📜

নমো তস্স ভগৰতো অরহতো সম্মাসম্বুদ্ধস্স

দীঘনিকাযে

সীলক্খন্ধৰগ্গঅভিনৰটীকা

(দুতিযো ভাগো)

২. সামঞ্ঞফলসুত্তৰণ্ণনা

রাজামচ্চকথাৰণ্ণনা

১৫০. ইদানি ¶ ¶ সামঞ্ঞফলসুত্তস্স সংৰণ্ণনাক্কমো অনুপ্পত্তোতি দস্সেতুং ‘‘এৰং…পে… সুত্ত’’ন্তিআদিমাহ. তত্থ অনুপুব্বপদৰণ্ণনাতি অনুক্কমেন পদৰণ্ণনা, পদং পদং পতি অনুক্কমেন ৰণ্ণনাতি ৰুত্তং হোতি. পুব্বে ৰুত্তঞ্হি, উত্তানং ৰা পদমঞ্ঞত্র ৰণ্ণনাপি ‘‘অনুপুব্বপদৰণ্ণনা’’ ত্ৰেৰ ৰুচ্চতি. এৰঞ্চ কত্ৰা ‘‘অপুব্বপদৰণ্ণনা’’তিপি পঠন্তি, পুব্বে অৰণ্ণিতপদৰণ্ণনাতি অত্থো. দুগ্গজনপদট্ঠানৰিসেসসম্পদাদিযোগতো পধানভাৰেন রাজূহি গহিতট্ঠেন এৰংনামকং, ন পন নামমত্তেনাতি আহ ‘‘তঞ্হী’’তিআদি. ননু ¶ মহাৰগ্গে মহাগোৰিন্দসুত্তে আগতো এস পুরোহিতো এৰ, ন রাজা, কস্মা সো রাজসদ্দৰচনীযভাৰেন গহিতোতি? মহাগোৰিন্দেন পুরোহিতেন পরিগ্গহিতম্পি চেতং রেণুনা নাম মগধরাজেন পরিগ্গহিতমেৰাতি অত্থসম্ভৰতো এৰং ৰুত্তং, ন পন সো রাজসদ্দৰচনীযভাৰেন গহিতো তস্স রাজাভাৰতো. মহাগোৰিন্দপরিগ্গহিতভাৰকিত্তনঞ্হি তদা রেণুরঞ্ঞা পরিগ্গহিতভাৰূপলক্খণং. সো হি তস্স সব্বকিচ্চকারকো পুরোহিতো, ইদম্পি চ লোকে সমুদাচিণ্ণং ¶ ‘‘রাজকম্মপসুতেন কতম্পি রঞ্ঞা কত’’ন্তি. ইদং ৰুত্তং হোতি – মন্ধাতুরঞ্ঞা চেৰ মহাগোৰিন্দং বোধিসত্তং পুরোহিতমাণাপেত্ৰা রেণুরঞ্ঞা চ অঞ্ঞেহি চ রাজূহি পরিগ্গহিতত্তা রাজগহন্তি. কেচি পন ‘‘মহাগোৰিন্দো’’তি মহানুভাৰো একো পুরাতনো রাজাতি ৰদন্তি. পরিগ্গহিতত্তাতি রাজধানীভাৰেন পরিগ্গহিতত্তা. গয্হতীতি হি গহং, রাজূনং, রাজূহি ৰা গহন্তি রাজগহং. নগরসদ্দাপেক্খায নপুংসকনিদ্দেসো.

অঞ্ঞেপেত্থ পকারেতি নগরমাপনেন রঞ্ঞা কারিতসব্বগেহত্তা রাজগহং, গিজ্ঝকূটাদীহি পঞ্চহি পব্বতেহি পরিক্খিত্তত্তা পব্বতরাজেহি পরিক্খিত্তগেহসদিসন্তিপি রাজগহং, সম্পন্নভৰনতায রাজমানং গেহন্তিপি রাজগহং, সুসংৰিহিতারক্খতায অনত্থাৰহিতুকামেন উপগতানং পটিরাজূনং গহং গহণভূতন্তিপি রাজগহং, রাজূহি দিস্ৰা সম্মা পতিট্ঠাপিতত্তা তেসং গহং গেহভূতন্তিপি রাজগহং, আরামরামণেয্যতাদীহি রাজতি, নিৰাসসুখতাদিনা চ সত্তেহি মমত্তৰসেন গয্হতি পরিগ্গয্হতীতিপি রাজগহন্তি এদিসে পকারে. নামমত্তমেৰ পুব্বে ৰুত্তনযেনাতি অত্থো. সো পন পদেসো ৰিসেসট্ঠানভাৰেন উল়ারসত্তপরিভোগোতি আহ ‘‘তং পনেত’’ন্তিআদি. তত্থ ‘‘বুদ্ধকালে, চক্কৰত্তিকালে চা’’তি ইদং যেভুয্যৰসেন ৰুত্তং অঞ্ঞদাপি কদাচি সম্ভৰতো, ‘‘নগরং হোতী’’তি চ ইদং উপলক্খণমেৰ মনুস্সাৰাসস্সেৰ অসম্ভৰতো. তথা হি ৰুত্তং ‘‘সেসকালে সুঞ্ঞং হোতী’’তিআদি. তেসন্তি যক্খানং. ৰসনৰনন্তি আপানভূমিভূতং উপৰনং.

অৰিসেসেনাতি ৰিহারভাৰসামঞ্ঞেন, সদ্দন্তরসন্নিধানসিদ্ধং ৰিসেসপরামসনমন্তরেনাতি অত্থো. ইদং ৰুত্তং হোতি – ‘‘পাতিমোক্খসংৰরসংৰুতো ৰিহরতি, (অ. নি. ৫.১০১; পাচি. ১৪৭; পরি. ৪৪১) পঠমং ঝানং উপসম্পজ্জ ৰিহরতি, (ধ. স. ১৬০) মেত্তাসহগতেন চেতসা একং দিসং ফরিত্ৰা ৰিহরতি, (দী. নি. ৩.৭১, ৩০৮; ম. নি. ১.৭৭, ৪৫৯, ৫০৯; ২.৩০৯, ৩১৫; ৩.২৩০; ৰিভ. ৬৪২) সব্বনিমিত্তানং অমনসিকারা অনিমিত্তং চেতোসমাধিং উপসম্পজ্জ ৰিহরতী’’তিআদীসু (ম. নি. ১.৪৫৯) সদ্দন্তরসন্নিধানসিদ্ধেন ৰিসেসপরামসনেন যথাক্কমং ইরিযাপথৰিহারাদিৰিসেসৰিহারসমঙ্গীপরিদীপনং ¶ ¶ , ন এৰমিদং, ইদং পন তথা ৰিসেসপরামসনমন্তরেন অঞ্ঞতরৰিহারসমঙ্গীপরিদীপনন্তি.

সতিপি চ ৰুত্তনযেন অঞ্ঞতরৰিহারসমঙ্গীপরিদীপনে ইধ ইরিযাপথসঙ্খাতৰিসেসৰিহারসমঙ্গীপরিদীপনমেৰ সম্ভৰতীতি দস্সেতি ‘‘ইধ পনা’’তিআদিনা. কস্মা পন সদ্দন্তরসন্নিধানসিদ্ধস্স ৰিসেসপরামসনস্সাভাৰেপি ইধ ৰিসেসৰিহারসমঙ্গীপরিদীপনং সম্ভৰতীতি? ৰিসেসৰিহারসমঙ্গীপরিদীপনস্স সদ্দন্তরসঙ্খাতৰিসেসৰচনস্স অভাৰতো এৰ. ৰিসেসৰচনে হি অসতি ৰিসেসমিচ্ছতা ৰিসেসো পযোজিতব্বোতি. অপিচ ইরিযাপথসমাযোগপরিদীপনস্স অত্থতো সিদ্ধত্তা তথাদীপনমেৰ সম্ভৰতীতি. কস্মা চাযমত্থো সিদ্ধোতি? দিব্বৰিহারাদীনম্পি সাধারণতো. কদাচিপি হি ইরিযাপথৰিহারেন ৰিনা ন ভৰতি তমন্তরেন অত্তভাৰপরিহরণাভাৰতোতি.

ইরিযনং পৰত্তনং ইরিযা, কাযিককিরিযা, তস্সা পৰত্তনুপাযভাৰতো পথোতি ইরিযাপথো, ঠাননিসজ্জাদযো. ন হি ঠাননিসজ্জাদিঅৰত্থাহি ৰিনা কঞ্চি কাযিকং কিরিযং পৰত্তেতুং সক্কা, তস্মা সো তায পৰত্তনুপাযোতি ৰুচ্চতি. ৰিহরতি পৰত্ততি এতেন, ৰিহরণমত্তং ৰা তন্তি ৰিহারো, সো এৰ ৰিহারো তথা, অত্থতো পনেস ঠাননিসজ্জাদিআকারপ্পৰত্তো চতুসন্ততিরূপপ্পবন্ধোৰ. দিৰি ভৰো দিব্বো, তত্থ বহুলং পৰত্তিযা ব্রহ্মপারিসজ্জাদিদেৰলোকে ভৰোতি অত্থো, যো ৰা তত্থ দিব্বানুভাৰো, তদত্থায সংৰত্ততীতি দিব্বো, অভিঞ্ঞাভিনীহারাদিৰসেন ৰা মহাগতিকত্তা দিব্বো, সোৰ ৰিহারো, দিব্বভাৰাৰহো ৰা ৰিহারো দিব্বৰিহারো, মহগ্গতজ্ঝানানি. নেত্তিযং [নেত্তি. ৮৬ (অত্থতো সমানং)] পন চতস্সো আরুপ্পসমাপত্তিযো আনেঞ্জৰিহারাতি ৰিসুং ৰুত্তং, তং পন মেত্তাজ্ঝানাদীনং ব্রহ্মৰিহারতা ৰিয তাসং ভাৰনাৰিসেসভাৰং সন্ধায ৰুত্তং. অট্ঠকথাসু পন দিব্বভাৰাৰহসামঞ্ঞতো তাপি ‘‘দিব্বৰিহারা’’ ত্ৰেৰ ৰুত্তা. ব্রহ্মানং, ব্রহ্মভূতা ৰা হিতূপসংহারাদিৰসেন পৰত্তিযা সেট্ঠভূতা ৰিহারাতি ব্রহ্মৰিহারা, মেত্তাজ্ঝানাদিৰসেন পৰত্তা চতস্সো অপ্পমঞ্ঞাযো. অরিযা উত্তমা, অনঞ্ঞসাধারণত্তা ৰা অরিযানং ৰিহারাতি অরিযৰিহারা, চতস্সোপি ফলসমাপত্তিযো. ইধ পন রূপাৰচরচতুত্থজ্ঝানং, তব্বসেন পৰত্তা অপ্পমঞ্ঞাযো ¶ , চতুত্থজ্ঝানিকঅগ্গফলসমাপত্তি চ ভগৰতো দিব্বব্রহ্মঅরিযৰিহারা.

অঞ্ঞতরৰিহারসমঙ্গীপরিদীপনন্তি তাসমেকতো অপ্পৰত্তত্তা একেন ৰা দ্ৰীহি ৰা সমঙ্গীভাৰপরিদীপনং, ভাৰলোপেনাযং ভাৰপ্পধানেন ৰা নিদ্দেসো. ভগৰা হি লোভদোসমোহুস্সন্নে লোকে ¶ সকপটিপত্তিযা ৰেনেয্যানং ৰিনযনত্থং তং তং ৰিহারে উপসম্পজ্জ ৰিহরতি. তথা হি যদা সত্তা কামেসু ৰিপ্পটিপজ্জন্তি, তদা কির ভগৰা দিব্বেন ৰিহারেন ৰিহরতি তেসং অলোভকুসলমূলুপ্পাদনত্থং ‘‘অপ্পেৰ নাম ইমং পটিপত্তিং দিস্ৰা এত্থ রুচিমুপ্পাদেত্ৰা কামেসু ৰিরজ্জেয্যু’’ন্তি. যদা পন ইস্সরিযত্থং সত্তেসু ৰিপ্পটিপজ্জন্তি, তদা ব্রহ্মৰিহারেন ৰিহরতি তেসং অদোসকুসলমূলুপ্পাদনত্থং ‘‘অপ্পেৰ নাম ইমং পটিপত্তিং দিস্ৰা এত্থ রুচিমুপ্পাদেত্ৰা অদোসেন দোসং ৰূপসমেয্যু’’ন্তি. যদা পন পব্বজিতা ধম্মাধিকরণং ৰিৰদন্তি, তদা অরিযৰিহারেন ৰিহরতি তেসং অমোহকুসলমূলুপ্পাদনত্থং ‘‘অপ্পেৰ নাম ইমং পটিপত্তিং দিস্ৰা এত্থ রুচিমুপ্পাদেত্ৰা অমোহেন মোহং ৰূপসমেয্যু’’ন্তি. এৰঞ্চ কত্ৰা ইমেহি দিব্বব্রহ্মঅরিযৰিহারেহি সত্তানং ৰিৰিধং হিতসুখং হরতি, ইরিযাপথৰিহারেন চ একং ইরিযাপথবাধনং অঞ্ঞেন ইরিযাপথেন ৰিচ্ছিন্দিত্ৰা অপরিপতন্তং অত্তভাৰং হরতীতি ৰুত্তং ‘‘অঞ্ঞতরৰিহারসমঙ্গীপরিদীপন’’ন্তি.

‘‘তেনা’’তিআদি যথাৰুত্তসংৰণ্ণনায গুণদস্সনং, তস্মাতি অত্থো, যথাৰুত্তত্থসমত্থনং ৰা. তেন ইরিযাপথৰিহারেন ৰিহরতীতি সম্বন্ধো. তথা ৰদমানো পন ৰিহরতীতি এত্থ ৰি-সদ্দো ৰিচ্ছেদনত্থজোতকো, ‘‘হরতী’’তি এতস্স চ নেতি পৰত্তেতীতি অত্থোতি ঞাপেতি ‘‘ঠিতোপী’’তিআদিনা ৰিচ্ছেদনযনাকারেন ৰুত্তত্তা. এৰঞ্হি সতি তত্থ কস্স কেন ৰিচ্ছিন্দনং, কথং কস্স নযনন্তি অন্তোলীনচোদনং সন্ধাযাহ. ‘‘সো হী’’তিআদীতি অযম্পি সম্বন্ধো উপপন্নো হোতি. যদিপি ভগৰা একেনেৰ ইরিযাপথেন চিরতরং কালং পৰত্তেতুং সক্কোতি, তথাপি উপাদিন্নকস্স নাম সরীরস্স অযং সভাৰোতি দস্সেতুং ‘‘একং ইরিযাপথবাধন’’ন্তিআদি ৰুত্তং. অপরিপতন্তন্তি ভাৰনপুংসকনিদ্দেসো, অপতমানং কত্ৰাতি অত্থো. যস্মা পন ভগৰা যত্থ কত্থচি ৰসন্তো ৰেনেয্যানং ধম্মং দেসেন্তো, নানাসমাপত্তীহি চ কালং ¶ ৰীতিনামেন্তো ৰসতি, সত্তানং, অত্তনো চ ৰিৰিধং সুখং হরতি, তস্মা ৰিৰিধং হরতীতি ৰিহরতীতি এৰম্পেত্থ অত্থো ৰেদিতব্বো.

গোচরগামনিদস্সনত্থং ‘‘রাজগহে’’তি ৰত্ৰা বুদ্ধানমনুরূপনিৰাসট্ঠানদস্সনত্থং পুন ‘‘অম্বৰনে’’তি ৰুত্তন্তি দস্সেন্তো ‘‘ইদমস্সা’’তিআদিমাহ. অস্সাতি ভগৰতো. তস্সাতি রাজগহসঙ্খাতস্স গোচরগামস্স. যস্স সমীপৰসেন ‘‘রাজগহে’’তি ভুম্মৰচনং পৰত্ততি, সোপি তস্স সমীপৰসেন ৰত্তব্বোতি দস্সেতি ‘‘রাজগহসমীপে অম্বৰনে’’তি ইমিনা. সমীপত্থেতি অম্বৰনস্স সমীপত্থে. এতন্তি ‘‘রাজগহে’’তি ৰচনং. ভুম্মৰচনন্তি আধারৰচনং. ভৰন্তি এত্থাতি হি ভুম্মং, আধারো, তদেৰ ৰচনং তথা, ভুম্মে পৰত্তং ৰা ৰচনং ৰিভত্তি ভুম্মৰচনং ¶ , তেন যুত্তং তথা, সত্তমীৰিভত্তিযুত্তপদন্তি অত্থো. ইদং ৰুত্তং হোতি – কামং ভগৰা অম্বৰনেযেৰ ৰিহরতি. তস্সমীপত্তা পন গোচরগামদস্সনত্থং ভুম্মৰচনৰসেন ‘‘রাজগহে’’তিপি ৰুত্তং যথা তং ‘‘গঙ্গাযং গাৰো চরন্তি, কূপে গগ্গকুল’’ন্তি চাতি. অনেনেৰ যদি ভগৰা রাজগহে ৰিহরতি, অথ ন ৰত্তব্বং ‘‘অম্বৰনে’’তি. যদি চ অম্বৰনে, এৰম্পি ন ৰত্তব্বং ‘‘রাজগহে’’তি. ন হি ‘‘পাটলিপুত্তে পাসাদে ৰসতী’’তিআদীসু ৰিয ইধ অধিকরণাধিকরণস্স অভাৰতো অধিকরণস্স দ্ৰযনিদ্দেসো যুত্তো সিযাতি চোদনা অনৰকাসা কতাতি দট্ঠব্বং. কুমারভতো এৰ কোমারভচ্চো সকত্থৰুত্তিপচ্চযেন, নিরুত্তিনযেন ৰা যথা ‘‘ভিসগ্গমেৰ ভেসজ্জ’’ন্তি. ‘‘যথাহা’’তিআদিনা খন্ধকপাল়িৰসেন তদত্থং সাধেতি. কস্মা চ অম্বৰনং জীৰকসম্বন্ধং কত্ৰা ৰুত্তন্তি অনুযোগেন মূলতো পট্ঠায তমত্থং দস্সেন্তো ‘‘অযং পনা’’তিআদিমাহ.

দোসাভিসন্নন্তি ৰাতপিত্তাদিৰসেন উস্সন্নদোসং. ৰিরেচেত্ৰাতি দোসপ্পকোপতো ৰিৰেচেত্ৰা. সিৰেয্যকং দুস্সযুগন্তি সিৰিরট্ঠে জাতং মহগ্ঘং দুস্সযুগং. দিৰসস্স দ্ৰত্তিক্খত্তুন্তি একস্সেৰ দিৰসস্স দ্ৰিৰারে ৰা তিৰারে ৰা ভাগে, ভুম্মত্থে ৰা এতং সামিৰচনং, একস্মিংযেৰ দিৰসে দ্ৰিৰারং ৰা তিৰারং ৰাতি অত্থো. তম্বপট্টৰণ্ণেনাতি তম্বলোহপট্টৰণ্ণেন. সচীৰরভত্তেনাতি চীৰরেন, ভত্তেন চ. ‘‘তং সন্ধাযা’’তি ইমিনা ন ভগৰা অম্বৰনমত্তেযেৰ ৰিহরতি, অথ খো এৰং কতে ৰিহারে. সো পন তদধিকরণতায ৰিসুং অধিকরণভাৰেন ন ৰুত্তোতি সন্ধাযভাসিতমত্থং ¶ দস্সেতি. সামঞ্ঞে হি সতি সন্ধাযভাসিতনিদ্ধারণং.

অড্ঢেন তেল়স অড্ঢতেল়স. তাদিসেহি ভিক্খুসতেহি. অড্ঢো পনেত্থ সতস্সেৰ. যেন হি পযুত্তো তব্ভাগৰাচকো অড্ঢসদ্দো, সো চ খো পণ্ণাসাৰ, তস্মা পঞ্ঞাসায ঊনানি তেল়স ভিক্খুসতানীতি অত্থং ৰিঞ্ঞাপেতুং ‘‘অড্ঢসতেনা’’তিআদি ৰুত্তং. অড্ঢমেৰ সতং সতস্স ৰা অড্ঢং তথা.

রাজতীতি অত্তনো ইস্সরিযসম্পত্তিযা দিব্বতি সোভতি চ. রঞ্জেতীতি দানাদিনা, সস্সমেধাদিনা চ চতূহি সঙ্গহৰত্থূহি রমেতি, অত্তনি ৰা রাগং করোতীতি অত্থো. চ-সদ্দো চেত্থ ৰিকপ্পনত্থো. জনপদৰাচিনো পুথুৰচনপরত্তা ‘‘মগধান’’ন্তি ৰুত্তং, জনপ্পদাপদেসেন ৰা তব্বাসিকানং গহিতত্তা. রঞ্ঞোতি পিতু বিম্বিসাররঞ্ঞো. সসতি হিংসতীতি সত্তু, ৰেরী, অজাতোযেৰ সত্তু অজাতসত্তু. ‘‘নেমিত্তকেহি নিদ্দিট্ঠো’’তি ৰচনেন চ অজাতস্স তস্স সত্তুভাৰো ন তাৰ হোতি, সত্তুভাৰস্স পন তথা নিদ্দিট্ঠত্তা এৰং ৰোহরীযতীতি দস্সেতি. অজাতস্সেৰ ¶ পন তস্স ‘‘রঞ্ঞো লোহিতং পিৰেয্য’’ন্তি দেৰিযা দোহল়স্স পৰত্তত্তা অজাতোযেৰেস রঞ্ঞো সত্তূতিপি ৰদন্তি.

‘‘তস্মি’’ন্তিআদিনা তদত্থং ৰিৰরতি, সমত্থেতি চ. দোহল়োতি অভিলাসো. ভারিযেতি গরুকে, অঞ্ঞেসং অসক্কুণেয্যে ৰা. অসক্কোন্তীতি অসক্কুণমানা. অকথেন্তীতি অকথযমানা সমানা. নিবন্ধিত্ৰাতি ৰচসা বন্ধিত্ৰা. সুৰণ্ণসত্থকেনাতি সুৰণ্ণমযেন সত্থকেন, ঘনসুৰণ্ণকতেনাতি অত্থো. অযোমযঞ্হি রঞ্ঞো সরীরং উপনেতুং অযুত্তন্তি ৰদন্তি. সুৰণ্ণপরিক্খতেন ৰা অযোমযসত্থেনাতি অত্থেপি অযমেৰাধিপ্পাযো. বাহুং ফালাপেত্ৰাতি লোহিতসিরাৰেধৰসেন বাহুং ফালাপেত্ৰা. কেৰলস্স লোহিতস্স গব্ভিনিযা দুজ্জীরভাৰতো উদকেন সম্ভিন্দিত্ৰা পাযেসি. হঞ্ঞিস্সতীতি হঞ্ঞিস্সতে, আযতিং হনীযতেতি অত্থো. নেমিত্তকানং ৰচনং তথং ৰা সিযা, ৰিতথং ৰাতি অধিপ্পাযেন ‘‘পুত্তোতি ৰা ধীতাতি ৰা ন পঞ্ঞাযতী’’তি ৰুত্তং. ‘‘অত্তনো’’তিআদিনা অঞ্ঞম্পি কারণং দস্সেত্ৰা নিৰারেসি. রঞ্ঞো ভাৰো রজ্জং, রজ্জস্স সমীপে পৰত্ততীতি ওপরজ্জং, ঠানন্তরং.

মহাতি ¶ মহতী. সমাসে ৰিয হি ৰাক্যেপি মহন্তসদ্দস্স মহাদেসো. ধুরাতি গণস্স ধুরভূতা, ধোরয্হা জেট্ঠকাতি অত্থো. ধুরং নীহরামীতি গণধুরমাৰহামি, গণবন্ধিযং নিব্বত্তেস্সামীতি ৰুত্তং হোতি. ‘‘সো ন সক্কা’’তিআদিনা পুন চিন্তনাকারং দস্সেতি. ইদ্ধিপাটিহারিযেনাতি অহিমেখলিককুমারৰণ্ণৰিকুব্বনিদ্ধিনা. তেনাতি অপ্পাযুকভাৰেন. হীতি নিপাতমত্তং. তেন হীতি ৰা উয্যোজনত্থে নিপাতো. তেন ৰুত্তং ‘‘কুমারং…পে… উয্যোজেসী’’তি. বুদ্ধো ভৰিস্সামীতি এত্থ ইতি-সদ্দো ইদমত্থো, ইমিনা খন্ধকে আগতনযেনাতি অত্থো. পুব্বে খোতিআদীহিপি খন্ধকপাল়িযেৰ (চূল়ৰ. ৩৩৯).

পোত্থনিযন্তি ছুরিকং. যং ‘‘নখর’’ন্তিপি ৰুচ্চতি, দিৰা দিৰসেতি (দী. নি. টী. ১.১৫০) দিৰসস্সপি দিৰা. সাম্যত্থে হেতং ভুম্মৰচনং ‘‘দিৰা দিৰসস্সা’’তি অঞ্ঞত্থ দস্সনতো. দিৰস্স দিৰসেতিপি ৰট্টতি অকারন্তস্সপি দিৰসদ্দস্স ৰিজ্জমানত্তা. নেপাতিকম্পি দিৰাসদ্দমিচ্ছন্তি সদ্দৰিদূ, মজ্ঝন্হিকৰেলাযন্তি অত্থো. সা হি দিৰসস্স ৰিসেসো দিৰসোতি. ‘‘ভীতো’’তিআদি পরিযাযো, কাযথম্ভনেন ৰা ভীতো. হদযমংসচলনেন উব্বিগ্গো. ‘‘জানেয্যুং ৰা, মা ৰা’’তি পরিসঙ্কায উস্সঙ্কী. ঞাতে সতি অত্তনো আগচ্ছমানভযৰসেন উত্রস্তো. ৰুত্তপ্পকারন্তি দেৰদত্তেন ৰুত্তাকারং ৰিপ্পকারন্তি অপকারং অনুপকারং, ৰিপরীতকিচ্চং ৰা. সব্বে ভিক্খূতি দেৰদত্তপরিসং সন্ধাযাহ.

অচ্ছিন্দিত্ৰাতি ¶ অপনযনৰসেন ৰিলুম্পিত্ৰা. রজ্জেনাতি ৰিজিতেন. একস্স রঞ্ঞো আণাপৰত্তিট্ঠানং ‘‘রজ্জ’’ন্তি হি ৰুত্তং, রাজভাৰেন ৰা.

মনসো অত্থো ইচ্ছা মনোরথো র-কারাগমং, ত-কারলোপঞ্চ কত্ৰা, চিত্তস্স ৰা নানারম্মণেসু ৰিব্ভমকরণতো মনসো রথো ইৰ মনোরথো, মনো এৰ রথো ৰিযাতি ৰা মনোরথোতিপি নেরুত্তিকা ৰদন্তি. সুকিচ্চকারিম্হীতি সুকিচ্চকারী অম্হি. অৰমানন্তি অৰমঞ্ঞনং অনাদরং. মূলঘচ্চন্তি জীৰিতা ৰোরোপনং সন্ধাযাহ, ভাৰনপুংসকমেতং. রাজকুলানং কির সত্থেন ঘাতনং রাজূনমনাচিণ্ণং, তস্মা সো ‘‘ননু ভন্তে’’তিআদিমাহ. তাপনগেহং নাম উণ্হগহাপনগেহং, তং পন ধূমেনেৰ অচ্ছিন্না. তেন ৰুত্তং ‘‘ধূমঘর’’ন্তি. কম্মকরণত্থাযাতি তাপন কম্মকরণত্থমেৰ. কেনচি ছাদিতত্তা উচ্চো অঙ্গোতি উচ্চঙ্গো ¶ , যস্স কস্সচি গহণত্থং পটিচ্ছন্নো উন্নতঙ্গোতি ইধ অধিপ্পেতো. তেন ৰুত্তং ‘‘উচ্চঙ্গং কত্ৰা পৰিসিতুং মা দেথা’’তি. ‘‘উচ্ছঙ্গে কত্ৰা’’তিপি পাঠো, এৰং সতি মজ্ঝিমঙ্গোৰ, উচ্ছঙ্গে কিঞ্চি গহেতব্বং কত্ৰাতি অত্থো. মোল়িযন্তি চূল়াযং ‘‘ছেত্ৰান মোল়িং ৰরগন্ধৰাসিত’’ন্তিআদীসু (ম. নি. অট্ঠ. ২.১; সং. নি. অট্ঠ. ২.২.৫৫; অপ. অট্ঠ. ১.অৰিদূরেনিদানকথা; বু. ৰং. অট্ঠ. ২৭.অৰিদূরেনিদানকথা; জা. অট্ঠ. ১.অৰিদূরেনিদানকথা) ৰিয. তেনাহ ‘‘মোল়িং বন্ধিত্ৰা’’তি. চতুমধুরেনাতি সপ্পিসক্করমধুনাল়িকেরস্নেহসঙ্খাতেহি চতূহি মধুরেহি অভিসঙ্খতপানৰিসেসেনাতি ৰদন্তি, তং মহাধম্মসমাদানসুত্তপাল়িযা (ম. নি. ১.৪৭৩) ন সমেতি. ৰুত্তঞ্হি তত্থ ‘‘দধি চ মধু চ সপ্পি চ ফাণিতঞ্চ একজ্ঝং সংসট্ঠ’’ন্তি, (ম. নি. ১.৪৮৫) তদট্ঠকথাযঞ্চ ৰুত্তং ‘‘দধি চ মধু চাতি সুপরিসুদ্ধং দধি চ সুমধুরং মধু চ. একজ্ঝং সংসট্ঠন্তি একতো কত্ৰা মিস্সিতং আলুল়িতং. তস্স তন্তি তস্স তং চতুমধুরভেসজ্জং পিৰতো’’তি ‘‘অত্তুপক্কমেন মরণং ন যুত্ত’’ন্তি মনসি কত্ৰা রাজা তস্সা সরীরং লেহিত্ৰা যাপেতি. ন হি অরিযা অত্তানং ৰিনিপাতেন্তি.

মগ্গফলসুখেনাতি মগ্গফলসুখৰতা, সোতাপত্তিমগ্গফলসুখূপসঞ্হিতেন চঙ্কমেন যাপেতীতি অত্থো. হারেস্সামীতি অপনেস্সামি. ৰীতচ্চিতেহীতি ৰিগতঅচ্চিতেহি জালৰিগতেহি সুদ্ধঙ্গারেহি. কেনচি সঞ্ঞত্তোতি কেনচি সম্মা ঞাপিতো, ওৰদিতোতি ৰুত্তং হোতি. মস্সুকরণত্থাযাতি মস্সুৰিসোধনত্থায. মনং করোথাতি যথা রঞ্ঞো মনং হোতি, তথা করোথ. পুব্বেতি পুরিমভৰে. চেতিযঙ্গণেতি গন্ধপুপ্ফাদীহি পূজনট্ঠানভূতে চেতিযস্স ভূমিতলে. নিসজ্জনত্থাযাতি ভিক্খুসঙ্ঘস্স নিসীদনত্থায. পঞ্ঞত্তকটসারকন্তি পঞ্ঞপেতব্বউত্তমকিলঞ্জং. তথাৰিধো ¶ কিলঞ্জো হি ‘‘কটসারকো’’তি ৰুচ্চতি. তস্সাতি যথাৰুত্তস্স কম্মদ্ৰযস্স. তং পন মনোপদোসৰসেনেৰ তেন কতন্তি দট্ঠব্বং. যথাহ –

‘‘মনোপুব্বঙ্গমা ধম্মা, মনোসেট্ঠা মনোমযা;

মনসা চে পদুট্ঠেন, ভাসতি ৰা করোতি ৰা;

ততো নং দুক্খমন্ৰেতি, চক্কংৰ ৰহতো পদ’’ন্তি. (ধ. প. ১; নেত্তি. ৯০);

পরিচারকোতি সহাযকো. অভেদেপি ভেদমিৰ ৰোহারো লোকে পাকটোতি ৰুত্তং ‘‘যক্খো হুত্ৰা নিব্বত্তী’’তি. একাযপি হি উপ্পাদকিরিযায ¶ ইধ ভেদৰোহারো, পটিসন্ধিৰসেন হুত্ৰা, পৰত্তিৰসেন নিব্বত্তীতি ৰা পচ্চেকং যোজেতব্বং, পটিসন্ধিৰসেন ৰা পৰত্তনসঙ্খাতং সাতিসযনিব্বত্তনং ঞাপেতুং একাযেৰ কিরিযা পদদ্ৰযেন ৰুত্তা. তথাৰচনঞ্হি পটিসন্ধিৰসেন নিব্বত্তনেযেৰ দিস্সতি ‘‘মক্কটকো নাম দেৰপুত্তো হুত্ৰা নিব্বত্তি (ধ. প. অট্ঠ. ১.৫) কণ্টকো নাম…পে… নিব্বত্তি, (জা. অট্ঠ. ১.অৰিদূরেনিদানকথা) মণ্ডূকো নাম…পে… নিব্বত্তী’’তিআদীসু ৰিয. দ্ৰিন্নং ৰা পদানং ভাৰত্থমপেক্খিত্ৰা ‘‘যক্খো’’তিআদীসু সামিঅত্থে পচ্চত্তৰচনং কতং পুরিমায পচ্ছিমৰিসেসনতো, পরিচারকস্স…পে… যক্খস্স ভাৰেন নিব্বত্তীতি অত্থো, হেত্ৰত্থে ৰা এত্থ ত্ৰা-সদ্দো যক্খস্স ভাৰতো পৰত্তনহেতূতি. অস্স পন রঞ্ঞো মহাপুঞ্ঞস্সপি সমানস্স তত্থ বহুলং নিব্বত্তপুব্বতায চিরপরিচিতনিকন্তি ৰসেন তত্থেৰ নিব্বত্তি ৰেদিতব্বা.

তং দিৰসমেৰাতি রঞ্ঞো মরণদিৰসেযেৰ. খোভেত্ৰাতি পুত্তস্নেহস্স বলৰভাৰতো, তংসহজাতপীতি ৰেগস্স চ সৰিপ্ফারতায তং সমুট্ঠানরূপধম্মেহি ফরণৰসেন সকলসরীরং আলোল়েত্ৰা. তেনাহ ‘‘অট্ঠিমিঞ্জং আহচ্চ অট্ঠাসী’’তি. পিতুগুণন্তি পিতুনো অত্তনি সিনেহগুণং. তেন ৰুত্তং ‘‘মযি জাতেপী’’তিআদি. ৰিস্সজ্জেথ ৰিস্সজ্জেথাতি তুরিতৰসেন, সোকৰসেন চ ৰুত্তং.

অনুট্ঠুভিত্ৰাতি অছড্ডেত্ৰা.

নাল়াগিরিহত্থিং মুঞ্চাপেত্ৰাতি এত্থ ইতি-সদ্দো পকারত্থো, তেন ‘‘অভিমারকপুরিসপেসেনাদিপ্পকারেনা’’তি পুব্বে ৰুত্তপ্পকারত্তযং পচ্চামসতি, কত্থচি পন সো ন ¶ দিট্ঠো. পঞ্চ ৰত্থূনীতি ‘‘সাধু ভন্তে ভিক্খূ যাৰজীৰং আরঞ্ঞিকা অস্সূ’’তিআদিনা (পারা. ৪০৯; চূল়ৰ. ৩৪৩) ৰিনযে ৰুত্তানি পঞ্চ ৰত্থূনি. যাচিত্ৰাতি এত্থ যাচনং ৰিয কত্ৰাতি অত্থো. ন হি সো পটিপজ্জিতুকামো যাচতীতি অযমত্থো ৰিনযে (পারা. অট্ঠ. ২.৪১০) ৰুত্তোযেৰ. সঞ্ঞাপেস্সামীতি চিন্তেত্ৰা সঙ্ঘভেদং কত্ৰাতি সম্বন্ধো. ইদঞ্চ তস্স অনিক্খিত্তধুরতাদস্সনৰসেন ৰুত্তং, সো পন অকতেপি সঙ্ঘভেদে তেহি সঞ্ঞাপেতিযেৰ. উণ্হলোহিতন্তি বলৰসোকসমুট্ঠিতং উণ্হভূতং লোহিতং. মহানিরযেতি অৰীচিনিরযে. ৰিত্থারকথানযোতি অজাতসত্তুপসাদনাদিৰসেন ৰিত্থারতো ৰত্তব্বায কথায নযমত্তং. কস্মা পনেত্থ ¶ সা ন ৰুত্তা, ননু সঙ্গীতিকথা ৰিয খন্ধকে (চূল়ৰ. ৩৪৩) আগতাপি সা ৰত্তব্বাতি চোদনায আহ ‘‘আগতত্তা পন সব্বং ন ৰুত্ত’’ন্তি, খন্ধকে আগতত্তা, কিঞ্চিমত্তস্স চ ৰচনক্কমস্স ৰুত্তত্তা ন এত্থ কোচি ৰিরোধোতি অধিপ্পাযো. ‘‘এৰ’’ন্তিআদি যথানুসন্ধিনা নিগমনং.

কোসলরঞ্ঞোতি পসেনদিকোসলস্স পিতু মহাকোসলরঞ্ঞো. ননু ৰিদেহস্স রঞ্ঞো ধীতা ৰেদেহীতি অত্থো সম্ভৰতীতি চোদনমপনেতি ‘‘ন ৰিদেহরঞ্ঞো’’তি ইমিনা. অথ কেনট্ঠেনাতি আহ ‘‘পণ্ডিতাধিৰচনমেত’’ন্তি, পণ্ডিতৰেৰচনং, পণ্ডিতনামন্তি ৰা অত্থো. অযং পন পদত্থো কেন নিব্বচনেনাতি ৰুত্তং ‘‘তত্রায’’ন্তিআদি. ৰিদন্তীতি জানন্তি. ৰেদেনাতি করণভূতেন ঞাণেন. ‘‘ঈহতী’’তি এতস্স পৰত্ততীতিপি অত্থো টীকাযং ৰুত্তো. ৰেদেহীতি ইধ নদাদিগণোতি আহ ‘‘ৰেদেহিযা’’তি.

সোযেৰ অহো তদহো, সত্তমীৰচনেন পন ‘‘তদহূ’’তি পদসিদ্ধি. এত্থাতি এতস্মিং দিৰসে. উপসদ্দেন ৰিসিট্ঠো ৰসসদ্দো উপৰসনেযেৰ, ন ৰসনমত্তে, উপৰসনঞ্চ সমাদানমেৰাতি দস্সেতুং ‘‘সীলেনা’’তিআদি ৰুত্তং. এত্থ চ সীলেনাতি সাসনে অরিযুপোসথং সন্ধায ৰুত্তং. অনসনেনাতি অভুঞ্জনমত্তসঙ্খাতং বাহিরুপোসথং. ৰা-সদ্দো চেত্থ অনিযমত্থো, তেন একচ্চং মনোদুচ্চরিতং, দুস্সীল্যাদিঞ্চ সঙ্গণ্হাতি. তথা হি গোপালকুপোসথো অভিজ্ঝাসহগতস্স চিত্তস্স ৰসেন ৰুত্তো, নিগণ্ঠুপোসথো মোসৰজ্জাদিৰসেন. যথাহ ৰিসাখুপোসথে ‘‘সো তেন অভিজ্ঝাসহগতেন চেতসা দিৰসং অতিনামেতী’’তি, (অ. নি. ৩.৭১) ‘‘ইতি যস্মিং সমযে সচ্চে সমাদপেতব্বা, মুসাৰাদে তস্মিং সমযে সমাদপেতী’’তি (অ. নি. ৩.৭১) চ আদি.

এৰং অধিপ্পেতত্থানুরূপং নিব্বচনং দস্সেত্ৰা ইদানি অত্থুদ্ধারৰসেন নিব্বচনানুরূপং অধিপ্পেতত্থং ¶ দস্সেতুং ‘‘অযং পনা’’তিআদিমাহ. এত্থাতি উপোসথসদ্দে. সমানসদ্দৰচনীযানং অনেকপ্পভেদানং অত্থানমুদ্ধরণং অত্থুদ্ধারো সমানসদ্দৰচনীযেসু ৰা অত্থেসু অধিপ্পেতস্সেৰ অত্থস্স উদ্ধরণং অত্থুদ্ধারোতিপি ৰট্টতি. অনেকত্থদস্সনঞ্হি অধিপ্পেতত্থস্স উদ্ধরণত্থমেৰ. ননু চ ‘‘অত্থমত্তং পতি সদ্দা অভিনিৰিসন্তী’’তিআদিনা অত্থুদ্ধারে ¶ চোদনা, সোধনা চ হেট্ঠা ৰুত্তাযেৰ. অপিচ ৰিসেসসদ্দস্স অৰাচকভাৰতো পাতিমোক্খুদ্দেসাদিৰিসযোপি উপোসথসদ্দো সামঞ্ঞরূপো এৰ, অথ কস্মা পাতিমোক্খুদ্দেসাদিৰিসেসৰিসযো ৰুত্তোতি? সচ্চমেতং, অযং পনত্থো তাদিসং সদ্দসামঞ্ঞমনাদিযিত্ৰা তত্থ তত্থ সম্ভৰত্থদস্সনৰসেনেৰ ৰুত্তোতি, এৰং সব্বত্থ. সীলদিট্ঠিৰসেন (সীলসুদ্ধিৰসেন দী. নি. টী. ১.১৫০) উপেতেহি সমগ্গেহি ৰসীযতি ন উট্ঠীযতীতি উপোসথো, পাতিমোক্খুদ্দেসো. সমাদানৰসেন, অধিট্ঠানৰসেন ৰা উপেচ্চ অরিযৰাসাদিঅত্থায ৰসিতব্বো আৰসিতব্বোতি উপোসথো, সীলং. অনসনাদিৰসেন উপেচ্চ ৰসিতব্বো অনুৰসিতব্বোতি উপোসথো, ৰতসমাদানসঙ্খাতো উপৰাসো. নৰমহত্থিকুলপরিযাপন্নে হত্থিনাগে কিঞ্চি কিরিযমনপেক্খিত্ৰা তংকুলসম্ভূততামত্তং পতি রুল়্হিৰসেনেৰ উপোসথোতি সমঞ্ঞা, তস্মা তত্থ নামপঞ্ঞত্তি ৰেদিতব্বা. অরযো উপগন্ত্ৰা উসেতি দাহেতীতি উপোসথো, উসসদ্দো দাহেতিপি সদ্দৰিদূ ৰদন্তি. দিৰসে পন উপোসথ সদ্দপৰত্তি অট্ঠকথাযং ৰুত্তাযেৰ. ‘‘সুদ্ধস্স ৰে সদাফগ্গূ’’তিআদীসু সুদ্ধস্সাতি সব্বসো কিলেসমলাভাৰেন পরিসুদ্ধস্স. ৰেতি নিপাতমত্তং, ব্যত্তন্তি ৰা অত্থো. সদাতি নিচ্চকালম্পি. ফগ্গূতি ফগ্গুণীনক্খত্তমেৰ যুত্তং ভৰতি, নিরুত্তিনযেন চেতস্স সিদ্ধি. যস্স হি সুন্দরিকভারদ্ৰাজস্স নাম ব্রাহ্মণস্স ফগ্গুণমাসে উত্তরফগ্গুণীযুত্তদিৰসে তিত্থন্হানং করোন্তস্স সংৰচ্ছরম্পি কতপাপপৰাহনং হোতীতি লদ্ধি. ততো তং ৰিৰেচেতুং ইদং মজ্ঝিমাগমাৰরে মূলপণ্ণাসকে ৰত্থসুত্তে ভগৰতা ৰুত্তং. সুদ্ধস্সুপোসথো সদাতি যথাৰুত্তকিলেসমলসুদ্ধিযা পরিসুদ্ধস্স উপোসথঙ্গানি, ৰতসমাদানানি চ অসমাদিযতোপি নিচ্চকালং উপোসথৰাসো এৰ ভৰতীতি অত্থো. ‘‘ন ভিক্খৰে’’তিআদীসু ‘‘অভিক্খুকো আৰাসো ন গন্তব্বো’’তি নীহরিত্ৰা সম্বন্ধো. উপৰসিতব্বদিৰসোতি উপৰসনকরণদিৰসো, অধিকরণে ৰা তব্বসদ্দো দট্ঠব্বো. এৰঞ্হি অট্ঠকথাযং ৰুত্তনিব্বচনেন সমেতি. অন্তোগধাৰধারণেন, অঞ্ঞত্থাপোহনেন চ নিৰারণং সন্ধায ‘‘সেসদ্ৰযনিৰারণত্থ’’ন্তি ৰুত্তং. ‘‘পন্নরসে’’তি পদমারব্ভ দিৰসৰসেন যথাৰুত্তনিব্বচনং কতন্তি ¶ দস্সেন্তো ‘‘তেনেৰ ৰুত্ত’’ন্তিআদিমাহ. পঞ্চদসন্নং তিথীনং পূরণৰসেন ‘‘পন্নরসো’’তি হি দিৰসো ৰুত্তো.

‘‘তানি এত্থ সন্তী’’তি এত্তকেযেৰ ৰুত্তে নন্ৰেতানি অঞ্ঞত্থাপি সন্তীতি চোদনা সিযাতি তং নিৰারেতুং ‘‘তদা কিরা’’তিআদি ৰুত্তং. অনেন বহুসো, অতিসযতো ৰা এত্থ তদ্ধিতৰিসযো ¶ পযুত্তোতি দস্সেতি. চাতুমাসী, চাতুমাসিনীতি চ পচ্চযৰিসেসেন ইত্থিলিঙ্গেযেৰ পরিযাযৰচনং. পরিযোসানভূতাতি চ পূরণভাৰমেৰ সন্ধায ৰদতি তায সহেৰ চতুমাসপরিপুণ্ণভাৰতো. ইধাতি পাল়িযং. তীহি আকারেহি পূরেতীতি পুণ্ণাতি অত্থং দস্সেতি ‘‘মাসপুণ্ণতাযা’’তিআদিনা. তত্থ তদা কত্তিকমাসস্স পুণ্ণতায মাসপুণ্ণতা. পুরিমপুণ্ণমিতো হি পট্ঠায যাৰ অপরা পুণ্ণমী, তাৰ একো মাসোতি তত্থ ৰোহারো. ৰস্সানস্স উতুনো পুণ্ণতায উতুপুণ্ণতা. কত্তিকমাসলক্খিতস্স সংৰচ্ছরস্স পুণ্ণতায সংৰচ্ছরপুণ্ণতা. পুরিমকত্তিকমাসতো পভুতি যাৰ অপরকত্তিকমাসো, তাৰ একো কত্তিকসংৰচ্ছরোতি এৰং সংৰচ্ছরপুণ্ণতাযাতি ৰুত্তং হোতি. লোকিকানং মতেন পন মাসৰসেন সংৰচ্ছরসমঞ্ঞা লক্খিতা. তথা চ লক্খণং গরুসঙ্কন্তিৰসেন. ৰুত্তঞ্হি জোতিসত্থে –

‘‘নক্খত্তেন সহোদয-মত্থং যাতি সূরমন্তি;

তস্স সঙ্কং তত্র ৰত্তব্বং, ৰস্সং মাসকমেনেৰা’’তি.

মিনীযতি দিৰসো এতেনাতি মা. তস্স হি গতিযা দিৰসো মিনিতব্বো ‘‘পাটিপদো দুতিযা, ততিযা’’তিআদিনা. এত্থ পুণ্ণোতি এতিস্সা রত্তিযা সব্বকলাপারিপূরিযা পুণ্ণো. চন্দস্স হি সোল়সমো ভাগো ‘‘কলা’’তি ৰুচ্চতি, তদা চ চন্দো সব্বাসম্পি সোল়সন্নং কলানং ৰসেন পরিপুণ্ণো হুত্ৰা দিস্সতি. এত্থ চ ‘‘তদহুপোসথে পন্নরসে’’তি পদানি দিৰসৰসেন ৰুত্তানি, ‘‘কোমুদিযা’’তিআদীনি তদেকদেসরত্তিৰসেন.

কস্মা পন রাজা অমচ্চপরিৰুতো নিসিন্নো, ন এককোৰাতি চোদনায সোধনালেসং দস্সেতুং পাল়িপদত্থমেৰ অৰত্ৰা ‘‘এৰরূপাযা’’তিআদীনিপি ৰদতি. এতেহি চাযং সোধনালেসো দস্সিতো ‘‘এৰং রুচিযমানায রত্তিযা তদা পৰত্তত্তা তথা পরিৰুতো নিসিন্নো’’তি. ধোৰিযমানদিসাভাগাযাতি ¶ এত্থাপি ৰিযসদ্দো যোজেতব্বো. রজতৰিমাননিচ্ছরিতেহীতি রজতৰিমানতো নিক্খন্তেহি, রজতৰিমানপ্পভায ৰা ৰিপ্ফুরিতেহি. ‘‘ৰিসরো’’তি ইদং মুত্তাৰল়িআদীনম্পি ৰিসেসনপদং. অব্ভং ধূমো রজো রাহূতি ইমে চত্তারো উপক্কিলেসা পাল়িনযেন (অ. নি. ৪.৫০; পাচি. ৪৪৭). রাজামচ্চেহীতি রাজকুলসমুদাগতেহি অমচ্চেহি. অথ ৰা অনুযুত্তকরাজূহি চেৰ অমচ্চেহি চাতি অত্থো. কঞ্চনাসনেতি সীহাসনে. ‘‘রঞ্ঞং তু হেমমাসনং, সীহাসনমথো ৰাল়বীজনিত্থী চ চামর’’ন্তি হি ৰুত্তং. কস্মা নিসিন্নোতি নিসীদনমত্তে চোদনা. এত ন্তি কন্দনং, পবোধনং ৰা. ইতীতি ইমিনা হেতুনা. নক্খত্ত ন্তি কত্তিকানক্খত্তছণং. সম্মা ঘোসিতব্বং এতরহি নক্খত্তন্তি সঙ্ঘুট্ঠং. পঞ্চৰণ্ণকুসুমেহি ¶ লাজেন, পুণ্ণঘটেহি চ পটিমণ্ডিতং ঘরেসু দ্ৰারং যস্স তদেতং নগরং পঞ্চ…পে… দ্ৰারং. ধজো ৰটো. পটাকো পট্টোতি সীহল়িযা ৰদন্তি. তদা কির পদীপুজ্জলনসীসেন কতনক্খত্তং. তথা হি উম্মাদন্তিজাতকাদীসুপি (জা. ২.১৮.৫৭) কত্তিকমাসে এৰমেৰ ৰুত্তং. তেনাহ ‘‘সমুজ্জলিতদীপমালালঙ্কতসব্বদিসাভাগ’’ন্তি. ৰীথি নাম রথিকা মহামগ্গো. রচ্ছা নাম অনিব্বিদ্ধা খুদ্দকমগ্গো. তত্থ তত্থ নিসিন্নৰসেন সমানভাগেন পাটিযেক্কং নক্খত্তকীল়ং অনুভৰমানেন সমভিকিণ্ণন্তি ৰুত্তং হোতি. মহাঅট্ঠকথাযং এৰং ৰত্ৰাপি তত্থেৰ ইতি সন্নিট্ঠানং কতন্তি অত্থো.

উদানং উদাহারোতি অত্থতো একং. মানন্তি মানপত্তং কত্তুভূতং. ছড্ডনৰসেন অৰসেকো. সোতৰসেন ওঘো. পীতিৰচনন্তি পীতিসমুট্ঠানৰচনং কম্মভূতং. হদযন্তি চিত্তং কত্তুভূতং. গহেতুন্তি বহি অনিচ্ছরণৰসেন গণ্হিতুং, হদযন্তোযেৰ ঠপেতুং ন সক্কোতীতি অধিপ্পাযো. তেন ৰুত্তং ‘‘অধিকং হুত্ৰা’’তিআদি. ইদং ৰুত্তং হোতি – যং ৰচনং পটিগ্গাহক নিরপেক্খং কেৰলং উল়ারায পীতিযা ৰসেন সরসতো সহসাৰ মুখতো নিচ্ছরতি, তদেৰিধ ‘‘উদান’’ন্তি অধিপ্পেতন্তি.

দোসেহি ইতা গতা অপগতাতি দোসিনা ত-কারস্স ন-কারং কত্ৰা যথা ‘‘কিলেসে জিতো ৰিজিতাৰীতি জিনো’’তি আহ ‘‘দোসাপগতা’’তি. যদিপি সুত্তে ৰুত্তং ‘‘চত্তারোমে ভিক্খৰে চন্দিমসূরিযানং উপক্কিলেসা, যেহি উপক্কিলেসেহি উপক্কিলিট্ঠা চন্দিমসূরিযা ন ¶ তপন্তি ন ভাসন্তি ন ৰিরোচন্তি. কতমে চত্তারো? অব্ভা ভিক্খৰে…পে… মহিকা. ধূমো রজো. রাহু ভিক্খৰে চন্দিমসূরিযানং উপক্কিলেসো’’তি, (চূল়ৰ. ৪৪৭) তথাপি ততিযুপক্কিলেসস্স পভেদদস্সন ৰসেন অট্ঠকথানযেন দস্সেতুং ‘‘পঞ্চহি উপক্কিলেসেহী’’তি ৰুত্তং. অযমত্থো চ রমণীযাদিসদ্দযোগতো ঞাযতীতি আহ ‘‘তস্মা’’তিআদি. অনীয-সদ্দোপি বহুলা কত্ৰত্থাভিধাযকো যথা ‘‘নিয্যানিকা ধম্মা’’তি (ধ. স. দুকমাতিকা ৯৬) দস্সেতি ‘‘রমযতী’’তি ইমিনা. জুণ্হাৰসেন রত্তিযা সুরূপত্তমাহ ‘‘ৰুত্তদোসৰিমুত্তাযা’’তিআদিনা. অব্ভাদযো চেত্থ ৰুত্তদোসা. অযঞ্চ হেতু ‘‘দস্সিতুং যুত্তা’’তি এত্থাপি সম্বজ্ঝিতব্বো. তেন কারণেন, উতুসম্পত্তিযা চ পাসাদিকতা দট্ঠব্বা. ঈদিসায রত্তিযা যুত্তো দিৰসো মাসো উতু সংৰচ্ছরোতি এৰং দিৰসমাসাদীনং লক্খণা সল্লক্খণুপাযা ভৰিতুং যুত্তা, তস্মা লক্খিতব্বাতি লক্খণিযা, সা এৰ লক্খঞ্ঞা য-ৰতো ণ-কারস্স ঞ-কারাদেসৰসেন যথা ‘‘পোক্খরঞ্ঞো সুমাপিতা’’তি আহ ‘‘দিৰসমাসাদীন’’ন্তিআদি.

‘‘যং ¶ নো পযিরুপাসতো চিত্তং পসীদেয্যা’’তি ৰচনতো সমণং ৰা ব্রাহ্মণং ৰাতি এত্থ পরমত্থসমণো, পরমত্থব্রাহ্মণো চ অধিপ্পেতো, ন পন পব্বজ্জামত্তসমণো, ন চ জাতিমত্তব্রাহ্মণোতি ৰুত্তং ‘‘সমিতপাপতাযা’’তিআদি. বহতি পাপে বহি করোতীতি ব্রাহ্মণো নিরুত্তিনযেন. বহুৰচনে ৰত্তব্বে একৰচনং, একৰচনে ৰা ৰত্তব্বে বহুৰচনং ৰচনব্যত্তযো ৰচনৰিপল্লাসোতি অত্থো. ইধ পন ‘‘পযিরুপাসত’’ন্তি ৰত্তব্বে ‘‘পযিরুপাসতো’’তি ৰুত্তত্তা বহুৰচনে ৰত্তব্বে একৰচনৰসেন ৰচনব্যত্তযো দস্সিতো. অত্তনি, গরুট্ঠানিযে চ হি একস্মিম্পি বহুৰচনপ্পযোগো নিরুল়্হো. পযিরুপাসতোতি চ ৰণ্ণৰিপরিযাযনিদ্দেসো এস যথা ‘‘পযিরুদাহাসী’’তি. অযঞ্হি বহুলং দিট্ঠপযোগো, যদিদং পরিসদ্দে য-কারপরে ৰণ্ণৰিপরিযাযো. তথা হি অক্খরচিন্তকা ৰদন্তি ‘‘পরিযাদীনং রযাদিৰণ্ণস্স যরাদীহি ৰিপরিযাযো’’তি. যন্তি সমণং ৰা ব্রাহ্মণং ৰা. ইমিনা সব্বেনপি ৰচনেনাতি ‘‘রমণীযা ৰতা’’তিআদিৰচনেন. ওভাসনিমিত্তকম্মন্তি ওভাসভূতং নিমিত্তকম্মং ¶ , পরিব্যত্তং নিমিত্তকরণন্তি অত্থো. মহাপরাধতাযাতি মহাদোসতায.

‘‘তেন হী’’তিআদি তদত্থৰিৰরণং. দেৰদত্তো চাতি এত্থ চ-সদ্দো সমুচ্চযৰসেন অত্থুপনযনে, তেন যথা রাজা অজাতসত্তু অত্তনো পিতু অরিযসাৰকস্স সত্থু উপট্ঠাকস্স ঘাতনেন মহাপরাধো, এৰং ভগৰতো মহানত্থকরস্স দেৰদত্তস্স অপস্সযভাৰেনাপীতি ইমমত্থং উপনেতি. তস্স পিট্ঠিছাযাযাতি ৰোহারমত্তং, তস্স জীৰকস্স পিট্ঠিঅপস্সযেন, তং পমুখং কত্ৰা অপস্সাযাতি ৰুত্তং হোতি. ৰিক্খেপপচ্ছেদনত্থন্তি ৰক্খমানায অত্তনো কথায উপ্পজ্জনকৰিক্খেপস্স পচ্ছিন্দনত্থং, অনুপ্পজ্জনত্থন্তি অধিপ্পাযো. তেনাহ ‘‘তস্সং হী’’তিআদি. অসিক্খিতানন্তি কাযৰচীসংযমনে ৰিগতসিক্খানং. কুলূপকেতি কুলমুপগতে সত্থারে. গহিতাসারতাযাতি গহেতব্বগুণসারৰিগততায. নিব্বিক্খেপন্তি অঞ্ঞেসমপনযনৰিরহিতং.

ভদ্দন্তি অৰস্সযসম্পন্নতায সুন্দরং.

১৫১. অযঞ্চত্থো ইমায পাল়িচ্ছাযায অধিগতো, ইমমত্থমেৰ ৰা অন্তোগধং কত্ৰা পাল়িযমেৰং ৰুত্তন্তি দস্সেতি ‘‘তেনাহা’’তিআদিনা. অসত্থাপি সমানো সত্থা পটিঞ্ঞাতো যেনাতি সত্থুপটিঞ্ঞাতো, তস্স অবুদ্ধস্সাপি সমানস্স বুদ্ধপটিঞ্ঞাতস্স ‘‘অহমেকো লোকে অত্থধম্মানুসাসকো’’তি আচরিযপটিঞ্ঞাতভাৰং ৰা সন্ধায এৰং ৰুত্তং. ‘‘সো কিরা’’তিআদিনা অনুস্সুতিমত্তং পতি পোরাণট্ঠকথানযোৰ কিরসদ্দেন ৰুত্তো. এস নযো পরতো মক্খলিপদনিব্বচনেপি ¶ . একূনদাসসতং পূরযমানোতি একেনূনদাসসতং অত্তনা সদ্ধিং অনূনদাসসতং কত্ৰা পূরযমানো. এৰং জাযমানো চেস মঙ্গলদাসো জাতো. জাতরূপেনেৰাতি মাতুকুচ্ছিতো ৰিজাতৰেসেনেৰ, যথা ৰা সত্তা অনিৰত্থা অপারুতা জাযন্তি, তথা জাতরূপেনেৰ. উপসঙ্কমন্তীতি উপগতা ভজন্তা হোন্তি. তদেৰ পব্বজ্জং অগ্গহেসীতি তদেৰ নগ্গরূপং ‘‘অযমেৰ পব্বজ্জা নাম সিযা’’তি পব্বজ্জং কত্ৰা অগ্গহেসি. পব্বজিংসূতি তং পব্বজিতমনুপব্বজিংসু.

‘‘পব্বজিতসমূহসঙ্খাতো’’তি এতেন পব্বজিতসমূহতামত্তেন সঙ্ঘো, ন নিয্যানিকদিট্ঠিৰিসুদ্ধসীলসামঞ্ঞৰসেন সংহতত্তাতি দস্সেতি. অস্স অত্থীতি ¶ অস্স সত্থুপটিঞ্ঞাতস্স পরিৰারভাৰেন অত্থি. ‘‘সঙ্ঘী গণী’’তি চেদং পরিযাযৰচনং, সঙ্কেতমত্ততো নানন্তি আহ ‘‘স্ৰেৰা’’তিআদি. স্ৰেৰাতি চ পব্বজিতসমূহসঙ্খাতো এৰ. কেচি পন ‘‘পব্বজিতসমূহৰসেন সঙ্ঘী, গহট্ঠসমূহৰসেন গণী’’তি ৰদন্তি, তং তেসং মতিমত্তং গণে এৰ লোকে সঙ্ঘ-সদ্দস্স নিরুল়্হত্তা. অচেলকৰতচরিযাদি অত্তনা পরিকপ্পিতমত্তং আচারো. পঞ্ঞাতো পাকটো সঙ্ঘীআদিভাৰেন. অপ্পিচ্ছো সন্তুট্ঠোতি অত্থতো একং. তত্থ লব্ভমানাপ্পিচ্ছতং দস্সেতুং ‘‘অপ্পিচ্ছতায ৰত্থম্পি ন নিৰাসেতী’’তি ৰুত্তং. ন হি তস্মিং সাসনিকে ৰিয সন্তগুণনিগ্গূহণলক্খণা অপ্পিচ্ছতা লব্ভতি. যসোতি কিত্তিসদ্দো. তরন্তি এতেন সংসারোঘন্তি এৰং সম্মততায লদ্ধি তিত্থং নাম ‘‘সাধূ’’তি সম্মতো, ন চ সাধূহি সম্মতোতি অত্থমাহ ‘‘অয’’ন্তিআদিনা. ন হি তস্স সাধূহি সম্মততা লব্ভতি. সুন্দরো সপ্পুরিসোতি দ্ৰিধা অত্থো. অস্সুতৰতোতি অস্সুতারিযধম্মস্স, কত্তুত্থে চেতং সামিৰচনং. ‘‘ইমানি মে ৰতসমাদানানি এত্তকং কালং সুচিণ্ণানী’’তি বহূ রত্তিযো জানাতি. তা পনস্স রত্তিযো চিরকালভূতাতি কত্ৰা ‘‘চিরং পব্বজিতস্সা’’তিআদি ৰুত্তং, অন্তত্থঅঞ্ঞপদত্থসমাসো চেস যথা ‘‘মাসজাতো’’তি. অথ তস্স পদদ্ৰযস্স কো ৰিসেসোতি চে? চিরপব্বজিতগ্গহণেনস্স বুদ্ধিসীলতা, রত্তঞ্ঞূগহণেন তত্থ সম্পজানতা দস্সিতা, অযমেতস্স ৰিসেসোতি. কিং পন অত্থং সন্ধায সো অমচ্চো আহাতি ৰুত্তং ‘‘অচিরপব্বজিতস্সা’’তিআদি. ওকপ্পনীযাতি সদ্দহনীযা. অদ্ধানন্তি দীঘকালং. কিত্তকো পন সোতি আহ ‘‘দ্ৰে তযো রাজপরিৰট্টে’’তি, দ্ৰিন্নং, তিণ্ণং ৰা রাজূনং রজ্জানুসাসনপটিপাটিযোতি অত্থো. ‘‘অদ্ধগতো’’তি ৰত্ৰাপি পুন কতং ৰযগ্গহণং ওসানৰযাপেক্খং পদদ্ৰযস্স অত্থৰিসেসসম্ভৰতোতি দস্সেতি ‘‘পচ্ছিমৰয’’ন্তি ইমিনা. উভযন্তি ‘‘অদ্ধগতো, ৰযোঅনুপ্পত্তো’’তি পদদ্ৰযং.

কাজরো ¶ নাম একো রুক্খৰিসেসো, যো ‘‘পণ্ণকরুক্খো’’তিপি ৰুচ্চতি. দিস্ৰা ৰিয অনত্তমনোতি সম্বন্ধো. পুব্বে পিতরা সদ্ধিং সত্থু সন্তিকং গন্ত্ৰা দেসনায সুতপুব্বতং সন্ধাযাহ ‘‘ঝানা…পে… কামো’’তি. তিলক্খণব্ভাহতন্তি তীহি লক্খণেহি অভিঘটিতং. দস্সনেনাতি নিদস্সনমত্তং. সো হি দিস্ৰা তেন সদ্ধিং অল্লাপসল্লাপং কত্ৰা ¶ , ততো অকিরিযৰাদং সুত্ৰা চ অনত্তমনো অহোসি. গুণকথাযাতি অভূতগুণকথায. তেনাহ ‘‘সুট্ঠুতরং অনত্তমনো’’তি. যদি অনত্তমনো, কস্মা তুণ্হী অহোসীতি চোদনং ৰিসোধেতি ‘‘অনত্তমনো সমানোপী’’তিআদিনা.

১৫২. গোসালাযাতি এৰংনামকে গামেতি ৰুত্তং. ৰস্সানকালে গুন্নং পতিট্ঠিতসালাযাতি পন অত্থে তব্বসেন তস্স নামং সাতিসযমুপপন্নং হোতি বহুলমনঞ্ঞসাধারণত্তা, তথাপি সো পোরাণেহি অননুস্সুতোতি একচ্চৰাদো নাম কতো. ‘‘মা খলীতি সামিকো আহা’’তি ইমিনা তথাৰচনমুপাদায তস্স আখ্যাতপদেন সমঞ্ঞাতি দস্সেতি. সঞ্ঞায হি ৰত্তুমিচ্ছায আখ্যাতপদম্পি নামিকং ভৰতি যথা ‘‘অঞ্ঞাসিকোণ্ডঞ্ঞো’’তি (মহাৰ. ১৭). সেসন্তি ‘‘সো পণ্ণেন ৰা’’তিআদিৰচনং.

১৫৩. দাসাদীসু সিরিৰড্ঢকাদিনামমিৰ অজিতোতি তস্স নামমত্তং. কেসেহি ৰাযিতো কম্বলো যস্সাতিপি যুজ্জতি. পটিকিট্ঠতরন্তি নিহীনতরং. ‘‘যথাহা’’তিআদিনা অঙ্গুত্তরাগমে তিকনিপাতে মক্খলিসুত্ত (অ. নি. ৩.১৩৮) মাহরি. তন্তাৰুতানীতি তন্তে ৰীতানি. ‘‘সীতে সীতো’’তিআদিনা ছহাকারেহি তস্স পটিকিট্ঠতরং দস্সেতি.

১৫৪. পকুজ্ঝতি সম্মাদিট্ঠিকেসু ব্যাপজ্জতীতি পকুধো. ৰচ্চং কত্ৰাপীতি এত্থ পি-সদ্দেন ভোজনং ভুঞ্জিত্ৰাপি কেনচি অসুচিনা মক্খিত্ৰাপীতি ইমমত্থং সম্পিণ্ডেতি. ৰালিকাথূপং কত্ৰাতি ৰতসমাদানসীসেন ৰালিকাসঞ্চযং কত্ৰা, তথারূপে অনুপগমনীযট্ঠানে পুন ৰতং সমাদায গচ্ছতীতি ৰুত্তং হোতি.

১৫৬. ‘‘গণ্ঠনকিলেসো’’তি এতস্স ‘‘পলিবুন্ধনকিলেসো’’তি অত্থৰচনং, সংসারে পরিবুন্ধনকিচ্চো খেত্তৰত্থুপুত্তদারাদিৰিসযো রাগাদিকিলেসোতি অত্থো. ‘‘এৰংৰাদিতাযা’’তি ইমিনা লদ্ধিৰসেনস্স নামং, ন পনত্থতোতি দস্সেতি. যাৰ হি সো মগ্গেন সমুগ্ঘাটিতো, তাৰ অত্থিযেৰ. অযং পন ৰচনত্থো – ‘‘নত্থি ময্হং গণ্ঠো’’তি গণ্হাতীতি নিগণ্ঠোতি. নাটস্সাতি এৰংনামকস্স.

কোমারভচ্চজীৰককথাৰণ্ণনা

১৫৭. সব্বথা ¶ ¶ তুণ্হীভূতভাৰং সন্ধায ‘‘এস নাগ…পে… ৰিযা’’তি ৰুত্তং. সুপণ্ণোতি গরুল়ো, গরুডো ৰা সক্কটমতেন. ‘‘ড-ল়ান’মৰিসেসো’’তি হি তত্থ ৰদন্তি. যথাধিপ্পাযং ন ৰত্ততীতি কত্ৰা ‘‘অনত্থো ৰত মে’’তি ৰুত্তং. উপসন্তস্সাতি সব্বথা সঞ্ঞমেন উপসমং গতস্স. জীৰকস্স তুণ্হীভাৰো মম অধিপ্পাযস্স মদ্দনসদিসো, তস্মা তদেৰ তুণ্হীভাৰং পুচ্ছিত্ৰা কথাপনেন মম অধিপ্পাযো সম্পাদেতব্বোতি অযমেত্থ রঞ্ঞো অধিপ্পাযোতি দস্সেন্তো ‘‘হত্থিম্হি খো পনা’’তিআদিমাহ. কিন্তি কারণপুচ্ছাযং নিপাতোতি দস্সেতি ‘‘কেন কারণেনা’’তি ইমিনা, যেন তুৰং তুণ্হী, কিং তং কারণন্তি ৰা অত্থং দস্সেতি. তত্থ যথাসম্ভৰং কারণং উদ্ধরিত্ৰা অধিপ্পাযং দস্সেতুং ‘‘ইমেস’’ন্তিআদি ৰুত্তং. যথা এতেসন্তি এতেসং কুলূপকো অত্থি যথা, ইমেসং নু খো তিণ্ণং কারণানং অঞ্ঞতরেন কারণেন তুণ্হী ভৰসীতি পুচ্ছতীতি অধিপ্পাযো.

কথাপেতীতি কথাপেতুকামো হোতি. পঞ্চপতিট্ঠিতেনাতি এত্থ পঞ্চহি অঙ্গেহি অভিমুখং ঠিতেনাতি অত্থো, পাদজাণু কপ্পর হত্থ সীসসঙ্খাতানি পঞ্চ অঙ্গানি সমং কত্ৰা ওনামেত্ৰা অভিমুখং ঠিতেন পঠমং ৰন্দিত্ৰাতি ৰুত্তং হোতি. যম্পি ৰদন্তি ‘‘নৰকতরেনুপালি ভিক্খুনা ৰুড্ঢতরস্স ভিক্খুনো পাদে ৰন্দন্তেন ইমে পঞ্চ ধম্মে অজ্ঝত্তং উপট্ঠাপেত্ৰা পাদা ৰন্দিতব্বা’তিআদিকং (পরি. ৪৬৯) ৰিনযপাল়িমাহরিত্ৰা একংসকরণঅঞ্জলিপগ্গহণপাদসম্বাহনপেমগারৰুপট্ঠাপনৰসেন পঞ্চপতিট্ঠিতৰন্দনা’’তি, তমেত্থানধিপ্পেতং দূরতো ৰন্দনে যথাৰুত্তপঞ্চঙ্গস্স অপরিপুণ্ণত্তা. ৰন্দনা চেত্থ পণমনা অঞ্জলিপগ্গহণকরপুটসমাযোগো. ‘‘পঞ্চপতিট্ঠিতেন ৰন্দিত্ৰা’’তি চ কাযপণামো ৰুত্তো, ‘‘মম সত্থুনো’’তিআদিনা পন ৰচীপণামো, তদুভযপুরেচরানুচরৰসেন মনোপণামোতি. কামং সব্বাপি তথাগতস্স পটিপত্তি অনঞ্ঞসাধারণা অচ্ছরিযব্ভুতরূপাৰ, তথাপি গব্ভোক্কন্তি অভিজাতি অভিনিক্খমন অভিসম্বোধি ধম্মচক্কপ্পৰত্তন (সং. নি. ৫.১০৮১; পটি. ম. ৩.৩০) যমকপাটিহারিযদেৰোরোহনানি সদেৰকে লোকে অতিৰিয সুপাকটানি, ন সক্কা কেনচি পটিবাহিতুন্তি তানিযেৰেত্থ উদ্ধটানি.

ইত্থং ¶ ইমং পকারং ভূতো পত্তোতি ইত্থম্ভূতো, তস্স আখ্যানং ইত্থম্ভূতাখ্যানং, সোযেৰত্থো ইত্থম্ভূতাখ্যানত্থো. অথ ৰা ইত্থং এৰংপকারো ভূতো জাতোতি ইত্থম্ভূতো, তাদিসোতি আখ্যানং ইত্থম্ভূতাখ্যানং, তদেৰত্থো ইত্থম্ভূতাখ্যানত্থো, তস্মিং উপযোগৰচনন্তি অত্থো. অব্ভুগ্গতোতি এত্থ ¶ হি অভিসদ্দো পধানৰসেন ইত্থম্ভূতাখ্যানত্থজোতকো কম্মপ্পৰচনীযো অভিভৰিত্ৰা উগ্গমনকিরিযাপকারস্স দীপনতো, তেন পযোগতো ‘‘তং খো পন ভগৰন্ত’’ন্তি ইদং উপযোগৰচনং সামিঅত্থে সমানম্পি অপ্পধানৰসেন ইত্থম্ভূতাখ্যানত্থদীপনতো ‘‘ইত্থম্ভূতাখ্যানত্থে’’তি ৰুত্তং. তেনেৰাহ ‘‘তস্স খো পন ভগৰতোতি অত্থো’’তি. ননু চ ‘‘সাধু দেৰদত্তো মাতরমভী’’তি এত্থ ৰিয ‘‘তং খো পন ভগৰন্ত’’ন্তি এত্থ অভিসদ্দো অপ্পযুত্তো, কথমেত্থ তংপযোগতো উপযোগৰচনং সিযাতি? অত্থতো পযুত্তত্তা. অত্থসদ্দপযোগেসু হি অত্থপযোগোযেৰ পধানোতি. ইদং ৰুত্তং হোতি – যথা ‘‘সাধু দেৰদত্তো মাতরমভী’’তি এত্থ অভিসদ্দপযোগতো ইত্থম্ভূতাখ্যানে উপযোগৰচনং কতং, এৰমিধাপি ‘‘তং খো পন ভগৰন্তং অভি এৰং কল্যাণো কিত্তিসদ্দো উগ্গতো’’তি অভিসদ্দপযোগতো ইত্থম্ভূতাখ্যানে উপযোগৰচনং কতন্তি. যথা হি ‘‘সাধু দেৰদত্তো মাতরমভী’’তি এত্থ ‘‘দেৰদত্তো মাতরমভি মাতুৰিসযে, মাতুযা ৰা সাধূ’’তি এৰং অধিকরণত্থে, সামিঅত্থে ৰা ভুম্মৰচনস্স, সামিৰচনস্স ৰা পসঙ্গে ইত্থম্ভূতাখ্যানজোতকেন কম্মপ্পৰচনীযেন অভিসদ্দেন পযোগতো উপযোগৰচনং কতং, এৰমিধাপি সামিঅত্থে সামিৰচনপ্পসঙ্গে যথা চ তত্থ ‘‘দেৰদত্তো মাতুৰিসযে, মাতু সম্বন্ধী ৰা সাধুত্তপ্পকারপ্পত্তো’’তি অযমত্থো ৰিঞ্ঞাযতি, এৰমিধাপি ‘‘ভগৰতো সম্বন্ধী কিত্তিসদ্দো অব্ভুগ্গতো অভিভৰিত্ৰা উগ্গমনপ্পকারপ্পত্তো’’তি অযমত্থো ৰিঞ্ঞাযতি. তত্থ হি দেৰদত্তগ্গহণং ৰিয ইধ কিত্তিসদ্দগ্গহণং, ‘‘মাতর’’ন্তি ৰচনং ৰিয ‘‘ভগৰন্ত’’ন্তি ৰচনং, সাধুসদ্দো ৰিয উগ্গতসদ্দো ৰেদিতব্বো.

কল্যাণোতি ভদ্দকো. কল্যাণভাৰো চস্স কল্যাণগুণৰিসযতাযাতি আহ ‘‘কল্যাণগুণসমন্নাগতো’’তি, কল্যাণেহি গুণেহি সমন্নাগতো তব্বিসযতায যুত্তোতি অত্থো. তং ৰিসযতা হেত্থ সমন্নাগমো, কল্যাণগুণৰিসযতায তন্নিস্সিতোতি ¶ অধিপ্পাযো. সেট্ঠোতি পরিযাযৰচনেপি এসেৰ নযো. সেট্ঠগুণৰিসযতা এৰ হি কিত্তিসদ্দস্স সেট্ঠতা ‘‘ভগৰাতি ৰচনং সেট্ঠং, ভগৰাতি ৰচনমুত্তম’’ন্তিআদীসু (ৰিসুদ্ধি. ১.১৪২; পারা. অট্ঠ. ১.ৰেরঞ্জকণ্ডৰণ্ণনা; উদা. অট্ঠ. ১; ইতিৰু. অট্ঠ. নিদানৰণ্ণনা; মহানি. অট্ঠ. ৪৯) ৰিয. ‘‘অরহং সম্মাসম্বুদ্ধো’’তিআদিনা গুণানং সংকিত্তনতো, সদ্দনীযতো চ ৰণ্ণোযেৰ কিত্তিসদ্দো নামাতি আহ ‘‘কিত্তিযেৰা’’তি. ৰণ্ণো এৰ হি কিত্তেতব্বতো কিত্তি, সদ্দনীযতো সদ্দোতি চ ৰুচ্চতি. কিত্তিপরিযাযো হি সদ্দসদ্দো যথা ‘‘উল়ারসদ্দা ইসযো, গুণৰন্তো তপস্সিনো’’তি. কিত্তিৰসেন পৰত্তো সদ্দো কিত্তিসদ্দোতি ভিন্নাধিকরণতং দস্সেতি ‘‘থুতিঘোসো’’তি ইমিনা. কিত্তিসদ্দো হেত্থ থুতিপরিযাযো কিত্তনমভিত্থৰনং কিত্তীতি. থুতিৰসেন পৰত্তো ঘোসো থুতিঘোসো, অভিত্থৰুদাহারোতি অত্থো. অভিসদ্দো অভিভৰনে, অভিভৰনঞ্চেত্থ ¶ অজ্ঝোত্থরণমেৰাতি ৰুত্তং ‘‘অজ্ঝোত্থরিত্ৰা’’তি, অনঞ্ঞসাধারণে গুণে আরব্ভ পৰত্তত্তা অভিব্যাপেত্ৰাতি অত্থো. কিন্তি-সদ্দো অব্ভুগ্গতোতি চোদনায ‘‘ইতিপি সো ভগৰা’’তিআদিমাহাতি অনুসন্ধিং দস্সেতুং ‘‘কিন্তী’’তি ৰুত্তং.

পদানং সম্বজ্ঝনং পদসম্বন্ধো. সো ভগৰাতি যো সো সমতিংস পারমিযো পূরেত্ৰা সব্বকিলেসে ভঞ্জিত্ৰা অনুত্তরং সম্মাসম্বোধিং অভিসম্বুদ্ধো দেৰানমতিদেৰো সক্কানমতিসক্কো ব্রহ্মানমতিব্রহ্মা লোকনাথো ভাগ্যৰন্ততাদীহি কারণেহি সদেৰকে লোকে ‘‘ভগৰা’’তি পত্থটকিত্তিসদ্দো, সো ভগৰা. যং তং-সদ্দা হি নিচ্চসম্বন্ধা. ‘‘ভগৰা’’তি চ ইদমাদিপদং সত্থু নামকিত্তনং. তেনাহ আযস্মা ধম্মসেনাপতি ‘‘ভগৰাতি নেতং নামং মাতরা কতং, ন পিতরা কত’’ন্তিআদি (মহানি. ৬; চূল়নি. ২). পরতো পন ‘‘ভগৰা’’তি পদং গুণকিত্তনং. যথা কম্মট্ঠানিকেন‘‘অরহ’’ন্তিআদীসু নৰসু ঠানেসু পচ্চেকং ইতিপিসদ্দং যোজেত্ৰা বুদ্ধগুণা অনুস্সরীযন্তি, এৰমিধ বুদ্ধগুণসংকিত্তকেনাপীতি দস্সেন্তো ‘‘ইতিপি অরহং…পে… ইতিপি ভগৰা’’তি আহ. এৰঞ্হি সতি‘‘অরহ’’ন্তিআদীহি নৰহি পদেহি যে সদেৰকে লোকে অতিৰিয পাকটা পঞ্ঞাতা বুদ্ধগুণা, তে নানপ্পকারতো ৰিভাৰিতা হোন্তি ‘‘ইতিপী’’তি পদদ্ৰযেন তেসং নানপ্পকারতাদীপনতো. ‘‘ইতিপেতং ভূতং, ইতিপেতং ¶ তচ্ছ’’ন্তিআদীসু (দী. নি. ১.৬) ৰিয হি ইতি-সদ্দো ইধ আসন্নপচ্চক্খকরণত্থো, পি-সদ্দো সম্পিণ্ডনত্থো, তেন চ নেসং নানপ্পকারভাৰো দীপিতো, তানি চ গুণসল্লক্খণকারণানি সদ্ধাসম্পন্নানং ৰিঞ্ঞুজাতিকানং পচ্চক্খানি হোন্তি, তস্মা তানি সংকিত্তেন্তেন ৰিঞ্ঞুনা চিত্তস্স সম্মুখীভূতানেৰ কত্ৰা সংকিত্তেতব্বানীতি দস্সেন্তো ‘‘ইমিনা চ ইমিনা চ কারণেনাতি ৰুত্তং হোতী’’তি আহ. এৰঞ্হি নিরূপেত্ৰা কিত্তেন্তে যস্স সংকিত্তেতি, তস্স ভগৰতি অতিৰিয পসাদো হোতি.

আরকত্তাতি কিলেসেহি সুৰিদূরত্তা. অরীনন্তি কিলেসারীনং. অরানন্তি সংসারচক্কস্স অরানং. হতত্তাতি ৰিদ্ধংসিতত্তা. পচ্চযাদীনন্তি চীৰরাদিপচ্চযানঞ্চেৰ পূজা ৰিসেসানঞ্চ. রহাভাৰাতি চক্খুরহাদীনমভাৰতো. রহোপাপকরণাভাৰো হি পদমনতিক্কম্ম রহাভাৰোতি ৰুত্তং. এৰম্পি হি যথাধিপ্পেতমত্থো লব্ভতীতি. ততোতি ৰিসুদ্ধিমগ্গতো (ৰিসুদ্ধি. ১.১২৩). যথা চ ৰিসুদ্ধিমগ্গতো, এৰং তংসংৰণ্ণনায পরমত্থমঞ্জূসাযং (ৰিসুদ্ধি. টী. ১.১২৪) নেসং ৰিত্থারো গহেতব্বো.

যস্মা জীৰকো বহুসো সত্থু সন্তিকে বুদ্ধগুণে সুত্ৰা ঠিতো, দিট্ঠসচ্চতায চ সত্থুসাসনে ¶ ৰিগতকথংকথো, সত্থুগুণকথনে চ ৰেসারজ্জপ্পত্তো, তস্মা সো এৰং ৰিত্থারতো এৰ আহাতি ৰুত্তং ‘‘জীৰকো পনা’’তিআদি. ‘‘এত্থ চা’’তিআদিনা সামত্থিযত্থমাহ. থামো দেসনাঞাণমেৰ, বলং পন দসবলঞাণং. ৰিস্সত্থন্তি ভাৰনপুংসকপদং, অনাসঙ্কন্তি অত্থো.

পঞ্চৰণ্ণাযাতি খুদ্দিকাদিৰসেন পঞ্চপকারায. নিরন্তরং ফুটং অহোসি কতাধিকারভাৰতো. কম্মন্তরাযৰসেন হিস্স রঞ্ঞো গুণসরীরং খতূপহতং হোতি. কস্মা পনেস জীৰকমেৰ গমনসজ্জায আণাপেতীতি আহ ‘‘ইমাযা’’তিআদি.

১৫৮. ‘‘উত্তম’’ন্তি ৰত্ৰা ন কেৰলং উত্তমভাৰোযেৰেত্থ কারণং, অথ খো অপ্পসদ্দতাপীতি দস্সেতুং ‘‘অস্সযানরথযানানী’’তিআদি ৰুত্তং. হত্থিযানেসু চ নিব্বিসেৰনমেৰ গণ্হন্তো হত্থিনিযোপি কপ্পাপেসি. পদানুপদন্তি পদমনুগতং পদং পুরতো গচ্ছন্তস্স হত্থিযানস্স পদে তেসং পদং কত্ৰা, পদসদ্দো চেত্থ পদৰল়ঞ্জে. নিব্বুতস্সাতি সব্বকিলেসদরথৰূপসমস্স ¶ . নিব্বুতেহেৰাতি অপ্পসদ্দতায সদ্দসঙ্খোভনৰূপসমেহেৰ.

করেণূতি হত্থিনিপরিযাযৰচনং. কণতি সদ্দং করোতীতি হি করেণু, করোৰ যস্সা, ন দীঘো দন্তোতি ৰা করেণু, ‘‘করেণুকা’’তিপি পাঠো, নিরুত্তিনযেন পদসিদ্ধি. আরোহনসজ্জনং কুথাদীনং বন্ধনমেৰ. ওপৰয্হন্তি রাজানমুপৰহিতুং সমত্থং. ‘‘ওপগুয্হ’’ন্তিপি পঠন্তি, রাজানমুপগূহিতুং গোপিতুং সমত্থন্তি অত্থো. ‘‘এৰং কিরস্সা’’তিআদি পণ্ডিতভাৰৰিভাৰনং. কথা ৰত্ততীতি লদ্ধোকাসভাৰেন ধম্মকথা পৰত্ততি. ‘‘রঞ্ঞো আসঙ্কানিৰত্তনত্থং আসন্নচারীভাৰেন হত্থিনীসু ইত্থিযো নিসজ্জাপিতা’’তি (দী. নি. টী. ১.১৫৮) আচরিযধম্মপালত্থেরেন ৰুত্তং. অট্ঠকথাযং পন ‘‘ইত্থিযো নিস্সায পুরিসানং ভযং নাম নত্থি, সুখং ইত্থিপরিৰুতো গমিস্সামী’’তি তত্থ কারণং ৰুত্তমেৰ. ইমিনাপি কারণেন ভৰিতব্বন্তি পন আচরিযেন এৰং ৰুত্তং সিযা. রঞ্ঞো পরেসং দূরুপসঙ্কমনভাৰদস্সনত্থং তা পুরিসৰেসং গাহাপেত্ৰা আৰুধহত্থা কারিতা. হত্থিনিকাসতানীতি এত্থ হত্থিনিযো এৰ হত্থিনিকা. ‘‘পঞ্চ হত্থিনিযা সতানী’’তিপি কত্থচি পাঠো, সো অযুত্তোৰ ‘‘পঞ্চমত্তেহি ভিক্খুসতেহী’’তিআদীসু (পারা. ১) ৰিয ঈদিসেসু পচ্ছিমপদস্স সমাসস্সেৰ দস্সনতো. কস্সচিদেৰাতি সন্নিপতিতে মহাজনে যস্স কস্সচি এৰ, তদঞ্ঞেসম্পি আযতিং মগ্গফলানমুপনিস্সযোতি আহ ‘‘সা মহাজনস্স উপকারায ভৰিস্সতী’’তি.

পটিৰেদেসীতি ঞাপেসি. উপচারৰচনন্তি ৰোহারৰচনমত্তং তেনেৰ অধিপ্পেতত্থস্স অপরিযোসানতো ¶ . তেনাহ ‘‘তদেৰ অত্তনো রুচিযা করোহী’’তি. ইমিনাযেৰ হি তদত্থপরিযোসানং. মঞ্ঞসীতি পকতিযাৰ জানাসি. তদেৰাতি গমনাগমনমেৰ. যদি গন্তুকামো, গচ্ছ, অথ ন গন্তুকামো, মা গচ্ছ, অত্তনো রুচিযেৰেত্থ পমাণন্তি ৰুত্তং হোতি.

১৫৯. পাটিএক্কাযেৰ সন্ধিৰসেন পচ্চেকা. ‘‘মহঞ্চ’’ন্তি পদে করণত্থে পচ্চত্তৰচনন্তি আহ ‘‘মহতা’’তি. মহন্তস্স ভাৰো মহঞ্চং. ন কেৰলং নিগ্গহীতন্তৰসেনেৰ পাঠো, অথ খো আকারন্তৰসেনাপীতি আহ ¶ ‘‘মহচ্চাতিপি পাল়ী’’তি. যথা ‘‘খত্তিযা’’তি ৰত্তব্বে ‘‘খত্যা’’তি, এৰং ‘‘মহতিযা’’তি ৰত্তব্বে মহত্যা. পুন চ-কারং কত্ৰা মহচ্চাতি সন্ধিৰসেন পদসিদ্ধি. পুল্লিঙ্গৰসেন ৰত্তব্বে ইত্থিলিঙ্গৰসেন ৰিপল্লাসো লিঙ্গৰিপরিযাযো. ৰিসেসনঞ্হি ভিয্যো ৰিসেস্যলিঙ্গাদিগাহকং. তিযোজনসতানন্তি পচ্চেকং তিযোজনসতপরিমণ্ডলানং. দ্ৰিন্নং মহারট্ঠানং ইস্সরিযসিরীতি অঙ্গমগধরট্ঠানমাধিপচ্চমাহ. তদত্থং ৰিৰরতি ‘‘তস্সা’’তিআদিনা. পটিমুক্কৰেঠনানীতি আবন্ধসিরোৰেঠনানি. আসত্তখগ্গানীতি অংসে ওলম্বনৰসেন সন্নদ্ধাসীনি. মণিদণ্ডতোমরেতি মণিদণ্ডঙ্কুসে.

‘‘অপরাপী’’তিআদিনা পদসা পরিৰারা ৰুত্তা. খুজ্জৰামনকা ৰেসৰসেন, কিরাতসৰরঅন্ধকাদযো জাতিৰসেন তাসং পরিচারকিনিযো দস্সিতা. ৰিস্সাসিকপুরিসাতি ৰস্সৰরে সন্ধাযাহ. কুলভোগইস্সরিযাদিৰসেন মহতী মত্তা পমাণমেতেসন্তি মহামত্তা, মহানুভাৰা রাজামচ্চা. ৰিজ্জাধরতরুণা ৰিযাতি মন্তানুভাৰেন ৰিজ্জামযিদ্ধিসম্পন্না ৰিজ্জাধরকুমারকা ৰিয. রট্ঠিযপুত্তাতি ভোজপুত্তা. রট্ঠে পরিচরন্তীতি হি লুদ্দকা রট্ঠিযা, তেসং নানাৰুধপরিচযতায রাজভটভূতা পুত্তাতি অত্থো, অন্তররট্ঠভোজকানং ৰা পুত্তা রট্ঠিযপুত্তা, খত্তিযা ভোজরাজানো. ‘‘অনুযুত্তা ভৰন্তু তে’’তিআদীসু ৰিয হি টীকাযং (দী. নি. টী. ১.১৫৯) ৰুত্তো ভোজসদ্দো ভোজকৰাচকোতি দট্ঠব্বং. উস্সাপেত্ৰাতি উদ্ধং পসারেত্ৰা. জযসদ্দন্তি ‘‘জযতু মহারাজা’’তিআদিজযপটিবদ্ধং সদ্দং. ধনুপন্তিপরিক্খেপোতি ধনুপন্তিপরিৰারো. সব্বত্থ তংগাহকৰসেন ৰেদিতব্বো. হত্থিঘটাতি হত্থিসমূহা. পহরমানাতি ফুসমানা. অঞ্ঞমঞ্ঞসঙ্ঘট্টনাতি অৰিচ্ছেদগমনেন অঞ্ঞমঞ্ঞসম্বন্ধা. সেণিযোতি গন্ধিকসেণীদুস্সিকসেণীআদযো ‘‘অনপলোকেত্ৰা রাজানং ৰা সঙ্ঘং ৰা গণং ৰা পূগং ৰা সেণিং ৰা অঞ্ঞত্র কপ্পা ৰুট্ঠাপেয্যা’’তিআদীসু (পাচি. ৬৮২) ৰিয. ‘‘অট্ঠারস অক্খোভিণী সেনিযো’’তি কত্থচি লিখন্তি, সো অনেকেসুপি পোত্থকেসু ন দিট্ঠো. অনেকসঙ্খ্যা চ সেনা হেট্ঠা ¶ গণিতাতি অযুত্তোযেৰ. তদা সব্বাৰুধতো সরোৰ দূরগামীতি কত্ৰা সরপতনাতিক্কমপ্পমাণেন রঞ্ঞো পরিসং সংৰিদহতি. কিমত্থন্তি আহ ‘‘সচে’’তিআদি.

সযং ¶ ভাযনট্ঠেন চিত্তুত্রাসো ভযং যথা তথা ভাযতীতি কত্ৰা. ভাযিতব্বে এৰ ৰত্থুস্মিং ভযতো উপট্ঠিতে ‘‘ভাযিতব্বমিদ’’ন্তি ভাযিতব্বাকারেন তীরণতো ঞাণং ভযং ভযতো তীরেতীতি কত্ৰা. তেনেৰাহ ৰিসুদ্ধিমগ্গে (ৰিসুদ্ধি. ২.৭৫১) ‘‘ভযতুপট্ঠানঞাণং পন ভাযতি, ন ভাযতীতি? ন ভাযতি. তঞ্হি ‘অতীতা সঙ্খারা নিরুদ্ধা, পচ্চুপ্পন্না নিরুজ্ঝন্তি, অনাগতা নিরুজ্ঝিস্সন্তী’তি তীরণমত্তমেৰ হোতী’’তি. ভাযনট্ঠানট্ঠেন আরম্মণং ভযং ভাযতি এতস্মাতি কত্ৰা. ভাযনহেতুট্ঠেন ওত্তপ্পং ভযং পাপতো ভাযতি এতেনাতি কত্ৰা. ভযানকন্তি ভাযনাকারো. তেপীতি দীঘাযুকা দেৰাপি. ধম্মদেসনন্তি পঞ্চসু খন্ধেসু পন্নরসলক্খণপটিমণ্ডিতং ধম্মদেসনং. যেভুয্যেনাতি ঠপেত্ৰা খীণাসৰদেৰে তদঞ্ঞেসং ৰসেন বাহুল্লতো. খীণাসৰত্তা হি তেসং চিত্তুত্রাসভযম্পি ন উপ্পজ্জতি. কামং সীহোপমসুত্তট্ঠকথাযং (অ. নি. অট্ঠ. ২.৪.৩৩) চিত্তুত্রাসভযম্পি তদত্থভাৰেন ৰুত্তং, ইধ পন পকরণানুরূপতো ঞাণভযমেৰ গহিতং. সংৰেগন্তি সহোত্তপ্পঞাণং. সন্তাসন্তি সব্বসো উব্বিজ্জনং. ভাযিতব্বট্ঠেন ভযমেৰ ভীমভাৰেন ভেরৰন্তি ভযভেরৰং, ভীতব্বৰত্থু. তেনাহ ‘‘আগচ্ছতী’’তি, এতং নরং তং ভযভেরৰং আগচ্ছতি নূনাতি অত্থো.

ভীরুং পসংসন্তীতি পাপতো ভাযনতো উত্রাসনতো ভীরুং পসংসন্তি পণ্ডিতা. ন হি তত্থ সূরন্তি তস্মিং পাপকরণে সূরং পগব্ভধংসিনং ন হি পসংসন্তি. তেনাহ ‘‘ভযা হি সন্তো ন করোন্তি পাপ’’ন্তি. তত্থ ভযাতি পাপুত্রাসতো, ওত্তপ্পহেতূতি অত্থো.

ছম্ভিতস্সাতি থম্ভিতস্স, থ-কারস্স ছ-কারাদেসো. তদত্থমাহ ‘‘সকলসরীরচলন’’ন্তি, ভযৰসেন সকলকাযপকম্পনন্তি অত্থো. উয্যোধনং সম্পহারো.

একেতি উত্তরৰিহারৰাসিনো. ‘‘রাজগহে’’তিআদি তেসমধিপ্পাযৰিৰরণং. একেকস্মিং মহাদ্ৰারে দ্ৰে দ্ৰে কত্ৰা চতুসট্ঠি খুদ্দকদ্ৰারানি. ‘‘তদা’’তিআদিনা অকারণভাৰে হেতুং দস্সেতি.

ইদানি সকৰাদং দস্সেতুং ‘‘অযং পনা’’তিআদি ৰুত্তং. ‘‘জীৰকো কিরা’’তিআদি আসঙ্কনাকারদস্সনং. অস্সাতি অজাতসত্তুরঞ্ঞো. উক্কণ্ঠিতোতি অনভিরতো. ছত্তং উস্সাপেতুকামো ¶ মঞ্ঞেতি সম্বন্ধো ¶ . ভাযিত্ৰাতি ভাযনহেতু. তস্সাতি জীৰকস্স. সম্মসদ্দো সমানত্থো, সমানভাৰো চ ৰযেনাতি আহ ‘‘ৰযস্সাভিলাপো’’তি. ৰযেন সমানো ৰযস্সো যথা ‘‘একরাজা হরিস্সৰণ্ণো’’তি (জা. ১.২.১৭). সমানসদ্দস্স হি সাদেসমিচ্ছন্তি সদ্দৰিদূ, তেন অভিলাপো আলপনং তথা, রুল়্হীনিদ্দেসো এস, ‘‘মারিসা’’তি আলপনমিৰ. যথা হি মারিসাতি নিদ্দুক্খতাভিলাপো সদুক্খেপি নেরযিকে ৰুচ্চতি ‘‘যদা খো তে মারিস সঙ্কুনা সঙ্কু হদযে সমাগচ্ছেয্যা’’তিআদীসু, (ম. নি. ১.৫১২) এৰং যো কোচি সহাযো অসমানৰযোপি ‘‘সম্মা’’তি ৰুচ্চতীতি, তস্মা সহাযাভিলাপো ইচ্চেৰ অত্থো. কচ্চি ন ৰঞ্চেসীতি পাল়িযা সম্বন্ধো. ‘‘ন পলম্ভেসী’’তি ৰুত্তেপি ইধ পরিকপ্পত্থোৰ সম্ভৰতীতি ৰুত্তং ‘‘ন ৰিপ্পলম্ভেয্যাসী’’তি, ন পলোভেয্যাসীতি অত্থো. কথায সল্লাপো, সো এৰ নিগ্ঘোসো তথা.

ৰিনস্সেয্যাতি চিত্তৰিঘাতেন ৰিহঞ্ঞেয্য. ‘‘ন তং দেৰা’’তিআদিৰচনং সন্ধায ‘‘দল়্হং কত্ৰা’’তি ৰুত্তং. তুরিতৰসেনিদমামেডিতন্তি দস্সেতি ‘‘তরমানোৰা’’তি ইমিনা. ‘‘অভিক্কম মহারাজা’’তি ৰত্ৰা তত্থ কারণং দস্সেতুং ‘‘এতে’’তিআদি ৰুত্তন্তি সসম্বন্ধমত্থং দস্সেন্তো ‘‘মহারাজ চোরবলং নামা’’তিআদিমাহ.

সামঞ্ঞফলপুচ্ছাৰণ্ণনা

১৬০. অযং বহিদ্ৰারকোট্ঠকোকাসো নাগস্স ভূমি নাম. তেনাহ ‘‘ৰিহারস্সা’’তিআদি. ভগৰতো তেজোতি বুদ্ধানুভাৰো. রঞ্ঞো সরীরং ফরি যথা তং সোণদণ্ডস্স ব্রাহ্মণস্স ভগৰতো সন্তিকং আগচ্ছন্তস্স অন্তোৰনসণ্ডগতস্স. ‘‘অত্তনো অপরাধং সরিত্ৰা মহাভযং উপ্পজ্জী’’তি ইদং সেদমুঞ্চনস্স কারণদস্সনং. ন হি বুদ্ধানুভাৰতো সেদমুঞ্চনং সম্ভৰতি কাযচিত্তপস্সদ্ধিহেতুভাৰতো.

একেতি উত্তরৰিহারৰাসিনোযেৰ. তদযুত্তমেৰাতি দস্সেতি ‘‘ইমিনা’’তিআদিনা. অভিমারেতি ধনুগ্গহে. ধনপালন্তি নাল়াগিরিং. সো হি তদা নাগরেহি পূজিতধনরাসিনো লব্ভনতো ‘‘ধনপালো’’তি ৰোহরীযতি. ন কেৰলং দিট্ঠপুব্বতোযেৰ, অথ খো পকতিযাপি ভগৰা সঞ্ঞাতোতি ¶ দস্সেতুং ‘‘ভগৰা হী’’তিআদিমাহ. আকিণ্ণৰরলক্খণোতি বত্তিংস মহাপুরিসলক্খণে সন্ধাযাহ. অনুব্যঞ্জনপটিমণ্ডিতোতি অসীতানুব্যঞ্জনে (জিনালঙ্কারটীকায ৰিজাতমঙ্গলৰণ্ণনাযং ৰিত্থারো). ছব্বণ্ণাহি রস্মীহীতি তদা ৰত্তমানা রস্মিযো. ইস্সরিযলীল়াযাতি ¶ ইস্সরিযৰিলাসেন. ননু চ ভগৰতো সন্তিকে ইস্সরিযলীলায পুচ্ছা অগারৰোযেৰ সিযাতি চোদনায ‘‘পকতি হেসা’’তিআদিমাহ, পকতিযা পুচ্ছনতো ন অগারৰোতি অধিপ্পাযো. পরিৰারেত্ৰা নিসিন্নেন ভিক্খুসঙ্ঘেন পুরে কতেপি অত্থতো তস্স পুরতো নিসিন্নো নাম. তেনাহ ‘‘পরিৰারেত্ৰা’’তিআদি.

১৬১. যেন, তেনাতি চ ভুম্মত্থে করণৰচনন্তি দস্সেতি ‘‘যত্থ, তত্থা’’তি ইমিনা. যেন মণ্ডলস্স দ্ৰারং, তেনূপসঙ্কমীতি সম্পত্তভাৰস্স ৰুত্তত্তা ইধ উপগমনমেৰ যুত্তন্তি আহ ‘‘উপগতো’’তি. অনুচ্ছৰিকে একস্মিং পদেসেতি যত্থ ৰিঞ্ঞুজাতিকা অট্ঠংসু, তস্মিং. কো পনেস অনুচ্ছৰিকপদেসো নাম? অতিদূরতাদিছনিসজ্জদোসৰিরহিতো পদেসো, নপচ্ছতাদিঅট্ঠনিসজ্জদোসৰিরহিতো ৰা. যথাহু অট্ঠকথাচরিযা –

‘‘ন পচ্ছতো ন পুরতো, নাপি আসন্নদূরতো;

ন কচ্ছে নো পটিৰাতে, ন চাপি ওনতুন্নতে;

ইমে দোসে ৰিস্সজ্জেত্ৰা, একমন্তং ঠিতা অহূ’’তি. (খু. পা. অট্ঠ. এৰমিচ্চাদিপাঠৰণ্ণনা; সু. নি. অট্ঠ. ২.২৬১);

তদা ভিক্খুসঙ্ঘে তুণ্হীভাৰস্স অনৰসেসতো ব্যাপিতভাৰং দস্সেতুং ‘‘তুণ্হীভূতং তুণ্হীভূত’’ন্তি ৰিচ্ছাৰচনং ৰুত্তন্তি আহ ‘‘যতো…পে… মেৰা’’তি, যতো যতো ভিক্খুতোতি অত্থো. হত্থেন, হত্থস্স ৰা কুকতভাৰো হত্থকুক্কুচ্চং, অসঞ্ঞমো, অসম্পজঞ্ঞকিরিযা চ. তথা পাদকুক্কুচ্চন্তি এত্থাপি. ৰা-সদ্দো অৰুত্তৰিকপ্পনে, তেন তদঞ্ঞোপি চক্খুসোতাদিঅসঞ্ঞমো নত্থীতি ৰিভাৰিতো. তত্থ পন চক্খুঅসংযমো সব্বপঠমো দুন্নিৰারিতো চাতি তদভাৰং দস্সেতুং ‘‘সব্বালঙ্কারপটিমণ্ডিত’’ন্তিআদি ৰুত্তং.

ৰিপ্পসন্নরহদমিৰাতি অনাৰিলোদকসরমিৰ. যেনেতরহি…পে… ইমিনা মে…পে… হোতূতি সম্বন্ধো. অঞ্ঞো হি অত্থক্কমো, অঞ্ঞো সদ্দক্কমোতি ¶ আহ ‘‘যেনা’’তিআদি. তত্থ কাযিক-ৰাচসিকেন উপসমেন লদ্ধেন মানসিকোপি উপসমো অনুমানতো লদ্ধো এৰাতি কত্ৰা ‘‘মানসিকেন চা’’তি ৰুত্তং. সীলূপসমেনাতি সীলসঞ্ঞমেন. ৰুত্তমত্থং লোকপকতিযা সাধেন্তো ‘‘দুল্লভঞ্হী’’তিআদিমাহ. লদ্ধাতি লভিত্ৰা.

উপসমন্তি আচারসম্পত্তিসঙ্খাতং সংযমং. ‘‘এৰ’’ন্তিআদিনা তথা ইচ্ছায কারণং দস্সেতি ¶ . সোতি অয্যকো, উদযভদ্দো ৰা. ‘‘কিঞ্চাপী’’তিআদি তদত্থ-সমত্থনং. ঘাতেস্সতিযেৰাতি তংকালাপেক্খায ৰুত্তং. তেনাহ ‘‘ঘাতেসী’’তি. ইদঞ্হি সম্পতিপেক্খৰচনং. পঞ্চপরিৰট্টোতি পঞ্চরাজপরিৰট্টো.

কস্মা এৰমাহ, ননু ভগৰন্তমুদ্দিস্স রাজা ন কিঞ্চি ৰদতীতি অধিপ্পাযো. ৰচীভেদেতি যথাৰুত্তউদানৰচীভেদে. তুণ্হী নিরৰোতি পরিযাযৰচনমেতং. ‘‘অয’’ন্তিআদি চিত্তজাননাকারদস্সনং. অযং…পে… ন সক্খিস্সতীতি ঞত্ৰাতি সম্বন্ধো. ৰচনানন্তরন্তি উদানৰচনানন্তরং. যেনাতি যত্থ পদেসে, যেন ৰা সোতপথেন. যেন পেমন্তি এত্থাপি যথারহমেস নযো.

কতাপরাধস্স আলপনং নাম দুক্করন্তি সন্ধায ‘‘মুখং নপ্পহোতী’’তি ৰুত্তং. ‘‘আগমা খো ত্ৰং মহারাজ যথাপেম’’ন্তি ৰচননিদ্দিট্ঠং ৰা তদা তদত্থদীপনাকারেন পৰত্তং নানানযৰিচিত্তং ভগৰতো মধুরৰচনম্পি সন্ধায এৰং ৰুত্তন্তি দট্ঠব্বং. একম্পি হি অত্থং ভগৰা যথা সোতূনং ঞাণং পৰত্ততি, তথা দেসেতি. যং সন্ধায অট্ঠকথাসু ৰুত্তং ‘‘ভগৰতা অব্যাকতং তন্তিপদং নাম নত্থি, সব্বেসঞ্ঞেৰ অত্থোপি ভাসিতো’’তি. পঞ্চহাকারেহীতি ইট্ঠানিট্ঠেসু সমভাৰাদিসঙ্খাতেহি পঞ্চহি কারণেহি. ৰুত্তঞ্হেতং মহানিদ্দেসে (মহানি. ৩৮, ১৬২) –

‘‘পঞ্চহাকারেহি তাদী ইট্ঠানিট্ঠে তাদী, চত্তাৰীতি তাদী, তিণ্ণাৰীতি তাদী, মুত্তাৰীতি তাদী, তংনিদ্দেসা তাদী.

কথং অরহা ইট্ঠানিট্ঠে তাদী? অরহা লাভেপি তাদী, অলাভেপি, যসেপি, অযসেপি, পসংসাযপি, নিন্দাযপি, সুখেপি, দুক্খেপি তাদী, একং চে বাহং গন্ধেন লিম্পেয্যুং, একং চে বাহং ৰাসিযা ¶ তচ্ছেয্যুং, অমুস্মিং নত্থি রাগো, অমুস্মিং নত্থি পটিঘং, অনুনযপটিঘৰিপ্পহীনো, উগ্ঘাতিনিঘাতিৰীতিৰত্তো, অনুরোধৰিরোধসমতিক্কন্তো, এৰং অরহা ইট্ঠানিট্ঠে তাদী.

কথং অরহা চত্তাৰীতি তাদী? অরহতো…পে… থম্ভো, সারম্ভো, মানো, অতিমানো, মদো, পমাদো, সব্বে কিলেসা, সব্বে দুচ্চরিতা, সব্বে দরথা, সব্বে পরিল়াহা ¶ , সব্বে সন্তাপা, সব্বা কুসলাভিসঙ্খারা চত্তা ৰন্তা মুত্তা পহীনা পটিনিস্সট্ঠা, এৰং অরহা চত্তাৰীতি তাদী.

কথং অরহা তিণ্ণাৰীতি তাদী? অরহা কামোঘং তিণ্ণো, ভৰোঘং তিণ্ণো, দিট্ঠোঘং তিণ্ণো, অৰিজ্জোঘং তিণ্ণো, সব্বং সংসারপথং তিণ্ণো উত্তিণ্ণো নিত্তিণ্ণো অতিক্কন্তো সমতিক্কন্তো ৰীতিৰত্তো, সো ৰুট্ঠৰাসো চিণ্ণচরণো জাতিমরণসঙ্খযো, জাতিমরণসংসারো (মহানি. ৩৮) নত্থি তস্স পুনব্ভৰোতি, এৰং অরহা তিণ্ণাৰীতি তাদী.

কথং অরহা মুত্তাৰীতি তাদী? অরহতো রাগা চিত্তং মুত্তং ৰিমুত্তং সুৰিমুত্তং, দোসা, মোহা, কোধা, উপনাহা, মক্খা, পল়াসা, ইস্সায, মচ্ছরিযা, মাযায, সাঠেয্যা, থম্ভা, সারম্ভা, মানা, অতিমানা, মদা, পমাদা, সব্বকিলেসেহি, সব্বদুচ্চরিতেহি, সব্বদরথেহি, সব্বপরিল়াহেহি, সব্বসন্তাপেহি, সব্বাকুসলাভিসঙ্খারেহি চিত্তং মুত্তং ৰিমুত্তং সুৰিমুত্তং; এৰং অরহা মুত্তাৰীতি তাদী.

কথং অরহা তংনিদ্দেসা তাদী? অরহা ‘সীলে সতি সীলৰা’তি তংনিদ্দেসা তাদী, ‘সদ্ধায সতি সদ্ধো’তি, ‘ৰীরিযে সতি ৰীরিযৰা’তি, ‘সতিযা সতি সতিমা’তি, ‘সমাধিম্হি সতি সমাহিতো’তি, ‘পঞ্ঞায সতি পঞ্ঞৰা’তি, ‘ৰিজ্জায সতি তেৰিজ্জো’তি, ‘অভিঞ্ঞায সতি ছল়ভিঞ্ঞো’তি তংনিদ্দেসা তাদী, এৰং অরহা তংনিদ্দেসা তাদী’’তি.

ভগৰা পন সব্বেসম্পি তাদীনমতিসযো তাদী. তেনাহ ‘‘সুপ্পতিট্ঠিতো’’তি. ৰুত্তম্পি চেতং ভগৰতা কাল়কারামসুত্তন্তে ‘‘ইতি খো ভিক্খৰে ¶ তথাগতো দিট্ঠসুতমুতৰিঞ্ঞাতব্বেসু ধম্মেসু তাদীযেৰ তাদী, তম্হা চ পন তাদিম্হা অঞ্ঞো তাদী উত্তরিতরো ৰা পণীততরো ৰা নত্থীতি ৰদামী’’তি (অ. নি. ৪.২৪). অথ ৰা পঞ্চৰিধারিযিদ্ধিসিদ্ধেহি পঞ্চহাকারেহি তাদিলক্খণে সুপ্পতিট্ঠিতোতি অত্থো. ৰুত্তঞ্হেতং আযস্মতা ধম্মসেনাপতিনা পটিসম্ভিদামগ্গে –

‘‘কতমা অরিযা ইদ্ধি? ইধ ভিক্খু সচে আকঙ্খতি ‘পটিকূলে অপ্পটিকূলসঞ্ঞী ৰিহরেয্য’ন্তি, অপ্পটিকূলসঞ্ঞী তত্থ ৰিহরতি, সচে আকঙ্খতি ‘অপ্পটিকূলে ¶ পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি, সচে আকঙ্খতি ‘পটিকূলে চ অপ্পটিকূলে চ অপ্পটিকূলসঞ্ঞী ৰিহরেয্য’ন্তি, অপ্পটিকূলসঞ্ঞী তত্থ ৰিহরতি, সচে আকঙ্খতি ‘অপ্পটিকূলে চ পটিকূলে চ পটিকূলসঞ্ঞী ৰিহরেয্য’ন্তি, পটিকূলসঞ্ঞী তত্থ ৰিহরতি, সচে আকঙ্খতি ‘পটিকূলে চ অপ্পটিকূলে চ তদুভযং অভিনিৰজ্জেত্ৰা উপেক্খকো ৰিহরেয্যং সতো সম্পজানো’তি, উপেক্খকো তত্থ ৰিহরতি সতো সম্পজানো’’তি (পটি. ম. ৩.১৭).

বহিদ্ধাতি সাসনতো বহিসমযে.

১৬২. এসাতি ভিক্খুসঙ্ঘস্স ৰন্দনাকারো. তমত্থং লোকসিদ্ধায উপমায সাধেতুং ‘‘রাজান’’ন্তিআদি ৰুত্তং. ওকাসন্তি পুচ্ছিতব্বট্ঠানং.

ন মে পঞ্হৰিস্সজ্জনে ভারো অত্থীতি সত্থু সব্বত্থ অপ্পটিহতঞাণচারতায অত্থতো আপন্নায দস্সনং. ‘‘যদি আকঙ্খসী’’তি ৰুত্তেযেৰ হি এস অত্থো আপন্নো হোতি. সব্বং তে ৰিস্সজ্জেস্সামীতি এত্থাপি অযং নযো. ‘‘যং আকঙ্খসি, তং পুচ্ছা’’তি ৰচনেনেৰ হি অযমত্থো সিজ্ঝতি. অসাধারণং সব্বঞ্ঞুপৰারণন্তি সম্বন্ধো. যদি ‘‘যদাকঙ্খসী’’তি ন ৰদন্তি, অথ কথং ৰদন্তীতি আহ ‘‘সুত্ৰা’’তিআদি. পদেসঞাণেযেৰ ঠিতত্তা তথা ৰদন্তীতি ৰেদিতব্বং. বুদ্ধা পন সব্বঞ্ঞুপৰারণং পৰারেন্তীতি সম্বন্ধো.

‘‘পুচ্ছাৰুসো যদাকঙ্খসী’’তিআদীনি সুত্তপদানি যেসং পুগ্গলানং ৰসেন আগতানি, তং দস্সনত্থং ‘‘যক্খনরিন্দদেৰসমণব্রাহ্মণপরিব্বাজকান’’ন্তি ৰুত্তং. তত্থ হি ‘‘পুচ্ছাৰুসো যদাকঙ্খসী’’তি আল়ৰকস্স যক্খস্স ¶ ওকাসকরণং, ‘‘পুচ্ছ মহারাজা’’তি নরিন্দানং, ‘‘পুচ্ছ ৰাসৰা’’তিআদি দেৰানমিন্দস্স, ‘‘তেন হী’’তিআদি সমণানং, ‘‘বাৰরিস্স চা’’তিআদি ব্রাহ্মণানং, ‘‘পুচ্ছ মং সভিযা’’তিআদি পরিব্বাজকানং ওকাসকরণন্তি দট্ঠব্বং. ৰাসৰাতি দেৰানমিন্দালপনং. তদেতঞ্হি সক্কপঞ্হসুত্তে. মনসিচ্ছসীতি মনসা ইচ্ছসি.

কতাৰকাসাতি যস্মা তুম্হে মযা কতোকাসা, তস্মা বাৰরিস্স চ তুয্হং অজিতস্স চ সব্বেসঞ্চ সেসানং যং কিঞ্চি সব্বং সংসযং যথা মনসা ইচ্ছথ, তথা পুচ্ছৰ্হো পুচ্ছথাতি যোজনা. এত্থ চ বাৰরিস্স সংসযং মনসা পুচ্ছৰ্হো, তুম্হাকং পন সব্বেসং সংসযং মনসা চ ¶ অঞ্ঞথা চ যথা ইচ্ছথ, তথা পুচ্ছৰ্হোতি অধিপ্পাযো. বাৰরী হি ‘‘অত্তনো সংসযং মনসাৰ পুচ্ছথা’’তি অন্তেৰাসিকে আণাপেসি. ৰুত্তঞ্হি –

‘‘অনাৰরণদস্সাৰী, যদি বুদ্ধো ভৰিস্সতি;

মনসা পুচ্ছিতে পঞ্হে, ৰাচায ৰিস্সজেস্সতী’’তি. (সু. নি. ১০১১);

তদেতং পারাযনৰগ্গে. তথা ‘‘পুচ্ছ মং সভিযা’’তিআদিপি.

বুদ্ধভূমিন্তি বুদ্ধট্ঠানং, আসৰক্খযঞাণং, সব্বঞ্ঞুতঞ্ঞাণঞ্চ. বোধিসত্তভূমি নাম বোধিসত্তট্ঠানং পারমীসম্ভরণঞাণং, ভূমিসদ্দো ৰা অৰত্থাৰাচকো, বুদ্ধাৰত্থং, বোধিসত্তাৰত্থাযন্তি চ অত্থো. একত্তনযেন হি পৰত্তেসু খন্ধেসু অৰত্থাযেৰ তং তদাকারনিস্সিতা.

যো ভগৰা বোধিসত্তভূমিযং পদেসঞাণে ঠিতো সব্বঞ্ঞুপৰারণং পৰারেসি, তস্স তদেৰ অচ্ছরিযন্তি সম্বন্ধো. কথন্তি আহ ‘‘কোণ্ডঞ্ঞ পঞ্হানী’’তিআদি. তত্থ কোণ্ডঞ্ঞাতি গোত্তৰসেন সরভঙ্গমালপন্তি. ৰিযাকরোহীতি ব্যাকরোহি. সাধুরূপাতি সাধুসভাৰা. ধম্মোতি সনন্তনো পৰেণীধম্মো. যন্তি আগমনকিরিযাপরামসনং, যেন ৰা কারণেন আগচ্ছতি, তেন ৰিযাকরোহীতি সম্বন্ধো. ৰুদ্ধন্তি সীলপঞ্ঞাদীহি ৰুদ্ধিপ্পত্তং, গরুন্তি অত্থো. এস ভারোতি সংসযুপচ্ছেদনসঙ্খাতো এসো ভারো, আগতো ভারো তযা অৰস্সং ৰহিতব্বোতি অধিপ্পাযো.

মযা ¶ কতাৰকাসা ভোন্তো পুচ্ছন্তু. কস্মাতি চে? অহঞ্হি তং তং ৰো ব্যাকরিস্সং ঞত্ৰা সযং লোকমিমং, পরঞ্চাতি. সযন্তি চ সযমেৰ পরূপদেসেন ৰিনা. এৰং সরভঙ্গকালে সব্বঞ্ঞুপৰারণং পৰারেসীতি সম্বন্ধো.

পঞ্হানন্তি ধম্মযাগপঞ্হানং. অন্তকরন্তি নিট্ঠানকরং. সুচিরতেনাতি এৰং নামকেন ব্রাহ্মণেন. পুট্ঠুন্তি পুচ্ছিতুং. জাতিযাতি পটিসন্ধিযা, ‘‘ৰিজাতিযা’’তিপি ৰদন্তি. পংসুং কীল়ন্তো সম্ভৰকুমারো নিসিন্নোৰ হুত্ৰা পৰারেসীতি যোজেতব্বং.

তগ্ঘাতি একংসত্থে নিপাতো. যথাপি কুসলো তথাতি যথা সব্বধম্মকুসলো সব্বধম্মৰিদূ বুদ্ধো জানাতি কথেতি, তথা তে অহমক্খিস্সন্তি অত্থো. জানাতি-সদ্দো হি ইধ সম্বন্ধমুপগচ্ছতি ¶ . যথাহ ‘‘যেন যস্স হি সম্বন্ধো, দূরট্ঠম্পি চ তস্স ত’’ন্তি (সারত্থ. টী. ১.পঠমমহাসঙ্গীতিকথাৰণ্ণনা). জাননা চেত্থ কথনা. যথা ‘‘ইমিনা ইমং জানাতী’’তি ৰুত্তোৰাযমত্থো আচরিযেন. রাজা চ খো তং যদি কাহতি ৰা, ন ৰাতি যো তং ইধ পুচ্ছিতুং পেসেসি, সো কোরব্যরাজা তং তযা পুচ্ছিতমত্থং, তযা ৰা পুট্ঠেন মযা অক্খাতমত্থং যদি করোতু ৰা, ন ৰা করোতু, অহং পন যথাধম্মং তে অক্খিস্সং আচিক্খিস্সামীতি ৰুত্তং হোতি. জাতকট্ঠকথাযং পন –

‘‘রাজা চ খো তন্তি অহং তং পঞ্হং যথা তুম্হাকং রাজা জানাতি জানিতুং সক্কোতি, তথা অক্খিস্সং. ততো উত্তরি রাজা যথা জানাতি, তথা যদি করিস্সতি ৰা, ন ৰা করিস্সতি, করোন্তস্স ৰা অকরোন্তস্স ৰা তস্সেৰেতং ভৰিস্সতি, ময্হং পন দোসো নত্থীতি দীপেতী’’তি (জা. অট্ঠ. ৫.১৬.১৭২) –

জানাতি-সদ্দো ৰাক্যদ্ৰযসাধারণৰসেন ৰুত্তো.

১৬৩. সিপ্পমেৰ সিপ্পাযতনং আযতনসদ্দস্স তব্ভাৰৰুত্তিত্তা. অপিচ সিক্খিতব্বতায সিপ্পঞ্চ তং সত্তানং জীৰিতৰুত্তিযা কারণভাৰতো, নিস্সযভাৰতো ৰা আযতনঞ্চাতি সিপ্পাযতনং. সেয্যথিদন্তি একোৰ নিপাতো, নিপাতসমুদাযো ৰা. তস্স তে কতমেতি ¶ ইধ অত্থোতি আহ ‘‘কতমে পন তে’’তি. ইমে কতমেতিপি পচ্চেকমত্থো যুজ্জতি. এৰং সব্বত্থ. ইদঞ্চ ৰত্তব্বাপেক্খনৰসেন ৰুত্তং, তস্মা তে সিপ্পাযতনিকা কতমেতি অত্থো. ‘‘পুথুসিপ্পাযতনানী’’তি হি সাধারণতো সিপ্পানি উদ্দিসিত্ৰা উপরি তংতংসিপ্পূপজীৰিনোৰ নিদ্দিট্ঠা পুগ্গলাধিট্ঠানায কথায. কস্মাতি চে? পপঞ্চং পরিহরিতুকামত্তা. অঞ্ঞথা হি যথাধিপ্পেতানি তাৰ সিপ্পাযতনানি দস্সেত্ৰা পুন তংতংসিপ্পূপজীৰিনোপি দস্সেতব্বা সিযুং তেসমেৰেত্থ পধানতো অধিপ্পেতত্তা. এৰঞ্চ সতি কথাপপঞ্চো ভৰেয্য, তস্মা তং পপঞ্চং পরিহরিতুং সিপ্পূপজীৰীহি তংতংসিপ্পাযতনানি সঙ্গহেত্ৰা এৰমাহাতি তমত্থং দস্সেতুং ‘‘হত্থারোহাতিআদীহি যে তং তং সিপ্পং নিস্সায জীৰন্তি, তে দস্সেতী’’তি ৰুত্তং. কস্মাতি আহ ‘‘অযঞ্হী’’তিআদি. সিপ্পং উপনিস্সায জীৰন্তীতি সিপ্পূপজীৰিনো.

হত্থিমারোহন্তীতি হত্থারোহা, হত্থারুল়্হযোধা. হত্থিং আরোহাপযন্তীতি হত্থারোহা, হত্থাচরিয হত্থিৰেজ্জ হত্থিমেণ্ডাদযো. যেন হি পযোগেন পুরিসো হত্থিনো আরোহনযোগ্গো হোতি, তং হত্থিস্স পযোগং ৰিধাযন্তানং সব্বেসম্পেতেসং গহণং. তেনাহ ‘‘সব্বেপী’’তিআদি. তত্থ ¶ হত্থাচরিযা নাম যে হত্থিনো, হত্থারোহকানঞ্চ সিক্খাপকা. হত্থিৰেজ্জা নাম হত্থিভিসক্কা. হত্থিমেণ্ডা নাম হত্থীনং পাদরক্খকা. হত্থিং মণ্ডযন্তি রক্খন্তীতি হত্থিমণ্ডা, তেযেৰ হত্থিমেণ্ডা, হত্থিং মিনেন্তি সম্মা ৰিদহনেন হিংসন্তীতি ৰা হত্থিমেণ্ডা. আদি-সদ্দেন হত্থীনং যৰপদাযকাদযো সঙ্গণ্হাতি. অস্সারোহাতি এত্থাপি সুদ্ধহেতুকত্তুৰসেন যথাৰুত্তোৰ অত্থো. রথে নিযুত্তা রথিকা. রথরক্খা নাম রথস্স আণিরক্খকা. ধনুং গণ্হন্তীতি ধনুগ্গহা, ইস্সাসা, ধনুং গণ্হাপেন্তীতি ধনুগ্গহা, ধনুসিপ্পসিক্খাপকা ধন্ৰাচরিযা.

চেলেন চেলপটাকায যুদ্ধে অকন্তি গচ্ছন্তীতি চেলকা, জযদ্ধজগাহকাতি আহ ‘‘যে যুদ্ধে’’তিআদি. জযধজন্তি জযনত্থং, জযকালে ৰা পগ্গহিতধজং. পুরতোতি সেনায পুব্বে. যথা তথা ঠিতে সেনিকে ব্যূহৰিচারণৰসেন ততো ততো চলযন্তি উচ্চালেন্তীতি চলকাতি ৰুত্তং ‘‘ইধ রঞ্ঞো’’তিআদি. সকুণগ্ঘিআদযো ৰিয মংসপিণ্ডং পরসেনাসমূহসঙ্খাতং পিণ্ডং সাহসিকতায ছেত্ৰা ছেত্ৰা ¶ দযন্তি উপ্পতিত্ৰা উপ্পতিত্ৰা নিগ্গচ্ছন্তীতি পিণ্ডদাযকা. তেনাহ ‘‘তে কিরা’’তিআদি. সাহসং করোন্তীতি সাহসিকা, তেযেৰ মহাযোধা. পিণ্ডমিৰাতি তালফলপিণ্ডমিৰাতি ৰদন্তি, ‘‘মংসপিণ্ডমিৰা’’তি (দী. নি. টী. ১.১৬৩) আচরিযেন ৰুত্তং. সব্বত্থ ‘‘আচরিযেনা’’তি ৰুত্তে আচরিযধম্মপালত্থেরোৰ গহেতব্বো. দুতিযৰিকপ্পে পিণ্ডে জনসমূহসঙ্খাতে সম্মদ্দে দযন্তি উপ্পতন্তা ৰিয গচ্ছন্তীতি পিণ্ডদাযকা, দয-সদ্দো গতিযং, অয-সদ্দস্স ৰা দ-কারাগমেন নিপ্ফত্তি.

উগ্গতুগ্গতাতি সঙ্গামং পত্ৰা জৰপরক্কমাদিৰসেন অতিৰিয উগ্গতা. তদেৰাতি পরেহি ৰুত্তং তমেৰ সীসং ৰা আৰুধং ৰা. পক্খন্দন্তীতি ৰীরসূরভাৰেন অসজ্জমানা পরসেনমনুপৰিসন্তি. থামজৰবলপরক্কমাদিসম্পত্তিযা মহানাগসদিসতা. তেনাহ ‘‘হত্থিআদীসুপী’’তিআদি. একন্তসূরাতি একচরসূরা অন্তসদ্দস্স তব্ভাৰৰুত্তিতো, সূরভাৰেন একাকিনো হুত্ৰা যুজ্ঝনকাতি অত্থো. সজালিকাতি সৰম্মিকা. সন্নাহো কঙ্কটো ৰম্মং কৰচো উরচ্ছদো জালিকাতি হি অত্থতো একং. সচম্মিকাতি জালিকা ৰিয সরীরপরিত্তাণেন চম্মেন সচম্মিকা. চম্মকঞ্চুকন্তি চম্মমযকঞ্চুকং. পৰিসিত্ৰাতি তস্স অন্তো হুত্ৰা, পটিমুঞ্চিত্ৰাতি ৰুত্তং হোতি. সরপরিত্তাণং চম্মন্তি চম্মপটিসিব্বিতং চেলকং, চম্মমযং ৰা ফলকং. বলৰসিনেহাতি সামিনি অতিসযপেমা. ঘরদাসযোধাতি অন্তোজাতদাসপরিযাপন্না যোধা, ‘‘ঘরদাসিকপুত্তা’’তিপি পাঠো, অন্তোজাতদাসীনং পুত্তাতি অত্থো.

আল়ারং ¶ ৰুচ্চতি মহানসং, তত্থ নিযুত্তা আল়ারিকা. পূৰিকাতি পূৰসম্পাদকা, যে পূৰমেৰ নানপ্পকারতো সম্পাদেত্ৰা ৰিক্কিণন্তা জীৰন্তি. কেসনখসণ্ঠপনাদিৰসেন মনুস্সানং অলঙ্কারৰিধিং কপ্পেন্তি সংৰিদহন্তীতি কপ্পকা. চুণ্ণৰিলেপনাদীহি মলহরণৰণ্ণসম্পাদনৰিধিনা ন্হাপেন্তি নহানং করোন্তীতি ন্হাপিকা. নৰন্তাদিৰিধিনা পৰত্তো গণনগন্থো অন্তরা ছিদ্দাভাৰেন অচ্ছিদ্দকোতি ৰুচ্চতি, তদেৰ পঠেন্তীতি অচ্ছিদ্দকপাঠকা. হত্থেন অধিপ্পাযৰিঞ্ঞাপনং, গণনং ৰা হত্থমুদ্দা. অঙ্গুলিসঙ্কোচনঞ্হি মুদ্দাতি ৰুচ্চতি, তেন চ ৰিঞ্ঞাপনং, গণনং ৰা হোতি. হত্থসদ্দো চেত্থ তদেকদেসেসু অঙ্গুলীসু দট্ঠব্বো ‘‘ন ভুঞ্জমানো সব্বং ¶ হত্থং মুখে পক্খিপিস্সামী’’তিআদীসু (পাচি. ৬১৮) ৰিয, তমুপনিস্সায জীৰন্তীতি মুদ্দিকা. তেনাহ ‘‘হত্থমুদ্দাযা’’তিআদি.

অযকারো কম্মারকারকো. দন্তকারো ভমকারো. চিত্তকারো লেপচিত্তকারো. আদি-সদ্দেন কোট্টকলেখকৰিলীৰকারইট্ঠককারদারুকারাদীনং সঙ্গহো. দিট্ঠেৰ ধম্মেতি ইমস্মিংযেৰ অত্তভাৰে. করণনিপ্ফাদনৰসেন দস্সেত্ৰা. সন্দিট্ঠিকমেৰাতি অসম্পরাযিকতায সামং দট্ঠব্বং, সযমনুভৰিতব্বং অত্তপচ্চক্খন্তি অত্থো. উপজীৰন্তীতি উপনিস্সায জীৰন্তি. সুখিতন্তি সুখপ্পত্তং. থামবলূপেতভাৰোৰ পীণনন্তি আহ ‘‘পীণিতং থামবলূপেত’’ন্তি. উপরীতি দেৰলোকে. তথা উদ্ধন্তিপি. সো হি মনুস্সলোকতো উপরিমো. অগ্গং ৰিযাতি অগ্গং, ফলং. ‘‘কম্মস্স কতত্তা ফলস্স নিব্বত্তনতো তং কম্মস্স অগ্গিসিখা ৰিয হোতী’’তি আচরিযেন ৰুত্তং. অপিচ সগ্গন্তি উত্তমং, ফলং. সগ্গন্তি সুট্ঠু অগ্গং, রূপসদ্দাদিদসৰিধং অত্তনো ফলং নিপ্ফাদেতুং অরহতীতি অত্থো. সুঅগ্গিকাৰ নিরুত্তিনযেন সোৰগ্গিকা, দক্খিণাসদ্দাপেক্খায চ সব্বত্থ ইত্থিলিঙ্গনিদ্দেসো. সুখোতি সুখূপাযো ইট্ঠো কন্তো. অগ্গেতি উল়ারে. অত্তনা পরিভুঞ্জিতব্বং বাহিরং রূপং, অত্তনো ৰণ্ণপোক্খরতা ৰণ্ণোতি অযমেতেসং ৰিসেসো. দক্খন্তি ৰড্ঢন্তি এতাযাতি দক্খিণা, পরিচ্চাগমযং পুঞ্ঞন্তি আহ ‘‘দক্খিণং দান’’ন্তি.

মগ্গো সামঞ্ঞং সমিতপাপসঙ্খাতস্স সমণস্স ভাৰোতি কত্ৰা, তস্স ৰিপাকত্তা অরিযফলং সামঞ্ঞফলং. ‘‘যথাহা’’তিআদিনা মহাৰগ্গসংযুত্তপাল়িৰসেন তদত্থং সাধেতি. তং এস রাজা ন জানাতি অরিযধম্মস্স অকোৰিদতায. যস্মা পনেস ‘‘দাসকস্সকাদিভূতানং পব্বজিতানং লোকতো অভিৰাদনাদিলাভো সন্দিট্ঠিকং সামঞ্ঞফলং নামা’’তি চিন্তেত্ৰা ‘‘অত্থি নু খো কোচি সমণো ৰা ব্রাহ্মণো ৰা ঈদিসমত্থং জানন্তো’’তি ৰীমংসন্তো পূরণাদিকে পুচ্ছিত্ৰা তেসং কথায অনধিগতৰিত্তো ভগৰন্তম্পি এতমত্থং পুচ্ছি. তস্মা ৰুত্তং ‘‘দাসকস্সকোপমং সন্ধায পুচ্ছতী’’তি.

রাজামচ্চাতি ¶ ¶ রাজকুলসমুদাগতা অমচ্চা, অনুযুত্তকরাজানো চেৰ অমচ্চা চাতিপি অত্থো. কণ্হপক্খন্তি যথাপুচ্ছিতে অত্থে লব্ভমানদিট্ঠিগতূপসংহিতং সংকিলেসপক্খং. সুক্কপক্খন্তি তব্বিধুরং উপরি সুত্তাগতং ৰোদানপক্খং. সমণকোলাহলন্তি সমণকোতূহলং তং তং সমণৰাদানং অঞ্ঞমঞ্ঞৰিরোধং. সমণভণ্ডনন্তি তেনেৰ ৰিরোধেন ‘‘এৰংৰাদীনং তেসং সমণব্রাহ্মণানং অযং দোসো, এৰংৰাদীনং তেসং অযং দোসো’’তি এৰং তং তং ৰাদস্স পরিভাসনং. ইস্সরানুৰত্তকো হি লোকোতি ধম্মতাদস্সনেন তদত্থসমত্থনং. অত্তনো দেসনাকোসল্লেন রঞ্ঞো ভারং করোন্তো, ন তদঞ্ঞেন পরৰম্ভনাদিকারণেন.

১৬৪. নু-সদ্দো ৰিয নো-সদ্দোপি পুচ্ছাযং নিপাতোতি আহ ‘‘অভিজানাসি নূ’’তি. অযঞ্চাতি এত্থ চ-সদ্দো ন কেৰলং অভিজানাসিপদেনেৰ, অথ খো ‘‘পুচ্ছিতা’’তি পদেন চাতি সমুচ্চযত্থো. কথং যোজেতব্বোতি অনুযোগমপনেতি ‘‘ইদঞ্হী’’তিআদিনা. পুচ্ছিতা নূতি পুব্বে পুচ্ছং কত্তা নু. নং পুট্ঠভাৰন্তি তাদিসং পুচ্ছিতভাৰং অভিজানাসি নু. ন তে সম্মুট্ঠন্তি তৰ ন পমুট্ঠং ৰতাতি অত্থো. অফাসুকভাৰোতি তথা ভাসনেন অসুখভাৰো. পণ্ডিতপতিরূপকানন্তি (সামং ৰিয অত্তনো সক্কারানং পণ্ডিতভাসানং) আমং ৰিয পক্কানং পণ্ডিতা ভাসানং. (দী. নি. টী. ১.১৬৩) পাল়িপদঅত্থব্যঞ্জনেসূতি পাল়িসঙ্খাতে পদে, তদত্থে তপ্পরিযাপন্নক্খরে চ, ৰাক্যপরিযাযো ৰা ব্যঞ্জনসদ্দো ‘‘অক্খরং পদং ব্যঞ্জন’’ন্তিআদীসু (নেত্তি. ২৮) ৰিয. ভগৰতো রূপং সভাৰো ৰিয রূপমস্সাতি ভগৰন্তরূপো, ভগৰা ৰিয একন্তপণ্ডিতোতি অত্থো.

পূরণকস্সপৰাদৰণ্ণনা

১৬৫. একমিদাহন্তি এত্থ ইদন্তি নিপাতমত্তং, একং সমযমিচ্চেৰ অত্থো. সম্মোদেতি সম্মোদনং করোতীতি সম্মোদনীযং. অনীযসদ্দো হি বহুলা কত্ৰত্থাভিধাযকো যথা ‘‘নিয্যানিকা’’তি, (ধ. স. সুত্তন্তদুকমাতিকা ৯৭) সম্মোদনং ৰা জনেতীতি সম্মোদনিযং তদ্ধিতৰসেন. সরিতব্বন্তি সারণীযং, সরণস্স অনুচ্ছৰিকন্তি ৰা সারণিযং, এতমত্থং দস্সেতুং ‘‘সম্মোদজনকং সরিতব্বযুত্তক’’ন্তি ৰুত্তং, সরিতব্বযুত্তকন্তি চ সরণানুচ্ছৰিকন্তি অত্থো.

১৬৬. সহত্থাতি ¶ সহত্থেনেৰ, তেন সুদ্ধকত্তারং দস্সেতি, আণত্তিযাতি পন হেতুকত্তারং, নিস্সগ্গিযথাৰরাদযোপি ইধ সহত্থ করণেনেৰ সঙ্গহিতা. হত্থাদীনীতি হত্থপাদকণ্ণনাসাদীনি. পচনং দহনং ৰিবাধনন্তি আহ ‘‘দণ্ডেন উপ্পীল়েন্তস্সা’’তি. পপঞ্চসূদনিযং নাম মজ্ঝিমাগমট্ঠকথাযং ¶ পন ‘‘পচতো’’তি এতস্স ‘‘তজ্জেন্তস্স ৰা’’তি (ম. নি. অট্ঠ. ৩.৯৭) দুতিযোপি অত্থো ৰুত্তো, ইধ পন তজ্জনং, পরিভাসনঞ্চ দণ্ডেন সঙ্গহেত্ৰা ‘‘দণ্ডেন উপ্পীল়েন্তস্স ইচ্চেৰ ৰুত্ত’’ন্তি (দী. নি. টী. ১.১৬৬) আচরিযেন ৰুত্তং, অধুনা পন পোত্থকেসু ‘‘তজ্জেন্তস্স ৰা’’তি পাঠোপি বহুসো দিস্সতি. সোকন্তি সোককারণং, সোচনন্তিপি যুজ্জতি কারণসম্পাদনেন ফলস্সপি কত্তব্বতো. পরেহীতি অত্তনো ৰচনকরেহি কম্মভূতেহি. ফন্দতোতি এত্থ পরস্স ফন্দনৰসেন সুদ্ধকত্তুত্থো ন লব্ভতি, অথ খো অত্তনো ফন্দনৰসেনেৰাতি আহ ‘‘পরং ফন্দন্তং ফন্দনকালে সযম্পি ফন্দতো’’তি, অত্তনা কতেন পরস্স ৰিবাধনপযোগেন সযম্পি ফন্দতোতি অত্থো. ‘‘অতিপাতাপযতো’’তি পদং সুদ্ধকত্তরি, হেতুকত্তরি চ পৰত্ততীতি দস্সেতি ‘‘হনন্তস্সাপি হনাপেন্তস্সাপী’’তি ইমিনা. সব্বত্থাতি ‘‘আদিযতো’’তিআদীসু. করণকারণৰসেনাতি সযংকারপরংকারৰসেন.

ঘরভিত্তিযা অন্তো চ বহি চ সন্ধি ঘরসন্ধি. কিঞ্চিপি অসেসেত্ৰা নিরৰসেসো লোপো ৰিলুম্পনং নিল্লোপোতি আহ ‘‘মহাৰিলোপ’’ন্তি. একাগারে নিযুত্তো ৰিলোপো একাগারিকো. তেনাহ ‘‘একমেৰা’’তিআদি. ‘‘পরিপন্থে তিট্ঠতো’’তি এত্থ অচ্ছিন্দনত্থমেৰ তিট্ঠতীতি অযমত্থো পকরণতো সিদ্ধোতি দস্সেতি ‘‘আগতাগতান’’ন্তিআদিনা. ‘‘পরিতো সব্বসো পন্থে হননং পরিপন্থো’’তি (দী. নি. টী. ১.১৬৬) অযমত্থোপি আচরিযেন ৰুত্তো. করোমীতি সঞ্ঞাযাতি সঞ্চেতনিকভাৰমাহ, তেনেতং দস্সেতি ‘‘সঞ্চিচ্চ করোতোপি ন করীযতি নাম, পগেৰ অসঞ্চিচ্চা’’তি. পাপং ন করীযতীতি পুব্বে অসতো উপ্পাদেতুং অসক্কুণেয্যত্তা পাপং অকতমেৰ নাম. তেনাহ ‘‘নত্থি পাপ’’ন্তি.

যদি এৰং কথং সত্তা পাপে পৰত্তন্তীতি অত্তনো ৰাদে পরেহি আরোপিতং দোসমপনেতুকামো পূরণো ইমমত্থম্পি দস্সেতীতি আহ ‘‘সত্তা পনা’’তিআদি. সঞ্ঞামত্তমেতং ‘‘পাপং করোন্তী’’তি, পাপং ¶ পন নত্থেৰাতি ৰুত্তং হোতি. এৰং কিরস্স হোতি – ইমেসং সত্তানং হিংসাদিকিরিযা অত্তানং ন পাপুণাতি তস্স নিচ্চতায নিব্বিকারত্তা, সরীরং পন অচেতনং কট্ঠকলিঙ্গরূপমং, তস্মিং ৰিকোপিতেপি ন কিঞ্চি পাপন্তি. পরিযন্তো ৰুচ্চতি নেমি পরিযোসানে ঠিতত্তা. তেন ৰুত্তং আচরিযেন ‘‘নিসিতখুরমযনেমিনা’’তি (দী. নি. টী. ১.১৬৬). দুতিযৰিকপ্পে চক্কপরিযোসানমেৰ পরিযন্তো, খুরেন সদিসো পরিযন্তো যস্সাতি খুরপরিযন্তো. খুরগ্গহণেন চেত্থ খুরধারা গহিতা তদৰরোধতো. পাল়িযং চক্কেনাতি চক্কাকারকতেন আৰুধৰিসেসেন. তং মংসখলকরণসঙ্খাতং নিদানং কারণং যস্সাতি ততোনিদানং, ‘‘পচ্চত্তৰচনস্স তোআদেসো, সমাসে চস্স লোপাভাৰো’’তি (পারা. অট্ঠ. ১.২১) অট্ঠকথাসু ¶ ৰুত্তো. ‘‘পচ্চত্তত্থে নিস্সক্কৰচনম্পি যুজ্জতী’’তি (সারত্থ. টী. পঠমমহাসঙ্গীতিকথাৰণ্ণনা) আচরিযসারিপুত্তত্থেরো. ‘‘কারণত্থে নিপাতসমুদাযো’’তিপি অক্খরচিন্তকা.

গঙ্গায দক্খিণদিসা অপ্পতিরূপদেসো, উত্তরদিসা পন পতিরূপদেসোতি অধিপ্পাযেন ‘‘দক্খিণঞ্চে’’তিআদি ৰুত্তং, তঞ্চ দেসদিসাপদেসেন তন্নিৰাসিনো সন্ধাযাতি দস্সেতুং ‘‘দক্খিণতীরে’’তিআদিমাহ. হননদানকিরিযা হি তদাযত্তা. মহাযাগন্তি মহাৰিজিতরঞ্ঞো যঞ্ঞসদিসম্পি মহাযাগং. দমসদ্দো ইন্দ্রিযসংৰরস্স, উপোসথসীলস্স চ ৰাচকোতি আহ ‘‘ইন্দ্রিযদমেন উপোসথকম্মেনা’’তি. কেচি পন উপোসথকম্মেনা’তি ইদং ইন্দ্রিযদমস্স ৰিসেসনং, তস্মা ‘উপোসথকম্মভূতেন ইন্দ্রিযদমেনা’তি’’ অত্থং ৰদন্তি, তদযুত্তমেৰ তদুভযত্থৰাচকত্তা দমসদ্দস্স, অত্থদ্ৰযস্স চ ৰিসেসৰুত্তিতো. অধুনা হি কত্থচি পোত্থকে ৰা-সদ্দো, চ-সদ্দোপি দিস্সতি. সীলসংযমেনাতি তদঞ্ঞেন কাযিকৰাচসিকসংৰরেন. সচ্চৰচনেনাতি অমোসৰজ্জেন. তস্স ৰিসুং ৰচনং লোকে গরুতরপুঞ্ঞসম্মতভাৰতো. যথা হি পাপধম্মেসু মুসাৰাদো গরুতরো, এৰং পুঞ্ঞধম্মেসু অমোসৰজ্জো. তেনাহ ভগৰা ইতিৰুত্তকে –

‘‘একধম্মং ¶ অতীতস্স, মুসাৰাদিস্স জন্তুনো;

ৰিতিণ্ণপরলোকস্স, নত্থি পাপং অকারিয’’ন্তি. (ইতিৰু. ২৭);

পৰত্তীতি যো করোতি, তস্স সন্তানে ফলুপ্পাদপচ্চযভাৰেন উপ্পত্তি. এৰঞ্হি ‘‘নত্থি কম্মং, নত্থি কম্মফল’’ন্তি অকিরিযৰাদস্স পরিপুণ্ণতা. সতি হি কম্মফলে কম্মানমকিরিযভাৰো কথং ভৰিস্সতি. সব্বথাপীতি ‘‘করোতো’’তিআদিনা ৰুত্তেন সব্বপ্পকারেনপি.

লবুজন্তি লিকুচং. পাপপুঞ্ঞানং কিরিযমেৰ পটিক্খিপতি, ন রঞ্ঞা পুট্ঠং সন্দিট্ঠিকং সামঞ্ঞফলং ব্যাকরোতীতি অধিপ্পাযো. ইদঞ্হি অৰধারণং ৰিপাকপটিক্খেপনিৰত্তনত্থং. যো হি কম্মং পটিক্খিপতি, তেন অত্থতো ৰিপাকোপি পটিক্খিত্তোযেৰ নাম হোতি. তথা হি ৰক্খতি ‘‘কম্মং পটিবাহন্তেনাপী’’তিআদি (দী. নি. অট্ঠ. ১.১৭০-১৭২).

পটিরাজূহি অনভিভৰনীযভাৰেন ৰিসেসতো জিতন্তি ৰিজিতং, একস্স রঞ্ঞো আণাপৰত্তিদেসো. ‘‘মা ময্হং ৰিজিতে ৰসথা’’তি অপসাদনা পব্বজিতস্স পব্বাজনসঙ্খাতা ৰিহেঠনাযেৰাতি ¶ ৰুত্তং ‘‘ৰিহেঠেতব্ব’’ন্তি. তেন ৰুত্তস্স অত্থস্স ‘‘এৰমেত’’ন্তি উপধারণং সল্লক্খণং উগ্গণ্হনং, তদমিনা পটিক্খিপতীতি আহ ‘‘সারতো অগ্গণ্হন্তো’’তি. তস্স পন অত্থস্স অদ্ধনিযভাৰাপাদনৰসেন চিত্তেন সন্ধারণং নিক্কুজ্জনং, তদমিনা পটিক্খিপতীতি দস্সেতি ‘‘সারৰসেনেৰ…পে… অট্ঠপেন্তো’’তি ইমিনা. সারৰসেনেৰাতি উত্তমৰসেনেৰ, অৰিতথত্তা ৰা পরেহি অনুচ্চালিতো থিরভূতো অত্থো অফেগ্গুভাৰেন সারোতি ৰুচ্চতি, তংৰসেনেৰাতি অত্থো. নিস্সরণন্তি ৰট্টতো নিয্যানং. পরমত্থোতি অৰিপরীতত্থো, উত্তমস্স ৰা ঞাণস্সারম্মণভূতো অত্থো. ব্যঞ্জনং পন তেন উগ্গহিতঞ্চেৰ নিক্কুজ্জিতঞ্চ তথাযেৰ ভগৰতো সন্তিকে ভাসিতত্তা.

মক্খলিগোসালৰাদৰণ্ণনা

১৬৮. উভযেনাতি হেতুপচ্চযপটিসেধৰচনেন. ‘‘ৰিজ্জমানমেৰা’’তি ইমিনা সভাৰতো ৰিজ্জমানস্সেৰ পটিক্খিপনে তস্স অঞ্ঞাণমেৰ কারণন্তি দস্সেতি. সংকিলেসপচ্চযন্তি সংকিলিস্সনস্স মলীনস্স কারণং ¶ . ৰিসুদ্ধিপচ্চযন্তি সংকিলেসতো ৰিসুদ্ধিযা ৰোদানস্স পচ্চযং. অত্তকারেতি পচ্চত্তৰচনস্স এ-কারৰসেন পদসিদ্ধি যথা ‘‘ৰনপ্পগুম্বে যথা ফুসিতগ্গে’’তি, (খু. পা. ১৩; সু. নি. ২৩৬) পচ্চত্তত্থে ৰা ভুম্মৰচনং যথা ‘‘ইদম্পিস্স হোতি সীলস্মি’’ন্তি (দী. নি. ১.১৯৪), তদেৰত্থং দস্সেতি ‘‘অত্তকারো’’তি ইমিনা. সো চ তেন তেন সত্তেন অত্তনা কাতব্বকম্মং, অত্তনা নিপ্ফাদেতব্বপযোগো ৰা. তেনাহ ‘‘যেনা’’তিআদি. সব্বঞ্ঞুতন্তি সম্মাসম্বোধিং. তন্তি অত্তনা কতকম্মং. দুতিযপদেনাতি ‘‘নত্থি পরকারে’’তি পদেন. পরকারো চ নাম পরস্স ৰাহসা ইজ্ঝনকপযোগো. তেন ৰুত্তং ‘‘যং পরকার’’ন্তিআদি. ওৰাদানুসাসনিন্তি ওৰাদভূতমনুসাসনিং, পঠমং ৰা ওৰাদো, পচ্ছা অনুসাসনী. ‘‘পরকার’’ন্তি পদস্স উপলক্খণৰসেন অত্থদস্সনঞ্চেতং, লোকুত্তরধম্মে পরকারাৰস্সযো নত্থীতি আহ ‘‘ঠপেত্ৰা মহাসত্ত’’ন্তি. অত্থেৰেস লোকিযধম্মে যথা তং অম্হাকং বোধিসত্তস্স আল়ারুদকে নিস্সায পঞ্চাভিঞ্ঞালোকিযসমাপত্তিলাভো, তঞ্চ পচ্ছিমভৰিকমহাসত্তং সন্ধায ৰুত্তং, পচ্চেকবোধিসত্তস্সপি এত্থেৰ সঙ্গহো তেসম্পি তদভাৰতো. মনুস্সসোভগ্যতন্তি মনুস্সেসু সুভগভাৰং. এৰন্তি ৰুত্তপ্পকারেন কম্মৰাদস্স, কিরিযৰাদস্স চ পটিক্খিপনেন. জিনচক্কেতি ‘‘অত্থি ভিক্খৰে কম্মং কণ্হং কণ্হৰিপাক’’ন্তিআদি (অ. নি. ৪.২৩২) নযপ্পৰত্তে কম্মানং, কম্মফলানঞ্চ অত্থিতাপরিদীপনে বুদ্ধসাসনে. পচ্চনীককথনং পহারদানসদিসন্তি ‘‘পহারং দেতি নামা’’তি.

যথাৰুত্তঅত্তকারপরকারাভাৰতো ¶ এৰ সত্তানং পচ্চত্তপুরিসকারো নাম কোচি নত্থীতি সন্ধায ‘‘নত্থিপুরিসকারে’’তি তস্স পটিক্খিপনং দস্সেতুং ‘‘যেনা’’তিআদি ৰুত্তং. ‘‘দেৰত্তম্পী’’তিআদিনা, ‘‘মনুস্সসোভগ্যত’’ন্তিআদিনা চ ৰুত্তপ্পকারা. ‘‘বলে পতিট্ঠিতা’’তি ৰত্ৰা ৰীরিযমেৰিধ বলন্তি দস্সেতুং ‘‘ৰীরিযং কত্ৰা’’তি ৰুত্তং. সত্তানঞ্হি দিট্ঠধম্মিকসম্পরাযিক নিব্বানসম্পত্তিআৰহং ৰীরিযবলং নত্থীতি সো পটিক্খিপতি, নিদস্সনমত্তঞ্চেতং ৰোদানিযবলস্স পটিক্খিপনং সংকিলেসিকস্সাপি বলস্স তেন পটিক্খিপনতো. যদি ৰীরিযাদীনি পুরিসকারৰেৰচনানি, অথ কস্মা তেসং ৰিসুং গহণন্তি আহ ‘‘ইদং নো ৰীরিযেনা’’তিআদি. ইদং নো ৰীরিযেনাতি ইদং ফলং অম্হাকং ৰীরিযেন পৰত্তং. পৰত্তৰচনপটিক্খেপকরণৰসেনাতি অঞ্ঞেসং পৰত্তৰোহারৰচনস্স পটিক্খেপকরণৰসেন ¶ . ৰীরিযথামপরক্কমসম্বন্ধনেন পৰত্তবলৰাদীনং ৰাদস্স পটিক্খেপকরণৰসেন ‘‘নত্থি বল’’ন্তি পদমিৰ সব্বানিপেতানি তেন আদীযন্তীতি অধিপ্পাযো. তঞ্চ ৰচনীযত্থতো ৰুত্তং, ৰচনত্থতো পন তস্সা তস্সা কিরিযায উস্সন্নট্ঠেন বলং. সূরৰীরভাৰাৰহট্ঠেন ৰীরিযং. তদেৰ দল়্হভাৰতো, পোরিসধুরং ৰহন্তেন পৰত্তেতব্বতো চ পুরিসথামো. পরং পরং ঠানং অক্কমনৰসেন পৰত্তিযা পুরিসপরক্কমোতি ৰেদিতব্বং.

রূপাদীসু সত্তৰিসত্ততায সত্তা. অস্সসনপস্সসনৰসেন পৰত্তিযা পাণনতো পাণাতি ইমিনা অত্থেন সমানেপি পদদ্ৰযে একিন্দ্রিযাদিৰসেন পাণে ৰিভজিত্ৰা সত্ততো ৰিসেসং কত্ৰা এস ৰদতীতি আহ ‘‘একিন্দ্রিযো’’তিআদি. ভৰন্তীতি ভূতাতি সত্তপাণপরিযাযেপি সতি অণ্ডকোসাদীসু সম্ভৰনট্ঠেন ততো ৰিসেসাৰ, তেন ৰুত্তাতি দস্সেতি ‘‘অণ্ড…পে… ৰদতী’’তি ইমিনা. ৰত্থিকোসো গব্ভাসযো. জীৰনতো পাণং ধারেন্তো ৰিয ৰড্ঢনতো জীৰা. তেনাহ ‘‘সালিযৰা’’তিআদি. আদিসদ্দেন ৰিরুল়্হধম্মা তিণরুক্খা গহিতা. নত্থি এতেসং সংকিলেসৰিসুদ্ধীসু ৰসো সামত্থিযন্তি অৰসা. তথা অবলা অৰীরিযা. তেনাহ ‘‘তেস’’ন্তিআদি. নিযতাতি নিযমনা, অছেজ্জসুত্তাৰুতস্স অভেজ্জমণিনো ৰিয নিযতপ্পৰত্তিতায গতিজাতিবন্ধাপৰগ্গৰসেন নিযামোতি অত্থো. তত্থ তত্থাতি তাসু তাসু জাতীসু. ছন্নং অভিজাতীনং সম্বন্ধীভূতানং গমনং সমৰাযেন সমাগমো. সম্বন্ধীনিরপেক্খোপি ভাৰসদ্দো সম্বন্ধীসহিতো ৰিয পকতিযত্থৰাচকোতি আহ ‘‘সভাৰোযেৰা’’তি, যথা কণ্টকস্স তিক্খতা, কপিত্থফলাদীনং পরিমণ্ডলতা, মিগপক্খীনং ৰিচিত্তাকারতা চ, এৰং সব্বস্সাপি লোকস্স হেতুপচ্চযমন্তরেন তথা তথা পরিণামো অকুত্তিমো সভাৰোযেৰাতি অত্থো. তেন ৰুত্তং ‘‘যেনা’’তিআদি. পরিণমনং নানপ্পকারতাপত্তি. যেনাতি সত্তপাণাদিনা. যথা ভৰিতব্বং, তথেৰাতি সম্বন্ধো.

ছল়ভিজাতিযো ¶ পরতো ৰিত্থারীযিস্সন্তি. ‘‘সুখঞ্চ দুক্খঞ্চ পটিসংৰেদেন্তী’’তি ৰদন্তো মক্খলি অদুক্খমসুখভূমিং সব্বেন সব্বং ন জানাতীতি ৰুত্তং ‘‘অঞ্ঞা অদুক্খমসুখভূমি নত্থীতি দস্সেতী’’তি. অযং ‘‘সুখঞ্চ দুক্খঞ্চ পটিসংৰেদেন্তী’’তি ¶ ৰচনং করণভাৰেন গহেত্ৰা ৰুত্তা আচরিযস্স মতি. পোত্থকেসু পন ‘‘অঞ্ঞা সুখদুক্খভূমি নত্থীতি দস্সেতী’’তি অযমেৰ পাঠো দিট্ঠো, ন ‘‘অদুক্খমসুখভূমী’’তি. এৰং সতি ‘‘ছস্ৰেৰাভিজাতীসূ’’তি ৰচনং অধিকরণভাৰেন গহেত্ৰা ছসু এৰ অভিজাতীসু সুখদুক্খপটিসংৰেদনং, ন তেহি অঞ্ঞত্থ, তাযেৰ সুখদুক্খভূমি, ন তদঞ্ঞাতি দস্সেতীতি ৰুত্তন্তি ৰেদিতব্বং. অযমেৰ চ যুত্ততরো পটিক্খেপিতব্বস্স অত্থস্স ভূমিৰসেন ৰুত্তত্তা. যদি হি ‘‘সুখঞ্চ দুক্খঞ্চ পটিসংৰেদেন্তী’’তি ৰচনেন পটিক্খেপিতব্বস্স দস্সনং সিযা, অথ ‘‘অঞ্ঞা অদুক্খমসুখা নত্থী’’তি দস্সেয্য, ন ‘‘অদুক্খমসুখভূমী’’তি দস্সনহেতুৰচনস্স ভূমিঅত্থাভাৰতো. দস্সেতি চেতং তাসং ভূমিযা অভাৰমেৰ, তেন ৰিঞ্ঞাযতি অযং পাঠো, অযঞ্চত্থো যুত্ততরোতি.

পমুখযোনীনন্তি মনুস্সেসু খত্তিযব্রাহ্মণাদিৰসেন, তিরচ্ছানাদীসু সীহব্যগ্ঘাদিৰসেন পধানযোনীনং, পধানতা চেত্থ উত্তমতা. তেনাহ ‘‘উত্তমযোনীন’’ন্তি. সট্ঠি সতানীতি ছ সহস্সানি. ‘‘পঞ্চ চ কম্মুনো সতানী’’তি পদস্স অত্থদস্সনং ‘‘পঞ্চ কম্মসতানি চা’’তি. ‘‘এসেৰ নযো’’তি ইমিনা ‘‘কেৰলং তক্কমত্তকেন নিরত্থকং দিট্ঠিং দীপেতী’’তি ইমমেৰত্থমতিদিসতি. এত্থ চ ‘‘তক্কমত্তকেনা’’তি ৰদন্তো যস্মা তক্কিকা অৰস্সযভূততথত্থগ্গহণঅঙ্কুসনযমন্তরেন নিরঙ্কুসতায পরিকপ্পনস্স যং কিঞ্চি অত্তনা পরিকপ্পিতং সারতো মঞ্ঞমানা তথেৰ অভিনিৰিস্স তত্থ চ দিট্ঠিগাহং গণ্হন্তি, তস্মা ন তেসং দিট্ঠিৰত্থুস্মিং ৰিঞ্ঞূহি ৰিচারণা কাতব্বাতি ইমমধিপ্পাযং ৰিভাৰেতি. কেচীতি উত্তরৰিহারৰাসিনো. পঞ্চিন্দ্রিযৰসেনাতি চক্খাদিপঞ্চিন্দ্রিযৰসেন. তে হি ‘‘চক্খুসোতঘানজিৰ্হাকাযসঙ্খাতানি ইমানি পঞ্চিন্দ্রিযানি ‘পঞ্চ কম্মানী’তি তিত্থিযা পঞ্ঞপেন্তী’’তি ৰদন্তি ‘‘কাযৰচীমনোকম্মানি চ ‘তীণি কম্মানী’তি’’. কম্মন্তি লদ্ধীতি তদুভযং ওল়ারিকত্তা পরিপুণ্ণকম্মন্তি লদ্ধি. মনোকম্মং অনোল়ারিকত্তা উপড্ঢকম্মন্তি লদ্ধীতি যোজনা. ‘‘দ্ৰাসট্ঠি পটিপদা’’তি ৰত্তব্বে সভাৰনিরুত্তিং অজানন্তো ‘‘দ্ৰট্ঠিপটিপদা’’তি ৰদতীতি আহ ‘‘দ্ৰাসট্ঠি পটিপদা’’তি. সদ্দরচকা পন ‘‘দ্ৰাসট্ঠিযা সলোপো, অত্তমা’’তি ৰদন্তি, তদযুত্তমেৰ সভাৰনিরুত্তিযা যোগতো অসিদ্ধত্তা ¶ . যদি হি সা যোগেন সিদ্ধা অস্স, এৰং সভাৰনিরুত্তিযেৰ সিযা, তথা চ সতি আচরিযানং মতেন ৰিরুজ্ঝতীতি ৰদন্তি. ‘‘চুল্লাসীতি সহস্সানী’’তিআদিকা পন অঞ্ঞত্র দিট্ঠপযোগা সভাৰনিরুত্তিযেৰ. দিস্সতি হি ৰিসুদ্ধিমগ্গাদীসু –

‘‘চুল্লাসীতি ¶ সহস্সানি, কপ্পা তিট্ঠন্তি যে মরূ;

ন ত্ৰেৰ তেপি তিট্ঠন্তি, দ্ৰীহি চিত্তেহি সমোহিতা’’তি. (ৰিসুদ্ধি. ২.৭১৫; মহানি. ১০, ৩৯);

একস্মিং কপ্পেতি চতুন্নমসঙ্খ্যেয্যকপ্পানং অঞ্ঞতরভূতে একস্মিং অসঙ্খ্যেয্যকপ্পে. তত্থাপি চ ৰিৰট্টট্ঠাযীসঞ্ঞিতং একমেৰ সন্ধায ‘‘দ্ৰট্ঠন্তরকপ্পা’’তি ৰুত্তং. ন হি সো অস্সুতসাসনধম্মো ইতরে জানাতি বাহিরকানমৰিসযত্তা, অজানন্তো এৰমাহাতি অত্থো.

উরব্ভে হনন্তি, হন্ত্ৰা ৰা জীৰিতং কপ্পেন্তীতি ওরব্ভিকা. এস নযো সাকুণিকাদীসুপি. লুদ্দাতি ৰুত্তাৰসেসকা যে কেচি চাতুপ্পদজীৰিকা নেসাদা. মাগৰিকপদস্মিঞ্হি রোহিতাদিমিগজাতিযেৰ গহিতা. বন্ধনাগারে নিযোজেন্তীতি বন্ধনাগারিকা. কুরূরকম্মন্তাতি দারুণকম্মন্তা. অযং সব্বোপি কণ্হকম্মপসুততায কণ্হাভিজাতীতি ৰদতি কণ্হস্স ধম্মস্স অভিজাতি অব্ভুপ্পত্তি যস্সাতি কত্ৰা. ভিক্খূতি বুদ্ধসাসনে ভিক্খূ. কণ্টকেতি ছন্দরাগে. সঞ্ঞোগৰসেন তেসং পক্খিপনং. কণ্টকসদিসছন্দরাগেন সঞ্ঞুত্তা ভুঞ্জন্তীতি হি অধিপ্পাযেন ‘‘কণ্টকে পক্খিপিত্ৰা’’তি ৰুত্তং. কস্মাতি চে? যস্মা ‘‘তে পণীতপণীতে পচ্চযে পটিসেৰন্তী’’তি তস্স মিচ্ছাগাহো, তস্মা ঞাযলদ্ধেপি পচ্চযে ভুঞ্জমানা আজীৰকসমযস্স ৰিলোমগাহিতায পচ্চযেসু কণ্টকে পক্খিপিত্ৰা খাদন্তি নামাতি ৰদতি কণ্টকৰুত্তিকাতি কণ্টকেন যথাৰুত্তেন সহ জীৰিকা. অযঞ্হিস্স পাল়িযেৰাতি অযং মক্খলিস্স ৰাদদীপনা অত্তনা রচিতা পাল়িযেৰাতি যথাৰুত্তমত্থং সমত্থেতি. কণ্টকৰুত্তিকা এৰ নাম একে অপরে পব্বজিতা বাহিরকা সন্তি, তে নীলাভিজাতীতি ৰদতীতি অত্থো. তে হি সৰিসেসং অত্তকিলমথানুযোগমনুযুত্তা. তথা হি তে কণ্টকে ৰত্তন্তা ৰিয ভৰন্তীতি কণ্টকৰুত্তিকাতি ৰুত্তা. নীলস্স ধম্মস্স অভিজাতি যস্সাতি নীলাভিজাতি. এৰমিতরেসুপি.

