📜

নমো তস্স ভগৰতো অরহতো সম্মাসম্বুদ্ধস্স

মজ্ঝিমনিকাযে

মূলপণ্ণাস-টীকা

(পঠমো ভাগো)

গন্থারম্ভকথাৰণ্ণনা

১. সংৰণ্ণনারম্ভে ¶ ¶ রতনত্তযৰন্দনা সংৰণ্ণেতব্বস্স ধম্মস্স পভৰনিস্সযৰিসুদ্ধিপটিৰেদনত্থং, তং পন ধম্মসংৰণ্ণনাসু ৰিঞ্ঞূনং বহুমানুপ্পাদনত্থং, তং সম্মদেৰ তেসং উগ্গহধারণাদিক্কমলদ্ধব্বায সম্মাপটিপত্তিযা সব্বহিতসুখনিপ্ফাদনত্থং. অথ ৰা মঙ্গলভাৰতো, সব্বকিরিযাসু পুব্বকিচ্চভাৰতো, পণ্ডিতেহি সমাচরিতভাৰতো, আযতিং পরেসং দিট্ঠানুগতিআপজ্জনতো চ সংৰণ্ণনাযং রতনত্তযপণামকিরিযা. অথ ৰা রতনত্তযপণামকরণং পূজনীযপূজাপুঞ্ঞৰিসেসনিব্বত্তনত্থং. তং অত্তনো যথালদ্ধসম্পত্তিনিমিত্তকস্স কম্মস্স বলানুপ্পদানত্থং. অন্তরা চ তস্স অসঙ্কোচনত্থং. তদুভযং অনন্তরাযেন অট্ঠকথায পরিসমাপনত্থং. ইদমেৰ চ পযোজনং আচরিযেন ইধাধিপ্পেতং. তথা হি ৰক্খতি ‘‘ইতি মে পসন্নমতিনো…পে… তস্সানুভাৰেনা’’তি. ৰত্থুত্তযপূজাহি নিরতিসযপুঞ্ঞক্খেত্তসংবুদ্ধিযা অপরিমেয্যপভাৰো পুঞ্ঞাতিসযোতি বহুৰিধন্তরাযেপি লোকসন্নিৰাসে ¶ অন্তরাযনিবন্ধনসকলসংকিলেসৰিদ্ধংসনায পহোতি. ভযাদিউপদ্দৰঞ্চ নিৰারেতি. যথাহ –

‘‘পূজারহে পূজযতো. বুদ্ধে যদি ৰ সাৰকে’’তিআদি (ধ. প. ১৯৫; অপ. ১.১০.১), তথা ¶ –

‘‘যে, ভিক্খৰে, বুদ্ধে পসন্না, অগ্গে তে পসন্না, অগ্গে খো পন পসন্নানং অগ্গো ৰিপাকো হোতী’’তিআদি (ইতিৰু. ৯০, ৯১),

‘‘বুদ্ধোতি কিত্তযন্তস্স, কাযে ভৰতি যা পীতি;

ৰরমেৰ হি সা পীতি, কসিণেনপি জম্বুদীপস্স.

ধম্মোতি কিত্তযন্তস্স…পে… কসিণেনপি জম্বুদীপস্স;

সঙ্ঘোতি কিত্তযন্তস্স…পে… কসিণেনপি জম্বুদীপস্সা’’তি. (ইতিৰু. অট্ঠ. ৯০),

তথা –

‘‘যস্মিং মহানাম সমযে অরিযসাৰকো তথাগতং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি, ন দোস…পে… ন মোহপরিযুট্ঠিতং চিত্তং হোতী’’তিআদি (অ. নি. ৬.১০; ১১.১১),

‘‘অরঞ্ঞে রুক্খমূলে ৰা…পে…

ভযং ৰা ছম্ভিতত্তং ৰা,

লোমহংসো ন হেস্সতী’’তি চ. (সং. নি. ২.২৪৯);

তত্থ যস্স ৰত্থুত্তযস্স ৰন্দনং কত্তুকামো, তস্স গুণাতিসযযোগসন্দস্সনত্থং ‘‘করুণাসীতলহদয’’ন্তিআদিনা গাথাত্তযমাহ. গুণাতিসযযোগেন হি ৰন্দনারহভাৰো, ৰন্দনারহে চ কতা ৰন্দনা যথাধিপ্পেতং পযোজনং সাধেতীতি. তত্থ যস্সা দেসনায সংৰণ্ণনং কত্তুকামো. সা ন ৰিনযদেসনা ৰিয করুণাপ্পধানা, নাপি অভিধম্মদেসনা ৰিয পঞ্ঞাপ্পধানা ¶ , অথ খো করুণাপঞ্ঞাপ্পধানাতি তদুভযপ্পধানমেৰ তাৰ সম্মাসম্বুদ্ধস্স থোমনং কাতুং তম্মূলকত্তা সেসরতনানং ‘‘করুণাসীতলহদয’’ন্তিআদি ৰুত্তং. তত্থ কিরতীতি করুণা, পরদুক্খং ৰিক্খিপতি অপনেতীতি অত্থো. অথ ৰা কিণাতীতি করুণা, পরদুক্খে সতি কারুণিকং হিংসতি ৰিবাধতীতি অত্থো. পরদুক্খে সতি সাধূনং কম্পনং হদযখেদং করোতীতি ৰা করুণা. অথ ৰা কমিতি সুখং, তং রুন্ধতীতি করুণা. এসা হি পরদুক্খাপনযনকামতালক্খণা অত্তসুখনিরপেক্খতায কারুণিকানং সুখং রুন্ধতি ৰিবন্ধতীতি অত্থো ¶ . করুণায সীতলং করুণাসীতলং, করুণাসীতলং হদযং অস্সাতি করুণাসীতলহদযো, তং করুণাসীতলহদযং.

তত্থ কিঞ্চাপি পরেসং হিতোপসংহারসুখাদিঅপরিহানিচ্ছনসভাৰতায, ব্যাপাদারতীনং উজুৰিপচ্চনীকতায চ পরসত্তসন্তানগতসন্তাপৰিচ্ছেদনাকারপ্পৰত্তিযা মেত্তামুদিতানম্পি চিত্তসীতলভাৰকারণতা উপলব্ভতি, তথাপি পরদুক্খাপনযনাকারপ্পৰত্তিযা পরূপতাপাসহনরসা অৰিহিংসাভূতা করুণাৰ ৰিসেসেন ভগৰতো চিত্তস্স চিত্তপস্সদ্ধি ৰিয সীতিভাৰনিমিত্তন্তি ৰুত্তং ‘‘করুণাসীতলহদয’’ন্তি. করুণামুখেন ৰা মেত্তামুদিতানম্পি হদযসীতলভাৰকারণতা ৰুত্তাতি দট্ঠব্বং. অথ ৰা অসাধারণঞাণৰিসেসনিবন্ধনভূতা সাতিসযং নিরৰসেসঞ্চ সব্বঞ্ঞুতঞ্ঞাণং ৰিয সৰিসযব্যাপিতায মহাকরুণাভাৰং উপগতা করুণাৰ ভগৰতো অতিসযেন হদযসীতলভাৰহেতূতি আহ ‘‘করুণাসীতলহদয’’ন্তি. অথ ৰা সতিপি মেত্তামুদিতানং সাতিসযে হদযসীতিভাৰনিবন্ধনত্তে সকলবুদ্ধগুণৰিসেসকারণতায তাসম্পি কারণন্তি করুণাৰ ভগৰতো ‘‘হদযসীতলভাৰকারণ’’ন্তি ৰুত্তা. করুণানিদানা হি সব্বেপি বুদ্ধগুণা. করুণানুভাৰনিব্বাপিযমানসংসারদুক্খসন্তাপস্স হি ভগৰতো পরদুক্খাপনযনকামতায অনেকানিপি অসঙ্খ্যেয্যানি কপ্পানং অকিলন্তরূপস্সেৰ নিরৰসেসবুদ্ধকরধম্মসম্ভরণনিরতস্স সমধিগতধম্মাধিপতেয্যস্স চ সন্নিহিতেসুপি সত্তসঙ্খারসমুপনীতহদযূপতাপনিমিত্তেসু ন ঈসকম্পি চিত্তসীতিভাৰস্স অঞ্ঞথত্তমহোসীতি. এতস্মিঞ্চ অত্থৰিকপ্পে তীসুপি অৰত্থাসু ভগৰতো করুণা সঙ্গহিতাতি দট্ঠব্বং.

পজানাতীতি পঞ্ঞা, যথাসভাৰং পকারেহি পটিৰিজ্ঝতীতি অত্থো. পঞ্ঞাৰ ঞেয্যাৰরণপ্পহানতো পকারেহি ধম্মসভাৰজোতনট্ঠেন পজ্জোতোতি পঞ্ঞাপজ্জোতো. সৰাসনপ্পহানতো ৰিসেসেন হতং সমুগ্ঘাতিতং ৰিহতং, পঞ্ঞাপজ্জোতেন ৰিহতং পঞ্ঞাপজ্জোতৰিহতং. মুয্হন্তি তেন, সযং ৰা মুয্হতি, মোহনমত্তমেৰ ৰা তন্তি মোহো, অৰিজ্জা, স্ৰেৰ ৰিসযসভাৰপটিচ্ছাদনতো অন্ধকারসরিক্খতায তমো ৰিযাতি তমো, পঞ্ঞাপজ্জোতৰিহতো ¶ মোহতমো এতস্সাতি পঞ্ঞাপজ্জোতৰিহতমোহতমো, তং পঞ্ঞাপজ্জোতৰিহতমোহতমং. সব্বেসম্পি ¶ হি খীণাসৰানং সতিপি পঞ্ঞাপজ্জোতেন অৰিজ্জন্ধকারস্স ৰিহতভাৰে সদ্ধাৰিমুত্তেহি ৰিয দিট্ঠিপ্পত্তানং সাৰকেহি পচ্চেকসম্বুদ্ধেহি চ সৰাসনপ্পহানেন সম্মাসম্বুদ্ধানং কিলেসপ্পহানস্স ৰিসেসো ৰিজ্জতীতি সাতিসযেন অৰিজ্জাপহানেন ভগৰন্তং থোমেন্তো আহ ‘‘পঞ্ঞাপজ্জোতৰিহতমোহতম’’ন্তি.

অথ ৰা অন্তরেন পরোপদেসং অত্তনো সন্তানে অচ্চন্তং অৰিজ্জন্ধকারৰিগমস্স নিব্বত্তিতত্তা, তথা সব্বঞ্ঞুতায বলেসু চ ৰসীভাৰস্স সমধিগতত্তা, পরসন্ততিযঞ্চ ধম্মদেসনাতিসযানুভাৰেন সম্মদেৰ তস্স পৰত্তিতত্তা ভগৰাৰ ৰিসেসতো মোহতমৰিগমেন থোমেতব্বোতি আহ ‘‘পঞ্ঞাপজ্জোতৰিহতমোহতম’’ন্তি. ইমস্মিঞ্চ অত্থৰিকপ্পে ‘‘পঞ্ঞাপজ্জোতো’’তি পদেন ভগৰতো পটিৰেধপঞ্ঞা ৰিয দেসনাপঞ্ঞাপি সামঞ্ঞনিদ্দেসেন, একসেসনযেন ৰা সঙ্গহিতাতি দট্ঠব্বং.

অথ ৰা ভগৰতো ঞাণস্স ঞেয্যপরিযন্তিকত্তা সকলঞেয্যধম্মসভাৰাৰবোধনসমত্থেন অনাৰরণঞাণসঙ্খাতেন পঞ্ঞাপজ্জোতেন সব্বঞেয্যধম্মসভাৰচ্ছাদকস্স মোহন্ধকারস্স ৰিধমিতত্তা অনঞ্ঞসাধারণো ভগৰতো মোহতমৰিনাসোতি কত্ৰা ৰুত্তং ‘‘পঞ্ঞাপজ্জোতৰিহতমোহতম’’ন্তি. এত্থ চ মোহতমৰিধমনন্তে অধিগতত্তা অনাৰরণঞাণং কারণূপচারেন সসন্তানে মোহতমৰিধমনন্তি দট্ঠব্বং. অভিনীহারসম্পত্তিযা সৰাসনপ্পহানমেৰ হি কিলেসানং ঞেয্যাৰরণপ্পহানন্তি, পরসন্তানে পন মোহতমৰিধমনস্স কারণভাৰতো অনাৰরণঞাণং ‘‘মোহতমৰিধমন’’ন্তি ৰুচ্চতীতি.

কিং পন কারণং অৰিজ্জাসমুগ্ঘাতোযেৰেকো পহানসম্পত্তিৰসেন ভগৰতো থোমনানিমিত্তং গয্হতি, ন পন সাতিসযং নিরৰসেসকিলেসপ্পহানন্তি? তপ্পহানৰচনেনেৰ তদেকট্ঠতায সকলসংকিলেসগণসমুগ্ঘাতস্স জোতিতভাৰতো. ন হি সো তাদিসো কিলেসো অত্থি, যো নিরৰসেসঅৰিজ্জাপ্পহানেন ন পহীযতীতি.

অথ ৰা ৰিজ্জা ৰিয সকলকুসলধম্মসমুপ্পত্তিযা নিরৰসেসাকুসলধম্মনিব্বত্তিযা সংসারপ্পৰত্তিযা চ অৰিজ্জা পধানকারণন্তি তব্বিঘাতৰচনেন ¶ সকলসংকিলেসগণসমুগ্ঘাতো ৰুত্তোযেৰ হোতীতি ৰুত্তং ‘‘পঞ্ঞাপজ্জোতৰিহতমোহতম’’ন্তি.

নরা ¶ চ অমরা চ নরামরা, সহ নরামরেহীতি সনরামরো, সনরামরো চ সো লোকো চাতি সনরামরলোকো. তস্স গরূতি সনরামরলোকগরু, তং সনরামরলোকগরুং. এতেন দেৰমনুস্সানং ৰিয তদৰসিট্ঠসত্তানম্পি যথারহং গুণৰিসেসাৰহতায ভগৰতো উপকারিতং দস্সেতি. ন চেত্থ পধানাপ্পধানভাৰো চোদেতব্বো. অঞ্ঞো হি সদ্দক্কমো, অঞ্ঞো অত্থক্কমো. এদিসেসু হি সমাসপদেসু পধানম্পি অপ্পধানং ৰিয নিদ্দিসীযতি যথা ‘‘সরাজিকায পরিসাযা’’তি (চূল়ৰ. ৩৩৬). কামঞ্চেত্থ সত্তসঙ্খারোকাসৰসেন তিৰিধো লোকো, গরুভাৰস্স পন অধিপ্পেতত্তা গরুকরণসমত্থস্সেৰ যুজ্জনতো সত্তলোকস্স ৰসেন অত্থো গহেতব্বো. সো হি লোকীযন্তি এত্থ পুঞ্ঞপাপানি তব্বিপাকো চাতি ‘‘লোকো’’তি ৰুচ্চতি. অমরগ্গহণেন চেত্থ উপপত্তিদেৰা অধিপ্পেতা.

অথ ৰা সমূহত্থো লোকসদ্দো সমুদাযৰসেন লোকীযতি পঞ্ঞাপীযতীতি. সহ নরেহীতি সনরা, সনরা চ তে অমরা চাতি সনরামরা, তেসং লোকোতি সনরামরলোকোতি পুরিমনযেনেৰ যোজেতব্বং. অমরসদ্দেন চেত্থ ৰিসুদ্ধিদেৰাপি সঙ্গয্হন্তি. তে হি মরণাভাৰতো পরমত্থতো অমরা. নরামরানংযেৰ চ গহণং উক্কট্ঠনিদ্দেসৰসেন যথা ‘‘সত্থা দেৰমনুস্সান’’ন্তি (দী. নি. ১.১৫৭). তথা হি সব্বানত্থপরিহারপুব্বঙ্গমায নিরৰসেসহিতসুখৰিধানতপ্পরায নিরতিসযায পযোগসম্পত্তিযা সদেৰমনুস্সায পজায অচ্চন্তূপকারিতায অপরিমিতনিরুপমপ্পভাৰগুণৰিসেসসমঙ্গিতায চ সব্বসত্তুত্তমো ভগৰা অপরিমাণাসু লোকধাতূসু অপরিমাণানং সত্তানং উত্তমগারৰট্ঠানং. তেন ৰুত্তং ‘‘সনরামরলোকগরু’’ন্তি.

সোভনং গতং গমনং এতস্সাতি সুগতো. ভগৰতো হি ৰেনেয্যজনুপসঙ্কমনং একন্তেন তেসং হিতসুখনিপ্ফাদনতো সোভনং, তথা ¶ লক্খণানুব্যঞ্জনপটিমণ্ডিতরূপকাযতায দুতৰিলম্বিত-খলিতানুকড্ঢন-নিপ্পীল়নুক্কুটিক-কুটিলাকুলতাদি-দোসরহিত-মৰহসিত-রাজহংস- ৰসভৰারণ-মিগরাজগমনং কাযগমনং ঞাণগমনঞ্চ ৰিপুলনিম্মলকরুণা-সতিৰীরিযাদি-গুণৰিসেসসহিতমভিনীহারতো যাৰ মহাবোধিং অনৰজ্জতায সোভনমেৰাতি. অথ ৰা সযম্ভুঞাণেন সকলমপি লোকং পরিঞ্ঞাভিসমযৰসেন পরিজানন্তো ঞাণেন সম্মা গতো অৰগতোতি সুগতো. তথা লোকসমুদযং পহানাভিসমযৰসেন পজহন্তো অনুপ্পত্তিধম্মতং আপাদেন্তো সম্মা গতো অতীতোতি সুগতো, লোকনিরোধং নিব্বানং সচ্ছিকিরিযাভিসমযৰসেন সম্মা গতো অধিগতোতি সুগতো, লোকনিরোধগামিনিং পটিপদং ভাৰনাভিসমযৰসেন সম্মা গতো পটিপন্নোতি সুগতো. ‘‘সোতাপত্তিমগ্গেন যে কিলেসা পহীনা, তে কিলেসে ন পুনেতি ন পচ্চেতি ন পচ্চাগচ্ছতীতি সুগতো’’তিআদিনা (মহানি. ৩৮; চূল়নি. ২৭) নযেন অযমত্থো ¶ ৰিভাৰেতব্বো. অথ ৰা সুন্দরং ঠানং সম্মাসম্বোধিং, নিব্বানমেৰ ৰা গতো অধিগতোতি সুগতো. যস্মা ৰা ভূতং তচ্ছং অত্থসংহিতং ৰেনেয্যানং যথারহং কালযুত্তমেৰ চ ধম্মং ভাসতি, তস্মা সম্মা গদতি ৰদতীতি সুগতো দ-কারস্স ত-কারং কত্ৰা. ইতি সোভনগমনতাদীহি সুগতো, তং সুগতং.

পুঞ্ঞপাপকম্মেহি উপপজ্জনৰসেন গন্তব্বতো গতিযো, উপপত্তিভৰৰিসেসা. তা পন নিরযাদিৰসেন পঞ্চৰিধা. তাহি সকলস্সপি ভৰগামিকম্মস্স অরিযমগ্গাধিগমেন অৰিপাকারহভাৰকরণেন নিৰত্তিতত্তা ভগৰা পঞ্চহিপি গতীহি সুট্ঠু মুত্তো ৰিসংযুত্তোতি আহ ‘‘গতিৰিমুত্ত’’ন্তি. এতেন ভগৰতো কত্থচিপি গতিযা অপরিযাপন্নতং দস্সেতি, যতো ভগৰা ‘‘দেৰাতিদেৰো’’তি ৰুচ্চতি. তেনেৰাহ –

‘‘যেন দেৰূপপত্যস্স, গন্ধব্বো ৰা ৰিহঙ্গমো;

যক্খত্তং যেন গচ্ছেয্যং, মনুস্সত্তঞ্চ অব্বজে;

তে ময্হং আসৰা খীণা, ৰিদ্ধস্তা ৰিনল়ীকতা’’তি. (অ. নি. ৪.৩৬);

তংতংগতিসংৰত্তনকানঞ্হি কম্মকিলেসানং অগ্গমগ্গেন বোধিমূলেযেৰ সুপ্পহীনত্তা নত্থি ভগৰতো গতিপরিযাপন্নতাতি অচ্চন্তমেৰ ভগৰা সব্বভৰযোনিগতি-ৰিঞ্ঞাণট্ঠিতি-সত্তাৰাস-সত্তনিকাযেহি পরিমুত্তো, তং গতিৰিমুত্তং. ৰন্দেতি নমামি, থোমেমীতি ৰা অত্থো.

অথ ¶ ৰা গতিৰিমুত্তন্তি অনুপাদিসেসনিব্বানধাতুপ্পত্তিযা ভগৰন্তং থোমেতি. এত্থ হি দ্ৰীহি আকারেহি ভগৰতো থোমনা ৰেদিতব্বা অত্তহিতসম্পত্তিতো পরহিতপটিপত্তিতো চ. তেসু অত্তহিতসম্পত্তি অনাৰরণঞাণাধিগমতো সৰাসনানং সব্বেসং কিলেসানং অচ্চন্তপ্পহানতো অনুপাদিসেসনিব্বানপ্পত্তিতো চ ৰেদিতব্বা, পরহিতপটিপত্তি লাভসক্কারাদিনিরপেক্খচিত্তস্স সব্বদুক্খনিয্যানিকধম্মদেসনতো ৰিরুদ্ধেসুপি নিচ্চং হিতজ্ঝাসযতো ঞাণপরিপাককালাগমনতো চ. সা পনেত্থ আসযতো পযোগতো চ দুৰিধা পরহিতপটিপত্তি, তিৰিধা চ অত্তহিতসম্পত্তি পকাসিতা হোতি. কথং? ‘‘করুণাসীতলহদয’’ন্তি এতেন আসযতো পরহিতপটিপত্তি, সম্মাগদনত্থেন সুগতসদ্দেন পযোগতো পরহিতপটিপত্তি, ‘‘পঞ্ঞাপজ্জোতৰিহতমোহতমং গতিৰিমুত্ত’’ন্তি এতেহি চতুসচ্চপটিৰেধত্থেন চ সুগতসদ্দেন তিৰিধাপি অত্তহিতসম্পত্তি, অৰসিট্ঠট্ঠেন ¶ তেন ‘‘পঞ্ঞাপজ্জোতৰিহতমোহতম’’ন্তি এতেন চাপি সব্বাপি অত্তহিতসম্পত্তিপরহিতপটিপত্তি পকাসিতা হোতীতি.

অথ ৰা তীহি আকারেহি ভগৰতো থোমনা ৰেদিতব্বা – হেতুতো ফলতো উপকারতো চ. তত্থ হেতু মহাকরুণা, সা পঠমপদেন দস্সিতা. ফলং চতুব্বিধং ঞাণসম্পদা পহানসম্পদা আনুভাৰসম্পদা রূপকাযসম্পদা চাতি. তাসু ঞাণপহানসম্পদা দুতিযপদেন সচ্চপটিৰেধত্থেন চ সুগতসদ্দেন পকাসিতা হোন্তি, আনুভাৰসম্পদা পন ততিযপদেন, রূপকাযসম্পদা যথাৰুত্তকাযগমনসোভনত্থেন সুগতসদ্দেন লক্খণানুব্যঞ্জনপারিপূরিযা ৰিনা তদভাৰতো. উপকারো অনন্তরং অবাহিরং করিত্ৰা তিৰিধযানমুখেন ৰিমুত্তিধম্মদেসনা. সো সম্মাগদনত্থেন সুগতসদ্দেন পকাসিতো হোতীতি ৰেদিতব্বং.

