📜

নমো তস্স ভগৰতো অরহতো সম্মাসম্বুদ্ধস্স

মজ্ঝিমনিকাযে

মূলপণ্ণাস-অট্ঠকথা

(দুতিযো ভাগো)

৩. ওপম্মৰগ্গো

১. ককচূপমসুত্তৰণ্ণনা

২২২. এৰং মে সুতন্তি ককচূপমসুত্তং. তত্থ মোল়িযফগ্গুনোতি মোল়ীতি চূল়া ৰুচ্চতি. যথাহ –

‘‘ছেত্ৰান মোল়িং ৰরগন্ধৰাসিতং,

ৰেহাযসং উক্খিপি সক্যপুঙ্গৰো;

রতনচঙ্কোটৰরেন ৰাসৰো,

সহস্সনেত্তো সিরসা পটিগ্গহী’’তি.

সা তস্স গিহিকালে মহতী অহোসি, তেনস্স মোল়িযফগ্গুনোতি সঙ্খা উদপাদি. পব্বজিতম্পি নং তেনেৰ নামেন সঞ্জানন্তি. অতিৰেলন্তি ৰেলং অতিক্কমিত্ৰা. তত্থ কালৰেলা, সীমৰেলা, সীলৰেলাতি তিৰিধা ৰেলা. ‘‘তাযং ৰেলাযং ইমং উদানং উদানেসী’’তি (ধম্মপদে ৰগ্গানমুদ্দানং, গাথানমুদ্দানং; মহাৰ. ১-৩) অযং কালৰেলা নাম. ‘‘ঠিতধম্মো ৰেলং নাতিৰত্ততী’’তি (চূল়ৰ. ৩৮৪; উদা. ৪৫; অ. নি. ৮.১৯) অযং সীমৰেলা নাম. ‘‘ৰেলাঅনতিক্কমো সেতুঘাতো’’তি (ধ. স. ২৯৯-৩০১) চ, ‘‘ৰেলা চেসা অৰীতিক্কমনট্ঠেনা’’তি চ, অযং সীলৰেলা নাম. তং তিৰিধম্পি সো অতিক্কমিযেৰ. ভিক্খুনিযো হি ওৰদিতুং কালো নাম অত্থি, সো অত্থঙ্গতেপি সূরিযে ওৰদন্তো তং কালৰেলম্পি অতিক্কমি. ভিক্খুনীনং ওৰাদে পমাণং নাম অত্থি সীমা মরিযাদা. সো উত্তরিছপ্পঞ্চৰাচাহি ওৰদন্তো তং সীমৰেলম্পি অতিক্কমি. কথেন্তো পন দৰসহগতং কত্ৰা দুট্ঠুল্লাপত্তিপহোনকং কথেতি, এৰং সীলৰেলম্পি অতিক্কমি.

সংসট্ঠোতি মিস্সীভূতো সমানসুখদুক্খো হুত্ৰা. সম্মুখাতি পুরতো. অৰণ্ণং ভাসতীতি তা পন পচনকোট্টনাদীনি করোন্তিযো দিস্ৰা নত্থি ইমাসং অনাপত্তি নাম, ইমা ভিক্খুনিযো অনাচারা দুব্বচা পগব্ভাতি অগুণং কথেতি. অধিকরণম্পি করোতীতি ইমেসং ভিক্খূনং ইমা ভিক্খুনিযো দিট্ঠকালতো পট্ঠায অক্খীনি দয্হন্তি, ইমস্মিং ৰিহারে পুপ্ফপূজা ৰা আসনধোৰনপরিভণ্ডকরণাদীনি ৰা ইমাসং ৰসেন ৰত্তন্তি. কুলধীতরো এতা লজ্জিনিযো, তুম্হে ইমা ইদঞ্চিদঞ্চ ৰদথ, অযং নাম তুম্হাকং আপত্তি হোতি, ৰিনযধরানং সন্তিকং আগন্ত্ৰা ৰিনিচ্ছযং মে দেথাতি অধিকরণং আকড্ঢতি.

মোল়িযফগ্গুনস্স অৰণ্ণং ভাসতীতি নত্থি ইমস্স ভিক্খুনো অনাপত্তি নাম. নিচ্চকালং ইমস্স পরিৰেণদ্ৰারং অসুঞ্ঞং ভিক্খুনীহীতি অগুণং কথেতি. অধিকরণম্পি করোন্তীতি ইমেসং ভিক্খূনং মোল়িযফগ্গুনত্থেরস্স দিট্ঠকালতো পট্ঠায অক্খীনি দয্হন্তি. ইমস্মিং ৰিহারে অঞ্ঞেসং ৰসনট্ঠানং ওলোকেতুম্পি ন সক্কা. ৰিহারং আগতভিক্খুনিযো ওৰাদং ৰা পটিসন্থারং ৰা উদ্দেসপদং ৰা থেরমেৰ নিস্সায লভন্তি, কুলপুত্তকো লজ্জী কুক্কুচ্চকো, এৰরূপং নাম তুম্হে ইদঞ্চিদঞ্চ ৰদথ, এথ ৰিনযধরানং সন্তিকে ৰিনিচ্ছযং দেথাতি অধিকরণং আকড্ঢন্তি.

সো ভিক্খু ভগৰন্তং এতদৰোচাতি নেৰ পিযকম্যতায ন ভেদাধিপ্পাযেন, অত্থকামতায অৰোচ. একং কিরস্স অহোসি – ‘‘ইমস্স ভিক্খুস্স এৰং সংসট্ঠস্স ৰিহরতো অযসো উপ্পজ্জিস্সতি. সো সাসনস্সাপি অৰণ্ণোযেৰ. অঞ্ঞেন পন কথিতো অযং ন ওরমিস্সতি, ভগৰতা ধম্মং দেসেত্ৰা ওৰদিতো ওরমিস্সতী’’তি তস্স অত্থকামতায ভগৰন্তং এতং, ‘‘আযস্মা, ভন্তে’’তিআদিৰচনং অৰোচ.

২২৩. আমন্তেহীতি জানাপেহি. আমন্তেতীতি পক্কোসতি.

২২৪. সদ্ধাতি সদ্ধায. তস্মাতি যস্মা ত্ৰং কুলপুত্তো চেৰ সদ্ধাপব্বজিতো চ, যস্মা ৰা তে এতাহি সদ্ধিং সংসট্ঠস্স ৰিহরতো যে তা অক্কোসিস্সন্তি ৰা, পহরিস্সন্তি ৰা, তেসু দোমনস্সং উপ্পজ্জিস্সতি, সংসগ্গে পহীনে নুপ্পজ্জিস্সতি, তস্মা. তত্রাতি তস্মিং অৰণ্ণভাসনে. গেহসিতাতি পঞ্চকামগুণনিস্সিতা. ছন্দাতি তণ্হাছন্দাপি পটিঘছন্দাপি. ৰিপরিণতন্তি রত্তম্পি চিত্তং ৰিপরিণতং. দুট্ঠম্পি, মূল়্হম্পি চিত্তং ৰিপরিণতং. ইধ পন তণ্হাছন্দৰসেন রত্তম্পি ৰট্টতি, পটিঘছন্দৰসেন দুট্ঠম্পি ৰট্টতি. হিতানুকম্পীতি হিতেন অনুকম্পমানো হিতেন ফরমানো. ন দোসন্তরোতি ন দোসচিত্তো ভৰিস্সামি.

২২৫. অথ খো ভগৰাতি কস্মা আরভি? ফগ্গুনস্স কির এত্তকং ওৰাদং সুত্ৰাপি, ‘‘ভিক্খুনিসংসগ্গতো ওরমিস্সামি ৰিরমিস্সামী’’তি চিত্তম্পি ন উপ্পন্নং, ভগৰতা পন সদ্ধিং পটাণী ৰিয পটিৰিরুদ্ধো অট্ঠাসি, অথস্স ভগৰতো যথা নাম জিঘচ্ছিতস্স ভোজনে, পিপাসিতস্স পানীযে, সীতেন ফুট্ঠস্স উণ্হে দুক্খিতস্স সুখে পত্থনা উপ্পজ্জতি. এৰমেৰ ইমং দুব্বচং ভিক্খুং দিস্ৰা পঠমবোধিযং সুব্বচা ভিক্খূ আপাথং আগমিংসু. অথ তেসং ৰণ্ণং কথেতুকামো হুত্ৰা ইমং দেসনং আরভি.

তত্থ আরাধযিংসূতি গণ্হিংসু পূরযিংসু. একং সমযন্তি একস্মিং সমযে. একাসনভোজনন্তি একং পুরেভত্তভোজনং. সূরিযুগ্গমনতো হি যাৰ মজ্ঝন্হিকা সত্তক্খত্তুং ভুত্তভোজনম্পি ইধ একাসনভোজনন্তেৰ অধিপ্পেতং. অপ্পাবাধতন্তি নিরাবাধতং. অপ্পাতঙ্কতন্তি নিদ্দুক্খতং. লহুট্ঠানন্তি সরীরস্স সল্লহুকং উট্ঠানং. বলন্তি কাযবলং. ফাসুৰিহারন্তি কাযস্স সুখৰিহারং. ইমিনা কিং কথিতং? দিৰা ৰিকালভোজনং পজহাপিতকালো কথিতো. ভদ্দালিসুত্তে পন রত্তিং ৰিকালভোজনং পজহাপিতকালো কথিতো. ইমানি হি দ্ৰে ভোজনানি ভগৰা ন একপ্পহারেন পজহাপেসি. কস্মা? ইমানেৰ হি দ্ৰে ভোজনানি ৰট্টে সত্তানং আচিণ্ণানি. সন্তি কুলপুত্তা সুখুমালা, তে একতো দ্ৰেপি ভোজনানি পজহন্তা কিলমন্তি. তস্মা একতো অপজহাপেত্ৰা একস্মিং কালে দিৰা ৰিকালভোজনং, একস্মিং রত্তিং ৰিকালভোজনন্তি ৰিসুং পজহাপেসি. তেসু ইধ দিৰা ৰিকালভোজনং পজহাপিতকালো কথিতো. তত্থ যস্মা বুদ্ধা ন ভযং দস্সেত্ৰা তজ্জেত্ৰা পজহাপেন্তি, আনিসংসং পন দস্সেত্ৰা পজহাপেন্তি, এৰঞ্হি সত্তা সুখেন পজহন্তি. তস্মা আনিসংসং দস্সেন্তো ইমে পঞ্চ গুণে দস্সেসি. অনুসাসনী করণীযাতি পুনপ্পুনং সাসনে কত্তব্বং নাহোসি. ‘‘ইদং করোথ, ইদং মা করোথা’’তি সতুপ্পাদকরণীযমত্তমেৰ অহোসি. তাৰত্তকেনেৰ তে কত্তব্বং অকংসু, পহাতব্বং পজহিংসু, পঠমবোধিযং, ভিক্খৰে, সুব্বচা ভিক্খূ অহেসুং অস্সৰা ওৰাদপটিকরাতি.

ইদানি নেসং সুব্বচভাৰদীপিকং উপমং আহরন্তো সেয্যথাপীতিআদিমাহ. তত্থ সুভূমিযন্তি সমভূমিযং. ‘‘সুভূম্যং সুখেত্তে ৰিহতখাণুকে বীজানি পতিট্ঠপেয্যা’’তি (দী. নি. ২.৪৩৮) এত্থ পন মণ্ডভূমি সুভূমীতি আগতা. চতুমহাপথেতি দ্ৰিন্নং মহামগ্গানং ৰিনিৰিজ্ঝিত্ৰা গতট্ঠানে. আজঞ্ঞরথোতি ৰিনীতঅস্সরথো. ওধস্তপতোদোতি যথা রথং অভিরুহিত্ৰা ঠিতেন সক্কা হোতি গণ্হিতুং, এৰং আলম্বনং নিস্সায তিরিযতো ঠপিতপতোদো. যোগ্গাচরিযোতি অস্সাচরিযো. স্ৰেৰ অস্সদম্মে সারেতীতি অস্সদম্মসারথি. যেনিচ্ছকন্তি যেন যেন মগ্গেন ইচ্ছতি. যদিচ্ছকন্তি যং যং গতিং ইচ্ছতি. সারেয্যাতি উজুকং পুরতো পেসেয্য. পচ্চাসারেয্যাতি পটিনিৰত্তেয্য.

এৰমেৰ খোতি যথা হি সো যোগ্গাচরিযো যেন যেন মগ্গেন গমনং ইচ্ছতি, তং তং অস্সা আরুল়্হাৰ হোন্তি. যায যায চ গতিযা ইচ্ছতি, সা সা গতি গহিতাৰ হোতি. রথং পেসেত্ৰা অস্সা নেৰ ৰারেতব্বা ন ৰিজ্ঝিতব্বা হোন্তি. কেৰলং তেসং সমে ভূমিভাগে খুরেসু নিমিত্তং ঠপেত্ৰা গমনমেৰ পস্সিতব্বং হোতি. এৰং ময্হম্পি তেসু ভিক্খূসু পুনপ্পুনং ৰত্তব্বং নাহোসি. ইদং করোথ ইদং মা করোথাতি সতুপ্পাদনমত্তমেৰ কত্তব্বং হোতি. তেহিপি তাৰদেৰ কত্তব্বং কতমেৰ হোতি, অকত্তব্বং জহিতমেৰ. তস্মাতি যস্মা সুব্বচা যুত্তযানপটিভাগা হুত্ৰা সতুপ্পাদনমত্তেনেৰ পজহিংসু, তস্মা তুম্হেপি পজহথাতি অত্থো. এলণ্ডেহীতি এলণ্ডা কির সালদূসনা হোন্তি, তস্মা এৰমাহ. ৰিসোধেয্যাতি এলণ্ডে চেৰ অঞ্ঞা চ ৰল্লিযো ছিন্দিত্ৰা বহি নীহরণেন সোধেয্য. সুজাতাতি সুসণ্ঠিতা. সম্মা পরিহরেয্যাতি মরিযাদং বন্ধিত্ৰা উদকাসিঞ্চনেনপি কালেনকালং মূলমূলে খণনেনপি ৰল্লিগুম্বাদিচ্ছেদনেনপি কিপিল্লপূটকহরণেনপি মক্কটকজালসুক্খদণ্ডকহরণেনপি সম্মা ৰড্ঢেত্ৰা পোসেয্য. ৰুদ্ধিআদীনি ৰুত্তত্থানেৰ.

২২৬. ইদানি অক্খন্তিযা দোসং দস্সেন্তো ভূতপুব্বন্তিআদিমাহ. তত্থ ৰেদেহিকাতি ৰিদেহরট্ঠৰাসিকস্স ধীতা. অথ ৰা ৰেদোতি পঞ্ঞা ৰুচ্চতি, ৰেদেন ঈহতি ইরিযতীতি ৰেদেহিকা, পণ্ডিতাতি অত্থো. গহপতানীতি ঘরসামিনী. কিত্তিসদ্দোতি কিত্তিঘোসো. সোরতাতি সোরচ্চেন সমন্নাগতা. নিৰাতাতি নিৰাতৰুত্তি. উপসন্তাতি নিব্বুতা. দক্খাতি ভত্তপচনসযনত্থরণদীপুজ্জলনাদিকম্মেসু ছেকা. অনলসাতি উট্ঠাহিকা, সুসংৰিহিতকম্মন্তাতি সুট্ঠু সংৰিহিতকম্মন্তা. একা অনলসা হোতি, যং যং পন ভাজনং গণ্হাতি, তং তং ভিন্দতি ৰা ছিদ্দং ৰা করোতি, অযং ন তাদিসাতি দস্সেতি.

দিৰা উট্ঠাসীতি পাতোৰ কত্তব্বানি ধেনুদুহনাদিকম্মানি অকত্ৰা উস্সূরে উট্ঠিতা. হে জে কাল়ীতি অরে কাল়ি. কিং জে দিৰা উট্ঠাসীতি কিং তে কিঞ্চি অফাসুকং অত্থি, কিং দিৰা উট্ঠাসীতি? নো ৰত রে কিঞ্চীতি অরে যদি তে ন কিঞ্চি অফাসুকং অত্থি, নেৰ সীসং রুজ্ঝতি, ন পিট্ঠি, অথ কস্মা পাপি দাসি দিৰা উট্ঠাসীতি কুপিতা অনত্তমনা ভাকুটিমকাসি. দিৰাতরং উট্ঠাসীতি পুনদিৰসে উস্সূরতরং উট্ঠাসি. অনত্তমনৰাচন্তি অরে পাপি দাসি অত্তনো পমাণং ন জানাসি; কিং অগ্গিং সীতোতি মঞ্ঞসি, ইদানি তং সিক্খাপেস্সামীতিআদীনি ৰদমানা কুপিতৰচনং নিচ্ছারেসি.

পটিৰিসকানন্তি সামন্তগেহৰাসীনং. উজ্ঝাপেসীতি অৰজানাপেসি. চণ্ডীতি অসোরতা কিব্বিসা. ইতি যত্তকা গুণা, ততো দিগুণা দোসা উপ্পজ্জিংসু. গুণা নাম সণিকং সণিকং আগচ্ছন্তি; দোসা একদিৰসেনেৰ পত্থটা হোন্তি. সোরতসোরতোতি অতিৰিয সোরতো, সোতাপন্নো নু খো, সকদাগামী অনাগামী অরহা নু খোতি ৰত্তব্বতং আপজ্জতি. ফুসন্তীতি ফুসন্তা ঘট্টেন্তা আপাথং আগচ্ছন্তি.

অথ ভিক্খু সোরতোতি ৰেদিতব্বোতি অথ অধিৰাসনক্খন্তিযং ঠিতো ভিক্খু সোরতোতি ৰেদিতব্বো. যো চীৰর…পে… পরিক্খারহেতূতি যো এতানি চীৰরাদীনি পণীতপণীতানি লভন্তো পাদপরিকম্মপিট্ঠিপরিকম্মাদীনি একৰচনেনেৰ করোতি. অলভমানোতি যথা পুব্বে লভতি, এৰং অলভন্তো. ধম্মঞ্ঞেৰ সক্করোন্তোতি ধম্মংযেৰ সক্কারং সুকতকারং করোন্তো. গরুং করোন্তোতি গরুভারিযং করোন্তো. মানেন্তোতি মনেন পিযং করোন্তো. পূজেন্তোতি পচ্চযপূজায পূজেন্তো. অপচাযমানোতি ধম্মংযেৰ অপচাযমানো অপচিতিং নীচৰুত্তিং দস্সেন্তো.

২২৭. এৰং অক্খন্তিযা দোসং দস্সেত্ৰা ইদানি যে অধিৰাসেন্তি, তে এৰং অধিৰাসেন্তীতি পঞ্চ ৰচনপথে দস্সেন্তো পঞ্চিমে, ভিক্খৰেতিআদিমাহ. তত্থ কালেনাতি যুত্তপত্তকালেন. ভূতেনাতি সতা ৰিজ্জমানেন. সণ্হেনাতি সম্মট্ঠেন. অত্থসঞ্হিতেনাতি অত্থনিস্সিতেন কারণনিস্সিতেন. অকালেনাতিআদীনি তেসংযেৰ পটিপক্খৰসেন ৰেদিতব্বানি. মেত্তচিত্তাতি উপ্পন্নমেত্তচিত্তা হুত্ৰা. দোসন্তরাতি দুট্ঠচিত্তা, অব্ভন্তরে উপ্পন্নদোসা হুত্ৰা. তত্রাতি তেসু ৰচনপথেসু. ফরিত্ৰাতি অধিমুচ্চিত্ৰা. তদারম্মণঞ্চাতি কথং তদারম্মণং সব্বাৰন্তং লোকং করোতি? পঞ্চ ৰচনপথে গহেত্ৰা আগতং পুগ্গলং মেত্তচিত্তস্স আরম্মণং কত্ৰা পুন তস্সেৰ মেত্তচিত্তস্স অৰসেসসত্তে আরম্মণং করোন্তো সব্বাৰন্তং লোকং তদারম্মণং করোতি নাম. তত্রাযং ৰচনত্থো. তদারম্মণঞ্চাতি তস্সেৰ মেত্তচিত্তস্স আরম্মণং কত্ৰা. সব্বাৰন্তন্তি সব্বসত্তৰন্তং. লোকন্তি সত্তলোকং. ৰিপুলেনাতি অনেকসত্তারম্মণেন. মহগ্গতেনাতি মহগ্গতভূমিকেন. অপ্পমাণেনাতি সুভাৰিতেন. অৰেরেনাতি নিদ্দোসেন. অব্যাবজ্ঝেনাতি নিদ্দুক্খেন. ফরিত্ৰা ৰিহরিস্সামাতি এৰরূপেন মেত্তাসহগতেন চেতসা তঞ্চ পুগ্গলং সব্বঞ্চ লোকং তস্স চিত্তস্স আরম্মণং কত্ৰা অধিমুচ্চিত্ৰা ৰিহরিস্সাম.

২২৮. ইদানি তদত্থদীপিকং উপমং আহরন্তো সেয্যথাপীতিআদিমাহ. তত্থ অপথৰিন্তি নিপ্পথৰিং করিস্সামীতি অত্থো. তত্র তত্রাতি তস্মিং তস্মিং ঠানে. ৰিকিরেয্যাতি পচ্ছিযা পংসুং উদ্ধরিত্ৰা বীজানি ৰিয ৰিকিরেয্য. ওট্ঠুভেয্যাতি খেল়ং পাতেয্য. অপথৰিং করেয্যাতি এৰং কাযেন চ ৰাচায চ পযোগং কত্ৰাপি সক্কুণেয্য অপথৰিং কাতুন্তি? গম্ভীরাতি বহলত্তেন দ্ৰিযোজনসতসহস্সানি চত্তারি চ নহুতানি গম্ভীরা. অপ্পমেয্যাতি তিরিযং পন অপরিচ্ছিন্না. এৰমেৰ খোতি এত্থ ইদং ওপম্মসংসন্দনং – পথৰী ৰিয হি মেত্তচিত্তং দট্ঠব্বং. কুদালপিটকং গহেত্ৰা আগতপুরিসো ৰিয পঞ্চ ৰচনপথে গহেত্ৰা আগতপুগ্গলো. যথা সো কুদালপিটকেন মহাপথৰিং অপথৰিং কাতুং ন সক্কোতি, এৰং ৰো পঞ্চ ৰচনপথে গহেত্ৰা আগতপুগ্গলো মেত্তচিত্তস্স অঞ্ঞথত্তং কাতুং ন সক্খিস্সতীতি.

২২৯. দুতিযউপমাযং হলিদ্দিন্তি যংকিঞ্চি পীতকৰণ্ণং. নীলন্তি কংসনীলং ৰা পলাসনীলং ৰা. অরূপীতি অরূপো. ননু চ, দ্ৰিন্নং কট্ঠানং ৰা দ্ৰিন্নং রুক্খানং ৰা দ্ৰিন্নং সেয্যানং ৰা দ্ৰিন্নং সেলানং ৰা অন্তরং পরিচ্ছিন্নাকাসরূপন্তি আগতং, কস্মা ইধ অরূপীতি ৰুত্তোতি? সনিদস্সনভাৰপটিক্খেপতো. তেনেৰাহ ‘‘অনিদস্সনো’’তি. তস্মিঞ্হি রূপং লিখিতুং, রূপপাতুভাৰং দস্সেতুং ন সক্কা, তস্মা ‘‘অরূপী’’তি ৰুত্তো. অনিদস্সনোতি দস্সনস্স চক্খুৰিঞ্ঞাণস্স অনাপাথো. উপমাসংসন্দনে পনেত্থ আকাসো ৰিয মেত্তচিত্তং. তুলিকপঞ্চমা চত্তারো রঙ্গজাতা ৰিয পঞ্চ ৰচনপথা, তুলিকপঞ্চমে রঙ্গে গহেত্ৰা আগতপুরিসো ৰিয পঞ্চ ৰচনপথে গহেত্ৰা আগতপুগ্গলো. যথা সো তুলিকপঞ্চমেহি রঙ্গেহি আকাসে রূপপাতুভাৰং কাতুং ন সক্কোতি, এৰং ৰো পঞ্চ ৰচনপথে গহেত্ৰা আগতপুগ্গলো মেত্তচিত্তস্স অঞ্ঞথত্তং কত্ৰা দোসুপ্পত্তিং দস্সেতুং ন সক্খিস্সতীতি.

২৩০. ততিযউপমাযং আদিত্তন্তি পজ্জলিতং. গম্ভীরা অপ্পমেয্যাতি ইমিস্সা গঙ্গায গম্ভীরট্ঠানং গাৰুতম্পি অত্থি, অড্ঢযোজনম্পি, যোজনম্পি. পুথুলং পনস্সা এৰরূপংযেৰ, দীঘতো পন পঞ্চযোজনসতানি. সা কথং গম্ভীরা অপ্পমেয্যাতি? এতেন পযোগেন পরিৰত্তেত্ৰা উদ্ধনে উদকং ৰিয তাপেতুং অসক্কুণেয্যতো. ঠিতোদকং পন কেনচি উপাযেন অঙ্গুলমত্তং ৰা অড্ঢঙ্গুলমত্তং ৰা এৰং তাপেতুং সক্কা ভৰেয্য, অযং পন ন সক্কা, তস্মা এৰং ৰুত্তং. উপমাসংসন্দনে পনেত্থ গঙ্গা ৰিয মেত্তচিত্তং, তিণুক্কং আদায আগতপুরিসো ৰিয পঞ্চ ৰচনপথে গহেত্ৰা আগতপুগ্গলো. যথা সো আদিত্তায তিণুক্কায গঙ্গং তাপেতুং ন সক্কোতি, এৰং ৰো পঞ্চ ৰচনপথে গহেত্ৰা আগতপুগ্গলো মেত্তচিত্তস্স অঞ্ঞথত্তং কাতুং ন সক্খিস্সতীতি.

২৩১. চতুত্থউপমাযং বিল়ারভস্তাতি বিল়ারচম্মপসিব্বকা. সুমদ্দিতাতি সুট্ঠু মদ্দিতা. সুপরিমদ্দিতাতি অন্তো চ বহি চ সমন্ততো সুপরিমদ্দিতা. তূলিনীতি সিম্বলিতূললতাতূলসমানা. ছিন্নসস্সরাতি ছিন্নসস্সরসদ্দা. ছিন্নভব্ভরাতি ছিন্নভব্ভরসদ্দা. উপমাসংসন্দনে পনেত্থ বিল়ারভস্তা ৰিয মেত্তচিত্তং, কট্ঠকঠলং আদায আগতপুরিসো ৰিয পঞ্চ ৰচনপথে গহেত্ৰা আগতপুগ্গলো. যথা সো কট্ঠেন ৰা কঠলেন ৰা বিল়ারভস্তং সরসরং ভরভরং সদ্দং কাতুং ন সক্কোতি, এৰং ৰো পঞ্চ ৰচনপথে গহেত্ৰা আগতপুগ্গলো মেত্তচিত্তস্স অঞ্ঞথত্তং কত্ৰা দোসানুগতভাৰং কাতুং ন সক্খিস্সতীতি.

২৩২. ওচরকাতি অৰচরকা হেট্ঠাচরকা, নীচকম্মকারকাতি অত্থো. যো মনো পদূসেয্যাতি যো ভিক্খু ৰা ভিক্খুনী ৰা মনো পদূসেয্য, তং ককচেন ওকন্তনং নাধিৰাসেয্য. ন মে সো তেন সাসনকরোতি সো তেন অনধিৰাসনেন ময্হং ওৰাদকরো ন হোতি. আপত্তি পনেত্থ নত্থি.

২৩৩. অণুং ৰা থূলং ৰাতি অপ্পসাৰজ্জং ৰা মহাসাৰজ্জং ৰা. যং তুম্হে নাধিৰাসেয্যাথাতি যো তুম্হেহি অধিৰাসেতব্বো ন ভৰেয্যাতি অত্থো. নো হেতং, ভন্তেতি, ভন্তে, অনধিৰাসেতব্বং নাম ৰচনপথং ন পস্সামাতি অধিপ্পাযো. দীঘরত্তং হিতায সুখাযাতি ইতি ভগৰা অরহত্তেন কূটং গণ্হন্তো যথানুসন্ধিনা দেসনং নিট্ঠপেসীতি.

পপঞ্চসূদনিযা মজ্ঝিমনিকাযট্ঠকথায

ককচূপমসুত্তৰণ্ণনা নিট্ঠিতা.

২. অলগদ্দূপমসুত্তৰণ্ণনা

২৩৪. এৰং মে সুতন্তি অলগদ্দূপমসুত্তং. তত্থ গদ্ধে বাধযিংসূতি গদ্ধবাধিনো, গদ্ধবাধিনো পুব্বপুরিসা অস্সাতি গদ্ধবাধিপুব্বো, তস্স গদ্ধবাধিপুব্বস্স, গিজ্ঝঘাতককুলপ্পসুতস্সাতি অত্থো. সগ্গমোক্খানং অন্তরাযং করোন্তীতি অন্তরাযিকা. তে কম্মকিলেসৰিপাকউপৰাদআণাৰীতিক্কমৰসেন পঞ্চৰিধা. তত্থ পঞ্চানন্তরিযধম্মা কম্মন্তরাযিকা নাম. তথা ভিক্খুনীদূসককম্মং, তং পন মোক্খস্সেৰ অন্তরাযং করোতি, ন সগ্গস্স. নিযতমিচ্ছাদিট্ঠিধম্মা কিলেসন্তরাযিকা নাম. পণ্ডকতিরচ্ছানগতউভতোব্যঞ্জনকানং পটিসন্ধিধম্মা ৰিপাকন্তরাযিকা নাম. অরিযূপৰাদধম্মা উপৰাদন্তরাযিকা নাম, তে পন যাৰ অরিযে ন খমাপেন্তি, তাৰদেৰ, ন ততো পরং. সঞ্চিচ্চ ৰীতিক্কন্তা সত্ত আপত্তিক্খন্ধা আণাৰীতিক্কমন্তরাযিকা নাম. তেপি যাৰ ভিক্খুভাৰং ৰা পটিজানাতি, ন ৰুট্ঠাতি ৰা, ন দেসেতি ৰা, তাৰদেৰ, ন ততো পরং.

তত্রাযং ভিক্খু বহুস্সুতো ধম্মকথিকো সেসন্তরাযিকে জানাতি, ৰিনযে পন অকোৰিদত্তা পণ্ণত্তিৰীতিক্কমন্তরাযিকে ন জানাতি, তস্মা রহোগতো এৰং চিন্তেসি – ইমে আগারিকা পঞ্চ কামগুণে পরিভুঞ্জন্তা সোতাপন্নাপি সকদাগামিনোপি অনাগামিনোপি হোন্তি. ভিক্খূপি মনাপিকানি চক্খুৰিঞ্ঞেয্যানি রূপানি পস্সন্তি…পে… কাযৰিঞ্ঞেয্যে ফোট্ঠব্বে ফুসন্তি, মুদুকানি অত্থরণপাৰুরণাদীনি পরিভুঞ্জন্তি, এতং সব্বং ৰট্টতি. কস্মা ইত্থীনংযেৰ রূপসদ্দগন্ধরসফোট্ঠব্বা ন ৰট্টন্তি? এতেপি ৰট্টন্তীতি. এৰং রসেন রসং সংসন্দেত্ৰা সচ্ছন্দরাগপরিভোগঞ্চ নিচ্ছন্দরাগপরিভোগঞ্চ একং কত্ৰা থূলৰাকেহি সদ্ধিং অতিসুখুমসুত্তং উপনেন্তো ৰিয, সাসপেন সদ্ধিং সিনেরুং উপসংহরন্তো ৰিয, পাপকং দিট্ঠিগতং উপ্পাদেত্ৰা, ‘‘কিং ভগৰতা মহাসমুদ্দং বন্ধন্তেন ৰিয মহতা উস্সাহেন পঠমপারাজিকং পঞ্ঞত্তং, নত্থি এত্থ দোসো’’তি সব্বঞ্ঞুতঞ্ঞাণেন সদ্ধিং পটিৰিরুজ্ঝন্তো ৰেসারজ্জঞাণং পটিবাহন্তো অরিযমগ্গে খাণুকণ্টকাদীনি পক্খিপন্তো মেথুনধম্মে দোসো নত্থীতি জিনস্স আণাচক্কে পহারং অদাসি. তেনাহ – ‘‘তথাহং ভগৰতা ধম্মং দেসিতং আজানামী’’তিআদি.

এৰং ব্যা খোতি এৰং ৰিয খো. সমনুযুঞ্জন্তীতিআদীসু কিং লদ্ধিকো ত্ৰং, লদ্ধিং ৰদেহীতি পুচ্ছমানা সমনুযুঞ্জন্তি নাম. দিট্ঠিং পতিট্ঠাপেন্তা সমনুগ্গাহন্তি নাম. কেন কারণেন এৰং ৰদসীতি কারণং পুচ্ছন্তা সমনুভাসন্তি নাম. অট্ঠিকঙ্কলূপমাতিআদীসু (ম. নি. ২.৪২-৪৮) অট্ঠিকঙ্কলূপমা অপ্পস্সাদট্ঠেন. মংসপেসূপমা বহুসাধারণট্ঠেন. তিণুক্কূপমা অনুদহনট্ঠেন. অঙ্গারকাসূপমা মহাভিতাপনট্ঠেন. সুপিনকূপমা ইত্তরপচ্চুপট্ঠানট্ঠেন. যাচিতকূপমা তাৰকালিকট্ঠেন. রুক্খফলূপমা সব্বঙ্গপচ্চঙ্গপলিভঞ্জনট্ঠেন. অসিসূনূপমা অধিকুট্টনট্ঠেন. সত্তিসূলূপমা ৰিনিৰিজ্ঝনট্ঠেন. সপ্পসিরূপমা সাসঙ্কসপ্পটিভযট্ঠেন. থামসাতি দিট্ঠিথামেন. পরামাসাতি দিট্ঠিপরামাসেন. অভিনিৰিস্স ৰোহরতীতি অধিট্ঠহিত্ৰা ৰোহরতি দীপেতি ৰা.

২৩৫. যতো খো তে ভিক্খূতি যদা তে ভিক্খূ. এৰং ব্যা খো অহং, ভন্তে, ভগৰতাতি ইদং এস অত্তনো অজ্ঝাসযেন নত্থীতি ৰত্তুকামোপি ভগৰতো আনুভাৰেন সম্পটিচ্ছতি, বুদ্ধানং কির সম্মুখা দ্ৰে কথা কথেতুং সমত্থো নাম নত্থি.

২৩৬. কস্স খো নাম ত্ৰং মোঘপুরিসাতি ত্ৰং মোঘপুরিস কস্স খত্তিযস্স ৰা ব্রাহ্মণস্স ৰা ৰেস্সস্স ৰা সুদ্দস্স ৰা গহট্ঠস্স ৰা পব্বজিতস্স ৰা দেৰস্স ৰা মনুস্সস্স ৰা মযা এৰং ধম্মং দেসিতং আজানাসি. অথ খো ভগৰা ভিক্খূ আমন্তেসীতি অযং পাটিযেক্কো অনুসন্ধি. অরিট্ঠো কির চিন্তেসি – ‘‘ভগৰা মং মোঘপুরিসোতি ৰদতি, ন খো পন মোঘপুরিসাতি ৰুত্তমত্তকেন মগ্গফলানং উপনিস্সযো ন হোতি. উপসেনম্পি হি ৰঙ্গন্তপুত্তং, ‘অতিলহুং খো ত্ৰং, মোঘপুরিস, বাহুল্লায আৰত্তো’তি (মহাৰ. ৭৫) ভগৰা মোঘপুরিসৰাদেন ওৰদি. থেরো অপরভাগে ঘটেন্তো ৰাযমন্তো ছ অভিঞ্ঞা সচ্ছাকাসি. অহম্পি তথারূপং ৰীরিযং পগ্গণ্হিত্ৰা মগ্গফলানি নিব্বত্তেস্সামী’’তি. অথস্স ভগৰা বন্ধনা পৰুত্তস্স পণ্ডুপলাসস্স ৰিয অৰিরুল়্হিভাৰং দস্সেন্তো ইমং দেসনং আরভি.

উস্মীকতোপীতি, ভিক্খৰে, তুম্হে কিন্তি মঞ্ঞথ, অযং অরিট্ঠো এৰংলদ্ধিকো সব্বঞ্ঞুতঞ্ঞাণেন পটিৰিরুজ্ঝিত্ৰা ৰেসারজ্জঞাণং পটিবাহিত্ৰা তথাগতস্স আণাচক্কে পহারং দদমানো অপি নু ইমস্মিং ধম্মৰিনযে উস্মীকতোপি? যথা নিব্বুতেপি মহন্তে অগ্গিক্খন্ধে খজ্জুপনকমত্তাপি অগ্গিপপটিকা হোতিযেৰ, যং নিস্সায পুন মহাঅগ্গিক্খন্ধো ভৰেয্য. কিং নু খো এৰং ইমস্স অপ্পমত্তিকাপি ঞাণুস্মা অত্থি, যং নিস্সায ৰাযমন্তো মগ্গফলানি নিব্বত্তেয্যাতি? নো হেতং, ভন্তেতি, ভন্তে, এৰংলদ্ধিকস্স কুতো এৰরূপা ঞাণুস্মাতি? মগ্গফলানং পচ্চযসমত্থায ঞাণুস্মায উস্মীকতভাৰং পটিক্খিপন্তা ৰদন্তি. মঙ্কুভূতোতি নিত্তেজভূতো. পত্তক্খন্ধোতি পতিতক্খন্ধো. অপ্পটিভানোতি কিঞ্চি পটিভানং অপস্সন্তো ভিন্নপটিভানো এৰরূপম্পি নাম নিয্যানিকসাসনং লভিত্ৰা অৰিরুল়্হিধম্মো কিরম্হি সমুগ্ঘাতিতপচ্চযো জাতোতি অত্তনো অভব্বতং পচ্চৰেক্খন্তো পাদঙ্গুট্ঠকেন ভূমিং খণমানো নিসীদি.

পঞ্ঞাযিস্সসি খোতি অযম্পি পাটিযেক্কো অনুসন্ধি. অরিট্ঠো কির চিন্তেসি – ‘‘ভগৰা ময্হং মগ্গফলানং উপনিস্সযো পচ্ছিন্নোতি ৰদতি, ন খো পন বুদ্ধা সউপনিস্সযানংযেৰ ধম্মং দেসেন্তি, অনুপনিস্সযানম্পি দেসেন্তি, অহং সত্থু সন্তিকা সুগতোৰাদং লভিত্ৰা অত্তনো সম্পত্তূপগং কুসলং করিস্সামী’’তি. অথস্স ভগৰা ওৰাদং পটিপস্সম্ভেন্তো ‘‘পঞ্ঞাযিস্সসী’’তিআদিমাহ. তস্সত্থো, ত্ৰংযেৰ, মোঘপুরিস, ইমিনা পাপকেন দিট্ঠিগতেন নিরযাদীসু পঞ্ঞাযিস্সসি, মম সন্তিকা তুয্হং সুগতোৰাদো নাম নত্থি, ন মে তযা অত্থো, ইধাহং ভিক্খূ পটিপুচ্ছিস্সামীতি.

২৩৭. অথ খো ভগৰাতি অযম্পি পাটিযেক্কো অনুসন্ধি. ইমস্মিঞ্হি ঠানে ভগৰা পরিসং সোধেতি, অরিট্ঠং গণতো নিস্সারেতি. সচে হি পরিসগতানং কস্সচি এৰং ভৰেয্য – ‘‘অযং অরিট্ঠো ভগৰতা অকথিতং কথেতুং কিং সক্খিস্সতি, কচ্চি নু খো পরিসমজ্ঝে ভগৰতা কথায সমারদ্ধায সহসা কথিত’’ন্তি. এৰং কথিতং পন ন অরিট্ঠোৰ সুণাতি, অঞ্ঞেনপি সুতং ভৰিস্সতি. অথাপিস্স সিযা ‘‘যথা সত্থা অরিট্ঠং নিগ্গণ্হাতি, মম্পি এৰং নিগ্গণ্হেয্যাতি সুত্ৰাপি তুণ্হীভাৰং আপজ্জেয্যা’’তি. ‘‘তং সব্বং ন করিস্সন্তী’’তি. মযাপি ন কথিতং, অঞ্ঞেন সুতম্পি নত্থীতি ‘‘তুম্হেপিমে, ভিক্খৰে’’তিআদিনা পরিসায লদ্ধিং সোধেতি. পরিসায পন লদ্ধিসোধনেনেৰ অরিট্ঠো গণতো নিস্সারিতো নাম হোতি.

ইদানি অরিট্ঠস্স লদ্ধিং পকাসেন্তো সো ৰত, ভিক্খৰেতিআদিমাহ. তত্থ অঞ্ঞত্রেৰ কামেহীতিআদীসু যো সো, ভিক্খৰে, ভিক্খু ‘‘তে পটিসেৰতো নালং অন্তরাযাযা’’তি এৰংলদ্ধিকো, সো ৰত কিলেসকামেহি চেৰ কিলেসকামসম্পযুত্তেহি সঞ্ঞাৰিতক্কেহি চ অঞ্ঞত্র, এতে ধম্মে পহায, ৰিনা এতেহি ধম্মেহি, ৰত্থুকামে পটিসেৰিস্সতি, মেথুনসমাচারং সমাচরিস্সতীতি নেতং ঠানং ৰিজ্জতি. ইদং কারণং নাম নত্থি, অট্ঠানমেতং অনৰকাসোতি.

২৩৮. এৰং ভগৰা অযং অরিট্ঠো যথা নাম রজকো সুগন্ধানিপি দুগ্গন্ধানিপি জিণ্ণানিপি নৰানিপি সুদ্ধানিপি অসুদ্ধানিপি ৰত্থানি একতো ভণ্ডিকং করোতি, এৰমেৰ ভিক্খূনং নিচ্ছন্দরাগপণীতচীৰরাদিপরিভোগঞ্চ অনিবদ্ধসীলানং গহট্ঠানং অন্তরাযকরং সচ্ছন্দরাগপরিভোগঞ্চ নিবদ্ধসীলানং ভিক্খূনং আৰরণকরং সচ্ছন্দরাগপরিভোগঞ্চ সব্বং একসদিসং করোতীতি অরিট্ঠস্স লদ্ধিং পকাসেত্ৰা ইদানি দুগ্গহিতায পরিযত্তিযা দোসং দস্সেন্তো ইধ, ভিক্খৰে, একচ্চেতিআদিমাহ. তত্থ পরিযাপুণন্তীতি উগ্গণ্হন্তি. সুত্তন্তিআদীসু উভতোৰিভঙ্গনিদ্দেসখন্ধকপরিৰারা, সুত্তনিপাতে মঙ্গলসুত্তরতনসুত্তনালকসুআতুৰট্টকসুত্তানি, অঞ্ঞম্পি চ সুত্তনামকং তথাগতৰচনং সুত্তন্তি ৰেদিতব্বং. সব্বম্পি সগাথকং সুত্তং গেয্যন্তি ৰেদিতব্বং, ৰিসেসেন সংযুত্তকে সকলোপি সগাথাৰগ্গো. সকলং অভিধম্মপিটকং, নিগ্গাথকং সুত্তং, যঞ্চ অঞ্ঞম্পি অট্ঠহি অঙ্গেহি অসঙ্গহিতং বুদ্ধৰচনং, তং ৰেয্যাকরণন্তি ৰেদিতব্বং. ধম্মপদং, থেরগাথা, থেরিগাথা, সুত্তনিপাতে নোসুত্তনামিকা সুদ্ধিকগাথা চ গাথাতি ৰেদিতব্বা. সোমনস্সঞাণমযিকগাথাপটিসংযুত্তা দ্ৰেঅসীতিসুত্তন্তা উদানন্তি ৰেদিতব্বা. ‘‘ৰুত্তঞ্হেতং ভগৰতা’’তিআদিনযপ্পৰত্তা (ইতিৰু. ১,২) দসুত্তরসতসুত্তন্তা ইতিৰুত্তকন্তি ৰেদিতব্বা. অপণ্ণকজাতকাদীনি পণ্ণাসাধিকানি পঞ্চজাতকসতানি জাতকন্তি ৰেদিতব্বানি. ‘‘চত্তারোমে, ভিক্খৰে, অচ্ছরিযা অব্ভুতা ধম্মা আনন্দে’’তিআদিনযপ্পৰত্তা (অ. নি. ৪.১২৯) সব্বেপি অচ্ছরিযঅব্ভুতধম্মপ্পটিসংযুত্তা সুত্তন্তা অব্ভুতধম্মন্তি ৰেদিতব্বা. চূল়ৰেদল্লমহাৰেদল্লসম্মাদিট্ঠিসক্কপঞ্হসঙ্খারভাজনিযমহাপুণ্ণমসুত্তাদযো সব্বেপি ৰেদঞ্চ তুট্ঠিঞ্চ লদ্ধা লদ্ধা পুচ্ছিতসুত্তন্তা ৰেদল্লন্তি ৰেদিতব্বা.

অত্থং ন উপপরিক্খন্তীতি অত্থত্থং কারণত্থং ন পস্সন্তি ন পরিগ্গণ্হন্তি. অনুপপরিক্খতন্তি অনুপপরিক্খন্তানং. ন নিজ্ঝানং খমন্তীতি ন উপট্ঠহন্তি ন আপাথং আগচ্ছন্তি, ইমস্মিং ঠানে সীলং সমাধি ৰিপস্সনা মগ্গো ফলং ৰট্টং ৰিৰট্টং কথিতন্তি এৰং জানিতুং ন সক্কা হোন্তীতি অত্থো. তে উপারম্ভানিসংসা চেৰাতি তে পরেসং ৰাদে দোসারোপনানিসংসা হুত্ৰা পরিযাপুণন্তীতি অত্থো. ইতিৰাদপ্পমোক্খানিসংসা চাতি এৰং ৰাদপমোক্খানিসংসা, পরেহি সকৰাদে দোসে আরোপিতে তং দোসং এৰং মোচেস্সামাতি ইমিনাৰ কারণেন পরিযাপুণন্তীতি অত্থো. তঞ্চস্স অত্থং নানুভোন্তীতি যস্স চ মগ্গস্স ৰা ফলস্স ৰা অত্থায কুলপুত্তা ধম্মং পরিযাপুণন্তি, তঞ্চস্স ধম্মস্স অত্থং এতে দুগ্গহিতগ্গাহিনো নানুভোন্তি. অপিচ পরস্স ৰাদে উপারম্ভং আরোপেতুং অত্তনো ৰাদং মোচেতুং অসক্কোন্তাপি তঞ্চ অত্থং নানুভোন্তিযেৰ.

২৩৯. অলগদ্দত্থিকোতি আসিৰিসঅত্থিকো. গদোতি হি ৰিসস্স নামং, তং তস্স অলং পরিপুণ্ণং অত্থীতি অলগদ্দো. ভোগেতি সরীরে. ইধ পন, ভিক্খৰে, একচ্চে কুলপুত্তা ধম্মং পরিযাপুণন্তীতি নিত্থরণপরিযত্তিৰসেন উগ্গণ্হন্তি. তিস্সো হি পরিযত্তিযো অলগদ্দপরিযত্তি নিত্থরণপরিযত্তি ভণ্ডাগারিকপরিযত্তীতি.

তত্থ যো বুদ্ধৰচনং উগ্গহেত্ৰা এৰং চীৰরাদীনি ৰা লভিস্সামি, চতুপরিসমজ্ঝে ৰা মং জানিস্সন্তীতি লাভসক্কারহেতু পরিযাপুণাতি, তস্স সা পরিযত্তি অলগদ্দপরিযত্তি নাম. এৰং পরিযাপুণতো হি বুদ্ধৰচনং অপরিযাপুণিত্ৰা নিদ্দোক্কমনং ৰরতরং.

যো পন বুদ্ধৰচনং উগ্গণ্হিত্ৰা সীলস্স আগতট্ঠানে সীলং পূরেত্ৰা সমাধিস্স আগতট্ঠানে সমাধিগব্ভং গণ্হাপেত্ৰা ৰিপস্সনায আগতট্ঠানে ৰিপস্সনং পট্ঠপেত্ৰা মগ্গফলানং আগতট্ঠানে মগ্গং ভাৰেস্সামি ফলং সচ্ছিকরিস্সামীতি উগ্গণ্হাতি, তস্স সা পরিযত্তি নিত্থরণপরিযত্তি নাম হোতি.

খীণাসৰস্স পন পরিযত্তি ভণ্ডাগারিকপরিযত্তি নাম. তস্স হি অপরিঞ্ঞাতং অপ্পহীনং অভাৰিতং অসচ্ছিকতং ৰা নত্থি. সো হি পরিঞ্ঞাতক্খন্ধো পহীনকিলেসো ভাৰিতমগ্গো সচ্ছিকতফলো, তস্মা বুদ্ধৰচনং পরিযাপুণন্তো তন্তিধারকো পৰেণিপালকো ৰংসানুরক্খকোৰ হুত্ৰা উগ্গণ্হাতি. ইতিস্স সা পরিযত্তি ভণ্ডাগারিকপরিযত্তি নাম হোতি.

যো পন পুথুজ্জনো ছাতভযাদীসু গন্থধরেসু একস্মিং ঠানে ৰসিতুং অসক্কোন্তেসু সযং ভিক্খাচারেন অকিলমমানো অতিমধুরং বুদ্ধৰচনং মা নস্সতু, তন্তিং ধারেস্সামি, ৰংসং ঠপেস্সামি, পৰেণিং পালেস্সামীতি পরিযাপুণাতি, তস্স পরিযত্তি ভণ্ডাগারিকপরিযত্তি হোতি, ন হোতীতি? ন হোতি. কস্মা? ন অত্তনো ঠানে ঠত্ৰা পরিযাপুতত্তা. পুথুজ্জনস্স হি পরিযত্তি নাম অলগদ্দা ৰা হোতি নিত্থরণা ৰা, সত্তন্নং সেক্খানং নিত্থরণাৰ, খীণাসৰস্স ভণ্ডাগারিকপরিযত্তিযেৰ. ইমস্মিং পন ঠানে নিত্থরণপরিযত্তি অধিপ্পেতা.

নিজ্ঝানং খমন্তীতি সীলাদীনং আগতট্ঠানেসু ইধ সীলং কথিতং, ইধ সমাধি, ইধ ৰিপস্সনা, ইধ মগ্গো, ইধ ফলং, ইধ ৰট্টং, ইধ ৰিৰট্টন্তি আপাথং আগচ্ছন্তি. তঞ্চস্স অত্থং অনুভোন্তীতি যেসং মগ্গফলানং অত্থায পরিযাপুণন্তি. সুগ্গহিতপরিযত্তিং নিস্সায মগ্গং ভাৰেত্ৰা ফলং সচ্ছিকরোন্তা তঞ্চস্স ধম্মস্স অত্থং অনুভৰন্তি. পরৰাদে উপারম্ভং আরোপেতুং সক্কোন্তাপি সকৰাদে আরোপিতং দোসং ইচ্ছিতিচ্ছিতট্ঠানং গহেত্ৰা মোচেতুং সক্কোন্তাপি অনুভোন্তিযেৰ. দীঘরত্তং হিতায সুখায সংৰত্তন্তীতি সীলাদীনং আগতট্ঠানে সীলাদীনি পূরেন্তানম্পি, পরেসং ৰাদে সহধম্মেন উপারম্ভং আরোপেন্তানম্পি, সকৰাদতো দোসং হরন্তানম্পি, অরহত্তং পত্ৰা পরিসমজ্ঝে ধম্মং দেসেত্ৰা ধম্মদেসনায পসন্নেহি উপনীতে চত্তারো পচ্চযে পরিভুঞ্জন্তানম্পি দীঘরত্তং হিতায সুখায সংৰত্তন্তি.

এৰং সুগ্গহিতে বুদ্ধৰচনে আনিসংসং দস্সেত্ৰা ইদানি তত্থেৰ নিযোজেন্তো তস্মা তিহ, ভিক্খৰেতিআদিমাহ. তত্থ তস্মাতি যস্মা দুগ্গহিতপরিযত্তি দুগ্গহিতঅলগদ্দো ৰিয দীঘরত্তং অহিতায দুক্খায সংৰত্ততি, সুগ্গহিতপরিযত্তি সুগ্গহিতঅলগদ্দো ৰিয দীঘরত্তং হিতায সুখায সংৰত্ততি, তস্মাতি অত্থো. তথা নং ধারেয্যাথাতি তথেৰ নং ধারেয্যাথ, তেনেৰ অত্থেন গণ্হেয্যাথ. যে ৰা পনাস্সু ৰিযত্তা ভিক্খূতি যে ৰা পন অঞ্ঞে সারিপুত্তমোগ্গল্লানমহাকস্সপমহাকচ্চানাদিকা ব্যত্তা পণ্ডিতা ভিক্খূ অস্সু, তে পুচ্ছিতব্বা. অরিট্ঠেন ৰিয পন মম সাসনে ন কললং ৰা কচৰরং ৰা পক্খিপিতব্বং.

২৪০. কুল্লূপমন্তি কুল্লসদিসং. নিত্থরণত্থাযাতি চতুরোঘনিত্থরণত্থায. উদকণ্ণৰন্তি যঞ্হি উদকং গম্ভীরং ন পুথুলং. পুথুলং ৰা পন ন গম্ভীরং, ন তং অণ্ণৰোতি ৰুচ্চতি. যং পন গম্ভীরঞ্চেৰ পুথুলঞ্চ, তং অণ্ণৰোতি ৰুচ্চতি. তস্মা মহন্তং উদকণ্ণৰন্তি মহন্তং পুথুলং গম্ভীরং উদকন্তি অযমেত্থ অত্থো. সাসঙ্কং নাম যত্থ চোরানং নিৰুত্থোকাসো দিস্সতি. ঠিতোকাসো, নিসিন্নোকাসো, নিপন্নোকাসো দিস্সতি. সপ্পটিভযং নাম যত্থ চোরেহি মনুস্সা হতা দিস্সন্তি, ৰিলুত্তা দিস্সন্তি, আকোটিতা দিস্সন্তি. উত্তরসেতূতি উদকণ্ণৰস্স উপরি বদ্ধো সেতু. কুল্লং বন্ধিত্ৰাতি কুল্লো নাম তরণত্থায কলাপং কত্ৰা বদ্ধো. পত্থরিত্ৰা বদ্ধা পন পদরচাটিআদযো উল়ুম্পোতি ৰুচ্চন্তি. উচ্চারেত্ৰাতি ঠপেত্ৰা. কিচ্চকারীতি পত্তকারী যুত্তকারী, পতিরূপকারীতি অত্থো. ধম্মাপি ৰো পহাতব্বাতি এত্থ ধম্মাতি সমথৰিপস্সনা. ভগৰা হি সমথেপি ছন্দরাগং পজহাপেসি, ৰিপস্সনাযপি. সমথে ছন্দরাগং কত্থ পজহাপেসি? ‘‘ইতি খো, উদাযি, নেৰসঞ্ঞানাসঞ্ঞাযতনস্সপি পহানং ৰদামি, পস্সসি নো ত্ৰং, উদাযি, তং সংযোজনং অণুং ৰা থূলং ৰা, যস্সাহং নো পহানং ৰদামী’’তি (ম. নি. ২.১৫৬) এত্থ সমথে ছন্দরাগং পজহাপেসি. ‘‘ইমং চে তুম্হে, ভিক্খৰে, দিট্ঠিং এৰং পরিসুদ্ধং এৰং পরিযোদাতং ন অল্লীযেথ ন কেলাযেথ ন ধনাযেথা’’তি (ম. নি. ১.৪০১) এত্থ ৰিপস্সনায ছন্দরাগং পজহাপেসি. ইধ পন উভযত্থ পজহাপেন্তো ‘‘ধম্মাপি ৰো পহাতব্বা, পগেৰ অধম্মা’’তি আহ.

তত্রাযং অধিপ্পাযো – ভিক্খৰে, অহং এৰরূপেসু সন্তপ্পণীতেসু ধম্মেসু ছন্দরাগপ্পহানং ৰদামি, কিং পন ইমস্মিং অসদ্ধম্মে গামধম্মে ৰসলধম্মে দুট্ঠুল্লে ওদকন্তিকে, যত্থ অযং অরিট্ঠো মোঘপুরিসো নিদ্দোসসঞ্ঞী পঞ্চসু কামগুণেসু ছন্দরাগং নালং অন্তরাযাযাতি ৰদতি. অরিট্ঠেন ৰিয ন তুম্হেহি ময্হং সাসনে কললং ৰা কচৰরং ৰা পক্খিপিতব্বন্তি এৰং ভগৰা ইমিনাপি ওৰাদেন অরিট্ঠংযেৰ নিগ্গণ্হাতি.

২৪১. ইদানি যো পঞ্চসু খন্ধেসু তিৰিধগ্গাহৰসেন অহং মমন্তি গণ্হাতি, সো ময্হং সাসনে অযং অরিট্ঠো ৰিয কললং কচৰরং পক্খিপতীতি দস্সেন্তো ছযিমানি, ভিক্খৰেতিআদিমাহ. তত্থ দিট্ঠিট্ঠানানীতি দিট্ঠিপি দিট্ঠিট্ঠানং, দিট্ঠিযা আরম্মণম্পি দিট্ঠিট্ঠানং, দিট্ঠিযা পচ্চযোপি. রূপং এতং মমাতিআদীসু এতং মমাতি তণ্হাগ্গাহো. এসোহমস্মীতি মানগ্গাহো. এসো মে অত্তাতি দিট্ঠিগ্গাহো. এৰং রূপারম্মণা তণ্হামানদিট্ঠিযো কথিতা হোন্তি. রূপং পন অত্তাতি ন ৰত্তব্বং. ৰেদনাদীসুপি এসেৰ নযো. দিট্ঠং রূপাযতনং, সুতং সদ্দাযতনং, মুতং গন্ধাযতনং রসাযতনং ফোট্ঠব্বাযতনং, তঞ্হি পত্ৰা গহেতব্বতো মুতন্তি ৰুত্তং. অৰসেসানি সত্তাযতনানি ৰিঞ্ঞাতং নাম. পত্তন্তি পরিযেসিত্ৰা ৰা অপরিযেসিত্ৰা ৰা পত্তং. পরিযেসিতন্তি পত্তং ৰা অপ্পত্তং ৰা পরিযেসিতং. অনুৰিচরিতং মনসাতি চিত্তেন অনুসঞ্চরিতং. লোকস্মিঞ্হি পরিযেসিত্ৰা পত্তম্পি অত্থি, পরিযেসিত্ৰা নোপত্তম্পি. অপরিযেসিত্ৰা পত্তম্পি অত্থি, অপরিযেসিত্ৰা নোপত্তম্পি. তত্থ পরিযেসিত্ৰা পত্তং পত্তং নাম. পরিযেসিত্ৰা নোপত্তং পরিযেসিতং নাম. অপরিযেসিত্ৰা পত্তঞ্চ, অপরিযেসিত্ৰা নোপত্তঞ্চ মনসানুৰিচরিতং নাম.

অথ ৰা পরিযেসিত্ৰা পত্তম্পি অপরিযেসিত্ৰা পত্তম্পি পত্তট্ঠেন পত্তং নাম. পরিযেসিত্ৰা নোপত্তং পরিযেসিতং নাম. অপরিযেসিত্ৰা নোপত্তং মনসানুৰিচরিতং নাম. সব্বং ৰা এতং মনসা অনুৰিচরিতত্তা মনসানুৰিচরিতং নাম. ইমিনা ৰিঞ্ঞাণারম্মণা তণ্হামানদিট্ঠিযো কথিতা, দেসনাৰিলাসেন হেট্ঠা দিট্ঠাদিআরম্মণৰসেন ৰিঞ্ঞাণং দস্সিতং. যম্পি তং দিট্ঠিট্ঠানন্তি যম্পি এতং সো লোকোতিআদিনা নযেন পৰত্তং দিট্ঠিট্ঠানং.

সো লোকো সো অত্তাতি যা এসা ‘‘রূপং অত্ততো সমনুপস্সতী’’তিআদিনা নযেন পৰত্তা দিট্ঠি লোকো চ অত্তা চাতি গণ্হাতি, তং সন্ধায ৰুত্তং. সো পেচ্চ ভৰিস্সামীতি সো অহং পরলোকং গন্ত্ৰা নিচ্চো ভৰিস্সামি, ধুৰো সস্সতো অৰিপরিণামধম্মো ভৰিস্সামি, সিনেরুমহাপথৰীমহাসমুদ্দাদীহি সস্সতীহি সমং তথেৰ ঠস্সামি. তম্পি এতং মমাতি তম্পি দস্সনং এতং মম, এসোহমস্মি, এসো মে অত্তাতি সমনুপস্সতি. ইমিনা দিট্ঠারম্মণা তণ্হামানদিট্ঠিযো কথিতা. ৰিপস্সনায পটিৰিপস্সনাকালে ৰিয পচ্ছিমদিট্ঠিযা পুরিমদিট্ঠিগ্গহণকালে এৰং হোতি.

সুক্কপক্খে রূপং নেতং মমাতি রূপে তণ্হামানদিট্ঠিগ্গাহা পটিক্খিত্তা. ৰেদনাদীসুপি এসেৰ নযো. সমনুপস্সতীতি ইমস্স পন পদস্স তণ্হাসমনুপস্সনা মানসমনুপস্সনা দিট্ঠিসমনুপস্সনা ঞাণসমনুপস্সনাতি চতস্সো সমনুপস্সনাতি অত্থো. তা কণ্হপক্খে তিস্সন্নং সমনুপস্সনানং, সুক্কপক্খে ঞাণসমনুপস্সনায ৰসেন ৰেদিতব্বা. অসতি ন পরিতস্সতীতি অৰিজ্জমানে ভযপরিতস্সনায তণ্হাপরিতস্সনায ৰা ন পরিতস্সতি. ইমিনা ভগৰা অজ্ঝত্তক্খন্ধৰিনাসে অপরিতস্সমানং খীণাসৰং দস্সেন্তো দেসনং মত্থকং পাপেসি.

২৪২. এৰং ৰুত্তে অঞ্ঞতরো ভিক্খূতি এৰং ভগৰতা ৰুত্তে অঞ্ঞতরো অনুসন্ধিকুসলো ভিক্খু – ‘‘ভগৰতা অজ্ঝত্তক্খন্ধৰিনাসে অপরিতস্সন্তং খীণাসৰং দস্সেত্ৰা দেসনা নিট্ঠাপিতা, অজ্ঝত্তং অপরিতস্সন্তে খো পন সতি অজ্ঝত্তং পরিতস্সকেন বহিদ্ধা পরিক্খারৰিনাসে পরিতস্সকেন অপরিতস্সকেন চাপি ভৰিতব্বং. ইতি ইমেহি চতূহি কারণেহি অযং পঞ্হো পুচ্ছিতব্বো’’তি চিন্তেত্ৰা একংসং চীৰরং কত্ৰা অঞ্জলিং পগ্গয্হ ভগৰন্তং এতদৰোচ. বহিদ্ধা অসতীতি বহিদ্ধা পরিক্খারৰিনাসে. অহু ৰত মেতি অহোসি ৰত মে ভদ্দকং যানং ৰাহনং হিরঞ্ঞং সুৰণ্ণন্তি অত্থো. তং ৰত মে নত্থীতি তং ৰত ইদানি ময্হং নত্থি, রাজূহি ৰা চোরেহি ৰা হটং, অগ্গিনা ৰা দড্ঢং, উদকেন ৰা ৰুল়্হং, পরিভোগেন ৰা জিণ্ণং. সিযা ৰত মেতি ভৰেয্য ৰত ময্হং যানং ৰাহনং হিরঞ্ঞং সুৰণ্ণং সালি ৰীহি যৰো গোধুমো. তং ৰতাহং ন লভামীতি তমহং অলভমানো তদনুচ্ছৰিকং কম্মং অকত্ৰা নিসিন্নত্তা ইদানি ন লভামীতি সোচতি, অযং অগারিযসোচনা, অনগারিযস্স পত্তচীৰরাদীনং ৰসেন ৰেদিতব্বা.

অপরিতস্সনাৰারে ন এৰং হোতীতি যেহি কিলেসেহি এৰং ভৰেয্য, তেসং পহীনত্তা ন এৰং হোতি. দিট্ঠিট্ঠানাধিট্ঠানপরিযুট্ঠানাভিনিৰেসানুসযানন্তি দিট্ঠীনঞ্চ দিট্ঠিট্ঠানানঞ্চ দিট্ঠাধিট্ঠানানঞ্চ দিট্ঠিপরিযুট্ঠানানঞ্চ অভিনিৰেসানুসযানঞ্চ. সব্বসঙ্খারসমথাযাতি নিব্বানত্থায. নিব্বানঞ্হি আগম্ম সব্বসঙ্খারাইঞ্জিতানি, সব্বসঙ্খারচলনানি সব্বসঙ্খারৰিপ্ফন্দিতানি সম্মন্তি ৰূপসম্মন্তি, তস্মা তং, ‘‘সব্বসঙ্খারসমথো’’তি ৰুচ্চতি. তদেৰ চ আগম্ম খন্ধূপধি কিলেসূপধি অভিসঙ্খারূপধি, পঞ্চকামগুণূপধীতি ইমে উপধযো পটিনিস্সজ্জিযন্তি, তণ্হা খীযতি ৰিরজ্জতি নিরুজ্ঝতি, তস্মা তং, ‘‘সব্বূপধিপটিনিস্সগ্গো তণ্হাক্খযো ৰিরাগো নিরোধো’’তি ৰুচ্চতি. নিব্বানাযাতি অযং পনস্স সরূপনিদ্দেসো, ইতি সব্বেহেৰ ইমেহি পদেহি নিব্বানস্স সচ্ছিকিরিযত্থায ধম্মং দেসেন্তস্সাতি অযমত্থো দীপিতো. তস্সেৰং হোতীতি তস্স দিট্ঠিগতিকস্স উচ্ছিজ্জিস্সামি নামস্সু, ৰিনস্সিস্সামি নামস্সু, নাস্সু নাম ভৰিস্সামীতি এৰং হোতি. দিট্ঠিগতিকস্স হি তিলক্খণং আরোপেত্ৰা সুঞ্ঞতাপটিসংযুত্তং কত্ৰা দেসিযমানং ধম্মং সুণন্তস্স তাসো উপ্পজ্জতি. ৰুত্তঞ্হেতং – ‘‘তাসো হেসো, ভিক্খৰে, অসুতৰতো পুথুজ্জনস্স নো চস্সং, নো চ মে সিযা’’তি (সং. নি. ৩.৫৫).

২৪৩. এত্তাৰতা বহিদ্ধাপরিক্খারৰিনাসে তস্সনকস্স চ নোতস্সনকস্স চ অজ্ঝত্তক্খন্ধৰিনাসে তস্সনকস্স চ নোতস্সনকস্স চাতি ইমেসং ৰসেন চতুক্কোটিকা সুঞ্ঞতা কথিতা. ইদানি বহিদ্ধা পরিক্খারং পরিগ্গহং নাম কত্ৰা, ৰীসতিৰত্থুকং সক্কাযদিট্ঠিং অত্তৰাদুপাদানং নাম কত্ৰা, সক্কাযদিট্ঠিপমুখা দ্ৰাসট্ঠি দিট্ঠিযো দিট্ঠিনিস্সযং নাম কত্ৰা তিকোটিকং সুঞ্ঞতং দস্সেতুং তং, ভিক্খৰে, পরিগ্গহন্তিআদিমাহ. তত্থ পরিগ্গহন্তি বহিদ্ধা পরিক্খারং. পরিগ্গণ্হেয্যাথাতি যথা ৰিঞ্ঞূ মনুস্সো পরিগ্গণ্হেয্য. অহম্পি খো তং, ভিক্খৰেতি, ভিক্খৰে, তুম্হেপি ন পস্সথ, অহম্পি ন পস্সামি, ইতি এৰরূপো পরিগ্গহো নত্থীতি দস্সেতি. এৰং সব্বত্থ অত্থো ৰেদিতব্বো.

২৪৪. এৰং তিকোটিকং সুঞ্ঞতং দস্সেত্ৰা ইদানি অজ্ঝত্তক্খন্ধে অত্তাতি বহিদ্ধা পরিক্খারে অত্তনিযন্তি কত্ৰা দ্ৰিকোটিকং দস্সেন্তো অত্তনি ৰা, ভিক্খৰে, সতীতিআদিমাহ. তত্থ অযং সঙ্খেপত্থো, ভিক্খৰে, অত্তনি ৰা সতি ইদং মে পরিক্খারজাতং অত্তনিযন্তি অস্স, অত্তনিযেৰ ৰা পরিক্খারে সতি অযং মে অত্তা ইমস্স পরিক্খারস্স সামীতি, এৰং অহন্তি. সতি মমাতি, মমাতি সতি অহন্তি যুত্তং ভৰেয্য. সচ্চতোতি ভূততো, থেততোতি তথতো থিরতো ৰা.

ইদানি ইমে পঞ্চক্খন্ধে অনিচ্চং দুক্খং অনত্তাতি এৰং তিপরিৰট্টৰসেন অগ্গণ্হন্তো অযং অরিট্ঠো ৰিয ময্হং সাসনে কললং কচৰরং পক্খিপতীতি দস্সেন্তো তং কিং মঞ্ঞথ, ভিক্খৰে, রূপং নিচ্চং ৰাতিআদিমাহ. তত্থ অনিচ্চং, ভন্তেতি, ভন্তে, যস্মা হুত্ৰা ন হোতি, তস্মা অনিচ্চং. উপ্পাদৰযৰত্তিতো ৰিপরিণামতাৰকালিকনিচ্চপটিক্খেপট্ঠেন ৰাতি চতূহি কারণেহি অনিচ্চং. দুক্খং, ভন্তেতি, ভন্তে, পটিপীল়নাকারেন দুক্খং, সন্তাপদুক্খমদুক্খৰত্থুকসুখপটিক্খেপট্ঠেন ৰাতি চতূহি কারণেহি দুক্খং. ৰিপরিণামধম্মন্তি ভৰসঙ্কন্তিউপগমনসভাৰং পকতিভাৰৰিজহনসভাৰং. কল্লং নু তং সমনুপস্সিতুং এতং মম, এসোহমস্মি, এসো মে অত্তাতি যুত্তং নু খো তং ইমেসং তিণ্ণং তণ্হামানদিট্ঠিগ্গাহানং ৰসেন অহং মমাতি এৰং গহেতুং. নো হেতং, ভন্তেতি ইমিনা তে ভিক্খূ অৰসৰত্তনাকারেন রূপং, ভন্তে, অনত্তাতি পটিজানন্তি. সুঞ্ঞঅস্সামিকঅনিস্সরঅত্তপটিক্খেপট্ঠেন ৰাতি চতূহি কারণেহি অনত্তা.

ভগৰা হি কত্থচি অনিচ্চৰসেন অনত্তত্তং দস্সেতি, কত্থচি দুক্খৰসেন, কত্থচি উভযৰসেন. ‘‘চক্খু অত্তাতি যো ৰদেয্য, তং ন উপপজ্জতি, চক্খুস্স উপ্পাদোপি ৰযোপি পঞ্ঞাযতি. যস্স খো পন উপ্পাদোপি ৰযোপি পঞ্ঞাযতি, অত্তা মে উপ্পজ্জতি চ ৰেতি চাতি ইচ্চস্স এৰমাগতং হোতি, তস্মা তং ন উপপজ্জতি চক্খু অত্তাতি যো ৰদেয্য, ইতি চক্খু অনত্তা’’তি (ম. নি. ৩.৪২২) ইমস্মিঞ্হি ছছক্কসুত্তে অনিচ্চৰসেন অনত্ততং দস্সেতি. ‘‘রূপঞ্চ হিদং, ভিক্খৰে, অত্তা অভৰিস্স, নযিদং রূপং আবাধায সংৰত্তেয্য, লব্ভেথ চ রূপে ‘এৰং মে রূপং হোতু, এৰং মে রূপং মা অহোসী’তি. যস্মা চ খো, ভিক্খৰে, রূপং অনত্তা, তস্মা রূপং আবাধায সংৰত্ততি, ন চ লব্ভতি রূপে ‘এৰং মে রূপং হোতু, এৰং মে রূপং মা অহোসী’’’তি (মহাৰ. ২০; সং. নি. ৩.৫৯) ইমস্মিং অনত্তলক্খণসুত্তে দুক্খৰসেন অনত্ততং দস্সেতি. ‘‘রূপং, ভিক্খৰে, অনিচ্চং, যদনিচ্চং তং দুক্খং, যং দুক্খং তদনত্তা, যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্ব’’ন্তি (সং. নি. ৩.৭৬) ইমস্মিং অরহত্তসুত্তে উভযৰসেন অনত্ততং দস্সেতি. কস্মা? অনিচ্চং দুক্খঞ্চ পাকটং. অনত্তাতি ন পাকটং.

পরিভোগভাজনাদীসু হি ভিন্নেসু অহো অনিচ্চন্তি ৰদন্তি, অহো অনত্তাতি ৰত্তা নাম নত্থি. সরীরে গণ্ডপিল়কাদীসু ৰা উট্ঠিতাসু কণ্টকেন ৰা ৰিদ্ধা অহো দুক্খন্তি ৰদন্তি, অহো অনত্তাতি পন ৰত্তা নাম নত্থি. কস্মা? ইদঞ্হি অনত্তলক্খণং নাম অৰিভূতং দুদ্দসং দুপ্পঞ্ঞাপনং. তেন তং ভগৰা অনিচ্চৰসেন ৰা দুক্খৰসেন ৰা উভযৰসেন ৰা দস্সেতি. তযিদং ইমস্মিম্পি তেপরিৰট্টে অনিচ্চদুক্খৰসেনেৰ দস্সিতং. ৰেদনাদীসুপি এসেৰ নযো.

তস্মা তিহ, ভিক্খৰেতি, ভিক্খৰে, যস্মা এতরহি অঞ্ঞদাপি রূপং অনিচ্চং দুক্খং অনত্তা, তস্মাতি অত্থো. যংকিঞ্চি রূপন্তিআদীনি ৰিসুদ্ধিমগ্গে খন্ধনিদ্দেসে ৰিত্থারিতানেৰ.

২৪৫. নিব্বিন্দতীতি উক্কণ্ঠতি. এত্থ চ নিব্বিদাতি ৰুট্ঠানগামিনীৰিপস্সনা অধিপ্পেতা. ৰুট্ঠানগামিনীৰিপস্সনায হি বহূনি নামানি. এসা হি কত্থচি সঞ্ঞগ্গন্তি ৰুত্তা. কত্থচি ধম্মট্ঠিতিঞাণন্তি. কত্থচি পারিসুদ্ধিপধানিযঙ্গন্তি. কত্থচি পটিপদাঞাণদস্সনৰিসুদ্ধীতি. কত্থচি তম্মযতাপরিযাদানন্তি. কত্থচি তীহি নামেহি. কত্থচি দ্ৰীহীতি.

তত্থ পোট্ঠপাদসুত্তে তাৰ ‘‘সঞ্ঞা খো, পোট্ঠপাদ, পঠমং উপ্পজ্জতি, পচ্ছা ঞাণ’’ন্তি (দী. নি. ১.৪১৬) এৰং সঞ্ঞগ্গন্তি ৰুত্তা. সুসিমসুত্তে ‘‘পুব্বে খো, সুসিম, ধম্মট্ঠিতিঞাণং, পচ্ছা নিব্বানে ঞাণ’’ন্তি (সং. নি. ২.৭০) এৰং ধম্মট্ঠিতিঞাণন্তি ৰুত্তা. দসুত্তরসুত্তে ‘‘পটিপদাঞাণদস্সনৰিসুদ্ধিপধানিযঙ্গ’’ন্তি (দী. নি. ৩.৩৫৯) এৰং পারিসুদ্ধিপদানিযঙ্গন্তি ৰুত্তা. রথৰিনীতে ‘‘কিং নু খো, আৰুসো, পটিপদাঞাণদস্সনৰিসুদ্ধত্থং ভগৰতি ব্রহ্মচরিযং ৰুস্সতী’’তি (ম. নি. ১.২৫৭) এৰং পটিপদাঞাণদস্সনৰিসুদ্ধীতি ৰুত্তা. সল়াযতনৰিভঙ্গে ‘‘অতম্মযতং, ভিক্খৰে, নিস্সায অতম্মযতং আগম্ম যাযং উপেক্খা নানত্তা নানত্তসিতা, তং অভিনিৰজ্জেত্ৰা যাযং উপেক্খা একত্তা একত্তসিতা, তং নিস্সায তং আগম্ম এৰমেতিস্সা পহানং হোতি, এৰমেতিস্সা সমতিক্কমো হোতী’’তি (দী. নি. ৩.৩১০) এৰং তম্মযতাপরিযাদানন্তি ৰুত্তা. পটিসম্ভিদামগ্গে ‘‘যা চ মুঞ্চিতুকম্যতা, যা চ পটিসঙ্খানুপস্সনা, যা চ সঙ্খারুপেক্খা, ইমে ধম্মা একত্থা ব্যঞ্জনমেৰ নান’’ন্তি (পটি. ম. ১.৫৪) এৰং তীহি নামেহি ৰুত্তা. পট্ঠানে ‘‘অনুলোমং গোত্রভুস্স অনন্তরপচ্চযেন পচ্চযো, অনুলোমং ৰোদানস্স অনন্তরপচ্চযেন পচ্চযো’’তি (পট্ঠা. ১.১.৪১৭) এৰং দ্ৰীহি নামেহি ৰুত্তা. ইমস্মিং পন অলগদ্দসুত্তে নিব্বিন্দতীতি নিব্বিদানামেন আগতা.

নিব্বিদা ৰিরজ্জতীতি এত্থ ৰিরাগোতি মগ্গো ৰিরাগা ৰিমুচ্চতীতি এত্থ ৰিরাগেন মগ্গেন ৰিমুচ্চতীতি ফলং কথিতং. ৰিমুত্তস্মিং ৰিমুত্তমিতি ঞাণং হোতীতি ইধ পচ্চৰেক্খণা কথিতা.

এৰং ৰিমুত্তচিত্তং মহাখীণাসৰং দস্সেত্ৰা ইদানি তস্স যথাভূতেহি পঞ্চহি কারণেহি নামং গণ্হন্তো অযং ৰুচ্চতি, ভিক্খৰেতিআদিমাহ. অৰিজ্জাতি ৰট্টমূলিকা অৰিজ্জা. অযঞ্হি দুরুক্খিপনট্ঠেন পলিঘোতি ৰুচ্চতি. তেনেস তস্স উক্খিত্তত্তা উক্খিত্তপলিঘোতি ৰুত্তো. তালাৰত্থুকতাতি সীসচ্ছিন্নতালো ৰিয কতা, সমূলং ৰা তালং উদ্ধরিত্ৰা তালস্স ৰত্থু ৰিয কতা, যথা তস্মিং ৰত্থুস্মিং পুন সো তালো ন পঞ্ঞাযতি, এৰং পুন অপঞ্ঞত্তিভাৰং নীতাতি অত্থো. পোনোব্ভৰিকোতি পুনব্ভৰদাযকো. জাতিসংসারোতিআদীসু জাযনৰসেন চেৰ সংসরণৰসেন চ এৰং লদ্ধনামানং পুনব্ভৰখন্ধানং পচ্চযো কম্মাভিসঙ্খারো. সো হি পুনপ্পুনং উপ্পত্তিকরণৰসেন পরিক্খিপিত্ৰা ঠিতত্তা পরিক্খাতি ৰুচ্চতি, তেনেস তস্সা সংকিণ্ণত্তা ৰিকিণ্ণত্তা সংকিণ্ণপরিক্খোতি ৰুত্তো. তণ্হাতি ৰট্টমূলিকা তণ্হা. অযঞ্হি গম্ভীরানুগতট্ঠেন এসিকাতি ৰুচ্চতি. তেনেস তস্সা অব্বূল়্হত্তা লুঞ্চিত্ৰা ছড্ডিতত্তা অব্বূল়্হেসিকোতি ৰুত্তো. ওরম্ভাগিযানীতি ওরং ভজনকানি কামভৰে উপপত্তিপচ্চযানি. এতানি হি কৰাটং ৰিয নগরদ্ৰারং চিত্তং পিদহিত্ৰা ঠিতত্তা অগ্গল়াতি ৰুচ্চন্তি. তেনেস তেসং নিরাকতত্তা ভিন্নত্তা নিরগ্গল়োতি ৰুত্তো. অরিযোতি নিক্কিলেসো পরিসুদ্ধো. পন্নদ্ধজোতি পতিতমানদ্ধজো. পন্নভারোতি খন্ধভারকিলেসভারঅভিসঙ্খারভারপঞ্চকামগুণভারা পন্না ওরোহিতা অস্সাতি পন্নভারো. অপিচ ইধ মানভারস্সেৰ ওরোপিতত্তা পন্নভারোতি অধিপ্পেতো. ৰিসংযুত্তোতি চতূহি যোগেহি সব্বকিলেসেহি চ ৰিসংযুত্তো. ইধ পন মানসংযোগেনেৰ ৰিসংযুত্তত্তা ৰিসংযুত্তোতি অধিপ্পেতো. অস্মিমানোতি রূপে অস্মীতি মানো, ৰেদনায… সঞ্ঞায… সঙ্খারেসু… ৰিঞ্ঞাণে অস্মীতি মানো.

এত্তাৰতা ভগৰতা মগ্গেন কিলেসে খেপেত্ৰা নিরোধসযনৰরগতস্স নিব্বানারম্মণং ফলসমাপত্তিং অপ্পেত্ৰা ৰিহরতো খীণাসৰস্স কালো দস্সিতো. যথা হি দ্ৰে নগরানি একং চোরনগরং, একং খেমনগরং. অথ একস্স মহাযোধস্স এৰং ভৰেয্য – ‘‘যাৰিমং চোরনগরং তিট্ঠতি, তাৰ খেমনগরং ভযতো ন মুচ্চতি, চোরনগরং অনগরং করিস্সামী’’তি সন্নাহং কত্ৰা খগ্গং গহেত্ৰা চোরনগরং উপসঙ্কমিত্ৰা নগরদ্ৰারে উস্সাপিতে এসিকত্থম্ভে খগ্গেন ছিন্দিত্ৰা সদ্ৰারবাহকং কৰাটং ছিন্দিত্ৰা পলিঘং উক্খিপিত্ৰা পাকারং ভিন্দন্তো পরিক্খং সংকিরিত্ৰা নগরসোভনত্থায উস্সিতে ধজে পাতেত্ৰা নগরং অগ্গিনা ঝাপেত্ৰা খেমনগরং পৰিসিত্ৰা পাসাদং অভিরুয্হ ঞাতিগণপরিৰুতো সুরসভোজনং ভুঞ্জেয্য, এৰং চোরনগরং ৰিয সক্কাযো, খেমনগরং ৰিয নিব্বানং, মহাযোধো ৰিয যোগাৰচরো. তস্সেৰং হোতি, ‘‘যাৰ সক্কাযৰট্টং ৰত্ততি, তাৰ দ্ৰত্তিংসকম্মকারণঅট্ঠনৰুতিরোগপঞ্চৰীসতিমহাভযেহি পরিমুচ্চনং নত্থী’’তি. সো মহাযোধো ৰিয সন্নাহং সীলসন্নাহং কত্ৰা, পঞ্ঞাখগ্গং গহেত্ৰা খগ্গেন এসিকত্থম্ভে ৰিয অরহত্তমগ্গেন তণ্হেসিকং লুঞ্চিত্ৰা, সো যোধো সদ্ৰারবাহকং নগরকৰাটং ৰিয পঞ্চোরম্ভাগিযসংযোজনগ্গল়ং উগ্ঘাটেত্ৰা, সো যোধো পলিঘং ৰিয, অৰিজ্জাপলিঘং উক্খিপিত্ৰা, সো যোধো পাকারং ভিন্দন্তো পরিক্খং ৰিয কম্মাভিসঙ্খারং ভিন্দন্তো জাতিসংসারপরিক্খং সংকিরিত্ৰা, সো যোধো নগরসোভনত্থায উস্সাপিতে ধজে ৰিয মানদ্ধজে পাতেত্ৰা সক্কাযনগরং ঝাপেত্ৰা, সো যোধো খেমনগরে উপরিপাসাদে সুরসভোজনং ৰিয কিলেসনিব্বানং নগরং পৰিসিত্ৰা অমতনিরোধারম্মণং ফলসমাপত্তিসুখং অনুভৰমানো কালং ৰীতিনামেতি.

২৪৬. ইদানি এৰং ৰিমুত্তচিত্তস্স খীণাসৰস্স পরেহি অনধিগমনীযৰিঞ্ঞাণতং দস্সেন্তো এৰং ৰিমুত্তচিত্তং খোতিআদিমাহ. তত্থ অন্ৰেসন্তি অন্ৰেসন্তা গৰেসন্তা. ইদং নিস্সিতন্তি ইদং নাম নিস্সিতং. তথাগতস্সাতি এত্থ সত্তোপি তথাগতোতি অধিপ্পেতো, উত্তমপুগ্গলো খীণাসৰোপি. অননুৰিজ্জোতি অসংৰিজ্জমানো ৰা অৰিন্দেয্যো ৰা. তথাগতোতি হি সত্তে গহিতে অসংৰিজ্জমানোতি অত্থো ৰট্টতি, খীণাসৰে গহিতে অৰিন্দেয্যোতি অত্থো ৰট্টতি.

তত্থ পুরিমনযে অযমধিপ্পাযো – ভিক্খৰে, অহং দিট্ঠেৰ ধম্মে ধরমানকংযেৰ খীণাসৰং তথাগতো সত্তো পুগ্গলোতি ন পঞ্ঞপেমি. অপ্পটিসন্ধিকং পন পরিনিব্বুতং খীণাসৰং সত্তোতি ৰা পুগ্গলোতি ৰা কিং পঞ্ঞপেস্সামি? অননুৰিজ্জো তথাগতো. ন হি পরমত্থতো সত্তো নাম কোচি অত্থি, তস্স অৰিজ্জমানস্স ইদং নিস্সিতং ৰিঞ্ঞাণন্তি অন্ৰেসন্তাপি কিং অধিগচ্ছিস্সন্তি? কথং পটিলভিস্সন্তীতি অত্থো. দুতিযনযে অযমধিপ্পাযো – ভিক্খৰে, অহং দিট্ঠেৰ ধম্মে ধরমানকংযেৰ খীণাসৰং ৰিঞ্ঞাণৰসেন ইন্দাদীহি অৰিন্দিযং ৰদামি. ন হি সইন্দা দেৰা সব্রহ্মকা সপজাপতিকা অন্ৰেসন্তাপি খীণাসৰস্স ৰিপস্সনাচিত্তং ৰা মগ্গচিত্তং ৰা ফলচিত্তং ৰা, ইদং নাম আরম্মণং নিস্সায ৰত্ততীতি জানিতুং সক্কোন্তি. তে অপ্পটিসন্ধিকস্স পরিনিব্বুতস্স কিং জানিস্সন্তীতি?

অসতাতি অসন্তেন. তুচ্ছাতি তুচ্ছকেন. মুসাতি মুসাৰাদেন. অভূতেনাতি যং নত্থি, তেন. অব্ভাচিক্খন্তীতি অভিআচিক্খন্তি, অভিভৰিত্ৰা ৰদন্তি. ৰেনযিকোতি ৰিনযতি ৰিনাসেতীতি ৰিনযো, সো এৰ ৰেনযিকো, সত্তৰিনাসকোতি অধিপ্পাযো. যথা চাহং ন, ভিক্খৰেতি, ভিক্খৰে, যেন ৰাকারেন অহং ন সত্তৰিনাসকো. যথা চাহং ন ৰদামীতি যেন ৰা কারণেন অহং সত্তৰিনাসং ন পঞ্ঞপেমি. ইদং ৰুত্তং হোতি – যথাহং ন সত্তৰিনাসকো, যথা চ ন সত্তৰিনাসং পঞ্ঞপেমি, তথা মং তে ভোন্তো সমণব্রাহ্মণা ‘‘ৰেনযিকো সমণো গোতমো’’তি ৰদন্তা সত্তৰিনাসকো সমণো গোতমোতি চ, ‘‘সতো সত্তস্স উচ্ছেদং ৰিনাসং ৰিভৰং পঞ্ঞপেতী’’তি ৰদন্তা সত্তৰিনাসং পঞ্ঞপেতীতি চ অসতা তুচ্ছা মুসা অভূতেন অব্ভাচিক্খন্তীতি.

পুব্বে চাতি পুব্বে মহাবোধিমণ্ডম্হিযেৰ চ. এতরহি চাতি এতরহি ধম্মদেসনাযঞ্চ. দুক্খঞ্চেৰ পঞ্ঞপেমি, দুক্খস্স চ নিরোধন্তি ধম্মচক্কং অপ্পৰত্তেত্ৰা বোধিমণ্ডে ৰিহরন্তোপি ধম্মচক্কপ্পৰত্তনতো পট্ঠায ধম্মং দেসেন্তোপি চতুসচ্চমেৰ পঞ্ঞপেমীতি অত্থো. এত্থ হি দুক্খগ্গহণেন তস্স মূলভূতো সমুদযো, নিরোধগ্গহণেন তংসম্পাপকো মগ্গো গহিতোৰ হোতীতি ৰেদিতব্বো. তত্র চেতি তস্মিং চতুসচ্চপ্পকাসনে. পরেতি সচ্চানি আজানিতুং পটিৰিজ্ঝিতুং অসমত্থপুগ্গলা. অক্কোসন্তীতি দসহি অক্কোসৰত্থূহি অক্কোসন্তি. পরিভাসন্তীতি ৰাচায পরিভাসন্তি. রোসেন্তি ৰিহেসেন্তীতি রোসেস্সাম ৰিহেসেস্সামাতি অধিপ্পাযেন ঘট্টেন্তি দুক্খাপেন্তি. তত্রাতি তেসু অক্কোসাদীসু, তেসু ৰা পরপুগ্গলেসু. আঘাতোতি কোপো. অপ্পচ্চযোতি দোমনস্সং. অনভিরদ্ধীতি অতুট্ঠি.

তত্র চেতি চতুসচ্চপ্পকাসনেযেৰ. পরেতি চতুসচ্চপ্পকাসনং আজানিতুং পটিৰিজ্ঝিতুং সমত্থপুগ্গলা. আনন্দোতি আনন্দপীতি. উপ্পিলাৰিতত্তন্তি উপ্পিলাপনপীতি. তত্র চেতি চতুসচ্চপ্পকাসনম্হিযেৰ. তত্রাতি সক্কারাদীসু. যং খো ইদং পুব্বে পরিঞ্ঞাতন্তি ইদং খন্ধপঞ্চকং পুব্বে বোধিমণ্ডে তীহি পরিঞ্ঞাহি পরিঞ্ঞাতং. তত্থমেতি তস্মিং খন্ধপঞ্চকে ইমে. কিং ৰুত্তং হোতি? তত্রাপি তথাগতস্স ইমে সক্কারা মযি করীযন্তীতি ৰা অহং এতে অনুভৰামীতি ৰা ন হোতি. পুব্বে পরিঞ্ঞাতক্খন্ধপঞ্চকংযেৰ এতে সক্কারে অনুভোতীতি এত্তকমেৰ হোতীতি. তস্মাতি যস্মা সচ্চানি পটিৰিজ্ঝিতুং অসমত্থা তথাগতম্পি অক্কোসন্তি, তস্মা. সেসং ৰুত্তনযেনেৰ ৰেদিতব্বং.

২৪৭. তস্মা তিহ, ভিক্খৰে, যং ন তুম্হাকন্তি যস্মা অত্তনিযেপি ছন্দরাগপ্পহানং দীঘরত্তং হিতায সুখায সংৰত্ততি, তস্মা যং ন তুম্হাকং, তং পজহথাতি অত্থো. যথাপচ্চযং ৰা করেয্যাতি যথা যথা ইচ্ছেয্য তথা তথা করেয্য. ন হি নো এতং, ভন্তে, অত্তা ৰাতি, ভন্তে, এতং তিণকট্ঠসাখাপলাসং অম্হাকং নেৰ অত্তা ন অম্হাকং রূপং ন ৰিঞ্ঞাণন্তি ৰদন্তি. অত্তনিযং ৰাতি অম্হাকং চীৰরাদিপরিক্খারোপি ন হোতীতি অত্থো. এৰমেৰ খো, ভিক্খৰে, যং ন তুম্হাকং তং পজহথাতি ভগৰা, খন্ধপঞ্চকংযেৰ ন তুম্হাকন্তি দস্সেত্ৰা পজহাপেতি, তঞ্চ খো ন উপ্পাটেত্ৰা, লুঞ্চিত্ৰা ৰা. ছন্দরাগৰিনযেন পনেতং পজহাপেতি.

২৪৮. এৰং স্ৰাক্খাতোতি এত্থ তিপরিৰট্টতো পট্ঠায যাৰ ইমং ঠানং আহরিতুম্পি ৰট্টতি, পটিলোমেন পেমমত্তকেন সগ্গপরাযণতো পট্ঠায যাৰ ইমং ঠানং আহরিতুম্পি ৰট্টতি. স্ৰাক্খাতোতি সুকথিতো. সুকথিতত্তা এৰ উত্তানো ৰিৰটো পকাসিতো. ছিন্নপিলোতিকোতি পিলোতিকা ৰুচ্চতি ছিন্নং ভিন্নং তত্থ তত্থ সিব্বিতং গণ্ঠিকতং জিণ্ণং ৰত্থং, তং যস্স নত্থি, অট্ঠহত্থং ৰা নৰহত্থং ৰা অহতসাটকং নিৰত্থো, সো ছিন্নপিলোতিকো নাম. অযম্পি ধম্মো তাদিসো, ন হেত্থ কোহঞ্ঞাদিৰসেন ছিন্নভিন্নসিব্বিতগণ্ঠিকতভাৰো অত্থি. অপিচ কচৰরো পিলোতিকোতি ৰুচ্চতি. ইমস্মিঞ্চ সাসনে সমণকচৰরং নাম পতিট্ঠাতুং ন লভতি. তেনেৰাহ –

‘‘কারণ্ডৰং নিদ্ধমথ, কসম্বুঞ্চাপকস্সথ;

ততো পলাপে ৰাহেথ, অস্সমণে সমণমানিনে.

নিদ্ধমিত্ৰান পাপিচ্ছে, পাপআচারগোচরে;

সুদ্ধা সুদ্ধেহি সংৰাসং, কপ্পযৰ্হো পতিস্সতা;

ততো সমগ্গা নিপকা, দুক্খস্সন্তং করিস্সথা’’তি. (সু. নি. ২৮৩-২৮৫);

ইতি সমণকচৰরস্স ছিন্নত্তাপি অযং ধম্মো ছিন্নপিলোতিকো নাম হোতি. ৰট্টং তেসং নত্থি পঞ্ঞাপনাযাতি তেসং ৰট্টং অপঞ্ঞত্তিভাৰং গতং নিপ্পঞ্ঞত্তিকং জাতং. এৰরূপো মহাখীণাসৰো এৰং স্ৰাক্খাতে সাসনেযেৰ উপ্পজ্জতি. যথা চ খীণাসৰো, এৰং অনাগামিআদযোপি.

তত্থ ধম্মানুসারিনো সদ্ধানুসারিনোতি ইমে দ্ৰে সোতাপত্তিমগ্গট্ঠা হোন্তি. যথাহ – ‘‘কতমো চ পুগ্গলো ধম্মানুসারী? যস্স পুগ্গলস্স সোতাপত্তিফলসচ্ছিকিরিযায পটিপন্নস্স পঞ্ঞিন্দ্রিযং অধিমত্তং হোতি, পঞ্ঞাৰাহিং পঞ্ঞাপুব্বঙ্গমং অরিযমগ্গং ভাৰেতি. অযং ৰুচ্চতি পুগ্গলো ধম্মানুসারী. সোতাপত্তিফলসচ্ছিকিরিযায পটিপন্নো পুগ্গলো ধম্মানুসারী, ফলে ঠিতো দিট্ঠিপ্পত্তো. কতমো চ পুগ্গলো সদ্ধানুসারী? যস্স পুগ্গলস্স সোতাপত্তিফলসচ্ছিকিরিযায পটিপন্নস্স সদ্ধিন্দ্রিযং অধিমত্তং হোতি, সদ্ধাৰাহিং সদ্ধাপুব্বঙ্গমং অরিযমগ্গং ভাৰেতি. অযং ৰুচ্চতি পুগ্গলো সদ্ধানুসারী. সোতাপত্তিফলসচ্ছিকিরিযায পটিপন্নো পুগ্গলো সদ্ধানুসারী, ফলে ঠিতো সদ্ধাৰিমুত্তো’’তি (পু. প. ৩০). যেসং মযি সদ্ধামত্তং পেমমত্তন্তি ইমিনা যেসং অঞ্ঞো অরিযধম্মো নত্থি, তথাগতে পন সদ্ধামত্তং পেমমত্তমেৰ হোতি. তে ৰিপস্সকপুগ্গলা অধিপ্পেতা. ৰিপস্সকভিক্খূনঞ্হি এৰং ৰিপস্সনং পট্ঠপেত্ৰা নিসিন্নানং দসবলে একা সদ্ধা একং পেমং উপ্পজ্জতি. তায সদ্ধায তেন পেমেন হত্থে গহেত্ৰা সগ্গে ঠপিতা ৰিয হোন্তি, নিযতগতিকা কির এতে. পোরাণকত্থেরা পন এৰরূপং ভিক্খুং চূল়সোতাপন্নোতি ৰদন্তি. সেসং সব্বত্থ উত্তানত্থমেৰাতি.

পপঞ্চসূদনিযা মজ্ঝিমনিকাযট্ঠকথায

অলগদ্দূপমসুত্তৰণ্ণনা নিট্ঠিতা.

৩. ৰম্মিকসুত্তৰণ্ণনা

২৪৯. এৰং মে সুতন্তি ৰম্মিকসুত্তং. তত্থ আযস্মাতি পিযৰচনমেতং. কুমারকস্সপোতি তস্স নামং. কুমারকালে পব্বজিতত্তা পন ভগৰতা, ‘‘কস্সপং পক্কোসথ, ইদং ফলং ৰা খাদনীযং ৰা কস্সপস্স দেথা’’তি ৰুত্তে, কতরস্স কস্সপস্সাতি কুমারকস্সপস্সাতি এৰং গহিতনামত্তা ততো পট্ঠায ৰুড্ঢকালেপি ‘‘কুমারকস্সপো’’ ত্ৰেৰ ৰুচ্চতি. অপিচ রঞ্ঞা পোসাৰনিকপুত্তত্তাপি তং ‘‘কুমারকস্সপো’’তি সঞ্জানিংসু. অযং পনস্স পুব্বযোগতো পট্ঠায আৰিভাৰকথা –

থেরো কির পদুমুত্তরস্স ভগৰতো কালে সেট্ঠিপুত্তো অহোসি. অথেকদিৰসং ভগৰন্তং চিত্রকথিং একং অত্তনো সাৰকং ঠানন্তরে ঠপেন্তং দিস্ৰা ভগৰতো সত্তাহং দানং দত্ৰা, ‘‘অহম্পি ভগৰা অনাগতে একস্স বুদ্ধস্স অযং থেরো ৰিয চিত্রকথী সাৰকো ভৰেয্য’’ন্তি পত্থনং কত্ৰা পুঞ্ঞানি করোন্তো কস্সপস্স ভগৰতো সাসনে পব্বজিত্ৰা ৰিসেসং নিব্বত্তেতুং নাসক্খি.

তদা কির পরিনিব্বুতস্স ভগৰতো সাসনে ওসক্কন্তে পঞ্চ ভিক্খূ নিস্সেণিং বন্ধিত্ৰা পব্বতং অভিরুয্হ সমণধম্মং অকংসু. সঙ্ঘত্থেরো ততিযদিৰসে অরহত্তং পত্তো. অনুথেরো চতুত্থদিৰসে অনাগামী অহোসি. ইতরে তযো ৰিসেসং নিব্বত্তেতুং অসক্কোন্তা দেৰলোকে নিব্বত্তিংসু. তেসং একং বুদ্ধন্তরং দেৰেসু চ মনুস্সেসু চ সম্পত্তিং অনুভোন্তানং একো তক্কসিলাযং রাজকুলে নিব্বত্তিত্ৰা পুক্কুসাতি নাম রাজা হুত্ৰা ভগৰন্তং উদ্দিস্স পব্বজিত্ৰা রাজগহং গচ্ছন্তো কুম্ভকারসালাযং ভগৰতো ধম্মদেসনং সুত্ৰা অনাগামিফলং পত্তো. একো একস্মিং সমুদ্দপট্টনে কুলঘরে নিব্বত্তিত্ৰা নাৰং আরুয্হ ভিন্ননাৰো দারুচীরানি নিৰাসেত্ৰা লাভসম্পত্তিং পত্তো, ‘‘অহং অরহা’’তি চিত্তং উপ্পাদেত্ৰা, ‘‘ন ত্ৰং অরহা, গচ্ছ সত্থারং পঞ্হং পুচ্ছা’’তি অত্থকামায দেৰতায চোদিতো তথা কত্ৰা অরহত্তফলং পত্তো.

একো রাজগহে একিস্সা কুলদারিকায কুচ্ছিম্হি উপ্পন্নো. সা চ পঠমং মাতাপিতরো যাচিত্ৰা পব্বজ্জং অলভমানা কুলঘরং গতা গব্ভসণ্ঠিতম্পি অজানন্তী সামিকং আরাধেত্ৰা তেন অনুঞ্ঞাতা ভিক্খুনীসু পব্বজিতা. তস্সা গব্ভিনিনিমিত্তং দিস্ৰা ভিক্খুনিযো দেৰদত্তং পুচ্ছিংসু, সো ‘‘অস্সমণী’’তি আহ. দসবলং পুচ্ছিংসু, সত্থা উপালিত্থেরং পটিচ্ছাপেসি. থেরো সাৰত্থিনগরৰাসীনি কুলানি ৰিসাখঞ্চ উপাসিকং পক্কোসাপেত্ৰা সোধেন্তো, – ‘‘পুরে লদ্ধো গব্ভো, পব্বজ্জা অরোগা’’তি আহ. সত্থা ‘‘সুৰিনিচ্ছিতং অধিকরণ’’ন্তি থেরস্স সাধুকারং অদাসি. সা ভিক্খুনী সুৰণ্ণবিম্বসদিসং পুত্তং ৰিজাযি, তং গহেত্ৰা রাজা পসেনদি কোসলো পোসাপেসি. ‘‘কস্সপো’’তি চস্স নামং কত্ৰা অপরভাগে অলঙ্করিত্ৰা সত্থু সন্তিকং নেত্ৰা পব্বাজেসি. ইতি রঞ্ঞো পোসাৰনিকপুত্তত্তাপি তং ‘‘কুমারকস্সপো’’তি সঞ্জানিংসূতি.

অন্ধৰনেতি এৰংনামকে ৰনে. তং কির ৰনং দ্ৰিন্নং বুদ্ধানং কালে অৰিজহিতনামং অন্ধৰনংত্ৰেৰ পঞ্ঞাযতি. তত্রাযং পঞ্ঞত্তিৰিভাৰনা – অপ্পাযুকবুদ্ধানঞ্হি সরীরধাতু ন একগ্ঘনা হোতি. অধিট্ঠানানুভাৰেন ৰিপ্পকিরিযতি. তেনেৰ অম্হাকম্পি ভগৰা, – ‘‘অহং ন চিরট্ঠিতিকো, অপ্পকেহি সত্তেহি অহং দিট্ঠো, যেহি ন দিট্ঠো, তেৰ বহুতরা, তে মে ধাতুযো আদায তত্থ তত্থ পূজেন্তা সগ্গপরাযণা ভৰিস্সন্তী’’তি পরিনিব্বানকালে, ‘‘অত্তনো সরীরং ৰিপ্পকিরিযতূ’’তি অধিট্ঠাসি. দীঘাযুকবুদ্ধানং পন সুৰণ্ণক্খন্ধো ৰিয একগ্ঘনং ধাতুসরীরং তিট্ঠতি.

কস্সপস্সাপি ভগৰতো তথেৰ অট্ঠাসি. ততো মহাজনা সন্নিপতিত্ৰা, ‘‘ধাতুযো একগ্ঘনা ন সক্কা ৰিযোজেতুং, কিং করিস্সামা’’তি সম্মন্তযিত্ৰা একগ্ঘনমেৰ চেতিযং করিস্সাম, কিত্তকং পন হোতু তন্তি আহংসু. একে সত্তযোজনিযন্তি আহংসু. এতং অতিমহন্তং, অনাগতে জগ্গিতুং ন সক্কা, ছযোজনং হোতু, পঞ্চযোজনং… চতুযোজনং… তিযোজনং… দ্ৰিযোজনং… একযোজনং হোতূতি সন্নিট্ঠানং কত্ৰা ইট্ঠকা কীদিসা হোন্তূতি বাহিরন্তে ইট্ঠকা রত্তসুৰণ্ণমযা একগ্ঘনা সতসহস্সগ্ঘনিকা হোন্তু, অব্ভন্তরিমন্তে পঞ্ঞাসসহস্সগ্ঘনিকা. হরিতালমনোসিলাহি মত্তিকাকিচ্চং কযিরতু, তেলেন উদককিচ্চন্তি নিট্ঠং গন্ত্ৰা চত্তারি মুখানি চতুধা ৰিভজিংসু. রাজা একং মুখং গণ্হি, রাজপুত্তো পথৰিন্দরকুমারো একং, অমচ্চানং জেট্ঠকো হুত্ৰা সেনাপতি একং, জনপদানং জেট্ঠকো হুত্ৰা সেট্ঠি একং.

তত্থ ধনসম্পন্নতায রাজাপি সুৰণ্ণং নীহরাপেত্ৰা অত্তনা গহিতমুখে কম্মং আরভি, উপরাজাপি, সেনাপতিপি. সেট্ঠিনা গহিতমুখে পন কম্মং ওলীযতি. ততো যসোরতো নাম একো উপাসকো তেপিটকো ভাণকো অনাগামী অরিযসাৰকো, সো কম্মং ওলীযতীতি ঞত্ৰা পঞ্চ সকটসতানি যোজাপেত্ৰা জনপদং গন্ত্ৰা ‘‘কস্সপসম্মাসম্বুদ্ধো ৰীসতিৰস্সসহস্সানি ঠত্ৰা পরিনিব্বুতো. তস্স যোজনিকং রতনচেতিযং কযিরতি, যো যং দাতুং উস্সহতি সুৰণ্ণং ৰা হিরঞ্ঞং ৰা সত্তরতনং ৰা হরিতালং ৰা মনোসিলং ৰা, সো তং দেতূ’’তি সমাদপেসি. মনুস্সা অত্তনো অত্তনো থামেন হিরঞ্ঞসুৰণ্ণাদীনি অদংসু. অসক্কোন্তা তেলতণ্ডুলাদীনি দেন্তিযেৰ. উপাসকো তেলতণ্ডুলাদীনি কম্মকারানং ভত্তৰেতনত্থং পহিণাতি, অৰসেসেহি সুৰণ্ণং চেতাপেত্ৰা পহিণাতি, এৰং সকলজম্বুদীপং অচরি.

চেতিযে কম্মং নিট্ঠিতন্তি চেতিযট্ঠানতো পণ্ণং পহিণিংসু – ‘‘নিট্ঠিতং কম্মং আচরিযো আগন্ত্ৰা চেতিযং ৰন্দতূ’’তি. সোপি পণ্ণং পহিণি – ‘‘মযা সকলজম্বুদীপো সমাদপিতো, যং অত্থি, তং গহেত্ৰা কম্মং নিট্ঠাপেন্তূ’’তি. দ্ৰেপি পণ্ণানি অন্তরামগ্গে সমাগমিংসু. আচরিযস্স পণ্ণতো পন চেতিযট্ঠানতো পণ্ণং পঠমতরং আচরিযস্স হত্থং অগমাসি. সো পণ্ণং ৰাচেত্ৰা চেতিযং ৰন্দিস্সামীতি এককোৰ নিক্খমি. অন্তরামগ্গে অটৰিযং পঞ্চ চোরসতানি উট্ঠহিংসু. তত্রেকচ্চে তং দিস্ৰা ইমিনা সকলজম্বুদীপতো হিরঞ্ঞসুৰণ্ণং সম্পিণ্ডিতং, নিধিকুম্ভী নো পৰট্টমানা আগতাতি অৰসেসানং আরোচেত্ৰা তং অগ্গহেসুং. কস্মা তাতা, মং গণ্হথাতি? তযা সকলজম্বুদীপতো সব্বং হিরঞ্ঞসুৰণ্ণং সম্পিণ্ডিতং, অম্হাকম্পি থোকং থোকং দেহীতি. কিং তুম্হে ন জানাথ, কস্সপো ভগৰা পরিনিব্বুতো, তস্স যোজনিকং রতনচেতিযং কযিরতি, তদত্থায মযা সমাদপিতং, নো অত্তনো অত্থায. তং তং লদ্ধলদ্ধট্ঠানতো তত্থেৰ পেসিতং, ময্হং পন নিৰত্থসাটকমত্তং ঠপেত্ৰা অঞ্ঞং ৰিত্তং কাকণিকম্পি নত্থীতি.

একে, ‘‘এৰমেতং ৰিস্সজেথ আচরিয’’ন্তি আহংসু. একে, ‘‘অযং রাজপূজিতো অমচ্চপূজিতো, অম্হেসু কঞ্চিদেৰ নগরৰীথিযং দিস্ৰা রাজরাজমহামত্তাদীনং আরোচেত্ৰা অনযৰ্যসনং পাপুণাপেয্যা’’তি আহংসু. উপাসকো, ‘‘তাতা, নাহং এৰং করিস্সামী’’তি আহ. তঞ্চ খো তেসু কারুঞ্ঞেন, ন অত্তনো জীৰিতনিকন্তিযা. অথ তেসু গহেতব্বো ৰিস্সজ্জেতব্বোতি ৰিৰদন্তেসু গহেতব্বোতি লদ্ধিকা এৰ বহুতরা হুত্ৰা জীৰিতা ৰোরোপযিংসু.

তেসং বলৰগুণে অরিযসাৰকে অপরাধেন নিব্বুতদীপসিখা ৰিয অক্খীনি অন্তরধাযিংসু. তে, ‘‘কহং ভো চক্খু, কহং ভো চক্খূ’’তি ৰিপ্পলপন্তা একচ্চে ঞাতকেহি গেহং নীতা. একচ্চে নোঞাতকা অনাথাতি তত্থেৰ অটৰিযং রুক্খমূলে পণ্ণসালাযং ৰসিংসু. অটৰিং আগতমনুস্সা কারুঞ্ঞেন তেসং তণ্ডুলং ৰা পুটভত্তং ৰা পরিব্বযং ৰা দেন্তি. দারুপণ্ণাদীনং অত্থায গন্ত্ৰা আগতা মনুস্সা কুহিং গতত্থাতি ৰুত্তে অন্ধৰনং গতম্হাতি ৰদন্তি. এৰং দ্ৰিন্নম্পি বুদ্ধানং কালে তং ৰনং অন্ধৰনংত্ৰেৰ পঞ্ঞাযতি. কস্সপবুদ্ধকালে পনেতং ছড্ডিতজনপদে অটৰি অহোসি. অম্হাকং ভগৰতো কালে সাৰত্থিযা অৰিদূরে জেতৰনস্স পিট্ঠিভাগে পৰিৰেককামানং কুলপুত্তানং ৰসনট্ঠানং পধানঘরং অহোসি, তত্থ আযস্মা কুমারকস্সপো তেন সমযেন সেখপটিপদং পূরযমানো ৰিহরতি. তেন ৰুত্তং ‘‘অন্ধৰনে ৰিহরতী’’তি.

অঞ্ঞতরা দেৰতাতি নামগোত্তৰসেন অপাকটা একা দেৰতাতি অত্থো. ‘‘অভিজানাতি নো, ভন্তে, ভগৰা অহুঞাতঞ্ঞতরস্স মহেসক্খস্স সংখিত্তেন তণ্হাসঙ্খযৰিমুত্তিং ভাসিতা’’তি (ম. নি. ১.৩৬৫) এত্থ পন অভিঞ্ঞাতো সক্কোপি দেৰরাজা অঞ্ঞতরোতি ৰুত্তো. দেৰতাতি চ ইদং দেৰানম্পি দেৰধীতানম্পি সাধারণৰচনং. ইমস্মিং পনত্থে দেৰো অধিপ্পেতো. অভিক্কন্তায রত্তিযাতি এত্থ অভিক্কন্তসদ্দো খযসুন্দরাভিরূপঅব্ভনুমোদনাদীসু দিস্সতি. তত্থ – ‘‘অভিক্কন্তা, ভন্তে, রত্তি, নিক্খন্তো পঠমো যামো, চিরনিসিন্নো ভিক্খুসঙ্ঘো, উদ্দিসতু, ভন্তে, ভগৰা ভিক্খূনং পাতিমোক্খ’’ন্তি এৰমাদীসু (অ. নি. ৮.২০) খযে দিস্সতি. ‘‘অযং ইমেসং চতুন্নং পুগ্গলানং অভিক্কন্ততরো চ পণীততরো চা’’তি (অ. নি. ৪.১০০) এৰমাদীসু সুন্দরে.

‘‘কো মে ৰন্দতি পাদানি, ইদ্ধিযা যসসা জলং;

অভিক্কন্তেন ৰণ্ণেন, সব্বা ওভাসযং দিসা’’তি. (ৰি. ৰ. ৮৫৭) –

এৰমাদীসু অভিরূপে. ‘‘অভিক্কন্তং, ভো গোতমা’’তি এৰমাদীসু (পারা. ১৫) অব্ভনুমোদনে. ইধ পন খযে. তেন অভিক্কন্তায রত্তিযাতি পরিক্খীণায রত্তিযাতি ৰুত্তং হোতি. তত্থাযং দেৰপুত্তো মজ্ঝিমযামসমনন্তরে আগতোতি ৰেদিতব্বো. অভিক্কন্তৰণ্ণাতি ইধ অভিক্কন্তসদ্দো অভিরূপে. ৰণ্ণসদ্দো পন ছৰি-থুতি-কুলৰগ্গকারণ-সণ্ঠানপমাণরূপাযতনাদীসু দিস্সতি. তত্থ, ‘‘সুৰণ্ণৰণ্ণোসি ভগৰা’’তি এৰমাদীসু ছৰিযা. ‘‘কদা সঞ্ঞূল়্হা পন তে গহপতি সমণস্স গোতমস্স ৰণ্ণা’’তি (ম. নি. ২.৭৭) এৰমাদীসু থুতিযং. ‘‘চত্তারোমে, ভো গোতম, ৰণ্ণা’’তি এৰমাদীসু (দী. নি. ৩.১১৫) কুলৰগ্গে. ‘‘অথ কেন নু ৰণ্ণেন, গন্ধথেনোতি ৰুচ্চতী’’তি এৰমাদীসু (সং. নি. ১.২৩৪) কারণে. ‘‘মহন্তং হত্থিরাজৰণ্ণং অভিনিম্মিনিত্ৰা’’তি এৰমাদীসু (সং. নি. ১.১৩৮) সণ্ঠানে. ‘‘তযো পত্তস্স ৰণ্ণা’’তি এৰমাদীসু (পারা. ৬০২) পমাণে. ‘‘ৰণ্ণো গন্ধো রসো ওজা’’তি এৰমাদীসু রূপাযতনে. সো ইধ ছৰিযং দট্ঠব্বো. তেন অভিক্কন্তৰণ্ণাতি অভিরূপছৰিইট্ঠৰণ্ণা, মনাপৰণ্ণাতি ৰুত্তং হোতি. দেৰতা হি মনুস্সলোকং আগচ্ছমানা পকতিৰণ্ণং পকতিইদ্ধিং পজহিত্ৰা ওল়ারিকং অত্তভাৰং কত্ৰা অতিরেকৰণ্ণং অতিরেকইদ্ধিং মাপেত্ৰা নটসমজ্জাদীনি গচ্ছন্তা মনুস্সা ৰিয অভিসঙ্খতেন কাযেন আগচ্ছন্তি. অযম্পি দেৰপুত্তো তথেৰ আগতো. তেন ৰুত্তং ‘‘অভিক্কন্তৰণ্ণা’’তি.

কেৰলকপ্পন্তি এত্থ কেৰলসদ্দো অনৰসেস-যেভূয্য-অব্যামিস্সানতিরেকদল়্হত্থ-ৰিসংযোগাদিঅনেকত্থো. তথা হিস্স, ‘‘কেৰলপরিপুণ্ণং পরিসুদ্ধং ব্রহ্মচরিয’’ন্তি (পারা. ১) এৰমাদীসু অনৰসেসত্তমত্থো. ‘‘কেৰলকপ্পা চ অঙ্গমগধা পহূতং খাদনীযং ভোজনীযং আদায উপসঙ্কমিস্সন্তী’’তি এৰমাদীসু যেভুয্যতা. ‘‘কেৰলস্স দুক্খক্খন্ধস্স সমুদযো হোতী’’তি (ৰিভ. ২২৫) এৰমাদীসু অব্যামিস্সতা. ‘‘কেৰলং সদ্ধামত্তকং নূন অযমাযস্মা’’তি (মহাৰ. ২৪৪) এৰমাদীসু অনতিরেকতা. ‘‘আযস্মতো অনুরুদ্ধস্স বাহিযো নাম সদ্ধিৰিহারিকো কেৰলকপ্পং সঙ্ঘভেদায ঠিতো’’তি (অ. নি. ৪.২৪৩) এৰমাদীসু দল়্হত্থতা. ‘‘কেৰলী ৰুসিতৰা উত্তমপুরিসোতি ৰুচ্চতী’’তি (সং. নি. ৩.৫৭) এৰমাদীসু ৰিসংযোগো. ইধ পনস্স অনৰসেসত্তমত্থোতি অধিপ্পেতো.

কপ্পসদ্দো পনাযং অভিসদ্দহন-ৰোহার-কাল-পঞ্ঞত্তি- ছেদন-ৰিকপ্প-লেস-সমন্তভাৰাদি-অনেকত্থো. তথা হিস্স, ‘‘ওকপ্পনিযমেতং ভোতো গোতমস্স, যথা তং অরহতো সম্মাসম্বুদ্ধস্সা’’তি (ম. নি. ১.৩৮৭) এৰমাদীসু অভিসদ্দহনমত্থো. ‘‘অনুজানামি, ভিক্খৰে, পঞ্চহি সমণকপ্পেহি ফলং পরিভুঞ্জিতু’’ন্তি (চূল়ৰ. ২৫০) এৰমাদীসু ৰোহারো. ‘‘যেন সুদং নিচ্চকপ্পং ৰিহরামী’’তি এৰমাদীসু (ম. নি. ১.৩৮৭) কালো. ‘‘ইচ্চাযস্মা কপ্পো’’তি (সং. নি. ৩.১২৪) এৰমাদীসু পঞ্ঞত্তি. ‘‘অলঙ্কতা কপ্পিতকেসমস্সূ’’তি (সং. নি. ৪.৩৬৫) এৰমাদীসু ছেদনং. ‘‘কপ্পতি দ্ৰঙ্গুলকপ্পো’’তি (চূল়ৰ. ৪৪৬) এৰমাদীসু ৰিকপ্পো. ‘‘অত্থি কপ্পো নিপজ্জিতু’’ন্তি (অ. নি. ৮.৮০) এৰমাদীসু লেসো. ‘‘কেৰলকপ্পং ৰেল়ুৰনং ওভাসেত্ৰা’’তি (সং. নি. ১.৯৪) এৰমাদীসু সমন্তভাৰো. ইধ পনস্স সমন্তভাৰো অত্থো অধিপ্পেতো. তস্মা কেৰলকপ্পং অন্ধৰনন্তি এত্থ অনৰসেসং সমন্ততো অন্ধৰনন্তি এৰমত্থো দট্ঠব্বো.

ওভাসেত্ৰাতি ৰত্থালঙ্কারসরীরসমুট্ঠিতায আভায ফরিত্ৰা, চন্দিমা ৰিয চ সূরিযো ৰিয চ একোভাসং একপজ্জোতং করিত্ৰাতি অত্থো. একমন্তং অট্ঠাসীতি একস্মিং অন্তে, একস্মিং ওকাসে অট্ঠাসি. এতদৰোচাতি এতং ‘‘ভিক্খু ভিক্খূ’’তিআদিৰচনমৰোচ. কস্মা পনাযং অৰন্দিত্ৰা সমণৰোহারেনেৰ কথেতীতি? সমণসঞ্ঞাসমুদাচারেনেৰ. এৰং কিরস্স অহোসি – ‘‘অযং অন্তরা কামাৰচরে ৰসি. অহং পন অস্মি ততো কালতো পট্ঠায ব্রহ্মচারী’’তি সমণসঞ্ঞাৰস্স সমুদাচরতি, তস্মা অৰন্দিত্ৰা সমণৰোহারেনেৰ কথেতি. পুব্বসহাযো কিরেসো দেৰপুত্তো থেরস্স. কুতো পট্ঠাযাতি? কস্সপসম্মাসম্বুদ্ধকালতো পট্ঠায. যো হি পুব্বযোগে আগতেসু পঞ্চসু সহাযেসু অনুথেরো চতুত্থদিৰসে অনাগামী অহোসীতি ৰুত্তো, অযং সো. তদা কির তেসু সঙ্ঘত্থেরস্স অরহত্তেনেৰ সদ্ধিং অভিঞ্ঞা আগমিংসু. সো, ‘‘ময্হং কিচ্চং মত্থকং পত্ত’’ন্তি ৰেহাসং উপ্পতিত্ৰা অনোতত্তদহে মুখং ধোৰিত্ৰা উত্তরকুরুতো পিণ্ডপাতং আদায আগন্ত্ৰা, ‘‘ইমং, আৰুসো, পিণ্ডপাতং ভুঞ্জিত্ৰা অপ্পমত্তা সমণধম্মং করোথা’’তি আহ. ইতরে আহংসু – ‘‘ন, আৰুসো, অম্হাকং এৰং কতিকা অত্থি – ‘যো পঠমং ৰিসেসং নিব্বত্তেত্ৰা পিণ্ডপাতং আহরতি, তেনাভতং ভুঞ্জিত্ৰা সেসেহি সমণধম্মো কাতব্বো’তি. তুম্হে অত্তনো উপনিস্সযেন কিচ্চং মত্থকং পাপযিত্থ. মযম্পি সচে নো উপনিস্সযো ভৰিস্সতি, কিচ্চং মত্থকং পাপেস্সাম. পপঞ্চো এস অম্হাকং, গচ্ছথ তুম্হে’’তি. সো যথাফাসুকং গন্ত্ৰা আযুপরিযোসানে পরিনিব্বাযি.

পুনদিৰসে অনুথেরো অনাগামিফলং সচ্ছকাসি, তস্স অভিঞ্ঞাযো আগমিংসু. সোপি তথেৰ পিণ্ডপাতং আহরিত্ৰা তেহি পটিক্খিত্তো যথাফাসুকং গন্ত্ৰা আযুপরিযোসানে সুদ্ধাৰাসে নিব্বত্তি. সো সুদ্ধাৰাসে ঠত্ৰা তে সহাযে ওলোকেন্তো, একো তদাৰ পরিনিব্বুতো, একো অধুনা ভগৰতো সন্তিকে অরিযভূমিং পত্তো, একো লাভসক্কারং নিস্সায, ‘‘অহং অরহা’’তি চিত্তং উপ্পাদেত্ৰা সুপ্পারকপট্টনে ৰসতীতি দিস্ৰা তং উপসঙ্কমিত্ৰা, ‘‘ন ত্ৰং অরহা, ন অরহত্তমগ্গং পটিপন্নো, গচ্ছ ভগৰন্তং উপসঙ্কমিত্ৰা ধম্মং সুণাহী’’তি উয্যোজেসি. সোপি অন্তরঘরে ভগৰন্তং ওৰাদং যাচিত্ৰা, ‘‘তস্মা তিহ তে বাহিয এৰং সিক্খিতব্বং দিট্ঠে দিট্ঠমত্তং হোতূ’’তি (উদা. ১০) ভগৰতা সংখিত্তেন ওৰদিতো অরিযভূমিং সম্পাপুণি.

ততো অঞ্ঞো একো অত্থি, সো কুহিন্তি ওলোকেন্তো অন্ধৰনে সেক্খপটিপদং পূরযমানো ৰিহরতীতি দিস্ৰা চিন্তেসি – ‘‘সহাযকস্স সন্তিকে গমিস্সামীতি, গচ্ছন্তেন পন তুচ্ছহত্থেন অগন্ত্ৰা কিঞ্চি পণ্ণাকারং গহেত্ৰা গন্তুং ৰট্টতি, সহাযো খো পন মে নিরামিসো পব্বতমত্থকে ৰসন্তো মযা আকাসে ঠত্ৰা দিন্নং পিণ্ডপাতম্পি অপরিভুঞ্জিত্ৰা সমণধম্মং অকাসি, ইদানি আমিসপণ্ণাকারং কিং গণ্হিস্সতি? ধম্মপণ্ণাকারং গহেত্ৰা গমিস্সামী’’তি ব্রহ্মলোকে ঠিতোৰ রতনাৰল়িং গন্থেন্তো ৰিয পন্নরস পঞ্হে ৰিভজিত্ৰা তং ধম্মপণ্ণাকারং আদায আগন্ত্ৰা সহাযস্স অৰিদূরে ঠত্ৰা অত্তনো সমণসঞ্ঞাসমুদাচারৰসেন তং অনভিৰাদেত্ৰাৰ, ‘‘ভিক্খু ভিক্খূ’’তি আলপিত্ৰা অযং ৰম্মিকোতিআদিমাহ. তত্থ তুরিতালপনৰসেন ভিক্খু ভিক্খূতি আমেডিতং ৰেদিতব্বং. যথা ৰা একনেৰ তিলকেন নলাটং ন সোভতি, তং পরিৰারেত্ৰা অঞ্ঞেসুপি দিন্নেসু ফুল্লিতমণ্ডিতং ৰিয সোভতি, এৰং একেনেৰ পদেন ৰচনং ন সোভতি, পরিৰারিকপদেন সদ্ধিং ফুল্লিতমণ্ডিতং ৰিয সোভতীতি তং পরিৰারিকপদৰসেন ৰচনং ফুল্লিতমণ্ডিতং ৰিয করোন্তোপি এৰমাহ.

অযং ৰম্মিকোতি পুরতো ঠিতো ৰম্মিকো নাম নত্থি, দেসনাৰসেন পন পুরতো ঠিতং দস্সেন্তো ৰিয অযন্তি আহ. লঙ্গিন্তি সত্থং আদায খণন্তো পলিঘং অদ্দস. উক্খিপ লঙ্গিং অভিক্খণ সুমেধাতি তাত, পণ্ডিত, লঙ্গী নাম রত্তিং ধূমাযতি দিৰা পজ্জলতি. উক্খিপেত পরং পরতো খণাতি. এৰং সব্বপদেসু অত্থো দট্ঠব্বো. উদ্ধুমাযিকন্তি মণ্ডূকং. চঙ্কৰারন্তি খারপরিস্সাৰনং. কুম্মন্তি কচ্ছপং. অসিসূনন্তি মংসচ্ছেদকং অসিঞ্চেৰ অধিকুট্টনঞ্চ. মংসপেসিন্তি নিসদপোতপ্পমাণং অল্লমংসপিণ্ডং. নাগন্তি সুমনপুপ্ফকলাপসদিসং মহাফণং তিৰিধসোৰত্থিকপরিক্খিত্তং অহিনাগং অদ্দস. মা নাগং ঘট্টেসীতি দণ্ডককোটিযা ৰা ৰল্লিকোটিযা ৰা পংসুচুণ্ণং ৰা পন খিপমানো মা নাগং ঘট্টযি. নমো করোহি নাগস্সাতি উপরিৰাততো অপগম্ম সুদ্ধৰত্থং নিৰাসেত্ৰা নাগস্স নমক্কারং করোহি. নাগেন অধিসযিতং ধনং নাম যাৰ সত্তমা কুলপরিৰট্টা খাদতো ন খীযতি, নাগো তে অধিসযিতং ধনং দস্সতি, তস্মা নমো করোহি নাগস্সাতি. ইতো ৰা পন সুত্ৰাতি যথা দুক্খক্খন্ধে ইতোতি সাসনে নিস্সকং, ন তথা ইধ. ইধ পন দেৰপুত্তে নিস্সক্কং, তস্মা ইতো ৰা পনাতি মম ৰা পন সন্তিকা সুত্ৰাতি অযমেত্থ অত্থো.

২৫১. চাতুম্মহাভূতিকস্সাতি চতুমহাভূতমযস্স. কাযস্সেতং অধিৰচনন্তি সরীরস্স নামং. যথেৰ হি বাহিরকো ৰম্মিকো, ৰমতীতি ৰন্তকোতি ৰন্তুস্সযোতি ৰন্তসিনেহসম্বন্ধোতি চতূহি কারণেহি ৰম্মিকোতি ৰুচ্চতি. সো হি অহিমঙ্গুসউন্দূরঘরগোল়িকাদযো নানপ্পকারে পাণকে ৰমতীতি ৰম্মিকো. উপচিকাহি ৰন্তকোতি ৰম্মিকো. উপচিকাহি ৰমিত্ৰা মুখতুণ্ডকেন উক্খিত্তপংসুচুণ্ণেন কটিপ্পমাণেনপি পোরিসপ্পমাণেনপি উস্সিতোতি ৰম্মিকো. উপচিকাহি ৰন্তখেল়সিনেহেন আবদ্ধতায সত্তসত্তাহং দেৰে ৰস্সন্তেপি ন ৰিপ্পকিরিযতি, নিদাঘেপি ততো পংসুমুট্ঠিং গহেত্ৰা তস্মিং মুট্ঠিনা পীল়িযমানে সিনেহো নিক্খমতি, এৰং ৰন্তসিনেহেন সম্বদ্ধোতি ৰম্মিকো. এৰমযং কাযোপি, ‘‘অক্খিম্হা অক্খিগূথকো’’তিআদিনা নযেন নানপ্পকারকং অসুচিকলিমলং ৰমতীতি ৰম্মিকো. বুদ্ধপচ্চেকবুদ্ধখীণাসৰা ইমস্মিং অত্তভাৰে নিকন্তিপরিযাদানেন অত্তভাৰং ছড্ডেত্ৰা গতাতি অরিযেহি ৰন্তকোতিপি ৰম্মিকো. যেহি চাযং তীহি অট্ঠিসতেহি উস্সিতো ন্হারুসম্বদ্ধো মংসাৰলেপনো অল্লচম্মপরিযোনদ্ধো ছৰিরঞ্জিতো সত্তে ৰঞ্চেতি, তং সব্বং অরিযেহি ৰন্তমেৰাতি ৰন্তুস্সযোতিপি ৰম্মিকো. ‘‘তণ্হা জনেতি পুরিসং, চিত্তমস্স ৰিধাৰতী’’তি (সং. নি. ১.৫৫) এৰং তণ্হায জনিতত্তা অরিযেহি ৰন্তেনেৰ তণ্হাসিনেহেন সম্বদ্ধো অযন্তি ৰন্তসিনেহেন সম্বদ্ধোতিপি ৰম্মিকো. যথা চ ৰম্মিকস্স অন্তো নানপ্পকারা পাণকা তত্থেৰ জাযন্তি, উচ্চারপস্সাৰং করোন্তি, গিলানা সযন্তি, মতা পতন্তি. ইতি সো তেসং সূতিঘরং ৰচ্চকুটি গিলানসালা সুসানঞ্চ হোতি. এৰং খত্তিযমহাসালাদীনম্পি কাযো অযং গোপিতরক্খিতো মণ্ডিতপ্পসাধিতো মহানুভাৰানং কাযোতি অচিন্তেত্ৰা ছৰিনিস্সিতা পাণা চম্মনিস্সিতা পাণা মংসনিস্সিতা পাণা ন্হারুনিস্সিতা পাণা অট্ঠিনিস্সিতা পাণা অট্ঠিমিঞ্জনিস্সিতা পাণাতি এৰং কুলগণনায অসীতিমত্তানি কিমিকুলসহস্সানি অন্তোকাযস্মিংযেৰ জাযন্তি, উচ্চারপস্সাৰং করোন্তি, গেলঞ্ঞেন আতুরিতানি সযন্তি, মতানি পতন্তি, ইতি অযম্পি তেসং পাণানং সূতিঘরং ৰচ্চকুটি গিলানসালা সুসানঞ্চ হোতীতি ‘‘ৰম্মিকো’’ ত্ৰেৰ সঙ্খং গতো. তেনাহ ভগৰা – ‘‘ৰম্মিকোতি খো, ভিক্খু, ইমস্স চাতুমহাভূতিকস্স কাযস্সেতং অধিৰচন’’ন্তি.

মাতাপেত্তিকসম্ভৰস্সাতি মাতিতো চ পিতিতো চ নিব্বত্তেন মাতাপেত্তিকেন সুক্কসোণিতেন সম্ভূতস্স. ওদনকুম্মাসূপচযস্সাতি ওদনেন চেৰ কুম্মাসেন চ উপচিতস্স ৰড্ঢিতস্স. অনিচ্চুচ্ছাদনপরিমদ্দনভেদনৰিদ্ধংসনধম্মস্সাতি এত্থ অযং কাযো হুত্ৰা অভাৰট্ঠেন অনিচ্চধম্মো. দুগ্গন্ধৰিঘাতত্থায তনুৰিলেপনেন উচ্ছাদনধম্মো. অঙ্গপচ্চঙ্গাবাধৰিনোদনত্থায খুদ্দকসম্বাহনেন পরিমদ্দনধম্মো. দহরকালে ৰা ঊরূসু সযাপেত্ৰা গব্ভৰাসেন দুস্সণ্ঠিতানং তেসং তেসং অঙ্গানং সণ্ঠানসম্পাদনত্থং অঞ্ছনপীল়নাদিৰসেন পরিমদ্দনধম্মো. এৰং পরিহরতোপি চ ভেদনৰিদ্ধংসনধম্মো ভিজ্জতি চেৰ ৰিকিরতি চ, এৰং সভাৰোতি অত্থো. তত্থ মাতাপেত্তিকসম্ভৰওদনকুম্মাসূপচযউচ্ছাদনপরিমদ্দনপদেহি সমুদযো কথিতো, অনিচ্চভেদৰিদ্ধংসনপদেহি অত্থঙ্গমো. এৰং সত্তহিপি পদেহি চাতুমহাভূতিকস্স কাযস্স উচ্চাৰচভাৰো ৰড্ঢিপরিহানি সমুদযত্থঙ্গমো কথিতোতি ৰেদিতব্বো.

দিৰা কম্মন্তেতি দিৰা কত্তব্বকম্মন্তে. ধূমাযনাতি এত্থ অযং ধূমসদ্দো কোধে তণ্হায ৰিতক্কে পঞ্চসু কামগুণেসু ধম্মদেসনায পকতিধূমেতি ইমেসু অত্থেসু ৰত্ততি. ‘‘কোধো ধূমো ভস্মনিমোসৰজ্জ’’ন্তি (সং. নি. ১.১৬৫) এত্থ হি কোধে ৰত্ততি. ‘‘ইচ্ছাধূমাযিতা সত্তা’’তি এত্থ তণ্হায. ‘‘তেন খো পন সমযেন অঞ্ঞতরো ভিক্খু ভগৰতো অৰিদূরে ধূমাযন্তো নিসিন্নো হোতী’’তি এত্থ ৰিতক্কে.

‘‘পঙ্কো চ কামা পলিপো চ কামা,

ভযঞ্চ মেতং তিমূলং পৰুত্তং;

রজো চ ধূমো চ মযা পকাসিতা;

হিত্ৰা তুৰং পব্বজ ব্রহ্মদত্তা’’তি. (জা. ১.৬.১৪) –

এত্থ পঞ্চকামগুণেসু. ‘‘ধূমং কত্তা হোতী’’তি (ম. নি. ১.৩৪৯) এত্থ ধম্মদেসনায. ‘‘ধজো রথস্স পঞ্ঞাণং, ধূমো পঞ্ঞাণমগ্গিনো’’তি (সং. নি. ১.৭২) এত্থ পকতিধূমে. ইধ পনাযং ৰিতক্কে অধিপ্পেতো. তেনাহ ‘‘অযং রত্তিং ধূমাযনা’’তি.

তথাগতস্সেতং অধিৰচনন্তি তথাগতো হি সত্তন্নং ধম্মানং বাহিতত্তা ব্রাহ্মণো নাম. যথাহ – ‘‘সত্তন্নং খো, ভিক্খু, ধম্মানং বাহিতত্তা ব্রাহ্মণো. কতমেসং সত্তন্নং? রাগো বাহিতো হোতি, দোসো… মোহো… মানো… সক্কাযদিট্ঠি… ৰিচিকিচ্ছা… সীলব্বতপরামাসো বাহিতো হোতি. ইমেসং ভিক্খু সত্তন্নং ধম্মানং বাহিতত্তা ব্রাহ্মণো’’তি (চূল়নি. মেত্তগূমাণৰপুচ্ছানিদ্দেস ২৮). সুমেধোতি সুন্দরপঞ্ঞো. সেক্খস্সাতি এত্থ সিক্খতীতি সেক্খো. যথাহ – ‘‘সিক্খতীতি খো, ভিক্খু, তস্মা সেক্খোতি ৰুচ্চতি. কিঞ্চ সিক্খতি? অধিসীলম্পি সিক্খতি, অধিচিত্তম্পি সিক্খতি, অধিপঞ্ঞম্পি সিক্খতী’’তি (অ. নি. ৩.৮৬).

পঞ্ঞায অধিৰচনন্তি লোকিযলোকুত্তরায পঞ্ঞায এতং অধিৰচনং, ন আৰুধসত্থস্স. ৰীরিযারম্ভস্সাতি কাযিকচেতসিকৰীরিযস্স. তং পঞ্ঞাগতিকমেৰ হোতি. লোকিযায পঞ্ঞায লোকিযং, লোকুত্তরায পঞ্ঞায লোকুত্তরং. এত্থ পনাযং অত্থদীপনা –

একো কির জানপদো ব্রাহ্মণো পাতোৰ মাণৰকেহি সদ্ধিং গামতো নিক্খম্ম দিৰসং অরঞ্ঞে মন্তে ৰাচেত্ৰা সাযং গামং আগচ্ছতি. অন্তরামগ্গে চ একো ৰম্মিকো অত্থি. সো রত্তিং ধূমাযতি, দিৰা পজ্জলতি. ব্রাহ্মণো অন্তেৰাসিং সুমেধং মাণৰং আহ – ‘‘তাত, অযং ৰম্মিকো রত্তিং ধূমাযতি, দিৰা পজ্জলতি, ৰিকারমস্স পস্সিস্সাম, ভিন্দিত্ৰা নং চত্তারো কোট্ঠাসে কত্ৰা খিপাহী’’তি. সো সাধূতি কুদালং গহেত্ৰা সমেহি পাদেহি পথৰিযং পতিট্ঠায তথা অকাসি. তত্র আচরিযব্রাহ্মণো ৰিয ভগৰা. সুমেধমাণৰকো ৰিয সেক্খো ভিক্খু. ৰম্মিকো ৰিয কাযো. ‘‘তাত, অযং ৰম্মিকো রত্তিং ধূমাযতি, দিৰা পজ্জলতি, ৰিকারমস্স পস্সিস্সাম, ভিন্দিত্ৰা নং চত্তারো কোট্ঠাসে কত্ৰা খিপাহী’’তি ব্রাহ্মণেন ৰুত্তকালো ৰিয, ‘‘ভিক্খু চাতুমহাভূতিকং কাযং চত্তারো কোট্ঠাসে কত্ৰা পরিগ্গণ্হাহী’’তি ভগৰতা ৰুত্তকালো. তস্স সাধূতি কুদালং গহেত্ৰা তথাকরণং ৰিয সেক্খস্স ভিক্খুনো, ‘‘যো ৰীসতিযা কোট্ঠাসেসু থদ্ধভাৰো, অযং পথৰীধাতু. যো দ্ৰাদসসু কোট্ঠাসেসু আবন্ধনভাৰো, অযং আপোধাতু. যো চতূসু কোট্ঠাসেসু পরিপাচনভাৰো, অযং তেজোধাতু. যো ছসু কোট্ঠাসেসু ৰিত্থম্ভনভাৰো, অযং ৰাযোধাতূ’’তি এৰং চতুধাতুৰৰত্থানৰসেন কাযপরিগ্গহো ৰেদিতব্বো.

লঙ্গীতি খো, ভিক্খূতি কস্মা ভগৰা অৰিজ্জং লঙ্গীতি কত্ৰা দস্সেসীতি? যথা হি নগরস্স দ্ৰারং পিধায পলিঘে যোজিতে মহাজনস্স গমনং পচ্ছিজ্জতি, যে নগরস্স অন্তো, তে অন্তোযেৰ হোন্তি. যে বহি, তে বহিযেৰ. এৰমেৰ যস্স ঞাণমুখে অৰিজ্জালঙ্গী পততি, তস্স নিব্বানসম্পাপকং ঞাণগমনং পচ্ছিজ্জতি, তস্মা অৰিজ্জং লঙ্গীতি কত্ৰা দস্সেসি. পজহ অৰিজ্জন্তি এত্থ কম্মট্ঠানউগ্গহপরিপুচ্ছাৰসেন অৰিজ্জাপহানং কথিতং.

উদ্ধুমাযিকাতি খো, ভিক্খূতি এত্থ উদ্ধুমাযিকমণ্ডূকো নাম নো মহন্তো, নখপিট্ঠিপ্পমাণো হোতি, পুরাণপণ্ণন্তরে ৰা গচ্ছন্তরে ৰা ৰল্লিঅন্তরে ৰা ৰসতি. সো দণ্ডকোটিযা ৰা ৰল্লিকোটিযা ৰা পংসুচুণ্ণকেন ৰা ঘট্টিতো আযমিত্ৰা মহন্তো পরিমণ্ডলো বেলুৰপক্কপ্পমাণো হুত্ৰা চত্তারো পাদে আকাসগতে কত্ৰা পচ্ছিন্নগমনো হুত্ৰা অমিত্তৰসং যাতি, কাককুললাদিভত্তমেৰ হোতি. এৰমেৰ অযং কোধো পঠমং উপ্পজ্জন্তো চিত্তাৰিলমত্তকোৰ হোতি. তস্মিং খণে অনিগ্গহিতো ৰড্ঢিত্ৰা মুখৰিকুলনং পাপেতি. তদা অনিগ্গহিতো হনুসঞ্চোপনং পাপেতি. তদা অনিগ্গহিতো ফরুসৰাচানিচ্ছারণং পাপেতি. তদা অনিগ্গহিতো দিসাৰিলোকনং পাপেতি. তদা অনিগ্গহিতো আকড্ঢনপরিকড্ঢনং পাপেতি. তদা অনিগ্গহিতো পাণিনা লেড্ডুদণ্ডসত্থপরামসনং পাপেতি. তদা অনিগ্গহিতো দণ্ডসত্থাভিনিপাতং পাপেতি. তদা অনিগ্গহিতো পরঘাতনম্পি অত্তঘাতনম্পি পাপেতি. ৰুত্তম্পি হেতং – ‘‘যতো অযং কোধো পরং ঘাতেত্ৰা অত্তানং ঘাতেতি, এত্তাৰতাযং কোধো পরমুস্সদগতো হোতি পরমৰেপুল্লপ্পত্তো’’তি. তত্থ যথা উদ্ধুমাযিকায চতূসু পাদেসু আকাসগতেসু গমনং পচ্ছিজ্জতি, উদ্ধুমাযিকা অমিত্তৰসং গন্ত্ৰা কাকাদিভত্তং হোতি, এৰমেৰ কোধসমঙ্গীপুগ্গলো কম্মট্ঠানং গহেত্ৰা ৰড্ঢেতুং ন সক্কোতি, অমিত্তৰসং যাতি, সব্বেসং মারানং যথাকামকরণীযো হোতি. তেনাহ ভগৰা – ‘‘উদ্ধুমাযিকাতি খো, ভিক্খু, কোধূপাযাসস্সেতং অধিৰচন’’ন্তি. তত্থ বলৰপ্পত্তো কোধোৰ কোধূপাযাসো. পজহ কোধূপাযাসন্তি এত্থ পটিসঙ্খানপ্পহানং কথিতং.

দ্ৰিধাপথোতি এত্থ, যথা পুরিসো সধনো সভোগো কন্তারদ্ধানমগ্গপ্পটিপন্নো দ্ৰেধাপথং পত্ৰা, ‘‘ইমিনা নু খো গন্তব্বং, ইমিনা গন্তব্ব’’ন্তি নিচ্ছেতুং অসক্কোন্তো তত্থেৰ তিট্ঠতি, অথ নং চোরা উট্ঠহিত্ৰা অনযব্যসনং পাপেন্তি, এৰমেৰ খো মূলকম্মট্ঠানং গহেত্ৰা নিসিন্নো ভিক্খু বুদ্ধাদীসু কঙ্খায উপ্পন্নায কম্মট্ঠানং ৰড্ঢেতুং ন সক্কোতি, অথ নং কিলেসমারাদযো সব্বে মারা অনযব্যসনং পাপেন্তি, ইতি ৰিচিকিচ্ছা দ্ৰেধাপথসমা হোতি. তেনাহ ভগৰা – ‘‘দ্ৰিধাপথোতি খো, ভিক্খু, ৰিচিকিচ্ছাযেতং অধিৰচন’’ন্তি. পজহ ৰিচিকিচ্ছন্তি এত্থ কম্মট্ঠানউগ্গহপরিপুচ্ছাৰসেন ৰিচিকিচ্ছাপহানং কথিতং.

চঙ্গৰারন্তি এত্থ, যথা রজকেহি খারপরিস্সাৰনম্হি উদকে পক্খিত্তে একো উদকঘটো দ্ৰেপি দসপি ৰীসতিপি ঘটসতম্পি পগ্ঘরতিযেৰ, পসটমত্তম্পি উদকং ন তিট্ঠতি, এৰমেৰ নীৰরণসমঙ্গিনো পুগ্গলস্স অব্ভন্তরে কুসলধম্মো ন তিট্ঠতি. তেনাহ ভগৰা – ‘‘চঙ্গৰারন্তি খো, ভিক্খু, পঞ্চন্নেতং নীৰরণানং অধিৰচন’’ন্তি. পজহ পঞ্চনীৰরণেতি এত্থ ৰিক্খম্ভনতদঙ্গৰসেন নীৰরণপ্পহানং কথিতং.

কুম্মোতি এত্থ, যথা কচ্ছপস্স চত্তারো পাদা সীসন্তি পঞ্চেৰ অঙ্গানি হোন্তি, এৰমেৰ সব্বেপি সঙ্খতা ধম্মা গয্হমানা পঞ্চেৰ খন্ধা ভৰন্তি. তেনাহ ভগৰা – ‘‘কুম্মোতি খো, ভিক্খু, পঞ্চন্নেতং উপাদানক্খন্ধানং অধিৰচন’’ন্তি. পজহ পঞ্চুপাদানক্খন্ধেতি এত্থ পঞ্চসু খন্ধেসু ছন্দরাগপ্পহানং কথিতং.

অসিসূনাতি এত্থ, যথা সূনায উপরি মংসং ঠপেত্ৰা অসিনা কোট্টেন্তি, এৰমিমে সত্তা ৰত্থুকামত্থায কিলেসকামেহি ঘাতযমানা ৰত্থুকামানং উপরি কত্ৰা কিলেসকামেহি কন্তিতা কোট্টিতা চ হোন্তি. তেনাহ ভগৰা – ‘‘অসিসূনাতি খো, ভিক্খু, পঞ্চন্নেতং কামগুণানং অধিৰচন’’ন্তি. পজহ পঞ্চ কামগুণেতি এত্থ পঞ্চসু কামগুণেসু ছন্দরাগপ্পহানং কথিতং.

মংসপেসীতি খো, ভিক্খূতি এত্থ অযং মংসপেসি নাম বহুজনপত্থিতা খত্তিযাদযো মনুস্সাপি নং পত্থেন্তি কাকাদযো তিরচ্ছানাপি. ইমে হি সত্তা অৰিজ্জায সম্মত্তা নন্দিরাগং উপগম্ম ৰট্টং ৰড্ঢেন্তি. যথা ৰা মংসপেসি ঠপিতঠপিতট্ঠানে লগ্গতি, এৰমিমে সত্তা নন্দিরাগবদ্ধা ৰট্টে লগ্গন্তি, দুক্খং পত্ৰাপি ন উক্কণ্ঠন্তি, ইতি নন্দিরাগো মংসপেসিসদিসো হোতি. তেনাহ ভগৰা – ‘‘মংসপেসীতি খো, ভিক্খু, নন্দিরাগস্সেতং অধিৰচন’’ন্তি. পজহ নন্দীরাগন্তি এত্থ চতুত্থমগ্গেন নন্দীরাগপ্পহানং কথিতং.

নাগোতি খো, ভিক্খু, খীণাসৰস্সেতং ভিক্খুনো অধিৰচনন্তি এত্থ যেনত্থেন খীণাসৰো নাগোতি ৰুচ্চতি, সো অনঙ্গণসুত্তে (ম. নি. অট্ঠ. ১.৬৩) পকাসিতো এৰ. নমো করোহি নাগস্সাতি খীণাসৰস্স বুদ্ধনাগস্স, ‘‘বুদ্ধো সো ভগৰা বোধায ধম্মং দেসেতি, দন্তো সো ভগৰা দমথায ধম্মং দেসেতি, সন্তো সো ভগৰা সমথায ধম্মং দেসেতি, তিণ্ণো সো ভগৰা তরণায ধম্মং দেসেতি, পরিনিব্বুতো সো ভগৰা পরিনিব্বানায ধম্মং দেসেতী’’তি (ম. নি. ১.৩৬১) এৰং নমক্কারং করোহীতি অযমেত্থ অত্থো. ইতি ইদং সুত্তং থেরস্স কম্মট্ঠানং অহোসি. থেরোপি ইদমেৰ সুত্তং কম্মট্ঠানং কত্ৰা ৰিপস্সনং ৰড্ঢেত্ৰা অরহত্তং পত্তো. অযমেতস্স অত্থোতি অযং এতস্স পঞ্হস্স অত্থো. ইতি ভগৰা রতনরাসিম্হি মণিকূটং গণ্হন্তো ৰিয যথানুসন্ধিনাৰ দেসনং নিট্ঠপেসীতি.

পপঞ্চসূদনিযা মজ্ঝিমনিকাযট্ঠকথায

ৰম্মিকসুত্তৰণ্ণনা নিট্ঠিতা.

৪. রথৰিনীতসুত্তৰণ্ণনা

২৫২. এৰং মে সুতন্তি রথৰিনীতসুত্তং. তত্থ রাজগহেতি এৰংনামকে নগরে, তঞ্হি মন্ধাতুমহাগোৰিন্দাদীহি পরিগ্গহিতত্তা রাজগহন্তি ৰুচ্চতি. অঞ্ঞেপেত্থ পকারে ৰণ্ণযন্তি. কিং তেহি? নামমেতং তস্স নগরস্স. তং পনেতং বুদ্ধকালে চ চক্কৰত্তিকালে চ নগরং হোতি, সেসকালে সুঞ্ঞং হোতি যক্খপরিগ্গহিতং, তেসং ৰসন্তৰনং হুত্ৰা তিট্ঠতি. ৰেল়ুৰনে কলন্দকনিৰাপেতি ৰেল়ুৰনন্তি তস্স উয্যানস্স নামং, তং কির ৰেল়ূহি পরিক্খিত্তং অহোসি অট্ঠারসহত্থেন চ পাকারেন, গোপুরট্টালকযুত্তং নীলোভাসং মনোরমং, তেন ৰেল়ুৰনন্তি ৰুচ্চতি. কলন্দকানঞ্চেত্থ নিৰাপং অদংসু, তেন কলন্দকনিৰাপোতি ৰুচ্চতি.

পুব্বে কির অঞ্ঞতরো রাজা তত্থ উয্যানকীল়নত্থং আগতো সুরামদেন মত্তো দিৰাসেয্যং উপগতো সুপি. পরিজনোপিস্স, ‘‘সুত্তো রাজা’’তি পুপ্ফফলাদীহি পলোভিযমানো ইতো চিতো চ পক্কামি, অথ সুরাগন্ধেন অঞ্ঞতরস্মা সুসিররুক্খা কণ্হসপ্পো নিক্খমিত্ৰা রঞ্ঞাভিমুখো আগচ্ছতি. তং দিস্ৰা রুক্খদেৰতা, ‘‘রঞ্ঞো জীৰিতং দম্মী’’তি কাল়কৰেসেন আগন্ত্ৰা কণ্ণমূলে সদ্দমকাসি. রাজা পটিবুজ্ঝি, কণ্হসপ্পো নিৰত্তো. সো তং দিস্ৰা, ‘‘ইমায মম জীৰিতং দিন্ন’’ন্তি কাল়কানং তত্থ নিৰাপং পট্ঠপেসি, অভযঘোসনঞ্চ ঘোসাপেসি. তস্মা তং ততো পভুতি কলন্দকনিৰাপন্তি সঙ্খ্যং গতং. কলন্দকাতি কাল়কানং নামং.

