পরিচারৰসেনাতি তঙ্খণিকপরিচারৰসেন, ইদঞ্চ পঠমং পট্ঠপিতনিযামেনেৰ ৰুত্তং, পচ্ছা পন যানসযনাদীনি ৰিয ইত্থিযোপি অত্থিকানং পরিচ্চত্তা এৰ. তেনাহ ‘‘ইত্থীহিপী’’তিআদি. পরিচ্চাগৰসেনাতি নিরপেক্খপরিচ্চাগৰসেন. দীযতীতি দানং, দেয্যৰত্থু. তং অগ্গীযতি নিস্সজ্জীযতি এত্থাতি দানগ্গং, পরিৰেসনট্ঠানং. তাদিসানি অত্থীতি যাদিসানি রঞ্ঞো দানগ্গে খোমসুখুমাদীনি ৰত্থানি, তাদিসানি যেসং অত্তনো সন্তকানি সন্তি. ওহাযাতি পহায তত্থেৰ ঠপেত্ৰা. অত্থো অত্থি যেসং তেতি অত্থিকা. এৰং অনত্থিকাপি দট্ঠব্বা.

২৫৫. কলহসদ্দোপীতি পি-সদ্দেন দানাধিপ্পাযেন গেহতো নীহতং পুন গেহং পৰেসেতুং ন যুত্তন্তি ইমমত্থং সমুচ্চেতি. তেনাহ ‘‘ন খো এতং অম্হাকং পতিরূপ’’ন্তিআদি (দী. নি. ২.২৫৫).

২৫৭. উণ্হীসমত্থকেতি সিখাপরিযন্তমত্থকে. পরিচ্ছেদমত্থকেতি পাসাদঙ্গণপরিচ্ছেদস্স মত্থকে.

২৫৮. হরতীতি অতিৰিয পভস্সরভাৰেন চক্খূনি পটিহরন্তং দুদ্দিক্খতায দিট্ঠিযো হরতি অপনেন্তং ¶ ৰিয হোতি. তং পন হরণং নেসং পরিপ্ফন্দনেনাতি আহ ‘‘ফন্দাপেতী’’তি.

পঠমভাণৰারৰণ্ণনা নিট্ঠিতা.

ঝানসম্পত্তিৰণ্ণনা

২৬০. মহতিযা ইদ্ধিযাতি মহন্তেন ইচ্ছিতত্থসমিজ্ঝনেন. তেসংযেৰ ইচ্ছিতিচ্ছিতত্থানং. ‘‘অনুভৰিতব্বান’’ন্তি ¶ ইমিনা আনুভাৰ-সদ্দস্স কম্মসাধনতং দস্সেতি. পুব্বে সম্পন্নং কত্ৰা দেয্যধম্মপরিচ্চাগস্স কতভাৰং দস্সেন্তো ‘‘সম্পত্তিপরিচ্চাগস্সা’’তি আহ. অত্তানং দমেতি এতেনাতি দমো.

বোধিসত্তপুব্বযোগৰণ্ণনা

অস্সাতি ¶ মহাসুদস্সনরঞ্ঞো. একো থেরোতি অপ্পঞ্ঞাতো নামগোত্ততো অঞ্ঞতরো পুথুজ্জনো থেরো. থেরং দিস্ৰাতি অঞ্ঞতরস্মিং রুক্খমূলে নিসিন্নং দিস্ৰা. কট্ঠত্থরণন্তি কট্ঠমযং অত্থরণং, দারুফলকন্তি অত্থো.

পরিভোগভাজনন্তি পানীযপরিভোজনীযাদিপরিভোগযোগ্যং ভাজনং. আরকণ্টকন্তি সূচিৰিজ্ঝনককণ্টকং. পিপ্ফলিকন্তি খুদ্দকসত্থকং. উদকতুম্বকন্তি কুণ্ডিকং.

কূটাগারদ্ৰারেযেৰ নিৰত্তেসীতি কূটাগারং পৰিট্ঠকালতো পট্ঠায তেসং মিচ্ছাৰিতক্কানং পৰত্তিযা ওকাসং নাদাসি.

২৬১. কসিণমেৰ পঞ্ঞাযতি মহাপুরিসস্স তত্থ তত্থ কতাধিকারত্তা, তেসঞ্চ পদেসানং সুপরিকম্মকতকসিণসদিসত্তা.

২৬২. চত্তারি ঝানানীতি চত্তারি কসিণজ্ঝানানি. কসিণজ্ঝানপ্পমঞ্ঞানংযেৰ ৰচনং তাসং তদা আদরগারৰৰসেন নিব্বত্তিতত্তা. মহাবোধিসত্তানঞ্হি অরূপজ্ঝানেসু ¶ আদরো নত্থি, অভিঞ্ঞাপদট্ঠানতং পন সন্ধায তানিপি নিব্বত্তেন্তি, তস্মা মহাসত্তো তাপসপরিব্বাজককালে যত্তকে লোকিযগুণে নিব্বত্তেতি, তে সব্বেপি তদা নিব্বত্তেসিযেৰ. তেনাহ ‘‘মহাপুরিসো পনা’’তিআদি.

চতুরাসীতিনগরসহস্সাদিৰণ্ণনা

২৬৩. অভিহরিতব্বভত্তন্তি উপনেতব্বভত্তং.

২৬৪. নিবদ্ধৰত্তন্তি পুব্বে উপনিবদ্ধং পাকৰত্তং.

সুভদ্দাদেৰিউপসঙ্কমনৰণ্ণনা

২৬৫. আৰট্টেত্ৰাতি ¶ অতিৰিসিত্ৰা. যং যং রঞ্ঞো ইচ্ছিতং দানূপকরণঞ্চেৰ ভোগূপকরণঞ্চ, তস্স তস্স তথেৰ সমিদ্ধভাৰং ৰিত্থৰতি.

২৬৬. সচে পন রাজা জীৰিতে ছন্দং জনেয্য, ইতো পরম্পি চিরং কালং তিট্ঠেয্য মহিদ্ধিকো মহানুভাৰোতি এৰং মহজ্ঝাসযা দেৰী ভোগেসু, জীৰিতে চ রাজানং সাপেক্খং কাতুং ৰাযমি. তেন ৰুত্তং ‘‘মা ¶ হেৰ খো রাজা’’তিআদি. তেনেৰাহ ‘‘তস্স কালঙ্কিরিযং অনিচ্ছমানা’’তিআদি. ছন্দং জনেহীতি এত্থ ছন্দ-সদ্দো তণ্হাপরিযাযোতি আহ ‘‘পেমং উপ্পাদেহী’’তি. অপেক্খতি আরম্মণং এতায ন ৰিস্সজ্জেতীতি অপেক্খা, তণ্হা.

২৬৭. গরহিতাতি এত্থ কেহি গরহিতা, কস্মা চ গরহিতাতি অন্তোলীনং চোদনং ৰিস্সজ্জেন্তো ‘‘বুদ্ধেহী’’তিআদিমাহ, তেন ৰিঞ্ঞুগরহিতত্তা, দুগ্গতিসংৰত্তনিযতো চ সাপেক্খকালকিরিযা পরিৰজ্জেতব্বাতি দস্সেতি.

২৬৮. একমন্তং গন্ত্ৰাতি রঞ্ঞো চক্খুপথং ৰিজহিত্ৰা.

ব্রহ্মলোকূপগমনৰণ্ণনা

২৬৯. সোণস্সাতি কোল়িৰীসস্স সোণস্স. একা ভত্তপাতীতি একং ভত্তৰড্ঢিতকং. তাদিসং ভত্তন্তি তথারূপং গরুং মধুরং সিনিদ্ধং ভত্তং. ভুত্তানন্তি ভুত্তৰন্তানং.

২৭১. দাসমনুস্সাতি দাসা চেৰ আযুত্তকমনুস্সা চ.

ইদানি যথাৰুত্তায রঞ্ঞো মহাসুদস্সনস্স ভোগসম্পত্তিযা কম্মসরিক্খতং উদ্ধরন্তো ‘‘এতানি পনা’’তিআদিমাহ, তং সুৰিঞ্ঞেয্যমেৰ.

২৭২. আদিতো ¶ পট্ঠাযাতি সমুদাগমনতো পট্ঠায. যত্থ তং পুঞ্ঞং আযূহিতং, যতো সা সম্পত্তি নিব্বত্তা, ততো ততিযত্তভাৰতো পভুতি. মহাসুদস্সনস্স জাতকদেসনা হি তদা সমুদাগমনতো পট্ঠায ভগৰতা দেসিতাতি. পংস্ৰাগারকীল়ং ৰিযাতি যথা নাম দারকা পংসূহি ৰাপিগেহভোজনাদীনি ¶ দস্সেন্তা যথারুচি কীল়িত্ৰা গমনকালে সব্বং তং ৰিধংসেন্তা গচ্ছন্তি, এৰমেৰ ভগৰা মহাসুদস্সনকালে অত্তনা অনুভূতং দিব্বসম্পত্তিসদিসং অচিন্তেয্যানুভাৰসম্পত্তিং ৰিত্থারতো দস্সেত্ৰা পুন অত্তনো দেসনং আদীনৰনিস্সরণদস্সনৰসেন ৰিৰট্টাভিমুখং ৰিপরিৰত্তেন্তো ‘‘সব্বা সা সম্পত্তি অনিচ্চতায ৰিপরিণতা ৰিধংসিতা’’তি দস্সেন্তো ‘‘পস্সানন্দা’’তিআদিমাহ. ৰিপরিণতাতি ৰিপরিণামং সভাৰৰিগমং গতা. তেনাহ ‘‘পকতিৰিজহনেনা’’তিআদি. পকতীতি সভাৰধম্মানং উদযৰযপরিচ্ছিন্নো ¶ কক্খল়ফুসনাদিসভাৰো, সো ভঙ্গক্খণতো পট্ঠায জহিতো, পরিচ্চজন্তো সব্বসো নত্থেৰ. তেনাহ ‘‘নিব্বুতপদীপো ৰিয অপঞ্ঞত্তিকভাৰং গতা’’তি.

এত্তাৰতাতি আদিতো পট্ঠায পৰত্তেন এত্তকেন দেসনামগ্গেন. অনেকানি ৰস্সকোটিসতসহস্সানিযেৰ উব্বেধো এতিস্সাতি অনেকৰস্সকোটিসতসহস্সুব্বেধা. অনিচ্চলক্খণং আদাযাতি তং সম্পত্তিগতং অনিচ্চলক্খণং দেসনায গহেত্ৰা ৰিভাৰেত্ৰা. যথা নিস্সেণিমুচ্চনে তাদিসং সতহত্থুব্বেধং রুক্খং পকতিপুরিসেন আরোহিতুং ন সক্কা, এৰং অনিচ্চতাৰিভাৰনেন তস্সা সম্পত্তিযা অপেক্খানিস্সেণিমুচ্চনে ¶ কেনচি আরোহিতুং ন সক্কাতি আহ ‘‘অনিচ্চলক্খণং আদায নিস্সেণিং মুঞ্চন্তো ৰিযা’’তি. তেনেৰাতি যথাৰুত্তকারণেনেৰ, আদিতো সাতিসযং কামেসু অস্সাদং দস্সেত্ৰাপি উপরি নেসং ‘‘পস্সানন্দা’’তিআদিনা আদীনৰং, ওকারং, সংকিলেসং, নেক্খম্মে আনিসংসঞ্চ ৰিভাৰেত্ৰা দেসনায নিট্ঠাপিতত্তা. পুব্বেতি অতীতকালে. ৰসভরাজাতি ৰসভনামকো সীহল়মহারাজা.

উদকপুপ্ফুল়াদযোতি আদি-সদ্দেন তিণগ্গে উস্সাৰবিন্দুআদিকে সঙ্গণ্হাতি.

মহাসুদস্সনস্স পনাতি পন-সদ্দো ৰিসেসত্থজোতনো, তেন মহাসুদস্সনমহারাজা ঝানাভিঞ্ঞাসমাপত্তিযো নিব্বত্তেসি, তদগ্গেন পরিসুদ্ধে চ সমণভাৰে পতিট্ঠিতো, যতো ৰিধুয এৰ কামৰিতক্কাদিসমণভাৰসংকিলেসং সুঞ্ঞাগারং পাৰিসি, এৰংভূতস্সাপি তস্স কালং কিরিযতো সত্তমে দিৰসে সব্বা চক্কৰত্তিসম্পত্তি অন্তরহিতা, ন ততো পরং, অহো অচ্ছরিযমনুস্সো অনঞ্ঞসাধারণগুণৰিসেসোতি ইমং ৰিসেসং দস্সেতি.

অনারুল়্হন্তি ‘‘রাজা কির পুব্বে গহপতিকুলে নিব্বত্তী’’তিআদিনা, (দী. নি. অট্ঠ. ২.২৬০) ‘‘পুন থেরং আমন্তেসী’’তিআদিনা (দী. নি. অট্ঠ. ২.২৭২) চ ৰুত্তমত্থং ¶ সন্ধাযাহ. সো হি ইমস্মিং সুত্তে সঙ্গীতিং অনারুল়্হো, অঞ্ঞত্থ পন আগতো ইমিস্সা দেসনায পিট্ঠিৰত্তকভাৰেন. যং পনেত্থ অত্থতো ন ৰিভত্তং, তং সুৰিঞ্ঞেয্যং এৰাতি.

মহাসুদস্সনসুত্তৰণ্ণনায লীনত্থপ্পকাসনা.

৫. জনৰসভসুত্তৰণ্ণনা

নাতিকিযাদিব্যাকরণৰণ্ণনা

২৭৩-২৭৫. ‘‘পরিতো’’তি ¶ ¶ ¶ পদং যথা সমন্তত্থৰাচকো, এৰং সমীপত্থৰাচকোপি হোতীতি সমন্তা সামন্তাতি অত্থো ৰুত্তো. আমেডিতেন পন সমন্তত্থো জোতিতো. যস্স পন সামন্তা জনপদেসু ‘‘নাতিকে ৰিহরতী’’তি ৰুত্তত্তা নাতিকস্সাতি ৰিঞ্ঞাতো যমত্থো. যস্স পরিতো জনপদেসু ব্যাকরোতি, তত্থ পরিচারকারকানং ব্যাকরণং অৰুত্তসিদ্ধং, নিদস্সনৰসেন ৰা তস্স ৰক্খমানত্তা ‘‘পরিতো পরিতো জনপদেসু’’ ইচ্চেৰ ৰুত্তং. পরিচারকেতি উপাসকে. তেনাহ ‘‘বুদ্ধধম্মসঙ্ঘানং পরিচারকে’’তি. উপপত্তীসূতি নিব্বত্তীসু. ঞাণগতিপুঞ্ঞানং উপপত্তীসূতি এত্থ ঞাণগতূপপত্তি নাম তস্স তস্স মগ্গঞাণগমনস্স নিব্বত্তি. যং সন্ধায ৰুত্তং ‘‘পঞ্চন্নং ওরম্ভাগিযানং পরিক্খযা’’তিআদি. পুঞ্ঞূপপত্তি নাম তংতংদেৰনিকাযূপপত্তি. সব্বত্থাতি ‘‘ৰজ্জিমল্লেসূ’’তিআদিকে সব্বত্থ চতূসুপি পদেসু. পুরিমেসূতি পাল়িযং ৰুত্তে সন্ধাযাহ. দসসুযেৰাতি তেসু এৰ দসসু জনপদেসু. পরিচারকে ব্যাকরোতি ব্যকাতব্বানং বহূনং তত্থ লব্ভনতো. নাতিকে ভৰা নাতিকিযা.

নিট্ঠঙ্গতাতি নিট্ঠং নিচ্ছযং উপগতা.

আনন্দপরিকথাৰণ্ণনা

২৭৬. যস্মা সঙ্ঘসুপ্পটিপত্তি নাম ধম্মসুধম্মতায, ধম্মসুধম্মতা চ বুদ্ধসুবুদ্ধতায, তস্মা ‘‘অহো ধম্মো, অহো সঙ্ঘো’’তি ধম্মসঙ্ঘগুণকিত্তনাপি অত্থতো বুদ্ধগুণকিত্তনা এৰ হোতীতি ‘‘ভগৰন্তং ¶ কিত্তযমানরূপা’’তি পদস্স ‘‘অহো ধম্মো’’তিআদিনাপি অত্থো ৰুত্তো.

২৭৮. ঞাণগতীতি ¶ ‘‘পঞ্চন্নং ওরম্ভাগিযানং সংযোজনানং পরিক্খযা’’তিআদিনা আগতং পহাতব্বপহানৰসেন পৰত্তং মগ্গঞাণগমনং. যস্মা তস্সা এৰ ঞাণগতিযা ৰসেন তস্স তস্স অরিযপুগ্গলস্স ওপপাতিকতাদিৰিসেসো, তস্মা তং তাদিসং তস্স অভিসম্পরাযং সন্ধাযাহ ‘‘ঞাণাভিসম্পরাযমেৰা’’তি.

২৭৯. উপসন্তং ¶ পতি সম্মতি আলোকীযতীতি উপসন্তপতিসো. উপসন্তদস্সনো উপসন্তউস্সন্নো. ভাতিরিৰাতি এত্থ র-কারো পদসন্ধিকরো, ইৰ-সদ্দো ভুসত্থোতি আহ ‘‘অতিৰিয ভাতী’’তি.

জনৰসভযক্খৰণ্ণনা

২৮০. জেট্ঠকভাৰেন জনে ৰসভসদিসোতি জনৰসভোতি অস্স দেৰপুত্তস্স নামং অহোসি.

ইতো দেৰলোকা চৰিত্ৰা সত্তক্খত্তুং মনুস্সলোকে রাজভূতস্স. মনুস্সলোকা চৰিত্ৰা সত্তক্খত্তুং দেৰভূতস্স. এত্থেৰাতি এতস্মিংযেৰ চাতুমহারাজিকভৰে, এত্থাপি ৰেস্সৰণস্স সহব্যতাৰসেন.

২৮১. আসিসনং আসা, পত্থনা. আসাসীসেন চেত্থ কত্তুকম্যতাকুসলচ্ছন্দং ৰদতি. তেনেৰাহ ‘‘সকদাগামিমগ্গত্থাযা’’তিআদি. যদগ্গেতি এত্থ অগ্গ-সদ্দো আদিপরিযাযোতি আহ ‘‘তং দিৰসং আদিং কত্ৰা’’তি. ‘‘পুরিমং…পে… অৰিনিপাতো’’তি ইদং যথা তত্তকং কালং সুগতিতো সুগতূপপত্তিযেৰ ¶ অহোসি, তথা কতূপচিতকুসলকম্মত্তা. ফুস্সস্স সম্মাসম্বুদ্ধস্স কালতো পভুতি হি সম্ভতৰিৰট্টূপনিস্সযকুসলসম্ভারো এস দেৰপুত্তো. অনচ্ছরিযন্তি অনু অনু অচ্ছরিযং. তেনাহ ‘‘পুনপ্পুনং অচ্ছরিযমেৰা’’তি. সযংপরিসাযাতি সকায পরিসায. ভগৰতো দিট্ঠসদিসমেৰাতি আৰজ্জনসমনন্তরং যথা তে ভগৰতো চতুৰীসতিসতসহস্সমত্তা সত্তা ঞাণগতিতো দিট্ঠা, এৰং তুম্হেহি দিট্ঠসদিসমেৰ. ৰেস্সৰণস্স সম্মুখা সুতং মযাতি ৰদতি.

দেৰসভাৰণ্ণনা

২৮২. ৰস্সূপনাযিকসঙ্গহত্থন্তি ¶ ৰস্সূপনাযিকায আরক্খাসংৰিধানৰসেন ভিক্খূনং সঙ্গহণত্থং ‘‘ৰস্সূপগতা ভিক্খূ এৰং সুখেন সমণধম্মং করোন্তী’’তি, পৰারণসঙ্গহো পনস্স পৰারেত্ৰা সত্থু সন্তিকং গচ্ছন্তানং ভিক্খূনং অন্তরামগ্গে পরিস্সযপরিহরণত্থং. ধম্মস্সৰনত্থং দূরট্ঠানং ¶ গচ্ছন্তেসুপি এসেৰ নযো. অত্তনাপি আগন্ত্ৰা ধম্মস্সৰনত্থং সন্নিপতিযেৰ. এত্থেত্থাতি এত্থ এত্থ অয্যানং ৰসনট্ঠানে.

তদাপীতি ‘‘পুরিমানি ভন্তে দিৰসানী’’তি ৰুত্তকালেপি. এতেনেৰ কারণেনাতি ৰস্সূপনাযিকনিমিত্তমেৰ. তেনাহ পাল়িযং ‘‘তদহুপোসথে পন্নরসে ৰস্সূপনাযিকাযা’’তিআদি. আসনেপি নিসজ্জায সুধম্মায দেৰসভায পঠমং দেৰেসু তাৰতিংসেসু নিসিন্নেসু তস্সা চতূসু দ্ৰারেসু চত্তারো মহারাজানো নিসীদন্তি, ইদং নেসং আসনে নিসজ্জায চারিত্তং হোতি.

যেনত্থেনাতি যেন কিচ্চেন যেন পযোজনেন. আরক্খত্থন্তি আরক্খভূতমত্থং. ৰুত্তং ৰচনং এতেসন্তি ৰুত্তৰচনা, মহারাজানো.

২৮৩. অতিক্কমিত্ৰাতি অভিভৰিত্ৰা.

সনঙ্কুমারকথাৰণ্ণনা

২৮৪. অভিসম্ভৰিতুং অধিগন্তুং অসক্কুণেয্যো অনভিসম্ভৰনীযো. তেনাহ ‘‘অপ্পত্তব্বো’’তিআদি. চক্খুযেৰ পথো রূপদস্সনস্স মগ্গো উপাযোতি চক্খুপথো, তস্মিং চক্খুপথস্মিন্তি আহ ‘‘চক্খুপসাদে’’তি, চক্খুস্স গোচরযোগ্গো ৰা চক্খুপথোতি আহ ‘‘আপাথে ৰা’’তি. নাভিভৰতীতি ন অভিভৰতি, গোচরভাৰং ¶ ন গচ্ছতীতি অত্থো. হেট্ঠা হেট্ঠাতি তাৰতিংসতো পট্ঠায হেট্ঠা হেট্ঠা, ন চাতুমহারাজিকতো পট্ঠায, নাপি ব্রহ্মপারিসজ্জতো পট্ঠায. ‘‘চাতুমহারাজিকা হি তাৰতিংসানং যথা জাতিরূপানি পস্সিতুং সক্কোন্তি, তথা ব্রহ্মানো হেট্ঠিমা উপরিমান’’ন্তি কেচি, তং ন যুত্তং. ন হি হেট্ঠিমা ব্রহ্মানো উপরিমানং মূলপটিসন্ধিরূপং পস্সিতুং সক্কোন্তি, মাপিতমেৰ পস্সিতুং সক্কোন্তীতি দট্ঠব্বং.

সুণন্তোৰ ¶ নিদ্দং ওক্কমীতি গতিযো উপধারেন্তো বহি ৰিসটৰিতক্কৰিচ্ছেদেন সঙ্কোচং আপন্নচিত্ততায. ময্হং অয্যকস্সাতি ভগৰন্তং সন্ধায ৰদতি.

পঞ্চ সিখা এতস্সাতি পঞ্চসিখো, পঞ্চসিখো ৰিয পঞ্চসিখোতি আহ ‘‘পঞ্চসিখগন্ধব্বসদিসো’’তি. মমাযন্তীতি পিযাযন্তি.

২৮৫. সুমুত্তোতি ¶ সরদোসেহি সুট্ঠু মুত্তো. যেহি পিত্তসেম্হাদীহি পলিবুদ্ধত্তা সরো অৰিস্সট্ঠো সিযা, তদভাৰতো ৰিস্সট্ঠোতি দস্সেন্তো আহ ‘‘অপলিবুদ্ধো’’তি. ৰিঞ্ঞাপেতীতি ৰিঞ্ঞেয্যো, অন্তোগধহেতুঅত্থো কত্তুসাধনো এস ৰিঞ্ঞেয্যসদ্দোতি আহ ‘‘অত্থৰিঞ্ঞাপনো’’তি. সরস্স মধুরতা নাম মদ্দৰন্তি আহ ‘‘মধুরো মুদূ’’তি. সৰনং অরহতীতি সৰনীযো. সৰনারহতায চ আপাথসুখতাযাতি আহ ‘‘কণ্ণসুখো’’তি. বিন্দূতি পিণ্ডিতো. আকোটিতভিন্নকংসসদ্দো ৰিয অনেকাৰযৰো অহুত্ৰা নিরৰযৰো, একভাৰোতি অত্থো. তেনাহ ‘‘একগ্ঘনো’’তি, এতেনেৰস্স অৰিসারিতা সংৰণ্ণিতা দট্ঠব্বা. গম্ভীরুপ্পত্তিট্ঠানতায চস্স গম্ভীরতাতি আহ ‘‘নাভিমূলতো’’তিআদি. এৰং সমুট্ঠিতোতি জীৰ্হাদিপ্পহারমত্তসমুট্ঠিতো. অমধুরো চ হোতি উপ্পত্তিট্ঠানানং পরিলহুভাৰতো. ন চ দূরং সাৰেতি ৰীরভাৰাভাৰতো. নিন্নাদী সুৰিপুলভাৰতো সৰিসেসং নিন্নাদো, পাসংসনিন্নাদো ৰা. তেনাহ ‘‘মহামেঘ…পে… যুত্তো’’তি.