অম্হাকং ¶ সঞ্ঞোজনগণ্ঠো নত্থীতি ৰাদিনো বাহিরকপব্বজিতা নিগণ্ঠা. একমেৰ সাটকং পরিদহন্তা একসাটকা. কণ্হতো পরিসুদ্ধো নীলো, ততো পন লোহিতোতিআদিনা যথাক্কমং তস্স পরিসুদ্ধং ৰাদং দস্সেতুং ‘‘ইমে কিরা’’তিআদি ৰুত্তং. পণ্ডরতরাতি ভুঞ্জননহানপটিক্খেপাদিৰতসমাযোগেন পরিসুদ্ধতরা কণ্হনীলমুপাদায লোহিতস্সাপি পরিসুদ্ধভাৰেন ৰত্তব্বতো. ওদাতৰসনাতি ওদাতৰত্থপরিদহনা. অচেলকসাৰকাতি আজীৰকসাৰকভূতা. তে কির আজীৰকলদ্ধিযা ৰিসুদ্ধচিত্ততায নিগণ্ঠেহিপি পণ্ডরতরা হলিদ্দাভানম্পি ¶ পুরিমে উপাদায পরিসুদ্ধভাৰপ্পত্তিতো. ‘‘এৰ’’ন্তিআদিনা তস্স ছন্দাগমনং দস্সেতি. নন্দাদীনং সাৰকভূতা পব্বজিতা আজীৰকা. তথা আজীৰকিনিযো. নন্দাদযো কির তথারূপং আজীৰকপটিপত্তিং উক্কংসং পাপেত্ৰা ঠিতা, তস্মা নিগণ্ঠেহি আজীৰকসাৰকেহি পব্বজিতেহি পণ্ডরতরা ৰুত্তা পরমসুক্কাভিজাতীতি অযং তস্স লদ্ধি.

পুরিসভূমিযোতি পধাননিদ্দেসো. ইত্থীনম্পি হেতা ভূমিযো এস ইচ্ছতেৰ. সত্ত দিৰসেতি অচ্চন্তসঞ্ঞোগৰচনং, এত্তকম্পি মন্দা মোমূহাতি. সম্বাধট্ঠানতোতি মাতুকুচ্ছিং সন্ধাযাহ. রোদন্তি চেৰ ৰিরৰন্তি চ তমনুস্সরিত্ৰা. খেদনং, কীল়নঞ্চ খিড্ডাসদ্দেনেৰ সঙ্গহেত্ৰা খিড্ডাভূমি ৰুত্তা. পদস্স নিক্খিপনং পদনিক্খিপনং. যদা তথা পদং নিক্খিপিতুং সমত্থো, তদা পদৰীমংসভূমি নামাতি ভাৰো. ৰতাৰতস্স জাননকালে. ভিক্খু চ পন্নকোতিআদিপি তেসং বাহিরকানং পাল়িযেৰ. তত্থ পন্নকোতি ভিক্খায ৰিচরণকো, তেসং ৰা পটিপত্তিযা পটিপন্নকো. জিনোতি জিণ্ণো জরাৰসেন হীনধাতুকো, অত্তনো ৰা পটিপত্তিযা পটিপক্খং জিনিত্ৰা ঠিতো. সো কির তথাভূতো ধম্মম্পি কস্সচি ন কথেসি. তেনাহ ‘‘ন কিঞ্চি আহা’’তি. ওট্ঠৰদনাদিৰিপ্পকারে কতেপি খমনৰসেন ন কিঞ্চি কথেতীতিপি ৰদন্তি. অলাভিন্তি ‘‘সো ন কুম্ভিমুখা পটিগ্গণ্হাতী’’তিআদিনা নযেন মহাসীহনাদসুত্তে (দী. নি. ১.৩৯৪; ম. নি. ১.১৫৫) ৰুত্তঅলাভহেতুসমাযোগেন অলাভিং. ততোযেৰ জিঘচ্ছাদুব্বলপরেততায সযনপরাযনট্ঠেন সমণং পন্নভূমীতি ৰদতি.

আজীৰৰুত্তিসতানীতি সত্তানমাজীৰভূতানি জীৰিকাৰুত্তিসতানি. ‘‘পরিব্বাজকসতানী’’তি ৰুচ্চমানেপি চেস সভাৰলিঙ্গমজানন্তো ‘‘পরিব্বাজকসতে’’তি ¶ ৰদতি. এৰমঞ্ঞেসুপি. তেনাহ ‘‘পরিব্বাজকপব্বজ্জাসতানী’’তি. নাগভৰনং নাগমণ্ডলং যথা ‘‘মহিংসকমণ্ডল’’ন্তি. পরমাণুআদি রজো. পসুগ্গহণেন এল়কজাতি গহিতা. মিগগ্গহণেন রুরুগৰযাদি মিগজাতি. গণ্ঠিম্হীতি ফল়ুম্হি, পব্বেতি অত্থো. চাতুমহারাজিকাদিব্রহ্মকাযিকাদিৰসেন, তেসঞ্চ অন্তরভেদৰসেন বহূ দেৰা. তত্থ চাতুমহারাজিকানং একচ্চঅন্তরভেদো মহাসমযসুত্তেন (দী. নি. ২.৩৩১) দীপেতব্বো. ‘‘সো পনা’’তিআদিনা অজানন্তো পনেস বহূ দেৰেপি সত্ত এৰ ৰদতীতি তস্স অপ্পমাণতং দস্সেতি. মনুস্সাপি অনন্তাতি দীপদেসকুলৰংসাজীৰাদিৰিভাগৰসেন. পিসাচা এৰ পেসাচা, তে অপরপেতাদিৰসেন মহন্তমহন্তা, বহুতরাতি অত্থো. বাহিরকসমযে পন ‘‘ছদ্দন্তদহমন্দাকিনিযো কুৰাল়িযমুচলিন্দনামেন ৰোহরিতা’’তি (দী. নি. টী. ১.১৬৮) আচরিযেন ৰুত্তং.

গণ্ঠিকাতি ¶ পব্বগণ্ঠিকা. পব্বগণ্ঠিম্হি হি পৰুটসদ্দো. মহাপপাতাতি মহাতটা. পারিসেসনযেন খুদ্দকপপাতসতানি. এৰং সুপিনেসুপি. ‘‘মহাকপ্পিনো’’তি ইদং ‘‘মহাকপ্পান’’ন্তি অত্থতো ৰেদিতব্বং. সদ্দতো পনেস অজানন্তো এৰং ৰদতীতি ন ৰিচারণক্খমং. তথা ‘‘চুল্লাসীতি সতসহস্সানী’’তি ইদম্পি. সো হি ‘‘চতুরাসীতি সতসহস্সানী’’তি ৰত্তুমসক্কোন্তো এৰং ৰদতি. সদ্দরচকা পন ‘‘চতুরাসীতিযা তুলোপো, চস্স চু, রস্স লো, দ্ৰিত্তঞ্চা’’তি ৰদন্তি. এত্তকা মহাসরাতি এতপ্পমাণৰতা মহাসরতো, সত্তমহাসরতোতি ৰুত্তং হোতি. কিরাতি তস্স ৰাদানুস্সৰনে নিপাতো. পণ্ডিতোপি…পে… ন গচ্ছতি, কস্মা? সত্তানং সংসরণকালস্স নিযতভাৰতো.

‘‘অচেলকৰতেন ৰা অঞ্ঞেন ৰা যেন কেনচী’’তি ৰুত্তমতিদিসতি ‘‘তাদিসেনেৰা’’তি ইমিনা. তপোকম্মেনাতি তপকরণেন. এত্থাপি ‘‘তাদিসেনেৰা’’তি অধিকারো. যো…পে… ৰিসুজ্ঝতি, সো অপরিপক্কং কম্মং পরিপাচেতি নামাতি যোজনা. অন্তরাতি চতুরাসীতিমহাকপ্পসতসহস্সানমব্ভন্তরে. ফুস্স ফুস্সাতি পত্ৰা পত্ৰা. ৰুত্তপরিমাণং কালন্তি চতুরাসীতিমহাকপ্পসতসহস্সপমাণং কালং. ইদং ৰুত্তং হোতি – অপরিপক্কং সংসরণনিমিত্তং কম্মং সীলাদিনা সীঘংযেৰ ৰিসুদ্ধপ্পত্তিযা ¶ পরিপাচেতি নাম. পরিপক্কং কম্মং ফুস্স ফুস্স কালেন পরিপক্কভাৰানাপাদনেন ব্যন্তিং ৰিগমনং করোতি নামাতি. দোণেনাতি পরিমিননদোণতুম্বেন. রূপকৰসেনত্থো লব্ভতীতি ৰুত্তং ‘‘মিতং ৰিযা’’তি. ন হাপনৰড্ঢনং পণ্ডিতবালৰসেনাতি দস্সেতি ‘‘ন সংসারো’’তিআদিনা. ৰড্ঢনং উক্কংসো. হাপনং অৰকংসো.

কতসুত্তগুল়েতি কতসুত্তৰট্টিযং. পলেতীতি পরেতি যথা ‘‘অভিসম্পরাযো’’তি, (মহানি. ৬৯; চূল়নি. ৮৫; পটি. ম. ৩.৪) র-কারস্স পন ল-কারং কত্ৰা এৰং ৰুত্তং যথা ‘‘পলিবুদ্ধো’’তি (চূল়নি. ১৫; মি. প. ৩.৬). সো চ চুরাদিগণৰসেন গতিযন্তি ৰুত্তং ‘‘গচ্ছতী’’তি. ইমায উপমায চেস সত্তানং সংসারো অনুক্কমেন খীযতেৰ, ন ৰড্ঢতি পরিচ্ছিন্নরূপত্তাতি ইমমত্থং ৰিভাৰেতীতি আহ ‘‘সুত্তে খীণে’’তিআদি. তত্থেৰাতি খীযনট্ঠানেযেৰ.

অজিতকেসকম্বলৰাদৰণ্ণনা

১৭১. দিন্নন্তি দেয্যধম্মসীসেন দানচেতনাযেৰ ৰুত্তা. তংমুখেন চ ফলন্তি দস্সেতি ‘‘দিন্নস্স ফলাভাৰ’’ন্তি ইমিনা. দিন্নঞ্হি মুখ্যতো অন্নাদিৰত্থু, তং কথমেস পটিক্খিপিস্সতি ¶ . এস নযো যিট্ঠং হুতন্তি এত্থাপি. সব্বসাধারণং মহাদানং মহাযাগো. পাহুনভাৰেন কত্তব্বসক্কারো পাহুনকসক্কারো. ফলন্তি আনিসংসফলং, নিস্সন্দফলঞ্চ. ৰিপাকোতি সদিসফলং. চতুরঙ্গসমন্নাগতে দানে ঠানন্তরাদিপত্তি ৰিয হি আনিসংসো, সঙ্খব্রাহ্মণস্স দানে (জা. ১.১০.৩৯) তাণলাভমত্তং ৰিয নিস্সন্দো, পটিসন্ধিসঙ্খাতং সদিসফলং ৰিপাকো. অযং লোকো, পরলোকোতি চ কম্মুনা লদ্ধব্বো ৰুত্তো ফলাভাৰমেৰ সন্ধায পটিক্খিপনতো. পচ্চক্খদিট্ঠো হি লোকো কথং তেন পটিক্খিত্তো সিযা. ‘‘সব্বে তত্থ তত্থেৰ উচ্ছিজ্জন্তী’’তি ইমিনা কারণমাহ, যত্থ যত্থ ভৰযোনিআদীসু ঠিতা ইমে সত্তা, তত্থ তত্থেৰ উচ্ছিজ্জন্তি, নিরুদযৰিনাসৰসেন ৰিনস্সন্তীতি অত্থো. তেসূতি মাতাপিতূসু. ফলাভাৰৰসেনেৰ ৰদতি, ন মাতাপিতূনং, নাপি তেসু ইদানি করিযমানসক্কারাসক্কারানমভাৰৰসেন তেসং লোকে পচ্চক্খত্তা. পুব্বুল়স্স ৰিয ইমেসং সত্তানং উপ্পাদো নাম কেৰলো, ন চৰিত্ৰা আগমনপুব্বকো অত্থীতি দস্সনত্থং ¶ ‘‘নত্থি সত্তা ওপপাতিকা’’তি ৰুত্তন্তি আহ ‘‘চৰিত্ৰা উপপজ্জনকা সত্তা নাম নত্থী’’তি. সমণেন নাম যাথাৰতো জানন্তেন কস্সচি অকথেত্ৰা সঞ্ঞতেন ভৰিতব্বং, অঞ্ঞথা অহোপুরিসিকা নাম সিযা. কিঞ্হি পরো পরস্স করিস্সতি, তথা চ অত্তনো সম্পাদনস্স কস্সচি অৰস্সযো এৰ ন সিযা তত্থ তত্থেৰ উচ্ছিজ্জনতোতি ইমমত্থং সন্ধায ‘‘যে ইমঞ্চ…পে… পৰেদেন্তী’’তি আহ. অযং অট্ঠকথাৰসেসকো অত্থো.

চতূসু মহাভূতেসু নিযুত্তো চাতুমহাভূতিকো, অত্থমত্ততো পন দস্সেতুং ‘‘চতুমহাভূতমযো’’তি ৰুত্তং. যথা হি মত্তিকায নিব্বত্তং ভাজনং মত্তিকামযং, এৰমযম্পি চতূহি মহাভূতেহি নিব্বত্তো চতুমহাভূতমযোতি ৰুচ্চতি. অজ্ঝত্তিকপথৰীধাতূতি সত্তসন্তানগতা পথৰীধাতু. বাহিরপথৰীধাতুন্তি বহিদ্ধা মহাপথৰিং, তেন পথৰীযেৰ কাযোতি দস্সেতি. অনুগচ্ছতীতি অনুবন্ধতি. উভযেনাপীতি পদদ্ৰযেনপি. উপেতি উপগচ্ছতীতি বাহিরপথৰিকাযতো তদেকদেসভূতা পথৰী আগন্ত্ৰা অজ্ঝত্তিকভাৰপ্পত্তি হুত্ৰা সত্তভাৰেন সণ্ঠিতা, সা চ মহাপথৰী ঘটাদিগতপথৰী ৰিয ইদানি তমেৰ বাহিরং পথৰিকাযং সমুদাযভূতং পুন উপেতি উপগচ্ছতি, সব্বসো তেন বাহিরপথৰিকাযেন নিব্বিসেসতং একীভাৰমেৰ গচ্ছতীতি অত্থো. আপাদীসুপি এসেৰ নযোতি এত্থ পজ্জুন্নেন মহাসমুদ্দতো গহিতআপো ৰিয ৰস্সোদকভাৰেন পুনপি মহাসমুদ্দং, সূরিযরংসিতো গহিতইন্দগ্গিসঙ্খাততেজো ৰিয পুনপি সূরিযরংসিং, মহাৰাযুক্খন্ধতো নিগ্গতমহাৰাতো ৰিয পুনপি মহাৰাযুক্খন্ধং উপেতি উপগচ্ছতীতি পরিকপ্পনামত্তেন দিট্ঠিগতিকস্স অধিপ্পাযো.

মনচ্ছট্ঠানি ¶ ইন্দ্রিযানীতি মনমেৰ ছট্ঠং যেসং চক্খুসোতঘানজিৰ্হাকাযানং, তানি ইন্দ্রিযানি. আকাসং পক্খন্দন্তি তেসং ৰিসযভাৰাতি ৰদন্তি. ৰিসযীগহণেন হি ৰিসযাপি গহিতা এৰ হোন্তি. কথং গণিতা মঞ্চপঞ্চমাতি আহ ‘‘মঞ্চো চেৰ…পে… অত্থো’’তি. আল়াহনং সুসানন্তি অত্থতো একং. গুণাগুণপদানীতি গুণদোসকোট্ঠাসানি. সরীরমেৰ ৰা পদানি তংতংকিরিযায পজ্জিতব্বতো. পারাৰতপক্খিৰণ্ণানীতি পারাৰতস্স নাম পক্খিনো ৰণ্ণানি. ‘‘পারাৰতপক্খৰণ্ণানী’’তি পাঠো, পারাৰতসকুণস্স পত্তৰণ্ণানীতি অত্থো. ভস্মন্তাতি ¶ ছারিকাপরিযন্তা. তেনাহ ‘‘ছারিকাৰসানমেৰা’’তি. আহুতিসদ্দেনেত্থ ‘‘দিন্নং যিট্ঠং হুত’’ন্তি ৰুত্তপ্পকারং দানং সব্বম্পি গহিতন্তি দস্সেতি ‘‘পাহুনকসক্কারাদিভেদং দিন্নদান’’ন্তি ইমিনা, ৰিরূপেকসেসনিদ্দেসো ৰা এস. অত্থোতি অধিপ্পাযতো অত্থো সদ্দতো তস্স অনধিগমিতত্তা. এৰমীদিসেসু. দব্বন্তি মুয্হন্তীতি দত্তূ, বালপুগ্গলা, তেহি দত্তূহি. কিং ৰুত্তং হোতীতি আহ ‘‘বালা দেন্তী’’তিআদি. পাল়িযং ‘‘লোকো অত্থী’’তি মতি যেসং তে অত্থিকা, ‘‘অত্থী’’তি চেদং নেপাতিকপদং, তেসং ৰাদো অত্থিকৰাদো, তং অত্থিকৰাদং.

তত্থাতি তেসু যথাৰুত্তেসু তীসু মিচ্ছাৰাদীসু. কম্মং পটিবাহতি অকিরিযৰাদিভাৰতো. ৰিপাকং পটিবাহতি সব্বেন সব্বং আযতিং উপপত্তিযা পটিক্খিপনতো. ৰিপাকন্তি চ আনিসংসনিস্সন্দসদিসফলৰসেন তিৰিধম্পি ৰিপাকং. উভযং পটিবাহতি সব্বসো হেতুপটিসেধনেনেৰ ফলস্সাপি পটিসেধিতত্তা. উভযন্তি চ কম্মং ৰিপাকম্পি. সো হি ‘‘অহেতূ অপ্পচ্চযা সত্তা সংকিলিস্সন্তি, ৰিসুজ্ঝন্তি চা’’তি ৰদন্তো কম্মস্স ৰিয ৰিপাকস্সাপি সংকিলেসৰিসুদ্ধীনং পচ্চযত্তাভাৰজোতনতো তদুভযং পটিবাহতি নাম. ৰিপাকো পটিবাহিতো হোতি অসতি কম্মস্মিং ৰিপাকাভাৰতো. কম্মং পটিবাহিতং হোতি অসতি ৰিপাকে কম্মস্স নিরত্থকতাপত্তিতো. ইতীতি ৰুত্তত্থনিদস্সনং. অত্থতোতি সরূপতো, ৰিসুং ৰিসুং তংতংদিট্ঠিদীপকভাৰেন পাল়িযং আগতাপি তদুভযপটিবাহকাৰাতি অত্থো. পচ্চেকং তিৰিধদিট্ঠিকা এৰ তে উভযপটিবাহকত্তা. ‘‘উভযপ্পটিবাহকা’’তি হি হেতুৰচনং হেতুগব্ভত্তা তস্স ৰিসেসনস্স. অহেতুকৰাদা চেৰাতিআদি পটিঞ্ঞাৰচনং তপ্ফলভাৰেন নিচ্ছিতত্তা. তস্মা ৰিপাকপটিবাহকত্তা নত্থিকৰাদা, কম্মপটিবাহকত্তা অকিরিযৰাদা, তদুভযপটিবাহকত্তা অহেতুকৰাদাতি যথালাভং হেতুফলতাসম্বন্ধো ৰেদিতব্বো. যো হি ৰিপাকপটিবাহনেন নত্থিকদিট্ঠিকো উচ্ছেদৰাদী, সো অত্থতো কম্মপটিবাহনেন অকিরিযদিট্ঠিকো, উভযপটিবাহনেন অহেতুকদিট্ঠিকো চ হোতি. সেসদ্ৰযেপি এসেৰ নযো.

‘‘যে ৰা পনা’’তিআদিনা তেসমনুদিট্ঠিকানং নিযামোক্কন্তিৰিনিচ্ছযো ৰুত্তো. তত্থ তেসন্তি ¶ পূরণাদীনং. সজ্ঝাযন্তীতি তং দিট্ঠিদীপকং গন্থং যথা ¶ তথা তেহি কতং উগ্গহেত্ৰা পঠন্তি. ৰীমংসন্তীতি তস্স অত্থং ৰিচারেন্তি. ‘‘তেস’’ন্তিআদি ৰীমংসনাকারদস্সনং. ‘‘করোতো…পে… উচ্ছিজ্জতী’’তি এৰং ৰীমংসন্তানং তেসন্তি সম্বন্ধো. তস্মিং আরম্মণেতি যথাপরিকপ্পিতে কম্মফলাভাৰাদিকে ‘‘করোতো ন করীযতি পাপ’’ন্তিআদি নযপ্পৰত্তায মিচ্ছাদস্সনসঙ্খাতায লদ্ধিযা আরম্মণে. মিচ্ছাসতি সন্তিট্ঠতীতি মিচ্ছাসতিসঙ্খাতা লদ্ধিসহগতা তণ্হা সন্তিট্ঠতি. ‘‘করোতো ন করীযতি পাপ’’ন্তিআদিৰসেন হি অনুস্সৰূপলদ্ধে অত্থে তদাকারপরিৰিতক্কনেহি সৰিগ্গহে ৰিয সরূপতো চিত্তস্স পচ্চুপট্ঠিতে চিরকালপরিচযেন ‘‘এৰমেত’’ন্তি নিজ্ঝানক্খমভাৰূপগমনে, নিজ্ঝানক্খন্তিযা চ তথা তথা গহিতে পুনপ্পুনং তথেৰ আসেৰন্তস্স বহুলীকরোন্তস্স মিচ্ছাৰিতক্কেন সমানীযমানা মিচ্ছাৰাযামুপত্থম্ভিতা অতংসভাৰম্পি ‘‘তংসভাৰ’’ন্তি গণ্হন্তী মিচ্ছালদ্ধিসহগতা তণ্হা মুসা ৰিতথং সরণতো পৰত্তনতো মিচ্ছাসতীতি ৰুচ্চতি. চতুরঙ্গুত্তরটীকাযম্পি (অ. নি. অট্ঠ. ২.৪.৩০) চেস অত্থো ৰুত্তোযেৰ. মিচ্ছাসঙ্কপ্পাদযো ৰিয হি মিচ্ছাসতি নাম পাটিযেক্কো কোচি ধম্মো নত্থি, তণ্হাসীসেন গহিতানং চতুন্নম্পি অকুসলক্খন্ধানমেতং অধিৰচনন্তি মজ্ঝিমাগমট্ঠকথাযম্পি সল্লেখসুত্তৰণ্ণনাযং (ম. নি. অট্ঠ. ১.৮৩) ৰুত্তং.

চিত্তং একগ্গং হোতীতি যথাসকং ৰিতক্কাদিপচ্চযলাভেন তস্মিং আরম্মণে অৰট্ঠিততায অনেকগ্গতং পহায একগ্গং অপ্পিতং ৰিয হোতি, চিত্তসীসেন চেত্থ মিচ্ছাসমাধি এৰ ৰুত্তো. সো হি পচ্চযৰিসেসেহি লদ্ধভাৰনাবলো ঈদিসে ঠানে সমাধানপতিরূপককিচ্চকরোযেৰ হোতি ৰালৰিজ্ঝনাদীসু ৰিযাতি দট্ঠব্বং. জৰনানি জৰন্তীতি অনেকক্খত্তুং তেনাকারেন পুব্বভাগিযেসু জৰনৰারেসু পৰত্তেসু সন্নিট্ঠানভূতে সব্বপচ্ছিমে জৰনৰারে সত্ত জৰনানি জৰন্তি. ‘‘পঠমজৰনে সতেকিচ্ছা হোন্তি, তথা দুতিযাদীসূ’’তি ইদং ধম্মসভাৰদস্সনমেৰ, ন পন তস্মিং খণে তেসং তিকিচ্ছা কেনচি সক্কা কাতুন্তি দস্সনং তেস্ৰেৰ ঠত্ৰা সত্তমজৰনস্স অৰস্সমুপ্পজ্জমানস্স নিৰত্তিতুং অসক্কুণেয্যত্তা, এৰং লহুপরিৰত্তে চ চিত্তৰারে ওৰাদানুসাসন ৰসেন তিকিচ্ছায অসম্ভৰতো. তেনাহ ‘‘বুদ্ধানম্পি অতেকিচ্ছা অনিৰত্তিনো’’তি ¶ . অরিট্ঠকণ্টকসদিসাতি অরিট্ঠভিক্খুকণ্টকসামণেরসদিসা, তে ৰিয অতেকিচ্ছা অনিৰত্তিনো মিচ্ছাদিট্ঠিগতিকাযেৰ জাতাতি ৰুত্তং হোতি.

তত্থাতি তেসু তীসু মিচ্ছাদস্সনেসু. কোচি একং দস্সনং ওক্কমতীতি যস্স একস্মিংযেৰ অভিনিৰেসো, আসেৰনা চ পৰত্তা, সো একমেৰ দস্সনং ওক্কমতি. কোচি দ্ৰে, কোচি তীণিপীতি যস্স দ্ৰীসু, তীসুপি ৰা অভিনিৰেসো, আসেৰনা চ পৰত্তা, সো দ্ৰে ¶ , তীণিপি ওক্কমতি, এতেন পন ৰচনেন যা পুব্বে ‘‘ইতি সব্বেপেতে অত্থতো উভযপ্পটিবাহকা’’তিআদিনা উভযপ্পটিবাহকতামুখেন দীপিতা অত্থতো সিদ্ধা সব্বদিট্ঠিকতা, সা পুব্বভাগিযা. যা পন মিচ্ছত্তনিযামোক্কন্তিভূতা, সা যথাসকং পচ্চযসমুদাগমসিদ্ধিতো ভিন্নারম্মণানং ৰিয ৰিসেসাধিগমানং একজ্ঝং অনুপ্পত্তিযা অঞ্ঞমঞ্ঞং অব্বোকিণ্ণা এৰাতি দস্সেতি. ‘‘একস্মিং ওক্কন্তেপী’’তিআদিনা তিস্সন্নম্পি দিট্ঠীনং সমানসামত্থিযতং, সমানফলতঞ্চ ৰিভাৰেতি. সগ্গাৰরণাদিনা হেতা সমানসামত্থিযা চেৰ সমানফলা চ, তস্মা তিস্সোপি চেতা একস্স উপ্পন্নাপি অব্বোকিণ্ণা এৰ, একায ৰিপাকে দিন্নে ইতরা তস্সা অনুবলপ্পদাযিকাযোতি দট্ঠব্বং. ‘‘পত্তো সগ্গমগ্গাৰরণঞ্চেৰা’’তিআদিং ৰত্ৰা ‘‘অভব্বো’’তিআদিনা তদেৰত্থং আৰিকরোতি. মোক্খমগ্গাৰরণন্তি নিব্বানপথভূতস্স অরিযমগ্গস্স নিৰারণং. পগেৰাতি পটিক্খেপত্থে নিপাতো, মোক্খসঙ্খাতং পন নিব্বানং গন্তুং কা নাম কথাতি অত্থো. অপিচ পগেৰাতি পা এৰ, পঠমতরমেৰ মোক্খং গন্তুমভব্বো, মোক্খগমনতোপি দূরতরমেৰাতি ৰুত্তং হোতি. এৰমঞ্ঞত্থাপি যথারহং.

‘‘ৰট্টখাণু নামেস সত্তো’’তি ইদং ৰচনং নেয্যত্থমেৰ, ন নীতত্থং. তথা হি ৰুত্তং পপঞ্চসূদনিযং নাম মজ্ঝিমাগমট্ঠকথাযং ‘‘কিং পনেস একস্মিংযেৰ অত্তভাৰে নিযতো হোতি, উদাহু অঞ্ঞস্মিম্পীতি? একস্মিংযেৰ নিযতো, আসেৰনৰসেন পন ভৰন্তরেপি তং তং দিট্ঠিং রোচেতিযেৰা’’তি (ম. নি. অট্ঠ. ৩.১০৩). অকুসলঞ্হি নামেতং অবলং দুব্বলং, ন কুসলং ৰিয সবলং মহাবলং, তস্মা ‘‘একস্মিংযেৰ অত্তভাৰে নিযতো’’তি তত্থ ৰুত্তং. অঞ্ঞথা সম্মত্তনিযামো ৰিয মিচ্ছত্তনিযামোপি অচ্চন্তিকো সিযা, ন চ অচ্চন্তিকো. যদেৰং ৰট্টখাণুজোতনা কথং যুজ্জেয্যাতি আহ ¶ ‘‘আসেৰনৰসেনা’’তিআদি, তস্মা যথা সত্তঙ্গুত্তরপাল়িযং ‘‘সকিং নিমুগ্গোপি নিমুগ্গো এৰ বালো’’তি [অ. নি. ৭.১৫ (অত্থতো সমানং)] ৰুত্তং, এৰং ৰট্টখাণুজোতনাপি ৰুত্তা. যাদিসে হি পচ্চযে পটিচ্চ অযং তং তং দস্সনং ওক্কন্তো, পুন কদাচি তপ্পটিপক্খে পচ্চযে পটিচ্চ ততো সীসুক্খিপনমস্স ন হোতীতি ন ৰত্তব্বং. তস্মা তত্থ, (ম. নি. অট্ঠ. ৩.১০২) ইধ চ অট্ঠকথাযং ‘‘এৰরূপস্স হি যেভুয্যেন ভৰতো ৰুট্ঠানং নাম নত্থী’’তি যেভুয্যগ্গহণং কতং, ইতি আসেৰনৰসেন ভৰন্তরেপি তংতংদিট্ঠিযা রোচনতো যেভুয্যেনস্স ভৰতো ৰুট্ঠানং নত্থীতি কত্ৰা ৰট্টখাণুকো নামেস জাতো, ন পন মিচ্ছত্তনিযামস্স অচ্চন্তিকতাযাতি নীহরিত্ৰা ঞাতব্বত্থতায নেয্যত্থমিদং, ন নীতত্থন্তি ৰেদিতব্বং. যং সন্ধায অভিধম্মেপি ‘‘অরহা, যে চ পুথুজ্জনা মগ্গং ন পটিলভিস্সন্তি, তে রূপক্খন্ধঞ্চ ন পরিজানন্তি, ৰেদনাক্খন্ধঞ্চ ন পরিজানিস্সন্তী’’তিআদি ¶ (যম. ১.খন্ধযমক ২১০) ৰুত্তং. পথৰিগোপকোতি যথাৰুত্তকারণেন পথৰিপালকো. তদত্থং সমত্থেতুং ‘‘যেভুয্যেনা’’তিআদি ৰুত্তং.

এৰং মিচ্ছাদিট্ঠিযা পরমসাৰজ্জানুসারেন সোতূনং সতিমুপ্পাদেন্তো ‘‘তস্মা’’তিআদিমাহ. তত্থ তস্মাতি যস্মা এৰং সংসারখাণুভাৰস্সাপি পচ্চযো অপণ্ণকজাতো, তস্মা পরিৰজ্জেয্যাতি সম্বন্ধো. অকল্যাণজনন্তি কল্যাণধম্মৰিরহিতজনং অসাধুজনং. আসীৰিসন্তি আসুমাগতহলাহলং. ভূতিকামোতি দিট্ঠধম্মিকসম্পরাযিকপরমত্থানং ৰসেন অত্তনো গুণেহি ৰুড্ঢিকামো. ৰিচক্খণোতি পঞ্ঞাচক্খুনা ৰিৰিধত্থস্স পস্সকো, ধীরোতি অত্থো.

পকুধকচ্চাযনৰাদৰণ্ণনা

১৭৪. ‘‘অকটা’’তি এত্থ ত-কারস্স ট-কারাদেসোতি আহ ‘‘অকতা’’তি, সমেন, ৰিসমেন ৰা কেনচিপি হেতুনা অকতা, ন ৰিহিতাতি অত্থো. তথা অকটৰিধাতি এত্থাপি. নত্থি কতৰিধো করণৰিধি এতেসন্তি অকটৰিধা. পদদ্ৰযেনাপি লোকে কেনচি হেতুপচ্চযেন নেসং অনিব্বত্তভাৰং দস্সেতি. তেনাহ ‘‘এৰং করোহী’’তিআদি. ইদ্ধিযাপি ন নিম্মিতাতি কস্সচি ইদ্ধিমতো চেতোৰসিপ্পত্তস্স পুগ্গলস্স, দেৰস্স, ইস্সরাদিনো চ ইদ্ধিযাপি ন নিম্মিতা. অনিম্মাপিতাতি কস্সচি ¶ অনিম্মাপিতা. কামং সদ্দতো যুত্তং, অত্থতো চ পুরিমেন সমানং, তথাপি পাল়িযমট্ঠকথাযঞ্চ অনাগতমেৰ অগহেতব্বভাৰে কারণন্তি দস্সেতি ‘‘তং নেৰ পাল়িয’’ন্তিআদিনা.

ব্রহ্মজালসুত্তসংৰণ্ণনাযং (দী. নি. অট্ঠ. ১.৩০) ৰুত্তত্থমেৰ. ইদমেত্থ যোজনামত্তং – ৰঞ্ঝাতি হি ৰঞ্ঝপসুৰঞ্ঝতালাদযো ৰিয অফলা কস্সচি অজনকা, তেন পথৰিকাযাদীনং রূপাদিজনকভাৰং পটিক্খিপতি. রূপসদ্দাদযো হি পথৰিকাযাদীহি অপ্পটিবদ্ধৰুত্তিকাতি তস্স লদ্ধি. পব্বতস্স কূটমিৰ ঠিতাতি কূটট্ঠা, যথা পব্বতকূটং কেনচি অনিব্বত্তিতং কস্সচি চ অনিব্বত্তকং, এৰমেতেপি সত্তকাযাতি অধিপ্পাযো. যমিদং ‘‘বীজতো অঙ্কুরাদি জাযতী’’তি ৰুচ্চতি, তং ৰিজ্জমানমেৰ ততো নিক্খমতি, ন অৰিজ্জমানং, ইতরথা অঞ্ঞতোপি অঞ্ঞস্স উপলদ্ধি সিযা, এৰমেতেপি সত্তকাযা, তস্মা এসিকট্ঠাযিট্ঠিতাতি. ঠিতত্তাতি নিব্বিকারভাৰেন সুপ্পতিট্ঠিতত্তা. ন চলন্তীতি ন ৰিকারমাপজ্জন্তি. ৰিকারাভাৰতো হি তেসং সত্তন্নং কাযানং এসিকট্ঠাযিট্ঠিততা, অনিঞ্জনঞ্চ অত্তনো পকতিযা অৰট্ঠানমেৰ. তেনাহ ‘‘ন ৰিপরিণমন্তী’’তি. পকতিন্তি সভাৰং ¶ . অৰিপরিণামধম্মত্তা এৰ ন অঞ্ঞমঞ্ঞং উপহনন্তি. সতি হি ৰিকারমাপাদেতব্বভাৰে উপঘাতকতা সিযা, তথা অনুগ্গহেতব্বভাৰে সতি অনুগ্গাহকতাপীতি তদভাৰং দস্সেতুং পাল়িযং ‘‘নাল’’ন্তিআদি ৰুত্তং. পথৰীযেৰ কাযেকদেসত্তা পথৰিকাযো যথা ‘‘সমুদ্দো দিট্ঠো’’তি, পথৰিসমূহো ৰা কাযসদ্দস্স সমূহৰাচকত্তা যথা ‘‘হত্থিকাযো’’তি. জীৰসত্তমানং কাযানং নিচ্চতায নিব্বিকারভাৰতো ন হন্তব্বতা, ন ঘাতেতব্বতা চ, তস্মা নেৰ কোচি হন্তা, ঘাতেতা ৰা অত্থীতি দস্সেতুং পাল়িযং ‘‘সত্তন্নং ত্ৰেৰ কাযান’’ন্তিআদি ৰুত্তং. যদি কোচি হন্তা নত্থি, কথং তেসং সত্থপ্পহারোতি তত্থ চোদনাযাহ ‘‘যথা’’তিআদি. তত্থ সত্তন্নং ত্ৰেৰাতি সত্তন্নমেৰ. ইতিসদ্দো হেত্থ নিপাতমত্তং. পহতন্তি পহরিতং. একতোধারাদিকং সত্থং. অন্তরেনেৰ পৰিসতি, ন তেসু. ইদং ৰুত্তং হোতি – কেৰলং ‘‘অহং ইমং জীৰিতা ৰোরোপেমী’’তি তেসং তথা সঞ্ঞামত্তমেৰ, হননঘাতনাদি পন পরমত্থতো নত্থেৰ কাযানং অৰিকোপনীযভাৰতোতি.

নিগণ্ঠনাটপুত্তৰাদৰণ্ণনা

১৭৭. চত্তারো ¶ যামা ভাগা চতুযামং, চতুযামং এৰ চাতুযামং. ভাগত্থো হি ইধ যাম-সদ্দো যথা ‘‘রত্তিযা পঠমো যামো’’তি (সং. নি. অট্ঠ. ৩.৩৬৮). সো পনেত্থ ভাগো সংৰরলক্খিতোতি আহ ‘‘চতুকোট্ঠাসেন সংৰরেন সংৰুতো’’তি, সংযমত্থো ৰা যামসদ্দো যমনং সঞ্ঞমনং যামোতি কত্ৰা. ‘‘যতত্তো’’তিআদীসু ৰিয হি অনুপসগ্গোপি সউপসগ্গো ৰিয সঞ্ঞমত্থৰাচকো, সো পন চতূহি আকারেহীতি আহ ‘‘চতুকোট্ঠাসেন সংৰরেনা’’তি. আকারো কোট্ঠাসোতি হি অত্থতো একং. ৰারিতো সব্বৰারি যস্সাযং সব্বৰারিৰারিতো যথা ‘‘অগ্যাহিতো’’তি. তেনাহ ‘‘ৰারিতসব্বউদকো’’তি. ৰারিসদ্দেন চেত্থ ৰারিপরিভোগো ৰুত্তো যথা ‘‘রত্তূপরতো’’তি. পটিক্খিত্তো সব্বসীতোদকো তপ্পরিভোগো যস্সাতি তথা. তন্তি সীতোদকং. সব্বৰারিযুত্তোতি সংৰরলক্খণমত্তং কথিতং. সব্বৰারিধুতোতি পাপনিজ্জরলক্খণং. সব্বৰারিফুটোতি কম্মক্খযলক্খণন্তি ইমমত্থং দস্সেন্তো ‘‘সব্বেনা’’তিআদিমাহ, সব্বেন পাপৰারণেন যুত্তোতি হি সব্বপ্পকারেন সংৰরলক্খণেন পাপৰারণেন সমন্নাগতো. ধুতপাপোতি সব্বেন নিজ্জরলক্খণেন পাপৰারণেন ৰিধুতপাপো. ফুট্ঠোতি অট্ঠন্নম্পি কম্মানং খেপনেন মোক্খপ্পত্তিযা কম্মক্খযলক্খণেন সব্বেন পাপৰারণেন ফুট্ঠো, তং পত্ৰা ঠিতোতি অত্থো. ‘‘দ্ৰেযেৰ গতিযো ভৰন্তি, অনঞ্ঞা’’তিআদীসু (দী. নি. ১.২৫৮; ২.৩৪; ৩.১৯৯, ২০০; ম. নি. ২.৩৮৪, ৩৯৮) ৰিয গমুসদ্দো নিট্ঠানত্থোতি ৰুত্তং ‘‘কোটিপ্পত্তচিত্তো’’তি, মোক্খাধিগমেন উত্তমমরিযাদপ্পত্তচিত্তোতি অত্থো. কাযাদীসু ইন্দ্রিযেসু সংযমেতব্বস্স অভাৰতো ¶ সংযতচিত্তো. অতীতে হেত্থ ত-সদ্দো. সংযমেতব্বস্স অৰসেসস্স অভাৰতো সুপ্পতিট্ঠিতচিত্তো. কিঞ্চি সাসনানুলোমন্তি পাপৰারণং সন্ধায ৰুত্তং. অসুদ্ধলদ্ধিতাযাতি ‘‘অত্থি জীৰো, সো চ সিযা নিচ্চো, সিযা অনিচ্চো’’তি (দী. নি. টী. ১.১৭৭). এৰমাদিমলীনলদ্ধিতায. সব্বাতি কম্মপকতিৰিভাগাদিৰিসযাপি সব্বা নিজ্ঝানক্খন্তিযো. দিট্ঠিযেৰাতি মিচ্ছাদিট্ঠিযো এৰ জাতা.

সঞ্চযবেলট্ঠপুত্তৰাদৰণ্ণনা

১৭৯-১৮১. অমরাৰিক্খেপে ¶ ৰুত্তনযো এৰাতি ব্রহ্মজালে অমরাৰিক্খেপৰাদৰণ্ণনাযং (দী. নি. অট্ঠ. ১.৬১) ৰুত্তনযো এৰ. কস্মা? ৰিক্খেপব্যাকরণভাৰতো, তথেৰ চ তত্থ ৰিক্খেপৰাদস্স আগতত্তা.

পঠমসন্দিট্ঠিকসামঞ্ঞফলৰণ্ণনা

১৮২. পীল়েত্ৰাতি তেলযন্তেন উপ্পীল়েত্ৰা, ইমিনা রঞ্ঞো আভোগমাহ. ৰদতো হি আভোগৰসেন সব্বত্থ অত্থনিচ্ছযো. অট্ঠকথাচরিযা চ তদাভোগঞ্ঞূ, পরম্পরাভতত্থস্সাৰিরোধিনো চ, তস্মা সব্বত্থ যথা তথা ৰচনোকাসলদ্ধভাৰমত্তেন অত্থো ন ৰুত্তো, অথ খো তেসং ৰত্তুমিচ্ছিতৰসেনাতি গহেতব্বং, এৰঞ্চ কত্ৰা তত্থ তত্থ অত্থুদ্ধারাদিৰসেন অত্থৰিৰেচনা কতাতি.

১৮৩. যথা তে রুচ্চেয্যাতি ইদানি মযা পুচ্ছিযমানো অত্থো যথা তৰ চিত্তে রুচ্চেয্য, তযা চিত্তে রুচ্চেথাতি অত্থো. কম্মত্থে হেতং কিরিযাপদং. মযা ৰা দানি পুচ্ছিযমানমত্থং তৰ সম্পদানভূতস্স রোচেয্যাতিপি ৰট্টতি. ঘরদাসিযা কুচ্ছিস্মিং জাতো অন্তোজাতো. ধনেন কীতো ধনক্কীতো. বন্ধগ্গাহগহিতো করমরানীতো. সামমেৰ যেন কেনচি হেতুনা দাসভাৰমুপগতো সামংদাসব্যোপগতো. সামন্তি হি সযমেৰ. দাসব্যন্তি দাসভাৰং. কোচি দাসোপি সমানো অলসো কম্মং অকরোন্তো ‘‘কম্মকারো’’তি ন ৰুচ্চতি, সো পন ন তথাভূতোতি ৰিসেসনমেতন্তি আহ ‘‘অনলসো’’তিআদি. দূরতোতি দূরদেসতো আগতং. পঠমমেৰাতি অত্তনো আসন্নতরট্ঠানুপসঙ্কমনতো পগেৰ পুরেতরমেৰ. উট্ঠহতীতি গারৰৰসেন উট্ঠহিত্ৰা তিট্ঠতি, পচ্চুট্ঠাতীতি ৰা অত্থো. পচ্ছাতি সামিকস্স নিপজ্জায পচ্ছা. সযনতো অৰুট্ঠিতেতি রত্তিযা ৰিভাযনৰেলায সেয্যতো অৰুট্ঠিতে. পচ্চূসকালতোতি অতীতরত্তিযা পচ্চূসকালতো ¶ . যাৰ সামিনো রত্তিং নিদ্দোক্কমনন্তি অপরায ভাৰিনিযা রত্তিযা পদোসৰেলাযং যাৰ নিদ্দোক্কমনং. যা অতীতরত্তিযা পচ্চূসৰেলা, ভাৰিনিযা চ পদোসৰেলা, এত্থন্তরে সব্বকিচ্চং কত্ৰা পচ্ছা নিপততীতি ৰুত্তং ¶ হোতি. কিং কারমেৰাতি কিং করণীযমেৰ কিন্তি পুচ্ছায কাতব্বতো, পুচ্ছিত্ৰা কাতব্বৰেয্যাৰচ্চন্তি অত্থো. পটিস্সৰেনেৰ সমীপচারিতা ৰুত্তাতি আহ ‘‘পটিসুণন্তো ৰিচরতী’’তি. পটিকুদ্ধং মুখং ওলোকেতুং ন ৰিসহতীতিপি দস্সেতি ‘‘তুট্ঠপহট্ঠ’’ন্তি ইমিনা.

দেৰো ৰিযাতি আধিপচ্চপরিৰারাদিসমন্নাগতো পধানদেৰো ৰিয, তেন মঞ্ঞে-সদ্দো ইধ উপমত্থোতি ঞাপেতি যথা ‘‘অক্খাহতং মঞ্ঞে অট্ঠাসি রঞ্ঞো মহাসুদস্সনস্স অন্তেপুরং উপসোভযমান’’ন্তি (দী. নি. ২.২৪৫). সো ৰতস্সাহন্তি এত্থ সো ৰত অস্সং অহন্তি পদচ্ছেদো, সো রাজা ৰিয অহম্পি ভৰেয্যং. কেনাতি চে? যদি পুঞ্ঞানি করেয্যং, তেনাতি অত্থোতি আহ ‘‘সো ৰত অহ’’ন্তিআদি. ৰতসদ্দো উপমাযং. তেনাহ ‘‘এৰরূপো’’তি. পুঞ্ঞানীতি উল়ারতরং পুঞ্ঞং সন্ধায ৰুত্তং অঞ্ঞদা কতপুঞ্ঞতো উল়ারায পব্বজ্জায অধিপ্পেতত্তা. ‘‘সো ৰতস্সায’’ন্তিপি পাঠে সো রাজা ৰিয অযং অহম্পি অস্সং. কথং? ‘‘যদি পুঞ্ঞানি করেয্য’’ন্তি অত্থসম্ভৰতো ‘‘অযমেৰত্থো’’তি ৰুত্তং. অস্সন্তি হি উত্তমপুরিসযোগে অহং-সদ্দো অপ্পযুত্তোপি অযং-সদ্দেন পরামসনতো পযুত্তো ৰিয হোতি. সো অহং এৰরূপো অস্সং ৰত, যদি পুঞ্ঞানি করেয্যন্তি পঠমপাঠস্স অত্থমিচ্ছন্তি কেচি. এৰং সতি দুতিযপাঠে ‘‘অযমেৰত্থো’’তি অৰত্তব্বো সিযা তত্থ অযং-সদ্দেন অহং-সদ্দস্স পরামসনতো, ‘‘সো’’তি চ পরামসিতব্বস্স অঞ্ঞস্স সম্ভৰতো. যন্তি দানং. সতভাগম্পীতি সতভূতং ভাগম্পি, রঞ্ঞা দিন্নদানং সতধা কত্ৰা তত্থ একভাগম্পীতি ৰুত্তং হোতি. যাৰজীৰং ন সক্খিস্সামি দাতুন্তি যাৰজীৰং দানত্থায উস্সাহং করোন্তোপি সতভাগমত্তম্পি দাতুং ন সক্খিস্সামি, তস্মা পব্বজিস্সামীতি পব্বজ্জাযং উস্সাহং কত্ৰাতি অত্থো. ‘‘যংনূনা’’তি নিপাতো পরিৰিতক্কনত্থেতি ৰুত্তং ‘‘এৰং চিন্তনভাৰ’’ন্তি.

কাযেন পিহিতোতি কাযেন সংৰরিতব্বস্স কাযদ্ৰারেন পৰত্তনকস্স পাপধম্মস্স সংৰরণৰসেন পিদহিতো. উস্সুক্কৰচনৰসেন পনত্থো ৰিহরেয্য-পদেন সম্বজ্ঝিতব্বত্তাতি আহ ‘‘অকুসলপৰেসনদ্ৰারং থকেত্ৰা’’তি. হুত্ৰাতি হি সেসো. অকুসলপৰেসনদ্ৰারন্তি চ কাযকম্মভূতানমকুসলানং পৰেসনভূতং কাযৰিঞ্ঞত্তিসঙ্খাতং দ্ৰারং. সেসপদদ্ৰযেপীতি ¶ ‘‘ৰাচায সংৰুতো, মনসা সংৰুতো’’তি পদদ্ৰযেপি. ঘাসচ্ছাদনেন পরমতাযাতি ঘাসচ্ছাদনপরিযেসনে সল্লেখৰসেন পরমতায, উক্কট্ঠভাৰে ৰা সণ্ঠিতো ঘাসচ্ছাদনমত্তমেৰ পরমং পমাণং কোটি এতস্স ¶ , ন ততো পরং কিঞ্চি আমিসজাতং পরিযেসতি, পচ্চাসিসতি চাতি ঘাসচ্ছাদনপরমো, তস্স ভাৰো ঘাসচ্ছাদনপরমতাতিপি অট্ঠকথামুত্তকো নযো. ঘসিতব্বো অসিতব্বোতি ঘাসো, আহারো, আভুসো ছাদেতি পরিদহতি এতেনাতি অচ্ছাদনং, নিৰাসনং, অপিচ ঘসনং ঘাসো, আভুসো ছাদীযতে অচ্ছাদনন্তিপি যুজ্জতি. এতদত্থম্পীতি ঘাসচ্ছাদনত্থাযাপি. অনেসনন্তি একৰীসতিৰিধম্পি অননুরূপমেসনং.

ৰিৰেকট্ঠকাযানন্তি গণসঙ্গণিকতো পৰিৰিত্তে ঠিতকাযানং, সম্বন্ধীভূতানং কাযৰিৰেকোতি সম্বন্ধো. নেক্খম্মাভিরতানন্তি ঝানাভিরতানং. পরমৰোদানপ্পত্তানন্তি তায এৰ ঝানাভিরতিযা পরমং উত্তমং ৰোদানং চিত্তৰিসুদ্ধিং পত্তানং. নিরুপধীনন্তি কিলেসূপধিঅভিসঙ্খারূপধীহি অচ্চন্তৰিগতানং. ৰিসঙ্খারং ৰুচ্চতি নিব্বানং, তদধিগমনেতা ৰিসঙ্খারগতা, অরহন্তো, তেসং. ‘‘এৰং ৰুত্তে’’তি ইমিনা মহানিদ্দেসে (মহানি. ৭, ৯) আগতভাৰং দস্সেতি. এত্থ চ পঠমো ৰিৰেকো ইতরেহি দ্ৰীহি ৰিৰেকেহি সহাপি ৰত্তব্বো ইতরেসু সিদ্ধেসু তস্সাপি সিজ্ঝনতো, ৰিনা চ তস্মিং সিদ্ধেপি ইতরে সমসিজ্ঝনতো. তথা দুতিযোপি. ততিযো পন ইতরেহি সহেৰ ৰত্তব্বো. ন ৰিনা ইতরেসু সিদ্ধেসুযেৰ তস্স সিজ্ঝনতোতি দট্ঠব্বং. ‘‘গণসঙ্গণিকং পহাযা’’তিআদি তদধিপ্পাযৰিভাৰনং. তত্থ গণে জনসমাগমে সন্নিপতনং গণসঙ্গণিকা, তং পহায. কাযেন একো ৰিহরতি ৰিচরতি পুগ্গলৰসেন অসহাযত্তা. চিত্তে কিলেসানং সন্নিপতনং চিত্তকিলেসসঙ্গণিকা, তং পহায. একো ৰিহরতি কিলেসৰসেন অসহাযত্তা. মগ্গস্স একচিত্তক্খণিকত্তা, গোত্রভুআদীনঞ্চ আরম্মণকরণমত্তত্তা ন তেসং ৰসেন সাতিসযা নিব্বুতিসুখসম্ফুসনা, ফলসমাপত্তিনিরোধসমাপত্তিৰসেন পন সাতিসযাতি আহ ‘‘ফলসমাপত্তিং ৰা নিরোধসমাপত্তিং ৰা’’তি. ফলপরিযোসানো হি নিরোধো. পৰিসিত্ৰাতি সমাপজ্জনৰসেন অন্তোকত্ৰা. নিব্বানং পত্ৰাতি এত্থ উস্সুক্কৰচনমেতং আরম্মণকরণেন, চিত্তচেতসিকানং নিরোধেন চ ¶ নিব্বুতিপজ্জনস্স অধিপ্পেতত্তা. চোদনত্থেতি জানাপেতুং উস্সাহকরণত্থে.

১৮৪. অভিহরিত্ৰাতি অভিমুখভাৰেন নেত্ৰা. নন্তি তথা পব্বজ্জায ৰিহরন্তং. অভিহারোতি নিমন্তনৰসেন অভিহরণং. ‘‘চীৰরাদীহি পযোজনং সাধেস্সামী’’তি ৰচনসেসেন যোজনা. তথা ‘‘যেনত্থো, তং ৰদেয্যাথা’’তি. চীৰরাদিৰেকল্লন্তি চীৰরাদীনং লূখতায ৰিকলভাৰং. তদুভযম্পীতি তদেৰ অভিহারদ্ৰযম্পি. সপ্পাযন্তি সব্বগেলঞ্ঞাপহরণৰসেন উপকারাৰহং. ভাৰিনো অনত্থস্স অজননৰসেন পরিপালনং রক্খাগুত্তি. পচ্চুপ্পন্নস্স পন অনত্থস্স ¶ নিসেধৰসেন পরিপালনং আৰরণগুত্তি. কিমত্থিযং ‘‘ধম্মিক’ন্তি ৰিসেসনন্তি আহ ‘‘সা পনেসা’’তিআদি. ৰিহারসীমাযাতি উপচারসীমায, লাভসীমায ৰা.

১৮৫. কেৰলো যদি-এৰং-সদ্দো পুব্বে ৰুত্তত্থাপেক্খকোতি ৰুত্তং ‘‘যদি তৰ দাসো’’তিআদি. এৰং সন্তেতি এৰং লব্ভমানে সতি. দুতিযং উপাদায পঠমভাৰো, তস্মা ‘‘পঠম’’ন্তি ভণন্তো অঞ্ঞস্সাপি অত্থিতং দীপেতি. তদেৰ চ কারণং কত্ৰা রাজাপি এৰমাহাতি দস্সেতুং ‘‘পঠমন্তি ভণন্তো’’তিআদি ৰুত্তং. তেনেৰাতি পঠমসদ্দেন অঞ্ঞস্সাপি অত্থিতাদীপনেনেৰ.

দুতিযসন্দিট্ঠিকসামঞ্ঞফলৰণ্ণনা

১৮৬. কসতীতি ৰিলেখতি কসিং করোতি. গহপতিকোতি এত্থ ক-সদ্দো অপ্পত্থোতি ৰুত্তং ‘‘একগেহমত্তে জেট্ঠকো’’তি. ইদং ৰুত্তং হোতি – গহস্স পতি গহপতি, খুদ্দকো গহপতি গহপতিকো একস্মিঞ্ঞেৰ গেহমত্তে জেট্ঠকত্তাতি, খুদ্দকভাৰো পনস্স গেহৰসেনেৰাতি কত্ৰা ‘‘একগেহমত্তে’’তি ৰুত্তং. তেন হি অনেককুলজেট্ঠকভাৰং পটিক্খিপতি, গহং, গেহন্তি চ অত্থতো সমানমেৰ. করসদ্দো বলিম্হীতি ৰুত্তং ‘‘বলিসঙ্খাত’’ন্তি. করোতীতি অভিনিপ্ফাদেতি সম্পাদেতি. ৰড্ঢেতীতি উপরূপরি উপ্পাদনেন মহন্তং সন্নিচযং করোতি.

কস্মা তদুভযম্পি ৰুত্তন্তি আহ ‘‘যথা হী’’তিআদি. অপ্পম্পি পহায পব্বজিতুং দুক্করন্তি দস্সনঞ্চ পগেৰ মহন্তন্তি ৰিঞ্ঞাপনত্থং. এসা হি কথিকানং ¶ পকতি, যদিদং যেন কেনচি পকারেন অত্থন্তরৰিঞ্ঞাপনন্তি. অপ্পম্পি পহায পব্বজিতুং দুক্করভাৰো পন মজ্ঝিমনিকাযে মজ্ঝিমপণ্ণাসকে লটুকিকোপমসুত্তেন (ম. নি. ২.১৪৮ আদযো) দীপেতব্বো. ৰুত্তঞ্হি তত্থ ‘‘সেয্যথাপি উদাযি পুরিসো দলিদ্দো অস্সকো অনাল়্হিযো, তস্স’স্স একং অগারকং ওলুগ্গৰিলুগ্গং কাকাতিদাযিং নপরমরূপং, একা খটোপিকা ওলুগ্গৰিলুগ্গা নপরমরূপা’’তি ৰিত্থারো. যদি অপ্পম্পি ভোগং পহায পব্বজিতুং দুক্করং, কস্মা দাসৰারেপি ভোগগ্গহণং ন কতন্তি আহ ‘‘দাসৰারে পনা’’তিআদি. অত্তনোপি অনিস্সরোতি অত্তানম্পি সযমনিস্সরো. যথা চ দাসস্স ভোগাপি অভোগাযেৰ পরাযত্তভাৰতো, এৰং ঞাতযোপীতি দাসৰারে ঞাতিপরিৰট্টগ্গহণম্পি ন কতন্তি দট্ঠব্বং. পরিৰট্টতি পরম্পরভাৰেন সমন্ততো আৰট্টতীতি পরিৰট্টো, ঞাতিযেৰ. তেনাহ ‘‘ঞাতিযেৰ ঞাতিপরিৰট্টো’’তি.

পণীততরসামঞ্ঞফলৰণ্ণনা

১৮৯. তন্তি ¶ যথা দাসৰারে ‘‘এৰমেৰা’’তি ৰুত্তং, ন তথা ইধ কস্সকৰারে, তদৰচনং কস্মাতি অনুযুঞ্জেয্য চেতি অত্থো. এৰমেৰাতি ৰুচ্চমানেতি যথা পঠমদুতিযানি সামঞ্ঞফলানি পঞ্ঞত্তানি, তথাযেৰ পঞ্ঞপেতুং সক্কা নু খোতি ৰুত্তে. এৰরূপাহীতি যথাৰুত্তদাসকস্সকূপমাসদিসাহি উপমাহি. সামঞ্ঞফলং দীপেতুং পহোতি অনন্তপটিভানতায ৰিচিত্তনযদেসনভাৰতো. তত্থাতি এৰং দীপনে. পরিযন্তং নাম নত্থি অনন্তনযদেসনভাৰতো, সৰনে ৰা অসন্তোসনেন ভিয্যো ভিয্যো সোতুকামতাজননতো সোতুকামতায পরিযন্তং নাম নত্থীতি অত্থো. তথাপীতি ‘‘দেসনায উত্তরুত্তরাধিকনানানযৰিচিত্তভাৰে সতিপী’’তি (দী. নি. টী. ১.১৮৯) আচরিযেন ৰুত্তং, সতিপি এৰং অপরিযন্তভাৰেতিপি যুজ্জতি. অনুমানঞাণেন চিন্তেত্ৰা. উপরি ৰিসেসন্তি তং ঠপেত্ৰা তদুপরি ৰিসেসমেৰ সামঞ্ঞফলং পুচ্ছন্তো. কস্মাতি আহ ‘‘সৰনে’’তিআদি. এতেন ইমমত্থং দীপেতি – অনেকত্থা সমানাপি সদ্দা ৰত্তিচ্ছানুপুব্বিকাযেৰ তংতদত্থদীপকাতি.

সাধুকং সাধূতি একত্থমেতং সাধুসদ্দস্সেৰ ক-কারেন ৰড্ঢেত্ৰা ৰুত্তত্তা. তেনেৰ হি সাধুকসদ্দস্সত্থং ৰদন্তেন সাধুসদ্দো অত্থুদ্ধারৰসেন ¶ উদাহটো. তেন চ ননু সাধুকসদ্দস্সেৰ অত্থুদ্ধারো ৰত্তব্বো, ন সাধুসদ্দস্সাতি চোদনা নিসেধিতা. আযাচনেতি অভিমুখং যাচনে, অভিপত্থনাযন্তি অত্থো. সম্পটিচ্ছনেতি পটিগ্গহণে. সম্পহংসনেতি সংৰিজ্জমানগুণৰসেন হংসনে তোসনে, উদগ্গতাকরণেতি অত্থো.

সাধু ধম্মরুচীতি গাথা উম্মাদন্তীজাতকে (জা. ২.১৮.১০১). তত্থাযমট্ঠকথাৰিনিচ্ছযপৰেণী – সুচরিতধম্মে রোচেতীতি ধম্মরুচি, ধম্মরতোতি অত্থো. তাদিসো হি জীৰিতং জহন্তোপি অকত্তব্বং ন করোতি. পঞ্ঞাণৰাতি পঞ্ঞৰা ঞাণসম্পন্নো. মিত্তানমদ্দুব্ভোতি মিত্তানং অদুস্সনভাৰো. ‘‘অদূসকো অনুপঘাতকো’’তি (দী. নি. টী. ১.১৮৯) আচরিযেন ৰুত্তং. ‘‘অদ্রুব্ভো’’তিপি পাঠো দ-কারস্স দ্র-কারং কত্ৰা.

দল়্হীকম্মেতি সাতচ্চকিরিযাযং. আণত্তিযন্তি আণাপনে. ইধাপীতি সামঞ্ঞফলেপি. অস্সাতি সাধুকসদ্দস্স. ‘‘সুণোহি সাধুকং মনসি করোহী’’তি হি সাধুকসদ্দেন সৰনমনসিকারানং সাতচ্চকিরিযাপি তদাণাপনম্পি জোতিতং হোতি. আযাচনেনেৰ চ উয্যোজনসামঞ্ঞতো আণত্তি সঙ্গহিতাতি ন সা ৰিসুং অত্থুদ্ধারে ৰুত্তা. আণারহস্স হি আণত্তি ¶ , তদনরহস্স আযাচনন্তি ৰিসেসো. সুন্দরেপীতি সুন্দরত্থেপি. ইদানি যথাৰুত্তেন সাধুকসদ্দস্স অত্থত্তযেন পকাসিতং ৰিসেসং দস্সেতুং, তস্স ৰা অত্থত্তযস্স ইধ যোগ্যতং ৰিভাৰেতুং ‘‘দল়্হীকম্মত্থেন হী’’তিআদি ৰুত্তং. সুগ্গহিতং গণ্হন্তোতি সুগ্গহিতং কত্ৰা গণ্হন্তো. সুন্দরন্তি ভাৰনপুংসকং. ভদ্দকন্তি পসত্থং, ‘‘ধম্ম’’ন্তি ইমিনা সম্বন্ধো. সুন্দরং ভদ্দকন্তি ৰা সৰনানুগ্গহণে পরিযাযৰচনং.

মনসি করোহীতি এত্থ ন আরম্মণপটিপাদনলক্খণো মনসিকারো, অথ খো ৰীথিপটিপাদনজৰনপটিপাদনমনসিকারপুব্বকে চিত্তে ঠপনলক্খণোতি দস্সেন্তো ‘‘আৰজ্জ, সমন্নাহরা’’তি আহ. অৰিক্খিত্তচিত্তোতি যথাৰুত্তমনসিকারদ্ৰযপুব্বকায চিত্তপটিপাটিযা একারম্মণে ঠপনৰসেন অনুদ্ধতচিত্তো হুত্ৰা. নিসামেহীতি সুণাহি, অনগ্ঘরতনমিৰ ৰা সুৰণ্ণমঞ্জুসায দুল্লভধম্মরতনং চিত্তে পটিসামেহীতিপি অত্থো ¶ . তেন ৰুত্তং ‘‘চিত্তে করোহী’’তি. এৰং পদদ্ৰযস্স পচ্চেকং যোজনাৰসেন অত্থং দস্সেত্ৰা ইদানি পটিযোগীৰসেন দস্সেতুং ‘‘অপিচা’’তিআদি ৰুত্তং. তত্থ সোতিন্দ্রিযৰিক্খেপৰারণং সৰনে নিযোজনৰসেন কিরিযন্তরপটিসেধনতো, তেন সোতং ওদহাতি অত্থং দস্সেতি. মনিন্দ্রিযৰিক্খেপৰারণং মনসিকারেন দল়্হীকম্মনিযোজনেন অঞ্ঞচিন্তাপটিসেধনতো. ব্যঞ্জনৰিপল্লাসগ্গাহৰারণং ‘‘সাধুক’’ন্তি ৰিসেসেত্ৰা ৰুত্তত্তা. অত্থৰিপল্লাসগ্গাহৰারণেপি এস নযো.

ধারণূপপরিক্খাদীসূতি এত্থ আদি-সদ্দেন তুলনতীরণাদিকে, দিট্ঠিযা সুপ্পটিৰেধে চ সঙ্গণ্হাতি. যথাধিপ্পেতমত্থং ব্যঞ্জেতি পকাসেতি, সযমেতেনাতি ৰা ব্যঞ্জনং, সভাৰনিরুত্তি, সহ ব্যঞ্জনেনাতি সব্যঞ্জনো, ব্যঞ্জনসম্পন্নোতি অত্থো. সহপ্পৰত্তি হি ‘‘সম্পন্নতা সমৰাযতা ৰিজ্জমানতা’’তিআদিনা অনেকৰিধা, ইধ পন সম্পন্নতাযেৰ তদঞ্ঞস্স অসম্ভৰতো, তস্মা ‘‘সহ ব্যঞ্জনেনা’’তি নিব্বচনং কত্ৰাপি ‘‘ব্যঞ্জনসম্পন্নো’’তি (দী. নি. টী. ১.১৮৯) অত্থো আচরিযেন ৰুত্তোতি দট্ঠব্বং, যথা তং ‘‘ন কুসলা অকুসলা, কুসলপটিপক্খা’’তি (ধ. স. ১) অরণীযতো উপগন্তব্বতো অনুধাতব্বতো অত্থো, চতুপারিসুদ্ধিসীলাদি, সহ অত্থেনাতি সাত্থো, ৰুত্তনযেন অত্থসম্পন্নোতি অত্থো. সাধুকপদং একমেৰ সমানং আৰুত্তিনযাদিৰসেন উভযত্থ যোজেতব্বং. কথন্তি আহ ‘‘যস্মা’’তিআদি. ধম্মো নাম তন্তি. দেসনা নাম তস্সা মনসা ৰৰত্থাপিতায তন্তিযা দেসনা. অত্থো নাম তন্তিযা অত্থো. পটিৰেধো নাম তন্তিযা, তন্তিঅত্থস্স চ যথাভূতাৰবোধো. যস্মা চেতে ধম্মদেসনাত্থপটিৰেধা সসাদীহি ৰিয মহাসমুদ্দো মন্দবুদ্ধীহি দুক্খোগাহা, অলব্ভনেয্যপতিট্ঠা চ, তস্মা গম্ভীরা. তেন ৰুত্তং ‘‘যস্মা…পে… মনসি করোহী’’তি. এত্থ চ পটিৰেধস্স দুক্করভাৰতো ¶ ধম্মত্থানং দুক্খোগাহতা, দেসনাঞাণস্স দুক্করভাৰতো দেসনায, উপ্পাদেতুমসক্কুণেয্যতায, তব্বিসযঞাণুপ্পত্তিযা চ দুক্করভাৰতো পটিৰেধস্স দুক্খোগাহতা ৰেদিতব্বা. যমেত্থ ৰত্তব্বং, তং নিদানৰণ্ণনাযং ৰুত্তমেৰ.

‘‘সুণাহি সাধুক’’ন্তি ‘‘সাধুকং মনসি করোহী’’তি ৰদন্তো ন কেৰলং অত্থক্কমতো এৰ অযং যোজনা, অথ খো সদ্দক্কমতোপি উভযত্থ সম্বন্ধত্তাতি দস্সেতি. ‘‘সক্কা মহারাজা’’তি ইধাপি ‘‘অঞ্ঞম্পি দিট্ঠেৰ ¶ ধম্মে সন্দিট্ঠিকং সামঞ্ঞফলং…পে… পণীততরঞ্চা’’তি ইদমনুৰত্ততীতি আহ ‘‘এৰং পটিঞ্ঞাতং সামঞ্ঞফলদেসন’’ন্তি. ৰিত্থারতো ভাসনন্তি অত্থমেৰ দল়্হং করোতি ‘‘দেসেস্সামীতি সংখিত্তদীপন’’ন্তিআদিনা. হি-সদ্দো চেত্থ লুত্তনিদ্দিট্ঠো. ইদং ৰুত্তং হোতি – দেসনং নাম উদ্দিসনং. ভাসনং নাম নিদ্দিসনং পরিব্যত্তকথনং. তেনাযমত্থো সম্ভৰতীতি যথাৰুত্তমত্থং সগাথাৰগ্গসংযুত্তে ৰঙ্গীসসুত্তে (সং. নি. ১.২১৪) গাথাপদেন সাধেতুং ‘‘তেনাহা’’তিআদি ৰুত্তং.

সাল়িকাযিৰ নিগ্ঘোসোতি সাল়িকায নিগ্ঘোসো ৰিয, যথা সাল়িকায আলাপো মধুরো কণ্ণসুখো পেমনীযো, এৰন্তি অত্থো. পটিভানন্তি চেতস্স ৰিসেসনং লিঙ্গভেদস্সপি ৰিসেসনস্স দিস্সনতো যথা ‘‘গুণো পমাণ’’ন্তি. পটিভানন্তি চ সদ্দো ৰুচ্চতি পটিভাতি তংতদাকারেন দিস্সতীতি কত্ৰা. উদীরযীতি উচ্চারযি, ৰুচ্চতি ৰা, কম্মগব্ভঞ্চেতং কিরিযাপদং. ইমিনা চেতং দীপেতি – আযস্মন্তং ধম্মসেনাপতিং থোমেতুকামেন দেসনাভাসনানং ৰিসেসং দস্সেন্তেন পভিন্নপটিসম্ভিদেন আযস্মতা ৰঙ্গীসত্থেরেন ‘‘সঙ্খিত্তেন, ৰিত্থারেনা’’তি চ ৰিসেসনং কতং, তেনাযমত্থো ৰিঞ্ঞাযতীতি.

এৰং ৰুত্তেতি ‘‘ভাসিস্সামী’’তি ৰুত্তে. ‘‘ন কির ভগৰা সঙ্খেপেনেৰ দেসেস্সতি, অথ খো ৰিত্থারেনপি ভাসিস্সতী’’তি হি তং পদং সুত্ৰাৰ উস্সাহজাতো সঞ্জাতুস্সাহো, হট্ঠতুট্ঠোতি অত্থো. অযমাচরিযস্স অধিপ্পাযো. অপিচ ‘‘তেন হি মহারাজ সুণোহি সাধুকং মনসি করোহি, ভাসিস্সামী’’তি ৰুত্তং সব্বম্পি উয্যোজনপটিঞ্ঞাকরণপ্পকারং উস্সাহজননকারণং সব্বেনেৰ উস্সাহসম্ভৰতো, তস্মা এৰং ৰুত্তেতি ‘‘সুণোহি, সাধুকং মনসি করোহি, ভাসিস্সামী’’তি ৰুত্তে সব্বেহেৰ তীহিপি পদেহি উস্সাহজাতোতি অত্থো দট্ঠব্বো. পচ্চস্সোসীতি পতি অস্সোসি ভগৰতো ৰচনসমনন্তরমেৰ পচ্ছা অস্সোসি, ‘‘সক্কা পন ভন্তে’’তিআদিনা ৰা পুচ্ছিত্ৰা পুন ‘‘এৰং ভন্তে’’তি অস্সোসীতি অত্থো. তং পন পতিস্সৰনং অত্থতো সম্পটিচ্ছনমেৰাতি ¶ আহ ‘‘সম্পটিচ্ছি, পটিগ্গহেসী’’তি. তেনেৰ হি ‘‘ইতি অত্থো’’তি অৰত্ৰা ‘‘ইতি ৰুত্তং হোতী’’তি ৰুত্তং.

১৯০. ‘‘অথস্স ¶ ভগৰা এতদৰোচা’’তি ৰচনসম্বন্ধমত্তং দস্সেত্ৰা ‘‘এতং অৰোচা’’তি পদং ৰিভজিত্ৰা অত্থং দস্সেন্তো ‘‘ইদানী’’তিআদিমাহ. ‘‘ইধা’’তি ইমিনা ৰুচ্চমানং অধিকরণং তথাগতস্স উপ্পত্তিট্ঠানভূতং লোকমেৰাধিপ্পেতন্তি দস্সেতি ‘‘দেসোপদেসে নিপাতো’’তি ইমিনা. দেসস্স উপদিসনং দেসোপদেসো, তস্মিং. যদি সব্বত্থ দেসোপদেসে, অথাযমত্থো ন ৰত্তব্বো অৰুত্তেপি লব্ভমানত্তাতি চোদনাযাহ ‘‘স্ৰায’’ন্তিআদি. সামঞ্ঞভূতং ইধসদ্দং গণ্হিত্ৰা ‘‘স্ৰায’’ন্তি ৰুত্তং, ন তু যথাৰিসেসিতব্বং. তথা হি ৰক্খতি ‘‘কত্থচি পদপূরণমত্তমেৰা’’তি (দী. নি. অট্ঠ. ১.১৯০). লোকং উপাদায ৰুচ্চতি লোকসদ্দেন সমানাধিকরণভাৰতো. ইধ লোকেতি চ জাতিক্খেত্তং, তত্থাপি অযং চক্কৰাল়ো অধিপ্পেতো. সাসনমুপাদায ৰুচ্চতি ‘‘সমণো’’তি সদ্দন্তরসন্নিধানতো. অযঞ্হি চতুকঙ্গুত্তরপাল়ি. তত্থ পঠমো সমণোতি সোতাপন্নো. দুতিযো সমণোতি সকদাগামী. ৰুত্তঞ্হেতং তত্থেৰ –

‘‘কতমো চ ভিক্খৰে পঠমো সমণো? ইধ ভিক্খৰে ভিক্খু তিণ্ণং সংযোজনানং পরিক্খযা সোতাপন্নো হোতী’’তি, (অ. নি. ৪.২৪১) ‘‘কতমো চ ভিক্খৰে দুতিযো সমণো? ইধ ভিক্খৰে ভিক্খু তিণ্ণং সংযোজনানং পরিক্খযা রাগদোসমোহানং তনুত্তা সকদাগামী হোতী’’তি (অ. নি. ৪.২৪১) চ আদি.

ওকাসন্তি কঞ্চি পদেসমুপাদায ৰুচ্চতি ‘‘তিট্ঠমানস্সা’’তি সদ্দন্তরসন্নিধানতো.

ইধেৰ তিট্ঠমানস্সাতি ইমিস্সংযেৰ ইন্দসালগুহাযং পতিট্ঠমানস্স, দেৰভূতস্স মে সতোতি দেৰভাৰেন, দেৰো হুত্ৰা ৰা ভূতস্স সমানস্স. মেতি অনাদরযোগে সামিৰচনং. পুন মেতি কত্তুত্থে. ইদঞ্হি সক্কপঞ্হতো উদাহটং.

পদপূরণমত্তমেৰ ওকাসাপদিসনস্সাপি অসম্ভৰেন অত্থন্তরস্স অবোধনতো. পুব্বে ৰুত্তং তথাগতস্স উপ্পত্তিট্ঠানভূতমেৰ সন্ধায ‘‘লোক’’ন্তি ৰুত্তং. পুরিমং উয্যোজনপটিঞ্ঞাকরণৰিসযে আলপনন্তি ¶ পুন ‘‘মহারাজা’’তি আলপতি. ‘‘অরহ’’ন্তি আদযো সদ্দা ৰিত্থারিতাতি যোজনা. অত্থতো হি ৰিত্থারণং সদ্দমুখেনেৰ হোতীতি উভযত্থ সদ্দগ্গহণং কতং. যস্মা পন ‘‘অপরেহিপি অট্ঠহি কারণেহি ভগৰা তথাগতো’’তিআদিনা (উদা. অট্ঠ. ১৮; ইতিৰু. অট্ঠ. ৩৮) তথাগত-সদ্দো ¶ উদানট্ঠকথাদীসু, ‘‘অরহ’’ন্তি আদযো চ ৰিসুদ্ধিমগ্গটীকাযং (ৰিসুদ্ধি. টী. ১.১৩০) অপরেহিপি পকারেহি ৰিত্থারিতা আচরিযেন, তস্মা তেসু ৰুত্তনযেনপি তেসমত্থো ৰেদিতব্বো. তথাগতস্স সত্তনিকাযন্তোগধতায ‘‘ইধ পন সত্তলোকো অধিপ্পেতো’’তি ৰত্ৰা তত্থাযং যস্মিং সত্তনিকাযে, যস্মিঞ্চ ওকাসে উপ্পজ্জতি, তং দস্সেতুং ‘‘সত্তলোকে উপ্পজ্জমানোপি চা’’তিআদি ৰুত্তং. ন দেৰলোকে, ন ব্রহ্মলোকেতি এত্থ যং ৰত্তব্বং, তং পরতো আগমিস্সতি.

তস্সাপরেনাতি তস্স নিগমস্স অপরেন, ততো বহীতি ৰুত্তং হোতি. ততোতি মহাসালতো. ওরতো মজ্ঝেতি অব্ভন্তরং মজ্ঝিমপদেসো. এৰং পরিচ্ছিন্নেতি পঞ্চনিমিত্তবদ্ধা সীমা ৰিয পঞ্চহি যথাৰুত্তনিমিত্তেহি পরিচ্ছিন্নে. অড্ঢতেয্যযোজনসতেতি পণ্ণাসযোজনেহি ঊনতিযোজনসতে. অযঞ্হি মজ্ঝিমজনপদো মুদিঙ্গসণ্ঠানো, ন সমপরিৰট্টো, ন চ সমচতুরস্সো, উজুকেন কত্থচি অসীতিযোজনো হোতি, কত্থচি যোজনসতিকো, তথাপি চেস কুটিলপরিচ্ছেদেন মিনিযমানো পরিযন্ত পরিক্খেপতো নৰযোজনসতিকো হোতি. তেন ৰুত্তং ‘‘নৰযোজনসতে’’তি. অসীতিমহাথেরাতি যেভুয্যৰসেন ৰুত্তং সুনাপরন্তকস্স পুণ্ণত্থেরস্সাপি মহাসাৰকেসু পরিযাপন্নত্তা. সুনাপরন্তজনপদো হি পচ্চন্তৰিসযো. তথা হি ‘‘চন্দনমণ্ডলমাল়পটিগ্গহণে ভগৰা ন তত্থ অরুণং উট্ঠপেতী’’তি মজ্ঝিমাগম- (ম. নি. অট্ঠ. ৪.৩৯৭) সংযুত্তাগমট্ঠকথাসু (সং. নি. অট্ঠ. ৩.৪.৮৮-৮৯) ৰুত্তং. সারপ্পত্তাতি কুলভোগিস্সরিযাদিৰসেন, সীলসারাদিৰসেন চ সারভূতা. ব্রাহ্মণগহপতিকাতিব্রহ্মাযুপোক্খরসাতিআদিব্রাহ্মণা চেৰ অনাথপিণ্ডিকাদিগহপতিকা চ.

তত্থাতি মজ্ঝিমপদেসে, তস্মিংযেৰ ‘‘উপ্পজ্জতী’’তি ৰচনে ৰা. সুজাতাযাতি এৰংনামিকায পঠমং সরণগমনিকায যসত্থেরমাতুযা. চতূসু পনেতেসু ৰিকপ্পেসু পঠমো বুদ্ধভাৰায আসন্নতরপটিপত্তিদস্সনৰসেন ¶ ৰুত্তো. আসন্নতরায হি পটিপত্তিযা ঠিতোপি ‘‘উপ্পজ্জতী’’তি ৰুচ্চতি উপ্পাদস্স একন্তিকত্তা, পগেৰ পটিপত্তিযা মত্থকে ঠিতো. দুতিযো বুদ্ধভাৰাৰহপব্বজ্জতো পট্ঠায আসন্নমত্তপটিপত্তিদস্সনৰসেন, ততিযো বুদ্ধকরধম্মপারিপূরিতো পট্ঠায বুদ্ধভাৰায পটিপত্তিদস্সনৰসেন. ন হি মহাসত্তানং অন্তিমভৰূপপত্তিতো পট্ঠায বোধিসম্ভারসম্ভরণং নাম অত্থি বুদ্ধত্থায কালমাগমযমানেনেৰ তত্থ পতিট্ঠনতো. চতুত্থো বুদ্ধভাৰকরধম্মসমারম্ভতো পট্ঠায বোধিযা নিযতভাৰদস্সনেন. বোধিযা হি নিযতভাৰপ্পত্তিতো পভুতি ‘‘বুদ্ধো উপ্পজ্জতী’’তি ৰিঞ্ঞূহি ৰত্তুং সক্কা উপ্পাদস্স একন্তিকত্তা. যথা পন ‘‘সন্দন্তি নদিযো’’তি সন্দনকিরিযায অৰিচ্ছেদমুপাদায ৰত্তমানপ্পযোগো ¶ , এৰং উপ্পাদত্থায পটিপজ্জনকিরিযায অৰিচ্ছেদমুপাদায চতূসুপি ৰিকপ্পেসু ‘‘উপ্পজ্জতি নামা’’তি ৰুত্তং, পৰত্তাপরতৰত্তমানৰচনঞ্চেতং. চতুব্বিধঞ্হি ৰত্তমানলক্খণং সদ্দসত্থে পকাসিতং –

‘‘নিচ্চপৰত্তি সমীপো, পৰত্তুপরতো তথা;

পৰত্তাপরতো চেৰ, ৰত্তমানো চতুব্বিধো’’তি.

যস্মা পন বুদ্ধানং সাৰকানং ৰিয ন পটিপাটিযা ইদ্ধিৰিধঞাণাদীনি উপ্পজ্জন্তি, সহেৰ পন অরহত্তমগ্গেন সকলোপি সব্বঞ্ঞুতঞ্ঞাণাদিগুণরাসি আগতো নাম হোতি, তস্মা তেসং নিপ্ফত্তসব্বকিচ্চত্তা অরহত্তফলক্খণে উপ্পন্নো নামাতি একঙ্গুত্তরৰণ্ণনাযং (অ. নি. অট্ঠ. ১.১.১৭০) ৰুত্তং. অসতি হি নিপ্ফত্তসব্বকিচ্চত্তে ন তাৰতা ‘‘উপ্পন্নো’’তি ৰত্তুমরহতি. সব্বপঠমং উপ্পন্নভাৰন্তি চতূসু ৰিকপ্পেসু সব্বপঠমং ‘‘তথাগতো সুজাতায…পে… উপ্পজ্জতি নামা’’তি ৰুত্তং তথাগতস্স উপ্পন্নতাসঙ্খাতং অত্থিভাৰং. তদেৰ সন্ধায উপ্পজ্জতীতি ৰুত্তং বুদ্ধভাৰায আসন্নতরপটিপত্তিযং ঠিতস্সেৰ অধিপ্পেতত্তা. অযমেৰ হি অত্থো মুখ্যতো উপ্পজ্জতীতি ৰত্তব্বো. তেনাহ ‘‘তথাগতো…পে… অত্থো’’তি.

এত্থ চ ‘‘উপ্পন্নো’’তি ৰুত্তে অতীতকালৰসেন কোচি অত্থং গণ্হেয্যাতি তন্নিৰত্তনত্থং ‘‘উপ্পন্নো হোতী’’তি ৰুত্তং. ‘‘উপ্পন্না ধম্মা’’তিআদীসু (ধ. স. তিকমাতিকা ১৭) ৰিয হি ইধ উপ্পন্নসদ্দো পচ্চুপ্পন্নকালিকো. ননু চ অরহত্তফলসমঙ্গীসঙ্খাতো উপ্পন্নোযেৰ তথাগতো পৰেদনদেসনাদীনি সাধেতি, অথ কস্মা ¶ যথাৰুত্তো অরহত্তমগ্গপরিযোসানো উপ্পজ্জমানোযেৰ তথাগতো অধিপ্পেতো. ন হি সো পৰেদনদেসনাদীনি সাধেতি মধুপাযাসভোজনতো যাৰ অরহত্তমগ্গো, তাৰ তেসং কিচ্চানমসাধনতোতি? ন হেৰং দট্ঠব্বং, বুদ্ধভাৰায আসন্নতরপটিপত্তিযং ঠিতস্স উপ্পজ্জমানস্স গহণেনেৰ অরহত্তফলসমঙ্গীসঙ্খাতস্স উপ্পন্নস্সাপি গহিতত্তা. কারণগ্গহণেনেৰ হি ফলম্পি গহিতং তদৰিনাভাৰিত্তা. ইতি পৰেদনদেসনাদিসাধকস্স অরহত্তফলসমঙ্গিনোপি তথাগতস্স গহেতব্বত্তা নেয্যত্থমিদং ‘‘উপ্পজ্জতী’’তি ৰচনং দট্ঠব্বন্তি. তথা হি অঙ্গুত্তরট্ঠকথাযং (অ. নি. অট্ঠ. ১.১.১৭০) উপ্পজ্জমানো, উপ্পজ্জতি, উপ্পন্নোতি তীহি কালেহি অত্থৰিভজনে ‘‘দীপঙ্করপাদমূলে লদ্ধব্যাকরণতো যাৰ অনাগামিফলা উপ্পজ্জমানো নাম, অরহত্তমগ্গক্খণে পন উপ্পজ্জতি নাম, অরহত্তফলক্খণে উপ্পন্নো নামা’’তি ৰুত্তং. অযমেত্থ আচরিযধম্মপালত্থেরস্স মতি. যস্মা পন একঙ্গুত্তরট্ঠকথাযং ‘‘একপুগ্গলো ভিক্খৰে লোকে উপ্পজ্জমানো উপ্পজ্জতী’’তি (অ. নি. ১.১৭০) সুত্তপদৰণ্ণনাযং ¶ ‘‘ইমস্মিম্পি সুত্তে অরহত্তফলক্খণংযেৰ সন্ধায উপ্পজ্জতী’’তি ৰুত্তং, ‘‘উপ্পন্নো হোতীতি অযঞ্হেত্থ অত্থো’’তি (অ. নি. অট্ঠ. ১.১.১৭০) আগতং, তস্মা ইধাপি অরহত্তফলক্খণমেৰ সন্ধায উপ্পজ্জতীতি ৰুত্তন্তি দস্সেতি ‘‘সব্বপঠমং উপ্পন্নভাৰং সন্ধাযা’’তি ইমিনা. তেনাহ ‘‘উপ্পন্নো হোতীতি অযঞ্হেত্থ অত্থো’’তি. সব্বপঠমং উপ্পন্নভাৰন্তি চ সব্বৰেনেয্যানং পঠমতরং অরহত্তফলৰসেন উপ্পন্নভাৰন্তি অত্থো. ‘‘উপ্পন্নো হোতী’’তি চ ইমিনা অরহত্তফলক্খণৰসেন অতীতকালং দস্সেতীতি. অযমেৰ চ নযো অঙ্গুত্তরটীকাকারেন আচরিযসারিপুত্তত্থেরেন অধিপ্পেতোতি.

সো ভগৰাতি যো সো তথাগতো ‘‘অরহ’’ন্তিআদিনা পকিত্তিতগুণো, সো ভগৰা. ইদানি ৰত্তব্বং ইমসদ্দেন নিদস্সেতি ৰুচ্চমানত্থস্স পরামসনতো. ইদং ৰুত্তং হোতি – নযিদং মহাজনস্স সম্মুখমত্তং সন্ধায ‘‘ইমং লোক’’ন্তি ৰুত্তং, অথ খো ‘‘সদেৰক’’ন্তিআদিনা ৰক্খমানং অনৰসেসপরিযাদানং সন্ধাযাতি. ‘‘সহ দেৰেহি সদেৰক’’ন্তিআদিনা যথাৰাক্যং পদনিব্বচনং ৰুত্তং, যথাপদং পন ‘‘সদেৰকো’’তিআদিনা ৰত্তব্বং, ইমে চ তগ্গুণসংৰিঞ্ঞাণবাহিরত্থসমাসা. এত্থ হি অৰযৰেন ৰিগ্গহো, সমুদাযো সমাসত্থো হোতি লোকাৰযৰেন ¶ কতৰিগ্গহেন লোকসমুদাযস্স যথারহং লব্ভমানত্তা. সমৰাযজোতকসহসদ্দযোগে হি অযমেৰ সমাসো ৰিঞ্ঞাযতি. দেৰেহীতি চ পঞ্চকামাৰচরদেৰেহি, অরূপাৰচরদেৰেহি ৰা. ব্রহ্মুনাতি রূপাৰচরারূপাৰচরব্রহ্মুনা, রূপাৰচরব্রহ্মুনা এৰ ৰা, বহুকত্তুকাদীনমিৰ নেসং সিদ্ধি. পজাতত্তাতি যথাসকং কম্মকিলেসেহি পকারেন নিব্বত্তকত্তা.

এৰং ৰচনত্থতো অত্থং দস্সেত্ৰা ৰচনীযত্থতো দস্সেতুং ‘‘তত্থা’’তিআদি ৰুত্তং. পঞ্চকামাৰচরদেৰগ্গহণং পারিসেসঞাযেন ইতরেসং পদন্তরেহি ৰিসুং গহিতত্তা. ছট্ঠকামাৰচরদেৰগ্গহণং পচ্চাসত্তিঞাযেন. তত্থ হি মারো জাতো, তন্নিৰাসী চ. যস্মা চেস দামরিকরাজপুত্তো ৰিয তত্থ ৰসিতত্তা পাকটো, তস্মা সন্তেসুপি অঞ্ঞেসু ৰসৰত্তিমহারাজাদীসু পাকটতরেন তেনেৰ ৰিসেসেত্ৰা ৰুত্তোতি, অযঞ্চ নযো মজ্ঝিমাগমট্ঠকথাযং (ম. নি. অট্ঠ. ২.২৯০) পকাসিতোৰ. মারগ্গহণেন চেত্থ তংসম্বন্ধিনো দেৰাপি গহিতা ওকাসলোকেন সদ্ধিং সত্তলোকস্স গহণতো. এৰঞ্হি ৰসৰত্তিসত্তলোকস্স অনৰসেসপরিযাদানং হোতি. ব্রহ্মকাযিকাদিব্রহ্মগ্গহণম্পি পচ্চাসত্তিঞাযেন. পচ্চত্থিকপচ্চামিত্তসমণব্রাহ্মণগ্গহণন্তি পচ্চত্থিকা এৰ পচ্চামিত্তা, তেযেৰ সমণব্রাহ্মণা, তেসং গহণং তথা, তেন বাহিরকসমণব্রাহ্মণগ্গহণং ৰুত্তং, নিদস্সনমত্তঞ্চেতং অপচ্চত্থিকপচ্চামিত্তানম্পি তেসং ইমিনা গহণতো. সমিতপাপবাহিতপাপসমণব্রাহ্মণগ্গহণন্তি ¶ পন সাসনিকসমণব্রাহ্মণানং গহণং ৰেদিতব্বং. কামং ‘‘সদেৰক’’ন্তিআদিৰিসেসনানং ৰসেনেৰ সত্তৰিসযোপি লোকসদ্দো ৰিঞ্ঞাযতি সমৰাযত্থৰসেন তুল্যযোগৰিসযত্তা তেসং, ‘‘সলোমকো সপক্খকো’’তিআদীসু পন ৰিজ্জমানত্থৰসেন অতুল্যযোগৰিসযেপি অযং সমাসো লব্ভতীতি ব্যভিচারদস্সনতো অব্যভিচারেনত্থঞাপকং পজাগহণন্তি আহ ‘‘পজাৰচনেন সত্তলোকগ্গহণ’’ন্তি, ন পন লোকসদ্দেন সত্তলোকস্স অগ্গহিতত্তা এৰং ৰুত্তং. তেনাহ ‘‘তীহি পদেহি ওকাসলোকেন সদ্ধিং সত্তলোকো’’তি. সদেৰকাদিৰচনেন উপপত্তিদেৰানং, সস্সমণব্রাহ্মণীৰচনেন ৰিসুদ্ধিদেৰানঞ্চ গহিতত্তা ৰুত্তং ‘‘সদেৰ…পে… মনুস্সগ্গহণ’’ন্তি. তত্থ সম্মুতিদেৰা রাজানো ¶ . অৰসেসমনুস্সগ্গহণন্তি সম্মুতিদেৰেহি, সমণব্রাহ্মণেহি চ অৰসিট্ঠমনুস্সানং গহণং. এত্থাতি এতেসু পদেসু. তীহি পদেহীতি সদেৰকসমারকসব্রহ্মকপদেহি. দ্ৰীহীতি সস্সমণব্রাহ্মণীসদেৰমনুস্সপদেহি. সমাসপদত্থেসু সত্তলোকস্সপি ৰুত্তনযেন গহিতত্তা ‘‘ওকাসলোকেন সদ্ধিং সত্তলোকো’’তি ৰুত্তং.

‘‘অপরো নযো’’তিআদিনা অপরম্পি ৰচনীযত্থমাহ. অরূপিনোপি সত্তা অত্তনো আনেঞ্জৰিহারেন ৰিহরন্তো ‘‘দিব্বন্তীতি দেৰা’’তি ইদং নিব্বচনং লদ্ধুমরহন্তীতি আহ ‘‘সদেৰকগ্গহণেন অরূপাৰচরলোকো গহিতো’’তি. তেনেৰাহ ভগৰা ব্রহ্মজালাদীসু ‘‘আকাসানঞ্চাযতনূপগানং দেৰানং সহব্যত’’ন্তিআদি, (অ. নি. ৩.১৯৭) অরূপাৰচরভূতো ওকাসলোকো, সত্তলোকো চ গহিতোতি অত্থো. এৰং ছকামাৰচরদেৰলোকো, রূপী ব্রহ্মলোকোতি এত্থাপি. ছকামাৰচরদেৰলোকস্স সৰিসেসং মারৰসে পৰত্তনতো ৰুত্তং ‘‘সমারকগ্গহণেন ছকামাৰচরদেৰলোকো’’তি. সো হি তস্স দামরিকস্স ৰিয ৰসপৰত্তনোকাসো. রূপী ব্রহ্মলোকো গহিতো পারিসেসঞাযেন অরূপীব্রহ্মলোকস্স ৰিসুং গহিতত্তা. চতুপরিসৰসেনাতি খত্তিযব্রাহ্মণগহপতিসমণচাতুমহারাজিকতাৰতিংসমারব্রহ্মসঙ্খাতাসু অট্ঠসু পরিসাসু খত্তিযাদিচতুপরিসৰসেনেৰ তদঞ্ঞাসং সদেৰকাদিগ্গহণেন গহিতত্তা. কথং পনেত্থ চতুপরিসৰসেন মনুস্সলোকো গহিতোতি? ‘‘সস্সমণব্রাহ্মণি’’ন্তি ইমিনা সমণপরিসা, ব্রাহ্মণপরিসা চ গহিতা, ‘‘সদেৰমনুস্স’’ন্তি ইমিনা খত্তিযপরিসা, গহপতিপরিসা চাতি. ‘‘পজ’’ন্তি ইমিনা পন ইমাযেৰ চতস্সো পরিসা ৰুত্তা. চতুপরিসসঙ্খাতং পজন্তি হি ইধ অত্থো.

অঞ্ঞথা গহেতব্বমাহ ‘‘সম্মুতিদেৰেহি ৰা সহ মনুস্সলোকো’’তি. কথং পন গহিতোতি? ‘‘সস্সমণব্রাহ্মণি’’ন্তি ইমিনা সমণব্রাহ্মণা গহিতা, ‘‘সদেৰমনুস্স’’ন্তি ইমিনা সম্মুতিদেৰসঙ্খাতা খত্তিযা, গহপতিসুদ্দসঙ্খাতা চ অৰসেসমনুস্সাতি. ইতো পন অঞ্ঞেসং মনুস্সসত্তানমভাৰতো ¶ ‘‘পজ’’ন্তি ইমিনা এতেযেৰ চতূহি পকারেহি ঠিতা মনুস্সসত্তা ৰুত্তা. চতুকুলপ্পভেদং পজন্তি হি ইধ অত্থো. এৰং ৰিকপ্পদ্ৰযেপি পজাগহণেন চতুপরিসাদিৰসেন মনুস্সানঞ্ঞেৰ গহিতত্তা ¶ ইদানি অৰসেসসত্তেপি সঙ্গহেত্ৰা দস্সেতুং ‘‘অৰসেসসব্বসত্তলোকো ৰা’’তি ৰুত্তং. এত্থাপি চতুপরিসৰসেন গহিতেন মনুস্সলোকেন সহ অৰসেসসব্বসত্তলোকো গহিতো, সম্মুতিদেৰেহি ৰা সহ অৰসেসসব্বসত্তলোকোতি যোজেতব্বং. নাগগরুল়াদিৰসেন চ অৰসেসসব্বসত্তলোকো. ইদং ৰুত্তং হোতি – চতুপরিসসহিতো অৰসেসসুদ্দনাগসুপণ্ণনেরযিকাদিসত্তলোকো, চতুকুলপ্পভেদমনুস্সসহিতো ৰা অৰসেসনাগসুপণ্ণনেরযিকাদিসত্তলোকো গহিতোতি.

এত্তাৰতা ভাগসো লোকং গহেত্ৰা যোজনং দস্সেত্ৰা ইদানি তেন তেন ৰিসেসেন অভাগসো লোকং গহেত্ৰা যোজনং দস্সেতুং ‘‘অপিচেত্থা’’তিআদি ৰুত্তং. তত্থ উক্কট্ঠপরিচ্ছেদতোতি উক্কংসগতিপরিচ্ছেদতো, তব্বিজাননেনাতি ৰুত্তং হোতি. পঠমনযেন হি পঞ্চসু গতীসু দেৰগতিপরিযাপন্নাৰ পঞ্চকামগুণসমঙ্গিতায, দীঘাযুকতাযাতি এৰমাদীহি ৰিসেসেহি সেট্ঠা. দুতিযনযেন পন অরূপিনো দূরসমুগ্ঘাটিতকিলেসদুক্খতায, সন্তপণীতআনেঞ্জৰিহারসমঙ্গিতায, অতিৰিয দীঘাযুকতাযাতি এৰমাদীহি ৰিসেসেহি অতিৰিয উক্কট্ঠা. আচরিযেহি পন দুতিযনযমেৰ সন্ধায ৰুত্তং. এৰং পঠমপদেনেৰ পধাননযেন সব্বলোকস্স সচ্ছিকতভাৰে সিদ্ধেপি ইমিনা কারণৰিসেসেন সেসপদানি ৰুত্তানীতি দস্সেতি ‘‘ততো যেস’’ন্তিআদিনা. ততোতি পঠমপদতো পরং আহাতি সম্বন্ধো. ‘‘ছকামাৰচরিস্সরো’’ তিযেৰ ৰুত্তে সক্কাদীনম্পি তস্স আধিপচ্চং সিযাতি আসঙ্কানিৰত্তনত্থং ‘‘ৰসৰত্তী’’তি ৰুত্তং, তেন সাহসিককরণেন ৰসৰত্তাপনমেৰ তস্সাধিপচ্চন্তি দস্সেতি. সো হি ছট্ঠদেৰলোকেপি অনিস্সরো তত্থ ৰসৰত্তিদেৰরাজস্সেৰ ইস্সরত্তা. তেনাহ ভগৰা অঙ্গুত্তরাগমৰরে অট্ঠনিপাতে দানানিসংসসুত্তে ‘‘তত্র ভিক্খৰে ৰসৰত্তী দেৰপুত্তো দানমযং পুঞ্ঞকিরিযৰত্থুং অতিরেকং করিত্ৰা…পে… পরনিম্মিতৰসৰত্তী দেৰে দসহি ঠানেহি অধিগণ্হাতী’’তি (অ. নি. ৮.৩৬) ৰিত্থারো. মজ্ঝিমাগমট্ঠকথাযম্পি ৰুত্তং ‘‘তত্র হি ৰসৰত্তিরাজা রজ্জং কারেতি, মারো পন একস্মিং পদেসে অত্তনো পরিসায ইস্সরিযং পৰত্তেন্তো রজ্জপচ্চন্তে দামরিকরাজপুত্তো ৰিয ৰসতী’’তি (ম. নি. ১.৬০) ‘‘ব্রহ্মা মহানুভাৰো’’তিআদি ¶ দসসহস্সিযং মহাব্রহ্মুনো ৰসেন ৰদতি. ‘‘উক্কট্ঠপরিচ্ছেদতো’’তি হি হেট্ঠা ৰুত্তমেৰ. ‘‘একঙ্গুলিযা’’তিআদি একদেসেন মহানুভাৰতাদস্সনং. অনুত্তরন্তি সেট্ঠং নৰলোকুত্তরং. পুথূতি বহুকা, ৰিসুং ভূতা ৰা. উক্কট্ঠট্ঠানানন্তি উক্কংসগতিকানং. ভাৰানুক্কমোতি ভাৰৰসেন পরেসমজ্ঝাসযানুরূপং ‘‘সদেৰক’’ন্তিআদিপদানং অনুক্কমো, ভাৰৰসেন ¶ অনুসন্ধিক্কমো ৰা ভাৰানুক্কমো, অত্থানঞ্চেৰ পদানঞ্চ অনুসন্ধানপটিপাটীতি অত্থো, অযমেৰ ৰা পাঠো তথাযেৰ সমন্তপাসাদিকাযং (পারা. অট্ঠ. ৰেরঞ্জকণ্ডৰণ্ণনা ১) দিট্ঠত্তা, আচরিযসারিপুত্তত্থেরেন (সারত্থ. টী. ১.ৰেরঞ্জকণ্ডৰণ্ণনা) চ ৰণ্ণিতত্তা. ‘‘ৰিভাৰনানুক্কমো’’তিপি পাঠো দিস্সতি, সো পন তেসু অদিট্ঠত্তা ন সুন্দরো.

ইদানি পোরাণকানং সংৰণ্ণনানযং দস্সেতুং ‘‘পোরাণা পনাহূ’’তিআদি ৰুত্তং. তত্থ অঞ্ঞপদেন নিরৰসেসসত্তলোকস্স গহিতত্তা সব্বত্থ অৰসেসলোকন্তি অনৰসেসপরিযাদানং ৰুত্তং. তেনাহ ‘‘তিভৰূপগে সত্তে’’তি, তেধাতুকসঙ্খাতে তযো ভৰে উপগতসত্তেতি অত্থো. তীহাকারেহীতি দেৰমারব্রহ্মসহিততাসঙ্খাতেহি তীহি আকারেহি. তীসু পদেসূতি ‘‘সদেৰক’’ন্তিআদীসু তীসু পদেসু. পক্খিপিত্ৰাতি অত্থৰসেন সঙ্গহেত্ৰা. তেযেৰ তিভৰূপগে সত্তে ‘‘সস্সমণব্রাহ্মণিং, সদেৰমনুস্স’’ন্তি পদদ্ৰযে পক্খিপতীতি ঞাপেতুং ‘‘পুনা’’তি ৰুত্তং. তেন তেনাকারেনাতি সদেৰকত্তাদিনা, সস্সমণব্রাহ্মণীভাৰাদিনা চ তেন তেন পকারেন. ‘‘তিভৰূপগে সত্তে’’তি ৰত্ৰা ‘‘তেধাতুকমেৰা’’তি ৰদন্তা ওকাসলোকেন সদ্ধিং সত্তলোকো গহিতোতি দস্সেন্তি. তেধাতুকমেৰ পরিযাদিন্নন্তি পোরাণা পনাহূতি যোজনা.

সামন্তি অত্তনা. অঞ্ঞত্থাপোহনেন, অন্তোগধাৰধারণেন ৰা তপ্পটিসেধনমাহ ‘‘অপরনেয্যো হুত্ৰা’’তি, অপরেহি অনভিজানাপেতব্বো হুত্ৰাতি অত্থো. অভিঞ্ঞাতি য-কারলোপনিদ্দেসো যথা ‘‘পটিসঙ্খা যোনিসো’’তি (ম. নি. ১.২৩, ৪২২; ২.২৪; ৩.৭৫; সং. নি. ৪.১২০; অ. নি. ৬.৫৮; মহানি. ২০৬) ৰুত্তং ‘‘অভিঞ্ঞাযা’’তি. অভিসদ্দেন ন ৰিসেসনমত্তং জোতিতং, অথ খো ৰিসেসনমুখেন করণম্পীতি দস্সেতি ‘‘অধিকেন ঞাণেনা’’তি ইমিনা. অনুমানাদিপটিক্খেপোতি এত্থ আদিসদ্দেন ¶ উপমানঅত্থাপত্তিসদ্দন্তরসন্নিধানসম্পযোগৰিপ্পযোগসহচরণাদিনা কারণলেসমত্তেন পৰেদনং সঙ্গণ্হাতি একপ্পমাণত্তা. সব্বত্থ অপ্পটিহতঞাণচারতায হি সব্বধম্মপচ্চক্খা বুদ্ধা ভগৰন্তো. বোধেতি ৰিঞ্ঞাপেতীতি সদ্দতো অত্থৰচনং. পকাসেতীতি অধিপ্পাযতো. এৰং সব্বত্থ ৰিৰেচিতব্বো.

অনুত্তরং ৰিৰেকসুখন্তি ফলসমাপত্তিসুখং. হিত্ৰাপীতি পি-সদ্দগ্গহণং ফলসমাপত্তিযা অন্তরা ঠিতিকাপি কদাচি ভগৰতো দেসনা হোতীতি কত্ৰা কতং. ভগৰা হি ধম্মং দেসেন্তো যস্মিং খণে পরিসা সাধুকারং ৰা দেতি, যথাসুতং ৰা ধম্মং পচ্চৰেক্খতি, তং খণম্পি পুব্বাভোগেন পরিচ্ছিন্দিত্ৰা ফলসমাপত্তিং সমাপজ্জতি, যথাপরিচ্ছেদঞ্চ সমাপত্তিতো ৰুট্ঠায পুব্বে ¶ ঠিতট্ঠানতো পট্ঠায ধম্মং দেসেতীতি অট্ঠকথাসু (ম. নি. অট্ঠ. ২.৩৮৭) ৰুত্তোৰাযমত্থো. অপ্পং ৰা বহুং ৰা দেসেন্তোতি উগ্ঘটিতঞ্ঞুস্স ৰসেন অপ্পং ৰা ৰিপঞ্চিতঞ্ঞুস্স, নেয্যস্স চ ৰসেন বহুং ৰা দেসেন্তো. কথং দেসেতীতি আহ ‘‘আদিম্হিপী’’তিআদি. ধম্মস্স কল্যাণতা নিয্যানিকতায, নিয্যানিকতা চ সব্বসো অনৰজ্জভাৰেনেৰাতি ৰুত্তং ‘‘অনৰজ্জমেৰ কত্ৰা’’তি. দেসনাযাতি পরিযত্তিধম্মস্স দেসকাযত্তেন হি আণাদিৰিধিনা অতিসজ্জনং পবোধনং দেসনাতি পরিযত্তিধম্মো ৰুচ্চতি. কিঞ্চাপি অৰযৰৰিনিমুত্তো সমুদাযো নাম পরমত্থতো কোচি নত্থি, যেসু পন অৰযৰেসু সমুদাযরূপেন অৰেক্খিতেসু গাথাদিসমঞ্ঞা, তং ততো ভিন্নং ৰিয কত্ৰা সংসামিৰোহারমারোপেত্ৰা দস্সেন্তো ‘‘অত্থি দেসনায আদিমজ্ঝপরিযোসান’’ন্তি আহ. সাসনস্সাতি পটিপত্তিধম্মস্স. সাসিতব্বপুগ্গলগতেন হি যথাপরাধাদিনা সাসিতব্বভাৰেন অনুসাসনং, তদঙ্গৰিনযাদিৰসেন ৰিনযনন্তি কত্ৰা পটিপত্তিধম্মো ‘‘সাসন’’ন্তি ৰুচ্চতি. অত্থি সাসনস্স আদিমজ্ঝপরিযোসানন্তি সম্বন্ধো. চতুপ্পদিকাযপীতি এত্থ পি-সদ্দো সম্ভাৰনে, তেন এৰং অপ্পকতরাযপি আদিমজ্ঝপরিযোসানেসু কল্যাণতা, পগেৰ বহুতরাযাতি সম্ভাৰেতি. পদঞ্চেত্থ গাথায চতুত্থংসো, যং ‘‘পাদো’’তিপি ৰুচ্চতি, এতেনেৰ তিপাদিকছপাদিকাসুপি যথাসম্ভৰং ৰিভাগং দস্সেতি. এৰং সুত্তাৰযৰে কল্যাণত্তযং দস্সেত্ৰা সকলেপি সুত্তে দস্সেতুং ‘‘একানুসন্ধিকস্সা’’তিআদি ৰুত্তং. তত্থ নাতিবহুৰিভাগং যথানুসন্ধিনা একানুসন্ধিকং ¶ সন্ধায ‘‘একানুসন্ধিকস্সা’’তি আহ. ইতরস্মিং পন তেনেৰ ধম্মৰিভাগেন আদিমজ্ঝপরিযোসানা লব্ভন্তীতি ‘‘অনেকানুসন্ধিকস্সা’’তিআদি ৰুত্তং. নিদানন্তি আনন্দত্থেরেন ঠপিতং কালদেসদেসকপরিসাদিঅপদিসনলক্খণং নিদানগন্থং. ইদমৰোচাতি নিগমনং উপলক্খণমেৰ ‘‘ইতি যং তং ৰুত্তং, ইদমেতং পটিচ্চ ৰুত্ত’’ন্তি নিগমনস্সপি গহেতব্বতো. সঙ্গীতিকারকেহি ঠপিতানিপি হি নিদাননিগমনানি সত্থু দেসনায অনুৰিধানতো তদন্তোগধানেৰাতি ৰেদিতব্বং. অন্তে অনুসন্ধীতি সব্বপচ্ছিমো অনুসন্ধি.

‘‘সীলসমাধিৰিপস্সনা’’তিআদিনা সাসনস্স ইধ পটিপত্তিধম্মতং ৰিভাৰেতি. ৰিনযট্ঠকথাযং পন ‘‘সাসনধম্মো’’তি ৰুত্তত্তা –

‘‘সব্বপাপস্স অকরণং, কুসলস্স উপসম্পদা;

সচিত্তপরিযোদপনং, এতং বুদ্ধান সাসন’’ন্তি. (দী. নি. ২.৯০; ধ. প. ১৮৩; নেত্তি. ৩০, ৫০, ১১৬, ১২৪);

এৰং ¶ ৰুত্তস্স সত্থুসাসনস্স পকাসকো পরিযত্তিধম্মো এৰ সীলাদিঅত্থৰসেন কল্যাণত্তযৰিভাৰনে ৰুত্তো. ইধ পন পটিপত্তিযেৰ. তেন ৰক্খতি ‘‘ইধ দেসনায আদিমজ্ঝপরিযোসানং অধিপ্পেত’’ন্তি. সীলসমাধিৰিপস্সনা আদি নাম সাসনসম্পত্তিভূতানং উত্তরিমনুস্সধম্মানং মূলভাৰতো. কুসলানং ধম্মানন্তি অনৰজ্জধম্মানং. দিট্ঠীতি ৰিপস্সনা, অৰিনাভাৰতো পনেত্থ সমাধিগ্গহণং. মহাৰগ্গসংযুত্তে বাহিযসুত্তপদমিদং (সং. নি. ৫.৩৮১). কামং সুত্তে অরিযমগ্গস্স অন্তদ্ৰযৰিগমেন তেসং মজ্ঝিমপটিপদাভাৰো ৰুত্তো, মজ্ঝিমভাৰসামঞ্ঞতো পন সম্মাপটিপত্তিযা আরম্ভনিপ্ফত্তীনং মজ্ঝিমভাৰস্সাপি সাধকভাৰে যুত্তন্তি আহ ‘‘অত্থি ভিক্খৰে, মজ্ঝিমা পটিপদা তথাগতেন অভিসম্বুদ্ধাতি এৰং ৰুত্তো অরিযমগ্গো মজ্ঝং নামা’’তি, সীলসমাধিৰিপস্সনাসঙ্খাতানং আরম্ভানং, ফলনিব্বানসঙ্খাতানঞ্চ নিপ্ফত্তীনং ৰেমজ্ঝভাৰতো অরিযমগ্গো মজ্ঝং নামাতি অধিপ্পাযো. সউপাদিসেসনিব্বানধাতুৰসেন ফলং পরিযোসানং নাম, অনুপাদিসেসনিব্বানধাতুৰসেন পন নিব্বানং. সাসনপরিযোসানা হি নিব্বানধাতু. মগ্গস্স নিপ্ফত্তি ফলৰসেন, নিব্বানসচ্ছিকিরিযায চ হোতি ততো পরং কত্তব্বাভাৰতোতি ৰা এৰং ৰুত্তং. ইদানি তেসং দ্ৰিন্নম্পি সাসনস্স পরিযোসানতং আগমেন সাধেতুং ‘‘এতদত্থং ইদ’’ন্তিআদিমাহ. এতদেৰ ¶ ফলং অত্থো যস্সাতি এতদত্থং. ব্রাহ্মণাতি পিঙ্গলকোচ্ছব্রাহ্মণং ভগৰা আলপতি. ইদঞ্হি মজ্ঝিমাগমে মূলপণ্ণাসকে চূল়সারোপমসুত্ত (ম. নি. ১.৩১২ আদযো) পদং. এতদেৰ ফলং সারং যস্সাতি এতংসারং নিগ্গহিতাগমেন. তথা এতংপরিযোসানং. নিব্বানোগধন্তি নিব্বানন্তোগধং. আৰুসো ৰিসাখাতি ধম্মদিন্নায থেরিযা ৰিসাখগহপতিমালপনং. ইদঞ্হি চূল়ৰেদল্লসুত্তে (ম. নি. ১.৪৬০ আদযো) ‘‘সাত্থং সব্যঞ্জন’’ন্তিআদিসদ্দন্তরসন্নিধানতো ‘‘ইধ দেসনায আদিমজ্ঝপরিযোসানং অধিপ্পেত’’ন্তি ৰুত্তং.

এৰং সদ্দপবন্ধৰসেন দেসনায কল্যাণত্তযৰিভাগং দস্সেত্ৰা তদত্থৰসেনপি দস্সেন্তো ‘‘ভগৰা হী’’তিআদিমাহ. অত্থতোপি হি তস্সাধিপ্পেতভাৰং হি-সদ্দেন সমত্থেতি. তথা সমত্থনমুখেন চ অত্থৰসেন কল্যাণত্তযৰিভাগং দস্সেতীতি. অত্থতো পনেতং দস্সেন্তো যো তস্মিং তস্মিং অত্থে কতৰিধি সদ্দপবন্ধো গাথাসুত্তৰসেন ৰৰত্থিতো পরিযত্তিধম্মোযেৰ ইধ দেসনাতি ৰুত্তো, তস্স চত্থো ৰিসেসতো সীলাদি এৰাতি আহ ‘‘আদিম্হি সীল’’ন্তিআদি. ৰিসেসকথনঞ্হেতং. সামঞ্ঞতো পন সীলগ্গহণেন সসম্ভারসীলং গহিতং, তথা মগ্গগ্গহণেন সসম্ভারমগ্গোতি অত্থত্তযৰসেন অনৰসেসতো পরিযত্তিঅত্থং পরিযাদায তিট্ঠতি. ইতরথা হি কল্যাণত্তযৰিভাগো অসব্বসাধারণো সিযা. এত্থ চ সীলমূলকত্তা সাসনস্স সীলেন আদিকল্যাণতা ৰুত্তা, সাসনসম্পত্তিযা ৰেমজ্ঝভাৰতো মগ্গেন মজ্ঝেকল্যাণতা. নিব্বানাধিগমতো ¶ উত্তরি করণীযাভাৰতো নিব্বানেন পরিযোসানকল্যাণতা. তেনাতি সীলাদিদস্সনেন. অত্থৰসেন হি ইধ দেসনায আদিকল্যাণাদিভাৰো ৰুত্তো. ‘‘তস্মা’’তিআদি যথাৰুত্তানুসারেন সোতূনমনুসাসনীদস্সনং.

এসাতি যথাৰুত্তাকারেন কথনা. কথিকসণ্ঠিতীতি ধম্মকথিকস্স সণ্ঠানং কথনৰসেন সমৰট্ঠানং.

ৰণ্ণনা অত্থৰিৰরণা, পসংসনা ৰা. ন সো সাত্থং দেসেতি নিয্যানত্থৰিরহতো তস্সা দেসনায. তস্মাতি চতুসতিপট্ঠানাদিনিয্যানত্থদেসনতো. একব্যঞ্জনাদিযুত্তাতি সিথিলধনিতাদিভেদেসু দসসু ¶ ব্যঞ্জনেসু একপ্পকারেনেৰ, দ্ৰিপ্পকারেনেৰ ৰা ব্যঞ্জনেন যুত্তা দমিল়ভাসা ৰিয. সব্বনিরোট্ঠব্যঞ্জনাতি ৰিৰটকরণতায ওট্ঠে অফুসাপেত্ৰা উচ্চারেতব্বতো সব্বথা ওট্ঠফুসনরহিতৰিমুত্তব্যঞ্জনা কিরাতভাসা ৰিয. সব্বৰিস্সট্ঠব্যঞ্জনাতি সব্বস্সেৰ ৰিস্সজ্জনীযযুত্ততায সব্বথা ৰিস্সগ্গব্যঞ্জনা সৰরভাসা ৰিয. সব্বনিগ্গহিতব্যঞ্জনাতি সব্বস্সেৰ সানুসারতায সব্বথা বিন্দুসহিতব্যঞ্জনা পারসিকাদিমিলক্খুভাসা ৰিয. এৰং ‘‘দমিল়কিরাতসৰরমিলক্খূনং ভাসা ৰিযা’’তি ইদং পচ্চেকং যোজেতব্বং. মিলক্খূতি চ পারসিকাদযো. সব্বাপেসা ব্যঞ্জনেকদেসৰসেনেৰ পৰত্তিযা অপরিপুণ্ণব্যঞ্জনাতি ৰুত্তং ‘‘ব্যঞ্জনপারিপূরিযা অভাৰতো অব্যঞ্জনা নামা’’তি.

ঠানকরণানি সিথিলানি কত্ৰা উচ্চারেতব্বমক্খরং পঞ্চসু ৰগ্গেসু পঠমততিযং সিথিলং. তানি অসিথিলানি কত্ৰা উচ্চারেতব্বমক্খরং তেস্ৰেৰ দুতিযচতুত্থং ধনিতং. দ্ৰিমত্তকালমক্খরং দীঘং. একমত্তকালং রস্সং.

পমাণং একমত্তস্স, নিমীসুমীসতো’ ব্রৰুং;

অঙ্গুলিফোটকালস্স, পমাণেনাপি অব্রৰুং.

সঞ্ঞোগপরং, দীঘঞ্চ গরুকং. অসংযোগপরং রস্সং লহুকং. ঠানকরণানি নিগ্গহেত্ৰা অৰিৰটেন মুখেন উচ্চারেতব্বং নিগ্গহিতং. পরপদেন সম্বজ্ঝিত্ৰা উচ্চারেতব্বং সম্বন্ধং. তথা অসম্বজ্ঝিতব্বং ৰৰত্থিতং. ঠানকরণানি ৰিস্সট্ঠানি কত্ৰা ৰিৰটেন মুখেন উচ্চারেতব্বং ৰিমুত্তং. দসধাতিআদীসু এৰং সিথিলাদিৰসেন ব্যঞ্জনবুদ্ধিসঙ্খাতস্স অক্খরুপ্পাদকচিত্তস্স দসহি পকারেহি ব্যঞ্জনানং পভেদোতি অত্থো. সব্বানি হি অক্খরানি চিত্তসমুট্ঠানানি, যথাধিপ্পেতত্থস্স ¶ চ ব্যঞ্জনতো পকাসনতো ব্যঞ্জনানীতি, ব্যঞ্জনবুদ্ধিযা ৰা করণভূতায ব্যঞ্জনানং দসধা পভেদোতিপি যুজ্জতি.

অমক্খেত্ৰাতি অমিলেচ্ছেত্ৰা অৰিনাসেত্ৰা, অহাপেত্ৰাতি অত্থো. তদত্থমাহ ‘‘পরিপুণ্ণব্যঞ্জনমেৰ কত্ৰা’’তি, যমত্থং ভগৰা ঞাপেতুং একগাথং, একৰাক্যম্পি দেসেতি, তমত্থং পরিমণ্ডলপদব্যঞ্জনায এৰ দেসনায দেসেতীতি ৰুত্তং হোতি. তস্মাতি পরিপুণ্ণব্যঞ্জনধম্মদেসনতো ¶ . কেৰলসদ্দো ইধ অনৰসেসৰাচকো. ন অৰোমিস্সতাদিৰাচকোতি আহ ‘‘সকলাধিৰচন’’ন্তি. পরিপুণ্ণন্তি সব্বসো পুণ্ণং. তং পনত্থতো ঊনাধিকনিসেধনন্তি ৰুত্তং ‘‘অনূনাধিকৰচন’’ন্তি. তত্থ যদত্থং দেসিতো, তস্স সাধকত্তা অনূনতা ৰেদিতব্বা, তব্বিধুরস্স পন অসাধকত্তা অনধিকতা. উপনেতব্বস্স ৰা ৰোদানত্থস্স অৰুত্তস্স অভাৰতো অনূনতা, অপনেতব্বস্স সংকিলেসত্থস্স ৰুত্তস্স অভাৰতো অনধিকতা. সকলন্তি সব্বভাগৰন্তং. পরিপুণ্ণন্তি সব্বসো পুণ্ণমেৰ. তেনাহ ‘‘একদেসেনাপি অপরিপুণ্ণা নত্থী’’তি. অপরিসুদ্ধা দেসনা হোতি তণ্হায সংকিলিট্ঠত্তা. লোকেহি তণ্হায আমসিতব্বতো লোকামিসা, চীৰরাদযো পচ্চযা, তেসু অগধিতচিত্ততায লোকামিসনিরপেক্খো. হিতফরণেনাতি হিততো ফরণেন হিতূপসংহারেন ৰিসেসনভূতেন. মেত্তাভাৰনায করণভূতায মুদুহদযো. উল্লুম্পনসভাৰসণ্ঠিতেনাতি সকলসংকিলেসতো, ৰট্টদুক্খতো চ উদ্ধরণাকারসণ্ঠিতেন, কারুঞ্ঞাধিপ্পাযেনাতি ৰুত্তং হোতি.

‘‘ইতো পট্ঠায দস্সামি, এৰঞ্চ দস্সামী’’তি সমাদাতব্বট্ঠেন দানং ৰতং. পণ্ডিতপঞ্ঞত্ততায সেট্ঠট্ঠেন ব্রহ্মং, ব্রহ্মানং ৰা সেট্ঠানং চরিযন্তি দানমেৰ ব্রহ্মচরিযং. মচ্ছরিযলোভাদিনিগ্গহণেন সমাচিণ্ণত্তা দানমেৰ সুচিণ্ণং. ইদ্ধীতি দেৰিদ্ধি. জুতীতি পভা, আনুভাৰো ৰা. বলৰীরিযূপপত্তীতি মহতা বলেন, ৰীরিযেন চ সমন্নাগমো. নাগাতি ৰরুণনাগরাজানং ৰিধুরপণ্ডিতস্স আলপনং.

দানপতীতি দানসামিনো. ওপানভূতন্তি উদকতিত্থমিৰ ভূতং.

ধীরাতি সো ৰিধুরপণ্ডিতমালপতি.

মধুস্সৰোতি মধুরসসন্দনং. পুঞ্ঞন্তি পুঞ্ঞফলং, কারণৰোহারেন ৰুত্তং. ব্রহ্মং, ব্রহ্মানং ৰা চরিযন্তি ব্রহ্মচরিযং, ৰেয্যাৰচ্চং. এস নযো সেসেসুপি.

তিত্তিরিযন্তি ¶ তিত্তিরসকুণরাজেন ভাসিতং.

অঞ্ঞত্র তাহীতি পরদারভূতাহি ৰজ্জেত্ৰা. অম্হন্তি অম্হাকং.

তপস্সী ¶ , লূখো, জেগুচ্ছী, পৰিৰিত্তোতি চতুব্বিধস্স দুক্করস্স কতত্তা চতুরঙ্গসমন্নাগতং. সুদন্তি নিপাতমত্তং. লোমহংসনসুত্তং মজ্ঝিমাগমে মূলপণ্ণাসকে, ‘‘মহাসীহনাদসুত্ত’’ন্তিপি (ম. নি. ১.১৪৬) তং ৰদন্তি.

ইদ্ধন্তি সমিদ্ধং. ফীতন্তি ফুল্লিতং. ৰিত্থারিকন্তি ৰিত্থারভূতং. বাহুজঞ্ঞন্তি বহূহি জনেহি নিয্যানিকভাৰেন ঞাতং. পুথুভূতন্তি বহুভূতং. যাৰ দেৰমনুস্সেহীতি এত্থ দেৰলোকতো যাৰ মনুস্সলোকা সুপকাসিতন্তি অধিপ্পাযৰসেন পাসাদিকসুত্তট্ঠকথাযং (দী. নি. অট্ঠ. ৩.১৭০) ৰুত্তং, যাৰ দেৰা চ মনুস্সা চাতি অত্থো. তস্মাতি যস্মা সিক্খত্তযসঙ্গহং সকলসাসনং ইধ ‘‘ব্রহ্মচরিয’’ন্তি অধিপ্পেতং, তস্মা. ‘‘ব্রহ্মচরিয’’ন্তি ইমিনা সমানাধিকরণানি সব্বপদানি যোজেত্ৰা অত্থং দস্সেন্তো ‘‘সো ধম্মং দেসেতী’’তিআদিমাহ. ‘‘এৰং দেসেন্তো চা’’তি হি ইমিনা ব্রহ্মচরিযসদ্দেন ধম্মসদ্দাদীনং সমানত্থতং দস্সেতি, ‘‘ধম্মং দেসেতী’’তি ৰত্ৰাপি ‘‘ব্রহ্মচরিযং পকাসেতী’’তি ৰচনং সরূপতো অত্থপ্পকাসনত্থন্তি চ ৰিভাৰেতি.

১৯১. ৰুত্তপ্পকারসম্পদন্তি যথাৰুত্তআদিকল্যাণতাদিপ্পভেদগুণসম্পদং. দূরসমুস্সারিতমানস্সেৰ সাসনে সম্মাপটিপত্তি সম্ভৰতি, ন মানজাতিকস্সাতি ৰুত্তং ‘‘নিহতমানত্তা’’তি. উস্সন্নত্তাতি বহুলভাৰতো. ভোগরূপাদিৰত্থুকা মদা সুপ্পহেয্যা হোন্তি নিমিত্তস্স অনৰট্ঠানতো, ন তথা কুলৰিজ্জাদিমদা নিমিত্তস্স সমৰট্ঠানতো. তস্মা খত্তিযব্রাহ্মণকুলীনানং পব্বজিতানম্পি জাতিৰিজ্জং নিস্সায মানজপ্পনং দুপ্পজহন্তি আহ ‘‘যেভুয্যেন…পে… মানং করোন্তী’’তি. ৰিজাতিতাযাতি ৰিপরীতজাতিতায, হীনজাতিতাযাতি অত্থো. যেভুয্যেন উপনিস্সযসম্পন্না সুজাতিকা এৰ, ন দুজ্জাতিকাতি এৰং ৰুত্তং. পতিট্ঠাতুং ন সক্কোন্তীতি সীলে পতিট্ঠহিতুং ন উস্সহন্তি, সুৰিসুদ্ধং কত্ৰা সীলং রক্খিতুং ন সক্কোন্তীতি ৰুত্তং হোতি. সীলমেৰ হি সাসনে পতিট্ঠা, পতিট্ঠাতুন্তি ৰা সচ্চপটিৰেধেন লোকুত্তরায পতিট্ঠায পতিট্ঠাতুং. সা হি নিপ্পরিযাযতো সাসনে পতিট্ঠা নাম.

এৰং ব্যতিরেকতো অত্থং ৰত্ৰা অন্ৰযতোপি ৰদতি ‘‘গহপতিদারকা পনা’’তিআদিনা. কচ্ছেহি ¶ সেদং মুঞ্চন্তেহীতি ইত্থম্ভূতলক্খণে করণৰচনং. তথা পিট্ঠিযা লোণং পুপ্ফমানাযাতি, সেদং মুঞ্চন্তকচ্ছা ¶ লোণং পুপ্ফমানপিট্ঠিকা হুত্ৰা, তেহি ৰা পকারেহি লক্খিতাতি অত্থো. ভূমিং কসিত্ৰাতি ভূমিযা কস্সনতো, খেত্তূপজীৰনতোতি ৰুত্তং হোতি. তাদিসস্সাতি জাতিমন্তূপনিস্সযস্স. দুব্বলং মানং. বলৰং দপ্পং. কম্মন্তি পরিকম্মং. ‘‘ইতরেহী’’তিআদিনা ‘‘উস্সন্নত্তা’’তি হেতুপদং ৰিৰরতি. ‘‘ইতী’’তি ৰত্ৰা তদপরামসিতব্বং দস্সেতি ‘‘নিহতমানত্তা’’তিআদিনা, ইতিসদ্দো ৰা নিদস্সনে, এৰং যথাৰুত্তনযেনাতি অত্থো. এস নযো ঈদিসেসু.

পচ্চাজাতোতি এত্থ আকারো উপসগ্গমত্তন্তি আহ ‘‘পতিজাতো’’তি. পরিসুদ্ধন্তি রাগাদীনং অচ্চন্তমেৰ পহানদীপনতো নিরুপক্কিলেসতায সব্বথা সুদ্ধং. ধম্মস্স সামী তদুপ্পাদকট্ঠেন, ধম্মেন ৰা সদেৰকস্স লোকস্স সামীতি ধম্মস্সামী. সদ্ধন্তি পোথুজ্জনিকসদ্ধাৰসেন সদ্দহনং. ৰিঞ্ঞূজাতিকানঞ্হি ধম্মসম্পত্তিগহণপুব্বিকা সদ্ধাসিদ্ধি চতূসু পুগ্গলেসু ধম্মপ্পমাণধম্মপ্পসন্নপুগ্গলভাৰতো. ‘‘যো এৰং স্ৰাক্খাতধম্মো, সম্মাসম্বুদ্ধো ৰত সো ভগৰা’’তি সদ্ধং পটিলভতি. যোজনসতন্তরেপি ৰা পদেসে. জাযম্পতিকাতি জানিপতিকা. কামং ‘‘জাযম্পতিকা’’তি ৰুত্তেযেৰ ঘরসামিকঘরসামিনীৰসেন দ্ৰিন্নমেৰ গহণং ৰিঞ্ঞাযতি, যস্স পন পুরিসস্স অনেকা পজাপতিযো, তস্স ৰত্তব্বমেৰ নত্থি. একাযপি তাৰ সংৰাসো সম্বাধোযেৰাতি দস্সনত্থং ‘‘দ্ৰে’’তি ৰুত্তং. রাগাদিনা কিঞ্চনং, খেত্তৰত্থাদিনা পলিবোধনং, তদুভযেন সহ ৰত্ততীতি সকিঞ্চনপলিবোধনো, সোযেৰত্থো তথা. রাগো এৰ রজো, তদাদিকা দোসমোহরজা. ৰুত্তঞ্হি ‘‘রাগো রজো ন চ পন রেণু ৰুচ্চতী’’তিআদি (মহানি. ২০৯; চূল়নি. ৭৪) আগমনপথতাপি উট্ঠানট্ঠানতা এৰাতি দ্ৰেপি সংৰণ্ণনা একত্থা, ব্যঞ্জনমেৰ নানং. অলগ্গনট্ঠেনাতি অসজ্জনট্ঠেন অপ্পটিবন্ধসভাৰেন. রূপকৰসেন, তদ্ধিতৰসেন ৰা অব্ভোকাসোতি দস্সেতুং ৰিয-সদ্দগ্গহণং. এৰং অকুসলকুসলপ্পৰত্তীনং ঠানাঠানভাৰেন ঘরাৰাসপব্বজ্জানং সম্বাধব্ভোকাসতং দস্সেত্ৰা ইদানি কুসলপ্পৰত্তিযা এৰ অট্ঠানট্ঠানভাৰেন তেসং তব্ভাৰং দস্সেতুং ‘‘অপিচা’’তিআদি ৰুত্তং. রজানং সন্নিপাতট্ঠানং ৰিযাতি সম্বন্ধো.

ৰিসুং ৰিসুং পদুদ্ধারমকত্ৰা সমাসতো অত্থৰণ্ণনা সঙ্খেপকথা. একম্পি দিৰসন্তি একদিৰসমত্তম্পি. অখণ্ডং কত্ৰাতি দুক্কটমত্তস্সাপি অনাপজ্জনেন ¶ অছিদ্দং কত্ৰা. চরিমকচিত্তন্তি চুতিচিত্তং. কিলেসমলেনাতি তণ্হাসংকিলেসাদিমলেন. অমলীনন্তি অসংকিলিট্ঠং. পরিযোদাতট্ঠেন নিম্মলভাৰেন সঙ্খং ৰিয লিখিতং ধোতন্তি সঙ্খলিখিতং. অত্থমত্তং পন ¶ দস্সেতুং ‘‘লিখিতসঙ্খসদিস’’ন্তি ৰুত্তং. ধোতসঙ্খসপ্পটিভাগন্তি তদত্থস্সেৰ ৰিৰরণং. অপিচ লিখিতং সঙ্খং সঙ্খলিখিতং যথা ‘‘অগ্যাহিতো’’তি, তস্সদিসত্তা পন ইদং সঙ্খলিখিতন্তিপি দস্সেতি, ভাৰনপুংসকঞ্চেতং. অজ্ঝাৰসতাতি এত্থ অধি-সদ্দেন কম্মপ্পৰচনীযেন যোগতো ‘‘অগার’’ন্তি এতং ভুম্মত্থে উপযোগৰচনন্তি আহ ‘‘অগারমজ্ঝে’’তি. যং নূন যদি পন পব্বজেয্যং, সাধু ৰতাতি সম্বন্ধো. কসাযেন রত্তানি কাসাযানীতি দস্সেতি ‘‘কসাযরসপীততাযা’’তি ইমিনা. কস্মা চেতানি গহিতানীতি আহ ‘‘ব্রহ্মচরিযং চরন্তানং অনুচ্ছৰিকানী’’তি. অচ্ছাদেত্ৰাতি ৰোহারৰচনমত্তং, পরিদহিত্ৰাতি অত্থো, তঞ্চ খো নিৰাসনপারুপনৰসেন. অগারৰাসো অগারং উত্তরপদলোপেন, তস্স হিতং ৰুড্ঢিআৰহং কসিৰাণিজ্জাদিকম্মং. তং অনগারিযন্তি তস্মিং অনগারিযে.

১৯২. সহস্সতোতি কহাপণসহস্সতো. ভোগক্খন্ধো ভোগরাসি. আবন্ধনট্ঠেনাতি ‘‘পুত্তো নত্তা পনত্তা’’তিআদিনা পেমৰসেন পরিচ্ছেদং কত্ৰা বন্ধনট্ঠেন, এতেন আবন্ধনত্থো পরিৰট্ট-সদ্দোতি দস্সেতি. অথ ৰা পিতামহপিতুপুত্তাদিৰসেন পরিৰত্তনট্ঠেন পরিৰট্টোতিপি যুজ্জতি. ‘‘অম্হাকমেতে’’তি ঞাযন্তীতি ঞাতযো.

১৯৩. পাতিমোক্খসংৰরেন পিহিতকাযৰচীদ্ৰারো সমানো তেন সংৰরেন উপেতো নামাতি কত্ৰা ‘‘পাতিমোক্খসংৰরেন সমন্নাগতো’’তি ৰুত্তং. আচারগোচরানং ৰিত্থারো ৰিভঙ্গট্ঠকথাদীসু (ৰিভ. অট্ঠ. ৫০৩) গহেতব্বো. ‘‘আচারগোচরসম্পন্নো’’তিআদি চ তস্সেৰ পাতিমোক্খসংৰরসংৰুতভাৰস্স পচ্চযদস্সনং. অণুসদিসতায অপ্পমত্তকং ‘‘অণূ’’তি ৰুত্তন্তি আহ ‘‘অপ্পমত্তকেসূ’’তি. অসঞ্চিচ্চ আপন্নঅনুখুদ্দকাপত্তিৰসেন, সহসা উপ্পন্নঅকুসলচিত্তুপ্পাদৰসেন চ অপ্পমত্তকতা. ভযদস্সীতি ভযদস্সনসীলো. সম্মাতি অৰিপরীতং, সুন্দরং ৰা, তব্ভাৰো চ সক্কচ্চং যাৰজীৰং অৰীতিক্কমৰসেন. ‘‘সিক্খাপদেসূ’’তি ৰুত্তেযেৰ তদৰযৰভূতং ¶ ‘‘সিক্খাপদং সমাদায সিক্খতী’’তি অত্থস্স গম্যমানত্তা কম্মপদং ন ৰুত্তন্তি আহ ‘‘তং তং সিক্খাপদ’’ন্তি, তং তং সিক্খাকোট্ঠাসং, সিক্খায ৰা অধিগমুপাযং, তস্সা ৰা নিস্সযন্তি অত্থো.

এত্থাতি এতস্মিং ‘‘পাতিমোক্খসংৰরসংৰুতো’’তিআদিৰচনে. আচারগোচরগ্গহণেনেৰাতি ‘‘আচারগোচরসম্পন্নো’’তি ৰচনেনেৰ. তেনাহ ‘‘কুসলে কাযকম্মৰচীকম্মে গহিতেপী’’তি. ন হি আচারগোচরসদ্দমত্তেন কুসলকাযৰচীকম্মগ্গহণং সম্ভৰতি, ইমিনা পুনরুত্তিতায চোদনালেসং দস্সেতি. তস্সাতি আজীৰপারিসুদ্ধিসীলস্স. উপ্পত্তিদ্ৰারদস্সনত্থন্তি উপ্পত্তিযা কাযৰচীৰিঞ্ঞত্তিসঙ্খাতস্স ¶ দ্ৰারস্স কম্মাপদেসেন দস্সনত্থং, এতেন যথাৰুত্তচোদনায সোধনং দস্সেতি. ইদং ৰুত্তং হোতি – সিদ্ধেপি সতি পুনারম্ভো নিযমায ৰা হোতি, অত্থন্তরবোধনায ৰা, ইধ পন অত্থন্তরং বোধেতি, তস্মা উপ্পত্তিদ্ৰারদস্সনত্থং ৰুত্তন্তি. কুসলেনাতি চ সব্বসো অনেসনপহানতো অনৰজ্জেন. কথং তেন উপ্পত্তিদ্ৰারদস্সনন্তি আহ ‘‘যস্মা পনা’’তিআদি. কাযৰচীদ্ৰারেসু উপ্পন্নেন অনৰজ্জেন কাযকম্মৰচীকম্মেন সমন্নাগতত্তা পরিসুদ্ধাজীৰোতি অধিপ্পাযো. তদুভযমেৰ হি আজীৰহেতুকং আজীৰপারিসুদ্ধিসীলং.

ইদানি সুত্তন্তরেন সংসন্দিতুং ‘‘মুণ্ডিকপুত্তসুত্তন্তৰসেন ৰা এৰং ৰুত্ত’’ন্তি আহ. ৰা-সদ্দো চেত্থ সুত্তন্তরসংসন্দনাসঙ্খাতঅত্থন্তরৰিকপ্পনত্থো. মুণ্ডিকপুত্তসুত্তন্তং নাম মজ্ঝিমাগমৰরে মজ্ঝিমপণ্ণাসকে, যং ‘‘সমণমুণ্ডিকপুত্তসুত্ত’’ন্তিপি ৰদন্তি. তত্থ থপতীতি পঞ্চকঙ্গং নাম ৰড্ঢকিং ভগৰা আলপতি. থপতি-সদ্দো হি ৰড্ঢকিপরিযাযো. ইদং ৰুত্তং হোতি – যস্মা ‘‘কতমে চ থপতি কুসলা সীলা? কুসলং কাযকম্মং কুসলং ৰচীকম্ম’’ন্তি সীলস্স কুসলকাযকম্মৰচীকম্মভাৰং দস্সেত্ৰা ‘‘আজীৰপারিসুদ্ধম্পি খো অহং থপতি সীলস্মিং ৰদামী’’তি (ম. নি. ২.২৬৫) এৰং পৰত্তায মুণ্ডিকপুত্তসুত্তদেসনায ‘‘কাযকম্মৰচীকম্মেন সমন্নাগতো কুসলেনা’’তি সীলস্স কুসলকাযকম্মৰচীকম্মভাৰং দস্সেত্ৰা ‘‘পরিসুদ্ধাজীৰো’’তি এৰং পৰত্তা অযং সামঞ্ঞফলসুত্তদেসনা একসঙ্গহা অঞ্ঞদত্থু সংসন্দতি সমেতি যথা তং গঙ্গোদকেন যমুনোদকং, তস্মা ঈদিসীপি ভগৰতো দেসনাৰিভূতি অত্থেৰাতি ¶ . সীলস্মিং ৰদামীতি সীলন্তি ৰদামি, সীলস্মিং ৰা আধারভূতে অন্তোগধং পরিযাপন্নং, নিদ্ধারণসমুদাযভূতে ৰা একং সীলন্তি ৰদামি.

তিৰিধেনাতি চূল়সীলমজ্ঝিমসীলমহাসীলতো তিৰিধেন. ‘‘মনচ্ছট্ঠেসূ’’তি ইমিনা কাযপঞ্চমানমেৰ গহণং নিৰত্তেতি. উপরি নিদ্দেসে ৰক্খমানেসু সত্তসু ঠানেসু. তিৰিধেনাতি চতূসু পচ্চেকং যথালাভযথাবলযথাসারুপ্পতাৰসেন তিব্বিধেন.

চূল়মজ্ঝিমমহাসীলৰণ্ণনা

১৯৪-২১১. এৰন্তি ‘‘সো এৰং পব্বজিতো সমানো পাতিমোক্খসংৰরসংৰুতো ৰিহরতী’’তিআদিনা নযেন. ‘‘সীলস্মি’’ন্তি ইদং নিদ্ধারণে ভুম্মং ততো একস্স নিদ্ধারণীযত্তাতি আহ ‘‘একং সীল’’ন্তি. অপিচ ইমিনা আধারে ভুম্মং দস্সেতি সমুদাযস্স অৰযৰাধিট্ঠানত্তা যথা ‘‘রুক্খে সাখা’’তি. ‘‘ইদ’’ন্তি পদেন কত্ৰত্থৰসেন সমানাধিকরণং ভুম্মৰচনস্স ¶ কত্ৰত্থে পৰত্তনতো যথা ‘‘ৰনপ্পগুম্বে যথ ফুসিতগ্গে’’তি (খু. পা. ৬.১৩; সু. নি. ২৩৬) দস্সেতি ‘‘পচ্চত্তৰচনত্থে ৰা এতং ভুম্ম’’ন্তি ইমিনা. অযমেৰত্থোতি পচ্চত্তৰচনত্থো এৰ. ব্রহ্মজালেতি ব্রহ্মজালসুত্তৰণ্ণনাযং, (দী. নি. অট্ঠ. ১.৭) ব্রহ্মজালসুত্তপদে ৰা. সংৰণ্ণনাৰসেন ৰুত্তনযেনাতি অত্থো. ‘‘ইদমস্স হোতি সীলস্মি’’ন্তি এত্থ মহাসীলপরিযোসানেন নিদ্ধারিযমানস্স অভাৰতো পচ্চত্তৰচনত্থোযেৰ সম্ভৰতীতি আহ ‘‘ইদং অস্স সীলং হোতীতি অত্থো’’তি, ততোযেৰ চ পাল়িযং অপিগ্গহণমকতন্তি দট্ঠব্বং.

২১২. অত্তানুৰাদপরানুৰাদদণ্ডভযাদীনি অসংৰরমূলকানি ভযানি. ‘‘সীলস্সাসংৰরতোতি সীলস্স অসংৰরণতো, সীলসংৰরাভাৰতোতি অত্থো’’তি (দী. নি. টী. ১.২৮০) আচরিযেন ৰুত্তং, ‘‘যদিদং সীলসংৰরতো’’তি পন পদস্স ‘‘যং ইদং ভযং সীলসংৰরতো ভৰেয্যা’’তি অত্থৰচনতো, ‘‘সীলসংৰরহেতু ভযং ন সমনুপস্সতী’’তি চ অত্থস্স উপপত্তিতো সীলসংৰরতো সীলসংৰরহেতূতি অত্থোযেৰ সম্ভৰতি. ‘‘যং ইদং ভযং সীলসংৰরতো ভৰেয্যা’’তি হি পাঠোপি দিস্সতি. ‘‘সংৰরতো’’তি হেতুং ৰত্ৰা তদধিগমিতঅত্থৰসেন ‘‘অসংৰরমূলকস্স ভযস্স অভাৰা’’তিপি হেতুং ¶ ৰদতি. যথাৰিধানৰিহিতেনাতি যথাৰিধানং সম্পাদিতেন. খত্তিযাভিসেকেনাতি খত্তিযভাৰাৰহেন অভিসেকেন. মুদ্ধনি অৰসিত্তোতি মত্থকেযেৰ অভিসিত্তো. এত্থ চ ‘‘যথাৰিধানৰিহিতেনা’’তি ইমিনা পোরাণকাচিণ্ণৰিধানসমঙ্গিতাসঙ্খাতং একং অঙ্গং দস্সেতি, ‘‘খত্তিযাভিসেকেনা’’তি ইমিনা খত্তিযভাৰাৰহতাসঙ্খাতং, ‘‘মুদ্ধনি অৰসিত্তো’’তি ইমিনা মুদ্ধনিযেৰ অভিসিঞ্চিতভাৰসঙ্খাতং. ইতি তিৰঙ্গসমন্নাগতো খত্তিযাভিসেকো ৰুত্তো হোতি. যেন অভিসিত্তরাজূনং রাজানুভাৰো সমিজ্ঝতি. কেন পনাযমত্থো ৰিঞ্ঞাযতীতি? পোরাণকসত্থাগতনযেন. ৰুত্তঞ্হি অগ্গঞ্ঞসুত্তট্ঠকথাযং মহাসম্মতাভিসেকৰিভাৰনায ‘‘তে পনস্স খেত্তসামিনো তীহি সঙ্খেহি অভিসেকম্পি অকংসূ’’তি (দী. নি. অট্ঠ. ৩.১৩১) মজ্ঝিমাগমট্ঠকথাযঞ্চ মহাসীহনাদসুত্তৰণ্ণনাযং ৰুত্তং ‘‘মুদ্ধাৰসিত্তেনাতি তীহি সঙ্খেহি খত্তিযাভিসেকেন মুদ্ধনি অভিসিত্তেনা’’তি (ম. নি. অট্ঠ. ১.১৬০) সীহল়ট্ঠকথাযম্পি চূল়সীহনাদসুত্তৰণ্ণনাযং ‘‘পঠমং তাৰ অভিসেকং গণ্হন্তানং রাজূনং সুৰণ্ণমযাদীনি তীণি সঙ্খানি চ গঙ্গোদকঞ্চ খত্তিযকঞ্ঞঞ্চ লদ্ধুং ৰট্টতী’’তিআদি ৰুত্তং.

অযং পন তত্থাগতনযেন অভিসেকৰিধানৰিনিচ্ছযো – অভিসেকমঙ্গলত্থঞ্হি অলঙ্কতপটিযত্তস্স মণ্ডপস্স অন্তোকতস্স উদুম্বরসাখমণ্ডপস্স মজ্ঝে সুপ্পতিট্ঠিতে উদুম্বরভদ্দপীঠম্হি অভিসেকারহং অভিজচ্চং খত্তিযং নিসীদাপেত্ৰা পঠমং তাৰ মঙ্গলাভরণভূসিতা ¶ জাতিসম্পন্না খত্তিযকঞ্ঞা গঙ্গোদকপুণ্ণং সুৰণ্ণমযসামুদ্দিকদক্খিণাৰট্টসঙ্খং উভোহি হত্থেহি সক্কচ্চং গহেত্ৰা সীসোপরি উস্সাপেত্ৰা তেন তস্স মুদ্ধনি অভিসেকোদকং অভিসিঞ্চতি, এৰঞ্চ ৰদেতি ‘‘দেৰ তং সব্বেপি খত্তিযগণা অত্তানমারক্খত্থং ইমিনা অভিসেকেন অভিসেকিকং মহারাজং করোন্তি, ত্ৰং রাজধম্মেসু ঠিতো ধম্মেন সমেন রজ্জং কারেহি, এতেসু খত্তিযগণেসু ত্ৰং পুত্তসিনেহানুকম্পায সহিতচিত্তো, হিতসমমেত্তচিত্তো চ ভৰ, রক্খাৰরণগুত্তিযা তেসং রক্খিতো চ ভৰাহী’’তি. ততো পুন পুরোহিতোপি পোরোহিচ্চঠানানুরূপালঙ্কারেহি অলঙ্কতপটিযত্তো গঙ্গোদকপুণ্ণং রজতমযং সঙ্খং উভোহি হত্থেহি সক্কচ্চং গহেত্ৰা তস্স সীসোপরি উস্সাপেত্ৰা তেন তস্স মুদ্ধনি অভিসেকোদকং অভিসিঞ্চতি, এৰঞ্চ ৰদেতি ‘‘দেৰ তং সব্বেপি ব্রাহ্মণগণা ¶ অত্তানমারক্খত্থং ইমিনা অভিসেকেন অভিসেকিকং মহারাজং করোন্তি, ত্ৰং রাজধম্মেসু ঠিতো ধম্মেন সমেন রজ্জং কারেহি, এতেসু ব্রাহ্মণগণেসু ত্ৰং পুত্তসিনেহানুকম্পায সহিতচিত্তো, হিতসমমেত্তচিত্তো চ ভৰ, রক্খাৰরণগুত্তিযা তেসং রক্খিতো চ ভৰাহী’’তি. ততো পুন সেট্ঠিপি সেট্ঠিট্ঠানভূসনভূসিতো গঙ্গোদকপুণ্ণং রতনমযং সঙ্খং উভোহি হত্থেহি সক্কচ্চং গহেত্ৰা তস্স সীসোপরি উস্সাপেত্ৰা তেন তস্স মুদ্ধনি অভিসেকোদকং অভিসিঞ্চতি, এৰঞ্চ ৰদেতি ‘‘দেৰ তং সব্বেপি গহপতিগণা অত্তানমারক্খত্থং ইমিনা অভিসেকেন অভিসেকিকং মহারাজং করোন্তি, ত্ৰং রাজধম্মেসু ঠিতো ধম্মেন সমেন রজ্জং কারেহি, এতেসু গহপতিগণেসু ত্ৰং পুত্তসিনেহানুকম্পায সহিতচিত্তো, হিতসমমেত্তচিত্তো চ ভৰ, রক্খাৰরণগুত্তিযা তেসং রক্খিতো চ ভৰাহী’’তি. তে পন তস্স এৰং ৰদন্তা ‘‘সচে ত্ৰং অম্হাকং ৰচনানুরূপং রজ্জং করিস্সসি, ইচ্চেতং কুসলং. নো চে করিস্সসি, তৰ মুদ্ধা সত্তধা ফলতূ’’তি এৰং রঞ্ঞো অভিসপন্তি ৰিযাতি দট্ঠব্বন্তি. ৰড্ঢকীসূকরজাতকাদীহি চাযমত্থো ৰিভাৰেতব্বো, অভিসেকোপকরণানিপি সমন্তপাসাদিকাদীসু (পারা. অট্ঠ. ১.ততিযসঙ্গীতিকথা) গহেতব্বানীতি.

যস্মা নিহতপচ্চামিত্তো, তস্মা ন সমনুপস্সতীতি সম্বন্ধো. অনৰজ্জতা কুসলভাৰেনাতি আহ ‘‘কুসলং সীলপদট্ঠানেহী’’তিআদি. ইদং ৰুত্তং হোতি – কুসলসীলপদট্ঠানা অৰিপ্পটিসারপামোজ্জপীতিপস্সদ্ধিধম্মা, অৰিপ্পটিসারাদিনিমিত্তঞ্চ উপ্পন্নং চেতসিকসুখং পটিসংৰেদেতি, চেতসিকসুখসমুট্ঠানেহি চ পণীতরূপেহি ফুট্ঠসরীরস্স উপ্পন্নং কাযিকসুখন্তি.

ইন্দ্রিযসংৰরকথাৰণ্ণনা

২১৩. সামঞ্ঞস্স ¶ ৰিসেসাপেক্খতায ইধাধিপ্পেতোপি ৰিসেসো তেন অপরিচ্চত্তো এৰ হোতীতি আহ ‘‘চক্খুসদ্দো কত্থচি বুদ্ধচক্খুম্হি ৰত্ততী’’তিআদি. ৰিজ্জমানমেৰ হি অভিধেয্যভাৰেন ৰিসেসত্থং ৰিসেসন্তরনিৰত্তনেন ৰিসেসসদ্দো ৰিভাৰেতি, ন অৰিজ্জমানং. সেসপদেসুপি এসেৰ নযো. অঞ্ঞেহি অসাধারণং বুদ্ধানমেৰ চক্খু দস্সনন্তি ¶ বুদ্ধচক্খু, আসযানুসযঞাণং, ইন্দ্রিযপরোপরিযত্তঞাণঞ্চ. সমন্ততো সব্বসো দস্সনট্ঠেন চক্খূতি সমন্তচক্খু, সব্বঞ্ঞুতঞ্ঞাণং. তথূপমন্তি পব্বতমুদ্ধূপমং, ধম্মমযং পাসাদন্তি সম্বন্ধো. সুমেধ সমন্তচক্খু ত্ৰং জনতমৰেক্খস্সূতি অত্থো. অরিযমগ্গত্তযপঞ্ঞাতি হেট্ঠিমারিযমগ্গত্তযপঞ্ঞা. ‘‘ধম্মচক্খু নাম হেট্ঠিমা তযো মগ্গা, তীণি চ ফলানী’’তি সল়াযতনৰগ্গট্ঠকথাযং (সং. নি. অট্ঠ. ৩.৪.৪১৮) ৰুত্তং, ইধ পন মগ্গেহেৰ ফলানি সঙ্গহেত্ৰা দস্সেতি. চতুসচ্চসঙ্খাতে ধম্মে চক্খূতি হি ধম্মচক্খু. পঞ্ঞাযেৰ দস্সনট্ঠেন চক্খূতি পঞ্ঞাচক্খু, পুব্বেনিৰাসাসৰক্খযঞাণং. দিব্বচক্খুম্হীতি দুতিযৰিজ্জায. ইধাতি ‘‘চক্খুনা রূপং দিস্ৰা’’তি ইমস্মিং পাঠে. অযন্তি চক্খুসদ্দো. ‘‘পসাদচক্খুৰোহারেনা’’তি ইমিনা ইধ চক্খুসদ্দো চক্খুপসাদেযেৰ নিপ্পরিযাযতো ৰত্ততি, পরিযাযতো পন নিস্সযৰোহারেন নিস্সিতস্স ৰত্তব্বতো চক্খুৰিঞ্ঞাণেপি যথা ‘‘মঞ্চা উক্কুট্ঠিং করোন্তী’’তি দস্সেতি. ইধাপি সসম্ভারকথা অৰসিট্ঠাতি কত্ৰা সেসপদেসুপীতি পি-সদ্দগ্গহণং, ‘‘ন নিমিত্তগ্গাহী’’তিআদিপদেসুপীতি অত্থো. ৰিৰিধং অসনং খেদনং ব্যাসেকো, কিলেসো এৰ ব্যাসেকো, তেন ৰিরহিতো তথা, ৰিরহিততা চ অসম্মিস্সতা, অসম্মিস্সভাৰো চ সম্পযোগাভাৰতো পরিসুদ্ধতাতি আহ ‘‘অসম্মিস্সং পরিসুদ্ধ’’ন্তি, কিলেসদুক্খেন অৰোমিস্সং, ততো চ সুৰিসুদ্ধন্তি অত্থো. সতি চ সুৰিসুদ্ধে ইন্দ্রিযসংৰরে নীৰরণেসু পধানভূতপাপধম্মৰিগমেন অধিচিত্তানুযোগো হত্থগতো এৰ হোতি, তস্মা অধিচিত্তসুখমেৰ ‘‘অব্যাসেকসুখ’’ন্তি ৰুচ্চতীতি দস্সেতি ‘‘অধিচিত্তসুখ’’ন্তি ইমিনা.

সতিসম্পজঞ্ঞকথাৰণ্ণনা

২১৪. সমন্ততো পকারেহি, পকট্ঠং ৰা সৰিসেসং জানাতীতি সম্পজানো, তস্স ভাৰো সম্পজঞ্ঞং, তথাপৰত্তঞাণং, তস্স ৰিভজনং সম্পজঞ্ঞভাজনীযং, তস্মিং সম্পজঞ্ঞভাজনীযম্হি. ‘‘গমন’’ন্তি ইমিনা অভিক্কমনং অভিক্কন্তন্তি ভাৰসাধনমাহ. তথা পটিক্কমনং পটিক্কন্তন্তি ৰুত্তং ‘‘নিৰত্তন’’ন্তি. গমনঞ্চেত্থ নিৰত্তেত্ৰা, অনিৰত্তেত্ৰা চ গমনং, নিৰত্তনং পন ¶ নিৰত্তিমত্তমেৰ, অঞ্ঞমঞ্ঞমুপাদানকিরিযামত্তঞ্চেতং দ্ৰযং. কথং লব্ভতীতি আহ ‘‘গমনে’’তিআদি. অভিহরন্তোতি গমনৰসেন কাযং উপনেন্তো. পটিনিৰত্তেন্তোতি ¶ ততো পুন নিৰত্তেন্তো. অপনামেন্তোতি অপক্কমনৰসেন পরিণামেন্তো. আসনস্সাতি পীঠকাদিআসনস্স. পুরিমঅঙ্গাভিমুখোতি অটনিকাদিপুরিমাৰযৰাভিমুখো. সংসরন্তোতি সংসপ্পন্তো. পচ্ছিমঅঙ্গপদেসন্তি অটনিকাদিপচ্ছিমাযৰপ্পদেসং. পচ্চাসংসরন্তোতি পটিআসপ্পন্তো. ‘‘এসেৰ নযো’’তি ইমিনা নিপন্নস্সেৰ অভিমুখং সংসপ্পনপটিআসপ্পনানি দস্সেতি. ঠাননিসজ্জাসযনেসু হি যো গমনৰিধুরো কাযস্স পুরতো অভিহারো, সো অভিক্কমো. পচ্ছতো অপহারো পটিক্কমোতি লক্খণং.

সম্পজাননং সম্পজানং, তেন অত্তনা কত্তব্বকিচ্চস্স করণসীলো সম্পজানকারীতি আহ ‘‘সম্পজঞ্ঞেন সব্বকিচ্চকারী’’তি. ‘‘সম্পজঞ্ঞমেৰ ৰা কারী’’তি ইমিনা সম্পজানস্স করণসীলো সম্পজানকারীতি দস্সেতি. ‘‘সো হী’’তিআদি দুতিযৰিকপ্পস্স সমত্থনং. ‘‘সম্পজঞ্ঞ’’ন্তি চ ইমিনা সম্পজান-সদ্দস্স সম্পজঞ্ঞপরিযাযতা ৰুত্তা. তথা হি আচরিযানন্দত্থেরেন ৰুত্তং ‘‘সমন্ততো, সম্মা, সমং ৰা পজাননং সম্পজানং, তদেৰ সম্পজঞ্ঞ’’ন্তি (ৰিভ. মূলটী. ২.৫২৩) অযং অট্ঠকথাতো অপরো নযো – যথা অতিক্কন্তাদীসু অসম্মোহং উপ্পাদেতি, তথা সম্পজানস্স কারো করণং সম্পজানকারো, সো এতস্স অত্থীতি সম্পজানকারীতি.

ধম্মতো ৰড্ঢিসঙ্খাতেন অত্থেন সহ ৰত্ততীতি সাত্থকং, অভিক্কন্তাদি, সাত্থকস্স সম্পজাননং সাত্থকসম্পজঞ্ঞং. সপ্পাযস্স অত্তনো পতিরূপস্স সম্পজাননং সপ্পাযসম্পজঞ্ঞং. অভিক্কমাদীসু ভিক্খাচারগোচরে, অঞ্ঞত্থ চ পৰত্তেসু অৰিজহিতকম্মট্ঠানসঙ্খাতে গোচরে সম্পজাননং গোচরসম্পজঞ্ঞং. সামঞ্ঞনিদ্দেসেন, হি একসেসনযেন ৰা গোচরসদ্দো তদত্থদ্ৰযেপি পৰত্ততি. অতিক্কমাদীসু অসম্মুয্হনসঙ্খাতং অসম্মোহমেৰ সম্পজঞ্ঞং অসম্মোহসম্পজঞ্ঞং. চিত্তৰসেনেৰাতি চিত্তস্স ৰসেনেৰ, চিত্তৰসমনুগতেনেৰাতি অত্থো. পরিগ্গহেত্ৰাতি তুলযিত্ৰা তীরেত্ৰা, পটিসঙ্খাযাতি অত্থো. সঙ্ঘদস্সনেনেৰ উপোসথপৰারণাদিঅত্থায গমনং সঙ্গহিতং. আদিসদ্দেন কসিণপরিকম্মাদীনং সঙ্গহো. সঙ্খেপতো ৰুত্তং তদত্থমেৰ ৰিৰরিতুং ‘‘চেতিযং ৰা’’তিআদি ৰুত্তং. অরহত্তং পাপুণাতীতি উক্কট্ঠনিদ্দেসো এস. সমথৰিপস্সনুপ্পাদনম্পি হি ভিক্খুনো ৰড্ঢিযেৰ. তত্থাতি অসুভারম্মণে. কেচীতি অভযগিরিৰাসিনো. আমিসতোতি ¶ চীৰরাদিআমিসপচ্চযতো. কস্মাতি আহ ‘‘তং নিস্সাযা’’তিআদি.

তস্মিন্তি ¶ সাত্থকসম্পজঞ্ঞৰসেন পরিগ্গহিতঅত্থে. যস্মা পন ধম্মতো ৰড্ঢিযেৰ অত্থো নাম, তস্মা যং ‘‘সাত্থক’’ন্তি অধিপ্পেতং গমনং, তং সব্বম্পি সপ্পাযমেৰাতি সিযা অৰিসেসেন কস্সচি আসঙ্কাতি তন্নিৰত্তনত্থং ‘‘চেতিযদস্সনং তাৰা’’তিআদি আরদ্ধং. মহাপূজাযাতি মহতিযা পূজায, বহূনং পূজাদিৰসেতি ৰুত্তং হোতি. চিত্তকম্মরূপকানী ৰিযাতি চিত্তকম্মকতপটিমাযো ৰিয, যন্তপযোগেন ৰা নানপ্পকারৰিচিত্তকিরিযা পটিমাযো ৰিয. তত্রাতি তাসু পরিসাসু. অস্সাতি ভিক্খুনো. অসমপেক্খনং নাম গেহস্সিতঅঞ্ঞাণুপেক্খাৰসেন আরম্মণস্স অযোনিসো গহণং. যং সন্ধায ৰুত্তং ‘‘চক্খুনা রূপং দিস্ৰা উপ্পজ্জতি উপেক্খা বালস্স মূল়্হস্স পুথুজ্জনস্সা’’তিআদি (ম. নি. ৩.৩০৮) মাতুগামসম্ফস্সৰসেন কাযসংসগ্গাপত্তি. হত্থিআদিসম্মদ্দেন জীৰিতন্তরাযো. ৰিসভাগরূপদস্সনাদিনা ব্রহ্মচরিযন্তরাযো. ‘‘দসদ্ৰাদসযোজনন্তরে পরিসা সন্নিপতন্তী’’তিআদিনা ৰুত্তপ্পকারেনেৰ. মহাপরিসপরিৰারানন্তি কদাচি ধম্মস্সৰনাদিঅত্থায ইত্থিপুরিসসম্মিস্সপরিৰারে সন্ধায ৰুত্তং.

তদত্থদীপনত্থন্তি অসুভদস্সনস্স সাত্থকভাৰসঙ্খাতস্স অত্থস্স দীপনত্থং. পব্বজিতদিৰসতো পট্ঠায পটিৰচনদানৰসেন ভিক্খূনং অনুৰত্তনকথা আচিণ্ণা, তস্মা পটিৰচনস্স অদানৰসেন অননুৰত্তনকথা তস্স দুতিযা নাম হোতীতি আহ ‘‘দ্ৰে কথা নাম ন কথিতপুব্বা’’তি. দ্ৰে কথাতি হি ৰচনকরণাকরণকথা. তত্থ ৰচনকরণকথাযেৰ কথিতপুব্বা, দুতিযা ন কথিতপুব্বা. তস্মা সুব্বচত্তা পটিৰচনমদাসীতি অত্থো.

এৰন্তি ইমিনা. ‘‘সচে পন চেতিযস্স মহাপূজাযা’’তিআদিকং সব্বম্পি ৰুত্তপ্পকারং পচ্চামসতি, ন ‘‘পুরিসস্স মাতুগামাসুভ’’ন্তিআদিকমেৰ. পরিগ্গহিতং সাত্থকং, সপ্পাযঞ্চ যেন সো পরিগ্গহিতসাত্থকসপ্পাযো, তস্স, তেন যথানুপুব্বিকং সম্পজঞ্ঞপরিগ্গহণং দস্সেতি. ৰুচ্চমানযোগকম্মস্স পৰত্তিট্ঠানতায ভাৰনায আরম্মণং কম্মট্ঠানং, তদেৰ ভাৰনায ¶ ৰিসযভাৰতো গোচরন্তি আহ ‘‘কম্মট্ঠানসঙ্খাতং গোচর’’ন্তি. উগ্গহেত্ৰাতি যথা উগ্গহনিমিত্তং উপ্পজ্জতি, এৰং উগ্গহকোসল্লস্স সম্পাদনৰসেন উগ্গহণং কত্ৰা. ভিক্খাচারগোচরেতি ভিক্খাচারসঙ্খাতে গোচরে, অনেন কম্মট্ঠানে, ভিক্খাচারে চ গোচরসদ্দোতি দস্সেতি.