জাতিভূমিকাতি জাতিভূমিৰাসিনো. তত্থ জাতিভূমীতি জাতট্ঠানং. তং খো পনেতং নেৰ কোসলমহারাজাদীনং ন চঙ্কীব্রাহমণাদীনং ন সক্কসুযামসন্তুসিতাদীনং ন অসীতিমহাসাৰকাদীনং ন অঞ্ঞেসং সত্তানং জাতট্ঠানং ‘‘জাতিভূমী’’তি ৰুচ্চতি. যস্স পন জাতদিৰসে দসসহস্সিলোকধাতু একদ্ধজমালাৰিপ্পকিণ্ণকুসুমৰাসচুণ্ণগন্ধসুগন্ধা সব্বপালিফুল্লমিৰ নন্দনৰনং ৰিরোচমানা পদুমিনিপণ্ণে উদকবিন্দু ৰিয অকম্পিত্থ, জচ্চন্ধাদীনঞ্চ রূপদস্সনাদীনি অনেকানি পাটিহারিযানি পৰত্তিংসু, তস্স সব্বঞ্ঞুবোধিসত্তস্স জাতট্ঠানসাকিযজনপদো কপিলৰত্থাহারো, সা ‘‘জাতিভূমী’’তি ৰুচ্চতি.

ধম্মগরুভাৰৰণ্ণনা

ৰস্সংৰুট্ঠাতি তেমাসং ৰস্সংৰুট্ঠা পৰারিতপৰারণা হুত্ৰা. ভগৰা এতদৰোচাতি ‘‘কচ্চি, ভিক্খৰে, খমনীয’’ন্তিআদীহি ৰচনেহি আগন্তুকপটিসন্থারং কত্ৰা এতং, ‘‘কো নু খো, ভিক্খৰে’’তিআদিৰচনমৰোচ. তে কির ভিক্খু, – ‘‘কচ্চি, ভিক্খৰে, খমনীযং কচ্চি যাপনীযং, কচ্চিত্থ অপ্পকিলমথেন অদ্ধানং আগতা, ন চ পিণ্ডকেন কিলমিত্থ, কুতো চ তুম্হে, ভিক্খৰে, আগচ্ছথা’’তি পটিসন্থারৰসেন পুচ্ছিতা – ‘‘ভগৰা সাকিযজনপদে কপিলৰত্থাহারতো জাতিভূমিতো আগচ্ছামা’’তি আহংসু. অথ ভগৰা নেৰ সুদ্ধোদনমহারাজস্স, ন সক্কোদনস্স, ন সুক্কোদনস্স, ন ধোতোদনস্স, ন অমিতোদনস্স, ন অমিত্তায দেৰিযা, ন মহাপজাপতিযা, ন সকলস্স সাকিযমণ্ডলস্স আরোগ্যং পুচ্ছি. অথ খো অত্তনা চ দসকথাৰত্থুলাভিং পরঞ্চ তত্থ সমাদপেতারং পটিপত্তিসম্পন্নং ভিক্খুং পুচ্ছন্তো ইদং – ‘‘কো নু খো, ভিক্খৰে’’তিআদিৰচনং অৰোচ.

কস্মা পন ভগৰা সুদ্ধোদনাদীনং আরোগ্যং অপুচ্ছিত্ৰা এৰরূপং ভিক্খুমেৰ পুচ্ছতি? পিযতায. বুদ্ধানঞ্হি পটিপন্নকা ভিক্খূ ভিক্খুনিযো উপাসকা উপাসিকাযো চ পিযা হোন্তি মনাপা. কিং কারণা? ধম্মগরুতায. ধম্মগরুনো হি তথাগতা, সো চ নেসং ধম্মগরুভাৰো, ‘‘দুক্খং খো অগারৰো ৰিহরতি, অপ্পতিস্সো’’তি (অ. নি. ৪.২১) ইমিনা অজপালনিগ্রোধমূলে উপ্পন্নজ্ঝাসযেন ৰেদিতব্বো. ধম্মগরুতাযেৰ হি ভগৰা মহাকস্সপত্থেরস্স অভিনিক্খমনদিৰসে পচ্চুগ্গমনং করোন্তো তিগাৰুতং মগ্গং অগমাসি. অতিরেকতিযোজনসতং মগ্গং গন্ত্ৰা গঙ্গাতীরে ধম্মং দেসেত্ৰা মহাকপ্পিনং সপরিসং অরহত্তে পতিট্ঠপেসি. একস্মিং পচ্ছাভত্তে পঞ্চচত্তালীসযোজনং মগ্গং গন্ত্ৰা কুম্ভকারস্স নিৰেসনে তিযামরত্তিং ধম্মকথং কত্ৰা পুক্কুসাতিকুলপুত্তং অনাগামিফলে পতিট্ঠপেসি. ৰীসযোজনসতং গন্ত্ৰা ৰনৰাসিসামণেরস্স অনুগ্গহং অকাসি. সট্ঠিযোজনমগ্গং গন্ত্ৰা খদিরৰনিযত্থেরস্স ধম্মং দেসেসি. অনুরুদ্ধত্থেরো পাচীনৰংসদাযে নিসিন্নো মহাপুরিসৰিতক্কং ৰিতক্কেতীতি ঞত্ৰা তত্থ আকাসেন গন্ত্ৰা থেরস্স পুরতো ওরুয্হ সাধুকারমদাসি. কোটিকণ্ণসোণত্থেরস্স একগন্ধকুটিযং সেনাসনং পঞ্ঞপাপেত্ৰা পচ্চূসকালে ধম্মদেসনং অজ্ঝেসিত্ৰা সরভঞ্ঞপরিযোসানে সাধুকারমদাসি. তিগাৰুতং মগ্গং গন্ত্ৰা তিণ্ণং কুলপুত্তানং ৰসনট্ঠানে গোসিঙ্গসালৰনে সামগ্গিরসানিসংসং কথেসি. কস্সপোপি ভগৰা – ‘‘অনাগামিফলে পতিট্ঠিতো অরিযসাৰকো অয’’ন্তি ৰিস্সাসং উপ্পাদেত্ৰা ঘটিকারস্স কুম্ভকারস্স নিৰেসনং গন্ত্ৰা সহত্থা আমিসং গহেত্ৰা পরিভুঞ্জি.

অম্হাকংযেৰ ভগৰা উপকট্ঠায ৰস্সূপনাযিকায জেতৰনতো ভিক্খুসঙ্ঘপরিৰুতো চারিকং নিক্খমি. কোসলমহারাজঅনাথপিণ্ডিকাদযো নিৰত্তেতুং নাসক্খিংসু. অনাথপিণ্ডিকো ঘরং আগন্ত্ৰা দোমনস্সপ্পত্তো নিসীদি. অথ নং পুণ্ণা নাম দাসী দোমনস্সপ্পত্তোসি সামীতি আহ. ‘‘আম জে, সত্থারং নিৰত্তেতুং নাসক্খিং, অথ মে ইমং তেমাসং ধম্মং ৰা সোতুং, যথাধিপ্পাযং ৰা দানং দাতুং ন লভিস্সামী’’তি চিন্তা উপ্পন্নাতি. অহম্পি সামি সত্থারং নিৰত্তেস্সামীতি. সচে নিৰত্তেতুং সক্কোসি, ভুজিস্সাযেৰ ত্ৰন্তি. সা গন্ত্ৰা দসবলস্স পাদমূলে নিপজ্জিত্ৰা ‘‘নিৰত্তথ ভগৰা’’তি আহ. পুণ্ণে ত্ৰং পরপটিবদ্ধজীৰিকা কিং মে করিস্সসীতি. ভগৰা ময্হং দেয্যধম্মো নত্থীতি তুম্হেপি জানাথ, তুম্হাকং নিৰত্তনপচ্চযা পনাহং তীসু সরণেসু পঞ্চসু সীলেসু পতিট্ঠহিস্সামীতি. ভগৰা সাধু সাধু পুণ্ণেতি সাধুকারং কত্ৰা নিৰত্তেত্ৰা জেতৰনমেৰ পৰিট্ঠো. অযং কথা পাকটা অহোসি. সেট্ঠি সুত্ৰা পুণ্ণায কির ভগৰা নিৰত্তিতোতি তং ভুজিস্সং কত্ৰা ধীতুট্ঠানে ঠপেসি. সা পব্বজ্জং যাচিত্ৰা পব্বজি, পব্বজিত্ৰা ৰিপস্সনং আরভি. অথস্সা সত্থা আরদ্ধৰিপস্সকভাৰং ঞত্ৰা ইমং ওভাসগাথং ৰিস্সজ্জেসি –

‘‘পুণ্ণে পূরেসি সদ্ধম্মং, চন্দো পন্নরসো যথা;

পরিপুণ্ণায পঞ্ঞায, দুক্খস্সন্তং করিস্সসী’’তি. (থেরীগা. ৩);

গাথাপরিযোসানে অরহত্তং পত্ৰা অভিঞ্ঞাতা সাৰিকা অহোসীতি. এৰং ধম্মগরুনো তথাগতা.

নন্দকত্থেরে উপট্ঠানসালাযং ধম্মং দেসেন্তেপি ভগৰা অনহাতোৰ গন্ত্ৰা তিযামরত্তিং ঠিতকোৰ ধম্মকথং সুত্ৰা দেসনাপরিযোসানে সাধুকারমদাসি. থেরো আগন্ত্ৰা ৰন্দিত্ৰা, ‘‘কায ৰেলায, ভন্তে, আগতত্থা’’তি পুচ্ছি. তযা সুত্তন্তে আরদ্ধমত্তেতি. দুক্করং করিত্থ, ভন্তে, বুদ্ধসুখুমালা তুম্হেতি. সচে ত্ৰং, নন্দ, কপ্পং দেসেতুং সক্কুণেয্যাসি, কপ্পমত্তম্পাহং ঠিতকোৰ সুণেয্যন্তি ভগৰা অৰোচ. এৰং ধম্মগরুনো তথাগতা. তেসং ধম্মগরুতায পটিপন্নকা পিযা হোন্তি, তস্মা পটিপন্নকে পুচ্ছি. পটিপন্নকো চ নাম অত্তহিতায পটিপন্নো নো পরহিতায, পরহিতায পটিপন্নো নো অত্তহিতায, নো অত্তহিতায চ পটিপন্নো নো পরহিতায চ, অত্তহিতায চ পটিপন্নো পরহিতায চাতি চতুব্বিধো হোতি.

তত্থ যো সযং দসন্নং কথাৰত্থূনং লাভী হোতি, পরং তত্থ ন ওৰদতি ন অনুসাসতি আযস্মা বাকুলো ৰিয. অযং অত্তহিতায পটিপন্নো নাম নো পরহিতায পটিপন্নো, এৰরূপং ভিক্খুং ভগৰা ন পুচ্ছতি. কস্মা? ন ময্হং সাসনস্স ৰড্ঢিপক্খে ঠিতোতি.

যো পন দসন্নং কথাৰত্থূনং অলাভী, পরং তেহি ওৰদতি তেন কতৰত্তসাদিযনত্থং উপনন্দো সক্যপুত্তো ৰিয, অযং পরহিতায পটিপন্নো নাম নো অত্তহিতায, এৰরূপম্পি ন পুচ্ছতি. কস্মা? অস্স তণ্হা মহাপচ্ছি ৰিয অপ্পহীনাতি.

যো অত্তনাপি দসন্নং কথাৰত্থূনং অলাভী, পরম্পি তেহি ন ওৰদতি, লাল়ুদাযী ৰিয, অযং নেৰ অত্তহিতায পটিপন্নো ন পরহিতায, এৰরূপম্পি ন পুচ্ছতি. কস্মা? অস্স অন্তো কিলেসা ফরসুছেজ্জা ৰিয মহন্তাতি.

যো পন সযং দসন্নং কথাৰত্থূনং লাভী, পরম্পি তেহি ওৰদতি, অযং অত্তহিতায চেৰ পরহিতায চ পটিপন্নো নাম সারিপুত্তমোগ্গল্লানমহাকস্সপাদযো অসীতিমহাথেরা ৰিয, এৰরূপং ভিক্খুং পুচ্ছতি. কস্মা? ময্হং সাসনস্স ৰুড্ঢিপক্খে ঠিতোতি. ইধাপি এৰরূপমেৰ পুচ্ছন্তো – ‘‘কো নু খো, ভিক্খৰে’’তিআদিমাহ.

এৰং ভগৰতা পুট্ঠানং পন তেসং ভিক্খূনং ভগৰা অত্তনো জাতিভূমিযং উভযহিতায পটিপন্নং দসকথাৰত্থুলাভিং ভিক্খুং পুচ্ছতি, কো নু খো তত্থ এৰরূপোতি ন অঞ্ঞমঞ্ঞং চিন্তনা ৰা সমন্তনা ৰা অহোসি. কস্মা? আযস্মা হি মন্তাণিপুত্তো তস্মিং জনপদে আকাসমজ্ঝে ঠিতো চন্দো ৰিয সূরিযো ৰিয চ পাকটো পঞ্ঞাতো. তস্মা তে ভিক্খূ মেঘসদ্দং সুত্ৰা একজ্ঝং সন্নিপতিতমোরঘটা ৰিয ঘনসজ্ঝাযং কাতুং, আরদ্ধভিক্খূ ৰিয চ অত্তনো আচরিযং পুণ্ণত্থেরং ভগৰতো আরোচেন্তা থেরস্স চ গুণং ভাসিতুং অপ্পহোন্তেহি মুখেহি একপ্পহারেনেৰ পুণ্ণো নাম, ভন্তে, আযস্মাতিআদিমাহংসু. তত্থ পুণ্ণোতি তস্স থেরস্স নামং. মন্তাণিযা পন সো পুত্তো, তস্মা মন্তাণিপুত্তোতি ৰুচ্চতি. সম্ভাৰিতোতি গুণসম্ভাৰনায সম্ভাৰিতো.

অপ্পিচ্ছতাদিৰণ্ণনা

অপ্পিচ্ছোতি ইচ্ছাৰিরহিতো নিইচ্ছো নিত্তণ্হো. এত্থ হি ব্যঞ্জনং সাৰসেসং ৰিয, অত্থো পন নিরৰসেসো. ন হি তস্স অন্তো অণুমত্তাপি পাপিকা ইচ্ছা নাম অত্থি. খীণাসৰো হেস সব্বসো পহীনতণ্হো. অপিচেত্থ অত্রিচ্ছতা পাপিচ্ছতা মহিচ্ছতা অপ্পিচ্ছতাতি অযং ভেদো ৰেদিতব্বো.

তত্থ সকলাভে অতিত্তস্স পরলাভে পত্থনা অত্রিচ্ছতা নাম. তায সমন্নাগতস্স একভাজেন পক্কপূৰোপি অত্তনো পত্তে পতিতো ন সুপক্কো ৰিয খুদ্দকো ৰিয চ খাযতি. স্ৰেৰ পরস্স পত্তে পক্খিত্তো সুপক্কো ৰিয মহন্তো ৰিয চ খাযতি. অসন্তগুণসম্ভাৰনতা পন পটিগ্গহণে চ অমত্তঞ্ঞুতা পাপিচ্ছতা নাম, সা, ‘‘ইধেকচ্চো অস্সদ্ধো সমানো সদ্ধোতি মং জনো জানাতূ’’তিআদিনা নযেন অভিধম্মে আগতাযেৰ, তায সমন্নাগতো পুগ্গলো কোহঞ্ঞে পতিট্ঠাতি. সন্তগুণসম্ভাৰনা পন পটিগ্গহণে চ অমত্তঞ্ঞুতা মহিচ্ছতা নাম. সাপি, ‘‘ইধেকচ্চো সদ্ধো সমানো সদ্ধোতি মং জনো জানাতূতি ইচ্ছতি, সীলৰা সমানো সীলৰাতি মং জনো জানাতূ’’তি (ৰিভ. ৮৫১) ইমিনা নযেন আগতাযেৰ, তায সমন্নাগতো পুগ্গলো দুস্সন্তপ্পযো হোতি, ৰিজাতমাতাপিস্স চিত্তং গহেতুং ন সক্কোতি. তেনেতং ৰুচ্চতি –

‘‘অগ্গিক্খন্ধো সমুদ্দো চ, মহিচ্ছো চাপি পুগ্গলো;

সকটেন পচ্চযং দেতু, তযোপেতে অতপ্পযা’’তি.

সন্তগুণনিগূহনতা পন পটিগ্গহণে চ মত্তঞ্ঞুতা অপ্পিচ্ছতা নাম, তায সমন্নাগতো পুগ্গলো অত্তনি ৰিজ্জমানম্পি গুণং পটিচ্ছাদেতুকামতায, ‘‘সদ্ধো সমানো সদ্ধোতি মং জনো জানাতূতি ন ইচ্ছতি. সীলৰা, পৰিৰিত্তো, বহুস্সুতো, আরদ্ধৰীরিযো, সমাধিসম্পন্নো, পঞ্ঞৰা, খীণাসৰো সমানো খীণাসৰোতি মং জনো জানাতূ’’তি ন ইচ্ছতি, সেয্যথাপি মজ্ঝন্তিকত্থেরো.

থেরো কির মহাখীণাসৰো অহোসি, পত্তচীৰরং পনস্স পাদমত্তমেৰ অগ্ঘতি, সো অসোকস্স ধম্মরঞ্ঞো ৰিহারমহদিৰসে সঙ্ঘত্থেরো অহোসি. অথস্স অতিলূখভাৰং দিস্ৰা মনুস্সা, ‘‘ভন্তে, থোকং বহি হোথা’’তি আহংসু. থেরো, ‘‘মাদিসে খীণাসৰে রঞ্ঞো সঙ্গহং অকরোন্তে অঞ্ঞো কো করিস্সতী’’তি পথৰিযং নিমুজ্জিত্ৰা সঙ্ঘত্থেরস্স উক্খিত্তপিণ্ডং গণ্হন্তোযেৰ উম্মুজ্জি. এৰং খীণাসৰো সমানো, ‘‘খীণাসৰোতি মং জনো জানাতূ’’তি ন ইচ্ছতি. এৰং অপ্পিচ্ছো পন ভিক্খু অনুপ্পন্নং লাভং উপ্পাদেতি, উপ্পন্নং লাভং থাৰরং করোতি, দাযকানং চিত্তং আরাধেতি, যথা যথা হি সো অত্তনো অপ্পিচ্ছতায অপ্পং গণ্হাতি, তথা তথা তস্স ৰত্তে পসন্না মনুস্সা বহূ দেন্তি.

অপরোপি চতুব্বিধো অপ্পিচ্ছো – পচ্চযঅপ্পিচ্ছো ধুতঙ্গঅপ্পিচ্ছো পরিযত্তিঅপ্পিচ্ছো অধিগমঅপ্পিচ্ছোতি. তত্থ চতূসু পচ্চযেসু অপ্পিচ্ছো পচ্চযঅপ্পিচ্ছো নাম, সো দাযকস্স ৰসং জানাতি, দেয্যধম্মস্স ৰসং জানাতি, অত্তনো থামং জানাতি. যদি হি দেয্যধম্মো বহু হোতি, দাযকো অপ্পং দাতুকামো, দাযকস্স ৰসেন অপ্পং গণ্হাতি. দেয্যধম্মো অপ্পো, দাযকো বহুং দাতুকামো, দেয্যধম্মস্স ৰসেন অপ্পং গণ্হাতি. দেয্যধম্মোপি বহু, দাযকোপি বহুং দাতুকামো, অত্তনো থামং ঞত্ৰা পমাণেনেৰ গণ্হাতি.

ধুতঙ্গসমাদানস্স অত্তনি অত্থিভাৰং নজানাপেতুকামো ধুতঙ্গঅপ্পিচ্ছো নাম. তস্স ৰিভাৰনত্থং ইমানি ৰত্থূনি – সোসানিকমহাসুমনত্থেরো কির সট্ঠি ৰস্সানি সুসানে ৰসি, অঞ্ঞো একভিক্খুপি ন অঞ্ঞাসি, তেনেৰাহ –

‘‘সুসানে সট্ঠি ৰস্সানি, অব্বোকিণ্ণং ৰসামহং;

দুতিযো মং ন জানেয্য, অহো সোসানিকুত্তমো’’তি.

চেতিযপব্বতে দ্ৰেভাতিযত্থেরা ৰসিংসু. তেসু কনিট্ঠো উপট্ঠাকেন পেসিতা উচ্ছুখণ্ডিকা গহেত্ৰা জেট্ঠস্স সন্তিকং অগমাসি. পরিভোগং, ভন্তে, করোথাতি. থেরস্স চ ভত্তকিচ্চং কত্ৰা মুখং ৰিক্খালনকালো অহোসি. সো অলং, আৰুসোতি আহ. কচ্চি, ভন্তে, একাসনিকত্থাতি. আহরাৰুসো, উচ্ছুখণ্ডিকাতি পঞ্ঞাস ৰস্সানি একাসনিকো সমানোপি ধুতঙ্গং নিগূহমানো পরিভোগং কত্ৰা মুখং ৰিক্খালেত্ৰা পুন ধুতঙ্গং অধিট্ঠায গতো.

যো পন সাকেতকতিস্সত্থেরো ৰিয বহুস্সুতভাৰং জানাপেতুং ন ইচ্ছতি, অযং পরিযত্তিঅপ্পিচ্ছো নাম. থেরো কির খণো নত্থীতি উদ্দেসপরিপুচ্ছাসু ওকাসং অকরোন্তো মরণক্খযং, ভন্তে, লভিস্সথাতি চোদিতো গণং ৰিস্সজ্জেত্ৰা কণিকারৰালিকসমুদ্দৰিহারং গতো. তত্থ অন্তোৰস্সং থেরনৰমজ্ঝিমানং উপকারো হুত্ৰা মহাপৰারণায উপোসথদিৰসে ধম্মকথায জনতং খোভেত্ৰা গতো.

যো পন সোতাপন্নাদীসু অঞ্ঞতরো হুত্ৰা সোতাপন্নাদিভাৰং জানাপেতুং ন ইচ্ছতি, অযং অধিগমঅপ্পিচ্ছো নাম, তযো কুলপুত্তা ৰিয ঘটিকারকুম্ভকারো ৰিয চ.

আযস্মা পন পুণ্ণো অত্রিচ্ছতং পাপিচ্ছতং মহিচ্ছতঞ্চ পহায সব্বসো ইচ্ছাপটিপক্খভূতায অলোভসঙ্খাতায পরিসুদ্ধায অপ্পিচ্ছতায সমন্নাগতত্তা অপ্পিচ্ছো নাম অহোসি. ভিক্খূনম্পি, ‘‘আৰুসো, অত্রিচ্ছতা পাপিচ্ছতা মহিচ্ছতাতি ইমে ধম্মা পহাতব্বা’’তি তেসু আদীনৰং দস্সেত্ৰা এৰরূপং অপ্পিচ্ছতং সমাদায ৰত্তিতব্বন্তি অপ্পিচ্ছকথং কথেসি. তেন ৰুত্তং ‘‘অত্তনা চ অপ্পিচ্ছো অপ্পিচ্ছকথঞ্চ ভিক্খূনং কত্তা’’তি.

দ্ৰাদসৰিধসন্তোসৰণ্ণনা

ইদানি অত্তনা চ সন্তুট্ঠোতিআদীসু ৰিসেসত্থমেৰ দীপযিস্সাম. যোজনা পন ৰুত্তনযেনেৰ ৰেদিতব্বা. সন্তুট্ঠোতি ইতরীতরপচ্চযসন্তোসেন সমন্নাগতো. সো পনেস সন্তোসো দ্ৰাদসৰিধো হোতি. সেয্যথিদং, চীৰরে যথালাভসন্তোসো যথাবলসন্তোসো যথসারুপ্পসন্তোসোতি তিৰিধো, এৰং পিণ্ডপাতাদীসু. তস্সাযং পভেদসংৰণ্ণনা.

ইধ ভিক্খু চীৰরং লভতি সুন্দরং ৰা অসুন্দরং ৰা. সো তেনেৰ যাপেতি অঞ্ঞং ন পত্থেতি, লভন্তোপি ন গণ্হাতি, অযমস্স চীৰরে যথালাভসন্তোসো. অথ যো পকতিদুব্বলো ৰা হোতি আবাধজরাভিভূতো ৰা, গরুচীৰরং পারুপন্তো কিলমতি, সো সভাগেন ভিক্খুনা সদ্ধিং তং পরিৰত্তেত্ৰা লহুকেন যাপেন্তোপি সন্তুট্ঠোৰ হোতি, অযমস্স চীৰরে যথাবলসন্তোসো. অপরো পণীতপচ্চযলাভী হোতি, সো পট্টচীৰরাদীনং অঞ্ঞতরং মহগ্ঘচীৰরং বহূনি ৰা পন চীৰরানি লভিত্ৰা ইদং থেরানং চিরপব্বজিতানং ইদং বহুস্সুতানং অনুরূপং, ইদং গিলানানং ইদং অপ্পলাভানং হোতূতি দত্ৰা তেসং পুরাণচীৰরং ৰা সঙ্কারকূটাদিতো ৰা নন্তকানি উচ্চিনিত্ৰা তেহি সঙ্ঘাটিং কত্ৰা ধারেন্তোপি সন্তুট্ঠোৰ হোতি, অযমস্স চীৰরে যথাসারুপ্পসন্তোসো.

ইধ পন ভিক্খু পিণ্ডপাতং লভতি লূখং ৰা পণীতং ৰা, সো তেনেৰ যাপেতি, অঞ্ঞং ন পত্থেতি, লভন্তোপি ন গণ্হাতি, অযমস্স পিণ্ডপাতে যথালাভসন্তোসো. যো পন অত্তনো পকতিৰিরুদ্ধং ৰা ব্যাধিৰিরুদ্ধং ৰা পিণ্ডপাতং লভতি, যেনস্স পরিভুত্তেন অফাসু হোতি, সো সভাগস্স ভিক্খুনো তং দত্ৰা তস্স হত্থতো সপ্পাযভোজনং ভুঞ্জিত্ৰা সমণধম্মং করোন্তোপি সন্তুট্ঠোৰ হোতি, অযমস্স পিণ্ডপাতে যথাবলসন্তোসো. অপরো বহুং পণীতং পিণ্ডপাতং লভতি, সো তং চীৰরং ৰিয চিরপব্বজিতবহুস্সুতঅপ্পলাভিগিলানানং দত্ৰা তেসং ৰা সেসকং পিণ্ডায ৰা চরিত্ৰা মিস্সকাহারং ভুঞ্জন্তোপি সন্তুট্ঠোৰ হোতি, অযমস্স পিণ্ডপাতে যথাসারুপ্পসন্তোসো.

ইধ পন ভিক্খু সেনাসনং লভতি মনাপং ৰা অমনাপং ৰা, সো তেন নেৰ সোমনস্সং ন পটিঘং উপ্পাদেতি, অন্তমসো তিণসন্থারকেনাপি যথালদ্ধেনেৰ তুস্সতি, অযমস্স সেনাসনে যথালাভসন্তোসো. যো পন অত্তনো পকতিৰিরুদ্ধং ৰা ব্যাধিৰিরুদ্ধং ৰা সেনাসনং লভতি, যত্থস্স ৰসতো অফাসু হোতি, সো তং সভাগস্স ভিক্খুনো দত্ৰা তস্স সন্তকে সপ্পাযসেনাসনে ৰসন্তোপি সন্তুট্ঠোৰ হোতি, অযমস্স সেনাসনে যথাবলসন্তোসো. অপরো মহাপুঞ্ঞো লেণমণ্ডপকূটাগারাদীনি বহূনি পণীতসেনাসনানি লভতি, সো তানি চীৰরাদীনি ৰিয চিরপব্বজিতবহুস্সুতঅপ্পলাভিগিলানানং দত্ৰা যত্থ কত্থচি ৰসন্তোপি সন্তুট্ঠোৰ হোতি, অযমস্স সেনাসনে যথাসারুপ্পসন্তোসো. যোপি, ‘‘উত্তমসেনাসনং নাম পমাদট্ঠানং, তত্থ নিসিন্নস্স থিনমিদ্ধং ওক্কমতি, নিদ্দাভিভূতস্স পুন পটিবুজ্ঝতো পাপৰিতক্কা পাতুভৰন্তী’’তি পটিসঞ্চিক্খিত্ৰা তাদিসং সেনাসনং পত্তম্পি ন সম্পটিচ্ছতি, সো তং পটিক্খিপিত্ৰা অব্ভোকাসরুক্খমূলাদীসু ৰসন্তোপি সন্তুট্ঠোৰ হোতি, অযম্পিস্স সেনাসনে যথাসারুপ্পসন্তোসো.

ইধ পন ভিক্খু ভেসজ্জং লভতি লূখং ৰা পণীতং ৰা, সো যং লভতি, তেনেৰ সন্তুস্সতি, অঞ্ঞং ন পত্থেতি, লভন্তোপি ন গণ্হাতি, অযমস্স গিলানপচ্চযে যথালাভসন্তোসো. যো পন তেলেন অত্থিকো ফাণিতং লভতি, সো তং সভাগস্স ভিক্খুনো দত্ৰা তস্স হত্থতো তেলং গহেত্ৰা অঞ্ঞদেৰ ৰা পরিযেসিত্ৰা তেহি ভেসজ্জং করোন্তোপি সন্তুট্ঠোৰ হোতি, অযমস্স গিলানপচ্চযে যথাবলসন্তোসো. অপরো মহাপুঞ্ঞো বহুং তেলমধুফাণিতাদিপণীতভেসজ্জং লভতি, সো তং চীৰরং ৰিয চিরপব্বজিতবহুস্সুতঅপ্পলাভিগিলানানং দত্ৰা তেসং আভতকেন যেন কেনচি যাপেন্তোপি সন্তুট্ঠোৰ হোতি. যো পন একস্মিং ভাজনে মুত্তহরীতকং ঠপেত্ৰা একস্মিং চতুমধুরং, ‘‘গণ্হ, ভন্তে, যদিচ্ছসী’’তি ৰুচ্চমানো সচস্স তেসু অঞ্ঞতরেনপি রোগো ৰূপসম্মতি, অথ মুত্তহরীতকং নাম বুদ্ধাদীহি ৰণ্ণিতন্তি চতুমধুরং পটিক্খিপিত্ৰা মুত্তহরীতকেনেৰ ভেসজ্জং করোন্তো পরমসন্তুট্ঠোৰ হোতি, অযমস্স গিলানপচ্চযে যথাসারুপ্পসন্তোসো.

ইমেসং পন পচ্চেকং পচ্চযেসু তিণ্ণং তিণ্ণং সন্তোসানং যথাসারুপ্পসন্তোসোৰ অগ্গো. আযস্মা পুণ্ণো একেকস্মিং পচ্চযে ইমেহি তীহি সন্তোসেহি সন্তুট্ঠো অহোসি. সন্তুট্ঠিকথঞ্চাতি ভিক্খূনম্পি চ ইমং সন্তুট্ঠিকথং কত্তাৰ অহোসি.

তিৰিধপৰিৰেকৰণ্ণনা

পৰিৰিত্তোতি কাযপৰিৰেকো চিত্তপৰিৰেকো উপধিপৰিৰেকোতি ইমেহি তীহি পৰিৰেকেহি সমন্নাগতো. তত্থ একো গচ্ছতি, একো তিট্ঠতি, একো নিসীদতি, একো সেয্যং কপ্পেতি, একো গামং পিণ্ডায পৰিসতি, একো পটিক্কমতি, একো চঙ্কমমধিট্ঠাতি, একো চরতি, একো ৰিহরতীতি অযং কাযপৰিৰেকো নাম. অট্ঠ সমাপত্তিযো পন চিত্তপৰিৰেকো নাম. নিব্বানং উপধিপৰিৰেকো নাম. ৰুত্তম্পি হেতং – ‘‘কাযপৰিৰেকো চ ৰিৰেকট্ঠকাযানং নেক্খম্মাভিরতানং. চিত্তপৰিৰেকো চ পরিসুদ্ধচিত্তানং পরমৰোদানপ্পত্তানং. উপধিৰিৰেকো চ নিরুপধীনং পুগ্গলানং ৰিসঙ্খারগতান’’ন্তি (মহানি. ৫৭). পৰিৰেককথন্তি ভিক্খূনম্পি চ ইমং পৰিৰেককথং কত্তা.

পঞ্চৰিধসংসগ্গৰণ্ণনা

অসংসট্ঠোতি পঞ্চৰিধেন সংসগ্গেন ৰিরহিতো. সৰনসংসগ্গো দস্সনসংসগ্গো সমুল্লপনসংসগ্গো সম্ভোগসংসগ্গো কাযসংসগ্গোতি পঞ্চৰিধো সংসগ্গো. তেসু ইধ ভিক্খু সুণাতি, ‘‘অসুকস্মিং গামে ৰা নিগমে ৰা ইত্থী ৰা কুমারিকা ৰা অভিরূপা দস্সনীযা পাসাদিকা পরমায ৰণ্ণপোক্খরতায সমন্নাগতা’’তি. সো তং সুত্ৰা সংসীদতি ৰিসীদতি ন সক্কোতি ব্রহ্মচরিযং সন্ধারেতুং, সিক্খাদুব্বল্যং অনাৰিকত্ৰা হীনাযাৰত্ততীতি এৰং পরেহি ৰা কথীযমানং রূপাদিসম্পত্তিং অত্তনা ৰা হসিতলপিতগীতসদ্দং সুণন্তস্স সোতৰিঞ্ঞাণৰীথিৰসেন উপ্পন্নো রাগো সৰনসংসগ্গো নাম. সো অনিত্থিগন্ধপচ্চেকবোধিসত্তস্স চ পঞ্চগ্গল়লেণৰাসীতিস্সদহরস্স চ ৰসেন ৰেদিতব্বো –

দহরো কির আকাসেন গচ্ছন্তো গিরিগামৰাসিকম্মারধীতায পঞ্চহি কুমারীহি সদ্ধিং পদুমসরং গন্ত্ৰা ন্হত্ৰা পদুমানি চ পিলন্ধিত্ৰা মধুরস্সরেন গাযন্তিযা সদ্দং সুত্ৰা কামরাগেন ৰিদ্ধো ৰিসেসা পরিহাযিত্ৰা অনযব্যসনং পাপুণি. ইধ ভিক্খু ন হেৰ খো সুণাতি, অপিচ খো সামং পস্সতি ইত্থিং ৰা কুমারিং ৰা অভিরূপং দস্সনীযং পাসাদিকং পরমায ৰণ্ণপোক্খরতায সমন্নাগতং. সো তং দিস্ৰা সংসীদতি ৰিসীদতি ন সক্কোতি ব্রহ্মচরিযং সন্ধারেতুং, সিক্খাদুব্বল্যং অনাৰিকত্ৰা হীনাযাৰত্ততীতি এৰং ৰিসভাগরূপং ওলোকেন্তস্স পন চক্খুৰিঞ্ঞাণৰীথিৰসেন উপ্পন্নরাগো দস্সনসংসগ্গো নাম. সো এৰং ৰেদিতব্বো –

একো কির দহরো কালদীঘৰাপিদ্ৰারৰিহারং উদ্দেসত্থায গতো. আচরিযো তস্স অন্তরাযং দিস্ৰা ওকাসং ন করোতি. সো পুনপ্পুন্নং অনুবন্ধতি. আচরিযো সচে অন্তোগামে ন চরিস্সসি. দস্সামি তে উদ্দেসন্তি আহ. সো সাধূতি সম্পটিচ্ছিত্ৰা উদ্দেসে নিট্ঠিতে আচরিযং ৰন্দিত্ৰা গচ্ছন্তো আচরিযো মে ইমস্মিং গামে চরিতুং ন দেতি, কিং নু খো কারণন্তি চীৰরং পারুপিত্ৰা গামং পাৰিসি, একা কুলধীতা পীতকৰত্থং নিৰাসেত্ৰা গেহে ঠিতা দহরং দিস্ৰা সঞ্জাতরাগা উল়ুঙ্কেন যাগুং আহরিত্ৰা তস্স পত্তে পক্খিপিত্ৰা নিৰত্তিত্ৰা মঞ্চকে নিপজ্জি. অথ নং মাতাপিতরো কিং অম্মাতি পুচ্ছিংসু, দ্ৰারেন গতং দহরং লভমানা জীৰিস্সামি, অলভমানা মরিস্সামীতি. মাতাপিতরো ৰেগেন গন্ত্ৰা গামদ্ৰারে দহরং পত্ৰা ৰন্দিত্ৰা, ‘‘নিৰত্তথ, ভন্তে, ভিক্খং গণ্হাহী’’তি আহংসু. দহরো অলং গচ্ছামীতি. তে, ‘‘ইদং নাম, ভন্তে, কারণ’’ন্তি যাচিত্ৰা – ‘‘অম্হাকং, ভন্তে, গেহে এত্তকং নাম ধনং অত্থি, একাযেৰ নো ধীতা, ত্ৰং নো জেট্ঠপুত্তট্ঠানে ঠস্সসি, সুখেন সক্কা জীৰিতু’’ন্তি আহংসু. দহরো, ‘‘ন ময্হং ইমিনা পলিবোধেন অত্থো’’তি অনাদিযিত্ৰাৰ পক্কন্তো.

মাতাপিতরো গন্ত্ৰা, ‘‘অম্ম, নাসক্খিম্হা দহরং নিৰত্তেতুং, যং অঞ্ঞং সামিকং ইচ্ছসি, তং লভিস্সসি, উট্ঠেহি খাদ চ পিৰ চা’’তি আহংসু. সা অনিচ্ছন্তী সত্তাহং নিরাহারা হুত্ৰা কালমকাসি. মাতাপিতরো তস্সা সরীরকিচ্চং কত্ৰা তং পীতকৰত্থং ধুরৰিহারে ভিক্খুসঙ্ঘস্স অদংসু, ভিক্খূ ৰত্থং খণ্ডাখণ্ডং কত্ৰা ভাজযিংসু. একো মহল্লকো অত্তনো কোট্ঠাসং গহেত্ৰা কল্যাণীৰিহারং আগতো. সোপি দহরো চেতিযং ৰন্দিস্সামীতি তত্থেৰ গন্ত্ৰা দিৰাট্ঠানে নিসীদি. মহল্লকো তং ৰত্থখণ্ডং গহেত্ৰা, ‘‘ইমিনা মে পরিস্সাৰনং ৰিচারেথা’’তি দহরং অৰোচ. দহরো মহাথের ‘‘কুহিং লদ্ধ’’ন্তি আহ. সো সব্বং পৰত্তিং কথেসি. সো তং সুত্ৰাৰ, ‘‘এৰরূপায নাম সদ্ধিং সংৰাসং নালত্থ’’ন্তি রাগগ্গিনা দড্ঢো তত্থেৰ কালমকাসি.

অঞ্ঞমঞ্ঞং আলাপসল্লাপৰসেন উপ্পন্নরাগো পন সমুল্লপনসংসগ্গো নাম. ভিক্খুনো ভিক্খুনিযা সন্তকং, ভিক্খুনিযা ৰা ভিক্খুস্স সন্তকং গহেত্ৰা পরিভোগকরণৰসেন উপ্পন্নরাগো সম্ভোগসংসগ্গো নাম. সো এৰং ৰেদিতব্বো – মরিচৰট্টিৰিহারমহে কির ভিক্খূনং সতসহস্সং ভিক্খুনীনং নৰুতিসহস্সানি এৰ অহেসুং. একো সামণেরো উণ্হযাগুং গহেত্ৰা গচ্ছন্তো সকিং চীৰরকণ্ণে ঠপেসি, সকিং ভূমিযং. একা সামণেরী দিস্ৰা এত্থ পত্তং ঠপেত্ৰা যাহীতি থালকং অদাসি. তে অপরভাগে একস্মিং ভযে উপ্পন্নে পরসমুদ্দং অগমংসু. তেসু ভিক্খুনী পুরেতরং অগমাসি. সা, ‘‘একো কির সীহল়ভিক্খু আগতো’’তি সুত্ৰা থেরস্স সন্তিকং গন্ত্ৰা পটিসন্থারং কত্ৰা নিসিন্না, – ‘‘ভন্তে, মরিচৰট্টিৰিহারমহকালে তুম্হে কতিৰস্সা’’তি পুচ্ছি. তদাহং সত্তৰস্সিকসামণেরো. ত্ৰং পন কতিৰস্সাতি? অহং সত্তৰস্সিকসামণেরীযেৰ একস্স সামণেরস্স উণ্হযাগুং গহেত্ৰা গচ্ছন্তস্স পত্তঠপনত্থং থালকমদাসিন্তি. থেরো, ‘‘অহং সো’’তি ৰত্ৰা থালকং নীহরিত্ৰা দস্সেসি. তে এত্তকেনেৰ সংসগ্গেন ব্রহ্মচরিযং সন্ধারেতুং অসক্কোন্তা দ্ৰেপি সট্ঠিৰস্সকালে ৰিব্ভমিংসু.

হত্থগাহাদিৰসেন পন উপ্পন্নরাগো কাযসংসগ্গো নাম. তত্রিদং ৰত্থু – মহাচেতিযঙ্গণে কির দহরভিক্খূ সজ্ঝাযং গণ্হন্তি. তেসং পিট্ঠিপস্সে দহরভিক্খুনিযো ধম্মং সুণন্তি. তত্রেকো দহরো হত্থং পসারেন্তো একিস্সা দহরভিক্খুনিযা কাযং ছুপি. সা তং হত্থং গহেত্ৰা অত্তনো উরস্মিং ঠপেসি, এত্তকেন সংসগ্গেন দ্ৰেপি ৰিব্ভমিত্ৰা গিহিভাৰং পত্তা.

গাহগাহকাদিৰণ্ণনা

ইমেসু পন পঞ্চসু সংসগ্গেসু ভিক্খুনো ভিক্খূহি সদ্ধিং সৰনদস্সনসমুল্লপনসম্ভোগকাযপরামাসা নিচ্চম্পি হোন্তিযেৰ, ভিক্খুনীহি সদ্ধিং ঠপেত্ৰা কাযসংসগ্গং সেসা কালেন কালং হোন্তি; তথা উপাসকউপাসিকাহি সদ্ধিং সব্বেপি কালেন কালং হোন্তি. তেসু হি কিলেসুপ্পত্তিতো চিত্তং রক্খিতব্বং. একো হি ভিক্খু গাহগাহকো হোতি, একো গাহমুত্তকো, একো মুত্তগাহকো, একো মুত্তমুত্তকো.

তত্থ যং ভিক্খুং মনুস্সাপি আমিসেন উপলাপেত্ৰা গহণৰসেন উপসঙ্কমন্তি, ভিক্খুপি পুপ্ফফলাদীহি উপলাপেত্ৰা গহণৰসেন উপসঙ্কমতি, অযং গাহগাহকো নাম. যং পন মনুস্সা ৰুত্তনযেন উপসঙ্কমন্তি, ভিক্খু দক্খিণেয্যৰসেন উপসঙ্কমতি, অযং গাহমুত্তকো নাম. যস্স মনুস্সা দক্খিণেয্যৰসেন চত্তারো পচ্চযে দেন্তি, ভিক্খু পুপ্ফফলাদীহি উপলাপেত্ৰা গহণৰসেন উপসঙ্কমতি, অযং মুত্তগাহকো নাম. যস্স মনুস্সাপি দক্খিণেয্যৰসেন চত্তারো পচ্চযে দেন্তি, ভিক্খুপি চূল়পিণ্ডপাতিযতিস্সত্থেরো ৰিয দক্খিণেয্যৰসেন পরিভুঞ্জতি, অযং মুত্তমুত্তকো নাম.

থেরং কির একা উপাসিকা দ্ৰাদস ৰস্সানি উপট্ঠহি. একদিৰসং তস্মিং গামে অগ্গি উট্ঠহিত্ৰা গেহানি ঝাপেসি. অঞ্ঞেসং কুলূপকভিক্খূ আগন্ত্ৰা – ‘‘কিং উপাসিকে, অপি কিঞ্চি ভণ্ডকং অরোগং কাতুং অসক্খিত্থা’’তি পটিসন্থারং অকংসু. মনুস্সা, ‘‘অম্হাকং মাতু কুলূপকত্থেরো ভুঞ্জনৰেলাযমেৰ আগমিস্সতী’’তি আহংসু. থেরোপি পুনদিৰসে ভিক্খাচারৰেলং সল্লক্খেত্ৰাৰ আগতো. উপাসিকা কোট্ঠচ্ছাযায নিসীদাপেত্ৰা ভিক্খং সম্পাদেত্ৰা অদাসি. থেরে ভত্তকিচ্চং কত্ৰা পক্কন্তে মনুস্সা আহংসু – ‘‘অম্হাকং মাতু কুলূপকত্থেরো ভুঞ্জনৰেলাযমেৰ আগতো’’তি. উপাসিকা, ‘‘তুম্হাকং কুলূপকা তুম্হাকংযেৰ অনুচ্ছৰিকা, ময্হং থেরো ময্হেৰ অনুচ্ছৰিকো’’তি আহ. আযস্মা পন মন্তাণিপুত্তো ইমেহি পঞ্চহি সংসগ্গেহি চতূহিপি পরিসাহি সদ্ধিং অসংসট্ঠো গাহমুত্তকো চেৰ মুত্তমুত্তকো চ অহোসি. যথা চ সযং অসংসট্ঠো, এৰং ভিক্খূনম্পি তং অসংসগ্গকথং কত্তা অহোসি.

আরদ্ধৰীরিযোতি পগ্গহিতৰীরিযো, পরিপুণ্ণকাযিকচেতসিকৰীরিযোতি অত্থো. যো হি ভিক্খু গমনে উপ্পন্নকিলেসং ঠানং পাপুণিতুং ন দেতি, ঠানে উপ্পন্নকিলেসং নিসজ্জং, নিসজ্জায উপ্পন্নকিলেসং সযনং পাপুণিতুং ন দেতি, মন্তেন কণ্হসপ্পং উপ্পীল়েত্ৰা গণ্হন্তো ৰিয, অমিত্তং গীৰায অক্কমন্তো ৰিয চ ৰিচরতি, অযং আরদ্ধৰীরিযো নাম. থেরো চ তাদিসো অহোসি. ভিক্খূনম্পি তথেৰ ৰীরিযারম্ভকথং কত্তা অহোসি.

সীলসম্পন্নোতিআদীসু সীলন্তি চতুপারিসুদ্ধিসীলং. সমাধীতি ৰিপস্সনাপাদকা অট্ঠ সমাপত্তিযো. পঞ্ঞাতি লোকিযলোকুত্তরঞাণং. ৰিমুত্তীতি অরিযফলং. ৰিমুত্তিঞাণদস্সনন্তি একূনৰীসতিৰিধং পচ্চৰেক্খণঞাণং. থেরো সযম্পি সীলাদীহি সম্পন্নো অহোসি ভিক্খূনম্পি সীলাদিকথং কত্তা. স্ৰাযং দসহি কথাৰত্থূহি ওৰদতীতি ওৰাদকো. যথা পন একো ওৰদতিযেৰ, সুখুমং অত্থং পরিৰত্তেত্ৰা জানাপেতুং ন সক্কোতি. ন এৰং থেরো. থেরো পন তানি দস কথাৰত্থূনি ৰিঞ্ঞাপেতীতি ৰিঞ্ঞাপকো. একো ৰিঞ্ঞাপেতুং সক্কোতি, কারণং দস্সেতুং ন সক্কোতি. থেরো কারণম্পি সন্দস্সেতীতি সন্দস্সকো. একো ৰিজ্জমানং কারণং দস্সেতি, গাহেতুং পন ন সক্কোতি. থেরো গাহেতুম্পি সক্কোতীতি সমাদপকো. এৰং সমাদপেত্ৰা পন তেসু কথাৰত্থূসু উস্সাহজননৰসেন ভিক্খূ সমুত্তেজেতীতি সমুত্তেজকো. উস্সাহজাতে ৰণ্ণং ৰত্ৰা সম্পহংসেতীতি সম্পহংসকো.

পঞ্চলাভৰণ্ণনা

২৫৩. সুলদ্ধলাভাতি অঞ্ঞেসম্পি মনুস্সত্তভাৰপব্বজ্জাদিগুণলাভা নাম হোন্তি. আযস্মতো পন পুণ্ণস্স সুলদ্ধলাভা এতে, যস্স সত্থু সম্মুখা এৰং ৰণ্ণো অব্ভুগ্গতোতি অত্থো. অপিচ অপণ্ডিতেহি ৰণ্ণকথনং নাম ন তথা লাভো, পণ্ডিতেহি ৰণ্ণকথনং পন লাভো. গিহী হি ৰা ৰণ্ণকথনং ন তথা লাভো, গিহী হি ‘‘ৰণ্ণং কথেস্সামী’’তি, ‘‘অম্হাকং অয্যো সণ্হো সখিলো সুখসম্ভাসো, ৰিহারং আগতানং যাগুভত্তফাণিতাদীহি সঙ্গহং করোতী’’তি কথেন্তো অৰণ্ণমেৰ কথেতি. ‘‘অৰণ্ণং কথেস্সামী’’তি ‘‘অযং থেরো মন্দমন্দো ৰিয অবলবলো ৰিয ভাকুটিকভাকুটিকো ৰিয নত্থি ইমিনা সদ্ধিং ৰিস্সাসো’’তি কথেন্তো ৰণ্ণমেৰ কথেতি. সব্রহ্মচারীহিপি সত্থু পরম্মুখা ৰণ্ণকথনং ন তথা লাভো, সত্থু সম্মুখা পন অতিলাভোতি ইমম্পি অত্থৰসং পটিচ্চ ‘‘সুলদ্ধলাভা’’তি আহ. অনুমস্স অনুমস্সাতি দস কথাৰত্থূনি অনুপৰিসিত্ৰা অনুপৰিসিত্ৰা. তঞ্চ সত্থা অব্ভনুমোদতীতি তঞ্চস্স ৰণ্ণং এৰমেতং অপ্পিচ্ছো চ সো ভিক্খু সন্তুট্ঠো চ সো ভিক্খূতি অনুমোদতি. ইতি ৰিঞ্ঞূহি ৰণ্ণভাসনং একো লাভো, সব্রহ্মচারীহি একো, সত্থু সম্মুখা একো, অনুমস্স অনুমস্স একো, সত্থারা অব্ভনুমোদনং একোতি ইমে পঞ্চ লাভে সন্ধায ‘‘সুলদ্ধলাভা’’তি আহ. কদাচীতি কিস্মিঞ্চিদেৰ কালে. করহচীতি তস্সেৰ ৰেৰচনং. অপ্পেৰ নাম সিযা কোচিদেৰ কথাসল্লাপোতি অপি নাম কোচি কথাসমুদাচারোপি ভৰেয্য. থেরেন কির আযস্মা পুণ্ণো নেৰ দিট্ঠপুব্বো, নস্স ধম্মকথা সুতপুব্বা. ইতি সো তস্স দস্সনম্পি ধম্মকথম্পি পত্থযমানো এৰমাহ.

চারিকাদিৰণ্ণনা

২৫৪. যথাভিরন্তন্তি যথাঅজ্ঝাসযং ৰিহরিত্ৰা. বুদ্ধানঞ্হি একস্মিং ঠানে ৰসন্তানং ছাযূদকাদিৰিপত্তিং ৰা অপ্ফাসুকসেনাসনং ৰা, মনুস্সানং অস্সদ্ধাদিভাৰং ৰা আগম্ম অনভিরতি নাম নত্থি. তেসং সম্পত্তিযা ‘‘ইধ ফাসু ৰিহরামা’’তি অভিরমিত্ৰা চিরৰিহারোপি নত্থি. যত্থ পন তথাগতে ৰিহরন্তে সত্তা সরণেসু ৰা পতিট্ঠহন্তি, সীলানি ৰা সমাদিযন্তি, পব্বজন্তি ৰা, ততো সোতাপত্তিমগ্গাদীনং ৰা পন তেসং উপনিস্সযো হোতি. তত্থ বুদ্ধা সত্তে তাসু সম্পত্তীসু পতিট্ঠাপনঅজ্ঝাসযেন ৰসন্তি; তাসং অভাৰে পক্কমন্তি. তেন ৰুত্তং – ‘‘যথাঅজ্ঝাসযং ৰিহরিত্ৰা’’তি. চারিকং চরমানোতি অদ্ধানগমনং গচ্ছন্তো. চারিকা চ নামেসা ভগৰতো দুৰিধা হোতি তুরিতচারিকা চ, অতুরিতচারিকা চ.

তত্থ দূরেপি বোধনেয্যপুগ্গলং দিস্ৰা তস্স বোধনত্থায সহসা গমনং তুরিতচারিকা নাম. সা মহাকস্সপপচ্চুগ্গমনাদীসু দট্ঠব্বা. ভগৰা হি মহাকস্সপং পচ্চুগ্গচ্ছন্তো মুহুত্তেন তিগাৰুতং মগ্গং অগমাসি, আল়ৰকস্সত্থায তিংসযোজনং, তথা অঙ্গুলিমালস্স. পুক্কুসাতিস্স পন পঞ্চচত্তালীসযোজনং, মহাকপ্পিনস্স ৰীসযোজনসতং, খদিরৰনিযস্সত্থায সত্ত যোজনসতানি অগমাসি; ধম্মসেনাপতিনো সদ্ধিৰিহারিকস্স ৰনৰাসীতিস্সসামণেরস্স তিগাৰুতাধিকং ৰীসযোজনসতং.

একদিৰসং কির থেরো, ‘‘তিস্সসামণেরস্স সন্তিকং, ভন্তে, গচ্ছামী’’তি আহ. ভগৰা, ‘‘অহম্পি গমিস্সামী’’তি ৰত্ৰা আযস্মন্তং আনন্দং আমন্তেসি – ‘‘আনন্দ, ৰীসতিসহস্সানং ছল়ভিঞ্ঞানং আরোচেহি – ‘ভগৰা ৰনৰাসীতিস্সসামণেরস্স সন্তিকং গমিস্সতী’’’তি. ততো দুতিযদিৰসে ৰীসতিসহস্সখীণাসৰপরিৰুতো আকাসে উপ্পতিত্ৰা ৰীসযোজনসতমত্থকে তস্স গোচরগামদ্ৰারে ওতরিত্ৰা চীৰরং পারুপি. কম্মন্তং গচ্ছমানা মনুস্সা দিস্ৰা, ‘‘সত্থা, ভো, আগতো, মা কম্মন্তং অগমিত্থা’’তি ৰত্ৰা আসনানি পঞ্ঞপেত্ৰা যাগুং দত্ৰা পানৰত্তং করোন্তা, ‘‘কুহিং, ভন্তে, ভগৰা গচ্ছতী’’তি দহরভিক্খূ পুচ্ছিংসু. উপাসকা, ন ভগৰা অঞ্ঞত্থ গচ্ছতি, ইধেৰ তিস্সসামণেরস্স দস্সনত্থায আগতোতি. তে ‘‘অম্হাকং কির কুলূপকত্থেরস্স দস্সনত্থায সত্থা আগতো, নো ৰত নো থেরো ওরমত্তকো’’তি সোমনস্সজাতা অহেসুং.

অথ ভগৰতো ভত্তকিচ্চপরিযোসানে সামণেরো গামং পিণ্ডায চরিত্ৰা ‘‘উপাসকা মহা ভিক্খুসঙ্ঘো’’তি পুচ্ছি. অথস্স তে, ‘‘সত্থা, ভন্তে, আগতো’’তি আরোচেসুং, সো ভগৰন্তং উপসঙ্কমিত্ৰা পিণ্ডপাতেন আপুচ্ছি. সত্থা তস্স পত্তং হত্থেন গহেত্ৰা, ‘‘অলং, তিস্স, নিট্ঠিতং ভত্তকিচ্চ’’ন্তি আহ. ততো উপজ্ঝাযং আপুচ্ছিত্ৰা অত্তনো পত্তাসনে নিসীদিত্ৰা ভত্তকিচ্চমকাসি. অথস্স ভত্তকিচ্চপরিযোসানে সত্থা মঙ্গলং ৰত্ৰা নিক্খমিত্ৰা গামদ্ৰারে ঠত্ৰা, ‘‘কতরো তে, তিস্স, ৰসনট্ঠানং গমনমগ্গো’’তি আহ. ‘‘অযং ভগৰা’’তি. মগ্গং দেসযমানো পুরতো যাহি তিস্সাতি. ভগৰা কির সদেৰকস্স লোকস্স মগ্গদেসকো সমানোপি ‘‘সকলতিগাৰুতে মগ্গে সামণেরং দট্ঠুং লচ্ছামী’’তি তং মগ্গদেসকমকাসি.

সো অত্তনো ৰসনট্ঠানং গন্ত্ৰা ভগৰতো ৰত্তমকাসি. অথ নং ভগৰা, ‘‘কতরো তে, তিস্স, চঙ্কমো’’তি পুচ্ছিত্ৰা তত্থ গন্ত্ৰা সামণেরস্স নিসীদনপাসাণে নিসীদিত্ৰা, ‘‘তিস্স, ইমস্মিং ঠানে সুখং ৰসসী’’তি পুচ্ছি. সো আহ – ‘‘আম, ভন্তে, ইমস্মিং মে ঠানে ৰসন্তস্স সীহব্যগ্ঘহত্থিমিগমোরাদীনং সদ্দং সুণতো অরঞ্ঞসঞ্ঞা উপ্পজ্জতি, তায সুখং ৰসামী’’তি. অথ নং ভগৰা, ‘‘তিস্স, ভিক্খুসঙ্ঘং সন্নিপাতেহি, বুদ্ধদাযজ্জং তে দস্সামী’’তি ৰত্ৰা সন্নিপতিতে ভিক্খুসঙ্ঘে উপসম্পাদেত্ৰা অত্তনো ৰসনট্ঠানমেৰ অগমাসীতি. অযং তুরিতচারিকা নাম.

যং পন গামনিগমপটিপাটিযা দেৰসিকং যোজনড্ঢযোজনৰসেন পিণ্ডপাতচরিযাদীহি লোকং অনুগ্গণ্হন্তস্স গমনং, অযং অতুরিতচারিকা নাম. ইমং পন চারিকং চরন্তো ভগৰা মহামণ্ডলং মজ্ঝিমমণ্ডলং অন্তিমমণ্ডলন্তি ইমেসং তিণ্ণং মণ্ডলানং অঞ্ঞতরস্মিং চরতি. তত্থ মহামণ্ডলং নৰযোজনসতিকং, মজ্ঝিমমণ্ডলং ছযোজনসতিকং, অন্তিমমণ্ডলং তিযোজনসতিকং. যদা মহামণ্ডলে চারিকং চরিতুকামো হোতি, মহাপৰারণায পৰারেত্ৰা পাটিপদদিৰসে মহাভিক্খুসঙ্ঘপরিৰারো নিক্খমতি. সমন্তা যোজনসতং এককোলাহলং অহোসি, পুরিমং পুরিমং আগতা নিমন্তেতুং লভন্তি; ইতরেসু দ্ৰীসু মণ্ডলেসু সক্কারো মহামণ্ডলে ওসরতি. তত্র ভগৰা তেসু তেসু গামনিগমেসু একাহং দ্ৰীহং ৰসন্তো মহাজনং আমিসপটিগ্গহেন অনুগ্গণ্হন্তো ধম্মদানেন চস্স ৰিৰট্টূপনিস্সিতং কুসলং ৰড্ঢেন্তো নৰহি মাসেহি চারিকং পরিযোসাপেতি.

সচে পন অন্তোৰস্সে ভিক্খূনং সমথৰিপস্সনা তরুণা হোতি, মহাপৰারণায অপৰারেত্ৰা পৰারণাসঙ্গহং দত্ৰা কত্তিকপুণ্ণমায পৰারেত্ৰা মিগসিরস্স পঠমদিৰসে মহাভিক্খুসঙ্ঘপরিৰারো নিক্খমিত্ৰা মজ্ঝিমমণ্ডলং ওসরতি. অঞ্ঞেনপি কারণেন মজ্ঝিমমণ্ডলে চারিকং চরিতুকামো চতুমাসং ৰসিত্ৰাৰ নিক্খমতি. ৰুত্তনযেনেৰ ইতরেসু দ্ৰীসু মণ্ডলেসু সক্কারো মজ্ঝিমমণ্ডলে ওসরতি. ভগৰা পুরিমনযেনেৰ লোকং অনুগ্গণ্হন্তো অট্ঠহি মাসেহি চারিকং পরিযোসাপেতি.

সচে পন চতুমাসং ৰুট্ঠৰস্সস্সাপি ভগৰতো ৰেনেয্যসত্তা অপরিপক্কিন্দ্রিযা হোন্তি, তেসং ইন্দ্রিযপরিপাকং আগমযমানো অপরম্পি একং মাসং ৰা দ্ৰিতিচতুমাসং ৰা তত্থেৰ ৰসিত্ৰা মহাভিক্খুসঙ্ঘপরিৰারো নিক্খমতি. ৰুত্তনযেনেৰ ইতরেসু দ্ৰীসু মণ্ডলেসু সক্কারো অন্তোমণ্ডলে ওসরতি. ভগৰা পুরিমনযেনেৰ লোকং অনুগ্গণ্হন্তো সত্তহি ৰা ছহি ৰা পঞ্চহি ৰা চতূহি ৰা মাসেহি চারিকং পরিযোসাপেতি. ইতি ইমেসু তীসু মণ্ডলেসু যত্থ কত্থচি চারিকং চরন্তো ন চীৰরাদিহেতু চরতি. অথ খো যে দুগ্গতা বালা জিণ্ণা ব্যাধিতা, তে কদা তথাগতং আগন্ত্ৰা পস্সিস্সন্তি? মযি পন চারিকং চরন্তে মহাজনো তথাগতদস্সনং লভিস্সতি, তত্থ কেচি চিত্তানি পসাদেস্সন্তি, কেচি মালাদীহি পূজেস্সন্তি, কেচি কটচ্ছুভিক্খং দস্সন্তি, কেচি মিচ্ছাদস্সনং পহায সম্মাদিট্ঠিকা ভৰিস্সন্তি, তং তেসং ভৰিস্সতি দীঘরত্তং হিতায সুখাযাতি এৰং লোকানুকম্পায চারিকং চরতি.

অপিচ চতূহি কারণেহি বুদ্ধা ভগৰন্তো চারিকং চরন্তি – জঙ্ঘাৰিহারৰসেন সরীরফাসুকত্থায, অত্থুপ্পত্তিকালং অভিকঙ্খনত্থায, ভিখূনং সিক্খাপদং পঞ্ঞাপনত্থায, তত্থ তত্থ পরিপাকগতিন্দ্রিযে বোধনেয্যসত্তে বোধনত্থাযাতি. অপরেহিপি চতূহি কারণেহি বুদ্ধা ভগৰন্তো চারিকং চরন্তি – বুদ্ধং সরণং গচ্ছিস্সন্তীতি ৰা, ধম্মং সরণং গচ্ছিস্সন্তীতি ৰা, সঙ্ঘং সরণং গচ্ছিস্সন্তীতি ৰা, মহতা ধম্মৰস্সেন চতস্সো পরিসা সন্তপ্পেস্সামীতি ৰাতি. অপরেহি পঞ্চহি কারণেহি বুদ্ধা ভগৰন্তো চারিকং চরন্তি – পাণাতিপাতা ৰিরমিস্সন্তীতি ৰা, অদিন্নাদানা… কামেসুমিচ্ছাচারা… মুসাৰাদা… সুরামেরযমজ্জপমাদট্ঠানা ৰিরমিস্সন্তীতি ৰাতি. অপরেহি অট্ঠহি কারণেহি বুদ্ধা ভগৰন্তো চারিকং চরন্তি – পঠমজ্ঝানং পটিলভিস্সন্তীতি ৰা, দুতিযং…পে… নেৰসঞ্ঞানাসঞ্ঞাযতনসমাপত্তিং পটিলভিস্সন্তীতি ৰাতি. অপরেহি অট্ঠহি কারণেহি বুদ্ধা ভগৰন্তো চারিকং চরন্তি – সোতাপত্তিমগ্গং অধিগমিস্সন্তীতি ৰা, সোতাপত্তিফলং…পে… অরহত্তফলং সচ্ছিকরিস্সন্তীতি ৰাতি. অযং অতুরিতচারিকা, সা ইধ অধিপ্পেতা. সা পনেসা দুৰিধা হোতি নিবদ্ধচারিকা, অনিবদ্ধচারিকা চ. তত্থ যং একস্সেৰ বোধনেয্যসত্তস্স অত্থায গচ্ছতি, অযং নিবদ্ধচারিকা নাম. যং পন গামনিগমনগরপটিপাটিৰসেন চরতি, অযং অনিবদ্ধচারিকা নাম. এসা ইধ অধিপ্পেতা.

সেনাসনং সংসামেত্ৰাতি সেনাসনং পটিসামেত্ৰা. তং পন পটিসামেন্তো থেরো ন চূল়পত্তমহাপত্ত-চূল়থালকমহাথালক-পট্টুণ্ণচীৰর-দুকূলচীৰরাদীনং ভণ্ডিকং কত্ৰা সপ্পিতেলাদীনং ৰা পন ঘটে পূরাপেত্ৰা গব্ভে নিদহিত্ৰা দ্ৰারং পিধায কুঞ্চিকমুদ্দিকাদীনি যোজাপেসি. ‘‘সচে ন হোতি ভিক্খু ৰা সামণেরো ৰা আরামিকো ৰা উপাসকো ৰা, চতূসু পাসাণেসু মঞ্চে মঞ্চং আরোপেত্ৰা পীঠে পীঠং আরোপেত্ৰা চীৰরৰংসে ৰা চীৰররজ্জুযা ৰা উপরি পুঞ্জং কত্ৰা দ্ৰারৰাতপানং থকেত্ৰা পক্কমিতব্ব’’ন্তি (চূল়ৰ. ৩৬১) ৰচনতো পন নেৰাসিকং ভিক্খুং আপুচ্ছনমত্তকেনেৰ পটিসামেসি.

যেন সাৰত্থি তেন চারিকং পক্কামীতি সত্থু দস্সনকামো হুত্ৰা যেন দিসাভাগেন সাৰত্থি তেন পক্কামি. পক্কমন্তো চ ন সুদ্ধোদনমহারাজস্স আরোচাপেত্ৰা সপ্পিতেলমধুফাণিতাদীনি গাহাপেত্ৰা পক্কন্তো. যূথং পহায নিক্খন্তো পন মত্তহত্থী ৰিয, অসহাযকিচ্চো সীহো ৰিয, পত্তচীৰরমত্তং আদায এককোৰ পক্কামি. কস্মা পনেস পঞ্চসতেহি অত্তনো অন্তেৰাসিকেহি সদ্ধিং রাজগহং অগন্ত্ৰা ইদানি নিক্খন্তোতি? রাজগহং কপিলৰত্থুতো দূরং সট্ঠিযোজনানি, সাৰত্থি পন পঞ্চদস. সত্থা রাজগহতো পঞ্চচত্তালীসযোজনং আগন্ত্ৰা সাৰত্থিযং ৰিহরতি, ইদানি আসন্নো জাতোতি সুত্ৰা নিক্খমীতি অকারণমেতং. বুদ্ধানং সন্তিকং গচ্ছন্তো হি এস যোজনসহস্সম্পি গচ্ছেয্য, তদা পন কাযৰিৰেকো ন সক্কা লদ্ধুন্তি. বহূহি সদ্ধিং গমনকালে হি একস্মিং গচ্ছামাতি ৰদন্তে একো ইধেৰ ৰসামাতি ৰদতি. একস্মিং ৰসামাতি ৰদন্তে একো গচ্ছামাতি ৰদতি. তস্মা ইচ্ছিতিচ্ছিতক্খণে সমাপত্তিং অপ্পেত্ৰা নিসীদিতুং ৰা ফাসুকসেনাসনে কাযৰিৰেকং লদ্ধুং ৰা ন সক্কা হোতি, এককস্স পন তং সব্বং সুলভং হোতীতি তদা অগন্ত্ৰা ইদানি পক্কামি.

চারিকং চরমানোতি এত্থ কিঞ্চাপি অযং চারিকা নাম মহাজনসঙ্গহত্থং বুদ্ধানংযেৰ লব্ভতি, বুদ্ধে উপাদায পন রুল়্হীসদ্দেন সাৰকানম্পি ৰুচ্চতি কিলঞ্জাদীহি কতং বীজনম্পি তালৰণ্টং ৰিয. যেন ভগৰাতি সাৰত্থিযা অৰিদূরে একস্মিং গামকে পিণ্ডায চরিত্ৰা কতভত্তকিচ্চো জেতৰনং পৰিসিত্ৰা সারিপুত্তত্থেরস্স ৰা মহামোগ্গল্লানত্থেরস্স ৰা ৰসনট্ঠানং গন্ত্ৰা পাদে ধোৰিত্ৰা মক্খেত্ৰা পানীযং ৰা পানকং ৰা পিৰিত্ৰা থোকং ৰিস্সমিত্ৰা সত্থারং পস্সিস্সামীতি চিত্তম্পি অনুপ্পাদেত্ৰা উজুকং গন্ধকুটিপরিৰেণমেৰ অগমাসি. থেরস্স হি সত্থারং দট্ঠুকামস্স অঞ্ঞেন ভিক্খুনা কিচ্চং নত্থি. তস্মা রাহুলং ৰা আনন্দং ৰা গহেত্ৰা ওকাসং কারেত্ৰা সত্থারং পস্সিস্সামীতি এৰম্পি চিত্তং ন উপ্পাদেসি.

থেরো হি সযমেৰ বুদ্ধসাসনে ৰল্লভো রঞ্ঞো সঙ্গামৰিজযমহাযোধো ৰিয. যথা হি তাদিসস্স যোধস্স রাজানং দট্ঠুকামস্স অঞ্ঞং সেৰিত্ৰা দস্সনকম্মং নাম নত্থি; ৰল্লভতায সযমেৰ পস্সতি. এৰং থেরোপি বুদ্ধসাসনে ৰল্লভো, তস্স অঞ্ঞং সেৰিত্ৰা সত্থুদস্সনকিচ্চং নত্থীতি পাদে ধোৰিত্ৰা পাদপুঞ্ছনম্হি পুঞ্ছিত্ৰা যেন ভগৰা তেনুপসঙ্কমি. ভগৰাপি ‘‘পচ্চূসকালেযেৰ মন্তাণিপুত্তো আগমিস্সতী’’তি অদ্দস. তস্মা গন্ধকুটিং পৰিসিত্ৰা সূচিঘটিকং অদত্ৰাৰ দরথং পটিপ্পস্সম্ভেত্ৰা উট্ঠায নিসীদি. থেরো কৰাটং পণামেত্ৰা গন্ধকুটিং পৰিসিত্ৰা ভগৰন্তং অভিৰাদেত্ৰা একমন্তং নিসীদি. ধম্মিযা কথাযাতি ভগৰা ধম্মিং কথং কথেন্তো চূল়গোসিঙ্গসুত্তে (ম. নি. ১.৩২৫ আদযো) তিণ্ণং কুলপুত্তানং সামগ্গিরসানিসংসং কথেসি; সেক্খসুত্তে (ম. নি. ২.২২ আদযো) আৰসথানিসংসং, ঘটিকারসুত্তে (ম. নি. ২.২৮২ আদযো) সতিপটিলাভিকং পুব্বেনিৰাসপ্পটিসংযুত্তকথং; রট্ঠপালসুত্তে (ম. নি. ২.৩০৪) চত্তারো ধম্মুদ্দেসে, সেলসুত্তে (ম. নি. ২.৩৯৬ আদযো) পানকানিসংসকথং, উপক্কিলেসসুত্তে (ম. নি. ৩.২৩৬ আদযো) ভগুত্থেরস্স ধম্মকথং কথেন্তো একীভাৰে আনিসংসং কথেসি. ইমস্মিং পন রথৰিনীতে আযস্মতো পুণ্ণস্স কথেন্তো দসকথাৰত্থুনিস্সযং অনন্তনযং নাম দস্সেসি পুণ্ণ, অযম্পি অপ্পিচ্ছকথাযেৰ সন্তোসকথাযেৰাতি. পটিসম্ভিদাপত্তস্স সাৰকস্স ৰেলন্তে ঠত্ৰা মহাসমুদ্দে হত্থপ্পসারণং ৰিয অহোসি.

যেন অন্ধৰনন্তি তদা কির পচ্ছাভত্তে জেতৰনং আকিণ্ণং হোতি, বহূ খত্তিযব্রাহ্মণাদযো জেতৰনং ওসরন্তি; রঞ্ঞো চক্কৰত্তিস্স খন্ধাৰারট্ঠানং ৰিয হোতি, ন সক্কা পৰিৰেকং লভিতুং. অন্ধৰনং পন পধানঘরসদিসং পৰিৰিত্তং, তস্মা যেনন্ধৰনং তেনুপসঙ্কমি. কস্মা পন মহাথেরে ন অদ্দস? এৰং কিরস্স অহোসি – ‘‘সাযন্হসমযে আগন্ত্ৰা মহাথেরে দিস্ৰা পুন দসবলং পস্সিস্সামি, এৰং মহাথেরানং একং উপট্ঠানং ভৰিস্সতি, সত্থু দ্ৰে ভৰিস্সন্তি, ততো সত্থারং ৰন্দিত্ৰা মম ৰসনট্ঠানমেৰ গমিস্সামী’’তি.

সত্তৰিসুদ্ধিপঞ্হৰণ্ণনা

২৫৬. অভিণ্হং কিত্তযমানো অহোসীতি পুনপ্পুনং ৰণ্ণং কিত্তযমানো ৰিহাসি. থেরো কির ততো পট্ঠায দিৰসে দিৰসে সঙ্ঘমজ্ঝে ‘‘পুণ্ণো কির নাম মন্তাণিপুত্তো চতূহি পরিসাহি সদ্ধিং অসংসট্ঠো, সো দসবলস্স দস্সনত্থায আগমিস্সতি; কচ্চি নু খো মং অদিস্ৰাৰ গমিস্সতী’’তি থেরনৰমজ্ঝিমানং সতিকরণত্থং আযস্মতো পুণ্ণস্স গুণং ভাসতি. এৰং কিরস্স অহোসি – ‘‘মহল্লকভিক্খূ নাম ন সব্বকালং অন্তোৰিহারে হোন্তি; গুণকথায পনস্স কথিতায যো চ নং ভিক্খুং পস্সিস্সতি; সো আগন্ত্ৰা আরোচেস্সতী’’তি. অথাযং থেরস্সেৰ সদ্ধিৰিহারিকো তং আযস্মন্তং মন্তাণিপুত্তং পত্তচীৰরমাদায গন্ধকুটিং পৰিসন্তং অদ্দস. কথং পন নং এস অঞ্ঞাসীতি? পুণ্ণ, পুণ্ণাতি ৰত্ৰা কথেন্তস্স ভগৰতো ধম্মকথায অঞ্ঞাসি – ‘‘অযং সো থেরো, যস্স মে উপজ্ঝাযো অভিণ্হং কিত্তযমানো হোতী’’তি. ইতি সো আগন্ত্ৰা থেরস্স আরোচেসি. নিসীদনং আদাযাতি নিসীদনং নাম সদসং ৰুচ্চতি অৰাযিমং. থেরো পন চম্মখণ্ডং গহেত্ৰা অগমাসি. পিট্ঠিতো পিট্ঠিতোতি পচ্ছতো পচ্ছতো. সীসানুলোকীতি যো উন্নতট্ঠানে পিট্ঠিং পস্সন্তো নিন্নট্ঠানে সীসং পস্সন্তো গচ্ছতি, অযম্পি সীসানুলোকীতি ৰুচ্চতি. তাদিসো হুত্ৰা অনুবন্ধি. থেরো হি কিঞ্চাপি সংযতপদসদ্দতায অচ্চাসন্নো হুত্ৰা গচ্ছন্তোপি পদসদ্দেন ন বাধতি, ‘‘নাযং সম্মোদনকালো’’তি ঞত্ৰা পন ন অচ্চাসন্নো, অন্ধৰনং নাম মহন্তং, একস্মিং ঠানে নিলীনং অপস্সন্তেন, আৰুসো পুণ্ণ, পুণ্ণাতি অফাসুকসদ্দো কাতব্বো হোতীতি নিসিন্নট্ঠানজাননত্থং নাতিদূরে হুত্ৰা সীসানুলোকী অগমাসি. দিৰাৰিহারং নিসীদীতি দিৰাৰিহারত্থায নিসীদি.

তত্থ আযস্মাপি পুণ্ণো উদিচ্চব্রাহ্মণজচ্চো, সারিপুত্তত্থেরোপি. পুণ্ণত্থেরোপি সুৰণ্ণৰণ্ণো, সারিপুত্তত্থেরোপি. পুণ্ণত্থেরোপি অরহত্তফলসমাপত্তিসমাপন্নো, সারিপুত্তত্থেরোপি. পুণ্ণত্থেরোপি কপ্পসতসহস্সং অভিনীহারসম্পন্নো, সারিপুত্তত্থেরোপি কপ্পসতসহস্সাধিকং একমসঙ্খ্যেয্যং. পুণ্ণত্থেরোপি পটিসম্ভিদাপত্তো মহাখীণাসৰো, সারিপুত্তত্থেরোপি. ইতি একং কনকগুহং পৰিট্ঠা দ্ৰে সীহা ৰিয, একং ৰিজম্ভনভূমিং ওতিণ্ণা দ্ৰে ব্যগ্ঘা ৰিয, একং সুপুপ্ফিতসালৰনং পৰিট্ঠা দ্ৰে ছদ্দন্তনাগরাজানো ৰিয, একং সিম্বলিৰনং পৰিট্ঠা দ্ৰে সুপণ্ণরাজানো ৰিয, একং নরৰাহনযানং অভিরুল়্হা দ্ৰে ৰেস্সৰণা ৰিয, একং পণ্ডুকম্বলসিলং অভিনিসিন্না দ্ৰে সক্কা ৰিয, একৰিমানব্ভন্তরগতা দ্ৰে হারিতমহাব্রহ্মানো ৰিয চ তে দ্ৰেপি ব্রাহ্মণজচ্চা দ্ৰেপি সুৰণ্ণৰণ্ণা দ্ৰেপি সমাপত্তিলাভিনো দ্ৰেপি অভিনীহারসম্পন্না দ্ৰেপি পটিসম্ভিদাপত্তা মহাখীণাসৰা একং ৰনসণ্ডং অনুপৰিট্ঠা তং ৰনট্ঠানং সোভযিংসু.

ভগৰতি নো, আৰুসো, ব্রহ্মচরিযং ৰুস্সতীতি, আৰুসো, কিং অম্হাকং ভগৰতো সন্তিকে আযস্মতা ব্রহ্মচরিযং ৰুস্সতীতি? ইদং আযস্মা সারিপুত্তো তস্স ভগৰতি ব্রহ্মচরিযৰাসং জানন্তোপি কথাসমুট্ঠাপনত্থং পুচ্ছি. পুরিমকথায হি অপ্পতিট্ঠিতায পচ্ছিমকথা ন জাযতি, তস্মা এৰং পুচ্ছি. থেরো অনুজানন্তো ‘‘এৰমাৰুসো’’তি আহ. অথস্স পঞ্হৰিস্সজ্জনং সোতুকামো আযস্মা সারিপুত্তো ‘‘কিং নু খো আৰুসো সীলৰিসুদ্ধত্থং ভগৰতি ব্রহ্মচরিযং ৰুস্সতী’’তি পটিপাটিযা সত্ত ৰিসুদ্ধিযো পুচ্ছি. তাসং ৰিত্থারকথা ৰিসুদ্ধিমগ্গে ৰুত্তা. আযস্মা পন পুণ্ণো যস্মা চতুপারিসুদ্ধিসীলাদীসু ঠিতস্সাপি ব্রহ্মচরিযৰাসো মত্থকং ন পাপুণাতি, তস্মা, ‘‘নো হিদং, আৰুসো’’তি সব্বং পটিক্খিপি.

কিমত্থং চরহাৰুসোতি যদি সীলৰিসুদ্ধিআদীনং অত্থায ব্রহ্মচরিযং ন ৰুস্সতি, অথ কিমত্থং ৰুস্সতীতি পুচ্ছি. অনুপাদাপরিনিব্বানত্থং খো, আৰুসোতি এত্থ অনুপাদাপরিনিব্বানং নাম অপ্পচ্চযপরিনিব্বানং. দ্ৰেধা উপাদানানি গহণূপাদানঞ্চ পচ্চযূপাদানঞ্চ. গহণূপাদানং নাম কামুপাদানাদিকং চতুব্বিধং, পচ্চযূপাদানং নাম অৰিজ্জাপচ্চযা সঙ্খারাতি এৰং ৰুত্তপচ্চযা. তত্থ গহণূপাদানৰাদিনো আচরিযা অনুপাদাপরিনিব্বানন্তি চতূসু উপাদানেসু অঞ্ঞতরেনাপি কঞ্চি ধম্মং অগ্গহেত্ৰা পৰত্তং অরহত্তফলং অনুপাদাপরিনিব্বানন্তি কথেন্তি. তঞ্হি ন চ উপাদানসম্পযুত্তং হুত্ৰা কঞ্চি ধম্মং উপাদিযতি, কিলেসানঞ্চ পরিনিব্বুতন্তে জাতত্তা পরিনিব্বানন্তি ৰুচ্চতি. পচ্চযূপাদানৰাদিনো পন অনুপাদাপরিনিব্বানন্তি অপ্পচ্চযপরিনিব্বানং. পচ্চযৰসেন অনুপ্পন্নং অসঙ্খতং অমতধাতুমেৰ অনুপাদাপরিনিব্বানন্তি কথেন্তি. অযং অন্তো, অযং কোটি, অযং নিট্ঠা. অপ্পচ্চযপরিনিব্বানং পত্তস্স হি ব্রহ্মচরিযৰাসো মত্থকং পত্তো নাম হোতি, তস্মা থেরো ‘‘অনুপাদাপরিনিব্বানত্থ’’ন্তি আহ. অথ নং অনুযুঞ্জন্তো আযস্মা সারিপুত্তো ‘‘কিং নু খো, আৰুসো, সীলৰিসুদ্ধি অনুপাদাপরিনিব্বান’’ন্তি পুন পুচ্ছং আরভি.

২৫৮. থেরোপি সব্বপরিৰত্তেসু তথেৰ পটিক্খিপিত্ৰা পরিযোসানে দোসং দস্সেন্তো সীলৰিসুদ্ধিং চে, আৰুসোতিআদিমাহ. তত্থ পঞ্ঞপেয্যাতি যদি পঞ্ঞপেয্য. সউপাদানংযেৰ সমানং অনুপাদাপরিনিব্বানং পঞ্ঞপেয্যাতি সঙ্গহণধম্মমেৰ নিগ্গহণধম্মং সপ্পচ্চযধম্মমেৰ অপ্পচ্চযধম্মং সঙ্খতধম্মমেৰ অসঙ্খতধম্মন্তি পঞ্ঞপেয্যাতি অত্থো. ঞাণদস্সনৰিসুদ্ধিযং পন সপ্পচ্চযধম্মমেৰ অপ্পচ্চযধম্মং সঙ্খতধম্মমেৰ অসঙ্খতধম্মন্তি পঞ্ঞপেয্যাতি অযমেৰ অত্থো গহেতব্বো. পুথুজ্জনো হি, আৰুসোতি এত্থ ৰট্টানুগতো লোকিযবালপুথুজ্জনো দট্ঠব্বো. সো হি চতুপারিসুদ্ধিসীলমত্তস্সাপি অভাৰতো সব্বসো অঞ্ঞত্র ইমেহি ধম্মেহি. তেন হীতি যেন কারণেন একচ্চে পণ্ডিতা উপমায অত্থং জানন্তি, তেন কারণেন উপমং তে করিস্সামীতি অত্থো.

সত্তরথৰিনীতৰণ্ণনা

২৫৯. সত্ত রথৰিনীতানীতি ৰিনীতঅস্সাজানিযযুত্তে সত্ত রথে. যাৰদেৰ, চিত্তৰিসুদ্ধত্থাতি, আৰুসো, অযং সীলৰিসুদ্ধি নাম, যাৰদেৰ, চিত্তৰিসুদ্ধত্থা. চিত্তৰিসুদ্ধত্থাতি নিস্সক্কৰচনমেতং. অযং পনেত্থ অত্থো, যাৰদেৰ, চিত্তৰিসুদ্ধিসঙ্খাতা অত্থা, তাৰ অযং সীলৰিসুদ্ধি নাম ইচ্ছিতব্বা. যা পন অযং চিত্তৰিসুদ্ধি, এসা সীলৰিসুদ্ধিযা অত্থো, অযং কোটি, ইদং পরিযোসানং, চিত্তৰিসুদ্ধিযং ঠিতস্স হি সীলৰিসুদ্ধিকিচ্চং কতং নাম হোতীতি. এস নযো সব্বপদেসু.

ইদং পনেত্থ ওপম্মসংসন্দনং – রাজা পসেনদি কোসলো ৰিয হি জরামরণভীরুকো যোগাৰচরো দট্ঠব্বো. সাৰত্থিনগরং ৰিয সক্কাযনগরং, সাকেতনগরং ৰিয নিব্বাননগরং, রঞ্ঞো সাকেতে ৰড্ঢিআৰহস্স সীঘং গন্ত্ৰা পাপুণিতব্বস্স অচ্চাযিকস্স কিচ্চস্স উপ্পাদকালো ৰিয যোগিনো অনভিসমেতানং চতুন্নং অরিযসচ্চানং অভিসমযকিচ্চস্স উপ্পাদকালো. সত্ত রথৰিনীতানি ৰিয সত্ত ৰিসুদ্ধিযো, পঠমং রথৰিনীতং আরুল়্হকালো ৰিয সীলৰিসুদ্ধিযং ঠিতকালো, পঠমরথৰিনীতাদীহি দুতিযাদীনি আরুল়্হকালো ৰিয সীলৰিসুদ্ধিআদীহি চিত্তৰিসুদ্ধিআদীসু ঠিতকালো. সত্তমেন রথৰিনীতেন সাকেতে অন্তেপুরদ্ৰারে ওরুয্হ উপরিপাসাদে ঞাতিমিত্তগণপরিৰুতস্স সুরসভোজনপরিভোগকালো ৰিয যোগিনো ঞাণদস্সনৰিসুদ্ধিযা সব্বকিলেসে খেপেত্ৰা ধম্মৰরপাসাদং আরুয্হ পরোপণ্ণাসকুসলধম্মপরিৰারস্স নিব্বানারম্মণং ফলসমাপত্তিং অপ্পেত্ৰা নিরোধসযনে নিসিন্নস্স লোকুত্তরসুখানুভৰনকালো দট্ঠব্বো.

ইতি আযস্মন্তং পুণ্ণং দসকথাৰত্থুলাভিং ধম্মসেনাপতিসারিপুত্তত্থেরো সত্ত ৰিসুদ্ধিযো পুচ্ছি. আযস্মা পুণ্ণো দস কথাৰত্থূনি ৰিস্সজ্জেসি. এৰং পুচ্ছন্তো পন ধম্মসেনাপতি কিং জানিত্ৰা পুচ্ছি, উদাহু অজানিত্ৰা? তিত্থকুসলো ৰা পন হুত্ৰা ৰিসযস্মিং পুচ্ছি, উদাহু অতিত্থকুসলো হুত্ৰা অৰিসযস্মিং? পুণ্ণত্থেরোপি চ কিং জানিত্ৰা ৰিস্সজ্জেসি, উদাহু অজানিত্ৰা? তিত্থকুসলো ৰা পন হুত্ৰা ৰিসযস্মিং ৰিস্সজ্জেসি, উদাহু অতিত্থকুসলো হুত্ৰা অৰিসযেতি? জানিত্ৰা তিত্থকুসলো হুত্ৰা ৰিসযে পুচ্ছীতি হি ৰদমানো ধম্মসেনাপতিংযেৰ ৰদেয্য. জানিত্ৰা তিত্থকুসলো হুত্ৰা ৰিসযে ৰিস্সজ্জেসীতি ৰদমানো পুণ্ণত্থেরংযেৰ ৰদেয্য. যঞ্হি ৰিসুদ্ধীসু সংখিত্তং, তং কথাৰত্থূসু ৰিত্থিণ্ণং. যং কথাৰত্থূসু সংখিত্তং, তং ৰিসুদ্ধীসু ৰিত্থিণ্ণং. তদমিনা নযেন ৰেদিতব্বং.

ৰিসুদ্ধীসু হি একা সীলৰিসুদ্ধি চত্তারি কথাৰত্থূনি হুত্ৰা আগতা অপ্পিচ্ছকথা সন্তুট্ঠিকথা অসংসগ্গকথা, সীলকথাতি. একা চিত্তৰিসুদ্ধি তীণি কথাৰত্থূনি হুত্ৰা আগতা – পৰিৰেককথা, ৰীরিযারম্ভকথা, সমাধিকথাতি, এৰং তাৰ যং ৰিসুদ্ধীসু সংখিত্তং, তং কথাৰত্থূসু ৰিত্থিণ্ণং. কথাৰত্থূসু পন একা পঞ্ঞাকথা পঞ্চ ৰিসুদ্ধিযো হুত্ৰা আগতা – দিট্ঠিৰিসুদ্ধি, কঙ্খাৰিতরণৰিসুদ্ধি, মগ্গামগ্গঞাণদস্সনৰিসুদ্ধি, পটিপদাঞাণদস্সনৰিসুদ্ধি, ঞাণদস্সনৰিসুদ্ধীতি, এৰং যং কথাৰত্থূসু সংখিত্তং, তং ৰিসুদ্ধীসু ৰিত্থিণ্ণং. তস্মা সারিপুত্তত্থেরো সত্ত ৰিসুদ্ধিযো পুচ্ছন্তো ন অঞ্ঞং পুচ্ছি, দস কথাৰত্থূনিযেৰ পুচ্ছি. পুণ্ণত্থেরোপি সত্ত ৰিসুদ্ধিযো ৰিস্সজ্জেন্তো ন অঞ্ঞং ৰিস্সজ্জেসি, দস কথাৰত্থূনিযেৰ ৰিস্সজ্জেসীতি. ইতি উভোপেতে জানিত্ৰা তিত্থকুসলা হুত্ৰা ৰিসযেৰ পঞ্হং পুচ্ছিংসু চেৰ ৰিস্সজ্জেসুং চাতি ৰেদিতব্বো.

২৬০. কো নামো আযস্মাতি ন থেরো তস্স নামং ন জানাতি. জানন্তোযেৰ পন সম্মোদিতুং লভিস্সামীতি পুচ্ছি. কথঞ্চ পনাযস্মন্তন্তি ইদং পন থেরো সম্মোদমানো আহ. মন্তাণিপুত্তোতি মন্তাণিযা ব্রাহ্মণিযা পুত্তো. যথা তন্তি এত্থ তন্তি নিপাতমত্তং, যথা সুতৰতা সাৰকেন ব্যাকাতব্বা, এৰমেৰ ব্যাকতাতি অযমেত্থ সঙ্খেপত্থো. অনুমস্স অনুমস্সাতি দস কথাৰত্থূনি ওগাহেত্ৰা অনুপৰিসিত্ৰা. চেলণ্ডুপকেনাতি এত্থ চেলং ৰুচ্চতি ৰত্থং, অণ্ডুপকং চুম্বটকং. ৰত্থচুম্বটকং সীসে কত্ৰা আযস্মন্তং তত্থ নিসীদাপেত্ৰা পরিহরন্তাপি সব্রহ্মচারী দস্সনায লভেয্যুং, এৰং লদ্ধদস্সনম্পি তেসং লাভাযেৰাতি অট্ঠানপরিকপ্পেন অভিণ্হদস্সনস্স উপাযং দস্সেসি. এৰং অপরিহরন্তেন হি পঞ্হং ৰা পুচ্ছিতুকামেন ধম্মং ৰা সোতুকামেন ‘‘থেরো কত্থ ঠিতো কত্থ নিসিন্নো’’তি পরিযেসন্তেন চরিতব্বং হোতি. এৰং পরিহরন্তা পন ইচ্ছিতিচ্ছিতক্খণেযেৰ সীসতো ওরোপেত্ৰা মহারহে আসনে নিসীদাপেত্ৰা সক্কা হোন্তি পঞ্হং ৰা পুচ্ছিতুং ধম্মং ৰা সোতুং. ইতি অট্ঠানপরিকপ্পেন অভিণ্হদস্সনস্স উপাযং দস্সেসি.

সারিপুত্তোতি চ পন মন্তি সারিযা ব্রাহ্মণিযা পুত্তোতি চ পন এৰং মং সব্রহ্মচারী জানন্তি. সত্থুকপ্পেনাতি সত্থুসদিসেন. ইতি একপদেনেৰ আযস্মা পুণ্ণো সারিপুত্তত্থেরং চন্দমণ্ডলং আহচ্চ ঠপেন্তো ৰিয উক্খিপি. থেরস্স হি ইমস্মিং ঠানে একন্তধম্মকথিকভাৰো পাকটো অহোসি. অমচ্চঞ্হি পুরোহিতং মহন্তোতি ৰদমানো রাজসদিসোতি ৰদেয্য, গোণং হত্থিপ্পমাণোতি, ৰাপিং সমুদ্দপ্পমাণোতি, আলোকং চন্দিমসূরিযালোকপ্পমাণোতি, ইতো পরং এতেসং মহন্তভাৰকথা নাম নত্থি. সাৰকম্পি মহাতি ৰদন্তো সত্থুপটিভাগোতি ৰদেয্য, ইতো পরং তস্স মহন্তভাৰকথা নাম নত্থি. ইচ্চাযস্মা পুণ্ণো একপদেনেৰ থেরং চন্দমণ্ডলং আহচ্চ ঠপেন্তো ৰিয উক্খিপি.

এত্তকম্পি নো নপ্পটিভাসেয্যাতি পটিসম্ভিদাপত্তস্স অপ্পটিভানং নাম নত্থি. যা পনাযং উপমা আহটা, তং ন আহরেয্যাম, অত্থমেৰ কথেয্যাম. উপমা হি অজানন্তানং আহরীযতীতি অযমেত্থ অধিপ্পাযো. অট্ঠকথাযং পন ইদম্পি পটিক্খিপিত্ৰা উপমা নাম বুদ্ধানম্পি সন্তিকে আহরীযতি, থেরং পনেস অপচাযমানো এৰমাহাতি.

অনুমস্স অনুমস্স পুচ্ছিতাতি দস কথাৰত্থূনি ওগাহেত্ৰা ওগাহেত্ৰা পুচ্ছিতা. কিং পন পঞ্হস্স পুচ্ছনং ভারিযং, উদাহু ৰিস্সজ্জনন্তি? উগ্গহেত্ৰা পুচ্ছনং নো ভারিযং, ৰিস্সজ্জনং পন ভারিযং. সহেতুকং ৰা সকারণং কত্ৰা পুচ্ছনম্পি ৰিস্সজ্জনম্পি ভারিযমেৰ. সমনুমোদিংসূতি সমচিত্তা হুত্ৰা অনুমোদিংসু. ইতি যথানুসন্ধিনাৰ দেসনা নিট্ঠিতাতি.

পপঞ্চসূদনিযা মজ্ঝিমনিকাযট্ঠকথায

রথৰিনীতসুত্তৰণ্ণনা নিট্ঠিতা.

৫. নিৰাপসুত্তৰণ্ণনা

২৬১. এৰং মে সুতন্তি নিৰাপসুত্তং. তত্থ নেৰাপিকোতি যো মিগানং গহণত্থায অরঞ্ঞে তিণবীজানি ৰপতি ‘‘ইদং তিণং খাদিতুং আগতে মিগে সুখং গণ্হিস্সামী’’তি. নিৰাপন্তি ৰপ্পং. নিৰুত্তন্তি ৰপিতং. মিগজাতাতি মিগঘটা. অনুপখজ্জাতি অনুপৰিসিত্ৰা. মুচ্ছিতাতি তণ্হামুচ্ছনায মুচ্ছিতা, তণ্হায হদযং পৰিসিত্ৰা মুচ্ছনাকারং পাপিতাতি অত্থো. মদং আপজ্জিস্সন্তীতি মানমদং আপজ্জিস্সন্তি. পমাদন্তি ৰিস্সট্ঠসতিভাৰং. যথাকামকরণীযা ভৰিস্সন্তীতি যথা ইচ্ছিস্সাম, তথা কাতব্বা ভৰিস্সন্তি. ইমস্মিং নিৰাপেতি ইমস্মিং নিৰাপট্ঠানে. একং কির নিৰাপতিণং নাম অত্থি নিদাঘভদ্দকং, তং যথা যথা নিদাঘো হোতি, তথা তথা নীৰারৰনং ৰিয মেঘমালা ৰিয চ একগ্ঘনং হোতি, তং লুদ্দকা একস্মিং উদকফাসুকট্ঠানে কসিত্ৰা ৰপিত্ৰা ৰতিং কত্ৰা দ্ৰারং যোজেত্ৰা রক্খন্তি. অথ যদা মহানিদাঘে সব্বতিণানি সুক্খানি হোন্তি, জিৰ্হাতেমনমত্তম্পি উদকং দুল্লভং হোতি, তদা মিগজাতা সুক্খতিণানি চেৰ পুরাণপণ্ণানি চ খাদন্তা কম্পমানা ৰিয ৰিচরন্তা নিৰাপতিণস্স গন্ধং ঘাযিত্ৰা ৰধবন্ধনাদীনি অগণযিত্ৰা ৰতিং অজ্ঝোত্থরন্তা পৰিসন্তি. তেসঞ্হি নিৰাপতিণং অতিৰিয পিযং হোতি মনাপং. নেৰাপিকো তে দিস্ৰা দ্ৰে তীণি দিৰসানি পমত্তো ৰিয হোতি, দ্ৰারং ৰিৰরিত্ৰা তিট্ঠতি. অন্তোনিৰাপট্ঠানে তহিং তহিং উদকআৰাটকাপি হোন্তি, মিগা ৰিৰটদ্ৰারেন পৰিসিত্ৰা খাদিতমত্তকং পিৰিতমত্তকমেৰ কত্ৰা পক্কমন্তি, পুনদিৰসে কিঞ্চি ন করোন্তীতি কণ্ণে চালযমানা খাদিত্ৰা পিৰিত্ৰা অতরমানা গচ্ছন্তি, পুনদিৰসে কোচি কিঞ্চি কত্তা নত্থীতি যাৰদত্থং খাদিত্ৰা পিৰিত্ৰা মণ্ডলগুম্বং পৰিসিত্ৰা নিপজ্জন্তি. লুদ্দকা তেসং পমত্তভাৰং জানিত্ৰা দ্ৰারং পিধায সম্পরিৰারেত্ৰা কোটিতো পট্ঠায কোট্টেত্ৰা গচ্ছন্তি, এৰং তে তস্মিং নিৰাপে নেৰাপিকস্স যথাকামকরণীযা ভৰন্তি.

২৬২. তত্র, ভিক্খৰেতি, ভিক্খৰে, তেসু মিগজাতেসু. পঠমা মিগজাতাতি, মিগজাতা পঠমদুতিযা নাম নত্থি. ভগৰা পন আগতপটিপাটিৰসেন কপ্পেত্ৰা পঠমা, দুতিযা, ততিযা, চতুত্থাতি নামং আরোপেত্ৰা দস্সেসি. ইদ্ধানুভাৰাতি যথাকামং কত্তব্বভাৰতো; ৰসীভাৰোযেৰ হি এত্থ ইদ্ধীতি চ আনুভাৰোতি চ অধিপ্পেতো.

২৬৩. ভযভোগাতি ভযেন ভোগতো. বলৰীরিযন্তি অপরাপরং সঞ্চরণৰাযোধাতু, সা পরিহাযীতি অত্থো.

২৬৪. উপনিস্সায আসযং কপ্পেয্যামাতি অন্তো নিপজ্জিত্ৰা খাদন্তানম্পি ভযমেৰ, বাহিরতো আগন্ত্ৰা খাদন্তানম্পি ভযমেৰ, মযং পন অমুং নিৰাপট্ঠানং নিস্সায একমন্তে আসযং কপ্পেয্যামাতি চিন্তযিংসু. উপনিস্সায আসযং কপ্পযিংসূতি লুদ্দকা নাম ন সব্বকালং অপ্পমত্তা হোন্তি. মযং তত্থ তত্থ মণ্ডলগুম্বেসু চেৰ ৰতিপাদেসু চ নিপজ্জিত্ৰা এতেসু মুখধোৰনত্থং ৰা আহারকিচ্চকরণত্থং ৰা পক্কন্তেসু নিৰাপৰত্থুং পৰিসিত্ৰা খাদিতমত্তং কত্ৰা অম্হাকং ৰসনট্ঠানং পৰিসিস্সামাতি নিৰাপৰত্থুং উপনিস্সায গহনেসু গুম্বৰতিপাদাদীসু আসযং কপ্পযিংসু. ভুঞ্জিংসূতি ৰুত্তনযেন লুদ্দকানং পমাদকালং ঞত্ৰা সীঘং সীঘং পৰিসিত্ৰা ভুঞ্জিংসু. কেতবিনোতি সিক্খিতকেরাটিকা. ইদ্ধিমন্তাতি ইদ্ধিমন্তো ৰিয. পরজনাতি যক্খা. ইমে ন মিগজাতাতি. আগতিং ৰা গতিং ৰাতি ইমিনা নাম ঠানেন আগচ্ছন্তি, অমুত্র গচ্ছন্তীতি ইদং নেসং ন জানাম. দণ্ডৰাকরাহীতি দণ্ডৰাকরজালেহি. সমন্তা সপ্পদেসং অনুপরিৰারেসুন্তি অতিমাযাৰিনো এতে, ন দূরং গমিস্সন্তি, সন্তিকেযেৰ নিপন্না ভৰিস্সন্তীতি নিৰাপক্খেত্তস্স সমন্তা সপ্পদেসং মহন্তং ওকাসং অনুপরিৰারেসুং. অদ্দসংসূতি এৰং পরিৰারেত্ৰা ৰাকরজালং সমন্ততো চালেত্ৰা ওলোকেন্তা অদ্দসংসু. যত্থ তেতি যস্মিং ঠানে তে গাহং অগমংসু, তং ঠানং অদ্দসংসূতি অত্থো.

২৬৫. যংনূন মযং যত্থ অগতীতি তে কির এৰং চিন্তযিংসু – ‘‘অন্তো নিপজ্জিত্ৰা অন্তো খাদন্তানম্পি ভযমেৰ, বাহিরতো আগন্ত্ৰা খাদন্তানম্পি সন্তিকে ৰসিত্ৰা খাদন্তানম্পি ভযমেৰ, তেপি হি ৰাকরজালেন পরিক্খিপিত্ৰা গহিতাযেৰা’’তি, তেন তেসং এতদহোসি – ‘‘যংনূন মযং যত্থ নেৰাপিকস্স চ নেৰাপিকপরিসায চ অগতি অৰিসযো, তত্থ তত্থ সেয্যং কপ্পেয্যামা’’তি. অঞ্ঞে ঘট্টেস্সন্তীতি ততো ততো দূরতরৰাসিনো অঞ্ঞে ঘট্টেস্সন্তি. তে ঘট্টিতা অঞ্ঞেতি তেপি ঘট্টিতা অঞ্ঞে ততো দূরতরৰাসিনো ঘট্টেস্সন্তি. এৰং ইমং নিৰাপং নিৰুত্তং সব্বসো মিগজাতা পরিমুচ্চিস্সন্তীতি এৰং ইমং অম্হেহি নিৰুত্তং নিৰাপং সব্বে মিগঘটা মিগসঙ্ঘা ৰিস্সজ্জেস্সন্তি পরিচ্চজিস্সন্তি. অজ্ঝুপেক্খেয্যামাতি তেসং গহণে অব্যাৰটা ভৰেয্যামাতি; যথা তথা আগচ্ছন্তেসু হি তরুণপোতকো ৰা মহল্লকো ৰা দুব্বলো ৰা যূথপরিহীনো ৰা সক্কা হোন্তি লদ্ধুং, অনাগচ্ছন্তেসু কিঞ্চি নত্থি. অজ্ঝুপেক্খিংসু খো, ভিক্খৰেতি এৰং চিন্তেত্ৰা অব্যাৰটাৰ অহেসুং.

২৬৭. অমুং নিৰাপং নিৰুত্তং মারস্স অমূনি চ লোকামিসানীতি এত্থ নিৰাপোতি ৰা লোকামিসানীতি ৰা ৰট্টামিসভূতানং পঞ্চন্নং কামগুণানমেতং অধিৰচনং. মারো ন চ বীজানি ৰিয কামগুণে ৰপেন্তো আহিণ্ডতি, কামগুণগিদ্ধানং পন উপরি ৰসং ৰত্তেতি, তস্মা কামগুণা মারস্স নিৰাপা নাম হোন্তি. তেন ৰুত্তং – ‘‘অমুং নিৰাপং নিৰুত্তং মারস্সা’’তি. ন পরিমুচ্চিংসু মারস্স ইদ্ধানুভাৰাতি মারস্স ৰসং গতা অহেসুং, যথাকামকরণীযা. অযং সপুত্তভরিযপব্বজ্জায আগতউপমা.

২৬৮. চেতোৰিমুত্তি পরিহাযীতি এত্থ চেতোৰিমুত্তি নাম অরঞ্ঞে ৰসিস্সামাতি উপ্পন্নঅজ্ঝাসযো; সো পরিহাযীতি অত্থো. তথূপমে অহং ইমে দুতিযেতি অযং ব্রাহ্মণধম্মিকপব্বজ্জায উপমা. ব্রাহ্মণা হি অট্ঠচত্তালীসৰস্সানি কোমারব্রহ্মচরিযং চরিত্ৰা ৰট্টুপচ্ছেদভযেন পৰেণিং ঘটযিস্সামাতি ধনং পরিযেসিত্ৰা ভরিযং গহেত্ৰা অগারমজ্ঝে ৰসন্তা একস্মিং পুত্তে জাতে ‘‘অম্হাকং পুত্তো জাতো ৰট্টং ন উচ্ছিন্নং পৰেণি ঘটিতা’’তি পুন নিক্খমিত্ৰা পব্বজন্তি ৰা তমেৰ ৰা স’কলত্তৰাসং ৰসন্তি.

২৬৯. এৰঞ্হি তে, ভিক্খৰে, ততিযাপি সমণব্রাহ্মণা ন পরিমুচ্চিংসূতি পুরিমা ৰিয তেপি মারস্স ইদ্ধানুভাৰা ন মুচ্চিংসু; যথাকামকরণীযাৰ অহেসুং. কিং পন তে অকংসূতি? গামনিগমরাজধানিযো ওসরিত্ৰা তেসু তেসু আরামউয্যানট্ঠানেসু অস্সমং মাপেত্ৰা নিৰসন্তা কুলদারকে হত্থিঅস্সরথসিপ্পাদীনি নানপ্পকারানি সিপ্পানি সিক্খাপেসুং. ইতি তে ৰাকরজালেন ততিযা মিগজাতা ৰিয মারস্স পাপিমতো দিট্ঠিজালেন পরিক্খিপিত্ৰা যথাকামকরণীযা অহেসুং.

২৭০. তথূপমে অহং ইমে চতুত্থেতি অযং ইমস্স সাসনস্স উপমা আহটা.

২৭১. অন্ধমকাসি মারন্তি ন মারস্স অক্খীনি ভিন্দি. ৰিপস্সনাপাদকজ্ঝানং সমাপন্নস্স পন ভিক্খুনো ইমং নাম আরম্মণং নিস্সায চিত্তং ৰত্ততীতি মারো পস্সিতুং ন সক্কোতি. তেন ৰুত্তং – ‘‘অন্ধমকাসি মার’’ন্তি. অপদং ৰধিত্ৰা মারচক্খুন্তি তেনেৰ পরিযাযেন যথা মারস্স চক্খু অপদং হোতি নিপ্পদং, অপ্পতিট্ঠং, নিরারম্মণং, এৰং ৰধিত্ৰাতি অত্থো. অদস্সনং গতো পাপিমতোতি তেনেৰ পরিযাযেন মারস্স পাপিমতো অদস্সনং গতো. ন হি সো অত্তনো মংসচক্খুনা তস্স ৰিপস্সনাপাদকজ্ঝানং সমাপন্নস্স ভিক্খুনো ঞাণসরীরং দট্ঠুং সক্কোতি. পঞ্ঞায চস্স দিস্ৰা আসৰা পরিক্খীণা হোন্তীতি মগ্গপঞ্ঞায চত্তারি অরিযসচ্চানি দিস্ৰা চত্তারো আসৰা পরিক্খীণা হোন্তি. তিণ্ণো লোকে ৰিসত্তিকন্তি লোকে সত্তৰিসত্তভাৰেন ৰিসত্তিকাতি এৰং সঙ্খং গতং. অথ ৰা ‘‘ৰিসত্তিকাতি কেনট্ঠেন ৰিসত্তিকা? ৰিসতাতি ৰিসত্তিকা ৰিসটাতি ৰিসত্তিকা, ৰিপুলাতি ৰিসত্তিকা, ৰিসালাতি ৰিসত্তিকা, ৰিসমাতি ৰিসত্তিকা, ৰিসক্কতীতি ৰিসত্তিকা, ৰিসং হরতীতি ৰিসত্তিকা, ৰিসংৰাদিকাতি ৰিসত্তিকা, ৰিসমূলাতি ৰিসত্তিকা, ৰিসফলাতি ৰিসত্তিকা, ৰিসপরিভোগাতি ৰিসত্তিকা, ৰিসালা ৰা পন সা তণ্হা রূপে সদ্দে গন্ধে রসে ফোট্ঠব্বে’’তি (মহানি. ৩; চূল়নি. মেত্তগূমাণৰপুচ্ছানিদ্দেস ২২, খগ্গৰিসাণসুত্তনিদ্দেস ১২৪) ৰিসত্তিকা. এৰং ৰিসত্তিকাতি সঙ্খং গতং তণ্হং তিণ্ণো নিত্তিণ্ণো উত্তিণ্ণো. তেন ৰুচ্চতি – ‘‘তিণ্ণো লোকে ৰিসত্তিক’’ন্তি.

পপঞ্চসূদনিযা মজ্ঝিমনিকাযট্ঠকথায

নিৰাপসুত্তৰণ্ণনা নিট্ঠিতা.

৬. পাসরাসিসুত্তৰণ্ণনা

২৭২. এৰং মে সুতন্তি পাসরাসিসুত্তং. তত্থ সাধু মযং, আৰুসোতি আযাচন্তা ভণন্তি. এতে কির পঞ্চসতা ভিক্খূ জনপদৰাসিনো ‘‘দসবলং পস্সিস্সামা’’তি সাৰত্থিং অনুপ্পত্তা. সত্থুদস্সনং পন এতেহি লদ্ধং, ধম্মিং কথং ন তাৰ সুণন্তি. তে সত্থুগারৰেন ‘‘অম্হাকং, ভন্তে, ধম্মকথং কথেথা’’তি ৰত্তুং ন সক্কোন্তি. বুদ্ধা হি গরূ হোন্তি, একচারিকো সীহো মিগরাজা ৰিয, পভিন্নকুঞ্জরো ৰিয, ফণকতআসীৰিসো ৰিয, মহাঅগ্গিক্খন্ধো ৰিয চ দুরাসদা ৰুত্তম্পি চেতং –

‘‘আসীৰিসো যথা ঘোরো, মিগরাজাৰ কেসরী;

নাগোৰ কুঞ্জরো দন্তী, এৰং বুদ্ধা দুরাসদা’’তি.

এৰং দুরাসদং সত্থারং তে ভিক্খূ সযং যাচিতুং অসক্কোন্তা আযস্মন্তং আনন্দং যাচমানা ‘‘সাধু মযং, আৰুসো’’তি আহংসু.

অপ্পেৰ নামাতি অপি নাম লভেয্যাথ. কস্মা পন থেরো তে ভিক্খূ ‘‘রম্মকস্স ব্রাহ্মণস্স অস্সমং উপসঙ্কমেয্যাথা’’তি আহ? পাকটকিরিযতায. দসবলস্স হি কিরিযা থেরস্স পাকটা হোতি; জানাতি থেরো, ‘‘অজ্জ সত্থা জেতৰনে ৰসিত্ৰা পুব্বারামে দিৰাৰিহারং করিস্সতি; অজ্জ পুব্বারামে ৰসিত্ৰা জেতৰনে দিৰাৰিহারং করিস্সতি; অজ্জ এককোৰ পিণ্ডায পৰিসিস্সতি; অজ্জ ভিক্খুসঙ্ঘপরিৰুতো ইমস্মিং কালে জনপদচারিকং নিক্খমিস্সতী’’তি. কিং পনস্স এৰং জাননত্থং চেতোপরিযঞাণং অত্থীতি? নত্থি. অনুমানবুদ্ধিযা পন কতকিরিযায নযগ্গাহেন জানাতি. যঞ্হি দিৰসং ভগৰা জেতৰনে ৰসিত্ৰা পুব্বারামে দিৰাৰিহারং কাতুকামো হোতি, তদা সেনাসনপরিক্খারভণ্ডানং পটিসামনাকারং দস্সেতি, থেরো সম্মজ্জনিসঙ্কারছড্ডনকাদীনি পটিসামেতি. পুব্বারামে ৰসিত্ৰা জেতৰনং দিৰাৰিহারায আগমনকালেপি এসেৰ নযো.

যদা পন এককো পিণ্ডায পৰিসিতুকামো হোতি, তদা পাতোৰ সরীরপটিজগ্গনং কত্ৰা গন্ধকুটিং পৰিসিত্ৰা দ্ৰারং পিধায ফলসমাপত্তিং অপ্পেত্ৰা নিসীদতি. থেরো ‘‘অজ্জ ভগৰা বোধনেয্যবন্ধৰং দিস্ৰা নিসিন্নো’’তি তায সঞ্ঞায ঞত্ৰা ‘‘অজ্জ, আৰুসো, ভগৰা এককো পৰিসিতুকামো, তুম্হে ভিক্খাচারসজ্জা হোথা’’তি ভিক্খূনং সঞ্ঞং দেতি. যদা পন ভিক্খুসঙ্ঘপরিৰারো পৰিসিতুকামো হোতি, তদা গন্ধকুটিদ্ৰারং উপড্ঢপিদহিতং কত্ৰা ফলসমাপত্তিং অপ্পেত্ৰা নিসীদতি, থেরো তায সঞ্ঞায ঞত্ৰা পত্তচীৰরগ্গহণত্থায ভিক্খূনং সঞ্ঞং দেতি. যদা জনপদচারিকং নিক্খমিতুকামো হোতি, তদা একং দ্ৰে আলোপে অতিরেকং ভুঞ্জতি, সব্বকালং চঙ্কমনঞ্চারুয্হ অপরাপরং চঙ্কমতি, থেরো তায সঞ্ঞায ঞত্ৰা ‘‘ভগৰা, আৰুসো, জনপদচারিকং চরিতুকামো, তুম্হাকং কত্তব্বং করোথা’’তি ভিক্খূনং সঞ্ঞং দেতি.

ভগৰা পঠমবোধিযং ৰীসতি ৰস্সানি অনিবদ্ধৰাসো অহোসি, পচ্ছা পঞ্চৰীসতি ৰস্সানি অব্বোকিণ্ণং সাৰত্থিংযেৰ উপনিস্সায ৰসন্তো একদিৰসে দ্ৰে ঠানানি পরিভুঞ্জতি. জেতৰনে রত্তিং ৰসিত্ৰা পুনদিৰসে ভিক্খুসঙ্ঘপরিৰুতো দক্খিণদ্ৰারেন সাৰত্থিং পিণ্ডায পৰিসিত্ৰা পাচীনদ্ৰারেন নিক্খমিত্ৰা পুব্বারামে দিৰাৰিহারং করোতি. পুব্বারামে রত্তিং ৰসিত্ৰা পুনদিৰসে পাচীনদ্ৰারেন সাৰত্থিং পিণ্ডায পৰিসিত্ৰা দক্খিণদ্ৰারেন নিক্খমিত্ৰা জেতৰনে দিৰাৰিহারং করোতি. কস্মা? দ্ৰিন্নং কুলানং অনুকম্পায. মনুস্সত্তভাৰে ঠিতেন হি অনাথপিণ্ডিকেন ৰিয অঞ্ঞেন কেনচি, মাতুগামত্তভাৰে ঠিতায চ ৰিসাখায ৰিয অঞ্ঞায ইত্থিযা তথাগতং উদ্দিস্স ধনপরিচ্চাগো কতো নাম নত্থি, তস্মা ভগৰা তেসং অনুকম্পায একদিৰসে ইমানি দ্ৰে ঠানানি পরিভুঞ্জতি. তস্মিং পন দিৰসে জেতৰনে ৰসি, তস্মা থেরো – ‘‘অজ্জ ভগৰা সাৰত্থিযং পিণ্ডায চরিত্ৰা সাযন্হকালে গত্তানি পরিসিঞ্চনত্থায পুব্বকোট্ঠকং গমিস্সতি; অথাহং গত্তানি পরিসিঞ্চিত্ৰা ঠিতং ভগৰন্তং যাচিত্ৰা রম্মকস্স ব্রাহ্মণস্স অস্সমং গহেত্ৰা গমিস্সামি. এৰমিমে ভিক্খূ ভগৰতো সম্মুখা লভিস্সন্তি ধম্মকথং সৰনাযা’’তি চিন্তেত্ৰা তে ভিক্খূ এৰমাহ.

মিগারমাতুপাসাদোতি ৰিসাখায পাসাদো. সা হি মিগারেন সেট্ঠিনা মাতুট্ঠানে ঠপিতত্তা মিগারমাতাতি ৰুচ্চতি. পটিসল্লানা ৰুট্ঠিতোতি তস্মিং কির পাসাদে দ্ৰিন্নং মহাসাৰকানং সিরিগব্ভানং মজ্ঝে ভগৰতো সিরিগব্ভো অহোসি. থেরো দ্ৰারং ৰিৰরিত্ৰা অন্তোগব্ভং সম্মজ্জিত্ৰা মালাকচৰরং নীহরিত্ৰা মঞ্চপীঠং পঞ্ঞপেত্ৰা সত্থু সঞ্ঞং অদাসি. সত্থা সিরিগব্ভং পৰিসিত্ৰা দক্খিণেন পস্সেন সতো সম্পজানো সীহসেয্যং উপগম্ম দরথং পটিপ্পস্সম্ভেত্ৰা উট্ঠায ফলসমাপত্তিং অপ্পেত্ৰা নিসীদিত্ৰা সাযন্হসমযে ততো ৰুট্ঠাসি. তং সন্ধায ৰুত্তং ‘‘পটিসল্লানা ৰুট্ঠিতো’’তি.

পরিসিঞ্চিতুন্তি যো হি চুণ্ণমত্তিকাদীহি গত্তানি উব্বট্টেন্তো মল্লকমুট্ঠাদীহি ৰা ঘংসন্তো ন্হাযতি, সো ন্হাযতীতি ৰুচ্চতি. যো তথা অকত্ৰা পকতিযাৰ ন্হাযতি, সো পরিসিঞ্চতীতি ৰুচ্চতি. ভগৰতোপি সরীরে তথা হরিতব্বং রজোজল্লং নাম ন উপলিম্পতি, উতুগ্গহণত্থং পন ভগৰা কেৰলং উদকং ওতরতি. তেনাহ – ‘‘গত্তানি পরিসিঞ্চিতু’’ন্তি. পুব্বকোট্ঠকোতি পাচীনকোট্ঠকো.

সাৰত্থিযং কির ৰিহারো কদাচি মহা হোতি কদাচি খুদ্দকো. তথা হি সো ৰিপস্সিস্স ভগৰতো কালে যোজনিকো অহোসি, সিখিস্স তিগাৰুতো, ৰেস্সভুস্স অড্ঢযোজনিকো, ককুসন্ধস্স গাৰুতপ্পমাণো, কোণাগমনস্স অড্ঢগাৰুতপ্পমাণো, কস্সপস্স ৰীসতিউসভপ্পমাণো, অম্হাকং ভগৰতো কালে অট্ঠকরীসপ্পমাণো জাতো. তম্পি নগরং তস্স ৰিহারস্স কদাচি পাচীনতো হোতি, কদাচি দক্খিণতো, কদাচি পচ্ছিমতো, কদাচি উত্তরতো. জেতৰনে গন্ধকুটিযং পন চতুন্নং মঞ্চপাদানং পতিট্ঠিতট্ঠানং অচলমেৰ.

চত্তারি হি অচলচেতিযট্ঠানানি নাম মহাবোধিপল্লঙ্কট্ঠানং ইসিপতনে ধম্মচক্কপ্পৰত্তনট্ঠানং সঙ্কস্সনগরদ্ৰারে দেৰোরোহণকালে সোপানস্স পতিট্ঠট্ঠানং মঞ্চপাদট্ঠানন্তি. অযং পন পুব্বকোট্ঠকো কস্সপদসবলস্স ৰীসতিউসভৰিহারকালে পাচীনদ্ৰারে কোট্ঠকো অহোসি. সো ইদানিপি পুব্বকোট্ঠকোত্ৰেৰ পঞ্ঞাযতি. কস্সপদসবলস্স কালে অচিরৰতী নগরং পরিক্খিপিত্ৰা সন্দমানা পুব্বকোট্ঠকং পত্ৰা উদকেন ভিন্দিত্ৰা মহন্তং উদকরহদং মাপেসি সমতিত্থং অনুপুব্বগম্ভীরং. তত্থ একং রঞ্ঞো ন্হানতিত্থং, একং নাগরানং, একং ভিক্খুসঙ্ঘস্স, একং বুদ্ধানন্তি এৰং পাটিযেক্কানি ন্হানতিত্থানি হোন্তি রমণীযানি ৰিপ্পকিণ্ণরজতপট্টসদিসৰালিকানি. ইতি ভগৰা আযস্মতা আনন্দেন সদ্ধিং যেন অযং এৰরূপো পুব্বকোট্ঠকো তেনুপসঙ্কমি গত্তানি পরিসিঞ্চিতুং. অথাযস্মা আনন্দো উদকসাটিকং উপনেসি. ভগৰা রত্তদুপট্টং অপনেত্ৰা উদকসাটিকং নিৰাসেসি. থেরো দুপট্টেন সদ্ধিং মহাচীৰরং অত্তনো হত্থগতমকাসি. ভগৰা উদকং ওতরি. সহোতরণেনেৰস্স উদকে মচ্ছকচ্ছপা সব্বে সুৰণ্ণৰণ্ণা অহেসুং. যন্তনালিকাহি সুৰণ্ণরসধারানিসিঞ্চমানকালো ৰিয সুৰণ্ণপটপসারণকালো ৰিয চ অহোসি. অথ ভগৰতো ন্হানৰত্তং দস্সেত্ৰা ন্হত্ৰা পচ্চুত্তিণ্ণস্স থেরো রত্তদুপট্টং উপনেসি. ভগৰা তং নিৰাসেত্ৰা ৰিজ্জুলতাসদিসং কাযবন্ধনং বন্ধিত্ৰা মহাচীৰরং অন্তন্তেন সংহরিত্ৰা পদুমগব্ভসদিসং কত্ৰা উপনীতং দ্ৰীসু কণ্ণেসু গহেত্ৰা অট্ঠাসি. তেন ৰুত্তং – ‘‘পুব্বকোট্ঠকে গত্তানি পরিসিঞ্চিত্ৰা পচ্চুত্তরিত্ৰা একচীৰরো অট্ঠাসী’’তি.

এৰং ঠিতস্স পন ভগৰতো সরীরং ৰিকসিতকমলুপ্পলসরং সব্বপালিফুল্লং পারিচ্ছত্তকং তারামরীচিৰিকসিতং চ গগনতলং সিরিযা অৰহসমানং ৰিয ৰিরোচিত্থ. ব্যামপ্পভাপরিক্খেপৰিলাসিনী চস্স দ্ৰত্তিংসৰরলক্খণমালা গন্থেত্ৰা ঠপিতা দ্ৰত্তিংসচন্দমালা ৰিয, দ্ৰত্তিংসসূরিযমালা ৰিয, পটিপাটিযা ঠপিতা দ্ৰত্তিংসচক্কৰত্তি দ্ৰত্তিংসদেৰরাজা দ্ৰত্তিংসমহাব্রহ্মানো ৰিয চ অতিৰিয ৰিরোচিত্থ, ৰণ্ণভূমিনামেসা. এৰরূপেসু ঠানেসু বুদ্ধানং সরীরৰণ্ণং ৰা গুণৰণ্ণং ৰা চুণ্ণিযপদেহি ৰা গাথাহি ৰা অত্থঞ্চ উপমাযো চ কারণানি চ আহরিত্ৰা পটিবলেন ধম্মকথিকেন পূরেত্ৰা কথেতুং ৰট্টতীতি এৰরূপেসু ঠানেসু ধম্মকথিকস্স থামো ৰেদিতব্বো.

২৭৩. গত্তানি পুব্বাপযমানোতি পকতিভাৰং গমযমানো নিরুদকানি কুরুমানো, সুক্খাপযমানোতি অত্থো. সোদকেন গত্তেন চীৰরং পারুপন্তস্স হি চীৰরে কণ্ণিকা উট্ঠহন্তি, পরিক্খারভণ্ডং দুস্সতি. বুদ্ধানং পন সরীরে রজোজল্লং ন উপলিম্পতি; পদুমপত্তে পক্খিত্তউদকবিন্দু ৰিয উদকং ৰিনিৰত্তেত্ৰা গচ্ছতি, এৰং সন্তেপি সিক্খাগারৰতায ভগৰা, ‘‘পব্বজিতৰত্তং নামেত’’ন্তি মহাচীৰরং উভোসু কণ্ণেসু গহেত্ৰা পুরতো কাযং পটিচ্ছাদেত্ৰা অট্ঠাসি. তস্মিং খণে থেরো চিন্তেসি – ‘‘ভগৰা মহাচীৰরং পারুপিত্ৰা মিগারমাতুপাসাদং আরব্ভ গমনাভিহারতো পট্ঠায দুন্নিৰত্তিযো ভৰিস্সতি; বুদ্ধানঞ্হি অধিপ্পাযকোপনং নাম একচারিকসীহস্স গহণত্থং হত্থপ্পসারণং ৰিয; পভিন্নৰরৰারণস্স সোণ্ডায পরামসনং ৰিয; উগ্গতেজস্স আসীৰিসস্স গীৰায গহণং ৰিয চ ভারিযং হোতি. ইধেৰ রম্মকস্স ব্রাহ্মণস্স অস্সমস্স ৰণ্ণং কথেত্ৰা তত্থ গমনত্থায ভগৰন্তং যাচিস্সামী’’তি. সো তথা অকাসি. তেন ৰুত্তং – ‘‘অথ খো আযস্মা আনন্দো…পে… অনুকম্পং উপাদাযা’’তি.

তত্থ অনুকম্পং উপাদাযাতি ভগৰতো সম্মুখা ধম্মিং কথং সোস্সামাতি তং অস্সমং গতানং পঞ্চন্নং ভিক্খুসতানং অনুকম্পং পটিচ্চ, তেসু কারুঞ্ঞং কত্ৰাতি অত্থো. ধম্মিযা কথাযাতি দসসু পারমিতাসু অঞ্ঞতরায পারমিযা চেৰ মহাভিনিক্খমনস্স চ ৰণ্ণং কথযমানা সন্নিসিন্না হোন্তি. আগমযমানোতি ওলোকযমানো. অহং বুদ্ধোতি সহসা অপ্পৰিসিত্ৰা যাৰ সা কথা নিট্ঠাতি, তাৰ অট্ঠাসীতি অত্থো. অগ্গল়ং আকোটেসীতি অগ্গনখেন কৰাটে সঞ্ঞং অদাসি. ৰিৰরিংসূতি সোতং ওদহিত্ৰাৰ নিসিন্নত্তা তঙ্খণংযেৰ আগন্ত্ৰা ৰিৰরিংসু.

পঞ্ঞত্তে আসনেতি বুদ্ধকালে কির যত্থ যত্থ একোপি ভিক্খু ৰিহরতি, সব্বত্থ বুদ্ধাসনং পঞ্ঞত্তমেৰ হোতি. কস্মা? ভগৰা কির অত্তনো সন্তিকে কম্মট্ঠানং গহেত্ৰা ফাসুকট্ঠানে ৰিহরন্তে মনসি করোতি ‘‘অসুকো ময্হং সন্তিকে কম্মট্ঠানং গহেত্ৰা গতো, সক্খিস্সতি নু খো ৰিসেসং নিব্বত্তেতুং নো ৰা’’তি. অথ নং পস্সতি কম্মট্ঠানং ৰিস্সজ্জেত্ৰা অকুসলৰিতক্কে ৰিতক্কযমানং, ততো ‘‘কথঞ্হি নাম মাদিসস্স সত্থু সন্তিকে কম্মট্ঠানং গহেত্ৰা ৰিহরন্তং ইমং কুলপুত্তং অকুসলৰিতক্কা অভিভৰিত্ৰা অনমতগ্গে ৰট্টদুক্খে সংসারেস্সন্তী’’তি তস্স অনুগ্গহত্থং তত্থেৰ অত্তানং দস্সেত্ৰা তং কুলপুত্তং ওৰদিত্ৰা আকাসং উপ্পতিত্ৰা পুন অত্তনো ৰসনট্ঠানমেৰ গচ্ছতি. অথেৰং ওৰদিযমানা তে ভিক্খূ চিন্তযিংসু – ‘‘সত্থা অম্হাকং মনং জানিত্ৰা আগন্ত্ৰা অম্হাকং সমীপে ঠিতংযেৰ অত্তানং দস্সেতি; তস্মিং খণে, ‘ভন্তে, ইধ নিসীদথ, ইধ নিসীদথা’তি আসনপরিযেসনং নাম ভারো’’তি. তে আসনং পঞ্ঞপেত্ৰাৰ ৰিহরন্তি. যস্স পীঠং অত্থি, সো তং পঞ্ঞপেতি. যস্স নত্থি, সো মঞ্চং ৰা ফলকং ৰা কট্ঠং ৰা পাসাণং ৰা ৰালিকপুঞ্জং ৰা পঞ্ঞপেতি. তং অলভমানা পুরাণপণ্ণানিপি সঙ্কড্ঢিত্ৰা তত্থ পংসুকূলং পত্থরিত্ৰা ঠপেন্তি. ইধ পন পকতিপঞ্ঞত্তমেৰ আসনং অহোসি, তং সন্ধায ৰুত্তং – ‘‘পঞ্ঞত্তে আসনে নিসীদী’’তি.

কায নুত্থাতি কতমায নু কথায সন্নিসিন্না ভৰথাতি অত্থো. ‘‘কায নেত্থা’’তিপি পাল়ি, তস্সা কতমায নু এত্থাতি অত্থো. ‘‘কায নোত্থা’’তিপি পাল়ি, তস্সাপি পুরিমোযেৰ অত্থো. অন্তরা কথাতি কম্মট্ঠানমনসিকারউদ্দেসপরিপুচ্ছাদীনং অন্তরা অঞ্ঞা একা কথা. ৰিপ্পকতাতি মম আগমনপচ্চযা অপরিনিট্ঠিতা সিখং অপ্পত্তা. অথ ভগৰা অনুপ্পত্তোতি অথ এতস্মিং কালে ভগৰা আগতো. ধম্মী ৰা কথাতি দসকথাৰত্থুনিস্সিতা ৰা ধম্মী কথা. অরিযো ৰা তুণ্হীভাৰোতি এত্থ পন দুতিযজ্ঝানম্পি অরিযো তুণ্হীভাৰো মূলকম্মট্ঠানম্পি. তস্মা তং ঝানং অপ্পেত্ৰা নিসিন্নোপি, মূলকম্মট্ঠানং গহেত্ৰা নিসিন্নোপি ভিক্খু অরিযেন তুণ্হীভাৰেন নিসিন্নোতি ৰেদিতব্বো.

২৭৪. দ্ৰেমা, ভিক্খৰে, পরিযেসনাতি কো অনুসন্ধি? তে ভিক্খূ সম্মুখা ধম্মিং কথং সোস্সামাতি থেরস্স ভারং অকংসু, থেরো তেসং অস্সমগমনমকাসি. তে তত্থ নিসীদিত্ৰা অতিরচ্ছানকথিকা হুত্ৰা ধম্মিযা কথায নিসীদিংসু. অথ ভগৰা ‘‘অযং তুম্হাকং পরিযেসনা অরিযপরিযেসনা নামা’’তি দস্সেতুং ইমং দেসনং আরভি. তত্থ কতমা চ, ভিক্খৰে, অনরিযপরিযেসনাতি এত্থ যথা মগ্গকুসলো পুরিসো পঠমং ৰজ্জেতব্বং অপাযমগ্গং দস্সেন্তো ‘‘ৰামং মুঞ্চিত্ৰা দক্খিণং গণ্হা’’তি ৰদতি. এৰং ভগৰা দেসনাকুসলতায পঠমং ৰজ্জেতব্বং অনরিযপরিযেসনং আচিক্খিত্ৰা পচ্ছা ইতরং আচিক্খিস্সামীতি উদ্দেসানুক্কমং ভিন্দিত্ৰা এৰমাহ. জাতিধম্মোতি জাযনসভাৰো. জরাধম্মোতি জীরণসভাৰো. ব্যাধিধম্মোতি ব্যাধিসভাৰো. মরণধম্মোতি মরণসভাৰো. সোকধম্মোতি সোচনকসভাৰো. সংকিলেসধম্মোতি সংকিলিস্সনসভাৰো.

পুত্তভরিযন্তি পুত্তা চ ভরিযা চ. এস নযো সব্বত্থ. জাতরূপরজতন্তি এত্থ পন জাতরূপন্তি সুৰণ্ণং. রজতন্তি যংকিঞ্চি ৰোহারূপগং লোহমাসকাদি. জাতিধম্মা হেতে, ভিক্খৰে, উপধযোতি এতে পঞ্চকামগুণূপধযো নাম হোন্তি, তে সব্বেপি জাতিধম্মাতি দস্সেতি. ব্যাধিধম্মৰারাদীসু জাতরূপরজতং ন গহিতং, ন হেতস্স সীসরোগাদযো ব্যাধযো নাম হোন্তি, ন সত্তানং ৰিয চুতিসঙ্খাতং মরণং, ন সোকো উপ্পজ্জতি. অযাদীহি পন সংকিলেসেহি সংকিলিস্সতীতি সংকিলেসধম্মৰারে গহিতং. তথা উতুসমুট্ঠানত্তা জাতিধম্মৰারে. মলং গহেত্ৰা জীরণতো জরাধম্মৰারে চ.

২৭৫. অযং , ভিক্খৰে, অরিযা পরিযেসনাতি, ভিক্খৰে, অযং নিদ্দোসতাযপি অরিযেহি পরিযেসিতব্বতাযপি অরিযপরিযেসনাতি ৰেদিতব্বা.

২৭৬. অহম্পি সুদং, ভিক্খৰেতি কস্মা আরভি? মূলতো পট্ঠায মহাভিনিক্খমনং দস্সেতুং. এৰং কিরস্স অহোসি – ‘‘ভিক্খৰে, অহম্পি পুব্বে অনরিযপরিযেসনং পরিযেসিং. স্ৰাহং তং পহায অরিযপরিযেসনং পরিযেসিত্ৰা সব্বঞ্ঞুতং পত্তো. পঞ্চৰগ্গিযাপি অনরিযপরিযেসনং পরিযেসিংসু. তে তং পহায অরিযপরিযেসনং পরিযেসিত্ৰা খীণাসৰভূমিং পত্তা. তুম্হেপি মম চেৰ পঞ্চৰগ্গিযানঞ্চ মগ্গং আরুল়্হা. অরিযপরিযেসনা তুম্হাকং পরিযেসনা’’তি মূলতো পট্ঠায অত্তনো মহাভিনিক্খমনং দস্সেতুং ইমং দেসনং আরভি.

২৭৭. তত্থ দহরোৰ সমানোতি তরুণোৰ সমানো. সুসুকাল়কেসোতি সুট্ঠু কাল়কেসো, অঞ্জনৰণ্ণকেসোৰ হুত্ৰাতি অত্থো. ভদ্রেনাতি ভদ্দকেন. পঠমেন ৰযসাতি তিণ্ণং ৰযানং পঠমৰযেন. অকামকানন্তি অনিচ্ছমানানং, অনাদরত্থে সামিৰচনং. অস্সূনি মুখে এতেসন্তি অস্সুমুখা; তেসং অস্সুমুখানং, অস্সুকিলিন্নমুখানন্তি অত্থো. রুদন্তানন্তি কন্দিত্ৰা রোদমানানং. কিং কুসলগৰেসীতি কিং কুসলন্তি গৰেসমানো. অনুত্তরং সন্তিৰরপদন্তি উত্তমং সন্তিসঙ্খাতং ৰরপদং, নিব্বানং পরিযেসমানোতি অত্থো. যেন আল়ারো কালামোতি এত্থ আল়ারোতি তস্স নামং, দীঘপিঙ্গলো কিরেসো. তেনস্স আল়ারোতি নামং অহোসি. কালামোতি গোত্তং. ৰিহরতাযস্মাতি ৰিহরতু আযস্মা. যত্থ ৰিঞ্ঞূ পুরিসোতি যস্মিং ধম্মে পণ্ডিতো পুরিসো. সকং আচরিযকন্তি অত্তনো আচরিযসমযং. উপসম্পজ্জ ৰিহরেয্যাতি পটিলভিত্ৰা ৰিহরেয্য. এত্তাৰতা তেন ওকাসো কতো হোতি. তং ধম্মন্তি তং তেসং সমযং তন্তিং. পরিযাপুণিন্তি সুত্ৰাৰ উগ্গণ্হিং.

ওট্ঠপহতমত্তেনাতি তেন ৰুত্তস্স পটিগ্গহণত্থং ওট্ঠপহরণমত্তেন; অপরাপরং কত্ৰা ওট্ঠসঞ্চরণমত্তকেনাতি অত্থো. লপিতলাপনমত্তেনাতি তেন লপিতস্স পটিলাপনমত্তকেন. ঞাণৰাদন্তি জানামীতি ৰাদং. থেরৰাদন্তি থিরভাৰৰাদং, থেরো অহমেত্থাতি এতং ৰচনং. অহঞ্চেৰ অঞ্ঞে চাতি ন কেৰলং অহং, অঞ্ঞেপি বহূ এৰং ৰদন্তি. কেৰলং সদ্ধামত্তকেনাতি পঞ্ঞায অসচ্ছিকত্ৰা সুদ্ধেন সদ্ধামত্তকেনেৰ. বোধিসত্তো কির ৰাচায ধম্মং উগ্গণ্হন্তোযেৰ, ‘‘ন কালামস্স ৰাচায পরিযত্তিমত্তমেৰ অস্মিং ধম্মে, অদ্ধা এস সত্তন্নং সমাপত্তীনং লাভী’’তি অঞ্ঞাসি, তেনস্স এতদহোসি.

আকিঞ্চঞ্ঞাযতনং পৰেদেসীতি আকিঞ্চঞ্ঞাযতনপরিযোসানা সত্ত সমাপত্তিযো মং জানাপেসি. সদ্ধাতি ইমাসং সত্তন্নং সমাপত্তীনং নিব্বত্তনত্থায সদ্ধা. ৰীরিযাদীসুপি এসেৰ নযো. পদহেয্যন্তি পযোগং করেয্যং. নচিরস্সেৰ তং ধম্মং সযং অভিঞ্ঞা সচ্ছিকত্ৰা উপসম্পজ্জ ৰিহাসিন্তি বোধিসত্তো কির ৰীরিযং পগ্গহেত্ৰা কতিপাহঞ্ঞেৰ সত্ত সুৰণ্ণনিস্সেণিযো পসারেন্তো ৰিয সত্ত সমাপত্তিযো নিব্বত্তেসি; তস্মা এৰমাহ.

লাভা নো, আৰুসোতি অনুসূযকো কিরেস কালামো. তস্মা ‘‘অযং অধুনাগতো, কিন্তি কত্ৰা ইমং ধম্মং নিব্বত্তেসী’’তি উসূযং অকত্ৰা পসন্নো পসাদং পৰেদেন্তো এৰমাহ. উভোৰ সন্তা ইমং গণং পরিহরামাতি ‘‘মহা অযং গণো, দ্ৰেপি জনা পরিহরামা’’তি ৰত্ৰা গণস্স সঞ্ঞং অদাসি, ‘‘অহম্পি সত্তন্নং সমাপত্তীনং লাভী, মহাপুরিসোপি সত্তন্নমেৰ, এত্তকা জনা মহাপুরিসস্স সন্তিকে পরিকম্মং উগ্গণ্হথ, এত্তকা ময্হ’’ন্তি মজ্ঝে ভিন্দিত্ৰা অদাসি. উল়ারাযাতি উত্তমায. পূজাযাতি কালামস্স কির উপট্ঠাকা ইত্থিযোপি পুরিসাপি গন্ধমালাদীনি গহেত্ৰা আগচ্ছন্তি. কালামো – ‘‘গচ্ছথ, মহাপুরিসং পূজেথা’’তি ৰদতি. তে তং পূজেত্ৰা যং অৰসিট্ঠং হোতি, তেন কালামং পূজেন্তি. মহগ্ঘানি মঞ্চপীঠানি আহরন্তি; তানিপি মহাপুরিসস্স দাপেত্ৰা যদি অৰসিট্ঠং হোতি, অত্তনা গণ্হাতি. গতগতট্ঠানে ৰরসেনাসনং বোধিসত্তস্স জগ্গাপেত্ৰা সেসকং অত্তনা গণ্হাতি. এৰং উল়ারায পূজায পূজেসি. নাযং ধম্মো নিব্বিদাযাতিআদীসু অযং সত্তসমাপত্তিধম্মো নেৰ ৰট্টে নিব্বিন্দনত্থায, ন ৰিরজ্জনত্থায, ন রাগাদিনিরোধত্থায, ন উপসমত্থায, ন অভিঞ্ঞেয্যধম্মং অভিজাননত্থায, ন চতুমগ্গসম্বোধায, ন নিব্বানসচ্ছিকিরিযায সংৰত্ততীতি অত্থো.

যাৰদেৰ আকিঞ্চঞ্ঞাযতনূপপত্তিযাতি যাৰ সট্ঠিকপ্পসহস্সাযুপরিমাণে আকিঞ্চঞ্ঞাযতনভৰে উপপত্তি, তাৰদেৰ সংৰত্ততি, ন ততো উদ্ধং. এৰমযং পুনরাৰত্তনধম্মোযেৰ; যঞ্চ ঠানং পাপেতি, তং জাতিজরামরণেহি অপরিমুত্তমেৰ মচ্চুপাসপরিক্খিত্তমেৰাতি. ততো পট্ঠায চ পন মহাসত্তো যথা নাম ছাতজ্ঝত্তপুরিসো মনুঞ্ঞভোজনং লভিত্ৰা সম্পিযাযমানোপি ভুঞ্জিত্ৰা পিত্তৰসেন ৰা সেম্হৰসেন ৰা মক্খিকাৰসেন ৰা ছড্ডেত্ৰা পুন একং পিণ্ডম্পি ভুঞ্জিস্সামীতি মনং ন উপ্পাদেতি; এৰমেৰ ইমা সত্ত সমাপত্তিযো মহন্তেন উস্সাহেন নিব্বত্তেত্ৰাপি, তাসু ইমং পুনরাৰত্তিকাদিভেদং আদীনৰং দিস্ৰা, পুন ইমং ধম্মং আৰজ্জিস্সামি ৰা সমাপজ্জিস্সামি ৰা অধিট্ঠহিস্সামি ৰা ৰুট্ঠহিস্সামি ৰা পচ্চৰেক্খিস্সামি ৰাতি চিত্তমেৰ ন উপ্পাদেসি. অনলঙ্করিত্ৰাতি অলং ইমিনা, অলং ইমিনাতি পুনপ্পুনং অলঙ্করিত্ৰা. নিব্বিজ্জাতি নিব্বিন্দিত্ৰা. অপক্কমিন্তি অগমাসিং.

২৭৮. ন খো রামো ইমং ধম্মন্তি ইধাপি বোধিসত্তো তং ধম্মং উগ্গণ্হন্তোযেৰ অঞ্ঞাসি – ‘‘নাযং অট্ঠসমাপত্তিধম্মো উদকস্স ৰাচায উগ্গহিতমত্তোৰ, অদ্ধা পনেস অট্ঠসমাপত্তিলাভী’’তি. তেনস্স এতদহোসি – ‘‘ন খো রামো…পে… জানং পস্সং ৰিহাসী’’তি. সেসমেত্থ পুরিমৰারে ৰুত্তনযেনেৰ ৰেদিতব্বং.

২৭৯. যেন উরুৰেলা সেনানিগমোতি এত্থ উরুৰেলাতি মহাৰেলা, মহাৰালিকরাসীতি অত্থো. অথ ৰা উরূতি ৰালিকা ৰুচ্চতি; ৰেলাতি মরিযাদা, ৰেলাতিক্কমনহেতু আহটা উরু উরুৰেলাতি এৰমেত্থ অত্থো দট্ঠব্বো. অতীতে কির অনুপ্পন্নে বুদ্ধে দসসহস্সা কুলপুত্তা তাপসপব্বজ্জং পব্বজিত্ৰা তস্মিং পদেসে ৰিহরন্তা একদিৰসং সন্নিপতিত্ৰা কতিকৰত্তং অকংসু – ‘‘কাযকম্মৰচীকম্মানি নাম পরেসম্পি পাকটানি হোন্তি, মনোকম্মং পন অপাকটং. তস্মা যো কামৰিতক্কং ৰা ব্যাপাদৰিতক্কং ৰা ৰিহিংসাৰিতক্কং ৰা ৰিতক্কেতি, তস্স অঞ্ঞো চোদকো নাম নত্থি; সো অত্তনাৰ অত্তানং চোদেত্ৰা পত্তপুটেন ৰালিকং আহরিত্ৰা ইমস্মিং ঠানে আকিরতু, ইদমস্স দণ্ডকম্ম’’ন্তি. ততো পট্ঠায যো তাদিসং ৰিতক্কং ৰিতক্কেতি, সো তত্থ পত্তপুটেন ৰালিকং আকিরতি, এৰং তত্থ অনুক্কমেন মহাৰালিকরাসি জাতো. ততো তং পচ্ছিমা জনতা পরিক্খিপিত্ৰা চেতিযট্ঠানমকাসি; তং সন্ধায ৰুত্তং – ‘‘উরুৰেলাতি মহাৰেলা, মহাৰালিকরাসীতি অত্থো’’তি. তমেৰ সন্ধায ৰুত্তং – ‘‘অথ ৰা উরূতি ৰালিকা ৰুচ্চতি, ৰেলাতি মরিযাদা. ৰেলাতিক্কমনহেতু আহটা উরু উরুৰেলাতি এৰমেত্থ অত্থো দট্ঠব্বো’’তি.

সেনানিগমোতি সেনায নিগমো. পঠমকপ্পিকানং কির তস্মিং ঠানে সেনানিৰেসো অহোসি; তস্মা সো পদেসো সেনানিগমোতি ৰুচ্চতি. ‘‘সেনানি-গামো’’তিপি পাঠো. সেনানী নাম সুজাতায পিতা, তস্স গামোতি অত্থো. তদৰসরিন্তি তত্থ ওসরিং. রমণীযং ভূমিভাগন্তি সুপুপ্ফিতনানপ্পকারজলজথলজপুপ্ফৰিচিত্তং মনোরম্মং ভূমিভাগং. পাসাদিকঞ্চ ৰনসণ্ডন্তি মোরপিঞ্ছকলাপসদিসং পসাদজননৰনসণ্ডঞ্চ অদ্দসং. নদিঞ্চ সন্দন্তিন্তি সন্দমানঞ্চ মণিক্খন্ধসদিসং ৰিমলনীলসীতলসলিলং নেরঞ্জরং নদিং অদ্দসং. সেতকন্তি পরিসুদ্ধং নিক্কদ্দমং. সুপতিত্থন্তি অনুপুব্বগম্ভীরেহি সুন্দরেহি তিত্থেহি উপেতং. রমণীযন্তি রজতপট্টসদিসং ৰিপ্পকিণ্ণৰালিকং পহূতমচ্ছকচ্ছপং অভিরামদস্সনং. সমন্তা চ গোচরগামন্তি তস্স পদেসস্স সমন্তা অৰিদূরে গমনাগমনসম্পন্নং সম্পত্তপব্বজিতানং সুলভপিণ্ডং গোচরগামঞ্চ অদ্দসং. অলং ৰতাতি সমত্থং ৰত. তত্থেৰ নিসীদিন্তি বোধিপল্লঙ্কে নিসজ্জং সন্ধাযাহ. উপরিসুত্তস্মিঞ্হি তত্থেৰাতি দুক্করকারিকট্ঠানং অধিপ্পেতং, ইধ পন বোধিপল্লঙ্কো. তেনাহ – ‘‘তত্থেৰ নিসীদি’’ন্তি. অলমিদং পধানাযাতি ইদং ঠানং পধানত্থায সমত্থন্তি এৰং চিন্তেত্ৰা নিসীদিন্তি অত্থো.

২৮০. অজ্ঝগমন্তি অধিগচ্ছিং পটিলভিং. ঞাণঞ্চ পন মে দস্সনন্তি সব্বধম্মদস্সনসমত্থঞ্চ মে সব্বঞ্ঞুতঞ্ঞাণং উদপাদি. অকুপ্পা মে ৰিমুত্তীতি ময্হং অরহত্তফলৰিমুত্তি অকুপ্পতায চ অকুপ্পারম্মণতায চ অকুপ্পা, সা হি রাগাদীহি ন কুপ্পতীতি অকুপ্পতাযপি অকুপ্পা, অকুপ্পং নিব্বানমস্সারম্মণন্তিপি অকুপ্পা. অযমন্তিমা জাতীতি অযং সব্বপচ্ছিমা জাতি. নত্থি দানি পুনব্ভৰোতি ইদানি মে পুন পটিসন্ধি নাম নত্থীতি এৰং পচ্চৰেক্খণঞাণম্পি মে উপ্পন্নন্তি দস্সেতি.

২৮১. অধিগতোতি পটিৰিদ্ধো. ধম্মোতি চতুসচ্চধম্মো. গম্ভীরোতি উত্তানভাৰপটিক্খেপৰচনমেতং. দুদ্দসোতি গম্ভীরত্তাৰ দুদ্দসো দুক্খেন দট্ঠব্বো, ন সক্কা সুখেন দট্ঠুং. দুদ্দসত্তাৰ দুরনুবোধো, দুক্খেন অৰবুজ্ঝিতব্বো, ন সক্কা সুখেন অৰবুজ্ঝিতুং. সন্তোতি নিব্বুতো. পণীতোতি অতপ্পকো. ইদং দ্ৰযং লোকুত্তরমেৰ সন্ধায ৰুত্তং. অতক্কাৰচরোতি তক্কেন অৰচরিতব্বো ওগাহিতব্বো ন হোতি, ঞাণেনেৰ অৰচরিতব্বো. নিপুণোতি সণ্হো. পণ্ডিতৰেদনীযোতি সম্মাপটিপদং পটিপন্নেহি পণ্ডিতেহি ৰেদিতব্বো. আলযরামাতি সত্তা পঞ্চসু কামগুণেসু অল্লীযন্তি. তস্মা তে আলযাতি ৰুচ্চন্তি. অট্ঠসততণ্হাৰিচরিতানি আলযন্তি, তস্মা আলযাতি ৰুচ্চন্তি. তেহি আলযেহি রমন্তীতি আলযরামা. আলযেসু রতাতি আলযরতা. আলযেসু সুট্ঠু মুদিতাতি আলযসম্মুদিতা. যথেৰ হি সুসজ্জিতং পুপ্ফফলভরিতরুক্খাদিসম্পন্নং উয্যানং পৰিট্ঠো রাজা তায তায সম্পত্তিযা রমতি, সম্মুদিতো আমোদিতপমোদিতো হোতি, ন উক্কণ্ঠতি, সাযম্পি নিক্খমিতুং ন ইচ্ছতি; এৰমিমেহিপি কামালযতণ্হালযেহি সত্তা রমন্তি, সংসারৰট্টে সম্মুদিতা অনুক্কণ্ঠিতা ৰসন্তি. তেন নেসং ভগৰা দুৰিধম্পি আলযং উয্যানভূমিং ৰিয দস্সেন্তো ‘‘আলযরামা’’তিআদিমাহ.