তত্থ ‘‘করুণাসীতলহদয’’ন্তি এতেন সম্মাসম্বোধিযা মূলং দস্সেতি. মহাকরুণাসঞ্চোদিতমানসো হি ভগৰা সংসারপঙ্কতো সত্তানং সমুদ্ধরণত্থং কতাভিনীহারো অনুপুব্বেন পারমিযো পূরেত্ৰা অনুত্তরং সম্মাসম্বোধিং অধিগতোতি করুণা সম্মাসম্বোধিযা মূলং. ‘‘পঞ্ঞাপজ্জোতৰিহতমোহতম’’ন্তি এতেন সম্মাসম্বোধিং দস্সেতি ¶ . অনাৰরণঞাণপদট্ঠানঞ্হি মগ্গঞাণং, মগ্গঞাণপদট্ঠানঞ্চ অনাৰরণঞাণং ‘‘সম্মাসম্বোধী’’তি ৰুচ্চতীতি. সম্মাগমনত্থেন সুগতসদ্দেন সম্মাসম্বোধিযা পটিপত্তিং দস্সেতি লীনুদ্ধচ্চপতিট্ঠানাযূহনকামসুখল্লিকত্তকিলমথানুযোগসস্সতুচ্ছেদাভিনিৰেসাদি অন্তদ্ৰযরহিতায করুণাপঞ্ঞাপরিগ্গহিতায মজ্ঝিমায পটিপত্তিযা পকাসনতো সুগতসদ্দস্স. ইতরেহি সম্মাসম্বোধিযা পধানাপ্পধানভেদং পযোজনং দস্সেতি. সংসারমহোঘতো সত্তসন্তারণঞ্হেত্থ পধানং পযোজনং, তদঞ্ঞমপ্পধানং. তেসু পধানেন পরহিতপটিপত্তিং দস্সেতি, ইতরেন অত্তহিতসম্পত্তিং, তদুভযেন অত্তহিতায পটিপন্নাদীসু চতূসু পুগ্গলেসু ভগৰতো চতুত্থপুগ্গলভাৰং দস্সেতি. তেন চ অনুত্তরদক্খিণেয্যভাৰং উত্তমৰন্দনীযভাৰং অত্তনো চ ৰন্দনকিরিযায খেত্তঙ্গতভাৰং দস্সেতি.

এত্থ চ করুণাগহণেন লোকিযেসু মহগ্গতভাৰপ্পত্তাসাধারণগুণদীপনতো ভগৰতো সব্বলোকিযগুণসম্পত্তি দস্সিতা হোতি, পঞ্ঞাগহণেন সব্বঞ্ঞুতঞ্ঞাণপদট্ঠানমগ্গঞাণদীপনতো সব্বলোকুত্তরগুণসম্পত্তি. তদুভযগ্গহণসিদ্ধো হি অত্থো ‘‘সনরামরলোকগরু’’ন্তিআদিনা ৰিপঞ্চীযতীতি. করুণাগহণেন চ উপগমনং নিরুপক্কিলেসং দস্সেতি, পঞ্ঞাগহণেন অপগমনং. তথা করুণাগহণেন লোকসমঞ্ঞানুরূপং ভগৰতো পৰত্তিং দস্সেতি লোকৰোহারৰিসযত্তা ¶ করুণায, পঞ্ঞাগহণেন সমঞ্ঞায অনতিধাৰনং সভাৰানৰবোধেন হি ধম্মানং সমঞ্ঞং অতিধাৰিত্ৰা সত্তাদিপরামসনং হোতীতি. তথা করুণাগহণেন মহাকরুণাসমাপত্তিৰিহারং দস্সেতি, পঞ্ঞাগহণেন তীসু কালেসু অপ্পটিহতঞাণং চতুসচ্চঞাণং চতুপটিসম্ভিদাঞাণং চতুৰেসারজ্জঞাণং.

করুণাগহণেন মহাকরুণাসমাপত্তিঞাণস্স গহিতত্তা সেসাসাধারণঞাণানি, ছ অভিঞ্ঞা, অট্ঠসু পরিসাসু অকম্পনঞাণানি, দস বলানি, চুদ্দস বুদ্ধঞাণানি, সোল়স ঞাণচরিযা, অট্ঠারস বুদ্ধধম্মা, চতুচত্তালীস ঞাণৰত্থূনি, সত্তসত্ততিঞাণৰত্থূনীতি এৰমাদীনং অনেকেসং পঞ্ঞাপভেদানং ৰসেন ঞাণচারং দস্সেতি. তথা করুণাগহণেন চরণসম্পত্তিং, পঞ্ঞাগহণেন ৰিজ্জাসম্পত্তিং. করুণাগহণেন অত্তাধিপতিতা, পঞ্ঞাগহণেন ধম্মাধিপতিতা. করুণাগহণেন লোকনাথভাৰো, পঞ্ঞাগহণেন ¶ অত্তনাথভাৰো. তথা করুণাগহণেন পুব্বকারিভাৰো, পঞ্ঞাগহণেন কতঞ্ঞুতা. তথা করুণাগহণেন অপরন্তপতা, পঞ্ঞাগহণেন অনত্তন্তপতা. করুণাগহণেন ৰা বুদ্ধকরধম্মসিদ্ধি, পঞ্ঞাগহণেন বুদ্ধভাৰসিদ্ধি. তথা করুণাগহণেন পরেসং তারণং, পঞ্ঞাগহণেন সযং তরণং. তথা করুণাগহণেন সব্বসত্তেসু অনুগ্গহচিত্ততা, পঞ্ঞাগহণেন সব্বধম্মেসু ৰিরত্তচিত্ততা দস্সিতা হোতি.

সব্বেসঞ্চ বুদ্ধগুণানং করুণা আদি তন্নিদানভাৰতো, পঞ্ঞা পরিযোসানং ততো উত্তরি করণীযাভাৰতো. ইতি আদিপরিযোসানদস্সনেন সব্বে বুদ্ধগুণা দস্সিতা হোন্তি. তথা করুণাগহণেন সীলক্খন্ধপুব্বঙ্গমো সমাধিক্খন্ধো দস্সিতো হোতি. করুণানিদানঞ্হি সীলং ততো পাণাতিপাতাদিৰিরতিপ্পৰত্তিতো, সা চ ঝানত্তযসম্পযোগিনীতি. পঞ্ঞাৰচনেন পঞ্ঞাক্খন্ধো. সীলঞ্চ সব্ববুদ্ধগুণানং আদি, সমাধি মজ্ঝে, পঞ্ঞা পরিযোসানন্তি এৰম্পি আদিমজ্ঝপরিযোসানকল্যাণদস্সনেন সব্বে বুদ্ধগুণা দস্সিতা হোন্তি নযতো দস্সিতত্তা. এসো এৰ হি নিরৰসেসতো বুদ্ধগুণানং দস্সনুপাযো, যদিদং নযগ্গাহণং. অঞ্ঞথা কো নাম সমত্থো ভগৰতো গুণে অনুপদং নিরৰসেসতো দস্সেতুং. তেনেৰাহ –

‘‘বুদ্ধোপি বুদ্ধস্স ভণেয্য ৰণ্ণং;

কপ্পম্পি চে অঞ্ঞমভাসমানো.

খীযেথ ¶ কপ্পো চিরদীঘমন্তরে;

ৰণ্ণো ন খীযেথ তথাগতস্সা’’তি. (দী. নি. অট্ঠ. ১.৩০৫; ৩.১৪১; ম. নি. অট্ঠ. ২.৪২৫; উদা. অট্ঠ. ৫৩; অপ. অট্ঠ. ২.৭.২০; বু. ৰং. অট্ঠ. ৪.৪; চরিযা. অট্ঠ. ৩.১২২ পকিণ্ণককথা);

তেনেৰ চ আযস্মতা সারিপুত্তত্থেরেনপি বুদ্ধগুণপরিচ্ছেদনং পতি অনুযুত্তেন ‘‘নো হেতং, ভন্তে’’তি পটিক্খিপিত্ৰা ‘‘অপিচ মে, ভন্তে, ধম্মন্ৰযো ৰিদিতো’’তি (দী. নি. ২.১৪৬) ৰুত্তং.

২. এৰং সঙ্খেপেন সকলসব্বঞ্ঞুগুণেহি ভগৰন্তং অভিত্থৰিত্ৰা ইদানি সদ্ধম্মং থোমেতুং ‘‘বুদ্ধোপী’’তিআদিমাহ. তত্থ বুদ্ধোতি কত্তুনিদ্দেসো. বুদ্ধভাৰন্তি কম্মনিদ্দেসো. ভাৰেত্ৰা সচ্ছিকত্ৰাতি চ পুব্বকালকিরিযানিদ্দেসো ¶ . যন্তি অনিযমতো কম্মনিদ্দেসো. উপগতোতি অপরকালকিরিযানিদ্দেসো. ৰন্দেতি কিরিযানিদ্দেসো. তন্তি নিযমনং. ধম্মন্তি ৰন্দনকিরিযায কম্মনিদ্দেসো. গতমলং অনুত্তরন্তি চ তব্বিসেসনং.

তত্থ বুদ্ধসদ্দস্স তাৰ ‘‘বুজ্ঝিতা সচ্চানীতি বুদ্ধো, বোধেতা পজাযাতি বুদ্ধো’’তিআদিনা নিদ্দেসনযেন (মহানি. ১৯২; চূল়নি. ৯৭) অত্থো ৰেদিতব্বো. অথ ৰা সৰাসনায অঞ্ঞাণনিদ্দায অচ্চন্তৰিগমতো, বুদ্ধিযা ৰা ৰিকসিতভাৰতো বুদ্ধৰাতি বুদ্ধো জাগরণৰিকসনত্থৰসেন. অথ ৰা কস্সচিপি ঞেয্যধম্মস্স অনৰবুদ্ধস্স অভাৰেন ঞেয্যৰিসেসস্স কম্মভাৰেন অগ্গহণতো কম্মৰচনিচ্ছায অভাৰেন অৰগমনত্থৰসেনেৰ কত্তুনিদ্দেসো লব্ভতীতি বুদ্ধৰাতি বুদ্ধো যথা ‘‘দিক্খিতো ন দদাতী’’তি. অত্থতো পন পারমিতাপরিভাৰিতো সযম্ভুঞাণেন সহ ৰাসনায ৰিহতৰিদ্ধস্তনিরৰসেসকিলেসো মহাকরুণাসব্বঞ্ঞুতঞ্ঞাণাদিঅপরিমেয্যগুণগণাধারো খন্ধসন্তানো বুদ্ধো. যথাহ –

‘‘বুদ্ধোতি যো সো ভগৰা সযম্ভূ. অনাচরিযকো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝি, তত্থ চ সব্বঞ্ঞুতং পত্তো বলেসু চ ৰসীভাৰ’’ন্তি (মহানি. ১৯২; চূল়নি. ৯৭; পটি. ম. ৩.১৬১).

অপি-সদ্দো ¶ সম্ভাৰনে. তেন ‘‘এৰং গুণৰিসেসযুত্তো সোপি নাম ভগৰা’’তি ৰক্খমানগুণে ধম্মে সম্ভাৰনং দীপেতি. বুদ্ধভাৰন্তি সম্মাসম্বোধিং. ভাৰেত্ৰাতি উপ্পাদেত্ৰা ৰড্ঢেত্ৰা চ. সচ্ছিকত্ৰাতি পচ্চক্খং কত্ৰা. উপগতোতি পত্তো, অধিগতোতি অত্থো. এতস্স ‘‘বুদ্ধভাৰ’’ন্তি এতেন সম্বন্ধো. গতমলন্তি ৰিগতমলং, নিদ্দোসন্তি অত্থো. ৰন্দেতি পণমামি, থোমেমি ৰা. অনুত্তরন্তি উত্তররহিতং, লোকুত্তরন্তি অত্থো. ধম্মন্তি যথানুসিট্ঠং পটিপজ্জমানে অপাযতো চ সংসারতো চ অপতমানে কত্ৰা ধারেতীতি ধম্মো. অযঞ্হেত্থ সঙ্খেপত্থো – এৰং ৰিৰিধগুণগণসমন্নাগতো বুদ্ধোপি ভগৰা যং অরিযমগ্গসঙ্খাতং ধম্মং ভাৰেত্ৰা, ফলনিব্বানসঙ্খাতং পন সচ্ছিকত্ৰা অনুত্তরং সম্মাসম্বোধিং অধিগতো, তমেতং বুদ্ধানম্পি বুদ্ধভাৰহেতুভূতং সব্বদোসমলরহিতং অত্তনো উত্তরিতরাভাৰেন অনুত্তরং পটিৰেধসদ্ধম্মং নমামীতি. পরিযত্তিসদ্ধম্মস্সাপি তপ্পকাসনত্তা ইধ সঙ্গহো দট্ঠব্বো.

অথ ¶ ৰা ‘‘অভিধম্মনযসমুদ্দং অধিগচ্ছি, তীণি পিটকানি সম্মসী’’তি চ অট্ঠকথাযং ৰুত্তত্তা পরিযত্তিধম্মস্সপি সচ্ছিকিরিযাসম্মসনপরিযাযো লব্ভতীতি সোপি ইধ ৰুত্তো এৰাতি দট্ঠব্বং. তথা ‘‘যং ধম্মং ভাৰেত্ৰা সচ্চিকত্ৰা’’তি চ ৰুত্তত্তা বুদ্ধকরধম্মভূতাহি পারমিতাহি সহ পুব্বভাগে অধিসীলসিক্খাদযোপি ইধ ধম্মসদ্দেন সঙ্গহিতাতি ৰেদিতব্বং. তাপি হি মলপটিপক্খতায গতমলা অনঞ্ঞসাধারণতায অনুত্তরা চাতি. তথা হি সত্তানং সকলৰট্টদুক্খনিস্সরণত্থায কতমহাভিনীহারো মহাকরুণাধিৰাসপেসলজ্ঝাসযো পঞ্ঞাৰিসেসপরিধোতনিম্মলানং দানদমসংযমাদীনং উত্তমধম্মানং সতসহস্সাধিকানি কপ্পানং চত্তারি অসঙ্খ্যেয্যানি সক্কচ্চং নিরন্তরং নিরৰসেসানং ভাৰনাপচ্চক্খকরণেহি কম্মাদীসু অধিগতৰসীভাৰো অচ্ছরিযাচিন্তেয্যমহানুভাৰো অধিসীলাধিচিত্তানং পরমুক্কংসপারমিপ্পত্তো ভগৰা পচ্চযাকারে চতুৰীসতিকোটিসতসহস্সমুখেন মহাৰজিরঞাণং পেসেত্ৰা অনুত্তরং সম্মাসম্বোধিং অভিসম্বুদ্ধোতি.

এত্থ চ ‘‘ভাৰেত্ৰা’’তি এতেন ৰিজ্জাসম্পদায ধম্মং থোমেতি, ‘‘সচ্ছিকত্ৰা’’তি এতেন ৰিমুত্তিসম্পদায. তথা পঠমেন ঝানসম্পদায, দুতিযেন ৰিমোক্খসম্পদায. পঠমেন ৰা সমাধিসম্পদায, দুতিযেন সমাপত্তিসম্পদায. অথ ৰা পঠমেন খযেঞাণভাৰেন, দুতিযেন অনুপ্পাদেঞাণভাৰেন. পুরিমেন ৰা ৰিজ্জূপমতায, দুতিযেন ৰজিরূপমতায. পুরিমেন ৰা ৰিরাগসম্পত্তিযা, দুতিযেন নিরোধসম্পত্তিযা. তথা পঠমেন নিয্যানভাৰেন, দুতিযেন নিস্স্সরণভাৰেন. পঠমেন ৰা হেতুভাৰেন, দুতিযেন অসঙ্খতভাৰেন. পঠমেন ৰা দস্সনভাৰেন, দুতিযেন ৰিৰেকভাৰেন. পঠমেন ৰা অধিপতিভাৰেন, দুতিযেন অমতভাৰেন ধম্মং ¶ থোমেতি. অথ ৰা ‘‘যং ধম্মং ভাৰেত্ৰা বুদ্ধভাৰং উপগতো’’তি এতেন স্ৰাক্খাততায ধম্মং থোমেতি. ‘‘সচ্ছিকত্ৰা’’তি এতেন সন্দিট্ঠিকতায. তথা পুরিমেন অকালিকতায, পচ্ছিমেন এহিপস্সিকতায. পুরিমেন ৰা ওপনেয্যিকতায, পচ্ছিমেন পচ্চত্তং ৰেদিতব্বতায ধম্মং থোমেতি. ‘‘গতমল’’ন্তি ইমিনা সংকিলেসাভাৰদীপনেন ধম্মস্স পরিসুদ্ধতং দস্সেতি, ‘‘অনুত্তর’’ন্তি এতেন অঞ্ঞস্স ৰিসিট্ঠস্স অভাৰদীপনেন ৰিপুলপরিপুণ্ণতং. পঠমেন ৰা পহানসম্পদং ধম্মস্স দস্সেতি, দুতিযেন সভাৰসম্পদং. ভাৰেতব্বতায ৰা ধম্মস্স গতমলভাৰো যোজেতব্বো ¶ . ভাৰনাগুণেন হি সো দোসানং সমুগ্ঘাতকো হোতীতি. সচ্ছিকাতব্বভাৰেন অনুত্তরভাৰো যোজেতব্বো. সচ্ছিকিরিযানিব্বত্তিতো হি তদুত্তরিকরণীযাভাৰতো অনঞ্ঞসাধারণতায অনুত্তরোতি. তথা ‘‘ভাৰেত্ৰা’’তি এতেন সহ পুব্বভাগসীলাদীহি সেক্খা সীলসমাধিপঞ্ঞাক্খন্ধা দস্সিতা হোন্তি, ‘‘সচ্ছিকত্ৰা’’তি এতেন সহ অসঙ্খতায ধাতুযা অসেক্খা সীলসমাধিপঞ্ঞাক্খন্ধা দস্সিতা হোন্তীতি.

৩. এৰং সঙ্খেপেনেৰ সব্বধম্মগুণেহি সদ্ধম্মং অভিত্থৰিত্ৰা ইদানি অরিযসঙ্ঘং থোমেতুং ‘‘সুগতস্সা’’তিআদিমাহ. তত্থ সুগতস্সাতি সম্বন্ধনিদ্দেসো, তস্স ‘‘পুত্তান’’ন্তি এতেন সম্বন্ধো. ওরসানন্তি পুত্তৰিসেসনং. মারসেনমথনানন্তি ওরসপুত্তভাৰে কারণনিদ্দেসো. তেন কিলেসপ্পহানমেৰ ভগৰতো ওরসপুত্তভাৰে কারণং অনুজানাতীতি দস্সেতি. অট্ঠন্নন্তি গণনপরিচ্ছেদনিদ্দেসো. তেন সতিপি তেসং সত্তৰিসেসভাৰেন অনেকসহস্সসঙ্খাভাৰে ইমং গণনপরিচ্ছেদং নাতিৰত্তন্তীতি দস্সেতি মগ্গট্ঠফলট্ঠভাৰানাতিৰত্তনতো. সমূহন্তি সমুদাযনিদ্দেসো. অরিযসঙ্ঘন্তি গুণৰিসিট্ঠসঙ্ঘাটভাৰনিদ্দেসো. তেন অসভিপি অরিযপুগ্গলানং কাযসামগ্গিযং অরিযসঙ্ঘভাৰং দস্সেতি দিট্ঠিসীলসামঞ্ঞেন সংহতভাৰতো.

তত্থ উরসি ভৰা জাতা সংৰদ্ধা চ ওরসা. যথা হি সত্তানং ওরসপুত্তা অত্তজাততায পিতু সন্তকস্স দাযজ্জস্স ৰিসেসেন ভাগিনো হোন্তি, এৰমেৰ তেপি অরিযপুগ্গলা সম্মাসম্বুদ্ধস্স ধম্মস্সৰনন্তে অরিযায জাতিযা জাততায ভগৰতো সন্তকস্স ৰিমুত্তিসুখস্স অরিযধম্মরতনস্স চ একন্তভাগিনোতি ওরসা ৰিয ওরসা. অথ ৰা ভগৰতো ধম্মদেসনানুভাৰেন অরিযভূমিং ওক্কমমানা ওক্কন্তা চ অরিযসাৰকা ভগৰতো উরেন ৰাযামজনিতাভিজাতিতায নিপ্পরিযাযেন ‘‘ওরসপুত্তা’’তি ৰত্তব্বতং অরহন্তি. সাৰকেহি পৰত্তিযমানাপি হি ধম্মদেসনা ‘‘ভগৰতো ধম্মদেসনা’’ইচ্চেৰ ৰুচ্চতি তংমূলিকত্তা লক্খণাদিৰিসেসাভাৰতো চ.

যদিপি ¶ ¶ অরিযসাৰকানং অরিযমগ্গাধিগমসমযে ভগৰতো ৰিয তদন্তরায করণত্থং দেৰপুত্তমারো, মারৰাহিনী ৰা ন একন্তেন অপসাদেতি, তেহি পন অপসাদেতব্বতায কারণে ৰিমথিতে তেপি ৰিমথিতা এৰ নাম হোন্তীতি আহ – ‘‘মারসেনমথনান’’ন্তি. ইমস্মিং পনত্থে ‘‘মারমারসেনমথনান’’ন্তি ৰত্তব্বে ‘‘মারসেনমথনান’’ন্তি একদেসসরূপেকসেসো কতোতি দট্ঠব্বং. অথ ৰা খন্ধাভিসঙ্খারমারানং ৰিয দেৰপুত্তমারস্সপি গুণমারণে সহাযভাৰূপগমনতো কিলেসবলকাযো ‘‘সেনা’’তি ৰুচ্চতি. যথাহ ‘‘কামা তে পঠমা সেনা’’তিআদি (সু. নি. ৪৩৮; মহানি. ২৮, ৬৮, ১৪৯). সা চ তেহি দিযড্ঢসহস্সভেদা অনন্তভেদা ৰা কিলেসৰাহিনী সতিধম্মৰিচযৰীরিযসমথাদিগুণপহরণেহি ওধিসো ৰিমথিতা ৰিহতা ৰিদ্ধস্তা চাতি মারসেনমথনা, অরিযসাৰকা. এতেন তেসং ভগৰতো অনুজাতপুত্ততং দস্সেতি.

আরকত্তা কিলেসেহি, অনযে ন ইরিযনতো, অযে চ ইরিযনতো অরিযা নিরুত্তিনযেন. অথ ৰা সদেৰকেন লোকেন ‘‘সরণ’’ন্তি অরণীযতো উপগন্তব্বতো উপগতানঞ্চ তদত্থসিদ্ধিতো অরিযা, অরিযানং সঙ্ঘোতি অরিযসঙ্ঘো, অরিযো চ সো সঙ্ঘো চাতি ৰা অরিযসঙ্ঘো, তং অরিযসঙ্ঘং. ভগৰতো অপরভাগে বুদ্ধধম্মরতনানম্পি সমধিগমো সঙ্ঘরতনাধীনোতি অরিযসঙ্ঘস্স বহূপকারতং দস্সেতুং ইধেৰ ‘‘সিরসা ৰন্দে’’তি ৰুত্তন্তি দট্ঠব্বং.