পচ্ছিমং পচ্ছিমন্তি দুতিযং, চতুত্থং, ছট্ঠং, অট্ঠমঞ্চ পদং. পুরিমস্স পুরিমস্সাতি যথাক্কমং পঠমস্স, ততিযস্স, পঞ্চমস্স, সত্তমস্স চ. অত্থোযেৰাতি অত্থনিদ্দেসো এৰ. ৰিস্সট্ঠতা হিস্স ৰিঞ্ঞেয্যতায ৰেদিতব্বা, মঞ্জুভাৰো সৰনীযতায, বিন্দুভাৰো অৰিসারিতায, গম্ভীরভাৰো নিন্নাদিতাযাতি. যথাপরিসন্তি এত্থ যথা-সদ্দো পরিমাণৰাচী, ন পকারাদিৰাচীতি আহ ‘‘যত্তকা ¶ পরিসা’’তি, তেন পরিসপ্পমাণং এৰস্স সরো নিচ্ছরতি, অযমস্স ধম্মতাতি দস্সেতি. তেনাহ ‘‘তত্তকমেৰা’’তিআদি.

‘‘যে হি কেচী’’তিআদি ‘‘যাৰঞ্চ সো ভগৰা’’তিআদিনা ৰুত্তস্স অত্থস্স হেতুকিত্তনৰসেন সমত্থনং সরণেসু নেসং নিচ্চসেৰনেন, সীলেসু চ পতিট্ঠাপনেন ছকামসগ্গসম্পত্তিঅনুপ্পাদনতো. তেনাহ ‘‘যে হি কেচি…পে… ৰদতী’’তি. নিব্বেমতিকগহিতসরণেতি মগ্গেনাগতসরণগমনে. তে হি সব্বসো সমুগ্ঘাতিতৰিচিকিচ্ছতায রতনত্তযে অৰেচ্চপ্পসাদেন সমন্নাগতাযেৰ, পোথুজ্জনিকসদ্ধায ৰসেন বুদ্ধাদীনং গুণে ওগাহেত্ৰা ¶ জানন্তি, অপরনেয্যবুদ্ধিনো তে পরিযাযতো নিব্বেমতিকগহিতসরণা ৰেদিতব্বা. গন্ধব্বদেৰগণন্তি গন্ধব্বদেৰসমূহং. তুকা ¶ ৰুচ্চতি খীরিণী যা তুকাতিপি ৰুচ্চতি. তস্সা চুণ্ণং তুকাপিট্ঠং. তং কোট্টেত্ৰা পক্খিত্তং ঘনং নিরন্তরচিতং হুত্ৰা তিট্ঠতি.

ভাৰিতইদ্ধিপাদৰণ্ণনা

২৮৭. সুপঞ্ঞত্তাতি সুট্ঠু পকারেহি ঞাপিতা বোধিতা, অসঙ্করতো ৰা ঠপিতা, তং পন বোধনং, অসঙ্করতো ঠপনঞ্চ অত্থতো দেসনা এৰাতি আহ ‘‘সুকথিতা’’তি. ইজ্ঝনট্ঠেনাতি সমিজ্ঝনট্ঠেন, নিপ্পজ্জনস্স কারণভাৰেনাতি অত্থো. পতিট্ঠানট্ঠেনাতি অধিট্ঠানট্ঠেন. ইদ্ধিযা পাদোতি ইদ্ধিপাদো, ইদ্ধিযা অধিগমুপাযোতি অত্থো. তেন হি যস্মা উপরূপরি ৰিসেসসঙ্খাতং ইদ্ধিং পজ্জন্তি পাপুণন্তি, তস্মা ‘‘পাদো’’তি ৰুচ্চতি. ইজ্ঝতীতি ইদ্ধি, সমিজ্ঝতি নিপ্পজ্জতীতি অত্থো. ইদ্ধি এৰ পাদো ইদ্ধিপাদো, ইদ্ধিকোট্ঠাসোতি অত্থো. এৰং তাৰ ‘‘চত্তারো ইদ্ধিপাদা’’তি এত্থ অত্থো ৰেদিতব্বো. ইদ্ধিপহোনকতাযাতি ইদ্ধিযা নিপ্ফাদনে সমত্থভাৰায. ইদ্ধিৰিসৰিতাযাতি ইদ্ধিযা নিপ্ফাদনে যোগ্যভাৰায. অনেকত্থত্তা হি ধাতূনং যোগ্যত্থো ৰি-পুব্বো ¶ সু-সদ্দো, ৰিসৰনং ৰা পজ্জনং ৰিসৰিতা, তত্থ কামকারিতা ৰিসৰিতা. তেনাহ ‘‘পুনপ্পুন’’ন্তিআদি. ইদ্ধিৰিকুব্বনতাযাতি ৰিকুব্বনিদ্ধিযা ৰিৰিধরূপকরণায. তেনাহ ‘‘নানপ্পকারতো কত্ৰা দস্সনত্থাযা’’তি.

‘‘ছন্দঞ্চ ভিক্খু অধিপতিং করিত্ৰা লভতি সমাধিং, লভতি চিত্তস্সেকগ্গতং, অযং ৰুচ্চতি ছন্দসমাধী’’তি (ৰিভ. ৪৩২) ইমায পাল়িযা ছন্দাধিপতি সমাধি ছন্দসমাধীতি অধিপতিসদ্দলোপং কত্ৰা সমাসো ৰুত্তোতি ৰিঞ্ঞাযতি, অধিপতিসদ্দত্থদস্সনৰসেন পন ‘‘ছন্দহেতুকো, ছন্দাধিকো ৰা সমাধি ছন্দসসমাধী’’তি অট্ঠকথাযংৰুত্তন্তি ৰেদিতব্বং. ‘‘পধানভূতাতি ৰীরিযভূতা’’তি কেচি ৰদন্তি. সঙ্খতসঙ্খারাদিনিৰত্তনত্থঞ্হি পধানগ্গহণন্তি. অথ ৰা তং তং ৰিসেসং সঙ্খরোতীতি সঙ্খারো, সব্বম্পি ৰীরিযং. তত্থ চতুকিচ্চসাধকতো অঞ্ঞস্স নিৰত্তনত্থং পধানগ্গহণন্তি পধানভূতা সেট্ঠভূতাতি অত্থো. চতুব্বিধস্স পন ৰীরিযস্স অধিপ্পেতত্তা বহুৰচননিদ্দেসো কতো. ৰিসুং সমাসযোজনৰসেন যো পুব্বে ইদ্ধিপাদত্থো পাদস্স উপাযত্থতং, কোট্ঠাসত্থতঞ্চ গহেত্ৰা যথাযোগৰসেন ইধ ¶ ৰুত্তো, সো ৰক্খমানানং পটিলাভপুব্বভাগানং কত্তুকরণিদ্ধিভাৰং, উত্তরচূল়ভাজনীযে ৰা ৰুত্তেহি ছন্দাদীহি ইদ্ধিপাদেহি সাধেতব্বায ইদ্ধিযা কত্তিদ্ধিভাৰং, ছন্দাদীনঞ্চ করণিদ্ধিভাৰং সন্ধায ৰুত্তোতি ৰেদিতব্বো, তস্মা ‘‘ইজ্ঝনট্ঠেন ইদ্ধী’’তি এত্থ কত্তুঅত্থো, করণত্থো চ একজ্ঝং গহেত্ৰা ¶ ৰুত্তোতি কত্তুঅত্থং তাৰ দস্সেতুং ‘‘নিপ্ফত্তিপরিযাযেন ইজ্ঝনট্ঠেন ৰা’’তি ৰত্ৰা ইতরং দস্সেন্তো ‘‘ইজ্ঝন্তি ¶ এতাযা’’তিআদিমাহ. ৰুত্তন্তি কত্থ ৰুত্তং? ইদ্ধিপাদৰিভঙ্গপাঠে. (ৰিভ. ৪৩৪) তথাভূতস্সাতি তেনাকারেন ভূতস্স, তে ছন্দাদিধম্মে পটিলভিত্ৰা ঠিতস্সাতি অত্থো. ‘‘ৰেদনাক্খন্ধো’’তিআদীহি ছন্দাদযো অন্তোকত্ৰা চত্তারোপি খন্ধা কথিতা. সেসেসূতি সেসিদ্ধিপাদেসু.

ৰীরিযিদ্ধিপাদনিদ্দেসে ‘‘ৰীরিযসমাধিপধানসঙ্খারসমন্নাগত’’ন্তি দ্ৰিক্খত্তুং ৰীরিযং আগতং. তত্থ পুরিমং সমাধিৰিসেসনং ‘‘ৰীরিযাধিপতি সমাধি ৰীরিযসমাধী’’তি, দুতিযং সমন্নাগমঙ্গদস্সনং. দ্ৰেযেৰ হি সব্বত্থ সমন্নাগমঙ্গানি, সমাধি, পধানসঙ্খারো চ. ছন্দাদযো হি সমাধিৰিসেসনানি, পধানসঙ্খারো পন পধানৰচনেনেৰ ৰিসেসিতো, ন ছন্দাদীহীতি ন ইধ ৰীরিযাধিপতিতা পধানসঙ্খারস্স ৰুত্তা হোতি. ৰীরিযঞ্চ সমাধিং ৰিসেসেত্ৰা ঠিতমেৰ, সমন্নাগমঙ্গৰসেন পন পধানসঙ্খারৰচনেন ৰুত্তন্তি নাপি দ্ৰীহি ৰীরিযেহি সমন্নাগমো ৰুত্তো হোতি. যস্মা পন ছন্দাদীহি ৰিসিট্ঠো সমাধি, তথাৰিসিট্ঠেনেৰ চ তেন সম্পযুত্তো পধানসঙ্খারো, সেসধম্মা চ, তস্মা সমাধিৰিসেসনানং ৰসেন চত্তারো ইদ্ধিপাদা ৰুত্তা, ৰিসেসনভাৰো চ ছন্দাদীনং তংতংঅৰস্সযদস্সনৰসেন হোতীতি ‘‘ছন্দসমাধি…পে… ইদ্ধিপাদ’’ন্তি এত্থ নিস্সযত্থেপি পাদ-সদ্দে উপাযত্থেন ছন্দাদীনং ইদ্ধিপাদতা ৰুত্তা হোতি. তেনেৰ হি অভিধম্মে উত্তরচূল়ভাজনীযে (ৰিভ. ৪৫৬) ‘‘চত্তারো ইদ্ধিপাদা ছন্দিদ্ধিপাদো’’তিআদিনা ছন্দাদীনমেৰ ইদ্ধিপাদতা ৰুত্তা. পঞ্হপুচ্ছকে (ৰিভ. ৪৫৭ আদযো) ‘‘চত্তারো ইদ্ধিপাদা ইধ ভিক্খু ছন্দসমাধী’’তিআদিনা ¶ চ উদ্দেসং কত্ৰাপি পুন ছন্দাদীনংযেৰ কুসলাদিভাৰো ৰিভত্তো. উপাযিদ্ধিপাদদস্সনত্থমেৰ হি নিস্সযিদ্ধিপাদদস্সনং কতং, অঞ্ঞথা চতুব্বিধতা ন সিযাতি. অযমেত্থ পাল়িৰসেন অত্থৰিনিচ্ছযো ৰেদিতব্বো. ইদানি পটিলাভপুব্বভাগানং ৰসেন ইদ্ধিপাদে ৰিভজিত্ৰা দস্সেতুং ‘‘অপিচা’’তিআদি ¶ ৰুত্তং, তং সুৰিঞ্ঞেয্যমেৰ. ইধ ইদ্ধিপাদকথা সঙ্খেপেনেৰ ৰুত্তাতি আহ ‘‘ৰিত্থারেন পন…পে… ৰুত্তা’’তি.

কেচীতি অভযগিরিৰাসিনো. তেসু হি একচ্চে ‘‘ইদ্ধি নাম অনিপ্ফন্না’’তি ৰদন্তি, একচ্চে ‘‘ইদ্ধিপাদো পন অনিপ্ফন্নো’’তি ৰদন্তি, অনিপ্ফন্নোতি চ পরমত্থতো অসিদ্ধো, নত্থীতি অত্থো. আভতোতি অভিধম্মপাঠতো (ৰিভ. ৪৫৮) দীঘনিকাযট্ঠকথাযং (দী. নি. অট্ঠ. ২.২৮৭) আনীতো পুরিমনযতো অঞ্ঞেনাকারেন দেসনায পৰত্তত্তা. ছন্দো এৰ ইদ্ধিপাদো ছন্দিদ্ধিপাদো. এসেৰ নযো সেসেসুপি. ইমে পনাতি ইমস্মিং সুত্তে আগতা ইদ্ধিপাদা ¶ . রট্ঠপালত্থেরো (ম. নি. ২.২৯৩; অ. নি. অট্ঠ. ১.১.২১০; অপ. অট্ঠ. ২.রট্ঠপালত্থেরঅপদানৰণ্ণনায ৰিত্থারো) ‘‘ছন্দে সতি কথং নানুজানিস্সন্তী’’তি সত্তাহং ভত্তানি অভুঞ্জিত্ৰা মাতাপিতরো অনুজানাপেত্ৰা পব্বজিত্ৰা ছন্দমেৰ অৰস্সায লোকুত্তরং ধম্মং নিব্বত্তেসীতি আহ ‘‘রট্ঠপালত্থেরো…পে… নিব্বত্তেসী’’তি. সোণত্থেরো (মহাৰ. ২৪৩; অ. নি. ৬.৫৫; থেরগা. অট্ঠ. তেরসনিপাত; অপ. অট্ঠ. ২.সোণকোটিৰীসত্থেরঅপদানৰণ্ণনায ৰিত্থারো) ভাৰনমনুযুত্তো আরদ্ধৰীরিযো পরমসুখুমালো পাদেসু ফোটেসু জাতেসুপি ৰীরিযং নপ্পটিপস্সম্ভেসীতি আহ ‘‘সোণত্থেরো ৰীরিযং ধুরং কত্ৰা’’তি. সম্ভূতত্থেরো (থেরগা. অট্ঠ. ২.সম্মূতত্থেরগাথাৰণ্ণনায ৰিত্থারো) ‘‘চিত্তৰতো কিং নাম ন সিজ্ঝতী’’তি চিত্তং পুব্বঙ্গমং কত্ৰা ভাৰনং আরাধেসীতি আহ ‘‘সম্ভূতত্থেরো চিত্তং ধুরং কত্ৰা’’তি. মোঘত্থেরো ৰীমংসং অৰস্সযি, তস্মা তস্স ভগৰা ‘‘সুঞ্ঞতো লোকং অৰেক্খস্সূ’’তি (সু. নি. ১১২৫; বু. ৰং. ৫৪.৩৫৩; মহা. নি. ১৮৬; চূল়নি. মোঘরাজমাণৰপুচ্ছা ১৪৪; মোঘরাজমাণৰপুচ্ছানিদ্দেসে ৮৮; নেত্তি. ৫; পেটকো. ২২, ৩১) সুঞ্ঞতাকথং কথেসি, পঞ্ঞানিস্সিতমাননিগ্গহত্থং, পঞ্ঞায পরিগ্গহত্থঞ্চ দ্ৰিক্খত্তুং পুচ্ছিতো সমানো পঞ্হং ¶ কথেসি. তেনাহ ‘‘আযস্মা মোঘরাজা ৰীমংসং ধুরং কত্ৰা’’তি.

পুনপ্পুনং ছন্দুপ্পাদনং পেসনং ৰিয হোতীতি ছন্দস্স উপট্ঠানসদিসতা ৰুত্তা.

পরক্কমেনাতি পরক্কমসীসেন সূরভাৰং ৰদতি. থামভাৰতো চ ৰীরিযস্স সূরভাৰসদিসতা দট্ঠব্বা.

চিন্তনপ্পধানত্তা চিত্তস্স মন্তসংৰিধানসদিসতা ৰুত্তা.

জাতিসম্পত্তি ¶ নাম ৰিসিট্ঠজাতিতা. ‘‘সব্বধম্মেসু চ পঞ্ঞা সেট্ঠা’’তি ৰীমংসায জাতিসম্পত্তিসদিসতা ৰুত্তা. সম্মোহৰিনোদনিযং (ৰিভ. অট্ঠ. ৪৩৩) পন চিত্তিদ্ধিপাদস্স জাতিসম্পত্তিসদিসতা, ৰীমংসিদ্ধিপাদস্স মন্তবলসদিসতা চ যোজিতা.

অনেকং ৰিহিতং ৰিধং এতস্সাতি অনেকৰিহিতন্তি আহ ‘‘অনেকৰিধ’’ন্তি. ৰিধ-সদ্দো কোট্ঠাসপরিযাযো ‘‘একৰিধেন ঞাণৰত্থূ’’তিআদীসু (ৰিভ. ৭৫১) ৰিযাতি আহ ‘‘ইদ্ধিৰিধন্তি ইদ্ধিকোট্ঠাস’’ন্তি.

তিৰিধওকাসাধিগমৰণ্ণনা

২৮৮. ‘‘সুখস্সা’’তি ¶ ইদং তিণ্ণম্পি সুখানং সাধারণৰচনন্তি আহ ‘‘ঝানসুখস্স মগ্গসুখস্স ফলসুখস্সা’’তি. নানপ্পনাপত্ততায পন অপ্পধানত্তা উপচারজ্ঝানসুখস্স, ৰিপস্সনাসুখস্স চেত্থ অগ্গহণং. পুরিমেসু তাৰ দ্ৰীসু ওকাসাধিগমেসু তীণিপি সুখানি লব্ভন্তি, ততিযে পন কথন্তি? তত্থ কামং তীণি ন লব্ভন্তি, দ্ৰে পন লব্ভন্তিযেৰ. যথালাভৰসেন হেতং ৰুত্তং. ‘‘সক্খরকথলম্পি মচ্ছগুম্বম্পি চরন্তম্পি তিট্ঠন্তম্পী’’তিআদীসু (দী. নি. ১.২৪৯; ম. নি. ১.৪৩৩; ২.২৫৯; অ. নি. ১.৪৫, ৪৬) ৰিয. সংসট্ঠোতি সংসগ্গং উপগতো সমঙ্গীভূতো, সো পন তেহি সমন্নাগতচিত্তোপি হোতীতি ৰুত্তং ‘‘সম্পযুত্তচিত্তো’’তি. অরিযধম্মন্তি অরিযভাৰকরং ধম্মং. উপাযতোতি ৰিধিতো. পথতোতি মগ্গতো. কারণতোতি হেতুতো. যেন হি ৰিধিনা ধম্মানুধম্মপটিপত্তি হোতি, সো ¶ উপেতি এতেনাতি উপাযো, সো তদধিগমস্স মগ্গভাৰতো পথো, তস্স করণতো কারণন্তি চ ৰুচ্চতি.

‘‘অনিচ্চন্তিআদিৰসেন মনসি করোতী’’তি সঙ্খেপতো ৰুত্তমত্থং ৰিৰরিতুং ‘‘যোনিসো মনসিকারো নামা’’তিআদি ৰুত্তং. তত্থ উপাযমনসিকারোতি কুসলধম্মপ্পৰত্তিযা কারণভূতো মনসিকারো. পথমনসিকারোতি তস্স এৰ মগ্গভূতো মনসিকারো. অনিচ্চেতি আদিঅন্তৰন্ততায, অনচ্চন্তিকতায চ অনিচ্চে তেভূমকে সঙ্খারে ‘‘অনিচ্চ’’ন্তি মনসিকারোতি যোজনা. এসেৰ নযো সেসেসুপি. অযং পন ৰিসেসো তস্মিংযেৰ উদযব্বযপটিপীল়নতায দুক্খনতো, দুক্খমতো চ দুক্খে, অৰসৰত্তনত্থেন, অনত্তসভাৰতায চ অনত্তনি, অসুচিসভাৰতায ¶ অসুভে. সব্বম্পি হি তেভূমকং সঙ্খতং কিলেসাসুচিপগ্ঘরণতো ‘‘অসুভ’’ন্ত্ৰেৰ ৰত্তুং অরহতি. সচ্চানুলোমিকেন ৰাতি সচ্চাভিসমযস্স অনুলোমনৰসেন. ‘‘চিত্তস্স আৰট্টনা’’তিআদিনা আৰজ্জনায পচ্চযভূতা ততো পুরিমুপ্পন্না মনোদ্ৰারিকা কুসলজৰনপ্পৰত্তি ফলৰোহারেনেৰ তথা ৰুত্তা. তস্সা হি ৰসেন সা কুসলুপ্পত্তিযা উপনিস্সযো হোতীতি. আৰজ্জনা হি ভৰঙ্গচিত্তং আৰট্টেতীতি চিত্তস্স আৰট্টনা, অনু অনু আৰট্টেতীতি অন্ৰাৰট্টনা. ভৰঙ্গারম্মণতো অঞ্ঞং আভুজতীতি আভোগো. সমন্নাহরতীতি সমন্নাহারো. তদেৰারম্মণং অত্তানং অনুবন্ধিত্ৰা অনুবন্ধিত্ৰা উপ্পজ্জমানে মনসি করোতি ঠপেতীতি মনসিকারো. অযং ৰুচ্চতীতি অযং উপাযমনসিকারলক্খণো যোনিসোমনসিকারো নাম ৰুচ্চতি, যস্স ৰসেন পুগ্গলো দুক্খাদীনি সচ্চানি আৰজ্জিতুং সক্কোতি.

অসংসট্ঠোতি ¶ ন সংসট্ঠো কামাদীহি ৰিৰিত্তো ৰিনাভূতো. কামাদিৰিসংসগ্গহেতু উপ্পজ্জনকসুখং নাম ৰিৰেকজং পীতিসুখন্তি ¶ আহ ‘‘পঠমজ্ঝানসুখ’’ন্তি. কামং পঠমজ্ঝানসুখম্পি সোমনস্সমেৰ, সুত্তেসু পন তং কাযিকসুখস্সাপি পচ্চযভাৰতো ৰিসেসতো ‘‘সুখ’’ন্ত্ৰেৰ ৰুচ্চতীতি ইধাপি ঝানভূতং সোমনস্সং সুখন্তি, ইতরং সোমনস্সং. তেন ৰুত্তং ‘‘সুখা’’তি. হেতুম্হি নিস্সক্কৰচনন্তি আহ ‘‘ঝানসুখপচ্চযা’’তি. অপরাপরং সোমনস্সন্তি ঝানাধিগমহেতু পচ্চৰেক্খণাদিৰসেন পুনপ্পুনং উপ্পজ্জনকসোমনস্সং.

পমোদনং পমুদো, তরুণপীতি, ততো পমুদা. ‘‘পামোজ্জং পীতত্থাযা’’তিআদীসু তরুণপীতি ‘‘পামোজ্জ’’ন্তি ৰুচ্চতি, ইধ পন পকট্ঠো মুদো পমুদো পামোজ্জন্তি অধিপ্পেতং, তঞ্চ সোমনস্সরহিতং নত্থীতি অৰিনাভাৰিতায ‘‘বলৰতরং পীতিসোমনস্স’’ন্তি ৰুত্তং. ঝানস্স উজুৰিপচ্চনীকতং সন্ধায ‘‘পঞ্চ নীৰরণানি ৰিক্খম্ভেত্ৰা’’তি ৰুত্তং. ঝানং পন তদেকট্ঠে সব্বেপি কিলেসে, সব্বেপি অকুসলে ধম্মে ৰিক্খম্ভেতিযেৰ, অত্তনো ওকাসং গহেত্ৰা তিট্ঠতি পটিপক্খধম্মেহি অনভিভৰনীযতো. তস্মাতি ওকাসগ্গহণতো, লদ্ধোকাসতাযাতি অত্থো. মগ্গফলসুখাধিগমায ওকাসভাৰতো ৰা ওকাসো, অস্স অধিগমো ওকাসাধিগমো. পুরিমপক্খে পন ওকাসং অৰসরং অধিগচ্ছতি এতেনাতি ওকাসাধিগমো.

রূপসভাৰতায ¶ , একন্তরূপাধীনৰুত্তিতায, সৰিপ্ফারিকতায চ আনাপানৰিতক্কৰিচারানং থূলভাৰং অনুজানন্তো ‘‘কাযৰচীসঙ্খারা তাৰ ওল়ারিকা হোন্তূ’’তি আহ. তব্বিধুরতায পন একচ্চানং ৰেদনাসঞ্ঞানং থূলতং অননুজানন্তো ‘‘চিত্তসঙ্খারা কথং ওল়ারিকা’’তি আহ. ইতরো ‘‘অপ্পহীনত্তা’’তি কারণং ৰত্ৰা ‘‘কাযসঙ্খারা হী’’তিআদিনা তমত্থং ৰিৰরতি. তেতি চিত্তসঙ্খারা. অপ্পহীনা সঙ্খারা লব্ভমানসঙ্খারনিমিত্ততায ‘‘ওল়ারিকা’’তি ৰত্তুং অরহন্তি, পহীনা পন তদভাৰতো ‘‘সুখুমা’’তি আহ ‘‘পহীনে উপাদায ¶ অপ্পহীনত্তা ওল়ারিকা নাম জাতা’’তি. পাল়িযং ‘‘কাযসঙ্খারানং পটিপ্পস্সদ্ধিযা’’তি ৰুত্তত্তা ‘‘সুখন্তি চতুত্থজ্ঝানিকফলসমাপত্তিসুখ’’ন্তি ৰুত্তং. ‘‘চিত্তসঙ্খারানং পটিপ্পস্সদ্ধিযা’’তি পন ৰুত্তত্তা ‘‘নিরোধা ৰুট্ঠহন্তস্সা’’তি ৰুত্তং. ৰচীসঙ্খারপটিপ্পস্সদ্ধি কাযসঙ্খারপটিপ্পস্সদ্ধিযাৰ সিদ্ধাতি ৰেদিতব্বা. তেনেৰাহ ‘‘দুতিয…পে… ৰিসুং ন ৰুত্তানী’’তি. পাল়িযং পন অত্থতো সিদ্ধাপি সুপাকটভাৰেন ৰিভাৰেতুং সরূপতো গণ্হাতি. ন হি অরিযৰিনযে অত্থাপত্তিৰিভাৰনা অভিধম্মদেসনায পকতীতি. যথা নীৰরণৰিক্খম্ভনঞ্চ পঠমস্স ঝানস্স অধিগমায উপাযো, এৰং সুখদুক্খৰিক্খম্ভনং চতুত্থস্স ¶ ঝানস্স অধিগমায উপাযোতি ‘‘চতুত্থজ্ঝানং সুখং দুক্খং ৰিক্খম্ভেত্ৰা’’তি ৰুত্তং. সেসং হেট্ঠা ৰুত্তনযমেৰ.