যদিদন্তি নিপাতো, তস্স ঠানং সন্ধায ‘‘যং ইদ’’ন্তি, পটিচ্চসমুপ্পাদং সন্ধায ‘‘যো অয’’ন্তি এৰমত্থো দট্ঠব্বো. ইদপ্পচ্চযতাপটিচ্চসমুপ্পাদোতি ইমেসং পচ্চযা ইদপ্পচ্চযা; ইদপ্পচ্চযা এৰ ইদপ্পচ্চযতা; ইদপ্পচ্চযতা চ সা পটিচ্চসমুপ্পাদো চাতি ইদপ্পচ্চযতাপটিচ্চসমুপ্পাদো. সঙ্খারাদিপচ্চযানমেতং অধিৰচনং. সব্বসঙ্খারসমথোতিআদি সব্বং নিব্বানমেৰ. যস্মা হি তং আগম্ম সব্বসঙ্খারৰিপ্ফন্দিতানি সম্মন্তি ৰূপসম্মন্তি, তস্মা সব্বসঙ্খারসমথোতি ৰুচ্চতি. যস্মা চ তং আগম্ম সব্বে উপধযো পটিনিস্সট্ঠা হোন্তি, সব্বা তণ্হা খীযন্তি, সব্বে কিলেসরাগা ৰিরজ্জন্তি, সব্বং দুক্খং নিরুজ্ঝতি; তস্মা সব্বূপধিপটিনিস্সগ্গো তণ্হাক্খযো ৰিরাগো নিরোধোতি ৰুচ্চতি. সা পনেসা তণ্হা ভৰেন ভৰং, ফলেন ৰা সদ্ধিং কম্মং ৰিনতি সংসিব্বতীতি কত্ৰা ৰানন্তি ৰুচ্চতি, ততো নিক্খন্তং ৰানতোতি নিব্বানং. সো মমস্স কিলমথোতি যা অজানন্তানং দেসনা নাম, সো মম কিলমথো অস্স, সা মম ৰিহেসা অস্সাতি অত্থো. কাযকিলমথো চেৰ কাযৰিহেসা চ অস্সাতি ৰুত্তং হোতি. চিত্তে পন উভযম্পেতং বুদ্ধানং নত্থি. অপিস্সূতি অনুব্রূহনত্থে নিপাতো, সো ‘‘ন কেৰলং এতদহোসি, ইমাপি গাথা পটিভংসূ’’তি দীপেতি. মন্তি মম. অনচ্ছরিযাতি অনুঅচ্ছরিযা. পটিভংসূতি পটিভানসঙ্খাতস্স ঞাণস্স গোচরা অহেসুং; পরিৰিতক্কযিতব্বতং পাপুণিংসু.

কিচ্ছেনাতি দুক্খেন, ন দুক্খায পটিপদায. বুদ্ধানঞ্হি চত্তারোপি মগ্গা সুখপ্পটিপদাৰ হোন্তি. পারমীপূরণকালে পন সরাগসদোসসমোহস্সেৰ সতো আগতাগতানং যাচকানং, অলঙ্কতপ্পটিযত্তং সীসং কন্তিত্ৰা, গললোহিতং নীহরিত্ৰা, সুঅঞ্জিতানি অক্খীনি উপ্পাটেত্ৰা, কুলৰংসপ্পদীপং পুত্তং মনাপচারিনিং ভরিযন্তি এৰমাদীনি দেন্তস্স, অঞ্ঞানি চ খন্তিৰাদিসদিসেসু অত্তভাৰেসু ছেজ্জভেজ্জাদীনি পাপুণন্তস্স আগমনিযপটিপদং সন্ধাযেতং ৰুত্তং. হলন্তি এত্থ হ-কারো নিপাতমত্তো, অলন্তি অত্থো. পকাসিতুন্তি দেসিতুং, এৰং কিচ্ছেন অধিগতস্স ধম্মস্স অলং দেসিতুং, পরিযত্তং দেসিতুং, কো অত্থো দেসিতেনাতি ৰুত্তং হোতি. রাগদোসপরেতেহীতি রাগদোসপরিফুট্ঠেহি রাগদোসানুগতেহি ৰা.

পটিসোতগামিন্তি নিচ্চাদীনং পটিসোতং অনিচ্চং দুক্খমনত্তা অসুভন্তি এৰং গতং চতুসচ্চধম্মং. রাগরত্তাতি কামরাগেন ভৰরাগেন দিট্ঠিরাগেন চ রত্তা. ন দক্খন্তীতি অনিচ্চং দুক্খমনত্তা অসুভন্তি ইমিনা সভাৰেন ন পস্সিস্সন্তি, তে অপস্সন্তে কো সক্খিস্সতি এৰং গাহাপেতুং. তমোখন্ধেন আৰুটাতি অৰিজ্জারাসিনা অজ্ঝোত্থতা.

২৮২. অপ্পোস্সুক্কতাযাতি নিরুস্সুক্কভাৰেন, অদেসেতুকামতাযাতি অত্থো. কস্মা পনস্স এৰং চিত্তং নমি, ননু এস মুত্তো মোচেস্সামি, তিণ্ণো তারেস্সামি.

‘‘কিং মে অঞ্ঞাতৰেসেন, ধম্মং সচ্ছিকতেনিধ;

সব্বঞ্ঞুতং পাপুণিত্ৰা, তারযিস্সং সদেৰক’’ন্তি. (বু. ৰং. ২.৫৬) –

পত্থনং কত্ৰা পারমিযো পূরেত্ৰা সব্বঞ্ঞুতং পত্তোতি. সচ্চমেতং, তদেৰং পচ্চৰেক্খণানুভাৰেন পনস্স এৰং চিত্তং নমি. তস্স হি সব্বঞ্ঞুতং পত্ৰা সত্তানং কিলেসগহনতং, ধম্মস্স চ গম্ভীরতং পচ্চৰেক্খন্তস্স সত্তানং কিলেসগহনতা চ ধম্মগম্ভীরতা চ সব্বাকারেন পাকটা জাতা. অথস্স ‘‘ইমে সত্তা কঞ্জিকপুণ্ণা লাবু ৰিয, তক্কভরিতা চাটি ৰিয, ৰসাতেলপীতপিলোতিকা ৰিয, অঞ্জনমক্খিতহত্থো ৰিয চ কিলেসভরিতা অতিসংকিলিট্ঠা রাগরত্তা দোসদুট্ঠা মোহমূল়্হা, তে কিং নাম পটিৰিজ্ঝিস্সন্তী’’তি চিন্তযতো কিলেসগহনপচ্চৰেক্খণানুভাৰেনাপি এৰং চিত্তং নমি.

‘‘অযঞ্চ ধম্মো পথৰীসন্ধারকউদকক্খন্ধো ৰিয গম্ভীরো, পব্বতেন পটিচ্ছাদেত্ৰা ঠপিতো সাসপো ৰিয দুদ্দসো, সতধা ভিন্নস্স ৰালস্স কোটিযা কোটিপটিপাদনং ৰিয দুরনুবোধো. ননু মযা হি ইমং ধম্মং পটিৰিজ্ঝিতুং ৰাযমন্তেন অদিন্নং দানং নাম নত্থি, অরক্খিতং সীলং নাম নত্থি, অপরিপূরিতা কাচি পারমী নাম নত্থি? তস্স মে নিরুস্সাহং ৰিয মারবলং ৰিধমন্তস্সাপি পথৰী ন কম্পিত্থ, পঠমযামে পুব্বেনিৰাসং অনুস্সরন্তস্সাপি ন কম্পিত্থ, মজ্ঝিমযামে দিব্বচক্খুং সোধেন্তস্সাপি ন কম্পিত্থ, পচ্ছিমযামে পন পটিচ্চসমুপ্পাদং পটিৰিজ্ঝন্তস্সেৰ মে দসসহস্সিলোকধাতু কম্পিত্থ. ইতি মাদিসেনাপি তিক্খঞাণেন কিচ্ছেনেৰাযং ধম্মো পটিৰিদ্ধো, তং লোকিযমহাজনা কথং পটিৰিজ্ঝিস্সন্তী’’তি ধম্মগম্ভীরতাপচ্চৰেক্খণানুভাৰেনাপি এৰং চিত্তং নমীতি ৰেদিতব্বং.

অপিচ ব্রহ্মুনা যাচিতে দেসেতুকামতাযপিস্স এৰং চিত্তং নমি. জানাতি হি ভগৰা – ‘‘মম অপ্পোস্সুক্কতায চিত্তে নমমানে মং মহাব্রহ্মা ধম্মদেসনং যাচিস্সতি, ইমে চ সত্তা ব্রহ্মগরুকা, তে ‘সত্থা কির ধম্মং ন দেসেতুকামো অহোসি, অথ নং মহাব্রহ্মা যাচিত্ৰা দেসাপেসি, সন্তো ৰত, ভো, ধম্মো পণীতো ৰত, ভো, ধম্মো’তি মঞ্ঞমানা সুস্সূসিস্সন্তী’’তি. ইদম্পিস্স কারণং পটিচ্চ অপ্পোস্সুক্কতায চিত্তং নমি, নো ধম্মদেসনাযাতি ৰেদিতব্বং.

সহম্পতিস্সাতি সো কির কস্সপস্স ভগৰতো সাসনে সহকো নাম থেরো পঠমজ্ঝানং নিব্বত্তেত্ৰা পঠমজ্ঝানভূমিযং কপ্পাযুকব্রহ্মা হুত্ৰা নিব্বত্তো. তত্র নং সহম্পতিব্রহ্মাতি পটিসঞ্জানন্তি, তং সন্ধাযাহ – ‘‘ব্রহ্মুনো সহম্পতিস্সা’’তি. নস্সতি ৰত, ভোতি সো কির ইমং সদ্দং তথা নিচ্ছারেসি, যথা দসসহস্সিলোকধাতুব্রহ্মানো সুত্ৰা সব্বে সন্নিপতিংসু. যত্র হি নামাতি যস্মিং নাম লোকে. পুরতো পাতুরহোসীতি তেহি দসহি ব্রহ্মসহস্সেহি সদ্ধিং পাতুরহোসি. অপ্পরজক্খজাতিকাতি পঞ্ঞামযে অক্খিম্হি অপ্পং পরিত্তং রাগদোসমোহরজং এতেসং, এৰংসভাৰাতি অপ্পরজক্খজাতিকা. অস্সৰনতাতি অস্সৰনতায. ভৰিস্সন্তীতি পুরিমবুদ্ধেসু দসপুঞ্ঞকিরিযৰসেন কতাধিকারা পরিপাকগতপদুমানি ৰিয সূরিযরস্মিসম্ফস্সং, ধম্মদেসনংযেৰ আকঙ্খমানা চতুপ্পদিকগাথাৰসানে অরিযভূমিং ওক্কমনারহা ন একো, ন দ্ৰে, অনেকসতসহস্সা ধম্মস্স অঞ্ঞাতারো ভৰিস্সন্তীতি দস্সেতি.

পাতুরহোসীতি পাতুভৰি. সমলেহি চিন্তিতোতি সমলেহি ছহি সত্থারেহি চিন্তিতো. তে হি পুরেতরং উপ্পজ্জিত্ৰা সকলজম্বুদীপে কণ্টকে পত্থরমানা ৰিয, ৰিসং সিঞ্চমানা ৰিয চ সমলং মিচ্ছাদিট্ঠিধম্মং দেসযিংসু. অপাপুরেতন্তি ৰিৰর এতং. অমতস্স দ্ৰারন্তি অমতস্স নিব্বানস্স দ্ৰারভূতং অরিযমগ্গং. সুণন্তু ধম্মং ৰিমলেনানুবুদ্ধন্তি ইমে সত্তা রাগাদিমলানং অভাৰতো ৰিমলেন সম্মাসম্বুদ্ধেন অনুবুদ্ধং চতুসচ্চধম্মং সুণন্তু তাৰ ভগৰাতি যাচতি.

সেলে যথা পব্বতমুদ্ধনিট্ঠিতোতি সেলমযে একগ্ঘনে পব্বতমুদ্ধনি যথা ঠিতোৰ. ন হি তস্স ঠিতস্স দস্সনত্থং গীৰুক্খিপনপসারণাদিকিচ্চং অত্থি. তথূপমন্তি তপ্পটিভাগং সেলপব্বতূপমং. অযং পনেত্থ সঙ্খেপত্থো – যথা সেলপব্বতমুদ্ধনি ঠিতোৰ চক্খুমা পুরিসো সমন্ততো জনতং পস্সেয্য, তথা ত্ৰম্পি, সুমেধ, সুন্দরপঞ্ঞ-সব্বঞ্ঞুতঞ্ঞাণেন সমন্তচক্খু ভগৰা ধম্মমযং পাসাদমারুয্হ সযং অপেতসোকো সোকাৰতিণ্ণং জাতিজরাভিভূতং জনতং অৰেক্খস্সু উপধারয উপপরিক্খ. অযং পনেত্থ অধিপ্পাযো – যথা হি পব্বতপাদে সমন্তা মহন্তং খেত্তং কত্ৰা তত্থ কেদারপাল়ীসু কুটিকাযো কত্ৰা রত্তিং অগ্গিং জালেয্যুং. চতুরঙ্গসমন্নাগতঞ্চ অন্ধকারং অস্স, অথ তস্স পব্বতস্স মত্থকে ঠত্ৰা চক্খুমতো পুরিসস্স ভূমিং ওলোকযতো নেৰ খেত্তং, ন কেদারপাল়িযো, ন কুটিযো, ন তত্থ সযিতমনুস্সা পঞ্ঞাযেয্যুং. কুটিকাসু পন অগ্গিজালামত্তকমেৰ পঞ্ঞাযেয্য. এৰং ধম্মপাসাদং আরুয্হ সত্তনিকাযং ওলোকযতো তথাগতস্স, যে তে অকতকল্যাণা সত্তা, তে একৰিহারে দক্খিণজাণুপস্সে নিসিন্নাপি বুদ্ধচক্খুস্স আপাথং নাগচ্ছন্তি, রত্তিং খিত্তা সরা ৰিয হোন্তি. যে পন কতকল্যাণা ৰেনেয্যপুগ্গলা, তে এৰস্স দূরেপি ঠিতা আপাথং আগচ্ছন্তি, সো অগ্গি ৰিয হিমৰন্তপব্বতো ৰিয চ. ৰুত্তম্পি চেতং –

‘‘দূরে সন্তো পকাসেন্তি, হিমৰন্তোৰ পব্বতো;

অসন্তেত্থ ন দিস্সন্তি, রত্তিং খিত্তা যথা সরা’’তি. (ধ. প. ৩০৪);

উট্ঠেহীতি ভগৰতো ধম্মদেসনত্থং চারিকচরণং যাচন্তো ভণতি. ৰীরাতিআদীসু ভগৰা ৰীরিযৰন্ততায ৰীরো. দেৰপুত্তমচ্চুকিলেসমারানং ৰিজিতত্তা ৰিজিতসঙ্গামো. জাতিকন্তারাদিনিত্থরণত্থায ৰেনেয্যসত্থৰাহনসমত্থতায সত্থৰাহো. কামচ্ছন্দইণস্স অভাৰতো অণণোতি ৰেদিতব্বো.

২৮৩. অজ্ঝেসনন্তি যাচনং. বুদ্ধচক্খুনাতি ইন্দ্রিযপরোপরিযত্তঞাণেন চ আসযানুসযঞাণেন চ. ইমেসঞ্হি দ্ৰিন্নং ঞাণানং বুদ্ধচক্খূতি নামং, সব্বঞ্ঞুতঞ্ঞাণস্স সমন্তচক্খূতি, তিণ্ণং মগ্গঞাণানং ধম্মচক্খূতি. অপ্পরজক্খেতিআদীসু যেসং ৰুত্তনযেনেৰ পঞ্ঞাচক্খুম্হি রাগাদিরজং অপ্পং, তে অপ্পরজক্খা. যেসং তং মহন্তং, তে মহারজক্খা. যেসং সদ্ধাদীনি ইন্দ্রিযানি তিক্খানি, তে তিক্খিন্দ্রিযা. যেসং তানি মুদূনি, তে মুদিন্দ্রিযা. যেসং তেযেৰ সদ্ধাদযো আকারা সুন্দরা, তে স্ৰাকারা. যে কথিতকারণং সল্লক্খেন্তি, সুখেন সক্কা হোন্তি ৰিঞ্ঞাপেতুং, তে সুৰিঞ্ঞাপযা. যে পরলোকঞ্চেৰ ৰজ্জঞ্চ ভযতো পস্সন্তি, তে পরলোকৰজ্জভযদস্সাৰিনো নাম.

অযং পনেত্থ পাল়ি – ‘‘সদ্ধো পুগ্গলো অপ্পরজক্খো, অস্সদ্ধো পুগ্গলো মহারজক্খো. আরদ্ধৰীরিযো…, কুসিতো…, উপট্ঠিতস্সতি…, মুট্ঠস্সতি…, সমাহিতো…, অসমাহিতো…, পঞ্ঞৰা…, দুপ্পঞ্ঞো পুগ্গলো মহারজক্খো. তথা সদ্ধো পুগ্গলো তিক্খিন্দ্রিযো…পে… পঞ্ঞৰা পুগ্গলো পরলোকৰজ্জভযদস্সাৰী, দুপ্পঞ্ঞো পুগ্গলো ন পরলোকৰজ্জভযদস্সাৰী. লোকোতি খন্ধলোকো, আযতনলোকো, ধাতুলোকো, সম্পত্তিভৰলোকো, সম্পত্তিসম্ভৰলোকো, ৰিপত্তিভৰলোকো, ৰিপত্তিসম্ভৰলোকো, একো লোকো সব্বে সত্তা আহারট্ঠিতিকা. দ্ৰে লোকা – নামঞ্চ রূপঞ্চ. তযো লোকা – তিস্সো ৰেদনা. চত্তারো লোকা – চত্তারো আহারা. পঞ্চ লোকা – পঞ্চুপাদানক্খন্ধা. ছ লোকা – ছ অজ্ঝত্তিকানি আযতনানি. সত্ত লোকা – সত্ত ৰিঞ্ঞাণট্ঠিতিযো. অট্ঠ লোকা – অট্ঠ লোকধম্মা. নৰ লোকা – নৰ সত্তাৰাসা. দস লোকা – দসাযতনানি. দ্ৰাদস লোকা – দ্ৰাদসাযতনানি. অট্ঠারস লোকা – অট্ঠারস্স ধাতুযো. ৰজ্জন্তি সব্বে কিলেসা ৰজ্জা, সব্বে দুচ্চরিতা ৰজ্জা, সব্বে অভিসঙ্খারা ৰজ্জা, সব্বে ভৰগামিকম্মা ৰজ্জা. ইতি ইমস্মিঞ্চ লোকে ইমস্মিঞ্চ ৰজ্জে তিব্বা ভযসঞ্ঞা পচ্চুপট্ঠিতা হোতি, সেয্যথাপি উক্খিত্তাসিকে ৰধকে. ইমেহি পঞ্ঞাসায আকারেহি ইমানি পঞ্চিন্দ্রিযানি জানাতি পস্সতি অঞ্ঞাসি পটিৰিজ্ঝি. ইদং তথাগতস্স ইন্দ্রিযপরোপরিযত্তে ঞাণ’’ন্তি (পটি. ম. ১.১১২).

উপ্পলিনিযন্তি উপ্পলৰনে. ইতরেসুপি এসেৰ নযো. অন্তোনিমুগ্গপোসীনীতি যানি অন্তো নিমুগ্গানেৰ পোসিযন্তি. উদকং অচ্চুগ্গম্ম ঠিতানীতি উদকং অতিক্কমিত্ৰা ঠিতানি. তত্থ যানি অচ্চুগ্গম্ম ঠিতানি, তানি সূরিযরস্মিসম্ফস্সং আগমযমানানি ঠিতানি অজ্জ পুপ্ফনকানি. যানি সমোদকং ঠিতানি, তানি স্ৰে পুপ্ফনকানি. যানি উদকানুগ্গতানি অন্তোনিমুগ্গপোসীনি, তানি ততিযদিৰসে পুপ্ফনকানি. উদকা পন অনুগ্গতানি অঞ্ঞানিপি সরোগউপ্পলাদীনি নাম অত্থি, যানি নেৰ পুপ্ফিস্সন্তি, মচ্ছকচ্ছপভক্খানেৰ ভৰিস্সন্তি. তানি পাল়িং নারুল়্হানি. আহরিত্ৰা পন দীপেতব্বানীতি দীপিতানি.

যথেৰ হি তানি চতুব্বিধানি পুপ্ফানি, এৰমেৰ উগ্ঘটিতঞ্ঞূ ৰিপঞ্চিতঞ্ঞূ নেয্যো পদপরমোতি চত্তারো পুগ্গলা. তত্থ ‘‘যস্স পুগ্গলস্স সহ উদাহটৰেলায ধম্মাভিসমযো হোতি, অযং ৰুচ্চতি পুগ্গলো উগ্ঘটিতঞ্ঞূ. যস্স পুগ্গলস্স সংখিত্তেন ভাসিতস্স ৰিত্থারেন অত্থে ৰিভজিযমানে ধম্মাভিসমযো হোতি, অযং ৰুচ্চতি পুগ্গলো ৰিপঞ্চিতঞ্ঞূ. যস্স পুগ্গলস্স উদ্দেসতো পরিপুচ্ছতো যোনিসো মনসিকরোতো কল্যাণমিত্তে সেৰতো ভজতো পযিরুপাসতো অনুপুব্বেন ধম্মাভিসমযো হোতি, অযং ৰুচ্চতি পুগ্গলো নেয্যো. যস্স পুগ্গলস্স বহুম্পি সুণতো বহুম্পি ভণতো বহুম্পি ধারযতো বহুম্পি ৰাচযতো ন তায জাতিযা ধম্মাভিসমযো হোতি, অযং ৰুচ্চতি পুগ্গলো পদপরমো’’ (পু. প. ১৫১). তত্থ ভগৰা উপ্পলৰনাদিসদিসং দসসহস্সিলোকধাতুং ওলোকেন্তো ‘‘অজ্জ পুপ্ফনকানি ৰিয উগ্ঘটিতঞ্ঞূ, স্ৰে পুপ্ফনকানি ৰিয ৰিপঞ্চিতঞ্ঞূ, ততিযদিৰসে পুপ্ফনকানি ৰিয নেয্যো, মচ্ছকচ্ছপভক্খানি পুপ্ফানি ৰিয পদপরমো’’তি অদ্দস. পস্সন্তো চ ‘‘এত্তকা অপ্পরজক্খা, এত্তকা মহারজক্খা, তত্রাপি এত্তকা উগ্ঘটিতঞ্ঞূ’’তি এৰং সব্বাকারতোৰ অদ্দস.

তত্থ তিণ্ণং পুগ্গলানং ইমস্মিংযেৰ অত্তভাৰে ভগৰতো ধম্মদেসনা অত্থং সাধেতি. পদপরমানং অনাগতে ৰাসনত্থায হোতি. অথ ভগৰা ইমেসং চতুন্নং পুগ্গলানং অত্থাৰহং ধম্মদেসনং ৰিদিত্ৰা দেসেতুকম্যতং উপ্পাদেত্ৰা পুন সব্বেপি তীসু ভৰেসু সত্তে ভব্বাভব্বৰসেন দ্ৰে কোট্ঠাসে অকাসি. যে সন্ধায ৰুত্তং – ‘‘কতমে তে সত্তা অভব্বা, যে তে সত্তা কম্মাৰরণেন সমন্নাগতা কিলেসাৰরণেন সমন্নাগতা ৰিপাকাৰরণেন সমন্নাগতা অস্সদ্ধা অচ্ছন্দিকা দুপ্পঞ্ঞা অভব্বা নিযামং ওক্কমিতুং কুসলেসু ধম্মেসু সম্মত্তং, ইমে তে সত্তা অভব্বা. কতমে তে সত্তা ভব্বা? যে তে সত্তা ন কম্মাৰরণেন…পে… ইমে তে সত্তা ভব্বা’’তি (ৰিভ. ৮২৭; পটি. ম. ১.১১৫). তত্থ সব্বেপি অভব্বপুগ্গলে পহায ভব্বপুগ্গলেযেৰ ঞাণেন পরিগ্গহেত্ৰা ‘‘এত্তকা রাগচরিতা, এত্তকা দোসমোহচরিতা ৰিতক্কসদ্ধাবুদ্ধিচরিতা’’তি ছ কোট্ঠাসে অকাসি; এৰং কত্ৰা ধম্মং দেসিস্সামীতি চিন্তেসি.

পচ্চভাসিন্তি পতিঅভাসিং. অপারুতাতি ৰিৰটা. অমতস্স দ্ৰারাতি অরিযমগ্গো. সো হি অমতসঙ্খাতস্স নিব্বানস্স দ্ৰারং, সো মযা ৰিৰরিত্ৰা ঠপিতোতি দস্সেতি. পমুঞ্চন্তু সদ্ধন্তি সব্বে অত্তনো সদ্ধং পমুঞ্চন্তু, ৰিস্সজ্জেন্তু. পচ্ছিমপদদ্ৰযে অযমত্থো, অহঞ্হি অত্তনো পগুণং সুপ্পৰত্তিতম্পি ইমং পণীতং উত্তমং ধম্মং কাযৰাচাকিলমথসঞ্ঞী হুত্ৰা ন ভাসিং. ইদানি পন সব্বো জনো সদ্ধাভাজনং উপনেতু, পূরেস্সামি নেসং সঙ্কপ্পন্তি.

২৮৪. তস্স ময্হং, ভিক্খৰে, এতদহোসীতি এতং অহোসি – কস্স নু খো অহং পঠমং ধম্মং দেসেয্যন্তি অযং ধম্মদেসনাপটিসংযুত্তো ৰিতক্কো উদপাদীতি অত্থো. কদা পনেস উদপাদীতি? বুদ্ধভূতস্স অট্ঠমে সত্তাহে.

তত্রাযং অনুপুব্বিকথা – বোধিসত্তো কির মহাভিনিক্খমনদিৰসে ৰিৰটং ইত্থাগারং দিস্ৰা সংৰিগ্গহদযো, ‘‘কণ্ডকং আহরা’’তি ছন্নং আমন্তেত্ৰা ছন্নসহাযো অস্সরাজপিট্ঠিগতো নগরতো নিক্খমিত্ৰা কণ্ডকনিৰত্তনচেতিযট্ঠানং নাম দস্সেত্ৰা তীণি রজ্জানি অতিক্কম্ম অনোমানদীতীরে পব্বজিত্ৰা অনুপুব্বেন চারিকং চরমানো রাজগহে পিণ্ডায চরিত্ৰা পণ্ডৰপব্বতে নিসিন্নো মগধিস্সরেন রঞ্ঞা নামগোত্তং পুচ্ছিত্ৰা, ‘‘ইমং রজ্জং সম্পটিচ্ছাহী’’তি ৰুত্তো, ‘‘অলং মহারাজ, ন ময্হং রজ্জেন অত্থো, অহং রজ্জং পহায লোকহিতত্থায পধানং অনুযুঞ্জিত্ৰা লোকে ৰিৰটচ্ছদো ভৰিস্সামীতি নিক্খন্তো’’তি ৰত্ৰা, ‘‘তেন হি বুদ্ধো হুত্ৰা পঠমং ময্হং ৰিজিতং ওসরেয্যাসী’’তি পটিঞ্ঞং গহিতো কালামঞ্চ উদকঞ্চ উপসঙ্কমিত্ৰা তেসং ধম্মদেসনায সারং অৰিন্দন্তো ততো পক্কমিত্ৰা উরুৰেল়ায ছব্বস্সানি দুক্করকারিকং করোন্তোপি অমতং পটিৰিজ্ঝিতুং অসক্কোন্তো ওল়ারিকাহারপটিসেৰনেন কাযং সন্তপ্পেসি.

তদা চ উরুৰেলগামে সুজাতা নাম কুটুম্বিযধীতা একস্মিং নিগ্রোধরুক্খে পত্থনমকাসি – ‘‘সচাহং সমানজাতিকং কুলঘরং গন্ত্ৰা পঠমগব্ভে পুত্তং লভিস্সামি, বলিকম্মং করিস্সামী’’তি. তস্সা সা পত্থনা সমিজ্ঝি. সা ৰিসাখপুণ্ণমদিৰসে পাতোৰ বলিকম্মং করিস্সামীতি রত্তিযা পচ্চূসসমযে এৰ পাযসং পটিযাদেসি. তস্মিং পাযসে পচ্চমানে মহন্তমহন্তা পুপ্ফুল়া উট্ঠহিত্ৰা দক্খিণাৰট্টা হুত্ৰা সঞ্চরন্তি. একফুসিতম্পি বহি ন গচ্ছতি. মহাব্রহ্মা ছত্তং ধারেসি. চত্তারো লোকপালা খগ্গহত্থা আরক্খং গণ্হিংসু. সক্কো অলাতানি সমানেন্তো অগ্গিং জালেসি. দেৰতা চতূসু দীপেসু ওজং সংহরিত্ৰা তত্থ পক্খিপিংসু. বোধিসত্তো ভিক্খাচারকালং আগমযমানো পাতোৰ গন্ত্ৰা রুক্খমূলে নিসীদি. রুক্খমূলে সোধনত্থায গতা ধাতী আগন্ত্ৰা সুজাতায আরোচেসি – ‘‘দেৰতা রুক্খমূলে নিসিন্না’’তি. সুজাতা, সব্বং পসাধনং পসাধেত্ৰা সতসহস্সগ্ঘনিকে সুৰণ্ণথালে পাযসং ৰড্ঢেত্ৰা অপরায সুৰণ্ণপাতিযা পিদহিত্ৰা উক্খিপিত্ৰা গতা মহাপুরিসং দিস্ৰা সহেৰ পাতিযা হত্থে ঠপেত্ৰা ৰন্দিত্ৰা ‘‘যথা ময্হং মনোরথো নিপ্ফন্নো, এৰং তুম্হাকম্পি নিপ্ফজ্জতূ’’তি ৰত্ৰা পক্কামি.

বোধিসত্তো নেরঞ্জরায তীরং গন্ত্ৰা সুৰণ্ণথালং তীরে ঠপেত্ৰা ন্হত্ৰা পচ্চুত্তরিত্ৰা একূনপণ্ণাসপিণ্ডে করোন্তো পাযসং পরিভুঞ্জিত্ৰা ‘‘সচাহং অজ্জ বুদ্ধো ভৰামি, থালং পটিসোতং গচ্ছতূ’’তি খিপি. থালং পটিসোতং গন্ত্ৰা থোকং ঠত্ৰা কালনাগরাজস্স ভৰনং পৰিসিত্ৰা তিণ্ণং বুদ্ধানং থালানি উক্খিপিত্ৰা অট্ঠাসি.

মহাসত্তো ৰনসণ্ডে দিৰাৰিহারং কত্ৰা সাযন্হসমযে সোত্তিযেন দিন্না অট্ঠ তিণমুট্ঠিযো গহেত্ৰা বোধিমণ্ডং আরুয্হ দক্খিণদিসাভাগে অট্ঠাসি. সো পদেসো পদুমিনিপত্তে উদকবিন্দু ৰিয অকম্পিত্থ. মহাসত্তো, ‘‘অযং মম গুণং ধারেতুং ন সক্কোতী’’তি পচ্ছিমদিসাভাগং অগমাসি, সোপি তথেৰ অকম্পিত্থ. উত্তরদিসাভাগং অগমাসি, সোপি তথেৰ অকম্পিত্থ. পুরত্থিমদিসাভাগং অগমাসি, তত্থ পল্লঙ্কপ্পমাণং ঠানং সুনিখাতইন্দখিলো ৰিয নিচ্চলমহোসি. মহাসত্তো ‘‘ইদং ঠানং সব্ববুদ্ধানং কিলেসভঞ্জনৰিদ্ধংসনট্ঠান’’ন্তি তানি তিণানি অগ্গে গহেত্ৰা চালেসি. তানি চিত্তকারেন তূলিকগ্গেন পরিচ্ছিন্নানি ৰিয অহেসুং. বোধিসত্তো, ‘‘বোধিং অপ্পত্ৰা ইমং পল্লঙ্কং ন ভিন্দিস্সামী’’তি চতুরঙ্গৰীরিযং অধিট্ঠহিত্ৰা পল্লঙ্কং আভুজিত্ৰা নিসীদি.

তঙ্খণঞ্ঞেৰ মারো বাহুসহস্সং মাপেত্ৰা দিযড্ঢযোজনসতিকং গিরিমেখলং নাম হত্থিং আরুয্হ নৰযোজনং মারবলং গহেত্ৰা অদ্ধক্খিকেন ওলোকযমানো পব্বতো ৰিয অজ্ঝোত্থরন্তো উপসঙ্কমি. মহাসত্তো, ‘‘ময্হং দস পারমিযো পূরেন্তস্স অঞ্ঞো সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা সক্খি নত্থি, ৰেস্সন্তরত্তভাৰে পন ময্হং সত্তসু ৰারেসু মহাপথৰী সক্খি অহোসি; ইদানিপি মে অযমেৰ অচেতনা কট্ঠকলিঙ্গরূপমা মহাপথৰী সক্খী’’তি হত্থং পসারেতি. মহাপথৰী তাৰদেৰ অযদণ্ডেন পহতং কংসথালং ৰিয রৰসতং রৰসহস্সং মুঞ্চমানা ৰিরৰিত্ৰা পরিৰত্তমানা মারবলং চক্কৰাল়মুখৰট্টিযং মুঞ্চনমকাসি. মহাসত্তো সূরিযে ধরমানেযেৰ মারবলং ৰিধমিত্ৰা পঠমযামে পুব্বেনিৰাসঞাণং, মজ্ঝিমযামে দিব্বচক্খুং ৰিসোধেত্ৰা পচ্ছিমযামে পটিচ্চসমুপ্পাদে ঞাণং ওতারেত্ৰা ৰট্টৰিৰট্টং সম্মসিত্ৰা অরুণোদযে বুদ্ধো হুত্ৰা, ‘‘মযা অনেককপ্পকোটিসতসহস্সং অদ্ধানং ইমস্স পল্লঙ্কস্স অত্থায ৰাযামো কতো’’তি সত্তাহং একপল্লঙ্কেন নিসীদি. অথেকচ্চানং দেৰতানং, ‘‘কিং নু খো অঞ্ঞেপি বুদ্ধত্তকরা ধম্মা অত্থী’’তি কঙ্খা উদপাদি.

অথ ভগৰা অট্ঠমে দিৰসে সমাপত্তিতো ৰুট্ঠায দেৰতানং কঙ্খং ঞত্ৰা কঙ্খাৰিধমনত্থং আকাসে উপ্পতিত্ৰা যমকপাটিহারিযং দস্সেত্ৰা তাসং কঙ্খং ৰিধমিত্ৰা পল্লঙ্কতো ঈসকং পাচীননিস্সিতে উত্তরদিসাভাগে ঠত্ৰা চত্তারি অসঙ্খ্যেয্যানি কপ্পসতসহস্সঞ্চ পূরিতানং পারমীনং ফলাধিগমট্ঠানং পল্লঙ্কঞ্চেৰ বোধিরুক্খঞ্চ অনিমিসেহি অক্খীহি ওলোকযমানো সত্তাহং ৰীতিনামেসি, তং ঠানং অনিমিসচেতিযং নাম জাতং.

অথ পল্লঙ্কস্স চ ঠিতট্ঠানস্স চ অন্তরা পুরত্থিমপচ্ছিমতো আযতে রতনচঙ্কমে চঙ্কমন্তো সত্তাহং ৰীতিনামেসি, তং ঠানং রতনচঙ্কমচেতিযং নাম জাতং. ততো পচ্ছিমদিসাভাগে দেৰতা রতনঘরং মাপযিংসু, তত্থ পল্লঙ্কেন নিসীদিত্ৰা অভিধম্মপিটকং ৰিসেসতো চেত্থ অনন্তনযসমন্তপট্ঠানং ৰিচিনন্তো সত্তাহং ৰীতিনামেসি, তং ঠানং রতনঘরচেতিযং নাম জাতং. এৰং বোধিসমীপেযেৰ চত্তারি সত্তাহানি ৰীতিনামেত্ৰা পঞ্চমে সত্তাহে বোধিরুক্খমূলা যেন অজপালনিগ্রোধো তেনুপসঙ্কমি, তত্রাপি ধম্মং ৰিচিনন্তোযেৰ ৰিমুত্তিসুখঞ্চ পটিসংৰেদেন্তো নিসীদি, ধম্মং ৰিচিনন্তো চেত্থ এৰং অভিধম্মে নযমগ্গং সম্মসি – পঠমং ধম্মসঙ্গণীপকরণং নাম, ততো ৰিভঙ্গপকরণং, ধাতুকথাপকরণং, পুগ্গলপঞ্ঞত্তিপকরণং, কথাৰত্থু নাম পকরণং, যমকং নাম পকরণং, ততো মহাপকরণং পট্ঠানং নামাতি.

তত্থস্স সণ্হসুখুমপট্ঠানম্হি চিত্তে ওতিণ্ণে পীতি উপ্পজ্জি; পীতিযা উপ্পন্নায লোহিতং পসীদি, লোহিতে পসন্নে ছৰি পসীদি. ছৰিযা পসন্নায পুরত্থিমকাযতো কূটাগারাদিপ্পমাণা রস্মিযো উট্ঠহিত্ৰা আকাসে পক্খন্দছদ্দন্তনাগকুলং ৰিয পাচীনদিসায অনন্তানি চক্কৰাল়ানি পক্খন্দা, পচ্ছিমকাযতো উট্ঠহিত্ৰা পচ্ছিমদিসায, দক্খিণংসকূটতো উট্ঠহিত্ৰা দক্খিণদিসায, ৰামংসকূটতো উট্ঠহিত্ৰা উত্তরদিসায অনন্তানি চক্কৰাল়ানি পক্খন্দা, পাদতলেহি পৰাল়ঙ্কুরৰণ্ণা রস্মিযো নিক্খমিত্ৰা মহাপথৰিং ৰিনিৰিজ্ঝিত্ৰা উদকং দ্ৰিধা ভিন্দিত্ৰা ৰাতক্খন্ধং পদালেত্ৰা অজটাকাসং পক্খন্দা, সীসতো সম্পরিৰত্তিযমানং মণিদামং ৰিয নীলৰণ্ণা রস্মিৰট্টি উট্ঠহিত্ৰা ছ দেৰলোকে ৰিনিৰিজ্ঝিত্ৰা নৰ ব্রহ্মলোকে ৰেহপ্ফলে পঞ্চ সুদ্ধাৰাসে চ ৰিনিৰিজ্ঝিত্ৰা চত্তারো আরুপ্পে অতিক্কম্ম অজটাকাসং পক্খন্দা. তস্মিং দিৰসে অপরিমাণেসু চক্কৰাল়েসু অপরিমাণা সত্তা সব্বে সুৰণ্ণৰণ্ণাৰ অহেসুং. তং দিৰসঞ্চ পন ভগৰতো সরীরা নিক্খন্তা যাৰজ্জদিৰসাপি তা রস্মিযো অনন্তা লোকধাতুযো গচ্ছন্তিযেৰ.

এৰং ভগৰা অজপালনিগ্রোধে সত্তাহং ৰীতিনামেত্ৰা ততো অপরং সত্তাহং মুচলিন্দে নিসীদি, নিসিন্নমত্তস্সেৰ চস্স সকলং চক্কৰাল়গব্ভং পূরেন্তো মহাঅকালমেঘো উদপাদি. এৰরূপো কির মহামেঘো দ্ৰীসুযেৰ কালেসু ৰস্সতি চক্কৰত্তিম্হি ৰা উপ্পন্নে বুদ্ধে ৰা. ইধ বুদ্ধকালে উদপাদি. তস্মিং পন উপ্পন্নে মুচলিন্দো নাগরাজা চিন্তেসি – ‘‘অযং মেঘো সত্থরি ময্হং ভৰনং পৰিট্ঠমত্তেৰ উপ্পন্নো, ৰাসাগারমস্স লদ্ধুং ৰট্টতী’’তি. সো সত্তরতনমযং পাসাদং নিম্মিনিতুং সক্কোন্তোপি এৰং কতে ময্হং মহপ্ফলং ন ভৰিস্সতি, দসবলস্স কাযৰেয্যাৰচ্চং করিস্সামীতি মহন্তং অত্তভাৰং কত্ৰা সত্থারং সত্তক্খত্তুং ভোগেহি পরিক্খিপিত্ৰা উপরি ফণং ধারেসি. পরিক্খেপস্স অন্তো ওকাসো হেট্ঠা লোহপাসাদপ্পমাণো অহোসি. ইচ্ছিতিচ্ছিতেন ইরিযাপথেন সত্থা ৰিহরিস্সতীতি নাগরাজস্স অজ্ঝাসযো অহোসি. তস্মা এৰং মহন্তং ওকাসং পরিক্খিপি. মজ্ঝে রতনপল্লঙ্কো পঞ্ঞত্তো হোতি, উপরি সুৰণ্ণতারকৰিচিত্তং সমোসরিতগন্ধদামকুসুমদামচেলৰিতানং অহোসি. চতূসু কোণেসু গন্ধতেলেন দীপা জলিতা, চতূসু দিসাসু ৰিৰরিত্ৰা চন্দনকরণ্ডকা ঠপিতা. এৰং ভগৰা তং সত্তাহং তত্থ ৰীতিনামেত্ৰা ততো অপরং সত্তাহং রাজাযতনে নিসীদি.

অট্ঠমে সত্তাহে সক্কেন দেৰানমিন্দেন আভতং দন্তকট্ঠঞ্চ ওসধহরীতকঞ্চ খাদিত্ৰা মুখং ধোৰিত্ৰা চতূহি লোকপালেহি উপনীতে পচ্চগ্ঘে সেলমযে পত্তে তপুস্সভল্লিকানং পিণ্ডপাতং পরিভুঞ্জিত্ৰা পুন পচ্চাগন্ত্ৰা অজপালনিগ্রোধে নিসিন্নস্স সব্ববুদ্ধানং আচিণ্ণো অযং ৰিতক্কো উদপাদি.

তত্থ পণ্ডিতোতি পণ্ডিচ্চেন সমন্নাগতো. ৰিযত্তোতি ৰেয্যত্তিযেন সমন্নাগতো. মেধাৰীতি ঠানুপ্পত্তিযা পঞ্ঞায সমন্নাগতো. অপ্পরজক্খজাতিকোতি সমাপত্তিযা ৰিক্খম্ভিতত্তা নিক্কিলেসজাতিকো ৰিসুদ্ধসত্তো. আজানিস্সতীতি সল্লক্খেস্সতি পটিৰিজ্ঝিস্সতি. ঞাণঞ্চ পন মেতি ময্হম্পি সব্বঞ্ঞুতঞ্ঞাণং উপ্পজ্জি. ভগৰা কির দেৰতায কথিতেনেৰ নিট্ঠং অগন্ত্ৰা সযম্পি সব্বঞ্ঞুতঞ্ঞাণেন ওলোকেন্তো ইতো সত্তমদিৰসমত্থকে কালং কত্ৰা আকিঞ্চঞ্ঞাযতনে নিব্বত্তোতি অদ্দস. তং সন্ধাযাহ – ‘‘ঞাণঞ্চ পন মে দস্সনং উদপাদী’’তি. মহাজানিযোতি সত্তদিৰসব্ভন্তরে পত্তব্বমগ্গফলতো পরিহীনত্তা মহতী জানি অস্সাতি মহাজানিযো. অক্খণে নিব্বত্তত্তা গন্ত্ৰা দেসিযমানং ধম্মম্পিস্স সোতুং সোতপ্পসাদো নত্থি, ইধ ধম্মদেসনট্ঠানং আগমনপাদাপি নত্থি, এৰং মহাজানিযো জাতোতি দস্সেতি. অভিদোসকালঙ্কতোতি অড্ঢরত্তে কালঙ্কতো. ঞাণঞ্চ পন মেতি ময্হম্পি সব্বঞ্ঞুতঞ্ঞাণং উদপাদি. ইধাপি কির ভগৰা দেৰতায ৰচনেন সন্নিট্ঠানং অকত্ৰা সব্বঞ্ঞুতঞ্ঞাণেন ওলোকেন্তো ‘‘হিয্যো অড্ঢরত্তে কালঙ্কত্ৰা উদকো রামপুত্তো নেৰসঞ্ঞানাসঞ্ঞাযতনে নিব্বত্তো’’তি অদ্দস. তস্মা এৰমাহ. সেসং পুরিমনযসদিসমেৰ. বহুকারাতি বহূপকারা. পধানপহিতত্তং উপট্ঠহিংসূতি পধানত্থায পেসিতত্তভাৰং ৰসনট্ঠানে পরিৰেণসম্মজ্জনেন পত্তচীৰরং গহেত্ৰা অনুবন্ধনেন মুখোদকদন্তকট্ঠদানাদিনা চ উপট্ঠহিংসু. কে পন তে পঞ্চৰগ্গিযা নাম? যেতে –

রামো ধজো লক্খণো জোতিমন্তি,

যঞ্ঞো সুভোজো সুযামো সুদত্তো;

এতে তদা অট্ঠ অহেসুং ব্রাহ্মণা,

ছল়ঙ্গৰা মন্তং ৰিযাকরিংসূতি.

বোধিসত্তস্স জাতকালে সুপিনপটিগ্গাহকা চেৰ লক্খণপটিগ্গাহকা চ অট্ঠ ব্রাহ্মণা. তেসু তযো দ্ৰেধা ব্যাকরিংসু – ‘‘ইমেহি লক্খণেহি সমন্নাগতো অগারং অজ্ঝাৰসমানো রাজা হোতি চক্কৰত্তী, পব্বজমানো বুদ্ধো’’তি. পঞ্চ ব্রাহ্মণা একংসব্যাকরণা অহেসুং – ‘‘ইমেহি লক্খণেহি সমন্নাগতো অগারে ন তিট্ঠতি, বুদ্ধোৰ হোতী’’তি. তেসু পুরিমা তযো যথামন্তপদং গতা, ইমে পন পঞ্চ মন্তপদং অতিক্কন্তা. তে অত্তনা লদ্ধং পুণ্ণপত্তং ঞাতকানং ৰিস্সজ্জেত্ৰা ‘‘অযং মহাপুরিসো অগারং ন অজ্ঝাৰসিস্সতি, একন্তেন বুদ্ধো ভৰিস্সতী’’তি নিব্বিতক্কা বোধিসত্তং উদ্দিস্স সমণপব্বজ্জং পব্বজিতা. তেসং পুত্তাতিপি ৰদন্তি. তং অট্ঠকথায পটিক্খিত্তং.

এতে কির দহরকালেযেৰ বহূ মন্তে জানিংসু, তস্মা তে ব্রাহ্মণা আচরিযট্ঠানে ঠপযিংসু. তে পচ্ছা অম্হেহি পুত্তদারজটং ছড্ডেত্ৰা ন সক্কা ভৰিস্সতি পব্বজিতুন্তি দহরকালেযেৰ পব্বজিত্ৰা রমণীযানি সেনাসনানি পরিভুঞ্জন্তা ৰিচরিংসু. কালেন কালং পন ‘‘কিং, ভো, মহাপুরিসো মহাভিনিক্খমনং নিক্খন্তো’’তি পুচ্ছন্তি. মনুস্সা, ‘‘কুহিং তুম্হে মহাপুরিসং পস্সিস্সথ, তীসু পাসাদেসু তিৰিধনাটকমজ্ঝে দেৰো ৰিয সম্পত্তিং অনুভোতী’’তি ৰদন্তি. তে সুত্ৰা, ‘‘ন তাৰ মহাপুরিসস্স ঞাণং পরিপাকং গচ্ছতী’’তি অপ্পোস্সুক্কা ৰিহরিংসুযেৰ. কস্মা পনেত্থ ভগৰা, ‘‘বহুকারা খো ইমে পঞ্চৰগ্গিযা’’তি আহ? কিং উপকারকানংযেৰ এস ধম্মং দেসেতি, অনুপকারকানং ন দেসেতীতি? নো ন দেসেতি. পরিচযৰসেন হেস আল়ারঞ্চেৰ কালামং উদকঞ্চ রামপুত্তং ওলোকেসি. এতস্মিং পন বুদ্ধক্খেত্তে ঠপেত্ৰা অঞ্ঞাসিকোণ্ডঞ্ঞং পঠমং ধম্মং সচ্ছিকাতুং সমত্থো নাম নত্থি. কস্মা? তথাৰিধউপনিস্সযত্তা.

পুব্বে কির পুঞ্ঞকরণকালে দ্ৰে ভাতরো অহেসুং. তে একতোৰ সস্সং অকংসু. তত্থ জেট্ঠকস্স ‘‘একস্মিং সস্সে নৰৰারে অগ্গসস্সদানং মযা দাতব্ব’’ন্তি অহোসি. সো ৰপ্পকালে বীজগ্গং নাম দত্ৰা গব্ভকালে কনিট্ঠেন সদ্ধিং মন্তেসি – ‘‘গব্ভকালে গব্ভং ফালেত্ৰা দস্সামা’’তি. কনিট্ঠো ‘‘তরুণসস্সং নাসেতুকামোসী’’তি আহ. জেট্ঠো কনিট্ঠস্স অননুৰত্তনভাৰং ঞত্ৰা খেত্তং ৰিভজিত্ৰা অত্তনো কোট্ঠাসতো গব্ভং ফালেত্ৰা খীরং নীহরিত্ৰা সপ্পিফাণিতেহি যোজেত্ৰা অদাসি, পুথুককালে পুথুকং কারেত্ৰা অদাসি, লাযনে লাযনগ্গং ৰেণিকরণে ৰেণগ্গং কলাপাদীসু কলাপগ্গং খল়গ্গং ভণ্ডগ্গং কোট্ঠগ্গন্তি এৰং একসস্সে নৰৰারে অগ্গদানং অদাসি. কনিট্ঠো পনস্স উদ্ধরিত্ৰা অদাসি, তেসু জেট্ঠো অঞ্ঞাসিকোণ্ডঞ্ঞত্থেরো জাতো, কনিট্ঠো সুভদ্দপরিব্বাজকো. ইতি একস্মিং সস্সে নৰন্নং অগ্গদানানং দিন্নত্তা ঠপেত্ৰা থেরং অঞ্ঞো পঠমং ধম্মং সচ্ছিকাতুং সমত্থো নাম নত্থি. ‘‘বহুকারা খো ইমে পঞ্চৰগ্গিযা’’তি ইদং পন উপকারানুস্সরণমত্তকেনেৰ ৰুত্তং.

ইসিপতনে মিগদাযেতি তস্মিং কির পদেসে অনুপ্পন্নে বুদ্ধে পচ্চেকসম্বুদ্ধা গন্ধমাদনপব্বতে সত্তাহং নিরোধসমাপত্তিযা ৰীতিনামেত্ৰা নিরোধা ৰুট্ঠায নাগলতাদন্তকট্ঠং খাদিত্ৰা অনোতত্তদহে মুখং ধোৰিত্ৰা পত্তচীৰরমাদায আকাসেন আগন্ত্ৰা নিপতন্তি. তত্থ চীৰরং পারুপিত্ৰা নগরে পিণ্ডায চরিত্ৰা কতভত্তকিচ্চা গমনকালেপি ততোযেৰ উপ্পতিত্ৰা গচ্ছন্তি. ইতি ইসযো এত্থ নিপতন্তি উপ্পতন্তি চাতি তং ঠানং ইসিপতনন্তি সঙ্খং গতং. মিগানং পন অভযত্থায দিন্নত্তা মিগদাযোতি ৰুচ্চতি. তেন ৰুত্তং ‘‘ইসিপতনে মিগদাযে’’তি.

২৮৫. অন্তরা চ গযং অন্তরা চ বোধিন্তি গযায চ বোধিস্স চ ৰিৰরে তিগাৰুতন্তরে ঠানে. বোধিমণ্ডতো হি গযা তীণি গাৰুতানি. বারাণসী অট্ঠারস যোজনানি. উপকো বোধিমণ্ডস্স চ গযায চ অন্তরে ভগৰন্তং অদ্দস. অন্তরাসদ্দেন পন যুত্তত্তা উপযোগৰচনং কতং. ঈদিসেসু চ ঠানেসু অক্খরচিন্তকা ‘‘অন্তরা গামঞ্চ নদিঞ্চ যাতী’’তি এৰং একমেৰ অন্তরাসদ্দং পযুজ্জন্তি. সো দুতিযপদেনপি যোজেতব্বো হোতি. অযোজিযমানে উপযোগৰচনং ন পাপুণাতি. ইধ পন যোজেত্ৰা এৰ ৰুত্তোতি. অদ্ধানমগ্গপটিপন্নন্তি অদ্ধানসঙ্খাতং মগ্গং পটিপন্নং, দীঘমগ্গপটিপন্নন্তি অত্থো. অদ্ধানমগ্গগমনসমযস্স হি ৰিভঙ্গে ‘‘অদ্ধযোজনং গচ্ছিস্সামীতি ভুঞ্জিতব্ব’’ন্তিআদিৰচনতো (পাচি. ২১৮) অদ্ধযোজনম্পি অদ্ধানমগ্গো হোতি. বোধিমণ্ডতো পন গযা তিগাৰুতং.

সব্বাভিভূতি সব্বং তেভূমকধম্মং অভিভৰিত্ৰা ঠিতো. সব্বৰিদূতি সব্বং চতুভূমকধম্মং অৰেদিং অঞ্ঞাসিং. সব্বেসু ধম্মেসু অনুপলিত্তোতি সব্বেসু তেভূমকধম্মেসু কিলেসলেপনেন অনুপলিত্তো. সব্বং জহোতি সব্বং তেভূমকধম্মং জহিত্ৰা ঠিতো. তণ্হাক্খযে ৰিমুত্তোতি তণ্হাক্খযে নিব্বানে আরম্মণতো ৰিমুত্তো. সযং অভিঞ্ঞাযাতি সব্বং চতুভূমকধম্মং অত্তনাৰ জানিত্ৰা. কমুদ্দিসেয্যন্তি কং অঞ্ঞং ‘‘অযং মে আচরিযো’’তি উদ্দিসেয্যং.

ন মে আচরিযো অত্থীতি লোকুত্তরধম্মে ময্হং আচরিযো নাম নত্থি. নত্থি মে পটিপুগ্গলোতি ময্হং পটিভাগপুগ্গলো নাম নত্থি. সম্মাসম্বুদ্ধোতি সহেতুনা নযেন চত্তারি সচ্চানি সযং বুদ্ধো. সীতিভূতোতি সব্বকিলেসগ্গিনিব্বাপনেন সীতিভূতো. কিলেসানংযেৰ নিব্বুতত্তা নিব্বুতো. কাসিনং পুরন্তি কাসিরট্ঠে নগরং. আহঞ্ছং অমতদুন্দুভিন্তি ধম্মচক্কপটিলাভায অমতভেরিং পহরিস্সামীতি গচ্ছামি. অরহসি অনন্তজিনোতি অনন্তজিনোতি ভৰিতুং যুত্তো. হুপেয্য পাৰুসোতি, আৰুসো, এৰম্পি নাম ভৰেয্য. পক্কামীতি ৰঙ্কহারজনপদং নাম অগমাসি.

তত্থেকং মিগলুদ্দকগামকং নিস্সায ৰাসং কপ্পেসি. জেট্ঠকলুদ্দকো তং উপট্ঠাসি. তস্মিঞ্চ জনপদে চণ্ডা মক্খিকা হোন্তি. অথ নং একায চাটিযা ৰসাপেসুং, মিগলুদ্দকো দূরে মিগৰং গচ্ছন্তো ‘‘অম্হাকং অরহন্তে মা পমজ্জী’’তি ছাৰং নাম ধীতরং আণাপেত্ৰা অগমাসি সদ্ধিং পুত্তভাতুকেহি. সা চস্স ধীতা দস্সনীযা হোতি কোট্ঠাসসম্পন্না. দুতিযদিৰসে উপকো ঘরং আগতো তং দারিকং সব্বং উপচারং কত্ৰা পরিৰিসিতুং উপগতং দিস্ৰা রাগেন অভিভূতো ভুঞ্জিতুম্পি অসক্কোন্তো ভাজনেন ভত্তং আদায ৰসনট্ঠানং গন্ত্ৰা ভত্তং একমন্তে নিক্খিপিত্ৰা সচে ছাৰং লভামি, জীৰামি, নো চে, মরামীতি নিরাহারো সযি. সত্তমে দিৰসে মাগৰিকো আগন্ত্ৰা ধীতরং উপকস্স পৰত্তিং পুচ্ছি. সা ‘‘একদিৰসমেৰ আগন্ত্ৰা পুন নাগতপুব্বো’’তি আহ. মাগৰিকো আগতৰেসেনেৰ নং উপসঙ্কমিত্ৰা পুচ্ছিস্সামীতি তংখণংযেৰ গন্ত্ৰা ‘‘কিং, ভন্তে, অপ্ফাসুক’’ন্তি পাদে পরামসন্তো পুচ্ছি. উপকো নিত্থুনন্তো পরিৰত্ততিযেৰ. সো ‘‘ৰদথ ভন্তে, যং মযা সক্কা কাতুং, তং সব্বং করিস্সামী’’তি আহ. উপকো, ‘‘সচে ছাৰং লভামি, জীৰামি, নো চে, ইধেৰ মরণং সেয্যো’’তি আহ. জানাসি পন, ভন্তে, কিঞ্চি সিপ্পন্তি. ন জানামীতি. ন, ভন্তে, কিঞ্চি সিপ্পং অজানন্তেন সক্কা ঘরাৰাসং অধিট্ঠাতুন্তি.

সো আহ – ‘‘নাহং কিঞ্চি সিপ্পং জানামি, অপিচ তুম্হাকং মংসহারকো ভৰিস্সামি, মংসঞ্চ ৰিক্কীণিস্সামী’’তি. মাগৰিকো, ‘‘অম্হাকম্পি এতদেৰ রুচ্চতী’’তি উত্তরসাটকং দত্ৰা ঘরং আনেত্ৰা ধীতরং অদাসি. তেসং সংৰাসমন্ৰায পুত্তো ৰিজাযি. সুভদ্দোতিস্স নামং অকংসু. ছাৰা তস্স রোদনকালে ‘‘মংসহারকস্স পুত্ত, মিগলুদ্দকস্স পুত্ত মা রোদী’’তিআদীনি ৰদমানা পুত্ততোসনগীতেন উপকং উপ্পণ্ডেসি. ভদ্দে ত্ৰং মং অনাথোতি মঞ্ঞসি. অত্থি মে অনন্তজিনো নাম সহাযো. তস্সাহং সন্তিকে গমিস্সামীতি আহ. ছাৰা এৰমযং অট্টীযতীতি ঞত্ৰা পুনপ্পুনং কথেতি. সো একদিৰসং অনারোচেত্ৰাৰ মজ্ঝিমদেসাভিমুখো পক্কামি.

ভগৰা চ তেন সমযেন সাৰত্থিযং ৰিহরতি জেতৰনে মহাৰিহারে. অথ খো ভগৰা পটিকচ্চেৰ ভিক্খূ আণাপেসি – ‘‘যো, ভিক্খৰে, ‘অনন্তজিনো’তি পুচ্ছমানো আগচ্ছতি, তস্স মং দস্সেয্যাথা’’তি. উপকোপি খো ‘‘কুহিং অনন্তজিনো ৰসতী’’তি পুচ্ছন্তো অনুপুব্বেন সাৰত্থিং আগন্ত্ৰা ৰিহারমজ্ঝে ঠত্ৰা কুহিং অনন্তজিনোতি পুচ্ছি. তং ভিক্খূ ভগৰতো সন্তিকং নযিংসু. সো ভগৰন্তং দিস্ৰা – ‘‘সঞ্জানাথ মং ভগৰা’’তি আহ. আম, উপক, সঞ্জানামি, কুহিং পন ত্ৰং ৰসিত্থাতি. ৰঙ্কহারজনপদে, ভন্তেতি. উপক, মহল্লকোসি জাতো পব্বজিতুং সক্খিস্সসীতি. পব্বজিস্সামি, ভন্তেতি. ভগৰা পব্বাজেত্ৰা তস্স কম্মট্ঠানং অদাসি. সো কম্মট্ঠানে কম্মং করোন্তো অনাগামিফলে পতিট্ঠায কালং কত্ৰা অৰিহেসু নিব্বত্তো. নিব্বত্তক্খণেযেৰ অরহত্তং পাপুণীতি. অৰিহেসু নিব্বত্তমত্তা হি সত্ত জনা অরহত্তং পাপুণিংসু, তেসং সো অঞ্ঞতরো.

ৰুত্তঞ্হেতং –

‘‘অৰিহং উপপন্নাসে, ৰিমুত্তা সত্ত ভিক্খৰো;

রাগদোসপরিক্খীণা, তিণ্ণা লোকে ৰিসত্তিকং.

উপকো পলগণ্ডো চ, পুক্কুসাতি চ তে তযো;

ভদ্দিযো খণ্ডদেৰো চ, বহুরগ্গি চ সঙ্গিযো;

তে হিত্ৰা মানুসং দেহং, দিব্বযোগং উপজ্ঝগু’’ন্তি. (সং. নি. ১.১০৫);

২৮৬. সণ্ঠপেসুন্তি কতিকং অকংসু. বাহুল্লিকোতি চীৰরবাহুল্লাদীনং অত্থায পটিপন্নো. পধানৰিব্ভন্তোতি পধানতো ৰিব্ভন্তো ভট্ঠো পরিহীনো. আৰত্তো বাহুল্লাযাতি চীৰরাদীনং বহুলভাৰত্থায আৰত্তো. অপিচ খো আসনং ঠপেতব্বন্তি অপিচ খো পনস্স উচ্চকুলে নিব্বত্তস্স আসনমত্তং ঠপেতব্বন্তি ৰদিংসু. নাসক্খিংসূতি বুদ্ধানুভাৰেন বুদ্ধতেজসা অভিভূতা অত্তনো কতিকায ঠাতুং নাসক্খিংসু. নামেন চ আৰুসোৰাদেন চ সমুদাচরন্তীতি গোতমাতি, আৰুসোতি চ ৰদন্তি. আৰুসো গোতম, মযং উরুৰেলাযং পধানকালে তুয্হং পত্তচীৰরং গহেত্ৰা ৰিচরিম্হা, মুখোদকং দন্তকট্ঠং অদম্হা, ৰুত্থপরিৰেণং সম্মজ্জিম্হা, পচ্ছা কো তে ৰত্তপ্পটিপত্তিমকাসি, কচ্চি অম্হেসু পক্কন্তেসু ন চিন্তযিত্থাতি এৰরূপিং কথং কথেন্তীতি অত্থো. ইরিযাযাতি দুক্করইরিযায. পটিপদাযাতি দুক্করপটিপত্তিযা. দুক্করকারিকাযাতি পসতপসত-মুগ্গযূসাদিআহরকরণাদিনা দুক্করকরণেন. অভিজানাথ মে নোতি অভিজানাথ নু মম. এৰরূপং পভাৰিতমেতন্তি এতং এৰরূপং ৰাক্যভেদন্তি অত্থো. অপি নু অহং উরুৰেলায পধানে তুম্হাকং সঙ্গণ্হনত্থং অনুক্কণ্ঠনত্থং রত্তিং ৰা দিৰা ৰা আগন্ত্ৰা, – ‘‘আৰুসো, মা ৰিতক্কযিত্থ, ময্হং ওভাসো ৰা নিমিত্তং ৰা পঞ্ঞাযতী’’তি এৰরূপং কঞ্চি ৰচনভেদং অকাসিন্তি অধিপ্পাযো. তে একপদেনেৰ সতিং লভিত্ৰা উপ্পন্নগারৰা, ‘‘হন্দ অদ্ধা এস বুদ্ধো জাতো’’তি সদ্দহিত্ৰা নো হেতং, ভন্তেতি আহংসু. অসক্খিং খো অহং, ভিক্খৰে, পঞ্চৰগ্গিযে ভিক্খূ সঞ্ঞাপেতুন্তি অহং, ভিক্খৰে, পঞ্চৰগ্গিযে ভিক্খূ বুদ্ধো অহন্তি জানাপেতুং অসক্খিং. তদা পন ভগৰা উপোসথদিৰসেযেৰ আগচ্ছি. অত্তনো বুদ্ধভাৰং জানাপেত্ৰা কোণ্ডঞ্ঞত্থেরং কাযসক্খিং কত্ৰা ধম্মচক্কপ্পৰত্তনসুত্তং কথেসি. সুত্তপরিযোসানে থেরো অট্ঠারসহি ব্রহ্মকোটীহি সদ্ধিং সোতাপত্তিফলে পতিট্ঠাসি. সূরিযে ধরমানেযেৰ দেসনা নিট্ঠাসি. ভগৰা তত্থেৰ ৰস্সং উপগচ্ছি.

দ্ৰেপি সুদং, ভিক্খৰে, ভিক্খূ ওৰদামীতিআদি পাটিপদদিৰসতো পট্ঠায পিণ্ডপাতত্থাযপি গামং অপ্পৰিসনদীপনত্থং ৰুত্তং. তেসঞ্হি ভিক্খূনং কম্মট্ঠানেসু উপ্পন্নমলৰিসোধনত্থং ভগৰা অন্তোৰিহারেযেৰ অহোসি. উপ্পন্নে উপ্পন্নে কম্মট্ঠানমলে তেপি ভিক্খূ ভগৰতো সন্তিকং গন্ত্ৰা পুচ্ছন্তি. ভগৰাপি তেসং নিসিন্নট্ঠানং গন্ত্ৰা মলং ৰিনোদেতি. অথ নেসং ভগৰতা এৰং নীহটভত্তেন ওৰদিযমানানং ৰপ্পত্থেরো পাটিপদদিৰসে সোতাপন্নো অহোসি. ভদ্দিযত্থেরো দুতিযাযং, মহানামত্থেরো ততিযাযং, অস্সজিত্থেরো চতুত্থিযং. পক্খস্স পন পঞ্চমিযং সব্বেৰ তে একতো সন্নিপাতেত্ৰা অনত্তলক্খণসুত্তং কথেসি, সুত্তপরিযোসানে সব্বেপি অরহত্তফলে পতিট্ঠহিংসু. তেনাহ – ‘‘অথ খো, ভিক্খৰে, পঞ্চৰগ্গিযা ভিক্খূ মযা এৰং ওৰদিযমানা…পে… অনুত্তরং যোগক্খেমং নিব্বানং অজ্ঝগমংসু…পে… নত্থি দানি পুনব্ভৰো’’তি. এত্তকং কথামগ্গং ভগৰা যং পুব্বে অৰচ – ‘‘তুম্হেপি মমঞ্চেৰ পঞ্চৰগ্গিযানঞ্চ মগ্গং আরুল়্হা, অরিযপরিযেসনা তুম্হাকং পরিযেসনা’’তি ইমং একমেৰ অনুসন্ধিং দস্সেন্তো আহরি.

২৮৭. ইদানি যস্মা ন অগারিযানংযেৰ পঞ্চকামগুণপরিযেসনা হোতি, অনগারিযানম্পি চত্তারো পচ্চযে অপ্পচ্চৰেক্খিত্ৰা পরিভুঞ্জন্তানং পঞ্চকামগুণৰসেন অনরিযপরিযেসনা হোতি, তস্মা তং দস্সেতুং পঞ্চিমে, ভিক্খৰে, কামগুণাতিআদিমাহ. তত্থ নৰরত্তেসু পত্তচীৰরাদীসু চক্খুৰিঞ্ঞেয্যা রূপাতিআদযো চত্তারো কামগুণা লব্ভন্তি. রসো পনেত্থ পরিভোগরসো হোতি. মনুঞ্ঞে পিণ্ডপাতে ভেসজ্জে চ পঞ্চপি লব্ভন্তি. সেনাসনম্হি চীৰরে ৰিয চত্তারো. রসো পন এত্থাপি পরিভোগরসোৰ. যে হি কেচি, ভিক্খৰেতি কস্মা আরভি? এৰং পঞ্চ কামগুণে দস্সেত্ৰা ইদানি যে এৰং ৰদেয্যুং, ‘‘পব্বজিতকালতো পট্ঠায অনরিযপরিযেসনা নাম কুতো, অরিযপরিযেসনাৰ পব্বজিতান’’ন্তি, তেসং পটিসেধনত্থায ‘‘পব্বজিতানম্পি চতূসু পচ্চযেসু অপ্পচ্চৰেক্খণপরিভোগো অনরিযপরিযেসনা এৰা’’তি দস্সেতুং ইমং দেসনং আরভি. তত্থ গধিতাতি তণ্হাগেধেন গধিতা. মুচ্ছিতাতি তণ্হামুচ্ছায মুচ্ছিতা. অজ্ঝোপন্নাতি তণ্হায অজ্ঝোগাল়্হা. অনাদীনৰদস্সাৰিনোতি আদীনৰং অপস্সন্তা. অনিস্সরণপঞ্ঞাতি নিস্সরণং ৰুচ্চতি পচ্চৰেক্খণঞাণং. তে তেন ৰিরহিতা.

ইদানি তস্সত্থস্স সাধকং উপমং দস্সেন্তো সেয্যথাপি, ভিক্খৰেতিআদিমাহ. তত্রেৰং ওপম্মসংসন্দনং ৰেদিতব্বং – আরঞ্ঞকমগো ৰিয হি সমণব্রাহ্মণা, লুদ্দকেন অরঞ্ঞে ঠপিতপাসো ৰিয চত্তারো পচ্চযা, তস্স লুদ্দস্স পাসরাসিং অজ্ঝোত্থরিত্ৰা সযনকালো ৰিয তেসং চত্তারো পচ্চযে অপ্পচ্চৰেক্খিত্ৰা পরিভোগকালো. লুদ্দকে আগচ্ছন্তে মগস্স যেন কামং অগমনকালো ৰিয সমণব্রাহ্মণানং মারস্স যথাকামকরণীযকালো, মারৰসং উপগতভাৰোতি অত্থো. মগস্স পন অবদ্ধস্স পাসরাসিং অধিসযিতকালো ৰিয সমণব্রাহ্মণানং চতূসু পচ্চযেসু পচ্চৰেক্খণপরিভোগো, লুদ্দকে আগচ্ছন্তে মগস্স যেন কামং গমনং ৰিয সমণব্রাহ্মণানং মারৰসং অনুপগমনং ৰেদিতব্বং. ৰিস্সত্থোতি নিব্ভযো নিরাসঙ্কো. সেসং সব্বত্থ উত্তানত্থমেৰাতি.

পপঞ্চসূদনিযা মজ্ঝিমনিকাযট্ঠকথায

পাসরাসিসুত্তৰণ্ণনা নিট্ঠিতা.

অরিযপরিযেসনাতিপি এতস্সেৰ নামং.

৭. চূল়হত্থিপদোপমসুত্তৰণ্ণনা

২৮৮. এৰং মে সুতন্তি চূল়হত্থিপদোপমসুত্তং. তত্থ সব্বসেতেন ৰল়ৰাভিরথেনাতি, ‘‘সেতা সুদং অস্সা যুত্তা হোন্তি সেতালঙ্কারা. সেতো রথো সেতালঙ্কারো সেতপরিৰারো, সেতা রস্মিযো, সেতা পতোদলট্ঠি, সেতং ছত্তং, সেতং উণ্হীসং, সেতানি ৰত্থানি, সেতা উপাহনা, সেতায সুদং ৰালবীজনিযা বীজিযতী’’তি (সং. নি. ৫.৪) এৰং ৰুত্তেন সকলসেতেন চতূহি ৰল়ৰাহি যুত্তরথেন.

রথো চ নামেসো দুৰিধো হোতি – যোধরথো, অলঙ্কাররথোতি. তত্থ যোধরথো চতুরস্সসণ্ঠানো হোতি নাতিমহা, দ্ৰিন্নং তিণ্ণং ৰা জনানং গহণসমত্থো. অলঙ্কাররথো মহা হোতি, দীঘতো দীঘো, পুথুলতো পুথুলো. তত্থ ছত্তগ্গাহকো ৰালবীজনিগ্গাহকো তালৰণ্টগ্গাহকোতি এৰং অট্ঠ ৰা দস ৰা সুখেন ঠাতুং ৰা নিসীদিতুং ৰা নিপজ্জিতুং ৰা সক্কোন্তি, অযম্পি অলঙ্কাররথোযেৰ. সো সব্বো সচক্কপঞ্জরকুব্বরো রজতপরিক্খিত্তো অহোসি. ৰল়ৰা পকতিযা সেতৰণ্ণাৰ. পসাধনম্পি তাদিসং রজতমযং অহোসি. রস্মিযোপি রজতপনাল়ি সুপরিক্খিত্তা. পতোদলট্ঠিপি রজতপরিক্খিত্তা. ব্রাহ্মণোপি সেতৰত্থং নিৰাসেত্ৰা সেতংযেৰ উত্তরাসঙ্গমকাসি, সেতৰিলেপনং ৰিলিম্পি, সেতমালং পিলন্ধি, দসসু অঙ্গুলীসু অঙ্গুলিমুদ্দিকা, কণ্ণেসু কুণ্ডলানীতি এৰমাদিঅলঙ্কারোপিস্স রজতমযোৰ অহোসি. পরিৰারব্রাহ্মণাপিস্স দসসহস্সমত্তা তথেৰ সেতৰত্থৰিলেপনমালালঙ্কারা অহেসুং. তেন ৰুত্তং ‘‘সব্বসেতেন ৰল়ৰাভিরথেনা’’তি.

সাৰত্থিযা নিয্যাতীতি সো কির ছন্নং ছন্নং মাসানং একৰারং নগরং পদক্খিণং করোতি. ইতো এত্তকেহি দিৰসেহি নগরং পদক্খিণং করিস্সতীতি পুরেতরমেৰ ঘোসনা করীযতি; তং সুত্ৰা যে নগরতো ন পক্কন্তা, তে ন পক্কমন্তি. যে পক্কন্তা, তেপি, ‘‘পুঞ্ঞৰতো সিরিসম্পত্তিং পস্সিস্সামা’’তি আগচ্ছন্তি. যং দিৰসং ব্রাহ্মণো নগরং অনুৰিচরতি, তদা পাতোৰ নগরৰীথিযো সম্মজ্জিত্ৰা ৰালিকং ওকিরিত্ৰা লাজপঞ্চমেহি পুপ্ফেহি অভিপ্পকিরিত্ৰা পুণ্ণঘটে ঠপেত্ৰা কদলিযো চ ধজে চ উস্সাপেত্ৰা সকলনগরং ধূপিতৰাসিতং করোন্তি. ব্রাহ্মণো পাতোৰ সীসং ন্হাযিত্ৰা পুরেভত্তং ভুঞ্জিত্ৰা ৰুত্তনযেনেৰ সেতৰত্থাদীহি অত্তানং অলঙ্করিত্ৰা পাসাদা ওরুয্হ রথং অভিরুহতি. অথ নং তে ব্রাহ্মণা সব্বসেতৰত্থৰিলেপনমালালঙ্কারা সেতচ্ছত্তানি গহেত্ৰা পরিৰারেন্তি; ততো মহাজনস্স সন্নিপাতনত্থং পঠমংযেৰ তরুণদারকানং ফলাফলানি ৰিকিরিত্ৰা তদনন্তরং মাসকরূপানি; তদনন্তরং কহাপণে ৰিকিরন্তি; মহাজনা সন্নিপতন্তি. উক্কুট্ঠিযো চেৰ চেলুক্খেপা চ পৰত্তন্তি. অথ ব্রাহ্মণো মঙ্গলিকসোৰত্থিকাদীসু মঙ্গলানি চেৰ সুৰত্থিযো চ করোন্তেসু মহাসম্পত্তিযা নগরং অনুৰিচরতি. পুঞ্ঞৰন্তা মনুস্সা একভূমকাদিপাসাদে আরুয্হ সুকপত্তসদিসানি ৰাতপানকৰাটানি ৰিৰরিত্ৰা ওলোকেন্তি. ব্রাহ্মণোপি অত্তনো যসসিরিসম্পত্তিযা নগরং অজ্ঝোত্থরন্তো ৰিয দক্খিণদ্ৰারাভিমুখো হোতি. তেন ৰুত্তং ‘‘সাৰত্থিযা নিয্যাতী’’তি.

দিৰা দিৰস্সাতি দিৰসস্স দিৰা, মজ্ঝন্হকালেতি অত্থো. পিলোতিকং পরিব্বাজকন্তি পিলোতিকাতি এৰং ইত্থিলিঙ্গৰোহারৰসেন লদ্ধনামং পরিব্বাজকং. সো কির পরিব্বাজকো দহরো পঠমৰযে ঠিতো সুৰণ্ণৰণ্ণো বুদ্ধুপট্ঠাকো, পাতোৰ তথাগতস্স চেৰ মহাথেরানঞ্চ উপট্ঠানং কত্ৰা তিদণ্ডকুণ্ডিকাদিপরিক্খারং আদায জেতৰনা নিক্খমিত্ৰা নগরাভিমুখো পাযাসি. তং এস দূরতোৰ আগচ্ছন্তং অদ্দস. এতদৰোচাতি অনুক্কমেন সন্তিকং আগতং সঞ্জানিত্ৰা এতং, ‘‘হন্দ কুতো নু ভৰং ৰচ্ছাযনো আগচ্ছতী’’তি গোত্তং কিত্তেন্তো ৰচনং অৰোচ. পণ্ডিতো মঞ্ঞেতি ভৰং ৰচ্ছাযনো সমণং গোতমং পণ্ডিতোতি মঞ্ঞতি, উদাহু নোতি অযমেত্থ অত্থো.

কো চাহং, ভোতি, ভো, সমণস্স গোতমস্স পঞ্ঞাৰেয্যত্তিযং জাননে অহং কো নাম? কো চ সমণস্স গোতমস্স পঞ্ঞাৰেয্যত্তিযং জানিস্সামীতি কুতো চাহং সমণস্স গোতমস্স পঞ্ঞাৰেয্যত্তিযং জানিস্সামি, কেন কারণেন জানিস্সামীতি? এৰং সব্বথাপি অত্তনো অজাননভাৰং দীপেতি. সোপি নূনস্স তাদিসোৰাতি যো সমণস্স গোতমস্স পঞ্ঞাৰেয্যত্তিযং জানেয্য, সোপি নূন দস পারমিযো পূরেত্ৰা সব্বঞ্ঞুতং পত্তো তাদিসো বুদ্ধোযেৰ ভৰেয্য. সিনেরুং ৰা হিমৰন্তং ৰা পথৰিং ৰা আকাসং ৰা পমেতুকামেন তপ্পমাণোৰ দণ্ডো ৰা রজ্জু ৰা লদ্ধুং ৰট্টতি. সমণস্স গোতমস্স পঞ্ঞং জানন্তেনপি তস্স ঞাণসদিসমেৰ সব্বঞ্ঞুতঞ্ঞাণং লদ্ধুং ৰট্টতীতি দীপেতি. আদরৰসেন পনেত্থ আমেডিতং কতং. উল়ারাযাতি উত্তরায সেট্ঠায. কো চাহং, ভোতি, ভো, অহং সমণস্স গোতমস্স পসংসনে কো নাম? কো চ সমণং গোতমং পসংসিস্সামীতি কেন কারণেন পসংসিস্সামি? পসত্থপসত্থোতি সব্বগুণানং উত্তরিতরেহি সব্বলোকপসত্থেহি অত্তনো গুণেহেৰ পসত্থো, ন তস্স অঞ্ঞেহি পসংসনকিচ্চং অত্থি. যথা হি চম্পকপুপ্ফং ৰা নীলুপ্পলং ৰা পদুমং ৰা লোহিতচন্দনং ৰা অত্তনো ৰণ্ণগন্ধসিরিযাৰ পাসাদিকঞ্চেৰ সুগন্ধঞ্চ, ন তস্স আগন্তুকেহি ৰণ্ণগন্ধেহি থোমনকিচ্চং অত্থি. যথা চ মণিরতনং ৰা চন্দমণ্ডলং ৰা অত্তনো আলোকেনেৰ ওভাসতি, ন তস্স অঞ্ঞেন ওভাসনকিচ্চং অত্থি. এৰং সমণো গোতমো সব্বলোকপসত্থেহি অত্তনো গুণেহেৰ পসত্থো থোমিতো সব্বলোকস্স সেট্ঠতং পাপিতো, ন তস্স অঞ্ঞেন পসংসনকিচ্চং অত্থি. পসত্থেহি ৰা পসত্থোতিপি পসত্থপসত্থো.

কে পসত্থা নাম? রাজা পসেনদি কোসলো কাসিকোসলৰাসিকেহি পসত্থো, বিম্বিসারো অঙ্গমগধৰাসীহি. ৰেসালিকা লিচ্ছৰী ৰজ্জিরট্ঠৰাসীহি পসত্থা. পাৰেয্যকা মল্লা, কোসিনারকা মল্লা, অঞ্ঞেপি তে তে খত্তিযা তেহি তেহি জানপদেহি পসত্থা. চঙ্কীআদযো ব্রাহ্মণা ব্রাহ্মণগণেহি, অনাথপিণ্ডিকাদযো উপাসকা অনেকসতেহি উপাসকগণেহি, ৰিসাখাদযো উপাসিকা অনেকসতাহি উপাসিকাহি, সকুলুদাযিআদযো পরিব্বাজকা অনেকেহি পরিব্বাজকসতেহি, উপ্পলৰণ্ণাথেরিআদিকা মহাসাৰিকা অনেকেহি ভিক্খুনিসতেহি, সারিপুত্তত্থেরাদযো মহাসাৰকা অনেকসতেহি ভিক্খূহি, সক্কাদযো দেৰা অনেকসহস্সেহি দেৰেহি, মহাব্রহ্মাদযো ব্রহ্মানো অনেকসহস্সেহি ব্রহ্মেহি পসত্থা. তে সব্বেপি দসবলং থোমেন্তি ৰণ্ণেন্তি, পসংসন্তীতি ভগৰা ‘‘পসত্থপসত্থো’’তি ৰুচ্চতি.

অত্থৰসন্তি অত্থানিসংসং. অথস্স পরিব্বাজকো অত্তনো পসাদকারণং আচিক্খন্তো সেয্যথাপি, ভো, কুসলো নাগৰনিকোতিআদিমাহ. তত্থ নাগৰনিকোতি নাগৰনৰাসিকো অনুগ্গহিতসিপ্পো পুরিসো. পরতো পন উগ্গহিতসিপ্পো পুরিসো নাগৰনিকোতি আগতো. চত্তারি পদানীতি চত্তারি ঞাণপদানি ঞাণৰলঞ্জানি, ঞাণেন অক্কন্তট্ঠানানীতি অত্থো.

২৮৯. খত্তিযপণ্ডিতেতিআদীসু পণ্ডিতেতি পণ্ডিচ্চেন সমন্নাগতে. নিপুণেতি সণ্হে সুখুমবুদ্ধিনো, সুখুমঅত্থন্তরপটিৰিজ্ঝনসমত্থে. কতপরপ্পৰাদেতি ৰিঞ্ঞাতপরপ্পৰাদে চেৰ পরেহি সদ্ধিং কতৰাদপরিচযে চ. ৰালৰেধিরূপেতি ৰালৰেধিধনুগ্গহসদিসে. তে ভিন্দন্তা মঞ্ঞে চরন্তীতি ৰালৰেধি ৰিয ৰালং সুখুমানিপি পরেসং দিট্ঠিগতানি অত্তনো পঞ্ঞাগতেন ভিন্দন্তা ৰিয চরন্তীতি অত্থো. পঞ্হং অভিসঙ্খরোন্তীতি দুপদম্পি তিপদম্পি চতুপ্পদম্পি পঞ্হং করোন্তি. ৰাদং আরোপেস্সামাতি দোসং আরোপেস্সাম. ন চেৰ সমণং গোতমং পঞ্হং পুচ্ছন্তীতি; কস্মা ন পুচ্ছন্তি? ভগৰা কির পরিসমজ্ঝে ধম্মং দেসেন্তো পরিসায অজ্ঝাসযং ওলোকেতি, ততো পস্সতি – ‘‘ইমে খত্তিযপণ্ডিতা গুল়্হং রহস্সং পঞ্হং ওৰট্টিকসারং কত্ৰা আগতা’’তি. সো তেহি অপুট্ঠোযেৰ এৰরূপে পঞ্হে পুচ্ছায এত্তকা দোসা, ৰিস্সজ্জনে এত্তকা, অত্থে পদে অক্খরে এত্তকাতি ইমে পঞ্হে পুচ্ছন্তো এৰং পুচ্ছেয্য, ৰিস্সজ্জেন্তো এৰং ৰিস্সজ্জেয্যাতি, ইতি ওৰট্টিকসারং কত্ৰা আনীতে পঞ্হে ধম্মকথায অন্তরে পক্খিপিত্ৰা ৰিদ্ধংসেতি. খত্তিযপণ্ডিতা ‘‘সেয্যো ৰত নো, যে মযং ইমে পঞ্হে ন পুচ্ছিম্হা, সচে হি মযং পুচ্ছেয্যাম, অপ্পতিট্ঠেৰ নো কত্ৰা সমণো গোতমো খিপেয্যা’’তি অত্তমনা ভৰন্তি.

অপিচ বুদ্ধা নাম ধম্মং দেসেন্তা পরিসং মেত্তায ফরন্তি, মেত্তাফরণেন দসবলে মহাজনস্স চিত্তং পসীদতি, বুদ্ধা চ নাম রূপগ্গপ্পত্তা হোন্তি দস্সনসম্পন্না মধুরস্সরা মুদুজিৰ্হা সুফুসিতদন্তাৰরণা অমতেন হদযং সিঞ্চন্তা ৰিয ধম্মং কথেন্তি. তত্র নেসং মেত্তাফরণেন পসন্নচিত্তানং এৰং হোতি – ‘‘এৰরূপং অদ্ৰেজ্ঝকথং অমোঘকথং নিয্যানিককথং কথেন্তেন ভগৰতা সদ্ধিং ন সক্খিস্সাম পচ্চনীকগ্গাহং গণ্হিতু’’ন্তি অত্তনো পসন্নভাৰেনেৰ ন পুচ্ছন্তি.

অঞ্ঞদত্থূতি একংসেন. সাৰকা সম্পজ্জন্তীতি সরণগমনৰসেন সাৰকা হোন্তি. তদনুত্তরন্তি তং অনুত্তরং. ব্রহ্মচরিযপরিযোসানন্তি মগ্গব্রহ্মচরিযস্স পরিযোসানভূতং অরহত্তফলং, তদত্থায হি তে পব্বজন্তি. মনং ৰত, ভো, অনস্সামাতি, ভো, সচে মযং ন উপসঙ্কমেয্যাম, ইমিনা থোকেন অনুপসঙ্কমনমত্তেন অপযিরুপাসনমত্তেনেৰ নট্ঠা ভৰেয্যাম. উপসঙ্কমনমত্তকেন পনম্হা ন নট্ঠাতি অত্থো. দুতিযপদং পুরিমস্সেৰ ৰেৰচনং. অস্সমণাৰ সমানাতিআদীসু পাপানং অসমিতত্তা অস্সমণাৰ. অবাহিতত্তা চ পন অব্রাহ্মণাৰ. কিলেসারীনং অহতত্তা অনরহন্তোযেৰ সমানাতি অত্থো.

২৯০. উদানং উদানেসীতি উদাহারং উদাহরি. যথা হি যং তেলং মানং গহেতুং ন সক্কোতি, ৰিস্সন্দিত্ৰা গচ্ছতি, তং অৰসেকোতি ৰুচ্চতি, যঞ্চ জলং তল়াকং গহেতুং ন সক্কোতি, অজ্ঝোত্থরিত্ৰা গচ্ছতি, তং ওঘোতি ৰুচ্চতি. এৰমেৰ যং পীতিমযং ৰচনং হদযং গহেতুং ন সক্কোতি, অধিকং হুত্ৰা অন্তো অসণ্ঠহিত্ৰা বহি নিক্খমতি, তং উদানন্তি ৰুচ্চতি. এৰরূপং পীতিমযং ৰচনং নিচ্ছারেসীতি অত্থো. হত্থিপদোপমোতি হত্থিপদং উপমা অস্স ধম্মস্সাতি হত্থিপদোপমো. সো ন এত্তাৰতা ৰিত্থারেন পরিপূরো হোতীতি দস্সেতি. নাগৰনিকোতি উগ্গহিতহত্থিসিপ্পো হত্থিৰনচারিকো. অথ কস্মা ইধ কুসলোতি ন ৰুত্তোতি? পরতো ‘‘যো হোতি কুসলো’’তি ৰিভাগদস্সনতো. যো হি কোচি পৰিসতি, যো পন কুসলো হোতি, সো নেৰ তাৰ নিট্ঠং গচ্ছতি. তস্মা ইধ কুসলোতি অৰত্ৰা পরতো ৰুত্তো.

২৯১. ৰামনিকাতি রস্সা আযামতোপি ন দীঘা মহাকুচ্ছিহত্থিনিযো. উচ্চা চ নিসেৰিতন্তি সত্তট্ঠরতনুব্বেধে ৰটরুক্খাদীনং খন্ধপ্পদেসে ঘংসিতট্ঠানং. উচ্চা কাল়ারিকাতি উচ্চা চ যট্ঠিসদিসপাদা হুত্ৰা, কাল়ারিকা চ দন্তানং কল়ারতায. তাসং কির একো দন্তো উন্নতো হোতি, একো ওনতো. উভোপি চ ৰিরল়া হোন্তি, ন আসন্না. উচ্চা চ দন্তেহি আরঞ্জিতানীতি সত্তট্ঠরতনুব্বেধে ৰটরুক্খাদীনং খন্ধপ্পদেসে ফরসুনা পহতট্ঠানং ৰিয দাট্ঠাহি ছিন্নট্ঠানং. উচ্চা কণেরুকা নামাতি উচ্চা চ যট্ঠিসদিসদীঘপাদা হুত্ৰা, কণেরুকা চ দন্তানং কণেরুতায, তা কির মকুল়দাঠা হোন্তি. তস্মা কণেরুকাতি ৰুচ্চন্তি. সো নিট্ঠং গচ্ছতীতি সো নাগৰনিকো যস্স ৰতাহং নাগস্স অনুপদং আগতো, অযমেৰ সো, ন অঞ্ঞো. যঞ্হি অহং পঠমং পদং দিস্ৰা ৰামনিকানং পদং ইদং ভৰিস্সতীতি নিট্ঠং ন গতো, যম্পি ততো ওরভাগে দিস্ৰা কাল়ারিকানং ভৰিস্সতি, কণেরুকানং ভৰিস্সতীতি নিট্ঠং ন গতো, সব্বং তং ইমস্সেৰ মহাহত্থিনো পদন্তি মহাহত্থিং দিস্ৰাৰ নিট্ঠং গচ্ছতি.

এৰমেৰ খোতি এত্থ ইদং ওপম্মসংসন্দনং – নাগৰনং ৰিয হি আদিতো পট্ঠায যাৰ নীৰরণপ্পহানা ধম্মদেসনা ৰেদিতব্বা. কুসলো নাগৰনিকো ৰিয যোগাৰচরো; মহানাগো ৰিয সম্মাসম্বুদ্ধো; মহন্তং হত্থিপদং ৰিয ঝানাভিঞ্ঞা. নাগৰনিকস্স তত্থ তত্থ হত্থিপদং দিস্ৰাপি ৰামনিকানং পদং ভৰিস্সতি, কাল়ারিকানং কণেরুকানং পদং ভৰিস্সতীতি অনিট্ঠঙ্গতভাৰো ৰিয যোগিনো, ইমা ঝানাভিঞ্ঞা নাম বাহিরকপরিব্বাজকানম্পি সন্তীতি অনিট্ঠঙ্গতভাৰো. নাগৰনিকস্স, তত্থ তত্থ মযা দিট্ঠং পদং ইমস্সেৰ মহাহত্থিনো, ন অঞ্ঞস্সাতি মহাহত্থিং দিস্ৰা নিট্ঠঙ্গমনং ৰিয অরিযসাৰকস্স অরহত্তং পত্ৰাৰ নিট্ঠঙ্গমনং. ইদঞ্চ পন ওপম্মসংসন্দনং মত্থকে ঠত্ৰাপি কাতুং ৰট্টতি. ইমস্মিম্পি ঠানে ৰট্টতিযেৰ. অনুক্কমাগতং পন পাল়িপদং গহেত্ৰা ইধেৰ কতং. তত্থ ইধাতি দেসাপদেসে নিপাতো. স্ৰাযং কত্থচি লোকং উপাদায ৰুচ্চতি. যথাহ – ‘‘ইধ তথাগতো লোকে উপ্পজ্জতী’’তি (দী. নি. ১.২৭৯). কত্থচি সাসনং. যথাহ – ‘‘ইধেৰ, ভিক্খৰে, সমণো, ইধ দুতিযো সমণো’’তি (অ. নি. ৪.২৪১). কত্থচি ওকাসং. যথাহ –

‘‘ইধেৰ তিট্ঠমানস্স, দেৰভূতস্স মে সতো;

পুনরাযু চ মে লদ্ধো, এৰং জানাহি মারিসা’’তি. (দী. নি. ২.৩৬৯; দী. নি. অট্ঠ. ১.১৯০);

কত্থচি পদপূরণমত্তমেৰ. যথাহ – ‘‘ইধাহং, ভিক্খৰে, ভুত্তাৰী অস্সং পৰারিতো’’তি (ম. নি. ১.৩০). ইধ পন লোকং উপাদায ৰুত্তোতি ৰেদিতব্বো. ইদং ৰুত্তং হোতি ‘‘ব্রাহ্মণ ইমস্মিং লোকে তথাগতো উপ্পজ্জতি অরহং…পে… বুদ্ধো ভগৰা’’তি.

তত্থ তথাগতসদ্দো মূলপরিযাযে, অরহন্তিআদযো ৰিসুদ্ধিমগ্গে ৰিত্থারিতা. লোকে উপ্পজ্জতীতি এত্থ পন লোকোতি ওকাসলোকো সত্তলোকো সঙ্খারলোকোতি তিৰিধো. ইধ পন সত্তলোকো অধিপ্পেতো. সত্তলোকে উপ্পজ্জমানোপি চ তথাগতো ন দেৰলোকে, ন ব্রহ্মলোকে, মনুস্সলোকেযেৰ উপ্পজ্জতি. মনুস্সলোকেপি ন অঞ্ঞস্মিং চক্কৰাল়ে, ইমস্মিংযেৰ চক্কৰাল়ে. তত্রাপি ন সব্বট্ঠানেসু, ‘‘পুরত্থিমায দিসায গজঙ্গলং নাম নিগমো. তস্সাপরেন মহাসালো, ততো পরা পচ্চন্তিমা জনপদা, ওরতো মজ্ঝে. পুরত্থিমদক্খিণায দিসায সল্লৰতী নাম নদী, ততো পরা পচ্চন্তিমা জনপদা, ওরতো মজ্ঝে. দক্খিণায দিসায সেতকণ্ণিকং নাম নিগমো, ততো পরা পচ্চন্তিমা জনপদা, ওরতো মজ্ঝে. পচ্ছিমায দিসায থূণং নাম ব্রাহ্মণগামো, ততো পরা পচ্চন্তিমা জনপদা, ওরতো মজ্ঝে. উত্তরায দিসায উসিরদ্ধজো নাম পব্বতো, ততো পরা পচ্চন্তিমা জনপদা, ওরতো মজ্ঝে’’তি (মহাৰ. ২৫৯) এৰং পরিচ্ছিন্নে আযামতো তিযোজনসতে ৰিত্থারতো অড্ঢতেয্যযোজনসতে পরিক্খেপতো নৰযোজনসতে মজ্ঝিমপদেসে উপ্পজ্জতি. ন কেৰলঞ্চ তথাগতোৰ, পচ্চেকবুদ্ধা অগ্গসাৰকা অসীতি মহাথেরা বুদ্ধমাতা বুদ্ধপিতা চক্কৰত্তী রাজা অঞ্ঞে চ সারপ্পত্তা ব্রাহ্মণগহপতিকা এত্থেৰ উপ্পজ্জন্তি. তত্থ তথাগতো সুজাতায দিন্নমধুপাযসভোজনতো পট্ঠায যাৰ অরহত্তমগ্গো, তাৰ উপ্পজ্জতি নাম. অরহত্তফলে উপ্পন্নো নাম. মহাভিনিক্খমনতো ৰা যাৰ অরহত্তমগ্গো. তুসিতভৰনতো ৰা যাৰ অরহত্তমগ্গো. দীপঙ্করপাদমূলতো ৰা যাৰ অরহত্তমগ্গো, তাৰ উপ্পজ্জতি নাম. অরহত্তফলে উপ্পন্নো নাম. ইধ সব্বপঠমং উপ্পন্নভাৰং সন্ধায উপ্পজ্জতীতি ৰুত্তং, তথাগতো লোকে উপ্পন্নো হোতীতি অযঞ্হেত্থ অত্থো.

সো ইমং লোকন্তি সো ভগৰা ইমং লোকং, ইদানি ৰত্তব্বং নিদস্সেতি. সদেৰকন্তি সহ দেৰেহি সদেৰকং. এৰং সহ মারেন সমারকং. সহ ব্রহ্মুনা সব্রহ্মকং. সহ সমণব্রাহ্মণেহি সস্সমণব্রাহ্মণিং. পজাতত্তা পজা, তং পজং. সহ দেৰমনুস্সেহি সদেৰমনুস্সং. তত্থ সদেৰকৰচনেন পঞ্চকামাৰচরদেৰগ্গহণং ৰেদিতব্বং. সমারকৰচনেন ছট্ঠকামাৰচরদেৰগ্গহণং. সব্রহ্মকৰচনেন ব্রহ্মকাযিকাদিব্রহ্মগ্গহণং. সস্সমণব্রাহ্মণিৰচনেন সাসনস্স পচ্চত্থিপচ্চামিত্তসমণব্রাহ্মণগ্গহণং সমিতপাপবাহিতপাপসমণব্রাহ্মণগ্গহণঞ্চ. পজাৰচনেন সত্তলোকগ্গহণং. সদেৰমনুস্সৰচনেন সম্মুতিদেৰঅৰসেসমনুস্সগ্গহণং. এৰমেত্থ তীহি পদেহি ওকাসলোকেন সদ্ধিং সত্তলোকো, দ্ৰীহি পজাৰসেন সত্তলোকোৰ গহিতোতি ৰেদিতব্বো.

অপরো নযো – সদেৰকগ্গহণেন অরূপাৰচরদেৰলোকো গহিতো. সমারকগ্গহণেন ছকামাৰচরদেৰলোকো. সব্রহ্মকগ্গহণেন রূপী ব্রহ্মলোকো. সস্সমণব্রাহ্মণাদিগ্গহণেন চতুপরিসৰসেন সম্মুতিদেৰেহি ৰা সহ মনুস্সলোকো অৰসেসসব্বসত্তলোকো ৰা.

অপিচেত্থ সদেৰকৰচনেন উক্কট্ঠপরিচ্ছেদতো সব্বস্স লোকস্স সচ্ছিকতভাৰমাহ. ততো যেসং অহোসি – ‘‘মারো মহানুভাৰো ছকামাৰচরিস্সরো ৰসৰত্তী. কিং সোপি এতেন সচ্ছিকতো’’তি? তেসং ৰিমতিং ৰিধমন্তো সমারকন্তি আহ. যেসং পন অহোসি – ‘‘ব্রহ্মা মহানুভাৰো, একঙ্গুলিযা একস্মিং চক্কৰাল়সহস্সে আলোকং ফরতি, দ্ৰীহি…পে… দসহি অঙ্গুলীহি দসসু চক্কৰাল়সহস্সেসু আলোকং ফরতি, অনুত্তরঞ্চ ঝানসমাপত্তিসুখং পটিসংৰেদেতি. কিং সোপি সচ্ছিকতো’’তি? তেসং ৰিমতিং ৰিধমন্তো সব্রহ্মকন্তি আহ. ততো যে চিন্তেসুং – ‘‘পুথূ সমণব্রাহ্মণা সাসনস্স পচ্চত্থিকা, কিং তেপি সচ্ছিকতা’’তি? তেসং ৰিমতিং ৰিধমন্তো সস্সমণব্রাহ্মণিং পজন্তি আহ. এৰং উক্কট্ঠুক্কট্ঠানং সচ্ছিকতভাৰং পকাসেত্ৰা অথ সম্মুতিদেৰে অৰসেসমনুস্সে চ উপাদায উক্কট্ঠপরিচ্ছেদৰসেন সেসসত্তলোকস্স সচ্ছিকতভাৰং পকাসেন্তো সদেৰমনুস্সন্তি আহ. অযমেত্থ ভাৰানুক্কমো. পোরাণা পনাহু – সদেৰকন্তি দেৰতাহি সদ্ধিং অৰসেসলোকং. সমারকন্তি মারেন সদ্ধিং অৰসেসলোকং. সব্রহ্মকন্তি ব্রহ্মেহি সদ্ধিং অৰসেসলোকং. এৰং সব্বেপি তিভৰূপগে সত্তে তীহাকারেহি তীসু পদেসু পক্খিপেত্ৰা পুন দ্ৰীহি পদেহি পরিযাদিযন্তো ‘‘সস্সমণব্রাহ্মণিং পজং সদেৰমনুস্স’’ন্তি আহ. এৰং পঞ্চহি পদেহি তেন তেনাকারেন তেধাতুকমেৰ পরিযাদিন্নন্তি.

সযং অভিঞ্ঞা সচ্ছিকত্ৰা পৰেদেতীতি সযন্তি সামং অপরনেয্যো হুত্ৰা. অভিঞ্ঞাতি অভিঞ্ঞায, অধিকেন ঞাণেন ঞত্ৰাতি অত্থো. সচ্ছিকত্ৰাতি পচ্চক্খং কত্ৰা. এতেন অনুমানাদিপটিক্খেপো কতো হোতি. পৰেদেতীতি বোধেতি ৰিঞ্ঞাপেতি পকাসেতি. সো ধম্মং দেসেতি আদিকল্যাণং…পে… পরিযোসানকল্যাণন্তি সো ভগৰা সত্তেসু কারুঞ্ঞতং পটিচ্চ হিত্ৰাপি অনুত্তরং ৰিৰেকসুখং ধম্মং দেসেতি. তঞ্চ খো অপ্পং ৰা বহুং ৰা দেসেন্তো আদিকল্যাণাদিপ্পকারমেৰ দেসেতি. আদিম্হিপি কল্যাণং ভদ্দকং অনৰজ্জমেৰ কত্ৰা দেসেতি. মজ্ঝেপি… পরিযোসানেপি কল্যাণং ভদ্দকং অনৰজ্জমেৰ কত্ৰা দেসেতীতি ৰুত্তং হোতি.

তত্থ অত্থি দেসনায আদিমজ্ঝপরিযোসানং, অত্থি সাসনস্স. দেসনায তাৰ চতুপ্পদিকাযপি গাথায পঠমপাদো আদি নাম, ততো দ্ৰে মজ্ঝং নাম, অন্তে একো পরিযোসানং নাম. একানুসন্ধিকস্স সুত্তস্স নিদানমাদি, ইদমৰোচাতি পরিযোসানং, উভিন্নং অন্তরা মজ্ঝং. অনেকানুসন্ধিকস্স সুত্তস্স পঠমানুসন্ধি আদি, অন্তে অনুসন্ধি পরিযোসানং, মজ্ঝে একো ৰা দ্ৰে ৰা বহূ ৰা মজ্ঝমেৰ. সাসনস্স পন সীলসমাধিৰিপস্সনা আদি নাম. ৰুত্তম্পি চেতং – ‘‘কো চাদি কুসলানং ধম্মানং, সীলঞ্চ সুৰিসুদ্ধং, দিট্ঠি চ উজুকা’’তি (সং. নি. ৫.৩৬৯). ‘‘অত্থি, ভিক্খৰে, মজ্ঝিমা পটিপদা তথাগতেন অভিসম্বুদ্ধা’’তি এৰং ৰুত্তো পন অরিযমগ্গো মজ্ঝং নাম, ফলঞ্চেৰ নিব্বানঞ্চ পরিযোসানং নাম. ‘‘এতদত্থমিদং, ব্রাহ্মণ, ব্রহ্মচরিযমেতং সারং, এতং পরিযোসান’’ন্তি (ম. নি. ১.৩২৪) হি এত্থ ফলং পরিযোসানন্তি ৰুত্তং. ‘‘নিব্বানোগধঞ্হি, আৰুসো ৰিসাখ, ব্রহ্মচরিযং ৰুস্সতি নিব্বানপরাযণং নিব্বানপরিযোসান’’ন্তি (ম. নি. ১.৪৬৬) এত্থ নিব্বানং পরিযোসানন্তি ৰুত্তং. ইধ দেসনায আদিমজ্ঝপরিযোসানং অধিপ্পেতং. ভগৰা হি ধম্মং দেসেন্তো আদিম্হি সীলং দস্সেত্ৰা মজ্ঝে মগ্গং পরিযোসানে নিব্বানং দস্সেতি. তেন ৰুত্তং – ‘‘সো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণ’’ন্তি. তস্মা অঞ্ঞোপি ধম্মকথিকো ধম্মং কথেন্তো –

‘‘আদিম্হি সীলং দস্সেয্য, মজ্ঝে মগ্গং ৰিভাৰযে;

পরিযোসানম্হি নিব্বানং, এসা কথিকসণ্ঠিতী’’তি. (দী. নি. অট্ঠ. ১.১৯০);

সাত্থং সব্যঞ্জনন্তি যস্স হি যাগুভত্তইত্থিপুরিসাদিৰণ্ণনা নিস্সিতা দেসনা হোতি, ন সো সাত্থং দেসেতি. ভগৰা পন তথারূপং দেসনং পহায চতুসতিপট্ঠানাদিনিস্সিতং দেসনং দেসেতি. তস্মা ‘‘সাত্থং দেসেতী’’তি ৰুচ্চতি. যস্স পন দেসনা একব্যঞ্জনাদিযুত্তা ৰা সব্বনিরোট্ঠব্যঞ্জনা ৰা সব্বৰিস্সট্ঠসব্বনিগ্গহীতব্যঞ্জনা ৰা, তস্স দমিল়কিরাসৰরাদিমিলক্খূনং ভাসা ৰিয ব্যঞ্জনপারিপূরিযা অভাৰতো অব্যঞ্জনা নাম দেসনা হোতি. ভগৰা পন –

‘‘সিথিলং ধনিতঞ্চ দীঘরস্সং, গরুকং লহুকঞ্চ নিগ্গহীতং;

সম্বন্ধং ৰৰত্থিতং ৰিমুত্তং, দসধা ব্যঞ্জনবুদ্ধিযা পভেদো’’তি. (দী. নি. অট্ঠ. ১.১৯০) –

এৰং ৰুত্তং দসৰিধং ব্যঞ্জনং অমক্খেত্ৰা পরিপুণ্ণব্যঞ্জনমেৰ কত্ৰা ধম্মং দেসেতি. তস্মা ‘‘সব্যঞ্জনং ধম্মং দেসেতী’’তি ৰুচ্চতি.

কেৰলপরিপুণ্ণন্তি এত্থ কেৰলন্তি সকলাধিৰচনং. পরিপুণ্ণন্তি অনূনাধিকৰচনং. ইদং ৰুত্তং হোতি – ‘‘সকলপরিপুণ্ণমেৰ দেসেতি, একদেসনাপি অপরিপুণ্ণা নত্থী’’তি. পরিসুদ্ধন্তি নিরুপক্কিলেসং. যো হি ইদং ধম্মদেসনং নিস্সায লাভং ৰা সক্কারং ৰা লভিস্সামীতি দেসেতি, তস্স অপরিসুদ্ধা দেসনা হোতি. ভগৰা পন লোকামিসনিরপেক্খো হিতফরণেন মেত্তাভাৰনায মুদুহদযো উল্লুম্পনসভাৰসণ্ঠিতেন চিত্তেন দেসেতি. তস্মা ‘‘পরিসুদ্ধং ধম্মং দেসেতী’’তি ৰুচ্চতি. ব্রহ্মচরিযং পকাসেতীতি এত্থ ব্রহ্মচরিযন্তি সিক্খত্তযসঙ্গহং সকলসাসনং. তস্মা ব্রহ্মচরিযং পকাসেতীতি সো ধম্মং দেসেতি আদিকল্যাণং…পে… পরিসুদ্ধং, এৰং দেসেন্তো চ সিক্খত্তযসঙ্গহিতং সকলসাসনং ব্রহ্মচরিযং পকাসেতীতি এৰমেত্থ অত্থো দট্ঠব্বো. ব্রহ্মচরিযন্তি সেট্ঠট্ঠেন ব্রহ্মভূতং চরিযং. ব্রহ্মভূতানং ৰা বুদ্ধাদীনং চরিযন্তি ৰুত্তং হোতি.

তং ধম্মন্তি তং ৰুত্তপ্পকারসম্পদং ধম্মং. সুণাতি গহপতি ৰাতি কস্মা পঠমং গহপতিং নিদ্দিসতীতি? নিহতমানত্তা উস্সন্নত্তা চ. যেভুয্যেন হি খত্তিযকুলতো পব্বজিতা জাতিং নিস্সায মানং করোন্তি. ব্রাহ্মণকুলা পব্বজিতা মন্তে নিস্সায মানং করোন্তি. হীনজচ্চকুলা পব্বজিতা অত্তনো ৰিজাতিতায পতিট্ঠাতুং ন সক্কোন্তি. গহপতিদারকা পন কচ্ছেহি সেদং মুঞ্চন্তেহি পিট্ঠিযা লোণং পুপ্ফমানায ভূমিং কসিত্ৰা নিহতমানদপ্পা হোন্তি. তে পব্বজিত্ৰা মানং ৰা দপ্পং ৰা অকত্ৰা যথাবলং বুদ্ধৰচনং উগ্গহেত্ৰা ৰিপস্সনায কম্মং করোন্তা সক্কোন্তি অরহত্তে পতিট্ঠাতুং. ইতরেহি চ কুলেহি নিক্খমিত্ৰা পব্বজিতা নাম ন বহুকা, গহপতিকাৰ বহুকা, ইতি নিহতমানত্তা উস্সন্নত্তা চ পঠমং গহপতিং নিদ্দিসতীতি.

অঞ্ঞতরস্মিং ৰাতি ইতরেসং ৰা কুলানং অঞ্ঞতরস্মিং. পচ্চাজাতোতি পতিজাতো. তথাগতে সদ্ধং পটিলভতীতি পরিসুদ্ধং ধম্মং সুত্ৰা ধম্মস্সামিম্হি তথাগতে ‘‘সম্মাসম্বুদ্ধো ৰত ভগৰা’’তি সদ্ধং পটিলভতি. ইতি পটিসঞ্চিক্খতীতি এৰং পচ্চৰেক্খতি. সম্বাধো ঘরাৰাসোতি সচেপি সট্ঠিহত্থে ঘরে যোজনসতন্তরেপি ৰা দ্ৰে জাযম্পতিকা ৰসন্তি, তথাপি নেসং সকিঞ্চনসপলিবোধট্ঠেন ঘরাৰাসো সম্বাধোযেৰ. রজোপথোতি রাগরজাদীনং উট্ঠানট্ঠানন্তি মহাঅট্ঠকথাযং ৰুত্তং. আগমনপথোতিপি ৰট্টতি. অলগ্গনট্ঠেন অব্ভোকাসো ৰিযাতি অব্ভোকাসো. পব্বজিতো হি কূটাগাররতনপাসাদদেৰৰিমানাদীসু পিহিতদ্ৰারৰাতপানেসু পটিচ্ছন্নেসু ৰসন্তোপি নেৰ লগ্গতি ন সজ্জতি ন বজ্ঝতি. তেন ৰুত্তং – ‘‘অব্ভোকাসো পব্বজ্জা’’তি. অপিচ সম্বাধো ঘরাৰাসো কুসলকিরিযায ওকাসাভাৰতো. রজোপথো অসংৰুতসঙ্কারট্ঠানং ৰিয রজানং কিলেসরজানং সন্নিপাতট্ঠানতো. অব্ভোকাসো পব্বজ্জা কুসলকিরিযায যথাসুখং ওকাসসব্ভাৰতো.

নযিদং সুকরং…পে… পব্বজেয্যন্তি এত্থ অযং সঙ্খেপকথা – যদেতং সিক্খত্তযব্রহ্মচরিযং একম্পি দিৰসং অখণ্ডং কত্ৰা চরিমকচিত্তং পাপেতব্বতায একন্তপরিপুণ্ণং. একদিৰসম্পি চ কিলেসমলেন অমলিনং কত্ৰা চরিমকচিত্তং পাপেতব্বতায একন্তপরিসুদ্ধং, সঙ্খলিখিতং লিখিতসঙ্খসদিসং ধোতসঙ্খসপ্পটিভাগং চরিতব্বং, ইদং ন সুকরং অগারং অজ্ঝাৰসতা অগারমজ্ঝে ৰসন্তেন একন্তপরিপুণ্ণং…পে… চরিতুং. যংনূনাহং কেসে চ মস্সুঞ্চ ওহারেত্ৰা কাসাযরসপীততায কাসাযানি ব্রহ্মচরিযং চরন্তানং অনুচ্ছৰিকানি ৰত্থানি অচ্ছাদেত্ৰা পরিদহিত্ৰা অগারস্মা নিক্খমিত্ৰা অনগারিযং পব্বজেয্যন্তি. এত্থ চ যস্মা অগারস্স হিতং কসিৰাণিজ্জাদিকম্মং অগারিযন্তি ৰুচ্চতি, তঞ্চ পব্বজ্জায নত্থি. তস্মা পব্বজ্জা অনগারিযাতি ঞাতব্বা, তং অনগারিযং. পব্বজেয্যন্তি পটিপজ্জেয্যং. অপ্পং ৰাতি সহস্সতো হেট্ঠা ভোগক্খন্ধো অপ্পো নাম হোতি, সহস্সতো পট্ঠায মহা. আবন্ধনট্ঠেন ঞাতি এৰ পরিৰট্টো ঞাতিপরিৰট্টো. সো ৰীসতিযা হেট্ঠা অপ্পো হোতি, ৰীসতিযা পট্ঠায মহা.

২৯২. ভিক্খূনং সিক্খাসাজীৰসমাপন্নোতি যা ভিক্খূনং অধিসীলসঙ্খাতা সিক্খা, তঞ্চ, যত্থ চেতে সহ জীৰন্তি একজীৰিকা সভাগৰুত্তিনো হোন্তি, তং ভগৰতা পঞ্ঞত্তসিক্খাপদসঙ্খাতং সাজীৰঞ্চ তত্থ সিক্খনভাৰেন সমাপন্নোতি ভিক্খূনং সিক্খাসাজীৰসমাপন্নো. সমাপন্নোতি সিক্খং পরিপূরেন্তো, সাজীৰঞ্চ অৰীতিক্কমন্তো হুত্ৰা তদুভযং উপগতোতি অত্থো. পাণাতিপাতং পহাযাতিআদীসু পাণাতিপাতাদিকথা হেট্ঠা ৰিত্থারিতা এৰ. পহাযাতি ইমং পাণাতিপাতচেতনাসঙ্খাতং দুস্সীল্যং পজহিত্ৰা. পটিৰিরতো হোতীতি পহীনকালতো পট্ঠায ততো দুস্সীল্যতো ওরতো ৰিরতোৰ হোতি. নিহিতদণ্ডো নিহিতসত্থোতি পরূপঘাতত্থায দণ্ডং ৰা সত্থং ৰা আদায অৰত্তনতো নিক্খিত্তদণ্ডো চেৰ নিক্খিত্তসত্থো চাতি অত্থো. এত্থ চ ঠপেত্ৰা দণ্ডং সব্বম্পি অৰসেসং উপকরণং সত্তানং ৰিহিংসনভাৰতো সত্থন্তি ৰেদিতব্বং. যং পন ভিক্খূ কত্তরদণ্ডং ৰা দন্তকট্ঠৰাসিং ৰা পিপ্ফলকং ৰা গহেত্ৰা ৰিচরন্তি, ন তং পরূপঘাতত্থায. তস্মা নিহিতদণ্ডো নিহিতসত্থোত্ৰেৰ সঙ্খং গচ্ছতি. লজ্জীতি পাপজিগুচ্ছনলক্খণায লজ্জায সমন্নাগতো. দযাপন্নোতি দযং মেত্তচিত্ততং আপন্নো. সব্বপাণভূতহিতানুকম্পীতি সব্বে পাণভূতে হিতেন অনুকম্পকো. তায দযাপন্নতায সব্বেসং পাণভূতানং হিতচিত্তকোতি অত্থো. ৰিহরতীতি ইরিযতি পালেতি.

দিন্নমেৰ আদিযতীতি দিন্নাদাযী. চিত্তেনপি দিন্নমেৰ পটিকঙ্খতীতি দিন্নপাটিকঙ্খী. থেনেতীতি থেনো. ন থেনেন অথেনেন. অথেনত্তাযেৰ সুচিভূতেন. অত্তনাতি অত্তভাৰেন, অথেনং সুচিভূতং অত্তভাৰং কত্ৰা ৰিহরতীতি ৰুত্তং হোতি.

অব্রহ্মচরিযন্তি অসেট্ঠচরিযং. ব্রহ্মং সেট্ঠং আচারং চরতীতি ব্রহ্মচারী. আরাচারীতি অব্রহ্মচরিযতো দূরচারী. মেথুনাতি রাগপরিযুট্ঠানৰসেন সদিসত্তা মেথুনকাতি লদ্ধৰোহারেহি পটিসেৰিতব্বতো মেথুনাতি সঙ্খং গতা অসদ্ধম্মা. গামধম্মাতি গামৰাসীনং ধম্মা.

সচ্চং ৰদতীতি সচ্চৰাদী. সচ্চেন সচ্চং সন্দহতি ঘটেতীতি সচ্চসন্ধো, ন অন্তরন্তরা মুসা ৰদতীতি অত্থো. যো হি পুরিসো কদাচি মুসা ৰদতি, কদাচি সচ্চং, তস্স মুসাৰাদেন অন্তরিতত্তা সচ্চং সচ্চেন ন ঘটীযতি. তস্মা ন সো সচ্চসন্ধো, অযং পন ন তাদিসো, জীৰিতহেতুপি মুসাৰাদং অৰত্ৰা সচ্চেন সচ্চং সন্দহতিযেৰাতি সচ্চসন্ধো. থেতোতি থিরো, থিরকথোতি অত্থো. একো হি পুগ্গলো হলিদ্দিরাগো ৰিয, থুসরাসিম্হি নিখাতখাণু ৰিয, অস্সপিট্ঠে ঠপিতকুম্ভণ্ডমিৰ চ ন থিরকথো হোতি. একো পাসাণলেখা ৰিয ইন্দখিলো ৰিয চ থিরকথো হোতি; অসিনা সীসে ছিজ্জন্তেপি দ্ৰে কথা ন কথেতি; অযং ৰুচ্চতি থেতো. পচ্চযিকোতি পত্তিযাযিতব্বকো, সদ্ধাযিকোতি অত্থো. একচ্চো হি পুগ্গলো ন পচ্চযিকো হোতি, ‘‘ইদং কেন ৰুত্তং, অসুকেনা’’তি ৰুত্তে ‘‘মা তস্স ৰচনং সদ্দহথা’’তি ৰত্তব্বতং আপজ্জতি. একো পচ্চযিকো হোতি, ‘‘ইদং কেন ৰুত্তং, অসুকেনা’’তি ৰুত্তে, ‘‘যদি তেন ৰুত্তং, ইদমেৰ পমাণং, ইদানি উপপরিক্খিতব্বং নত্থি, এৰমেৰ ইদ’’ন্তি ৰত্তব্বতং আপজ্জতি, অযং ৰুচ্চতি পচ্চযিকো. অৰিসংৰাদকো লোকস্সাতি তায সচ্চৰাদিতায লোকং ন ৰিসংৰাদেতীতি অত্থো.

ইমেসং ভেদাযাতি যেসং ইতো সুত্ৰাতি ৰুত্তানং সন্তিকে সুতং, তেসং ভেদায. ভিন্নানং ৰা সন্ধাতাতি দ্ৰিন্নম্পি মিত্তানং ৰা সমানুপজ্ঝাযকাদীনং ৰা কেনচিদেৰ কারণেন ভিন্নানং একমেকং উপসঙ্কমিত্ৰা ‘‘তুম্হাকং ঈদিসে কুলে জাতানং এৰং বহুস্সুতানং ইদং ন যুত্ত’’ন্তিআদীনি ৰত্ৰা সন্ধানং কত্তা. অনুপ্পদাতাতি সন্ধানানুপ্পদাতা, দ্ৰে জনে সমগ্গে দিস্ৰা, ‘‘তুম্হাকং এৰরূপে কুলে জাতানং এৰরূপেহি গুণেহি সমন্নাগতানং অনুচ্ছৰিকমেত’’ন্তিআদীনি ৰত্ৰা দল়্হীকম্মং কত্তাতি অত্থো. সমগ্গো আরামো অস্সাতি সমগ্গারামো. যত্থ সমগ্গা নত্থি, তত্থ ৰসিতুম্পি ন ইচ্ছতীতি অত্থো. ‘‘সমগ্গরামো’’তিপি পাল়ি, অযমেৰেত্থ অত্থো. সমগ্গরতোতি সমগ্গেসু রতো, তে পহায অঞ্ঞত্র গন্তুম্পি ন ইচ্ছতীতি অত্থো. সমগ্গে দিস্ৰাপি সুত্ৰাপি নন্দতীতি সমগ্গনন্দী. সমগ্গকরণিং ৰাচং ভাসিতাতি যা ৰাচা সত্তে সমগ্গেযেৰ করোতি, তং সামগ্গিগুণপরিদীপকমেৰ ৰাচং ভাসতি, ন ইতরন্তি.

নেলাতি এলং ৰুচ্চতি দোসো, নাস্সা এলন্তি নেলা, নিদ্দোসাতি অত্থো. ‘‘নেলঙ্গো সেতপচ্ছাদো’’তি এত্থ ৰুত্তনেলং ৰিয. কণ্ণসুখাতি ব্যঞ্জনমধুরতায কণ্ণানং সুখা, সূচিৰিজ্ঝনং ৰিয কণ্ণসূলং ন জনেতি. অত্থমধুরতায সকলসরীরে কোপং অজনেত্ৰা পেমং জনেতীতি পেমনীযা. হদযং গচ্ছতি, অপটিহঞ্ঞমানা সুখেন চিত্তং পৰিসতীতি হদযঙ্গমা. গুণপরিপুণ্ণতায পুরে ভৰাতি পোরী, পুরে সংৰদ্ধনারী ৰিয সুকুমারাতিপি পোরী, পুরস্স এসাতিপি পোরী, নগরৰাসীনং কথাতি অত্থো. নগরৰাসিনো হি যুত্তকথা হোন্তি, পিতিমত্তং পিতাতি, মাতিমত্তং মাতাতি, ভাতিমত্তং ভাতাতি ৰদন্তি. এৰরূপী কথা বহুনো জনস্স কন্তা হোতীতি বহুজনকন্তা. কন্তভাৰেনেৰ বহুনো জনস্স মনাপা চিত্তৰুদ্ধিকরাতি বহুজনমনাপা.

কালেন ৰদতীতি কালৰাদী, ৰত্তব্বযুত্তকালং সল্লক্খেত্ৰা ৰদতীতি অত্থো. ভূতং তচ্ছং সভাৰমেৰ ৰদতীতি ভূতৰাদী. দিট্ঠধম্মিকসম্পরাযিকত্থসন্নিস্সিতমেৰ কত্ৰা ৰদতীতি অত্থৰাদী. নৰলোকুত্তরধম্মসন্নিস্সিতং কত্ৰা ৰদতীতি ধম্মৰাদী. সংৰরৰিনযপহানৰিনযসন্নিস্সিতং কত্ৰা ৰদতীতি ৰিনযৰাদী. নিধানং ৰুচ্চতি ঠপনোকাসো, নিধানমস্সা অত্থীতি নিধানৰতী, হদযে নিধাতব্ব যুত্তৰাচং ভাসিতাতি অত্থো. কালেনাতি এৰরূপিং ভাসমানোপি চ ‘‘অহং নিধানৰতিং ৰাচং ভাসিস্সামী’’তি ন অকালেন ভাসতি, যুত্তকালং পন অৰেক্খিত্ৰা ভাসতীতি অত্থো. সাপদেসন্তি সউপমং, সকারণন্তি অত্থো. পরিযন্তৰতিন্তি পরিচ্ছেদং দস্সেত্ৰা যথাস্সা পরিচ্ছেদো পঞ্ঞাযতি, এৰং ভাসতীতি অত্থো. অত্থসংহিতন্তি অনেকেহিপি নযেহি ৰিভজন্তেন পরিযাদাতুং অসক্কুণেয্যতায অত্থসম্পন্নং, যং ৰা সো অত্থৰাদী অত্থং ৰদতি, তেন অত্থেন সংহিতত্তা অত্থসংহিতং ৰাচং ভাসতি, ন অঞ্ঞং নিক্খিপিত্ৰা অঞ্ঞং ভাসতীতি ৰুত্তং হোতি.

২৯৩. বীজগামভূতগামসমারম্ভাতি মূলবীজং খন্ধবীজং ফল়ুবীজং অগ্গবীজং বীজবীজন্তি পঞ্চৰিধস্স বীজগামস্স চেৰ যস্স কস্সচি নীলতিণরুক্খাদিকস্স ভূতগামস্স চ সমারম্ভা, ছেদনভেদনপচনাদিভাৰেন ৰিকোপনা পটিৰিরতোতি অত্থো. একভত্তিকোতি পাতরাসভত্তং সাযমাসভত্তন্তি দ্ৰে ভত্তানি. তেসু পাতরাসভত্তং অন্তোমজ্ঝন্হিকেন পরিচ্ছিন্নং, ইতরং মজ্ঝন্হিকতো উদ্ধং অন্তোঅরুণেন. তস্মা অন্তোমজ্ঝন্হিকে দসক্খত্তুং ভুঞ্জমানোপি একভত্তিকোৰ হোতি, তং সন্ধায ৰুত্তং ‘‘একভত্তিকো’’তি. রত্তিযা ভোজনং রত্তি, ততো উপরতোতি রত্তূপরতো. অতিক্কন্তে মজ্ঝন্হিকে যাৰ সূরিযত্থংগমনা ভোজনং ৰিকালভোজনং নাম. ততো ৰিরতত্তা ৰিরতো ৰিকালভোজনা. সাসনস্স অননুলোমত্তা ৰিসূকং পটাণীভূতং দস্সনন্তি ৰিসূকদস্সনং. অত্তনা নচ্চননচ্চাপনাদিৰসেন নচ্চা চ গীতা চ ৰাদিতা চ, অন্তমসো মযূরনচ্চনাদিৰসেনাপি পৰত্তানং নচ্চাদীনং ৰিসূকভূতা দস্সনা চাতি নচ্চগীতৰাদিতৰিসূকদস্সনা. নচ্চাদীনি হি অত্তনা পযোজেতুং ৰা পরেহি পযোজাপেতুং ৰা পযুত্তানি পস্সিতুং ৰা নেৰ ভিক্খূনং ন ভিক্খুনীনং ৰট্টন্তি. মালাদীসু মালাতি যংকিঞ্চি পুপ্ফং. গন্ধন্তি যংকিঞ্চি গন্ধজাতং. ৰিলেপনন্তি ছৰিরাগকরণং. তত্থ পিল়ন্ধন্তো ধারেতি নাম. ঊনট্ঠানং পূরেন্তো মণ্ডেতি নাম. গন্ধৰসেন ছৰিরাগৰসেন চ সাদিযন্তো ৰিভূসেতি নাম. ঠানং ৰুচ্চতি কারণং. তস্মা যায দুস্সীল্যচেতনায তানি মালাধারণাদীনি মহাজনো করোতি, ততো পটিৰিরতোতি অত্থো.

উচ্চাসযনং ৰুচ্চতি পমাণাতিক্কন্তং. মহাসযনং অকপ্পিযত্থরণং. ততো পটিৰিরতোতি অত্থো. জাতরূপন্তি সুৰণ্ণং. রজতন্তি কহাপণো লোহমাসকো জতুমাসকো দারুমাসকোতি যে ৰোহারং গচ্ছন্তি, তস্স উভযস্সপি পটিগ্গহণা পটিৰিরতো, নেৰ নং উগ্গণ্হাতি, ন উগ্গণ্হাপেতি, ন উপনিক্খিত্তং সাদিযতীতি অত্থো. আমকধঞ্ঞপটিগ্গহণাতি সালিৰীহিযৰগোধূমকঙ্গুৰরককুদ্রূসকসঙ্খাতস্স সত্তৰিধস্সাপি আমকধঞ্ঞস্স পটিগ্গহণা. ন কেৰলঞ্চ এতেসং পটিগ্গহণমেৰ, আমসনম্পি ভিক্খূনং ন ৰট্টতিযেৰ. আমকমংসপটিগ্গহণাতি এত্থ অঞ্ঞত্র ওদিস্স অনুঞ্ঞাতা আমকমংসমচ্ছানং পটিগ্গহণমেৰ ভিক্খূনং ন ৰট্টতি, নো আমসনং.

ইত্থিকুমারিকপটিগ্গহণাতি এত্থ ইত্থীতি পুরিসন্তরগতা, ইতরা কুমারিকা নাম. তাসং পটিগ্গহণম্পি আমসনম্পি অকপ্পিযমেৰ. দাসিদাসপটিগ্গহণাতি এত্থ দাসিদাসৰসেনেৰ তেসং পটিগ্গহণং ন ৰট্টতি, ‘‘কপ্পিযকারকং দম্মি, আরামিকং দম্মী’’তি এৰং ৰুত্তে পন ৰট্টতি. অজেল়কাদীসু খেত্তৰত্থুপরিযোসানেসু কপ্পিযাকপ্পিযনযো ৰিনযৰসেন উপপরিক্খিতব্বো. তত্থ খেত্তং নাম যস্মিং পুব্বণ্ণং রুহতি. ৰত্থু নাম যস্মিং অপরণ্ণং রুহতি. যত্থ ৰা উভযম্পি রুহতি, তং খেত্তং. তদত্থায অকতভূমিভাগো ৰত্থু. খেত্তৰত্থুসীসেন চেত্থ ৰাপিতল়াকাদীনিপি সঙ্গহিতানেৰ. দূতেয্যং ৰুচ্চতি দূতকম্মং, গিহীনং পণ্ণং ৰা সাসনং ৰা গহেত্ৰা তত্থ তত্থ গমনং. পহিণগমনং ৰুচ্চতি ঘরা ঘরং পেসিতস্স খুদ্দকগমনং. অনুযোগো নাম তদুভযকরণং, তস্মা দূতেয্যপহিণগমনানং অনুযোগাতি এৰমেত্থ অত্থো ৰেদিতব্বো.

কযৰিক্কযাতি কযা চ ৰিক্কযা চ. তুলাকূটাদীসু কূটন্তি ৰঞ্চনং. তত্থ তুলাকূটং তাৰ রূপকূটং অঙ্গকূটং গহণকূটং পটিচ্ছন্নকূটন্তি চতুব্বিধং হোতি. তত্থ রূপকূটং নাম দ্ৰে তুলা সরূপা কত্ৰা গণ্হন্তো মহতিযা গণ্হাতি, দদন্তো খুদ্দিকায দেতি. অঙ্গকূটং নাম গণ্হন্তো পচ্ছাভাগে হত্থেন তুলং অক্কমতি, দদন্তো পুব্বভাগে. গহণকূটং নাম গণ্হন্তো মূলে রজ্জুং গণ্হাতি, দদন্তো অগ্গে. পটিচ্ছন্নকূটং নাম তুলং সুসিরং কত্ৰা অন্তো অযচুণ্ণং পক্খিপিত্ৰা গণ্হন্তো তং পচ্ছাভাগে করোতি, দদন্তো অগ্গভাগে. কংসো ৰুচ্চতি সুৰণ্ণপাতি, তায ৰঞ্চনং কংসকূটং. কথং? একং সুৰণ্ণপাতিং কত্ৰা অঞ্ঞা দ্ৰে তিস্সো লোহপাতিযো সুৰণ্ণৰণ্ণা করোতি, ততো জনপদং গন্ত্ৰা কিঞ্চিদেৰ অদ্ধকুলং পৰিসিত্ৰা, ‘‘সুৰণ্ণভাজনানি কিণথা’’তি ৰত্ৰা অগ্ঘে পুচ্ছিতে সমগ্ঘতরং দাতুকামা হোন্তি. ততো তেহি ‘‘কথং ইমেসং সুৰণ্ণভাৰো জানিতব্বো’’তি ৰুত্তে – ‘‘ৰীমংসিত্ৰা গণ্হথা’’তি সুৰণ্ণপাতিং পাসাণে ঘংসিত্ৰা সব্বা পাতিযো দত্ৰা গচ্ছতি.

মানকূটং নাম হদযভেদসিখাভেদরজ্জুভেদৰসেন তিৰিধং হোতি. তত্থ হদযভেদো সপ্পিতেলাদিমিননকালে লব্ভতি. তানি হি গণ্হন্তো হেট্ঠা ছিদ্দেন মানেন, ‘‘সণিকং আসিঞ্চা’’তি ৰত্ৰা অন্তোভাজনে বহুং পগ্ঘরাপেত্ৰা গণ্হাতি; দদন্তো ছিদ্দং পিধায সীঘং পূরেত্ৰা দেতি. সিখাভেদো তিলতণ্ডুলাদিমিননকালে লব্ভতি. তানি হি গণ্হন্তো সণিকং সিখং উস্সাপেত্ৰা গণ্হাতি, দদন্তো ৰেগেন পূরেত্ৰা সিখং ছিন্দন্তো দেতি. রজ্জুভেদো খেত্তৰত্থুমিননকালে লব্ভতি. লঞ্জং অলভন্তা হি খেত্তং অমহন্তম্পি মহন্তং কত্ৰা মিনন্তি.

উক্কোটনাদীসু উক্কোটনন্তি সামিকে অস্সামিকে কাতুং লঞ্জগ্গহণং. ৰঞ্চনন্তি তেহি তেহি উপাযেহি পরেসং ৰঞ্চনং. তত্রিদমেকং ৰত্থু – একো কির লুদ্দকো মিগঞ্চ মিগপোতকঞ্চ গহেত্ৰা আগচ্ছতি. তমেকো ধুত্তো, ‘‘কিং, ভো, মিগো অগ্ঘতি, কিং মিগপোতকো’’তি আহ. ‘‘মিগো দ্ৰে কহাপণে মিগপোতকো এক’’ন্তি চ ৰুত্তে কহাপণং দত্ৰা মিগপোতকং গহেত্ৰা থোকং গন্ত্ৰা নিৰত্তো, ‘‘ন মে, ভো, মিগপোতকেন অত্থো, মিগং মে দেহী’’তি আহ. তেন হি ‘‘দ্ৰে কহাপণে দেহী’’তি. সো আহ – ‘‘ননু তে, ভো, মযা পঠমং একো কহাপণো দিন্নো’’তি. আম দিন্নোতি. ‘‘ইমম্পি মিগপোতকং গণ্হ, এৰং সো চ কহাপণো অযঞ্চ কহাপণগ্ঘনকো মিগপোতকোতি দ্ৰে কহাপণা ভৰিস্সন্তী’’তি. সো কারণং ৰদতীতি সল্লক্খেত্ৰা মিগপোতকং গহেত্ৰা মিগং অদাসীতি.

নিকতীতি যোগৰসেন ৰা মাযাৰসেন ৰা অপামঙ্গং পামঙ্গন্তি, অমণিং মণিন্তি, অসুৰণ্ণং সুৰণ্ণন্তি কত্ৰা পটিরূপকেন ৰঞ্চনং. সাচিযোগোতি কুটিলযোগো, এতেসংযেৰ উক্কোটনাদীনমেতং নামং, তস্মা উক্কোটনসাচিযোগো ৰঞ্চনসাচিযোগো নিকতিসাচিযোগোতি এৰমেত্থ অত্থো দট্ঠব্বো. কেচি অঞ্ঞং দস্সেত্ৰা অঞ্ঞস্স পরিৰত্তনং সাচিযোগোতি ৰদন্তি. তং পন ৰঞ্চনেনেৰ সঙ্গহিতং. ছেদনাদীসু ছেদনন্তি হত্থচ্ছেদনাদি. ৰধোতি মারণং. বন্ধোতি রজ্জুবন্ধনাদীহি বন্ধনং. ৰিপরামোসোতি হিমৰিপরামোসো গুম্বৰিপরামোসোতি দুৰিধো. যং হিমপাতসমযে হিমেন পটিচ্ছন্না হুত্ৰা মগ্গপটিপন্নং জনং মুসন্তি, অযং হিমৰিপরামোসো. যং গুম্বাদীহি পটিচ্ছন্না মুসন্তি, অযং গুম্বৰিপরামোসো. আলোপো ৰুচ্চতি গামনিগমাদীনং ৰিলোপকরণং. সহসাকারোতি সাহসিককিরিযা, গেহং পৰিসিত্ৰা মনুস্সানং উরে সত্থং ঠপেত্ৰা ইচ্ছিতভণ্ডগ্গহণং. এৰমেতস্মা ছেদন…পে… সহসাকারা পটিৰিরতো হোতি.

২৯৪. সো সন্তুট্ঠো হোতীতি স্ৰাযং ভিক্খু হেট্ঠা ৰুত্তেন চতূসু পচ্চযেসু দ্ৰাদসৰিধেন ইতরীতরপচ্চযসন্তোসেন সমন্নাগতো হোতি. ইমিনা পন দ্ৰাদসৰিধেন ইতরীতরপচ্চযসন্তোসেন সমন্নাগতস্স ভিক্খুনো অট্ঠ পরিক্খারা ৰট্টন্তি তীণি চীৰরানি পত্তো দন্তকট্ঠচ্ছেদনৰাসি একা সূচি কাযবন্ধনং পরিস্সাৰনন্তি. ৰুত্তম্পি চেতং –

‘‘তিচীৰরঞ্চ পত্তো চ, ৰাসি সূচি চ বন্ধনং;

পরিস্সাৰনেন অট্ঠেতে, যুত্তযোগস্স ভিক্খুনো’’তি.

তে সব্বেপি কাযপরিহারিকাপি হোন্তি কুচ্ছিপরিহারিকাপি. কথং? তিচীৰরং তাৰ নিৰাসেত্ৰা পারুপিত্ৰা চ ৰিচরণকালে কাযং পরিহরতি পোসেতীতি কাযপরিহারিকং হোতি, চীৰরকণ্ণেন উদকং পরিস্সাৰেত্ৰা পিৰনকালে খাদিতব্বফলাফলগ্গহণকালে চ কুচ্ছিং পরিহরতি পোসেতীতি কুচ্ছিপরিহারিকং হোতি. পত্তোপি তেন উদকং উদ্ধরিত্ৰা নহানকালে কুটিপরিভণ্ডকরণকালে চ কাযপরিহারিকো হোতি, আহারং গহেত্ৰা ভুঞ্জনকালে কুচ্ছিপরিহারিকো হোতি. ৰাসিপি তায দন্তকট্ঠচ্ছেদনকালে মঞ্চপীঠানং অঙ্গপাদচীৰরকুটিদণ্ডকসজ্জনকালে চ কাযপরিহারিকা হোতি, উচ্ছুচ্ছেদননাল়িকেরাদিতচ্ছনকালে কুচ্ছিপরিহারিকা. সূচিপি চীৰরসিব্বনকালে কাযপরিহারিকা হোতি, পূৰং ৰা ফলং ৰা ৰিজ্ঝিত্ৰা খাদনকালে কুচ্ছিপরিহারিকা. কাযবন্ধনং বন্ধিত্ৰা ৰিচরণকালে কাযপরিহারিকং, উচ্ছুআদীনি বন্ধিত্ৰা গহণকালে কুচ্ছিপরিহারিকং. পরিস্সাৰনং তেন উদকং পরিস্সাৰেত্ৰা নহানকালে, সেনাসনপরিভণ্ডকরণকালে চ কাযপরিহারিকং, পানীযপরিস্সাৰনকালে তেনেৰ তিলতণ্ডুলপুথুকাদীনি গহেত্ৰা খাদনকালে চ কুচ্ছিপরিহারিকং. অযং তাৰ অট্ঠপরিক্খারিকস্স পরিক্খারমত্তা.

নৰপরিক্খারিকস্স পন সেয্যং পৰিসন্তস্স তত্রট্ঠকপচ্চত্থরণং ৰা কুঞ্চিকা ৰা ৰট্টতি. দসপরিক্খারিকস্স নিসীদনং ৰা চম্মখণ্ডং ৰা ৰট্টতি. একাদসপরিক্খারিকস্স কত্তরযট্ঠি ৰা তেলনাল়িকা ৰা ৰট্টতি. দ্ৰাদসপরিক্খারিকস্স ছত্তং ৰা উপাহনা ৰা ৰট্টতি. এতেসু চ অট্ঠপরিক্খারিকোৰ সন্তুট্ঠো, ইতরে অসন্তুট্ঠা, মহিচ্ছা মহাভারাতি ন ৰত্তব্বা. এতেপি হি অপ্পিচ্ছাৰ সন্তুট্ঠাৰ সুভরাৰ সল্লহুকৰুত্তিনোৰ. ভগৰা পন নযিমং সুত্তং তেসং ৰসেন কথেসি, অট্ঠপরিক্খারিকস্স ৰসেন কথেসি. সো হি খুদ্দকৰাসিঞ্চ সূচিঞ্চ পরিস্সাৰনে পক্খিপিত্ৰা পত্তস্স অন্তো ঠপেত্ৰা পত্তং অংসকূটে লগ্গেত্ৰা তিচীৰরং কাযপটিবদ্ধং কত্ৰা যেনিচ্ছকং সুখং পক্কমতি. পটিনিৰত্তেত্ৰা গহেতব্বং নামস্স ন হোতি, ইতি ইমস্স ভিক্খুনো সল্লহুকৰুত্তিতং দস্সেন্তো ভগৰা, সন্তুট্ঠো হোতি কাযপরিহারিকেন চীৰরেনাতিআদিমাহ.

তত্থ কাযপরিহারিকেনাতি কাযপরিহরণমত্তকেন. কুচ্ছিপরিহারিকেনাতি কুচ্ছিপরিহরণমত্তকেন. সমাদাযেৰ পক্কমতীতি তং অট্ঠপরিক্খারমত্তকং সব্বং গহেত্ৰা কাযপটিবদ্ধং কত্ৰাৰ গচ্ছতি, ‘‘মম ৰিহারো পরিৰেণং উপট্ঠাকো’’তিস্স সঙ্গো ৰা বদ্ধো ৰা ন হোতি, সো জিযা মুত্তো সরো ৰিয, যূথা অপক্কন্তো মত্তহত্থী ৰিয ইচ্ছিতিচ্ছিতং সেনাসনং ৰনসণ্ডং রুক্খমূলং ৰনপব্ভারং পরিভুঞ্জন্তো একোৰ তিট্ঠতি, একোৰ নিসীদতি, সব্বিরিযাপথেসু একোৰ অদুতিযো.

‘‘চাতুদ্দিসো অপ্পটিঘো চ হোতি,

সন্তুস্সমানো ইতরীতরেন;

পরিস্সযানং সহিতা অছম্ভী,

একো চরে খগ্গৰিসাণকপ্পো’’তি. (সু. নি. ৪২);

এৰং ৰণ্ণিতং খগ্গৰিসাণকপ্পতং আপজ্জতি.

ইদানি তমত্থং উপমায সাধেন্তো সেয্যথাপীতিআদিমাহ. তত্থ পক্খী সকুণোতি পক্খযুত্তো সকুণো. ডেতীতি উপ্পততি. অযং পনেত্থ সঙ্খেপত্থো – সকুণা নাম ‘‘অসুকস্মিং পদেসে রুক্খো পরিপক্কফলো’’তি ঞত্ৰা নানাদিসাহি আগন্ত্ৰা নখপক্খতুণ্ডাদীহি তস্স ফলানি ৰিজ্ঝন্তা ৰিধুনন্তা খাদন্তি. ‘‘ইদং অজ্জতনায ইদং স্ৰাতনায ভৰিস্সতী’’তি নেসং ন হোতি. ফলে পন খীণে নেৰ রুক্খস্স আরক্খং ঠপেন্তি, ন তত্থ পত্তং ৰা নখং ৰা তুণ্ডং ৰা ঠপেন্তি, অথ খো তস্মিং রুক্খে অনপেক্খো হুত্ৰা যো যং দিসাভাগং ইচ্ছতি, সো তেন সপত্তভারোৰ – উপ্পতিত্ৰা গচ্ছতি. এৰমেৰ অযং ভিক্খু নিস্সঙ্গো নিরপেক্খোযেৰ পক্কমতি. তেন ৰুত্তং ‘‘সমাদাযেৰ পক্কমতী’’তি. অরিযেনাতি নিদ্দোসেন. অজ্ঝত্তন্তি সকে অত্তভাৰে. অনৰজ্জসুখন্তি নিদ্দোসসুখং.

২৯৫. সো চক্খুনা রূপং দিস্ৰাতি সো ইমিনা অরিযেন সীলক্খন্ধেন সমন্নাগতো ভিক্খু চক্খুৰিঞ্ঞাণেন রূপং পস্সিত্ৰাতি অত্থো. সেসপদেসু যং ৰত্তব্বং সিযা, তং সব্বং ৰিসুদ্ধিমগ্গে ৰুত্তং. অব্যাসেকসুখন্তি কিলেসেহি অনৰসিত্তসুখং, অৰিকিণ্ণসুখন্তিপি ৰুত্তং. ইন্দ্রিযসংৰরসুখঞ্হি দিট্ঠাদীসু দিট্ঠমত্তাদিৰসেন পৰত্ততায অৰিকিণ্ণং হোতি. সো অভিক্কন্তে পটিক্কন্তেতি সো মনচ্ছট্ঠানং ইন্দ্রিযানং সংৰরেন সমন্নাগতো ভিক্খু ইমেসু অভিক্কন্তপটিক্কন্তাদীসু সত্তসু ঠানেসু সতিসম্পজঞ্ঞৰসেন সম্পজানকারী হোতি. তত্থ যং ৰত্তব্বং সিযা, তং সতিপট্ঠানে ৰুত্তমেৰ.

২৯৬. সো ইমিনা চাতিআদিনা কিং দস্সেতি? অরঞ্ঞৰাসস্স পচ্চযসম্পত্তিং দস্সেতি. যস্স হি ইমে চত্তারো পচ্চযা নত্থি, তস্স অরঞ্ঞৰাসো ন ইজ্ঝতি, তিরচ্ছানগতেহি ৰা ৰনচরকেহি ৰা সদ্ধিং ৰত্তব্বতং আপজ্জতি, অরঞ্ঞে অধিৰত্থা দেৰতা, ‘‘কিং এৰরূপস্স পাপভিক্খুনো অরঞ্ঞৰাসেনা’’তি ভেরৰসদ্দং সাৰেন্তি, হত্থেহি সীসং পহরিত্ৰা পলাযনাকারং করোন্তি. ‘‘অসুকো ভিক্খু অরঞ্ঞং পৰিসিত্ৰা ইদঞ্চিদঞ্চ পাপকম্মং অকাসী’’তি অযসো পত্থরতি. যস্স পনেতে চত্তারো পচ্চযা অত্থি, তস্স অরঞ্ঞৰাসো ইজ্ঝতি, সো হি অত্তনো সীলং পচ্চৰেক্খন্তো কিঞ্চি কাল়কং ৰা তিলকং ৰা অপস্সন্তো পীতিং উপ্পাদেত্ৰা তং খযতো ৰযতো সম্মসন্তো অরিযভূমিং ওক্কমতি, অরঞ্ঞে অধিৰত্থা দেৰতা অত্তমনা ৰণ্ণং ভাসন্তি, ইতিস্স উদকে পক্খিত্ততেলবিন্দু ৰিয যসো ৰিত্থারিকো হোতি.

তত্থ ৰিৰিত্তন্তি সুঞ্ঞং অপ্পসদ্দং, অপ্পনিগ্ঘোসন্তি অত্থো. এতদেৰ হি সন্ধায ৰিভঙ্গে, ‘‘ৰিৰিত্তন্তি সন্তিকে চেপি সেনাসনং হোতি, তঞ্চ অনাকিণ্ণং গহট্ঠেহি পব্বজিতেহি, তেন তং ৰিৰিত্ত’’ন্তি (ৰিভ. ৫২৬) ৰুত্তং. সেতি চেৰ আসতি চ এত্থাতি সেনাসনং, মঞ্চপীঠাদীনমেতং অধিৰচনং. তেনাহ – ‘‘সেনাসনন্তি মঞ্চোপি সেনাসনং, পীঠম্পি ভিসিপি বিম্বোহনম্পি, ৰিহারোপি অড্ঢযোগোপি, পাসাদোপি, হম্মিযম্পি, গুহাপি, অট্টোপি, মাল়োপি, লেণম্পি, ৰেল়ুগুম্বোপি, রুক্খমূলম্পি, মণ্ডপোপি সেনাসনং, যত্থ ৰা পন ভিক্খূ পটিক্কমন্তি, সব্বমেতং সেনাসন’’ন্তি. অপিচ ‘‘ৰিহারো অড্ঢযোগো পাসাদো হম্মিযং গুহা’’তি ইদং ৰিহারসেনাসনং নাম. ‘‘মঞ্চো পীঠং, ভিসি বিম্বোহন’’ন্তি ইদং মঞ্চপীঠসেনাসনং নাম. ‘‘চিমিলিকা, চম্মখণ্ডো, তিণসন্থারো, পণ্ণসন্থারো’’তি ইদং সন্থতসেনাসনং নাম. ‘‘যত্থ ৰা পন ভিক্খূ পটিক্কমন্তী’’তি ইদং ওকাসসেনাসনং নামাতি এৰং চতুব্বিধং সেনাসনং হোতি, তং সব্বম্পি সেনাসনগ্গহণেন গহিতমেৰ. ইমস্স পন সকুণসদিসস্স চাতুদ্দিসস্স ভিক্খুনো অনুচ্ছৰিকং দস্সেন্তো অরঞ্ঞং রুক্খমূলন্তিআদিমাহ.

তত্থ অরঞ্ঞন্তি ‘‘নিক্খমিত্ৰা বহি ইন্দখীলা, সব্বমেতং অরঞ্ঞ’’ন্তি ইদং ভিক্খুনীনং ৰসেন আগতং অরঞ্ঞং. ‘‘আরঞ্ঞকং নাম সেনাসনং পঞ্চধনুসতিকং পচ্ছিম’’ন্তি (পারা. ৬৫৪) ইদং পন ইমস্স ভিক্খুনো অনুরূপং, তস্স লক্খণং ৰিসুদ্ধিমগ্গে ধুতঙ্গনিদ্দেসে ৰুত্তং. রুক্খমূলন্তি যংকিঞ্চি সন্দচ্ছাযং ৰিৰিত্তং রক্খমূলং. পব্বতন্তি সেলং. তত্থ হি উদকসোণ্ডীসু উদককিচ্চং কত্ৰা সীতায রুক্খচ্ছাযায নিসিন্নস্স নানাদিসাসু খাযমানাসু সীতেন ৰাতেন ৰীজিযমানস্স চিত্তং একগ্গং হোতি. কন্দরন্তি কং ৰুচ্চতি উদকং, তেন দারিতং, উদকেন ভিন্নং পব্বতপ্পদেসং, যং নদীতুম্বন্তিপি নদীকুঞ্জন্তিপি ৰদন্তি. তত্থ হি রজতপট্টসদিসা ৰালিকা হোন্তি, মত্থকে মণিৰিতানং ৰিয ৰনগহনং, মণিক্খন্ধসদিসং উদকং সন্দতি. এৰরূপং কন্দরং ওরুয্হ পানীযং পিৰিত্ৰা গত্তানি সীতানি কত্ৰা ৰালিকং উস্সাপেত্ৰা পংসুকূলচীৰরং পঞ্ঞাপেত্ৰা নিসিন্নস্স সমণধম্মং করোতো চিত্তং একগ্গং হোতি. গিরিগুহন্তি দ্ৰিন্নং পব্বতানং অন্তরা, একস্মিংযেৰ ৰা উমঙ্গসদিসং মহাৰিৰরং. সুসানলক্খণং ৰিসুদ্ধিমগ্গে ৰুত্তং. ৰনপত্থন্তি অতিক্কমিত্ৰা মনুস্সানং উপচারট্ঠানং, যত্থ ন কসন্তি ন ৰপন্তি. তেনেৰাহ – ‘‘ৰনপত্থন্তি দূরানমেতং সেনাসনানং অধিৰচন’’ন্তিআদি (ৰিভ. ৫৩১). অব্ভোকাসন্তি অচ্ছন্নং, আকঙ্খমানো পনেত্থ চীৰরকুটিং কত্ৰা ৰসতি. পলালপুঞ্জন্তি পলালরাসিং. মহাপলালপুঞ্জতো হি পলালং নিক্কড্ঢিত্ৰা পব্ভারলেণসদিসে আলযে করোন্তি, গচ্ছগুম্বাদীনম্পি উপরি পলালং পক্খিপিত্ৰা হেট্ঠা নিসিন্না সমণধম্মং করোন্তি, তং সন্ধাযেতং ৰুত্তং.

পচ্ছাভত্তন্তি ভত্তস্স পচ্ছতো. পিণ্ডপাতপটিক্কন্তোতি পিণ্ডপাতপরিযেসনতো পটিক্কন্তো. পল্লঙ্কন্তি সমন্ততো ঊরুবদ্ধাসনং. আভুজিত্ৰাতি বন্ধিত্ৰা. উজুং কাযং পণিধাযাতি উপরিমং সরীরং উজুকং ঠপেত্ৰা অট্ঠারস পিট্ঠিকণ্টকে কোটিযা কোটিং পটিপাদেত্ৰা. এৰঞ্হি নিসিন্নস্স চম্মমংসনহারূনি ন পণমন্তি. অথস্স যা তেসং পণমনপচ্চযা খণে খণে ৰেদনা উপ্পজ্জেয্যুং, তা ন উপ্পজ্জন্তি. তাসু অনুপ্পজ্জমানাসু চিত্তং একগ্গং হোতি, কম্মট্ঠানং ন পরিপততি, ৰুদ্ধিং ফাতিং উপগচ্ছতি. পরিমুখং সতিং উপট্ঠপেত্ৰাতি কম্মট্ঠানাভিমুখং সতিং ঠপযিত্ৰা, মুখসমীপে ৰা কত্ৰাতি অত্থো. তেনেৰ ৰিভঙ্গে ৰুত্তং – ‘‘অযং সতি উপট্ঠিতা হোতি সূপট্ঠিতা নাসিকগ্গে ৰা মুখনিমিত্তে ৰা, তেন ৰুচ্চতি পরিমুখং সতিং উপট্ঠপেত্ৰা’’তি (ৰিভ. ৫৩৭). অথ ৰা ‘‘পরীতি পরিগ্গহট্ঠো, মুখন্তি নিয্যানত্থো, সতীতি উপট্ঠানত্থো, তেন ৰুচ্চতি পরিমুখং সতি’’ন্তি (পটি. ম. ১.১৬৪) এৰং পটিসম্ভিদাযং ৰুত্তনযেনপেত্থ অত্থো দট্ঠব্বো. তত্রাযং সঙ্খেপো ‘‘পরিগ্গহিতনিয্যানসতিং কত্ৰা’’তি.