এত্থ চ ‘‘সুগতস্স ওরসানং পুত্তান’’ন্তি এতেন অরিযসঙ্ঘস্স পভৰসম্পদং দস্সেতি, ‘‘মারসেনমথনান’’ন্তি এতেন পহানসম্পদং সকলসংকিলেসপ্পহানদীপনতো. ‘‘অট্ঠন্নম্পি সমূহ’’ন্তি এতেন ঞাণসম্পদং মগ্গট্ঠফলট্ঠভাৰদীপনতো. ‘‘অরিযসঙ্ঘ’’ন্তি এতেন পভাৰসম্পদং দস্সেতি সব্বসঙ্ঘানং অগ্গভাৰদীপনতো. অথ ৰা ‘‘সুগতস্স ওরসানং পুত্তান’’ন্তি অরিযসঙ্ঘস্স ৰিসুদ্ধনিস্সযভাৰদীপনং, ‘‘মারসেনমথনান’’ন্তি সম্মাউজুঞাযসামীচিপ্পটিপন্নভাৰদীপনং, ‘‘অট্ঠন্নম্পি সমূহ’’ন্তি আহুনেয্যাদিভাৰদীপনং, ‘‘অরিযসঙ্ঘ’’ন্তি অনুত্তরপুঞ্ঞক্খেত্তভাৰদীপনং. তথা ‘‘সুগতস্স ওরসানং পুত্তান’’ন্তি এতেন অরিযসঙ্ঘস্স লোকুত্তরসরণগমনসব্ভাৰং দীপেতি. লোকুত্তরসরণগমনেন হি তে ভগৰতো ওরসপুত্তা জাতা. ‘‘মারসেনমথনান’’ন্তি এতেন অভিনীহারসম্পদাসিদ্ধং ¶ পুব্বভাগে সম্মাপটিপত্তিং দস্সেতি. কতাভিনীহারা হি সম্মাপটিপন্না মারং মারপরিসং ৰা অভিৰিজিনন্তি. ‘‘অট্ঠন্নম্পি সমূহ’’ন্তি এতেন পটিৰিদ্ধস্তৰিপক্খে সেক্খাসেক্খধম্মে দস্সেতি পুগ্গলাধিট্ঠানেন মগ্গফলধম্মানং পকাসিতত্তা. ‘‘অরিযসঙ্ঘ’’ন্তি অগ্গদক্খিণেয্যভাৰং দস্সেতি. সরণগমনঞ্চ সাৰকানং সব্বগুণানং আদি, সপুব্বভাগপটিপদা সেক্খা সীলক্খন্ধাদযো মজ্ঝে, অসেক্খা সীলক্খন্ধাদযো ¶ পরিযোসানন্তি আদিমজ্ঝপরিযোসানকল্যাণা সঙ্খেপতো সব্বে অরিযসঙ্ঘগুণা পকাসিতা হোন্তি.

৪. এৰং গাথাত্তযেন সঙ্খেপতো সকলগুণসংকিত্তনমুখেন রতনত্তযস্স পণামং কত্ৰা ইদানি তংনিপচ্চকারং যথাধিপ্পেতে পযোজনে পরিণামেন্তো ‘‘ইতি মে’’তিআদিমাহ. তত্থ রতিজননট্ঠেন রতনং, বুদ্ধধম্মসঙ্ঘা. তেসঞ্হি ‘‘ইতিপি সো ভগৰা’’তিআদিনা যথাভূতগুণে আৰজ্জেন্তস্স অমতাধিগমহেতুভূতং অনপ্পকং পীতিপামোজ্জং উপ্পজ্জতি. যথাহ –

‘‘যস্মিং মহানাম, সমযে অরিযসাৰকো তথাগতং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি, ন দোস…পে… ন মোহপরিযুট্ঠিতং চিত্তং হোতি…পে… উজুগতচিত্তো খো মহানাম, অরিযসাৰকো লভতি অত্থৰেদং, লভতি ধম্মৰেদং, লভতি ধম্মূপসংহিতং পামোজ্জং, পমুদিতস্স পীতি জাযতী’’তিআদি (অ. নি. ৬.১০; ১১.১১).

চিত্তীকতাদিভাৰো ৰা রতনট্ঠো. ৰুত্তঞ্হেতং –

‘‘চিত্তীকতং মহগ্ঘঞ্চ, অতুলং দুল্লভদস্সনং;

অনোমসত্তপরিভোগং, রতনং তেন ৰুচ্চতী’’তি. (দী. নি. অট্ঠ. ২.৩৩; সং. নি. অট্ঠ. ৩.৫.২২৩; খু. পা. অট্ঠ. ৬.৩; সু. নি. অট্ঠ. ১.২২৬; মহানি. অট্ঠ. ৫০);

চিত্তিকতভাৰাদযো চ অনঞ্ঞসাধারণা বুদ্ধাদীসু এৰ লব্ভন্তীতি.

ৰন্দনাৰ ৰন্দনামযং যথা ‘‘দানমযং সীলময’’ন্তি (দী. নি. ৩.৩০৫; ইতিৰু. ৬০). ৰন্দনা চেত্থ কাযৰাচাচিত্তেহি তিণ্ণং রতনানং গুণনিন্নতা, থোমনা ৰা. পুজ্জভৰফলনিব্বত্তনতো ¶ পুঞ্ঞং, অত্তনো সন্তানং পুনাতীতি ৰা. সুৰিহতন্তরাযোতি সুট্ঠু ৰিহতন্তরাযো. এতেন অত্তনো পসাদসম্পত্তিযা রতনত্তযস্স চ খেত্তভাৰসম্পত্তিযা তং পুঞ্ঞং অত্থপ্পকাসনস্স উপঘাতকউপদ্দৰানং ৰিহননে সমত্থন্তি দস্সেতি. হুত্ৰাতি পুব্বকালকিরিযা. তস্স ‘‘অত্থং পকাসযিস্সামী’’তি এতেন সম্বন্ধো. তস্সাতি যং রতনত্তযৰন্দনামযং পুঞ্ঞং, তস্স. আনুভাৰেনাতি বলেন.

৫. এৰং ¶ রতনত্তযস্স নিপচ্চকারে পযোজনং দস্সেত্ৰা ইদানি যস্সা ধম্মদেসনায অত্থং সংৰণ্ণেতুকামো, তস্সা তাৰ গুণাভিত্থৰনৰসেন উপঞ্ঞাপনত্থং ‘‘মজ্ঝিমপমাণসুত্তঙ্কিতস্সা’’তিআদি ৰুত্তং. তত্থ মজ্ঝিমপমাণসুত্তঙ্কিতস্সাতি নাতিদীঘনাতিখুদ্দকপমাণেহি সুত্তন্তেহি লক্খিতস্স. যথা হি দীঘাগমে দীঘপমাণানি সুত্তানি, যথা চ সংযুত্তঙ্গুত্তরাগমেসু দ্ৰীসু খুদ্দকপমাণানি, ন এৰং ইধ. ইধ পন পমাণতো মজ্ঝিমানি সুত্তানি. তেন ৰুত্তং ‘‘মজ্ঝিমপমাণসুত্তঙ্কিতস্সাতি নাতিদীঘনাতিখুদ্দকপমাণেহি সুত্তন্তেহি লক্খিতস্সতি অত্থো’’তি. এতেন ‘‘মজ্ঝিমো’’তি অযং ইমস্স অত্থানুগতসমঞ্ঞাতি দস্সেতি. ননু চ সুত্তানি এৰ আগমো, কস্স পন সুত্তেহি অঙ্কনন্তি? সচ্চমেতং পরমত্থতো, সুত্তানি পন উপাদায পঞ্ঞত্তো আগমো. যথেৰ হি অত্থব্যঞ্জনসমুদাযে ‘‘সুত্ত’’ন্তি ৰোহারো, এৰং সুত্তসমুদাযে অযং ‘‘আগমো’’তি ৰোহারো. ইধাতি ইমস্মিং সাসনে. আগমিস্সন্তি এত্থ, এতেন এতস্মা ৰা অত্তত্থপরত্থাদযোতি আগমো, আদিকল্যাণাদিগুণসম্পত্তিযা উত্তমট্ঠেন তংতংঅভিপত্থিতসমিদ্ধিহেতুতায পণ্ডিতেহি ৰরিতব্বতো ৰরো, আগমো চ সো ৰরো চাতি আগমৰরো. আগমসম্মতেহি ৰা ৰরোতি আগমৰরো, মজ্ঝিমো চ সো আগমৰরো চাতি মজ্ঝিমাগমৰরো, তস্স.

বুদ্ধানং অনুবুদ্ধানং বুদ্ধানুবুদ্ধা, বুদ্ধানং সচ্চপটিৰেধং অনুগম্ম পটিৰিদ্ধসচ্চা অগ্গসাৰকাদযো অরিযা. তেহি অত্থসংৰণ্ণনাগুণসংৰণ্ণনানং ৰসেন সংৰণ্ণিতস্স. অথ ৰা বুদ্ধা চ অনুবুদ্ধা চ বুদ্ধানুবুদ্ধাতি যোজেতব্বং. সম্মাসম্বুদ্ধেনেৰ হি ৰিনযসুত্তাভিধম্মানং পকিণ্ণকদেসনাদিৰসেন যো পঠমং অত্থো ৰিভত্তো, সো এৰ পচ্ছা তস্স তস্স সংৰণ্ণনাৰসেন সঙ্গীতিকারেহি সঙ্গহং আরোপিতোতি. পরৰাদমথনস্সাতি অঞ্ঞতিত্থিযানং ৰাদনিম্মথনস্স, তেসং দিট্ঠিগতভঞ্জনস্সাতি অত্থো. অযঞ্হি ¶ আগমো মূলপরিযাযসুত্তসব্বাসৰসুত্তাদীসু দিট্ঠিগতিকানং দিট্ঠিগতদোসৰিভাৰনতো সচ্চকসুত্তং (ম. নি. ১.৩৫৩) উপালিসুত্তাদীসু (ম. নি. ২.৫৬) সচ্চকাদীনং মিচ্ছাৰাদনিম্মথনদীপনতো ৰিসেসতো ‘‘পরৰাদমথনো’’তি থোমিতোতি. সংৰণ্ণনাসু চাযং আচরিযস্স পকতি, যা তংতংসংৰণ্ণনাসু আদিতো তস্স তস্স সংৰণ্ণেতব্বস্স ধম্মস্স ৰিসেসগুণকিত্তনেন থোমনা. তথা হি সুমঙ্গলৰিলাসিনীসারত্থপকাসিনীমনোরথপূরণীসু অট্ঠসালিনীআদীসু চ যথাক্কমং ‘‘সদ্ধাৰহগুণস্স, ঞাণপ্পভেদজননস্স, ধম্মকথিকপুঙ্গৰানং ৰিচিত্তপটিভানজননস্স, তস্স গম্ভীরঞাণেহি ওগাল়্হস্স অভিণ্হসো নানানযৰিচিত্তস্স অভিধম্মস্সা’’তিআদিনা থোমনা কতা.

৬. অত্থো ¶ কথীযতি এতাযাতি অত্থকথা, সা এৰ অট্ঠকথা ত্থ-কারস্স ট্ঠ-কারং কত্ৰা যথা ‘‘দুক্খস্স পীল়নট্ঠো’’তি (পটি. ম. ১.১৭; ২.৮) আদিতোতিআদিম্হি পঠমসঙ্গীতিযং. ছল়ভিঞ্ঞতায পরমেন চিত্তিস্সরিযভাৰেন সমন্নাগতত্তা ঝানাদীসু পঞ্চৰিধৰসিতাসব্ভাৰতো চ ৰসিনো, থেরা মহাকস্সপাদযো. তেসং সতেহি পঞ্চহি. যাতি যা অট্ঠকথা. সঙ্গীতাতি অত্থং পকাসেতুং যুত্তট্ঠানে ‘‘অযং এতস্স অত্থো, অযং এতস্স অত্থো’’তি সঙ্গহেত্ৰা ৰুত্তা. অনুসঙ্গীতা চ যসত্থেরাদীহি পচ্ছাপি দুতিযততিযসঙ্গীতীসু. ইমিনা অত্তনো সংৰণ্ণনায আগমনসুদ্ধিং দস্সেতি.

৭. সীহস্স লানতো গহণতো সীহল়ো, সীহকুমারো. তংৰংসজাততায তম্বপণ্ণিদীপে খত্তিযানং, তেসং নিৰাসতায তম্বপণ্ণিদীপস্স চ সীহল়ভাৰো ৰেদিতব্বো. আভতাতি জম্বুদীপতো আনীতা. অথাতি পচ্ছা. অপরভাগে হি নিকাযন্তরলদ্ধীহি অসঙ্করত্থং সীহল়ভাসায অট্ঠকথা ঠপিতাতি. তেন মূলট্ঠকথা সব্বসাধারণা ন হোতীতি ইদং অত্থপ্পকাসনং একন্তেন করণীযন্তি দস্সেতি. তেনেৰাহ ‘‘দীপৰাসীনমত্থাযা’’তি. তত্থ দীপৰাসীনন্তি জম্বুদীপৰাসীনং, সীহল়দীপৰাসীনং ৰা অত্থায সীহল়ভাসায ঠপিতাতি যোজনা.

৮. অপনেত্ৰানাতি ¶ কঞ্চুকসদিসং সীহল়ভাসং অপনেত্ৰা. ততোতি অট্ঠকথাতো. অহন্তি অত্তানং নিদ্দিসতি, মনোরমং ভাসন্তি মাগধভাসং. সা হি সভাৰনিরুত্তিভূতা পণ্ডিতানং মনং রমযতীতি. তেনেৰাহ ‘‘তন্তিনযানুচ্ছৰিক’’ন্তি, পাল়িগতিযা অনুলোমিকং পাল়িভাসাযানুৰিধাযিনিন্তি অত্থো. ৰিগতদোসন্তি অসভাৰনিরুত্তিভাসন্তররহিতং.

৯. সমযং অৰিলোমেন্তোতি সিদ্ধন্তং অৰিরোধেন্তো. এতেন অত্থদোসাভাৰমাহ. অৰিরুদ্ধত্তা এৰ হি থেরৰাদাপি ইধ পকাসীযিস্সন্তি. থেরৰংসদীপানন্তি থিরেহি সীলক্খন্ধাদীহি সমন্নাগতত্তা থেরা, মহাকস্সপাদযো. তেহি আগতা আচরিযপরম্পরা থেরৰংসো, তপ্পরিযাপন্না হুত্ৰা আগমাধিগমসম্পন্নত্তা পঞ্ঞাপজ্জোতেন তস্স সমুজ্জলনতো থেরৰংসদীপা, মহাৰিহারৰাসিনো, তেসং. ৰিৰিধেহি আকারেহি নিচ্ছীযতীতি ৰিনিচ্ছযো, গণ্ঠিট্ঠানেসু খীলমদ্দনাকারেন পৰত্তা ৰিমতিচ্ছেদনী কথা. সুট্ঠু নিপুণো সণ্হো ৰিনিচ্ছযো এতেসন্তি সুনিপুণৰিনিচ্ছযা. অথ ৰা ৰিনিচ্ছিনোতীতি ৰিনিচ্ছযো, যথাৰুত্তত্থৰিসযং ঞাণং. সুট্ঠু নিপুণো ছেকো ৰিনিচ্ছযো এতেসন্তি যোজেতব্বং. এতেন মহাকস্সপাদিথেরপরম্পরাভতো, ততো এৰ চ অৰিপরীতো সণ্হো সুখুমো মহাৰিহারৰাসীনং ৰিনিচ্ছযোতি তস্স পমাণভূততং দস্সেতি.

১০. সুজনস্স ¶ চাতি চ-সদ্দো সম্পিণ্ডনত্থো. তেন ‘‘ন কেৰলং জম্বুদীপৰাসীনমেৰ অত্থায, অথ খো সাধুজনতোসনত্থঞ্চা’’তি দস্সেতি. তেন চ ‘‘তম্বপণ্ণিদীপৰাসীনম্পি অত্থাযা’’তি অযমত্থো সিদ্ধো হোতি উগ্গহণাদিসুকরতায তেসম্পি বহুকারত্তা. চিরট্ঠিতত্থন্তি চিরট্ঠিতিঅত্থং, চিরকালট্ঠিতিযাতি অত্থো. ইদঞ্হি অত্থপ্পকাসনং অৰিপরীতপদব্যঞ্জনসুনিক্খেপস্স অত্থসুনযস্স চ উপাযভাৰতো সদ্ধম্মস্স চিরট্ঠিতিযা সংৰত্ততি. ৰুত্তঞ্হেতং ভগৰতা ‘‘দ্ৰেমে, ভিক্খৰে, ধম্মা সদ্ধম্মস্স ঠিতিযা অসম্মোসায অনন্তরধানায সংৰত্তন্তি. কতমে দ্ৰে? সুন্নিক্খিত্তঞ্চ পদব্যঞ্জনং অত্থো চ সুনীতো’’তি (অ. নি. ২.২০).

১১. যং ¶ অত্থৰণ্ণনং কত্তুকামো, তস্সা মহত্তং পরিহরিতুং ‘‘সীলকথা’’তিআদি ৰুত্তং. তেনেৰাহ ‘‘ন তং ইধ ৰিচারযিস্সামী’’তি. অথ ৰা যং অট্ঠকথং কত্তুকামো, তদেকদেসভাৰেন ৰিসুদ্ধিমগ্গো গহেতব্বোতি কথিকানং উপদেসং করোন্তো তত্থ ৰিচারিতধম্মে উদ্দেসৰসেন দস্সেতি ‘‘সীলকথা’’তিআদিনা. তত্থ সীলকথাতি চারিত্তৰারিত্তাদিৰসেন সীলস্স ৰিত্থারকথা. ধুতধম্মাতি পিণ্ডপাতিকঙ্গাদযো তেরস কিলেসধুননকধম্মা. কম্মট্ঠানানি সব্বানীতি পাল়িযং আগতানি অট্ঠতিংস, অট্ঠকথাযং দ্ৰেতি নিরৰসেসানি যোগকম্মস্স ভাৰনায পৰত্তিট্ঠানানি. চরিযাৰিধানসহিতোতি রাগচরিতাদীনং সভাৰাদিৰিধানেন সহিতো. ঝানানি চত্তারি রূপাৰচরজ্ঝানানি, সমাপত্তিযো চতস্সো অরূপসমাপত্তিযো. অট্ঠপি ৰা পটিলদ্ধমত্তানি ঝানানি, সমাপজ্জনৰসীভাৰপ্পত্তিযা সমাপত্তিযো. ঝানানি ৰা রূপারূপাৰচরজ্ঝানানি, সমাপত্তিযো ফলসমাপত্তিনিরোধসমাপত্তিযো.

১২. লোকিযলোকুত্তরভেদা ছ অভিঞ্ঞাযো সব্বা অভিঞ্ঞাযো. ঞাণৰিভঙ্গাদীসু (ৰিভ. ৭৫১) আগতনযেন একৰিধাদিনা পঞ্ঞায সংকলেত্ৰা সম্পিণ্ডেত্ৰা নিচ্ছযো পঞ্ঞাসঙ্কলননিচ্ছযো.

১৩. পচ্চযধম্মানং হেতাদীনং পচ্চযুপ্পন্নধম্মানং হেতুপচ্চযাদিভাৰো পচ্চযাকারো, তস্স দেসনা পচ্চযাকারদেসনা, পটিচ্চসমুপ্পাদকথাতি অত্থো. সা পন নিকাযন্তরলদ্ধিসঙ্কররহিততায সুট্ঠু পরিসুদ্ধা, ঘনৰিনিব্ভোগস্স সুদুক্করতায নিপুণা সণ্হসুখুমা, একত্তনযাদিসহিতা চ তত্থ ৰিচারিতাতি আহ ‘‘সুপরিসুদ্ধনিপুণনযা’’তি. পটিসম্ভিদাদীসু আগতনযং অৰিস্সজ্জেত্ৰাৰ ৰিচারিতত্তা অৰিমুত্ততন্তিমগ্গা.

১৪. ইতি ¶ পন সব্বন্তি ইতি-সদ্দো পরিসমাপনে, পন-সদ্দো ৰচনালঙ্কারে, এতং সব্বন্তি অত্থো. ইধাতি ইমিস্সা অট্ঠকথায. ন তং ৰিচারযিস্সামি পুনরুত্তিভাৰতোতি অধিপ্পাযো.

১৫. ইদানি তস্সেৰ অৰিচারণস্স একন্তকারণং নিদ্ধারেন্তো ‘‘মজ্ঝে ৰিসুদ্ধিমগ্গো’’তিআদিমাহ. তত্থ ‘‘মজ্ঝে ঠত্ৰা’’তি এতেন মজ্ঝট্ঠভাৰদীপনেন ¶ ৰিসেসতো চতুন্নং আগমানং সাধারণট্ঠকথা ৰিসুদ্ধিমগ্গো, ন সুমঙ্গলৰিলাসিনীআদযো ৰিয অসাধারণট্ঠকথাতি দস্সেতি. ‘‘ৰিসেসতো’’তি চ ইদং ৰিনযাভিধম্মানম্পি ৰিসুদ্ধিমগ্গো যথারহং অত্থৰণ্ণনা হোতি এৰাতি কত্ৰা ৰুত্তং.

১৬. ইচ্চেৰাতি ইতি এৰ. তম্পীতি ৰিসুদ্ধিমগ্গম্পি. এতাযাতি পপঞ্চসূদনিযা. এত্থ চ ‘‘সীহল়দীপং আভতা’’তিআদিনা অট্ঠকথাকরণস্স নিমিত্তং দস্সেতি, ‘‘দীপৰাসীনমত্থায, সুজনস্স চ তুট্ঠত্থং, চিরট্ঠিতত্থঞ্চ ধম্মস্সা’’তি এতেন পযোজনং, ‘‘মজ্ঝিমাগমৰরস্স অত্থং পকাসযিস্সামী’’তি এতেন পিণ্ডত্থং, ‘‘অপনেত্ৰান ততোহং সীহল়ভাস’’ন্তিআদিনা, ‘‘সীলকথা’’তিআদিনা চ করণপ্পকারং. সীলকথাদীনং অৰিচারণম্পি হি ইধ করণপ্পকারো এৰাতি.

গন্থারম্ভকথাৰণ্ণনা নিট্ঠিতা.

নিদানকথাৰণ্ণনা

১. ৰিভাগৰন্তানং ¶ সভাৰৰিভাৰনং ৰিভাগদস্সনমুখেনেৰ হোতীতি পঠমং তাৰ পণ্ণাসৰগ্গসুত্তাদিৰসেন মজ্ঝিমাগমস্স ৰিভাগং দস্সেতুং ‘‘তত্থ মজ্ঝিমসঙ্গীতি নামা’’তিআদিমাহ. তত্থ তত্থাতি যং ৰুত্তং ‘‘মজ্ঝিমাগমৰরস্স অত্থং পকাসযিস্সামী’’তি, তস্মিং ৰচনে. যা মজ্ঝিমাগমপরিযাযেন মজ্ঝিমসঙ্গীতি ৰুত্তা, সা পণ্ণাসাদিতো এদিসাতি দস্সেতি ‘‘মজ্ঝিমসঙ্গীতি নামা’’তিআদিনা. তত্থাতি ৰা ‘‘এতায অট্ঠকথায ৰিজানাথ মজ্ঝিমসঙ্গীতিযা অত্থ’’ন্তি এত্থ যস্সা মজ্ঝিমসঙ্গীতিযা অত্থং ৰিজানাথাতি ৰুত্তং, সা মজ্ঝিমসঙ্গীতি নাম পণ্ণাসাদিতো এদিসাতি দস্সেতি. পঞ্চ দসকা পণ্ণাসা, মূলে আদিম্হি পণ্ণাসা, মূলভূতা ৰা পণ্ণাসা মূলপণ্ণাসা. মজ্ঝে ভৰা মজ্ঝিমা, মজ্ঝিমা চ সা পণ্ণাসা চাতি মজ্ঝিমপণ্ণাসা. উপরি উদ্ধং পণ্ণাসা উপরিপণ্ণাসা. পণ্ণাসত্তযসঙ্গহাতি পণ্ণাসত্তযপরিগণনা.