অৰিজ্জারাগাদীহি সহ ৰজ্জেহীতি সাৰজ্জং, অকুসলং, তদভাৰতো অনৰজ্জং কুসলং. অত্তনো হিতসুখং আকঙ্খন্তেন সেৰনীযতো সেৰিতব্বং, কুসলং, তব্বিপরিযাযতো ন সেৰিতব্বং, অকুসলং. লামকভাৰেন হীনং, অকুসলং, সেট্ঠভাৰেন পণীতং, কুসলন্তি সাৰজ্জদুকাদযো তযোপি দুকা যথারহং এতেসং কুসলাকুসলকম্মপথানং ৰসেনেৰ ৰেদিতব্বা. সব্বন্তি যথাৰুত্তং সব্বং চতূহি দুকেহি সঙ্গহিতং ধম্মজাতং. যথারহং কণ্হঞ্চ সুক্কঞ্চ পটিদ্ৰন্দিভাৰতো, সপ্পটিভাগঞ্চ অপ্পটিভাগঞ্চ অদ্ৰযভাৰতো. ৰট্টপটিচ্ছাদিকা অৰিজ্জা পহীযতি চতুন্নং অরিযসচ্চানং সম্মদেৰ পটিৰিজ্ঝনতো. ততো এৰ অরহত্তমগ্গৰিজ্জা উপ্পজ্জতি. সুখন্তি এৰং কম্মপথমুখেন তেভূমকধম্মে সম্মসিত্ৰা ৰিপস্সনং উস্সুক্কাপেত্ৰা মগ্গপটিপাটিযা অরহত্তে পতিট্ঠহন্তস্স যং অরহত্তমগ্গসুখঞ্চেৰ অরহত্তফলসুখঞ্চ, তং ইধ ‘‘সুখ’’ন্তি অধিপ্পেতং. অন্তোগধা এৰ নানন্তরিযভাৰতো.

অট্ঠতিংসারম্মণৰসেনাতি ¶ ¶ পাল়িযং আগতানং অট্ঠতিংসায কম্মট্ঠানানং ৰসেন. ৰিত্থারেত্ৰা কথেতব্বা পঠমজ্ঝানাদিৰসেন আগতত্তাতি অধিপ্পাযো. ‘‘কথ’’ন্তিআদিনা তমেৰ ৰিত্থারেত্ৰা কথনং নযতো দস্সেতি. ‘‘চতুৰীসতিযা ঠানেসূ’’তিআদীসু যং ৰত্তব্বং, তং মহাপরিনিব্বানৰণ্ণনাযং (দী. নি. অট্ঠ. ২.২১৯) ৰুত্তমেৰ. ‘‘নিরোধসমাপত্তিং পাপেত্ৰা’’তি ইমিনা অরূপজ্ঝানানিপি গহিতানি হোন্তি তেহি ৰিনা নিরোধসমাপত্তিসমাপজ্জনস্স অসম্ভৰতো, চতুত্থজ্ঝানসভাৰত্তা চ তেসং. দস উপচারজ্ঝানানীতি ঠপেত্ৰা কাযগতাসতিং আনাপানঞ্চ অট্ঠ অনুস্সতিযো, সঞ্ঞাৰৰত্থানঞ্চাতি দস উপচারজ্ঝানানি. অধিসীলং নাম সমাধিসংৰত্তনিযন্তি তস্স হেট্ঠিমন্তেন পঠমজ্ঝানং পরিযোসানন্তি ৰুত্তং ‘‘অধিসীলসিক্খা পঠমং ওকাসাধিগমং ভজতী’’তি. অধিচিত্তং নাম চতুত্থজ্ঝাননিট্ঠং তদন্তোগধত্তা অরূপজ্ঝানানং, তপ্পরিযোসানত্তা ফলজ্ঝানানন্তি ৰুত্তং ‘‘অধিচিত্তসিক্খা দুতিয’’ন্তি. মত্থকপ্পত্তা অধিপঞ্ঞাসিক্খা নাম অগ্গমগ্গৰিজ্জাতি আহ ‘‘অধিপঞ্ঞাসিক্খা ততিয’’ন্তি. সিক্খত্তযৰসেন তযো ওকাসাধিগমে নীহরন্তেন যথারহং তংতংসুত্তৰসেনপি নীহরিতব্বন্তি দস্সেন্তো ‘‘সামঞ্ঞফলেপী’’তিআদিমাহ.

যদগ্গেন চ তিস্সো সিক্খা যথাক্কমং তযো ওকাসাধিগমে ভজন্তি, তদগ্গেন তপ্পধানত্তা যথাক্কমং তীণি পিটকানি তে ভজন্তীতি দস্সেতুং ‘‘তীসু পনা’’তিআদি ৰুত্তং. তীণি ¶ পিটকানি ৰিভজিত্ৰাতি তিণ্ণং ওকাসাধিগমানং ৰসেন যথানুপুব্বং তীণি পিটকানি ৰিত্থারেত্ৰা কথেতুং লভিস্সামাতি. সমোধানেত্ৰাতি সমাযোজেত্ৰা তত্থ ৰুত্তমত্থং ইমস্স সুত্তস্স অত্থভাৰেন সমানেত্ৰা. দুক্কথিতন্তি অসম্বন্ধকথনেন, অতিপপঞ্চকথনেন ৰা দুট্ঠু কথিতন্তি ন সক্কা ৰত্তুং তথাকথনস্সেৰ সুকথনভাৰতোতি আহ ‘‘তেপিটকং…পে… সুকথিতং হোতী’’তি.

চতুসতিপট্ঠানৰণ্ণনা

২৮৯. ন কেৰলং অভিধম্মপরিযাযেনেৰ কুসলট্ঠো গহেতব্বো, অথ খো বাহিতিকপরিযাযেন পীতি আহ ‘‘ফলকুসলস্স চা’’তি. খেমট্ঠেনাতি চতূহিপি যোগেহি অনুপদ্দৰভাৰেন ¶ . সম্মা সমাহিতোতি সমথৰসেন ¶ চেৰ ৰিপস্সনাৰসেন চ সুট্ঠু সমাহিতো. একগ্গচিত্তোতি ৰিক্খেপস্স দূরসমুস্সারিতত্তা একগ্গতং অৰিক্খেপং পত্তচিত্তো. অত্তনো কাযতোতি অজ্ঝত্তং কাযে কাযানুপস্সনাৰসেন সম্মা সমাহিতচিত্তো সমানো ‘‘সমাহিতো যথাভূতং পজানাতি পস্সতী’’তি (সং. নি. ৩.৫; ৫.১০৭১, ১০৭২; নেত্তি. ৪০; মি. প. ১.১৪) ৰচনতো. তত্থ ঞাণদস্সনং নিব্বত্তেন্তো ততো বহিদ্ধা পরস্স কাযেপি ঞাণদস্সনং নিব্বত্তেতি. তেনাহ ‘‘পরস্স কাযাভিমুখং ঞাণং পেসেতী’’তি. সম্মা ৰিপ্পসীদতীতি সম্মা সমাধানপচ্চযেন অভিপ্পসাদেন ঞাণূপসঞ্হিতেন অজ্ঝত্তং কাযং ওকপ্পেতি. সব্বত্থাতি সব্বট্ঠানেসু. সতি কথিতাতি যোজনা. লোকিযলোকুত্তরমিস্সকা কথিতা অনুপস্সনাঞাণদস্সনানং তদুভযসাধারণভাৰতো.

সত্তসমাধিপরিক্খারৰণ্ণনা

২৯০. এত্থাতি ইমিস্সা কথায. ঝানক্খস্স ৰীরিযচক্কস্স অরিযমগ্গরথস্স সীলং ৰিভূসনভাৰেন ৰুত্তন্তি আহ ‘‘অলঙ্কারো পরিক্খারো নামা’’তি. সত্তহি নগরপরিক্খারেহীতি নগরং পরিৰারেত্ৰা রক্খণকেহি কতপরিক্খেপো, পরিখা, উদ্দাপো, পাকারো, এসিকা, পলিঘা, পাকারপক্খণ্ডিলন্তি ইমেহি সত্তহি নগরপরিক্খারেহি. সম্ভরীযতি ফলং এতেনাতি সম্ভারো, কারণং. ভেসজ্জঞ্হি ব্যাধিৰূপসমনেন জীৰিতস্স কারণং. পরিৰারপরিক্খারৰসেনাতি পরিৰারসঙ্খাতপরিক্খারৰসেন. পরিক্খারো হি সম্মাদিট্ঠিযাদযো মগ্গধম্মা সম্মাসমাধিস্স সহজাতাদিপচ্চযভাৰেন পরিকরণতো অভিসঙ্খরণতো. উপেচ্চ নিস্সীযতীতি উপনিসা, সহ উপনিসাযাতি সউপনিসোতি ¶ আহ ‘‘সউপনিস্সযো’’তি, সহকারীকারণভূতো ধম্মসমূহো ইধ ‘‘উপনিস্সযো’’তি ¶ অধিপ্পেতো. সম্মা পসত্থা সুন্দরা দিট্ঠি এতস্সাতি সম্মাদিট্ঠি, পুগ্গলো, তস্স সম্মাদিট্ঠিস্স. সো পন যস্মা পতিট্ঠিতসম্মাদিট্ঠিকো, তস্মা ৰুত্তং ‘‘সম্মাদিট্ঠিযং ঠিতস্সা’’তি. সম্মাসঙ্কপ্পো পহোতীতি মগ্গসম্মাদিট্ঠিযা দুক্খাদীসু পরিজাননাদিকিচ্চং সাধেন্তিযা কামৰিতক্কাদিকে সমুগ্ঘাটেন্তো সম্মাসঙ্কপ্পো যথা অত্তনো কিচ্চসাধনে পহোতি, তথা পৰত্তিং পনস্স দস্সেন্তো আহ ‘‘সম্মাসঙ্কপ্পো পৰত্ততী’’তি. এস নযো সব্বপদেসূতি ‘‘সম্মাসঙ্কপ্পস্স সম্মাৰাচা পহোতী’’তিআদীসু সেসপদেসু যথাৰুত্তমত্থং অতিদিসতি.

এত্থ ¶ চ যস্মা নিব্বানাধিগমায পটিপন্নস্স যোগিনো বহূপকারা সম্মাদিট্ঠি. তথা হি সা ‘‘পঞ্ঞাপজ্জোতো, পঞ্ঞাসত্থ’’ন্তি চ ৰুত্তা. তায হি সো অৰিজ্জন্ধকারং ৰিধমিত্ৰা কিলেসচোরে ঘাতেন্তো খেমেন নিব্বানং পাপুণাতি, তস্মা অরিযমগ্গকথাযং সম্মাদিট্ঠি আদিতো গয্হতি, ইধ পন পুগ্গলাধিট্ঠানদেসনায ‘‘সম্মাদিট্ঠিস্সা’’তি ৰুত্তং. যস্মা পন সম্মাদিট্ঠিপুগ্গলো নেক্খম্মসঙ্কপ্পাদিৰসেন সম্মদেৰ সঙ্কপ্পেতি, ন মিচ্ছাকামসঙ্কপ্পাদিৰসেন, তস্মা সম্মাদিট্ঠিস্স সম্মাসঙ্কপ্পো পহোতি. যস্মা চ সম্মাসঙ্কপ্পো সম্মাৰাচায উপকারকো. যথাহ ‘‘পুব্বে খো গহপতি ৰিতক্কেত্ৰা ৰিচারেত্ৰা পচ্ছা ৰাচং ভিন্দতী’’তি, (সং. নি. ২.৩৪৮) তস্মা সম্মাসঙ্কপ্পস্স সম্মাৰাচা পহোতি. যস্মা পন ‘‘ইদঞ্চিদঞ্চ করিস্সামা’’তি হি পঠমং ৰাচায সংৰিদহিত্ৰা যেভুয্যেন তে তে কম্মন্তা সম্মা পযোজীযন্তি, তস্মা ৰাচা কাযকম্মস্স উপকারিকাতি সম্মাৰাচস্স সম্মাকম্মন্তো পহোতি. যস্মা পন চতুব্বিধং ৰচীদুচ্চরিতং, তিৰিধঞ্চ কাযদুচ্চরিতং পহায উভযং সুচরিতং পূরেন্তস্সেৰ আজীৰট্ঠমকসীলং পূরতি, ন ইতরস্স ¶ , তস্মা সম্মাৰাচস্স সম্মাকম্মন্তস্স চ সম্মাআজীৰো পহোতি. ৰিসুদ্ধিদিট্ঠিসমুদাগতসম্মাআজীৰস্স যোনিসো পধানস্স সম্ভৰতো সম্মাআজীৰস্স সম্মাৰাযামো পহোতি. যোনিসো পদহন্তস্স কাযাদীসু চতূসু ৰত্থূসু সতি সূপট্ঠিতা হোতীতি সম্মাৰাযামস্স সম্মাসতি পহোতি. যস্মা এৰং সূপট্ঠিতা সতি সমাধিস্স উপকারানুপকারানং ধম্মানং গতিযো সমন্নেসিত্ৰা পহোতি একত্তারম্মণে চিত্তং সমাধাতুং, তস্মা সম্মাসতিস্স সম্মাসমাধি পহোতীতি. অযঞ্চ নযো পুব্বভাগে নানাক্খণিকানং সম্মাদিট্ঠিআদীনং ৰসেন ৰুত্তো, মগ্গক্খণে পন সম্মাদিট্ঠিআদীনং তস্স তস্স সহজাতাদিৰসেন ৰুত্তো ‘‘সম্মাদিট্ঠিস্স সম্মাসঙ্কপ্পো পহোতী’’তিআদীনং পদানমত্থো যুত্তো, অযমেৰ চ ইধাধিপ্পেতো. তেনাহ ‘‘অযং পনত্থো’’তিআদি.

মগ্গঞাণেতি মগ্গপরিযাপন্নঞাণে ঠিতস্স তংসমঙ্গিনো. মগ্গপঞ্ঞা হি চতুন্নং সচ্চানং সম্মাদস্সনট্ঠেন ‘‘মগ্গসম্মাদিট্ঠী’’তি ৰুত্তা, সা এৰ নেসং যাথাৰতো জাননতো পটিৰিজ্ঝনতো ইধ ¶ ‘‘মগ্গঞাণ’’ন্তিপি ৰুত্তা. মগ্গৰিমুত্তীতি মগ্গেন কিলেসানং ৰিমুচ্চনং সমুচ্ছেদপ্পহানমেৰ. ফলসম্মাদিট্ঠি এৰ ¶ ‘‘ফলসম্মাঞাণ’’ন্তি পরিযাযেন ৰুত্তং, পরিযাযৰচনঞ্চ ৰুত্তনযানুসারেন ৰেদিতব্বং. ফলৰিমুত্তি পন পটিপ্পস্সদ্ধিপ্পহানং দট্ঠব্বং.

অমতস্স দ্ৰারাতি অরিযমগ্গমাহ. সো পন ৰিনা চ আচরিযমুট্ঠিনা অনন্তরং অবাহিরং করিত্ৰা যাৰদেৰ মনুস্সেহি সুপ্পকাসিতত্তা ৰিৰটো. ধম্মৰিনীতাতি অরিযধম্মে ৰিনীতা. সো পনেত্থ কিলেসানং সমুচ্ছেদৰিনযৰসেন ৰেদিতব্বোতি আহ ‘‘সম্মানিয্যানেন নিয্যাতা’’তি.

অত্থীতি পুথুত্থৰিসযং নিপাতপদং ‘‘অত্থি ¶ ইমস্মিং কাযে কেসা’’তিআদীসু (দী. নি. ২.৩৭৭; ম. নি. ১.১১০; ৩.১৫৪; সং. নি. ৪.১২৭; অ. নি. ৬.২৯; ১০.৬০; ৰিভ. ৩৫৬; খু. পা. ২.১.দ্ৰত্তিংসআকার; নেত্তি. ৪৭) ৰিযাতি আহ ‘‘অনাগামিনো চ অত্থী’’তি. তেনেৰাহ ‘‘অত্থি চেৰেত্থ সকদাগামিনো’’তি. বহিদ্ধা সংযোজনপচ্চযো নিব্বত্তিহেতুভূতো পুঞ্ঞভাগো এতিস্সা অত্থীতি পুঞ্ঞভাগা, অতিসযৰিসিট্ঠো চেত্থ অত্থিঅত্থো ৰেদিতব্বো. ওত্তপ্পমানোতি উত্তসন্তো ভাযন্তো. ন পন নত্থি, অত্থি এৰাতি দীপেতি.

২৯১. অস্সাতি ৰেস্সৰণস্স. লদ্ধি পন ন অত্থি পটিৰিদ্ধসচ্চত্তা. ‘‘অভিসমযে ৰিসেসো নত্থী’’তি এতেন সব্বেপি সব্বঞ্ঞুগুণা সব্ববুদ্ধানং সদিসা এৰাতি দস্সেতি.

২৯২. কারণস্স একরূপত্তা ইমানি পন পদানীতি ন কেৰলং ‘‘তযিদং ব্রহ্মচরিয’’ন্তিআদীনি পদানি, অথ খো ‘‘ইমমত্থং জনৰসভো যক্খো’’তিআদীনি পদানি পীতি.

জনৰসভসুত্তৰণ্ণনায লীনত্থপ্পকাসনা.

৬. মহাগোৰিন্দসুত্তৰণ্ণনা

২৯৩. পঞ্চকুণ্ডলিকোতি ¶ ¶ ¶ ৰিস্সট্ঠপঞ্চৰেণিকো. চতুমগ্গট্ঠানেসূতি চতুন্নং মগ্গানং ৰিনিৰিজ্ঝিত্ৰা গতট্ঠানেসু. তত্থ হি কতা সালাদযো চতূহি দিসাহি আগতমনুস্সানং উপভোগক্খমা হোন্তি. ‘‘এৰরূপানী’’তি ইমিনা রুক্খমূলসোধনাদীনি চেৰ যথাসত্তি অন্নদানাদীনি চ পুঞ্ঞানি সঙ্গণ্হাতি. ‘‘সুৰণ্ণক্খন্ধসদিসো অত্তভাৰো ইট্ঠো কন্তো মনাপো অহোসী’’তি পাঠো. সকটসহস্সমত্তন্তি ৰাহসহস্সমত্তং, ৰাহো পন ৰীসতি খারী, খারী সোল়সদোণমত্তা, দোণং সোল়স নাল়িযো ৰেদিতব্বা. কুম্ভং দসম্বণানি. ‘‘সহস্সনাল়িযো’’তি কেচি. রত্তসুৰণ্ণকণ্ণিকন্তি রত্তসুৰণ্ণমযং ৰটংসকং.

যস্মা মজ্ঝিমযামে এৰ দেৰতা সত্থারং উপসঙ্কমিতুং অৰসরং লভন্তি, তস্মা ‘‘এককোট্ঠাসং অতীতাযা’’তি ৰুত্তং. অতিক্কন্তৰণ্ণোতি অতিৰিয কমনীযরূপো, কেৰলকপ্পন্তি ৰা মনং ঊনং অৰসেসং, ঈসকং অসমত্তন্তি অত্থো ভগৰতো হি সমীপট্ঠানং মুঞ্চিত্ৰা সব্বো গিজ্ঝকূটৰিহারো তেন ওভাসিতো. তেনাহ ‘‘চন্দিমা ৰিযা’’তিআদি.

দেৰসভাৰণ্ণনা

২৯৪. রতনমত্তকণ্ণিকরুক্খনিস্সন্দেনাতি রতনপ্পমাণরুক্খমযকূটদানপুঞ্ঞনিস্সন্দেন, তস্স ৰা পুঞ্ঞস্স নিস্সন্দফলভাৰেন. নিব্বত্তসভাযন্তি সমুট্ঠিতউপট্ঠানসালাযং. মণিমযাতি পদুমরাগাদিমণিমযা. আণিযোতি থম্ভতুলাসঙ্ঘাটকাদীসু ৰাল়রূপাদিসঙ্ঘাটনকআণিযো.

গন্ধব্বরাজাতি গন্ধব্বকাযিকানং দেৰতানং রাজা. যে ¶ তাৰতিংসানং আসন্নৰাসিনো চাতুমহারাজিকা দেৰা, তে পুরতো করোন্তো ‘‘দ্ৰীসু দেৰলোকেসু দেৰতা পুরতো কত্ৰা নিসিন্নো’’তি ৰুত্তো. সেসেসুপি তীসু ঠানেসু এসেৰ নযো.

নাগরাজাতি ¶ নাগানং অধিপতি, ন পন সযং নাগজাতিকো.

আসতি নিসীদতি এত্থাতি আসনং, নিসজ্জট্ঠানন্তি আহ ‘‘নিসীদিতুং ওকাসো’’তি. ‘‘এত্থা’’তি পদং নিপাতমত্তং, এত্থাতি ৰা এতস্মিং পাঠে. অত্থুদ্ধারনযেন ¶ ৰত্তব্বং পুব্বে ৰুত্তং চতুব্বিধমেৰ. তাৰতিংসা, একচ্চে চ চাতুমহারাজিকা যথালদ্ধায সম্পত্তিযা থাৰরভাৰায, আযতিং সোধনায চ পঞ্চ সীলানি রক্খন্তি, তে তস্স ৰিসোধনত্থং পৰারণাসঙ্গহং করোন্তি. তেন ৰুত্তং ‘‘মহাপৰারণাযা’’তিআদি.

ৰস্সসহস্সন্তি মনুস্সগণনায ৰস্সসহস্সং.

পন্নপলাসোতি পতিতপত্তো. খারকজাতোতি জাতখুদ্দকমকুল়ো. যে হি নীলপত্তকা অতিৰিয খুদ্দকা মকুল়া, তে ‘‘খারকা’’তি ৰুচ্চন্তি. জালকজাতোতি তেহিযেৰ খুদ্দকমকুল়েহি জাতজালকো সব্বসো জালো ৰিয জাতো. কেচি পন ‘‘জালকজাতোতি একজালো ৰিয জাতো’’তি অত্থং ৰদন্তি. পারিছত্তকো কির খারকগ্গহণকালে সব্বত্থকমেৰ পল্লৰিকো হোতি, তে চস্স পল্লৰা পভস্সরপৰাল়ৰণ্ণসমুজ্জলা হোন্তি, তেন সো সব্বসো সমুজ্জলন্তো তিট্ঠতি. কুটুমলকজাতোতি সঞ্জাতমহামকুল়ো. কোরকজাতোতি সঞ্জাতসূচিভেদো সম্পতি ৰিকসমানাৰত্থো. সব্বপালিফুল্লোতি সব্বসো ফুল্লিতৰিকসিতো.

কন্তনকৰাতোতি দেৰানং পুঞ্ঞকম্মপচ্চযা পুপ্ফানং ছিন্দনকৰাতো. কন্ততীতি ছিন্দতি. সম্পটিচ্ছনকৰাতোতি ছিন্নানং ছিন্নানং পুপ্ফানং সম্পটিগ্গণ্হনকৰাতো ¶ . নচ্চন্তোতি নানাৰিধভত্তিং সন্নিৰেসৰসেন নচ্চনং করোন্তো. অঞ্ঞতরদেৰতানন্তি নামগোত্তৰসেন অপ্পঞ্ঞাতদেৰতানং.

রেণুৰট্টীতি রেণুসঙ্ঘাতো. কণ্ণিকং আহচ্চাতি সুধম্মায কূটং আহন্ত্ৰা.

অট্ঠ দিৰসেতি পঞ্চমিযা সদ্ধিং পক্খে চত্তারো দিৰসে সন্ধায ৰুত্তং. যথাৰুত্তেসু অট্ঠসু দিৰসেসু ধম্মস্সৰনং নিবদ্ধং তদা পৰত্ততীতি ততো অঞ্ঞদা কারিতং সন্ধাযাহ ‘‘অকালধম্মস্সৰনং কারিত’’ন্তি. চেতিযে ছত্তস্স হেট্ঠা কাতব্বৰেদিকা ছত্তৰেদিকা. চেতিযং পরিক্খিপিত্ৰা পদক্খিণকরণট্ঠানং অন্তোকত্ৰা কাতব্বৰেদিকা পুটৰেদিকা. চেতিযস্স কুচ্ছিং পরিক্খিপিত্ৰা ¶ তং সম্বন্ধমেৰ কত্ৰা কাতব্বৰেদিকা কুচ্ছিৰেদিকা. সীহরূপপাদকং আসনং সীহাসনং. উভোসু পস্সেসু সীহরূপযুত্তং সোপানং সীহসোপানং.

অত্তমনা ¶ হোন্তি অনিযামনকভাৰতো. তেনেৰাহ ‘‘মহাপুঞ্ঞে পুরক্খত্ৰা’’তিআদি. পৰারণাসঙ্গহত্থায সন্নিপতিতাতি ৰেদিতব্বা ‘‘তদহুপোসথে পন্নরসে পৰারণায পুণ্ণায পুণ্ণমায রত্তিযা’’তি (দী. নি. ২.২৯৪) ৰচনতো.