অভিজ্ঝং লোকেতি এত্থ লুজ্জনপলুজ্জনট্ঠেন পঞ্চুপাদানক্খন্ধা লোকো, তস্মা পঞ্চসু উপাদানক্খন্ধেসু রাগং পহায কামচ্ছন্দং ৰিক্খম্ভেত্ৰাতি অযমেত্থ অত্থো. ৰিগতাভিজ্ঝেনাতি ৰিক্খম্ভনৰসেন পহীনত্তা ৰিগতাভিজ্ঝেন, ন চক্খুৰিঞ্ঞাণসদিসেনাতি অত্থো. অভিজ্ঝায চিত্তং পরিসোধেতীতি অভিজ্ঝাতো চিত্তং পরিমোচেতি. যথা নং সা মুঞ্চতি চেৰ, মুঞ্চিত্ৰা চ ন পুন গণ্হাতি, এৰং করোতীতি অত্থো. ব্যাপাদপদোসং পহাযাতিআদীসুপি এসেৰ নযো. ব্যাপজ্জতি ইমিনা চিত্তং পূতিকম্মাসাদযো ৰিয পুরিমপকতিং পজহতীতি ব্যাপাদো. ৰিকারাপত্তিযা পদুস্সতি, পরং ৰা পদূসেতি ৰিনাসেতীতি পদোসো. উভযমেতং কোধস্সেৰাধিৰচনং. থিনং চিত্তগেলঞ্ঞং. মিদ্ধং চেতসিকগেলঞ্ঞং. থিনঞ্চ মিদ্ধঞ্চ থিনমিদ্ধং. আলোকসঞ্ঞীতি রত্তিম্পি দিৰা দিট্ঠআলোকসঞ্জাননসমত্থতায ৰিগতনীৰরণায পরিসুদ্ধায সঞ্ঞায সমন্নাগতো. সতো সম্পজানোতি সতিযা চ ঞাণেন চ সমন্নাগতো. ইদং উভযং আলোকসঞ্ঞায উপকারত্তা ৰুত্তং. উদ্ধচ্চঞ্চ কুক্কুচ্চঞ্চ উদ্ধচ্চকুক্কুচ্চং. তিণ্ণৰিচিকিচ্ছোতি ৰিচিকিচ্ছং তরিত্ৰা অতিক্কমিত্ৰা ঠিতো. ‘‘কথমিদং কথমিদ’’ন্তি এৰং নপ্পৰত্ততীতি অকথংকথী. কুসলেসু ধম্মেসূতি অনৰজ্জেসু ধম্মেসু. ‘‘ইমে নু খো কুসলা, কথমিমে কুসলা’’তি এৰং ন ৰিচিকিচ্ছতি ন কঙ্খতীতি অত্থো. অযমেত্থ সঙ্খেপো, ইমেসু পন নীৰরণেসু ৰচনত্থলক্খণাদিভেদতো যং ৰত্তব্বং সিযা, তং সব্বং ৰিসুদ্ধিমগ্গে ৰুত্তং.

২৯৭. পঞ্ঞায দুব্বলীকরণেতি ইমে পঞ্চ নীৰরণা উপ্পজ্জমানা অনুপ্পন্নায লোকিযলোকুত্তরায পঞ্ঞায উপ্পজ্জিতুং ন দেন্তি, উপ্পন্না অপি অট্ঠ সমাপত্তিযো পঞ্চ ৰা অভিঞ্ঞা উচ্ছিন্দিত্ৰা পাতেন্তি; তস্মা ‘‘পঞ্ঞায দুব্বলীকরণা’’তি ৰুচ্চন্তি. তথাগতপদং ইতিপীতি ইদম্পি তথাগতস্স ঞাণপদং ঞাণৰল়ঞ্জং ঞাণেন অক্কন্তট্ঠানন্তি ৰুচ্চতি. তথাগতনিসেৰিতন্তি তথাগতস্স ঞাণফাসুকায নিঘংসিতট্ঠানং. তথাগতারঞ্জিতন্তি তথাগতস্স ঞাণদাঠায আরঞ্জিতট্ঠানং.

২৯৯. যথাভূতং পজানাতীতি যথাসভাৰং পজানাতি. নত্ৰেৰ তাৰ অরিযসাৰকো নিট্ঠং গতো হোতীতি ইমা ঝানাভিঞ্ঞা বাহিরকেহিপি সাধারণাতি ন তাৰ নিট্ঠং গতো হোতি. মগ্গক্খণেপি অপরিযোসিতকিচ্চতায ন তাৰ নিট্ঠং গতো হোতি. অপিচ খো নিট্ঠং গচ্ছতীতি অপিচ খো পন মগ্গক্খণে মহাহত্থিং পস্সন্তো নাগৰনিকো ৰিয সম্মাসম্বুদ্ধো ভগৰাতি ইমিনা আকারেন তীসু রতনেসু নিট্ঠং গচ্ছতি. নিট্ঠং গতো হোতীতি এৰং মগ্গক্খণে নিট্ঠং গচ্ছন্তো অরহত্তফলক্খণে পরিযোসিতসব্বকিচ্চতায সব্বাকারেন তীসু রতনেসু নিট্ঠং গতো হোতি. সেসং উত্তানত্থমেৰাতি.

পপঞ্চসূদনিযা মজ্ঝিমনিকাযট্ঠকথায

চূল়হত্থিপদোপমসুত্তৰণ্ণনা নিট্ঠিতা.

৮. মহাহত্থিপদোপমসুত্তৰণ্ণনা

৩০০. এৰং মে সুতন্তি মহাহত্থিপদোপমসুত্তং. তত্থ জঙ্গলানন্তি পথৰীতলচারীনং. পাণানন্তি সপাদকপাণানং. পদজাতানীতি পদানি. সমোধানং গচ্ছন্তীতি ওধানং পক্খেপং গচ্ছন্তি. অগ্গমক্খাযতীতি সেট্ঠং অক্খাযতি. যদিদং মহন্তত্তেনাতি মহন্তভাৰেন অগ্গং অক্খাযতি, ন গুণৰসেনাতি অত্থো. যে কেচি কুসলা ধম্মাতি যে কেচি লোকিযা ৰা লোকুত্তরা ৰা কুসলা ধম্মা. সঙ্গহং গচ্ছন্তীতি এত্থ চতুব্বিধো সঙ্গহো – সজাতিসঙ্গহো, সঞ্জাতিসঙ্গহো, কিরিযসঙ্গহো, গণনসঙ্গহোতি. তত্থ ‘‘সব্বে খত্তিযা আগচ্ছন্তু সব্বে ব্রাহ্মণা’’তি এৰং সমানজাতিৰসেন সঙ্গহো সজাতিসঙ্গহো নাম. ‘‘সব্বে কোসলকা সব্বে মাগধকা’’তি এৰং সঞ্জাতিদেসৰসেন সঙ্গহো সঞ্জাতিসঙ্গহো নাম. ‘‘সব্বে রথিকা সব্বে ধনুগ্গহা’’তি এৰং কিরিযৰসেন সঙ্গহো কিরিযসঙ্গহো নাম. ‘‘চক্খাযতনং কতমক্খন্ধগণনং গচ্ছতীতি? চক্খাযতনং রূপক্খন্ধগণনং গচ্ছতি. হঞ্চি চক্খাযতনং রূপক্খন্ধগণনং গচ্ছতি, তেন ৰত রে ৰত্তব্বে চক্খাযতনং রূপক্খন্ধেন সঙ্গহিত’’ন্তি (কথা. ৪৭১), অযং গণনসঙ্গহো নাম. ইমস্মিম্পি ঠানে অযমেৰ অধিপ্পেতো.

ননু চ ‘‘চতুন্নং অরিযসচ্চানং কতি কুসলা কতি অকুসলা কতি অব্যাকতাতি পঞ্হস্স ৰিস্সজ্জনে সমুদযসচ্চং অকুসলং, মগ্গসচ্চং কুসলং, নিরোধসচ্চং অব্যাকতং, দুক্খসচ্চং সিযা কুসলং, সিযা অকুসলং, সিযা অব্যাকত’’ন্তি (ৰিভ. ২১৬-২১৭) আগতত্তা চতুভূমকম্পি কুসলং দিযড্ঢমেৰ সচ্চং ভজতি. অথ কস্মা মহাথেরো চতূসু অরিযসচ্চেসু গণনং গচ্ছতীতি আহাতি? সচ্চানং অন্তোগধত্তা. যথা হি ‘‘সাধিকমিদং, ভিক্খৰে, দিযড্ঢসিক্খাপদসতং অন্ৰদ্ধমাসং উদ্দেসং আগচ্ছতি, যত্থ অত্তকামা কুলপুত্তা সিক্খন্তি. তিস্সো ইমা, ভিক্খৰে, সিক্খা অধিসীলসিক্খা অধিচিত্তসিক্খা অধিপঞ্ঞাসিক্খা’’তি (অ. নি. ৩.৮৮) এত্থ সাধিকমিদং দিযড্ঢসিক্খাপদসতং একা অধিসীলসিক্খাৰ হোতি, তং সিক্খন্তোপি তিস্সো সিক্খা সিক্খতীতি দস্সিতো, সিক্খানং অন্তোগধত্তা. যথা চ একস্স হত্থিপদস্স চতূসু কোট্ঠাসেসু একস্মিং কোট্ঠাসে ওতিণ্ণানিপি দ্ৰীসু তীসু চতূসু কোট্ঠাসেসু ওতিণ্ণানিপি সিঙ্গালসসমিগাদীনং পাদানি হত্থিপদে সমোধানং গতানেৰ হোন্তি. হত্থিপদতো অমুচ্চিত্ৰা তস্সেৰ অন্তোগধত্তা. এৰমেৰ একস্মিম্পি দ্ৰীসুপি তীসুপি চতূসুপি সচ্চেসু গণনং গতা ধম্মা চতূসু সচ্চেসু গণনং গতাৰ হোন্তি; সচ্চানং অন্তোগধত্তাতি দিযড্ঢসচ্চগণনং গতেপি কুসলধম্মে ‘‘সব্বে তে চতূসু অরিযসচ্চেসু সঙ্গহং গচ্ছন্তী’’তি আহ. ‘‘দুক্খে অরিযসচ্চে’’তিআদীসু উদ্দেসপদেসু চেৰ জাতিপি দুক্খাতিআদীসু নিদ্দেসপদেসু চ যং ৰত্তব্বং, তং ৰিসুদ্ধিমগ্গে ৰুত্তমেৰ. কেৰলং পনেত্থ দেসনানুক্কমোৰ ৰেদিতব্বো.

৩০১. যথা হি ছেকো ৰিলীৰকারো সুজাতং ৰেল়ুং লভিত্ৰা চতুধা ছেত্ৰা ততো তযো কোট্ঠাসে ঠপেত্ৰা একং গণ্হিত্ৰা পঞ্চধা ভিন্দেয্য, ততোপি চত্তারো ঠপেত্ৰা একং গণ্হিত্ৰা ফালেন্তো পঞ্চ পেসিযো করেয্য, ততো চতস্সো ঠপেত্ৰা একং গণ্হিত্ৰা কুচ্ছিভাগং পিট্ঠিভাগন্তি দ্ৰিধা ফালেত্ৰা পিট্ঠিভাগং ঠপেত্ৰা কুচ্ছিভাগং আদায ততো সমুগ্গবীজনিতালৰণ্টাদিনানপ্পকারং ৰেল়ুৰিকতিং করেয্য, সো পিট্ঠিভাগঞ্চ ইতরা চ চতস্সো পেসিযো ইতরে চ চত্তারো কোট্ঠাসে ইতরে চ তযো কোট্ঠাসে কম্মায ন উপনেস্সতীতি ন ৰত্তব্বো. একপ্পহারেন পন উপনেতুং ন সক্কা, অনুপুব্বেন উপনেস্সতি. এৰমেৰ অযং মহাথেরোপি ৰিলীৰকারো সুজাতং ৰেল়ুং লভিত্ৰা চত্তারো কোট্ঠাসে ৰিয, ইমং মহন্তং সুত্তন্তং আরভিত্ৰা চতুঅরিযসচ্চৰসেন মাতিকং ঠপেসি. ৰিলীৰকারস্স তযো কোট্ঠাসে ঠপেত্ৰা একং গহেত্ৰা তস্স পঞ্চধা করণং ৰিয থেরস্স তীণি অরিযসচ্চানি ঠপেত্ৰা একং দুক্খসচ্চং গহেত্ৰা ভাজেন্তস্স খন্ধৰসেন পঞ্চধা করণং. ততো যথা সো ৰিলীৰকারো চত্তারো কোট্ঠাসে ঠপেত্ৰা একং ভাগং গহেত্ৰা পঞ্চধা ফালেসি, এৰং থেরো চত্তারো অরূপক্খন্ধে ঠপেত্ৰা রূপক্খন্ধং ৰিভজন্তো চত্তারি চ মহাভূতানি চতুন্নঞ্চ মহাভূতানং উপাদায রূপন্তি পঞ্চধা অকাসি. ততো যথা সো ৰিলীৰকারো চতস্সো পেসিযো ঠপেত্ৰা একং গহেত্ৰা কুচ্ছিভাগং পিট্ঠিভাগন্তি দ্ৰিধা ফালেসি, এৰং থেরো উপাদায রূপঞ্চ তিস্সো চ ধাতুযো ঠপেত্ৰা একং পথৰীধাতুং ৰিভজন্তো অজ্ঝত্তিকবাহিরৰসেন দ্ৰিধা দস্সেসি. যথা সো ৰিলীৰকারো পিট্ঠিভাগং ঠপেত্ৰা কুচ্ছিভাগং আদায নানপ্পকারং ৰিলীৰৰিকতিং অকাসি, এৰং থেরো বাহিরং পথৰীধাতুং ঠপেত্ৰা অজ্ঝত্তিকং পথৰীধাতুং ৰীসতিযা আকারেহি ৰিভজিত্ৰা দস্সেতুং কতমা চাৰুসো, অজ্ঝত্তিকা পথৰীধাতূতিআদিমাহ.

যথা পন ৰিলীৰকারো পিট্ঠিভাগঞ্চ ইতরা চ চত্তস্সো পেসিযো ইতরে চ চত্তারো কোট্ঠাসে ইতরে চ তযো কোট্ঠাসে অনুপুব্বেন কম্মায উপনেস্সতি, ন হি সক্কা একপ্পহারেন উপনেতুং, এৰং থেরোপি বাহিরঞ্চ পথৰীধাতুং ইতরা চ তিস্সো ধাতুযো উপাদারূপঞ্চ ইতরে চ চত্তারো অরূপিনো খন্ধে ইতরানি চ তীণি অরিযসচ্চানি অনুপুব্বেন ৰিভজিত্ৰা দস্সেস্সতি, ন হি সক্কা একপ্পহারেন দস্সেতুং. অপিচ রাজপুত্তূপমাযপি অযং কমো ৰিভাৰেতব্বো –

একো কির মহারাজা, তস্স পরোসহস্সং পুত্তা. সো তেসং পিল়ন্ধনপরিক্খারং চতূসু পেল়াসু ঠপেত্ৰা জেট্ঠপুত্তস্স অপ্পেসি – ‘‘ইদং তে, তাত, ভাতিকানং পিল়ন্ধনভণ্ডং তথারূপে ছণে সম্পত্তে পিল়ন্ধনং নো দেহীতি যাচন্তানং দদেয্যাসী’’তি. সো ‘‘সাধু দেৰা’’তি সারগব্ভে পটিসামেসি, তথারূপে ছণদিৰসে রাজপুত্তা রঞ্ঞো সন্তিকং গন্ত্ৰা ‘‘পিল়ন্ধনং নো, তাত, দেথ, নক্খত্তং কীল়িস্সামা’’তি আহংসু. তাতা, জেট্ঠভাতিকস্স ৰো হত্থে মযা পিল়ন্ধনং ঠপিতং, তং আহরাপেত্ৰা পিল়ন্ধথাতি. তে সাধূতি পটিস্সুণিত্ৰা তস্স সন্তিকং গন্ত্ৰা, ‘‘তুম্হাকং কির নো হত্থে পিল়ন্ধনভণ্ডং, তং দেথা’’তি আহংসু. সো এৰং করিস্সামীতি গব্ভং ৰিৰরিত্ৰা, চতস্সো পেল়াযো নীহরিত্ৰা তিস্সো ঠপেত্ৰা একং ৰিৰরিত্ৰা, ততো পঞ্চ সমুগ্গে নীহরিত্ৰা চত্তারো ঠপেত্ৰা একং ৰিৰরিত্ৰা, ততো পঞ্চসু করণ্ডেসু নীহরিতেসু চত্তারো ঠপেত্ৰা একং ৰিৰরিত্ৰা পিধানং পস্সে ঠপেত্ৰা ততো হত্থূপগপাদূপগাদীনি নানপ্পকারানি পিল়ন্ধনানি নীহরিত্ৰা অদাসি. সো কিঞ্চাপি ইতরেহি চতূহি করণ্ডেহি ইতরেহি চতূহি সমুগ্গেহি ইতরাহি তীহি পেল়াহি ন তাৰ ভাজেত্ৰা দেতি, অনুপুব্বেন পন দস্সতি, ন হি সক্কা একপ্পহারেন দাতুং.

তত্থ মহারাজা ৰিয ভগৰা দট্ঠব্বো. ৰুত্তম্পি চেতং – ‘‘রাজাহমস্মি সেলাতি ভগৰা, ধম্মরাজা অনুত্তরো’’তি (সু. নি. ৫৫৯). জেট্ঠপুত্তো ৰিয সারিপুত্তত্থেরো, ৰুত্তম্পি চেতং – ‘‘যং খো তং, ভিক্খৰে, সম্মা ৰদমানো ৰদেয্য, ‘ভগৰতো পুত্তো ওরসো মুখতো জাতো ধম্মজো ধম্মনিম্মিতো ধম্মদাযাদো, নো আমিসদাযাদো’তি সারিপুত্তমেৰ তং সম্মা ৰদমানো ৰদেয্য, ভগৰতো পুত্তো…পে… নো আমিসদাযাদো’’তি (ম. নি. ৩.৯৭). পরোসহস্সরাজপুত্তা ৰিয ভিক্খুসঙ্ঘো দট্ঠব্বো. ৰুত্তম্পি চেতং –

‘‘পরোসহস্সং ভিক্খূনং, সুগতং পযিরুপাসতি;

দেসেন্তং ৰিরজং ধম্মং, নিব্বানং অকুতোভয’’ন্তি. (সং. নি. ১.২১৬);

রঞ্ঞো তেসং পুত্তানং পিল়ন্ধনং চতূসু পেল়াসু পক্খিপিত্ৰা জেট্ঠপুত্তস্স হত্থে ঠপিতকালো ৰিয ভগৰতো ধম্মসেনাপতিস্স হত্থে চতুসচ্চপ্পকাসনায ঠপিতকালো, তেনেৰাহ – ‘‘সারিপুত্তো, ভিক্খৰে, পহোতি চত্তারি অরিযসচ্চানি ৰিত্থারেন আচিক্খিতুং দেসেতুং পঞ্ঞাপেতুং পট্ঠপেতুং ৰিৰরিতুং ৰিভজিতুং উত্তানীকাতু’’ন্তি (ম. নি. ৩.৩৭১). তথারূপে খণে তেসং রাজপুত্তানং তং রাজানং উপসঙ্কমিত্ৰা পিল়ন্ধনং যাচনকালো ৰিয ভিক্খুসঙ্ঘস্স ৰস্সূপনাযিকসমযে আগন্ত্ৰা ধম্মদেসনায যাচিতকালো. উপকট্ঠায কির ৰস্সূপনাযিকায ইদং সুত্তং দেসিতং. রঞ্ঞো, ‘‘তাতা, জেট্ঠভাতিকস্স ৰো হত্থে মযা পিল়ন্ধনং ঠপিতং তং আহরাপেত্ৰা পিল়ন্ধথা’’তি ৰুত্তকালো ৰিয সম্বুদ্ধেনাপি, ‘‘সেৰেথ, ভিক্খৰে, সারিপুত্তমোগ্গল্লানে, ভজথ, ভিক্খৰে, সারিপুত্তমোগ্গল্লানে. পণ্ডিতা ভিক্খূ অনুগ্গাহকা সব্রহ্মচারীন’’ন্তি এৰং ধম্মসেনাপতিনো সন্তিকে ভিক্খূনং পেসিতকালো.

রাজপুত্তেহি রঞ্ঞো কথং সুত্ৰা জেট্ঠভাতিকস্স সন্তিকং গন্ত্ৰা পিল়ন্ধনং যাচিতকালো ৰিয ভিক্খূহি সত্থুকথং সুত্ৰা ধম্মসেনাপতিং উপসঙ্কম্ম ধম্মদেসনং আযাচিতকালো. জেট্ঠভাতিকস্স গব্ভং ৰিৰরিত্ৰা চতস্সো পেল়াযো নীহরিত্ৰা ঠপনং ৰিয ধম্মসেনাপতিস্স ইমং সুত্তন্তং আরভিত্ৰা চতুন্নং অরিযসচ্চানং ৰসেন মাতিকায ঠপনং. তিস্সো পেল়াযো ঠপেত্ৰা একং ৰিৰরিত্ৰা ততো পঞ্চসমুগ্গনীহরণং ৰিয তীণি অরিযসচ্চানি ঠপেত্ৰা দুক্খং অরিযসচ্চং ৰিভজন্তস্স পঞ্চক্খন্ধদস্সনং. চত্তারো সমুগ্গে ঠপেত্ৰা একং ৰিৰরিত্ৰা ততো পঞ্চকরণ্ডনীহরণং ৰিয চত্তারো অরূপক্খন্ধে ঠপেত্ৰা একং রূপক্খন্ধং ৰিভজন্তস্স চতুমহাভূতউপাদারূপৰসেন পঞ্চকোট্ঠাসদস্সনং.

৩০২. চত্তারো করণ্ডে ঠপেত্ৰা একং ৰিৰরিত্ৰা পিধানং পস্সে ঠপেত্ৰা হত্থূপগপাদূপগাদিপিল়ন্ধনদানং ৰিয তীণি মহাভূতানি উপাদারূপঞ্চ ঠপেত্ৰা একং পথৰীধাতুং ৰিভজন্তস্স বাহিরং তাৰ পিধানং ৰিয ঠপেত্ৰা অজ্ঝত্তিকায পথৰীধাতুযা নানাসভাৰতো ৰীসতিযা আকারেহি দস্সনত্থং ‘‘কতমা চাৰুসো অজ্ঝত্তিকা পথৰীধাতূ’’তিআদিৰচনং.

তস্স পন রাজপুত্তস্স তেহি চতূহি করণ্ডেহি চতূহি সমুগ্গেহি তীহি চ পেল়াহি পচ্ছা অনুপুব্বেন নীহরিত্ৰা পিল়ন্ধনদানং ৰিয থেরস্সাপি ইতরেসঞ্চ তিণ্ণং মহাভূতানং উপাদারূপানঞ্চ চতুন্নং অরূপক্খন্ধানঞ্চ তিণ্ণং অরিযসচ্চানঞ্চ পচ্ছা অনুপুব্বেন ভাজেত্ৰা দস্সনং ৰেদিতব্বং. যং পনেতং ‘‘কতমা চাৰুসো, অজ্ঝত্তিকা পথৰীধাতূ’’তিআদি ৰুত্তং. তত্থ অজ্ঝত্তং পচ্চত্তন্তি উভযম্পেতং নিযকাধিৰচনমেৰ. কক্খল়ন্তি থদ্ধং. খরিগতন্তি ফরুসং. উপাদিন্নন্তি ন কম্মসমুট্ঠানমেৰ, অৰিসেসেন পন সরীরট্ঠকস্সেতং গহণং. সরীরট্ঠকঞ্হি উপাদিন্নং ৰা হোতু, অনুপাদিন্নং ৰা, আদিন্নগহিতপরামট্ঠৰসেন সব্বং উপাদিন্নমেৰ নাম. সেয্যথিদং – কেসা লোমা…পে… উদরিযং করীসন্তি ইদং ধাতুকম্মট্ঠানিকস্স কুলপুত্তস্স অজ্ঝত্তিকপথৰীধাতুৰসেন তাৰ কম্মট্ঠানং ৰিভত্তং. এত্থ পন মনসিকারং আরভিত্ৰা ৰিপস্সনং ৰড্ঢেত্ৰা অরহত্তং গহেতুকামেন যং কাতব্বং, তং সব্বং ৰিসুদ্ধিমগ্গে ৰিত্থারিতমেৰ. মত্থলুঙ্গং পন ন ইধ পাল়িআরুল়্হং. তম্পি আহরিত্ৰা, ৰিসুদ্ধিমগ্গে ৰুত্তনযেনেৰ ৰণ্ণসণ্ঠানাদিৰসেন ৰৰত্থপেত্ৰা, ‘‘অযম্পি অচেতনা অব্যাকতা সুঞ্ঞা থদ্ধা পথৰীধাতু এৰা’’তি মনসি কাতব্বং. যং ৰা পনঞ্ঞম্পীতি ইদং ইতরেসু তীসু কোট্ঠাসেসু অনুগতায পথৰীধাতুযা গহণত্থং ৰুত্তং. যা চেৰ খো পন অজ্ঝত্তিকা পথৰীধাতূতি যা চ অযং ৰুত্তপ্পকারা অজ্ঝত্তিকা পথৰীধাতু. যা চ বাহিরাতি যা চ ৰিভঙ্গে, ‘‘অযো লোহং তিপু সীস’’ন্তিআদিনা (ৰিভ. ১৭৩) নযেন আগতা বাহিরা পথৰীধাতু.

এত্তাৰতা থেরেন অজ্ঝত্তিকা পথৰীধাতু নানাসভাৰতো ৰীসতিযা আকারেহি ৰিত্থারেন দস্সিতা, বাহিরা সঙ্খেপেন. কস্মা? যস্মিঞ্হি ঠানে সত্তানং আলযো নিকন্তি পত্থনা পরিযুট্ঠানং গহণং পরামাসো বলৰা হোতি, তত্থ তেসং আলযাদীনং উদ্ধরণত্থং বুদ্ধা ৰা বুদ্ধসাৰকা ৰা ৰিত্থারকথং কথেন্তি. যত্থ পন ন বলৰা, তত্থ কত্তব্বকিচ্চাভাৰতো সঙ্খেপেন কথেন্তি. যথা হি কস্সকো খেত্তং কসমানো যত্থ মূলসন্তানকানং বলৰতায নঙ্গলং লগ্গতি, তত্থ গোণে ঠপেত্ৰা পংসুং ৰিযূহিত্ৰা মূলসন্তানকানি ছেত্ৰা ছেত্ৰা উদ্ধরন্তো বহুং ৰাযামং করোতি. যত্থ তানি নত্থি, তত্থ বলৰং পযোগং কত্ৰা গোণে পিট্ঠিযং পহরমানো কসতিযেৰ, এৰংসম্পদমিদং ৰেদিতব্বং.

পথৰীধাতুরেৰেসাতি দুৰিধাপেসা থদ্ধট্ঠেন কক্খল়ট্ঠেন ফরুসট্ঠেন একলক্খণা পথৰীধাতুযেৰ, আৰুসোতি অজ্ঝত্তিকং বাহিরায সদ্ধিং যোজেত্ৰা দস্সেতি. যস্মা বাহিরায পথৰীধাতুযা অচেতনাভাৰো পাকটো, ন অজ্ঝত্তিকায, তস্মা সা বাহিরায সদ্ধিং একসদিসা অচেতনাযেৰাতি গণ্হন্তস্স সুখপরিগ্গহো হোতি. যথা কিং? যথা দন্তেন গোণেন সদ্ধিং যোজিতো অদন্তো কতিপাহমেৰ ৰিসূকাযতি ৰিপ্ফন্দতি, অথ ন চিরস্সেৰ দমথং উপেতি. এৰং অজ্ঝত্তিকাপি বাহিরায সদ্ধিং একসদিসাতি গণ্হন্তস্স কতিপাহমেৰ অচেতনাভাৰো ন উপট্ঠাতি, অথ ন চিরেনেৰস্সা অচেতনাভাৰো পাকটো হোতি. তং নেতং মমাতি তং উভযম্পি ন এতং মম, ন এসোহমস্মি, ন এসো মে অত্তাতি এৰং যথাভূতং সম্মপ্পঞ্ঞায দট্ঠব্বং. যথাভূতন্তি যথাসভাৰং, তঞ্হি অনিচ্চাদিসভাৰং, তস্মা অনিচ্চং দুক্খমনত্তাতি এৰং দট্ঠব্বন্তি অত্থো.

হোতি খো সো, আৰুসোতি কস্মা আরভি? বাহিরআপোধাতুৰসেন বাহিরায পথৰীধাতুযা ৰিনাসং দস্সেত্ৰা ততো ৰিসেসতরেন উপাদিন্নায সরীরট্ঠকপথৰীধাতুযা ৰিনাসদস্সনত্থং. পকুপ্পতীতি আপোসংৰট্টৰসেন ৰড্ঢমানা কুপ্পতি. অন্তরহিতা তস্মিং সমযে বাহিরা পথৰীধাতু হোতীতি তস্মিং সমযে কোটিসতসহস্সচক্কৰাল়ে খারোদকেন ৰিলীযমানা উদকানুগতা হুত্ৰা সব্বা পব্বতাদিৰসেন সণ্ঠিতা পথৰীধাতু অন্তরহিতা হোতি. ৰিলীযিত্ৰা উদকমেৰ হোতি. তাৰ মহল্লিকাযাতি তাৰ মহন্তায.

দুৰে সতসহস্সানি, চত্তারি নহুতানি চ;

এত্তকং বহলত্তেন, সঙ্খাতাযং ৰসুন্ধরাতি. –

এৰং বহলত্তেনেৰ মহন্তায, ৰিত্থারতো পন কোটিসতসহস্সচক্কৰাল়প্পমাণায. অনিচ্চতাতি হুত্ৰা অভাৰতা. খযধম্মতাতি খযং গমনসভাৰতা. ৰযধম্মতাতি ৰযং গমনসভাৰতা. ৰিপরিণামধম্মতাতি পকতিৰিজহনসভাৰতা, ইতি সব্বেহিপি ইমেহি পদেহি অনিচ্চলক্খণমেৰ ৰুত্তং. যং পন অনিচ্চং, তং দুক্খং. যং দুক্খং, তং অনত্তাতি তীণিপি লক্খণানি আগতানেৰ হোন্তি. মত্তট্ঠকস্সাতি পরিত্তট্ঠিতিকস্স, তত্থ দ্ৰীহাকারেহি ইমস্স কাযস্স পরিত্তট্ঠিতিতা ৰেদিতব্বা ঠিতিপরিত্ততায চ সরসপরিত্ততায চ. অযঞ্হি অতীতে চিত্তক্খণে জীৰিত্থ, ন জীৰতি, ন জীৰিস্সতি. অনাগতে চিত্তক্খণে জীৰিস্সতি, ন জীৰতি, ন জীৰিত্থ. পচ্চুপ্পন্নে চিত্তক্খণে জীৰতি, ন জীৰিত্থ, ন জীৰিস্সতীতি ৰুচ্চতি.

‘‘জীৰিতং অত্তভাৰো চ, সুখদুক্খা চ কেৰলা;

একচিত্তসমাযুত্তা, লহু সো ৰত্ততে খণো’’তি. –

ইদং এতস্সেৰ পরিত্তট্ঠিতিদস্সনত্থং ৰুত্তং. এৰং ঠিতিপরিত্ততায পরিত্তট্ঠিতিতা ৰেদিতব্বা.

অস্সাসপস্সাসূপনিবদ্ধাদিভাৰেন পনস্স সরসপরিত্ততা ৰেদিতব্বা. সত্তানঞ্হি অস্সাসূপনিবদ্ধং জীৰিতং, পস্সাসূপনিবদ্ধং জীৰিতং, অস্সাসপস্সাসূপনিবদ্ধং জীৰিতং, মহাভূতূপনিবদ্ধং জীৰিতং, কবল়ীকারাহারূপনিবদ্ধং জীৰিতং, ৰিঞ্ঞাণূপনিবদ্ধং জীৰিতন্তি ৰিসুদ্ধিমগ্গে ৰিত্থারিতং.

তণ্হুপাদিন্নস্সাতি তণ্হায আদিন্নগহিতপরামট্ঠস্স অহন্তি ৰা মমন্তি ৰা অস্মীতি ৰা. অথ খ্ৰাস্স নোতেৰেত্থ হোতীতি অথ খো অস্স ভিক্খুনো এৰং তীণি লক্খণানি আরোপেত্ৰা পস্সন্তস্স এত্থ অজ্ঝত্তিকায পথৰীধাতুযা অহন্তি ৰাতিআদি তিৰিধো তণ্হামানদিট্ঠিগ্গাহো নোতেৰ হোতি, ন হোতিযেৰাতি অত্থো. যথা চ আপোধাতুৰসেন, এৰং তেজোধাতুৰাযোধাতুৰসেনপি বাহিরায পথৰীধাতুযা অন্তরধানং হোতি. ইধ পন একংযেৰ আগতং. ইতরানিপি অত্থতো ৰেদিতব্বানি.

তঞ্চে, আৰুসোতি ইধ তস্স ধাতুকম্মট্ঠানিকস্স ভিক্খুনো সোতদ্ৰারে পরিগ্গহং পট্ঠপেন্তো বলং দস্সেতি. অক্কোসন্তীতি দসহি অক্কোসৰত্থূহি অক্কোসন্তি. পরিভাসন্তীতি তযা ইদঞ্চিদঞ্চ কতং, এৰঞ্চ এৰঞ্চ তং করিস্সামাতি ৰাচায পরিভাসন্তি. রোসেন্তীতি ঘট্টেন্তি. ৰিহেসেন্তীতি দুক্খাপেন্তি, সব্বং ৰাচায ঘট্টনমেৰ ৰুত্তং. সো এৰন্তি সো ধাতুকম্মট্ঠানিকো এৰং সম্পজানাতি. উপ্পন্না খো মে অযন্তি সম্পতিৰত্তমানুপ্পন্নভাৰেন চ সমুদাচারুপ্পন্নভাৰেন চ উপ্পন্না. সোতসম্ফস্সজাতি উপনিস্সযৰসেন সোতসম্ফস্সতো জাতা সোতদ্ৰারজৰনৰেদনা, ফস্সো অনিচ্চোতি সোতসম্ফস্সো হুত্ৰা অভাৰট্ঠেন অনিচ্চোতি পস্সতি. ৰেদনাদযোপি সোতসম্ফস্সসম্পযুত্তাৰ ৰেদিতব্বা. ধাতারম্মণমেৰাতি ধাতুসঙ্খাতমেৰ আরম্মণং. পক্খন্দতীতি ওতরতি. পসীদতীতি তস্মিং আরম্মণে পসীদতি, ভুম্মৰচনমেৰ ৰা এতং. ব্যঞ্জনসন্ধিৰসেন ‘‘ধাতারম্মণমেৰা’’তি ৰুত্তং, ধাতারম্মণেযেৰাতি অযমেত্থ অত্থো. অধিমুচ্চতীতি ধাতুৰসেন এৰন্তি অধিমোক্খং লভতি, ন রজ্জতি, ন দুস্সতি. অযঞ্হি সোতদ্ৰারম্হি আরম্মণে আপাথগতে মূলপরিঞ্ঞাআগন্তুকতাৰকালিকৰসেন পরিগ্গহং করোতি, তস্স ৰিত্থারকথা সতিপট্ঠানে সতিসম্পজঞ্ঞপব্বে ৰুত্তা. সা পন তত্থ চক্খুদ্ৰারৰসেন ৰুত্তা, ইধ সোতদ্ৰারৰসেন ৰেদিতব্বা.

এৰং কতপরিগ্গহস্স হি ধাতুকম্মট্ঠানিকস্স বলৰৰিপস্সকস্স সচেপি চক্খুদ্ৰারাদীসু আরম্মণে আপাথগতে অযোনিসো আৰজ্জনং উপ্পজ্জতি, ৰোট্ঠব্বনং পত্ৰা একং দ্ৰে ৰারে আসেৰনং লভিত্ৰা চিত্তং ভৰঙ্গমেৰ ওতরতি, ন রাগাদিৰসেন উপ্পজ্জতি, অযং কোটিপ্পত্তো তিক্খৰিপস্সকো. অপরস্স রাগাদিৰসেন একং ৰারং জৰনং জৰতি, জৰনপরিযোসানে পন রাগাদিৰসেন এৰং মে জৰনং জৰিতন্তি আৰজ্জতো আরম্মণং পরিগ্গহিতমেৰ হোতি, পুন ৰারং তথা ন জৰতি. অপরস্স একৰারং এৰং আৰজ্জতো পুন দুতিযৰারং রাগাদিৰসেন জৰনং জৰতিযেৰ, দুতিযৰারাৰসানে পন এৰং মে জৰনং জৰিতন্তি আৰজ্জতো আরম্মণং পরিগ্গহিতমেৰ হোতি, ততিযৰারে তথা ন উপ্পজ্জতি. এত্থ পন পঠমো অতিতিক্খো, ততিযো অতিমন্দো, দুতিযস্স পন ৰসেন ইমস্মিং সুত্তে, লটুকিকোপমে, ইন্দ্রিযভাৰনে চ অযমত্থো ৰেদিতব্বো.

এৰং সোতদ্ৰারে পরিগ্গহিতৰসেন ধাতুকম্মট্ঠানিকস্স বলং দস্সেত্ৰা ইদানি কাযদ্ৰারে দীপেন্তো তঞ্চে, আৰুসোতিআদিমাহ. অনিট্ঠারম্মণঞ্হি পত্ৰা দ্ৰীসু ৰারেসু কিলমতি সোতদ্ৰারে চ কাযদ্ৰারে চ. তস্মা যথা নাম খেত্তস্সামী পুরিসো কুদালং গহেত্ৰা খেত্তং অনুসঞ্চরন্তো যত্থ ৰা তত্থ ৰা মত্তিকপিণ্ডং অদত্ৰা দুব্বলট্ঠানেসুযেৰ কুদালেন ভূমিং ভিন্দিত্ৰা সতিণমত্তিকপিণ্ডং দেতি. এৰমেৰ মহাথেরো অনাগতে সিক্খাকামা পধানকম্মিকা কুলপুত্তা ইমেসু দ্ৰারেসু সংৰরং পট্ঠপেত্ৰা খিপ্পমেৰ জাতিজরামরণস্স অন্তং করিস্সন্তীতি ইমেসুযেৰ দ্ৰীসু দ্ৰারেসু গাল়্হং কত্ৰা সংৰরং দেসেন্তো ইমং দেসনং আরভি.

তত্থ সমুদাচরন্তীতি উপক্কমন্তি. পাণিসম্ফস্সেনাতি পাণিপ্পহারেন, ইতরেসুপি এসেৰ নযো. তথাভূতোতি তথাসভাৰো. যথাভূতস্মিন্তি যথাসভাৰে. কমন্তীতি পৰত্তন্তি. এৰং বুদ্ধং অনুস্সরতোতিআদীসু ইতিপি সো ভগৰাতিআদিনা নযেন অনুস্সরন্তোপি বুদ্ধং অনুস্সরতি, ৰুত্তং খো পনেতং ভগৰতাতি অনুস্সরন্তোপি অনুস্সরতিযেৰ. স্ৰাক্খাতো ভগৰতা ধম্মোতিআদিনা নযেন অনুস্সরন্তোপি ধম্মং অনুস্সরতি, ককচূপমোৰাদং অনুস্সরন্তোপি অনুস্সরতিযেৰ. সুপ্পটিপন্নোতিআদিনা নযেন অনুস্সরন্তোপি সঙ্ঘং অনুস্সরতি, ককচোকন্তনং অধিৰাসযমানস্স ভিক্খুনো গুণং অনুস্সরমানোপি অনুস্সরতিযেৰ.

উপেক্খা কুসলনিস্সিতা ন সণ্ঠাতীতি ইধ ৰিপস্সনুপেক্খা অধিপ্পেতা. উপেক্খা কুসলনিস্সিতা সণ্ঠাতীতি ইধ ছল়ঙ্গুপেক্খা, সা পনেসা কিঞ্চাপি খীণাসৰস্স ইট্ঠানিট্ঠেসু আরম্মণেসু অরজ্জনাদিৰসেন পৰত্ততি, অযং পন ভিক্খু ৰীরিযবলেন ভাৰনাসিদ্ধিযা অত্তনো ৰিপস্সনং খীণাসৰস্স ছল়ঙ্গুপেক্খাঠানে ঠপেতীতি ৰিপস্সনাৰ ছল়ঙ্গুপেক্খা নাম জাতা.

৩০৩. আপোধাতুনিদ্দেসে আপোগতন্তি সব্বআপেসু গতং অল্লযূসভাৰলক্খণং. পিত্তং সেম্হন্তিআদীসু পন যং ৰত্তব্বং, তং সব্বং সদ্ধিং ভাৰনানযেন ৰিসুদ্ধিমগ্গে ৰুত্তং. পকুপ্পতীতি ওঘৰসেন ৰড্ঢতি, সমুদ্দতো ৰা উদকং উত্তরতি, অযমস্স পাকতিকো পকোপো, আপোসংৰট্টকালে পন কোটিসতসহস্সচক্কৰাল়ং উদকপূরমেৰ হোতি. ওগচ্ছন্তীতি হেট্ঠা গচ্ছন্তি, উদ্ধনে আরোপিতউদকং ৰিয খযং ৰিনাসং পাপুণন্তি. সেসং পুরিমনযেনেৰ ৰেদিতব্বং.

৩০৪. তেজোধাতুনিদ্দেসে তেজোগতন্তি সব্বতেজেসু গতং উণ্হত্তলক্খণং. তেজো এৰ ৰা তেজোভাৰং গতন্তি তেজোগতং. পুরিমে আপোগতেপি পচ্ছিমে ৰাযোগতেপি এসেৰ নযো. যেন চাতি যেন তেজোগতেন. তস্মিং কুপ্পিতে অযং কাযো সন্তপ্পতি, একাহিকজরাদিভাৰেন উসুমজাতো হোতি. যেন চ জীরীযতীতি যেন অযং কাযো জীরতি, ইন্দ্রিযৰেকল্লত্তং বলপরিক্খযং ৰলিপলিতাদিভাৰঞ্চ পাপুণাতি. যেন চ পরিডয্হতীতি যেন কুপ্পিতেন অযং কাযো দয্হতি, সো চ পুগ্গলো দয্হামি দয্হামীতি কন্দন্তো সতধোতসপ্পিগোসীতচন্দনাদিলেপঞ্চ তালৰণ্টৰাতঞ্চ পচ্চাসীসতি. যেন চ অসিতপীতখাযিতসাযিতং সম্মা পরিণামং গচ্ছতীতি যেন তং অসিতং ৰা ওদনাদি, পীতং ৰা পানকাদি, খাযিতং ৰা পিট্ঠখজ্জকাদি, সাযিতং ৰা অম্বপক্কমধুফাণিতাদি সম্মা পরিপাকং গচ্ছতি, রসাদিভাৰেন ৰিৰেকং গচ্ছতীতি অত্থো. অযমেত্থ সঙ্খেপো. ৰিত্থারতো পন যং ৰত্তব্বং সিযা, তং সব্বং সদ্ধিং ভাৰনানযেন ৰিসুদ্ধিমগ্গে ৰুত্তং.

হরিতন্তন্তি হরিতমেৰ. অল্লতিণাদিং আগম্ম নিব্বাযতীতি অত্থো. পন্থন্তন্তি মহামগ্গমেৰ. সেলন্তন্তি পব্বতং. উদকন্তন্তি উদকং. রমণীযং ৰা ভূমিভাগন্তি তিণগুম্বাদিরহিতং, ৰিৰিত্তং অব্ভোকাসং ভূমিভাগং. অনাহারাতি নিরাহারা নিরুপাদানা, অযম্পি পকতিযাৰ তেজোৰিকারো ৰুত্তো, তেজোসংৰট্টকালে পন কোটিসতসহস্সচক্কৰাল়ং ঝাপেত্ৰা ছারিকামত্তম্পি ন তিট্ঠতি. ন্হারুদদ্দুলেনাতি চম্মনিল্লেখনেন. অগ্গিং গৰেসন্তীতি এৰরূপং সুখুমং উপাদানং গহেত্ৰা অগ্গিং পরিযেসন্তি, যং অপ্পমত্তকম্পি উসুমং লভিত্ৰা পজ্জলতি, সেসমিধাপি পুরিমনযেনেৰ ৰেদিতব্বং.

৩০৫. ৰাযোধাতুনিদ্দেসে উদ্ধঙ্গমা ৰাতাতি উগ্গারহিক্কারাদিপৰত্তকা উদ্ধং আরোহনৰাতা. অধোগমা ৰাতাতি উচ্চারপস্সাৰাদিনীহরণকা অধো ওরোহনৰাতা. কুচ্ছিসযা ৰাতাতি অন্তানং বহিৰাতা. কোট্ঠাসযা ৰাতাতি অন্তানং অন্তোৰাতা. অঙ্গমঙ্গানুসারিনোতি ধমনীজালানুসারেন সকলসরীরে অঙ্গমঙ্গানি অনুসটা সমিঞ্জনপসারণাদিনিব্বত্তকৰাতা. অস্সাসোতি অন্তোপৰিসননাসিকৰাতো. পস্সাসোতি বহিনিক্খমননাসিকৰাতো. অযমেত্থ সঙ্খেপো. ৰিত্থারতো পন যং ৰত্তব্বং সিযা, তং সব্বং সদ্ধিং ভাৰনানযেন ৰিসুদ্ধিমগ্গে ৰুত্তং.

গামম্পি ৰহতীতি সকলগামম্পি চুণ্ণৰিচুণ্ণং কুরুমানা আদায গচ্ছতি, নিগমাদীসুপি এসেৰ নযো. ইধ ৰাযোসংৰট্টকালে কোটিসতসহস্সচক্কৰাল়ৰিদ্ধংসনৰসেন ৰাযোধাতুৰিকারো দস্সিতো. ৰিধূপনেনাতি অগ্গিবীজনকেন. ওস্সৰনেতি ছদনগ্গে, তেন হি উদকং সৰতি, তস্মা তং ‘‘ওস্সৰন’’ন্তি ৰুচ্চতি. সেসমিধাপি পুরিমনযেনেৰ যোজেতব্বং.

৩০৬. সেয্যথাপি, আৰুসোতি ইধ কিং দস্সেতি? হেট্ঠা কথিতানং মহাভূতানং নিস্সত্তভাৰং. কট্ঠন্তি দব্বসম্ভারং. ৰল্লিন্তি আবন্ধনৰল্লিং. তিণন্তি ছদনতিণং. মত্তিকন্তি অনুলেপমত্তিকং. আকাসো পরিৰারিতোতি এতানি কট্ঠাদীনি অন্তো চ বহি চ পরিৰারেত্ৰা আকাসো ঠিতোতি অত্থো. অগারংত্ৰেৰ সঙ্খং গচ্ছতীতি অগারন্তি পণ্ণত্তিমত্তং হোতি. কট্ঠাদীসু পন ৰিসুং ৰিসুং রাসিকতেসু কট্ঠরাসিৰল্লিরাসীত্ৰেৰ ৰুচ্চতি. এৰমেৰ খোতি এৰমেৰ অট্ঠিআদীনি অন্তো চ বহি চ পরিৰারেত্ৰা ঠিতো আকাসো, তানেৰ অট্ঠিআদীনি পটিচ্চ রূপংত্ৰেৰ সঙ্খং গচ্ছতি, সরীরন্তি ৰোহারং গচ্ছতি. যথা কট্ঠাদীনি পটিচ্চ গেহন্তি সঙ্খং গতং অগারং খত্তিযগেহং ব্রাহ্মণগেহন্তি ৰুচ্চতি, এৰমিদম্পি খত্তিযসরীরং ব্রাহ্মণসরীরন্তি ৰুচ্চতি, ন হেত্থ কোচি সত্তো ৰা জীৰো ৰা ৰিজ্জতি.

অজ্ঝত্তিকঞ্চেৰ, আৰুসো, চক্খূতি ইদং কস্মা আরদ্ধং? হেট্ঠা উপাদারূপং চত্তারো চ অরূপিনো খন্ধা তীণি চ অরিযসচ্চানি ন কথিতানি, ইদানি তানি কথেতুং অযং দেসনা আরদ্ধাতি. তত্থ চক্খুং অপরিভিন্নন্তি চক্খুপসাদে নিরুদ্ধেপি উপহতেপি পিত্তসেম্হলোহিতেহি পলিবুদ্ধেপি চক্খু চক্খুৰিঞ্ঞাণস্স পচ্চযো ভৰিতুং ন সক্কোতি, পরিভিন্নমেৰ হোতি, চক্খুৰিঞ্ঞাণস্স পন পচ্চযো ভৰিতুং সমত্থং অপরিভিন্নং নাম. বাহিরা চ রূপাতি বাহিরা চতুসমুট্ঠানিকরূপা. তজ্জো সমন্নাহারোতি তং চক্খুঞ্চ রূপে চ পটিচ্চ ভৰঙ্গং আৰট্টেত্ৰা উপ্পজ্জনমনসিকারো, ভৰঙ্গাৰট্টনসমত্থং চক্খুদ্ৰারে কিরিযমনোধাতুচিত্তন্তি অত্থো. তং রূপানং অনাপাথগতত্তাপি অঞ্ঞাৰিহিতস্সপি ন হোতি, তজ্জস্সাতি তদনুরূপস্স. ৰিঞ্ঞাণভাগস্সাতি ৰিঞ্ঞাণকোট্ঠাসস্স.

যং তথাভূতস্সাতিআদীসু দ্ৰারৰসেন চত্তারি সচ্চানি দস্সেতি. তত্থ তথাভূতস্সাতি চক্খুৰিঞ্ঞাণেন সহভূতস্স, চক্খুৰিঞ্ঞাণসমঙ্গিনোতি অত্থো. রূপন্তি চক্খুৰিঞ্ঞাণস্স ন রূপজনকত্তা চক্খুৰিঞ্ঞাণক্খণে তিসমুট্ঠানরূপং, তদনন্তরচিত্তক্খণে চতুসমুট্ঠানম্পি লব্ভতি. সঙ্গহং গচ্ছতীতি গণনং গচ্ছতি. ৰেদনাদযো চক্খুৰিঞ্ঞাণসম্পযুত্তাৰ. ৰিঞ্ঞাণম্পি চক্খুৰিঞ্ঞাণমেৰ. এত্থ চ সঙ্খারাতি চেতনাৰ ৰুত্তা. সঙ্গহোতি একতো সঙ্গহো. সন্নিপাতোতি সমাগমো. সমৰাযোতি রাসি. যো পটিচ্চসমুপ্পাদং পস্সতীতি যো পচ্চযে পস্সতি. সো ধম্মং পস্সতীতি সো পটিচ্চসমুপ্পন্নধম্মে পস্সতি, ছন্দোতিআদি সব্বং তণ্হাৰেৰচনমেৰ, তণ্হা হি ছন্দকরণৰসেন ছন্দো. আলযকরণৰসেন আলযো. অনুনযকরণৰসেন অনুনযো. অজ্ঝোগাহিত্ৰা গিলিত্ৰা গহনৰসেন অজ্ঝোসানন্তি ৰুচ্চতি. ছন্দরাগৰিনযো ছন্দরাগপ্পহানন্তি নিব্বানস্সেৰ ৰেৰচনং, ইতি তীণি সচ্চানি পাল়িযং আগতানেৰ মগ্গসচ্চং আহরিত্ৰা গহেতব্বং, যা ইমেসু তীসু ঠানেসু দিট্ঠি সঙ্কপ্পো ৰাচা কম্মন্তো আজীৰো ৰাযামো সতি সমাধি ভাৰনাপটিৰেধো, অযং মগ্গোতি. বহুকতং হোতীতি এত্তাৰতাপি বহুং ভগৰতো সাসনং কতং হোতি, অজ্ঝত্তিকঞ্চেৰ, আৰুসো, সোতন্তিআদিৰারেসুপি এসেৰ নযো.

মনোদ্ৰারে পন অজ্ঝত্তিকো মনো নাম ভৰঙ্গচিত্তং. তং নিরুদ্ধম্পি আৰজ্জনচিত্তস্স পচ্চযো ভৰিতুং অসমত্থং মন্দথামগতমেৰ পৰত্তমানম্পি পরিভিন্নং নাম হোতি. আৰজ্জনস্স পন পচ্চযো ভৰিতুং সমত্থং অপরিভিন্নং নাম. বাহিরা চ ধম্মাতি ধম্মারম্মণং. নেৰ তাৰ তজ্জস্সাতি ইদং ভৰঙ্গসমযেনেৰ কথিতং. দুতিযৰারো পগুণজ্ঝানপচ্চৰেক্খণেন ৰা, পগুণকম্মট্ঠানমনসিকারেন ৰা, পগুণবুদ্ধৰচনসজ্ঝাযকরণাদিনা ৰা, অঞ্ঞৰিহিতকং সন্ধায ৰুত্তো. ইমস্মিং ৰারে রূপন্তি চতুসমুট্ঠানম্পি লব্ভতি. মনোৰিঞ্ঞাণঞ্হি রূপং সমুট্ঠাপেতি, ৰেদনাদযো মনোৰিঞ্ঞাণসম্পযুত্তা, ৰিঞ্ঞাণং মনোৰিঞ্ঞাণমেৰ. সঙ্খারা পনেত্থ ফস্সচেতনাৰসেনেৰ গহিতা. সেসং ৰুত্তনযেনেৰ ৰেদিতব্বং. ইতি মহাথেরো হেট্ঠা একদেসমেৰ সম্মসন্তো আগন্ত্ৰা ইমস্মিং ঠানে ঠত্ৰা হেট্ঠা পরিহীনদেসনং সব্বং তংতংদ্ৰারৰসেন ভাজেত্ৰা দস্সেন্তো যথানুসন্ধিনাৰ সুত্তন্তং নিট্ঠপেসীতি.

পপঞ্চসূদনিযা মজ্ঝিমনিকাযট্ঠকথায

মহাহত্থিপদোপমসুত্তৰণ্ণনা নিট্ঠিতা.

৯. মহাসারোপমসুত্তৰণ্ণনা

৩০৭. এৰং মে সুতন্তি মহাসারোপমসুত্তং. তত্থ অচিরপক্কন্তেতি সঙ্ঘং ভিন্দিত্ৰা রুহিরুপ্পাদকম্মং কত্ৰা নচিরপক্কন্তে সলিঙ্গেনেৰ পাটিযেক্কে জাতে.

ইধ, ভিক্খৰে, একচ্চো কুলপুত্তোতি কিঞ্চাপি অসুককুলপুত্তোতি ন নিযামিতো, দেৰদত্তংযেৰ পন সন্ধায ইদং ৰুত্তন্তি ৰেদিতব্বং. সো হি অসম্ভিন্নায মহাসম্মতপৰেণিযা ওক্কাকৰংসে জাতত্তা জাতিকুলপুত্তো. ওতিণ্ণোতি যস্স জাতি অন্তো অনুপৰিট্ঠা, সো জাতিযা ওতিণ্ণো নাম. জরাদীসুপি এসেৰ নযো. লাভসক্কারাদীসুপি লাভোতি চত্তারো পচ্চযা. সক্কারোতি তেসংযেৰ সুকতভাৰো. সিলোকোতি ৰণ্ণভণনং. অভিনিব্বত্তেতীতি উপ্পাদেতি. অপঞ্ঞাতাতি দ্ৰিন্নং জনানং ঠিতট্ঠানে ন পঞ্ঞাযন্তি, ঘাসচ্ছাদনমত্তম্পি ন লভন্তি. অপ্পেসক্খাতি অপ্পপরিৰারা, পুরতো ৰা পচ্ছতো ৰা গচ্ছন্তং ন লভন্তি.

সারেন সারকরণীযন্তি রুক্খসারেন কত্তব্বং অক্খচক্কযুগনঙ্গলাদিকং যংকিঞ্চি. সাখাপলাসং অগ্গহেসি ব্রহ্মচরিযস্সাতি মগ্গফলসারস্স সাসনব্রহ্মচরিযস্স চত্তারো পচ্চযা সাখাপলাসং নাম, তং অগ্গহেসি. তেন চ ৰোসানং আপাদীতি তেনেৰ চ অলমেত্তাৰতা সারো মে পত্তোতি ৰোসানং আপন্নো.

৩১০. ঞাণদস্সনং আরাধেতীতি দেৰদত্তো পঞ্চাভিঞ্ঞো, দিব্বচক্খু চ পঞ্চন্নং অভিঞ্ঞানং মত্থকে ঠিতং, তং ইমস্মিং সুত্তে ‘‘ঞাণদস্সন’’ন্তি ৰুত্তং. অজানং অপস্সং ৰিহরন্তীতি কিঞ্চি সুখুমং রূপং অজানন্তা অন্তমসো পংসুপিসাচকম্পি অপস্সন্তা ৰিহরন্তি.

৩১১. অসমযৰিমোক্খং আরাধেতীতি, ‘‘কতমো অসমযৰিমোক্খো? চত্তারো চ অরিযমগ্গা চত্তারি চ সামঞ্ঞফলানি, নিব্বানঞ্চ, অযং অসমযৰিমোক্খো’’তি (পটি. ম. ১.২১৩) এৰং ৰুত্তে নৰলোকুত্তরধম্মে আরাধেতি সম্পাদেতি পটিলভতি. লোকিযসমাপত্তিযো হি অপ্পিতপ্পিতক্খণেযেৰ পচ্চনীকধম্মেহি ৰিমুচ্চন্তি, তস্মা, ‘‘কতমো সমযৰিমোক্খো? চত্তারি চ ঝানানি চতস্সো চ অরূপাৰচরসমাপত্তিযো, অযং সমযৰিমোক্খো’’তি এৰং সমযৰিমোক্খোতি ৰুত্তা. লোকুত্তরধম্মা পন কালেন কালং ৰিমুচ্চন্তি, সকিং ৰিমুত্তানি হি মগ্গফলানি ৰিমুত্তানেৰ হোন্তি. নিব্বানং সব্বকিলেসেহি অচ্চন্তং ৰিমুত্তমেৰাতি ইমে নৰ ধম্মা অসমযৰিমোক্খোতি ৰুত্তা.

অকুপ্পা চেতোৰিমুত্তীতি অরহত্তফলৰিমুত্তি. অযমত্থো এতস্সাতি এতদত্থং, অরহত্তফলত্থমিদং ব্রহ্মচরিযং. অযং এতস্স অত্থোতি ৰুত্তং হোতি. এতং সারন্তি এতং অরহত্তফলং ব্রহ্মচরিযস্স সারং. এতং পরিযোসানন্তি এতং অরহত্তফলং ব্রহ্মচরিযস্স পরিযোসানং, এসা কোটি, ন ইতো পরং পত্তব্বং অত্থীতি যথানুসন্ধিনাৰ দেসনং নিট্ঠপেসীতি.

পপঞ্চসূদনিযা মজ্ঝিমনিকাযট্ঠকথায

মহাসারোপমসুত্তৰণ্ণনা নিট্ঠিতা.

১০. চূল়সারোপমসুত্তৰণ্ণনা

৩১২. এৰং মে সুতন্তি চূল়সারোপমসুত্তং. তত্থ পিঙ্গলকোচ্ছোতি সো ব্রাহ্মণো পিঙ্গলধাতুকো. কোচ্ছোতি পনস্স নামং, তস্মা ‘‘পিঙ্গলকোচ্ছো’’তি ৰুচ্চতি. সঙ্ঘিনোতিআদীসু পব্বজিতসমূহসঙ্খাতো সঙ্ঘো এতেসং অত্থীতি সঙ্ঘিনো. স্ৰেৰ গণো এতেসং অত্থীতি গণিনো. আচারসিক্খাপনৰসেন তস্স গণস্স আচরিযাতি গণাচরিযা. ঞাতাতি পঞ্ঞাতা পাকটা. ‘‘অপ্পিচ্ছা সন্তুট্ঠা, অপ্পিচ্ছতায ৰত্থম্পি ন নিৰাসেন্তী’’তিআদিনা নযেন সমুগ্গতো যসো এতেসং অত্থীতি যসস্সিনো. তিত্থকরাতি লদ্ধিকরা. সাধুসম্মতাতি ইমে সাধু সুন্দরা সপ্পুরিসাতি এৰং সম্মতা. বহুজনস্সাতি অস্সুতৰতো অন্ধবালপুথুজ্জনস্স. ইদানি তে দস্সেন্তো সেয্যথিদং পূরণোতিআদিমাহ. তত্থ পূরণোতি তস্স সত্থুপটিঞ্ঞস্স নামং. কস্সপোতি গোত্তং. সো কির অঞ্ঞতরস্স কুলস্স একূনদাসসতং পূরযমানো জাতো, তেনস্স ‘‘পূরণো’’তি নামং অকংসু. মঙ্গলদাসত্তা চস্স ‘‘দুক্কট’’ন্তি ৰত্তা নত্থি, অকতং ৰা ন কতন্তি. ‘‘সো কিমহমেত্থ ৰসামী’’তি পলাযি. অথস্স চোরা ৰত্থানি অচ্ছিন্দিংসু. সো পণ্ণেন ৰা তিণেন ৰা পটিচ্ছাদেতুম্পি অজানন্তো জাতরূপেনেৰ একং গামং পাৰিসি. মনুস্সা তং দিস্ৰা, ‘‘অযং সমণো অরহা অপ্পিচ্ছো, নত্থি ইমিনা সদিসো’’তি পূৰভত্তাদীনি গহেত্ৰা উপসঙ্কমন্তি. সো ‘‘ময্হং সাটকং অনিৰত্থভাৰেন ইদং উপ্পন্ন’’ন্তি ততো পট্ঠায সাটকং লভিত্ৰাপি ন নিৰাসেসি, তদেৰ পব্বজ্জং অগ্গহেসি. তস্স সন্তিকে অঞ্ঞেপি পঞ্চসতা মনুস্সা পব্বজিংসু, তং সন্ধাযাহ ‘‘পূরণো কস্সপো’’তি.

মক্খলীতি তস্স নামং. গোসালায জাতত্তা গোসালোতি দুতিযং নামং. তং কির সকদ্দমায ভূমিযা তেলঘটং গহেত্ৰা গচ্ছন্তং, ‘‘তাত, মা খলী’’তি সামিকো আহ. সো পমাদেন খলিত্ৰা পতিত্ৰা সামিকস্স ভযেন পলাযিতুং আরদ্ধো. সামিকো উপধাৰিত্ৰা সাটককণ্ণে অগ্গহেসি. সোপি সাটকং ছড্ডেত্ৰা অচেলকো হুত্ৰা পলাযি, সেসং পূরণসদিসমেৰ.

অজিতোতি তস্স নামং. কেসকম্বলং ধারেতীতি কেসকম্বলো. ইতি নামদ্ৰযং সংসন্দিত্ৰা ‘‘অজিতো কেসকম্বলো’’তি ৰুচ্চতি. তত্থ কেসকম্বলো নাম মনুস্সকেসেহি কতকম্বলো, ততো পটিকিট্ঠতরং ৰত্থং নাম নত্থি. যথাহ – ‘‘সেয্যথাপি, ভিক্খৰে, যানি কানিচি তন্তাৰুতানং ৰত্থানং, কেসকম্বলো তেসং পটিকিট্ঠো অক্খাযতি, কেসকম্বলো, ভিক্খৰে, সীতে সীতো উণ্হে উণ্হো দুব্বণ্ণো দুগ্গন্ধো দুক্খসম্ফস্সো’’তি (অ. নি. ৩.১৩৮).

পকুধোতি তস্স নামং. কচ্চাযনোতি গোত্তং. ইতি নামগোত্তং সংসন্দিত্ৰা, ‘‘পকুধো কচ্চাযনো’’তি ৰুচ্চতি. সীতুদকপটিক্খিত্তকো এস, ৰচ্চং কত্ৰাপি উদককিচ্চং ন করোতি, উণ্হোদকং ৰা কঞ্জিযং ৰা লভিত্ৰা করোতি, নদিং ৰা মগ্গোদকং ৰা অতিক্কম্ম, ‘‘সীলং মে ভিন্ন’’ন্তি ৰালিকথূপং কত্ৰা সীলং অধিট্ঠায গচ্ছতি, এৰরূপো নিস্সিরিকলদ্ধিকো এস.

সঞ্জযোতি তস্স নামং. বেলট্ঠস্স পুত্তোতি বেলট্ঠপুত্তো. অম্হাকং গণ্ঠনকিলেসো পলিবুজ্ঝনকিলেসো নত্থি, কিলেসগণ্ঠরহিতা মযন্তি এৰং ৰাদিতায লদ্ধনামৰসেন নিগণ্ঠো. নাটস্স পুত্তোতি নাটপুত্তো. অব্ভঞ্ঞংসূতি যথা তেসং পটিঞ্ঞা, তথেৰ জানিংসু. ইদং ৰুত্তং হোতি – সচে নেসং সা পটিঞ্ঞা নিয্যানিকা সব্বে অব্ভঞ্ঞংসু. নো চে, ন অব্ভঞ্ঞংসু. তস্মা কিং তেসং পটিঞ্ঞা নিয্যানিকা ন নিয্যানিকাতি, অযমেতস্স পঞ্হস্স অত্থো. অথ ভগৰা নেসং অনিয্যানিকভাৰকথনেন অত্থাভাৰতো অলন্তি পটিক্খিপিত্ৰা উপমায অত্থং পৰেদেন্তো ধম্মমেৰ দেসেতুং, ধম্মং, তে ব্রাহ্মণ, দেসেস্সামীতি আহ.

৩২০. তত্থ সচ্ছিকিরিযাযাতি সচ্ছিকরণত্থং. ন ছন্দং জনেতীতি কত্তুকম্যতাছন্দং ন জনযতি. ন ৰাযমতীতি ৰাযামং পরক্কমং ন করোতি. ওলীনৰুত্তিকো চ হোতীতি লীনজ্ঝাসযো হোতি. সাথলিকোতি সিথিলগ্গাহী, সাসনং সিথিলং কত্ৰা গণ্হাতি, দল়্হং ন গণ্হাতি.

৩২৩. ইধ, ব্রাহ্মণ ভিক্খু, ৰিৰিচ্চেৰ কামেহীতি কথং ইমে পঠমজ্ঝানাদিধম্মা ঞাণদস্সনেন উত্তরিতরা জাতাতি? নিরোধপাদকত্তা. হেট্ঠা পঠমজ্ঝানাদিধম্মা হি ৰিপস্সনাপাদকা, ইধ নিরোধপাদকা, তস্মা উত্তরিতরা জাতাতি ৰেদিতব্বা. ইতি ভগৰা ইদম্পি সুত্তং যথানুসন্ধিনাৰ নিট্ঠপেসি. দেসনাৰসানে ব্রাহ্মণো সরণেসু পতিট্ঠিতোতি.

পপঞ্চসূদনিযা মজ্ঝিমনিকাযট্ঠকথায

চূল়সারোপমসুত্তৰণ্ণনা নিট্ঠিতা.

ততিযৰগ্গৰণ্ণনা নিট্ঠিতা.

৪. মহাযমকৰগ্গো

১. চূল়গোসিঙ্গসুত্তৰণ্ণনা

৩২৫. এৰং মে সুতন্তি চূল়গোসিঙ্গসুত্তং. তত্থ নাতিকে ৰিহরতীতি নাতিকা নাম একং তল়াকং নিস্সায দ্ৰিন্নং চূল়পিতিমহাপিতিপুত্তানং দ্ৰে গামা, তেসু একস্মিং গামে. গিঞ্জকাৰসথেতি ইট্ঠকামযে আৰসথে. একস্মিং কির সমযে ভগৰা মহাজনসঙ্গহং করোন্তো ৰজ্জিরট্ঠে চারিকং চরমানো নাতিকং অনুপ্পত্তো. নাতিকৰাসিনো মনুস্সা ভগৰতো মহাদানং দত্ৰা ধম্মকথং সুত্ৰা পসন্নহদযা, ‘‘সত্থু ৰসনট্ঠানং করিস্সামা’’তি মন্তেত্ৰা ইট্ঠকাহেৰ ভিত্তিসোপানত্থম্ভে ৰাল়রূপাদীনি দস্সেন্তো পাসাদং কত্ৰা সুধায লিম্পিত্ৰা মালাকম্মলতাকম্মাদীনি নিট্ঠাপেত্ৰা ভুম্মত্থরণমঞ্চপীঠাদীনি পঞ্ঞপেত্ৰা সত্থু নিয্যাতেসুং. অপরাপরং পনেত্থ মনুস্সা ভিক্খুসঙ্ঘস্স রত্তিট্ঠানদিৰাট্ঠানমণ্ডপচঙ্কমাদীনি কারযিংসু. ইতি সো ৰিহারো মহা অহোসি. তং সন্ধায ৰুত্তং ‘‘গিঞ্জকাৰসথে’’তি.

গোসিঙ্গসালৰনদাযেতি তত্থ একস্স জেট্ঠকরুক্খস্স খন্ধতো গোসিঙ্গসণ্ঠানং হুত্ৰা ৰিটপং উট্ঠহি, তং রুক্খং উপাদায সব্বম্পি তং ৰনং গোসিঙ্গসালৰনন্তি সঙ্খং গতং. দাযোতি অৰিসেসেন অরঞ্ঞস্সেতং নামং. তস্মা গোসিঙ্গসালৰনদাযেতি গোসিঙ্গসালৰনঅরঞ্ঞেতি অত্থো. ৰিহরন্তীতি সামগ্গিরসং অনুভৰমানা ৰিহরন্তি. ইমেসঞ্হি কুলপুত্তানং উপরিপণ্ণাসকে পুথুজ্জনকালো কথিতো, ইধ খীণাসৰকালো. তদা হি তে লদ্ধস্সাদা লদ্ধপতিট্ঠা অধিগতপটিসম্ভিদা খীণাসৰা হুত্ৰা সামগ্গিরসং অনুভৰমানা তত্থ ৰিহরিংসু. তং সন্ধাযেতং ৰুত্তং.

যেন গোসিঙ্গসালৰনদাযো তেনুপসঙ্কমীতি ধম্মসেনাপতিমহামোগ্গল্লানত্থেরেসু ৰা অসীতিমহাসাৰকেসু ৰা, অন্তমসো ধম্মভণ্ডাগারিকআনন্দত্থেরম্পি কঞ্চি অনামন্তেত্ৰা সযমেৰ পত্তচীৰরং আদায অনীকা নিস্সটো হত্থী ৰিয, যূথা নিস্সটো কাল়সীহো ৰিয, ৰাতচ্ছিন্নো ৰলাহকো ৰিয এককোৰ উপসঙ্কমি. কস্মা পনেত্থ ভগৰা সযং অগমাসীতি? তযো কুলপুত্তা সামগ্গিরসং অনুভৰন্তা ৰিহরন্তি, তেসং পগ্গণ্হনতো, পচ্ছিমজনতং অনুকম্পনতো ধম্মগরুভাৰতো চ. এৰং কিরস্স অহোসি – ‘‘অহং ইমে কুলপুত্তে পগ্গণ্হিত্ৰা উক্কংসিত্ৰা পটিসন্থারং কত্ৰা ধম্মং নেসং দেসেস্সামী’’তি. এৰং তাৰ পগ্গণ্হনতো অগমাসি. অপরম্পিস্স অহোসি – ‘‘অনাগতে কুলপুত্তা সম্মাসম্বুদ্ধো সমগ্গৰাসং ৰসন্তানং সন্তিকং সযং গন্ত্ৰা পটিসন্থারং কত্ৰা ধম্মং কথেত্ৰা তযো কুলপুত্তে পগ্গণ্হি, কো নাম সমগ্গৰাসং ন ৰসেয্যাতি সমগ্গৰাসং ৰসিতব্বং মঞ্ঞমানা খিপ্পমেৰ দুক্খস্সন্তং করিস্সন্তী’’তি. এৰং পচ্ছিমজনতং অনুকম্পনতোপি অগমাসি. বুদ্ধা চ নাম ধম্মগরুনো হোন্তি, সো চ নেসং ধম্মগরুভাৰো রথৰিনীতে আৰিকতোৰ. ইতি ইমস্মা ধম্মগরুভাৰতোপি ধম্মং পগ্গণ্হিস্সামীতি অগমাসি.

দাযপালোতি অরঞ্ঞপালো. সো তং অরঞ্ঞং যথা ইচ্ছিতিচ্ছিতপ্পদেসেন মনুস্সা পৰিসিত্ৰা তত্থ পুপ্ফং ৰা ফলং ৰা নিয্যাসং ৰা দব্বসম্ভারং ৰা ন হরন্তি, এৰং ৰতিযা পরিক্খিত্তস্স তস্স অরঞ্ঞস্স যোজিতে দ্ৰারে নিসীদিত্ৰা তং অরঞ্ঞং রক্খতি, পালেতি. তস্মা ‘‘দাযপালো’’তি ৰুত্তো. অত্তকামরূপাতি অত্তনো হিতং কামযমানসভাৰা হুত্ৰা ৰিহরন্তি. যো হি ইমস্মিং সাসনে পব্বজিত্ৰাপি ৰেজ্জকম্মদূতকম্মপহিণগমনাদীনং ৰসেন একৰীসতিঅনেসনাহি জীৰিকং কপ্পেতি, অযং ন অত্তকামরূপো নাম. যো পন ইমস্মিং সাসনে পব্বজিত্ৰা একৰীসতিঅনেসনং পহায চতুপারিসুদ্ধিসীলে পতিট্ঠায বুদ্ধৰচনং উগ্গণ্হিত্ৰা সপ্পাযধুতঙ্গং অধিট্ঠায অট্ঠতিংসায আরম্মণেসু চিত্তরুচিযং কম্মট্ঠানং গহেত্ৰা গামন্তং পহায অরঞ্ঞং পৰিসিত্ৰা সমাপত্তিযো নিব্বত্তেত্ৰা ৰিপস্সনায কম্মং কুরুমানো ৰিহরতি, অযং অত্তকামো নাম. তেপি তযো কুলপুত্তা এৰরূপা অহেসুং. তেন ৰুত্তং – ‘‘অত্তকামরূপা ৰিহরন্তী’’তি.

মা তেসং অফাসুমকাসীতি তেসং মা অফাসুকং অকাসীতি ভগৰন্তং ৰারেসি. এৰং কিরস্স অহোসি – ‘‘ইমে কুলপুত্তা সমগ্গা ৰিহরন্তি, একচ্চস্স চ গতট্ঠানে ভণ্ডনকলহৰিৰাদা ৰত্তন্তি, তিখিণসিঙ্গো চণ্ডগোণো ৰিয ওৰিজ্ঝন্তো ৰিচরতি, অথেকমগ্গেন দ্ৰিন্নং গমনং ন হোতি, কদাচি অযম্পি এৰং করোন্তো ইমেসং কুলপুত্তানং সমগ্গৰাসং ভিন্দেয্য. পাসাদিকো চ পনেস সুৰণ্ণৰণ্ণো সুরসগিদ্ধো মঞ্ঞে, গতকালতো পট্ঠায পণীতদাযকানং অত্তনো উপট্ঠাকানঞ্চ ৰণ্ণকথনাদীহি ইমেসং কুলপুত্তানং অপ্পমাদৰিহারং ভিন্দেয্য. ৰসনট্ঠানানি চাপি এতেসং কুলপুত্তানং নিবদ্ধানি পরিচ্ছিন্নানি তিস্সো চ পণ্ণসালা তযো চঙ্কমা তীণি দিৰাট্ঠানানি তীণি মঞ্চপীঠানি. অযং পন সমণো মহাকাযো ৰুড্ঢতরো মঞ্ঞে ভৰিস্সতি. সো অকালে ইমে কুলপুত্তে সেনাসনা ৰুট্ঠাপেস্সতি. এৰং সব্বথাপি এতেসং অফাসু ভৰিস্সতী’’তি. তং অনিচ্ছন্তো, ‘‘মা তেসং অফাসুকমকাসী’’তি ভগৰন্তং ৰারেসি.

কিং পনেস জানন্তো ৰারেসি, অজানন্তোতি? অজানন্তো. কিঞ্চাপি হি তথাগতস্স পটিসন্ধিগ্গহণতো পট্ঠায দসসহস্সচক্কৰাল়কম্পনাদীনি পাটিহারিযানি পৰত্তিংসু, অরঞ্ঞৰাসিনো পন দুব্বলমনুস্সা সকম্মপ্পসুতা তানি সল্লক্খেতুং ন সক্কোন্তি. সম্মাসম্বুদ্ধো চ নাম যদা অনেকভিক্খুসহস্সপরিৰারো ব্যামপ্পভায অসীতিঅনুব্যঞ্জনেহি দ্ৰত্তিংসমহাপুরিসলক্খণসিরিযা চ বুদ্ধানুভাৰং দস্সেন্তো ৰিচরতি, তদা কো এসোতি অপুচ্ছিত্ৰাৰ জানিতব্বো হোতি. তদা পন ভগৰা সব্বম্পি তং বুদ্ধানুভাৰং চীৰরগব্ভেন পটিচ্ছাদেত্ৰা ৰলাহকগব্ভেন পটিচ্ছন্নো পুণ্ণচন্দো ৰিয সযমেৰ পত্তচীৰরমাদায অঞ্ঞাতকৰেসেন অগমাসি. ইতি নং অজানন্তোৰ দাযপালো নিৰারেসি.

এতদৰোচাতি থেরো কির মা সমণাতি দাযপালস্স কথং সুত্ৰাৰ চিন্তেসি – ‘‘মযং তযো জনা ইধ ৰিহরাম, অঞ্ঞে পব্বজিতা নাম নত্থি, অযঞ্চ দাযপালো পব্বজিতেন ৰিয সদ্ধিং কথেতি, কো নু খো ভৰিস্সতী’’তি দিৰাট্ঠানতো ৰুট্ঠায দ্ৰারে ঠত্ৰা মগ্গং ওলোকেন্তো ভগৰন্তং অদ্দস. ভগৰাপি থেরস্স সহ দস্সনেনেৰ সরীরোভাসং মুঞ্চি, অসীতিঅনুব্যঞ্জনৰিরাজিতা ব্যামপ্পভা পসারিতসুৰণ্ণপটো ৰিয ৰিরোচিত্থ. থেরো, ‘‘অযং দাযপালো ফণকতং আসিৰিসং গীৰায গহেতুং হত্থং পসারেন্তো ৰিয লোকে অগ্গপুগ্গলেন সদ্ধিং কথেন্তোৰ ন জানাতি, অঞ্ঞতরভিক্খুনা ৰিয সদ্ধিং কথেতী’’তি নিৰারেন্তো এতং, ‘‘মা, আৰুসো দাযপালা’’তিআদিৰচনং অৰোচ.

তেনুপসঙ্কমীতি কস্মা ভগৰতো পচ্চুগ্গমনং অকত্ৰা উপসঙ্কমি? এৰং কিরস্স অহোসি – ‘‘মযং তযো জনা সমগ্গৰাসং ৰসাম, সচাহং এককোৰ পচ্চুগ্গমনং করিস্সামি, সমগ্গৰাসো নাম ন ভৰিস্সতী’’তি পিযমিত্তে গহেত্ৰাৰ পচ্চুগ্গমনং করিস্সামি. যথা চ ভগৰা ময্হং পিযো, এৰং সহাযানম্পি মে পিযোতি, তেহি সদ্ধিং পচ্চুগ্গমনং কাতুকামো সযং অকত্ৰাৰ উপসঙ্কমি. কেচি পন তেসং থেরানং পণ্ণসালদ্ৰারে চঙ্কমনকোটিযা ভগৰতো আগমনমগ্গো হোতি, তস্মা থেরো তেসং সঞ্ঞং দদমানোৰ গতোতি. অভিক্কমথাতি ইতো আগচ্ছথ. পাদে পক্খালেসীতি ৰিকসিতপদুমসন্নিভেহি জালহত্থেহি মণিৰণ্ণং উদকং গহেত্ৰা সুৰণ্ণৰণ্ণেসু পিট্ঠিপাদেসু উদকমভিসিঞ্চিত্ৰা পাদেন পাদং ঘংসন্তো পক্খালেসি. বুদ্ধানং কাযে রজোজল্লং নাম ন উপলিম্পতি, কস্মা পক্খালেসীতি? সরীরস্স উতুগ্গহণত্থং, তেসঞ্চ চিত্তসম্পহংসনত্থং. অম্হেহি অভিহটেন উদকেন ভগৰা পাদে পক্খালেসি, পরিভোগং অকাসীতি তেসং ভিক্খূনং বলৰসোমনস্সৰসেন চিত্তং পীণিতং হোতি, তস্মা পক্খালেসি. আযস্মন্তং অনুরুদ্ধং ভগৰা এতদৰোচাতি সো কির তেসং ৰুড্ঢতরো.

৩২৬. তস্স সঙ্গহে কতে সেসানং কতোৰ হোতীতি থেরঞ্ঞেৰ এতং কচ্চি ৰো অনুরুদ্ধাতিআদিৰচনং অৰোচ. তত্থ কচ্চীতি পুচ্ছনত্থে নিপাতো. ৰোতি সামিৰচনং. ইদং ৰুত্তং হোতি – কচ্চি অনুরুদ্ধা তুম্হাকং খমনীযং, ইরিযাপথো ৰো খমতি? কচ্চি যাপনীযং, কচ্চি ৰো জীৰিতং যাপেতি ঘটিযতি? কচ্চি পিণ্ডকেন ন কিলমথ, কচ্চি তুম্হাকং সুলভপিণ্ডং, সম্পত্তে ৰো দিস্ৰা মনুস্সা উল়ুঙ্কযাগুং ৰা কটচ্ছুভিক্খং ৰা দাতব্বং মঞ্ঞন্তীতি ভিক্খাচারৰত্তং পুচ্ছতি. কস্মা? পচ্চযেন অকিলমন্তেন হি সক্কা সমণধম্মো কাতুং, ৰত্তমেৰ ৰা এতং পব্বজিতানং. অথ তেন পটিৰচনে দিন্নে, ‘‘অনুরুদ্ধা, তুম্হে রাজপব্বজিতা মহাপুঞ্ঞা, মনুস্সা তুম্হাকং অরঞ্ঞে ৰসন্তানং অদত্ৰা কস্স অঞ্ঞস্স দাতব্বং মঞ্ঞিস্সন্তি, তুম্হে পন এতং ভুঞ্জিত্ৰা কিং নু খো মিগপোতকা ৰিয অঞ্ঞমঞ্ঞং সঙ্ঘট্টেন্তা ৰিহরথ, উদাহু সামগ্গিভাৰো ৰো অত্থী’’তি সামগ্গিরসং পুচ্ছন্তো, কচ্চি পন ৰো, অনুরুদ্ধা, সমগ্গাতিআদিমাহ.

তত্থ খীরোদকীভূতাতি যথা খীরঞ্চ উদকঞ্চ অঞ্ঞমঞ্ঞং সংসন্দতি, ৰিসুং ন হোতি, একত্তং ৰিয উপেতি, কচ্চি এৰং সামগ্গিৰসেন একত্তূপগতচিত্তুপ্পাদা ৰিহরথাতি পুচ্ছতি. পিযচক্খূহীতি মেত্তচিত্তং পচ্চুপট্ঠপেত্ৰা ওলোকনচক্খূনি পিযচক্খূনি নাম. কচ্চি তথারূপেহি চক্খূহি অঞ্ঞমঞ্ঞং সম্পস্সন্তা ৰিহরথাতি পুচ্ছতি. তগ্ঘাতি একংসত্থে নিপাতো. একংসেন মযং, ভন্তেতি ৰুত্তং হোতি. যথা কথং পনাতি এত্থ যথাতি নিপাতমত্তং. কথন্তি কারণপুচ্ছা. কথং পন তুম্হে এৰং ৰিহরথ, কেন কারণেন ৰিহরথ, তং মে কারণং ব্রূথাতি ৰুত্তং হোতি. মেত্তং কাযকম্মন্তি মেত্তচিত্তৰসেন পৰত্তং কাযকম্মং. আৰি চেৰ রহো চাতি সম্মুখা চেৰ পরম্মুখা চ. ইতরেসুপি এসেৰ নযো.

তত্থ সম্মুখা কাযৰচীকম্মানি সহৰাসে লব্ভন্তি, ইতরানি ৰিপ্পৰাসে. মনোকম্মং সব্বত্থ লব্ভতি. যঞ্হি সহৰসন্তেসু একেন মঞ্চপীঠং ৰা দারুভণ্ডং ৰা মত্তিকাভণ্ডং ৰা বহি দুন্নিক্খিত্তং হোতি, তং দিস্ৰা কেনিদং ৰল়ঞ্জিতন্তি অৰঞ্ঞং অকত্ৰা অত্তনা দুন্নিক্খিত্তং ৰিয গহেত্ৰা পটিসামেন্তস্স পটিজগ্গিতব্বযুত্তং ৰা পন ঠানং পটিজগ্গন্তস্স সম্মুখা মেত্তং কাযকম্মং নাম হোতি. একস্মিং পক্কন্তে তেন দুন্নিক্খিত্তং সেনাসনপরিক্খারং তথেৰ নিক্খিপন্তস্স পটিজগ্গিতব্বযুত্তট্ঠানং ৰা পন পটিজগ্গন্তস্স পরম্মুখা মেত্তং কাযকম্মং নাম হোতি. সহৰসন্তস্স পন তেহি সদ্ধিং মধুরং সম্মোদনীযং কথং পটিসন্থারকথং সারণীযকথং ধম্মীকথং সরভঞ্ঞং সাকচ্ছং পঞ্হপুচ্ছনং পঞ্হৰিস্সজ্জনন্তি এৰমাদিকরণে সম্মুখা মেত্তং ৰচীকম্মং নাম হোতি. থেরেসু পন পক্কন্তেসু ময্হং পিযসহাযো নন্দিযত্থেরো কিমিলত্থেরো এৰং সীলসম্পন্নো, এৰং আচারসম্পন্নোতিআদিগুণকথনং পরম্মুখা মেত্তং ৰচীকম্মং নাম হোতি. ময্হং পিযমিত্তো নন্দিযত্থেরো কিমিলত্থেরো অৰেরো হোতু, অব্যাপজ্জো সুখী হোতূতি এৰং সমন্নাহরতো পন সম্মুখাপি পরম্মুখাপি মেত্তং মনোকম্মং হোতিযেৰ.

নানা হি খো নো, ভন্তে, কাযাতি কাযঞ্হি পিট্ঠং ৰিয মত্তিকা ৰিয চ ওমদ্দিত্ৰা একতো কাতুং ন সক্কা. একঞ্চ পন মঞ্ঞে চিত্তন্তি চিত্তং পন নো হিতট্ঠেন নিরন্তরট্ঠেন অৰিগ্গহট্ঠেন সমগ্গট্ঠেন একমেৰাতি দস্সেতি. কথং পনেতং সকং চিত্তং নিক্খিপিত্ৰা ইতরেসং চিত্তৰসেন ৰত্তিংসূতি? একস্স পত্তে মলং উট্ঠহতি, একস্স চীৰরং কিলিট্ঠং হোতি, একস্স পরিভণ্ডকম্মং হোতি. তত্থ যস্স পত্তে মলং উট্ঠিতং, তেন মমাৰুসো, পত্তে মলং উট্ঠিতং পচিতুং ৰট্টতীতি ৰুত্তে ইতরে ময্হং চীৰরং কিলিট্ঠং ধোৰিতব্বং, ময্হং পরিভণ্ডং কাতব্বন্তি অৰত্ৰা অরঞ্ঞং পৰিসিত্ৰা দারূনি আহরিত্ৰা ছিন্দিত্ৰা পত্তকটাহে পরিভণ্ডং কত্ৰা ততো পরং চীৰরং ৰা ধোৰন্তি, পরিভণ্ডং ৰা করোন্তি. মমাৰুসো, চীৰরং কিলিট্ঠং ধোৰিতুং ৰট্টতি, মম পণ্ণসালা উক্লাপা পরিভণ্ডং কাতুং ৰট্টতীতি পঠমতরং আরোচিতেপি এসেৰ নযো.

৩২৭. সাধু সাধু, অনুরুদ্ধাতি ভগৰা হেট্ঠা ন চ মযং, ভন্তে, পিণ্ডকেন কিলমিম্হাতি ৰুত্তে ন সাধুকারমদাসি. কস্মা? অযঞ্হি কবল়ীকারো আহারো নাম ইমেসং সত্তানং অপাযলোকেপি দেৰমনুস্সলোকেপি আচিণ্ণসমাচিণ্ণোৰ. অযং পন লোকসন্নিৰাসো যেভুয্যেন ৰিৰাদপক্খন্দো, অপাযলোকে দেৰমনুস্সলোকেপি ইমে সত্তা পটিৰিরুদ্ধা এৰ, এতেসং সামগ্গিকালো দুল্লভো, কদাচিদেৰ হোতীতি সমগ্গৰাসস্স দুল্লভত্তা ইধ ভগৰা সাধুকারমদাসি. ইদানি তেসং অপ্পমাদলক্খণং পুচ্ছন্তো কচ্চি পন ৰো, অনুরুদ্ধাতিআদিমাহ. তত্থ ৰোতি নিপাতমত্তং পচ্চত্তৰচনং ৰা, কচ্চি তুম্হেতি অত্থো. অম্হাকন্তি অম্হেসু তীসু জনেসু. পিণ্ডায পটিক্কমতীতি গামে পিণ্ডায চরিত্ৰা পচ্চাগচ্ছতি. অৰক্কারপাতিন্তি অতিরেকপিণ্ডপাতং অপনেত্ৰা ঠপনত্থায একং সমুগ্গপাতিং ধোৰিত্ৰা ঠপেতি.

যো পচ্ছাতি তে কির থেরা ন একতোৰ ভিক্খাচারং পৰিসন্তি, ফলসমাপত্তিরতা হেতে. পাতোৰ সরীরপ্পটিজগ্গনং কত্ৰা ৰত্তপ্পটিপত্তিং পূরেত্ৰা সেনাসনং পৰিসিত্ৰা কালপরিচ্ছেদং কত্ৰা ফলসমাপত্তিং অপ্পেত্ৰা নিসীদন্তি. তেসু যো পঠমতরং নিসিন্নো অত্তনো কালপরিচ্ছেদৰসেন পঠমতরং উট্ঠাতি; সো পিণ্ডায চরিত্ৰা পটিনিৰত্তো ভত্তকিচ্চট্ঠানং আগন্ত্ৰা জানাতি – ‘‘দ্ৰে ভিক্খূ পচ্ছা, অহং পঠমতরং আগতো’’তি. অথ পত্তং পিদহিত্ৰা আসনপঞ্ঞাপনাদীনি কত্ৰা যদি পত্তে পটিৰিসমত্তমেৰ হোতি, নিসীদিত্ৰা ভুঞ্জতি. যদি অতিরেকং হোতি, অৰক্কারপাতিযং পক্খিপিত্ৰা পাতিং পিধায ভুঞ্জতি. কতভত্তকিচ্চো পত্তং ধোৰিত্ৰা ৰোদকং কত্ৰা থৰিকায ওসাপেত্ৰা পত্তচীৰরং গহেত্ৰা অত্তনো ৰসনট্ঠানং পৰিসতি. দুতিযোপি আগন্ত্ৰাৰ জানাতি – ‘‘একো পঠমং আগতো, একো পচ্ছতো’’তি. সো সচে পত্তে ভত্তং পমাণমেৰ হোতি, ভুঞ্জতি. সচে মন্দং, অৰক্কারপাতিতো গহেত্ৰা ভুঞ্জতি. সচে অতিরেকং হোতি, অৰক্কারপাতিযং পক্খিপিত্ৰা পমাণমেৰ ভুঞ্জিত্ৰা পুরিমত্থেরো ৰিয ৰসনট্ঠানং পৰিসতি. ততিযোপি আগন্ত্ৰাৰ জানাতি – ‘‘দ্ৰে পঠমং আগতা, অহং পচ্ছতো’’তি. সোপি দুতিযত্থেরো ৰিয ভুঞ্জিত্ৰা কতভত্তকিচ্চো পত্তং ধোৰিত্ৰা ৰোদকং কত্ৰা থৰিকায ওসাপেত্ৰা আসনানি উক্খিপিত্ৰা পটিসামেতি; পানীযঘটে ৰা পরিভোজনীযঘটে ৰা অৰসেসং উদকং ছড্ডেত্ৰা ঘটে নিকুজ্জিত্ৰা অৰক্কারপাতিযং সচে অৰসেসভত্তং হোতি, তং ৰুত্তনযেন জহিত্ৰা পাতিং ধোৰিত্ৰা পটিসামেতি; ভত্তগ্গং সম্মজ্জতি. ততো কচৰরং ছড্ডেত্ৰা সম্মজ্জনিং উক্খিপিত্ৰা উপচিকাহি মুত্তট্ঠানে ঠপেত্ৰা পত্তচীৰরমাদায ৰসনট্ঠানং পৰিসতি. ইদং থেরানং বহিৰিহারে অরঞ্ঞে ভত্তকিচ্চকরণট্ঠানে ভোজনসালাযং ৰত্তং. ইদং সন্ধায, ‘‘যো পচ্ছা’’তিআদি ৰুত্তং.

যো পস্সতীতিআদি পন নেসং অন্তোৰিহারে ৰত্তন্তি ৰেদিতব্বং. তত্থ ৰচ্চঘটন্তি আচমনকুম্ভিং. রিত্তন্তি রিত্তকং. তুচ্ছন্তি তস্সেৰ ৰেৰচনং. অৰিসয্হন্তি উক্খিপিতুং অসক্কুণেয্যং, অতিভারিযং. হত্থৰিকারেনাতি হত্থসঞ্ঞায. তে কির পানীযঘটাদীসু যংকিঞ্চি তুচ্ছকং গহেত্ৰা পোক্খরণিং গন্ত্ৰা অন্তো চ বহি চ ধোৰিত্ৰা উদকং পরিস্সাৰেত্ৰা তীরে ঠপেত্ৰা অঞ্ঞং ভিক্খুং হত্থৰিকারেন আমন্তেন্তি, ওদিস্স ৰা অনোদিস্স ৰা সদ্দং ন করোন্তি. কস্মা ওদিস্স সদ্দং ন করোন্তি? তং ভিক্খুং সদ্দো বাধেয্যাতি. কস্মা অনোদিস্স সদ্দং ন করোন্তি? অনোদিস্স সদ্দে দিন্নে, ‘‘অহং পুরে, অহং পুরে’’তি দ্ৰেপি নিক্খমেয্যুং, ততো দ্ৰীহি কত্তব্বকম্মে ততিযস্স কম্মচ্ছেদো ভৰেয্য. সংযতপদসদ্দো পন হুত্ৰা অপরস্স ভিক্খুনো দিৰাট্ঠানসন্তিকং গন্ত্ৰা তেন দিট্ঠভাৰং ঞত্ৰা হত্থসঞ্ঞং করোতি, তায সঞ্ঞায ইতরো আগচ্ছতি, ততো দ্ৰে জনা হত্থেন হত্থং সংসিব্বন্তা দ্ৰীসু হত্থেসু ঠপেত্ৰা উপট্ঠপেন্তি. তং সন্ধাযাহ – ‘‘হত্থৰিকারেন দুতিযং আমন্তেত্ৰা হত্থৰিলঙ্ঘকেন উপট্ঠপেমা’’তি.

পঞ্চাহিকং খো পনাতি চাতুদ্দসে পন্নরসে অট্ঠমিযন্তি ইদং তাৰ পকতিধম্মস্সৰনমেৰ, তং অখণ্ডং কত্ৰা পঞ্চমে পঞ্চমে দিৰসে দ্ৰে থেরা নাতিৰিকালে ন্হাযিত্ৰা অনুরুদ্ধত্থেরস্স ৰসনট্ঠানং গচ্ছন্তি. তত্থ তযোপি নিসীদিত্ৰা তিণ্ণং পিটকানং অঞ্ঞতরস্মিং অঞ্ঞমঞ্ঞং পঞ্হং পুচ্ছন্তি, অঞ্ঞমঞ্ঞং ৰিস্সজ্জেন্তি, তেসং এৰং করোন্তানংযেৰ অরুণং উগ্গচ্ছতি. তং সন্ধাযেতং ৰুত্তং. এত্তাৰতা থেরেন ভগৰতা অপ্পমাদলক্খণং পুচ্ছিতেন পমাদট্ঠানেসুযেৰ অপ্পমাদলক্খণং ৰিস্সজ্জিতং হোতি. অঞ্ঞেসঞ্হি ভিক্খূনং ভিক্খাচারং পৰিসনকালো, নিক্খমনকালো, নিৰাসনপরিৰত্তনং, চীৰরপারুপনং, অন্তোগামে পিণ্ডায চরণং ধম্মকথনং, অনুমোদনং, গামতো নিক্খমিত্ৰা ভত্তকিচ্চকরণং, পত্তধোৰনং, পত্তওসাপনং, পত্তচীৰরপটিসামনন্তি পপঞ্চকরণট্ঠানানি এতানি. তস্মা থেরো অম্হাকং এত্তকং ঠানং মুঞ্চিত্ৰা পমাদকালো নাম নত্থীতি দস্সেন্তো পমাদট্ঠানেসুযেৰ অপ্পমাদলক্খণং ৰিস্সজ্জেসি.

৩২৮. অথস্স ভগৰা সাধুকারং দত্ৰা পঠমজ্ঝানং পুচ্ছন্তো পুন অত্থি পন ৰোতিআদিমাহ. তত্থ উত্তরি মনুস্সধম্মাতি মনুস্সধম্মতো উত্তরি. অলমরিযঞাণদস্সনৰিসেসোতি অরিযভাৰকরণসমত্থো ঞাণৰিসেসো. কিঞ্হি নো সিযা, ভন্তেতি কস্মা, ভন্তে, নাধিগতো ভৰিস্সতি, অধিগতোযেৰাতি. যাৰ দেৰাতি যাৰ এৰ.

৩২৯. এৰং পঠমজ্ঝানাধিগমে ব্যাকতে দুতিযজ্ঝানাদীনি পুচ্ছন্তো এতস্স পন ৰোতিআদিমাহ. তত্থ সমতিক্কমাযাতি সমতিক্কমত্থায. পটিপ্পস্সদ্ধিযাতি পটিপ্পস্সদ্ধত্থায. সেসং সব্বত্থ ৰুত্তনযেনেৰ ৰেদিতব্বং. পচ্ছিমপঞ্হে পন লোকুত্তরঞাণদস্সনৰসেন অধিগতং নিরোধসমাপত্তিং পুচ্ছন্তো অলমরিযঞাণদস্সনৰিসেসোতি আহ. থেরোপি পুচ্ছানুরূপেনেৰ ব্যাকাসি. তত্থ যস্মা ৰেদযিতসুখতো অৰেদযিতসুখং সন্ততরং পণীততরং হোতি, তস্মা অঞ্ঞং ফাসুৰিহারং উত্তরিতরং ৰা পণীততরং ৰা ন সমনুপস্সামাতি আহ.

৩৩০. ধম্মিযা কথাযাতি সামগ্গিরসানিসংসপ্পটিসংযুত্তায ধম্মিযা কথায. সব্বেপি তে চতূসু সচ্চেসু পরিনিট্ঠিতকিচ্চা, তেন তেসং পটিৰেধত্থায কিঞ্চি কথেতব্বং নত্থি. সামগ্গিরসেন পন অযঞ্চ অযঞ্চ আনিসংসোতি সামগ্গিরসানিসংসমেৰ নেসং ভগৰা কথেসি. ভগৰন্তং অনুসংযাযিত্ৰাতি অনুগন্ত্ৰা. তে কির ভগৰতো পত্তচীৰরং গহেত্ৰা থোকং অগমংসু, অথ ভগৰা ৰিহারস্স পরিৰেণপরিযন্তং গতকালে, ‘‘আহরথ মে পত্তচীৰরং, তুম্হে ইধেৰ তিট্ঠথা’’তি পক্কামি. ততো পটিনিৰত্তিত্ৰাতি ততো ঠিতট্ঠানতো নিৰত্তিত্ৰা. কিং নু খো মযং আযস্মতোতি ভগৰন্তং নিস্সায পব্বজ্জাদীনি অধিগন্ত্ৰাপি অত্তনো গুণকথায অট্টিযমানা অধিগমপ্পিচ্ছতায আহংসু. ইমাসঞ্চ ইমাসঞ্চাতি পঠমজ্ঝানাদীনং লোকিযলোকুত্তরানং. চেতসা চেতো পরিচ্চ ৰিদিতোতি অজ্জ মে আযস্মন্তো লোকিযসমাপত্তিযা ৰীতিনামেসুং, অজ্জ লোকুত্তরাযাতি এৰং চিত্তেন চিত্তং পরিচ্ছিন্দিত্ৰা ৰিদিতং. দেৰতাপি মেতি, ভন্তে অনুরুদ্ধ, অজ্জ অয্যো নন্দিযত্থেরো, অজ্জ অয্যো কিমিলত্থেরো ইমায চ ইমায চ সমাপত্তিযা ৰীতিনামেসীতি এৰমারোচেসুন্তি অত্থো. পঞ্হাভিপুট্ঠেনাতি তম্পি মযা সযং ৰিদিতন্তি ৰা দেৰতাহি আরোচিতন্তি ৰা এত্তকেনেৰ মুখং মে সজ্জন্তি কথং সমুট্ঠাপেত্ৰা অপুট্ঠেনেৰ মে ন কথিতং. ভগৰতা পন পঞ্হাভিপুট্ঠেন পঞ্হং অভিপুচ্ছিতেন সতা ব্যাকতং, তত্র মে কিং ন রোচথাতি আহ.

৩৩১. দীঘোতি ‘‘মণি মাণিৰরো দীঘো, অথো সেরীসকো সহা’’তি (দী. নি. ৩.২৯৩) এৰং আগতো অট্ঠৰীসতিযা যক্খসেনাপতীনং অব্ভন্তরো একো দেৰরাজা. পরজনোতি তস্সেৰ যক্খস্স নামং. যেন ভগৰা তেনুপসঙ্কমীতি সো কির ৰেস্সৰণেন পেসিতো এতং ঠানং গচ্ছন্তো ভগৰন্তং সযং পত্তচীৰরং গহেত্ৰা গিঞ্জকাৰসথতো গোসিঙ্গসালৰনস্স অন্তরে দিস্ৰা ভগৰা অত্তনা পত্তচীৰরং গহেত্ৰা গোসিঙ্গসালৰনে তিণ্ণং কুলপুত্তানং সন্তিকং গচ্ছতি. অজ্জ মহতী ধম্মদেসনা ভৰিস্সতি. মযাপি তস্সা দেসনায ভাগিনা ভৰিতব্বন্তি অদিস্সমানেন কাযেন সত্থু পদানুপদিকো গন্ত্ৰা অৰিদূরে ঠত্ৰা ধম্মং সুত্ৰা সত্থরি গচ্ছন্তেপি ন গতো, – ‘‘ইমে থেরা কিং করিস্সন্তী’’তি দস্সনত্থং পন তত্থেৰ ঠিতো. অথ তে দ্ৰে থেরে অনুরুদ্ধত্থেরং পলিৰেঠেন্তে দিস্ৰা, – ‘‘ইমে থেরা ভগৰন্তং নিস্সায পব্বজ্জাদযো সব্বগুণে অধিগন্ত্ৰাপি ভগৰতোৰ মচ্ছরাযন্তি, ন সহন্তি, অতিৰিয নিলীযন্তি পটিচ্ছাদেন্তি, ন দানি তেসং পটিচ্ছাদেতুং দস্সামি, পথৰিতো যাৰ ব্রহ্মলোকা এতেসং গুণে পকাসেস্সামী’’তি চিন্তেত্ৰা যেন ভগৰা তেনুপসঙ্কমি.

লাভা ৰত, ভন্তেতি যে, ভন্তে, ৰজ্জিরট্ঠৰাসিনো ভগৰন্তঞ্চ ইমে চ তযো কুলপুত্তে পস্সিতুং লভন্তি, ৰন্দিতুং লভন্তি, দেয্যধম্মং দাতুং লভন্তি, ধম্মং সোতুং লভন্তি, তেসং লাভা, ভন্তে, ৰজ্জীনন্তি অত্থো. সদ্দং সুত্ৰাতি সো কির অত্তনো যক্খানুভাৰেন মহন্তং সদ্দং কত্ৰা সকলং ৰজ্জিরট্ঠং অজ্ঝোত্থরন্তো তং ৰাচং নিচ্ছারেসি. তেন চস্স তেসু রুক্খপব্বতাদীসু অধিৰত্থা ভুম্মা দেৰতা সদ্দং অস্সোসুং. তং সন্ধায ৰুত্তং – ‘‘সদ্দং সুত্ৰা’’তি. অনুস্সাৰেসুন্তি মহন্তং সদ্দং সুত্ৰা সাৰেসুং. এস নযো সব্বত্থ. যাৰ ব্রহ্মলোকাতি যাৰ অকনিট্ঠব্রহ্মলোকা. তঞ্চেপি কুলন্তি, ‘‘অম্হাকং কুলতো নিক্খমিত্ৰা ইমে কুলপুত্তা পব্বজিতা এৰং সীলৰন্তো গুণৰন্তো আচারসম্পন্না কল্যাণধম্মা’’তি এৰং তঞ্চেপি কুলং এতে তযো কুলপুত্তে পসন্নচিত্তং অনুস্সরেয্যাতি এৰং সব্বত্থ অত্থো দট্ঠব্বো. ইতি ভগৰা যথানুসন্ধিনাৰ দেসনং নিট্ঠপেসীতি.

পপঞ্চসূদনিযা মজ্ঝিমনিকাযট্ঠকথায

চূল়গোসিঙ্গসুত্তৰণ্ণনা নিট্ঠিতা.

২. মহাগোসিঙ্গসুত্তৰণ্ণনা

৩৩২. এৰং মে সুতন্তি মহাগোসিঙ্গসুত্তং. তত্থ গোসিঙ্গসালৰনদাযেতি ইদং ৰসনট্ঠানদস্সনত্থং ৰুত্তং. অঞ্ঞেসু হি সুত্তেসু, ‘‘সাৰত্থিযং ৰিহরতি জেতৰনে অনাথপিণ্ডিকস্স আরামে’’তি এৰং পঠমং গোচরগামং দস্সেত্ৰা পচ্ছা ৰসনট্ঠানং দস্সেতি. ইমস্মিং পন মহাগোসিঙ্গসুত্তে ভগৰতো গোচরগামো অনিবন্ধো, কোচিদেৰ গোচরগামো ভৰিস্সতি. তস্মা ৰসনট্ঠানমেৰ পরিদীপিতং. অরঞ্ঞনিদানকং নামেতং সুত্তন্তি. সম্বহুলেহীতি বহুকেহি. অভিঞ্ঞাতেহি অভিঞ্ঞাতেহীতি সব্বত্থ ৰিস্সুতেহি পাকটেহি. থেরেহি সাৰকেহি সদ্ধিন্তি পাতিমোক্খসংৰরাদীহি থিরকারকেহেৰ ধম্মেহি সমন্নাগতত্তা থেরেহি, সৰনন্তে জাতত্তা সাৰকেহি সদ্ধিং একতো. ইদানি তে থেরে সরূপতো দস্সেন্তো, আযস্মতা চ সারিপুত্তেনাতিআদিমাহ. তত্থাযস্মা সারিপুত্তো অত্তনো সীলাদীহি গুণেহি বুদ্ধসাসনে অভিঞ্ঞাতো. চক্খুমন্তানং গগনমজ্ঝে ঠিতো সূরিযো ৰিয চন্দো ৰিয, সমুদ্দতীরে ঠিতানং সাগরো ৰিয চ পাকটো পঞ্ঞাতো. ন কেৰলঞ্চস্স ইমস্মিং সুত্তে আগতগুণৰসেনেৰ মহন্ততা ৰেদিতব্বা, ইতো অঞ্ঞেসং ধম্মদাযাদসুত্তং অনঙ্গণসুত্তং সম্মাদিট্ঠিসুত্তং সীহনাদসুত্তং রথৰিনীতং মহাহত্থিপদোপমং মহাৰেদল্লং চাতুমসুত্তং দীঘনখং অনুপদসুত্তং সেৰিতব্বাসেৰিতব্বসুত্তং সচ্চৰিভঙ্গসুত্তং পিণ্ডপাতপারিসুদ্ধি সম্পসাদনীযং সঙ্গীতিসুত্তং দসুত্তরসুত্তং পৰারণাসুত্তং (সং. নি. ১.২১৫ আদযো) সুসিমসুত্তং থেরপঞ্হসুত্তং মহানিদ্দেসো পটিসম্ভিদামগ্গো থেরসীহনাদসুত্তং অভিনিক্খমনং এতদগ্গন্তি ইমেসম্পি সুত্তানং ৰসেন থেরস্স মহন্ততা ৰেদিতব্বা. এতদগ্গস্মিঞ্হি, ‘‘এতদগ্গং, ভিক্খৰে, মম সাৰকানং ভিক্খূনং মহাপঞ্ঞানং যদিদং সারিপুত্তো’’তি (অ. নি. ১.১৮৮-১৮৯) ৰুত্তং.

মহামোগ্গল্লানোপি সীলাদিগুণেহি চেৰ ইমস্মিং সুত্তে আগতগুণেহি চ থেরো ৰিয অভিঞ্ঞাতো পাকটো মহা. অপিচস্স অনুমানসুত্তং, চূল়তণ্হাসঙ্খযসুত্তং মারতজ্জনিযসুত্তং পাসাদকম্পনং সকলং ইদ্ধিপাদসংযুত্তং নন্দোপনন্দদমনং যমকপাটিহারিযকালে দেৰলোকগমনং ৰিমানৰত্থু পেতৰত্থু থেরস্স অভিনিক্খমনং এতদগ্গন্তি ইমেসম্পি ৰসেন মহন্তভাৰো ৰেদিতব্বো. এতদগ্গস্মিঞ্হি, ‘‘এতদগ্গং, ভিক্খৰে, মম সাৰকানং ভিক্খূনং ইদ্ধিমন্তানং যদিদং মহামোগ্গল্লানো’’তি (অ. নি. ১.১৯০) ৰুত্তং.

মহাকস্সপোপি সীলাদিগুণেহি চেৰ ইমস্মিং সুত্তে আগতগুণেহি চ থেরো ৰিয অভিঞ্ঞাতো পাকটো মহা. অপিচস্স চীৰরপরিৰত্তনসুত্তং জিণ্ণচীৰরসুত্তং (সং. নি. ২.১৫৪ আদযো) চন্দোপমং সকলং কস্সপসংযুত্তং মহাঅরিযৰংসসুত্তং থেরস্স অভিনিক্খমনং এতদগ্গন্তি ইমেসম্পি ৰসেন মহন্তভাৰো ৰেদিতব্বো. এতদগ্গস্মিঞ্হি, ‘‘এতদগ্গং, ভিক্খৰে, মম সাৰকানং ভিক্খূনং ধুতৰাদানং যদিদং মহাকস্সপো’’তি (অ. নি. ১.১৯১) ৰুত্তং.

অনুরুদ্ধত্থেরোপি সীলাদিগুণেহি চেৰ ইমস্মিং সুত্তে আগতগুণেহি চ থেরো ৰিয অভিঞ্ঞাতো পাকটো মহা. অপিচস্স চূল়গোসিঙ্গসুত্তং নল়কপানসুত্তং অনুত্তরিযসুত্তং উপক্কিলেসসুত্তং অনুরুদ্ধসংযুত্তং মহাপুরিসৰিতক্কসুত্তং থেরস্স অভিনিক্খমনং এতদগ্গন্তি ইমেসম্পি ৰসেন মহন্তভাৰো ৰেদিতব্বো. এতদগ্গস্মিঞ্হি, ‘‘এতদগ্গং, ভিক্খৰে, মম সাৰকানং ভিক্খূনং দিব্বচক্খুকানং যদিদং অনুরুদ্ধো’’তি (অ. নি. ১.১৯২) ৰুত্তং.

আযস্মতা চ রেৰতেনাতি এত্থ পন দ্ৰে রেৰতা খদিরৰনিযরেৰতো চ কঙ্খারেৰতো চ. তত্থ খদিরৰনিযরেৰতো ধম্মসেনাপতিত্থেরস্স কনিট্ঠভাতিকো, ন সো ইধ অধিপ্পেতো. ‘‘অকপ্পিযো গুল়ো, অকপ্পিযা মুগ্গা’’তি (মহাৰ. ২৭২) এৰং কঙ্খাবহুলো পন থেরো ইধ রেৰতোতি অধিপ্পেতো. সোপি সীলাদিগুণেহি চেৰ ইমস্মিং সুত্তে আগতগুণেহি চ থেরো ৰিয অভিঞ্ঞাতো পাকটো মহা. অপিচস্স অভিনিক্খমনেনপি এতদগ্গেনপি মহন্তভাৰো ৰেদিতব্বো. এতদগ্গস্মিঞ্হি, ‘‘এতদগ্গং, ভিক্খৰে, মম সাৰকানং ভিক্খূনং ঝাযীনং যদিদং কঙ্খারেৰতো’’তি (অ. নি. ১.২০৪) ৰুত্তং.

আনন্দত্থেরোপি সীলাদিগুণেহি চেৰ ইমস্মিং সুত্তে আগতগুণেহি চ থেরো ৰিয অভিঞ্ঞাতো পাকটো মহা. অপিচস্স সেক্খসুত্তং বাহিতিকসুত্তং আনেঞ্জসপ্পাযং গোপকমোগ্গল্লানং বহুধাতুকং চূল়সুঞ্ঞতং মহাসুঞ্ঞতং অচ্ছরিযব্ভুতসুত্তং ভদ্দেকরত্তং মহানিদানং মহাপরিনিব্বানং সুভসুত্তং চূল়নিযলোকধাতুসুত্তং অভিনিক্খমনং এতদগ্গন্তি ইমেসম্পি ৰসেন মহন্তভাৰো ৰেদিতব্বো. এতদগ্গস্মিঞ্হি, ‘‘এতদগ্গং, ভিক্খৰে, মম সাৰকানং ভিক্খূনং বহুস্সুতানং যদিদং আনন্দো’’তি (অ. নি. ১.২১৯-২২৩) ৰুত্তং.

অঞ্ঞেহি চ অভিঞ্ঞাতেহি অভিঞ্ঞাতেহীতি ন কেৰলঞ্চ এতেহেৰ, অঞ্ঞেহি চ মহাগুণতায পাকটেহি অভিঞ্ঞাতেহি বহূহি থেরেহি সাৰকেহি সদ্ধিং ভগৰা গোসিঙ্গসালৰনদাযে ৰিহরতীতি অত্থো. আযস্মা হি সারিপুত্তো সযং মহাপঞ্ঞো অঞ্ঞেপি বহূ মহাপঞ্ঞে ভিক্খূ গহেত্ৰা তদা দসবলং পরিৰারেত্ৰা ৰিহাসি. আযস্মা মহামোগ্গল্লানো সযং ইদ্ধিমা, আযস্মা মহাকস্সপো সযং ধুতৰাদো, আযস্মা অনুরুদ্ধো সযং দিব্বচক্খুকো, আযস্মা রেৰতো সযং ঝানাভিরতো, আযস্মা আনন্দো সযং বহুস্সুতো অঞ্ঞেপি বহূ বহুস্সুতে ভিক্খূ গহেত্ৰা তদা দসবলং পরিৰারেত্ৰা ৰিহাসি, এৰং তদা এতে চ অঞ্ঞে চ অভিঞ্ঞাতা মহাথেরা তিংসসহস্সমত্তা ভিক্খূ দসবলং পরিৰারেত্ৰা ৰিহরিংসূতি ৰেদিতব্বা.

পটিসল্লানা ৰুট্ঠিতোতি ফলসমাপত্তিৰিৰেকতো ৰুট্ঠিতো. যেনাযস্মা মহাকস্সপো তেনুপসঙ্কমীতি থেরো কির পটিসল্লানা ৰুট্ঠিতো পচ্ছিমলোকধাতুং ওলোকেন্তো ৰনন্তে কীল়ন্তস্স মত্তখত্তিযস্স কণ্ণতো পতমানং কুণ্ডলং ৰিয, সংহরিত্ৰা সমুগ্গে পক্খিপমানং রত্তকম্বলং ৰিয, মণিনাগদন্ততো পতমানং সতসহস্সগ্ঘনিকং সুৰণ্ণপাতিং ৰিয চ অত্থং গচ্ছমানং পরিপুণ্ণপণ্ণাসযোজনং সূরিযমণ্ডলং অদ্দস. তদনন্তরং পাচীনলোকধাতুং ওলোকেন্তো নেমিযং গহেত্ৰা পরিৰত্তযমানং রজতচক্কং ৰিয, রজতকূটতো নিক্খমন্তং খীরধারামণ্ডং ৰিয, সপক্খে পপ্ফোটেত্ৰা গগনতলে পক্খন্দমানং সেতহংসং ৰিয চ মেঘৰণ্ণায সমুদ্দকুচ্ছিতো উগ্গন্ত্ৰা পাচীনচক্কৰাল়পব্বতমত্থকে সসলক্খণপ্পটিমণ্ডিতং একূনপণ্ণাসযোজনং চন্দমণ্ডলং অদ্দস. ততো সালৰনং ওলোকেসি. তস্মিঞ্হি সমযে সালরুক্খা মূলতো পট্ঠায যাৰ অগ্গা সব্বপালিফুল্লা দুকূলপারুতা ৰিয, মুত্তাকলাপৰিনদ্ধা ৰিয চ ৰিরোচিংসু. ভূমিতলং পুপ্ফসন্থরপূজায পটিমণ্ডিতং ৰিয, তত্থ তত্থ নিপতন্তেন পুপ্ফরেণুনা লাখারসেন সিঞ্চমানং ৰিয চ অহোসি. ভমরমধুকরগণা কুসুমরেণুমদমত্তা উপগাযমানা ৰিয ৰনন্তরেসু ৰিচরন্তি. তদা চ উপোসথদিৰসোৰ হোতি. অথ থেরো, ‘‘কায নু খো অজ্জ রতিযা ৰীতিনামেস্সামী’’তি চিন্তেসি, অরিযসাৰকা চ নাম পিযধম্মস্সৰনা হোন্তি. অথস্স এতদহোসি – ‘‘অজ্জ ময্হং জেট্ঠভাতিকস্স ধম্মসেনাপতিত্থেরস্স সন্তিকং গন্ত্ৰা ধম্মরতিযা ৰীতিনামেস্সামী’’তি. গচ্ছন্তো পন এককোৰ অগন্ত্ৰা ‘‘ময্হং পিযসহাযং মহাকস্সপত্থেরং গহেত্ৰা গমিস্সামী’’তি নিসিন্নট্ঠানতো ৰুট্ঠায চম্মখণ্ডং পপ্ফোটেত্ৰা যেনাযস্মা মহাকস্সপো তেনুপসঙ্কমি.

এৰমাৰুসোতি খো আযস্মা মহাকস্সপোতি থেরোপি যস্মা পিযধম্মস্সৰনোৰ অরিযসাৰকো, তস্মা তস্স ৰচনং সুত্ৰা গচ্ছাৰুসো, ত্ৰং, ময্হং সীসং ৰা রুজ্জতি পিট্ঠি ৰাতি কিঞ্চি লেসাপদেসং অকত্ৰা তুট্ঠহদযোৰ, ‘‘এৰমাৰুসো’’তিআদিমাহ. পটিস্সুত্ৰা চ নিসিন্নট্ঠানতো ৰুট্ঠায চম্মখণ্ডং পপ্ফোটেত্ৰা মহামোগ্গল্লানং অনুবন্ধি. তস্মিং সমযে দ্ৰে মহাথেরা পটিপাটিযা ঠিতানি দ্ৰে চন্দমণ্ডলানি ৰিয, দ্ৰে সূরিযমণ্ডলানি ৰিয, দ্ৰে ছদ্দন্তনাগরাজানো ৰিয, দ্ৰে সীহা ৰিয, দ্ৰে ব্যগ্ঘা ৰিয চ ৰিরোচিংসু. অনুরুদ্ধত্থেরোপি তস্মিং সমযে দিৰাট্ঠানে নিসিন্নো দ্ৰে মহাথেরে সারিপুত্তত্থেরস্স সন্তিকং গচ্ছন্তে দিস্ৰা পচ্ছিমলোকধাতুং ওলোকেন্তো সূরিযং ৰনন্তং পৰিসন্তং ৰিয, পাচীনলোকধাতুং ওলোকেন্তো চন্দং ৰনন্ততো উগ্গচ্ছন্তং ৰিয, সালৰনং ওলোকেন্তো সব্বপালিফুল্লমেৰ সালৰনঞ্চ দিস্ৰা অজ্জ উপোসথদিৰসো, ইমে চ মে জেট্ঠভাতিকা ধম্মসেনাপতিস্স সন্তিকং গচ্ছন্তি, মহন্তেন ধম্মস্সৰনেন ভৰিতব্বং, অহম্পি ধম্মস্সৰনস্স ভাগী ভৰিস্সামীতি নিসিন্নট্ঠানতো ৰুট্ঠায চম্মখণ্ডং পপ্ফোটেত্ৰা মহাথেরানং পদানুপদিকো হুত্ৰা নিক্খমি. তেন ৰুত্তং – ‘‘অথ খো আযস্মা চ মহামোগ্গল্লানো আযস্মা চ মহাকস্সপো আযস্মা চ অনুরুদ্ধো যেনাযস্মা সারিপুত্তো তেনুপসঙ্কমিংসূ’’তি. উপসঙ্কমিংসূতি. পটিপাটিযা ঠিতা তযো চন্দা ৰিয, সূরিযা ৰিয, সীহা ৰিয চ ৰিরোচমানা উপসঙ্কমিংসু.

৩৩৩. এৰং উপসঙ্কমন্তে পন তে মহাথেরে আযস্মা আনন্দো অত্তনো দিৰাট্ঠানে নিসিন্নোযেৰ দিস্ৰা, ‘‘অজ্জ মহন্তং ধম্মস্সৰনং ভৰিস্সতি, মযাপি তস্স ভাগিনা ভৰিতব্বং, ন খো পন এককোৰ গমিস্সামি, ময্হং পিযসহাযম্পি রেৰতত্থেরং গহেত্ৰা গমিস্সামী’’তি সব্বং মহামোগ্গল্লানস্স মহাকস্সপস্স অনুরুদ্ধস্স উপসঙ্কমনে ৰুত্তনযেনেৰ ৰিত্থারতো ৰেদিতব্বং. ইতি তে দ্ৰে জনা পটিপাটিযা ঠিতা দ্ৰে চন্দা ৰিয, সূরিযা ৰিয, সীহা ৰিয চ ৰিরোচমানা উপসঙ্কমিংসু. তেন ৰুত্তং – ‘‘অদ্দসা খো আযস্মা সারিপুত্তো’’তিআদি. দিস্ৰান আযস্মন্তং আনন্দং এতদৰোচাতি দূরতোৰ দিস্ৰা অনুক্কমেন কথাউপচারং সম্পত্তমেতং, ‘‘এতু খো আযস্মা’’তিআদিৰচনং অৰোচ. রমণীযং, আৰুসোতি এত্থ দুৰিধং রামণেয্যকং ৰনরামণেয্যকং পুগ্গলরামণেয্যকঞ্চ. তত্থ ৰনং নাম নাগসলল়সালচম্পকাদীহি সঞ্ছন্নং হোতি বহলচ্ছাযং পুপ্ফফলূপগং ৰিৰিধরুক্খং উদকসম্পন্নং গামতো নিস্সটং, ইদং ৰনরামণেয্যকং নাম. যং সন্ধায ৰুত্তং –

‘‘রমণীযানি অরঞ্ঞানি, যত্থ ন রমতী জনো;

ৰীতরাগা রমিস্সন্তি, ন তে কামগৰেসিনো’’তি. (ধ. প. ৯৯);

ৰনং পন সচেপি উজ্জঙ্গলে হোতি নিরুদকং ৰিরলচ্ছাযং কণ্টকসমাকিণ্ণং, বুদ্ধাদযোপেত্থ অরিযা ৰিহরন্তি, ইদং পুগ্গলরামণেয্যকং নাম. যং সন্ধায ৰুত্তং –

‘‘গামে ৰা যদি ৰারঞ্ঞে, নিন্নে ৰা যদি ৰা থলে;

যত্থ অরহন্তো ৰিহরন্তি, তং ভূমিরামণেয্যক’’ন্তি. (ধ. প. ৯৮);

ইধ পন তং দুৰিধম্পি লব্ভতি. তদা হি গোসিঙ্গসালৰনং সব্বপালিফুল্লং হোতি কুসুমগন্ধসুগন্ধং, সদেৰকে চেত্থ লোকে অগ্গপুগ্গলো সম্মাসম্বুদ্ধো তিংসসহস্সমত্তেহি অভিঞ্ঞাতভিক্খূহি সদ্ধিং ৰিহরতি. তং সন্ধায ৰুত্তং – ‘‘রমণীযং, আৰুসো আনন্দ, গোসিঙ্গসালৰন’’ন্তি.

দোসিনাতি দোসাপগতা, অব্ভং মহিকা ধূমো রজো রাহূতি ইমেহি পঞ্চহি উপক্কিলেসেহি ৰিরহিতাতি ৰুত্তং হোতি. সব্বপালিফুল্লাতি সব্বত্থ পালিফুল্লা, মূলতো পট্ঠায যাৰ অগ্গা অপুপ্ফিতট্ঠানং নাম নত্থি. দিব্বা মঞ্ঞে গন্ধা সম্পৰন্তীতি দিব্বা মন্দারপুপ্ফকোৰিল়ারপারিচ্ছত্তকচন্দনচুণ্ণগন্ধা ৰিয সমন্তা পৰাযন্তি, সক্কসুযাসন্তুসিতনিম্মানরতিপরনিম্মিতমহাব্রহ্মানং ওতিণ্ণট্ঠানং ৰিয ৰাযন্তীতি ৰুত্তং হোতি.

কথংরূপেন, আৰুসো আনন্দাতি আনন্দত্থেরো তেসং পঞ্চন্নং থেরানং সঙ্ঘনৰকোৰ. কস্মা থেরো তংযেৰ পঠমং পুচ্ছতীতি? মমাযিতত্তা. তে হি দ্ৰে থেরা অঞ্ঞমঞ্ঞং মমাযিংসু. সারিপুত্তত্থেরো, ‘‘মযা কত্তব্বং সত্থু উপট্ঠানং করোতী’’তি আনন্দত্থেরং মমাযি. আনন্দত্থেরো ভগৰতো সাৰকানং অগ্গোতি সারিপুত্তত্থেরং মমাযি, কুলদারকে পব্বাজেত্ৰা সারিপুত্তত্থেরস্স সন্তিকে উপজ্ঝং গণ্হাপেসি. সারিপুত্তত্থেরোপি তথেৰ অকাসি. এৰং একমেকেন অত্তনো পত্তচীৰরং দত্ৰা পব্বাজেত্ৰা উপজ্ঝং গণ্হাপিতানি পঞ্চ ভিক্খুসতানি অহেসুং. আযস্মা আনন্দো পণীতানি চীৰরাদীনিপি লভিত্ৰা থেরস্সেৰ দেতি.

একো কির ব্রাহ্মণো চিন্তেসি – ‘‘বুদ্ধরতনস্স চ সঙ্ঘরতনস্স চ পূজা পঞ্ঞাযতি, কথং নু খো ধম্মরতনং পূজিতং নাম হোতী’’তি? সো ভগৰন্তং উপসঙ্কমিত্ৰা এতমত্থং পুচ্ছি. ভগৰা আহ – ‘‘সচেসি, ব্রাহ্মণ, ধম্মরতনং পূজিতুকামো, একং বহুস্সুতং পূজেহী’’তি বহুস্সুতং, ভন্তে, আচিক্খথাতি ভিক্খুসঙ্ঘং পুচ্ছতি. সো ভিক্খুসঙ্ঘং উপসঙ্কমিত্ৰা বহুস্সুতং, ভন্তে, আচিক্খথাতি আহ. আনন্দত্থেরো ব্রাহ্মণাতি. ব্রাহ্মণো থেরং সহস্সগ্ঘনিকেন চীৰরেন পূজেসি. থেরো তং গহেত্ৰা ভগৰতো সন্তিকং অগমাসি. ভগৰা ‘‘কুতো, আনন্দ, লদ্ধ’’ন্তি আহ. একেন, ভন্তে, ব্রাহ্মণেন দিন্নং, ইদং পনাহং আযস্মতো সারিপুত্তস্স দাতুকামোতি. দেহি, আনন্দাতি. চারিকং পক্কন্তো, ভন্তেতি. আগতকালে দেহীতি. সিক্খাপদং, ভন্তে, পঞ্ঞত্তন্তি. কদা পন সারিপুত্তো আগমিস্সতীতি? দসাহমত্তেন, ভন্তেতি. ‘‘অনুজানামি, আনন্দ, দসাহপরমং অতিরেকচীৰরং নিক্খিপিতু’’ন্তি (পারা. ৪৬১; মহাৰ. ৩৪৭) সিক্খাপদং পঞ্ঞপেসি. সারিপুত্তত্থেরোপি তথেৰ যংকিঞ্চি মনাপং লভতি, তং আনন্দত্থেরস্স দেতি. এৰং তে থেরা অঞ্ঞমঞ্ঞং মমাযিংসু, ইতি মমাযিতত্তা পঠমং পুচ্ছি.

অপিচ অনুমতিপুচ্ছা নামেসা খুদ্দকতো পট্ঠায পুচ্ছিতব্বা হোতি. তস্মা থেরো চিন্তেসি – ‘‘অহং পঠমং আনন্দং পুচ্ছিস্সামি, আনন্দো অত্তনো পটিভানং ব্যাকরিস্সতি. ততো রেৰতং, অনুরুদ্ধং, মহাকস্সপং, মহামোগ্গল্লানং পুচ্ছিস্সামি. মহামোগ্গল্লানো অত্তনো পটিভানং ব্যাকরিস্সতি. ততো পঞ্চপি থেরা মং পুচ্ছিস্সন্তি, অহম্পি অত্তনো পটিভানং ব্যাকরিস্সামী’’তি. এত্তাৰতাপি অযং ধম্মদেসনা সিখাপ্পত্তা ৰেপুল্লপ্পত্তা ন ভৰিস্সতি, অথ মযং সব্বেপি দসবলং উপসঙ্কমিত্ৰা পুচ্ছিস্সাম, সত্থা সব্বঞ্ঞুতঞ্ঞাণেন ব্যাকরিস্সতি. এত্তাৰতা অযং ধম্মদেসনা সিখাপ্পত্তা ৰেপুল্লপ্পত্তা ভৰিস্সতি. যথা হি জনপদম্হি উপ্পন্নো অট্টো গামভোজকং পাপুণাতি, তস্মিং নিচ্ছিতুং অসক্কোন্তে জনপদভোজকং পাপুণাতি, তস্মিং অসক্কোন্তে মহাৰিনিচ্ছযঅমচ্চং, তস্মিং অসক্কোন্তে সেনাপতিং, তস্মিং অসক্কোন্তে উপরাজং, তস্মিং ৰিনিচ্ছিতুং অসক্কোন্তে রাজানং পাপুণাতি, রঞ্ঞা ৰিনিচ্ছিতকালতো পট্ঠায অট্টো অপরাপরং ন সঞ্চরতি, রাজৰচনেনেৰ ছিজ্জতি. এৰমেৰং অহঞ্হি পঠমং আনন্দং পুচ্ছিস্সামি…পে… অথ মযং সব্বেপি দসবলং উপসঙ্কমিত্ৰা পুচ্ছিস্সাম, সত্থা সব্বঞ্ঞুতঞ্ঞাণেন ব্যাকরিস্সতি. এত্তাৰতা অযং ধম্মদেসনা সিখাপ্পত্তা ৰেপুল্লপ্পত্তা ভৰিস্সতি. এৰং অনুমতিপুচ্ছং পুচ্ছন্তো থেরো পঠমং আনন্দত্থেরং পুচ্ছি.

বহুস্সুতো হোতীতি বহু অস্স সুতং হোতি, নৰঙ্গং সত্থুসাসনং পাল়িঅনুসন্ধিপুব্বাপরৰসেন উগ্গহিতং হোতীতি অত্থো. সুতধরোতি সুতস্স আধারভূতো. যস্স হি ইতো গহিতং ইতো পলাযতি, ছিদ্দঘটে উদকং ৰিয ন তিট্ঠতি, পরিসমজ্ঝে একং সুত্তং ৰা জাতকং ৰা কথেতুং ৰা ৰাচেতুং ৰা ন সক্কোতি, অযং ন সুতধরো নাম. যস্স পন উগ্গহিতং বুদ্ধৰচনং উগ্গহিতকালসদিসমেৰ হোতি, দসপি ৰীসতিপি ৰস্সানি সজ্ঝাযং অকরোন্তস্স ন নস্সতি, অযং সুতধরো নাম. সুতসন্নিচযোতি সুতস্স সন্নিচযভূতো. যথা হি সুতং হদযমঞ্জূসায সন্নিচিতং সিলাযং লেখা ৰিয, সুৰণ্ণঘটে পক্খিত্তসীহৰসা ৰিয চ অজ্ঝোসায তিট্ঠতি, অযং সুতসন্নিচযো নাম. ধাতাতি ঠিতা পগুণা. একচ্চস্স হি উগ্গহিতং বুদ্ধৰচনং ধাতং পগুণং নিচ্চলিতং ন হোতি, অসুকসুত্তং ৰা জাতকং ৰা কথেহীতি ৰুত্তে সজ্ঝাযিত্ৰা সংসন্দিত্ৰা সমনুগ্গাহিত্ৰা জানিস্সামীতি ৰদতি. একচ্চস্স ধাতং পগুণং ভৰঙ্গসোতসদিসং হোতি, অসুকসুত্তং ৰা জাতকং ৰা কথেহীতি ৰুত্তে উদ্ধরিত্ৰা তমেৰ কথেতি. তং সন্ধায ৰুত্তং ‘‘ধাতা’’তি.

ৰচসা পরিচিতাতি সুত্তদসক-ৰগ্গদসক-পণ্ণাসদসকানং ৰসেন ৰাচায সজ্ঝাযিতা. মনসানুপেক্খিতাতি চিত্তেন অনুপেক্খিতা, যস্স ৰাচায সজ্ঝাযিতং বুদ্ধৰচনং মনসা চিন্তেন্তস্স তত্থ তত্থ পাকটং হোতি. মহাদীপং জালেত্ৰা ঠিতস্স রূপগতং ৰিয পঞ্ঞাযতি. তং সন্ধায ৰুত্তং – ‘‘ৰচসা পরিচিতা মনসানুপেক্খিতা’’তি. দিট্ঠিযা সুপ্পটিৰিদ্ধাতি অত্থতো চ কারণতো চ পঞ্ঞায সুপ্পটিৰিদ্ধা. পরিমণ্ডলেহি পদব্যঞ্জনেহীতি এত্থ পদমেৰ অত্থস্স ব্যঞ্জনতো পদব্যঞ্জনং, তং অক্খরপারিপূরিং কত্ৰা দসৰিধব্যঞ্জনবুদ্ধিযো অপরিহাপেত্ৰা ৰুত্তং পরিমণ্ডলং নাম হোতি, এৰরূপেহি পদব্যঞ্জনেহীতি অত্থো. অপিচ যো ভিক্খু পরিসতি ধম্মং দেসেন্তো সুত্তং ৰা জাতকং ৰা নিক্খপিত্ৰা অঞ্ঞং উপারম্ভকরং সুত্তং আহরতি, তস্স উপমং কথেতি, তদত্থং ওহারেতি, এৰমিদং গহেত্ৰা এত্থ খিপন্তো একপস্সেনেৰ পরিহরন্তো কালং ঞত্ৰা ৰুট্ঠহতি. নিক্খিত্তসুত্তং পন নিক্খত্তমত্তমেৰ হোতি, তস্স কথা অপরিমণ্ডলা নাম হোতি. যো পন সুত্তং ৰা জাতকং ৰা নিক্খিপিত্ৰা বহি একপদম্পি অগন্ত্ৰা পাল়িযা অনুসন্ধিঞ্চ পুব্বাপরঞ্চ অমক্খেন্তো আচরিযেহি দিন্ননযে ঠত্ৰা তুলিকায পরিচ্ছিন্দন্তো ৰিয, গম্ভীরমাতিকায উদকং পেসেন্তো ৰিয, পদং কোট্টেন্তো সিন্ধৰাজানীযো ৰিয গচ্ছতি, তস্স কথা পরিমণ্ডলা নাম হোতি. এৰরূপিং কথং সন্ধায – ‘‘পরিমণ্ডলেহি পদব্যঞ্জনেহী’’তি ৰুত্তং.

অনুপ্পবন্ধেহীতি এত্থ যো ভিক্খু ধম্মং কথেন্তো সুত্তং ৰা জাতকং ৰা আরভিত্ৰা আরদ্ধকালতো পট্ঠায তুরিততুরিতো অরণিং মন্থেন্তো ৰিয, উণ্হখাদনীযং খাদন্তো ৰিয, পাল়িযা অনুসন্ধিপুব্বাপরেসু গহিতং গহিতমেৰ অগ্গহিতং অগ্গহিতমেৰ চ কত্ৰা পুরাণপণ্ণন্তরেসু চরমানং গোধং উট্ঠপেন্তো ৰিয তত্থ তত্থ পহরন্তো ওসাপেন্তো ওহায গচ্ছতি. যোপি ধম্মং কথেন্তো কালেন সীঘং কালেন দন্ধং কালেন মহাসদ্দং কালেন খুদ্দকসদ্দং করোতি. যথা পেতগ্গি কালেন জলতি, কালেন নিব্বাযতি, এৰমেৰ ইধ পেতগ্গিধম্মকথিকো নাম হোতি, পরিসায উট্ঠাতুকামায পুনপ্পুনং আরভতি. যোপি কথেন্তো তত্থ তত্থ ৰিত্থাযতি, নিত্থুনন্তো কন্দন্তো ৰিয কথেতি, ইমেসং সব্বেসম্পি কথা অপ্পবন্ধা নাম হোতি. যো পন সুত্তং আরভিত্ৰা আচরিযেহি দিন্ননযে ঠিতো অচ্ছিন্নধারং কত্ৰা নদীসোতং ৰিয পৰত্তেতি, আকাসগঙ্গতো ভস্সমানং উদকং ৰিয নিরন্তরং কথং পৰত্তেতি, তস্স কথা অনুপ্পবন্ধা হোতি. তং সন্ধায ৰুত্তং ‘‘অনুপ্পবন্ধেহী’’তি. অনুসযসমুগ্ঘাতাযাতি সত্তন্নং অনুসযানং সমুগ্ঘাতত্থায. এৰরূপেনাতি এৰরূপেন বহুস্সুতেন ভিক্খুনা তথারূপেনেৰ ভিক্খুসতেন ভিক্খুসহস্সেন ৰা সঙ্ঘাটিকণ্ণেন ৰা সঙ্ঘাটিকণ্ণং, পল্লঙ্কেন ৰা পল্লঙ্কং আহচ্চ নিসিন্নেন গোসিঙ্গসালৰনং সোভেয্য. ইমিনা নযেন সব্বৰারেসু অত্থো ৰেদিতব্বো.

৩৩৪. পটিসল্লানং অস্স আরামোতি পটিসল্লানারামো. পটিসল্লানে রতোতি পটিসল্লানরতো.

৩৩৫. সহস্সং লোকানন্তি সহস্সং লোকধাতূনং. এত্তকঞ্হি থেরস্স ধুৰসেৰনং আৰজ্জনপটিবদ্ধং, আকঙ্খমানো পন থেরো অনেকানিপি চক্কৰাল়সহস্সানি ৰোলোকেতিযেৰ. উপরিপাসাদৰরগতোতি সত্তভূমকস্স ৰা নৰভূমকস্স ৰা পাসাদৰরস্স উপরি গতো. সহস্সং নেমিমণ্ডলানং ৰোলোকেয্যাতি পাসাদপরিৰেণে নাভিযা পতিট্ঠিতানং নেমিৰট্টিযা নেমিৰট্টিং আহচ্চ ঠিতানং নেমিমণ্ডলানং সহস্সং ৰাতপানং ৰিৰরিত্ৰা ওলোকেয্য, তস্স নাভিযোপি পাকটা হোন্তি, অরাপি অরন্তরানিপি নেমিযোপি. এৰমেৰ খো, আৰুসোতি, আৰুসো, এৰং অযম্পি দিব্বচক্খুকো ভিক্খু দিব্বেন চক্খুনা অতিক্কন্তমানুসকেন সহস্সং লোকানং ৰোলোকেতি. তস্স পাসাদে ঠিতপুরিসস্স চক্কনাভিযো ৰিয চক্কৰাল়সহস্সে সিনেরুসহস্সং পাকটং হোতি. অরা ৰিয দীপা পাকটা হোন্তি. অরন্তরানি ৰিয দীপট্ঠিতমনুস্সা পাকটা হোন্তি. নেমিযো ৰিয চক্কৰাল়পব্বতা পাকটা হোন্তি.

৩৩৬. আরঞ্ঞিকোতি সমাদিণ্ণঅরঞ্ঞধুতঙ্গো. সেসপদেসুপি এসেৰ নযো.

৩৩৭. নো চ সংসাদেন্তীতি ন ওসাদেন্তি. সহেতুকঞ্হি সকারণং কত্ৰা পঞ্হং পুচ্ছিতুং ৰিস্সজ্জিতুম্পি অসক্কোন্তো সংসাদেতি নাম. এৰং ন করোন্তীতি অত্থো. পৰত্তিনী হোতীতি নদীসোতোদকং ৰিয পৰত্ততি.

৩৩৮. যায ৰিহারসমাপত্তিযাতি যায লোকিযায ৰিহারসমাপত্তিযা, যায লোকুত্তরায ৰিহারসমাপত্তিযা.

৩৩৯. সাধু সাধু সারিপুত্তাতি অযং সাধুকারো আনন্দত্থেরস্স দিন্নো. সারিপুত্তত্থেরেন পন সদ্ধিং ভগৰা আলপতি. এস নযো সব্বত্থ. যথা তং আনন্দোৰাতি যথা আনন্দোৰ সম্মা ব্যাকরণমানো ব্যাকরেয্য, এৰং ব্যাকতং আনন্দেন অত্তনো অনুচ্ছৰিকমেৰ, অজ্ঝাসযানুরূপমেৰ ব্যাকতন্তি অত্থো. আনন্দত্থেরো হি অত্তনাপি বহুস্সুতো, অজ্ঝাসযোপিস্স এৰং হোতি – ‘‘অহো ৰত সাসনে সব্রহ্মচারী বহুস্সুতা ভৰেয্যু’’ন্তি. কস্মা? বহুস্সুতস্স হি কপ্পিযাকপ্পিযং সাৰজ্জানৰজ্জং, গরুকলহুকং সতেকিচ্ছাতেকিচ্ছং পাকটং হোতি. বহুস্সুতো উগ্গহিতবুদ্ধৰচনং আৰজ্জিত্ৰা ইমস্মিং ঠানে সীলং কথিতং, ইমস্মিং সমাধি, ইমস্মিং ৰিপস্সনা, ইমস্মিং মগ্গফলনিব্বানানীতি সীলস্স আগতট্ঠানে সীলং পূরেত্ৰা, সমাধিস্স আগতট্ঠানে সমাধিং পূরেত্ৰা ৰিপস্সনায আগতট্ঠানে ৰিপস্সনাগব্ভং গণ্হাপেত্ৰা মগ্গং ভাৰেত্ৰা ফলং সচ্ছিকরোতি. তস্মা থেরস্স এৰং অজ্ঝাসযো হোতি – ‘‘অহো ৰত সব্রহ্মচারী একং ৰা দ্ৰে ৰা তযো ৰা চত্তারো ৰা পঞ্চ ৰা নিকাযে উগ্গহেত্ৰা আৰজ্জন্তা সীলাদীনং আগতট্ঠানেসু সীলাদীনি পরিপূরেত্ৰা অনুক্কমেন মগ্গফলনিব্বানানি সচ্ছিকরেয্যু’’ন্তি. সেসৰারেসুপি এসেৰ নযো.

৩৪০. আযস্মা হি রেৰতো ঝানজ্ঝাসযো ঝানাভিরতো, তস্মাস্স এৰং হোতি – ‘‘অহো ৰত সব্রহ্মচারী একিকা নিসীদিত্ৰা কসিণপরিকম্মং কত্ৰা অট্ঠ সমাপত্তিযো নিব্বত্তেত্ৰা ঝানপদট্ঠানং ৰিপস্সনং ৰড্ঢেত্ৰা লোকুত্তরধম্মং সচ্ছিকরেয্যু’’ন্তি. তস্মা এৰং ব্যাকাসি.

৩৪১. আযস্মা অনুরুদ্ধো দিব্বচক্খুকো, তস্স এৰং হোতি – ‘‘অহো ৰত সব্রহ্মচারী আলোকং ৰড্ঢেত্ৰা দিব্বেন চক্খুনা অনেকেসু চক্কৰাল়সহস্সেসু চৰমানে চ উপপজ্জমানে চ সত্তে দিস্ৰা ৰট্টভযেন চিত্তং সংৰেজেত্ৰা ৰিপস্সনং ৰড্ঢেত্ৰা লোকুত্তরধম্মং সচ্ছিকরেয্যু’’ন্তি. তস্মা এৰং ব্যাকাসি.

৩৪২. আযস্মা মহাকস্সপো ধুতৰাদো, তস্স এৰং হোতি – ‘‘অহো ৰত সব্রহ্মচারী ধুতৰাদা হুত্ৰা ধুতঙ্গানুভাৰেন পচ্চযতণ্হং মিলাপেত্ৰা অপরেপি নানপ্পকারে কিলেসে ধুনিত্ৰা ৰিপস্সনং ৰড্ঢেত্ৰা লোকুত্তরধম্মং সচ্ছিকরেয্যু’’ন্তি. তস্মা এৰং ব্যাকাসি.

৩৪৩. আযস্মা মহামোগ্গল্লানো সমাধিপারমিযা মত্থকং পত্তো, সুখুমং পন চিত্তন্তরং খন্ধন্তরং ধাত্ৰন্তরং আযতনন্তরং ঝানোক্কন্তিকং আরম্মণোক্কন্তিকং অঙ্গৰৰত্থানং আরম্মণৰৰত্থানং অঙ্গসঙ্কন্তি আরম্মণসঙ্কন্তি একতোৰড্ঢনং উভতোৰড্ঢনন্তি আভিধম্মিকধম্মকথিকস্সেৰ পাকটং. অনাভিধম্মিকো হি ধম্মং কথেন্তো – ‘‘অযং সকৰাদো অযং পরৰাদো’’তি ন জানাতি. সকৰাদং দীপেস্সামীতি পরৰাদং দীপেতি, পরৰাদং দীপেস্সামীতি সকৰাদং দীপেতি, ধম্মন্তরং ৰিসংৰাদেতি. আভিধম্মিকো সকৰাদং সকৰাদনিযামেনেৰ, পরৰাদং পরৰাদনিযামেনেৰ দীপেতি, ধম্মন্তরং ন ৰিসংৰাদেতি. তস্মা থেরস্স এৰং হোতি – ‘‘অহো ৰত সব্রহ্মচারী আভিধম্মিকা হুত্ৰা সুখুমেসু ঠানেসু ঞাণং ওতারেত্ৰা ৰিপস্সনং ৰড্ঢেত্ৰা লোকুত্তরধম্মং সচ্ছিকরেয্যু’’ন্তি. তস্মা এৰং ব্যাকাসি.

৩৪৪. আযস্মা সারিপুত্তো পঞ্ঞাপারমিযা মত্থকং পত্তো, পঞ্ঞৰাযেৰ চ চিত্তং অত্তনো ৰসে ৰত্তেতুং সক্কোতি, ন দুপ্পঞ্ঞো. দুপ্পঞ্ঞো হি উপ্পন্নস্স চিত্তস্স ৰসে ৰত্তেত্ৰা ইতো চিতো চ ৰিপ্ফন্দিত্ৰাপি কতিপাহেনেৰ গিহিভাৰং পত্ৰা অনযব্যসনং পাপুণাতি. তস্মা থেরস্স এৰং হোতি – ‘‘অহো ৰত সব্রহ্মচারী অচিত্তৰসিকা হুত্ৰা চিত্তং অত্তনো ৰসে ৰত্তেত্ৰা সব্বানস্স ৰিসেৰিতৰিপ্ফন্দিতানি ভঞ্জিত্ৰা ঈসকম্পি বহি নিক্খমিতুং অদেন্তা ৰিপস্সনং ৰড্ঢেত্ৰা লোকুত্তরধম্মং সচ্ছিকরেয্যু’’ন্তি. তস্মা এৰং ব্যাকাসি.

৩৪৫. সব্বেসং ৰো, সারিপুত্ত, সুভাসিতং পরিযাযেনাতি সারিপুত্ত, যস্মা সঙ্ঘারামস্স নাম বহুস্সুতভিক্খূহিপি সোভনকারণং অত্থি, ঝানাভিরতেহিপি, দিব্বচক্খুকেহিপি, ধুতৰাদেহিপি, আভিধম্মিকেহিপি, অচিত্তৰসিকেহিপি সোভনকারণং অত্থি. তস্মা সব্বেসং ৰো সুভাসিতং পরিযাযেন, তেন তেন কারণেন সুভাসিতমেৰ, নো দুব্ভাসিতং. অপিচ মমপি সুণাথাতি অপিচ মমপি ৰচনং সুণাথ. ন তাৰাহং ইমং পল্লঙ্কং ভিন্দিস্সামীতি ন তাৰ অহং ইমং চতুরঙ্গৰীরিযং অধিট্ঠায আভুজিতং পল্লঙ্কং ভিন্দিস্সামি, ন মোচেস্সামীতি অত্থো. ইদং কির ভগৰা পরিপাকগতে ঞাণে রজ্জসিরিং পহায কতাভিনিক্খমনো অনুপুব্বেন বোধিমণ্ডং আরুয্হ চতুরঙ্গৰীরিযং অধিট্ঠায অপরাজিতপল্লঙ্কং আভুজিত্ৰা দল়্হসমাদানো হুত্ৰা নিসিন্নো তিণ্ণং মারানং মত্থকং ভিন্দিত্ৰা পচ্চূসসমযে দসসহস্সিলোকধাতুং উন্নাদেন্তো সব্বঞ্ঞুতঞ্ঞাণং পটিৰিজ্ঝি, তং অত্তনো মহাবোধিপল্লঙ্কং সন্ধায এৰমাহ. অপিচ পচ্ছিমং জনতং অনুকম্পমানোপি পটিপত্তিসারং পুথুজ্জনকল্যাণকং দস্সেন্তো এৰমাহ. পস্সতি হি ভগৰা – ‘‘অনাগতে এৰং অজ্ঝাসযা কুলপুত্তা ইতি পটিসঞ্চিক্খিস্সন্তি, ‘ভগৰা মহাগোসিঙ্গসুত্তং কথেন্তো ইধ, সারিপুত্ত, ভিক্খু পচ্ছাভত্তং…পে… এৰরূপেন খো, সারিপুত্ত, ভিক্খুনা গোসিঙ্গসালৰনং সোভেয্যাতি আহ, মযং ভগৰতো অজ্ঝাসযং গণ্হিস্সামা’তি পচ্ছাভত্তং পিণ্ডপাতপটিক্কন্তা চতুরঙ্গৰীরিযং অধিট্ঠায দল়্হসমাদানা হুত্ৰা ‘অরহত্তং অপ্পত্ৰা ইমং পল্লঙ্কং ন ভিন্দিস্সামা’তি সমণধম্মং কাতব্বং মঞ্ঞিস্সন্তি, তে এৰং পটিপন্না কতিপাহেনেৰ জাতিজরামরণস্স অন্তং করিস্সন্তী’’তি, ইমং পচ্ছিমং জনতং অনুকম্পমানো পটিপত্তিসারং পুথুজ্জনকল্যাণকং দস্সেন্তো এৰমাহ. এৰরূপেন খো, সারিপুত্ত, ভিক্খুনা গোসিঙ্গসালৰনং সোভেয্যাতি, সারিপুত্ত, এৰরূপেন ভিক্খুনা নিপ্পরিযাযেনেৰ গোসিঙ্গসালৰনং সোভেয্যাতি যথানুসন্ধিনাৰ দেসনং নিট্ঠপেসীতি.