অযং সঙ্গহো নাম জাতিসঞ্জাতিকিরিযাগণনৰসেন চতুব্বিধো. তত্থ ‘‘যা চাৰুসো ৰিসাখ, সম্মাৰাচা, যো চ সম্মাকম্মন্তো, যো চ সম্মাআজীৰো ¶ , ইমে ধম্মা সীলক্খন্ধে সঙ্গহিতা’’তি (ম. নি. ১.৪৬২) অযং জাতিসঙ্গহো. ‘‘যো চাৰুসো ৰিসাখ, সম্মাৰাযামো. যা চ সম্মাসতি, যো চ সম্মাসমাধি, ইমে ধম্মা সমাধিক্খন্ধে সঙ্গহিতা’’তি অযং সঞ্জাতিসঙ্গহো. ‘‘যা চাৰুসো ৰিসাখ, সম্মাদিট্ঠি, যো চ সম্মাসঙ্কপ্পো, ইমে ধম্মা পঞ্ঞাক্খন্ধে সঙ্গহিতা’’তি অযং কিরিযাসঙ্গহো. ‘‘হঞ্চি চক্খাযতনং রূপক্খন্ধগণনং গচ্ছতি, তেন ৰত রে ৰত্তব্বে চক্খাযতনং রূপক্খন্ধেন সঙ্গহিত’’ন্তি (কথা. ৪৭১) অযং গণনসঙ্গহো. অযমেৰ চ ইধাধিপ্পেতো. তেন ৰুত্তং ‘‘পণ্ণাসত্তযসঙ্গহাতি পণ্ণাসত্তযপরিগণনা’’তি.

ৰগ্গতোতি সমূহতো, সো পনেত্থ দসকৰসেন ৰেদিতব্বো. যেভুয্যেন হি সাসনে দসকে ৰগ্গৰোহারো. তেনেৰাহ ‘‘একেকায পণ্ণাসায পঞ্চ পঞ্চ ৰগ্গে কত্ৰা’’তি. পন্নরসৰগ্গসমাযোগাতি পন্নরসৰগ্গসংযোগাতি অত্থো. কেচি পন সমাযোগসদ্দং সমুদাযত্থং ৰদন্তি. পদতোতি এত্থ অট্ঠক্খরো গাথাপাদো ‘‘পদ’’ন্তি অধিপ্পেতো, তস্মা ‘‘অক্খরতো ছ অক্খরসতসহস্সানি চতুরাসীতুত্তরসতাধিকানি চতুচত্তালীস সহস্সানি চ অক্খরানী’’তি পাঠেন ¶ ভৰিতব্বন্তি ৰদন্তি. যস্মা পন নৰক্খরো যাৰ দ্ৰাদসক্খরো চ গাথাপাদো সংৰিজ্জতি, তস্মা তাদিসানম্পি গাথানং ৰসেন অড্ঢতেয্যগাথাসতং ভাণৰারো হোতীতি কত্ৰা ‘‘অক্খরতো সত্ত অক্খরসতসহস্সানি চত্তালীসঞ্চ সহস্সানি তেপঞ্ঞাসঞ্চ অক্খরানী’’তি ৰুত্তং. এৰঞ্হি পদভাণৰারগণনাহি অক্খরগণনা সংসন্দতি, নেতরথা. ভাণৰারোতি চ দ্ৰত্তিংসক্খরানং গাথানং ৰসেন অড্ঢতেয্যগাথাসতং, অযঞ্চ অক্খরগণনা ভাণৰারগণনা চ পদগণনানুসারেন লদ্ধাতি ৰেদিতব্বা. ইমমেৰ হি অত্থং ঞাপেতুং সুত্তগণনানন্তরং ভাণৰারে অগণেত্ৰা পদানি গণিতানি. তত্রিদং ৰুচ্চতি –

‘‘ভাণৰারা যথাপি হি, মজ্ঝিমস্স পকাসিতা;

উপড্ঢভাণৰারো চ, তেৰীসতিপদাধিকো.

সত্ত সতসহস্সানি, অক্খরানং ৰিভাৰযে;

চত্তালীস সহস্সানি, তেপঞ্ঞাসঞ্চ অক্খর’’ন্তি.

অনুসন্ধিতোতি ¶ দেসনানুসন্ধিতো. একস্মিং এৰ হি সুত্তে পুরিমপচ্ছিমানং দেসনাভাগানং সম্বন্ধো অনুসন্ধানতো অনুসন্ধি. এত্থ চ অত্তজ্ঝাসযানুসন্ধি পরজ্ঝাসযানুসন্ধীতি দুৰিধো অজ্ঝাসযানুসন্ধি. সো পন কত্থচি দেসনায ৰিপ্পকতায ধম্মং সুণন্তানং পুচ্ছাৰসেন, কত্থচি দেসেন্তস্স সত্থু সাৰকস্স ধম্মপটিগ্গাহকানঞ্চ অজ্ঝাসযৰসেন, কত্থচি দেসেতব্বস্স ধম্মস্স ৰসেন হোতীতি সমাসতো তিপ্পকারো. তেন ৰুত্তং ‘‘পুচ্ছানুসন্ধিঅজ্ঝাসযানুসন্ধিযথানুসন্ধিৰসেন সঙ্খেপতো তিৰিধো অনুসন্ধী’’তি. সঙ্খেপেনেৰ চ চতুব্বিধো অনুসন্ধি ৰেদিতব্বো. তত্থ ‘‘এৰং ৰুত্তে অঞ্ঞতরো ভিক্খু ভগৰন্তং এতদৰোচ ‘কিং নু খো, ভন্তে, ওরিমং তীরং, কিং পারিমং তীরং, কো মজ্ঝে সংসীদো, কো থলে উস্সাদো, কো মনুস্সগ্গাহো, কো অমনুস্সগ্গাহো, কো আৰত্তগ্গাহো, কো অন্তোপূতিভাৰো’তি’’ (সং. নি. ৪.২৪১)? এৰং পুচ্ছন্তানং ৰিস্সজ্জেন্তেন ভগৰতা পৰত্তিতদেসনাৰসেন পুচ্ছানুসন্ধী ৰেদিতব্বো. ‘‘অথ খো অঞ্ঞতরস্স ভিক্খুনো এৰং চেতসো পরিৰিতক্কো উদপাদি ‘ইতি কির ভো রূপং অনত্তা… ৰেদনা… সঞ্ঞা… সঙ্খারা… ৰিঞ্ঞাণং অনত্তা, অনত্তকতানি কম্মানি কমত্তানং ফুসিস্সন্তী’তি. অথ খো ভগৰা তস্স ভিক্খুনো চেতসা চেতোপরিৰিতক্কমঞ্ঞায ভিক্খূ আমন্তেসি ঠানং খো পনেতং, ভিক্খৰে, ৰিজ্জতি, যং ইধেকচ্চো মোঘপুরিসো অৰিদ্ৰা অৰিজ্জাগতো তণ্হাধিপতেয্যেন চেতসা সত্থুসাসনং অতিধাৰিতব্বং মঞ্ঞেয্য ‘ইতি কির ভো রূপং অনত্তা…পে… ফুসিস্সন্তী’তি. তং কিং মঞ্ঞথ ¶ , ভিক্খৰে, রূপং নিচ্চং ৰা অনিচ্চং ৰা’’তি (ম. নি. ৩.৯০) এৰং পরেসং অজ্ঝাসযং ৰিদিত্ৰা ভগৰতা পৰত্তিতদেসনাৰসেন পরজ্ঝাসযানুসন্ধি ৰেদিতব্বো.

‘‘তস্স ময্হং ব্রাহ্মণ এতদহোসি ‘যংনূনাহং যা তা রত্তিযো অভিঞ্ঞাতা অভিলক্খিতা চাতুদ্দসী পঞ্চদসী অট্ঠমী চ পক্খস্স, তথারূপাসু রত্তীসু যানি তানি আরামচেতিযানি ৰনচেতিযানি রুক্খচেতিযানি ভিংসনকানি সলোমহংসানি, তথারূপেসু সেনাসনেসু ৰিহরেয্যং অপ্পেৰ নামাহং ভযভেরৰং পস্সেয্য’ন্তি’’ (ম. নি. ১.৪৯) এৰং ভগৰতা, ‘‘তত্রাৰুসো লোভো চ পাপকো দোসো চ পাপকো লোভস্স চ পহানায দোসস্স চ পহানায অত্থি মজ্ঝিমা পটিপদা, চক্খুকরণী ¶ ঞাণকরণী উপসমায অভিঞ্ঞায সম্বোধায নিব্বানায সংৰত্ততী’’তি (ম. নি. ১.৩৩) এৰং ধম্মসেনাপতিনা চ অত্তনো অজ্ঝাসযেনেৰ পৰত্তিতদেসনাৰসেন অত্তজ্ঝাসযানুসন্ধি ৰেদিতব্বো. যেন পন ধম্মেন আদিম্হি দেসনা উট্ঠিতা, তস্স অনুরূপধম্মৰসেন ৰা পটিপক্খধম্মৰসেন ৰা যেসু সুত্তেসু উপরি দেসনা আগচ্ছতি, তেসং ৰসেন যথানুসন্ধি ৰেদিতব্বো. সেয্যথিদং আকঙ্খেয্যসুত্তে (ম. নি. ১.৬৫) হেট্ঠা সীলেন দেসনা উট্ঠিতা, উপরি অভিঞ্ঞা আগতা. ৰত্থুসুত্তে (ম. নি. ১.৭০) হেট্ঠা কিলেসেন দেসনা উট্ঠিতা, উপরি ব্রহ্মৰিহারা আগতা. কোসম্বকসুত্তে (ম. নি. ১.৪৯১) হেট্ঠা ভণ্ডনেন দেসনা উট্ঠিতা, উপরি সারণীযধম্মা আগতা. ককচূপমে (ম. নি. ১.২২২) হেট্ঠা অক্খন্তিযা ৰসেন দেসনা উট্ঠিতা, উপরি ককচূপমা আগতাতি.

ৰিত্থারতো পনেত্থাতি এৰং সঙ্খেপতো তিৰিধো চতুব্বিধো চ অনুসন্ধি এত্থ এতস্মিং মজ্ঝিমনিকাযে তস্মিং তস্মিং সুত্তে যথারহং ৰিত্থারতো ৰিভজিত্ৰা ৰিঞ্ঞাযমানা নৰসতাধিকানি তীণি অনুসন্ধিসহস্সানি হোন্তি. যথা চেতং পণ্ণাসাদিৰিভাগৰচনং মজ্ঝিমসঙ্গীতিযা সরূপদস্সনত্থং হোতি, এৰং পক্খেপদোসপরিহরণত্থঞ্চ হোতি. এৰঞ্হি পণ্ণাসাদীসু ৰৰত্থিতেসু তব্বিনিমুত্তং কিঞ্চি সুত্তং যাৰ একং পদম্পি আনেত্ৰা ইমং মজ্ঝিমসঙ্গীতিযাতি কস্সচি ৰত্তুং ওকাসো ন সিযাতি.

এৰং পণ্ণাসৰগ্গসুত্তভাণৰারানুসন্ধিব্যঞ্জনতো মজ্ঝিমসঙ্গীতিং ৰৰত্থপেত্ৰা ইদানি নং আদিতো পট্ঠায সংৰণ্ণেতুকামো অত্তনো সংৰণ্ণনায তস্সা পঠমমহাসঙ্গীতিযং নিক্খিত্তানুক্কমেনেৰ পৰত্তভাৰং দস্সেতুং ‘‘তত্থ পণ্ণাসাসু মূলপণ্ণাসা আদী’’তিআদিমাহ. তত্থ যথাপচ্চযং তত্থ তত্থ দেসিতত্তা পঞ্ঞত্তত্তা চ ৰিপ্পকিণ্ণানং ধম্মৰিনযানং সঙ্গহেত্ৰা গাযনং ¶ কথনং সঙ্গীতি, মহাৰিসযত্তা পূজনীযত্তা চ মহতী সঙ্গীতীতি মহাসঙ্গীতি, পঠমা মহাসঙ্গীতি পঠমমহাসঙ্গীতি, তস্সা পৰত্তিতকালো পঠমমহাসঙ্গীতিকালো, তস্মিং পঠমমহাসঙ্গীতিকালে. নিদদাতি দেসনং দেসকালাদিৰসেন অৰিদিতং ৰিদিতং কত্ৰা নিদস্সেতীতি নিদানং, যো লোকিযেহি ‘‘উপোগ্ঘাতো’’তি ¶ ৰুচ্চতি, স্ৰাযমেত্থ ‘‘এৰং মে সুত’’ন্তিআদিকো গন্থো ৰেদিতব্বো, ন পন ‘‘সনিদানাহং, ভিক্খৰে, ধম্মং দেসেমী’’তিআদীসু (অ. নি. ৩.১২৬) ৰিয অজ্ঝাসযাদিদেসনুপ্পত্তিহেতু. তেনেৰাহ ‘‘এৰং মে সুতন্তিআদিকং আযস্মতা আনন্দেন পঠমমহাসঙ্গীতিকালে ৰুত্তং নিদানমাদী’’তি. কামঞ্চেত্থ যস্সং পঠমমহাসঙ্গীতিযং নিক্খিত্তানুক্কমেন সংৰণ্ণনং কত্তুকামো, সা ৰিত্থারতো ৰত্তব্বা. সুমঙ্গলৰিলাসিনিযং (দী. নি. টী. ১.নিদানকথাৰণ্ণনা) পন অত্তনা ৰিত্থারিতত্তা তত্থেৰ গহেতব্বাতি ইমিস্সা সংৰণ্ণনায মহন্ততং পরিহরন্তো ‘‘সা পনেসা’’তিআদিমাহ.

নিদানকথাৰণ্ণনা নিট্ঠিতা.

১. মূলপরিযাযৰগ্গো

১. মূলপরিযাযসুত্তৰণ্ণনা

অব্ভন্তরনিদানৰণ্ণনা

১. এৰং ¶ ¶ বাহিরনিদানে ৰত্তব্বং অতিদিসিত্ৰা ইদানি অভন্তরনিদানং আদিতো পট্ঠায সংৰণ্ণেতুং ‘‘যং পনেত’’ন্তিআদি ৰুত্তং. তত্থ যস্মা সংৰণ্ণনং করোন্তেন সংৰণ্ণেতব্বে ধম্মে পদৰিভাগং পদত্থঞ্চ দস্সেত্ৰা ততো পরং পিণ্ডত্তাদিদস্সনৰসেন সংৰণ্ণনা কাতব্বা, তস্মা পদানি তাৰ দস্সেন্তো ‘‘এৰন্তি নিপাতপদ’’ন্তিআদিমাহ. তত্থ পদৰিভাগোতি পদানং ৰিসেসো, ন পদৰিগ্গহো. অথ ৰা পদানি চ পদৰিভাগো চ পদৰিভাগো, পদৰিগ্গহো চ পদৰিভাগো চ পদৰিভাগোতি ৰা একসেসৰসেন পদপদৰিগ্গহা পদৰিভাগসদ্দেন ৰুত্তাতি ৰেদিতব্বং. তত্থ পদৰিগ্গহো ‘‘সুভগঞ্চ তং ৰনঞ্চাতি সুভগৰনং, সালানং রাজা, সালো চ সো রাজা চ ইতিপি সালরাজা’’তিআদিৰসেন সমাসপদেসু দট্ঠব্বো.

অত্থতোতি পদত্থতো. তং পন পদত্থং অত্থুদ্ধারক্কমেন পঠমং এৰংসদ্দস্স দস্সেন্তো ‘‘এৰং-সদ্দো তাৰা’’তিআদিমাহ. অৰধারণাদীতি এত্থ আদি-সদ্দেন ইদমত্থপুচ্ছাপরিমাণাদিঅত্থানং সঙ্গহো দট্ঠব্বো. তথা হি ‘‘এৰংগতানি পুথুসিপ্পাযতনানি (দী. নি. ১.১৬৩), এৰৰিধো এৰমাকারো’’তি চ আদীসু ইদং-সদ্দস্স অত্থে এৰং-সদ্দো. গত-সদ্দো হি পকারপরিযাযো, তথা ৰিধাকার-সদ্দা চ. তথা হি ৰিধযুত্তগত-সদ্দে লোকিযা পকারত্থে ৰদন্তি. ‘‘এৰং সু তে সুন্হাতা সুৰিলিত্তা কপ্পিতকেসমস্সূ আমুক্কমণিকুণ্ডলাভরণা ওদাতৰত্থৰসনা পঞ্চহি কামগুণেহি সমপ্পিতা সমঙ্গীভূতা পরিচারেন্তি, সেয্যথাপি ত্ৰং এতরহি সাচরিযকোতি. নো হিদং, ভো গোতমা’’তিআদীসু (দী. নি. ১.২৮৬) পুচ্ছাযং. ‘‘এৰংলহুপরিৰত্তং (অ. নি. ১.৪৮) এৰমাযুপরিযন্তো’’তি (পারা. ১২) চ আদীসু পরিমাণে.

ননু ¶ চ ‘‘এৰং সু তে সুন্হাতা সুৰিলিত্তা, এৰমাযুপরিযন্তো’’তি এত্থ এৰং-সদ্দেন পুচ্ছনাকারপরিমাণাকারানং ৰুত্তত্তা আকারত্থো এৰ ¶ এৰং-সদ্দোতি? ন, ৰিসেসসব্ভাৰতো. আকারমত্তৰাচকো হি এৰং-সদ্দো আকারত্থোতি অধিপ্পেতো যথা ‘‘এৰং ব্যা খো’’তিআদীসু (ম. নি. ১.২৩৪, ৩৯৬), ন পন আকারৰিসেসৰাচকো. এৰঞ্চ কত্ৰা ‘‘এৰং জাতেন মচ্চেনা’’তিআদীনি উপমাদিউদাহরণানি উপপন্নানি হোন্তি. তথা হি ‘‘যথাপি…পে… বহু’’ন্তি (ধ. প. ৫৩) এত্থ পুপ্ফরাসিট্ঠানিযতো মনুস্সূপপত্তি-সপ্পুরিসূপনিস্সয-সদ্ধম্মস্সৰন-যোনিসোমনসিকার- ভোগসম্পত্তি-আদিদানাদি-পুঞ্ঞকিরিযহেতুসমুদাযতো সোভা-সুগন্ধতাদিগুণযোগতো মালাগুণসদিসিযো পহূতা পুঞ্ঞকিরিযা মরিতব্বসভাৰতায মচ্চেন সত্তেন কত্তব্বাতি জোতিতত্তা পুপ্ফরাসিমালাগুণাৰ উপমা, তেসং উপমাকারো যথা-সদ্দেন অনিযমতো ৰুত্তোতি ‘‘এৰং-সদ্দো উপমাকারনিগমনত্থো’’তি ৰত্তুং যুত্তং. সো পন উপমাকারো নিযমিযমানো অত্থতো উপমাৰ হোতীতি আহ ‘‘উপমাযং আগতো’’তি. তথা ‘‘এৰং ইমিনা আকারেন অভিক্কমিতব্ব’’ন্তিআদিনা উপদিসিযমানায সমণসারুপ্পায আকপ্পসম্পত্তিযা যো তত্থ উপদিসনাকারো, সো অত্থতো উপদেসো এৰাতি ৰুত্তং ‘‘এৰং তে…পে… উপদেসে’’তি. তথা ‘‘এৰমেতং ভগৰা, এৰমেতং সুগতা’’তি এত্থ চ ভগৰতা যথাৰুত্তমত্থং অৰিপরীততো জানন্তেহি কতং তত্থ সংৰিজ্জমানগুণানং পকারেহি হংসনং উদগ্গতাকরণং সম্পহংসনং. যো তত্থ সম্পহংসনাকারোতি যোজেতব্বং.

এৰমেৰং পনাযন্তি এত্থ গরহণাকারোতি যোজেতব্বং, সো চ গরহণাকারো ‘‘ৰসলী’’তিআদিখুংসনসদ্দসন্নিধানতো ইধ এৰং-সদ্দেন পকাসিতোতি ৰিঞ্ঞাযতি. যথা চেত্থ, এৰং উপমাকারাদযোপি উপমাদিৰসেন ৰুত্তানং পুপ্ফরাসিআদিসদ্দানং সন্নিধানতো দট্ঠব্বং. এৰং, ভন্তেতি পন ধম্মস্স সাধুকং সৰনমনসিকারে সন্নিযোজিতেহি ভিক্খূহি অত্তনো তত্থ ঠিতভাৰস্স পটিজাননৰসেন ৰুত্তত্তা এত্থ এৰং-সদ্দো ৰচনসম্পটিচ্ছনত্থো ৰুত্তো. তেন এৰং, ভন্তে সাধু, ভন্তে, সুট্ঠু, ভন্তেতি ৰুত্তং হোতি. এৰঞ্চ ৰদেহীতি ‘‘যথাহং ৰদামি, এৰং সমণং আনন্দং ৰদেহী’’তি যো এৰং ৰদনাকারো ইদানি ৰত্তব্বো. সো এৰংসদ্দেন নিদস্সীযতীতি ‘‘নিদস্সনে’’তি ৰুত্তোতি. এৰং নোতি এত্থাপি তেসং যথাৰুত্তধম্মানং অহিতদুক্খাৰহভাৰে সন্নিট্ঠানজননত্থং অনুমতিগহণৰসেন ¶ ‘‘সংৰত্তন্তি ৰা নো ৰা, কথং ৰো এত্থ হোতী’’তি পুচ্ছায কতায ‘‘এৰং নো এত্থ হোতী’’তি ৰুত্তত্তা তদাকারসন্নিট্ঠানং এৰং-সদ্দেন ৰিভাৰিতন্তি ৰিঞ্ঞাযতি. সো পন তেসং ধম্মানং অহিতায দুক্খায সংৰত্তনাকারো নিযমিযমানো অৰধারণত্থো হোতীতি আহ ‘‘এৰং নো এত্থ হোতীতিআদীসু অৰধারণে’’তি.

নানানযনিপুণন্তি ¶ একত্তনানত্তঅব্যাপারএৰংধম্মতাসঙ্খাতা, নন্দিযাৰত্ততিপুক্খলসীহৰিক্কীল়িতঅঙ্কুসদিসালোচনসঙ্খাতা ৰা আধারাদিভেদৰসেন নানাৰিধা নযা নানানযা, নযা ৰা পাল়িগতিযো, তা চ পঞ্ঞত্তিঅনুপঞ্ঞত্তিআদিৰসেন সংকিলেসভাগিযাদিলোকিযাদিতদুভযৰোমিস্সকাদিৰসেন কুসলাদিৰসেন খন্ধাদিৰসেন সঙ্গহাদিৰসেন সমযৰিমুত্তাদিৰসেন ঠপনাদিৰসেন কুসলমূলাদিৰসেন তিকপ্পট্ঠানাদিৰসেন চ নানপ্পকারাতি নানানযা. তেহি নিপুণং সণ্হং সুখুমন্তি নানানযনিপুণং. আসযোৰ অজ্ঝাসযো, তে চ সস্সতাদিভেদেন, তত্থ চ অপ্পরজক্খতাদিভেদেন অনেকে, অত্তজ্ঝাসযাদযো এৰ ৰা সমুট্ঠানং উপ্পত্তিহেতু এতস্সাতি অনেকজ্ঝাসযসমুট্ঠানং. অত্থব্যঞ্জনসম্পন্নন্তি অত্থব্যঞ্জনপরিপুণ্ণং উপনেতব্বাভাৰতো, সঙ্কাসনপকাসন-ৰিৰরণ-ৰিভজন-উত্তানীকরণ-পঞ্ঞত্তিৰসেন ছহি অত্থপদেহি, অক্খর-পদব্যঞ্জনাকারনিরুত্তিনিদ্দেসৰসেন ছহি ব্যঞ্জনপদেহি চ সমন্নাগতন্তি ৰা অত্থো দট্ঠব্বো.