২৯৫. নৰহি কারণেহীতি ‘‘ইতিপি সো ভগৰা অরহ’’ন্তিআদিনা (দী. নি. ১.১৫৭, ২৫৫) ৰুত্তেহি অরহত্তাদীহি নৰহি বুদ্ধানুভাৰদীপনেহি কারণেহি. ধম্মস্স চাতি এত্থ চ-সদ্দো অৰুত্তসমুচ্চযত্থোতি তেন সম্পিণ্ডিতমত্থং দস্সেন্তো ‘‘উজুপ্পটিপন্নতাদিভেদং সঙ্ঘস্স চ সুপ্পটিপত্তি’’ন্তি আহ.

অট্ঠযথাভুচ্চৰণ্ণনা

২৯৬. যথা অনন্তমেৰ আনঞ্চং, ভিসক্কমেৰ ভেসজ্জং ¶ , এৰং যথাভূতা এৰ যথাভুচ্চাতি পাল়িযং ৰুত্তন্তি আহ ‘‘যথাভুচ্চেতি যথাভূতে’’তি. ৰণ্ণেতব্বতো কিত্তেতব্বতো ৰণ্ণা, গুণা. কথং পটিপন্নোতি হেতুঅৰত্থাযং, ফলঅৰত্থাযং, সত্তানং উপকারা ৰত্থাযন্তি তীসুপি অৰত্থাসু লোকনাথস্স বহুজনহিতায পটিপত্তিযা কথেতুকম্যতাপুচ্ছা. তথা হি নং আদিতো পট্ঠায যাৰ পরিযোসানা সঙ্খেপেনেৰ দস্সেন্তো ‘‘দীপঙ্করপাদমূলে’’তিআদিমাহ. তত্থ অভিনীহরমানোতি অভিনীহারং করোন্তো. যং পনেত্থ মহাভিনীহারে, পারমীসু চ ৰত্তব্বং, তং ব্রহ্মজালটীকাযং (দী. নি. টী. ১.৭) ৰুত্তং এৰাতি তত্থ ৰুত্তনযেনেৰ ৰেদিতব্বং.

‘‘খন্তিৰাদিতাপসকালে’’তিআদি (জা. ১.খন্তীৰাদীজাতক) হেতুঅৰত্থাযমেৰ অনঞ্ঞসাধারণায সুদুক্করায বহুজনহিতায পটিপত্তিযা ৰিভাৰনং. যথাধিপ্পেতং হিতসুখং যায কিরিযায ৰিনা ন ইজ্ঝতি, সাপি তদত্থা এৰাতি দস্সেতুং ‘‘তুসিতপুরে যাৰতাযুকং তিট্ঠন্তোপী’’তিআদি ৰুত্তং.

ধম্মচক্কপ্পৰত্তনাদি (সং. নি. ৫.১০৮১; মহাৰ. ১৩; পটি. ম. ৩.৩০) পন নিব্বত্তিতা বহুজনহিতায পটিপত্তি. আযুসঙ্খারোস্সজ্জনম্পি ‘‘এত্তকং কালং তিট্ঠামী’’তি পৰত্তিযা বহুজনহিতায পটিপত্তি. অনুপাদিসেসায নিব্বানধাতুযা পরিনিব্বানৰসেন বহুজনহিতায ¶ পটিপত্তি. তেনাহ ‘‘যাৰস্সা’’তিআদি. সেসপদানীতি ‘‘বহুজনসুখাযা’’তিআদীনি পদানি. পচ্ছিমন্তি ‘‘অত্থায হিতায সুখাযা’’তি ¶ পদত্তযং. পুরিমস্সাতি ততো পুরিমস্স পদত্তযস্স. অত্থোতি অত্থনিদ্দেসো.

যদিপি অতীতেনঙ্গেন সমন্নাগতা সত্থারো অহেসুং, তেপি পন বুদ্ধা এৰাতি অত্থতো অম্হাকং সত্থা অনঞ্ঞোতি আহ ‘‘অতীতেপি বুদ্ধতো অঞ্ঞং ন সমনুপস্সামা’’তি. যথা চ অতীতে, এৰং অনাগতে চাতি অযমত্থো নযতো লব্ভতীতি কত্ৰা ৰুত্তং ‘‘অনাগতেপি ন সমনুপস্সামা’’তি. সক্কো পন দেৰরাজা তমত্থং অত্থাপন্নমেৰ কত্ৰা ‘‘ন পনেতরহি’’ ইচ্চেৰাহ. কিং সক্কো কথেতীতি ৰিচারেত্ৰাতি ‘‘নেৰ অতীতংসে সমনুপস্সমা’তি ¶ ৰদন্তো সক্কো কিং কথেতী’’তি ৰিচারণং সমুট্ঠপেত্ৰা. যস্মা অতীতে বুদ্ধা অহেসুং, অনাগতে ভৰিস্সন্তীতি নাযমত্থো সক্কেন দেৰরাজেন পরিঞ্ঞাতো, তে পন বুদ্ধসামঞ্ঞেন অম্হাকং ভগৰতা সদ্ধিং গহেত্ৰা এতরহি অঞ্ঞস্স সব্বেন সব্বং অভাৰতো তথা ৰুত্তন্তি দস্সেতুং ‘‘এতরহী’’তিআদি ৰুত্তং. স্ৰাক্খাতাদীনীতি স্ৰাক্খাতপদাদীনি. কুসলাদীনীতি ‘‘ইদং কুসল’’ন্তিআদীনি পদানি.

গঙ্গাযমুনানং অসমাগমট্ঠানে উদকং ভিন্নৰণ্ণং হোন্তম্পি সমাগমট্ঠানে অভিন্নৰণ্ণং এৰাতি আহ ‘‘ৰণ্ণেনপি সংসন্দতি সমেতী’’তি. তত্থ কির গঙ্গোদকসদিসমেৰ যমুনোদকং. যথা নিব্বানং কেনচি কিলেসেন অনুপক্কিলিট্ঠতায পরিসুদ্ধং, এৰং নিব্বানগামিনিপটিপদাপি কেনচি কিলেসেন অনুপক্কিলিট্ঠতায পরিসুদ্ধাৰ ইচ্ছিতব্বা. তেনাহ ‘‘ন হী’’তিআদি. যেন পরিসুদ্ধত্থেন নিব্বানস্স, নিব্বানগামিনিযা পটিপদায চ আকাসূপমতা, সো কেনচি অনুপলেপো, অনুপক্কিলেসো চাতি আহ ‘‘আকাসম্পি অলগ্গং পরিসুদ্ধ’’ন্তি. ইদানি তমত্থং নিদস্সনেন ৰিভূতং কত্ৰা দস্সেতুং ‘‘চন্দিমসূরিযান’’ন্তিআদি ৰুত্তং. সংসন্দতি যুজ্জতি পটিপজ্জিতব্বতাপটিপজ্জনেহি অঞ্ঞমঞ্ঞানুচ্ছৰিকতায.

পটিপদায ঠিতানন্তি পটিপদং মগ্গপটিপত্তিং পটিপজ্জমানানং. ৰুসিতৰতন্তি ব্রহ্মচরিযৰাসং ৰুসিতৰন্তানং এতেসং. লদ্ধসহাযোতি এতাসং পটিপদানং ৰসেন লদ্ধসহাযো. তত্থ তত্থ সাৰকেহি সত্থু কাতব্বকিচ্চে. ইদং পন ‘‘অদুতিযো’’তিআদি সুত্তন্তরে আগতৰচনং অঞ্ঞেহি অসদিসট্ঠেন ৰুত্তং, ন যথাৰুত্তসহাযাভাৰতো. অপনুজ্জাতি অপনীয ৰিৰজ্জেত্ৰা. ‘‘অপনুজ্জা’’তি চ অন্তোগধাৰধারণং ¶ ইদং ৰচনং একন্তিকত্তা তস্স অপনোদস্সাতি ৰুত্তং ‘‘অপনুজ্জেৰা’’তি.

লব্ভতীতি ¶ ¶ লাভো, সো পন উক্কংসগতিৰিজাননেন সাতিসযো, ৰিপুলো এৰ চ ইধাধিপ্পেতোতি আহ ‘‘মহালাভো উপ্পন্নো’’তি. উস্সন্নপুঞ্ঞনিস্সন্দসমুপ্পন্নোতি যথাৰুত্তকালং সম্ভতসুৰিপুলউল়ারতরপুঞ্ঞাভিসন্দতো নিব্বত্তো.‘‘ইমে নিব্বত্তা, ইতো পরং ময্হং ওকাসো নত্থী’’তি উস্সাহজাতো ৰিয উপরূপরি ৰড্ঢমানো উদপাদি. সব্বদিসাসু হি যমকমহামেঘো উট্ঠহিত্ৰা মহামেঘং ৰিয সব্বপারমিযো ‘‘একস্মিং অত্তভাৰে ৰিপাকং দস্সামা’’তি সম্পিণ্ডিতা ৰিয ভগৰতো ইদং লাভসক্কারসিলোকং নিব্বত্তযিংসু, ততো অন্নপানৰত্থযানমালাগন্ধৰিলেপনাদিহত্থা খত্তিযব্রাহ্মণাদযো উপগন্ত্ৰা ‘‘কহং বুদ্ধো, কহং ভগৰা, কহং দেৰদেৰো, কহং নরাসভো, কহং পুরিসসীহো’’তি ভগৰন্তং পরিযেসন্তি, সকটসতেহিপি পচ্চযে আহরিত্ৰা ওকাসং অলভমানা সমন্তা গাৰুতপ্পমাণম্পি সকটধুরেন সকটধুরং আহচ্চ তিট্ঠন্তি চেৰ অনুবন্ধন্তি চ অন্ধকৰিন্দব্রাহ্মণাদযো ৰিয. সব্বং খন্ধকে, তেসু তেসু চ সুত্তেসু আগতনযেন ৰেদিতব্বং. তেনাহ ‘‘লাভসক্কারো মহোঘো ৰিযা’’তিআদি.

পটিপাটিভত্তন্তি বহূসু ‘‘দানং দস্সামা’’তি আহটপটিপাটিকায উট্ঠিতেসু অনুপটিপাটিযা দাতব্ব ভত্তং.

মত্থকং পত্তো অনঞ্ঞসাধারণত্তা তস্স দানস্স. উপাযং আচিক্খি নাগরানং অসক্কুণেয্যরূপেন দানং দাপেতুং. সালকল্যাণিরুক্খা রাজপরিগ্গহা অঞ্ঞেহি অসাধারণা, তস্মা তেসং পদরেহি মণ্ডপো কারিতো, হত্থিনো চ রাজভণ্ডভূতা নাগরেহি ন সক্কা লদ্ধুন্তি তেহি ছত্তং ধারাপিতং, তথা খত্তিযধীতাহি ৰেয্যাৰচ্চং কারিতং. ‘‘পঞ্চ আসনসতানী’’তি ইদং সালকল্যাণিমণ্ডপে পঞ্ঞত্তে সন্ধায ৰুত্তং, ততো বহি পন বহূনি পঞ্ঞত্তানি অহেসুং ¶ . চতুজ্জাতিযগন্ধং পিসতি বুদ্ধপ্পমুখস্স সঙ্ঘস্স পূজনত্থঞ্চেৰ পত্তস্স উব্বটনত্থঞ্চ. উদকন্তি পত্তধোৰনউদকং. অনগ্ঘানি অহেসুং অনগ্ঘরতনাভিসঙ্খতত্তা.

সত্তধা মুদ্ধা ফলিস্সতি অনাদরকারণাদিনা. কাল়ং ওলোকেস্সামীতি কাল়ং এৰং অনুপেক্খিস্সামি, তস্স উপ্পজ্জনকং অনত্থং পরিহরিস্সামীতি অত্থো.

কদরিযাতি ¶ থদ্ধমচ্ছরিনো পুঞ্ঞকম্মৰিমুখা. দেৰলোকং ন ৰজন্তি পুঞ্ঞস্স অকতত্তা, মচ্ছরিভাৰেন চ পাপস্স পসুতত্তা. বালাতি দুচ্চিন্তিতচিন্তনাদিনা বাললক্খণযুত্তা. নপ্পসংসন্তি দানং পসংসিতুম্পি ন ৰিসহন্তি. ধীরোতি ধীতিসম্পন্নো উল়ারপঞ্ঞো পরেহি কতং দানং ¶ অনুমোদমানোপি, তেনেৰ দানানুমোদনেনেৰ. সুখী পরত্থাতি পরলোকে কাযিকচেতসিকসুখসমঙ্গী হোতি.

ৰররোজো নাম তস্মিং কালে একো খত্তিযো, তস্স ৰররোজস্স. অনৰজ্জ…পে… ফলেয্য অভূতৰাদিভাৰতোতি অধিপ্পাযো. অতিরেকপদসহস্সেন তিংসাধিকেন অড্ঢতেয্যগাথাসতেন ৰণ্ণমেৰ কথেসি রূপপ্পসন্নতায চ.

যাৰ মঞ্ঞে খত্তিযাতি এত্থ যাৰাতি অৰধিপরিচ্ছেদৰচনং, অঞ্ঞেতি নিপাতমত্তং, যাৰ খত্তিযা খত্তিযে অৰধিং কত্ৰা সব্বে দেৰমনুস্সাতি অধিপ্পাযো. তেনাহ ‘‘খত্তিযা ব্রাহ্মণা’’তিআদি. মদপমত্তোতি লাভসক্কারসিলোকমদেন পমত্তো চেৰ তদন্ৰযেন পমাদেন পমত্তো চ হুত্ৰা.

তদন্ৰযমেৰাতি তদনুগতমেৰ. ৰাচা…পে… সমেতীতি ৰচীকম্মকাযকম্মানি অঞ্ঞমঞ্ঞং অৰিরুদ্ধানি, অঞ্ঞদত্থু সংসন্দন্তি. অজা এৰ মিগাতি অজামিগা, তে অজামিগে.

তিণ্ণৰিচিকিচ্ছো সব্বসো অতিক্কন্তৰিচিকিচ্ছাকন্তারো ¶ . ননু চ সব্বেপি সোতাপন্না তিণ্ণৰিচিকিচ্ছা, ৰিগতকথংকথা চ? সচ্চমেতং, ইদং পন ন তাদিসং তিণ্ণৰিচিকিচ্ছতং সন্ধায ৰুত্তং, অথ খো সব্বস্মিং ঞেয্যধম্মে সব্বাকারাৰবোধসঙ্খাতসন্নিট্ঠানৰসেন সব্বসো নিরাকতং সন্ধাযাতি দস্সেন্তো ‘‘যথা হী’’তি আদিমাহ. উস্সন্নুস্সন্নত্তাতি পরোপরভাৰতো, অযঞ্চ অত্থো ভগৰতো অনেকধাতুনানাধাতুঞাণবলেনপি ইজ্ঝতি. সব্বত্থ ৰিগতকথংকথো সব্বদস্সাৰিভাৰতো. সব্বেসং পরমত্থধম্মানং সচ্চাভিসমযৰসেন পটিৰিদ্ধত্তা ৰুত্তং ‘‘ৰোহারৰসেনা’’তি ৰা নামগোত্তাদিৰসেনাতি অত্থো.

পরিযোসিতসঙ্কপ্পোতি সব্বসো নিট্ঠিতমনোরথো. ননু চ অরিযমগ্গেন পরিযোসিতসঙ্কপ্পতা নাম সোল়সকিচ্চসিদ্ধিযা কতকরণীযভাৰেন, ন সব্বঞেয্যধম্মাৰবোধেনাতি চোদনং সন্ধাযাহ ‘‘পুব্বে ¶ অননুস্সুতেসূ’’তিআদি. সাৰকানং সাৰকপারমিঞাণং ৰিয, হি পচ্চেকবুদ্ধানং পচ্চেকবোধিঞাণং ৰিয চ সম্মাসম্বুদ্ধানং সব্বঞ্ঞুতঞ্ঞাণং চতুসচ্চাভিসম্বোধপুব্বকমেৰাতি. অননুস্সুতেসূতি ন অনুস্সুতেসু. সামন্তি সযমেৰ. পদদ্ৰযেনাপি পরতো ঘোসেন ৰিনাতি দস্সেতি. তত্থাতি নিমিত্তত্থে ভুম্মং, সচ্চাভিসম্বোধনিমিত্তন্তি অত্থো. সচ্চাভিসম্বোধো চ অগ্গমগ্গৰসেনাতি ¶ দট্ঠব্বং. বলেসু চ ৰসীভাৰন্তি দসন্নং বলঞাণানং যথারুচি পৰত্তি. জাতত্তা জাতাতি সম্মাসম্বুদ্ধে ৰদতি.

২৯৭. তত্থ তত্থ রাজধানিআদিকে নিবদ্ধৰাসং ৰসন্তো. তীসু মণ্ডলেসু যথাকালং চারিকং চরন্তো.

২৯৮. অস্সাতি ফলস্স. তন্তি কারণং. দ্ৰিন্নম্পি একতো উপ্পত্তিযা কারণং নত্থি, পগেৰ তিণ্ণং, চতুন্নং ৰাতি. ‘‘এত্থ চা’’তিআদি ‘‘একিস্সা লোকধাতুযা’’তি ৰুত্তলোকধাতুযা ¶ পমাণপরিচ্ছেদদস্সনত্থং আরদ্ধং.

যাৰতাতি যত্তকেন ঠানেন. পরিহরন্তীতি সিনেরুং পরিক্খিপন্তা পরিৰত্তন্তি. দিসাতি দিসাসু, ভুম্মত্থে এতং পচ্চত্তৰচনং. ভন্তি দিব্বন্তি. ৰিরোচনাতি ওভাসন্তা, ৰিরোচনা ৰা সোভমানা চন্দিমসূরিযা ভন্তি, ততো এৰ দিসা চ ভন্তি. তাৰ সহস্সধাতি তত্তকো সহস্সলোকো.

এত্তকন্তি ইমং চক্কৰাল়ং মজ্ঝে কত্ৰা ইমিনাৰ সদ্ধিং চক্কৰাল়ং দসসহস্সং. যং পনেত্থ ৰত্তব্বং, তং মহাপদানৰণ্ণনাযং ৰুত্তমেৰ. ন পঞ্ঞাযতীতি তীসু পিটকেসু অনাগতত্তা.

সনঙ্কুমারকথাৰণ্ণনা

৩০০. ৰণ্ণেনাতি রূপসম্পত্তিযা. সুৰিঞ্ঞেয্যত্তা তং অনামসিত্ৰা যসসদ্দস্সেৰ অত্থমাহ. অলঙ্কারপরিৰারেনাতি অলঙ্কারেন চ পরিৰারেন চ. পুঞ্ঞসিরিযাতি পুঞ্ঞিদ্ধিযা.

৩০১. সম্পসাদনেতি সম্পসাদজননে. সংপুব্বো খা-সদ্দো জাননত্থো ‘‘সঙ্খাযেতং পটিসেৰতী’’তিআদীসু (ম. নি. ২.১৬৮) ৰিযাতি আহ ‘‘জানিত্ৰা মোদামা’’তি.

গোৰিন্দব্রাহ্মণৰত্থুৰণ্ণনা

৩০৪. যাৰ ¶ দীঘরত্তন্তি যাৰ পরিমাণতো, অপরিমিতকালপরিদীপনমেতন্তি আহ ‘‘এত্তকন্তি…পে… অতিচিররত্ত’’ন্তি. মহাপঞ্ঞোৰ সো ভগৰাতি তেন ব্রহ্মুনা অনুমতিপুচ্ছাৰসেন ¶ দেৰানং ৰুত্তন্তি দস্সেন্তো ‘‘মহাপঞ্ঞোৰ সো ভগৰা. নোতি কথং তুম্হে মঞ্ঞথা’’তি আহ. সযমেৰেতং পঞ্হং ব্যাকাতুকামো ‘‘ভূতপুব্বং ভো’’তি আদিং আহাতি সম্বন্ধো. এৰং পন ব্যাকরোন্তেন অত্থতো অযম্পি অত্থো ৰুত্তো নাম হোতীতি দস্সেন্তো ‘‘অনচ্ছরিযমেত’’ন্তি আদিমাহ. তিণ্ণং মারানন্তি ¶ কিলেসাভিসঙ্খারদেৰপুত্তমারানং. ‘‘অনচ্ছরিযমেত’’ন্তি ৰুত্তমেৰত্থং নিগমনৰসেন ‘‘কিমেত্থ অচ্ছরিয’’ন্তি পুনপি ৰুত্তং.

রঞ্ঞো দিট্ঠধম্মিকসম্পরাযিকঅত্থানং পুরো ধানতো পুরে পুরে সংৰিধানতো পুরোহিতোতি আহ ‘‘সব্বকিচ্চানি অনুসাসনপুরোহিতো’’তি. গোৰিন্দিযাভিসেকেনাতি গোৰিন্দস্স ঠানে ঠপনাভিসেকেন. তং কির তস্স ব্রাহ্মণস্স কুলপরম্পরাগতং ঠানন্তরং. জোতিতত্তাতি আৰুধানং জোতিতত্তা. পালনসমত্থতাযাতি রঞ্ঞো, অপরিমিতস্স চ সত্তকাযস্স অনত্থতো পরিপালনসমত্থতায.

সম্মা ৰোস্সজ্জিত্ৰাতি সুট্ঠু তস্সেৰাগারৰভাৰেন ৰিস্সজ্জিত্ৰা নিয্যাতেত্ৰা. তং তমত্থং কিচ্চং পস্সতীতি অত্থদসো.

৩০৫. ভৰনং ৰড্ঢনং ভৰো, ভৰতি এতেনাতি ৰা ভৰো, ৰড্ঢিকারণং সন্ধিৰসেন ম-কারাগমো, ও-কারস্স চ অ-কারাদেসং কত্ৰা ‘‘ভৰমত্থূ’’তি ৰুত্তং. ভৰন্তং জোতিপালন্তি পন সামিঅত্থে উপযোগৰচনন্তি আহ ‘‘ভোতো’’তি. মা পচ্চব্যাহাসীতি মা পটিক্খিপীতি অত্থো. সো পন পটিক্খেপো পটিৰচনং হোতীতি আহ ‘‘মা পটিব্যাহাসী’’তি. অভিসম্ভোসীতি কম্মন্তানং সংৰিধানে সমত্থো হোতীতি আহ ‘‘সংৰিদহিত্ৰা’’তি. ভৰাভৰং, পঞ্ঞঞ্চ ৰিন্দি পটিলভীতি গোৰিন্দো, মহন্তো গোৰিন্দো মহাগোৰিন্দো. ‘‘গো’’তি হি পঞ্ঞাযেতং অধিৰচনং গচ্ছতি অত্থে বুজ্ঝতীতি.

রজ্জসংৰিভজনৰণ্ণনা

৩০৬. একপিতিকা ¶ ৰেমাতুকা কনিট্ঠভাতরো. অযং অভিসিত্তোতি অযং রেণু রাজকুমারো পিতু অচ্চযেন রজ্জে অভিসিত্তো. রাজকারকাতি রাজপুত্তং রজ্জে পতিট্ঠাপেতারো.

৩০৭. মদেন্তীতি ¶ মদনীযাতি কত্তুসাধনতং দস্সেন্তো ‘‘মদকরা’’তি আহ. মদকরণং পন পমাদস্স ৰিসেসকারণন্তি ৰুত্তং ‘‘পমাদকরা’’তি.

৩০৮. রেণুস্স ¶ রজ্জসমীপে দসগাৰুতমত্তৰিত্থতানি হুত্ৰা অপরভাগে তিযোজনসতং ৰিত্থতত্তা সব্বানি ছ রজ্জানি সকটমুখানি পট্ঠপেসি. ৰিতানসদিসং চতুরস্সভাৰতো.

৩১০. সহাতি গাথায পদপরিপূরণত্থং ৰুত্তং. তস্স অত্থং দস্সেন্তো ‘‘তেনেৰ সহা’’তি আহ. সহাতি ৰা অৰিনাভাৰত্থে নিপাতো, সো সহ আসুং সত্ত ভারধাতি যোজেতব্বো, তেন তে দেসন্তরে ৰসন্তা ৰিচিত্তেন সহভাৰিনো অৰিনাভাৰিনোতি দীপেতি. রজ্জভারং ধারেন্তি অত্তনি আরোপেন্তি ৰহন্তীতি ভারধা.

পঠমভাণৰারৰণ্ণনা নিট্ঠিতা.

কিত্তিসদ্দঅব্ভুগ্গমনৰণ্ণনা

৩১১. অনুপুরোহিতে ঠপেসীতি অনুপুরোহিতে কত্ৰা ঠপেসি, অনুপুরোহিতে ৰা ঠানে ঠপেসি. তিসৰনং করোন্তে সন্ধায ‘‘দিৰসস্স তিক্খত্তু’’ন্তি ৰুত্তং. দ্ৰীসু সন্ধীসু সৰনং করোন্তে সন্ধায ‘‘সাযং, পাতো ৰা’’তি ৰুত্তং. ততো পট্ঠাযাতি ৰতচরিযং মত্থকং পাপেত্ৰা ন্হাতকালতো পভুতি.

৩১২. অভিউগ্গচ্ছীতি উট্ঠহি উদপাদি. অচিন্তেত্ৰাতি ‘‘কথং খো অহং ব্রহ্মুনা সদ্ধিং মন্তেয্য’’ন্তি অচিন্তেত্ৰা এৰং চিত্তম্পি অনুপ্পাদেত্ৰা. তেন সমাগমনস্সেৰ অভাৰতো অমন্তেত্ৰা. তং দিস্ৰাতি তং করুণাব্রহ্মৰিহারভাৰনং ব্রহ্মদস্সনূপাযং দিস্ৰা ঞাণচক্খুনা.

৩১৩. এৰন্তি ¶ এৰং রঞ্ঞো আরোচেত্ৰা পটিসল্লানং উপগতে. সব্বত্থাতি সব্বেসু ছন্নং খত্তিযানং, সত্তন্নং ব্রাহ্মণমহাসালানং ¶ , সত্তন্নং নাটকসতানং, চত্তারীসায চ ভরিযানং আপুচ্ছনৰারেসু.