ইধাতি সাসনে. হরতীতি কম্মট্ঠানং পৰত্তনৰসেন নেতি, যাৰ পিণ্ডপাতপটিক্কমা অনুযুঞ্জতীতি অত্থো. ন পচ্চাহরতীতি আহারূপযোগতো যাৰ দিৰাঠানুপসঙ্কমনা কম্মট্ঠানং ন পটিনেতি. তত্থাতি তেসু চতূসু ভিক্খূসু. আৰরণীযেহীতি নীৰরণেহি. পগেৰাতি পাতোযেৰ ¶ . সরীরপরিকম্মন্তি মুখধোৰনাদিসরীরপটিজগ্গনং. দ্ৰে তযো পল্লঙ্কেতি দ্ৰে তযো নিসজ্জাৰারে. ঊরুবদ্ধাসনঞ্হেত্থ পল্লঙ্কো. উসুমন্তি দ্ৰে তীণি উণ্হাপনানি সন্ধায ৰুত্তং. কম্মট্ঠানং অনুযুঞ্জিত্ৰাতি তদহে মূলভূতং কম্মট্ঠানং অনুযুঞ্জিত্ৰা. কম্মট্ঠানসীসেনেৰাতি কম্মট্ঠানমুখেনেৰ, কম্মট্ঠানমৰিজহন্তো এৰাতি ৰুত্তং হোতি, তেন ‘‘পতোপি অচেতনো’’তিআদিনা (দী. নি. অট্ঠ. ১.২১৪; ম. নি. অট্ঠ. ১.২০৯; সং. নি. অট্ঠ. ৩.৫.১৬৮; ৰিভ. অট্ঠ. ৫২৩) ৰক্খমানং কম্মট্ঠানং, যথাপরিহরিযমানং ৰা অৰিজহিত্ৰাতি দস্সেতি.

গন্ত্ৰাতি পাপুণিত্ৰা. বুদ্ধানুস্সতিকম্মট্ঠানং চে, তদেৰ নিপচ্চকারসাধনং. অঞ্ঞঞ্চে, অনিপচ্চকারকরণমিৰ হোতীতি দস্সেতুং ‘‘সচে’’তিআদি ৰুত্তং. অতব্বিসযেন তং ঠপেত্ৰা. ‘‘মহন্তং চেতিযং চে’’তিআদিনা কম্মট্ঠানিকস্স মূলকম্মট্ঠানমনসিকারস্স পপঞ্চাভাৰদস্সনং. অঞ্ঞেন পন তথাপি অঞ্ঞথাপি ৰন্দিতব্বমেৰ. তথেৰাতি তিক্খত্তুমেৰ. পরিভোগচেতিযতো সারীরিকচেতিযং গরুতরন্তি কত্ৰা ‘‘চেতিযং ৰন্দিত্ৰা’’তি পুব্বকালকিরিযাৰসেন ৰুত্তং. যথাহ অট্ঠকথাযং ‘‘চেতিযং বাধযমানা বোধিসাখা হরিতব্বা’’তি, (ম. নি. অট্ঠ. ৪.১২৮; অ. নি. অট্ঠ. ১.১.২৭৫; ৰিভ. অট্ঠ. ৮০৯) অযং আচরিযস্স মতি, ‘‘বোধিযঙ্গণং পত্তেনাপী’’তি পন ৰচনতো যদি চেতিযঙ্গণতো গতে ভিক্খাচারমগ্গে বোধিযঙ্গণং ভৰেয্য, সাপি ৰন্দিতব্বাতি মগ্গানুক্কমেনেৰ ‘‘চেতিযং ৰন্দিত্ৰা’’তি পুব্বকালকিরিযাৰচনং, ন তু গরুকাতব্বতানুক্কমেন. এৰঞ্হি সতি বোধিযঙ্গণং পঠমং পত্তেনাপি বোধিং ৰন্দিত্ৰা চেতিযং ৰন্দিতব্বং, একমেৰ পত্তেনাপি তদেৰ ৰন্দিতব্বং, তদুভযম্পি ¶ অপ্পত্তেন ন ৰন্দিতব্বন্তি অযমত্থো সুৰিঞ্ঞাতো হোতি. ভিক্খাচারগতমগ্গেন হি পত্তট্ঠানে কত্তব্বঅন্তরাৰত্তদস্সনমেতং, ন পন ধুৰৰত্তদস্সনং. পুব্বে হেস কতৰত্তোযেৰ. তেনাহ ‘‘পগেৰ চেতিযঙ্গণবোধিযঙ্গণৰত্তং কত্ৰা’’তিআদি. বুদ্ধগুণানুস্সরণৰসেনেৰ বোধিআদিপরিভোগচেতিযেপি নিপচ্চকরণং উপপন্নন্তি দস্সেতি ‘‘বুদ্ধস্স ভগৰতো সম্মুখা ৰিয নিপচ্চকারং দস্সেত্ৰা’’তি ইমিনা. পটিসামিতট্ঠানন্তি সোপানমূলভাৰসামঞ্ঞেন ৰুত্তং, বুদ্ধারম্মণপীতিৰিসযভূতচেতিযঙ্গণবোধিযঙ্গণতো বাহিরট্ঠানং পত্ৰাতি ৰুত্তং হোতি.

গামসমীপেতি গামূপচারে. তাৰ পঞ্হং ৰা পুচ্ছন্তি, ধম্মং ৰা সোতুকামা হোন্তীতি সম্বন্ধো. জনসঙ্গহত্থন্তি ‘‘মযি অকথেন্তে এতেসং কো কথেস্সতী’’তি ধম্মানুগ্গহেন মহাজনস্স সঙ্গহণত্থং. অট্ঠকথাচরিযানং ৰচনং সমত্থেতুং ‘‘ধম্মকথা হি কম্মট্ঠানৰিনিমুত্তা নাম নত্থী’’তি ৰুত্তং. তস্মাতি যস্মা ¶ ‘‘ধম্মকথা নাম কাতব্বাযেৰা’’তি অট্ঠকথাচরিযা ৰদন্তি, যস্মা ৰা ধম্মকথা কম্মট্ঠানৰিনিমুত্তা নাম নত্থি, তস্মা ধম্মকথং কথেত্ৰাতি সম্বন্ধো. আচরিযানন্দত্থেরেন (ৰিভ. মূলটী. ৫২৩) পন ‘‘তস্মা’’তি এতস্স ‘‘কথেতব্বাযেৰাতি ৰদন্তী’’তি এতেন সম্বন্ধো ৰুত্তো. কম্মট্ঠানসীসেনেৰাতি অত্তনা পরিহরিযমানং কম্মট্ঠানং অৰিজহনৰসেন, তদনুগুণংযেৰ ধম্মকথং কথেত্ৰাতি অত্থো, দুতিযপদেপি এসেৰ নযো. অনুমোদনং কত্ৰাতি এত্থাপি ‘‘কম্মট্ঠানসীসেনেৰা’’তি অধিকারো. তত্থাতি গামতো নিক্খমনট্ঠানেযেৰ.

‘‘পোরাণকভিক্খূ’’তিআদিনা পোরাণকাচিণ্ণদস্সনেন যথাৰুত্তমত্থং দল়্হং করোতি. সম্পত্তপরিচ্ছেদেনেৰাতি ‘‘পরিচিতো অপরিচিতো’’তিআদিৰিভাগং অকত্ৰা সম্পত্তকোটিযা এৰ, সমাগমমত্তেনেৰাতি অত্থো. আনুভাৰেনাতি অনুগ্গহবলেন. ভযেতি পরচক্কাদিভযে. ছাতকেতি দুব্ভিক্খে.

‘‘পচ্ছিমযামেপি নিসজ্জাচঙ্কমেহি ৰীতিনামেত্ৰা’’তিআদিনা ৰুত্তপ্পকারং. করোন্তস্সাতি করমানস্সেৰ, অনাদরে চেতং সামিৰচনং. কম্মজতেজোতি গহণিং সন্ধাযাহ. পজ্জলতীতি উণ্হভাৰং জনেতি. ততোযেৰ উপাদিন্নকং গণ্হাতি, সেদা মুচ্চন্তি. কম্মট্ঠানং ৰীথিং নারোহতি ¶ খুদাপরিস্সমেন কিলন্তকাযস্স সমাধানাভাৰতো. অনুপাদিন্নং ওদনাদিৰত্থু. উপাদিন্নং উদরপটলং. অন্তোকুচ্ছিযঞ্হি ওদনাদিৰত্থুস্মিং অসতি কম্মজতেজো উট্ঠহিত্ৰা উদরপটলং গণ্হাতি, ‘‘ছাতোস্মি, আহারং মে দেথা’’তি ৰদাপেতি, ভুত্তকালে উদরপটলং মুঞ্চিত্ৰা ৰত্থুং গণ্হাতি, অথ সত্তো একগ্গো হোতি, যতো ‘‘ছাযারক্খসো ৰিয কম্মজতেজো’’তি অট্ঠকথাসু ৰুত্তো. সো পগেৰাতি এত্থ ‘‘তস্মা’’তি সেসো. গোরূপানন্তি গুন্নং, গোসমূহানং ৰা, ৰজতো গোচরত্থায নিক্খমনৰেলাযমেৰাতি অত্থো. ৰুত্তৰিপরীতনযেন উপাদিন্নকং মুঞ্চিত্ৰা অনুপাদিন্নকং গণ্হাতি. অন্তরাভত্তেতি ভত্তস্স অন্তরে, যাৰ ভত্তং ন ভুঞ্জতি, তাৰাতি অত্থো. তেনাহ ‘‘কম্মট্ঠানসীসেন আহারঞ্চ পরিভুঞ্জিত্ৰা’’তি. অৰসেসট্ঠানেতি যাগুযা অগ্গহিতট্ঠানে. ততোতি ভুঞ্জনতো. পোঙ্খানুপোঙ্খন্তি কম্মট্ঠানানুপট্ঠানস্স অনৰচ্ছেদদস্সনমেতং, উত্তরুত্তরিন্তি অত্থো, যথা পোঙ্খানুপোঙ্খং পৰত্তায সরপটিপাটিযা অনৰচ্ছেদো, এৰমেতস্সাপি কম্মট্ঠানুপট্ঠানস্সাতি ৰুত্তং হোতি. ‘‘এদিসা চা’’তিআদিনা তথা কম্মট্ঠানমনসিকারস্সাপি সাত্থকভাৰং দস্সেতি. আসনন্তি নিসজ্জাসনং.

নিক্খিত্তধুরোতি ভাৰনানুযোগে অনুক্খিত্তধুরো অনারদ্ধৰীরিযো. ৰত্তপটিপত্তিযা অপরিপূরণেন ¶ সব্বৰত্তানি ভিন্দিত্ৰা. পঞ্চৰিধচেতোখীলৰিনিবন্ধচিত্তোতি পঞ্চৰিধেন চেতোখীলেন, ৰিনিবন্ধেন চ সম্পযুত্তচিত্তো. ৰুত্তঞ্হি মজ্ঝিমাগমে চেতোখীলসুত্তে –

‘‘কতমস্স পঞ্চ চেতোখীলা অপ্পহীনা হোন্তি? ইধ ভিক্খৰে ভিক্খু সত্থরি কঙ্খতি, ধম্মে কঙ্খতি, সঙ্ঘে কঙ্খতি, সিক্খায কঙ্খতি, সব্রহ্মচারীসু কুপিতো হোতী’’তি, (ম. নি. ১.১৮৫)

‘‘কতমস্স পঞ্চ চেতসো ৰিনিবন্ধা অসমুচ্ছিন্না হোন্তি? ইধ ভিক্খৰে ভিক্খু কামে অৰীতরাগো হোতি, কাযে অৰীতরাগো হোতি, রূপে অৰীতরাগো হোতি, যাৰদত্থং উদরাৰদেহকং ভুঞ্জিত্ৰা সেয্যসুখং পস্সসুখং মিদ্ধসুখং অনুযুত্তো ৰিহরতি, অঞ্ঞতরং দেৰনিকাযং পণিধায ব্রহ্মচরিযং চরতী’’তি (ম. নি. ১.১৮৬). চ –

ৰিত্থারো ¶ . আচরিযেন (দী. নি. টী. ১.২১৫) পন পঞ্চৰিধচেতোৰিনিবন্ধচিত্তভাৰোযেৰ পদেকদেসমুল্লিঙ্গেত্ৰা দস্সিতো. চিত্তস্স কচৰরখাণুকভাৰো হি চেতোখীলো, চিত্তং বন্ধিত্ৰা মুট্ঠিযং ৰিয কত্ৰা গণ্হনভাৰো চেতসো ৰিনিবন্ধো. পঠমো চেত্থ ৰিচিকিচ্ছাদোসৰসেন, দুতিযো লোভৰসেনাতি অযমেতেসং ৰিসেসো. চরিত্ৰাতি ৰিচরিত্ৰা. কম্মট্ঠানৰিরহৰসেন তুচ্ছো.

ভাৰনাসহিতমেৰ ভিক্খায গতং, পচ্চাগতঞ্চ যস্সাতি গতপচ্চাগতিকং, তদেৰ ৰত্তং, তস্স ৰসেন. অত্তকামাতি অত্তনো হিতসুখমিচ্ছন্তা, ধম্মচ্ছন্দৰন্তোতি অত্থো. ধম্মো হি হিতং, সুখঞ্চ তন্নিমিত্তকন্তি. অথ ৰা ৰিঞ্ঞূনং অত্ততো নিব্বিসেসত্তা, অত্তভাৰপরিযাপন্নত্তা চ ধম্মো অত্তা নাম, তং কামেন্তি ইচ্ছন্তীতি অত্তকামা. অধুনা পন অত্থকামাতি হিতৰাচকেন অত্থসদ্দেন পাঠো দিস্সতি, ধম্মসঞ্ঞুত্তং হিতমিচ্ছন্তা, হিতভূতং ৰা ধম্মমিচ্ছন্তাতি তস্সত্থো. ইণট্টাতি ইণেন পীল়িতা. তথা সেসপদদ্ৰযেপি. এত্থাতি সাসনে.

উসভং নাম ৰীসতি যট্ঠিযো, গাৰুতং নাম অসীতি উসভা. তায সঞ্ঞাযাতি তাদিসায পাসাণসঞ্ঞায, কম্মট্ঠানমনসিকারেন ‘‘এত্তকং ঠানমাগতা’’তি জানন্তা গচ্ছন্তীতি অধিপ্পাযো. নন্তি কিলেসং. কম্মট্ঠানৰিপ্পযুত্তচিত্তেন পাদুদ্ধারণমকত্থুকামতো তিট্ঠতি, পচ্ছাগতো পন ঠিতিমনতিক্কমিতুকামতো. সোতি উপ্পন্নকিলেসো ভিক্খু. অযন্তি পচ্ছাগতো ¶ . এতন্তি পরস্স জাননং. তত্থেৰাতি পতিট্ঠিতট্ঠানেযেৰ. সোযেৰ নযোতি ‘‘অযং ভিক্খূ’’তিআদিকা যো পতিট্ঠানে ৰুত্তো, সো এৰ নিসজ্জাযপি নযো. পচ্ছতো আগচ্ছন্তানং ছিন্নভত্তভাৰভযেনাপি যোনিসোমনসিকারং পরিব্রূহেতীতি ইদম্পি পরস্স জাননেনেৰ সঙ্গহিতন্তি দট্ঠব্বং. পুরিমপাদেযেৰাতি পঠমং কম্মট্ঠানৰিপ্পযুত্তচিত্তেন উদ্ধরিতপাদৰল়ঞ্জেযেৰ. এতীতি গচ্ছতি. ‘‘আলিন্দকৰাসী মহাফুস্সদেৰত্থেরো ৰিযা’’তিআদিনা অট্ঠানেযেৰেতং কথিতং. ‘‘ক্ৰাযং এৰং পটিপন্নপুব্বো’’তি আসঙ্কং নিৰত্তেতি.

মদ্দন্তাতি ধঞ্ঞকরণট্ঠানে সালিসীসাদীনি মদ্দন্তা. অস্সাতি থেরস্স, উভযাপেক্খৰচনমেতং. অস্স অরহত্তপ্পত্তদিৰসে চঙ্কমনকোটিযন্তি চ ¶ . অধিগমপ্পিচ্ছতায ৰিক্খেপং কত্ৰা, নিবন্ধিত্ৰা চ পটিজানিত্ৰাযেৰ আরোচেসি.

পঠমং তাৰাতি পদসোভনত্থং পরিযাযৰচনং. মহাপধানন্তি ভগৰতো দুক্করচরিযং, অম্হাকং অত্থায লোকনাথেন ছব্বস্সানি কতং দুক্করচরিযং ‘‘এৰাহং যথাবলং পূজেস্সামী’’তি অত্থো. পটিপত্তিপূজাযেৰ হি পসত্থতরা সত্থুপূজা, ন তথা আমিসপূজা. ঠানচঙ্কমমেৰাতি অধিট্ঠাতব্বইরিযাপথৰসেন ৰুত্তং, ন ভোজনকালাদীসু অৰস্সং কত্তব্বনিসজ্জায পটিক্খেপৰসেন. এৰসদ্দেন হি ইতরায নিসজ্জায, সযনস্স চ নিৰত্তনং করোতি. ৰিপ্পযুত্তেন উদ্ধটে পটিনিৰত্তেন্তোতি সম্পযুত্তেন উদ্ধরিতপাদেযেৰ পুন ঠপনং সন্ধাযাহ. ‘‘গামসমীপং গন্ত্ৰা’’তি ৰত্ৰা তদত্থং ৰিৰরতি ‘‘গাৰী নূ’’তিআদিনা. কচ্ছকন্তরতোতি উপকচ্ছন্তরতো, উপকচ্ছে লগ্গিতকমণ্ডলুতোতি ৰুত্তং হোতি. উদকগণ্ডূসন্তি উদকাৰগণ্ডকারকং. কতিনং তিথীনং পূরণী কতিমী, ‘‘পঞ্চমী নু খো পক্খস্স, অট্ঠমী’’তিআদিনা দিৰসং ৰা পুচ্ছিতোতি অত্থো. অনারোচনস্স অকত্তব্বত্তা আরোচেতি. তথা হি ৰুত্তং ‘‘অনুজানামি ভিক্খৰে সব্বেহেৰ পক্খগণনং উগ্গহেতু’’ন্তিআদি (মহাৰ. ১৫৬).

‘‘উদকং গিলিত্ৰা আরোচেতী’’তি ৰুত্তনযেন. তত্থাতি গামদ্ৰারে. নিট্ঠুভনন্তি উদকনিট্ঠুভনট্ঠানং. তেসূতি মনুস্সেসু. ঞাণচক্খুসম্পন্নত্তা চক্খুমা. ঈদিসোতি সুসম্মট্ঠচেতিযঙ্গণাদিকো. ৰিসুদ্ধিপৰারণন্তি খীণাসৰভাৰেন পৰারণং.

ৰীথিং ওতরিত্ৰা ইতো চিতো চ অনোলোকেত্ৰা পঠমমেৰ ৰীথিযো সল্লক্খেতব্বাতি আহ ‘‘ৰীথিযো সল্লক্খেত্ৰা’’তি. যং সন্ধায ৰুত্তং ‘‘পাসাদিকেন অভিক্কন্তেন পটিক্কন্তেনা’’তিআদি ¶ (পারা. ৪৩২). তং গমনং দস্সেতুং ‘‘তত্থ চা’’তিআদিমাহ. ‘‘ন হি জৰেন পিণ্ডপাতিযধুতঙ্গং নাম কিঞ্চি অত্থী’’তি ইমিনা জৰেন গমনে লোলুপ্পচারিতা ৰিয অসারুপ্পতং দস্সেতি. উদকসকটন্তি উদকসারসকটং. তঞ্হি ৰিসমভূমিভাগপ্পত্তং নিচ্চলমেৰ কাতুং ৰট্টতি. তদনুরূপন্তি ভিক্খাদানানুরূপং. ‘‘আহারে পটিকূলসঞ্ঞং উপট্ঠপেত্ৰা’’তিআদীসু যং ৰত্তব্বং, তং পরতো আগমিস্সতি. রথস্স অক্খানং তেলেন অব্ভঞ্জনং, ৰণস্স লেপনং, পুত্তমংসস্স খাদনঞ্চ তিধা উপমা যস্স আহরণস্সাতি তথা. অট্ঠঙ্গসমন্নাগতন্তি ‘‘যাৰদেৰ ¶ ইমস্স কাযস্স ঠিতিযা, যাপনাযা’’তিআদিনা (ম. নি. ১.২৩; ২.২৪, ৩৮৭; সং. নি. ৪.১২০; অ. নি. ৬.৫৮; ৫.৯; ৰিভ. ৫১৮; মহানি. ২০৬) ৰুত্তেহি অট্ঠহি অঙ্গেহি সমন্নাগতং কত্ৰা. ‘‘নেৰ দৰাযা’’তিআদি পন পটিক্খেপমত্তদস্সনং. ভত্তকিলমথন্তি ভত্তৰসেন উপ্পন্নকিলমথং. পুরেভত্তাদি দিৰাৰসেন ৰুত্তং. পুরিমযামাদি রত্তিৰসেন.

গতপচ্চাগতেসু কম্মট্ঠানস্স হরণং ৰত্তন্তি অত্থং দস্সেন্তো ‘‘হরণপচ্চাহরণসঙ্খাত’’ন্তি আহ. ‘‘যদি উপনিস্সযসম্পন্নো হোতী’’তি ইদং ‘‘দেৰপুত্তো হুত্ৰা’’তিআদীসুপি সব্বত্থ সম্বজ্ঝিতব্বং. তত্থ পচ্চেকবোধিযা উপনিস্সযসম্পদা কপ্পানং দ্ৰে অসঙ্খ্যেয্যানি, সতসহস্সঞ্চ তজ্জা পুঞ্ঞঞাণসম্ভারসম্ভরণং, সাৰকবোধিযা অগ্গসাৰকানং একমসঙ্খ্যেয্যং, কপ্পসতসহস্সঞ্চ, মহাসাৰকানং (থেরগা. অট্ঠ. ২.ৰঙ্গীসত্থেরগাথাৰণ্ণনা ৰিত্থারো) কপ্পসতসহস্সমেৰ, ইতরেসং পন অতীতাসু জাতীসু ৰিৰট্টুপনিস্সযৰসেন কালনিযমমন্তরেন নিব্বত্তিতং নিব্বেধভাগিযকুসলং. ‘‘সেয্যথাপী’’তিআদিনা তস্মিং তস্মিং ঠানন্তরে এতদগ্গট্ঠপিতানং থেরানং সক্খিদস্সনং. তত্থ থেরো বাহিযো দারুচীরিযোতি বাহিযৰিসযে সঞ্জাতসংৰড্ঢতায বাহিযো, দারুচীরপরিহরণতো দারুচীরিযোতি চ সমঞ্ঞিতো থেরো. সো হাযস্মা –

‘‘তস্মা তিহ তে বাহিয এৰং সিক্খিতব্বং ‘দিট্ঠে দিট্ঠমত্তং ভৰিস্সতি, সুতে, মুতে, ৰিঞ্ঞাতে ৰিঞ্ঞাতমত্তং ভৰিস্সতী’তি, এৰঞ্হি তে বাহিয সিক্খিতব্বং. যতো খো তে বাহিয দিট্ঠে দিট্ঠমত্তং ভৰিস্সতি, সুতে, মুতে, ৰিঞ্ঞাতে ৰিঞ্ঞাতমত্তং ভৰিস্সতি, ততো ত্ৰং বাহিয ন তেন. যতো ত্ৰং বাহিয ন তেন, ততো বাহিয ন তত্থ. যতো ত্ৰং বাহিয ন তত্থ, ততো ত্ৰং বাহিয নেৰিধ ন হুরং ন উভযমন্তরেন, এসেৰন্তো দুক্খস্সা’তি’’ (উদা. ১০).

এত্তকায ¶ দেসনায অরহত্তং সচ্ছাকাসি. এৰং সারিপুত্তত্থেরাদীনম্পি মহাপঞ্ঞতাদিদীপনানি সুত্তপদানি ৰিত্থারতো ৰত্তব্বানি. ৰিসেসতো পন অঙ্গুত্তরাগমে এতদগ্গসুত্তপদানি (অ. নি. ১.১৮৮) সিখাপত্তন্তি কোটিপ্পত্তং নিট্ঠানপ্পত্তং সব্বথা পরিপুণ্ণতো.

তন্তি ¶ অসম্মুয্হনং. এৰন্তি ইদানি ৰুচ্চমানাকারেন ৰেদিতব্বং. ‘‘অত্তা অভিক্কমতী’’তি ইমিনা দিট্ঠিগাহৰসেন, ‘‘অহং অভিক্কমামী’’তি ইমিনা মানগাহৰসেন, তদুভযস্স পন ৰিনা তণ্হায অপ্পৰত্তনতো তণ্হাগাহৰসেনাতি তীহিপি মঞ্ঞনাহি অন্ধবালপুথুজ্জনস্স অভিক্কমে সম্মুয্হনং দস্সেতি. ‘‘তথা অসম্মুয্হন্তো’’তি ৰত্ৰা তদেৰ অসম্মুয্হনং যেন ঘনৰিনিব্ভোগেন হোতি, তং দস্সেন্তো ‘‘অভিক্কমামী’’তিআদিমাহ. চিত্তসমুট্ঠানৰাযোধাতূতি তেনেৰ অভিক্কমনচিত্তেন সমুট্ঠানা, তংচিত্তসমুট্ঠানিকা ৰা ৰাযোধাতু. ৰিঞ্ঞত্তিন্তি কাযৰিঞ্ঞত্তিং. জনযমানা উপ্পজ্জতি তস্সা ৰিকারভাৰতো. ইতীতি তস্মা উপ্পজ্জনতো. চিত্তকিরিযৰাযোধাতুৰিপ্ফারৰসেনাতি কিরিযমযচিত্তসমুট্ঠানৰাযোধাতুযা ৰিচলনাকারসঙ্খাতকাযৰিঞ্ঞত্তিৰসেন. তস্সাতি অট্ঠিসঙ্ঘাটস্স. অভিক্কমতোতি অভিক্কমন্তস্স. ওমত্তাতি অৰমত্তা লামকপ্পমাণা. ৰাযোধাতুতেজোধাতুৰসেন ইতরা দ্ৰে ধাতুযো.

ইদং ৰুত্তং হোতি – যস্মা চেত্থ ৰাযোধাতুযা অনুগতা তেজোধাতু উদ্ধরণস্স পচ্চযো. উদ্ধরণগতিকা হি তেজোধাতু, তেন তস্সা উদ্ধরণে ৰাযোধাতুযা অনুগতভাৰো হোতি, তস্মা ইমাসং দ্ৰিন্নমেত্থ সামত্থিযতো অধিমত্ততা, তথা অভাৰতো পন ইতরাসং ওমত্ততাতি. যস্মা পন তেজোধাতুযা অনুগতা ৰাযোধাতু অতিহরণৰীতিহরণানং পচ্চযো. কিরিযগতিকায হি ৰাযোধাতুযা অতিহরণৰীতিহরণেসু সাতিসযো ব্যাপারো, তেন তস্সা তত্থ তেজোধাতুযা অনুগতভাৰো হোতি, তস্মা ইমাসং দ্ৰিন্নমেত্থ সামত্থিযতো অধিমত্ততা, ইতরাসঞ্চ তদভাৰতো ওমত্ততাতি দস্সেতি ‘‘তথা অতিহরণৰীতিহরণেসূ’’তি ইমিনা. সতিপি চেত্থ অনুগমকানুগন্তব্বতাৰিসেসে তেজোধাতুৰাযোধাতুভাৰমত্তং সন্ধায তথাসদ্দগ্গহণং কতং. পঠমে হি নযে তেজোধাতুযা অনুগমকতা, ৰাযোধাতুযা অনুগন্তব্বতা, দুতিযে পন ৰাযোধাতুযা অনুগমকতা, তেজোধাতুযা অনুগন্তব্বতাতি. তত্থ অক্কন্তট্ঠানতো পাদস্স উক্খিপনং উদ্ধরণং, ঠিতট্ঠানং অতিক্কমিত্ৰা পুরতো হরণং অতিহরণং. খাণুআদিপরিহরণত্থং, পতিট্ঠিতপাদঘট্টনাপরিহরণত্থং ৰা পস্সেন হরণং ¶ ৰীতিহরণং, যাৰ পতিট্ঠিতপাদো, তাৰ হরণং অতিহরণং, ততো পরং হরণং ৰীতিহরণন্তি ৰা অযমেতেসং ৰিসেসো.

যস্মা ¶ পথৰীধাতুযা অনুগতা আপোধাতু ৰোস্সজ্জনে পচ্চযো. গরুতরসভাৰা হি আপোধাতু, তেন তস্সা ৰোস্সজ্জনে পথৰীধাতুযা অনুগতভাৰো হোতি, তস্মা তাসং দ্ৰিন্নমেত্থ সামত্থিযতো অধিমত্ততা, ইতরাসঞ্চ তদভাৰতো ওমত্ততাতি দস্সেন্তো আহ ‘‘ৰোস্সজ্জনে…পে… বলৰতিযো’’তি. যস্মা পন আপোধাতুযা অনুগতা পথৰীধাতু সন্নিক্খেপনস্স পচ্চযো. পতিট্ঠাভাৰে ৰিয পতিট্ঠাপনেপি তস্সা সাতিসযকিচ্চত্তা আপোধাতুযা তস্সা অনুগতভাৰো হোতি, তথা ঘট্টনকিরিযায পথৰীধাতুযা ৰসেন সন্নিরুজ্ঝনস্স সিজ্ঝনতো তস্সা সন্নিরুজ্ঝনেপি আপোধাতুযা অনুগতভাৰো হোতি, তস্মা ৰুত্তং ‘‘তথা সন্নিক্খেপনসন্নিরুজ্ঝনেসূ’’তি.

অনুগমকানুগন্তব্বতাৰিসেসেপি সতি পথৰীধাতুআপোধাতুভাৰমত্তং সন্ধায তথাসদ্দগ্গহণং কতং. পঠমে হি নযে পথৰীধাতুযা অনুগমকতা, আপোধাতুযা অনুগন্তব্বতা, দুতিযে পন আপোধাতুযা অনুগমকতা, পথৰীধাতুযা অনুগন্তব্বতাতি. ৰোস্সজ্জনঞ্চেত্থ পাদস্স ওনামনৰসেন ৰোস্সগ্গো, ততো পরং ভূমিআদীসু পতিট্ঠাপনং সন্নিক্খেপনং, পতিট্ঠাপেত্ৰা নিম্মদ্দনৰসেন গমনস্স সন্নিরোধো সন্নিরুজ্ঝনং.

তত্থাতি তস্মিং অতিক্কমনে, তেসু ৰা যথাৰুত্তেসু উদ্ধরণাতিহরণৰীতিহরণৰোস্সজ্জনসন্নিক্খেপনসন্নিরুজ্ঝনসঙ্খাতেসু ছসু কোট্ঠাসেসু. উদ্ধরণেতি উদ্ধরণক্খণে. রূপারূপধম্মাতি উদ্ধরণাকারেন পৰত্তা রূপধম্মা, তংসমুট্ঠাপকা চ অরূপধম্মা. অতিহরণং ন পাপুণন্তি খণমত্তাৰট্ঠানতো. সব্বত্থ এস নযো. তত্থ তত্থেৰাতি যত্থ যত্থ উদ্ধরণাদিকে উপ্পন্না, তত্থ তত্থেৰ. ন হি ধম্মানং দেসন্তরসঙ্কমনং অত্থি লহুপরিৰত্তনতো. পব্বং পব্বন্তি পরিচ্ছেদং পরিচ্ছেদং. সন্ধি সন্ধীতি গণ্ঠি গণ্ঠি. ওধি ওধীতি ভাগং ভাগং. সব্বঞ্চেতং উদ্ধরণাদিকোট্ঠাসে সন্ধায সভাগসন্ততিৰসেন ৰুত্তন্তি ৰেদিতব্বং. ইতরো এৰ হি রূপধম্মানম্পি পৰত্তিক্খণো গমনযোগগমনস্সাদানং দেৰপুত্তানং হেট্ঠুপরিযেন পটিমুখং ধাৰন্তানং সিরসি, পাদে চ বন্ধখুরধারাসমাগমতোপি সীঘতরো, যথা তিলানং ভিজ্জযমানানং পটপটাযনেন ¶ ভেদো লক্খীযতি, এৰং সঙ্খতধম্মানং উপ্পাদেনাতি দস্সনত্থং ‘‘পটপটাযন্তা’’তি ৰুত্তং, উপ্পাদৰসেন পটপট-সদ্দং অকরোন্তাপি করোন্তা ৰিযাতি অত্থো. তিলভেদলক্খণং পটপটাযনং ৰিয হি সঙ্খতভেদলক্খণং উপ্পাদো উপ্পন্নানমেকন্ততো ভিন্নত্তা. তত্থাতি অভিক্কমনে. কো একো অভিক্কমতি নাভিক্কমতিযেৰ. কস্স ৰা একস্স অভিক্কমনং সিযা, ন সিযা এৰ. কস্মা? পরমত্থতো হি…পে… ধাতূনং সযনং, তস্মাতি অত্থো. অন্ধবালপুথুজ্জনসম্মূল়্হস্স অত্তনো অভিক্কমননিৰত্তনঞ্হেতং ৰচনং. অথ ৰা ¶ ‘‘কো একো…পে… অভিক্কমন’’ন্তি চোদনায ‘‘পরমত্থতো হী’’তিআদিনা সোধনা ৰুত্তা.

তস্মিং তস্মিং কোট্ঠাসেতি যথাৰুত্তে ছব্বিধেপি কোট্ঠাসে গমনাদিকস্স অপচ্চামট্ঠত্তা. ‘‘সদ্ধিং রূপেন উপ্পজ্জতে, নিরুজ্ঝতী’’তি চ সিলোকপদেন সহ সম্বন্ধো. তত্থ পঠমপদসম্বন্ধে রূপেনাতি যেন কেনচি সহুপ্পজ্জনকেন রূপেন. দুতিযপদসম্বন্ধে পন ‘‘রূপেনা’’তি ইদং যং ততো নিরুজ্ঝমানচিত্ততো উপরি সত্তরসমচিত্তস্স উপ্পাদক্খণে উপ্পন্নং, তদেৰ তস্স নিরুজ্ঝমানচিত্তস্স নিরোধেন সদ্ধিং নিরুজ্ঝনকং সত্তরসচিত্তক্খণাযুকং রূপং সন্ধায ৰুত্তং, অঞ্ঞথা রূপারূপধম্মা সমানাযুকা সিযুং. যদি চ সিযুং, অথ ‘‘রূপং গরুপরিণামং দন্ধনিরোধ’’ন্তিআদি (ৰিভ. অট্ঠ. পকিণ্ণককথা) অট্ঠকথাৰচনেহি, ‘‘নাহং ভিক্খৰে অঞ্ঞং একধম্মম্পি সমনুপস্সামি, যং এৰং লহুপরিৰত্তং, যথযিদং চিত্ত’’ন্তি (অ. নি. ১.৩৮) এৰমাদিপাল়িৰচনেহি চ ৰিরোধো সিযা. চিত্তচেতসিকা হি সারম্মণসভাৰা যথাবলং অত্তনো আরম্মণপচ্চযভূতমত্থং ৰিভাৰেন্তো এৰ উপ্পজ্জন্তি, তস্মা তেসং তংসভাৰনিপ্ফত্তিঅনন্তরং নিরোধো, রূপধম্মা পন অনারম্মণা পকাসেতব্বা, এৰং তেসং পকাসেতব্বভাৰনিপ্ফত্তি সোল়সহি চিত্তেহি হোতি, তস্মা একচিত্তক্খণাতীতেন সহ সত্তরসচিত্তক্খণাযুকতা রূপধম্মানমিচ্ছিতাতি. লহুপরিৰত্তনৰিঞ্ঞাণৰিসেসস্স সঙ্গতিমত্তপচ্চযতায তিণ্ণং খন্ধানং, ৰিসযসঙ্গতিমত্ততায চ ৰিঞ্ঞাণস্স লহুপরিৰত্তিতা, দন্ধমহাভূতপচ্চযতায রূপস্স গরুপরিৰত্তিতা. যথাভূতং নানাধাতুঞাণং খো পন তথাগতস্সেৰ, তেন চ পুরেজাতপচ্চযো রূপধম্মোৰ ৰুত্তো, পচ্ছাজাতপচ্চযো চ তথেৰাতি রূপারূপধম্মানং সমানক্খণতা ন যুজ্জতেৰ, তস্মা ৰুত্তনযেনেৰেত্থ অত্থো ৰেদিতব্বোতি আচরিযেন (দী. নি. টী. ১.২১৪) ৰুত্তং ¶ , তদেতং চিত্তানুপরিৰত্তিযা ৰিঞ্ঞত্তিযা একনিরোধভাৰস্স সুৰিঞ্ঞেয্যত্তা এৰং ৰুত্তং. ততো সৰিঞ্ঞত্তিকেন পুরেতরং সত্তরসমচিত্তস্স উপ্পাদক্খণে উপ্পন্নেন রূপেন সদ্ধিং অঞ্ঞং চিত্তং নিরুজ্ঝতীতি অত্থো ৰেদিতব্বো. অঞ্ঞং চিত্তং নিরুজ্ঝতি, অঞ্ঞং উপ্পজ্জতে চিত্তন্তি যোজেতব্বং. অঞ্ঞো হি সদ্দক্কমো, অঞ্ঞো অত্থক্কমোতি. যঞ্হি পুরিমুপ্পন্নং চিত্তং, তং নিরুজ্ঝন্তং অঞ্ঞস্স পচ্ছা উপ্পজ্জমানস্স অনন্তরাদিপচ্চযভাৰেনেৰ নিরুজ্ঝতি, তথা লদ্ধপচ্চযমেৰ অঞ্ঞম্পি উপ্পজ্জতে চিত্তং, অৰত্থাৰিসেসতো চেত্থ অঞ্ঞথা. যদি এৰং তেসমুভিন্নং অন্তরো লব্ভেয্যাতি চোদনং ‘‘নো’’তি অপনেতুমাহ ‘‘অৰীচি মনুসম্বন্ধো’’তি, যথা ৰীচি অন্তরো ন লব্ভতি, তদেৰেদন্তি অৰিসেসং ৰিদূ মঞ্ঞন্তি, এৰং অনু অনু সম্বন্ধো চিত্তসন্তানো, রূপসন্তানো চ নদীসোতোৰ নদিযং ¶ উদকপ্পৰাহো ৰিয ৰত্ততীতি অত্থো. অৰীচীতি হি নিরন্তরতাৰসেন ভাৰনপুংসকৰচনং.

অভিমুখং লোকিতং আলোকিতন্তি আহ ‘‘পুরতোপেক্খন’’ন্তি. যংদিসাভিমুখো গচ্ছতি, তিট্ঠতি, নিসীদতি, সযতি ৰা, তদভিমুখং পেক্খনন্তি ৰুত্তং হোতি. যস্মা চ তাদিসমালোকিতং নাম হোতি, তস্মা তদনুগতদিসালোকনং ৰিলোকিতন্তি আহ ‘‘অনুদিসাপেক্খন’’ন্তি, অভিমুখদিসানুরূপগতেসু ৰামদক্খিণপস্সেসু ৰিৰিধা পেক্খনন্তি ৰুত্তং হোতি. হেট্ঠাউপরিপচ্ছাপেক্খনঞ্হি ‘‘ওলোকিতউল্লোকিতাপলোকিতানী’’তি গহিতানি. সারুপ্পৰসেনাতি সমণপতিরূপৰসেন, ইমিনাৰ অসারুপ্পৰসেন ইতরেসমগ্গহণন্তি সিজ্ঝতি. সম্মজ্জনপরিভণ্ডাদিকরণে ওলোকিতস্স, উল্লোকহরণাদীসু উল্লোকিতস্স, পচ্ছতো আগচ্ছন্তপরিস্সযপরিৰজ্জনাদীসু অপলোকিতস্স চ সিযা সম্ভৰোতি আহ ‘‘ইমিনা ৰা’’তিআদি, এতেন উপলক্খণমত্তঞ্চেতন্তি দস্সেতি.

কাযসক্খিন্তি কাযেন সচ্ছিকতং পচ্চক্খকারিনং, সাধকন্তি অত্থো. সো হি আযস্মা ৰিপস্সনাকালে ‘‘যমেৰাহং ইন্দ্রিযেসু অগুত্তদ্ৰারতং নিস্সায সাসনে অনভিরতিআদিৰিপ্পকারং পত্তো, তমেৰ সুট্ঠু নিগ্গহেস্সামী’’তি উস্সাহজাতো বলৰহিরোত্তপ্পো, তত্থ চ কতাধিকারত্তা ইন্দ্রিযসংৰরে উক্কংসপারমিপ্পত্তো, তেনেৰ নং সত্থা ‘‘এতদগ্গং ভিক্খৰে মম সাৰকানং ভিক্খূনং ইন্দ্রিযেসু গুত্তদ্ৰারানং, যদিদং নন্দো’’তি (অ. নি. ১.২৩০) এতদগ্গে ঠপেসি. নন্দস্সাতি কত্তুত্থে সামিৰচনং. ইতীতি ইমিনা আলোকনেন.

সাত্থকতা ¶ চ সপ্পাযতা চ ৰেদিতব্বা আলোকিতৰিলোকিতস্সাতি অজ্ঝাহরিত্ৰা সম্বন্ধো. তস্মাতি কম্মট্ঠানাৰিজহনস্সেৰ আলোকিতৰিলোকিতে. গোচরসম্পজঞ্ঞভাৰতো এত্থাতি আলোকিতৰিলোকিতে. অত্তনো কম্মট্ঠানৰসেনেৰাতি খন্ধাদিকম্মট্ঠানৰসেনেৰ আলোকনৰিলোকনং কাতব্বং, ন অঞ্ঞো উপাযো গৰেসিতব্বোতি অধিপ্পাযো. কম্মট্ঠানসীসেনেৰাতি ৰক্খমানকম্মট্ঠানমুখেনেৰ. যস্মা পন আলোকিতাদি নাম ধম্মমত্তস্সেৰ পৰত্তিৰিসেসো, তস্মা তস্স যাথাৰতো জাননং অসম্মোহসম্পজঞ্ঞন্তি দস্সেতুং ‘‘অব্ভন্তরে’’তিআদি ৰুত্তং. আলোকেতাতি আলোকেন্তো. তথা ৰিলোকেতা. ৰিঞ্ঞত্তিন্তি কাযৰিঞ্ঞত্তিং. ইতীতি তস্মা উপ্পজ্জনতো. চিত্তকিরিযৰাযোধাতুৰিপ্ফারৰসেনাতি কিরিযমযচিত্তসমুট্ঠানায ৰাযোধাতুযা ৰিচলনাকারসঙ্খাতকাযৰিঞ্ঞত্তিৰসেন. অক্খিদলন্তি অক্খিপটলং. অধো সীদতীতি ওসীদন্তং ৰিয হেট্ঠা গচ্ছতি. উদ্ধং লঙ্ঘেতীতি লঙ্ঘেন্তং ৰিয উপরি ¶ গচ্ছতি. যন্তকেনাতি অক্খিদলেসু যোজিতরজ্জুযো গহেত্ৰা পরিব্ভমনকচক্কেন. ততোতি তথা অক্খিদলানমোসীদনুল্লঙ্ঘনতো. মনোদ্ৰারিকজৰনস্স মূলকারণপরিজাননং মূলপরিঞ্ঞা. আগন্তুকস্স অব্ভাগতস্স, তাৰকালিকস্স চ তঙ্খণমত্তপৰত্তকস্স ভাৰো আগন্তুকতাৰকালিকভাৰো, তেসং ৰসেন.

তত্থাতি তেসু গাথায দস্সিতেসু সত্তসু চিত্তেসু. অঙ্গকিচ্চং সাধযমানন্তি পধানভূতঅঙ্গকিচ্চং নিপ্ফাদেন্তং, সরীরং হুত্ৰাতি ৰুত্তং হোতি. ভৰঙ্গঞ্হি পটিসন্ধিসদিসত্তা পধানমঙ্গং, পধানঞ্চ ‘‘সরীর’’ন্তি ৰুচ্চতি, অৰিচ্ছেদপ্পৰত্তিহেতুভাৰেন ৰা কারণকিচ্চং সাধযমানন্তি অত্থো. তং আৰট্টেত্ৰাতি ভৰঙ্গসামঞ্ঞৰসেন ৰুত্তং, পৰত্তাকারৰিসেসৰসেন পন অতীতাদিনা তিব্বিধং, তত্থ চ ভৰঙ্গুপচ্ছেদস্সেৰ আৰট্টনং. তন্নিরোধাতি তস্স নিরুজ্ঝনতো, অনন্তরপচ্চযৰসেন হেতুৰচনং. ‘‘পঠমজৰনেপি…পে… সত্তমজৰনেপী’’তি ইদং পঞ্চদ্ৰারিকৰীথিযং ‘‘অযং ইত্থী, অযং পুরিসো’’তি রজ্জনদুস্সনমুয্হনানমভাৰং সন্ধায ৰুত্তং. তত্থ হি আৰজ্জনৰোট্ঠব্বনানং পুরেতরং পৰত্তাযোনিসোমনসিকারৰসেন অযোনিসো আৰজ্জনৰোট্ঠব্বনাকারেন পৰত্তনতো ইট্ঠে ইত্থিরূপাদিম্হি লোভসহগতমত্তং জৰনং উপ্পজ্জতি, অনিট্ঠে চ দোসসহগতমত্তং, ন পনেকন্তরজ্জনদুস্সনাদি, মনোদ্ৰারে ¶ এৰ একন্তরজ্জনদুস্সনাদি হোতি, তস্স পন মনোদ্ৰারিকস্স রজ্জনদুস্সনাদিনো পঞ্চদ্ৰারিকজৰনং মূলং, যথাৰুত্তং ৰা সব্বম্পি ভৰঙ্গাদি, এৰং মনোদ্ৰারিকজৰনস্স মূলকারণৰসেন মূলপরিঞ্ঞা ৰুত্তা, আগন্তুকতাৰকালিকতা পন পঞ্চদ্ৰারিক জৰনস্সেৰ অপুব্বভাৰৰসেন, ইত্তরতাৰসেন চ. যুদ্ধমণ্ডলেতি সঙ্গামপ্পদেসে. হেট্ঠুপরিযৰসেনাতি হেট্ঠা চ উপরি চ পরিৰত্তমানৰসেন, অপরাপরং ভৰঙ্গুপ্পত্তিৰসেনাতি অত্থো. তথা ভৰঙ্গুপ্পাদৰসেন হি তেসং ভিজ্জিত্ৰা পতনং, ইমিনা পন হেট্ঠিমস্স, উপরিমস্স চ ভৰঙ্গস্স অপরাপরুপ্পত্তিৰসেন পঞ্চদ্ৰারিকজৰনতো ৰিসদিসস্স মনোদ্ৰারিকজৰনস্স উপ্পাদং দস্সেতি তস্স ৰসেনেৰ রজ্জনাদিপৰত্তনতো. তেনেৰাহ ‘‘রজ্জনাদিৰসেন আলোকিতৰিলোকিতং হোতী’’তি.

আপাথন্তি গোচরভাৰং. সককিচ্চনিপ্ফাদনৰসেনাতি আৰজ্জনাদিকিচ্চনিপ্ফাদনৰসেন. তন্তি জৰনং. চক্খুদ্ৰারে রূপস্স আপাথগমনেন আৰজ্জনাদীনং পৰত্তনতো পৰত্তিকারণৰসেনেৰ ‘‘গেহভূতে’’তি ৰুত্তং, ন নিস্সযৰসেন. আগন্তুকপুরিসো ৰিযাতি অব্ভাগতপুরিসো ৰিয. দুৰিধা হি আগন্তুকা অতিথিঅব্ভাগতৰসেন. তত্থ কতপরিচযো ‘‘অতিথী’’তি ৰুচ্চতি, অকতপরিচযো ‘‘অব্ভাগতো’’তি, অযমেৰিধাধিপ্পেতো. তেনাহ ‘‘যথা পরগেহে’’তিআদি ¶ . তস্সাতি জৰনস্স রজ্জনদুস্সনমুয্হনং অযুত্তন্তি সম্বন্ধো. আসিনেসূতি নিসিন্নেসু. আণাকরণন্তি অত্তনো ৰসকরণং.

সদ্ধিং সম্পযুত্তধম্মেহি ফস্সাদীহি. তত্থ তত্থেৰ সককিচ্চনিপ্ফাদনট্ঠানে ভিজ্জন্তি. ইতীতি তস্মা আৰজ্জনাদিৰোট্ঠব্বনপরিযোসানানং ভিজ্জনতো. ইত্তরানীতি অচিরট্ঠিতিকানি. তত্থাতি তস্মিং ৰচনে অযং উপমাতি অত্থো. উদযব্বযপরিচ্ছিন্নো তাৰ তত্তকো কালো এতেসন্তি তাৰকালিকানি, তস্স ভাৰো, তংৰসেন.

এতন্তি অসম্মোহসম্পজঞ্ঞং. এত্থাতি এতস্মিং যথাৰুত্তধম্মসমুদাযে. দস্সনং চক্খুৰিঞ্ঞাণং, তস্স ৰসেনেৰ আলোকনৰিলোকনপঞ্ঞাযনতো আৰজ্জনাদীনমগ্গহণং.

সমৰাযেতি সামগ্গিযং. তত্থাতি পঞ্চক্খন্ধৰসেন আলোকনৰিলোকন পঞ্ঞাযমানে. নিমিত্তত্থে চেতং ভুম্মং, তব্বিনিমুত্তকো কো একো ¶ আলোকেতি ন ত্ৰেৰ আলোকেতি. কো চ একো ৰিলোকেতি নত্ৰেৰ ৰিলোকেতীতি অত্থো.

‘‘তথা’’তিআদি আযতনৰসেন, ধাতুৰসেন চ দস্সনং. চক্খুরূপানি যথারহং দস্সনস্স নিস্সযারম্মণপচ্চযো, তথা আৰজ্জনা অনন্তরাদিপচ্চযো, আলোকো উপনিস্সযপচ্চযোতি দস্সনস্স সুত্তন্তনযেন পরিযাযতো পচ্চযতা ৰুত্তা. সহজাতপচ্চযোপি দস্সনস্সেৰ, নিদস্সনমত্তঞ্চেতং অঞ্ঞমঞ্ঞসম্পযুত্তঅত্থিঅৰিগতাদিপচ্চযানম্পি লব্ভনতো, ‘‘সহজাতাদিপচ্চযা’’তিপি অধুনা পাঠো দিস্সতি. ‘‘এৰ’’ন্তিআদি নিগমনং.

ইদানি যথাপাঠং সমিঞ্জনপসারণেসু সম্পজানং ৰিভাৰেন্তো ‘‘সমিঞ্জিতে পসারিতে’’তিআদিমাহ. তত্থ পব্বানন্তি পব্বভূতানং. তংসমিঞ্জনপসারণেনেৰ হি সব্বেসং হত্থপাদানং সমিঞ্জনপসারণং হোতি, পব্বমেতেসন্তি ৰা পব্বা যথা ‘‘সদ্ধো’’তি, পব্বৰন্তানন্তি অত্থো. চিত্তৰসেনেৰাতি চিত্তরুচিযা এৰ, চিত্তসামত্থিযা ৰা. যং যং চিত্তং উপ্পজ্জতি সাত্থেপি অনত্থেপি সমিঞ্জিতুং, পসারিতুং ৰা, তংতংচিত্তানুগতেনেৰ সমিঞ্জনপসারণমকত্ৰাতি ৰুত্তং হোতি. তত্থাতি সমিঞ্জনপসারণেসু অত্থানত্থপরিগ্গণ্হনং ৰেদিতব্বন্তি সম্বন্ধো. খণে খণেতি তথা ঠিতক্খণস্স ব্যাপনিচ্ছাৰচনং. ৰেদনাতি সন্থম্ভনাদীহি রুজ্জনা. ‘‘ৰেদনা উপ্পজ্জতী’’তিআদিনা পরম্পরপযোজনং দস্সেতি. তথা ‘‘তা ৰেদনা ¶ নুপ্পজ্জন্তী’’তিআদিনাপি. পুরিমং পুরিমঞ্হি পচ্ছিমস্স পচ্ছিমস্স কারণৰচনং. কালেতি সমিঞ্জিতুং, পসারিতুং ৰা যুত্তকালে. ফাতিন্তি ৰুদ্ধিং. ঝানাদি পন ৰিসেসো.

তত্রাযং নযোতি সপ্পাযাসপ্পাযঅপরিগ্গণ্হনে ৰত্থুসন্দস্সনসংঙ্খাতো নযো. তদপরিগ্গহণে আদীনৰদস্সনেনেৰ পরিগ্গহণেপি আনিসংসো ৰিভাৰিতোতি তেসমিধ উদাহরণং ৰেদিতব্বং. মহাচেতিযঙ্গণেতি দুট্ঠগামণিরঞ্ঞা কতস্স হেমমালীনামকস্স মহাচেতিযস্স অঙ্গণে. ৰুত্তঞ্হি –

‘‘দীপপ্পসাদকো থেরো, রাজিনো অয্যকস্স মে;

এৰং কিরাহ নত্তা তে, দুট্ঠগামণি ভূপতি.

মহাপুঞ্ঞো ¶ মহাথূপং, সোণ্ণমালিং মনোরমং;

ৰীসং হত্থসতং উচ্চং, কারেস্সতি অনাগতে’’তি.

ভূমিপ্পদেসো চেত্থ অঙ্গণং ‘‘উদঙ্গণে তত্থ পপং অৰিন্দু’’ন্তিআদিসু (জা. ১.১.২) ৰিয, তস্মা উপচারভূতে সুসঙ্খতে ভূমিপ্পদেসেতি অত্থো. তেনেৰ কারণেন গিহী জাতোতি কাযসংসগ্গসমাপজ্জনহেতুনা উক্কণ্ঠিতো হুত্ৰা হীনাযাৰত্তো. ঝাযীতি ঝাযনং ডয্হনমাপজ্জি. মহাচেতিযঙ্গণেপি চীৰরকুটিং কত্ৰা তত্থ সজ্ঝাযং গণ্হন্তীতি ৰুত্তং ‘‘চীৰরকুটিদণ্ডকে’’তি, চীৰরকুটিযা চীৰরছদনত্থায কতদণ্ডকেতি অত্থো. ‘‘মণিসপ্পো নাম সীহল়দীপে ৰিজ্জমানা একা সপ্পজাতীতি ৰদন্তী’’তি আচরিযানন্দত্থেরেন, (ৰিভ. মূলটী. ২৪২) আচরিযধম্মপালত্থেরেন (দী. নি. টী. ১.২১৪) চ ৰুত্তং. ‘‘কেচি, অপরে, অঞ্ঞে’’তি ৰা অৰত্ৰা ‘‘ৰদন্তি’’চ্চেৰ ৰচনঞ্চ সারতো গহেতব্বতাৰিঞ্ঞাপনত্থং অঞ্ঞথা গহেতব্বস্স অৰচনতো, তস্মা ন নীলসপ্পাদি ইধ ‘‘মণিসপ্পো’’তি ৰেদিতব্বো.

মহাথেরৰত্থুনাতি এৰংনামকস্স থেরস্স ৰত্থুনা. অন্তেৰাসিকেহীতি তত্থ নিসিন্নেসু বহূসু অন্তেৰাসিকেসু একেন অন্তেৰাসিকেন. তেনাহ ‘‘তং অন্তেৰাসিকা পুচ্ছিংসূ’’তি. কম্মট্ঠানন্তি ‘‘অব্ভন্তরে অত্তা নামা’’তিআদিনা (দী. নি. অট্ঠ. ১.২১৪) ৰক্খমানপ্পকারং ধাতুকম্মট্ঠানং. পকরণতোপি হি অত্থো ৰিঞ্ঞাযতীতি. তত্থ ঠিতানং পুচ্ছন্তানং সঙ্গহণৰসেন ‘‘তুম্হেহী’’তি পুন পুথুৰচনকরণং. এৰং রূপং সভাৰো যস্সাতি এৰরূপো নিগ্গহিতলোপৰসেন তেন ¶ , কম্মট্ঠানমনসিকারসভাৰেনাতি অত্থো. এৰমেত্থাপীতি অপি-সদ্দেন হেট্ঠা ৰুত্তং আলোকিতৰিলোকিতপক্খমপেক্খনং করোতি. অযং নযো উপরিপি.

সুত্তাকড্ঢনৰসেনাতি যন্তে যোজিতসুত্তানং আৰিঞ্ছনৰসেন. দারুযন্তস্সাতি দারুনা কতযন্তরূপস্স. তং তং কিরিযং যাতি পাপুণাতি, হত্থপাদাদীহি ৰা তং তং আকারং কুরুমানং যাতি গচ্ছতীতি যন্তং, নটকাদিপঞ্চালিকারূপং, দারুনা কতং যন্তং তথা, নিদস্সনমত্তঞ্চেতং. তথা হি নং পোত্থেন ৰত্থেন অলঙ্করিযত্তা পোত্থলিকা, পঞ্চ অঙ্গানি যস্সা সজীৰস্সেৰাতি পঞ্চালিকাতি চ ৰোহরন্তি. হত্থপাদলল়নন্তি হত্থপাদানং কম্পনং, হত্থপাদেহি ৰা লীল়াকরণং.

সঙ্ঘাটিপত্তচীৰরধারণেতি ¶ এত্থ সঙ্ঘাটিচীৰরানং সমানধারণতায একতোদস্সনং গন্থগরুতাপনযনত্থং, অন্তরৰাসকস্স নিৰাসনৰসেন, সেসানং পারুপনৰসেনাতি যথারহমত্থো. তত্থাতি সঙ্ঘাটিচীৰরধারণপত্তধারণেসু. ৰুত্তপ্পকারোতি পচ্চৰেক্খণৰিধিনা সুত্তে ৰুত্তপ্পভেদো.

উণ্হপকতিকস্সাতি উণ্হালুকস্স পরিল়াহবহুলকাযস্স. সীতালুকস্সাতি সীতবহুলকাযস্স. ঘনন্তি অপ্পিতং. দুপট্টন্তি নিদস্সনমত্তং. ‘‘উতুদ্ধটানং দুস্সানং চতুগ্গুণং সঙ্ঘাটিং, দিগুণং উত্তরাসঙ্গং, দিগুণং অন্তরৰাসকং, পংসুকূলে যাৰদত্থ’’ন্তি (মহাৰ. ৩৪৮) হি ৰুত্তং. ৰিপরীতন্তি তদুভযতো ৰিপরীতং, তেসং তিণ্ণম্পি অসপ্পাযং. কস্মাতি আহ ‘‘অগ্গল়াদিদানেনা’’তিআদি. উদ্ধরিত্ৰা অল্লীযাপনখণ্ডং অগ্গল়ং. আদিসদ্দেন তুন্নকম্মাদীনি সঙ্গণ্হাতি. তথা-সদ্দো অনুকড্ঢনত্থো, অসপ্পাযমেৰাতি. পট্টুণ্ণদেসে পাণকেহি সঞ্জাতৰত্থং পট্টুণ্ণং. ৰাকৰিসেসমযং সেতৰণ্ণং দুকূলং. আদিসদ্দেন কোসেয্যকম্বলাদিকং সানুলোমং কপ্পিযচীৰরং সঙ্গণ্হাতি. কস্মাতি ৰুত্তং ‘‘তাদিসঞ্হী’’তিআদি. অরঞ্ঞে এককস্স নিৰাসন্তরাযকরন্তি ব্রহ্মচরিযন্তরাযেকদেসমাহ. চোরাদিসাধারণতো চ তথা ৰুত্তং. নিপ্পরিযাযেন তং অসপ্পাযন্তি সম্বন্ধো. অনেনেৰ যথাৰুত্তমসপ্পাযং অনেকন্তং তথারূপপচ্চযেন কস্সচি কদাচি সপ্পাযসম্ভৰতো. ইদং পন দ্ৰযং একন্তমেৰ অসপ্পাযং কস্সচি কদাচিপি সপ্পাযাভাৰতোতি দস্সেতি. মিচ্ছা আজীৰন্তি এতেনাতি মিচ্ছাজীৰো, অনেসনৰসেন পচ্চযপরিযেসনপযোগো. নিমিত্তকম্মাদীহি পৰত্তো মিচ্ছাজীৰো তথা, এতেন একৰীসতিৰিধং অনেসনপযোগমাহ. ৰুত্তঞ্হি সুত্তনিপাতট্ঠকথাযং খুদ্দকপাঠট্ঠকথাযঞ্চ মেত্তসুত্তৰণ্ণনাযং –

‘‘যো ইমস্মিং সাসনে পব্বজিত্ৰা অত্তানং ন সম্মা পযোজেতি, খণ্ডসীলো হোতি ¶ , একৰীসতিৰিধং অনেসনং নিস্সায জীৰিকং কপ্পেতি. সেয্যথিদং? ৰেল়ুদানং, পত্তদানং, পুপ্ফ, ফল, দন্তকট্ঠ, মুখোদক, সিনান, চুণ্ণ, মত্তিকাদানং, চাটুকম্যতং, মুগ্গসূপ্যতং, পারিভটুতং, জঙ্ঘপেসনিকং, ৰেজ্জকম্মং, দূতকম্মং, পহিণগমনং, পিণ্ডপটিপিণ্ডং, দানানুপ্পদানং, ৰত্থুৰিজ্জং, নক্খত্তৰিজ্জং, অঙ্গৰিজ্জ’’ন্তি.

অভিধম্মটীকাকারেন পন ¶ আচরিযানন্দত্থেরেন এৰং ৰুত্তং –

‘‘একৰীসতি অনেসনা নাম ৰেজ্জকম্মং করোতি, দূতকম্মং করোতি, পহিণকম্মং করোতি, গণ্ডং ফালেতি, অরুমক্খনং দেতি, উদ্ধংৰিরেচনং দেতি, অধোৰিরেচনং দেতি, নত্থুতেলং পচতি, ৰণতেলং পচতি, ৰেল়ুদানং দেতি, পত্ত, পুপ্ফ, ফল, সিনান, দন্তকট্ঠ, মুখোদক, চুণ্ণ, মত্তিকাদানং দেতি, চাটুকম্মং করোতি, মুগ্গসূপিযং, পারিভটুং, জঙ্ঘপেসনিকং দ্ৰাৰীসতিমং দূতকম্মেন সদিসং, তস্মা একৰীসতী’’তি (ধ. স. মূলটী. ১৫০-৫১).

অট্ঠকথাৰচনঞ্চেত্থ ব্রহ্মজালাদিসুত্তন্তনযেন ৰুত্তং, টীকাৰচনং পন খুদ্দকৰত্থুৰিভঙ্গাদিঅভিধম্মনযেন, অতো চেত্থ কেসঞ্চি ৰিসমতাতি ৰদন্তি, ৰীমংসিত্ৰা গহেতব্বং. অপিচ ‘‘নিমিত্তকম্মাদী’’তি ইমিনা নিমিত্তোভাসপরিকথাযো ৰুত্তা. ‘‘মিচ্ছাজীৰো’’তি পন যথাৰুত্তপযোগো, তস্মা নিমিত্তকম্মঞ্চ মিচ্ছাজীৰো চ, তব্বসেন উপ্পন্নং অসপ্পাযং সীলৰিনাসনেন অনত্থাৰহত্তাতি অত্থো. সমাহারদ্ৰন্দেপি হি কত্থচি পুল্লিঙ্গপযোগো দিস্সতি যথা ‘‘চিত্তুপ্পাদো’’তি. অতিরুচিযে রাগাদযো, অতিঅরুচিযে চ দোসাদযোতি আহ ‘‘অকুসলা ধম্মা অভিৰড্ঢন্তী’’তি. তন্তি তদুভযং. কম্মট্ঠানাৰিজহনৰসেনাতি ৰক্খমানকম্মট্ঠানস্স অৰিজহনৰসেন.

‘‘অব্ভন্তরে অত্তা নামা’’তিআদিনা সঙ্খেপতো অসম্মোহসম্পজঞ্ঞং দস্সেত্ৰা ‘‘তত্থ চীৰরম্পি অচেতন’’ন্তিআদিনা চীৰরস্স ৰিয ‘‘কাযোপি অচেতনো’’তি কাযস্স অত্তসুঞ্ঞতাৰিভাৰনেন তমত্থং পরিদীপেন্তো ‘‘তস্মা নেৰ সুন্দরং চীৰরং লভিত্ৰা’’তিআদিনা ৰুত্তস্স ইতরীতরসন্তোসস্স কারণং ৰিভাৰেতীতি দট্ঠব্বং. এৰঞ্হি সম্বন্ধো ৰত্তব্বো – অসম্মোহসম্পজঞ্ঞং দস্সেন্তো ‘‘অব্ভন্তরে’’তিআদিমাহ. অত্তসুঞ্ঞতাৰিভাৰনেন পন তদত্থং পরিদীপিতুং ৰুত্তং ‘‘তত্থ চীৰর’’ন্তিআদি. ইদানি অত্তসুঞ্ঞতাৰিভাৰনস্স পযোজনভূতং ইতরীতরসন্তোসসঙ্খাতং লদ্ধগুণং পকাসেন্তো আহ ‘‘তস্মা নেৰ সুন্দর’’ন্তিআদীতি.

তত্থ ¶ ¶ অব্ভন্তরেতি অত্তনো সন্তানে. তত্থাতি তস্মিং চীৰরপারুপনে. তেসু ৰা পারুপকত্তপারুপিতব্বচীৰরেসু. কাযোপীতি অত্তপঞ্ঞত্তিমত্তো কাযোপি. ‘‘তস্মা’’তি অজ্ঝাহরিতব্বং, অচেতনত্তাতি অত্থো. অহন্তি কম্মভূতো কাযো. ধাতুযোতি চীৰরসঙ্খাতো বাহিরা ধাতুযো. ধাতুসমূহন্তি কাযসঙ্খাতং অজ্ঝত্তিকং ধাতুসমূহং. পোত্থকরূপপটিচ্ছাদনে ধাতুযো ধাতুসমূহং পটিচ্ছাদেন্তি ৰিযাতি সম্বন্ধো. পুসনং স্নেহসেচনং, পূরণং ৰা পোত্থং, লেপনখননকিরিযা, তেন কতন্তি পোত্থকং, তমেৰ রূপং তথা, খননকম্মনিব্বত্তং দারুমত্তিকাদিরূপমিধাধিপ্পেতং. তস্মাতি অচেতনত্তা, অত্তসুঞ্ঞভাৰতো ৰা.

নাগানং নিৰাসো ৰম্মিকো নাগৰম্মিকো. চিত্তীকরণট্ঠানভূতো রুক্খো চেতিযরুক্খো. কেহিচি সক্কতস্সাপি কেহিচি অসক্কতস্স কাযস্স উপমানভাৰেন যোগ্যত্তা তেসমিধ কথনং. তেহীতি মালাগন্ধগূথমুত্তাদীহি. অত্তসুঞ্ঞতায নাগৰম্মিকচেতিযরুক্খাদীহি ৰিয কাযসঙ্খাতেন অত্তনা সোমনস্সং ৰা দোমনস্সং ৰা ন কাতব্বন্তি ৰুত্তং হোতি.

‘‘লভিস্সামি ৰা, নো ৰা’’তি পচ্চৰেক্খণপুব্বকেন ‘‘লভিস্সামী’’তি অত্থসম্পস্সনেনেৰ গহেতব্বং. এৰঞ্হি সাত্থকসম্পজঞ্ঞং ভৰতীতি আহ ‘‘সহসাৰ অগ্গহেত্ৰা’’তিআদি.

গরুপত্তোতি অতিভারভূতো পত্তো. চত্তারো ৰা পঞ্চ ৰা গণ্ঠিকা চতুপঞ্চগণ্ঠিকা যথা ‘‘দ্ৰত্তিপত্তা (পাচি. ২৩২), ছপ্পঞ্চৰাচা’’তি (পাচি. ৬১) অঞ্ঞপদভূতস্স হি ৰা-সদ্দস্সেৰ অত্থো ইধ পধানো চতুগণ্ঠিকাহতো ৰা পঞ্চগণ্ঠিকাহতো ৰা পত্তো দুব্বিসোধনীযোতি ৰিকপ্পনৰসেন অত্থস্স গয্হমানত্তা. আহতা চতুপঞ্চগণ্ঠিকা যস্সাতি চতুপঞ্চগণ্ঠিকাহতো যথা ‘‘অগ্যাহিতো’’তি, চতুপঞ্চগণ্ঠিকাহি ৰা আহতো তথা, দুব্বিসোধনীযভাৰস্স হেতুগব্ভৰচনঞ্চেতং. কামঞ্চঊনপঞ্চবন্ধনসিক্খাপদে (পারা. ৬১২) পঞ্চগণ্ঠিকাহতোপি পত্তো পরিভুঞ্জিতব্বভাৰেন ৰুত্তো, দুব্বিসোধনীযতামত্তেন পন পলিবোধকরণতো ইধ অসপ্পাযোতি দট্ঠব্বং. দুদ্ধোতপত্তোতি অগণ্ঠিকাহতম্পি পকতিযাৰ দুব্বিসোধনীযপত্তং সন্ধাযাহ. ‘‘তং ধোৰন্তস্সেৰা’’তিআদি তদুভযস্সাপি ¶ অসপ্পাযভাৰে কারণং. ‘‘মণিৰণ্ণপত্তো পন লোভনীযো’’তি ইমিনা কিঞ্চাপি সো ৰিনযপরিযাযেন কপ্পিযো, সুত্তন্তপরিযাযেন পন অন্তরাযকরণতো অসপ্পাযোতি দস্সেতি. ‘‘পত্তং ভমং আরোপেত্ৰা মজ্জিত্ৰা পচন্তি ‘মণিৰণ্ণং করিস্সামা’তি, ন ৰট্টতী’’তি (পারা. অট্ঠ. ১.পাল়িমুত্তকৰিনিচ্ছযো) হি ৰিনযট্ঠকথাসু পচনকিরিযামত্তমেৰ পটিক্খিত্তং. তথা হি ৰদন্তি ¶ ‘‘মণিৰণ্ণং পন পত্তং অঞ্ঞেন কতং লভিত্ৰা পরিভুঞ্জিতুং ৰট্টতী’’তি (সারত্থ. টী. ২.৮৫) ‘‘তাদিসঞ্হি অরঞ্ঞে এককস্স নিৰাসন্তরাযকর’’ন্তিআদিনা চীৰরে ৰুত্তনযেন ‘‘নিমিত্তকম্মাদিৰসেন লদ্ধো পন একন্তঅকপ্পিযো সীলৰিনাসনেন অনত্থাৰহত্তা’’তিআদিনা অম্হেহি ৰুত্তনযোপি যথারহং নেতব্বো. সেৰমানস্সাতি হেত্ৰন্তো গধৰচনং অভিৰড্ঢনপরিহাযনস্স.

‘‘অব্ভন্তরে’’তিআদি সঙ্খেপো. ‘‘তত্থা’’তিআদি অত্তসুঞ্ঞতাৰিভাৰনেন ৰিত্থারো. সণ্ডাসেনাতি কম্মারানং অযোগহণৰিসেসেন. অগ্গিৰণ্ণপত্তগ্গহণেতি অগ্গিনা ঝাপিতত্তা অগ্গিৰণ্ণভূতপত্তস্স গহণে. রাগাদিপরিল়াহজনকপত্তস্স ঈদিসমেৰ উপমানং যুত্তন্তি এৰং ৰুত্তং.

‘‘অপিচা’’তিআদিনা সঙ্ঘাটিচীৰরপত্তধারণেসু একতো অসম্মোহসম্পজঞ্ঞং দস্সেতি. ছিন্নহত্থপাদে অনাথমনুস্সেতি সম্বন্ধো. নীলমক্খিকা নাম আসাটিককারিকা. গৰাদীনঞ্হি ৰণেসু নীলমক্খিকাহি কতা অনযব্যসনহেতুভূতা অণ্ডকা আসাটিকা নাম ৰুচ্চতি. অনাথসালাযন্তি অনাথানং নিৰাসসালাযং. দযালুকাতি করুণাবহুলা. ৰণমত্তচোল়কানীতি ৰণপ্পমাণেন পটিচ্ছাদনত্থায ছিন্নচোল়খণ্ডকানি. কেসঞ্চীতি বহূসু কেসঞ্চি অনাথমনুস্সানং. থূলানীতি থদ্ধানি. তত্থাতি তস্মিং পাপুণনে, ভাৰলক্খণে, নিমিত্তে ৰা এতং ভুম্মং. কস্মাতি ৰুত্তং ‘‘ৰণপটিচ্ছাদনমত্তেনেৰা’’তিআদি. চোল়কেন, কপালেনাতি চ অত্থযোগে কম্মত্থে ততিযা, করণত্থে ৰা. ৰণপটিচ্ছাদনমত্তেনেৰ ভেসজ্জকরণমত্তেনেৰাতি পন ৰিসেসনং, ন পন মণ্ডনানুভৰনাদিপ্পকারেন অত্থোতি. সঙ্খারদুক্খতাদীহি নিচ্চাতুরস্স কাযস্স পরিভোগভূতানং পত্তচীৰরানং এদিসমেৰ উপমানমুপপন্নন্তি তথা ৰচনং দট্ঠব্বং. সুখুমত্তসল্লক্খণেন উত্তমস্স সম্পজানস্স করণসীলত্তা, পুরিমেহি চ সম্পজানকারীহি উত্তমত্তা উত্তমসম্পজানকারী.

অসনাদিকিরিযায ¶ কম্মৰিসেসযোগতো অসিতাদিপদেহেৰ কম্মৰিসেসসহিতো কিরিযাৰিসেসো ৰিঞ্ঞাযতীতি ৰুত্তং ‘‘অসিতেতি পিণ্ডপাতভোজনে’’তিআদি. অট্ঠৰিধোপি অত্থোতি অট্ঠপ্পকারোপি পযোজনৰিসেসো.

তত্থ পিণ্ডপাতভোজনাদীসু অত্থো নাম ইমিনা মহাসিৰত্থেরৰাদৰসেন ‘‘ইমস্স কাযস্স ঠিতিযা’’তিআদিনা (সং. নি. ৪.১২০; অ. নি. ৬.৫৮; ৮.৯; ধ. স. ১৩৫৫; মহানি. ২০৬) সুত্তে ¶ ৰুত্তং অট্ঠৰিধম্পি পযোজনং দস্সেতি. মহাসিৰত্থেরো (ধ. স. ১.১৩৫৫) হি ‘‘হেট্ঠা চত্তারি অঙ্গানি পটিক্খেপো নাম, উপরি পন অট্ঠঙ্গানি পযোজনৰসেন সমোধানেতব্বানী’’তি ৰদতি. তত্থ ‘‘যাৰদেৰ ইমস্স কাযস্স ঠিতিযা’’তি একমঙ্গং, ‘‘যাপনাযা’’তি একং, ‘‘ৰিহিংসূপরতিযা’’তি একং, ‘‘ব্রহ্মচরিযানুগ্গহাযা’’তি একং, ‘‘ইতি পুরাণঞ্চ ৰেদনং পটিহঙ্খামী’’তি একং, ‘‘নৰঞ্চ ৰেদনং ন উপ্পাদেস্সামী’’তি একং, ‘‘যাত্রা চ মে ভৰিস্সতী’’তি একং, ‘‘অনৰজ্জতা চা’’তি একং, ফাসুৰিহারো পন ভোজনানিসংসমত্তন্তি এৰং অট্ঠ অঙ্গানি পযোজনৰসেন সমোধানেতব্বানি. অঞ্ঞথা পন ‘‘নেৰ দৰাযা’’তি একমঙ্গং, ‘‘ন মদাযা’’তি একং, ‘‘ন মণ্ডনাযা’’তি একং, ‘‘ন ৰিভূসনাযা’’তি একং, ‘‘যাৰদেৰ ইমস্স কাযস্স ঠিতিযা যাপনাযা’’তি একং, ‘‘ৰিহিংসূপরতিযা ব্রহ্মচরিযানুগ্গহাযা’’তি একং, ‘‘ইতি পুরাণঞ্চ ৰেদনং পটিহঙ্খামি, নৰঞ্চ ৰেদনং ন উপ্পাদেস্সামী’’তি একং, ‘‘যাত্রা চ মে ভৰিস্সতী’’তি একং, ‘‘অনৰজ্জতা চ ফাসুৰিহারো চা’’তি পন ভোজনানিসংসমত্তন্তি ৰুত্তানি অট্ঠঙ্গানি ইধানধিপ্পেতানি. কস্মাতি চে? পযোজনানমেৰ অভাৰতো, তেসমেৰ চ ইধ অত্থসদ্দেন ৰুত্তত্তা. ননু চ ‘‘নেৰদৰাযাতিআদিনা নযেন ৰুত্তো’’তি মরিযাদৰচনেন দুতিযনযস্সেৰ ইধাধিপ্পেতভাৰো ৰিঞ্ঞাযতীতি? ন, ‘‘নেৰ দৰাযা’’তিআদিনা পটিক্খেপঙ্গদস্সনমুখেন পচ্চৰেক্খণপাল়িযা দেসিতত্তা, যথাদেসিততন্তিক্কমস্সেৰ মরিযাদভাৰেন দস্সনতো. পাঠক্কমেনেৰ হি ‘‘নেৰ দৰাযাতিআদিনা নযেনা’’তি ৰুত্তং, ন অত্থক্কমেন, তেন পন ‘‘ইমস্স কাযস্স ঠিতিযাতিআদিনা নযেনা’’তি ৰত্তব্বন্তি.

তিধা ¶ দেন্তে দ্ৰিধা গাহং সন্ধায ‘‘পটিগ্গহণং নামা’’তি ৰুত্তং, ভোজনাদিগহণত্থায হত্থওতারণং ভুঞ্জনাদিঅত্থায আলোপকরণন্তিআদিনা অনুক্কমেন ভুঞ্জনাদিপযোগো ৰাযোধাতুৰসেনেৰ ৰিভাৰিতো. ৰাযোধাতুৰিপ্ফারেনেৰাতি এত্থ এৰ-সদ্দেন নিৰত্তেতব্বং দস্সেতি ‘‘ন কোচী’’তিআদিনা. কুঞ্চিকা নাম অৰাপুরণং, যং ‘‘তাল়ো’’তিপি ৰদন্তি. যন্তকেনাতি চক্কযন্তকেন. যততি উগ্ঘাটননিগ্ঘাটনউক্খিপননিক্খিপনাদীসু ৰাযমতি এতেনাতি হি যন্তকং. সঞ্চুণ্ণকরণং মুসলকিচ্চং. অন্তোকত্ৰা পতিট্ঠাপনং উদুক্খলকিচ্চং. আলোল়িতৰিলোল়িতৰসেন পরিৰত্তনং হত্থকিচ্চং. ইতীতি এৰং. তত্থাতি হত্থকিচ্চসাধনে, ভাৰলক্খণে, নিমিত্তে ৰা ভুম্মং. তনুকখেল়োতি পসন্নখেল়ো. বহলখেল়োতি আৰিলখেল়ো. জিৰ্হাসঙ্খাতেন হত্থেন আলোল়িতৰিলোল়িতৰসেন ইতো চিতো চ পরিৰত্তকং জিৰ্হাহত্থপরিৰত্তকং. কটচ্ছু, দব্বীতি কত্থচি পরিযাযৰচনং. ‘‘পুমে কটচ্ছু দব্বিত্থী’’তি হি ৰুত্তং. ইধ পন যেন ভোজনাদীনি অন্তোকত্ৰা গণ্হাতি, সো কটচ্ছু, যায পন তেসমুদ্ধরণাদীনি করোতি, সা ¶ দব্বীতি ৰেদিতব্বং. পলালসন্থারন্তি পতিট্ঠানভূতং পলালাদিসন্থারং. নিদস্সনমত্তঞ্হেতং. ধারেন্তোতি পতিট্ঠানভাৰেন সম্পটিচ্ছন্তো. পথৰীসন্ধারকজলস্স তংসন্ধারকৰাযুনা ৰিয পরিভুত্তাহারস্স ৰাযোধাতুনাৰ আমাসযে অৰট্ঠানন্তি দস্সেতি ‘‘ৰাযোধাতুৰসেনেৰ তিট্ঠতী’’তি ইমিনা. তথা পরিভুত্তঞ্হি আহারং ৰাযোধাতু হেট্ঠা চ তিরিযঞ্চ ঘনং পরিৰটুমং কত্ৰা যাৰ পক্কা সন্নিরুজ্ঝনৰসেন আমাসযে পতিট্ঠিতং করোতীতি. উদ্ধনং নাম যত্থ উক্খলিযাদীনি পতিট্ঠাপেত্ৰা পচন্তি, যা ‘‘চুল্লী’’তিপি ৰুচ্চতি. রস্সদণ্ডো দণ্ডকো. পতোদো যট্ঠি. ইতীতি ৰুত্তপ্পকারমতিদিসতি. ৰুত্তপ্পকারস্সেৰ হি ধাতুৰসেন ৰিভাৰনা. তত্থ অতিহরতীতি যাৰ মুখা অভিহরতি. ৰীতিহরতীতি ততো কুচ্ছিযং ৰিমিস্সং করোন্তো হরতী’’তি (দী. নি. টী. ১.২১৪) আচরিযধম্মপালত্থেরো, আচরিযানন্দত্থেরো পন ‘‘ততো যাৰ কুচ্ছি, তাৰ হরতী’’তি (ৰিভ. মূলটী. ৫২৩) আহ. তদুভযম্পি অত্থতো একমেৰ উভযত্থাপি কুচ্ছিসম্বন্ধমত্তং হরণস্সেৰ অধিপ্পেতত্তা.

অপিচ অতিহরতীতি মুখদ্ৰারং অতিক্কামেন্তো হরতি. ৰীতিহরতীতি কুচ্ছিগতং পস্সতো হরতি. ধারেতীতি আমাসযে পতিট্ঠিতং করোতি ¶ . পরিৰত্তেতীতি অপরাপরং পরিৰত্তনং করোতি. সঞ্চুণ্ণেতীতি মুসলেন ৰিয সঞ্চুণ্ণনং করোতি. ৰিসোসেতীতি ৰিসোসনং নাতিসুক্খং করোতি. নীহরতীতি কুচ্ছিতো বহি নিদ্ধারেতি. পথৰীধাতুকিচ্চেসুপি যথাৰুত্তোযেৰ অত্থো. তানি পন আহারস্স ধারণপরিৰত্তনসঞ্চুণ্ণনৰিসোসনানি পথৰীসহিতা এৰ ৰাযোধাতু কাতুং সক্কোতি, ন কেৰলা, তস্মা তানি পথৰীধাতুযাপি কিচ্চভাৰেন ৰুত্তানি. সিনেহেতীতি তেমেতি. অল্লত্তঞ্চ অনুপালেতীতি যথা ৰাযোধাতুআদীহি অতিৰিয সোসনং ন হোতি, তথা অল্লভাৰঞ্চ নাতিঅল্লতাকরণৰসেন অনুপালেতি. অঞ্জসোতি আহারস্স পৰিসনপরিৰত্তননিক্খমনাদীনং মগ্গো. ৰিঞ্ঞাণধাতূতি মনোৰিঞ্ঞাণধাতু পরিযেসনজ্ঝোহরণাদিৰিজাননস্স অধিপ্পেতত্তা. তত্থ তত্থাতি তস্মিং তস্মিং পরিযেসনজ্ঝোহরণাদিকিচ্চে. তংতংৰিজাননস্স পচ্চযভূতো তংনিপ্ফাদকোযেৰ পযোগো সম্মাপযোগো নাম. যেন হি পযোগেন পরিযেসনাদি নিপ্ফজ্জতি,. সো তব্বিসযৰিজাননম্পি নিপ্ফাদেতি নাম তদৰিনাভাৰতো. তমন্ৰায আগম্মাতি অত্থো. আভুজতীতি পরিযেসনৰসেন, অজ্ঝাহরণজিণ্ণাজিণ্ণতাদিপটিসংৰেদনৰসেন চ তানি পরিযেসনজ্ঝোহরণজিণ্ণাজিণ্ণতাদীনি আৰজ্জেতি ৰিজানাতি. আৰজ্জনপুব্বকত্তা ৰিজাননস্স ৰিজাননম্পেত্থ গহিতন্তি ৰেদিতব্বং. অথ ৰা সম্মাপযোগো নাম সম্মাপটিপত্তি. তমন্ৰায আগম্ম. ‘‘অব্ভন্তরে অত্তা নাম কোচি ভুঞ্জনকো নত্থী’’তিআদিনা আভুজতি সমন্নাহরতি, ৰিজানাতীতি অত্থো. আভোগপুব্বকো হি সব্বো ৰিঞ্ঞাণব্যাপারোতি ‘‘আভুজতি’’চ্চেৰ ৰুত্তং.

গমনতোতি ¶ ভিক্খাচারৰসেন গোচরগামং উদ্দিস্স গমনতো. পচ্চাগমনম্পি গমনসভাৰত্তা ইমিনাৰ সঙ্গহিতং. পরিযেসনতোতি গোচরগামে ভিক্খায আহিণ্ডনতো. পরিযেসনসভাৰত্তা ইমিনাৰ পটিক্কমনসালাদিউপসঙ্কমনম্পি সঙ্গহিতং. পরিভোগতোতি দন্তমুসলেহি সঞ্চুণ্ণেত্ৰা জিৰ্হায সম্পরিৰত্তনক্খণেযেৰ অন্তরহিতৰণ্ণগন্ধসঙ্খারৰিসেসং সুৰানদোণিযং সুৰানৰমথু ৰিয পরমজেগুচ্ছং আহারং পরিভুঞ্জনতো. আসযতোতি এৰং পরিভুত্তস্স আহারস্স পিত্তসেম্হপুব্বলোহিতাসযভাৰূপগমনেন পরমজিগুচ্ছনহেতুভূততো আমাসযস্স উপরি পতিট্ঠানকপিত্তাদিচতুব্বিধাসযতো. আসযতি একজ্ঝং পৰত্তমানোপি ¶ কম্মবলৰৰত্থিতো হুত্ৰা মরিযাদৰসেন অঞ্ঞমঞ্ঞং অসঙ্করতো তিট্ঠতি পৰত্ততি এত্থাতি হি আসযো, আমাসযস্স উপরি পতিট্ঠানকো পিত্তাদি চতুব্বিধাসযো. মরিযাদত্থো হি অযমাকারো. নিধানতোতি আমাসযতো. নিধেতি যথাভুত্তো আহারো নিচিতো হুত্ৰা তিট্ঠতি এত্থাতি হি আমাসযো ‘‘নিধান’’ন্তি ৰুচ্চতি. অপরিপক্কতোতি ভুত্তাহারপরিপাচনেন গহণীসঙ্খাতেন কম্মজতেজসা অপরিপাকতো. পরিপক্কতোতি যথাৰুত্তকম্মজতেজসাৰ পরিপাকতো. ফলতোতি নিপ্ফত্তিতো, সম্মাপরিপচ্চমানস্স, অসম্মাপরিপচ্চমানস্স চ ভুত্তাহারস্স যথাক্কমং কেসাদিকুণপদদ্দুআদিরোগাভিনিপ্ফত্তিসঙ্খাতপযোজনতোতি ৰা অত্থো. ‘‘ইদমস্স ফল’’ন্তি হি ৰুত্তং. নিস্সন্দনতোতি অক্খিকণ্ণাদীসু অনেকদ্ৰারেসু ইতো চিতো চ ৰিস্সন্দনতো. ৰুত্তঞ্হি –

‘‘অন্নং পানং খাদনীযং, ভোজনঞ্চ মহারহং;

একদ্ৰারেন পৰিসিত্ৰা, নৰদ্ৰারেহি সন্দতী’’তি. (ৰিসুদ্ধি. ১.৩০৩);

সম্মক্খনতোতি হত্থওট্ঠাদিঅঙ্গেসু নৰসু দ্ৰারেসু পরিভোগকালে, পরিভুত্তকালে চ যথারহং সব্বসো মক্খনতো. সব্বত্থ আহারে পটিক্কূলতা পচ্চৰেক্খিতব্বাতি সহ পাঠসেসেন যোজনা. তংতংকিরিযানিপ্ফত্তিপটিপাটিৰসেন চাযং ‘‘গমনতো’’তিআদিকা অনুপুব্বী ঠপিতা. সম্মক্খনং পন পরিভোগাদীসু লব্ভমানম্পি নিস্সন্দৰসেন ৰিসেসতো পটিক্কূলন্তি সব্বপচ্ছা ঠপিতন্তি দট্ঠব্বং.

পত্তকালেতি যুত্তকালে, যথাৰুত্তেন ৰা তেজেন পরিপচ্চনতো উচ্চারপস্সাৰভাৰং পত্তকালে. ৰেগসন্ধারণেন উপ্পন্নপরিল়াহত্তা সকলসরীরতো সেদা মুচ্চন্তি. ততোযেৰ অক্খীনি পরিব্ভমন্তি, চিত্তঞ্চ একগ্গং ন হোতি. অঞ্ঞে চ সূলভগন্দরাদযো রোগা উপ্পজ্জন্তি. সব্বং তন্তি সেদমুচ্চনাদিকং.

অট্ঠানেতি ¶ মনুস্সামনুস্সপরিগ্গহিতে খেত্তদেৰাযতনাদিকে অযুত্তট্ঠানে. তাদিসে হি করোন্তং কুদ্ধা মনুস্সা, অমনুস্সা ৰা জীৰিতক্খযম্পি পাপেন্তি. আপত্তীতি পন ভিক্খুভিক্খুনীনং যথারহং দুক্কটপাচিত্তিযা. পতিরূপে ঠানেতি ৰুত্তৰিপরীতে ঠানে. সব্বং তন্তি আপত্তিআদিকং.

নিক্খমাপেতা ¶ অত্তা নাম অত্থি, তস্স কামতায নিক্খমনন্তি বালমঞ্ঞনং নিৰত্তেতুং ‘‘অকামতাযা’’তি ৰুত্তং, অত্তনো অনিচ্ছায অপযোগেন ৰাযোধাতুৰিপ্ফারেনেৰ নিক্খমতীতি ৰুত্তং হোতি. সন্নিচিতাতি সমুচ্চযেন ঠিতা. ৰাযুৰেগসমুপ্পীল়িতাতি ৰাযোধাতুযা ৰেগেন সমন্ততো অৰপীল়িতা, নিক্খমনস্স চেতং হেতুৰচনং. ‘‘সন্নিচিতা উচ্চারপস্সাৰা’’তি ৰত্ৰা ‘‘সো পনাযং উচ্চারপস্সাৰো’’তি পুন ৰচনং সমাহারদ্ৰন্দেপি পুল্লিঙ্গপযোগস্স সম্ভৰতাদস্সনত্থং. একত্তমেৰ হি তস্স নিযতলক্খণন্তি. অত্তনা নিরপেক্খং নিস্সট্ঠত্তা নেৰ অত্তনো অত্থায সন্তকং ৰা হোতি, কস্সচিপি দীযনৰসেন অনিস্সজ্জিতত্তা, জিগুচ্ছনীযত্তা চ ন পরস্সপীতি অত্থো. সরীরনিস্সন্দোৰাতি সরীরতো ৰিস্সন্দনমেৰ নিক্খমনমত্তং. সরীরে সতি সো হোতি, নাসতীতি সরীরস্স আনিসংসমত্তন্তিপি ৰদন্তি. তদযুত্তমেৰ নিদস্সনেন ৰিসমভাৰতো. তত্থ হি ‘‘পটিজগ্গনমত্তমেৰা’’তি ৰুত্তং, পটিসোধনমত্তং এৰাতি চস্স অত্থো. ৰেল়ুনাল়িআদিউদকভাজনং উদকতুম্বো. তন্তি ছড্ডিতউদকং.

‘‘গতেতি গমনে’’তি পুব্বে অভিক্কমপটিক্কমগহণেন গমনেপি পুরতো, পচ্ছতো চ কাযস্স অতিহরণং ৰুত্তন্তি ইধ গমনমেৰ গহিত’’ন্তি (ৰিভ. মূলটী. ৫২৫) আচরিযানন্দত্থেরেন ৰুত্তং, তং কেচিৰাদো নাম আচরিযধম্মপালত্থেরেন কতং. কস্মাতি চে? গমনে পৰত্তস্স পুরতো, পচ্ছতো চ কাযাতিহরণস্স তদৰিনাভাৰতো পদৰীতিহারনিযমিতায গমনকিরিযায এৰ সঙ্গহিতত্তা, ৰিভঙ্গট্ঠকথাদীহি (অভি. অট্ঠ. ২.৫২৩) চ ৰিরোধনতো. ৰুত্তঞ্হি তত্থ গমনস্স উভযত্থ সমৰরোধত্তং, ভেদত্তঞ্চ –

‘‘এত্থ চ একো ইরিযাপথো দ্ৰীসু ঠানেসু আগতো. সো হেট্ঠা ‘অভিক্কন্তে পটিক্কন্তে’তি এত্থ ভিক্খাচারগামং গচ্ছতো চ আগচ্ছতো চ অদ্ধানগমনৰসেন কথিতো. ‘গতে ঠিতে নিসিন্নে’তি এত্থ ৰিহারে চুণ্ণিকপাদুদ্ধারইরিযাপথৰসেন কথিতোতি ৰেদিতব্বো’’তি.

‘‘গতে’’তিআদীসু অৰত্থাভেদেন কিরিযাভেদোযেৰ, ন পন অত্থভেদোতি দস্সেতুং ‘‘গচ্ছন্তো ৰা’’তিআদি ৰুত্তং. তেনাহ ‘‘তস্মা’’তিআদি ¶ . তত্থ সুত্তেতি দীঘনিকাযে, মজ্ঝিমনিকাযে চ সঙ্গীতে ¶ সতিপট্ঠানসুত্তে (দী. নি. ২.৩৭২; ম. নি. ১.১০৫) অদ্ধানইরিযাপথাতি চিরপৰত্তকা দীঘকালিকা ইরিযাপথা অদ্ধানসদ্দস্স চিরকালৰচনতো ‘‘অদ্ধনিযং অস্স চিরট্ঠিতিক’’ন্তিআদীসু (দী. নি. ২.১৮৪; ৩.১৭৭; পারা. ২১) ৰিয, অদ্ধানগমনপৰত্তকা ৰা দীঘমগ্গিকা ইরিযাপথা. অদ্ধানসদ্দো হি দীঘমগ্গপরিযাযো ‘‘অদ্ধানগমনসমযো’’তিআদীসু (পাচি. ২১৩, ২১৭) ৰিয. মজ্ঝিমাতি ভিক্খাচারাদিৰসেন পৰত্তা নাতিচিরকালিকা, নাতিদীঘমগ্গিকা ৰা ইরিযাপথা. চুণ্ণিযইরিযাপথাতি ৰিহারে, অঞ্ঞত্থ ৰা ইতো চিতো চ পরিৰত্তনাদিৰসেন পৰত্তা অপ্পমত্তকভাৰেন চুণ্ণৰিচুণ্ণিযভূতা ইরিযাপথা. অপ্পমত্তকম্পি হি ‘‘চুণ্ণৰিচুণ্ণ’’ন্তি লোকে ৰদন্তি. ‘‘খুদ্দকচুণ্ণিকইরিযাপথা’’তিপি পাঠো, খুদ্দকা হুত্ৰা ৰুত্তনযেন চুণ্ণিকা ইরিযাপথাতি অত্থো. তস্মাতি এৰং অৰত্থাভেদেন ইরিযাপথভেদমত্তস্স কথনতো. তেসুপীতি ‘‘গতে ঠিতে’’তিআদীসুপি. ৰুত্তনযেনাতি ‘‘অভিক্কন্তে’’তিআদীসু ৰুত্তনযেন.

অপরভাগেতি গমনইরিযাপথতো অপরভাগে. ঠিতোতি ঠিতইরিযাপথসম্পন্নো. এত্থেৰাতি চঙ্কমনেযেৰ. এৰং সব্বত্থ যথারহং.

গমনঠাননিসজ্জানং ৰিয নিসীদনসযনস্স কমৰচনমযুত্তং যেভুয্যেন তথা কমাভাৰতোতি ‘‘উট্ঠায’’ মিচ্চেৰ ৰুত্তং.

জাগরিতসদ্দসন্নিধানতো চেত্থ ভৰঙ্গোতরণৰসেন নিদ্দোক্কমনমেৰ সযনং, ন পন পিট্ঠিপসারণমত্তন্তি দস্সেতি ‘‘কিরিযামযপৰত্তান’’ন্তিআদিনা. দিৰাসেয্যসিক্খাপদে (পারা. ৭৭) ৰিয পিট্ঠিপসারণস্সাপি সযনইরিযাপথভাৰেন একলক্খণত্তা এত্থাৰরোধনং দট্ঠব্বং. করণং কিরিযা, কাযাদিকিচ্চং, তং নিব্বত্তেন্তীতি কিরিযামযানি তদ্ধিতসদ্দানমনেকত্থৰুত্তিতো. অথ ৰা আৰজ্জনদ্ৰযকিচ্চং কিরিযা, তায পকতানি, নিব্বত্তানি ৰা কিরিযামযানি. আৰজ্জনৰসেন হি ভৰঙ্গুপচ্ছেদে সতি ৰীথিচিত্তানি উপ্পজ্জন্তীতি. অপরাপরুপ্পত্তিযা নানপ্পকারতো ৰত্তন্তি পরিৰত্তন্তীতি পৰত্তানি. কত্থচি পন ‘‘চিত্তান’’ন্তি পাঠো, সো অভিধম্মট্ঠকথাদীহি, (ৰিভ. অট্ঠ. ৫২৩) তট্টীকাহি চ ৰিরুদ্ধত্তা ন পোরাণপাঠোতি ৰেদিতব্বো. কিরিযামযানি এৰ পৰত্তানি তথা, জৰনং, সব্বম্পি ৰা ছদ্ৰারিকৰীথিচিত্তং. তেনাহ অভিধম্মটীকাযং (ৰিভ. মূলটী. ৫২৫) ‘‘কাযাদিকিরিযামযত্তা ¶ , আৰজ্জনকিরিযাসমুট্ঠিতত্তা চ জৰনং, সব্বম্পি ৰা ছদ্ৰারপ্পৰত্তং কিরিযামযপৰত্তং নামা’’তি. অপ্পৰত্তন্তি নিদ্দোক্কমনকালে অনুপ্পজ্জনং সুত্তং নামাতি অত্থো গহেতব্বো. নেয্যত্থৰচনঞ্হি ¶ ইদং, ইতরথা ছদ্ৰারিকচিত্তানং পুরেচরানুচরৰসেন উপ্পজ্জন্তানং সব্বেসম্পি দ্ৰারৰিমুত্তচিত্তানং পৰত্তং সুত্তং নাম সিযা, এৰঞ্চ কত্ৰা নিদ্দোক্কমনকালতো অঞ্ঞস্মিং কালে উপ্পজ্জন্তানং দ্ৰারৰিমুত্তচিত্তানম্পি পৰত্তং জাগরিতে সঙ্গয্হতীতি ৰেদিতব্বং.

চিত্তস্স পযোগকারণভূতে ওট্ঠাদিকে পটিচ্চ যথাসকং ঠানে সদ্দো জাযতীতি আহ ‘‘ওট্ঠে চ পটিচ্চা’’তিআদি. কিঞ্চাপি সদ্দো যথাঠানং জাযতি, ওট্ঠালনাদিনা পন পযোগেনেৰ জাযতি, ন ৰিনা তেন পযোগেনাতি অধিপ্পাযো. কেচি পন ৰদন্তি ‘‘ওট্ঠে চাতিআদি সদ্দুপ্পত্তিট্ঠাননিদস্সন’’ন্তি, তদযুত্তমেৰ তথা অৰচনতো. ন হি ‘‘ওট্ঠে চ পটিচ্চা’’তিআদিনা সসমুচ্চযেন কম্মৰচনেন ঠানৰচনং সম্ভৰতীতি. তদনুরূপন্তি তস্স সদ্দস্স অনুরূপং. ভাসনস্স পটিসঞ্চিক্খনৰিরোধতো তুণ্হীভাৰপক্খে ‘‘অপরভাগে ভাসিতো ইতি পটিসঞ্চিক্খতী’’তি ন ৰুত্তং, তেন চ ৰিঞ্ঞাযতি ‘‘তুণ্হীভূতোৰ পটিসঞ্চিক্খতীতি অত্থো’’তি.

ভাসনতুণ্হীভাৰানং সভাৰতো ভেদে সতি অযং ৰিভাগো যুত্তো সিযা, নাসতীতি অনুযোগেনাহ ‘‘উপাদারূপপৰত্তিযঞ্হী’’তিআদি. উপাদারূপস্স সদ্দাযতনস্স পৰত্তি তথা, সদ্দাযতনস্স পৰত্তনং ভাসনং, অপ্পৰত্তনং তুণ্হীতি ৰুত্তং হোতি.

যস্মা পন মহাসিৰত্থেরৰাদে অনন্তরে অনন্তরে ইরিযাপথে পৰত্তরূপারূপধম্মানং তত্থ তত্থেৰ নিরোধদস্সনৰসেন সম্পজানকারিতা গহিতা, তস্মা তং মহাসতিপট্ঠানসুত্তে (দী. নি. ২.৩৭৬; ম. নি. ১.১০৯) আগতঅসম্মোহসম্পজঞ্ঞৰিপস্সনাৰারৰসেন ৰেদিতব্বং, ন চতুব্বিধসম্পজঞ্ঞৰিভাগৰসেন, অতো তত্থেৰ তমধিপ্পেতং, ন ইধাতি দস্সেন্তো ‘‘তযিদ’’ন্তিআদিমাহ. অসম্মোহসঙ্খাতং ধুরং জেট্ঠকং যস্স ৰচনস্সাতি অসম্মোহধুরং, মহাসতিপট্ঠানসুত্তেযেৰ তস্স ৰচনস্স অধিপ্পেতভাৰস্স হেতুগব্ভমিদং ৰচনং. যস্মা পনেত্থ সব্বম্পি চতুব্বিধং সম্পজঞ্ঞং লব্ভতি যাৰদেৰ সামঞ্ঞফলৰিসেসদস্সনপধানত্তা ¶ ইমিস্সা দেসনায, তস্মা তং ইধ অধিপ্পেতন্তি দস্সেতুং ‘‘ইমস্মিং পনা’’তিআদি ৰুত্তং. ৰুত্তনযেনেৰাতি অভিক্কন্তাদীসু ৰুত্তনযেনেৰ. ননু ‘‘সতিসম্পজঞ্ঞেন সমন্নাগতো’’তি এতস্স উদ্দেসস্সাযং নিদ্দেসো, অথ কস্মা সম্পজঞ্ঞৰসেনেৰ ৰিত্থারো কতোতি চোদনং সোধেন্তো ‘‘সম্পজানকারীতি চা’’তিআদিমাহ, সতিসম্পযুত্তস্সেৰ সম্পজানস্স ৰসেন অত্থস্স ৰিদিতব্বত্তা এৰং ৰিত্থারো কতোতি ৰুত্তং হোতি. ‘‘সতিসম্পযুত্তস্সেৰা’’তি চ ইমিনা যথা সম্পজঞ্ঞস্স কিচ্চতো পধানতা ¶ গহিতা, এৰং সতিযাপীতি অত্থং দস্সেতি, ন পনেতং সতিযা সম্পজঞ্ঞেন সহ ভাৰমত্তদস্সনং. ন হি কদাচি সতিরহিতা ঞাণপ্পৰত্তি অত্থীতি.

ননু চ সম্পজঞ্ঞৰসেনেৰাযং ৰিত্থারো, অথ কস্মা সতিসম্পযুত্তস্স সম্পজঞ্ঞস্স ৰসেন অত্থো ৰেদিতব্বোতি চোদনম্পি সোধেতি ‘‘সতিসম্পজঞ্ঞেন সমন্নাগতোতি এতস্স হি পদস্স অযং ৰিত্থারো’’তি ইমিনা. ইদং ৰুত্তং হোতি – ‘‘সতিসম্পজঞ্ঞেন সমন্নাগতো’’তি এৰং একতো উদ্দিট্ঠস্স অত্থস্স ৰিত্থারত্তা উদ্দেসে ৰিয নিদ্দেসেপি তদুভযং সমধুরভাৰেনেৰ গহিতন্তি. ইমিনাপি হি সতিযা সম্পজঞ্ঞেন সমধুরতংযেৰ ৰিভাৰেতি একতো উদ্দিট্ঠস্স অত্থস্স ৰিত্থারভাৰদস্সনেন তদত্থস্স সিদ্ধত্তা. ইদানি ৰিভঙ্গনযেনাপি তদত্থং সমত্থেতুং ‘‘ৰিভঙ্গপ্পকরণে পনা’’তিআদি ৰুত্তং. ইমিনাপি হি সম্পজঞ্ঞস্স ৰিয সতিযাপেত্থ পধানতংযেৰ ৰিভাৰেতি. তত্থ এতানি পদানীতি ‘‘অভিক্কন্তে পটিক্কন্তে সম্পজানকারী হোতী’’তিআদীনি উদ্দেসপদানি. ৰিভত্তানেৰাতি সতিযা সম্পজঞ্ঞেন সম্পযোগমকত্ৰা সব্বট্ঠানেসু ৰিসুং ৰিসুং ৰিভত্তানিযেৰ.

মজ্ঝিমভাণকা, পন আভিধম্মিকা (ৰিভ. অট্ঠ. ৫২৩) চ এৰং ৰদন্তি – একো ভিক্খু গচ্ছন্তো অঞ্ঞং চিন্তেন্তো অঞ্ঞং ৰিতক্কেন্তো গচ্ছতি, একো কম্মট্ঠানং অৰিস্সজ্জেত্ৰাৰ গচ্ছতি. তথা একো তিট্ঠন্তো অঞ্ঞং চিন্তেন্তো অঞ্ঞং ৰিতক্কেন্তো তিট্ঠতি, একো কম্মট্ঠানং অৰিস্সজ্জেত্ৰাৰ তিট্ঠতি. একো নিসীদন্তো অঞ্ঞং চিন্তেন্তো অঞ্ঞং ৰিতক্কেন্তো নিসীদতি, একো কম্মট্ঠানং অৰিস্সজ্জেত্ৰাৰ নিসীদতি. একো সযন্তো অঞ্ঞং চিন্তেন্তো অঞ্ঞং ৰিতক্কেন্তো সযতি, একো কম্মট্ঠানং অৰিস্সজ্জেত্ৰাৰ সযতি. এত্তকেন পন গোচরসম্পজঞ্ঞং ন পাকটং হোতীতি চঙ্কমনেন দীপেন্তি. যো হি ভিক্খু চঙ্কমং ওতরিত্ৰা চঙ্কমনকোটিযং ঠিতো পরিগ্গণ্হাতি ‘‘পাচীনচঙ্কমনকোটিযং পৰত্তা রূপারূপধম্মা ¶ পচ্ছিমচঙ্কমনকোটিং অপ্পত্ৰা এত্থেৰ নিরুদ্ধা, পচ্ছিমচঙ্কমনকোটিযং পৰত্তাপি পাচীনচঙ্কমনকোটিং অপ্পত্ৰা এত্থেৰ নিরুদ্ধা, চঙ্কমনৰেমজ্ঝে পৰত্তা উভো কোটিযো অপ্পত্ৰা এত্থেৰ নিরুদ্ধা, চঙ্কমনে পৰত্তা রূপারূপধম্মা ঠানং অপ্পত্ৰা এত্থেৰ নিরুদ্ধা, ঠানে পৰত্তা নিসজ্জং, নিসজ্জায পৰত্তা সযনং অপ্পত্ৰা এত্থেৰ নিরুদ্ধা’’তি এৰং পরিগ্গণ্হন্তো পরিগ্গণ্হন্তোযেৰ ভৰঙ্গং ওতারেতি, উট্ঠহন্তো কম্মট্ঠানং গহেত্ৰাৰ উট্ঠহতি. অযং ভিক্খু গতাদীসু সম্পজানকারী নাম হোতি.

এৰং পন সুত্তে কম্মট্ঠানং অৰিভূতং হোতি, কম্মট্ঠানং অৰিভূতং ন কাতব্বং, তস্মা যো ¶ ভিক্খু যাৰ সক্কোতি, তাৰ চঙ্কমিত্ৰা ঠত্ৰা নিসীদিত্ৰা সযমানো এৰং পরিগ্গহেত্ৰা সযতি ‘‘কাযো অচেতনো, মঞ্চো অচেতনো, কাযো ন জানাতি ‘অহং মঞ্চে সযিতো’তি, মঞ্চোপি ন জানাতি ‘মযি কাযো সযিতো’তি. অচেতনো কাযো অচেতনে মঞ্চে সযিতো’’তি. এৰং পরিগ্গণ্হন্তো পরিগ্গণ্হন্তোযেৰ চিত্তং ভৰঙ্গং ওতারেতি, পবুজ্ঝন্তো কম্মট্ঠানং গহেত্ৰাৰ পবুজ্ঝতি, অযং সুত্তে সম্পজানকারী নাম হোতি.

‘‘কাযাদিকিরিযানিপ্ফত্তনেন তম্মযত্তা, আৰজ্জনকিরিযাসমুট্ঠিতত্তা চ জৰনং, সব্বম্পি ৰা ছদ্ৰারপ্পৰত্তং কিরিযামযপৰত্তং নাম, তস্মিং সতি জাগরিতং নাম হোতী’’তি পরিগ্গণ্হন্তো ভিক্খু জাগরিতে সম্পজানকারী নাম. অপিচ রত্তিন্দিৰং ছ কোট্ঠাসে কত্ৰা পঞ্চ কোট্ঠাসে জগ্গন্তোপি জাগরিতে সম্পজানকারী নাম হোতি.

ৰিমুত্তাযতনসীসেন ধম্মং দেসেন্তোপি, বাত্তিংস তিরচ্ছানকথা পহায দসকথাৰত্থুনিস্সিতং সপ্পাযকথং কথেন্তোপি ভাসিতে সম্পজানকারী নাম.

অট্ঠতিংসায আরম্মণেসু চিত্তরুচিযং মনসিকারং পৰত্তেন্তোপি দুতিযজ্ঝানং সমাপন্নোপি তুণ্হীভাৰে সম্পজানকারী নাম. দুতিযঞ্হি ঝানং ৰচীসঙ্খারৰিরহতো ৰিসেসতো তুণ্হীভাৰো নামাতি. অযম্পি নযো পুরিমনযতো ৰিসেসনযত্তা ইধাপি আহরিত্ৰা ৰত্তব্বো. তথা হেস অভিধম্মট্ঠকথাদীসু (ৰিভ. অট্ঠ. ৫২৩) ‘‘অযং পনেত্থ অপরোপি নযো’’তি আরভিত্ৰা ¶ যথাৰুত্তনযো ৰিভাৰিতোতি. ‘‘এৰং খো মহারাজা’’তিআদি যথানিদ্দিট্ঠস্স অত্থস্স নিগমনং, তস্মা তত্থ নিদ্দেসানুরূপং অত্থং দস্সেন্তো ‘‘এৰ’’ন্তিআদিমাহ. সতিসম্পযুত্তস্স সম্পজঞ্ঞস্সাতি হি নিদ্দেসানুরূপং অত্থৰচনং. তত্থ ৰিনিচ্ছযো ৰুত্তোযেৰ. এৰন্তি ইমিনা ৰুত্তপ্পকারেন অভিক্কন্তপটিক্কন্তাদীসু সত্তসু ঠানেসু পচ্চেকং চতুব্বিধেন পকারেনাতি অত্থো.

সন্তোসকথাৰণ্ণনা

২১৫. অত্থদস্সনেন পদস্সপি ৰিঞ্ঞাযমানত্তা পদমনপেক্খিত্ৰা সন্তোসস্স অত্তনি অত্থিতায ভিক্খু সন্তুট্ঠোতি পৰুচ্চতীতি অত্থমত্তং দস্সেতুং ‘‘ইতরীতরপচ্চযসন্তোসেন সমন্নাগতো’’তি ৰুত্তং. সন্তুস্সতি ন লুদ্ধো ভৰতীতি হি পদনিব্বচনং. অপিচ পদনিব্বচনৰসেন অত্থে ৰুত্তে যস্স সন্তোসস্স অত্তনি অত্থিভাৰতো সন্তুট্ঠো নাম, সো অপাকটোতি তং পাকটকরণত্থং ‘‘ইতরীতরপচ্চযসন্তোসেন সমন্নাগতো’’তি অত্থমত্তমাহ, চীৰরাদিকে ¶ যত্থ কত্থচি কপ্পিযপচ্চযে সন্তোসেন সমঙ্গীভূতোতি অত্থো. ইতর-সদ্দো হি অনিযমৰচনো দ্ৰিক্খত্তুং ৰুচ্চমানো যং কিঞ্চি-সদ্দেন সমানত্থো হোতি. তেন ৰুত্তং ‘‘যত্থ কত্থচি কপ্পিযপচ্চযে’’তি. অথ ৰা ইতরং ৰুচ্চতি হীনং পণীততো অঞ্ঞত্তা, তথা পণীতম্পি হীনতো অঞ্ঞত্তা. অঞ্ঞমঞ্ঞাপেক্খাসিদ্ধা হি ইতরতা, তস্মা হীনেন ৰা পণীতেন ৰা চীৰরাদিকপ্পিযপচ্চযেন সন্তোসেন সমঙ্গীভূতোতি অত্থো দট্ঠব্বো. সন্তুস্সতি তেন, সন্তুস্সনমত্তন্তি ৰা সন্তোসো, তথা পৰত্তো অলোভো, অলোভপধানা ৰা চত্তারো খন্ধা. লভনং লাভো, অত্তনো লাভস্স অনুরূপং সন্তোসো যথালাভসন্তোসো. বলন্তি কাযবলং, অত্তনো বলস্স অনুরূপং সন্তোসো যথাবলসন্তোসো. সারুপ্পন্তি সপ্পাযং পতিরূপং ভিক্খুনো অনুচ্ছৰিকতা, অত্তনো সারুপ্পস্স অনুরূপং সন্তোসো যথাসারুপ্পসন্তোসো.

অপরো নযো – লব্ভতেতি লাভো, যো যো লাভো যথালাভং, ইতরীতরপচ্চযো, যথালাভেন সন্তোসো যথালাভসন্তোসো. বলস্স অনুরূপং পৰত্ততীতি যথাবলং, অত্তনো বলানুচ্ছৰিকপচ্চযো, যথা-সদ্দো চেত্থ সসাধনং অনুরূপকিরিযং ¶ ৰদতি, যথা তং ‘‘অধিচিত্ত’’ন্তি এত্থ অধি-সদ্দো সসাধনং অধিকরণকিরিযন্তি. যথাবলেন সন্তোসো যথাবলসন্তোসো. সারুপ্পতি পতিরূপং ভৰতি, সোভনং ৰা আরোপেতীতি সারুপ্পং, যং যং সারুপ্পং যথাসারুপ্পং, ভিক্খুনো সপ্পাযপচ্চযো, যথাসারুপ্পেন সন্তোসো যথাসারুপ্পসন্তোসো. যথাৰুত্তং পভেদমনুগতা ৰণ্ণনা পভেদৰণ্ণনা.

ইধাতি সাসনে. অঞ্ঞং ন পত্থেতীতি অপ্পত্তপত্থনভাৰমাহ, লভন্তোপি ন গণ্হাতীতি পত্তপত্থনাভাৰং. পঠমেন অপ্পত্তপত্থনাভাৰেযেৰ ৰুত্তে যথালদ্ধতো অঞ্ঞস্স অপত্থনা নাম অপ্পিচ্ছতাযপি সিযা পৰত্তিআকারোতি অপ্পিচ্ছতাপসঙ্গভাৰতো ততোপি নিৰত্তমেৰ সন্তোসস্স সরূপং দস্সেতুং দুতিযেন পত্তপত্থনাভাৰো ৰুত্তোতি দট্ঠব্বং. এৰমুপরিপি. পকতিদুব্বলোতি আবাধাদিৰিরহেপি সভাৰদুব্বলো. সমানো সীলাদিভাগো যস্সাতি সভাগো, সহ ৰা সীলাদীহি গুণভাগেহি ৰত্ততীতি সভাগো, লজ্জীপেসলো ভিক্খু, তেন. তং পরিৰত্তেত্ৰাতি পকতিদুব্বলাদীনং গরুচীৰরং ন ফাসুভাৰাৰহং, সরীরখেদাৰহঞ্চ হোতীতি পযোজনৰসেন পরিৰত্তনং ৰুত্তং, ন অত্রিচ্ছতাদিৰসেন. অত্রিচ্ছতাদিপ্পকারেন হি পরিৰত্তেত্ৰা লহুকচীৰরপরিভোগো সন্তোসৰিরোধী হোতি, তস্স পন তদভাৰতো যথাৰুত্তপ্পযোজনৰসেন পরিৰত্তেত্ৰা লহুকচীৰরপরিভোগোপি ন সন্তোসৰিরোধীতি আহ ‘‘লহুকেন যাপেন্তোপি সন্তুট্ঠোৰ হোতী’’তি. পযোজনৰসেন পরিৰত্তেত্ৰা লহুকচীৰরপরিভোগোপি ন তাৰ সন্তোসৰিরোধী, পগেৰ তথা অপরিৰত্তেত্ৰা পরিভোগেতি সম্ভাৰিতস্স অত্থস্স দস্সনত্থঞ্হেত্থ অপি-সদ্দগ্গহণং. চীৰরনিদ্দেসেপি ¶ ‘‘পত্তচীৰরাদীনং অঞ্ঞতর’’ন্তি ৰচনং যথারুতং গহিতাৰসেসপচ্চযসন্তোসস্স চীৰরসন্তোসে সমৰরোধিতাদস্সনত্থং. ‘‘থেরকো অযমাযস্মা মল্লকো’’তিআদীসু থেরৰোহারস্স পঞ্ঞত্তিমত্তেপি পৰত্তিতো দসৰস্সতো পভুতি চিরৰস্সপব্বজিতেস্ৰেৰ ইধ পৰত্তিঞাপনত্থং ‘‘থেরানং চিরপব্বজিতান’’ন্তি ৰুত্তং, থেরানন্তি ৰা সঙ্ঘত্থেরং ৰদতি. চিরপব্বজিতানন্তি পন তদৰসেসে ৰুড্ঢভিক্খূ. সঙ্কারকূটাদিতোতি কচৰররাসিআদিতো. অনন্তকানীতি নন্তকানি পিলোতিকানি. ‘‘অ-কারো ¶ চেত্থ নিপাতমত্ত’’ন্তি (ৰি. ৰ. অট্ঠ. ১১৬৫) ৰিমানট্ঠকথাযং ৰুত্তং. তথা চাহু ‘‘নন্তকং কপ্পটো জিণ্ণৰসনং তু পটচ্চর’’ন্তি নত্থি দসাসঙ্খাতো অন্তো কোটি যেসন্তি হি নন্তকানি, ন-সদ্দস্স তু অনাদেসে অনন্তকানীতিপি যুজ্জতি. সঙ্কেতকোৰিদানং পন আচরিযানং তথা অৰুত্তত্তা ৰীমংসিত্ৰা গহেতব্বং. ‘‘সনন্তকানী’’তিপি পাঠো, নন্তকেন সহ সংসিব্বিতানি পংসুকূলানি চীৰরানীতি অত্থো. সঙ্ঘাটিন্তি তিণ্ণং চীৰরানং অঞ্ঞতরং চীৰরং. তীণিপি হি চীৰরানি সঙ্ঘটিতত্তা ‘‘সঙ্ঘাটী’’তি ৰুচ্চন্তি. মহগ্ঘং চীৰরং, বহূনি ৰা চীৰরানি লভিত্ৰা তানি ৰিস্সজ্জেত্ৰা তদঞ্ঞস্স গহণম্পি মহিচ্ছতাদিনযে অট্ঠত্ৰা যথাসারুপ্পনযে এৰ ঠিতত্তা ন সন্তোসৰিরোধীতি আহ ‘‘তেসং…পে… ধারেন্তোপি সন্তুট্ঠোৰ হোতী’’তি. যথাসারুপ্পনযেন যথালদ্ধং ৰিস্সজ্জেত্ৰা তদঞ্ঞগহণম্পি ন তাৰ সন্তোসৰিরোধী, পগেৰ অনঞ্ঞগহণেন যথালদ্ধস্সেৰ যথাসারুপ্পং পরিভোগেতি সম্ভাৰিতস্স অত্থস্স দস্সনত্থঞ্হেত্থ অপি-সদ্দগ্গহণং, এৰং সেসপচ্চযেসুপি যথাবলযথাসারুপ্পনিদ্দেসেসু অপি-সদ্দগ্গহণে অধিপ্পাযো ৰেদিতব্বো.

পকতিৰিরুদ্ধন্তি সভাৰেনেৰ অসপ্পাযং. সমণধম্মকরণসীসেন সপ্পাযপচ্চযপরিযেসনং, পরিভুঞ্জনঞ্চ ৰিসেসতো যুত্ততরন্তি অত্থন্তরং ৰিঞ্ঞাপেতুং ‘‘যাপেন্তোপী’’তি অৰত্ৰা ‘‘সমণধম্মং করোন্তোপী’’তি ৰুত্তং. মিস্সকাহারন্তি তণ্ডুলমুগ্গাদীহি নানাৰিধপুব্বণ্ণাপরণ্ণেহি মিস্সেত্ৰা কতং আহারং.

অঞ্ঞম্পি সেনাসনে যথাসারুপ্পসন্তোসং দস্সেন্তো আহ ‘‘যো হী’’তিআদি. পঠমে হি নযে যথালদ্ধস্স ৰিস্সজ্জনেন, দুতিযে পন যথাপত্তস্স অসম্পটিচ্ছনেন যথাসারুপ্পসন্তোসো ৰুত্তোতি অযমেতেসং ৰিসেসো. হি-সদ্দো চেত্থ পক্খন্তরজোতকো. মজ্ঝিমাগমট্ঠকথাযং পন পি-সদ্দো দিস্সতি. ‘‘উত্তমসেনাসনং নাম পমাদট্ঠান’’ন্তি ৰত্ৰা তব্ভাৰমেৰ দস্সেতুং ‘‘তত্থ নিসিন্নস্সা’’তিআদি ৰুত্তং. নিদ্দাভিভূতস্সাতি থিনমিদ্দোক্কমনেন চিত্তচেতসিকগেলঞ্ঞভাৰতো ভৰঙ্গসন্ততিসঙ্খাতায নিদ্দায অভিভূতস্স, নিদ্দাযন্তস্সাতি অত্থো. পটিবুজ্ঝতোতি তথারূপেন আরম্মণন্তরেন ¶ পটিবুজ্ঝন্তস্স পটিবুজ্ঝনহেতু ¶ কামৰিতক্কা পাতুভৰন্তীতি ৰুত্তং হোতি. ‘‘পটিবুজ্ঝনতো’’তিপি হি কত্থচি পাঠো দিস্সতি. অযম্পীতি পঠমনযং উপাদায ৰুত্তং.

তেসং আভতেনাতি তেহি থেরাদীহি আভতেন, তেসং ৰা যেন কেনচি সন্তকেনাতি অজ্ঝাহরিত্ৰা সম্বন্ধো. মুত্তহরীতকন্তি গোমুত্তপরিভাৰিতং, পূতিভাৰেন ৰা মোচিতং ছড্ডিতং হরীতকং, ইদানি পন পোত্থকেসু ‘‘গোমুত্তহরীতক’’ন্তি পাঠো, সো ন পোরাণপাঠো তব্বণ্ণনায (দী. নি. টী. ১.২১৫) ৰিরুদ্ধত্তা. চতুমধুরন্তি মজ্ঝিমাগমৰরে মহাধম্মসমাদানসুত্তে (ম. নি. ১.৪৮৪ আদযো) ৰুত্তং দধিমধুসপ্পিফাণিতসঙ্খাতং চতুমধুরং, একস্মিঞ্চ ভাজনে চতুমধুরং ঠপেত্ৰা তেসু যদিচ্ছসি, তং গণ্হাহি ভন্তেতি অত্থো. ‘‘সচস্সা’’তিআদিনা তদুভযস্স রোগৰূপসমনভাৰং দস্সেতি. বুদ্ধাদীহি ৰণ্ণিতন্তি ‘‘পূতিমুত্তভেসজ্জং নিস্সায পব্বজ্জা’’তিআদিনা (মহাৰ. ৭৩, ১২৮) সম্মাসম্বুদ্ধাদীহি পসত্থং. অপ্পিচ্ছতাৰিসিট্ঠায সন্তুট্ঠিযা নিযোজনতো পরমেন উক্কংসগতেন সন্তোসেন সন্তুস্সতীতি পরমসন্তুট্ঠো.

কামঞ্চ সন্তোসপ্পভেদা যথাৰুত্ততোপি অধিকতরা চীৰরে ৰীসতি সন্তোসা, পিণ্ডপাতে পন্নরস, সেনাসনে চ পন্নরস, গিলানপচ্চযে ৰীসতীতি, ইধ পন সঙ্খেপেন দ্ৰাদসৰিধোযেৰ সন্তোসো ৰুত্তো. তদধিকতরপ্পভেদো পন চতুরঙ্গুত্তরে মহাঅরিযৰংসসুত্তট্ঠকথায (অ. নি. অট্ঠ. ২.৪.২৮) গহেতব্বো. তেনাহ ‘‘ইমিনা পনা’’তিআদি. এৰং ‘‘ইধ মহারাজ ভিক্খু সন্তুট্ঠো হোতী’’তি এত্থ পুগ্গলাধিট্ঠাননিদ্দিট্ঠেন সন্তুট্ঠপদেনেৰ সন্তোসপ্পভেদং দস্সেত্ৰা ইদানি ‘‘কাযপরিহারিকেন চীৰরেন কুচ্ছিপরিহারিকেন পিণ্ডপাতেনা’’তিআদি দেসনানুরূপং তেন সন্তোসেন সন্তুট্ঠস্স অনুচ্ছৰিকং পচ্চযপ্পভেদং, তস্স চ কাযকুচ্ছিপরিহারিযভাৰং ৰিভাৰেন্তো এৰমাহাতি অযমেত্থ সম্বন্ধো. কামঞ্চস্স চীৰরপিণ্ডপাতেহেৰ যথাক্কমং কাযকুচ্ছিপরিহারিযেহি সন্তুট্ঠতা পাল়িযং ৰুত্তা, তথাপি সেসপরিক্খারচতুক্কেন চ ৰিনা ৰিচরণমযুত্তং, সব্বত্থ চ কাযকুচ্ছিপরিহারিযতা লদ্ধব্বাতি অট্ঠকথাযং অযং ৰিনিচ্ছযো ৰুত্তোতি দট্ঠব্বং. দন্তকট্ঠচ্ছেদনৰাসীতি লক্খণমত্তং তদঞ্ঞকিচ্চস্সাপি তায সাধেতব্বত্তা, তেন ৰক্খতি ‘‘মঞ্চপীঠানং অঙ্গপাদচীৰরকুটিদণ্ডকসজ্জনকালে চা’’তিআদি. ৰুত্তম্পি চেতং পোরাণট্ঠকথাসু ‘‘ন হেতং কত্থচিপি পাল়িযমাগত’’ন্তি.

বন্ধনন্তি ¶ কাযবন্ধনং. পরিস্সাৰনেন পরিস্সাৰনঞ্চ, তেন সহাতি ৰা অত্থো. যুত্তো কম্মট্ঠানভাৰনাসঙ্খাতো যোগো যস্স, তস্মিং ৰা যোগো যুত্তোতি যুত্তযোগো, তস্স.

কাযং ¶ পরিহরন্তি পোসেন্তি, কাযস্স ৰা পরিহারো পোসনমত্তং পযোজনমেতেহীতি কাযপরিহারিযা ক-কারস্স য-কারং কত্ৰা. পোসনঞ্চেত্থ ৰড্ঢনং, ভরণং ৰা, তথা কুচ্ছিপরিহারিযাপি ৰেদিতব্বা. বহিদ্ধাৰ কাযস্স উপকারকভাৰেন কাযপরিহারিযতা, অজ্ঝোহরণৰসেন সরীরট্ঠিতিযা উপকারকভাৰেন কুচ্ছিপরিহারিযতাতি অযমেতেসং ৰিসেসো. তেনাহ ‘‘তিচীৰরং তাৰা’’তিআদি. ‘‘পরিহরতী’’তি এতস্স পোসেতীতি অত্থৰচনং. ইতীতি নিদস্সনে নিপাতো, এৰং ৰুত্তনযেন কাযপরিহারিযং হোতীতি কারণজোতনে ৰা, তস্মা পোসনতো কাযপরিহারিযং হোতীতি. এৰমুপরিপি. চীৰরকণ্ণেনাতি চীৰরপরিযন্তেন.

কুটিপরিভণ্ডকরণকালেতি কুটিযা সমন্ততো ৰিলিম্পনেন সম্মট্ঠকরণকালে.

অঙ্গং নাম মঞ্চপীঠানং পাদূপরি ঠপিতো পধানসম্ভারৰিসেসো. যত্থ পদরসঞ্চিননপিট্ঠিঅপস্সযনাদীনি করোন্তি, যো ‘‘অটনী’’তিপি ৰুচ্চতি.

মধুদ্দুমপুপ্ফং মধুকং নাম, মক্খিকামধূহি কতপূৰং ৰা. পরিক্খারমত্তা পরিক্খারপমাণং. সেয্যং পৰিসন্তস্সাতি পচ্চত্থরণকুঞ্চিকানং তাদিসে কালে পরিভুত্তভাৰং সন্ধায ৰুত্তং. তেনাহ ‘‘তত্রট্ঠকং পচ্চত্থরণ’’ন্তি. অত্তনো সন্তকভাৰেন পচ্চত্থরণাধিট্ঠানেন অধিট্ঠহিত্ৰা তত্থেৰ সেনাসনে তিট্ঠনকঞ্হি ‘‘তত্রট্ঠক’’ন্তি ৰুচ্চতি. ৰিকপ্পনৰচনতো পন তেসমঞ্ঞতরস্স নৰমতা, যথাৰুত্তপটিপাটিযা চেত্থ নৰমভাৰো, ন তু তেসং তথাপতিনিযতভাৰেন. কস্মাতি চে? তথাযেৰ তেসমধারণতো. এস নযো দসমাদীসুপি. তেলং পটিসামেত্ৰা হরিতা ৰেল়ুনাল়িআদিকা তেলনাল়ি. ননু সন্তুট্ঠপুগ্গলদস্সনে সন্তুট্ঠোৰ অট্ঠপরিক্খারিকো দস্সেতব্বোতি অনুযোগে যথারহং তেসম্পি সন্তুট্ঠভাৰং দস্সেন্তো ‘‘এতেসু চা’’তিআদিমাহ. মহন্তো পরিক্খারসঙ্খাতো ভারো এতেসন্তি মহাভারা, অযং অধুনা পাঠো, আচরিযধম্মপালত্থেরেন পন ‘‘মহাগজা’’তি পাঠস্স দিট্ঠত্তা ‘‘দুপ্পোসভাৰেন ¶ মহাগজা ৰিযাতি মহাগজা’’তি (দী. নি. টী. ১.২১৫) ৰুত্তং, ন তে এত্তকেহি পরিক্খারেহি ‘‘মহিচ্ছা, অসন্তুট্ঠা, দুব্ভরা, বাহুল্লৰুত্তিনো’’তি চ ৰত্তব্বাতি অধিপ্পাযো. যদি ইতরেপি সন্তুট্ঠা অপ্পিচ্ছতাদিসভাৰা, কিমেতেসম্পি ৰসেন অযং দেসনা ইচ্ছিতাতি চোদনং সোধেতুং ‘‘ভগৰা পনা’’তিআদি ৰুত্তং. অট্ঠপরিক্খারিকস্স ৰসেন ইমিস্সা দেসনায ইচ্ছিতভাৰো কথং ৰিঞ্ঞাযতীতি অনুযোগম্পি অপনেতি ‘‘সো হী’’তিআদিনা, তস্সেৰ তথা পক্কন্তভাৰেন ‘‘কাযপরিহারিকেন চীৰরেনা’’তিআদি পাল়িযা যোগ্যতো তস্স ৰসেন ইচ্ছিতভাৰো ৰিঞ্ঞাযতীতি ৰুত্তং হোতি. ৰচনীযস্স হেতুভাৰদস্সনেন হি ৰাচকস্সাপি হেতুভাৰো দস্সিতোতি ¶ . এৰঞ্চ কত্ৰা ‘‘ইতি ইমস্সা’’তিআদি লদ্ধগুণৰচনম্পি উপপন্নং হোতি. সল্লহুকা ৰুত্তি জীৰিকা যস্সাতি সল্লহুকৰুত্তি, তস্স ভাৰো সল্লহুকৰুত্তিতা, তং. কাযপারিহারিযেনাতি ভাৰপ্পধাননিদ্দেসো, ভাৰলোপনিদ্দেসো ৰাতি দস্সেতি ‘‘কাযং পরিহরণমত্তকেনা’’তি ইমিনা, কাযপোসনপ্পমাণেনাতি অত্থো. তথা কুচ্ছিপরিহারিযেনাতি এত্থাপি. ৰুত্তনযেন চেত্থ দ্ৰিধা ৰচনত্থো, টীকাযং (দী. নি. টী. ১.২১৫) পন পঠমস্স ৰচনত্থস্স হেট্ঠা ৰুত্তত্তা দুতিযোৰ ইধ ৰুত্তোতি দট্ঠব্বং. মমাযনতণ্হায আসঙ্গো. পরিগ্গহতণ্হায বন্ধো. জিযামুত্তোতি ধনুজিযায মুত্তো. যূথাতি হত্থিগণতো. তিধা পভিন্নমদো মদহত্থী. ৰনপব্ভারন্তি ৰনে পব্ভারং.

চতূসু দিসাসু সুখৰিহারিতায সুখৰিহারট্ঠানভূতা, ‘‘একং দিসং ফরিত্ৰা’’তিআদিনা (দী. নি. ৩.৩০৮; ম. নি. ১.৭৭, ৪৫৯, ৫০৯; ২.৩০৯) ৰা নযেন ব্রহ্মৰিহারভাৰনাফরণট্ঠানভূতা চতস্সো দিসা এতস্সাতি চতুদ্দিসো, সো এৰ চাতুদ্দিসো, চতস্সো ৰা দিসা চতুদ্দিসং, ৰুত্তনযেন তমস্সাতি চাতুদ্দিসো যথা ‘‘সদ্ধো’’তি. তাস্ৰেৰ দিসাসু কত্থচিপি সত্তে ৰা সঙ্খারে ৰা ভযেন ন পটিহনতি, সযং ৰা তেহি ন পটিহঞ্ঞতেতি অপ্পটিঘো. সন্তুস্সমানোতি সকেন, সন্তেন ৰা, সমমেৰ ৰা তুস্সনকো. ইতরীতরেনাতি যেন কেনচি পচ্চযেন, উচ্চাৰচেন ৰা. পরিচ্চ সযন্তি পৰত্তন্তি কাযচিত্তানি, তানি ৰা পরিসযন্তি অভিভৰন্তীতি পরিস্সযা, সীহব্যগ্ঘাদযো বাহিরা, কামচ্ছন্দাদযো চ অজ্ঝত্তিকা কাযচিত্তুপদ্দৰা, উপযোগত্থে ¶ চেতং সামিৰচনং. সহিতাতি অধিৰাসনখন্তিযা, ৰীরিযাদিধম্মেহি চ যথারহং খন্তা, গহন্তা চাতি অত্থো. থদ্ধভাৰকরভযাভাৰেন অছম্ভী. একো চরেতি অসহাযো একাকী হুত্ৰা চরিতুং ৰিহরিতুং সক্কুণেয্য. সমত্থনে হি এয্য-সদ্দো যথা ‘‘কো ইমং ৰিজটযে জট’’ন্তি (সং. নি. ১.২৩) খগ্গৰিসাণকপ্পতায একৰিহারীতি দস্সেতি ‘‘খগ্গৰিসাণকপ্পো’’তি ইমিনা. সণ্ঠানেন খগ্গসদিসং একমেৰ মত্থকে উট্ঠিতং ৰিসাণং যস্সাতি খগ্গো; খগ্গসদ্দেন তংসদিসৰিসাণস্স গহিতত্তা, মহিংসপ্পমাণো মিগৰিসেসো, যো লোকে ‘‘পলাসাদো, গণ্ঠকো’’তি চ ৰুচ্চতি, তস্স ৰিসাণেন একীভাৰেন সদিসোতি অত্থো. অপিচ একৰিহারিতায খগ্গৰিসাণকপ্পোতি দস্সেতুম্পি এৰং ৰুত্তং. ৰিত্থারো পনস্সা অত্থো খগ্গৰিসাণসুত্তৰণ্ণনাযং, (সু. নি. অট্ঠ. ১.৪২) চূল়নিদ্দেসে (চূল়নি. ১২৮) চ ৰুত্তনযেন ৰেদিতব্বো.

এৰং ৰণ্ণিতন্তি খগ্গৰিসাণসুত্তে ভগৰতা তথা দেসনায ৰিৰরিতং, থোমিতং ৰা. খগ্গস্স ¶ নাম মিগস্স ৰিসাণেন কপ্পো সদিসো তথা. কপ্প-সদ্দো হেত্থ ‘‘সত্থুকপ্পেন ৰত ভো কির সাৰকেন সদ্ধিং মন্তযমানা’’তিআদীসু (ম. নি. ১.২৬০) ৰিয পটিভাগে ৰত্ততি, তস্স ভাৰো খগ্গৰিসাণকপ্পতা, তং সো আপজ্জতীতি সম্বন্ধো.

ৰাতাভিঘাতাদীহি সিযা সকুণো ছিন্নপক্খো, অসঞ্জাতপক্খো ৰা, ইধ পন ডেতুং সমত্থো সপক্খিকোৰ অধিপ্পেতোতি ৰিসেসদস্সনত্থং পাল়িযং ‘‘পক্খী সকুণো’’তি ৰুত্তং, ন তু ‘‘আকাসে অন্তলিক্খে চঙ্কমতী’’তিআদীসু (পটি. ম. ৩.১১) ৰিয পরিযাযমত্তদস্সনত্থন্তি আহ ‘‘পক্খযুত্তো সকুণো’’তি. উপ্পততীতি উদ্ধং পততি গচ্ছতি, পক্খন্দতীতি অত্থো. ৰিধুনন্তাতি ৰিভিন্দন্তা, ৰিচালেন্তা ৰা. অজ্জতনাযাতি অজ্জভাৰত্থায. তথা স্ৰাতনাযাতি এত্থাপি. অত্তনো পত্তং এৰ ভারো যস্সাতি সপত্তভারো. মমাযনতণ্হাভাৰেন নিস্সঙ্গো. পরিগ্গহতণ্হাভাৰেন নিরপেক্খো. যেন কামন্তি যত্থ অত্তনো রুচি, তত্থ. ভাৰনপুংসকং ৰা এতং. যেন যথা পৰত্তো কামোতি হি যেনকামো, তং, যথাকামন্তি অত্থো.

নীৰরণপ্পহানকথাৰণ্ণনা

২১৬. পুব্বে ¶ ৰুত্তস্সেৰ অত্থচতুক্কস্স পুন সম্পিণ্ডেত্ৰা কথনং কিমত্থন্তি অধিপ্পাযেন অনুযোগং উদ্ধরিত্ৰা সোধেতি ‘‘সো…পে… কিং দস্সেতী’’তিআদিনা. পচ্চযসম্পত্তিন্তি সম্ভারপারিপূরিং. ইমে চত্তারোতি সীলসংৰরো ইন্দ্রিযসংৰরো সম্পজঞ্ঞং সন্তোসোতি পুব্বে ৰুত্তা চত্তারো আরঞ্ঞিকস্স সম্ভারা. ন ইজ্ঝতীতি ন সম্পজ্জতি ন সফলো ভৰতি. ন কেৰলং অনিজ্ঝনমত্তং, অথ খো অযম্পি দোসোতি দস্সেতি ‘‘তিরচ্ছানগতেহি ৰা’’তিআদিনা. ৰত্তব্বতং আপজ্জতীতি ‘‘অসুকস্স ভিক্খুনো অরঞ্ঞে তিরচ্ছানগতানং ৰিয, ৰনচরকানং ৰিয চ নিৰাসনমত্তমেৰ, ন পন অরঞ্ঞৰাসানুচ্ছৰিকা কাচি সম্মাপটিপত্তি অত্থী’’তি অপৰাদৰসেন ৰচনীযভাৰমাপজ্জতি, ইমস্সত্থস্স পন দস্সনেন ৰিরুজ্ঝনতো সদ্ধিং-সদ্দো ন পোরাণোতি দট্ঠব্বং. অথ ৰা আরঞ্ঞকেহি তিরচ্ছানগতেহি, ৰনচরৰিসভাগজনেহি ৰা সদ্ধিং ৰিপ্পটিপত্তিৰসেন ৰসনীযভাৰং আপজ্জতি. ‘‘ন ভিক্খৰে পণিধায অরঞ্ঞে ৰত্থব্বং, যো ৰসেয্য, আপত্তি দুক্কটস্সা’’তিআদীসু (পারা. ২২৩) ৰিয হি ৰত্থব্ব-সদ্দো ৰসিতব্বপরিযাযো. তথা হি ৰিভঙ্গট্ঠকথাযম্পি ৰুত্তং ‘‘এৰরূপস্স হি অরঞ্ঞৰাসো কাল়মক্কটঅচ্ছতরচ্ছদীপিমিগানং অটৰিৰাসসদিসো হোতী’’তি (ৰিভ. অট্ঠ. ৫২৬) অধিৰত্থাতি অধিৰসন্তা. পঠমং ভেরৰসদ্দং সাৰেন্তি. তাৰতা অপলাযন্তস্স হত্থেহিপি সীসং পহরিত্ৰা ¶ পলাপনাকারং করোন্তীতি আচরিযসারিপুত্তত্থেরেন কথিতং. এৰং ব্যতিরেকতো পচ্চযসম্পত্তিযা দস্সিতভাৰং পকাসেত্ৰা ইদানি অন্ৰযতোপি পকাসেতুং ‘‘যস্স পনেতে’’তিআদি ৰুত্তং. কথং ইজ্ঝতীতি আহ ‘‘সো হী’’তিআদি. কাল়কো তিলকোতি ৰণ্ণৰিকারাপনরোগৰসেন অঞ্ঞত্থ পরিযাযৰচনং. ৰুত্তঞ্হি –

‘‘দুন্নামকঞ্চ অরিসং, ছদ্দিকো ৰমথূরিতো;

দৰথু পরিতাপোথ, তিলকো তিলকাল়কো’’তি.

তিলসণ্ঠানং ৰিয জাযতীতি হি তিলকো, কাল়ো হুত্ৰা জাযতীতি কাল়কো. ইধ পন পণ্ণত্তিৰীতিক্কমসঙ্খাতং থুল্লৰজ্জং কাল়কসদিসত্তা কাল়কং, মিচ্ছাৰীতিক্কমসঙ্খাতং অণুমত্তৰজ্জং তিলকসদিসত্তা তিলকন্তি ¶ অযং ৰিসেসো. তন্তি তথা উপ্পাদিতং পীতিং. ৰিগতভাৰেন উপট্ঠানতো খযৰযৰসেন সম্মসনং. খীযনট্ঠেন হি খযোৰ ৰিগতো, ৰিপরীতো ৰা হুত্ৰা অযনট্ঠেন ৰযোতিপি ৰুচ্চতি. অরিযভূমি নাম লোকুত্তরভূমি. ইতীতি অরিযভূমিওক্কমনতো, দেৰতানং ৰণ্ণভণনতো ৰা, তত্থ তত্থ দেৰতানং ৰচনং সুত্ৰা তস্স যসো পত্থটোতি ৰুত্তং হোতি, এৰঞ্চ কত্ৰা হেট্ঠা ৰুত্তং অযসপত্থরণম্পি দেৰতানমারোচনৰসেনাতি গহেতব্বং.

ৰিৰিত্ত-সদ্দো জনৰিৰেকেতি আহ ‘‘সুঞ্ঞ’’ন্তি. তং পন জনসদ্দনিগ্ঘোসাভাৰেন ৰেদিতব্বং সদ্দকণ্টকত্তা ঝানস্সাতি দস্সেতুং ‘‘অপ্পসদ্দং অপ্পনিগ্ঘোসন্তি অত্থো’’তি ৰুত্তং. জনকগ্গহণেনেৰ হি ইধ জঞ্ঞং গহিতং. তথা হি ৰুত্তং ৰিভঙ্গে ‘‘যদেৰ তং অপ্পনিগ্ঘোসং, তদেৰ তং ৰিজনৰাত’’ন্তি (ৰিভ. ৫৩৩). অপ্পসদ্দন্তি চ পকতিসদ্দাভাৰমাহ. অপ্পনিগ্ঘোসন্তি নগরনিগ্ঘোসাদিসদ্দাভাৰং. ঈদিসেসু হি ব্যঞ্জনং সাৰসেসং ৰিয, অত্থো পন নিরৰসেসোতি অট্ঠকথাসু ৰুত্তং. মজ্ঝিমাগমট্ঠকথাৰণ্ণনাযং (ম. নি. অট্ঠ. ৩.৩৬৪) পন আচরিযধম্মপালত্থেরো এৰমাহ ‘‘অপ্পসদ্দস্স পরিত্তপরিযাযং মনসি কত্ৰা ৰুত্তং ‘ব্যঞ্জনং সাৰসেসং সিযা’তি. তেনাহ ‘ন হি তস্সা’তিআদি. অপ্পসদ্দো পনেত্থ অভাৰত্থোতিপি সক্কা ৰিঞ্ঞাতুং ‘অপ্পাবাধতঞ্চ সঞ্জানামী’তিআদীসু (ম. নি. ১.২২৫) ৰিযা’’তি. তমত্থং ৰিভঙ্গপাল়িযা (ৰিভ. ৫২৮) সংসন্দন্তো ‘‘এতদেৰা’’তিআদিমাহ. এতদেৰাতি চ মযা সংৰণ্ণিযমানং নিস্সদ্দতং এৰাতি অত্থো. সন্তিকেপীতি গামাদীনং সমীপেপি এদিসং ৰিৰিত্তং নাম, পগেৰ দূরেতি অত্থো. অনাকিণ্ণন্তি অসঙ্কিণ্ণং অসম্বাধং. যস্স সেনাসনস্স সমন্তা গাৰুতম্পি অড্ঢযোজনম্পি পব্বতগহনং ৰনগহনং নদীগহনং হোতি, ন কোচি অৰেলায উপসঙ্কমিতুং ¶ সক্কোতি, ইদং সন্তিকেপি অনাকিণ্ণং নাম. সেতীতি সযতি. আসতীতি নিসীদতি. ‘‘এত্থা’’তি ইমিনা সেন-সদ্দস্স, আসন-সদ্দস্স চ অধিকরণত্থভাৰং দস্সেতি, চ-সদ্দেন চ তদুভযপদস্স চত্থসমাসভাৰং. ‘‘তেনাহা’’তিআদিনা ৰিভঙ্গপাল়িমেৰ আহরতি.

ইদানি তস্সাযেৰত্থং সেনাসনপ্পভেদদস্সনৰসেন ৰিভাৰেতুং ‘‘অপিচা’’তিআদি ৰুত্তং. ৰিভঙ্গপাল়িযং নিদস্সননযেন সরূপতো দস্সিতসেনাসনস্সেৰ হি অযং ৰিভাগো. তত্থ ৰিহারো পাকারপরিচ্ছিন্নো সকলো ¶ আৰাসো. অড্ঢযোগো দীঘপাসাদো, ‘‘গরুল়সণ্ঠানপাসাদো’’তিপি ৰদন্তি. পাসাদো চতুরস্সপাসাদো. হম্মিযং মুণ্ডচ্ছদনপাসাদো. অট্টো পটিরাজূনং পটিবাহনযোগ্গো চতুপঞ্চভূমকো পতিস্সযৰিসেসো. মাল়ো এককূটসঙ্গহিতো অনেককোণৰন্তো পতিস্সযৰিসেসো. অপরো নযো – ৰিহারো দীঘমুখপাসাদো. অড্ঢযোগো একপস্সছদনকগেহং. তস্স কির একপস্সে ভিত্তি উচ্চতরা হোতি, ইতরপস্সে নীচা, তেন তং একছদনকং হোতি. পাসাদো আযতচতুরস্সপাসাদো. হম্মিযং মুণ্ডচ্ছদনকং চন্দিকঙ্গণযুত্তং. গুহা কেৰলা পব্বতগুহা. লেণং দ্ৰারবন্ধং পব্ভারং. সেসং ৰুত্তনযমেৰ. ‘‘মণ্ডপোতি সাখামণ্ডপো’’তি (দী. নি. টী. ১.২১৬) এৰং আচরিযধম্মপালত্থেরেন, অঙ্গুত্তরটীকাকারেন চ আচরিযসারিপুত্তত্থেরেন ৰুত্তং.

ৰিভঙ্গট্ঠকথাযং (ৰিভ. অট্ঠ. ৫২৭) পন ৰিহারোতি সমন্তা পরিহারপথং, অন্তোযেৰ চ রত্তিট্ঠানদিৰাট্ঠানানি দস্সেত্ৰা কতসেনাসনং. অড্ঢযোগোতি সুপণ্ণৰঙ্কগেহং. পাসাদোতি দ্ৰে কণ্ণিকানি গহেত্ৰা কতো দীঘপাসাদো. অট্টোতি পটিরাজাদিপটিবাহনত্থং ইট্ঠকাহি কতো বহলভিত্তিকো চতুপঞ্চভূমকো পতিস্সযৰিসেসো. মাল়োতি ভোজনসালাসদিসো মণ্ডলমাল়ো. ৰিনযট্ঠকথাযং পন ‘‘এককূটসঙ্গহিতো চতুরস্সপাসাদো’’তি (পারা. অট্ঠ. ২.৪৮২-৪৮৭) ৰুত্তং. লেণন্তি পব্বতং খণিত্ৰা ৰা পব্ভারস্স অপ্পহোনকট্ঠানে কুট্টং উট্ঠাপেত্ৰা ৰা কতসেনাসনং. গুহাতি ভূমিদরি ৰা যত্থ রত্তিন্দিৰং দীপং লদ্ধুং ৰট্টতি, পব্বতগুহা ৰা ভূমিগুহা ৰাতি ৰুত্তং.

তং আৰসথভূতং পতিস্সযসেনাসনং ৰিহরিতব্বট্ঠেন, ৰিহারট্ঠানট্ঠেন চ ৰিহারসেনাসনং নাম. মসারকাদিচতুব্বিধো মঞ্চো. তথা পীঠং. উণ্ণভিসিআদিপঞ্চৰিধা ভিসি. সীসপ্পমাণং বিম্বোহনং. ৰিত্থারতো ৰিদত্থিচতুরঙ্গুলতা, দীঘতো মঞ্চৰিত্থারপ্পমাণতা চেত্থ সীসপ্পমাণং. মসারকাদীনি মঞ্চপীঠভাৰতো, ভিসিউপধানঞ্চ মঞ্চপীঠসম্বন্ধতো মঞ্চপীঠসেনাসনং. মঞ্চপীঠভূতঞ্হি সেনাসনং, মঞ্চপীঠসম্বন্ধঞ্চ সামঞ্ঞনিদ্দেসেন, একসেসেন ৰা ‘‘মঞ্চপীঠসেনাসন’’ন্তি ¶ ৰুচ্চতি. আচরিযসারিপুত্তত্থেরোপি এৰমেৰ ৰদতি. আচরিযধম্মপালত্থেরেন পন ‘‘মঞ্চপীঠসেনাসনন্তি মঞ্চপীঠঞ্চেৰ মঞ্চপীঠসম্বন্ধসেনাসনঞ্চা’’তি (দী. নি. টী. ১.২১৬) ৰুত্তং. চিমিলিকা ¶ নাম সুধাপরিকম্মকতায ভূমিযা ৰণ্ণানুরক্খণত্থং পটখণ্ডাদীহি সিব্বেত্ৰা কতা. চম্মখণ্ডো নাম সীহব্যগ্ঘদীপিতরচ্ছচম্মাদীসুপি যং কিঞ্চি চম্মং. অট্ঠকথাসু (পাচি. অট্ঠ. ১১২; ৰি. সঙ্গ. অট্ঠ. ৮২) হি সেনাসনপরিভোগে পটিক্খিত্তচম্মং ন দিস্সতি. তিণসন্থারোতি যেসং কেসঞ্চি তিণানং সন্থারো. এসেৰ নযো পণ্ণসন্থারেপি. চিমিলিকাদি ভূমিযং সন্থরিতব্বতায সন্থতসেনাসনং. যত্থ ৰা পন ভিক্খূ পটিক্কমন্তীতি ঠপেত্ৰা ৰা এতানি মঞ্চাদীনি যত্থ ভিক্খূ সন্নিপতন্তি, সব্বমেতং সেনাসনং নামাতি এৰং ৰুত্তং অৰসেসং রুক্খমূলাদিপটিক্কমিতব্বট্ঠানং অভিসঙ্খরণাভাৰতো কেৰলং সযনস্স, নিস্সজ্জায চ ওকাসভূতত্তা ওকাসসেনাসনং. সেনাসনগ্গহণেনাতি ‘‘ৰিৰিত্তং সেনাসন’’ন্তি ইমিনা সেনাসনসদ্দেন ৰিৰিত্তসেনাসনস্স ৰা আদানেন, ৰচনেন ৰা গহিতমেৰ সামঞ্ঞজোতনায ৰিসেসে অৰট্ঠানতো, ৰিসেসত্থিনা চ ৰিসেসস্স পযুজ্জিতব্বতো.

যদেৰং কস্মা ‘‘অরঞ্ঞ’’ন্তিআদি পুন ৰুত্তন্তি অনুযোগেন ‘‘ইধ পনস্সা’’তিআদিমাহ. এৰং গহিতেসুপি সেনাসনেসু যথাৰুত্তস্স ভিক্খুনো অনুচ্ছৰিকমেৰ সেনাসনং দস্সেতুকামত্তা পুন এৰং ৰুত্তন্তি অধিপ্পাযো. ‘‘ভিক্খুনীনং ৰসেন আগত’’ন্তি ইদং ৰিনযে আগতমেৰ সন্ধায ৰুত্তং, ন অভিধম্মে. ৰিনযে হি গণম্হাওহীযনসিক্খাপদে (পাচি. ৬৯১) ভিক্খুনীনং আরঞ্ঞকধুতঙ্গস্স পটিক্খিত্তত্তা ইদম্পি চ তাসং অরঞ্ঞং নাম, ন পন পঞ্চধনুসতিকং পচ্ছিমং অরঞ্ঞমেৰ সেনাসনং, ইদম্পি চ তাসং গণম্হাওহীযনাপত্তিকরং, ন তু পঞ্চধনুসতিকাদিমেৰ অরঞ্ঞং. ৰুত্তঞ্হি তত্থ –

‘‘একা ৰা গণম্হা ওহীযেয্যাতি অগামকে অরঞ্ঞে দুতিযিকায ভিক্খুনিযা দস্সনূপচারং ৰা সৰনূপচারং ৰা ৰিজহন্তিযা আপত্তি থুল্লচ্চযস্স, ৰিজহিতে আপত্তি সঙ্ঘাদিসেসস্সা’’তি.

ৰিনযট্ঠকথাসুপি (পাচি. অট্ঠ. ৬৯২) হি তথাৰ অত্থো ৰুত্তোতি. অভিধম্মে পন ‘‘অরঞ্ঞন্তি নিক্খমিত্ৰা বহি ইন্দখীলা সব্বমেতং অরঞ্ঞ’’ন্তি (ৰিভ. ৫২৯) আগতং. ৰিনযসুত্তন্তা হি উভোপি পরিযাযদেসনা নাম, অভিধম্মো পন নিপ্পরিযাযদেসনা, তস্মা যং ন গামপদেসন্তোগধং, তং অরঞ্ঞন্তি নিপ্পরিযাযেন দস্সেতুং তথা ৰুত্তং. ইন্দখীলা বহি নিক্খমিত্ৰা ¶ যং ঠানং পৰত্তং ¶ , সব্বমেতং অরঞ্ঞং নামাতি চেত্থ অত্থো. আরঞ্ঞকং নাম…পে… পচ্ছিমন্তি ইদং পন সুত্তন্তনযেন আরঞ্ঞকসিক্খাপদে (পারা. ৬৫২) আরঞ্ঞিকং ভিক্খুং সন্ধায ৰুত্তং ইমস্স ভিক্খুনো অনুরূপং, তস্মা ৰিসুদ্ধিমগ্গে ধুতঙ্গনিদ্দেসে (ৰিসুদ্ধি. ১.১৯) যং তস্স লক্খণং ৰুত্তং, তং যুত্তমেৰ, অতো তত্থ ৰুত্তনযেন গহেতব্বন্তি অধিপ্পাযো.

সন্দচ্ছাযন্তি সীতচ্ছাযং. তেনাহ ‘‘তত্থ হী’’তিআদি. রুক্খমূলন্তি রুক্খসমীপং. ৰুত্তঞ্হেতং ‘‘যাৰতা মজ্ঝন্হিকে কালে সমন্তা ছাযা ফরতি, নিৰাতে পণ্ণানি নিপতন্তি, এত্তাৰতা রুক্খমূল’’ন্তি. পব্বতন্তি সুদ্ধপাসাণসুদ্ধপংসুউভযমিস্সকৰসেন তিৰিধোপি পব্বতো অধিপ্পেতো, ন সিলামযো এৰ. সেল-সদ্দো পন অৰিসেসতো পব্বতপরিযাযোতি কত্ৰা এৰং ৰুত্তং. ‘‘তত্থ হী’’তিআদিনা তদুভযস্স অনুরূপতং দস্সেতি. দিসাসু খাযমানাসূতি দসসু দিসাসু অভিমুখীভাৰেন দিস্সমানাসু. তথারূপেনপি কারণেন সিযা চিত্তস্স একগ্গতাতি এতং ৰুত্তং, সব্বদিসাহি আগতেন ৰাতেন বীজিযমানভাৰহেতুদস্সনত্থন্তি কেচি. কং ৰুচ্চতি উদকং পিপাসৰিনোদনস্স কারকত্তা. ‘‘যং নদীতুম্বন্তিপি নদীকুঞ্জন্তিপি ৰদন্তি, তং কন্দরন্তি অপব্বতপদেসেপি ৰিদুগ্গনদীনিৰত্তনপদেসং কন্দরন্তি দস্সেতী’’তি (ৰিভ. মূলটী. ৫৩০) আচরিযানন্দত্থেরো, তেনেৰ ৰিঞ্ঞাযতি ‘‘নদীতুম্বনদীকুঞ্জসদ্দা নদীনিৰত্তনপদেসৰাচকা’’তি. নদীনিৰত্তনপদেসো চ নাম নদিযা নিক্খমনউদকেন পুন নিৰত্তিত্ৰা গতো ৰিদুগ্গপদেসো. ‘‘অপব্বতপদেসেপী’’তি ৰদন্তো পন অট্ঠকথাযং নিদস্সনমত্তেন পঠমং পব্বতপদেসন্তি ৰুত্তং, যথাৰুত্তো পন নদীপদেসোপি কন্দরো এৰাতি দস্সেতি.

‘‘তত্থ হী’’তিআদিনাপি নিদস্সনমত্তেনেৰ তস্সানুরূপভাৰমাহ. উস্সাপেত্ৰাতি পুঞ্জং কত্ৰা. ‘‘দ্ৰিন্নং পব্বতানম্পি আসন্নতরে ঠিতানং ওৰরকাদিসদিসং ৰিৰরং হোতি, একস্মিংযেৰ পন পব্বতে উমঙ্গসদিস’’ন্তি ৰদন্তি আচরিযা. একস্মিংযেৰ হি উমঙ্গসদিসং অন্তোলেণং হোতি উপরি পটিচ্ছন্নত্তা, ন দ্ৰীসু তথা অপ্পটিচ্ছন্নত্তা, তস্মা ‘‘উমঙ্গসদিস’’ন্তি ইদং ‘‘একস্মিং যেৰা’’তি ইমিনা সম্বন্ধনীযং. ‘‘মহাৰিৰর’’ন্তি ইদং পন উভযেহিপি. উমঙ্গসদিসন্তি চ ‘‘সুদুঙ্গাসদিস’’ন্তি (দী. নি. টী. ১.২১৬) আচরিযেন ৰুত্তং. সুদুঙ্গাতি হি ভূমিঘরস্সেতং ¶ অধিৰচনং, ‘‘তং গহেত্ৰা সুদুঙ্গায রৰন্তং যক্খিনী খিপী’’তিআদীসু ৰিয. মনুস্সানং অনুপচারট্ঠানন্তি পকতিসঞ্চারৰসেন মনুস্সেহি ন সঞ্চরিতব্বট্ঠানং. কস্সনৰপ্পনাদিৰসেন হি পকতিসঞ্চারপটিক্খেপো ইধাধিপ্পেতো. তেনাহ ‘‘যত্থ ¶ ন কসন্তি ন ৰপন্তী’’তি. আদিসদ্দেন পন ‘‘ৰনপত্থন্তি ৰনসণ্ঠানমেতং সেনাসনানং অধিৰচনং, ৰনপত্থন্তি ভীসনকানমেতং, ৰনপত্থন্তি সলোমহংসানমেতং, ৰনপত্থন্তি পরিযন্তানমেতং, ৰনপত্থন্তি ন মনুস্সূপচারানমেতং সেনাসনানং অধিৰচন’’ন্তি (ৰিভ. ৫৩১) ইমং ৰিভঙ্গপাল়িসেসং সঙ্গণ্হাতি. পত্থোতি হি পব্বতস্স সমানভূমি, যো ‘‘সানূ’’তিপি ৰুচ্চতি, তস্সদিসত্তা পন মনুস্সানমসঞ্চরণভূতং ৰনং, তস্মা পত্থসদিসং ৰনং ৰনপত্থোতি ৰিসেসনপরনিপাতো দট্ঠব্বো. সব্বেসং সব্বাসু দিসাসু অভিমুখো ওকাসো অব্ভোকাসোতি আহ ‘‘অচ্ছন্ন’’ন্তি, কেনচি ছদনেন অন্তমসো রুক্খসাখাযপি ন ছাদিতন্তি অত্থো. দণ্ডকানং উপরি চীৰরং ছাদেত্ৰা কতা চীৰরকুটি. নিক্কড্ঢিত্ৰাতি নীহরিত্ৰা. অন্তোপব্ভারলেণসদিসো পলালরাসিযেৰ অধিপ্পেতো, ইতরথা তিণপণ্ণসন্থারসঙ্গোপি সিযাতি ৰুত্তং ‘‘পব্ভারলেণসদিসে আলযে’’তি, পব্ভারসদিসে, লেণসদিসে ৰাতি অত্থো. গচ্ছগুম্বাদীনম্পীতি পি-সদ্দেন পুরিমনযং সম্পিণ্ডেতি.

পিণ্ডপাতস্স পরিযেসনং পিণ্ডপাতো উত্তরপদলোপেন, ততো পটিক্কন্তো পিণ্ডপাতপটিক্কন্তোতি আহ ‘‘পিণ্ডপাতপরিযেসনতো পটিক্কন্তো’’তি. পল্লঙ্কন্তি এত্থ পরি-সদ্দো ‘‘সমন্ততো’’তি এতস্মিং অত্থে, তস্মা পরিসমন্ততো অঙ্কনং আসনং পল্লঙ্কো র-কারস্স ল-কারং, দ্ৰিভাৰঞ্চ কত্ৰা যথা ‘‘পলিবুদ্ধো’’তি, (মি. প. ৬.৩.৬) সমন্তভাৰো চ ৰামোরুং, দক্খিণোরুঞ্চ সমং ঠপেত্ৰা উভিন্নং পাদানং অঞ্ঞমঞ্ঞসম্বন্ধনকরণং. তেনাহ ‘‘সমন্ততো ঊরুবদ্ধাসন’’ন্তি. ঊরূনং বন্ধনৰসেন নিসজ্জাৰ ইধ পল্লঙ্কো, ন আহরিমেহি ৰাল়েহি কতোতি ৰুত্তং হোতি. আভুজিত্ৰাতি চ যথা পল্লঙ্কৰসেন নিসজ্জা হোতি, তথা উভো পাদে আভুগ্গে সমিঞ্জিতে কত্ৰা, তং পন উভিন্নং পাদানং তথাবন্ধতাকরণমেৰাতি আহ ‘‘বন্ধিত্ৰা’’তি. উজুং কাযন্তি এত্থ কায-সদ্দো উপরিমকাযৰিসযো হেট্ঠিমকাযস্স অনুজুকং ঠপনস্স নিসজ্জাৰচনেনেৰ ৰিঞ্ঞাপিতত্তাতি ৰুত্তং ‘‘উপরিমং সরীরং উজুং ঠপেত্ৰা’’তি. তং পন উপরিমকাযস্স ¶ উজুকং ঠপনং সরূপতো দস্সেতি ‘‘অট্ঠারসা’’তিআদিনা, অট্ঠারসন্নং পিট্ঠিকণ্টকট্ঠিকানং কোটিযা কোটিং পটিপাদনমেৰ তথা ঠপনন্তি অধিপ্পাযো.

ইদানি তথা ঠপনস্স পযোজনং দস্সেন্তো ‘‘এৰঞ্হী’’তিআদিমাহ. তত্থ এৰন্তি তথা ঠপনে সতি, ইমিনা ৰা তথাঠপনহেতুনা. ন পণমন্তীতি ন ওনমন্তি. ‘‘অথস্সা’’তিআদি পন পরম্পরপযোজনদস্সনং. অথাতি এৰং অনোনমনে. ৰেদনাতি পিট্ঠিগিলানাদিৰেদনা. ন পরিপততীতি ন ৰিগচ্ছতি ৰীথিং ন ৰিলঙ্ঘেতি. ততো এৰ পুব্বেনাপরং ৰিসেসপ্পত্তিযা কম্মট্ঠানং ৰুদ্ধিং ফাতিং ৰেপুল্লং উপগচ্ছতি. পরিসদ্দো চেত্থ অভিসদ্দপরিযাযো অভিমুখত্থোতি ৰুত্তং ¶ ‘‘কম্মট্ঠানাভিমুখ’’ন্তি, বহিদ্ধা পুথুত্তারম্মণতো নিৰারেত্ৰা কম্মট্ঠানংযেৰ পুরক্খত্ৰাতি অত্থো. পরিসদ্দস্স সমীপত্থতং দস্সেতি ‘‘মুখসমীপে ৰা কত্ৰা’’তি ইমিনা, মুখস্স সমীপে ৰিয চিত্তে নিবদ্ধং উপট্ঠাপনৰসেন কত্ৰাতি ৰুত্তং হোতি. পরিসদ্দস্স সমীপত্থতং ৰিভঙ্গপাল়িযা (ৰিভ. ৫৩৭) সাধেতুং ‘‘তেনেৰা’’তিআদি ৰুত্তং. নাসিকগ্গেতি নাসপুটগ্গে. মুখনিমিত্তং নাম উত্তরোট্ঠস্স ৰেমজ্ঝপ্পদেসো, যত্থ নাসিকৰাতো পটিহঞ্ঞতি.