ৰিৰিধপাটিহারিযন্তি এত্থ পাটিহারিযপদস্স ৰচনত্থং (উদা. অট্ঠ. ১; ইতিৰু. অট্ঠ. নিদানৰণ্ণনা; সং. নি. টী. ১.১.১ দেৰতাসংযুত্ত) ‘‘পটিপক্খহরণতো, রাগাদিকিলেসাপনযনতো চ পাটিহারিয’’ন্তি ৰদন্তি, ভগৰতো পন পটিপক্খা রাগাদযো ন সন্তি, যে হরিতব্বা. পুথুজ্জনানম্পি ৰিগতূপক্কিলেসে অট্ঠগুণসমন্নাগতে চিত্তে হতপটিপক্খে ইদ্ধিৰিধং পৰত্ততি, তস্মা তত্থ পৰত্তৰোহারেন চ ন সক্কা ইধ ‘‘পাটিহারিয’’ন্তি ৰত্তুং. সচে পন মহাকারুণিকস্স ভগৰতো ৰেনেয্যগতা চ কিলেসা পটিপক্খা, তেসং হরণতো ‘‘পাটিহারিয’’ন্তি ৰুত্তং, এৰং সতি যুত্তমেতং. অথ ৰা ভগৰতো চ সাসনস্স চ পটিপক্খা তিত্থিযা, তেসং হরণতো পাটিহারিযং. তে হি দিট্ঠিহরণৰসেন দিট্ঠিপকাসনে অসমত্থভাৰেন চ ইদ্ধিআদেসনানুসাসনীহি হরিতা অপনীতা হোন্তীতি ¶ . ‘‘পটী’’তি ৰা অযং সদ্দো ‘‘পচ্ছা’’তি এতস্স অত্থং বোধেতি ‘‘তস্মিং পটিপৰিট্ঠম্হি, অঞ্ঞো আগঞ্ছি ব্রাহ্মণো’’তিআদীসু (সু. নি. ৯৮৫; চূল়নি. ৪) ৰিয, তস্মা সমাহিতে চিত্তে ৰিগতূপক্কিলেসে চ কতকিচ্চেন পচ্ছা হরিতব্বং পৰত্তেতব্বন্তি পাটিহারিযং, অত্তনো ৰা উপক্কিলেসেসু চতুত্থজ্ঝানমগ্গেহি হরিতেসু পচ্ছা হরণং পাটিহারিযং, ইদ্ধিআদেসনানুসাসনিযো চ ৰিগতূপক্কিলেসেন কতকিচ্চেন চ সত্তহিতত্থং পুন পৰত্তেতব্বা, হরিতেসু চ অত্তনো উপক্কিলেসেসু পরসত্তানং উপকিলেসহরণানি হোন্তীতি পাটিহারিযানি ভৰন্তি. পাটিহারিযমেৰ পাটিহারিযং, পাটিহারিযে ৰা ইদ্ধিআদেসনানুসাসনিসমুদাযে ভৰং একমেকং পাটিহারিযন্তি ৰুচ্চতি. পাটিহারিযং ৰা চতুত্থজ্ঝানং মগ্গো চ পটিপক্খহরণতো, তত্থ জাতং, তস্মিং ৰা নিমিত্তভূতে, ততো ৰা আগতন্তি ¶ পাটিহারিযং. তস্স পন ইদ্ধিআদিভেদেন ৰিসযভেদেন চ বহুৰিধস্স ভগৰতো দেসনাযং লব্ভমানত্তা আহ ‘‘ৰিৰিধপাটিহারিয’’ন্তি.

ন অঞ্ঞথাতি ভগৰতো সম্মুখা সুতাকারতো ন অঞ্ঞথাতি অত্থো, ন পন ভগৰতো দেসিতাকারতো. অচিন্তেয্যানুভাৰা হি ভগৰতো দেসনা. এৰঞ্চ কত্ৰা ‘‘সব্বপ্পকারেন কো সমত্থো ৰিঞ্ঞাতু’’ন্তি ইদং ৰচনং সমত্থিতং ভৰতি, ধারণবলদস্সনঞ্চ ন ৰিরুজ্ঝতি সুতাকারাৰিরজ্ঝনস্স অধিপ্পেতত্তা. ন হেত্থ অত্থন্তরতাপরিহারো দ্ৰিন্নম্পি অত্থানং একৰিসযত্তা. ইতরথা থেরো ভগৰতো দেসনায সব্বথা পটিগ্গহণে সমত্থো অসমত্থো চাতি আপজ্জেয্যাতি.

‘‘যো পরো ন হোতি, সো অত্তা’’তি এৰং ৰুত্তায নিযকজ্ঝত্তসঙ্খাতায সসন্ততিযা ৰত্তনতো তিৰিধোপি মে-সদ্দো কিঞ্চাপি একস্মিংযেৰ অত্থে দিস্সতি, করণসম্পদানসামিনিদ্দেসৰসেন পন ৰিজ্জমানং ভেদং সন্ধাযাহ ‘‘মে-সদ্দো তীসু অত্থেসু দিস্সতী’’তি.

কিঞ্চাপি উপসগ্গো কিরিযং ৰিসেসেতি, জোতকভাৰতো পন সতিপি তস্মিং সুতসদ্দো এৰ তং তমত্থং ৰদতীতি অনুপসগ্গস্স সুতসদ্দস্স অত্থুদ্ধারে সউপসগ্গস্স গহণং ন ৰিরুজ্ঝতীতি দস্সেন্তো ‘‘সউপসগ্গো চ অনুপসগ্গো চা’’তিআদিমাহ. অস্সাতি সুতসদ্দস্স. কম্মভাৰসাধনানি ইধ সুতসদ্দে সম্ভৰন্তীতি ৰুত্তং ‘‘উপধারিতন্তি ৰা উপধারণন্তি ৰা ¶ অত্থো’’তি. মযাতি অত্থে সতীতি যদা মে-সদ্দস্স কত্তুৰসেন করণনিদ্দেসো, তদাতি অত্থো. মমাতি অত্থে সতীতি যদা সম্বন্ধৰসেন সামিনিদ্দেসো, তদা.

সুত-সদ্দসন্নিধানে পযুত্তেন এৰং-সদ্দেন সৰনকিরিযাজোতকেন ভৰিতব্বন্তি ৰুত্তং ‘‘এৰন্তি সোতৰিঞ্ঞাণাদিৰিঞ্ঞাণকিচ্চনিদস্সন’’ন্তি. আদি-সদ্দেন সম্পটিচ্ছনাদীনং পঞ্চদ্ৰারিকৰিঞ্ঞাণানং তদভিনীহটানঞ্চ মনোদ্ৰারিকৰিঞ্ঞাণানং গহণং ৰেদিতব্বং. সব্বেসম্পি ৰাক্যানং এৰ-কারত্থসহিতত্তা ‘‘সুত’’ন্তি এতস্স সুতমেৰাতি অযমত্থো লব্ভতীতি আহ ‘‘অস্সৰনভাৰপটিক্খেপতো’’তি. এতেন অৰধারণেন নিরাসঙ্কতং দস্সেতি. যথা চ সুতং সুতমেৰাতি নিযমেতব্বং, তং সম্মা সুতং হোতীতি আহ ‘‘অনূনানধিকাৰিপরীতগ্গহণনিদস্সন’’ন্তি. অথ ৰা সদ্দন্তরত্থাপোহনৰসেন সদ্দো অত্থং ৰদতীতি সুতন্তি অসুতং ন হোতীতি অযমেতস্স অত্থোতি ৰুত্তং ‘‘অস্সৰনভাৰপটিক্খেপতো’’তি ¶ . ইমিনা দিট্ঠাদিৰিনিৰত্তনং করোতি. ইদং ৰুত্তং হোতি ‘‘ন ইদং মযা দিট্ঠং, ন সযম্ভুঞাণেন সচ্ছিকতং, অথ খো সুতং, তঞ্চ খো সম্মদেৰা’’তি. তেনেৰাহ – ‘‘অনূনানধিকাৰিপরীতগ্গহণনিদস্সন’’ন্তি. অৰধারণত্থে ৰা এৰং-সদ্দে অযমত্থযোজনা করীযতীতি তদপেক্খস্স সুত-সদ্দস্স অযমত্থো ৰুত্তো ‘‘অস্সৰনভাৰপটিক্খেপতো’’তি. তেনেৰাহ ‘‘অনূনানধিকাৰিপরীতগ্গহণনিদস্সন’’ন্তি. সৰনসদ্দো চেত্থ কম্মত্থো ৰেদিতব্বো ‘‘সুয্যতী’’তি.

এৰং সৰনহেতুসুণন্তপুগ্গলসৰনৰিসেসৰসেন পদত্তযস্স একেন পকারেন অত্থযোজনং দস্সেত্ৰা ইদানি পকারন্তরেহিপি তং দস্সেতুং ‘‘তথা এৰ’’ন্তিআদি ৰুত্তং. তত্থ তস্সাতি যা সা ভগৰতো সম্মুখা ধম্মস্সৰনাকারেন পৰত্তা মনোদ্ৰারৰিঞ্ঞাণৰীথি, তস্সা. সা হি নানপ্পকারেন আরম্মণে পৰত্তিতুং সমত্থা. তথা চ ৰুত্তং ‘‘সোতদ্ৰারানুসারেনা’’তি. নানপ্পকারেনাতি ৰক্খমানানং অনেকৰিহিতানং ব্যঞ্জনত্থগ্গহণানং নানাকারেন. এতেন ইমিস্সা যোজনায আকারত্থো এৰং-সদ্দো গহিতোতি দীপেতি. পৰত্তিভাৰপ্পকাসনন্তি পৰত্তিযা অত্থিভাৰপ্পকাসনং. সুতন্তি ধম্মপ্পকাসনন্তি যস্মিং আরম্মণে ¶ ৰুত্তপ্পকারা ৰিঞ্ঞাণৰীথি নানপ্পকারেন পৰত্তা, তস্স ধম্মত্তা ৰুত্তং, ন সুতসদ্দস্স ধম্মত্থত্তা. ৰুত্তস্সেৰত্থস্স পাকটীকরণং ‘‘অযঞ্হেত্থা’’তিআদি. তত্থ ৰিঞ্ঞাণৰীথিযাতি করণত্থে করণৰচনং. মযাতি কত্তুঅত্থে.

এৰন্তি নিদ্দিসিতব্বপ্পকাসনন্তি নিদস্সনত্থং এৰং-সদ্দং গহেত্ৰা ৰুত্তং নিদস্সেতব্বস্স নিদ্দিসিতব্বত্তাভাৰাভাৰতো. তেন এৰং-সদ্দেন সকলম্পি সুত্তং পচ্চামট্ঠন্তি দস্সেতি. সুত-সদ্দস্স কিরিযাসদ্দত্তা সৰনকিরিযায চ সাধারণৰিঞ্ঞাণপবন্ধপটিবদ্ধত্তা তত্থ চ পুগ্গলৰোহারোতি ৰুত্তং ‘‘সুতন্তি পুগ্গলকিচ্চপ্পকাসন’’ন্তি. ন হি পুগ্গলৰোহাররহিতে ধম্মপবন্ধে সৰনকিরিযা লব্ভতীতি.

যস্স চিত্তসন্তানস্সাতিআদিপি আকারত্থমেৰ এৰং-সদ্দং গহেত্ৰা পুরিমযোজনায অঞ্ঞথা অত্থযোজনং দস্সেতুং ৰুত্তং. তত্থ আকারপঞ্ঞত্তীতি উপাদাপঞ্ঞত্তি এৰ ধম্মানং পৰত্তিআকারূপাদানৰসেন তথা ৰুত্তা. সুতন্তি ৰিসযনিদ্দেসোতি সোতব্বভূতো ধম্মো সৰনকিরিযাকত্তুপুগ্গলস্স সৰনকিরিযাৰসেন পৰত্তিট্ঠানন্তি কত্ৰা ৰুত্তং. চিত্তসন্তানৰিনিমুত্তস্স পরমত্থতো কস্সচি কত্তু অভাৰেপি সদ্দৰোহারেন বুদ্ধিপরিকপ্পিতভেদৰচনিচ্ছায চিত্তসন্তানতো অঞ্ঞং ৰিয তংসমঙ্গিং কত্ৰা ৰুত্তং ‘‘চিত্তসন্তানেন ¶ তংসমঙ্গিনো’’তি. সৰনকিরিযাৰিসযোপি সোতব্বধম্মো সৰনকিরিযাৰসেন পৰত্তচিত্তসন্তানস্স ইধ পরমত্থতো কত্তুভাৰতো, সৰনৰসেন চিত্তপ্পৰত্তিযা এৰ ৰা সৰনকিরিযাভাৰতো তংকিরিযাকত্তু চ ৰিসযো হোতীতি ৰুত্তং ‘‘তংসমঙ্গিনো কত্তুৰিসযে’’তি. সুতাকারস্স চ থেরস্স সম্মানিচ্ছিতভাৰতো আহ ‘‘গহণসন্নিট্ঠান’’ন্তি. এতেন ৰা অৰধারণত্থং এৰং-সদ্দং গহেত্ৰা অযমত্থযোজনা কতাতি দট্ঠব্বং.

পুব্বে সুতানং নানাৰিহিতানং সুত্তসঙ্খাতানং অত্থব্যঞ্জনানং উপধারিতরূপস্স আকারস্স নিদস্সনস্স, অৰধারণস্স ৰা পকাসনসভাৰো এৰং-সদ্দোতি তদাকারাদিউপধারণস্স পুগ্গলপঞ্ঞত্তিযা উপাদানভূতধম্মপবন্ধব্যাপারতায ৰুত্তং – ‘‘এৰন্তি পুগ্গলকিচ্চনিদ্দেসো’’তি. সৰনকিরিযা পন পুগ্গলৰাদিনোপি ৰিঞ্ঞাণনিরপেক্খা নত্থীতি ৰিসেসতো ৰিঞ্ঞাণব্যাপারোতি আহ ‘‘সুতন্তি ৰিঞ্ঞাণকিচ্চনিদ্দেসো’’তি. ‘‘মে’’তি সদ্দপ্পৰত্তিযা একন্তেনেৰ সত্তৰিসযত্তা ৰিঞ্ঞাণকিচ্চস্স চ তত্থেৰ সমোদহিতব্বতো ¶ ‘‘মেতি উভযকিচ্চযুত্তপুগ্গলনিদ্দেসো’’তি ৰুত্তং. অৰিজ্জমানপঞ্ঞত্তিৰিজ্জমানপঞ্ঞত্তিসভাৰা যথাক্কমং এৰং-সদ্দ – সুত-সদ্দানং অত্থাতি তে তথারূপ-পঞ্ঞত্তি-উপাদানভূত-ধম্মপবন্ধব্যাপারভাৰেন দস্সেন্তো আহ – ‘‘এৰন্তি পুগ্গলকিচ্চনিদ্দেসো, সুতন্তি ৰিঞ্ঞাণকিচ্চনিদ্দেসো’’তি. এত্থ চ করণকিরিযাকত্তুকম্মৰিসেসপ্পকাসনৰসেন পুগ্গলব্যাপারৰিসযপুগ্গলব্যাপারনিদস্সনৰসেন গহণাকারগাহকতব্বিসযৰিসেসনিদ্দেসৰসেন কত্তুকরণব্যাপারকত্তুনিদ্দেসৰসেন চ দুতিযাদযো চতস্সো অত্থযোজনা দস্সিতাতি দট্ঠব্বং.

সব্বস্সপি সদ্দাধিগমনীযস্স অত্থস্স পঞ্ঞত্তিমুখেনেৰ পটিপজ্জিতব্বত্তা সব্বপঞ্ঞত্তীনঞ্চ ৰিজ্জমানাদিৰসেন ছসু পঞ্ঞত্তিভেদেসু অন্তোগধত্তা তেসু ‘‘এৰ’’ন্তিআদীনং পঞ্ঞত্তীনং সরূপং নিদ্ধারেন্তো আহ – ‘‘এৰন্তি চ মেতি চা’’তিআদি. তত্থ ‘‘এৰ’’ন্তি চ ‘‘মে’’তি চ ৰুচ্চমানস্সত্থস্স আকারাদিনো ধম্মানং অসল্লক্খণভাৰতো অৰিজ্জমানপঞ্ঞত্তিভাৰোতি আহ – ‘‘সচ্চিকট্ঠপরমত্থৰসেন অৰিজ্জমানপঞ্ঞত্তী’’তি. তত্থ সচ্চিকট্ঠপরমত্থৰসেনাতি ভূতত্থউত্তমত্থৰসেন. ইদং ৰুত্তং হোতি – যো মাযামরীচিআদযো ৰিয অভূতত্থো, অনুস্সৰাদীহি গহেতব্বো ৰিয অনুত্তমত্থো চ ন হোতি, সো রূপসদ্দাদিসভাৰো, রুপ্পনানুভৰনাদিসভাৰো ৰা অত্থো সচ্চিকট্ঠো পরমত্থো চাতি ৰুচ্চতি, ন তথা ‘‘এৰং মে’’তি পদানং অত্থোতি. এতমেৰত্থং পাকটতরং কাতুং ‘‘কিঞ্হেত্থ ত’’ন্তিআদি ৰুত্তং. সুতন্তি পন সদ্দাযতনং সন্ধাযাহ ‘‘ৰিজ্জমানপঞ্ঞত্তী’’তি. তেনেৰ হি ‘‘যঞ্হি তং এত্থ সোতেন উপলদ্ধ’’ন্তি ৰুত্তং, ‘‘সোতদ্ৰারানুসারেন উপলদ্ধ’’ন্তি পন ৰুত্তে অত্থব্যঞ্জনাদিসব্বং লব্ভতি.

তং ¶ তং উপাদায ৰত্তব্বতোতি সোতপথমাগতে ধম্মে উপাদায তেসং উপধারিতাকারাদিনো পচ্চামসনৰসেন ‘‘এৰ’’ন্তি, সসন্ততিপরিযাপন্নে খন্ধে উপাদায ‘‘মে’’তি ৰত্তব্বত্তাতি অত্থো. দিট্ঠাদিসভাৰরহিতে সদ্দাযতনে পৰত্তমানোপি সুতৰোহারো ‘‘দুতিযং ততিয’’ন্তিআদিকো ৰিয পঠমাদীনি দিট্ঠমুতৰিঞ্ঞাতে অপেক্খিত্ৰাৰ পৰত্তোতি আহ ‘‘দিট্ঠাদীনি উপনিধায ৰত্তব্বতো’’তি অসুতং ন হোতীতি হি সুতন্তি পকাসিতোযমত্থোতি. অত্তনা পটিৰিদ্ধা সুত্তস্স পকারৰিসেসা ‘‘এৰ’’ন্তি থেরেন পচ্চামট্ঠাতি আহ ‘‘অসম্মোহং দীপেতী’’তি. নানপ্পকারপটিৰেধসমত্থো হোতীতি এতেন ¶ ৰক্খমানস্স সুত্তস্স নানপ্পকারতং দুপ্পটিৰিজ্ঝতঞ্চ দস্সেতি. সুতস্স অসম্মোসং দীপেতীতি সুতাকারস্স যাথাৰতো দস্সিযমানত্তা ৰুত্তং. অসম্মোহেনাতি সম্মোহাভাৰেন, পঞ্ঞায এৰ ৰা সৰনকালসম্ভূতায তদুত্তরকালপঞ্ঞাসিদ্ধি. এৰং অসম্মোসেনাতি এত্থাপি ৰত্তব্বং. ব্যঞ্জনানং পটিৰিজ্ঝিতব্বো আকারো নাতিগম্ভীরো, যথাসুতধারণমেৰ তত্থ করণীযন্তি সতিযা ব্যাপারো অধিকো, পঞ্ঞা তত্থ গুণীভূতাতি ৰুত্তং ‘‘পঞ্ঞাপুব্বঙ্গমাযা’’তিআদি ‘‘পঞ্ঞায পুব্বঙ্গমা’’তি কত্ৰা. পুব্বঙ্গমতা চেত্থ পধানতা ‘‘মনোপুব্বঙ্গমা’’তিআদীসু (ধ. প. ১, ২) ৰিয. পুব্বঙ্গমতায ৰা চক্খুৰিঞ্ঞাণাদীসু আৰজ্জনাদীনং ৰিয অপ্পধানত্তে পঞ্ঞা পুব্বঙ্গমা এতিস্সাতি অযম্পি অত্থো যুজ্জতি. এৰং সতিপুব্বঙ্গমাযাতি এত্থাপি ৰুত্তনযানুসারেন যথাসম্ভৰমত্থো ৰেদিতব্বো. অত্থব্যঞ্জনসম্পন্নস্সাতি অত্থব্যঞ্জনপরিপুণ্ণস্স, সঙ্কাসনপকাসনৰিৰরণৰিভজনউত্তানীকরণপঞ্ঞত্তিৰসেন ছহি অত্থপদেহি, অক্খরপদব্যঞ্জনাকারনিরুত্তিনিদ্দেসৰসেন ছহি ব্যঞ্জনপদেহি চ সমন্নাগতস্সাতি ৰা অত্থো দট্ঠব্বো.

যোনিসোমনসিকারং দীপেতি এৰং-সদ্দেন ৰুচ্চমানানং আকারনিদস্সনাৰধারণত্থানং অৰিপরীতসদ্ধম্মৰিসযত্তাতি অধিপ্পাযো. অৰিক্খেপং দীপেতীতি ‘‘মূলপরিযাযং কত্থ ভাসিত’’ন্তিআদিপুচ্ছাৰসেন পকরণপ্পত্তস্স ৰক্খমানস্স সুত্তস্স সৰনং সমাধানমন্তরেন ন সম্ভৰতীতি কত্ৰা ৰুত্তং. ৰিক্খিত্তচিত্তস্সাতিআদি তস্সেৰত্থস্স সমত্থনৰসেন ৰুত্তং. সব্বসম্পত্তিযাতি অত্থব্যঞ্জনদেসকপযোজনাদিসম্পত্তিযা. অৰিপরীতসদ্ধম্মৰিসযেহি ৰিয আকারনিদস্সনাৰধারণত্থেহি যোনিসোমনসিকারস্স, সদ্ধম্মস্সৰনেন ৰিয চ অৰিক্খেপস্স যথা যোনিসোমনসিকারেন ফলভূতেন অত্তসম্মাপণিধিপুব্বেকতপুঞ্ঞতানং সিদ্ধি ৰুত্তা তদৰিনাভাৰতো, এৰং অৰিক্খেপেন ফলভূতেন কারণভূতানং সদ্ধম্মস্সৰনসপ্পুরিসূপনিস্সযানং সিদ্ধি দস্সেতব্বা সিযা অস্সুতৰতো সপ্পুরিসূপনিস্সযরহিতস্স চ তদভাৰতো. ন হি ৰিক্খিত্তচিত্তোতিআদিনা সমত্থনৰচনেন পন অৰিক্খেপেন কারণভূতেন সপ্পুরিসূপনিস্সযেন চ ফলভূতস্স সদ্ধম্মস্সৰনস্স সিদ্ধি দস্সিতা. অযং পনেত্থ অধিপ্পাযো যুত্তো সিযা – সদ্ধম্মস্সৰনসপ্পুরিসূপনিস্সযা ¶ ন ¶ একন্তেন অৰিক্খেপস্স কারণং বাহিরঙ্গত্তা, অৰিক্খেপো পন সপ্পুরিসূপনিস্সযো ৰিয সদ্ধম্মস্সৰনস্স একন্তকারণন্তি. এৰম্পি অৰিক্খেপেন সপ্পুরিসূপনিস্সযসিদ্ধিজোতনা ন সমত্থিতাৰ, নো ন সমত্থিতা ৰিক্খিত্তচিত্তানং সপ্পুরিসপযিরুপাসনাভাৰস্স অত্থসিদ্ধত্তা. এত্থ চ পুরিমং ফলেন কারণস্স সিদ্ধিদস্সনং নদীপূরেন ৰিয উপরি ৰুট্ঠিসব্ভাৰস্স, দুতিযং কারণেন ফলস্স সিদ্ধিদস্সনং দট্ঠব্বং একন্তৰস্সিনা ৰিয মেঘৰুট্ঠানেন ৰুট্ঠিপ্পৰত্তিযা.