৩১৬. সাদিসিযোতি জাতিযা সাদিসিযোতি আহ ‘‘সমৰণ্ণা সমজাতিকা’’তি.

৩১৭. সন্থাগারন্তি ঝানমনসিকারেন বহি ৰিসটৰিতক্কৰূপসমনেন চিত্তস্স সন্থম্ভনং ¶ অগারং, ঝানসালন্তি অত্থো. গহিতাৰাতি ভাৰনানুযোগেন মহাসত্তেন অত্তনো চিত্তসন্তানে উপ্পাদনৰসেন গহিতা এৰ. নত্থি ঝানেনেৰ ৰিক্খম্ভিতত্তা. ৰিসেসতো হিস্স করুণায ভাৰিতত্তা অনভিরতি উক্কণ্ঠনা নত্থি, মেত্তায ভাৰিতত্তা ভযপরিতস্সনা নত্থি. উক্কণ্ঠনাতি পন ব্রহ্মদস্সনে উস্সুক্কং, পরিতস্সনাতি তদভিপত্থনাতি আহ ‘‘ব্রহ্মুনো পনা’’তিআদি.

ব্রহ্মুনাসাকচ্ছাৰণ্ণনা

৩১৮. চিত্তুত্রাসোতি চিত্তস্স উত্রাসনমত্তং. কথন্তি সত্তনিকাযনিৰাসট্ঠাননামগোত্তাদীনং ৰসেন কেন পকারেন. তেনাহ ‘‘কি’’ন্তিআদি.

সোতি যে তে পনকনসনন্তবন্ধসতনসনঙ্কুমারকালনামকা লোকে পাকটা পঞ্ঞাতা ব্রহ্মানো, তেসু সনঙ্কুমারো নামাহন্তি দস্সেতি.

অগ্ঘন্তি গরুট্ঠানিযানং দাতব্বংআহারং. মধুসাকন্তি মধুরাহারং, যং কিঞ্চি অতিথিনো দাতব্বং আহারং উপচারৰসেন এৰং ৰদতি. তেনাহ ‘‘মধুসাকং পনা’’তিআদি. পুচ্ছামাতি নিমন্তনৰসেন পুচ্ছাম.

৩১৯. মহাসত্তো চত্তারো ব্রহ্মৰিহারে ভাৰেত্ৰা ঠিতোপি তেসু ‘‘ব্রহ্মসহব্যতায মগ্গো’’তি অনিব্বেমতিকতায ‘‘কঙ্খী’’তি অৰোচ. কেচি পন ‘‘তপোকম্মেন পরিক্খীণসরীরতায, ব্রহ্মসমাগমেন ভযাদিসমুপ্পত্তিযা চ পটিলদ্ধমত্তেহি ব্রহ্মৰিহারেহি পরিহীনো অহোসি, তস্মা অৰিক্খম্ভিতৰিচিকিচ্ছতায ‘কঙ্খী’তি অৰোচা’’তি ৰদন্তি. পরস্স ৰেদিযা ৰিদিতা পরৰেদিযা, তে পন তস্স পাকটা ৰিভূতাতি আহ ‘‘পরস্স ¶ পাকটেসু পরৰেদিযেসূ’’তি. তত্থ কারণমাহ ‘‘পরেন সযং অভিসঙ্খতত্তা’’তি. মমাতি ¶ কম্মং মমংকারো, মমত্তন্তি আহ ‘‘ইদং মম…পে… তণ্হ’’ন্তি. ‘‘মম’’ন্তি করোতি এতেনাতি হি মমংকারো, তথাপৰত্তা তণ্হা. মনুজেসূতি নিদ্ধারণে ভুম্মং, ন ৰিসযেতি আহ ‘‘মনুজেসু যো কোচী’’তি. ‘‘একোদিভূতো’’তি পদস্স ভাৰত্থং তাৰ দস্সেন্তো ‘‘একীভূতো’’তি ৰত্ৰা পুন তং ৰিৰরন্তো ‘‘একো তিট্ঠন্তো একো নিসীদন্তো’’তি আহ. তাদিসোতি একো হুত্ৰা পৰত্তনকো. ভূতোতি জাতো. ঝানে অধিমুত্তি নাম তস্মিং নিব্বত্তিতে, অনিব্বত্তিতে কুতো অধিমুত্তীতি আহ ‘‘ঝানং নিব্বত্তেত্ৰাতি অত্থো’’তি. ৰিস্সগন্ধো নাম কোধাদিকিলেসপরিভাৰনাতি তেসং ৰিক্খম্ভনেন ¶ ৰিস্সগন্ধৰিরহিতো. এতেসু ধম্মেসূতি পব্বজ্জানং ৰিৰেকৰাসকরুণাব্রহ্মৰিহারাদিধম্মেসু.

৩২০. অৰিদ্ৰাতি ন ৰিদিতৰা. আৰরিতাতি কুসলানং উত্তরিমনুস্সধম্মানং উপ্পত্তিনিৰারণেন আৰরিতা. পূতিকাতি ব্যাপন্নচিত্ততাদিনা পূতিভূতা. কিলেসৰসেন দুগ্গন্ধং ৰিস্সগন্ধং ৰাযতি. নিরযাদিঅপাযেসু নিব্বত্তনসীলতায আপাযিকাতি আহ ‘‘অপাযূপগা’’তি. চোরাদীহি উপদ্দুতস্স পৰিসিতুকামস্স পাকারকৰাটপরিখাদীহি ৰিয নগরং কোধাদীহি নিৰুতো পিহিতো ব্রহ্মলোকো অস্সাতি নিৰুতব্রহ্মলোকো. পুচ্ছতি ‘‘কেনাৰটা’’তি ৰদন্তো.

মুসাৰাদোৰ মোসৰজ্জং যথা ভিসক্কমেৰ ভেসজ্জং. কুজ্ঝনং দুস্সনং. দিট্ঠাদীসু অদিট্ঠাদিৰাদিতাৰসেন পরেসং ৰিসংৰাদনং পরৰিসংৰাদনং. সদিসং পতিরূপং দস্সেত্ৰা পলোভনং সদিসং দস্সেত্ৰা ৰঞ্চনং. মিত্তানং ৰিহিংসনং মেত্তিভেদো মিত্তদুব্ভনং. দল়্হমচ্ছরিতা থদ্ধমচ্ছরিযং. অত্তনি ৰিজ্জমানং নিহীনতং, সদিসতং ৰা অতিক্কমিত্ৰা মঞ্ঞনং. পরেসং সম্পত্তিযা অসহনং খীযনং. অত্তসম্পত্তিযা নিগূহনৰসেন, পরেহি সাধারণভাৰাসহনৰসেন চ ৰিৰিধা ইচ্ছা রুচি এতস্সাতি ৰিৰিচ্ছা. কদরিযতায ¶ মুদুকং মচ্ছরিযং. যত্থ কত্থচীতি সকসন্তকে, পরসন্তকে, হীনাতিকে চাতি যত্থ কত্থচি আরম্মণে. লুব্ভনং আরম্মণস্স গহণং অভিগিজ্ঝনং. মজ্জনং সেয্যাদিৰসেন মদনং সম্পগ্গহো. মুয্হনং আরম্মণস্স অনৰবোধো. এতেসূতি এতেসু যথাৰুত্তেসু কোধাদীসু সত্তসন্তানস্স কিলিস্সনতো ৰিবাধনতো, উপতাপনতো চ কিলেসসঞ্ঞিতেসু পাপধম্মেসু. যুত্তা পযুত্তা সম্পযুত্তা অৰিরহিতা.

এত্থ ¶ চাযং ব্রহ্মা মহাসত্তেন আমগন্ধে সুপুট্ঠো অত্তনো যথাউপট্ঠিতে পাপধম্মে চুদ্দসহি পদেহি ৰিভজিত্ৰা কথেসি, তে পন তাদিসং পৰত্তিৰিসেসং উপাদায ৰুত্তাপি কেচি পুন ৰুত্তা, আমগন্ধসুত্তে (সু. নি. ২৪২) পন ৰুত্তাপি কেচি ইধ সব্বসো ন ৰুত্তা, এৰং সন্তেপি লক্খণহারনযেন, তদেকট্ঠতায ৰা তেসং পেত্থ সঙ্গহো দট্ঠব্বো. তেনাহ ‘‘ইদং পন সুত্ত’’ন্তিআদি. তত্থ আমগন্ধসুত্তেন দীপেত্ৰাতি ইধ সরূপতো অৰুত্তে আমগন্ধেপি ৰুত্তেহি একলক্খণতাদিনা আমগন্ধসুত্তেন পকাসেত্ৰা কথেতব্বং তত্থ নেসং সরূপতো কথিতত্তা. আমগন্ধসুত্তম্পি ইমিনা দীপেতব্বং ইধ ৰুত্তানম্পি কেসঞ্চি আমগন্ধানং তত্থ অৰুত্তভাৰতো. যস্মা আমগন্ধসুত্তে ৰুত্তাপি আমগন্ধা অত্থতো ইধ সঙ্গহং সমোসরণং গচ্ছন্তি, তস্মা ইধ ৰুত্তে পরিহরণৰসেন দস্সেন্তেন যস্মা চেত্থ কেচি অভিধম্মনযেন অকিলেসসভাৰাপি সত্তসন্তানস্স ¶ ৰিবাধনট্ঠেন ‘‘কিলেসা’’তি ৰত্তব্বতং অরহন্তি, তস্মা ‘‘চুদ্দসসু কিলেসেসূ’’তি ৰুত্তং.

নিম্মাদং মিলাপনং খেপনন্তি আহ ‘‘নিম্মাদেতব্বা পহাতব্বা’’তি. বুদ্ধতন্তীতি বুদ্ধভাৰীনং পৰেণী, বুদ্ধভাৰিনোপি ‘‘বুদ্ধা’’তি ৰুচ্চন্তি যথা ‘‘অগমা রাজগহং বুদ্ধো’’তি. মহাপুরিসস্স দল়্হীকম্মং কত্ৰাতি মহাপুরিসস্স ‘‘পব্বজিস্সামহ’’ন্তি ¶ পৰত্তচিত্তুপ্পাদস্স দল়্হীকম্মং কত্ৰা.

রেণুরাজআমন্তনাৰণ্ণনা

৩২১. মম মনং হরিত্ৰাতি মম চিত্তং অপনেত্ৰা তস্স ৰসেন অৰত্তিত্ৰা.

একীভাৰং উপগন্ত্ৰা ৰুত্থস্সাতি কাযৰিৰেকপরিব্রূহনেন একীভাৰং উপগন্ত্ৰা তপোকম্মৰসেন ৰুত্থস্স. কুসপত্তেহি পরিত্থতোতি বরিহিসেহি ৰেদিযা সমন্ততো সন্থরিতো. অকাচোতি ৰণো ৰণসদিসখণ্ডিচ্চৰিরহিতো. তেনাহ ‘‘অকক্কসো’’তি.

ছখত্তিযআমন্তনাৰণ্ণনা

৩২২. সিক্খেয্যামাতি সিক্খাপেয্যাম, সিক্খাপনঞ্চেত্থ অত্থিভাৰাপাদনন্তি আহ ‘‘উপলাপেয্যামা’’তি.

৩২৩. যস্স ¶ ৰীরিযারম্ভস্স, খন্তিবলস্স চ অভাৰেন পব্বজিতানং সমণধম্মো পরিপুণ্ণো, পরিসুদ্ধো চ ন হোতি, তেসু ৰীরিযারম্ভখন্তিবলেসু তে তে নিযোজেতুং ‘‘আরম্ভৰ্হো’’তিআদি ৰুত্তং.

করুণাঝানমগ্গোতি করুণাঝানসঙ্খাতো মগ্গো. উজুমগ্গোতি ব্রহ্মলোকগমনে উজুভূতো মগ্গো. অনুত্তরোতি সেট্ঠো ব্রহ্মৰিহারসভাৰতো. তেনাহ ‘‘উত্তমমগ্গো নামা’’তি. সব্ভি রক্খিতো সাধূহি যথা পরিহানি ন হোতি, এৰং পটিপক্খদূরীকরণেন রক্খিতো গোপিতো. ‘‘সদ্ধম্মো সব্ভি ৰক্খিতো’’তি কেচি পঠন্তি, তেসং সপরহিতসাধনেন সাধূহি বুদ্ধাদীহি কথিতো পৰেদিতোতি অত্থো.

তঙ্খণৰিদ্ধংসনধম্মন্তি ¶ যস্মিং খণে ৰিরোধিধম্মসমাযোগো, তস্মিংযেৰ খণে ৰিনস্সনসভাৰং, যো ৰা সো গমনস্সাদানং দেৰপুত্তানং হেট্ঠুপরিযেন পটিমুখং ধাৰন্তানং সিরসি, পাদে চ বদ্ধখুরধারাসমাগমনতোপি সীঘতরতায অতিইত্তরো পৰত্তিক্খণো, তেনেৰ ৰিনস্সনসভাৰং. তস্স জীৰিতস্স. গতিন্তি নিট্ঠং. মন্তাযন্তি মন্তেয্যন্তি ¶ ৰুত্তং হোতীতি আহ ‘‘মন্তেতব্ব’’ন্তি. করণত্থে ৰা ভুম্মন্তি ‘‘মন্তায’’ন্তি ইদং ভুম্মং করণত্থে দট্ঠব্বং যথা ‘‘ঞাতায’’ন্তি. সব্বপলিবোধেতি সব্বেপি কুসলকিরিযায ৰিবন্ধে উপরোধে.

ব্রাহ্মণমহাসালাদীনং আমন্তনাৰণ্ণনা

৩২৪. অপ্পেসক্খাতি অপ্পানুভাৰাতি আহ ‘‘পব্বজিতকালতো পট্ঠাযা’’তিআদি.

চক্কৰত্তি রাজা ৰিয সম্ভাৰিতো.

মহাগোৰিন্দপব্বজ্জাৰণ্ণনা

৩২৮. সমাপত্তীনং আজাননং নাম অত্তপচ্চক্খতা, সচ্ছিকিরিযাতি আহ ‘‘ন সক্খিংসু নিব্বত্তেতু’’ন্তি.

৩২৯. ইমিনাতি ‘‘সরামহ’’ন্তি ইমিনা পদেন. ‘‘সরামহ’’ন্তি হি ৰদন্তেন ভগৰতো মহাব্রহ্মুনা কথিতং ‘‘তথেৰ ত’’ন্তি ভগৰতা পটিঞ্ঞাতমেৰ জাতন্তি. ন ৰট্টে নিব্বিন্দনত্থায চতুসচ্চকম্মট্ঠানকথায অভাৰতো. অসতি পন ৰট্টে নিব্বিদায ৰিরাগানং অসম্ভৰো এৰাতি আহ ¶ ‘‘ন ৰিরাগাযা’’তিআদি. একন্তমেৰ ৰট্টে নিব্বিন্দনত্থায অনেকাকারৰোকারৰট্টে আদীনৰৰিভাৰনতো.

‘‘নিব্বিদাযা’’তি ইমিনা পদেন ৰিপস্সনা ৰুত্তা. এস নযো সেসেসুপি. ৰৰত্থানকথাতি ৰিপস্সনামগ্গনিব্বানানং তংতংপদেহি ৰৰত্থপেত্ৰা কথা. অযমেত্থ নিপ্পরিযাযকথাতি আহ ‘‘পরিযাযেন পনা’’তিআদি.

৩৩০. পরিপূরেতুন্তি ভাৰনাপারিপূরিৰসেন পরিপুণ্ণে কাতুং, নিব্বত্তেতুন্তি অত্থো. ব্রহ্মচরিযচিণ্ণকুলপুত্তানন্তি ¶ চিণ্ণমগ্গব্রহ্মচরিযানং কুলপুত্তানন্তি উক্কট্ঠনিদ্দেসেন অরহত্তনিকূটেন দেসনং নিট্ঠপেসি.

অভিনন্দনং নাম সম্পটিচ্ছনং ‘‘অভিনন্দন্তি আগত’’ন্তিআদীসু ¶ ৰিয, তঞ্চেত্থ অত্থতো চিত্তস্স অত্তমনতাতি আহ ‘‘চিত্তেন সম্পটিচ্ছন্তো অভিনন্দিত্ৰা’’তি. ‘‘সাধু সাধূ’’তি ৰাচায সম্পহংসনা অনুমোদনাতি আহ ‘‘ৰাচায সম্পহংসমানো অনুমোদিত্ৰা’’তি.

মহাগোৰিন্দসুত্তৰণ্ণনায লীনত্থপ্পকাসনা.

৭. মহাসমযসুত্তৰণ্ণনা

নিদানৰণ্ণনা

৩৩১. উদানন্তি ¶ ¶ ¶ রঞ্ঞা ওক্কাকেন জাতিসম্ভেদপরিহারনিমিত্তং পৰত্তিতং উদানং পটিচ্চ. একোপি জনপদো রুল়্হিসদ্দেন ‘‘সক্কা’’তি ৰুচ্চতীতি এত্থ যং ৰত্তব্বং, তং মহানিদানৰণ্ণনাযং ৰুত্তনযেন ৰেদিতব্বং. অরোপিতেতি কেনচি অরোপিতে.

আৰরণেনাতি সেতুনা. বন্ধাপেত্ৰাতি পংসুপলাসপাসাণমত্তিকাখণ্ডাদীহি আল়িং থিরং কারাপেত্ৰা.

‘‘জাতিং ঘট্টেত্ৰা কলহং ৰড্ঢযিংসূ’’তি সঙ্খেপেন ৰুত্তমত্থং পাকটতরং কাতুং ‘‘কোলিযকম্মকরা ৰদন্তী’’তিআদি ৰুত্তং.

তীণি জাতকানীতি ফন্দনজাতকপথৰীউন্দ্রিযজাতকলটুকিকজাতকানি দ্ৰে জাতকানীতি রুক্খধম্ম ৰট্টকজাতকানি.

তেনাতি ভগৰতা. কলহকারণভাৰোতি কলহকারণস্স অত্থিভাৰো.

অট্ঠানেতি অকারণে. ৰেরং কত্ৰাতি ৰিরোধং উপ্পাদেত্ৰা. ‘‘কুঠারিহত্থো পুরিসো’’তিআদিনা ফন্দনজাতকং কথেসি. ‘‘দুদ্দুভাযতি ভদ্দন্তে’’তিআদিনা পথৰীউন্দ্রিযজাতকং কথেসি. ‘‘ৰন্দামি তং কুঞ্জরা’’তিআদিনা লটুকিকজাতকং কথেসি.

‘‘সাধূ ¶ সম্বহুলা ঞাতী; অপি রুক্খা অরঞ্ঞজা;

ৰাতো ৰহতি একট্ঠং, ব্রহন্তম্পি ৰনপ্পতি’’ন্তি. –

আদিনা রুক্খধম্মজাতকং কথেসি.

‘‘সম্মোদমানা ¶ গচ্ছন্তি, জালং আদায পক্খিনো;

যদা তে ৰিৰদিস্সন্তি, তদা এহিন্তি মে ৰস’’ন্তি. –

আদিনা ৰট্টকজাতকং কথেসি.

‘‘অত্তদণ্ডা ¶ ভযং জাতং, জনং পস্সথ মেধগং;

সংৰেগং কিত্তযিস্সামি, যথা সংৰিজিতং মযা’’তি. (সু. নি. ১.৯৪১);

আদিনা অত্তদণ্ডসুত্তং কথেসি.

তংতংপলোভনকিরিযা কাযৰাচাহি পরক্কমন্তিযো ‘‘উক্কণ্ঠন্তূ’’তি সাসনং পেসেন্তি.

কুণালদহেতি কুণালদহতীরে পতিট্ঠায. পুচ্ছিতপুচ্ছিতং কথেসি (জা. ২.কুণালজাতক) ‘‘অনুক্কমেন কুণালসকুণরাজস্স পুচ্ছনপ্পসঙ্গেন কুণালজাতকং কথেস্সামী’’তি. অনভিরতিং ৰিনোদেসি ইত্থীনং দোসদস্সনমুখেন কামানং আদীনৰোকারসংকিলেসৰিভাৰনেন.

কোসজ্জং ৰিধমিত্ৰা পুরিসথামপরিব্রূহনেন ‘‘উত্তমপুরিসসদিসেহি নো ভৰিতুং ৰট্টতী’’তি উপ্পন্নচিত্তা.

অৰিস্সট্ঠকম্মন্তাতি অরতিৰিনোদনতো পট্ঠায অৰিস্সট্ঠসমণকম্মন্তা, অপরিচত্তকম্মট্ঠানাতি অত্থো. নিসীদিতুং ৰট্টতীতি ভগৰা চিন্তেসীতি যোজনা.

পদুমিনিযন্তি পদুমস্সরে. ৰিকসিংসু গুণগণৰিবোধেন. ‘‘অযং ইমস্স…পে… ন কথেসী’’তি ইমিনা সব্বেপি তে ভিক্খূ তাৰদেৰ পটিপাটিযা আগতত্তা অঞ্ঞমঞ্ঞস্স লজ্জমানা ¶ অত্তনা পটিৰিদ্ধৰিসেসং ভগৰতো নারোচেসুন্তি দস্সেতি. ‘‘খীণাসৰান’’ন্তিআদিনা তত্থ কারণমাহ.

ওসীদমত্তেতি ভগৰতো সন্তিকং উপগতমত্তে. অরিযমণ্ডলেতি অরিযসমূহে. পাচীনযুগন্ধরপরিক্খেপতোতি যুগন্ধরপব্বতস্স পাচীনপরিক্খেপতো, ন বাহিরকেহি উচ্চমানউদযপব্বততো. রামণেয্যকদস্সনত্থন্তি বুদ্ধুপ্পাদপটিমণ্ডিতত্তা ৰিসেসতো রমণীযস্স লোকস্স রমণীযভাৰদস্সনত্থং. উল্লঙ্ঘিত্ৰাতি ¶ উট্ঠহিত্ৰা. এৰরূপে খণে লযে মুহুত্তেতি যথাৰুত্তে চন্দমণ্ডলস্স উট্ঠিতক্খণে উট্ঠিতৰেলাযং উট্ঠিতমুহুত্তেতি উপরূপরি কালস্স ৰড্ঢিতভাৰদস্সনত্থং ৰুত্তং.

তথা ¶ তেসং ভিক্খূনং জাতিআদিৰসেন ভগৰতো অনুরূপপরিৰারিতং দস্সেন্তো ‘‘তত্থা’’তি আদিমাহ.

সমাপন্নদেৰতাতি আসন্নট্ঠানে ঝানসমাপত্তি সমাপন্নদেৰতা. চলিংসূতি উট্ঠহিংসু. কোসমত্তং ঠানং সদ্দন্তরং. জম্বুদীপে কির আদিতো তেসট্ঠিমত্তানি নগরসহস্সানি উপ্পন্নানি, তথা দুতিযং, তথা ততিযং, তং সন্ধাযাহ ‘‘তিক্খত্তুং তেসট্ঠিযা নগরসহস্সেসূ’’তি. তে পন সম্পিণ্ডেত্ৰা সতসহস্সতো পরং অসীতিসহস্সানি, নৰসহস্সানি চ হোন্তি. নৰনৰুতিযা দোণমুখসতসহস্সেসূতি নৰসতসহস্সাধিকেসু নৰুতিসতসহস্সেসু দোণমুখেসু. দোণমুখন্তি চ মহানগরস্স আযুপ্পত্তিট্ঠানভূতং পাদনগরং ৰুচ্চতি. ছন্নৰুতিযা পট্টনকোটিসতসহস্সেসূতি ছকোটিঅধিকনৰুতিকোটিসতসহস্সপট্টনেসু. তম্বপণ্ণিদীপাদীসু ছপণ্ণাসায রতনাকরেসু. এৰং পন নগরদোণিমুখপট্টনরতনাকরাদিৰিভাগেন কথনং তংতংঅধিৰত্থায ৰসন্তীনং দেৰতানং বহুভাৰদস্সনত্থং. যদি দসসহস্সচক্কৰাল়েসু দেৰতা সন্নিপতিতা, অথ কস্মা পাল়িযং ‘‘দসহি চ লোকধাতূহী’’তি ৰুত্তন্তি আহ ‘‘দসসহস্স…পে… অধিপ্পেতা’’তি, তেন সহস্সিলোকধাতু ইধ ‘‘একা লোকধাতূ’’তি ৰুত্তাতি ৰেদিতব্বং.

লোহপাসাদেতি আদিতো কতে লোহপাসাদে. ব্রহ্মলোকেতি হেট্ঠিমে ব্রহ্মলোকে. যদি তা দেৰতা এৰং নিরন্তরা, পচ্ছা আগতানং ওকাসো এৰ ন ভৰেয্যাতি চোদনং সন্ধাযাহ ‘‘যথা খো পনা’’তিআদি. সুদ্ধাৰাসকাযং উপপন্না সুদ্ধাৰাসকাযিকা, তাসং পন যস্মা সুদ্ধাৰাসভূমি নিৰাসট্ঠানং, তস্মা ৰুত্তং ‘‘সুদ্ধাৰাসৰাসীন’’ন্তি. আৰাসাতি আৰাসনট্ঠানভূতা ¶ ¶ , দেৰতা পন ওরম্ভাগিযানং, ইতরেসঞ্চ সংযোজনানং সমুচ্ছিন্দনেন সুদ্ধো আৰাসো এতেসন্তি সুদ্ধাৰাসা.