এত্থ চ যথা ‘‘ৰিৰিত্তং সেনাসনং ভজতী’’তিআদিনা (ৰিভ. ৫০৮) ভাৰনানুরূপং সেনাসনং দস্সিতং, এৰং ‘‘নিসীদতী’’তি ইমিনা অলীনানুদ্ধচ্চপক্খিকো সন্তো ইরিযাপথো দস্সিতো, ‘‘পল্লঙ্কং আভুজিত্ৰা’’তি ইমিনা নিসজ্জায দল়্হভাৰো, ‘‘পরিমুখং সতিং উপট্ঠপেত্ৰা’’তি ইমিনা আরম্মণপরিগ্গহণূপাযোতি. পরি-সদ্দো পরিগ্গহট্ঠো ‘‘পরিণাযিকা’’তিআদীসু (ধ. স. ১৬) ৰিয. মুখ-সদ্দো নিয্যানট্ঠো ‘‘সুঞ্ঞতৰিমোক্খমুখ’’ন্তিআদীসু ৰিয. পটিপক্খতো নিক্খমনমেৰ হি নিয্যানং. অসম্মোসনভাৰো উপট্ঠানট্ঠো. তত্রাতি পটিসম্ভিদানযে. পরিগ্গহিতনিয্যানন্তি সব্বথা গহিতাসম্মোসতায পরিগ্গহিতং, পরিচ্চত্তসম্মোসপটিপক্খতায চ নিয্যানং সতিং কত্ৰা, পরমং সতিনেপক্কং উপট্ঠপেত্ৰাতি ৰুত্তং হোতি. অযং আচরিযধম্মপালত্থেরস্স, আচরিযসারিপুত্তত্থেরস্স চ মতি. অথ ৰা ‘‘কাযাদীসু সুট্ঠুপৰত্তিযা পরিগ্গহিতং, ততো এৰ চ নিয্যানভাৰযুত্তং, কাযাদিপরিগ্গহণঞাণসম্পযুত্ততায ৰা পরিগ্গহিতং, ততোযেৰ চ নিয্যানভূতং ¶ উপট্ঠানং কত্ৰাতি অত্থো’’তি অযং আচরিযানন্দত্থেরস্স (ৰিভ. মূলটী. ৫৩৭) মতি.

২১৭. অভিজ্ঝাযতি গিজ্ঝতি অভিকঙ্খতি এতাযাতি অভিজ্ঝা, কামচ্ছন্দনীৰরণং. লুচ্চনট্ঠেনাতি ভিজ্জনট্ঠেন, খণে খণে ভিজ্জনট্ঠেনাতি অত্থোতি আচরিযধম্মপালত্থেরেন, (দী. নি. টী. ১.২১৭) অঙ্গুত্তরটীকাকারেন চ আচরিযসারিপুত্তত্থেরেন ৰুত্তং. সুত্তেসু চ দিস্সতি ‘‘লুচ্চতীতি খো ভিক্খু লোকোতি ৰুচ্চতি. কিঞ্চ লুচ্চতি? চক্খু খো ভিক্খু লুচ্চতি, রূপা লুচ্চন্তি, চক্খুৰিঞ্ঞাণং লুচ্চতী’’তিআদি. (সং. নি. ৪.৮২) অভিধম্মট্ঠকথাযং, (ধ. স. অট্ঠ. ৭-১৩) পন ইধ চ অধুনা পোত্থকে ‘‘লুচ্চনপলুচ্চনট্ঠেনা’’তি লিখিতং. তত্থ লুচ্চনমেৰ পলুচ্চনপরিযাযেন ৰিসেসেত্ৰা ৰুত্তং. লুচসদ্দো হি অপেক্খনাদিঅত্থোপি ভৰতি ‘‘ওলোকেতী’’তিআদীসু, ভিজ্জনপভিজ্জনট্ঠেনাতি অত্থো. ৰংসত্থপকাসিনিযং পন ৰুত্তং ‘‘খণভঙ্গৰসেন লুচ্চনসভাৰতো, চুতিভঙ্গৰসেন চ পলুচ্চনসভাৰতো লোকো নামা’’তি (ৰংসত্থপকাসিনিযং নাম মহাৰংসটীকাযং পঠমপরিচ্ছেদে পঞ্চমগাথা ৰণ্ণনাযং) কেচি পন ‘‘ভিজ্জনউপ্পজ্জনট্ঠেনা’’তি অত্থং ৰদন্তি. আহচ্চভাসিতৰচনত্থেন ৰিরুজ্ঝনতো, লুচসদ্দস্স চ ¶ অনুপ্পাদৰাচকত্তা অযুত্তমেৰেতং. অপিচ আচরিযেহিপি ‘‘লুচ্চনপলুচ্চনট্ঠেনা’’তি পাঠমেৰ উল্লিঙ্গেত্ৰা তথা অত্থো ৰুত্তো সিযা, পচ্ছা পন পরম্পরাভতৰসেন পমাদলেখত্তা তত্থ তত্থ ন দিট্ঠোতি দট্ঠব্বং, ন লুচ্চতি ন পলুচ্চতীতি যো গহিতোপি তথা ন হোতি, স্ৰেৰ লোকো, অনিচ্চানুপস্সনায ৰা লুচ্চতি ভিজ্জতি ৰিনস্সতীতি গহেতব্বোৰ লোকোতি তংগহণরহিতানং লোকুত্তরানং নত্থি লোকতা, দুক্খসচ্চং ৰা লোকোতি ৰুত্তং ‘‘পঞ্চুপাদানক্খন্ধা লোকো’’তি. এৰং তত্থ তত্থ ৰচনতোপি যথাৰুত্তো কেসঞ্চি অত্থো ন যুত্তোতি.

তস্মাতি পঞ্চুপাদানক্খন্ধানমেৰ লোকভাৰতো. ৰিক্খম্ভনৰসেনাতি এত্থ ৰিক্খম্ভনং তদঙ্গপ্পহানৰসেনেৰ অনুপ্পাদনং অপ্পৰত্তনং, ন পন ৰিক্খম্ভনপ্পহানৰসেন পটিপক্খানং সুট্ঠুপহীনং. ‘‘পহীনত্তা’’তি হি তথাপহীনসদিসতং এৰ সন্ধায ৰুত্তং. কস্মাতি চে? ঝানস্স অনধিগতত্তা. এৰং পন পুব্বভাগভাৰনায তথা পহানতোযেৰেতং চিত্তং ৰিগতাভিজ্ঝং নাম, ন ¶ তু চক্খুৰিঞ্ঞাণমিৰ সভাৰতো অভিজ্ঝাৰিরহিতত্তাতি দস্সেতুং ‘‘ন চক্খুৰিঞ্ঞাণসদিসেনা’’তি ৰুত্তং. যথা তন্তি এত্থ তন্তি নিপাতমত্তং, তং চিত্তং ৰা. অধুনা মুঞ্চনস্স, অনাগতে চ পুন অনাদানস্স করণং পরিসোধনং নামাতি ৰুত্তং হোতি. যথা চ ইমস্স চিত্তস্স পুব্বভাগভাৰনায পরিসোধিতত্তা ৰিগতাভিজ্ঝতা, এৰং অব্যাপন্নতা, ৰিগতথিনমিদ্ধতা, অনুদ্ধততা, নিব্বিচিকিচ্ছতা চ ৰেদিতব্বাতি নিদস্সেন্তো ‘‘ব্যাপাদপদোসং পহাযাতিআদীসুপি এসেৰ নযো’’তি আহ. পূতিকুম্মাসাদযোতি আভিদোসিকযৰকুম্মাসাদযো. পুরিমপকতিন্তি পরিসুদ্ধপণ্ডরসভাৰং, ইমিনা ৰিকারমাপজ্জতীতি অত্থং দস্সেতি. ৰিকারাপত্তিযাতি পুরিমপকতিৰিজহনসঙ্খাতেন ৰিকারমাপজ্জনেন. ‘‘উভয’’ন্তিআদিনা তুল্যত্থসমাসভাৰমাহ. ‘‘যা তস্মিং সমযে চিত্তস্স অকল্লতা’’তিআদিনা (ধ. স. ১১৬২; ৰিভ. ৫৪৬) থিনস্স, ‘‘যা তস্মিং সমযে কাযস্স অকল্লতা’’তিআদিনা চ মিদ্ধস্স অভিধম্মে নিদ্দিট্ঠত্তা ‘‘থিনং চিত্তগেলঞ্ঞং, মিদ্ধং চেতসিকগেলঞ্ঞ’’ন্তি ৰুত্তং. সতিপি হি থিনমিদ্ধস্স অঞ্ঞমঞ্ঞং অৰিপ্পযোগে চিত্তকাযলহুতাদীনং ৰিয চিত্তচেতসিকানং যথাক্কমং তংতংৰিসেসস্স যা তেসং অকল্লতাদীনং ৰিসেসপচ্চযতা, অযমেতেসং সভাৰোতি দট্ঠব্বং. দিট্ঠালোকো নাম পস্সিতো রত্তিং চন্দালোকদীপালোকউক্কালোকাদি, দিৰা চ সূরিযালোকাদি. রত্তিম্পি দিৰাপি তস্স সঞ্জাননসমত্থা সঞ্ঞা আলোকসঞ্ঞা, তস্সা চ ৰিগতনীৰরণায পরিসুদ্ধায অত্থিতা ইধ অধিপ্পেতা. অতিসযত্থৰিসিট্ঠস্স হি অত্থিঅত্থস্স অৰবোধকো অযমীকারোতি দস্সেন্তো ‘‘রত্তিম্পী’’তিআদিমাহ, ৰিগতথিনমিদ্ধভাৰস্স কারণত্তা চেতং ৰুত্তং. সুত্তেসু পাকটোৰাযমত্থো.

সরতীতি ¶ সতো, সম্পজানাতীতি সম্পজানোতি এৰং পুগ্গলনিদ্দেসোতি দস্সেতি ‘‘সতিযা চ ঞাণেন চ সমন্নাগতো’’তি ইমিনা. সন্তেসুপি অঞ্ঞেসু ৰীরিযসমাধিআদীসু কস্মা ইদমেৰ উভযং ৰুত্তং, ৰিগতাভিজ্ঝাদীসু ৰা ইদং উভযং অৰত্ৰা কস্মা ইধেৰ ৰুত্তন্তি অনুযোগমপনেতুং ‘‘ইদং উভয’’ন্তিআদি ৰুত্তং, পুগ্গলাধিট্ঠানেন নিদ্দিট্ঠসতিসম্পজঞ্ঞসঙ্খাতং ইদং উভযন্তি অত্থো. অতিক্কমিত্ৰা ঠিতোতি ত-সদ্দস্স অতীতত্থতং আহ, পুব্বভাগভাৰনায পজহনমেৰ চ অতিক্কমনং. ‘‘কথং ইদং ¶ কথং ইদ’’ন্তি পৰত্ততীতি কথংকথা, ৰিচিকিচ্ছা, সা এতস্স অত্থীতি কথংকথী, ন কথংকথী অকথংকথী, নিব্বিচিকিচ্ছোতি ৰচনত্থো, অত্থমত্তং পন দস্সেতুং ‘‘কথং ইদং কথং ইদ’ন্তি এৰং নপ্পৰত্ততীতি অকথংকথী’’তি ৰুত্তং. ‘‘কুসলেসু ধম্মেসূ’’তি ইদং ‘‘অকথংকথী’’তি ইমিনা সম্বজ্ঝিতব্বন্তি আহ ‘‘ন ৰিচিকিচ্ছতি, ন কঙ্খতীতি অত্থো’’তি. ৰচনত্থলক্খণাদিভেদতোতি এত্থ আদিসদ্দেন পচ্চযপহানপহাযকাদীনম্পি সঙ্গহো দট্ঠব্বো. তেপি হি পভেদতো ৰত্তব্বাতি.

২১৮. ৰড্ঢিযা গহিতং ধনং ইণং নামাতি ৰুত্তং ‘‘ৰড্ঢিযা ধনং গহেত্ৰা’’তি. ৰিগতো অন্তো ব্যন্তো, সো যস্সাতি ব্যন্তী. তেনাহ ‘‘ৰিগতন্ত’’ন্তি, ৰিরহিতদাতব্বইণপরিযন্তং করেয্যাতি চেতস্স অত্থো. তেসন্তি ৰড্ঢিযা গহিতানং ইণধনানং. পরিযন্তো নাম তদুত্তরি দাতব্বইণসেসো. নত্থি ইণমস্সাতি অণণো. তস্স ভাৰো আণণ্যং. তমেৰ নিদানং আণণ্যনিদানং, আণণ্যহেতু আণণ্যকারণাতি অত্থো. আণণ্যমেৰ হি নিদানং কারণমস্সাতি ৰা আণণ্যনিদানং, ‘‘পামোজ্জং সোমনস্স’’ন্তি ইমেহি সম্বন্ধো. ‘‘ইণপলিবোধতো মুত্তোম্হী’’তি বলৰপামোজ্জং লভতি. ‘‘জীৰিকানিমিত্তম্পি মে অৰসিট্ঠং অত্থী’’তি সোমনস্সং অধিগচ্ছতি.

২১৯. ৰিসভাগৰেদনা নাম দুক্খৰেদনা. সা হি কুসলৰিপাকসন্তানস্স ৰিরোধিভাৰতো সুখৰেদনায ৰিসভাগা, তস্সা উপ্পত্তিযা করণভূতায. ককচেনেৰাতি ককচেন ইৰ. চতুইরিযাপথন্তি চতুব্বিধম্পি ইরিযাপথং. ব্যাধিতো হি যথা ঠানগমনেসু অসমত্থো, এৰং নিসজ্জাদীসুপি. আবাধেতীতি পীল়েতি. ৰাতাদীনং ৰিকারভূতা ৰিসমাৰত্থাযেৰ ‘‘আবাধো’’তি ৰুচ্চতি. তেনাহ ‘‘তংসমুট্ঠানেন দুক্খেন দুক্খিতো’’তি, আবাধসমুট্ঠানেন দুক্খৰেদনাসঙ্খাতেন দুক্খেন দুক্খিতো দুক্খসমন্নাগতোতি অত্থো. দুক্খৰেদনায পন আবাধভাৰেন আদিম্হি বাধতীতি আবাধোতি কত্ৰা আবাধসঙ্খাতেন মূলব্যাধিনা আবাধিকো, অপরাপরং সঞ্জাতদুক্খসঙ্খাতেন অনুবন্ধব্যাধিনা দুক্খিতোতি অত্থো গহেতব্বো. এৰঞ্হি সতি দুক্খৰেদনাৰসেন ৰুত্তস্স দুক্খিতপদস্স আবাধিকপদেন ৰিসেসিতব্বতা পাকটা হোতীতি অযমেত্থ ¶ ¶ আচরিযধম্মপালত্থেরেন (দী. নি. টী. ১.২১৯) ৰুত্তনযো. অধিকং মত্তং পমাণং অধিমত্তং, বাল়্হং, অধিমত্তং গিলানো ধাতুসঙ্খযেন পরিক্খীণসরীরোতি অধিমত্তগিলানো. অধিমত্তব্যাধিপরেততাযাতি অধিমত্তব্যাধিপীল়িততায. ন রুচ্চেয্যাতি ন রুচ্চেথ, কম্মত্থপদঞ্চেতং ‘‘ভত্তঞ্চস্সা’’তি এত্থ ‘‘অস্সা’’তি কত্তুদস্সনতো. মত্তাসদ্দো অনত্থকোতি ৰুত্তং ‘‘বলমত্তাতি বলমেৰা’’তি, অপ্পমত্তকং ৰা বলং বলমত্তা. তদুভযন্তি পামোজ্জং, সোমনস্সঞ্চ. লভেথ পামোজ্জং ‘‘রোগতো মুত্তোম্হী’’তি. অধিগচ্ছেয্য সোমনস্সং ‘‘অত্থি মে কাযবল’’ন্তি পাল়িযা অত্থো.

২২০. কাকণিকমত্তং নাম ‘‘একগুঞ্জমত্ত’’ন্তি ৰদন্তি. ‘‘দিযড্ঢৰীহিমত্ত’’ন্তি ৰিনযটীকাযং ৰুত্তং. অপিচ কণ-সদ্দো কুণ্ডকে –

‘‘অকণং অথুসং সুদ্ধং, সুগন্ধং তণ্ডুলপ্ফলং;

তুণ্ডিকীরে পচিত্ৰান, ততো ভুঞ্জন্তি ভোজন’’ন্তি. (দী. নি. ৩.২৮১) আদীসু ৰিয;

‘‘কণো তু কুণ্ডকো ভৰে’’তি (অভিধানে ভকণ্ডে চতুব্বণ্ণৰগ্গে ৪৫৪ গাথা) হি ৰুত্তং. অপ্পকো পন কণো কাকণোতি ৰুচ্চতি যথা ‘‘কালৰণ’’ন্তি, তস্মা কাকণোৰ পমাণমস্সাতি কাকণিকং, কাকণিকমেৰ কাকণিকমত্তং, খুদ্দককুণ্ডকপ্পমাণমেৰাতি অত্থো দট্ঠব্বো. এৰঞ্হি সতি ‘‘রাজদাযো নাম কাকণিকমত্তং ন ৰট্টতি, অড্ঢমাসগ্ঘনিকং মংসং দেতী’’তি (জা. অট্ঠ. ৬.উমঙ্গজাতকৰণ্ণনায) ৰুত্তেন উমঙ্গজাতকৰচনেন চ অৰিরুদ্ধং হোতি. ৰযোতি খযো ভঙ্গো, তস্স ‘‘বন্ধনা মুত্তোম্হী’’তি আৰজ্জযতো তদুভযং হোতি. তেন ৰুত্তং ‘‘লভেথ পামোজ্জং, অধিগচ্ছেয্য সোমনস্স’’ন্তি. ৰচনাৰসেসং সন্ধায ‘‘সেসং ৰুত্তনযেনেৰা’’তিআদি ৰুত্তং. ৰুত্তনযেনেৰাতি চ পঠমদুতিযপদেসু ৰুত্তনযেনেৰ. সব্বপদেসূতি ততিযাদীসু তীসু কোট্ঠাসেসু. একেকো হি উপমাপক্খো ‘‘পদ’’ন্তি ৰুত্তো.

২২১-২২২. অধীনোতি আযত্তো, ন সেরিভাৰযুত্তো. তেনাহ ‘‘অত্তনো রুচিযা কিঞ্চি কাতুং ন লভতী’’তি. এৰমিতরস্মিম্পি. যেন গন্তুকামো, তেন কামং গমো ন হোতীতি সপাঠসেসযোজনং দস্সেতুং ‘‘যেনা’’তিআদি ৰুত্তং. কামন্তি চেতং ভাৰনপুংসকৰচনং, কামেন ৰা ইচ্ছায গমো কামংগমো নিগ্গহীতাগমেন. দাসব্যাতি ¶ এত্থ ব্য-সদ্দস্স ভাৰত্থতং দস্সেতি ‘‘দাসভাৰা’’তি ইমিনা. অপরাধীনতায অত্তনো ভুজো ৰিয সকিচ্চে এসিতব্বো পেসিতব্বোতি ¶ ভুজিস্সো, সযংৰসীতি নিব্বচনং. ‘‘ভুজো নাম অত্তনো যথাসুখং ৰিনিযোগো, সো ইস্সো ইচ্ছিতব্বো এত্থাতি ভুজিস্সো, অস্সামিকো’’তি মূলপণ্ণাসকটীকাযং ৰুত্তং. অত্থমত্তং পন দস্সেন্তো ‘‘অত্তনো সন্তকো’’তি আহ, অত্তাৰ অত্তনো সন্তকো, ন পরস্সাতি ৰুত্তং হোতি. অনুদকতায কং পানীযং তারেন্তি এত্থাতি কন্তারো, অদ্ধানসদ্দো চ দীঘপরিযাযোতি ৰুত্তং ‘‘নিরুদকং দীঘমগ্গ’’ন্তি.

২২৩. সেসানীতি ব্যাপাদাদীনি. তত্রাতি দস্সনে. অযন্তি ইদানি ৰুচ্চমানা সদিসতা, যেন ইণাদীনং উপমাভাৰো, কামচ্ছন্দাদীনঞ্চ উপমেয্যভাৰো হোতি, সো নেসং উপমোপমেয্যসম্বন্ধো সদিসতাতি দট্ঠব্বং. তেহীতি পরেহি ইণসামিকেহি. কিঞ্চি পটিবাহিতুন্তি ফরুসৰচনাদিকং কিঞ্চিপি পটিসেধেতুং ন সক্কোতি ইণং দাতুমসক্কুণত্তা. কস্মাতি ৰুত্তং ‘‘তিতিক্খাকারণ’’ন্তিআদি, ইণস্স তিতিক্খাকারণত্তাতি অত্থো. যো যম্হি কামচ্ছন্দেন রজ্জতীতি যো পুগ্গলো যম্হি কামচ্ছন্দস্স ৰত্থুভূতে পুগ্গলে কামচ্ছন্দেন রজ্জতি. তণ্হাসহগতেন তং ৰত্থুং গণ্হাতীতি তণ্হাভূতেন কামচ্ছন্দেন তং কামচ্ছন্দস্স ৰত্থুভূতং পুগ্গলং ‘‘মমেত’’ন্তি গণ্হাতি. সহগতসদ্দো হেত্থ তব্ভাৰমত্তো ‘‘যাযং তণ্হা পোনোভৰিকা নন্দীরাগসহগতা’’তিআদীসু (দী. নি. ২.৪০০; ম. নি. ১.১৩৩, ৪৮০; ৩.৩৭৩; সং. নি. ৫.১০৮১; মহাৰ. ১৫; পটি. ম. ২.৩০) ৰিয. তেনাতি কামচ্ছন্দস্স ৰত্থুভূতেন পুগ্গলেন. কস্মাতি আহ ‘‘তিতিক্খাকারণ’’ন্তিআদি, কামচ্ছন্দস্স তিতিক্খাকারণত্তাতি অত্থো. তিতিক্খাসদিসো চেত্থ রাগপধানো অকুসলচিত্তুপ্পাদো ‘‘তিতিক্খা’’তি ৰুত্তো, ন তু ‘‘খন্তী পরমং তপো তিতিক্খা’’তিআদীসু (দী. নি. ২.৯১; ধ. প. ১৮৪) ৰিয তপভূতো অদোসপধানো চিত্তুপ্পাদো. ঘরসামিকেহীতি ঘরস্স সামিকভূতেহি সস্সুসসুরসামিকেহি. ইত্থীনং কামচ্ছন্দো তিতিক্খাকারণং হোতি ৰিযাতি সম্বন্ধো.

‘‘যথা পনা’’তিআদিনা সেসানং রোগাদিসদিসতা ৰুত্তা. তত্থ পিত্তদোসকোপনৰসেন পিত্তরোগাতুরো. তস্স পিত্তকোপনতো সব্বম্পি ¶ মধুসক্করাদিকং অমধুরভাৰেন সম্পজ্জতীতি ৰুত্তং ‘‘তিত্তকং তিত্তকন্তি উগ্গিরতিযেৰা’’তি. তুম্হে উপদ্দৰেথাতি টীকাযং (দী. নি. টী. ১.২২৩) উদ্ধটপাঠো, ‘‘উপদ্দৰং করোথা’’তি নামধাতুৰসেন অত্থো, ইদানি পন ‘‘তুম্হেহি উপদ্দুতা’’তি পাঠো দিস্সতি. ৰিব্ভমতীতি ইতো চিতো চ আহিণ্ডতি, হীনায ৰা আৰত্ততি. মধুসক্করাদীনং রসং ন ৰিন্দতি নানুভৰতি ন জানাতি ন লভতি চ ৰিযাতি সম্বন্ধো. সাসনরসন্তি সাসনস্স রসং, সাসনমেৰ ৰা রসং.

নক্খত্তছণং ¶ নক্খত্তং. তেনাহ ‘‘অহো নচ্চং, অহো গীত’’ন্তি. মুত্তোতি বন্ধনতো পমুত্তো. ধম্মস্সৰনস্সাতি সোতব্বধম্মস্স.

সীঘং পৰত্তেতব্বকিচ্চং অচ্চাযিকং. সীঘত্থো হি অতিসদ্দো ‘‘পাণাতিপাতো’’তিআদীসু (ম. নি. ২.১৯৩; ৰিভ. ৯৬৮) ৰিয. ৰিনযে অপকতঞ্ঞুনাতি ৰিনযক্কমে অকুসলেন. পকতং নিট্ঠানং ৰিনিচ্ছযং জানাতীতি পকতঞ্ঞূ, ন পকতঞ্ঞূ তথা. সো হি কপ্পিযাকপ্পিযং যাথাৰতো ন জানাতি. তেনাহ ‘‘কিস্মিঞ্চিদেৰা’’তিআদি. কপ্পিযমংসেপীতি সূকরমংসাদিকেপি. অকপ্পিযমংসসঞ্ঞাযাতি অচ্ছমংসাদিসঞ্ঞায.

দণ্ডকসদ্দেনাপীতি সাখাদণ্ডকসদ্দেনপি. উস্সঙ্কিতপরিসঙ্কিতোতি অৰসঙ্কিতো চেৰ সমন্ততো সঙ্কিতো চ, অতিৰিয সঙ্কিতোতি ৰুত্তং হোতি. তদাকারদস্সনং ‘‘গচ্ছতিপী’’তিআদি. সো হি থোকং গচ্ছতিপি. গচ্ছন্তো পন তায উস্সঙ্কিতপরিসঙ্কিততায তত্থ তত্থ তিট্ঠতিপি. ঈদিসে কন্তারে গতে ‘‘কো জানাতি, কিং ভৰিস্সতী’’তি নিৰত্ততিপি, তস্মা চ গতট্ঠানতো অগতট্ঠানমেৰ বহুতরং হোতি, ততো এৰ চ সো কিচ্ছেন কসিরেন খেমন্তভূমিং পাপুণাতি ৰা, ন ৰা পাপুণাতি. কিচ্ছেন কসিরেনাতি পরিযাযৰচনং, কাযিকদুক্খেন খেদনং ৰা কিচ্ছং, চেতসিকদুক্খেন পীল়নং কসিরং. খেমন্তভূমিন্তি খেমভূতং ভূমিং অন্তসদ্দস্স তব্ভাৰত্তা, ভযস্স খীযনং ৰা খেমো, সোৰ অন্তো পরিচ্ছেদো যস্সা তথা, সা এৰ ভূমীতি খেমন্তভূমি, তং নিব্ভযপ্পদেসন্তি অত্থো. অট্ঠসু ঠানেসূতি ‘‘তত্থ কতমা ৰিচিকিচ্ছা? সত্থরি কঙ্খতি ৰিচিকিচ্ছতি. ধম্মে. সঙ্ঘে. সিক্খায. পুব্বন্তে. অপরন্তে. পুব্বন্তাপরন্তে. ইদপ্পচ্চযতাপটিচ্চসমুপ্পন্নেসু ধম্মেসু কঙ্খতি ৰিচিকিচ্ছতী’’তি (ৰিভ. ৯১৫) ৰিভঙ্গে ¶ ৰুত্তেসু অট্ঠসু ঠানেসু. অধিমুচ্চিত্ৰাতি ৰিনিচ্ছিনিত্ৰা, সদ্দহিত্ৰা ৰা. সদ্ধায গণ্হিতুন্তি সদ্ধেয্যৰত্থুং ‘‘ইদমেৰ’’ন্তি সদ্দহনৰসেন গণ্হিতুং, সদ্দহিতুং ন সক্কোতীতি অত্থো. ইতীতি তস্মা ৰুত্তনযেন অসক্কুণনতো অন্তরাযং করোতীতি সম্বন্ধো. ‘‘অত্থি নু খো, নত্থি নু খো’’তি অরঞ্ঞং পৰিট্ঠস্স আদিম্হি এৰ সপ্পনং সংসযো আসপ্পনং. ততো পরং সমন্ততো, উপরূপরি ৰা সপ্পনং পরিসপ্পনং. উভযেনপি তত্থেৰ সংসযৰসেন পরিব্ভমনং দস্সেতি. তেনাহ ‘‘অপরিযোগাহন’’ন্তি, ‘‘এৰমিদ’’ন্তি সমন্ততো অনোগাহনন্তি অত্থো. ছম্ভিতত্তন্তি অরঞ্ঞসঞ্ঞায উপ্পন্নং ছম্ভিতভাৰং হদযমংসচলনং, উত্রাসন্তি ৰুত্তং হোতি. উপমেয্যপক্খেপি যথারহমেসমত্থো.

২২৪. তত্রাযং সদিসতাতি এত্থ পন অপ্পহীনপক্খে ৰুত্তনযানুসারেন সদিসতা ৰেদিতব্বা ¶ . যদগ্গেন হি কামচ্ছন্দাদযো ইণাদিসদিসা, তদগ্গেন চ তেসং পহানং আণণ্যাদিসদিসতাতি. ইদং পন অনুত্তানপদত্থমত্তং – সমিদ্ধতন্তি অড্ঢতং. পুব্বে পণ্ণমারোপিতায ৰড্ঢিযা সহ ৰত্ততীতি সৰড্ঢিকং. পণ্ণন্তি ইণদানগ্গহণে সল্লক্খণৰসেন লিখিতপণ্ণং. পুন পণ্ণন্তি ইণযাচনৰসেন সাসনলিখিতপণ্ণং. নিল্লেপতাযাতি ধনসম্বন্ধাভাৰেন অৰিলিম্পনতায. তথা অলগ্গতায. পরিযাযৰচনঞ্হেতং দ্ৰযং. অথ ৰা নিল্লেপতাযাতি ৰুত্তনযেন অৰিলিম্পনভাৰেন ৰিসেসনভূতেন অলগ্গতাযাতি অত্থো. ছ ধম্মেতি অসুভনিমিত্তস্স উগ্গহো, অসুভভাৰনানুযোগো, ইন্দ্রিযেসু গুত্তদ্ৰারতা, ভোজনে মত্তঞ্ঞুতা, কল্যাণমিত্ততা, সপ্পাযকথাতি ইমে ছ ধম্মে. ভাৰেত্ৰাতি ব্রূহেত্ৰা, অত্তনি ৰা উপ্পাদেত্ৰা. অনুপ্পন্নঅনুপ্পাদনউপ্পন্নপ্পহানাদিৰিভাৰনৰসেন মহাসতিপট্ঠানসুত্তে সৰিসেসং পাল়িযা আগতত্তা ‘‘মহাসতিপট্ঠানে ৰণ্ণযিস্সামা’’তি ৰুত্তং. ‘‘মহাসতিপট্ঠানে’’তি চ ইমস্মিং দীঘাগমে (দী. নি. ২.৩৭২ আদযো) সঙ্গীতমাহ, ন মজ্ঝিমাগমে নিকাযন্তরত্তা. নিকাযন্তরাগতোপি হি অত্থো আচরিযেহি অঞ্ঞত্থ যেভুয্যেন ৰুত্তোতি ৰদন্তি. এস নযো ব্যাপাদাদিপ্পহানভাগেপি. পরৰত্থুম্হীতি আরম্মণভূতে পরস্মিং ৰত্থুস্মিং. মমাযনাভাৰেন নেৰ সঙ্গো. পরিগ্গহাভাৰেন ন বদ্ধো. দিব্বানিপি রূপানি পস্সতো কিলেসো ন সমুদাচরতি, পগেৰ মানুসিযানীতি সম্ভাৰনে অপি-সদ্দো.

অনত্থকরোতি ¶ অত্তনো, পরস্স চ অহিতকরো. ছ ধম্মেতি মেত্তানিমিত্তস্স উগ্গহো, মেত্তাভাৰনানুযোগো, কম্মস্সকতা, পটিসঙ্খানবহুলতা, কল্যাণমিত্ততা, সপ্পাযকথাতি ইমে ছ ধম্মে. তত্থেৰাতি মহাসতিপট্ঠানেযেৰ. চারিত্তসীলমেৰ উদ্দিস্স পঞ্ঞত্তসিক্খাপদং ‘‘আচারপণ্ণত্তী’’তি ৰুত্তং. আদি-সদ্দেন ৰারিত্তপণ্ণত্তিসিক্খাপদং সঙ্গণ্হাতি.

পৰেসিতোতি পৰেসাপিতো. বন্ধনাগারং পৰেসাপিতত্তা অলদ্ধনক্খত্তানুভৰনো পুরিসো হি ‘‘নক্খত্তদিৰসে বন্ধনাগারং পৰেসিতো পুরিসো’’তি ৰুত্তো, নক্খত্তদিৰসে এৰ ৰা তদননুভৰনত্থং তথা কতো পুরিসো এৰং ৰুত্তোতিপি ৰট্টতি. অপরস্মিন্তি ততো পচ্ছিমে, অঞ্ঞস্মিং ৰা নক্খত্তদিৰসে. ওকাসন্তি কম্মকারণাকারণং, কম্মকারণক্খণং ৰা. মহানত্থকরন্তি দিট্ঠধম্মিকাদিঅত্থহাপনমুখেন মহতো অনত্থস্স কারকং. ছ ধম্মেতি অতিভোজনে নিমিত্তগ্গাহো, ইরিযাপথসম্পরিৰত্তনতা, আলোকসঞ্ঞামনসিকারো, অব্ভোকাসৰাসো, কল্যাণমিত্ততা, সপ্পাযকথাতি ইমে ছ ধম্মে, ধম্মনক্খত্তস্সাতি যথাৰুত্তসোতব্বধম্মসঙ্খাতস্স মহস্স. সাধূনং রতিজননতো হি ধম্মোপি ছণসদিসট্ঠেন ‘‘নক্খত্ত’’ন্তি ৰুত্তো.

উদ্ধচ্চকুক্কুচ্চে ¶ মহানত্থকরন্তি পরাযত্ততাপাদনেন ৰুত্তনযেন মহতো অনত্থস্স কারকং. ছ ধম্মেতি বহুস্সুততা, পরিপুচ্ছকতা, ৰিনযে পকতঞ্ঞুতা, ৰুড্ঢসেৰিতা, কল্যাণমিত্ততা, সপ্পাযকথাতি ইমে ছ ধম্মে. বলস্স, বলেন ৰা অত্তনা ইচ্ছিতস্স করণং বলক্কারো, তেন. নেক্খম্মপটিপদন্তি নীৰরণতো নিক্খমনপটিপদং উপচারভাৰনমেৰ, ন পঠমং ঝানং. অযঞ্হি উপচারভাৰনাধিকারো.

বলৰাতি পচ্চত্থিকৰিধমনসমত্থেন বলেন বলৰা ৰন্তু-সদ্দস্স অভিসযত্থৰিসিট্ঠস্স অত্থিযত্থস্স বোধনতো. হত্থসারন্তি হত্থগতধনসারং. সজ্জাৰুধোতি সজ্জিতধন্ৰাদিআৰুধো, সন্নদ্ধপঞ্চাৰুধোতি অত্থো. সূরৰীরসেৰকজনৰসেন সপরিৰারো. তন্তি যথাৰুত্তং পুরিসং. বলৰন্ততায, সজ্জাৰুধতায, সপরিৰারতায চ চোরা দূরতোৰ দিস্ৰা পলাযেয্যুং. অনত্থকারিকাতি সম্মাপটিপত্তিযা ৰিবন্ধকরণতো ৰুত্তনযেন অহিতকারিকা. ছ ধম্মেতি বহুস্সুততা, পরিপুচ্ছকতা ¶ , ৰিনযে পকতঞ্ঞুতা, অধিমোক্খবহুলতা, কল্যাণমিত্ততা, সপ্পাযকথাতি ইমে ছ ধম্মে. যথা বাহুসচ্চাদীনি উদ্ধচ্চকুক্কুচ্চস্স পহানায সংৰত্তন্তি, এৰং ৰিচিকিচ্ছাযপীতি ইধাপি বহুস্সুততাদযো তযোপি ধম্মা গহিতা, কল্যাণমিত্ততা, পন সপ্পাযকথা চ পঞ্চন্নম্পি পহানায সংৰত্তন্তি, তস্মা তাসু তস্স তস্স নীৰরণস্স অনুচ্ছৰিকসেৰনতা দট্ঠব্বা. তিণং ৰিযাতি তিণং ভযৰসেন ন গণেতি ৰিয. দুচ্চরিতকন্তারং নিত্থরিত্ৰাতি দুচ্চরিতচরণূপাযভূতায ৰিচিকিচ্ছায নিত্থরণৰসেন দুচ্চরিতসঙ্খাতং কন্তারং নিত্থরিত্ৰা. ৰিচিকিচ্ছা হি সম্মাপটিপত্তিযা অপ্পটিপজ্জননিমিত্ততামুখেন মিচ্ছাপটিপত্তিমেৰ পরিব্রূহেতীতি তস্সা অপ্পহানং দুচ্চরিতচরণূপাযো, পহানঞ্চ দুচ্চরিতৰিধূননূপাযোতি.

২২৫. ‘‘তুট্ঠাকারো’’তি ইমিনা পামোজ্জং নাম তরুণপীতিং দস্সেতি. সা হি তরুণতায কথঞ্চিপি তুট্ঠাৰত্থা তুট্ঠাকারমত্তং. ‘‘তুট্ঠস্সা’’তি ইদং ‘‘পমুদিতস্সা’’তি এতস্স অত্থৰচনং, তস্সত্থো ‘‘ওক্কন্তিকভাৰপ্পত্তায পীতিযা ৰসেন তুট্ঠস্সা’’তি টীকাযং ৰুত্তো, এৰং সতি পামোজ্জপদেন ওক্কন্তিকা পীতিযেৰ গহিতা সিযা. ‘‘সকলসরীরং খোভযমানা পীতি জাযতী’’তি এতস্সা চত্থো ‘‘অত্তনো সৰিপ্ফারিকতায, অত্তসমুট্ঠানপণীতরূপুপ্পত্তিযা চ সকলসরীরং খোভযমানা ফরণলক্খণা পীতি জাযতী’’তি ৰুত্তো, এৰঞ্চ সতি পীতিপদেন ফরণা পীতিযেৰ গহিতা সিযা, কারণং পনেত্থ গৰেসিতব্বং. ইধ, পন অঞ্ঞত্থ চ তরুণবলৰতামত্তসামঞ্ঞেন পদদ্ৰযস্স অত্থদীপনতো যা কাচি তরুণা পীতি পামোজ্জং, বলৰতী পীতি, পঞ্চৰিধায ৰা পীতিযা যথাক্কমং তরুণবলৰতাসম্ভৰতো পুরিমা পুরিমা পামোজ্জং ¶ , পচ্ছিমা পচ্ছিমা পীতীতিপি ৰদন্তি, অযমেত্থ তদনুচ্ছৰিকো অত্থো. তুট্ঠস্সাতি পামোজ্জসঙ্খাতায তরুণপীতিযা ৰসেন তুট্ঠস্স. ত-সদ্দো হি অতীতত্থো, ইতরথা হেতুফলসম্বন্ধাভাৰাপত্তিতো, হেতুফলসম্বন্ধভাৰস্স চ ৰুত্তত্তা. ‘‘সকলসরীরং খোভযমানা’’তি ইমিনা পীতি নাম এত্থ বলৰপীতীতি দস্সেতি. সা হি অত্তনো সৰিপ্ফারিকতায, অত্তসমুট্ঠানপণীতরূপুপ্পত্তিযা চ সকলসরীরং সঙ্খোভযমানা জাযতি. সকলসরীরে পীতিৰেগস্স পীতিৰিপ্ফারস্স উপ্পাদনঞ্চেত্থ সঙ্খোভনং.

পীতিসহিতং ¶ পীতি উত্তরপদলোপেন. কিং পন তং? মনো, পীতি মনো এতস্সাতি সমাসো. পীতিযা সম্পযুত্তং মনো যস্সাতিপি ৰট্টতি, তস্স. অত্থমত্তং পন দস্সেতুং ‘‘পীতিসম্পযুত্তচিত্তস্স পুগ্গলস্সা’’তি ৰুত্তং. কাযোতি ইধ সব্বোপি অরূপকলাপো অধিপ্পেতো, ন পন কাযলহুতাদীসু ৰিয ৰেদনাদিক্খন্ধত্তযমেৰ, ন চ কাযাযতনাদীসু ৰিয রূপকাযম্পীতি দস্সেতি ‘‘নামকাযো’’তি ইমিনা. পস্সদ্ধিদ্ৰযৰসেনেৰ হেত্থ পস্সম্ভনমধিপ্পেতং, পস্সম্ভনং পন ৰিগতকিলেসদরথতাতি আহ ‘‘ৰিগতদরথো হোতী’’তি, পহীনউদ্ধচ্চাদিকিলেসদরথোতি অত্থো. ৰুত্তপ্পকারায পুব্বভাগভাৰনায ৰসেন চেতসিকসুখং পটিসংৰেদেন্তোযেৰ তংসমুট্ঠানপণীতরূপফুটসরীরতায কাযিকম্পি সুখং পটিসংৰেদেতীতি ৰুত্তং ‘‘কাযিকম্পি চেতসিকম্পি সুখং ৰেদযতী’’তি. ইমিনা নেক্খম্মসুখেনাতি ‘‘সুখং ৰেদেতী’’তি এৰং ৰুত্তেন সংকিলেসনীৰরণপক্খতো নিক্খন্তত্তা, পঠমজ্ঝানপক্খিকত্তা চ যথারহং নেক্খম্মসঙ্খাতেন উপচারসুখেন অপ্পনাসুখেন চ. সমাধানম্পেত্থ তদুভযেনেৰাতি ৰুত্তং ‘‘উপচারৰসেনাপি অপ্পনাৰসেনাপী’’তি.

এত্থ পনাযমধিপ্পাযো – কামচ্ছন্দপ্পহানতো পট্ঠায যাৰ পস্সদ্ধকাযস্স সুখপটিসংৰেদনা, তাৰ যথা পুব্বে, তথা ইধাপি পুব্বভাগভাৰনাযেৰ ৰুত্তা, ন অপ্পনা. তথা হি কামচ্ছন্দপ্পহানে আচরিযধম্মপালত্থেরেন ৰুত্তং ‘‘ৰিক্খম্ভনৰসেনাতি এত্থ ৰিক্খম্ভনং অনুপ্পাদনং অপ্পৰত্তনং, ন পটিপক্খানং সুপ্পহীনতা, পহীনত্তাতি চ পহীনসদিসতং সন্ধায ৰুত্তং ঝানস্স অনধিগতত্তা’’তি (দী. নি. টী. ১.২৬১). পস্সদ্ধকাযস্স সুখপটিসংৰেদনায চ ৰুত্তপ্পকারায পুব্বভাগভাৰনায ৰসেন চেতসিকসুখং পটিসংৰেদেন্তোযেৰ তংসমুট্ঠানপণীতরূপফুটসরীরতায কাযিকম্পি সুখং পটিসংৰেদেতীতি. অপিচ কা নাম কথা অঞ্ঞেহি ৰত্তব্বা অট্ঠকথাযমেৰ ‘‘ছ ধম্মে ভাৰেত্ৰা’’তি তত্থ তত্থ পুব্বভাগভাৰনায ৰুত্তত্তা. সুখিনো চিত্তসমাধানে পন সুখস্স উপচারভাৰনায ৰিয অপ্পনাযপি কারণত্তা, ‘‘সো ৰিৰিচ্চেৰ কামেহী’’তিআদিনা চ ৰক্খমানায অপ্পনায হেতুফলৰসেন সম্বজ্ঝনতো পুব্বভাগসমাধি ¶ , অপ্পনাসমাধি চ ৰুত্তো, পুব্বভাগসুখমিৰ ৰা অপ্পনাসুখম্পি অপ্পনাসমাধিস্স কারণমেৰাতি তম্পি অপ্পনাসুখং অপ্পনাসমাধিনো ¶ কারণভাৰেন আচরিযধম্মপালত্থেরেন গহিতন্তি ইমমত্থমসল্লক্খেন্তা নেক্খম্মপদত্থং যথাতথং অগ্গহেত্ৰা পাল়িযং, অট্ঠকথাযম্পি সংকিণ্ণাকুলং কেচি করোন্তীতি.

পঠমজ্ঝানকথাৰণ্ণনা

২২৬. যদেৰং ‘‘সুখিনো চিত্তং সমাধিযতী’’তি এতেনেৰ উপচারৰসেনপি অপ্পনাৰসেনপি চিত্তস্স সমাধানং কথিতং সিযা, এৰং সন্তে ‘‘সো ৰিৰিচ্চেৰ কামেহী’’তিআদিকা দেসনা কিমত্থিযাতি চোদনায ‘‘সো ৰিৰিচ্চেৰ…পে… ৰুত্তন্তি ৰেদিতব্ব’’ন্তি ৰুত্তং. তত্থ ‘‘সমাহিতে’’তি পদদ্ৰযং ‘‘দস্সনত্থং ৰুত্ত’’ন্তি ইমেহি সম্বন্ধিত্ৰা সমাহিতত্তা তথা দস্সনত্থং ৰুত্তন্তি অধিপ্পাযো ৰেদিতব্বো. উপরিৰিসেসদস্সনত্থন্তি উপচারসমাধিতো, পঠমজ্ঝানাদিসমাধিতো চ উপরি পত্তব্বস্স পঠমদুতিযজ্ঝানাদিৰিসেসস্স দস্সনত্থং. উপচারসমাধিসমধিগমেনেৰ হি পঠমজ্ঝানাদিৰিসেসো সমধিগন্তুং সক্কা, ন পন তেন ৰিনা, দুতিযজ্ঝানাদিসমধিগমেপি পামোজ্জুপ্পাদাদিকারণপরম্পরা ইচ্ছিতব্বা, দুতিযমগ্গাদিসমধিগমে পটিপদাঞাণদস্সনৰিসুদ্ধি ৰিযাতি দট্ঠব্বং. অপ্পনাসমাধিনাতি পঠমজ্ঝানাদিঅপ্পনাসমাধিনা. তস্স সমাধিনোতি যো অপ্পনালক্খণো সমাধি ‘‘সুখিনো চিত্তং সমাধিযতী’’তি সব্বসাধারণৰসেন ৰুত্তো, তস্স সমাধিনো. পভেদদস্সনত্থন্তি দুতিযজ্ঝানাদিৰিভাগস্স চেৰ পঠমাভিঞ্ঞাদিৰিভাগস্স চ পভেদদস্সনত্থং. করজকাযন্তি চতুসন্ততিরূপসমুদাযভূতং চাতুমহাভূতিককাযং. সো হি গব্ভাসযে করীযতীতি কত্ৰা করসঙ্খাততো পুপ্ফসম্ভৰতো জাতত্তা করজোতি ৰুচ্চতি. করোতি হি মাতু সোণিতসঙ্খাতপুপ্ফস্স, পিতু সুক্কসঙ্খাতসম্ভৰস্স চ নামং, ততো জাতো পন অণ্ডজজলাবুজৰসেন গব্ভসেয্যককাযোৰ. কামং ওপপাতিকাদীনম্পি হেতুসম্পন্নানং যথাৰুত্তসমাধিসমধিগমো সম্ভৰতি, তথাপি যেভুয্যত্তা, পাকটত্তা চ স্ৰেৰ কাযো ৰুত্তোতি. করোতি পুত্তে নিব্বত্তেতীতি করো, সুক্কসোণিতং, করেন জাতো করজোতিপি ৰদন্তি.

ননু চ নামকাযোপি ৰিৰেকজেন পীতিসুখেন তথা লদ্ধূপকারোৰ সিযা, অথ কস্মা যথাৰুত্তো রূপকাযোৰ ইধ গহিতোতি? সদ্দন্তরাভিসম্বন্ধেন অধিগতত্তা. ‘‘অভিসন্দেতী’’তিআদিসদ্দন্তরাভিসম্বন্ধতো হি রূপকাযো ¶ এৰ ইধ ভগৰতা ৰুত্তোতি অধিগমীযতি তস্সেৰ অভিসন্দনাদিকিরিযাযোগ্যত্তাতি. অভিসন্দেতীতি অভিসন্দনং করোতি, সো ¶ ইমমেৰ কাযং ৰিৰেকজেন পীতিসুখেনাতি হি ভেদৰসেন, সমুদাযাৰযৰৰসেন চ পরিকপ্পনামত্তসিদ্ধা হেতুকিরিযা এত্থ লব্ভতি, অভিসন্দনং পনেতং ঝানমযেন পীতিসুখেন করজকাযস্স তিন্তভাৰাপাদনং, সব্বত্থকমেৰ চ লূখভাৰস্সাপনযনন্তি আহ ‘‘তেমেতি স্নেহেতী’’তি, অৰস্সুতভাৰং, অল্লভাৰঞ্চ করোতীতি অত্থো. অত্থতো পন অভিসন্দনং নাম যথাৰুত্তপীতিসুখসমুট্ঠানেহি পণীতরূপেহি কাযস্স পরিপ্ফরণং দট্ঠব্বং. তেনেৰাহ ‘‘সব্বত্থ পৰত্তপীতি সুখং করোতী’’তি. তংসমুট্ঠানরূপফরণৰসেনেৰ হি সব্বত্থ পৰত্তপীতিসুখতা. পরিসন্দেতীতিআদীসুপি এসেৰ নযো. ভস্তং নাম চম্মপসিব্বকং. পরিপ্ফরতীতি সুদ্ধকিরিযাপদং. তেন ৰুত্তং ‘‘সমন্ততো ফুসতী’’তি, সো ইমমেৰ কাযং ৰিৰেকজেন পীতিসুখেন সমন্ততো ফুট্ঠো ভৰতীতি অত্থো. ফুসনকিরিযাযেৰেত্থ উপপন্না, ন ব্যাপনকিরিযা ভিক্খুস্সেৰ সুদ্ধকত্তুভাৰতো. সব্বং এতস্স অত্থীতি সব্বৰা যথা ‘‘গুণৰা’’তি, তস্স সব্বৰতো, ‘‘অৰযৰাৰযৰীসম্বন্ধে অৰযৰিনি সামিৰচন’’ন্তি সদ্দলক্খণেন পনেতস্স ‘‘কিঞ্চী’’তি অৰযৰেন সম্বজ্ঝনতো অৰযৰীৰিসযোযেৰেস সব্বসদ্দোতি মন্ত্ৰা ছৰিমংসাদিকোট্ঠাসসঙ্খাতেন অৰযৰেন অৰযৰীভাৰং দস্সেন্তো আহ ‘‘সব্বকোট্ঠাসৰতো কাযস্সা’’তি. ‘‘কিঞ্চী’’তি এতস্স ‘‘উপা…পে… ঠান’’ন্তি অত্থৰচনং. উপাদিন্নকসন্ততিপৰত্তিট্ঠানেতি কম্মজরূপসন্ততিযা পৰত্তিট্ঠানে অফুটং নাম ন হোতীতি সম্বন্ধো. ছৰিমংসলোহিতানুগতন্তি ছৰিমংসলোহিতাদিকম্মজরূপমনুগতং. যত্থ যত্থ কম্মজরূপং, তত্থ তত্থ চিত্তজরূপস্সাপি ব্যাপনতো তেন তস্স কাযস্স ফুটভাৰং সন্ধায ‘‘অফুটং নাম ন হোতী’’তি ৰুত্তং.

২২৭. ছেকোতি কুসলো, তং পন কোসল্লং ‘‘কংসথালে ন্হানিযচুণ্ণানি আকিরিত্ৰা’’তিআদিসদ্দন্তরসন্নিধানতো, পকরণতো চ ন্হানিযচুণ্ণানং করণে, পযোজনে, পিণ্ডনে চ সমত্থতাৰসেন ৰেদিতব্বন্তি দস্সেতি ‘‘পটিবলো’’তিআদিনা. কংসসদ্দো পন ‘‘মহতিযা কংসপাতিযা’’তিআদীসু ¶ (ম. নি. ১.৬১) সুৰণ্ণে আগতো, ‘‘কংসো উপহতো যথা’’তিআদীসু (ধ. প. ১৩৪) কিত্তিমলোহে, ‘‘উপকংসো নাম রাজা মহাকংসস্স অত্রজো’’তিআদীসু [জা. অট্ঠ. ৪.১০.১৬৪ (অত্থতো সমানং)] পণ্ণত্তিমত্তে. ইধ পন যত্থ কত্থচি লোহেতি আহ ‘‘যেন কেনচি লোহেন কতভাজনে’’তি. ননু উপমাকরণমত্তমেৰিদং, অথ কস্মা কংসথালকস্স সৰিসেসস্স গহণং কতন্তি অনুযোগং পরিহরতি ‘‘মত্তিকাভাজন’’ন্তিআদিনা. ‘‘সন্দেন্তস্সা’’তি পরিমদ্দেত্ৰা পিণ্ডং করোন্তস্সেৰ ভিজ্জতি, ন পন সন্দনক্খমং হোতি, অনাদরলক্খণে চেতং সামিৰচনং. কিরিযন্তরস্স পৰত্তনক্খণেযেৰ কিরিযন্তরস্স পৰত্তনঞ্হি অনাদরলক্খণং. ‘‘পরিপ্ফোসকং পরিপ্ফোসক’’ন্তি ইদং ভাৰনপুংসকন্তি ¶ দস্সেতি ‘‘সিঞ্চিত্ৰা সিঞ্চিত্ৰা’’তি ইমিনা. ফুসসদ্দো চেত্থ পরিসিঞ্চনে যথা তং ৰাতৰুট্ঠিসমযে ‘‘দেৰো চ থোকং থোকং ফুসাযতী’’তি, (পাচি. ৩৬২) তস্মা ততো ততো ন্হানিযচুণ্ণতো উপরি উদকেন ব্যাপনকরণৰসেন পরিসিঞ্চিত্ৰা পরিসিঞ্চিত্ৰাতি অত্থো. অনুপসগ্গোপি হি সদ্দো সউপসগ্গো ৰিয পকরণাধিগতস্স অত্থস্স দীপকো, ‘‘সিঞ্চিত্ৰা সিঞ্চিত্ৰা’’তি পন ৰচনং ‘‘পরিপ্ফোসকং পরিপ্ফোসক’’ন্তি এতস্স ‘‘সন্দেয্যা’’তি এত্থ ৰিসেসনভাৰৰিঞ্ঞাপনত্থং. এৰমীদিসেসু. ‘‘সন্দেয্যা’’তি এত্থ সন্দ-সদ্দো পিণ্ডকরণেতি ৰুত্তং ‘‘পিণ্ডং করেয্যা’’তি. অনুগতাতি অনুপৰিসনৰসেন গতা উপগতা. পরিগ্গহিতাতি পরিতো গহিতা সমন্ততো ফুট্ঠা.

অন্তরো চ বাহিরো চ পদেসো, তেহি সহ পৰত্ততীতি সন্তরবাহিরা, ন্হানিযপিণ্ডি, ‘‘সমন্তরবাহিরা’’তিপি পাঠো, ম-কারো পদসন্ধিৰসেন আগমো. যথাৰুত্তেন পরিগ্গহিততাকারণেনেৰ সন্তরবাহিরো ন্হানিযপিণ্ডি ফুটা উদকস্নেহেনাতি আহ ‘‘সব্বত্থকমেৰ উদকসিনেহেন ফুটা’’তি. সব্বত্থ পৰত্তনং সব্বত্থকং, ভাৰনপুংসকঞ্চেতং, সব্বপদেসে হুত্ৰা এৰ ফুটাতি অত্থো. ‘‘সন্তরবাহিরা ফুটা’’তি চ ইমিনা ন্হানিযপিণ্ডিযা সব্বসো উদকেন তেমিতভাৰমাহ, ‘‘ন চ পগ্ঘরণী’’তি পন ইমিনা তিন্তাযপি তায ঘনথদ্ধভাৰং. তেনাহ ‘‘ন চ বিন্দুং বিন্দু’’ন্তিআদি. উদকস্স ফুসিতং ফুসিতং, ¶ ন চ পগ্ঘরণী সূদনীতি অত্থো, ‘‘বিন্দুং উদকং’’ তিপি কত্থচি পাঠো, উদকসঙ্খাতং বিন্দুন্তি তস্সত্থো. বিন্দুসদ্দো হি ‘‘ব্যালম্বম্বুধরবিন্দূ’’তিআদীসু ৰিয ধারাৰযৰে. এৰং পন অপগ্ঘরণতো হত্থেনপি দ্ৰীহিপি তীহিপি অঙ্গুলেহি গহেতুং, ওৰট্টিকায ৰা কাতুং সক্কা. যদি হি সা পগ্ঘরণী অস্স, এৰং সতি স্নেহৰিগমনেন সুক্খত্তা থদ্ধা হুত্ৰা তথা গহেতুং, কাতুং ৰা ন সক্কাতি ৰুত্তং হোতি. ওৰট্টিকাযাতি পরিৰট্টুলৰসেন, গুল়িকাৰসেন সা পিণ্ডি কাতুং সক্কাতি অত্থো.

দুতিযজ্ঝানকথাৰণ্ণনা

২২৯. তাহি তাহি উদকসিরাহি উব্ভিজ্জতি উদ্ধং নিক্খমতীতি উব্ভিদং, তাদিসং উদকং যস্সাতি উব্ভিদোদকো, দ-কারস্স পন ত-কারে কতে উব্ভিতোদকো, ইমমত্থং দস্সেতুং ‘‘উব্ভিন্নউদকো’’তি ৰুত্তং, নদীতীরে খতকূপকো ৰিয উব্ভিজ্জনকউদকোতি অত্থো. উব্ভিজ্জনকম্পি উদকং কত্থচি হেট্ঠা উব্ভিজ্জিত্ৰা ধারাৰসেন উট্ঠহিত্ৰা বহি গচ্ছতি, ন তং কোচি অন্তোযেৰ পতিট্ঠিতং কাতুং সক্কোতি ধারাৰসেন উট্ঠহনতো, ইধ পন ৰালিকাতটে ৰিয উদকরহদস্স অন্তোযেৰ উব্ভিজ্জিত্ৰা তত্থেৰ তিট্ঠতি, ন ধারাৰসেন উট্ঠহিত্ৰা বহি গচ্ছতীতি ¶ ৰিঞ্ঞাযতি অখোভকস্স সন্নিসিন্নস্সেৰ উদকস্স অধিপ্পেতত্তাতি ইমমত্থং সন্ধাযাহ ‘‘ন হেট্ঠা’’তিআদি. হেট্ঠাতি উদকরহদস্স হেট্ঠা মহাউদকসিরা, লোহিতানুগতা লোহিতসিরা ৰিয উদকানুগতো পথৰিপদেসো ‘‘উদকসিরা’’তি ৰুচ্চতি. উগ্গচ্ছনকউদকোতি ধারাৰসেন উট্ঠহনকউদকো. অন্তোযেৰাতি উদকরহদস্স অন্তো সমতলপদেসে এৰ. উব্ভিজ্জনকউদকোতি উব্ভিজ্জিত্ৰা তত্থেৰ তিট্ঠনকউদকো. আগমনমগ্গোতি বাহিরতো উদকরহদাভিমুখং আগমনমগ্গো. কালেন কালন্তি রুল়্হীপদং ‘‘একো একাযা’’তিআদি (পারা. ৪৪৩, ৪৪৪, ৪৫২) ৰিযাতি ৰুত্তং ‘‘কালে কালে’’তি. অন্ৰদ্ধমাসন্তি এত্থ অনুসদ্দো ব্যাপনে. ৰস্সানস্স অদ্ধমাসং অদ্ধমাসন্তি অত্থো. এৰং অনুদসাহন্তি এত্থাপি. ৰুট্ঠিন্তি ৰস্সনং. অনুপ্পৰচ্ছেয্যাতি ন উপৰচ্ছেয্য. ৰস্সসদ্দতো চস্স সিদ্ধীতি দস্সেতি ‘‘ন ৰস্সেয্যা’’তি ইমিনা.

‘‘সীতা ¶ ৰারিধারা’’তি ইত্থিলিঙ্গপদস্স ‘‘সীতং ধার’’ন্তি নপুংসকলিঙ্গেন অত্থৰচনং ধারসদ্দস্স দ্ৰিলিঙ্গিকভাৰৰিঞ্ঞাপনত্থং. সীতন্তি খোভনাভাৰেন সীতলং, পুরাণপণ্ণতিণকট্ঠাদিসংকিণ্ণাভাৰেন ৰা সেতং পরিসুদ্ধং. সেতং সীতন্তি হি পরিযাযো. কস্মা পনেত্থ উব্ভিদোদকোযেৰ রহদো গহিতো, ন ইতরেতি অনুযোগমপনেতি ‘‘হেট্ঠা উগ্গচ্ছনউদকঞ্হী’’তিআদিনা. উগ্গন্ত্ৰা উগ্গন্ত্ৰা ভিজ্জন্তন্তি উট্ঠহিত্ৰা উট্ঠহিত্ৰা ধারাকিরণৰসেন উব্ভিজ্জন্তং, ৰিনস্সন্তং ৰা. খোভেতীতি আলোল়েতি. ৰুট্ঠীতি ৰস্সনং. ধারানিপাতপুব্বুল়কেহীতি উদকধারানিপাতেহি চ ততোযেৰ উট্ঠিতউদকপুব্বুল়কসঙ্খাতেহি ফেণপটলেহি চ. এৰং যথাক্কমং তিণ্ণম্পি রহদানমগহেতব্বতং ৰত্ৰা উব্ভিদোদকস্সেৰ গহেতব্বতং ৰদতি ‘‘সন্নিসিন্নমেৰা’’তিআদিনা. তত্থ সন্নিসিন্নমেৰাতি সম্মা, সমং ৰা নিসিন্নমেৰ, অপরিক্খোভতায নিচ্চলমেৰ, সুপ্পসন্নমেৰাতি অধিপ্পাযো. ইদ্ধিনিম্মিতমিৰাতি ইদ্ধিমতা ইদ্ধিযা তথা নিম্মিতং ইৰ. তত্থাতি তস্মিং উপমোপমেয্যৰচনে. সেসন্তি ‘‘অভিসন্দেতী’’তিআদিকং.

ততিযজ্ঝানকথাৰণ্ণনা

২৩১. ‘‘উপ্পলিনী’’তিআদি গচ্ছস্সপি ৰনস্সপি অধিৰচনং. ইধ পন ‘‘যাৰ অগ্গা, যাৰ চ মূলা’’তি ৰচনযোগেন ‘‘অপ্পেকচ্চানী’’তিআদিনা উপ্পলগচ্ছাদীনমেৰ গহেতব্বতায ৰনমেৰাধিপ্পেতং, তস্মা ‘‘উপ্পলানীতি উপ্পলগচ্ছানি. এত্থাতি উপ্পলৰনে’’তিআদিনা অত্থো ৰেদিতব্বো. অৰযৰেন হি সমুদাযস্স নিব্বচনং কতং. একঞ্হি উপ্পলগচ্ছাদি ¶ উপ্পলাদিযেৰ, চতুপঞ্চমত্তম্পি পন উপ্পলাদিৰনন্তি ৰোহরীযতি, সারত্থদীপনিযং পন জলাসযোপি উপ্পলিনিআদিভাৰেন ৰুত্তো. এত্থ চাতি এতস্মিং পদত্তযে, এতেসু ৰা তীসু উপ্পলপদুমপুণ্ডরীকসঙ্খাতেসু অত্থেসু. ‘‘সেতরত্তনীলেসূ’’তি উপ্পলমেৰ ৰুত্তং, সেতুপ্পলরত্তুপ্পলনীলুপ্পলেসূতি অত্থো. যং কিঞ্চি উপ্পলং উপ্পলমেৰ উপ্পলসদ্দস্স সামঞ্ঞনামৰসেন তেসু সব্বেসুপি পৰত্তনতো. সতপত্তন্তি এত্থ সতসদ্দো বহুপরিযাযো ‘‘সতগ্ঘী সতরংসি সূরিযো’’তিআদীসু ৰিয অনেকসঙ্খ্যাভাৰতো. এৰঞ্চ কত্ৰা অনেকপত্তস্সাপি পদুমভাৰে সঙ্গহো সিদ্ধো হোতি. পত্তন্তি চ পুপ্ফদলমধিপ্পেতং. ৰণ্ণনিযমেন সেতং পদুমং, রত্তং ¶ পুণ্ডরীকন্তি সাসনৰোহারো, লোকে পন ‘‘রত্তং পদুমং, সেতং পুণ্ডরীক’’ন্তি ৰদন্তি. ৰুত্তঞ্হি ‘‘পুণ্ডরীকং সিতং রত্তং, কোকনদং কোকাসকো’’তি. রত্তৰণ্ণতায হি কোকনামকানং সুনখানং নাদযতো সদ্দাপযতো, তেহি চ অসিতব্বতো ‘‘কোকনদং, কোকাসকো’’তি চ পদুমং ৰুচ্চতি. যথাহ ‘‘পদ্মং যথা কোকনদং সুগন্ধ’’ন্তি. অযং পনেত্থ ৰচনত্থো উদকং পাতি, উদকে ৰা প্লৰতীতি উপ্পলং. পঙ্কে দৰতি গচ্ছতি, পকারেন ৰা দৰতি ৰিরুহতীতি পদুমং. পণ্ডরং ৰণ্ণমস্স, মহন্ততায ৰা মুডিতব্বংখণ্ডেতব্বন্তি পুণ্ডরীকং ম-কারস্স প-কারাদিৰসেন. মুডিসদ্দঞ্হি মুডরিসদ্দং ৰা খণ্ডনত্থমিচ্ছন্তি সদ্দৰিদূ, সদ্দসত্থতো চেত্থ পদসিদ্ধি. যাৰ অগ্গা, যাৰ চ মূলা উদকেন অভিসন্দনাদিভাৰদস্সনত্থং পাল়িযং ‘‘উদকানুগ্গতানী’’তি ৰচনং, তস্মা উদকতো ন উগ্গতানিচ্চেৰ অত্থো, ন তু উদকে অনুরূপগতানীতি আহ ‘‘উদকা…পে… গতানী’’তি. ইধ পন উপ্পলাদীনি ৰিয করজকাযো, উদকং ৰিয ততিযজ্ঝানসুখং দট্ঠব্বং.

চতুত্থজ্ঝানকথাৰণ্ণনা

২৩৩. যস্মা পন চতুত্থজ্ঝানচিত্তমেৰ ‘‘চেতসা’’তি ৰুত্তং, তঞ্চ রাগাদিউপক্কিলেসমলাপগমতো নিরুপক্কিলেসং নিম্মলং, তস্মা উপক্কিলেসৰিগমনমেৰ পরিসুদ্ধভাৰোতি আহ ‘‘নিরুপক্কিলেসট্ঠেন পরিসুদ্ধ’’ন্তি. যস্মা চ পরিসুদ্ধস্সেৰ পচ্চযৰিসেসেন পৰত্তিৰিসেসো পরিযোদাততা সুদ্ধন্তসুৰণ্ণস্স নিঘংসনেন পভস্সরতা ৰিয, তস্মা পভস্সরতাযেৰ পরিযোদাততাতি আহ ‘‘পভস্সরট্ঠেন পরিযোদাত’’ন্তি. ৰিজ্জু ৰিয পভায ইতো চিতো চ নিচ্ছরণং পভস্সরং যথা ‘‘আভস্সরা’’তি. ওদাতেন ৰত্থেনাতি এত্থ ‘‘ওদাতেনা’’তি গুণৰচনং সন্ধায ‘‘ওদাতেন…পে… ইদ’’ন্তি ৰুত্তং. উতুফরণত্থন্তি উণ্হস্স উতুনো ফরণদস্সনত্থং. কস্মাতি আহ ‘‘কিলিট্ঠৰত্থেনা’’তিআদি. উতুফরণং ন হোতীতি ওদাতৰত্থেন ৰিয সৰিসেসং উতুফরণং ন হোতি, অপ্পকমত্তমেৰ হোতীতি অধিপ্পাযো ¶ . তেনাহ ‘‘তঙ্খণ…পে… বলৰং হোতী’’তি. ‘‘তঙ্খণধোতপরিসুদ্ধেনা’’তি চ এতেন ওদাতসদ্দো এত্থ পরিসুদ্ধৰচনো এৰ ‘‘গিহী ওদাতৰত্থৰসনো’’তিআদীসু ৰিয ¶ , ন সেতৰচনো যেন কেনচি তঙ্খণধোতপরিসুদ্ধেনেৰ উতুফরণসম্ভৰতোতি দস্সেতি.

ননু চ পাল়িযং ‘‘নাস্স কিঞ্চি সব্বাৰতো কাযস্স ওদাতেন ৰত্থেন অফুটং অস্সা’’তি কাযস্স ওদাতৰত্থফরণং ৰুত্তং, ন পন ৰত্থস্স উতুফরণং, অথ কস্মা উতুফরণং ইধ ৰুত্তন্তি অনুযোগেনাহ ‘‘ইমিস্সায হী’’তিআদি. যস্মা ৰত্থং ৰিয করজকাযো, উতুফরণং ৰিয চতুত্থজ্ঝানসুখং, তস্মা এৰমত্থো ৰেদিতব্বোতি ৰুত্তং হোতি, এতেন চ ওদাতেন ৰত্থেন সব্বাৰতো কাযস্স ফরণাসম্ভৰতো, উপমেয্যেন চ অযুত্তত্তা কাযগ্গহণেন তন্নিস্সিতৰত্থং গহেতব্বং, ৰত্থগ্গহণেন চ তপ্পচ্চযং উতুফরণন্তি দস্সেতি. নেয্যত্থতো হি অযং উপমা ৰুত্তা. ৰিচিত্রদেসনা হি বুদ্ধা ভগৰন্তোতি. যোগিনো হি করজকাযো ৰত্থং ৰিয দট্ঠব্বো উতুফরণসদিসেন চতুত্থজ্ঝানসুখেন ফরিতব্বত্তা, উতুফরণং ৰিয চতুত্থজ্ঝানসুখং ৰত্থস্স ৰিয তেন করজকাযস্স ফরণতো, পুরিসস্স সরীরং ৰিয চতুত্থজ্ঝানং উতুফরণট্ঠানিযস্স সুখস্স নিস্সযভাৰতো. তেনাহ ‘‘তস্মা’’তিআদি. ইদঞ্হি যথাৰুত্তৰচনস্স গুণদস্সনং. এত্থ চ পাল়িযং ‘‘পরিসুদ্ধেন চেতসা’’তি চেতোগহণেন চতুত্থজ্ঝানসুখং ভগৰতা ৰুত্তন্তি ঞাপেতুং ‘‘চতুত্থজ্ঝানসুখং, চতুত্থজ্ঝানসুখেনা’’তি চ ৰুত্তন্তি দট্ঠব্বং. ননু চ চতুত্থজ্ঝানসুখং নাম সাতলক্খণং নত্থীতি? সচ্চং, সন্তসভাৰত্তা পনেত্থ উপেক্খাযেৰ ‘‘সুখ’’ন্তি অধিপ্পেতা. তেন ৰুত্তং সম্মোহৰিনোদনিযং ‘‘উপেক্খা পন সন্তত্তা, সুখমিচ্চেৰ ভাসিতা’’তি (ৰিভ. অট্ঠ. ২৩২; ৰিসুদ্ধি. ২.৬৪৪; মহানি. অট্ঠ. ২৭; পটি. ম. অট্ঠ. ১.১০৫).

এত্তাৰতাতি পঠমজ্ঝানাধিগমপরিদীপনতো পট্ঠায যাৰ চতুত্থজ্ঝানাধিগমপরিদীপনা, তাৰতা ৰচনক্কমেন. লভনং লাভো, সো এতস্সাতি লাভী, রূপজ্ঝানানং লাভী রূপজ্ঝানলাভী যথা ‘‘লাভী চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি, (সং. নি. ২.৭০; উদা. ৩৮) লভনসীলো ৰা লাভী. কিং লভনসীলো? রূপজ্ঝানানীতিপি যুজ্জতি. এৰমিতরস্মিম্পি. ন অরূপজ্ঝানলাভীতি ন ৰেদিতব্বোতি যোজেতব্বং. কস্মাতি ৰুত্তং ‘‘ন হী’’তিআদি, অট্ঠন্নম্পি সমাপত্তীনং উপরি অভিঞ্ঞাধিগমে অৰিনাভাৰতোতি ¶ ৰুত্তং হোতি. চুদ্দসহাকারেহীতি ‘‘কসিণানুলোমতো, কসিণপটিলোমতো কসিণানুলোমপটিলোমতো, ঝানানুলোমতো, ঝানপটিলোমতো, ঝানানুলোমপটিলোমতো, ঝানুক্কন্তিকতো, কসিণুক্কন্তিকতো, ঝানকসিণুক্কন্তিকতো, অঙ্গসঙ্কন্তিতো, আরম্মণসঙ্কন্তিতো ¶ , অঙ্গারম্মণসঙ্কন্তিতো অঙ্গৰৰত্থানতো, আরম্মণৰৰত্থানতো’’তি (ৰিসুদ্ধি. ২.৩৬৫) ৰিসুদ্ধিমগ্গে ৰুত্তেহি ইমেহি চুদ্দসহাকারেহি. সতিপি ঝানেসু আৰজ্জনাদিপঞ্চৰিধৰসীভাৰে অযমেৰ চুদ্দসৰিধো ৰসীভাৰো অভিঞ্ঞা নিব্বত্তনে একন্তেন ইচ্ছিতব্বোতি দস্সেন্তেন ‘‘চুদ্দসহাকারেহি চিণ্ণৰসীভাৰ’’ন্তি ৰুত্তং, ইমিনা চ অরূপসমাপত্তীসু চিণ্ণৰসীভাৰং ৰিনা রূপসমাপত্তীসু এৰ চিণ্ণৰসীভাৰেন সমাপত্তি ন ইজ্ঝতীতি তাসং অভিঞ্ঞাধিগমে অৰিনাভাৰং দস্সেতীতি ৰেদিতব্বং.

ননু যথাপাঠমেৰ ৰিনিচ্ছযো ৰত্তব্বোতি চোদনং সোধেতি ‘‘পাল়িযং পনা’’তিআদিনা, সাৰসেসপাঠভাৰতো নীহরিত্ৰা এস ৰিনিচ্ছযো ৰত্তব্বোতি ৰুত্তং হোতি. যজ্জেৰং অরূপজ্ঝানানিপি পাল়িযং গহেতব্বানি, অথ কস্মা তানি অগ্গহেত্ৰা সাৰসেসপাঠো ভগৰতা কতোতি? সব্বাভিঞ্ঞানং ৰিসেসতো রূপাৰচরচতুত্থজ্ঝানপাদকত্তা. সতিপি হি তাসং তথা অৰিনাভাৰে ৰিসেসতো পনেতা রূপাৰচরচতুত্থজ্ঝানপাদকা, তস্মা তাসং তপ্পাদকভাৰৰিঞ্ঞাপনত্থং তত্থেৰ ঠত্ৰা দেসনা কতা, ন পন অরূপাৰচরজ্ঝানানং ইধ অননুপযোগতো. তেনাহ ‘‘অরূপজ্ঝানানি আহরিত্ৰা কথেতব্বানী’’তি.

ৰিপস্সনাঞাণকথাৰণ্ণনা

২৩৪. ‘‘পুন চপরং মহারাজ (পাল়িযং নত্থি) ভিক্খূ’’তি ৰত্ৰাপি কিমত্থং দস্সেতুং ‘‘সো’’তি পদং পুন ৰুত্তন্তি চোদনাযাহ ‘‘সো…পে… দস্সেতী’’তি, যথারুতৰসেন, নেয্যত্থৰসেন চ ৰুত্তাসু অট্ঠসু সমাপত্তীসু চিণ্ণৰসিতাৰিসিট্ঠং ভিক্খুং দস্সেতুং এৰং ৰুত্তন্তি অধিপ্পাযো. সেসন্তি ‘‘সো’’তি পদত্থতো সেসং ‘‘এৰং সমাহিতে’’তিআদীসু ৰত্তব্বং সাধিপ্পাযমত্থজাতং. ঞেয্যং জানাতীতি ঞাণং, তদেৰ পচ্চক্খং কত্ৰা পস্সতীতি দস্সনং, ঞাণমেৰ দস্সনং ন চক্খাদিকন্তি ঞাণদস্সনং, পঞ্চৰিধম্পি ঞাণং, তযিদং পন ঞাণদস্সনপদং ¶ সাসনে যেসু ঞাণৰিসেসেসু নিরুল়্হং, তং সব্বং অত্থুদ্ধারৰসেন দস্সেন্তো ‘‘ঞাণদস্সনন্তি মগ্গঞাণম্পি ৰুচ্চতী’’তিআদিমাহ. ঞাণদস্সনৰিসুদ্ধত্থন্তি ঞাণদস্সনস্স ৰিসুদ্ধিপযোজনায. ফাসুৰিহারোতি অরিযৰিহারভূতো সুখৰিহারো. ভগৰতোপীতি ন কেৰলং দেৰতারোচনমেৰ, অথ খো তদা ভগৰতোপি ঞাণদস্সনং উদপাদীতি অত্থো. সত্তাহং কালঙ্কতস্স অস্সাতি সত্তাহকালঙ্কতো. ‘‘কালামো’’তি গোত্তৰসেন ৰুত্তং. চেতোৰিমুত্তি [ৰিমুত্তি (অট্ঠকথাযং)] নাম অরহত্তফলসমাপত্তি. যস্মা ৰিপস্সনাঞাণং ঞেয্যসঙ্খাতে তেভূমকসঙ্খারে অনিচ্চাদিতো ¶ জানাতি, ভঙ্গানুপস্সনতো চ পট্ঠায পচ্চক্খতো তে পস্সতি, তস্মা যথাৰুত্তট্ঠেন ঞাণদস্সনং নাম জাতন্তি দস্সেতি ‘‘ইধ পনা’’তিআদিনা.

অভিনীহরতীতি ৰিপস্সনাভিমুখং চিত্তং তদঞ্ঞকরণীযতো নীহরিত্ৰা হরতীতি অযং সদ্দতো অত্থো, অধিপ্পাযতো পন তং দস্সেতুং ‘‘ৰিপস্সনাঞাণস্সা’’তিআদি ৰুত্তং. তদভিমুখভাৰোযেৰ হিস্স তন্নিন্নতাদিকরণং, তং পন ৰুত্তনযেন অট্ঠঙ্গসমন্নাগতে তস্মিং চিত্তে ৰিপস্সনাক্কমেন জাতে ৰিপস্সনাভিমুখং চিত্তপেসনমেৰাতি দট্ঠব্বং. তন্নিন্নন্তি তস্সং ৰিপস্সনাযং নিন্নং. ইতরদ্ৰযং তস্সেৰ ৰেৰচনং. তস্সং পোণং ৰঙ্কং পব্ভারং নীচন্তি অত্থো. ব্রহ্মজালে ৰুত্তোযেৰ. ওদনকুম্মাসেহি উপচীযতি ৰড্ঢাপীযতি, উপচযতি ৰা ৰড্ঢতীতি অত্থং সন্ধায ‘‘ওদনেনা’’তিআদি ৰুত্তং. অনিচ্চুচ্ছাদনপরিমদ্দনভেদনৰিদ্ধংসনধম্মোতি এত্থ ‘‘অনিচ্চধম্মো’’তিআদিনা ধম্মসদ্দো পচ্চেকং যোজেতব্বো. তত্থ অনিচ্চধম্মোতি পভঙ্গুতায অদ্ধুৰসভাৰো. দুগ্গন্ধৰিঘাতত্থাযাতি সরীরে দুগ্গন্ধস্স ৰিগমায. উচ্ছাদনধম্মোতি উচ্ছাদেতব্বতাসভাৰো, ইমস্স পূতিকাযস্স দুগ্গন্ধভাৰতো গন্ধোদকাদীহি উব্বট্টনৰিলিম্পনজাতিকোতি অত্থো. উচ্ছাদনেন হি পূতিকাযে সেদৰাতপিত্তসেম্হাদীহি গরুভাৰদুগ্গন্ধানমপগমো হোতি. মহাসম্বাহনং মল্লাদীনং বাহুৰড্ঢনাদিঅত্থংৰ হোতি, অঙ্গপচ্চঙ্গাবাধৰিনোদনত্থং পন খুদ্দকসম্বাহনমেৰ যুত্তন্তি আহ ‘‘খুদ্দকসম্বাহনেনা’’তি, মন্দসম্বাহনেনাতি অত্থো. পরিমদ্দনধম্মোতি পরিমদ্দিতব্বতাসভাৰো.

এৰং ¶ অনিযমিতকালৰসেন অত্থং ৰত্ৰা ইদানি নিযমিতকালৰসেন অত্থং ৰদতি ‘‘দহরকালে’’তিআদিনা. ৰা-সদ্দো চেত্থ অত্থদস্সনৰসেনেৰ অত্থন্তরৰিকপ্পনস্স ৰিঞ্ঞাযমানত্তা ন পযুত্তো, লুত্তনিদ্দিট্ঠো ৰা. দহরকালেতি অচিরৰিজাতকালে. সযাপেত্ৰা অঞ্ছনপীল়নাদিৰসেন পরিমদ্দনধম্মোতি সম্বন্ধো. মিতন্তি ভাৰনপুংসকনিদ্দেসো, তেন যথাপমাণং, মন্দং ৰা অঞ্ছনপীল়নাদীনি দস্সেতি. অঞ্ছনঞ্চেত্থ আকড্ঢনং. পীল়নং সম্বাহনং. আদিসদ্দেন সমিঞ্জনউগ্গমনাদীনি সঙ্গণ্হাতি. এৰং পরিহরিতোপীতি উচ্ছাদনাদিনা সুখেধিতোপি. ভিজ্জতি চেৰাতি অনিচ্চতাদিৰসেন নস্সতি চ. ৰিকিরতি চাতি এৰং ভিন্দন্তো চ কিঞ্চি পযোজনং অসাধেন্তো ৰিপ্পকিণ্ণোৰ হোতি. এৰং নৰহি পদেহি যথারহং কাযে সমুদযৰযধম্মানুপস্সিতা দস্সিতাতি ইমমত্থং ৰিভাৰেন্তো ‘‘তত্থা’’তিআদিমাহ. তত্থ ছহি পদেহীতি ‘‘রূপী, চাতুমহাভূতিকো, মাতাপেত্তিকসম্ভৰো, ওদনকুম্মাসূপচযো, উচ্ছাদনধম্মো, পরিমদ্দনধম্মো’’তি ইমেহি ছহি পদেহি. যুত্তং তাৰ হোতু মজ্ঝে তীহিপি পদেহি কাযস্স সমুদযকথনং তেসং তদত্থদীপনতো, ‘‘রূপী, উচ্ছাদনধম্মো, পরিমদ্দনধম্মো’’তি পন তীহি ¶ ত্পদেহি কথং তস্স তথাকথনং যুত্তং সিযা তেসং তদত্থস্স অদীপনতোতি? যুত্তমেৰ তেসম্পি তদত্থস্স দীপিতত্তা. ‘‘রূপী’’তি হি ইদং অত্তনো পচ্চযভূতেন উতুআহারলক্খণেন রূপেন রূপৰাতি অত্থস্স দীপকং. পচ্চযসঙ্গমৰিসিট্ঠে হি তদস্সত্থিঅত্থে অযমীকারো. ‘‘উচ্ছাদনধম্মো, পরিমদ্দনধম্মো’’তি চ ইদং পদদ্ৰযং তথাৰিধরূপুপ্পাদনেন সণ্ঠানসম্পাদনত্থস্স দীপকন্তি. দ্ৰীহীতি ‘‘ভেদনধম্মো, ৰিদ্ধংসনধম্মো’’তি দ্ৰীহি পদেহি. নিস্সিতঞ্চ কাযপরিযাপন্নে হদযৰত্থুম্হি নিস্সিতত্তা ৰিপস্সনাচিত্তস্স. তদা পৰত্তঞ্হি ৰিপস্সনাচিত্তমেৰ ‘‘ইদঞ্চ মে ৰিঞ্ঞাণ’’ন্তি আসন্নপচ্চক্খৰসেন ৰুত্তং. পটিবদ্ধঞ্চ কাযেন ৰিনা অপ্পৰত্তনতো, কাযসঞ্ঞিতানঞ্চ রূপধম্মানং আরম্মণকরণতো.

২৩৫. সুট্ঠু ওভাসতীতি সুভো, পভাসম্পন্নো মণি, তায এৰ পভাসম্পত্তিযা মণিনো ভদ্রতাতি অত্থমত্তং দস্সেতুং ‘‘সুভোতি সুন্দরো’’তি ৰুত্তং. পরিসুদ্ধাকরসমুট্ঠানমেৰ মণিনো সুৰিসুদ্ধজাতিতাতি আহ ‘‘জাতিমাতি পরিসুদ্ধাকরসমুট্ঠিতো’’তি. সুৰিসুদ্ধরতনাকরতো সমুট্ঠিতোতি অত্থো. আকরপরিৰিসুদ্ধিমূলকো এৰ হি ¶ মণিনো কুরুৰিন্দজাতিআদিজাতিৰিসেসোতি. ইধাধিপ্পেতস্স পন ৰেল়ুরিযমণিনো ৰিল়ূর (ৰি. ৰ. অট্ঠ. ৩৪ আদযো ৰাক্যক্খ্খ্ন্ধেসু পস্সিতব্বং) পব্বতস্স, ৰিল়ূর গামস্স চ অৰিদূরে পরিসুদ্ধাকরো. যেভুয্যেন হি সো ততো সমুট্ঠিতো. তথা হেস ৰিল়ূরনামকস্স পব্বতস্স, গামস্স চ অৰিদূরে সমুট্ঠিতত্তা ৰেল়ুরিযোতি পঞ্ঞাযিত্থ, দেৰলোকে পৰত্তস্সপি চ তংসদিসৰণ্ণনিভতায তদেৰ নামং জাতং যথা তং মনুস্সলোকে লদ্ধনামৰসেন দেৰলোকে দেৰতানং, সো পন মযূরগীৰাৰণ্ণো ৰা হোতি ৰাযসপত্তৰণ্ণো ৰা সিনিদ্ধৰেণুপত্তৰণ্ণো ৰাতি আচরিযধম্মপালত্থেরেন পরমত্থদীপনিযং (ৰি. ৰ. অট্ঠ. ৩৪) ৰুত্তং. ৰিনযসংৰণ্ণনাসু (ৰি. ৰি. টী. ১.২৮১) পন ‘‘অল্লৰেল়ুৰণ্ণো’’তি ৰদন্তি. তথা হিস্স ‘‘ৰংসৰণ্ণো’’তিপি নামং জাতং. ‘‘মঞ্জারক্খিমণ্ডলৰণ্ণো’’তি চ ৰুত্তো, ততোযেৰ সো ইধ পদেসে মঞ্জারমণীতি পাকটো হোতি. চক্কৰত্তিপরিভোগারহপণীততরমণিভাৰতো পন তস্সেৰ পাল়িযং ৰচনং দট্ঠব্বং. যথাহ ‘‘পুন চপরং আনন্দ রঞ্ঞো মহাসুদস্সনস্স মণিরতনং পাতুরহোসি, সো অহোসি মণি ৰেল়ুরিযো সুভো জাতিমা অট্ঠংসো’’তিআদি (দী. নি. ২.২৪৮). পাসাণসক্খরাদিদোসনীহরণৰসেনেৰ পরিকম্মনিপ্ফত্তীতি দস্সেতি ‘‘অপনীতপাসাণসক্খরো’’তি ইমিনা.

ছৰিযা এৰ সণ্হভাৰেন অচ্ছতা, ন সঙ্ঘাতস্সাতি আহ ‘‘অচ্ছোতি তনুচ্ছৰী’’তি. ততো চেৰ ৰিসেসেন পসন্নোতি দস্সেতুং ‘‘সুট্ঠু পসন্নো’’তি ৰুত্তং. পরিভোগমণিরতনাকারসম্পত্তি সব্বাকারসম্পন্নতা ¶ . তেনাহ ‘‘ধোৰনৰেধনাদীহী’’তিআদি. পাসাণাদীসু ধোততা ধোৰনং, কাল়কাদিঅপহরণত্থায চেৰ সুত্তেন আৰুনত্থায চ ৰিজ্ঝিতব্বতা ৰেধনং. আদিসদ্দেন তাপসণ্হকরণাদীনং সঙ্গহো. ৰণ্ণসম্পত্তিন্তি আৰুনিতসুত্তস্স ৰণ্ণসম্পত্তিং. কস্মাতি ৰুত্তং ‘‘তাদিস’’ন্তিআদি, তাদিসস্সেৰ আৰুতস্স পাকটভাৰতোতি ৰুত্তং হোতি.

মণি ৰিয করজকাযো পচ্চৰেক্খিতব্বতো. আৰুতসুত্তং ৰিয ৰিঞ্ঞাণং অনুপৰিসিত্ৰা ঠিতত্তা. চক্খুমা পুরিসো ৰিয ৰিপস্সনালাভী ভিক্খু ¶ সম্মদেৰ তস্স দস্সনতো, তস্স পুরিসস্স মণিনো আৰিভূতকালো ৰিয তস্স ভিক্খুনো কাযস্স আৰিভূতকালো তন্নিস্সযস্স পাকটভাৰতো. সুত্তস্সাৰিভূতকালো ৰিয তেসং ধম্মানমাৰিভূতকালো তন্নিস্সিতস্স পাকটভাৰতোতি অযমেত্থ উপমাসম্পাদনে কারণৰিভাৰনা, ‘‘আৰুতসুত্তং ৰিয ৰিপস্সনাঞাণ’’ন্তি কত্থচি পাঠো, ‘‘ইদঞ্চ ৰিঞ্ঞাণ’’ন্তি ৰচনতো পন ‘‘ৰিঞ্ঞাণ’’ন্তি পাঠোৰ সুন্দরতরো, ‘‘ৰিপস্সনাৰিঞ্ঞাণ’’ন্তি ৰা ভৰিতব্বং. ৰিপস্সনাঞাণং অভিনীহরিত্ৰাতি ৰিপস্সনাঞাণাভিমুখং চিত্তং নীহরিত্ৰা.

তত্রাতি ৰেল়ুরিযমণিম্হি. তদারম্মণানন্তি কাযসঞ্ঞিতরূপধম্মারম্মণানং. ‘‘ফস্সপঞ্চমকান’’ন্তিআদিপদত্তযস্সেতং ৰিসেসনং অত্থৰসা লিঙ্গৰিভত্তিৰচনৰিপরিণামোতি কত্ৰা পচ্ছিমপদস্সাপি ৰিসেসনভাৰতো. ফস্সপঞ্চমকগ্গহণেন, সব্বচিত্তচেতসিকগ্গহণেন চ গহিতধম্মা ৰিপস্সনাচিত্তুপ্পাদপরিযাপন্না এৰাতি দট্ঠব্বং. এৰঞ্হি তেসং ৰিপস্সনাৰিঞ্ঞাণগতিকত্তা আৰুতসুত্তং ৰিয ‘‘ৰিপস্সনাৰিঞ্ঞাণ’’ন্তি হেট্ঠা ৰুত্তৰচনং অৰিরোধিতং হোতি. কস্মা পন ৰিপস্সনাৰিঞ্ঞাণস্সেৰ গহণন্তি? ‘‘ইদঞ্চ মে ৰিঞ্ঞাণং এত্থ সিতং এত্থ পটিবদ্ধ’’ন্তি ইমিনা তস্সেৰ ৰচনতো. ‘‘অযং খো মে কাযো’’তিআদিনা হি ৰিপস্সনাঞাণেন ৰিপস্সিত্ৰা ‘‘তদেৰ ৰিপস্সনাঞাণসম্পযুত্তং ৰিঞ্ঞাণং এত্থ সিতং এত্থ পটিবদ্ধ’’ন্তি নিস্সযৰিসযাদিৰসেন মনসি করোতি, তস্মা তস্সেৰ ইধ গহণং সম্ভৰতি, নাঞ্ঞস্সাতি দট্ঠব্বং. তেনাহ ‘‘ৰিপস্সনাৰিঞ্ঞাণস্সেৰ ৰা আৰিভূতকালো’’তি. ধম্মসঙ্গহাদীসু (ধ. স. ২ আদযো) দেসিতনযেন পাকটভাৰতো চেত্থ ফস্সপঞ্চমকানং গহণং, নিরৰসেসপরিগ্গহণতো সব্বচিত্তচেতসিকানং, যথারুতং দেসিতৰসেন পধানভাৰতো ৰিপস্সনাৰিঞ্ঞাণস্সাতি ৰেদিতব্বং. কিং পনেতে পচ্চৰেক্খণঞাণস্স আৰিভৰন্তি, উদাহু পুগ্গলস্সাতি? পচ্চৰেক্খণঞাণস্সেৰ, তস্স পন আৰিভূতত্তা পুগ্গলস্সাপি আৰিভূতা নাম হোন্তি, তস্মা ‘‘ভিক্খুনো আৰিভূতকালো’’তি ৰুত্তন্তি.

যস্মা ¶ পনিদং ৰিপস্সনাঞাণং মগ্গঞাণানন্তরং হোতি, তস্মা লোকিযাভিঞ্ঞানং পরতো, ছট্ঠভিঞ্ঞায চ পুরতো ৰত্তব্বং, অথ কস্মা সব্বাভিঞ্ঞানং পুরতোৰ ৰুত্তন্তি চোদনালেসং দস্সেত্ৰা পরিহরন্তো ¶ ‘‘ইদঞ্চ ৰিপস্সনাঞাণ’’ন্তিআদিমাহ. ‘‘ইদঞ্চ মগ্গঞাণানন্তর’’ন্তি হি ইমিনা যথাৰুত্তং চোদনালেসং দস্সেতি. তত্থ ‘‘মগ্গঞাণানন্তর’’ন্তি সিখাপ্পত্তৰিপস্সনাভূতং গোত্রভুঞাণং সন্ধায ৰুত্তং. তদেৰ হি অরহত্তমগ্গস্স, সব্বেসং ৰা মগ্গফলানমনন্তরং হোতি, পধানতো পন তব্বচনেনেৰ সব্বস্সপি ৰিপস্সনাঞাণস্স গহণং দট্ঠব্বং অৰিসেসতো তস্স ইধ ৰুত্তত্তা. মগ্গসদ্দেন চ অরহত্তমগ্গস্সেৰ গহণং তস্সেৰাভিঞ্ঞাপরিযাপন্নত্তা, অভিঞ্ঞাসম্বন্ধেন চ চোদনাসম্ভৰতো. লোকিযাভিঞ্ঞানং পুরতো ৰুত্তং ৰিপস্সনাঞাণং তাসং নানন্তরতায অনুপকারং, আসৰক্খযঞাণসঙ্খাতায পন লোকুত্তরাভিঞ্ঞায পুরতো ৰুত্তং তস্সা অনন্তরতায উপকারং, তস্মা ইদং লোকিযাভিঞ্ঞানং পরতো, ছট্ঠাভিঞ্ঞায চ পুরতো ৰত্তব্বং. কস্মা পন উপকারট্ঠানে তথা অৰত্ৰা অনুপকারট্ঠানেৰ ভগৰতা ৰুত্তন্তি হি চোদনা সম্ভৰতি. ‘‘এৰং সন্তেপী’’তিআদি পরিহারদস্সনং. তত্থ এৰং সন্তেপীতি যদিপি ঞাণানুপুব্বিযা মগ্গঞাণস্স অনন্তরতায উপকারং হোতি, এৰং সতিপীতি অত্থো.

অভিঞ্ঞাৰারেতি ছল়ভিঞ্ঞাৰসেন ৰুত্তে দেসনাৰারে. এতস্স অন্তরা ৰারো নত্থীতি পঞ্চসু লোকিযাভিঞ্ঞাসু কথিতাসু আকঙ্খেয্যসুত্তাদীসু (ম. নি. ১.৬৫) ৰিয ছট্ঠাভিঞ্ঞাপি অৰস্সং কথেতব্বা অভিঞ্ঞালক্খণভাৰেন তপ্পরিযাপন্নতো, ন চ ৰিপস্সনাঞাণং লোকিযাভিঞ্ঞানং, ছট্ঠাভিঞ্ঞায চ অন্তরা পৰেসেত্ৰা কথেতব্বং অনভিঞ্ঞালক্খণভাৰেন তদপরিযাপন্নতো. ইতি এতস্স ৰিপস্সনাঞাণস্স তাসমভিঞ্ঞানং অন্তরা ৰারো নত্থি, তস্মা তত্থ অৰসরাভাৰতো ইধেৰ রূপাৰচরচতুত্থজ্ঝানানন্তরং ৰিপস্সনাঞাণং কথিতন্তি অধিপ্পাযো. ‘‘যস্মা চা’’তিআদিনা অত্থন্তরমাহ. তত্থ চ-সদ্দো সমুচ্চযত্থো, তেন ন কেৰলং ৰিপস্সনাঞাণস্স ইধ দস্সনে তদেৰ কারণং, অথ খো ইদম্পীতি ইমমত্থং সমুচ্চিনাতীতি আচরিযেন (দী. নি. টী. ১.২৩৫) ৰুত্তং. সদ্দৰিদূ পন ঈদিসে ঠানে চ-সদ্দো ৰা-সদ্দত্থো, সো চ ৰিকপ্পত্থোতি ৰদন্তি, তম্পি যুত্তমেৰ অত্থন্তরদস্সনে পযুত্তত্তা. অত্তনা পযুজ্জিতব্বস্স হি ৰিজ্জমানত্থস্সেৰ জোতকা উপসগ্গনিপাতা যথা মগ্গনিদস্সনে সাখাভঙ্গা, যথা চ অদিস্সমানা জোতনে পদীপাতি এৰমীদিসেসু. হোতি চেত্থ –

‘‘অত্থন্তরদস্সনম্হি ¶ , চ সদ্দো যদি দিস্সতি;

সমুচ্চযে ৰিকপ্পে সো, গহেতব্বো ৰিভাৰিনা’’তি.

অকতসম্মসনস্সাতি ¶ হেতুগব্ভপদং. তথা কতসম্মসনস্সাতি চ. ‘‘দিব্বেন চক্খুনা ভেরৰম্পি রূপং পস্সতোতি এত্থ ইদ্ধিৰিধঞাণেন ভেরৰং রূপং নিম্মিনিত্ৰা মংসচক্খুনা পস্সতোতিপি ৰত্তব্বং. এৰম্পি হি অভিঞ্ঞালাভিনো অপরিঞ্ঞাতৰত্থুকস্স ভযং সন্তাসো উপ্পজ্জতি উচ্চৰালিকৰাসিমহানাগত্থেরস্স ৰিযা’’তি আচরিযেন (দী. নি. টী. ১.২৩৫) ৰুত্তং. যথা চেত্থ, এৰং দিব্বায সোতধাতুযা ভেরৰং সদ্দং সুণতোতি এত্থাপি ইদ্ধিৰিধঞাণেন ভেরৰং সদ্দং নিম্মিনিত্ৰা মংসসোতেন সুণতোপীতি ৰত্তব্বমেৰ. এৰম্পি হি অভিঞ্ঞালাভিনো অপরিঞ্ঞাতৰত্থুকস্স ভযং সন্তাসো উপ্পজ্জতি উচ্চৰালিকৰাসিমহানাগত্থেরস্স ৰিয. থেরো হি কোঞ্চনাদসহিতং সব্বসেতং হত্থিনাগং মাপেত্ৰা দিস্ৰা, সুত্ৰা চ সঞ্জাতভযসন্তাসোতি অট্ঠকথাসু (ৰিভ. অট্ঠ. ২.৮৮২; ম. নি. অট্ঠ. ১.৮১; ৰিসুদ্ধি. ২.৭৩৩) ৰুত্তো. অনিচ্চাদিৰসেন কতসম্মসনস্স দিব্বায…পে… ভযং সন্তাসো ন উপ্পজ্জতীতি সম্বন্ধো. ভযৰিনোদনহেতু নাম ৰিপস্সনাঞাণেন কতসম্মসনতা, তস্স, তেন ৰা সম্পাদনত্থন্তি অত্থো. ইধেৰাতি চতুত্থজ্ঝানানন্তরমেৰ. ‘‘অপিচা’’তিআদিনা যথাপাঠং যুত্ততরনযং দস্সেতি. ৰিপস্সনায পৰত্তং পামোজ্জপীতিপস্সদ্ধিপরম্পরাগতসুখং ৰিপস্সনাসুখং. পাটিযেক্কন্তি ঝানাভিঞ্ঞাদীহি অসম্মিস্সং ৰিসুং ভূতং সন্দিট্ঠিকং সামঞ্ঞফলং. তেনাহ ভগৰা ধম্মপদে –

‘‘যতো যতো সম্মসতি, খন্ধানং উদযব্বযং;

লভতী পীতিপামোজ্জং, অমতং তং ৰিজানত’’ন্তিআদি. (ধ. প. ৩৭৪);

ইধাপি ৰুত্তং ‘‘ইদম্পি খো মহারাজ সন্দিট্ঠিকং সামঞ্ঞফলং…পে… পণীততরঞ্চা’’তি, তস্মা পাল়িযা সংসন্দনতো ইমমেৰ নযং যুত্ততরন্তি ৰদন্তি. আদিতোৰাতি অভিঞ্ঞানমাদিম্হিযেৰ.

মনোমযিদ্ধিঞাণকথাৰণ্ণনা

২৩৬-৭. মনোমযন্তি এত্থ পন মযসদ্দো অপরপঞ্ঞত্তিৰিকারপদপূরণনিব্বত্তিআদীসু অনেকেস্ৰত্থেসু আগতো. ইধ পন নিব্বত্তিঅত্থেতি দস্সেতুং ¶ ‘‘মনেন নিব্বত্তিত’’ন্তি ৰুত্তং. ‘‘অভিঞ্ঞামনেন নিব্বত্তিত’’ন্তি অত্থোতি আচরিযেনাতি (দী. নি. টী. ১.২৩৬, ২৩৭) ৰুত্তং. ৰিসুদ্ধিমগ্গে (ৰিসুদ্ধি. ২.৩৯৭) পন ‘‘অধিট্ঠানমনেন নিম্মিতত্তা মনোময’’ন্তি আগতং, অভিঞ্ঞামনেন, অধিট্ঠানমনেন চাতি উভযথাপি নিব্বত্তত্তা উভযম্পেতং যুত্তমেৰ ¶ . অঙ্গং নাম হত্থপাদাদিতংতংসমুদাযং, পচ্চঙ্গং নাম কপ্পরজণ্ণুআদি তস্মিং তস্মিং সমুদাযে অৰযৰং. ‘‘অহীনিন্দ্রিয’’ন্তি এত্থ পরিপুণ্ণতাযেৰ অহীনতা, ন তু অপ্পণীততা, পরিপুণ্ণভাৰো চ চক্খুসোতাদীনং সণ্ঠানৰসেনেৰ. নিম্মিতরূপে হি পসাদো নাম নত্থীতি দস্সেতুং ‘‘সণ্ঠানৰসেন অৰিকলিন্দ্রিয’’ন্তি ৰুত্তং, ইমিনাৰ তস্স জীৰিতিন্দ্রিযাদীনম্পি অভাৰো ৰুত্তোতি দট্ঠব্বং. সণ্ঠানৰসেনাতি চ কমলদলাদিসদিসসণ্ঠানমত্তৰসেন, ন রূপাভিঘাতারহভূতপ্পসাদাদিইন্দ্রিযৰসেন. ‘‘সব্বঙ্গপচ্চঙ্গিং অহীনিন্দ্রিয’’ন্তি ৰুত্তমেৰত্থং সমত্থেন্তো ‘‘ইদ্ধিমতা’’তিআদিমাহ. অৰিদ্ধকণ্ণোতি কুলচারিত্তৰসেন কণ্ণালঙ্কারপিল়ন্ধনত্থং অৰিজ্ঝিতকণ্ণো, নিদস্সনমত্তমেতং. তেনাহ ‘‘সব্বাকারেহী’’তি, ৰণ্ণসণ্ঠানাৰযৰৰিসেসাদিসব্বাকারেহীতি অত্থো. তেনাতি ইদ্ধিমতা.

অযমেৰত্থো পাল়িযম্পি ৰিভাৰিতোতি আহ ‘‘মুঞ্জম্হা ঈসিকন্তিআদিউপমাত্তযম্পি হি…পে… ৰুত্ত’’ন্তি. কত্থচি পন ‘‘মুঞ্জম্হা ঈসিকন্তিআদি উপমামত্তং. যম্পি হি সদিসভাৰদস্সনত্থমেৰ ৰুত্ত’’ন্তি পাঠো দিস্সতি. তত্থ ‘‘উপমামত্ত’’ন্তি ইমিনা অত্থন্তরদস্সনং নিৰত্তেতি, ‘‘যম্পি হী’’তিআদিনা পন তস্স উপমাভাৰং সমত্থেতি. নিযতানপেক্খেন চ যং-সদ্দেন ‘‘মুঞ্জম্হা ঈসিক’’ন্তিআদিৰচনমেৰ পচ্চামসতি. সদিসভাৰদস্সনত্থমেৰাতি সণ্ঠানতোপি ৰণ্ণতোপি অৰযৰৰিসেসতোপি সদিসভাৰদস্সনত্থংযেৰ. কথং সদিসভাৰোতি ৰুত্তং ‘‘মুঞ্জসদিসা এৰ হী’’তিআদি. মুঞ্জং নাম তিণৰিসেসো, যেন কোচ্ছাদীনি করোন্তি. ‘‘পৰাহেয্যা’’তি ৰচনতো অন্তো ঠিতা এৰ ঈসিকা অধিপ্পেতাতি দস্সেতি ‘‘অন্তো ঈসিকা হোতী’’তি ইমিনা. ঈসিকাতি চ কল়ীরো. ৰিসুদ্ধিমগ্গটীকাযং পন ‘‘কণ্ড’’ন্তি (ৰিসুদ্ধি. টী. ২.৩৯৯) ৰুত্তং. ৰট্টায কোসিযাতি পরিৰট্টুলায অসিকোসিযা. পত্থটাযাতি পট্টিকায. করডিতব্বো ভাজেতব্বোতি করণ্ডো, পেল়া. করডিতব্বো জিগুচ্ছিতব্বোতি করণ্ডো, নিম্মোকং. ইধাপি ¶ নিম্মোকমেৰাতি আহ ‘‘করণ্ডাতি ইদম্পী’’তিআদি. ৰিলীৰকরণ্ডো নাম পেল়া. কস্মা অহিকঞ্চুকস্সেৰ নামং, ন ৰিলীৰকরণ্ডকস্সাতি চোদনং সোধেতি ‘‘অহিকঞ্চুকো হী’’তিআদিনা, স্ৰেৰ অহিনা সদিসো, তস্মা তস্সেৰ নামন্তি ৰুত্তং হোতি. ৰিসুদ্ধিমগ্গটীকাযং পন ‘‘করণ্ডাযাতি পেল়ায, নিম্মোকতোতি চ ৰদন্তী’’তি (ৰিসুদ্ধি. টী. ২.৩৯৯) ৰুত্তং. তত্থ পেল়াগহণং অহিনা অসদিসতায ৰিচারেতব্বং.

যজ্জেৰং ‘‘সেয্যথাপি পন মহারাজ পুরিসো অহিং করণ্ডা উদ্ধরেয্যা’’তি পুরিসস্স করণ্ডতো অহিউদ্ধরণূপমায অযমত্থো ৰিরুজ্ঝেয্য. ন হি সো হত্থেন ততো উদ্ধরিতুং সক্কাতি ¶ অনুযোগেনাহ ‘‘তত্থা’’তিআদি. ‘‘উদ্ধরেয্যা’’তি হি অনিযমৰচনেপি হত্থেন উদ্ধরণস্সেৰ পাকটত্তা তংদস্সনমিৰ জাতং. তেনাহ ‘‘হত্থেন উদ্ধরমানো ৰিয দস্সিতো’’তি. ‘‘অযঞ্হী’’তিআদি চিত্তেন উদ্ধরণস্স হেতুদস্সনং. অহিনো নাম পঞ্চসু ঠানেসু সজাতিং নাতিৰত্তন্তি উপপত্তিযং, চুতিযং, ৰিস্সট্ঠনিদ্দোক্কমনে, সমানজাতিযা মেথুনপটিসেৰনে, জিণ্ণতচাপনযনেতি ৰুত্তং ‘‘সজাতিযং ঠিতো’’তি. উরগজাতিযমেৰ ঠিতো পজহতি, ন নাগিদ্ধিযা অঞ্ঞজাতিরূপোতি অত্থো. ইদঞ্হি মহিদ্ধিকে নাগে সন্ধায ৰুত্তং. সরীরং খাদযমানং ৰিযাতি অত্তনোযেৰ তচং অত্তনো সরীরং খাদযমানং ৰিয. পুরাণতচং জিগুচ্ছন্তোতি জিণ্ণতায কত্থচি মুত্তং কত্থচি ওলম্বিতং জিণ্ণতচং জিগুচ্ছন্তো. চতূহীতি ‘‘সজাতিযং ঠিতো, নিস্সায, থামেন, জিগুচ্ছন্তো’’তি যথাৰুত্তেহি চতূহি কারণেহি. ততোতি কঞ্চুকতো. অঞ্ঞেনাতি অত্ততো অঞ্ঞেন. চিত্তেনাতি পুরিসস্স চিত্তেনেৰ, ন হত্থেন. সেয্যথাপি নাম পুরিসো অহিং পস্সিত্ৰা ‘‘অহো ৰতাহং ইমং অহিং কঞ্চুকতো উদ্ধরেয্য’’ন্তি অহিং করণ্ডা চিত্তেন উদ্ধরেয্য, তস্স এৰমস্স ‘‘অযং অহি, অযং করণ্ডো, অঞ্ঞো অহি, অঞ্ঞো করণ্ডো, করণ্ডা ত্ৰেৰ অহি উব্ভতো’’তি, এৰমেৰ…পে… সো ইমম্হা কাযা অঞ্ঞং কাযং অভিনিম্মিনাতি…পে… অহীনিন্দ্রিযন্তি অযমেত্থ অধিপ্পাযো.

ইদ্ধিৰিধঞাণাদিকথাৰণ্ণনা

২৩৯. ভাজনাদিৰিকতিকিরিযানিস্সযভূতা ¶ সুপরিকম্মকতমত্তিকাদযো ৰিয ৰিকুব্বনকিরিযানিস্সযভাৰতো ইদ্ধিৰিধঞাণং দট্ঠব্বং.

২৪১. পুব্বে নীৰরণপ্পহানৰারে ৰিয কন্তারগ্গহণং অকত্ৰা কেৰলং অদ্ধানমগ্গগ্গহণং খেমমগ্গদস্সনত্থং. কস্মা পন খেমমগ্গস্সেৰ দস্সনং, ন কন্তারমগ্গস্স, ননু উপমাদস্সনমত্তমেতন্তি চোদনং পরিহরন্তো ‘‘যস্মা’’তিআদিমাহ. ‘‘অপ্পটিভযঞ্হী’’তিআদি পন খেমমগ্গস্সেৰ গহণকারণদস্সনং. ৰাতাতপাদিনিৰারণত্থং সীসে সাটকং কত্ৰা. তথা তথা পন পরিপুণ্ণৰচনং উপমাসম্পত্তিযা উপমেয্যসম্পাদনত্থং, অধিপ্পেতস্স চ উপমেয্যত্থস্স সুৰিঞ্ঞাপনত্থং, হেতুদাহরণভেদ্যভেদকাদিসম্পন্নৰচনেন চ ৰিঞ্ঞূজাতিকানং চিত্তারাধনত্থন্তি ৰেদিতব্বং. এৰং সব্বত্থ. সুখং ৰৰত্থপেতীতি অকিচ্ছং অকসিরেন সল্লক্খেতি, পরিচ্ছিন্দতি চ.

২৪৩. মন্দো উত্তানসেয্যকদারকোপি ‘‘দহরো’’তি ৰুচ্চতীতি ততো ৰিসেসনত্থং ‘‘যুৰা’’তি ¶ ৰুত্তন্তি মন্ত্ৰা যুৰসদ্দেন ৰিসেসিতব্বমেৰ দহরসদ্দস্স অত্থং দস্সেতুং ‘‘তরুণো’’তি ৰুত্তং. তথা যুৰাপি কোচি অনিচ্ছনকো, অনিচ্ছনতো চ অমণ্ডনজাতিকোতি ততো ৰিসেসনত্থং ‘‘মণ্ডনজাতিকো’’তিআদি ৰুত্তন্তি মন্ত্ৰা মণ্ডনজাতিকাদিসদ্দেন ৰিসেসিতব্বমেৰ যুৰসদ্দস্স অত্থং দস্সেতুং ‘‘যোব্বন্নেন সমন্নাগতো’’তি ৰুত্তং. পাল়িযঞ্হি যথাক্কমং পদত্তযস্স ৰিসেসিতব্বৰিসেসকভাৰেন ৰচনতো তথা সংৰণ্ণনা কতা, ইতরথা এককেনাপি পদেন অধিপ্পেতত্থাধিগমিকা সপরিৰারা সংৰণ্ণনাৰ কাতব্বা সিযাতি. ‘‘মণ্ডনপকতিকো’’তি ৰুত্তমেৰ ৰিৰরিতুং ‘‘দিৰসস্সা’’তিআদিমাহ. কণিকসদ্দো দোসপরিযাযো, দোসো চ নাম কাল়তিলকাদীতি দস্সেতি ‘‘কাল়তিলকা’’তিআদিনা. কাল়তিলপ্পমাণা বিন্দৰো কাল়তিলকানি, কাল়া ৰা কম্মাসা, যে ‘‘সাসপবীজিকা’’তিপি ৰুচ্চন্তি. তিলপ্পমাণা বিন্দৰো তিলকানি. ৰঙ্গং নাম ৰিযঙ্গং ৰিপরিণামিতমঙ্গং. যোব্বন্নপীল়কাদযো মুখদূসিপীল়কা, যে ‘‘খরপীল়কা’’ তিপি ৰুচ্চন্তি. মুখনিমিত্তন্তি মুখচ্ছাযং. মুখে গতো দোসো মুখদোসো ¶ . লক্খণৰচনমত্তমেতং মুখে অদোসস্সপি পাকটভাৰস্স অধিপ্পেতত্তা, যথা ৰা মুখে দোসো, এৰং মুখে অদোসোপি মুখদোসোতি সরলোপেন ৰুত্তো সামঞ্ঞনিদ্দেসতোপি অনেকত্থস্স ৰিঞ্ঞাতব্বত্তা, পিসদ্দলোপেন ৰা অযমত্থো ৰেদিতব্বো. অৰুত্তোপি হি অত্থো সম্পিণ্ডনৰসেন ৰুত্তো ৰিয ৰিঞ্ঞাযতি, মুখদোসো চ মুখঅদোসো চ মুখদোসোতি একদেসসরূপেকসেসনযেনপেত্থ অত্থো দট্ঠব্বো. এৰঞ্হি অত্থস্স পরিপুণ্ণতায ‘‘পরেসং সোল়সৰিধং চিত্তং পাকটং হোতী’’তি ৰচনং সমত্থিতং হোতি. তেনেতং ৰুচ্চতি –

‘‘ৰত্তব্বস্সাৰসিট্ঠস্স, গাহো নিদস্সনাদিনা;

অপিসদ্দাদিলোপেন, একসেসনযেন ৰা.

অসমানে সদ্দে তিধা, চতুধা চ সমানকে;

সামঞ্ঞনিদ্দেসতোপি, ৰেদিতব্বো ৰিভাৰিনা’’তি.

‘‘সরাগং ৰা চিত্ত’’ন্তিআদিনা পাল়িযং ৰুত্তং সোল়সৰিধং চিত্তং.

২৪৫. পুব্বেনিৰাসঞাণূপমাযন্তি পুব্বেনিৰাসঞাণস্স, পুব্বেনিৰাসঞাণে ৰা দস্সিতায উপমায. কস্মা পন পাল়িযং গামত্তযমেৰ উপমানে গহিতন্তি চোদনং সোধেতুং ‘‘তং দিৰস’’ন্তিআদি ৰুত্তং. তং দিৰসং কতকিরিযা নাম পাকতিকসত্তস্সাপি যেভুয্যেন পাকটা হোতি. তস্মা তং দিৰসং গন্তুং সক্কুণেয্যং গামত্তযমেৰ ভগৰতা গহিতং, ন তদুত্তরীতি অধিপ্পাযো ¶ . কিঞ্চাপি পাল়িযং তংদিৰসগ্গহণং নত্থি, গামত্তযগ্গহণেন পন তদহেৰ কতকিরিযা অধিপ্পেতাতি মন্ত্ৰা অট্ঠকথাযং তংদিৰসগ্গহণং কতন্তি দট্ঠব্বং. তংদিৰসগতগামত্তযগ্গহণেনেৰ চ মহাভিনীহারেহি অঞ্ঞেসম্পি পুব্বেনিৰাসঞাণলাভীনং তীসুপি ভৰেসু কতকিরিযা যেভুয্যেন পাকটা হোতীতি দীপিতন্তি দট্ঠব্বং. এতদত্থম্পি হি গামত্তযগ্গহণন্তি. তীসু ভৰেসু কতকিরিযাযাতি অভিসম্পরাযেসু পুব্বে দিট্ঠধম্মে পন ইদানি, পুব্বে চ কতকিচ্চস্স.

২৪৭. পাল়িযং রথিকায ৰীথিং সঞ্চরন্তেতি অঞ্ঞায রথিকায অঞ্ঞং রথিং সঞ্চরন্তেতি অত্থো, তেন অপরাপরং সঞ্চরণং দস্সিতন্তি আহ ‘‘অপরাপরং সঞ্চরন্তে’’তি, তংতংকিচ্চৰসেন ইতো চিতো চ সঞ্চরন্তেতি ৰুত্তং হোতি, অযমেৰত্থো রথিৰীথিসদ্দানমেকত্থত্তা. সিঙ্ঘাটকম্হীতি ৰীথিচতুক্কে. পাসাদো ৰিয ভিক্খুস্স করজকাযো দট্ঠব্বো ¶ তত্থ পতিট্ঠিতস্স দট্ঠব্বদস্সনসিদ্ধিতো. মংসচক্খুমতো হি দিব্বচক্খুসমধিগমো. যথাহ ‘‘মংসচক্খুস্স উপ্পাদো, মগ্গো দিব্বস্স চক্খুনো’’তি (ইতিৰু. ৬১). চক্খুমা পুরিসো ৰিয অযমেৰ দিব্বচক্খুং পত্ৰা ঠিতো ভিক্খু দট্ঠব্বস্স দস্সনতো. গেহং পৰিসন্তো, ততো নিক্খমন্তো ৰিয চ মাতুকুচ্ছিং পটিসন্ধিৰসেন পৰিসন্তো, ততো চ ৰিজাতিৰসেন নিক্খমন্তো মাতুকুচ্ছিযা গেহসদিসত্তা. তথা হি ৰুত্তং ‘‘মাতরং কুটিকং ব্রূসি, ভরিযং ব্রূসি কুলাৰক’’ন্তি (সং. নি. ১.১৯). অযং অট্ঠকথামুত্তকো নযো – গেহং পৰিসন্তো ৰিয অত্তভাৰং উপপজ্জনৰসেন ওক্কমন্তো, গেহা নিক্খমন্তো ৰিয চ অত্তভাৰতো চৰনৰসেন অপক্কমন্তো অত্তভাৰস্স গেহসদিসত্তা. ৰুত্তঞ্হি ‘‘গহকারক দিট্ঠোসি, পুন গেহং ন কাহসী’’তি (ধ. প. ১৫৪).

অপরাপরং সঞ্চরণকসত্তাতি পুনপ্পুনং সংসারে পরিব্ভমনকসত্তা. অব্ভোকাসট্ঠানেতি অজ্ঝোকাসদেসভূতে. মজ্ঝেতি নগরস্স মজ্ঝভূতে সিঙ্ঘাটকে. তত্থ তত্থাতি তস্মিং তস্মিং ভৰেকদেসে. নিব্বত্তসত্তাতি উপ্পজ্জমানকসত্তা. ইমিনা হি তস্মিং তস্মিং ভৰে জাতসংৰদ্ধে সত্তে ৰদতি, ‘‘অপরাপরং সঞ্চরণকসত্তা’’তি পন এতেন তথা অনিযমিতকালিকে সাধারণসত্তে. এৰঞ্হি তেসং যথাক্কমং সঞ্চরণকসন্নিসিন্নকজনোপমতা উপপন্না হোতীতি. তীসু ভৰেসু নিব্বত্তসত্তানং আৰিভূতকালোতি এত্থ পন ৰুত্তপ্পকারানং সব্বেসম্পি সত্তানং অনিযমতো গহণং ৰেদিতব্বং.

ননু চাযং দিব্বচক্খুকথা, অথ কস্মা ‘‘তীসু ভৰেসূ’’তি চতুৰোকারভৰস্সাপি সঙ্গহো কতো. ন হি সো অরূপধম্মারম্মণোতি অনুযোগং পরিহরন্তো ‘‘ইদঞ্চা’’তিআদিমাহ. তত্থ ¶ ‘‘ইদন্তি তীসু ভৰেসু নিব্বত্তসত্তানন্তি ইদং ৰচন’’ন্তি (দী. নি. টী. ১.২৪৭) অযমেত্থ আচরিযস্স মতি, এৰং সতি অট্ঠকথাচরিযেহি অট্ঠকথাযমেৰ যথাৰুত্তো অনুযোগো পরিহরিতোতি. অযং পনেত্থ অম্হাকং খন্তি – ননু চাযং দিব্বচক্খুকথা, অথ কস্মা ‘‘দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে’’তিআদিনা অৰিসেসতো চতুৰোকারভৰূপগস্সাপি সঙ্গহো কতো. ন হি ¶ সো অরূপধম্মারম্মণোতি অনুযোগং পরিহরন্তো ‘‘ইদঞ্চা’’তিআদিমাহ. তত্থ ইদন্তি ‘‘সত্তে পস্সতি চৰমানে উপপজ্জমানে’’তিআদিৰচনং. এৰঞ্হি সতি অট্ঠকথাচরিযেহি পাল়িযমেৰ যথাৰুত্তো অনুযোগো পরিহরিতোতি. যদগ্গেন সো পাল়িযং পরিহরিতো, তদগ্গেন অট্ঠকথাযম্পি তস্সা অত্থৰণ্ণনাভাৰতো. দেসনাসুখত্থমেৰাতি কেৰলং দেসনাসুখত্থং এৰ অৰিসেসেন ৰুত্তং, ন পন চতুৰোকারভৰূপগানং দিব্বচক্খুস্স আৰিভাৰসব্ভাৰতো. ‘‘ঠপেত্ৰা অরূপভৰ’’ন্তি ৰা ‘‘দ্ৰীসু ভৰেসূ’’তি ৰা সত্তে পস্সতি কামাৰচরভৰতো, রূপাৰচরভৰতো চ চৰমানেতি ৰা কামাৰচরভৰে, রূপাৰচরভৰে চ উপপজ্জমানেতি ৰা ৰুচ্চমানা হি দেসনা যথারহং ভেদ্যভেদকাদিৰিভাৰনেন সুখাসুখাৰবোধা চ ন হোতি, অৰিসেসেন পন এৰমেৰ ৰুচ্চমানা সুখাসুখাৰবোধা চ. দেসেতুং, অৰবোধেতুঞ্চ সুকরতাপযোজনঞ্হি ‘‘দেসনাসুখত্থ’’ন্তি ৰুত্তং. কস্মাতি আহ ‘‘আরুপ্পে…পে… নত্থী’’তি, দিব্বচক্খুগোচরভূতানং রূপধম্মানমভাৰতোতি ৰুত্তং হোতি.

আসৰক্খযঞাণকথাৰণ্ণনা

২৪৮. ইধ ৰিপস্সনাপাদকং চতুত্থজ্ঝানচিত্তং ৰেদিতব্বং, ন লোকিযাভিঞ্ঞাসু ৰিয অভিঞ্ঞাপাদকং. ৰিপস্সনাপাদকন্তি চ ৰিপস্সনায পদট্ঠানভূতং, ৰিপস্সনা চ নামেসা তিৰিধা ৰিপস্সকপুগ্গলভেদেন মহাবোধিসত্তানং ৰিপস্সনা, পচ্চেকবোধিসত্তানং ৰিপস্সনা, সাৰকানং ৰিপস্সনা চাতি. তত্থ মহাবোধিসত্তানং, পচ্চেকবোধিসত্তানঞ্চ ৰিপস্সনা চিন্তামযঞাণসম্বন্ধিকা সযম্ভুঞাণভূতা, সাৰকানং পন সুতমযঞাণসম্বন্ধিকা পরোপদেসসম্ভূতা. সা ‘‘ঠপেত্ৰা নেৰসঞ্ঞানাসঞ্ঞাযতনং অৰসেসরূপারূপজ্ঝানানং অঞ্ঞতরতো ৰুট্ঠাযা’’তিআদিনা অনেকধা, অরূপমুখৰসেন চতুধাতুৰৰত্থানে ৰুত্তানং তেসং তেসং ধাতুপরিগ্গহমুখানঞ্চ অঞ্ঞতরমুখৰসেন অনেকধা চ ৰিসুদ্ধিমগ্গে (ৰিসুদ্ধি. ২.৬৬৪) নানানযতো ৰিভাৰিতা, মহাবোধিসত্তানং পন চতুৰীসতিকোটিসতসহস্সমুখেন পভেদগমনতো নানানযং সব্বঞ্ঞুতঞ্ঞাণসন্নিস্সযস্স অরিযমগ্গঞাণস্স অধিট্ঠানভূতং পুব্বভাগঞাণগব্ভং গণ্হাপেন্তং ¶ পরিপাকং গচ্ছন্তং পরমগম্ভীরং সণ্হসুখুমতরং অনঞ্ঞসাধারণং ৰিপস্সনাঞাণং হোতি ¶ , যং অট্ঠকথাসু ‘‘মহাৰজিরঞাণ’’ন্তি ৰুচ্চতি, যস্স চ পৰত্তিৰিভাগেন চতুৰীসতিকোটিসতসহস্সপ্পভেদস্স পাদকভাৰেন সমাপজ্জিযমানা চতুৰীসতিকোটিসতসহস্সসঙ্খ্যা দেৰসিকং সত্থু ৰল়ঞ্জনসমাপত্তিযো ৰুচ্চন্তি. স্ৰাযং বুদ্ধানং ৰিপস্সনাচারো পরমত্থমঞ্জুসাযং ৰিসুদ্ধিমগ্গৰণ্ণনাযং (ৰিসুদ্ধি. টী. ১.১৪৪) উদ্দেসতো আচরিযেন দস্সিতো, ততো সো অত্থিকেহি গহেতব্বো. ইধ পন সাৰকানং ৰিপস্সনাৰ অধিপ্পেতা.

‘‘আসৰানং খযঞাণাযা’’তি ইদং কিরিযাপযোজনভূতে তদত্থে সম্পদানৰচনং, তস্মা অসতিপি পযোজনৰাচকে পযোজনৰসেনেৰ অত্থো ৰেদিতব্বোতি আহ ‘‘খযঞাণনিব্বত্তনত্থাযা’’তি. এৰমীদিসেসু. নিব্বানং, অরহত্তমগ্গো চ উক্কট্ঠনিদ্দেসেন ইধ খযো নাম, তত্থ ঞাণং খযঞাণং, তস্স নিব্বত্তনসঙ্খাতো অত্থো পযোজনং, তদত্থাযাতি অত্থো. খেপেতি পাপধম্মে সমুচ্ছিন্দতীতি খযো, মগ্গো. সো পন পাপক্খযো আসৰক্খযেন ৰিনা নত্থি, তস্মা ‘‘খযে ঞাণ’’ন্তি (ধ. স. সুত্তন্তদুকমাতিকা ১৪৮) এত্থ খযগ্গহণেন আসৰক্খযোৰ ৰুত্তোতি দস্সেতি ‘‘আসৰানং খযো’’তি ইমিনা. অনুপ্পাদে ঞাণন্তি আসৰানমনুপ্পাদভূতে অরিযফলে ঞাণং. খীযিংসু আসৰা এত্থাতি খযো, ফলং. সমিতপাপতায সমণো, সমিতপাপতা চ নিপ্পরিযাযতো অরহত্তফলেনেৰাতি আহ ‘‘আসৰানং খযা সমণো হোতীতি এত্থ ফল’’ন্তি. খযাতি চ খীণত্তাতি অত্থো. খীযন্তি আসৰা এত্থাতি খযো, নিব্বানং. ‘‘আসৰক্খযা’’তি পন সমাসৰসেন দ্ৰিভাৰং কত্ৰা ৰুত্তত্তা ‘‘আসৰানং খযো’’তি পদস্স অত্থুদ্ধারে আসৰক্খযপদগ্গহণং.

‘‘পরৰজ্জানুপস্সিস্সা’’তিআদিগাথা ধম্মপদে (ধ. প. ২৫৩). তত্থ উজ্ঝানসঞ্ঞিনোতি গরহসঞ্ঞিনো. অরাতি দূরা. ‘‘অরা সিঙ্ঘামি ৰারিজ’’ন্তিআদীসু (সং. নি. ১.২৩৪; জা. ১.৬.১১৬) ৰিয হি দূরত্থোযং নিপাতো. ‘‘আরা’’তিপি পাঠো. অরাসদ্দো ৰিয আরাসদ্দোপি দূরত্থে একো নিপাতোতি ৰেদিতব্বো. তদেৰ হি পদং সদ্দসত্থে উদাহটং. কামঞ্চ ধম্মপদট্ঠকথাযং ‘‘অরহত্তমগ্গসঙ্খাতা আরা দূরং গতোৰ হোতী’’তি (ধ. প. অট্ঠ. ২.২৫৩) ৰুত্তং, তথাপি আসৰৰড্ঢিযা সঙ্খারে ৰড্ঢেন্তো ¶ ৰিসঙ্খারতো সুৰিদূরদূরো, তস্মা ‘‘আরা সো আসৰক্খযা’’তি এত্থ আসৰক্খযপদং ৰিসঙ্খারাধিৰচনম্পি সম্ভৰতীতি আহ ‘‘নিব্বান’’ন্তি. খযনং খযো, আসৰানং খণনিরোধো. সেসং তস্স পরিযাযৰচনং. ভঙ্গো আসৰানং খযোতি ৰুত্তোতি যোজনা. ইধ পন নিব্বানম্পি মগ্গোপি অৰিনাভাৰতো. ন হি নিব্বানমনারব্ভ মগ্গেনেৰ আসৰানং খযো হোতীতি.

তন্নিন্নন্তি ¶ তস্মিং আসৰানং খযঞাণে নিন্নং. সেসং তস্সেৰ ৰেৰচনং. পাল়িযং ইদং দুক্খন্তি দুক্খস্স অরিযসচ্চস্স পরিচ্ছিন্দিত্ৰা, অনৰসেসেত্ৰা চ তদা তস্স ভিক্খুনো পচ্চক্খতো গহিতভাৰদস্সনন্তি দস্সেতুং ‘‘এত্তক’’ন্তিআদি ৰুত্তং. তত্থ হি এত্তকং দুক্খন্তি তস্স পরিচ্ছিজ্জ গহিতভাৰদস্সনং. ন ইতো ভিয্যোতি অনৰসেসেত্ৰা গহিতভাৰদস্সনং. তেনাহ ‘‘সব্বম্পি দুক্খসচ্চ’’ন্তিআদি. সরসলক্খণপটিৰেধৰসেন পজাননমেৰ যথাভূতং পজাননং নামাতি দস্সেতি ‘‘সরসলক্খণপটিৰেধেনা’’তি ইমিনা. রসোতি সভাৰো রসিতব্বো জানিতব্বোতি কত্ৰা, অত্তনো রসো সরসো, সো এৰ লক্খণং, তস্স অসম্মোহতো পটিৰিজ্ঝনেনাতি অত্থো. অসম্মোহতো পটিৰিজ্ঝনঞ্চ নাম যথা তস্মিং ঞাণে পৰত্তে পচ্ছা দুক্খসচ্চস্স সরূপাদিপরিচ্ছেদে সম্মোহো ন হোতি, তথা তস্স পৰত্তিযেৰ. তেন ৰুত্তং ‘‘যথাভূতং পজানাতী’’তি. ‘‘নিব্বত্তিক’’ন্তি ইমিনা ‘‘দুক্খং সমুদেতি এতস্মাতি দুক্খসমুদযো’’তি নিব্বচনং দস্সেতি. তদুভযন্তি দুক্খং, দুক্খসমুদযো চ. যং ঠানং পত্ৰাতি যং নিব্বানং মগ্গস্স আরম্মণপচ্চযট্ঠেন কারণভূতং আগম্ম. ঠানন্তি হি কারণং ৰুচ্চতি তিট্ঠতি এত্থ ফলং তদাযত্ততাযাতি কত্ৰা. তদুভযং পত্ৰাতি চ তদুভযৰতো পুগ্গলস্স তদুভযস্স পত্তি ৰিয ৰুত্তা. পুগ্গলস্সেৰ হি আরম্মণকরণৰসেন নিব্বানপ্পত্তি, ন তদুভযস্স. অপিচ পত্ৰাতি পাপুণনহেতু, পুগ্গলস্স আরম্মণকরণৰসেন সমাপজ্জনতোতি অত্থো. অসমানকত্তুকে ৰিয হি সমানকত্তুকেপি ত্ৰাপচ্চযস্স হেত্ৰত্থে পৰত্তি সদ্দসত্থেসু পাকটা. অপ্পৰত্তীতি অপ্পৰত্তিনিমিত্তং ‘‘ন পৰত্ততি তদুভযমেতেনা’’তি কত্ৰা, অপ্পৰত্তিট্ঠানং ৰা ‘‘ন পৰত্ততি তদুভযমেত্থা’’তি কত্ৰা, অনেন চ ‘‘দুক্খং নিরুজ্ঝতি এত্থ, এতেনাতি ৰা দুক্খনিরোধো’’তি নিব্বচনং দস্সেতি, দুক্খসমুদযস্স পন গহণং তংনিব্বত্তকস্স নিরুজ্ঝনতো তস্সাপি নিরুজ্ঝনদস্সনত্থন্তি দট্ঠব্বং. নিব্বানপদেযেৰ ¶ ত-সদ্দো নিৰত্ততীতি অযং-সদ্দো পুন ৰুত্তো. সব্বনামিকঞ্হি পদং ৰুত্তস্স ৰা লিঙ্গস্স গাহকং, ৰুচ্চমানস্স ৰা. তস্সাতি দুক্খনিরোধস্স. সম্পাপকন্তি সচ্ছিকরণৰসেন সম্মদেৰ পাপকং, এতেন চ ‘‘দুক্খনিরোধং গমযতি, গচ্ছতি ৰা এতাযাতি দুক্খনিরোধগামিনী, সাযেৰ পটিপদা দুক্খনিরোধগামিনিপটিপদা’’তি নিব্বচনং দস্সেতি.

কিলেসৰসেনাতি আসৰসঙ্খাতকিলেসৰসেন. তদেৰ আসৰপরিযাযেন দস্সেন্তো পুন আহ, তস্মা ন এত্থ পুনরুত্তিদোসোতি অধিপ্পাযো. পরিযাযদেসনাভাৰো নাম হি আৰেণিকো বুদ্ধধম্মোতি হেট্ঠা ৰুত্তোৰাযমত্থো. ননু চ আসৰানং দুক্খসচ্চপরিযাযোৰ অত্থি, ন সেসসচ্চপরিযাযো, অথ কস্মা সরূপতো দস্সিতসচ্চানিযেৰ কিলেসৰসেন পরিযাযতো পুন দস্সেন্তো এৰমাহাতি ৰুত্তন্তি? সচ্চং, তংসম্বন্ধত্তা পন সেসসচ্চানং তংসমুদযাদিপরিযাযোপি লব্ভতীতি ¶ কত্ৰা এৰং ৰুত্তন্তি ৰেদিতব্বং. দুক্খসচ্চপরিযাযভূতআসৰসম্বন্ধানি হি আসৰসমুদযাদীনীতি, সচ্চানি দস্সেন্তোতিপি যোজেতব্বং. ‘‘আসৰানং খযঞাণাযা’’তি আরদ্ধত্তা চেত্থ আসৰানমেৰ গহণং, ন সেসকিলেসানং তথা অনারদ্ধত্তাতি দট্ঠব্বং. তথা হি ‘‘কামাসৰাপি চিত্তং ৰিমুচ্চতী’’তিআদিনা (দী. নি. ১.২৪৮; ম. নি. ১.৪৩৩; ৩.১৯) আসৰৰিমুত্তসীসেনেৰ সব্বকিলেসৰিমুত্তি ৰুত্তা. ‘‘ইদং দুক্খন্তি যথাভূতং পজানাতী’’তিআদিনা মিস্সকমগ্গোৰ ইধ কথিতো লোকিযৰিপস্সনায লোকুত্তরমগ্গস্স মিস্সকত্তাতি ৰুত্তং ‘‘সহ ৰিপস্সনায কোটিপ্পত্তং মগ্গং কথেসী’’তি. ‘‘জানতো পস্সতো’’তি ইমিনা তযোপি পরিঞ্ঞাসচ্ছিকিরিযাভাৰনাভিসমযা ৰুত্তা চতুসচ্চপজাননায এৰ চতুকিচ্চসিদ্ধিতো, পহানাভিসমযো পন পারিসেসতো ‘‘ৰিমুচ্চতী’’তি ইমিনা ৰুত্তোতি আহ ‘‘মগ্গক্খণং দস্সেতী’’তি. চত্তারি হি কিচ্চানি চতুসচ্চপজাননায এৰ সিদ্ধানি. যথাহ ‘‘তং খো পনিদং দুক্খং অরিযসচ্চং পরিঞ্ঞাতন্তি মে ভিক্খৰে পুব্বে অননুস্সুতেসু ধম্মেসু চক্খুং উদপাদী’’তিআদি (সং. নি. ৫.১০৮১; মহাৰ. ১৫; পটি. ম. ২.২৯). অযং অট্ঠকথামুত্তকো নযো – জানতো পস্সতোতি চ হেতুনিদ্দেসো, ‘‘জাননহেতু পস্সনহেতু কামাসৰাপি চিত্তং ৰিমুচ্চতী’’তিআদিনা যোজনা. কামঞ্চেত্থ জাননপস্সনকিরিযানং, ৰিমুচ্চনকিরিযায চ সমানকালতা, তথাপি ¶ ধম্মানং সমানকালিকানম্পি পচ্চযপচ্চযুপ্পন্নতা সহজাতাদিকোটিযা লব্ভতীতি, হেতুগব্ভৰিসেসনতাদস্সনমেতন্তিপি ৰদন্তি.

ভৰাসৰগ্গহণেন চেত্থ ভৰরাগস্স ৰিয ভৰদিট্ঠিযাপি সমৰরোধোতি দিট্ঠাসৰস্সাপি সঙ্গহো দট্ঠব্বো, অধুনা পন ‘‘দিট্ঠাসৰাপি চিত্তং ৰিমুচ্চতী’’তি কত্থচি পাঠো দিস্সতি, সো ন পোরাণো, পচ্ছা পমাদলিখিতোতি ৰেদিতব্বো. ভযভেরৰসুত্তসংৰণ্ণনাদীসু (ম. নি. অট্ঠ. ১.৫৪) অনেকাসুপি তথেৰ সংৰণ্ণিতত্তা. এত্থ চ কিঞ্চাপি পাল়িযং সচ্চপটিৰেধো অনিযমিতপুগ্গলস্স অনিযমিতকালৰসেন ৰুত্তো, তথাপি অভিসমযকালে তস্স পচ্চুপ্পন্নতং উপাদায ‘‘এৰং জানতো এৰং পস্সতো’’তি ৰত্তমানকালনিদ্দেসো কতো, সো চ কামং কস্সচি মগ্গক্খণতো পরং যাৰজ্জতনা অতীতকালিকো এৰ, সব্বপঠমং পনস্স অতীতকালিকত্তং ফলক্খণেন ৰেদিতব্বন্তি আহ ‘‘ৰিমুত্তস্মিন্তি ইমিনা ফলক্খণ’’ন্তি. পচ্চৰেক্খণঞাণন্তি ফলপচ্চৰেক্খণঞাণং তথা চেৰ ৰুত্তত্তা. তগ্গহণেন পন তদৰিনাভাৰতো সেসানি নিরৰসেসানি গহেতব্বানি, একদেসানি ৰা অপরিপুণ্ণাযপি পচ্চৰেক্খণায সম্ভৰতো. ‘‘খীণা জাতী’’তিআদীহি পদেহি ‘‘নাপরং ইত্থত্তাযা’’তি পদপরিযোসানেহি. তস্সাতি পচ্চৰেক্খণঞাণস্স. ভূমিন্তি পৰত্তিট্ঠানং. ননু চ ‘‘ৰিমুত্তস্মিং ৰিমুত্ত’’ন্তি ৰুত্তং ফলমেৰ তস্স আরম্মণসঙ্খাতা ভূমি, অথ কথং ‘‘খীণা জাতী’’তিআদীহি তস্স ভূমিদস্সনন্তি চোদনং ¶ সোধেতুং ‘‘তেন হী’’তিআদি ৰুত্তং. যস্মা পন পহীনকিলেসপচ্চৰেক্খণেন ৰিজ্জমানস্সাপি কম্মস্স আযতিং অপ্পটিসন্ধিকভাৰতো ‘‘খীণা জাতী’’তি পজানাতি, যস্মা চ মগ্গপচ্চৰেক্খণাদীহি ‘‘ৰুসিতং ব্রহ্মচরিয’’ন্তিআদীনি পজানাতি, তস্মা ‘‘খীণা জাতী’’তিআদীহি তস্স ভূমিদস্সনন্তি ৰুত্তং হোতি. ‘‘তেন ঞাণেনা’’তি হি যথারুততো, অৰিনাভাৰতো চ গহিতেন পঞ্চৰিধেন পচ্চৰেক্খণঞাণেনাতি অত্থো.

‘‘খীণা জাতী’’তি এত্থ সোতুজনানং সুৰিঞ্ঞাপনত্থং পরম্মুখা ৰিয চোদনং সমুট্ঠাপেতি ‘‘কতমা পনা’’তিআদিনা. যেন পনাধিপ্পাযেন চোদনা কতা, তদধিপ্পাযং পকাসেত্ৰা পরিহারং ৰত্তুকামো ‘‘ন তাৰস্সা’’তিআদিমাহ. ‘‘ন তাৰ…পে… ৰিজ্জমানত্তা’’তি ৰক্খমানমেৰ হি অত্থং মনসি কত্ৰা অযং চোদনা সমুট্ঠাপিতা, তত্থ ন তাৰস্স অতীতা ¶ জাতি খীণাতি অস্স ভিক্খুনো অতীতা জাতি, ন তাৰ মগ্গভাৰনায খীণা. তত্থ কারণমাহ ‘‘পুব্বেৰ খীণত্তা’’তি, মগ্গভাৰনায পুরিমতরমেৰ নিরুজ্ঝনৰসেন খীণত্তাতি অধিপ্পাযো. ন অনাগতা অস্স জাতি খীণা মগ্গভাৰনাযাতি যোজনা. তত্থ কারণমাহ ‘‘অনাগতে ৰাযামাভাৰতো’’তি, ইদঞ্চ অনাগতভাৰসামঞ্ঞমেৰ গহেত্ৰা লেসেন চোদনাধিপ্পাযৰিভাৰনত্থং ৰদতি, ন অনাগতৰিসেসং অনাগতে মগ্গভাৰনায খেপনপযোগাভাৰতোতি অত্থো. ৰিজ্জমানেযেৰ হি পযোগো সম্ভৰতি, ন অৰিজ্জমানেতি ৰুত্তং হোতি. অনাগতৰিসেসো পনেত্থ অধিপ্পেতো, তস্স চ খেপনে ৰাযামোপি লব্ভতেৰ. তেনাহ ‘‘যা পন মগ্গস্সা’’তিআদি. অনাগতৰিসেসোতি চ অভাৰিতে মগ্গে উপ্পজ্জনারহো অনন্তরজাতিভেদো ৰুচ্চতি. ন পচ্চুপ্পন্না অস্স জাতি খীণা মগ্গভাৰনাযাতি যোজনা. তত্থ কারণমাহ ‘‘ৰিজ্জমানত্তা’’তি, একভৰপরিযাপন্নতায ৰিজ্জমানত্তাতি অত্থো. তত্থ তত্থ ভৰে পঠমাভিনিব্বত্তিলক্খণা হি জাতি. ‘‘যা পনা’’তিআদিনা পন মগ্গভাৰনায কিলেসহেতুৰিনাসনমুখেন অনাগতজাতিযা এৰ খীণভাৰো পকাসিতোতি দট্ঠব্বং. একচতুপঞ্চৰোকারভৰেসূতি ভৰত্তযগ্গহণং ৰুত্তনযেন অনৰসেসতো জাতিযা খীণভাৰদস্সনত্থং, পুব্বপদদ্ৰযেপেত্থ উত্তরপদলোপো. একচতুপঞ্চক্খন্ধপ্পভেদাতি এত্থাপি এসেৰ নযো. ‘‘তং সো’’তিআদি ‘‘কথঞ্চ নং পজানাতী’’তি চোদনায সোধনাৰচনং. তত্থ তন্তি যথাৰুত্তং জাতিং. সোতি খীণাসৰো ভিক্খু. পচ্চৰেক্খিত্ৰাতি পজাননায পুব্বভাগে পহীনকিলেসপচ্চৰেক্খণদস্সনং. এৰঞ্চ কত্ৰা পচ্চৰেক্খণপরম্পরায তথা পজাননা সিদ্ধাতি দট্ঠব্বং. পচ্চৰেক্খণন্তরৰিভাৰনত্থমেৰ হি ‘‘জানন্তো পজানাতী’’তি ৰত্তমানৰচনদ্ৰযং ৰুত্তং, জানন্তো হুত্ৰা, জাননহেতু ৰা পজানাতি নামাতি অত্থো.

ব্রহ্মচরিযৰাসো ¶ নাম উক্কট্ঠনিদ্দেসতো মগ্গব্রহ্মচরিযস্স নিব্বত্তনমেৰাতি আহ ‘‘পরিৰুত্থ’’ন্তি, সমন্ততো নিরৰসেসেন ৰসিতং পরিচিণ্ণন্তি অত্থো. কস্মা পনিদং সো অতীতকালৰসেন পজানাতীতি অনুযোগেনাহ ‘‘পুথুজ্জনকল্যাণকেন হি সদ্ধি’’ন্তিআদি. পুথুজ্জনকল্যাণকোপি হি হেট্ঠা ৰুত্তলক্খণো সোতাপত্তিফলসচ্ছিকিরিযায পটিপন্নো ¶ নাম দক্খিণৰিভঙ্গসুত্তাদীসু (ম. নি. ৩.৩৭৯) তথা এৰ ৰুত্তত্তা. ৰসন্তি নামাতি ৰসন্তা এৰ নাম হোন্তি, ন ৰুত্থৰাসা. তস্মাতি ৰুত্থৰাসত্তা. ননু চ ‘‘সো ‘ইদং দুক্খ’’ন্তি যথাভূতং পজানাতী’’তিআদিনা পাল়িযং সম্মাদিট্ঠিযেৰ ৰুত্তা, ন সম্মাসঙ্কপ্পাদযো, অথ কস্মা ‘‘চতূসু সচ্চেসু চতূহি মগ্গেহি পরিঞ্ঞাপহানসচ্ছিকিরিযাভাৰনাৰসেন সোল়সৰিধং কিচ্চং নিট্ঠাপিত’’ন্তি অট্ঠঙ্গিকস্স মগ্গস্স সাধারণতো ৰুত্তন্তি? সম্মাসঙ্কপ্পাদীনম্পি চতুকিচ্চসাধনৰসেন পৰত্তিতো. সম্মাদিট্ঠিযা হি চতূসু সচ্চেসু পরিঞ্ঞাদিকিচ্চসাধনৰসেন পৰত্তমানায সম্মাসঙ্কপ্পাদীনম্পি সেসানং দুক্খসচ্চে পরিঞ্ঞাভিসমযানুগুণাৰ পৰত্তি, ইতরসচ্চেসু চ নেসং পহানাভিসমযাদিৰসেন পৰত্তি পাকটা এৰাতি. দুক্খনিরোধমগ্গেসু যথাক্কমং পরিঞ্ঞাসচ্ছিকিরিযাভাৰনাপি যাৰদেৰ সমুদযপহানত্থাতি কত্ৰা তদত্থেযেৰ তাসং পক্খিপনেন ‘‘কতং করণীয’’ন্তি পদস্স অধিপ্পাযং ৰিভাৰেতুং ‘‘তেনা’’তিআদি ৰুত্তং. ‘‘দুক্খমূলং সমুচ্ছিন্ন’’ন্তি ইমিনাপি তদেৰ পকারন্তরেন ৰিভাৰেতি.

কস্মা পনেত্থ ‘‘কতং করণীয’’ন্তি অতীতনিদ্দেসো কতোতি আহ ‘‘পুথুজ্জনকল্যাণকাদযো’’তিআদি. ইমে পকারা ইত্থং, তব্ভাৰো ইত্থত্তন্তি দস্সেতি ‘‘ইত্থভাৰাযা’’তি ইমিনা, আয-সদ্দো চ সম্পদানত্থে, তদত্থাযাতি অত্থো. তে পন পকারা অরিযমগ্গব্যাপারভূতা পরিঞ্ঞাদযো ইধাধিপ্পেতাতি ৰুত্তং ‘‘এৰং সোল়সকিচ্চভাৰাযা’’তি. তে হি মগ্গং পচ্চৰেক্খতো মগ্গানুভাৰেন পাকটা হুত্ৰা উপট্ঠহন্তি মগ্গে পচ্চৰেক্খিতে তংকিচ্চপচ্চৰেক্খণাযপি সুখেন সিদ্ধিতো. এৰং সাধারণতো চতূসু মগ্গেসু পচ্চেকং চতুকিচ্চৰসেন সোল়সকিচ্চভাৰং পকাসেত্ৰা তেসুপি কিচ্চেসু পহানমেৰ পধানং তদত্থত্তা ইতরেসং পরিঞ্ঞাদীনন্তি তদেৰ ৰিসেসতো পকাসেতুং ‘‘কিলেসক্খযভাৰায ৰা’’তি আহ.

অপিচ পুরিমনযেন পচ্চৰেক্খণপরম্পরায পচ্চৰেক্খণৰিধিং দস্সেত্ৰা ইদানি পধানত্তা পহীনকিলেসপচ্চৰেক্খণৰিধিমেৰ দস্সেতুং এৰং ৰুত্তন্তিপি দট্ঠব্বং. দুতিযৰিকপ্পে অযং পকারো ইত্থং, তব্ভাৰো ইত্থত্তং, আযসদ্দো চেত্থ সম্পদানৰচনস্স কারিযভূতো নিস্সক্কত্থেতি দস্সেতি ‘‘ইত্থভাৰতো’’তি ইমিনা. ‘‘ইমস্মা এৰং পকারা’’তি পন ৰদন্তো পকারো নাম ¶ পকারৰন্ততো অত্থতো ভেদো নত্থি. যদি হি সো ভেদো অস্স, তস্সেৰ সো পকারো ন সিযা, তস্মা ¶ ইত্থং-সদ্দো পকারৰন্তৰাচকো, অত্থতো পন অভেদেপি সতি অৰযৰাৰযৰিতাদিনা ভেদপরিকপ্পনাৰসেন সিযা কিঞ্চি ভেদমত্থং, তস্মা ইত্থত্তসদ্দো পকারৰাচকোতি দস্সেতি. অযমিধ টীকাযং, (দী. নি. টী. ১.২৪৮) মজ্ঝিমাগমটীকাৰিনযটীকাদীসু (সারত্থ. টী. ১.১৪) চ আগতনযো.

সদ্দৰিদূ পন পৰত্তিনিমিত্তানুসারেন এৰমিচ্ছন্তি – অযং পকারো অস্সাতি ইত্থং, পকারৰন্তো. ৰিচিত্রা হি তদ্ধিতৰুত্তি. তস্স ভাৰো ইত্থত্তং, পকারো, ইমমত্থং দস্সেন্তো ‘‘ইত্থভাৰতো ইমস্মা এৰং পকারা’’তি আহাতি. পঠমৰিকপ্পেপি যথারহং এস নযো. ইদানি ৰত্তমানখন্ধসন্তানাতি সরূপকথনং. অপরন্তি অনাগতং. ‘‘ইমে পন পঞ্চক্খন্ধা পরিঞ্ঞাতা তিট্ঠন্তী’’তি ইদানি পাঠো, ‘‘ইমে পন চরিমকত্তভাৰসঙ্খাতা পঞ্চক্খন্ধা পরিঞ্ঞাতা তিট্ঠন্তী’’তি পন মজ্ঝিমাগমৰিনযটীকাদীসু, (সারত্থ. টী. ১.১৪) ইধ চ টীকাযং (দী. নি. টী. ১.২৪৮) উল্লিঙ্গিতপাঠো. তত্থ চরিমকত্তভাৰসঙ্খাতাতি একসন্ততিপরিযাপন্নভাৰেন পচ্ছিমকত্তভাৰকথিতা. পরিঞ্ঞাতাতি মগ্গেন পরিচ্ছিজ্জ ঞাতা. তিট্ঠন্তীতি অপ্পতিট্ঠা অনোকাসা তিট্ঠন্তি. এতেন হি তেসং খন্ধানং অপরিঞ্ঞামূলাভাৰেন অপতিট্ঠাভাৰং দস্সেতি. অপরিঞ্ঞামূলিকা হি পতিট্ঠা, তদভাৰতো পন অপ্পতিট্ঠাভাৰো. যথাহ ‘‘কবল়ীকারে চে ভিক্খৰে আহারে অত্থি রাগো, অত্থি নন্দী, অত্থি তণ্হা, পতিট্ঠিতং তত্থ ৰিঞ্ঞাণং ৰিরুল়্হ’’ন্তিআদি (সং. নি. ২.৬৪; কথা. ২৯৬; মহানি. ৭). তদুপমং ৰিভাৰেতি ‘‘ছিন্নমূলকা রুক্খা ৰিযা’’তি ইমিনা, যথা ছিন্নমূলকা রুক্খা মূলাভাৰতো অপ্পতিট্ঠা অনোকাসা তিট্ঠন্তি, এৰমেতেপি অপরিঞ্ঞামূলাভাৰতোতি. অযমেত্থ ওপম্মসংসন্দনা. চরিমকচিত্তনিরোধেনাতি পরিনিব্বানচিত্তনিরোধেন. অনুপাদানোতি অনিন্ধনো. অপণ্ণত্তিকভাৰন্তি যেসু খন্ধেসু ৰিজ্জমানেসু তথা তথা পরিকপ্পনাসিদ্ধা পঞ্ঞত্তি, তদভাৰতো তস্সাপি ধরমানকপঞ্ঞত্তিযা অভাৰেন অপঞ্ঞত্তিকভাৰং গমিস্সন্তি. পণ্ণত্তি পঞ্ঞত্তীতি হি অত্থতো একং যথা ‘‘পঞ্ঞাস পণ্ণাসা’’তি. পঞ্ঞাস পণ্ণাদেসোতি হি অক্খরচিন্তকা ৰদন্তি.

২৪৯. যেভুয্যেন ¶ সংখিপতি সঙ্কুচিতো ভৰতীতি সঙ্খেপো, পব্বতমত্থকং. তঞ্হি পব্বতপাদতো অনুক্কমেন বহুলং সংখিত্তং সঙ্কুচিতং হোতি. তেনাহ ‘‘পব্বতমত্থকে’’তি, পব্বতসিখরেতি অত্থো. অযং অট্ঠকথামুত্তকো নযো – সঙ্খিপীযতি পব্বতভাৰেন গণীযতীতি সঙ্খেপো, পব্বতপরিযাপন্নো পদেসো, তস্মিং পব্বতপরিযাপন্নে পদেসেতি অত্থোতি. অনাৰিলোতি অকালুসিযো, সা চস্স অনাৰিলতা কদ্দমাভাৰেন হোতীতি আহ ‘‘নিক্কদ্দমো’’তি. সপতি অপদাপি ¶ সমানা গচ্ছতীতি সিপ্পি, খুদ্দকা সিপ্পি সিপ্পিযো কা-কারস্স য-কারং কত্ৰা, যো ‘‘মুত্তিকো’’তিপি ৰুচ্চতি. সৰতি পসৰতীতি সম্বুকো, যং ‘‘জলসুত্তি, সঙ্খলিকা’’তি চ ৰোহরন্তি. সমাহারে যেভুয্যতো নপুংসকপযোগোতি ৰুত্তং ‘‘সিপ্পিযসম্বুক’’ন্তি. এৰমীদিসেসু. সক্খরাতি মুট্ঠিপ্পমাণা পাসাণা. কথলানীতি কপালখণ্ডানি. সমূহৰাচকস্স ঘটাসদ্দস্স ইত্থি লিঙ্গস্সাপি দিস্সনতো ‘‘গুম্ব’’ন্তি পদস্সত্থং দস্সেতি ‘‘ঘটা’’তি ইমিনা.

কামঞ্চ ‘‘সিপ্পিযসম্বুকম্পি সক্খরকথলম্পি মচ্ছগুম্বম্পি তিট্ঠন্তম্পি চরন্তম্পী’’তি এত্থ সক্খরকথলং তিট্ঠতিযেৰ, সিপ্পিযসম্বুকমচ্ছগুম্বানি চরন্তিপি তিট্ঠন্তিপি, তথাপি সহচরণনযেন সব্বানেৰ চরন্তি ৰিয এৰং ৰুত্তন্তি অত্থং দস্সেন্তো ‘‘তিট্ঠন্তম্পি চরন্তম্পীতি এত্থা’’তিআদিমাহ. তত্থ হি ‘‘সক্খরকথলং তিট্ঠতিযেৰা’’তিআদিনা যথাসম্ভৰমত্থং দস্সেতি, ‘‘যথা পনা’’তিআদিনা পন সহচরণনযং. পন-সদ্দো অরুচিসংসূচনে, তথাপীতি অত্থো. অন্তরন্তরাতি বহূনং গাৰীনমন্তরন্তরা ঠিতাসু গাৰীসু ৰিজ্জমানাসুপি. গাৰোতি গাৰিযো. ইতরাপীতি ঠিতাপি নিসিন্নাপি. চরন্তীতি ৰুচ্চন্তি সহচরণনযেন. তিট্ঠন্তমেৰাতিআদীসু অযমধিপ্পাযো – সিপ্পিযসম্বুকমচ্ছগুম্বানং চরণকিরিযাযপি যোগতো ঠানকিরিযায অনেকন্তত্তা একন্ততো তিট্ঠন্তমেৰ ন কদাচিপি চরন্তং সক্খরকথলং উপাদায সিপ্পিযসম্বুকম্পি মচ্ছগুম্বম্পি তিট্ঠন্তন্তি ৰুত্তং, ন তু তেসং ঠানকিরিযমুপাদায. তেসং পন চরণকিরিযমুপাদায ‘‘চরন্তম্পী’’তি পি-সদ্দলোপো হেত্থ দট্ঠব্বো. ইতরম্পি দ্ৰযন্তি সিপ্পিযসম্বুকমচ্ছগুম্বং পদৰসেন এৰং ৰুত্তং. ইতরঞ্চ দ্ৰযন্তি সিপ্পিযসম্বুকমচ্ছগুম্বমেৰ. চরন্তন্তি ৰুত্তন্তি এত্থাপি তেসং ঠানকিরিযমুপাদায ‘‘তিট্ঠন্তম্পী’’তি পি-সদ্দলোপো, এৰমেত্থ অট্ঠকথাচরিযেহি সহচরণনযো দস্সিতো, আচরিযধম্মপালত্থেরেন পন যথালাভনযোপি. তথা ¶ হি ৰুত্তং ‘‘কিং ৰা ইমায সহচরিযায, যথালাভগ্গহণং পনেত্থ দট্ঠব্বং. সক্খরকথলস্স হি ৰসেন তিট্ঠন্তন্তি, সিপ্পিসম্বুকস্স মচ্ছগুম্বস্স চ ৰসেন তিট্ঠন্তম্পি চরন্তম্পীতি এৰং যোজনা কাতব্বা’’তি (দী. নি. টী. ১.২৪৯). অলব্ভমানস্সাপি অত্থস্স সহযোগীৰসেন দেসনামত্তং পতি সহচরণনযো, সাধারণতো দেসিতস্সাপি অত্থস্স সম্ভৰৰসেন ৰিৰেচনং পতি যথালাভনযোতি উভযথাপি যুজ্জতি.

এৰম্পেত্থ ৰদন্তি – অট্ঠকথাযং ‘‘সক্খরকথলং তিট্ঠতিযেৰ, ইতরানি চরন্তিপি তিট্ঠন্তিপী’’তি ইমিনা যথালাভনযো দস্সিতো যথাসম্ভৰং অত্থস্স ৰিৰেচিতত্তা, ‘‘যথা পনা’’তিআদিনা পন সহচরণনযো অলব্ভমানস্সাপি অত্থস্স সহযোগীৰসেন দেসনামত্তস্স ৰিভাৰিতত্তাতি ¶ , তদেতম্পি অনুপৰজ্জমেৰ অত্থস্স যুত্তত্তা, অট্ঠকথাযঞ্চ তথা দস্সনস্সাপি সম্ভৰতোতি দট্ঠব্বং. ‘‘তত্থা’’তিআদি উপমাসংসন্দনং. তীরেতি উদকরহদস্স তীরে. উদকরহদো চ নাম কত্থচি সমুদ্দোপি ৰুচ্চতি ‘‘রহদোপি তত্থ গম্ভীরো, সমুদ্দো সরিতোদকো’’তিআদীসু (দী. নি. ৩.২৭৮). কত্থচি জলাসযোপি ‘‘রহদোপি তত্থ ধরণী নাম, যতো মেঘা পৰস্সন্তি, ৰস্সা যতো পতাযন্তী’’তিআদীসু, (দী. নি. ৩.২৮১) ইধাপি জলাসযোযেৰ. সো হি উদকৰসেন রহো চক্খুরহাদিকং দদাতীতি উদকরহদো ও-কারস্স অ-কারং কত্ৰা. সদ্দৰিদূ পন ‘‘উদকং হরতীতি উদকরহদো নিরুত্তিনযেনা’’তি ৰদন্তি.

‘‘এত্তাৰতা’’তিআদিনা চতুত্থজ্ঝানান্তরং দস্সিতৰিপস্সনাঞাণতো পট্ঠায যথাৰুত্তত্থস্স সম্পিণ্ডনং. তত্থ এত্তাৰতাতি ‘‘পুন চপরং মহারাজ ভিক্খু এৰং সমাহিতে চিত্তে…পে… ঞাণদস্সনায চিত্তং অভিনীহরতী’’তিআদিনা এত্তকেন, এতপরিমাণৰন্তেন ৰা ৰচনক্কমেন. ৰিপস্সনাঞাণন্তি ঞাণদস্সননামেন দস্সিতং ৰিপস্সনাঞাণং, তস্স চ ৰিসুং গণনদস্সনেন হেট্ঠা চতুত্থজ্ঝানানন্তরং ৰত্তব্বতাকারণেসু তীসু নযেসু ততিযনযস্সেৰ যুত্ততরভাৰোপি দীপিতোতি দট্ঠব্বং. মনোমযঞাণস্স ইদ্ধিৰিধসমৰরোধিতভাৰে ৰিসুদ্ধিমগ্গে (ৰিসুদ্ধি. ২.৩৭৯ আদযো) ৰুত্তেপি ইধ পাল়িযং ৰিসুং দেসিতত্তা ৰিসুং এৰ গহণং, তথা দেসনা চ পাটিযেক্কসন্দিট্ঠিকসামঞ্ঞফলত্থাতি দট্ঠব্বং. অনাগতংসঞাণযথাকম্মূপগঞাণদ্ৰযস্স ¶ পাল়িযং অনাগতত্তা ‘‘দিব্বচক্খুৰসেন নিপ্ফন্ন’’ন্তি ৰুত্তং, তব্বসেন নিপ্ফন্নত্তা তগ্গহণেনেৰ গহিতং তং ঞাণদ্ৰযন্তি ৰুত্তং হোতি. দিব্বচক্খুস্স হি অনাগতংসঞাণং, যথাকম্মূপগঞাণঞ্চাতি দ্ৰেপি ঞাণানি পরিভণ্ডানি হোন্তীতি. দিব্বচক্খুঞাণন্তি চুতূপপাতঞাণনামেন দস্সিতং দিব্বচক্খুঞাণং.

সব্বেসং পন দসন্নং ঞাণানং আরম্মণৰিভাগস্স ৰিসুদ্ধিমগ্গে অনাগতত্তা তত্থানাগতঞাণানং আরম্মণৰিভাগং দস্সেতুং ‘‘তেস’’ন্তিআদি ৰুত্তং. তেসন্তি দসন্নং ঞাণানং. তত্থাতি তস্মিং আরম্মণৰিভাগে, তেসু ৰা দসসু ঞাণেসু. ভূমিভেদতো পরিত্তমহগ্গতং, কালভেদতো অতীতানাগতপচ্চুপ্পন্নং, সন্তানভেদতো অজ্ঝত্তবহিদ্ধা চাতি ৰিপস্সনাঞাণং সত্তৰিধারম্মণং. পরিত্তারম্মণাদিতিকত্তযেনেৰ হি তস্স আরম্মণৰিভাগো, ন মগ্গারম্মণতিকেন. নিম্মিতরূপাযতনমত্তমেৰাতি অত্তনা নিম্মিতং রূপারম্মণমেৰ, অত্তনা ৰা নিম্মিতে মনোমযে কাযে ৰিজ্জমানং রূপাযতনমেৰাতিপি যুজ্জতি. ইদঞ্হি তস্স ঞাণস্স অভিনিম্মিযমানে মনোমযে কাযে রূপাযতনমেৰারব্ভ পৰত্তনতো ৰুত্তং, ন পন তত্থ গন্ধাযতনাদীনমভাৰতো ¶ . ন হি রূপকলাপো গন্ধাযতনাদিৰিরহিতো অত্থীতি সব্বথা পরিনিপ্ফন্নমেৰ নিম্মিতরূপং. তেনাহ ‘‘পরিত্তপচ্চুপ্পন্নবহিদ্ধারম্মণ’’ন্তি, যথাক্কমং ভূমিকালসন্তানভেদতো তিব্বিধারম্মণন্তি অত্থো. নিব্বানৰসেন একধম্মারম্মণম্পি সমানং আসৰক্খযঞাণং পরিত্তারম্মণাদিতিকৰসেন তিৰিধারম্মণং দস্সেতুং ‘‘অপ্পমাণবহিদ্ধানৰত্তব্বারম্মণ’’ন্তি ৰুত্তং. তঞ্হি পরিত্ততিকৰসেন অপ্পমাণারম্মণং, অজ্ঝত্তিকৰসেন বহিদ্ধারম্মণং, অতীততিকৰসেন নৰত্তব্বারম্মণঞ্চ হোতি.