ভগৰতো ৰচনস্স অত্থব্যঞ্জনপভেদপরিচ্ছেদৰসেন সকলসাসনসম্পত্তিওগাহনাকারো নিরৰসেসপরহিতপারিপূরিকারণন্তি ৰুত্তং ‘‘এৰং ভদ্দকো আকারো’’তি. যস্মা ন হোতীতি সম্বন্ধো. পচ্ছিমচক্কদ্ৰযসম্পত্তিন্তি অত্তসম্মাপণিধিপুব্বেকতপুঞ্ঞতাসঙ্খাতং গুণদ্ৰযং. অপরাপরৰুত্তিযা চেত্থ চক্কভাৰো, চরন্তি এতেহি সত্তা সম্পত্তিভৰেসূতি ৰা. যে সন্ধায ৰুত্তং ‘‘চত্তারিমানি, ভিক্খৰে, চক্কানি, যেহি সমন্নাগতানং দেৰমনুস্সানং চতুচক্কং ৰত্ততী’’তিআদি (অ. নি. ৪.৩১). পুরিমপচ্ছিমভাৰো চেত্থ দেসনাক্কমৰসেন দট্ঠব্বো. পচ্ছিমচক্কদ্ৰযসিদ্ধিযাতি পচ্ছিমচক্কদ্ৰযস্স অত্থিতায. সম্মাপণিহিতত্তো পুব্বে চ কতপুঞ্ঞো সুদ্ধাসযো হোতি তদসুদ্ধিহেতূনং কিলেসানং দূরীভাৰতোতি আহ – ‘‘আসযসুদ্ধি সিদ্ধা হোতী’’তি. তথা হি ৰুত্তং ‘‘সম্মাপণিহিতং চিত্তং, সেয্যসো নং ততো করে’’তি (ধ. প. ৪৩), ‘‘কতপুঞ্ঞোসি ত্ৰং আনন্দ, পধানমনুযুঞ্জ, খিপ্পং হোহিসি অনাসৰো’’তি (দী. নি. ২.২০৭) চ. তেনেৰাহ ‘‘আসযসুদ্ধিযা অধিগমব্যত্তিসিদ্ধী’’তি. পযোগসুদ্ধিযাতি যোনিসোমনসিকারপুব্বঙ্গমস্স ধম্মস্সৰনপযোগস্স ৰিসদভাৰেন. তথা চাহ ‘‘আগমব্যত্তিসিদ্ধী’’তি. সব্বস্স ৰা কাযৰচীপযোগস্স নিদ্দোসভাৰেন. পরিসুদ্ধকাযৰচীপযোগো হি ৰিপ্পটিসারাভাৰতো অৰিক্খিত্তচিত্তো পরিযত্তিযং ৰিসারদো হোতীতি.

নানপ্পকারপটিৰেধদীপকেনাতিআদিনা অত্থব্যঞ্জনেসু থেরস্স এৰংসদ্দসুত-সদ্দানং অসম্মোহাসম্মোসদীপনতো চতুপটিসম্ভিদাৰসেন অত্থযোজনং দস্সেতি. তত্থ সোতব্বভেদপটিৰেধদীপকেনাতি এতেন অযং সুত-সদ্দো এৰং-সদ্দসন্নিধানতো, ৰক্খমানাপেক্খায ৰা সামঞ্ঞেনেৰ ¶ সোতব্বধম্মৰিসেসং আমসতীতি দস্সেতি. মনোদিট্ঠিকরণা পরিযত্তিধম্মানং অনুপেক্খনসুপ্পটিৰেধা ৰিসেসতো মনসিকারপটিবদ্ধাতি তে ৰুত্তনযেন যোনিসোমনসিকারদীপকেন এৰংসদ্দেন যোজেত্ৰা, সৰনধারণৰচীপরিচযা পরিযত্তিধম্মানং ৰিসেসেন সোতাৰধানপটিবদ্ধাতি তে অৰিক্খেপদীপকেন সুত-সদ্দেন যোজেত্ৰা দস্সেন্তো সাসনসম্পত্তিযা ¶ ধম্মস্সৰনে উস্সাহং জনেতি. তত্থ ধম্মাতি পরিযত্তিধম্মা. মনসানুপেক্খিতাতি ‘‘ইধ সীলং কথিতং, ইধ সমাধি, ইধ পঞ্ঞা, এত্তকা এত্থ অনুসন্ধিযো’’তিআদিনা নযেন মনসা অনু অনু পেক্খিতা. দিট্ঠিযা সুপ্পটিৰিদ্ধাতি নিজ্ঝানক্খন্তিভূতায, ঞাতপরিঞ্ঞাসঙ্খাতায ৰা দিট্ঠিযা তত্থ তত্থ ৰুত্তরূপারূপধম্মে ‘‘ইতি রূপং, এত্তকং রূপ’’ন্তিআদিনা সুট্ঠু ৰৰত্থপেত্ৰা পটিৰিদ্ধা.

সকলেন ৰচনেনাতি পুব্বে তীহি পদেহি ৰিসুং ৰিসুং যোজিতত্তা ৰুত্তং. অত্তনো অদহন্তোতি ‘‘মমেদ’’ন্তি অত্তনি অট্ঠপেন্তো. অসপ্পুরিসভূমিন্তি অকতঞ্ঞুতং ‘‘ইধেকচ্চো পাপভিক্খু তথাগতপ্পৰেদিতং ধম্মৰিনযং পরিযাপুণিত্ৰা অত্তনো দহতী’’তি (পারা. ১৯৫) এৰং ৰুত্তং অনরিযৰোহারাৰত্থং, সা এৰ অনরিযৰোহারাৰত্থা অসদ্ধম্মো. ননু চ আনন্দত্থেরস্স ‘‘মমেদং ৰচন’’ন্তি অধিমানস্স, মহাকস্সপত্থেরাদীনঞ্চ তদাসঙ্কায অভাৰতো অসপ্পুরিসভূমিসমতিক্কমাদিৰচনং নিরত্থকন্তি? নযিদমেৰং ‘‘এৰং মে সুত’’ন্তি ৰদন্তেন অযম্পি অত্থো ৰিভাৰিতোতি দস্সনতো. কেচি পন ‘‘দেৰতানং পরিৰিতক্কাপেক্খং তথাৰচনন্তি এদিসী চোদনা অনৰকাসাৰা’’তি ৰদন্তি. তস্মিং কির খণে একচ্চানং দেৰতানং এৰং চেতসো পরিৰিতক্কো উদপাদি ‘‘ভগৰা চ পরিনিব্বুতো, অযঞ্চ আযস্মা দেসনাকুসলো, ইদানি ধম্মং দেসেতি সক্যকুলপ্পসুতো তথাগতস্স ভাতা চূল়পিতুপুত্তো, কিং নু খো সযং সচ্ছিকতং ধম্মং দেসেতি, উদাহু ভগৰতোযেৰ ৰচনং যথাসুত’’ন্তি. এৰং তদাসঙ্কিতপ্পকারতো অসপ্পুরিসভূমিসমোক্কমাদিতো অতিক্কমাদি ৰিভাৰিতন্তি. অপ্পেতীতি নিদস্সেতি. দিট্ঠধম্মিকসম্পরাযিকপরমত্থেসু যথারহং সত্তে নেতীতি নেত্তি, ধম্মোযেৰ নেত্তি ধম্মনেত্তি.

দল়্হতরনিৰিট্ঠা ৰিচিকিচ্ছা কঙ্খা. নাতিসংসপ্পনা মতিভেদমত্তা ৰিমতি. অস্সদ্ধিযং ৰিনাসেতি ভগৰতা দেসিতত্তা, সম্মুখাৰস্স পটিগ্গহিতত্তা, খলিতদুরুত্তাদিগহণদোসাভাৰতো ¶ চ. এত্থ চ পঠমাদযো তিস্সো অত্থযোজনা আকারাদিঅত্থেসু অগ্গহিতৰিসেসমেৰ এৰং-সদ্দং গহেত্ৰা দস্সিতা, ততো পরা চতস্সো আকারত্থমেৰ এৰং-সদ্দং গহেত্ৰা ৰিভাৰিতা, পচ্ছিমা পন তিস্সো যথাক্কমং আকারত্থং নিদস্সনত্থং অৰধারণত্থঞ্চ এৰং-সদ্দং গহেত্ৰা যোজিতাতি দট্ঠব্বং.

এক-সদ্দো অঞ্ঞসেট্ঠাসহাযসঙ্খ্যাদীসু দিস্সতি. তথা হেস ‘‘সস্সতো অত্তা চ লোকো চ, ইদমেৰ সচ্চং মোঘমঞ্ঞন্তি ইত্থেকে অভিৰদন্তী’’তিআদীসু (ম. নি. ৩.২৭) অঞ্ঞত্থে দিস্সতি ¶ , ‘‘চেতসো একোদিভাৰ’’ন্তিআদীসু (দী. নি. ১.২২৮) সেট্ঠত্থে, ‘‘একো ৰূপকট্ঠো’’তিআদীসু (দী. নি. ১.৪০৫) অসহাযে, ‘‘একোৰ খো, ভিক্খৰে, খণো চ সমযো চ ব্রহ্মচরিযৰাসাযা’’তিআদীসু সঙ্খ্যাযং. ইধাপি সঙ্খ্যাযন্তি দস্সেন্তো আহ ‘‘একন্তি গণনপরিচ্ছেদনিদ্দেসো’’তি. কালঞ্চ সমযঞ্চাতি যুত্তকালঞ্চ পচ্চযসামগ্গিঞ্চ খণোতি ওকাসো. তথাগতুপ্পাদাদিকো হি মগ্গব্রহ্মচরিযস্স ওকাসো তপ্পচ্চযপটিলাভহেতুত্তা. খণো এৰ চ সমযো. যো ‘‘খণো’’তি চ ‘‘সমযো’’তি চ ৰুচ্চতি, সো একোৰাতি হি অত্থো মহাসমযোতি মহাসমূহো. সমযোপি খোতি সিক্খাপদপূরণস্স হেতুপি. সমযপ্পৰাদকেতি দিট্ঠিপ্পৰাদকে. তত্থ হি নিসিন্না তিত্থিযা অত্তনো অত্তনো সমযং পৰদন্তীতি. অত্থাভিসমযাতি হিতপটিলাভা. অভিসমেতব্বোতি অভিসমযো, অভিসমযো অত্থো অভিসমযট্ঠোতি পীল়নাদীনি অভিসমেতব্বভাৰেন একীভাৰং উপনেত্ৰা ৰুত্তানি. অভিসমযস্স ৰা পটিৰেধস্স ৰিসযভূতো অত্থো অভিসমযট্ঠোতি. তানেৰ তথা একত্তেন ৰুত্তানি. তত্থ পীল়নং দুক্খসচ্চস্স তংসমঙ্গিনো হিংসনং অৰিপ্ফারিকতাকরণং. সন্তাপো দুক্খদুক্খতাদিৰসেন সন্তাপনং পরিদহনং.

তত্থ সহকারীকারণং সন্নিজ্ঝং সমেতি সমৰেতীতি সমযো, সমৰাযো. সমেতি সমাগচ্ছতি মগ্গব্রহ্মচরিযং এত্থ তদাধারপুগ্গলেহীতি সমযো, খণো. সমেতি এত্থ, এতেন ৰা সংগচ্ছতি সত্তো, সভাৰধম্মো ৰা সহজাতাদীহি উপ্পাদাদীহি ৰাতি সমযো, কালো. ধম্মপ্পৰত্তিমত্ততায অত্থতো অভূতোপি হি কালো ধম্মপ্পৰত্তিযা অধিকরণং করণং ¶ ৰিয চ কপ্পনামত্তসিদ্ধেন রূপেন ৰোহরীযতীতি. সমং, সহ ৰা অৰযৰানং অযনং পৰত্তি অৰট্ঠানন্তি সমযো, সমূহো যথা ‘‘সমুদাযো’’তি. অৰযৰসহাৰট্ঠানমেৰ হি সমূহোতি. অৰসেসপচ্চযানং সমাগমে এতি ফলং এতস্মা উপ্পজ্জতি পৰত্ততি চাতি সমযো, হেতু যথা ‘‘সমুদযো’’তি. সমেতি সংযোজনভাৰতো সম্বন্ধো এতি অত্তনো ৰিসযে পৰত্ততি, দল়্হগ্গহণভাৰতো ৰা সংযুত্তা অযন্তি পৰত্তন্তি সত্তা যথাভিনিৰেসং এতেনাতি সমযো, দিট্ঠি; দিট্ঠিসঞ্ঞোজনেন হি সত্তা অতিৰিয বজ্ঝন্তীতি. সমিতি সঙ্গতি সমোধানন্তি সমযো, পটিলাভো. সমযনং, সম্মা ৰা অযনং অপগমোতি সমযো, পহানং. অভিমুখং ঞাণেন সম্মা এতব্বো অভিসমেতব্বোতি অভিসমযো, ধম্মানং অৰিপরীতো সভাৰো. অভিমুখভাৰেন সম্মা এতি গচ্ছতি বুজ্ঝতীতি অভিসমযো, ধম্মানং অৰিপরীতসভাৰাৰবোধো. এৰং তস্মিং তস্মিং অত্থে সময-সদ্দস্স পৰত্তি ৰেদিতব্বা. সমযসদ্দস্স অত্থুদ্ধারে অভিসমযসদ্দস্স উদাহরণং ৰুত্তনযেনেৰ ৰেদিতব্বং. অস্সাতি সমযসদ্দস্স ¶ . কালো অত্থো সমৰাযাদীনং অত্থানং ইধ অসম্ভৰতো, দেসদেসকপরিসানং ৰিয সুত্তস্স নিদানভাৰেন কালস্স অপদিসিতব্বতো চ.

কস্মা পনেত্থ অনিযমিতৰসেনেৰ কালো নিদ্দিট্ঠো, ন উতুসংৰচ্ছরাদিৰসেন নিযমেত্ৰাতি? আহ – ‘‘তত্থ কিঞ্চাপী’’তিআদি. উতুসংৰচ্ছরাদিৰসেন নিযমং অকত্ৰা সমযসদ্দস্স ৰচনেন অযম্পি গুণো লদ্ধো হোতীতি দস্সেন্তো ‘‘যে ৰা ইমে’’তিআদিমাহ. সামঞ্ঞজোতনা হি ৰিসেসে অৰতিট্ঠতীতি. তত্থ দিট্ঠধম্মসুখৰিহারসমযো দেৰসিকং ঝানফলসমাপত্তীহি ৰীতিনামনকালো, ৰিসেসতো সত্তসত্তাহানি. সুপ্পকাসাতি দসসহস্সিলোকধাতুসংকম্পনওভাসপাতুভাৰাদীহি পাকটা. যথাৰুত্তভেদেসু এৰ সমযেসু একদেসং পকারন্তরেহি সঙ্গহেত্ৰা দস্সেতুং ‘‘যো চায’’ন্তিআদিমাহ. তথা হি ঞাণকিচ্চসমযো অত্তহিতপটিপত্তিসমযো চ অভিসম্বোধিসমযো, অরিযতুণ্হীভাৰসমযো দিট্ঠধম্মসুখৰিহারসমযো, করুণাকিচ্চপরহিতপটিপত্তিধম্মিকথাসমযো দেসনাসমযো এৰ.

করণৰচনেন ¶ নিদ্দেসো কতোতি সম্বন্ধো. তত্থাতি অভিধম্মতদঞ্ঞসুত্তপদৰিনযেসু. তথাতি ভুম্মকরণেহি. অধিকরণত্থো আধারত্থো. ভাৰো নাম কিরিযা, তায কিরিযন্তরলক্খণং ভাৰেনভাৰলক্খণং. তত্থ যথা কালো সভাৰধম্মপরিচ্ছিন্নো সযং পরমত্থতো অৰিজ্জমানোপি আধারভাৰেন পঞ্ঞাতো তঙ্খণপ্পৰত্তানং ততো পুব্বে পরতো চ অভাৰতো ‘‘পুব্বণ্হে জাতো, সাযন্হে গচ্ছতী’’তি চ আদীসু, সমূহো চ অৰযৰৰিনিমুত্তো অৰিজ্জমানোপি কপ্পনামত্তসিদ্ধো অৰযৰানং আধারভাৰেন পঞ্ঞাপীযতি ‘‘রুক্খে সাখা, যৰরাসিযং সম্ভূতো’’তিআদীসু, এৰং ইধাপীতি দস্সেন্তো আহ ‘‘অধিকরণঞ্হি…পে… ধম্মান’’ন্তি. যস্মিং কালে ধম্মপুঞ্জে ৰা কামাৰচরং কুসলং চিত্তং উপ্পন্নং হোতি, তস্মিং এৰ কালে ধম্মপুঞ্জে চ ফস্সাদযোপি হোন্তীতি অযঞ্হি তত্থ অত্থো. যথা চ ‘‘গাৰীসু দুয্হমানাসু গতো, দুদ্ধাসু আগতো’’তি দোহনকিরিযায গমনকিরিযা লক্খীযতি, এৰং ইধাপি ‘‘যস্মিং সমযে, তস্মিং সমযে’’তি চ ৰুত্তে ‘‘সতী’’তি অযমত্থো ৰিঞ্ঞাযমানো এৰ হোতি পদত্থস্স সত্তাৰিরহাভাৰতোতি সমযস্স সত্তাকিরিযায চিত্তস্স উপ্পাদকিরিযা ফস্সাদীনং ভৰনকিরিযা চ লক্খীযতি. যস্মিং সমযেতি যস্মিং নৰমে খণে, যস্মিং যোনিসোমনসিকারাদিহেতুম্হি, পচ্চযসমৰাযে ৰা সতি কামাৰচরং কুসলং চিত্তং উপ্পন্নং হোতি, তস্মিংযেৰ খণে, হেতুম্হি, পচ্চযসমৰাযে ৰা ফস্সাদযোপি হোন্তীতি উভযত্থ সমযসদ্দে ভুম্মনিদ্দেসো কতো লক্খণভূতভাৰযুত্তোতি দস্সেন্তো আহ ‘‘খণ…পে… লক্খীযতী’’তি.

হেতুঅত্থো ¶ করণত্থো চ সম্ভৰতি ‘‘অন্নেন ৰসতি, অজ্ঝেনেন ৰসতি, ফরসুনা ছিন্দতি, কুদালেন খণতী’’তিআদীসু ৰিয. ৰীতিক্কমঞ্হি সুত্ৰা ভিক্খুসঙ্ঘং সন্নিপাতাপেত্ৰা ওতিণ্ণৰত্থুকং পুগ্গলং পটিপুচ্ছিত্ৰা ৰিগরহিত্ৰা চ তং তং ৰত্থুং ওতিণ্ণকালং অনতিক্কমিত্ৰা তেনেৰ কালেন সিক্খাপদানি পঞ্ঞপেন্তো ভগৰা ৰিহরতি সিক্খাপদপঞ্ঞত্তিহেতুঞ্চ অপেক্খমানো ততিযপারাজিকাদীসু ৰিয.

অচ্চন্তমেৰ আরম্ভতো পট্ঠায যাৰ দেসনানিট্ঠানং পরহিতপটিপত্তিসঙ্খাতেন করুণাৰিহারেন. তদত্থজোতনত্থন্তি অচ্চন্তসংযোগত্থজোতনত্থং. উপযোগৰচননিদ্দেসো কতো যথা ‘‘মাসং অজ্ঝেতী’’তি.

পোরাণাতি ¶ অট্ঠকথাচরিযা. অভিলাপমত্তভেদোতি ৰচনমত্তেন ৰিসেসো. তেন সুত্তৰিনযেসু ৰিভত্তিব্যত্তযো কতোতি দস্সেতি.

সেট্ঠন্তি সেট্ঠৰাচকং ৰচনং ‘‘সেট্ঠ’’ন্তি ৰুত্তং সেট্ঠগুণসহচরণতো. তথা উত্তমন্তি এত্থাপি. গারৰযুত্তোতি গরুভাৰযুত্তো গরুগুণযোগতো, গরুকরণারহতায ৰা গারৰযুত্তো. ৰুত্তোযেৰ, ন পন ইধ ৰত্তব্বো ৰিসুদ্ধিমগ্গস্স ইমিস্সা অট্ঠকথায একদেসভাৰতোতি অধিপ্পাযো.

অপরো নযো (সং. নি. টী. ১.১.১; সারত্থ. টী. ১.ৰিনযানিসংসকথাৰণ্ণনা; ৰিসুদ্ধি. মহাটী. ১.১৪৪; ইতিৰু. অট্ঠ. গন্থারম্ভকথা) – ভাগৰাতি ভগৰা, ভতৰাতি ভগৰা, ভাগে ৰনীতি ভগৰা, ভগে ৰনীতি ভগৰা, ভত্তৰাতি ভগৰা, ভগে ৰমীতি ভগৰা, ভাগে ৰমীতি ভগৰা.

ভগৰা ভতৰা ভাগে, ভগে চ ৰনি ভত্তৰা;

ভগে ৰমি তথা ভাগে, ৰমীতি ভগৰা জিনো.