পপঞ্চসূদনিযা মজ্ঝিমনিকাযট্ঠকথায

মহাগোসিঙ্গসুত্তৰণ্ণনা নিট্ঠিতা.

৩. মহাগোপালকসুত্তৰণ্ণনা

৩৪৬. এৰং মে সুতন্তি মহাগোপালকসুত্তং. তত্থ তিস্সো কথা একনাল়িকা, চতুরস্সা, নিসিন্নৰত্তিকাতি. তত্থ পাল়িং ৰত্ৰা একেকপদস্স অত্থকথনং একনাল়িকা নাম. অপণ্ডিতং গোপালকং দস্সেত্ৰা, অপণ্ডিতং ভিক্খুং দস্সেত্ৰা, পণ্ডিতং গোপালকং দস্সেত্ৰা, পণ্ডিতং ভিক্খুং দস্সেত্ৰাতি চতুক্কং বন্ধিত্ৰা কথনং চতুরস্সা নাম. অপণ্ডিতং গোপালকং দস্সেত্ৰা পরিযোসানগমনং, অপণ্ডিতং ভিক্খুং দস্সেত্ৰা পরিযোসানগমনং, পণ্ডিতং গোপালকং দস্সেত্ৰা পরিযোসানগমনং, পণ্ডিতং ভিক্খুং দস্সেত্ৰা পরিযোসানগমনন্তি অযং নিসিন্নৰত্তিকা নাম. অযং ইধ সব্বাচরিযানং আচিণ্ণা.

একাদসহি, ভিক্খৰে, অঙ্গেহীতি একাদসহি অগুণকোট্ঠাসেহি. গোগণন্তি গোমণ্ডলং. পরিহরিতুন্তি পরিগ্গহেত্ৰা ৰিচরিতুং. ফাতিং কাতুন্তি ৰড্ঢিং আপাদেতুং. ইধাতি ইমস্মিং লোকে. ন রূপঞ্ঞূ হোতীতি গণনতো ৰা ৰণ্ণতো ৰা রূপং ন জানাতি. গণনতো ন জানাতি নাম অত্তনো গুন্নং সতং ৰা সহস্সং ৰাতি সঙ্খ্যং ন জানাতি. সো গাৰীসু হটাসু ৰা পলাতাসু ৰা গোগণং গণেত্ৰা, অজ্জ এত্তিকা ন দিস্সন্তীতি দ্ৰে তীণি গামন্তরানি ৰা অটৰিং ৰা ৰিচরন্তো ন পরিযেসতি, অঞ্ঞেসং গাৰীসু অত্তনো গোগণং পৰিট্ঠাসুপি গোগণং গণেত্ৰা, ‘‘ইমা এত্তিকা গাৰো ন অম্হাক’’ন্তি যট্ঠিযা পোথেত্ৰা ন নীহরতি, তস্স নট্ঠা গাৰিযো নট্ঠাৰ হোন্তি. পরগাৰিযো গহেত্ৰা ৰিচরন্তং গোসামিকা দিস্ৰা, ‘‘অযং এত্তকং কালং অম্হাকং ধেনুং গণ্হাতী’’তি তজ্জেত্ৰা অত্তনো গাৰিযো গহেত্ৰা গচ্ছন্তি. তস্স গোগণোপি পরিহাযতি, পঞ্চগোরসপরিভোগতোপি পরিবাহিরো হোতি. ৰণ্ণতো ন জানাতি নাম – ‘‘এত্তিকা গাৰো সেতা, এত্তিকা রত্তা, এত্তিকা কাল়া, এত্তিকা কবরা এত্তিকা নীলা’’তি ন জানাতি, সো গাৰীসু হটাসু ৰা…পে… পঞ্চগোরসপরিভোগতোপি পরিবাহিরো হোতি.

ন লক্খণকুসলো হোতীতি গাৰীনং সরীরে কতং ধনুসত্তিসূলাদিভেদং লক্খণং ন জানাতি, সো গাৰীসু হটাসু ৰা পলাতাসু ৰা অজ্জ অসুকলক্খণা চ অসুকলক্খণা চ গাৰো ন দিস্সন্তি…পে… পঞ্চগোরসপরিভোগতোপি পরিবাহিরো হোতি.

ন আসাটিকং হারেতাতি গুন্নং খাণুকণ্টকাদীহি পহটট্ঠানেসু ৰণো হোতি. তত্থ নীলমক্খিকা অণ্ডকানি পাতেন্তি, তেসং আসাটিকাতি নাম. তানি দণ্ডেন অপনেত্ৰা ভেসজ্জং দাতব্বং হোতি. বালো গোপালকো তথা ন করোতি, তেন ৰুত্তং – ‘‘ন আসাটিকং হারেতা হোতী’’তি. তস্স গুন্নং ৰণা ৰড্ঢন্তি, গম্ভীরা হোন্তি, পাণকা কুচ্ছিং পৰিসন্তি, গাৰো গেলঞ্ঞাভিভূতা নেৰ যাৰদত্থং তিণানি খাদিতুং, ন পানীযং পাতুং সক্কোন্তি. তত্থ গুন্নং খীরং ছিজ্জতি, গোণানং জৰো হাযতি, উভযেসং জীৰিতন্তরাযো হোতি. এৰমস্স গোগণোপি পরিহাযতি, পঞ্চগোরসতোপি পরিবাহিরো হোতি.

ন ৰণং পটিচ্ছাদেতা হোতীতি গুন্নং ৰুত্তনযেনেৰ সঞ্জাতো ৰণো ভেসজ্জং দত্ৰা ৰাকেন ৰা চীরকেন ৰা বন্ধিত্ৰা পটিচ্ছাদেতব্বো হোতি. বালো গোপালকো তথা ন করোতি, অথস্স গুন্নং ৰণেহি যূসা পগ্ঘরন্তি, তা অঞ্ঞমঞ্ঞং নিঘংসেন্তি, তেন অঞ্ঞেসম্পি ৰণা জাযন্তি. এৰং গাৰো গেলঞ্ঞাভিভূতা নেৰ যাৰদত্থং তিণানি খাদিতুং…পে… পরিবাহিরো হোতি.

ন ধূমং কত্তা হোতীতি অন্তোৰস্সে ডংসমকসাদীনং উস্সন্নকালে গোগণে ৰজং পৰিট্ঠে তত্থ তত্থ ধূমো কাতব্বো হোতি, অপণ্ডিতো গোপালকো তং ন করোতি. গোগণো সব্বরত্তিং ডংসাদীহি উপদ্দুতো নিদ্দং অলভিত্ৰা পুনদিৰসে অরঞ্ঞে তত্থ তত্থ রুক্খমূলাদীসু নিপজ্জিত্ৰা নিদ্দাযতি, নেৰ যাৰদত্থং তিণানি খাদিতুং…পে… পঞ্চগোরসপরিভোগতোপি পরিবাহিরো হোতি.

ন তিত্থং জানাতীতি তিত্থং সমন্তি ৰা ৰিসমন্তি ৰা সগাহন্তি ৰা নিগ্গাহন্তি ৰা ন জানাতি, সো অতিত্থেন গাৰিযো ওতারেতি. তাসং ৰিসমতিত্থে পাসাণাদীনি অক্কমন্তীনং পাদা ভিজ্জন্তি, সগাহং গম্ভীরং তিত্থং ওতিণ্ণা কুম্ভীলাদযো গাহা গণ্হন্তি. অজ্জ এত্তিকা গাৰো নট্ঠা, অজ্জ এত্তিকাতি ৰত্তব্বতং আপজ্জতি. এৰমস্স গোগণোপি পরিহাযতি, পঞ্চগোরসতোপি পরিবাহিরো হোতি.

ন পীতং জানাতীতি পীতম্পি অপীতম্পি ন জানাতি. গোপালকেন হি ‘‘ইমায গাৰিযা পীতং, ইমায ন পীতং, ইমায পানীযতিত্থে ওকাসো লদ্ধো, ইমায ন লদ্ধো’’তি এৰং পীতাপীতং জানিতব্বং হোতি. অযং পন দিৰসভাগং অরঞ্ঞে গোগণং রক্খিত্ৰা পানীযং পাযেস্সামীতি নদিং ৰা তল়াকং ৰা গহেত্ৰা গচ্ছতি. তত্থ মহাউসভা চ অনুউসভা চ বলৰগাৰিযো চ দুব্বলানি চেৰ মহল্লকানি চ গোরূপানি সিঙ্গেহি ৰা ফাসুকাহি ৰা পহরিত্ৰা অত্তনো ওকাসং কত্ৰা ঊরুপ্পমাণং উদকং পৰিসিত্ৰা যথাকামং পিৰন্তি. অৰসেসা ওকাসং অলভমানা তীরে ঠত্ৰা কললমিস্সকং উদকং পিৰন্তি, অপীতা এৰ ৰা হোন্তি. অথ নে গোপালকো পিট্ঠিযং পহরিত্ৰা পুন অরঞ্ঞং পৰেসেতি, তত্থ অপীতগাৰিযো পিপাসায সুক্খমানা যাৰদত্থং তিণানি খাদিতুং ন সক্কোন্তি, তত্থ গুন্নং খীরং ছিজ্জতি, গোণানং জৰো হাযতি…পে… পরিবাহিরো হোতি.

ন ৰীথিং জানাতীতি ‘‘অযং মগ্গো সমো খেমো, অযং ৰিসমো সাসঙ্কো সপ্পটিভযো’’তি ন জানাতি. সো সমং খেমং মগ্গং ৰজ্জেত্ৰা গোগণং ইতরং মগ্গং পটিপাদেতি, তত্থ গাৰো সীহব্যগ্ঘাদীনং গন্ধেন চোরপরিস্সযেন ৰা অভিভূতা ভন্তমিগসপ্পটিভাগা গীৰং উক্খিপিত্ৰা তিট্ঠন্তি, নেৰ যাৰদত্থং তিণানি খাদন্তি, ন পানীযং পিৰন্তি, তত্থ গুন্নং খীরং ছিজ্জতি…পে… পরিবাহিরো হোতি.

ন গোচরকুসলো হোতীতি গোপালকেন হি গোচরকুসলেন ভৰিতব্বং, পঞ্চাহিকৰারো ৰা সত্তাহিকৰারো ৰা জানিতব্বো, একদিসায গোগণং চারেত্ৰা পুনদিৰসে তত্থ ন চারেতব্বো. মহতা হি গোগণেন চিণ্ণট্ঠানং ভেরিতলং ৰিয সুদ্ধং হোতি নিত্তিণং, উদকম্পি আলুল়ীযতি. তস্মা পঞ্চমে ৰা সত্তমে ৰা দিৰসে পুন তত্থ চারেতুং ৰট্টতি, এত্তকেন হি তিণম্পি পটিৰিরুহতি, উদকম্পি পসীদতি. অযং পন ইমং পঞ্চাহিকৰারং ৰা সত্তাহিকৰারং ৰা ন জানাতি, দিৰসে দিৰসে রক্খিতট্ঠানেযেৰ রক্খতি. অথস্স গোগণো হরিততিণং ন লভতি, সুক্খতিণং খাদন্তো কললমিস্সকং উদকং পিৰতি, তত্থ গুন্নং খীরং ছিজ্জতি…পে… পরিবাহিরো হোতি.

অনৰসেসদোহী চ হোতীতি পণ্ডিতগোপালকেন যাৰ ৰচ্ছকস্স মংসলোহিতং সণ্ঠাতি, তাৰ একং দ্ৰে থনে ঠপেত্ৰা সাৰসেসদোহিনা ভৰিতব্বং. অযং ৰচ্ছকস্স কিঞ্চি অনৰসেসেত্ৰা দুহতি, খীরপকো ৰচ্ছো খীরপিপাসায সুক্খতি, সণ্ঠাতুং অসক্কোন্তো কম্পমানো মাতু পুরতো পতিত্ৰা কালঙ্করোতি. মাতা পুত্তকং দিস্ৰা, ‘‘ময্হং পুত্তকো অত্তনো মাতুখীরং পাতুম্পি ন লভতী’’তি পুত্তসোকেন ন যাৰদত্থং তিণানি খাদিতুং, ন পানীযং পাতুং সক্কোতি, থনেসু খীরং ছিজ্জতি. এৰমস্স গোগণোপি পরিহাযতি, পঞ্চগোরসতোপি পরিবাহিরো হোতি.

গুন্নং পিতুট্ঠানং করোন্তীতি গোপিতরো. গাৰো পরিণযন্তি যথারুচিং গহেত্ৰা গচ্ছন্তীতি গোপরিণাযকা. ন অতিরেকপূজাযাতি পণ্ডিতো হি গোপালকো এৰরূপে উসভে অতিরেকপূজায পূজেতি, পণীতং গোভত্তং দেতি, গন্ধপঞ্চঙ্গুলিকেহি মণ্ডেতি, মালং পিলন্ধেতি, সিঙ্গে সুৰণ্ণরজতকোসকে চ ধারেতি, রত্তিং দীপং জালেত্ৰা চেলৰিতানস্স হেট্ঠা সযাপেতি. অযং পন ততো একসক্কারম্পি ন করোতি, উসভা অতিরেকপূজং অলভমানা গোগণং ন রক্খন্তি, পরিস্সযং ন ৰারেন্তি. এৰমস্স গোগণো পরিহাযতি, পঞ্চগোরসতো পরিবাহিরো হোতি.

৩৪৭. ইধাতি ইমস্মিং সাসনে. ন রূপঞ্ঞূ হোতীতি, ‘‘চত্তারি মহাভূতানি চতুন্নঞ্চ মহাভূতানং উপাদাযরূপ’’ন্তি এৰং ৰুত্তরূপং দ্ৰীহাকারেহি ন জানাতি গণনতো ৰা সমুট্ঠানতো ৰা. গণনতো ন জানাতি নাম, ‘‘চক্খাযতনং, সোত-ঘান-জিৰ্হা-কাযাযতনং, রূপ-সদ্দ-গন্ধ-রস-ফোট্ঠব্বাযতনং, ইত্থিন্দ্রিযং, পুরিসিন্দ্রিযং, জীৰিতিন্দ্রিযং, কাযৰিঞ্ঞত্তি, ৰচীৰিঞ্ঞত্তি, আকাসধাতু, আপোধাতু, রূপস্স লহুতা, মুদুতা, কম্মঞ্ঞতা, উপচযো, সন্ততি, জরতা, রূপস্স অনিচ্চতা, কবল়ীকারো আহারো’’তি এৰং পাল়িযং আগতা পঞ্চৰীসতি রূপকোট্ঠাসাতি ন জানাতি. সেয্যথাপি সো গোপালকো গণনতো গুন্নং রূপং ন জানাতি, তথূপমো অযং ভিক্খু. সো গণনতো রূপং অজানন্তো রূপং পরিগ্গহেত্ৰা অরূপং ৰৰত্থপেত্ৰা রূপারূপং পরিগ্গহেত্ৰা পচ্চযং সল্লক্খেত্ৰা লক্খণং আরোপেত্ৰা কম্মট্ঠানং মত্থকং পাপেতুং ন সক্কোতি. সো যথা তস্স গোপালকস্স গোগণো ন ৰড্ঢতি, এৰং ইমস্মিং সাসনে সীলসমাধিৰিপস্সনামগ্গফলনিব্বানেহি ন ৰড্ঢতি, যথা চ সো গোপালকো পঞ্চহি গোরসেহি পরিবাহিরো হোতি, এৰং অসেক্খেন সীলক্খন্ধেন, অসেক্খেন সমাধি, পঞ্ঞা, ৰিমুত্তি, ৰিমুত্তিঞাণদস্সনক্খন্ধেনাতি পঞ্চহি ধম্মক্খন্ধেহি পরিবাহিরো হোতি.

সমুট্ঠানতো ন জানাতি নাম, ‘‘এত্তকং রূপং একসমুট্ঠানং, এত্তকং দ্ৰিসমুট্ঠানং, এত্তকং তিসমুট্ঠানং, এত্তকং চতুসমুট্ঠানং, এত্তকং ন কুতোচিসমুট্ঠাতী’’তি ন জানাতি. সেয্যথাপি সো গোপালকো ৰণ্ণতো গুন্নং রূপং ন জানাতি, তথূপমো অযং ভিক্খু. সো সমুট্ঠানতো রূপং অজানন্তো রূপং পরিগ্গহেত্ৰা অরূপং ৰৰত্থপেত্ৰা…পে… পরিবাহিরো হোতি.

ন লক্খণকুসলো হোতীতি কম্মলক্খণো বালো, কম্মলক্খণো পণ্ডিতোতি এৰং ৰুত্তং কুসলাকুসলং কম্মং পণ্ডিতবাললক্খণন্তি ন জানাতি. সো এৰং অজানন্তো বালে ৰজ্জেত্ৰা পণ্ডিতে ন সেৰতি, বালে ৰজ্জেত্ৰা পণ্ডিতে অসেৰন্তো কপ্পিযাকপ্পিযং কুসলাকুসলং সাৰজ্জানৰজ্জং গরুকলহুকং সতেকিচ্ছঅতেকিচ্ছং কারণাকারণং ন জানাতি; তং অজানন্তো কম্মট্ঠানং গহেত্ৰা ৰড্ঢেতুং ন সক্কোতি. সো যথা তস্স গোপালকস্স গোগণো ন ৰড্ঢতি, এৰং ইমস্মিং সাসনে যথাৰুত্তেহি সীলাদীহি ন ৰড্ঢতি, গোপালকো ৰিয চ পঞ্চহি গোরসেহি পঞ্চহি ধম্মক্খন্ধেহি পরিবাহিরো হোতি.

ন আসাটিকং হারেতা হোতীতি উপ্পন্নং কামৰিতক্কন্তি এৰং ৰুত্তে কামৰিতক্কাদিকে ন ৰিনোদেতি, সো ইমং অকুসলৰিতক্কং আসাটিকং অহারেত্ৰা ৰিতক্কৰসিকো হুত্ৰা ৰিচরন্তো কম্মট্ঠানং গহেত্ৰা ৰড্ঢেতুং ন সক্কোতি, সো যথা তস্স গোপালকস্স…পে… পরিবাহিরো হোতি.

ন ৰণং পটিচ্ছাদেতা হোতীতি চক্খুনা রূপং দিস্ৰা নিমিত্তগ্গাহী হোতীতিআদিনা নযেন সব্বারম্মণেসু নিমিত্তং গণ্হন্তো যথা সো গোপালকো ৰণং ন পটিচ্ছাদেতি, এৰং সংৰরং ন সম্পাদেতি. সো ৰিৰটদ্ৰারো ৰিচরন্তো কম্মট্ঠানং গহেত্ৰা ৰড্ঢেতুং ন সক্কোতি…পে… পরিবাহিরো হোতি.

ন ধূমং কত্তা হোতীতি সো গোপালকো ধূমং ৰিয ধম্মদেসনাধূমং ন করোতি, ধম্মকথং ৰা সরভঞ্ঞং ৰা উপনিসিন্নকথং ৰা অনুমোদনং ৰা ন করোতি. ততো নং মনুস্সা বহুস্সুতো গুণৰাতি ন জানন্তি, তে গুণাগুণং অজানন্তা চতূহি পচ্চযেহি সঙ্গহং ন করোন্তি. সো পচ্চযেহি কিলমমানো বুদ্ধৰচনং সজ্ঝাযং কাতুং ৰত্তপটিপত্তিং পূরেতুং কম্মট্ঠানং গহেত্ৰা ৰড্ঢেতুং ন সক্কোতি…পে… পরিবাহিরো হোতি.

ন তিত্থং জানাতীতি তিত্থভূতে বহুস্সুতভিক্খূ ন উপসঙ্কমতি, উপসঙ্কমন্তো, ‘‘ইদং, ভন্তে, ব্যঞ্জনং কথং রোপেতব্বং, ইমস্স ভাসিতস্স কো অত্থো, ইমস্মিং ঠানে পাল়ি কিং ৰদেতি, ইমস্মিং ঠানে অত্থো কিং দীপেতী’’তি এৰং ন পরিপুচ্ছতি ন পরিপঞ্হতি, ন জানাপেতীতি অত্থো. তস্স তে এৰং অপরিপুচ্ছতো অৰিৰটঞ্চেৰ ন ৰিৰরন্তি, ভাজেত্ৰা ন দস্সেন্তি, অনুত্তানীকতঞ্চ ন উত্তানীকরোন্তি, অপাকটং ন পাকটং করোন্তি. অনেকৰিহিতেসু চ কঙ্খাঠানিযেসু ধম্মেসূতি অনেকৰিধাসু কঙ্খাসু একং কঙ্খম্পি ন পটিৰিনোদেন্তি. কঙ্খা এৰ হি কঙ্খাঠানিযা ধম্মা নাম. তত্থ একং কঙ্খম্পি ন নীহরন্তীতি অত্থো. সো এৰং বহুস্সুততিত্থং অনুপসঙ্কমিত্ৰা সকঙ্খো কম্মট্ঠানং গহেত্ৰা ৰড্ঢেতুং ন সক্কোতি. যথা চ সো গোপালকো তিত্থং ন জানাতি, এৰং অযম্পি ভিক্খু ধম্মতিত্থং ন জানাতি, অজানন্তো অৰিসযে পঞ্হং পুচ্ছতি, অভিধম্মিকং উপসঙ্কমিত্ৰা কপ্পিযাকপ্পিযং পুচ্ছতি, ৰিনযধরং উপসঙ্কমিত্ৰা রূপারূপপরিচ্ছেদং পুচ্ছতি. তে অৰিসযে পুট্ঠা কথেতুং ন সক্কোন্তি, সো অত্তনা সকঙ্খো কম্মট্ঠানং গহেত্ৰা ৰড্ঢেতুং ন সক্কোতি…পে… পরিবাহিরো হোতি.

ন পীতং জানাতীতি যথা সো গোপালকো পীতাপীতং ন জানাতি, এৰং ধম্মূপসঞ্হিতং পামোজ্জং ন জানাতি ন লভতি, সৰনমযং পুঞ্ঞকিরিযৰত্থুং নিস্সায আনিসংসং ন ৰিন্দতি, ধম্মস্সৰনগ্গং গন্ত্ৰা সক্কচ্চং ন সুণাতি, নিসিন্নো নিদ্দাযতি, কথং কথেতি, অঞ্ঞৰিহিতকো হোতি, সো সক্কচ্চং ধম্মং অসুণন্তো কম্মট্ঠানং গহেত্ৰা ৰড্ঢেতুং ন সক্কোতি…পে… পরিবাহিরো হোতি.

ন ৰীথিং জানাতীতি সো গোপালকো মগ্গামগ্গং ৰিয, – ‘‘অযং লোকিযো অযং লোকুত্তরো’’তি অরিযং অট্ঠঙ্গিকং মগ্গং যথাভূতং ন পজানাতি. অজানন্তো লোকিযমগ্গে অভিনিৰিসিত্ৰা লোকুত্তরং নিব্বত্তেতুং ন সক্কোতি…পে… পরিবাহিরো হোতি.

ন গোচরকুসলো হোতীতি সো গোপালকো পঞ্চাহিকৰারে সত্তাহিকৰারে ৰিয চত্তারো সতিপট্ঠানে, ‘‘ইমে লোকিযা ইমে লোকুত্তরা’’তি যথাভূতং ন পজানাতি. অজানন্তো সুখুমট্ঠানেসু অত্তনো ঞাণং চরাপেত্ৰা লোকিযসতিপট্ঠানে অভিনিৰিসিত্ৰা লোকুত্তরং নিব্বত্তেতুং ন সক্কোতি…পে… পরিবাহিরো হোতি.

অনৰসেসদোহী চ হোতীতি পটিগ্গহণে মত্তং অজানন্তো অনৰসেসং দুহতি. নিদ্দেসৰারে পনস্স অভিহট্ঠুং পৰারেন্তীতি অভিহরিত্ৰা পৰারেন্তি. এত্থ দ্ৰে অভিহারা ৰাচাভিহারো চ পচ্চযাভিহারো চ. ৰাচাভিহারো নাম মনুস্সা ভিক্খুস্স সন্তিকং গন্ত্ৰা, ‘‘ৰদেয্যাথ, ভন্তে, যেনত্থো’’তি পৰারেন্তি. পচ্চযাভিহারো নাম ৰত্থাদীনি ৰা তেলফাণিতাদীনি ৰা গহেত্ৰা ভিক্খুস্স সন্তিকং গন্ত্ৰা, ‘‘গণ্হথ, ভন্তে, যাৰতকেন অত্থো’’তি ৰদন্তি. তত্র ভিক্খু মত্তং ন জানাতীতি ভিক্খু তেসু পচ্চযেসু পমাণং ন জানাতি, – ‘‘দাযকস্স ৰসো ৰেদিতব্বো, দেয্যধম্মস্স ৰসো ৰেদিতব্বো, অত্তনো থামো ৰেদিতব্বো’’তি রথৰিনীতে ৰুত্তনযেন পমাণযুত্তং অগ্গহেত্ৰা যং আহরন্তি, তং সব্বং গণ্হাতীতি অত্থো. মনুস্সা ৰিপ্পটিসারিনো ন পুন অভিহরিত্ৰা পৰারেন্তি. সো পচ্চযেহি কিলমন্তো কম্মট্ঠানং গহেত্ৰা ৰড্ঢেতুং ন সক্কোতি…পে… পরিবাহিরো হোতি.

তে ন অতিরেকপূজায পূজেতা হোতীতি সো গোপালকো মহাউসভে ৰিয তে থেরে ভিক্খূ ইমায আৰি চেৰ রহো চ মেত্তায কাযকম্মাদিকায অতিরেকপূজায ন পূজেতি. ততো থেরা, – ‘‘ইমে অম্হেসু গরুচিত্তীকারং ন করোন্তী’’তি নৰকে ভিক্খূ দ্ৰীহি সঙ্গহেহি ন সঙ্গণ্হন্তি, ন আমিসসঙ্গহেন চীৰরেন ৰা পত্তেন ৰা পত্তপরিযাপন্নেন ৰা ৰসনট্ঠানেন ৰা. কিলমন্তে মিলাযন্তেপি নপ্পটিজগ্গন্তি. পাল়িং ৰা অট্ঠকথং ৰা ধম্মকথাবন্ধং ৰা গুয্হগন্থং ৰা ন সিক্খাপেন্তি. নৰকা থেরানং সন্তিকা সব্বসো ইমে দ্ৰে সঙ্গহে অলভমানা ইমস্মিং সাসনে পতিট্ঠাতুং ন সক্কোন্তি. যথা তস্স গোপালকস্স গোগণো ন ৰড্ঢতি, এৰং সীলাদীনি ন ৰড্ঢন্তি. যথা চ সো গোপালকো পঞ্চহি গোরসেহি পরিবাহিরো হোতি, এৰং পঞ্চহি ধম্মক্খন্ধেহি পরিবাহিরা হোন্তি. সুক্কপক্খো কণ্হপক্খে ৰুত্তৰিপল্লাসৰসেন যোজেত্ৰা ৰেদিতব্বোতি.

পপঞ্চসূদনিযা মজ্ঝিমনিকাযট্ঠকথায

মহাগোপালকসুত্তৰণ্ণনা নিট্ঠিতা.

৪. চূল়গোপালকসুত্তৰণ্ণনা

৩৫০. এৰং মে সুতন্তি চূল়গোপালকসুত্তং. তত্থ উক্কচেলাযন্তি এৰংনামকে নগরে. তস্মিং কির মাপিযমানে রত্তিং গঙ্গাসোততো মচ্ছো থলং পত্তো. মনুস্সা চেলানি তেলপাতিযং তেমেত্ৰা উক্কা কত্ৰা মচ্ছং গণ্হিংসু. নগরে নিট্ঠিতে তস্স নামং করোন্তে অম্হেহি নগরট্ঠানস্স গহিতদিৰসে চেলুক্কাহি মচ্ছো গহিতোতি উক্কচেলা-ত্ৰেৰস্স নামং অকংসু. ভিক্খূ আমন্তেসীতি যস্মিং ঠানে নিসিন্নস্স সব্বা গঙ্গা পাকটা হুত্ৰা পঞ্ঞাযতি, তাদিসে ৰালিকুস্সদে গঙ্গাতিত্থে সাযন্হসমযে মহাভিক্খুসঙ্ঘপরিৰুতো নিসীদিত্ৰা মহাগঙ্গং পরিপুণ্ণং সন্দমানং ওলোকেন্তো, – ‘‘অত্থি নু খো ইমং গঙ্গং নিস্সায কোচি পুব্বে ৰড্ঢিপরিহানিং পত্তো’’তি আৰজ্জিত্ৰা, পুব্বে একং বালগোপালকং নিস্সায অনেকসতসহস্সা গোগণা ইমিস্সা গঙ্গায আৰট্টে পতিত্ৰা সমুদ্দমেৰ পৰিট্ঠা, অপরং পন পণ্ডিতগোপালকং নিস্সায অনেকসতসহস্সগোগণস্স সোত্থি জাতা ৰড্ঢি জাতা আরোগ্যং জাতন্তি অদ্দস. দিস্ৰা ইমং কারণং নিস্সায ভিক্খূনং ধম্মং দেসেস্সামীতি চিন্তেত্ৰা ভিক্খূ আমন্তেসি.

মাগধকোতি মগধরট্ঠৰাসী. দুপ্পঞ্ঞজাতিকোতি নিপ্পঞ্ঞসভাৰো দন্ধো মহাজল়ো. অসমৰেক্খিত্ৰাতি অসল্লক্খেত্ৰা অনুপধারেত্ৰা. পতারেসীতি তারেতুং আরভি. উত্তরং তীরং সুৰিদেহানন্তি গঙ্গায ওরিমে তীরে মগধরট্ঠং, পারিমে তীরে ৰিদেহরট্ঠং, গাৰো মগধরট্ঠতো ৰিদেহরট্ঠং নেত্ৰা রক্খিস্সামীতি উত্তরং তীরং পতারেসি. তং সন্ধায ৰুত্তং – ‘‘উত্তরং তীরং সুৰিদেহান’’ন্তি. আমণ্ডলিকং করিত্ৰাতি মণ্ডলিকং কত্ৰা. অনযব্যসনং আপজ্জিংসূতি অৰড্ঢিং ৰিনাসং পাপুণিংসু, মহাসমুদ্দমেৰ পৰিসিংসু. তেন হি গোপালকেন গাৰো ওতারেন্তেন গঙ্গায ওরিমতীরে সমতিত্থঞ্চ ৰিসমতিত্থঞ্চ ওলোকেতব্বং অস্স, মজ্ঝে গঙ্গায গুন্নং ৰিস্সমট্ঠানত্থং দ্ৰে তীণি ৰালিকত্থলানি সল্লক্খেতব্বানি অস্সু. তথা পারিমতীরে তীণি চত্তারি তিত্থানি, ইমস্মা তিত্থা ভট্ঠা ইমং তিত্থং গণ্হিস্সন্তি, ইমস্মা ভট্ঠা ইমন্তি. অযং পন বালগোপালকো ওরিমতীরে গুন্নং ওতরণতিত্থং সমং ৰা ৰিসমং ৰা অনোলোকেত্ৰাৰ মজ্ঝে গঙ্গায গুন্নং ৰিস্সমট্ঠানত্থং দ্ৰে তীণি ৰালিকত্থলানিপি অসল্লক্খেত্ৰাৰ পরতীরে চত্তারি পঞ্চ উত্তরণতিত্থানি অসমৰেক্খিত্ৰাৰ অতিত্থেনেৰ গাৰো ওতারেসি. অথস্স মহাউসভো জৰনসম্পন্নতায চেৰ থামসম্পন্নতায চ তিরিযং গঙ্গায সোতং ছেত্ৰা পারিমং তীরং পত্ৰা ছিন্নতটঞ্চেৰ কণ্টকগুম্বগহনঞ্চ দিস্ৰা, ‘‘দুব্বিনিৰিট্ঠমেত’’ন্তি ঞত্ৰা ধুরগ্গ-পতিট্ঠানোকাসম্পি অলভিত্ৰা পটিনিৰত্তি. গাৰো মহাউসভো নিৰত্তো মযম্পি নিৰত্তিস্সামাতি নিৰত্তা. মহতো গোগণস্স নিৰত্তট্ঠানে উদকং ছিজ্জিত্ৰা মজ্ঝে গঙ্গায আৰট্টং উট্ঠপেসি. গোগণো আৰট্টং পৰিসিত্ৰা সমুদ্দমেৰ পত্তো. একোপি গোণো অরোগো নাম নাহোসি. তেনাহ – ‘‘তত্থেৰ অনযব্যসনং আপজ্জিংসূ’’তি.

অকুসলা ইমস্স লোকস্সাতি ইধ লোকে খন্ধধাতাযতনেসু অকুসলা অছেকা, পরলোকেপি এসেৰ নযো. মারধেয্যং ৰুচ্চতি তেভূমকধম্মা. অমারধেয্যং নৰ লোকুত্তরধম্মা. মচ্চুধেয্যম্পি তেভূমকধম্মাৰ. অমচ্চুধেয্যং নৰ লোকুত্তরধম্মা. তত্থ অকুসলা অছেকা. ৰচনত্থতো পন মারস্স ধেয্যং মারধেয্যং. ধেয্যন্তি ঠানং ৰত্থু নিৰাসো গোচরো. মচ্চুধেয্যেপি এসেৰ নযো. তেসন্তি তেসং এৰরূপানং সমণব্রাহ্মণানং, ইমিনা ছ সত্থারো দস্সিতাতি ৰেদিতব্বা.

৩৫১. এৰং কণ্হপক্খং নিট্ঠপেত্ৰা সুক্কপক্খং দস্সেন্তো ভূতপুব্বং, ভিক্খৰেতিআদিমাহ. তত্থ বলৰগাৰোতি দন্তগোণে চেৰ ধেনুযো চ. দম্মগাৰোতি দমেতব্বগোণে চেৰ অৰিজাতগাৰো চ. ৰচ্ছতরেতি ৰচ্ছভাৰং তরিত্ৰা ঠিতে বলৰৰচ্ছে. ৰচ্ছকেতি ধেনুপকে তরুণৰচ্ছকে. কিসাবলকেতি অপ্পমংসলোহিতে মন্দথামে. তাৰদেৰ জাতকোতি তংদিৰসে জাতকো. মাতুগোরৰকেন ৰুয্হমানোতি মাতা পুরতো পুরতো হুংহুন্তি গোরৰং কত্ৰা সঞ্ঞং দদমানা উরেন উদকং ছিন্দমানা গচ্ছতি, ৰচ্ছকো তায গোরৰসঞ্ঞায ধেনুযা ৰা উরেন ছিন্নোদকেন গচ্ছমানো ‘‘মাতুগোরৰকেন ৰুয্হমানো’’তি ৰুচ্চতি.

৩৫২. মারস্স সোতং ছেত্ৰাতি অরহত্তমগ্গেন মারস্স তণ্হাসোতং ছেত্ৰা. পারং গতাতি মহাউসভা নদীপারং ৰিয সংসারপারং নিব্বানং গতা. পারং অগমংসূতি মহাউসভানং পারঙ্গতক্খণে গঙ্গায সোতস্স তযো কোট্ঠাসে অতিক্কম্ম ঠিতা মহাউসভে পারং পত্তে দিস্ৰা তেসং গতমগ্গং পটিপজ্জিত্ৰা পারং অগমংসু. পারং গমিস্সন্তীতি চতুমগ্গৰজ্ঝানং কিলেসানং তযো কোট্ঠাসে খেপেত্ৰা ঠিতা ইদানি অরহত্তমগ্গেন অৰসেসং তণ্হাসোতং ছেত্ৰা বলৰগাৰো ৰিয নদীপারং সংসারপারং নিব্বানং গমিস্সন্তীতি. ইমিনা নযেন সব্বৰারেসু অত্থো ৰেদিতব্বো. ধম্মানুসারিনো, সদ্ধানুসারিনোতি ইমে দ্ৰে পঠমমগ্গসমঙ্গিনো.

জানতাতি সব্বধম্মে জানন্তেন বুদ্ধেন. সুপ্পকাসিতোতি সুকথিতো. ৰিৰটন্তি ৰিৰরিতং. অমতদ্ৰারন্তি অরিযমগ্গো. নিব্বানপত্তিযাতি তদত্থায ৰিৰটং. ৰিনল়ীকতন্তি ৰিগতমাননল়ং কতং. খেমং পত্থেথাতি কত্তুকম্যতাছন্দেন অরহত্তং পত্থেথ, কত্তুকামা নিব্বত্তেতুকামা হোথাতি অত্থো. ‘‘পত্ত’ত্থা’’তিপি পাঠো. এৰরূপং সত্থারং লভিত্ৰা তুম্হে পত্তাযেৰ নামাতি অত্থো. সেসং সব্বত্থ উত্তানমেৰ. ভগৰা পন যথানুসন্ধিনাৰ দেসনং নিট্ঠপেসীতি.

পপঞ্চসূদনিযা মজ্ঝিমনিকাযট্ঠকথায

চূল়গোপালকসুত্তৰণ্ণনা নিট্ঠিতা.

৫. চূল়সচ্চকসুত্তৰণ্ণনা

৩৫৩. এৰং মে সুতন্তি চূল়সচ্চকসুত্তং. তত্থ মহাৰনে কূটাগারসালাযন্তি মহাৰনং নাম সযংজাতং অরোপিমং সপরিচ্ছেদং মহন্তং ৰনং. কপিলৰত্থুসামন্তা পন মহাৰনং হিমৰন্তেন সহ একাবদ্ধং অপরিচ্ছেদং হুত্ৰা মহাসমুদ্দং আহচ্চ ঠিতং. ইদং তাদিসং ন হোতি. সপরিচ্ছেদং মহন্তং ৰনন্তি মহাৰনং. কূটাগারসালা পন মহাৰনং নিস্সায কতে আরামে কূটাগারং অন্তোকত্ৰা হংসৰট্টকচ্ছন্নেন কতা সব্বাকারসম্পন্না বুদ্ধস্স ভগৰতো গন্ধকুটি ৰেদিতব্বা.

সচ্চকো নিগণ্ঠপুত্তোতি পুব্বে কির একো নিগণ্ঠো চ নিগণ্ঠী চ পঞ্চ পঞ্চ ৰাদসতানি উগ্গহেত্ৰা, ৰাদং আরোপেস্সামাতি জম্বুদীপে ৰিচরন্তা ৰেসালিযং সমাগতা. লিচ্ছৰিরাজানো দিস্ৰা, – ‘‘ত্ৰং কো, ত্ৰং কা’’তি পুচ্ছিংসু. নিগণ্ঠো – ‘‘অহং ৰাদং আরোপেস্সামীতি জম্বুদীপে ৰিচরামী’’তি আহ. নিগণ্ঠীপি তথা আহ. লিচ্ছৰিনো, ‘‘ইধেৰ অঞ্ঞমঞ্ঞং ৰাদং আরোপেথা’’তি আহংসু. নিগণ্ঠী অত্তনা উগ্গহিতানি পঞ্চৰাদসতানি পুচ্ছি, নিগণ্ঠো কথেসি. নিগণ্ঠেন পুচ্ছিতেপি নিগণ্ঠী কথেসিযেৰ. একস্সপি ন জযো, ন পরাজযো, উভো সমসমাৰ অহেসুং. লিচ্ছৰিনো, – ‘‘তুম্হে উভোপি সমসমা আহিণ্ডিত্ৰা কিং করিস্সথ, ইধেৰ ৰসথা’’তি গেহং দত্ৰা বলিং পট্ঠপেসুং. তেসং সংৰাসমন্ৰায চতস্সো ধীতরো জাতা, – একা সচ্চা নাম, একা লোলা নাম, একা পটাচারা নাম, একা আচারৰতী নাম. তাপি পণ্ডিতাৰ অহেসুং, মাতাপিতূহি উগ্গহিতানি পঞ্চ পঞ্চ ৰাদসতানি উগ্গহেসুং. তা ৰযপত্তা মাতাপিতরো অৰোচুং – ‘‘অম্হাকং অম্মা কুলে দারিকা নাম হিরঞ্ঞসুৰণ্ণাদীনি দত্ৰা কুলঘরং পেসিতপুব্বা নাম নত্থি. যো পন অগারিকো তাসং ৰাদং মদ্দিতুং সক্কোতি, তস্স পাদপরিচারিকা হোন্তি. যো পব্বজিতো তাসং মদ্দিতুং সক্কোতি, তস্স সন্তিকে পব্বজন্তি. তুম্হে কিং করিস্সথা’’তি? মযম্পি এৰমেৰ করিস্সামাতি. চতস্সোপি পরিব্বাজিকৰেসং গহেত্ৰা, ‘‘অযং জম্বুদীপো নাম জম্বুযা পঞ্ঞাযতী’’তি জম্বুসাখং গহেত্ৰা চারিকং পক্কমিংসু. যং গামং পাপুণন্তি, তস্স দ্ৰারে পংসুপুঞ্জে ৰা ৰালিকপুঞ্জে ৰা জম্বুধজং ঠপেত্ৰা, – ‘‘যো ৰাদং আরোপেতুং সক্কোতি, সো ইমং মদ্দতূ’’তি ৰত্ৰা গামং পৰিসন্তি. এৰং গামেন গামং ৰিচরন্তিযো সাৰত্থিং পাপুণিত্ৰা তথেৰ গামদ্ৰারে জম্বুধজং ঠপেত্ৰা সম্পত্তমনুস্সানং আরোচেত্ৰা অন্তোনগরং পৰিট্ঠা.

তেন সমযেন ভগৰা সাৰত্থিং নিস্সায জেতৰনে ৰিহরতি. অথাযস্মা সারিপুত্তো গিলানে পুচ্ছন্তো অজগ্গিতট্ঠানং জগ্গন্তো অত্তনো কিচ্চমহন্ততায অঞ্ঞেহি ভিক্খূহি দিৰাতরং গামং পিণ্ডায পৰিসন্তো গামদ্ৰারে জম্বুধজং দিস্ৰা, – ‘‘কিমিদ’’ন্তি দারকে পুচ্ছি. তে তমত্থং আরোচেসুং. তেন হি মদ্দথাতি. ন সক্কোম, ভন্তে, ভাযামাতি. ‘‘কুমারা মা ভাযথ, ‘কেন অম্হাকং জম্বুধজো মদ্দাপিতো’তি ৰুত্তে, বুদ্ধসাৰকেন সারিপুত্তত্থেরেন মদ্দাপিতো, ৰাদং আরোপেতুকামা জেতৰনে থেরস্স সন্তিকং গচ্ছথাতি ৰদেয্যাথা’’তি আহ. তে থেরস্স ৰচনং সুত্ৰা জম্বুধজং মদ্দিত্ৰা ছড্ডেসুং. থেরো পিণ্ডায চরিত্ৰা ৰিহারং গতো. পরিব্বাজিকাপি গামতো নিক্খমিত্ৰা, ‘‘অম্হাকং ধজো কেন মদ্দাপিতো’’তি পুচ্ছিংসু. দারকা তমত্থং আরোচেসুং. পরিব্বাজিকা পুন গামং পৰিসিত্ৰা একেকং ৰীথিং গহেত্ৰা, – ‘‘বুদ্ধসাৰকো কির সারিপুত্তো নাম অম্হেহি সদ্ধিং ৰাদং করিস্সতি, সোতুকামা নিক্খমথা’’তি আরোচেসুং. মহাজনো নিক্খমি, তেন সদ্ধিং পরিব্বাজিকা জেতৰনং অগমিংসু.

থেরো – ‘‘অম্হাকং ৰসনট্ঠানে মাতুগামস্স আগমনং নাম অফাসুক’’ন্তি ৰিহারমজ্ঝে নিসীদি. পরিব্বাজিকাযো গন্ত্ৰা থেরং পুচ্ছিংসু – ‘‘তুম্হেহি অম্হাকং ধজো মদ্দাপিতো’’তি? আম, মযা মদ্দাপিতোতি. মযং তুম্হেহি সদ্ধিং ৰাদং করিস্সামাতি. সাধু করোথ, কস্স পুচ্ছা কস্স ৰিস্সজ্জনং হোতূতি? পুচ্ছা নাম অম্হাকং পত্তা, তুম্হে পন মাতুগামা নাম পঠমং পুচ্ছথাতি আহ. তা চতস্সোপি চতূসু দিসাসু ঠত্ৰা মাতাপিতূনং সন্তিকে উগ্গহিতং ৰাদসহস্সং পুচ্ছিংসু. থেরো খগ্গেন কুমুদনাল়ং ছিন্দন্তো ৰিয পুচ্ছিতং পুচ্ছিতং নিজ্জটং নিগ্গণ্ঠিং কত্ৰা কথেসি, কথেত্ৰা পুন পুচ্ছথাতি আহ. এত্তকমেৰ, ভন্তে, মযং জানামাতি. থেরো আহ – ‘‘তুম্হেহি ৰাদসহস্সং পুচ্ছিতং মযা কথিতং, অহং পন একং যেৰ পঞ্হং পুচ্ছিস্সামি, তং তুম্হে কথেথা’’তি. তা থেরস্স ৰিসযং দিস্ৰা, ‘‘পুচ্ছথ, ভন্তে, ব্যাকরিস্সামা’’তি ৰত্তুং নাসক্খিংসু. ‘‘ৰদ, ভন্তে, জানমানা ব্যাকরিস্সামা’’তি পুন আহংসু.

থেরো অযং পন কুলপুত্তে পব্বাজেত্ৰা পঠমং সিক্খাপেতব্বপঞ্হোতি ৰত্ৰা, – ‘‘একং নাম কি’’ন্তি পুচ্ছি. তা নেৰ অন্তং, ন কোটিং অদ্দসংসু. থেরো কথেথাতি আহ. ন পস্সাম, ভন্তেতি. তুম্হেহি ৰাদসহস্সং পুচ্ছিতং মযা কথিতং, ময্হং তুম্হে একং পঞ্হম্পি কথেতুং ন সক্কোথ, এৰং সন্তে কস্স জযো কস্স পরাজযোতি? তুম্হাকং, ভন্তে, জযো, অম্হাকং পরাজযোতি. ইদানি কিং করিস্সথাতি? তা মাতাপিতূহি ৰুত্তৰচনং আরোচেত্ৰা, ‘‘তুম্হাকং সন্তিকে পব্বজিস্সামা’’তি আহংসু. তুম্হে মাতুগামা নাম অম্হাকং সন্তিকে পব্বজিতুং ন ৰট্টতি, অম্হাকং পন সাসনং গহেত্ৰা ভিক্খুনিউপস্সযং গন্ত্ৰা পব্বজথাতি. তা সাধূতি থেরস্স সাসনং গহেত্ৰা ভিক্খুনিসঙ্ঘস্স সন্তিকং গন্ত্ৰা পব্বজিংসু. পব্বজিতা চ পন অপ্পমত্তা আতাপিনিযো হুত্ৰা নচিরস্সেৰ অরহত্তং পাপুণিংসু.

অযং সচ্চকো তাসং চতুন্নম্পি কনিট্ঠভাতিকো. তাহি চতূহিপি উত্তরিতরপঞ্ঞো, মাতাপিতূনম্পি সন্তিকা ৰাদসহস্সং, ততো বহুতরঞ্চ বাহিরসমযং উগ্গহেত্ৰা কত্থচি অগন্ত্ৰা রাজদারকে সিপ্পং সিক্খাপেন্তো তত্থেৰ ৰেসালিযং ৰসতি, পঞ্ঞায অতিপূরিতত্তা কুচ্ছি মে ভিজ্জেয্যাতি ভীতো অযপট্টেন কুচ্ছিং পরিক্খিপিত্ৰা চরতি, ইমং সন্ধায ৰুত্তং ‘‘সচ্চকো নিগণ্ঠপুত্তো’’তি.

ভস্সপ্পৰাদকোতি ভস্সং ৰুচ্চতি কথামগ্গো, তং পৰদতি কথেতীতি ভস্সপ্পৰাদকো. পণ্ডিতৰাদোতি অহং পণ্ডিতোতি এৰং ৰাদো. সাধুসম্মতো বহুজনস্সাতি যং যং নক্খত্তচারেন আদিসতি, তং তং যেভুয্যেন তথেৰ হোতি, তস্মা অযং সাধুলদ্ধিকো ভদ্দকোতি এৰং সম্মতো মহাজনস্স. ৰাদেন ৰাদং সমারদ্ধোতি কথামগ্গেন দোসং আরোপিতো. আযস্মা অস্সজীতি সারিপুত্তত্থেরস্স আচরিযো অস্সজিত্থেরো. জঙ্ঘাৰিহারং অনুচঙ্কমমানোতি ততো ততো লিচ্ছৰিরাজগেহতো তং তং গেহং গমনত্থায অনুচঙ্কমমানো. যেনাযস্মা অস্সজি তেনুপসঙ্কমীতি কস্মা উপসঙ্কমি? সমযজাননত্থং.

এৰং কিরস্স অহোসি – ‘‘অহং ‘সমণস্স গোতমস্স ৰাদং আরোপেস্সামী’তি আহিণ্ডামি, ‘সমযং পনস্স ন জানামী’তি ন আরোপেসিং. পরস্স হি সমযং ঞত্ৰা আরোপিতো ৰাদো স্ৰারোপিতো নাম হোতি. অযং পন সমণস্স গোতমস্স সাৰকো পঞ্ঞাযতি অস্সজিত্থেরো; সো অত্তনো সত্থু সমযে কোৰিদো, এতাহং পুচ্ছিত্ৰা কথং পতিট্ঠাপেত্ৰা সমণস্স গোতমস্স ৰাদং আরোপেস্সামী’’তি. তস্মা উপসঙ্কমি. ৰিনেতীতি কথং ৰিনেতি, কথং সিক্খাপেতীতি পুচ্ছতি. থেরো পন যস্মা দুক্খন্তি ৰুত্তে উপারম্ভস্স ওকাসো হোতি, মগ্গফলানিপি পরিযাযেন দুক্খন্তি আগতানি, অযঞ্চ দুক্খন্তি ৰুত্তে থেরং পুচ্ছেয্য – ‘‘ভো অস্সজি, কিমত্থং তুম্হে পব্বজিতা’’তি. ততো ‘‘মগ্গফলত্থাযা’’তি ৰুত্তে, – ‘‘নযিদং, ভো অস্সজি, তুম্হাকং সাসনং নাম, মহাআঘাতনং নামেতং, নিরযুস্সদো নামেস, নত্থি তুম্হাকং সুখাসা, উট্ঠাযুট্ঠায দুক্খমেৰ জিরাপেন্তা আহিণ্ডথা’’তি দোসং আরোপেয্য, তস্মা পরৰাদিস্স পরিযাযকথং কাতুং ন ৰট্টতি. যথা এস অপ্পতিট্ঠো হোতি, এৰমস্স নিপ্পরিযাযকথং কথেস্সামীতি চিন্তেত্ৰা, ‘‘রূপং, ভিক্খৰে, অনিচ্চ’’ন্তি ইমং অনিচ্চানত্তৰসেনেৰ কথং কথেতি. দুস্সুতন্তি সোতুং অযুত্তং.

৩৫৪. সন্থাগারেতি রাজকুলানং অত্থানুসাসনসন্থাগারসালাযং. যেন তে লিচ্ছৰী তেনুপসঙ্কমীতি এৰং কিরস্স অহোসি – ‘‘অহং পুব্বে সমযং অজাননভাৰেন সমণস্স গোতমস্স ৰাদং ন আরোপেসিং, ইদানি পনস্স মহাসাৰকেন কথিতং সমযং জানামি, ইমে চ মম অন্তেৰাসিকা পঞ্চসতা লিচ্ছৰী সন্নিপতিতা. এতেহি সদ্ধিং গন্ত্ৰা সমণস্স গোতমস্স ৰাদং আরোপেস্সামী’’তি তস্মা উপসঙ্কমি. ঞাতঞ্ঞতরেনাতি ঞাতেসু অভিঞ্ঞাতেসু পঞ্চৰগ্গিযত্থেরেসু অঞ্ঞতরেন. পতিট্ঠিতন্তি যথা তেন পতিট্ঠিতং. সচে এৰং পতিট্ঠিস্সতি, অথ পন অঞ্ঞদেৰ ৰক্খতি, তত্র মযা কিং সক্কা কাতুন্তি ইদানেৰ পিট্ঠিং পরিৰত্তেন্তো আহ. আকড্ঢেয্যাতি অত্তনো অভিমুখং কড্ঢেয্য. পরিকড্ঢেয্যাতি পুরতো পটিপণামেয্য. সম্পরিকড্ঢেয্যাতি কালেন আকড্ঢেয্য, কালেন পরিকড্ঢেয্য. সোণ্ডিকাকিলঞ্জন্তি সুরাঘরে পিট্ঠকিলঞ্জং. সোণ্ডিকাধুত্তোতি সুরাধুত্তো. ৰালং কণ্ণে গহেত্ৰাতি সুরাপরিস্সাৰনত্থৰিকং ধোৰিতুকামো কসটনিধুননত্থং উভোসু কণ্ণেসু গহেত্ৰা. ওধুনেয্যাতি অধোমুখং কত্ৰা ধুনেয্য. নিদ্ধুনেয্যাতি উদ্ধংমুখং কত্ৰা ধুনেয্য. নিপ্ফোটেয্যাতি পুনপ্পুনং পপ্ফোটেয্য. সাণধোৰিকং নামাতি এত্থ মনুস্সা সাণসাটককরণত্থং সাণৰাকে গহেত্ৰা মুট্ঠিং মুট্ঠিং বন্ধিত্ৰা উদকে পক্খিপন্তি. তে ততিযদিৰসে সুট্ঠু কিলিন্না হোন্তি. অথ মনুস্সা অম্বিলযাগুসুরাদীনি আদায তত্থ গন্ত্ৰা সাণমুট্ঠিং গহেত্ৰা, দক্খিণতো ৰামতো সম্মুখা চাতি তীসু ফলকেসু সকিং দক্খিণফলকে, সকিং ৰামফলকে, সকিং সম্মুখফলকে পহরন্তা অম্বিলযাগুসুরাদীনি ভুঞ্জন্তা পিৰন্তা খাদন্তা ধোৰন্তি. মহন্তা কীল়া হোতি. রঞ্ঞো নাগো তং কীল়ং দিস্ৰা গম্ভীরং উদকং অনুপৰিসিত্ৰা সোণ্ডায উদকং গহেত্ৰা সকিং কুম্ভে সকিং পিট্ঠিযং সকিং উভোসু পস্সেসু সকিং অন্তরসত্থিযং পক্খিপন্তো কীল়িত্থ. তদুপাদায তং কীল়িতজাতং সাণধোৰিকং নাম ৰুচ্চতি, তং সন্ধায ৰুত্তং – ‘‘সাণধোৰিকং নাম কীল়িতজাতং কীল়তী’’তি. কিং সো ভৰমানো সচ্চকো নিগণ্ঠপুত্তো, যো ভগৰতো ৰাদং আরোপেস্সতীতি যো সচ্চকো নিগণ্ঠপুত্তো ভগৰতো ৰাদং আরোপেস্সতি, সো কিং ভৰমানো কিং যক্খো ভৰমানো উদাহু ইন্দো, উদাহু ব্রহ্মা ভৰমানো ভগৰতো ৰাদং আরোপেস্সতি? ন হি সক্কা পকতিমনুস্সেন ভগৰতো ৰাদং আরোপেতুন্তি অযমেত্থ অধিপ্পাযো.

৩৫৫. তেন খো পন সমযেনাতি যস্মিং সমযে সচ্চকো আরামং পাৰিসি, তস্মিং. কিস্মিং পন সমযে পাৰিসীতি? মহামজ্ঝন্হিকসমযে. কস্মা পন তস্মিং সমযে চঙ্কমন্তীতি? পণীতভোজনপচ্চযস্স থিনমিদ্ধস্স ৰিনোদনত্থং. দিৰাপধানিকা ৰা তে. তাদিসানঞ্হি পচ্ছাভত্তং চঙ্কমিত্ৰা ন্হত্ৰা সরীরং উতুং গণ্হাপেত্ৰা নিসজ্জ সমণধম্মং করোন্তানং চিত্তং একগ্গং হোতি. যেন তে ভিক্খূতি সো কির কুহিং সমণো গোতমোতি পরিৰেণতো পরিৰেণং গন্ত্ৰা পুচ্ছিত্ৰা পৰিসিস্সামীতি ৰিলোকেন্তো অরঞ্ঞে হত্থী ৰিয চঙ্কমে চঙ্কমমানে পংসুকূলিকভিক্খূ দিস্ৰা তেসং সন্তিকং অগমাসি. তং সন্ধায, ‘‘যেন তে ভিক্খূ’’তিআদি ৰুত্তং. কহং নু খো, ভোতি কতরস্মিং আৰাসে ৰা মণ্ডপে ৰাতি অত্থো. এস, অগ্গিৰেস্সন, ভগৰাতি তদা কির ভগৰা পচ্চূসকালে মহাকরুণা সমাপত্তিং সমাপজ্জিত্ৰা দসসহস্সচক্কৰাল়ে সব্বঞ্ঞুতঞ্ঞাণজালং পত্থরিত্ৰা বোধনেয্যসত্তং ওলোকেন্তো অদ্দস – ‘‘স্ৰে সচ্চকো নিগণ্ঠপুত্তো মহতিং লিচ্ছৰিপরিসং গহেত্ৰা মম ৰাদং আরোপেতুকামো আগমিস্সতী’’তি. তস্মা পাতোৰ সরীরপটিজগ্গনং কত্ৰা ভিক্খুসঙ্ঘপরিৰারো ৰেসালিযং পিণ্ডায চরিত্ৰা পিণ্ডপাতপটিক্কন্তো মহাপরিসায নিসীদিতুং সুখট্ঠানে নিসীদিস্সামীতি গন্ধকুটিং অপৰিসিত্ৰা মহাৰনে অঞ্ঞতরস্মিং রুক্খমূলে দিৰাৰিহারং নিসীদি. তে ভিক্খূ ভগৰতো ৰত্তং দস্সেত্ৰা আগতা, সচ্চকেন পুট্ঠা দূরে নিসিন্নং ভগৰন্তং দস্সেন্তা, ‘‘এস অগ্গিৰেস্সন ভগৰা’’তি আহংসু.

মহতিযা লিচ্ছৰিপরিসায সদ্ধিন্তি হেট্ঠা পঞ্চমত্তেহি লিচ্ছৰিসতেহি পরিৰুতোতি ৰুত্তং. তে এতস্স অন্তেৰাসিকাযেৰ, অন্তোৰেসালিযং পন সচ্চকো পঞ্চমত্তানি লিচ্ছৰিরাজসতানি গহেত্ৰা, ‘‘ৰাদত্থিকো ভগৰন্তং উপসঙ্কমন্তো’’তি সুত্ৰা দ্ৰিন্নং পণ্ডিতানং কথাসল্লাপং সোস্সামাতি যেভুয্যেন মনুস্সা নিক্খন্তা, এৰং সা পরিসা মহতী অপরিচ্ছিন্নগণনা অহোসি. তং সন্ধাযেতং ৰুত্তং. অঞ্জলিং পণামেত্ৰাতি এতে উভতোপক্খিকা, তে এৰং চিন্তেসুং – ‘‘সচে নো মিচ্ছাদিট্ঠিকা চোদেস্সন্তি, ‘কস্মা তুম্হে সমণং গোতমং ৰন্দিত্থা’তি, তেসং, ‘কিং অঞ্জলিমত্তকরণেনপি ৰন্দিতং হোতী’তি ৰক্খাম. সচে নো সম্মাদিট্ঠিকা চোদেস্সন্তি, ‘কস্মা ভগৰন্তং ন ৰন্দিত্থা’তি, ‘কিং সীসেন ভূমিং পহরন্তেনেৰ ৰন্দিতং হোতি, ননু অঞ্জলিকম্মম্পি ৰন্দনা এৰা’তি ৰক্খামা’’তি. নাম গোত্তন্তি, ভো গোতম, অহং অসুকস্স পুত্তো দত্তো নাম মিত্তো নাম ইধ আগতোতি ৰদন্তা নামং সাৰেন্তি নাম. ভো গোতম, অহং ৰাসিট্ঠো নাম কচ্চানো নাম ইধ আগতোতি ৰদন্তা গোত্তং সাৰেন্তি নাম. এতে কির দলিদ্দা জিণ্ণকুলপুত্তা পরিসমজ্ঝে নামগোত্তৰসেন পাকটা ভৰিস্সামাতি এৰং অকংসু. যে পন তুণ্হীভূতা নিসীদিংসু, তে কেরাটিকা চেৰ অন্ধবালা চ. তত্থ কেরাটিকা, ‘‘একং দ্ৰে কথাসল্লাপে করোন্তো ৰিস্সাসিকো হোতি, অথ ৰিস্সাসে সতি একং দ্ৰে ভিক্খা অদাতুং ন যুত্ত’’ন্তি ততো অত্তানং মোচেন্তা তুণ্হী নিসীদন্তি. অন্ধবালা অঞ্ঞাণতাযেৰ অৰক্খিত্তমত্তিকাপিণ্ডো ৰিয যত্থ কত্থচি তুণ্হীভূতা নিসীদন্তি.

৩৫৬. কিঞ্চিদেৰ দেসন্তি কঞ্চি ওকাসং কিঞ্চি কারণং, অথস্স ভগৰা পঞ্হপুচ্ছনে উস্সাহং জনেন্তো আহ – পুচ্ছ, অগ্গিৰেস্সন, যদাকঙ্খসীতি. তস্সত্থো – ‘‘পুচ্ছ যদি আকঙ্খসি, ন মে পঞ্হৰিস্সজ্জনে ভারো অত্থি’’. অথ ৰা ‘‘পুচ্ছ যং আকঙ্খসি, সব্বং তে ৰিস্সজ্জেস্সামী’’তি সব্বঞ্ঞুপৰারণং পৰারেসি অসাধারণং পচ্চেকবুদ্ধঅগ্গসাৰমহাসাৰকেহি. তে হি যদাকঙ্খসীতি ন ৰদন্তি, সুত্ৰা ৰেদিস্সামাতি ৰদন্তি. বুদ্ধা পন ‘‘পুচ্ছাৰুসো, যদাকঙ্খসী’’তি (সং. নি. ১.২৩৭) ৰা, ‘‘পুচ্ছ, মহারাজ, যদাকঙ্খসী’’তি (দী. নি. ১.১৬২) ৰা,

‘‘পুচ্ছ ৰাসৰ মং পঞ্হং, যং কিঞ্চি মনসিচ্ছসি;

তস্স তস্সেৰ পঞ্হস্স, অহং অন্তং করোমি তে’’ ইতি. (দী. নি. ২.৩৫৬) ৰা,

‘‘তেন হি ত্ৰং, ভিক্খু, সকে আসনে নিসীদিত্ৰা পুচ্ছ যদাকঙ্খসী’’তি (ম. নি. ৩.৮৫) ৰা,

‘‘বাৰরিস্স চ তুয্হং ৰা, সব্বেসং সব্বসংসযং;

কতাৰকাসা পুচ্ছৰ্হো, যং কিঞ্চি মনসিচ্ছথা’’তি. (সু. নি. ১০৩৬) ৰা,

‘‘পুচ্ছ মং সভিয পঞ্হং, যং কিঞ্চি মনসিচ্ছসি;

তস্স তস্সেৰ পঞ্হস্স, অহং অন্তং করোমি তে’’ ইতি. (সু. নি. ৫১৭) ৰা –

তেসং তেসং যক্খনরিন্দদেৰসমণব্রাহ্মণপরিব্বাজকানং সব্বঞ্ঞুপৰারণং পৰারেন্তি. অনচ্ছরিযঞ্চেতং, যং ভগৰা বুদ্ধভূমিং পত্ৰা এতং পৰারণং পৰারেয্য. যো বোধিসত্তভূমিযং পদেসঞাণেপি ঠিতো

‘‘কোণ্ডঞ্ঞ পঞ্হানি ৰিযাকরোহি,

যাচন্তি তং ইসযো সাধুরূপা;

কোণ্ডঞ্ঞ এসো মনুজেসু ধম্মো,

যং ৰুদ্ধমাগচ্ছতি এস ভারো’’তি. (জা. ২.১৭.৬০) –

এৰং সক্কাদীনং অত্থায ইসীহি যাচিতো

‘‘কতাৰকাসা পুচ্ছন্তু ভোন্তো,

যং কিঞ্চি পঞ্হং মনসাভিপত্থিতং;

অহঞ্হি তং তং ৰো ৰিযাকরিস্সং,

ঞত্ৰা সযং লোকমিমং পরঞ্চা’’তি. (জা. ২.১৭.৬১);

এৰং সরভঙ্গকালে, সম্ভৰজাতকে চ সকলজম্বুদীপং তিক্খত্তুং ৰিচরিত্ৰা পঞ্হানং অন্তকরং অদিস্ৰা সুচিরতেন ব্রাহ্মণেন পঞ্হং পুট্ঠো ওকাসে কারিতে, জাতিযা সত্তৰস্সো রথিকাযং পংসুং কীল়ন্তো পল্লঙ্কং আভুজিত্ৰা অন্তরৰীথিযং নিসিন্নোৰ –

‘‘তগ্ঘ তে অহমক্খিস্সং, যথাপি কুসলো তথা;

রাজা চ খো তং জানাতি, যদি কাহতি ৰা ন ৰা’’তি. (জা. ১.১৬.১৭২) –

সব্বঞ্ঞুপৰারণং পৰারেসি.

এৰং ভগৰতা সব্বঞ্ঞুপৰারণায পৰারিতায অত্তমনো পঞ্হং পুচ্ছন্তো, ‘‘কথং পন, ভো গোতমা’’তিআদিমাহ.

অথস্স ভগৰা, ‘‘পস্সথ, ভো, অঞ্ঞং সাৰকেন কথিতং, অঞ্ঞং সত্থা কথেতি, ননু মযা পটিকচ্চেৰ ৰুত্তং, ‘সচে তথা পতিট্ঠিস্সতি, যথাস্স সাৰকেন পতিট্ঠিতং, এৰাহং ৰাদং আরোপেস্সামী’তি. অযং পন অঞ্ঞমেৰ কথেতি, তত্থ কিং মযা সক্কা কাতু’’ন্তি এৰং নিগণ্ঠস্স ৰচনোকাসো মা হোতূতি হেট্ঠা অস্সজিত্থেরেন কথিতনিযামেনেৰ কথেন্তো, এৰং খো অহং, অগ্গিৰেস্সনাতিআদিমাহ. উপমা মং, ভো গোতম, পটিভাতীতি, ভো গোতম, ময্হং একা উপমা উপট্ঠাতি, আহরামি তং উপমন্তি ৰদতি. পটিভাতু তং, অগ্গিৰেস্সনাতি উপট্ঠাতু তে, অগ্গিৰেস্সন, আহর তং উপমং ৰিসত্থোতি ভগৰা অৰোচ. বলকরণীযাতি বাহুবলেন কত্তব্বা কসিৰাণিজ্জাদিকা কম্মন্তা. রূপত্তাযং পুরিসপুগ্গলোতি রূপং অত্তা অস্সাতি রূপত্তা, রূপং অত্তাতি গহেত্ৰা ঠিতপুগ্গলং দীপেতি. রূপে পতিট্ঠাযাতি তস্মিং অত্তাতি গহিতরূপে পতিট্ঠহিত্ৰা. পুঞ্ঞং ৰা অপুঞ্ঞং ৰা পসৰতীতি কুসলং ৰা অকুসলং ৰা পটিলভতি. ৰেদনত্তাদীসুপি এসেৰ নযো. ইমিনা কিং দীপেতি? ইমে পঞ্চক্খন্ধা ইমেসং সত্তানং পথৰী ৰিয পতিট্ঠা, তে ইমেসু পঞ্চসু খন্ধেসু পতিট্ঠায কুসলাকুসলকম্মং নাম আযূহন্তি. তুম্হে এৰরূপং ৰিজ্জমানমেৰ অত্তানং পটিসেধেন্তো পঞ্চক্খন্ধা অনত্তাতি দীপেথাতি অতিৰিয সকারণং কত্ৰা উপমং আহরি. ইমিনা চ নিগণ্ঠেন আহটওপম্মং নিযতমেৰ, সব্বঞ্ঞুবুদ্ধতো অঞ্ঞো তস্স কথং ছিন্দিত্ৰা ৰাদে দোসং দাতুং সমত্থো নাম নত্থি. দুৰিধা হি পুগ্গলা বুদ্ধৰেনেয্যা চ সাৰকৰেনেয্যা চ. সাৰকৰেনেয্যে সাৰকাপি ৰিনেন্তি বুদ্ধাপি. বুদ্ধৰেনেয্যে পন সাৰকা ৰিনেতুং ন সক্কোন্তি, বুদ্ধাৰ ৰিনেন্তি. অযম্পি নিগণ্ঠো বুদ্ধৰেনেয্যো, তস্মা এতস্স ৰাদং ছিন্দিত্ৰা অঞ্ঞো দোসং দাতুং সমত্থো নাম নত্থি. তেনস্স ভগৰা সযমেৰ ৰাদে দোসদস্সনত্থং ননু ত্ৰং, অগ্গিৰেস্সনাতিআদিমাহ.

অথ নিগণ্ঠো চিন্তেসি – ‘‘অতিৰিয সমণো গোতমো মম ৰাদং পতিট্ঠপেতি, সচে উপরি কোচি দোসো ভৰিস্সতি, মমং এককংযেৰ নিগ্গণ্হিস্সতি. হন্দাহং ইমং ৰাদং মহাজনস্সাপি মত্থকে পক্খিপামী’’তি, তস্মা এৰমাহ – অহম্পি, ভো গোতম, এৰং ৰদামি রূপং মে অত্তা…পে… ৰিঞ্ঞাণং মে অত্তাতি, অযঞ্চ মহতী জনতাতি. ভগৰা পন নিগণ্ঠতো সতগুণেনপি সহস্সগুণেনপি সতসহস্সগুণেনপি ৰাদীৰরতরো, তস্মা চিন্তেসি – ‘‘অযং নিগণ্ঠো অত্তানং মোচেত্ৰা মহাজনস্স মত্থকে ৰাদং পক্খিপতি, নাস্স অত্তানং মোচেতুং দস্সামি, মহাজনতো নিৰত্তেত্ৰা এককংযেৰ নং নিগ্গণ্হিস্সামী’’তি. অথ নং কিঞ্হি তে, অগ্গিৰেস্সনাতিআদিমাহ. তস্সত্থো – নাযং জনতা মম ৰাদং আরোপেতুং আগতা, ত্ৰংযেৰ সকলং ৰেসালিং সংৰট্টিত্ৰা মম ৰাদং আরোপেতুং আগতো, তস্মা ত্ৰং সকমেৰ ৰাদং নিৰেঠেহি, মা মহাজনস্স মত্থকে পক্খিপসীতি. সো পটিজানন্তো অহঞ্হি, ভো গোতমাতিআদিমাহ.

৩৫৭. ইতি ভগৰা নিগণ্ঠস্স ৰাদং পতিট্ঠপেত্ৰা, তেন হি, অগ্গিৰেস্সনাতি পুচ্ছং আরভি. তত্থ তেন হীতি কারণত্থে নিপাতো. যস্মা ত্ৰং পঞ্চক্খন্ধে অত্ততো পটিজানাসি, তস্মাতি অত্থো. সকস্মিং ৰিজিতেতি অত্তনো রট্ঠে. ঘাতেতাযং ৰা ঘাতেতুন্তি ঘাতারহং ঘাতেতব্বযুত্তকং ঘাতেতুং. জাপেতাযং ৰা জাপেতুন্তি ধনজানিরহং জাপেতব্বযুত্তং জাপেতুং জিণ্ণধনং কাতুং. পব্বাজেতাযং ৰা পব্বাজেতুন্তি সকরট্ঠতো পব্বাজনারহং পব্বাজেতুং, নীহরিতুং. ৰত্তিতুঞ্চ অরহতীতি ৰত্ততি চেৰ ৰত্তিতুঞ্চ অরহতি. ৰত্তিতুং যুত্তোতি দীপেতি. ইতি নিগণ্ঠো অত্তনো ৰাদভেদনত্থং আহটকারণমেৰ অত্তনো মারণত্থায আৰুধং তিখিণং করোন্তো ৰিয ৰিসেসেত্ৰা দীপেতি, যথা তং বালো. এৰং মে রূপং হোতূতি মম রূপং এৰংৰিধং হোতু, পাসাদিকং অভিরূপং অলঙ্কতপ্পটিযত্তং সুৰণ্ণতোরণং ৰিয সুসজ্জিতচিত্তপটো ৰিয চ মনাপদস্সনন্তি. এৰং মে রূপং মা অহোসীতি মম রূপং এৰংৰিধং মা হোতু, দুব্বণ্ণং দুস্সণ্ঠিতং ৰলিতপলিতং তিলকসমাকিণ্ণন্তি.

তুণ্হী অহোসীতি নিগণ্ঠো ইমস্মিং ঠানে ৰিরদ্ধভাৰং ঞত্ৰা, ‘‘সমণো গোতমো মম ৰাদং ভিন্দনত্থায কারণং আহরি, অহং বালতায তমেৰ ৰিসেসেত্ৰা দীপেসিং, ইদানি নট্ঠোম্হি, সচে ৰত্ততীতি ৰক্খামি, ইমে রাজানো উট্ঠহিত্ৰা, ‘অগ্গিৰেস্সন, ত্ৰং মম রূপে ৰসো ৰত্ততীতি ৰদসি, যদি তে রূপে ৰসো ৰত্ততি, কস্মা ত্ৰং যথা ইমে লিচ্ছৰিরাজানো তাৰতিংসদেৰসদিসেহি অত্তভাৰেহি ৰিরোচন্তি অভিরূপা পাসাদিকা, এৰং ন ৰিরোচসী’তি. সচে ন ৰত্ততীতি ৰক্খামি, সমণো গোতমো উট্ঠহিত্ৰা, ‘অগ্গিৰেস্সন, ত্ৰং পুব্বে ৰত্ততি মে রূপস্মিং ৰসোতি ৰত্ৰা ইদানি পটিক্খিপসী’তি ৰাদং আরোপেস্সতি. ইতি ৰত্ততীতি ৰুত্তেপি একো দোসো, ন ৰত্ততীতি ৰুত্তেপি একো দোসো’’তি তুণ্হী অহোসি. দুতিযম্পি ভগৰা পুচ্ছি, দুতিযম্পি তুণ্হী অহোসি. যস্মা পন যাৰততিযং ভগৰতা পুচ্ছিতে অব্যাকরোন্তস্স সত্তধা মুদ্ধা ফলতি, বুদ্ধা চ নাম সত্তানংযেৰ অত্থায কপ্পসতসহস্সাধিকানি চত্তারি অসঙ্খ্যেয্যানি পারমীনং পূরিতত্তা সত্তেসু বলৰঅনুদ্দযা হোন্তি. তস্মা যাৰততিযং অপুচ্ছিত্ৰা অথ খো ভগৰা সচ্চকং নিগণ্ঠপুত্তং এতদৰোচ – এতং ‘‘ব্যাকরোহী দানী’’তিআদিৰচনং অৰোচ.

তত্থ সহধম্মিকন্তি সহেতুকং সকারণং. ৰজিরং পাণিম্হি অস্সাতি ৰজিরপাণি. যক্খোতি ন যো ৰা সো ৰা যক্খো, সক্কো দেৰরাজাতি ৰেদিতব্বো. আদিত্তন্তি অগ্গিৰণ্ণং. সম্পজ্জলিতন্তি সুট্ঠু পজ্জলিতং. সজোতিভূতন্তি সমন্ততো জোতিভূতং, একগ্গিজালভূতন্তি অত্থো. ঠিতো হোতীতি মহন্তং সীসং, কন্দলমকুলসদিসা দাঠা, ভযানকানি অক্খিনাসাদীনীতি এৰং ৰিরূপরূপং মাপেত্ৰা ঠিতো. কস্মা পনেস আগতোতি? দিট্ঠিৰিস্সজ্জাপনত্থং. অপিচ, ‘‘অহঞ্চেৰ খো পন ধম্মং দেসেয্যং, পরে চ মে ন আজানেয্যু’’ন্তি এৰং ধম্মদেসনায অপ্পোস্সুক্কভাৰং আপন্নে ভগৰতি সক্কো মহাব্রহ্মুনা সদ্ধিং আগন্ত্ৰা, ‘‘ভগৰা ধম্মং দেসেথ, তুম্হাকং আণায অৰত্তমানে মযং ৰত্তাপেস্সাম, তুম্হাকং ধম্মচক্কং হোতু, অম্হাকং আণাচক্ক’’ন্তি পটিঞ্ঞমকাসি. তস্মা ‘‘অজ্জ সচ্চকং তাসেত্ৰা পঞ্হং ৰিস্সজ্জাপেস্সামী’’তি আগতো.

ভগৰা চেৰ পস্সতি, সচ্চকো চ নিগণ্ঠপুত্তোতি যদি হি তং অঞ্ঞেপি পস্সেয্যুং. তং কারণং অগরু অস্স, ‘‘সমণো গোতমো সচ্চকং অত্তনো ৰাদে অনোতরন্তং ঞত্ৰা যক্খং আৰাহেত্ৰা দস্সেসি, ততো সচ্চকো ভযেন কথেসী’’তি ৰদেয্যুং. তস্মা ভগৰা চেৰ পস্সতি সচ্চকো চ. তস্স তং দিস্ৰাৰ সকলসরীরতো সেদা মুচ্চিংসু, অন্তোকুচ্ছি ৰিপরিৰত্তমানা মহারৰং রৰি. সো ‘‘অঞ্ঞেপি নু খো পস্সন্তী’’তি ওলোকেন্তো কস্সচি লোমহংসমত্তম্পি ন অদ্দস. ততো – ‘‘ইদং ভযং মমেৰ উপ্পন্নং. সচাহং যক্খোতি ৰক্খামি, ‘কিং তুয্হমেৰ অক্খীনি অত্থি, ত্ৰমেৰ যক্খং পস্সসি, পঠমং যক্খং অদিস্ৰা সমণেন গোতমেন ৰাদসঙ্ঘাটে খিত্তোৰ যক্খং পস্সসী’তি ৰদেয্যু’’ন্তি চিন্তেত্ৰা – ‘‘ন দানি মে ইধ অঞ্ঞং পটিসরণং অত্থি, অঞ্ঞত্র সমণা গোতমা’’তি মঞ্ঞমানো, অথ খো সচ্চকো নিগণ্ঠপুত্তো…পে… ভগৰন্তং এতদৰোচ. তাণং গৰেসীতি তাণন্তি গৰেসমানো. লেণং গৰেসীতি লেণন্তি গৰেসমানো. সরণং গৰেসীতি সরণন্তি গৰেসমানো. এত্থ চ তাযতি রক্খতীতি তাণং. নিলীযন্তি এত্থাতি লেণং. সরতীতি সরণং, ভযং হিংসতি ৰিদ্ধংসেতীতি অত্থো.

৩৫৮. মনসি করিত্ৰাতি মনম্হি কত্ৰা পচ্চৰেক্খিত্ৰা উপধারেত্ৰা. এৰং মে ৰেদনা হোতূতি কুসলাৰ হোতু, সুখাৰ হোতু. এৰং মে সঞ্ঞা হোতূতি কুসলাৰ হোতু, সুখাৰ হোতু, সোমনস্সসম্পযুত্তাৰ হোতূতি. সঙ্খারৰিঞ্ঞাণেসুপি এসেৰ নযো. মা অহোসীতি এত্থ পন ৰুত্তৰিপরিযাযেন অত্থো ৰেদিতব্বো. কল্লং নূতি যুত্তং নু. সমনুপস্সিতুন্তি ‘‘এতং মম এসোহমস্মি এসো মে অত্তা’’তি এৰং তণ্হামানদিট্ঠিৰসেন পস্সিতুং. নো হিদং, ভো গোতমাতি ন যুত্তমেতং, ভো গোতম. ইতি ভগৰা যথা নাম ছেকো অহিতুণ্ডিকো সপ্পদট্ঠৰিসং তেনেৰ সপ্পেন পুন ডংসাপেত্ৰা উব্বাহেয্য, এৰং তস্সংযেৰ পরিসতি সচ্চকং নিগণ্ঠপুত্তং তেনেৰ মুখেন পঞ্চক্খন্ধা অনিচ্চা দুক্খা অনত্তাতি ৰদাপেসি. দুক্খং অল্লীনোতি ইমং পঞ্চক্খন্ধদুক্খং তণ্হাদিট্ঠীহি অল্লীনো. উপগতো অজ্ঝোসিতোতিপি তণ্হাদিট্ঠিৰসেনেৰ ৰেদিতব্বো. দুক্খং এতং মমাতিআদীসু পঞ্চক্খন্ধদুক্খং তণ্হামানদিট্ঠিৰসেন সমনুপস্সতীতি অত্থো. পরিজানেয্যাতি অনিচ্চং দুক্খং অনত্তাতি তীরণপরিঞ্ঞায পরিতো জানেয্য. পরিক্খেপেত্ৰাতি খযং ৰযং অনুপ্পাদং উপনেত্ৰা.

৩৫৯. নৰন্তি তরুণং. অকুক্কুকজাতন্তি পুপ্ফগ্গহণকালে অন্তো অঙ্গুট্ঠপ্পমাণো একো ঘনদণ্ডকো নিব্বত্ততি, তেন ৰিরহিতন্তি অত্থো. রিত্তোতি সুঞ্ঞো অন্তোসারৰিরহিতো. রিত্তত্তাৰ তুচ্ছো. অপরদ্ধোতি পরাজিতো. ভাসিতা খো পন তেতি ইদং ভগৰা তস্স মুখরভাৰং পকাসেত্ৰা নিগ্গণ্হন্তো আহ. সো কির পুব্বে পূরণাদযো ছ সত্থারো উপসঙ্কমিত্ৰা পঞ্হং পুচ্ছতি. তে ৰিস্সজ্জেতুং ন সক্কোন্তি. অথ নেসং পরিসমজ্ঝে মহন্তং ৰিপ্পকারং আরোপেত্ৰা উট্ঠায জযং পৰেদেন্তো গচ্ছতি. সো সম্মাসম্বুদ্ধম্পি তথেৰ ৰিহেঠেস্সামীতি সঞ্ঞায উপসঙ্কমিত্ৰা –

‘‘অম্ভো কো নাম যং রুক্খো, সিন্নপত্তো সকণ্টকো;

যত্থ একপ্পহারেন, উত্তমঙ্গং ৰিভিজ্জিত’’ন্তি.

অযং খদিরং আহচ্চ অসারকরুক্খপরিচিতো মুদুতুণ্ডসকুণো ৰিয সব্বঞ্ঞুতঞ্ঞাণসারং আহচ্চ ঞাণতুণ্ডভেদং পত্তো সব্বঞ্ঞুতঞ্ঞাণস্স থদ্ধভাৰং অঞ্ঞাসি. তদস্স পরিসমজ্ঝে পকাসেন্তো ভাসিতা খো পন তেতিআদিমাহ. নত্থি এতরহীতি উপাদিন্নকসরীরে সেদো নাম নত্থীতি ন ৰত্তব্বং, এতরহি পন নত্থীতি ৰদতি. সুৰণ্ণৰণ্ণং কাযং ৰিৰরীতি ন সব্বং কাযং ৰিৰরি. বুদ্ধা নাম গণ্ঠিকং পটিমুঞ্চিত্ৰা পটিচ্ছন্নসরীরা পরিসতি ধম্মং দেসেন্তি. অথ ভগৰা গলৰাটকসম্মুখট্ঠানে চীৰরং গহেত্ৰা চতুরঙ্গুলমত্তং ওতারেসি. ওতারিতমত্তে পন তস্মিং সুৰণ্ণৰণ্ণা রস্মিযো পুঞ্জপুঞ্জা হুত্ৰা সুৰণ্ণঘটতো রত্তসুৰণ্ণরসধারা ৰিয, রত্তৰণ্ণৰলাহকতো ৰিজ্জুলতা ৰিয চ নিক্খমিত্ৰা সুৰণ্ণমুরজসদিসং মহাখন্ধং উত্তমসিরং পদক্খিণং কুরুমানা আকাসে পক্খন্দিংসু. কস্মা পন ভগৰা এৰমকাসীতি? মহাজনস্স কঙ্খাৰিনোদনত্থং. মহাজনো হি সমণো গোতমো ময্হং সেদো নত্থীতি ৰদতি, সচ্চকস্স তাৰ নিগণ্ঠপুত্তস্স যন্তারুল়্হস্স ৰিয সেদা পগ্ঘরন্তি. সমণো পন গোতমো ঘনদুপট্টচীৰরং পারুপিত্ৰা নিসিন্নো, অন্তো সেদস্স অত্থিতা ৰা নত্থিতা ৰা কথং সক্কা ঞাতুন্তি কঙ্খং করেয্য, তস্স কঙ্খাৰিনোদনত্থং এৰমকাসি. মঙ্কুভূতোতি নিত্তেজভূতো. পত্তক্খন্ধোতি পতিতক্খন্ধো. অপ্পটিভানোতি উত্তরি অপ্পস্সন্তো. নিসীদীতি পাদঙ্গুট্ঠকেন ভূমিং কসমানো নিসীদি.

৩৬০. দুম্মুখোতি ন ৰিরূপমুখো, অভিরূপো হি সো পাসাদিকো. নামং পনস্স এতং. অভব্বো তং পোক্খরণিং পুন ওতরিতুন্তি সব্বেসং অল়ানং ভগ্গত্তা পচ্ছিন্নগমনো ওতরিতুং অভব্বো, তত্থেৰ কাককুললাদীনং ভত্তং হোতীতি দস্সেতি. ৰিসূকাযিকানীতি দিট্ঠিৰিসূকানি. ৰিসেৰিতানীতি দিট্ঠিসঞ্চরিতানি. ৰিপ্ফন্দিতানীতি দিট্ঠিৰিপ্ফন্দিতানি. যদিদং ৰাদাধিপ্পাযোতি এত্থ যদিদন্তি নিপাতমত্তং; ৰাদাধিপ্পাযো হুত্ৰা ৰাদং আরোপেস্সামীতি অজ্ঝাসযেন উপসঙ্কমিতুং অভব্বো; ধম্মস্সৰনায পন উপসঙ্কমেয্যাতি দস্সেতি. দুম্মুখং লিচ্ছৰিপুত্তং এতদৰোচাতি কস্মা অৰোচ? দুম্মুখস্স কিরস্স উপমাহরণকালে সেস লিচ্ছৰিকুমারাপি চিন্তেসুং – ‘‘ইমিনা নিগণ্ঠেন অম্হাকং সিপ্পুগ্গহণট্ঠানে চিরং অৰমানো কতো, অযং দানি অমিত্তস্স পিট্ঠিং পস্সিতুং কালো. মযম্পি একেকং উপমং আহরিত্ৰা পাণিপ্পহারেন পতিতং মুগ্গরেন পোথেন্তো ৰিয তথা নং করিস্সাম, যথা ন পুন পরিসমজ্ঝে সীসং উক্খিপিতুং সক্খিস্সতী’’তি, তে ওপম্মানি করিত্ৰা দুম্মুখস্স কথাপরিযোসানং আগমযমানা নিসীদিংসু. সচ্চকো তেসং অধিপ্পাযং ঞত্ৰা, ইমে সব্বেৰ গীৰং উক্খিপিত্ৰা ওট্ঠেহি চলমানেহি ঠিতা; সচে পচ্চেকা উপমা হরিতুং লভিস্সন্তি, পুন মযা পরিসমজ্ঝে সীসং উক্খিপিতুং ন সক্কা ভৰিস্সতি, হন্দাহং দুম্মুখং অপসাদেত্ৰা যথা অঞ্ঞস্স ওকাসো ন হোতি, এৰং কথাৰারং পচ্ছিন্দিত্ৰা সমণং গোতমং পঞ্হং পুচ্ছিস্সামীতি তস্মা এতদৰোচ. তত্থ আগমেহীতি তিট্ঠ, মা পুন ভণাহীতি অত্থো.

৩৬১. তিট্ঠতেসা, ভো গোতমাতি, ভো গোতম, এসা অম্হাকঞ্চেৰ অঞ্ঞেসঞ্চ পুথুসমণব্রাহ্মণানং ৰাচা তিট্ঠতু. ৰিলাপং ৰিলপিতং মঞ্ঞেতি এতঞ্হি ৰচনং ৰিলপিতং ৰিয হোতি, ৰিপ্পলপিতমত্তং হোতীতি অত্থো. অথ ৰা তিট্ঠতেসাতি এত্থ কথাতি আহরিত্ৰা ৰত্তব্বা. ৰাচাৰিলাপং ৰিলপিতং মঞ্ঞেতি এত্থ পনিদং ৰাচানিচ্ছারণং ৰিলপিতমত্তং মঞ্ঞে হোতীতি অত্থো.

ইদানি পঞ্হং পুচ্ছন্তো কিত্তাৰতাতিআদিমাহ. তত্থ ৰেসারজ্জপত্তোতি ঞাণপত্তো. অপরপ্পচ্চযোতি অপরপ্পত্তিযো. অথস্স ভগৰা পঞ্হং ৰিস্সজ্জেন্তো ইধ, অগ্গিৰেস্সনাতিআদিমাহ, তং উত্তানত্থমেৰ. যস্মা পনেত্থ পস্সতীতি ৰুত্তত্তা সেক্খভূমি দস্সিতা. তস্মা উত্তরি অসেক্খভূমিং পুচ্ছন্তো দুতিযং পঞ্হং পুচ্ছি, তম্পিস্স ভগৰা ব্যাকাসি. তত্থ দস্সনানুত্তরিযেনাতিআদীসু দস্সনানুত্তরিযন্তি লোকিযলোকুত্তরা পঞ্ঞা. পটিপদানুত্তরিযন্তি লোকিযলোকুত্তরা পটিপদা. ৰিমুত্তানুত্তরিযন্তি লোকিযলোকুত্তরা ৰিমুত্তি. সুদ্ধলোকুত্তরমেৰ ৰা গহেত্ৰা দস্সনানুত্তরিযন্তি অরহত্তমগ্গসম্মাদিট্ঠি. পটিপদানুত্তরিযন্তি সেসানি মগ্গঙ্গানি. ৰিমুত্তানুত্তরিযন্তি অগ্গফলৰিমুত্তি. খীণাসৰস্স ৰা নিব্বানদস্সনং দস্সনানুত্তরিযং নাম. মগ্গঙ্গানি পটিপদানুত্তরিযং. অগ্গফলং ৰিমুত্তানুত্তরিযন্তি ৰেদিতব্বং. বুদ্ধো সো ভগৰাতি সো ভগৰা সযম্পি চত্তারি সচ্চানি বুদ্ধো. বোধাযাতি পরেসম্পি চতুসচ্চবোধায ধম্মং দেসেতি. দন্তোতিআদীসু দন্তোতি নিব্বিসেৰনো. দমথাযাতি নিব্বিসেৰনত্থায. সন্তোতি সব্বকিলেসৰূপসমেন সন্তো. সমথাযাতি কিলেসৰূপসমায. তিণ্ণোতি চতুরোঘতিণ্ণো. তরণাযাতি চতুরোঘতরণায. পরিনিব্বুতোতি কিলেসপরিনিব্বানেন পরিনিব্বুতো. পরিনিব্বানাযাতি কিলেসপরিনিব্বানত্থায.

৩৬২. ধংসীতি গুণধংসকা. পগব্বাতি ৰাচাপাগব্বিযেন সমন্নাগতা. আসাদেতব্বন্তি ঘট্টেতব্বং. আসজ্জাতি ঘট্টেত্ৰা. নত্ৰেৰ ভৰন্তং গোতমন্তি ভৰন্তং গোতমং আসজ্জ কস্সচি অত্তনো ৰাদং অনুপহতং সকলং আদায পক্কমিতুং থামো নত্থীতি দস্সেতি. ন হি ভগৰা হত্থিআদযো ৰিয কস্সচি জীৰিতন্তরাযং করোতি. অযং পন নিগণ্ঠো ইমা তিস্সো উপমা ন ভগৰতো উক্কংসনত্থং আহরি, অত্তুক্কংসনত্থমেৰ আহরি. যথা হি রাজা কঞ্চি পচ্চত্থিকং ঘাতেত্ৰা এৰং নাম সূরো এৰং থামসম্পন্নো পুরিসো ভৰিস্সতীতি পচ্চত্থিকং থোমেন্তোপি অত্তানমেৰ থোমেতি. এৰমেৰ সোপি সিযা হি, ভো গোতম, হত্থিং পভিন্নন্তিআদীহি ভগৰন্তং উক্কংসেন্তোপি মযমেৰ সূরা মযং পণ্ডিতা মযং বহুস্সুতাযেৰ এৰং পভিন্নহত্থিং ৰিয, জলিতঅগ্গিক্খন্ধং ৰিয, ফণকতআসীৰিসং ৰিয চ ৰাদত্থিকা সম্মাসম্বুদ্ধং উপসঙ্কমিম্হাতি অত্তানংযেৰ উক্কংসেতি. এৰং অত্তানং উক্কংসেত্ৰা ভগৰন্তং নিমন্তযমানো অধিৰাসেতু মেতিআদিমাহ. তত্থ অধিৰাসেতূতি সম্পটিচ্ছতু. স্ৰাতনাযাতি যং মে তুম্হেসু কারং করোতো স্ৰে ভৰিস্সতি পুঞ্ঞঞ্চ পীতিপামোজ্জঞ্চ, তদত্থায. অধিৰাসেসি ভগৰা তুণ্হীভাৰেনাতি ভগৰা কাযঙ্গং ৰা ৰাচঙ্গং ৰা অচোপেত্ৰা অব্ভন্তরেযেৰ খন্তিং ধারেন্তো তুণ্হীভাৰেন অধিৰাসেসি. সচ্চকস্স অনুগ্গহকরণত্থং মনসাৰ সম্পটিচ্ছীতি ৰুত্তং হোতি.

৩৬৩. যমস্স পতিরূপং মঞ্ঞেয্যাথাতি তে কির লিচ্ছৰী তস্স পঞ্চথালিপাকসতানি নিচ্চভত্তং আহরন্তি. তদেৰ সন্ধায এস স্ৰে তুম্হে যং অস্স সমণস্স গোতমস্স পতিরূপং কপ্পিযন্তি মঞ্ঞেয্যাথ, তং আহরেয্যাথ; সমণস্স হি গোতমস্স তুম্হে পরিচারকা কপ্পিযাকপ্পিযং যুত্তাযুত্তং জানাথাতি ৰদতি. ভত্তাভিহারং অভিহরিংসূতি অভিহরিতব্বং ভত্তং অভিহরিংসু. পণীতেনাতি উত্তমেন. সহত্থাতি সহত্থেন. সন্তপ্পেত্ৰাতি সুট্ঠু তপ্পেত্ৰা, পরিপুণ্ণং সুহিতং যাৰদত্থং কত্ৰা. সম্পৰারেত্ৰাতি সুট্ঠু পৰারেত্ৰা, অলং অলন্তি হত্থসঞ্ঞায পটিক্খিপাপেত্ৰা. ভুত্তাৰিন্তি ভুত্তৰন্তং. ওনীতপত্তপাণিন্তি পত্ততো ওনীতপাণিং, অপনীতহত্থন্তি ৰুত্তং হোতি. ‘‘ওনিত্তপত্তপাণি’’ন্তিপি পাঠো, তস্সত্থো, ওনিত্তং নানাভূতং পত্তং পাণিতো অস্সাতি ওনিত্তপত্তপাণী. তং ওনিত্তপত্তপাণিং, হত্থে চ পত্তঞ্চ ধোৰিত্ৰা একমন্তে পত্তং নিক্খিপিত্ৰা নিসিন্নন্তি অত্থো. একমন্তং নিসীদীতি ভগৰন্তং এৰংভূতং ঞত্ৰা একস্মিং ওকাসে নিসীদীতি অত্থো. পুঞ্ঞঞ্চাতি যং ইমস্মিং দানে পুঞ্ঞং, আযতিং ৰিপাকক্খন্ধাতি অত্থো. পুঞ্ঞমহীতি ৰিপাকক্খন্ধানংযেৰ পরিৰারো. তং দাযকানং সুখায হোতূতি তং ইমেসং লিচ্ছৰীনং সুখত্থায হোতু. ইদং কির সো অহং পব্বজিতো নাম, পব্বজিতেন চ ন যুত্তং অত্তনো দানং নিয্যাতেতুন্তি তেসং নিয্যাতেন্তো এৰমাহ. অথ ভগৰা যস্মা লিচ্ছৰীহি সচ্চকস্স দিন্নং, ন ভগৰতো. সচ্চকেন পন ভগৰতো দিন্নং, তস্মা তমত্থং দীপেন্তো যং খো, অগ্গিৰেস্সনাতিআদিমাহ. ইতি ভগৰা নিগণ্ঠস্স মতেন ৰিনাযেৰ অত্তনো দিন্নং দক্খিণং নিগণ্ঠস্স নিয্যাতেসি, সা চস্স অনাগতে ৰাসনা ভৰিস্সতীতি.

পপঞ্চসূদনিযা মজ্ঝিমনিকাযট্ঠকথায

চূল়সচ্চকসুত্তৰণ্ণনা নিট্ঠিতা.

৬. মহাসচ্চকসুত্তৰণ্ণনা

৩৬৪. এৰং মে সুতন্তি মহাসচ্চকসুত্তং. তত্থ একং সমযন্তি চ তেন খো পন সমযেনাতি চ পুব্বণ্হসমযন্তি চ তীহি পদেহি একোৰ সমযো ৰুত্তো. ভিক্খূনঞ্হি ৰত্তপটিপত্তিং কত্ৰা মুখং ধোৰিত্ৰা পত্তচীৰরমাদায চেতিযং ৰন্দিত্ৰা কতরং গামং পৰিসিস্সামাতি ৰিতক্কমাল়কে ঠিতকালো নাম হোতি. ভগৰা এৰরূপে সমযে রত্তদুপট্টং নিৰাসেত্ৰা কাযবন্ধনং বন্ধিত্ৰা পংসুকূলচীৰরং একংসং পারুপিত্ৰা গন্ধকুটিতো নিক্খম্ম ভিক্খুসঙ্ঘপরিৰুতো গন্ধকুটিপমুখে অট্ঠাসি. তং সন্ধায, – ‘‘একং সমযন্তি চ তেন খো পন সমযেনাতি চ পুব্বণ্হসময’’ন্তি চ ৰুত্তং. পৰিসিতুকামোতি পিণ্ডায পৰিসিস্সামীতি এৰং কতসন্নিট্ঠানো. তেনুপসঙ্কমীতি কস্মা উপসঙ্কমীতি? ৰাদারোপনজ্ঝাসযেন. এৰং কিরস্স অহোসি – ‘‘পুব্বেপাহং অপণ্ডিততায সকলং ৰেসালিপরিসং গহেত্ৰা সমণস্স গোতমস্স সন্তিকং গন্ত্ৰা পরিসমজ্ঝে মঙ্কু জাতো. ইদানি তথা অকত্ৰা এককোৰ গন্ত্ৰা ৰাদং আরোপেস্সামি. যদি সমণং গোতমং পরাজেতুং সক্খিস্সামি, অত্তনো লদ্ধিং দীপেত্ৰা জযং করিস্সামি. যদি সমণস্স গোতমস্স জযো ভৰিস্সতি, অন্ধকারে নচ্চং ৰিয ন কোচি জানিস্সতী’’তি নিদ্দাপঞ্হং নাম গহেত্ৰা ইমিনা ৰাদজ্ঝাসযেন উপসঙ্কমি.

অনুকম্পং উপাদাযাতি সচ্চকস্স নিগণ্ঠপুত্তস্স অনুকম্পং পটিচ্চ. থেরস্স কিরস্স এৰং অহোসি – ‘‘ভগৰতি মুহুত্তং নিসিন্নে বুদ্ধদস্সনং ধম্মস্সৰনঞ্চ লভিস্সতি. তদস্স দীঘরত্তং হিতায সুখায সংৰত্তিস্সতী’’তি. তস্মা ভগৰন্তং যাচিত্ৰা পংসুকূলচীৰরং চতুগ্গুণং পঞ্ঞপেত্ৰা নিসীদতু ভগৰাতি আহ. ‘‘কারণং আনন্দো ৰদতী’’তি সল্লক্খেত্ৰা নিসীদি ভগৰা পঞ্ঞত্তে আসনে. ভগৰন্তং এতদৰোচাতি যং পন পঞ্হং ওৰট্টিকসারং কত্ৰা আদায আগতো তং ঠপেত্ৰা পস্সেন তাৰ পরিহরন্তো এতং সন্তি, ভো গোতমাতিআদিৰচনং অৰোচ.

৩৬৫. ফুসন্তি হি তে, ভো গোতমাতি তে সমণব্রাহ্মণা সরীরে উপ্পন্নং সারীরিকং দুক্খং ৰেদনং ফুসন্তি লভন্তি, অনুভৰন্তীতি অত্থো. ঊরুক্খম্ভোতি খম্ভকতঊরুভাৰো, ঊরুথদ্ধতাতি অত্থো. ৰিম্হযত্থৰসেন পনেত্থ ভৰিস্সতীতি অনাগতৰচনং কতং. কাযন্ৰযং হোতীতি কাযানুগতং হোতি কাযস্স ৰসৰত্তি. কাযভাৰনাতি পন ৰিপস্সনা ৰুচ্চতি, তায চিত্তৰিক্খেপং পাপুণন্তো নাম নত্থি, ইতি নিগণ্ঠো অসন্তং অভূতং যং নত্থি, তদেৰাহ. চিত্তভাৰনাতিপি সমথো ৰুচ্চতি, সমাধিযুত্তস্স চ পুগ্গলস্স ঊরুক্খম্ভাদযো নাম নত্থি, ইতি নিগণ্ঠো ইদং অভূতমেৰ আহ. অট্ঠকথাযং পন ৰুত্তং – ‘‘যথেৰ ‘ভূতপুব্বন্তি ৰত্ৰা ঊরুক্খম্ভোপি নাম ভৰিস্সতী’তিআদীনি ৰদতো অনাগতরূপং ন সমেতি, তথা অত্থোপি ন সমেতি, অসন্তং অভূতং যং নত্থি, তং কথেতী’’তি.

নো কাযভাৰনন্তি পঞ্চাতপতপ্পনাদিং অত্তকিলমথানুযোগং সন্ধাযাহ. অযঞ্হি তেসং কাযভাৰনা নাম. কিং পন সো দিস্ৰা এৰমাহ? সো কির দিৰাদিৰস্স ৰিহারং আগচ্ছতি, তস্মিং খো পন সমযে ভিক্খূ পত্তচীৰরং পটিসামেত্ৰা অত্তনো অত্তনো রত্তিট্ঠানদিৰাট্ঠানেসু পটিসল্লানং উপগচ্ছন্তি. সো তে পটিসল্লীনে দিস্ৰা চিত্তভাৰনামত্তং এতে অনুযুঞ্জন্তি, কাযভাৰনা পনেতেসং নত্থীতি মঞ্ঞমানো এৰমাহ.

৩৬৬. অথ নং ভগৰা অনুযুঞ্জন্তো কিন্তি পন তে, অগ্গিৰেস্সন, কাযভাৰনা সুতাতি আহ. সো তং ৰিত্থারেন্তো সেয্যথিদং, নন্দো ৰচ্ছোতিআদিমাহ. তত্থ নন্দোতি তস্স নামং. ৰচ্ছোতি গোত্তং. কিসোতি নামং. সংকিচ্চোতি গোত্তং. মক্খলিগোসালো হেট্ঠা আগতোৰ. এতেতি এতে তযো জনা, তে কির কিলিট্ঠতপানং মত্থকপত্তা অহেসুং. উল়ারানি উল়ারানীতি পণীতানি পণীতানি. গাহেন্তি নামাতি বলং গণ্হাপেন্তি নাম. ব্রূহেন্তীতি ৰড্ঢেন্তি. মেদেন্তীতি জাতমেদং করোন্তি. পুরিমং পহাযাতি পুরিমং দুক্করকারং পহায. পচ্ছা উপচিনন্তীতি পচ্ছা উল়ারখাদনীযাদীহি সন্তপ্পেন্তি, ৰড্ঢেন্তি. আচযাপচযো হোতীতি ৰড্ঢি চ অৰড্ঢি চ হোতি, ইতি ইমস্স কাযস্স কালেন ৰড্ঢি, কালেন পরিহানীতি ৰড্ঢিপরিহানিমত্তমেৰ পঞ্ঞাযতি, কাযভাৰনা পন ন পঞ্ঞাযতীতি দীপেত্ৰা চিত্তভাৰনং পুচ্ছন্তো, ‘‘কিন্তি পন তে, অগ্গিৰেস্সন, চিত্তভাৰনা সুতা’’তি আহ. ন সম্পাযাসীতি সম্পাদেত্ৰা কথেতুং নাসক্খি, যথা তং বালপুথুজ্জনো.

৩৬৭. কুতো পন ত্ৰন্তি যো ত্ৰং এৰং ওল়ারিকং দুব্বলং কাযভাৰনং ন জানাসি? সো ত্ৰং কুতো সণ্হং সুখুমং চিত্তভাৰনং জানিস্সসীতি. ইমস্মিং পন ঠানে চোদনালযত্থেরো, ‘‘অবুদ্ধৰচনং নামেতং পদ’’ন্তি বীজনিং ঠপেত্ৰা পক্কমিতুং আরভি. অথ নং মহাসীৰত্থেরো আহ – ‘‘দিস্সতি, ভিক্খৰে, ইমস্স চাতুমহাভূতিকস্স কাযস্স আচযোপি অপচযোপি আদানম্পি নিক্খেপনম্পী’’তি (সং. নি. ২.৬২). তং সুত্ৰা সল্লক্খেসি – ‘‘ওল়ারিকং কাযং পরিগ্গণ্হন্তস্স উপ্পন্নৰিপস্সনা ওল়ারিকাতি ৰত্তুং ৰট্টতী’’তি.

৩৬৮. সুখসারাগীতি সুখসারাগেন সমন্নাগতো. সুখায ৰেদনায নিরোধা উপ্পজ্জতি দুক্খা ৰেদনাতি ন অনন্তরাৰ উপ্পজ্জতি, সুখদুক্খানঞ্হি অনন্তরপচ্চযতা পট্ঠানে (পট্ঠা. ১.২.৪৫-৪৬) পটিসিদ্ধা. যস্মা পন সুখে অনিরুদ্ধে দুক্খং নুপ্পজ্জতি, তস্মা ইধ এৰং ৰুত্তং. পরিযাদায তিট্ঠতীতি খেপেত্ৰা গণ্হিত্ৰা তিট্ঠতি. উভতোপক্খন্তি সুখং একং পক্খং দুক্খং একং পক্খন্তি এৰং উভতোপক্খং হুত্ৰা.

৩৬৯. উপ্পন্নাপি সুখা ৰেদনা চিত্তং ন পরিযাদায তিট্ঠতি, ভাৰিতত্তা কাযস্স. উপ্পন্নাপি দুক্খা ৰেদনা চিত্তং ন পরিযাদায তিট্ঠতি, ভাৰিতত্তা চিত্তস্সাতি এত্থ কাযভাৰনা ৰিপস্সনা, চিত্তভাৰনা সমাধি. ৰিপস্সনা চ সুখস্স পচ্চনীকা, দুক্খস্স আসন্না. সমাধি দুক্খস্স পচ্চনীকো, সুখস্স আসন্নো. কথং? ৰিপস্সনং পট্ঠপেত্ৰা নিসিন্নস্স হি অদ্ধানে গচ্ছন্তে গচ্ছন্তে তত্থ তত্থ অগ্গিউট্ঠানং ৰিয হোতি, কচ্ছেহি সেদা মুচ্চন্তি, মত্থকতো উসুমৰট্টিউট্ঠানং ৰিয হোতীতি চিত্তং হঞ্ঞতি ৰিহঞ্ঞতি ৰিপ্ফন্দতি. এৰং তাৰ ৰিপস্সনা সুখস্স পচ্চনীকা, দুক্খস্স আসন্না. উপ্পন্নে পন কাযিকে ৰা চেতসিকে ৰা দুক্খে তং দুক্খং ৰিক্খম্ভেত্ৰা সমাপত্তিং সমাপন্নস্স সমাপত্তিক্খণে দুক্খং দূরাপগতং হোতি, অনপ্পকং সুখং ওক্কমতি. এৰং সমাধি দুক্খস্স পচ্চনীকো, সুখস্স আসন্নো. যথা ৰিপস্সনা সুখস্স পচ্চনীকা, দুক্খস্স আসন্না, ন তথা সমাধি. যথা সমাধি দুক্খস্স পচ্চনীকো, সুখস্স আসন্নো, ন চ তথা ৰিপস্সনাতি. তেন ৰুত্তং – ‘‘উপ্পন্নাপি সুখা ৰেদনা চিত্তং ন পরিযাদায তিট্ঠতি, ভাৰিতত্তা কাযস্স. উপ্পন্নাপি দুক্খা ৰেদনা চিত্তং ন পরিযাদায তিট্ঠতি, ভাৰিতত্তা চিত্তস্সা’’তি.

৩৭০. আসজ্জ উপনীযাতি গুণে ঘট্টেত্ৰা চেৰ উপনেত্ৰা চ. তং ৰত মেতি তং ৰত মম চিত্তং.

৩৭১. কিঞ্হি নো সিযা, অগ্গিৰেস্সনাতি, অগ্গিৰেস্সন, কিং ন ভৰিস্সতি, ভৰিস্সতেৰ, মা এৰং সঞ্ঞী হোহি, উপ্পজ্জিযেৰ মে সুখাপি দুক্খাপি ৰেদনা, উপ্পন্নায পনস্সা অহং চিত্তং পরিযাদায ঠাতুং ন দেমি. ইদানিস্স তমত্থং পকাসেতুং উপরি পসাদাৰহং ধম্মদেসনং দেসেতুকামো মূলতো পট্ঠায মহাভিনিক্খমনং আরভি. তত্থ ইধ মে, অগ্গিৰেস্সন, পুব্বেৰ সম্বোধা…পে… তত্থেৰ নিসীদিং, অলমিদং পধানাযাতি ইদং সব্বং হেট্ঠা পাসরাসিসুত্তে ৰুত্তনযেনেৰ ৰেদিতব্বং. অযং পন ৰিসেসো, তত্থ বোধিপল্লঙ্কে নিসজ্জা, ইধ দুক্করকারিকা.

৩৭৪. অল্লকট্ঠন্তি অল্লং উদুম্বরকট্ঠং. সস্নেহন্তি সখীরং. কামেহীতি ৰত্থুকামেহি. অৰূপকট্ঠাতি অনপগতা. কামচ্ছন্দোতিআদীসু কিলেসকামোৰ ছন্দকরণৰসেন ছন্দো. সিনেহকরণৰসেন স্নেহো. মুচ্ছাকরণৰসেন মুচ্ছা. পিপাসাকরণৰসেন পিপাসা. অনুদহনৰসেন পরিল়াহোতি ৰেদিতব্বো. ওপক্কমিকাতি উপক্কমনিব্বত্তা. ঞাণায দস্সনায অনুত্তরায সম্বোধাযাতি সব্বং লোকুত্তরমগ্গৰেৰচনমেৰ.

ইদং পনেত্থ ওপম্মসংসন্দনং – অল্লং সখীরং উদুম্বরকট্ঠং ৰিয হি কিলেসকামেন ৰত্থুকামতো অনিস্সটপুগ্গলা. উদকে পক্খিত্তভাৰো ৰিয কিলেসকামেন তিন্ততা; মন্থনেনাপি অগ্গিনো অনভিনিব্বত্তনং ৰিয কিলেসকামেন ৰত্থুকামতো অনিস্সটানং ওপক্কমিকাহি ৰেদনাহি লোকুত্তরমগ্গস্স অনধিগমো. অমন্থনেনাপি অগ্গিনো অনভিনিব্বত্তনং ৰিয তেসং পুগ্গলানং ৰিনাপি ওপক্কমিকাহি ৰেদনাহি লোকুত্তরমগ্গস্স অনধিগমো. দুতিযউপমাপি ইমিনাৰ নযেন ৰেদিতব্বা. অযং পন ৰিসেসো, পুরিমা সপুত্তভরিযপব্বজ্জায উপমা; পচ্ছিমা ব্রাহ্মণধম্মিকপব্বজ্জায.

৩৭৬. ততিযউপমায কোল়াপন্তি ছিন্নসিনেহং নিরাপং. থলে নিক্খিত্তন্তি পব্বতথলে ৰা ভূমিথলে ৰা নিক্খিত্তং. এত্থাপি ইদং ওপম্মসংসন্দনং – সুক্খকোল়াপকট্ঠং ৰিয হি কিলেসকামেন ৰত্থুকামতো নিস্সটপুগ্গলা, আরকা উদকা থলে নিক্খিত্তভাৰো ৰিয কিলেসকামেন অতিন্ততা. মন্থনেনাপি অগ্গিনো অভিনিব্বত্তনং ৰিয কিলেসকামেন ৰত্থুকামতো নিস্সটানং অব্ভোকাসিকনেসজ্জিকাদিৰসেন ওপক্কমিকাহিপি ৰেদনাহি লোকুত্তরমগ্গস্স অধিগমো. অঞ্ঞস্স রুক্খস্স সুক্খসাখায সদ্ধিং ঘংসনমত্তেনেৰ অগ্গিনো অভিনিব্বত্তনং ৰিয ৰিনাপি ওপক্কমিকাহি ৰেদনাহি সুখাযেৰ পটিপদায লোকুত্তরমগ্গস্স অধিগমোতি. অযং উপমা ভগৰতা অত্তনো অত্থায আহটা.

৩৭৭. ইদানি অত্তনো দুক্করকারিকং দস্সেন্তো, তস্স ময্হন্তিআদিমাহ. কিং পন ভগৰা দুক্করং অকত্ৰা বুদ্ধো ভৰিতুং ন সমত্থোতি? কত্ৰাপি অকত্ৰাপি সমত্থোৰ. অথ কস্মা অকাসীতি? সদেৰকস্স লোকস্স অত্তনো পরক্কমং দস্সেস্সামি. সো চ মং ৰীরিযনিম্মথনগুণো হাসেস্সতীতি. পাসাদে নিসিন্নোযেৰ হি পৰেণিআগতং রজ্জং লভিত্ৰাপি খত্তিযো ন তথাপমুদিতো হোতি, যথা বলকাযং গহেত্ৰা সঙ্গামে দ্ৰে তযো সম্পহারে দত্ৰা অমিত্তমথনং কত্ৰা পত্তরজ্জো. এৰং পত্তরজ্জস্স হি রজ্জসিরিং অনুভৰন্তস্স পরিসং ওলোকেত্ৰা অত্তনো পরক্কমং অনুস্সরিত্ৰা, ‘‘অসুকট্ঠানে অসুককম্মং কত্ৰা অসুকঞ্চ অসুকঞ্চ অমিত্তং এৰং ৰিজ্ঝিত্ৰা এৰং পহরিত্ৰা ইমং রজ্জসিরিং পত্তোস্মী’’তি চিন্তযতো বলৰসোমনস্সং উপ্পজ্জতি. এৰমেৰং ভগৰাপি সদেৰকস্স লোকস্স পরক্কমং দস্সেস্সামি, সো হি মং পরক্কমো অতিৰিয হাসেস্সতি, সোমনস্সং উপ্পাদেস্সতীতি দুক্করমকাসি.

অপিচ পচ্ছিমং জনতং অনুকম্পমানোপি অকাসিযেৰ, পচ্ছিমা হি জনতা সম্মাসম্বুদ্ধো কপ্পসতসহস্সাধিকানি চত্তারি অসঙ্খ্যেয্যানি পারমিযো পূরেত্ৰাপি পধানং পদহিত্ৰাৰ সব্বঞ্ঞুতঞ্ঞাণং পত্তো, কিমঙ্গং পন মযন্তি পধানৰীরিযং কত্তব্বং মঞ্ঞিস্সতি; এৰং সন্তে খিপ্পমেৰ জাতিজরামরণস্স অন্তং করিস্সতীতি পচ্ছিমং জনতং অনুকম্পমানো অকাসিযেৰ.

দন্তেভিদন্তমাধাযাতি হেট্ঠাদন্তে উপরিদন্তং ঠপেত্ৰা. চেতসা চিত্তন্তি কুসলচিত্তেন অকুসলচিত্তং. অভিনিগ্গণ্হেয্যন্তি নিগ্গণ্হেয্যং. অভিনিপ্পীল়েয্যন্তি নিপ্পীল়েয্যং. অভিসন্তাপেয্যন্তি তাপেত্ৰা ৰীরিযনিম্মথনং করেয্যং. সারদ্ধোতি সদরথো. পধানাভিতুন্নস্সাতি পধানেন অভিতুন্নস্স, ৰিদ্ধস্স সতোতি অত্থো.

৩৭৮. অপ্পাণকন্তি নিরস্সাসকং. কম্মারগগ্গরিযাতি কম্মারস্স গগ্গরনাল়িযা. সীসৰেদনা হোন্তীতি কুতোচি নিক্খমিতুং অলভমানেহি ৰাতেহি সমুট্ঠাপিতা বলৰতিযো সীসৰেদনা হোন্তি. সীসৰেঠং দদেয্যাতি সীসৰেঠনং দদেয্য. দেৰতাতি বোধিসত্তস্স চঙ্কমনকোটিযং পণ্ণসালপরিৰেণসামন্তা চ অধিৰত্থা দেৰতা.

তদা কির বোধিসত্তস্স অধিমত্তে কাযদাহে উপ্পন্নে মুচ্ছা উদপাদি. সো চঙ্কমেৰ নিসিন্নো হুত্ৰা পপতি. তং দিস্ৰা দেৰতা এৰমাহংসু – ‘‘ৰিহারোত্ৰেৰ সো অরহতো’’তি, ‘‘অরহন্তো নাম এৰরূপা হোন্তি মতকসদিসা’’তি লদ্ধিযা ৰদন্তি. তত্থ যা দেৰতা ‘‘কালঙ্কতো’’তি আহংসু, তা গন্ত্ৰা সুদ্ধোদনমহারাজস্স আরোচেসুং – ‘‘তুম্হাকং পুত্তো কালঙ্কতো’’তি. মম পুত্তো বুদ্ধো হুত্ৰা কালঙ্কতো, নো অহুত্ৰাতি? বুদ্ধো ভৰিতুং নাসক্খি, পধানভূমিযংযেৰ পতিত্ৰা কালঙ্কতোতি. নাহং সদ্দহামি, মম পুত্তস্স বোধিং অপত্ৰা কালঙ্কিরিযা নাম নত্থীতি.

অপরভাগে সম্মাসম্বুদ্ধস্স ধম্মচক্কং পৰত্তেত্ৰা অনুপুব্বেন রাজগহং গন্ত্ৰা কপিলৰত্থুং অনুপ্পত্তস্স সুদ্ধোদনমহারাজা পত্তং গহেত্ৰা পাসাদং আরোপেত্ৰা যাগুখজ্জকং দত্ৰা অন্তরাভত্তসমযে এতমত্থং আরোচেসি – তুম্হাকং ভগৰা পধানকরণকালে দেৰতা আগন্ত্ৰা, ‘‘পুত্তো তে, মহারাজ, কালঙ্কতো’’তি আহংসূতি. কিং সদ্দহসি মহারাজাতি? ন ভগৰা সদ্দহিন্তি. ইদানি, মহারাজ, সুপিনপ্পটিগ্গহণতো পট্ঠায অচ্ছরিযানি পস্সন্তো কিং সদ্দহিস্সসি? অহম্পি বুদ্ধো জাতো, ত্ৰম্পি বুদ্ধপিতা জাতো, পুব্বে পন ময্হং অপরিপক্কে ঞাণে বোধিচরিযং চরন্তস্স ধম্মপালকুমারকালেপি সিপ্পং উগ্গহেতুং গতস্স, ‘‘তুম্হাকং পুত্তো ধম্মপালকুমারো কালঙ্কতো, ইদমস্স অট্ঠী’’তি এল়কট্ঠিং আহরিত্ৰা দস্সেসুং, তদাপি তুম্হে, ‘‘মম পুত্তস্স অন্তরামরণং নাম নত্থি, নাহং সদ্দহামী’’তি অৰোচুত্থ, মহারাজাতি ইমিস্সা অট্ঠুপ্পত্তিযা ভগৰা মহাধম্মপালজাতকং কথেসি.

৩৭৯. মা খো ত্ৰং মারিসাতি সম্পিযাযমানা আহংসু. দেৰতানং কিরাযং পিযমনাপৰোহারো, যদিদং মারিসাতি. অজজ্জিতন্তি অভোজনং. হলন্তি ৰদামীতি অলন্তি ৰদামি, অলং ইমিনা এৰং মা করিত্থ, যাপেস্সামহন্তি এৰং পটিসেধেমীতি অত্থো.

৩৮০-১. মঙ্গুরচ্ছৰীতি মঙ্গুরমচ্ছচ্ছৰি. এতাৰ পরমন্তি তাসম্পি ৰেদনানমেতংযেৰ পরমং, উত্তমং পমাণং. পিতু সক্কস্স কম্মন্তে…পে… পঠমং ঝানং উপসম্পজ্জ ৰিহরিতাতি রঞ্ঞো কির ৰপ্পমঙ্গলদিৰসো নাম হোতি, তদা অনেকপ্পকারং খাদনীযং ভোজনীযং পটিযাদেন্তি. নগরৰীথিযো সোধাপেত্ৰা পুণ্ণঘটে ঠপাপেত্ৰা ধজপটাকাদযো উস্সাপেত্ৰা সকলনগরং দেৰৰিমানং ৰিয অলঙ্করোন্তি. সব্বে দাসকম্মকরাদযো অহতৰত্থনিৰত্থা গন্ধমালাদিপটিমণ্ডিতা রাজকুলে সন্নিপতন্তি. রঞ্ঞো কম্মন্তে নঙ্গলসতসহস্সং যোজীযতি. তস্মিং পন দিৰসে একেন ঊনং অট্ঠসতং যোজেন্তি. সব্বনঙ্গলানি সদ্ধিং বলিবদ্দরস্মিযোত্তেহি জাণুস্সোণিস্স রথো ৰিয রজতপরিক্খিত্তানি হোন্তি. রঞ্ঞো আলম্বননঙ্গলং রত্তসুৰণ্ণপরিক্খিত্তং হোতি. বলিবদ্দানং সিঙ্গানিপি রস্মিপতোদাপি সুৰণ্ণপরিক্খিত্তা হোন্তি. রাজা মহাপরিৰারেন নিক্খমন্তো পুত্তং গহেত্ৰা অগমাসি.

কম্মন্তট্ঠানে একো জম্বুরুক্খো বহলপত্তপলাসো সন্দচ্ছাযো অহোসি. তস্স হেট্ঠা কুমারস্স সযনং পঞ্ঞপেত্ৰা উপরি সুৰণ্ণতারকখচিতং ৰিতানং বন্ধাপেত্ৰা সাণিপাকারেন পরিক্খিপাপেত্ৰা আরক্খং ঠপেত্ৰা রাজা সব্বালঙ্কারং অলঙ্করিত্ৰা অমচ্চগণপরিৰুতো নঙ্গলকরণট্ঠানং অগমাসি. তত্থ রাজা সুৰণ্ণনঙ্গলং গণ্হাতি. অমচ্চা একেনূনঅট্ঠসতরজতনঙ্গলানি গহেত্ৰা ইতো চিতো চ কসন্তি. রাজা পন ওরতো পারং গচ্ছতি, পারতো ৰা ওরং গচ্ছতি. এতস্মিং ঠানে মহাসম্পত্তি হোতি, বোধিসত্তং পরিৰারেত্ৰা নিসিন্না ধাতিযো রঞ্ঞো সম্পত্তিং পস্সিস্সামাতি অন্তোসাণিতো বহি নিক্খন্তা. বোধিসত্তো ইতো চিতো চ ওলোকেন্তো কঞ্চি অদিস্ৰা ৰেগেন উট্ঠায পল্লঙ্কং আভুজিত্ৰা আনাপানে পরিগ্গহেত্ৰা পঠমজ্ঝানং নিব্বত্তেসি. ধাতিযো খজ্জভোজ্জন্তরে ৰিচরমানা থোকং চিরাযিংসু, সেসরুক্খানং ছাযা নিৰত্তা, তস্স পন রুক্খস্স পরিমণ্ডলা হুত্ৰা অট্ঠাসি. ধাতিযো অয্যপুত্তো এককোতি ৰেগেন সাণিং উক্খিপিত্ৰা অন্তো পৰিসমানা বোধিসত্তং সযনে পল্লঙ্কেন নিসিন্নং তঞ্চ পাটিহারিযং দিস্ৰা গন্ত্ৰা রঞ্ঞো আরোচযিংসু – ‘‘কুমারো দেৰ, এৰং নিসিন্নো অঞ্ঞেসং রুক্খানং ছাযা নিৰত্তা, জম্বুরুক্খস্স পরিমণ্ডলা ঠিতা’’তি. রাজা ৰেগেনাগন্ত্ৰা পাটিহারিযং দিস্ৰা, ‘‘ইদং তে, তাত, দুতিযং ৰন্দন’’ন্তি পুত্তং ৰন্দি. ইদমেতং সন্ধায ৰুত্তং – ‘‘পিতু সক্কস্স কম্মন্তে…পে… পঠমজ্ঝানং উপসম্পজ্জ ৰিহরিতা’’তি. সিযা নু খো এসো মগ্গো বোধাযাতি ভৰেয্য নু খো এতং আনাপানস্সতিপঠমজ্ঝানং বুজ্ঝনত্থায মগ্গোতি. সতানুসারিৰিঞ্ঞাণন্তি নযিদং বোধায মগ্গো ভৰিস্সতি, আনাপানস্সতিপঠমজ্ঝানং পন ভৰিস্সতীতি এৰং একং দ্ৰে ৰারে উপ্পন্নসতিযা অনন্তরং উপ্পন্নৰিঞ্ঞাণং সতানুসারিৰিঞ্ঞাণং নাম. যং তং সুখন্তি যং তং আনাপানস্সতিপঠমজ্ঝানসুখং.

৩৮২. পচ্চুপট্ঠিতা হোন্তীতি পণ্ণসালপরিৰেণসম্মজ্জনাদিৰত্তকরণেন উপট্ঠিতা হোন্তি. বাহুল্লিকোতি পচ্চযবাহুল্লিকো. আৰত্তো বাহুল্লাযাতি রসগিদ্ধো হুত্ৰা পণীতপিণ্ডপাতাদীনং অত্থায আৰত্তো. নিব্বিজ্জ পক্কমিংসূতি উক্কণ্ঠিত্ৰা ধম্মনিযামেনেৰ পক্কন্তা বোধিসত্তস্স সম্বোধিং পত্তকালে কাযৰিৰেকস্স ওকাসদানত্থং ধম্মতায গতা. গচ্ছন্তা চ অঞ্ঞট্ঠানং অগন্ত্ৰা বারাণসিমেৰ অগমংসু. বোধিসত্তো তেসু গতেসু অদ্ধমাসং কাযৰিৰেকং লভিত্ৰা বোধিমণ্ডে অপরাজিতপল্লঙ্কে নিসীদিত্ৰা সব্বঞ্ঞুতঞ্ঞাণং পটিৰিজ্ঝি.

৩৮৩. ৰিৰিচ্চেৰ কামেহীতিআদি ভযভেরৰে ৰুত্তনযেনেৰ ৰেদিতব্বং.

৩৮৭. অভিজানামি খো পনাহন্তি অযং পাটিযেক্কো অনুসন্ধি. নিগণ্ঠো কির চিন্তেসি – ‘‘অহং সমণং গোতমং একং পঞ্হং পুচ্ছিং. সমণো গোতমো ‘অপরাপি মং, অগ্গিৰেস্সন, অপরাপি মং, অগ্গিৰেস্সনা’তি পরিযোসানং অদস্সেন্তো কথেতিযেৰ. কুপিতো নু খো’’তি? অথ ভগৰা, অগ্গিৰেস্সন, তথাগতে অনেকসতায পরিসায ধম্মং দেসেন্তে কুপিতো সমণো গোতমোতি একোপি ৰত্তা নত্থি, পরেসং বোধনত্থায পটিৰিজ্ঝনত্থায এৰ তথাগতো ধম্মং দেসেতীতি দস্সেন্তো ইমং ধম্মদেসনং আরভি. তত্থ আরব্ভাতি সন্ধায. যাৰদেৰাতি পযোজনৰিধি পরিচ্ছেদনিযমনং. ইদং ৰুত্তং হোতি – পরেসং ৰিঞ্ঞাপনমেৰ তথাগতস্স ধম্মদেসনায পযোজনং, তস্মা ন একস্সেৰ দেসেতি, যত্তকা ৰিঞ্ঞাতারো অত্থি, সব্বেসং দেসেতীতি. তস্মিংযেৰ পুরিমস্মিন্তি ইমিনা কিং দস্সেতীতি? সচ্চকো কির চিন্তেসি – ‘‘সমণো গোতমো অভিরূপো পাসাদিকো সুফুসিতং দন্তাৰরণং, জিৰ্হা মুদুকা, মধুরং ৰাক্করণং, পরিসং রঞ্জেন্তো মঞ্ঞে ৰিচরতি, অন্তো পনস্স চিত্তেকগ্গতা নত্থী’’তি. অথ ভগৰা, অগ্গিৰেস্সন, ন তথাগতো পরিসং রঞ্জেন্তো ৰিচরতি, চক্কৰাল়পরিযন্তাযপি পরিসায তথাগতো ধম্মং দেসেতি, অসল্লীনো অনুপলিত্তো এত্তকং একৰিহারী, সুঞ্ঞতফলসমাপত্তিং অনুযুত্তোতি দস্সেতুং এৰমাহ.

অজ্ঝত্তমেৰাতি গোচরজ্ঝত্তমেৰ. সন্নিসাদেমীতি সন্নিসীদাপেমি, তথাগতো হি যস্মিং খণে পরিসা সাধুকারং দেতি, তস্মিং খণে পুব্বাভোগেন পরিচ্ছিন্দিত্ৰা ফলসমাপত্তিং সমাপজ্জতি, সাধুকারসদ্দস্স নিগ্ঘোসে অৰিচ্ছিন্নেযেৰ সমাপত্তিতো ৰুট্ঠায ঠিতট্ঠানতো পট্ঠায ধম্মং দেসেতি, বুদ্ধানঞ্হি ভৰঙ্গপরিৰাসো লহুকো হোতীতি অস্সাসৰারে পস্সাসৰারে সমাপত্তিং সমাপজ্জন্তি. যেন সুদং নিচ্চকপ্পন্তি যেন সুঞ্ঞেন ফলসমাধিনা নিচ্চকালং ৰিহরামি, তস্মিং সমাধিনিমিত্তে চিত্তং সণ্ঠপেমি সমাদহামীতি দস্সেতি.

ওকপ্পনিযমেতন্তি সদ্দহনিযমেতং. এৰং ভগৰতো একগ্গচিত্ততং সম্পটিচ্ছিত্ৰা ইদানি অত্তনো ওৰট্টিকসারং কত্ৰা আনীতপঞ্হং পুচ্ছন্তো অভিজানাতি খো পন ভৰং গোতমো দিৰা সুপিতাতি আহ. যথা হি সুনখো নাম অসম্ভিন্নখীরপক্কপাযসং সপ্পিনা যোজেত্ৰা উদরপূরং ভোজিতোপি গূথং দিস্ৰা অখাদিত্ৰা গন্তুং ন সক্কা, অখাদমানো ঘাযিত্ৰাপি গচ্ছতি, অঘাযিত্ৰাৰ গতস্স কিরস্স সীসং রুজ্জতি; এৰমেৰং ইমস্সপি সত্থা অসম্ভিন্নখীরপক্কপাযসসদিসং অভিনিক্খমনতো পট্ঠায যাৰ আসৰক্খযা পসাদনীযং ধম্মদেসনং দেসেতি. এতস্স পন এৰরূপং ধম্মদেসনং সুত্ৰা সত্থরি পসাদমত্তম্পি ন উপ্পন্নং, তস্মা ওৰট্টিকসারং কত্ৰা আনীতপঞ্হং অপুচ্ছিত্ৰা গন্তুং অসক্কোন্তো এৰমাহ. তত্থ যস্মা থিনমিদ্ধং সব্বখীণাসৰানং অরহত্তমগ্গেনেৰ পহীযতি, কাযদরথো পন উপাদিন্নকেপি হোতি অনুপাদিন্নকেপি. তথা হি কমলুপ্পলাদীনি একস্মিং কালে ৰিকসন্তি, একস্মিং মকুলানি হোন্তি, সাযং কেসঞ্চি রুক্খানম্পি পত্তানি পতিলীযন্তি, পাতো ৰিপ্ফারিকানি হোন্তি. এৰং উপাদিন্নকস্স কাযস্স দরথোযেৰ দরথৰসেন ভৰঙ্গসোতঞ্চ ইধ নিদ্দাতি অধিপ্পেতং, তং খীণাসৰানম্পি হোতি. তং সন্ধায, ‘‘অভিজানামহ’’ন্তিআদিমাহ. সম্মোহৰিহারস্মিং ৰদন্তীতি সম্মোহৰিহারোতি ৰদন্তি.

৩৮৯. আসজ্জ আসজ্জাতি ঘট্টেত্ৰা ঘট্টেত্ৰা. উপনীতেহীতি উপনেত্ৰা কথিতেহি. ৰচনপ্পথেহীতি ৰচনেহি. অভিনন্দিত্ৰা অনুমোদিত্ৰাতি অলন্তি চিত্তেন সম্পটিচ্ছন্তো অভিনন্দিত্ৰা ৰাচাযপি পসংসন্তো অনুমোদিত্ৰা. ভগৰতা ইমস্স নিগণ্ঠস্স দ্ৰে সুত্তানি কথিতানি. পুরিমসুত্তং একো ভাণৰারো, ইদং দিযড্ঢো, ইতি অড্ঢতিযে ভাণৰারে সুত্ৰাপি অযং নিগণ্ঠো নেৰ অভিসমযং পত্তো, ন পব্বজিতো, ন সরণেসু পতিট্ঠিতো. কস্মা এতস্স ভগৰা ধম্মং দেসেসীতি? অনাগতে ৰাসনত্থায. পস্সতি হি ভগৰা, ‘‘ইমস্স ইদানি উপনিস্সযো নত্থি, ময্হং পন পরিনিব্বানতো সমধিকানং দ্ৰিন্নং ৰস্সসতানং অচ্চযেন তম্বপণ্ণিদীপে সাসনং পতিট্ঠহিস্সতি. তত্রাযং কুলঘরে নিব্বত্তিত্ৰা সম্পত্তে কালে পব্বজিত্ৰা তীণি পিটকানি উগ্গহেত্ৰা ৰিপস্সনং ৰড্ঢেত্ৰা সহ পটিসম্ভিদাহি অরহত্তং পত্ৰা কাল়বুদ্ধরক্খিতো নাম মহাখীণাসৰো ভৰিস্সতী’’তি. ইদং দিস্ৰা অনাগতে ৰাসনত্থায ধম্মং দেসেসি.

সোপি তত্থেৰ তম্বপণ্ণিদীপম্হি সাসনে পতিট্ঠিতে দেৰলোকতো চৰিত্ৰা দক্খিণগিরিৰিহারস্স ভিক্খাচারগামে একস্মিং অমচ্চকুলে নিব্বত্তো পব্বজ্জাসমত্থযোব্বনে পব্বজিত্ৰা তেপিটকং বুদ্ধৰচনং উগ্গহেত্ৰা গণং পরিহরন্তো মহাভিক্খুসঙ্ঘপরিৰুতো উপজ্ঝাযং পস্সিতুং অগমাসি. অথস্স উপজ্ঝাযো সদ্ধিৰিহারিকং চোদেস্সামীতি তেপিটকং বুদ্ধৰচনং উগ্গহেত্ৰা আগতেন তেন সদ্ধিং মুখং দত্ৰা কথামত্তম্পি ন অকাসি. সো পচ্চূসসমযে ৰুট্ঠায থেরস্স সন্তিকং গন্ত্ৰা, – ‘‘তুম্হে, ভন্তে, মযি গন্থকম্মং কত্ৰা তুম্হাকং সন্তিকং আগতে মুখং দত্ৰা কথামত্তম্পি ন করিত্থ, কো ময্হং দোসো’’তি পুচ্ছি. থেরো আহ – ‘‘ত্ৰং, আৰুসো, বুদ্ধরক্খিত এত্তকেনেৰ ‘পব্বজ্জাকিচ্চং মে মত্থকং পত্ত’ন্তি সঞ্ঞং করোসী’’তি. কিং করোমি, ভন্তেতি? গণং ৰিনোদেত্ৰা ত্ৰং পপঞ্চং ছিন্দিত্ৰা চেতিযপব্বতৰিহারং গন্ত্ৰা সমণধম্মং করোহীতি. সো উপজ্ঝাযস্স ওৰাদে ঠত্ৰা সহ পটিসম্ভিদাহি অরহত্তং পত্ৰা পুঞ্ঞৰা রাজপূজিতো হুত্ৰা মহাভিক্খুসঙ্ঘপরিৰারো চেতিযপব্বতৰিহারে ৰসি.

তস্মিঞ্হি কালে তিস্সমহারাজা উপোসথকম্মং করোন্তো চেতিযপব্বতে রাজলেণে ৰসতি. সো থেরস্স উপট্ঠাকভিক্খুনো সঞ্ঞং অদাসি – ‘‘যদা ময্হং অয্যো পঞ্হং ৰিস্সজ্জেতি, ধম্মং ৰা কথেতি, তদা মে সঞ্ঞং দদেয্যাথা’’তি. থেরোপি একস্মিং ধম্মস্সৰনদিৰসে ভিক্খুসঙ্ঘপরিৰারো কণ্টকচেতিযঙ্গণং আরুয্হ চেতিযং ৰন্দিত্ৰা কাল়তিম্বরুরুক্খমূলে অট্ঠাসি. অথ নং একো পিণ্ডপাতিকত্থেরো কাল়কারামসুত্তন্তে পঞ্হং পুচ্ছি. থেরো ননু, আৰুসো, অজ্জ ধম্মস্সৰনদিৰসোতি আহ. আম, ভন্তে, ধম্মস্সৰনদিৰসোতি. তেন হি পীঠকং আনেথ, ইধেৰ নিসিন্না ধম্মস্সৰনং করিস্সামাতি. অথস্স রুক্খমূলে আসনং পঞ্ঞপেত্ৰা অদংসু. থেরো পুব্বগাথা ৰত্ৰা কাল়কারামসুত্তং আরভি. সোপিস্স উপট্ঠাকদহরো রঞ্ঞো সঞ্ঞং দাপেসি. রাজা পুব্বগাথাসু অনিট্ঠিতাসুযেৰ পাপুণি. পত্ৰা চ অঞ্ঞাতকৰেসেনেৰ পরিসন্তে ঠত্ৰা তিযামরত্তিং ঠিতকোৰ ধম্মং সুত্ৰা থেরস্স, ইদমৰোচ ভগৰাতি ৰচনকালে সাধুকারং অদাসি. থেরো ঞত্ৰা, কদা আগতোসি, মহারাজাতি পুচ্ছি. পুব্বগাথা ওসারণকালেযেৰ, ভন্তেতি. দুক্করং তে মহারাজ, কতন্তি. নযিদং, ভন্তে, দুক্করং, যদি পন মে অয্যস্স ধম্মকথং আরদ্ধকালতো পট্ঠায একপদেপি অঞ্ঞৰিহিতভাৰো অহোসি, তম্বপণ্ণিদীপস্স পতোদযট্ঠিনিতুদনমত্তেপি ঠানে সামিভাৰো নাম মে মা হোতূতি সপথমকাসি.

তস্মিং পন সুত্তে বুদ্ধগুণা পরিদীপিতা, তস্মা রাজা পুচ্ছি – ‘‘এত্তকাৰ, ভন্তে, বুদ্ধগুণা, উদাহু অঞ্ঞেপি অত্থী’’তি. মযা কথিততো, মহারাজ, অকথিতমেৰ বহু অপ্পমাণন্তি. উপমং, ভন্তে, করোথাতি. যথা, মহারাজ, করীসসহস্সমত্তে সালিক্খেত্তে একসালিসীসতো অৰসেসসালীযেৰ বহূ, এৰং মযা কথিতগুণা অপ্পা, অৰসেসা বহূতি. অপরম্পি, ভন্তে, উপমং করোথাতি. যথা, মহারাজ, মহাগঙ্গায ওঘপুণ্ণায সূচিপাসং সম্মুখং করেয্য, সূচিপাসেন গতউদকং অপ্পং, সেসং বহু, এৰমেৰ মযা কথিতগুণা অপ্পা, অৰসেসা বহূতি. অপরম্পি, ভন্তে, উপমং করোথাতি. ইধ, মহারাজ, চাতকসকুণা নাম আকাসে কীল়ন্তা ৰিচরন্তি. খুদ্দকা সা সকুণজাতি, কিং নু খো তস্স সকুণস্স আকাসে পক্খপসারণট্ঠানং বহু, অৰসেসো আকাসো অপ্পোতি? কিং, ভন্তে, ৰদথ, অপ্পো তস্স পক্খপসারণোকাসো, অৰসেসোৰ বহূতি. এৰমেৰ, মহারাজ, অপ্পকা মযা বুদ্ধগুণা কথিতা, অৰসেসা বহূ অনন্তা অপ্পমেয্যাতি. সুকথিতং, ভন্তে, অনন্তা বুদ্ধগুণা অনন্তেনেৰ আকাসেন উপমিতা. পসন্না মযং অয্যস্স, অনুচ্ছৰিকং পন কাতুং ন সক্কোম. অযং মে দুগ্গতপণ্ণাকারো ইমস্মিং তম্বপণ্ণিদীপে ইমং তিযোজনসতিকং রজ্জং অয্যস্স দেমাতি. তুম্হেহি, মহারাজ, অত্তনো পসন্নাকারো কতো, মযং পন অম্হাকং দিন্নং রজ্জং তুম্হাকংযেৰ দেম, ধম্মেন সমেন রজ্জং কারেহি মহারাজাতি.

পপঞ্চসূদনিযা মজ্ঝিমনিকাযট্ঠকথায

মহাসচ্চকসুত্তৰণ্ণনা নিট্ঠিতা.

৭. চূল়তণ্হাসঙ্খযসুত্তৰণ্ণনা

৩৯০. এৰং মে সুতন্তি চূল়তণ্হাসঙ্খযসুত্তং. তত্থ পুব্বারামে মিগারমাতুপাসাদেতি পুব্বারামসঙ্খাতে ৰিহারে মিগারমাতুযা পাসাদে. তত্রাযং অনুপুব্বীকথাঅতীতে সতসহস্সকপ্পমত্থকে একা উপাসিকা পদুমুত্তরং ভগৰন্তং নিমন্তেত্ৰা বুদ্ধপ্পমুখস্স ভিক্খুসঙ্ঘস্স সতসহস্সং দানং দত্ৰা ভগৰতো পাদমূলে নিপজ্জিত্ৰা, ‘‘অনাগতে তুম্হাদিসস্স বুদ্ধস্স অগ্গুপট্ঠাযিকা হোমী’’তি পত্থনমকাসি. সা কপ্পসতসহস্সং দেৰেসু চেৰ মনুস্সেসু চ সংসরিত্ৰা অম্হাকং ভগৰতো কালে ভদ্দিযনগরে মেণ্ডকসেট্ঠিপুত্তস্স ধনঞ্জযস্স সেট্ঠিনো গহে সুমনদেৰিযা কুচ্ছিম্হি পটিসন্ধিং গণ্হি. জাতকালে চস্সা ৰিসাখাতি নামং অকংসু. সা যদা ভগৰা ভদ্দিযনগরং অগমাসি, তদা পঞ্চহি দারিকাসতেহি সদ্ধিং ভগৰতো পচ্চুগ্গমনং কত্ৰা পঠমদস্সনম্হিযেৰ সোতাপন্না অহোসি. অপরভাগে সাৰত্থিযং মিগারসেট্ঠিপুত্তস্স পুণ্ণৰড্ঢনকুমারস্স গেহং গতা, তত্থ নং মিগারসেট্ঠি মাতিট্ঠানে ঠপেসি, তস্মা মিগারমাতাতি ৰুচ্চতি.

পতিকুলং গচ্ছন্তিযা চস্সা পিতা মহালতাপিল়ন্ধনং নাম কারাপেসি. তস্মিং পিল়ন্ধনে চতস্সো ৰজিরনাল়িযো উপযোগং অগমংসু, মুত্তানং একাদস নাল়িযো, পৰাল়ানং দ্ৰাৰীসতি নাল়িযো, মণীনং তেত্তিংস নাল়িযো, ইতি এতেহি চ অঞ্ঞেহি চ সত্তৰণ্ণেহি রতনেহি নিট্ঠানং অগমাসি. তং সীসে পটিমুক্কং যাৰ পাদপিট্ঠিযা ভস্সতি, পঞ্চন্নং হত্থীনং বলং ধারযমানাৰ নং ইত্থী ধারেতুং সক্কোতি. সা অপরভাগে দসবলস্স অগ্গুপট্ঠাযিকা হুত্ৰা তং পসাধনং ৰিস্সজ্জেত্ৰা নৰহি কোটীহি ভগৰতো ৰিহারং কারযমানা করীসমত্তে ভূমিভাগে পাসাদং কারেসি. তস্স উপরিভূমিযং পঞ্চ গব্ভসতানি হোন্তি, হেট্ঠাভূমিযং পঞ্চাতি গব্ভসহস্সপ্পটিমণ্ডিতো অহোসি. সা ‘‘সুদ্ধপাসাদোৰ ন সোভতী’’তি তং পরিৰারেত্ৰা পঞ্চ দ্ৰিকূটগেহসতানি, পঞ্চ চূল়পাসাদসতানি, পঞ্চ দীঘসালসতানি চ কারাপেসি. ৰিহারমহো চতূহি মাসেহি নিট্ঠানং অগমাসি.

মাতুগামত্তভাৰে ঠিতায ৰিসাখায ৰিয অঞ্ঞিস্সা বুদ্ধসাসনে ধনপরিচ্চাগো নাম নত্থি, পুরিসত্তভাৰে ঠিতস্স চ অনাথপিণ্ডিকস্স ৰিয অঞ্ঞস্স বুদ্ধসাসনে ধনপরিচ্চাগো নাম নত্থি. সো হি চতুপঞ্ঞাসকোটিযো ৰিস্সজ্জেত্ৰা সাৰত্থিযা দক্খিণভাগে অনুরাধপুরস্স মহাৰিহারসদিসে ঠানে জেতৰনমহাৰিহারং নাম কারেসি. ৰিসাখা, সাৰত্থিযা পাচীনভাগে উত্তমদেৰীৰিহারসদিসে ঠানে পুব্বারামং নাম কারেসি. ভগৰা ইমেসং দ্ৰিন্নং কুলানং অনুকম্পায সাৰত্থিং নিস্সায ৰিহরন্তো ইমেসু দ্ৰীসু ৰিহারেসু নিবদ্ধৰাসং ৰসি. একং অন্তোৰস্সং জেতৰনে ৰসতি, একং পুব্বারামে, এতস্মিং পন সমযে ভগৰা পুব্বারামে ৰিহরতি. তেন ৰুত্তং – ‘‘পুব্বারামে মিগারমাতুপাসাদে’’তি.

কিত্তাৰতা নু খো, ভন্তেতি কিত্তকেন নু খো, ভন্তে. সংখিত্তেন তণ্হাসঙ্খযৰিমুত্তো হোতীতি তণ্হাসঙ্খযে নিব্বানে তং আরম্মণং কত্ৰা ৰিমুত্তচিত্ততায তণ্হাসঙ্খযৰিমুত্তো নাম সংখিত্তেন কিত্তাৰতা হোতি? যায পটিপত্তিযা তণ্হাসঙ্খযৰিমুত্তো হোতি, তং মে খীণাসৰস্স ভিক্খুনো পুব্বভাগপ্পটিপদং সংখিত্তেন দেসেথাতি পুচ্ছতি. অচ্চন্তনিট্ঠোতি খযৰযসঙ্খাতং অন্তং অতীতাতি অচ্চন্তা. অচ্চন্তা নিট্ঠা অস্সাতি অচ্চন্তনিট্ঠো, একন্তনিট্ঠো সততনিট্ঠোতি অত্থো. অচ্চন্তং যোগক্খেমীতি অচ্চন্তযোগক্খেমী, নিচ্চযোগক্খেমীতি অত্থো. অচ্চন্তং ব্রহ্মচারীতি অচ্চন্তব্রহ্মচারী, নিচ্চব্রহ্মচারীতি অত্থো. অচ্চন্তং পরিযোসানমস্সাতি পুরিমনযেনেৰ অচ্চন্তপরিযোসানো. সেট্ঠো দেৰমনুস্সানন্তি দেৰানঞ্চ মনুস্সানঞ্চ সেট্ঠো উত্তমো. এৰরূপো ভিক্খু কিত্তাৰতা হোতি, খিপ্পমেতস্স সঙ্খেপেনেৰ পটিপত্তিং কথেথাতি ভগৰন্তং যাচতি. কস্মা পনেস এৰং ৰেগাযতীতি? কীল়ং অনুভৰিতুকামতায.

অযং কির উয্যানকীল়ং আণাপেত্ৰা চতূহি মহারাজূহি চতূসু দিসাসু আরক্খং গাহাপেত্ৰা দ্ৰীসু দেৰলোকেসু দেৰসঙ্ঘেন পরিৰুতো অড্ঢতিযাহি নাটককোটীহি সদ্ধিং এরাৰণং আরুয্হ উয্যানদ্ৰারে ঠিতো ইমং পঞ্হং সল্লক্খেসি – ‘‘কিত্তকেন নু খো তণ্হাসঙ্খযৰিমুত্তস্স খীণাসৰস্স সঙ্খেপতো আগমনিযপুব্বভাগপটিপদা হোতী’’তি. অথস্স এতদহোসি – ‘‘অযং পঞ্হো অতিৰিয সস্সিরিকো, সচাহং ইমং পঞ্হং অনুগ্গণ্হিত্ৰাৰ উয্যানং পৰিসিস্সামি, ছদ্ৰারিকেহি আরম্মণেহি নিম্মথিতো ন পুন ইমং পঞ্হং সল্লক্খেস্সামি, তিট্ঠতু তাৰ উয্যানকীল়া, সত্থু সন্তিকং গন্ত্ৰা ইমং পঞ্হং পুচ্ছিত্ৰা উগ্গহিতপঞ্হো উয্যানে কীল়িস্সামী’’তি হত্থিক্খন্ধে অন্তরহিতো ভগৰতো সন্তিকে পাতুরহোসি. তেপি চত্তারো মহারাজানো আরক্খং গহেত্ৰা ঠিতট্ঠানেযেৰ ঠিতা, পরিচারিকদেৰসঙ্ঘাপি নাটকানিপি এরাৰণোপি নাগরাজা তত্থেৰ উয্যানদ্ৰারে অট্ঠাসি, এৰমেস কীল়ং অনুভৰিতুকামতায ৰেগাযন্তো এৰমাহ.

সব্বে ধম্মা নালং অভিনিৰেসাযাতি এত্থ সব্বে ধম্মা নাম পঞ্চক্খন্ধা দ্ৰাদসাযতনানি অট্ঠারস ধাতুযো. তে সব্বেপি তণ্হাদিট্ঠিৰসেন অভিনিৰেসায নালং ন পরিযত্তা ন সমত্থা ন যুত্তা, কস্মা? গহিতাকারেন অতিট্ঠনতো. তে হি নিচ্চাতি গহিতাপি অনিচ্চাৰ সম্পজ্জন্তি, সুখাতি গহিতাপি দুক্খাৰ সম্পজ্জন্তি, অত্তাতি গহিতাপি অনত্তাৰ সম্পজ্জন্তি, তস্মা নালং অভিনিৰেসায. অভিজানাতীতি অনিচ্চং দুক্খং অনত্তাতি ঞাতপরিঞ্ঞায অভিজানাতি. পরিজানাতীতি তথেৰ তীরণপরিঞ্ঞায পরিজানাতি. যংকিঞ্চি ৰেদনন্তি অন্তমসো পঞ্চৰিঞ্ঞাণসম্পযুত্তম্পি যংকিঞ্চি অপ্পমত্তকম্পি ৰেদনং অনুভৰতি. ইমিনা ভগৰা সক্কস্স দেৰানমিন্দস্স ৰেদনাৰসেন নিব্বত্তেত্ৰা অরূপপরিগ্গহং দস্সেতি. সচে পন ৰেদনাকম্মট্ঠানং হেট্ঠা ন কথিতং ভৰেয্য, ইমস্মিং ঠানে কথেতব্বং সিযা. হেট্ঠা পন কথিতং, তস্মা সতিপট্ঠানে ৰুত্তনযেনেৰ ৰেদিতব্বং. অনিচ্চানুপস্সীতি এত্থ অনিচ্চং ৰেদিতব্বং, অনিচ্চানুপস্সনা ৰেদিতব্বা, অনিচ্চানুপস্সী ৰেদিতব্বো. তত্থ অনিচ্চন্তি পঞ্চক্খন্ধা, তে হি উপ্পাদৰযট্ঠেন অনিচ্চা. অনিচ্চানুপস্সনাতি পঞ্চক্খন্ধানং খযতো ৰযতো দস্সনঞাণং. অনিচ্চানুপস্সীতি তেন ঞাণেন সমন্নাগতো পুগ্গলো. তস্মা ‘‘অনিচ্চানুপস্সী ৰিহরতী’’তি অনিচ্চতো অনুপস্সন্তো ৰিহরতীতি অযমেত্থ অত্থো.