উত্তরিতরসদ্দো, পণীততরসদ্দো চ পরিযাযোতি দস্সেতি ‘‘সেট্ঠতর’’ন্তি ইমিনা. রতনকূটং ৰিয কূটাগারস্স অরহত্তং কূটং উত্তমঙ্গভূতং ভগৰতো দেসনায অরহত্তপরিযোসানত্তাতি আহ ‘‘অরহত্তনিকূটেনা’’তি. দেসনং নিট্ঠাপেসীতি তিত্থকরমতহরৰিভাৰিনিং নানাৰিধকুহনলপনাদিমিচ্ছাজীৰৰিদ্ধংসিনিং তিৰিধসীলালঙ্কতপরমসল্লেখপটিপত্তিপরিদীপিনিং ঝানাভিঞ্ঞাদিউত্তরিমনুস্সধম্মৰিভূসিনিং চুদ্দসৰিধমহাসামঞ্ঞ্ফলপটিমণ্ডিতং অনঞ্ঞসাধারণং সামঞ্ঞফলদেসনং রতনাগারং ¶ ৰিয রতনকূটেন অরহত্তকূটেন নিট্ঠাপেসি ‘‘ৰিমুত্তস্মি’’ন্তি ইমিনা, অরহত্তফলস্স দেসিতত্তাতি অত্থো.

অজাতসত্তুউপাসকত্তপটিৰেদনাকথাৰণ্ণনা

২৫০. এত্তাৰতা ভগৰতা দেসিতস্স সামঞ্ঞফলসুত্তস্স অত্থৰণ্ণনং কত্ৰা ইদানি ধম্মসঙ্গাহকেহি সঙ্গীতস্স ‘‘এৰং ৰুত্তে’’তিআদিপাঠস্সপি অত্থৰণ্ণনং করোন্তো পঠমং সম্বন্ধং দস্সেতুং ‘‘রাজা’’তিআদিমাহ. তত্থ তত্থাতি তস্মিং তস্মিং সামঞ্ঞফলে, সুত্তপদেসে ৰা. করণং কারো, সাধু ইতি কারো তথা, ‘‘সাধু ভগৰা, সাধু সুগতা’’তিআদিনা তং পৰত্তেন্তো. আদিমজ্ঝপরিযোসানন্তি দেসনায আদিঞ্চ মজ্ঝঞ্চ পরিযোসানঞ্চ. সক্কচ্চং সাদরং গারৰং সুত্ৰা, ‘‘চিন্তেত্ৰা’’তি এত্থ ইদং পুব্বকালকিরিযাৰচনং. ইমে পঞ্হে পুথূ সমণব্রাহ্মণে পুচ্ছন্তো অহং চিরং ৰত অম্হি, এৰং পুচ্ছন্তোপি অহং থুসে কোট্টেন্তো ৰিয কঞ্চি সারং নালত্থন্তি যোজনা. তথা যো…পে… ৰিস্সজ্জেসি, তস্স ভগৰতো গুণসম্পদা অহো ৰত. দসবলস্স গুণানুভাৰং অজানন্তো অহং ৰঞ্চিতো সুচিরং ৰত অম্হীতি. ৰঞ্চিতোতি চ অঞ্ঞাণেন ৰঞ্চিতো আৰট্টিতো, মোহেন পটিচ্ছাদিতো অম্হীতি ৰুত্তং হোতি. তেনাহ ‘‘দসবলস্স গুণানুভাৰং অজানন্তো’’তি. সামঞ্ঞজোতনা হি ৰিসেসে অৰতিট্ঠতি. চিন্তেত্ৰা আৰিকরোন্তোতি সম্বন্ধো. উল্লঙ্ঘনসমত্থাযপি উব্বেগপীতিযা অনুল্লঙ্ঘনম্পি সিযাতি আহ ‘‘পঞ্চৰিধায পীতিযা ফুটসরীরো’’তি. ফুটসরীরোতি চ ফুসিতসরীরোতি অত্থো, ন ব্যাপিতসরীরোতি ¶ সব্বায পীতিযা অব্যাপিতত্তা. তন্তি অত্তনো পসাদস্স আৰিকরণং, উপাসকত্তপৰেদনঞ্চ. আরদ্ধং ধম্মসঙ্গাহকেহি.

অভিক্কন্তাতি অতিক্কন্তা ৰিগতা, ৰিগতভাৰো চ খযো এৰাতি আহ ‘‘খযে দিস্সতী’’তি. তথা হি ৰুত্তং ‘‘নিক্খন্তো পঠমো যামো’’তি. অভিক্কন্ততরোতি অতিৰিয কন্ততরো মনোরমো, তাদিসো চ সুন্দরো ভদ্দকো নামাতি ৰুত্তং ‘‘সুন্দরে’’তি.

‘‘কো মে’’তিআদি গাথা ৰিমানৰত্থুম্হি (ৰি. ৰ. ৮৫৭). তত্থ কোতি দেৰনাগযক্খগন্ধব্বাদীসু কতমো. মেতি মম. পাদানীতি পাদে, লিঙ্গৰিপরিযাযোযং. ইদ্ধিযাতি ঈদিসায দেৰিদ্ধিযা. যসসাতি ঈদিসেন পরিৰারেন, পরিজনেন ¶ চ. জলন্তি জলন্তো ৰিজ্জোতমানো. অভিক্কন্তেনাতি অতিৰিয কন্তেন কমনীযেন, অভিরূপেনাতি ৰুত্তং হোতি. ৰণ্ণেনাতি ছৰিৰণ্ণেন সরীরৰণ্ণনিভায. সব্বা ওভাসযং দিসাতি সব্বা দসপি দিসা ওভাসযন্তো. চন্দো ৰিয, সূরিযো ৰিয চ একোভাসং একালোকং করোন্তো কো ৰন্দতীতি সম্বন্ধো.

অভিরূপেতি অতিরেকরূপে উল়ারৰণ্ণেন সম্পন্নরূপে. অব্ভানুমোদনেতি অভিঅনুমোদনে অভিপ্পমোদিতভাৰে. কিমত্থিযং ‘‘অব্ভানুমোদনে’’তি ৰচনন্তি আহ ‘‘তস্মা’’তিআদি. যুত্তং তাৰ হোতু অব্ভানুমোদনে, কস্মা পনাযং দ্ৰিক্খত্তুং ৰুত্তোতি চোদনায সোধনামুখেন আমেডিতৰিসযং নিদ্ধারেতি ‘‘ভযে কোধে’’তিআদিনা, ইমিনা সদ্দলক্খণেন হেতুভূতেন এৰং ৰুত্তো, ইমিনা চ ইমিনা চ ৰিসযেনাতি ৰুত্তং হোতি. ‘‘সাধু সাধু ভন্তে’’তি আমেডিতৰসেন অত্থং দস্সেত্ৰা তস্স ৰিসযং নিদ্ধারেন্তো এৰমাহাতিপি সম্বন্ধং ৰদন্তি. তত্থ ‘‘চোরো চোরো, সপ্পো সপ্পো’’তিআদীসু ভযে আমেডিতং, ‘‘ৰিজ্ঝ ৰিজ্ঝ, পহর পহরা’’তিআদীসু কোধে, ‘‘সাধু সাধূ’’তিআদীসু (সং. নি. ২.১২৭; ৩.৩৫; ৫.১০৮৫) পসংসাযং, ‘‘গচ্ছ গচ্ছ, লুনাহি লুনাহী’’তিআদীসু তুরিতে, ‘‘আগচ্ছ আগচ্ছা’’তিআদীসু কোতূহলে, ‘‘বুদ্ধো বুদ্ধোতি চিন্তেন্তো’’তিআদীসু (বু. ৰং. ২.৪৪) অচ্ছরে, ‘‘অভিক্কমথাযস্মন্তো অভিক্কমথাযস্মন্তো’’তিআদীসু (দী. নি. ৩.২০; অ. নি. ৯.১১) হাসে, ‘‘কহং একপুত্তক, কহং একপুত্তকা’’তিআদীসু (সং. নি. ২.৬৩) সোকে, ‘‘অহো সুখং, অহো সুখ’’ন্তিআদীসু (উদা. ২০; দী. নি. ৩.৩০৫) পসাদে. চসদ্দো অৰুত্তসমুচ্চযত্থো, তেন গরহা অসম্মানাদীনং সঙ্গহো দট্ঠব্বো. ‘‘পাপো পাপো’’তিআদীসু হি গরহাযং, ‘‘অভিরূপক অভিরূপকা’’তিআদীসু অসম্মানে. এৰমেতেসু নৰসু, অঞ্ঞেসু চ ৰিসযেসু আমেডিতৰচনং ¶ বুধো করেয্য, যোজেয্যাতি অত্থো. আমেডনং পুনপ্পুনমুচ্চারণং, আমেডীযতি ৰা পুনপ্পুনমুচ্চারীযতীতি আমেডিতং, একস্সেৰত্থস্স দ্ৰত্তিক্খত্তুং ৰচনং. মেডিসদ্দো হি উম্মাদনে, আপুব্বো তু দ্ৰত্তিক্খত্তুমুচ্চারণে ৰত্ততি যথা ‘‘এতদেৰ যদা ৰাক্য-মামেডযতি ৰাসৰো’’তি.

এৰং ¶ আমেডিতৰসেন দ্ৰিক্খত্তুং ৰুত্তভাৰং দস্সেত্ৰা ইদানি নযিদং আমেডিতৰসেনেৰ দ্ৰিক্খত্তুং ৰুত্তং, অথ খো পচ্চেকমত্থদ্ৰযৰসেনপীতি দস্সেন্তো ‘‘অথ ৰা’’তিআদিমাহ. আমেডিতৰসেন অত্থং দস্সেত্ৰা ৰিচ্ছাৰসেনাপি দস্সেন্তো এৰমাহাতিপি ৰদন্তি, তদযুত্তমেৰ ব্যাপেতব্বস্স দ্ৰিক্খত্তুমৰুত্তত্তা. ব্যাপেতব্বস্স হি ব্যাপকেন গুণকিরিযাদব্বেন ব্যাপনিচ্ছায দ্ৰত্তিক্খত্তুং ৰচনং ৰিচ্ছা যথা ‘‘গামো গামো রমণীযো’’তি. তত্থ অভিক্কন্তন্তি অভিক্কমনীযং, তব্ভাৰো চ অতিইট্ঠতাযাতি ৰুত্তং ‘‘অতিইট্ঠ’’ন্তিআদি, পদত্তযঞ্চেতং পরিযাযৰচনং. এত্থাতি দ্ৰীসু অভিক্কন্তসদ্দেসু. ‘‘অভিক্কন্ত’’ন্তি ৰচনং অপেক্খিত্ৰা নপুংসকলিঙ্গেন ৰুত্তং, তং পন ভগৰতো ৰচনং ধম্মদেসনাযেৰাতি কত্ৰা ‘‘যদিদং ভগৰতো ধম্মদেসনা’’তি আহ, যাযং ভগৰতো ধম্মদেসনা মযা সুতা, তদিদং ভগৰতো ধম্মদেসনাসঙ্খাতং ৰচনং অভিক্কন্তন্তি অত্থো. এৰং পটিনিদ্দেসোপি হি অত্থতো অভেদত্তা যুত্তো এৰ ‘‘যত্থ চ দিন্নং মহপ্ফলমাহূ’’তিআদীসু (ৰি. ৰ. ৮৮৮) ৰিয. ‘‘অভিক্কন্ত’’ন্তি ৰুত্তস্স ৰা অত্থমত্তদস্সনং এতং, তস্মা অত্থৰসেন লিঙ্গৰিভত্তিৰিপরিণামো ৰেদিতব্বো, কারিযৰিপরিণামৰসেন চেত্থ ৰিভত্তিৰিপরিণামতা. ৰচনন্তি হেত্থ সেসো, অভিক্কন্তং ভগৰতো ৰচনং, যাযং ভগৰতো ধম্মদেসনা মযা সুতা, সা অভিক্কন্তং অভিক্কন্তাতি অত্থো. দুতিযপদেপি ‘‘অভিক্কন্তন্তি পসাদনং অপেক্খিত্ৰা নপুংসকলিঙ্গেন ৰুত্ত’’ন্তিআদিনা যথারহমেস নযো নেতব্বো.

‘‘ভগৰতো ৰচন’’ন্তিআদিনা অত্থদ্ৰযসরূপং দস্সেতি. তত্থ দোসনাসনতোতি রাগাদিকিলেসদোসৰিদ্ধংসনতো. গুণাধিগমনতোতি সীলাদিগুণানং সম্পাদনৰসেন অধিগমাপনতো. যে গুণে দেসনা অধিগমেতি, তেসু ‘‘গুণাধিগমনতো’’তি ৰুত্তেসুযেৰ গুণেসু পধানভূতা গুণা দস্সেতব্বাতি তে পধানভূতে গুণে তাৰ দস্সেতুং ‘‘সদ্ধাজননতো পঞ্ঞাজননতো’’তি ৰুত্তং. সদ্ধাপধানা হি লোকিযা গুণা, পঞ্ঞাপধানা লোকুত্তরাতি, পধাননিদ্দেসো চেস দেসনায অধিগমেতব্বেহি সীলসমাধিদুকাদীহিপি যোজনাসম্ভৰতো. অঞ্ঞম্পি অত্থদ্ৰযং দস্সেতি ‘‘সাত্থতো’’তিআদিনা. সীলাদিঅত্থসম্পত্তিযা ¶ সাত্থতো. সভাৰনিরুত্তিসম্পত্তিযা সব্যঞ্জনতো. সুৰিঞ্ঞেয্যসদ্দপযোগতায উত্তানপদতো. সণ্হসুখুমভাৰেন দুব্বিঞ্ঞেয্যত্থতায ¶ গম্ভীরত্থতো. সিনিদ্ধমুদুমধুরসদ্দপযোগতায কণ্ণসুখতো. ৰিপুলৰিসুদ্ধপেমনীযত্থতায হদযঙ্গমতো. মানাতিমানৰিধমনেন অনত্তুক্কংসনতো. থম্ভসারম্ভনিম্মদ্দনেন অপরৰম্ভনতো. হিতাধিপ্পাযপ্পৰত্তিযা পরেসং রাগপরিল়াহাদিৰূপসমনেন করুণাসীতলতো. কিলেসন্ধকারৰিধমনেন পঞ্ঞাৰদাততো. অৰদাতং, ওদাতন্তি চ অত্থতো একং. করৰীকরুতমঞ্জুতায আপাথরমণীযতো. পুব্বাপরাৰিরুদ্ধসুৰিসুদ্ধতায ৰিমদ্দক্খমতো. আপাথরমণীযতায এৰ সুয্যমানসুখতো. ৰিমদ্দক্খমতায, হিতজ্ঝাসযপ্পৰত্তিতায চ ৰীমংসিযমানহিততোতি এৰমেত্থ অত্থো ৰেদিতব্বো. আদিসদ্দেন পন সংসারচক্কনিৰত্তনতো, সদ্ধম্মচক্কপ্পৰত্তনতো, মিচ্ছাৰাদৰিদ্ধংসনতো, সম্মাৰাদপতিট্ঠাপনতো, অকুসলমূলসমুদ্ধরণতো, কুসলমূলসংরোপনতো, অপাযদ্ৰারৰিধানতো, সগ্গমগ্গদ্ৰারৰিৰরণতো, পরিযুট্ঠানৰূপসমনতো, অনুসযসমুগ্ঘাটনতোতি এৰমাদীনং সঙ্গহো দট্ঠব্বো.

ন কেৰলং পদদ্ৰযেনেৰ, ততো পরম্পি চতূহি উপমাহীতি পি-সদ্দো সম্পিণ্ডনত্থো. ‘‘চক্খুমন্তো রূপানি দক্খন্তী’’তি ইদং ‘‘তেলপজ্জোতং ধারেয্যা’’তি চতুত্থউপমায আকারমত্তদস্সনং, ন পন উপমন্তরদস্সনন্তি আহ ‘‘চতূহি উপমাহী’’তি. অধোমুখট্ঠপিতন্তি কেনচি অধোমুখং ঠপিতং. হেট্ঠামুখজাতন্তি সভাৰেনেৰ হেট্ঠামুখং জাতং. উগ্ঘাটেয্যাতি ৰিৰটং করেয্য. ‘‘হত্থে গহেত্ৰা’’তি সমাচিক্খণদস্সনত্থং ৰুত্তং, ‘‘পুরত্থাভিমুখো, উত্তরাভিমুখো ৰা গচ্ছা’’তিআদিনা ৰচনমত্তং অৰত্ৰা ‘‘এস মগ্গো, এৰং গচ্ছা’’তি হত্থে গহেত্ৰা নিস্সন্দেহং দস্সেয্যাতি ৰুত্তং হোতি. কাল়পক্খে চাতুদ্দসী কাল়পক্খচাতুদ্দসী. নিরন্তররুক্খগহনেন একগ্ঘনো ৰনসণ্ডো ঘনৰনসণ্ডো. মেঘস্স পটলং মেঘপটলং, মেঘচ্ছন্নতাতি ৰুত্তং হোতি. নিক্কুজ্জিতং উক্কুজ্জেয্যাতি কস্সচিপি আধেয্যস্স অনাধারভূতং কিঞ্চি ভাজনং আধারভাৰাপাদনৰসেন উক্কুজ্জেয্য উপরি মুখং ঠপেয্য. হেট্ঠামুখজাততায ৰিমুখং, অধোমুখট্ঠপিততায অসদ্ধম্মে পতিতন্তি এৰং পদদ্ৰযং নিক্কুজ্জিতপদস্স যথাদস্সিতেন ¶ অত্থদ্ৰযেন যথারহং যোজেতব্বং, ন যথাসঙ্খ্যং. অত্তনো সভাৰেনেৰ হি এস রাজা সদ্ধম্মৰিমুখো, পাপমিত্তেন পন দেৰদত্তেন পিতুঘাতাদীসু উয্যোজিতত্তা অসদ্ধম্মে পতিতোতি. ৰুট্ঠাপেন্তেন ভগৰতাতি সম্বন্ধো.

‘‘কস্সপস্স ভগৰতো’’তিআদিনা তদা রঞ্ঞা অৰুত্তস্সাপি অত্থাপত্তিমত্তদস্সনং. কামঞ্চ কামচ্ছন্দাদযোপি পটিচ্ছাদকা নীৰরণভাৰতো, মিচ্ছাদিট্ঠি পন সৰিসেসং পটিচ্ছাদিকা সত্তে মিচ্ছাভিনিৰেসৰসেনাতি আহ ‘‘মিচ্ছাদিট্ঠিগহনপটিচ্ছন্ন’’ন্তি. তেনাহ ভগৰা ‘‘মিচ্ছাদিট্ঠিপরমাহং ভিক্খৰে ৰজ্জং ৰদামী’’তি, [অ. নি. ১.৩১০ (অত্থতো সমানং)] মিচ্ছাদিট্ঠিসঙ্খাতগুম্বপটিচ্ছন্নন্তি ¶ অত্থো. ‘‘মিচ্ছাদিট্ঠিগহনপটিচ্ছন্নং সাসনং ৰিৰরন্তেনা’’তি ৰদন্তো সব্ববুদ্ধানং একাৰ অনুসন্ধি, একংৰ সাসনন্তি কত্ৰা কস্সপস্স ভগৰতো সাসনম্পি ইমিনা সদ্ধিং একসাসনং করোতীতি দট্ঠব্বং. অঙ্গুত্তরট্ঠকথাদীসুপি হি তথা চেৰ ৰুত্তং, এৰঞ্চ কত্ৰা মিচ্ছাদিট্ঠিগহনপটিচ্ছন্নস্স সাসনস্স ৰিৰরণৰচনং উপপন্নং হোতীতি.

সব্বো অকুসলধম্মসঙ্খাতো অপাযগামিমগ্গো কুম্মগ্গো কুচ্ছিতো মগ্গোতি কত্ৰা. সম্মাদিট্ঠিআদীনং উজুপটিপক্খতায মিচ্ছাদিট্ঠিআদযো অট্ঠ মিচ্ছত্তধম্মা মিচ্ছামগ্গো মোক্খমগ্গতো মিচ্ছা ৰিতথো মগ্গোতি কত্ৰা. তেনেৰ হি তদুভযস্স পটিপক্খতং সন্ধায ‘‘সগ্গমোক্খমগ্গং আৰিকরোন্তেনা’’তি ৰুত্তং. সব্বো হি কুসলধম্মো সগ্গমগ্গো. সম্মাদিট্ঠিআদযো অট্ঠ সম্মত্তধম্মা মোক্খমগ্গো. সপ্পিআদিসন্নিস্সযো পদীপো ন তথা উজ্জলো, যথা তেলসন্নিস্সযোতি তেলপজ্জোতগ্গহণং. ধারেয্যাতি ধরেয্য, সমাহরেয্য সমাদহেয্যাতি অত্থো. বুদ্ধাদিরতনরূপানীতি বুদ্ধাদীনং তিণ্ণং রতনানং ৰণ্ণাযতনানি. তেসং বুদ্ধাদিরতনরূপানং পটিচ্ছাদকস্স মোহন্ধকারস্স ৰিদ্ধংসকং তথা. দেসনাসঙ্খাতং পজ্জোতং তথা. তদুভযং তুল্যাধিকরণৰসেন ৰিযূহিত্ৰা তস্স ধারকো সমাদহকোতি অত্থেন ‘‘তপ্পটিচ্ছাদকমোহন্ধকারৰিদ্ধংসকদেসনাপজ্জোতধারকেনা’’তি ৰুত্তং. এতেহি পরিযাযেহীতি যথাৰুত্তেহি নিক্কুজ্জিতুক্কুজ্জনপটিচ্ছন্নৰিৰরণমগ্গাচিক্খণতেলপজ্জোতধারণ সঙ্খাত চতুব্বিধোপমোপমিতব্বপ্পকারেহি, যথাৰুত্তেহি ¶ ৰা নানাৰিধকুহনলপনাদিমিচ্ছাজীৰৰিধমনাদিৰিভাৰনপরিযাযেহি. তেনাহ ‘‘অনেকপরিযাযেন ধম্মো পকাসিতো’’তি.

‘‘এৰ’’ন্তিআদিনা ‘‘এসাহ’’ন্তিআদিপাঠস্স সম্বন্ধং দস্সেতি. পসন্নচিত্ততাযপসন্নাকারং করোতি. পসন্নচিত্ততা চ ইমং দেসনং সুত্ৰা এৰাতি অত্থং ঞাপেতুং ‘‘ইমায দেসনাযা’’তিআদি ৰুত্তং. ইমায দেসনায হেতুভূতায. পসন্নাকারন্তি পসন্নেহি সাধুজনেহি কত্তব্বসক্কারং. সরণন্তি পটিসরণং. তেনাহ ‘‘পরাযণ’’ন্তি. পরাযণতা পন অনত্থনিসেধনেন, অত্থসম্পাদনেন চাতি ৰুত্তং ‘‘অঘস্স তাতা, হিতস্স চ ৰিধাতা’’তি. অঘস্সাতি নিস্সক্কে সামিৰচনং, পাপতোতি অত্থো. দুক্খতোতিপি ৰদন্তি কেচি. তাযতি অৰস্সযং করোতীতি তাতা. হিতস্সাতি উপযোগত্থে সামিৰচনং. ৰিদহতি সংৰিধানং করোতীতি ৰিধাতা. ‘‘ইতি ইমিনা অধিপ্পাযেনা’’তি ৰদন্তো ‘‘ইতিসদ্দো চেত্থ লুত্তনিদ্দিট্ঠো, সো চ আকারত্থো’’তি দস্সেতি. সরণন্তি গমনং. হিতাধিপ্পাযেন ভজনং, জাননং ৰা, এৰঞ্চ কত্ৰা ৰিনযট্ঠকথাদীসু ‘‘সরণন্তি গচ্ছামী’’তি সহেৰ ইতিসদ্দেন অত্থো ৰুত্তোতি. এত্থ হি নাযং গমি-সদ্দো ¶ নী-সদ্দাদযো ৰিয দ্ৰিকম্মিকো, তস্মা যথা ‘‘অজং গামং নেতী’’তি ৰুচ্চতি, এৰং ‘‘ভগৰন্তং সরণং গচ্ছামী’’তি ৰত্তুং ন সক্কা, ‘‘সরণন্তি গচ্ছামী’’তি পন ৰত্তব্বং, তস্মা এত্থ ইতিসদ্দো লুত্তনিদ্দিট্ঠোতি ৰেদিতব্বং, এৰঞ্চ কত্ৰা ‘‘যো বুদ্ধং সরণং গচ্ছতি, সো বুদ্ধং ৰা গচ্ছেয্য সরণং ৰা’’তি (খু. পা. অট্ঠ. ১.গমতীযদীপনা) খুদ্দকনিকাযট্ঠকথায উদ্ধটা চোদনা অনৰকাসা. ন হি গমি-সদ্দং দুহাদিন্যাদিগণিকং করোন্তি অক্খরচিন্তকাতি. হোতু তাৰ গমি-সদ্দস্স এককম্মভাৰো, তথাপি ‘‘গচ্ছতেৰ পুব্বং দিসং, গচ্ছতি পচ্ছিমং দিস’’ন্তিআদীসু (সং. নি. ১.১৫৯; ৩.৮৭) ৰিয ‘‘ভগৰন্তং, সরণ’’ন্তি পদদ্ৰযস্স সমানাধিকরণতা যুত্তাতি? ন, তস্স পদদ্ৰযস্স সমানাধিকরণভাৰানুপপত্তিতো. তস্স হি সমানাধিকরণভাৰে অধিপ্পেতে পটিহতচিত্তোপি ভগৰন্তং উপসঙ্কমন্তো বুদ্ধং সরণং গতো নাম সিযা. যঞ্হি তং ‘‘বুদ্ধো’’তি ৰিসেসিতং সরণং, তমেৰেস গতোতি, ন চেত্থ অনুপপত্তিকেন অত্থেন অত্থো, তস্মা ‘‘ভগৰন্ত’’ন্তি গমনীযত্থস্স দীপনং, ‘‘সরণ’’ন্তি পন গমনাকারস্সাতি ৰুত্তনযেন ¶ ইতিলোপৰসেনেৰ অত্থো গহেতব্বোতি. ধম্মঞ্চ সঙ্ঘঞ্চাতি এত্থাপি এসেৰ নযো. হোন্তি চেত্থ –

‘‘গমিস্স এককম্মত্তা, ইতিলোপং ৰিজানিযা;

পটিঘাতপ্পসঙ্গত্তা, ন চ তুল্যত্থতা সিযা.

তস্মা গমনীযত্থস্স, পুব্বপদংৰ জোতকং;

গমনাকারস্স পরং, ইত্যুত্তং সরণত্তযে’’তি.

‘‘ইতি ইমিনা অধিপ্পাযেন ভগৰন্তং গচ্ছামী’’তি পন ৰদন্তো অনেনেৰ অধিপ্পাযেন ভজনং, জাননং ৰা সরণগমনং নামাতি নিযমেতি. তত্থ ‘‘গচ্ছামী’’তিআদীসু পুরিমস্স পুরিমস্স পচ্ছিমং পচ্ছিমং অত্থৰচনং, ‘‘গচ্ছামী’’তি এতস্স ৰা অনঞ্ঞসাধারণতাদস্সনৰসেন পাটিযেক্কমেৰ অত্থৰচনং ‘‘ভজামী’’তিআদিপদত্তযং. ভজনঞ্হি সরণাধিপ্পাযেন উপসঙ্কমনং, সেৰনং সন্তিকাৰচরভাৰো, পযিরুপাসনং ৰত্তপটিৰত্তকরণেন উপট্ঠানন্তি এৰং সব্বথাপি অনঞ্ঞসাধারণতংযেৰ দস্সেতি. এৰং ‘‘গচ্ছামী’’তি পদস্স গতিঅত্থং দস্সেত্ৰা বুদ্ধিঅত্থম্পি দস্সেতুং ‘‘এৰং ৰা’’তিআদিমাহ, তত্থ এৰন্তি ‘‘ভগৰা মে সরণ’’ন্তিআদিনা অধিপ্পাযেন. কস্মা পন ‘‘গচ্ছামী’’তি পদস্স ‘‘বুজ্ঝামী’’তি অযমত্থো লব্ভতীতি চোদনং সোধেতি ‘‘যেসঞ্হী’’তিআদিনা, অনেন চ নিরুত্তিনযমন্তরেন সভাৰতোৰ গমুধাতুস্স বুদ্ধিঅত্থোতি দীপেতি. ধাতূনন্তি মূলসদ্দসঙ্খাতানং ই, যা, কমু, গমুইচ্চাদীনং.

‘‘অধিগতমগ্গে ¶ , সচ্ছিকতনিরোধে’’তি পদদ্ৰযেনাপি ফলট্ঠা এৰ দস্সিতা, ন মগ্গট্ঠাতি তে দস্সেন্তো ‘‘যথানুসিট্ঠং পটিপজ্জমানে চা’’তি আহ. ননু চ কল্যাণপুথুজ্জনোপি ‘‘যথানুসিট্ঠং পটিপজ্জতী’’তি ৰুচ্চতীতি? কিঞ্চাপি ৰুচ্চতি, নিপ্পরিযাযেন পন মগ্গট্ঠা এৰ তথা ৰত্তব্বা, ন ইতরো নিযামোক্কমনাভাৰতো. তথা হি তে এৰ ‘‘অপাযেসু অপতমানে ধারেতী’’তি ৰুত্তা. সম্মত্তনিযামোক্কমনেন হি অপাযৰিনিমুত্তিসম্ভৰোতি. এৰং অনেকেহিপি ৰিনয- (সারত্থ. টী. ১.ৰেরঞ্জকণ্ডৰণ্ণনা) সুত্তন্তটীকাকারেহী (দী. নি. টী. ১.২৫০) ৰুত্তং, তদেতং সম্মত্তনিযামোক্কমনৰসেন নিপ্পরিযাযতো অপাযৰিনিমুত্তকে সন্ধায ৰুত্তং, তদনুপপত্তিৰসেন পন পরিযাযতো অপাযৰিনিমুত্তকং কল্যাণপুথুজ্জনম্পি ‘‘যথানুসিট্ঠং পটিপজ্জমানে’’তি পদেন দস্সেতীতি দট্ঠব্বং. তথা ¶ হেস দক্খিণৰিভঙ্গসুত্তাদীসু (ম. নি. ৩.৩৭৯) সোতাপত্তিফলসচ্ছিকিরিযায পটিপন্নভাৰেন ৰুত্তোতি, ছত্তৰিমানে (ৰি. ৰ. ৮৮৬ আদযো) ছত্তমাণৰকো চেত্থ নিদস্সনং. অধিগতমগ্গে, সচ্ছিকতনিরোধে চ যথানুসিট্ঠং পটিপজ্জমানে চ পুগ্গলে অপাযেসু অপতমানে কত্ৰা ধারেতীতি সপাঠসেসযোজনা. অতীতকালিকেন হি পুরিমপদদ্ৰযেন ফলট্ঠানমেৰ গহণং, ৰত্তমানকালিকেন চ পচ্ছিমেন পদেন সহ কল্যাণপুথুজ্জনেন মগ্গট্ঠানমেৰ. ‘‘অপতমানে’’তি পন পদেন ধারণাকারদস্সনং অপতনকরণৰসেনেৰ ধারেতীতি, ধারণসরূপদস্সনং ৰা. ধারণং নাম অপতনকরণমেৰাতি, অপতনকরণঞ্চ অপাযাদিনিব্বত্তককিলেসৰিদ্ধংসনৰসেন ৰট্টতো নিয্যানমেৰ. ‘‘অপাযেসূ’’তি হি দুক্খবহুলট্ঠানতায পধানৰসেন ৰুত্তং, ৰট্টদুক্খেসু পন সব্বেসুপি অপতমানে কত্ৰা ধারেতীতি অত্থো ৰেদিতব্বো. তথা হি অভিধম্মট্ঠকথাযং ৰুত্তং ‘‘সোতাপত্তিমগ্গো চেত্থ অপাযভৰতো ৰুট্ঠাতি, সকদাগামিমগ্গো সুগতিকামভৰেকদেসতো, অনাগামিমগ্গো কামভৰতো, অরহত্তমগ্গো রূপারূপভৰতো, সব্বভৰেহিপি ৰুট্ঠাতি এৰাতি ৰদন্তী’’তি (ধ. স. অট্ঠ. ৩৫০) এৰঞ্চ কত্ৰা অরিযমগ্গো নিয্যানিকতায, নিব্বানঞ্চ তস্স তদত্থসিদ্ধিহেতুতাযাতি উভযমেৰ নিপ্পরিযাযেন ধম্মো নামাতি সরূপতো দস্সেতুং ‘‘সো অত্থতো অরিযমগ্গো চেৰ নিব্বানঞ্চা’’তি ৰুত্তং. নিব্বানঞ্হি আরম্মণং লভিত্ৰা অরিযমগ্গস্স তদত্থসিদ্ধি, স্ৰাযমত্থো চ পাল়িযা এৰ সিদ্ধোতি আহ ‘‘ৰুত্তঞ্চেত’’ন্তিআদি. যাৰতাতি যত্তকা. তেসন্তি তত্তকানং ধম্মানং. ‘‘অগ্গো অক্খাযতী’’তি ৰত্তব্বে ও-কারস্স অ-কারং, ম-কারাগমঞ্চ কত্ৰা ‘‘অগ্গমক্খাযতী’’তি ৰুত্তং. ‘‘অক্খাযতী’’তি চেত্থ ইতিসদ্দো আদিঅত্থো, পকারত্থো ৰা, তেন ‘‘যাৰতা ভিক্খৰে ধম্মা সঙ্খতা ৰা অসঙ্খতা ৰা, ৰিরাগো তেসং অগ্গমক্খাযতী’’তিআদি (ইতিৰু. ৯০; অ. নি. ৪.৩৪) সুত্তপদং সঙ্গণ্হাতি, ‘‘ৰিত্থারো’’তি ইমিনা ৰা তদৰসেসসঙ্গহো.

যস্মা ¶ পন অরিযফলানং ‘‘তায সদ্ধায অৰূপসন্তাযা’’তিআদি ৰচনতো মগ্গেন সমুচ্ছিন্নানং কিলেসানং পটিপ্পস্সদ্ধিপ্পহানকিচ্চতায নিয্যানানুগুণতা, নিয্যানপরিযোসানতা চ, পরিযত্তিযা পন নিয্যানধম্মসমধিগমহেতুতায ¶ নিয্যানানুগুণতাতি ইমিনা পরিযাযেন ৰুত্তনযেন ধম্মভাৰো লব্ভতি, তস্মা তদুভযম্পি সঙ্গণ্হন্তো ‘‘ন কেৰলঞ্চা’’তিআদিমাহ. স্ৰাযমত্থো চ পাঠারুল়্হো এৰাতি দস্সেতি ‘‘ৰুত্তঞ্হেত’’ন্তিআদিনা. তত্থ ছত্তমাণৰকৰিমানেতি ছত্তো কির নাম সেতব্যাযং ব্রাহ্মণমাণৰকো, সো উক্কট্ঠাযং পোক্খরসাতিব্রাহ্মণস্স সন্তিকে সিপ্পং উগ্গহেত্ৰা ‘‘গরুদক্খিণং দস্সামী’’তি উক্কট্ঠাভিমুখো গচ্ছতি, অথস্স ভগৰা অন্তরামগ্গে চোরন্তরাযং, তাৰতিংসভৰনে নিব্বত্তমানঞ্চ দিস্ৰা গাথাবন্ধৰসেন সরণগমনৰিধিং দেসেসি, তস্স তাৰতিংসভৰনুপগস্স তিংসযোজনিকং ৰিমানং ছত্তমাণৰকৰিমানং. দেৰলোকেপি হি তস্স মনুস্সকালে সমঞ্ঞা যথা ‘‘মণ্ডূকো দেৰপুত্তো, (ৰি. ৰ. ৮৫৮ আদযো) কুৰেরো দেৰরাজা’’তি, ইধ পন ছত্তমাণৰকৰিমানং ৰত্থু কারণং এতস্সাতি কত্ৰা উত্তরপদলোপেন ‘‘ন তথা তপতি নভে সূরিযো, চন্দো চ ন ভাসতি ন ফুস্সো, যথা’’তিআদিকা (ৰি. ৰ. ৮৮৯) দেসনা ‘‘ছত্তমাণৰকৰিমান’’ন্তি ৰুচ্চতি, তত্রাযং গাথা পরিযাপন্না, তস্মা ছত্তমাণৰকৰিমানৰত্থুদেসনাযন্তি অত্থো ৰেদিতব্বো.

কামরাগো ভৰরাগোতি এৰমাদিভেদো অনাদিকালৰিভাৰিতো সব্বোপি রাগো ৰিরজ্জতি পহীযতি এতেনাতি রাগৰিরাগো, মগ্গো. এজাসঙ্খাতায তণ্হায, অন্তোনিজ্ঝানলক্খণস্স চ সোকস্স তদুপ্পত্তিযং সব্বসো পরিক্খীণত্তা নত্থি এজা, সোকো চ এতস্মিন্তি অনেজং, অসোকঞ্চ, ফলং. তদট্ঠকথাযং (ৰি. ৰ. অট্ঠ. ৮৮৭) পন ‘‘তণ্হাৰসিট্ঠানং সোকনিমিত্তানং কিলেসানং পটিপ্পস্সম্ভনতো অসোক’’ন্তি ৰুত্তং. ধম্মমসঙ্খতন্তি সম্পজ্জ সম্ভূয পচ্চযেহি অপ্পটিসঙ্খতত্তা অসঙ্খতং অত্তনো সভাৰধারণতো পরমত্থধম্মভূতং নিব্বানং. তদট্ঠকথাযং পন ‘‘ধম্মন্তি সভাৰধম্মং. সভাৰতো গহেতব্বধম্মো হেস, যদিদং মগ্গফলনিব্বানানি, ন পরিযত্তিধম্মো ৰিয পঞ্ঞত্তিধম্মৰসেনা’’তি (ৰি. ৰ. অট্ঠ. ৮৮৭) ৰুত্তং, এৰং সতি ধম্মসদ্দো তীসুপি ঠানেসু যোজেতব্বো. অপ্পটিকূলসদ্দেন চ তত্থ নিব্বানমেৰ গহিতং ‘‘নত্থি এত্থ কিঞ্চিপি পটিকূল’’ন্তি কত্ৰা, অপ্পটিকূলন্তি চ অৰিরোধদীপনতো কিঞ্চি অৰিরুদ্ধং, ইট্ঠং পণীতন্তি ৰা অত্থো. পগুণরূপেন ¶ পৰত্তিতত্তা, পকট্ঠগুণৰিভাৰনতো ৰা পগুণং. যথাহ ‘‘ৰিহিংসসঞ্ঞী পগুণং ন ভাসিং, ধম্মং পণীতং মনুজেসু ব্রহ্মে’’তি (ম. নি. ১.২৮৩; ২.৩৩৯; মহাৰ. ৯).

ধম্মক্খন্ধা কথিতাতি যোজনা. এৰং ইধ চতূহিপি পদেহি পরিযত্তিধম্মোযেৰ গহিতো, তদট্ঠকথাযং ¶ পন ‘‘সৰনৰেলাযং, উপপরিক্খণৰেলাযং, পটিপজ্জনৰেলাযন্তি সব্বদাপি ইট্ঠমেৰাতি মধুরং, সব্বঞ্ঞুতঞ্ঞাণসন্নিস্সযায পটিভানসম্পদায পৰত্তিতত্তা সুপ্পৰত্তিভাৰতো, নিপুণভাৰতো চ পগুণং, ৰিভজিতব্বস্স অত্থস্স খন্ধাদিৰসেন, কুসলাদিৰসেন, উদ্দেসাদিৰসেন চ সুট্ঠু ৰিভজনতো সুৰিভত্তন্তি তীহিপি পদেহি পরিযত্তিধম্মমেৰ ৰদতী’’তি (ৰি. ৰ. অট্ঠ. ৮৮৭) ৰুত্তং. আপাথকালে ৰিয মজ্জনকালেপি, কথেন্তস্স ৰিয সুণন্তস্সাপি সম্মুখীভাৰতো উভতোপচ্চক্খতাদস্সনত্থং ইধেৰ ‘‘ইম’’ন্তি আসন্নপচ্চক্খৰচনমাহ. পুন ‘‘ধম্ম’’ন্তি ইদং যথাৰুত্তস্স চতুব্বিধস্সাপি ধম্মস্স সাধারণৰচনং. পরিযত্তিধম্মোপি হি সরণেসু চ সীলেসু চ পতিট্ঠানমত্তাযপি যাথাৰপটিপত্তিযা অপাযপতনতো ধারেতি, ইমস্স চ অত্থস্স ইদমেৰ ছত্তমাণৰকৰিমানং সাধকন্তি দট্ঠব্বং. সাধারণভাৰেন যথাৰুত্তং ধম্মং পচ্চক্খং কত্ৰা দস্সেন্তো পুন ‘‘ইম’’ন্তি আহ. যস্মা চেসা ভ-কারত্তযেন চ পটিমণ্ডিতা দোধকগাথা, তস্মা ততিযপাদে মধুরসদ্দে ম-কারো অধিকোপি অরিযচরিযাদিপদেহি ৰিয অনেকক্খরপদেন যুত্তত্তা অনুপৰজ্জোতি দট্ঠব্বং.

দিট্ঠিসীলসঙ্ঘাতেনাতি ‘‘যাযং দিট্ঠি অরিযা নিয্যানিকা নিয্যাতি তক্করস্স সম্মা দুক্খক্খযায, তথারূপায দিট্ঠিযা দিট্ঠিসামঞ্ঞগতো ৰিহরতী’’তি (দী. নি. ৩.৩২৪, ৩৫৬; অ. নি. ৬.১১; পরি. ২৭৪) এৰং ৰুত্তায দিট্ঠিযা চেৰ ‘‘যানি তানি সীলানি অখণ্ডানি অচ্ছিদ্দানি অসবলানি অকম্মাসানি ভুজিস্সানি ৰিঞ্ঞুপসত্থানি অপরামট্ঠানি সমাধিসংৰত্তনিকানি, তথারূপেহি সীলেহি সীলসামঞ্ঞগতো ৰিহরতী’’তি (দী. নি. ৩.৩২৪, ৩৫৬; ম. নি. ১.৪৯২; ৩.৫৪; অ. নি. ৬.৯২; পরি. ২৭৪) এৰং ৰুত্তানং সীলানঞ্চ সংহতভাৰেন, দিট্ঠিসীলসামঞ্ঞেনাতি অত্থো. সংহতোতি সঙ্ঘটিতো, সমেতোতি ৰুত্তং হোতি. অরিযপুগ্গলা ¶ হি যত্থ কত্থচি দূরে ঠিতাপি অত্তনো গুণসামগ্গিযা সংহতা এৰ. ‘‘ৰুত্তঞ্হেত’’ন্তিআদিনা আহচ্চপাঠেন সমত্থেতি.

যত্থাতি যস্মিং সঙ্ঘে. দিন্নন্তি পরিচ্চত্তং অন্নাদিদেয্যধম্মং, গাথাবন্ধত্তা চেত্থ অনুনাসিকলোপো. দোধকগাথা হেসা. মহপ্ফলমাহূতি ‘‘মহপ্ফল’’ন্তি বুদ্ধাদযো আহু. চতূসূতি চেত্থ চ-কারো অধিকোপি ৰুত্তনযেন অনুপৰজ্জো. অচ্চন্তমেৰ কিলেসাসুচিতো ৰিসুদ্ধত্তা সুচীসু. ‘‘সোতাপন্নো সোতাপত্তিফলসচ্ছিকিরিযায পটিপন্নো’’তিআদিনা (সং. নি. ৫.৪৮৮) ৰুত্তেসু চতূসু পুরিসযুগেসু. চতুসচ্চধম্মস্স, নিব্বানধম্মস্স চ পচ্চক্খতো দস্সনেন, অরিযধম্মস্স পচ্চক্খদস্সাৰিতায ৰা ধম্মদসা. তে পুগ্গলা মগ্গট্ঠফলট্ঠে ¶ যুগলে অকত্ৰা ৰিসুং ৰিসুং পুগ্গলগণনেন অট্ঠ চ হোন্তি. ইমং সঙ্ঘং সরণত্থং সরণায পরাযণায অপাযদুক্খৰট্টদুক্খপরিতাণায উপেহি উপগচ্ছ ভজ সেৰ, এৰং ৰা জানাহি বুজ্ঝস্সূতি সহ যোজনায অত্থো. যত্থ যেসু সুচীসু চতূসু পুরিসযুগেসু দিন্নং মহপ্ফলমাহু, ধম্মদসা তে পুগ্গলা অট্ঠ চ, ইমং সঙ্ঘং সরণত্থমুপেহীতি ৰা সম্বন্ধো. এৰম্পি হি পটিনিদ্দেসো যুত্তো এৰ অত্থতো অভিন্নত্তাতি দট্ঠব্বং. গাথাসুখত্থঞ্চেত্থ পুরিসপদে ঈকারং, পুগ্গলাপদে চ রস্সং কত্ৰা নিদ্দেসো.

এত্তাৰতাতি ‘‘এসাহ’’ন্তিআদিৰচনক্কমেন. তীণি ৰত্থূনি ‘‘সরণ’’ন্তি গমনানি, তিক্খত্তুং ৰা ‘‘সরণ’’ন্তি গমনানীতি সরণগমনানি. পটিৰেদেসীতি অত্তনো হদযগতং ৰাচায পৰেদেসি.

সরণগমনকথাৰণ্ণনা

সরণগমনস্স ৰিসযপ্পভেদফলসংকিলেসভেদানং ৰিয, কত্তু চ ৰিভাৰনা তত্থ কোসল্লায হোতি যেৰাতি সহ কত্তুনা তং ৰিধিং দস্সেতুং ‘‘ইদানি তেসু সরণগমনেসু কোসল্লত্থং…পে… ৰেদিতব্বো’’তি ৰুত্তং. ‘‘যো চ সরণং গচ্ছতী’’তি ইমিনা হি কত্তারং ৰিভাৰেতি তেন ৰিনা সরণগমনস্সেৰ অসম্ভৰতো, ‘‘সরণগমন’’ন্তি ইমিনা চ সরণগমনমেৰ, ‘‘সরণ’’ন্তিআদীহি পন যথাক্কমং ৰিসযাদযো. কস্মা পনেত্থ ৰোদানং ন গহিতং, ননু ৰোদানৰিভাৰনাপি তত্থ কোসল্লায হোতীতি? সচ্চমেতং, তং পন সংকিলেসগ্গহণেনেৰ অত্থতো ¶ ৰিভাৰিতং হোতীতি ন গহিতং. যানি হি নেসং সংকিলেসকারণানি অঞ্ঞাণাদীনি, তেসং সব্বেন সব্বং অনুপ্পন্নানং অনুপ্পাদনেন, উপ্পন্নানঞ্চ পহানেন ৰোদানং হোতীতি. অত্থতোতি সরণসদ্দত্থতো, ‘‘সরণত্থতো’’তিপি পাঠো, অযমেৰত্থো. হিংসত্থস্স সরসদ্দস্স ৰসেনেতং সিদ্ধন্তি দস্সেন্তো ধাত্ৰত্থৰসেন ‘‘হিংসতীতি সরণ’’ন্তি ৰত্ৰা তং পন হিংসনং কেসং, কথং, কস্স ৰাতি চোদনং সোধেতি ‘‘সরণগতান’’ন্তিআদিনা. কেসন্তি হি সরণগতানং. কথন্তি তেনেৰ সরণগমনেন. কস্সাতি ভযাদীনন্তি যথাক্কমং সোধনা. তত্থ সরণগতানন্তি ‘‘সরণ’’ন্তি গতানং. সরণগমনেনাতি ‘‘সরণ’’ন্তি গমনেন কুসলধম্মেন. ভযন্তি ৰট্টভযং. সন্তাসন্তি চিত্তুত্রাসং তেনেৰ চেতসিকদুক্খস্স সঙ্গহিতত্তা. দুক্খন্তি কাযিকদুক্খগ্গহণং. দুগ্গতিপরিকিলেসন্তি দুগ্গতিপরিযাপন্নং সব্বম্পি দুক্খং ‘‘দুগ্গতিযং পরিকিলিস্সনং সংৰিবাধনং, সমুপতাপনং ৰা’’তি কত্ৰা, তযিদং সব্বং পরতো ফলকথাযং আৰি ভৰিস্সতি. হিংসনঞ্চেত্থ ৰিনাসনমেৰ, ন পন সত্তহিংসনমিৰাতি দস্সেতি ‘‘হনতি ৰিনাসেতী’’তি ¶ ইমিনা. এতন্তি সরণপদং. অধিৰচনন্তি নামং, পসিদ্ধৰচনং ৰা, যথাভুচ্চং ৰা গুণং অধিকিচ্চ পৰত্তৰচনং. তেনাহ ‘‘রতনত্তযস্সেৰা’’তি.

এৰং হিংসনত্থৰসেন অৰিসেসতো সরণসদ্দত্থং দস্সেত্ৰা ইদানি তদত্থৰসেনেৰ ৰিসেসতো দস্সেতুং ‘‘অথ ৰা’’তিআদি ৰুত্তং. রতনত্তযস্স পচ্চেকং হিংসনকারণদস্সনমেৰ হি পুরিমনযতো ইমস্স ৰিসেসোতি. তত্থ হিতে পৰত্তনেনাতি ‘‘সম্পন্নসীলা ভিক্খৰে ৰিহরথা’’তিআদিনা (ম. নি. ১.৬৪, ৬৯) অত্থে সত্তানং নিযোজনেন. অহিতা চ নিৰত্তনেনাতি ‘‘পাণাতিপাতস্স খো পাপকো ৰিপাকো, পাপকং অভিসম্পরায’’ন্তিআদিনা আদীনৰদস্সনাদিমুখেন অনত্থতো চ সত্তানং নিৰত্তনেন. ভযং হিংসতীতি হিতাহিতেসু অপ্পৰত্তিপৰত্তিহেতুকং ব্যসনং অপ্পৰত্তিকরণেন ৰিনাসেতি. ভৰকন্তারা উত্তারণেন মগ্গসঙ্খাতো ধম্মো, ফলনিব্বানসঙ্খাতো পন অস্সাসদানেন সত্তানং ভযং হিংসতীতি যোজনা. কারানন্তি দানৰসেন, পূজাৰসেন চ উপনীতানং সক্কারানং. অনুপসগ্গোপি হি সদ্দো সউপসগ্গো ৰিয অত্থৰিসেসৰাচকো ‘‘অপ্পকম্পি কতং কারং, পুঞ্ঞং হোতি মহপ্ফল’’ন্তিআদীসু ৰিয. অনুত্তরদক্খিণেয্যভাৰতো ¶ ৰিপুলফলপটিলাভকরণেন সত্তানং ভযং হিং সতীতি যোজেতব্বং. ইমিনাপি পরিযাযেনাতি রতনত্তযস্স পচ্চেকং হিংসকভাৰকারণদস্সনৰসেন ৰিভজিত্ৰা ৰুত্তেন ইমিনাপি কারণেন. যস্মা পনিদং সরণপদং নাথপদং ৰিয সুদ্ধনামপদত্তা ধাত্ৰত্থং অন্তোনীতং কত্ৰা সঙ্কেতত্থম্পি ৰদতি, তস্মা হেট্ঠা সরণং পরাযণন্তি অত্থো ৰুত্তোতি দট্ঠব্বং.

এৰং সরণত্থং দস্সেত্ৰা ইদানি সরণগমনত্থং দস্সেন্তো ‘‘তপ্পসাদা’’তিআদিমাহ. তত্থ ‘‘সম্মাসম্বুদ্ধো ভগৰা, স্ৰাক্খাতো ধম্মো, সুপ্পটিপন্নো সঙ্ঘো’’তি এৰমাদিনা তস্মিং রতনত্তযে পসাদো তপ্পসাদো, তদেৰ রতনত্তযং গরু এতস্সাতি তগ্গরু, তস্স ভাৰো তগ্গরুতা, তপ্পসাদো চ তগ্গরুতা চ তপ্পসাদতগ্গরুতা, তাহি. ৰিহতকিলেসো ৰিধুতৰিচিকিচ্ছাসম্মোহাসদ্ধিযাদিপাপধম্মত্তা, তদেৰ রতনত্তযং পরাযণং পরাগতি তাণং লেণং এতস্সাতি তপ্পরাযণো, তস্স ভাৰো তপ্পরাযণতা, সাযেৰ আকারো তপ্পরাযণতাকারো, তেন পৰত্তো তপ্পরাযণতাকারপ্পৰত্তো. এত্থ চ পসাদগ্গহণেন লোকিযং সরণগমনমাহ. তঞ্হি সদ্ধাপধানং, ন ঞাণপধানং, গরুতাগহণেন পন লোকুত্তরং. অরিযা হি রতনত্তযং গুণাভিঞ্ঞতায পাসাণচ্ছত্তং ৰিয গরুং কত্ৰা পস্সন্তি, তস্মা তপ্পসাদেন তদঙ্গপ্পহানৰসেন ৰিহতকিলেসো, তগ্গরুতায চ অগারৰকরণহেতূনং সমুচ্ছেদৰসেনাতি যোজেতব্বং. তপ্পরাযণতা পনেত্থ তগ্গতিকতাতি তায চতুব্বিধম্পি ৰক্খমানং সরণগমনং গহিতন্তি দট্ঠব্বং. অৰিসেসেন ৰা ¶ পসাদগরুতা জোতিতাতি পসাদগ্গহণেন অনৰেচ্চপ্পসাদস্স লোকিযস্স, অৰেচ্চপ্পসাদস্স চ লোকুত্তরস্স গহণং, তথা গরুতাগহণেন লোকিযস্স গরুকরণস্স, লোকুত্তরস্স চাতি উভযেনপি পদেন উভযম্পি লোকিযলোকুত্তরসরণগমনং যোজেতব্বং. উপ্পজ্জতি চিত্তমেতেনাতি উপ্পাদো, সম্পযুত্তধম্মসমূহো, চিত্তঞ্চ তং উপ্পাদো চাতি চিত্তুপ্পাদো. সমাহারদ্ৰন্দেপি হি কত্থচি পুল্লিঙ্গমিচ্ছন্তি সদ্দৰিদূ, তদাকারপ্পৰত্তং সদ্ধাপঞ্ঞাদিসম্পযুত্তধম্মসহিতং চিত্তং সরণগমনং নাম ‘‘সরণন্তি গচ্ছতি এতেনাতি কত্ৰা’’তি ৰুত্তং হোতি. ‘‘তংসমঙ্গী’’তিআদি কত্তুৰিভাৰনা. তেন যথাৰুত্তচিত্তুপ্পাদেন সমঙ্গীতি তংসমঙ্গী. তেনাহ ‘‘ৰুত্তপ্পকারেন চিত্তুপ্পাদেনা’’তি ¶ . উপেতীতি ভজতি সেৰতি পযিরুপাসতি, জানাতি ৰা, বুজ্ঝতীতি অত্থো.

লোকুত্তরং সরণগমনং কেসন্তি আহ ‘‘দিট্ঠসচ্চান’’ন্তি, অট্ঠন্নং অরিযপুগ্গলানন্তি অত্থো. কদা তং ইজ্ঝতীতি আহ ‘‘মগ্গক্খণে’’তি, ‘‘ইজ্ঝতী’’তি পদেন চেতস্স সম্বন্ধো. মগ্গক্খণে ইজ্ঝমানেনেৰ হি চতুসচ্চাধিগমেন ফলট্ঠানম্পি সরণগমকতা সিজ্ঝতি লোকুত্তরসরণগমনস্স ভেদাভাৰতো, তেসঞ্চ একসন্তানত্তা. কথং তং ইজ্ঝতীতি আহ ‘‘সরণগমনুপক্কিলেসসমুচ্ছেদেনা’’তিআদি, উপপক্কিলেসসমুচ্ছেদতো, আরম্মণতো, কিচ্চতো চ সকলেপি রতনত্তযে ইজ্ঝতীতি ৰুত্তং হোতি. সরণগমনুপক্কিলেসসমুচ্ছেদেনাতি চেত্থ পহানাভিসমযং সন্ধায ৰুত্তং, আরম্মণতোতি সচ্ছিকিরিযাভিসমযং. নিব্বানারম্মণং হুত্ৰা আরম্মণতো ইজ্ঝতীতি হি যোজেতব্বং, ত্ৰা-সদ্দো চ হেতুত্থৰাচকো যথা ‘‘সক্কো হুত্ৰা নিব্বত্তী’’তি (ধ. প. অট্ঠ. ১.২.২৯). অপিচ ‘‘আরম্মণতো’’তি ৰুত্তমেৰত্থং সরূপতো নিযমেতি ‘‘নিব্বানারম্মণং হুত্ৰা’’তি ইমিনা. ‘‘কিচ্চতো’’তি তদৰসেসং ভাৰনাভিসমযং পরিঞ্ঞাভিসমযঞ্চ সন্ধায ৰুত্তং. ‘‘আরম্মণতো নিব্বানারম্মণং হুত্ৰা’’তি এতেন ৰা মগ্গক্খণানুরূপং একারম্মণতং দস্সেত্ৰা ‘‘কিচ্চতো’’তি ইমিনা পহানতো অৰসেসং কিচ্চত্তযং দস্সিতন্তি দট্ঠব্বং. ‘‘মগ্গক্খণে, নিব্বানারম্মণং হুত্ৰা’’তি চ ৰুত্তত্তা অত্থতো মগ্গঞাণসঙ্খাতো চতুসচ্চাধিগমো এৰ লোকুত্তরসরণগমনন্তি ৰিঞ্ঞাযতি. তত্থ হি চতুসচ্চাধিগমনে সরণগমনুপক্কিলেসস্স পহানাভিসমযৰসেন সমুচ্ছিন্দনং ভৰতি, নিব্বানধম্মো পন সচ্ছিকিরিযাভিসমযৰসেন, মগ্গধম্মো চ ভাৰনাভিসমযৰসেন পটিৰিজ্ঝিযমানোযেৰ সরণগমনত্থং সাধেতি, বুদ্ধগুণা পন সাৰকগোচরভূতা পরিঞ্ঞাভিসমযৰসেন পটিৰিজ্ঝিযমানা সরণগমনত্থং সাধেন্তি, তথা অরিযসঙ্ঘগুণা. তেনাহ ‘‘সকলেপি রতনত্তযে ইজ্ঝতী’’তি.

ফলপরিযত্তীনম্পেত্থ ৰুত্তনযেন মগ্গানুগুণপ্পৰত্তিযা গহণং, অপরিঞ্ঞেয্যভূতানঞ্চ বুদ্ধসঙ্ঘগুণানং ¶ তগ্গুণসামঞ্ঞতাযাতি দট্ঠব্বং. এৰঞ্হি সকলভাৰৰিসিট্ঠৰচনং উপপন্নং হোতীতি. ইজ্ঝন্তঞ্চ সহেৰ ইজ্ঝতি, ন লোকিযং ৰিয পটিপাটিযা অসম্মোহপটিৰেধেন পটিৰিদ্ধত্তাতি গহেতব্বং. পদীপস্স ¶ ৰিয হি একক্খণেযেৰ মগ্গস্স চতুকিচ্চসাধনন্তি. যে পন ৰদন্তি ‘‘সরণগমনং নিব্বানারম্মণং হুত্ৰা ন পৰত্ততি, মগ্গস্স অধিগতত্তা পন অধিগতমেৰ তং হোতি একচ্চানং তেৰিজ্জাদীনং লোকিযৰিজ্জাদযো ৰিযা’’তি, তেসং পন ৰচনে লোকিযমেৰ সরণগমনং সিযা, ন লোকুত্তরং, তঞ্চ অযুত্তমেৰ দুৰিধস্সাপি তস্স ইচ্ছিতব্বত্তা. তদঙ্গপ্পহানেন সরণগমনুপক্কিলেসৰিক্খম্ভনং. আরম্মণতো বুদ্ধাদিগুণারম্মণং হুত্ৰাতি এত্থাপি ৰুত্তনযেন অত্থো, সরণগমনুপক্কিলেসৰিক্খম্ভনতো, আরম্মণতো চ সকলেপি রতনত্তযে ইজ্ঝতীতি ৰুত্তং হোতি.

তন্তি লোকিযসরণগমনং. ‘‘সম্মাসম্বুদ্ধো ভগৰা’’তিআদিনা সদ্ধাপটিলাভো. সদ্ধামূলিকাতি যথাৰুত্তসদ্ধাপুব্বঙ্গমা. সহজাতৰসেন পুব্বঙ্গমতাযেৰ হি তম্মূলিকতা সদ্ধাৰিরহিতস্স বুদ্ধাদীসু সম্মাদস্সনস্স অসম্ভৰতো. সম্মাদিট্ঠি নাম বুদ্ধসুবুদ্ধতং, ধম্মসুধম্মতং সঙ্ঘসুপ্পটিপন্নতঞ্চ লোকিযাৰবোধৰসেন সম্মা ঞাযেন দস্সনতো. ‘‘সদ্ধাপটিলাভো’’তি ইমিনা সম্মাদিট্ঠিৰিরহিতাপি সদ্ধা লোকিযসরণগমনন্তি দস্সেতি, ‘‘সদ্ধামূলিকা চ সম্মাদিট্ঠী’’তি পন এতেন সদ্ধূপনিস্সযা যথাৰুত্তা পঞ্ঞাতি. লোকিযম্পি হি সরণগমনং দুৰিধং ঞাণসম্পযুত্তং, ঞাণৰিপ্পযুত্তঞ্চ. তত্থ পঠমেন পদেন মাতাদীহি উস্সাহিতদারকাদীনং ৰিয ঞাণৰিপ্পযুত্তং সরণগমনং গহিতং, দুতিযেন পন ঞাণসম্পযুত্তং. তদুভযমেৰ পুঞ্ঞকিরিযৰত্থু ৰিসেসভাৰেন দস্সেতুং ‘‘দসসু পুঞ্ঞকিরিযৰত্থূসু দিট্ঠিজুকম্মন্তি ৰুচ্চতী’’তি আহ. দিট্ঠি এৰ অত্তনো পচ্চযেহি উজুং করীযতীতি হি অত্থেন সম্মাদিট্ঠিযা দিট্ঠিজুকম্মভাৰো, দিট্ঠি উজুং করীযতি এতেনাতি অত্থেন পন সদ্ধাযপি. সদ্ধাসম্মাদিট্ঠিগ্গহণেন চেত্থ তপ্পধানস্সাপি চিত্তুপ্পাদস্স গহণং, দিট্ঠিজুকম্মপদেন চ যথাৰুত্তেন করণসাধনেন, এৰঞ্চ কত্ৰা ‘‘তপ্পরাযণতাকারপ্পৰত্তো চিত্তুপ্পাদো’’তি হেট্ঠা ৰুত্তৰচনং সমত্থিতং হোতি, সদ্ধাসম্মাদিট্ঠীনং পন ৰিসুং গহণং তংসম্পযুত্তচিত্তুপ্পাদস্স তপ্পধানতাযাতি দট্ঠব্বং.

তযিদন্তি লোকিযং সরণগমনমেৰ পচ্চামসতি লোকুত্তরস্স তথা ভেদাভাৰতো. তস্স হি মগ্গক্খণেযেৰ ৰুত্তনযেন ইজ্ঝনতো তথাৰিধস্স সমাদানস্স অৰিজ্জমানত্তা এস ভেদো ন ¶ সম্ভৰতীতি. অত্তা সন্নিয্যাতীযতি অপ্পীযতি পরিচ্চজীযতি এতেনাতি অত্তসন্নিয্যাতনং, যথাৰুত্তং সরণগমনসঙ্খাতং দিট্ঠিজুকম্মং. তং রতনত্তযং পরাযণং পটিসরণমেতস্সাতি তপ্পরাযণো ¶ , পুগ্গলো, চিত্তুপ্পাদো ৰা, তস্স ভাৰো তপ্পরাযণতা, তদেৰ দিট্ঠিজুকম্মং. ‘‘সরণ’’ন্তি অধিপ্পাযেন সিস্সভাৰং অন্তেৰাসিকভাৰসঙ্খাতং ৰত্তপটিৰত্তাদিকরণং উপগচ্ছতি এতেনাতি সিস্সভাৰূপগমনং. সরণগমনাধিপ্পাযেনেৰ পণিপততি এতেনাতি পণিপাতো, পণিপতনঞ্চেত্থ অভিৰাদনপচ্চুট্ঠানঅঞ্জলিকম্মসামীচিকম্মমেৰ, সব্বত্থ চ অত্থতো যথাৰুত্তদিট্ঠিজুকম্মমেৰ ৰেদিতব্বং.

সংসারদুক্খনিত্থরণত্থং অত্তনো অত্তভাৰস্স পরিচ্চজনং অত্তপরিচ্চজনং. তপ্পরাযণতাদীসুপি এসেৰ নযো. হিতোপদেসকথাপরিযাযেন ধম্মস্সাপি আচরিযভাৰো সমুদাচরীযতি ‘‘ফলো অম্বো অফলো চ, তে সত্থারো উভো মমা’’তিআদীসু ৰিযাতি আহ ‘‘ধম্মস্স অন্তেৰাসিকো’’তি. ‘‘অভিৰাদনা’’তিআদি পণিপাতস্স অত্থদস্সনং. বুদ্ধাদীনংযেৰাতি অৰধারণস্স অত্তসন্নিয্যাতনাদীসুপি সীহগতিকৰসেন অধিকারো ৰেদিতব্বো. এৰঞ্হি তদঞ্ঞনিৰত্তনং কতং হোতীতি. ‘‘ইমেসঞ্হী’’তিআদি চতুধা পৰত্তনস্স সমত্থনং, কারণদস্সনং ৰা.

এৰং অত্তসন্নিয্যাতনাদীনি একেন পকারেন দস্সেত্ৰা ইদানি অপরেহিপি পকারেহি দস্সেতুং ‘‘অপিচা’’তিআদি আরদ্ধং, এতেন অত্তসন্নিয্যাতনতপ্পরাযণতাদীনং চতুন্নং পরিযাযন্তরেহিপি অত্তসন্নিয্যাতনতপ্পরাযণতাদি কতমেৰ হোতি অত্থস্স অভিন্নত্তা যথা তং ‘‘সিক্খাপচ্চক্খানঅভূতারোচনানী’’তি দস্সেতি. জীৰিতপরিযন্তিকন্তি ভাৰনপুংসকৰচনং, যাৰজীৰং গচ্ছামীতি অত্থো. মহাকস্সপো কির সযমেৰ পব্বজিতৰেসং গহেত্ৰা মহাতিত্থব্রাহ্মণগামতো নিক্খমিত্ৰা গচ্ছন্তো তিগাৰুতমগ্গং পচ্চুগ্গমনং কত্ৰা অন্তরা চ রাজগহং, অন্তরা চ নাল়ন্দং বহুপুত্তকনিগ্রোধরুক্খমূলে এককমেৰ নিসিন্নং ভগৰন্তং পস্সিত্ৰা ‘‘অযং ভগৰা অরহং সম্মাসম্বুদ্ধো’’তি অজানন্তোযেৰ ‘‘সত্থারঞ্চ ৰতাহং পস্সেয্যং, ভগৰন্তমেৰ ¶ পস্সেয্য’’ন্তিআদিনা (সং. নি. ২.১৫৪) সরণগমনমকাসি. তেন ৰুত্তং ‘‘মহাকস্সপস্স সরণগমনং ৰিযা’’তি. ৰিত্থারো কস্সপসংযুত্তট্ঠকথাযং (সং. নি. অট্ঠ. ২.২.১৫৪) গহেতব্বো. তত্থ সত্থারঞ্চৰতাহং পস্সেয্যং, ভগৰন্তমেৰ পস্সেয্যন্তি সচে অহং সত্থারং পস্সেয্যং, ইমং ভগৰন্তংযেৰ পস্সেয্যং. ন হি মে ইতো অঞ্ঞেন সত্থারা ভৰিতুং সক্কা. সুগতঞ্চ ৰতাহং পস্সেয্যং, ভগৰন্তমেৰ পস্সেয্যন্তি সচে অহং সম্মাপটিপত্তিযা সুট্ঠু গতত্তা সুগতং নাম পস্সেয্যং, ইমং ভগৰন্তংযেৰ পস্সেয্যং. ন হি মে ইতো অঞ্ঞেন সুগতেন ভৰিতুং সক্কা. সম্মাসম্বুদ্ধঞ্চ ৰতাহং পস্সেয্যং, ভগৰন্তমেৰ পস্সেয্যন্তি সচে অহং সম্মা সামঞ্চ সচ্চানি বুদ্ধত্তা সম্মাসম্বুদ্ধং নাম পস্সেয্যং, ইমং ভগৰন্তংযেৰ পস্সেয্যং, ন হি মে ¶ ইতো অঞ্ঞেন সম্মাসম্বুদ্ধেন ভৰিতুং সক্কাতি অযমেত্থ অট্ঠকথা. সব্বত্থ চ-সদ্দো, ৰত-সদ্দো চ পদপূরণমত্তং, চে-সদ্দেন ৰা ভৰিতব্বং ‘‘সচে’’তি অট্ঠকথাযং (সং. নি. অট্ঠ. ২.২.১৫৪) ৰুত্তত্তা. ৰত-সদ্দো চ পস্সিতুকামতায একংসত্থং দীপেতীতিপি যুজ্জতি.

‘‘সো অহ’’ন্তিআদি সুত্তনিপাতে আল়ৰকসুত্তে. তত্থ কিঞ্চাপি মগ্গেনেৰ তস্স সরণগমনমাগতং, সোতাপন্নভাৰদস্সনত্থং, পন পসাদানুরূপদস্সনত্থঞ্চ এৰং ৰাচং ভিন্দতীতি তদট্ঠকথাযং (সু. নি. অট্ঠ. ১.১৮১) ৰুত্তং. গামা গামন্তি অঞ্ঞস্মা দেৰগামা অঞ্ঞং দেৰগামং, দেৰতানং ৰা খুদ্দকং, মহন্তঞ্চ গামন্তিপি অত্থো. পুরা পুরন্তি এত্থাপি এসেৰ নযো. ধম্মস্স চ সুধম্মতন্তি বুদ্ধস্স সুবুদ্ধতং, ধম্মস্স সুধম্মতং, সঙ্ঘস্স সুপ্পটিপন্নতঞ্চ অভিত্থৰিত্ৰাতি সহ সমুচ্চযেন, পাঠসেসেন চ অত্থো, সম্বুদ্ধং নমস্সমানো ধম্মঘোসকো হুত্ৰা ৰিচরিস্সামীতি ৰুত্তং হোতি.

আল়ৰকাদীনন্তি আদি-সদ্দেন সাতাগিরহেমৰতাদীনম্পি সঙ্গহো. ননু চ এতে আল়ৰকাদযো অধিগতমগ্গত্তা মগ্গেনেৰ আগতসরণগমনা, কস্মা তেসং তপ্পরাযণতাসরণগমনং ৰুত্তন্তি? মগ্গেনাগতসরণগমনেহিপি তেহি তপ্পরাযণতাকারস্স পৰেদিতত্তা. ‘‘সো অহং ৰিচরিস্সামি…পে… সুধম্মতং, (সং. নি. ১.২৪৬; সু. নি. ১৯৪) তে মযং ৰিচরিস্সাম, গামা গামং নগা নগং…পে… সুধম্মত’’ন্তি (সু. নি. ১৮২) চ হি এতেহি তপ্পরাযণতাকারো পৰেদিতো. তস্মা সরণগমনৰিসেসমনপেক্খিত্ৰা পৰেদনাকারমত্তং উপদিসন্তেন এৰং ৰুত্তন্তি দট্ঠব্বং. অথাতি ‘‘কথং খো ব্রাহ্মণো হোতী’’তিআদিনা পুট্ঠস্স অট্ঠৰিধপঞ্হস্স ‘‘পুব্বেনিৰাসং যো ৰেদী’’তিআদিনা ব্যাকরণপরিযোসানকালে. ইদঞ্হি মজ্ঝিমপণ্ণাসকে ব্রহ্মাযুসুত্তে (ম. নি. ২.৩৯৪) পরিচুম্বতীতি পরিফুসতি ¶ . পরিসম্বাহতীতি পরিমজ্জতি. এৰম্পি পণিপাতো দট্ঠব্বোতি এৰম্পি পরমনিপচ্চকারেন পণিপাতো দট্ঠব্বো.

সো পনেসাতি পণিপাতো. ঞাতি…পে… ৰসেনাতি এত্থ ঞাতিৰসেন, ভযৰসেন, আচরিযৰসেন, দক্খিণেয্যৰসেনাতি পচ্চেকং যোজেতব্বং দ্ৰন্দপরতো সুয্যমানত্তা. তত্থ ঞাতিৰসেনাতি ঞাতিভাৰৰসেন. ভাৰপ্পধাননিদ্দেসো হি অযং, ভাৰলোপনিদ্দেসো ৰা তব্ভাৰস্সেৰ অধিপ্পেতত্তা. এৰং সেসেসুপি পণিপাতপদেন চেতেসং সম্বন্ধো তব্বসেন পণিপাতস্স চতুব্বিধত্তা. তেনাহ ‘‘দক্খিণেয্যপণিপাতেনা’’তি, দক্খিণেয্যতাহেতুকেন পণিপাতেনেৰাতি অত্থো. ইতরেহীতি ঞাতিভাৰাদিহেতুকেহি পণিপাতেহি. ‘‘সেট্ঠৰসেনেৰা’’তিআদি তস্সেৰত্থস্স সমত্থনং ¶ . ইদানি ‘‘ন ইতরেহী’’তিআদিনা ৰুত্তমেৰ অত্থত্তযং যথাক্কমং ৰিত্থারতো দস্সেতুং ‘‘তস্মা’’তিআদি ৰুত্তং. ‘‘সাকিযো ৰা’’তি পিতুপক্খতো ঞাতিকুলদস্সনং, ‘‘কোলিযো ৰা’’তি পন মাতুপক্খতো. ৰন্দতীতি পণিপাতস্স উপলক্খণৰচনং. রাজপূজিতোতি রাজূহি, রাজূনং ৰা পূজিতো যথা ‘‘গামপূজিতো’’তি. পূজাৰচনপযোগে হি কত্তরি সামিৰচনমিচ্ছন্তি সদ্দৰিদূ. ভগৰতোতি বোধিসত্তভূতস্স, বুদ্ধভূতস্স ৰা ভগৰতো. উগ্গহিতন্তি সিক্খিতসিপ্পং.

‘‘চতুধা’’তিআদি সিঙ্গালোৰাদসুত্তে (দী. নি. ৩.২৬৫) ঘরমাৰসন্তি ঘরে ৰসন্তো, কম্মপ্পৰচনীযযোগতো চেত্থ ভুম্মত্থে উপযোগৰচনং. কম্মং পযোজযেতি কসিৰাণিজ্জাদিকম্মং পযোজেয্য. কুলানঞ্হি ন সব্বকালং একসদিসং ৰত্ততি, কদাচি রাজাদিৰসেন আপদাপি উপ্পজ্জতি, তস্মা ‘‘আপদাসু উপ্পন্নাসু ভৰিস্সতী’’তি এৰং মনসি কত্ৰা নিধাপেয্যাতি আহ ‘‘আপদাসু ভৰিস্সতী’’তি. ইমেসু পন চতূসু কোট্ঠাসেসু ‘‘একেন ভোগে ভুঞ্জেয্যা’’তি ৰুত্তকোট্ঠাসতোযেৰ গহেত্ৰা ভিক্খূনম্পি কপণদ্ধিকাদীনম্পি দানং দাতব্বং, পেসকারন্হাপিতকাদীনম্পি ৰেতনং দাতব্বন্তি অযং ভোগপরিগ্গহণানুসাসনী, এৰরূপং অনুসাসনিং উগ্গহেত্ৰাতি অত্থো. ইদঞ্হি দিট্ঠধম্মিকংযেৰ সন্ধায ৰদতি, সম্পরাযিকং, পন নিয্যানিকং ৰা অনুসাসনিং পচ্চাসিসন্তোপি দক্খিণেয্যপণিপাতমেৰ করোতি নামাতি দট্ঠব্বং. ‘‘যো পনা’’তিআদি ‘‘সেট্ঠৰসেনেৰ…পে… গণ্হাতী’’তি ৰুত্তস্সত্থস্স ৰিত্থারৰচনং.

‘‘এৰ’’ন্তিআদি ¶ পন ‘‘সেট্ঠৰসেন চ ভিজ্জতী’’তি ৰুত্তস্স ব্যতিরেকদস্সনং. অত্থৰসা লিঙ্গৰিভত্তিৰিপরিণামোতি কত্ৰা গহিতসরণায উপাসিকায ৰাতিপি যোজেতব্বং. এৰমীদিসেসু. পব্বজিতম্পীতি পি-সদ্দো সম্ভাৰনত্থোতি ৰুত্তং ‘‘পগেৰ অপব্বজিত’’ন্তি. সরণগমনং ন ভিজ্জতি সেট্ঠৰসেন অৰন্দিতত্তা. তথাতি অনুকড্ঢনত্থে নিপাতো ‘‘সরণগমনং ন ভিজ্জতী’’তি. রট্ঠপূজিতত্তাতি রট্ঠে, রট্ঠৰাসীনং ৰা পূজিতত্তা. তযিদং ভযৰসেন ৰন্দিতব্বভাৰস্সেৰ সমত্থনং, ন তু অভেদস্স কারণদস্সনং, তস্স পন কারণং সেট্ঠৰসেন অৰন্দিতত্তাতি ৰেদিতব্বং. ৰুত্তঞ্হি ‘‘সেট্ঠৰসেন চ ভিজ্জতী’’তি. সেট্ঠৰসেনাতি লোকে অগ্গদক্খিণেয্যতায সেট্ঠভাৰৰসেনাতি অত্থো. তেনাহ ‘‘অযং লোকে অগ্গদক্খিণেয্যোতি ৰন্দতী’’তি. তিত্থিযম্পি ৰন্দতো ন ভিজ্জতি, পগেৰ ইতরং. সরণগমনপ্পভেদোতি সরণগমনৰিভাগো, তব্বিভাগসম্বন্ধতো চেত্থ সক্কা অভেদোপি সুখেন দস্সেতুন্তি অভেদদস্সনং কতং.

অরিযমগ্গো ¶ এৰ লোকুত্তরসরণগমনন্তি চত্তারি সামঞ্ঞফলানি ৰিপাকফলভাৰেন ৰুত্তানি. সব্বদুক্খক্খযোতি সকলস্স ৰট্টদুক্খস্স অনুপ্পাদনিরোধো নিব্বানং. এত্থ চ কম্মসদিসং ৰিপাকফলং, তব্বিপরীতং আনিসংসফলন্তি দট্ঠব্বং. যথা হি সালিবীজাদীনং ফলানি তংসদিসানি ৰিপক্কানি নাম হোন্তি, ৰিপাকনিরুত্তিঞ্চ লভন্তি, ন মূলঙ্কুরপত্তক্খন্ধনাল়ানি, এৰং কুসলাকুসলানং ফলানি অরূপধম্মভাৰেন, সারম্মণভাৰেন চ সদিসানি ৰিপক্কানি নাম হোন্তি, ৰিপাকনিরুত্তিঞ্চ লভন্তি, ন তদঞ্ঞানি কম্মনিব্বত্তানিপি কম্মঅসদিসানি, তানি পন আনিসংসানি নাম হোন্তি, আনিসংসনিরুত্তিমত্তঞ্চ লভন্তীতি. ‘‘ৰুত্তঞ্হেত’’ন্তিআদিনা ধম্মপদে অগ্গিদত্তব্রাহ্মণৰত্থুপাল়িমাহরিত্ৰা দস্সেতি.

যো চাতি এত্থ চ-সদ্দো ব্যতিরেকে, যো পনাতি অত্থো. তত্রাযমধিপ্পাযো – ব্যতিরেকত্থদীপনে যদি ‘‘বহুং ৰে সরণং যন্তি, পব্বতানি ৰনানি চা’’তিআদিনা (ধ. প. ১৮৮) ৰুত্তং খেমং সরণং ন হোতি, ন উত্তমং সরণং, এতঞ্চ সরণমাগম্ম সব্বদুক্খা ন পমুচ্চতি, এৰং সতি কিং নাম ৰত্থু খেমং সরণং হোতি, উত্তমং সরণং, কিং নাম ৰত্থুং সরণমাগম্ম সব্বদুক্খা পমুচ্চতীতি চে?

যো ¶ চ বুদ্ধঞ্চ ধম্মঞ্চ, সঙ্ঘঞ্চ সরণং গতো…পে…

এতং খো সরণং খেমং, এতং সরণমুত্তমং;

এতং সরণমাগম্ম, সব্বদুক্খা পমুচ্চতীতি. (ধ. প. ১৯০-৯২);

এৰমীদিসেসু. লোকিযস্স সরণগমনস্স অঞ্ঞতিত্থিযাৰন্দনাদিনা কুপ্পনতো, চলনতো চ অকুপ্পং অচলং লোকুত্তরমেৰ সরণগমনং পকাসেতুং ‘‘চত্তারি অরিযসচ্চানি, সম্মপ্পঞ্ঞায পস্সতী’’তি ৰুত্তং. ৰাচাসিলিট্ঠত্থঞ্চেত্থ সম্মাসদ্দস্স রস্সত্তং. ‘‘দুক্খ’’ন্তিআদি ‘‘চত্তারি অরিযসচ্চানী’’তি ৰুত্তস্স সরূপদস্সনং. দুক্খস্স চ অতিক্কমন্তি দুক্খনিরোধং. দুক্খূপসমগামিনন্তি দুক্খনিরোধগামিং. ‘‘এত’’ন্তি ‘‘চত্তারি…পে… পস্সতী’’তি (ধ. প. ১৯০) এৰং ৰুত্তং লোকুত্তরসরণগমনসঙ্খাতং অরিযসচ্চদস্সনং. খো-সদ্দো অৰধারণত্থো পদত্তযেপি যোজেতব্বো.

নিচ্চতো অনুপগমনাদিৰসেনাতি ‘‘নিচ্চ’’ন্তি অগ্গহণাদিৰসেন, ইতিনা নিদ্দিসিতব্বেহি তো-সদ্দমিচ্ছন্তি সদ্দৰিদূ. ‘‘ৰুত্তঞ্হেত’’ন্তিআদিনা ঞাণৰিভঙ্গাদীসু (ম. নি. ৩.১২৬; অ. নি. ১.২৬৮) আগতং ¶ পাল়িং সাধকভাৰেন আহরতি. অট্ঠানন্তি জনকহেতুপটিক্খেপো. অনৰকাসোতি পচ্চযহেতুপটিক্খেপো. উভযেনাপি কারণমেৰ পটিক্খিপতি. যন্তি যেন কারণেন. দিট্ঠিসম্পন্নোতি মগ্গদিট্ঠিযা সম্পন্নো সোতাপন্নো. কঞ্চি সঙ্খারন্তি চতুভূমকেসু সঙ্খতসঙ্খারেসু একম্পি সঙ্খারং. নিচ্চতো উপগচ্ছেয্যাতি ‘‘নিচ্চো’’তি গণ্হেয্য. সুখতো উপগচ্ছেয্যাতি ‘‘একন্তসুখী অত্তা হোতি অরোগো পরং মরণা’’তি (দী. নি. ১.৭৬) এৰং অত্তদিট্ঠিৰসেন ‘‘সুখো’’তি গণ্হেয্য, দিট্ঠিৰিপ্পযুত্তচিত্তেন পন অরিযসাৰকো পরিল়াহৰূপসমত্থং মত্তহত্থিপরিত্তাসিতো চোক্খব্রাহ্মণো ৰিয উক্কারভূমিং কঞ্চি সঙ্খারং সুখতো উপগচ্ছতি. অত্তৰারে কসিণাদিপণ্ণত্তিসঙ্গহণত্থং ‘‘সঙ্খার’’ন্তি অৰত্ৰা ‘‘ধম্ম’’ন্তি ৰুত্তং. যথাহ পরিৰারে –

‘‘অনিচ্চা সব্বে সঙ্খারা, দুক্খানত্তা চ সঙ্খতা;

নিব্বানঞ্চেৰ পঞ্ঞত্তি, অনত্তা ইতি নিচ্ছযা’’তি. (পরি. ২৫৭);

ইমেসু পন তীসুপি ৰারেসু অরিযসাৰকস্স চতুভূমকৰসেনেৰ পরিচ্ছেদো ৰেদিতব্বো, তেভূমকৰসেনেৰ ৰা. যং যঞ্হি পুথুজ্জনো ‘‘নিচ্চং ¶ সুখং অত্তা’’তি গাহং গণ্হাতি, তং তং অরিযসাৰকো ‘‘অনিচ্চং দুক্খং অনত্তা’’তি গণ্হন্তো গাহং ৰিনিৰেঠেতি.

‘‘মাতর’’ন্তিআদীসু জনিকা মাতা, জনকো পিতা, মনুস্সভূতো খীণাসৰো অরহাতি অধিপ্পেতো. কিং পন অরিযসাৰকো তেহি অঞ্ঞম্পি পাণং জীৰিতা ৰোরোপেয্যাতি? এতম্পি অট্ঠানমেৰ. চক্কৰত্তিরজ্জসকজীৰিতহেতুপি হি সো তং জীৰিতা ন ৰোরোপেয্য, তথাপি পুথুজ্জনভাৰস্স মহাসাৰজ্জতাদস্সনত্থং অরিযভাৰস্স চ বলৰতাপকাসনত্থং এৰং ৰুত্তন্তি দট্ঠব্বং. পদুট্ঠচিত্তোতি ৰধকচিত্তেন পদূসনচিত্তো, পদূসিতচিত্তো ৰা. লোহিতং উপ্পাদেয্যাতি জীৰমানকসরীরে খুদ্দকমক্খিকায পিৰনমত্তম্পি লোহিতং উপ্পাদেয্য. সঙ্ঘং ভিন্দেয্যাতি সমানসংৰাসকং সমানসীমাযং ঠিতং সঙ্ঘং পঞ্চহি কারণেহি ভিন্দেয্য, ৰুত্তঞ্হেতং ‘‘পঞ্চহুপালি আকারেহি সঙ্ঘো ভিজ্জতি কম্মেন, উদ্দেসেন, ৰোহরন্তো, অনুস্সাৰনেন, সলাকগ্গাহেনা’’তি (পরি. ৪৫৮) অঞ্ঞং সত্থারন্তি ইতো অঞ্ঞং তিত্থকরং ‘‘অযং মে সত্থা’’তি এৰং গণ্হেয্য, নেতং ঠানং ৰিজ্জতীতি অত্থো. ভৰসম্পদাতি সুগতিভৰেন সম্পদা, ইদং ৰিপাকফলং. ভোগসম্পদাতি মনুস্সভোগদেৰভোগেহি সম্পদা, ইদং পন আনিসংসফলং. ‘‘ৰুত্তঞ্হেত’’ন্তিআদিনা দেৰতাসংযুত্তাদিপাল়িং (সং. নি. ১.৩৭) সাধকভাৰেন দস্সেতি.

গতা ¶ সেতি এত্থ সে-ইতি নিপাতমত্তং. ন তে গমিস্সন্তি অপাযভূমিন্তি তে বুদ্ধং সরণং গতা তন্নিমিত্তং অপাযং ন গমিস্সন্তি. মানুসন্তি চ গাথাবন্ধৰসেন ৰিসঞ্ঞোগনিদ্দেসো, মনুস্সেসু জাতন্তি অত্থো. দেৰকাযন্তি দেৰসঙ্ঘং, দেৰপুরং ৰা ‘‘দেৰানং কাযো সমূহো এত্থা’’তি কত্ৰা.

‘‘অপরম্পী’’তিআদিনা সল়াযতনৰগ্গে মোগ্গল্লানসংযুত্তে (সং. নি. ৪.৩৪১) আগতং অঞ্ঞম্পি ফলমাহ, অপরম্পি ফলং মহামোগ্গল্লানত্থেরেন ৰুত্তন্তি অত্থো. অঞ্ঞে দেৰেতি অসরণঙ্গতে দেৰে. দসহি ঠানেহীতি দসহি কারণেহি. ‘‘দিব্বেনা’’তিআদি তস্সরূপদস্সনং. অধিগণ্হন্তীতি অভিভৰন্তি অতিক্কমিত্ৰা তিট্ঠন্তি. ‘‘এস নযো’’তি ইমিনা ‘‘সাধু খো দেৰানমিন্দ ধম্মসরণগমনং হোতী’’তি (সং. নি. ৪.৩৪১) সুত্তপদং অতিদিসতি. ৰেলামসুত্তং ¶ নাম অঙ্গুত্তরনিকাযে নৰনিপাতে জাতিগোত্তরূপভোগসদ্ধাপঞ্ঞাদীহি মরিযাদৰেলাতিক্কন্তেহি উল়ারেহি গুণেহি সমন্নাগতত্তা ৰেলামনামকস্স বোধিসত্তভূতস্স চতুরাসীতিসহস্সরাজূনং আচরিযব্রাহ্মণস্স দানকথাপটিসঞ্ঞুত্তং সুত্তং (অ. নি. ৯.২০) তত্থ হি করীসস্স চতুত্থভাগপ্পমাণানং চতুরাসীতিসহস্সসঙ্খ্যানং সুৰণ্ণপাতিরূপিযপাতিকংসপাতীনং যথাক্কমং রূপিযসুৰণ্ণ হিরঞ্ঞপূরানং, সব্বালঙ্কারপটিমণ্ডিতানং, চতুরাসীতিযা হত্থিসহস্সানং চতুরাসীতিযা অস্সসহস্সানং, চতুরাসীতিযা রথসহস্সানং, চতুরাসীতিযা ধেনুসহস্সানং, চতুরাসীতিযা কঞ্ঞাসহস্সানং, চতুরাসীতিযা পল্লঙ্কসহস্সানং, চতুরাসীতিযা ৰত্থকোটিসহস্সানং, অপরিমাণস্স চ খজ্জভোজ্জাদিভেদস্স আহারস্স পরিচ্চজনৰসেন সত্তমাসাধিকানি সত্তসংৰচ্ছরানি নিরন্তরং পৰত্তৰেলামমহাদানতো একস্স সোতাপন্নস্স দিন্নদানং মহপ্ফলতরং, ততো সতংসোতাপন্নানং দিন্নদানতো একস্স সকদাগামিনো, ততো একস্স অনাগামিনো, ততো একস্স অরহতো, ততো একস্স পচ্চেকবুদ্ধস্স, ততো সম্মাসম্বুদ্ধস্স, ততো বুদ্ধপ্পমুখস্স সঙ্ঘস্স দিন্নদানং মহপ্ফলতরং, ততো চাতুদ্দিসং সঙ্ঘং উদ্দিস্স ৰিহারকরণং, ততো সরণগমনং মহপ্ফলতরন্তি অযমত্থো পকাসিতো. ৰুত্তঞ্হেতং –

‘‘যং গহপতি ৰেলামো ব্রাহ্মণো দানং অদাসি মহাদানং, যো চেকং দিট্ঠিসম্পন্নং ভোজেয্য, ইদং ততো মহপ্ফলতরং, যো চ সতং দিট্ঠিসম্পন্নানং ভোজেয্য, যো চেকং সকদাগামিং ভোজেয্য, ইদং ততো মহপ্ফলতর’’ন্তিআদি (অ. নি. ৯.২০).

ইমিনা চ উক্কট্ঠপরিচ্ছেদতো লোকুত্তরস্সেৰ সরণগমনস্স ফলং দস্সিতন্তি ৰেদিতব্বং. তথা হি ¶ ৰেলামসুত্তট্ঠকথাযং ৰুত্তং ‘‘সরণং গচ্ছেয্যাতি এত্থ মগ্গেনাগতং অনিৰত্তনসরণং অধিপ্পেতং, অপরে পনাহু ‘অত্তানং নিয্যাতেত্ৰা দিন্নত্তা সরণগমনং ততো মহপ্ফলতর’ন্তি ৰুত্ত’’ন্তি (অ. নি. অট্ঠ. ৩.৯.২০) কূটদন্তসুত্তট্ঠকথাযং পন ৰক্খতি ‘‘যস্মা চ সরণগমনং নাম তিণ্ণং রতনানং জীৰিতপরিচ্চাগমযং পুঞ্ঞকম্মং সগ্গসম্পত্তিং দেতি, তস্মা মহপ্ফলতরঞ্চ মহানিসংসতরঞ্চাতি ৰেদিতব্ব’’ন্তি (দী. নি. অট্ঠ. ১.৩৫০, ৩৫১) ইমিনা পন ¶ নযেন লোকিযস্সাপি সরণগমনস্স ফলং ইধ দস্সিতমেৰাতি গহেতব্বং. আচরিযধম্মপালত্থেরেনপি (দী. নি. টী. ১.২৫০) হি অযমেৰত্থো ইচ্ছিতোতি ৰিঞ্ঞাযতি ইধ চেৰ অঞ্ঞাসু চ মজ্ঝিমাগমটীকাদীসু অৰিসেসতোযেৰ ৰুত্তত্তা, আচরিযসারিপুত্তত্থেরেনাপি অযমত্থো অভিমতো সিযা সারত্থদীপনিযং, (সারত্থ. টী. ৰেরঞ্জকঅণ্ডৰণ্ণনা.১৫) অঙ্গুত্তরটীকাযঞ্চ তদুভযসাধারণৰচনতো. অপরে পন ৰদন্তি ‘‘কূটদন্তসুত্তট্ঠকথাযম্পি (দী. নি. টী. ১.২৪৯) লোকুত্তরস্সেৰ সরণগমনস্স ফলং ৰুত্ত’’ন্তি, তদযুত্তমেৰ তথা অৰুত্তত্তা. ‘‘যস্মা…পে… দেতী’’তি হি তদুভযসাধারণকারণৰসেন তদুভযস্সাপি ফলং তত্থ ৰুত্তন্তি. ৰেলামসুত্তাদীনন্তি এত্থ আদিসদ্দেন (অ. নি. ৪.৩৪; ইতিৰু. ৯০) অগ্গপ্পসাদসুত্তছত্তমাণৰকৰিমানাদীনং (ৰি. ৰ. ৮৮৬ আদযো) সঙ্গহো দট্ঠব্বো.

অঞ্ঞাণং নাম ৰত্থুত্তযস্স গুণানমজাননং তত্থ সম্মোহো. সংসযো নাম ‘‘বুদ্ধো নু খো, ন নু খো’’তিআদিনা (দী. নি. অট্ঠ. ২.২১৬) ৰিচিকিচ্ছা. মিচ্ছাঞাণং নাম ৰত্থুত্তযস্স গুণানং অগুণভাৰপরিকপ্পনেন ৰিপরীতগ্গাহো. আদিসদ্দেন অনাদরাগারৰাদীনং সঙ্গহো. সংকিলিস্সতীতি সংকিলিট্ঠং মলীনং ভৰতি. ন মহাজুতিকন্তিআদিপি সংকিলেসপরিযাযো এৰ. তত্থ ন মহাজুতিকন্তি ন মহুজ্জলং, অপরিসুদ্ধং অপরিযোদাতন্তি অত্থো. ন মহাৰিপ্ফারন্তি ন মহানুভাৰং, অপণীতং অনুল়ারন্তি অত্থো. সাৰজ্জোতি তণ্হাদিট্ঠাদিৰসেন সদোসো. তদেৰ ফলৰসেন ৰিভাৰেতুং ‘‘অনিট্ঠফলো’’তি ৰুত্তং, সাৰজ্জত্তা অকন্তিফলো হোতীতি অত্থো. লোকিযসরণগমনং সিক্খাসমাদানং ৰিয অগহিতকালপরিচ্ছেদং জীৰিতপরিযন্তমেৰ হোতি, তস্মা তস্স খন্ধভেদেন ভেদো, সো চ তণ্হাদিট্ঠাদিৰিরহিতত্তা অদোসোতি আহ ‘‘অনৰজ্জো কালকিরিযায হোতী’’তি. সোতি অনৰজ্জো সরণগমনভেদো. সতিপি অনৰজ্জত্তে ইট্ঠফলোপি ন হোতি, পগেৰ অনিট্ঠফলো অৰিপাকত্তা. ন হি তং অকুসলং হোতি, অথ খো ভেদনমত্তন্তি অধিপ্পাযো. ভৰন্তরেপীতি অঞ্ঞস্মিম্পি ভৰে.

ধরসদ্দস্স দ্ৰিকম্মিকত্তা ‘‘উপাসক’’ন্তি ইদম্পি কম্মমেৰ, তঞ্চ খো আকারট্ঠানেতি অত্থমত্তং দস্সেতুং ‘‘উপাসকো অযন্তি এৰং ধারেতূ’’তি ¶ ৰুত্তং. ধারেতূতি চ উপধারেতূতি অত্থো. উপধারণঞ্চেত্থ ¶ জাননমেৰাতি দস্সেতি ‘‘জানাতূ’’তি ইমিনা. উপাসকৰিধিকোসল্লত্থন্তি উপাসকভাৰৰিধানকোসল্লত্থং. কো উপাসকোতি সরূপপুচ্ছা, কিং লক্খণো উপাসকো নামাতি ৰুত্তং হোতি. কস্মাতি হেতুপুচ্ছা, কেন পৰত্তিনিমিত্তেন উপাসকসদ্দো তস্মিং পুগ্গলে নিরুল়্হোতি অধিপ্পাযো. তেনাহ ‘‘কস্মা উপাসকোতি ৰুচ্চতী’’তি. সদ্দস্স হি অভিধেয্যে পৰত্তিনিমিত্তমেৰ তদত্থস্স তব্ভাৰকারণং. কিমস্স সীলন্তি ৰতসমাদানপুচ্ছা, কীদিসং অস্স উপাসকস্স সীলং, কিত্তকেন ৰতসমাদানেনাযং সীলসম্পন্নো নাম হোতীতি অত্থো. কো আজীৰোতি কম্মসমাদানপুচ্ছা, কো অস্স সম্মাআজীৰো, কেন কম্মসমাদানেন অস্স আজীৰো সম্ভৰতীতি পুচ্ছতি, সো পন মিচ্ছাজীৰস্স পরিৰজ্জনেন হোতীতি মিচ্ছাজীৰোপি ৰিভজীযতি. কা ৰিপত্তীতি তদুভযেসং ৰিপ্পটিপত্তিপুচ্ছা, কা অস্স উপাসকস্স সীলস্স, আজীৰস্স চ ৰিপত্তীতি অত্থো. সামঞ্ঞনিদ্দিট্ঠে হি সতি অনন্তরস্সেৰ ৰিধি ৰা পটিসেধো ৰাতি অনন্তরস্স গহণং. কা সম্পত্তীতি তদুভযেসমেৰ সম্মাপটিপত্তিপুচ্ছা, কা অস্স উপাসকস্স সীলস্স, আজীৰস্স চ সম্পত্তীতি ৰুত্তনযেন অত্থো. সরূপৰচনত্থাদিসঙ্খাতেন পকারেন কিরতীতি পকিণ্ণং, তদেৰ পকিণ্ণকং, অনেকাকারেন পৰত্তং অত্থৰিনিচ্ছযন্তি অত্থো.

যো কোচীতি খত্তিযব্রাহ্মণাদীসু যো কোচি, ইমিনা পদেন অকারণমেত্থ জাতিআদিৰিসেসোতি দস্সেতি, ‘‘সরণগতো’’তি ইমিনা পন সরণগমনমেৰেত্থ পমাণন্তি. ‘‘গহট্ঠো’’তি চ ইমিনা আগারিকেস্ৰেৰ উপাসকসদ্দো নিরুল়্হো, ন পব্বজ্জূপগতেসূতি. তমত্থং মহাৰগ্গসংযুত্তে মহানামসুত্তেন (সং. নি. ৫.১০৩৩) সাধেন্তো ‘‘ৰুত্তঞ্হেত’’ন্তিআদিমাহ. তত্থ যতোতি বুদ্ধাদিসরণগমনতো. মহানামাতি অত্তনো চূল়পিতুনো সুক্কোদনস্স পুত্তং মহানামং নাম সক্যরাজানং ভগৰা আলপতি. এত্তাৰতাতি এত্তকেন বুদ্ধাদিসরণগমনেন উপাসকো নাম হোতি, ন জাতিআদীহি কারণেহীতি অধিপ্পাযো. কামঞ্চ তপুস্সভল্লিকানং ৰিয দ্ৰেৰাচিকউপাসকভাৰোপি অত্থি, সো পন তদা ৰত্থুত্তযাভাৰতো কদাচিযেৰ হোতীতি সব্বদা পৰত্তং তেৰাচিকউপাসকভাৰং ¶ দস্সেতুং ‘‘সরণগতো’’তি ৰুত্তং. তেপি হি পচ্ছা তিসরণগতা এৰ, ন চেত্থ সম্ভৰতি অঞ্ঞং পটিক্খিপিত্ৰা একং ৰা দ্ৰে ৰা সরণগতো উপাসকো নামাতি ইমমত্থম্পি ঞাপেতুং এৰং ৰুত্তন্তি দট্ঠব্বং.

উপাসনতোতি তেনেৰ সরণগমনেন, তত্থ চ সক্কচ্চকারিতায গারৰবহুমানাদিযোগেন পযিরুপাসনতো, ইমিনা কত্ৰত্থং দস্সেতি. তেনাহ ‘‘সো হী’’তিআদি.

ৰেরমণিযোতি ¶ এত্থ ৰেরং ৰুচ্চতি পাণাতিপাতাদিদুস্সীল্যং, তস্স মণনতো হননতো ৰিনাসনতো ৰেরমণিযো নাম, পঞ্চ ৰিরতিযো ৰিরতিপধানত্তা তস্স সীলস্স. তথা হি উদাহটে মহানামসুত্তে ৰুত্তং ‘‘পাণাতিপাতা পটিৰিরতো হোতী’’তিআদি (সং. নি. ৫.১০৩৩) ‘‘যথাহা’’তিআদিনা সাধকং, সরূপঞ্চ দস্সেতি যথা তং উয্যানপালস্স একেনেৰ উদকপতিট্ঠানপযোগেন অম্বসেচনং, গরুসিনানঞ্চ. যথাহ অম্বৰিমানে (ৰি. ৰ. ১১৫১ আদযো) –

‘‘অম্বো চ সিত্তো সমণো চ ন্হাপিতো,

মযা চ পুঞ্ঞং পসুতং অনপ্পকং;

ইতি সো পীতিযা কাযং, সব্বং ফরতি অত্তনো’’তি.

[‘‘অম্বো চ সিঞ্চতো আসি, সমণো চ নহাপিতো;

বহুঞ্চ পুঞ্ঞং পসুতং, অহো সফলং জীৰিত’’ন্তি. (ইধ টীকাযং মূলপাঠো)]

এৰমীদিসেসু. এত্তাৰতাতি এত্তকেন পঞ্চৰেরৰিরতিমত্তেন.

মিচ্ছাৰণিজ্জাতি অযুত্তৰণিজ্জা, ন সম্মাৰণিজ্জা, অসারুপ্পৰণিজ্জকম্মানীতি অত্থো. পহাযাতি অকরণেনেৰ পজহিত্ৰা. ধম্মেনাতি ধম্মতো অনপেতেন, তেন মিচ্ছাৰণিজ্জকম্মেন আজীৰনতো অঞ্ঞম্পি অধম্মিকং আজীৰনং পটিক্খিপতি. সমেনাতি অৰিসমেন, তেন কাযৰিসমাদিদুচ্চরিতং ৰজ্জেত্ৰা কাযসমাদিনা সুচরিতেন আজীৰনং দস্সেতি. ‘‘ৰুত্তঞ্হেত’’ন্তিআদিনা পঞ্চঙ্গুত্তরপাল়িমাহরিত্ৰা সাধকং, সরূপঞ্চ দস্সেতি. ৰাণিজানং অযন্তি ৰণিজ্জা, যস্স কস্সচি ৰিক্কযো, ইত্থিলিঙ্গপদমেতং. সত্থৰণিজ্জাতি আৰুধভণ্ডং কত্ৰা ৰা কারেত্ৰা ৰা ¶ যথাকতং পটিলভিত্ৰা ৰা তস্স ৰিক্কযো. সত্তৰণিজ্জাতি মনুস্সৰিক্কযো. মংসৰণিজ্জাতি সূনকারাদযো ৰিয মিগসূকরাদিকে পোসেত্ৰা মংসং সম্পাদেত্ৰা ৰিক্কযো. মজ্জৰণিজ্জাতি যং কিঞ্চি মজ্জং যোজেত্ৰা তস্স ৰিক্কযো. ৰিসৰণিজ্জাতি ৰিসং যোজেত্ৰা, সঙ্গহেত্ৰা ৰা তস্স ৰিক্কযো. তত্থ সত্থৰণিজ্জা পরোপরোধনিমিত্ততায অকরণীযাতি ৰুত্তা, সত্তৰণিজ্জা অভুজিস্সভাৰকরণতো, মংসৰণিজ্জা ৰধহেতুতো, মজ্জৰণিজ্জা পমাদট্ঠানতো, ৰিসৰণিজ্জা পরূপঘাতকারণতো.

তস্সেৰাতি যথাৰুত্তস্স পঞ্চৰেরমণিলক্খণস্স সীলস্স চেৰ পঞ্চমিচ্ছাৰণিজ্জাদিপ্পহানলক্খণস্স আজীৰস্স চ পটিনিদ্দেসো. ৰিপত্তীতি ভেদো, পকোপো চ ¶ . এৰং সীলআজীৰৰিপত্তিৰসেন উপাসকস্স ৰিপত্তিং দস্সেত্ৰা অস্সদ্ধিযাদিৰসেনপি দস্সেন্তো ‘‘অপিচা’’তিআদিমাহ. যাযাতি অস্সদ্ধিযাদিৰিপ্পটিপত্তিযা. চণ্ডালোতি নীচধম্মজাতিকট্ঠেন উপাসকচণ্ডালো. মলন্তি মলীনট্ঠেন উপাসকমলং. পতিকিট্ঠোতি লামকট্ঠেন উপাসকনিহীনো. সাপিস্সাতি সাপি অস্সদ্ধিযাদিৰিপ্পটিপত্তি অস্স উপাসকস্স ৰিপত্তীতি ৰেদিতব্বা. কা পনাযন্তি ৰুত্তং ‘‘তে চা’’তিআদি. উপাসকচণ্ডালসুত্তং, (অ. নি. ৫.১৭৫) উপাসকরতনসুত্তঞ্চ পঞ্চঙ্গুত্তরে. তত্থ বুদ্ধাদীসু, কম্মকম্মফলেসু চ সদ্ধাৰিপরিযাযো মিচ্ছাৰিমোক্খো অস্সদ্ধিযং, তেন সমন্নাগতো অস্সদ্ধো. যথাৰুত্তসীলৰিপত্তিআজীৰৰিপত্তিৰসেন দুস্সীলো. ‘‘ইমিনা দিট্ঠাদিনা ইদং নাম মঙ্গলং হোতী’’তি এৰং বালজনপরিকপ্পিতেন কোতূহলসঙ্খাতেন দিট্ঠসুতমুতমঙ্গলেন সমন্নাগতো কোতূহলমঙ্গলিকো. মঙ্গলং পচ্চেতীতি দিট্ঠমঙ্গলাদিভেদং মঙ্গলমেৰ পত্তিযাযতি নো কম্মন্তি কম্মস্সকতং নো পত্তিযাযতি. ইতো চ বহিদ্ধাতি ইতো সব্বঞ্ঞুবুদ্ধসাসনতো বহিদ্ধা বাহিরকসমযে. চ-সদ্দো অট্ঠানপযুত্তো, সব্বত্থ ‘‘অস্সদ্ধো’’তিআদীসু যোজেতব্বো. দক্খিণেয্যং পরিযেসতীতি দুপ্পটিপন্নং দক্খিণারহসঞ্ঞী গৰেসতি. তত্থাতি বহিদ্ধা বাহিরকসমযে. পুব্বকারং করোতীতি পঠমতরং দানমাননাদিকং কুসলকিরিযং করোতি, বাহিরকসমযে পঠমতরং কুসলকিরিযং কত্ৰা পচ্ছা সাসনে করোতীতি ৰুত্তং হোতীতি ¶ . তত্থাতি ৰা তেসং বাহিরকানং তিত্থিযানন্তিপি ৰদন্তি. এত্থ চ দক্খিণেয্যপরিযেসনপুব্বকারে একং কত্ৰা পঞ্চ ধম্মা ৰেদিতব্বা.

অস্সাতি উপাসকস্স. সীলসম্পদাতি যথাৰুত্তেন পঞ্চৰেরমণিলক্খণেন সীলেন সম্পদা. আজীৰসম্পদাতি পঞ্চমিচ্ছাৰণিজ্জাদিপ্পহানলক্খণেন আজীৰেন সম্পদা. এৰং সীলসম্পদাআজীৰসম্পদাৰসেন উপাসকস্স সম্পত্তিং দস্সেত্ৰা সদ্ধাদিৰসেনপি দস্সেন্তো ‘‘যে চস্সা’’তিআদিমাহ. যে চ পঞ্চ ধম্মা, তেপি অস্স সম্পত্তীতি যোজনা. ধম্মেহীতি গুণেহি. চতুন্নং পরিসানং রতিজননট্ঠেন উপাসকোৰ রতনং উপাসকরতনং. গুণসোভাকিত্তিসদ্দসুগন্ধতাদীহি উপাসকোৰ পদুমং উপাসকপদুমং. তথা উপাসকপুণ্ডরীকং. সেসং ৰিপত্তিযং ৰুত্তৰিপরিযাযেন ৰেদিতব্বং.

নিগণ্ঠীনন্তি নিগণ্ঠসমণীনং. আদিম্হীতি পঠমত্থে. উচ্ছগ্গন্তি উচ্ছুঅগ্গং উচ্ছুকোটি. তথা ৰেল়গ্গন্তি এত্থাপি. কোটিযন্তি পরিযন্তকোটিযং, পরিযন্তত্থেতি অত্থো. অম্বিলগ্গন্তি অম্বিলকোট্ঠাসং. তথা তিত্তকগ্গন্তি এত্থাপি. ৰিহারগ্গেনাতি ওৰরককোট্ঠাসেন ‘‘ইমস্মিং গব্ভে ৰসন্তানং ইদং নাম ফলং পাপুণাতী’’তিআদিনা তংতংৰসনট্ঠানকোট্ঠাসেনাতি অত্থো ¶ . পরিৰেণগ্গেনাতি এত্থাপি এসেৰ নযো. অগ্গেতি এত্থ উপযোগৰচনস্স একারাদেসো, ৰচনৰিপল্লাসো ৰা, কত্ৰা-সদ্দো চ সেসোতি ৰুত্তং ‘‘আদিং কত্ৰা’’তি. ভাৰত্থে তা-সদ্দোতি দস্সেতি ‘‘অজ্জভাৰ’’ন্তি ইমিনা, অজ্জভাৰো চ নাম তস্মিং ধম্মস্সৰনসমযে ধরমানকতাপাপুণকভাৰো. তদা হি তং নিস্সযৰসেন ধরমানতং নিমিত্তং কত্ৰা তংদিৰসনিস্সিতঅরুণুগ্গমনতো পট্ঠায যাৰ পুন অরুণুগ্গমনা এত্থন্তরে অজ্জসদ্দো পৰত্ততি, তস্মা তস্মিং সমযে ধরমানকতাসঙ্খাতং অজ্জভাৰং আদিং কত্ৰাতি অত্থো দট্ঠব্বো. অজ্জতন্তি ৰা অজ্জইচ্চেৰ অত্থো তা-সদ্দস্স সকত্থৰুত্তিতো যথা ‘‘দেৰতা’’তি, অযং আচরিযানং মতি. এৰং পঠমক্খরেন দিস্সমানপাঠানুরূপং অত্থং দস্সেত্ৰা ইদানি ততিযক্খরেন দিস্সমানপাঠানুরূপং অত্থং দস্সেতুং ‘‘অজ্জদগ্গেতি ৰা পাঠো’’তিআদি ৰুত্তং. আগমমত্তত্তা দকারো পদসন্ধিকরো. অজ্জাতি হি নেপাতিকমিদং পদং. তেনাহ ‘‘অজ্জ অগ্গন্তি অত্থো’’তি.

‘‘পাণো’’তি ইদং পরমত্থতো জীৰিতিন্দ্রিযে এৰ, ‘‘পাণুপেত’’ন্তি চ করণত্থেনেৰ সমাসোতি ঞাপেতুং ‘‘যাৰ মে জীৰিতং পৰত্ততি, তাৰ ¶ উপেত’’ন্তি আহ. উপেতি উপগচ্ছতীতি হি উপেতো, পাণেহি করণভূতেহি উপেতো পাণুপেতোতি অত্থো আচরিযেহি অভিমতো. ইমিনা চ ‘‘পাণুপেতন্তি ইদং পদং তস্স সরণগমনস্স আপাণকোটিকতাদস্সন’’ন্তি ইমমত্থং ৰিভাৰেতি. ‘‘পাণুপেত’’ন্তি হি ইমিনা যাৰ মে পাণা ধরন্তি, তাৰ সরণং উপেতো, উপেন্তো চ ন ৰাচামত্তেন, ন চ একৰারং চিত্তুপ্পাদমত্তেন, অথ খো পাণানং পরিচ্চজনৰসেন যাৰজীৰং উপেতোতি আপাণকোটিকতা দস্সিতা. ‘‘তীহি…পে… গত’’ন্তি ইদং ‘‘সরণং গত’’ন্তি এতস্স অত্থৰচনং. ‘‘অনঞ্ঞসত্থুক’’ন্তি ইদং পন অন্তোগধাৰধারণেন, অঞ্ঞত্থাপোহনেন চ নিৰত্তেতব্বত্থদস্সনং. একচ্চো কপ্পিযকারকসদ্দস্স অত্থো উপাসকসদ্দস্স ৰচনীযোপি ভৰতীতি ৰুত্তং ‘‘উপাসকং কপ্পিযকারক’’ন্তি, অত্তসন্নিয্যাতনসরণগমনং ৰা সন্ধায এৰং ৰুত্তন্তি দট্ঠব্বং. এৰং ‘‘পাণুপেত’’ন্তি ইমিনা নীতত্থতো দস্সিতং তস্স সরণগমনস্স আপাণকোটিকতং দস্সেত্ৰা এৰং ৰদন্তো পনেস রাজা ‘‘জীৰিতেন সহ ৰত্থুত্তযং পটিপূজেন্তো সরণগমনং রক্খামী’’তি অধিপ্পাযং ৰিভাৰেতীতি নেয্যত্থতো ৰিভাৰিতং তস্স রঞ্ঞো অধিপ্পাযং ৰিভাৰেন্তো ‘‘অহঞ্হী’’তিআদিমাহ. তত্থ হি-সদ্দো সমত্থনে, কারণত্থে ৰা, তেন ইমায যুত্তিযা, ইমিনা ৰা কারণেন উপাসকং মং ভগৰা ধারেতূতি অযমত্থো পকাসিতো.

অচ্চযনং সাধুমরিযাদং অতিক্কম্ম মদ্দিত্ৰা পৰত্তনং অচ্চযো, কাযিকাদিঅজ্ঝাচারসঙ্খাতো দোসোতি আহ ‘‘অপরাধো’’তি, অচ্চেতি অভিভৰিত্ৰা পৰত্ততি এতেনাতি ¶ ৰা অচ্চযো, কাযিকাদিৰীতিক্কমস্স পৰত্তনকো অকুসলধম্মসঙ্খাতো দোসো এৰ, সো চ অপরজ্ঝতি এতেনাতি অপরাধোতি ৰুচ্চতি. সো হি অপরজ্ঝন্তং পুরিসং অভিভৰিত্ৰা পৰত্ততি. তেনাহ ‘‘অতিক্কম্ম অভিভৰিত্ৰা পৰত্তো’’তি. ধম্মন্তি দসরাজধম্মং. ৰিত্থারো পনেতস্স মহাহংসজাতকাদীহি ৰিভাৰেতব্বো. চরতীতি আচরতি করোতি. ধম্মেনেৰাতি ধম্মতো অনপেতেনেৰ, অনপেতকুসলধম্মেনেৰাতি অত্থো. তেনাহ ‘‘ন পিতুঘাতনাদিনা অধম্মেনা’’তি. ‘‘পটিগ্গণ্হাতূ’’তি এতস্স অধিৰাসনং সম্পটিচ্ছতূতি সদ্দতো অত্থো, অধিপ্পাযতো পন ¶ অত্থং দস্সেতুং ‘‘খমতূ’’তি ৰুত্তং. পুন অকরণমেত্থ সংৰরোতি দস্সেতি ‘‘পুন এৰরূপস্সা’’তিআদিনা. ‘‘অপরাধস্সা’’তিআদি অঞ্ঞমঞ্ঞং ৰেৰচনং.

২৫১. ‘‘যথাধম্মো ঠিতো, তথেৰা’’তি ইমিনাপি যথা-সদ্দস্স অনুরূপত্থমাহ, সাধুসমাচিণ্ণকুসলধম্মানুরূপন্তি অত্থো. পটিসদ্দস্স অনত্থকতং দস্সেতি ‘‘করোসী’’তি ইমিনা. পটিকম্মং করোসীতিপি ৰদন্তি. যথাধম্মং পটিকরণং নাম কতাপরাধস্স খমাপনমেৰাতি আহ ‘‘খমাপেসীতি ৰুত্তং হোতী’’তি. ‘‘পটিগ্গণ্হামা’’তি এতস্স অধিৰাসনং সম্পটিচ্ছামাতি অত্থং দস্সেতি ‘‘খমামা’’তি ইমিনা. ৰুদ্ধি হেসাতি এত্থ হ-কারো পদসিলিট্ঠতায আগমো, হি-সদ্দো ৰা নিপাতমত্তং. এসাতি যথাধম্মং পটিকিরিযা, আযতিং সংৰরাপজ্জনা চ. তেনাহ ‘‘যো অচ্চযং…পে… আপজ্জতী’’তি. সদেৰকেন লোকেন ‘‘সরণ’’ন্তি অরণীযতো উপগন্তব্বতো তথাগতো অরিযো নামাতি ৰুত্তং ‘‘বুদ্ধস্স ভগৰতো’’তি. ৰিনেতি সত্তে এতেনাতি ৰিনযো, সাসনং. ৰদ্ধতি সগ্গমোক্খসম্পত্তি এতাযাতি ৰুদ্ধি. কতমা পন সা, যা ‘‘এসা’’তি নিদ্দিট্ঠা ৰুদ্ধীতি চোদনমপনেতুং ‘‘যো অচ্চয’’ন্তিআদি ৰুত্তন্তি সম্বন্ধং দস্সেতি ‘‘কতমা’’তিআদিনা, যা অযং সংৰরাপজ্জনা, সা ‘‘এসা’’তি নিদ্দিট্ঠা ৰুদ্ধি নামাতি অত্থো. ‘‘যথাধম্মং পটিকরোতী’’তি ইদং আযতিং সংৰরাপজ্জনায পুব্বকিরিযাদস্সনন্তি ৰিঞ্ঞাপনত্থং ‘‘যথাধম্মং পটিকরিত্ৰা আযতিং সংৰরাপজ্জনা’’তি ৰুত্তং. এসা হি আচরিযানং পকতি, যদিদং যেন কেনচি পকারেন অধিপ্পাযন্তরৰিঞ্ঞাপনং, এতপদেন পন তস্সাপি পটিনিদ্দেসো সম্ভৰতি ‘‘যথাধম্মং পটিকরোতী’’ তিপি পটিনিদ্দিসিতব্বস্স দস্সনতো. কেচি পন ‘‘যথাধম্মং পটিকরোতী’তি ইদং পুব্বকিরিযামত্তস্সেৰ দস্সনং, ন পটিনিদ্দিসিতব্বস্স. ‘আযতিঞ্চ সংৰরং আপজ্জতী’তি ইদং পন পটিনিদ্দিসিতব্বস্সেৰাতি ৰিঞ্ঞাপনত্থং এৰং ৰুত্ত’’ন্তি ৰদন্তি, তদযুত্তমেৰ খমাপনস্সাপি ৰুদ্ধিহেতুভাৰেন অরিযূপৰাদে ৰুত্তত্তা. ইতরথা হি খমাপনাভাৰেপি আযতিং সংৰরাপজ্জনায এৰ অরিযূপৰাদাপগমনং ৰুত্তং সিযা, ন চ পন ৰুত্তং, তস্মা ৰুত্তনযেনেৰ অত্থো ৰেদিতব্বোতি.

কস্মা পন ¶ ‘‘যায’’ন্তিআদিনা ধম্মনিদ্দেসো দস্সিতো, ননু পাল়িযং ‘‘যো অচ্চয’’ন্তিআদিনা পুগ্গলনিদ্দেসো কতোতি চোদনং সোধেতুং ‘‘দেসনং পনা’’তিআদি আরদ্ধং. পুগ্গলাধিট্ঠানং করোন্তোতি পুগ্গলাধিট্ঠানধম্মদেসনং ¶ করোন্তো. পুগ্গলাধিট্ঠানাপি হি পুগ্গলাধিট্ঠানধম্মদেসনা, পুগ্গলাধিট্ঠানপুগ্গলদেসনাতি দুৰিধা হোতি. অযমেত্থাধিপ্পাযো – কিঞ্চাপি ‘‘ৰুদ্ধি হেসা’’তিআদিনা ধম্মাধিট্ঠানদেসনা আরদ্ধা, তথাপি পুন পুগ্গলাধিট্ঠানং করোন্তেন ‘‘যো অচ্চয’’ন্তিআদিনা পুগ্গলাধিট্ঠানদেসনা আরদ্ধা দেসনাৰিলাসৰসেন, ৰেনেয্যজ্ঝাসযৰসেন চাতি. তদুভযৰসেনেৰ হি ধম্মাধিট্ঠানাদিভেদেন চতুব্বিধা দেসনা.

২৫২. ৰচসাযত্তেতি ৰচসা আযত্তে. ৰাচাপটিবন্ধত্তেতি ৰদন্তি, তং ‘‘সো হী’’তিআদিনা ৰিরুদ্ধং ৰিয দিস্সতি. ৰচসাযত্থেতি পন ৰাচাপরিযোসানত্থেতি অত্থো যুত্তো ওসানকরণত্থস্স সাসদ্দস্স ৰসেন সাযসদ্দনিপ্ফত্তিতো যথা ‘‘দাযো’’তি. এৰঞ্হি সমত্থনৰচনম্পি উপপন্নং হোতি. গমনায কতং ৰাচাপরিযোসানং কত্ৰা ৰুত্তত্তা তস্মিংযেৰ অত্থে ৰত্ততীতি. হন্দসদ্দঞ্হি চোদনত্থে, ৰচসগ্গত্থে চ ইচ্ছন্তি. ‘‘হন্দ দানি ভিক্খৰে আমন্তযামী’’তিআদীসু (দী. নি. ২.২১৮; সং. নি. ১.১৮৬) হি চোদনত্থে, ‘‘হন্দ দানি অপাযামী’’তিআদীসু (জা. ২.২২.৮৪৩) ৰচসগ্গত্থে, ৰচসগ্গো চ নাম ৰাচাৰিস্সজ্জনং, তঞ্চ ৰাচাপরিযোসানমেৰাতি দট্ঠব্বং. দুক্করকিচ্চৰসেন বহুকিচ্চতাতি আহ ‘‘বলৰকিচ্চা’’তি. ‘‘অৰস্সং কত্তব্বং কিচ্চং, ইতরং করণীযং. পঠমং ৰা কত্তব্বং কিচ্চং, পচ্ছা কত্তব্বং করণীযং. খুদ্দকং ৰা কিচ্চং, মহন্তং করণীয’’ন্তিপি উদানট্ঠকথাদীসু (উদা. অট্ঠ. ১৫) ৰুত্তং. যং-তং-সদ্দানং নিচ্চসম্বন্ধত্তা, গমনকালজাননতো, অঞ্ঞকিরিযায চ অনুপযুত্তত্তা ‘‘তস্স কালং ত্ৰমেৰ জানাসী’’তি ৰুত্তং. ইদং ৰুত্তং হোতি ‘‘তযা ঞাতং গমনকালং ত্ৰমেৰ ঞত্ৰা গচ্ছাহী’’তি. অথ ৰা যথা কত্তব্বকিচ্চনিযোজনে ‘‘ইমং জান, ইমং দেহি, ইমং আহরা’’তি (পাচি. ৮৮, ৯৩) ৰুত্তং, তথা ইধাপি তযা ঞাতং কালং ত্ৰমেৰ জানাসি, গমনৰসেন করোহীতি গমনে নিযোজেতীতি দস্সেতুং ‘‘ত্ৰমেৰ জানাসী’’তি পাঠসেসো ৰুত্তোতি দট্ঠব্বং. ‘‘তিক্খত্তুং পদক্খিণং কত্ৰা’’তিআদি যথাসমাচিণ্ণং পকরণাধিগতমত্তং দস্সেতুং ৰুত্তং. তত্থ পদক্খিণন্তি পকারতো কতং দক্খিণং. তেনাহ ‘‘তিক্খত্তু’’ন্তি. দসনখসমোধানসমুজ্জলন্তি দ্ৰীসু হত্থেসু জাতানং দসন্নং নখানং সমোধানেন একীভাৰেন সমুজ্জলন্তং, তেন দ্ৰিন্নং করতলানং সমট্ঠপনং ¶ দস্সেতি. অঞ্জলিন্তি হত্থপুটং. অঞ্জতি ব্যত্তিং পকাসেতি এতাযাতি অঞ্জলি. অঞ্জু-সদ্দঞ্হি ব্যত্তিযং, অলিপচ্চযঞ্চ ইচ্ছন্তি সদ্দৰিদূ. অভিমুখোৰাতি সম্মুখো এৰ, ন ভগৰতো পিট্ঠিং দস্সেত্ৰাতি অত্থো. পঞ্চপ্পতিট্ঠিতৰন্দনানযো ৰুত্তো এৰ.

২৫৩. ইমস্মিংযেৰ ¶ অত্তভাৰে ৰিপচ্চনকানং অত্তনো পুব্বে কতকুসলমূলানং খণনেন খতো, তেসমেৰ উপহননেন উপহতো, পদদ্ৰযেনপি তস্স কম্মাপরাধমেৰ দস্সেতি পরিযাযৰচনত্তা পদদ্ৰযস্স. কুসলমূলসঙ্খাতপতিট্ঠাভেদনেন খতূপহতভাৰং দস্সেতুং ‘‘ভিন্নপতিট্ঠো জাতো’’তি ৰুত্তং. পতিট্ঠা, মূলন্তি চ অত্থতো একং. পতিট্ঠহতি সম্মত্তনিযামোক্কমনং এতাযাতি হি পতিট্ঠা, তস্স কুসলূপনিস্সযসম্পদা, সা কিরিযাপরাধেন ভিন্না ৰিনাসিতা এতেনাতি ভিন্নপতিট্ঠো. তদেৰ ৰিত্থারেন্তো ‘‘তথা’’তিআদিমাহ. যথা কুসলমূলসঙ্খাতা অত্তনো পতিট্ঠানজাতা, তথা অনেন রঞ্ঞা অত্তনাৰ অত্তা খতো খনিতোতি যোজনা. খতোতি হি ইদং ইধ কম্মৰসেন সিদ্ধং, পাল়িযং পন কত্তুৰসেনাতি দট্ঠব্বং. পদদ্ৰযস্স পরিযাযত্তা ‘‘উপহতো’’তি ইধ ন ৰুত্তং.

‘‘রাগো রজো ন চ পন রেণু ৰুচ্চতী’’তিআদি (মহানি. ২০৯; চূল়নি. ৭৪) ৰচনতো রাগদোসমোহাৰ ইধ রজো নামাতি ৰুত্তং ‘‘রাগরজাদিৰিরহিত’’ন্তি. ৰীতসদ্দস্স ৰিগতপরিযাযতং দস্সেতি ‘‘ৰিগতত্তা’’তি ইমিনা. ধম্মেসু চক্খুন্তি চতুসচ্চধম্মেসু পৰত্তং তেসং দস্সনট্ঠেন চক্খুং. ধম্মেসূতি ৰা হেট্ঠিমেসু তীসু মগ্গধম্মেসু. চক্খুন্তি সোতাপত্তিমগ্গসঙ্খাতং একং চক্খুং, সমুদাযেকদেসৰসেন আধারত্থসমাসোযং, ন তু নিদ্ধারণত্থসমাসো. সো হি সাসনগন্থেসু, সক্কতগন্থেসু চ সব্বত্থ পটিসিদ্ধোতি. ধম্মমযন্তি সমথৰিপস্সনাধম্মেন নিব্বত্তং, ইমিনা ‘‘ধম্মেন নিব্বত্তং চক্খু ধম্মচক্খূ’’তি অত্থমাহ. অপিচ ধম্মমযন্তি সীলাদিতিৰিধধম্মক্খন্ধোযেৰ ময-সদ্দস্স সকত্থে পৰত্তনতো, অনেন ‘‘ধম্মোযেৰ চক্খু ধম্মচক্খূ’’তি অত্থমাহ. অঞ্ঞেসু ঠানেসূতি অঞ্ঞেসু সুত্তপদেসেসু, এতেন যথাপাঠং তিৰিধত্থতং দস্সেতি. ইধ পন সোতাপত্তিমগ্গস্সেৰেতং অধিৰচনং, তস্মিম্পি অনধিগতে অঞ্ঞেসং ৰত্তব্বতাযেৰ অভাৰতোতি অধিপ্পাযো.

ইদানি ¶ ‘‘খতাযং ভিক্খৰে রাজা’’তিআদিপাঠস্স সুৰিঞ্ঞেয্যমধিপ্পাযং দস্সেন্তো ‘‘ইদং ৰুত্তং হোতী’’তিআদিমাহ. তত্থ নাভৰিস্সাতি সচে ন অভৰিস্সথ, এৰং সতীতি অত্থো. অতীতে হি ইদং কালাতিপত্তিৰচনং, ন অনাগতেতি দট্ঠব্বং. এস নযো সোতাপত্তিমগ্গং পত্তো অভৰিস্সাতি এত্থাপি. ননু চ মগ্গপাপুণনৰচনং ভৰিস্সমানত্তা অনাগতকালিকন্তি? সচ্চং অনিযমিতে, ইধ পন ‘‘ইধেৰাসনে নিসিন্নো’’তি নিযমিতত্তা অতীতকালিকমেৰাতি ৰেদিতব্বং. ইদঞ্হি ভগৰা রঞ্ঞো আসনা ৰুট্ঠায অচিরপক্কন্তস্সেৰ অৰোচাতি. পাপমিত্তসংসগ্গেনাতি দেৰদত্তেন, দেৰদত্তপরিসাসঙ্খাতেন চ পাপমিত্তেন সংসগ্গতো. অস্সাতি সোতাপত্তিমগ্গস্স. ‘‘এৰং সন্তেপী’’তিআদিনা পাঠানারুল়্হং ৰচনাৰসেসং দস্সেতি. তস্মাতি সরণং ¶ গতত্তা মুচ্চিস্সতীতি সম্বন্ধো. ‘‘মম চ সাসনমহন্ততাযা’’তি পাঠো যুত্তো, কত্থচি পন চ-সদ্দো ন দিস্সতি, তত্থ সো লুত্তনিদ্দিট্ঠোতি দট্ঠব্বং. ন কেৰলং সরণং গতত্তাযেৰ মুচ্চিস্সতি, অথ খো যত্থ এস পসন্নো, পসন্নাকারঞ্চ করোতি, তস্স চ তিৰিধস্সপি সাসনস্স উত্তমতাযাতি হি সহ সমুচ্চযেন অত্থো অধিপ্পেতোতি.

‘‘যথা নামা’’তিআদি দুক্করকম্মৰিপাকতো সুকরেন মুচ্চনেন উপমাদস্সনং. কোচীতি কোচি পুরিসো. কস্সচীতি কস্সচি পুরিসস্স, ‘‘ৰধ’’ন্তি এত্থ ভাৰযোগে কম্মত্থে সামিৰচনং. পুপ্ফমুট্ঠিমত্তেন দণ্ডেনাতি পুপ্ফমুট্ঠিমত্তসঙ্খাতেন ধনদণ্ডেন. মুচ্চেয্যাতি ৰধকম্মদণ্ডতো মুচ্চেয্য, দণ্ডেনাতি ৰা নিস্সক্কত্থে করণৰচনং ‘‘সুমুত্তা মযং তেন মহাসমণেনা’’তিআদীসু (দী. নি. ২.২৩২; চূল়ৰ. ৪৩৭) ৰিয, পুপ্ফমুট্ঠিমত্তেন ধনদণ্ডতো, ৰধদণ্ডতো চ মুচ্চেয্যাতি অত্থো. লোহকুম্ভিযন্তি লোহকুম্ভিনরকে. তত্থ হি তদনুভৰনকানং সত্তানং কম্মবলেন লোহমযা মহতী কুম্ভী নিব্বত্তা, তস্মা তং ‘‘লোহকুম্ভী’’তি ৰুচ্চতি. উপরিমতলতো অধো পতন্তো, হেট্ঠিমতলতো উদ্ধং গচ্ছন্তো, উভযথা পন সট্ঠিৰস্সসহস্সানি হোন্তি. ৰুত্তঞ্চ –

‘‘সট্ঠিৰস্সসহস্সানি, পরিপুণ্ণানি সব্বসো;

নিরযে পচ্চমানানং, কদা অন্তো ভৰিস্সতী’’তি. (পে. ৰ. ৮০২; জা. ১.৪.৫৪);

‘‘হেট্ঠিমতলং ¶ পত্ৰা, উপরিমতলং পাপুণিত্ৰা মুচ্চিস্সতী’’তি ৰদন্তো ইমমত্থং দীপেতি – যথা অঞ্ঞে সেট্ঠিপুত্তাদযো অপরাপরং অধো পতন্তা, উদ্ধং গচ্ছন্তা চ অনেকানি ৰস্সসতসহস্সানি তত্থ পচ্চন্তি, ন তথা অযং, অযং পন রাজা যথাৰুত্তকারণেন একৰারমেৰ অধো পতন্তো, উদ্ধঞ্চ গচ্ছন্তো সট্ঠিৰস্সসহস্সানিযেৰ পচ্চিত্ৰা মুচ্চিস্সতীতি. অযং পন অত্থো কুতো লদ্ধোতি অনুযোগং পরিহরন্তো ‘‘ইদম্পি কির ভগৰতা ৰুত্তমেৰা’’তি আহ. কিরসদ্দো চেত্থ অনুস্সৰনত্থো, তেন ভগৰতা ৰুত্তভাৰস্স আচরিযপরম্পরতো সুয্যমানতং, ইমস্স চ অত্থস্স আচরিযপরম্পরাভতভাৰং দীপেতি. অথ পাল়িযং সঙ্গীতং সিযাতি চোদনমপনেতি ‘‘পাল়িযং পন ন আরুল়্হ’’ন্তি ইমিনা, পকিণ্ণকদেসনাভাৰেন পাল়িযমনারুল়্হত্তা পাঠভাৰেন ন সঙ্গীতন্তি অধিপ্পাযো. পকিণ্ণকদেসনা হি পাল়িযমনারুল়্হাতি অট্ঠকথাসু ৰুত্তং.

যদি ¶ অনন্তরে অত্তভাৰে নরকে পচ্চতি, এৰং সতি ইমং দেসনং সুত্ৰা কো রঞ্ঞো আনিসংসো লদ্ধোতি কস্সচি আসঙ্কা সিযাতি তদাসঙ্কানিৰত্তনত্থং চোদনং উদ্ধরিত্ৰা পরিহরিতুং ‘‘ইদং পনা’’তিআদি ৰুত্তং. ‘‘অযঞ্হী’’তিআদিনা নিদ্দালাভাদিকং দিট্ঠধম্মিকসম্পরাযিকং অনেকৰিধং মহানিসংসং সরূপতো নিযমেত্ৰা দস্সেতি. এত্থ হি ‘‘অযং…পে… নিদ্দং লভতী’’তি ইমিনা নিদ্দালাভং দস্সেতি, তদা কাযিকচেতসিকদুক্খাপগতভাৰঞ্চ নিদ্দালাভসীসেন, ‘‘তিণ্ণং…পে… অকাসী’’তি ইমিনা তিণ্ণং রতনানং মহাসক্কারকিরিযং, ‘‘পোথুজ্জনিকায…পে… নাহোসী’’তি ইমিনা সাতিসযং পোথুজ্জনিকসদ্ধাপটিলাভং দস্সেতীতি এৰমাদি দিট্ঠধম্মিকো, ‘‘অনাগতে…পে… পরিনিব্বাযিস্সতী’’তি ইমিনা পন উক্কংসতো সম্পরাযিকো দস্সিতো, অনৰসেসতো পন অপরাপরেসু ভৰেসু অপরিমাণোযেৰ সম্পরাযিকো ৰেদিতব্বো.

তত্থ মধুরাযাতি মধুররসভূতায. ওজৰন্তিযাতি মধুররসস্সাপি সারভূতায ওজায ওজৰতিযা. পুথুজ্জনে ভৰা পোথুজ্জনিকা. পঞ্চ মারে ৰিসেসতো জিতৰাতি ৰিজিতাৰী, পরূপদেসৰিরহতা চেত্থ ৰিসেসভাৰো. পচ্চেকং অভিসম্বুদ্ধোতি পচ্চেকবুদ্ধো, অনাচরিযকো হুত্ৰা সামঞ্ঞেৰ সম্বোধিং অভিসম্বুদ্ধোতি অত্থো. তথা হি ‘‘পচ্চেকবুদ্ধা সযমেৰ বুজ্ঝন্তি, ন পরে বোধেন্তি, অত্থরসমেৰ ¶ পটিৰিজ্ঝন্তি, ন ধম্মরসং. ন হি তে লোকুত্তরধম্মং পঞ্ঞত্তিং আরোপেত্ৰা দেসেতুং সক্কোন্তি, মূগেন দিট্ঠসুপিনো ৰিয, ৰনচরকেন নগরে সাযিতব্যঞ্জনরসো ৰিয চ নেসং ধম্মাভিসমযো হোতি, সব্বং ইদ্ধিসমাপত্তিপটিসম্ভিদাপভেদং পাপুণন্তী’’তি (সু. নি. অট্ঠ. ১.খগ্গৰিসাণসুত্তৰণ্ণনা; অপ. অট্ঠ. ১.৯০, ৯১) অট্ঠকথাসু ৰুত্তং.

এত্থাহ – যদি রঞ্ঞো কম্মন্তরাযাভাৰে তস্মিংযেৰ আসনে ধম্মচক্খু উপ্পজ্জিস্সথ, অথ কথং অনাগতে পচ্চেকবুদ্ধো হুত্ৰা পরিনিব্বাযিস্সতি. যদি চ অনাগতে পচ্চেকবুদ্ধো হুত্ৰা পরিনিব্বাযিস্সতি, অথ কথং তস্মিংযেৰ আসনে ধম্মচক্খু উপ্পজ্জিস্সথ, ননু ইমে সাৰকবোধিপচ্চেকবোধিউপনিস্সযা ভিন্ননিস্সযা দ্ৰিন্নং বোধীনং অসাধারণভাৰতো. অসাধারণা হি এতা দ্ৰে যথাক্কমং পঞ্চঙ্গদ্ৰযঙ্গসম্পত্তিযা, অভিনীহারসমিদ্ধিৰসেন, পারমীসম্ভরণকালৰসেন, অভিসম্বুজ্ঝনৰসেন চাতি? নাযং ৰিরোধো ইতো পরতোযেৰস্স পচ্চেকবোধিসম্ভারানং সম্ভরণীযত্তা. সাৰকবোধিযা বুজ্ঝনকসত্তাপি হি অসতি তস্সা সমৰাযে কালন্তরে পচ্চেকবোধিযা বুজ্ঝিস্সন্তি তথাভিনীহারস্স সম্ভৰতোতি. অপরে পন ভণন্তি – ‘‘পচ্চেকবোধিযাযেৰাযং রাজা কতাভিনীহারো. কতাভিনীহারাপি হি তত্থ নিযতিমপ্পত্তা ¶ তস্স ঞাণস্স পরিপাকং অনুপগতত্তা সত্থু সম্মুখীভাৰে সাৰকবোধিং পাপুণিস্সন্তীতি ভগৰা ‘সচাযং ভিক্খৰে রাজা’তিআদিমৰোচ, মহাবোধিসত্তানমেৰ চ আনন্তরিযপরিমুত্তি হোতি, ন ইতরেসং বোধিসত্তানং. তথা হি পচ্চেকবোধিযং নিযতো সমানো দেৰদত্তো চিরকালসম্ভূতেন লোকনাথে আঘাতেন গরুতরানি আনন্তরিযকম্মানি পসৰি, তস্মা কম্মন্তরাযেন অযং ইদানি অসমৰেতদস্সনাভিসমযো রাজা পচ্চেকবোধিনিযামেন অনাগতে ৰিজিতাৰী নাম পচ্চেকবুদ্ধো হুত্ৰা পরিনিব্বাযিস্সতী’’তি দট্ঠব্বং, যুত্ততরমেত্থ ৰীমংসিত্ৰা গহেতব্বং.

যথাৰুত্তং পাল়িমেৰ সংৰণ্ণনায নিগমৰসেন দস্সেন্তো ‘‘ইদমৰোচা’’তিআদিমাহ. তস্সত্থো হি হেট্ঠা ৰুত্তোতি. অপিচ পাল়িযমনারুল়্হম্পি অত্থং সঙ্গহেতুং ‘‘ইদমৰোচা’’তিআদিনা নিগমনং করোতীতি দট্ঠব্বং.

ইতি ¶ সুমঙ্গলৰিলাসিনিযা দীঘনিকাযট্ঠকথায পরমসুখুমগম্ভীরদুরনুবোধত্থপরিদীপনায সুৰিমলৰিপুলপঞ্ঞাৰেয্যত্তিযজননায অজ্জৰমদ্দৰসোরচ্চসদ্ধাসতিধিতিবুদ্ধিখন্তিৰীরিযাদিধম্মসমঙ্গিনা সাট্ঠকথে পিটকত্তযে অসঙ্গাসংহিরৰিসারদঞাণচারিনা অনেকপ্পভেদসকসমযসমযন্তরগহনজ্ঝোগাহিনা মহাগণিনা মহাৰেয্যাকরণেন ঞাণাভিৰংসধম্মসেনাপতিনামথেরেন মহাধম্মরাজাধিরাজগরুনা কতায সাধুৰিলাসিনিযা নাম লীনত্থপ্পকাসনিযা সামঞ্ঞফলসুত্তৰণ্ণনায লীনত্থপ্পকাসনা.

সামঞ্ঞফলসুত্তৰণ্ণনা নিট্ঠিতা.

৩. অম্বট্ঠসুত্তৰণ্ণনা

অদ্ধানগমনৰণ্ণনা

২৫৪. এৰং ¶ ¶ সামঞ্ঞফলসুত্তং সংৰণ্ণেত্ৰা ইদানি অম্বট্ঠসুত্তং সংৰণ্ণেন্তো যথানুপুব্বং সংৰণ্ণোকাসস্স পত্তভাৰং ৰিভাৰেতুং, সামঞ্ঞফলসুত্তস্সানন্তরং সঙ্গীতস্স সুত্তস্স অম্বট্ঠসুত্তভাৰং পকাসেতুং ‘‘এৰং মে সুতং…পে… কোসলেসূতি অম্বট্ঠসুত্ত’’ন্তি আহ. এৰমীদিসেসু. ইতিসদ্দো চেত্থ আদিঅত্থো, পদত্থৰিপল্লাসজোতকো পন ইতিসদ্দো লুত্তনিদ্দিট্ঠো, আদিসদ্দলোপো ৰা এস, উপলক্খণনিদ্দেসো ৰা. অপুব্বপদৰণ্ণনা নাম হেট্ঠা অগ্গহিততায অপুব্বস্স পদস্স অত্থৰিভজনা. ‘‘হিত্ৰা পুনপ্পুনাগত-মত্থং অত্থং পকাসযিস্সামী’’তি (দী. নি. অট্ঠ. ১.গন্থারম্ভকথা) হি ৰুত্তং, ‘‘অনুপুব্বপদৰণ্ণনা’’তি কত্থচি পাঠো, সো অযুত্তোৰ টীকায অনুদ্ধটত্তা, তথা অসংৰণ্ণিতত্তা চ.

‘‘রাজকুমারা গোত্তৰসেন কোসলা নামা’’তি (দী. নি. টী. ১.২৫৪) আচরিযেন ৰুত্তং. অক্খরচিন্তকা পন ৰদন্তি ‘‘কোসং লন্তি গণ্হন্তি, কুসলং ৰা পুচ্ছন্তীতি কোসলা’’তি. জনপদিনোতি জনপদৰন্তো, জনপদস্স ৰা ইস্সরা. ‘‘কোসলা নাম রাজকুমারা’’তি ৰুত্তেযেৰ সিদ্ধেপি ‘‘জনপদিনো’’তি ৰচনং সন্তেসুপি অঞ্ঞেসু তংতংনামপঞ্ঞাতেসু তত্থ নিৰসন্তেসু জনপদিভাৰতো তেসমেৰ নিৰসনমুপাদায জনপদস্সাযং সমঞ্ঞাতি দস্সনত্থং. ‘‘তেসং নিৰাসো’’তি ইমিনা ‘‘কোসলানং নিৰাসা কোসলা’’তি তদ্ধিতং দস্সেতি. ‘‘একোপি জনপদো’’তি ইমিনা পন সদ্দতোযেৰেতং পুথুৰচনং, অত্থতো পনেস একো এৰাতি ৰিভাৰেতি. অপি-সদ্দো চেত্থ অনুগ্গহে, তেন কামং একোযেৰেস জনপদো, তথাপি ইমিনা কারণেন পুথুৰচনমুপপন্নন্তি অনুগ্গণ্হাতি. যদি একোৰ জনপদো, কথং তত্থ বহুৰচনন্তি আহ ‘‘রুল়্হিসদ্দেনা’’তিআদি, রুল়্হিসদ্দত্তা বহুৰচনমুপপন্নন্তি ৰুত্তং হোতি. নিস্সিতেসু পযুত্তস্স পুথুৰচনস্স, পুথুভাৰস্স ৰা নিস্সযে অভিনিরোপনা ইধ রুল়্হি, তেন ৰুত্তং ¶ আচরিযেন ইধ চেৰ অঞ্ঞত্থ চ মজ্ঝিমাগমটীকাদীসু ‘‘অক্খরচিন্তকা হি ঈদিসেসু ঠানেসু যুত্তে ৰিয ঈদিসলিঙ্গৰচনানি ইচ্ছন্তি, অযমেত্থ রুল়্হি যথা ‘অঞ্ঞত্থাপি কুরূসু ৰিহরতি, অঙ্গেসু ৰিহরতী’তি ¶ চা’’তি. কেচি পন কোসলনামাভিনিরোপনমিচ্ছন্তি, অযুত্তমেতং পুথুৰচনস্স অপ্পযুজ্জিতব্বত্তা. নামাভিনিরোপনায হি একৰচনম্পি ভৰতি যথা ‘‘সীহো গাযতী’’তি. তব্বিসেসিতেপি জনপদসদ্দে জাতিসদ্দত্তা একৰচনমেৰ. তেনাহ ‘‘তস্মিং কোসলেসু জনপদে’’তি, কোসলনামকে তস্মিং জনপদেতি অত্থো. অভূততো হি ৰোহারমত্তং রুল়্হি, ভূততোযেৰ অত্থো ৰিনিচ্ছিনিতব্বো. যথা হি –

‘‘সন্তি পুত্তা ৰিদেহানং, দীঘাৰু রট্ঠৰড্ঢনো;

তে রজ্জং কারযিস্সন্তি, মিথিলাযং পজাপতী’’তি. (জা. ২.২২.২৭৬) আদীসু –

তংপুত্তসঙ্খাতস্স একত্থস্স রুল়্হিৰসেন ‘‘পুত্তা’’তি বহুৰচনপযোগো, তথা ইধাপি তন্নিৰাসসঙ্খাতস্স একত্থস্স রুল়্হিৰসেন ‘‘কোসলেসূ’’তি বহুৰচনপযোগো হোতি. যথা চ ‘‘পাণং ন হঞ্ঞে, ন চ’দিন্নমাদিযে’’তিআদীসু (অ. নি. ৮.৪২, ৪৩, ৪৫) জাতিৰসেন বহ্ৰত্থানমেকৰচনপযোগো, তথা ইধাপি জাতিৰসেন অৰযৰপ্পভেদেন বহ্ৰত্থস্স ‘‘জনপদে’’তি একৰচনপযোগো হোতি. ৰুত্তঞ্চ আচরিযেন মজ্ঝিমাগমটীকাযং ‘‘তব্বিসেসনেপি জনপদসদ্দে জাতিসদ্দে একৰচনমেৰ. তেনাহ ‘তস্মিং অঙ্গেসু জনপদে’তি’’.

এৰং রুল়্হিৰসেন বহুম্হি ৰিয ৰত্তব্বে বহুৰচনং দস্সেত্ৰা ইদানি বহ্ৰত্থৰসেন বহুম্পি এৰ ৰত্তব্বে বহুৰচনং দস্সেন্তো ‘‘পোরাণা পনাহূ’’তিআদিমাহ. পন-সদ্দো চেত্থ ৰিসেসত্থজোতনো, তেন পুথুঅত্থৰিসযতায এৰেতং পুথুৰচনং, ন রুল়্হিৰসেনাতি ৰক্খমানং ৰিসেসং জোতেতি. সো হি পদেসো তিযোজনসতপরিমাণতায বহুপ্পভেদোতি, ইমস্মিং পন নযে তেসু কোসলেসু জনপদেসূতি অত্থো ৰেদিতব্বো. মহাপনাদন্তি মহাপনাদজাতক (জা. ১.৩.৪০, ৪১, ৪২) সুরুচিজাতকেসু (জা. ১.১৪.১০২ আদযো) আগতং সুরুচিনো নাম ৰিদেহরঞ্ঞো পুত্তং মহাপনাদনামকং রাজকুমারং. নানানাটকানীতি ভণ্ডুকণ্ডপণ্ডুকণ্ডপমুখানি ছসতসহস্সানি নানাৰিধনাটকানি, কত্থচি পন আদিসদ্দোপি দিট্ঠো, সো জাতকট্ঠকথাযং ন দিস্সতি, যদি চ দিস্সতি, তেন নটলঙ্ঘকাদীনং সঙ্গহো দট্ঠব্বো. সিতমত্তম্পীতি মিহিতমত্তম্পি. তস্স ¶ কির দিব্বনাটকানং অনন্তরভৰেযেৰ দিট্ঠত্তা মনুস্সনাটকানং নচ্চং অমনুঞ্ঞং অহোসি. নঙ্গলানিপি ছড্ডেত্ৰাতি কসিকম্মপ্পহানৰসেন নঙ্গলানি ¶ পহায, নিদস্সনমত্তঞ্চেতং. ন হি কেৰলং কস্সকা এৰ, অথ খো অঞ্ঞেপি উভযরট্ঠৰাসিনো মনুস্সা অত্তনো অত্তনো কিচ্চং পহায তস্মিং মঙ্গলট্ঠানে সন্নিপতিংসু. তদা কির মহাপনাদকুমারস্স পাসাদমঙ্গলং, ছত্তমঙ্গলং, আৰাহমঙ্গলন্তি তীণি মঙ্গলানি একতো অকংসু, কাসিৰিদেহরট্ঠৰাসিনোপি তত্থ সন্নিপতিত্ৰা অতিরেকসত্তৰস্সানি ছণমনুভৰিংসূতি, অধুনা পন ‘‘নঙ্গলাদীনী’’তি পাঠো দিস্সতি, সো ন পোরাণপাঠো টীকাযমনুদ্ধটত্তা.

মহাজনকাযে সন্নিপতিতেতি কেচি ‘‘পহংসনৰিধিং দস্সেত্ৰা রাজকুমারং হাসাপেস্সামা’’তি, কেচি ‘‘তং কীল়নং পস্সিস্সামা’’তি এৰং মহাজনসমূহে সন্নিপতিতে. অতুলম্বাভিরুহনদারুচিতকপৰেসনাদি নানাকীল়াযো দস্সেত্ৰা. সক্কপেসিতো কির দিব্বনাটকো রাজঙ্গণে আকাসে ঠত্ৰা উপড্ঢভাগং নাম দস্সেতি, একোৰ হত্থো, একো পাদো, একং অক্খি, একা দাঠা নচ্চতি চলতি, উপড্ঢং ফন্দতি, সেসং নিচ্চলমহোসি, তং দিস্ৰা মহাপনাদো থোকং হসিতমকাসি, ইমমত্থং সন্ধায ‘‘সো দিব্বনাটকং দস্সেত্ৰা হসাপেসী’’তি ৰুত্তং. সুহজ্জা নাম ৰিস্সাসিকা ‘‘সুট্ঠু হদযমেতেস’’ন্তি কত্ৰা. আদিসদ্দেন ঞাতকপরিজনাদীনং সঙ্গহো. তস্মাতি তথা ৰচনতো. তং কুসলন্তি ৰচনং উপাদাযাতি এত্থ ‘‘কচ্চি কুসলং? আম কুসল’’ন্তি ৰচনপটিৰচনৰসেন পৰত্তকুসলৰাদিতায তে মনুস্সা আদিতো ‘‘কুসলা’’তি সমঞ্ঞং লভিংসু, তেসং কুসলানং ইস্সরাতি রাজকুমারা কোসলা নাম জাতা, তেসং নিৰাসট্ঠানতায পন পদেসো কোসলাতি পুব্বে ৰুত্তনযমেৰ. তেনাহ ‘‘সো পদেসো কোসলাতি ৰুচ্চতী’’তি. এৰং মজ্ঝিমাগমটীকাযং আচরিযেনেৰ ৰুত্তং. তত্রাযমধিপ্পাযো সিযা – ‘‘সো পদেসো কোসলাতি ৰুচ্চতী’’তি সঞ্ঞীসঞ্ঞা যথাক্কমং একৰচনবহুৰচনৰসেন ৰুত্তত্তা পুরিমনযে ৰিয ইধাপি রুল়্হিৰসেনেৰ বহুৰচনং হোতি. রাজকুমারানং নামলাভহেতুমত্তঞ্হেত্থ ৰিসেসোতি. ইধ পন আচরিযেন এৰং ৰুত্তং সো পদেসোতি পদেসসামঞ্ঞতো ৰুত্তং, ৰচনৰিপল্লাসেন ৰা, তে পদেসাতি অত্থো. কোসলাতি ৰুচ্চতি কুসলা ¶ এৰ কোসলাতি কত্ৰা’’তি (দী. নি. টী. ১.২৫৪) তত্রাযমধিপ্পাযো সিযা – সো পদেসোতি জাতিসদ্দৰসেন, ৰচনৰিপল্লাসেন ৰা ৰুত্তত্তা পুথুঅত্থৰিসযতায এৰ বহুৰচনং হোতি. পদেসস্স নামলাভহেতু হেত্থ ৰিসেসোতি. ‘‘কুসল’’ন্তি হি ৰচনমুপাদায রুল়্হিনামৰসেন ৰুত্তনযেন কোসলা যথা ‘‘যেৰাপনকং, নতুম্হাকৰগ্গো’’তি. অপিচ ৰচনপটিৰচনৰসেন ‘‘কুসল’’ন্তি ৰদন্তি এত্থাতি কোসলা. ৰিচিত্রা হি তদ্ধিতৰুত্তীতি. কুসলন্তি চ আরোগ্যং ‘‘কচ্চি নু ভোতো কুসলং, কচ্চি ভোতো অনাময’’ন্তিআদীসু (জা. ১.১৫.১৪৫; জা. ২.২০.১২৯) ৰিয, কচ্চি তুম্হাকং আরোগ্যং হোতীতি অত্থো, ছেকং ৰা ‘‘কুসলা নচ্চগীতস্স ¶ , সিক্খিতা চাতুরিত্থিযো’’তিআদীসু (জা. ২.২২.৯৪) ৰিয, কচ্চি তেসং নাটকানং ছেকতা হোতীতি অত্থো.

চরণং চারিকা, চরণং ৰা চারো, সো এৰ চারিকা, তযিদং মগ্গগমনমেৰ ইধাধিপ্পেতং, ন চুণ্ণিকগমনমত্তন্তি দস্সেতুং ‘‘অদ্ধানগমন’’ন্তি ৰুত্তং, ভাৰনপুংসকঞ্চেতং, অদ্ধানগমনসঙ্খাতায চারিকায চরমানোতি ৰুত্তং হোতি, অভেদেপি ৰা ভেদৰোহারেন ৰুত্তং যথা ‘‘দিৰাৰিহারং নিসীদী’’তি, (ম. নি. ১.২৫৬) অদ্ধানগমনসঙ্খাতং চারিকং চরমানো, চরণং করোন্তোতি অত্থো. সব্বত্থকো হি করভূধাতূনমত্থোতি. ‘‘অদ্ধানমগ্গ’’ন্তিপি কত্থচি পাঠো, সো ন সুন্দরো. ন হি চারিকাসদ্দো মগ্গৰাচকোতি. ইদানি তং ৰিভাগেন দস্সেত্ৰা ইধাধিপ্পেতং নিযমেন্তো ‘‘চারিকা চ নামেসা’’তিআদিমাহ. সাৰকানম্পি রুল়্হিৰসেন চারিকায সম্ভৰতো ততো ৰিসেসেতি ‘‘ভগৰতো’’তি ইমিনা. তথা হি মজ্ঝিমাগমট্ঠকথাযং ৰুত্তং ‘‘চারিকং চরমানোতি এত্থ কিঞ্চাপি অযং চারিকা নাম মহাজনসঙ্গহত্থং বুদ্ধানংযেৰ লব্ভতি, বুদ্ধে উপাদায পন রুল়্হিসদ্দেন সাৰকানম্পি ৰুচ্চতি কিলঞ্জাদীহি কতবীজনীপি তালৰণ্টং ৰিযা’’তি. দূরেপীতি এত্থ পি-সদ্দেন, অপি-সদ্দেন ৰা নাতিদূরেপীতি সম্পিণ্ডনং তত্থাপি চারিকাসম্ভৰতো. বোধনেয্যপুগ্গলন্তি চতুসচ্চপটিৰেধৰসেন বোধনারহপুগ্গলং. সহসা গমনন্তি সীঘগমনং. ‘‘মহাকস্সপস্স পচ্চুগ্গমনাদীসূ’’তি ৰুত্তমেৰ সরূপতো দস্সেতি ‘‘ভগৰা হী’’তিআদিনা. পচ্চুগ্গচ্ছন্তোতি পটিমুখং গচ্ছন্তো, পচ্চুট্ঠহন্তোতি অত্থো. ‘‘তথা’’তি ইমিনা ‘‘তিংসযোজন’’ন্তি পদমনুকড্ঢতি. পক্কুসাতি নাম গন্ধাররাজা. মহাকপ্পিনো ¶ নাম কুক্কুটৰতীরাজা. ধনিযো নাম কোরণ্ডসেট্ঠিপুত্তো গোপো.

এৰং ধম্মগরুতাকিত্তনমুখেন মহাকস্সপপচ্চুগ্গমনাদীনি (সং. নি. অট্ঠ. ২.১৫৪) একদেসেন দস্সেত্ৰা ইদানি ৰনৰাসিতিস্সসামণেরস্স ৰত্থুং ৰিত্থারেত্ৰা চারিকং দস্সেতুং ‘‘একদিৰস’’ন্তিআদি আরদ্ধং. কো পনেস তিস্সসামণেরো নাম? সাৰত্থিযং ধম্মসেনাপতিনো উপট্ঠাককুলে জাতো মহাপুঞ্ঞো ‘‘পিণ্ডপাতদাযকতিস্সো, কম্বলদাযকতিস্সো’’তি চ পুব্বে লদ্ধনামো পচ্ছা ‘‘ৰনৰাসিতিস্সো’’তি পাকটো খীণাসৰসামণেরো. ৰিত্থারো ধম্মপদে (ধ. প. অট্ঠ. ১.৭৪ ৰনৰাসীতিস্সসামণেরৰত্থু). আকাসগামীহি সদ্ধিং আকাসেনেৰ গন্তুকামো ভগৰা ‘‘ছল়ভিঞ্ঞানং আরোচেহী’’তি অৰোচ. তস্সাতি তিস্সসামণেরস্স. তন্তি ভগৰন্তং সদ্ধিং ভিক্খুসঙ্ঘেন চীৰরং পারুপন্তং. নো থেরো নো ওরমত্তকো ৰতাতি সম্বন্ধো, গুণেন লামকপ্পমাণিকো নো হোতীতি অত্থো.

অত্তনো ¶ পত্তাসনেতি ভিক্খূনং আসনপরিযন্তে. তেসং গামিকানং দানপটিসংযুত্তং মঙ্গলং ৰত্ৰা. কস্মা পন সদেৰকস্স লোকস্স মগ্গদেসকোপি সমানো ভগৰা এৰমাহাতি চোদনং সোধেতুং ‘‘ভগৰা কিরা’’তিআদি ৰুত্তং. মগ্গদেসকোতি নিব্বানমগ্গস্স, সুগতিমগ্গস্স ৰা দেসকো.

তাযাতি অরঞ্ঞসঞ্ঞায. সঙ্ঘকম্মৰসেন সিজ্ঝমানাপি উপসম্পদা সত্থু আণাৰসেন সিজ্ঝনতো ‘‘বুদ্ধদাযজ্জং তে দস্সামী’’তি ৰুত্তন্তি ৰদন্তি. অপরে পন ‘‘অপরিপুণ্ণৰীসতিৰস্সস্সেৰ তস্স উপসম্পদং অনুজানন্তো সত্থা ‘বুদ্ধদাযজ্জং তে দস্সামী’তি অৰোচা’’তি ৰদন্তি. ধম্মসেনাপতিনা উপজ্ঝাযেন উপসম্পাদেত্ৰা, ততোযেৰেস ধম্মসেনাপতিনো সদ্ধিৰিহারিকোতি অট্ঠকথাসু ৰুত্তো. ধম্মপদট্ঠকথাযং পন ধম্মসেনাপতিআদিথেরানং চত্তালীসভিক্খুসহস্সপরিৰারানং অত্তনো অত্তনো পরিৰারেহি সদ্ধিং পচ্চেকং গমনং, ভগৰতো চ এককস্সেৰ গমনং খুদ্দকভাণকানং মতেন ৰুত্তং, ইধ, পন মজ্ঝিমাগমট্ঠকথাযঞ্চ (ম. নি. অট্ঠ. ২.৬৫) অঞ্ঞথা গমনং দীঘভাণকমজ্ঝিমভাণকানং মতেনাতি দট্ঠব্বং. অযন্তি মহাকস্সপাদীনমত্থায চারিকা. যং পন অনুগ্গণ্হন্তস্স ভগৰতো গমনং, অযং অতুরিতচারিকা নামাতি সম্বন্ধো.

ইমং ¶ পন চারিকন্তি অতুরিতচারিকং. মহামণ্ডলন্তি মজ্ঝিমদেসপরিযাপন্নেনেৰ বাহিরিমেন পমাণেন পরিচ্ছিন্নত্তা মহন্ততরং মণ্ডলং. মজ্ঝিমমণ্ডলন্তি ইতরেসং উভিন্নং ৰেমজ্ঝে পৰত্তং মণ্ডলং. অন্তোমণ্ডলন্তি ইতরেহি খুদ্দকং মণ্ডলং, ইতরেসং ৰা অন্তোগধত্তা অন্তিমং মণ্ডলং, অব্ভন্তরিমং মণ্ডলন্তি ৰুত্তং হোতি. কিং পনিমেসং পমাণন্তি আহ ‘‘কত্থা’’তিআদি. তত্থ নৰযোজনসতিকতা মজ্ঝিমদেসপরিযাপন্নৰসেনেৰ গহেতব্বা ততো পরং অতুরিতচারিকায অগমনতো. তদুত্তরি হি তুরিতচারিকায এৰ তথাগতো গচ্ছতি, ন অতুরিতচারিকায. পৰারেত্ৰাৰ চারিকাচরণং বুদ্ধাচিণ্ণন্তি ৰুত্তং ‘‘মহাপৰারণায পৰারেত্ৰা’’তিআদি. পাটিপদদিৰসেতি পঠমকত্তিকপুণ্ণমিযা অনন্তরে পাটিপদৰসে. সমন্তাতি গতগতট্ঠানস্স চতূসু পস্সেসু সমন্ততো. মহাজনকাযস্স সন্নিপতনতো পুরিমং পুরিমং আগতা নিমন্তেতুং লভন্তি. তথা সন্নিপতনমেৰ দস্সেতুং ‘‘ইতরেসূ’’তিআদি ৰুত্তং. সমথৰিপস্সনা তরুণা হোন্তীতি এত্থ সমথস্স তরুণভাৰো উপচারসমাধিৰসেন, ৰিপস্সনায পন সঙ্খারপরিচ্ছেদঞাণং, কঙ্খাৰিতরণঞাণং, সম্মসনঞাণং, মগ্গামগ্গঞাণন্তি চতুন্নং ঞাণানং ৰসেন ৰেদিতব্বো. তরুণৰিপস্সনাতি হি তেসং চতুন্নং ঞাণানমধিৰচনং. পৰারণাসঙ্গহং দত্ৰাতি অনুমতিদানৰসেন দত্ৰা. কত্তিকপুণ্ণমাযন্তি পচ্ছিমকত্তিকপুণ্ণমিযং. ‘‘মিগসিরস্স পঠমপাটিপদদিৰসে’’তি ¶ ইদং মজ্ঝিমদেসৰোহারৰসেন মিগসিরমাসস্স পঠমং পাটিপদদিৰসং সন্ধায ৰুত্তং, এতরহি পৰত্তৰোহারৰসেন পন পচ্ছিমকত্তিকমাসস্স কাল়পক্খপাটিপদদিৰসো ৰেদিতব্বো.