তত্থ কথং ভাগৰাতি ভগৰা? যে তে সীলাদযো ধম্মক্খন্ধা গুণভাগা গুণকোট্ঠাসা, তে অনঞ্ঞসাধারণা নিরতিসযা তথাগতস্স অত্থি উপলব্ভন্তি. তথা হিস্স সীলং, সমাধি, পঞ্ঞা, ৰিমুত্তি, ৰিমুত্তিঞাণদস্সনং, হিরী, ওত্তপ্পং, সদ্ধা, ৰীরিযং, সতি সম্পজঞ্ঞং, সীলৰিসুদ্ধি, দিট্ঠিৰিসুদ্ধি, সমথো, ৰিপস্সনা, তীণি কুসলমূলানি, তীণি সুচরিতানি, তযো ¶ সম্মাৰিতক্কা, তিস্সো অনৰজ্জসঞ্ঞা, তিস্সো ধাতুযো, চত্তারো সতিপট্ঠানা, চত্তারো সম্মপ্পধানা, চত্তারো ইদ্ধিপাদা, চত্তারো অরিযমগ্গা, চত্তারি অরিযফলানি, চতস্সো পটিসম্ভিদা, চতুযোনিপটিচ্ছেদকঞাণং, চত্তারো অরিযৰংসা, চত্তারি ৰেসারজ্জঞাণানি, পঞ্চ পধানিযঙ্গানি, পঞ্চঙ্গিকো সম্মাসমাধি, পঞ্চঞাণিকো সম্মাসমাধি, পঞ্চিন্দ্রিযানি, পঞ্চ বলানি, পঞ্চ নিস্সারণীযা ধাতুযো, পঞ্চ ৰিমুত্তাযতনঞাণানি, পঞ্চ ৰিমুত্তিপরিপাচনীযা সঞ্ঞা, ছ অনুস্সতিট্ঠানানি, ছ গারৰা, ছ নিস্সারণীযা ধাতুযো, ছ সততৰিহারা, ছ অনুত্তরিযানি, ছ নিব্বেধভাগিযা সঞ্ঞা, ছ অভিঞ্ঞা, ছ অসাধারণঞাণানি, সত্ত অপরিহানিযা ধম্মা, সত্ত অরিযধম্মা, সত্ত অরিযধনানি, সত্ত বোজ্ঝঙ্গা, সত্ত সপ্পুরিসধম্মা, সত্ত নিজ্জরৰত্থূনি, সত্ত ¶ সঞ্ঞা, সত্ত দক্খিণেয্যপুগ্গলদেসনা, সত্ত খীণাসৰবলদেসনা, অট্ঠ পঞ্ঞাপটিলাভহেতুদেসনা, অট্ঠ সম্মত্তানি, অট্ঠ লোকধম্মাতিক্কমা, অট্ঠ আরম্ভৰত্থূনি, অট্ঠ অক্খণদেসনা, অট্ঠ মহাপুরিসৰিতক্কা, অট্ঠ অভিভাযতনদেসনা, অট্ঠ ৰিমোক্খা, নৰ যোনিসোমনসিকারমূলকা ধম্মা, নৰ পারিসুদ্ধিপধানিযঙ্গানি, নৰ সত্তাৰাসদেসনা, নৰ আঘাতপটিৰিনযা, নৰ সঞ্ঞা, নৰ নানত্তা, নৰ অনুপুব্বৰিহারা, দস নাথকরণা ধম্মা, দস কসিণাযতনানি, দস কুসলকম্মপথা, দস সম্মত্তানি, দস অরিযৰাসা, দস অসেক্খধম্মা, দস তথাগতবলানি, একাদস মেত্তানিসংসা, দ্ৰাদস ধম্মচক্কাকারা, তেরস ধুতগুণা, চুদ্দস বুদ্ধঞাণানি, পঞ্চদস ৰিমুত্তিপরিপাচনীযা ধম্মা, সোল়সৰিধা আনাপানস্সতি, সোল়স অপরন্তপনীযা ধম্মা, অট্ঠারস বুদ্ধধম্মা, একূনৰীসতি পচ্চৰেক্খণঞাণানি, চতুচত্তালীস ঞাণৰত্থূনি, পঞ্ঞাস উদযব্বযঞাণানি, পরোপণ্ণাস কুসলধম্মা, সত্তসত্ততি ঞাণৰত্থূনি, চতুৰীসতিকোটিসতসহস্সসঙ্খাসমাপত্তিসঞ্চারিমহাৰজিরঞাণং, অনন্তনযসমন্তপট্ঠানপৰিচযপচ্চৰেক্খণদেসনাঞাণানি তথা অনন্তাসু লোকধাতূসু অনন্তানং সত্তানং আসযাদিৰিভাৰনঞাণানি চাতি এৰমাদযো অনন্তাপরিমাণভেদা অনঞ্ঞসাধারণা নিরতিসযা গুণভাগা গুণকোট্ঠাসা সংৰিজ্জন্তি উপলব্ভন্তি, তস্মা যথাৰুত্তৰিভাগা গুণভাগা অস্স অত্থীতি ‘‘ভাগৰা’’তি ৰত্তব্বে আ-কারস্স রস্সত্তং কত্ৰা ‘‘ভগৰা’’তি ৰুত্তো. এৰং তাৰ ভাগৰাতি ভগৰা.

যস্মা সীলাদযো সব্বে, গুণভাগা অসেসতো;

ৰিজ্জন্তি সুগতে তস্মা, ভগৰাতি পৰুচ্চতীতি.

কথং ভতৰাতি ভগৰা? যে তে সব্বলোকহিতায উস্সুক্কমাপন্নেহি মনুস্সত্তাদিকে অট্ঠ ধম্মে ¶ সমোধানেত্ৰা সম্মাসম্বোধিযা কতমহাভিনীহারেহি মহাবোধিসত্তেহি পরিপূরিতব্বা দানপারমী, সীল, নেক্খম্ম, পঞ্ঞা, ৰীরিয, খন্তি, সচ্চ, অধিট্ঠান, মেত্তা, উপেক্খাপারমীতি দস পারমিযো দস উপপারমিযো দস পরমত্থপারমিযোতি সমতিংস পারমিযো, দানাদীনি চত্তারি সঙ্গহৰত্থূনি, সচ্চাদীনি চত্তারি অধিট্ঠানানি, অঙ্গপরিচ্চাগো নযনধনরজ্জপুত্তদারপরিচ্চাগোতি পঞ্চ মহাপরিচাগা, পুব্বযোগো, পুব্বচরিযা, ধম্মক্খানং, ঞাতত্থচরিযা, লোকত্থচরিযা, বুদ্ধিচরিযাতি ¶ এৰমাদযো, সঙ্খেপতো ৰা সব্বে পুঞ্ঞঞাণসম্ভারা বুদ্ধকরধম্মা, তে মহাভিনীহারতো পট্ঠায কপ্পানং সতসহস্সাধিকানি চত্তারি অসঙ্খেয্যানি যথা হানভাগিযা সংকিলেসভাগিযা ঠিতিভাগিযা ৰা ন হোন্তি, অথ খো উত্তরুত্তরি ৰিসেসভাগিযাৰ হোন্তি, এৰং সক্কচ্চং নিরন্তরং অনৰসেসতো ভতা সম্ভতা অস্স অত্থীতি ‘‘ভতৰা’’তি ৰত্তব্বে ‘‘ভগৰা’’তি ৰুত্তো নিরুত্তিনযেন ত-কারস্স গ-কারং কত্ৰা. অথ ৰা ভতৰাতি তেযেৰ যথাৰুত্তে বুদ্ধকরধম্মে ৰুত্তনযেনেৰ ভরি সম্ভরি, পরিপূরেসীতি অত্থো. এৰম্পি ভতৰাতি ভগৰা.

সম্মাসম্বোধিযা সব্বে, দানপারমিআদিকে;

সম্ভারে ভতৰা নাথো, তেনাপি ভগৰা মতোতি.

কথং ভাগে ৰনীতি ভগৰা? যে তে চতুৰীসতিকোটিসতসহস্সসঙ্খা দেৰসিকং ৰল়ঞ্জনকসমাপত্তিভাগা, তে অনৰসেসতো লোকহিতত্থং অত্তনো চ দিট্ঠধম্মসুখৰিহারত্থং নিচ্চকপ্পং ৰনি ভজি সেৰি বহুলমকাসীতি ভাগে ৰনীতি ভগৰা. অথ ৰা অভিঞ্ঞেয্যধম্মেসু কুসলাদীসু খন্ধাদীসু চ যে তে পরিঞ্ঞেয্যাদিৰসেন সঙ্খেপতো ৰা চতুব্বিধা অভিসমযভাগা, ৰিত্থারতো পন ‘‘চক্খু পরিঞ্ঞেয্যং সোতং…পে… জরামরণং পরিঞ্ঞেয্য’’ন্তিআদিনা (পটি. ম. ১.২১) অনেকে পরিঞ্ঞেয্যভাগা, ‘‘চক্খুস্স সমুদযো পহাতব্বো…পে… জরামরণস্স সমুদযো পহাতব্বো’’তিআদিনা পহাতব্বভাগা, ‘‘চক্খুস্স নিরোধো…পে… জরামরণস্স নিরোধো সচ্ছিকাতব্বো’’তিআদিনা সচ্ছিকাতব্বভাগা, ‘‘চক্খুস্স নিরোধগামিনী পটিপদা’’তিআদিনা, ‘‘চত্তারো সতিপট্ঠানা’’তিআদিনা চ অনেকভেদা ভাৰেতব্বভাগা চ ধম্মা, তে সব্বে ৰনি ভজি যথারহং গোচরভাৰনাসেৰনানং ৰসেন সেৰি. এৰম্পি ভাগে ৰনীতি ভগৰা. অথ ৰা ‘‘যে ইমে সীলাদযো ধম্মক্খন্ধা সাৰকেহি সাধারণা গুণভাগা গুণকোট্ঠাসা, কিন্তি নু খো তে ৰিনেয্যসন্তানেসু পতিট্ঠপেয্য’’ন্তি মহাকরুণায ৰনি অভিপত্থযি, সা চস্স অভিপত্থনা যথাধিপ্পেতফলাৰহা অহোসি. এৰম্পি ভাগে ৰনীতি ভগৰা.

যস্মা ¶ ঞেয্যসমাপত্তিগুণভাগে অসেসতো;

ভজি পত্থযি সত্তানং, হিতায ভগৰা ততোতি.

কথং ¶ ভগে ৰনীতি ভগৰা? সমাসতো তাৰ কতপুঞ্ঞেহি পযোগসম্পন্নেহি যথাৰিভৰং ভজীযন্তীতি ভগা, লোকিযলোকুত্তরা সম্পত্তিযো. তত্থ লোকিযে তাৰ তথাগতো সম্বোধিতো পুব্বে বোধিসত্তভূতো পরমুক্কংসগতে ৰনি ভজি সেৰি, যত্থ পতিট্ঠায নিরৰসেসতো বুদ্ধকরধম্মে সমন্নানেন্তো বুদ্ধধম্মে পরিপাচেসি, বুদ্ধভূতো পন তে নিরৰজ্জসুখূপসংহিতে অনঞ্ঞসাধারণে লোকুত্তরেপি ৰনি ভজি সেৰি, ৰিত্থারতো পন পদেসরজ্জইস্সরিযচক্কৰত্তিসম্পত্তি-দেৰরজ্জসম্পত্তিআদিৰসেন- ঝানৰিমোক্খসমাধিসমাপত্তিঞাণদস্সন-মগ্গভাৰনাফলসচ্ছি- কিরিযাদি-উত্তরিমনুস্সধম্মৰসেন চ অনেকৰিহিতে অনঞ্ঞসাধারণে ভগে ৰনি ভজি সেৰি. এৰম্পি ভগে ৰনীতি ভগৰা.

যা তা সম্পত্তিযো লোকে, যা চ লোকুত্তরা পুথু;

সব্বা তা ভজি সম্বুদ্ধো, তস্মাপি ভগৰা মতোতি.

কথং ভত্তৰাতি ভগৰা? ভত্তা দল়্হভত্তিকা অস্স বহূ অত্থীতি ভত্তৰা. তথাগতো হি মহাকরুণাসব্বঞ্ঞুতঞ্ঞাণাদিঅপরিমিতনিরুপমপভাৰগুণৰিসেসসমঙ্গিভাৰতো সব্বসত্তুত্তমো, সব্বানত্থপরিহারপুব্বঙ্গমায নিরৰসেসহিতসুখৰিধানতপ্পরায নিরতিসযায পযোগসম্পত্তিযা সদেৰমনুস্সায পজায অচ্চন্তূপকারিতায দ্ৰত্তিংসমহাপুরিসলক্খণ-অসীতিঅনুব্যঞ্জন-ব্যামপ্পভাদিঅনঞ্ঞসাধারণ- ৰিসেসপটিমণ্ডিত-রূপকাযতায যথাভুচ্চ-গুণাধিগতেন ‘‘ইতিপি সো ভগৰা’’তিআদিনযপ্পৰত্তেন লোকত্তযব্যাপিনা সুৰিপুলেন সুৰিসুদ্ধেন চ থুতিঘোসেন সমন্নাগতত্তা উক্কংসপারমিপ্পত্তাসু অপ্পিচ্ছতাসন্তুট্ঠিআদীসু সুপ্পতিট্ঠিতভাৰতো দসবলচতুৰেসারজ্জাদিনিরতিসযগুণৰিসেস-সমঙ্গিভাৰতো চ রূপপ্পমাণো রূপপ্পসন্নো, ঘোসপ্পমাণো ঘোসপ্পসন্নো, লূখপ্পমাণো লূখপ্পসন্নো, ধম্মপ্পমাণো ধম্মপ্পসন্নোতি এৰং চতুপ্পমাণিকে লোকসন্নিৰাসে সব্বথাপি পসাদাৰহভাৰেন সমন্তপাসাদিকত্তা অপরিমাণানং সত্তানং সদেৰমনুস্সানং আদরবহুমানগারৰাযতনতায পরমপেমসম্ভত্তিট্ঠানং. যে তস্স ওৰাদে পতিট্ঠিতা অৰেচ্চপ্পসাদেন সমন্নাগতা হোন্তি, কেনচি অসংহারিযা তেসং পসাদভত্তি সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা. তথা হি তে অত্তনো জীৰিতপরিচ্চাগেপি তত্থ পসাদং ন পরিচ্চজন্তি, তস্স ৰা আণং দল়্হভত্তিভাৰতো. তেনেৰাহ –

‘‘যো ¶ ¶ ৰে কতঞ্ঞূ কতৰেদি ধীরো;

কল্যাণমিত্তো দল়্হভত্তি চ হোতী’’তি. (জা. ২.১৭.৭৮);

‘‘সেয্যথাপি, ভিক্খৰে, মহাসমুদ্দো ঠিতধম্মো ৰেলং নাতিৰত্ততি, এৰমেৰ খো, ভিক্খৰে, যং মযা সাৰকানং সিক্খাপদং পঞ্ঞত্তং, তং মম সাৰকা জীৰিতহেতুপি নাতিক্কমন্তী’’তি (অ. নি. ৮.২০; উদা. ৪৫; চূল়ৰ. ৩৮৫) চ.

এৰং ভত্তৰাতি ভগৰা নিরুত্তিনযেন একস্স ত-কারস্স লোপং কত্ৰা ইতরস্স গ-কারং কত্ৰা.

গুণাতিসযযুত্তস্স, যস্মা লোকহিতেসিনো;

সম্ভত্তা বহৰো সত্থু, ভগৰা তেন ৰুচ্চতীতি.

কথং ভগে ৰমীতি ভগৰা? যস্মা তথাগতো বোধিসত্তভূতোপি পুরিমাসু জাতীসু পারমিযো পূরেন্তো ভগসঙ্খাতং সিরিং ইস্সরিযং যসঞ্চ ৰমি, উগ্গিরি, খেল়পিণ্ডং ৰিয অনপেক্খো ছড্ডযি; পচ্ছিমত্তভাৰেপি হত্থাগতং চক্কৰত্তিসিরিং দেৰলোকাধিপচ্চসদিসং চতুদীপিস্সরিযং চক্কৰত্তিসম্পত্তিসন্নিস্সযং সত্তরতনসমুজ্জলং যসঞ্চ তিণাযপি অমঞ্ঞমানো নিরপেক্খো পহায অভিনিক্খমিত্ৰা সম্মাসম্বোধিং অভিসম্বুদ্ধো, তস্মা ইমে সিরিআদিকে ভগে ৰমীতি ভগৰা. অথ ৰা ভানি নাম নক্খত্তানি, তেহি সমং গচ্ছন্তি পৰত্তন্তীতি ভগা, সিনেরুযুগন্ধরউত্তরকুরুহিমৰন্তাদিভাজনলোকৰিসেসসন্নিস্সযা সোভা কপ্পট্ঠিযভাৰতো, তেপি ভগে ৰমি তন্নিৰাসিসত্তাৰাসসমতিক্কমনতো, তপ্পটিবদ্ধছন্দরাগপহানেন পজহীতি. এৰম্পি ভগে ৰমীতি ভগৰা.

চক্কৰত্তিসিরিং যস্মা, যসং ইস্সরিযং সুখং;

পহাসি লোকচিত্তঞ্চ, সুগতো ভগৰা ততোতি.

কথং ভাগে ৰমীতি ভগৰা? ভাগা নাম সভাগধম্মকোট্ঠাসা, তে খন্ধাযতনধাতাদিৰসেন, তত্থাপি রূপৰেদনাদিৰসেন, পথৰিযাদিঅতীতাদিৰসেন চ অনেকৰিধা. তে ভগৰা সব্বং পপঞ্চং সব্বং যোগং সব্বং গন্থং সব্বং সংযোজনং সমুচ্ছিন্দিত্ৰা অমতং ধাতুং সমধিগচ্ছন্তো ৰমি উগ্গিরি, অনপেক্খো ছড্ডযি ন পচ্চাগমি. তথা হেস ‘‘সব্বত্থমেৰ পথৰিং ¶ আপং ¶ তেজং ৰাযং, চক্খুং সোতং ঘানং জিৰ্হং কাযং মনং, রূপে সদ্দে গন্ধে রসে ফোট্ঠব্বে ধম্মে, চক্খুৰিঞ্ঞাণং…পে… মনোৰিঞ্ঞাণং, চক্খুসম্ফস্সং…পে… মনোসম্ফস্সং, চক্খুসম্ফস্সজং ৰেদনং…পে… মনোসম্ফস্সজং ৰেদনং, চক্খুসম্ফস্সজং সঞ্ঞং…পে… মনোসম্ফস্সজং সঞ্ঞং, চক্খুসম্ফস্সজং চেতনং…পে… মনোসম্ফস্সজং চেতনং, রূপতণ্হং…পে… ধম্মতণ্হং, রূপৰিতক্কং…পে… ধম্মৰিতক্কং, রূপৰিচারং…পে… ধম্মৰিচার’’ন্তিআদিনা অনুপদধম্মৰিভাগৰসেনপি সব্বেৰ ধম্মকোট্ঠাসে অনৰসেসতো ৰমি উগ্গিরি, অনপেক্খপরিচ্চাগেন ছড্ডযি. ৰুত্তং হেতং ‘‘যং তং, আনন্দ, চত্তং ৰন্তং মুত্তং পহীনং পটিনিস্সট্ঠং, তং তথাগতো পুন পচ্চাগমিস্সতীতি নেতং ঠানং ৰিজ্জতী’’তি (দী. নি. ২.১৮৩). এৰম্পি ভাগে ৰমীতি ভগৰা. অথ ৰা ভাগে ৰমীতি সব্বেপি কুসলাকুসলে সাৰজ্জানৰজ্জে হীনপণীতে কণ্হসুক্কসপ্পটিভাগে ধম্মে অরিযমগ্গঞাণমুখেন ৰমি উগ্গিরি অনপেক্খো পরিচ্চজি পজহি, পরেসঞ্চ তথত্তায ধম্মং দেসেসি. ৰুত্তম্পি চেতং ‘‘ধম্মাপি ৰো, ভিক্খৰে, পহাতব্বা, পগেৰ অধম্মা (ম. নি. ১.২৪০), কুল্লূপমং ৰো, ভিক্খৰে, ধম্মং দেসেস্সামি নিত্থরণত্থায, নো গহণত্থাযা’’তিআদি (ম. নি. ১.২৪০). এৰম্পি ভাগে ৰমীতি ভগৰা.

খন্ধাযতনধাতাদি-ধম্মভাগামহেসিনা;

কণ্হসুক্কা যতো ৰন্তা, ততোপি ভগৰা মতোতি.

তেন ৰুত্তং –

‘‘ভাগৰা ভতৰা ভাগে, ভগে চ ৰনি ভত্তৰা;

ভগে ৰমি তথা ভাগে, ৰমীতি ভগৰা জিনো’’তি.

ধম্মসরীরং পচ্চক্খং করোতীতি ‘‘যো ৰো, আনন্দ, মযা ধম্মো চ ৰিনযো চ দেসিতো পঞ্ঞত্তো, সো ৰো মমচ্চযেন সত্থা’’তি (দী. নি. ২.২১৬) ৰচনতো ধম্মস্স সত্থুভাৰপরিযাযো ৰিজ্জতীতি কত্ৰা ৰুত্তং. ৰজিরসঙ্ঘাতসমানকাযো পরেহি অভেজ্জসরীরত্তা. ন হি ভগৰতো রূপকাযে কেনচি সক্কা অন্তরাযো কাতুন্তি.

দেসনাসম্পত্তিং নিদ্দিসতি ৰক্খমানস্স সকলস্স সুত্তস্স ‘‘এৰ’’ন্তি নিদস্সনতো. সাৰকসম্পত্তিং নিদ্দিসতি পটিসম্ভিদাপ্পত্তেন পঞ্চসু ঠানেসু ভগৰতা এতদগ্গে ঠপিতেন মযা মহাসাৰকেন ¶ সুতং, তঞ্চ খো মযাৰ ¶ সুতং, ন অনুস্সুতিকং, ন পরম্পরাভতন্তি ইমস্স অত্থস্স দীপনতো. কালসম্পত্তিং নিদ্দিসতি ভগৰা-সদ্দসন্নিধানে পযুত্তস্স সময-সদ্দস্স কালস্স বুদ্ধুপ্পাদপটিমণ্ডিতভাৰদীপনতো. বুদ্ধুপ্পাদপরমা হি কালসম্পদা. তেনেতং ৰুচ্চতি –

‘‘কপ্পকসাযে কলিযুগে, বুদ্ধুপ্পাদো অহো মহচ্ছরিযং;

হুতাৰহমজ্ঝে জাতং, সমুদিতমকরন্দমরৰিন্দ’’ন্তি. (দী. নি. টী. ১.১; সং. নি. টী. ১.১.১; অ. নি. টী. ১.১.১ রূপাদিৰগ্গৰণ্ণনা);

ভগৰাতি দেসকসম্পত্তিং নিদ্দিসতি গুণৰিসিট্ঠসত্তুত্তমগরুগারৰাধিৰচনভাৰতো.

মঙ্গলদিৰসো সুখণো সুনক্খত্তন্তি অজ্জ মঙ্গলদিৰসো, তস্মা সুনক্খত্তং, তত্থাপি অযং সুখণো. মা অতিক্কমীতি মা রত্তিৰিভাযনং অনুদিক্খন্তানং রত্তি অতিক্কমীতি এৰং সম্বন্ধো ৰেদিতব্বো. উক্কাসু ঠিতাসু ঠিতাতি উক্কট্ঠা (দী. নি. টী. ১.২৫৫; অ. নি. টী. ২.৪.৩৬). উক্কাসু ৰিজ্জোতলন্তীসু ঠিতা পতিট্ঠিতাতি মূলৰিভূজাদিপক্খেপেন (পাণিনি ৩.২.৫) সদ্দসিদ্ধি ৰেদিতব্বা. নিরুত্তিনযেন ৰা উক্কাসু ঠিতাসু ঠিতা আসীতি উক্কট্ঠা. অপরে পন ভণন্তি ‘‘ভূমিভাগসম্পত্তিযা মনুস্সসম্পত্তিযা উপকরণসম্পত্তিযা চ সা নগরী উক্কট্ঠগুণযোগতো ‘উক্কট্ঠা’তি নামং লভী’’তি.

অৰিসেসেনাতি ন ৰিসেসেন, ৰিহারভাৰসামঞ্ঞেনাতি অত্থো. ইরিযাপথ…পে… ৰিহারেসূতি ইরিযাপথৰিহারো দিব্বৰিহারো ব্রহ্মৰিহারো অরিযৰিহারোতি এতেসু চতূসু ৰিহারেসু. সমঙ্গিপরিদীপনন্তি সমঙ্গীভাৰপরিদীপনং. এতন্তি ‘‘ৰিহরতী’’তি এতং পদং. তথা হি তং ‘‘ইধেকচ্চো গিহীহি সংসট্ঠো ৰিহরতি সহনন্দী সহসোকী’’তিআদীসু (সং. নি. ৪.২৪১) ইরিযাপথৰিহারে আগতং; ‘‘যস্মিং সমযে, ভিক্খৰে, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতী’’তিআদীসু (ধ. স. ১৬০; ৰিভ. ৬২৪) দিব্বৰিহারে; ‘‘সো মেত্তাসহগতেন চেতসা একং দিসং ফরিত্ৰা ৰিহরতী’’তিআদীসু (দী. নি. ১.৫৫৬; ৩.৩০৮; ম. নি. ১.৭৭; ২.৩০৯; ৩.২৩০) ব্রহ্মৰিহারে; ‘‘সো খো অহং অগ্গিৰেস্সন তস্সাযেৰ কথায পরিযোসানে তস্মিং এৰ পুরিমস্মিং সমাধিনিমিত্তে অজ্ঝত্তমেৰ ¶ ¶ চিত্তং সণ্ঠপেমি সন্নিসাদেমি একোদিং করোমি সমাদহামি, যেন সুদং নিচ্চকপ্পং ৰিহরামী’’তিআদীসু (ম. নি. ১.৩৮৭) অরিযৰিহারে.