৩৩২. পুরত্থিমচক্কৰাল়মুখৰট্টিযং ওতরি অঞ্ঞত্থ ওকাসং অলভমানো. এৰং সেসাপি. বুদ্ধানং অভিমুখমগ্গো বুদ্ধৰীথি. যাৰ চক্কৰাল়া ওত্থরিতুং ওৰরিতুং ন সক্কা. পহটবুদ্ধৰীথিযাৰাতি বুদ্ধানং সন্তিকং উপসঙ্কমন্তেহি তেহি দেৰব্রহ্মেহি ৰল়ঞ্জিতৰীথিযাৰ. সমিতি সঙ্গতি সন্নিপাতো সমযো, মহন্তো সমযো মহাসমযোতি আহ ‘‘মহাসমূহো’’তি ¶ . পৰদ্ধং ৰনং পৰনন্তি আহ ‘‘ৰনসণ্ডো’’তি. দেৰঘটাতি দেৰসমূহা.

সমাদহংসূতি সমাদহিতং লোকুত্তরসমাধিনা সুট্ঠু অপ্পিতং অকংসু, যথাসমাহিতং পন সমাধিনা যোজিতং নাম হোতীতি ৰুত্তং ‘‘সমাধিনা যোজেসু’’ন্তি. সব্বেসং গোমুত্তৰঙ্কাদীনং দূরসমূহনিতত্তা সব্বে…পে… অকরিংসু. নযতি অস্সে এতেহীতি নেত্তানি, যোত্তানি. অৰীথিপটিপন্নানং অস্সানং ৰীথিপটিপাদনং রস্মিগ্গহণেন পহোতীতি ‘‘সব্বযোত্তানি গহেত্ৰা অচোদেন্তো’’তি ৰত্ৰা তং পন অচোদনং অৰারণং এৰাতি আহ ‘‘অচোদেন্তো অৰারেন্তো’’তি.

যথা খীলং ভিত্তিযং ৰা ভূমিযং ৰা আকোটিতং দুন্নীহরণং, যথা চ পলিঘং নগরপ্পৰেসনিৰারণং, যথা চ ইন্দখীলং গম্ভীরনেমি সুনিখাতং দুন্নীহরণং, এৰং রাগাদযো সত্তসন্তানতো দুন্নীহরণা, নিব্বাননগরপ্পৰেসনিৰারণা চাতি তে ‘‘খীলং, পলিঘং, ইন্দখীল’’ন্তি চ ৰুত্তা. তণ্হাএজায অভাৰেন অনেজা পরমসন্তুট্ঠভাৰেন চাতুদ্দিসত্তা অপ্পটিহতচারিকং চরন্তি.

গতাসেতি গতা এৰ, ন পন গমিস্সন্তি পরিনিট্ঠিতসরণগমনত্তাতি ¶ . লোকুত্তরসরণগমনং অধিপ্পেতন্তি আহ ‘‘নিব্বেমতিকসরণগমনেন গতা’’তি. তে হি নিযমেন অপাযভূমিং ন গমিস্সন্তি, দেৰকাযঞ্চ পরিপূরেস্সন্তি. যে পন লোকিযেন সরণগমনেন বুদ্ধং সরণং গতাসে, ন তে গমিস্সন্তি অপাযভূমিং, সতি চ পচ্চযন্তরসমৰাযে পহায মানুসং দেহং, দেৰকাযং পরিপূরেস্সন্তীতি অযমেত্থ অত্থো.

দেৰতাসন্নিপাতৰণ্ণনা

৩৩৩. এতেসন্তি ¶ দেৰতাসন্নিপাতানং. ইদানীতি ইমস্মিং কালে. বুদ্ধানন্তি অঞ্ঞেসং বুদ্ধানং অভাৰা. চিত্তকল্লতা চিত্তমদ্দৰং.

কিং পন ভগৰতাৰ মহন্তে দেৰতাসমাগমে তেসং নামগোত্তং কথেতুং সক্কাতি? আম সক্কাতি দস্সেতুং ‘‘বুদ্ধা নাম মহন্তা’’তিআদি ৰুত্তং. তত্থ দিট্ঠন্তি রূপাযতনমাহ, সুতন্তি সদ্দাযতনং, মুতন্তি সম্পত্তগ্গাহিইন্দ্রিযৰিসযং গন্ধরসফোট্ঠব্বাযতনং, ৰিঞ্ঞাতন্তি ৰুত্তাৰসেসং সব্বং ¶ ঞেয্যং, পত্তন্তি পরিযেসিত্ৰা, অপরিযেসিত্ৰা ৰা সম্পত্তং, পরিযেসিতন্তি পত্তং, অপ্পত্তং ৰা পরিযিট্ঠং. অনুৰিচরিতং মনসাতি কেৰলং মনসা আলোচিতং. কত্থচি নীলাদিৰসেন ৰিভত্তরূপারম্মণেতি অভিধম্মে (ধ. স. ৬১৫) ‘‘নীলং পীতক’’ন্তিআদিনা ৰিভত্তে যত্থ কত্থচি রূপারম্মণে কিঞ্চি রূপারম্মণং ৰা ন অত্থীতি যোজনা. ভেরিসদ্দাদিৰসেনাতি এত্থাপি এসেৰ নযো. যন্তি যং আরম্মণং. এতেসন্তি বুদ্ধানং.

ইদানি যথাৰুত্তমত্থং পাল়িযা সমত্থেতুং ‘‘যথাহা’’তিআদি ৰুত্তং. তদা জাননকিরিযায অপরিযোসিতভাৰদস্সনত্থং ‘‘জানামী’’তি ৰত্ৰা যস্মা যং কিঞ্চি নেয্যং নাম, সব্বং তং ভগৰতা অঞ্ঞাতং নাম নত্থি, তস্মা ৰুত্তং ‘‘তমহং অব্ভঞ্ঞাসি’’ন্তি.

ন ওলোকেন্তি পযোজনাভাৰতো. ৰিপরীতা ‘‘ন কম্মাৰরণেন সমন্নাগতা’’তিআদিনা নযেন ৰুত্তা. ‘‘যস্স মঙ্গলা সমূহতা’’তি (সু. নি. ৩৬২) আরভিত্ৰা ‘‘রাগং ¶ ৰিনযেথ মানুসেসু দিব্বেসু কামেসু চা’’তিআদিনা (সু. নি. ৩৬৩) চ রাগনিগ্গহকথাবাহুল্লতো সম্মাপরিব্বাজনীযসুত্তং রাগচরিতানং সপ্পাযং, ‘‘পিযমপ্পিযভূতা কলহ ৰিৰাদা পরিদেৰসোকা সহমচ্ছরা চা’’তিআদিনা (সু. নি. ৮৬৯; মহানি. ৯৮) কলহাদযো যতো দোসতো সমুট্ঠহন্তি, সো চ দোসো যতো পিযভাৰতো, সো চ পিযভাৰো যতো ছন্দতো সমুট্ঠহন্তি, ইতি ফলতো, কারণপরম্পরতো চ দোসে আদীনৰৰিভাৰনবাহুল্লতো কলহৰিৰাদসুত্তং (সু. নি. ৮৬৯; মহানি. ৯৮) দোসচরিতানং সপ্পাযং –

‘‘অপ্পঞ্হি এতং ন অলং সমায,

দুৰে ৰিৰাদস্স ফলানি ব্রূমি;

এতম্পি ¶ দিস্ৰা ন ৰিৰাদযেথ,

খেমাভিপস্সং অৰিৰাদভূমি’’ন্তি. (সু. নি. ৯০২; মহানি. ১৩১) –

আদিনা নযেন সম্মোহৰিধমনতো, পঞ্ঞাপরিব্রূহনতো চ মহাব্যূহসুত্তং মোহচরিতানং সপ্পাযং –

‘‘পরস্স ¶ চে ধম্মং অনানুজানং,

বালো, মগো হোতি নিহীনপঞ্ঞো;

সব্বেৰ বালা সুনিহীনপঞ্ঞা,

সব্বেৰিমে দিট্ঠিপরিব্বসানা’’তি. (সু. নি. ৮৮৬; মহানি. ১১৫) –

আদিনা নযেন সন্দিট্ঠিপরামাসিতাপনযনমুখেন সৰিসযেসু দিট্ঠিগ্গহণেসু ৰিসটৰিতক্কৰিচ্ছিন্দনৰসেন পৰত্তত্তা চূল়ব্যূহসুত্তং ৰিতক্কচরিতানং সপ্পাযং –

‘‘মূলং ¶ পপঞ্চসঙ্খায (ইতি ভগৰা),

মন্তা অস্মীতি সব্বং উপরুন্ধে;

যা কাচি তণ্হা অজ্ঝত্তং,

তাসং ৰিনযা সদা সতো সিক্খে’’তি. (সু. নি. ৯২২; মহানি. ১৫১) –

পপঞ্চসঙ্খায মূলং অৰিজ্জাদিকিলেসজাতং অস্মীতি পৰত্তমানঞ্চাতি সব্বং মন্তা পঞ্ঞায উপরুন্ধেয্য. যা কাচি অজ্ঝত্তং রূপতণ্হাদিভেদা তণ্হা উপ্পজ্জেয্য, তাসং ৰিনযা ৰূপসমায সদা সতো উপট্ঠিতস্সতি হুত্ৰা সিক্খেয্যাতি এৰমাদি উপদেসস্স সদ্ধোৰ ভাজনং. তস্স হি সো অত্থাৰহোতি তুৰট্টকসুত্তং সদ্ধাচরিতানং সপ্পাযং –

‘‘ৰীততণ্হো পুরা ভেদা (ইতি ভগৰা),

পুব্বমন্তমনিস্সিতো;

ৰেমজ্ঝে ¶ নুপসঙ্খেয্যো,

তস্স নত্থি পুরক্খত’’ন্তি. (সু. নি. ৮৫৫; মহানি. ৮৪) –

যো সরীরভেদতো পুব্বেৰ পহীনতণ্হো, ততো এৰ অতীতদ্ধসঞ্ঞিতং পুরিমকোট্ঠাসং তণ্হানিস্সযেন অনিস্সিতো, ৰেমজ্ঝে পচ্চুপ্পন্নেপি অদ্ধনি ‘‘রত্তো’’তিআদিনা উপসঙ্খাতব্বো, তস্স অরহতো তণ্হাদিট্ঠিপুরক্খারানং অভাৰা অনাগতে অদ্ধনি কিঞ্চি পুরক্খতং নত্থীতি আদিনা এৰং গম্ভীরকথাবাহুল্লতো পূরাভেদসুত্তং (সু. নি. ৮৫৫; মহানি. ৮৪) বুদ্ধিচরিতানং সপ্পাযন্তি কত্ৰা ৰুত্তং ‘‘অথ নেসং সপ্পাযং …পে… ৰৰত্থপেত্ৰা’’তি. মনসাকাসীতি এৰং চরিযায ৰসেন মনসি কত্ৰা পুন তং সদিসং অত্তনো ¶ দেসনানিক্খেপযোগ্যতাৰসেন মনসি অকাসি. অত্তজ্ঝাসযেন নু খো জানেয্যাতি পরজ্ঝাসযাদিং অনপেক্খিত্ৰা ময্হংযেৰ অজ্ঝাসযেন আরদ্ধ দেসনং ¶ জানেয্য নু খো. পরজ্ঝাসযেনাতি সন্নিপতিতায পরিসায কস্সচি অজ্ঝাসযেন. অট্ঠুপ্পত্তিকেনাতি ইধ সমুট্ঠিতঅট্ঠুপ্পত্তিযা. পুচ্ছাৰসেনাতি কস্সচি পুচ্ছন্তস্স পুচ্ছাৰসেন. আরদ্ধদেসনং জানেয্যাতি. ‘‘সচে পচ্চেকবুদ্ধো ভৰেয্যা’’তি ইদং ইমেসং সুত্তানং দেসনায পুচ্ছা পচ্চেকবুদ্ধানং ভারিযা, অৰিসযা চাতি দস্সনত্থং ৰুত্তং. তেনাহ ‘‘সোপি ন সক্কুণেয্যা’’তি.

এত্থ চ যস্মা ন অনুমতিপুচ্ছা, কথেতুকম্যতাপুচ্ছা ৰা যুত্তা, অথ খো দিট্ঠসংসন্দনপুচ্ছাসদিসী ৰা ৰিমতিচ্ছেদনপুচ্ছাসদিসী ৰা পুচ্ছা যুত্তা, তাৰ পুগ্গলজ্ঝাসযৰসেন পৰত্তিতা নাম হোন্তি, ন যথাধম্মৰসেন, তত্থ যদি ভগৰা তথা সযমেৰ পুচ্ছিত্ৰা সযমেৰ ৰিস্সজ্জেয্য, সুণন্তীনং দেৰতানং সম্মোহো ভৰেয্য ‘‘কিং নামেতং ভগৰা পঠমং এৰমাহ, পুনপি এৰমাহা’’তি, অন্ধকারং পৰিট্ঠা ৰিয হোন্তি, তস্মা ৰুত্তং ‘‘এৰং পেতা দেৰতা ন সক্খিস্সন্তি পটিৰিজ্ঝিতু’’ন্তি. যথাধম্মদেসনাযং পন কথেতুকম্যতাৰসেন পুচ্ছনেন সম্মোহো হোতীতি. সূরিযো উগ্গতোতি আহ দেৰসঙ্ঘো আসন্নতরভাৰেন ওভাসস্স ৰিপুলউল়ারভাৰতো. একিস্সা লোকধাতুযাতি সুত্তে (দী. নি. ৩.১৬১; ম. নি. ৩.১২৯; অ. নি. ১.২৭৭; ৰিভ. ৮০৯; নেত্তি. ৫৭; মি. প. ৫.১.১) আগতনযেন সব্বত্থেৰ পন অপুব্বং অচরিমং দ্ৰে বুদ্ধা ন হোন্তেৰ. তেনেৰাহ – ‘‘অনন্তাসু…পে… অদ্দসা’’তি.

গাথাযং পুচ্ছামীতি নিম্মিতবুদ্ধো ভগৰন্তং পুচ্ছিতুং ওকাসং কারাপেসি. মুনিন্তি বুদ্ধমুনিং ¶ . পহূতপঞ্ঞন্তি মহাপঞ্ঞং. তিণ্ণন্তি চতুরোঘতিণ্ণং. পারঙ্গতন্তি নিব্বানপ্পত্তং, সব্বস্স ৰা ঞেয্যস্স পারং পরিযন্তং গতং. পরিনিব্বুতং সউপাদিসেসনিব্বানৰসেন. ঠিতত্তন্তি অৰট্ঠিতচিত্তং লোকধম্মেহি অকম্পনেয্যতায. নিক্খম্ম ঘরা পনুজ্জ কামেতি ৰত্থুকামে পনূদিত্ৰা ঘরাৰাসা নিক্খম্ম. কথং ভিক্খু সম্মা সো লোকে পরিব্বজেয্যাতি সো ভিক্খু কথং সম্মা পরিব্বজেয্য গচ্ছেয্য ৰিহরেয্য, অনুপলিত্তো হুত্ৰা লোকং অতিক্কমেয্যাতি অত্থো.

৩৩৪. সিলোকং ¶ অনুকস্সামীতি ¶ এত্থ সিলোকো নাম পাদসমুদযো, ইসীহি ৰুচ্চমানা গাথাতিপি ৰুচ্চতি. পাদোৰ নিযতৰণ্ণানুপুব্বিকানং পদানং সমূহো, তং সিলোকং অনুকস্সামি পৰত্তযিস্সামীতি অত্থোতি আহ ‘‘অক্খর…পে… পৰত্তযিস্সামী’’তি. যত্থাতি অধিকরণে ভুম্মং. আমেডিতলোপেনাযং নিদ্দেসোতি আহ ‘‘যেসু যেসু ঠানেসূ’’তি. ভুম্মাতি ভূমিপটিবদ্ধনিৰাসা. তং তং নিস্সিতা তং তং ঠানং নিস্সিতৰন্তো নিস্সায ৰসমানা, তেহি সদ্ধিং সিলোকং অনুকস্সামীতি অধিপ্পাযো. ‘‘যে সিতা গিরিগব্ভর’’ন্তি ইমিনা তেসং ৰিৰেকৰাসং দস্সেতি, ‘‘পহিতত্তা সমাহিতা’’তি ইমিনা ভাৰনাভিযোগং.

বহুজনা পঞ্চসতসঙ্খ্যত্তা. পটিপক্খাভিভৰনতো, তেজুস্সদতায চ সীহা ৰিয পৰিৰিত্ততায নিলীনা. একত্তন্তি একীভাৰং. ওদাতচিত্তা হুত্ৰা সুদ্ধাতি অরহত্তমগ্গাধিগমেন পরিযোদাতচিত্তা হুত্ৰা সুদ্ধা, ন কেৰলং সরীরসুদ্ধিযাৰ. ৰিপ্পসন্নাতি অরিযমগ্গপ্পসাদেন ৰিসেসতো পসন্না. চিত্তস্স আৰিলভাৰকরানং কিলেসানং অভাৰেন অনাৰিলা.

ভিক্খূ জানিত্ৰাতি ভিন্নকিলেসে ভিক্খূ ‘‘ইমে দিব্বচক্খুনা এতে দেৰকাযে পস্সন্তীতি জানিত্ৰা. সৰনন্তে জাতত্তাতি ধম্মস্সৰনপরিযোসানে অরিযজাতিযা জাতত্তা. ইদং সব্বন্তি ইদং ‘‘ভিয্যো পঞ্চসতে’’তিআদিকং সব্বং.

তদত্থায ৰীরিযং করিংসূতি দিব্বচক্খুঞাণাভিনীহারৰসেন ৰীরিযং উস্সাহং অকংসু. তেনাহ ‘‘ন তং তেহী’’তিআদি. সত্তরিন্তি ত-কারস্স র-কারাদেসং কত্ৰা ৰুত্তং, সত্ততিন্তি অত্থো. ‘‘সহস্স’’ন্তি পন অনুৰত্ততি, সত্ততিযোগেন বহুৰচনং. তেনাহ ‘‘একে সহস্সং. একে সত্ততিসহস্সানী’’তি.

অনন্তন্তি অন্তরহিতং, তং পন অতিৰিয মহন্তং নাম হোতীতি আহ ‘‘ৰিপুল’’ন্তি.

অৰেক্খিত্ৰাতি ¶ ¶ ঞাণচক্খুনা ৰিসুং ৰিসুং অৰেক্খিত্ৰা ‘‘ৰৰত্থিত্ৰানা’’তিপি পঠন্তি, সো এৰত্থো. তং অৰেক্খনং নিচ্ছযকরণং হোতীতি আহ ‘‘ৰৰত্থপেত্ৰা’’তি. পুব্বে ৰুত্তগাথাসু ততিযগাথায পচ্ছিমদ্ধং, চতুত্থগাথায পুরিমদ্ধঞ্চ সন্ধাযাহ ‘‘পুব্বে ৰুত্তগাথমেৰা’’তি.

ৰিজাননম্পি ¶ দস্সনং এৰাতি আহ ‘‘পস্সথ ওলোকেথা’’তি. ৰাচাযতপৰত্তিতভাৰতো ‘‘অনুপটিপাটিযাৰ কিত্তযিস্সামী’’তি ৰদতি.

৩৩৫. সত্ত সহস্সানি সঙ্খাযাতি সত্ত সহস্সা. যক্খাযেৰাতি যক্খজাতিকা এৰ. আনুভাৰসম্পন্নাতি মহেসক্খা. ইদ্ধিমন্তোতি ৰা মহানুভাৰা. জুতিমন্তোতি মহপ্পভা. ৰণ্ণৰন্তোতি অতিক্কন্তৰণ্ণা. যসস্সিনোতি মহাপরিৰারা চেৰ পত্থটকিত্তিসদ্দা চ. সমিতি-সদ্দো সমীপত্থোতি অধিপ্পাযেনাহ ‘‘ভিক্খূনং সন্তিক’’ন্তি.

হেমৰতপব্বতেতি হিমৰতো সমীপে ঠিতপব্বতে.

এতে সব্বেপীতি এতে সত্তসহস্সা কাপিলৰত্থৰা, ছসহস্সা হেমৰতা, তিসহস্সা সাতাগিরাতি যথাৰুত্তা সব্বেপি সোল়সসহস্সা.

রাজগহনগরেতি রাজগহনগরস্স সমীপে. তন্তি কুম্ভীরং.

৩৩৬. কামং পাচীনদিসং পসাসতি, তথাপি চতূসুপি দিসাসু সপরিৰারদীপেসু চতূসুপি মহাদীপেসু গন্ধব্বানং জেট্ঠকো, কথং? সব্বে তে তস্স ৰসে ৰত্তন্তি. কুম্ভণ্ডানং অধিপতীতিআদীসুপি এসেৰ নযো.

তস্সাপি ৰিরুল়্হস্স. তাদিসাযেৰাতি ধতরট্ঠস্স পুত্তসদিসা এৰ পুথুত্থতো, নামতো, বলতো, ইদ্ধিআদিৰিসেসতো চ.

সব্বসঙ্গাহিকৰসেনাতি দসসহস্সিলোকধাতুযা পচ্চেকং চত্তারো ¶ চত্তারো মহারাজানোতি তেসং সব্বেসং সঙ্গণ্হনৰসেন. তেনাহ ‘‘অযঞ্চেত্থা’’তিআদি.

চতুরো দিসাতি চতূসু দিসাসু. চতুরো দিসা জলমানা সমুজ্জলন্তা ওভাসেন্তা. যদি ¶ এৰং মহতিযা পরিসায আগতানং কথং কাপিলৰত্থৰে ৰনে ঠিতাতি আহ ‘‘তে পনা’’তিআদি.

৩৩৭. তেসং মহারাজানং দাসাতি যোজনা. মাযায যুত্তা, তস্মা মাযাৰিনো. ৰঞ্চনং এতেসু অত্থি, ৰঞ্চনে ৰা নিযুত্তাতি ৰঞ্চনিকা. কেরাটিযসাঠেয্যেনাতি নিহীনসঠেন কম্মেন. মাযা এতেসং অত্থীতি ¶ মাযা, তে চ পরেসং ৰঞ্চনত্থং যেন মাযাকরণেন ‘‘মাযা’’তি ৰুত্তা, তং দস্সেন্তো ‘‘মাযাকারকা’’তি আহ.

এত্তকা দাসাতি এত্তকা কুটেণ্ডুআদিকা নিঘণ্ডুপরিযোসানা অট্ঠমহারাজানং দাসা.

দেৰরাজানোতি দেৰা হুত্ৰা তংতংদেৰকাযস্স রাজানো. চিত্তো চ সেনো চ চিত্তসেনো চাতি তযো এতে দেৰপুত্তা পাল়িযং একসেসনযেন ৰুত্তাতি আহ ‘‘চিত্তো চা’’তিআদি.

ভিক্খুসঙ্ঘো সমিতো সন্নিপতিতো এত্থাতি ভিক্খুসঙ্ঘসমিতি, ইমং ৰনং.

৩৩৮. নাগসদহৰাসিকাতি নাগসদহনিৰাসিনো. তত্থেকো কির নাগরাজা, চিরকালং ৰসতো তস্স পরিসা মহতী পরম্পরাগতা অত্থি, তং সন্ধাযাহ ‘‘তচ্ছকনাগপরিসাযা’’তি.

যমুনৰাসিনোতি যমুনাযং ৰসনকনাগা. নাগৰোহারেনাতি হত্থিনাগৰোহারেন.

ৰুত্তপ্পকারেতি কম্বলস্সতরে ঠপেত্ৰা ইতরে ৰুত্তপ্পকারনাগা. লোভাভিভূতাতি আহারলোভেন অভিভূতা. দিব্বানুভাৰতাতি দিব্বানুভাৰতো, দিব্বানুভাৰহেতু ৰা দিব্বা. ‘‘চিত্রসুপণ্ণা’’তি নামং ৰিচিত্রসুন্দরপত্তৰন্ততায.

উপৰ্হযন্তাতি ¶ উপেচ্চ কথেন্তা. কাকোলূকঅহিনকুলাদযো ৰিয অঞ্ঞমঞ্ঞং জাতিসমুদাগতৰেরাপি সমানা মিত্তা ৰিয…পে… হট্ঠতুট্ঠচিত্তা অঞ্ঞমঞ্ঞস্মিন্তি অধিপ্পাযো. বুদ্ধংযেৰ তে সরণং গতা ‘‘বুদ্ধানুভাৰেনেৰ মযং অঞ্ঞমঞ্ঞস্মিং মেত্তিং পটিলভিম্হা’’তি.

৩৩৯. ভাতরোতি মেথুনভাতরো. তেনাহ ‘‘সুজায অসুরকঞ্ঞায কারণা’’তি.

তেসূতি ¶ অসুরেসু. কালকঞ্চাতি এৰং নামা. মহাভিস্মাতি ভিংসনকমহাসরীরা. অভব্বাতি সম্মত্তনিযামং ওক্কমিতুং ন ভব্বা অচ্ছন্দিকত্তা তাদিসস্স ছন্দস্সেৰ অভাৰতো.

বলিনো ¶ মহাঅসুরস্স অব্ভতীতত্তা তস্স পুত্তে এৰ কিত্তেন্তো ভগৰা ‘‘সতঞ্চ বলিপুত্তান’’ন্তি আদিমাহ. সো কির সুখুমং অত্তভাৰং মাপেত্ৰা উপগচ্ছি.

৩৪০. কম্মং কত্ৰাতি পরিকম্মং কত্ৰা. নিব্বত্তাতি উপচারজ্ঝানেন নিব্বত্তা. অপ্পনাঝানেন পন নিব্বত্তা ব্রহ্মানো হোন্তি, তে পরতো ৰক্খতি ‘‘সুব্রহ্মা’’তিআদিনা (দী. নি. ২.৩৪১), অযঞ্চ কামাৰচরদেৰতা ৰুচ্চতি. তেনেৰাহ – ‘‘মেত্তাকরুণাকাযিকাতি মেত্তাঝানে চ করুণাঝানে চ পরিকম্মং কত্ৰা নিব্বত্তদেৰা’’তি. মেত্তাঝানে করুণাঝানেতি মেত্তাঝাননিমিত্তং করুণাঝাননিমিত্তং, তদত্থন্তি অত্থো.