অঞ্ঞেনপি কারণেনাতি ভিক্খূনং সমথৰিপস্সনাতরুণভাৰতো অঞ্ঞেনপি মজ্ঝিমমণ্ডলে ৰেনেয্যানং ঞাণপরিপাকাদিকারণেন. চতুমাসন্তি আসল়্হীপুণ্ণমিযা পাটিপদতো যাৰ পচ্ছিমকত্তিকপুণ্ণমী, তাৰ চতুমাসং. ‘‘সমন্তা যোজনসত’’ন্তিআদিনা ৰুত্তনযেনেৰ. ৰসনং ৰস্সং, ৰসনকিরিযা, ৰুত্থং ৰসিতং ৰস্সমস্সাতি ৰুত্থৰস্সো, তস্স. তথাগতেন ৰিনেতব্বত্তা ‘‘ভগৰতো ৰেনেয্যসত্তা’’তি সামিনিদ্দেসো ৰুত্তো, কত্তুনিদ্দেসো ৰা এস. ৰেনেয্যসত্তাতি চ চরিতানুরূপং ৰিনেতব্বসত্তা. ইন্দ্রিযপরিপাকং আগমযমানোতি সদ্ধাদিইন্দ্রিযানং ৰিমুত্তিপরিপাচনভাৰেন পরিপক্কং পটিমানেন্তো. ফুস্সমাঘফগ্গুণচিত্তমাসানং ¶ অঞ্ঞতরমাসস্স পঠমদিৰসে নিক্খমনতো মাসনিযমো এত্থ ন কতোতি দট্ঠব্বং. তেনাহ ‘‘একমাসং ৰা দ্ৰিতিচতুমাসং ৰা তত্থেৰ ৰসিত্ৰা’’তি. তত্থেৰাতি ৰস্সূপগমনট্ঠানে এৰ. ‘‘সত্তহি ৰা’’তিআদি ‘‘একমাসং ৰা’’তিআদিনা যথাক্কমং যোজেতব্বং – যদি অপরম্পি একমাসং তত্থেৰ ৰসতি, সত্তহি মাসেহি চারিকং পরিযোসাপেতি. যদি দ্ৰিমাসং ছহি, যদি তিমাসং পঞ্চহি, যদি চতুমাসং তত্থেৰ ৰসতি, চতূহি মাসেহি চারিকং পরিযোসাপেতীতি. কস্মা পন চারিকাগমনন্তি আসঙ্কানিৰত্তনত্থং ‘‘ইতী’’তিআদি ৰুত্তং. অতিরেকং জরাদুব্বলো বাল়্হজিণ্ণো. তে কদা পস্সিস্সন্তি, ন পস্সিস্সন্তি এৰ. লোকানুকম্পকাযাতি লোকানুকম্পকায এৰ. তেন ৰুত্তং ‘‘ন চীৰরাদিহেতূ’’তি.

জঙ্ঘৰিহারৰসেনাতি জঙ্ঘাহি ৰিচরণৰসেন, জঙ্ঘাহি ৰিচরিত্ৰা তত্থ তত্থ কতিপাহং নিৰসনৰসেন ৰা. সব্বিরিযাপথসাধারণঞ্হি ৰিহারৰচনং. সরীরফাসুকত্থাযাতি একস্মিংযেৰ ঠানে নিবদ্ধৰাসৰসেন উস্সন্নধাতুকস্স সরীরস্স ৰিচরণেন ফাসুভাৰত্থায. অট্ঠুপ্পত্তিকালাভিকঙ্খনত্থাযাতি অগ্গিক্খন্ধোপমসুত্ত (অ. নি. ৭.৭২) মঘদেৰজাতকাদি (জা. ১.১.৯) দেসনানং ৰিয ধম্মদেসনায অভিকঙ্খিতব্বঅট্ঠুপ্পত্তিকালত্থায, অট্ঠুপ্পত্তিকালস্স ৰা অভিকঙ্খনত্থায, অট্ঠুপ্পত্তিকালে ধম্মদেসনত্থাযাতি ৰুত্তং হোতি. সিক্খাপদপঞ্ঞাপনত্থাযাতি সুরাপানসিক্খাপদাদি (পাচি. ৩২৭, ৩২৮, ৩২৯) পঞ্ঞাপনে ৰিয সিক্খাপদানং পঞ্ঞাপনত্থায. বোধনত্থাযাতি অঙ্গুলিমালাদযো (ম. নি. ২.৩৪৭) ৰিয বোধনেয্যসত্তে চতুসচ্চবোধনত্থায. মহতাতি মহতিযা. কঞ্চি, কতিপযে ৰা পুগ্গলে উদ্দিস্স ¶ চারিকা নিবদ্ধচারিকা. তদঞ্ঞা সম্বহুলে উদ্দিস্স গামনিগমনগরপটিপাটিযা চারিকা অনিবদ্ধচারিকা. তেনাহ ‘‘তত্থা’’তিআদি. যং চরতীতি কিরিযাপরামসনং.

‘‘এসা ইধ অধিপ্পেতা’’তি ৰুত্তমেৰ ৰিত্থারতো দস্সেতুং ‘‘তদা কিরা’’তিআদি ৰুত্তং. দসসহস্সিলোকধাতুযাতি জাতিক্খেত্তভূতং দসসহস্সচক্কৰাল়ং সন্ধায ৰুত্তং. কস্মাতি চে? তত্থেৰ ভব্বসত্তানং সম্ভৰতো. তত্থ হি সত্তে ভব্বে পরিপক্কিন্দ্রিযে পস্সিতুং বুদ্ধঞাণং অভিনীহরিত্ৰা ঠিতো ভগৰা ঞাণজালং পত্থরতীতি ৰুচ্চতি, ইদঞ্চ দেৰব্রহ্মানং ¶ ৰসেন ৰুত্তং. মনুস্সা পন ইমস্মিংযেৰ চক্কৰাল়ে, ইমস্মিংযেৰ চ সপরিৰারে জম্বুদীপে বোধনেয্যা হোন্তি. বোধনেয্যবন্ধৰেতি বোধনেয্যসত্তসঙ্খাতে ভগৰতো বন্ধৰে. গোত্তাদিসম্বন্ধা ৰিয হি সচ্চপটিৰেধসম্বন্ধা ৰেনেয্যা ভগৰতো বন্ধৰা নামাতি. গোচরভাৰূপগমনং সন্ধায ‘‘সব্বঞ্ঞুতঞ্ঞাণজালস্স অন্তো পৰিট্ঠো’’তি ৰুত্তং. ভগৰা কির মহাকরুণাসমাপত্তিং সমাপজ্জিত্ৰা ততো ৰুট্ঠায ‘‘যে সত্তা ভব্বা পরিপক্কঞাণা, তে ময্হং ঞাণস্স উপট্ঠহন্তূ’’তি চিত্তং অধিট্ঠায সমন্নাহরতি, তস্স সহসমন্নাহারা একো ৰা দ্ৰে ৰা সম্বহুলা ৰা তদা ৰিনযূপগা ৰেনেয্যা ঞাণস্স আপাথমাগচ্ছন্তি, অযমেত্থ বুদ্ধানুভাৰো. এৰমাপাথগতানং পন নেসং উপনিস্সযং পুব্বচরিযং, পুব্বহেতুং, সম্পতি ৰত্তমানঞ্চ পটিপত্তিং ওলোকেতি. ৰেনেয্যসত্তপরিগ্গণ্হনত্থঞ্হি সমন্নাহারে কতে পঠমং নেসং ৰেনেয্যভাৰেন উপট্ঠানং হোতি, অথ ‘‘কিং নু খো ভৰিস্সতী’’তি সরণগমনাদিৰসেন কঞ্চি নিপ্ফত্তিং ৰীমংসমানো পুব্বূপনিস্সযাদীনি ওলোকেতি. তেনাহ ‘‘অথ ভগৰা’’তিআদি. সোতি অম্বট্ঠো. ৰাদপটিৰাদং কত্ৰাতি ‘‘এৰং নু তে অম্বট্ঠা’’তিআদিনা (দী. নি. ১.২৬২) মযা ৰুত্তৰচনস্স ‘‘যে চ খো তে ভো গোতম মুণ্ডকা সমণকা’’তিআদিনা (দী. নি. ১.২৬৩) পটিৰচনং দত্ৰা, অসব্ভিৰাক্যন্তি অসপ্পুরিসৰাচং, তিক্খত্তুং ইব্ভৰাদনিপাতনৰসেন নানপ্পকারং সাধুসভাৰায ৰাচায ৰত্তুমযুত্তং ৰাক্যং ৰক্খতীতি ৰুত্তং হোতি. নিব্বিসেৰনন্তি ৰিগততুদনং, মানদপ্পৰসেন অপগতপরিনিপ্ফন্দনন্তি অত্থো.

অৰসরিতব্বন্তি উপগন্তব্বং. তস্স গামস্স ইদং নামমত্তং, কিমেত্থ অত্থপরিযেসনাযাতি ৰুত্তং ‘‘ইজ্ঝানঙ্গলন্তিপি পাঠো’’তি. ‘‘যেন দিসাভাগেনা’’তি করণনিদ্দেসানুরূপং করণত্থে উপযোগৰচনন্তি দস্সেতি ‘‘তেন অৰসরী’’তি ইমিনা. ‘‘যস্মিং পদেসে’’তি পন ভুম্মনিদ্দেসানুরূপং ‘‘তং ৰা অৰসরী’’তি ৰুত্তং. তদুভযমেৰত্থং ৰিৰরতি ‘‘তেন দিসাভাগেনা’’তিআদিনা. গতোতি উপগতো, অগমাসীতি অত্থো. পুন গতোতি সম্পত্তো, সম্পাপুণীতি অত্থো. ‘‘ইচ্ছানঙ্গলে’’তি ইদং তদা ভগৰতো গোচরগামনিদস্সনং, সমীপত্থে চেতং ভুম্মং ¶ . ‘‘ইচ্ছানঙ্গলৰনসণ্ডে’’তি ইদং পন নিৰাসট্ঠানদস্সনং, নিপ্পরিযাযতো অধিকরণে চেতং ভুম্মন্তি তদুভযম্পি পদং ৰিসেসত্থদস্সনেন ৰিৰরন্তো ‘‘ইচ্ছানঙ্গলং উপনিস্সাযা’’তিআদিমাহ ¶ . ‘‘সীলখন্ধাৰার’’ন্তিআদি ৰুত্তনযেন ৰেনেয্যহিতসমপেক্খনৰসেনেৰ ভগৰতো ৰিহারদস্সনং. তত্থ ধম্মরাজস্স ভগৰতো সব্বসো অধম্মনিগ্গণ্হনপরা এৰ পটিপত্তি, সা চ সীলসমাধিপঞ্ঞাৰসেনাতি সীলাদিত্তযস্সেৰ গহণং. সীলখন্ধাৰারন্তি চক্কৰত্তিরঞ্ঞো দারুইট্ঠকাদিকতং খন্ধাৰারসদিসং সীলসঙ্খাতং খন্ধাৰারং বন্ধিত্ৰা ৰিহরতীতি সম্বন্ধো. দারুক্খন্ধাদীহি আসমন্ততো ৰরন্তি পরিক্খিপন্তি এত্থাতি হি খন্ধাৰারো অ-কারস্স দীঘং কত্ৰা, রাজূনং অচিরনিৰাসট্ঠানং. তত্থ পন ভগৰতো অচিরনিৰসনকিরিযাসম্বন্ধমত্তেন ভযনিৰারণট্ঠেন তংসদিসতায সীলম্পি তথা ৰুচ্চতি. সমাধিকোন্তন্তি সম্মাসমাধিসঙ্খাতং মঙ্গলসত্তিং. সব্বঞ্ঞুতঞ্ঞাণপদন্তি সব্বঞ্ঞুতঞ্ঞাণসঙ্খাতং জযমন্তপদং. পরিৰত্তযমানোতি পরিজপ্পমানো. ‘‘সব্বঞ্ঞুতঞ্ঞাণসর’’ন্তিপি পাঠো, সব্বঞ্ঞুতঞ্ঞাণৰজিরগ্গসরং অপরাপরং সম্পরিৰত্তমানোতি অত্থো. যথাভিরুচিতেন ৰিহারেনাতি সব্বৰিহারসাধারণদস্সনং, দিব্বৰিহারাদীসু যেন যেন অত্তনা অভিরুচিতেন ৰিহারেন ৰিহরতীতি অত্থো.

পোক্খরসাতিৰত্থুৰণ্ণনা

২৫৫. মন্তেতি ইরুৰেদাদিমন্তসত্থে. ইরুৰেদাদযো হি গুত্তভাসিতব্বট্ঠেন ‘‘মন্তা’’তি ৰুচ্চন্তি. অণ-সদ্দো সদ্দেতি আহ ‘‘সজ্ঝাযতী’’তি. লোকিযা পন ৰদন্তি ‘‘ব্রহ্মুনো অপচ্চং ব্রাহ্মণো, নাগমো, ণত্তং, দীঘাদী’’তি. কস্মা অযমেৰ ৰচনত্থো ৰুত্তোতি আহ ‘‘ইদমেৰা’’তিআদি. অথ কেসং ইতরো ৰচনত্থোতি চোদনমপনেতি ‘‘অরিযা পনা’’তিআদিনা. অথ ৰা যং লোকিযা ৰদন্তি ‘‘ব্রহ্মুনা জাতো ব্রাহ্মণো’’তিআদিনিরুত্তিং, তং পটিক্খিপিতুং এৰং ৰুত্তং. ‘‘ইদমেৰা’’তি হি অৰধারণেন তং পটিক্খিপতি. ‘‘জাতিব্রাহ্মণান’’ন্তি পন ইমিনা সদ্দন্তরেন দস্সিতেসু জাতিব্রাহ্মণৰিসুদ্ধিব্রাহ্মণৰসেন দুৰিধেসু ব্রাহ্মণেসু ৰিসুদ্ধিব্রাহ্মণানং নিরুত্তিং দস্সেন্তো ‘‘অরিযা পনা’’তিআদিমাহ. বহন্তি পাপে বহি করোন্তীতি হি অরিযা ব্রাহ্মণা নিরুত্তিনযেন. ‘‘তস্স কির কাযো সেতপোক্খরসদিসো’’তি ইদমেৰস্স নামলাভহেতুদস্সনং, সেসং পন তপ্পসঙ্গেন যথাৰিজ্জমানৰিসেসদস্সনমেৰ. তেনাহ ‘‘ইতি নং পোক্খরসদিসত্তা পোক্খরসাতীতি সঞ্জানন্তী’’তি. পোক্খরেন সদিসো কাযো যস্সাতি হি পোক্খরসাতী নিরুত্তিনযেন ¶ . সাতসদ্দো ৰা সদিসত্থো, পোক্খরেন সাতো সদিসো কাযো তথা, সো যস্সাতি পোক্খরসাতী. সেতপোক্খরসদিসোতি সেতপদুমৰণ্ণো. দেৰনগরেতি আলকমন্দাদিদেৰপুরে. উস্সাপিতরজততোরণন্তি গম্ভীরনেমনিখাতং অচ্চুগ্গতং রজতমযং ইন্দখীলং ¶ . কাল়মেঘরাজীতি কদাচি দিস্সমানা কাল়অব্ভলেখা. রজতপনাল়িকাতি রজতমযতুম্বং. সুৰট্টিতাতি ৰট্টভাৰস্স যুত্তট্ঠানে সুট্ঠু ৰট্টুলা. কাল়ৰঙ্গতিলকাদীনমভাৰেন সুপরিসুদ্ধা. ‘‘অরাজকে’’তিআদিনাপি সোভগ্গপ্পত্তভাৰমেৰ নিদস্সেতি.

ইদানি অপরম্পি তস্স নামলাভহেতুং দস্সেন্তো ‘‘অযং পনা’’তিআদিমাহ. তত্থ চ ‘‘হিমৰন্তপদেসে মহাসরে পদুমগব্ভে নিব্বত্তী’’তি ইদমেৰস্স নামলাভহেতুদস্সনং. সেসং পন তপ্পসঙ্গেন তথাপৰত্তাকারদস্সনমেৰ. তেনাহ ‘‘ইতি নং পোক্খরে সযিতত্তা পোক্খরসাতীতি সঞ্জানন্তী’’তি. পোক্খরে কমলে সযতীতি হি পোক্খরসাতী, সাতং ৰা ৰুচ্চতি সমসণ্ঠানং, পোক্খরে জাতং সমসণ্ঠানং তথা, তমস্সত্থীতিপি পোক্খরসাতী. যং পন আচরিযেন ৰুত্তং ‘‘ইমস্স ব্রাহ্মণস্স কীদিসো পুব্বযোগো, যেন নং ভগৰা অনুগ্গণ্হিতুং তং ঠানং উপগতোতি আহা’’তি, (দী. নি. টী. ১.২৫৫) তদেতং ‘‘অযং পনা’’তিআদিৰচনং একদেসমেৰ সন্ধায ৰুত্তং. ‘‘সো ততো মনুস্সলোক’’ন্তিআদিৰচনতো দেৰলোকে নিব্বত্তীতি এত্থ অপরাপরং নিব্বত্তি এৰ ৰুত্তাতি দট্ঠব্বং. তথারূপেন কম্মেন নিব্বত্তিমেৰ সন্ধায ‘‘মাতুকুচ্ছিৰাসং জিগুচ্ছিত্ৰা’’তিআদি ৰুত্তং. ‘‘পদুমগব্ভে নিব্বত্তী’’তি ইমিনা সংসেদজোযেৰ হুত্ৰা নিব্বত্তীতি দস্সেতি. ন পুপ্ফতীতি ন ৰিকসতি. তেনাতি তাপসেন. নাল়তোতি পুপ্ফদণ্ডতো. সুৰণ্ণচুণ্ণেহি পিঞ্জরং হেমৰণ্ণো যস্সাতি সুৰণ্ণচুণ্ণপিঞ্জরো, তং, সুৰণ্ণচুণ্ণেহি ৰিকিণ্ণভাৰেন হেমৰণ্ণন্তি অত্থো. পিঞ্জরসদ্দো হি হেমৰণ্ণপরিযাযোতি সারত্থদীপনিযং (সারত্থ. টী. ১.২২) ৰুত্তং. এস নযো পদুমরেণুপিঞ্জরন্তি এত্থাপি. রজতবিম্বকন্তি রূপিযমযরূপকং. পটিজগ্গামীতি পোসেমি. পারন্তি পরিযোসানং, নিপ্ফত্তি ৰা ৰুচ্চতি নদীসমুদ্দাদীনং পরিযোসানভূতং পারং ৰিযাতি কত্ৰা. পটিসন্ধিপঞ্ঞাসঙ্খাতেন সভাৰঞাণেন পণ্ডিতো. ইতি কত্তব্বেসু, ৰেদেসু ৰা ৰিসারদপঞ্ঞাসঙ্খাতেন ৰেয্যত্তিযেন ¶ ব্যত্তো. অগ্গব্রাহ্মণোতি দিসাপামোক্খব্রাহ্মণো. সিপ্পন্তি ৰেদসিপ্পং তস্সেৰ পকরণাধিগতত্তা. ব্রহ্মদেয্যং অদাসীতি ৰক্খমাননযেন ব্রহ্মদেয্যং কত্ৰা অদাসি.

‘‘অজ্ঝাৰসতী’’তি এত্থ অধি-সদ্দো, আ-সদ্দো চ উপসগ্গমত্তং, ততো ‘‘উক্কট্ঠ’’ন্তি ইদং অজ্ঝাপুব্বৰসযোগে ভুম্মত্থে উপযোগৰচনং. অধি-সদ্দো ৰা ইস্সরিযত্থো, আ-সদ্দো মরিযাদত্থো ততো ‘‘উক্কট্ঠ’’ন্তি ইদং কম্মপ্পৰচনীযযোগে ভুম্মত্থে উপযোগৰচনন্তি দস্সেতি ‘‘উক্কট্ঠনামকে’’তিআদিনা. তদেৰত্থং ৰিৰরিতুং ‘‘তস্সা’’তিআদি ৰুত্তং. ‘‘তস্স নগরস্স সামিকো হুত্ৰা’’তি হি ‘‘অভিভৰিত্ৰা’’তি এতস্সত্থৰিৰরণং, তেনেতং দীপেতি ‘‘সামিভাৰো অভিভৰন’’ন্তি. ‘‘যায মরিযাদাযা’’তিআদি পন আ-সদ্দস্সত্থৰিৰরণং, তেনেতং দীপেতি ‘‘আসদ্দো ¶ মরিযাদত্থো, মরিযাদা চ নাম যায তত্থ ৰসিতব্বং, সাযেৰ অপরাধীনতা’’তি. যায মরিযাদাযাতি হি যায অপরাধীনতাসঙ্খাতায অনঞ্ঞসাধারণায অৰত্থাযাতি অত্থো. ‘‘উপসগ্গৰসেনা’’তিআদি পন ‘‘উক্কট্ঠনামকে’’তি এতস্সত্থৰিৰরণং, তেনেতং দীপেতি ‘‘সতিপি ভুম্মৰচনপ্পসঙ্গে ধাত্ৰত্থানুৰত্তকৰিসেসকভূতেহি দুৰিধেহিপি উপসগ্গেহি যুত্তত্তা উপযোগৰচনমেৰেত্থ ৰিহিত’’ন্তি. ‘‘তস্স কিরা’’তিআদি পন অত্থানুগতসমঞ্ঞাপরিদীপনং. ৰত্থু নাম নগরমাপনারহভূমিপ্পদেসো ‘‘আরামৰত্থু, ৰিহারৰত্থূ’’তিআদীসু ৰিয.

উক্কাতি দণ্ডদীপিকা. অগ্গহেসুন্তি ‘‘অজ্জ মঙ্গলদিৰসো, তস্মা সুনক্খত্তং, তত্থাপি অযং সুখণো মা অতিক্কমী’’তি রত্তিৰিভাযনং অনুরক্খন্তা, রত্তিযং আলোককরণত্থায উক্কা ঠপেত্ৰা উক্কাসু জলমানাসু নগরস্স ৰত্থুং অগ্গহেসুং, তেনেতং দীপেতি – উক্কাসু ঠিতাতি উক্কট্ঠা. মূলৰিভুজাদি আকতিগণপক্খেপেন, নিরুত্তিনযেন ৰা উক্কাসু ৰিজ্জোতযন্তীসু ঠিতাতি উক্কট্ঠা, তথা উক্কাসু ঠিতাসু ঠিতা আসীতিপি উক্কট্ঠাতি. মজ্ঝিমাগমট্ঠকথাযং পন এৰং ৰুত্তং ‘‘তঞ্চ নগরং ‘মঙ্গলদিৰসো সুখণো, সুনক্খত্তং মা অতিক্কমী’তি রত্তিম্পি উক্কাসু ঠিতাসু মাপিতত্তা উক্কট্ঠাতিপি ৰুচ্চতি, দণ্ডদীপিকাসু জালেত্ৰা ধারিযমানাসু মাপিতত্তাতি ৰুত্তং হোতী’’তি, (ম. নি. অট্ঠ. ১.মূলপরিযাযসুত্তৰণ্ণনা) তদপিমিনা সংসন্দতি চেৰ সমেতি ¶ চ নগরৰত্থুপরিগ্গহস্সপি নগরমাপনপরিযাপন্নত্তাতি দট্ঠব্বং. অপরে পন ভণন্তি ‘‘ভূমিভাগসম্পত্তিযা, উপকরণসম্পত্তিযা, মনুস্সসম্পত্তিযা চ তং নগরং উক্কট্ঠগুণযোগতো উক্কট্ঠাতি নামং লভতী’’তি. লোকিযা পন ৰদন্তি ‘‘উক্কা ধারীযতি এতস্স মাপিতকালেতি উক্কট্ঠা, ৰণ্ণৰিকারোয’’ন্তি, ইত্থিলিঙ্গৰসেন চাযং সমঞ্ঞা, তেনেৰিধ পযোগো দিস্সতি ‘‘যথা চ ভৰং গোতমো উক্কট্ঠায অঞ্ঞানি উপাসককুলানি উপসঙ্কমতী’’তি (দী. নি. ১.২৯৯) মূলপরিযাযসুত্তাদীসু (ম. নি. ১.১) চ ‘‘একং সমযং ভগৰা উক্কট্ঠাযং ৰিহরতি সুভগৰনে সালরাজমূলে’’তিআদি. এৰমেত্থ হোতু উপসগ্গৰসেন উপযোগৰচনং, কথং পনেতং সেসপদেসু সিযাতি অনুযোগেনাহ ‘‘তস্স অনুপযোগত্তা সেসপদেসূ’’তি. তত্থ তস্সাতি উপসগ্গৰসেন উপযোগসঞ্ঞুত্তস্স ‘‘উক্কট্ঠ’’ন্তি পদস্স. অনুপযোগত্তাতি ৰিসেসনভাৰেন অনুপযুত্তত্তা. সেসপদেসূতি ‘‘সত্তুস্সদ’’ন্তিআদীসু সত্তসু পদেসু.

কিং নু খ্ৰাযং সদ্দপযোগো সদ্দলক্খণানুগতোতি চোদনমপনেতি ‘‘তত্থ…পে… পরিযেসিতব্ব’’ন্তি ইমিনা. তত্থাতি উপসগ্গৰসেন, অনুপযোগৰসেন চ উপযোগৰচনন্তি ৰুত্তে দুব্বিধেপি ৰিধানে. লক্খণন্তি গহণূপাযঞাযভূতং সদ্দলক্খণং, সুত্তং ৰা. পরিযেসিতব্বন্তি সদ্দসত্থেসু ¶ ৰিজ্জমানত্তা ঞাণেন গৰেসিতব্বং, গহেতব্বন্তি ৰুত্তং হোতি. এতেন হি সদ্দলক্খণানুগতোৰাযং সদ্দপযোগোতি দস্সেতি, সদ্দৰিদূ চ ইচ্ছন্তি ‘‘উপঅনুঅধিআইচ্চাদিপুব্বৰসযোগে সত্তমিযত্থে উপযোগৰচনং পাপুণাতি, ৰিসেসিতব্বপদে চ যথাৰিধিমনুপযোগো ৰিসেসনপদানং সমানাধিকরণভূতান’’ন্তি. তত্র যদা অধি-সদ্দো, আ-সদ্দো চ উপসগ্গমত্তং, তদা ‘‘ততিযাসত্তমীনঞ্চা’’তি লক্খণেন অজ্ঝাপুব্বৰসযোগে উপযোগৰচনং. তথা হি ৰদন্তি ‘‘সত্তমিযত্থে কালদিসাসু উপান্ৰজ্ঝাৰসযোগে, অধিপুব্বসিঠাৰসানং পযোগে, তপ্পানচারেসু চ দুতিযা. কালে পুব্বণ্হসমযং নিৰাসেত্ৰা, একং সমযং ভগৰা, কঞ্চি কালং পুরেজাতপচ্চযেন পচ্চযো, ইমং রত্তিং চত্তারো মহারাজানো. দিসাযং পুরিমং দিসং ধতরট্ঠো. উপাদিপুব্বৰসযোগে গামং উপৰসতি, গামং অনুৰসতি, গামং আৰসতি, অগারং অজ্ঝাৰসতি, অধিপুব্বসিঠাৰসানং পযোগে ¶ পথৰিং অধিসেস্সতি, গামং অধিতিট্ঠতি, গামং অজ্ঝাৰসতি. তপ্পানচারেসু নদিং পিৰতি, গামং চরতি ইচ্চাদীতি.

যদা পন অধি-সদ্দো ইস্সরিযত্থো, আ-সদ্দো চ মরিযাদত্থো, তদা ‘‘কম্মপ্পৰচনীযযুত্তে’’তি লক্খণেন কম্মপ্পৰচনীযযোগে উপযোগৰচনং. তথা হি ৰদন্তি ‘‘অনুআদযো উপসগ্গা, ধীআদযো নিপাতা চ কম্মপ্পৰচনীযসঞ্ঞা হোন্তি কিরিযাসঙ্খাতং কম্মং পৰচনীযং যেসং তে কম্মপ্পৰচনীযা’’তি. সেসপদানং পন যথাৰিধিমনুপযোগে কতরেন লক্খণেন উপযোগৰচনন্তি? যথাৰুত্তলক্খণেনেৰ. যজ্জেৰং তেসম্পি আধারভাৰতো নানাধারতা সিযাতি? ন, বহূনম্পি পদানং নগরৰসেন একত্থভাৰতো. সকত্থমত্তঞ্হি তেসং নানাকরণন্তি. অঞ্ঞে পন সদ্দৰিদূ এৰমিচ্ছন্তি ‘‘সমানাধিকরণপদানং পচ্চেকং কিরিযাসম্বন্ধনেন ৰিসেসিতব্বপদেন সমানৰচনতা যথা ‘কটং করোতি, ৰিপুলং, দস্সনীয’ন্তি এত্থ ‘কটং করোতি, ৰিপুলং করোতি, দস্সনীযং করোতী’তি পচ্চেকং কিরিযাসম্বন্ধনেন কম্মত্থেযেৰ দুতিযা’’তি, তদেতং ৰিচারেতব্বং ৰিসেসনপদানং সমানাধিকরণানং কিরিযাসম্বজ্ঝনাভাৰতো. যদা হি কিরিযাসম্বজ্ঝনং, তদা ৰিসেসনমেৰ ন হোতীতি.

উস্সদতা নামেত্থ বহুলতাতি ৰুত্তং ‘‘বহুজন’’ন্তি. তং পন বহুলতং দস্সেতি ‘‘আকিণ্ণমনুস্স’’ন্তিআদিনা. অরঞ্ঞাদীসু গহেত্ৰা পোসেতব্বা পোসাৰনিযা, এতেন তেসং ধম্মভাৰং দস্সেতি. আৰিজ্ঝিত্ৰাতি পরিক্খিপিত্ৰা. খণিত্ৰা কতা পোক্খরণী, আবন্ধিত্ৰা কতং তল়াকং. অচ্ছিন্নূদকট্ঠানেযেৰ জলজকুসুমানি জাতানীতি ৰুত্তং ‘‘উদকস্স নিচ্চভরিতানেৰা’’তি. উদকস্সাতি চ পূরণকিরিযাযোগে করণত্থে সামিৰচনং ‘‘মহন্তে মহন্তে সাণিপসিব্বকে কারাপেত্ৰা হিরঞ্ঞসুৰণ্ণস্স পূরাপেত্ৰা’’তিআদীসু (পারা. ৩৪) ৰিয. সহ ধঞ্ঞেনাতি ¶ সধঞ্ঞন্তি নগরসদ্দাপেক্খায নপুংসকলিঙ্গেন ৰুত্তং, যথাৰাক্যং ৰা উপযোগৰচনেন. এৰং সব্বত্থ. পুব্বণ্ণাপরণ্ণাদিভেদং বহুধঞ্ঞসন্নিচযন্তি এত্থ আদিসদ্দেন তদুভযৰিনিমুত্তং অলাবুকুম্ভণ্ডাদিসূপেয্যং সঙ্গণ্হাতি. তেনাযমত্থো ৰিঞ্ঞাযতি – নযিধ ধঞ্ঞসদ্দো সালিআদিধঞ্ঞৰিসেসৰাচকো, পোসনে সাধুত্তমত্তেন পন নিরৰসেসপুব্বণ্ণাপরণ্ণসূপেয্যৰাচকো, ৰিরূপেকসেসৰসেন ¶ ৰা পযুত্তোতি. এত্তাৰতাতি যথাৰুত্তপদত্তযেন. রাজলীলাযাতি রাজূনং ৰিলাসেন. সমিদ্ধিযা উপভোগপরিভোগসম্পুণ্ণভাৰেন সম্পত্তি সমিদ্ধিসম্পত্তি.

‘‘রাজভোগ্গ’’ন্তি ৰুত্তে ‘‘কেন দিন্ন’’ন্তি অৰস্সং পুচ্ছিতব্বতো এৰং ৰুত্তন্তি দস্সেতি ‘‘কেনা’’তিআদিনা. রঞ্ঞা ৰিয ভুঞ্জিতব্বন্তি ৰা রাজভোগ্গন্তি অট্ঠকথাতো অপরো নযো. যাৰ পুত্তনত্তপনত্তপরম্পরা কুলসন্তকভাৰেন রাজতো লদ্ধত্তা ‘‘রঞ্ঞো দাযভূত’’ন্তি ৰুত্তং. ‘‘ধম্মদাযাদা মে ভিক্খৰে ভৰথা’’তিআদীসু (ম. নি. ১.২৯) ৰিয চ দাযসদ্দো দাযজ্জপরিযাযোতি আহ ‘‘দাযজ্জন্তি অত্থো’’তি. কথং দিন্নত্তা ব্রহ্মদেয্যং নামাতি চোদনং পরিহরতি ‘‘ছত্তং উস্সাপেত্ৰা’’তিআদিনা. রাজনীহারেন পরিভুঞ্জিতব্বতো হি উদ্ধং পরিভোগলাভস্স ব্রহ্মদেয্যতা নাম নত্থি, ইদঞ্চ তথা দিন্নমেৰ, তস্মা ব্রহ্মদেয্যং নামাতি ৰুত্তং হোতি. ছেজ্জভেজ্জন্তি সরীরদণ্ডধনদণ্ডাদিভেদং দণ্ডমাহ. নদীতিত্থপব্বতাদীসূতি নদীতিত্থপব্বতপাদগামদ্ৰারঅটৰিমুখাদীসু. সেতচ্ছত্তগ্গহণেন সেসরাজককুধভণ্ডম্পি গহিতং তপ্পমুখত্তাতি ৰেদিতব্বং. ‘‘রঞ্ঞা ভুঞ্জিতব্ব’’ন্ত্ৰেৰ ৰুত্তে ইধাধিপ্পেতত্থো ন পাকটোতি হুত্ৰা-সদ্দগ্গহণং কতং. তঞ্হি সো রাজকুলতো অসমুদাগতোপি রাজা হুত্ৰা ভুঞ্জিতুং লভতীতি অযমিধাধিপ্পেতো অত্থো. দাতব্বন্তি দাযং, ‘‘রাজদায’’ন্তি ইমিনাৰ রঞ্ঞা দিন্নভাৰে সিদ্ধে ‘‘রঞ্ঞা পসেনদিনা কোসলেন দিন্ন’’ন্তি পুন চ ৰচনং কিমত্থিযন্তি আহ ‘‘দাযকরাজদীপনত্থ’’ন্তিআদি. অসুকেন রঞ্ঞা দিন্নন্তি দাযকরাজস্স অদীপিতত্তা এৰং ৰুত্তন্তি অধিপ্পাযো. এত্থ চ পঠমনযে ‘‘রাজভোগ্গ’’ন্তি পদে পুচ্ছাসম্ভৰতো ইদং ৰুত্তং, দুতিযনযে পন ‘‘রাজদায’’ন্তি পদেতি অযম্পি ৰিসেসো দট্ঠব্বো. তত্থ অতিবহুলতায পুরতো ঠপনোকাসাভাৰতো পস্সেনপি ওদনসূপব্যঞ্জনাদি দীযতি এতস্সাতি পসেনদি, অলুত্তসমাসৰসেন. সো হি রাজা তণ্ডুলদোণস্স ওদনম্পি তদুপিযেন সূপব্যঞ্জনেন ভুঞ্জতি. তথা হি নং ভুত্তপাতরাসকালে সত্থু সন্তিকমাগন্ত্ৰা ইতো চিতো চ সম্পরিৰত্তন্তং নিদ্দায অভিভুয্যমানং উজুকং নিসীদিতুমসক্কোন্তং ভগৰা –

‘‘মিদ্ধী ¶ যদা হোতি মহগ্ঘসো চ,

নিদ্দাযিতা সম্পরিৰত্তসাযী;

মহাৰরাহোৰ ¶ নিৰাপৰুট্ঠো,

পুনপ্পুনং গব্ভমুপেতি মন্দো’’তি. (ধ. প. ৩২৫; নেত্তি. ২৬, ৯০);

ইমায গাথায ওৰদি. ভাগিনেয্যঞ্চ সো সুদস্সনং নাম মাণৰং –

‘‘মনুজস্স সদা সতীমতো,

মত্তং জানতো লদ্ধভোজনে;

তনুকস্স ভৰন্তি ৰেদনা,

সণিকং জীরতি আযুপালয’’ন্তি. (সং. নি. ১.২৪) –

ইমং গাথং ভগৰতো সন্তিকে উগ্গহাপেত্ৰা অত্তনো ভুঞ্জন্তস্স ওসানপিণ্ডকালে দেৰসিকং ভণাপেতি, সো অপরেন সমযেন তস্সা গাথায অত্থং সল্লক্খেত্ৰা পুনপ্পুনং ওসানপিণ্ডপরিহরণেন নাল়িকোদনমত্তায সণ্ঠহিত্ৰা তনুসরীরো বলৰা সুখপ্পত্তো অহোসীতি. উদানট্ঠকথাযং (উদা. অট্ঠ. ১২) পন এৰং ৰুত্তং ‘‘পচ্চামিত্তং পরসেনং জিনাতীতি পসেনদী’’তি. সদ্দৰিদূপি হি জ-কারস্স দ-কারে ইদমুদাহরন্তি. সো হি অত্তনো ভাগিনেয্যং অজাতসত্তুরাজানং, পঞ্চচোরসতাদীনি চ অৰরুদ্ধকানি জিনাতীতি. কোসলরট্ঠস্সাধিপতিভাৰতো কোসলো, তস্মা কোসলাধিপতিনা পসেনদি নামকেন রঞ্ঞা দিন্নন্তি অত্থো ৰেদিতব্বো. নিস্সট্ঠপরিচ্চত্ততাসঙ্খাতেন পুন অগ্গহেতব্বভাৰেনেৰ দিন্নত্তা ইধ ব্রহ্মদেয্যং নাম, ন তু পুরিমনযে ৰিয রাজসঙ্খেপেন পরিভুঞ্জিতব্বভাৰেন দিন্নত্তাতি আহ ‘‘যথা’’তিআদি. নিস্সট্ঠং হুত্ৰা, নিস্সট্ঠভাৰেন ৰা পরিচ্চত্তং নিস্সট্ঠপরিচ্চত্তং, মুত্তচাগৰসেন চজিতন্তি অত্থো.

সৰনং উপলব্ভোতি দস্সেতি ‘‘উপলভী’’তি ইমিনা, সো চাযমুপলব্ভো সৰনৰসেনেৰ জাননন্তি ৰুত্তং ‘‘সোতদ্ৰারসম্পত্তৰচননিগ্ঘোসানুসারেন অঞ্ঞাসী’’তি. সোতদ্ৰারানুসারৰিঞ্ঞাণৰীথিৰসেন জাননমেৰ হি ইধ সৰনং তেনেৰ ‘‘সমণো খলু ভো গোতমো’’তিআদিনা ৰুত্তস্সত্থস্স অধিগতত্তা, ন পন সোতদ্ৰারৰীথিৰসেন সুতমত্তং ¶ তেন তদত্থস্স অনধিগতত্তা. অৰধারণফলত্তা সদ্দপযোগস্স সব্বম্পি ৰাক্যং অন্তোগধাৰধারণং. তস্মা তদত্থজোতকসদ্দেন ৰিনাপি অঞ্ঞত্থাপোহনৰসেন অস্সোসি এৰ, নাস্স কোচি সৰনন্তরাযো অহোসীতি অযমত্থো ৰিঞ্ঞাযতীতি আহ ‘‘পদপূরণমত্তে নিপাতো’’তি, অন্তোগধাৰধারণেপি ¶ চ সব্বস্মিং ৰাক্যে নীতত্থতো অৰধারণত্থং খো-সদ্দগ্গহণং ‘‘এৰা’’তি সামত্থিযা সাতিসযং এতদত্থস্স ৰিঞ্ঞাযমানত্তাতি পঠমৰিকপ্পো ৰুত্তো, নীতত্থতো অৰধারণেন কো অত্থো একন্তিকো কতো, অৰধারিতো চাতি ৰুত্তং ‘‘তত্থা’’তিআদি. অথ পদপূরণমত্তেন খো-সদ্দেন কিং পযোজনন্তি চোদনমপনেতি ‘‘পদপূরণেনা’’তিআদিনা, অক্খরসমূহপদস্স, পদসমূহৰাক্যস্স চ সিলিট্ঠতাপযোজনমত্তমেৰাতি অত্থো. ‘‘অস্সোসী’’তি হিদং পদং খো-সদ্দে গহিতে তেন ফুল্লিতং মণ্ডিতং ৰিভূসিতং ৰিয হোন্তং পূরিতং নাম হোতি, তেন চ পুরিমপচ্ছিমপদানি সুখুচ্চারণৰসেন সিলিট্ঠানি হোন্তি, ন তস্মিং অগ্গহিতে, তস্মা পদপূরণমত্তম্পি পদব্যঞ্জনসিলিট্ঠতাপযোজনন্তি ৰুত্তং হোতি. মত্তসদ্দো চেত্থ ৰিসেসনিৰত্তিঅত্থো, তেনস্স অনত্থন্তরদীপনতা দস্সিতা, এৰ-সদ্দেন পন পদব্যঞ্জনসিলিট্ঠতায একন্তিকতা.

‘‘সমণো খলূ’’তিআদি যথাসুতত্থনিদস্সনন্তি দস্সেতি ‘‘ইদানী’’তিআদিনা. সমিতপাপত্তাতি এত্থ অচ্চন্তং অনৰসেসতো সৰাসনং সমিতপাপত্তাতি অত্থো গহেতব্বো. এৰঞ্হি বাহিরকৰীতরাগসেক্খাসেক্খপাপসমনতো ভগৰতো পাপসমনং যথারহং ৰিসেসিতং হোতি. তেন ৰুত্তং ‘‘ভগৰা চ অনুত্তরেন অরিযমগ্গেন সমিতপাপো’’তি. তদেৰত্থং নিদ্দেসপাঠেন সাধেতুং ‘‘ৰুত্তঞ্হেত’’ন্তিআদিমাহ. অস্সাতি অনেন ভিক্খুনা, ভগৰতা ৰা. সমিতাতি সমাপিতা, সমভাৰং ৰা আপাদযিতা, অস্স ৰা সম্পদানভূতস্স সন্তা হোন্তীতি অত্থো. অত্থানুগতা চাযং ভগৰতি সমঞ্ঞাতি ৰুত্তং ‘‘ভগৰা চা’’তিআদি. তেনাতি তথা সমিতপাপত্তা. যথাভূতং পৰত্তো যথাভুচ্চং, তদেৰ গুণো, তেন অধিগতং তথা. ‘‘খলূ’’তি ইদং নেপাতিকং খলুপচ্ছাভত্তিকপদে (মি. প. ৪.১.৮) ৰিয, ন নামং, অনেকত্থত্তা চ নিপাতানং অনুস্সৰনত্থোৰ ইধাধিপ্পেতোতি আহ ‘‘অনুস্সৰনত্থে নিপাতো’’তি, পরম্পরসৰনঞ্চেত্থ ¶ অনুস্সৰনং. ব্রাহ্মণজাতিসমুদাগতন্তি ব্রাহ্মণজাতিযা আগতং, জাতিসিদ্ধন্তি ৰুত্তং হোতি. আলপনমত্তন্তি পিযালপনৰচনমত্তং, ন তদুত্তরি অত্থপরিদীপনং. পিযসমুদাহারা হেতে ‘‘ভো’’তি ৰা ‘‘আৰুসো’’তি ৰা ‘‘দেৰানং পিযা’’তি ৰা. ধম্মপদে ব্রাহ্মণৰত্থুপাঠেন, (ধ. প. ৩১৫ আদযো) সুত্তনিপাতে চ ৰাসেট্ঠসুত্তপদেন ব্রাহ্মণজাতিসমুদাগতালপনভাৰং সমত্থেতুং ‘‘ৰুত্তম্পি চেত’’ন্তিআদিমাহ.

তত্রাযমত্থো – সচে রাগাদিকিঞ্চনেহি সকিঞ্চনো অস্স, সো আমন্তনাদীসু ‘‘ভো ভো’’তি ৰদন্তো হুত্ৰা ৰিচরণতো ভোৰাদীযেৰ নাম হোতি, ন ব্রাহ্মণো. ‘‘অকিঞ্চনং অনাদানং, তমহং ব্রূমি ব্রাহ্মণ’’ন্তি (ধ. প. ৩৯৬, সু. নি. ৬২৫) সেসগাথাপদং. তত্থ ¶ রাগাদযো সত্তে কিঞ্চন্তি মদ্দন্তি পলিবুদ্ধন্তীতি কিঞ্চনানি. মনুস্সা কির গোণেহি খলং মদ্দাপেন্তা ‘‘কিঞ্চেহি কপিল, কিঞ্চেহি কাল়কা’’তি ৰদন্তি, তস্মা কিঞ্চনসদ্দো মদ্দনত্থো ৰেদিতব্বো. যথাহ নিদ্দেসে ‘‘অকিঞ্চনন্তি রাগকিঞ্চনং, দোস, মোহ, মান, দিট্ঠি, কিলেসকিঞ্চনং, দুচ্চরিতকিঞ্চনং, যস্সেতে কিঞ্চনা পহীনা সমুচ্ছিন্না ৰূপসন্তা পটিপ্পস্সদ্ধা অভব্বুপ্পত্তিকা ঞাণগ্গিনা দড্ঢা, সো ৰুচ্চতি অকিঞ্চনো’’তি (চূল়নি. ২৮, ৩২, ৬০, ৬৩). গোতমোতি গোত্তৰসেন পরিকিত্তনং, যং ‘‘আদিচ্চগোত্ত’’ন্তিপি লোকে ৰদন্তি, সক্যপুত্তোতি পন জাতিৰসেন সাকিযোতি চ তস্সেৰ ৰেৰচনং. ৰুত্তঞ্হেতং পব্বজ্জাসুত্তে –

‘‘আদিচ্চা নাম গোত্তেন, সাকিযা নাম জাতিযা;

তম্হা কুলা পব্বজিতোম্হি, ন কামে অভিপত্থয’’ন্তি. (সু. নি. ৪২৫);

তথা চাহ ‘‘গোতমোতি ভগৰন্তং গোত্তৰসেন পরিকিত্তেতী’’তিআদি. তত্থ গং তাযতীতি গোত্তং, ‘‘গোতমো’’তি পৰত্তমানং অভিধানং, বুদ্ধিঞ্চ একংসিকৰিসযতায রক্খতীতি অত্থো. যথা হি বুদ্ধি আরম্মণভূতেন অত্থেন ৰিনা ন ৰত্ততি, এৰং অভিধানং অভিধেয্যভূতেন, তস্মা সো গোত্তসঙ্খাতো অত্থো তানি রক্খতীতি ৰুচ্চতি, গো-সদ্দো চেত্থ অভিধানে, বুদ্ধিযঞ্চ ৰত্ততি. তথা হি ৰদন্তি –

‘‘গো ¶ গোণে চেন্দ্রিযে ভুম্যং, ৰচনে চেৰ বুদ্ধিযং;

আদিচ্চে রস্মিযঞ্চেৰ, পানীযেপি চ ৰত্ততে;

তেসু অত্থেসু গোণে থী, পুমা চ ইতরে পুমা’’তি.

তত্থ ‘‘গোসু দুয্হমানাসু গতো, গোপঞ্চমো’’তিআদীসু গোসদ্দো গোণে ৰত্ততি. ‘‘গোচরো’’তিআদীসু ইন্দ্রিযে. ‘‘গোরক্খ’’ন্তিআদীসু ভূমিযং. তথা হি সুত্তনিপাতট্ঠকথায ৰাসেট্ঠসুত্তসংৰণ্ণনাযং ৰুত্তং ‘‘গোরক্খন্তি খেত্তরক্খং, কসিকম্মন্তি ৰুত্তং হোতি. পথৰী হি ‘গো’তি ৰুচ্চতি, তপ্পভেদো চ ‘‘খেত্ত’’ন্তি (সু. নি. অট্ঠ. ২.৬১৯-৬২৬). ‘‘গোত্তং নাম দ্ৰে গোত্তানি হীনঞ্চ গোত্তং, উক্কট্ঠঞ্চ গোত্ত’’ন্তিআদীসু (পাচি. ১৫) ৰচনে, বুদ্ধিযঞ্চ ৰত্ততি. ‘‘গোগোত্তং গোতমং নমে’’তি পোরাণকৰিরচনায আদিচ্চে, আদিচ্চবন্ধুং গোতমং সম্মাসম্বুদ্ধং নমামীতি হি অত্থো, ‘‘উণ্হগূ’’তিআদীসু রস্মিযং, উণ্হা গাৰো রস্মিযো এতস্সাতি হি উণ্হগু, সূরিযো. ‘‘গোসীতচন্দন’’ন্তিআদীসু (অ. নি. টী. ১.৪৯) পানীযে ¶ , গোসঙ্খাতং পানীযং ৰিয সীতং, তদেৰ চন্দনং তথা. তস্মিঞ্হি উদ্ধনতো উদ্ধরিতপক্কুথিততেলস্মিং পক্খিত্তে তঙ্খণঞ্ঞেৰ তং তেলং সীতলং হোতীতি. এতেসু পন অত্থেসু গোণে ৰত্তমানো গো-সদ্দো যথারহং ইত্থিলিঙ্গো চেৰ পুল্লিঙ্গো চ, সেসেসু পন পুল্লিঙ্গোযেৰ.

কিং পনেতং গোত্তং নামাতি? অঞ্ঞকুলপরম্পরায অসাধারণং তস্স কুলস্স আদিপুরিসসমুদাগতং তংকুলপরিযাপন্নসাধারণং সামঞ্ঞরূপন্তি দট্ঠব্বং. সাধারণমেৰ হি ইদং তংকুলপরিযাপন্নানং সাধারণতো চ সামঞ্ঞরূপং. তথা হি তংকুলে জাতা সুদ্ধোদনমহারাজাদযোপি ‘‘গোতমো’’ ত্ৰেৰ ৰুচ্চন্তি, তেনেৰ ভগৰা অত্তনো পিতরং সুদ্ধোদনমহারাজানং ‘‘অতিক্কন্তৰরা খো গোতম তথাগতা’’তি (মহাৰ. ১০৫) অৰোচ, ৰেস্সৰণোপি মহারাজা ভগৰন্তং ‘‘ৰিজ্জাচরণসম্পন্নং, বুদ্ধং ৰন্দাম গোতম’’ন্তি, (দী. নি. ৩.২৮৮) আযস্মাপি ৰঙ্গীসো আযস্মন্তং আনন্দং ‘‘সাধু নিব্বাপনং ব্রূহি, অনুকম্পায গোতমা’’তি (সং. নি. ১.২১২). ইধ পন ভগৰন্তমেৰ. তেনাহ ‘‘ভগৰন্তং গোত্তৰসেন পরিকিত্তেতী’’তি. তস্মাতি যথাৰুত্তমত্থত্তযং পচ্চামসতি. এত্থ চ ‘‘সমণো’’তি ইমিনা ¶ সরিক্খকজনেহি ভগৰতো বহুমতভাৰো দস্সিতো তব্বিসযসমিতপাপতাপরিকিত্তনতো, ‘‘গোতমো’’তি ইমিনা লোকিযজনেহি তব্বিসযউল়ারগোত্তসম্ভূততাপরিকিত্তনতো.

সক্যস্স সুদ্ধোদনমহারাজস্স পুত্তো সক্যপুত্তো, ইমিনা পন উচ্চাকুলপরিদীপনং উদিতোদিতৰিপুলখত্তিযকুলসম্ভূততাপরিকিত্তনতো. সব্বখত্তিযানঞ্হি আদিভূতমহাসম্মতমহারাজতো পট্ঠায অসম্ভিন্নং উল়ারতমং সক্যরাজকুলং. যথাহ –

‘‘মহাসম্মতরাজস্স, ৰংসজো হি মহামুনি;

কপ্পাদিস্মিঞ্হি রাজাসি, মহাসম্মতনামকো’’তি. (মহাৰংসে দুতিযপরিচ্ছেদে পঠমগাথা);

কথং সদ্ধাপব্বজিতভাৰপরিদীপনন্তি আহ ‘‘কেনচী’’তিআদি. পরিজিযনং পরিহাযনং পারিজুঞ্ঞং, পরিজিরতীতি ৰা পরিজিণ্ণো, তস্স ভাৰো পারিজুঞ্ঞং, তেন. ঞাতিপারিজুঞ্ঞভোগপারিজুঞ্ঞাদিনা কেনচি পারিজুঞ্ঞেন পরিহানিযা অনভিভূতো অনজ্ঝোত্থটো হুত্ৰা পব্বজিতোতি অত্থো. তদেৰ পরিযাযন্তরেন ৰিভাৰেতুং ‘‘অপরিক্খীণংযেৰ তং কুলং পহাযা’’তি ৰুত্তং. অপরিক্খীণন্তি হি ঞাতিপারিজুঞ্ঞভোগপারিজুঞ্ঞাদিনা কেনচি পারিজুঞ্ঞেন অপরিক্খযং. সদ্ধায পব্বজিতোতি সদ্ধায এৰ পব্বজিতো. এৰঞ্হি ‘‘কেনচী’’তিআদিনা ¶ নিৰত্তিতৰচনং সূপপন্নং হোতি. ননু চ ‘‘সক্যকুলা পব্বজিতো’’তি ইদং উচ্চাকুলা পব্বজিতভাৰপরিদীপনমেৰ সিযা তদত্থস্সেৰ ৰিঞ্ঞাযমানত্তা, ন সদ্ধাপব্বজিতভাৰপরিদীপনং তদত্থস্স অৰিঞ্ঞাযমানত্তাতি? ন খো পনেৰং দট্ঠব্বং মহন্তং ঞাতিপরিৰট্টং, মহন্তঞ্চ ভোগক্খন্ধং পহায সদ্ধাপব্বজিতভাৰস্স অত্থতো সিদ্ধত্তা. তথা হি লোকনাথস্স অভিজাতিযং তস্স কুলস্স ন কিঞ্চি পারিজুঞ্ঞং, অথ খো ৰুড্ঢিযেৰ, ততো তস্স সমিদ্ধতমভাৰো লোকে পাকটো পঞ্ঞাতো হোতি, তস্মা ‘‘সক্যকুলা পব্বজিতো’’তি এত্তকেযেৰ ৰুত্তে তথা সমিদ্ধতমং কুলং পহায সদ্ধাপব্বজিতভাৰো সিদ্ধোযেৰাতি, ইমং পরিহারং ‘‘কেনচি পারিজুঞ্ঞেনা’’তিআদিনা ৰিভাৰেতীতি দট্ঠব্বং. ততো পরন্তি ‘‘কোসলেসু চারিকং চরমানো’’তিআদিৰচনং.

‘‘সাধু ধম্মরুচি রাজা, সাধু পঞ্ঞাণৰা নরো;

সাধু মিত্তানমদুব্ভো, পাপস্সাকরণং সুখ’’ন্তি. আদীসু –

ৰিয ¶ সাধুসদ্দো ইধ সুন্দরত্থোতি আহ ‘‘সুন্দরং খো পনা’’তি. খোতি অৰধারণত্থে নিপাতো, পনাতি পক্খন্তরত্থে. এৰং সাত্থকতাৰিঞ্ঞাপনত্থঞ্হি সংৰণ্ণনাযমেতেসং গহণং. সুন্দরন্তি চ ভদ্দকং, ভদ্দকতা চ পস্সন্তানং হিতসুখাৰহভাৰেনাতি ৰুত্তং ‘‘অত্থাৰহং সুখাৰহ’’ন্তি. অত্থো চেত্থ দিট্ঠধম্মিকসম্পরাযিকপরমত্থৰসেন তিৰিধং হিতং সুখম্পি তথেৰ তিৰিধং সুখং.

তথারূপানন্তি তাদিসানং, অযং সদ্দতো অত্থো. অত্থমত্তং পন দস্সেতুং ‘‘এৰরূপান’’ন্তি ৰুত্তং. যাদিসেহি চ গুণেহি ভগৰা সমন্নাগতো চতুপ্পমাণিকস্স লোকস্স সব্বকালম্পি-অচ্চন্তায-সদ্ধায-পসাদনীযো তেসং যথাভূতসভাৰত্তা, তাদিসেহি গুণেহি সমন্নাগতভাৰং সন্ধায ‘‘তথারূপানং অরহত’’ন্তি ৰুত্তন্তি দস্সেন্তো ‘‘যথারূপো’’তিআদিমাহ. লদ্ধসদ্ধানন্তি লদ্ধসদ্দহানং, পরজনস্স সদ্ধং পটিলভন্তানন্তি ৰুত্তং হোতি. লদ্ধসদ্দানন্তি ৰা পটিলদ্ধকিত্তিসদ্দানং, এতেন ‘‘অরহত’’ন্তি পদস্স অরহন্তানন্তি অত্থো, অরহন্তসমঞ্ঞায চ পাকটভাৰো দস্সিতো, অপিচ ‘‘যথারূপো সো ভৰং গোতমো’’তি ইমিনা ‘‘তথারূপান’’ন্তি পদস্স অনিযমৰসেন অত্থং দস্সেত্ৰা সরূপনিযমৰসেনপি দস্সেতুং ‘‘যথাভুচ্চগুণাধিগমেন লোকে অরহন্তোতি লদ্ধসদ্ধান’’ন্তি ৰুত্তং, ইদম্পি হি ‘‘তথারূপান’’ন্তি পদস্সেৰ অত্থদস্সনং, অযমেৰ চ নযো আচরিযেহি অধিপ্পেতো ইধ টীকাযং, (দী. নি. টী. ১.২৫৫) সারত্থদীপনিযঞ্চ তথেৰ ৰুত্তত্তা. ‘‘যথারূপা তে ভৰন্তো অরহন্তো’’তি অৰত্ৰা ‘‘যথারূপো সো ভৰং গোতমো’’তি ৰচনং ভগৰতিযেৰ গরুগারৰৰসেন ‘‘তথারূপানং অরহত’’ন্তি পুথুৰচননিদ্দিট্ঠভাৰৰিঞ্ঞাপনত্থং ¶ . অত্তনি, গরূসু চ হি বহুৰচনং ইচ্ছন্তি সদ্দৰিদূ. ‘‘যথাভুচ্চ…পে… অরহত’’ন্তি ইমিনা চ ধম্মপ্পমাণানং, লূখপ্পমাণানঞ্চ সত্তানং ভগৰতো পসাদাৰহতং যথারুততো দস্সেতি অরহন্তভাৰস্স তেসঞ্ঞেৰ যথারহং ৰিসযত্তা, তংদস্সনেন পন ইতরেসম্পি রূপপ্পমাণঘোসপ্পমাণানং পসাদাৰহতা দস্সিতাযেৰ তদৰিনাভাৰতোতি দট্ঠব্বং.

পসাদসোম্মানীতি পসন্নানি, সীতলানি চ, পসাদৰসেন ৰা সীতলানি, অনেন পসন্নমনতং দস্সেতি. ‘‘দস্সন’’ন্তি ৰুত্তেপি তদুত্তরি কত্তব্বতাসম্ভৰতো ¶ অযং সম্ভাৰনত্থো লব্ভতীতি আহ ‘‘দস্সনমত্তম্পি সাধু হোতী’’তি. ইতরথা হি ‘‘দস্সনঞ্ঞেৰ সাধু, ন তদুত্তরি করণ’’ন্তি অনধিপ্পেতত্থো আপজ্জতি, সম্ভাৰনত্থো চেত্থ পি-সদ্দো, অপি-সদ্দো ৰা লুত্তনিদ্দিট্ঠো. ‘‘ব্রহ্মচরিযং পকাসেতী’’তি এত্থ ইতি-সদ্দো ‘‘অব্ভুগ্গতো’’তি ইমিনা সম্বন্ধমুপগতো, তস্মা অযং ‘‘সাধু হোতী’’তি ইধ ইতি-সদ্দো ‘‘ব্রাহ্মণো পোক্খরসাতী অম্বট্ঠং মাণৰং আমন্তেসী’’তি ইমিনা সম্বজ্ঝিতব্বো, ‘‘অজ্ঝাসযং কত্ৰা’’তি চ পাঠসেসো তদত্থস্স ৰিঞ্ঞাযমানত্তা. যস্স হি অত্থো ৰিঞ্ঞাযতি, সদ্দো ন পযুজ্জতি, সো ‘‘পাঠসেসো’’তি ৰুচ্চতি, ইমমত্থং ৰিভাৰেন্তো আহ ‘‘দস্সনমত্তম্পি সাধু হোতীতি এৰং অজ্ঝাসযং কত্ৰা’’তি. মূলপণ্ণাসকে চূল়সীহনাদসুত্তট্ঠকথায (ম. নি. অট্ঠ. ১.১৪৪) আগতং কোসিযসকুণৰত্থু চেত্থ কথেতব্বং.

অম্বট্ঠমাণৰকথাৰণ্ণনা

২৫৬. ‘‘অজ্ঝাযকো’’তি ইদং পঠমপকতিযা গরহাৰচনমেৰ, দুতিযপকতিযা পসংসাৰচনং কত্ৰা ৰোহরন্তি যথা তং ‘‘পুরিসো নরো’’তি দস্সেতুং অগ্গঞ্ঞসুত্তপদ (দী. নি. ৩.১৩২) মুদাহটং. তত্থ ইমেতি ঝাযকনামেন সমঞ্ঞিতা জনা. ন ঝাযন্তীতি পণ্ণকুটীসু ঝানং ন অপ্পেন্তি ন নিপ্ফাদেন্তি, গামনিগমসামন্তং ওসরিত্ৰা ৰেদগন্থে করোন্তাৰ অচ্ছন্তীতি অত্থো. তং পনেতেসং ব্রাহ্মণঝাযকসঙ্খাতং পঠমদুতিযনামং উপাদায ততিযমেৰ জাতন্তি আহ ‘‘অজ্ঝাযকাত্ৰেৰ ততিযং অক্খরং উপনিব্বত্ত’’ন্তি, অক্খরন্তি চ নিরুত্তি সমঞ্ঞা. সা হি তস্মিংযেৰ নিরুল়্হভাৰেন অঞ্ঞত্থ অসঞ্চরণতো ‘‘অক্খর’’ন্তি ৰুচ্চতি. মন্তে পরিৰত্তেতীতি ৰেদে সজ্ঝাযতি, পরিযাপুণাতীতি অত্থো. ইধ হি অধিআপুব্বই-সদ্দৰসেন পদসন্ধি, ইতরত্থ পন ঝে-সদ্দৰসেন. মন্তে ধারেতীতি যথাঅধীতে মন্তে অসম্মূল়্হে কত্ৰা হদযে ঠপেতি.

আথব্বণৰেদো ¶ পরূপঘাতকরত্তা সাধূনমপরিভোগোতি কত্ৰা ‘‘ইরুৰেদযজুৰেদসামৰেদান’’ন্তি ৰুত্তং. তত্থ ইচ্চন্তে থোমীযন্তে দেৰা এতাযাতি ইরু ইচ-ধাতুৰসেন চ-কারস্স র-কারং কত্ৰা, ইত্থিলিঙ্গোযং ¶ . যজ্জন্তে পুজ্জন্তে দেৰা অনেনাতি যজু পুন্নপুংসকলিঙ্গৰসেন. সোযন্তি অন্তং করোন্তি, সাযন্তি ৰা তনুং করোন্তি পাপমনেনাতি সামং সো-ধাতুপক্খে ও-কারস্স আ-কারং কত্ৰা. ৰিদন্তি ধম্মং, কম্মং ৰা এতেহীতি ৰেদা, তে এৰ মন্তা ‘‘সুগতিযোপি মুনন্তি, সুয্যন্তি চ এতেহী’’তি কত্ৰা. পহরণং সঙ্ঘট্টনং পহতং, ওট্ঠানং পহতং তথা, তস্স করণৰসেন, ওট্ঠানি চালেত্ৰা পগুণভাৰকরণৰসেন পারং গতো, ন অত্থৰিভাৰনৰসেনাতি ৰুত্তং হোতি. পারগূতি চ নিচ্চসাপেক্খতায কিতন্তসমাসো.

‘‘সহ নিঘণ্টুনা’’তিআদিনা যথাৰাক্যং ৰিভত্যন্তৰসেন নিব্বচনদস্সনং. নিঘণ্টুরুক্খাদীনন্তি নিঘণ্টু নাম রুক্খৰিসেসো, তদাদিকানমত্থানন্তি অত্থো, এতেন নিঘণ্টুরুক্খপরিযাযং আদিং কত্ৰা তপ্পমুখেন সেসপরিযাযানং তত্থ দস্সিতত্তা সো গন্থো নিঘণ্টু নাম যথা তং ‘‘পারাজিককণ্ডো, কুসলত্তিকো’’তি অযমত্থো দস্সিতো ইমিনা যথারুতমেৰ তদত্থস্স অধিগতত্তা. আচরিযা পন এৰং ৰদন্তি ‘‘ৰচনীযৰাচকভাৰেন অত্থং, সদ্দঞ্চ নিখডতি ভিন্দতি ৰিভজ্জ দস্সেতীতি নিখণ্ডু, সো এৰ খ-কারস্স ঘ-কারং কত্ৰা ‘নিঘণ্ডূ’তি ৰুত্তো’’তি (দী. নি. টী. ১.২৫৬), তদেতং অট্ঠকথানযতো অঞ্ঞনযদস্সনন্তি গহেতব্বং. ইতরথা হি সো অট্ঠকথায ৰিরোধো সিযা, ৰিচারেতব্বমেতং. অক্খরচিন্তকা পন এৰমিচ্ছন্তি ‘‘তত্থ তত্থাগতানি নামানি নিস্সেসতো ঘটেন্তি রাসিং করোন্তি এত্থাতি নিঘণ্টু নিগ্গহিতাগমেনা’’তি. ৰেৰচনপ্পকাসকন্তি পরিযাযসদ্দদীপকং, একেকস্স অত্থস্স অনেকপরিযাযৰচনৰিভাৰকন্তি অত্থো. নিদস্সনমত্তঞ্চেতং অনেকেসম্পি অত্থানং একসদ্দৰচনীযতাৰিভাৰনৰসেনপি তস্স গন্থস্স পৰত্তত্তা. কো পনেসোতি? এতরহি নামলিঙ্গানুসাসনরতনমালাভিধানপ্পদীপিকাদি. ৰচীভেদাদিলক্খণা কিরিযা কপ্পীযতি এতেনাতি কিরিযাকপ্পো, তথেৰ ৰিৰিধং কপ্পীযতি এতেনাতি ৰিকপ্পো, কিরিযাকপ্পো চ সো ৰিকপ্পো চাতি কিরিযাকপ্পৰিকপ্পো. সো হি ৰণ্ণপদসম্বন্ধপদত্থাদিৰিভাগতো বহুৰিকপ্পোতি কত্ৰা ‘‘কিরিযাকপ্পৰিকপ্পো’’তি ৰুচ্চতি, সো চ গন্থৰিসেসোযেৰাতি ৰুত্তং ‘‘কৰীনং উপকারাৰহং সত্থ’’ন্তি, চতুন্নম্পি কৰীনং কৰিভাৰসম্পদাভোগসম্পদাদিপযোজনৰসেন উপকারাৰহো গন্থোতি অত্থো ¶ . কো পনেসোতি? কব্যবন্ধনৰিধিৰিধাযকো কব্যালঙ্কারগীতাসুবোধালঙ্কারাদি. ইদং পন মূলকিরিযাকপ্পগন্থং সন্ধায ৰুত্তং. সো হি মহাৰিসযো সতসহস্সগাথাপরিমাণো, যং ‘‘নযচরিযাদিপকরণ’’ন্তিপি ৰদন্তি. ৰচনত্থতো পন কিটযতি গমেতি ঞাপেতি কিরিযাদিৰিভাগন্তি কেটুভং কিট-ধাতুতো অভপচ্চযৰসেন, অ-কারস্স ¶ চ উকারো. অথ ৰা কিরিযাদিৰিভাগং অনৰসেসপরিযাদানতো কিটেন্তো গমন্তো ওভেতি পূরেতীতি কেটুভং কিট-সদ্দূপপদউভধাতুৰসেন. অপিচ কিটন্তি গচ্ছন্তি কৰযো বন্ধেসু কোসল্লমেতেনাতি কেটুভং, পুরিমনযেনেৰেত্থ পদসিদ্ধি. ঠানকরণাদিৰিভাগতো, নিব্বচনৰিভাগতো চ অক্খরা পভেদীযন্তি এতেনাতি অক্খরপ্পভেদো, তং পন ছসু ৰেদঙ্গেসু পরিযাপন্নং পকরণদ্ৰযমেৰাতি ৰুত্তং ‘‘সিক্খা চ নিরুত্তি চা’’তি. তত্থ সিক্খন্তি অক্খরসমযমেতাযাতি সিক্খা, অকারাদিৰণ্ণানং ঠানকরণপযতনপটিপাদকসত্থং. নিচ্ছযেন, নিস্সেসতো ৰা উত্তি নিরুত্তি, ৰণ্ণাগমৰণ্ণৰিপরিযাযাদিলক্খণং. ৰুত্তঞ্চ –

‘‘ৰণ্ণাগমো ৰণ্ণৰিপরিযাযো,

দ্ৰে চাপরে ৰণ্ণৰিকারনাসা;

ধাতুস্স অত্থাতিসযেন যোগো,

তদুচ্চতে পঞ্চৰিধা নিরুত্তী’’তি. (পারা. অট্ঠ. ১.ৰেরঞ্জকণ্ডৰণ্ণনা; ৰিসুদ্ধি. ১.১৪৪; মহানি. অট্ঠ. ১.৫০);

ইধ পন তব্বসেন অনেকধা নিব্বচনপরিদীপকং সত্থং উত্তরপদলোপেন ‘‘নিরুত্তী’’তি অধিপ্পেতং নিব্বচনৰিভাগতোপি অক্খরপভেদভাৰস্স আচরিযেহি (দী. নি. টী. ১.২৫৬) ৰুত্তত্তা, তমন্তরেন নিব্বচনৰিভাগস্স চ ব্যাকরণঙ্গেন সঙ্গহিতত্তা. ব্যাকরণং, নিরুত্তি চ হি পচ্চেকমেৰ ৰেদঙ্গং যথাহু –

‘‘কপ্পো ব্যাকরণং জোতি-সত্থং সিক্খা নিরুত্তি চ;

ছন্দোৰিচিতি চেতানি, ৰেদঙ্গানি ৰদন্তি ছা’’তি.

তস্মা ব্যাকরণঙ্গেন অসঙ্করভূতমেৰ নিরুত্তিনযেন নিব্বচনমিধাধিপ্পেতং, ন ছসু ব্যঞ্জনপদেসু ৰিয তদুভযসাধারণনিব্বচনং ৰেদঙ্গৰিসযত্তাতি ৰেদিতব্বং. অযং পনেত্থ মহানিদ্দেসট্ঠকথায (মহানি. অট্ঠ. ৫০) আগতনিরুত্তিনযৰিনিচ্ছযো ¶ . তত্থ হি ‘‘নক্খত্তরাজারিৰ তারকান’’ন্তি (জা. ১.১.১১, ২৫) এত্থ র-কারাগমো ৰিয অৰিজ্জমানস্স অক্খরস্স আগমো ৰণ্ণাগমো নাম. হিংসনত্তা ‘‘হিংসো’’তি ৰত্তব্বে ‘‘সীহো’’তি পরিৰত্তনং ৰিয ৰিজ্জমানানমক্খরানং হেট্ঠুপরিযৰসেন পরিৰত্তনং ৰণ্ণৰিপরিযাযো নাম. ‘‘নৰছন্নকেদানি দিয্যতী’’তি (জা. ১.৬.৮৮) এত্থ অ-কারস্স এ-কারাপজ্জনং ৰিয অঞ্ঞক্খরস্স অঞ্ঞক্খরাপজ্জনং ৰণ্ণৰিকারো নাম. ‘‘জীৰনস্স মূতো জীৰনমূতো’’তি ৰত্তব্বে ¶ ‘‘জীমূতো’’তি ৰ-কার ন-কারানং ৰিনাসো ৰিয ৰিজ্জমানক্খরানং ৰিনাসো ৰণ্ণৰিনাসো নাম. ‘‘ফরুসাহি ৰাচাহি পকুব্বমানো, আসজ্জ মং ত্ৰং ৰদসে কুমারা’’তি (জা. ১.১০.৮৫) এত্থ ‘‘পকুব্বমানো’’তি পদস্স অভিভৰমানোতি অত্থপটিপাদনং ৰিয তত্থ তত্থ যথাযোগং ৰিসেসত্থপটিপাদনং ধাতূনমত্থাতিসযেন যোগো নামাতি.

যথাৰুত্তপ্পভেদানং তিণ্ণং ৰেদানং অযং চতুত্থোযেৰ সিযা, অথ কেন সদ্ধিং পঞ্চমোতি আহ ‘‘আথব্বণৰেদং চতুত্থং কত্ৰা’’তি. আথব্বণৰেদো নাম আথব্বণৰেদিকেহি ৰিহিতো পরূপঘাতকরো মন্তো, সো পন ইতিহাসপঞ্চমভাৰপ্পকাসনত্থং গণিততামত্তেন গহিতো, ন সরূপৰসেন, এৰঞ্চ কত্ৰা ‘‘এতেস’’ন্তি পদস্স তেসং তিণ্ণং ৰেদানন্ত্ৰেৰ অত্থো গহেতব্বো. তঞ্হি ‘‘তিণ্ণং ৰেদান’’ন্তি এতস্স ৰিসেসনন্তি. ইতিহ অসাতি এৰং ইধ লোকে অহোসি ‘‘আসা’’তিপি কত্থচি পাঠো, সোযেৰত্থো. ইহ ঠানে ইতি এৰং, ইদং ৰা কম্মং, ৰত্থুং ৰা আস ইচ্ছাহীতিপি অত্থো. তস্স গন্থস্স মহাৰিসযতাদীপনত্থঞ্চেত্থ ৰিচ্ছাৰচনং, ইমিনা ‘‘ইতিহাসা’’তি ৰচনেন পটিসংযুত্তো ইতিহাসো তদ্ধিতৰসেনাতি অত্থং দস্সেতি. ইতিহ আস, ইতিহ আসা’’তি ঈদিসৰচনপটিসংযুত্তো ইতিহাসো নিরুত্তিনযেনাতি অত্থদস্সনন্তিপি ৰদন্তি. অক্খরচিন্তকা পন এৰমিচ্ছন্তি ‘‘ইতিহ-সদ্দো পারম্পরিযোপদেসে একোৰ নিপাতো, অসতি ৰিজ্জতীতি অসো, ইতিহ অসো এতস্মিন্তি ইতিহাসো সমাসৰসেনা’’তি, তেসং মতে ‘‘ইতিহ অসা’’তি এত্থ এৰং পারম্পরিযোপদেসো অস ৰিজ্জমানো অহোসীতি অত্থো. ‘‘পুরাণকথাসঙ্খাতো’’তি ইমিনা তস্স গন্থৰিসেসভাৰমাহ, ভারতনামকানং দ্ৰেভাতিকরাজূনং যুদ্ধকথা, রামরঞ্ঞো সীতাহরণকথা, নরসীহরাজুপ্পত্তিকথাতি এৰমাদিপুরাণকথাসঙ্খাতো ¶ ভারতপুরাণরামপুরাণনরসীহপুরাণাদিগন্থো ইতিহাসো নামাতি ৰুত্তং হোতি. ‘‘তেসং ইতিহাসপঞ্চমানং ৰেদান’’ন্তি ইমিনা যথাৰাক্যং ‘‘তিণ্ণং ৰেদান’’ন্তি এত্থ ৰিসেসনভাৰং দস্সেতি.

পজ্জতি অত্থো এতেনাতি পদং, নামাখ্যাতোপসগ্গনিপাতাদিৰসেন অনেকৰিভাগং ৰিভত্তিযন্তপদং. তদপি ব্যাকরণে আগতমেৰাতি ৰুত্তং ‘‘তদৰসেস’’ন্তি, পদতো অৰসেসং পকতিপচ্চযাদিসদ্দলক্খণভূতন্তি অত্থো. তং তং সদ্দং, তদত্থঞ্চ ব্যাকরোতি ব্যাচিক্খতি এতেনাতি ব্যাকরণং, ৰিসেসেন ৰা আকরীযন্তে পকতিপচ্চযাদযো অভিনিপ্ফাদীযন্তে এত্থ, অনেনাতি ৰা ব্যাকরণং, সাধুসদ্দানমন্ৰাখ্যাযকং মুদ্ধবোধব্যাকরণ সারস্সতব্যাকরণ পাণিনীব্যাকরণচন্দ্রব্যাকরণাদি অধুনাপি ৰিজ্জমানসত্থং. অধীযতীতি অজ্ঝাযতি. ৰেদেতীতি পরেসং ৰাচেতি. চ-সদ্দো অত্থদ্ৰযসমুচ্চিননত্থো, ৰিকপ্পনত্থো ৰা অত্থন্তরস্স ৰিকপ্পিতত্তা. ৰিচিত্রা ¶ হি তদ্ধিতৰুত্তি. পদকোতি ব্যাকরণেসু আগতপদকোসল্লং সন্ধায ৰুত্তং, ৰেয্যাকরণোতি তদৰসিট্ঠপকতিপচ্চযাদিসদ্দৰিধিকোসল্লন্তি ইমস্সত্থস্স ৰিঞ্ঞাপনত্থং পদদ্ৰযস্স একতো অত্থৰচনং. এসা হি আচরিযানং পকতি, যদিদং যেন কেনচি পকারেন অত্থন্তরৰিঞ্ঞাপনং. অযং অট্ঠকথাতো অপরো নযো – তে এৰ ৰেদে পদসো কাযতীতি পদকোতি. তত্থ পদসোতি গজ্জবন্ধপজ্জবন্ধপদেন. কাযতীতি কথেতি যথা ‘‘জাতক’’ন্তি, ইমিনা ৰেদকারকসমত্থতং দস্সেতি. এৰঞ্হি ‘‘অজ্ঝাযকো’’তিআদীহি ইমস্স ৰিসেসো পাকটো হোতীতি.

আযতিং হিতং বালজনসঙ্খাতো লোকো ন যততি ন ঈহতি অনেনাতি লোকাযতং. তঞ্হি গন্থং নিস্সায সত্তা পুঞ্ঞকিরিযায চিত্তম্পি ন উপ্পাদেন্তি, লোকা ৰা বালজনা আযতন্তি উস্সহন্তি ৰাদস্সাদেন এত্থাতি লোকাযতং. অঞ্ঞমঞ্ঞৰিরুদ্ধং, সগ্গমোক্খৰিরুদ্ধং ৰা তনোন্তি এত্থাতি ৰিতণ্ডো ড-পচ্চযৰসেন, ন-কারস্স চ ণ-কারং কত্ৰা, ৰিরুদ্ধেন ৰাদদণ্ডেন তাল়েন্তি ৰাদিনো এত্থাতি ৰিতণ্ডো তডি-ধাতুৰসেন, নিগ্গহীতাগমঞ্চ কত্ৰা. অদেসম্পি যং নিস্সায ৰাদীনং ৰাদো পৰত্তো, তং তেসং দেসতোপি উপচারৰসেন ৰুচ্চতি যথা ‘‘চক্খুং ¶ লোকে পিযরূপং সাতরূপং, এত্থেসা তণ্হা পহীযমানা পহীযতি, এত্থ নিরুজ্ঝমানা নিরুজ্ঝতী’’তি, (দী. নি. ২.৪০১; ম. নি. ১.১৩৩; ৰিভ. ২০৪) ৰিসেসেন ৰা পণ্ডিতানং মনং তডেন্তি চালেন্তি এতেনাতি ৰিতণ্ডো, তং ৰদন্তি, সো ৰাদো ৰা এতেসন্তি ৰিতণ্ডৰাদা, তেসং সত্থং তথা. লক্খণদীপকসত্থং উত্তরপদলোপেন, তদ্ধিতৰসেন ৰা লক্খণন্তি দস্সেতি ‘‘লক্খণদীপক’’ন্তিআদিনা. লক্খীযতি বুদ্ধভাৰাদি অনেনাতি লক্খণং, নিগ্রোধবিম্বতাদি. তেনাহ ‘‘যেসং ৰসেনা’’তিআদি. দ্ৰাদসসহস্সগন্থপমাণন্তি এত্থ ভাণৰারপ্পমাণাদীসু ৰিয বাত্তিংসক্খরগন্থোৰ অধিপ্পেতো. ৰুত্তঞ্হি –

‘‘অট্ঠক্খরা একপদং, একা গাথা চতুপ্পদং;

গাথা চেকা মতো গন্থো, গন্থো বাত্তিংসতক্খরো’’তি.

দ্ৰাদসহি গুণিতসহস্সবাত্তিংসক্খরগন্থপ্পমাণন্তি অত্থো. যত্থাতি যস্মিং লক্খণসত্থে, আধারে চেতং ভুম্মং যথা ‘‘রুক্খে সাখা’’তি. সোল়স চ সহস্সঞ্চ সোল়সসহস্সং, সোল়সাধিকসহস্সগাথাপরিমাণাতি অত্থো. এৰঞ্হি আধারাধেয্যৰচনং সূপপন্নং হোতীতি. পধানৰসেন বুদ্ধানং লক্খণদীপনতো বুদ্ধমন্তা নাম. পচ্চেকবুদ্ধাদীনম্পি হি লক্খণং তত্থ দীপিতমেৰ. তেন ৰুত্তং ‘‘যেসং ৰসেনা’’তিআদি.

‘‘অনূনো ¶ পরিপূরকারী’’তি অত্থমত্তদস্সনং, সদ্দতো পন অধিগতমত্থং দস্সেতুং ‘‘অৰযো ন হোতী’’তি ৰুত্তং. কো পনেস অৰযোতি অনুযোগমপনেতি ‘‘অৰযো নামা’’তিআদিনা. অযমেত্তাধিপ্পাযো – যো তানি সন্ধারেতুং সক্কোতি, সো ‘‘ৰযো’’তি ৰুচ্চতি. যো পন ন সক্কোতি, সো অৰযো নাম. যো চ অৰযো ন হোতি, সো ‘‘দ্ৰে পটিসেধা পকতিযত্থগমকা’’তি ঞাযেন ৰযো এৰাতি. ৰযতীতি হি ৰযো, আদিমজ্ঝপরিযোসানেসু কত্থচিপি অপরিকিলমন্তো অৰিত্থাযন্তো তে গন্থে সন্তানে পণেতি ব্যৰহরতীতি অত্থো. অযং পন ৰিনযট্ঠকথানযো (পারা. ৮৪) – অনৰযোতি অনু অৰযো, সন্ধিৰসেন উ-কারলোপো, অনু অনু অৰযো অনূনো, পরিপুণ্ণসিপ্পোতি অত্থো. ৰযোতি হি হানি ‘‘আযৰযো’’তিআদীসু ৰিয, নত্থি এতস্স যথাৰুত্তগন্থেসু ৰযো ঊনতাতি অৰযো, অনু অনু অৰযো অনৰযোতি.

‘‘অনুঞ্ঞাতো’’তি ¶ পদস্স কম্মসাধনৰসেন, ‘‘পটিঞ্ঞাতো’’তি পদস্স চ কত্তুসাধনৰসেন অত্থং দস্সেন্তো ‘‘আচরিযেনা’’তিআদিমাহ. অস্সাতি অম্বট্ঠস্স. পাল়িযং ‘‘যমহং জানামি, তং ত্ৰং জানাসী’’তি ইদং অনুজাননাকারদস্সনং, ‘‘যং ত্ৰং জানাসি, তমহং জানামী’’তি ইদং পন পটিজাননাকারদস্সনন্তি দস্সেতি ‘‘যং অহ’’ন্তিআদিনা. ‘‘আম আচরিযা’’তি হি যথাগতং পটিজাননৰচনমেৰ অত্থৰসেন ৰুত্তং. যন্তি তেৰিজ্জকং পাৰচনং. তস্সাতি আচরিযস্স. পটিৰচনদানমেৰ পটিঞ্ঞা তথা, তায সযমেৰ পটিঞ্ঞাতোতি অত্থো. ‘‘সকে’’তিআদি অনুজাননপটিজাননাধিকারদস্সনং. অদেসস্সপি দেসমিৰ কপ্পনামত্তেনাতি ৰুত্তং ‘‘কতরস্মি’’ন্তিআদি. সস্স অত্তনো সন্তকং সকং. আচরিযানং পরম্পরতো, পরম্পরভূতেহি ৰা আচরিযেহি আগতং আচরিযকং. তিস্সো ৰিজ্জা, তাসং সমূহো তেৰিজ্জকং, ৰেদত্তযং. পধানং ৰচনং, পকট্ঠানং ৰা অট্ঠকাদীনং ৰচনং পাৰচনং.

২৫৭. ইদানি যেনাধিপ্পাযেন ব্রাহ্মণো পোক্খরসাতী অম্বট্ঠং মাণৰং আমন্তেত্ৰা ‘‘অযং তাতা’’তিআদিৰচনমব্র্ৰি, তদধিপ্পাযং ৰিভাৰেন্তো ‘‘এস কিরা’’তিআদিমাহ. তত্থ উগ্গতস্সাতি পুব্বে পাকটস্স কিত্তিমতো পোরাণজনস্স. বহূ জনাতি পূরণকস্সপাদযো সন্ধায ৰুত্তং. একচ্চন্তি খত্তিযাদিজাতিমন্তং, লোকসম্মতং ৰা জনং. গরূতি ভারিযং, অত্তানং ততো মোচেত্ৰা অপগমনমত্তম্পি দুক্করং হোতি, পগেৰ তদুত্তরি করণন্তি ৰুত্তং হোতি. অনত্থো নাম তথাপগমনাদিনা নিন্দাব্যারোসউপারম্ভাদি.

‘‘অব্ভুগ্গতো’’তি এত্থ অভিসদ্দযোগেন ইত্থম্ভূতাখ্যানত্থৰসেনেৰ ‘‘গোতম’’ন্তি উপযোগৰচনং ¶ . ‘‘তং ভৰন্তং, তথা সন্তংযেৰা’’তি পদেসুপি তস্স অনুপযোগত্তা তদত্থৰসেনেৰাতি দস্সেতি ‘‘তস্স ভোতো’’তিআদিনা. তেনাহ ‘‘ইধাপী’’তিআদি. তথা সতোযেৰাতি যেনাকারেন অরহতাদিনা সদ্দো অব্ভুগ্গতো, তেনাকারেন সন্তস্স ভূতস্স এৰ তস্স ভৰতো গোতমস্স সদ্দো যদি ৰা অব্ভুগ্গতোতি অত্থো. অপিচ তং ভৰন্তং গোতমং তথা সন্তংযেৰাতি একস্সপি অত্থস্স দ্ৰিক্খত্তুং সম্বন্ধভাৰেন ৰচনং সামঞ্ঞৰিসিট্ঠতাপরিকপ্পনেন অত্থৰিসেসৰিঞ্ঞাপনত্থং, তস্মা ‘‘তস্স ভোতো গোতমস্সা’’তি সামঞ্ঞসম্বন্ধভাৰেন ৰিচ্ছিন্দিত্ৰা ‘‘তথা সতোযেৰা’’তি ¶ ৰিসেসসম্বন্ধভাৰেন যোজেতব্বং. যদি-সদ্দো চেত্থ সংসযত্থো দ্ৰিন্নম্পি অত্থানং সংসযিতব্বত্তা. ৰা-সদ্দো চ ৰিকপ্পনত্থো তেসু একস্স ৰিকপ্পেতব্বত্তা. সদ্দৰিদূ পন এৰং ৰদন্তি – ‘‘ইমস্স ৰচনং সচ্চং ৰা যদি ৰা মুসা’’তিআদীসু ৰিয যদি-সদ্দো ৰা-সদ্দো চ উভোপি ৰিকপ্পত্থাযেৰ. যদি-সদ্দোপি হি ‘‘যং যদেৰ পরিসং উপসঙ্কমতি যদি খত্তিযপরিসং যদি ব্রাহ্মণপরিস’’ন্তিআদীসু (অ. নি. ৫.৩৪) ৰা-সদ্দত্থো দিস্সতি. ‘‘অপ্পং ৰস্সসতং আযু, ইদানেতরহি ৰিজ্জতী’’তিআদীসু ৰিয চ ইধ সমানত্থসদ্দপযোগোতি. পাল়িযং ‘‘যদি ৰা নো তথা’’তি ইদম্পি ‘‘সন্তংযেৰ সদ্দো অব্ভুগ্গতো’’তি ইমিনা সম্বজ্ঝিত্ৰা যথাৰুত্তনযেনেৰ যোজেতব্বং. ননু ‘‘গোতম’’ন্তি পদেযেৰ উপযোগৰচনং সিযা, ন এত্থাতি চোদনায ‘‘ইধাপী’’তিআদি ৰুত্তং, তস্স অনুপযোগত্তা, ৰিচ্ছিন্দিত্ৰা সম্বন্ধৰিসেসভাৰেন যোজেতব্বত্তা ৰা ইধাপি ইত্থম্ভূতাখ্যানত্থৰসেনেৰ উপযোগৰচনং নামাতি ৰুত্তং হোতি. ইত্থম্ভূতাখ্যানং অত্থো যস্স তথা, অভিসদ্দো, ইত্থম্ভূতাখ্যানমেৰ ৰা অত্থো তথা, সোযেৰত্থো. যদগ্গেন হি সদ্দযোগো হোতি, তদগ্গেন অত্থযোগোপীতি.

২৫৮. ভোতি অত্তনো আচরিযং আলপতি. যথা-সদ্দং সাত্থকং কত্ৰা সহ পাঠসেসেন যোজেতুং ‘‘যথা সক্কা’’তিআদি ৰুত্তং. সোতি ভগৰা. পুরিমনযে আকারত্থজোতনযথা-সদ্দযোগ্যতো কথন্তি পুচ্ছামত্তং, ইধ পন তদযোগ্যতো ‘‘আকারপুচ্ছা’’তি ৰুত্তং. বাহিরকসমযে আচরিযম্হি উপজ্ঝাযসমুদাচারোতি আহ ‘‘অথ নং উপজ্ঝাযো’’তি, উপজ্ঝাযসঞ্ঞিতো আচরিযব্রাহ্মণোতি অত্থো.

কামঞ্চ মন্তো, ব্রহ্মং, কপ্পোতি তিব্বিধো ৰেদো, তথাপি অট্ঠকাদি ৰুত্তং পধানভূতং মূলং মন্তো, তদত্থৰিৰরণমত্থং ব্রহ্মং, তত্থ ৰুত্তনযেন যঞ্ঞকিরিযাৰিধানং কপ্পোতি মন্তস্সেৰ পধানভাৰতো, ইতরেসঞ্চ তন্নিস্সযেনেৰ জাতত্তা মন্তগ্গহণেন ব্রহ্মকপ্পানম্পি গহণং সিদ্ধমেৰাতি দস্সেতি ‘‘তীসু ৰেদেসূ’’তি ইমিনা. মন্তোতি হি অট্ঠকাদীহি ইসীহি ৰুত্তমূলৰেদস্সেৰ নামং, ৰেদোতি সব্বস্স, তস্মা ‘‘ৰেদেসূ’’তি ৰুত্তে ¶ সব্বেসম্পি গহণং সিজ্ঝতীতি ¶ ৰেদিতব্বং. লক্খণানীতি লক্খণদীপকানি মন্তপদানি. পজ্জগজ্জবন্ধপৰেসনৰসেন পক্খিপিত্ৰা. ব্রাহ্মণৰেসেনেৰাতি ৰেদৰাচকব্রাহ্মণলিঙ্গেনেৰ. ৰেদেতি মহাপুরিসলক্খণমন্তে. মহেসক্খা সত্তাতি মহাপুঞ্ঞৰন্তো পণ্ডিতসত্তা. জানিস্সন্তি ইতি মনসি কত্ৰা ৰাচেন্তীতি সম্বন্ধো. তেনাতি তথা ৰাচনতো. পুব্বেতি ‘‘তথাগতো উপ্পজ্জিস্সতী’’তি ৰত্তব্বকালতো পভুতি তথাগতস্স ধরমানকালে. অজ্ঝাযিতব্বৰাচেতব্বভাৰেন আগচ্ছন্তি পাকটা ভৰন্তি. একগাথাদ্ৰিগাথাদিৰসেন অনুক্কমেন অন্তরধাযন্তি. ন কেৰলং লক্খণমন্তাযেৰ, অথ খো অঞ্ঞেপি ৰেদা ব্রাহ্মণানং অঞ্ঞাণভাৰেন অনুক্কমেন অন্তরধাযন্তি এৰাতি আচরিযেন (দী. নি. টী. ১.২৫৮) ৰুত্তং.

বুদ্ধভাৰপত্থনা পণিধি, পারমীসম্ভরণং সমাদানং, কম্মস্সকতাদিপঞ্ঞা ঞাণং. ‘‘পণিধিমহতো সমাদানমহতোতিআদিনা পচ্চেকং মহন্তসদ্দো যোজেতব্বো’’তি (দী. নি. টী. ১.২৫৮) আচরিযেন ৰুত্তং. এৰঞ্চ সতি করুণা আদি যেসং সদ্ধাসীলাদীনং তে করুণাদযো, তে এৰ গুণা করুণাদিগুণা, পণিধি চ সমাদানঞ্চ ঞাণঞ্চ করুণাদিগুণা চ, তেহি মহন্তো পণিধিসমাদানঞাণকরুণাদিগুণমহন্তোতি নিব্বচনং কাতব্বং. এৰঞ্হি দ্ৰন্দতোপরত্তা মহন্তসদ্দো পচ্চেকং যোজীযতীতি. অপিচ পণিধি চ সমাদানঞ্চ ঞাণঞ্চ করুণা চ, তমাদি যেসং তে তথা, তেযেৰ গুণা, তেহি মহন্তোতি নিব্বচনেনপি অত্থো সূপপন্নো হোতি, পণিধিমহন্ততাদি চস্স বুদ্ধৰংস (বু. ৰং. ৯ আদযো) চরিযাপিটকাদি (চরিযা. ১ আদযো) ৰসেন ৰেদিতব্বো. মহাপদানসুত্তট্ঠকথাযং পন ‘‘মহাপুরিসস্সাতি জাতিগোত্তকুলপদেসাদিৰসেন মহন্তস্স পুরিসস্সা’’তি (দী. নি. অট্ঠ. ২.৩৩) ৰুত্তং. তত্থ ‘‘খত্তিযো, ব্রাহ্মণো’’তি এৰমাদি জাতি. ‘‘কোণ্ডঞ্ঞো, গোতমো’’তি এৰমাদি গোত্তং. ‘‘পোণিকা, চিক্খল্লিকা, সাকিযা, কোলিযা’’তি এৰমাদি কুলপদেসো, তদেতং সব্বম্পি ইধ আদিসদ্দেন সঙ্গহিতন্তি দট্ঠব্বং. এৰঞ্হি সতি ‘‘দ্ৰেযেৰ গতিযো ভৰন্তী’’তি উভিন্নং সাধারণৰচনং সমত্থিতং হোতীতি.

নিট্ঠাতি নিপ্ফত্তিযো সিদ্ধিযো. নন্ৰাযং গতি-সদ্দো অনেকত্থো, কস্মা নিট্ঠাযমেৰ ৰুত্তোতি আহ‘‘কামঞ্চায’’ন্তিআদি. ভৰভেদেতি ¶ নিরযাদিভৰৰিসেসে. সো হি সুচরিতদুচ্চরিতকম্মেন সত্তেহি উপপজ্জনৰসেন গন্তব্বাতি গতি. গচ্ছতি পৰত্ততি এত্থাতি গতি, নিৰাসট্ঠানং. গমতি যথাসভাৰং জানাতীতি গতি. পঞ্ঞা, গমনং ব্যাপনং গতি, ৰিস্সটভাৰো, সো পন ইতো চ এত্তো চ ব্যাপেত্ৰা ঠিততাৰ. গমনং নিপ্ফত্তনং গতি, নিট্ঠা ¶ , অজ্ঝাসযপটিসরণত্থাপি নিদস্সননযেন গহিতা. তথা হেস ‘‘ইমেসং খো অহং ভিক্খূনং সীলৰন্তানং কল্যাণধম্মানং নেৰ জানামি আগতিং ৰা গতিং ৰা’’তি (ম. নি. ১.৫০৮) এত্থ অজ্ঝাসযে ৰত্ততি, ‘‘নিব্বানং অরহতো গতী’’তি (পরি. ৩৩৯) এত্থ পটিসরণে, পরাযণে অপস্সযেতি অত্থো. গচ্ছতি যথারুচি পৰত্ততীতি গতি, অজ্ঝাসযো. গচ্ছতি অৰচরতি, অৰচরণৰসেন ৰা পৰত্ততি এত্থাতি গতি, পটিসরণং. সব্বসঙ্খতৰিসঞ্ঞুত্তস্স হি অরহতো নিব্বানমেৰ পটিসরণং, ইধ পন নিট্ঠাযং ৰত্ততীতি ৰেদিতব্বো তদঞ্ঞেসমৰিসযত্তা.

ননু দ্ৰিন্নং নিপ্ফত্তীনং নিমিত্তভূতানি লক্খণানি ৰিসদিসানেৰ, অথ কস্মা ‘‘যেহি সমন্নাগতস্সা’’তিআদিনা তেসং সদিসভাৰো ৰুত্তোতি চোদনালেসং দস্সেত্ৰা সোধেন্তো ‘‘তত্থ কিঞ্চাপী’’তিআদিমাহ. সমানেপি নিগ্রোধবিম্বতাদিলক্খণভাৰে অত্থেৰ কোচি নেসং ৰিসেসোতি দস্সেতুং ‘‘ন তেহেৰ বুদ্ধো হোতী’’তি ৰুত্তং. ‘‘যথা হি বুদ্ধানং লক্খণানি সুৰিসদানি, সুপরিব্যত্তানি, পরিপুণ্ণানি চ হোন্তি, ন এৰং চক্কৰত্তীন’’ন্তি অযং পন ৰিসেসো আচরিযধম্মপালত্থেরেন (দী. নি. টী. ১.২৫৮) পকাসিতো. জাযন্তি ভিন্নেসুপি অত্থেসু অভিন্নধীসদ্দা এতাযাতি জাতি, লক্খণভাৰমত্তং. ৰুত্তঞ্হি –

‘‘সবলাদীসু ভিন্নেসু, যায ৰত্তন্তুভিন্নধী;

সদ্দা সা জাতিরেসা চ, মালাসুত্তমিৰন্ৰিতা’’তি.

তস্মা লক্খণতামত্তেন সমানভাৰতো ৰিসদিসানিপি তানিযেৰ চক্কৰত্তিনিপ্ফত্তিনিমিত্তভূতানি লক্খণানি সদিসানি ৰিয কত্ৰা তানি বুদ্ধনিপ্ফত্তিনিমিত্তভূতানি লক্খণানি নামাতি ইদং ৰচনং ৰুচ্চতীতি অত্থো. অধিআপুব্বৰসযোগে ভুম্মত্থে উপযোগৰচনন্তি আহ ‘‘অগারে ৰসতী’’তি চতূহি অচ্ছরিযধম্মেহীতি অভিরূপতা, দীঘাযুকতা, অপ্পাবাধতা, ব্রাহ্মণগহপতিকানং পিযমনাপতাতি ইমেহি চতূহি অচ্ছরিযসভাৰভূতাহি ইদ্ধীহি. যথাহ –

‘‘রাজা ¶ আনন্দ, মহাসুদস্সনো চতূহি ইদ্ধীহি সমন্নাগতো অহোসি. কতমাহি চতূহি ইদ্ধীহি? ইধানন্দ, রাজা মহাসুদস্সনো অভিরূপো অহোসি দস্সনীযো পাসাদিকো’’তিআদি (দী. নি. ২.২৫২).

চেতিযজাতকে ¶ (জা. অট্ঠ. ৩.৮.৪৪) আগতনযং গহেত্ৰাপি এৰং ৰদন্তি ‘‘সরীরতো চন্দনগন্ধো ৰাযতি, অযং একা ইদ্ধি. মুখতো উপ্পলগন্ধো ৰাযতি, অযং দুতিযা. চত্তারো দেৰপুত্তা চতূসু দিসাসু সব্বকালং খগ্গহত্থা আরক্খং গণ্হন্তি, অযং ততিযা. আকাসেন ৰিচরতি, অযং চতুত্থী’’তি. অনাগতৰংসসংৰণ্ণনাযং পন ‘‘অভিরূপভাৰো একা ইদ্ধি, সমৰেপাকিনিযা গহণিযা সমন্নাগতভাৰো দুতিযা, যাৰতাযুকম্পি সকললোকস্স দস্সনাতিত্তিকভাৰো ততিযা, আকাসচারিভাৰো চতুত্থী’’তি ৰুত্তং. তত্থ সমৰেপাকিনিযা গহণিযা সমন্নাগতভাৰোতি সমৰিপাচনিযা কম্মজতেজোধাতুযা সম্পন্নতা. যস্স হি ভুত্তমত্তোৰ আহারো জীরতি, যস্স ৰা পন পুটভত্তং ৰিয তথেৰ তিট্ঠতি, উভোপেতে ন সমৰেপাকিনিযা সমন্নাগতা. যস্স পন পুন ভত্তকালে ভত্তচ্ছন্দো উপ্পজ্জতেৰ, অযং সমৰেপাকিনিযা সমন্নাগতো নাম, তথারূপতাতি অত্থো. সঙ্গহৰত্থূহীতি দানং, পিযৰচনং, অত্থচরিযা, সমানত্ততাতি ইমেহি সঙ্গহোপাযেহি. যথাহ –

‘‘দানঞ্চ পেয্যৰজ্জঞ্চ, অত্থচরিযা চ যা ইধ;

সমানত্ততা চ ধম্মেসু, তত্থ তত্থ যথারহং;

এতে খো সঙ্গহা লোকে, রথস্সাণীৰ যাযতো.

এতে চ সঙ্গহা নাস্সু, ন মাতা পুত্তকারণা;

লভেথ মানং পূজং ৰা, পিতা ৰা পুত্তকারণা.

যস্মা চ সঙ্গহা এতে, সমপেক্খন্তি পণ্ডিতা;

তস্মা মহত্তং পপ্পোন্তি, পাসংসা চ ভৰন্তি তে’’তি. (দী. নি. ৩.২৭৩);

রঞ্জনতোতি পীতিসোমনস্সৰসেন রঞ্জনতো, ন রাগৰসেন, পীতিসোমনস্সানং জননতোতি ৰুত্তং হোতি. চতূহি সঙ্গহৰত্থূহি রঞ্জনট্ঠেন রাজাতি পন সব্বেসং রাজূনং সমঞ্ঞা তথা অকরোন্তানম্পি ৰিলীৰবীজনাদীসু ¶ তালৰণ্টৰোহারো ৰিয রুল়্হিৰসেন পৰত্তিতো, তস্মা ‘‘অচ্ছরিযধম্মেহী’’তি অসাধারণনিব্বচনং ৰুত্তন্তি দট্ঠব্বং.

সদ্দসামত্থিযতো অনেকধা চক্কৰত্তীসদ্দস্স ৰচনত্থং দস্সেন্তো পধানভূতং ৰচনত্থং পঠমং দস্সেতুং ‘‘চক্করতন’’ন্তিআদিমাহ. ইদমেৰ হি পধানং চক্করতনস্স পৰত্তনমন্তরেন চক্কৰত্তিভাৰানাপত্তিতো. তথা হি অট্ঠকথাসু ৰুত্তং ‘‘কিত্তাৰতা চক্কৰত্তী হোতীতি? একঙ্গুলদ্ৰঙ্গুলমত্তম্পি ¶ চক্করতনে আকাসং অব্ভুগ্গন্ত্ৰা পৰত্তে’’তি (দী. নি. অট্ঠ. ২.২৪৩; ম. নি. অট্ঠ. ৩.২৫৬). যস্মা পন রাজা চক্কৰত্তী একংসং উত্তরাসঙ্গং করিত্ৰা ৰামহত্থেন হত্থিসোণ্ডসদিসপনাল়িং সুৰণ্ণভিঙ্কারং উক্খিপিত্ৰা দক্খিণহত্থেন চক্করতনং উদকেন অব্ভুক্কিরিত্ৰা ‘‘পৰত্ততু ভৰং চক্করতনং, অভিৰিজিনাতু ভৰং চক্করতন’’ন্তি (দী. নি. ২.২৪৪) ৰচনেন চক্করতনং ৰেহাসং অব্ভুগ্গন্ত্ৰা পৰত্তেসি, তস্মা তাদিসং পৰত্তাপনং সন্ধায ‘‘চক্করতনং ৰত্তেতী’’তি ৰুত্তং. যথাহ ‘‘অথ খো আনন্দ রাজা মহাসুদস্সনো উট্ঠাযাসনা…পে… চক্করতনং অব্ভুক্কিরি ‘পৰত্ততু ভৰং চক্করতন’ন্তি’’আদি (দী. নি. ২.২৪৪). ন কেৰলঞ্চ চক্কসদ্দো চক্করতনেযেৰ ৰত্ততি অথ খো সম্পত্তিচক্কাদীসুপি, তস্মা তংতদত্থৰাচকসদ্দসামত্থিযতোপি ৰচনত্থং দস্সেতি ‘‘সম্পত্তিচক্কেহী’’তিআদিনা. তত্থ সম্পত্তিচক্কেহীতি –

‘‘পতিরূপে ৰসে দেসে, অরিযমিত্তকরো সিযা;

সম্মাপণিধিসম্পন্নো, পুব্বে পুঞ্ঞকতো নরো;

ধঞ্ঞং ধনং যসো কিত্তি, সুখঞ্চেতংধিৰত্ততী’’তি. (অ. নি. ৪.৩১) –

ৰুত্তেহি পতিরূপদেসৰাসাদিসম্পত্তিচক্কেহি. ৰত্ততীতি পৰত্ততি সম্পজ্জতি, উপরূপরি কুসলধম্মং ৰা পটিপজ্জতি. তেহীতি সম্পত্তিচক্কেহি. পরন্তি সত্তনিকাযং, যথা সযংসদ্দো সুদ্ধকত্তুত্থস্স জোতকো, তথা পরংসদ্দোপি হেতুকত্তুত্থস্সাতি ৰেদিতব্বং. ৰত্তেতীতি পৰত্তেতি সম্পাদেতি, উপরূপরি কুসলধম্মং ৰা পটিপজ্জাপেতি. যথাহ –

‘‘রাজা মহাসুদস্সনো এৰমাহ ‘পাণো ন হন্তব্বো, অদিন্নং ন আদাতব্বং, কামেসু মিচ্ছা ন চরিতব্বা, মুসা ন ভণিতব্বা, মজ্জং ন পাতব্বং, যথাভুত্তঞ্চ ভুঞ্জথা’তি. যে খো পনানন্দ ¶ পুরত্থিমায দিসায পটিরাজানো, তে রঞ্ঞো মহাসুদস্সনস্স অনুযন্তা অহেসু’’ন্তিআদি (দী. নি. ২.২৪৪).

ইরিযাপথচক্কানন্তি ইরিযাপথভূতানং চক্কানং. ইরিযাপথোপি হি ‘‘চক্ক’’ন্তি ৰুচ্চতি ‘‘চতুচক্কং নৰদ্ৰার’’ন্তিআদীসু (সং. নি. ১.২৯, ১০৯). যথাহ –

‘‘রথঙ্গে ¶ লক্খণে ধম্মো-রচক্কেস্ৰিরিযাপথে;

চক্কং সম্পত্তিযং চক্ক-রতনে মণ্ডলে বলে;

কুলালভণ্ডে আণায-মাযুধে দানরাসিসূ’’তি.

ৰত্তোতি পৰত্তনং উপ্পজ্জনং, ইমিনাৰ ইরিযাপথচক্কং ৰত্তেতি পরহিতায উপ্পাদেতীতি নিব্বচনম্পি দস্সেতি অত্থতো সমানত্তা. তথা চাহ –

‘‘অথ খো তং আনন্দ চক্করতনং পুরত্থিমং দিসং পৰত্তি, অন্ৰদেৰ রাজা মহাসুদস্সনো সদ্ধিং চতুরঙ্গিনিযা সেনায. যস্মিং খো পনানন্দ, পদেসে চক্করতনং পতিট্ঠাসি, তত্থ রাজা মহাসুদস্সনো ৰাসং উপগচ্ছি সদ্ধিং চতুরঙ্গিনিযা সেনাযা’’তিআদি (দী. নি. ২.২৪৪).

অযং অট্ঠকথাতো অপরো নযো – অপ্পটিহতং আণাসঙ্খাতং চক্কং ৰত্তেতীতি চক্কৰত্তী. তথা হি ৰুত্তং –

‘‘পঞ্চহি ভিক্খৰে ধম্মেহি সমন্নাগতো রাজা চক্কৰত্তী ধম্মেনেৰ চক্কং ৰত্তেতি, তং হোতি চক্কং অপ্পটিৰত্তিযং কেনচি মনুস্সভূতেন পচ্চত্থিকেন পাণিনা. কতমেহি পঞ্চহি? ইধ ভিক্খৰে রাজা চক্কৰত্তী অত্থঞ্ঞূ চ হোতি, ধম্মঞ্ঞূ চ মত্তঞ্ঞূ, চ কালঞ্ঞূ চ পরিসঞ্ঞূ চ. ইমেহি খো…পে… পাণিনা’’তিআদি (অ. নি. ৫.১৩১).

খত্তিযমণ্ডলাদিসঞ্ঞিতং চক্কং সমূহং অত্তনো ৰসে ৰত্তেতি অনুৰত্তেতীতিপি চক্কৰত্তী. ৰুত্তঞ্হি ‘‘যে খো পনানন্দ পুরত্থিমায দিসায পটিরাজানো, তে রঞ্ঞো মহাসুদস্সনস্স অনুযন্তা অহেসু’’ন্তিআদি (দী. নি. ২.২৪৪). চক্কলক্খণং ৰত্ততি এতস্সাতিপি চক্কৰত্তী. তেনাহ ‘‘ইমস্স দেৰ কুমারস্স হেট্ঠা ¶ পাদতলেসু চক্কানি জাতানি সহস্সারানি সনেমিকানি সনাভিকানি সব্বাকারপরিপূরানী’’তিআদি (দী. নি. ২.৩৫). চক্কং মহন্তং কাযবলং ৰত্ততি এতস্সাতিপি চক্কৰত্তী. ৰুত্তঞ্হেতং ‘‘অযঞ্হি দেৰ কুমারো সত্তুস্সদো…পে… অযঞ্হি দেৰ কুমারো সীহপুব্বদ্ধকাযো’’তিআদি (দী. নি. ২.৩৫). তেন হিস্স লক্খণেন মহব্বলভাৰো ৰিঞ্ঞাযতি. চক্কং দসৰিধং, দ্ৰাদসৰিধং ৰা ৰত্তধম্মং ৰত্ততি পটিপজ্জতীতি চক্কৰত্তী. তেন ৰুত্তং ‘‘ন হি তে তাত দিব্বং চক্করতনং পেত্তিকং দাযজ্জং ¶ , ইঙ্ঘ ত্ৰং তাত অরিযে চক্কৰত্তিৰত্তে ৰত্তাহী’’তিআদি (দী. নি. ৩.৮৩). চক্কং মহন্তং দানং ৰত্তেতি পৰত্তেতীতিপি চক্কৰত্তী. ৰুত্তঞ্চ –

‘‘পট্ঠপেসি খো আনন্দ রাজা মহাসুদস্সনো তাসং পোক্খরণীনং তীরে এৰরূপং দানং অন্নং অন্নত্থিকস্স, পানং পানত্থিকস্স, ৰত্থং ৰত্থত্থিকস্স, যানং যানত্থিকস্স, সযনং সযনত্থিকস্স, ইত্থিং ইত্থিত্থিকস্স, হিরঞ্ঞং হিরঞ্ঞত্থিকস্স, সুৰণ্ণং সুৰণ্ণত্থিকস্সা’’তিআদি (দী. নি. ২.২৫৪).

রাজাতি সামঞ্ঞং তদঞ্ঞসাধারণতো. চক্কৰত্তীতি ৰিসেসং অনঞ্ঞসাধারণতো. ধম্মসদ্দো ঞাযে, সমো এৰ চ ঞাযো নামাতি আহ ‘‘ঞাযেন সমেনা’’তি. ৰত্ততি উপ্পজ্জতি, পটিপজ্জতীতি ৰা অত্থো. ‘‘ইদং নাম চরতী’’তি অৰুত্তেপি সামঞ্ঞজোতনায ৰিসেসে অৰট্ঠানতো, ৰিসেসত্থিনা চ ৰিসেসস্স পযুজ্জিতব্বত্তা ‘‘সদত্থপরত্থে’’তি যোজীযতি. পদেসগ্গহণে হি অসতি গহেতব্বস্স নিপ্পদেসতা ৰিঞ্ঞাযতি যথা ‘‘দিক্খিতো ন দদাতী’’তি. যস্মা চক্কৰত্তিরাজা ধম্মেনেৰ রজ্জমধিগচ্ছতি, ন অধম্মেন পরূপঘাতাদিনা. তস্মা ৰুত্তং ‘‘ধম্মেন রজ্জং লভিত্ৰা’’তিআদি, ধম্মেনাতি চ ঞাযেন, কুসলধম্মেন ৰা. রঞ্ঞো ভাৰো রজ্জং, ইস্সরিযং.

পরেসং হিতোপাযভূতং ধম্মং করোতি, চরতীতি ৰা ধম্মিকো. অত্তনো হিতোপাযভূতস্স ধম্মস্স কারকো, চরকো ৰা রাজাতি ধম্মরাজাতি ইমং সৰিসেসং অত্থং দস্সেতি ‘‘পরহিতধম্মকরণেন ৰা’’তিআদিনা. অযং পন মহাপদানট্ঠকথানযো – দসৰিধে কুসলধম্মে, অগতিরহিতে ৰা রাজধম্মে নিযুত্তোতি ধম্মিকো; তেনেৰ ধম্মেন লোকং ¶ রঞ্জেতীতি ধম্মরাজা. পরিযাযৰচনমেৰ হি ইদং পদদ্ৰযন্তি. আচরিযেন পন এৰং ৰুত্তং ‘‘চক্কৰত্তিৰত্তসঙ্খাতং ধম্মং চরতি, চক্কৰত্তিৰত্তসঙ্খাতো ৰা ধম্মো এতস্স, এতস্মিং ৰা অত্থীতি ধম্মিকো, ধম্মতো অনপেতত্তা ধম্মো চ সো রঞ্জনট্ঠেন রাজা চাতি ধম্মরাজা’’তি (দী. নি. টী. ১.২৫৮). ‘‘রাজা হোতি চক্কৰত্তী’’তি ৰচনতো ‘‘চাতুরন্তো’’তি ইদং চতুদীপিস্সরতং ৰিভাৰেতীতি আহ ‘‘চাতুরন্তাযা’’তিআদি. চত্তারো সমুদ্দা অন্তা পরিযোসানা এতিস্সাতি চাতুরন্তা, পথৰী. সা হি চতূসু দিসাসু পুরত্থিমসমুদ্দাদিচতুসমুদ্দপরিযোসানত্তা এৰং ৰুচ্চতি. তেন ৰুত্তং ‘‘চতুসমুদ্দ অন্তাযা’’তি, সা পন অৰযৰভূতেহি চতুব্বিধেহি দীপেহি ৰিভূসিতা একলোকধাতুপরিযাপন্না পথৰীযেৰাতি দস্সেতি ‘‘চতুব্বিধদীপৰিভূসিতায পথৰিযা’’তি ইমিনা. যথাহ –

‘‘যাৰতা ¶ চন্দিমসূরিযা, পরিহরন্তি দিসা ভন্তি ৰিরোচনা;

সব্বেৰ দাসা মন্ধাতু, যে চ পাণা পথৰিস্সিতা’’তি.

এত্থ চ ‘‘চতুদীপৰিভূসিতাযা’’তি অৰত্ৰা চতুব্বিধদীপৰিভূসিতাযাতি ৰিধসদ্দগ্গহণং পচ্চেকং পঞ্চসতপরিত্তদীপানম্পি মহাদীপেযেৰ সঙ্গহণত্থং সদ্দাতিরিত্তেন অত্থাতিরিত্তস্স ৰিঞ্ঞাযমানত্তা, কোট্ঠাসৰাচকেন ৰা ৰিধসদ্দেন সমানভাগানং গহিতত্তাতি দট্ঠব্বং. কোপাদিপচ্চত্থিকেতি এত্থ আদিসদ্দেন কামমোহমানমদাদিকে সঙ্গণ্হাতি. ৰিজেতীতি তংকালাপেক্খায ৰত্তমানৰচনং, ৰিজিতৰাতি অত্থো. সদ্দৰিদূ হি অতীতে তাৰীসদ্দমিচ্ছন্তি. ‘‘সব্বরাজানো ৰিজেতী’’তি ৰদন্তো কামং চক্কৰত্তিনো কেনচি যুদ্ধং নাম নত্থি, যুদ্ধেন পন সাধেতব্বস্স ৰিজযস্স সিদ্ধিযা ‘‘ৰিজিতসঙ্গামো’’ ত্ৰেৰ ৰুত্তোতি দস্সেতি.

থাৰরস্স ধুৰস্স ভাৰো থাৰরিযং, যথা জনপদে থাৰরিযং পত্তো, তং দস্সেতুং ‘‘ন সক্কা কেনচী’’তিআদি ৰুত্তং, ইমিনা কেনচি অকম্পিযট্ঠেন জনপদে থাৰরিযপ্পত্তোতি তপ্পুরিসসমাসং দস্সেতি, ইতরেন চ দল়্হভত্তিভাৰতো জনপদো থাৰরিযপ্পত্তো এতস্মিন্তি অঞ্ঞপদত্থসমাসং. তম্হীতি অস্মিং রাজিনি. যথা জনপদো তস্মিং থাৰরিযং পত্তো, তদাৰিকরোন্তো ‘‘অনুযুত্তো’’তিআদিমাহ. তত্থ অনুযুত্তোতি নিচ্চপযুত্তো. সকম্মনিরতোতি চক্কৰত্তিনো রজ্জকম্মে সদা পৰত্তো ¶ . অচলো অসম্পৰেধীতি পরিযাযৰচনমেতং, চোরানং ৰা ৰিলোপনমত্তেন অচলো, দামরিকত্তেন অসম্পৰেধী. চোরেহি ৰা অচলো, পটিরাজূহি অসম্পৰেধী. অনতিমুদুভাৰেন ৰা অচলো, অনতিচণ্ডভাৰেন অসম্পৰেধী. তথা হি অতিচণ্ডস্স রঞ্ঞো বলিখণ্ডাদীহি লোকং পীল়যতো মনুস্সা মজ্ঝিমজনপদং ছড্ডেত্ৰা পব্বতসমুদ্দতীরাদীনি নিস্সায পচ্চন্তে ৰাসং কপ্পেন্তি, অতিমুদুকস্স চ রঞ্ঞো চোরসাহসিকজনৰিলোপপীল়িতা মনুস্সা পচ্চন্তং পহায জনপদমজ্ঝে ৰাসং কপ্পেন্তি, ইতি এৰরূপে রাজিনি জনপদো থাৰরভাৰং ন পাপুণাতি. এতস্মিং পন তদুভযৰিরহিতে সুৰণ্ণতুলা ৰিয সমভাৰপ্পত্তে রাজিনি রজ্জং কারযমানে জনপদো পাসাণপিট্ঠিযং ঠপেত্ৰা অযোপট্টেন পরিক্খিত্তো ৰিয অচলো অসম্পৰেধী থাৰরিযপ্পত্তোতি.

সেয্যথিদন্তি একোৰ নিপাতো, ‘‘সো কতমো, তং কতমং, সা কতমা’’তিআদিনা যথারহং লিঙ্গৰিভত্তিৰচনৰসেন পযোজিযমানোৰ হোতি, ইধ তানি কতমানীতি পযুত্তোতি আহ ‘‘তস্স চেতানী’’তিআদি. চচতি চক্কৰত্তিনো যথারুচি আকাসাদিগমনায পরিব্ভমতীতি চক্কং. চক্করতনঞ্হি অন্তোসমুট্ঠিতৰাযোধাতুৰসেন রঞ্ঞো চক্কৰত্তিস্স ৰচনসমনন্তরমেৰ ¶ পৰত্ততি, ন চন্দসূরিযৰিমানাদি ৰিয বহিসমুট্ঠিতৰাযোধাতুৰসেনাতি ৰিমানট্ঠকথাযং (ৰি. ৰ. অট্ঠ. ১.পঠমপীঠৰিমানৰণ্ণনা) ৰুত্তং. রতিজননট্ঠেনাতি পীতিসোমনস্সুপ্পাদনট্ঠেন. তঞ্হি পস্সন্তস্স, সুণন্তস্স চ অনপ্পকং পীতিসোমনস্সং উপ্পজ্জতি অচ্ছরিযধম্মত্তা. ৰচনত্থতো পন রমেতি রতিং করোতীতি রতনং, রমনং ৰা রতং, তং নেতীতি রতনং, রতং ৰা জনেতীতি রতনং জ-কারলোপৰসেনাতিপি নেরুত্তিকা. সব্বত্থাতি হত্থিরতনাদীসু.

চিত্তীকতভাৰাদিনাপি চক্কস্স রতনট্ঠো ৰেদিতব্বো, সো পন রতিজননট্ঠেনেৰ একসঙ্গহতায ৰিসুং ন গহিতো. কস্মা একসঙ্গহোতি চে? চিত্তীকতাদিভাৰস্সপি রতিনিমিত্তত্তা. অথ ৰা গন্থব্যাসং পরিহরিতুকামেন চিত্তীকতাদিভাৰো ন গহিতোতি ৰেদিতব্বং. অঞ্ঞাসু পন অট্ঠকথাসু (দী. নি. অট্ঠ. ২.৩৩; সং. নি. অট্ঠ. ৩.৫.২২৩; খু. পা. অট্ঠ. ৬.৩.যানীধাতিগাথাৰণ্ণনা; সু. নি. অট্ঠ. ১.২২৬; মহানি. অট্ঠ. ১৫৬) এৰং ৰুত্তং –

‘‘রতিজননট্ঠেন ¶ রতনং. অপিচ –

চিত্তীকতং মহগ্ঘঞ্চ, অতুলং দুল্লভদস্সনং;

অনোমসত্তপরিভোগং, রতনং তেন ৰুচ্চতি.

‘‘চক্করতনস্স চ নিব্বত্তকালতো পট্ঠায অঞ্ঞং দেৰট্ঠানং নাম ন হোতি, সব্বেপি গন্ধপুপ্ফাদীহি তস্সেৰ পূজঞ্চ অভিৰাদনাদীনি চ করোন্তীতি চিত্তীকতট্ঠেন রতনং. চক্করতনস্স চ এত্তকং নাম ধনং অগ্ঘতীতি অগ্ঘো নত্থি, ইতি মহগ্ঘট্ঠেনপি রতনং. চক্করতনঞ্চ অঞ্ঞেহি লোকে ৰিজ্জমানরতনেহি অসদিসন্তি অতুলট্ঠেন রতনং. যস্মা পন যস্মিং কপ্পে বুদ্ধা উপ্পজ্জন্তি, তস্মিংযেৰ চক্কৰত্তিনো উপ্পজ্জন্তি, বুদ্ধা চ কদাচি করহচি উপ্পজ্জন্তি, তস্মা দুল্লভদস্সনট্ঠেনপি রতনং. তদেতং জাতিরূপকুলইস্সরিযাদীহি অনোমস্স উল়ারসত্তস্সেৰ উপ্পজ্জতি, ন অঞ্ঞস্সাতি অনোমসত্তপরিভোগট্ঠেনপি রতনং. যথা চ চক্করতনং, এৰং সেসানিপী’’তি.

তত্রাযং তট্টীকায, অঞ্ঞত্থ চ ৰুত্তনযেন অত্থৰিভাৰনা – ইদঞ্হি ‘‘চিত্তীকত’’ন্তিআদিৰচনং নিব্বচনত্থৰসেন ৰুত্তং ন হোতি, অথ কিন্তি চে? লোকে ‘‘রতন’’ন্তি ¶ সম্মতস্স ৰত্থুনো গরুকাতব্বভাৰেন ৰুত্তং. সরূপতো পনেতং লোকিযমহাজনেন সম্মতং হিরঞ্ঞসুৰণ্ণাদিকং, চক্কৰত্তিরঞ্ঞো উপ্পন্নং চক্করতনাদিকং, কতঞ্ঞুকতৰেদিপুগ্গলাদিকং, সব্বুক্কট্ঠপরিচ্ছেদৰসেন বুদ্ধাদিসরণত্তযঞ্চ দট্ঠব্বং. ‘‘অহো মনোহর’’ন্তি চিত্তে কত্তব্বতায চিত্তীকতং, স্ৰাযং চিত্তীকারো তস্স পূজনীযতাযাতি কত্ৰা পূজনীযন্তি অত্থং ৰদন্তি. কেচি পন ‘‘ৰিচিত্রকতট্ঠেন চিত্তীকত’’ন্তি ভণন্তি, তং ন গহেতব্বং ইধ চিত্তসদ্দস্স হদযৰাচকত্তা ‘‘চিত্তীকত্ৰা সুণাথ মে’’তি (বু. ৰং. ১.৮০) আহচ্চভাসিতপাল়িযং ৰিয. তথা চাহু ‘‘যথারহমিৰণ্ণাগমো ভূকরেসূ’’তি. ‘‘পস্স চিত্তীকতং রূপং, মণিনা কুণ্ডলেন চা’’তিআদীসু (ম. নি. ২.৩০২) পন পুব্বে অৰিচিত্রং ইদানি ৰিচিত্রং কতন্তি চিত্তীকতন্তি অত্থো গহেতব্বো তত্থ চিত্তসদ্দস্স ৰিচিত্রৰাচকত্তা. মহন্তং ৰিপুলং অপরিমিতং অগ্ঘতীতি মহগ্ঘং. নত্থি এতস্স তুলা উপমা, তুলং ৰা সদিসন্তি অতুলং. কদাচিদেৰ উপ্পজ্জনতো দুক্খেন ¶ লদ্ধব্বদস্সনত্তা দুল্লভদস্সনং. অনোমেহি উল়ারগুণেহেৰ সত্তেহি পরিভুঞ্জিতব্বতো অনোমসত্তপরিভোগং.

ইদানি নেসং চিত্তীকতাদিঅত্থানং সৰিসেসং চক্করতনে লব্ভমানতং দস্সেত্ৰা ইতরেসুপি তে অতিদিসিতুং ‘‘যথা চ চক্করতন’’ন্তিআদি আরদ্ধং. তত্থ অঞ্ঞং দেৰট্ঠানং নাম ন হোতি রঞ্ঞো অনঞ্ঞসাধারণিস্সরিযাদিসম্পত্তিপটিলাভহেতুতো, অঞ্ঞেসং সত্তানং যথিচ্ছিতত্থপটিলাভহেতুতো চ. অগ্ঘো নত্থি অতিৰিয উল়ারসমুজ্জলরতনত্তা, অচ্ছরিযব্ভুতধম্মতায চ. যদগ্গেন চ মহগ্ঘং, তদগ্গেন অতুলং. সত্তানং পাপজিগুচ্ছনেন ৰিগতকাল়কো পুঞ্ঞপসুততায মণ্ডভূতো যাদিসো কালো বুদ্ধুপ্পাদারহো, তাদিসে এৰ চক্কৰত্তীনম্পি সম্ভৰোতি আহ ‘‘যস্মা পনা’’তিআদি. কদাচি করহচীতি পরিযাযৰচনং, ‘‘কদাচী’’তি ৰা যথাৰুত্তকালং সন্ধায ৰুত্তং, ‘‘করহচী’’তি জম্বুসিরিদীপসঙ্খাতং দেসং. তেনাহ –

‘‘কালং দীপঞ্চ দেসঞ্চ, কুলং মাতরমেৰ চ;

ইমে পঞ্চ ৰিলোকেত্ৰা, উপ্পজ্জতি মহাযসো’’তি. (ধ. প. অট্ঠ. ১.১.১০);

উপমাৰসেন চেতং ৰুত্তং. উপমোপমেয্যানঞ্চ ন অচ্চন্তমেৰ সদিসতা, তস্মা যথা বুদ্ধা কদাচি করহচি উপ্পজ্জন্তি, ন তথা চক্কৰত্তিনো, চক্কৰত্তিনো পন অনেকদাপি বুদ্ধুপ্পাদকপ্পে উপ্পজ্জন্তীতি অত্থো গহেতব্বো. এৰং সন্তেপি চক্কৰত্তিৰত্তপূরণস্স দুক্করভাৰতো ¶ দুল্লভুপ্পাদোযেৰাতি ইমিনা দুল্লভুপ্পাদতাসামঞ্ঞেন তেসং দুল্লভদস্সনতা ৰুত্তাতি ৰেদিতব্বং. কামং চক্করতনানুভাৰেন সমিজ্ঝমানো গুণো চক্কৰত্তিপরিৰারজনসাধারণো, তথাপি চক্কৰত্তী এৰ নং সামিভাৰেন ৰিসৰিতায পরিভুঞ্জতীতি ৰত্তব্বতং অরহতি তদত্থমেৰ উপ্পজ্জনতোতি দস্সেন্তো ‘‘তদেত’’ন্তিআদিমাহ. যথাৰুত্তানং পঞ্চন্নং, ছন্নম্পি ৰা অত্থানং সেসরতনেসুপি লব্ভনতো ‘‘এৰং সেসানিপী’’তি ৰুত্তং.

ইমেহি পন রতনেহি রাজা চক্কৰত্তী কিমত্থং পচ্চনুভোতি, ননু ৰিনাপি তেসু কেনচি রঞ্ঞা চক্কৰত্তিনা ভৰিতব্বন্তি চোদনায তস্স তেহি হথারহমত্থপচ্চনুভৰনদস্সনেন কেনচিপি অৰিনাভাৰিতং ৰিভাৰেতুং ‘‘ইমেসু পনা’’তিআদি আরদ্ধং. অজিতং পুরত্থিমাদিদিসায খত্তিযমণ্ডলং ¶ জিনাতি মহেসক্খতাসংৰত্তনিযকম্মনিস্সন্দভাৰতো. যথাসুখং অনুৰিচরতি হত্থিরতনং, অস্সরতনঞ্চ অভিরুহিত্ৰা তেসং আনুভাৰেন অন্তোপাতরাসংযেৰ সমুদ্দপরিযন্তং পথৰিং অনুপরিযাযিত্ৰা রাজধানিযা এৰ পচ্চাগমনতো. পরিণাযকরতনেন ৰিজিতমনুরক্খতি তত্থ তত্থ কত্তব্বকিচ্চসংৰিদহনতো. অৰসেসেহি মণিরতনইত্থিরতনগহপতিরতনেহি উপভুঞ্জনেন পৰত্তং উপভোগসুখং অনুভৰতি যথারহং তেহি তথানুভৰনসিদ্ধিতো. সো হি মণিরতনেন যোজনপ্পমাণে পদেসে অন্ধকারং ৰিধমেত্ৰা আলোকদস্সনাদিনা সুখমনুভৰতি, ইত্থিরতনেন অতিক্কন্তমানুসকরূপদস্সনাদিৰসেন, গহপতিরতনেন ইচ্ছিতিচ্ছিতমণিকনকরজতাদিধনপটিলাভৰসেন সুখমনুভৰতি.

ইদানি সত্তিযা, সত্তিফলেন চ যথাৰুত্তমত্থং ৰিভাৰেতুং ‘‘পঠমেনা’’তিআদি ৰুত্তং. তিৰিধা হি সত্তিযো ‘‘সক্কোন্তি সমত্থেন্তি রাজানো এতাযা’’তি কত্ৰা. যথাহু –

‘‘পভাৰুস্সাহমন্তানং, ৰসা তিস্সো হি সত্তিযো;

পভাৰো দণ্ডজো তেজো, পতাপো তু চ কোসজো.

মন্তো চ মন্তনং সো তু, চতুক্কণ্ণো দ্ৰিগোচরো;

তিগোচরো তু ছক্কণ্ণো, রহস্সং গুয্হমুচ্চতে’’তি.

তত্থ ৰীরিযবলং উস্সাহসত্তি. পঠমেন চস্স চক্করতনেন তদনুযোগো পরিপুণ্ণো হোতি. কস্মাতি চে? তেন উস্সাহসত্তিযা পৰত্তেতব্বস্স অপ্পটিহতাণাচক্কভাৰস্স সিদ্ধিতো. পঞ্ঞাবলং মন্তসত্তি. পচ্ছিমেন চস্স পরিণাযকরতনেন তদনুযোগো. কস্মাতি চে ¶ ? তস্স সব্বরাজকিচ্চেসু কুসলভাৰেন মন্তসত্তিযা ৰিয অৰিরজ্ঝনপযোগত্তা. দমনেন, ধনেন চ পভুত্তং পভূসত্তি. হত্থিঅস্সগহপতিরতনেহি চস্স তদনুযোগো পরিপুণ্ণো হোতি. কস্মাতি চে? হত্থিঅস্সরতনানং মহানুভাৰতায, গহপতিরতনতো পটিলদ্ধকোসসম্পত্তিযা চ পভাৰসত্তিযা ৰিয পভাৰসমিদ্ধিসিদ্ধিতো. ইত্থিমণিরতনেহি তিৰিধসত্তিযোগফলং পরিপুণ্ণং হোতীতি সম্বন্ধো, যথাৰুত্তাহি তিৰিধাহি সত্তীহি পযুজ্জনতো যং ফলং লদ্ধব্বং. তং সব্বং তেহি ¶ পরিপুণ্ণং হোতীতি অত্থো. কস্মাতি চে? তেহেৰ উপভোগসুখস্স সিজ্ঝনতো.

দুৰিধসুখৰসেনপি যথাৰুত্তমত্থং ৰিভাৰেতুং ‘‘সো ইত্থিমণিরতনেহী’’তিআদি কথিতং. ভোগসুখন্তি সমীপে কত্ৰা পরিভোগৰসেন পৰত্তসুখং. সেসেহীতি তদৰসেসেহি চক্কাদিপঞ্চরতনেহি. অপচ্চত্থিকতাৰসেন পৰত্তসুখং ইস্সরিযসুখং. ইদানি তেসং সম্পন্নহেতুৰসেনপি কেনচি অৰিনাভাৰিতমেৰ ৰিভাৰেতুং ‘‘ৰিসেসতো’’তিআদিমাহ. অদোসকুসলমূলজনিতকম্মানুভাৰেনাতি অদোসসঙ্খাতেন কুসলমূলেন সহজাতাদিপচ্চযৰসেন উপ্পাদিতকম্মস্স আনুভাৰেন সম্পজ্জন্তি সোম্মতররতনজাতিকত্তা. কম্মফলঞ্হি যেভুয্যেন কম্মসরিক্খকং. মজ্ঝিমানি মণিইত্থিগহপতিরতনানি অলোভকুসলমূলজনিতকম্মানুভাৰেন সম্পজ্জন্তি উল়ারধনস্স, উল়ারধনপটিলাভকারণস্স চ পরিচ্চাগসম্পদাহেতুকত্তা. পচ্ছিমং পরিণাযকরতনং অমোহকুসলমূলজনিতকম্মানুভাৰেন সম্পজ্জতি মহাপঞ্ঞেনেৰ চক্কৰত্তিরাজকিচ্চস্স পরিনেতব্বত্তা, মহাপঞ্ঞভাৰস্স চ অমোহকুসলমূলজনিতকম্মনিস্সন্দভাৰতো. বোজ্ঝঙ্গসংযুত্তেতি মহাৰগ্গে দুতিযে বোজ্ঝঙ্গসংযুত্তে (সং. নি. ৫.২২৩). রতনসুত্তস্সাতি তত্থ পঞ্চমৰগ্গে সঙ্গীতস্স দুতিযস্স রতনসুত্তস্স (সং. নি. ৫.২২৩). উপদেসো নাম সৰিসেসং সত্তন্নং রতনানং ৰিচারণৰসেন পৰত্তো নযো.

সরণতো পটিপক্খৰিধমনতো সূরা সত্তিৰন্তো, নিব্ভযাৰহাতি অত্থো. তেনাহ ‘‘অভীরুকজাতিকা’’তি. অসুরে ৰিজিনিত্ৰা ঠিতত্তা সক্কো দেৰানমিন্দো ধীরো নাম, তস্স সেনঙ্গভাৰতো দেৰপুত্তো ‘‘অঙ্গ’’ন্তি ৰুচ্চতি, ধীরস্স অঙ্গং, তস্স রূপমিৰ রূপং যেসং তে ধীরঙ্গরূপা, তেন ৰুত্তং ‘‘দেৰপুত্তসদিসকাযা’’তি. একেতি সারসমাসনামকা আচরিযা, তদক্খমন্তো আহ ‘‘অযং পনেত্থা’’তিআদি. সভাৰোতি সভাৰভূতো অত্থো. উত্তমসূরাতি উত্তমযোধা. সূরসদ্দো হি ইধ যোধত্থো. এৰঞ্হি পুরিমনযতো ইমস্স ৰিসেসতা হোতি, ‘‘উত্তমত্থো সূরসদ্দো’’তিপি ৰদন্তি, ‘‘উত্তমা সূরা ৰুচ্চন্তী’’তিপি হি পাঠো দিস্সতি. ৰীরানন্তি ৰীরিযৰন্তানং. অঙ্গন্তি কারণং ‘‘অঙ্গীযতি ঞাযতি ফলমেতেনা’’তি কত্ৰা. যেন ৰীরিযেন ‘‘ধীরা’’তি ৰুচ্চন্তি, তদেৰ ধীরঙ্গং নামাতি ¶ আহ ‘‘ৰীরিযন্তি ৰুত্তং হোতী’’তি. রূপন্তি ¶ সরীরং. তেন ৰুত্তং ‘‘ৰীরিযমযসরীরা ৰিযা’’তি. ৰীরিযমেৰ ৰীরিযমযং যথা ‘‘দানময’’ন্তি, (দী. নি. ৩.৩০৫; ইতিৰু. ৬০; নেত্তি. ৩৪) তস্মা ৰীরিযসঙ্খাতসরীরা ৰিযাতি অত্থো. ৰীরিযং পন ন একন্তরূপন্তি ৰিয-সদ্দগ্গহণং কতং. অপিচ ধীরঙ্গেন নিব্বত্তং ধীরঙ্গন্তি অত্থং দস্সেতুং ‘‘ৰীরিযমযসরীরা ৰিযা’’তি ৰুত্তং, এৰম্পি ৰীরিযতো রূপং ন একন্তং নিব্বত্তন্তি ৰিয-সদ্দেন দস্সেতি. অথ ৰা রূপং সরীরভূতং ধীরঙ্গং ৰীরিযমেতেসন্তি যোজেতব্বং, তথাপি ৰীরিযং নাম কিঞ্চি সৰিগ্গহং ন হোতীতি দীপেতি ‘‘ৰীরিযমযসরীরা ৰিযা’’তি ইমিনা, ইধাপি মযসদ্দো সকত্থেযেৰ দট্ঠব্বো, তস্মা সৰিগ্গহৰীরিযসদিসাতি অত্থো. ইদং ৰুত্তং হোতি – সৰিগ্গহং চে ৰীরিযং নাম সিযা, তে চস্স পুত্তা তংসদিসাযেৰ ভৰেয্যুন্তি অযমেৰ চত্থো আচরিযেন (দী. নি. টী. ১.২৫৮) অনুমতো. মহাপদানট্ঠকথাযং পন এৰং ৰুত্তং ‘‘ধীরঙ্গং রূপমেতেসন্তি ধীরঙ্গরূপা, ৰীরিযজাতিকা ৰীরিযসভাৰা ৰীরিযমযা অকিলাসুনো অহেসুং, দিৰসম্পি যুজ্ঝন্তা ন কিলমন্তীতি ৰুত্তং হোতী’’তি, (দী. নি. অট্ঠ. ২.৩৪) তদেতং রূপসদ্দস্স সভাৰত্থতং সন্ধায ৰুত্তন্তি দট্ঠব্বং. ইধ চেৰ অঞ্ঞত্থ কত্থচি ‘‘ধিতঙ্গরূপা’’তি পাঠো দিস্সতি. ৰীরিযত্থোপি হি ধিতিসদ্দো হোতি ‘‘সচ্চং ধম্মো ধিতি চাগো, দিট্ঠং সো অতিৰত্ততী’’তিআদীসু (জা. ১.১.৫৭) ধিতিসদ্দো ৰিয. কত্থচি পন ‘‘ৰীরঙ্গ’’ন্তি পাঠোৰ দিট্ঠো. যথা রুচ্চতি, তথা গহেতব্বং.

ননু চ রঞ্ঞো চক্কৰত্তিস্স পটিসেনা নাম নত্থি, য’মস্স পুত্তা পমদ্দেয্যুং, অথ কস্মা ‘‘পরসেনপ্পমদ্দনা’’তি ৰুত্তন্তি চোদনং সোধেন্তো ‘‘সচে’’তিআদিমাহ, পরসেনা হোতু ৰা, মা ৰা, ‘‘সচে পন ভৰেয্যা’’তি পরিকপ্পনামত্তেন তেসং এৰমানুভাৰতং দস্সেতুং তথা ৰুত্তন্তি অধিপ্পাযো, ‘‘পরসেনপ্পমদ্দনা’’তি ৰুত্তেপি পরসেনং পমদ্দিতুং সমত্থাতি অত্থো গহেতব্বো পকরণতোপি অত্থন্তরস্স ৰিঞ্ঞাযমানত্তা, যথা ‘‘সিক্খমানেন ভিক্খৰে ভিক্খুনা অঞ্ঞাতব্বং পরিপুচ্ছিতব্বং পরিপঞ্হিতব্ব’’ন্তি (পাচি. ৪৩৪) এতস্স পদভাজনীযে (পাচি. ৪৩৬) ‘‘সিক্খিতুকামেনা’’তি অত্থগ্গহণন্তি ইমমত্থং দস্সেতুং ‘‘তং পরিমদ্দিতুং সমত্থা’’তি ৰুত্তং. ন হি তে পরসেনং পমদ্দন্তা তিট্ঠন্তি, অথ খো পমদ্দনসমত্থা এৰ হোন্তি ¶ . এৰমঞ্ঞত্রপি যথারহং. পরসেনং পমদ্দনায সমত্থেন্তীতি পরসেনপ্পমদ্দনাতি অত্থং দস্সেতীতিপি ৰদন্তি.

পুব্বে কতূপচিতস্স এতরহি ৰিপচ্চমানকস্স পুঞ্ঞধম্মস্স চিরতরং ৰিপচ্চিতুং পচ্চযভূতং চক্কৰত্তিৰত্তসমুদাগতং পযোগসম্পত্তিসঙ্খাতং ধম্মং দস্সেতুং ‘‘ধম্মেনা’’তি পদস্স ‘‘পাণো ¶ ন হন্তব্বোতিআদিনা পঞ্চসীলধম্মেনা’’তি অত্থমাহ. অযঞ্হি অত্থো ‘‘যে খো পনানন্দ পুরত্থিমায দিসায পটিরাজানো, তে রাজানং মহাসুদস্সনং উপসঙ্কমিত্ৰা এৰমাহংসু ‘এহি খো মহারাজ, স্ৰাগতং তে মহারাজ, সকং তে মহারাজ, অনুসাস মহারাজা’তি. রাজা মহাসুদস্সনো এৰমাহ ‘পাণো ন হন্তব্বো, অদিন্নং ন আদাতব্বং, কামেসু মিচ্ছা ন চরিতব্বা, মুসা ন ভণিতব্বা, মজ্জং ন পাতব্বং, যথাভুত্তঞ্চ ভুঞ্জথা’তি. যে খো পনানন্দ পুরত্থিমায দিসায পটিরাজানো, তে রঞ্ঞো মহাসুদস্সনস্স অনুযন্তা অহেসু’’ন্তিআদিনা (দী. নি. ২.২৪৪) আগতং রঞ্ঞো ওৰাদধম্মং সন্ধায ৰুত্তো. এৰঞ্হি ‘‘অদণ্ডেন অসত্থেনা’’তি ইদম্পি ৰিসেসনৰচনং সুসমত্থিতং হোতি. অঞ্ঞাসুপি সুত্তনিপাতট্ঠকথাদীসু (সু. নি. অট্ঠ. ২২৬; খু. পা. অট্ঠ. ৬.৩; দী. নি. অট্ঠ. ২.৩৩; সং. নি. অট্ঠ. ৩.২২৩) অযমেৰত্থো ৰুত্তো.

মহাপদানট্ঠকথাযং পন ‘‘অদণ্ডেনাতি যে কতাপরাধে সত্তে সতম্পি সহস্সম্পি গণ্হন্তি, তে ধনদণ্ডেন রজ্জং কারেন্তি নাম, যে ছেজ্জভেজ্জং অনুসাসন্তি, তে সত্থদণ্ডেন. অযং পন দুৰিধম্পি দণ্ডং পহায অদণ্ডেন অজ্ঝাৰসতি. অসত্থেনাতি যে একতোধারাদিনা সত্থেন পরং ৰিহেসন্তি, তে সত্থেন রজ্জং কারেন্তি নাম. অযং পন সত্থেন খুদ্দকমক্খিকাযপি পিৰনমত্তং লোহিতং কস্সচি অনুপ্পাদেত্ৰা ধম্মেনেৰ, ‘এহি খো মহারাজা’তি এৰং পটিরাজূহি সম্পটিচ্ছিতাগমনো ৰুত্তপ্পকারং পথৰিং অভিৰিজিনিত্ৰা অজ্ঝাৰসতি অভিভৰিত্ৰা সামী হুত্ৰা ৰসতীতি অত্থো’’তি (দী. নি. অট্ঠ. ২.৩৪) ৰুত্তং, তদেতং ‘‘ধম্মেনা’’তি পদস্স ‘‘পুব্বে কতূপচিতেন এতরহি ৰিপচ্চমানকেন যেন কেনচি পুঞ্ঞধম্মেনা’’তি অত্থং সন্ধায ৰুত্তং. তেনেৰ হি ‘‘ধম্মেন পটিরাজূহি সম্পটিচ্ছিতাগমনো ৰুত্তপ্পকারং পথৰিং ¶ অভিৰিজিনিত্ৰা অজ্ঝাৰসতী’’তি. আচরিযেনপি (দী. নি. টী. ১.২৫৮) ৰুত্তং ধম্মেনাতি কতূপচিতেন অত্তনো পুঞ্ঞধম্মেন. তেন হি সঞ্চোদিতা পথৰিযং সব্বরাজানো পচ্চুগ্গন্ত্ৰা ‘‘স্ৰাগতং তে মহারাজা’’তিআদীনি ৰত্ৰা অত্তনো রজ্জং রঞ্ঞো চক্কৰত্তিস্স নিয্যাতেন্তি. তেন ৰুত্তং ‘‘সো ইমং পথৰিং সাগরপরিযন্তং অদণ্ডেন অসত্থেন ধম্মেন অভিৰিজিয অজ্ঝাৰসতী’’তি, তেনপি যথাৰুত্তমেৰত্থং দস্সেতি, তস্মা উভযথাপি এত্থ অত্থো যুত্তো এৰাতি দট্ঠব্বং. চক্কৰত্তিৰত্তপূরণাদিপযোগসম্পত্তিমন্তরেন হি পুব্বে কতূপচিতকম্মেনেৰ এৰমজ্ঝাৰসনং ন সম্ভৰতি, তথা পুব্বে কতূপচিতকম্মমন্তরেন চক্কৰত্তিৰত্তপূরণাদিপযোগসম্পত্তিযা এৰাতি.

এৰং একং নিপ্ফত্তিং কথেত্ৰা দুতিযং নিপ্ফত্তিং কথেতুং যদেতং ‘‘সচে খো পনা’’তিআদিৰচনং ৰুত্তং, তত্থ অনুত্তানমত্থং দস্সেন্তো ‘‘অরহং…পে… ৰিৰট্টচ্ছদোতি এত্থা’’তিআদিমাহ ¶ . যস্মা রাগাদযো সত্ত পাপধম্মা লোকে উপ্পজ্জন্তি, উপ্পজ্জমানা চ তে সত্তসন্তানং ছাদেত্ৰা পরিযোনন্ধিত্ৰা কুসলপ্পৰত্তিং নিৰারেন্তি, তস্মা তে ইধ ছদসদ্দেন ৰুত্তাতি দস্সেতি ‘‘রাগদোসা’’তিআদিনা. দুচ্চরিতন্তি মিচ্ছাদিট্ঠিতো অঞ্ঞেন মনোদুচ্চরিতেন সহ তীণি দুচ্চরিতানি, মিচ্ছাদিট্ঠি পন ৰিসেসেন সত্তানং ছদনতো, পরমসাৰজ্জত্তা চ ৰিসুং গহিতা. ৰুত্তঞ্চ ‘‘সব্বে তে ইমেহেৰ দ্ৰাসট্ঠিযা ৰত্থূহি অন্তোজালীকতা, এত্থ সিতাৰ উম্মুজ্জমানা উম্মুজ্জন্তী’’তিআদি (দী. নি. ১.১৪৬). তথা মুয্হনট্ঠেন মোহো, অৰিদিতকরণট্ঠেন অৰিজ্জাতি পৰত্তিআকারভেদেন অঞ্ঞাণমেৰ দ্ৰিধা ৰুত্তং. তথা হিস্স দ্ৰিধাপি ছদনত্থো কথিতো ‘‘অন্ধতমং তদা হোতি, যং মোহো সহতে নর’’ন্তি, (মহানি. ৫, ১৫৬, ১৯৫) ‘‘অৰিজ্জায নিৰুতো লোকো, ৰেৰিচ্ছা পমাদা নপ্পকাসতী’’তি (সু. নি. ১০৩৯; চূল়নি. পারাযনৰগ্গ.২) চ. এৰং রাগদোসাদীনম্পি ছদনত্থো ৰত্তব্বো. মহাপদানট্ঠকথাযং (দী. নি. অট্ঠ. ২.৩৩) পন রাগদোসমোহমানদিট্ঠিকিলেসতণ্হাৰসেন সত্ত পাপধম্মা গহিতা. তত্র রঞ্জনট্ঠেন রাগো, তণ্হাযনট্ঠেন তণ্হাতি পৰত্তিআকারভেদেন লোভো এৰ দ্ৰিধা ৰুত্তো. তথা হিস্স দ্ৰিধাপি ছদনত্থো একন্তিকোৰ. যথাহ ‘‘অন্ধতমং তদা হোতি, যং রাগো সহতে নর’’ন্তি, ‘‘কামন্ধা জালসঞ্ছন্না, তণ্হাছদনছাদিতা’’তি ¶ (উদা. ৯৪) চ, কিলেসগ্গহণেন চ ৰুত্তাৰসিট্ঠা ৰিচিকিচ্ছাদযো ৰুত্তা.

সত্তহি পটিচ্ছন্নেতি হেতুগব্ভৰচনং, সত্তহি পাপধম্মেহি পটিচ্ছন্নত্তা কিলেসৰসেন অন্ধকারে লোকেতি অত্থো. তং ছদনন্তি সত্তপাপধম্মসঙ্খাতং ছদনং. ৰিৰট্টেত্ৰাতি ৰিৰট্টং কত্ৰা ৰিগমেত্ৰা. তদেৰ পরিযাযন্তরেন ৰুত্তং ‘‘সমন্ততো সঞ্জাতালোকো হুত্ৰা’’তি. কিলেসছদনৰিগমো এৰ হি আলোকো, এতেন ৰিৰট্টযিতব্বো ৰিগমেতব্বোতি ৰিৰট্টো, ছাদেতি পটিচ্ছাদেতীতি ছদো, ৰিৰট্টো ছদো অনেনাতি ৰিৰট্টচ্ছদা, ৰিৰট্টচ্ছদো ৰাতি অত্থং দস্সেতি. অযঞ্হি ৰিৰট্টচ্ছদসদ্দো দল়্হধম্মপচ্চক্খধম্মসদ্দাদযো ৰিয পুল্লিঙ্গৰসেন আকারন্তো, ওকারন্তো চ হোতি. তথা হি মহাপদানট্ঠকথাযং ৰুত্তং ‘‘রাগদোসমোহমানদিট্ঠিকিলেসতণ্হাসঙ্খাতং ছদনং আৰরণং ৰিৰটং ৰিদ্ধংসিতং ৰিৰটকং এতেনাতি ৰিৰটচ্ছদো, ‘ৰিৰট্টচ্ছদা’তিপি পাঠো, অযমেৰত্থো’’তি, (দী. নি. অট্ঠ. ২.৩৩) তস্সা লীনত্থপ্পকাসনিযম্পি ৰুত্তং ‘‘ৰিৰট্টচ্ছদাতি ওকারস্স আকারং কত্ৰা নিদ্দেসো’’তি. সদ্দৰিদূ পন ‘‘আধন্ৰাদিতোতি লক্খণেন সমাসন্তগতেহি ধনুসদ্দাদীহি ক্ৰচি আপচ্চযো’’তি ৰত্ৰা ‘‘কণ্ডিৰধন্ৰা, পচ্চক্খধম্মা, ৰিৰট্টচ্ছদা’’তি পযোগমুদাহরন্তি.

কস্মা পদত্তযমেতং ৰুত্তন্তি অনুযোগং হেতালঙ্কারনযেন পরিহরন্তো ‘‘তত্থা’’তিআদিমাহ, তত্থাতি চ ¶ তীসু পদেসূতি অত্থো. পূজাৰিসেসং পটিগ্গণ্হিতুং অরহতীতি অরহন্তি অত্থেন পূজারহতা ৰুত্তা. যস্মা সম্মাসম্বুদ্ধো, তস্মা পূজারহতাতি তস্সা পূজারহতায হেতু ৰুত্তো. সৰাসনসব্বকিলেসপ্পহানপুব্বকত্তা বুদ্ধভাৰস্স বুদ্ধত্তহেতুভূতা ৰিৰট্টচ্ছদতা ৰুত্তা. কম্মাদিৰসেন তিৰিধং ৰট্টঞ্চ রাগাদিৰসেন সত্তৰিধো ছদো চ ৰট্টচ্ছদা, ৰট্টচ্ছদেহি ৰিগতো, ৰিগতা ৰা ৰট্টচ্ছদা যস্সাতি ৰিৰট্টচ্ছদো, ৰিৰট্টচ্ছদা ৰা, দ্ৰন্দপুব্বগো পন ৰি-সদ্দো উভযত্থ যোজেতব্বোতি ইমমত্থং দস্সেতুং ‘‘ৰিৰট্টো চ ৰিচ্ছদো চা’’তি ৰুত্তং. এৰম্পি ৰদন্তি ‘‘ৰিৰট্টো চ সো ৰিচ্ছদো চাতি ৰিৰট্টচ্ছদো, উত্তরপদে ¶ পুব্বপদলোপোতি অত্থং দস্সেতী’’তি. ‘‘অরহং ৰট্টাভাৰেনা’’তি ইদং কিলেসেহি আরকত্তা, কিলেসারীনং সংসারচক্কস্সারানঞ্চ হতত্তা, পাপকরণে চ রহাভাৰাতি অত্থং সন্ধায ৰুত্তং. ইদঞ্হি ফলেন হেতানুমানদস্সনং – যথা তং ধূমেন অগ্গিস্স, উদকোঘেন উপরি ৰুট্ঠিযা, এতেন চ অত্থেন অরহভাৰো হেতু, ৰট্টাভাৰো ফলন্তি অযং আচরিযমতি. ‘‘পচ্চযাদীনং, পূজাৰিসেসস্স চ অরহত্তা’’তি পন হেতুনা ফলানুমানদস্সনম্পি সিযা যথা তং অগ্গিনা ধূমস্স, উপরি ৰুট্ঠিযা উদকোঘস্স. ‘‘সম্মাসম্বুদ্ধো ছদনাভাৰেনা’’তি ইদং পন হেতুনা ফলানুমানদস্সনং সৰাসনসব্বকিলেসচ্ছদনাভাৰপুব্বকত্তা সম্মাসম্বুদ্ধভাৰস্স. অরহত্তমগ্গেন হি ৰিচ্ছদতা, সব্বঞ্ঞুতঞ্ঞাণেন সম্মাসম্বুদ্ধভাৰো. ‘‘ৰিৰট্টো চ ৰিচ্ছদো চা’’তি ইদং হেতুদ্ৰযং. কামঞ্চ আচরিযমতিযা ফলেন হেতুঅনুমানদস্সনে ৰিৰট্টতা ফলমেৰ হোতি, হেতুঅনুমানদস্সনস্স, পন তথাঞাণস্স চ হেতুভাৰতো হেতুযেৰ নামাতি ৰেদিতব্বং.

এৰং পদত্তযৰচনে হেতালঙ্কারনযেন পযোজনং দস্সেত্ৰা ইদানি চতুৰেসারজ্জৰসেনপি দস্সেন্তো ‘‘দুতিযেনা’’তিআদিমাহ. তত্থ দুতিযেন ৰেসারজ্জেনাতি ‘‘চত্তারিমানি ভিক্খৰে তথাগতস্স ৰেসারজ্জানি, যেহি ৰেসারজ্জেহি সমন্নাগতো তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতী’’তিআদিনা (অ. নি. ৪.৮; ম. নি. ১.১৫০) ভগৰতা ৰুত্তক্কমেন দুতিযভূতেন ‘‘খীণাসৰস্স তে পটিজানতো ‘ইমে আসৰা অপরিক্খীণা’তি, তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহ ধম্মেন পটিচোদেস্সতীতি নিমিত্তমেতং ভিক্খৰে ন সমনুপস্সামি, এতমহং ভিক্খৰে নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামী’’তি পরিদীপিতেন ৰেসারজ্জেন. পুরিমসিদ্ধীতি পুরিমস্স ‘‘অরহ’’ন্তি পদস্স অত্থসিদ্ধি অরহত্তসিদ্ধি, দুতিযৰেসারজ্জস্স তদত্থভাৰতো তেন ৰেসারজ্জেন তদত্থসিদ্ধীতি ৰুত্তং হোতি. ‘‘খীণাসৰস্স তে পটিজানতো ‘ইমে আসৰা অপরিক্খীণা’ তি’’আদিনা ৰুত্তমেৰ হি দুতিযৰেসারজ্জং ‘‘কিলেসেহি আরকত্তা’’তিআদিনা ৰুত্তো ‘‘অরহ’’ন্তি পদস্স অত্থোতি ¶ . ততো চ ৰিঞ্ঞাযতি ‘‘যথা দুতিযেন ¶ ৰেসারজ্জেন পুরিমসিদ্ধি, এৰং পুরিমেনপি অত্থেন দুতিযৰেসারজ্জসিদ্ধী’’তি. এৰঞ্চ কত্ৰা ইমিনা নযেন চতুৰেসারজ্জৰসেন পদত্তযৰচনে পযোজনদস্সনং উপপন্নং হোতি. ইতরথা হি কিঞ্চিপযোজনাভাৰতো ইদংযেৰ ৰচনং ইধ অৰত্তব্বং সিযাতি. এস নযো সেসেসুপি.

পঠমেনাতি ৰুত্তনযেন পঠমভূতেন ‘‘সম্মাসম্বুদ্ধস্স তে পটিজানতো ‘ইমে ধম্মা অনভিসম্বুদ্ধা’তি, তত্র…পে… ৰিহরামী’’তি পরিদীপিতেন ৰেসারজ্জেন. দুতিযসিদ্ধীতি দুতিযস্স ‘‘সম্মাসম্বুদ্ধো’’তি পদস্স অত্থসিদ্ধি বুদ্ধত্তসিদ্ধি তস্স তদত্থভাৰতো. ততিযচতুত্থেহীতি ৰুত্তনযেনেৰ ততিযচতুত্থভূতেহি ‘‘যে খো পন তে অন্তরাযিকা ধম্মা ৰুত্তা, তে পটিসেৰতো নালং অন্তরাযাযাতি, তত্র…পে… ৰিহরামী’’তি চ ‘‘যস্স খো পন তে অত্থায ধম্মো দেসিতো, সো ন নিয্যাতি তক্করস্স সম্মা দুক্খক্খযাযাতি, তত্র…পে… ৰিহরামী’’তি (অ. নি. ৪.৮; ম. নি. ১.১৫০) চ পরিদীপিতেহি ৰেসারজ্জেহি. ততিযসিদ্ধীতি ততিযস্স ‘‘ৰিৰট্টচ্ছদা’’তি পদস্স অত্থসিদ্ধি ৰিৰট্টচ্ছদত্থসিদ্ধি তেহি তস্স পাকটভাৰতোতি অত্থো. ‘‘যাথাৰতো অন্তরাযিকনিয্যানিকধম্মাপদেসেন হি সত্থু ৰিৰট্টচ্ছদভাৰো লোকে পাকটো অহোসী’’তি (দী. নি. টী. ১.২৫৮) আচরিযেন ৰুত্তং, ৰিৰট্টচ্ছদভাৰেনেৰ অন্তরাযিকনিয্যানিকধম্মদেসনাসিদ্ধিতো ‘‘ততিযেন ততিযচতুত্থসিদ্ধী’’তিপি ৰত্তুং যুজ্জতি.

এৰং পদত্তযৰচনে চতুৰেসারজ্জৰসেন পযোজনং দস্সেত্ৰা ইদানি চক্খুত্তযৰসেনপি দস্সেন্তো ‘‘পুরিমঞ্চা’’তিআদিমাহ. তত্থ চ-সদ্দো উপন্যাসত্থো. পুরিমং ‘‘অরহ’’ন্তি পদং ভগৰতো হেট্ঠিমমগ্গফলত্তযঞাণসঙ্খাতং ধম্মচক্খুং সাধেতি কিলেসারীনং, সংসারচক্কস্স অরানঞ্চ হতভাৰদীপনতো. দুতিযং ‘‘সম্মাসম্বুদ্ধো’’তি পদং আসযানুসযইন্দ্রিযপরোপরিযত্তঞাণসঙ্খাতং বুদ্ধচক্খুং সাধেতি সম্মাসম্বুদ্ধস্সেৰ তংসম্ভৰতো. তদেতঞ্হি ঞাণদ্ৰযং সাৰকপচ্চেকবুদ্ধানং ন সম্ভৰতি. ততিযং ‘‘ৰিৰট্টচ্ছদা’’তি পদং সব্বঞ্ঞুতঞ্ঞাণসঙ্খাতং সমন্তচক্খুং সাধেতি সৰাসনসব্বকিলেসপ্পহানদীপনতো. ‘‘সম্মাসম্বুদ্ধো’’তি হি ৰত্ৰা ‘‘ৰিৰট্টচ্ছদা’’তি ৰচনং সম্মাসম্বুদ্ধভাৰায সৰাসনসব্বকিলেসপ্পহানং ৰিভাৰেতীতি. ‘‘অহং খো পন তাত অম্বট্ঠ মন্তানং দাতা’’তি ইদং অপ্পধানং, ‘‘ত্ৰং মন্তানং পটিগ্গহেতা’’তি ইদমেৰ পধানং সমুত্তেজনাৰচনন্তি সন্ধায ¶ ‘‘ত্ৰং মন্তানং পটিগ্গহেতাতি ইমিনা’স্স মন্তেসু সূরভাৰং জনেতী’’তি ৰুত্তং, লক্খণৰিভাৰনে ৰিসদঞাণতাসঙ্খাতং সূরভাৰং জনেতীতি অত্থো.

২৫৯. এৰং ¶ ভোতি এত্থ এৰং-সদ্দো ৰচনসম্পটিচ্ছনে নিপাতো, ৰচনসম্পটিচ্ছনঞ্চেত্থ তথা মযং তং ভৰন্তং গোতমং ৰেদিস্সাম, ত্ৰং মন্তানং পটিগ্গহেতাতি চ এৰং পৰত্তস্স পোক্খরসাতিনো ৰচনস্স সম্পটিগ্গহো. ‘‘তস্সত্থো’’তিআদিনাপি হি তদেৰত্থং দস্সেতি. তথা চ ৰুত্তং ‘‘ব্রাহ্মণস্স পোক্খরসাতিস্স পটিস্সুত্ৰা’’তি, তং পনেস আচরিযস্স সমুত্তেজনায লক্খণেসু ৰিগতসম্মোহভাৰেন বুদ্ধমন্তে সম্পস্সমানত্তা ৰদতীতি দস্সেন্তো ‘‘সোপী’’তিআদিমাহ. তত্থ ‘‘তাযাতি তায যথাৰুত্তায সমুত্তেজনাযা’’তি (দী. নি. টী. ১.২৫৯) আচরিযেন ৰুত্তং, অধুনা পন পোত্থকেসু ‘‘তায আচরিযকথাযা’’তি পাঠো দিস্সতি. অত্থতো চেস অৰিরুদ্ধোযেৰ. মন্তেসু সতিসমুপ্পাদিকা হি কথা সমুত্তেজনাতি.

অযানভূমিন্তি যানস্স অভূমিং, যানেন যাতুমসক্কুণেয্যট্ঠানভূতং, দ্ৰারকোট্ঠকসমীপং গন্ত্ৰাতি অত্থো.

অৰিসেসেন ৰুত্তস্সপি ৰচনস্স অত্থো অট্ঠকথাপমাণতো ৰিসেসেন গহেতব্বোতি আহ ‘‘ঠিতমজ্ঝন্হিকসমযে’’তি. সব্বেসমাচিণ্ণৰসেন পঠমনযং ৰত্ৰা পধানিকানমেৰ আৰেণিকাচিণ্ণৰসেন দুতিযনযো ৰুত্তো. দিৰাপধানিকাতি দিৰাপধানানুযুঞ্জনকা, দিৰসভাগে সমণধম্মকরণত্থং তে এৰং চঙ্কমন্তীতি ৰুত্তং হোতি. তেনাহ ‘‘তাদিসানঞ্হী’’তিআদি. ‘‘পরিৰেণতো পরিৰেণমাগচ্ছন্তো পপঞ্চো হোতি, পুচ্ছিত্ৰাৰ পৰিসিস্সামী’’তি অম্বট্ঠস্স তদুপসঙ্কমনাধিপ্পাযং ৰিভাৰেন্তো ‘‘সো কিরা’’তিআদিমাহ.

২৬০. অভিঞ্ঞাতকুলে জাতো অভিঞ্ঞাতকোলঞ্ঞো. কামঞ্চ ৰক্খমাননযেন পুব্বে অম্বট্ঠকুলমপঞ্ঞাতং, তদা পন পঞ্ঞাতন্তি আহ ‘‘তদা কিরা’’তিআদি. রূপজাতিমন্তকুলাপদেসেহীতি ‘‘অযমীদিসো’’তি অপদিসনহেতুভূতেহি চতূহি রূপজাতিমন্তকুলেহি. যেন তে ¶ ভিক্খূ চিন্তযিংসু, তদধিপ্পাযং আৰি কাতুং ‘‘যো হী’’তিআদি ৰুত্তং. অৰিসেসতো ৰুত্তম্পি ৰিসেসতো ৰিঞ্ঞাযমানত্থং সন্ধায ভাসিতৰচনন্তি দস্সেতি ‘‘গন্ধকুটিং সন্ধাযা’’তি ইমিনা. এৰমীদিসেসু.

অতুরিতোতি অৰেগাযন্তো, ‘‘অতুরন্তো’’তিপি পাঠো, সোযেৰত্থো. কথং পৰিসন্তো অতরমানো পৰিসতি নামাতি আহ ‘‘সণিক’’ন্তিআদি. তত্থ পদপ্পমাণট্ঠানেতি দ্ৰিন্নং পদানং অন্তরে মুট্ঠিরতনপমাণট্ঠানে. সিন্দুৰারো নাম একো পুপ্ফূপগরুক্খো, যস্স সেতং পুপ্ফং হোতি, যো ¶ ‘‘নিগ্গুণ্ডী’’ তিপি ৰুচ্চতি. পমুখন্তি গন্ধকুটিগব্ভপমুখং. ‘‘কুঞ্চিকচ্ছিদ্দসমীপে’’তি ৰুত্তৰচনং সমত্থেতুং ‘‘দ্ৰারং কিরা’’তিআদি ৰুত্তং.