ৰিরাগানুপস্সীতি এত্থ দ্ৰে ৰিরাগা খযৰিরাগো চ অচ্চন্তৰিরাগো চ. তত্থ সঙ্খারানং খযৰযতো অনুপস্সনাপি, অচ্চন্তৰিরাগং নিব্বানং ৰিরাগতো দস্সনমগ্গঞাণম্পি ৰিরাগানুপস্সনা. তদুভযসমাঙ্গীপুগ্গলো ৰিরাগানুপস্সী নাম, তং সন্ধায ৰুত্তং ‘‘ৰিরাগানুপস্সী’’তি, ৰিরাগতো অনুপস্সন্তোতি অত্থো. নিরোধানুপস্সিম্হিপি এসেৰ নযো, নিরোধোপি হি খযনিরোধো চ অচ্চন্তনিরোধো চাতি দুৰিধোযেৰ. পটিনিস্সগ্গানুপস্সীতি এত্থ পটিনিস্সগ্গো ৰুচ্চতি ৰোস্সগ্গো, সো চ পরিচ্চাগৰোস্সগ্গো পক্খন্দনৰোস্সগ্গোতি দুৰিধো হোতি. তত্থ পরিচ্চাগৰোস্সগ্গোতি ৰিপস্সনা, সা হি তদঙ্গৰসেন কিলেসে চ খন্ধে চ ৰোস্সজ্জতি. পক্খন্দনৰোস্সগ্গোতি মগ্গো, সো হি নিব্বানং আরম্মণং আরম্মণতো পক্খন্দতি. দ্ৰীহিপি ৰা কারণেহি ৰোস্সগ্গোযেৰ, সমুচ্ছেদৰসেন খন্ধানং কিলেসানঞ্চ ৰোস্সজ্জনতো, নিব্বানঞ্চ পক্খন্দনতো. তস্মা কিলেসে চ খন্ধে চ পরিচ্চজতীতি পরিচ্চাগৰোস্সগ্গো, নিরোধে নিব্বানধাতুযা চিত্তং পক্খন্দতীতি পক্খন্দনৰোস্সগ্গোতি উভযম্পেতং মগ্গে সমেতি. তদুভযসমঙ্গীপুগ্গলো ইমায পটিনিস্সগ্গানুপস্সনায সমন্নাগতত্তা পটিনিস্সগ্গানুপস্সী নাম হোতি. তং সন্ধায ৰুত্তং ‘‘পটিনিস্সগ্গানুপস্সী’’তি. ন কিঞ্চি লোকে উপাদিযতীতি কিঞ্চি একম্পি সঙ্খারগতং তণ্হাৰসেন ন উপাদিযতি ন গণ্হাতি ন পরামসতি. অনুপাদিযং ন পরিতস্সতীতি অগ্গণ্হন্তো তণ্হাপরিতস্সনায ন পরিতস্সতি. পচ্চত্তঞ্ঞেৰ পরিনিব্বাযতীতি সযমেৰ কিলেসপরিনিব্বানেন পরিনিব্বাযতি. খীণা জাতীতিআদিনা পনস্স পচ্চৰেক্খণাৰ দস্সিতা. ইতি ভগৰা সক্কস্স দেৰানমিন্দস্স সংখিত্তেন খীণাসৰস্স পুব্বভাগপ্পটিপদং পুচ্ছিতো সল্লহুকং কত্ৰা সংখিত্তেনেৰ খিপ্পং কথেসি.

৩৯১. অৰিদূরে নিসিন্নো হোতীতি অনন্তরে কূটাগারে নিসিন্নো হোতি. অভিসমেচ্চাতি ঞাণেন অভিসমাগন্ত্ৰা, জানিত্ৰাতি অত্থো. ইদং ৰুত্তং হোতি – কিং নু খো এস জানিত্ৰা অনুমোদি, উদাহু অজানিত্ৰা ৰাতি. কস্মা পনস্স এৰমহোসীতি? থেরো কির ন ভগৰতো পঞ্হৰিস্সজ্জনসদ্দং অস্সোসি, সক্কস্স পন দেৰরঞ্ঞো, ‘‘এৰমেতং ভগৰা এৰমেতং সুগতা’’তি অনুমোদনসদ্দং অস্সোসি. সক্কো কির দেৰরাজা মহতা সদ্দেন অনুমোদি. অথ কস্মা ন ভগৰতো সদ্দং অস্সোসীতি? যথাপরিসৰিঞ্ঞাপকত্তা. বুদ্ধানঞ্হি ধম্মং কথেন্তানং একাবদ্ধায চক্কৰাল়পরিযন্তাযপি পরিসায সদ্দো সুয্যতি, পরিযন্তং পন মুঞ্চিত্ৰা অঙ্গুলিমত্তম্পি বহিদ্ধা ন নিচ্ছরতি. কস্মা? এৰরূপা মধুরকথা মা নিরত্থকা অগমাসীতি. তদা ভগৰা মিগারমাতুপাসাদে সত্তরতনমযে কূটাগারে সিরিগব্ভম্হি নিসিন্নো হোতি, তস্স দক্খিণপস্সে সারিপুত্তত্থেরস্স ৰসনকূটাগারং, ৰামপস্সে মহামোগ্গল্লানস্স, অন্তরে ছিদ্দৰিৰরোকাসো নত্থি, তস্মা থেরো ন ভগৰতো সদ্দং অস্সোসি, সক্কস্সেৰ অস্সোসীতি.

পঞ্চহি তূরিযসতেহীতি পঞ্চঙ্গিকানং তূরিযানং পঞ্চহি সতেহি. পঞ্চঙ্গিকং তূরিযং নাম আততং ৰিততং আততৰিততং সুসিরং ঘনন্তি ইমেহি পঞ্চহি অঙ্গেহি সমন্নাগতং. তত্থ আততং নাম চম্মপরিযোনদ্ধেসু ভেরিআদীসু একতলতূরিযং. ৰিততং নাম উভযতলং. আততৰিততং নাম তন্তিবদ্ধপণৰাদি. সুসিরং ৰংসাদি. ঘনং সম্মাদি. সমপ্পিতোতি উপগতো. সমঙ্গীভূতোতি তস্সেৰ ৰেৰচনং. পরিচারেতীতি তং সম্পত্তিং অনুভৰন্তো ততো ততো ইন্দ্রিযানি চারেতি. ইদং ৰুত্তং হোতি – পরিৰারেত্ৰা ৰজ্জমানেহি পঞ্চহি তূরিযসতেহি সমন্নাগতো হুত্ৰা দিব্বসম্পত্তিং অনুভৰতী. পটিপণামেত্ৰাতি অপনেত্ৰা, নিস্সদ্দানি কারাপেত্ৰাতি অত্থো. যথেৰ হি ইদানি সদ্ধা রাজানো গরুভাৰনিযং ভিক্খুং দিস্ৰা – ‘‘অসুকো নাম অয্যো আগচ্ছতি, মা, তাতা, গাযথ, মা ৰাদেথ, মা নচ্চথা’’তি নাটকানি পটিৰিনেন্তি, সক্কোপি থেরং দিস্ৰা এৰমকাসি. চিরস্সং খো, মারিস মোগ্গল্লান, ইমং পরিযাযমকাসীতি এৰরূপং লোকে পকতিযা পিযসমুদাহারৰচনং হোতি, লোকিযা হি চিরস্সং আগতম্পি অনাগতপুব্বম্পি মনাপজাতিযং আগতং দিস্ৰা, – ‘‘কুতো ভৰং আগতো, চিরস্সং ভৰং আগতো, কথং তে ইধাগমনমগ্গো ঞাতো মগ্গমূল়্হোসী’’তিআদীনি ৰদন্তি. অযং পন আগতপুব্বত্তাযেৰ এৰমাহ. থেরো হি কালেন কালং দেৰচারিকং গচ্ছতিযেৰ. তত্থ পরিযাযমকাসীতি ৰারমকাসি. যদিদং ইধাগমনাযাতি যো অযং ইধাগমনায ৰারো, তং, ভন্তে, চিরস্সমকাসীতি ৰুত্তং হোতি. ইদমাসনং পঞ্ঞত্তন্তি যোজনিকং মণিপল্লঙ্কং পঞ্ঞপাপেত্ৰা এৰমাহ.

৩৯২. বহুকিচ্চা বহুকরণীযাতি এত্থ যেসং বহূনি কিচ্চানি, তে বহুকিচ্চা. বহুকরণীযাতি তস্সেৰ ৰেৰচনং. অপ্পেৰ সকেন করণীযেনাতি সকরণীযমেৰ অপ্পং মন্দং, ন বহু, দেৰানং করণীযং পন বহু, পথৰিতো পট্ঠায হি কপ্পরুক্খমাতুগামাদীনং অত্থায অট্টা সক্কস্স সন্তিকে ছিজ্জন্তি, তস্মা নিযমেন্তো আহ – অপিচ দেৰানংযেৰ তাৰতিংসানং করণীযেনাতি. দেৰানঞ্হি ধীতা চ পুত্তা চ অঙ্কে নিব্বত্তন্তি, পাদপরিচারিকা ইত্থিযো সযনে নিব্বত্তন্তি, তাসং মণ্ডনপসাধনকারিকা দেৰধীতা সযনং পরিৰারেত্ৰা নিব্বত্তন্তি, ৰেয্যাৰচ্চকরা অন্তোৰিমানে নিব্বত্তন্তি, এতেসং অত্থায অট্টকরণং নত্থি. যে পন সীমন্তরে নিব্বত্তন্তি, তে ‘‘মম সন্তকা তৰ সন্তকা’’তি নিচ্ছেতুং অসক্কোন্তা অট্টং করোন্তি, সক্কং দেৰরাজানং পুচ্ছন্তি, সো যস্স ৰিমানং আসন্নতরং, তস্স সন্তকোতি ৰদতি. সচে দ্ৰেপি সমট্ঠানে হোন্তি, যস্স ৰিমানং ওলোকেন্তো ঠিতো, তস্স সন্তকোতি ৰদতি. সচে একম্পি ন ওলোকেতি, তং উভিন্নং কলহুপচ্ছেদনত্থং অত্তনো সন্তকং করোতি. তং সন্ধায, ‘‘দেৰানংযেৰ তাৰতিংসানং করণীযেনা’’তি আহ. অপিচস্স এৰরূপং কীল়াকিচ্চম্পি করণীযমেৰ.

যং নো খিপ্পমেৰ অন্তরধাযতীতি যং অম্হাকং সীঘমেৰ অন্ধকারে রূপগতং ৰিয ন দিস্সতি. ইমিনা – ‘‘অহং, ভন্তে, তং পঞ্হৰিস্সজ্জনং ন সল্লক্খেমী’’তি দীপেতি. থেরো – ‘‘কস্মা নু খো অযং যক্খো অসল্লক্খণভাৰং দীপেতি, পস্সেন পরিহরতী’’তি আৰজ্জন্তো – ‘‘দেৰা নাম মহামূল়্হা হোন্তি. ছদ্ৰারিকেহি আরম্মণেহি নিম্মথীযমানা অত্তনো ভুত্তাভুত্তভাৰম্পি পীতাপীতভাৰম্পি ন জানন্তি, ইধ কতমেত্থ পমুস্সন্তী’’তি অঞ্ঞাসি. কেচি পনাহু – ‘‘থেরো এতস্স গরু ভাৰনিযো, তস্মা ‘ইদানেৰ লোকে অগ্গপুগ্গলস্স সন্তিকে পঞ্হং উগ্গহেত্ৰা আগতো, ইদানেৰ নাটকানং অন্তরং পৰিট্ঠোতি এৰং মং থেরো তজ্জেয্যা’তি ভযেন এৰমাহা’’তি. এতং পন কোহঞ্ঞং নাম হোতি, ন অরিযসাৰকস্স এৰরূপং কোহঞ্ঞং নাম হোতি, তস্মা মূল়্হভাৰেনেৰ ন সল্লক্খেসীতি ৰেদিতব্বং. উপরি কস্মা সল্লক্খেসীতি? থেরো তস্স সোমনস্সসংৰেগং জনযিত্ৰা তমং নীহরি, তস্মা সল্লক্খেসীতি.

ইদানি সক্কো পুব্বে অত্তনো এৰং ভূতকারণং থেরস্স আরোচেতুং ভূতপুব্বন্তিআদিমাহ. তত্থ সমুপব্যূল়্হোতি সন্নিপতিতো রাসিভূতো. অসুরা পরাজিনিংসূতি অসুরা পরাজযং পাপুণিংসু. কদা পনেতে পরাজিতাতি? সক্কস্স নিব্বত্তকালে. সক্কো কির অনন্তরে অত্তভাৰে মগধরট্ঠে মচলগামে মঘো নাম মাণৰো অহোসি, পণ্ডিতো ব্যত্তো, বোধিসত্তচরিযা ৰিযস্স চরিযা অহোসি. সো তেত্তিংস পুরিসে গহেত্ৰা কল্যাণমকাসি. একদিৰসং অত্তনোৰ পঞ্ঞায উপপরিক্খিত্ৰা গামমজ্ঝে মহাজনস্স সন্নিপতিতট্ঠানে কচৰরং উভযতো অপব্বহিত্ৰা তং ঠানং অতিরমণীযমকাসি, পুন তত্থেৰ মণ্ডপং কারেসি, পুন গচ্ছন্তে কালে সালং কারেসি. গামতো চ নিক্খমিত্ৰা গাৰুতম্পি অড্ঢযোজনম্পি তিগাৰুতম্পি যোজনম্পি ৰিচরিত্ৰা তেহি সহাযেহি সদ্ধিং ৰিসমং সমং অকাসি. তে সব্বেপি একচ্ছন্দা তত্থ তত্থ সেতুযুত্তট্ঠানেসু সেতুং, মণ্ডপসালাপোক্খরণীমালাগচ্ছরোপনাদীনং যুত্তট্ঠানেসু মণ্ডপাদীনি করোন্তা বহুং পুঞ্ঞমকংসু. মঘো সত্ত ৰতপদানি পূরেত্ৰা কাযস্স ভেদা সদ্ধিং সহাযেহি তাৰতিংসভৰনে নিব্বত্তি.

তস্মিং কালে অসুরগণা তাৰতিংসদেৰলোকে পটিৰসন্তি. সব্বে তে দেৰানং সমানাযুকা সমানৰণ্ণা চ হোন্তি, তে সক্কং সপরিসং দিস্ৰা অধুনা নিব্বত্তা নৰকদেৰপুত্তা আগতাতি মহাপানং সজ্জযিংসু. সক্কো দেৰপুত্তানং সঞ্ঞং অদাসি – ‘‘অম্হেহি কুসলং করোন্তেহি ন পরেহি সদ্ধিং সাধারণং কতং, তুম্হে গণ্ডপানং মা পিৰিত্থ পীতমত্তমেৰ করোথা’’তি. তে তথা অকংসু. বালঅসুরা গণ্ডপানং পিৰিত্ৰা মত্তা নিদ্দং ওক্কমিংসু. সক্কো দেৰানং সঞ্ঞং দত্ৰা তে পাদেসু গাহাপেত্ৰা সিনেরুপাদে খিপাপেসি, সিনেরুস্স হেট্ঠিমতলে অসুরভৰনং নাম অত্থি, তাৰতিংসদেৰলোকপ্পমাণমেৰ. তত্থ অসুরা ৰসন্তি. তেসম্পি চিত্তপাটলি নাম রুক্খো অত্থি. তে তস্স পুপ্ফনকালে জানন্তি – ‘‘নাযং তাৰতিংসা, সক্কেন ৰঞ্চিতা ময’’ন্তি. তে গণ্হথ নন্তি ৰত্ৰা সিনেরুং পরিহরমানা দেৰে ৰুট্ঠে ৰম্মিকপাদতো ৰম্মিকমক্খিকা ৰিয অভিরুহিংসু. তত্থ কালেন দেৰা জিনন্তি, কালেন অসুরা. যদা দেৰানং জযো হোতি, অসুরে যাৰ সমুদ্দপিট্ঠা অনুবন্ধন্তি. যদা অসুরানং জযো হোতি, দেৰে যাৰ ৰেদিকপাদা অনুবন্ধন্তি. তস্মিং পন সঙ্গামে দেৰানং জযো অহোসি, দেৰা অসুরে যাৰ সমুদ্দপিট্ঠা অনুবন্ধিংসু. সক্কো অসুরে পলাপেত্ৰা পঞ্চসু ঠানেসু আরক্খং ঠপেসি. এৰং আরক্খং দত্ৰা ৰেদিকপাদে ৰজিরহত্থা ইন্দপটিমাযো ঠপেসি. অসুরা কালেন কালং উট্ঠহিত্ৰা তা পটিমাযো দিস্ৰা, ‘‘সক্কো অপ্পমত্তো তিট্ঠতী’’তি ততোৰ নিৰত্তন্তি. ততো পটিনিৰত্তিত্ৰাতি ৰিজিতট্ঠানতো নিৰত্তিত্ৰা. পরিচারিকাযোতি মালাগন্ধাদিকম্মকারিকাযো.

৩৯৩. ৰেস্সৰণো চ মহারাজাতি সো কির সক্কস্স ৰল্লভো, বলৰৰিস্সাসিকো, তস্মা সক্কেন সদ্ধিং অগমাসি. পুরক্খত্ৰাতি পুরতো কত্ৰা. পৰিসিংসূতি পৰিসিত্ৰা পন উপড্ঢপিহিতানি দ্ৰারানি কত্ৰা ওলোকযমানা অট্ঠংসু. ইদম্পি, মারিস মোগ্গল্লান, পস্স ৰেজযন্তস্স পাসাদস্স রামণেয্যকন্তি, মারিস মোগ্গল্লান, ইদম্পি ৰেজযন্তস্স পাসাদস্স রামণেয্যকং পস্স, সুৰণ্ণত্থম্ভে পস্স, রজতত্থম্ভে মণিত্থম্ভে পৰাল়ত্থম্ভে লোহিতঙ্গত্থম্ভে মসারগল্লত্থম্ভে মুত্তত্থম্ভে সত্তরতনত্থম্ভে, তেসংযেৰ সুৰণ্ণাদিমযে ঘটকে ৰাল়রূপকানি চ পস্সাতি এৰং থম্ভপন্তিযো আদিং কত্ৰা রামণেয্যকং দস্সেন্তো এৰমাহ. যথা তং পুব্বেকতপুঞ্ঞস্সাতি যথা পুব্বে কতপুঞ্ঞস্স উপভোগট্ঠানেন সোভিতব্বং, এৰমেৰং সোভতীতি অত্থো. অতিবাল়্হং খো অযং যক্খো পমত্তো ৰিহরতীতি অত্তনো পাসাদে নাটকপরিৰারেন সম্পত্তিযা ৰসেন অতিৰিয মত্তো.

ইদ্ধাভিসঙ্খারং অভিসঙ্খাসীতি ইদ্ধিমকাসি. আপোকসিণং সমাপজ্জিত্ৰা পাসাদপতিট্ঠিতোকাসং উদকং হোতূতি ইদ্ধিং অধিট্ঠায পাসাদকণ্ণিকে পাদঙ্গুট্ঠকেন পহরি. সো পাসাদো যথা নাম উদকপিট্ঠে ঠপিতপত্তং মুখৰট্টিযং অঙ্গুলিযা পহটং অপরাপরং কম্পতি চলতি ন সন্তিট্ঠতি. এৰমেৰং সংকম্পি সম্পকম্পি সম্পৰেধি, থম্ভপিট্ঠসঙ্ঘাটকণ্ণিকগোপানসিআদীনি করকরাতি সদ্দং মুঞ্চন্তানি পতিতুং ৰিয আরদ্ধানি. তেন ৰুত্তং – ‘‘সঙ্কম্পেসি সম্পকম্পেসি সম্পৰেধেসী’’তি. অচ্ছরিযব্ভুতচিত্তজাতাতি অহো অচ্ছরিযং, অহো অব্ভুতন্তি এৰং সঞ্জাতঅচ্ছরিযঅব্ভুতা চেৰ সঞ্জাততুট্ঠিনো চ অহেসুং উপ্পন্নবলৰসোমনস্সা. সংৰিগ্গন্তি উব্বিগ্গং. লোমহট্ঠজাতন্তি জাতলোমহংসং, কঞ্চনভিত্তিযং ঠপিতমণিনাগদন্তেহি ৰিয উদ্ধগ্গেহি লোমেহি আকিণ্ণসরীরন্তি অত্থো. লোমহংসো চ নামেস সোমনস্সেনপি হোতি দোমনস্সেনপি, ইধ পন সোমনস্সেন জাতো. থেরো হি সক্কস্স সোমনস্সৰেগেন সংৰেজেতুং তং পাটিহারিযমকাসি. তস্মা সোমনস্সৰেগেন সংৰিগ্গলোমহট্ঠং ৰিদিত্ৰাতি অত্থো.

৩৯৪. ইধাহং, মারিসাতি ইদানিস্স যস্মা থেরেন সোমনস্সসংৰেগং জনযিত্ৰা তমং ৰিনোদিতং, তস্মা সল্লক্খেত্ৰা এৰমাহ. এসো নু তে, মারিস, সো ভগৰা সত্থাতি, মারিস, ত্ৰং কুহিং গতোসীতি ৰুত্তে ময্হং সত্থু সন্তিকন্তি ৰদেসি, ইমস্মিং দেৰলোকে একপাদকেন ৰিয তিট্ঠসি, যং ত্ৰং এৰং ৰদেসি, এসো নু তে, মারিস, সো ভগৰা সত্থাতি পুচ্ছিংসু. সব্রহ্মচারী মে এসোতি এত্থ কিঞ্চাপি থেরো অনগারিযো অভিনীহারসম্পন্নো অগ্গসাৰকো, সক্কো অগারিযো, মগ্গব্রহ্মচরিযৰসেন পনেতে সব্রহ্মচারিনো হোন্তি, তস্মা এৰমাহ. অহো নূন তে সো ভগৰা সত্থাতি সব্রহ্মচারী তাৰ তে এৰংমহিদ্ধিকো, সো পন তে ভগৰা সত্থা অহো নূন মহিদ্ধিকোতি সত্থু ইদ্ধিপাটিহারিযদস্সনে জাতাভিলাপা হুত্ৰা এৰমাহংসু.

৩৯৫. ঞাতঞ্ঞতরস্সাতি পঞ্ঞাতঞ্ঞতরস্স, সক্কো হি পঞ্ঞাতানং অঞ্ঞতরো. সেসং সব্বত্থ পাকটমেৰ, দেসনং পন ভগৰা যথানুসন্ধিনাৰ নিট্ঠাপেসীতি.

পপঞ্চসূদনিযা মজ্ঝিমনিকাযট্ঠকথায

চূল়তণ্হাসঙ্খযসুত্তৰণ্ণনা নিট্ঠিতা.

৮. মহাতণ্হাসঙ্খযসুত্তৰণ্ণনা

৩৯৬. এৰং মে সুতন্তি মহাতণ্হাসঙ্খযসুত্তং. তত্থ দিট্ঠিগতন্তি অলগদ্দূপমসুত্তে লদ্ধিমত্তং দিট্ঠিগতন্তি ৰুত্তং, ইধ সস্সতদিট্ঠি. সো চ ভিক্খু বহুস্সুতো, অযং অপ্পস্সুতো, জাতকভাণকো ভগৰন্তং জাতকং কথেত্ৰা, ‘‘অহং, ভিক্খৰে, তেন সমযেন ৰেস্সন্তরো অহোসিং, মহোসধো, ৰিধুরপণ্ডিতো, সেনকপণ্ডিতো, মহাজনকো রাজা অহোসি’’ন্তি সমোধানেন্তং সুণাতি. অথস্স এতদহোসি – ‘‘ইমে রূপৰেদনাসঞ্ঞাসঙ্খারা তত্থ তত্থেৰ নিরুজ্ঝন্তি, ৰিঞ্ঞাণং পন ইধলোকতো পরলোকং, পরলোকতো ইমং লোকং সন্ধাৰতি সংসরতী’’তি সস্সতদস্সনং উপ্পন্নং. তেনাহ – ‘‘তদেৰিদং ৰিঞ্ঞাণং সন্ধাৰতি সংসরতি অনঞ্ঞ’’ন্তি.

সম্মাসম্বুদ্ধেন পন, ‘‘ৰিঞ্ঞাণং পচ্চযসম্ভৰং, সতি পচ্চযে উপ্পজ্জতি, ৰিনা পচ্চযং নত্থি ৰিঞ্ঞাণস্স সম্ভৰো’’তি ৰুত্তং. তস্মা অযং ভিক্খু বুদ্ধেন অকথিতং কথেতি, জিনচক্কে পহারং দেতি, ৰেসারজ্জঞাণং পটিবাহতি, সোতুকামং জনং ৰিসংৰাদেতি, অরিযপথে তিরিযং নিপতিত্ৰা মহাজনস্স অহিতায দুক্খায পটিপন্নো. যথা নাম রঞ্ঞো রজ্জে মহাচোরো উপ্পজ্জমানো মহাজনস্স অহিতায দুক্খায উপ্পজ্জতি, এৰং জিনসাসনে চোরো হুত্ৰা মহাজনস্স অহিতায দুক্খায উপ্পন্নোতি ৰেদিতব্বো. সম্বহুলা ভিক্খূতি জনপদৰাসিনো পিণ্ডপাতিকভিক্খূ. তেনুপসঙ্কমিংসূতি অযং পরিসং লভিত্ৰা সাসনম্পি অন্তরধাপেয্য, যাৰ পক্খং ন লভতি, তাৰদেৰ নং দিট্ঠিগতা ৰিৰেচেমাতি সুতসুতট্ঠানতোযেৰ অট্ঠত্ৰা অনিসীদিত্ৰা উপসঙ্কমিংসু.

৩৯৮. কতমং তং সাতি ৰিঞ্ঞাণন্তি সাতি যং ত্ৰং ৰিঞ্ঞাণং সন্ধায ৰদেসি, কতমং তং ৰিঞ্ঞাণন্তি? য্ৰাযং, ভন্তে, ৰদো ৰেদেয্যো তত্র তত্র কল্যাণপাপকানং কম্মানং ৰিপাকং পটিসংৰেদেতীতি, ভন্তে, যো অযং ৰদতি ৰেদযতি, যো চাযং তহিং তহিং কুসলাকুসলকম্মানং ৰিপাকং পচ্চনুভোতি. ইদং, ভন্তে, ৰিঞ্ঞাণং, যমহং সন্ধায ৰদেমীতি. কস্স নু খো নামাতি কস্স খত্তিযস্স ৰা ব্রাহ্মণস্স ৰা ৰেস্সসুদ্দগহট্ঠপব্বজিতদেৰমনুস্সানং ৰা অঞ্ঞতরস্স.

৩৯৯. অথ খো ভগৰা ভিক্খূ আমন্তেসীতি কস্মা আমন্তেসি? সাতিস্স কির এৰং অহোসি – ‘‘সত্থা মং ‘মোঘপুরিসো’তি ৰদতি, ন চ মোঘপুরিসোতি ৰুত্তমত্তেনেৰ মগ্গফলানং উপনিস্সযো ন হোতি. উপসেনম্পি হি ৰঙ্গন্তপুত্তং, ‘অতিলহুং খো ত্ৰং মোঘপুরিস বাহুল্লায আৰত্তো’তি (মহাৰ. ৭৫) ভগৰা মোঘপুরিসৰাদেন ওৰদি. থেরো অপরভাগে ঘটেন্তো ৰাযমন্তো ছ অভিঞ্ঞা সচ্ছাকাসি. অহম্পি তথারূপং ৰীরিযং পগ্গণ্হিত্ৰা মগ্গফলানি নিব্বত্তেস্সামী’’তি. অথস্স ভগৰা ছিন্নপচ্চযো অযং সাসনে অৰিরুল়্হধম্মোতি দস্সেন্তো ভিক্খূ আমন্তেসি. উস্মীকতোতিআদি হেট্ঠা ৰুত্তাধিপ্পাযমেৰ. অথ খো ভগৰাতি অযম্পি পাটিযেক্কো অনুসন্ধি. সাতিস্স কির এতদহোসি – ‘‘ভগৰা ময্হং মগ্গফলানং উপনিস্সযো নত্থীতি ৰদতি, কিং সক্কা উপনিস্সযে অসতি কাতুং? ন হি তথাগতা সউপনিস্সযস্সেৰ ধম্মং দেসেন্তি, যস্স কস্সচি দেসেন্তিযেৰ. অহং বুদ্ধস্স সন্তিকা সুগতোৰাদং লভিত্ৰা সগ্গসম্পত্তূপগং কুসলং করিস্সামী’’তি. অথস্স ভগৰা, ‘‘নাহং, মোঘপুরিস, তুয্হং ওৰাদং ৰা অনুসাসনিং ৰা দেমী’’তি সুগতোৰাদং পটিপ্পস্সম্ভেন্তো ইমং দেসনং আরভি. তস্সত্থো হেট্ঠা ৰুত্তনযেনেৰ ৰেদিতব্বো. ইদানি পরিসায লদ্ধিং সোধেন্তো, ‘‘ইধাহং ভিক্খূ পটিপুচ্ছিস্সামী’’তিআদিমাহ. তং সব্বম্পি হেট্ঠা ৰুত্তনযেনেৰ ৰেদিতব্বং.

৪০০. ইদানি ৰিঞ্ঞাণস্স সপ্পচ্চযভাৰং দস্সেতুং যং যদেৰ, ভিক্খৰেতিআদিমাহ. তত্থ মনঞ্চ পটিচ্চ ধম্মে চাতি সহাৰজ্জনেন ভৰঙ্গমনঞ্চ তেভূমকধম্মে চ পটিচ্চ. কট্ঠঞ্চ পটিচ্চাতিআদি ওপম্মনিদস্সনত্থং ৰুত্তং. তেন কিং দীপেতি? দ্ৰারসঙ্কন্তিযা অভাৰং. যথা হি কট্ঠং পটিচ্চ জলমানো অগ্গি উপাদানপচ্চযে সতিযেৰ জলতি, তস্মিং অসতি পচ্চযৰেকল্লেন তত্থেৰ ৰূপসম্মতি, ন সকলিকাদীনি সঙ্কমিত্ৰা সকলিকগ্গীতিআদিসঙ্খ্যং গচ্ছতি, এৰমেৰ চক্খুঞ্চ পটিচ্চ রূপে চ উপ্পন্নং ৰিঞ্ঞাণং তস্মিং দ্ৰারে চক্খুরূপআলোকমনসিকারসঙ্খাতে পচ্চযম্হি সতিযেৰ উপ্পজ্জতি, তস্মিং অসতি পচ্চযৰেকল্লেন তত্থেৰ নিরুজ্ঝতি, ন সোতাদীনি সঙ্কমিত্ৰা সোতৰিঞ্ঞাণন্তিআদিসঙ্খ্যং গচ্ছতি. এস নযো সব্বৰারেসু. ইতি ভগৰা নাহং ৰিঞ্ঞাণপ্পৰত্তে দ্ৰারসঙ্কন্তিমত্তম্পি ৰদামি, অযং পন সাতি মোঘপুরিসো ভৰসঙ্কন্তিং ৰদতীতি সাতিং নিগ্গহেসি.

৪০১. এৰং ৰিঞ্ঞাণস্স সপ্পচ্চযভাৰং দস্সেত্ৰা ইদানি পন পঞ্চন্নম্পি খন্ধানং সপ্পচ্চযভাৰং দস্সেন্তো, ভূতমিদন্তিআদিমাহ. তত্থ ভূতমিদন্তি ইদং খন্ধপঞ্চকং জাতং ভূতং নিব্বত্তং, তুম্হেপি তং ভূতমিদন্তি, ভিক্খৰে, পস্সথাতি. তদাহারসম্ভৰন্তি তং পনেতং খন্ধপঞ্চকং আহারসম্ভৰং পচ্চযসম্ভৰং, সতি পচ্চযে উপ্পজ্জতি এৰং পস্সথাতি পুচ্ছতি. তদাহারনিরোধাতি তস্স পচ্চযস্স নিরোধা. ভূতমিদং নোস্সূতি ভূতং নু খো ইদং, ন নু খো ভূতন্তি. তদাহারসম্ভৰং নোস্সূতি তং ভূতং খন্ধপঞ্চকং পচ্চযসম্ভৰং নু খো, ন নু খোতি. তদাহারনিরোধাতি তস্স পচ্চযস্স নিরোধা. নিরোধধম্মং নোস্সূতি তং ধম্মং নিরোধধম্মং নু খো, ন নু খোতি. সম্মপ্পঞ্ঞায পস্সতোতি ইদং খন্ধপঞ্চকং জাতং ভূতং নিব্বত্তন্তি যাথাৰসরসলক্খণতো ৰিপস্সনাপঞ্ঞায সম্মা পস্সন্তস্স. পঞ্ঞায সুদিট্ঠন্তি ৰুত্তনযেনেৰ ৰিপস্সনাপঞ্ঞায সুট্ঠু দিট্ঠং. এৰং যে যে তং পুচ্ছং সল্লক্খেসুং, তেসং তেসং পটিঞ্ঞং গণ্হন্তো পঞ্চন্নং খন্ধানং সপ্পচ্চযভাৰং দস্সেতি.

ইদানি যায পঞ্ঞায তেহি তং সপ্পচ্চযং সনিরোধং খন্ধপঞ্চকং সুদিট্ঠং, তত্থ নিত্তণ্হভাৰং পুচ্ছন্তো ইমং চে তুম্হেতিআদিমাহ. তত্থ দিট্ঠিন্তি ৰিপস্সনাসম্মাদিট্ঠিং. সভাৰদস্সনেন পরিসুদ্ধং. পচ্চযদস্সনেন পরিযোদাতং. অল্লীযেথাতি তণ্হাদিট্ঠীহি অল্লীযিত্ৰা ৰিহরেয্যাথ. কেলাযেথাতি তণ্হাদিট্ঠীহি কীল়মানা ৰিহরেয্যাথ. ধনাযেথাতি ধনং ৰিয ইচ্ছন্তা গেধং আপজ্জেয্যাথ. মমাযেথাতি তণ্হাদিট্ঠীহি মমত্তং উপ্পাদেয্যাথ. নিত্থরণত্থায নো গহণত্থাযাতি যো সো মযা চতুরোঘনিত্থরণত্থায কুল্লূপমো ধম্মো দেসিতো, নো নিকন্তিৰসেন গহণত্থায. অপি নু তং তুম্হে আজানেয্যাথাতি. ৰিপরিযাযেন সুক্কপক্খো ৰেদিতব্বো.

৪০২. ইদানি তেসং খন্ধানং পচ্চযং দস্সেন্তো, চত্তারোমে, ভিক্খৰে, আহারাতিআদিমাহ, তম্পি ৰুত্তত্থমেৰ. যথা পন একো ইমং জানাসীতি ৰুত্তো, ‘‘ন কেৰলং ইমং, মাতরম্পিস্স জানামি, মাতু মাতরম্পী’’তি এৰং পৰেণিৰসেন জানন্তো সুট্ঠু জানাতি নাম. এৰমেৰং ভগৰা ন কেৰলং খন্ধমত্তমেৰ জানাতি, খন্ধানং পচ্চযম্পি তেসম্পি পচ্চযানং পচ্চযন্তি এৰং সব্বপচ্চযপরম্পরং জানাতি. সো তং, বুদ্ধবলং দীপেন্তো ইদানি পচ্চযপরম্পরং দস্সেতুং, ইমে চ, ভিক্খৰে, চত্তারো আহারাতিআদিমাহ. তং ৰুত্তত্থমেৰ. ইতি খো, ভিক্খৰে, অৰিজ্জাপচ্চযা সঙ্খারা…পে… দুক্খক্খন্ধস্স সমুদযো হোতীতি এত্থ পন পটিচ্চসমুপ্পাদকথা ৰিত্থারেতব্বা ভৰেয্য, সা ৰিসুদ্ধিমগ্গে ৰিত্থারিতাৰ.

৪০৪. ইমস্মিং সতি ইদং হোতীতি ইমস্মিং অৰিজ্জাদিকে পচ্চযে সতি ইদং সঙ্খারাদিকং ফলং হোতি. ইমস্সুপ্পাদা ইদং উপ্পজ্জতীতি ইমস্স অৰিজ্জাদিকস্স পচ্চযস্স উপ্পাদা ইদং সঙ্খারাদিকং ফলং উপ্পজ্জতি, তেনেৰাহ – ‘‘যদিদং অৰিজ্জাপচ্চযা সঙ্খারা…পে… সমুদযো হোতী’’তি. এৰং ৰট্টং দস্সেত্ৰা ইদানি ৰিৰট্টং দস্সেন্তো, অৰিজ্জায ত্ৰেৰ অসেসৰিরাগনিরোধাতিআদিমাহ. তত্থ অৰিজ্জায ত্ৰেৰাতি অৰিজ্জায এৰ তু. অসেসৰিরাগনিরোধাতি ৰিরাগসঙ্খাতেন মগ্গেন অসেসনিরোধা অনুপ্পাদনিরোধা. সঙ্খারনিরোধোতি সঙ্খারানং অনুপ্পাদনিরোধো হোতি, এৰং নিরুদ্ধানং পন সঙ্খারানং নিরোধা ৰিঞ্ঞাণনিরোধো হোতি, ৰিঞ্ঞাণাদীনঞ্চ নিরোধা নামরূপাদীনি নিরুদ্ধানিযেৰ হোন্তীতি দস্সেতুং সঙ্খারনিরোধা ৰিঞ্ঞাণনিরোধোতিআদিং ৰত্ৰা এৰমেতস্স কেৰলস্স দুক্খক্খন্ধস্স নিরোধো হোতীতি ৰুত্তং. তত্থ কেৰলস্সাতি সকলস্স, সুদ্ধস্স ৰা, সত্তৰিরহিতস্সাতি অত্থো. দুক্খক্খন্ধস্সাতি দুক্খরাসিস্স. নিরোধো হোতীতি অনুপ্পাদো হোতি.

৪০৬. ইমস্মিং অসতীতিআদি ৰুত্তপটিপক্খনযেন ৰেদিতব্বং.

৪০৭. এৰং ৰট্টৰিৰট্টং কথেত্ৰা ইদানি ইমং দ্ৰাদসঙ্গপচ্চযৰট্টং সহ ৰিপস্সনায মগ্গেন জানন্তস্স যা পটিধাৰনা পহীযতি, তস্সা অভাৰং পুচ্ছন্তো অপি নু তুম্হে, ভিক্খৰেতিআদিমাহ. তত্থ এৰং জানন্তাতি এৰং সহৰিপস্সনায মগ্গেন জানন্তা. এৰং পস্সন্তাতি তস্সেৰ ৰেৰচনং. পুব্বন্তন্তি পুরিমকোট্ঠাসং, অতীতখন্ধধাতুআযতনানীতি অত্থো. পটিধাৰেয্যাথাতি তণ্হাদিট্ঠিৰসেন পটিধাৰেয্যাথ. সেসং সব্বাসৰসুত্তে ৰিত্থারিতমেৰ.

ইদানি নেসং তত্থ নিচ্চলভাৰং পুচ্ছন্তো, অপি নু তুম্হে, ভিক্খৰে, এৰং জানন্তা এৰং পস্সন্তা এৰং ৰদেয্যাথ, সত্থা নো গরূতিআদিমাহ. তত্থ গরূতি ভারিকো অকামা অনুৰত্তিতব্বো. সমণোতি বুদ্ধসমণো. অঞ্ঞং সত্থারং উদ্দিসেয্যাথাতি অযং সত্থা অম্হাকং কিচ্চং সাধেতুং ন সক্কোতীতি অপি নু এৰংসঞ্ঞিনো হুত্ৰা অঞ্ঞং বাহিরকং সত্থারং উদ্দিসেয্যাথ. পুথুসমণব্রাহ্মণানন্তি এৰংসঞ্ঞিনো হুত্ৰা পুথূনং তিত্থিযসমণানং চেৰ ব্রাহ্মণানঞ্চ. ৰতকোতূহলমঙ্গলানীতি ৰতসমাদানানি চ দিট্ঠিকুতূহলানি চ দিট্ঠসুতমুতমঙ্গলানি চ. তানি সারতো পচ্চাগচ্ছেয্যাথাতি এতানি সারন্তি এৰংসঞ্ঞিনো হুত্ৰা পটিআগচ্ছেয্যাথ. এৰং নিস্সট্ঠানি চ পুন গণ্হেয্যাথাতি অত্থো. সামং ঞাতন্তি সযং ঞাণেন ঞাতং. সামং দিট্ঠন্তি সযং পঞ্ঞাচক্খুনা দিট্ঠং. সামং ৰিদিতন্তি সযং ৰিভাৰিতং পাকটং কতং. উপনীতা খো মে তুম্হেতি মযা, ভিক্খৰে, তুম্হে ইমিনা সন্দিট্ঠিকাদিসভাৰেন ধম্মেন নিব্বানং উপনীতা, পাপিতাতি অত্থো. সন্দিট্ঠিকোতিআদীনমত্থো ৰিসুদ্ধিমগ্গে ৰিত্থারিতো. ইদমেতং পটিচ্চ ৰুত্তন্তি এতং ৰচনমিদং তুম্হেহি সামং ঞাতাদিভাৰং পটিচ্চ ৰুত্তং.

৪০৮. তিণ্ণং খো পন, ভিক্খৰেতি কস্মা আরভি? ননু হেট্ঠা ৰট্টৰিৰট্টৰসেন দেসনা মত্থকং পাপিতাতি? আম পাপিতা. অযং পন পাটিএক্কো অনুসন্ধি, ‘‘অযঞ্হি লোকসন্নিৰাসো পটিসন্ধিসম্মূল়্হো, তস্স সম্মোহট্ঠানং ৰিদ্ধংসেত্ৰা পাকটং করিস্সামী’’তি ইমং দেসনং আরভি. অপিচ ৰট্টমূলং অৰিজ্জা, ৰিৰট্টমূলং বুদ্ধুপ্পাদো, ইতি ৰট্টমূলং অৰিজ্জং ৰিৰট্টমূলঞ্চ বুদ্ধুপ্পাদং দস্সেত্ৰাপি, ‘‘পুন একৰারং ৰট্টৰিৰট্টৰসেন দেসনং মত্থকং পাপেস্সামী’’তি ইমং দেসনং আরভি. তত্থ সন্নিপাতাতি সমোধানেন পিণ্ডভাৰেন. গব্ভস্সাতি গব্ভে নিব্বত্তনকসত্তস্স. অৰক্কন্তি হোতীতি নিব্বত্তি হোতি. কত্থচি হি গব্ভোতি মাতুকুচ্ছি ৰুত্তো. যথাহ –

‘‘যমেকরত্তিং পঠমং, গব্ভে ৰসতি মাণৰো;

অব্ভুট্ঠিতোৰ সো যাতি, স গচ্ছং ন নিৰত্ততী’’তি. (জা. ১.১৫.৩৬৩);

কত্থচি গব্ভে নিব্বত্তনসত্তো. যথাহ – ‘‘যথা খো, পনানন্দ, অঞ্ঞা ইত্থিকা নৰ ৰা দস ৰা মাসে গব্ভং কুচ্ছিনা পরিহরিত্ৰা ৰিজাযন্তী’’তি (ম. নি. ৩.২০৫). ইধ সত্তো অধিপ্পেতো, তং সন্ধায ৰুত্তং ‘‘গব্ভস্স অৰক্কন্তি হোতী’’তি.

ইধাতি ইমস্মিং সত্তলোকে. মাতা চ উতুনী হোতীতি ইদং উতুসমযং সন্ধায ৰুত্তং. মাতুগামস্স কির যস্মিং ওকাসে দারকো নিব্বত্ততি, তত্থ মহতী লোহিতপীল়কা সণ্ঠহিত্ৰা ভিজ্জিত্ৰা পগ্ঘরতি, ৰত্থু সুদ্ধং হোতি, সুদ্ধে ৰত্থুম্হি মাতাপিতূসু একৰারং সন্নিপতিতেসু যাৰ সত্ত দিৰসানি খেত্তমেৰ হোতি. তস্মিং সমযে হত্থগ্গাহৰেণিগ্গাহাদিনা অঙ্গপরামসনেনপি দারকো নিব্বত্ততিযেৰ. গন্ধব্বোতি তত্রূপগসত্তো. পচ্চুপট্ঠিতো হোতীতি ন মাতাপিতূনং সন্নিপাতং ওলোকযমানো সমীপে ঠিতো পচ্চুপট্ঠিতো নাম হোতি. কম্মযন্তযন্তিতো পন একো সত্তো তস্মিং ওকাসে নিব্বত্তনকো হোতীতি অযমেত্থ অধিপ্পাযো. সংসযেনাতি ‘‘অরোগো নু খো ভৰিস্সামি অহং ৰা, পুত্তো ৰা মে’’তি এৰং মহন্তেন জীৰিতসংসযেন. লোহিতঞ্হেতং, ভিক্খৰেতি তদা কির মাতুলোহিতং তং ঠানং সম্পত্তং পুত্তসিনেহেন পণ্ডরং হোতি. তস্মা এৰমাহ. ৰঙ্ককন্তি গামদারকানং কীল়নকং খুদ্দকনঙ্গলং. ঘটিকা ৰুচ্চতি দীঘদণ্ডেন রস্সদণ্ডকং পহরণকীল়া. মোক্খচিকন্তি সম্পরিৰত্তককীল়া, আকাসে ৰা দণ্ডকং গহেত্ৰা ভূমিযং ৰা সীসং ঠপেত্ৰা হেট্ঠুপরিযভাৰেন পরিৰত্তনকীল়নন্তি ৰুত্তং হোতি. চিঙ্গুলকং ৰুচ্চতি তালপণ্ণাদীহি কতং ৰাতপ্পহারেন পরিব্ভমনচক্কং. পত্তাল়্হকং ৰুচ্চতি পণ্ণনাল়িকা, তায ৰালিকাদীনি মিনন্তা কীল়ন্তি. রথকন্তি খুদ্দকরথং. ধনুকম্পি খুদ্দকধনুমেৰ.

৪০৯. সারজ্জতীতি রাগং উপ্পাদেতি. ব্যাপজ্জতীতি ব্যাপাদং উপ্পাদেতি. অনুপট্ঠিতকাযসতীতি কাযে সতি কাযসতি, তং অনুপট্ঠপেত্ৰাতি অত্থো. পরিত্তচেতসোতি অকুসলচিত্তো. যত্থস্স তে পাপকাতি যস্সং ফলসমাপত্তিযং এতে নিরুজ্ঝন্তি, তং ন জানাতি নাধিগচ্ছতীতি অত্থো. অনুরোধৰিরোধন্তি রাগঞ্চেৰ দোসঞ্চ. অভিনন্দতীতি তণ্হাৰসেন অভিনন্দতি, তণ্হাৰসেনেৰ অহো সুখন্তিআদীনি ৰদন্তো অভিৰদতি. অজ্ঝোসায তিট্ঠতীতি তণ্হাঅজ্ঝোসানগহণেন গিলিত্ৰা পরিনিট্ঠপেত্ৰা গণ্হাতি. সুখং ৰা অদুক্খমসুখং ৰা অভিনন্দতু, দুক্খং কথং অভিনন্দতীতি? ‘‘অহং দুক্খিতো মম দুক্খ’’ন্তি গণ্হন্তো অভিনন্দতি নাম. উপ্পজ্জতি নন্দীতি তণ্হা উপ্পজ্জতি. তদুপাদানন্তি সাৰ তণ্হা গহণট্ঠেন উপাদানং নাম. তস্স উপাদানপচ্চযা ভৰো…পে… সমুদযো হোতীতি, ইদঞ্হি ভগৰতা পুন একৰারং দ্ৰিসন্ধি তিসঙ্খেপং পচ্চযাকারৰট্টং দস্সিতং.

৪১০-৪. ইদানি ৰিৰট্টং দস্সেতুং ইধ, ভিক্খৰে, তথাগতো লোকে উপ্পজ্জতীতিআদিমাহ. তত্থ অপ্পমাণচেতসোতি অপ্পমাণং লোকুত্তরং চেতো অস্সাতি অপ্পমাণচেতসো, মগ্গচিত্তসমঙ্গীতি অত্থো. ইমং খো মে তুম্হে, ভিক্খৰে, সংখিত্তেন তণ্হাসঙ্খযৰিমুত্তিং ধারেথাতি, ভিক্খৰে, ইমং সংখিত্তেন দেসিতং ময্হং, তণ্হাসঙ্খযৰিমুত্তিদেসনং তুম্হে নিচ্চকালং ধারেয্যাথ মা পমজ্জেয্যাথ. দেসনা হি এত্থ ৰিমুত্তিপটিলাভহেতুতো ৰিমুত্তীতি ৰুত্তা. মহাতণ্হাজালতণ্হাসঙ্ঘাটপটিমুক্কন্তি তণ্হাৰ সংসিব্বিতট্ঠেন মহাতণ্হাজালং, সঙ্ঘটিতট্ঠেন সঙ্ঘাটন্তি ৰুচ্চতি; ইতি ইমস্মিং মহাতণ্হাজালে তণ্হাসঙ্ঘাটে চ ইমং সাতিং ভিক্খুং কেৰট্টপুত্তং পটিমুক্কং ধারেথ. অনুপৰিট্ঠো অন্তোগধোতি নং ধারেথাতি অত্থো. সেসং সব্বত্থ উত্তানত্থমেৰাতি.

পপঞ্চসূদনিযা মজ্ঝিমনিকাযট্ঠকথায

মহাতণ্হাসঙ্খযসুত্তৰণ্ণনা নিট্ঠিতা.

৯. মহাঅস্সপুরসুত্তৰণ্ণনা

৪১৫. এৰং মে সুতন্তি মহাঅস্সপুরসুত্তং. তত্থ অঙ্গেসূতি অঙ্গা নাম জানপদিনো রাজকুমারা, তেসং নিৰাসো একোপি জনপদো রুল়্হীসদ্দেন ‘‘অঙ্গা’’তি ৰুচ্চতি, তস্মিং অঙ্গেসু জনপদে. অস্সপুরং নাম অঙ্গানং নিগমোতি অস্সপুরন্তি নগরনামেন লদ্ধৰোহারো অঙ্গানং জনপদস্স একো নিগমো, তং গোচরগামং কত্ৰা ৰিহরতীতি অত্থো. ভগৰা এতদৰোচাতি এতং ‘‘সমণা সমণাতি ৰো, ভিক্খৰে, জনো সঞ্জানাতী’’তিআদিৰচনমৰোচ.

কস্মা পন এৰং অৰোচাতি. তস্মিং কির নিগমে মনুস্সা সদ্ধা পসন্না বুদ্ধমামকা ধম্মমামকা সঙ্ঘমামকা, তদহুপব্বজিতসামণেরম্পি ৰস্সসতিকত্থেরসদিসং কত্ৰা পসংসন্তি; পুব্বণ্হসমযং ভিক্খুসঙ্ঘং পিণ্ডায পৰিসন্তং দিস্ৰা বীজনঙ্গলাদীনি গহেত্ৰা খেত্তং গচ্ছন্তাপি, ফরসুআদীনি গহেত্ৰা অরঞ্ঞং পৰিসন্তাপি তানি উপকরণানি নিক্খিপিত্ৰা ভিক্খুসঙ্ঘস্স নিসীদনট্ঠানং আসনসালং ৰা মণ্ডপং ৰা রুক্খমূলং ৰা সম্মজ্জিত্ৰা আসনানি পঞ্ঞপেত্ৰা অরজপানীযং পচ্চুপট্ঠাপেত্ৰা ভিক্খুসঙ্ঘং নিসীদাপেত্ৰা যাগুখজ্জকাদীনি দত্ৰা কতভত্তকিচ্চং ভিক্খুসঙ্ঘং উয্যোজেত্ৰা ততো তানি উপকরণানি আদায খেত্তং ৰা অরঞ্ঞং ৰা গন্ত্ৰা অত্তনো কম্মানি করোন্তি, কম্মন্তট্ঠানেপি নেসং অঞ্ঞা কথা নাম নত্থি. চত্তারো মগ্গট্ঠা চত্তারো ফলট্ঠাতি অট্ঠ পুগ্গলা অরিযসঙ্ঘো নাম; তে ‘‘এৰরূপেন সীলেন, এৰরূপেন আচারেন, এৰরূপায পটিপত্তিযা সমন্নাগতা লজ্জিনো পেসলা উল়ারগুণা’’তি ভিক্খুসঙ্ঘস্সেৰ ৰণ্ণং কথেন্তি. কম্মন্তট্ঠানতো আগন্ত্ৰা ভুত্তসাযমাসা ঘরদ্ৰারে নিসিন্নাপি, সযনিঘরং পৰিসিত্ৰা নিসিন্নাপি ভিক্খুসঙ্ঘস্সেৰ ৰণ্ণং কথেন্তি. ভগৰা তেসং মনুস্সানং নিপচ্চকারং দিস্ৰা ভিক্খুসঙ্ঘং পিণ্ডপাতাপচাযনে নিযোজেত্ৰা এতদৰোচ.

যে ধম্মা সমণকরণা চ ব্রাহ্মণকরণা চাতি যে ধম্মা সমাদায পরিপূরিতা সমিতপাপসমণঞ্চ বাহিতপাপব্রাহ্মণঞ্চ করোন্তীতি অত্থো. ‘‘তীণিমানি, ভিক্খৰে, সমণস্স সমণিযানি সমণকরণীযানি. কতমানি তীণি? অধিসীলসিক্খাসমাদানং, অধিচিত্তসিক্খাসমাদানং, অধিপঞ্ঞাসিক্খাসমাদান’’ন্তি (অ. নি. ৩.৮২) এত্থ পন সমণেন কত্তব্বধম্মা ৰুত্তা. তেপি চ সমণকরণা হোন্তিযেৰ. ইধ পন হিরোত্তপ্পাদিৰসেন দেসনা ৰিত্থারিতা. এৰং নো অযং অম্হাকন্তি এত্থ নোতি নিপাতমত্তং. এৰং অযং অম্হাকন্তি অত্থো. মহপ্ফলা মহানিসংসাতি উভযম্পি অত্থতো একমেৰ. অৰঞ্ঝাতি অমোঘা. সফলাতি অযং তস্সেৰ অত্থো. যস্সা হি ফলং নত্থি, সা ৰঞ্ঝা নাম হোতি. সউদ্রযাতি সৰড্ঢি, ইদং সফলতায ৰেৰচনং. এৰঞ্হি ৰো, ভিক্খৰে, সিক্খিতব্বন্তি, ভিক্খৰে, এৰং তুম্হেহি সিক্খিতব্বং. ইতি ভগৰা ইমিনা এত্তকেন ঠানেন হিরোত্তপ্পাদীনং ধম্মানং ৰণ্ণং কথেসি. কস্মা? ৰচনপথপচ্ছিন্দনত্থং. সচে হি কোচি অচিরপব্বজিতো বালভিক্খু এৰং ৰদেয্য – ‘‘ভগৰা হিরোত্তপ্পাদিধম্মে সমাদায ৰত্তথাতি ৰদতি, কো নু খো তেসং সমাদায ৰত্তনে আনিসংসো’’তি? তস্স ৰচনপথপচ্ছিন্দনত্থং. অযঞ্চ আনিসংসো, ইমে হি ধম্মা সমাদায পরিপূরিতা সমিতপাপসমণং নাম বাহিতপাপব্রাহ্মণং নাম করোন্তি, চতুপচ্চযলাভং উপ্পাদেন্তি, পচ্চযদাযকানং মহপ্ফলতং সম্পাদেন্তি, পব্বজ্জং অৰঞ্ঝং সফলং সউদ্রযং করোন্তীতি ৰণ্ণং অভাসি. অযমেত্থ সঙ্খেপো. ৰিত্থারতো পন ৰণ্ণকথা সতিপট্ঠানে (দী. নি. অট্ঠ. ২.৩৭৩; ম. নি. অট্ঠ. ২.৩৭৩) ৰুত্তনযেনেৰ ৰেদিতব্বা.

৪১৬. হিরোত্তপ্পেনাতি ‘‘যং হিরীযতি হিরীযিতব্বেন, ওত্তপ্পতি ওত্তপ্পিতব্বেনা’’তি (ধ. স. ১৩৩১) এৰং ৰিত্থারিতায হিরিযা চেৰ ওত্তপ্পেন চ. অপিচেত্থ অজ্ঝত্তসমুট্ঠানা হিরী, বহিদ্ধাসমুট্ঠানং ওত্তপ্পং. অত্তাধিপতেয্যা হিরী, লোকাধিপতেয্যং ওত্তপ্পং. লজ্জাসভাৰসণ্ঠিতা হিরী, ভযসভাৰসণ্ঠিতং ওত্তপ্পং, ৰিত্থারকথা পনেত্থ সব্বাকারেন ৰিসুদ্ধিমগ্গে ৰুত্তা. অপিচ ইমে দ্ৰে ধম্মা লোকং পালনতো লোকপালধম্মা নামাতি কথিতা. যথাহ – ‘‘দ্ৰেমে, ভিক্খৰে, সুক্কা ধম্মা লোকং পালেন্তি. কতমে দ্ৰে? হিরী চ ওত্তপ্পঞ্চ. ইমে খো, ভিক্খৰে, দ্ৰে সুক্কা ধম্মা লোকং পালেন্তি. ইমে চ খো, ভিক্খৰে, দ্ৰে সুক্কা ধম্মা লোকং ন পালেয্যুং, নযিধ পঞ্ঞাযেথ, ‘মাতা’তি ৰা, ‘মাতুচ্ছা’তি ৰা, ‘মাতুলানী’তি ৰা, ‘আচরিযভরিযা’তি ৰা, ‘গরূনং দারা’তি ৰা, সম্ভেদং লোকো অগমিস্স, যথা অজেল়কা কুক্কুটসূকরা সোণসিঙ্গালা’’তি (অ. নি. ২.৯). ইমেযেৰ জাতকে ‘‘দেৰধম্মা’’তি কথিতা. যথাহ –

‘‘হিরিওত্তপ্পসম্পন্না, সুক্কধম্মসমাহিতা;

সন্তো সপ্পুরিসা লোকে, দেৰধম্মাতি ৰুচ্চরে’’তি. (জা. ১.১.৬);

মহাচুন্দত্থেরস্স পন কিলেসসল্লেখনপটিপদাতি কত্ৰা দস্সিতা. যথাহ – ‘‘পরে অহিরিকা ভৰিস্সন্তি, মযমেত্থ হিরিমনা ভৰিস্সামাতি সল্লেখো করণীযো. পরে অনোত্তাপী ভৰিস্সন্তি, মযমেত্থ ওত্তাপী ভৰিস্সামাতি সল্লেখো করণীযো’’তি (ম. নি. ১.৮৩). ইমেৰ মহাকস্সপত্থেরস্স ওৰাদূপসম্পদাতি কত্ৰা দস্সিতা. ৰুত্তঞ্হেতং – ‘‘তস্মা তিহ তে, কস্সপ, এৰং সিক্খিতব্বং, তিব্বং মে হিরোত্তপ্পং পচ্চুপট্ঠিতং ভৰিস্সতি থেরেসু নৰেসু মজ্ঝিমেসূতি. এৰঞ্হি তে, কস্সপ, সিক্খিতব্ব’’ন্তি (সং. নি. ২.১৫৪). ইধ পনেতে সমণধম্মা নামাতি দস্সিতা.

যস্মা পন এত্তাৰতা সামঞ্ঞত্থো মত্থকং পত্তো নাম হোতি, তস্মা অপরেপি সমণকরণধম্মে দস্সেতুং সিযা খো পন, ভিক্খৰে, তুম্হাকন্তিআদিমাহ. তত্থ সামঞ্ঞত্থোতি সংযুত্তকে তাৰ, ‘‘কতমঞ্চ, ভিক্খৰে, সামঞ্ঞং? অযমেৰ অরিযো অট্ঠঙ্গিকো মগ্গো. সেয্যথিদং, সম্মাদিট্ঠি…পে… সম্মাসমাধি, ইদং ৰুচ্চতি, ভিক্খৰে, সামঞ্ঞং. কতমো চ, ভিক্খৰে, সামঞ্ঞত্থো? যো, ভিক্খৰে, রাগক্খযো দোসক্খযো মোহক্খযো, অযং ৰুচ্চতি, ভিক্খৰে, সামঞ্ঞত্থো’’তি (সং. নি. ৫.৩৬) মগ্গো ‘‘সামঞ্ঞ’’ন্তি, ফলনিব্বানানি ‘‘সামঞ্ঞত্থো’’তি ৰুত্তানি. ইমস্মিং পন ঠানে মগ্গম্পি ফলম্পি একতো কত্ৰা সামঞ্ঞত্থো কথিতোতি ৰেদিতব্বো. আরোচযামীতি কথেমি. পটিৰেদযামীতি জানাপেমি.

৪১৭. পরিসুদ্ধো নো কাযসমাচারোতি এত্থ কাযসমাচারো পরিসুদ্ধো অপরিসুদ্ধোতি দুৰিধো. যো হি ভিক্খু পাণং হনতি অদিন্নং আদিযতি, কামেসু মিচ্ছা চরতি, তস্স কাযসমাচারো অপরিসুদ্ধো নাম, অযং পন কম্মপথৰসেনেৰ ৰারিতো. যো পন পাণিনা ৰা লেড্ডুনা ৰা দণ্ডেন ৰা সত্থেন ৰা পরং পোথেতি ৰিহেঠেতি, তস্স কাযসমাচারো অপরিসুদ্ধো নাম, অযম্পি সিক্খাপদবদ্ধেনেৰ পটিক্খিত্তো. ইমস্মিং সুত্তে উভযম্পেতং অকথেত্ৰা পরমসল্লেখো নাম কথিতো. যো হি ভিক্খু পানীযঘটে ৰা পানীযং পিৰন্তানং, পত্তে ৰা ভত্তং ভুঞ্জন্তানং কাকানং নিৰারণৰসেন হত্থং ৰা দণ্ডং ৰা লেড্ডুং ৰা উগ্গিরতি, তস্স কাযসমাচারো অপরিসুদ্ধো. ৰিপরীতো পরিসুদ্ধো নাম. উত্তানোতি উগ্গতো পাকটো. ৰিৰটোতি অনাৰটো অসঞ্ছন্নো. উভযেনাপি পরিসুদ্ধতংযেৰ দীপেতি. ন চ ছিদ্দৰাতি সদা একসদিসো অন্তরন্তরে ছিদ্দরহিতো. সংৰুতোতি কিলেসানং দ্ৰার পিদহনেন পিদহিতো, ন ৰজ্জপটিচ্ছাদনত্থায.

৪১৮. ৰচীসমাচারেপি যো ভিক্খু মুসা ৰদতি, পিসুণং কথেতি, ফরুসং ভাসতি, সম্ফং পলপতি, তস্স ৰচীসমাচারো অপরিসুদ্ধো নাম. অযং পন কম্মপথৰসেন ৰারিতো. যো পন গহপতিকাতি ৰা দাসাতি ৰা পেস্সাতি ৰা আদীহি খুংসেন্তো ৰদতি, তস্স ৰচীসমাচারো অপরিসুদ্ধো নাম. অযং পন সিক্খাপদবদ্ধেনেৰ পটিক্খিত্তো. ইমস্মিং সুত্তে উভযম্পেতং অকথেত্ৰা পরমসল্লেখো নাম কথিতো. যো হি ভিক্খু দহরেন ৰা সামণেরেন ৰা, ‘‘কচ্চি, ভন্তে, অম্হাকং উপজ্ঝাযং পস্সথা’’তি ৰুত্তে, সম্বহুলা, আৰুসো, ভিক্খুভিক্খুনিযো একস্মিং পদেসে ৰিচদিংসু, উপজ্ঝাযো তে ৰিক্কাযিকসাকভণ্ডিকং উক্খিপিত্ৰা গতো ভৰিস্সতী’’তিআদিনা নযেন হসাধিপ্পাযোপি এৰরূপং কথং কথেতি, তস্স ৰচীসমাচারো অপরিসুদ্ধো. ৰিপরীতো পরিসুদ্ধো নাম.

৪১৯. মনোসমাচারে যো ভিক্খু অভিজ্ঝালু ব্যাপন্নচিত্তো মিচ্ছাদিট্ঠিকো হোতি, তস্স মনোসমাচারো অপরিসুদ্ধো নাম. অযং পন কম্মপথৰসেনেৰ ৰারিতো. যো পন উপনিক্খিত্তং জাতরূপরজতং সাদিযতি, তস্স মনোসমাচারো অপরিসুদ্ধো নাম. অযম্পি সিক্খাপদবদ্ধেনেৰ পটিক্খিত্তো. ইমস্মিং সুত্তে উভযম্পেতং অকথেত্ৰা পরমসল্লেখো নাম কথিতো. যো পন ভিক্খু কামৰিতক্কং ৰা ব্যাপাদৰিতক্কং ৰা ৰিহিংসাৰিতক্কং ৰা ৰিতক্কেতি, তস্স মনোসমাচারো অপরিসুদ্ধো. ৰিপরীতো পরিসুদ্ধো নাম.

৪২০. আজীৰস্মিং যো ভিক্খু আজীৰহেতু ৰেজ্জকম্মং পহিণগমনং গণ্ডফালনং করোতি, অরুমক্খনং দেতি, তেলং পচতীতি একৰীসতিঅনেসনাৰসেন জীৰিকং কপ্পেতি. যো ৰা পন ৰিঞ্ঞাপেত্ৰা ভুঞ্জতি, তস্স আজীৰো অপরিসুদ্ধো নাম. অযং পন সিক্খাপদবদ্ধেনেৰ পটিক্খিত্তো. ইমস্মিং সুত্তে উভযম্পেতং অকথেত্ৰা পরমসল্লেখো নাম কথিতো. যো হি ভিক্খু সপ্পিনৰনীততেলমধুফাণিতাদীনি লভিত্ৰা, ‘‘স্ৰে ৰা পুনদিৰসে ৰা ভৰিস্সতী’’তি সন্নিধিকারকং পরিভুঞ্জতি, যো ৰা পন নিম্বঙ্কুরাদীনি দিস্ৰা সামণেরে ৰদতি – ‘‘অংঙ্কুরে খাদথা’’তি, সামণেরা থেরো খাদিতুকামোতি কপ্পিযং কত্ৰা দেন্তি, দহরে পন সামণেরে ৰা পানীযং পিৰথ, আৰুসোতি ৰদতি, তে থেরো পানীযং পিৰিতুকামোতি পানীযসঙ্খং ধোৰিত্ৰা দেন্তি, তম্পি পরিভুঞ্জন্তস্স আজীৰো অপরিসুদ্ধো নাম হোতি. ৰিপরীতো পরিসুদ্ধো নাম.

৪২২. মত্তঞ্ঞূতি পরিযেসনপটিগ্গহণপরিভোগেসু মত্তঞ্ঞূ, যুত্তঞ্ঞূ, পমাণঞ্ঞূ.

৪২৩. জাগরিযমনুযুত্তাতি রত্তিন্দিৰং ছ কোট্ঠাসে কত্ৰা একস্মিং কোট্ঠাসে নিদ্দায ওকাসং দত্ৰা পঞ্চ কোট্ঠাসে জাগরিযম্হি যুত্তা পযুত্তা. সীহসেয্যন্তি এত্থ কামভোগিসেয্যা, পেতসেয্যা, সীহসেয্যা, তথাগতসেয্যাতি চতস্সো সেয্যা. তত্থ ‘‘যেভুয্যেন, ভিক্খৰে, কামভোগী সত্তা ৰামেন পস্সেন সেন্তী’’তি (অ. নি. ৪.২৪৬) অযং কামভোগিসেয্যা, তেসু হি যেভুয্যেন দক্খিণপস্সেন সযানো নাম নত্থি.

‘‘যেভুয্যেন, ভিক্খৰে, পেতা উত্তানা সেন্তী’’তি (অ. নি. ৪.২৪৬) অযং পেতসেয্যা, পেতা হি অপ্পমংসলোহিতত্তা অট্ঠিসঙ্ঘাতজটিতা একেন পস্সেন সযিতুং ন সক্কোন্তি, উত্তানাৰ সেন্তি.

‘‘যেভুয্যেন, ভিক্খৰে, সীহো মিগরাজা নঙ্গুট্ঠং অন্তরসত্থিম্হি অনুপক্খিপিত্ৰা দক্খিণেন পস্সেন সেতী’’তি (অ. নি. ৪.২৪৬) অযং সীহসেয্যা. তেজুস্সদত্তা হি সীহো মিগরাজা দ্ৰে পুরিমপাদে একস্মিং ঠানে পচ্ছিমপাদে একস্মিং ঠপেত্ৰা নঙ্গুট্ঠং অন্তরসত্থিম্হি পক্খিপিত্ৰা পুরিমপাদপচ্ছিমপাদনঙ্গুট্ঠানং ঠিতোকাসং সল্লক্খেত্ৰা দ্ৰিন্নং পুরিমপাদানং মত্থকে সীসং ঠপেত্ৰা সযতি. দিৰসম্পি সযিত্ৰা পবুজ্ঝমানো ন উত্রাসন্তো পবুজ্ঝতি. সীসং পন উক্খিপিত্ৰা পুরিমপাদানং ঠিতোকাসং সল্লক্খেতি. সচে কিঞ্চি ঠানং ৰিজহিত্ৰা ঠিতং হোতি, ‘‘নযিদং তুয্হং জাতিযা, ন সূরভাৰস্স চ অনুরূপ’’ন্তি অনত্তমনো হুত্ৰা তত্থেৰ সযতি, ন গোচরায পক্কমতি. অৰিজহিত্ৰা ঠিতে পন ‘‘তুয্হং জাতিযা সূরভাৰস্স চ অনুরূপমিদ’’ন্তি হট্ঠতুট্ঠো উট্ঠায সীহৰিজম্ভিতং ৰিজম্ভিত্ৰা কেসরভারং ৰিধুনিত্ৰা তিক্খত্তুং সীহনাদং নদিত্ৰা গোচরায পক্কমতি. চতুত্থজ্ঝানসেয্যা পন তথাগতসেয্যাতি ৰুচ্চতি. তাসু ইধ সীহসেয্যা আগতা. অযঞ্হি তেজুস্সদইরিযাপথত্তা উত্তমসেয্যা নাম. পাদে পাদন্তি দক্খিণপাদে ৰামপাদং. অচ্চাধাযাতি অতিআধায ঈসকং অতিক্কম্ম ঠপেত্ৰা, গোপ্ফকেন হি গোপ্ফকে, জাণুনা ৰা জাণুম্হি সঙ্ঘট্টিযমানে অভিণ্হং ৰেদনা উপ্পজ্জতি, চিত্তং একগ্গং ন হোতি, সেয্যা অফাসুকা হোতি. যথা পন ন সঙ্ঘট্টেতি, এৰং অতিক্কম্ম ঠপিতে ৰেদনা নুপ্পজ্জতি, চিত্তং একগ্গং হোতি, সেয্যা ফাসুকা হোতি, তস্মা এৰমাহ.

৪২৫. অভিজ্ঝং লোকেতিআদি চূল়হত্থিপদে ৰিত্থারিতং.

৪২৬. যা পনাযং সেয্যথাপি, ভিক্খৰেতি উপমা ৰুত্তা. তত্থ ইণং আদাযাতি ৰড্ঢিযা ধনং গহেত্ৰা. ব্যন্তী করেয্যাতি ৰিগতন্তানি করেয্য. যথা তেসং কাকণিকমত্তোপি পরিযন্তো নাম নাৰসিস্সতি, এৰং করেয্য, সব্বসো পটিনিয্যাতেয্যাতি অত্থো. ততোনিদানন্তি আণণ্যনিদানং. সো হি অণণোম্হীতি আৰজ্জন্তো বলৰপামোজ্জং লভতি, বলৰসোমনস্সমধিগচ্ছতি. তেন ৰুত্তং – ‘‘লভেথ পামোজ্জং, অধিগচ্ছেয্য সোমনস্স’’ন্তি.

ৰিসভাগৰেদনুপ্পত্তিযা ককচেনেৰ চতুইরিযাপথং ছিন্দন্তো আবাধতীতি আবাধো, স্ৰাস্স অত্থীতি আবাধিকো. তংসমুট্ঠানেন দুক্খেন দুক্খিতো. অধিমত্তগিলানোতি বাল়্হগিলানো. নচ্ছাদেয্যাতি অধিমত্তব্যাধিপরেততায ন রুচ্চেয্য. বলমত্তাতি বলমেৰ, বলঞ্চস্স কাযে ন ভৰেয্যাতি অত্থো. ততোনিদানন্তি আরোগ্যনিদানং, তস্স হি অরোগোম্হীতি আৰজ্জযতো তদুভযং হোতি. তেন ৰুত্তং – ‘‘লভেথ পামোজ্জং, অধিগচ্ছেয্য সোমনস্স’’ন্তি. ন চস্স কিঞ্চি ভোগানং ৰযোতি কাকণিকমত্তম্পি ভোগানং ৰযো ন ভৰেয্য. ততোনিদানন্তি বন্ধনামোক্খনিদানং, সেসং ৰুত্তনযেনেৰ সব্বপদেসু যোজেতব্বং. অনত্তাধীনোতি ন অত্তনি অধীনো, অত্তনো রুচিযা কিঞ্চি কাতুং ন লভতি. পরাধীনোতি পরেসু অধীনো, পরস্সেৰ রুচিযা পৰত্ততি. ন যেন কামং গমোতি যেন দিসাভাগেনস্স কামো হোতি. ইচ্ছা উপ্পজ্জতি গমনায, তেন গন্তুং ন লভতি. দাসব্যাতি দাসভাৰা. ভুজিস্সোতি অত্তনো সন্তকো. ততোনিদানন্তি ভুজিস্সনিদানং. কন্তারদ্ধানমগ্গন্তি কন্তারং অদ্ধানমগ্গং, নিরুদকং দীঘমগ্গন্তি অত্থো. ততোনিদানন্তি খেমন্তভূমিনিদানং.

ইমে পঞ্চ নীৰরণে অপ্পহীনেতি এত্থ ভগৰা অপ্পহীনং কামচ্ছন্দনীৰরণং ইণসদিসং, সেসানি রোগাদিসদিসানি কত্ৰা দস্সেতি. তত্রাযং সদিসতা – যো হি পরেসং ইণং গহেত্ৰা ৰিনাসেতি. সো তেহি ইণং দেহীতি ৰুচ্চমানোপি ফরুসং ৰুচ্চমানোপি বজ্ঝমানোপি পহরিযমানোপি কিঞ্চি পটিবাহিতুং ন সক্কোতি, সব্বং তিতিক্খতি, তিতিক্খকারণঞ্হিস্স তং ইণং হোতি. এৰমেৰং যো যম্হি কামচ্ছন্দেন রজ্জতি, তণ্হাগণেন তং ৰত্থুং গণ্হাতি, সো তেন ফরুসং ৰুচ্চমানোপি বজ্ঝমানোপি পহরিযমানোপি সব্বং তিতিক্খতি. তিতিক্খকারণঞ্হিস্স সো কামচ্ছন্দো হোতি ঘরসামিকেহি ৰধীযমানানং ইত্থীনং ৰিযাতি. এৰং ইণং ৰিয কামচ্ছন্দো দট্ঠব্বো.

যথা পন পিত্তরোগাতুরো মধুসক্করাদীসুপি দিন্নেসু পিত্তরোগাতুরতায তেসং রসং ন ৰিন্দতি, তিত্তকং তিত্তকন্তি উগ্গিরতিযেৰ. এৰমেৰং ব্যাপন্নচিত্তো হিতকামেহি আচরিযুপজ্ঝাযেহি অপ্পমত্তকম্পি ওৰদীযমানো ওৰাদং ন গণ্হাতি, ‘‘অতি ৰিয মে তুম্হে উপদ্দৰেথা’’তিআদীনি ৰত্ৰা ৰিব্ভমতি. পিত্তরোগাতুরতায সো পুরিসো মধুসক্করাদিরসং ৰিয, কোধাতুরতায ঝানসুখাদিভেদং সাসনরসং ন ৰিন্দতীতি. এৰং রোগো ৰিয ব্যাপাদো দট্ঠব্বো.

যথা পন নক্খত্তদিৰসে বন্ধনাগারে বদ্ধো পুরিসো নক্খত্তস্স নেৰ আদিং, ন মজ্ঝং, ন পরিযোসানং পস্সতি. সো দুতিযদিৰসে মুত্তো, ‘‘অহো হিয্যো নক্খত্তং মনাপং, অহো নচ্চং, অহো গীত’’ন্তিআদীনি সুত্ৰাপি পটিৰচনং ন দেতি. কিং কারণা? নক্খত্তস্স অননুভূতত্তা. এৰমেৰং থিনমিদ্ধাভিভূতো ভিক্খু ৰিচিত্তনযেপি ধম্মস্সৰনে পৰত্তমানে নেৰ তস্স আদিং, ন মজ্ঝং, ন পরিযোসানং জানাতি. সো উট্ঠিতে ধম্মস্সৰনে, ‘‘অহো ধম্মস্সৰনং, অহো কারণং, অহো উপমা’’তি ধম্মস্সৰনস্স ৰণ্ণং ভণমানানং সুত্ৰাপি পটিৰচনং ন দেতি. কিং কারণা? থিনমিদ্ধৰসেন ধম্মকথায অননুভূতত্তাতি. এৰং বন্ধনাগারং ৰিয থিনমিদ্ধং দট্ঠব্বং.

যথা পন নক্খত্তং কীল়ন্তোপি দাসো, ‘‘ইদং নাম অচ্চাযিকং করণীযং অত্থি, সীঘং, তত্থ গচ্ছ, নো চে গচ্ছসি, হত্থপাদং ৰা তে ছিন্দামি কণ্ণনাসং ৰা’’তি ৰুত্তো সীঘং গচ্ছতিযেৰ, নক্খত্তস্স আদিমজ্ঝপরিযোসানং অনুভৰিতুং ন লভতি. কস্মা? পরাধীনতায. এৰমেৰং ৰিনযে অপ্পকতঞ্ঞুনা ৰিৰেকত্থায অরঞ্ঞং পৰিট্ঠেনাপি কিস্মিঞ্চিদেৰ অন্তমসো কপ্পিযমংসেপি অকপ্পিযমংসসঞ্ঞায উপ্পন্নায ৰিৰেকং পহায সীলৰিসোধনত্থং ৰিনযধরস্স সন্তিকে গন্তব্বং হোতি. ৰিৰেকসুখং অনুভৰিতুং ন লভতি. কস্মা? উদ্ধচ্চকুক্কুচ্চাভিভূততাযাতি, এৰং দাসব্যং ৰিয উদ্ধচ্চকুক্কুচ্চং দট্টব্বং.

যথা পন কন্তারদ্ধানমগ্গপটিপন্নো পুরিসো চোরেহি মনুস্সানং ৰিলুত্তোকাসং পহতোকাসঞ্চ দিস্ৰা দণ্ডকসদ্দেনপি সকুণসদ্দেনপি চোরা আগতাতি উস্সঙ্কিতপরিসঙ্কিতো হোতি, গচ্ছতিপি, তিট্ঠতিপি, নিৰত্ততিপি, গতট্ঠানতো আগতট্ঠানমেৰ বহুতরং হোতি. সো কিচ্ছেন কসিরেন খেমন্তভূমিং পাপুণাতি ৰা, ন ৰা পাপুণাতি. এৰমেৰং যস্স অট্ঠসু ঠানেসু ৰিচিকিচ্ছা উপ্পন্না হোতি. সো ‘‘বুদ্ধো নু খো, ন নু খো বুদ্ধো’’তিআদিনা নযেন ৰিচিকিচ্ছন্তো অধিমুচ্চিত্ৰা সদ্ধায গণ্হিতুং ন সক্কোতি. অসক্কোন্তো মগ্গং ৰা ফলং ৰা ন পাপুণাতীতি যথা কন্তারদ্ধানমগ্গে ‘‘চোরা অত্থি নত্থী’’তি পুনপ্পুনং আসপ্পনপরিসপ্পনং অপরিযোগাহনং ছম্ভিতত্ত চিত্তস্স উপ্পাদেন্তো খেমন্তপত্তিযা অন্তরাযং করোতি, এৰং ৰিচিকিচ্ছাপি ‘‘বুদ্ধো নু খো ন বুদ্ধো’’তিআদিনা নযেন পুনপ্পুনং আসপ্পনপরিসপ্পনং অপরিযোগাহনং ছম্ভিতত্তং চিত্তস্স উপ্পাদযমানা অরিযভূমিপ্পত্তিযা অন্তরাযং করোতীতি কন্তারদ্ধানমগ্গো ৰিয দট্ঠব্বা.

ইদানি সেয্যথাপি, ভিক্খৰে, আণণ্যন্তি এত্থ ভগৰা পহীনকামচ্ছন্দনীৰরণং আণণ্যসদিসং, সেসানি আরোগ্যাদিসদিসানি কত্ৰা দস্সেতি. তত্রাযং সদিসতা – যথা হি পুরিসো ইণং আদায কম্মন্তে পযোজেত্ৰা সমিদ্ধকম্মন্তো, ‘‘ইদং ইণং নাম পলিবোধমূল’’ন্তি চিন্তেত্ৰা সৰড্ঢিকং ইণং নিয্যাতেত্ৰা পণ্ণং ফালাপেয্য. অথস্স ততো পট্ঠায নেৰ কোচি দূতং পেসেতি, ন পণ্ণং, সো ইণসামিকে দিস্ৰাপি সচে ইচ্ছতি, আসনা উট্ঠহতি, নো চে, ন উট্ঠহতি. কস্মা? তেহি সদ্ধিং নিল্লেপতায অলগ্গতায. এৰমেৰ ভিক্খু, ‘‘অযং কামচ্ছন্দো নাম পলিবোধমূল’’ন্তি সতিপট্ঠানে ৰুত্তনযেনেৰ ছ ধম্মে ভাৰেত্ৰা কামচ্ছন্দনীৰরণং পজহতি. তস্সেৰং পহীনকামচ্ছন্দস্স যথা ইণমুত্তস্স পুরিসস্স ইণসামিকে দিস্ৰা নেৰ ভযং ন ছম্ভিতত্তং হোতি. এৰমেৰ পরৰত্থুম্হি নেৰ সঙ্গো ন বন্ধো হোতি. দিব্বানিপি রূপানি পস্সতো কিলেসো ন সমুদাচরতি. তস্মা ভগৰা আণণ্যমিৰ কামচ্ছন্দপ্পহানমাহ.

যথা পন সো পিত্তরোগাতুরো পুরিসো ভেসজ্জকিরিযায তং রোগং ৰূপসমেত্ৰা ততো পট্ঠায মধুসক্করাদীনং রসং ৰিন্দতি. এৰমেৰং ভিক্খু, ‘‘অযং ব্যাপাদো নাম অনত্থকারকো’’তি ছ ধম্মে ভাৰেত্ৰা ব্যাপাদনীৰরণং পজহতি. সো এৰং পহীনব্যাপাদো যথা পিত্তরোগৰিমুত্তো পুরিসো মধুসক্করাদীনি মধুরানি সম্পিযাযমানো পটিসেৰতি. এৰমেৰং আচারপণ্ণত্তিআদীনি সিক্খাপিযমানো সিরসা সম্পটিচ্ছিত্ৰা সম্পিযাযমানো সিক্খতি. তস্মা ভগৰা আরোগ্যমিৰ ব্যাপাদপ্পহানমাহ.

যথা সো নক্খত্তদিৰসে বন্ধনাগারং পৰেসিতো পুরিসো অপরস্মিং নক্খত্তদিৰসে, ‘‘পুব্বেপি অহং পমাদদোসেন বদ্ধো তং নক্খত্তং নানুভৰামি, ইদানি অপ্পমত্তো ভৰিস্সামী’’তি যথাস্স পচ্চত্থিকা ওকাসং ন লভন্তি. এৰং অপ্পমত্তো হুত্ৰা নক্খত্তং অনুভৰিত্ৰা – ‘‘অহো নক্খত্তং অহো নক্খত্ত’’ন্তি উদানং উদানেসি. এৰমেৰ ভিক্খু, ‘‘ইদং থিনমিদ্ধং নাম মহাঅনত্থকর’’ন্তি ছ ধম্মে ভাৰেত্ৰা থিনমিদ্ধনীৰরণং পজহতি. সো এৰং পহীনথিনমিদ্ধো যথা বন্ধনা মুত্তো পুরিসো সত্তাহম্পি নক্খত্তস্স আদিমজ্ঝপরিযোসানং অনুভৰতি. এৰমেৰং ভিক্খু ধম্মনক্খত্তস্স আদিমজ্ঝপরিযোসানং অনুভৰন্তো সহ পটিসম্ভিদাহি অরহত্তং পাপুণাতি. তস্মা ভগৰা বন্ধনা মোক্খমিৰ থিনমিদ্ধপ্পহানমাহ.

যথা পন দাসো কঞ্চিদেৰ মিত্তং উপনিস্সায সামিকানং ধনং দত্ৰা অত্তানং ভুজিস্সং কত্ৰা ততো পট্ঠায যং ইচ্ছতি, তং করেয্য. এৰমেৰ ভিক্খু, ‘‘ইদং উদ্ধচ্চকুক্কুচ্চং নাম মহাঅনত্থকর’’ন্তি ছ ধম্মে ভাৰেত্ৰা উদ্ধচ্চকুক্কুচ্চং পজহতি. সো এৰং পহীনুদ্ধচ্চকুক্কুচ্চো যথা ভুজিস্সো পুরিসো যং ইচ্ছতি, তং করোতি. ন তং কোচি বলক্কারেন ততো নিৰত্তেতি. এৰমেৰং ভিক্খু যথাসুখং নেক্খম্মপটিপদং পটিপজ্জতি, ন নং উদ্ধচ্চকুক্কুচ্চং বলক্কারেন ততো নিৰত্তেতি. তস্মা ভগৰা ভুজিস্সং ৰিয উদ্ধচ্চকুক্কুচ্চপ্পহানমাহ.

যথা বলৰা পুরিসো হত্থসারং গহেত্ৰা সজ্জাৰুধো সপরিৰারো কন্তারং পটিপজ্জেয্য. তং চোরা দূরতোৰ দিস্ৰা পলাযেয্যুং. সো সোত্থিনা তং কন্তারং নিত্থরিত্ৰা খেমন্তং পত্তো হট্ঠতুট্ঠো অস্স. এৰমেৰং ভিক্খু, ‘‘অযং ৰিচিকিচ্ছা নাম অনত্থকারিকা’’তি ছ ধম্মে ভাৰেত্ৰা ৰিচিকিচ্ছং পজহতি. সো এৰং পহীনৰিচিকিচ্ছো যথা বলৰা সজ্জাৰুধো সপরিৰারো পুরিসো নিব্ভযো চোরে তিণং ৰিয অগণেত্ৰা সোত্থিনা নিক্খমিত্ৰা খেমন্তভূমিং পাপুণাতি. এৰমেৰং দুচ্চরিতকন্তারং নিত্থরিত্ৰা পরমখেমন্তভূমিং অমতং নিব্বানং পাপুণাতি. তস্মা ভগৰা খেমন্তভূমিং ৰিয ৰিচিকিচ্ছাপহানমাহ.

৪২৭. ইমমেৰ কাযন্তি ইমং করজকাযং. অভিসন্দেতীতি তেমেতি স্নেহেতি, সব্বত্থ পৰত্তপীতিসুখং করোতি. পরিসন্দেতীতি সমন্ততো সন্দেতি. পরিপূরেতীতি ৰাযুনা ভস্তং ৰিয পূরেতি. পরিপ্ফরতীতি সমন্ততো ফুসতি. সব্বাৰতো কাযস্সাতি অস্স ভিক্খুনো সব্বকোট্ঠাসৰতো কাযস্স. কিঞ্চি উপাদিন্নকসন্ততিপৰত্তিট্ঠানে ছৰিমংসলোহিতানুগতং অণুমত্তম্পি ঠানং পঠমজ্ঝানসুখেন অফুট্ঠং নাম ন হোতি. দক্খোতি ছেকো পটিবলো ন্হানীযচুণ্ণানি কাতুঞ্চেৰ যোজেতুঞ্চ সন্নেতুঞ্চ. কংসথালেতি যেন কেনচি লোহেন কতভাজনে. মত্তিকভাজনং পন থিরং ন হোতি, সন্নেন্তস্স ভিজ্জতি, তস্মা তং ন দস্সেতি. পরিপ্ফোসকং পরিপ্ফোসকন্তি সিঞ্চিত্ৰা সিঞ্চিত্ৰা. সন্নেয্যাতি ৰামহত্থেন কংসথালং গহেত্ৰা দক্খিণেন হত্থেন পমাণযুত্তং উদকং সিঞ্চিত্ৰা সিঞ্চিত্ৰা পরিমদ্দন্তো পিণ্ডং করেয্য. স্নেহানুগতাতি উদকসিনেহেন অনুগতা. স্নেহপরেতাতি উদকসিনেহেন পরিগতা. সন্তরবাহিরাতি সদ্ধিং অন্তোপদেসেন চেৰ বহিপদেসেন চ, সব্বত্থকমেৰ উদকসিনেহেন ফুটাতি অত্থো. ন চ পগ্ঘরিণীতি ন বিন্দু বিন্দু উদকং পগ্ঘরতি, সক্কা হোতি হত্থেনপি দ্ৰীহিপি তীহিপি অঙ্গুলীহি গহেতুং ওৰট্টিকম্পি কাতুন্তি অত্থো.

৪২৮. দুতিযজ্ঝানসুখউপমাযং উব্ভিতোদকোতি উব্ভিন্নউদকো, ন হেট্ঠা উব্ভিজ্জিত্ৰা উগ্গচ্ছনউদকো, অন্তোযেৰ পন উব্ভিজ্জনউদকোতি অত্থো. আযমুখন্তি আগমনমগ্গো. দেৰোতি মেঘো. কালেনকালন্তি কালে কালে, অন্ৰদ্ধমাসং ৰা অনুদসাহং ৰাতি অত্থো. ধারন্তি ৰুট্ঠিং. নানুপ্পৰেচ্ছেয্যাতি ন পৰেসেয্য, ন ৰস্সেয্যাতি অত্থো. সীতা ৰারিধারা উব্ভিজ্জিত্ৰাতি সীতং ৰারি তং উদকরহদং পূরযমানং উব্ভিজ্জিত্ৰা. হেট্ঠা উগ্গচ্ছনউদকঞ্হি উগ্গন্ত্ৰা উগ্গন্ত্ৰা ভিজ্জন্তং উদকং খোভেতি. চতূহি দিসাহি পৰিসনউদকং পুরাণপণ্ণতিণকট্ঠদণ্ডকাদীহি উদকং খোভেতি. ৰুট্ঠিউদকং ধারানিপাতপুপ্ফুল়কেহি উদকং খোভেতি. সন্নিসিন্নমেৰ পন হুত্ৰা ইদ্ধিনিম্মিতমিৰ উপ্পজ্জমানং উদকং ইমং পদেসং ফরতি, ইমং পদেসং ন ফরতীতি নত্থি. তেন অফুটোকাসো নাম ন হোতীতি. তত্থ রহদো ৰিয করজকাযো, উদকং ৰিয দুতিযজ্ঝানসুখং. সেসং পুরিমনযেনেৰ ৰেদিতব্বং.

৪২৯. ততিযজ্ঝানসুখউপমাযং উপ্পলানি এত্থ সন্তীতি উপ্পলিনী. সেসপদদ্ৰযেসুপি এসেৰ নযো. এত্থ চ সেতরত্তনীলেসু যংকিঞ্চি উপ্পলং উপ্পলমেৰ, ঊনকসতপত্তং পুণ্ডরীকং, সতপত্তং পদুমং. পত্তনিযমং ৰা ৰিনাপি সেতং পদুমং, রত্তং পুণ্ডরীকন্তি অযমেত্থ ৰিনিচ্ছযো. উদকানুগ্গতানীতি উদকতো ন উগ্গতানি. অন্তোনিমুগ্গপোসীনীতি উদকতলস্স অন্তো নিমুগ্গানিযেৰ হুত্ৰা পোসীনি, ৰড্ঢীনীতি অত্থো. সেসং পুরিমনযেনেৰ ৰেদিতব্বং.

৪৩০. চতুত্থজ্ঝানসুখউপমাযং পরিসুদ্ধেন চেতসা পরিযোদাতেনাতি এত্থ নিরুপক্কিলেসট্ঠেন পরিসুদ্ধং. পভস্সরট্ঠেন পরিযোদাতং ৰেদিতব্বং. ওদাতেন ৰত্থেনাতি ইদং উতুফরণত্থং ৰুত্তং. কিলিট্ঠৰত্থেন হি উতুফরণং ন হোতি, তঙ্খণধোতপরিসুদ্ধেন উতুফরণং বলৰং হোতি. ইমিস্সা হি উপমায ৰত্থং ৰিয করজকাযো. উতুফরণং ৰিয চতুত্থজ্ঝানসুখং. তস্মা যথা সুন্হাতস্স পুরিসস্স পরিসুদ্ধং ৰত্থং সসীসং পারুপিত্ৰা নিসিন্নস্স সরীরতো উতু সব্বমেৰ ৰত্থং ফরতি, ন কোচি ৰত্থস্স অফুটোকাসো হোতি. এৰং চতুত্থজ্ঝানসুখেন ভিক্খুনো করজকাযস্স ন কোচি ওকাসো অফুটো হোতীতি এৰমেত্থ অত্থো দট্ঠব্বো. চতুত্থজ্ঝানচিত্তমেৰ ৰা ৰত্থং ৰিয, তংসমুট্ঠানরূপং উতুফরণং ৰিয. যথা হি কত্থচি ওদাতৰত্থে কাযং অপ্ফুসন্তেপি তংসমুট্ঠানেন উতুনা সব্বত্থকমেৰ কাযো ফুট্ঠো হোতি. এৰং চতুত্থজ্ঝানসমুট্ঠিতেন সুখুমরূপেন সব্বত্থকমেৰ ভিক্খুনো করজকাযো ফুটো হোতীতি এৰমেত্থ অত্থো দট্ঠব্বো.

৪৩১. পুব্বেনিৰাসঞাণউপমাযং তংদিৰসং কতকিরিযা পাকটা হোতীতি তংদিৰসং গতগামত্তযমেৰ গহিতং. তত্থ গামত্তযং গতপুরিসো ৰিয পুব্বেনিৰাসঞাণলাভী দট্ঠব্বো. তযো গামা ৰিয তযো ভৰা দট্ঠব্বা. তস্স পুরিসস্স তীসু গামেসু তংদিৰসং কতকিরিযায আৰিভাৰো ৰিয পুব্বেনিৰাসায চিত্তং অভিনীহরিত্ৰা নিসিন্নস্স ভিক্খুনো তীসু ভৰেসু কতকিরিযায আৰিভাৰো দট্ঠব্বো.

৪৩২. দিব্বচক্খুউপমাযং দ্ৰে অগারাতি দ্ৰে ঘরা. সদ্ৰারাতি সম্মুখদ্ৰারা. অনুচঙ্কমন্তেতি অপরাপরং সঞ্চরন্তে. অনুৰিচরন্তেতি ইতো চিতো চ ৰিচরন্তে, ইতো পন গেহা নিক্খমিত্ৰা এতং গেহং, এতস্মা ৰা নিক্খমিত্ৰা ইমং গেহং পৰিসনৰসেনপি দট্ঠব্বা. তত্থ দ্ৰে অগারা সদ্ৰারা ৰিয চুতিপটিসন্ধিযো, চক্খুমা পুরিসো ৰিয দিব্বচক্খুঞাণলাভী, চক্খুমতো পুরিসস্স দ্ৰিন্নং গেহানং অন্তরে ঠত্ৰা পস্সতো দ্ৰে অগারে পৰিসনকনিক্খমনকপুরিসানং পাকটকালো ৰিয দিব্বচক্খুলাভিনো আলোকং ৰড্ঢেত্ৰা ওলোকেন্তস্স চৰনকউপপজ্জনকসত্তানং পাকটকালো. কিং পন তে ঞাণস্স পাকটা, পুগ্গলস্সাতি? ঞাণস্স. তস্স পাকটত্তা পন পুগ্গলস্স পাকটাযেৰাতি.

৪৩৩. আসৰক্খযঞাণউপমাযং পব্বতসঙ্খেপেতি পব্বতমত্থকে. অনাৰিলোতি নিক্কদ্দমো. সিপ্পিযো চ সম্বুকা চ সিপ্পিসম্বুকং. সক্খরা চ কথলা চ সক্খরকথলং. মচ্ছানং গুম্বা ঘটাতি মচ্ছগুম্বং. তিট্ঠন্তম্পি চরন্তম্পীতি এত্থ সক্খরকথলং তিট্ঠতিযেৰ, ইতরানি চরন্তিপি তিট্ঠন্তিপি. যথা পন অন্তরন্তরা ঠিতাসুপি নিসিন্নাসুপি ৰিজ্জমানাসুপি, ‘‘এতা গাৰো চরন্তী’’তি চরন্তিযো উপাদায ইতরাপি চরন্তীতি ৰুচ্চন্তি. এৰং তিট্ঠন্তমেৰ সক্খরকথলং উপাদায ইতরম্পি দ্ৰযং তিট্ঠন্তন্তি ৰুত্তং. ইতরঞ্চ দ্ৰযং চরন্তং উপাদায সক্খরকথলম্পি চরন্তন্তি ৰুত্তং. তত্থ চক্খুমতো পুরিসস্স তীরে ঠত্ৰা পস্সতো সিপ্পিসম্বুকাদীনং ৰিভূতকালো ৰিয আসৰানং খযায চিত্তং নীহরিত্ৰা নিসিন্নস্স ভিক্খুনো চতুন্নং সচ্চানং ৰিভূতকালো দট্ঠব্বো.

৪৩৪. ইদানি সত্তহাকারেহি সলিঙ্গতো সগুণতো খীণাসৰস্স নামং গণ্হন্তো, অযং ৰুচ্চতি, ভিক্খৰে, ভিক্খু সমণো ইতিপীতিআদিমাহ. তত্থ এৰং খো, ভিক্খৰে, ভিক্খু সমণো হোতীতিআদীসু, ভিক্খৰে, এৰং ভিক্খু সমিতপাপত্তা সমণো হোতি. বাহিতপাপত্তা ব্রাহ্মণো হোতি. ন্হাতকিলেসত্তা ন্হাতকো হোতি, ধোতকিলেসত্তাতি অত্থো. চতুমগ্গঞাণসঙ্খাতেহি ৰেদেহি অকুসলধম্মানং গতত্তা ৰেদগূ হোতি, ৰিদিতত্তাতি অত্থো. তেনেৰ ৰিদিতাস্স হোন্তীতিআদিমাহ. কিলেসানং সুতত্তা সোত্তিযো হোতি, নিস্সুতত্তা অপহতত্তাতি অত্থো. কিলেসানং আরকত্তা অরিযো হোতি, হতত্তাতি অত্থো. তেহি আরকত্তা অরহং হোতি, দূরীভূতত্তাতি অত্থো. সেসং সবত্থ পাকটমেৰাতি.

পপঞ্চসূদনিযা মজ্ঝিমনিকাযট্ঠকথায

মহাঅস্সপুরসুত্তৰণ্ণনা নিট্ঠিতা.

১০. চূল়অস্সপুরসুত্তৰণ্ণনা

৪৩৫. এৰং মে সুতন্তি চূল়অস্সপুরসুত্তং. তস্স দেসনাকারণং পুরিমসদিসমেৰ. সমণসামীচিপ্পটিপদাতি সমণানং অনুচ্ছৰিকা সমণানং অনুলোমপ্পটিপদা.

৪৩৬. সমণমলানন্তিআদীসু এতে ধম্মা উপ্পজ্জমানা সমণে মলিনে করোন্তি মলগ্গহিতে, তস্মা ‘‘সমণমলা’’তি ৰুচ্চন্তি. এতেহি সমণা দুস্সন্তি, পদুস্সন্তি, তস্মা সমণদোসাতি ৰুচ্চন্তি. এতে উপ্পজ্জিত্ৰা সমণে কসটে নিরোজে করোন্তি মিলাপেন্তি, তস্মা সমণকসটাতি ৰুচ্চন্তি. আপাযিকানং ঠানানন্তি অপাযে নিব্বত্তাপকানং কারণানং. দুগ্গতিৰেদনিযানন্তি দুগ্গতিযং ৰিপাকৰেদনায পচ্চযানং. মতজং নামাতি মনুস্সা তিখিণং অযং অযেন সুঘংসিত্ৰা তং অযচুণ্ণং মংসেন সদ্ধিং মদ্দিত্ৰা কোঞ্চসকুণে খাদাপেন্তি. তে উচ্চারং কাতুং অসক্কোন্তা মরন্তি. নো চে মরন্তি, পহরিত্ৰা মারেন্তি. অথ তেসং কুচ্ছিং ফালেত্ৰা নং উদকেন ধোৰিত্ৰা চুণ্ণং গহেত্ৰা মংসেন সদ্ধিং মদ্দিত্ৰা পুন খাদাপেন্তীতি এৰং সত্ত ৰারে খাদাপেত্ৰা গহিতেন অযচুণ্ণেন আৰুধং করোন্তি. সুসিক্খিতা চ নং অযকারা বহুহত্থকম্মমূলং লভিত্ৰা করোন্তি. তং মতসকুণতো জাতত্তা ‘‘মতজ’’ন্তি ৰুচ্চতি, অতিতিখিণং হোতি. পীতনিসিতন্তি উদকপীতঞ্চেৰ সিলায চ সুনিঘংসিতং. সঙ্ঘাটিযাতি কোসিযা. সম্পারুতন্তি পরিযোনদ্ধং. সম্পলিৰেঠিতন্তি সমন্ততো ৰেঠিতং.

৪৩৭. রজোজল্লিকস্সাতি রজোজল্লধারিনো. উদকোরোহকস্সাতি দিৰসস্স তিক্খত্তুং উদকং ওরোহন্তস্স. রুক্খমূলিকস্সাতি রুক্খমূলৰাসিনো. অব্ভোকাসিকস্সাতি অব্ভোকাসৰাসিনো. উব্ভট্ঠকস্সাতি উদ্ধং ঠিতকস্স. পরিযাযভত্তিকস্সাতি মাসৰারেন ৰা অড্ঢমাসৰারেন ৰা ভুঞ্জন্তস্স. সব্বমেতং বাহিরসমযেনেৰ কথিতং. ইমস্মিঞ্হি সাসনে চীৰরধরো ভিক্খু সঙ্ঘাটিকোতি ন ৰুচ্চতি. রজোজল্লধারণাদিৰতানি ইমস্মিং সাসনে নত্থিযেৰ. বুদ্ধৰচনস্স বুদ্ধৰচনমেৰ নামং, ন মন্তাতি. রুক্খমূলিকো, অব্ভোকাসিকোতি এত্তকংযেৰ পন লব্ভতি. তম্পি বাহিরসমযেনেৰ কথিতং. জাতমেৰ নন্তি তংদিৰসে জাতমত্তংযেৰ নং. সঙ্ঘাটিকং করেয্যুন্তি সঙ্ঘাটিকং ৰত্থং নিৰাসেত্ৰা চ পারুপিত্ৰা চ সঙ্ঘাটিকং করেয্যুং. এস নযো সব্বত্থ.

৪৩৮. ৰিসুদ্ধমত্তানং সমনুপস্সতীতি অত্তানং ৰিসুজ্ঝন্তং পস্সতি. ৰিসুদ্ধোতি পন ন তাৰ ৰত্তব্বো. পামোজ্জং জাযতীতি তুট্ঠাকারো জাযতি. পমুদিতস্স পীতীতি তুট্ঠস্স সকলসরীরং খোভযমানা পীতি জাযতি. পীতিমনস্স কাযোতি পীতিসম্পযুত্তস্স পুগ্গলস্স নামকাযো. পস্সম্ভতীতি ৰিগতদরথো হোতি. সুখং ৰেদেতীতি কাযিকম্পি চেতসিকম্পি সুখং ৰেদিযতি. চিত্তং সমাধিযতীতি ইমিনা নেক্খম্মসুখেন সুখিতস্স চিত্তং সমাধিযতি, অপ্পনাপত্তং ৰিয হোতি. সো মেত্তাসহগতেন চেতসাতি হেট্ঠা কিলেসৰসেন আরদ্ধা দেসনা পব্বতে ৰুট্ঠৰুট্ঠি ৰিয নদিং যথানুসন্ধিনা ব্রহ্মৰিহারভাৰনং ওতিণ্ণা. তত্থ যং ৰত্তব্বং সিযা, তং সব্বং ৰিসুদ্ধিমগ্গে ৰুত্তমেৰ. সেয্যথাপি, ভিক্খৰে, পোক্খরণীতি মহাসীহনাদসুত্তে মগ্গো পোক্খরণিযা উপমিতো, ইধ সাসনং উপমিতন্তি ৰেদিতব্বং. আসৰানং খযা সমণো হোতীতি সব্বকিলেসানং সমিতত্তা পরমত্থসমণো হোতীতি. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

চূল়অস্সপুরসুত্তৰণ্ণনা নিট্ঠিতা.

চতুত্থৰগ্গৰণ্ণনা নিট্ঠিতা.

৫. চূল়যমকৰগ্গো

১. সালেয্যকসুত্তৰণ্ণনা

৪৩৯. এৰং মে সুতন্তি সালেয্যকসুত্তং. তত্থ কোসলেসূতি কোসলা নাম জানপদিনো রাজকুমারা. তেসং নিৰাসো একোপি জনপদো রুল়্হীসদ্দেন কোসলাতি ৰুচ্চতি, তস্মিং কোসলেসু জনপদে. পোরাণা পনাহু – যস্মা পুব্বে মহাপনাদং রাজকুমারং নানানাটকানি দিস্ৰা সিতমত্তম্পি অকরোন্তং সুত্ৰা রাজা আহ – ‘‘যো মম পুত্তং হসাপেতি, সব্বালঙ্কারেন নং অলঙ্করোমী’’তি. ততো নঙ্গলানিপি ছড্ডেত্ৰা মহাজনকাযে সন্নিপতিতে মনুস্সা সাতিরেকানি সত্তৰস্সানি নানাকীল়িকাযো দস্সেত্ৰা নং হসাপেতুং নাসক্খিংসু. ততো সক্কো দেৰনটং পেসেসি. সো দিব্বনাটকং দস্সেত্ৰা হসাপেসি. অথ তে মনুস্সা অত্তনো অত্তনো ৰসনোকাসাভিমুখা পক্কমিংসু. তে পটিপথে মিত্তসুহজ্জাদযো দিস্ৰা পটিসন্থারং করোন্তা, ‘‘কচ্চি, ভো, কুসলং, কচ্চি, ভো, কুসল’’ন্তি আহংসু. তস্মা তং ‘‘কুসলং কুসল’’ন্তি ৰচনং উপাদায সো পদেসো কোসলাতি ৰুচ্চতীতি.

চারিকং চরমানোতি অতুরিতচারিকং চরমানো. মহতা ভিক্খুসঙ্ঘেন সদ্ধিন্তি সতং ৰা সহস্সং ৰা সতসহস্সং ৰাতি এৰং অপরিচ্ছিন্নেন মহতা ভিক্খুসঙ্ঘেন সদ্ধিং. ব্রাহ্মণগামোতি ব্রাহ্মণানং সমোসরণগামোপি ব্রাহ্মণগামোতি ৰুচ্চতি ব্রাহ্মণানং ভোগগামোপি. ইধ সমোসরণগামো অধিপ্পেতো. তদৰসরীতি তং অৰসরি, সম্পত্তোতি অত্থো. ৰিহারো পনেত্থ অনিযামিতো; তস্মা তস্স অৰিদূরে বুদ্ধানং অনুচ্ছৰিকো একো ৰনসণ্ডো ভৰিস্সতি, সত্থা তং ৰনসণ্ডং গতোতি ৰেদিতব্বো. অস্সোসুন্তি সুণিংসু উপলভিংসু. সোতদ্ৰারসম্পত্তৰচননিগ্ঘোসানুসারেন জানিংসু. খোতি অৰধারণত্থে পদপূরণমত্তে ৰা নিপাতো. তত্থ অৰধারণত্থেন অস্সোসুংযেৰ, ন নেসং কোচি সৰনন্তরাযো অহোসীতি অযমত্থো ৰেদিতব্বো. পদপূরণেন ব্যঞ্জনসিলিট্ঠতামত্তমেৰ.

ইদানি যমত্থং অস্সোসুং, তং পকাসেতুং সমণো খলু, ভো, গোতমোতিআদি ৰুত্তং. তত্থ সমিতপাপত্তা সমণোতি ৰেদিতব্বো. খলূতি অনুস্সৰনত্থে নিপাতো. ভোতি তেসং অঞ্ঞমঞ্ঞং আলপনমত্তং. গোতমোতি ভগৰতো গোত্তৰসেন পরিদীপনং. তস্মা সমণো খলু, ভো, গোতমোতি এত্থ সমণো কির, ভো, গোতমগোত্তোতি এৰমত্থো দট্ঠব্বো. সক্যপুত্তোতি ইদং পন ভগৰতো উচ্চাকুলপরিদীপনং. সক্যকুলা পব্বজিতোতি সদ্ধাপব্বজিতভাৰদীপনং. কেনচি পারিজুঞ্ঞেন অনভিভূতো অপরিক্খীণংযেৰ তং কুলং পহায সদ্ধাপব্বজিতোতি ৰুত্তং হোতি. ততো পরং ৰুত্তত্থমেৰ. তং খো পনাতি ইত্থম্ভূতাখ্যানত্থে উপযোগৰচনং, তস্স খো পন ভোতো গোতমস্সাতি অত্থো. কল্যাণোতি কল্যাণগুণসমন্নাগতো, সেট্ঠোতি ৰুত্তং হোতি. কিত্তিসদ্দোতি কিত্তিযেৰ, থুতিঘোসো ৰা. অব্ভুগ্গতোতি সদেৰকং লোকং অজ্ঝোত্থরিত্ৰা উগ্গতো. কিন্তি? ‘‘ইতিপি সো ভগৰা…পে… বুদ্ধো ভগৰা’’তি.

তত্রাযং পদসম্বন্ধো – সো ভগৰা ইতিপি অরহং, ইতিপি সম্মাসম্বুদ্ধো…পে… ইতিপি ভগৰাতি. ইমিনা চ ইমিনা চ কারণেনাতি ৰুত্তং হোতি. তত্থ আরকত্তা, অরীনং অরানঞ্চ হতত্তা, পচ্চযাদীনং অরহত্তা, পাপকরণে রহাভাৰাতি ইমেহি তাৰ কারণেহি সো ভগৰা অরহন্তি ৰেদিতব্বোতিআদিনা নযেন মাতিকং নিক্খিপিত্ৰা সব্বানেৰ এতানি পদানি ৰিসুদ্ধিমগ্গে বুদ্ধানুস্সতিনিদ্দেসে ৰিত্থারিতানীতি ততো তেসং ৰিত্থারো গহেতব্বো.

সাধু খো পনাতি সুন্দরং খো পন; অত্থাৰহং সুখাৰহন্তি ৰুত্তং হোতি. তথারূপানং অরহতন্তি যথারূপো সো ভৰং গোতমো, এৰরূপানং অনেকেহিপি কপ্পকোটিসতসহস্সেহি দুল্লভদস্সনানং ব্যামপ্পভাপরিক্খিত্তেহি অসীতিঅনুব্যঞ্জনরতনপটিমণ্ডিতেহি দ্ৰত্তিংস্মহাপুরিসলক্খণৰরেহি সমাকিণ্ণমনোরমসরীরানং অতপ্পকদস্সনানং অতিমধুরধম্মনিগ্ঘোসানং, যথাভূতগুণাধিগমেন লোকে অরহন্তোতি লদ্ধসদ্দানং অরহতং. দস্সনং হোতীতি পসাদসোম্মানি অক্খীনি উম্মীলেত্ৰা দস্সনমত্তম্পি সাধু হোতি. সচে পন অট্ঠঙ্গসমন্নাগতেন ব্রহ্মস্সরেন ধম্মং দেসেন্তস্স একং পদম্পি সোতুং লভিস্সাম, সাধুতরংযেৰ ভৰিস্সতীতি এৰং অজ্ঝাসযং কত্ৰা.

যেন ভগৰা তেনুপসঙ্কমিংসূতি সব্বকিচ্চানি পহায তুট্ঠমানসা আগমংসু. এতদৰোচুন্তি দুৰিধা হি পুচ্ছা অগারিকপুচ্ছা অনগারিকপুচ্ছা চ. তত্থ ‘‘কিং, ভন্তে, কুসলং, কিং অকুসল’’ন্তি ইমিনা নযেন অগারিকপুচ্ছা আগতা. ‘‘ইমে খো, ভন্তে, পঞ্চুপাদানক্খন্ধা’’তি ইমিনা নযেন অনগারিকপুচ্ছা. ইমে পন অত্তনো অনুরূপং অগারিকপুচ্ছং পুচ্ছন্তা এতং, ‘‘কো নু খো, ভো গোতম, হেতু কো পচ্চযো’’তিআদিৰচনং অৰোচুং. তেসং ভগৰা যথা ন সক্কোন্তি সল্লক্খেতুং, এৰং সংখিত্তেনেৰ তাৰ পঞ্হং ৰিস্সজ্জেন্তো, অধম্মচরিযাৰিসমচরিযাহেতু খো গহপতযোতিআদিমাহ. কস্মা পন ভগৰা যথা ন সল্লক্খেন্তি, এৰং ৰিস্সজ্জেসীতি? পণ্ডিতমানিকা হি তে; আদিতোৰ মাতিকং অট্ঠপেত্ৰা যথা সল্লক্খেন্তি, এৰং অত্থে ৰিত্থারিতে, দেসনং উত্তানিকাতি মঞ্ঞন্তা অৰজানন্তি, মযম্পি কথেন্তা এৰমেৰ কথেয্যামাতি ৰত্তারো ভৰন্তি. তেন নেসং ভগৰা যথা ন সক্কোন্তি সল্লক্খেতুং, এৰং সংখিত্তেনেৰ তাৰ পঞ্হং ৰিস্সজ্জেসি. ততো সল্লক্খেতুং অসক্কোন্তেহি ৰিত্থারদেসনং যাচিতো ৰিত্থারেন দেসেতুং, তেন হি গহপতযোতিআদিমাহ. তত্থ তেন হীতি কারণত্থে নিপাতো. যস্মা মং তুম্হে যাচথ, তস্মাতি অত্থো.

৪৪০. তিৰিধন্তি তীহি কোট্ঠাসেহি. কাযেনাতি কাযদ্ৰারেন. অধম্মচরিযাৰিসমচরিযাতি অধম্মচরিযসঙ্খাতা ৰিসমচরিযা. অযং পনেত্থ পদত্থো, অধম্মস্স চরিযা অধম্মচরিযা, অধম্মকরণন্তি অত্থো. ৰিসমা চরিযা, ৰিসমস্স ৰা কম্মস্স চরিযাতি ৰিসমচরিযা. অধম্মচরিযা চ সা ৰিসমচরিযা চাতি অধম্মচরিযাৰিসমচরিযা. এতেনুপাযেন সব্বেসু কণ্হসুক্কপদেসু অত্থো ৰেদিতব্বো. লুদ্দোতি কক্খল়ো. দারুণোতি সাহসিকো. লোহিতপাণীতি পরং জীৰিতা ৰোরোপেন্তস্স পাণী লোহিতেন লিপ্পন্তি. সচেপি ন লিপ্পন্তি, তথাৰিধো লোহিতপাণীত্ৰেৰ ৰুচ্চতি. হতপ্পহতে নিৰিট্ঠোতি হতে চ পরস্স পহারদানে, পহতে চ পরমারণে নিৰিট্ঠো. অদযাপন্নোতি নিক্করুণতং আপন্নো.

যং তং পরস্সাতি যং তং পরস্স সন্তকং. পরৰিত্তূপকরণন্তি তস্সেৰ পরস্স ৰিত্তূপকরণং তুট্ঠিজননং পরিক্খারভণ্ডকং. গামগতং ৰাতি অন্তোগামে ৰা ঠপিতং. অরঞ্ঞগতং ৰাতি অরঞ্ঞে রুক্খগ্গপব্বতমত্থকাদীসু ৰা ঠপিতং. অদিন্নন্তি তেহি পরেহি কাযেন ৰা ৰাচায ৰা অদিন্নং. থেয্যসঙ্খাতন্তি এত্থ থেনোতি চোরো. থেনস্স ভাৰো থেয্যং, অৰহরণচিত্তস্সেতং অধিৰচনং. সঙ্খা সঙ্খাতন্তি অত্থতো একং, কোট্ঠাসস্সেতং অধিৰচনং, ‘‘সঞ্ঞানিদানা হি পপঞ্চসঙ্খা’’তিআদীসু ৰিয. থেয্যঞ্চ তং সঙ্খাতঞ্চাতি থেয্যসঙ্খাতং, থেয্যচিত্তসঙ্খাতো একো চিত্তকোট্ঠাসোতি অত্থো. করণত্থে চেতং পচ্চত্তৰচনং, তস্মা থেয্যসঙ্খাতেনাতি অত্থতো দট্ঠব্বং.

মাতুরক্খিতাতিআদীসু যং পিতরি নট্ঠে ৰা মতে ৰা ঘাসচ্ছাদনাদীহি পটিজগ্গমানা, ৰযপত্তং কুলঘরে দস্সামীতি মাতা রক্খতি, অযং মাতুরক্খিতা নাম. এতেনুপাযেন পিতুরক্খিতাদযোপি ৰেদিতব্বা. সভাগকুলানি পন কুচ্ছিগতেসুপি গব্ভেসু কতিকং করোন্তি – ‘‘সচে ময্হং পুত্তো হোতি, তুয্হং ধীতা, অঞ্ঞত্থ গন্তুং ন লভিস্সতি, ময্হং পুত্তস্সেৰ হোতূ’’তি. এৰং গব্ভেপি পরিগ্গহিতা সস্সামিকা নাম. ‘‘যো ইত্থন্নামং ইত্থিং গচ্ছতি, তস্স এত্তকো দণ্ডো’’তি এৰং গামং ৰা গেহং ৰা ৰীথিং ৰা উদ্দিস্স ঠপিতদণ্ডা, পন সপরিদণ্ডা নাম. অন্তমসো মালাগুণপরিক্খিত্তাপীতি যা সব্বন্তিমেন পরিচ্ছেদেন, ‘‘এসা মে ভরিযা ভৰিস্সতী’’তি সঞ্ঞায তস্সা উপরি কেনচি মালাগুণং খিপন্তেন মালাগুণমত্তেনাপি পরিক্খিত্তা হোতি. তথারূপাসু চারিত্তং আপজ্জিতা হোতীতি এৰরূপাসু ইত্থীসু সম্মাদিট্ঠিসুত্তে ৰুত্তমিচ্ছাচারলক্খণৰসেন ৰীতিক্কমং কত্তা হোতি.

সভাগতোতি সভাযং ঠিতো. পরিসাগতোতি পরিসাযং ঠিতো. ঞাতিমজ্ঝগতোতি দাযাদানং মজ্ঝে ঠিতো. পূগমজ্ঝগতোতি সেনীনং মজ্ঝে ঠিতো. রাজকুলমজ্ঝগতোতি রাজকুলস্স মজ্ঝে মহাৰিনিচ্ছযে ঠিতো. অভিনীতোতি পুচ্ছনত্থায নীতো. সক্খিপুট্ঠোতি সক্খিং কত্ৰা পুচ্ছিতো. এহম্ভো পুরিসাতি আলপনমেতং. অত্তহেতু ৰা পরহেতু ৰাতি অত্তনো ৰা পরস্স ৰা হত্থপাদাদিহেতু ৰা ধনহেতু ৰা. আমিসকিঞ্চিক্খহেতু ৰাতি এত্থ আমিসন্তি লাভো অধিপ্পেতো. কিঞ্চিক্খন্তি যং ৰা তং ৰা অপ্পমত্তকং. অন্তমসো তিত্তিরৰট্টকসপ্পিপিণ্ডনৰনীতপিণ্ডাদিমত্তকস্সপি লঞ্জস্স হেতূতি অত্থো. সম্পজানমুসা ভাসিতা হোতীতি জানন্তোযেৰ মুসাৰাদং কত্তা হোতি.

ইমেসং ভেদাযাতি যেসং ইতোতি ৰুত্তানং সন্তিকে সুতং হোতি, তেসং ভেদায. অমূসং ভেদাযাতি যেসং অমুত্রাতি ৰুত্তানং সন্তিকে সুতং হোতি, তেসং ভেদায. ইতি সমগ্গানং ৰা ভেদকাতি এৰং সমগ্গানং ৰা দ্ৰিন্নং সহাযকানং ভেদং কত্তা. ভিন্নানং ৰা অনুপ্পদাতাতি সুট্ঠু কতং তযা, তং পজহন্তেন কতিপাহেনেৰ তে মহন্তং অনত্থং করেয্যাতি এৰং ভিন্নানং পুন অসংসন্দনায অনুপ্পদাতা উপত্থম্ভেতা কারণং দস্সেতাতি অত্থো. ৰগ্গো আরামো অভিরতিট্ঠানমস্সাতি ৰগ্গারামো. ৰগ্গরতোতি ৰগ্গেসু রতো. ৰগ্গে দিস্ৰা ৰা সুত্ৰা ৰা নন্দতীতি ৰগ্গনন্দী. ৰগ্গকরণিং ৰাচন্তি যা ৰাচা সমগ্গেপি সত্তে ৰগ্গে করোতি ভিন্দতি, তং কলহকারণং ৰাচং ভাসিতা হোতি.

অণ্ডকাতি যথা সদোসে রুক্খে অণ্ডকানি উট্ঠহন্তি, এৰং সদোসতায খুংসনাৰম্ভনাদিৰচনেহি অণ্ডকা জাতা. কক্কসাতি পূতিকা. যথা নাম পূতিকরুক্খো কক্কসো হোতি পগ্ঘরিতচুণ্ণো, এৰং কক্কসা হোতি, সোতং ঘংসমানা ৰিয পৰিসতি. তেন ৰুত্তং ‘‘কক্কসা’’তি. পরকটুকাতি পরেসং কটুকা অমনাপা দোসজননী. পরাভিসজ্জনীতি কুটিলকণ্টকসাখা ৰিয মম্মেসু ৰিজ্ঝিত্ৰা পরেসং অভিসজ্জনী গন্তুকামানম্পি গন্তুং অদত্ৰা লগ্গনকারী. কোধসামন্তাতি কোধস্স আসন্না. অসমাধিসংৰত্তনিকাতি অপ্পনাসমাধিস্স ৰা উপচারসমাধিস্স ৰা অসংৰত্তনিকা. ইতি সব্বানেৰ তানি সদোসৰাচায ৰেৰচনানি.

অকালৰাদীতি অকালেন ৰত্তা. অভূতৰাদীতি যং নত্থি, তস্স ৰত্তা. অনত্থৰাদীতি অকারণনিস্সিতং ৰত্তা. অধম্মৰাদীতি অসভাৰং ৰত্তা. অৰিনযৰাদীতি অসংৰরৰিনযপটিসংযুত্তস্স ৰত্তা. অনিধানৰতি ৰাচন্তি হদযমঞ্জূসাযং নিধেতুং অযুত্তং ৰাচং ভাসিতা হোতি. অকালেনাতি ৰত্তব্বকালস্স পুব্বে ৰা পচ্ছা ৰা অযুত্তকালে ৰত্তা হোতি. অনপদেসন্তি সুত্তাপদেসৰিরহিতং. অপরিযন্তৰতিন্তি অপরিচ্ছেদং, সুত্তং ৰা জাতকং ৰা নিক্খিপিত্ৰা তস্স উপলব্ভং ৰা উপমং ৰা ৰত্থুং ৰা আহরিত্ৰা বাহিরকথংযেৰ কথেতি. নিক্খিত্তং নিক্খিত্তমেৰ হোতি. ‘‘সুত্তং নু খো কথেতি জাতকং নু খো, নস্স অন্তং ৰা কোটিং ৰা পস্সামা’’তি ৰত্তব্বতং আপজ্জতি. যথা ৰটরুক্খসাখানং গতগতট্ঠানে পারোহা ওতরন্তি, ওতিণ্ণোতিণ্ণট্ঠানে সম্পজ্জিত্ৰা পুন ৰড্ঢন্তিযেৰ. এৰং অড্ঢযোজনম্পি যোজনম্পি গচ্ছন্তিযেৰ, গচ্ছন্তে গচ্ছন্তে পন মূলরুক্খো ৰিনস্সতি, পৰেণিজাতকাৰ তিট্ঠন্তি. এৰমযম্পি নিগ্রোধধম্মকথিকো নাম হোতি; নিক্খিত্তং নিক্খিত্তমত্তমেৰ কত্ৰা পস্সেনেৰ পরিহরন্তো গচ্ছতি. যো পন বহুম্পি ভণন্তো এতদত্থমিদং ৰুত্তন্তি আহরিত্ৰা জানাপেতুং সক্কোতি, তস্স কথেতুং ৰট্টতি. অনত্থসংহিতন্তি ন অত্থনিস্সিতং.

অভিজ্ঝাতা হোতীতি অভিজ্ঝায ওলোকেতা হোতি. অহো ৰতাতি পত্থনত্থে নিপাতো. অভিজ্ঝায ওলোকিতমত্তকেন চেত্থ কম্মপথভেদো ন হোতি. যদা পন, ‘‘অহো ৰতিদং মম সন্তকং অস্স, অহমেত্থ ৰসং ৰত্তেয্য’’ন্তি অত্তনো পরিণামেতি, তদা কম্মপথভেদো হোতি, অযমিধ অধিপ্পেতো.

ব্যাপন্নচিত্তোতি ৰিপন্নচিত্তো পূতিভূতচিত্তো. পদুট্ঠমনসঙ্কপ্পোতি দোসেন দুট্ঠচিত্তসঙ্কপ্পো. হঞ্ঞন্তূতি ঘাতিযন্তূ. ৰজ্ঝন্তূতি ৰধং পাপুণন্তু. মা ৰা অহেসুন্তি কিঞ্চিপি মা অহেসুং. ইধাপি কোপমত্তকেন কম্মপথভেদো ন হোতি. হঞ্ঞন্তূতিআদিচিন্তনেনেৰ হোতি, তস্মা এৰং ৰুত্তং.

মিচ্ছাদিট্ঠিকোতি অকুসলদস্সনো. ৰিপরীতদস্সনোতি ৰিপল্লত্থদস্সনো. নত্থি দিন্নন্তি দিন্নস্স ফলাভাৰং সন্ধায ৰদতি. যিট্ঠং ৰুচ্চতি মহাযাগো. হুতন্তি পহেণকসক্কারো অধিপ্পেতো, তম্পি উভযং ফলাভাৰমেৰ সন্ধায পটিক্খিপতি. সুকতদুক্কটানন্তি সুকতদুক্কটানং, কুসলাকুসলানন্তি অত্থো. ফলং ৰিপাকোতি যং ফলন্তি ৰা ৰিপাকোতি ৰা ৰুচ্চতি, তং নত্থীতি ৰদতি. নত্থি অযং লোকোতি পরলোকে ঠিতস্স অযং লোকো নত্থি. নত্থি পরো লোকোতি ইধ লোকে ঠিতস্সপি পরলোকো নত্থি, সব্বে তত্থ তত্থেৰ উচ্ছিজ্জন্তীতি দস্সেতি. নত্থি মাতা নত্থি পিতাতি তেসু সম্মাপটিপত্তিমিচ্ছাপটিপত্তীনং ফলাভাৰৰসেন ৰদতি. নত্থি সত্তা ওপপাতিকাতি চৰিত্ৰা উপপজ্জনকসত্তা নাম নত্থীতি ৰদতি. সযং অভিঞ্ঞা সচ্ছিকত্ৰা পৰেদেন্তীতি যে ইমঞ্চ লোকং পরঞ্চ লোকং অভিৰিসিট্ঠায পঞ্ঞায সযং পচ্চক্খং কত্ৰা পৰেদেন্তি, তে নত্থীতি সব্বঞ্ঞুবুদ্ধানং অভাৰং দীপেতি, এত্তাৰতা দসৰত্থুকা মিচ্ছাদিট্ঠি কথিতা হোতি.

৪৪১. পাণাতিপাতং পহাযাতিআদযো সত্ত কম্মপথা চূল়হত্থিপদে ৰিত্থারিতা. অনভিজ্ঝাদযো উত্তানত্থাযেৰ.

৪৪২. সহব্যতং উপপজ্জেয্যন্তি সহভাৰং উপগচ্ছেয্যং. ব্রহ্মকাযিকানং দেৰানন্তি পঠমজ্ঝানভূমিদেৰানং. আভানং দেৰানন্তি আভা নাম ৰিসুং নত্থি, পরিত্তাভঅপ্পমাণাভআভস্সরানমেতং অধিৰচনং. পরিত্তাভানন্তিআদি পন একতো অগ্গহেত্ৰা তেসংযেৰ ভেদতো গহণং. পরিত্তসুভানন্তিআদীসুপি এসেৰ নযো. ইতি ভগৰা আসৰক্খযং দস্সেত্ৰা অরহত্তনিকূটেন দেসনং নিট্ঠপেসি.

ইধ ঠত্ৰা পন দেৰলোকা সমানেতব্বা. তিস্সন্নং তাৰ ঝানভূমীনং ৰসেন নৰ ব্রহ্মলোকা, পঞ্চ সুদ্ধাৰাসা চতূহি আরূপেহি সদ্ধিং নৰাতি অট্ঠারস, ৰেহপ্ফলেহি সদ্ধিং একূনৰীসতি, তে অসঞ্ঞং পক্খিপিত্ৰা ৰীসতি ব্রহ্মলোকা হোন্তি, এৰং ছহি কামাৰচরেহি সদ্ধিং ছব্বীসতি দেৰলোকা নাম. তেসং সব্বেসম্পি ভগৰতা দসকুসলকম্মপথেহি নিব্বত্তি দস্সিতা.

তত্থ ছসু তাৰ কামাৰচরেসু তিণ্ণং সুচরিতানং ৰিপাকেনেৰ নিব্বত্তি হোতি. উপরিদেৰলোকানং পন ইমে কম্মপথা উপনিস্সযৰসেন কথিতা. দস কুসলকম্মপথা হি সীলং, সীলৰতো চ কসিণপরিকম্মং ইজ্ঝতীতি. সীলে পতিট্ঠায কসিণপরিকম্মং কত্ৰা পঠমজ্ঝানং নিব্বত্তেত্ৰা পঠমজ্ঝানভূমিযং নিব্বত্ততি; দুতিযাদীনি ভাৰেত্ৰা দুতিযজ্ঝানভূমিআদীসু নিব্বত্ততি; রূপাৰচরজ্ঝানং পাদকং কত্ৰা ৰিপস্সনং ৰড্ঢেত্ৰা অনাগামিফলে পতিট্ঠিতো পঞ্চসু সুদ্ধাৰাসেসু নিব্বত্ততি; রূপাৰচরজ্ঝানং পাদকং কত্ৰা অরূপাৰচরসমাপত্তিং নিব্বত্তেত্ৰা চতূসু অরূপেসু নিব্বত্ততি; রূপারূপজ্ঝানং পাদকং কত্ৰা ৰিপস্সনং ৰড্ঢেত্ৰা অরহত্তং পাপুণাতি. অসঞ্ঞভৰো পন বাহিরকানং তাপসপরিব্বাজকানং আচিণ্ণোতি ইধ ন নিদ্দিট্ঠো. সেসং সব্বত্থ উত্তানত্থমেৰাতি.

পপঞ্চসূদনিযা মজ্ঝিমনিকাযট্ঠকথায

সালেয্যকসুত্তৰণ্ণনা নিট্ঠিতা.

২. ৰেরঞ্জকসুত্তৰণ্ণনা

৪৪৪. এৰং মে সুতন্তি ৰেরঞ্জকসুত্তং. তত্থ ৰেরঞ্জকাতি ৰেরঞ্জৰাসিনো. কেনচিদেৰ করণীযেনাতি কেনচিদেৰ অনিযমিতকিচ্চেন. সেসং সব্বং পুরিমসুত্তে ৰুত্তনযেনেৰ ৰেদিতব্বং. কেৰলঞ্হি ইধ অধম্মচারী ৰিসমচারীতি এৰং পুগ্গলাধিট্ঠানা দেসনা কতা. পুরিমসুত্তে ধম্মাধিট্ঠানাতি অযং ৰিসেসো. সেসং তাদিসমেৰাতি.

পপঞ্চসূদনিযা মজ্ঝিমনিকাযট্ঠকথায

ৰেরঞ্জকসুত্তৰণ্ণনা নিট্ঠিতা.

৩. মহাৰেদল্লসুত্তৰণ্ণনা

৪৪৯. এৰং মে সুতন্তি মহাৰেদল্লসুত্তং. তত্থ আযস্মাতি সগারৰসপ্পতিস্সৰচনমেতং. মহাকোট্ঠিকোতি তস্স থেরস্স নামং. পটিসল্লানা ৰুট্ঠিতোতি ফলসমাপত্তিতো ৰুট্ঠিতো. দুপ্পঞ্ঞো দুপ্পঞ্ঞোতি এত্থ পঞ্ঞায দুট্ঠং নাম নত্থি, অপ্পঞ্ঞো নিপ্পঞ্ঞোতি অত্থো. কিত্তাৰতা নু খোতি কারণপরিচ্ছেদপুচ্ছা, কিত্তকেন নু খো এৰং ৰুচ্চতীতি অত্থো. পুচ্ছা চ নামেসা অদিট্ঠজোতনাপুচ্ছা, দিট্ঠসংসন্দনাপুচ্ছা, ৰিমতিচ্ছেদনাপুচ্ছা, অনুমতিপুচ্ছা, কথেতুকম্যতাপুচ্ছাতি পঞ্চৰিধা হোতি. তাসমিদং নানাকরণং –

কতমা অদিট্ঠজোতনাপুচ্ছা? পকতিযা লক্খণং অঞ্ঞাতং হোতি অদিট্ঠং অতুলিতং অতীরিতং অৰিভূতং অৰিভাৰিতং, তস্স ঞাণায দস্সনায তুলনায তীরণায ৰিভূতায ৰিভাৰনত্থায পঞ্হং পুচ্ছতি. অযং অদিট্ঠজোতনাপুচ্ছা.

কতমা দিট্ঠসংসন্দনাপুচ্ছা? পকতিযা লক্খণং ঞাতং হোতি দিট্ঠং তুলিতং তীরিতং ৰিভূতং ৰিভাৰিতং, অঞ্ঞেহি পণ্ডিতেহি সদ্ধিং সংসন্দনত্থায পঞ্হং পুচ্ছতি. অযং দিট্ঠসংসন্দনাপুচ্ছা.

কতমা ৰিমতিচ্ছেদনাপুচ্ছা? পকতিযা সংসযপক্খন্দো হোতি ৰিমতিপক্খন্দো, দ্ৰেল়্হকজাতো, ‘‘এৰং নু খো, ন নু খো, কিং নু খো, কথং নু খো’’তি, সো ৰিমতিচ্ছেদনত্থায পঞ্হং পুচ্ছতি. অযং ৰিমতিচ্ছেদনাপুচ্ছা (মহানি. ১৫০; চূল়নি. পুণ্ণকমাণৰপুচ্ছানিদ্দেস ১২).

‘‘তং কিং মঞ্ঞথ, ভিক্খৰে, রূপং নিচ্চং ৰা অনিচ্চং ৰাতি? অনিচ্চং, ভন্তে’’তি (মহাৰ. ২১) এৰরূপা অনুমতিং গহেত্ৰা ধম্মদেসনাকালে পুচ্ছা অনুমতিপুচ্ছা নাম.

‘‘চত্তারোমে, ভিক্খৰে, সতিপট্ঠানা, কতমে চত্তারো’’তি (সং. নি. ৫.৩৯০) এৰরূপা ভিক্খুসঙ্ঘং সযমেৰ পুচ্ছিত্ৰা সযমেৰ ৰিস্সজ্জেতুকামস্স পুচ্ছা কথেতুকম্যতাপুচ্ছা নাম. তাসু ইধ দিট্ঠসংসন্দনাপুচ্ছা অধিপ্পেতা.

থেরো হি অত্তনো দিৰাট্ঠানে নিসীদিত্ৰা সযমেৰ পঞ্হং সমুট্ঠপেত্ৰা সযং ৰিনিচ্ছিনন্তো ইদং সুত্তং আদিতো পট্ঠায মত্থকং পাপেসি. একচ্চো হি পঞ্হং সমুট্ঠাপেতুংযেৰ সক্কোতি ন নিচ্ছেতুং; একচ্চো নিচ্ছেতুং সক্কোতি ন সমুট্ঠাপেতুং; একচ্চো উভযম্পি ন সক্কোতি; একচ্চো উভযম্পি সক্কোতি. তেসু থেরো উভযম্পি সক্কোতিযেৰ. কস্মা? মহাপঞ্ঞতায. মহাপঞ্ঞং নিস্সায হি ইমস্মিং সাসনে সারিপুত্তত্থেরো, মহাকচ্চানত্থেরো, পুণ্ণত্থেরো, কুমারকস্সপত্থেরো, আনন্দত্থেরো, অযমেৰ আযস্মাতি সম্বহুলা থেরা ৰিসেসট্ঠানং অধিগতা. ন হি সক্কা যায ৰা তায ৰা অপ্পমত্তিকায পঞ্ঞায সমন্নাগতেন ভিক্খুনা সাৰকপারমীঞাণস্স মত্থকং পাপুণিতুং, মহাপঞ্ঞেন পন সক্কাতি মহাপঞ্ঞতায সারিপুত্তত্থেরো তং ঠানং অধিগতো. পঞ্ঞায হি থেরেন সদিসো নত্থি. তেনেৰ নং ভগৰা এতদগ্গে ঠপেসি – ‘‘এতদগ্গং, ভিক্খৰে, মম সাৰকানং ভিক্খূনং মহাপঞ্ঞানং যদিদং সারিপুত্তো’’তি (অ. নি. ১.১৮৯).

তথা ন সক্কা যায ৰা তায ৰা অপ্পমত্তিকায পঞ্ঞায সমন্নাগতেন ভিক্খুনা ভগৰতা সংখিত্তেন ভাসিতস্স সব্বঞ্ঞুতঞ্ঞাণেন সদ্ধিং সংসন্দিত্ৰা সমানেত্ৰা ৰিত্থারেন অত্থং ৰিভজেতুং, মহাপঞ্ঞেন পন সক্কাতি মহাপঞ্ঞতায মহাকচ্চানত্থেরো তত্থ পটিবলো জাতো, তেনেৰ নং ভগৰা এতদগ্গে ঠপেসি – ‘‘এতদগ্গং, ভিক্খৰে, মম সাৰকানং ভিক্খূনং সংখিত্তেন ভাসিতস্স ৰিত্থারেন অত্থং ৰিভজন্তানং যদিদং মহাকচ্চানো’’তি (অ. নি. ১.১৯৭).

তথা ন সক্কা যায ৰা তায ৰা অপ্পমত্তিকায পঞ্ঞায সমন্নাগতেন ভিক্খুনা ধম্মকথং কথেন্তেন দস কথাৰত্থূনি আহরিত্ৰা সত্ত ৰিসুদ্ধিযো ৰিভজন্তেন ধম্মকথং কথেতুং, মহাপঞ্ঞেন পন সক্কাতি মহাপঞ্ঞতায পুণ্ণত্থেরো চতুপরিসমজ্ঝে অলঙ্কতধম্মাসনে চিত্তবীজনিং গহেত্ৰা নিসিন্নো লীল়াযন্তো পুণ্ণচন্দো ৰিয ধম্মং কথেসি. তেনেৰ নং ভগৰা এতদগ্গে ঠপেসি – ‘‘এতদগ্গং, ভিক্খৰে, মম সাৰকানং ভিক্খূনং ধম্মকথিকানং যদিদং পুণ্ণো মন্তাণিপুত্তো’’তি (অ. নি. ১.১৯৬).

তথা যায ৰা তায ৰা অপ্পমত্তিকায পঞ্ঞায সমন্নাগতো ভিক্খু ধম্মং কথেন্তো ইতো ৰা এত্তো ৰা অনুক্কমিত্ৰা যট্ঠিকোটিং গহেত্ৰা অন্ধো ৰিয, একপদিকং দণ্ডকসেতুং আরুল়্হো ৰিয চ গচ্ছতি. মহাপঞ্ঞো পন চতুপ্পদিকং গাথং নিক্খিপিত্ৰা উপমা চ কারণানি চ আহরিত্ৰা তেপিটকং বুদ্ধৰচনং গহেত্ৰা হেট্ঠুপরিযং করোন্তো কথেসি. মহাপঞ্ঞতায পন কুমারকস্সপত্থেরো চতুপ্পদিকং গাথং নিক্খিপিত্ৰা উপমা চ কারণানি চ আহরিত্ৰা তেহি সদ্ধিং যোজেন্তো জাতস্সরে পঞ্চৰণ্ণানি কুসুমানি ফুল্লাপেন্তো ৰিয সিনেরুমত্থকে ৰট্টিসহস্সং তেলপদীপং জালেন্তো ৰিয তেপিটকং বুদ্ধৰচনং হেট্ঠুপরিযং করোন্তো কথেসি. তেনেৰ নং ভগৰা এতদগ্গে ঠপেসি – ‘‘এতদগ্গং, ভিক্খৰে, মম সাৰকানং ভিক্খূনং চিত্তকথিকানং যদিদং কুমারকস্সপো’’তি (অ. নি. ১.২১৭).

তথা যায ৰা তায ৰা অপ্পমত্তিকায পঞ্ঞায সমন্নাগতো ভিক্খু চতূহি মাসেহি চতুপ্পদিকম্পি গাথং গহেতুং ন সক্কোতি. মহাপঞ্ঞো পন একপদে ঠত্ৰা পদসতম্পি পদসহস্সম্পি গণ্হাতি. আনন্দত্থেরো পন মহাপঞ্ঞতায একপদুদ্ধারে ঠত্ৰা সকিংযেৰ সুত্ৰা পুন অপুচ্ছন্তো সট্ঠি পদসহস্সানি পন্নরস গাথাসহস্সানি ৰল্লিযা পুপ্ফানি আকড্ঢিত্ৰা গণ্হন্তো ৰিয একপ্পহারেনেৰ গণ্হাতি. গহিতগহিতং পাসাণে খতলেখা ৰিয, সুৰণ্ণঘটে পক্খিত্তসীহৰসা ৰিয চ গহিতাকারেনেৰ তিট্ঠতি. তেনেৰ নং ভগৰা এতদগ্গে ঠপেসি – ‘‘এতদগ্গং, ভিক্খৰে, মম সাৰকানং ভিক্খূনং গতিমন্তানং যদিদং আনন্দো, সতিমন্তানং, ধিতিমন্তানং, বহুস্সুতানং, উপট্ঠাকানং যদিদং আনন্দো’’তি (অ. নি. ১.২১৯-২২৩).

ন হি সক্কা যায ৰা তায ৰা অপ্পমত্তিকায পঞ্ঞায সমন্নাগতেন ভিক্খুনা চতুপটিসম্ভিদাপভেদস্স মত্থকং পাপুণিতুং. মহাপঞ্ঞেন পন সক্কাতি মহাপঞ্ঞতায মহাকোট্ঠিতত্থেরো অধিগমপরিপুচ্ছাসৰনপুব্বযোগানং ৰসেন অনন্তনযুস্সদং পটিসম্ভিদাপভেদং পত্তো. তেনেৰ নং ভগৰা এতদগ্গে ঠপেসি – ‘‘এতদগ্গং, ভিক্খৰে, মম সাৰকানং ভিক্খূনং পটিসম্ভিদাপত্তানং যদিদং মহাকোট্ঠিতো’’তি (অ. নি. ১.২১৮).

ইতি থেরো মহাপঞ্ঞতায পঞ্হং সমুট্ঠাপেতুম্পি নিচ্ছেতুম্পীতি উভযম্পি সক্কোতি. সো দিৰাট্ঠানে নিসীদিত্ৰা সযমেৰ সব্বপঞ্হে সমুট্ঠপেত্ৰা সযং ৰিনিচ্ছিনন্তো ইদং সুত্তং আদিতো পট্ঠায মত্থকং পাপেত্ৰা, ‘‘সোভনা ৰত অযং ধম্মদেসনা, জেট্ঠভাতিকেন নং ধম্মসেনাপতিনা সদ্ধিং সংসন্দিস্সামি, ততো অযং দ্ৰিন্নম্পি অম্হাকং একমতিযা একজ্ঝাসযেন চ ঠপিতা অতিগরুকা ভৰিস্সতি পাসাণচ্ছত্তসদিসা, চতুরোঘনিত্থরণত্থিকানং তিত্থে ঠপিতনাৰা ৰিয, মগ্গগমনত্থিকানং সহস্সযুত্তআজঞ্ঞরথো ৰিয বহুপকারা ভৰিস্সতী’’তি দিট্ঠসংসন্দনত্থং পঞ্হং পুচ্ছি. তেন ৰুত্তং – ‘‘তাসু ইধ দিট্ঠসংসন্দনাপুচ্ছা অধিপ্পেতা’’তি.

নপ্পজানাতীতি এত্থ যস্মা নপ্পজানাতি, তস্মা দুপ্পঞ্ঞোতি ৰুচ্চতীতি অযমত্থো. এস নযো সব্বত্থ. ইদং দুক্খন্তি নপ্পজানাতীতি ইদং দুক্খং, এত্তকং দুক্খং, ইতো উদ্ধং নত্থীতি দুক্খসচ্চং যাথাৰসরসলক্খণতো ন পজানাতি. অযং দুক্খসমুদযোতি ইতো দুক্খং সমুদেতীতি পৰত্তিদুক্খপভাৰিকা তণ্হা সমুদযসচ্চন্তি যাথাৰসরসলক্খণতো ন পজানাতি. অযং দুক্খনিরোধোতি ইদং দুক্খং অযং দুক্খসমুদযো চ ইদং নাম ঠানং পত্ৰা নিরুজ্ঝতীতি উভিন্নং অপ্পৰত্তি নিব্বানং নিরোধসচ্চন্তি যাথাৰসরসলক্খণতো ন পজানাতি. অযং দুক্খনিরোধগামিনী পটিপদাতি অযং পটিপদা দুক্খনিরোধং গচ্ছতীতি মগ্গসচ্চং যাথাৰসরসলক্খণতো ন পজানাতীতি. অনন্তরৰারেপি ইমিনাৰ নযেন অত্থো ৰেদিতব্বো. সঙ্খেপতো পনেত্থ চতুসচ্চকম্মট্ঠানিকো পুগ্গলো কথিতোতি ৰেদিতব্বো.

অযঞ্হি আচরিযসন্তিকে চত্তারি সচ্চানি সৰনতো উগ্গণ্হাতি. ঠপেত্ৰা তণ্হং তেভূমকা ধম্মা দুক্খসচ্চং, তণ্হা সমুদযসচ্চং, উভিন্নং অপ্পৰত্তি নিব্বানং নিরোধসচ্চং, দুক্খসচ্চং পরিজানন্তো সমুদযসচ্চং পজহন্তো নিরোধপাপনো মগ্গো মগ্গসচ্চন্তি এৰং উগ্গহেত্ৰা অভিনিৰিসতি. তত্থ পুরিমানি দ্ৰে সচ্চানি ৰট্টং, পচ্ছিমানি ৰিৰট্টং, ৰট্টে অভিনিৰেসো হোতি, নো ৰিৰট্টে, তস্মা অযং অভিনিৰিসমানো দুক্খসচ্চে অভিনিৰিসতি.

দুক্খসচ্চং নাম রূপাদযো পঞ্চক্খন্ধাতি ৰৰত্থপেত্ৰা ধাতুকম্মট্ঠানৰসেন ওতরিত্ৰা, ‘‘চত্তারি মহাভূতানি চতুন্নঞ্চ মহাভূতানং উপাদায রূপং রূপ’’ন্তি ৰৰত্থপেতি. তদারম্মণা ৰেদনা সঞ্ঞা সঙ্খারা ৰিঞ্ঞাণং নামন্তি এৰং যমকতালক্খন্ধং ভিন্দন্তো ৰিয ‘‘দ্ৰেৰ ইমে ধম্মা নামরূপ’’ন্তি ৰৰত্থপেতি. তং পনেতং ন অহেতুকং সহেতুকং সপ্পচ্চযং, কো চস্স পচ্চযো অৰিজ্জাদযো ধম্মাতি এৰং পচ্চযে চেৰ পচ্চযুপ্পন্নধম্মে চ ৰৰত্থপেত্ৰা ‘‘সব্বেপি ধম্মা হুত্ৰা অভাৰট্ঠেন অনিচ্চা’’তি অনিচ্চলক্খণং আরোপেতি, ততো উদযৰযপ্পটিপীল়নাকারেন দুক্খা, অৰসৰত্তনাকারেন অনত্তাতি তিলক্খণং আরোপেত্ৰা ৰিপস্সনাপটিপাটিযা সম্মসন্তো লোকুত্তরমগ্গং পাপুণাতি.

মগ্গক্খণে চত্তারি সচ্চানি একপটিৰেধেন পটিৰিজ্ঝতি, একাভিসমযেন অভিসমেতি. দুক্খং পরিঞ্ঞাপটিৰেধেন পটিৰিজ্ঝতি. সমুদযং পহানপটিৰেধেন, নিরোধং সচ্ছিকিরিযাপটিৰেধেন, মগ্গং ভাৰনাপটিৰেধেন পটিৰিজ্ঝতি. দুক্খং পরিঞ্ঞাভিসমযেন অভিসমেতি, সমুদযং পহানাভিসমযেন, নিরোধং সচ্ছিকিরিযাভিসমযেন, মগ্গং ভাৰনাভিসমযেন অভিসমেতি. সো তীণি সচ্চানি কিচ্চতো পটিৰিজ্ঝতি, নিরোধং আরম্মণতো. তস্মিঞ্চস্স খণে অহং দুক্খং পরিজানামি, সমুদযং পজহামি, নিরোধং সচ্ছিকরোমি, মগ্গং ভাৰেমীতি আভোগসমন্নাহারমনসিকারপচ্চৰেক্খণা নত্থি. এতস্স পন পরিগ্গণ্হন্তস্সেৰ মগ্গো তীসু সচ্চেসু পরিঞ্ঞাদিকিচ্চং সাধেন্তোৰ নিরোধং আরম্মণতো পটিৰিজ্ঝতীতি.

তস্মা পঞ্ঞৰাতি ৰুচ্চতীতি এত্থ হেট্ঠিমকোটিযা সোতাপন্নো, উপরিমকোটিযা খীণাসৰো পঞ্ঞৰাতি নিদ্দিট্ঠো. যো পন তেপিটকং বুদ্ধৰচনং পাল়িতো চ অত্থতো চ অনুসন্ধিতো চ পুব্বাপরতো চ উগ্গহেত্ৰা হেট্ঠুপরিযং করোন্তো ৰিচরতি, অনিচ্চদুক্খানত্তৰসেন পরিগ্গহমত্তম্পি নত্থি, অযং পঞ্ঞৰা নাম, দুপ্পঞ্ঞো নামাতি? ৰিঞ্ঞাণচরিতো নামেস, পঞ্ঞৰাতি ন ৰত্তব্বো. অথ যো তিলক্খণং আরোপেত্ৰা ৰিপস্সনাপটিপাটিযা সম্মসন্তো অজ্জ অজ্জেৰ অরহত্তন্তি চরতি, অযং পঞ্ঞৰা নাম, দুপ্পঞ্ঞো নামাতি? ভজাপিযমানো পঞ্ঞৰাপক্খং ভজতি. সুত্তে পন পটিৰেধোৰ কথিতো.

ৰিঞ্ঞাণং ৰিঞ্ঞাণন্তি ইধ কিং পুচ্ছতি? যেন ৰিঞ্ঞাণেন সঙ্খারে সম্মসিত্ৰা এস পঞ্ঞৰা নাম জাতো, তস্স আগমনৰিপস্সনা ৰিঞ্ঞাণং কম্মকারকচিত্তং পুচ্ছামীতি পুচ্ছতি. সুখন্তিপি ৰিজানাতীতি সুখৰেদনম্পি ৰিজানাতি. উপরিপদদ্ৰযেপি এসেৰ নযো. ইমিনা থেরো ‘‘সুখং ৰেদনং ৰেদযমানো সুখং ৰেদনং ৰেদযামীতি পজানাতী’’তিআদিনা (ম. নি. ১.১১৩; দী. নি. ২.৩৮০) নযেন আগতৰেদনাৰসেন অরূপকম্মট্ঠানং কথেসি. তস্সত্থো সতিপট্ঠানে ৰুত্তনযেনেৰ ৰেদিতব্বো.