তে আপোদেৰাদযো যথাসকং ৰগ্গৰসেন ঠিতত্তা দসধা ঠিতা. যাৰ করুণাকাযিকা দস দেৰকাযা. নানত্তৰণ্ণাতি নানাসভাৰৰণ্ণৰন্তো.

ৰেণ্ডুদেৰতাতি ৰেণ্ডু নাম দেৰতা, এৰং সহলি দেৰতা. অসমদেৰতা, যমকদেৰতাতি ‘‘দ্ৰে অযনিযো’’তি ৰদন্তি, তপ্পমুখা দ্ৰে দেৰনিকাযাতি. চন্দস্সূপনিসা দেৰা চন্দস্স উপনিস্সযতো ৰত্তমানা তস্স পুরতো চ পচ্ছতো চ পস্সতো চ ধাৰনকদেৰা. তেনাহ ‘‘চন্দনিস্সিতকা দেৰা’’তি. সূরিযস্সূপনিসা, নক্খত্তনিস্সিতাতি এত্থাপি এসেৰ নযো. কেৰলং ৰাতৰাযনহেতৰো দেৰতা ৰাতৰলাহকা. তথা কেৰলং অব্ভপটলসঞ্চরণহেতৰো অব্ভৰলাহকা. উণ্হপ্পৰত্তিহেতৰো ¶ উণ্হৰলাহকা. ৰস্সৰলাহকা পন পজ্জুন্নসদিসাতি. তে ইধ ন ৰুত্তা. ৰসুদেৰতা নাম একো দেৰনিকাযো, তেসং পুব্বঙ্গমত্তা ৰাসৰো, সক্কো.

দসেতেতি এতে ৰেণ্ডুদেৰতাদযো ৰাসৰপরিযোসানা দস দেৰকাযা.

ইমানীতি ‘‘জলমগ্গী’’তি চ ‘‘সিখারিৰা’’তি চ ইমানি তেসং নামানি. কেচি পন ম-কারো পদসন্ধিকরো ‘‘জলা’’তি চ ‘‘অগ্গী’’তি চ ‘‘সিখারিৰা’’তি চ ইমানি তেসং নামানীতি ৰদন্তি. এতেতি তেসু এৰ ‘‘অরিট্ঠকা, রোজা’’তি চ ৰুত্তদেৰেসু একচ্চে,উমাপুপ্ফনিভাসিনো ¶ ৰণ্ণতো উমাপুপ্ফসদিসাতি এৰমত্থো গহেতব্বো, অঞ্ঞথা একাদস দেৰকাযা সিযুং.

দসেতেতি ¶ এতে দস সহভূদেৰাদযো ৰাসৰনেসিপরিযোসানা দস দেৰকাযা. তেনেৰ নিকাযভেদৰসেন দসধাৰ আগতা.

‘‘সমানা’’তিআদি তেসং দেৰানং নিকাযসমুদাযগতং নামং. এৰং সেসানম্পি.

দসেতেতি এতে সমানাদিকা মহাপারগপরিযোসানা দস দেৰকাযা. তেনেৰ নিকাযভেদেন দসধা আগতা.

সুক্কাদযো তযো দেৰকাযা. পামোক্খদেৰাতি পমুখা পধানভূতা দেৰা.

দিসাতি দিসাসু. দেৰোতি মেঘো. দসেতেতি এতে সুক্কাদযো পজ্জুন্নপরিযোসানা দস দেৰকাযা, তে দেৰনিকাযভেদেন দসধা আগতা.

দসেতেতি এতে খেমিযাদযো পরনিম্মিতপরিযোসানা দস দেৰকাযা, তে দেৰনিকাযভেদেন দসধাৰ আগতা. তত্থ ‘‘খেমিযা, কট্ঠকাদযো চ পঞ্চাপি সদেৰকাযা তাৰতিংসকাযিকা’’তি ৰদন্তি. নামন্ৰযেনাতি ¶ নামানুগমেন ‘‘আপোদেৰতা’’তিআদিনামসভাগেন. তেনেৰাহ ‘‘নামভাগেন নামকোট্ঠাসেনা’’তি. সব্বা দেৰতাতি দসসহস্সিলোকধাতূসু সব্বাপি দেৰতা. নিদ্দিসতি তংতংনামসভাগেন একজ্ঝং কত্ৰা.

পৰুত্থাতি পৰাসং গতা ৰিয অপেতাতি আহ ‘‘ৰিগতা’’তি. পৰুত্থা ৰা পকারতো ৰুত্থা ৰুসিতা, তেন জাতি ৰুসিতব্বা অস্সাতি পৰুট্ঠজাতি. কাল়কভাৰা সংকিলেসধম্মা, সব্বসো তদভাৰতো কাল়কভাৰাতীতং দসবলং. লঞ্চনাভাৰেন ৰা অসিতাতিগো কাল়কভাৰাতীতায সিরিযা চন্দো, তাদিসং চন্দং ৰিয সিরিযা ৰিরোচমানং.

৩৪১. একো ব্রহ্মাতি সগাথকৰগ্গে (সং. নি. ১.৯৮) আগতো সুব্রহ্মদেৰপুত্তো. ব্রহ্মলোকে নিব্বত্তিত্ৰা হেট্ঠিমেসু পতিট্ঠিতা অরিযব্রহ্মানো, ন ¶ সুদ্ধাৰাসব্রহ্মানো. তিস্সমহাব্রহ্মা পুথুজ্জনো, যো অপরভাগে মনুস্সেসু নিব্বত্তিত্ৰা মোগ্গলিপুত্ততিস্সত্থেরো জাতো.

সহস্সং ¶ ব্রহ্মলোকানন্তি ব্রহ্মলোকো এতেসন্তি ব্রহ্মলোকা, ব্রহ্মানো, তেসং ব্রহ্মলোকানং সহস্সং সত্তলোকপরিযাযো চাযং লোকসদ্দোতি আহ ‘‘মহাব্রহ্মানং সহস্সং আগত’’ন্তি. অনন্তরগাথাযং ‘‘আগতা’’তি ৰুত্তপদমেৰ অত্থৰসেন ৰদতি. যত্থাতি যস্মিং ব্রহ্মসহস্সে. অঞ্ঞে ব্রহ্মেতি তদঞ্ঞে ব্রহ্মানো. অভিভৰিত্ৰা তিট্ঠতি ৰণ্ণেন, যসসা আযুনা চ.

ইস্সরাতি তেনেৰ ৰসপৰত্তনেন সেসব্রহ্মানং অধিপতিনো.

৩৪২. কাল়কধম্মসমন্নাগতো কাল়কস্স পাপিমস্স মারস্স বালভাৰং পস্সথ, যো অত্তনো অৰিসযে নিরত্থকং পরক্কমিতুং ৰাযমতি.

ৰীতরাগভাৰাৰহস্স ধম্মস্সৰনস্স অন্তরাযকরণেন ¶ অৰীতরাগা রাগেন বদ্ধা এৰ নাম হোন্তীতি ৰুত্তং ‘‘রাগেন বদ্ধং হোতূ’’তি.

ভযানকং সরঞ্চ কত্ৰাতি ভেরৰং মহন্তং সদ্দং সমুট্ঠপেত্ৰা.

ইদানি তং সদ্দং উপমায দস্সেন্তো ‘‘যথা’’তি আদিমাহ. কঞ্চীতি তস্মিং সমাগমে কঞ্চি দেৰতং, মানুসকং ৰা অত্তনো ৰসে ৰত্তেতুং অসক্কোন্তো অসযংৰসে সযঞ্চ ন অত্তনো ৰসে ঠিতো. তেনাহ ‘‘অসযংৰসী’’তিআদি.

৩৪৩. ‘‘ৰীতরাগেহী’’তি দেসনাসীসমেতং. সব্বাযপি হি তত্থ সমাগতপরিসায মারসেনা অপক্কন্তাৰ. নেসং লোমম্পি ইঞ্জযুং তেসং লোমমত্তম্পি ন চালেসুং, কুতো অন্তরাযকরণং. ইতি যত্তকা তত্থ ৰিসেসং অধিগচ্ছিংসু, তেসং সব্বেসম্পি অন্তরাযাকরণৰসেন অত্থো ৰিভাৰেতব্বো, ৰীতরাগগ্গহণেন ৰা সরাগৰীতরাগৰিভাৰিনো চ তত্থ সঙ্গহিতাতি ৰেদিতব্বং. মারো ইমং গাথং অভাসি অচ্ছরিযব্ভুতচিত্তজাতো. কথঞ্হি নাম তাৰ ঘোরতরং মহতিং ৰিভিংসকং মযি করোন্তেপি সব্বে পিমে নিব্বিকারা সমাহিতা এৰ. কস্মা? ৰিজিতাৰিনো ইমে উত্তমপুরিসাতি. তেনাহ ‘‘সব্বে’’তিআদি. যাদিসো অরিযানং ধম্মনিস্সিতো ¶ পমোদো, ন কদাচি তাদিসো অনরিযানং হোতীতি ‘‘সাসনে ভূতেহি অরিযেহি’’ ইচ্চেতং ৰুত্তং. ৰি-সদ্দেন ৰিনা কেৰলোপি সুত-সদ্দো ৰিখ্যাতত্থৰচনো হোতি ‘‘সুতধম্মস্সা’’তিআদীসু (মহাৰ. ৫; উদা. ১১) ৰিযাতি আহ ‘‘জনে ৰিস্সুতা’’তি.

দূরেতি ¶ দূরে পদেসে. দহরস্স অন্তরাযং পরিহরন্তী ‘‘ন সক্কা ভন্তে সকলং কাযং দস্সেতু’’ন্তি অৰোচাতি.

মহাসমযসুত্তৰণ্ণনায লীনত্থপ্পকাসনা.

৮. সক্কপঞ্হসুত্তৰণ্ণনা

নিদানৰণ্ণনা

৩৪৪. অম্বসণ্ডানং ¶ ¶ ¶ অদূরভৰত্তা একোপি সো ব্রাহ্মণগামো ‘‘অম্বসণ্ডা’’ত্ৰেৰ বহুৰচনৰসেন ৰুচ্চতি, যথা ‘‘ৰরণা নগর’’ন্তি. ৰেদি এৰ ৰেদিকো, ৰেদিকো এৰ ৰেদিযো ক-কারস্স য-কারং কত্ৰা, তস্মিং ৰেদিযকে. তেনাহ ‘‘মণিৰেদিকাসদিসেনা’’তিআদি, ইন্দনীলাদিমণিমযৰেদিকাসদিসেনাতি অত্থো. পুব্বেপীতি লেণকরণতো পুব্বে, গুহারূপেন ঠিতা, দ্ৰারে ইন্দসালরুক্খৰতী চ, তস্মা ‘‘ইন্দসালগুহা’’তি ৰুত্তা পুরিমৰোহারেন.

উস্সুক্কং ৰুচ্চতি অভিরুচি, তং পন বুদ্ধদস্সনকামতাৰসেন, তথা উস্সাহনৰসেন চ পৰত্তিযা ‘‘ধম্মিকো উস্সাহো’’তি ৰুত্তং. সক্কেন সদিসো…পে… নত্থীতি. যথাহ ‘‘অপ্পমাদেন মঘৰা, দেৰানং সেট্ঠতং গতো’’তি (ধ. প. ৩০). পরিত্তকেনাতি অপরাপরং বহুং পুঞ্ঞকম্মং অকত্ৰা অপ্পমত্তকেনেৰ পুঞ্ঞকম্মেন.

সক্কোপি কামং মহাপুঞ্ঞকতভীরুত্তানো হোতি, সাতিসযায পন দিব্বসম্পত্তিযা ৰিযোগহেতুকেন সোকেন দিগুণিতেন মরণভযেন ¶ সংতজ্জিতো জাতো. তেনাহ ‘‘সক্কো পন মরণভযাভিভূতো অহোসী’’তি.

দিব্বচক্খুনা দেৰতানং দস্সনং নাম পটিৰিজ্ঝনসদিসন্তি আহ ‘‘পটিৰিজ্ঝী’’তি. পাটিযেক্কো ৰোহারোতি আৰেণিকো পিযসমুদাহারো. মরিসনিযসম্পত্তিকাতি মারিসা. তেসঞ্হি সম্পত্তিযো মহানুভাৰতায সহন্তি উপট্ঠহন্তি, অঞ্ঞে অযোনিসোমনসিকারতায চেৰ অপ্পহুকায চ ন সহন্তিযেৰ, সা পন নেসং মরিসনিযসম্পত্তিকতা দুক্খৰিরহিতাযাতি ৰুত্তং ‘‘নিদ্দুক্খাতিপি ৰুত্তং হোতী’’তি. এককো ৰাতি দেৰপরিসায ৰিনা আগতত্তা ৰুত্তং, মাতলিআদযো ¶ পন তাদিসা সহাযা তদাপি অহেসুংযেৰ. তথা হি ৰক্খতি ‘‘অপি চাযং আযস্মতো চক্কনেমিসদ্দেন তম্হা সমাধিম্হা ৰুট্ঠিতো’’তি (দী. নি. অট্ঠ. ২.৩৫২). ওকাসং নাকাসি ¶ সক্কস্স ঞাণপরিপাকং আগমেন্তো, অঞ্ঞেসঞ্চ বহূনং দেৰানং ধম্মাভিসমযং উপপরিক্খমানো. সোতি সক্কো.

এৰন্তি ৰচনসম্পটিচ্ছনে নিপাতোতি আহ ‘‘এৰং হোতূ’’তিআদি. ভদ্দংতৰাতি পন সক্কং উদ্দিস্স নেসং আসি ৰাদো.

৩৪৫. ৰল্লভো…পে… ধম্মং সুণাতীতি অযমত্থো গোৰিন্দসুত্তাদীহি (দী. নি. ২.২৯৪) দীপেতব্বো. ইমিনা কতোকাসেতি ইমিনা পঞ্চসিখেন কতোকাসে ভগৰতি.

অনুচরিযন্তি অনুচরণভাৰং, তং পনস্স অনুচরণং নাম সদ্ধিং গমনমেৰাতি আহ ‘‘সহচরণং একতো গমন’’ন্তি.

সোৰণ্ণমযন্তি ¶ সুৰণ্ণমযং. পোক্খরন্তি ৰীণায দোণিমাহ. দণ্ডোতি ৰীণদণ্ডো. ৰেঠকাতি তন্তীনং বন্ধনায চেৰ উপ্পীল়নায চ ধমেতব্বা ৰেঠকা. পত্তকন্তি পোক্খরং. সমপঞ্ঞাসমুচ্ছনা মুচ্ছেত্ৰাতি যথা সমপঞ্ঞাসমুচ্ছনা কমতো তত্থ সংমুচ্ছনং কাতুং সক্কা, এৰং তং সজ্জেত্ৰাতি অত্থো. ‘‘সমপঞ্ঞাসমুচ্ছনা সংমুচ্ছেত্ৰা’’তি চ ইদং দেৰলোকে নিযতং ৰীণাৰাদনৰিধিং সন্ধায ৰুত্তং. মনুস্সলোকে পন একৰীসতি মুচ্ছনা. তেনেৰাহ ৰীণোপমসুত্তৰণ্ণনাযং –

‘‘সত্ত সরা তযো গামা, মুচ্ছনা একৰীসতি;

তানা চেকূনপঞ্ঞাস, ইচ্চেতে সরমণ্ডলা’’তি. (অ. নি. অট্ঠ. ৩.৫৫; সারত্থ. টী. ৩.২৪৩);

তত্থ ছজ্জো, উসভো, গন্ধারো, মজ্ঝিমো, পঞ্চমো, ধেৰতো, নিসাদোতি এতে সত্ত সরা. ছজ্জগামো, মজ্ঝিমগামো, সাধারণগামোতি তযো গামা, সরসমূহাতি অত্থো. মনুস্সলোকে ৰাদনৰিধিনা একেকস্সেৰ চ সরস্স ৰসেন তযো তযো মুচ্ছনা কত্ৰা একৰীসতি মুচ্ছনা. একেকস্সেৰ চ সরস্স সত্ত সত্ত তানভেদা, যতো সরস্স মন্দতরৰৰত্থানং হোতি, তে একূনপঞ্ঞাস তানৰিসেসাতি, তিস্সো দুৰে চতস্সো, চতস্সো তিস্সো দুৰে চতস্সোতি দ্ৰাৰীসতি সুতিভেদা ¶ ইচ্ছিতা, অযং পন একেকস্স সরস্স ৰসেন সত্ত সত্ত মুচ্ছনা, অন্তরসরস্স চ একাতি সমপঞ্ঞাসায মুচ্ছনানং যোগ্যভাৰেন ৰীণং ৰজ্জেসি. তেন ৰুত্তং ‘‘সমপঞ্ঞাস ¶ মুচ্ছনা সংমুচ্ছেত্ৰা’’তি. সেসদেৰে জানাপেন্তো সক্কস্স গমনকালন্তি যোজনা.

৩৪৬. অতিরিৰাতি র-কারো পদসন্ধিকরো, অতীৰ অতিৰিযাতি ৰুত্তং হোতি. পকতি ¶ …পে… অগমাসি মরণভযসংতজ্জিতত্তা তরমানরূপো. তেনেৰাহ ‘‘ননু চা’’তিআদি.

৩৪৭. বুদ্ধা নাম মহাকারুণিকা, সদেৰকস্স লোকস্স হিতসুখত্থায এৰ উপ্পন্না, তে কথং অত্থিকেহি দুরুপসঙ্কমাতি আহ ‘‘অহং সরাগো’’তিআদি. তদন্তরং পটিসল্লীনাতি যেন অন্তরেন যেন খণেন উপসঙ্কমেয্য, তদন্তরং পটিসল্লীনা ঝানং সমাপন্না. তদন্তর-সদ্দো ৰা ‘‘এতরহী’’তি ইমিনা সমানত্থোতি আহ ‘‘সম্পতি পটিসল্লীনা ৰা’’তি.

পঞ্চসিখগীতগাথাৰণ্ণনা

৩৪৮. সাৰেসীতি যথাধিপ্পেতমুচ্ছনং পট্ঠপেত্ৰা ৰীণং ৰাদেন্তো তংতংঠানুপ্পত্তিযা পাকটীভূতমন্দতাৰৰত্থং দস্সেন্তো সুমধুরকোমলমধুপানমত্তমধুকারৰিরুতাপহাসিনিলক্খণো পসন্নভানী সমরৰং তন্তিস্সরং সাৰেসি.

‘‘সক্যপুত্তোৰ ঝানেন, একোদি নিপকো সতো;

অমতং মুনি জিগীসানো….

যথাপি মুনি নন্দেয্য, পত্ৰা সম্বোধিং উত্তম’’ন্তি. (দী. নি. ২.৩৪৮);

চ এৰং বুদ্ধূপসঞ্হিতা. বুদ্ধূপসঞ্হিতা পন বুদ্ধানং ধম্মসরীরং আরব্ভ নিস্সযং কত্ৰা পৰত্তিতাতি আহ ‘‘ধম্মো অরহতাং ইৰা’’তি. ধম্মূপসঞ্হিতা, অরহত্তূপসঞ্হিতা চ ৰেদিতব্বা.

সূরিযসমানসরীরাতি সূরিযসমানপ্পভাসরীরা. তেনাহ ‘‘তস্সা কিরা’’তিআদি. যস্মা তিম্বরুনো গন্ধব্বদেৰরাজস্স সূরিযৰচ্ছ সা ¶ অঙ্কে জাতা, তস্মা আহ ‘‘যং তিম্বরুং দেৰরাজানং ¶ নিস্সায ত্ৰং জাতা’’তি. কল্যাণঙ্গতায ‘‘কল্যাণী’’তি ৰুত্তাতি আহ ‘‘সব্বঙ্গসোভনা’’তি.

রাগাৰেসৰসেন ¶ পুব্বে ৰুত্তা গাথা ইদানিপি তমেৰ আরব্ভ পুরতো ঠিতং ৰিয আলপন্তো ৰদতি.

থনুদরন্তি পযোধরঞ্চ উদরঞ্চ অধিপ্পেতন্তি আহ ‘‘থনৰেমজ্ঝং উদরঞ্চা’’তি.

কিঞ্চি কারণন্তি কিঞ্চি পীল়ং.

পকতিং জহিত্ৰা ঠিতং অভিরত্তভাৰেন.

ৰামূরূতি রুচিরঊরূ. তেনাহ ‘‘ৰামাকারেনা’’তিআদি. ৰামৰিকসিতরুচিরসুন্দরাভিরূপচারুসদ্দা হি একত্থা দট্ঠব্বা. ন তিখিণন্তি ন তিক্খং ন লূখং ন কক্খল়ং. মন্দন্তি মুদু সিনিদ্ধং.

অনেকভাৰোতি অনেকসভাৰো, সো পন বহুৰিধো নাম হোতীতি আহ ‘‘অনেকৰিধো জাতো’’তি. অনেকভাগোতি অনেককোট্ঠাসো.

তযা সদ্ধিং ৰিপচ্চতন্তি তযা সহিতংযেৰ মে তং কম্মং ৰিপচ্চতু, তযা সহেৰ তস্স কম্মস্স ফলং অনুভৰেয্যন্তি অধিপ্পাযো. তযা সদ্ধিমেৰাতি যথা চক্কৰত্তিসংৰত্তনিযকম্মং তস্স নিস্সন্দফলভূতেন ইত্থিরতনেন সদ্ধিংযেৰ ৰিপাকং দেতি, এৰং তং মে কম্মং তযা সদ্ধিংযেৰ ময্হং ৰিপাকং দেতু.

একোদীতি একোদিভাৰং গতো, সমাহিতোতি অত্থো. জিগীসানোতি জিগীসমানো হোতি. তথাভূতোৰ জিগীসতি নামাতি তথা পঠমৰিকপ্পো ৰুত্তো. দুতিযৰিকপ্পে পন ‘‘ৰিচরতী’’তি কিরিযাপদং আহরিত্ৰা অত্থো ৰুত্তো.

নন্দেয্যন্তি সমাগমং পত্থেন্তো ৰদতি অতিসস্সিরিকরূপসোভায.

৩৪৯. সংসন্দতীতি ¶ ¶ সমেতি, যায মুচ্ছনায, যেন চ আকারেন তন্তিস্সরো পৰত্তো, তং মুচ্ছনং অনতিৰত্তেন্তো, তেনেৰ চ আকারেন গীতস্সরোপি পৰত্তোতি অত্থো. যেন অজ্ঝাসযেন ভগৰা পঞ্চসিখস্স গন্ধব্বে ৰণ্ণং কথেসি, যদত্থঞ্চ কথেসি, তং সব্বং ৰিভাৰেতুং ‘‘কস্মা’’তিআদিমাহ. নত্থি বোধিমূলে এৰ সমুচ্ছিন্নত্তা. উপেক্খকো ভগৰা অনুপলিত্তভাৰতো. সুৰিমুত্তচিত্তো ভগৰা ছন্দরাগতো, সব্বস্মা ¶ চ কিলেসা. যদি এৰং কস্মা পঞ্চসিখস্স গন্ধব্বে ৰণ্ণং কথেসীতি আহ ‘‘সচে পনা’’তিআদি.

গন্থিতাতি সন্দহিতা, তা পন নিরন্তরং কথিযমানা রাসিকতা ৰিয হোন্তীতি আহ ‘‘পিণ্ডিতা’’তি. ৰোহারৰচনন্তি ভগৰতো, ভিক্খূনঞ্চ পুরতো ৰত্তব্বং উপচারৰচনং.

উপনচ্চন্তিযাতি উপগন্ত্ৰা নচ্চন্তিযা.

সক্কূপসঙ্কমনৰণ্ণনা

৩৫০. ‘‘কদা সংযূল়্হা’’তিআদীনি ৰদন্তো পটিসম্মোদতি. ৰিপ্পকারম্পি দস্সেয্যাতি অড্ঢকতাভিনযৰসেন নচ্চম্পি দস্সেয্য.

৩৫১. ‘‘অভিৰদিতো সক্কো দেৰানমিন্দো’’তিআদীনং ‘‘তেন খো পন সমযেনা’’তিআদীনং (পারা. ১৬, ২৪) ৰিয সঙ্গীতিকারৰচনভাৰে সংসযো নত্থি, ‘‘এৰঞ্চ পন তথাগতা’’তি ইধ পন সিযা সংসযোতি ‘‘ধম্মসঙ্গাহকত্থেরেহি ঠপিতৰচন’’ন্তি ৰত্ৰা ইতরস্সাপি তথাভাৰং দস্সেতুং ‘‘সব্বমেত’’ন্তিআদি ৰুত্তং. ৰুড্ঢিৰচনেন ৰুত্তোতি ‘‘সুখী হোতু পঞ্চসিখ সক্কো দেৰানং ইন্দো’’তি আসীসৰাদং ৰুত্তো. ‘‘ভগৰতো পাদে সিরসা ৰন্দতী’’তি ৰদন্তো অভিৰাদেতি নাম ‘‘সুখী হোতূ’’তি আসীসৰাদস্স ৰদাপনতো. তথা পন আসীসৰাদং ৰদন্তো অভিৰদতি নাম সব্বকালং তথেৰ তিট্ঠনতো.

উরুং ¶ ৰেপুল্লং দস্সতি দক্খতীতি উরুন্দা ৰিভত্তিঅলোপেন. ৰিৰটা অঙ্গণট্ঠানং. যো পকতিযা গুহাযং অন্ধকারো, সো অন্তরহিতোতি যো তস্সং গুহাযং সত্থু সমন্ততো অসীতিহত্থতো অযং পাকতিকো অন্ধকারো, সো দেৰানং ৰত্থাভরণসরীরোভাসেহি অন্তরহিতো, আলোকো সম্পজ্জি. অসীতিহত্থে পন বুদ্ধালোকেনেৰ অন্ধকারো অন্তরহিতো, ন চ সমত্থো দেৰানং ওভাসো বুদ্ধানং অভিভৰিতুং.