২৬১. ‘‘দানং দদমানেহী’’তি ইমিনা পারমিতানুভাৰেন সযমেৰ দ্ৰারৰিৰরণং দস্সেতি.

ভগৰতা সদ্ধিং সম্মোদিংসূতি এত্থ সমত্থেন সং-সদ্দেন ৰিঞ্ঞাযমানং ভগৰতো তেহি সদ্ধিং পঠমং পৰত্তমোদতাসঙ্খাতং নেয্যত্থং দস্সেন্তো ‘‘যথা’’তিআদিমাহ. ভগৰাপি হি ‘‘কচ্চি ভো মাণৰা খমনীযং, কচ্চি যাপনীয’’ন্তিআদীনি পুচ্ছন্তো তেহি মাণৰেহি সদ্ধিং পুব্বভাসিতায পঠমঞ্ঞেৰ পৰত্তমোদো অহোসি. সমপ্পৰত্তমোদাতি ভগৰতো তদনুকরণেন সমং পৰত্তসংসন্দনা. তদত্থং সহ উপমায দস্সেতুং ‘‘সীতোদকং ৰিযা’’তিআদি ৰুত্তং. তত্থ পরমনিব্বুতকিলেসদরথতায ভগৰতো সীতোদকসদিসতা, অনিব্বুতকিলেসদরথতায চ মাণৰানং উণ্হোদকসদিসতা দট্ঠব্বা. সম্মোদিতন্তি সংসন্দিতং. মুদসদ্দো হেত্থ সংসন্দনেযেৰ, ন পামোজ্জে, এৰঞ্হি যথাৰুত্তউপমাৰচনং সমত্থিতং হোতি. তথা হি ৰুত্তং ‘‘একীভাৰ’’ন্তি, সম্মোদনকিরিযায সমানতং একরূপতন্তি অত্থো.

খমনীযন্তি ‘‘চতুচক্কং নৰদ্ৰারং সরীরযন্তং দুক্খবহুলতায সভাৰতো দুস্সহং কচ্চি খমিতুং সক্কুণেয্য’’ন্তি পুচ্ছন্তি, যাপনীযন্তি আহারাদিপচ্চযপটিবদ্ধৰুত্তিকং চিরপ্পবন্ধসঙ্খাতায যাপনায কচ্চি যাপেতুং সক্কুণেয্যং, সীসরোগাদিআবাধাভাৰেন কচ্চি অপ্পাবাধং, দুক্খজীৰিকাভাৰেন কচ্চি অপ্পাতঙ্কং, তংতংকিচ্চকরণে উট্ঠানসুখতায কচ্চি লহুট্ঠানং, তদনুরূপবলযোগতো কচ্চি বলং, সুখৰিহারফলসব্ভাৰেন কচ্চিফাসুৰিহারো অত্থীতি সব্বত্থ কচ্চি-সদ্দং যোজেত্ৰা অত্থো ৰেদিতব্বো. বলপ্পত্তা ¶ পীতি পীতিযেৰ. তরুণা পীতি পামোজ্জং. সম্মোদনং জনেতি করোতীতি সম্মোদনিকং, তদেৰ সম্মোদনিযং ক-কারস্স য-কারং কত্ৰা. সম্মোদেতব্বতো সম্মোদনীযন্তি ইমমত্থং দস্সেতি ‘‘সম্মোদিতুং যুত্তভাৰতো’’তি ইমিনা. এৰং আচরিযেহি ৰুত্তং. সম্মোদিতুং অরহতীতি সম্মোদনিকং, তদেৰ সম্মোদনিযং যথাৰুত্তনযেনাতি ইমমত্থম্পি দস্সেতীতি দট্ঠব্বং. ‘‘সারেতু’’ন্তি এতস্স ‘‘নিরন্তরং পৰত্তেতু’’ন্তি অত্থৰচনং. সরিতব্বভাৰতোতি অনুস্সরিতব্বভাৰতো. ‘‘সারেতুং অরহতী’’তি অত্থে যথাপদং দীঘেন ‘‘সারণীয’’ন্তি ৰুত্তং. ‘‘সরিতব্ব’’ন্তি অত্থে পন ‘‘সরণীয’’ন্তি ৰত্তব্বে দীঘং কত্ৰা ‘‘সারণীয’’ন্তি ৰুত্তন্তি ৰেদিতব্বং. এৰং সদ্দতো অত্থং দস্সেত্ৰা ইদানি অত্থমত্ততো দস্সেতুং ‘‘সুয্যমানসুখতো’’তিআদি ৰুত্তং. তত্থ সুয্যমানসুখতোতি আপাথমধুরত্তমাহ, অনুস্সরিযমানসুখতোতি ৰিমদ্দরমণীযত্তং. ব্যঞ্জনপরিসুদ্ধতাযাতি সভাৰনিরুত্তিভাৰেন তস্সা কথায ¶ ৰচনচাতুরিযং, অত্থপরিসুদ্ধতাযাতি অত্থস্স নিরুপক্কিলেসত্তং. অনেকেহি পরিযাযেহীতি অনেকেহি কারণেহি.

অপসাদেস্সামীতি মঙ্কুং করিস্সামি. উভোসু খন্ধেসু সাটকং আসজ্জেত্ৰা কণ্ঠে ওলম্বনং সন্ধায ‘‘কণ্ঠে ওলম্বিত্ৰা’’তি ৰুত্তং. দুস্সকণ্ণং গহেত্ৰাতি নিৰত্থসাটকস্স কোটিং একেন হত্থেন গহেত্ৰা. চঙ্কমিতুমারুহনং সন্ধায ‘‘চঙ্কমং অভিরুহিত্ৰা’’তি আহ. ধাতুসমতাতি রসাদিধাতূনং সমাৰত্থতা, অরোগতাতি অত্থো. পাসাদিকত্থন্তি পসাদজননত্থং ‘‘গতগতট্ঠানে’’তি ইমিনা সম্বন্ধো. ‘‘পাসাদিকত্তা’’তিপি পাঠো, তস্সত্থো – অঙ্গপচ্চঙ্গানং পসাদাৰহত্তাতি, ‘‘উপ্পন্নবহুমানা’’তি ইমিনা সম্বন্ধো. উপ্পণ্ডনকথন্তি অৰহসিতব্বতাযুত্তকথং. ‘‘অনাচারভাৰসারণীয’’ন্তি তস্স ৰিসেসনং, অনাচারভাৰেন সারণীযং ‘‘অনাচারো ৰতায’’ন্তি সরিতব্বকন্তি অত্থো.

২৬২. কাতুং দুক্করমসক্কুণেয্যং কিচ্চমযং আরভীতি দস্সেতুং ‘‘ভৰগ্গং গহেতুকামো ৰিযা’’তিআদি ৰুত্তং. অসক্কুণেয্যঞ্হেতং সদেৰকেনপি লোকেন, যদিদং ভগৰতো অপসাদনং. তেনাহ ‘‘অট্ঠানে ৰাযমতী’’তি. হন্দ তেন সদ্ধিং মন্তেমীতি এৰং অট্ঠানে ৰাযমন্তোপি অযং বালো ‘‘মযি কিঞ্চি অকথেন্তে মযা সদ্ধিং উত্তরি কথেতুম্পি ¶ ন ৰিসহতী’’তি মানমেৰ পগ্গণ্হিস্সতি, কথেন্তে পন কথাপসঙ্গেনস্স জাতিগোত্তে ৰিভাৰিতে মাননিগ্গহো ভৰিস্সতি, ‘‘হন্দ তেন সদ্ধিং মন্তেমী’’তি ভগৰা অম্বট্ঠং মাণৰং এতদৰোচাতি অত্থো. আচারসমাচারসিক্খাপনেন আচরিযা, তেসং পন আচরিযানং পকট্ঠা আচরিযাতি পাচরিযা যথা ‘‘পপিতামহো’’তি ইমমত্থং দস্সেতুং ‘‘আচরিযেহি চ তেসং আচরিযেহি চা’’তি ৰুত্তং.

পঠমইব্ভৰাদৰণ্ণনা

২৬৩. কিঞ্চাপি ‘‘সযানো ৰা’’তিআদিৰচনং ন ৰত্তব্বং, মানৰসেন পন যুগগ্গাহং করোন্তো ৰদতীতি দস্সেন্তো ‘‘কামং তীসূ’’তিআদিমাহ. তত্থ তীসু ইরিযাপথেসূতি ঠানগমননিসজ্জাসু. তেস্ৰেৰ হি আচরিযেন সদ্ধিং সল্লপিতুমরহতি, ন তু সযনে গরুকরণীযানং সযানানম্পি সম্মুখা গরুকারেহি সযনস্স অকত্তব্বভাৰতো. কথাসল্লাপন্তি কথাৰসেন যুগগ্গাহকরণত্থং সল্লপনং. সযানেন হি আচরিযেন সদ্ধিং সযানস্স কথা নাম আচারো ন হোতি, তথাপেতং ইতরেহি সদিসং কত্ৰা কথনং ইধ কথাসল্লাপো.

যং ¶ পনেতং ‘‘সযানো ৰা হি ভো গোতম ব্রাহ্মণো সযানেন ব্রাহ্মণেন সদ্ধিং সল্লপিতুমরহতী’’তি ৰুত্তস্স সল্লাপস্স অনাচারভাৰৰিভাৰনং সত্থারা অম্বট্ঠেন সদ্ধিং কথেন্তেন কতং, তং পাল়িৰসেন সঙ্গীতিমনারুল়্হম্পি অগরহিতায আচরিযপরম্পরায যাৰজ্জতনা সমাভতন্তি ‘‘যে চ খো তে ভো গোতমা’’তিআদিকায উপরিপাল়িযা সম্বন্ধভাৰেন দস্সেন্তো ‘‘ততো কিরা’’তিআদিমাহ. গোরূপন্তি গো নূন রূপকৰসেন ৰুত্তত্তা, রূপসদ্দস্স চ তব্ভাৰৰুত্তিতো. যদি অহীল়েন্তো ভৰেয্য, ‘‘মুণ্ডা সমণা’’তি ৰদেয্য, হীল়েন্তো পন গরহত্থেন ক-সদ্দেন পদং ৰড্ঢেত্ৰা ‘‘মুণ্ডকা সমণকা’’তি ৰদতীতি দস্সেতুং ‘‘মুণ্ডে মুণ্ডা’’তিআদি ৰুত্তং. ইব্ভাতি গহপতিকাতি অত্থমত্তৰচনং, সদ্দতো পন ইভস্স পযোগো ইভো উত্তরপদলোপেন, তং ইভং অরহন্তীতি ইব্ভা দ্ৰিত্তং কত্ৰা. কিং ৰুত্তং হোতি – যথা সোভনং গমনতো ইভসঙ্খাতো হত্থিৰাহনভূতো পরস্স ৰসেন পৰত্ততি, ন অত্তনো, এৰমেতেপি ব্রাহ্মণানং সুস্সূসকা সুদ্দা পরস্স ৰসেন ¶ পৰত্তন্তি, ন অত্তনো, তস্মা ইভসদিসপযোগতায ইব্ভাতি. তে পন কুটুম্বিকতায ঘরৰাসিনো ঘরসামিকা হোন্তীতি অত্থমত্তং দস্সেতি ‘‘গহপতিকা’’তি ইমিনা.

কণ্হাতি কণ্হজাতিকা. দ্ৰিজা এৰ হি সুদ্ধজাতিকা, ন ইতরেতি তস্সাধিপ্পাযো. তেনাহ ‘‘কাল়কা’’তি. পিতামহভাৰেন ঞাতিবন্ধৰত্তা বন্ধু. তেনাহ ‘‘পিতামহোতি ৰোহরন্তী’’তি. অপচ্চাতি পুত্তা. মুখতো নিক্খন্তাতি ব্রাহ্মণানং পুব্বপুরিসা ব্রহ্মুনো মুখতো নিক্খন্তা, অযং তেসং পঠমুপ্পত্তীতি অধিপ্পাযো. সেসপদেসুপি এসেৰ নযো. অযং পনেত্থ ৰিসেসো – ‘‘ইব্ভা কণ্হা’’তি ৰত্ৰা ‘‘বন্ধুপাদাপচ্চা’’তি ৰদন্তো কুলৰসেন সমণা ৰেস্সকুলপরিযাপন্না, পঠমুপ্পত্তিৰসেন পন ব্রহ্মুনো পিট্ঠিপাদতো নিক্খন্তা, ন পকতিৰেস্সা ৰিয নাভিতোতি দস্সেতীতি, ইদং পনস্স ‘‘মুখতো নিক্খন্তা’’তিআদিৰচনতোপি অতিৰিয অসমৰেক্খিতপুব্বৰচনং চতুৰণ্ণপরিযাপন্নস্সেৰ সমণভাৰসম্ভৰতো. অনিযমেত্ৰাতি অৰিসেসেত্ৰা, অনুদ্দেসিকভাৰেনাতি অত্থো.

মানমেৰ নিস্সায কথেসীতি মানমেৰাপস্সযং কত্ৰা অত্তানং উক্কংসেন্তো, পরে চ ৰম্ভেন্তো ‘‘মুণ্ডকা সমণকা’’তিআদিৰচনং কথেসি. জানাপেস্সামীতি অত্তনো গোত্তপমাণং যাথাৰতো ৰিভাৰনেন ৰিঞ্ঞাপেস্সামি. অত্থোতি হিতং, ইচ্ছিতৰত্থু ৰা, তং পন কত্তব্বকিচ্চমেৰাতি ৰুত্তং ‘‘আগন্ত্ৰা কত্তব্বকিচ্চসঙ্খাতো অত্থো’’তি, সো এতস্স অত্থীতি অত্থিকং যথা ‘‘দণ্ডিকো’’তি. দুতিযস্সপি পুগ্গলৰাচকস্স তদস্সত্থিপচ্চযস্স ৰিজ্জমানত্তা পঠমেন ¶ তদারম্মণিকচিত্তমেৰ ৰিঞ্ঞাযতীতি আহ ‘‘তস্স মাণৰস্স চিত্ত’’ন্তি. অত্থিকমস্স অত্থীতি অত্থিকৰা যথা ‘‘গুণৰা’’তি.

‘‘যাযেৰ খো পনত্থাযা’’তি লিঙ্গৰিপল্লাসৰসেন ৰুত্তন্তি দস্সেতি ‘‘যেনেৰ খো পনত্থেনা’’তি ইমিনা. তেনেৰাহ ‘‘তমেৰ অত্থন্তি ইদং পুরিসলিঙ্গৰসেনেৰ ৰুত্ত’’ন্তি. তত্থ হি সাভাৰিকলিঙ্গতাদস্সনেন ইধ অসাভাৰিকলিঙ্গতাসিদ্ধীতি. অযং পনেত্থ অট্ঠকথাতো অপরো নযো – যায অত্থাযাতি পুল্লিঙ্গৰসেনেৰ তদত্থে সম্পদানৰচনং, যস্স কত্তব্বকিচ্চসঙ্খাতস্স অত্থস্স অত্থাযাতি অত্থোতি. অস্সাতি অম্বট্ঠস্স ¶ দস্সেত্ৰাতি সম্বন্ধো. অঞ্ঞেসং সন্তিকং আগতানন্তি গরুট্ঠানিযানং সন্তিকমুপগতানং সাধুরূপানং. ৰত্তন্তি তেসং সমাচিণ্ণং. পকরণতোযেৰ ‘‘আচরিযকুলে’’তি অত্থো ৰিঞ্ঞাযতি, ‘‘অৰুসিতৰা’’তি চ অসিক্খিতভাৰোযেৰ ৰোহারৰসেন ৰুত্তো যথা তং চীৰরদানং তিচীৰরেন অচ্ছাদেসীতি. তেনাহ ‘‘আচরিযকুলে অৰুসিতৰা অসিক্খিতো’’তি. অসিক্খিতত্তা এৰ অপ্পস্সুতো, ‘‘ৰুসিতমানী’’তি চ পদাপেক্খায অপরিযোসিতৰচনত্তা সমানোতি পাঠসেসোতি দস্সেতি ‘‘অপ্পস্সুতোৰ সমানো’’তি ইমিনা. বাহুসচ্চঞ্হি নাম যাৰদেৰ উপসমত্থং ইচ্ছিতব্বং, তদভাৰতো পনাযং অম্বট্ঠো অৰুসিতৰা অসিক্খিতো অপ্পস্সুতোতি ৰিঞ্ঞাযতীতি এৰম্পি অত্থাপত্তিতো কারণং ৰিভাৰেন্তো আহ ‘‘কিমঞ্ঞত্র অৰুসিতত্তা’’তি. ইমম্পি সম্বন্ধং দীপেতি ‘‘এতস্স হী’’তিআদিনা. যথারুততো পন ফরুসৰচনসমুদাচারেন অনুপসমকারণদস্সনমেতং. তত্রাযং যোজনা – ‘‘কিমঞ্ঞত্র অৰুসিতত্তা’’তি ইদং কারণং এতস্স অম্বট্ঠস্স ফরুসৰচনসমুদাচারে কারণন্তি. ‘‘ফরুসৰচনসমুদাচারেনা’’তিপি পাঠো, তথা সমুদাচারৰসেন ৰুত্তং কারণন্তি অত্থো. এৰম্পি যোজেন্তি – অৰুসিতত্তা অৰুসিতভাৰং অঞ্ঞত্র ঠপেত্ৰা এতস্স এৰং ফরুসৰচনসমুদাচারে কারণং কিমঞ্ঞং অত্থীতি. পুরিমযোজনাৰেত্থ যুত্ততরা যথাপাঠং যোজেতব্বতো. ‘‘অঞ্ঞত্রা’’তি নিপাতযোগতো অৰুসিতত্তাতি উপযোগত্থে নিস্সক্কৰচনং. তদেৰ কারণং সমত্থেতি ‘‘আচরিযকুলে’’তিআদিনা.

২৬৪. কোধসঙ্খাতস্স পরস্স ৰসানুগতচিত্ততায অসকমনো. মাননিম্মদনত্থন্তি মানস্স নিম্মদনত্থং অভিমদ্দনত্থং, অমদনত্থং ৰা, মানমদৰিরহত্থন্তি অত্থো. দোসং উগ্গিলেত্ৰাতি সিনেহপানেন কিলিন্নং ৰাতপিত্তসেম্হদোসং উব্বমনং কত্ৰা. গোত্তেন গোত্তন্তি অম্বট্ঠেনেৰ ভগৰতা পুট্ঠেন ৰুত্তেন সাৰজ্জেন পুরাতনগোত্তেন অধুনা অনৰজ্জসঞ্ঞিতং গোত্তং. কুলাপদেসেন কুলাপদেসন্তি এত্থাপি এসেৰ নযো. উট্ঠাপেত্ৰাতি সাৰজ্জতো উট্ঠহনং কত্ৰা, উদ্ধরিত্ৰাতি ৰুত্তং হোতি. গোত্তঞ্চেত্থ আদিপুরিসৰসেন, কুলাপদেসো পন তদন্ৰযে উপ্পন্নাভিঞ্ঞাতপুরিসৰসেন ¶ গহেতব্বো যথা ‘‘আদিচ্চো মাঘৰো’’তি. সাকিযানঞ্হি আদিচ্চগোত্তং অদিতিযা নাম দেৰধীতায পুত্তভূতং আদিপুরিসং ¶ পতি হোতি, তং ‘‘গোতমগোত্ত’’ন্তিপি ৰদন্তি. যথাহ পব্বজ্জাসুত্তে –

‘‘আদিচ্চা নাম গোত্তেন, সাকিযা নাম জাতিযা;

তম্হা কুলা পব্বজিতোম্হি, ন কামে অভিপত্থয’’ন্তি. (সু. নি. ৪২৫);

মাঘৰকুলং পন তদন্ৰযে অভিঞ্ঞাতং মচলগামিকপুরিসং পতি হোতীতি. গোত্তমূলস্স গারয্হতায অমানৰত্থুভাৰপৰেদনতো ‘‘মানদ্ধজং মূলে ছেত্ৰা নিপাতেস্সামী’’তি ৰুত্তং. ঘট্টেন্তোতি জাতিগোত্তৰসেন ওমসন্তো. হীল়েন্তোতি হীল়নং গরহং করোন্তো. ‘‘চণ্ডা ভো গোতম সক্যজাতী’’তিআদিনা সাকিযেসু চণ্ডভাৰাদিদোসং পাপিতেসু সমণোপি গোতমো পাপিতো ভৰিস্সতীতি অধিপ্পাযো.

যস্মিং মানুস্সযকোধুস্সযা অঞ্ঞমঞ্ঞূপত্থদ্ধা, সো ‘‘চণ্ডো’’তি ৰুচ্চতীতি দস্সেতি ‘‘মাননিস্সিতকোধযুত্তা’’তি ইমিনা, পকতূপনিস্সযারম্মণৰসেন চেত্থ নিস্সিতভাৰো, ন সহজাতাদিৰসেন. খরাতি চিত্তেন, ৰাচায চ কক্খল়া. লহুকাতি তরুণা অৰুদ্ধকম্মা. তেনাহ ‘‘অপ্পকেনেৰা’’তিআদি. অলাবুকটাহন্তি লাবুফলস্স অভেজ্জকপালং. অট্ঠকথামুত্তকনযং দস্সেতুং ‘‘ভস্সাতি সাহসিকাতি কেচি ৰদন্তি, সারম্ভকাতি অপরে’’তি (দী. নি. টী. ১.২৬৪) আচরিযেন ৰুত্তং. সমানাতি হোন্তা ভৰমানাতি অসসদ্দৰসেনত্থোতি আহ ‘‘সন্তাতি পুরিমপদস্সেৰ ৰেৰচন’’ন্তি. ন সক্করোন্তীতি সক্কারং ন করোন্তীতি অত্থমেৰ ৰিঞ্ঞাপেতি ‘‘ন ব্রাহ্মণান’’ন্তিআদিনা. অপচিতিকম্মন্তি পণিপাতকম্মং. ‘‘যদিমে সক্যা’’তি পচ্ছিমৰাক্যে য-সদ্দস্স কিরিযাপরামসনস্স অনিযমস্স ‘‘তযিদং ভো গোতমা’’তি পুরিমৰাক্যে ত-সদ্দেন নিযমনং ৰেদিতব্বন্তি আহ ‘‘যং ইমে সক্যা’’তিআদি. নানুলোমন্তি অত্তনো জাতিযা ন অনুচ্ছৰিকং.

দুতিযইব্ভৰাদৰণ্ণনা

২৬৫. সন্ধাগারপদনিব্বচনং হেট্ঠা ৰুত্তমেৰ. তদা অভিসিত্তসক্যরাজূনম্পি বহুতং সন্ধাযাহ ‘‘অভিসিত্তসক্যরাজানো’’তি. কামঞ্হি সক্যরাজকুলে যো সব্বেসং ৰুদ্ধতরো, সমত্থো চ, সো এৰ অভিসেকং লভতি ¶ . একচ্চো পন অভিসিত্তো সমানো ‘‘ইদং রজ্জং নাম বহুকিচ্চং ¶ বহুব্যাপার’’ন্তি ততো নিব্বিজ্জ রজ্জং ৰযসা অনন্তরস্স নিয্যাতেতি, কদাচি সোপি অঞ্ঞস্সাতি এৰং পরম্পরানিয্যাতনৰসেন তদা বহূ অভিসিত্তপুব্বা সক্যরাজানো হোন্তীতি ইদং আচরিযস্সাভিমতং (দী. নি. টী. ১.২৬৫). অপিচ যথারহং ঠানন্তরেসু অভিসিত্তসক্যরাজূনম্পি বহুতং সন্ধায এৰমাহাতিপি যুজ্জতি. তে হি ‘‘রাজানো’’তি ৰুচ্চন্তি. যথাহ –

‘‘রাজানো নাম পথব্যারাজা, পদেসরাজা, মণ্ডলিকা, অন্তরভোগিকা, অক্খদস্সা, মহামত্তা, যে ৰা পন ছেজ্জভেজ্জং করোন্তা অনুসাসন্তি, এতে রাজানো নামা’’তি (পারা. ৯২).

সংহারিমেহি ৰাল়রূপেহি কতো পল্লঙ্কো, ভদ্দপীঠং ৰেত্তাসনং. মিহিতমত্তং হসিতমত্তং. অনুহসন্তীতি মমুদ্দেসিকং মহাহসিতং করোন্তি, ইদঞ্হি ‘‘অনুজগ্ঘন্তা’’তি এতস্স সংৰণ্ণনাপদং. জগ্ঘসদ্দো চ মহাহসনে পৰত্ততি ‘‘ন উজ্জগ্ঘিকায অন্তরঘরে গমিস্সামী’’তিআদীসু (পাচি. ৫৮৬) ৰিয.

কণ্হাযনতো পট্ঠায পরম্পরাগতং কুলৰংসং অনুস্সৰৰসেন জানন্তি. কুলাভিমানিনো হি যেভুয্যেন পরেসং উচ্চাৰচং কুলং তথা তথা উদাহরন্তি, অত্তনো চ কুলৰংসং জানন্তি, এৰং অম্বট্ঠোপি, তথা হেস পরতো ভগৰতা পুচ্ছিতো ৰজিরপাণি ভযেন অত্তনো কুলৰংসং যাথাৰতো কথেসীতি. ওলম্বেত্ৰাতি হত্থিসোণ্ডসণ্ঠানাদিনা সাটকং অৰলম্বেত্ৰা. ততোতি তথাজাননতো, গমনতো চ. মমঞ্ঞেৰ মঞ্ঞেতি মমমেৰ অনুজগ্ঘন্তা মঞ্ঞে.

ততিযইব্ভৰাদৰণ্ণনা

২৬৬. খেত্তলেড্ডূনন্তি খেত্তে কসনৰসেন উট্ঠাপিতমত্তিকাখণ্ডানং. লেড্ডুকানমন্তরে নিৰাসিতত্তা ‘‘লেড্ডুকিকা’’ ইচ্চেৰ (দী. নি. টী. ১.২৬৬) সঞ্ঞাতা খুদ্দকসকুণিকা. মজ্ঝিমপণ্ণাসকে লেড্ডুকিকোপমসুত্তৰণ্ণনাযং ‘‘চাতকসকুণিকা’’তি (ম. নি. অট্ঠ. ৩.১৫০) ৰুত্তা, নিঘণ্টুসত্থেসু পন তং ‘‘লাপসকুণিকা’’তি ৰদন্তি. কোধৰসেন লগ্গিতুন্তি উপনয্হিতুং, আঘাতং বন্ধিতুন্তি অত্থো.

‘‘অম্হে ¶ হংসকোঞ্চমোরসমে করোতী’’তি ৰদন্তো হেট্ঠা গহিতং ‘‘ন তং কোচি হংসো ৰা কোঞ্চো ¶ ৰা মোরো ৰা আগন্ত্ৰা কিং ত্ৰং লপসীতি নিসেধেতী’’তি ইদম্পি ৰচনং সঙ্গীতিমনারুল়্হং তদা ভগৰতা ৰুত্তমেৰাতি দস্সেতি. তদা ৰদন্তোযেৰ হি এৰং করোতীতি ৰত্তুমরহতি. ‘‘এৰং নু তে’’তিআদিৰচনং, ‘‘অৰুসিতৰাযেৰা’’তিআদিৰচনঞ্চ মানৰসেন সমণেন গোতমেন ৰুত্তন্তি অম্বট্ঠো মঞ্ঞতীতি অধিপ্পাযেনাহ ‘‘নিম্মানো দানি জাতোতি মঞ্ঞমানো’’তি.

দাসিপুত্তৰাদৰণ্ণনা

২৬৭. নিম্মাদেতীতি অ-কারস্স আ-কারং কত্ৰা নিদ্দেসো উম্মাদে মদসদ্দেন নিপ্ফন্নত্তাতি দস্সেতি ‘‘নিম্মদেতী’’তি ইমিনা. নিম্মানেতি ৰিগতমানে. যদি পনাহং গোত্তং পুচ্ছেয্যং সাধু ৰতাতি অত্থো. পাকটং কাতুকম্যতায তিক্খত্তুং মহাসদ্দেন অৰোচ. কস্মা অৰোচাতি পন অসুদ্ধভাৰং জানন্তস্সাপি তথাৰচনে কারণপুচ্ছা. গোত্তভূতং নামমেৰ অধিপ্পেতং, ন ৰিসুং গোত্তন্তি আহ ‘‘মাতাপেত্তিকন্তি মাতাপিতূনং সন্তক’’ন্তি. গোত্তঞ্হি পিতিতো লদ্ধব্বং পেত্তিকমেৰ, ন মাতাপেত্তিকং. ন হি ব্রাহ্মণানং সগোত্তায এৰ আৰাহৰিৰাহো ইচ্ছিতো, গোত্তনামং পন জাতিসিদ্ধং, ন কিত্তিমং, ন গুণনামং ৰা, জাতি চ উভযসম্বন্ধিনীতি মাতাপেত্তিকমেৰ, ন পেত্তিকমত্তং. নামগোত্তন্তি গোত্তভূতং নামং, ন কিত্তিমং, ন গুণনামং ৰা ৰিসেসনপরনিপাতৰসেন ৰুত্তত্তা যথা ‘‘অগ্যাহিতো’’তি. নামঞ্চ তদেৰ পৰেণীৰসেন পৰত্তত্তা গোত্তঞ্চাতি হি নামগোত্তং. তত্থ যা ‘‘কণ্হাযনো’’তি নামপণ্ণত্তি নিরুল়্হা, তং সন্ধাযাহ ‘‘পণ্ণত্তিৰসেন নাম’’ন্তি. তং পনেতং নামং কণ্হইসিতো পট্ঠায তস্মিং কুলপরম্পরাৰসেন আগতং, ন এতস্মিংযেৰ নিরুল়্হন্তি ৰুত্তং ‘‘পৰেণীৰসেন গোত্ত’’ন্তি. গোত্তপদস্স ৰচনত্থো হেট্ঠা ৰুত্তোযেৰ.

‘‘অনুস্সরতো’’তি এত্থ ন কেৰলং অনুস্সরণমত্তং অধিপ্পেতং, অথ খো কুলসুদ্ধিৰীমংসনৰসেনেৰাতি আহ ‘‘কুলকোটিং সোধেন্তস্সা’’তি, কুলগ্গং ৰিসোধেন্তস্সাতি অত্থো. ‘‘অয্যপুত্তা’’তি এত্থ অয্যসদ্দো অয্যিরকেতি ৰুত্তং ‘‘সামিনো পুত্তা’’তি. চতূসু দাসীসু ¶ দিসা ওক্কাকরঞ্ঞো অন্তোজাতদাসী. তেনাহ ‘‘ঘরদাসিযা পুত্তো’’তি. এত্থ চ যস্মা অম্বট্ঠো জাতিং নিস্সায মানথদ্ধো, ন চ তস্স যাথাৰতো জাতিযা অৰিভাৰিতায মাননিগ্গহো করীযতি, অকতে চ মাননিগ্গহে মানৰসেন রতনত্তযং অপরজ্ঝিস্সতি, কতে পন মাননিগ্গহে অপরভাগে রতনত্তযে পসীদিস্সতি, ন চেদিসী ৰাচা ফরুসৰাচা নাম হোতি চিত্তস্স সণ্হভাৰতো. মজ্ঝিমপণ্ণাসকে অভযসুত্তঞ্চ (ম. নি. ২.৮৩) এত্থ নিদস্সনং ¶ . কেচি চ জনা কক্খল়ায ৰাচায ৰুত্তা অগ্গিনা ৰিয লোহাদযো মুদুভাৰং গচ্ছন্তি, তস্মা ভগৰা অম্বট্ঠং নিব্বিসেৰনং কত্তুকামো ‘‘অয্যপুত্তা সক্যা ভৰন্তি, দাসিপুত্তো ত্ৰমসি সক্যান’’ন্তি অৰোচ.

‘‘ইধেকচ্চো পাপভিক্খু তথাগতপ্পৰেদিতং ধম্মৰিনযং পরিযাপুণিত্ৰা অত্তনো দহতী’’তিআদীসু (পারা. ১৯৫) ৰিয দহসদ্দো ধারণত্থো, ধারণঞ্চেত্থ পুব্বপুরিসৰসেন সঞ্ঞাপনন্তি আহ ‘‘ওক্কাকো নো পুব্বপুরিসো’’তিআদি. দহসদ্দঞ্হি ভস্মীকরণে, ধারণে চ ইচ্ছন্তি সদ্দৰিদূ. পভা নিচ্ছরতীতি পভস্সরং হুত্ৰা নিক্খমতি তথারূপেন পুঞ্ঞকম্মেন দন্তানং পভস্সরভাৰতো.

তেতি জেট্ঠকুমারে. পঠমকপ্পিকানন্তি পঠমকপ্পস্স আদিকালে নিব্বত্তানং. কিরসদ্দেন চেত্থ অনুস্সৰত্থেন, যো ৰুচ্চমানায রাজপরম্পরায কেসঞ্চি মতিভেদো, তং উল্লিঙ্গেতি. অনুস্সৰৰচনেনেৰ হি অননুস্সুতো উত্তরৰিহারৰাসিআদীনং মতিভেদো নিরাকরীযতীতি. মহাসম্মতস্সাতি অগ্গঞ্ঞসুত্তে ৰক্খমাননযেন ‘‘অযং নো রাজা’’তি মহাজনেন সম্মন্নিত্ৰা ঠপিতত্তা ‘‘মহাসম্মতো’’তি এৰং সম্মতস্স. যং সন্ধায ৰদন্তি –

‘‘আদিচ্চকুলসম্ভূতো, সুৰিসুদ্ধগুণাকরো;

মহানুভাৰো রাজাসি, মহাসম্মতনামকো.

যো চক্খুভূতো লোকস্স, গুণরংসিসমুজ্জলো;

তমোনুদো ৰিরোচিত্থ, দুতিযো ৰিয ভাণুমা.

ঠপিতা ¶ যেন মরিযাদা, লোকে লোকহিতেসিনা;

ৰৰত্থিতা সক্কুণন্তি, ন ৰিলঙ্ঘযিতু জনা.

যসস্সিনং তেজস্সিনং, লোকসীমানুরক্খকং;

আদিভূতং মহাৰীরং, কথযন্তি ‘মনূ’তি য’’ন্তি. (দী. নি. টী. ১.২৬৭);

তস্স চ পুত্তপপুত্তপরম্পরং সন্ধায এৰং ৰদন্তি –

‘‘তস্স ¶ পুত্তো মহাতেজো, রোজো নাম মহীপতি;

তস্স পুত্তো ৰররোজো, পৰরো রাজমণ্ডলে.

তস্সাসি কল্যাণগুণো, কল্যাণো নাম অত্রজো;

রাজা তস্সাসি তনযো, ৰরকল্যাণনামকো.

তস্স পুত্তো মহাৰীরো, মন্ধাতা কামভোগিনং;

অগ্গভূতো মহিন্দেন, অড্ঢরজ্জেন পূজিতো.

তস্স সূনু মহাতেজো, ৰরমন্ধাতুনামকো;

‘উপোসথো’তি নামেন, তস্স পুত্তো মহাযসো.

ৰরো নাম মহাতেজো, তস্স পুত্তো মহাৰরো;

তস্সাসি উপৰরোতি, পুত্তো রাজা মহাবলো.

তস্স পুত্তো মঘদেৰো, দেৰতুল্যো মহীপতি;

চতুরাসীতি সহস্সানি, তস্স পুত্তপরম্পরা.

তেসং পচ্ছিমকো রাজা, ‘ওক্কাকো’ইতি ৰিস্সুতো;

মহাযসো মহাতেজো, অখুদ্দো রাজমণ্ডলে’’তি. (দী. নি. টী. ১.২৬৭);

ইদং অট্ঠকথানুপরোধৰচনং. যং পন দীপৰংসে ৰুত্তং –

‘‘পঠমাভিসিত্তো রাজা, ভূমিপালো জুতিন্ধরো;

মহাসম্মতো নামেন, রজ্জং কারেসি খত্তিযো.

তস্স পুত্তো রোজো নাম, ৰররোজো চ খত্তিযো;

কল্যাণো ৰরকল্যাণো, উপোসথো মহিস্সরো.

মন্ধাতা ¶ সত্তমো তেসং, চতুদীপম্হি ইস্সরো;

ৰরো ¶ উপৰরো রাজা, চেতিযো চ মহিস্সরো’’তিআদি.

যঞ্চ মহাৰংসাদীসু ৰুত্তং –

‘‘মহাসম্মতরাজস্স, ৰংসজো হি মহামুনি;

কপ্পাদিস্মিং রাজাসি, মহাসম্মতনামকো.

রোজো চ ৰররোজো চ, তথা কল্যাণকা দুৰে;

উপোসথো চ মন্ধাতা, ৰরকো পৰরা দুৰে’’তিআদি.

সব্বমেতং যেভুয্যতো অট্ঠকথাৰিরোধৰচনং. অট্ঠকথাযঞ্হি মন্ধাতুরাজা ছট্ঠো ৰুত্তো, মঘদেৰরাজা একাদসমো, তস্স চ পুত্তপরম্পরায চতুরাসীতিসহস্সরাজূনং পচ্ছিমকো ওক্কাকরাজা, তেসু পন মন্ধাতুরাজা সত্তমো ৰুত্তো, মঘদেৰরাজা অনেকেসং রাজসহস্সানং পচ্ছিমকো, তস্স চ পুত্তপরম্পরায অনেকরাজসহস্সানং পচ্ছিমকো ওক্কাকরাজাতি এৰমাদিনা অনেকধা ৰিরোধৰচনং অট্ঠকথাযং নিরাকরোতি. ননু অৰোচুম্হ ‘‘কিরসদ্দেন চেত্থ অনুস্সৰত্থেন, যো ৰুচ্চমানায রাজপরম্পরায কেসঞ্চি মতিভেদো, তং উল্লিঙ্গেতী’’তি. তেসং পচ্ছতোতি মঘদেৰপরম্পরাভূতানং কল়ারজনকপরিযোসানানং চতুরাসীতিখত্তিযসহস্সানং অপরভাগেতি যথানুস্সুতং আচরিযেন ৰুত্তং. দীপৰংসাদীসু পন ‘‘কল়ারজনকরঞ্ঞো পুত্তপরম্পরায অনেকখত্তিযসহস্সানং পচ্ছিমকো রাজা সুজাতো নাম, তস্স পুত্তো ওক্কাকো রাজা’’তি ৰুত্তং. মঘদেৰপরম্পরায অনেকসহস্সরাজূনং অপরভাগে পঠমো ওক্কাকো নাম রাজা অহোসি, তস্স পরম্পরাভূতানং পন অনেকসহস্সরাজূনং অপরভাগে দুতিযো ওক্কাকো নাম রাজা অহোসি, তস্সপি পরম্পরায অনেকসহস্সরাজূনং অপরভাগে ততিযো ওক্কাকো নাম রাজা অহোসি. তং সন্ধাযাহ ‘‘তযো ওক্কাকৰংসা অহেসু’’ন্তিআদি.

জাতিযা পঞ্চমদিৰসে নামকম্মাদিমঙ্গলং লোকাচিণ্ণন্তি ৰুত্তং ‘‘পঞ্চমদিৰসে অলঙ্করিত্ৰা’’তি. সহসা ৰরং অদাসিন্তি পুত্তদস্সনেন বলৰসোমনস্সপ্পত্তো ¶ তুরিতং অৰীমংসিত্ৰা তুট্ঠিদাযৰসেন ৰরং অদাসিং ‘‘যং ইচ্ছসি, তং গণ্হাহী’’তি. সাতি জন্তুকুমারমাতা. রজ্জং পরিণামেতুং ইচ্ছতীতি মম ৰরদানং অন্তরং কত্ৰা ইমং রজ্জং পরিণামেতুং ইচ্ছতি.

রজ্জং ¶ কারেস্সন্তীতি রাজভাৰং মহাজনেন মহাজনং ৰা কারাপেস্সন্তি. নপ্পসহেয্যাতি নিৰাসত্থায পরিযত্তো ন ভৰেয্য.

কল়ারৰণ্ণতায কপিলব্রাহ্মণো নাম অহোসি. নিক্খম্মাতি ঘরাৰাসতো কামেহি চ নিক্খমিত্ৰা. সাকো নাম সব্বসারমযো রুক্খৰিসেসো, যেন পাসাদাদি করীযতে, তংসমুদাযভূতে ৰনসণ্ডেতি অত্থো. ভূমিযা পৰত্তং ভুম্মং, তং গুণদোসং জালেতি জোতেতি, তং ৰা জলতি জোততি পাকটং ভৰতি এতাযাতি ভুম্মজালা. হেট্ঠা চাতি এত্থ চ-সদ্দেন ‘‘অসীতিহত্থে’’তি ইদমনুকড্ঢতি. এতস্মিং পদেসেতি সাকৰনসণ্ডমাহ. খন্ধপন্তিৰসেন দক্খিণাৰট্টা. সাখাপন্তিৰসেন পাচীনাভিমুখা. তেহীতি মিগসূকরেহি, মণ্ডূকমূসিকেহি চ. তেতি সীহব্যগ্ঘাদযো সপ্পবিল়ারা চ.

এত্থাতি এৰং মাপিযমানে নগরে. তুম্হাকং পুরিসেসু পরিযাপন্নং একেকম্পি পুরিসং পচ্চত্থিকভূতং অঞ্ঞং পুরিসসতম্পি পুরিসসহস্সম্পি অভিভৰিতুং ন সক্খিস্সতীতি যোজনা. চক্কৰত্তিবলেনাতি চক্কৰত্তিবলভাৰেন. অতিসেয্যোতি অতিৰিয উত্তমো ভৰেয্য. কপিলস্স ইসিনো ৰসনট্ঠানত্তা কপিলৰত্থু.

নেসং সন্তিকে ভৰেয্যাতি সম্বন্ধো. অসদিসসংযোগেতি জাতিযা অসদিসানং ঘরাৰাসপযোগে হেতুভূতে. অৰসেসাহি অত্তনো অত্তনো কণিট্ঠাহি.

ৰড্ঢমানানন্তি অনাদরে সামিৰচনং, অনন্তরাযিকায পুত্তধীতুৰড্ঢনায ৰড্ঢমানেসু এৰ উদপাদীতি অত্থো. লোহিতকতায কোৰিল়ারপুপ্ফসদিসানি. কুট্ঠরোগো নাম সাসমসূরীরোগা ৰিয যেভুয্যেন সঙ্কমনসভাৰোতি ৰুত্তং ‘‘অযং রোগো সঙ্কমতী’’তি. উপরি পদরেন পটিচ্ছাদেত্ৰা পংসুং রাসিকরণেন দত্ৰা. নাটকিত্থিযো ¶ নাম নচ্চন্তিযো. রাজভরিযাযো ওরোধা নাম. তস্সাতি সুসিরস্স. মিগসকুণাদীনন্তি এত্থ আদিসদ্দেন ৰনচরকপেতাদিকে সঙ্গণ্হাতি.

তস্মিং রামরঞ্ঞে নিসিন্নেতি সম্বন্ধো. পদরেতি দারুফলকে. খত্তিযমাযারোচনেন অত্তনো খত্তিযভাৰং জানাপেত্ৰা.

মাতিকন্তি মাতিতো আগতং. পাভতন্তি মূলভণ্ডং, পণ্ণাকারো ৰা. রঞ্ঞোতি রামরাজস্স জেট্ঠপুত্তভূতস্স বারাণসিরঞ্ঞো. তত্থাতি বারাণসিযং. ইধেৰাতি হিমৰন্তপস্সেযেৰ. নগরন্তি রাজধানীভূতং মহানগরং. কোলরুক্খো ¶ নাম কুট্ঠভেসজ্জুপগো একো রুক্খৰিসেসো. ব্যগ্ঘপথেতি ব্যগ্ঘমগ্গে.

মাতুলাতি মাতু ভাতরো. কেসগ্গহণন্তি কেসৰেণিবন্ধনং. দুস্সগ্গহণন্তি ৰত্থস্স নিৰসনাকারো. ন্হানতিত্থন্তি যথাৰুত্তায পোক্খরণিযা উদকন্হানতিত্থং. ইদানিপি তেসং জাতিসম্ভেদাভাৰং দস্সেন্তো ‘‘এৰং তেস’’ন্তিআদিমাহ. আৰাহো দারিকাহরণং. ৰিৰাহো দারিকাদানং. তত্থাতি তেসু সক্যকোলিযেসু. ধাতুসদ্দানমনেকত্থত্তা সমুসদ্দো নিৰাসত্থোতি ৰুত্তং ‘‘ৰসন্তী’’তি. অগ্গেতি উপযোগত্থে ভুম্মৰচনং, আদ্যত্থে চ অগ্গসদ্দো, কিরিযাৰিসেসোতি চ দস্সেতি ‘‘তং অগ্গ’’ন্তিআদিনা. যদেত্থ ভগৰতা ৰুত্তং ‘‘অথ খো অম্বট্ঠ রাজা ওক্কাকো উদানং উদানেসি ‘সক্যা ৰত ভো কুমারা, পরমসক্যা ৰত ভো কুমারা’তি, তদগ্গে খো পন অম্বট্ঠ সক্যা পঞ্ঞাযন্তী’’তি, তদেতং সদ্দতো, অত্থতো চ সাভাৰিকনিব্বচননিদস্সনং ‘‘সকাহি ভগিনীহিপি সদ্ধিং সংৰাসৰসেন জাতিসম্ভেদমকত্ৰা কুলৰংসং অনুরক্খিতুং সক্কুণন্তি সমত্থেন্তীতি সক্যা’’তি তেযেৰ সদ্দরচনাৰিসেসেন সাকিযা. যং পনেতং সক্কতনিঘণ্টুসত্থেসু ৰুত্তং –

‘‘সাকরুক্খপটিচ্ছন্নং, ৰাসং যস্মা পুরাকংসু;

তস্মা দিট্ঠা ৰংসজাতে, ভুৰি ‘সক্যা’তি ৰিস্সুতা’’তি.

তদেতং সদ্দমত্তং পতি অসাভাৰিকনিব্বচননিদস্সনং ‘‘কপিলমুনিনো ৰসনট্ঠানে সাকৰনে ৰসন্তীতি সক্যা, সাকিযা’’তি চ.

কাল়ৰণ্ণতায ¶ কণ্হো নামাতি ৰুত্তং ‘‘কাল়ৰণ্ণ’’ন্তিআদি. হনুযং জাতা মস্সূ, উত্তরোট্ঠস্স উভোসু পস্সেসু দাঠাকারেন জাতা দাঠিকা. ইদঞ্চ অত্থমত্তেন ৰুত্তং, তদ্ধিতৰসেন পন যথা এতরহি যক্খে ‘‘পিসাচো’’তি সমঞ্ঞা, এৰং তদা ‘‘কণ্হো’’তি, তস্মা জাতমত্তেযেৰ সব্যাহরণেন পিসাচসদিসতায কণ্হোতি. তথাহি ৰুত্তং ‘‘যথা খো পন অম্বট্ঠ এতরহি মনুস্সা পিসাচে দিস্ৰা ‘পিসাচা’তি সঞ্জানন্তি, এৰমেৰ খো অম্বট্ঠ তেন খো পন সমযেন মনুস্সা পিসাচে ‘কণ্হা’তি সঞ্জানন্তী’’তিআদি. তত্থ পিসাচো জাতোতি ইদানি পাকটনামেন সুৰিঞ্ঞাপনত্থং পুরিমপদস্সেৰ ৰেৰচনং ৰুত্তং. ‘‘ন সকবল়েন মুখেন ব্যাহরিস্সামী’’তিআদীসু (পাচি. ৬১৯) ৰিয উপসগ্গৰসেন সদ্দকরণত্থো হরসদ্দো, পুন দুতিযোপসগ্গেন যুত্তো উচ্চাসদ্দকরণে ৰত্ততীতি ৰুত্তং ‘‘উচ্চাসদ্দমকাসী’’তি.

২৬৮. অত্তনো ¶ উপারম্ভমোচনত্থাযাতি আচরিযেন, অম্বট্ঠেন চ অত্তনো অত্তনো উপরি পাপেতব্বোপৰাদস্স অপনযনত্থং. ‘‘অত্তনো’’তি হেতং ৰিচ্ছালোপৰচনং. পরিভিন্দিস্সতীতি অনত্থকামতাপৰেদনেন পরিভেদং করিস্সতি, পেসুঞ্ঞং উপসংহরিস্সতীতি ৰুত্তং হোতি. অত্থৰিঞ্ঞাপনে সাধনতায ৰাচা এৰ করণং ৰাক্করণং নিরুত্তিনযেন, তং কল্যাণমস্সাতি কল্যাণৰাক্করণো. অস্মিং ৰচনেতি এত্থ তসদ্দেন কামং ‘‘চত্তারোমে ভো গোতম ৰণ্ণা’’তিআদিনা (দী. নি. ১.২৬৬) অম্বট্ঠেন হেট্ঠা ৰুত্তো জাতিৰাদো পরামসিতব্বো হোতি, তথাপেস জাতিৰাদো ৰেদে ৰুত্তৰিধিনাযেৰ তেন পটিমন্তেতব্বো, তস্মা পটিমন্তনহেতুভাৰেন পসিদ্ধং ৰেদত্তযৰচনমেৰ পরামসিতব্বন্তি দস্সেতুং ৰুত্তং ‘‘অত্তনা উগ্গহিতে ৰেদত্তযৰচনে’’তি. ইদানি ‘‘পোরাণং খো পন তে অম্বট্ঠ মাতাপেত্তিক’’ন্তিআদিনা ভগৰতা ৰুত্তৰচনস্সপি পরামসনং দস্সেন্তো ‘‘এতস্মিং ৰা দাসিপুত্তৰচনে’’তি আহ. অপিচ পটিমন্তেতুন্তি এত্থ পটিমন্তনা নাম পঞ্হাৰিস্সজ্জনা, উত্তরিকথনা ৰা, তস্মা অত্থদ্ৰযানুরূপং তব্বিসযস্স ত-সদ্দেন পরামসনং দস্সেতীতি দট্ঠব্বং.

২৬৯. তাৰাতি মন্তনায পঠমমেৰ, অকতায এৰ মন্তনাযাতি ৰুত্তং হোতি. দুজ্জানাতি দুব্বিঞ্ঞেয্যা, পঠমমেৰ সীসমুক্খিপিতুং অসমত্থনতো ¶ , জাতিযা চ দুব্বিঞ্ঞেয্যত্তা, অট্টস্স চ দুক্করণতো অম্বট্ঠো সযমেৰ মোচেতূতি অধিপ্পাযো. অত্তনাৰ সক্যেসু ইব্ভৰাদনিপাতনেন অত্তনো উপরি পাপুণনং সন্ধায ‘‘অত্তনা বদ্ধং পুটক’’ন্তি ৰুত্তং, অত্তনাৰ বদ্ধং পুটোল়িন্তি অত্থো.

২৭০. ধম্মো নাম কারণং ‘‘ধম্মপটিসম্ভিদা’’তিআদীসু (ৰিভ. ৭১৮ আদযো) ৰিয, ধম্মেন সহ ৰত্ততীতি সহধম্মো, সো এৰ সহধম্মিকোতি আহ ‘‘সহেতুকো’’তিআদি, পরিযাযৰচনমেতং. জনকো ৰা হেতু, উপত্থম্ভকো কারণং. অঞ্ঞেন অট্ঠানগতেন অঞ্ঞং অট্ঠানগতং ৰচনং. তেনাহ ‘‘যো হী’’তিআদি.

ততোতি দ্ৰিক্খত্তুং চোদনাতো পরং, ততিযচোদনায অনাগতায এৰ পক্কমিস্সামীতি ৰুত্তং হোতি.

২৭১. পূজিতব্বতো সক্কো দেৰরাজা যক্খো নাম. যো অগ্গিস্স পকতিৰণ্ণো, তেন সমন্নাগতন্তি ৰুত্তং ‘‘আদিত্তন্তি অগ্গিৰণ্ণ’’ন্তি. কন্দলো নাম পুপ্ফূপগরুক্খৰিসেসো, যস্স সেতং ¶ পুপ্ফং পুপ্ফতি, মকুল়ম্পিস্স সেতৰণ্ণং দাঠাকারং হোতি. ৰিরূপরূপন্তি ৰিপরীতরূপসণ্ঠানং.

অট্ঠমসত্তাহে অজপালনিগ্রোধমূলে নিসিন্নস্স সব্ববুদ্ধস্স আচিণ্ণসমাচিণ্ণং অপ্পোস্সুক্কতং সন্ধায ‘‘অহঞ্চেৰা’’তিআদি ৰুত্তং. অৰত্তমানেতি অপ্পটিপজ্জমানে, অননুৰত্তমানে ৰা. তস্মাতি তদা তথাপটিঞ্ঞাতত্তা. তাসেত্ৰা পঞ্হং ৰিস্সজ্জাপেস্সামীতি আগতো যথা তং মূলপণ্ণাসকে আগতস্স সচ্চকপরিব্বাজকস্স সমাগমে (ম. নি. ১.৩৫৭).

‘‘ভগৰা চেৰ পস্সতি অম্বট্ঠো চা’’তি এত্থ ইতরেসমদস্সনে দুৰিধম্পি কারণং দস্সেন্তো ‘‘যদি হী’’তিআদিমাহ. হি-সদ্দো কারণত্থে নিপাতো. যস্মা অগরু, যস্মা চ ৰদেয্যুং, তস্মাতি সম্বন্ধো. অঞ্ঞেসম্পি সাধারণতো অগরু অভারিযং. আৰাহেত্ৰাতি মন্তবলেন অৰ্হানং কত্ৰা. তস্সাতি অম্বট্ঠস্স. অন্তোকুচ্ছি অন্তঅন্তগুণাদিকো. ৰাদসঙ্ঘট্টেতি ৰাচাসঙ্ঘট্টনে. মঞ্ঞমানোতি মঞ্ঞনতো. সম্বন্ধদস্সনঞ্হেতং.

২৭২. তাণং গৰেসমানোতি ‘‘অযমেৰ সমণো গোতমো ইতো ভযতো মম তাযকো’’তি ভগৰন্তংযেৰ ‘‘তাণ’’ন্তি পরিযেসন্তো ¶ , উপগচ্ছন্তোতি ৰুত্তং হোতি. সেসপদদ্ৰযেপি এসেৰ নযো. তাযতীতি যথূপট্ঠিতভযতো পালেতি. তেনাহ ‘‘রক্খতী’’তি, কত্তুসাধনমেতং. নিলীযতীতি যথূপট্ঠিতেনেৰ ভযেন উপদ্দুতো নিলীনো হোতি, অধিকরণসাধনমেতং. সরসদ্দো হিংসনে, তঞ্চ ৰিদ্ধংসনমেৰ অধিপ্পেতন্তি ৰুত্তং ‘‘ভযং হিংসতি ৰিদ্ধংসেতী’’তি, কত্তুসাধনমেতং.

অম্বট্ঠৰংসকথাৰণ্ণনা

২৭৪. গঙ্গায দক্খিণতোতি গঙ্গায নাম নদিযা দক্খিণদিসাভাগে. ব্রাহ্মণতাপসাতি ব্রহ্মকুলিনো তাপসা. সরং ৰা সত্তিআদযো ৰা পরস্স উপরি খিপিতুকামস্স মন্তানুভাৰেন হত্থং ন পরিৰত্ততি, হত্থে পন অপরিৰত্তন্তে কুতো আৰুধং পরিৰত্তিস্সতীতি তথা অপরিৰত্তনং সন্ধায ‘‘আৰুধং ন পরিৰত্ততী’’তি ৰুত্তং. ভদ্রং ভোতি সম্পটিচ্ছনং, সাধূতি অত্থো. ধনুনা খিত্তসরেন অগমনীযং সসম্ভারকথানযেন ‘‘ধনু অগমনীয’’ন্তি ৰুত্তং যথা ‘‘ধনুনা ৰিজ্ঝতি, চক্খুনা পস্সতী’’তি. অম্বট্ঠং নাম ৰিজ্জন্তি সত্তানং সরীরে অব্ভঙ্গং ঠপেতীতি অম্বট্ঠা নিরুত্তিনযেন, এৰংলদ্ধনামং মন্তৰিজ্জন্তি অত্থো. যতো অম্বট্ঠা ৰিজ্জা এতস্মিং অত্থীতি কত্ৰা ¶ কণ্হো ইসি ‘‘অম্বট্ঠো’’তি পঞ্ঞাযিত্থ, তব্বংসজাততায পনাযং মাণৰো ‘‘অম্বট্ঠো’’তি ৰোহরীযতি. সো কির ‘‘কথং নামাহং দিসায দাসিযা কুচ্ছিম্হি নিব্বত্তো’’তি তং হীনং জাতিং জিগুচ্ছন্তো ‘‘হন্দাহং যথা তথা ইমং জাতিং সোধেস্সামী’’তি নিগ্গতো. তেন ৰুত্তং ‘‘ইদানি মে মনোরথং পূরেস্সামী’’তি. অযঞ্হিস্স মনোরথো – ৰিজ্জাবলেন রাজানং তাসেত্ৰা তস্স ধীতরং লদ্ধকালতো পট্ঠায ম্যাযং দাসজাতি সোধিতা ভৰিস্সতীতি.

সেট্ঠমন্তেতি সেট্ঠভূতে ৰেদমন্তে. কো নু কিং কারণা দাসিপুত্তো সমানো মদ্দরূপিং ধীতরং যাচতীতি অত্থো. খুরতি ছিন্দতি, খুরং ৰা পাতি পিৰতীতি খুরপ্পো, খুরমস্স অগ্গে অপ্পীযতি ঠপীযতীতি ৰা খুরপ্পো, সরো. মন্তানুভাৰেন রঞ্ঞো বাহুক্খম্ভমত্তং জাতং, তেন পন বাহুক্খম্ভেন ‘‘কো জানাতি, কিং ভৰিস্সতী’’তি রাজা ভীতো উস্সঙ্কী উত্রস্তো অহোসি. তথা চ ৰুত্তং ‘‘ভযেন ৰেধমানো অট্ঠাসী’’তি.

সরভঙ্গজাতকে ¶ (জা. ২.১৭.৫২) আগতানং দণ্ডকীরাজাদীনং পচ্ছা ওক্কাকরাজা অহোসি, তেসং পৰত্তি চ সব্বত্থ চিরকালং পাকটাতি আহ ‘‘দণ্ডকীরঞ্ঞো’’তিআদি. অপরদ্ধস্স দণ্ডকীরঞ্ঞো, অপরদ্ধো নাল়িকেরো, অজ্জুনো চাতি সম্বন্ধো. সতিপি ৰালুকাদিৰস্সে আৰুধৰস্সেনেৰ ৰিনাসোতি ৰুত্তং ‘‘আৰুধৰুট্ঠিযা’’তি. ‘‘অযম্পি ঈদিসো মহানুভাৰো’’তি মঞ্ঞমানা এৰং চিন্তযন্তা ভযেন অৰোচুন্তি দট্ঠব্বং.

উন্দ্রিযিস্সতীতি ভিন্দিযিস্সতি. কম্মরূপঞ্হেতং ‘‘পথৰী’’তি কম্মকত্তুৰসেন ৰুত্তত্তা যথা ‘‘কুসুলো ভিজ্জতী’’তি. তেনাহ ‘‘ভিজ্জিস্সতী’’তি. থুসমুট্ঠীতি পলাসমুট্ঠি, ভুসমুট্ঠি ৰা. কস্মাতি আহ ‘‘সরসন্থম্ভনমত্তে’’তিআদি.

ভীততসিতা ভযৰসেন ছম্ভিতসরীরা উদ্ধগ্গলোমা হোন্তি হট্ঠলোমা, অভীততসিতা পন ভযুপদ্দৰাভাৰতো অচ্ছম্ভিতসরীরা পতিতলোমা হোন্তি অহট্ঠলোমা, খেমেন সোত্থিনা তিট্ঠন্তি, তায পন পতিতলোমতায তস্স সোত্থিভাৰো পাকটো হোতীতি ফলেন কারণং ৰিভাৰেতুং পাল়িযং ‘‘পল্লোমো’তি ৰুত্তন্তি দস্সেতি ‘‘পন্নলোমো’’তিআদিনা. নিরুত্তিনযেন পদসিদ্ধি যথা তং ভযভেরৰসুত্তে ‘‘ভিয্যো পল্লোমমাপাদিং অরঞ্ঞে ৰিহারাযা’’তি (ম. নি. ১.৩৬ আদযো). ইদন্তি ওসানৰচনং. ‘‘সচে মে রাজা তং দারিকং দস্সেতি, কুমারো সোত্থি পল্লোমো ভৰিস্সতী’’তি পটিঞ্ঞাকরণং পকরণতোযেৰ পাকটং. তেনাতি কণ্হেন. মন্তেতি বাহুক্খম্ভকমন্তস্স পটিপ্পস্সম্ভকৰিজ্জাসঙ্খাতে মন্তে. এৰরূপানঞ্হি ভযুপদ্দৰকরানং মন্তানং একংসেনেৰ ¶ পটিপ্পস্সম্ভকমন্তাহোন্তি যথা তং কুসুমারকৰিজ্জাদীনং. পরিৰত্তিতেতি পজপ্পিতে. অত্তনো ধীতুযা অপৰাদমোচনত্থং তং অদাসং ভুজিস্সং করোতি. তস্সা অনুরূপে ইস্সরিযে ঠপনত্থং উল়ারে চ নং ঠানে ঠপেসি. একেন পক্খেনাতি মাতুপক্খেন. করুণাযন্তো সমস্সাসনত্থং আহ, ন পন উচ্চাকুলীনভাৰদস্সনত্থং. তেনাহ ‘‘অথ খো ভগৰা’’তিআদি.

খত্তিযসেট্ঠভাৰৰণ্ণনা

২৭৫. ব্রাহ্মণেসূতি ৰোহারমত্তং, ব্রাহ্মণানং সমীপে ব্রাহ্মণেহি লদ্ধব্বানি আসনাদীনি লভেথাতি ৰুত্তং হোতি. তেন ৰুত্তং ‘‘ব্রাহ্মণানং ¶ অন্তরে’’তি. কেৰলং ৰেদসত্থানুরূপং পরলোকগতে সদ্ধায এৰ কাতব্বং, ন তদঞ্ঞং কিঞ্চি অভিপত্থেন্তেনাতি সদ্ধন্তি নিব্বচনং দস্সেতুং ‘‘মতকে উদ্দিস্স কতভত্তে’’তি ৰুত্তং. মঙ্গলাদিভত্তেতি এত্থ আদিসদ্দেন উস্সৰদেৰতারাধনাদিভত্তে সঙ্গণ্হাতি. যঞ্ঞভত্তেতি পাপসঞ্ঞমাদিৰসেন কতভত্তে. ‘‘পাপসঞ্ঞমাদিভত্তো ভৰিস্সতী’’তিআদিনা হি অগ্গিহোমো ইধ যঞ্ঞং. পাহুনকানন্তি অতিথীনং. অনাগন্তুকানম্পি পাহেণকভত্তং ‘‘পাহুন’’ন্ত্ৰেৰ ৰুচ্চতীতি আহ ‘‘পণ্ণাকারভত্তে ৰা’’তি. আৰটং নিৰারণং. অনাৰটং অনিৰারণং. খত্তিযভাৰং অপ্পত্তো উভতোসুজাতাভাৰতো. তেনাহ ‘‘অপরিসুদ্ধো’’তি.

২৭৬. ইত্থিযা ৰা ইত্থিং করিত্ৰাতি এত্থ করণং নাম কিরিযাসামঞ্ঞৰিসযং করভূধাতূনং অত্থৰসেন সব্বধাত্ৰন্তোগধত্তাতি আহ ‘‘পরিযেসিত্ৰা’’তি. খত্তিযকুমারস্স ভরিযাভূতং ব্রাহ্মণকঞ্ঞং ইত্থিং পরিযেসিত্ৰা গহেত্ৰা ব্রাহ্মণানং ইত্থিযা ৰা খত্তিযাৰ সেট্ঠা, ‘‘হীনা ব্রাহ্মণা’’তি পাল়িমুদাহরিত্ৰা যোজেতব্বং. ‘‘পুরিসেন ৰা পুরিসং করিত্ৰাতি এত্থাপি এসেৰ নযো’’তি (দী. নি. টী. ১.২৭৬) আচরিযেন ৰুত্তং. তত্থাপি হি খত্তিযকঞ্ঞায পতিভূতং ব্রাহ্মণকুমারং পুরিসং পরিযেসিত্ৰা গহেত্ৰা ব্রাহ্মণানং পুরিসেন ৰা খত্তিযাৰ সেট্ঠা, হীনা ব্রাহ্মণাতি যোজনা. কিস্মিঞ্চিদেৰ পকরণেতি এত্থ পকরণং নাম কারণং ‘‘এতস্মিং নিদানে এতস্মিং পকরণে’’তিআদীসু (পাচি. ৪২, ৯০) ৰিয, তস্মা রাগাদিৰসেন পক্খলিতে ঠানে হেতুভূতেতি অত্থো, তং পন অত্থতো অপরাধোৰ, সো চ অকত্তব্বকরণন্তি আহ ‘‘কিস্মিঞ্চিদেৰ দোসে’’তিআদি. ভস্সসদ্দো ভস্মপরিযাযো. ভসীযতি নিরত্থকভাৰেন খিপীযতীতি হি ভস্সং, ছারিকা. ‘‘ৰধিত্ৰা’’তি এতস্স অত্থৰচনং ‘‘ওকিরিত্ৰা’’তি.

২৭৭. কম্মকিলেসেহি জনেতব্বো, তেহি ৰা জাযতীতি জনিতো, স্ৰেৰ জনেতো, মনুস্সোৰ ¶ . তথা হি ৰুত্তং ‘‘যে গোত্তপটিসারিনো’’তি. তদেতং পজাৰচনং ৰিয জাতিসদ্দৰসেন বহুম্হি একৰচনন্তি আহ ‘‘পজাযাতি অত্থো’’তি. এতস্মিং জনেতিপি যুজ্জতি. পটিসরন্তীতি গোত্তং পটিচ্চ ‘‘অহং গোতমো, অহং কস্সপো’’তিআদিনা সরণং করোন্তি ৰিচিনন্তি.

পঠমভাণৰারৰণ্ণনা নিট্ঠিতা.

ৰিজ্জাচরণকথাৰণ্ণনা

২৭৮. ইমস্মিং ¶ পন সিলোকে আহরিযমানে ব্রহ্মগরুকা সদ্ধেয্যতং আপজ্জিস্সন্তি, অম্বট্ঠো চ ‘‘ৰিজ্জাচরণসম্পন্নো’’তি পদং সুত্ৰা ৰিজ্জাচরণং পুচ্ছিস্সতি, এৰমযং ৰিজ্জাচরণপরিদীপনী দেসনা মহাজনস্স সাত্থিকা ভৰিস্সতীতি পস্সিত্ৰা লোকনাথো ইমং সিলোকং সনঙ্কুমারভাসিতং আহরীতি ইমমত্থম্পি ৰিভাৰেন্তো ‘‘ইমায পন গাথাযা’’তিআদিমাহ. ইতরথা হি ভগৰাপি অসব্বঞ্ঞূ পরাৰস্সযো ভৰেয্য, ন চ যুজ্জতি ভগৰতো পরাৰস্সযতা সম্মাসম্বুদ্ধভাৰতো. তেনাহ ‘‘অহম্পি হি, অম্বট্ঠ, এৰং ৰদামী’’তিআদি. ব্রাহ্মণসমযে সিদ্ধন্তি ব্রাহ্মণলদ্ধিযা পাকটং. ৰক্খমাননযেন জাতিৰাদাদিপটিসংযুত্তং. ‘‘সংসন্দিত্ৰাতি ঘটেত্ৰা, অৰিরুদ্ধং কত্ৰাতি অত্থো’’তি (দী. নি. টী. ১.২৭৭) আচরিযেনৰুত্তং. ইদানি পন পোত্থকেসু ‘‘পটিক্খিপিত্ৰা’’তি পাঠো দিস্সতি, সো অযুত্তোৰ. কস্মাতি চে? ন হি পাল়িযং ব্রাহ্মণসমযসিদ্ধং ৰিজ্জাচরণং পটিক্খিপতি, তদেৰ অম্বট্ঠেন চিন্তিতং ৰিজ্জাচরণং ঘটেত্ৰা অৰিরুদ্ধং কত্ৰা অনুত্তরং ৰিজ্জাচরণং দেসেতীতি.

ৰাদোতি লদ্ধি, ৰচীভেদো ৰা. তেনাহ ‘‘ব্রাহ্মণ…পে…আদিৰচন’’ন্তি. লদ্ধিপি হি ৰত্তব্বত্তা ৰচনমেৰ. ইদন্তি অজ্ঝেনজ্ঝাপনযজনযাজনাদিকম্মং, ন ৰেস্সস্স, ন খত্তিযস্স, ন তদঞ্ঞেসন্তি অত্থং আদিসদ্দেন সঙ্গণ্হাতি. সব্বত্থাতি গোত্তৰাদমানৰাদেসু. তত্থাপি হি গোত্তৰাদোতি গোত্তং আরব্ভ ৰাদো, কস্সপস্সেৰিদং ৰট্টতি, ন কোসিযস্সাতিআদিৰচনন্তি অত্থো. মানৰাদোতি মানং আরব্ভ অত্তুক্কংসনপরৰম্ভনৰসেন ৰাদো, ব্রাহ্মণস্সেৰিদং ৰট্টতি, ন সুদ্দস্সাতিআদিৰচনন্তি অত্থো. জাতিৰাদে ৰিনিবদ্ধাতি জাতিসন্নিস্সিতৰাদে পটিবদ্ধা. সব্বত্থাতি ¶ গোত্তৰাদৰিনিবদ্ধাদীসু. গোত্তৰাদৰিনিবদ্ধাতি হি গোত্তৰাদে ৰিনিবদ্ধা. মানৰাদৰিনিবদ্ধাতি মানৰাদে ৰিনিবদ্ধা, যে হি ব্রাহ্মণস্সেৰ অজ্ঝেনজ্ঝাপনযজনযাজনাদযোতি এৰং অত্তুক্কংসনপরৰম্ভনৰসেন পৰত্তা, তে মানৰাদৰিনিবদ্ধা চ হোন্তি. আৰাহৰিৰাহৰিনিবদ্ধাতি আৰাহৰিৰাহেসু ৰিনিবদ্ধা. যে হি ৰিনিবদ্ধত্তযৰসেন ‘‘অরহসি ৰা মং ত্ৰং, ন ৰা মং ত্ৰং অরহসী’’তি এৰং পৰত্তনকা, তে আৰাহৰিৰাহৰিনিবদ্ধা চ হোন্তীতি ইমমত্থসেসং সন্ধায ‘‘এস নযো’’তি ¶ ৰুত্তং. আৰাহৰিৰাহৰিনিবদ্ধভাৰৰিভাৰনত্থঞ্হি ‘‘অরহসি ৰা মং ত্ৰং, ন ৰা মং ত্ৰং অরহসী’’তি পাল়িযং ৰুত্তং, তদেতং জাতিৰাদাদীহি তীহি পদেহি যোজেতব্বং. আৰুত্তিআদিনযেন হি জাতিৰাদাদযো দ্ৰিক্খত্তুমত্থদীপকা. তথা হি আচরিযেন ৰুত্তং ‘‘যে পন আৰাহৰিৰাহৰিনিবদ্ধা, তে এৰ সম্বন্ধত্তযৰসেন ‘অরহসি ৰা মং ত্ৰং, ন ৰা মং ত্ৰং অরহসী’তি এৰং পৰত্তনকা’’তি (দী. নি. টী. ১.২৭৮).

ননু পুব্বে ৰিজ্জাচরণং পুট্ঠং, কস্মা তং পুন পুচ্ছতীতি চোদনং সোধেন্তো ‘‘ততো অম্বট্ঠো’’তিআদিমাহ. তত্থ যত্থাতি যস্সং ৰিজ্জাচরণসম্পত্তিযং. ব্রাহ্মণসমযসিদ্ধং সন্ধায ৰুত্তং. লগ্গিস্সামাতি ওলগ্গা অন্তোগধা ভৰিস্সাম. ততোতি তায ৰিজ্জাচরণসম্পদায. অৰক্খিপীতি অৰচাসি. পরমত্থতো অৰিজ্জাচরণানিযেৰ ‘‘ৰিজ্জাচরণানী’’তি গহেত্ৰা ঠিতো হি পরমত্থতো ৰিজ্জাচরণেসু ৰিভজিযমানেসু সো ততো দূরতো অপনীতো নাম হোতি. যত্থাতি যস্সং পন ৰিজ্জাচরণসম্পত্তিযং. অনুত্তরৰিজ্জাচরণং সন্ধায ৰুত্তং. জাননকিরিযাযোগে কম্মম্পি যুজ্জনকিরিযাযোগে কত্তাযেৰ উপপন্নো. পধানকিরিযাপেক্খা হি কারকাতি ৰুত্তং ‘‘অযং নো ৰিজ্জাচরণসম্পদা ঞাতুং ৰট্টতী’’তি. এৰমীদিসেসু. সমুদাগমতোতি আদিসমুট্ঠানতো.

২৭৯. কামং চরণপরিযাপন্নত্তা চরণৰসেন নিয্যাতেতুং ৰট্টতি, অম্বট্ঠস্স পন অসমপথগমনং নিৰারেন্তো সীলৰসেনেৰ নিয্যাতেতীতি ইমমত্থং ৰিভাৰেতুং ‘‘চরণপরিযাপন্নম্পী’’তি ৰুত্তং. ব্রহ্মজালে (দী. নি. ১.৭, ১১, ২১) ৰুত্তনযেন খুদ্দকাদিভেদং তিৰিধং সীলং. সীলৰসেনেৰাতি সীলপরিযাযৰসেনেৰ. কিঞ্চি কিঞ্চি সীলন্তি ব্রাহ্মণানং জাতিসিদ্ধং অহিংসনাদিযমনিযমলক্খণং অপ্পমত্তকং সীলং. তস্মাতি তথা ৰিজ্জমানত্তা, অত্তনি ৰিজ্জমানং সীলমত্তম্পি নিস্সায লগ্গেয্যাতি অধিপ্পাযো. ‘‘তত্থ তত্থেৰ লগ্গেয্যাতি তস্মিং তস্মিংযেৰ ব্রাহ্মণসমযসিদ্ধে সীলমত্তে ‘চরণ’ন্তি লগ্গেয্যা’’তি (দী. নি. টী. ১.২৭৯) আচরিযেন ৰুত্তং, তদেতং অট্ঠকথাযমেৰ সাকারৰচনস্স ৰুত্তত্তা ৰিচারেতব্বং, অধিপ্পাযমত্তদস্সনং ৰা এতং. অযং পনেত্থ ¶ অত্থো – তত্থ তত্থেৰ লগ্গেয্যাতি তস্মিং তস্মিংযেৰ অত্তনি ৰিজ্জমানসীলমত্তপটিসংযুত্তট্ঠানে ‘‘মযম্পি চরণসম্পন্না’’তি লগ্গেয্য, তস্মা সীলৰসেনেৰ নিয্যাতেতীতি সম্বন্ধো. তথাপসঙ্গাভাৰতো পন উপরি চরণৰসেনেৰ নিয্যাতেতীতি ¶ দস্সেন্তো ‘‘যং পনা’’তিআদিমাহ. রূপাৰচরচতুত্থজ্ঝাননিদ্দেসেনেৰ অরূপাৰচরজ্ঝানানম্পি নিদ্দিট্ঠভাৰাপত্তিতো ‘‘অট্ঠপি সমাপত্তিযো ‘চরণ’ন্তি নিয্যাতিতা’’তি ৰুত্তং. তানিপি হি অঙ্গসমতায চতুত্থজ্ঝানানেৰাতি. নিয্যাতিতাতি চ অসেসতো নীহরিত্ৰা গহিতা, নিদস্সিতাতি অত্থো. ৰিপস্সনাঞাণতো পনাতি ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনীযে ঠিতে আনেঞ্জপ্পত্তে ঞাণদস্সনায চিত্তং অভিনীহরতি অভিনিন্নামেতী’’তিআদিনা নযেন ৰিপস্সনাঞাণতো পট্ঠায.

চতুঅপাযমুখকথাৰণ্ণনা

২৮০. অসম্পাপুণন্তোতি আরভিত্ৰাপি সম্পজ্জিতুমসক্কোন্তো. অৰিসহমানোতি আরভিতুমেৰ অসক্কোন্তো. ‘‘খারী’’তি তাপসপরিক্খারস্সেতং অধিৰচনং, সো চ অনেকভেদোতি ৰিভজিত্ৰা দস্সেতুং ‘‘অরণী’’তিআদি ৰুত্তং. তত্থ অরণীতি হেট্ঠিমুপরিমৰসেন অগ্গিধমনকং অরণীদ্ৰযং. কমণ্ডলূতি কুণ্ডিকা. সুজাতি হোমদব্বি. সুজাসদ্দো হি হোমকম্মনি হব্যন্নাদীনমুদ্ধরণত্থং কতদব্বিযং ৰত্ততি যথা তং কূটদন্তসুত্তে ‘‘পঠমো ৰা দুতিযো ৰা সুজং পগ্গণ্হন্তান’’ন্তি (দী. নি. ১.৩৪১). তথা হি ইমস্মিংযেৰ ঠানে আচরিযেন ৰুত্তং ‘‘সুজাতি দব্বী’’তি (দী. নি. টী. ১.২৮০). হব্যন্নাদীনং সুখগ্গহণত্থং জাযতীতি হি সুজা. কেচি পন ইমমত্থমৰিচারেত্ৰা তুন্নত্থমেৰ গহেত্ৰা ‘‘সূচী’’তি পঠন্তি, তদযুত্তমেৰ আচরিযেন তথা অৰণ্ণিতত্তা. চমতি অদতীতি চমরো, মিগৰিসেসো, তস্স ৰালেন কতা বীজনী চামরা. আদিসদ্দেন তিদণ্ডতিঘটিকাদীনি সঙ্গণ্হাতি. কুচ্ছিতেন ৰঙ্কাকারেন জাযতীতি কাজো যথা ‘‘কালৰণ’’ন্তি; কচতি ভারং বন্ধতি এত্থাতি ৰা কাচো. দুৰিধম্পি হি পদমিচ্ছন্তি সদ্দৰিদূ. খারিভরিতন্তি খারীহি পরিপুণ্ণং. একেন ৰি-কারেন পদং ৰড্ঢেত্ৰা ‘‘খারিৰিৰিধ’’ন্তি পঠন্তানং ৰাদে সমুচ্চযসমাসেন অত্থং দস্সেন্তো ‘‘যে পনা’’তিআদিমাহ.

ননু উপসম্পন্নস্স ভিক্খুনো সাসনিকোপি যো কোচি অনুপসম্পন্নো অত্থতো পরিচারকোৰ হোতি অপি খীণাসৰসামণেরো, কিমঙ্গং পন বাহিরকপব্বজিতেতি অনুযোগং পতি তত্থ ৰিসেসং দস্সেতুং ‘‘কামঞ্চা’’তিআদি ৰুত্তং. ৰুত্তনযেনাতি ‘‘কপ্পিয…পে… ৰত্তকরণৰসেনা’’তি ¶ ¶ এৰং ৰুত্তনযেন. অনেকসতসহস্সসংৰরৰিনযসমাদানৰসেন উপসম্পন্নভাৰস্স ৰিসিট্ঠভাৰতো খীণাসৰসামণেরোপি পুথুজ্জনভিক্খুনো পরিচারকোতি ৰুত্তো.

‘‘নৰকোটিসহস্সানি, অসীতিসতকোটিযো;

পঞ্ঞাসসতসহস্সানি, ছত্তিংস চ পুনাপরে;

এতে সংৰরৰিনযা, সম্বুদ্ধেন পকাসিতা;

পেয্যালমুখেন নিদ্দিট্ঠা, সিক্খা ৰিনযসংৰরে’’তি. (ৰিসুদ্ধি. ১.২০; অপ. অট্ঠ. ২.৫৫; পটি. ম. অট্ঠ. ১.২.৩৭);

এৰং ৰুত্তপ্পভেদানং অনেকসতসহস্সানং সংৰরৰিনযানং সমাদায সিক্খনেন উপরিভূতা অগ্গভূতা সম্পদাতি হি উপসম্পদা, তায চেস উপসম্পদায পুথুজ্জনভিক্খু উপসম্পন্নোতি.

অযং পনাতি যথাৰুত্তলক্খণো তাপসো. তাপসা হি কম্মৰাদিকিরিযৰাদিনো, ন সাসনস্স পটাণীভূতা, যতো নেসং পব্বজিতুমাগতানং ৰিনাৰ তিত্থিযপরিৰাসেন খন্ধকে পব্বজ্জা অনুঞ্ঞাতা. তপো এতেসমত্থীতি তাপসা ত-কারস্স দীঘং কত্ৰা. ‘‘লোমসা’’তিআদীসু ৰিয হি স-পচ্চযমিচ্ছন্তি সদ্দৰিদূ. ইদং ৰুত্তং হোতি – কামং খীণাসৰোপি সামণেরো পুথুজ্জনস্স ভিক্খুনো অত্থতো পরিচারকোৰ হোতি, সো পন ৰত্তকরণমত্তেনেৰ পরিচারকো, ন লামকভাৰেন. তাপসো তু গুণৰসেন চেৰ ৰেয্যাৰচ্চকরণৰসেন চ লামকভাৰেনেৰ পরিচারকো, ন ৰত্তকরণমত্তেন, এৰমিমেসং নানাকরণং সন্ধায তাপসস্সেৰ পরিচারকতা ৰুত্তাতি.

‘‘কস্মা’’তিআদিনা চোদকো কারণং চোদেতি. ‘‘যস্মা’’তিআদিনা আচরিযো কারণং দস্সেত্ৰা পরিহরতি. এৰং সঙ্খেপতো পরিহরিতমত্থং ৰিৰরিতুং ‘‘ইমস্মিঞ্হী’’তিআদি ৰুত্তং. অসক্কোন্তন্তি অসমত্থনেন ৰিপ্পটিপজ্জন্তং অলজ্জিং. খুরধারূপমন্তি খুরধারানং মত্থকেনেৰ অক্কমিত্ৰা গমনূপমং. বহুজনসম্মতাতি মহাজনেন সেট্ঠসম্মতা. অঞ্ঞেতি অপরে ভিক্খূ. ইধাতি তাপসপব্বজ্জায. ছন্দেন সহ চরন্তীতি সছন্দচারিনো, যথাকামং পটিপন্নকাতি ৰুত্তং হোতি. অনুসিক্খন্তোতি দিট্ঠানুগতিযা সিক্খন্তো. তাপসাৰ বহুকা হোন্তি, ন ভিক্খূ.

কুদালপিটকানং ¶ নিব্বচনং হেট্ঠা ৰুত্তমেৰ. বহুজনকুহাপনত্থন্তি বহুনো জনস্স ৰিম্হাপনত্থং ¶ . অগ্গিসালন্তি অগ্গিহুত্তসালং. নানাদারূহীতি পলাসরুক্খদণ্ডাদীহি নানাৰিধসমিধাদারূহি. হোমকরণৰসেনাতি যঞ্ঞকরণৰসেন.

উদকৰসেনেত্থ পানাগারং. তেনাহ ‘‘পানীযং উপট্ঠপেত্ৰা’’তিআদি. যং ভত্তপুটং ৰা যানি তণ্ডুলাদীনি ৰাতি সম্বন্ধো. অম্বিলযাগু নাম তক্কাদিঅম্বিলসংযুত্তা যাগু. তণ্হাদীহি আমসিতব্বতো চীৰরাদি আমিসং নাম. ৰড্ঢিযাতি দিগুণতিগুণাদিৰড্ঢিযা. কুটুম্বং সণ্ঠপেতীতি ধনং পতিট্ঠাপেতি. যথাৰুত্তমত্থং পাল়িযং নিদস্সনমত্তেন ৰুত্তন্তি আহ ‘‘ইদং পনস্স পটিপত্তিমুখ’’ন্তি, ইদং পন পাল়িৰচনং অস্স চতুত্থস্স পুগ্গলস্স কোহঞ্ঞপটিপত্তিযা মুখমত্তন্তি অত্থো. কস্মাতি চে? সো হি নানাৰিধেন কোহঞ্ঞেন লোকং ৰিম্হাপযন্তো তত্থ অচ্ছতি. তেনাহ ‘‘ইমিনা হী’’তিআদি. এৰন্তি ‘‘তত্থ পানীযং উপট্ঠপেত্ৰা’’তিআদিনা ৰুত্তনযেন.

‘‘সব্বাপি তাপসপব্বজ্জা নিদ্দিট্ঠা’’তি ধম্মাধিট্ঠাননযেন দস্সিতমেৰ পুগ্গলাধিট্ঠাননযেন ৰিৰরিতুং ‘‘অট্ঠৰিধা হী’’তিআদি ৰুত্তং. খলাদীসু মনুস্সানং সন্তিকে উপতিট্ঠিত্ৰা ৰীহিমুগ্গমাসতিলাদীনি ভিক্খাচরিযনিযামেন সঙ্কড্ঢিত্ৰা উঞ্ছনং উঞ্ছা, সা এৰ চরিযা ৰুত্তি এতেসন্তি উঞ্ছাচরিযা. অগ্গিপক্কিকায ভত্তভিক্খায জীৰন্তীতি অগ্গিপক্কিকা, ন অগ্গিপক্কিকা অনগ্গিপক্কিকা, তণ্ডুলভিক্খায এৰ জীৰিকাতি ৰুত্তং হোতি. উঞ্ছাচরিযা হি খলাদীনি গন্ত্ৰা উপতিট্ঠিত্ৰা মনুস্সেহি দিয্যমানং খলগ্গং নাম ধঞ্ঞং পটিগ্গণ্হন্তি, অনগ্গিপক্কিকা পন তাদিসমপটিগ্গণ্হিত্ৰা তণ্ডুলমেৰ পটিগ্গণ্হন্তীতি অযমেতেসং ৰিসেসো. ন সযং পচন্তীতি অসামপাকা, পক্কভিক্খায এৰ জীৰিকা. অযো ৰিয কট্ঠিনো মুট্ঠিপ্পমাণো পাসাণো অযমুট্ঠি নাম, তেন ৰত্তন্তীতি অযমুট্ঠিকা. দন্তেন উপ্পাটিতং ৰক্কলং রুক্খত্তচো দন্তৰক্কলং, তেন ৰত্তন্তীতি দন্তৰক্কলিকা. পৰত্তং রুক্খাদিতো পাতাপিতং ফলং ভুঞ্জন্তি সীলেনাতি পৰত্তফলভোজিনো. পণ্ডুপলাসসদ্দস্স একসেসনযেন দ্ৰিধা অত্থো, জিণ্ণতায পণ্ডুভূতং পলাসঞ্চেৰ জিণ্ণপক্কভাৰেন তংসদিসং পুপ্ফফলাদি ¶ চাতি. তেন ৰক্খতি ‘‘সযং পতিতানেৰ পুপ্ফফলপণ্ডুপলাসাদীনি খাদন্তা যাপেন্তী’’তি, (দী. নি. অট্ঠ. ১.২৮০) তেন ৰত্তন্তীতি পণ্ডুপলাসিকা, সযংপতিতপণ্ণপুপ্ফফলভোজিনো. ইদানি তে অট্ঠৰিধেপি সরূপতো দস্সেতুং ‘‘তত্থা’’তিআদি ৰুত্তং. কেণিযজটিলৰত্থু খন্ধকৰণ্ণনায (মহাৰ. অট্ঠ. ৩০০) গহেতব্বং.

সঙ্কড্ঢিত্ৰাতি ভিক্খাচরিযাৰসেন একজ্ঝং কত্ৰা.

তণ্ডুলভিক্খন্তি ¶ তণ্ডুলমেৰ ভিক্খং. ভিক্খিতব্বা যাচিতব্বা, ভিক্খূনং অযন্তি ৰা ভিক্খাতি হি ভিক্খাসদ্দো তণ্ডুলাদীসুপি নিরুল়্হো. তেন ৰুত্তং ‘‘পচিত্ৰা পরিভুঞ্জন্তী’’তি.

ভিক্খাপরিযেট্ঠি নাম দুক্খাতি পরেসং গেহতো গেহং গন্ত্ৰা ভিক্খায পরিযেসনা নাম দীনৰুত্তিভাৰেন দুক্খা.

যে পন ‘‘পাসাণস্স পরিগ্গহো নাম দুক্খো পব্বজিতস্সা’’তি দন্তেহেৰ উপ্পাটেত্ৰা খাদন্তি, তে দন্তৰক্কলিকা নামাতি অযং অট্ঠকথামুত্তকনযো.

পণ্ডুপলাসসদ্দো পুপ্ফফলৰিসযোপি সদিসতাকপ্পনেনাতি দস্সেতি ‘‘পুপ্ফফলপণ্ডুপলাসাদীনী’’তি ইমিনা.

তেতি পণ্ডুপলাসিকা. নিদস্সনমত্তমেতং অঞ্ঞেসম্পি তথা ভেদসম্ভৰতো. পাপুণনট্ঠানেতি গহেতুং সম্পাপুণনট্ঠানে. একরুক্খতোতি পঠমং উপগতরুক্খতো.

কথমেত্তাৰতা সব্বাপি তাপসপব্বজ্জা নিদ্দিট্ঠাতি চোদনা ন তাৰ ৰিসোধিতাতি আহ ‘‘ইমা পনা’’তিআদি. চতূহিযেৰাতি ‘‘খারিৰিধমাদাযা’’তিআদিনা ৰুত্তাহি পৰত্তফলভোজনিকা, কন্দমূলফলভোজনিকা, অগ্যাগারিকা, আগারিকা চেতি চতূহি এৰ তাপসপব্বজ্জাহি. অগারং ভজন্তীতি অগারং নিৰাসভাৰেন উপগচ্ছন্তি. ইমিনা হি ‘‘চতুদ্ৰারং অগারং করিত্ৰা অচ্ছতী’’তিআদিনা ইধ ৰুত্তায চতুত্থায তাপসপব্বজ্জায তেসমৰরোধতং দস্সেতি. এৰমিতরেসুপি পটিলোমতো যোজনা ৰেদিতব্বা. অগ্গিপরিচরণৰসেন অগ্যাগারং ভজন্তি ¶ . এৰং পন তেসমৰরোধতং ৰদন্তো তদনুরূপং ইমেসম্পি পচ্চেকং দুৰিধতং দস্সেতীতি দট্ঠব্বং.

২৮১. আচরিযেন পোক্খরসাতিনা সহ পৰত্ততীতি সাচরিযকো, তস্স. অপাযমুখম্পীতি ৰিনাসকারণম্পি. পগেৰ ৰিজ্জাচরণসম্পদায সন্দিস্সনেতি পি-সদ্দো গরহাযং. তেন ৰুত্তং ‘‘অপি নু ত্ৰং ইমায অনুত্তরায ৰিজ্জাচরণসম্পদায সন্দিস্সসি সাচরিযকো’’তিআদি. তত্রাযমট্ঠকথামুত্তকনযো – ‘‘নো হিদং ভো গোতমা’’তি সন্দিস্সনং পটিক্খিপিত্ৰা অসন্দিস্সনাকারমেৰ ৰিভাৰেতুং ‘‘কো চাহ’’ন্তিআদি ৰুত্তং. সাচরিযকো অহং কো চ কীদিসো হুত্ৰা অনুত্তরায ৰিজ্জাচরণসম্পদায সন্দিস্সামি, অনুত্তরা ৰিজ্জাচরণসম্পদা ¶ কা চ কীদিসা হুত্ৰা সাচরিযকে মযি সন্দিস্সতি, আরকা অহং…পে… সাচরিযকোতি সহ পাঠসেসেন যোজনা.

২৮২. অপাযে ৰিনাসনুপাযে নিযুত্তো আপাযিকো. তব্ভাৰং ন পরিপূরেতি পরিপূরেতুং ন সক্কোতীতি অপরিপূরমানো, তব্ভাৰেন অপরিপুণ্ণোতি অত্থো. অত্তনা আপাযিকেন হোন্তেনাপি তব্ভাৰং অপরিপূরমানেন পোক্খরসাতিনা এসা ৰাচা ভাসিতাতি অত্থতো সম্বন্ধত্তা কত্ৰত্থে চেতং পচ্চত্তৰচনন্তি আহ ‘‘আপাযিকেনাপি অপরিপূরমানেনা’’তি. অপিচ অত্তনা অপরিপূরমানেন আপাযিকেনাপি সযং অপরিপূরমানাপাযিকেন হুত্ৰাপি পোক্খরসাতিনা এসা ৰাচা ভাসিতাতি অত্থযুত্তিতো ইত্থম্ভূতলক্খণে চেতং পচ্চত্তৰচনন্তিপি এৰং ৰুত্তং. অঞ্ঞো হি সদ্দক্কমো, অঞ্ঞো অত্থক্কমোতি. কেচি পন ‘‘করণত্থমেৰ দস্সেতুং এৰং ৰুত্ত’’ন্তি ৰদন্তি, তদযুত্তমেৰ পদদ্ৰযস্স কত্তুপদেন সমানত্থত্তা, সমানত্থানঞ্চ পদানং অঞ্ঞমঞ্ঞং করণভাৰানুপপত্তিতো, অলমতিপপঞ্চেন.

পুব্বকইসিভাৰানুযোগৰণ্ণনা

২৮৩. দীযতেতি দত্তি, সা এৰ দত্তিকন্তি আহ ‘‘দিন্নক’’ন্তি. অদাতুকামম্পি দাতুকামং কত্ৰা সম্মুখা পরমাৰট্টেতি সম্মূল়্হং করোতি এতাযাতি সম্মুখাৰট্টনী. তেনাহ ‘‘ন দেমীতি ৰত্তুং ন সক্কোতী’’তি. পুন তস্সাতি ব্রাহ্মণস্স. কারণানুরূপং রাজূনং পুণ্ণপত্তন্তি আহ ‘‘কস্মা মে ¶ দিন্নো’’তি. সঙ্খপলিতকুট্ঠন্তি ধোতসঙ্খমিৰ সেতকুট্ঠং. সেতপোক্খররজততো গুণসমানকাযত্তা এৰমাহ. অনুগচ্ছতীতি পরমনুবন্ধতি.

যদি দুৰিধেনপি কারণেন রাজা ব্রাহ্মণস্স সম্মুখাভাৰং ন দেতি, অথ কস্মা তদুপসঙ্কমনং ন পটিক্খিত্তন্তি আহ ‘‘যস্মা পনা’’তিআদি. ‘‘খেত্তৰিজ্জাযাতি নীতিসত্থে’’তি (দী. নি. টী. ১.২৮৩) আচরিযেন ৰুত্তং. হেট্ঠাপি ব্রহ্মজালৰণ্ণনাযং এৰং ৰুত্তং ‘‘খেত্তৰিজ্জাতি অব্ভেয্যমাসুরক্খরাজসত্থাদিনীতিসত্থ’’ন্তি. (দী. নি. অট্ঠ. ১.২১) দুস্সমেত্থ তিরোকরণিযং. তেনাহ ‘‘সাণিপাকারস্স অন্তো ঠত্ৰা’’তি. অন্তসদ্দেন পন তব্ভাৰেন পদে ৰড্ঢিযমানে দুস্সন্তং যথা ‘‘ৰনন্তো’’তি. ‘‘পযাতন্তি সদ্ধং, সস্সতিকং ৰা. তেনাহ অভিহরিত্ৰা দিন্ন’’ন্তি আচরিযেন ৰুত্তং, তস্মা মতকভত্তসঙ্খেপেন ৰা নিচ্চভত্তসঙ্খেপেন ৰা অভিহরিত্ৰা দিন্নং ভিক্খন্তি অত্থো ৰেদিতব্বো. ‘‘অযং পনা’’তিআদি অত্থাপত্তিৰচনং. নিট্ঠন্তি নিচ্ছযং. কস্মা পন ভগৰা ব্রাহ্মণস্স এৰরূপং অমনাপং মম্মৰচনং অৰোচাতি চোদনং ¶ কারণং দস্সেত্ৰা সোধেতুং ‘‘ইদং পনা’’তিআদি ৰুত্তং. রহস্সম্পি পটিচ্ছন্নম্পি মম্মৰচনং পকাসেসীতি সম্বন্ধো.

২৮৪. রাজাসনং নাম হত্থিক্খন্ধপদেসং সন্ধায ‘‘হত্থিগীৰায ৰা নিসিন্নো’’তি পাল়িযং ৰুত্তং. রথূপত্থরেতি রথস্স উপরি অত্থরিতপদেসে. তেনাহ ‘‘রথম্হী’’তিআদি. উগ্গতুগ্গতেহীতি উগ্গতানমতিসযেন উগ্গতেহি. ন হি ৰিচ্ছাসমাসো লোকিকেহি অভিমতোতি. রঞ্ঞো অপচ্চং রাজঞ্ঞো, বহুকত্তং পতি, একসেসনযেন ৰা ‘‘রাজঞ্ঞেহী’’তি ৰুত্তং. পাকটমন্তনন্তি পকাসভূতং মন্তনং. তদেৰিধাধিপ্পেতং, ন রহস্সমন্তনং সুদ্দাদীহিপি সুয্যমানস্স ইচ্ছিতত্তা. তেন ৰুত্তং ‘‘অথ আগচ্ছেয্য সুদ্দো ৰা সুদ্দদাসো ৰা’’তিআদি. তাদিসেহিযেৰাতি রঞ্ঞো আকারসদিসেহেৰ. তস্সত্থস্স সাধনসমত্থং ৰচনং রঞ্ঞা ভণিতং যথা, তথা সোপি তস্সত্থস্স সাধনসমত্থমেৰ ভণিতং ৰচনং অপিনু ভণতীতি যোজেতব্বং.

২৮৫. ‘‘পৰত্তারো’’তি এতস্স পাৰচনভাৰেন ৰত্তারোতি সদ্দতো অত্থো. যস্মা পন তে তথাভূতা মন্তানং পৰত্তকা নাম, তস্মা ¶ অধিপ্পাযতো অত্থং দস্সেতুং ‘‘পৰত্তযিতারো’’তি ৰুত্তং. ৰদসদ্দেন, হি তুপচ্চযেন চ ‘‘ৰত্তারো’’তি পদসিদ্ধি, তথা ৰতুসদ্দেন ‘‘পৰত্তযিতারো’’তি. ইদং আচরিযস্স (দী. নি. টী. ১.২৮৫) চ আচরিযসারিপুত্তত্থেরস্স চ মতং. ৰতুসদ্দেনেৰ ‘‘পৰত্তারো’’তি পদসিদ্ধিং দস্সেতীতিপি কেচি ৰদন্তি. পদদ্ৰযস্স তুল্যাধিকরণত্তা ‘‘মন্তমেৰা’’তি ৰুত্তং. ‘‘সুদ্দে বহি কত্ৰা রহো ভাসিতব্বট্ঠেন মন্তা এৰ তং তং অত্থপটিপত্তিহেতুতায পদ’’ন্তি হি তুল্যাধিকরণং হোতি, অনুপনীতাসাধারণতায রহস্সভাৰেন ৰত্তব্বায মন্তনকিরিযায পদমধিগমুপাযন্তিপি মন্তপদন্তি অট্ঠকথামুত্তকো নযো. গীতন্তি গাযনৰসেন সজ্ঝাযিতং, গাযনম্পিধ উদত্তানুদত্তাদিসরসম্পাদনৰসেনেৰ অধিপ্পেতন্তি ৰুত্তং ‘‘সরসম্পত্তিৰসেনা’’তি. পাৰচনভাৰেন অঞ্ঞেসং ৰুত্তং. তমঞ্ঞেসং ৰাদাপনৰসেন ৰাচিতং. সঙ্গহেত্ৰা উপরূপরি সঞ্ঞূল়্হাৰসেন সমুপব্যূল়্হং. ইরুৰেদযজুৰেদসামৰেদাদিৰসেন, তত্থাপি পচ্চেকং মন্তব্রহ্মাদিৰসেন, অজ্ঝাযানুৰাকাদিৰসেন চ রাসিকতং. যথাৰুত্তনযেনেৰ পিণ্ডং কত্ৰা ঠপিতং. অঞ্ঞেসং ৰাচিতং অনুৰাচেন্তীতি অঞ্ঞেসং কম্মভূতানং তেহি ৰাচাপিতং মন্তপদং এতরহি ব্রাহ্মণা অঞ্ঞেসং অনুৰাচাপেন্তি.

তেসন্তি মন্তকত্তূনং. দিব্বচক্খুপরিভণ্ডং যথাকম্মূপগঞাণং, পচ্চক্খতো দস্সনট্ঠেন দিব্বচক্খুসদিসঞ্চ পুব্বেনিৰাসানুস্সতিঞাণং সন্ধায ‘‘দিব্বেন চক্খুনা’’তি ৰুত্তং. অতো দিব্বচক্খুপরিভণ্ডেন ¶ যথাকম্মূপগঞাণেন সত্তানং কম্মস্সকতাদীনি চেৰ দিব্বচক্খুসদিসেন পুব্বেনিৰাসানুস্সতিঞাণেন অতীতকপ্পে ব্রাহ্মণানং মন্তজ্ঝেনৰিধিঞ্চ ওলোকেত্ৰাতি অত্থো গহেতব্বো. রূপমেৰ হি পচ্চুপ্পন্নং দিব্বচক্খুস্স আরম্মণন্তি তমিধ অট্ঠানগতং হোতি. পাৰচনেন সহ সংসন্দিত্ৰাতি যং কস্সপসম্মাসম্বুদ্ধেন ৰুত্তং ৰট্টসন্নিস্সিতং ৰচনং, তেন সহ সংসন্দিত্ৰা অৰিরুদ্ধং কত্ৰা. ন হি তেসং ৰিৰট্টসন্নিস্সিতো অত্থো পচ্চক্খতো হোতি. গন্থিংসূতি পজ্জগজ্জবন্ধৰসেন সক্কতভাসায বন্ধিংসু. অপরা পরেতি অট্ঠকাদীহি অপরা অঞ্ঞেপি পরে পচ্ছিমা ওক্কাকরাজকালাদীসু উপ্পন্না. পাণাতিপাতাদীনি পক্খিপিত্ৰাতি অট্ঠকাদীহি গন্থিতমন্তপদেস্ৰেৰ পাণাতিপাতাদিকিলেসসন্নিস্সিতপদানং তত্থ তত্থ পক্খিপনং কত্ৰা. ৰিরুদ্ধে অকংসূতি সুত্তনিপাতে ব্রাহ্মণধম্মিকসুত্তাদীসু (সু. নি. ব্রাহ্মণধম্মিকসুত্ত) আগতনযেন সংকিলেসিকত্থদীপনতো ¶ পচ্চনীকভূতে অকংসু. ইসীতি নিদস্সনমত্তং. ‘‘ইসি ৰা ইসিত্থায পটিপন্নো ৰা’’তি হি ৰত্তব্বং. কস্মা পনেত্থ পটিঞ্ঞাগহণৰসেন দেসনাসোতপতিতং ন করোতীতি আহ ‘‘ইধ ভগৰা’’তিআদি. ইধাতি ‘‘ত্যাহং মন্তে অধীযামি, ‘সাচরিযকো’তি ত্ৰং মঞ্ঞসী’’তি ৰুত্তট্ঠানে. পটিঞ্ঞং অগ্গহেত্ৰাতি যথা হেট্ঠা পটিঞ্ঞা গহিতা, তথা ‘‘তং কিং মঞ্ঞসি অম্বট্ঠ, তাৰতা ত্ৰং ভৰিস্সসি ইসি ৰা ইসিত্থায ৰা পটিপন্নো সাচরিযকোতি, নো হিদং ভো গোতমা’’তি এৰং ইধ পটিঞ্ঞং অগ্গহেত্ৰা.

২৮৬. নিরামগন্ধাতি কিলেসাসুচিৰসেন ৰিস্সগন্ধরহিতা. অনিত্থিগন্ধাতি ইত্থীনং গন্ধমত্তস্সপি অৰিসহনেন ইত্থিগন্ধরহিতা. রজোজল্লধরাতি পকতিরজসেদাদিজল্লধরা. পাকারপুরিসগুত্তীতি পাকারাৰরণং, পুরিসাৰরণঞ্চ. এত্থ পন ‘‘নিরামগন্ধা’’তি এতেন তেসং দসন্নং ব্রাহ্মণানং ৰিক্খম্ভিতকিলেসতং দস্সেতি, ‘‘অনিত্থিগন্ধা, ব্রহ্মচারিনো’’তি চ এতেন একৰিহারিতং, ‘‘রজোজল্লধরা’’তি এতেন মণ্ডনৰিভূসনাভাৰং, ‘‘অরঞ্ঞাযতনে পব্বতপাদেসু ৰসিংসূ’’তি এতেন মনুস্সূপচারং পহায ৰিৰিত্তৰাসং, ‘‘ৰনমূলফলাহারা ৰসিংসূ’’তি এতেন সালিমংসোদনাদিপণীতাহার পটিক্খেপং, ‘‘যদা’’তিআদিনা যানৰাহনপটিক্খেপং, ‘‘সব্বদিসাসূ’’তিআদিনা রক্খাৰরণপটিক্খেপং. এৰঞ্চ দস্সেন্তো মিচ্ছাপটিপদাপক্খিকং সাচরিযকস্স অম্বট্ঠস্স ৰুত্তিং উপাদায সম্মাপটিপদাপক্খিকাপি তেসং ব্রাহ্মণানং ৰুত্তি অরিযৰিনযে সম্মাপটিপত্তিং উপাদায মিচ্ছাপটিপদাযেৰ. কথঞ্হি নাম তে ভৰিস্সতি সল্লেখপটিপত্তিযুত্ততাতি. ‘‘এৰং সু তে’’তিআদিনা ভগৰা অম্বট্ঠং সন্তজ্জেন্তো নিগ্গণ্হাতীতিপি ৰিভাৰেতি. ইদঞ্হি ৰক্খমানায পাল়িযা পিণ্ডত্থদস্সনন্তি.

দুস্সপট্টিকা দুস্সপট্টং. দুস্সকলাপো দুস্সৰেণী. ৰেঠকেহীতি ৰেঠকপট্টকেহি, দুস্সেহি সংৰেঠেত্ৰা ¶ কতনমিতফাসুকাহীতি ৰুত্তং হোতি. কপ্পেতুন্তি কত্তরিকায ছিন্দিতুং. কপ্পিতৰালেহীতি এত্থাপি এসেৰ নযো. ‘‘ন ভিক্খৰে মস্সু কপ্পাপেতব্ব’’ন্তিআদীসু (চূল়ৰ. ২৭৫) ৰিয হি কপুসদ্দো ছেদনে ৰত্ততি. যুত্তট্ঠানেসূতি গীৰাসীসৰালধীসু. ৰালাতি তেসু ঠানেসু জাযমানা লোমা. সহচরণৰসেন, ঠানীনামেন ৰা ‘‘কুত্তৰালা’’তি ¶ ৰুত্তা. কেচি পন ‘‘ৰাল়যুত্তত্তা’’তি পাঠং কপ্পেত্ৰা ৰাল়রূপযুত্তত্তাতি অত্থং ৰদন্তি, পাল়িযানপেক্খনমেৰ তেসং দোসো. ‘‘কুত্তৰালেহি ৰল়ৰারথেহী’’তি পাল়িযং ৰুত্তং. সমন্তানগরন্তি নগরস্স সমন্ততো. পাকারস্স অধোভাগে কতসুধাকম্মং ঠানং নগরস্স সমীপে কত্তব্বতো, উপকারকরণতো চ ‘‘উপকারিকা’’তি ৰুচ্চতি. নগরস্স উপকারিকা এতাসন্তি নগরূপকারিকাযো, রাজধানীঅপেক্খায ইত্থিলিঙ্গনিদ্দেসো. তেনাহ ‘‘ইধ পনা’’তিআদি. মতীতি ৰিচিকিচ্ছাৰসেন অনেকংসিকজাননা. উপরি দেসনায অৰড্ঢকারণং দস্সেন্তো ‘‘ইদং ভগৰা’’তিআদিমাহ. পাল়িযং সো মং পঞ্হেনাতি সো জনো মং পুচ্ছাৰসেন সোধেয্য. অহং ৰেয্যাকরণেন সোধেস্সামীতি অহম্পিমং ৰিস্সজ্জনাৰসেন সোধেস্সামীতি যথারহমধিকারৰসেন অত্থো ৰেদিতব্বো.

দ্ৰেলক্খণদস্সনৰণ্ণনা

২৮৭. ‘‘নিসিন্নান’’ন্তিআদি অনাদরে সামিৰচনং, ৰিসেসনং ৰা. সঙ্কুচিতে ইরিযাপথে অনৰসেসতো লক্খণানং দুব্বিভাৰনতো ‘‘ন সক্কোতী’’তি ৰুত্তং, তথা সুৰিভাৰনতো পন ‘‘সক্কোতী’’তি. পরিযেসনসুখত্থমেৰ তদাচিণ্ণতা দট্ঠব্বা. তেনাতি দুৰিধেনপি কারণেন.

গৰেসীতি ঞাণেন পরিযেসনমকাসি. গণযন্তোতি ঞাণেনেৰ সঙ্কলযন্তো. সমানযীতি সম্মা আনযি সমাহরি. ‘‘কঙ্খতী’’তি পদস্স আকঙ্খতীতি অত্থোতি আহ ‘‘অহো ৰতা’’তিআদি. অনুপসগ্গম্পি হি পদং কত্থচি সউপসগ্গমিৰ অত্থৰিসেসৰাচকং যথা ‘‘গোত্রভূ’’তি. ততো ততো সরীরপ্পদেসতো. কিচ্ছতীতি কিলমতি. তেনাহ ‘‘ন সক্কোতি দট্ঠু’’ন্তি. তাযাতি ‘‘ৰিচিনন্তো কিচ্ছতী’’তি ৰুত্তায ৰিচিকিচ্ছায. ততোতি সন্নিট্ঠানং অগমনতো. এৰং ‘‘কঙ্খতী’’তি পদস্স আসিসনত্থতং দস্সেত্ৰা ইদানি সংসযত্থতং দস্সেন্তো ‘‘কঙ্খায ৰা’’তিআদিমাহ. তত্থ কঙ্খাযাতি ‘‘কঙ্খতী’’তি পদেন ৰুত্তায কঙ্খায. অসত্ৰপধানঞ্হি আখ্যাতিকং. এস নযো সেসেসুপি. অৰত্থাপভেদগতা ৰিমতি এৰ ‘‘তীহি ধম্মেহী’’তি ৰুত্তা, তিপ্পকারেহি সংসযধম্মেহীতি অত্থো. কালুসিযভাৰোতি অপ্পসন্নতায হেতুভূতো আৰিলভাৰো.

ৰত্থিকোসেনাতি ¶ ¶ নাভিযা অধোভাগসঙ্খাতে ৰত্থিম্হি জাতেন লিঙ্গপসিব্বকেন. ‘‘অণ্ডকোসো’’তিআদীসু (ম. নি. ১.১৫২, ১৮৯; ২.২৭; অ. নি. ৭.৭১; পারা. ১১) ৰিয হি কোসসদ্দো পরিৰেঠকপসিব্বকে ৰত্ততি. ৰত্থেন গুহিতব্বত্তা ৰত্থগুয্হং. যস্মা ভগৰতো কোসোহিতং ৰত্থগুয্হং সব্ববুদ্ধাৰেণিকং অঞ্ঞেহি অসাধারণং সুৰিসুদ্ধকঞ্চনমণ্ডলসন্নিভং, অত্তনো সণ্ঠানসন্নিৰেসসুন্দরতায আজানেয্যগন্ধহত্থিনো ৰরঙ্গপরমচারুভাৰং, ৰিকসমানতপনিযারৰিন্দসমুজ্জলকেসরাৰত্তৰিলাসং, সঞ্ঝাপভানুরঞ্জিতজলৰনন্তরাভিলক্খিতসম্পুণ্ণচন্দমণ্ডলসোভঞ্চ অত্তনো সিরিযা অভিভুয্য ৰিরাজতি, যং বাহিরব্ভন্তরমলেহি অনুপক্কিলিট্ঠতায, চিরকালপরিচিতব্রহ্মচরিযাধিকারতায, সণ্ঠিতসণ্ঠানসম্পত্তিযা চ কোপীনম্পি সমানং অকোপীনমেৰ জাতং. তেন ৰুত্তং ‘‘ভগৰতো হী’’তিআদি. ৰরৰারণস্সেৰাতি ৰরগন্ধহত্থিনো ইৰ. পহূতভাৰন্তি পুথুলভাৰং. এত্থেৰ হি তস্স সংসযো. তনুমুদুসুকুমারাদীসু পনস্স গুণেসু ৰিচারণা এৰ নাহোসি.

২৮৮. ‘‘তথারূপ’’ন্তি ইদং সমাসপদন্তি আহ ‘‘তংরূপ’’ন্তি. এত্থাতি যথা অম্বট্ঠো কোসোহিতং ৰত্থগুয্হমদ্দস্স, তথা ইদ্ধাভিসঙ্খারমভিসঙ্খরণে. ইমিনা হি ‘‘তথারূপং ইদ্ধাভিসঙ্খারং অভিসঙ্খরী’’তিআদিপাল়িপরামসনং, অতো চেত্থ সহ ইদ্ধাভিসঙ্খারনযেন ৰত্থগুয্হদস্সনকারণং মিলিন্দপঞ্হাপাঠেন (মি. প. ৩.৩) ৰিভাৰিতং হোতি. কেচি পন ‘‘ৰত্থগুয্হদস্সনে’’তি পরামসন্তি, তদযুত্তমেৰ. ন হি তং পাল়িযং, অট্ঠকথাযঞ্চ অত্থি, যং এৰং পরামসিতব্বং সিযা, ইদ্ধাভিসঙ্খারনযো চ অৰিভাৰিতো হোতি. কিমেত্থ অঞ্ঞেন ৰত্তব্বং চতুপটিসম্ভিদাপত্তেন ছল়ভিঞ্ঞেন ৰাদীৰরেন ভদন্তনাগসেনত্থেরেন ৰুত্তনযেনেৰ সম্পটিচ্ছিতব্বত্তা. হিরী করীযতে এত্থাতি হিরিকরণং, তদেৰ ওকাসো তথা, হিরিযিতব্বট্ঠানং. উত্তরস্সাতি সুত্তনিপাতে আগতস্স উত্তরমাণৰস্স (ম. নি. ২.৩৮৪). সব্বেসম্পি চেতেসং ৰত্থু সুত্তনিপাততো গহেতব্বং.

ছাযন্তি পটিবিম্বং. কথং দস্সেসি, কীদিসং ৰাতি আহ ‘‘ইদ্ধিযা’’তিআদি. ছাযারূপকমত্তন্তি ভগৰতো পটিবিম্বরূপকমেৰ, ন পকতিৰত্থগুয্হং, তঞ্চ বুদ্ধসন্তানতো ৰিনিমুত্তত্তা রূপকমত্তং ভগৰতা সদিসৰণ্ণসণ্ঠানাৰযৰং ইদ্ধিমযং বিম্বকমেৰ হোতি, এৰঞ্চ কত্ৰা অপ্পকত্থেন ক-কারেন ৰিসেসিতৰচনং উপপন্নং হোতি. ছাযারূপকমত্তং ইদ্ধিযা অভিসঙ্খরিত্ৰা দস্সেসীতি সম্বন্ধো. ‘‘তং পন দস্সেন্তো ভগৰা যথা অত্তনো বুদ্ধরূপং ন ¶ দিস্সতি, তথা কত্ৰা দস্সেতী’’তি (দী. নি. টী. ১.২৮৮) আচরিযা ৰদন্তি. তদেতং ভদন্তনাগসেনত্থেরেন ৰুত্তেন ইদ্ধাভিসঙ্খতছাযারূপকমত্তদস্সনৰচনেন সংসন্দতি চেৰ সমেতি চ যথা ¶ তং ‘‘খীরেন খীরং, গঙ্গোদকেন যমুনোদক’’ন্তি দট্ঠব্বং. তথাৰচনেনেৰ হি সেসবুদ্ধরূপস্স তঙ্খণে অদস্সিতভাৰো অত্থতো আপন্নো হোতি. নিৰাসননিৰত্থতাদিৰচনেন পনেত্থ বুদ্ধসন্তানতো ৰিনিমুত্তস্সপি ছাযারূপকস্স নিৰাসনাদিঅবহিগতভাৰো দস্সিতো, ন চ চোদেতব্বং ‘‘কথং নিৰাসনাদিঅন্তরগতং ছাযারূপকং ভগৰা দস্সেতি, কথঞ্চ অম্বট্ঠো পস্সতী’’তি. অচিন্তেয্যো হি ইদ্ধিৰিসযোতি. ছাযং দিট্ঠেতি ছাযায দিট্ঠায. এতন্তি ছাযারূপকং. বুজ্ঝনকে সতি জীৰিতনিমিত্তম্পি হদযমংসং দস্সেয্যাতি অধিপ্পাযো. নিন্নেত্ৰাতি নীহরিত্ৰা. অযমেৰ ৰা পাঠো. কল্লোসীতি ৰিস্সজ্জনে ত্ৰং কুসলো ছেকো অসি, যথাৰুত্তো ৰা ৰিস্সজ্জনামগ্গো উপপন্নো যুত্তো অসীতি অত্থো. ‘‘কুসলো’’তি কেচি পঠন্তি, অযুত্তমেতং. মিলিন্দপঞ্হে হি সব্বত্থ ৰিস্সজ্জনাৰসানে ‘‘কল্লো’’ ইচ্চেৰ দিট্ঠোতি.

নিন্নামেত্ৰাতি মুখতো নীহরণৰসেন কণ্ণসোতাদিঅভিমুখং পণামেত্ৰা, অধিপ্পাযমেৰ দস্সেতুং ‘‘নীহরিত্ৰা’’তি ৰুত্তং. কথিনসূচিং ৰিযাতি ঘনসুখুমভাৰাপাদনেন কক্খল়সূচিমিৰ কত্ৰা. তথাকরণেনাতি কথিনসূচিং ৰিয করণেন. এত্থাতি পহূতজিৰ্হায. মুদুভাৰো, দীঘভাৰো, তনুভাৰো চ দস্সিতো অমুদুনো ঘনসুখুমভাৰাপাদনত্থমসক্কুণেয্যত্তাতি আচরিযেন (দী. নি. টী. ১.২৮৮) ৰুত্তং. তত্রাযমধিপ্পাযো – যস্মা মুদুমেৰ ঘনসুখুমভাৰাপাদনত্থং সক্কোতি, তস্মা তথাকরণেন মুদুভাৰো দস্সিতো অগ্গি ৰিয ধূমেন. যস্মা চ মুদুযেৰ ঘনসুখুমভাৰাপজ্জনেন দীঘগামি, তস্মা কণ্ণসোতানুমসনেন দীঘভাৰো দস্সিতো. যস্মা পন মুদু এৰ ঘনসুখুমভাৰাপজ্জনেন তনু হোতি, তস্মা নাসিকাসোতানুমসনেন তনুভাৰো দস্সিতোতি. অপুথুলস্স তথাপটিচ্ছাদনত্থমসক্কুণেয্যত্তা নলাটচ্ছাদনেন পুথুলভাৰো দস্সিতো.

২৮৯. পত্থেন্তো হুত্ৰা উদিক্খন্তোতি যোজেতব্বং.

২৯০. মূলৰচনং ¶ কথা. পটিৰচনং সল্লাপো.

২৯১. ‘‘উদ্ধুমাতক’’ন্তিআদীসু (সং. নি. ৫.২৪২; ৰিসুদ্ধি. ১.১০২) ৰিয ক-সদ্দো জিগুচ্ছনত্থোতি ৰুত্তং ‘‘তমেৰ জিগুচ্ছন্তো’’তি. তমেৰাতি পণ্ডিতভাৰমেৰ, অম্বট্ঠমেৰাতিপি অত্থো. অম্বট্ঠঞ্হি সন্ধায এৰমাহ. তথা হি পাল়িযং ৰুত্তং ‘‘এৰং…পে… অম্বট্ঠং মাণৰং এতদৰোচা’’তি. কামঞ্চ অম্বট্ঠং সন্ধায এৰং ৰুত্তং, নামগোত্তৰসেন পন অনিযমং কত্ৰা গরহন্তো পুথুৰচনেন ৰদতীতি ৰেদিতব্বং. ‘‘যদেৰ খো ত্ৰ’’ন্তি এতস্স অনিযমৰচনস্স ‘‘এৰরূপেনা’’তি ইদং নিযমৰচনন্তি দস্সেতি ‘‘যাদিসো’’তিআদিনা. ভাৰেনভাৰলক্খণে ¶ ভুম্মৰচনত্থে করণৰচনন্তি ৰুত্তং ‘‘এদিসে অত্থচরকে’’তি. ন অঞ্ঞত্রাতি ন অঞ্ঞত্থ সুগতিযং. এত্থ পন ‘‘অত্থচরকেনা’’তি ইমিনা ব্যতিরেকমুখেন অনত্থচরকতংযেৰ ৰিভাৰেতীতি দট্ঠব্বং. ‘‘উপনেয্য উপনেয্যা’’তি ইদং ত্ৰাদ্যন্তং ৰিচ্ছাৰচনন্তি আহ ‘‘ব্রাহ্মণো খো পনা’’তিআদি. এৰং উপনেত্ৰা উপনেত্ৰাতি তং তং দোসং উপনীয উপনীয. তেনাহ ‘‘সুট্ঠু দাসাদিভাৰং আরোপেত্ৰা’’তি. পাতেসীতি পৰট্টনৰসেন পাতেসি. যঞ্চ অগমাসি, তম্পি অস্স তথাগমনসঙ্খাতং ঠানং অচ্ছিন্দিত্ৰাতি যোজনা.

পোক্খরসাতিবুদ্ধূপসঙ্কমনৰণ্ণনা

২৯২-৩-৬. কিত্তকো পন সোতি ৰুত্তং ‘‘সম্মোদনীযকথাযপি কালো নত্থী’’তি. আগমা নূতি আগতো নু. খোতি নিপাতমত্তং. ইধাতি এত্থ, তুম্হাকং সন্তিকন্তি অত্থো. অধিৰাসেতূতি সাদিযতু, তং পন সাদিযনং ইধ মনসাৰ সম্পটিগ্গহো, ন কাযৰাচাহীতি আহ ‘‘সম্পটিচ্ছতূ’’তি. অজ্জ পৰত্তমানং অজ্জতনং, পুঞ্ঞং, পীতিপামোজ্জঞ্চ, ইমমত্থং দস্সেতুং ‘‘যং মে’’তিআদি ৰুত্তং. কারন্তি উপকারং, সক্কারং ৰা. অচোপেত্ৰাতি অচালেত্ৰা.

২৯৭. ‘‘সহত্থা’’তি ইদং করণত্থে নিস্সক্কৰচনং. তেনাহ ‘‘সহত্থেনা’’তি. সুহিতন্তি ধাতং, জিঘচ্ছাদুক্খাভাৰেন ৰা সুখিতং. যাৰদত্থন্তি যাৰ অত্থো, তাৰ ভোজনেন তদা কতং. পটিক্খেপপৰারণাৰেত্থ অধিপ্পেতা, ন নিমন্তনপৰারণাতি আহ ‘‘অল’’ন্তিআদি. ‘‘হত্থসঞ্ঞাযা’’তি নিদস্সনমত্তং অঞ্ঞত্থ মুখৰিকারেন, ৰচীভেদেন চ পটিক্খেপস্স ৰুত্তত্তা ¶ , একক্খণেপি চ তথাপটিক্খেপস্স লব্ভনতো. ওনীতা পত্ততো পাণি এতস্সাতি ওনীতপত্তপাণীতি ভিন্নাধিকরণৰিসযো তিপদো বাহিরত্থসমাসো. মুদ্ধজণ-কারেন, পন সঞ্ঞোগত-কারেন চ ওণিত্তসদ্দো ৰিনাভূতেতি দস্সেতি ‘‘ওণিত্তপত্তপাণিন্তিপি পাঠো’’তিআদিনা. সুচিকরণত্থে ৰা ওণিত্তসদ্দো. ওণিত্তং আমিসাপনযনেন সুচিকতং পত্তং পাণি চ অস্সাতি হি ওণিত্তপত্তপাণি. তেনাহ ‘‘হত্থে চ পত্তঞ্চ ধোৰিত্ৰা’’তি. ‘‘ওণিত্তং নানাভূতং ৰিনাভূতং, আমিসাপনযনেন ৰা সুচিকতং পত্তং পাণিতো অস্সাতি ওণিত্তপত্তপাণী’’তি (সারত্থ. টী. ১.২৩) সারত্থদীপনিযং ৰুত্তং. তত্থ পচ্ছিমৰচনং ‘‘হত্থে চ পত্তঞ্চ ধোৰিত্ৰা’’তি ইমিনা অসংসন্দনতো ৰিচারেতব্বং. এৰংভূতন্তি ‘‘ভুত্তাৰিং ওনীতপত্তপাণি’’ন্তি ৰুত্তপ্পকারেন ভূতং.

২৯৮. অনুপুব্বিং কথন্তি অনুপুব্বং কথেতব্বং কথং. তেনাহ ‘‘অনুপটিপাটিকথ’’ন্তি. কা ¶ পন সাতি আহ ‘‘দানানন্তরং সীল’’ন্তিআদি, তেনাযমত্থো বোধিতো হোতি – দানকথা তাৰ পচুরজনেসুপি পৰত্তিযা সব্বসাধারণত্তা, সুকরত্তা, সীলে পতিট্ঠানস্স উপাযভাৰতো চ আদিতো কথেতব্বা. পরিচ্চাগসীলো হি পুগ্গলো পরিগ্গহৰত্থূসু ৰিনিস্সটভাৰতো সুখেনেৰ সীলানি সমাদিযতি, তত্থ চ সুপ্পতিট্ঠিতো হোতি, সীলেন দাযকপটিগ্গাহকসুদ্ধিতো পরানুগ্গহং ৰত্ৰা পরপীল়ানিৰত্তিৰচনতো, কিরিযধম্মং ৰত্ৰা অকিরিযধম্মৰচনতো, ভোগসম্পত্তিহেতুং ৰত্ৰা ভৰসম্পত্তিহেতুৰচনতো চ দানকথানন্তরং সীলকথা কথেতব্বা. তঞ্চে দানসীলং ৰট্টনিস্সিতং, অযং ভৰসম্পত্তি তস্স ফলন্তি দস্সনত্থং সীলকথানন্তরং সগ্গকথা. তায হি এৰং দস্সিতং হোতি ‘‘ইমেহি দানসীলমযেহি, পণীতপণীততরাদিভেদভিন্নেহি চ পুঞ্ঞকিরিযৰত্থূহি এতা চাতুমহারাজিকাদীসু পণীতপণীততরাদিভেদভিন্না অপরিমেয্যা দিব্বসম্পত্তিযো লদ্ধব্বা’’তি. স্ৰাযং সগ্গো রাগাদীহি উপক্কিলিট্ঠো, সব্বথা পন তেহি অনুপক্কিলিট্ঠো অরিযমগ্গোতি দস্সনত্থং সগ্গকথানন্তরং মগ্গকথা. মগ্গঞ্চ কথেন্তেন তদধিগমুপাযদস্সনত্থং কামানং আদীনৰো, ওকারো, সংকিলেসো, নেক্খম্মে আনিসংসো চ কথেতব্বো. সগ্গপরিযাপন্নাপি হি সব্বে কামা নাম বহ্ৰাদীনৰা অনিচ্চা অদ্ধুৰা ৰিপরিণামধম্মা, পগেৰ ইতরেতি ¶ আদীনৰো, সব্বেপি কামা হীনা গম্মা পোথুজ্জনিকা অনরিযা অনত্থসংহিতাতি লামকভাৰো ওকারো, সব্বেপি ভৰা কিলেসানং ৰত্থুভূতাতি সংকিলেসো, সব্বসংকিলেসৰিপ্পযুত্তং নিব্বানন্তি নেক্খম্মে আনিসংসো চ কথেতব্বোতি. অযম্পি অত্থো বোধিতোতি ৰেদিতব্বো. মগ্গোতি হি এত্থ ইতি-সদ্দেন আদ্যত্থেন কামাদীনৰাদীনম্পি সঙ্গহোতি অযমত্থৰণ্ণনা কতা. তেনাহ ‘‘সেয্যথিদং – দানকথং সীলকথং সগ্গকথং কামানং আদীনৰং ওকারং সংকিলেসং নেক্খম্মে আনিসংসং পকাসেতী’’তি. ৰিত্থারো সারত্থদীপনিযং (সারত্থ. টী. ৩.২৬) গহেতব্বো.

কসি-সদ্দো ঞাণেন গহণেতি আহ ‘‘গহিতা’’তিআদি. সামংসদ্দেন নিৰত্তেতব্বমত্থং দস্সেতি ‘‘অসাধারণা অঞ্ঞেস’’ন্তি ইমিনা, লোকুত্তরধম্মাধিগমে পরূপদেসৰিগতত্তা, একেনেৰ লোকে পঠমং অনুত্তরায সম্মাসম্বোধিযা অভিসম্বুদ্ধত্তা চ অঞ্ঞেসমসাধারণাতি ৰুত্তং হোতি. ধম্মচক্খুন্তি এত্থ সোতাপত্তিমগ্গোৰ অধিপ্পেতো, ন ব্রহ্মাযুসুত্তে (ম. নি. ২.৩৮৩ আদযো) ৰিয হেট্ঠিমা তযো মগ্গা, ন চ চূল়রাহুলোৰাদসুত্তে (ম. নি. ৩.৪১৬) ৰিয আসৰক্খযো. ‘‘তস্স উপ্পত্তিআকারদস্সনত্থ’’ন্তি কস্মা ৰুত্তং, ননু মগ্গঞাণং অসঙ্খতধম্মারম্মণমেৰ, ন সঙ্খতধম্মারম্মণন্তি চোদনং সোধেন্তো ‘‘তঞ্হী’’তিআদিমাহ. কিচ্চৰসেনাতি অসম্মোহপটিৰেধকিচ্চৰসেন.

পোক্খরসাতিউপাসকত্তপটিৰেদনাকথাৰণ্ণনা

২৯৯. পাল়িযং ¶ ‘‘দিট্ঠধম্মো’’তিআদীসু দস্সনং নাম ঞাণতো অঞ্ঞম্পি চক্খাদিদস্সনং অত্থীতি তন্নিৰত্তনত্থং ‘‘পত্তধম্মো’’তি ৰুত্তং. পত্তি চ ঞাণপত্তিতো অঞ্ঞাপি কাযগমনাদিপত্তি ৰিজ্জতীতি ততো ৰিসেসদস্সনত্থং ‘‘ৰিদিতধম্মো’’তি ৰুত্তং. সা পনেসা ৰিদিতধম্মতা একদেসতোপি হোতীতি নিপ্পদেসতো ৰিদিতধম্মতং দস্সেতুং ‘‘পরিযোগাল়্হধম্মো’’তি ৰুত্তং, তেনস্স সচ্চাভিসম্বোধমেৰ দীপেতি. মগ্গঞাণঞ্হি একাভিসমযৰসেন পরিঞ্ঞাদিচতুকিচ্চং সাধেন্তং নিপ্পদেসেন চতুসচ্চধম্মং সমন্ততো ওগাল়্হং নাম হোতি. তেনাহ ‘‘দিট্ঠো অরিযসচ্চধম্মো এতেনাতি দিট্ঠধম্মো’’তি. ‘‘কথং পন একমেৰ ঞাণং একস্মিং খণে চত্তারি কিচ্চানি সাধেন্তং পৰত্ততি. ন হি তাদিসং লোকে দিট্ঠং, ন আগমো ৰা তাদিসো অত্থী’’তি ¶ ন ৰত্তব্বং. যথা হি পদীপো একস্মিংযেৰ খণে ৰট্টিং দহতি, স্নেহং পরিযাদিযতি, অন্ধকারং ৰিধমতি, আলোকঞ্চাপি দস্সেতি, এৰমেতং ঞাণন্তি দট্ঠব্বং. ‘‘মগ্গসমঙ্গিস্স ঞাণং দুক্খেপেতং ঞাণং, দুক্খসমুদযেপেতং ঞাণং, দুক্খনিরোধেপেতং ঞাণং, দুক্খনিরোধগামিনিযা পটিপদাযপেতং ঞাণ’’ন্তি (ৰিভ. ৭৯৪) সুত্তপদম্পেত্থ উদাহরিতব্বন্তি.

তিণ্ণা ৰিচিকিচ্ছাতি সপ্পটিভযকন্তারসদিসা সোল়সৰত্থুকা, অট্ঠৰত্থুকা চ ৰিচিকিচ্ছা অনেন ৰিতিণ্ণা. ৰিগতা কথংকথাতি পৰত্তিআদীসু ‘‘এৰং নু খো, ন নু খো’’তি এৰং পৰত্তিকা কথংকথা অস্স ৰিগতা সমুচ্ছিন্না. ৰিসারদভাৰং পত্তোতি সারজ্জকরানং পাপধম্মানং পহীনত্তা, তপ্পটিপক্খেসু চ সীলাদিগুণেসু সুপ্পতিট্ঠিতত্তা ৰিসারদভাৰং ৰেয্যত্তিযং পত্তো অধিগতো. সাযং ৰেসারজ্জপ্পত্তি সুপ্পতিট্ঠিততা কত্থাতি চোদনায ‘‘সত্থুসাসনে’’তি ৰুত্তন্তি দস্সেন্তো ‘‘কত্থ? সত্থুসাসনে’’তি আহ. অত্তনাৰ পচ্চক্খতো দিট্ঠত্তা, অধিগতত্তা চ ন অস্স পচ্চযো পচ্চেতব্বো পরো অত্থীতি অত্থো. তত্থাধিপ্পাযমাহ ‘‘ন পরস্সা’’তিআদিনা. ন ৰত্ততীতি ন পৰত্ততি, ন পটিপজ্জতি ৰা, ন পরং পচ্চেতি পত্তিযাযতীতি অপরপ্পচ্চযোতিপি যুজ্জতি. যং পনেত্থ ৰত্তব্বম্পি অৰুত্তং, তদেতং পুব্বে ৰুত্তত্তা, পরতো ৰুচ্চমানত্তা চ অৰুত্তন্তি ৰেদিতব্বং.

ইতি সুমঙ্গলৰিলাসিনিযা দীঘনিকাযট্ঠকথায পরমসুখুমগম্ভীরদুরনুবোধত্থপরিদীপনায সুৰিমলৰিপুলপঞ্ঞাৰেয্যত্তিযজননায অজ্জৰমদ্দৰসোরচ্চসদ্ধাসতিধিতিবুদ্ধিখন্তিৰীরিযাদিধম্মসমঙ্গিনা সাট্ঠকথে পিটকত্তযে অসঙ্গাসংহীরৰিসারদঞাণচারিনা অনেকপ্পভেদসকসমযসমযন্তরগহনজ্ঝোগাহিনা ¶ মহাগণিনা মহাৰেয্যাকরণেন ঞাণাভিৰংসধম্মসেনাপতিনামত্থেরেন মহাধম্মরাজাধিরাজগরুনা কতায সাধুৰিলাসিনিযা নাম লীনত্থপকাসনিযা অম্বট্ঠসুত্তৰণ্ণনায লীনত্থপকাসনা.

অম্বট্ঠসুত্তৰণ্ণনা নিট্ঠিতা.

৪. সোণদণ্ডসুত্তৰণ্ণনা

৩০০. এৰং ¶ ¶ অম্বট্ঠসুত্তং সংৰণ্ণেত্ৰা ইদানি সোণদণ্ডসুত্তং সংৰণ্ণেন্তো যথানুপুব্বং সংৰণ্ণনোকাসস্স পত্তভাৰং ৰিভাৰেতুং, অম্বট্ঠসুত্তস্সানন্তরং সঙ্গীতস্স সুত্তস্স সোণদণ্ডসুত্তভাৰং ৰা পকাসেতুং ‘‘এৰং মে সুতং…পে… অঙ্গেসূতি সোণদণ্ডসুত্ত’’ন্তি আহ. সুন্দরভাৰেন সাতিসযানি অঙ্গানি এতেসমত্থীতি অঙ্গা. তদ্ধিতপচ্চযস্স অতিসযৰিসিট্ঠে অত্থিতাঅত্থে পৰত্তিতো, পধানতো রাজকুমারা, রুল়্হিৰসেন পন জনপদোতি ৰুত্তং ‘‘অঙ্গা নামা’’তিআদি. ইধাপি অধিপ্পেতা, ন অম্বট্ঠসুত্তে এৰ. ‘‘তদা কিরা’’তিআদি তস্সা চারিকায কারণৰচনং. আগমনে আদীনৰং দস্সেত্ৰা পটিক্খিপনৰসেন আগন্তুং ন দস্সন্তি, নানুজানিস্সন্তীতি অধিপ্পাযো.

নীলাসোককণিকারকোৰিল়ারকুন্দরাজরুক্খাদিসম্মিস্সতায তং চম্পকৰনং নীলাদিপঞ্চৰণ্ণকুসুমপটিমণ্ডিতং, ন চম্পকরুক্খানঞ্ঞেৰ নীলাদিপঞ্চৰণ্ণকুসুমতাযাতি ৰদন্তি, তথারূপায পন ধাতুযা চম্পকরুক্খাৰ নীলাদিপঞ্চৰণ্ণম্পি কুসুমং পুপ্ফন্তি. ইদানিপি হি কত্থচি দেসে দিস্সন্তি, এৰঞ্চ যথারুতম্পি অট্ঠকথাৰচনং উপপন্নং হোতি. কুসুমগন্ধসুগন্ধেতি ৰুত্তনযেন সম্মিস্সকানং, সুদ্ধচম্পকানং ৰা কুসুমানং গন্ধেহি সুগন্ধে. এৰং পন ৰদন্তো ন মাপনকালেযেৰ তস্মিং নগরে চম্পকরুক্খা উস্সন্না, অথ খো অপরভাগেপীতি দস্সেতি. মাপনকালে হি চম্পকরুক্খানমুস্সন্নতায তং নগরং ‘‘চম্পা’’তি নামং লভি. ইস্সরত্তাতি অধিপতিভাৰতো. সেনা এতস্স অত্থীতি সেনিকো, স্ৰেৰ সেনিযো. বহুভাৰৰিসিট্ঠা চেত্থ অত্থিতা তদ্ধিতপচ্চযেন জোতিতাতি ৰুত্তং ‘‘মহতিযা সেনায সমন্নাগতত্তা’’তি. সারসুৰণ্ণসদিসতাযাতি উত্তমজাতিসুৰণ্ণসদিসতায. চূল়দুক্খক্খন্ধসুত্তট্ঠকথাযং পন এৰং ৰুত্তং ‘‘সেনিযো’’তি তস্স নামং, বিম্বীতি অত্তভাৰস্স নামং ৰুচ্চতি, সো তস্স সারভূতো দস্সনীযো পাসাদিকো অত্তভাৰসমিদ্ধিযা বিম্বিসারোতি ৰুচ্চতী’’তি (ম. নি. অট্ঠ. ১.১৮০).

৩০১-২. সংহতাতি ¶ সন্নিপতনৰসেন সঙ্ঘটিতা, সন্নিপতিতাতি ৰুত্তং হোতি. একেকিস্সায দিসাযাতি একেকায পদেসভূতায দিসায. পাল়িযং ব্রাহ্মণগহপতিকানমধিপ্পেতত্তা ‘‘সঙ্ঘিনো’’তি ৰত্তব্বে ¶ ‘‘সঙ্ঘী’’তি পুথুত্তে একৰচনং ৰুত্তন্তি দস্সেতি ‘‘এতেস’’ন্তি ইমিনা. এৰং আচরিযেন (দী. নি. টী. ১.৩০১, ৩০২) ৰুত্তং, সঙ্ঘীতি পন দীঘৰসেন বহুৰচনম্পি দিস্সতি. অগণাতি অসমূহভূতা অগণবন্ধা, ‘‘অগণনা’’তিপি পাঠো, অযমেৰত্থো, সঙ্খ্যাত্থস্স অযুত্তত্তা. ন হি তেসং সঙ্খ্যা অত্থীতি. ইদং ৰুত্তং হোতি – পুব্বে অন্তোনগরে অগণাপি পচ্ছা বহিনগরে গণং ভূতা পত্তাতি গণীভূতাতি. অভূততব্ভাৰে হি করাসভূযোগে অ-কারস্স ঈ-কারাদেসো, ঈপচ্চযো ৰা. রাজরাজঞ্ঞাদীনং দণ্ডধরো পুরিসোৰ ততো ততো খত্তিযানং তাযনতো রক্খণতো খত্তা নিরুত্তিনযেন. সো হি যত্থ তেহি পেসিতো, তত্থ তেসং দোসং পরিহরন্তো যুত্তপত্তৰসেন পুচ্ছিতমত্থং কথেতি. তেনাহ ‘‘পুচ্ছিতপঞ্হে ব্যাকরণসমত্থো’’তি. কুলাপদেসাদিনা মহতী মত্তা পমাণমেতস্সাতি মহামত্তো.

সোণদণ্ডগুণকথাৰণ্ণনা

৩০৩. একস্স রঞ্ঞো আণাপৰত্তিট্ঠানানি রজ্জানি নাম, ৰিসিট্ঠানি রজ্জানি ৰিরজ্জানি, তানেৰ ৰেরজ্জানি, নানাৰিধানি ৰেরজ্জানি তথা, তেসু জাতাতিআদিনা তিধা তদ্ধিতনিব্বচনং. ৰিচিত্রা হি তদ্ধিতৰুত্তীতি. যঞ্ঞানুভৰনত্থন্তি যস্স কস্সচি যঞ্ঞস্স অনুভৰনত্থং. তেতি নানাৰেরজ্জকা ব্রাহ্মণা. তস্সাতি সোণদণ্ডব্রাহ্মণস্স. উত্তমব্রাহ্মণোতি অভিজনসম্পত্তিযা, ৰিত্তসম্পত্তিযা, ৰিজ্জাসম্পত্তিযা চ উগ্গততরো, উল়ারো ৰা ব্রাহ্মণো. আৰট্টনীমাযা ৰুত্তাৰ. লাভমচ্ছেরেন নিপ্পীল়িততায অসন্নিপাতো ভৰিস্সতি.

অঙ্গেতি গমেতি অত্তনো ফলং ঞাপেতি, সযং ৰা অঙ্গীযতি গমীযতি ঞাযতীতি অঙ্গং, হেতু. তেনাহ ‘‘কারণেনা’’তি. লোকধম্মতানুস্সরণেন অপরানিপি কারণানি আহংসূতি দস্সেন্তো ‘‘এৰ’’ন্তিআদিমাহ.

দ্ৰীহি পক্খেহীতি মাতুপক্খেন, পিতুপক্খেন চাতি দ্ৰীহি ঞাতিপক্খেহি. ‘‘উভতো সুজাতো’’তি হি এত্থকেযেৰ ৰুত্তে যেহি কেহিচি দ্ৰীহি ভাগেহি সুজাতত্তং ৰিজানেয্য, সুজাতসদ্দো চ ‘‘সুজাতো চারুদস্সনো’’তিআদীসু (ম. নি. ২.৩৯৯) আরোহসম্পত্তিপরিযাযোপি হোতীতি জাতিৰসেনেৰ ¶ সুজাতত্তং ৰিভাৰেতুং ‘‘মাতিতো চ পিতিতো চা’’তি ৰুত্তং. তেনাহ ‘‘ভোতো মাতা ব্রাহ্মণী’’তিআদি. এৰন্তি ৰুত্তপ্পকারেন, মাতুপক্খতো চ ¶ পিতুপক্খতো চ পচ্চেকং তিৰিধেন ঞাতিপরিৰট্টেনাতি ৰুত্তং হোতি. ‘‘সংসুদ্ধগহণিকো’’তি ইমিনাপি ‘‘মাতিতো চ পিতিতো চা’’তি ৰুত্তমেৰত্থং সমত্থেতীতি আহ ‘‘সংসুদ্ধা তে মাতুগহণী’’তি, সংসুদ্ধাৰ অনঞ্ঞপুরিসসাধারণাতি অত্থো. অনোরসপুত্তৰসেনাপি হি লোকে মাতাপিতুসমঞ্ঞা দিস্সতি, ইধ পনস্স ওরসপুত্তৰসেনেৰ ইচ্ছিতাতি দস্সেতুং ‘‘সংসুদ্ধগহণিকো’’তি ৰুত্তং. গব্ভং গণ্হাতি ধারেতীতি গহণী, ততিযাৰট্টসঙ্খাতো গব্ভাসযসঞ্ঞিতো মাতুকুচ্ছিপদেসো সমৰেপাকিনিযাতি সমৰিপাচনিযা. এত্থাতি মহাসুদস্সনসুত্তে. যথাভুত্তমাহারং ৰিপাচনৰসেন গণ্হাতি ন ছড্ডেতীতি গহণী, কম্মজতেজোধাতু, যা ‘‘উদরগ্গী’’তি লোকে পঞ্ঞাযতি.

পিতুপিতাতি পিতুনো পিতা. পিতামহোতি আমহ-পচ্চযেন তদ্ধিতসিদ্ধি. ‘‘চতুযুগ’’ন্তিআদীসু ৰিয তং তদত্থে যুজ্জিতব্বতো কালৰিসেসো যুগং নাম. এতং যুগসদ্দেন আযুপ্পমাণৰচনং অভিলাপমত্তং লোকৰোহারৰচনমত্তমেৰ, অধিপ্পেতত্থতো পন পিতামহোযেৰ পিতামহযুগসদ্দেন ৰুত্তো তস্সেৰ পধানভাৰেন অধিপ্পেতত্তাতি অধিপ্পাযো. ততো উদ্ধন্তি পিতামহতো উপরি. তেনাহ ‘‘পুব্বপুরিসা’’তি, তদৰসেসা পুব্বকা ছ পুরিসাতি অত্থো. পুরিসগ্গহণঞ্চেত্থ উক্কট্ঠনিদ্দেসেন কতন্তি দট্ঠব্বং. এৰঞ্হি ‘‘মাতিতো’’তি পাল়িৰচনং সমত্থিতং হোতি.

তত্রাযমট্ঠকথামুত্তকনযো – মাতা চ পিতা চ পিতরো, পিতূনং পিতরো পিতামহা, তেসং যুগো দ্ৰন্দো পিতামহযুগো, তস্মা, যাৰ সত্তমা পিতামহযুগা পিতামহদ্ৰন্দাতি অত্থো ৰেদিতব্বো, এৰঞ্চ পিতামহগ্গহণেনেৰ মাতামহোপি গহিতো. যুগসদ্দো চেত্থ একসেসো ‘‘যুগো চ যুগো চ যুগো’’তি, অতো তত্থ তত্থ ঞাতিপরিৰট্টে পিতামহদ্ৰন্দং গহিতং হোতীতি.

‘‘যাৰ সত্তমা পিতামহযুগা’’তি ইদং কাকাপেক্খনমিৰ উভযত্থ সম্বন্ধগতন্তি আহ ‘‘এৰ’’ন্তিআদি. যাৰ সত্তমো পুরিসো, তাৰ অক্খিত্তো ¶ অনুপকুট্ঠো জাতিৰাদেনাতি সম্বন্ধো. অক্খিত্তোতি অপ্পত্তখেপো. অনৰক্খিত্তোতি সদ্ধথালিপাকাদীসু ন ছড্ডিতো. ন উপকুট্ঠোতি ন উপক্কোসিতো. ‘‘জাতিৰাদেনা’’তি ইদং হেতুম্হি করণৰচনন্তি দস্সেতুং ‘‘কেন কারণেনা’’তিআদি ৰুত্তং. ইতিপীতি ইমিনাপি কারণেন. এত্থ চ ‘‘উভতো…পে… যুগা’’তি এতেন ব্রাহ্মণস্স যোনিদোসাভাৰো দস্সিতো সংসুদ্ধগহণিকভাৰকিত্তনতো, ‘‘অক্খিত্তো’’তি এতেন কিরিযাপরাধাভাৰো. কিরিযাপরাধেন হি সত্তা খেপং পাপুণন্তি. ‘‘অনুপকুট্ঠো’’তি এতেন অযুত্তসংসগ্গাভাৰো. অযুত্তসংসগ্গঞ্হি পটিচ্চ সত্তা অক্কোসং লভন্তীতি.

ইস্সরোতি ¶ আধিপতেয্যসংৰত্তনিযকম্মবলেন ঈসনসীলো, সা পনস্স ইস্সরতা ৰিভৰসম্পত্তিপচ্চযা পাকটা জাতা, তস্মা অড্ঢভাৰপরিযাযেন দস্সেন্তো ‘‘অড্ঢোতি ইস্সরো’’তি আহ. মহন্তং ধনমস্স ভূমিগতং, ৰেহাসগতঞ্চাতি মহদ্ধনো. তস্সাতি তস্স তস্স গুণস্স, অযমেৰ চ পাঠো অধুনা দিস্সতি. অগুণংযেৰ দস্সেমাতি অন্ৰযতো তস্স গুণং ৰত্ৰা ব্যতিরেকতো ভগৰতো অনুপসঙ্কমনকারণং অগুণমেৰ দস্সেম.

অধিকরূপোতি ৰিসিট্ঠরূপো উত্তমসরীরো. দস্সনং অরহতীতি দস্সনীযোতি আহ ‘‘দস্সনযোগ্গো’’তি. পসাদং আৰহতীতি পাসাদিকো. তেনাহ ‘‘পসাদজননতো’’তি. পোক্খরসদ্দো ইধ সুন্দরত্থে, সরীরত্থে চ নিরুল়্হো. ৰণ্ণস্সাতি ৰণ্ণধাতুযা. পকাসনিযেন পরিসুদ্ধনিমিত্তেন ৰণ্ণসদ্দস্স ৰণ্ণধাতুযং পৰত্তনতো তন্নিমিত্তমেৰ ৰণ্ণতা, সা চ ৰণ্ণনিস্সিতাতি অভেদৰসেন ৰুত্তং ‘‘উত্তমেন পরিসুদ্ধেন ৰণ্ণেনা’’তি. সরীরং পন সন্নিৰেসৰিসিট্ঠং করচরণগীৰাসীসাদিসমুদাযং, তঞ্চ অৰযৰভূতেন সণ্ঠাননিমিত্তেন গয্হতি, তস্মা তন্নিমিত্তমেৰ পোক্খরতাতি ৰুত্তং ‘‘সরীরসণ্ঠানসম্পত্তিযা’’তি, উত্তমায সরীরসণ্ঠানসম্পত্তিযাতিপি যোজেতব্বং. অত্থৰসা হি লিঙ্গৰিভত্তিৰিপরিণামো. সব্বেসু ৰণ্ণেসু সুৰণ্ণৰণ্ণোৰ উত্তমোতি আহ ‘‘পরিসুদ্ধৰণ্ণেসুপি সেট্ঠেন সুৰণ্ণৰণ্ণেন সমন্নাগতো’’তি. তথা হি বুদ্ধা, চক্কৰত্তিনো চ সুৰণ্ণৰণ্ণাৰ হোন্তি. যস্মা পন ৰচ্ছসসদ্দো সরীরাভে পৰত্ততি, তস্মা ব্রহ্মৰচ্ছসীতি উত্তমসরীরাভো, সুৰণ্ণাভো ইচ্চেৰ অত্থো. ইমমেৰ হি অত্থং সন্ধায ‘‘মহাব্রহ্মুনো সরীরসদিসেনেৰ সরীরেন সমন্নাগতো’’তি ¶ ৰুত্তং, ন ব্রহ্মুজুগত্ততং. ওকাসোতি সব্বঙ্গপচ্চঙ্গট্ঠানং. আরোহপরিণাহসম্পত্তিযা, অৰযৰপারিপূরিযা চ দস্সনস্স ওকাসো ন খুদ্দকোতি অত্থো. তেনাহ ‘‘সব্বানেৰা’’তিআদি.

সীলন্তি যমনিযমলক্খণং সীলং, তং পনস্স রত্তঞ্ঞুতায ৰুদ্ধং ৰদ্ধিতন্তি ৰিসেসতো ‘‘ৰুদ্ধসীলী’’তি ৰুত্তং. ৰুদ্ধসীলেনাতি সব্বদা সম্মাযোগতো ৰুদ্ধেন ধুৰসীলেন. এৰঞ্চ কত্ৰা পদত্তযম্পেতং অধিপ্পেতত্থতো ৰিসিট্ঠং হোতি, সদ্দত্থমত্তং পন সন্ধায ‘‘ইদং ৰুদ্ধসীলীপদস্সেৰ ৰেৰচন’’ন্তি ৰুত্তং. পঞ্চসীলতো পরং তত্থ সীলস্স অভাৰতো, তেসমজাননতো চ ‘‘পঞ্চসীলমত্তমেৰা’’তি আহ.

ৰাচায পরিমণ্ডলপদব্যঞ্জনতা এৰ সুন্দরভাৰোতি ৰুত্তং ‘‘সুন্দরা পরিমণ্ডলপদব্যঞ্জনা’’তি. ঠানকরণসম্পত্তিযা, সিক্খাসম্পত্তিযা চ কস্সচিপি অনূনতায পরিমণ্ডলপদানি ব্যঞ্জনানি অক্খরানি এতিস্সাতি পরিমণ্ডলপদব্যঞ্জনা. অক্খরমেৰ হি তংতদত্থৰাচকভাৰেন ¶ পরিচ্ছিন্নং পদং. অথ ৰা পদমেৰ অত্থস্স ব্যঞ্জকত্তা ব্যঞ্জনং, সিথিলধনিতাদিঅক্খরপারিপূরিযা চ পদব্যঞ্জনস্স পরিমণ্ডলতা, পরিমণ্ডলং পদব্যঞ্জনমেতিস্সাতি তথা. অপিচ পজ্জতি অত্থো এতেনাতি পদং, নামাদি, যথাধিপ্পেতমত্থং ব্যঞ্জেতীতি ব্যঞ্জনং, ৰাক্যং, তেসং পরিপুণ্ণতায পরিমণ্ডলপদব্যঞ্জনা. অত্থৰিঞ্ঞাপনে সাধনতায ৰাচাৰ করণং ৰাক্করণন্তি তুল্যাধিকরণতং দস্সেতুং ‘‘উদাহরণঘোসো’’তি ৰুত্তং, ৰচীভেদসদ্দোতি অত্থো. তস্স ব্রাহ্মণস্স, তেন ৰা ভাসিতব্বস্স অত্থস্স গুণপরিপুণ্ণভাৰেন পূরে গুণেহি পরিপুণ্ণভাৰে ভৰাতি পোরী. পুন পুরেতি রাজধানীমহানগরে. ভৰত্তাতি সংৰড্ঢত্তা. সুখুমালত্তনেনাতি সুখুমালভাৰেন, ইমিনা তস্সা ৰাচায মুদুসণ্হত্তমাহ. অপলিবুদ্ধাযাতি পিত্তসেম্হাদীহি অপরিযোনদ্ধায, হেতুগব্ভপদমেতং. ততো এৰ হি যথাৰুত্তদোসাভাৰোতি. ডংসেত্ৰা ৰিয একদেসকথনং সন্দিট্ঠং, সণিকং চিরাযিত্ৰা কথনং ৰিলম্বিতং, ‘‘সন্নিদ্ধৰিলম্বিতাদী’’তিপি পাঠো. সদ্দেন অজনকং ৰচিনং, মম্মকসঙ্খাতং ৰা একক্খরমেৰ দ্ৰত্তিক্খত্তুমুচ্চারণং সন্নিদ্ধং. আদিসদ্দেন দুক্খলিতানুকড্ঢিতাদীনি সঙ্গণ্হাতি. এল়াগল়েনাতি এল়াপগ্ঘরণেন. ‘‘এল়া গল়ন্তী’’তি ৰুত্তস্সেৰ দ্ৰিধা অত্থং দস্সেতুং ‘‘লালা ৰা পগ্ঘরন্তী’’তিআদি ¶ ৰুত্তং. ‘‘পস্সে’ল়মূগং উরগং দুজিৰ্হ’’ন্তিআদীসু (জা. ১.৭.৪৯) ৰিয হি এল়াসদ্দো লালায, খেল়ে চ পৰত্ততি. খেল়ফুসিতানীতি খেল়বিন্দূনি.

তত্রাযমট্ঠকথামুত্তকনযো – এলন্তি দোসো ৰুচ্চতি ‘‘যা সা ৰাচা নেলা কণ্ণসুখা’’তিআদীসু (দী. নি. ১.৮, ১৯৪) ৰিয. দুপ্পঞ্ঞা চ সদোসমেৰ কথং কথেন্তা এলং পগ্ঘরাপেন্তি, তস্মা তেসং ৰাচা এলগল়া নাম হোতি, তব্বিপরীতাযাতি অত্থো. ‘‘আদিমজ্ঝপরিযোসানং পাকটং কত্ৰা’’তি ইমিনা তস্সা ৰাচায অত্থপারিপূরিং ৰদতি. ৰিঞ্ঞাপনসদ্দেন এতস্স সম্বন্ধো.

জরাজিণ্ণতায জিণ্ণোতি খণ্ডিচ্চপালিচ্চাদিভাৰমাপাদিতো. ৰুদ্ধিমরিযাদপ্পত্তোতি ৰুদ্ধিযা পরিচ্ছেদং পরিযন্তং পত্তো. জাতিমহল্লকতাযাতি উপপত্তিযা মহল্লকভাৰেন. তেনাহ ‘‘চিরকালপ্পসুতো’’তি. অদ্ধসদ্দো অদ্ধানপরিযাযো দীঘকালৰাচকো. কিত্তকো পন সোতি আহ ‘‘দ্ৰে তযো রাজপরিৰট্টে’’তি, দ্ৰিন্নং তিণ্ণং রাজূনং রজ্জপসাসনপটিপাটিযোতি অত্থো. ‘‘অদ্ধগতো’’তি ৰত্ৰাপি কতং ৰযোগহণং ওসানৰযাপেক্খন্তি ৰুত্তং ‘‘পচ্ছিমৰযং সম্পত্তো’’তি. পচ্ছিমো ততিযভাগোতি ৰস্সসতস্স তিধা কতেসু ভাগেসু ততিযো ওসানভাগো. পচ্চেকং তেত্তিংসৰস্সতো চ অধিকমাসপক্খাদিপি ৰিভজীযতি, তস্মা সত্তসট্ঠিমে ৰস্সে যথারহং লব্ভমানমাসপক্খদিৰসতো পট্ঠায পচ্ছিমৰযো ৰেদিতব্বো. আচরিযসারিপুত্তত্থেরেনপি ¶ হি ইমমেৰত্থং সন্ধায ‘‘সত্তসট্ঠিৰস্সতো পট্ঠায পচ্ছিমৰযো কোট্ঠাসো’’তি (সারত্থ. টী. ১.ৰেরঞ্জকণ্ডৰণ্ণনা) ৰুত্তং. ইতরথা হি ‘‘পচ্ছিমৰযো নাম ৰস্সসতস্স পচ্ছিমো ততিযভাগো’’তি অট্ঠকথাৰচনেন ৰিরোধো ভৰেয্যাতি.

এৰং কেৰলজাতিৰসেন পঠমৰিকপ্পং ৰত্ৰা গুণমিস্সকৰসেনপি দুতিযৰিকপ্পং ৰদন্তেন ‘‘অপিচা’’তিআদি আরদ্ধং. তত্থ নাযং জিণ্ণতা ৰযোমত্তেন, অথ খো কুলপরিৰট্টেন পুরাণতাতি আহ ‘‘জিণ্ণোতি পোরাণো’’তিআদি. চিরকালপ্পৰত্তকুলন্ৰযোতি চিরকালং পৰত্তকুলপরিৰট্টো, তেনাস্স কুলৰসেন উদিতোদিতভাৰমাহ. ‘‘ৰযোঅনুপ্পত্তো’’তি ইমিনা জাতিৰুদ্ধিযা ৰক্খমানত্তা, গুণৰুদ্ধিযা ¶ চ ততো সাতিসযত্তা ‘‘ৰুদ্ধোতি সীলাচারাদিগুণৰুদ্ধিযা যুত্তো’’তি ৰুত্তং. ৰক্খমানং পতি পারিসেসগ্গহণঞ্হেতং. তথা জাতিমহল্লকতাযপি তেনেৰ পদেন ৰক্খমানত্তা, ৰিভৰমহত্ততায চ অনৰসেসিতত্তা ‘‘মহল্লকোতি ৰিভৰমহন্ততায সমন্নাগতো’’তি আহ. মগ্গপটিপন্নোতি ব্রাহ্মণানং যুত্তপটিপত্তিৰীথিং অৰোক্কম্ম চরণৰসেন উপগতোতি অত্থং দস্সেতি ‘‘ব্রাহ্মণান’’ন্তিআদিনা. জাতিৰুদ্ধভাৰমনুপ্পত্তো, তম্পি অন্তিমৰযং পচ্ছিমৰযমেৰ অনুপ্পত্তোতি সাধিপ্পাযযোজনা. ইমিনা হি পচ্ছিমৰযৰসেন জাতিৰুদ্ধভাৰং দস্সেতীতি.

বুদ্ধগুণকথাৰণ্ণনা

৩০৪. তাদিসেহি মহানুভাৰেহি সদ্ধিং যুগগ্গাহৰসেন ঠপনম্পি ন মাদিসানং পণ্ডিতজাতীনমনুচ্ছৰিকং, কুতো পন উক্কংসৰসেন ঠপনন্তি ইদং ব্রাহ্মণস্স ন যুত্তরূপন্তি দস্সেন্তো ‘‘ন খো পন মেত’’ন্তিআদিমাহ. তত্থ যেপি গুণা অত্তনো গুণেহি সদিসা, তেপি গুণে উত্তরিতরেযেৰ মঞ্ঞমানো পকাসেতীতি সম্বন্ধো. সদিসাতি চ একদেসেন সদিসা. ন হি বুদ্ধানং গুণেহি সব্বথা সদিসা কেচিপি গুণা অঞ্ঞেসু লব্ভন্তি. ‘‘কো চাহ’’ন্তিআদি উত্তরিতরাকারদস্সনং. অহঞ্চ কীদিসো নাম হুত্ৰা সদিসো ভৰিস্সামি, সমণস্স…পে… গুণা চ কীদিসা নাম হুত্ৰা সদিসা ভৰিস্সন্তীতি সাধিপ্পাযযোজনা. কেচি নৰং পাঠং করোন্তি, অযমেৰ মূলপাঠো যথা তং অম্বট্ঠসুত্তে ‘‘কো চাহং ভো গোতম সাচরিযকো, কা চ অনুত্তরা ৰিজ্জাচরণসম্পদা’’তি. ইতরেতি অত্তনো গুণেহি অসদিসে গুণে, ‘‘পকাসেতী’’তি ইমিনাৰ সম্বন্ধো. একন্তেনেৰাতি সদিসগুণানং ৰিয পসঙ্গাভাৰেন.

এৰং নিযামেন্তো সোণদণ্ডো ইদং অত্থজাতং দীপেতি. যথা হীতি এত্থ হি-সদ্দো কারণে. তেনাহ ¶ ‘‘তস্মা মযমেৰ অরহামা’’তি. গোপদকন্তি গাৰিযা খুরট্ঠানে ঠিতউদকং. গুণেতি সদিসগুণেপি, পগেৰ অসদিসগুণে.

সট্ঠিকুলসতসহস্সন্তি সট্ঠিসহস্সাধিকং কুলসতসহস্সং. ধম্মপদট্ঠকথাদীসু (ধ. প. অট্ঠ. ১৬) পন কত্থচি ভগৰতো অসীতিকুলসহস্সতাৰচনং একেকপক্খমেৰ সন্ধাযাতি ৰেদিতব্বং.

সুধামট্ঠপোক্খরণিযোতি ¶ সুধায পরিকম্মকতা পোক্খরণিযো. সত্তরতনানন্তি সত্তহি রতনেহি. পূরযোগে হি করণত্থে বহুলং ছট্ঠীৰচনং. পাসাদনিযূহাদযোতি উপরিপাসাদে ঠিততুলাসীসাদযো. ‘‘সত্তরতনান’’ন্তি অধিকারো, অভেদেপি ভেদৰোহারো এস. কুলপরিযাযেনাতি সুদ্ধোদনমহারাজস্স অসম্ভিন্নখত্তিযকুলানুক্কমেন. তেসুপীতি চতূসু নিধীসুপি. গহিতং গহিতং ঠানং পূরতিযেৰ ধনেন পাকতিকমেৰ হোতি, ন ঊনং.

ভদ্দকেনাতি সুন্দরেন. পচ্ছিমৰযে ৰুত্তনযেন পঠমৰযো ৰেদিতব্বো. মাতাপিতূনং অনিচ্ছায পব্বজ্জাৰ অনাদরো তেন যুত্তে অত্থে সামিৰচনন্তি ৰুত্তং হোতি. এতেসন্তি মাতাপিতূনং. কন্দিত্ৰাতি ‘‘কহং পিযপুত্তকা’’তিআদিনা পরিদেৰিত্ৰা.

অপরিমাণোযেৰাতি ‘‘এত্তকো এসো’’তি কেনচি পরিচ্ছিন্দিতুমসক্কুণেয্যতায অপরিচ্ছিন্নোযেৰ. দ্ৰে ৰেল়ূ অধোকটিমত্তকমেৰ হোন্তীতি আহ ‘‘দ্ৰিন্নং ৰেল়ূনং উপরি কটিমত্তমেৰা’’তি. পারমিতানুভাৰেন ব্রাহ্মণস্স এৰ পঞ্ঞাযতি, ভগৰা পন তদা পকতিপ্পমাণোৰাতি দস্সেতুং ‘‘পঞ্ঞাযমানো’’তি ৰুত্তমিৰ দিস্সতি, ৰীমংসিত্ৰা গহেতব্বং. ‘‘ন হী’’তিআদিনা পারমিতাবলেনেৰ এৰং অপরিমাণতা, ন ইদ্ধিবলেনাতি দস্সেতী’’তি ৰদন্তি. অতুলোতি অসদিসো. ‘‘ধম্মপদে গাথমাহা’’তি কত্থচি পাঠো অযুত্তোৰ. ন হি ধম্মপদে অযং গাথা দিস্সতি. সুধাপিণ্ডিযত্থেরাপদানাদীসু (অপ. ১.১০.সুধাপিণ্ডিযত্থেরাপদান) পনাযং গাথা আগতা, সা চ খো অঞ্ঞৰত্থুস্মিং এৰ, ন ইমস্মিং ৰত্থুম্হি, তস্মা পাল়িৰসেন সঙ্গীতিমনারুল়্হা পকিণ্ণকদেসনাযেৰাযং গাথাতি দট্ঠব্বং.