সংসট্ঠাতি একুপ্পাদাদিলক্খণেন সংযোগট্ঠেন সংসট্ঠা, উদাহু ৰিসংসট্ঠাতি পুচ্ছতি. এত্থ চ থেরো মগ্গপঞ্ঞঞ্চ ৰিপস্সনাৰিঞ্ঞাণঞ্চাতি ইমে দ্ৰে লোকিযলোকুত্তরধম্মে মিস্সেত্ৰা ভূমন্তরং ভিন্দিত্ৰা সমযং অজানন্তো ৰিয পুচ্ছতীতি ন ৰেদিতব্বো. মগ্গপঞ্ঞায পন মগ্গৰিঞ্ঞাণেন, ৰিপস্সনাপঞ্ঞায চ ৰিপস্সনাৰিঞ্ঞাণেনেৰ সদ্ধিং সংসট্ঠভাৰং পুচ্ছতীতি ৰেদিতব্বো. থেরোপিস্স তমেৰত্থং ৰিস্সজ্জেন্তো ইমে ধম্মা সংসট্ঠাতিআদিমাহ. তত্থ ন চ লব্ভা ইমেসং ধম্মানন্তি ইমেসং লোকিযমগ্গক্খণেপি লোকুত্তরমগ্গক্খণেপি একতো উপ্পন্নানং দ্ৰিন্নং ধম্মানং. ৰিনিব্ভুজিত্ৰা ৰিনিব্ভুজিত্ৰাতি ৰিসুং ৰিসুং কত্ৰা ৰিনিৰট্টেত্ৰা, আরম্মণতো ৰা ৰত্থুতো ৰা উপ্পাদতো ৰা নিরোধতো ৰা নানাকরণং দস্সেতুং ন সক্কাতি অত্থো. তেসং তেসং পন ধম্মানং ৰিসযো নাম অত্থি. লোকিযধম্মং পত্ৰা হি চিত্তং জেট্ঠকং হোতি পুব্বঙ্গমং, লোকুত্তরং পত্ৰা পঞ্ঞা.

সম্মাসম্বুদ্ধোপি হি লোকিযধম্মং পুচ্ছন্তো, ‘‘ভিক্খু, ত্ৰং কতমং পঞ্ঞং অধিগতো, কিং পঠমমগ্গপঞ্ঞং, উদাহু দুতিয ততিয চতুত্থ মগ্গপঞ্ঞ’’ন্তি ন এৰং পুচ্ছতি. কিং ফস্সো ত্ৰং, ভিক্খু, কিং ৰেদনো, কিং সঞ্ঞো, কিং চেতনোতি ন চ পুচ্ছতি, চিত্তৰসেন পন, ‘‘কিঞ্চিত্তো ত্ৰং, ভিক্খূ’’তি (পারা. ১৩৫) পুচ্ছতি. কুসলাকুসলং পঞ্ঞপেন্তোপি ‘‘মনোপুব্বঙ্গমা ধম্মা, মনোসেট্ঠা মনোমযা’’তি (ধ. প. ১, ২) চ, ‘‘কতমে ধম্মা কুসলা? যস্মিং সমযে কামাৰচরং কুসলং চিত্তং উপ্পন্নং হোতী’’তি (ধ. স. ১) চ এৰং চিত্তৰসেনেৰ পঞ্ঞাপেতি. লোকুত্তরং পুচ্ছন্তো পন কিং ফস্সো ত্ৰং ভিক্খু, কিং ৰেদনো, কিং সঞ্ঞো, কিং চেতনোতি ন পুচ্ছতি. কতমা তে, ভিক্খু, পঞ্ঞা অধিগতা, কিং পঠমমগ্গপঞ্ঞা, উদাহু দুতিযততিযচতুত্থমগ্গপঞ্ঞাতি এৰং পঞ্ঞাৰসেনেৰ পুচ্ছতি.

ইন্দ্রিযসংযুত্তেপি ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং ৰীরিযিন্দ্রিযং সতিন্দ্রিযং সমাধিন্দ্রিযং পঞ্ঞিন্দ্রিযং. কত্থ চ, ভিক্খৰে, সদ্ধিন্দ্রিযং দট্ঠব্বং? চতূসু সোতাপত্তিযঙ্গেসু এত্থ সদ্ধিন্দ্রিযং দট্ঠব্বং. কত্থ চ, ভিক্খৰে, ৰীরিযিন্দ্রিযং দট্ঠব্বং? চতূসু সম্মপ্পধানেসু এত্থ ৰীরিযিন্দ্রিযং দট্ঠব্বং. কত্থ চ, ভিক্খৰে, সতিন্দ্রিযং দট্ঠব্বং? চতূসু সতিপট্ঠানেসু এত্থ সতিন্দ্রিযং দট্ঠব্বং. কত্থ চ, ভিক্খৰে, সমাধিন্দ্রিযং দট্ঠব্বং? চতূসু ঝানেসু এত্থ সমাধিন্দ্রিযং দট্ঠব্বং. কত্থ চ, ভিক্খৰে, পঞ্ঞিন্দ্রিযং দট্ঠব্বং? চতূসু অরিযসচ্চেসু এত্থ পঞ্ঞিন্দ্রিযং দট্ঠব্ব’’ন্তি (সং. নি. ৫.৪৭৮). এৰং সৰিসযস্মিংযেৰ লোকিযলোকুত্তরা ধম্মা কথিতা.

যথা হি চত্তারো সেট্ঠিপুত্তা রাজাতি রাজপঞ্চমেসু সহাযেসু নক্খত্তং কীল়িস্সামাতি ৰীথিং ওতিণ্ণেসু একস্স সেট্ঠিপুত্তস্স গেহং গতকালে ইতরে চত্তারো তুণ্হী নিসীদন্তি, গেহসামিকোৰ, ‘‘ইমেসং খাদনীযং ভোজনীযং দেথ, গন্ধমালালঙ্কারাদীনি দেথা’’তি গেহে ৰিচারেতি. দুতিযস্স ততিযস্স চতুত্থস্স গেহং গতকালে ইতরে চত্তারো তুণ্হী নিসীদন্তি, গেহসামিকোৰ, ‘‘ইমেসং খাদনীযং ভোজনীযং দেথ, গন্ধমালালঙ্কারাদীনি দেথা’’তি গেহে ৰিচারেতি. অথ সব্বপচ্ছা রঞ্ঞো গেহং গতকালে কিঞ্চাপি রাজা সব্বত্থ ইস্সরোৰ, ইমস্মিং পন কালে অত্তনো গেহেযেৰ, ‘‘ইমেসং খাদনীযং ভোজনীযং দেথ, গন্ধমালালঙ্কারাদীনি দেথা’’তি ৰিচারেতি. এৰমেৰং খো সদ্ধাপঞ্চমকেসু ইন্দ্রিযেসু তেসু সহাযেসু একতো ৰীথিং ওতরন্তেসু ৰিয একারম্মণে উপ্পজ্জমানেসুপি যথা পঠমস্স গেহে ইতরে চত্তারো তুণ্হী নিসীদন্তি, গেহসামিকোৰ ৰিচারেতি, এৰং সোতাপত্তিযঙ্গানি পত্ৰা অধিমোক্খলক্খণং সদ্ধিন্দ্রিযমেৰ জেট্ঠকং হোতি পুব্বঙ্গমং, সেসানি তদন্ৰযানি হোন্তি. যথা দুতিযস্স গেহে ইতরে চত্তারো তুণ্হী নিসীদন্তি, গেহসামিকোৰ ৰিচারেতি, এৰং সম্মপ্পধানানি পত্ৰা পগ্গহণলক্খণং ৰীরিযিন্দ্রিযমেৰ জেট্ঠকং হোতি পুব্বঙ্গমং, সেসানি তদন্ৰযানি হোন্তি. যথা ততিযস্স গেহে ইতরে চত্তারো তুণ্হী নিসীদন্তি, গেহসামিকোৰ ৰিচারেতি, এৰং সতিপট্ঠানানি পত্ৰা উপট্ঠানলক্খণং সতিন্দ্রিযমেৰ জেট্ঠকং হোতি পুব্বঙ্গমং, সেসানি তদন্ৰযানি হোন্তি. যথা চতুত্থস্স গেহে ইতরে চত্তারো তুণ্হী নিসীদন্তি, গেহসামিকোৰ ৰিচারেতি, এৰং ঝানৰিমোক্খে পত্ৰা অৰিক্খেপলক্খণং সমাধিন্দ্রিযমেৰ জেট্ঠকং হোতি পুব্বঙ্গমং, সেসানি তদন্ৰযানি হোন্তি. সব্বপচ্ছা রঞ্ঞো গেহং গতকালে পন যথা ইতরে চত্তারো তুণ্হী নিসীদন্তি, রাজাৰ গেহে ৰিচারেতি, এৰমেৰ অরিযসচ্চানি পত্ৰা পজাননলক্খণং পঞ্ঞিন্দ্রিযমেৰ জেট্ঠকং হোতি পুব্বঙ্গমং, সেসানি তদন্ৰযানি হোন্তি.

ইতি পটিসম্ভিদাপত্তানং অগ্গে ঠপিতো মহাকোট্ঠিতত্থেরো লোকিযধম্মং পুচ্ছন্তো চিত্তং জেট্ঠকং চিত্তং পুব্বঙ্গমং কত্ৰা পুচ্ছি; লোকুত্তরধম্মং পুচ্ছন্তো পঞ্ঞং জেট্ঠকং পঞ্ঞং পুব্বঙ্গমং কত্ৰা পুচ্ছি. ধম্মসেনাপতিসারিপুত্তত্থেরোপি তথেৰ ৰিস্সজ্জেসীতি.

যং হাৰুসো, পজানাতীতি যং চতুসচ্চধম্মমিদং দুক্খন্তিআদিনা নযেন মগ্গপঞ্ঞা পজানাতি. তং ৰিজানাতীতি মগ্গৰিঞ্ঞাণম্পি তথেৰ তং ৰিজানাতি. যং ৰিজানাতীতি যং সঙ্খারগতং অনিচ্চন্তিআদিনা নযেন ৰিপস্সনাৰিঞ্ঞাণং ৰিজানাতি. তং পজানাতীতি ৰিপস্সনাপঞ্ঞাপি তথেৰ তং পজানাতি. তস্মা ইমে ধম্মাতি তেন কারণেন ইমে ধম্মা. সংসট্ঠাতি একুপ্পাদএকনিরোধএকৰত্থুকএকারম্মণতায সংসট্ঠা.

পঞ্ঞা ভাৰেতব্বাতি ইদং মগ্গপঞ্ঞং সন্ধায ৰুত্তং. তংসম্পযুত্তং পন ৰিঞ্ঞাণং তায সদ্ধিং ভাৰেতব্বমেৰ হোতি. ৰিঞ্ঞাণং পরিঞ্ঞেয্যন্তি ইদং ৰিপস্সনাৰিঞ্ঞাণং সন্ধায ৰুত্তং. তংসম্পযুত্তা পন পঞ্ঞা তেন সদ্ধিং পরিজানিতব্বাৰ হোতি.

৪৫০. ৰেদনা ৰেদনাতি ইদং কস্মা পুচ্ছতি? ৰেদনালক্খণং পুচ্ছিস্সামীতি পুচ্ছতি. এৰং সন্তেপি তেভূমিকসম্মসনচারৰেদনাৰ অধিপ্পেতাতি সল্লক্খেতব্বা. সুখম্পি ৰেদেতীতি সুখং আরম্মণং ৰেদেতি অনুভৰতি. পরতো পদদ্ৰযেপি এসেৰ নযো. ‘‘রূপঞ্চ হিদং, মহালি, একন্তদুক্খং অভৰিস্স, দুক্খানুপতিতং দুক্খাৰক্কন্তং অনৰক্কন্তং সুখেন, নযিদং সত্তা রূপস্মিং সারজ্জেয্যুং. যস্মা চ খো, মহালি, রূপং সুখং সুখানুপতিতং সুখাৰক্কন্তং অনৰক্কন্তং দুক্খেন, তস্মা সত্তা রূপস্মিং সারজ্জন্তি, সারাগা সংযুজ্জন্তি, সংযোগা সংকিলিস্সন্তি. ৰেদনা চ হিদং… সঞ্ঞা… সঙ্খারা… ৰিঞ্ঞাণঞ্চ হিদং, মহালি, একন্তদুক্খং অভৰিস্স…পে… সংকিলিস্সন্তী’’তি (সং. নি. ৩.৭০) ইমিনা হি মহালিসুত্তপরিযাযেন ইধ আরম্মণং সুখং দুক্খং অদুক্খমসুখন্তি কথিতং. অপিচ পুরিমং সুখং ৰেদনং আরম্মণং কত্ৰা অপরা সুখা ৰেদনা ৰেদেতি; পুরিমং দুক্খং ৰেদনং আরম্মণং কত্ৰা অপরা দুক্খা ৰেদনা ৰেদেতি; পুরিমং অদুক্খমসুখং ৰেদনং আরম্মণং কত্ৰা অপরা অদুক্খমসুখা ৰেদনা ৰেদেতীতি এৰমেত্থ অত্থো দট্ঠব্বো. ৰেদনাযেৰ হি ৰেদেতি, ন অঞ্ঞো কোচি ৰেদিতা নাম অত্থীতি ৰুত্তমেতং.

সঞ্ঞা সঞ্ঞাতি ইধ কিং পুচ্ছতি? সব্বসঞ্ঞায লক্খণং. কিং সব্বত্থকসঞ্ঞাযাতি? সব্বসঞ্ঞায লক্খণন্তিপি সব্বত্থকসঞ্ঞায লক্খণন্তিপি একমেৰেতং, এৰং সন্তেপি তেভূমিকসম্মসনচারসঞ্ঞাৰ অধিপ্পেতাতি সল্লক্খেতব্বা. নীলকম্পি সঞ্জানাতীতি নীলপুপ্ফে ৰা ৰত্থে ৰা পরিকম্মং কত্ৰা উপচারং ৰা অপ্পনং ৰা পাপেন্তো সঞ্জানাতি. ইমস্মিঞ্হি অত্থে পরিকম্মসঞ্ঞাপি উপচারসঞ্ঞাপি অপ্পনাসঞ্ঞাপি ৰট্টতি. নীলে নীলন্তি উপ্পজ্জনকসঞ্ঞাপি ৰট্টতিযেৰ. পীতকাদীসুপি এসেৰ নযো.

যা চাৰুসো, ৰেদনাতি এত্থ ৰেদনা, সঞ্ঞা, ৰিঞ্ঞাণন্তি ইমানি তীণি গহেত্ৰা পঞ্ঞা কস্মা ন গহিতাতি? অসব্বসঙ্গাহিকত্তা. পঞ্ঞায হি গহিতায পঞ্ঞায সম্পযুত্তাৰ ৰেদনাদযো লব্ভন্তি, নো ৰিপ্পযুত্তা. তং পন অগ্গহেত্ৰা ইমেসু গহিতেসু পঞ্ঞায সম্পযুত্তা চ ৰিপ্পযুত্তা চ অন্তমসো দ্ৰে পঞ্চৰিঞ্ঞাণধম্মাপি লব্ভন্তি. যথা হি তযো পুরিসা সুত্তং সুত্তন্তি ৰদেয্যুং, চতুত্থো রতনাৰুতসুত্তন্তি. তেসু পুরিমা তযো তক্কগতম্পি পট্টিৰট্টকাদিগতম্পি যংকিঞ্চি বহুং সুত্তং লভন্তি অন্তমসো মক্কটকসুত্তম্পি. রতনাৰুতসুত্তং পরিযেসন্তো মন্দং লভতি, এৰংসম্পদমিদং ৰেদিতব্বং. হেট্ঠতো ৰা পঞ্ঞা ৰিঞ্ঞাণেন সদ্ধিং সম্পযোগং লভাপিতা ৰিস্সট্ঠত্তাৰ ইধ ন গহিতাতি ৰদন্তি. যং হাৰুসো, ৰেদেতীতি যং আরম্মণং ৰেদনা ৰেদেতি, সঞ্ঞাপি তদেৰ সঞ্জানাতি. যং সঞ্জানাতীতি যং আরম্মণং সঞ্ঞা সঞ্জানাতি, ৰিঞ্ঞাণম্পি তদেৰ ৰিজানাতীতি অত্থো.

ইদানি সঞ্জানাতি ৰিজানাতি পজানাতীতি এত্থ ৰিসেসো ৰেদিতব্বো. তত্থ উপসগ্গমত্তমেৰ ৰিসেসো. জানাতীতি পদং পন অৰিসেসো. তস্সাপি জাননত্থে ৰিসেসো ৰেদিতব্বো. সঞ্ঞা হি নীলাদিৰসেন আরম্মণং সঞ্জাননমত্তমেৰ, অনিচ্চং দুক্খং অনত্তাতি লক্খণপটিৰেধং পাপেতুং ন সক্কোতি. ৰিঞ্ঞাণং নীলাদিৰসেন আরম্মণঞ্চেৰ সঞ্জানাতি, অনিচ্চাদিলক্খণপটিৰেধঞ্চ পাপেতি, উস্সক্কিত্ৰা পন মগ্গপাতুভাৰং পাপেতুং ন সক্কোতি. পঞ্ঞা নীলাদিৰসেন আরম্মণম্পি সঞ্জানাতি, অনিচ্চাদিৰসেন লক্খণপটিৰেধম্পি পাপেতি, উস্সক্কিত্ৰা মগ্গপাতুভাৰং পাপেতুম্পি সক্কোতি.

যথা হি হেরঞ্ঞিকফলকে কহাপণরাসিম্হি কতে অজাতবুদ্ধি দারকো গামিকপুরিসো মহাহেরঞ্ঞিকোতি তীসু জনেসু ওলোকেত্ৰা ঠিতেসু অজাতবুদ্ধি দারকো কহাপণানং চিত্তৰিচিত্তচতুরস্সমণ্ডলভাৰমেৰ জানাতি, ইদং মনুস্সানং উপভোগপরিভোগং রতনসম্মতন্তি ন জানাতি. গামিকপুরিসো চিত্তাদিভাৰঞ্চেৰ জানাতি, মনুস্সানং উপভোগপরিভোগরতনসম্মতভাৰঞ্চ. ‘‘অযং কূটো অযং ছেকো অযং করতো অযং সণ্হো’’তি পন ন জানাতি. মহাহেরঞ্ঞিকো চিত্তাদিভাৰম্পি রতনসম্মতভাৰম্পি কূটাদিভাৰম্পি জানাতি, জানন্তো চ পন নং রূপং দিস্ৰাপি জানাতি, আকোটিতস্স সদ্দং সুত্ৰাপি, গন্ধং ঘাযিত্ৰাপি, রসং সাযিত্ৰাপি, হত্থেন গরুকলহুকভাৰং উপধারেত্ৰাপি অসুকগামে কতোতিপি জানাতি, অসুকনিগমে অসুকনগরে অসুকপব্বতচ্ছাযায অসুকনদীতীরে কতোতিপি, অসুকাচরিযেন কতোতিপি জানাতি. এৰমেৰং সঞ্ঞা অজাতবুদ্ধিদারকস্স কহাপণদস্সনং ৰিয নীলাদিৰসেন আরম্মণমত্তমেৰ সঞ্জানাতি. ৰিঞ্ঞাণং গামিকপুরিসস্স কহাপণদস্সনং ৰিয নীলাদিৰসেন আরম্মণম্পি সঞ্জানাতি, অনিচ্চাদিৰসেন লক্খণপটিৰেধম্পি পাপেতি. পঞ্ঞা মহাহেরঞ্ঞিকস্স কহাপণদস্সনং ৰিয নীলাদিৰসেন আরম্মণম্পি সঞ্জানাতি, অনিচ্চাদিৰসেন লক্খণপটিৰেধম্পি পাপেতি, উস্সক্কিত্ৰা মগ্গপাতুভাৰম্পি পাপেতি. সো পন নেসং ৰিসেসো দুপ্পটিৰিজ্ঝো.

তেনাহ আযস্মা নাগসেনো – ‘‘দুক্করং, মহারাজ, ভগৰতা কতন্তি. কিং, ভন্তে, নাগসেন ভগৰতা দুক্করং কতন্তি? দুক্করং, মহারাজ, ভগৰতা কতং, ইমেসং অরূপীনং চিত্তচেতসিকানং ধম্মানং একারম্মণে পৰত্তমানানং ৰৰত্থানং অক্খাতং, অযং ফস্সো, অযং ৰেদনা, অযং সঞ্ঞা, অযং চেতনা, ইদং চিত্ত’’ন্তি (মি. প. ২.৭.১৬). যথা হি তিলতেলং, সাসপতেলং, মধুকতেলং, এরণ্ডকতেলং, ৰসাতেলন্তি ইমানি পঞ্চ তেলানি একচাটিযং পক্খিপিত্ৰা দিৰসং যমকমন্থেহি মন্থেত্ৰা ততো ইদং তিলতেলং, ইদং সাসপতেলন্তি একেকস্স পাটিযেক্কং উদ্ধরণং নাম দুক্করং, ইদং ততো দুক্করতরং. ভগৰা পন সব্বঞ্ঞুতঞ্ঞাণস্স সুপ্পটিৰিদ্ধত্তা ধম্মিস্সরো ধম্মরাজা ইমেসং অরূপীনং ধম্মানং একারম্মণে পৰত্তমানানং ৰৰত্থানং অক্খাসি. পঞ্চন্নং মহানদীনং সমুদ্দং পৰিট্ঠট্ঠানে, ‘‘ইদং গঙ্গায উদকং, ইদং যমুনাযা’’তি এৰং পাটিযেক্কং উদকউদ্ধরণেনাপি অযমত্থো ৰেদিতব্বো.

৪৫১. নিস্সট্ঠেনাতি নিস্সটেন পরিচ্চত্তেন ৰা. তত্থ নিস্সটেনাতি অত্থে সতি পঞ্চহি ইন্দ্রিযেহীতি নিস্সক্কৰচনং. পরিচ্চত্তেনাতি অত্থে সতি করণৰচনং ৰেদিতব্বং. ইদং ৰুত্তং হোতি – পঞ্চহি ইন্দ্রিযেহি নিস্সরিত্ৰা মনোদ্ৰারে পৰত্তেন পঞ্চহি ৰা ইন্দ্রিযেহি তস্স ৰত্থুভাৰং অনুপগমনতায পরিচ্চত্তেনাতি. পরিসুদ্ধেনাতি নিরুপক্কিলেসেন. মনোৰিঞ্ঞাণেনাতি রূপাৰচরচতুত্থজ্ঝানচিত্তেন. কিং নেয্যন্তি কিং জানিতব্বং. ‘‘যংকিঞ্চি নেয্যং নাম অত্থি ধম্ম’’ন্তিআদীসু (মহানি. ৬৯) হি জানিতব্বং নেয্যন্তি ৰুত্তং. আকাসানঞ্চাযতনং নেয্যন্তি কথং রূপাৰচরচতুত্থজ্ঝানচিত্তেন অরূপাৰচরসমাপত্তি নেয্যাতি? রূপাৰচরচতুত্থজ্ঝানে ঠিতেন অরূপাৰচরসমাপত্তিং নিব্বত্তেতুং সক্কা হোতি. এত্থ ঠিতস্স হি সা ইজ্ঝতি. তস্মা ‘‘আকাসানঞ্চাযতনং নেয্য’’ন্তিআদিমাহ. অথ নেৰসঞ্ঞানাসঞ্ঞাযতনং কস্মা ন ৰুত্তন্তি? পাটিযেক্কং অভিনিৰেসাভাৰতো. তত্থ হি কলাপতো নযতো সম্মসনং লব্ভতি, ধম্মসেনাপতিসদিসস্সাপি হি ভিক্খুনো পাটিযেক্কং অভিনিৰেসো ন জাযতি. তস্মা থেরোপি, ‘‘এৰং কিরমে ধম্মা অহুত্ৰা সম্ভোন্তি, হুত্ৰা পটিৰেন্তী’’তি (ম. নি. ৩.৯৪) কলাপতো নযতো সম্মসিত্ৰা ৰিস্সজ্জেসীতি. ভগৰা পন সব্বঞ্ঞুতঞ্ঞাণস্স হত্থগতত্তা নেৰসঞ্ঞানাসঞ্ঞাযতনসমাপত্তিযম্পি পরোপঞ্ঞাস ধম্মে পাটিযেক্কং অংগুদ্ধারেনেৰ উদ্ধরিত্ৰা, ‘‘যাৰতা সঞ্ঞাসমাপত্তিযো, তাৰতা অঞ্ঞাপটিৰেধো’’তি আহ.

পঞ্ঞাচক্খুনা পজানাতীতি দস্সনপরিণাযকট্ঠেন চক্খুভূতায পঞ্ঞায পজানাতি. তত্থ দ্ৰে পঞ্ঞা সমাধিপঞ্ঞা ৰিপস্সনাপঞ্ঞা চ. সমাধিপঞ্ঞায কিচ্চতো অসম্মোহতো চ পজানাতি. ৰিপস্সনাপঞ্ঞায লক্খণপটিৰেধেন আরম্মণতো জাননং কথিতং. কিমত্থিযাতি কো এতিস্সা অত্থো. অভিঞ্ঞত্থাতিআদীসু অভিঞ্ঞেয্যে ধম্মে অভিজানাতীতি অভিঞ্ঞত্থা. পরিঞ্ঞেয্যে ধম্মে পরিজানাতীতি পরিঞ্ঞত্থা. পহাতব্বে ধম্মে পজহতীতি পহানত্থা. সা পনেসা লোকিযাপি অভিঞ্ঞত্থা চ পরিঞ্ঞত্থা চ ৰিক্খম্ভনতো পহানত্থা. লোকুত্তরাপি অভিঞ্ঞত্থা চ পরিঞ্ঞত্থা চ সমুচ্ছেদতো পহানত্থা. তত্থ লোকিযা কিচ্চতো অসম্মোহতো চ পজানাতি, লোকুত্তরা অসম্মোহতো.

৪৫২. সম্মাদিট্ঠিযা উপ্পাদাযাতি ৰিপস্সনাসম্মাদিট্ঠিযা চ মগ্গসম্মাদিট্ঠিযা চ. পরতো চ ঘোসোতি সপ্পাযধম্মস্সৰনং. যোনিসো চ মনসিকারোতি অত্তনো উপাযমনসিকারো. তত্থ সাৰকেসু অপি ধম্মসেনাপতিনো দ্ৰে পচ্চযা লদ্ধুং ৰট্টন্তিযেৰ. থেরো হি কপ্পসতসহস্সাধিকং একং অসঙ্খ্যেয্যং পারমিযো পূরেত্ৰাপি অত্তনো ধম্মতায অণুমত্তম্পি কিলেসং পজহিতুং নাসক্খি. ‘‘যে ধম্মা হেতুপ্পভৰা’’তি (মহাৰ. ৬০) অস্সজিত্থেরতো ইমং গাথং সুত্ৰাৰস্স পটিৰেধো জাতো. পচ্চেকবুদ্ধানং পন সব্বঞ্ঞুবুদ্ধানঞ্চ পরতোঘোসকম্মং নত্থি, যোনিসোমনসিকারস্মিংযেৰ ঠত্ৰা পচ্চেকবোধিঞ্চ সব্বঞ্ঞুতঞ্ঞাণঞ্চ নিব্বত্তেন্তি.

অনুগ্গহিতাতি লদ্ধূপকারা. সম্মাদিট্ঠীতি অরহত্তমগ্গসম্মাদিট্ঠি. ফলক্খণে নিব্বত্তা চেতোৰিমুত্তি ফলং অস্সাতি চেতোৰিমুত্তিফলা. তদেৰ চেতোৰিমুত্তিসঙ্খাতং ফলং আনিসংসো অস্সাতি চেতোৰিমুত্তিফলানিসংসা. দুতিযপদেপি এসেৰ নযো. এত্থ চ চতুত্থফলপঞ্ঞা পঞ্ঞাৰিমুত্তি নাম, অৰসেসা ধম্মা চেতোৰিমুত্তীতি ৰেদিতব্বা. সীলানুগ্গহিতাতিআদীসু সীলন্তি চতুপারিসুদ্ধিসীলং. সুতন্তি সপ্পাযধম্মস্সৰনং. সাকচ্ছাতি কম্মট্ঠানে খলনপক্খলনচ্ছেদনকথা. সমথোতি ৰিপস্সনাপাদিকা অট্ঠ সমাপত্তিযো. ৰিপস্সনাতি সত্তৰিধা অনুপস্সনা. চতুপারিসুদ্ধিসীলঞ্হি পূরেন্তস্স, সপ্পাযধম্মস্সৰনং সুণন্তস্স, কম্মট্ঠানে খলনপক্খলনং ছিন্দন্তস্স, ৰিপস্সনাপাদিকাসু অট্ঠসমাপত্তীসু কম্মং করোন্তস্স, সত্তৰিধং অনুপস্সনং ভাৰেন্তস্স অরহত্তমগ্গো উপ্পজ্জিত্ৰা ফলং দেতি.

যথা হি মধুরং অম্বপক্কং পরিভুঞ্জিতুকামো অম্বপোতকস্স সমন্তা উদককোট্ঠকং থিরং কত্ৰা বন্ধতি. ঘটং গহেত্ৰা কালেন কালং উদকং আসিঞ্চতি. উদকস্স অনিক্খমনত্থং মরিযাদং থিরং করোতি. যা হোতি সমীপে ৰল্লি ৰা সুক্খদণ্ডকো ৰা কিপিল্লিকপুটো ৰা মক্কটকজালং ৰা, তং অপনেতি. খণিত্তিং গহেত্ৰা কালেন কালং মূলানি পরিখণতি. এৰমস্স অপ্পমত্তস্স ইমানি পঞ্চ কারণানি করোতো সো অম্বো ৰড্ঢিত্ৰা ফলং দেতি. এৰংসম্পদমিদং ৰেদিতব্বং. রুক্খস্স সমন্ততো কোট্ঠকবন্ধনং ৰিয হি সীলং দট্ঠব্বং, কালেন কালং উদকসিঞ্চনং ৰিয ধম্মস্সৰনং, মরিযাদায থিরভাৰকরণং ৰিয সমথো, সমীপে ৰল্লিআদীনং হরণং ৰিয কম্মট্ঠানে খলনপক্খলনচ্ছেদনং, কালেন কালং খণিত্তিং গহেত্ৰা মূলখণনং ৰিয সত্তন্নং অনুপস্সনানং ভাৰনা. তেহি পঞ্চহি কারণেহি অনুগ্গহিতস্স অম্বরুক্খস্স মধুরফলদানকালো ৰিয ইমস্স ভিক্খুনো ইমেহি পঞ্চহি ধম্মেহি অনুগ্গহিতায সম্মাদিট্ঠিযা অরহত্তফলদানং ৰেদিতব্বং.

৪৫৩. কতি পনাৰুসো, ভৰাতি ইধ কিং পুচ্ছতি? মূলমেৰ গতো অনুসন্ধি, দুপ্পঞ্ঞো যেহি ভৰেহি ন উট্ঠাতি, তে পুচ্ছিস্সামীতি পুচ্ছতি. তত্থ কামভৰোতি কামভৰূপগং কম্মং কম্মাভিনিব্বত্তা উপাদিন্নক্খন্ধাপীতি উভযমেকতো কত্ৰা কামভৰোতি আহ. রূপারূপভৰেসুপি এসেৰ নযো. আযতিন্তি অনাগতে. পুনব্ভৰস্স অভিনিব্বত্তীতি পুনব্ভৰাভিনিব্বত্তি. ইধ ৰট্টং পুচ্ছিস্সামীতি পুচ্ছতি. তত্রাতত্রাভিনন্দনাতি রূপাভিনন্দনা সদ্দাভিনন্দনাতি এৰং তহিং তহিং অভিনন্দনা, করণৰচনে চেতং পচ্চত্তং. তত্রতত্রাভিনন্দনায পুনব্ভৰাভিনিব্বত্তি হোতীতি অত্থো. এত্তাৰতা হি গমনং হোতি, আগমনং হোতি, গমনাগমনং হোতি, ৰট্টং ৰত্ততীতি ৰট্টং মত্থকং পাপেত্ৰা দস্সেসি. ইদানি ৰিৰট্টং পুচ্ছন্তো ‘‘কথং পনাৰুসো’’তিআদিমাহ. তস্স ৰিস্সজ্জনে অৰিজ্জাৰিরাগাতি অৰিজ্জায খযনিরোধেন. ৰিজ্জুপ্পাদাতি অরহত্তমগ্গৰিজ্জায উপ্পাদেন. কিং অৰিজ্জা পুব্বে নিরুদ্ধা, অথ ৰিজ্জা পুব্বে উপ্পন্নাতি? উভযমেতং ন ৰত্তব্বং. পদীপুজ্জলনেন অন্ধকারৰিগমো ৰিয ৰিজ্জুপ্পাদেন অৰিজ্জা নিরুদ্ধাৰ হোতি. তণ্হানিরোধাতি তণ্হায খযনিরোধেন. পুনব্ভৰাভিনিব্বত্তি ন হোতীতি এৰং আযতিং পুনব্ভৰস্স অভিনিব্বত্তি ন হোতি, গমনং আগমনং গমনাগমনং উপচ্ছিজ্জতি, ৰট্টং ন ৰত্ততীতি ৰিৰট্টং মত্থকং পাপেত্ৰা দস্সেসি.

৪৫৪. কতমং পনাৰুসোতি ইধ কিং পুচ্ছতি? উভতোভাগৰিমুত্তো ভিক্খু কালেন কালং নিরোধং সমাপজ্জতি. তস্স নিরোধপাদকং পঠমজ্ঝানং পুচ্ছিস্সামীতি পুচ্ছতি. পঠমং ঝানন্তি ইধ কিং পুচ্ছতি? নিরোধং সমাপজ্জনকেন ভিক্খুনা অঙ্গৰৰত্থানং কোট্ঠাসপরিচ্ছেদো নাম জানিতব্বো, ইদং ঝানং পঞ্চঙ্গিকং চতুরঙ্গিকং তিৰঙ্গিকং দুৰঙ্গিকন্তি অঙ্গৰৰত্থানং কোট্ঠাসপরিচ্ছেদং পুচ্ছিস্সামীতি পুচ্ছতি. ৰিতক্কোতিআদীসু পন অভিনিরোপনলক্খণো ৰিতক্কো, অনুমজ্জনলক্খণো ৰিচারো, ফরণলক্খণা পীতি, সাতলক্খণং সুখং, অৰিক্খেপলক্খণা চিত্তেকগ্গতাতি ইমে পঞ্চ ধম্মা ৰত্তন্তি. কতঙ্গৰিপ্পহীনন্তি ইধ পন কিং পুচ্ছতি? নিরোধং সমাপজ্জনকেন ভিক্খুনা উপকারানুপকারানি অঙ্গানি জানিতব্বানি, তানি পুচ্ছিস্সামীতি পুচ্ছতি, ৰিস্সজ্জনং পনেত্থ পাকটমেৰ. ইতি হেট্ঠা নিরোধপাদকং পঠমজ্ঝানং গহিতং, উপরি তস্স অনন্তরপচ্চযং নেৰসঞ্ঞানাসঞ্ঞাযতনসমাপত্তিং পুচ্ছিস্সতি. অন্তরা পন ছ সমাপত্তিযো সংখিত্তা, নযং ৰা দস্সেত্ৰা ৰিস্সট্ঠাতি ৰেদিতব্বা.

৪৫৫. ইদানি ৰিঞ্ঞাণনিস্সযে পঞ্চ পসাদে পুচ্ছন্তো পঞ্চিমানি, আৰুসোতিআদিমাহ. তত্থ গোচরৰিসযন্তি গোচরভূতং ৰিসযং. অঞ্ঞমঞ্ঞস্সাতি চক্খু সোতস্স সোতং ৰা চক্খুস্সাতি এৰং একেকস্স গোচরৰিসযং ন পচ্চনুভোতি. সচে হি নীলাদিভেদং রূপারম্মণং সমোধানেত্ৰা সোতিন্দ্রিযস্স উপনেয্য, ‘‘ইঙ্ঘ তাৰ নং ৰৰত্থপেহি ৰিভাৰেহি, কিং নামেতং আরম্মণ’’ন্তি. চক্খুৰিঞ্ঞাণঞ্হি ৰিনাপি মুখেন অত্তনো ধম্মতায এৰং ৰদেয্য – ‘‘অরে অন্ধবাল, ৰস্সসতম্পি ৰস্সসহস্সম্পি পরিধাৰমানো অঞ্ঞত্র মযা কুহিং এতস্স জাননকং লভিস্সসি, আহর নং চক্খুপসাদে উপনেহি, অহমেতং আরম্মণং জানিস্সামি, যদি ৰা নীলং যদি ৰা পীতকং, ন হি এসো অঞ্ঞস্স ৰিসযো, ময্হেৰেসো ৰিসযো’’তি. সেসদ্ৰারেসুপি এসেৰ নযো. এৰমেতানি অঞ্ঞমঞ্ঞস্স গোচরং ৰিসযং ন পচ্চনুভোন্তি নাম. কিং পটিসরণন্তি এতেসং কিং পটিসরণং, কিং এতানি পটিসরন্তীতি পুচ্ছতি. মনো পটিসরণন্তি জৰনমনো পটিসরণং. মনো চ নেসন্তি মনোদ্ৰারিকজৰনমনো ৰা পঞ্চদ্ৰারিকজৰনমনো ৰা এতেসং গোচরৰিসযং রজ্জনাদিৰসেন অনুভোতি. চক্খুৰিঞ্ঞাণঞ্হি রূপদস্সনমত্তমেৰ, এত্থ রজ্জনং ৰা দুস্সনং ৰা মুয্হনং ৰা নত্থি. এতস্মিং পন দ্ৰারে জৰনং রজ্জতি ৰা দুস্সতি ৰা মুয্হতি ৰা. সোতৰিঞ্ঞাণাদীসুপি এসেৰ নযো.

তত্রাযং উপমা – পঞ্চ কির দুব্বলভোজকা রাজানং সেৰিত্ৰা কিচ্ছেন কসিরেন একস্মিং পঞ্চকুলিকে গামে পরিত্তকং আযং লভিংসু. তেসং তত্থ মচ্ছভাগো মংসভাগো যুত্তিকহাপণো ৰা, বন্ধকহাপণো ৰা, মাপহারকহাপণো ৰা, অট্ঠকহাপণো ৰা, সোল়সকহাপণো ৰা, বাত্তিংসকহাপণো ৰা, চতুসট্ঠিকহাপণো ৰা, দণ্ডোতি এত্তকমত্তমেৰ পাপুণাতি. সতৰত্থুকং পঞ্চসতৰত্থুকং সহস্সৰত্থুকং মহাবলিং রাজাৰ গণ্হাতি. তত্থ পঞ্চকুলিকগামো ৰিয পঞ্চ পসাদা দট্ঠব্বা; পঞ্চ দুব্বলভোজকা ৰিয পঞ্চ ৰিঞ্ঞাণানি; রাজা ৰিয জৰনং; দুব্বলভোজকানং পরিত্তকং আযপাপুণনং ৰিয চক্খুৰিঞ্ঞাণাদীনং রূপদস্সনাদিমত্তং. রজ্জনাদীনি পন এতেসু নত্থি. রঞ্ঞো মহাবলিগ্গহণং ৰিয তেসু দ্ৰারেসু জৰনস্স রজ্জনাদীনি ৰেদিতব্বানি.

৪৫৬. পঞ্চিমানি, আৰুসোতি ইধ কিং পুচ্ছতি? অন্তোনিরোধস্মিং পঞ্চ পসাদে. কিরিযমযপৰত্তস্মিঞ্হি ৰত্তমানে অরূপধম্মা পসাদানং বলৰপচ্চযা হোন্তি. যো পন তং পৰত্তং নিরোধেত্ৰা নিরোধসমাপত্তিং সমাপন্নো, তস্স অন্তোনিরোধে পঞ্চ পসাদা কিং পটিচ্চ তিট্ঠন্তীতি ইদং পুচ্ছিস্সামীতি পুচ্ছতি. আযুং পটিচ্চাতি জীৰিতিন্দ্রিযং পটিচ্চ তিট্ঠন্তি. উস্মং পটিচ্চাতি জীৰিতিন্দ্রিযং কম্মজতেজং পটিচ্চ তিট্ঠতি. যস্মা পন কম্মজতেজোপি জীৰিতিন্দ্রিযেন ৰিনা ন তিট্ঠতি, তস্মা ‘‘উস্মা আযুং পটিচ্চ তিট্ঠতী’’তি আহ. ঝাযতোতি জলতো. অচ্চিং পটিচ্চাতি জালসিখং পটিচ্চ. আভা পঞ্ঞাযতীতি আলোকো নাম পঞ্ঞাযতি. আভং পটিচ্চ অচ্চীতি তং আলোকং পটিচ্চ জালসিখা পঞ্ঞাযতি.

এৰমেৰ খো, আৰুসো, আযু উস্মং পটিচ্চ তিট্ঠতীতি এত্থ জালসিখা ৰিয কম্মজতেজো. আলোকো ৰিয জীৰিতিন্দ্রিযং. জালসিখা হি উপ্পজ্জমানা আলোকং গহেত্ৰাৰ উপ্পজ্জতি. সা তেন অত্তনা জনিতআলোকেনেৰ সযম্পি অণু থূলা দীঘা রস্সাতি পাকটা হোতি. তত্থ জালপৰত্তিযা জনিতআলোকেন তস্সাযেৰ জালপৰত্তিযা পাকটভাৰো ৰিয উস্মং পটিচ্চ নিব্বত্তেন কম্মজমহাভূতসম্ভৰেন জীৰিতিন্দ্রিযেন উস্মায অনুপালনং. জীৰিতিন্দ্রিযঞ্হি দসপি ৰস্সানি…পে… ৰস্সসতম্পি কম্মজতেজপৰত্তং পালেতি. ইতি মহাভূতানি উপাদারূপানং নিস্সযপচ্চযাদিৰসেন পচ্চযানি হোন্তীতি আযু উস্মং পটিচ্চ তিট্ঠতি. জীৰিতিন্দ্রিযং মহাভূতানি পালেতীতি উস্মা আযুং পটিচ্চ তিট্ঠতীতি ৰেদিতব্বা.

৪৫৭. আযুসঙ্খারাতি আযুমেৰ. ৰেদনিযা ধম্মাতি ৰেদনা ধম্মাৰ. ৰুট্ঠানং পঞ্ঞাযতীতি সমাপত্তিতো ৰুট্ঠানং পঞ্ঞাযতি. যো হি ভিক্খু অরূপপৰত্তে উক্কণ্ঠিত্ৰা সঞ্ঞঞ্চ ৰেদনঞ্চ নিরোধেত্ৰা নিরোধং সমাপন্নো, তস্স যথাপরিচ্ছিন্নকালৰসেন রূপজীৰিতিন্দ্রিযপচ্চযা অরূপধম্মা উপ্পজ্জন্তি. এৰং পন রূপারূপপৰত্তং পৰত্ততি. যথা কিং? যথা একো পুরিসো জালাপৰত্তে উক্খণ্ঠিতো উদকেন পহরিত্ৰা জালং অপ্পৰত্তং কত্ৰা ছারিকায অঙ্গারে পিধায তুণ্হী নিসীদতি. যদা পনস্স পুন জালায অত্থো হোতি, ছারিকং অপনেত্ৰা অঙ্গারে পরিৰত্তেত্ৰা উপাদানং দত্ৰা মুখৰাতং ৰা তালৰণ্টৰাতং ৰা দদাতি. অথ জালাপৰত্তং পুন পৰত্ততি. এৰমেৰ জালাপৰত্তং ৰিয অরূপধম্মা. পুরিসস্স জালাপৰত্তে উক্কণ্ঠিত্ৰা উদকপ্পহারেন জালং অপ্পৰত্তং কত্ৰা ছারিকায অঙ্গারে পিধায তুণ্হীভূতস্স নিসজ্জা ৰিয ভিক্খুনো অরূপপৰত্তে উক্কণ্ঠিত্ৰা সঞ্ঞঞ্চ ৰেদনঞ্চ নিরোধেত্ৰা নিরোধসমাপজ্জনং. ছারিকায পিহিতঅঙ্গারা ৰিয রূপজীৰিতিন্দ্রিযং. পুরিসস্স পুন জালায অত্থে সতি ছারিকাপনযনাদীনি ৰিয ভিক্খুনো যথাপরিচ্ছিন্নকালাপগমনং. অগ্গিজালায পৰত্তি ৰিয পুন অরূপধম্মেসু উপ্পন্নেসু রূপারূপপৰত্তি ৰেদিতব্বা.

আযু উস্মা চ ৰিঞ্ঞাণন্তি রূপজীৰিতিন্দ্রিযং, কম্মজতেজোধাতু, চিত্তন্তি ইমে তযো ধম্মা যদা ইমং রূপকাযং জহন্তি, অথাযং অচেতনং কট্ঠং ৰিয পথৰিযং ছড্ডিতো সেতীতি অত্থো. ৰুত্তঞ্চেতং –

‘‘আযু উস্মা চ ৰিঞ্ঞাণং, যদা কাযং জহন্তিমং;

অপৰিদ্ধো তদা সেতি, পরভত্তং অচেতন’’ন্তি. (সং. নি. ৩.৯৫);

কাযসঙ্খারাতি অস্সাসপস্সাসা. ৰচীসঙ্খারাতি ৰিতক্কৰিচারা. চিত্তসঙ্খারাতি সঞ্ঞাৰেদনা. আযূতি রূপজীৰিতিন্দ্রিযং. পরিভিন্নানীতি উপহতানি, ৰিনট্ঠানীতি অত্থো. তত্থ কেচি ‘‘নিরোধসমাপন্নস্স চিত্তসঙ্খারাৰ নিরুদ্ধা’’তি ৰচনতো চিত্তং অনিরুদ্ধং হোতি, তস্মা সচিত্তকা অযং সমাপত্তীতি ৰদন্তি. তে ৰত্তব্বা – ‘‘ৰচীসঙ্খারাপিস্স নিরুদ্ধা’’তি ৰচনতো ৰাচা অনিরুদ্ধা হোতি, তস্মা নিরোধং সমাপন্নেন ধম্মম্পি কথেন্তেন সজ্ঝাযম্পি করোন্তেন নিসীদিতব্বং সিযা. ‘‘যো চাযং মতো কালঙ্কতো, তস্সাপি চিত্তসঙ্খারা নিরুদ্ধা’’তি ৰচনতো চিত্তং অনিরুদ্ধং ভৰেয্য, তস্মা কালঙ্কতে মাতাপিতরো ৰা অরহন্তে ৰা ঝাপযন্তেন অনন্তরিযকম্মং কতং ভৰেয্য. ইতি ব্যঞ্জনে অভিনিৰেসং অকত্ৰা আচরিযানং নযে ঠত্ৰা অত্থো উপপরিক্খিতব্বো. অত্থো হি পটিসরণং, ন ব্যঞ্জনং.

ইন্দ্রিযানি ৰিপ্পসন্নানীতি কিরিযমযপৰত্তস্মিঞ্হি ৰত্তমানে বহিদ্ধা আরম্মণেসু পসাদে ঘট্টেন্তেসু ইন্দ্রিযানি কিলমন্তানি উপহতানি মক্খিতানি ৰিয হোন্তি, ৰাতাদীহি উট্ঠিতেন রজেন চতুমহাপথে ঠপিতআদাসো ৰিয. যথা পন থৰিকাযং পক্খিপিত্ৰা মঞ্জূসাদীসু ঠপিতো আদাসো অন্তোযেৰ ৰিরোচতি, এৰং নিরোধং সমাপন্নস্স ভিক্খুনো অন্তোনিরোধে পঞ্চ পসাদা অতিৰিরোচন্তি. তেন ৰুত্তং ‘‘ইন্দ্রিযানি ৰিপ্পসন্নানী’’তি.

৪৫৮. কতি পনাৰুসো, পচ্চযাতি ইধ কিং পুচ্ছতি? নিরোধস্স অনন্তরপচ্চযং নেৰসঞ্ঞানাসঞ্ঞাযতনং পুচ্ছিস্সামীতি পুচ্ছতি. ৰিস্সজ্জনে পনস্স সুখস্স চ পহানাতি চত্তারো অপগমনপচ্চযা কথিতা. অনিমিত্তাযাতি ইধ কিং পুচ্ছতি? নিরোধতো ৰুট্ঠানকফলসমাপত্তিং পুচ্ছিস্সামীতি পুচ্ছতি. অৰসেসসমাপত্তিৰুট্ঠানঞ্হি ভৰঙ্গেন হোতি, নিরোধা ৰুট্ঠানং পন ৰিপস্সনানিস্সন্দায ফলসমাপত্তিযাতি তমেৰ পুচ্ছতি. সব্বনিমিত্তানন্তি রূপাদীনং সব্বারম্মণানং. অনিমিত্তায চ ধাতুযা মনসিকারোতি সব্বনিমিত্তাপগতায নিব্বানধাতুযা মনসিকারো. ফলসমাপত্তিসহজাতং মনসিকারং সন্ধাযাহ. ইতি হেট্ঠা নিরোধপাদকং পঠমজ্ঝানং গহিতং, নিরোধস্স অনন্তরপচ্চযং নেৰসঞ্ঞানাসঞ্ঞাযতনং গহিতং, ইধ নিরোধতো ৰুট্ঠানকফলসমাপত্তি গহিতাতি.

ইমস্মিং ঠানে নিরোধকথা কথেতব্বা হোতি. সা, ‘‘দ্ৰীহি বলেহি সমন্নাগতত্তা তযো চ সঙ্খারানং পটিপ্পস্সদ্ধিযা সোল়সহি ঞাণচরিযাহি নৰহি সমাধিচরিযাহি ৰসীভাৰতাপঞ্ঞা নিরোধসমাপত্তিযা ঞাণ’’ন্তি এৰং পটিসম্ভিদামগ্গে (পটি. ম. ১.৮৩) আগতা. ৰিসুদ্ধিমগ্গে পনস্সা সব্বাকারেন ৰিনিচ্ছযকথা কথিতা.

ইদানি ৰলঞ্জনসমাপত্তিং পুচ্ছন্তো কতি পনাৰুসো, পচ্চযাতিআদিমাহ. নিরোধতো হি ৰুট্ঠানকফলসমাপত্তিযা ঠিতি নাম ন হোতি, একং দ্ৰে চিত্তৰারমেৰ পৰত্তিত্ৰা ভৰঙ্গং ওতরতি. অযঞ্হি ভিক্খু সত্ত দিৰসে অরূপপৰত্তং নিরোধেত্ৰা নিসিন্নো নিরোধৰুট্ঠানকফলসমাপত্তিযং ন চিরং তিট্ঠতি. ৰলঞ্জনসমাপত্তিযং পন অদ্ধানপরিচ্ছেদোৰ পমাণং. তস্মা সা ঠিতি নাম হোতি. তেনাহ – ‘‘অনিমিত্তায চেতোৰিমুত্তিযা ঠিতিযা’’তি. তস্সা চিরট্ঠিতত্থং কতি পচ্চযাতি অত্থো. ৰিস্সজ্জনে পনস্সা পুব্বে চ অভিসঙ্খারোতি অদ্ধানপরিচ্ছেদো ৰুত্তো. ৰুট্ঠানাযাতি ইধ ভৰঙ্গৰুট্ঠানং পুচ্ছতি. ৰিস্সজ্জনেপিস্সা সব্বনিমিত্তানঞ্চ মনসিকারোতি রূপাদিনিমিত্তৰসেন ভৰঙ্গসহজাতমনসিকারো ৰুত্তো.

৪৫৯. যা চাযং, আৰুসোতি ইধ কিং পুচ্ছতি? ইধ অঞ্ঞং অভিনৰং নাম নত্থি. হেট্ঠা কথিতধম্মেযেৰ একতো সমোধানেত্ৰা পুচ্ছামীতি পুচ্ছতি. কত্থ পন তে কথিতা? ‘‘নীলম্পি সঞ্জানাতি পীতকম্পি, লোহিতকম্পি, ওদাতকম্পি সঞ্জানাতী’’তি (ম. নি. ১.৪৫০) এতস্মিঞ্হি ঠানে অপ্পমাণা চেতোৰিমুত্তি কথিতা. ‘‘নত্থি কিঞ্চীতি আকিঞ্চঞ্ঞাযতনন্তি নেয্য’’ন্তি (ম. নি. ১.৪৫১) এত্থ আকিঞ্চঞ্ঞং. ‘‘পঞ্ঞাচক্খুনা পজানাতী’’তি (ম. নি. ১.৪৫১) এত্থ সুঞ্ঞতা. ‘‘কতি পনাৰুসো, পচ্চযা অনিমিত্তায চেতোৰিমুত্তিযা ঠিতিযা ৰুট্ঠানাযা’’তি এত্থ অনিমিত্তা. এৰং হেট্ঠা কথিতাৰ ইমস্মিং ঠানে একতো সমোধানেত্ৰা পুচ্ছতি. তং পন পটিক্খিপিত্ৰা এতা তস্মিং তস্মিং ঠানে নিদ্দিট্ঠাৰাতি ৰত্ৰা অঞ্ঞে চত্তারো ধম্মা একনামকা অত্থি. একো ধম্মো চতুনামকো অত্থি, এতং পাকটং কত্ৰা কথাপেতুং ইধ পুচ্ছতীতি অট্ঠকথাযং সন্নিট্ঠানং কতং. তস্সা ৰিস্সজ্জনে অযং ৰুচ্চতাৰুসো, অপ্পমাণা চেতোৰিমুত্তীতি অযং ফরণঅপ্পমাণতায অপ্পমাণা নাম. অযঞ্হি অপ্পমাণে ৰা সত্তে ফরতি, একস্মিম্পি ৰা সত্তে অসেসেত্ৰা ফরতি.

অযং ৰুচ্চতাৰুসো, আকিঞ্চঞ্ঞাতি আরম্মণকিঞ্চনস্স অভাৰতো আকিঞ্চঞ্ঞা. অত্তেন ৰাতি অত্ত ভাৰপোসপুগ্গলাদিসঙ্খাতেন অত্তেন সুঞ্ঞং. অত্তনিযেন ৰাতি চীৰরাদিপরিক্খারসঙ্খাতেন অত্তনিযেন সুঞ্ঞং. অনিমিত্তাতি রাগনিমিত্তাদীনং অভাৰেনেৰ অনিমিত্তা, অরহত্তফলসমাপত্তিং সন্ধাযাহ. নানত্থা চেৰ নানাব্যঞ্জনা চাতি ব্যঞ্জনম্পি নেসং নানা অত্থোপি. তত্থ ব্যঞ্জনস্স নানতা পাকটাৰ. অত্থো পন, অপ্পমাণা চেতোৰিমুত্তি ভূমন্তরতো মহগ্গতা এৰ হোতি রূপাৰচরা; আরম্মণতো সত্ত পঞ্ঞত্তিআরম্মণা. আকিঞ্চঞ্ঞা ভুম্মন্তরতো মহগ্গতা অরূপাৰচরা; আরম্মণতো ন ৰত্তব্বারম্মণা. সুঞ্ঞতা ভুম্মন্তরতো কামাৰচরা; আরম্মণতো সঙ্খারারম্মণা. ৰিপস্সনা হি এত্থ সুঞ্ঞতাতি অধিপ্পেতা. অনিমিত্তা ভুম্মন্তরতো লোকুত্তরা; আরম্মণতো নিব্বনারম্মণা.

রাগো খো, আৰুসো, পমাণকরণোতিআদীসু যথা পব্বতপাদে পূতিপণ্ণরসউদকং নাম হোতি কাল়ৰণ্ণং; ওলোকেন্তানং ব্যামসতগম্ভীরং ৰিয খাযতি. যট্ঠিং ৰা রজ্জুং ৰা গহেত্ৰা মিনন্তস্স পিট্ঠিপাদোত্থরণমত্তম্পি ন হোতি. এৰমেৰং যাৰ রাগাদযো নুপ্পজ্জন্তি, তাৰ পুগ্গলং সঞ্জানিতুং ন সক্কা হোন্তি, সোতাপন্নো ৰিয, সকদাগামী ৰিয, অনাগামী ৰিয চ খাযতি. যদা পনস্স রাগাদযো উপ্পজ্জন্তি, তদা রত্তো দুট্ঠো মূল়্হোতি পঞ্ঞাযতি. ইতি এতে ‘‘এত্তকো অয’’ন্তি পুগ্গলস্স পমাণং দস্সেন্তো ৰিয উপ্পজ্জন্তীতি পমাণকরণা নাম ৰুত্তা. যাৰতা খো, আৰুসো, অপ্পমাণা চেতোৰিমুত্তিযোতি যত্তকা অপ্পমাণা চেতোৰিমুত্তিযো. কিত্তকা পন তা? চত্তারো ব্রহ্মৰিহারা, চত্তারো মগ্গা, চত্তারি চ ফলানীতি দ্ৰাদস. তত্থ ব্রহ্মৰিহারা ফরণঅপ্পমাণতায অপ্পমাণা. সেসা পমাণকরণানং কিলেসানং অভাৰেন অপ্পমাণা. নিব্বানম্পি অপ্পমাণমেৰ, চেতোৰিমুত্তি পন ন হোতি, তস্মা ন গহিতং. অকুপ্পাতি অরহত্তফলচেতোৰিমুত্তি; সা হি তাসং সব্বজেট্ঠিকা, তস্মা অগ্গমক্খাযতীতি ৰুত্তা. রাগো খো, আৰুসো, কিঞ্চনোতি রাগো উপ্পজ্জিত্ৰা পুগ্গলং কিঞ্চতি মদ্দতি পলিবুন্ধতি. তস্মা কিঞ্চনোতি ৰুত্তো. মনুস্সা কির গোণেহি খলং মদ্দাপেন্তো কিঞ্চেহি কপিল, কিঞ্চেহি কাল়কাতি ৰদন্তি. এৰং মদ্দনত্থো কিঞ্চনত্থোতি ৰেদিতব্বো. দোসমোহেসুপি এসেৰ নযো. আকিঞ্চঞ্ঞা চেতোৰিমুত্তিযো নাম নৰ ধম্মা আকিঞ্চঞ্ঞাযতনঞ্চ মগ্গফলানি চ. তত্থ আকিঞ্চঞ্ঞাযতনং কিঞ্চনং আরম্মণং অস্স নত্থীতি আকিঞ্চঞ্ঞং. মগ্গফলানি কিঞ্চনানং মদ্দনানং পলিবুন্ধনকিলেসানং নত্থিতায আকিঞ্চঞ্ঞানি. নিব্বানম্পি আকিঞ্চঞ্ঞং, চেতোৰিমুত্তি পন ন হোতি, তস্মা ন গহিতং.

রাগো খো, আৰুসো, নিমিত্তকরণোতিআদীসু যথা নাম দ্ৰিন্নং কুলানং সদিসা দ্ৰে ৰচ্ছকা হোন্তি. যাৰ তেসং লক্খণং ন কতং হোতি, তাৰ ‘‘অযং অসুককুলস্স ৰচ্ছকো, অযং অসুককুলস্সা’’তি ন সক্কা হোন্তি জানিতুং. যদা পন তেসং সত্তিসূলাদীসু অঞ্ঞতরং লক্খণং কতং হোতি, তদা সক্কা হোন্তি জানিতুং. এৰমেৰ যাৰ পুগ্গলস্স রাগো নুপ্পজ্জতি, তাৰ ন সক্কা হোতি জানিতুং অরিযো ৰা পুথুজ্জনো ৰাতি. রাগো পনস্স উপ্পজ্জমানোৰ সরাগো নাম অযং পুগ্গলোতি সঞ্জানননিমিত্তং করোন্তো ৰিয উপ্পজ্জতি, তস্মা ‘‘নিমিত্তকরণো’’তি ৰুত্তো. দোসমোহেসুপি এসেৰ নযো.

অনিমিত্তা চেতোৰিমুত্তি নাম তেরস ধম্মা – ৰিপস্সনা, চত্তারো আরুপ্পা, চত্তারো মগ্গা, চত্তারি চ ফলানীতি. তত্থ ৰিপস্সনা নিচ্চনিমিত্তং সুখনিমিত্তং অত্তনিমিত্তং উগ্ঘাটেতীতি অনিমিত্তা নাম. চত্তারো আরুপ্পা রূপনিমিত্তস্স অভাৰেন অনিমিত্তা নাম. মগ্গফলানি নিমিত্তকরণানং কিলেসানং অভাৰেন অনিমিত্তানি. নিব্বানম্পি অনিমিত্তমেৰ, তং পন চেতোৰিমুত্তি ন হোতি, তস্মা ন গহিতং. অথ কস্মা সুঞ্ঞতা চেতোৰিমুত্তি ন গহিতাতি? সা, ‘‘সুঞ্ঞা রাগেনা’’তিআদিৰচনতো সব্বত্থ অনুপৰিট্ঠাৰ, তস্মা ৰিসুং ন গহিতা. একত্থাতি আরম্মণৰসেন একত্থা. অপ্পমাণং আকিঞ্চঞ্ঞং সুঞ্ঞতং অনিমিত্তন্তি হি সব্বানেতানি নিব্বানস্সেৰ নামানি. ইতি ইমিনা পরিযাযেন একত্থা. অঞ্ঞস্মিং পন ঠানে অপ্পমাণা হোন্তি, অঞ্ঞস্মিং আকিঞ্চঞ্ঞা অঞ্ঞস্মিং সুঞ্ঞতা অঞ্ঞস্মিং অনিমিত্তাতি ইমিনা পরিযাযেন নানাব্যঞ্জনা. ইতি থেরো যথানুসন্ধিনাৰ দেসনং নিট্ঠপেসীতি.

পপঞ্চসূদনিযা মজ্ঝিমনিকাযট্ঠকথায

মহাৰেদল্লসুত্তৰণ্ণনা নিট্ঠিতা.

৪. চূল়ৰেদল্লসুত্তৰণ্ণনা

৪৬০. এৰং মে সুতন্তি চূল়ৰেদল্লসুত্তং. তত্থ ৰিসাখো উপাসকোতি ৰিসাখোতি এৰংনামকো উপাসকো. যেন ধম্মদিন্নাতি যেন ধম্মদিন্না নাম ভিক্খুনী তেনুপসঙ্কমি. কো পনাযং ৰিসাখো? কা ধম্মদিন্না? কস্মা উপসঙ্কমীতি? ৰিসাখো নাম ধম্মদিন্নায গিহিকালে ঘরসামিকো. সো যদা ভগৰা সম্মাসম্বোধিং অভিসম্বুজ্ঝিত্ৰা পৰত্তৰরধম্মচক্কো যসাদযো কুলপুত্তে ৰিনেত্ৰা উরুৰেলং পত্ৰা তত্থ জটিলসহস্সং ৰিনেত্ৰা পুরাণজটিলেহি খীণাসৰভিক্খূহি সদ্ধিং রাজগহং গন্ত্ৰা বুদ্ধদস্সনত্থং দ্ৰাদসনহুতায পরিসায সদ্ধিং আগতস্স বিম্বিসারমহারাজস্স ধম্মং দেসেসি. তদা রঞ্ঞা সদ্ধিং আগতেসু দ্ৰাদসনহুতেসু একং নহুতং উপাসকত্তং পটিৰেদেসি, একাদস নহুতানি সোতাপত্তিফলে পতিট্ঠহিংসু সদ্ধিং রঞ্ঞা বিম্বিসারেন. অযং উপাসকো তেসং অঞ্ঞতরো, তেহি সদ্ধিং পঠমদস্সনেৰ সোতাপত্তিফলে পতিট্ঠায, পুন একদিৰসং ধম্মং সুত্ৰা সকদাগামিফলং পত্ৰা, ততো অপরভাগেপি একদিৰসং ধম্মং সুত্ৰা অনাগামিফলে পতিট্ঠিতো. সো অনাগামী হুত্ৰা গেহং আগচ্ছন্তো যথা অঞ্ঞেসু দিৰসেসু ইতো চিতো চ ওলোকেন্তো সিতং কুরুমানো আগচ্ছতি, এৰং অনাগন্ত্ৰা সন্তিন্দ্রিযো সন্তমানসো হুত্ৰা অগমাসি.

ধম্মদিন্না সীহপঞ্জরং উগ্ঘাটেত্ৰা ৰীথিং ওলোকযমানা তস্স আগমনাকারং দিস্ৰা, ‘‘কিং নু খো এত’’ন্তি চিন্তেত্ৰা তস্স পচ্চুগ্গমনং কুরুমানা সোপানসীসে ঠত্ৰা ওলম্বনত্থং হত্থং পসারেসি. উপাসকো অত্তনো হত্থং সমিঞ্জেসি. সা ‘‘পাতরাসভোজনকালে জানিস্সামী’’তি চিন্তেসি. উপাসকো পুব্বে তায সদ্ধিং একতো ভুঞ্জতি. তং দিৰসং পন তং অনপলোকেত্ৰা যোগাৰচরভিক্খু ৰিয এককোৰ ভুঞ্জি. সা, ‘‘সাযন্হকালে জানিস্সামী’’তি চিন্তেসি. উপাসকো তংদিৰসং সিরিগব্ভং ন পাৰিসি, অঞ্ঞং গব্ভং পটিজগ্গাপেত্ৰা কপ্পিযমঞ্চকং পঞ্ঞপাপেত্ৰা নিপজ্জি. উপাসিকা, ‘‘কিং নু খ্ৰস্স বহিদ্ধা পত্থনা অত্থি, উদাহু কেনচিদেৰ পরিভেদকেন ভিন্নো, উদাহু ময্হেৰ কোচি দোসো অত্থী’’তি বলৰদোমনস্সা হুত্ৰা, ‘‘একং দ্ৰে দিৰসে ৰসিতকালে সক্কা ঞাতু’’ন্তি তস্স উপট্ঠানং গন্ত্ৰা ৰন্দিত্ৰা অট্ঠাসি.

উপাসকো, ‘‘কিং ধম্মদিন্নে অকালে আগতাসী’’তি পুচ্ছি. আম অয্যপুত্ত, আগতাম্হি, ন ত্ৰং যথা পুরাণো, কিং নু তে বহিদ্ধা পত্থনা অত্থীতি? নত্থি ধম্মদিন্নেতি. অঞ্ঞো কোচি পরিভেদকো অত্থীতি? অযম্পি নত্থীতি. এৰং সন্তে ময্হেৰ কোচি দোসো ভৰিস্সতীতি. তুয্হম্পি দোসো নত্থীতি. অথ কস্মা মযা সদ্ধিং যথা পকতিযা আলাপসল্লাপমত্তম্পি ন করোথাতি? সো চিন্তেসি – ‘‘অযং লোকুত্তরধম্মো নাম গরু ভারিযো ন পকাসেততব্বো, সচে খো পনাহং ন কথেস্সামি, অযং হদযং ফালেত্ৰা এত্থেৰ কালং করেয্যা’’তি তস্সানুগ্গহত্থায কথেসি – ‘‘ধম্মদিন্নে অহং সত্থু ধম্মদেসনং সুত্ৰা লোকুত্তরধম্মং নাম অধিগতো, তং অধিগতস্স এৰরূপা লোকিযকিরিযা ন ৰট্টতি. যদি ত্ৰং ইচ্ছসি, তৰ চত্তালীস কোটিযো মম চত্তালীস কোটিযোতি অসীতিকোটিধনং অত্থি, এত্থ ইস্সরা হুত্ৰা মম মাতিট্ঠানে ৰা ভগিনিট্ঠানে ৰা ঠত্ৰা ৰস. তযা দিন্নেন ভত্তপিণ্ডমত্তকেন অহং যাপেস্সামি. অথেৰং ন করোসি, ইমে ভোগে গহেত্ৰা কুলগেহং গচ্ছ, অথাপি তে বহিদ্ধা পত্থনা নত্থি, অহং তং ভগিনিট্ঠানে ৰা ধিতুট্ঠানে ৰা ঠপেত্ৰা পোসেস্সামী’’তি.

সা চিন্তেসি – ‘‘পকতিপুরিসো এৰং ৰত্তা নাম নত্থি. অদ্ধা এতেন লোকুত্তরৰরধম্মো পটিৰিদ্ধো. সো পন ধম্মো কিং পুরিসেহেৰ পটিবুজ্ঝিতব্বো, উদাহু মাতুগামোপি পটিৰিজ্ঝিতুং সক্কোতী’’তি ৰিসাখং এতদৰোচ – ‘‘কিং নু খো এসো ধম্মো পুরিসেহেৰ লভিতব্বো, মাতুগামেনপি সক্কা লদ্ধু’’ন্তি? কিং ৰদেসি ধম্মদিন্নে, যে পটিপন্নকা, তে এতস্স দাযাদা, যস্স যস্স উপনিস্সযো অত্থি, সো সো এতং পটিলভতীতি. এৰং সন্তে ময্হং পব্বজ্জং অনুজানাথাতি. সাধু ভদ্দে, অহম্পি তং এতস্মিংযেৰ মগ্গে যোজেতুকামো, মনং পন তে অজানমানো ন কথেমীতি তাৰদেৰ বিম্বিসারস্স রঞ্ঞো সন্তিকং গন্ত্ৰা ৰন্দিত্ৰা অট্ঠাসি.

রাজা, ‘‘কিং, গহপতি, অকালে আগতোসী’’তি পুচ্ছি. ধম্মদিন্না, ‘‘মহারাজ, পব্বজিস্সামী’’তি ৰদতীতি. কিং পনস্স লদ্ধুং ৰট্টতীতি? অঞ্ঞং কিঞ্চি নত্থি, সোৰণ্ণসিৰিকং দেৰ, লদ্ধুং ৰট্টতি নগরঞ্চ পটিজগ্গাপেতুন্তি. রাজা সোৰণ্ণসিৰিকং দত্ৰা নগরং পটিজগ্গাপেসি. ৰিসাখো ধম্মদিন্নং গন্ধোদকেন নহাপেত্ৰা সব্বালঙ্কারেহি অলঙ্কারাপেত্ৰা সোৰণ্ণসিৰিকায নিসীদাপেত্ৰা ঞাতিগণেন পরিৰারাপেত্ৰা গন্ধপুপ্ফাদীহি পূজযমানো নগরৰাসনং করোন্তো ৰিয ভিক্খুনিউপস্সযং গন্ত্ৰা, ‘‘ধম্মদিন্নং পব্বাজেথায্যে’’তি আহ. ভিক্খুনিযো ‘‘একং ৰা দ্ৰে ৰা দোসে সহিতুং ৰট্টতি গহপতী’’তি আহংসু. নত্থয্যে কোচি দোসো, সদ্ধায পব্বজতীতি. অথেকা ব্যত্তা থেরী তচপঞ্চককম্মট্ঠানং আচিক্খিত্ৰা কেসে ওহারেত্ৰা পব্বাজেসি. ৰিসাখো, ‘‘অভিরময্যে, স্ৰাক্খাতো ধম্মো’’তি ৰন্দিত্ৰা পক্কামি.

তস্সা পব্বজিতদিৰসতো পট্ঠায লাভসক্কারো উপ্পজ্জি. তেনেৰ পলিবুদ্ধা সমণধম্মং কাতুং ওকাসং ন লভতি. অথাচরিয-উপজ্ঝাযথেরিযো গহেত্ৰা জনপদং গন্ত্ৰা অট্ঠতিংসায আরম্মণেসু চিত্তরুচিতং কম্মট্ঠানং কথাপেত্ৰা সমণধম্মং কাতুং আরদ্ধা, অভিনীহারসম্পন্নত্তা পন নাতিচিরং কিলমিত্থ.

ইতো পট্ঠায হি সতসহস্সকপ্পমত্থকে পদুমুত্তরো নাম সত্থা লোকে উদপাদি. তদা এসা একস্মিং কুলে দাসী হুত্ৰা অত্তনো কেসে ৰিক্কিণিত্ৰা সুজাতত্থেরস্স নাম অগ্গসাৰকস্স দানং দত্ৰা পত্থনমকাসি. সা তায পত্থনাভিনীহারসম্পত্তিযা নাতিচিরং কিলমিত্থ, কতিপাহেনেৰ অরহত্তং পত্ৰা চিন্তেসি – ‘‘অহং যেনত্থেন সাসনে পব্বজিতা, সো মত্থকং পত্তো, কিং মে জনপদৰাসেন, ময্হং ঞাতকাপি পুঞ্ঞানি করিস্সন্তি, ভিক্খুনিসঙ্ঘোপি পচ্চযেহি ন কিলমিস্সতি, রাজগহং গচ্ছামী’’তি ভিক্খুনিসঙ্ঘং গহেত্ৰা রাজগহমেৰ অগমাসি. ৰিসাখো, ‘‘ধম্মদিন্না কির আগতা’’তি সুত্ৰা, ‘‘পব্বজিত্ৰা নচিরস্সেৰ জনপদং গতা, গন্ত্ৰাপি নচিরস্সেৰ পচ্চাগতা, কিং নু খো ভৰিস্সতি, গন্ত্ৰা জানিস্সামী’’তি দুতিযগমনেন ভিক্খুনিউপস্সযং অগমাসি. তেন ৰুত্তং – ‘‘অথ খো ৰিসাখো উপাসকো যেন ধম্মদিন্না ভিক্খুনী তেনুপসঙ্কমী’’তি.

এতদৰোচাতি এতং সক্কাযোতিআদিৰচনং অৰোচ. কস্মা অৰোচাতি? এৰং কিরস্স অহোসি – ‘‘অভিরমসি নাভিরমসি, অয্যে’’তি এৰং পুচ্ছনং নাম ন পণ্ডিতকিচ্চং, পঞ্চুপাদানক্খন্ধে উপনেত্ৰা পঞ্হং পুচ্ছিস্সামি, পঞ্হব্যাকরণেন তস্সা অভিরতিং ৰা অনভিরতিং ৰা জানিস্সামীতি, তস্মা অৰোচ. তং সুত্ৰাৰ ধম্মদিন্না অহং, আৰুসো ৰিসাখ, অচিরপব্বজিতা সকাযং ৰা পরকাযং ৰা কুতো জানিস্সামীতি ৰা, অঞ্ঞত্থেরিযো উপসঙ্কমিত্ৰা পুচ্ছাতি ৰা অৰত্ৰা উপনিক্খিত্তং সম্পটিচ্ছমানা ৰিয, একপাসকগণ্ঠিং মোচেন্তী ৰিয গহনট্ঠানে হত্থিমগ্গং নীহরমানা ৰিয খগ্গমুখেন সমুগ্গং ৰিৰরমানা ৰিয চ পটিসম্ভিদাৰিসযে ঠত্ৰা পঞ্হং ৰিস্সজ্জমানা, পঞ্চ খো ইমে, আৰুসো ৰিসাখ, উপাদানক্খন্ধাতিআদিমাহ. তত্থ পঞ্চাতি গণনপরিচ্ছেদো. উপাদানক্খন্ধাতি উপাদানানং পচ্চযভূতা খন্ধাতি এৰমাদিনা নযেনেত্থ উপাদানক্খন্ধকথা ৰিত্থারেত্ৰা কথেতব্বা. সা পনেসা ৰিসুদ্ধিমগ্গে ৰিত্থারিতা এৰাতি তত্থ ৰিত্তারিতনযেনেৰ ৰেদিতব্বা. সক্কাযসমুদযাদীসুপি যং ৰত্তব্বং, তং হেট্ঠা তত্থ তত্থ ৰুত্তমেৰ.

ইদং পন চতুসচ্চব্যাকরণং সুত্ৰা ৰিসাখো থেরিযা অভিরতভাৰং অঞ্ঞাসি. যো হি বুদ্ধসাসনে উক্কণ্ঠিতো হোতি অনভিরতো, সো এৰং পুচ্ছিতপুচ্ছিতপঞ্হং সণ্ডাসেন একেকং পলিতং গণ্হন্তো ৰিয, সিনেরুপাদতো ৰালুকং উদ্ধরন্তো ৰিয ৰিস্সজ্জেতুং ন সক্কোতি. যস্মা পন ইমানি চত্তারি সচ্চানি লোকে চন্দিমসূরিযা ৰিয বুদ্ধসাসনে পাকটানি, পরিসমজ্ঝে গতো হি ভগৰাপি মহাথেরাপি সচ্চানেৰ পকাসেন্তি; ভিক্খুসঙ্ঘোপি পব্বজিতদিৰসতো পট্ঠায কুলপুত্তে চত্তারি নাম কিং, চত্তারি অরিযসচ্চানীতি পঞ্হং উগ্গণ্হাপেতি. অযঞ্চ ধম্মদিন্না উপাযকোসল্লে ঠিতা পণ্ডিতা ব্যত্তা নযং গহেত্ৰা সুতেনপি কথেতুং সমত্থা, তস্মা ‘‘ন সক্কা এতিস্সা এত্তাৰতা সচ্চানং পটিৰিদ্ধভাৰো ঞাতুং, সচ্চৰিনিব্ভোগপঞ্হব্যাকরণেন সক্কা ঞাতু’’ন্তি চিন্তেত্ৰা হেট্ঠা কথিতানি দ্ৰে সচ্চানি পটিনিৰত্তেত্ৰা গুল়্হং কত্ৰা গণ্ঠিপঞ্হং পুচ্ছিস্সামীতি পুচ্ছন্তো তঞ্ঞেৰ নু খো, অয্যেতিআদিমাহ.

তস্স ৰিস্সজ্জনে ন খো, আৰুসো ৰিসাখ, তঞ্ঞেৰ উপাদানন্তি উপাদানস্স সঙ্খারক্খন্ধেকদেসভাৰতো ন তংযেৰ উপাদানং তে পঞ্চুপাদানক্খন্ধা, নাপি অঞ্ঞত্র পঞ্চহি উপাদানক্খন্ধেহি উপাদানং. যদি হি তঞ্ঞেৰ সিযা, রূপাদিসভাৰম্পি উপাদানং সিযা. যদি অঞ্ঞত্র সিযা, পরসমযে চিত্তৰিপ্পযুত্তো অনুসযো ৰিয পণ্ণত্তি ৰিয নিব্বানং ৰিয চ খন্ধৰিনিমুত্তং ৰা সিযা, ছট্ঠো ৰা খন্ধো পঞ্ঞপেতব্বো ভৰেয্য, তস্মা এৰং ব্যাকাসি. তস্সা ব্যাকরণং সুত্ৰা ‘‘অধিগতপতিট্ঠা অয’’ন্তি ৰিসাখো নিট্ঠমগমাসি. ন হি সক্কা অখীণাসৰেন অসম্বদ্ধেন অৰিত্থাযন্তেন পদীপসহস্সং জালেন্তেন ৰিয এৰরূপো গুল়্হো পটিচ্ছন্নো তিলক্খণাহতো গম্ভীরো পঞ্হো ৰিস্সজ্জেতুং. নিট্ঠং গন্ত্ৰা পন, ‘‘অযং ধম্মদিন্না সাসনে লদ্ধপতিট্ঠা অধিগতপটিসম্ভিদা ৰেসারজ্জপ্পত্তা ভৰমত্থকে ঠিতা মহাখীণাসৰা, সমত্থা ময্হং পুচ্ছিতপঞ্হং কথেতুং, ইদানি পন নং ওৰত্তিকসারং পঞ্হং পুচ্ছিস্সামী’’তি চিন্তেত্ৰা তং পুচ্ছন্তো, কথং পনায্যেতিআদিমাহ.

৪৬১. তস্স ৰিস্সজ্জনে অস্সুতৰাতিআদি মূলপরিযাযে ৰিত্থারিতমেৰ. রূপং অত্ততো সমনুপস্সতীতি, ‘‘ইধেকচ্চো রূপং অত্ততো সমনুপস্সতি. যং রূপং সো অহং, যো অহং তং রূপন্তি রূপঞ্চ অত্তঞ্চ অদ্ৰযং সমনুপস্সতি. সেয্যথাপি নাম তেলপ্পদীপস্স ঝাযতো যা অচ্চি সো ৰণ্ণো, যো ৰণ্ণো সা অচ্চীতি অচ্চিঞ্চ ৰণ্ণঞ্চ অদ্ৰযং সমনুপস্সতি. এৰমেৰ ইধেকচ্চো রূপং অত্ততো সমনুপস্সতি…পে… অদ্ৰযং সমনুপস্সতী’’তি (পটি. ম. ১.১৩১) এৰং রূপং অত্তাতি দিট্ঠিপস্সনায পস্সতি. রূপৰন্তং ৰা অত্তানন্তি অরূপং অত্তাতি গহেত্ৰা ছাযাৰন্তং রুক্খং ৰিয তং অত্তানং রূপৰন্তং সমনুপস্সতি. অত্তনি ৰা রূপন্তি অরূপমেৰ অত্তাতি গহেত্ৰা পুপ্ফস্মিং গন্ধং ৰিয অত্তনি রূপং সমনুপস্সতি. রূপস্মিং ৰা অত্তানন্তি অরূপমেৰ অত্তাতি গহেত্ৰা করণ্ডায মণিং ৰিয অত্তানং রূপস্মিং সমনুপস্সতি. ৰেদনং অত্ততোতিআদীসুপি এসেৰ নযো.

তত্থ, রূপং অত্ততো সমনুপস্সতীতি সুদ্ধরূপমেৰ অত্তাতি কথিতং. রূপৰন্তং ৰা অত্তানং, অত্তনি ৰা রূপং, রূপস্মিং ৰা অত্তানং. ৰেদনং অত্ততো… সঞ্ঞং… সঙ্খারে… ৰিঞ্ঞাণং অত্ততো সমনুপস্সতীতি ইমেসু সত্তসু ঠানেসু অরূপং অত্তাতি কথিতং. ৰেদনাৰন্তং ৰা অত্তানং, অত্তনি ৰা ৰেদনং, ৰেদনায ৰা অত্তানন্তি এৰং চতূসু খন্ধেসু তিণ্ণং তিণ্ণং ৰসেন দ্ৰাদসসু ঠানেসু রূপারূপমিস্সকো অত্তা কথিতো. তত্থ রূপং অত্ততো সমনুপস্সতি… ৰেদনং… সঞ্ঞং… সঙ্খারে… ৰিঞ্ঞাণং অত্ততো সমনুপস্সতীতি ইমেসু পঞ্চসু ঠানেসু উচ্ছেদদিট্ঠি কথিতা, অৰসেসেসু সস্সতদিট্ঠীতি. এৰমেত্থ পন্নরস ভৰদিট্ঠিযো, পঞ্চ ৰিভৰদিট্ঠিযো হোন্তি. ন রূপং অত্ততোতি এত্থ রূপং অত্তাতি ন সমনুপস্সতি. অনিচ্চং দুক্খং অনত্তাতি পন সমনুপস্সতি. ন রূপৰন্তং অত্তানং…পে… ন ৰিঞ্ঞাণস্মিং অত্তানন্তি ইমে পঞ্চক্খন্ধে কেনচি পরিযাযেন অত্ততো ন সমনুপস্সতি, সব্বাকারেন পন অনিচ্চা দুক্খা অনত্তাতি সমনুপস্সতি.

এত্তাৰতা থেরিযা, ‘‘এৰং খো, আৰুসো ৰিসাখ, সক্কাযদিট্ঠি হোতী’’তি এৰং পুরিমপঞ্হং ৰিস্সজ্জেন্তিযা এত্তকেন গমনং হোতি, আগমনং হোতি, গমনাগমনং হোতি, ৰট্টং ৰত্ততীতি ৰট্টং মত্থকং পাপেত্ৰা দস্সিতং. এৰং খো, আৰুসো ৰিসাখ, সক্কাযদিট্ঠি ন হোতীতি পচ্ছিমং পঞ্হং ৰিস্সজ্জেন্তিযা এত্তকেন গমনং ন হোতি, আগমনং ন হোতি, গমনাগমনং ন হোতি, ৰট্টং নাম ন ৰত্ততীতি ৰিৰট্টং মত্থকং পাপেত্ৰা দস্সিতং.

৪৬২. কতমো পনায্যে, অরিযো অট্ঠঙ্গিকো মগ্গোতি অযং পঞ্হো থেরিযা পটিপুচ্ছিত্ৰা ৰিস্সজ্জেতব্বো ভৰেয্য – ‘‘উপাসক, তযা হেট্ঠা মগ্গো পুচ্ছিতো, ইধ কস্মা মগ্গমেৰ পুচ্ছসী’’তি. সা পন অত্তনো ব্যত্ততায পণ্ডিচ্চেন তস্স অধিপ্পাযং সল্লক্খেসি – ‘‘ইমিনা উপাসকেন হেট্ঠা পটিপত্তিৰসেন মগ্গো পুচ্ছিতো ভৰিস্সতি, ইধ পন তং সঙ্খতাসঙ্খতলোকিযলোকুত্তরসঙ্গহিতাসঙ্গহিতৰসেন পুচ্ছিতুকামো ভৰিস্সতী’’তি. তস্মা অপ্পটিপুচ্ছিত্ৰাৰ যং যং পুচ্ছি, তং তং ৰিস্সজ্জেসি. তত্থ সঙ্খতোতি চেতিতো কপ্পিতো পকপ্পিতো আযূহিতো কতো নিব্বত্তিতো সমাপজ্জন্তেন সমাপজ্জিতব্বো. তীহি চ খো, আৰুসো ৰিসাখ, খন্ধেহি অরিযো অট্ঠঙ্গিকো মগ্গো সঙ্গহিতোতি এত্থ যস্মা মগ্গো সপ্পদেসো, তযো খন্ধা নিপ্পদেসা, তস্মা অযং সপ্পদেসত্তা নগরং ৰিয রজ্জেন নিপ্পদেসেহি তীহি খন্ধেহি সঙ্গহিতো. তত্থ সম্মাৰাচাদযো তযো সীলমেৰ, তস্মা তে সজাতিতো সীলক্খন্ধেন সঙ্গহিতাতি. কিঞ্চাপি হি পাল়িযং সীলক্খন্ধেতি ভুম্মেন ৰিয নিদ্দেসো কতো, অত্থো পন করণৰসেন ৰেদিতব্বো. সম্মাৰাযামাদীসু পন তীসু সমাধি অত্তনো ধম্মতায আরম্মণে একগ্গভাৰেন অপ্পেতুং ন সক্কোতি. ৰীরিযে পন পগ্গহকিচ্চং সাধেন্তে সতিযা চ অপিলাপনকিচ্চং সাধেন্তিযা লদ্ধূপকারো হুত্ৰা সক্কোতি.

তত্রাযং উপমা – যথা হি ‘‘নক্খত্তং কীল়িস্সামা’’তি উয্যানং পৰিট্ঠেসু তীসু সহাযেসু একো সুপুপ্ফিতং চম্পকরুক্খং দিস্ৰা হত্থং উক্খিপিত্ৰাপি গহেতুং ন সক্কুণেয্য. অথস্স দুতিযো ওনমিত্ৰা পিট্ঠিং দদেয্য, সো তস্স পিট্ঠিযং ঠত্ৰাপি কম্পমানো গহেতুং ন সক্কুণেয্য. অথস্স ইতরো অংসকূটং উপনামেয্য, সো একস্স পিট্ঠিযং ঠত্ৰা একস্স অংসকূটং ওলুব্ভ যথারুচি পুপ্ফানি ওচিনিত্ৰা পিল়ন্ধিত্ৰা নক্খত্তং কীল়েয্য. এৰংসম্পদমিদং দট্ঠব্বং. একতো উয্যানং পৰিট্ঠা তযো সহাযকা ৰিয হি একতো জাতা সম্মাৰাযামাদযো তযো ধম্মা. সুপুপ্ফিতচম্পকো ৰিয আরম্মণং. হত্থং উক্খিপিত্ৰাপি গহেতুং অসক্কোন্তো ৰিয অত্তনো ধম্মতায আরম্মণে একগ্গভাৰেন অপ্পেতুং অসক্কোন্তো সমাধি. পিট্ঠিং দত্ৰা ওনতসহাযো ৰিয ৰাযামো. অংসকূটং দত্ৰা ঠিতসহাযো ৰিয সতি. যথা তেসু একস্স পিট্ঠিযং ঠত্ৰা একস্স অংসকূটং ওলুব্ভ ইতরো যথারুচি পুপ্ফং গহেতুং সক্কোতি, এৰমেৰং ৰীরিযে পগ্গহকিচ্চং সাধেন্তে, সতিযা চ অপিলাপনকিচ্চং সাধেন্তিযা লদ্ধুপকারো সমাধি সক্কোতি আরম্মণে একগ্গভাৰেন অপ্পেতুং. তস্মা সমাধিযেৰেত্থ সজাতিতো সমাধিক্খন্ধেন সঙ্গহিতো. ৰাযামসতিযো পন কিরিযতো সঙ্গহিতা হোন্তি.

সম্মাদিট্ঠিসম্মাসঙ্কপ্পেসুপি পঞ্ঞা অত্তনো ধম্মতায অনিচ্চং দুক্খং অনত্তাতি আরম্মণং নিচ্ছেতুং ন সক্কোতি, ৰিতক্কে পন আকোটেত্ৰা আকোটেত্ৰা দেন্তে সক্কোতি. কথং? যথা হি হেরঞ্ঞিকো কহাপণং হত্থে ঠপেত্ৰা সব্বভাগেসু ওলোকেতুকামো সমানোপি ন চক্খুদলেনেৰ পরিৰত্তেতুং সক্কোতি, অঙ্গুলিপব্বেহি পন পরিৰত্তেত্ৰা ইতো চিতো চ ওলোকেতুং সক্কোতি. এৰমেৰ ন পঞ্ঞা অত্তনো ধম্মতায অনিচ্চাদিৰসেন আরম্মণং নিচ্ছেতুং সক্কোতি, অভিনিরোপনলক্খণেন পন আহননপরিযাহননরসেন ৰিতক্কেন আকোটেন্তেন ৰিয পরিৰত্তেন্তেন ৰিয চ আদাযা দিন্নমেৰ ৰিনিচ্ছেতুং সক্কোতি. তস্মা ইধাপি সম্মাদিট্ঠিযেৰ সজাতিতো পঞ্ঞাক্খন্ধেন সঙ্গহিতা. সম্মাসঙ্কপ্পো পন কিরিযতো সঙ্গহিতো হোতি. ইতি ইমেহি তীহি খন্ধেহি মগ্গো সঙ্গহং গচ্ছতি. তেন ৰুত্তং – ‘‘তীহি চ খো, আৰুসো ৰিসাখ, খন্ধেহি অরিযো অট্ঠঙ্গিকো মগ্গো সঙ্গহিতো’’তি.

ইদানি একচিত্তক্খণিকং মগ্গসমাধিং সনিমিত্তং সপরিক্খারং পুচ্ছন্তো, কতমো পনায্যেতিআদিমাহ. তস্স ৰিস্সজ্জনে চত্তারো সতিপট্ঠানা মগ্গক্খণে চতুকিচ্চসাধনৰসেন উপ্পন্না সতি, সা সমাধিস্স পচ্চযত্থেন নিমিত্তং. চত্তারো সম্মপ্পধানা চতুকিচ্চসাধনৰসেনেৰ উপ্পন্নং ৰীরিযং, তং পরিৰারট্ঠেন পরিক্খারো হোতি. তেসংযেৰ ধম্মানন্তি তেসং মগ্গসম্পযুত্তধম্মানং. আসেৰনাতিআদীসু একচিত্তক্খণিকাযেৰ আসেৰনাদযো ৰুত্তাতি.

ৰিতণ্ডৰাদী পন, ‘‘একচিত্তক্খণিকো নাম মগ্গো নত্থি, ‘এৰং ভাৰেয্য সত্ত ৰস্সানী’তি হি ৰচনতো সত্তপি ৰস্সানি মগ্গভাৰনা হোতি, কিলেসা পন লহু ছিজ্জন্তা সত্তহি ঞাণেহি ছিজ্জন্তী’’তি ৰদতি. সো ‘‘সুত্তং আহরা’’তি ৰত্তব্বো. অদ্ধা অঞ্ঞং অপস্সন্তো, ‘‘যা তেসংযেৰ ধম্মানং আসেৰনা ভাৰনা বহুলীকম্ম’’ন্তি ইদমেৰ সুত্তং আহরিত্ৰা, ‘‘অঞ্ঞেন চিত্তেন আসেৰতি, অঞ্ঞেন ভাৰেতি, অঞ্ঞেন বহুলীকরোতী’’তি ৰক্খতি. ততো ৰত্তব্বো – ‘‘কিং পনিদং, সুত্তং নেয্যত্থং নীতত্থ’’ন্তি. ততো ৰক্খতি – ‘‘নীতত্থং যথা সুত্তং তথেৰ অত্থো’’তি. তস্স ইদং উত্তরং – এৰং সন্তে একং চিত্তং আসেৰমানং উপ্পন্নং, অপরম্পি আসেৰমানং, অপরম্পি আসেৰমানন্তি এৰং দিৰসম্পি আসেৰনাৰ ভৰিস্সতি, কুতো ভাৰনা, কুতো বহুলীকম্মং? একং ৰা ভাৰযমানং উপ্পন্নং অপরম্পি ভাৰযমানং অপরম্পি ভাৰযমানন্তি এৰং দিৰসম্পি ভাৰনাৰ ভৰিস্সতি, কুতো আসেৰনা কুতো বহুলীকম্মং? একং ৰা বহুলীকরোন্তং উপ্পন্নং, অপরম্পি বহুলীকরোন্তং, অপরম্পি বহুলীকরোন্তন্তি এৰং দিৰসম্পি বহুলীকম্মমেৰ ভৰিস্সতি কুতো আসেৰনা, কুতো ভাৰনাতি.

অথ ৰা এৰং ৰদেয্য – ‘‘একেন চিত্তেন আসেৰতি, দ্ৰীহি ভাৰেতি, তীহি বহুলীকরোতি. দ্ৰীহি ৰা আসেৰতি, তীহি ভাৰেতি, একেন বহুলীকরোতি. তীহি ৰা আসেৰতি, একেন ভাৰেতি, দ্ৰীহি বহুলীকরোতী’’তি. সো ৰত্তব্বো – ‘‘মা সুত্তং মে লদ্ধন্তি যং ৰা তং ৰা অৰচ. পঞ্হং ৰিস্সজ্জেন্তেন নাম আচরিযস্স সন্তিকে ৰসিত্ৰা বুদ্ধৰচনং উগ্গণ্হিত্ৰা অত্থরসং ৰিদিত্ৰা ৰত্তব্বং হোতি. একচিত্তক্খণিকাৰ অযং আসেৰনা, একচিত্তক্খণিকা ভাৰনা, একচিত্তক্খণিকং বহুলীকম্মং. খযগামিলোকুত্তরমগ্গো বহুলচিত্তক্খণিকো নাম নত্থি, ‘একচিত্তক্খণিকোযেৰা’তি সঞ্ঞাপেতব্বো. সচে সঞ্জানাতি, সঞ্জানাতু, নো চে সঞ্জানাতি, গচ্ছ পাতোৰ ৰিহারং পৰিসিত্ৰা যাগুং পিৰাহী’’তি উয্যোজেতব্বো.

৪৬৩. কতি পনায্যে সঙ্খারাতি ইধ কিং পুচ্ছতি? যে সঙ্খারে নিরোধেত্ৰা নিরোধং সমাপজ্জতি, তে পুচ্ছিস্সামীতি পুচ্ছতি. তেনেৰস্স অধিপ্পাযং ঞত্ৰা থেরী, পুঞ্ঞাভিসঙ্খারাদীসু অনেকেসু সঙ্খারেসু ৰিজ্জমানেসুপি, কাযসঙ্খারাদযোৰ আচিক্খন্তী, তযোমে, আৰুসোতিআদিমাহ. তত্থ কাযপটিবদ্ধত্তা কাযেন সঙ্খরীযতি করীযতি নিব্বত্তীযতীতি কাযসঙ্খারো. ৰাচং সঙ্খরোতি করোতি নিব্বত্তেতীতি ৰচীসঙ্খারো. চিত্তপটিবদ্ধত্তা চিত্তেন সঙ্খরীযতি করীযতি নিব্বত্তীযতীতি চিত্তসঙ্খারো. কতমো পনায্যেতি ইধ কিং পুচ্ছতি? ইমে সঙ্খারা অঞ্ঞমঞ্ঞমিস্সা আলুল়িতা অৰিভূতা দুদ্দীপনা. তথা হি, কাযদ্ৰারে আদানগহণমুঞ্চনচোপনানি পাপেত্ৰা উপ্পন্না অট্ঠ কামাৰচরকুসলচেতনা দ্ৰাদস অকুসলচেতনাতি এৰং কুসলাকুসলা ৰীসতি চেতনাপি অস্সাসপস্সাসাপি কাযসঙ্খারাত্ৰেৰ ৰুচ্চন্তি. ৰচীদ্ৰারে হনুসংচোপনং ৰচীভেদং পাপেত্ৰা উপ্পন্না ৰুত্তপ্পকারাৰ ৰীসতি চেতনাপি ৰিতক্কৰিচারাপি ৰচীসঙ্খারোত্ৰেৰ ৰুচ্চন্তি. কাযৰচীদ্ৰারেসু চোপনং অপত্তা রহো নিসিন্নস্স চিন্তযতো উপ্পন্না কুসলাকুসলা একূনতিংস চেতনাপি সঞ্ঞা চ ৰেদনা চাতি ইমে দ্ৰে ধম্মাপি চিত্তসঙ্খারোত্ৰেৰ ৰুচ্চন্তি. এৰং ইমে সঙ্খারা অঞ্ঞমঞ্ঞমিস্সা আলুল়িতা অৰিভূতা দুদ্দীপনা. তে পাকটে ৰিভূতে কত্ৰা কথাপেস্সামীতি পুচ্ছতি.

কস্মা পনায্যেতি ইধ কাযসঙ্খারাদিনামস্স পদত্থং পুচ্ছতি. তস্স ৰিস্সজ্জনে কাযপ্পটিবদ্ধাতি কাযনিস্সিতা, কাযে সতি হোন্তি, অসতি ন হোন্তি. চিত্তপ্পটিবদ্ধাতি চিত্তনিস্সিতা, চিত্তে সতি হোন্তি, অসতি ন হোন্তি.

৪৬৪. ইদানি কিং নু খো এসা সঞ্ঞাৰেদযিতনিরোধং ৰলঞ্জেতি, ন ৰলঞ্জেতি. চিণ্ণৰসী ৰা তত্থ নো চিণ্ণৰসীতি জাননত্থং পুচ্ছন্তো, কথং পনায্যে, সঞ্ঞাৰেদযিতনিরোধসমাপত্তি হোতীতিআদিমাহ. তস্স ৰিস্সজ্জনে সমাপজ্জিস্সন্তি ৰা সমাপজ্জামীতি ৰা পদদ্ৰযেন নেৰসঞ্ঞানাসঞ্ঞাযতনসমাপত্তিকালো কথিতো. সমাপন্নোতি পদেন অন্তোনিরোধো. তথা পুরিমেহি দ্ৰীহি পদেহি সচিত্তককালো কথিতো, পচ্ছিমেন অচিত্তককালো. পুব্বেৰ তথা চিত্তং ভাৰিতং হোতীতি নিরোধসমাপত্তিতো পুব্বে অদ্ধানপরিচ্ছেদকালেযেৰ, এত্তকং কালং অচিত্তকো ভৰিস্সামীতি অদ্ধানপরিচ্ছেদচিত্তং ভাৰিতং হোতি. যং তং তথত্তায উপনেতীতি যং এৰং ভাৰিতং চিত্তং, তং পুগ্গলং তথত্তায অচিত্তকভাৰায উপনেতি.

পঠমং নিরুজ্ঝতি ৰচীসঙ্খারোতি সেসসঙ্খারেহি পঠমং দুতিযজ্ঝানেযেৰ নিরুজ্ঝতি. ততো কাযসঙ্খারোতি ততো পরং কাযসঙ্খারো চতুত্থজ্ঝানে নিরুজ্ঝতি. ততো চিত্তসঙ্খারোতি ততো পরং চিত্তসঙ্খারো অন্তোনিরোধে নিরুজ্ঝতি. ৰুট্ঠহিস্সন্তি ৰা ৰুট্ঠহামীতি ৰা পদদ্ৰযেন অন্তোনিরোধকালো কথিতো. ৰুট্ঠিতোতি পদেন ফলসমাপত্তিকালো. তথা পুরিমেহি দ্ৰীহি পদেহি অচিত্তককালো কথিতো, পচ্ছিমেন সচিত্তককালো. পুব্বেৰ তথা চিত্তং ভাৰিতং হোতীতি নিরোধসমাপত্তিতো পুব্বে অদ্ধানপরিচ্ছেদকালেযেৰ এত্তকং কালং অচিত্তকো হুত্ৰা ততো পরং সচিত্তকো ভৰিস্সামীতি অদ্ধানপরিচ্ছেদচিত্তং ভাৰিতং হোতি. যং তং তথত্তায উপনেতীতি যং এৰং ভাৰিতং চিত্তং, তং পুগ্গলং তথত্তায সচিত্তকভাৰায উপনেতি. ইতি হেট্ঠা নিরোধসমাপজ্জনকালো গহিতো, ইধ নিরোধতো ৰুট্ঠানকালো.

ইদানি নিরোধকথং কথেতুং ৰারোতি নিরোধকথা কথেতব্বা সিযা, সা পনেসা, ‘‘দ্ৰীহি বলেহি সমন্নাগতত্তা তযো চ সঙ্খারানং পটিপ্পস্সদ্ধিযা সোল়সহি ঞাণচরিযাহি নৰহি সমাধিচরিযাহি ৰসীভাৰতাপঞ্ঞা নিরোধসমাপত্তিযা ঞাণ’’ন্তি মাতিকং ঠপেত্ৰা সব্বাকারেন ৰিসুদ্ধিমগ্গে কথিতা. তস্মা তত্থ কথিতনযেনেৰ গহেতব্বা. কো পনাযং নিরোধো নাম? চতুন্নং খন্ধানং পটিসঙ্খা অপ্পৰত্তি. অথ কিমত্থমেতং সমাপজ্জন্তীতি. সঙ্খারানং পৰত্তে উক্কণ্ঠিতা সত্তাহং অচিত্তকা হুত্ৰা সুখং ৰিহরিস্সাম, দিট্ঠধম্মনিব্বানং নামেতং, যদিদং নিরোধোতি এতদত্থং সমাপজ্জন্তি.

পঠমং উপ্পজ্জতি চিত্তসঙ্খারোতি নিরোধা ৰুট্ঠহন্তস্স হি ফলসমাপত্তিচিত্তং পঠমং উপ্পজ্জতি. তংসম্পযুত্তং সঞ্ঞঞ্চ ৰেদনঞ্চ সন্ধায, ‘‘পঠমং উপ্পজ্জতি চিত্তসঙ্খারো’’তি আহ. ততো কাযসঙ্খারোতি ততো পরং ভৰঙ্গসমযে কাযসঙ্খারো উপ্পজ্জতি. কিং পন ফলসমাপত্তি অস্সাসপস্সাসে ন সমুট্ঠাপেতীতি? সমুট্ঠাপেতি. ইমস্স পন চতুত্থজ্ঝানিকা ফলসমাপত্তি, সা ন সমুট্ঠাপেতি. কিং ৰা এতেন ফলসমাপত্তি পঠমজ্ঝানিকা ৰা হোতু, দুতিযততিযচতুত্থজ্ঝানিকা ৰা, সন্তায সমাপত্তিযা ৰুট্ঠিতস্স ভিক্খুনো অস্সাসপস্সাসা অব্বোহারিকা হোন্তি. তেসং অব্বোহারিকভাৰো সঞ্জীৰত্থেরৰত্থুনা ৰেদিতব্বো. সঞ্জীৰত্থেরস্স হি সমাপত্তিতো ৰুট্ঠায কিংসুকপুপ্ফসদিসে ৰীতচ্চিতঙ্গারে মদ্দমানস্স গচ্ছতো চীৰরে অংসুমত্তম্পি ন ঝাযি, উসুমাকারমত্তম্পি নাহোসি, সমাপত্তিফলং নামেতন্তি ৰদন্তি. এৰমেৰং সন্তায সমাপত্তিযা ৰুট্ঠিতস্স ভিক্খুনো অস্সাসপস্সাসা অব্বোহারিকা হোন্তীতি ভৰঙ্গসমযেনেৰেতং কথিতন্তি ৰেদিতব্বং.

ততো ৰচীসঙ্খারোতি ততো পরং কিরিযমযপৰত্তৰল়ঞ্জনকালে ৰচীসঙ্খারো উপ্পজ্জতি. কিং ভৰঙ্গং ৰিতক্কৰিচারে ন সমুট্ঠাপেতীতি? সমুট্ঠাপেতি. তংসমুট্ঠানা পন ৰিতক্কৰিচারা ৰাচং অভিসঙ্খাতুং ন সক্কোন্তীতি কিরিযমযপৰত্তৰল়ঞ্জনকালেনেৰতং কথিতং. সুঞ্ঞতো ফস্সোতিআদযো সগুণেনাপি আরম্মণেনাপি কথেতব্বা. সগুণেন তাৰ সুঞ্ঞতা নাম ফলসমাপত্তি, তায সহজাতং ফস্সং সন্ধায সুঞ্ঞতো ফস্সোতি ৰুত্তং. অনিমিত্তাপণিহিতেসুপিএসেৰ নযো. আরম্মণেন পন নিব্বানং রাগাদীহি সুঞ্ঞত্তা সুঞ্ঞং নাম, রাগনিমিত্তাদীনং অভাৰা অনিমিত্তং, রাগদোসমোহপ্পণিধীনং অভাৰা অপ্পণিহিতং. সুঞ্ঞতং নিব্বানং আরম্মণং কত্ৰা উপ্পন্নফলসমাপত্তিযং ফস্সো সুঞ্ঞতো নাম. অনিমিত্তাপণিহিতেসুপি এসেৰ নযো.

অপরা আগমনিযকথা নাম হোতি, সুঞ্ঞতা, অনিমিত্তা, অপ্পণিহিতাতি হি ৰিপস্সনাপি ৰুচ্চতি. তত্থ যো ভিক্খু সঙ্খারে অনিচ্চতো পরিগ্গহেত্ৰা অনিচ্চতো দিস্ৰা অনিচ্চতো ৰুট্ঠাতি, তস্স ৰুট্ঠানগামিনিৰিপস্সনা অনিমিত্তা নাম হোতি. যো দুক্খতো পরিগ্গহেত্ৰা দুক্খতো দিস্ৰা দুক্খতো ৰুট্ঠাতি, তস্স অপ্পণিহিতা নাম. যো অনত্ততো পরিগ্গহেত্ৰা অনত্ততো দিস্ৰা অনত্ততো ৰুট্ঠাতি, তস্স সুঞ্ঞতা নাম. তত্থ অনিমিত্তৰিপস্সনায মগ্গো অনিমিত্তো নাম, অনিমিত্তমগ্গস্স ফলং অনিমিত্তং নাম. অনিমিত্তফলসমাপত্তিসহজাতে ফস্সে ফুসন্তে অনিমিত্তো ফস্সো ফুসতীতি ৰুচ্চতি. অপ্পণিহিতসুঞ্ঞতেসুপি এসেৰ নযো. আগমনিযেন কথিতে পন সুঞ্ঞতো ৰা ফস্সো অনিমিত্তো ৰা ফস্সো অপ্পণিহিতো ৰা ফস্সোতি ৰিকপ্পো আপজ্জেয্য, তস্মা সগুণেন চেৰ আরম্মণেন চ কথেতব্বং. এৰঞ্হি তযো ফস্সা ফুসন্তীতি সমেতি.

ৰিৰেকনিন্নন্তিআদীসু নিব্বানং ৰিৰেকো নাম, তস্মিং ৰিৰেকে নিন্নং ওনতন্তি ৰিৰেকনিন্নং. অঞ্ঞতো আগন্ত্ৰা যেন ৰিৰেকো, তেন ৰঙ্কং ৰিয হুত্ৰা ঠিতন্তি ৰিৰেকপোণং. যেন ৰিৰেকো, তেন পতমানং ৰিয ঠিতন্তি ৰিৰেকপব্ভারং.

৪৬৫. ইদানি যা ৰেদনা নিরোধেত্ৰা নিরোধসমাপত্তিং সমাপজ্জতি, তা পুচ্ছিস্সামীতি পুচ্ছন্তো কতি পনায্যে, ৰেদনাতি আহ. কাযিকং ৰাতিআদীসু পঞ্চদ্ৰারিকং সুখং কাযিকং নাম, মনোদ্ৰারিকং চেতসিকং নামাতি ৰেদিতব্বং. তত্থ সুখন্তি সভাৰনিদ্দেসো. সাতন্তি তস্সেৰ মধুরভাৰদীপকং ৰেৰচনং. ৰেদযিতন্তি ৰেদযিতভাৰদীপকং, সব্বৰেদনানং সাধারণৰচনং. সেসপদেসুপি এসেৰ নযো. ঠিতিসুখা ৰিপরিণামদুক্খাতিআদীসু সুখায ৰেদনায অত্থিভাৰো সুখং, নত্থিভাৰো দুক্খং. দুক্খায ৰেদনায অত্থিভাৰো দুক্খং, নত্থিভাৰো সুখং. অদুক্খমসুখায ৰেদনায জাননভাৰো সুখং, অজাননভাৰো দুক্খন্তি অত্থো.

কিং অনুসযো অনুসেতীতি কতমো অনুসযো অনুসেতি. অপ্পহীনট্ঠেন সযিতো ৰিয হোতীতি অনুসযপুচ্ছং পুচ্ছতি. ন খো, আৰুসো ৰিসাখ, সব্বায সুখায ৰেদনায রাগানুসযো অনুসেতীতি ন সব্বায সুখায ৰেদনায রাগানুসযো অনুসেতি. ন সব্বায সুখায ৰেদনায সো অপ্পহীনো, ন সব্বং সুখং ৰেদনং আরব্ভ উপ্পজ্জতীতি অত্থো. এস নযো সব্বত্থ. কিং পহাতব্বন্তি অযং পহানপুচ্ছা নাম.

রাগং তেন পজহতীতি এত্থ একেনেৰ ব্যাকরণেন দ্ৰে পুচ্ছা ৰিস্সজ্জেসি. ইধ ভিক্খু রাগানুসযং ৰিক্খম্ভেত্ৰা পঠমজ্ঝানং সমাপজ্জতি, ঝানৰিক্খম্ভিতং রাগানুসযং তথা ৰিক্খম্ভিতমেৰ কত্ৰা ৰিপস্সনং ৰড্ঢেত্ৰা অনাগামিমগ্গেন সমুগ্ঘাতেতি. সো অনাগামিমগ্গেন পহীনোপি তথা ৰিক্খম্ভিতত্তাৰ পঠমজ্ঝানে নানুসেতি নাম. তেনাহ – ‘‘ন তত্থ রাগানুসযো অনুসেতী’’তি. তদাযতনন্তি তং আযতনং, পরমস্সাসভাৰেন পতিট্ঠানভূতং অরহত্তন্তি অত্থো. ইতি অনুত্তরেসূতি এৰং অনুত্তরা ৰিমোক্খাতি লদ্ধনামে অরহত্তে. পিহং উপট্ঠাপযতোতি পত্থনং পট্ঠপেন্তস্স. উপ্পজ্জতি পিহাপচ্চযা দোমনস্সন্তি পত্থনায পট্ঠপনমূলকং দোমনস্সং উপ্পজ্জতি. তং পনেতং ন পত্থনায পট্ঠপনমূলকং উপ্পজ্জতি, পত্থেত্ৰা অলভন্তস্স পন অলাভমূলকং উপ্পজ্জমানং, ‘‘উপ্পজ্জতি পিহাপচ্চযা’’তি ৰুত্তং. তত্থ কিঞ্চাপি দোমনস্সং নাম একন্তেন অকুসলং, ইদং পন সেৰিতব্বং দোমনস্সং ৰট্টতীতি ৰদন্তি. যোগিনো হি তেমাসিকং ছমাসিকং ৰা নৰমাসিকং ৰা পটিপদং গণ্হন্তি. তেসু যো তং তং পটিপদং গহেত্ৰা অন্তোকালপরিচ্ছেদেযেৰ অরহত্তং পাপুণিস্সামীতি ঘটেন্তো ৰাযমন্তো ন সক্কোতি যথাপরিচ্ছিন্নকালেন পাপুণিতুং, তস্স বলৰদোমনস্সং উপ্পজ্জতি, আল়িন্দিকৰাসিমহাফুস্সদেৰত্থেরস্স ৰিয অস্সুধারা পৰত্তন্তি. থেরো কির একূনৰীসতিৰস্সানি গতপচ্চাগতৰত্তং পূরেসি. তস্স, ‘‘ইমস্মিং ৰারে অরহত্তং গণ্হিস্সামি, ইমস্মিং ৰারে ৰিসুদ্ধিপৰারণং পৰারেস্সামী’’তি মানসং বন্ধিত্ৰা সমণধম্মং করোন্তস্সেৰ একূনৰীসতিৰস্সানি অতিক্কন্তানি. পৰারণাদিৰসে আগতে থেরস্স অস্সুপাতেন মুত্তদিৰসো নাম নাহোসি. ৰীসতিমে পন ৰস্সে অরহত্তং পাণুণি.

পটিঘং তেন পজহতীতি এত্থ দোমনস্সেনেৰ পটিঘং পজহতি. ন হি পটিঘেনেৰ পটিঘপ্পহানং, দোমনস্সেন ৰা দোমনস্সপ্পহানং নাম অত্থি. অযং পন ভিক্খু তেমাসিকাদীসু অঞ্ঞতরং পটিপদং গহেত্ৰা ইতি পটিসঞ্চিক্খতি – ‘‘পস্স ভিক্খু, কিং তুয্হং সীলেন হীনট্ঠানং অত্থি, উদাহু ৰীরিযেন, উদাহু পঞ্ঞায, ননু তে সীলং সুপরিসুদ্ধং ৰীরিযং সুপগ্গহিতং পঞ্ঞা সূরা হুত্ৰা ৰহতী’’তি. সো এৰং পটিসঞ্চিক্খিত্ৰা, ‘‘ন দানি পুন ইমস্স দোমনস্সস্স উপ্পজ্জিতুং দস্সামী’’তি ৰীরিযং দল়্হং কত্ৰা অন্তোতেমাসে ৰা অন্তোছমাসে ৰা অন্তোনৰমাসে ৰা অনাগামিমগ্গেন তং সমুগ্ঘাতেতি. ইমিনা পরিযাযেন পটিঘেনেৰ পটিঘং, দোমনস্সেনেৰ দোমনস্সং পজহতি নাম.

ন তত্থ পটিঘানুসযো অনুসেতীতি তত্থ এৰরূপে দোমনস্সে পটিঘানুসযো নানুসেতি. ন তং আরব্ভ উপ্পজ্জতি, পহীনোৰ তত্থ পটিঘানুসযোতি অত্থো. অৰিজ্জং তেন পজহতীতি ইধ ভিক্খু অৰিজ্জানুসযং ৰিক্খম্ভেত্ৰা চতুত্থজ্ঝানং সমাপজ্জতি, ঝানৰিক্খম্ভিতং অৰিজ্জানুসযং তথা ৰিক্খম্ভিতমেৰ কত্ৰা ৰিপস্সনং ৰড্ঢেত্ৰা অরহত্তমগ্গেন সমুগ্ঘাতেতি. সো অরহত্তমগ্গেন পহীনোপি তথা ৰিক্খম্ভিতত্তাৰ চতুত্থজ্ঝানে নানুসেতি নাম. তেনাহ – ‘‘ন তত্থ অৰিজ্জানুসযো অনুসেতী’’তি.

৪৬৬. ইদানি পটিভাগপুচ্ছং পুচ্ছন্তো সুখায পনায্যেতিআদিমাহ. তস্স ৰিস্সজ্জনে যস্মা সুখস্স দুক্খং, দুক্খস্স চ সুখং পচ্চনীকং, তস্মা দ্ৰীসু ৰেদনাসু ৰিসভাগপটিভাগো কথিতো. উপেক্খা পন অন্ধকারা অৰিভূতা দুদ্দীপনা, অৰিজ্জাপি তাদিসাৰাতি তেনেত্থ সভাগপটিভাগো কথিতো. যত্তকেসু পন ঠানেসু অৰিজ্জা তমং করোতি, তত্তকেসু ৰিজ্জা তমং ৰিনোদেতীতি ৰিসভাগপটিভাগো কথিতো. অৰিজ্জায খো, আৰুসোতি এত্থ উভোপেতে ধম্মা অনাসৰা লোকুত্তরাতি সভাগপটিভাগোৰ কথিতো. ৰিমুত্তিযা খো, আৰুসোতি এত্থ অনাসৰট্ঠেন লোকুত্তরট্ঠেন অব্যাকতট্ঠেন চ সভাগপটিভাগোৰ কথিতো. অচ্চযাসীতি এত্থ পঞ্হং অতিক্কমিত্ৰা গতোসীতি অত্থো. নাসক্খি পঞ্হানং পরিযন্তং গহেতুন্তি পঞ্হানং পরিচ্ছেদপমাণং গহেতুং নাসক্খি, অপ্পটিভাগধম্মস্স পটিভাগং পুচ্ছি. নিব্বানং নামেতং অপ্পটিভাগং, ন সক্কা নীলং ৰা পীতকং ৰাতি কেনচি ধম্মেন সদ্ধিং পটিভাগং কত্ৰা দস্সেতুং. তঞ্চ ত্ৰং ইমিনা অধিপ্পাযেন পুচ্ছসীতি অত্থো.

এত্তাৰতা চাযং উপাসকো যথা নাম সত্তমে ঘরে সলাকভত্তং লভিত্ৰা গতো ভিক্খু সত্ত ঘরানি অতিক্কম্ম অট্ঠমস্স দ্ৰারে ঠিতো সব্বানিপি সত্ত গেহানি ৰিরদ্ধোৰ ন অঞ্ঞাসি, এৰমেৰং অপ্পটিভাগধম্মস্স পটিভাগং পুচ্ছন্তো সব্বাসুপি সত্তসু সপ্পটিভাগপুচ্ছাসু ৰিরদ্ধোৰ হোতীতি ৰেদিতব্বো. নিব্বানোগধন্তি নিব্বানব্ভন্তরং নিব্বানং অনুপৰিট্ঠং. নিব্বানপরাযনন্তি নিব্বানং পরং অযনমস্স পরা গতি, ন ততো পরং গচ্ছতীতি অত্থো. নিব্বানং পরিযোসানং অৰসানং অস্সাতি নিব্বানপরিযোসানং.

৪৬৭. পণ্ডিতাতি পণ্ডিচ্চেন সমন্নাগতা, ধাতুকুসলা আযতনকুসলা পটিচ্চসমুপ্পাদকুসলা ঠানাট্ঠানকুসলাতি অত্থো. মহাপঞ্ঞাতি মহন্তে অত্থে মহন্তে ধম্মে মহন্তা নিরুত্তিযো মহন্তানি পটিভানানি পরিগ্গণ্হনসমত্থায পঞ্ঞায সমন্নাগতা. যথা তং ধম্মদিন্নাযাতি যথা ধম্মদিন্নায ভিক্খুনিযা ব্যাকতং, অহম্পি তং এৰমেৰং ব্যাকরেয্যন্তি. এত্তাৰতা চ পন অযং সুত্তন্তো জিনভাসিতো নাম জাতো, ন সাৰকভাসিতো. যথা হি রাজযুত্তেহি লিখিতং পণ্ণং যাৰ রাজমুদ্দিকায ন লঞ্ছিতং হোতি, ন তাৰ রাজপণ্ণন্তি সঙ্খ্যং গচ্ছতি; লঞ্ছিতমত্তং পন রাজপণ্ণং নাম হোতি, তথা, ‘‘অহম্পি তং এৰমেৰ ব্যাকরেয্য’’ন্তি ইমায জিনৰচনমুদ্দিকায লঞ্ছিতত্তা অযং সুত্তন্তো আহচ্চৰচনেন জিনভাসিতো নাম জাতো. সেসং সব্বত্থ উত্তানত্থমেৰাতি.

পপঞ্চসূদনিযা মজ্ঝিমনিকাযট্ঠকথায

চূল়ৰেদল্লসুত্তৰণ্ণনা নিট্ঠিতা.

৫. চূল়ধম্মসমাদানসুত্তৰণ্ণনা

৪৬৮. এৰং মে সুতন্তি চূল়ধম্মসমাদানসুত্তং. তত্থ ধম্মসমাদানানীতি ধম্মোতি গহিতগহণানি. পচ্চুপ্পন্নসুখন্তি পচ্চুপ্পন্নে সুখং, আযূহনক্খণে সুখং সুকরং সুখেন সক্কা পূরেতুং. আযতিং দুক্খৰিপাকন্তি অনাগতে ৰিপাককালে দুক্খৰিপাকং. ইমিনা উপাযেন সব্বপদেসু অত্থো ৰেদিতব্বো.

৪৬৯. নত্থি কামেসু দোসোতি ৰত্থুকামেসুপি কিলেসকামেসুপি দোসো নত্থি. পাতব্যতং আপজ্জন্তীতি তে ৰত্থুকামেসু কিলেসকামেন পাতব্যতং পিৰিতব্বতং, যথারুচি পরিভুঞ্জিতব্বতং আপজ্জন্তীতি অত্থো. মোল়িবদ্ধাহীতি মোল়িং কত্ৰা বদ্ধকেসাহি. পরিব্বাজিকাহীতি তাপসপরিব্বাজিকাহি. এৰমাহংসূতি এৰং ৰদন্তি. পরিঞ্ঞং পঞ্ঞপেন্তীতি পহানং সমতিক্কমং পঞ্ঞপেন্তি. মালুৰাসিপাটিকাতি দীঘসণ্ঠানং মালুৰাপক্কং. ফলেয্যাতি আতপেন সুস্সিত্ৰা ভিজ্জেয্য. সালমূলেতি সালরুক্খস্স সমীপে. সন্তাসং আপজ্জেয্যাতি কস্মা আপজ্জতি? ভৰনৰিনাসভযা. রুক্খমূলে পতিতমালুৰাবীজতো হি লতা উপ্পজ্জিত্ৰা রুক্খং অভিরুহতি. সা মহাপত্তা চেৰ হোতি বহুপত্তা চ, কোৰিল়ারপত্তসদিসেহি পত্তেহি সমন্নাগতা. অথ তং রুক্খং মূলতো পট্ঠায ৰিনন্ধমানা সব্বৰিটপানি সঞ্ছাদেত্ৰা মহন্তং ভারং জনেত্ৰা তিট্ঠতি. সা ৰাতে ৰা ৰাযন্তে দেৰে ৰা ৰস্সন্তে ওঘনং জনেত্ৰা তস্স রুক্খস্স সব্বসাখাপসাখং ভঞ্জতি, ভূমিযং নিপাতেতি. ততো তস্মিং রুক্খে পতিট্ঠিতৰিমানং ভিজ্জতি নস্সতি. ইতি সা ভৰনৰিনাসভযা সন্তাসং আপজ্জতি.

আরামদেৰতাতি তত্থ তত্থ পুপ্ফারামফলারামেসু অধিৰত্থা দেৰতা. ৰনদেৰতাতি অন্ধৰনসুভগৰনাদীসু ৰনেসু অধিৰত্থা দেৰতা. রুক্খদেৰতাতি অভিলক্খিতেসু নল়েরুপুচিমন্দাদীসু রুক্খেসু অধিৰত্থা দেৰতা. ওসধিতিণৰনপ্পতীসূতি হরীতকীআমলকীআদীসু ওসধীসু তালনাল়িকেরাদীসু তিণেসু ৰনজেট্ঠকেসু চ ৰনপ্পতিরুক্খেসু অধিৰত্থা দেৰতা. ৰনকম্মিকাতি ৰনে কসনলাযনদারুআহরণগোরক্খাদীসু কেনচিদেৰ কম্মেন ৰা ৰিচরকমনুস্সা. উদ্ধরেয্যুন্তি খাদেয্যুং. ৰিলম্বিনীতি ৰাতেন পহতপহতট্ঠানেসু কেল়িং করোন্তী ৰিয ৰিলম্বন্তী. সুখো ইমিস্সাতি এৰরূপায মালুৰালতায সম্ফস্সোপি সুখো, দস্সনম্পি সুখং. অযং মে দারকানং আপানমণ্ডলং ভৰিস্সতি, কীল়াভূমি ভৰিস্সতি, দুতিযং মে ৰিমানং পটিলদ্ধন্তি লতায দস্সনেপি সম্ফস্সেপি সোমনস্সজাতা এৰমাহ.

ৰিটভিং করেয্যাতি সাখানং উপরি ছত্তাকারেন তিট্ঠেয্য. ওঘনং জনেয্যাতি হেট্ঠা ঘনং জনেয্য. উপরি আরুয্হ সকলং রুক্খং পলিৰেঠেত্ৰা পুন হেট্ঠা ভস্সমানা ভূমিং গণ্হেয্যাতি অত্থো. পদালেয্যাতি এৰং ওঘনং কত্ৰা পুন ততো পট্ঠায যাৰ মূলা ওতিণ্ণসাখাহি অভিরুহমানা সব্বসাখা পলিৰেঠেন্তী মত্থকং পত্ৰা তেনেৰ নিযামেন পুন ওরোহিত্ৰা চ অভিরুহিত্ৰা চ সকলরুক্খং সংসিব্বিত্ৰা অজ্ঝোত্থরন্তী সব্বসাখা হেট্ঠা কত্ৰা সযং উপরি ঠত্ৰা ৰাতে ৰা ৰাযন্তে দেৰে ৰা ৰস্সন্তে পদালেয্য. ভিন্দেয্যাতি অত্থো. খাণুমত্তমেৰ তিট্ঠেয্য, তত্থ যং সাখট্ঠকৰিমানং হোতি, তং সাখাসু ভিজ্জমানাসু তত্থ তত্থেৰ ভিজ্জিত্ৰা সব্বসাখাসু ভিন্নাসু সব্বং ভিজ্জতি. রুক্খট্ঠকৰিমানং পন যাৰ রুক্খস্স মূলমত্তম্পি তিট্ঠতি, তাৰ ন নস্সতি. ইদং পন ৰিমানং সাখট্ঠকং, তস্মা সব্বসাখাসু সংভিজ্জমানাসু ভিজ্জিত্থ. দেৰতা পুত্তকে গহেত্ৰা খাণুকে ঠিতা পরিদেৰিতুং আরদ্ধা.

৪৭১. তিব্বরাগজাতিকোতি বহলরাগসভাৰো. রাগজং দুক্খং দোমনস্সং পটিসংৰেদেতীতি তিব্বরাগজাতিকত্তা দিট্ঠে দিট্ঠে আরম্মণে নিমিত্তং গণ্হাতি. অথস্স আচরিযুপজ্ঝাযা দণ্ডকম্মং আণাপেন্তি. সো অভিক্খণং দণ্ডকম্মং করোন্তো দুক্খং দোমনস্সং পটিসংৰেদেতি, নত্ৰেৰ ৰীতিক্কমং করোতি. তিব্বদোসজাতিকোতি অপ্পমত্তিকেনেৰ কুপ্পতি, দহরসামণেরেহি সদ্ধিং হত্থপরামাসাদীনি করোন্তোৰ কথেতি. সোপি দণ্ডকম্মপচ্চযা দুক্খং দোমনস্সং পটিসংৰেদেতি. মোহজাতিকো পন ইধ কতং ৰা কততো অকতং ৰা অকততো ন সল্লক্খেতি, তানি তানি কিচ্চানি ৰিরাধেতি. সোপি দণ্ডকম্মপচ্চযা দুক্খং দোমনস্সং পটিসংৰেদেতি.

৪৭২. ন তিব্বরাগজাতিকোতিআদীনি ৰুত্তপটিপক্খনযেন ৰেদিতব্বানি. কস্মা পনেত্থ কোচি তিব্বরাগাদিজাতিকো হোতি, কোচি ন তিব্বরাগাদিজাতিকো? কম্মনিযামেন. যস্স হি কম্মাযূহনক্খণে লোভো বলৰা হোতি, অলোভো মন্দো, অদোসামোহা বলৰন্তো, দোসমোহা মন্দা, তস্স মন্দো অলোভো লোভং পরিযাদাতুং ন সক্কোতি, অদোসামোহা পন বলৰন্তো দোসমোহে পরিযাদাতুং সক্কোন্তি. তস্মা সো তেন কম্মেন দিন্নপটিসন্ধিৰসেন নিব্বত্তো লুদ্ধো হোতি, সুখসীলো অক্কোধনো পঞ্ঞৰা ৰজিরূপমঞাণো.

যস্স পন কম্মাযূহনক্খণে লোভদোসা বলৰন্তো হোন্তি, অলোভাদোসা মন্দা, অমোহো বলৰা, মোহো মন্দো, সো পুরিমনযেনেৰ লুদ্ধো চেৰ হোতি দুট্ঠো চ, পঞ্ঞৰা পন হোতি ৰজিরূপমঞাণো দত্তাভযত্থেরো ৰিয.

যস্স পন কম্মাযূহনক্খণে লোভাদোসমোহা বলৰন্তো হোন্তি, ইতরে মন্দা, সো পুরিমনযেনেৰ লুদ্ধো চেৰ হোতি দন্ধো চ, সুখসীলকো পন হোতি অক্কোধনো.

তথা যস্স কম্মাযূহনক্খণে তযোপি লোভদোসমোহা বলৰন্তো হোন্তি, অলোভাদযো মন্দা, সো পুরিমনযেনেৰ লুদ্ধো চেৰ হোতি দুট্ঠো চ মূল়্হো চ.

যস্স পন কম্মাযূহনক্খণে অলোভদোসমোহা বলৰন্তো হোন্তি, ইতরে মন্দা, সো পুরিমনযেনেৰ অপ্পকিলেসো হোতি, দিব্বারম্মণম্পি দিস্ৰা নিচ্চলো, দুট্ঠো পন হোতি দন্ধপঞ্ঞো চ.

যস্স পন কম্মাযূহনক্খণে অলোভাদোসমোহা বলৰন্তো হোন্তি, ইতরে মন্দা, সো পুরিমনযেনেৰ অলুদ্ধো চেৰ হোতি সুখসীলকো চ, মূল়্হো পন হোতি.

তথা যস্স কম্মাযূহনক্খণে অলোভদোসামোহা বলৰন্তো হোন্তি, ইতরে মন্দা, সো পুরিমনযেনেৰ অলুদ্ধো চেৰ হোতি পঞ্ঞৰা চ, দুট্ঠো পন হোতি কোধনো.

যস্স পন কম্মাযূহনক্খণে তযোপি অলোভাদযো বলৰন্তো হোন্তি, লোভাদযো মন্দা, সো মহাসঙ্ঘরক্খিতত্থেরো ৰিয অলুদ্ধো অদুট্ঠো পঞ্ঞৰা চ হোতি.

সেসং সব্বত্থ উত্তানত্থমেৰাতি.

পপঞ্চসূদনিযা মজ্ঝিমনিকাযট্ঠকথায

চূল়ধম্মসমাদানসুত্তৰণ্ণনা নিট্ঠিতা.

৬. মহাধম্মসমাদানসুত্তৰণ্ণনা

৪৭৩. এৰং মে সুত্তন্তি মহাধম্মসমাদানসুত্তং. তত্থ এৰংকামাতি এৰংইচ্ছা. এৰংছন্দাতি এৰংঅজ্ঝাসযা. এৰংঅধিপ্পাযাতি এৰংলদ্ধিকা. তত্রাতি তস্মিং অনিট্ঠৰড্ঢনে চেৰ ইট্ঠপরিহানে চ. ভগৰংমূলকাতি ভগৰা মূলং এতেসন্তি ভগৰংমূলকা. ইদং ৰুত্তং হোতি – ইমে, ভন্তে, অম্হাকং ধম্মা পুব্বে কস্সপসম্মাসম্বুদ্ধেন উপ্পাদিতা, তস্মিং পরিনিব্বুতে একং বুদ্ধন্তরং অঞ্ঞো সমণো ৰা ব্রাহ্মণো ৰা ইমে ধম্মে উপ্পাদেতুং সমত্থো নাম নাহোসি, ভগৰতা পন নো ইমে ধম্মা উপ্পাদিতা. ভগৰন্তঞ্হি নিস্সায মযং ইমে ধম্মে আজানাম পটিৰিজ্ঝামাতি এৰং ভগৰংমূলকা নো, ভন্তে, ধম্মাতি. ভগৰংনেত্তিকাতি ভগৰা হি ধম্মানং নেতা ৰিনেতা অনুনেতাতি. যথাসভাৰতো পাটিযেক্কং পাটিযেক্কং নামং গহেত্ৰা দস্সিতা ধম্মা ভগৰংনেত্তিকা নাম হোন্তি. ভগৰংপটিসরণাতি চতুভূমকা ধম্মা সব্বঞ্ঞুতঞ্ঞাণস্স আপাথং আগচ্ছমানা ভগৰতি পটিসরন্তি নামাতি ভগৰংপটিসরণা. পটিসরন্তীতি ওসরন্তি সমোসরন্তি. অপিচ মহাবোধিমণ্ডে নিসিন্নস্স ভগৰতো পটিৰেধৰসেন ফস্সো আগচ্ছতি, অহং ভগৰা কিন্নামোতি? ত্ৰং ফুসনট্ঠেন ফস্সো নাম. ৰেদনা, সঞ্ঞা, সঙ্খারা, ৰিঞ্ঞাণং আগচ্ছতি. অহং ভগৰা কিন্নামন্তি? ত্ৰং ৰিজাননট্ঠেন ৰিঞ্ঞাণং নামাতি এৰং চতুভূমকধম্মানং যথাসভাৰতো পাটিযেক্কং পাটিযেক্কং নামং গণ্হন্তো ভগৰা ধম্মে পটিসরতীতিপি ভগৰংপটিসরণা. ভগৰন্তঞ্ঞেৰ পটিভাতূতি ভগৰতোযেৰ এতস্স ভাসিতস্স অত্থো উপট্ঠাতু, তুম্হেযেৰ নো কথেত্ৰা দেথাতি অত্থো.

৪৭৪. সেৰিতব্বেতি নিস্সযিতব্বে. ভজিতব্বেতি উপগন্তব্বে. যথা তং অৰিদ্দসুনোতি যথা অৰিদুনো বালস্স অন্ধপুথুজ্জনস্স. যথা তং ৰিদ্দসুনোতি যথা ৰিদুনো মেধাৰিনো পণ্ডিতস্স.

৪৭৫. অত্থি, ভিক্খৰে, ধম্মসমাদানন্তি পুরিমসুত্তে উপ্পটিপাটিআকারেন মাতিকা ঠপিতা, ইধ পন যথাধম্মরসেনেৰ সত্থা মাতিকং ঠপেসি. তত্থ ধম্মসমাদানন্তি পাণাতিপাতাদীনং ধম্মানং গহণং.

৪৭৬. অৰিজ্জাগতোতি অৰিজ্জায সমন্নাগতো.

৪৭৭. ৰিজ্জাগতোতি ৰিজ্জায সমন্নাগতো পঞ্ঞৰা.

৪৭৮. সহাপি দুক্খেনাতি এত্থ মিচ্ছাচারো অভিজ্ঝা মিচ্ছাদিট্ঠীতি ইমে তাৰ তযো পুব্বচেতনায চ অপরচেতনায চাতি দ্ৰিন্নং চেতনানং ৰসেন দুক্খৰেদনা হোন্তি. সন্নিট্ঠাপকচেতনা পন সুখসম্পযুত্তা ৰা উপেক্খাসম্পযুত্তা ৰা হোতি. সেসা পাণাতিপাতাদযো সত্ত তিস্সন্নম্পি চেতনানং ৰসেন দুক্খৰেদনা হোন্তি. ইদং সন্ধায ৰুত্তং – ‘‘সহাপি দুক্খেন সহাপি দোমনস্সেনা’’তি. দোমনস্সমেৰ চেত্থ দুক্খন্তি ৰেদিতব্বং. পরিযেট্ঠিং ৰা আপজ্জন্তস্স পুব্বভাগপরভাগেসু কাযিকং দুক্খম্পি ৰট্টতিযেৰ.

৪৭৯. সহাপি সুখেনাতি এত্থ পাণাতিপাতো ফরুসৰাচা ব্যাপাদোতি ইমে তাৰ তযো পুব্বচেতনায চ অপরচেতনায চাতি দ্ৰিন্নং চেতনানং ৰসেন সুখৰেদনা হোন্তি. সন্নিট্ঠাপকচেতনা পন দুক্খসম্পযুত্তাৰ হোতি. সেসা সত্ত তিস্সন্নম্পি চেতনানং ৰসেন সুখৰেদনা হোন্তিযেৰ. সহাপি সোমনস্সেনাতি সোমনস্সমেৰ চেত্থ সুখন্তি ৰেদিতব্বং. ইট্ঠফোট্ঠব্বসমঙ্গিনো ৰা পুব্বভাগপরভাগেসু কাযিকং সুখম্পি ৰট্টতিযেৰ.

৪৮০. ততিযধম্মসমাদানে ইধেকচ্চো মচ্ছবন্ধো ৰা হোতি, মাগৰিকো ৰা, পাণুপঘাতংযেৰ নিস্সায জীৰিকং কপ্পেতি. তস্স গরুট্ঠানিযো ভিক্খু অকামকস্সেৰ পাণাতিপাতে আদীনৰং, পাণাতিপাতৰিরতিযা চ আনিসংসং কথেত্ৰা সিক্খাপদং দেতি. সো গণ্হন্তোপি দুক্খিতো দোমনস্সিতোৰ হুত্ৰা গণ্হাতি. অপরভাগে কতিপাহং ৰীতিনামেত্ৰা রক্খিতুং অসক্কোন্তোপি দুক্খিতোৰ হোতি, তস্স পুব্বাপরচেতনা দুক্খসহগতাৰ হোন্তি. সন্নিট্ঠাপকচেতনা পন সুখসহগতা ৰা উপেক্খাসহগতা ৰাতি এৰং সব্বত্থ অত্থো ৰেদিতব্বো. ইতি পুব্বভাগপরভাগচেতনাৰ সন্ধায ইদং ৰুত্তং – ‘‘সহাপি দুক্খেন সহাপি দোমনস্সেনা’’তি. দোমনস্সমেৰ চেত্থ দুক্খন্তি ৰেদিতব্বং.

৪৮১. চতুত্থধম্মসমাদানে দসসুপি পদেসু তিস্সোপি পুব্বভাগাপরভাগসন্নিট্ঠাপকচেতনা সুখসম্পযুত্তা হোন্তিযেৰ, তং সন্ধায ইদং ৰুত্তং – ‘‘সহাপি সুখেন সহাপি সোমনস্সেনা’’তি. সোমনস্সমেৰ চেত্থ সুখন্তি ৰেদিতব্বং.

৪৮২. তিত্তকালাবূতি তিত্তকরসঅলাবু. ৰিসেন সংসট্ঠোতি হলাহলৰিসেন সম্পযুত্তো মিস্সিতো লুল়িতো. নচ্ছাদেস্সতীতি ন রুচ্চিস্সতি ন তুট্ঠিং করিস্সতি. নিগচ্ছসীতি গমিস্সসি. অপ্পটিসঙ্খায পিৰেয্যাতি তং অপ্পচ্চৰেক্খিত্ৰা পিৰেয্য.

৪৮৩. আপানীযকংসোতি আপানীযস্স মধুরপানকস্স ভরিতকংসো. ৰণ্ণসম্পন্নোতি পানকৰণ্ণাদীহি সম্পন্নৰণ্ণো, কংসে পক্খিত্তপানকৰসেন পানককংসোপি এৰং ৰুত্তো. ছাদেস্সতীতি তঞ্হি হলাহলৰিসং যত্থ যত্থ পক্খিত্তং হোতি, তস্স তস্সেৰ রসং দেতি. তেন ৰুত্তং ‘‘ছাদেস্সতী’’তি.

৪৮৪. পূতিমুত্তন্তি মুত্তমেৰ. যথা হি মনুস্সভাৰো সুৰণ্ণৰণ্ণো পূতিকাযোত্ৰেৰ, তদহুজাতাপি গলোচিলতা পূতিলতাত্ৰেৰ ৰুচ্চতি. এৰং তঙ্খণং গহিতং তরুণম্পি মুত্তং পূতিমুত্তমেৰ. নানাভেসজ্জেহীতি হরীতকামলকাদীহি নানোসধেহি. সুখী অস্সাতি অরোগো সুৰণ্ণৰণ্ণো সুখী ভৰেয্য.

৪৮৫. দধি চ মধু চাতি সুপরিসুদ্ধং দধি চ সুমধুরং মধু চ. একজ্ঝং সংসট্ঠন্তি একতো কত্ৰা মিস্সিতং আলুল়িতং. তস্স তন্তি তস্স তং চতুমধুরভেসজ্জং পিৰতো রুচ্চেয্য. ইদঞ্চ যং ভগন্দরসংসট্ঠং লোহিতং পক্খন্দতি, ন তস্স ভেসজ্জং, আহারং থম্ভেত্ৰা মগ্গং অৰলঞ্জং করোতি. যং পন পিত্তসংসট্ঠং লোহিতং, তস্সেতং ভেসজ্জং সীতলকিরিযায পরিযত্তভূতং.

৪৮৬. ৰিদ্ধেতি উব্বিদ্ধে. মেঘৰিগমেন দূরীভূতেতি অত্থো. ৰিগতৰলাহকেতি অপগতমেঘে, দেৰেতি আকাসে. আকাসগতং তমগতন্তি আকাসগতং তমং. পুথুসমণব্রাহ্মণপরপ্পৰাদেতি পুথূনং সমণব্রাহ্মণসঙ্খাতানং পরেসং ৰাদে. অভিৰিহচ্চাতি অভিহন্ত্ৰা. ভাসতে চ তপতে চ ৰিরোচতে চাতি সরদকালে মজ্ঝন্হিকসমযে আদিচ্চোৰ ওভাসং মুঞ্চতি তপতি ৰিজ্জোততীতি.

ইদং পন সুত্তং দেৰতানং অতিৰিয পিযং মনাপং. তত্রিদং ৰত্থু – দক্খিণদিসাযং কির হত্থিভোগজনপদে সঙ্গরৰিহারো নাম অত্থি. তস্স ভোজনসালদ্ৰারে সঙ্গররুক্খে অধিৰত্থা দেৰতা রত্তিভাগে একস্স দহরস্স সরভঞ্ঞৰসেন ইদং সুত্তং ওসারেন্তস্স সুত্ৰা সাধুকারং অদাসি. দহরো কিং এসোতি আহ. অহং, ভন্তে, ইমস্মিং রুক্খে অধিৰত্থা দেৰতাতি. কস্মিং দেৰতে পসন্নাসি, কিং সদ্দে, উদাহু সুত্তেতি? সদ্দো নাম, ভন্তে, যস্স কস্সচি হোতিযেৰ, সুত্তে পসন্নাম্হি. সত্থারা জেতৰনে নিসীদিত্ৰা কথিতদিৰসে চ অজ্জ চ একব্যঞ্জনেপি নানং নত্থীতি. অস্সোসি ত্ৰং দেৰতে সত্থারা কথিতদিৰসেতি? আম, ভন্তে. কত্থ ঠিতা অস্সোসীতি? জেতৰনং, ভন্তে, গতাম্হি, মহেসক্খাসু পন দেৰতাসু আগচ্ছন্তীসু তত্থ ওকাসং অলভিত্ৰা ইধেৰ ঠত্ৰা অস্সোসিন্তি. এত্থ ঠিতায সক্কা সুত্থু সদ্দো সোতুন্তি? ত্ৰং পন, ভন্তে, ময্হং সদ্দং সুণসীতি? আম দেৰতেতি. দক্খিণকণ্ণপস্সে নিসীদিত্ৰা কথনকালো ৰিয, ভন্তে, হোতীতি. কিং পন দেৰতে সত্থু রূপং পস্সসীতি? সত্থা মমেৰ ওলোকেতীতি মঞ্ঞমানা সণ্ঠাতুং ন সক্কোমি, ভন্তেতি. ৰিসেসং পন নিব্বত্তেতুং অসক্খিত্থ দেৰতেতি. দেৰতা তত্থেৰ অন্তরধাযি. তং দিৰসং কিরেস দেৰপুত্তো সোতাপত্তিফলে পতিট্ঠিতো. এৰমিদং সুত্তং দেৰতানং পিযং মনাপং. সেসং সব্বত্থ উত্তানত্থমেৰাতি.

পপঞ্চসূদনিযা মজ্ঝিমনিকাযট্ঠকথায

মহাধম্মসমাদানসুত্তৰণ্ণনা নিট্ঠিতা.

৭. ৰীমংসকসুত্তৰণ্ণনা

৪৮৭. এৰং মে সুতন্তি ৰীমংসকসুত্তং. তত্থ ৰীমংসকেনাতি তযো ৰীমংসকা – অত্থৰীমংসকো সঙ্খারৰীমংসকো সত্থুৰীমংসকোতি. তেসু, ‘‘পণ্ডিতা হাৰুসো, মনুস্সা ৰীমংসকা’’তি (সং. নি. ৩.২) এত্থ অত্থৰীমংসকো আগতো. ‘‘যতো খো, আনন্দ, ভিক্খু ধাতুকুসলো চ হোতি, আযতনকুসলো চ হোতি, পটিচ্চসমুপ্পাদকুসলো চ হোতি, ঠানাট্ঠানকুসলো চ হোতি, এত্তাৰতা খো, আনন্দ, পণ্ডিতো ভিক্খু ৰীমংসকোতি অলং ৰচনাযা’’তি (ম. নি. ৩.১২৪) এত্থ সঙ্খারৰীমংসকো আগতো. ইমস্মিং পন সুত্তে সত্থুৰীমংসকো অধিপ্পেতো. চেতোপরিযাযন্তি চিত্তৰারং চিত্তপরিচ্ছেদং. সমন্নেসনাতি এসনা পরিযেসনা উপপরিক্খা. ইতি ৰিঞ্ঞাণাযাতি এৰং ৰিজাননত্থায.

৪৮৮. দ্ৰীসু ধম্মেসু তথাগতো সমন্নেসিতব্বোতি ইধ কল্যাণমিত্তূপনিস্সযং দস্সেতি. মহা হি এস কল্যাণমিত্তূপনিস্সযো নাম. তস্স মহন্তভাৰো এৰং ৰেদিতব্বো – একস্মিং হি সমযে আযস্মা আনন্দো উপড্ঢং অত্তনো আনুভাৰেন হোতি, উপড্ঢং কল্যাণমিত্তানুভাৰেনাতি চিন্তেত্ৰা অত্তনো ধম্মতায নিচ্ছেতুং অসক্কোন্তো ভগৰন্তং উপসঙ্কমিত্ৰা পুচ্ছি, – ‘‘উপড্ঢমিদং, ভন্তে, ব্রহ্মচরিযস্স, যদিদং কল্যাণমিত্ততা কল্যাণসহাযতা কল্যাণসম্পৰঙ্কতা’’তি. ভগৰা আহ – ‘‘মা হেৰং, আনন্দ, মা হেৰং, আনন্দ, সকলমেৰিদং, আনন্দ, ব্রহ্মচরিযং যদিদং কল্যাণমিত্ততা কল্যাণসহাযতা, কল্যাণসম্পৰঙ্কতা. কল্যাণমিত্তস্সেতং, আনন্দ, ভিক্খুনো পাটিকঙ্খং কল্যাণসহাযস্স কল্যাণসম্পৰঙ্কস্স, অরিযং অট্ঠঙ্গিকং মগ্গং ভাৰেস্সতি, অরিযং অট্ঠঙ্গিকং মগ্গং বহুলীকরিস্সতি. কথঞ্চানন্দ, ভিক্খু কল্যাণমিত্তো…পে… অরিযং অট্ঠঙ্গিকং মগ্গং ভাৰেতি, অরিযং অট্ঠঙ্গিকং মগ্গং বহুলীকরোতি. ইধানন্দ, ভিক্খু সম্মাদিট্ঠিং ভাৰেতি…পে… সম্মাসমাধিং ভাৰেতি ৰিৰেকনিস্সিতং এৰং খো, আনন্দ, ভিক্খু কল্যাণমিত্তো…পে… বহুলীকরোতি, তদমিনাপেতং, আনন্দ, পরিযাযেন ৰেদিতব্বং. যথা সকলমেৰিদং ব্রহ্মচরিযং যদিদং কল্যাণমিত্ততা কল্যাণসহাযতা কল্যাণসম্পৰঙ্কতা. মমঞ্হি, আনন্দ, কল্যাণমিত্তং আগম্ম জাতিধম্মা সত্তা জাতিযা পরিমুচ্চন্তি. জরাধম্মা…পে… সোকপরিদেৰদুক্খদোমনস্সুপাযাসধম্মা সত্তা সোকপরিদেৰদুক্খদোমনস্সুপাযাসেহি পরিমুচ্চন্তী’’তি (সং. নি. ৫.২).

ভিক্খূনং বাহিরঙ্গসম্পত্তিং কথেন্তোপি আহ – ‘‘বাহিরং, ভিক্খৰে, অঙ্গন্তি করিত্ৰা নাঞ্ঞং একঙ্গম্পি সমনুপস্সামি, যং এৰং মহতো অত্থায সংৰত্ততি, যথযিদং, ভিক্খৰে, কল্যাণমিত্ততা. কল্যাণমিত্ততা, ভিক্খৰে, মহতো অত্থায সংৰত্ততী’’তি (অ. নি. ১.১১৩). মহাচুন্দস্স কিলেসসল্লেখপটিপদং কথেন্তোপি, ‘‘পরে পাপমিত্তা ভৰিস্সন্তি, মযমেত্থ কল্যাণমিত্তা ভৰিস্সামাতি সল্লেখো করণীযো’’তি (ম. নি. ১.৮৩) আহ. মেঘিযত্থেরস্স ৰিমুত্তিপরিপাচনিযধম্মে কথেন্তোপি, ‘‘অপরিপক্কায, মেঘিয, চেতোৰিমুত্তিযা পঞ্চ ধম্মা পরিপাকায সংৰত্তন্তি. কতমে পঞ্চ? ইধ, মেঘিয, ভিক্খু কল্যাণমিত্তো হোতি’’তি (উদা. ৩১) কল্যাণমিত্তূপনিস্সযমেৰ ৰিসেসেসি. পিযপুত্তস্স রাহুলত্থেরস্স অভিণ্হোৰাদং দেন্তোপি –

‘‘মিত্তে ভজস্সু কল্যাণে, পন্তঞ্চ সযনাসনং;

ৰিৰিত্তং অপ্পনিগ্ঘোসং, মত্তঞ্ঞূ হোহি ভোজনে.

চীৰরে পিণ্ডপাতে চ, পচ্চযে সযনাসনে;

এতেসু তণ্হং মাকাসি, মা লোকং পুনরাগমী’’তি. (সু. নি. ৩৪০, ৩৪১) –

কল্যাণমিত্তূপনিস্সযমেৰ সব্বপঠমং কথেসি. এৰং মহা এস কল্যাণমিত্তূপনিস্সযো নাম. ইধাপি তং দস্সেন্তো ভগৰা দ্ৰীসু ধম্মেসু তথাগতো সমন্নেসিতব্বোতি দেসনং আরভি. পণ্ডিতো ভিক্খু দ্ৰীসু ধম্মেসু তথাগতং এসতু গৰেসতূতি অত্থো. এতেন ভগৰা অযং মহাজচ্চোতি ৰা, লক্খণসম্পন্নোতি ৰা, অভিরূপো দস্সনীযোতি ৰা, অভিঞ্ঞাতো অভিলক্খিতোতি ৰা, ইমং নিস্সাযাহং চীৰরাদযো পচ্চযে লভিস্সামীতি ৰা, এৰং চিন্তেত্ৰা মং নিস্সায ৰসনকিচ্চং নত্থি. যো পন এৰং সল্লক্খেতি, ‘‘পহোতি মে এস সত্থা হুত্ৰা সত্থুকিচ্চং সাধেতু’’ন্তি, সো মং ভজতূতি সীহনাদং নদতি. বুদ্ধসীহনাদো কির নামেস সুত্তন্তোতি.