৩৫২. চিরপ্পটিকাহন্তি ¶ চিরপ্পভুতিকো অহং. অড্ডকরণং নাম নত্থি অৰিৰাদাধিকরণট্ঠানে নিব্বত্তত্তা. কীল়াদীনিপীতি আদি-সদ্দেন ধম্মস্সৰনাদিং সঙ্গণ্হাতি.

সলল়মযগন্ধকুটিযন্তি ¶ সলল়রুক্খেহি রঞ্ঞা পসেনদিনা কারিতগন্ধকুটিযং. তেনস্সাতি তেন ফলদ্ৰযাধিগমেন পহীনওল়ারিককামরাগতায অস্সা ভূজতিযা দেৰলোকে অভিরতিযেৰ নত্থি. চক্কনেমিসদ্দেন তম্হা সমাধিম্হা ৰুট্ঠিতোতি এত্থ অধিপ্পাযং অজানন্তা ‘‘আরম্মণস্স অধিমত্ততায সমাপত্তিতো ৰুট্ঠানং জাত’’ন্তি মঞ্ঞেয্যুন্তি তং পটিক্খিপন্তো ‘‘সমাপন্নো সদ্দং সুণাতীতি নো ৰত রে ৰত্তব্বে’’তি আহ. সতি চ আরম্মণসঙ্ঘট্টনাযং গহণেনপি ভৰিতব্বন্তি অধিপ্পাযেন ‘‘সুণাতী’’তি ৰুত্তং, ইতরো ‘‘পঠমং ঝানং সমাপন্নস্স সদ্দো কণ্টকো’’তি ৰচনমত্তং নিস্সায সব্বস্সাপি ঝানস্স সদ্দো কণ্টকোতি অধিপ্পাযেন পটিক্খেপং অসহন্তো ‘‘ননু ভগৰা…পে… ¶ ভণতী’’তি ইমমেৰ সুত্তপদং উদ্ধরি. তত্থ যথা দোসদস্সনপটিপক্খভাৰনাৰসেন পটিঘসঞ্ঞানং সুপ্পহীনত্তা মহতাপি সদ্দেন অরূপসমাপত্তিতো ন ৰুট্ঠানং, এৰং ‘‘উপ্পাদো ভযং, অনুপ্পাদো খেম’’ন্তিআদিনা সম্মদেৰ দোসদস্সনপটিপক্খভাৰনাৰসেন সব্বাসম্পি লোকিযসঞ্ঞানং অগ্গমগ্গেন সমতিক্কন্তত্তা আরম্মণাধিগমতায ন কদাচি ফলসমাপত্তিতো ৰুট্ঠানং হোতীতি. তথা পন ন সুপ্পহীনত্তা পটিঘসঞ্ঞানং সব্বরূপসমাপত্তিতো ৰুট্ঠানং হোতি, পঠমজ্ঝানং পন অপ্পকম্পি সদ্দং ন সহতীতি তংসমাপন্নস্স ‘‘সদ্দো কণ্টকো’’তি ৰুত্তং. যদি পন পটিঘসঞ্ঞানং ৰিক্খম্ভিতত্তা মহতাপি সদ্দেন অরূপসমাপত্তিতো ন ৰুট্ঠানং হোতি, পগেৰ মগ্গফলসমাপত্তিতো. তেনাহ ‘‘চক্কনেমিসদ্দেনা’’তিআদি. চক্কনেমিসদ্দেনাতি চ নযিদং করণৰচনং হেতুম্হি, করণে ৰা অথ খো সহযোগে. ইমমেৰ হি অত্থং দস্সেতুং ‘‘ভগৰা পনা’’তিআদি ৰুত্তং.

গোপকৰত্থুৰণ্ণনা

৩৫৩. পরিপূরকারিনীতি পরিপুণ্ণানি, পরিসুদ্ধানি চ কত্ৰা রক্খিতৰতী. ‘‘ইত্থিত্ত’’ন্তিআদি তত্থ ৰিরজ্জনাকারদস্সনং. ধিত্থিভাৰংইত্থিভাৰস্স ধিক্কারো হেতূতি অত্থো. অলন্তি পটিক্খেপৰচনং, পযোজনং নত্থীতি অত্থো. ৰিরাজেতীতি জিগুচ্ছতি. এতা সম্পত্তিযোতি চক্কৰত্তিসিরিআদিকা এতা যথাৰুত্তসম্পত্তিযো. তস্মা পুব্বপরিচযেন উপট্ঠিতনিকন্তিৰসেন. উপট্ঠানসালন্তি সুধম্মদেৰসভং.

সোতি ¶ ¶ ¶ গোপকদেৰপুত্তো. ৰট্টেত্ৰা ৰট্টেত্ৰাতি তোমরাদিং ৰত্তেন্তেন ৰিয চোদনৰচনং পরিৰট্টেত্ৰা পরিৰট্টেত্ৰা. গাল়্হং ৰিজ্ঝিতব্বাতি গাল়্হতরং ঘট্টেতব্বা.

কুতো মুখাতি কুতো পৰত্তঞাণমুখা. তেনাহ ‘‘অঞ্ঞৰিহিতকা’’তি. কতপুঞ্ঞেতি সম্মা কতপুঞ্ঞে ধম্মে.

দাযোতি লাভো. সো হি দীযতি তেহি দাতব্বত্তা দাযো, যেসং দীযতি, তেহি লদ্ধত্তা লাভোতি চ ৰুচ্চতি. সঙ্খারে…পে… পতিট্ঠহিংসু কতাধিকারত্তা. তত্থ তাৰতিংসভৰনে ঠিতানংযেৰ নিব্বত্তো যথা সক্কস্স ইন্দসালগুহাযং ঠিতস্সেৰ সক্কত্তভাৰো.

নিকন্তিং তস্মিং গন্ধব্বকাযে আলযং সমুচ্ছিন্দিতুং ন সক্কোন্তো.

৩৫৪. অত্তনাৰ ৰেদিতব্বোতি অত্তনাৰ অধিগন্ত্ৰা ৰেদিতব্বো, ন পরপ্পচ্চযিকেন. তুম্হেহি ৰুচ্চমানানীতি কেৰলং তুম্হেহি ৰুচ্চমানানি.

ৰিযাযামাতি ৰিস্সট্ঠং ৰীরিযং সন্তানে পৰত্তেম. পকতিযাতি রূপাৰচরভাৰেন, ‘‘অনুস্সর’’ন্তি ৰা পাঠো.

কামরাগো এৰ ‘‘ছন্দো রাগো ছন্দরাগো’’তিআদি পৰত্তিভেদেন সংযোজনট্ঠেন ‘‘কামরাগসংযোজনানী’’তি, যোগগন্থাদিপৰত্তিআকারভেদেন ‘‘কামবন্ধনানী’’তি চ ৰুত্তো. পাপিমযোগানীতি এত্থ পন সেসযোগগন্থানম্পি ৰসেন অত্থো ৰেদিতব্বো.

দুৰিধানন্তি ¶ ৰত্থুকামকিলেসকামৰসেন দুৰিধানং.

‘‘এত্থ কিং, তত্থ কি’’ন্তি চ পদদ্ৰযে কিন্তি নিপাতমত্তং. চাতুদ্দিসভাৰেতি তেসং বুদ্ধাদীনং তিণ্ণং রতনানং চতুদ্দিসযোগ্যভাৰে অপ্পটিহটভাৰে. বুদ্ধরতনঞ্হি মহাকারুণিকতায, অনাৰরণঞাণতায, পরমসন্তুট্ঠতায চ চাতুদ্দিসং, ধম্মরতনং স্ৰাক্খাততায, সঙ্ঘরতনং সুপ্পটিপন্নতায. তেনাহ ‘‘সব্বদিসাসু অসজ্জমানো’’তি.

মজ্ঝিমস্স পঠমজ্ঝানস্স অধিগতত্তা তাৰদেৰ কাযং ব্রহ্মপুরোহিতং অধিগন্ত্ৰা তাৰদেৰ পুরিমং ¶ ঝানসতিং পটিলভিত্ৰা তং ঝানং পাদকং কত্ৰা ৰিপস্সনং ৰড্ঢেত্ৰা ওরম্ভাগিযসংযোজনসমুচ্ছিন্দনেন মগ্গফলৰিসেসং অনাগামিফলসঙ্খাতং ৰিসেসং অজ্ঝগংসু অধিগচ্ছিংসু. কেচি পন ‘‘কামাৰচরত্তভাৰেন ¶ মগ্গফলানি অধিগচ্ছিংসূতি অধিপ্পাযেন পঞ্চমস্স ঝানস্স অনধিগতত্তা সুদ্ধাৰাসেসু ন উপ্পজ্জিংসু, পঠমজ্ঝানলাভিতায পন ব্রহ্মপুরোহিতেসু নিব্বত্তিংসূ’’তি ৰদন্তি.

মঘমাণৰৰত্থুৰণ্ণনা

৩৫৫. ৰিসুদ্ধোতি ৰিসুদ্ধঅজ্ঝাসযো, উপনিস্সযসম্পন্নোতি অধিপ্পাযো. গামকম্মকরণট্ঠানন্তি গামিকানং উপট্ঠানট্ঠানং ৰদতি. তাৰতকেনেৰাতি অত্তনা সোধিতট্ঠানেৰ অঞ্ঞস্স আগন্ত্ৰা অৰট্ঠানেনেৰ. সতিং পটিলভিত্ৰাতি ‘‘অহো মযা কতকম্মং সফলং জাত’’ন্তি যোনিসো চিত্তং উপ্পাদেত্ৰা.

পাসাণেতি মগ্গমজ্ঝে উচ্চতরভাৰেন ঠিতপাসাণে. উচ্চালেত্ৰাতি উদ্ধরিত্ৰা. এতস্স সগ্গস্স গমনমগ্গন্তি এতস্স চন্দাদীনং উপ্পত্তিট্ঠানভূতস্স সগ্গস্স গমনমগ্গং পুঞ্ঞকম্মং.

সুগতিৰসেন লদ্ধব্বং, কহাপণঞ্চাতি কহাপণং, দণ্ডৰসেন লদ্ধব্বং বলি দণ্ডবলি. গহপতিকা ¶ কিং করিস্সন্তীতি গহপতিকা নাম অটৰিকা ৰিয ৰিসমনিস্সিতা, তে ন কঞ্চি অনত্থং করিস্সন্তি, এৰং তযা জানমানেন কস্মা ময্হং ন কথিতন্তি যদিপি পুব্বে ন কথিতং, এতরহি পন ভযেন কথিতং, মা ময্হং দোসং করেয্যাথ, আরোচিতকালতো পট্ঠায ন ময্হং দোসোতি ৰদতি.

নিবদ্ধন্তি একন্তিকং.

পিসুণেসীতি পিসুণকম্মমকাসি, তুম্হাকং অন্তরে ময্হং পেসুঞ্ঞং উপসংহরতীতি অত্থো. পুন অহরণীযং ব্রহ্মদেয্যং কত্ৰা. ময্হম্পীতি ময্হম্পি অত্থায মং উদ্দিস্স পুঞ্ঞকম্মং করোথ. নীলুপ্পলং নাম ৰিকসমানং উদকতো উগ্গন্ত্ৰাৰ ৰিকসতি, এৰং অহুত্ৰা অন্তোউদকে পুপ্ফিতং নীলুপ্পলং ৰিয. অম্হাকং পনিদং পুঞ্ঞকম্মং ভৰন্তরূপপত্তিযা ৰিনা ইমস্মিংযেৰ অত্তভাৰে ৰিপাকং দেতীতি যোজনা. চিন্তামত্তকম্পীতি দোমনস্সৰসেন চিন্তামত্তকম্পি.

পগেৰাতি ¶ কালস্সেৰ, অতিৰিয পাতোতি অত্থো. কণ্ণিকূপগন্তি কণ্ণিকযোগ্যং. তচ্ছেত্ৰা মট্ঠং কত্ৰা কণ্ণিকায কত্তব্বং সব্বং নিট্ঠপেত্ৰা. তথা হি সা ৰত্থেন ৰেঠেত্ৰা ঠপিতা.

চযবন্ধনং ¶ সালায অধিট্ঠানসজ্জনং. কণ্ণিকমঞ্চবন্ধনং কণ্ণিকারোহনকালে আরুহিত্ৰা অৰট্ঠানঅট্টকরণং.

যস্স অত্থতে ফলকে যস্স ফলকে অত্থতেতি যোজনা.

অৰিদূরেতি সালায, কোৰিল়াররুক্খস্স চ অৰিদূরে. সব্বজেট্ঠিকাতি সব্বাসং তস্স ভরিযানং জেট্ঠিকা সুজাতা.

তস্সেৰাতি সক্কস্সেৰ. সন্তিকেতি সমীপে সন্তিকাৰচরা হুত্ৰা নিব্বত্তা. ধজেন সদ্ধিং সহস্সযোজনিকো পাসাদো.

কক্কটকৰিজ্ঝনসূলসদিসন্তি ¶ কক্কটকে গণ্হিতুং তস্স বিলপরিযন্তস্স ৰিজ্ঝনসূচিসদিসং.

মচ্ছরূপেনাতি মতমচ্ছরূপেন. ওসরতীতি পিলৰন্তো গচ্ছতি. তস্সাপি বকসকুণিকায পঞ্চ ৰস্সসতানি আযু অহোসি দেৰনেরযিকানং ৰিয মনুস্সপেততিরচ্ছানানং আযুনো অপরিচ্ছিন্নত্তা.

উক্কুট্ঠিমকাসীতি উচ্চাসদ্দমকাসি.

পুব্বসন্নিৰাসেনাতি পুরিমজাতীসু চিরসন্নিৰাসেন. এৰঞ্হি একচ্চানং দিট্ঠমত্তেনপি সিনেহো উপ্পজ্জতি. তেনাহ ভগৰা –

‘‘পুব্বেৰ সন্নিৰাসেন, পচ্চুপ্পন্নহিতেন ৰা;

এৰং তং জাযতে পেমং, উপ্পলংৰ যথোদকে’’তি. (জা. ১.২.১৭৪);

অৰসেসেসূতি ¶ অসুরে, সক্কং ঠপেত্ৰা দ্ৰীসু দেৰলোকেসু দেৰেৰ সন্ধায ৰদতি.

অত্থনিস্সিতন্তি অত্তনো, পরেসঞ্চ অত্থমেৰ হিতমেৰ নিস্সিতং, তং পন হিতং সুখস্স নিদানন্তি আহ ‘‘কারণনিস্সিত’’ন্তি.

পঞ্হৰেয্যাকরণৰণ্ণনা

৩৫৭. কিংসংযোজনাতি কীদিসসংযোজনা. সত্তে অনত্থে সংযোজেন্তি বন্ধন্তীতি সংযোজনানীতি আহ ‘‘কিংবন্ধনা, কেন বন্ধনেন বদ্ধা’’তি. পুথুকাযাতি বহূ সত্তকাযাতি আহ ‘‘বহূ জনা’’তি. ৰেরং ৰুচ্চতি দোসোতি আহ ‘‘অৰেরাতি অপ্পটিঘা’’তি. আৰুধেন ¶ সরীরে দণ্ডো আৰুধদণ্ডো, ধনস্স দাপনত্থেন দণ্ডো ধনদণ্ডো, তদুভযাকরণেন ততো ৰিনিমুত্তো অদণ্ডো, সম্পত্তিহরণতো, সহ অনত্থুপ্পত্তিতো চ সপত্তো, পটিসত্তূতি আহ ‘‘অসপত্তাতি অপচ্চত্থিকা’’তি. ব্যাপজ্ঝং ¶ ৰুচ্চতি চিত্তদুক্খং, তব্বিরহিতা অব্যাপজ্ঝাতি আহ ‘‘ৰিগতদোমনস্সা’’তি. পুব্বে ‘‘অৰেরা’’তি পদেন সম্বদ্ধাঘাতকাভাৰো ৰুত্তো. তেনাহ ‘‘অপ্পটিঘা’’তি. ‘‘অৰেরিনো’’তি পন ইমিনাপি কোপমত্তস্সপি অনুপ্পাদনং. তেনাহ ‘‘কত্থচি কোপং ন উপ্পাদেত্ৰা’’তি. ‘‘ৰিহরেমূ’’তি চ পদং পুরিমপদেহিপি যোজেতব্বং ‘‘অৰেরা ৰিহরেমূ’’তিআদিনা. অযঞ্চ অৰেরাদিভাৰো সংৰিভাগেন পাকটো হোতীতি দস্সেতুং ‘‘অচ্ছরাযা’’তি আদিং ৰত্ৰা ‘‘ইতি চে নেসং হোতী’’তি ৰুত্তং. চিত্তুপ্পত্তি দল়্হতরাপি হুত্ৰা পৰত্ততীতি দস্সেতুং ‘‘দানং দত্ৰা, পূজং কত্ৰা চ পত্থযন্তী’’তি ৰুত্তং. ইতি চেতি চে-সদ্দো অন্ৰযসংসগ্গেন পরিকপ্পেতীতি আহ ‘‘এৰঞ্চ নেস’’ন্তি.

যায কাযচি পরেসং সম্পত্তিযা খীযনং উসূযনং অসহনং লক্খণং এতিস্সাতি পরসম্পত্তিখীযনলক্খণা, যদগ্গেন অত্তসম্পত্তিযা পরেহি সাধারণভাৰং অসহনলক্খণং, তদগ্গেনস্স ‘‘নিগূহনলক্খণ’’ন্তিপি ৰত্তব্বং. তথা হিস্স পোরাণা ‘‘মা ইদং অচ্ছরিযং অঞ্ঞেসং হোতু, ময্হমেৰ হোতূতি মচ্ছরিয’’ন্তি নিব্বচনং ৰদন্তি. অভিধম্মে ‘‘যা পরলাভসক্কারগরুকারমাননৰন্দনপূজনাসু ইস্সা ইস্সাযনা’’তিআদিনা (ধ. স. ১১২৬) নিক্খেপকণ্ডে, ‘‘যা এতেসু পরেসং লাভাদীসু কিং ইমিনা ইমেস’’ন্তিআদিনা তংসংৰণ্ণনাযঞ্চ ৰুত্তানেৰ, তস্মা তত্থ ৰুত্তনযেনেৰ ৰেদিতব্বানীতি অধিপ্পাযো.

যস্মা পন ইস্সামচ্ছরিযানি বহ্ৰাদীনৰানি, তেসং ৰিভাৰনা লোকস্স বহুকারা ¶ , তস্মা অভিধম্মট্ঠকথাযং ¶ (ধ. স. অট্ঠ. ১১২৫) ৰিভাৰিতানম্পি তেসং দিট্ঠধম্মিকেপি সম্পরাযিকে পিআদীনৰে দস্সেন্তো ‘‘আৰাসমচ্ছরিযেন পনা’’তিআদিমাহ. এত্থাতি এতেসু ইস্সামচ্ছরিযেসু, এতেসু ৰা আৰাসমচ্ছরিযাদীসু পঞ্চসু মচ্ছরিযেসু. সঙ্কারং সীসেন উক্খিপিত্ৰাৰ ৰিচরতি ¶ তত্থ লগ্গচিত্ততায, নিহীনজ্ঝাসযতায চ. মমাতি মযা, অযমেৰ ৰা পাঠো. লোহিতম্পি মুখতো উগ্গচ্ছতি চিত্তৰিঘাতেন সংতত্তহদযতায. কুচ্ছিৰিরেচনম্পি হোতি অতিজলগ্গিনো. অঞ্ঞো ৰিভৰপটিৰেধধম্মো অরিযানংযেৰ হোতি, তে চ তং ন মচ্ছরাযন্তি মচ্ছরিযস্স সব্বসো পহীনত্তা. পটিৰেধধম্মে মচ্ছরিযস্স অসম্ভৰো এৰাতি আহ ‘‘পরিযত্তিধম্মমচ্ছরিযেন চা’’তি. ৰণ্ণমচ্ছরিযেন দুব্বণ্ণো, ধম্মমচ্ছরিযেন এল়মূগো দুপ্পঞ্ঞো হোতি.

‘‘অপিচা’’তিআদি পঞ্চন্নং মচ্ছরিযানং ৰসেন কম্মসরিক্খকৰিপাকদস্সনং. আৰাসমচ্ছরিযেন লোহগেহে পচ্চতি পরেসং আৰাসপচ্চযহিতসুখনিসেধনতো. কুলমচ্ছরিযেন অপ্পলাভো হোতি পরেহি কুলেসু লদ্ধব্বলাভনিসেধনতো, অপ্পলাভোতি চ অলাভোতি অত্থো. লাভমচ্ছরিযেন গূথনিরযে নিব্বত্ততি লাভহেতু পরেহি লদ্ধব্বস্স অস্সাদনিসেধনতো. সব্বথাপি নিরস্সাদো হি গূথনিরযো. ৰণ্ণো নাম ন হোতীতি সরীরৰণ্ণো, গুণৰণ্ণোতি দুৰিধোপি ৰণ্ণো নামমত্তেনপি ন হোতি, তত্থ তত্থ নিব্বত্তমানো ৰিরূপো এৰ হোতি. সম্পত্তিনিগূহনসভাৰেন মচ্ছরিযেন ৰিরূপিতে সন্তানে যেভুয্যেন গুণা পতিট্ঠমেৰ ন লভন্তি, যে চ পতিট্ঠহেয্যুং, তেসম্পি ৰসেনস্স ৰণ্ণো ন ভৰেয্য. তে হি তস্স লোকে রত্তিং খিত্তা সরা ৰিয ন পঞ্ঞাযন্তি. ধম্মমচ্ছরিযেন কুক্কুল়নিরযে. সোতাপত্তিমগ্গেন ¶ পহীযতি অপাযগমনীযভাৰতো. ৰেরাদীহি ন পরিমুচ্চন্তিযেৰ তপ্পরিমুচ্চনায ইচ্ছায অপ্পত্তব্বত্তা জাতিআদিধম্মানং সত্তানং জাতিআদীহি ৰিয.

তিণ্ণা মেত্থ কঙ্খাতি ম-কারো পদসন্ধিকরো. এতস্মিং পঞ্হেতি এতস্মিং ‘‘কিংসংযোজনা নু খো’’তি এৰং ঞাতুং ইচ্ছিতে অত্থে. তুম্হাকং ৰচনং সুত্ৰাতি ‘‘ইস্সামচ্ছরিযসংযোজনা’’তি এৰং পৰত্তং তুম্হাকং ৰিস্সজ্জনৰচনং সুত্ৰা. কঙ্খা তিণ্ণাতি যথাপুচ্ছিতে অত্থে সংসযো তরিতো ৰিগতো দেসনানুস্সরণমত্তেন, ন সমুচ্ছেদৰসেনাতি আহ ‘‘ন মগ্গৰসেনা’’তিআদি. অযম্পি কথংকথা ৰিগতাতি কঙ্খায ৰিগতত্তা এৰ তস্সা পৰত্তিআকারৰিসেসভূতা ‘‘ইদং কথ ইদং কথ’’ন্তি অযম্পি কথংকথা ৰিগতা অপগতা.

৩৫৮. নিদানাদীনি ¶ মহানিদানসুত্তৰণ্ণনাযং (দী. নি. অট্ঠ. ২.৯৫) ৰুত্তত্থানেৰ. পিযানং ¶ অত্তনো পরিগ্গহভূতানং সত্তসঙ্খারানং পরেহি সাধারণভাৰাসহনৰসেন, নিগূহনৰসেন চ পৰত্তনতো পিযসত্তসঙ্খারনিদানং মচ্ছরিযং, অপ্পিযানং পরিগ্গহভূতানং সত্তানং, সঙ্খারানঞ্চ অসহনৰসেন পৰত্তিযা অপ্পিযসত্তসঙ্খারনিদানা ইস্সা. যঞ্হি কিঞ্চি অপ্পিযসম্বন্ধং ভদ্দকম্পি তং কোধনস্স অপ্পিযমেৰাতি. উভযন্তি মচ্ছরিযং, ইস্সা চাতি উভযং. উভযনিদানন্তি পিযনিদানঞ্চেৰ অপ্পিযনিদানঞ্চ. পিযাতি ইট্ঠা. কেল়াযিতাতি ধনাযিতা. মমাযিতাতি মমত্তং কত্ৰা পরিগ্গহিতা. ইস্সং করোতীতি ‘‘কিং ইমস্স ইমিনা’’তি তস্স পিযসত্তলাভাসহনৰসেন উস্সূযতি, তমেৰ পিযসত্তং যাচিতো. অহো ৰতস্সাতি সাধু ৰত অস্স. ‘‘ইমস্স পুগ্গলস্স এৰরূপং পিযৰত্থু ন ভৰেয্যা’’তি ইস্সং করোতি উসূযং উপ্পাদেতি. মমাযন্তাতি কেল়াযন্তা. অপ্পিযেতি অপ্পিযে সত্তে তেসং সতাপতো. অস্সাতি পুগ্গলস্স, যেন তে লদ্ধা. তেতি ¶ সত্তসঙ্খারা, সচেপি অমনাপা হোন্তি অপ্পিযেহি সমুদাগতত্তা. ৰিপরীতৰুত্তিতাযাতি অযাথাৰগাহিতায. কো অঞ্ঞো এৰরূপস্স লাভীতি তেন অত্তানং সম্ভাৰেন্তো ইস্সং ৰা করোতি. অঞ্ঞস্স তাদিসং উপ্পজ্জমানম্পি ‘‘অহো ৰতস্স এৰরূপং ন ভৰেয্যা’’তি ইস্সং ৰা করোতি, অযঞ্চ নযো হেট্ঠা ৰুত্তনযত্তা ন গহিতো.