তত্থ তে তাদিসেতি পরিযাযৰচনমেতং ‘‘অপ্পং ৰস্সসতং আযু, ইদানেতরহি ৰিজ্জতী’’তিআদীসু (বু. ৰং. ২৭.২১) ৰিয, ‘‘এতাদিসে’’তিপি পঠন্তি, তদসুন্দরং অপদানাদীসু ¶ তথা অদিস্সনতো. কিলেসপরিনিব্বানেন পরিনিব্বুতে কুতোচিপি অভযে তে তাদিসে পূজযতো এত্থ ইদং পুঞ্ঞং কেনচি মহানুভাৰেন অপি সঙ্খাতুং ন সক্কাতি অত্থো.

বাহন্তরন্তি ¶ দ্ৰিন্নং বাহূনমন্তরং. দ্ৰাদস যোজনসতানীতি দ্ৰাদসাধিকানি যোজনসতানি. বহলন্তরেনাতি সমন্তা সরীরপরিণাহপ্পমাণেন. পুথুলতোতি ৰিত্থারতো. অঙ্গুলিপব্বানীতি একেকানি অঙ্গুলিপব্বানি. ভমুকন্তরন্তি দ্ৰিন্নং ভমুকানমন্তরং. মুখং ৰিত্থারতো দ্ৰিযোজনসতং পরিমণ্ডলতো ৰিসুং ৰুত্তত্তা. ‘‘এদিসো ভগৰা’’তি যা পরেহি ৰুত্তা কথা, তস্সা অনুরূপন্তি যথাকথং, ইমিনা অঞ্ঞেহি ৰুত্তং ভগৰতো ৰণ্ণকথং সুত্ৰা ওলোকেতুকামতায আগতোতি দস্সেতি, যথাকথন্তি ৰা কীদিসং. ‘‘যথাকথং পন তুম্হে ভিক্খৰে সমগ্গা সম্মোদমানা অৰিৰদমানা ফাসুকং ৰস্সং ৰসিত্থা’’তিআদীসু (পারা. ১৯৪) ৰিয হি পুচ্ছাযং এস নিপাতসমুদাযো, একো ৰা নিপাতো.

গন্ধকুটিপরিৰেণেতি গন্ধকুটিযা পরিৰেণে, গন্ধকুটিতো বহি পরিৰেণব্ভন্তরেতি অত্থো. তত্থাতি মঞ্চকে. ‘‘সীহসেয্যং কপ্পেসী’’তি যথা রাহু অসুরিন্দো আযামতো, ৰিত্থারতো, উব্বেধতো চ ভগৰতো রূপকাযস্স পরিচ্ছেদং গহেতুং ন সক্কোতি, তথা রূপং ইদ্ধাভিসঙ্খারং অভিসঙ্খরোন্তো সীহসেয্যং কপ্পেসী’’তি (দী. নি. টী. ১.৩০৪) এৰং আচরিযেন ৰুত্তং, ‘‘তদেতং ‘ন মযা অসুরিন্দ অধোমুখেন পারমিযো পূরিতা, উদ্ধগ্গমেৰ কত্ৰা দানং দিন্ন’’ন্তি অট্ঠকথাৰচনেন অচ্চন্তমেৰ ৰিরুদ্ধং হোতি. এতঞ্হি গন্ধকুটিদ্ৰারৰিৰরণাদীসু ৰিয পারমিতানুভাৰসিদ্ধিদস্সনং, অঞ্ঞথা তদেৰ ৰচনং ৰত্তব্বং ভৰেয্যা’’তি ৰদন্তি, ৰীমংসিত্ৰা সম্পটিচ্ছিতব্বং. অধোমুখেনাতি ওসক্কিতৰীরিযতং সন্ধায ৰুত্তং, উদ্ধগ্গমেৰাতি অনোসক্কিতৰীরিযতং, উব্ভকোটিকং কত্ৰাতি অত্থো. তদা রাহু উপাসকভাৰং পটিৰেদেসীতি আহ ‘‘তং দিৰস’’ন্তিআদি.

কিলেসেহি আরকত্তা অরিযং নিরুত্তিনযেন, অতোযেৰ উত্তমতা পরিসুদ্ধতাতি ৰুত্তং ‘‘উত্তমং পরিসুদ্ধ’’ন্তি. অনৰজ্জট্ঠেন কুসলং, ন সুখৰিপাকট্ঠেন তস্স অরহতমসম্ভৰতো. কুসলসীলেনাতি অনৰজ্জেনেৰ ৰিদ্ধস্তসৰাসনকিলেসেন সীলেন. এৰঞ্চ কত্ৰা পদচতুক্কম্পেতং অধিপ্পেতত্থতো ৰিসিট্ঠং হোতি, সদ্দত্থমত্তং পন সন্ধায ‘‘ইদমস্স ৰেৰচন’’ন্তি ৰুত্তং.

কত্থচি ¶ চতুরাসীতিপাণসহস্সানি, কত্থচি অপরিমাণাপি দেৰমনুস্সাতি অত্থং সন্ধায ‘‘ভগৰতো ¶ একেকায ধম্মদেসনাযা’’তিআদিমাহ. মহাসমযসুত্ত (দী. নি. ২.৩৩১ আদযো) মঙ্গলসুত্ত- (খু. পা. ৫.১ আদযো; সু. নি. ২৬১ আদযো) দেসনাদীসু হি চতুৰীসতিযা ঠানেসু অসঙ্খ্যেয্যা অপরিমেয্যা দেৰমনুস্সা মগ্গফলামতং পিৰিংসু. কোটিসতসহস্সাদিপরিমাণেনপি বহূ এৰ, নিদস্সনৰসেন পনেৰং ৰুত্তং. তস্মা অনুত্তরসিক্খাপকভাৰেন ভগৰা বহূনং আচরিযো, তেসং আচরিযভূতানং সাৰকানমাচরিযভাৰেন সাৰকৰেনেয্যানং পাচরিযো. ভগৰতা হি দিন্ননযে ঠত্ৰা সাৰকা ৰেনেয্যং ৰিনেন্তি, তস্মা ভগৰাৰ তেসং পধানো আচরিযোতি.

ৰদন্তস্সাধিপ্পেতোৰ অত্থো পমাণং, ন লক্খণহারাদিৰিসযোতি আহ ‘‘ব্রাহ্মণো পনা’’তিআদি. ‘‘ইমস্স ৰা পূতিকাযস্সা’’তি পাঠাৰসানে পেয্যালং কত্ৰা ‘‘কেলনা পটিকেলনা’’তি ৰুত্তং. অযঞ্হি খুদ্দকৰত্থুৰিভঙ্গপাল়ি (ৰিভ. ৮৫৪) ‘‘বাহিরানং ৰা পরিক্খারানং মণ্ডনা’’তিআদি পেয্যালৰসেন গয্হতি. তত্থ ইমস্স ৰা পূতিকাযস্সাতি ইমস্স ৰা মনুস্সসরীরস্স. যথা হি তদহুজাতোপি সিঙ্গালো ‘‘জরসিঙ্গালো’’ ত্ৰেৰ, ঊরুপ্পমাণাপি চ গলোচিলতা ‘‘পূতিলতা’’ ত্ৰেৰ সঙ্খ্যং গচ্ছতি, এৰং সুৰণ্ণৰণ্ণোপি মনুস্সসরীরো ‘‘পূতিকাযো’’ ত্ৰেৰ, তস্স মণ্ডনাতি অত্থো. কেলনাতি কীল়না. ‘‘কেলাযনা’’তিপি পঠন্তি. পটিকেলনাতি পটিকীল়না. চপলস্স ভাৰো চাপল্যং, চাপল্লং ৰা, যেন সমন্নাগতো পুগ্গলো ৰস্সসতিকোপি সমানো তদহুজাতদারকো ৰিয হোতি, তস্সেদমধিৰচনন্তি ৰেদিতব্বং.

অপাপে পুরে করোতি, ন ৰা পাপং পুরে করোতীতি অপাপপুরেক্খারোতি যুত্তাযুত্তসমাসেন দুৰিধমত্থং দস্সেতুং ‘‘অপাপে নৰলোকুত্তরধম্মে’’তিআদি ৰুত্তং. অপাপেতি চ পাপপটিপক্খে, পাপৰিরহিতে ৰা. ব্রহ্মনি সেট্ঠে ভগৰতি ভৰা তস্স ধম্মদেসনাৰসেন অরিযায জাতিযা জাতত্তা, ব্রহ্মুনো ৰা ভগৰতো অপচ্চং গরুকরণাদিনা, যথানুসিট্ঠং পটিপত্তিযা চ, ব্রহ্মং ৰা সেট্ঠং অরিযমগ্গং জানাতীতি ব্রহ্মঞ্ঞা, অরিযসাৰকসঙ্খাতা পজা. তেনাহ ‘‘সারিপুত্তমোগ্গল্লানা’’তিআদি. ব্রাহ্মণপজাযাতি বহিতপাপপজায. ‘‘অপাপপুরেক্খারো’’তি এত্থ ‘‘পুরেক্খারো’’তি পদমধিকারোতি দস্সেতি ‘‘এতিস্সায ¶ চ পজায পুরেক্খারো’’তি ইমিনা. চ-সদ্দো সমুচ্চযত্থো ‘‘ন কেৰলং অপাপপুরেক্খারো এৰ, অথ খো ব্রহ্মঞ্ঞায চ পজায সম্বন্ধভূতায পুরেক্খারো’’তি. ‘‘অযঞ্হী’’তিআদি অধিপ্পাযমত্তদস্সনং. ‘‘অপাপপুরেক্খারো’’তি ইদং ‘‘ব্রহ্মঞ্ঞায পজাযা’’তি ইমিনাৰ সম্বন্ধিতব্বং, ন চ পচ্চেকমত্থদীপকং, পকতিব্রাহ্মণজাতিৰসেনপি চেতস্স অত্থো ৰেদিতব্বোতি দস্সেন্তো ‘‘অপিচা’’তিআদিমাহ. অযুত্তসমাসো চাযং. পাপন্তি পাপকম্মং, অহিতং দুক্খন্তি অত্থো. তস্স ¶ সম্বন্ধিপেক্খত্তা কস্সা অপাপপুরেক্খারোতি পুচ্ছায এৰমাহাতি দস্সেতুং ‘‘কস্সা’’তিআদি ৰুত্তং. ‘‘অত্তনা’’তিআদি তদত্থৰিৰরণং. ব্রাহ্মণপজাযাতি ব্রাহ্মণজাতিপজায.

রঞ্জন্তি অট্টং ভজন্তি রাজানো এতেনাতি রট্ঠং, একস্স রঞ্ঞো রজ্জভূতকাসিকোসলাদিমহাজনপদা. জনা পজ্জন্তি সুখজীৰিকং পাপুণন্তি এত্থাতি জনপদো, একস্স রঞ্ঞো রজ্জে একেককোট্ঠাসভূতা উত্তরপথদক্খিণপথাদিখুদ্দকজনপদা. তত্থাতি তথা আগতেসু. পুচ্ছাযাতি অত্তনা অভিসঙ্খতায পুচ্ছায. ৰিস্সজ্জনাসম্পটিচ্ছনেতি ৰিস্সজ্জনায অত্তনো ঞাণেন সম্পটিগ্গহণে. কেসঞ্চি উপনিস্সযসম্পত্তিং, ঞাণপরিপাকং, চিত্তাচারঞ্চ ঞত্ৰা ভগৰাৰ পুচ্ছায উস্সাহং জনেত্ৰা ৰিস্সজ্জেতীতি অধিপ্পাযো.

‘‘তত্থ কতমং সাখল্য’’ন্তিআদি নিক্খেপকণ্ডপাল়ি (ধ. স. ১৩৫০). অদ্ধানদরথন্তি দীঘমগ্গাগমনপরিস্সমং. অস্সাতি ভগৰতো, মুখপদুমন্তি সম্বন্ধো. বালাতপসম্ফস্সনেনেৰাতি অভিনৰুগ্গতসূরিযরংসিসম্ফস্সনেন ইৰ. তথা হি সূরিযো ‘‘পদ্মবন্ধূ’’তি লোকে পাকটো, চন্দো পন ‘‘কুমুদবন্ধূ’’তি. পুণ্ণচন্দস্স সিরিযা সমানা সিরী এতস্সাতি পুণ্ণচন্দসস্সিরিকং. কথং নিক্কুজ্জিতসদিসতাতি আহ ‘‘সম্পত্তাযা’’তিআদি. এত্থ পন ‘‘এহি স্ৰাগতৰাদী’’তি ইমিনা সুখসম্ভাসপুব্বকং পিযৰাদিতং দস্সেতি, ‘‘সখিলো’’তি ইমিনা সণ্হৰাচতং, ‘‘সম্মোদকো’’তি ইমিনা পটিসন্ধারকুসলতং, ‘‘অব্ভাকুটিকো’’তি ইমিনা সব্বত্থেৰ ৰিপ্পসন্নমুখতং, ‘‘উত্তানমুখো’’তি ইমিনা সুখসল্লাপতং, ‘‘পুব্বভাসী’’তি ইমিনা ধম্মানুগ্গহস্স ওকাসকরণেন হিতজ্ঝাসযতং দস্সেতীতি ৰেদিতব্বং.

যত্থ ¶ কিরাতি এত্থ কির-সদ্দো অরুচিসূচনে –

‘‘খণৰত্থুপরিত্তত্তা, আপাথং ন ৰজন্তি যে;

তে ধম্মারম্মণা নাম, যে’সং রূপাদযো কিরা’’তি. –

আদীসু (অভিধম্মাৰতার-অট্ঠকথাযং আরম্মণৰিভাগে ছট্ঠঅনুচ্ছেদে – ৭৭) ৰিয, তেন ভগৰতা অধিৰুত্থপদেসে ন দেৰতানুভাৰেন মনুস্সানং অনুপদ্দৰতা, অথ খো বুদ্ধানুভাৰেনাতি দস্সেতি. বুদ্ধানুভাৰেনেৰ হি তা আরক্খং গণ্হন্তি. পংসুপিসাচকাদযোতি পংসুনিস্সিতপিসাচকাদযো ¶ . আদিসদ্দেন ভূতরক্খসাদীনং গহণং. ইদানি বুদ্ধানুভাৰমেৰ পাকটং কত্ৰা দস্সেতুং ‘‘অপিচা’’তিআদি ৰুত্তং.

অনুসাসিতব্বো সঙ্ঘো নাম সব্বোপি ৰেনেয্যজনসমূহো. সযং উপ্পাদিতো সঙ্ঘো নাম নিব্বত্তিতঅরিযপুগ্গলসমূহো. ‘‘তাদিসো’’তি ইমিনা ‘‘সযং ৰা উপ্পাদিতো’’তি ৰুত্তৰিকপ্পো এৰ পচ্চামট্ঠো অনন্তরস্স ৰিধি পটিসেধোৰাতি কত্ৰা, তস্মা ‘‘পুরিমপদস্সেৰ ৰা’’তি ৰিকপ্পন্তরগহণন্তি আচরিযেন (দী. নি. টী. ১.৩০৪) ৰুত্তং. তত্রাযমধিপ্পাযো – কামং ‘‘গণী’’তি ইদং ‘‘সঙ্ঘী’’তি পদস্সেৰ ৰেৰচনং, অত্থমত্তং পন দস্সেতুং যথাৰুত্তৰিকপ্পদ্ৰযে দুতিযৰিকপ্পমেৰ পচ্চামসিত্ৰা ‘‘তাদিসোৰস্স গণো অত্থী’’তি ৰুত্তত্তা অৰসিট্ঠস্সপি পঠমৰিকপ্পস্স সঙ্গহণত্থং ‘‘পুরিমপদস্সেৰ ৰা ৰেৰচনমেত’’ন্তি ৰুত্তন্তি. এৰম্পি ৰদন্তি – ধম্মসেনাপতিত্থেরাদীনং পচ্চেকগণীনং গণং, সুত্তন্তিকাদিগণং ৰা সন্ধায ‘‘তাদিসো’’তিআদি ৰুত্তং. তত্থাপি হি সব্বোৰ ভিক্খুগণো অনুসাসিতব্বো নাম, নিব্বত্তিতঅরিযগণো পন সযং উপ্পাদিতো নাম, তস্মা ‘‘তাদিসো’’তি ইমিনা ৰিকপ্পদ্ৰযস্সাপি পচ্চামসনং উপপন্নং হোতি. এৰং পদদ্ৰযস্স ৰিসেসত্থতং দস্সেত্ৰা সব্বথা সমানত্থতং দস্সেতুং ‘‘পুরিমপদস্সেৰা’’তিআদি ৰুত্তন্তি. পূরণমক্খলিআদীনং বহূনং তিত্থকরানং, নিদ্ধারণে চেতং সামিৰচনং. অচেলকাদিমত্তকেনপি কারণেনাতি নিচ্চোল়তাদিমত্তকেনপি অপ্পিচ্ছসন্তুট্ঠতাদিসমারোপনলক্খণেন কারণেন.

নৰকাতি অভিনৰা. পাহুনকাতি পহেণকং পটিগ্গণ্হিতুমনুচ্ছৰিকা, এতেন দুৰিধেসু আগন্তুকেসু পুরেতরমাগতৰসেন ইধ অতিথিনো, ন ভোজনৰেলাযমাগতৰসেন ¶ অব্ভাগতাতি দস্সেতি. পরিযাপুণামীতি পরিচ্ছিন্দিতুং জানামি, ধাত্ৰত্থমত্তং পন দস্সেতুং ‘‘জানামী’’তি ৰুত্তং.

কপ্পম্পীতি আযুকপ্পম্পি, ভণেয্য চেতি সম্বন্ধো. চিরং চিরকালে কপ্পো খীযেথ, দীঘমন্তরে দীঘকালন্তরেপি তথাগতস্স ৰণ্ণো ন খীযেথাতি যোজনা. ‘‘চির’’ন্তি চেত্থ ৰত্তব্বেপি ছন্দহানিভযা রস্সত্থং নিগ্গহিতলোপো, অতিদীঘকালং ৰা সন্ধায ‘‘চিরদীঘমন্তরে’’তি ৰুত্তং, উভযত্থ সম্বন্ধিতব্বমেতং, কিরিযারহাদিযোগে ৰিয চ অন্তরযোগে অধিকক্খরপাদো অনুপৰজ্জো, অযঞ্চ গাথা অভূতপরিকপ্পনাৰসেন অট্ঠকথাসু (দী. নি. অট্ঠ. ১.৩০৪; ৩.১৪১; ম. নি. অট্ঠ. ২.৪২৫; উদা. অট্ঠ. ৫৩; বু. ৰং. অট্ঠ. ৪.৪; চরিযা. অট্ঠ. নিদানকথা, পকিণ্ণককথা; অপ. অট্ঠ. ২.৭.২০) ৰুত্তা ¶ তথা ভাসমানস্স অভাৰতো.

৩০৫. নন্তি আচরিযং. অলং-সদ্দো ইধ অরহত্থো ‘‘অলমেৰ নিব্বিন্দিতু’’ন্তিআদীসু (দী. নি. ২.২৭২; সং. নি. ২.১৩৪, ১৪৩) ৰিযাতি আহ ‘‘যুত্তমেৰা’’তি. পুটেন নেত্ৰা অসিতব্বতো পরিভুঞ্জিতব্বতো পুটোসং ৰুচ্চতি পাথেয্যং. ইত্থম্ভূতলক্খণে করণৰচনং দস্সেতি ‘‘তং গহেত্ৰা’’তি ইমিনা. পাল়িযং পুটংসেনপি কুলপুত্তেনাতি সম্বন্ধং দস্সেতুং ‘‘তেন পুটংসেনা’’তি ৰুত্তং. ‘‘অংসেনা’’তিআদি অধিপ্পাযমত্তদস্সনং, ৰহন্তেন কুলপুত্তেন উপসঙ্কমিতুং অলমেৰাতি অত্থো.

সোণদণ্ডপরিৰিতক্কৰণ্ণনা

৩০৬-৭. ন ইধ তিরো-সদ্দো ‘‘তিরোকুড্ডে ৰা তিরোপাকারে ৰা ছড্ডেয্য ৰা ছড্ডাপেয্য ৰা’’তিআদীসু (পাচি. ৮২৫) ৰিয বহিঅত্থোতি আহ ‘‘অন্তোৰনসণ্ডে গতস্সা’’তি. তত্থ ৰিহারোপি ৰনসণ্ডপরিযাপন্নোতি দস্সেতি ‘‘ৰিহারব্ভন্তরং পৰিট্ঠস্সা’’তি ইমিনা. এতে অঞ্জলিং পণামেত্ৰা নিসিন্না মিচ্ছাদিট্ঠিৰসেন উভতোপক্খিকা, ‘‘ইতরে পন সম্মাদিট্ঠিৰসেন একতোপক্খিকা’’তি অত্থতো আপন্নো হোতি. দলিদ্দত্তা, ঞাতিপারিজুঞ্ঞাদিনা জিণ্ণত্তা চ নামগোত্তৰসেন অপাকটা হুত্ৰা পাকটা ভৰিতুকামা এৰমকংসূতি অধিপ্পাযো. কেরাটিকাতি সঠা. তত্থাতি দ্ৰীসু জনেসু. ততোতি ৰিস্সাসতো, দানতো ৰা.

ব্রাহ্মণপঞ্ঞত্তিৰণ্ণনা

৩০৯. অনোনতকাযৰসেন ¶ থদ্ধগত্তো, ন মানৰসেন. তেন পাল়িযং ৰক্খতি ‘‘অব্ভুন্নামেত্ৰা’’তি. চেতোৰিতক্কং সন্ধায চিত্তসীসেন ‘‘চিত্তং অঞ্ঞাসী’’তি ৰুত্তং. ৰিঘাতন্তি চিত্তদুক্খং.

৩১১. সকসমযেতি ব্রাহ্মণলদ্ধিযং. মীযমানোতি মরিযমানো. দিট্ঠিসঞ্জাননেনেৰাতি অত্তনো লদ্ধিসঞ্জাননেনেৰ. সুজন্তি হোমদব্বিং, নিব্বচনং ৰুত্তমেৰ. গণ্হন্তেসূতি জুহনত্থং গণ্হনকেসু, ইরুৰিজ্জেসূতি অত্থো. ইরুৰেদৰসেন হোমকরণতো হি যঞ্ঞযজকা ‘‘ইরুৰিজ্জা’’তি ৰুচ্চন্তি. পঠমো ৰাতি তত্থ সন্নিপতিতেসু সুজাকিরিযাযং সব্বপধানো ৰা. দুতিযো ¶ ৰাতি তদনন্তরিকো ৰা. ‘‘সুজ’’ন্তি ইদং করণত্থে উপযোগৰচনন্তি আহ ‘‘সুজাযা’’তি. অগ্গিহুত্তমুখতায যঞ্ঞস্স যঞ্ঞে দিয্যমানং সুজামুখেন দিয্যতি. ৰুত্তঞ্চ ‘‘অগ্গিহুত্তমুখা যঞ্ঞা, সাৰিত্তী ছন্দসো মুখ’’ন্তি (ম. নি. ২.৪০০). তস্মা ‘‘দিয্যমান’’ন্তি অযং পাঠসেসো ৰিঞ্ঞাযতীতি আচরিযেন (দী. নি. টী. ১.৩১১) ৰুত্তং. অপিচ সুজায দিয্যমানং সুজন্তি তদ্ধিতৰসেন অত্থং দস্সেতুং এৰমাহ. পোরাণাতি অট্ঠকথাচরিযা. পুরিমৰাদে চেত্থ দানৰসেন পঠমো ৰা দুতিযো ৰা, পচ্ছিমৰাদে আদানৰসেনাতি অযমেতেসং ৰিসেসো. ৰিসেসতোতি ৰিজ্জাচরণৰিসেসতো, ন ব্রাহ্মণেহি ইচ্ছিতৰিজ্জাচরণমত্ততো. উত্তমব্রাহ্মণস্সাতি অনুত্তরদক্খিণেয্যতায উক্কট্ঠব্রাহ্মণস্স. যথাধিপ্পেতস্স হি ৰিজ্জাচরণৰিসেসদীপকস্স ‘‘কতমং পন তং ব্রাহ্মণসীলং, কতমা সা পঞ্ঞা’’তিআদিৰচনস্স ওকাসকরণত্থমেৰ ‘‘ইমেসং পন ব্রাহ্মণ পঞ্চন্নং অঙ্গান’’ন্তিআদিৰচনং ভগৰা অৰোচ, তস্মা পধানৰচনানুরূপমনুসন্ধিং দস্সেতুং ‘‘ভগৰা পনা’’তিআদি ৰুত্তন্তি দট্ঠব্বং.

৩১৩. অপৰদতীতি ৰণ্ণাদীনি অপনেত্ৰা ৰদতি, অত্থমত্তং পন দস্সেতুং ‘‘পটিক্খিপতী’’তি ৰুত্তং. ইদন্তি ‘‘মা ভৰং সোণদণ্ডো এৰং অৰচা’’তিআদিৰচনং. ব্রাহ্মণসমযন্তি ব্রাহ্মণসিদ্ধন্তং. মা ভিন্দীতি মা ৰিনাসেসি.

৩১৬. সমোযেৰ হুত্ৰা সমোতি সমসমো, সব্বথা সমোতি অত্থো. পরিযাযদ্ৰযঞ্হি অতিসযত্থদীপকং যথা ‘‘দুক্খদুক্খং, রূপরূপ’’ন্তি. একদেসমত্ততো পন অঙ্গকেন মাণৰেন তেসং সমভাৰতো ¶ তং নিৰত্তেন্তো ‘‘ঠপেত্ৰা একদেসমত্ত’’ন্তিআদিমাহ. কুলকোটিপরিদীপনন্তি কুলস্স আদিপরিদীপনং. যস্মা অত্তনো ভগিনিযা…পে… ন জানিস্সতি, তস্মা ন তস্স মাতাপিতুমত্তং সন্ধায ৰদতি, কুলকোটিপরিদীপনং পন সন্ধায ৰদতীতি অধিপ্পাযো. ‘‘অত্থভঞ্জনক’’ন্তি ইমিনা কম্মপথপত্তং ৰদতি. গুণেতি যথাৰুত্তে পঞ্চসীলে. অথাপি সিযাতি যদিপি তুম্হাকং এৰং পরিৰিতক্কো সিযা, ভিন্নসীলস্সাপি পুন পকতিসীলে ঠিতস্স ব্রাহ্মণভাৰং ৰণ্ণাদযো সাধেন্তীতি এৰং সিযাতি অত্থো. ‘‘সাধেতী’’তি পাঠে ‘‘ৰণ্ণো’’তি কত্তা আচরিযেন (দী. নি. টী. ১.৩১৬) অজ্ঝাহটো, নিদস্সনঞ্চেতং. মন্তজাতীসুপি হি এসেৰ নযো. সীলমেৰাতি পুন পকতিভূতং সীলমেৰ ব্রাহ্মণভাৰং সাধেস্সতি, কস্মাতি চে ‘‘তস্মিং হি…পে… ৰণ্ণাদযো’’তি. তত্থ সম্মোহমত্তং ৰণ্ণাদযোতি ৰণ্ণমন্তজাতিযো ব্রাহ্মণভাৰস্স অঙ্গন্তি সম্মোহমত্তমেতং, অসমৰেক্খিত্ৰা কথিতমিদং.

সীলপঞ্ঞাকথাৰণ্ণনা

৩১৭. কথিতো ¶ ব্রাহ্মণেন পঞ্হোতি ‘‘সীলৰা চ হোতী’’তিআদিনা দ্ৰিন্নমেৰ অঙ্গানং ৰসেন যথাপুচ্ছিতো পঞ্হো যাথাৰতো ৰিস্সজ্জিতো. এত্থাতি যথাৰিস্সজ্জিতে অত্থে, অঙ্গদ্ৰযে ৰা. তস্সাতি সোণদণ্ডস্স. যদি একমঙ্গং ঠপেয্য, অথ পতিট্ঠাতুং ন সক্কুণেয্য. যদি পন ন ঠপেয্য, অথ সক্কুণেয্য, কিং পনেস তথা সক্খিস্সতি নু খো, নোতি ৰীমংসনত্থমেৰ এৰমাহ, ন তু একস্স অঙ্গস্স ঠপনীযত্তাতি ৰুত্তং হোতি. তথা চাহ ‘‘এৰমেতং ব্রাহ্মণা’’তিআদি. ধোৰিতত্তাৰ পরিসুজ্ঝনন্তি আহ ‘‘সীলপরিসুদ্ধা’’তি, সীলসম্পত্তিযা সব্বসো সুদ্ধা অনুপক্কিলিট্ঠাতি অত্থো. কুতো দুস্সীলে পঞ্ঞা অসমাহিতত্তা তস্স. কুতো ৰা পঞ্ঞারহিতে জল়ে এল়মূগে সীলং সীলৰিভাগস্স, সীলপরিসোধনূপাযস্স চ অজাননতো. এল়া মুখে গল়তি যস্সাতি এল়মূগো খ-কারস্স গ-কারং কত্ৰা, এলমুখো, এলমূকো ৰা. ইতি বহুধা পাঠোতি ভযভেরৰসুত্তট্ঠকথাযং (ম. নি. অট্ঠ. ১.৪৮) ৰুত্তো. পকট্ঠং উক্কট্ঠং ঞাণং পঞ্ঞাণন্তি কত্ৰা পাকতিকং ঞাণং নিৰত্তেতুং ‘‘পঞ্ঞাণ’’ন্তি ৰুত্তং. ৰিপস্সনাদিঞাণঞ্হি ইধাধিপ্পেতং, তদেতং পকারেহি জাননতো পঞ্ঞাৰাতি আহ ‘‘পঞ্ঞাযেৰা’’তি.

চতুপারিসুদ্ধিসীলেন ¶ ধোতাতি সমাধিপদট্ঠানেন চতুপারিসুদ্ধিসীলেন সকলসংকিলেসমলৰিসুদ্ধিযা ধোৰিতা ৰিসুদ্ধা. তেনাহ ‘‘কথং পনা’’তিআদি. তত্থ ধোৰতীতি সুজ্ঝতি. সট্ঠিঅসীতিৰস্সানীতি সট্ঠিৰস্সানি ৰা অসীতিৰস্সানি ৰা. মরণকালেপি, পগেৰ অঞ্ঞস্মিং কালে. মহাসট্ঠিৰস্সত্থেরো ৰিযাতি সট্ঠিৰস্সমহাথেরো ৰিয. ৰেদনাপরিগ্গহমত্তম্পীতি এত্থ ৰেদনাপরিগ্গহো নাম যথাউপ্পন্নং ৰেদনং সভাৰসরসতো উপধারেত্ৰা পুন পদট্ঠানতো ‘‘অযং ৰেদনা ফস্সং পটিচ্চ উপ্পজ্জতি, সো চ ফস্সো অনিচ্চো দুক্খো ৰিপরিণামধম্মো’’তি লক্খণত্তযং আরোপেত্ৰা পৰত্তিতৰিপস্সনা. এৰং পস্সন্তেন হি সুখেন সক্কা সা ৰেদনা অধিৰাসেতুং ‘‘ৰেদনা এৰ ৰেদযতী’’তি. ৰেদনং ৰিক্খম্ভেত্ৰাতি যথাউপ্পন্নং দুক্খৰেদনং অনুৰত্তিত্ৰা ৰিপস্সনং আরভিত্ৰা ৰীথিপটিপন্নায ৰিপস্সনায তং ৰিনোদেত্ৰা. সংসুমারপতিতেনাতি কুম্ভীলেন ৰিয ভূমিযং উরেন নিপজ্জমানেন. ‘‘নাহ’’ন্তিআদিং তথা সীলরক্খণমেৰ দুক্করন্তি কত্ৰা ৰদতি. সীলে পতিট্ঠিতস্স হি অরহত্তং হত্থগতংযেৰ. যথাহ ‘‘সীলে পতিট্ঠায…পে… ৰিজটযে জট’’ন্তি (সং. নি. ১.২৩, ১৯২; পেটকো. ২২; মি. প. ২.৯) চতূসু পুগ্গলেসু উগ্ঘাটিতঞ্ঞুনো এৰাযং ৰিসযোতি আহ ‘‘উগ্ঘাটিতঞ্ঞুতাযা’’তি. পঞ্ঞায সীলং ধোৰিত্ৰাতি সীলং আদিমজ্ঝপরিযোসানেসু অখণ্ডাদিভাৰাপাদনেন ¶ পঞ্ঞায সুৰিসোধিতং কত্ৰা. সন্ততিমহামত্তৰত্থু ধম্মপদে (ধ. প. অট্ঠ. ২.সন্তিমহামত্তৰত্থু).

৩১৮. ‘‘কস্মা আহা’’তি উপরিদেসনায কারণং পুচ্ছতি. লজ্জা নাম ‘‘সীলস্স চ জাতিযা চ গুণদোসপ্পকাসনেন সমণেন গোতমেন পুচ্ছিতপঞ্হং ৰিস্সজ্জেসী’’তি পরিসায পঞ্ঞাততা, সা তথা ৰিস্সজ্জিতুমসমত্থতায ভিজ্জিস্সতীতি অত্থো, পঠমং অলজ্জমানোপি ইদানি লজ্জিস্সামীতি ৰুত্তং হোতি. পরমন্তি পমাণং. ‘‘এত্তকপরমা ময’’ন্তি পদানং তুল্যাধিকরণতং দস্সেতুং ‘‘তে ময’’ন্তি ৰুত্তং. ইদং ৰুত্তং হোতি – ‘‘সীলপঞ্ঞাণ’’ন্তি ৰচনমেৰ অম্হাকং পরমং, তদত্থভূতানি পঞ্চসীলানি, ৰেদত্তযৰিভাৰনং পঞ্ঞঞ্চ লক্খণাদিতো নিদ্ধারেত্ৰা জাননং নত্থি, কেৰলং তত্থ ৰচীপরমাৰ মযন্তি. অযং পনেত্থ অট্ঠকথামুত্তকনযো – এত্তকপরমাতি এত্তকউক্কংসকোটিকা, পঠমং পঞ্হাৰিস্সজ্জনাৰ অম্হাকং ¶ উক্কংসকোটীতি অত্থো. তেনাহ ‘‘মযা সকসমযৰসেন পঞ্হো ৰিস্সজ্জিতো’’তি. পরন্তি অতিরেকং. ভাসিতস্সাতি ৰচনস্স সদ্দস্স.

অযং পন ৰিসেসোতি সীলনিদ্দেসে নিয্যাতনমত্তং অপেক্খিত্ৰা ৰুত্তং. তেনাহ ‘‘সীলমিচ্চেৰ নিয্যাতিত’’ন্তি. সামঞ্ঞফলসুত্তে (দী. নি. ১.১৫০) হি সীলং নিয্যাতেত্ৰাপি পুন সামঞ্ঞফলমিচ্চেৰ নিয্যাতিতং. সব্বেসম্পি মহগ্গতচিত্তানং ঞাণসম্পযুত্তত্তা, ঝানানঞ্চ তং সম্পযোগতো ‘‘অত্থতো পঞ্ঞাসম্পদা’’তি ৰুত্তং. পঞ্ঞানিদ্দেসে হি ঝানপঞ্ঞং অধিট্ঠানং কত্ৰা পঠমং ৰিপস্সনাপঞ্ঞা নিয্যাতিতা. তেনাহ ‘‘ৰিপস্সনাপঞ্ঞাযা’’তিআদি.

সোণদণ্ডউপাসকত্তপটিৰেদনাকথাৰণ্ণনা

৩২১. দহরো যুৰাতি এত্থ দহরৰচনেন পঠমযোব্বনভাৰং দস্সেতি. পঠমযোব্বনকালগতো হি ‘‘দহরো’’তি ৰুচ্চতি. পুত্তস্স পুত্তো নত্তা নাম. নপ্পহোতীতি ন সম্পজ্জতি, পুত্তনত্তপ্পমাণোপি ন হোতীতি অত্থো. ‘‘আসনা মে তং ৰুট্ঠান’’ন্তি এতস্স অত্থাপত্তিং দস্সেতুং ‘‘মম অগারৰেনা’’তিআদি ৰুত্তং. এতন্তি অঞ্জলিপগ্গহণং. অযঞ্হি যথা তথা অত্তনো মহাজনস্স সম্ভাৰনং উপ্পাদেত্ৰা কোহঞ্ঞেন পরে ৰিম্হাপেত্ৰা লাভুপ্পাদনং নিজিগীসন্তো ৰিচরতি, তস্মাস্স অতিৰিয কুহকভাৰং দস্সেন্তো ‘‘ইমিনা কিরা’’তিআদিং ৰদতি ¶ . অগারৰং নাম নত্থীতি অগারৰৰচনং নাম নত্থি, নাযং ভগৰতি অগারৰেন ‘‘অহঞ্চেৰ খো পনা’’তিআদিমাহ, অথ খো অত্তনো লাভপরিহানিভযেনেৰাতি ৰুত্তং হোতি.

৩২২. তঙ্খণানুরূপাযাতি যাদিসী তদা তস্স অজ্ঝাসযপ্পৰত্তি, তদনুরূপাযাতি মজ্ঝেপদলোপেন অত্থো. তদা তস্স ৰিৰট্টসন্নিস্সিতস্স তাদিসস্স ঞাণপরিপাকস্স অভাৰতো কেৰলং অব্ভুদযসন্নিস্সিতো এৰ অত্থো দস্সিতোতি আহ ‘‘দিট্ঠধম্মিকসম্পরাযিকং অত্থং সন্দস্সেত্ৰা’’তি, পচ্চক্খতো ৰিভাৰেত্ৰাতি অত্থো. কুসলে ধম্মেতি তেভূমকে কুসলধম্মে, অযমেত্থ নিপ্পরিযাযতো অত্থো. পরিযাযতো পন ‘‘চতুভূমকে’’তিপি ৰত্তুং ৰট্টতি লোকুত্তরকুসলস্সপি আযতিং লব্ভমানত্তা. তথা হি ৰক্খতি ‘‘আযতিং নিব্বানত্থায, ৰাসনাভাগিযায ¶ ৰা’’তি. তত্থাতি কুসলে ধম্মে যথাসমাদপিতে. নন্তি সোণদণ্ডব্রাহ্মণং. সমুত্তেজেত্ৰাতি সম্মদেৰ উপরূপরি নিসানেত্ৰা পুঞ্ঞকিরিযায তিক্খৰিসদভাৰমাপাদেত্ৰা. তং পন অত্থতো তত্থ উস্সাহজননমেৰ হোতীতি আহ ‘‘সউস্সাহং কত্ৰা’’তি. তায চ সউস্সাহতাযাতি এৰং পুঞ্ঞকিরিযায সউস্সাহতা নিযমতো দিট্ঠধম্মিকাদিঅত্থসম্পাদনীতি যথাৰুত্তায সউস্সাহতায চ সম্পহংসেত্ৰাতি সম্বন্ধো. অঞ্ঞেহি চ ৰিজ্জমানগুণেহীতি এৰরূপা তে গুণসমঙ্গিতা চ একন্তেন দিট্ঠধম্মিকাদিঅত্থনিপ্ফাদনীতি তস্মিং ৰিজ্জমানেহি, অঞ্ঞেহি চ গুণেহি সম্পহংসেত্ৰা সম্মদেৰ হট্ঠতুট্ঠভাৰমাপাদেত্ৰাতি অত্থো.

যদি ভগৰা ধম্মরতনৰস্সং ৰস্সি, অথ কস্মা সো ৰিসেসং নাধিগচ্ছীতি চোদনং সোধেতুং ‘‘ব্রাহ্মণো পনা’’তিআদি ৰুত্তং. কুহকতাযাতি ৰুত্তনযেন কোহঞ্ঞকত্তা, ইমিনা পযোগসম্পত্তিঅভাৰং দস্সেতি. যজ্জেৰং কস্মা ভগৰা তস্স তথা ধম্মরতনৰস্সং ৰস্সীতি পটিচোদনম্পি সোধেন্তো ‘‘কেৰলমস্সা’’তিআদিমাহ. তত্থ কেৰলন্তি নিব্বেধাসেক্খভাগিযেন অসম্মিস্সং. নিব্বানত্থাযাতি নিব্বানাধিগমত্থায, পরিনিব্বানত্থায ৰা. আযতিং ৰিসেসাধিগমনূপাযভূতা পুঞ্ঞকিরিযাসু পরিচযসঙ্খাতা ৰাসনা এৰ ভাগো, তস্মিং উপাযভাৰেন পৰত্তাতি ৰাসনাভাগিযা. ন হি ভগৰতো নিরত্থকা চতুপ্পদিকগাথামত্তাপি ধম্মদেসনা অত্থি. তেনাহ ‘‘সব্বা পুরিমপচ্ছিমকথা’’তি. আদিতো চেত্থ পভুতি যাৰ ব্রাহ্মণস্স ৰিস্সজ্জনাপরিযোসানং, তাৰ পুরিমকথা, ভগৰতো পন সীলপঞ্ঞাৰিস্সজ্জনা পচ্ছিমকথা. ব্রাহ্মণেন ৰুত্তাপি হি বুদ্ধগুণাদিপটিসঞ্ঞুত্তা কথা আযতিং নিব্বানত্থায ৰাসনাভাগিযা এৰাতি. সেসং সুৰিঞ্ঞেয্যমেৰ.

ইতি সুমঙ্গলৰিলাসিনিযা দীঘনিকাযট্ঠকথায পরমসুখুমগম্ভীরদুরনুবোধত্থপরিদীপনায সুৰিমলৰিপুলপঞ্ঞাৰেয্যত্তিযজননায ¶ সাধুৰিলাসিনিযা নাম লীনত্থপকাসনিযা সোণদণ্ডসুত্তৰণ্ণনায লীনত্থপকাসনা.

সোণদণ্ডসুত্তৰণ্ণনা নিট্ঠিতা.

৫. কূটদন্তসুত্তৰণ্ণনা

৩২৩. এৰং ¶ ¶ সোণদণ্ডসুত্তং সংৰণ্ণেত্ৰা ইদানি কূটদন্তসুত্তং সংৰণ্ণেন্তো যথানুপুব্বং সংৰণ্ণনোকাসস্স পত্তভাৰং ৰিভাৰেতুং, সোণদণ্ড সুত্তস্সানন্তরং সঙ্গীতস্স সুত্তস্স কূটদন্তসুত্তভাৰং ৰা পকাসেতুং ‘‘এৰং মে সুতং…পে… মগধেসূতি কূটদন্তসুত্ত’’ন্তি আহ. ‘‘মগধা নাম জনপদিনো রাজকুমারা’’তিআদীসু অম্বট্ঠসুত্তে কোসলজনপদৰণ্ণনাযং অম্হেহি ৰুত্তনযো যথারহং নেতব্বো. অযং পনেত্থ ৰিসেসো – মগেন সদ্ধিং ধাৰন্তীতি মগধা, রাজকুমারা, মংসেসু ৰা গিজ্ঝন্তীতি মগধা নিরুত্তিনযেন. রুল়্হিতো, পচ্চযলোপতো চ তেসং নিৰাসভূতেপি জনপদে ৰুদ্ধি ন হোতীতি নেরুত্তিকা. জনপদনামেযেৰ বহুৰচনং, ন জনপদসদ্দে জাতিসদ্দত্তাতি ৰুত্তং ‘‘তস্মিং মগধেসু জনপদে’’তি. ইতো পরন্তি ‘‘মগধেসূ’’তি পদতো পরং ‘‘চারিকং চরমানো’’তিআদিৰচনং. পুরিমসুত্তদ্ৰযেতি অম্বট্ঠসোণদণ্ডসুত্তদ্ৰযে. ৰুত্তনযমেৰাতি যং তত্থ আগতসদিসং ইধাগতং, তং অত্থৰণ্ণনাতো ৰুত্তনযমেৰ, তত্থ ৰুত্তনযেনেৰ ৰেদিতব্বন্তি ৰুত্তং হোতি. ‘‘তরুণো অম্বরুক্খো অম্বলট্ঠিকা’’তি ব্রহ্মজালসুত্তৰণ্ণনাযং (দী. নি. অট্ঠ. ১.২) ৰুত্তত্তা ‘‘অম্বলট্ঠিকা ব্রহ্মজালে ৰুত্তসদিসাৰা’’তি আহ.

যঞ্ঞাৰাটং সম্পাদেত্ৰা মহাযঞ্ঞং উদ্দিস্স সৰিঞ্ঞাণকানি, অৰিঞ্ঞাণকানি চ যঞ্ঞূপকরণানি উপট্ঠপিতানীতি অত্থং সন্ধায ‘‘মহাযঞ্ঞো উপক্খটো’’তি পাল়িযং ৰুত্তং, তং পনেতং উপকরণং তেসং তথা সজ্জনমেৰাতি দস্সেতি ‘‘সজ্জিতো’’তি ইমিনা. ৰচ্ছতরসতানীতি যুৰভাৰপ্পত্তানি বলৰৰচ্ছসতানি. ৰচ্ছানং ৰিসেসাতি হি ৰচ্ছতরা, তে পন ৰচ্ছা এৰ হোন্তি, ন দম্মা, ন চ বলীবদ্দাতি আহ ‘‘ৰচ্ছসতানী’’তি. অযং আচরিযমতি (দী. নি. টী. ১.৩২৩). তর-সদ্দো ৰা অনত্থকোতি ৰুত্তং ‘‘ৰচ্ছসতানী’’তি. এৰঞ্হি সব্বোপি ৰচ্ছপ্পভেদো সঙ্গহিতো হোতি. এতেতি উসভাদযো উরব্ভপরিযোসানা. অনেকেসন্তি অনেকজাতিকানং. মিগপক্খীনন্তি মহিংসরুরুপসদকুরুঙ্গগোকণ্ণমিগানঞ্চেৰ মোরকপিঞ্জরৰট্টকতিত্তির ¶ লাপাদিপক্খীনঞ্চ. সঙ্খ্যাৰসেন অনেকতং সত্তসতগ্গহণেন পরিচ্ছিন্দিতুং ‘‘সত্তসত্তসতানী’’তি ৰুত্তং, সত্তসতানি, সত্তসতানি ¶ চাতি অত্থো. থূণন্তি যঞ্ঞোপকরণানং মিগপক্খীনং বন্ধনত্থম্ভং. যূপোতিপি তস্স নামং. তেনাহ ‘‘যূপসঙ্খাত’’ন্তি.

৩২৮. ৰিধাতি ৰিপ্পটিসারৰিনোদনা. যো হি যঞ্ঞসঙ্খাতস্স পুঞ্ঞস্স উপক্কিলেসো, তস্স ৰিধমনতো নিৰারণতো নিরোধনতো ৰিধা ৰুচ্চন্তি ৰিপ্পটিসারৰিনোদনা, তা এৰ পুঞ্ঞাভিসন্দং অৰিচ্ছিন্দিত্ৰা ঠপেন্তীতি ‘‘ঠপনা’’তি চ ৰুত্তা. অৰিপ্পটিসারতো এৰ হি উপরূপরি পুঞ্ঞাভিসন্দপ্পৰত্তীতি. ঠপনা চেতা যঞ্ঞস্স আদিমজ্ঝপরিযোসানৰসেন তীসু কালেসু পৰত্তিযা তিপ্পকারাতি আহ ‘‘তিট্ঠপন’’ন্তি. পরিক্খারসদ্দো চেত্থ পরিৰারপরিযাযো ‘‘পরিকরোন্তি যঞ্ঞং অভিসঙ্খরোন্তী’’তি কত্ৰা. তেনাহ ‘‘সোল়সপরিৰার’’ন্তি.

মহাৰিজিতরাজযঞ্ঞকথাৰণ্ণনা

৩৩৬. পুব্বে ভূতং ভূতপুব্বং যথা ‘‘দিট্ঠপুব্ব’’ন্তি আহ ‘‘পুব্বচরিত’’ন্তি, অত্তনো পুরিমজাতিসম্ভূতং বোধিসম্ভারভূতং পুঞ্ঞচরিযন্তি অত্থো. তথা হি তস্স অনুগামিনিধিস্স থাৰরনিধিনা নিদস্সনং উপপন্নং হোতি. সদ্দৰিদূ পন ৰদন্তি ‘‘ভূতপুব্বন্তি ইদং কালসত্তমিযা নেপাতিকপদ’’ন্তি. অতীতকালেতি হি তেসং মতেন অত্থো. অস্সাতি অনেন. মহন্তং পথৰীমণ্ডলং ৰিজিতন্তি সম্বন্ধো. মহন্তং ৰা ৰিজিতং পথৰীমণ্ডলমস্স অত্থীতি অত্থো. ‘‘অন্তোরট্ঠেতি যস্স ৰিজিতে ৰিহরতি, তস্স রট্ঠে’’তিআদীসু ৰিয হি ৰিজিতসদ্দো রজ্জে পৰত্ততি, ইমিনা তস্স একরাজভাৰং দীপেতি, ন চক্কৰত্তিরাজভাৰং সত্তরতনসম্পন্নতাঅৰচনতো. পাল়িযং ন যেন কেনচি সন্তকমত্তেন অড্ঢতাতি দস্সেতুং ‘‘অড্ঢো’’তি ৰত্ৰা ‘‘মহদ্ধনো’’তি ৰুত্তং. তেনাহ ‘‘যো কোচী’’তিআদি. অড্ঢতা হি নাম ৰিভৰসম্পন্নত্তা সা চ তং তদুপাদায ৰুচ্চতি. তথা মহদ্ধনতাপীতি তং থামপ্পত্তং উক্কংসগতং দস্সেতুং ‘‘অপরিমাণসঙ্খ্যেনা’’তি আহ. ভুঞ্জিতব্বট্ঠেন ৰিসেসতো কামা ইধ ভোগা নামাতি দস্সেতি. ‘‘পঞ্চকামগুণৰসেনা’’তি ইমিনা. পিণ্ডপিণ্ডৰসেনাতি ভাজনালঙ্কারাদিৰিভাগং অহুত্ৰা কেৰলং খণ্ডখণ্ডৰসেন.

রূপং অপ্পেত্ৰা, অনপ্পেত্ৰা ৰা মাসপ্পমাণেন কতো মাসকো. আদিসদ্দেন থালকাদীনি সঙ্গণ্হাতি. অনেককোটিসঙ্খ্যেনাতি কহাপণানং ¶ কোটিসতাদিপ্পমাণং সন্ধায ৰুত্তং হেট্ঠিমন্তেন কোটিসতপ্পমাণেনেৰ খত্তিযমহাসালভাৰপ্পত্তিতো.

তুট্ঠীতি ¶ সুমনতা. উপকরণসদ্দো চেত্থ কারণপরিযাযো. কিং পন তন্তি আহ ‘‘নানাৰিধালঙ্কারসুৰণ্ণরজতভাজনাদিভেদ’’ন্তি. আদিসদ্দেন ৰত্থসেয্যাৰসথাদীনি সঙ্গয্হন্তি, সুৰণ্ণরজতমণিমুত্তাৰেল়ুরিযৰজিরপৰাল়ানি সত্ত রতনানীতি ৰদন্তি. যথাহু –

‘‘সুৰণ্ণং রজতং মুত্তা, মণিৰেল়ুরিযানি চ;

ৰজিরঞ্চ পৰাল়ন্তি, সত্তাহু রতনানিমে’’তি.

সালিৰীহিআদি সত্তধঞ্ঞং সানুলোমং পুব্বন্নং নাম পুরেক্খতং সস্সফলন্তি কত্ৰা. তব্বিপরিযাযতো মুগ্গমাসাদি তদৰসেসং অপরন্নং নাম. অপরন্নতো পুব্বে পৰত্তমন্নং পুব্বন্নং, ততো অপরস্মিং পৰত্তমন্নং অপরন্নং. ন্ন-কারস্স পন ণ্ণ-কারে কতে পুব্বণ্ণং, অপরণ্ণঞ্চাতি নেরুত্তিকা. পুব্বাপরভাৰো পনেতেসং আদিকপ্পে সম্ভৰাসম্ভৰৰসেন ৰেদিতব্বো. পুরিমং ‘‘অড্ঢো মহদ্ধনো পহূতজাতরূপরজতো’’তি ৰচনং দেৰসিকং পরিব্বযদানগহণাদিৰসেন, পরিৰত্তনধনধঞ্ঞৰসেন চ ৰুত্তং, ইদং পন ‘‘পহূতধনধঞ্ঞো’’তি ৰচনং নিধানগতধনৰসেন, সঙ্গহিতধঞ্ঞৰসেন চাতি ইমং ৰিসেসং সন্ধায অযং নযো দস্সিতো. ৰীসকহাপণম্বণাদিদেৰসিকৰল়ঞ্জনম্পি হি মহাসাললক্খণং.

ইদানি তব্বিপরীতৰসেন ৰিসেসং দস্সেতুং ‘‘অথ ৰা’’তিআদিনা দুতিযনযো আরদ্ধো. ইমিনা এৰ হি পুরিমৰচনং নিধানগতধনৰসেন, সঙ্গহিতধঞ্ঞৰসেন চ ৰুত্তন্তি অত্থতো সিদ্ধং হোতি. তত্থ ইদন্তি ‘‘পহূতধনধঞ্ঞো’’তি ৰচনং. অস্সাতি মহাৰিজিতরঞ্ঞো. দিৰসে দিৰসে পরিভুঞ্জিতব্বং দেৰসিকং, ভাৰনপুংসকমেতং. দাসকম্মকরপোরিসাদীনং ৰেত্তনানুপ্পদানং পরিব্বযদানং. ইণসোধনাদিৰসেন ধনধঞ্ঞানমাদানং গহণং. আদিসদ্দেন ইণদানাদীনং সঙ্গহো. পরিৰত্তনধনধঞ্ঞৰসেনাতি কযৰিক্কযকরণেন পরিৰত্তিতব্বানং ধনধঞ্ঞানং ৰসেন. কত্থচি পন সমুচ্চযৰিরহিতপাঠো দিস্সতি. তত্থ ‘‘পরিব্বযদানগ্গহণাদিৰসেনা’’তি ইদং পরিৰত্তনপদেন সম্বন্ধং কত্ৰা তাদিসেন ৰিধিনা ইতো চিতো চ পরিৰত্তেতব্বানং ধনধঞ্ঞানং ৰসেনাতি অত্থো ৰেদিতব্বো.

কোট্ঠং ¶ ৰুচ্চতি ধঞ্ঞট্ঠপনট্ঠানং, তদেৰ অগারং তথা. তেনাহ ‘‘ধঞ্ঞেন পরিপুণ্ণকোট্ঠাগারো’’তি. এৰং সারগব্ভং কোসো, ধঞ্ঞট্ঠপনট্ঠানং কোট্ঠাগারন্তি দস্সেত্ৰা ইদানি ততো অঞ্ঞথাপি তং দস্সেতুং ‘‘অথ ৰা’’তিআদি ৰুত্তং. তত্থ যথা অসিনো তিক্খভাৰপরিহারতো পরিচ্ছদো ‘‘কোসো’’তি ৰুচ্চতি, এৰং রঞ্ঞো তিক্খভাৰপরিহারকত্তা চতুরঙ্গিনী ¶ সেনা ‘‘কোসো’’তি আহ ‘‘চতুব্বিধো কোসো’’তিআদি. ‘‘দ্ৰাদসপুরিসো হত্থী’’তিআদিনা (পাচি. ৩১৪) ৰুত্তলক্খণেন চেত্থ হত্থিআদযো গহেতব্বা. ৰত্থকোট্ঠাগারগ্গহণেনেৰ সব্বস্সপি কুপ্পভণ্ডট্ঠপনট্ঠানস্স গহিতত্তা ‘‘কোট্ঠাগারং তিৰিধ’’ন্তিআদি ৰুত্তং. জাতরূপরজততো হি অঞ্ঞং লোহঅযদারুৰিসাণৰত্থাদিকমসারদব্বং গোপেতব্বতো গ-কারস্স ক-কারং কত্ৰা কুপ্পং ৰুচ্চতি. জাতরূপরজতনিধানং ধনকোট্ঠাগারং. তত্থ তত্থ রতনং ৰিলোকেত্ৰা চরণং রতনৰিলোকনচারিকা. কামং তমত্থং রাজা জানাতি, ভণ্ডাগারিকেন পন কথাপেত্ৰা পরিসায নিস্সদ্দভাৰাপাদনত্থমেৰ এৰং পুচ্ছতি. তথা কথাপনে হি অসতি পরিসা সদ্দং করিস্সতি ‘‘কস্মা রাজা পরম্পরাগতং কুলধনং ৰিনাসেতী’’তি, ততো চ পকতিক্খোভো ভৰিস্সতি, সতি পন তথা কথাপনে ‘‘এতংকারণা তং ছড্ডেতী’’তি নিস্সদ্দভাৰমাপজ্জিস্সতি. ততো চ পকতিক্খোভো ন ভৰিস্সতি, তস্মা তথা পুচ্ছতীতি ৰেদিতব্বং. মরণৰসন্তি মরণস্স, মরণসঙ্খাতং ৰা ৰিসযং.

৩৩৭. পাল়িযং ‘‘আমন্তেত্ৰা’’তি এতস্স মন্তিতুকামো হুত্ৰাতি অত্থং ৰিঞ্ঞাপেতুং ‘‘একেন পণ্ডিতেন সদ্ধিং মন্তেত্ৰা’’তি ৰুত্তং. ধাত্ৰত্থানুৰত্তকো হেত্থ উপসগ্গো, পকরণাধিগতো চ কত্থচি অত্থৰিসেসো যথা ‘‘সিক্খমানেন ভিক্খৰে ভিক্খুনা অঞ্ঞাতব্বং পরিপুচ্ছিতব্বং পরিপঞ্হিতব্ব’’ন্তি (পাচি. ৪৩৪). তথা হিস্স পদভাজনে ৰুত্তং ‘‘সিক্খমানেনাতি সিক্খিতুকামেন. অঞ্ঞাতব্বন্তি জানিতব্ব’’ন্তিআদি (পাচি. ৪৩৬). আমন্তেসীতি মন্তিতুকামোসি. জনপদস্স অনুপদ্দৰত্থং, যঞ্ঞস্স চ চিরানপ্পৰত্তনত্থং ব্রাহ্মণো চিন্তেসীতি আহ ‘‘অযং রাজা’’তিআদি. আহরন্তানং মনুস্সানং গেহানীতি সম্বন্ধো, অনাদরে ৰা এতং সামিৰচনং.

৩৩৮. সত্তানং ¶ হিতসুখস্স ৰিদূসনতো, অহিতদুক্খস্স চ আৰহনতো কণ্টকসদিসতায চোরা এৰ ইধ ‘‘কণ্টকা’’তি ৰুত্তং ‘‘চোরকণ্টকেহি সকণ্টকো’’তি. যথা গামৰাসীনং ঘাতকা গামঘাতকা অভেদৰসেন, উপচারেন চ নিস্সযনামস্স নিস্সিতেপি পৰত্তনতো, এৰং পন্থিকানং দুহনা বাধনা পন্থদুহা. ধম্মতো অপেতস্স অযুত্তস্স করণসীলো অধম্মকারী, যো ৰা অত্তনো ৰিজিতে জনপদাদীনং ততো ততো অনত্থতো তাযনেন খত্তিযেন কত্তব্বধম্মো, তস্স অকরণসীলোতি অত্থো. দস্সূতি চোরানমেতং অধিৰচনং. দংসেন্তি ৰিদ্ধংসেন্তীতি হি দস্সৰো নিগ্গহীতলোপেন, তে এৰ খীলসদিসত্তা খীলন্তি দস্সুখীলং. যথা হি খেত্তে খীলং কসনাদীনং সুখপ্পৰত্তিং, মূলসন্তানেন সস্সপরিবুদ্ধিঞ্চ ৰিবন্ধতি, এৰং দস্সৰোপি রজ্জে রাজাণায সুখপ্পৰত্তিং, মূলৰিরুল়্হিযা জনপদপরিবুদ্ধিঞ্চ ৰিবন্ধন্তী. পাণচাগং ¶ দস্সেতুং ‘‘মারণেনা’’তি ৰুত্তং, হিংসনং দস্সেতুং ‘‘কোট্টনেনা’’তি. ৰধসদ্দো হি হিংসনত্থোপি হোতি ‘‘ৰধতি ন রোদতি, আপত্তি দুক্কটস্সা’’তিআদীসু (পাচি. ৮৮০) ৰিয, কপ্পরাদীহি পোথনেনাতি অত্থো. অদ্দু নাম দারুক্খন্ধেন কতো বন্ধনোপকরণৰিসেসো, তেন বন্ধনং তথা. আদিসদ্দেন রজ্জুবন্ধনসঙ্খলিকবন্ধনঘরবন্ধনাদীনি সঙ্গণ্হাতি. হা-ধাতুযা জানিপদনিপ্ফত্তিং দস্সেতি ‘‘হানিযা’’তি ইমিনা, সা চ ধনহাযনমেৰাতি ৰুত্তং ‘‘সতং গণ্হথা’’তিআদি.

পঞ্চসিখমত্তং ঠপেত্ৰা মুণ্ডাপনং পঞ্চসিখমুণ্ডকরণং. তং ‘‘কাকপক্খকরণ’’ন্তিপি ৰোহরন্তি. সীসে ছকণোদকাৰসেচনং গোমযসিঞ্চনং. কুদণ্ডকো নাম চতুহত্থতো ঊনো রস্সদণ্ডকো, যো ‘‘গদ্দুলো’’তিপি ৰুচ্চতি, তেন বন্ধনং কুদণ্ডকবন্ধনং. আদিসদ্দেন খুরমুণ্ডং করিত্ৰা ভস্মপুটৰধনাদীনং সঙ্গহো. সম্মাসদ্দো ঞাযত্থোতি আহ ‘‘হেতুনা’’তিআদি, পরিযাযৰচনমেতং. ঊহনিস্সামীতি উদ্ধরিস্সামি, অপনেস্সামীতি অত্থো. পুব্বে তত্থ কতপরিচযতায উস্সাহং করোন্তি. ‘‘অনুপ্পদেতূ’’তি এতস্স অনু অনু পদেতূতি অত্থং সন্ধায ‘‘দিন্নে অপ্পহোন্তে’’তিআদি ৰুত্তং. কসিউপকরণভণ্ডং ফালপাজনযুগনঙ্গলাদি, ইমিনা পাল়িযং বীজভত্তমেৰ নিদস্সনৰসেন ৰুত্তন্তি দস্সেতি. সক্খিকরণপণ্ণারোপননিবন্ধনং ¶ ৰড্ঢিযা সহ ৰা ৰিনা ৰা পুন গহেতুকামস্স দানে হোতি, ইধ পন তদুভযম্পি নত্থি পুন অগ্গহেতুকামত্তাতি ৰুত্তং ‘‘সক্খিং অকত্ৰা’’তিআদি. তেনাহ ‘‘মূলচ্ছেজ্জৰসেনা’’তি. সক্খিন্তি তদা পচ্চক্খকজনং. পণ্ণে অনারোপেত্ৰাতি তালাদিপণ্ণে যথাচিণ্ণং লিখনৰসেন অনারোপেত্ৰা. অঞ্ঞত্থ পণ্ণাকারেপি পাভতসদ্দো, ইধ পন ভণ্ডমূলেযেৰাতি আহ ‘‘ভণ্ডমূলস্সা’’তিআদি. ভণ্ডমূলঞ্হি পকারতো উদযভণ্ডানি আভরতি সংহরতি এতেনাতি পাভতং. উদযধনতো পগেৰ আভতং পাভতন্তি সদ্দৰিদূ, পণ্ণাকারো পন তং তদত্থং পত্থেন্তেহি আভরীযতেতি পাভতং. পত্থনত্থজোতকো হি অযং প-সদ্দো.

‘‘যথাহা’’তিআদিনা পাভতসদ্দস্স মূলভণ্ডত্থতং চূল়সেট্ঠিজাতকপাঠেন (জা. ১.১.৪) সাধেতি. তত্রাযমট্ঠকথা (জা. অট্ঠ. ১.১.৪) ‘‘অপ্পকেনপীতি থোকেনপি পরিত্তকেনপি. মেধাৰীতি পঞ্ঞৰা. পাভতেনাতি ভণ্ডমূলেন. ৰিচক্খণোতি ৰোহারকুসলো. সমুট্ঠাপেতি অত্তানন্তি মহন্তং ধনঞ্চ যসঞ্চ উপ্পাদেত্ৰা তত্থ অত্তানং সণ্ঠাপেতি পতিট্ঠাপেতি. যথা কিং? অণুং অগ্গিংৰ সন্ধমং, যথা পণ্ডিতপুরিসো পরিত্তং অগ্গিং অনুক্কমেন গোমযচুণ্ণাদীনি পক্খিপিত্ৰা মুখৰাতেন ধমন্তো সমুট্ঠাপেতি ৰড্ঢেতি মহন্তং অগ্গিক্খন্ধং করোতি, এৰমেৰ পণ্ডিতো থোকম্পি পাভতং লভিত্ৰা নানাউপাযেহি পযোজেত্ৰা ধনঞ্চ যসঞ্চ ৰড্ঢেতি, ৰড্ঢেত্ৰা চ ¶ পন তত্থ অত্তানং পতিট্ঠাপেতি, তায এৰ ৰা পন ধনযসমহন্ততায অত্তানং সমুট্ঠাপেতি, অভিঞ্ঞাতং পাকটং করোতীতি অত্থো’’তি.

দিৰসে দিৰসে দাতব্বং দেৰসিকং. মাসে মাসে দাতব্বং মাসিকং. আদিসদ্দেন অনুপোসথিকাদীনি সঙ্গণ্হাতি. তস্স তস্স পুরিসস্স. কুসলানুরূপেন, কম্মানুরূপেন সূরভাৰানুরূপেনাতি দ্ৰন্দতো পরং সুয্যমানো অনুরূপসদ্দো পচ্চেকং যোজেতব্বো. ছেকভাৰানুরূপতা চেত্থ কুসলানুরূপং. কত্থচি কুলসদ্দো দিস্সতি, সো চ জাণুসোণিআদিকুলানমিৰ কুলানুরূপম্পি দাতব্বতো যুজ্জতেৰ. সেনাপচ্চাদি ঠানন্তরং, ইমিনা ভত্তৰেতনং নিদ্দিট্ঠমত্তন্তি দস্সেতি. সককম্মপসুতত্তা, অনুপদ্দৰত্তা চ ধনধঞ্ঞানং রাসিকো রাসিকারভূতো. খেমেন ঠিতাতি ¶ অনুপদ্দৰেন পৰত্তা. তেনাহ ‘‘অভযা’’তি, কুতোচিপি ভযরহিতাতি অত্থো. মোদা মোদমানাতি মোদায মোদমানা, সোমনস্সেনেৰ মোদমানা, ন সংসন্দনমত্তেনাতি ৰুত্তং হোতি. ‘‘ভগৰতা সদ্ধিং সম্মোদী’’তিআদীসু (দী. নি. ১.৩৮১) হি মুদসদ্দো সংসন্দনেপি পৰত্ততি, অঞ্ঞে মোদা হুত্ৰা অপরেপি মোদমানা ৰিহরন্তীতি ৰা অত্থো. তেনাহ ‘‘অঞ্ঞমঞ্ঞং পমুদিতচিত্তাতি, অসঞ্ঞোগেপি ৰত্তিচ্ছাযেৰ ৰুদ্ধীতি দ্ৰিধা পাঠো ৰুত্তো. ইদ্ধফীতভাৰন্তি সমিদ্ধৰেপুল্লভাৰং.

চতুপরিক্খারৰণ্ণনা

৩৩৯. তস্মিং তস্মিং কিচ্চে অনুযন্তি অনুৰত্তন্তীতি অনুযন্তা. তেযেৰ আনুযন্তা যথা ‘‘অনুভাৰো এৰ আনুভাৰো’’তি, ‘‘আনুযুত্তা’’তিপি পাঠো, তস্মিং তস্মিং কিচ্চে অনুযুজ্জন্তীতি হি আনুযুত্তা ৰুত্তনযেন. অস্সাতি রঞ্ঞো. তেতি আনুযন্তখত্তিযাদযো. ‘‘অম্হে এত্থ বহি করোতী’’তি অত্তমনা ন ভৰিস্সন্তি. ‘‘নিবন্ধৰিপুলাযাগমো গামো নিগমো. ৰিৰড্ঢিতমহাআযো মহাগামো’’তি (দী. নি. টী. ১.৩৩৮) আচরিযেন ৰুত্তং. ‘‘অপাকারপরিক্খেপো সাপণো নিগমো, সপাকারাপণং নগরং, তং তব্বিপরীতো গামো’’তি (কঙ্খাৰিতরণী অভিনৰটীকাযং সঙ্ঘাদিসেসকণ্ডে কুলদূসকসিক্খাপদে পস্সিতব্বং) ৰিনযটীকাসু. গসন্তি মদন্তি এত্থাতি গামো, স্ৰেৰ পাকটো চে, নিগমো নাম অতিরেকো গামোতি কত্ৰা. ভুসত্থো হেত্থ নী-সদ্দো, সঞ্ঞাসদ্দত্তা চ রস্সোতি সদ্দৰিদূ. জনপদত্থো ৰুত্তোৰ. ‘‘সাম্যামচ্চো সখা কোসো, দুগ্গঞ্চ ৰিজিতং বল’’ন্তি ৰুত্তাসু সত্তসু রাজপকতীসু রঞ্ঞো তদৰসেসানং ছন্নং ৰসেন হিতসুখাতিৰুদ্ধি, তদেকদেসা চ আনুযন্তাদযোতি আহ ‘‘যং তুম্হাক’’ন্তিআদি.

তংতংকিচ্চেসু ¶ রঞ্ঞা অমা সহ ভৰন্তীতি অমচ্চা. ‘‘অমাৰাসী’’তিআদীসু ৰিয হি সমকিরিযায অমাতি অব্যযপদং, চ-পচ্চযেন তদ্ধিতসিদ্ধীতি নেরুত্তিকা. রজ্জকিচ্চৰোসাসনকালে পন তে রঞ্ঞা পিযা, সহপৰত্তনকা চ ভৰন্তীতি দস্সেতি ‘‘পিযসহাযকা’’তি ইমিনা. রঞ্ঞো পরিসতি ভৰা ‘‘পারিসজ্জা. কে পন তেতি ৰুত্তং ‘‘সেসা আণত্তিকারকা’’তি ¶ , যথাৰুত্তানুযুত্তখত্তিযাদীহি অৰসেসা রঞ্ঞো আণাকরাতি অত্থো. সতিপি দেয্যধম্মে আনুভাৰসম্পত্তিযা, পরিৰারসম্পত্তিযা চ অভাৰে তাদিসং দাতুং ন সক্কা. ৰুদ্ধকালে চ তাদিসানম্পি রাজূনং তদুভযং হাযতেৰ, দেয্যধম্মে পন অসতি পগেৰাতি দস্সেতুং ‘‘দেয্যধম্মস্মিঞ্হী’’তিআদিমাহ. দেয্যধম্মস্মিং অসতি চ মহল্লককালে চ দাতুং ন সক্কাতি যোজনা. এতেনাতি যথাৰুত্তকারণদ্ৰযেন. অনুমতিযাতি অনুজাননেন. পক্খাতি সপক্খা যঞ্ঞস্স অঙ্গভূতা. যঞ্ঞং পরিকরোন্তীতি পরিক্খারা, সম্ভারা, তে চ তস্স যঞ্ঞস্স অঙ্গভূতত্তা পরিৰারা ৰিয হোন্তীতি আহ ‘‘পরিৰারা ভৰন্তী’’তি. ‘‘রথো’’তিআদিনা ইধানধিপ্পেতমত্থং নিসেধেতি.

‘‘রথো সেতপরিক্খারো, ঝানক্খো চক্কৰীরিযো;

উপেক্খা ধুরসমাধি, অনিচ্ছা পরিৰারণ’’ন্তি. (সং. নি. ৫.৪);

হি সংযুত্তমহাৰগ্গপাল়ি. তত্থ রথোতি ব্রহ্মযানসঞ্ঞিতো অট্ঠঙ্গিকমগ্গরথো. সেতপরিক্খারোতি চতুপারিসুদ্ধিসীলালঙ্কারো. ‘‘সীলপরিক্খারো’’তিপি পাঠো. ঝানক্খোতি ৰিপস্সনাসম্পযুত্তানং পঞ্চন্নং ঝানঙ্গানং ৰসেন ঝানমযঅক্খো. চক্কৰীরিযোতি ৰীরিযচক্কো. উপেক্খা ধুরসমাধীতি উপেক্খা দ্ৰিন্নং ধুরানং সমতা. অনিচ্ছা পরিৰারণন্তি অলোভো সীহধম্মাদীনি ৰিয পরিৰারণং.

অট্ঠপরিক্খারৰণ্ণনা

৩৪০. উভতো সুজাতাদীহি ৰুচ্চমানেহি. যসসাতি পঞ্চৰিধেন আনুভাৰেন. তেনাহ ‘‘আণাঠপনসমত্থতাযা’’তি. ‘‘সদ্ধো’’তি এতস্স ‘‘দাতাদানস্স ফলং পচ্চনুভোতি পত্তিযাযতী’’তি অত্থং দস্সেতুং ‘‘দানস্সা’’তিআদি ৰুত্তং. দানে সূরোতি দানসূরো, দেয্যধম্মে ঈসকম্পি সঙ্গং অকত্ৰা মুত্তচাগো, তব্ভাৰো পন কম্মস্সকতাঞাণস্স তিক্খৰিসদভাৰেন ৰেদিতব্বো. তস্স হি তিক্খৰিসদভাৰং ৰিভাৰেতুং ‘‘সদ্দো’’তি ৰত্ৰা ‘‘দানসূরো’’তি ৰুত্তন্তি দট্ঠব্বং. তেনাহ ‘‘ন সদ্ধামত্তকেনা’’তিআদি. যস্স হি কম্মস্সকতা পচ্চক্খমিৰ উপট্ঠাতি, সো ¶ এৰং ৰুত্তো. যং দানং দেতীতি যং দেয্যধম্মং পরস্স দেতি. তস্স পতি হুত্ৰাতি তব্বিসযং লোভং সুট্ঠুমভিভৰন্তো তস্স অধিপতি হুত্ৰা ¶ দেতি. কারণোপচারৰচনঞ্হেতং. পরতোপি এসেৰ নযো. তব্বিসযেন লোভেন অনাকড্ঢনীযত্তা ন দাসো, ন সহাযো.

তদেৰত্থং ব্যতিরেকতো, অন্ৰযতো চ ৰিৰরিত্ৰা দস্সেন্তো ‘‘যো হী’’তিআদিমাহ. ইধানধিপ্পেতস্স হি দাসাদিদ্ৰযস্স ব্যতিরেকতো দস্সনং. খাদনীযভোজনীযাদীসু মধুরস্সেৰ পণীতত্তা ‘‘মধুরং ভুঞ্জতী’’তি ৰুত্তং, নিদস্সনমত্তং ৰা এতং, পণীতং পরিভুঞ্জতীতি ৰুত্তং হোতি. দাসো হুত্ৰা দেতি তণ্হায দাসব্যতং উপগতত্তা. সহাযো হুত্ৰা দেতি তস্স পিযভাৰানিস্সজ্জনতো. সামী হুত্ৰা দেতি তত্থ তণ্হাদাসব্যতো অত্তানং মোচেত্ৰা অভিভুয্য পৰত্তনতো. যং পনেতং আচরিযেন ৰুত্তং ‘‘সামিপরিভোগসদিসা’’তি, (দী. নি. টী. ১.৩৪০) তং তণ্হাদাসব্যমতিক্কন্ততাসামঞ্ঞং সন্ধায ৰুত্তং. ন হি খীণাসৰস্স পরিভোগো সামিপরিভোগো ৰিয খীণাসৰস্সেৰ দানং দানসামীতি অত্থো উপপন্নো হোতি, পচ্ছা ৰা পমাদলিখিতমেতং. তাদিসোতি দানসামিসভাৰো.

সমিতপাপসমণবাহিতপাপব্রাহ্মণা উক্কট্ঠনিদ্দেসেনেত্থ ৰুত্তা, পব্বজ্জামত্তসমণজাতিমত্তব্রাহ্মণা ৰা কপণাদিগ্গহণেন গহিতাতি ৰেদিতব্বং. দুগ্গতাতি দুক্করং জীৰিকমুপগতা কসিরৰুত্তিকা. তেনাহ ‘‘দলিদ্দমনুস্সা’’তি. পথাৰিনোতি মগ্গগামিনো. ৰণিব্বকাতি দাযকানং গুণকিত্তনৰসেন, কম্মফলকিত্তনমুখেন চ যাচনকা সেয্যথাপি নগ্গচরিযাদযোতি অত্থং দস্সেতুং ‘‘যে ইট্ঠং দিন্ন’’ন্তিআদি ৰুত্তং. তদুভযেনেৰ হি দানস্স ৰণ্ণথোমনা সম্ভৰতি. যে ৰিচরন্তি, তে ৰণিব্বকা নামাতি যোজেতব্বং. পসতমত্তন্তি ৰীহিতণ্ডুলাদিৰসেন ৰুত্তং, সরাৰমত্তন্তি যাগুভত্তাদিৰসেন. ওপানং ৰুচ্চতি ওগাহেত্ৰা পাতব্বতো নদীতল়াকাদীনং সব্বসাধারণং তিত্থং, ওপানমিৰভূতোতি ওপানভূতো. তেনাহ ‘‘উদপানভূতো’’তিআদি. হুত্ৰাতি ভাৰতো. সুতমেৰ সুতজাতন্তি জাতসদ্দস্স অনত্থন্তরৰাচকত্তমাহ যথা ‘‘কোসজাত’’ন্তি.

অতীতাদিঅত্থচিন্তনসমত্থতা নাম তস্স রঞ্ঞো অনুমানৰসেন, ইতিকত্তব্বতাৰসেন চ ৰেদিতব্বা, ন বুদ্ধানং ৰিয তত্থ পচ্চক্খদস্সিতাযাতি দস্সেতুং ‘‘অতীতে’’তিআদি ৰুত্তং. পুঞ্ঞাপুঞ্ঞানিসংসচিন্তনঞ্চেত্থ পকরণাধিগতৰসেন ¶ ৰেদিতব্বং. পুঞ্ঞস্সাতি যঞ্ঞপুঞ্ঞস্স. দাযকচিত্তম্পীতি দাযকানং, দাযকং ৰা চিত্তম্পি, দাতুকম্যতাচিত্তম্পীতি ৰুত্তং হোতি. ইমেসু পন অট্ঠসু অঙ্গেসু অড্ঢতাদযো পঞ্চ যঞ্ঞস্স তাৰ পরিক্খারা হোন্তু তেহি ৰিনা তস্স অসিজ্ঝনতো ¶ , সুজাততা, পন সূরূপতা চ কথং যঞ্ঞস্স পরিক্খারো সিযা তদুভযেন ৰিনাপি তস্স সিজ্ঝনতোতি চোদনায সব্বেসম্পি অট্ঠন্নমঙ্গানং পরিক্খারভাৰং অন্ৰযতো, ব্যতিরেকতো চ দস্সেন্তো ‘‘এতে হি কিরা’’তিআদিমাহ. এত্থ চ কেচি এৰং ৰদন্তি ‘‘যথা অড্ঢতাদযো পঞ্চ যঞ্ঞস্স একংসতোৰ অঙ্গানি, ন এৰং সুজাততা, সুরূপতা চ, তদুভযং পন অনেকংসতোৰ অঙ্গন্তি দীপেতুং অরুচিসূচকস্স কিরসদ্দস্স গহণং কত’’ন্তি. তে হি ‘‘অযং দুজ্জাতোতিআদিৰচনস্স অনেকংসিকতং মঞ্ঞমানা তথা ৰদন্তি, তযিদং অসারং. সব্বসাধারণৰসেন হেতং ব্যতিরেকতো যঞ্ঞস্স অঙ্গভাৰদস্সনং তত্থ সিযা কেসঞ্চি তথা পরিৰিতক্কো’’তি তস্সাপি অৰকাসাভাৰদস্সনত্থমেৰ এৰং ৰুত্তত্তা, তদুভযসাধারণৰসেনেৰ অনেকংসতো অঙ্গভাৰস্স অদস্সনতো চ. কিরসদ্দো পনেত্থ তদা ব্রাহ্মণস্স চিন্তিতাকারসূচনত্থো দট্ঠব্বো. এৰমনেন চিন্তেত্ৰা ‘‘ইমানিপি অট্ঠঙ্গানি তস্সেৰ যঞ্ঞস্স পরিক্খারা ভৰন্তীতি ৰুত্তানী’’তি কিরসদ্দেন তস্স চিন্তিতাকারো সূচিতো হোতি. এৰমাদীনীতি এত্থ আদিসদ্দেন ‘‘অযং ৰিরূপো কিত্তকং…পে… উপচ্ছিন্দিস্সতি, অযং দলিদ্দো, অপ্পেসক্খো, অস্সদ্ধো, অপ্পস্সুতো, ন অত্থঞ্ঞূ, ন মেধাৰী কিত্তকং…পে… উপচ্ছিন্দিস্সতী’’তি এতেসং সঙ্গহো ৰেদিতব্বো.

চতুপরিক্খারাদিৰণ্ণনা

৩৪১. ‘‘সুজং পগ্গণ্হন্তান’’ন্তি এত্থ সোণদণ্ডসুত্তৰণ্ণনাযং (দী. নি. অট্ঠ. ১.৩১১-৩১৩) ৰুত্তেসু দ্ৰীসু ৰিকপ্পেসু দুতিযৰিকপ্পং নিসেধেন্তো ‘‘মহাযাগ’’ন্তিআদিমাহ, তেন চ পুরোহিতস্স সযমেৰ কটচ্ছুগ্গহণজোতনেন এৰং সহত্থা সক্কচ্চং দানে যুত্তপযুত্ততা ইচ্ছিতব্বাতি দস্সেতি. এৰং দুজ্জাতস্সাতি এত্থাপি ‘‘সুজাততায অনেকংসতো অঙ্গভাৰদস্সনমেৰিদ’’ন্তি অগ্গহেত্ৰা হেট্ঠা ৰুত্তনযেন সব্বসাধারণৰসেনেৰ অত্থো গহেতব্বো. আদিসদ্দেন হি ‘‘এৰং অনজ্ঝাযকস্স…পে… দুস্সীলস্স…পে… দুপ্পঞ্ঞস্স ¶ সংৰিধানেন পৰত্তদানং কিত্তকং কালং পৰত্তিস্সতী’’তি এতেসং সঙ্গহো দট্ঠব্বো. তস্মাতি তদুভযকারণতো.

তিস্সোৰিধাৰণ্ণনা

৩৪২. তিণ্ণং ঠানানন্তি দানস্স আদিমজ্ঝপরিযোসানসঙ্খাতানং তিস্সন্নং ভূমীনং, অৰত্থানানন্তি অত্থো. চলন্তীতি কম্পন্তি পুরিমাকারেন ন তিট্ঠন্তি. করণত্থেতি ততিযাৰিভত্তিঅত্থে. করণীযসদ্দাপেক্খায হি কত্তরি এৰ এতং সামিৰচনং, ন করণে. যেভুয্যেন ¶ হি করণজোতকৰচনস্স অত্থভাৰতো অনুত্তকত্তাৰ করণত্থোতি ইধাধিপ্পেতো. পচ্ছানুতাপস্স অকরণূপাযং দস্সেতুং ‘‘পুব্ব…পে… পতিট্ঠপেতব্বা’’তি ৰুত্তং. তত্থ অচলাতি দল়্হা কেনচি অসংহীরা. পতিট্ঠপেতব্বাতি সুপ্পতিট্ঠিতা কাতব্বা. তথা পতিট্ঠাপনূপাযম্পি দস্সেন্তো ‘‘এৰঞ্হী’’তিআদিমাহ. তথা পতিট্ঠাপনেন হি যথা তং দানং সম্পতি যথাধিপ্পাযং নিপ্পজ্জতি, এৰং আযতিম্পি ৰিপুলফলতায মহপ্ফলং হোতি ৰিপ্পটিসারেন অনুপক্কিলিট্ঠভাৰতো. দ্ৰীসু ঠানেসূতি যজমানযিট্ঠট্ঠানেসু. ৰিপ্পটিসারো…পে… ন কত্তব্বোতি অত্থং সন্ধায ‘‘এসেৰ নযো’’তি ৰুত্তং. মুঞ্চচেতনাতি পরিচ্চাগচেতনা, তস্সা নিচ্চলভাৰো নাম মুত্তচাগতা পুব্বাভিসঙ্খারৰসেন উল়ারভাৰো. পচ্ছাসমনুস্সরণচেতনাতি পরচেতনা, তস্সা পন নিচ্চলভাৰো ‘‘অহো মযা দানং দিন্নং সাধু সুট্ঠূ’’তি দানস্স সক্কচ্চং পচ্চৰেক্খণৰসেন ৰেদিতব্বো. তদুভযচেতনানং নিচ্চলকরণূপাযং ব্যতিরেকতো দস্সেতুং ‘‘তথা…পে… হোতী’’তি ৰুত্তং. তত্থ তথা অকরোন্তস্সাতি মুঞ্চচেতনং, পচ্ছাসমনুস্সরণচেতনঞ্চ নিচ্চলমকরোন্তস্স, ৰিপ্পটিসারং, উপ্পাদেন্তস্সাতি ৰুত্তং হোতি. ‘‘নাপি উল়ারেসু ভোগেসু চিত্তং নমতী’’তি ইদং পন পচ্ছাসমনুস্সরণচেতনায এৰ ব্যতিরেকতো নিচ্চলকরণূপাযদস্সনং. এৰঞ্হি যথানিদ্দিট্ঠনিদস্সনং উপপন্নং হোতি. তত্থ উল়ারেসু ভোগেসূতি খেত্তৰিসেসে পরিচ্চাগস্স কতত্তা লদ্ধেসুপি উল়ারেসু ভোগেসু. নাপি চিত্তং নমতি পচ্ছা ৰিপ্পটিসারেন উপক্কিলিট্ঠভাৰতো. যথা কথন্তি আহ ‘‘মহারোরুৰ’’ন্তিআদি. তস্স হি সেট্ঠিস্স গহপতিনো ৰত্থু কোসলসংযুত্তে, (সং. নি. ১.১৩১) ময্হকজাতকে (জা. অট্ঠ. ৩.৬.ময্হকজাতকৰণ্ণনা) চ আগতং. তথা হি ৰুত্তং –

‘‘ভূতপুব্বং ¶ সো মহারাজ সেট্ঠি গহপতি তগরসিখিং নাম পচ্চেকসম্বুদ্ধং পিণ্ডপাতেন পটিপাদেসি, ‘দেথ সমণস্স পিণ্ডপাত’ন্তি ৰত্ৰা উট্ঠাযাসনা পক্কামি, দত্ৰা চ পন পচ্ছা ৰিপ্পটিসারী অহোসি ‘‘ৰরমেতং পিণ্ডপাতং দাসা ৰা কম্মকরা ৰা ভুঞ্জেয্যু’’’ন্তিআদি.

সো কির অঞ্ঞেসুপি দিৰসেসু তং পচ্চেকবুদ্ধং পস্সতি, দাতুং পনস্স চিত্তং ন উপ্পজ্জতি, তস্মিং পন দিৰসে অযং পদুমৰতিযা দেৰিযা ততিযপুত্তো তগরসিখী পচ্চেকবুদ্ধো গন্ধমাদনপব্বতে ফলসমাপত্তিসুখেন ৰীতিনামেত্ৰা পুব্বণ্হসমযে ৰুট্ঠায অনোতত্তদহে মুখং ধোৰিত্ৰা মনোসিলাতলে নিৰাসেত্ৰা কাযবন্ধনং বন্ধিত্ৰা পত্তচীৰরমাদায অভিঞ্ঞাপাদকং ঝানং সমাপজ্জিত্ৰা ইদ্ধিযা ৰেহাসং অব্ভুগ্গন্ত্ৰা নগরদ্ৰারে ওরুয্হ চীৰরং পারুপিত্ৰা পত্তমাদায নগরৰাসীনং ঘরদ্ৰারেসু সহস্সভণ্ডিকং ঠপেন্তো ৰিয পাসাদিকেহি অভিক্কমনাদীহি ¶ অনুপুব্বেন সেট্ঠিনো ঘরদ্ৰারং সম্পত্তো, তং দিৰসঞ্চ সেট্ঠি পাতোৰ উট্ঠায পণীতং ভোজনং ভুঞ্জিত্ৰা ঘরদ্ৰারকোট্ঠকে আসনং পঞ্ঞপেত্ৰা দন্তন্তরানি সোধেন্তো নিসিন্নো হোতি. সো পচ্চেকবুদ্ধং দিস্ৰা তং দিৰসং পাতোৰ ভুত্ৰা নিসিন্নত্তা দানচিত্তং উপ্পাদেত্ৰা ভরিযং পক্কোসাপেত্ৰা ‘‘ইমস্স সমণস্স পিণ্ডপাতং দেহী’’তি ৰত্ৰা রাজুপট্ঠানত্থং পক্কামি. সেট্ঠিভরিযা সম্পজঞ্ঞজাতিকা চিন্তেসি ‘‘মযা এত্তকেন কালেন ইমস্স ‘দেথা’তি ৰচনং ন সুতপুব্বং, দাপেন্তোপি চ অজ্জ ন যস্স ৰা তস্স ৰা দাপেতি, ৰীতরাগদোসমোহস্স ৰন্তকিলেসস্স ওহিতভারস্স পচ্চেকবুদ্ধস্স দাপেতি, যং ৰা তং ৰা অদত্ৰা পণীতং পিণ্ডপাতং দস্সামী’’তি ঘরা নিক্খম্ম পচ্চেকবুদ্ধং পঞ্চপতিট্ঠিতেন ৰন্দিত্ৰা পত্তং আদায অন্তোনিৰেসনে পঞ্ঞত্তাসনে নিসীদাপেত্ৰা সুপরিসুদ্ধেহি সালিতণ্ডুলেহি ভত্তং সম্পাদেত্ৰা তদনুরূপং খাদনীযং, ব্যঞ্জনং, সূপেয্যঞ্চ অভিসঙ্খরিত্ৰা পত্তং পূরেত্ৰা বহি গন্ধেহি অলঙ্করিত্ৰা পচ্চেকবুদ্ধস্স হত্থেসু পতিট্ঠপেত্ৰা ৰন্দি. পচ্চেকবুদ্ধো ‘‘অঞ্ঞেসম্পি পচ্চেকবুদ্ধানং সঙ্গহং করিস্সামী’’তি অপরিভুঞ্জিত্ৰাৰ অনুমোদনং ৰত্ৰা পক্কামি. সোপি খো সেট্ঠি রাজুপট্ঠানং কত্ৰা আগচ্ছন্তো পচ্চেকবুদ্ধং দিস্ৰা আহ ‘‘মযং তুম্হাকং পিণ্ডপাতং দেথা’’তি ৰত্ৰা পক্কন্তা, অপি ৰো লদ্ধো পিণ্ডপাতো’’তি? আম, সেট্ঠি লদ্ধোতি. ‘‘পস্সামা’’তি গীৰং উক্খিপিত্ৰা ওলোকেসি ¶ , অথস্স পিণ্ডপাতগন্ধো উট্ঠহিত্ৰা নাসপুটং পহরি. সো চিত্তং সংযমেতুং অসক্কোন্তো পচ্ছা ৰিপ্পটিসারী অহোসি, তস্স পন ৰিপ্পটিসারস্স উপ্পন্নাকারো ‘‘ৰরমেত’’ন্তিআদিনা পাল়িযং ৰুত্তোযেৰ. পিণ্ডপাতদানেন পনেস সত্তক্খত্তুং সুগতিং সগ্গং লোকং উপপন্নো, সত্তক্খত্তুমেৰ চ সাৰত্থিযং সেট্ঠিকুলে নিব্বত্তো, অযঞ্চস্স সত্তমো ভৰো, পচ্ছা ৰিপ্পটিসারেন পন নাপি উল়ারেসু ভোগেসু চিত্তং নমতি. ৰুত্তঞ্হেতং সংযুত্তৰরলঞ্ছকে –

‘‘যং খো সো মহারাজ সেট্ঠি গহপতি দত্ৰা পচ্ছা ৰিপ্পটিসারী অহোসি ‘ৰরমেতং পিণ্ডপাতং দাসা ৰা কম্মকরা ৰা ভুঞ্জেয্যু’ন্তি, তস্স কম্মস্স ৰিপাকেন নাস্সুল়ারায ভত্তভোগায চিত্তং নমতি, নাস্সুল়ারায ৰত্থভোগায, যানভোগায, নাস্সুল়ারানং পঞ্চন্নং কামগুণানং ভোগায চিত্তং নমতী’’তি (সং. নি. ১.১৩১).

ময্হকজাতকেপি ৰুত্তং –

‘‘ইতি মহারাজ আগন্তুকসেট্ঠি তগরসিখিপচ্চেকবুদ্ধস্স দিন্নপচ্চযেন বহুং ধনং লভি ¶ , দত্ৰা অপরচেতনং পণীতং কাতুং অসমত্থতায পণীতে ভোগে ভুঞ্জিতুং নাসক্খী’’তি (জা. অট্ঠ. ৩.৬.ময্হকজাতকৰণ্ণনা).

ভাতু পনেস একং পুত্তং (ধ. প. অট্ঠ. ২.৩৫৪) সাপতেয্যস্স কারণা জীৰিতং ৰোরোপেসি, তেন কম্মেন বহূনি ৰস্সানি নিরযে পচ্চিত্থ, সত্তক্খত্তুঞ্চ অপুত্তকো জাতো, ইদানিপি তেনেৰ কম্মেন মহারোরুৰং উপপন্নো. তেন ৰুত্তং ‘‘মহারোরুৰং উপপন্নস্স সেট্ঠিগহপতিনো ৰিযা’’তি, পুরিমপচ্ছিমচেতনাৰসেন চেত্থ অত্থো ৰেদিতব্বো. একা হি চেতনা দ্ৰে পটিসন্ধিযো ন দেতীতি.

দসআকারৰণ্ণনা

৩৪৩. আকরোতি অত্তনো অনুরূপতায সমরিযাদপরিচ্ছেদং ফলং নিব্বত্তেতীতি আকারো, কারণন্তি আহ ‘‘দসহি কারণেহী’’তি. মরিযাদত্থো হেত্থ আ-সদ্দো. ন দুস্সীলেস্ৰেৰ, অথ খো সীলৰন্তেসুপি ৰিপ্পটিসারং উপ্পাদেস্সতি. তদুভযেপি ন উপ্পাদেতব্বোতি হি দস্সেতুং ¶ অপি-সদ্দেন, পি-সদ্দেন ৰা সম্পিণ্ডনং করোতি. পটিগ্গাহকতোৰ উপ্পজ্জতীতি বলৰতরং ৰিপ্পটিসারং সন্ধায ৰুত্তং, দুব্বলো পন দেয্যধম্মতো, পরিৰারজনতোপি উপ্পজ্জতেৰ. উপ্পজ্জিতুং যুত্তন্তি উপ্পজ্জনারহং. ৰিপ্পটিসারম্পি ৰিনোদেসীতি সম্বন্ধো. তেসংযেৰাতি পাণাতিপাতীনমেৰ. যজনং নামেত্থ দানমেৰাধিপ্পেতং, ন অগ্গিজুহনন্তি আহ ‘‘দেতু ভৰ’’ন্তি. ৰিস্সজ্জতূতি মুত্তচাগৰসেন চজতু. অব্ভন্তরন্তি অজ্ঝত্তং সকসন্তানে.

সোল়সাকারৰণ্ণনা

৩৪৪. অনুমতিপক্খাদযো এৰ হেট্ঠা যঞ্ঞস্স ৰত্থুং কত্ৰা ‘‘সোল়সপরিক্খারা’’তি ৰুত্তা, ইধ পন সন্দস্সনাদিৰসেন অনুমোদনায আরদ্ধত্তা ৰুত্তং ‘‘সোল়সহি আকারেহী’’তি. দস্সেত্ৰাতি অত্তনো দেসনানুভাৰেন পচ্চক্খমিৰ ফলং দস্সেত্ৰা, অনেকৰারং পন দস্সনতো ‘‘দস্সেত্ৰা দস্সেত্ৰা’’তি ব্যাপনৰচনং, তদেৰ আভুসো মেডনট্ঠেন আমেডিতৰচনন্তি আচরিযেন (দী. নি. টী. ১.৩৪৪) ৰুত্তং. ‘‘সমাদপেত্ৰা সমাদপেত্ৰা’’তিআদীসুপি এসেৰ নযো. তমত্থন্তি দানফলৰসেন কম্মফলসম্বন্ধমত্থং. সমাদপেত্ৰাতি সুতমত্তং অকত্ৰা যথা রাজা তমত্থং সম্মদেৰ আদিযতি চিত্তে করোন্তো সুগ্গহিতং কত্ৰা গণ্হাতি, তথা সক্কচ্চং আদাপেত্ৰা.

‘‘ৰিপ্পটিসারৰিনোদনেনা’’তি ¶ ইদং নিদস্সনমত্তং. লোভদোসমোহইস্সামচ্ছরিযমানাদযোপি হি দানচিত্তস্স উপক্কিলেসা, তেসং ৰিনোদনেনপি তং ৰোদাপিতং সমুত্তেজিতং নাম হোতি তিক্খৰিসদভাৰাপত্তিতো, আসন্নতরভাৰতো পন ৰিপ্পটিসারৰিনোদনমেৰ গহিতং. পৰত্তিতে হি দানে তস্স সম্ভৰোতি. যাথাৰতো ৰিজ্জমানেহি গুণেহি হট্ঠপহট্ঠভাৰাপাদনং সম্পহংসনন্তি আহ ‘‘সুন্দর’’ন্তিআদি. ধম্মতোতি সচ্চতো. তদত্থমেৰ দস্সেতুং ‘‘ধম্মেন সমেন কারণেনা’’তি ৰুত্তং. সচ্চঞ্হি ধম্মতো অনপেতত্তা ধম্মং, উপসমচরিযভাৰতো সমং, যুত্তভাৰেন কারণন্তি চ ৰুচ্চতি.

৩৪৫. তস্মিং যঞ্ঞে রুক্খতিণচ্ছেদোপি নাম নাহোসি, কুতো পাণৰধোতি পাণৰধাভাৰস্সেৰ দল়্হীকরণত্থং, সব্বসো ৰিপরীতগ্গাহেহি অৰিদূসিততাদস্সনত্থঞ্চ পাল়িযং ‘‘নেৰ গাৰো হঞ্ঞিংসূ’’তিআদীনি ৰত্ৰাপি ¶ ‘‘ন রুক্খা ছিজ্জিংসূ’’তিআদি ৰুত্তন্তি দস্সেন্তো ‘‘যে যূপনামকে’’তিআদিমাহ. বরিহিসত্থাযাতি পরিচ্ছেদত্থায. ৰনমালাসঙ্খেপেনাতি ৰনপুপ্ফেহি গন্ধিতমালানিযামেন. এৰং আচরিযেন (দী. নি. টী. ১.৩৪৫) ৰুত্তং, ৰনপন্তিআকারেনাতি অত্থো. ভূমিযং ৰা পত্থরন্তীতি ৰেদিভূমিং পরিক্খিপন্তা তত্থ তত্থ পত্থরন্তি. মন্তাদিনা হি পরিসঙ্খতা ভূমি ৰিন্দতি অস্স লাভসক্কারেতি কত্ৰা ‘‘ৰেদী’’তি ৰুচ্চতি. তেপি রুক্খা তেপি দব্বাতি সম্বন্ধো, কম্মকত্তা চেতং দ্ৰযং, অভিহিতকম্মং ৰা. ৰত্তিচ্ছায হি যথাসত্তিং কারকা ভৰন্তি. ৰুত্তনযেন পাণৰধাভাৰস্স দল়্হীকরণত্থং, ৰিপরীতগ্গাহেন অৰিদূসিতভাৰদস্সনত্থঞ্চেতন্তি দস্সেতি কিং পনা’’তিআদিনা. অন্তোগেহদাসো অন্তোজাতো. আদিসদ্দেন ধনক্কীতকরমরানীতসামংদাসব্যূপগতানং সঙ্গহো. পুব্বমেৰাতি ভতিকরণতো পগেৰ. ধনং গহেত্ৰাতি দিৰসে দিৰসে যথাকম্মং গহেত্ৰা. ভত্তৰেতনন্তি দেৰসিকং ভত্তঞ্চেৰ মাসিকাদিপরিব্বযঞ্চ. ৰুত্তোৰাযমত্থো. তজ্জিতাতি সন্তজ্জিতা. পরিকম্মানীতি সব্বভাগিযানি কম্মানি, উচ্চাৰচানি কম্মানীতি অত্থো. পিযসমুদাচারেনেৰাতি ইট্ঠৰচনেনেৰ. যথানামৰসেনেৰাতি পাকটনামানুরূপেনেৰ. সপ্পিতেলনৰনীতদধিমধুফাণিতেন চেৰাতি এত্থ চ-সদ্দো অৰুত্তসমুচ্চযত্থো, তেন পণীতপণীতানং নানপ্পকারানং খাদনীযভোজনীযাদীনঞ্চেৰ ৰত্থযানমালাগন্ধৰিলেপনসেয্যাৰসথাদীনঞ্চ সঙ্গহো দট্ঠব্বো, তেনাহ ‘‘পণীতেহি সপ্পিতেলাদিসম্মিস্সেহেৰা’’তিআদি. তস্স তস্স কালস্স অনুরূপেহি যাগু…পে… পানকাদীহীতি সম্বন্ধো. সপ্পিআদীনন্তি সপ্পিআদীহি.

৩৪৬. পটিসামেতব্বতো, অত্তনো অত্তনো সন্তকভাৰতো চ সং নাম ধনং ৰুচ্চতি, তস্স পতীতি সপতি নিগ্গহিতলোপেন, ধনৰা, দিট্ঠধম্মিকসম্পরাযিকহিতাৰহত্তা তস্স হিতন্তি সাপতেয্যং ¶ , তদেৰ ধনং. তেনাহ ‘‘পহূতং ধন’’ন্তি. অক্খযধম্মমেৰাতি অখযসভাৰমেৰ. গামভাগেনাতি সংকিত্তনৰসেন গামে ৰা গহেতব্বভাগেন, এৰং আচরিযেন (দী. নি. টী. ১.৩৪৬) ৰুত্তং, পচ্চেকং সভাগগামকোট্ঠাসেনাতিপি অত্থো. সেসেসুপি এসেৰ নযো.

৩৪৭. যঞ্ঞাৰাটোতি ¶ খণিতাৰাটস্স অস্সমেধাদিযঞ্ঞযজনট্ঠানস্সেতং অধিৰচনং, তব্বোহারেন পন ইধ দানসালায এৰ, তায চ পুরত্থিমনগরদ্ৰারে কতায পুরত্থিমভাগে এৰাতি অত্থং দস্সেতি ‘‘পুরত্থিমতো নগরদ্ৰারে’’তিআদিনা. তং পন ঠানং রঞ্ঞো দানসালায নাতিদূরে এৰাতি আহ ‘‘যথা’’তিআদি. যতো তত্থ পাতরাসং ভুঞ্জিত্ৰা অকিলন্তরূপাযেৰ সাযন্হে রঞ্ঞো দানসালং সম্পাপুণন্তি. ‘‘দক্খিণেন যঞ্ঞাৰাটস্সা’’তিআদীসুপি এসেৰ নযো. যাগুং পিৰিত্ৰাতি হি যাগুসীসেন পাতরাসভোজনমাহ.

৩৪৮. মধুরন্তি সাদুরসং. উপরি ৰত্তব্বমত্থন্তি ‘‘অপিচ মে ভো এৰং হোতী’’তিআদিনা ৰুচ্চমানমত্থং. পরিহারেনাতি ভগৰন্তং গরুং কত্ৰা অগারৰপরিহারেন, উজুকভাৰাপনযনেন ৰা, উজুকৰুত্তিং পরিহরিত্ৰা ৰঙ্কৰুত্তিযাৰ যথাচিন্তিতমত্থং পুচ্ছন্তো এৰমাহাতি ৰুত্তং হোতি. তেনাহ ‘‘উজুকমেৰ পুচ্ছযমানো অগারৰো ৰিয হোতী’’তি.

নিচ্চদানঅনুকুলযঞ্ঞৰণ্ণনা

৩৪৯. উট্ঠাযাতি দানে উট্ঠানৰীরিযমাহ, সমুট্ঠাযাতি তস্স সাতচ্চকিরিযং. কসিৰাণিজ্জাদিকম্মানি অকরোন্তো দলিদ্দিযাদিঅনত্থাপত্তিযা নস্সিস্সতীতি অধিপ্পাযো. অপ্পসম্ভারতরো চেৰ মহপ্ফলতরো চাতি সঙ্খেপতো অট্ঠকথাযং ৰুত্তো পাল়িযং পন ‘‘অপ্পত্থতরো চ অপ্পসমারম্ভতরো চ মহপ্ফলতরো চ মহানিসংসতরো চা’’তি পাঠো. তত্থ অপ্পসম্ভারতরোতি অতিৰিয পরিত্তসম্ভারো, অসমারব্ভিযসম্ভারো. অপ্পত্থতরোতি পন অতিৰিয অপ্পকিচ্চো, অত্থো চেত্থ কিচ্চং, ত্থ-কারস্স ট্ঠ-কারং কত্ৰা ‘‘অপ্পট্ঠতরো’’তিপি পাঠো. সম্মা আরভীযতি যঞ্ঞো এতেনাতি সমারম্ভো, সম্ভারসম্ভরণৰসেন পৰত্তসত্তপীল়া, অপ্পো সমারম্ভো এতস্সাতি তথা, অযং পনাতিসযেনাতি অপ্পসমারম্ভতরো. ৰিপাকসঞ্ঞিতং মহন্তং সদিসং ফলমেতস্সাতি মহপ্ফলো, অযং পনাতিসযেনাতি মহপ্ফলতরো. উদযসঞ্ঞিতং মহন্তং নিস্সন্দাদিফলমেতস্সাতি মহানিসংসো, অযং পনাতিসযেনাতি মহানিসংসতরো. ধুৰদানানীতি ধুৰানি থিরানি অৰিচ্ছিন্নানি কত্ৰা দাতব্বদানানি. নিচ্চভত্তানীতি এত্থ ভত্তসীসেন চতুপচ্চযগ্গহণং. অনুকুলযঞ্ঞানীতি অনুকুলং কুলানুক্কমং উপাদায দাতব্বদানানি ¶ . তেনাহ ¶ ‘‘অম্হাক’’ন্তিআদি. যানি পৰত্তেতব্বানি, তানি অনুকুলযঞ্ঞানি নামাতি যোজেতব্বং. নিবদ্ধদানানীতি নিবন্ধেত্ৰা নিযমেত্ৰা পৰেণীৰসেন পৰত্তিতদানানি.

হত্থিদন্তেন কতা দন্তমযসলাকা, যত্থ দাযকানং নামং অঙ্কন্তি, ইমিনা তং নিচ্চভত্তং সলাকদানৰসেনাতি দস্সেতি. তং কুলন্তি অনাথপিণ্ডিককুলং. দালিদ্দিযেনাতি দলিদ্দভাৰেন. ‘‘একসলাকতো উদ্ধং দাতুং নাসক্খী’’তি ইমিনা একেনপি সলাকদানেন নিবদ্ধদানং উপচ্ছিন্দিতুমদত্ৰা অনুরক্খণমাহ. রঞ্ঞোতি সেতৰাহনরঞ্ঞো.

আদীনি ৰত্ৰাতি এত্থ আদিসদ্দেন ‘‘কস্মা সেনো ৰিয মংসপেসিং পক্খন্দিত্ৰা গণ্হাসী’’তি এৰমাদীনং সমসমদানে উস্সুক্কনৰচনানং সঙ্গহো. গলগ্গাহাতি গলগ্গহণা. ‘‘কম্মচ্ছেদৰসেনা’’তি ইমিনা অত্তনো অত্তনো কম্মোকাসাদানম্পি পীল়াযেৰাতি দস্সেতি. সমারম্ভসদ্দো চেত্থ পীল়নত্থোতি আহ ‘‘পীল়াসঙ্খাতো সমারম্ভো’’তি. পুব্বচেতনামুঞ্চচেতনাঅপরচেতনাসম্পত্তিযা দাযকৰসেন তীণি অঙ্গানি, ৰীতরাগতাৰীতদোসতাৰীতমোহতাপটিপত্তিযা দক্খিণেয্যৰসেন চ তীণীতি এৰং ছল়ঙ্গসমন্নাগতা হোতি দক্খিণা, ছল়ঙ্গুত্তরে নন্দমাতাসুত্তঞ্চ (অ. নি. ৬.৩৭) তস্সত্থস্স সাধকং. অপরাপরং উপ্পজ্জনকচেতনাৰসেন মহানদী ৰিয, মহোঘো ৰিয চ ইতো চিতো চ অভিসন্দিত্ৰা পক্খন্দিত্ৰা পৰত্তিতো পুঞ্ঞমেৰ পুঞ্ঞাভিসন্দো. তথাৰিধন্তি পমাণস্স কাতুং অসুকরত্তমাহ. কারণমহত্তেন ফলমহত্তম্পি ৰেদিতব্বং উপরি নজ্জা ৰুট্ঠিযা মহোঘো ৰিযাতি ৰুত্তং ‘‘তস্মা’’তিআদি.

৩৫০. নৰনৰোতি সব্বদা অভিনৰো, দিৰসে দিৰসে দাযকস্স ব্যাপারাপজ্জনতো কিচ্চপরিযোসানং নত্থীতি ৰুত্তং ‘‘একেনা’’তিআদি. যথারদ্ধস্স আৰাসস্স কতিপযেনাপি কালেন পরিসমাপেতব্বতো কিচ্চপরিযোসানং অত্থীতি আহ ‘‘পণ্ণসাল’’ন্তিআদি. মহাৰিহারেপি কিচ্চপরিযোসানস্স অত্থিতাউপাযং দস্সেতুং ‘‘একৰারং ধনপরিচ্চাগং কত্ৰা’’তি ৰুত্তং. সুত্তন্তপরিযাযেনাতি সব্বাসৰসুত্তন্তাদিপাল়িনযেন. নৰানিসংসাতি সীতপটিঘাতাদযো পটিসল্লানারামপরিযোসানা যথাপচ্চৰেক্খণং গণিতা নৰ উদযা, অপ্পমত্ততায চেতে ৰুত্তা.

যস্মা ¶ পন আৰাসং দেন্তেন নাম সব্বম্পি পচ্চযজাতং দিন্নমেৰ হোতি. যথাহ সংযুত্তাগমৰরলঞ্ছকে ‘‘সো চ সব্বদদো হোতি যো দদাতি উপস্সয’’ন্তি (সং. নি. ১.৪২), সদা পুঞ্ঞপৰড্ঢনূপাযঞ্চ এতং. ৰুত্তঞ্হি তত্থেৰ ‘‘যে দদন্তি উপস্সযং, তেসং দিৰা ¶ চ রত্তো চ, সদা পুঞ্ঞং পৰড্ঢতী’’তি (সং. নি. ১.৪৭) তথা হি দ্ৰে তযো গামে পিণ্ডায চরিত্ৰা কিঞ্চি অলদ্ধা আগতস্সাপি ছাযূদকসম্পন্নং আরামং পৰিসিত্ৰা নহাযিত্ৰা পতিস্সযে মুহুত্তং নিপজ্জিত্ৰা উট্ঠায নিসিন্নস্স কাযে বলং আহরিত্ৰা পক্খিত্তং ৰিয হোতি. বহি ৰিচরন্তস্স চ কাযে ৰণ্ণধাতু ৰাতাতপেহি কিলমতি, পতিস্সযং পৰিসিত্ৰা দ্ৰারং পিধায মুহুত্তং নিপন্নস্স ৰিসভাগসন্ততি ৰূপসম্মতি, সভাগসন্ততি পতিট্ঠাতি, ৰণ্ণধাতু আহরিত্ৰা পক্খিত্তা ৰিয হোতি. বহি ৰিচরন্তস্স চ পাদে কণ্টকো ৰিজ্ঝতি, খাণু পহরতি, সরীসপাদিপরিস্সযা চেৰ চোরভযঞ্চ উপ্পজ্জতি, পতিস্সযং পৰিসিত্ৰা দ্ৰারং পিধায নিপন্নস্স সব্বে তে পরিস্সযা ন হোন্তি, সজ্ঝাযন্তস্স ধম্মপীতিসুখং, কম্মট্ঠানং মনসি করোন্তস্স উপসমসুখঞ্চ উপ্পজ্জতি বহিদ্ধা ৰিক্খেপাভাৰতো. বহি ৰিচরন্তস্স চ কাযে সেদা মুচ্চন্তি অক্খীনি ফন্দন্তি, সেনাসনং পৰিসনক্খণে মঞ্চপীঠাদীনি ন পঞ্ঞাযন্তি, মুহুত্তং নিপন্নস্স পন অক্খিপসাদো আহরিত্ৰা পক্খিত্তো ৰিয হোতি, দ্ৰারৰাতপানমঞ্চপীঠাদীনি পঞ্ঞাযন্তি. এতস্মিঞ্চ আৰাসে ৰসন্তং দিস্ৰা মনুস্সা চতূহি পচ্চযেহি সক্কচ্চং উপট্ঠহন্তি. তেন ৰুত্তং ‘‘আৰাসং দেন্তেন…পে… হোতী’’তি ‘‘সদা পুঞ্ঞপৰড্ঢনূপাযঞ্চ এত’’ন্তি চ, তস্মা এতে যথাৰুত্তা সব্বেপি আনিসংসা ৰেদিতব্বা.

খন্ধকপরিযাযেনাতি সেনাসনক্খন্ধকে (চূল়ৰ. ২৯৪) আগতৰিনযপাল়িনযেন. তত্থ হি আগতা –

‘‘সীতং উণ্হং পটিহন্তি, ততো ৰাল়মিগানি চ;

সরীসপে চ মকসে, সিসিরে চাপি ৰুট্ঠিযো.

ততো ৰাতাতপো ঘোরো, সঞ্জাতো পটিহঞ্ঞতি;

লেণত্থঞ্চ সুখত্থঞ্চ, ঝাযিতুঞ্চ ৰিপস্সিতুং.

ৰিহারদানং সঙ্ঘস্স, অগ্গং বুদ্ধেন ৰণ্ণিতং;

তস্মা হি পণ্ডিতো পোসো, সম্পস্সং অত্থমত্তনো.

ৰিহারে ¶ কারযে রম্মে, ৰাসযেত্থ বহুস্সুতে;

তেসং অন্নঞ্চ পানঞ্চ, ৰত্থসেনাসনানি চ.

দদেয্য ¶ উজুভূতেসু, ৰিপ্পসন্নেন চেতসা;

তে তস্স ধম্মং দেসেন্তি, সব্বদুক্খপনূদনং;

যং সো ধম্মং ইধঞ্ঞায, পরিনিব্বাতি অনাসৰো’’তি. –

রাজগহসেট্ঠাদীনং ৰিহারদানেন অনুমোদনাগাথাযো পেয্যালৰসেন দস্সিতা. তত্থ সীতং উণ্হন্তি উতুৰিসভাগৰসেন ৰুত্তং. সিসিরে চাপি ৰুট্ঠিযোতি এত্থ সিসিরোতি সম্ফুসিতকৰাতো ৰুচ্চতি. ৰুট্ঠিযোতি উজুকমেঘৰুট্ঠিযো এৰ. এতানি সব্বানি ‘‘পটিহন্তী’’তি ইমিনাৰ পদেন যোজেতব্বানি.

পটিহঞ্ঞতীতি ৰিহারেন পটিহঞ্ঞতি. লেণত্থন্তি নিলীযনত্থং. সুখত্থন্তি সীতাদিপরিস্সযাভাৰেন সুখৰিহারত্থং. ‘‘ঝাযিতুঞ্চ ৰিপস্সিতু’’ন্তি ইদম্পি পদদ্ৰযং ‘‘সুখত্থঞ্চা’’তি ইমিনাৰ পদেন যোজেতব্বং. ইদঞ্হি ৰুত্তং হোতি – সুখত্থঞ্চ ৰিহারদানং, কতমসুখত্থং? ঝাযিতুং, ৰিপস্সিতুঞ্চ যং সুখং তদত্থং. অথ ৰা পরপদেনপি যোজেতব্বং – ঝাযিতুঞ্চ ৰিপস্সিতুঞ্চ ৰিহারদানং, ‘‘ইধ ঝাযিস্সতি ৰিপস্সিস্সতী’’তি দদতো ৰিহারদানং সঙ্ঘস্স অগ্গং বুদ্ধেন ৰণ্ণিতং. ৰুত্তঞ্হেতং ‘‘সো চ সব্বদদো হোতি, যো দদাতি উপস্সয’’ন্তি (সং. নি. ১.৪২).

যস্মা চ অগ্গং ৰণ্ণিতং, তস্মা হি পণ্ডিতো পোসোতি গাথা. ৰাসযেত্থ বহুস্সুতেতি এত্থ ৰিহারে পরিযত্তিবহুস্সুতে চ পটিৰেধবহুস্সুতে চ ৰাসেয্য. তেসং অন্নঞ্চাতি যং তেসং অনুচ্ছৰিকং অন্নঞ্চ পানঞ্চ ৰত্থানি চ মঞ্চপীঠাদিসেনাসনানি চ, তং সব্বং তেসু উজুভূতেসু অকুটিলচিত্তেসু. দদেয্যাতি নিদহেয্য. তঞ্চ খো ৰিপ্পসন্নেন চেতসা, ন চিত্তপ্পসাদং ৰিরাধেত্ৰা. এৰং ৰিপ্পসন্নচিত্তস্স হি তে তস্স ধম্মং দেসেন্তি…পে… পরিনিব্বাতি অনাসৰোতি অযমেত্থ অট্ঠকথানযো.

অযং পন আচরিযধম্মপালত্থেরেন (দী. নি. টী. ১.৩৫০) চেৰ আচরিযসারিপুত্তত্থেরেন (সারত্থ. টী. ৩.২৯৫) চ সংৰণ্ণিতো টীকানযো – সীতন্তি অজ্ঝত্তং ধাতুক্খোভৰসেন ৰা বহিদ্ধা ¶ উতুৰিপরিণামৰসেন ৰা উপ্পজ্জনকসীতং. উণ্হন্তি অগ্গিসন্তাপং, তস্স ৰনডাহাদীসু সম্ভৰো দট্ঠব্বো. পটিহন্তীতি পটিবাধতি যথা তদুভযৰসেন কাযচিত্তানং বাধনং ন হোতি, এৰং করোতি. সীতুণ্হব্ভাহতে হি সরীরে ৰিক্খিত্তচিত্তো ভিক্খু যোনিসো পদহিতুং ন সক্কোতি, ৰাল়মিগানীতি সীহব্যগ্ঘাদিচণ্ডমিগে ¶ . গুত্তসেনাসনঞ্হি আরঞ্ঞকম্পি পৰিসিত্ৰা দ্ৰারং পিধায নিসিন্নস্স তে পরিস্সযা ন হোন্তি. সরীসপেতি যে কেচি সরন্তে গচ্ছন্তে দীঘজাতিকে সপ্পাদিকে. মকসেতি নিদস্সনমত্তমেতং, টংসাদীনম্পি এতেনেৰ সঙ্গহো দট্ঠব্বো. সিসিরেতি সিসিরকালৰসেন, সত্তাহৰদ্দলিকাদিৰসেন চ উপ্পন্নে সিসিরসম্ফস্সে. ৰুট্ঠিযোতি যদা তদা উপ্পন্না ৰস্সৰুট্ঠিযো পটিহন্তীতি যোজনা.

ৰাতাতপো ঘোরোতি রুক্খগচ্ছাদীনং উম্মূলভঞ্জনাদিৰসেন পৰত্তিযা ঘোরো সরজঅরজাদিভেদো ৰাতো চেৰ গিম্হপরিল়াহসমযেসু উপ্পত্তিযা ঘোরো সূরিযাতপো চ পটিহঞ্ঞতি পটিবাহীযতি. লেণত্থন্তি নানারম্মণতো চিত্তং নিৰত্তেত্ৰা পটিসল্লানারামত্থং. সুখত্থন্তি ৰুত্তপরিস্সযাভাৰেন ফাসুৰিহারত্থং. ঝাযিতুন্তি অট্ঠতিংসায আরম্মণেসু যত্থ কত্থচি চিত্তং উপনিবন্ধিত্ৰা উপনিজ্ঝাযিতুং. ৰিপস্সিতুন্তি অনিচ্চাদিতো সঙ্খারে সম্মসিতুং.

ৰিহারেতি পতিস্সযে. কারযেতি কারাপেয্য. রম্মেতি মনোরমে নিৰাসসুখে. ৰাসযেত্থ বহুস্সুতেতি কারেত্ৰা পন এত্থ ৰিহারে বহুস্সুতে সীলৰন্তে কল্যাণধম্মে নিৰাসেয্য, তে নিৰাসেন্তো পন তেসং বহুস্সুতানং যথা পচ্চযেহি কিলমথো ন হোতি, এৰং অন্নঞ্চ পানঞ্চ ৰত্থসেনাসনানি চ দদেয্য উজুভূতেসু অজ্ঝাসযসম্পন্নেসু কম্মকম্মফলানং, রতনত্তযগুণানঞ্চ সদ্দহনেন ৰিপ্পসন্নেন চেতসা.

ইদানি গহট্ঠপব্বজিতানং অঞ্ঞমঞ্ঞূপকারিতং দস্সেতুং ‘‘তে তস্সা’’তি গাথমাহ. তত্থ তেতি বহুস্সুতা. তস্সাতি উপাসকস্স. ধম্মং দেসেন্তীতি সকলৰট্টদুক্খপনূদনং সদ্ধম্মং দেসেন্তি. যং সো ধম্মং ইধঞ্ঞাযাতি সো উপাসকো যং সদ্ধম্মং ইমস্মিং সাসনে সম্মাপটিপজ্জনেন জানিত্ৰা অগ্গমগ্গাধিগমনেন অনাসৰো হুত্ৰা পরিনিব্বাতি একাদসগ্গিৰূপসমেন সীতি ভৰতীতি.

সীতপটিঘাতাদিকা ¶ ৰিপস্সনাৰসানা তেরস, অন্নাদিলাভো, ধম্মস্সৰনং, ধম্মাৰবোধো, পরিনিব্বানন্তি এৰমেত্থ সত্তরস আনিসংসা ৰুত্তা.

পটিগ্গহণকানং ৰিহারৰসেন উপ্পন্নফলানুরূপম্পি দাযকানং ৰিহারদানফলং ৰেদিতব্বং. যেভুয্যেন হি কম্মসরিক্খকফলং লভন্তীতি আহ ‘‘তস্মা’’তিআদি. ‘‘সঙ্ঘস্স পন পরিচ্চত্তত্তা’’তি ইমিনা সঙ্ঘিকৰিহারমেৰ পধানৰসেন ৰদতি, সঙ্ঘিকৰিহারো নামেস চাতুদ্দিসং সঙ্ঘং ¶ উদ্দিস্স কতৰিহারো, যং সন্ধায পদভাজনিযং ৰুত্তং ‘‘সঙ্ঘিকো নাম ৰিহারো সঙ্ঘস্স দিন্নো হোতি পরিচ্চত্তো’’তি. যত্থ হি চেতিযং পতিট্ঠিতং হোতি, ধম্মস্সৰনং করীযতি, চতূহি দিসাহি ভিক্খূ আগন্ত্ৰা অপ্পটিপুচ্ছিত্ৰাযেৰ পাদে ধোৰিত্ৰা কুঞ্চিকায দ্ৰারং ৰিৰরিত্ৰা সেনাসনং পটিজগ্গিত্ৰা যথাফাসুকং গচ্ছন্তি, সো অন্তমসো চতুরতনিকাপি পণ্ণসালা হোতু, চাতুদ্দিসং সঙ্ঘং উদ্দিস্স কতৰিহারোত্ৰেৰ ৰুচ্চতি.

৩৫১. লোভং নিগ্গণ্হিতুং অসক্কোন্তস্স দুপ্পরিচ্চজা. ‘‘একভিক্খুস্স ৰা’তিআদি উপাসকানং তথা সমাদানে আচিণ্ণং, দল়্হতরং সমাদানঞ্চ দস্সেতুং ৰুত্তং, সরণং পন তেসং সামং সমাদিন্নম্পি সমাদিন্নমেৰ হোতী’’তি ৰদন্তি. সঙ্ঘস্স ৰা গণস্স ৰা সন্তিকেতি যোজনা. তত্থাতি যথাগহিতে সরণে, ‘‘তস্সা’’তিপি পাঠো, যথাগহিতসরণস্সাতি অত্থো. নত্থি পুনপ্পুনং কত্তব্বতাতি ৰিঞ্ঞূজাতিকে সন্ধায ৰুত্তং. ৰিঞ্ঞূজাতিকানমেৰ হি সরণাদিঅত্থকোসল্লানং সুৰণ্ণঘটে সীহৰসা ৰিয অকুপ্পং সরণগমনং তিট্ঠতি. ‘‘জীৰিতপরিচ্চাগমযং পুঞ্ঞ’’ন্তি চ ইদং ‘‘সচে ত্ৰং যথাগহিতং সরণং ন ভিন্দিস্সতি, এৰাহং তং মারেমী’’তি কামং কোচি তিণ্হেন সত্থেন জীৰিতা ৰোরোপেয্য, তথাপি ‘‘নেৰাহং বুদ্ধং ‘ন বুদ্ধো’তি, ধম্মং ‘ন ধম্মো’তি, সঙ্ঘং ‘ন সঙ্ঘো’তি ৰদামী’’তি দল়্হতরং কত্ৰা গহিতসরণস্স ৰসেন ৰুত্তং. ‘‘সগ্গসম্পত্তিং দেতী’’তি নিদস্সনমত্তমেতং. ফলানিসংসানি পনস্স সরণগমনৰণ্ণনাযং (দী. নি. অট্ঠ. ১.২৫০ সরণগমনকথা) ৰুত্তানেৰ.

৩৫২. ৰক্খমাননযেন ৰেরহেতুতায ৰেরং ৰুচ্চতি পাণাতিপাতাদিপাপধম্মো, তং মণতি ‘‘মযি ইধ ঠিতায কথমাগচ্ছসী’’তি তজ্জেন্তী ৰিয নিৰারেতীতি ¶ ৰেরমণী, ততো ৰা পাপধম্মতো ৰিরমতি এতাযাতি ‘‘ৰিরমণী’’তি ৰত্তব্বে নিরুত্তিনযেন ই-কারস্স এ-কারং কত্ৰা ‘‘ৰেরমণী’’তি ৰুত্তং. খুদ্দকপাঠট্ঠকথাযং পনাহ ‘‘ৰেরমণিসিক্খাপদং, ৰিরমণিসিক্খাপদন্তি দ্ৰিধাসজ্ঝাযং করোন্তী’’তি (খু. পা. অট্ঠ. সাধারণৰিভাৰনা) কুসলচিত্তসম্পযুত্তাৰেত্থ ৰিরতি অধিপ্পেতা, ন ফলসম্পযুত্তা যঞ্ঞাধিকরণতো. অসমাদিন্নসীলস্স সম্পত্ততো যথূপট্ঠিতৰীতিক্কমিতব্বৰত্থুতো ৰিরতি সম্পত্তৰিরতি. সমাদানৰসেন উপ্পন্না ৰিরতি সমাদানৰিরতি. সেতু ৰুচ্চতি অরিযমগ্গো, তপ্পরিযাপন্না হুত্ৰা পাপধম্মানং সমুচ্ছেদৰসেন ঘাতনপ্পৰত্তা ৰিরতি সেতুঘাতৰিরতি. অঞ্ঞত্র ‘‘সমুচ্ছেদৰিরতী’’তিপি ৰুত্তা. ইদানি তা সরূপতো দস্সেতুং ‘‘তত্থা’’তিআদি ৰুত্তং. জাতি…পে… দীনীতি অপদিসিতব্বজাতিগোত্তকুলাদীনি. আদিসদ্দেন ৰযবাহুসচ্চাদীনং সঙ্গহো ¶ . পরিহরতীতি অৰীতিক্কমৰসেন পরিৰজ্জেতি, সীহল়দীপে চক্কনউপাসকস্স ৰিয সম্পত্তৰিরতি ৰেদিতব্বা.

‘‘পাণং ন হনামী’’তিআদীসু আদযত্থেন ইতি-সদ্দেন, ৰিকপ্পত্থেন ৰা-সদ্দেন ৰা ‘‘অদিন্নং নাদিযামি, অদিন্নাদানা ৰিরমামি, ৰেরমণিং সমাদিযামী’’তি এৰমাদীনং পচ্চেকমত্থানং সঙ্গহো দট্ঠব্বো. এৰঞ্চ কত্ৰা ‘‘সিক্খাপদ’’ মিচ্চেৰ অৰত্ৰা ‘‘সিক্খাপদানী’’তি ৰুত্তং. পাণাতিপাতা ৰেরমণিন্তি সম্বন্ধো. সমাদিযামীতি সম্মা আদিযামি, অৰীতিক্কমাধিপ্পাযেন, অখণ্ডা’ ছিদ্দা’ কম্মাসা’ সবলকারিতায চ গণ্হামীতি ৰুত্তং হোতি. উত্তরৰড্ঢমানপব্বতৰাসিউপাসকস্স (ম. নি. অট্ঠ. ১.৮৯ কুসলকম্মপথৰণ্ণনা; সং. নি. অট্ঠ. ২.২.১০৯-১১১; ধ. স. অট্ঠ. কুসলকম্মপথৰণ্ণনা) ৰিয সমাদানৰিরতি ৰেদিতব্বা.

মগ্গসম্পযুত্তাতি সম্মাদিট্ঠিযাদিমগ্গসম্পযুত্তা. ইদানি তত্থা তত্থাগতেসু ধম্মতো, কোট্ঠাসতো, আরম্মণতো, ৰেদনাতো, মূলতো, আদানতো, ভেদতোতিআদিনা অনেকধা ৰিনিচ্ছযেসু সঙ্খেপেনেৰ আরম্মণতো ৰিনিচ্ছযং দস্সেতুং ‘‘তত্থা’’তিআদি ৰুত্তং. পুরিমা দ্ৰেতি সম্পত্তসমাদানৰিরতিযো. ‘‘জীৰিতিন্দ্রিযাদিৰত্থূ’’তি পরমত্থতো পাণো ৰুত্তো, পঞ্ঞত্তিতো পন ‘‘সত্তাদিৰত্থূ’’তি ৰত্তব্বং, এৰঞ্হি ‘‘সত্তেযেৰ আরভিত্ৰা পাণাতিপাতা, অব্রহ্মচরিযা চ ৰিরমতী’’তি (খু. পা. অট্ঠ. একতানানতাদিৰিনিচ্ছয) খুদ্দকাগমট্ঠকথাৰচনেন সংসন্দতি সমেতীতি. আদিসদ্দেন চেত্থ সত্তসঙ্খারৰসেন ¶ অদিন্নৰত্থু, তথা ফোট্ঠব্বৰত্থু, ৰিতথৰত্থু, সঙ্খারৰসেনেৰ সুরামেরযৰত্থূতি এতেসং সঙ্গহো দট্ঠব্বো. তং আরম্মণং কত্ৰা পৰত্তন্তীতি যথাৰুত্তং ৰীতিক্কমৰত্থুং আলম্বিত্ৰা ৰীতিক্কমনচেতনাসঙ্খাতৰিরমিতব্বৰত্থুতো ৰিরমণৰসেন পৰত্তন্তি. পচ্ছিমাতি সেতুঘাতৰিরতি. নিব্বানারম্মণাৰ তথাপি কিচ্চসাধনতো. ইমিনা পন তত্থেৰ আগতেসু তীসু আচরিযৰাদেসু দ্ৰে পটিবাহিত্ৰা একস্সেৰানুজাননং ৰেদিতব্বং.

‘‘সম্পত্তৰিরতি, হি সমাদানৰিরতি চ যদেৰ পজহতি, তং অত্তনো পাণাতিপাতাদিঅকুসলমেৰারম্মণং কত্ৰা পৰত্ততী’’তি কেচি ৰদন্তি. ‘‘সমাদানৰিরতি যতো ৰিরমতি, তং অত্তনো ৰা পরেসং ৰা পাণাতিপাতাদিঅকুসলমেৰালম্বণং কত্ৰা পৰত্ততি. সম্পত্তৰিরতি পন যতো ৰিরমতি, তেসং পাণাতিপাতাদীনং আলম্বণানেৰ আরম্মণং কত্ৰা পৰত্ততী’’তি অপরে. ‘‘দ্ৰযম্পি চেতং যতো পাণাতিপাতাদিঅকুসলতো ৰিরমতি, তেসমারম্মণভূতং ৰীতিক্কমিতব্বৰত্থুমেৰালম্বণং কত্ৰা পৰত্ততি. পুরিমপুরিমপদত্থঞ্হি ৰীতিক্কমৰত্থুমালম্বণং ¶ কত্ৰা পচ্ছিমপচ্ছিমপদত্থতো ৰিরমিতব্বৰত্থুতো ৰিরমতী’’তি অঞ্ঞে. পঠমৰাদো চেত্থ অযুত্তোযেৰ. কস্মা? তস্স অত্তনো পাণাতিপাতাদিঅকুসলস্স পচ্চুপ্পন্নাভাৰতো, অবহিদ্ধাভাৰতো চ. সিক্খাপদৰিভঙ্গে হি পঞ্চন্নং সিক্খাপদানং পচ্চুপ্পন্নারম্মণতা, বহিদ্ধারম্মণতা চ ৰুত্তা. তথা দুতিযৰাদোপি অযুত্তোযেৰ. কস্মা? পুরিমৰাদেন সম্মিস্সত্তা, পরেসং পাণাতিপাতাদিঅকুসলারম্মণভাৰে চ অনেকন্তি কত্তা, দ্ৰিন্নং আলম্বণপ্পভেদৰচনতো চ. ততিযৰাদো পন যুত্তো সব্বভাণকানমভিমতো, তস্মা তদেৰ অনুজানাতীতি দট্ঠব্বং. তেন ৰুত্তং ‘‘তীসু আচরিযৰাদেসু দ্ৰে পটিবাহিত্ৰা একস্সেৰানুজাননং ৰেদিতব্ব’’ন্তি.

এত্থাহ – যজ্জেতং ৰিরতিদ্ৰযং জীৰিতিন্দ্রিযাদিৰীতিক্কমিতব্বৰত্থুমেৰালম্বণং কত্ৰা পৰত্তেয্য, এৰং সতি অঞ্ঞং চিন্তেন্তো অঞ্ঞং করেয্য, যঞ্চ পজহতি, তং ন জানেয্যাতি অয’মনধিপ্পেতো অত্থো আপজ্জতীতি? ৰুচ্চতে – ন হি কিচ্চসাধনৰসেন পৰত্তেন্তো ‘‘অঞ্ঞং চিন্তেন্তো অঞ্ঞং করোতী’’তি ৰা ‘‘যঞ্চ পজহতি, তং ন জানাতী’’তি ৰা ৰুচ্চতি. যথা পন অরিযমগ্গো নিব্বানারম্মণোৰ কিলেসে পজহতি, এৰং জীৰিতিন্দ্রিযাদিৰত্থারম্মণম্পেতং ৰিরতিদ্ৰযং পাণাতিপাতাদীনি দুস্সীল্যানি পজহতি. তেনাহু পোরাণা –

‘‘আরভিত্ৰান ¶ অমতং, জহন্তো সব্বপাপকে;

নিদস্সনঞ্চেত্থ ভৰে, মগ্গট্ঠোরিযপুগ্গলো’’তি. (খু. পা. অট্ঠ. একতানানতাৰিনিচ্ছয);

ইদানি সঙ্খেপেনেৰ আদানতো, ভেদতো ৰা ৰিনিচ্ছযং দস্সেতুং ‘‘এত্থা’’তিআদি ৰুত্তং. ‘‘পঞ্চঙ্গসমন্নাগতং সীলং সমাদিযামী’’তিআদিনা একতো একজ্ঝং গণ্হাতি. এৰম্পি হি কিচ্চৰসেন এতাসং পঞ্চৰিধতা ৰিঞ্ঞাযতি. সব্বানিপি ভিন্নানি হোন্তি একজ্ঝং সমাদিন্নত্তা. ন হি তদা পঞ্চঙ্গিকত্তং সীলস্স সম্পজ্জতি. যং তু ৰীতিক্কন্তং, তেনেৰ কম্মবদ্ধো. ‘‘পাণাতিপাতা ৰেরমণিসিক্খাপদং সমাদিযামী’’তিআদিনা একেকং ৰিসুং ৰিসুং গণ্হাতি. ‘‘ৰেরমণিসিক্খাপদ’’ন্তি চ ইদং সমাসভাৰেন খুদ্দকপাঠট্ঠকথাযং (খু. পা. অট্ঠ. সাধারণৰিভাৰনা) ৰুত্তং, পাল়িপোত্থকেসু পন ‘‘ৰেরমণি’’ন্তি নিগ্গহিতন্তমেৰ ব্যাসভাৰেন দিস্সতি. গহট্ঠৰসেন চেতং ৰুত্তং. সামণেরানং পন যথা তথা ৰা সমাদানে একস্মিং ভিন্নে সব্বানিপি ভিন্নানি হোন্তি পারাজিকাপত্তিতো. ইতি একজ্ঝং, পচ্চেকঞ্চ সমাদানে ৰিসেসো ইধ ৰুত্তো, খুদ্দকাগমট্ঠকথাযং পন ‘‘একজ্ঝং সমাদিযতো একাযেৰ ৰিরতি একাৰ ¶ চেতনা হোতি, কিচ্চৰসেন পনেতাসং পঞ্চৰিধত্তং ৰিঞ্ঞাযতি. পচ্চেকং সমাদিযতো পন পঞ্চেৰ ৰিরতিযো, পঞ্চ চ চেতনা হোন্তী’’তি (খু. পা. অট্ঠ. একতানানতাদিৰিনিচ্ছয) অযং ৰিসেসো ৰুত্তো. ভেদেপি ‘‘যথা তথা ৰা সমাদিযন্তু, সামণেরানং একস্মিং ভিন্নে সব্বানিপি ভিন্নানি হোন্তি. পারাজিকট্ঠানিযানি হি তানি তেসং. যং তু ৰীতিক্কন্তং হোতি, তেনেৰ কম্মবদ্ধো. গহট্ঠানং পন একস্মিং ভিন্নে একমেৰ ভিন্নং হোতি, যতো তেসং তংসমাদানেনেৰ পুন পঞ্চঙ্গিকত্তং সীলস্স সম্পজ্জতী’’তি ৰুত্তং. যথাৰুত্তোপি দীঘভাণকানং ৰাদো অপরেৰাদো নাম তত্থ কতো.

সেতুঘাতৰিরতিযা পন ভেদো নাম নত্থি পটিপক্খসমুচ্ছিন্দনেন অকুপ্পসভাৰত্তা. তদেৰত্থং দস্সেন্তেন ‘‘ভৰন্তরেপী’’তিআদি ৰুত্তং. তত্থ ‘‘ভৰন্তরেপী’’তি ইমিনা অত্তনো অরিযভাৰং অজানন্তোপীতি অত্থং ৰিঞ্ঞাপেতি. জীৰিতহেতুপি, পগেৰ অঞ্ঞহেতু. ‘‘নেৰ পাণং হনতি, ন সুরং পিৰতী’’তি ইদং মজ্ঝেপেয্যালনিদ্দিট্ঠং, মিগপদৰল়ঞ্জননযেন ৰা ৰুত্তং ¶ . সুরন্তি চ নিদস্সনমত্তং. সব্বম্পি হি সুরামেরযমজ্জপমাদট্ঠানানুযোগং ন করোতি. ‘‘মজ্জন্তি তদেৰ উভযং, যং ৰা পনঞ্ঞম্পি সুরাসৰৰিনিমুত্তং মদনীয’’ন্তি (সং. নি. অট্ঠ. ৩.৫.১১৩৪) সংযুত্তমহাৰগ্গট্ঠকথাযং ৰুত্তং. খুদ্দকপাঠট্ঠকথাযঞ্চ ‘‘তদুভযমেৰ মদনীযট্ঠেন মজ্জং, যং ৰা পনঞ্ঞম্পি কিঞ্চি অত্থি মদনীযং, যেন পীতেন মত্তো হোতি পমত্তো, ইদং ৰুচ্চতি মজ্জ’’ন্তি (খু. পা. অট্ঠ. পুরিমপঞ্চসিক্খাপদৰণ্ণনা) ‘‘সচে পিস্সা’’তিআদিনা তত্থেৰ ৰিসেসদস্সনং, অজানন্তস্সপি খীরমেৰ মুখং পৰিসতি, ন সুরা, পগেৰ জানন্তস্স. কোঞ্চসকুণানন্তি কুন্তসকুণানং. সচেপি মুখে খীরমিস্সকে উদকে পক্খিপন্তীতি যোজেতব্বং. ‘‘ন চেত্থ উপমোপমেয্যানং সম্বদ্ধতা সিযা কোঞ্চসকুণানং যোনিসিদ্ধত্তা’’তি কোচি ৰদেয্যাতি আহ ‘‘ইদ’’ন্তিআদি. যোনিসিদ্ধন্তি মনুস্সতিরচ্ছানানং উদ্ধং তিরিযমেৰ দীঘতা ৰিয, বকানং মেঘসদ্দেন, কুক্কুটীনং ৰাতেন গব্ভগ্গহণং ৰিয চ জাতিসিদ্ধং, ইতি কোচি ৰদেয্য চেতি অত্থো. ‘‘চেৰা’’তিপি পাঠং ৰত্ৰা সমুচ্চযত্থমিচ্ছন্তি কেচি. ধম্মতাসিদ্ধন্তি বোধিসত্তে কুচ্ছিগতে বোধিসত্তমাতু সীলং ৰিয, ৰিজাতে তস্সা দিৰঙ্গমনং ৰিয চ সভাৰেন সিদ্ধং, মগ্গধম্মতায ৰা অরিযমগ্গানুভাৰেন সিদ্ধন্তি ৰেদিতব্বন্তি ৰিস্সজ্জেয্যাতি অত্থো.

দিট্ঠিজুকরণং নাম ভারিযং দুক্করং, তস্মা সরণগমনং সিক্খাপদসমাদানতো মহট্ঠতরমেৰ, ন অপ্পট্ঠতরন্তি অধিপ্পাযো. এতন্তি সিক্খাপদং. যথা ৰা তথা ৰা গণ্হন্তস্সাপীতি আদরং গারৰমকত্ৰা সমাদিযন্তস্সাপি. সাধুকং গণ্হন্তস্সাপীতি সক্কচ্চং সীলানি ¶ সমাদিযন্তস্সাপি অপ্পট্ঠতরমেৰ, অপ্পসমারম্ভতরঞ্চ, ন দিগুণং উস্সাহো করণীযোতি ৰুত্তং হোতি. সীলং ইধ অভযদানতায দানং, অনৰসেসং ৰা সত্তনিকাযং দযতি রক্খতীতি দানং. অযমেত্থ অট্ঠকথামুত্তকনযো – সরণং উপগতেন কাযৰাচাচিত্তেহি সক্কচ্চং ৰত্থুত্তযপূজা কাতব্বা, তত্থ চ সংকিলেসো সাধুকং পরিহরিতব্বো, সিক্খাপদানি পন সমাদানমত্তং, সম্পত্তৰত্থুতো ৰিরমণমত্তঞ্চাতি সরণগমনতো সীলস্স অপ্পট্ঠতরতা, অপ্পসমারম্ভতরতা চ ৰেদিতব্বা. সব্বেসং সত্তানং জীৰিতদানাদিনা দণ্ডনিধানতো, সকললোকিযলোকুত্তর গুণাধিট্ঠানতো চস্স মহপ্ফলতরতা, মহানিসংসতরতা চ দট্ঠব্বাতি.

তমত্থং ¶ পাল়িযা সাধেন্তো ‘‘ৰুত্তঞ্হেত’’ন্তিআদিমাহ. তত্থ ‘‘অগ্গানী’’তি ঞাতত্তা অগ্গঞ্ঞানি. চিররত্ততায ঞাতত্তা রত্তঞ্ঞানি. ‘‘অরিযানং সাধূনং ৰংসানী’’তি ঞাতত্তা ৰংসঞ্ঞানি. পুরিমকানং আদিপুরিসানং এতানীতি পোরাণানি. সব্বসো কেনচিপি পকারেন সাধূহি ন কিণ্ণানি ন ছড্ডিতানীতি অসংকিণ্ণানি. অযঞ্চ নযো নেসং যথা অতীতে, এৰং এতরহি, অনাগতে চাতি আহ ‘‘অসংকিণ্ণপুব্বানী’’তিআদি. অতীতে হি কালে অসংকিণ্ণভাৰস্স ‘‘অসংকিণ্ণপুব্বানী’’তি নিদস্সনং, পচ্চুপ্পন্নে ‘‘ন সঙ্কিযন্তী’’তি, অনাগতে ‘‘ন সঙ্কিযিস্সন্তী’’তি. অতোযেৰ অপ্পটিকুট্ঠানি ন পটিক্খিত্তানি. ন হি কদাচিপি ৰিঞ্ঞূ সমণব্রাহ্মণা হিংসাদিপাপধম্মং অনুজানন্তি. অপরিমাণানং সত্তানং অভযং দেতীতি সব্বেসু ভূতেসু নিহিতদণ্ডত্তা সকলস্সপি সত্তনিকাযস্স ভযাভাৰং দেতি. ন হি অরিযসাৰকতো কস্সচি ভযং হোতি. অৰেরন্তি ৰেরাভাৰং. অব্যাপজ্ঝন্তি নিদ্দুক্খতং. ‘‘অপরিমাণানং সত্তানং অভযং দত্ৰা’’তিআদি আনিসংসদস্সনং, হেতুম্পি চেত্থ ত্ৰা-সদ্দো যথা ‘‘মাতরং সরিত্ৰা রোদতী’’তি.

যং কিঞ্চি চজনলক্খণং, সব্বং তং যঞ্ঞোতি আহ ‘‘ইদঞ্চ পনা’’তিআদি. ন নু চ পঞ্চসীলং সব্বকালিকং. অবুদ্ধুপ্পাদকালেপি হি ৰিঞ্ঞূ তং সমাদিযন্তি, ন চ একন্ততো ৰিমুত্তাযতনং বাহিরকানম্পি সমাদিন্নত্তা. সরণগমনং পন বুদ্ধুপ্পাদহেতুকং, একন্ততো চ ৰিমুত্তাযতনং, কথং তত্থ সরণগমনতো পঞ্চসীলস্স মহপ্ফলতাতি আহ ‘‘কিঞ্চাপী’’তিআদি. জেট্ঠকন্তি মহপ্ফলভাৰেন উত্তমং. ‘‘সরণগমনেযেৰ পতিট্ঠাযা’’তি ইমিনা তস্স সীলস্স সরণগমনেন অভিসঙ্খতত্তা ততো মহপ্ফলতং, তথা অনভিসঙ্খতস্স চ সীলস্স অপ্পফলতং দস্সেতি.

৩৫৩. ঈদিসমেৰাতি এৰং সংকিলেসপটিপক্খমেৰ হুত্ৰা. ননু চ পঠমজ্ঝানাদিযঞ্ঞাযেৰ ¶ দেসেতব্বা, কস্মা বুদ্ধুপ্পাদতো পট্ঠায দেসনমারভতীতি অনুযোগং পরিহরিতুং ‘‘তিৰিধ…পে… দস্সেতুকামো’’তি ৰুত্তং. তিৰিধসীলপারিপূরিযং ঠিতস্স হি নেসং যঞ্ঞানং অপ্পট্ঠতরতা, মহপ্ফলতরতা চ হোতি, তস্মা তং দস্সেতুকামত্তা বুদ্ধুপ্পাদতো পট্ঠায দেসনং আরভতীতি ৰুত্তং হোতি. তেনাহ ‘‘তত্থা’’তিআদি. হেট্ঠা ¶ ৰুত্তেহি গুণেহীতি এত্থ ‘‘সো তং ধম্মং সুত্ৰা তথাগতে সদ্ধং পটিলভতী’’তিআদিনা (দী. নি. ১.১৯১) হেট্ঠা ৰুত্তা সরণগমনং, সীলসম্পদা, ইন্দ্রিযেসু গুত্তদ্ৰারতাতি এৰমাদযো গুণা ৰেদিতব্বা. পঠমং ঝানং নিব্বত্তেন্তো ন কিলমতীতি যোজনা. তানীতি পঠমজ্ঝানাদীনি. ‘‘পঠমং ঝান’’ন্তিআদিনা পাল়িযং পণীতানমেৰ ঝানানং উক্কট্ঠনিদ্দেসো কতোতি মন্তৰা ‘‘একং কপ্পং, অট্ঠ কপ্পে’’তিআদি ৰুত্তং, মহাকপ্পৰসেন চেত্থ অত্থো. হীনং পন পঠমং ঝানং অসঙ্খ্যেয্যকপ্পস্স ততিযভাগং আযুং দেতি. মজ্ঝিমং উপড্ঢকপ্পং. হীনং দুতিযং ঝানং দ্ৰে কপ্পানি, মজ্ঝিমং চত্তারীতিআদিনা অত্থো নেতব্বো. অপিচ যস্মা পণীতানিযেৰেত্থ ঝানানি অধিপ্পেতানি মহপ্ফলতরভাৰদস্সনপরত্তা দেসনায, তস্মা ‘‘পঠমং ঝানং একং কপ্প’’ন্তিআদিনা পণীতানেৰ ঝানানি নিদ্দিট্ঠানীতি দট্ঠব্বং.

তদেৰাতি চতুত্থজ্ঝানমেৰ. চতুক্কনযেন হি দেসনা আগতা. যদি এৰং কথং আরুপ্পতাতি আহ ‘‘আকাসানঞ্চাযতনাদিসমাপত্তিৰসেন ভাৰিত’’ন্তি, তথা ভাৰিতত্তা চতুত্থজ্ঝানমেৰ আরুপ্পং হুত্ৰা ৰীসতিকপ্পসহস্সাদীনি আযুং দেতীতি অধিপ্পাযো. অযং আচরিযস্স মতি. অথ ৰা তদেৰাতি আরুপ্পসঙ্খাতং চতুত্থজ্ঝানমেৰ, তং পন কস্মা ৰীসতিকপ্পসহস্সাদীনি আযুং দেতীতি ৰুত্তং ‘‘আকাসানঞ্চাযতনাদিসমাপত্তিৰসেন ভাৰিত’’ন্তি, তথা ভাৰিতত্তা এৰং দেতীতি অধিপ্পাযো. অপরো নযো ‘‘তদেৰা’’তি ৰুত্তে রূপাৰচরচতুত্থজ্ঝানমেৰাতি অত্থো আপজ্জেয্যাতি তং নিৰত্তেতুং ‘‘আকাসানঞ্চাযতনাদিসমাপত্তিৰসেন ভাৰিত’’ন্তি আহ, তথা ভাৰিতং অঙ্গসমতায চতুত্থজ্ঝানসঙ্খাতং আরুপ্পজ্ঝানমেৰাধিপ্পেতন্তি ৰুত্তং হোতি.

সম্মদেৰ নিচ্চসঞ্ঞাদিপটিপক্খৰিধমনৰসেন পৰত্তমানা পুব্বভাগিযে এৰ বোধিপক্খিযধম্মে সমানেন্তী ৰিপস্সনা ৰিপস্সকপুগ্গলস্স অনপ্পকং পীতিসোমনস্সং সমাৰহতীতি ৰুত্তং ‘‘ৰিপস্সনাসুখসদিসস্স পন সুখস্স অভাৰা মহপ্ফল’’ন্তি. যথাহ ধম্মরাজা ধম্মপদে –

‘‘যতো ¶ যতো সম্মসতি, খন্ধানং উদযব্বযং;

লভতী পীতিপামোজ্জং, অমতং তং ৰিজানত’’ন্তি. (ধ. প. ৩৭৪);

যস্মা ¶ পনাযং দেসনা ইমিনা অনুক্কমেন ইমানি ঞাণানি নিব্বত্তেন্তস্স ৰসেন পৰত্তিতা, তস্মা ‘‘ৰিপস্সনাঞাণে পতিট্ঠাযা’’তিআদিনা হেট্ঠিমং হেট্ঠিমং উপরিমস্স উপরিমস্স পতিট্ঠাভূতং কত্ৰা ৰুত্তং. সমানরূপনিম্মানং নাম মনোমযিদ্ধিযা অঞ্ঞেহি অসাধারণকিচ্চন্তি আহ ‘‘অত্তনো…পে… মহপ্ফলা’’তি. হত্থিঅস্সাদিৰিৰিধরূপকরণং ৰিকুব্বনং, তস্স দস্সনসমত্থতায. ইচ্ছিতিচ্ছিতট্ঠানং নাম পুরিমজাতীসু ইচ্ছিতিচ্ছিতো খন্ধপদেসো. অরহত্তমগ্গেনেৰ মগ্গসুখং নিট্ঠিতন্তি ৰুত্তং ‘‘অতি…পে… মহপ্ফল’’ন্তি. সমাপেন্তোতি পরিযোসাপেন্তো.

কূটদন্তউপাসকত্তপটিৰেদনাদিকথাৰণ্ণনা

৩৫৪-৮. ‘‘অভিক্কন্তং ভো গোতমা’’তিআদি দেসনায পসাদৰচনং, ‘‘এসাহং ভৰন্ত’’ন্তিআদি পন সরণগমনৰচনন্তি তদুভযসম্বন্ধং দস্সেন্তো ‘‘দেসনাযা’’তিআদিমাহ. তনূতি মন্দো কাযিকচেতসিকসুখসমুপব্যূহতো. সব্বে তে পাণযোতি ‘‘সত্ত চ উসভসতানী’’তিআদিনা ৰুত্তে সব্বে তে পাণিনো. তং পৰত্তিন্তি তেসং পাণীনং মোচনাকারং. আকুলভাৰোতি ভগৰতো সন্তিকে ধম্মস্স সুতত্তা পাণীসু অনুদ্দযং উপট্ঠপেত্ৰা ঠিতস্স ‘‘কথঞ্হি নাম মযা তাৰ বহূ পাণিনো মারণত্থায বন্ধাপিতা’’তি চিত্তে পরিব্যাকুলভাৰো, যস্মা অত্থি, তস্মা ন দেসেতীতি যোজনা, ‘‘উদপাদী’’তিপি পাঠো. সুত্ৰাতি ‘‘মুত্তা ভো তে পাণযো’’তি আরোচিতৰচনং সুত্ৰা. চিত্তচারোতি চিত্তপ্পৰত্তি. ‘‘কল্লচিত্তং মুদুচিত্তং ৰিনীৰরণচিত্তং উদগ্গচিত্তং পসন্নচিত্ত’’ন্তি ইদং পদপঞ্চকং সন্ধায‘‘কল্লচিত্তন্তিআদী’’তি ৰুত্তং. তত্থ ‘‘দানকথং সীলকথ’’ন্তিআদিনা ৰুত্তায অনুপুব্বিকথায আনুভাৰেন. কামচ্ছন্দৰিগমেন কল্লচিত্ততা অরোগচিত্ততা, ব্যাপাদৰিগমেন মেত্তাৰসেন মুদুচিত্ততা অকথিনচিত্ততা, উদ্ধচ্চকুক্কুচ্চৰিগমেন ৰিক্খেপাভাৰতো ৰিনীৰরণচিত্ততা তেহি অমলীনচিত্ততা, থিনমিদ্ধৰিগমেন সম্পগ্গহণৰসেন উদগ্গচিত্ততা অমলীনচিত্ততা, ৰিচিকিচ্ছাৰিগমেন সম্মাপটিপত্তিযা অৰিমুত্ততায পসন্নচিত্ততা অনাৰিলচিত্ততা চ হোতীতি আহ ‘‘অনুপুব্বিকথানুভাৰেন ৰিক্খম্ভিতনীৰরণতং সন্ধায ৰুত্ত’’ন্তি. যং পনেত্থ অত্থতো অৰিভত্তং, তং সুৰিঞ্ঞেয্যমেৰ.

ইতি ¶ ¶ সুমঙ্গলৰিলাসিনিযা দীঘনিকাযট্ঠকথায পরমসুখুমগম্ভীরদুরনুবোধত্থপরিদীপনায সুৰিমলৰিপুলপঞ্ঞাৰেয্যত্তিযজননায সাধুৰিলাসিনিযা নাম লীনত্থপকাসনিযা কূটদন্তসুত্তৰণ্ণনায লীনত্থপকাসনা.

কূটদন্তসুত্তৰণ্ণনা নিট্ঠিতা.

৬. মহালিসুত্তৰণ্ণনা

ব্রাহ্মণদূতৰত্থুৰণ্ণনা

৩৫৯. এৰং ¶ ¶ কূটদন্তসুত্তং সংৰণ্ণেত্ৰা ইদানি মহালিসুত্তং সংৰণ্ণেন্তো যথানুপুব্বং সংৰণ্ণনোকাসস্স পত্তভাৰং ৰিভাৰেতুং, কূটদন্তসুত্তস্সানন্তরং সঙ্গীতস্স সুত্তস্স মহালিসুত্তভাৰং ৰা পকাসেতুং ‘‘এৰং মে সুতং…পে… ৰেসালিযন্তি মহালিসুত্ত’’ন্তি আহ. পুনপ্পুনং ৰিসালভাৰূপগমনতোতি এত্থাযং সঙ্খেপো – বারাণসিরঞ্ঞো কির অগ্গমহেসিযা মংসপেসিগব্ভেন দ্ৰে দারকা নিব্বত্তা ধীতা চ পুত্তো চ, তেসং অঞ্ঞমঞ্ঞং ৰিৰাহেন সোল়সক্খত্তুং পুত্তধীতুৰসেন দ্ৰে দ্ৰে দারকা ৰিজাতা. ততো তেসং দারকানং যথাক্কমং ৰড্ঢেন্তানং পচ্চেকং সপরিৰারানং আরামুয্যাননিৰাসট্ঠানপরিৰারসম্পত্তিং গহেতুং অপ্পহোনকতায নগরং তিক্খত্তুং গাৰুতন্তরেন গাৰুতন্তরেন পরিক্খিপিংসু, এৰং তস্স পুনপ্পুনং তিপাকারপরিক্খেপেন ৰিসালভাৰমুপগতত্তা ‘‘ৰেসালী’’ত্ৰেৰ নামং জাতং. তেন ৰুত্তং ‘‘পুনপ্পুনং ৰিসালভাৰূপগমনতো ৰেসালীতি লদ্ধনামকে নগরে’’তি. ৰিত্থারকথা চেত্থ মহাসীহনাদসুত্তৰণ্ণনায, (ম. নি. অট্ঠ. ১.১৪৬) রতনসুত্তৰণ্ণনায (খু. পা. অট্ঠ. ৰেসালিৰত্থু; সু. নি. অট্ঠ. ১.রতনসুত্তৰণ্ণনা) চ গহেতব্বা. বহিনগরেতি নগরতো বহি, ন অম্বপালিৰনং ৰিয অন্তোনগরস্মিং. সযংজাতন্তি সযমেৰ জাতং অরোপিমং. মহন্তভাৰেনাতি রুক্খগচ্ছানং, ঠিতোকাসস্স চ মহন্তভাৰেন. তেনেৰাহ ‘‘হিমৰন্তেন সদ্ধিং একাবদ্ধং হুত্ৰা’’তি. যং পন ৰেনযিকানং মতেন ৰিনযট্ঠকথাযং ৰুত্তং –

‘‘তত্থ মহাৰনং নাম সযংজাতং অরোপিমং সপরিচ্ছেদং মহন্তং ৰনং. কপিলৰত্থুসামন্তা পন মহাৰনং হিমৰন্তেন সহ একাবদ্ধং অপরিচ্ছেদং হুত্ৰা মহাসমুদ্দং আহচ্চ ঠিতং, ইদং তাদিসং ন হোতী’’তি (পারা. অট্ঠ. ২.১৬২).

তং ¶ মজ্ঝিমভাণকসংযুত্তভাণকানম্পি সমানকথা. মজ্ঝিমট্ঠকথাযঞ্হি (ম. নি. অট্ঠ. ২.৩৫২) সংযুত্তট্ঠকথাযঞ্চ (সং. নি. অট্ঠ. ১.৩৭) তথেৰ ৰুত্তং. ইধ পন দীঘভাণকানং মতেন এৰং ৰুত্তন্তি দট্ঠব্বং. যদি চ ‘‘অহুত্ৰা’’তি কত্থচি পাঠো দিস্সতি, এৰং সতি সব্বেসম্পি ¶ সমানৰাদো সিযাতি. কূটাগারসালাসঙ্খেপেনাতি হংসমণ্ডলাকারসঙ্খাতহংসৰট্টকচ্ছন্নেন কূটাগারসালানিযামেন, তথা কতত্তা পাসাদোযেৰ ‘‘কূটাগারসালা’’তি ৰুত্তো, তব্বোহারেন পন সকলোপি সঙ্ঘারামোতি ৰুত্তং হোতি. ৰিনযট্ঠকথাযং (পারা. অট্ঠ. ২.১৬২) তু এৰং ৰুত্তং –

‘‘কূটাগারসালা পন মহাৰনং নিস্সায কতে আরামে কূটাগারং অন্তোকত্ৰা হংসৰট্টকচ্ছদনেন কতা সব্বাকারসম্পন্না বুদ্ধস্স ভগৰতো গন্ধকুটি ৰেদিতব্বা’’তি.

কোসলেসু জাতা, ভৰা, তে ৰা নিৰাসো এতেসন্তি কোসলকা. এৰং মাগধকা. জনপদৰাচিনো হি পাযতো পুল্লিঙ্গপুথুৰচনা. যস্স অকরণে পুগ্গলো মহাজানিযো হোতি, তং করণং অরহতীতি করণীযন্তি ৰুচ্চতি. তেনাহ ‘‘অৰস্সং কত্তব্বকম্মেনা’’তি. অকাতুম্পি ৰট্টতি অসতি সমৰাযে, তস্মা সমৰাযে সতি কত্তব্বতো তং কিচ্চন্তি ৰুচ্চতীতি অধিপ্পাযো.

৩৬০. যা বুদ্ধানং উপ্পজ্জনারহা নানত্তসঞ্ঞা, তাসং ৰসেন ‘‘নানারম্মণচারতো’’তি ৰুত্তং, নানারম্মণপ্পৰত্তিতোতি অত্থো. সম্ভৰন্তস্সেৰ হি পটিসেধো, ন অসম্ভৰন্তস্স. পটিক্কম্মাতি নিৰত্তেত্ৰা তথা চিত্তং অনুপ্পাদেত্ৰা. সল্লীনোতি ঝানসমাপত্তিযা একত্তারম্মণং অল্লীনো. নিলীনোতি তস্সেৰ ৰেৰচনং. তেন ৰুত্তং ‘‘একীভাৰ’’ন্তিআদি. সপরিৰারত্তা অনেকোপি তদা একো ৰিয ভৰতীতি একীভাৰো, তং একীভাৰং. যেনাযস্মা নাগিতো, তং সন্ধায ‘‘তস্মা ঠানা’’তি ৰুত্তং.

ওট্ঠদ্ধলিচ্ছৰিৰত্থুৰণ্ণনা

৩৬১. অদ্ধোট্ঠতাযাতি উপড্ঢোট্ঠতায. তস্স কির উত্তরোট্ঠস্স অপ্পকতায তিরিযং ফালেত্ৰা অদ্ধমপনীতং ৰিয খাযতি চত্তারো দন্তে, দ্ৰে চ দাঠা ন ছাদেতি, তেন নং ‘‘ওট্ঠদ্ধো’’তি ৰোহরতি. কেচি পন ‘‘অধো-সদ্দেন পাঠং পরিকপ্পেত্ৰা হেট্ঠা ওট্ঠস্স ওলম্বকতায ‘‘ওট্ঠাধো’’তি অত্থং ৰদন্তি, তদযুত্তমেৰ তথা পাঠস্স অদিস্সনতো, আচরিযেন ¶ (দী. নি. টী. ১.৩৬১) চ অৰণ্ণিতত্তা. অযং কির উপোসথিকো দাযকো দানপতি ¶ সদ্ধো পসন্নো বুদ্ধমামকো ধম্মসঙ্ঘমামকো. তেনাহ ‘‘পুরেভত্ত’’ন্তিআদি. খন্ধকে, (মহাৰ. ২৮৯) মহাপরিনিব্বানসুত্তে (দী. নি. ২.১৬১) চ আগতনযেন ‘‘নীলপীতাদি…পে… তাৰতিংসপরিসসপ্পটিভাগাযা’’তি ৰুত্তং. অযং পন ৰেসালী ভগৰতো কালে ইদ্ধা চেৰ ৰেপুল্লপ্পত্তা চ অহোসি. তত্থ হি রাজূনমেৰ সত্ত সহস্সানি, সত্ত সতানি, সত্ত চ রাজানো অহেসুং, তথা যুৰরাজসেনাপতিভণ্ডাগারিকপভুতীনম্পি, পাসাদকূটাগারআরামপোক্খরণিআদযোপি তপ্পরিমাণাযেৰ, বহুজনা, আকিণ্ণমনুস্সা, সুভিক্খা চ. তেন ৰুত্তং ‘‘মহতিযা লিচ্ছৰিপরিসাযা’’তি. তস্স পন কুলস্স আদিভূতানং যথাৰুত্তানং মংসপেসিযা নিব্বত্তদারকানং তাপসেন পাযিতং যং খীরং উদরং পৰিসতি, সব্বং তং মণিভাজনগতং ৰিয দিস্সতি, চরিমকভৰে বোধিসত্তে কুচ্ছিগতে বোধিসত্তমাতু ৰিয উদরচ্ছৰিযা অতিৰিপ্পসন্নতায তে নিচ্ছৰী অহেসুং. অপরে পনাহু ‘‘সিব্বেত্ৰা ঠপিতা ৰিয নেসং অঞ্ঞমঞ্ঞং লীনা ছৰি অহোসী’’তি. এৰং তে নিচ্ছৰিতায ৰা লীনচ্ছৰিতায ৰা লিচ্ছৰীতি পঞ্ঞাযিংসু, নিরুত্তিনযেন চেত্থ পদসিদ্ধি, তব্বংসে উপ্পন্না সব্বেপি লিচ্ছৰযো নাম জাতা. তেনাহ ‘‘লিচ্ছৰিপরিসাযা’’তি, লিচ্ছৰিরাজূনং, লিচ্ছৰিৰংসভূতায ৰা পরিসাযাতি অত্থো. মহন্তং যসং লাতি গণ্হাতীতি মহালি যথা ‘‘ভদ্দালী’’তি. মূলনামন্তি মাতাপিতূহি কতনামং.

৩৬২. সাসনে যুত্তপযুত্তোতি ভাৰনমনুযুত্তো. সব্বত্থ সীহসমানৰুত্তিনোপি ভগৰতো পরিসায মহত্তে সতি তদজ্ঝাসযানুরূপং পৰত্তিযমানায ধম্মদেসনায ৰিসেসো হোতীতি আহ ‘‘মহন্তেন উস্সাহেন ধম্মং দেসেস্সতী’’তি.