ইদানি তে দ্ৰে ধম্মে দস্সেন্তো চক্খুসোতৰিঞ্ঞেয্যেসূতি আহ. তত্থ সত্থু কাযিকো সমাচারো ৰীমংসকস্স চক্খুৰিঞ্ঞেয্যো ধম্মো নাম. ৰাচসিকো সমাচারো সোতৰিঞ্ঞেয্যো ধম্মো নাম. ইদানি তেসু সমন্নেসিতব্বাকারং দস্সেন্তো যে সংকিলিট্ঠাতিআদিমাহ. তত্থ সংকিলিট্ঠাতি কিলেসসম্পযুত্তা. তে চ ন চক্খুসোতৰিঞ্ঞেয্যা. যথা পন উদকে চলন্তে ৰা পুপ্ফুল়কে ৰা মুঞ্চন্তে অন্তো মচ্ছো অত্থীতি ৰিঞ্ঞাযতি, এৰং পাণাতিপাতাদীনি ৰা করোন্তস্স, মুসাৰাদাদীনি ৰা ভণন্তস্স কাযৰচীসমাচারে দিস্ৰা চ সুত্ৰা চ তংসমুট্ঠাপকচিত্তং সংকিলিট্ঠন্তি ৰিঞ্ঞাযতি. তস্মা এৰমাহ. সংকিলিট্ঠচিত্তস্স হি কাযৰচীসমাচারাপি সংকিলিট্ঠাযেৰ নাম. ন তে তথাগতস্স সংৰিজ্জন্তীতি ন তে তথাগতস্স অত্থি. ন উপলব্ভন্তীতি এৰং জানাতীতি অত্থো. নত্থিতাযেৰ হি তে ন উপলব্ভন্তি ন পটিচ্ছন্নতায. তথা হি ভগৰা একদিৰসং ইমেসু ধম্মেসু ভিক্খুসঙ্ঘং পৰারেন্তো আহ – ‘‘হন্দ দানি, ভিক্খৰে, পৰারেমি ৰো, ন চ মে কিঞ্চি গরহথ কাযিকং ৰা ৰাচসিকং ৰা’’তি. এৰং ৰুত্তে আযস্মা সারিপুত্তো উট্ঠাযাসনা একংসং উত্তরাসঙ্গং করিত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – ‘‘ন খো মযং, ভন্তে, ভগৰতো কিঞ্চি গরহাম কাযিকং ৰা ৰাচসিকং ৰা. ভগৰা হি, ভন্তে, অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জানেতা, অনক্খাতস্স মগ্গস্স অক্খাতা, মগ্গঞ্ঞূ মগ্গৰিদূ মগ্গকোৰিদো. মগ্গানুগা চ, ভন্তে, এতরহি সাৰকা ৰিহরন্তি পচ্ছাসমন্নাগতা’’তি (সং. নি. ১.২১৫). এৰং পরিসুদ্ধা তথাগতস্স কাযৰচীসমাচারা. উত্তরোপি সুদং মাণৰো তথাগতস্স কাযৰচীদ্ৰারে অনারাধনীযং কিঞ্চি পস্সিস্সামীতি সত্ত মাসে অনুবন্ধিত্ৰা লিক্খামত্তম্পি ন অদ্দস. মনুস্সভূতো ৰা এস বুদ্ধভূতস্স কাযৰচীদ্ৰারে কিং অনারাধনীযং পস্সিস্সতি? মারোপি দেৰপুত্তো বোধিসত্তস্স সতো মহাভিনিক্খমনতো পট্ঠায ছব্বস্সানি গৰেসমানো কিঞ্চি অনারাধনীযং নাদ্দস, অন্তমসো চেতোপরিৰিতক্কমত্তম্পি. মারো কির চিন্তেসি – ‘‘সচস্স ৰিতক্কিতমত্তম্পি অকুসলং পস্সিস্সামি, তত্থেৰ নং মুদ্ধনি পহরিত্ৰা পক্কমিস্সামী’’তি. সো ছব্বস্সানি অদিস্ৰা বুদ্ধভূতম্পি একং ৰস্সং অনুবন্ধিত্ৰা কিঞ্চি ৰজ্জং অপস্সন্তো গমনসমযে ৰন্দিত্ৰা –

‘‘মহাৰীর মহাপুঞ্ঞং, ইদ্ধিযা যসসা জলং;

সব্বৰেরভযাতীতং, পাদে ৰন্দামি গোতম’’ন্তি. (সং. নি. ১.১৫৯) –

গাথং ৰত্ৰা গতো.

ৰীতিমিস্সাতি কালে কণ্হা, কালে সুক্কাতি এৰং ৰোমিস্সকা. ৰোদাতাতি পরিসুদ্ধা নিক্কিলেসা. সংৰিজ্জন্তীতি ৰোদাতা ধম্মা অত্থি উপলব্ভন্তি. তথাগতস্স হি পরিসুদ্ধা কাযসমাচারাদযো. তেনাহ – ‘‘চত্তারিমানি, ভিক্খৰে, তথাগতস্স অরক্খেয্যানি. কতমানি চত্তারি? পরিসুদ্ধকাযসমাচারো, ভিক্খৰে, তথাগতো, নত্থি তথাগতস্স কাযদুচ্চরিতং, যং তথাগতো রক্খেয্য, ‘মা মে ইদং পরো অঞ্ঞাসী’তি. পরিসুদ্ধৰচীসমাচারো… পরিসুদ্ধমনোসমাচারো… পরিসুদ্ধাজীৰো, ভিক্খৰে, তথাগতো, নত্থি তথাগতস্স মিচ্ছাজীৰো, যং তথাগতো রক্খেয্য, মা মে ইদং পরো অঞ্ঞাসী’’তি (অ. নি. ৭.৫৮).

ইমং কুসলং ধম্মন্তি ইমং অনৰজ্জং আজীৰট্ঠমকসীলং. ‘‘অযমাযস্মা সত্থা কিং নু খো দীঘরত্তং সমাপন্নো অতিচিরকালতো পট্ঠায ইমিনা সমন্নাগতো, উদাহু ইত্তরসমাপন্নো হিয্যো ৰা পরে ৰা পরসুৰে ৰা দিৰসে সমাপন্নো’’তি এৰং গৰেসতূতি অত্থো. একচ্চেন হি একস্মিং ঠানে ৰসন্তেন বহু মিচ্ছাজীৰকম্মং কতং, তং তত্থ কালাতিক্কমে পঞ্ঞাযতি, পাকটং হোতি. সো অঞ্ঞতরং পচ্চন্তগামং ৰা সমুদ্দতীরং ৰা গন্ত্ৰা পণ্ণসালং কারেত্ৰা আরঞ্ঞকো ৰিয হুত্ৰা ৰিহরতি. মনুস্সা সম্ভাৰনং উপ্পাদেত্ৰা তস্স পণীতে পচ্চযে দেন্তি. জনপদৰাসিনো ভিক্খূ তস্স পরিহারং দিস্ৰা, ‘‘অতিদপ্পিতো ৰতাযং আযস্মা, কো নু খো এসো’’তি পরিগ্গণ্হন্তা, ‘‘অসুকট্ঠানে অসুকং নাম মিচ্ছাজীৰং কত্ৰা পক্কন্তভিক্খূ’’তি ঞত্ৰা ন সক্কা ইমিনা সদ্ধিং উপোসথো ৰা পৰারণা ৰা কাতুন্তি সন্নিপতিত্ৰা ধম্মেন সমেন উক্খেপনীযাদীসু অঞ্ঞতরং কম্মং করোন্তি. এৰরূপায পটিচ্ছন্নপটিপত্তিযা অত্থিভাৰং ৰা নত্থিভাৰং ৰা ৰীমংসাপেতুং এৰমাহ.

এৰং জানাতীতি দীঘরত্তং সমাপন্নো, ন ইত্তরসমাপন্নোতি জানাতি. অনচ্ছরিযং চেতং. যং তথাগতস্স এতরহি সব্বঞ্ঞুতং পত্তস্স দীঘরত্তং আজীৰট্ঠমকসীলং পরিসুদ্ধং ভৰেয্য. যস্স বোধিসত্তকালেপি এৰং অহোসি.

অতীতে কির গন্ধাররাজা চ ৰেদেহরাজা চ দ্ৰেপি সহাযকা হুত্ৰা কামেসু আদীনৰং দিস্ৰা রজ্জানি পুত্তানং নিয্যাতেত্ৰা ইসিপব্বজ্জং পব্বজিত্ৰা একস্মিং অরঞ্ঞগামকে পিণ্ডায চরন্তি. পচ্চন্তো নাম দুল্লভলোণো হোতি. ততো অলোণং যাগুং লভিত্ৰা একিস্সায সালায নিসীদিত্ৰা পিৰন্তি. অন্তরন্তরে মনুস্সা লোণচুণ্ণং আহরিত্ৰা দেন্তি. একদিৰসং একো ৰেদেহিসিস্স পণ্ণে পক্খিপিত্ৰা লোণচুণ্ণং অদাসি. ৰেদেহিসি গহেত্ৰা উপড্ঢং গন্ধারিসিস্স-সন্তিকে ঠপেত্ৰা উপড্ঢং অত্তনো সন্তিকে ঠপেসি. ততো থোকং পরিভুত্তাৰসেসং দিস্ৰা, ‘‘মা ইদং নস্সী’’তি পণ্ণেন ৰেঠেত্ৰা তিণগহনে ঠপেসি. পুন একস্মিং দিৰসে যাগুপানকালে সতিং কত্ৰা ওলোকেন্তো তং দিস্ৰা গন্ধারিসিং উপসঙ্কমিত্ৰা, ‘‘ইতো থোকং গণ্হথ আচরিযা’’তি আহ. কুতো তে লদ্ধং ৰেদেহিসীতি? তস্মিং দিৰসে পরিভুত্তাৰসেসং ‘‘মা নস্সী’’তি মযা ঠপিতন্তি. গন্ধারিসি গহেতুং ন ইচ্ছতি, অলোণকংযেৰ যাগুং পিৰিত্ৰা ৰেদেহং ইসিং অৰোচ –

‘‘হিত্ৰা গামসহস্সানি, পরিপুণ্ণানি সোল়স;

কোট্ঠাগারানি ফীতানি, সন্নিধিং দানি কুব্বসী’’তি. (জা. ১.৭.৭৬);

ৰেদেহিসি অৰোচ – ‘‘তুম্হে রজ্জং পহায পব্বজিতা, ইদানি কস্মা লোণচুণ্ণমত্তসন্নিধিকারণা পব্বজ্জায অনুচ্ছৰিকং ন করোথা’’তি? কিং মযা কতং ৰেদেহিসীতি? অথ নং আহ –

‘‘হিত্ৰা গন্ধারৰিসযং, পহূতধনধারিযং;

পসাসনতো নিক্খন্তো, ইধ দানি পসাসসী’’তি. (জা. ১.৭.৭৭);

গন্ধারো আহ –

‘‘ধম্মং ভণামি ৰেদেহ, অধম্মো মে ন রুচ্চতি;

ধম্মং মে ভণমানস্স, ন পাপমুপলিম্পতী’’তি. (জা. ১.৭.৭৮);

ৰেদেহো আহ –

‘‘যেন কেনচি ৰণ্ণেন, পরো লভতি রুপ্পনং;

মহত্থিযম্পি চে ৰাচং, ন তং ভাসেয্য পণ্ডিতো’’তি. (জা. ১.৭.৭৯);

গন্ধারো আহ –

‘‘কামং রুপ্পতু ৰা মা ৰা, ভুসংৰ ৰিকিরীযতু;

ধম্মং মে ভণমানস্স, ন পাপমুপলিম্পতী’’তি. (জা. ১.৭.৮০);

ততো ৰেদেহিসি যস্স সকাপি বুদ্ধি নত্থি, আচরিযসন্তিকে ৰিনযং ন সিক্খতি, সো অন্ধমহিংসো ৰিয ৰনে চরতীতি চিন্তেত্ৰা আহ –

‘‘নো চে অস্স সকা বুদ্ধি, ৰিনযো ৰা সুসিক্খিতো;

ৰনে অন্ধমহিংসোৰ, চরেয্য বহুকো জনো.

যস্মা চ পনিধেকচ্চে, আচেরম্হি সুসিক্খিতা;

তস্মা ৰিনীতৰিনযা, চরন্তি সুসমাহিতা’’তি. (জা. ১.৭.৮১-৮২);

এৰঞ্চ পন ৰত্ৰা ৰেদেহিসি অজানিত্ৰা মযা কতন্তি গন্ধারিসিং খমাপেসি. তে উভোপি তপং চরিত্ৰা ব্রহ্মলোকং অগমংসু. এৰং তথাগতস্স বোধিসত্তকালেপি দীঘরত্তং আজীৰট্ঠমকসীলং পরিসুদ্ধং অহোসি.

উত্তজ্ঝাপন্নো অযমাযস্মা ভিক্খু যসপত্তোতি অযমাযস্মা অম্হাকং সত্থা ভিক্খু ঞত্তং পঞ্ঞাতভাৰং পাকটভাৰং অজ্ঝাপন্নো নু খো, সযঞ্চ পরিৰারসম্পত্তিং পত্তো নু খো নোতি. তেন চস্স পঞ্ঞাতজ্ঝাপন্নভাৰেন যসসন্নিস্সিতভাৰেন চ কিং একচ্চে আদীনৰা সন্দিস্সন্তি উদাহু নোতি এৰং সমন্নেসন্তূতি দস্সেতি. ন তাৰ, ভিক্খৰেতি, ভিক্খৰে, যাৰ ভিক্খু ন রাজরাজমহামত্তাদীসু অভিঞ্ঞাতভাৰং ৰা পরিৰারসম্পত্তিং ৰা আপন্নো হোতি, তাৰ একচ্চে মানাতিমানাদযো আদীনৰা ন সংৰিজ্জন্তি উপসন্তূপসন্তো ৰিয সোতাপন্নো ৰিয সকদাগামী ৰিয চ ৰিহরতি. অরিযো নু খো পুথুজ্জনো নু খোতিপি ঞাতুং ন সক্কা হোতি.

যতো চ খো, ভিক্খৰেতি যদা পন ইধেকচ্চো ভিক্খু ঞাতো হোতি পরিৰারসম্পন্নো ৰা, তদা তিণ্হেন সিঙ্গেন গোগণং ৰিজ্ঝন্তো দুট্ঠগোণো ৰিয, মিগসঙ্ঘং অভিমদ্দমানো দীপি ৰিয চ অঞ্ঞে ভিক্খূ তত্থ তত্থ ৰিজ্ঝন্তো অগারৰো অসভাগৰুত্তি অগ্গপাদেন ভূমিং ফুসন্তো ৰিয চরতি. একচ্চো পন কুলপুত্তো যথা যথা ঞাতো হোতি যসস্সী, তথা তথা ফলভারভরিতো ৰিয সালি সুট্ঠুতরং ওনমতি, রাজরাজমহামত্তাদীসু উপসঙ্কমন্তেসু অকিঞ্চনভাৰং পচ্চৰেক্খিত্ৰা সমণসঞ্ঞং উপট্ঠপেত্ৰা ছিন্নৰিসাণউসভো ৰিয, চণ্ডালদারকো ৰিয চ সোরতো নিৰাতো নীচচিত্তো হুত্ৰা ভিক্খুসঙ্ঘস্স চেৰ সদেৰকস্স চ লোকস্স, হিতায সুখায পটিপজ্জতি. এৰরূপং পটিপত্তিং সন্ধায ‘‘নাস্স ইধেকচ্চে আদীনৰা’’তি আহ.

তথাগতো পন অট্ঠসু লোকধম্মেসু তাদী, সো হি লাভেপি তাদী, অলাভেপি তাদী, যসেপি তাদী, অযসেপি তাদী, পসংসাযপি তাদী, নিন্দাযপি তাদী, সুখেপি তাদী, দুক্খেপি তাদী, তস্মা সব্বাকারেন নাস্স ইধেকচ্চে আদীনৰা সংৰিজ্জন্তি. অভযূপরতোতি অভযো হুত্ৰা উপরতো, অচ্চন্তূপরতো সততূপরতোতি অত্থো. ন ৰা ভযেন উপরতোতিপি অভযূপরতো. চত্তারি হি ভযানি কিলেসভযং ৰট্টভযং দুগ্গতিভযং উপৰাদভযন্তি. পুথুজ্জনো চতূহিপি ভযেহি ভাযতি. সেক্খা তীহি, তেসঞ্হি দুগ্গতিভযং পহীনং, ইতি সত্ত সেক্খা ভযূপরতা, খীণাসৰো অভযূপরতো নাম, তস্স হি একম্পি ভযং নত্থি. কিং পরৰাদভযং নত্থীতি? নত্থি. পরানুদ্দযং পন পটিচ্চ, ‘‘মাদিসং খীণাসৰং পটিচ্চ সত্তা মা নস্সন্তূ’’তি উপৰাদং রক্খতি. মূলুপ্পলৰাপিৰিহারৰাসী যসত্থেরো ৰিয.

থেরো কির মূলুপ্পলৰাপিগামং পিণ্ডায পাৰিসি. অথস্স উপট্ঠাককুলদ্ৰারং পত্তস্স পত্তং গহেত্ৰা থণ্ডিলপীঠকং নিস্সায আসনং পঞ্ঞপেসুং. অমচ্চধীতাপি তংযেৰ পীঠকং নিস্সায পরতোভাগে নীচতরং আসনং পঞ্ঞাপেত্ৰা নিসীদি. একো নেৰাসিকো ভিক্খু পচ্ছা পিণ্ডায পৰিট্ঠো দ্ৰারে ঠত্ৰাৰ ওলোকেন্তো থেরো অমচ্চধীতরা সদ্ধিং একমঞ্চে নিসিন্নোতি সল্লক্খেত্ৰা, ‘‘অযং পংসুকূলিকো ৰিহারেৰ উপসন্তূপসন্তো ৰিয ৰিহরতি, অন্তোগামে পন উপট্ঠাযিকাহি সদ্ধিং একমঞ্চে নিসীদতী’’তি চিন্তেত্ৰা, ‘‘কিং নু খো মযা দুদ্দিট্ঠ’’ন্তি পুনপ্পুনং ওলোকেত্ৰা তথাসঞ্ঞীৰ হুত্ৰা পক্কামি. থেরোপি ভত্তকিচ্চং কত্ৰা ৰিহারং গন্ত্ৰা ৰসনট্ঠানং পৰিসিত্ৰা দ্ৰারং পিধায নিসীদি. নেৰাসিকোপি কতভত্তকিচ্চো ৰিহারং গন্ত্ৰা, ‘‘তং পংসুকূলিকং নিগ্গণ্হিত্ৰা ৰিহারা নিক্কড্ঢিস্সামী’’তি অসঞ্ঞতনীহারেন থেরস্স ৰসনট্ঠানং গন্ত্ৰা পরিভোগঘটতো উলুঙ্কেন উদকং গহেত্ৰা মহাসদ্দং করোন্তো পাদে ধোৰি. থেরো, ‘‘কো নু খো অযং অসঞ্ঞতচারিকো’’তি আৰজ্জন্তো সব্বং ঞত্ৰা, ‘‘অযং মযি মনং পদোসেত্ৰা অপাযূপগো মা অহোসী’’তি ৰেহাসং অব্ভুগ্গন্ত্ৰা কণ্ণিকামণ্ডলসমীপে পল্লঙ্কেন নিসীদি. নেৰাসিকো দুট্ঠাকারেন ঘটিকং উক্খিপিত্ৰা দ্ৰারং ৰিৰরিত্ৰা অন্তো পৰিট্ঠো থেরং অপস্সন্তো, ‘‘হেট্ঠামঞ্চং পৰিট্ঠো ভৰিস্সতী’’তি ওলোকেত্ৰা তত্থাপি অপস্সন্তো নিক্খমিতুং আরভি. থেরো উক্কাসি. ইতরো উদ্ধং ওলোকেন্তো দিস্ৰা অধিৰাসেতুং অসক্কোন্তো এৰমাহ – ‘‘পতিরূপং তে, আৰুসো, পংসুকূলিক এৰং আনুভাৰসম্পন্নস্স উপট্ঠাযিকায সদ্ধিং একমঞ্চে নিসীদিতু’’ন্তি. পব্বজিতা নাম, ভন্তে, মাতুগামেন সদ্ধিং ন একমঞ্চে নিসীদন্তি, তুম্হেহি পন দুদ্দিট্ঠমেতন্তি. এৰং খীণাসৰা পরানুদ্দযায উপৰাদং রক্খন্তি.

খযা রাগস্সাতি রাগস্স খযেনেৰ. ৰীতরাগত্তা কামে ন পটিসেৰতি, ন পটিসঙ্খায ৰারেত্ৰাতি. তঞ্চেতি এৰং তথাগতস্স কিলেসপ্পহানং ঞত্ৰা তত্থ তত্থ ঠিতনিসিন্নকালাদীসুপি চতুপরিসমজ্ঝে অলঙ্কতধম্মাসনে নিসীদিত্ৰাপি ইতিপি সত্থা ৰীতরাগো ৰীতদোসো ৰীতমোহো ৰন্তকিলেসো পহীনমলো অব্ভা মুত্তপুণ্ণচন্দো ৰিয সুপরিসুদ্ধোতি এৰং তথাগতস্স কিলেসপ্পহানে ৰণ্ণং কথযমানং তং ৰীমংসকং ভিক্খুং পরে এৰং পুচ্ছেয্যুং চেতি অত্থো.

আকারাতি কারণানি. অন্ৰযাতি অনুবুদ্ধিযো. সঙ্ঘে ৰা ৰিহরন্তোতি অপ্পেকদা অপরিচ্ছিন্নগণনস্স ভিক্খুসঙ্ঘস্স মজ্ঝে ৰিহরন্তো. একো ৰা ৰিহরন্তোতি ইচ্ছামহং, ভিক্খৰে, অড্ঢমাসং পটিসল্লীযিতুন্তি, তেমাসং পটিসল্লীযিতুন্তি এৰং পটিসল্লানে চেৰ পালিলেয্যকৰনসণ্ডে চ এককো ৰিহরন্তো. সুগতাতি সুট্ঠুগতা সুপ্পটিপন্না কারকা যুত্তপযুত্তা. এৰরূপাপি হি একচ্চে ভিক্খূ অত্থি. দুগ্গতাতি দুট্ঠুগতা দুপ্পটিপন্না কাযদল়্হিবহুলা ৰিস্সট্ঠকম্মট্ঠানা. এৰরূপাপি একচ্চে অত্থি. গণমনুসাসন্তীতি গণবন্ধনেন বদ্ধা গণারামা গণবহুলিকা হুত্ৰা গণং পরিহরন্তি. এৰরূপাপি একচ্চে অত্থি. তেসং পটিপক্খভূতা গণতো নিস্সটা ৰিসংসট্ঠা ৰিপ্পমুত্তৰিহারিনোপি অত্থি.

আমিসেসু সন্দিস্সন্তীতি আমিসগিদ্ধা আমিসচক্খুকা চতুপচ্চযআমিসত্থমেৰ আহিণ্ডমানা আমিসেসু সন্দিস্সমানকভিক্খূপি অত্থি. আমিসেন অনুপলিত্তা চতূহি পচ্চযেহি ৰিনিৰত্তমানসা অব্ভা মুত্তচন্দসদিসা হুত্ৰা ৰিহরমানাপি অত্থি. নাযমাযস্মা তং তেন অৰজানাতীতি অযং আযস্মা সত্থা তায তায পটিপত্তিযা তং তং পুগ্গলং নাৰজানাতি, অযং পটিপন্নো কারকো, অযং গণতো নিস্সটো ৰিসংসট্ঠো. অযং আমিসেন অনুপলিত্তো পচ্চযেহি ৰিনিৰত্তমানসো অব্ভা মুত্তো চন্দিমা ৰিযাতি এৰমস্স গেহসিতৰসেন উস্সাদনাপি নত্থি. অযং দুপ্পটিপন্নো অকারকো কাযদল়্হিবহুলো ৰিস্সট্ঠকম্মট্ঠানো, অযং গণবন্ধনবদ্ধো, অযং আমিসগিদ্ধো লোলো আমিসচক্খুকোতি এৰমস্স গেহসিতৰসেন অপসাদনাপি নত্থীতি অত্থো. ইমিনা কিং কথিতং হোতি? তথাগতস্স সত্তেসু তাদিভাৰো কথিতো হোতি. অযঞ্হি –

‘‘ৰধকস্স দেৰদত্তস্স, চোরস্সঙ্গুলিমালিনো;

ধনপালে রাহুলে চ, সব্বেসং সমকো মুনী’’তি. (মি. প. ৬.৬.৫);

৪৮৯. তত্র, ভিক্খৰেতি তেসু দ্ৰীসু ৰীমংসকেসু. যো, ‘‘কে পনাযস্মতো আকারা’’তি পুচ্ছাযং আগতো গণ্ঠিৰীমংসকো চ, যো ‘‘অভযূপরতো অযমাযস্মা’’তি আগতো মূলৰীমংসকো চ. তেসু মূলৰীমংসকেন তথাগতোৰ উত্তরি পটিপুচ্ছিতব্বো. সো হি পুব্বে পরস্সেৰ কথায নিট্ঠঙ্গতো. পরো চ নাম জানিত্ৰাপি কথেয্য অজানিত্ৰাপি. এৰমস্স কথা ভূতাপি হোতি অভূতাপি, তস্মা পরস্সেৰ কথায নিট্ঠং অগন্ত্ৰা ততো উত্তরি তথাগতোৰ পটিপুচ্ছিতব্বোতি অত্থো.

ব্যাকরমানোতি এত্থ যস্মা তথাগতস্স মিচ্ছাব্যাকরণং নাম নত্থি, তস্মা সম্মা মিচ্ছাতি অৰত্ৰা ব্যাকরমানোত্ৰেৰ ৰুত্তং. এতং পথোহমস্মি এতং গোচরোতি এস ময্হং পথো এস গোচরোতি অত্থো. ‘‘এতাপাথো’’তিপি পাঠো, তস্সত্থো ময্হং আজীৰট্ঠমকসীলং পরিসুদ্ধং, স্ৰাহং তস্স পরিসুদ্ধভাৰেন ৰীমংসকস্স ভিক্খুনো ঞাণমুখে এতাপাথো, এৰং আপাথং গচ্ছামীতি ৰুত্তং হোতি. নো চ তেন তম্মযোতি তেনপি চাহং পরিসুদ্ধেন সীলেন ন তম্মযো, ন সতণ্হো, পরিসুদ্ধসীলত্তাৰ নিত্তণ্হোহমস্মীতি দীপেতি.

উত্তরুত্তরিং পণীতপণীতন্তি উত্তরুত্তরিং চেৰ পণীততরঞ্চ কত্ৰা দেসেতি. কণ্হসুক্কসপ্পটিভাগন্তি কণ্হং চেৰ সুক্কঞ্চ, তঞ্চ খো সপ্পটিভাগং সৰিপক্খং কত্ৰা, কণ্হং পটিবাহিত্ৰা সুক্কন্তি সুক্কং পটিবাহিত্ৰা কণ্হন্তি এৰং সপ্পটিভাগং কত্ৰা কণ্হসুক্কং দেসেতি. কণ্হং দেসেন্তোপি সউস্সাহং সৰিপাকং দেসেতি, সুক্কং দেসেন্তোপি সউস্সাহং সৰিপাকং দেসেতি. অভিঞ্ঞায ইধেকচ্চং ধম্মং ধম্মেসু নিট্ঠং গচ্ছতীতি তস্মিং দেসিতে ধম্মে একচ্চং পটিৰেধধম্মং অভিঞ্ঞায তেন পটিৰেধধম্মেন দেসনাধম্মে নিট্ঠং গচ্ছতি. সত্থরি পসীদতীতি এৰং ধম্মে নিট্ঠং গন্ত্ৰা ভিয্যোসোমত্তায সম্মাসম্বুদ্ধো সো ভগৰাতি সত্থরি পসীদতি. তেন পন ভগৰতা যো ধম্মো অক্খাতো, সোপি স্ৰাক্খাতো ভগৰতা ধম্মো নিয্যানিকত্তা. য্ৰাস্স তং ধম্মং পটিপন্নো সঙ্ঘো, সোপি সুপ্পটিপন্নো ৰঙ্কাদিদোসরহিতং পটিপদং পটিপন্নত্তাতি এৰং ধম্মে সঙ্ঘেপি পসীদতি. তঞ্চেতি তং এৰং পসন্নং তত্থ তত্থ তিণ্ণং রতনানং ৰণ্ণং কথেন্তং ভিক্খুং.

৪৯০. ইমেহি আকারেহীতি ইমেহি সত্থুৰীমংসনকারণেহি. ইমেহি পদেহীতি ইমেহি অক্খরসম্পিণ্ডনপদেহি. ইমেহি ব্যঞ্জনেহীতি ইমেহি ইধ ৰুত্তেহি অক্খরেহি. সদ্ধা নিৰিট্ঠাতি ওকপ্পনা পতিট্ঠিতা. মূলজাতাতি সোতাপত্তিমগ্গৰসেন সঞ্জাতমূলা. সোতাপত্তিমগ্গো হি সদ্ধায মূলং নাম. আকারৰতীতি কারণং পরিযেসিত্ৰা গহিতত্তা সকারণা. দস্সনমূলিকাতি সোতাপত্তিমগ্গমূলিকা. সো হি দস্সনন্তি ৰুচ্চতি. দল়্হাতি থিরা. অসংহারিযাতি হরিতুং ন সক্কা. সমণেন ৰাতি সমিতপাপসমণেন ৰা. ব্রাহ্মণেন ৰাতি বাহিতপাপব্রাহ্মণেন ৰা. দেৰেন ৰাতি উপপত্তিদেৰেন ৰা. মারেন ৰাতি ৰসৰত্তিমারেন ৰা, সোতাপন্নস্স হি ৰসৰত্তিমারেনাপি সদ্ধা অসংহারিযা হোতি সূরম্বট্ঠস্স ৰিয.

সো কির সত্থু ধম্মদেসনং সুত্ৰা সোতাপন্নো হুত্ৰা গেহং আগতো. অথ মারো দ্ৰত্তিংসৰরলক্খণপ্পটিমণ্ডিতং বুদ্ধরূপং মাপেত্ৰা তস্স ঘরদ্ৰারে ঠত্ৰা – ‘‘সত্থা আগতো’’তি সাসনং পহিণি. সূরো চিন্তেসি, ‘‘অহং ইদানেৰ সত্থু সন্তিকা ধম্মং সুত্ৰা আগতো, কিং নু খো ভৰিস্সতী’’তি উপসঙ্কমিত্ৰা সত্থুসঞ্ঞায ৰন্দিত্ৰা অট্ঠাসি. মারো আহ – ‘‘যং তে মযা, সূরম্বট্ঠ, রূপং অনিচ্চং…পে… ৰিঞ্ঞাণং অনিচ্চন্তি কথিতং, তং অনুপধারেত্ৰাৰ সহসা মযা এৰং ৰুত্তং. তস্মা ত্ৰং রূপং নিচ্চং…পে… ৰিঞ্ঞাণং নিচ্চন্তি গণ্হাহী’’তি. সূরো চিন্তেসি – ‘‘অট্ঠানমেতং, যং বুদ্ধা অনুপধারেত্ৰা অপচ্চক্খং কত্ৰা কিঞ্চি কথেয্যুং, অদ্ধা অযং ময্হং ৰিবাধনত্থং মারো আগতো’’তি. ততো নং ত্ৰং মারোতি আহ. সো মুসাৰাদং কাতুং নাসক্খি, আম মারোস্মীতি পটিজানি. কস্মা আগতোসীতি ৰুত্তে তৰ সদ্ধাচালনত্থন্তি আহ. কণ্হ পাপিম, ত্ৰং তাৰ এককো তিট্ঠ, তাদিসানং মারানং সতম্পি সহস্সম্পি মম সদ্ধং চালেতুং অসমত্থং, মগ্গেন আগতা সদ্ধা নাম সিলাপথৰিযং পতিট্ঠিতসিনেরু ৰিয অচলা হোতি, কিং ত্ৰং এত্থাতি অচ্ছরং পহরি. সো ঠাতুং অসক্কোন্তো তত্থেৰন্তরধাযি. ব্রহ্মুনা ৰাতি ব্রহ্মকাযিকাদীসু অঞ্ঞতরব্রহ্মুনা ৰা. কেনচি ৰা লোকস্মিন্তি এতে সমণাদযো ঠপেত্ৰা অঞ্ঞেনপি কেনচি ৰা লোকস্মিং হরিতুং ন সক্কা. ধম্মসমন্নেসনাতি সভাৰসমন্নেসনা. ধম্মতাসুসমন্নিট্ঠোতি ধম্মতায সুসমন্নিট্ঠো, সভাৰেনেৰ সুট্ঠু সমন্নেসিতো হোতীতি অত্থো. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

ৰীমংসকসুত্তৰণ্ণনা নিট্ঠিতা.

৮. কোসম্বিযসুত্তৰণ্ণনা

৪৯১. এৰং মে সুতন্তি কোসম্বিযসুত্তং. তত্থ কোসম্বিযন্তি এৰংনামকে নগরে. তস্স কির নগরস্স আরামপোক্খরণীআদীসু তেসু তেসু ঠানেসু কোসম্বরুক্খাৰ উস্সন্না অহেসুং, তস্মা কোসম্বীতি সঙ্খং অগমাসি. কুসম্বস্স নাম ইসিনো অস্সমতো অৰিদূরে মাপিতত্তাতিপি একে. ঘোসিতারামেতি ঘোসিতসেট্ঠিনা কারিতে আরামে.

পুব্বে কির অদ্দিলরট্ঠং নাম অহোসি. ততো কোতূহলকো নাম দলিদ্দো ছাতকভযেন সপুত্তদারো কেদারপরিচ্ছিন্নং সুভিক্খং রট্ঠং গচ্ছন্তো পুত্তং ৰহিতুং অসক্কোন্তো ছড্ডেত্ৰা অগমাসি. মাতা নিৰত্তিত্ৰা তং গহেত্ৰা গতা. তে একং গোপালকগামকং পৰিসিংসু, গোপালকানঞ্চ তদা পহতপাযসো পটিযত্তো হোতি, ততো পাযসং লভিত্ৰা ভুঞ্জিংসু. অথ সো পুরিসো পহূতপাযসং ভুঞ্জিত্ৰা জিরাপেতুং অসক্কোন্তো রত্তিভাগে কালং কত্ৰা তত্থেৰ সুনখিযা কুচ্ছিম্হি পটিসন্ধিং গহেত্ৰা কুক্কুরো জাতো. সো গোপালকস্স পিযো অহোসি মনাপো, গোপালকো চ পচ্চেকবুদ্ধং উপট্ঠাসি. পচ্চেকবুদ্ধোপি ভত্তকিচ্চাৰসানে কুক্কুরস্স একং পিণ্ডং দেতি. সো পচ্চেকবুদ্ধে সিনেহং উপ্পাদেত্ৰা গোপালকেন সদ্ধিং পণ্ণসালম্পি গচ্ছতি.

সো গোপালকে অসন্নিহিতে ভত্তৰেলায সযমেৰ গন্ত্ৰা কালারোচনত্থং পণ্ণসালদ্ৰারে ভুস্সতি, অন্তরামগ্গেপি চণ্ডমিগে দিস্ৰা ভুস্সিত্ৰা পলাপেতি. সো পচ্চেকবুদ্ধে মুদুকেন চিত্তেন কালং কত্ৰা দেৰলোকে নিব্বত্তি. তত্রস্স ঘোসকদেৰপুত্তোত্ৰেৰ নামং অহোসি. সো দেৰলোকতো চৰিত্ৰা কোসম্বিযং একস্মিং কুলঘরে নিব্বত্তি. তং অপুত্তকো সেট্ঠি তস্স মাতাপিতূনং ধনং দত্ৰা পুত্তং কত্ৰা অগ্গহেসি. অথ সো অত্তনো পুত্তে জাতে সত্তক্খত্তুং মারাপেতুং উপক্কমি. সো পুঞ্ঞৰন্ততায সত্তসুপি ঠানেসু মরণং অপ্পত্ৰা অৰসানে একায সেট্ঠিধীতায ৰেয্যত্তিযেন লদ্ধজীৰিকো অপরভাগে পিতুঅচ্চযেন সেট্ঠিট্ঠানং পত্ৰা ঘোসিতসেট্ঠি নাম জাতো. অঞ্ঞেপি কোসম্বিযং কুক্কুটসেট্ঠি পাৰারিকসেট্ঠীতি দ্ৰে সেট্ঠিনো সন্তি. ইমেহি সদ্ধিং তযো অহেসুং.

তেন চ সমযেন তেসং সহাযকানং সেট্ঠীনং কুলূপকা পঞ্চসতা ইসযো পব্বতপাদে ৰসিংসু. তে কালেন কালং লোণম্বিলসেৰনত্থায মনুস্সপথং আগচ্ছন্তি. অথেকস্মিং ৰারে গিম্হসমযে মনুস্সপথং আগচ্ছন্তা নিরুদকমহাকন্তারং অতিক্কমিত্ৰা কন্তারপরিযোসানে মহন্তং নিগ্রোধরুক্খং দিস্ৰা চিন্তেসুং – ‘‘যাদিসো অযং রুক্খো, অদ্ধা এত্থ মহেসক্খায দেৰতায ভৰিতব্বং, সাধু ৰতস্স, সচে নো পানীযং ৰা ভোজনীযং ৰা দদেয্যা’’তি. দেৰতা ইসীনং অজ্ঝাসযং ৰিদিত্ৰা ইমেসং সঙ্গহং করিস্সামীতি অত্তনো আনুভাৰেন ৰিটপন্তরতো নঙ্গলসীসমত্তং উদকধারং পৰত্তেসি. ইসিগণো রজতক্খন্ধসদিসং উদকৰট্টিং দিস্ৰা অত্তনো ভাজনেহি উদকং গহেত্ৰা পরিভোগং কত্ৰা চিন্তেসি – ‘‘দেৰতায অম্হাকং পরিভোগউদকং দিন্নং, ইদং পন অগামকং মহাঅরঞ্ঞং, সাধু ৰতস্স, সচে নো আহারম্পি দদেয্যা’’তি. দেৰতা ইসীনং উপসংকপ্পনৰসেন দিব্বানি যাগুখজ্জকাদীনি দত্ৰা সন্তপ্পেসি. ইসযো চিন্তযিংসু – ‘‘দেৰতায অম্হাকং পরিভোগউদকম্পি ভোজনম্পি সব্বং দিন্নং, সাধু ৰতস্স, সচে নো অত্তানং দস্সেয্যা’’তি.

দেৰতা তেসং অজ্ঝাসযং ৰিদিত্ৰা উপড্ঢকাযং দস্সেসি. তে আহংসু – ‘‘দেৰতে, মহতী তে সম্পত্তি, কিং কম্মং কত্ৰা ইমং সম্পত্তিং অধিগতাসী’’তি? ভন্তে, নাতিমহন্তং পরিত্তকং কম্মং কত্ৰাতি. উপড্ঢউপোসথকম্মং নিস্সায হি দেৰতায সা সম্পত্তি লদ্ধা.

অনাথপিণ্ডিকস্স কির গেহে অযং দেৰপুত্তো কম্মকারো অহোসি. সেট্ঠিস্স হি গেহে উপোসথদিৰসেসু অন্তমসো দাসকম্মকারে উপাদায সব্বো জনো উপোসথিকো হোতি. একদিৰসং অযং কম্মকারো এককোৰ পাতো উট্ঠায কম্মন্তং গতো. মহাসেট্ঠি নিৰাপং লভনমনুস্সে সল্লক্খেন্তো এতস্সেৰেকস্স অরঞ্ঞং গতভাৰং ঞত্ৰা অস্স সাযমাসত্থায নিৰাপং অদাসি. ভত্তকারিকা দাসী একস্সেৰ ভত্তং পচিত্ৰা অরঞ্ঞতো আগতস্স ভত্তং ৰড্ঢেত্ৰা অদাসি, কম্মকারো আহ – ‘‘অঞ্ঞেসু দিৰসেসু ইমস্মিং কালে গেহং একসদ্দং অহোসি, অজ্জ অতিৰিয সন্নিসিন্নং, কিং নু খো এত’’ন্তি? তস্স সা আচিক্খি – ‘‘অজ্জ ইমস্মিং গেহে সব্বে মনুস্সা উপোসথিকা, মহাসেট্ঠি তুয্হেৰেকস্স নিৰাপং অদাসী’’তি. এৰং অম্মাতি? আম সামীতি. ইমস্মিং কালে উপোসথং সমাদিন্নস্স উপোসথকম্মং হোতি ন হোতীতি মহাসেট্ঠিং পুচ্ছ অম্মাতি? তায গন্ত্ৰা পুচ্ছিতো মহাসেট্ঠি আহ – ‘‘সকলউপোসথকম্মং ন হোতি, উপড্ঢকম্মং পন হোতি, উপোসথিকো হোতূ’’তি. কম্মকারো ভত্তং অভুঞ্জিত্ৰা মুখং ৰিক্খালেত্ৰা উপোসথিকো হুত্ৰা ৰসনট্ঠানং গন্ত্ৰা নিপজ্জি. তস্স আহারপরিক্খীণকাযস্স রত্তিং ৰাতো কুপ্পি. সো পচ্চূসসমযে কালং কত্ৰা উপড্ঢউপোসথকম্মনিস্সন্দেন মহাৰট্টনিঅটৰিযং নিগ্রোধরুক্খে দেৰপুত্তো হুত্ৰা নিব্বত্তি. সো তং পৰত্তিং ইসীনং আরোচেসি.

ইসযো তুম্হেহি মযং বুদ্ধো, ধম্মো, সঙ্ঘোতি অসুতপুব্বং সাৰিতা, উপ্পন্নো নু খো লোকে বুদ্ধোতি? আম, ভন্তে, উপ্পন্নোতি. ইদানি কুহিং ৰসতীতি? সাৰত্থিং নিস্সায জেতৰনে, ভন্তেতি. ইসযো তিট্ঠথ তাৰ তুম্হে মযং সত্থারং পস্সিস্সামাতি হট্ঠতুট্ঠা নিক্খমিত্ৰা অনুপুব্বেন কোসম্বিনগরং সম্পাপুণিংসু. মহাসেট্ঠিনো, ‘‘ইসযো আগতা’’তি পচ্চুগ্গমনং কত্ৰা, ‘‘স্ৰে অম্হাকং ভিক্খং গণ্হথ, ভন্তে’’তি নিমন্তেত্ৰা পুনদিৰসে ইসিগণস্স মহাদানং অদংসু. ইসযো ভুঞ্জিত্ৰাৰ গচ্ছামাতি আপুচ্ছিংসু. তুম্হে, ভন্তে, অঞ্ঞস্মিং কালে একম্পি মাসং দ্ৰেপি তযোপি চত্তারোপি মাসে ৰসিত্ৰা গচ্ছথ. ইমস্মিং পন ৰারে হিয্যো আগন্ত্ৰা অজ্জেৰ গচ্ছামাতি ৰদথ, কিমিদন্তি? আম গহপতযো বুদ্ধো লোকে উপ্পন্নো, ন খো পন সক্কা জীৰিতন্তরাযো ৰিদিতুং, তেন মযং তুরিতা গচ্ছামাতি. তেন হি, ভন্তে, মযম্পি গচ্ছাম, অম্হেহি সদ্ধিংযেৰ গচ্ছথাতি. তুম্হে অগারিযা নাম মহাজটা, তিট্ঠথ তুম্হে, মযং পুরেতরং গমিস্সামাতি নিক্খমিত্ৰা একস্মিং ঠানে দ্ৰেপি দিৰসানি অৰসিত্ৰা তুরিতগমনেনেৰ সাৰত্থিং পত্ৰা জেতৰনৰিহারে সত্থু সন্তিকমেৰ অগমংসু. সত্থু মধুরধম্মকথং সুত্ৰা সব্বেৰ পব্বজিত্ৰা অরহত্তং পাপুণিংসু.

তেপি তযো সেট্ঠিনো পঞ্চহি পঞ্চহি সকটসতেহি সপ্পিমধুফাণিতাদীনি চেৰ পট্টুন্নদুকূলাদীনি চ আদায কোসম্বিতো নিক্খমিত্ৰা অনুপুব্বেন সাৰত্থিং পত্ৰা জেতৰনসামন্তে খন্ধাৰারং বন্ধিত্ৰা সত্থু সন্তিকং গন্ত্ৰা ৰন্দিত্ৰা পটিসন্থারং কত্ৰা একমন্তং নিসীদিংসু. সত্থা তিণ্ণম্পি সহাযকানং মধুরধম্মকথং কথেসি. তে বলৰসোমনস্সজাতা সত্থারং নিমন্তেত্ৰা পুনদিৰসে মহাদানং অদংসু. পুন নিমন্তেত্ৰা পুনদিৰসেতি এৰং অড্ঢমাসং দানং দত্ৰা, ‘‘অম্হাকং জনপদং আগমনায পটিঞ্ঞং দেথা’’তি পাদমূলে নিপজ্জিংসু. ভগৰা, ‘‘সুঞ্ঞাগারে খো গহপতযো তথাগতা অভিরমন্তী’’তি আহ. এত্তাৰতা পটিঞ্ঞা দিন্না নাম হোতীতি গহপতযো সল্লক্খেত্ৰা দিন্না নো ভগৰতা পটিঞ্ঞাতি দসবলং ৰন্দিত্ৰা নিক্খমিত্ৰা অন্তরামগ্গে যোজনে যোজনে ঠানে ৰিহারং কারেত্ৰা অনুপুব্বেন কোসম্বিং পত্ৰা, ‘‘লোকে বুদ্ধো উপ্পন্নো’’তি কথযিংসু. তযোপি জনা অত্তনো অত্তনো আরামে মহন্তং ধনপরিচ্চাগং কত্ৰা ভগৰতো ৰসনত্থায ৰিহারে কারাপযিংসু. তত্থ কুক্কুটসেট্ঠিনা কারিতো কুক্কুটারামো নাম অহোসি. পাৰারিকসেট্ঠিনা অম্বৰনে কারিতো পাৰারিকম্বৰনো নাম অহোসি. ঘোসিতেন কারিতো ঘোসিতারামো নাম অহোসি. তং সন্ধায ৰুত্তং – ‘‘ঘোসিতসেট্ঠিনা কারিতে আরামে’’তি.

ভণ্ডনজাতাতিআদীসু কলহস্স পুব্বভাগো ভণ্ডনং নাম, তং জাতং এতেসন্তি ভণ্ডনজাতা. হত্থপরামাসাদিৰসেন মত্থকং পত্তো কলহো জাতো এতেসন্তি কলহজাতা. ৰিরুদ্ধভূতং ৰাদন্তি ৰিৰাদং, তং আপন্নাতি ৰিৰাদাপন্না. মুখসত্তীহীতি ৰাচাসত্তীহি. ৰিতুদন্তাতি ৰিজ্ঝন্তা. তে ন চেৰ অঞ্ঞমঞ্ঞং সঞ্ঞাপেন্তি ন চ সঞ্ঞত্তিং উপেন্তীতি তে অত্থঞ্চ কারণঞ্চ দস্সেত্ৰা নেৰ অঞ্ঞমঞ্ঞং জানাপেন্তি. সচেপি সঞ্ঞাপেতুং আরভন্তি, তথাপি সঞ্ঞত্তিং ন উপেন্তি, জানিতুং ন ইচ্ছন্তীতি অত্থো. নিজ্ঝত্তিযাপি এসেৰ নযো. এত্থ চ নিজ্ঝত্তীতি সঞ্ঞত্তিৰেৰচনমেৰেতং. কস্মা পনেতে ভণ্ডনজাতা অহেসুন্তি? অপ্পমত্তকেন কারণেন.

দ্ৰে কির ভিক্খূ একস্মিং আৰাসে ৰসন্তি ৰিনযধরো চ সুত্তন্তিকো চ. তেসু সুত্তন্তিকো ভিক্খু একদিৰসং ৰচ্চকুটিং পৰিট্ঠো আচমনউদকাৰসেসং ভাজনে ঠপেত্ৰাৰ নিক্খমি. ৰিনযধরো পচ্ছা পৰিট্ঠো তং উদকং দিস্ৰা নিক্খমিত্ৰা তং ভিক্খুং পুচ্ছি, আৰুসো, তযা ইদং উদকং ঠপিতন্তি? আম, আৰুসোতি. ত্ৰমেত্থ আপত্তিভাৰং ন জানাসীতি? আম ন জানামীতি. হোতি, আৰুসো, এত্থ আপত্তীতি. সচে হোতি দেসেস্সামীতি. সচে পন তে, আৰুসো, অসঞ্চিচ্চ অসতিযা কতং, নত্থি তে আপত্তীতি. সো তস্সা আপত্তিযা অনাপত্তিদিট্ঠি অহোসি.

ৰিনযধরো অত্তনো নিস্সিতকানং, ‘‘অযং সুত্তন্তিকো আপত্তিং আপজ্জমানোপি ন জানাতী’’তি আরোচেসি. তে তস্স নিস্সিতকে দিস্ৰা – ‘‘তুম্হাকং উপজ্ঝাযো আপত্তিং আপজ্জিত্ৰাপি আপত্তিভাৰং ন জানাতী’’তি আহংসু. তে গন্ত্ৰা অত্তনো উপজ্ঝাযস্স আরোচেসুং. সো এৰমাহ – ‘‘অযং ৰিনযধরো পুব্বে ‘অনাপত্তী’তি ৰত্ৰা ইদানি ‘আপত্তী’তি ৰদতি, মুসাৰাদী এসো’’তি. তে গন্ত্ৰা, ‘‘তুম্হাকং উপজ্ঝাযো মুসাৰাদী’’তি এৰং অঞ্ঞমঞ্ঞং কলহং ৰড্ঢযিংসু, তং সন্ধাযেতং ৰুত্তং.

ভগৰন্তং এতদৰোচাতি এতং, ‘‘ইধ, ভন্তে, কোসম্বিযং ভিক্খূ ভণ্ডনজাতা’’তিআদিৰচনং অৰোচ. তঞ্চ খো নেৰ পিযকম্যতায ন ভেদাধিপ্পাযেন, অথ খো অত্থকামতায হিতকামতায. সামগ্গিকারকো কিরেস ভিক্খু, তস্মাস্স এতদহোসি – ‘‘যথা ইমে ভিক্খূ ৰিৰাদং আরদ্ধা, ন সক্কা মযা, নাপি অঞ্ঞেন ভিক্খুনা সমগ্গা কাতুং, অপ্পেৰ নাম সদেৰকে লোকে অপ্পটিপুগ্গলো ভগৰা সযং ৰা গন্ত্ৰা, অত্তনো ৰা সন্তিকং পক্কোসাপেত্ৰা এতেসং ভিক্খূনং খন্তিমেত্তাপটিসংযুত্তং সারণীযধম্মদেসনং কথেত্ৰা সামগ্গিং করেয্যা’’তি অত্থকামতায হিতকামতায গন্ত্ৰা অৰোচ.

৪৯২. ছযিমে, ভিক্খৰে, ধম্মা সারণীযাতি হেট্ঠা কলহভণ্ডনৰসেন দেসনা আরদ্ধা. ইমস্মিং ঠানে ছ সারণীযা ধম্মা আগতাতি এৰমিদং কোসম্বিযসুত্তং যথানুসন্ধিনাৰ গতং হোতি. তত্থ সারণীযাতি সরিতব্বযুত্তা অদ্ধানে অতিক্কন্তেপি ন পমুস্সিতব্বা. যো তে ধম্মে পূরেতি, তং সব্রহ্মচারীনং পিযং করোন্তীতি পিযকরণা. গরুং করোন্তীতি গরুকরণা. সঙ্গহাযাতি সঙ্গহণত্থায. অৰিৰাদাযাতি অৰিৰাদনত্থায. সামগ্গিযাতি সমগ্গভাৰত্থায. একীভাৰাযাতি একীভাৰত্থায নিন্নানাকরণায. সংৰত্তন্তীতি ভৰন্তি. মেত্তং কাযকম্মন্তি মেত্তচিত্তেন কত্তব্বং কাযকম্মং. ৰচীকম্মমনোকম্মেসুপি এসেৰ নযো. ইমানি ভিক্খূনং ৰসেন আগতানি, গিহীসুপি লব্ভন্তিযেৰ. ভিক্খূনঞ্হি মেত্তচিত্তেন আভিসমাচারিকধম্মপূরণং মেত্তং কাযকম্মং নাম. গিহীনং চেতিযৰন্দনত্থায বোধিৰন্দনত্থায সঙ্ঘনিমন্তনত্থায গমনং গামং পিণ্ডায পৰিট্ঠে ভিক্খূ দিস্ৰা পচ্চুগ্গমনং পত্তপটিগ্গহণং আসনপঞ্ঞাপনং অনুগমনন্তি এৰমাদিকং মেত্তং কাযকম্মং নাম.

ভিক্খূনং মেত্তচিত্তেন আচারপঞ্ঞত্তিসিক্খাপদং, কম্মট্ঠানকথনং ধম্মদেসনা তেপিটকম্পি বুদ্ধৰচনং মেত্তং ৰচীকম্মং নাম. গিহীনঞ্চ, ‘‘চেতিযৰন্দনত্থায গচ্ছাম, বোধিৰন্দনত্থায গচ্ছাম, ধম্মস্সৰনং করিস্সাম, পদীপমালাপুপ্ফপূজং করিস্সাম, তীণি সুচরিতানি সমাদায ৰত্তিস্সাম, সলাকভত্তাদীনি দস্সাম, ৰস্সাৰাসিকং দস্সাম, অজ্জ সঙ্ঘস্স চত্তারো পচ্চযে দস্সাম, সঙ্ঘং নিমন্তেত্ৰা খাদনীযাদীনি সংৰিদহথ, আসনানি পঞ্ঞাপেথ, পানীযং উপট্ঠপেথ, সঙ্ঘং পচ্চুগ্গন্ত্ৰা আনেথ, পঞ্ঞত্তাসনে নিসীদাপেত্ৰা ছন্দজাতা উস্সাহজাতা ৰেয্যাৰচ্চং করোথা’’তিআদিকথনকালে মেত্তং ৰচীকম্মং নাম.

ভিক্খূনং পাতোৰ উট্ঠায সরীরপটিজগ্গনং চেতিযঙ্গণৰত্তাদীনি চ কত্ৰা ৰিৰিত্তাসনে নিসীদিত্ৰা, ‘‘ইমস্মিং ৰিহারে ভিক্খূ সুখী হোন্তু, অৰেরা অব্যাপজ্ঝা’’তি চিন্তনং মেত্তং মনোকম্মং নাম. গিহীনং ‘‘অয্যা সুখী হোন্তু, অৰেরা অব্যাপজ্ঝা’’তি চিন্তনং মেত্তং মনোকম্মং নাম.

আৰি চেৰ রহো চাতি সম্মুখা চ পরম্মুখা চ. তত্থ নৰকানং চীৰরকম্মাদীসু সহাযভাৰূপগমনং সম্মুখা মেত্তং কাযকম্মং নাম. থেরানং পন পাদধোৰনৰন্দনবীজনদানাদিভেদম্পি সব্বং সামীচিকম্মং সম্মুখা মেত্তং কাযকম্মং নাম. উভযেহিপি দুন্নিক্খিত্তানং দারুভণ্ডাদীনং তেসু অৰমঞ্ঞং অকত্ৰা অত্তনা দুন্নিক্খিত্তানং ৰিয পটিসামনং পরম্মুখা মেত্তং কাযকম্মং নাম. দেৰত্থেরো তিস্সত্থেরোতি এৰং পগ্গয্হ ৰচনং সম্মুখা মেত্তং ৰচীকম্মং নাম. ৰিহারে অসন্তং পন পরিপুচ্ছন্তস্স, কুহিং অম্হাকং দেৰত্থেরো, অম্হাকং তিস্সত্থেরো কদা নু খো আগমিস্সতীতি এৰং মমাযনৰচনং পরম্মুখা মেত্তং ৰচীকম্মং নাম. মেত্তাসিনেহসিনিদ্ধানি পন নযনানি উম্মীলেত্ৰা সুপ্পসন্নেন মুখেন ওলোকনং সম্মুখা মেত্তং মনোকম্মং নাম. দেৰত্থেরো, তিস্সত্থেরো অরোগো হোতু অপ্পাবাধোতি সমন্নাহরণং পরম্মুখা মেত্তং মনোকম্মং নাম.

লাভাতি চীৰরাদযো লদ্ধপচ্চযা. ধম্মিকাতি কুহনাদিভেদং মিচ্ছাজীৰং ৰজ্জেত্ৰা ধম্মেন সমেন ভিক্খাচরিযৰত্তেন উপ্পন্না. অন্তমসো পত্তপরিযাপন্নমত্তম্পীতি পচ্ছিমকোটিযা পত্তে পরিযাপন্নং পত্তস্স অন্তোগতং দ্ৰত্তিকটচ্ছুভিক্খামত্তম্পি. অপ্পটিৰিভত্তভোগীতি এত্থ দ্ৰে পটিৰিভত্তানি নাম আমিসপটিৰিভত্তং পুগ্গলপটিৰিভত্তঞ্চ. তত্থ, ‘‘এত্তকং দস্সামি, এত্তকং ন দস্সামী’’তি এৰং চিত্তেন ৰিভজনং আমিসপটিৰিভত্তং নাম. ‘‘অসুকস্স দস্সামি, অসুকস্স ন দস্সামী’’তি এৰং চিত্তেন ৰিভজনং পন পুগ্গলপটিৰিভত্তং নাম. তদুভযম্পি অকত্ৰা যো অপ্পটিৰিভত্তং ভুঞ্জতি, অযং অপ্পটিৰিভত্তভোগী নাম.

সীলৰন্তেহি সব্রহ্মচারীহি সাধারণভোগীতি এত্থ সাধারণভোগিনো ইদং লক্খণং, যং যং পণীতং লব্ভতি, তং তং নেৰ লাভেন লাভং জিগীসনামুখেন গিহীনং দেতি, ন অত্তনা পরিভুঞ্জতি; পটিগ্গণ্হন্তোৰ সঙ্ঘেন সাধারণং হোতূতি গহেত্ৰা গণ্ডিং পহরিত্ৰা পরিভুঞ্জিতব্বং সঙ্ঘসন্তকং ৰিয পস্সতি. ইদং পন সারণীযধম্মং কো পূরেতি, কো ন পূরেতীতি? দুস্সীলো তাৰ ন পূরেতি. ন হি তস্স সন্তকং সীলৰন্তা গণ্হন্তি. পরিসুদ্ধসীলো পন ৰত্তং অখণ্ডেন্তো পূরেতি.

তত্রিদং ৰত্তং – যো হি ওদিস্সকং কত্ৰা মাতু ৰা পিতু ৰা আচরিযুপজ্ঝাযাদীনং ৰা দেতি, সো দাতব্বং দেতি, সারণীযধম্মো পনস্স ন হোতি, পলিবোধজগ্গনং নাম হোতি. সারণীযধম্মো হি মুত্তপলিবোধস্সেৰ ৰট্টতি, তেন পন ওদিস্সকং দেন্তেন গিলানগিলানুপট্ঠাকআগন্তুকগমিকানঞ্চেৰ নৰপব্বজিতস্স চ সঙ্ঘাটিপত্তগ্গহণং অজানন্তস্স দাতব্বং. এতেসং দত্ৰা অৰসেসং থেরাসনতো পট্ঠায থোকং থোকং অদত্ৰা যো যত্তকং গণ্হাতি, তস্স তত্তকং দাতব্বং. অৰসিট্ঠে অসতি পুন পিণ্ডায চরিত্ৰা থেরাসনতো পট্ঠায যং যং পণীতং, তং তং দত্ৰা সেসং পরিভুঞ্জিতব্বং, ‘‘সীলৰন্তেহী’’তি ৰচনতো দুস্সীলস্স অদাতুম্পি ৰট্টতি.

অযং পন সারণীযধম্মো সুসিক্খিতায পরিসায সুপূরো হোতি, নো অসিক্খিতায পরিসায. সুসিক্খিতায হি পরিসায যো অঞ্ঞতো লভতি, সো ন গণ্হাতি, অঞ্ঞতো অলভন্তোপি পমাণযুত্তমেৰ গণ্হাতি, ন অতিরেকং. অযঞ্চ পন সারণীযধম্মো এৰং পুনপ্পুনং পিণ্ডায চরিত্ৰা লদ্ধং লদ্ধং দেন্তস্সাপি দ্ৰাদসহি ৰস্সেহি পূরতি, ন ততো ওরং. সচে হি দ্ৰাদসমেপি ৰস্সে সারণীযধম্মপূরকো পিণ্ডপাতপূরং পত্তং আসনসালাযং ঠপেত্ৰা নহাযিতুং গচ্ছতি, সঙ্ঘত্থেরো চ কস্সেসো পত্তোতি? সারণীযধম্মপূরকস্সাতি ৰুত্তে – ‘‘আহরথ ন’’ন্তি সব্বং পিণ্ডপাতং ৰিচারেত্ৰা ভুঞ্জিত্ৰা চ রিত্তপত্তং ঠপেতি. অথ সো ভিক্খু রিত্তপত্তং দিস্ৰা, ‘‘ময্হং অসেসেত্ৰাৰ পরিভুঞ্জিংসূ’’তি দোমনস্সং উপ্পাদেতি, সারণীযধম্মো ভিজ্জতি, পুন দ্ৰাদস ৰস্সানি পূরেতব্বো হোতি, তিত্থিযপরিৰাসসদিসো হেস. সকিং খণ্ডে জাতে পুন পূরেতব্বোৰ. যো পন, ‘‘লাভা ৰত মে, সুলদ্ধং ৰত মে, যস্স মে পত্তগতং অনাপুচ্ছাৰ সব্রহ্মচারী পরিভুঞ্জন্তী’’তি সোমনস্সং জনেতি, তস্স পুণ্ণো নাম হোতি.

এৰং পূরিতসারণীযধম্মস্স পন নেৰ ইস্সা, ন মচ্ছরিযং হোতি, সো মনুস্সানং পিযো হোতি, সুলভপচ্চযো; পত্তগতমস্স দীযমানম্পি ন খীযতি, ভাজনীযভণ্ডট্ঠানে অগ্গভণ্ডং লভতি, ভযে ৰা ছাতকে ৰা সম্পত্তে দেৰতা উস্সুক্কং আপজ্জন্তি.

তত্রিমানি ৰত্থূনি – লেণগিরিৰাসী তিস্সত্থেরো কির মহাগিরিগামং উপনিস্সায ৰসতি. পঞ্ঞাস মহাথেরা নাগদীপং চেতিযৰন্দনত্থায গচ্ছন্তা গিরিগামে পিণ্ডায চরিত্ৰা কিঞ্চি অলদ্ধা নিক্খমিংসু. থেরো পৰিসন্তো তে দিস্ৰা পুচ্ছি – ‘‘লদ্ধং, ভন্তে’’তি? ৰিচরিম্হা, আৰুসোতি. সো অলদ্ধভাৰং ঞত্ৰা আহ – ‘‘যাৰাহং, ভন্তে, আগচ্ছামি, তাৰ ইধেৰ হোথা’’তি. মযং, আৰুসো, পঞ্ঞাস জনা পত্ততেমনমত্তম্পি ন লভিম্হাতি. নেৰাসিকা নাম, ভন্তে, পটিবলা হোন্তি, অলভন্তাপি ভিক্খাচারমগ্গসভাৰং জানন্তীতি. থেরা আগমিংসু. থেরো গামং পাৰিসি. ধুরগেহেযেৰ মহাউপাসিকা খীরভত্তং সজ্জেত্ৰা থেরং ওলোকযমানা ঠিতা থেরস্স দ্ৰারং সম্পত্তস্সেৰ পত্তং পূরেত্ৰা অদাসি. সো তং আদায থেরানং সন্তিকং গন্ত্ৰা, ‘‘গণ্হথ, ভন্তে’’তি সঙ্ঘত্থেরমাহ. থেরো, ‘‘অম্হেহি এত্তকেহি কিঞ্চি ন লদ্ধং, অযং সীঘমেৰ গহেত্ৰা আগতো, কিং নু খো’’তি সেসানং মুখং ওলোকেসি. থেরো ওলোকনাকারেনেৰ ঞত্ৰা – ‘‘ধম্মেন সমেন লদ্ধপিণ্ডপাতো, নিক্কুক্কুচ্চা গণ্হথ ভন্তে’’তিআদিতো পট্ঠায সব্বেসং যাৰদত্থং দত্ৰা অত্তনাপি যাৰদত্থং ভুঞ্জি.

অথ নং ভত্তকিচ্চাৰসানে থেরা পুচ্ছিংসু – ‘‘কদা, আৰুসো, লোকুত্তরধম্মং পটিৰিজ্ঝী’’তি? নত্থি মে, ভন্তে, লোকুত্তরধম্মোতি. ঝানলাভীসি, আৰুসোতি? এতম্পি মে, ভন্তে, নত্থীতি. ননু, আৰুসো, পাটিহারিযন্তি? সারণীযধম্মো মে, ভন্তে, পূরিতো, তস্স মে ধম্মস্স পূরিতকালতো পট্ঠায সচেপি ভিক্খুসতসহস্সং হোতি, পত্তগতং ন খীযতীতি. সাধু সাধু, সপ্পুরিস, অনুচ্ছৰিকমিদং তুয্হন্তি. ইদং তাৰ পত্তগতং ন খীযতীতি এত্থ ৰত্থু.

অযমেৰ পন থেরো চেতিযপব্বতে গিরিভণ্ডমহাপূজায দানট্ঠানং গন্ত্ৰা, ‘‘ইমস্মিং ঠানে কিং ৰরভণ্ড’’ন্তি পুচ্ছতি. দ্ৰে সাটকা, ভন্তেতি. এতে ময্হং পাপুণিস্সন্তীতি. তং সুত্ৰা অমচ্চো রঞ্ঞো আরোচেসি – ‘‘একো দহরো এৰং ৰদতী’’তি. ‘‘দহরস্সেৰং চিত্তং, মহাথেরানং পন সুখুমসাটকা ৰট্টন্তী’’তি ৰত্ৰা, ‘‘মহাথেরানং দস্সামী’’তি ঠপেসি. তস্স ভিক্খুসঙ্ঘে পটিপাটিযা ঠিতে দেন্তস্স মত্থকে ঠপিতাপি তে সাটকা হত্থং নারোহন্তি, অঞ্ঞেৰ আরোহন্তি. দহরস্স দানকালে পন হত্থং আরুল়্হা. সো তস্স হত্থে ঠপেত্ৰা অমচ্চস্স মুখং ওলোকেত্ৰা দহরং নিসীদাপেত্ৰা দানং দত্ৰা সঙ্ঘং ৰিস্সজ্জেত্ৰা দহরস্স সন্তিকে নিসীদিত্ৰা, ‘‘কদা, ভন্তে, ইমং ধম্মং পটিৰিজ্ঝিত্থা’’তি আহ. সো পরিযাযেনপি অসন্তং অৰদন্তো, ‘‘নত্থি ময্হং, মহারাজ, লোকুত্তরধম্মো’’তি আহ. ননু, ভন্তে, পুব্বেৰ অৰচুত্থাতি? আম, মহারাজ, সারণীযধম্মপূরকো অহং, তস্স মে ধম্মস্স পূরিতকালতো পট্ঠায ভাজনীযভণ্ডট্ঠানে অগ্গভণ্ডং পাপুণাতীতি. সাধু সাধু, ভন্তে, অনুচ্ছৰিকমিদং তুম্হাকন্তি ৰন্দিত্ৰা পক্কামি. ইদং ভাজনীযভণ্ডট্ঠানে অগ্গভণ্ডং পাপুণাতীতি এত্থ ৰত্থু.

ব্রাহ্মণতিস্সভযে পন ভাতরগামৰাসিনো নাগত্থেরিযা অনারোচেত্ৰাৰ পলাযিংসু. থেরী পচ্চূসকালে, ‘‘অতিৰিয অপ্পনিগ্ঘোসো গামো, উপধারেথ তাৰা’’তি দহরভিক্খুনিযো আহ. তা গন্ত্ৰা সব্বেসং গতভাৰং ঞত্ৰা আগম্ম থেরিযা আরোচেসুং. সা সুত্ৰা, ‘‘মা তুম্হে তেসং গতভাৰং চিন্তযিত্থ, অত্তনো উদ্দেসপরিপুচ্ছাযোনিসোমনসিকারেসুযেৰ যোগং করোথা’’তি ৰত্ৰা ভিক্খাচারৰেলায পারুপিত্ৰা অত্তদ্ৰাদসমা গামদ্ৰারে নিগ্রোধরুক্খমূলে অট্ঠাসি. রুক্খে অধিৰত্থা দেৰতা দ্ৰাদসন্নম্পি ভিক্খুনীনং পিণ্ডপাতং দত্ৰা, ‘‘অয্যে, অঞ্ঞত্থ মা গচ্ছথ, নিচ্চং ইধেৰ এথা’’তি আহ. থেরিযা পন কনিট্ঠভাতা নাগত্থেরো নাম অত্থি. সো, ‘‘মহন্তং ভযং, ন সক্কা ইধ যাপেতুং, পরতীরং গমিস্সামাতি অত্তদ্ৰাদসমোৰ অত্তনো ৰসনট্ঠানা নিক্খন্তো থেরিং দিস্ৰা গমিস্সামী’’তি ভাতরগামং আগতো. থেরী, ‘‘থেরা আগতা’’তি সুত্ৰা তেসং সন্তিকং গন্ত্ৰা, কিং অয্যাতি পুচ্ছি. সো তং পৰত্তিং আচিক্খি. সা, ‘‘অজ্জ একদিৰসং ৰিহারেযেৰ ৰসিত্ৰা স্ৰেৰ গমিস্সথা’’তি আহ. থেরা ৰিহারং অগমংসু.

থেরী পুনদিৰসে রুক্খমূলে পিণ্ডায চরিত্ৰা থেরং উপসঙ্কমিত্ৰা, ‘‘ইমং পিণ্ডপাতং পরিভুঞ্জথা’’তি আহ. থেরো, ‘‘ৰট্টিস্সতি থেরী’’তি ৰত্ৰা তুণ্হী অট্ঠাসি. ধম্মিকো তাতা পিণ্ডপাতো কুক্কুচ্চং অকত্ৰা পরিভুঞ্জথাতি. ৰট্টিস্সতি থেরীতি. সা পত্তং গহেত্ৰা আকাসে খিপি, পত্তো আকাসে অট্ঠাসি. থেরো, ‘‘সত্ততালমত্তে ঠিতম্পি ভিক্খুনীভত্তমেৰ, থেরীতি ৰত্ৰা ভযং নাম সব্বকালং ন হোতি, ভযে ৰূপসন্তে অরিযৰংসং কথযমানো, ‘ভো পিণ্ডপাতিক ভিক্খুনীভত্তং ভুঞ্জিত্ৰা ৰীতিনামযিত্থা’তি চিত্তেন অনুৰদিযমানো সন্থম্ভেতুং ন সক্খিস্সামি, অপ্পমত্তা হোথ থেরিযো’’তি মগ্গং আরুহি.

রুক্খদেৰতাপি, ‘‘সচে থেরো থেরিযা হত্থতো পিণ্ডপাতং পরিভুঞ্জিস্সতি, ন নং নিৰত্তেস্সামি, সচে পন ন পরিভুঞ্জিস্সতি, নিৰত্তেস্সামী’’তি চিন্তযমানা ঠত্ৰা থেরস্স গমনং দিস্ৰা রুক্খা ওরুয্হ পত্তং, ভন্তে, দেথাতি পত্তং গহেত্ৰা থেরং রুক্খমূলংযেৰ আনেত্ৰা আসনং পঞ্ঞাপেত্ৰা পিণ্ডপাতং দত্ৰা কতভত্তকিচ্চং পটিঞ্ঞং কারেত্ৰা দ্ৰাদস ভিক্খুনিযো, দ্ৰাদস চ ভিক্খূ সত্ত ৰস্সানি উপট্ঠহি. ইদং দেৰতা উস্সুক্কং আপজ্জন্তীতি এত্থ ৰত্থু, তত্র হি থেরী সারণীযধম্মপূরিকা অহোসি.

অখণ্ডানীতিআদীসু যস্স সত্তসু আপত্তিক্খন্ধেসু আদিম্হি ৰা অন্তে ৰা সিক্খাপদং ভিন্নং হোতি, তস্স সীলং পরিযন্তে ছিন্নসাটকো ৰিয খণ্ডং নাম. যস্স পন ৰেমজ্ঝে ভিন্নং, তস্স মজ্ঝে ছিদ্দসাটকো ৰিয ছিদ্দং নাম হোতি. যস্স পন পটিপাটিযা দ্ৰে তীণি ভিন্নানি, তস্স পিট্ঠিযং ৰা কুচ্ছিযং ৰা উট্ঠিতেন ৰিসভাগৰণ্ণেন কাল়রত্তাদীনং অঞ্ঞতরৰণ্ণা গাৰী ৰিয সবলং নাম হোতি. যস্স পন অন্তরন্তরা ভিন্নানি, তস্স অন্তরন্তরা ৰিসভাগবিন্দুচিত্রা গাৰী ৰিয কম্মাসং নাম হোতি. যস্স পন সব্বেন সব্বং অভিন্নানি, তস্স তানি সীলানি অখণ্ডানি অচ্ছিদ্দানি অসবলানি অকম্মাসানি নাম হোন্তি. তানি পনেতানি তণ্হাদাসব্যতো মোচেত্ৰা ভুজিস্সভাৰকরণতো ভুজিস্সানি. বুদ্ধাদীহি ৰিঞ্ঞূহি পসত্থত্তা ৰিঞ্ঞুপ্পসত্থানি. তণ্হাদিট্ঠীহি অপরামট্ঠত্তা, ‘‘ইদং নাম ত্ৰং আপন্নপুব্বো’’তি কেনচি পরামট্ঠুং অসক্কুণেয্যত্তা চ অপরামট্ঠানি. উপচারসমাধিং ৰা অপ্পনাসমাধিং ৰা সংৰত্তযন্তীতি সমাধিসংৰত্তনিকানীতি ৰুচ্চন্তি. সীলসামঞ্ঞগতো ৰিহরতীতি তেসু তেসু দিসাভাগেসু ৰিহরন্তেহি ভিক্খূহি সদ্ধিং সমানভাৰূপগতসীলো ৰিহরতি. সোতাপন্নাদীনঞ্হি সীলং সমুদ্দন্তরেপি দেৰলোকেপি ৰসন্তানং অঞ্ঞেসং সোতাপন্নাদীনং সীলেন সমানমেৰ হোতি, নত্থি মগ্গসীলে নানত্তং, তং সন্ধাযেতং ৰুত্তং.

যাযং দিট্ঠীতি মগ্গসম্পযুত্তা সম্মাদিট্ঠি. অরিযাতি নিদ্দোসা. নিয্যাতীতি নিয্যানিকা. তক্করস্সাতি যো তথাকারী হোতি. দুক্খক্খযাযাতি সব্বদুক্খক্খযত্থং. দিট্ঠিসামঞ্ঞগতোতি সমানদিট্ঠিভাৰং উপগতো হুত্ৰা ৰিহরতি. অগ্গন্তি জেট্ঠকং. সব্বগোপানসিযো সঙ্গণ্হাতীতি সঙ্গাহিকং. সব্বগোপানসীনং সঙ্ঘাটং করোতীতি সঙ্ঘাটনিকং. সঙ্ঘাটনিযন্তি অত্থো. যদিদং কূটন্তি যমেতং কূটাগারকণ্ণিকাসঙ্খাতং কূটং নাম. পঞ্চভূমিকাদিপাসাদা হি কূটবদ্ধাৰ তিট্ঠন্তি. যস্মিং পতিতে মত্তিকং আদিং কত্ৰা সব্বে পতন্তি. তস্মা এৰমাহ. এৰমেৰ খোতি যথা কূটং কূটাগারস্স, এৰং ইমেসম্পি সারণীযধম্মানং যা অযং অরিযা দিট্ঠি, সা অগ্গা চ সঙ্গাহিকা চ সঙ্ঘাটনিযা চাতি দট্ঠব্বা.

৪৯৩. কথঞ্চ, ভিক্খৰে, যাযং দিট্ঠীতি এত্থ, ভিক্খৰে, যাযং সোতাপত্তিমগ্গদিট্ঠি অরিযা নিয্যানিকা নিয্যাতি তক্করস্স সম্মা দুক্খক্খযাযাতি ৰুত্তা, সা কথং কেন কারণেন নিয্যাতীতি অত্থো. পরিযুট্ঠিতচিত্তোৰ হোতীতি এত্তাৰতাপি পরিযুট্ঠিতচিত্তোযেৰ নাম হোতীতি অত্থো. এস নযো সব্বত্থ. সুপ্পণিহিতং মে মানসন্তি ময্হং চিত্তং সুট্ঠু ঠপিতং. সচ্চানং বোধাযাতি চতুন্নং সচ্চানং বোধত্থায. অরিযন্তিআদীসু তং ঞাণং যস্মা অরিযানং হোতি, ন পুথুজ্জনানং, তস্মা অরিযন্তি ৰুত্তং. যেসং পন লোকুত্তরধম্মোপি অত্থি, তেসংযেৰ হোতি, ন অঞ্ঞেসং, তস্মা লোকুত্তরন্তি ৰুত্তং. পুথুজ্জনানং পন অভাৰতো অসাধারণং পুথুজ্জনেহীতি ৰুত্তং. এস নযো সব্বৰারেসু.

৪৯৪. লভামি পচ্চত্তং সমথন্তি অত্তনো চিত্তে সমথং লভামীতি অত্থো. নিব্বুতিযম্পি এসেৰ নযো. এত্থ চ সমথোতি একগ্গতা. নিব্বুতীতি কিলেসৰূপসমো.

৪৯৫. তথারূপায দিট্ঠিযাতি এৰরূপায সোতাপত্তিমগ্গদিট্ঠিযা.

৪৯৬. ধম্মতাযাতি সভাৰেন. ধম্মতা এসাতি সভাৰো এস. ৰুট্ঠানং পঞ্ঞাযতীতি সঙ্ঘকম্মৰসেন ৰা দেসনায ৰা ৰুট্ঠানং দিস্সতি. অরিযসাৰকো হি আপত্তিং আপজ্জন্তো গরুকাপত্তীসু কুটিকারসদিসং, লহুকাপত্তীসু সহসেয্যাদিসদিসং অচিত্তকাপত্তিংযেৰ আপজ্জতি, তম্পি অসঞ্চিচ্চ, নো সঞ্চিচ্চ, আপন্নং ন পটিচ্ছাদেতি. তস্মা অথ খো নং খিপ্পমেৰাতিআদিমাহ. দহরোতি তরুণো. কুমারোতি ন মহল্লকো. মন্দোতি চক্খুসোতাদীনং মন্দতায মন্দো. উত্তানসেয্যকোতি অতিদহরতায উত্তানসেয্যকো, দক্খিণেন ৰা ৰামেন ৰা পস্সেন সযিতুং ন সক্কোতীতি অত্থো. অঙ্গারং অক্কমিত্ৰাতি ইতো চিতো চ পসারিতেন হত্থেন ৰা পাদেন ৰা ফুসিত্ৰা. এৰং ফুসন্তানং পন মনুস্সানং ন সীঘং হত্থো ঝাযতি, তথা হি একচ্চে হত্থেন অঙ্গারং গহেত্ৰা পরিৰত্তমানা দূরম্পি গচ্ছন্তি. দহরস্স পন হত্থপাদা সুখুমালা হোন্তি, সো ফুট্ঠমত্তেনেৰ দয্হমানো চিরীতি সদ্দং করোন্তো খিপ্পং পটিসংহরতি, তস্মা ইধ দহরোৰ দস্সিতো. মহল্লকো চ দয্হন্তোপি অধিৰাসেতি, অযং পন অধিৰাসেতুং ন সক্কোতি. তস্মাপি দহরোৰ দস্সিতো. দেসেতীতি আপত্তিপটিগ্গাহকে সভাগপুগ্গলে সতি একং দিৰসং ৰা রত্তিং ৰা অনধিৰাসেত্ৰা রত্তিং চতুরঙ্গেপি তমে সভাগভিক্খুনো ৰসনট্ঠানং গন্ত্ৰা দেসেতিযেৰ.

৪৯৭. উচ্চাৰচানীতি উচ্চনীচানি. কিং করণীযানীতি কিং করোমীতি এৰং ৰত্ৰা কত্তব্বকম্মানি. তত্থ উচ্চকম্মং নাম চীৰরস্স করণং রজনং চেতিযে সুধাকম্মং উপোসথাগারচেতিযঘরবোধিঘরেসু কত্তব্বকম্মন্তি এৰমাদি. অৰচকম্মং নাম পাদধোৰনমক্খনাদিখুদ্দককম্মং, অথ ৰা চেতিযে সুধাকম্মাদি উচ্চকম্মং নাম. তত্থেৰ কসাৰপচনউদকানযনকুচ্ছকরণ নিয্যাসবন্ধনাদি অৰচকম্মং নাম. উস্সুক্কং আপন্নো হোতীতি উস্সুক্কভাৰং কত্তব্বতং পটিপন্নো হোতি. তিব্বাপেক্খো হোতীতি বহলপত্থনো হোতি. থম্বঞ্চ আলুম্পতীতি তিণঞ্চ আলুম্পমানা খাদতি. ৰচ্ছকঞ্চ অপচিনাতীতি ৰচ্ছকঞ্চ অপলোকেতি. তরুণৰচ্ছা হি গাৰী অরঞ্ঞে একতো আগতং ৰচ্ছকং একস্মিং ঠানে নিপন্নং পহায দূরং ন গচ্ছতি, ৰচ্ছকস্স আসন্নট্ঠানে চরমানা তিণং আলুম্পিত্ৰা গীৰং উক্খিপিত্ৰা একন্তং ৰচ্ছকমেৰ চ ৰিলোকেতি, এৰমেৰ সোতাপন্নো উচ্চাৰচানি কিং করণীযানি করোন্তো তন্নিন্নো হোতি, অসিথিলপূরকো তিব্বচ্ছন্দো বহলপত্থনো হুত্ৰাৰ করোতি.

তত্রিদং ৰত্থু – মহাচেতিযে কির সুধাকম্মে করিযমানে একো অরিযসাৰকো একেন হত্থেন সুধাভাজনং, একেন কুচ্ছং গহেত্ৰা সুধাকম্মং করিস্সামীতি চেতিযঙ্গণং আরুল়্হো. একো কাযদল়্হিবহুলো ভিক্খু গন্ত্ৰা থেরস্স সন্তিকে অট্ঠাসি. থেরো অঞ্ঞস্মিং সতি পপঞ্চো হোতীতি তস্মা ঠানা অঞ্ঞং ঠানং গতো. সোপি ভিক্খু তত্থেৰ অগমাসি. থেরো পুন অঞ্ঞং ঠানন্তি এৰং কতিপযট্ঠানে আগতং, – ‘‘সপ্পুরিস মহন্তং চেতিযঙ্গণং কিং অঞ্ঞস্মিং ঠানে ওকাসং ন লভথা’’তি আহ. ন ইতরো পক্কামীতি.

৪৯৮. বলতায সমন্নাগতোতি বলেন সমন্নাগতো. অট্ঠিং কত্ৰাতি অত্থিকভাৰং কত্ৰা, অত্থিকো হুত্ৰাতি অত্থো. মনসিকত্ৰাতি মনস্মিং করিত্ৰা. সব্বচেতসা সমন্নাহরিত্ৰাতি অপ্পমত্তকম্পি ৰিক্খেপং অকরোন্তো সকলচিত্তেন সমন্নাহরিত্ৰা. ওহিতসোতোতি ঠপিতসোতো. অরিযসাৰকা হি পিযধম্মস্সৰনা হোন্তি, ধম্মস্সৰনগ্গং গন্ত্ৰা নিদ্দাযমানা ৰা যেন কেনচি সদ্ধিং সল্লপমানা ৰা ৰিক্খিত্তচিত্তা ৰা ন নিসীদন্তি, অথ খো অমতং পরিভুঞ্জন্তা ৰিয অতিত্তাৰ হোন্তি ধম্মস্সৰনে, অথ অরুণং উগ্গচ্ছতি. তস্মা এৰমাহ.

৫০০. ধম্মতা সুসমন্নিট্ঠা হোতীতি সভাৰো সুট্ঠু সমন্নেসিতো হোতি. সোতাপত্তিফলসচ্ছিকিরিযাযাতি করণৰচনং, সোতাপত্তিফলসচ্ছিকতঞাণেনাতি অত্থো. এৰং সত্তঙ্গসমন্নাগতোতি এৰং ইমেহি সত্তহি মহাপচ্চৰেক্খণঞাণেহি সমন্নাগতো. অযং তাৰ আচরিযানং সমানকথা. লোকুত্তরমগ্গো হি বহুচিত্তক্খণিকো নাম নত্থি.

ৰিতণ্ডৰাদী পন একচিত্তক্খণিকো নাম মগ্গো নত্থি, ‘‘এৰং ভাৰেয্য সত্ত ৰস্সানী’’তি হি ৰচনতো সত্তপি ৰস্সানি মগ্গভাৰনা হোন্তি. কিলেসা পন লহু ছিজ্জন্তা সত্তহি ঞাণেহি ছিজ্জন্তীতি ৰদতি. সো সুত্তং আহরাতি ৰত্তব্বো, অদ্ধা অঞ্ঞং সুত্তং অপস্সন্তো, ‘‘ইদমস্স পঠমং ঞাণং অধিগতং হোতি, ইদমস্স দুতিযং ঞাণং…পে… ইদমস্স সত্তমং ঞাণং অধিগতং হোতী’’তি ইমমেৰ আহরিত্ৰা দস্সেস্সতি. ততো ৰত্তব্বো কিং পনিদং সুত্তং নেয্যত্থং নীতত্থন্তি. ততো ৰক্খতি – ‘‘নীতত্থত্থং, যথাসুত্তং তথেৰ অত্থো’’তি. সো ৰত্তব্বো – ‘‘ধম্মতা সুসমন্নিট্ঠা হোতি সোতাপত্তিফলসচ্ছিকিরিযাযাতি এত্থ কো অত্থো’’তি? অদ্ধা সোতাপত্তিফলসচ্ছিকিরিযাযত্থোতি ৰক্খতি. ততো পুচ্ছিতব্বো, ‘‘মগ্গসমঙ্গী ফলং সচ্ছিকরোতি, ফলসমঙ্গী’’তি. জানন্তো, ‘‘ফলসমঙ্গী সচ্ছিকরোতী’’তি ৰক্খতি. ততো ৰত্তব্বো, – ‘‘এৰং সত্তঙ্গসমন্নাগতো খো, ভিক্খৰে, অরিযসাৰকো সোতাপত্তিফলসমন্নাগতো হোতীতি ইধ মগ্গং অভাৰেত্ৰা মণ্ডূকো ৰিয উপ্পতিত্ৰা অরিযসাৰকো ফলমেৰ গণ্হিস্সতি. মা সুত্তং মে লদ্ধন্তি যং ৰা তং ৰা অৰচ. পঞ্হং ৰিস্সজ্জেন্তেন নাম আচরিযসন্তিকে ৰসিত্ৰা বুদ্ধৰচনং উগ্গণ্হিত্ৰা অত্থরসং ৰিদিত্ৰা ৰত্তব্বং হোতী’’তি. ‘‘ইমানি সত্ত ঞাণানি অরিযসাৰকস্স পচ্চৰেক্খণঞাণানেৰ, লোকুত্তরমগ্গো বহুচিত্তক্খণিকো নাম নত্থি, একচিত্তক্খণিকোযেৰা’’তি সঞ্ঞাপেতব্বো. সচে সঞ্জানাতি সঞ্জানাতু. নো চে সঞ্জানাতি, ‘‘গচ্ছ পাতোৰ ৰিহারং পৰিসিত্ৰা যাগুং পিৰাহী’’তি উয্যোজেতব্বো. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

কোসম্বিযসুত্তৰণ্ণনা নিট্ঠিতা.

৯. ব্রহ্মনিমন্তনিকসুত্তৰণ্ণনা

৫০১. এৰং মে সুতন্তি ব্রহ্মনিমন্তনিকসুত্তং. তত্থ পাপকং দিট্ঠিগতন্তি লামকা সস্সতদিট্ঠি. ইদং নিচ্চন্তি ইদং সহ কাযেন ব্রহ্মট্ঠানং অনিচ্চং ‘‘নিচ্চ’’ন্তি ৰদতি. ধুৰাদীনি তস্সেৰ ৰেৰচনানি. তত্থ ধুৰন্তি থিরং. সস্সতন্তি সদা ৰিজ্জমানং. কেৰলন্তি অখণ্ডং সকলং. অচৰনধম্মন্তি অচৰনসভাৰং. ইদঞ্হি ন জাযতীতিআদীসু ইমস্মিং ঠানে কোচি জাযনকো ৰা জীযনকো ৰা মীযনকো ৰা চৰনকো ৰা উপপজ্জনকো ৰা নত্থীতি সন্ধায ৰদতি. ইতো চ পনঞ্ঞন্তি ইতো সহ কাযকা ব্রহ্মট্ঠানা উত্তরি অঞ্ঞং নিস্সরণং নাম নত্থীতি এৰমস্স থামগতা সস্সতদিট্ঠি উপ্পন্না হোতি. এৰংৰাদী পন সো উপরি তিস্সো ঝানভূমিযো চত্তারো মগ্গা চত্তারি ফলানি নিব্বানন্তি সব্বং পটিবাহতি. অৰিজ্জাগতোতি অৰিজ্জায গতো সমন্নাগতো অঞ্ঞাণী অন্ধীভূতো. যত্র হি নামাতি যো নাম.

৫০২. অথ খো, ভিক্খৰে, মারো পাপিমাতি মারো কথং ভগৰন্তং অদ্দস? সো কির অত্তনো ভৰনে নিসীদিত্ৰা কালেন কালং সত্থারং আৰজ্জেতি – ‘‘অজ্জ সমণো গোতমো কতরস্মিং গামে ৰা নিগমে ৰা ৰসতী’’তি. ইমস্মিং পন কালে আৰজ্জন্তো, ‘‘উক্কট্ঠং নিস্সায সুভগৰনে ৰিহরতী’’তি ঞত্ৰা, ‘‘কত্থ নু খো গতো’’তি ওলোকেন্তো ব্রহ্মলোকং গচ্ছন্তং দিস্ৰা, ‘‘সমণো গোতমো ব্রহ্মলোকং গচ্ছতি, যাৰ তত্থ ধম্মকথং কথেত্ৰা ব্রহ্মগণং মম ৰিসযা নাতিক্কমেতি, তাৰ গন্ত্ৰা ধম্মদেসনাযং ৰিছন্দং করিস্সামী’’তি সত্থু পদানুপদিকো গন্ত্ৰা ব্রহ্মগণস্স অন্তরে অদিস্সমানেন কাযেন অট্ঠাসি. সো, ‘‘সত্থারা বকব্রহ্মা অপসাদিতো’’তি ঞত্ৰা ব্রহ্মুনো উপত্থম্ভো হুত্ৰা অট্ঠাসি. তেন ৰুত্তং – ‘‘অথ খো, ভিক্খৰে, মারো পাপিমা’’তি.

ব্রহ্মপারিসজ্জং অন্ৰাৰিসিত্ৰাতি একস্স ব্রহ্মপারিসজ্জস্স সরীরং পৰিসিত্ৰা. মহাব্রহ্মানং পন ব্রহ্মপুরোহিতানং ৰা অন্ৰাৰিসিতুং ন সক্কোতি. মেতমাসদোতি মা এতং অপসাদযিত্থ. অভিভূতি অভিভৰিত্ৰা ঠিতো জেট্ঠকো. অনভিভূতোতি অঞ্ঞেহি অনভিভূতো. অঞ্ঞদত্থূতি একংসৰচনে নিপাতো. দস্সনৰসেন দসো, সব্বং পস্সতীতি দীপেতি. ৰসৰত্তীতি সব্বজনং ৰসে ৰত্তেতি. ইস্সরোতি লোকে ইস্সরো. কত্তা নিম্মাতাতি লোকস্স কত্তা চ নিম্মাতা চ, পথৰীহিমৰন্তসিনেরুচক্কৰাল়মহাসমুদ্দচন্দিমসূরিযা চ ইমিনা নিম্মিতাতি দীপেতি.

সেট্ঠো সজিতাতি অযং লোকস্স উত্তমো চ সজিতা চ. ‘‘ত্ৰং খত্তিযো নাম হোহি, ত্ৰং ব্রাহ্মণো নাম, ৰেস্সো নাম, সুদ্দো নাম, গহট্ঠো নাম, পব্বজিতো নাম, অন্তমসো ওট্ঠো হোহি, গোণো হোহী’’তি এৰং সত্তানং ৰিসজ্জেতা অযন্তি দস্সেতি. ৰসী পিতা ভূতভব্যানন্তি অযং চিণ্ণৰসিতায ৰসী, অযং পিতা ভূতানঞ্চ ভব্যানঞ্চাতি ৰদতি. তত্থ অণ্ডজজলাবুজা সত্তা অন্তোঅণ্ডকোসে চেৰ অন্তোৰত্থিম্হি চ ভব্যা নাম, বহি নিক্খন্তকালতো পট্ঠায ভূতা. সংসেদজা পঠমচিত্তক্খণে ভব্যা, দুতিযতো পট্ঠায ভূতা. ওপপাতিকা পঠমইরিযাপথে ভব্যা, দুতিযতো পট্ঠায ভূতাতি ৰেদিতব্বা. তে সব্বেপি এতস্স পুত্তাতি সঞ্ঞায, ‘‘পিতা ভূতভব্যান’’ন্তি আহ.

পথৰীগরহকাতি যথা ত্ৰং এতরহি, ‘‘অনিচ্চা দুক্খা অনত্তা’’তি পথৰিং গরহসি জিগুচ্ছসি, এৰং তেপি পথৰীগরহকা অহেসুং, ন কেৰলং ত্ৰংযেৰাতি দীপেতি. আপগরহকাতিআদীসুপি এসেৰ নযো. হীনে কাযে পতিট্ঠিতাতি চতূসু অপাযেসু নিব্বত্তা. পথৰীপসংসকাতি যথা ত্ৰং গরহসি, এৰং অগরহিত্ৰা, ‘‘নিচ্চা ধুৰা সস্সতা অচ্ছেজ্জা অভেজ্জা অক্খযা’’তি এৰং পথৰীপসংসকা পথৰিযা ৰণ্ণৰাদিনো অহেসুন্তি ৰদতি. পথৰাভিনন্দিনোতি তণ্হাদিট্ঠিৰসেন পথৰিযা অভিনন্দিনো. সেসেসুপি এসেৰ নযো. পণীতে কাযে পতিট্ঠিতাতি ব্রহ্মলোকে নিব্বত্তা. তং তাহন্তি তেন কারণেন তং অহং. ইঙ্ঘাতি চোদনত্থে নিপাতো. উপাতিৰত্তিত্থোতি অতিক্কমিত্থ. ‘‘উপাতিৰত্তিতো’’তিপি পাঠো, অযমেৰত্থো. দণ্ডেন পটিপ্পণামেয্যাতি চতুহত্থেন মুগ্গরদণ্ডেন পোথেত্ৰা পলাপেয্য. নরকপপাতেতি সতপোরিসে মহাসোব্ভে. ৰিরাধেয্যাতি হত্থেন গহণযুত্তে ৰা পাদেন পতিট্ঠানযুত্তে ৰা ঠানে গহণপতিট্ঠানানি কাতুং ন সক্কুণেয্য. ননু ত্ৰং ভিক্খু পস্সসীতি ভিক্খু ননু ত্ৰং ইমং ব্রহ্মপরিসং সন্নিপতিতং ওভাসমানং ৰিরোচমানং জোতযমানং পস্সসীতি ব্রহ্মুনো ওৰাদে ঠিতানং ইদ্ধানুভাৰং দস্সেতি. ইতি খো মং, ভিক্খৰে, মারো পাপিমা ব্রহ্মপরিসং উপনেসীতি, ভিক্খৰে, মারো পাপিমা ননু ত্ৰং ভিক্খু পস্সসি ব্রহ্মপরিসং যসেন চ সিরিযা চ ওভাসমানং ৰিরোচমানং জোতযমানং, যদি ত্ৰম্পি মহাব্রহ্মুনো ৰচনং অনতিক্কমিত্ৰা যদেৰ তে ব্রহ্মা ৰদতি, তং করেয্যাসি, ত্ৰম্পি এৰমেৰং যসেন চ সিরিযা চ ৰিরোচেয্যাসীতি এৰং ৰদন্তো মং ব্রহ্মপরিসং উপনেসি উপসংহরি. মা ত্ৰং মঞ্ঞিত্থোতি মা ত্ৰং মঞ্ঞি. মারো ত্ৰমসি পাপিমাতি পাপিম ত্ৰং মহাজনস্স মারণতো মারো নাম, পাপকং লামকং মহাজনস্স অযসং করণতো পাপিমা নামাতি জানামি.

৫০৩. কসিণং আযুন্তি সকলং আযুং. তে খো এৰং জানেয্যুন্তি তে এৰং মহন্তেন তপোকম্মেন সমন্নাগতা, ত্ৰং পন পুরিমদিৰসে জাতো, কিং জানিস্সসি, যস্স তে অজ্জাপি মুখে খীরগন্ধো ৰাযতীতি ঘট্টেন্তো ৰদতি. পথৰিং অজ্ঝোসিস্সসীতি পথৰিং অজ্ঝোসায গিলিত্ৰা পরিনিট্ঠপেত্ৰা তণ্হামানদিট্ঠীহি গণ্হিস্সসি. ওপসাযিকো মে ভৰিস্সসীতি ময্হং সমীপসযো ভৰিস্সসি, মং গচ্ছন্তং অনুগচ্ছিস্সসি, ঠিতং উপতিট্ঠিস্সসি, নিসিন্নং উপনিসীদিস্সসি, নিপন্নং উপনিপজ্জিস্সসীতি অত্থো. ৰত্থুসাযিকোতি মম ৰত্থুস্মিং সযনকো. যথাকামকরণীযো বাহিতেয্যোতি মযা অত্তনো রুচিযা যং ইচ্ছামি, তং কত্তব্বো, বাহিত্ৰা চ পন জজ্ঝরিকাগুম্বতোপি নীচতরো লকুণ্ডটকতরো কাতব্বো ভৰিস্সসীতি অত্থো.

ইমিনা এস ভগৰন্তং উপলাপেতি ৰা অপসাদেতি ৰা. উপলাপেতি নাম সচে খো ত্ৰং, ভিক্খু, তণ্হাদীহি পথৰিং অজ্ঝোসিস্সসি, ওপসাযিকো মে ভৰিস্সসি, মযি গচ্ছন্তে গমিস্সসি, তিট্ঠন্তে ঠস্সসি, নিসিন্নে নিসীদিস্সসি, নিপন্নে নিপজ্জিস্সসি, অহং তং সেসজনং পটিবাহিত্ৰা ৰিস্সাসিকং অব্ভন্তরিকং করিস্সামীতি এৰং তাৰ উপলাপেতি নাম. সেসপদেহি পন অপসাদেতি নাম. অযঞ্হেত্থ অধিপ্পাযো – সচে ত্ৰং পথৰিং অজ্ঝোসিস্সসি, ৰত্থুসাযিকো মে ভৰিস্সসি, মম গমনাদীনি আগমেত্ৰা গমিস্সসি ৰা ঠস্সসি ৰা নিসীদিস্সসি ৰা নিপজ্জিস্সসি ৰা, মম ৰত্থুস্মিং ময্হং আরক্খং গণ্হিস্সসি, অহং পন তং যথাকামং করিস্সামি বাহিত্ৰা চ জজ্ঝরিকাগুম্বতোপি লকুণ্ডকতরন্তি এৰং অপসাদেতি নাম. অযং পন ব্রহ্মা মাননিস্সিতো, তস্মা ইধ অপসাদনাৰ অধিপ্পেতা. আপাদীসুপি এসেৰ নযো.

অপিচ তে অহং ব্রহ্মেতি ইদানি ভগৰা, ‘‘অযং ব্রহ্মা মাননিস্সিতো ‘অহং জানামী’তি মঞ্ঞতি, অত্তনো যসেন সম্মত্তো সরীরং ফুসিতুম্পি সমত্থং কিঞ্চি ন পস্সতি, থোকং নিগ্গহেতুং ৰট্টতী’’তি চিন্তেত্ৰা ইমং দেসনং আরভি. তত্থ গতিঞ্চ পজানামীতি নিপ্ফত্তিঞ্চ পজানামি. জুতিঞ্চাতি আনুভাৰঞ্চ পজানামি. এৰং মহেসক্খোতি এৰং মহাযসো মহাপরিৰারো.

যাৰতা চন্দিমসূরিযা পরিহরন্তীতি যত্তকে ঠানে চন্দিমসূরিযা ৰিচরন্তি. দিসা ভন্তি ৰিরোচনাতি দিসাসু ৰিরোচমানা ওভাসন্তি, দিসা ৰা তেহি ৰিরোচমানা ওভাসন্তি. তাৰ সহস্সধা লোকোতি তত্তকেন পমাণেন সহস্সধা লোকো, ইমিনা চক্কৰাল়েন সদ্ধিং চক্কৰাল়সহস্সন্তি অত্থো. এত্থ তে ৰত্ততে ৰসোতি এত্থ চক্কৰাল়সহস্সে তুয্হং ৰসো ৰত্ততি. পরোপরঞ্চ জানাসীতি এত্থ চক্কৰাল়সহস্সে পরোপরে উচ্চনীচে হীনপ্পণীতে সত্তে জানাসি. অথো রাগৰিরাগিনন্তি ন কেৰলং, ‘‘অযং ইদ্ধো অযং পকতিমনুস্সো’’তি পরোপরং, ‘‘অযং পন সরাগো অযং ৰীতরাগো’’তি এৰং রাগৰিরাগিনম্পি জনং জানাসি. ইত্থংভাৰঞ্ঞথাভাৰন্তি ইত্থংভাৰোতি ইদং চক্কৰাল়ং. অঞ্ঞথাভাৰোতি ইতো সেসং একূনসহস্সং. সত্তানং আগতিং গতিন্তি এত্থ চক্কৰাল়সহস্সে পটিসন্ধিৰসেন সত্তানং আগতিং, চুতিৰসেন গতিং চ জানাসি. তুয্হং পন অতিমহন্তোহমস্মীতি সঞ্ঞা হোতি, সহস্সিব্রহ্মা নাম ত্ৰং, অঞ্ঞেসং পন তযা উত্তরি দ্ৰিসহস্সানং তিসহস্সানং চতুসহস্সানং পঞ্চসহস্সানং দসসহস্সানং সতসহস্সানঞ্চ ব্রহ্মানং পমাণং নত্থি, চতুহত্থায পিলোতিকায পটপ্পমাণং কাতুং ৰাযমন্তো ৰিয মহন্তোস্মীতি সঞ্ঞং করোসীতি নিগ্গণ্হাতি.

৫০৪. ইধূপপন্নোতি ইধ পঠমজ্ঝানভূমিযং উপপন্নো. তেন তং ত্ৰং ন জানাসীতি তেন কারণেন তং কাযং ত্ৰং ন জানাসি. নেৰ তে সমসমোতি জানিতব্বট্ঠানং পত্ৰাপি তযা সমসমো ন হোমি. অভিঞ্ঞাযাতি অঞ্ঞায. কুতো নীচেয্যন্তি তযা নীচতরভাৰো পন ময্হং কুতো.

হেট্ঠূপপত্তিকো কিরেস ব্রহ্মা অনুপ্পন্নে বুদ্ধুপ্পাদে ইসিপব্বজ্জং পব্বজিত্ৰা কসিণপরিকম্মং কত্ৰা সমাপত্তিযো নিব্বত্তেত্ৰা অপরিহীনজ্ঝানো কালং কত্ৰা চতুত্থজ্ঝানভূমিযং ৰেহপ্ফলব্রহ্মলোকে পঞ্চকপ্পসতিকং আযুং গহেত্ৰা নিব্বত্তি. তত্থ যাৰতাযুকং ঠত্ৰা হেট্টূপপত্তিকং কত্ৰা ততিযজ্ঝানং পণীতং ভাৰেত্ৰা সুভকিণ্হব্রহ্মলোকে চতুসট্ঠিকপ্পং আযুং গহেত্ৰা নিব্বত্তি. তত্থ দুতিযজ্ঝানং ভাৰেত্ৰা আভস্সরেসু অট্ঠকপ্পং আযুং গহেত্ৰা নিব্বত্তি. তত্থ পঠমজ্ঝানং ভাৰেত্ৰা পঠমজ্ঝানভূমিযং কপ্পাযুকো হুত্ৰা নিব্বত্তি, সো পঠমকালে অত্তনা কতকম্মঞ্চ নিব্বত্তট্ঠানঞ্চ অঞ্ঞাসি, কালে পন গচ্ছন্তে উভযং পমুস্সিত্ৰা সস্সতদিট্ঠিং উপ্পাদেসি. তেন নং ভগৰা, ‘‘তেন তং ত্ৰং ন জানাসি…পে… কুতো নীচেয্য’’ন্তি আহ.

অথ ব্রহ্মা চিন্তেসি – ‘‘সমণো গোতমো ময্হং আযুঞ্চ নিব্বত্তট্ঠানঞ্চ পুব্বেকতকম্মঞ্চ জানাতি, হন্দ নং পুব্বে কতকম্মং পুচ্ছামী’’তি সত্থারং অত্তনো পুব্বেকতকম্মং পুচ্ছি. সত্থা কথেসি.

পুব্বে কিরেস কুলঘরে নিব্বত্তিত্ৰা কামেসু আদীনৰং দিস্ৰা, ‘‘জাতিজরাব্যাধিমরণস্স অন্তং করিস্সামী’’তি নিক্খম্ম ইসিপব্বজ্জং পব্বজিত্ৰা সমাপত্তিযো নিব্বত্তেত্ৰা অভিঞ্ঞাপাদকজ্ঝানলাভী হুত্ৰা গঙ্গাতীরে পণ্ণসালং কারেত্ৰা ঝানরতিযা ৰীতিনামেতি. তদা চ কালেন কালং সত্থৰাহা পঞ্চহি সকটসতেহি মরুকন্তারং পটিপজ্জন্তি. মরুকন্তারে পন দিৰা ন সক্কা গন্তুং, রত্তিং গমনং হোতি. অথ পুরিমসকটস্স অগ্গযুগে যুত্তবলিবদ্দা গচ্ছন্তা নিৰত্তিত্ৰা আগতমগ্গাভিমুখাৰ অহেসুং. ইতরসকটানি তথেৰ নিৰত্তিত্ৰা অরুণে উগ্গতে নিৰত্তিতভাৰং জানিংসু. তেসঞ্চ তদা কন্তারং অতিক্কমনদিৰসো অহোসি. সব্বং দারুদকং পরিক্খীণং, তস্মা, ‘‘নত্থি দানি অম্হাকং জীৰিত’’ন্তি চিন্তেত্ৰা গোণে চক্কেসু বন্ধিত্ৰা মনুস্সা সকটপচ্ছাযাযং পৰিসিত্ৰা নিপজ্জিংসু. তাপসোপি কালস্সেৰ পণ্ণসালতো নিক্খমিত্ৰা পণ্ণসালদ্ৰারে নিসিন্নো গঙ্গং ওলোকযমানো অদ্দস গঙ্গং মহতা উদকোঘেন ৰুয্হমানং পৰত্তিতমণিক্খন্ধং ৰিয আগচ্ছন্তিং. দিস্ৰা চিন্তেসি – ‘‘অত্থি নু খো ইমস্মিং লোকে এৰরূপস্স মধুরোদকস্স অলাভেন কিলিস্সমানা সত্তা’’তি. সো এৰং আৰজ্জন্তো মরুকন্তারে তং সত্থং দিস্ৰা, ‘‘ইমে সত্তা মা নস্সন্তূ’’তি, ‘‘ইতো মহা উদকক্খন্ধো ছিজ্জিত্ৰা মরুকন্তারে সত্থাভিমুখো গচ্ছতূ’’তি অভিঞ্ঞাচিত্তেন অধিট্ঠাসি. সহচিত্তুপ্পাদেন মাতিকারুল়্হং ৰিয উদকং তত্থ অগমাসি. মনুস্সা উদকসদ্দেন ৰুট্ঠায উদকং দিস্ৰা হত্থতুট্ঠা ন্হাযিত্ৰা পিৰিত্ৰা গোণেপি পাযেত্ৰা সোত্থিনা ইচ্ছিতট্ঠানং অগমংসু. সত্থা তং ব্রহ্মুনো পুব্বকম্মং দস্সেন্তো –

‘‘যং ত্ৰং অপাযেসি বহূ মনুস্সে,

পিপাসিতে ঘম্মনি সম্পরেতে;

তং তে পুরাণং ৰতসীলৰত্তং,

সুত্তপ্পবুদ্ধোৰ অনুস্সরামী’’তি. (জা. ১.৭.৭১) –

ইমং গাথমাহ.

অপরস্মিং সমযে তাপসো গঙ্গাতীরে পণ্ণসালং মাপেত্ৰা আরঞ্ঞকং গামং নিস্সায ৰসতি. তেন চ সমযেন চোরা তং গামং পহরিত্ৰা হত্থসারং গহেত্ৰা গাৰিযো চ করমরে চ গহেত্ৰা গচ্ছন্তি. গাৰোপি সুনখাপি মনুস্সাপি মহাৰিরৰং ৰিরৰন্তি. তাপসো তং সদ্দং সুত্ৰা ‘‘কিং নু খো এত’’ন্তি আৰজ্জন্তো, ‘‘মনুস্সানং ভযং উপ্পন্ন’’ন্তি ঞত্ৰা, ‘‘মযি পস্সন্তে ইমে সত্তা মা নস্সন্তূ’’তি অভিঞ্ঞাপাদকজ্ঝানং সমাপজ্জিত্ৰা ৰুট্ঠায অভিঞ্ঞাচিত্তেন চোরানং পটিপথে চতুরঙ্গিনিসেনং মাপেসি কম্মসজ্জং আগচ্ছন্তিং. চোরা দিস্ৰা, ‘‘রাজা’’তি তে মঞ্ঞমানা ৰিলোপং ছড্ডেত্ৰা পক্কমিংসু. তাপসো ‘‘যং যস্স সন্তকং, তং তস্সেৰ হোতূ’’তি অধিট্ঠাসি, তং তথেৰ অহোসি. মহাজনো সোত্থিভাৰং পাপুণি. সত্থা ইদম্পি তস্স পুব্বকম্মং দস্সেন্তো –

‘‘যং এণিকূলস্মিং জনং গহীতং,

অমোচযী গয্হক নীযমানং;

তং তে পুরাণং ৰতসীলৰত্তং,

সুত্তপ্পবুদ্ধোৰ অনুস্সরামী’’তি. (জা. ১.৭.৭২) –

ইমং গাথমাহ. এত্থ এণিকূলস্মিন্তি গঙ্গাতীরে.

পুন একস্মিং সমযে উপরিগঙ্গাৰাসিকং কুলং হেট্ঠাগঙ্গাৰাসিকেন কুলেন সদ্ধিং মিত্তসন্থৰং কত্ৰা নাৰাসঙ্ঘাটং বন্ধিত্ৰা বহুং খাদনীযভোজনীযঞ্চেৰ গন্ধমালাদীনি চ আরোপেত্ৰা গঙ্গাসোতেন আগচ্ছতি. মনুস্সা খাদমানা ভুঞ্জমানা নচ্চন্তা গাযন্তা দেৰৰিমানেন গচ্ছন্তা ৰিয বলৰসোমনস্সা অহেসুং. গঙ্গেয্যকো নাগো দিস্ৰা কুপিতো, ‘‘ইমে মযি সঞ্ঞম্পি ন করোন্তি, ইদানি নে সমুদ্দমেৰ পাপেস্সামী’’তি মহন্তং অত্তভাৰং মাপেত্ৰা উদকং দ্ৰিধা ভিন্দিত্ৰা উট্ঠায ফণং কত্ৰা সুস্সূকারং করোন্তো অট্ঠাসি. মহাজনো দিস্ৰা ভীতো ৰিস্সরমকাসি. তাপসো পণ্ণসালায নিসিন্নো সুত্ৰা, ‘‘ইমে গাযন্তা নচ্চন্তা সোমনস্সজাতা আগচ্ছন্তি, ইদানি পন ভযরৰং রৰিংসু, কিং নু খো’’তি আৰজ্জন্তো নাগরাজং দিস্ৰা, ‘‘মযি পস্সন্তে ইমে সত্তা মা নস্সন্তূ’’তি অভিঞ্ঞাপাদকজ্ঝানং সমাপজ্জিত্ৰা অত্তভাৰং ৰিজহিত্ৰা সুপণ্ণৰণ্ণং মাপেত্ৰা নাগরাজস্স দস্সেসি. নাগরাজা ভীতো ফণং সংহরিত্ৰা উদকং পৰিট্ঠো. মহাজনো সোত্থিভাৰং পাপুণি. সত্থা ইদম্পি তস্স পুব্বকম্মং দস্সেন্তো –

‘‘গঙ্গায সোতস্মিং গহীতনাৰং,

লুদ্দেন নাগেন মনুস্সকপ্পা;

অমোচযিত্থ বলসা পসয্হ,

তং তে পুরাণং ৰতসীলৰত্তং;

সুত্তপ্পবুদ্ধোৰ অনুস্সরামী’’তি. (জা. ১.৭.৭৩) –

ইমং গাথমাহ.

অপরস্মিং সমযে এস ইসিপব্বজ্জং পব্বজিত্ৰা কেসৰো নাম তাপসো অহোসি. তেন সমযেন অম্হাকং বোধিসত্তো কপ্পো নাম মাণৰো কেসৰস্স বদ্ধচরো অন্তেৰাসিকো হুত্ৰা আচরিযস্স কিংকারপটিস্সাৰী মনাপচারী বুদ্ধিসম্পন্নো অত্থচরো অহোসি. কেসৰো তং ৰিনা ৰত্তিতুং নাসক্খি, তং নিস্সাযেৰ জীৰিকং কপ্পেসি. সত্থা ইদম্পি তস্স পুব্বকম্মং দস্সেন্তো –

‘‘কপ্পো চ তে বদ্ধচরো অহোসি,

সম্বুদ্ধিমন্তং ৰতিনং অমঞ্ঞি;

তং তে পুরাণং ৰতসীলৰত্তং,

সুত্তপ্পবুদ্ধোৰ অনুস্সরামী’’তি. (জা. ১.৭.৭৪) –

ইমং গাথমাহ.

এৰং ব্রহ্মুনো নানত্তভাৰেসু কতকম্মং সত্থা পকাসেসি. সত্থরি কথেন্তেযেৰ ব্রহ্মা সল্লক্খেসি, দীপসহস্সে উজ্জলিতে রূপানি ৰিয সব্বকম্মানিস্স পাকটানি অহেসুং. সো পসন্নচিত্তো ইমং গাথমাহ –

‘‘অদ্ধা পজানাসি মমেতমাযুং,

অঞ্ঞম্পি জানাসি তথা হি বুদ্ধো;

তথা হি তাযং জলিতানুভাৰো,

ওভাসযং তিট্ঠতি ব্রহ্মলোক’’ন্তি. (জা. ১.৭.৭৫);

অথস্স ভগৰা উত্তরি অসমসমতং পকাসেন্তো পথৰিং খো অহং ব্রহ্মেতিআদিমাহ. তত্থ পথৰিযা পথৰত্তেন অননুভূতন্তি পথৰিযা পথৰিসভাৰেন অননুভূতং অপ্পত্তং. কিং পন তন্তি? নিব্বানং. তঞ্হি সব্বস্মা সঙ্খতা নিস্সটত্তা পথৰিসভাৰেন অপ্পত্তং নাম. তদভিঞ্ঞাযাতি তং নিব্বানং জানিত্ৰা সচ্ছিকত্ৰা. পথৰিং নাপহোসিন্তি পথৰিং তণ্হাদিট্ঠিমানগাহেহি ন গণ্হিং. আপাদীসুপি এসেৰ নযো. ৰিত্থারো পন মূলপরিযাযে ৰুত্তনযেনেৰ ৰেদিতব্বো.

সচে খো তে, মারিস, সব্বস্স সব্বত্তেনাতি ইদমেৰ ব্রহ্মা অত্তনো ৰাদিতায সব্বন্তি অক্খরং নিদ্দিসিত্ৰা অক্খরে দোসং গণ্হন্তো আহ. সত্থা পন সক্কাযং সন্ধায ‘‘সব্ব’’ন্তি ৰদতি, ব্রহ্মা সব্বসব্বং সন্ধায. ত্ৰং ‘‘সব্ব’’ন্তি ৰদসি, ‘‘সব্বস্স সব্বত্তেন অননুভূত’’ন্তি ৰদসি, যদি সব্বং অননুভূতং নত্থি, অথস্স অননুভূতং অত্থি. মা হেৰ তে রিত্তকমেৰ অহোসি তুচ্ছকমেৰ অহোসীতি তুয্হং ৰচনং রিত্তকং মা হোতু, তুচ্ছকং মা হোতূতি সত্থারং মুসাৰাদেন নিগ্গণ্হাতি.

সত্থা পন এতস্মা ব্রহ্মুনা সতগুণেন সহস্সগুণেন সতসহস্সগুণেন ৰাদীতরো, তস্মা অহং সব্বঞ্চ ৰক্খামি, অননুভূতঞ্চ ৰক্খামি, সুণাহি মেতি তস্স ৰাদমদ্দনত্থং কারণং আহরন্তো ৰিঞ্ঞাণন্তিআদিমাহ. তত্থ ৰিঞ্ঞাণন্তি ৰিজানিতব্বং. অনিদস্সনন্তি চক্খুৰিঞ্ঞাণস্স আপাথং অনুপগমনতো অনিদস্সনং নাম, পদদ্ৰযেনপি নিব্বানমেৰ ৰুত্তং. অনন্তন্তি তযিদং উপ্পাদৰযঅন্তরহিতত্তা অনন্তং নাম. ৰুত্তম্পি হেতং –

‘‘অন্তৰন্তানি ভূতানি, অসম্ভূতং অনন্তকং;

ভূতে অন্তানি দিস্সন্তি, ভূতে অন্তা পকাসিতা’’তি.

সব্বতোপভন্তি সব্বসো পভাসম্পন্নং. নিব্বানতো হি অঞ্ঞো ধম্মো সপভতরো ৰা জোতিৰন্ততরো ৰা পরিসুদ্ধতরো ৰা পণ্ডরতরো ৰা নত্থি. সব্বতো ৰা তথা পভূতমেৰ, ন কত্থচি নত্থীতি সব্বতোপভং. পুরত্থিমদিসাদীসু হি অসুকদিসায নাম নিব্বানং নত্থীতি ন ৰত্তব্বং. অথ ৰা পভন্তি তিত্থস্স নামং, সব্বতো পভমস্সাতি সব্বতোপভং. নিব্বানস্স কির যথা মহাসমুদ্দস্স যতো যতো ওতরিতুকামা হোন্তি, তং তদেৰ তিত্থং, অতিত্থং নাম নত্থি. এৰমেৰং অট্ঠতিংসায কম্মট্ঠানেসু যেন যেন মুখেন নিব্বানং ওতরিতুকামা হোন্তি, তং তদেৰ তিত্থং. নিব্বানস্স অতিত্থং নাম কম্মট্ঠানং নত্থি. তেন ৰুত্তং সব্বতোপভন্তি. তং পথৰিযা পথৰত্তেনাতি তং নিব্বানং পথৰিযা পথৰীসভাৰেন ততো পরেসং আপাদীনং আপাদিসভাৰেন চ অননুভূতং. ইতি যং তুম্হাদিসানং ৰিসযভূতং সব্বতেভূমকধম্মজাতং তস্স সব্বত্তেন তং ৰিঞ্ঞাণং অনিদস্সনং অনন্তং সব্বতোপতং অননুভূতন্তি ৰাদং পতিট্ঠপেসি.

ততো ব্রহ্মা গহিতগহিতং সত্থারা ৰিস্সজ্জাপিতো কিঞ্চি গহেতব্বং অদিস্ৰা লল়িতকং কাতুকামো হন্দ চরহি তে, মারিস, অন্তরধাযামীতি আহ. তত্থ অন্তরধাযামীতি অদিস্সমানকপাটিহারিযং করোমীতি আহ. সচে ৰিসহসীতি যদি সক্কোসি ময্হং অন্তরধাযিতুং, অন্তরধাযসি, পাটিহারিযং করোহীতি. নেৰস্সু মে সক্কোতি অন্তরধাযিতুন্তি ময্হং অন্তরধাযিতুং নেৰ সক্কোতি. কিং পনেস কাতুকামো অহোসীতি? মূলপটিসন্ধিং গন্তুকামো অহোসি. ব্রহ্মানঞ্হি মূলপটিসন্ধিকঅত্তভাৰো সুখুমো, অঞ্ঞেসং অনাপাথো, অভিসঙ্খতকাযেনেৰ তিট্ঠন্তি. সত্থা তস্স মূলপটিসন্ধিং গন্তুং ন অদাসি. মূলপটিসন্ধিং ৰা অগন্ত্ৰাপি যেন তমেন অত্তানং অন্তরধাপেত্ৰা অদিস্সমানকো ভৰেয্য, সত্থা তং তমং ৰিনোদেসি, তস্মা অন্তরধাযিতুং নাসক্খি. সো অসক্কোন্তো ৰিমানে নিলীযতি, কপ্পরুক্খে নিলীযতি, উক্কুটিকো নিসীদতি. ব্রহ্মগণো কেল়িমকাসি – ‘‘এস খো বকো ব্রহ্মা ৰিমানে নিলীযতি, কপ্পরুক্খে নিলীযতি, উক্কুটিকো নিসীদতি, ব্রহ্মে ত্ৰং অন্তরহিতোম্হী’’তি সঞ্ঞং উপ্পাদেসি নামাতি. সো ব্রহ্মগণেন উপ্পণ্ডিতো মঙ্কু অহোসি.

এৰং ৰুত্তে অহং, ভিক্খৰেতি, ভিক্খৰে, এতেন ব্রহ্মুনা, ‘‘হন্দ চরহি তে, মারিস, অন্তরধাযামী’’তি এৰং ৰুত্তে তং অন্তরধাযিতুং অসক্কোন্তং দিস্ৰা অহং এতদৰোচং. ইমং গাথমভাসিন্তি কস্মা ভগৰা গাথমভাসীতি? সমণস্স গোতমস্স ইমস্মিং ঠানে অত্থিভাৰো ৰা নত্থিভাৰো ৰা কথং সক্কা জানিতুন্তি এৰং ব্রহ্মগণস্স ৰচনোকাসো মা হোতূতি অন্তরহিতোৰ গাথমভাসি.

তত্থ ভৰেৰাহং ভযং দিস্ৰাতি অহং ভৰে ভযং দিস্ৰাযেৰ. ভৰঞ্চ ৰিভৰেসিনন্তি ইমঞ্চ কামভৰাদিতিৰিধম্পি সত্তভৰং ৰিভৰেসিনং ৰিভৰং গৰেসমানং পরিযেসমানম্পি পুনপ্পুনং ভৰেযেৰ দিস্ৰা. ভৰং নাভিৰদিন্তি তণ্হাদিট্ঠিৰসেন কিঞ্চি ভৰং ন অভিৰদিং, ন গৰেসিন্তি অত্থো. নন্দিঞ্চ ন উপাদিযিন্তি ভৰতণ্হং ন উপগঞ্ছিং, ন অগ্গহেসিন্তি অত্থো. ইতি চত্তারি সচ্চানি পকাসেন্তো সত্থা ধম্মং দেসেসি. দেসনাপরিযোসানে দেসনানুসারেন ৰিপস্সনাগব্ভং গাহাপেত্ৰা দসমত্তানি ব্রহ্মসহস্সানি মগ্গফলামতপানং পিৰিংসু.

অচ্ছরিযব্ভুতচিত্তজাতাতি অচ্ছরিযজাতা অব্ভুতজাতা তুট্ঠিজাতা চ অহেসুং. সমূলং ভৰং উদব্বহীতি বোধিমণ্ডে অত্তনো তায তায দেসনায অঞ্ঞেসম্পি বহূনং দেৰমনুস্সানং সমূলকং ভৰং উদব্বহি, উদ্ধরি উপ্পাটেসীতি অত্থো.

৫০৫. তস্মিং পন সমযে মারো পাপিমা কোধাভিভূতো হুত্ৰা, ‘‘মযি ৰিচরন্তেযেৰ সমণেন গোতমেন ধম্মকথং কথেত্ৰা দসমত্তানি ব্রহ্মসহস্সানি মম ৰসং অতিৰত্তিতানী’’তি কোধাভিভূততায অঞ্ঞতরস্স ব্রহ্মপারিসজ্জস্স সরীরে অধিমুচ্চি, তং দস্সেতুং অথ খো, ভিক্খৰেতিআদিমাহ. তত্থ সচে ত্ৰং এৰং অনুবুদ্ধোতি সচে ত্ৰং এৰং অত্তনাৰ চত্তারি সচ্চানি অনুবুদ্ধো. মা সাৰকে উপনেসীতি গিহিসাৰকে ৰা পব্বজিতসাৰকে ৰা তং ধম্মং মা উপনযসি. হীনে কাযে পতিট্ঠিতাতি চতূসু অপাযেসু পতিট্ঠিতা. পণীতে কাযে পতিট্ঠিতাতি ব্রহ্মলোকে পতিট্ঠিতা. ইদং কে সন্ধায ৰদতি? বাহিরপব্বজ্জং পব্বজিতে তাপসপরিব্বাজকে. অনুপ্পন্নে হি বুদ্ধুপ্পাদে কুলপুত্তা তাপসপব্বজ্জং পব্বজিত্ৰা কস্সচি কিঞ্চি অৰিচারেত্ৰা একচরা হুত্ৰা সমাপত্তিযো নিব্বত্তেত্ৰা ব্রহ্মলোকে উপ্পজ্জিংসু, তে সন্ধায এৰমাহ. অনক্খাতং কুসলঞ্হি মারিসাতি পরেসং অনক্খাতং অনোৰদনং ধম্মকথায অকথনং কুসলং এতং সেয্যো. মা পরং ওৰদাহীতি কালেন মনুস্সলোকং, কালেন দেৰলোকং, কালেন ব্রহ্মলোকং, কালেন নাগলোকং আহিণ্ডন্তো মা ৰিচরি, একস্মিং ঠানে নিসিন্নো ঝানমগ্গফলসুখেন ৰীতিনামেহীতি. অনালপনতাযাতি অনুল্লপনতায. ব্রহ্মুনো চ অভিনিমন্তনতাযাতি বকব্রহ্মুনো চ ইদঞ্হি, মারিস, নিচ্চন্তিআদিনা নযেন সহ কাযকেন ব্রহ্মট্ঠানেন নিমন্তনৰচনেন. তস্মাতি তেন কারণেন. ইমস্স ৰেয্যাকরণস্স ব্রহ্মনিমন্তনিকংত্ৰেৰ অধিৰচনং সঙ্খা সমঞ্ঞা পঞ্ঞত্তি জাতা. সেসং সব্বত্থ উত্তানত্থমেৰাতি.

পপঞ্চসূদনিযা মজ্ঝিমনিকাযট্ঠকথায

ব্রহ্মনিমন্তনিকসুত্তৰণ্ণনা নিট্ঠিতা.

১০. মারতজ্জনীযসুত্তৰণ্ণনা

৫০৬. এৰং মে সুতন্তি মারতজ্জনীযসুত্তং. তত্থ কোট্ঠমনুপৰিট্ঠোতি কুচ্ছিং পৰিসিত্ৰা অন্তানং অন্তো অনুপৰিট্ঠো, পক্কাসযট্ঠানে নিসিন্নো. গরুগরো ৰিযাতি গরুকগরুকো ৰিয থদ্ধো পাসাণপুঞ্জসদিসো. মাসাচিতং মঞ্ঞেতি মাসভত্তং ভুত্তস্স কুচ্ছি ৰিয মাসপূরিতপসিব্বকো ৰিয তিন্তমাসো ৰিয চাতি অত্থো. ৰিহারং পৰিসিত্ৰাতি সচে আহারদোসেন এস গরুভাৰো, অব্ভোকাসে চঙ্কমিতুং ন সপ্পাযন্তি চঙ্কমা ওরোহিত্ৰা পণ্ণসালং পৰিসিত্ৰা পকতিপঞ্ঞত্তে আসনে নিসীদি. পচ্চত্তং যোনিসো মনসাকাসীতি, ‘‘কিং নু খো এত’’ন্তি আৰজ্জমানো অত্তনোযেৰ উপাযেন মনসি অকাসি. সচে পন থেরো অত্তনো সীলং আৰজ্জেত্ৰা, ‘‘যং হিয্যো ৰা পরে ৰা পরসুৰে ৰা পরিভুত্তং অৰিপক্কমত্থি, অঞ্ঞো ৰা কোচি ৰিসভাগদোসো, সব্বং জীরতু ফাসুকং হোতূ’’তি হত্থেন কুচ্ছিং পরামসিস্স, মারো পাপিমা ৰিলীযিত্ৰা অগমিস্স. থেরো পন তথা অকত্ৰা যোনিসো মনসি অকাসি. মা তথাগতং ৰিহেসেসীতি যথা হি পুত্তেসু ৰিহেসিতেসু মাতাপিতরো ৰিহেসিতাৰ হোন্তি, সদ্ধিৰিহারিকঅন্তেৰাসিকেসু ৰিহেসিতেসু আচরিযুপজ্ঝাযা ৰিহেসিতাৰ, জনপদে ৰিহেসিতে রাজা ৰিহেসিতোৰ হোতি, এৰং তথাগতসাৰকে ৰিহেসিতে তথাগতো ৰিহেসিতোৰ হোতি. তেনাহ – ‘‘মা তথাগতং ৰিহেসেসী’’তি.

পচ্চগ্গল়ে অট্ঠাসীতি পতিঅগ্গল়েৰ অট্ঠাসি. অগ্গল়ং ৰুচ্চতি কৰাটং, মুখেন উগ্গন্ত্ৰা পণ্ণসালতো নিক্খমিত্ৰা বহিপণ্ণসালায কৰাটং নিস্সায অট্ঠাসীতি অত্থো.

৫০৭. ভূতপুব্বাহং পাপিমাতি কস্মা ইদং দেসনং আরভি? থেরো কির চিন্তেসি – ‘‘আকাসট্ঠকদেৰতানং তাৰ মনুস্সগন্ধো যোজনসতে ঠিতানং আবাধং করোতি. ৰুত্তঞ্হেতং – ‘যোজনসতং খো রাজঞ্ঞ মনুস্সগন্ধো দেৰে উব্বাধতী’তি (দী. নি. ২.৪১৫). অযং পন মারো নাগরিকো পরিচোক্খো মহেসক্খো আনুভাৰসম্পন্নো দেৰরাজা সমানো মম কুচ্ছিযং পৰিসিত্ৰা অন্তানং অন্তো পক্কাসযোকাসে নিসিন্নো অতিৰিয পদুট্ঠো ভৰিস্সতি. এৰরূপং নাম জেগুচ্ছং পটিকূলং ওকাসং পৰিসিত্ৰা নিসীদিতুং সক্কোন্তস্স কিমঞ্ঞং অকরণীযং ভৰিস্সতি, কিং অঞ্ঞং লজ্জিস্সতি, ত্ৰং মম ঞাতিকোতি পন ৰুত্তে মুদুভাৰং অনাপজ্জমানো নাম নত্থি, হন্দস্স ঞাতিকোটিং পটিৰিজ্ঝিত্ৰা মুদুকেনেৰ নং উপাযেন ৰিস্সজ্জেস্সামী’’তি চিন্তেত্ৰা ইমং দেসনমারভি.

সো মে ত্ৰং ভাগিনেয্যো হোসীতি সো ত্ৰং তস্মিং কালে ময্হং ভাগিনেয্যো হোসি. ইদং পৰেণিৰসেন ৰুত্তং. দেৰলোকস্মিং পন মারস্স পিতু ৰংসো পিতামহস্স ৰংসো রজ্জং করোন্তো নাম নত্থি, পুঞ্ঞৰসেন দেৰলোকে দেৰরাজা হুত্ৰা নিব্বত্তো, যাৰতাযুকং ঠত্ৰা চৰতি. অঞ্ঞো একো অত্তনা কতেন কম্মেন তস্মিং ঠানে অধিপতি হুত্ৰা নিব্বত্ততি. ইতি অযং মারোপি তদা ততো চৰিত্ৰা পুন কুসলং কত্ৰা ইমস্মিং কালে তস্মিং অধিপতিট্ঠানে নিব্বত্তোতি ৰেদিতব্বো.

ৰিধুরোতি ৰিগতধুরো, অঞ্ঞেহি সদ্ধিং অসদিসোতি অত্থো. অপ্পকসিরেনাতি অপ্পদুক্খেন. পসুপালকাতি অজেল়কপালকা. পথাৰিনোতি মগ্গপটিপন্না. কাযে উপচিনিত্ৰাতি সমন্ততো চিতকং বন্ধিত্ৰা. অগ্গিং দত্ৰা পক্কমিংসূতি এত্তকেন সরীরং পরিযাদানং গমিস্সতীতি চিতকস্স পমাণং সল্লক্খেত্ৰা চতূসু দিসাসু অগ্গিং দত্ৰা পক্কমিংসু. চিতকো পদীপসিখা ৰিয পজ্জলি, থেরস্স উদকলেণং পৰিসিত্ৰা নিসিন্নকালো ৰিয অহোসি. চীৰরানি পপ্ফোটেত্ৰাতি সমাপত্তিতো ৰুট্ঠায ৰিগতধূমে কিংসুকৰণ্ণে অঙ্গারে মদ্দমানো চীৰরানি ৰিধুনিত্ৰা. সরীরে পনস্স উসুমমত্তম্পি নাহোসি, চীৰরেসু অংসুমত্তম্পি নজ্ঝাযি, সমাপত্তিফলং নামেতং.

৫০৮. অক্কোসথাতি দসহি অক্কোসৰত্থূহি অক্কোসথ. পরিভাসথাতি ৰাচায পরিভাসথ. রোসেথাতি ঘট্টেথ. ৰিহেসেথাতি দুক্খাপেথ. সব্বমেতং ৰাচায ঘট্টনস্সেৰ অধিৰচনং. যথা তং দূসী মারোতি যথা এতেসং দূসী মারো. লভেথ ওতারন্তি লভেথ ছিদ্দং, কিলেসুপ্পত্তিযা আরম্মণং পচ্চযং লভেয্যাতি অত্থো. মুণ্ডকাতিআদীসু মুণ্ডে মুণ্ডাতি সমণে চ সমণাতি ৰত্তুং ৰট্টেয্য, ইমে পন হীল়েন্তা মুণ্ডকা সমণকাতি আহংসু. ইব্ভাতি গহপতিকা. কিণ্হাতি কণ্হা, কাল়কাতি অত্থো. বন্ধুপাদাপচ্চাতি এত্থ বন্ধূতি ব্রহ্মা অধিপ্পেতো. তঞ্হি ব্রাহ্মণা পিতামহোতি ৰোহরন্তি. পাদানং অপচ্চা পাদাপচ্চা, ব্রহ্মুনো পিট্ঠিপাদতো জাতাতি অধিপ্পাযো. তেসং কির অযং লদ্ধি – ‘‘ব্রাহ্মণা ব্রহ্মুনো মুখতো নিক্খন্তা, খত্তিযা উরতো, ৰেস্সা নাভিতো, সুদ্দা জাণুতো, সমণা পিট্ঠিপাদতো’’তি.

ঝাযিনোস্মা ঝাযিনোস্মাতি ঝাযিনো মযং ঝাযিনো মযন্তি. মধুরকজাতাতি আলসিযজাতা. ঝাযন্তীতি চিন্তযন্তি. পজ্ঝাযন্তীতিআদীনি উপসগ্গৰসেন ৰড্ঢিতানি. মূসিকং মগ্গযমানোতি সাযং গোচরত্থায সুসিররুক্খতো নিক্খন্তং রুক্খসাখায মূসিকং পরিযেসন্তো. সো কির উপসন্তূপসন্তো ৰিয নিচ্চলোৰ তিট্ঠতি, সম্পত্তকালে মূসিকং সহসা গণ্হাতি. কোত্থূতি সিঙ্গালো, সোণোতিপি ৰদন্তি. সন্ধিসমলসঙ্কটিরেতি সন্ধিম্হি চ সমলে চ সঙ্কটিরে চ. তত্থ সন্ধি নাম ঘরসন্ধি. সমলো নাম গূথনিদ্ধমনপনাল়ি. সঙ্কটিরং নাম সঙ্কারট্ঠানং. ৰহচ্ছিন্নোতি কন্তারতো নিক্খন্তো ছিন্নৰহো. সন্ধিসমলসঙ্কটিরেতি সন্ধিম্হি ৰা সমলে ৰা সঙ্কটিরে ৰা. সোপি হি বদ্ধগত্তো ৰিয নিচ্চলো ঝাযতি.

নিরযং উপপজ্জন্তীতি সচে মারো মনুস্সানং সরীরে অধিমুচ্চিত্ৰা এৰং করেয্য, মনুস্সানং অকুসলং ন ভৰেয্য, মারস্সেৰ ভৰেয্য. সরীরে পন অনধিমুচ্চিত্ৰা ৰিসভাগৰত্থুং ৰিপ্পটিসারারম্মণং দস্সেতি, তদা কির সো ভিক্খূ খিপ্পং গহেত্ৰা মচ্ছে অজ্ঝোত্থরন্তে ৰিয, জালং গহেত্ৰা মচ্ছে গণ্হন্তে ৰিয, লেপযট্ঠিং ওড্ডেত্ৰা সকুণে বন্ধন্তে ৰিয, সুনখেহি সদ্ধিং অরঞ্ঞে মিগৰং চরন্তে ৰিয, মাতুগামে গহেত্ৰা আপানভূমিযং নিসিন্নে ৰিয, নচ্চন্তে ৰিয, গাযন্তে ৰিয, ভিক্খুনীনং রত্তিট্ঠানদিৰাট্ঠানেসু ৰিসভাগমনুস্সে নিসিন্নে ৰিয, ঠিতে ৰিয চ কত্ৰা দস্সেসি. মনুস্সা অরঞ্ঞগতাপি ৰনগতাপি ৰিহারগতাপি ৰিপ্পটিসারারম্মণং পস্সিত্ৰা আগন্ত্ৰা অঞ্ঞেসং কথেন্তি – ‘‘সমণা এৰরূপং অস্সমণকং অননুচ্ছৰিকং করোন্তি, এতেসং দিন্নে কুতো কুসলং, মা এতেসং কিঞ্চি অদত্থা’’তি. এৰং তে মনুস্সা দিট্ঠদিট্ঠট্ঠানে সীলৰন্তে অক্কোসন্তা অপুঞ্ঞং পসৰিত্ৰা অপাযপূরকা অহেসুং. তেন ৰুত্তং ‘‘নিরযং উপপজ্জন্তী’’তি.

৫০৯. অন্ৰাৰিট্ঠাতি আৰট্টিতা. ফরিত্ৰা ৰিহরিংসূতি ন কেৰলং ফরিত্ৰা ৰিহরিংসু. ককুসন্ধস্স পন ভগৰতো ওৰাদে ঠত্ৰা ইমে চত্তারো ব্রহ্মৰিহারে নিব্বত্তেত্ৰা ঝানপদট্ঠানং ৰিপস্সনং ৰড্ঢেত্ৰা অরহত্তে পতিট্ঠহিংসু.

৫১০. আগতিং ৰা গতিং ৰাতি পটিসন্ধিৰসেন আগমনট্ঠানং ৰা, চুতিৰসেন গমনট্ঠানং ৰা ন জানামি. সিযা চিত্তস্স অঞ্ঞথত্তন্তি সোমনস্সৰসেন অঞ্ঞথত্তং ভৰেয্য. সগ্গং লোকং উপপজ্জন্তীতি ইধাপি পুরিমনযেনেৰ অত্থো ৰেদিতব্বো. যথা হি পুব্বে ৰিপ্পটিসারকরং আরম্মণং দস্সেতি, এৰমিধাপি পসাদকরং. সো কির তদা মনুস্সানং দস্সনট্ঠানে ভিক্খূ আকাসে গচ্ছন্তে ৰিয, ঠিতে ৰিয পল্লঙ্কেন নিসিন্নে ৰিয, আকাসে সূচিকম্মং করোন্তে ৰিয, পোত্থকং ৰাচেন্তে ৰিয, আকাসে চীৰরং পসারেত্ৰা কাযং উতুং গণ্হাপেন্তে ৰিয, নৰপব্বজিতে আকাসেন চরন্তে ৰিয, তরুণসামণেরে আকাসে ঠত্ৰা পুপ্ফানি ওচিনন্তে ৰিয কত্ৰা দস্সেসি. মনুস্সা অরঞ্ঞগতাপি ৰনগতাপি ৰিহারগতাপি পব্বজিতানং তং পটিপত্তিং দিস্ৰা আগন্ত্ৰা অঞ্ঞেসং কথেন্তি – ‘‘ভিক্খূসু অন্তমসো সামণেরাপি এৰংমহিদ্ধিকো মহানুভাৰা, এতেসং দিন্নং মহপ্ফলং নাম হোতি, এতেসং দেথ সক্করোথা’’তি. ততো মনুস্সা ভিক্খুসঙ্ঘং চতূহি পচ্চযেহি সক্করোন্তা বহুং পুঞ্ঞং কত্ৰা সগ্গপথপূরকা অহেসুং. তেন ৰুত্তং ‘‘সগ্গং লোকং উপপজ্জন্তী’’তি.

৫১১. এথ তুম্হে, ভিক্খৰে, অসুভানুপস্সিনো কাযে ৰিহরথাতি ভগৰা সকলজম্বুদীপং আহিণ্ডন্তো অন্তমসো দ্ৰিন্নম্পি তিণ্ণম্পি ভিক্খূনং ৰসনট্ঠানং গন্ত্ৰা –

‘‘অসুভসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো মেথুনধম্মসমাপত্তিযা চিত্তং পতিলীযতি পতিকুটতি পতিৰত্ততি ন সম্পসারিযতি, উপেক্খা ৰা পাটিকুল্যতা ৰা সণ্ঠাতি.

আহারে পটিকূলসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো রসতণ্হায চিত্তং পতিলীযতি পতিকুটতি পতিৰত্ততি ন সম্পসারিযতি, উপেক্খা ৰা পাটিকুল্যতা ৰা সণ্ঠাতি.

সব্বলোকে অনভিরতিসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো লোকচিত্রেসু চিত্তং পতিলীযতি পতিকুটতি পতিৰত্ততি ন সম্পসারিযতি, উপেক্খা ৰা পাটিকুল্যতা ৰা সণ্ঠাতি.

অনিচ্চসঞ্ঞাপরিচিতেন, ভিক্খৰে, ভিক্খুনো চেতসা বহুলং ৰিহরতো লাভসক্কারসিলোকে চিত্তং পতিলীযতি পতিকুটতি পতিৰত্ততি ন সম্পসারিযতি, উপেক্খা ৰা পাটিকুল্যতা ৰা সণ্ঠাতী’’তি (অ. নি. ৭.৪৯) এৰং আনিসংসং দস্সেত্ৰা –

এথ তুম্হে, ভিক্খৰে, অসুভানুপস্সী কাযে ৰিহরথ, আহারে পটিকূলসঞ্ঞিনো সব্বলোকে অনভিরতিসঞ্ঞিনো সব্বসঙ্খারেসু অনিচ্চানুপস্সিনোতি. ইমানি চত্তারি কম্মট্ঠানানি কথেসি. তেপি ভিক্খূ ইমেসু চতূসু কম্মট্ঠানেসু কম্মং করোন্তা ৰিপস্সনং ৰড্ঢেত্ৰা সব্বাসৰে খেপেত্ৰা অরহত্তে পতিট্ঠহিংসু, ইমানিপি চত্তারি কম্মট্ঠানানি রাগসন্তানি দোসমোহসন্তানি রাগপটিঘাতানি দোসমোহপটিঘাতানি চাতি.

৫১২. সক্খরং গহেত্ৰাতি অন্তোমুট্ঠিযং তিট্ঠনপমাণং পাসাণং গহেত্ৰা. অযঞ্হি ব্রাহ্মণগহপতিকেহি ভিক্খূ অক্কোসাপেত্ৰাপি, ব্রাহ্মণগহপতিকানং ৰসেন ভিক্খুসঙ্ঘস্স লাভসক্কারং উপ্পাদাপেত্ৰাপি, ওতারং অলভন্তো ইদানি সহত্থা উপক্কমিতুকামো অঞ্ঞতরস্স কুমারস্স সরীরে অধিমুচ্চিত্ৰা এৰরূপং পাসাণং অগ্গহেসি. তং সন্ধায ৰুত্তং ‘‘সক্খরং গহেত্ৰা’’তি.

সীসং ৰো ভিন্দীতি সীসং ভিন্দি, মহাচম্মং ছিজ্জিত্ৰা মংসং দ্ৰেধা অহোসি. সক্খরা পনস্স সীসকটাহং অভিন্দিত্ৰা অট্ঠিং আহচ্চেৰ নিৰত্তা. নাগাপলোকিতং অপলোকেসীতি পহারসদ্দং সুত্ৰা যথা নাম হত্থিনাগো ইতো ৰা এত্তো ৰা অপলোকেতুকামো গীৰং অপরিৰত্তেত্ৰা সকলসরীরেনেৰ নিৰত্তিত্ৰা অপলোকেতি. এৰং সকলসরীরেনেৰ নিৰত্তিত্ৰা অপলোকেসি. যথা হি মহাজনস্স অট্ঠীনি কোটিযা কোটিং আহচ্চ ঠিতানি, পচ্চেকবুদ্ধানং অঙ্কুসলগ্গানি, ন এৰং বুদ্ধানং. বুদ্ধানং পন সঙ্খলিকানি ৰিয একাবদ্ধানি হুত্ৰা ঠিতানি, তস্মা পচ্ছতো অপলোকনকালে ন সক্কা হোতি গীৰং পরিৰত্তেতুং. যথা পন হত্থিনাগো পচ্ছাভাগং অপলোকেতুকামো সকলসরীরেনেৰ পরিৰত্ততি, এৰং পরিৰত্তিতব্বং হোতি. তস্মা ভগৰা যন্তেন পরিৰত্তিতা সুৰণ্ণপটিমা ৰিয সকলসরীরেনেৰ নিৰত্তিত্ৰা অপলোকেসি, অপলোকেত্ৰা ঠিতো পন, ‘‘ন ৰাযং দূসী মারো মত্তমঞ্ঞাসী’’তি আহ. তস্সত্থো, অযং দূসী মারো পাপং করোন্তো নেৰ পমাণং অঞ্ঞাসি, পমাণাতিক্কন্তমকাসীতি.

সহাপলোকনাযাতি ককুসন্ধস্স ভগৰতো অপলোকনেনেৰ সহ তঙ্খণঞ্ঞেৰ. তম্হা চ ঠানা চৰীতি তম্হা চ দেৰট্ঠানা চুতো, মহানিরযং উপপন্নোতি অত্থো. চৰমানো হি ন যত্থ কত্থচি ঠিতো চৰতি, তস্মা ৰসৰত্তিদেৰলোকং আগন্ত্ৰা চুতো, ‘‘সহাপলোকনাযা’’তি চ ৰচনতো ন ভগৰতো অপলোকিতত্তা চুতোতি ৰেদিতব্বো, চুতিকালদস্সনমত্তমেৰ হেতং. উল়ারে পন মহাসাৰকে ৰিরদ্ধত্তা কুদারিযা পহটং ৰিযস্স আযু তত্থেৰ ছিজ্জিত্ৰা গতন্তি ৰেদিতব্বং. তযো নামধেয্যা হোন্তীতি তীণি নামানি হোন্তি. ছফস্সাযতনিকোতি ছসু ফস্সাযতনেসু পাটিযেক্কায ৰেদনায পচ্চযো.

সঙ্কুসমাহতোতি অযসূলেহি সমাহতো. পচ্চত্তৰেদনিযোতি সযমেৰ ৰেদনাজনকো. সঙ্কুনা সঙ্কু হদযে সমাগচ্ছেয্যাতি অযসূলেন সদ্ধিং অযসূলং হদযমজ্ঝে সমাগচ্ছেয্য. তস্মিং কির নিরযে উপপন্নানং তিগাৰুতো অত্তভাৰো হোতি, থেরস্সাপি তাদিসো অহোসি. অথস্স হি নিরযপালা তালক্খন্ধপমাণানি অযসূলানি আদিত্তানি সম্পজ্জলিতানি সজোতিভূতানি সযমেৰ গহেত্ৰা পুনপ্পুনং নিৰত্তমানা, – ‘‘ইমিনা তে ঠানেন চিন্তেত্ৰা পাপং কত’’ন্তি পূৰদোণিযং পূৰং কোট্টেন্তো ৰিয হদযমজ্ঝং কোট্টেত্ৰা, পণ্ণাস জনা পাদাভিমুখা পণ্ণাস জনা সীসাভিমুখা কোট্টেত্ৰা গচ্ছন্তি, এৰং গচ্ছন্তা পঞ্চহি ৰস্সসতেহি উভো অন্তে পত্ৰা পুন নিৰত্তমানা পঞ্চহি ৰস্সসতেহি হদযমজ্ঝং আগচ্ছন্তি. তং সন্ধায এৰং ৰুত্তং.

ৰুট্ঠানিমন্তি ৰিপাকৰুট্ঠানৰেদনং. সা কির মহানিরযে ৰেদনাতো দুক্খতরা হোতি, যথা হি সিনেহপানসত্তাহতো পরিহারসত্তাহং দুক্খতরং, এৰং মহানিরযদুক্খতো উস্সদে ৰিপাকৰুট্ঠানৰেদনা দুক্খতরাতি ৰদন্তি. সেয্যথাপি মচ্ছস্সাতি পুরিসসীসঞ্হি ৰট্টং হোতি, সূলেন পহরন্তস্স পহারো ঠানং ন লভতি পরিগলতি, মচ্ছসীসং আযতং পুথুলং, পহারো ঠানং লভতি, অৰিরজ্ঝিত্ৰা কম্মকারণা সুকরা হোতি, তস্মা এৰরূপং সীসং হোতি.

৫১৩. ৰিধুরং সাৰকমাসজ্জাতি ৰিধুরং সাৰকং ঘট্টযিত্ৰা. পচ্চত্তৰেদনাতি সযমেৰ পাটিযেক্কৰেদনাজনকা. ঈদিসো নিরযো আসীতি ইমস্মিং ঠানে নিরযো দেৰদূতসুত্তেন দীপেতব্বো. কণ্হ-দুক্খং নিগচ্ছসীতি কাল়ক-মার, দুক্খং ৰিন্দিস্সসি. মজ্ঝে সরস্সাতি মহাসমুদ্দস্স মজ্ঝে উদকং ৰত্থুং কত্ৰা নিব্বত্তৰিমানানি কপ্পট্ঠিতিকানি হোন্তি, তেসং ৰেল়ুরিযস্স ৰিয ৰণ্ণো হোতি, পব্বতমত্থকে জলিতনল়গ্গিক্খন্ধো ৰিয চ নেসং অচ্চিযো জোতন্তি, পভস্সরা পভাসম্পন্না হোন্তি, তেসু ৰিমানেসু নীলভেদাদিৰসেন নানত্তৰণ্ণা অচ্ছরা নচ্চন্তি. যো এতমভিজানাতীতি যো এতং ৰিমানৰত্থুং জানাতীতি অত্থো. এৰমেত্থ ৰিমানপেতৰত্থুকেনেৰ অত্থো ৰেদিতব্বো. পাদঙ্গুট্ঠেন কম্পযীতি ইদং পাসাদকম্পনসুত্তেন দীপেতব্বং. যো ৰেজযন্তং পাসাদন্তি ইদং চূল়তণ্হাসঙ্খযৰিমুত্তিসুত্তেন দীপেতব্বং. সক্কং সো পরিপুচ্ছতীতি ইদম্পি তেনেৰ দীপেতব্বং. সুধম্মাযাভিতো সভন্তি সুধম্মসভায সমীপে, অযং পন ব্রহ্মলোকে সুধম্মসভাৰ, ন তাৰতিংসভৰনে. সুধম্মসভাৰিরহিতো হি দেৰলোকো নাম নত্থি.

ব্রহ্মলোকে পভস্সরন্তি ব্রহ্মলোকে মহামোগ্গল্লানমহাকস্সপাদীহি সাৰকেহি সদ্ধিং তস্স তেজোধাতুং সমাপজ্জিত্ৰা নিসিন্নস্স ভগৰতো ওভাসং. একস্মিঞ্হি সমযে ভগৰা ব্রহ্মলোকে সুধম্মায দেৰসভায সন্নিপতিত্ৰা, – ‘‘অত্থি নু খো কোচি সমণো ৰা ব্রাহ্মণো ৰা এৰংমহিদ্ধিকো. যো ইধ আগন্তুং সক্কুণেয্যা’’তি চিন্তেন্তস্সেৰ ব্রহ্মগণস্স চিত্তমঞ্ঞায তত্থ গন্ত্ৰা ব্রহ্মগণস্স মত্থকে নিসিন্নো তেজোধাতুং সমাপজ্জিত্ৰা মহামোগ্গল্লানাদীনং আগমনং চিন্তেসি. তেপি গন্ত্ৰা সত্থারং ৰন্দিত্ৰা তেজোধাতুং সমাপজ্জিত্ৰা পচ্চেকং দিসাসু নিসীদিংসু, সকলব্রহ্মলোকো একোভাসো অহোসি. সত্থা চতুসচ্চপ্পকাসনং ধম্মং দেসেসি, দেসনাপরিযোসানে অনেকানি ব্রহ্মসহস্সানি মগ্গফলেসু পতিট্ঠহিংসু. তং সন্ধাযিমা গাথা ৰুত্তা, সো পনাযমত্থো অঞ্ঞতরব্রহ্মসুত্তেন দীপেতব্বো.

ৰিমোক্খেন অফস্সযীতি ঝানৰিমোক্খেন ফুসি. ৰনন্তি জম্বুদীপং. পুব্বৰিদেহানন্তি পুব্বৰিদেহানঞ্চ দীপং. যে চ ভূমিসযা নরাতি ভূমিসযা নরা নাম অপরগোযানকা চ উত্তরকুরুকা চ. তেপি সব্বে ফুসীতি ৰুত্তং হোতি. অযং পন অত্থো নন্দোপনন্দদমনেন দীপেতব্বো. ৰত্থু ৰিসুদ্ধিমগ্গে ইদ্ধিকথায ৰিত্থারিতং. অপুঞ্ঞং পসৰীতি অপুঞ্ঞং পটিলভি. আসং মা অকাসি ভিক্খূসূতি ভিক্খূ ৰিহেসেমীতি এতং আসং মা অকাসি. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

মারতজ্জনীযসুত্তৰণ্ণনা নিট্ঠিতা.

পঞ্চমৰগ্গৰণ্ণনা নিট্ঠিতা.

মূলপণ্ণাসট্ঠকথা নিট্ঠিতা.