তত্থ ইরিযনং ৰত্তনং ইরিযা, কাযপ্পযোগো. তস্সা পৰত্তনুপাযভাৰতো ঠানাদি ইরিযাপথো. ঠানসমঙ্গী ৰা হি কাযেন কিঞ্চি করেয্য গমনাদীসু অঞ্ঞতরসমঙ্গী ৰা. অথ ৰা ইরিযতি পৰত্ততি এতেন অত্তভাৰো, কাযকিচ্চং ৰাতি ইরিযা, তস্সা পৰত্তিযা উপাযভাৰতো পথোতি ইরিযাপথো, ঠানাদি এৰ. সো চ অত্থতো গতিনিৰত্তিআদিআকারেন পৰত্তো চতুসন্ততিরূপপবন্ধো এৰ. ৰিহরণং, ৰিহরতি এতেনাতি ৰা ৰিহারো, ইরিযাপথো এৰ ৰিহারো ইরিযাপথৰিহারো. দিৰি ভৰোতি দিব্বো. তত্থ বহুলপ্পৰত্তিযা ব্রহ্মপারিসজ্জাদিদেৰলোকে ভৰোতি অত্থো. তত্থ যো দিব্বানুভাৰো, তদত্থায সংৰত্ততীতি ৰা দিব্বো, অভিঞ্ঞাভিনীহারৰসেন মহাগতিকত্তা ৰা দিব্বো, দিব্বো চ সো ৰিহারো চাতি দিব্বৰিহারো, চতস্সো রূপাৰচরসমাপত্তিযো. আরুপ্পসমাপত্তিযোপি এত্থেৰ সঙ্গহং গচ্ছন্তি. ব্রহ্মূনং, ব্রহ্মানো ৰা ৰিহারা ব্রহ্মৰিহারা, চতস্সো অপ্পমঞ্ঞাযো. অরিযানং, অরিযা ৰা ৰিহারা অরিযৰিহারা, চত্তারি সামঞ্ঞফলানি. সো হি ভগৰা একং ইরিযাপথবাধনন্তিআদি যদিপি ভগৰা একেনপি ইরিযাপথেন চিরতরং কালং অত্তভাৰং পৰত্তেতুং সক্কোতি, তথাপি ‘‘উপাদিন্নকসরীরস্স নাম অযং সভাৰো’’তি দস্সেতুং ৰুত্তং. যস্মা ৰা ভগৰা যত্থ কত্থচি ৰসন্তো ৰেনেয্যানং ধম্মং দেসেন্তো, নানাসমাপত্তীহি চ কালং ৰীতিনামেন্তো ৰসতীতি ৰেনেয্যসত্তানং অত্তনো চ ৰিৰিধং হিতসুখং হরতি উপনেতি উপ্পাদেতি, তস্মা ৰিৰিধং হরতীতি এৰমেত্থ অত্থো ৰেদিতব্বো.

সুভগত্তাতি সিরীকামানৰসেন সোভনত্তা. তেনেৰাহ ‘‘সুন্দরসিরিকত্তা সুন্দরকামত্তা চা’’তি. ছণসমজ্জউস্সৰেতি এত্থ ছণং নাম ফগ্গুনমাসাদীসু উত্তরফগ্গুনাদি-অভিলক্খিতদিৰসেসু সপরিজনানং মনুস্সানং মঙ্গলকরণং. সমজ্জং নাম নটসমজ্জাদি. উস্সৰো নক্খত্তং. যত্থ গামনিগমৰাসিনো তযো সত্ত ৰা দিৰসে নক্খত্তঘোসনং কত্ৰা যথাৰিভৰং অলঙ্কতপটিযত্তা ভোগে পরিভুঞ্জন্তা নক্খত্তকীল়নং ¶ কীল়ন্তি. তেসং তং তথেৰ হোতীতি তেসং মনুস্সানং তং পত্থনং তন্নিৰাসিদেৰতানুভাৰেন যেভুয্যেন তথেৰ হোতি, পত্থনা সমিজ্ঝতীতি অত্থো. বহুজনকন্ততাযাতি ইমিনা ‘‘সুন্দরকামত্তা’’তি এতস্সেৰ পদস্স পকারন্তরেন অত্থং ৰিভাৰেতি. তত্রাযং ৰচনত্থো – কমনীযট্ঠেন সুট্ঠু ভজীযতীতি সুভগং, সুভা অগা রুক্খা এত্থাতি ৰা সুভগং, সুন্দরকিত্তিযোগতো ৰা ‘‘সুভগ’’ন্তি এৰম্পেত্থ অত্থং ৰণ্ণেন্তি. কেচি পন ‘‘সুভাগৰনে’’তি পঠন্তি, ‘‘সুন্দরভূমিভাগে ¶ ৰনে’’তি চস্স অত্থং ৰদন্তি. সুভগস্স নাম যক্খস্স ৰনং তেন পরিগ্গহিতত্তাতি ‘‘সুভগৰন’’ন্তি অঞ্ঞে. ৰননং ভত্তীতিঅত্থে তং ৰননং কারেতীতি এতস্মিং অত্থে ৰনযতীতি পদসিদ্ধি ৰেদিতব্বা. তেনেৰাহ ‘‘অত্তনি সিনেহং উপ্পাদেতী’’তি. যাচনত্থে ৰনুতে ইতি ৰনন্তি উপচারকপ্পনাৰসেন ৰন-সদ্দো ৰেদিতব্বো.

উজুৰংসাতি উজুভূতৰিটপা. মহাসালাতি মহারুক্খা. অঞ্ঞতরস্মিং সালমূলেতি অঞ্ঞতরস্স রুক্খস্স মূলে. ৰনপ্পতিজেট্ঠকরুক্খোতি ৰনপ্পতিভূতো জেট্ঠকরুক্খো. তমেৰ জেট্ঠকভাৰন্তি ৰনপ্পতিভাৰেনাগতং সেট্ঠভাৰং পধানভাৰং. তেন হি সো ‘‘সালরাজা’’তি ৰুত্তো. উপগতানং রঞ্জনট্ঠেন রাজা, অঞ্ঞস্মিম্পি তাদিসে রুক্খে রাজৰোহারং দস্সেতুং ‘‘সুপতিট্ঠিতস্সা’’তিআদি ৰুত্তং. তত্থ ব্রাহ্মণ ধম্মিকাতি আলপনং. নিপ্পরিযাযেন সাখাদিমতো সঙ্ঘাতস্স সুপ্পতিট্ঠিতভাৰসাধনে অৰযৰৰিসেসে পৰত্তমানো মূল-সদ্দো. যস্মা তংসদিসেসু তন্নিস্সযে পদেসে চ রুল়্হীৰসেন পরিযাযতো পৰত্ততি, তস্মা ‘‘মূলানি উদ্ধরেয্যা’’তি এত্থ নিপ্পরিযাযমূলং অধিপ্পেতন্তি একেন মূল-সদ্দেন ৰিসেসেত্ৰা আহ ‘‘মূলমূলে দিস্সতী’’তি যথা ‘‘দুক্খদুক্খং (সং. নি. ৪.৩২৭), রূপরূপ’’ন্তি (ৰিসুদ্ধি. ২.৪৪৯) চ. অসাধারণহেতুম্হীতি অসাধারণকারণে. লোভসহগতচিত্তুপ্পাদানং এৰ আৰেণিকে নেসং সুপ্পতিট্ঠিতভাৰসাধনতো মূলট্ঠেন উপকারকে পচ্চযধম্মে দিস্সতীতি অত্থো.

তত্থাতি ‘‘একং সমযং ভগৰা উক্কট্ঠাযং ৰিহরতি সুভগৰনে সালরাজমূলে’’তি যং ৰুত্তং ৰাক্যং, তত্ত. সিযাতি কস্সচি এৰং পরিৰিতক্কো সিযা, ৰক্খমানাকারেন কদাচি চোদেয্য ৰাতি অত্থো. অথ তত্থ ৰিহরতীতি যদি সুভগৰনে সালরাজমূলে ৰিহরতি. ন ৰত্তব্বন্তি নানাঠানভূতত্তা ¶ উক্কট্ঠাসুভগৰনানং, একং সমযন্তি চ ৰুত্তত্তাতি অধিপ্পাযো. ইদানি চোদকো তমেৰ অত্তনো অধিপ্পাযং ‘‘ন হি সক্কা’’তিআদিনা ৰিৰরতি. ইতরো সব্বমেতং অৰিপরীতং অত্থং অজানন্তেন ৰুত্তন্তি দস্সেন্তো ‘‘ন খো পনেতং এৰং দট্ঠব্ব’’ন্তি আহ. তত্থ এতন্তি ‘‘উক্কট্ঠাযং ৰিহরতি সুভগৰনে সালরাজমূলে’’তি এতং ৰচনং. এৰন্তি ‘‘যদি তাৰ ভগৰা’’তিআদিনা যং তং ভৰতা চোদিতং, তং অত্থতো এৰং ন খো পন দট্ঠব্বং, ন উভযত্থ অপুব্বঅচরিমং ৰিহারদস্সনত্থন্তি অত্থো.

ইদানি অত্তনো যথাধিপ্পেতং অৰিপরীতং অত্থং, তস্স চ পটিকচ্চেৰ ৰুত্তভাৰং, তেন চ অপ্পটিৰিদ্ধত্তং পকাসেন্তো ‘‘ননু অৰোচুম্হ…পে… সালরাজমূলে’’তি আহ. এৰম্পি ‘‘সুভগৰনে ¶ সালরাজমূলে ৰিহরতী’’চ্চেৰ ৰত্তব্বং, ন ‘‘উক্কট্ঠায’’ন্তি চোদনং মনসি কত্ৰা ৰুত্তং ‘‘গোচরগামনিদস্সনত্থ’’ন্তিআদি.

অৰস্সং চেত্থ গোচরগামকিত্তনং কাতব্বং. তথা হি তং যথা সুভগৰনাদিকিত্তনং পব্বজিতানুগ্গহকরণাদিঅনেকপ্পযোজনং, এৰং গহট্ঠানুগ্গহকরণাদিৰিৰিধপ্পযোজনন্তি দস্সেন্তো ‘‘উক্কট্ঠাকিত্তনেনা’’তিআদিমাহ. তত্থ পচ্চযগ্গহণেন উপসঙ্কমনপযিরুপাসনানং ওকাসদানেন ধম্মদেসনায সরণেসু সীলেসু চ পতিট্ঠাপনেন যথূপনিস্সযং উপরিৰিসেসাধিগমাৰহনেন চ গহট্ঠানগ্গহকরণং, উগ্গহপরিপুচ্ছানং কম্মট্ঠানানুযোগস্স চ অনুরূপৰসনট্ঠানপরিগ্গহেনেত্থ পব্বজিতানুগ্গহকরণং ৰেদিতব্বং. করুণায উপগমনং, ন লাভাদিনিমিত্তং, পঞ্ঞায অপগমনং, ন ৰিরোধাদিনিমিত্তন্তি উপগমনাপগমনানং নিরুপক্কিলেসতং ৰিভাৰেতি. ধম্মিকসুখং নাম অনৰজ্জসুখং. দেৰানং উপকারবহুলতা জনৰিৰিত্ততায. পচুরজনৰিৰিত্তং হি ঠানং দেৰা উপসঙ্কমিতব্বং মঞ্ঞন্তি. তদত্থপরিনিপ্ফাদনন্তি লোকত্থনিপ্ফাদনং, বুদ্ধকিচ্চসম্পাদনন্তি অত্থো. এৰমাদিনাতি আদি-সদ্দেন উক্কট্ঠাকিত্তনতো রূপকাযস্স অনুগ্গণ্হনং দস্সেতি, সুভগৰনাদিকিত্তনতো ধম্মকাযস্স. তথা পুরিমেন পরাধীনকিরিযাকরণং, দুতিযেন অত্তাধীনকিরিযাকরণং. পুরিমেন ৰা করুণাকিচ্চং, ইতরেন পঞ্ঞাকিচ্চং. পুরিমেন চস্স পরমায অনুকম্পায সমন্নাগমং, পচ্ছিমেন পরমায উপেক্খায সমন্নাগমং ¶ দীপেতি. ভগৰা হি সব্বসত্তে পরমায অনুকম্পায অনুকম্পতি, ন চ তত্থ সিনেহদোসানুপতিতো পরমুপেক্খকভাৰতো, উপেক্খকো চ ন চ পরহিতসুখকরণে অপ্পোসুক্কো মহাকারুণিকভাৰতো.

তস্স মহাকারুণিকতায লোকনাথতা, উপেক্খকতায অত্তনাথতা. তথা হেস বোধিসত্তভূতো মহাকরুণায সঞ্চোদিতমানসো সকললোকহিতায উস্সুক্কমাপন্নো মহাভিনীহারতো পট্ঠায তদত্থনিপ্ফাদনত্থং পুঞ্ঞঞাণসম্ভারে সম্পাদেন্তো অপরিমিতং কালং অনপ্পকং দুক্খমনুভোসি, উপেক্খকতায সম্মা পতিতেহি দুক্খেহি ন ৰিকম্পি. তথা মহাকারুণিকতায সংসারাভিমুখতা, উপেক্খকতায ততো নিব্বিন্দনা. তথা উপেক্খকতায নিব্বানাভিমুখতা, মহাকারুণিকতায তদধিগমো. তথা মহাকারুণিকতায পরেসং অভিংসাপনং, উপেক্খকতায সযং পরেহি অভাযনং. মহাকারুণিকতায পরং রক্খতো অত্তনো রক্খণং, উপেক্খকতায অত্তানং রক্খতো পরেসং রক্খণং. তেনস্স অত্তহিতায পটিপন্নাদীসু চতুত্থপুগ্গলভাৰো সিদ্ধো হোতি. তথা মহাকারুণিকতায সচ্চাধিট্ঠানস্স চাগাধিট্ঠানস্স চ পারিপূরি, উপেক্খকতায উপসমাধিট্ঠানস্স পঞ্ঞাধিট্ঠানস্স চ পারিপূরি. এৰং পরিসুদ্ধাসযপযোগস্স ¶ মহাকারুণিকতায লোকহিতত্থমেৰ রজ্জসম্পদাদিভৰসম্পত্তিযা উপগমনং, উপেক্খকতায তিণাযপি অমঞ্ঞমানস্স ততো অপগমনং. ইতি সুৰিসুদ্ধউপগমাপগমস্স মহাকারুণিকতায লোকহিতত্থমেৰ দানৰসেন সম্পত্তীনং পরিচ্চজনা, উপেক্খকতায চস্স ফলস্স অত্তনো অপচ্চাসীসনা. এৰং সমুদাগমনতো পট্ঠায অচ্ছরিযব্ভুতগুণসমন্নাগতস্স মহাকারুণিকতায পরেসং হিতসুখত্থং অতিদুক্করকারিতা, উপেক্খকতায কাযম্পি অনলংকারিতা.

তথা মহাকারুণিকতায চরিমত্তভাৰে জিণ্ণাতুরমতদস্সনেন সঞ্জাতসংৰেগো, উপেক্খকতায উল়ারেসু দেৰভোগসদিসেসু ভোগেসু নিরপেক্খো মহাভিনিক্খমনং নিক্খমি. তথা মহাকারুণিকতায ‘‘কিচ্ছং ৰতাযং লোকো আপন্নো’’তিআদিনা (দী. নি. ২.৫৭; সং. নি. ২.৪, ১০) করুণামুখেনেৰ ৰিপস্সনারম্ভো ¶ , উপেক্খকতায বুদ্ধভূতস্স সত্ত সত্তাহানি ৰিৰেকসুখেনেৰ ৰীতিনামনং. মহাকারুণিকতায ধম্মগম্ভীরতং পচ্চৰেক্খিত্ৰা ধম্মদেসনায অপ্পোসুক্কতং আপজ্জিত্ৰাপি মহাব্রহ্মুনো অজ্ঝেসনাপদেসেন ওকাসকরণং, উপেক্খকতায পঞ্চৰগ্গিযাদি ৰেনেয্যানং অননুরূপসমুদাচারেপি অনঞ্ঞথাভাৰো. মহাকারুণিকতায কত্থচি পটিঘাতাভাৰেনস্স সব্বত্থ অমিত্তসঞ্ঞায অভাৰো, উপেক্খকতায কত্থচিপি অনুরোধাভাৰেন সব্বত্থ সিনেহসন্থৰাভাৰো. মহাকারুণিকতায গামাদীনং আসন্নট্ঠানে ৰসন্তস্সপি উপেক্খকতায অরঞ্ঞট্ঠানে এৰ ৰিহরণং. তেন ৰুত্তং ‘‘পুরিমেন চস্স পরমায অন্নুকম্পায সমন্নাগমং, পচ্ছিমেন পরমায উপেক্খায সমন্নাগমং দীপেতী’’তি.

তন্তি ‘‘তত্রা’’তি পদং. দেসকালপরিদীপনন্তি যে দেসকালা ইধ ৰিহরণকিরিযাৰিসেসনভাৰেন ৰুত্তা, তেসং পরিদীপনন্তি দস্সেন্তো ‘‘যং সমযং…পে… দীপেতী’’তি আহ. তং-সদ্দো হি ৰুত্তস্স অত্থস্স পটিনিদ্দেসো, তস্মা ইধ কালস্স, দেসস্স ৰা পটিনিদ্দেসো ভৰিতুং অরহতি, ন অঞ্ঞস্স. অযং তাৰ তত্র-সদ্দস্স পটিনিদ্দেসভাৰে অত্থৰিভাৰনা. যস্মা পন ঈদিসেসু ঠানেসু তত্র-সদ্দো ধম্মদেসনাৰিসিট্ঠং দেসং কালঞ্চ ৰিভাৰেতি, তস্মা ৰুত্তং ‘‘ভাসিতব্বযুত্তে ৰা দেসকালে দীপেতী’’তি. তেন তত্রাতি যত্থ ভগৰা ধম্মদেসনত্থং ভিক্খূ আলপি অভাসি, তাদিসে দেসে, কালে ৰাতি অত্থো. ন হীতিআদিনা তমেৰত্থং সমত্থেতি. ননু চ যত্থ ঠিতো ভগৰা ‘‘অকালো খো তাৰা’’তিআদিনা বাহিযস্স ধম্মদেসনং পটিক্খিপি, তত্থেৰ অন্তরৰীথিযং ঠিতো তস্স ধম্মং দেসেতীতি? সচ্চমেতং, অদেসেতব্বকালে অদেসনায ইদং উদাহরণং. তেনেৰাহ ‘‘অকালো খো তাৰা’’তি. যং পন তত্থ ৰুত্তং ¶ ‘‘অন্তরঘরং পৰিট্ঠম্হা’’তি (উদা. ১০), তম্পি তস্স অকালভাৰস্সেৰ পরিযাযেন দস্সনত্থং ৰুত্তং. তস্স হি তদা অদ্ধানপরিস্সমেন রূপকাযে অকম্মঞ্ঞতা অহোসি, বলৰপীতিৰেগেন নামকাযে, তদুভযস্স ৰূপসমং আগমেন্তো পপঞ্চপরিহারত্থং ভগৰা ‘‘অকালো খো’’তি পরিযাযেন পটিক্খিপি. অদেসেতব্বদেসে অদেসনায পন উদাহরণং ‘‘অথ খো ভগৰা মগ্গা ওক্কম্ম অঞ্ঞতরস্মিং ¶ রুক্খমূলে নিসীদি (সং. নি. ২.১৫৪), ৰিহারতো নিক্খমিত্ৰা ৰিহারপচ্ছাযাযং পঞ্ঞত্তে আসনে নিসীদী’’তি (দী. নি. ১.৩৬৩) চ এৰমাদিকং ইধ আদি-সদ্দেন সঙ্গহিতং.

‘‘অথ খো সো, ভিক্খৰে, বালো ইধ পুব্বে রসাদো ইধ পাপানি কম্মানি করিত্ৰা’’তিআদীসু (ম. নি. ৩.২৫১) পদপূরণমত্তে খো-সদ্দো, ‘‘দুক্খং খো অগারৰো ৰিহরতি অপ্পতিস্সো’’তিআদীসু (অ. নি. ৪.২১) অৰধারণে, ‘‘কিত্তাৰতা নু খো, আৰুসো, সত্থু পৰিৰিত্তস্স ৰিহরতো সাৰকা ৰিৰেকং নানুসিক্খন্তী’’তিআদীসু (ম. নি. ১.৩১) আদিকালত্থে. ৰাক্যারম্ভেতি অত্থো. তত্থ পদপূরণেন ৰচনালঙ্কারমত্তং কতং হোতি, আদিকালত্থেন ৰাক্যস্স উপঞ্ঞাসমত্তং, অৰধারত্থেন পন নিযমদস্সনং, তস্মা আমন্তেসি এৰাতি আমন্তনে নিযমো দস্সিতো হোতীতি.

‘‘ভগৰাতি লোকগরুদীপন’’ন্তি কস্মা ৰুত্তং, ননু পুব্বেপি ভগৰা-সদ্দস্স অত্থো ৰুত্তোতি? যদিপি পুব্বে ৰুত্তো, তং পনস্স যথাৰুত্তে ঠানে ৰিহরণকিরিযায কত্তুৰিসেসদস্সনত্থং কতং, ন আমন্তনকিরিযায, ইধ পন আমন্তনকিরিযায, তস্মা তদত্থং পুন ‘‘ভগৰা’’তি পাল়িযং ৰুত্তন্তি তস্সত্থং দস্সেতুং ‘‘ভগৰাতি লোকগরুদীপন’’ন্তি আহ. কথাসৰনযুত্তপুগ্গলৰচনন্তি ৰক্খমানায মূলপরিযাযদেসনায সৰনযোগ্যপুগ্গলৰচনং. চতূসুপি পরিসাসু ভিক্খূ এৰ এদিসানং দেসনানং ৰিসেসেন ভাজনভূতা, ইতি সাতিসযসাসনসম্পটিগ্গাহকভাৰদস্সনত্থং ইধ ভিক্খুগহণন্তি দস্সেত্ৰা ইদানি সদ্দত্থং দস্সেতুং ‘‘অপিচা’’তিআদিমাহ.

তত্থ ভিক্খকোতি ভিক্খূতি ভিক্খনধম্মতায ভিক্খূতি অত্থো. ভিক্খাচরিযং অজ্ঝুপগতোতি বুদ্ধাদীহিপি অজ্ঝুপগতং ভিক্খাচরিযং উঞ্ছাচরিযং অজ্ঝুপগতত্তা অনুট্ঠিতত্তা ভিক্খূ. যো হি কোচি অপ্পং ৰা মহন্তং ৰা ভোগক্খন্ধং পহায অগারস্মা অনগারিযং পব্বজিতো, সো কসিগোরক্খাদীহি জীৰিকাকপ্পনং হিত্ৰা লিঙ্গসম্পটিচ্ছনেনেৰ ভিক্খাচরিযং অজ্ঝুপগতত্তা ভিক্খু, পরপটিবদ্ধজীৰিকত্তা ৰা ৰিহারমজ্ঝে কাজভত্তং ভুঞ্জমানোপি ভিক্খাচরিযং ¶ অজ্ঝুপগতোতি ভিক্খু, পিণ্ডিযালোপভোজনং নিস্সায পব্বজ্জায উস্সাহজাতত্তা ৰা ভিক্খাচরিযং অজ্ঝুপগতোতি ভিক্খূতি এৰম্পেত্থ অত্থো দট্ঠব্বো. আদিনা নযেনাতি ‘‘ভিন্নপটধরোতি ভিক্খু, ভিন্দতি পাপকে অকুসলে ধম্মেতি ভিক্খু, ভিন্নত্তা ¶ পাপকানং অকুসলানং ধম্মানং ভিক্খূ’’তিআদিনা ৰিভঙ্গে (ৰিভ. ৫১০) আগতনযেন. ঞাপনেতি অৰবোধনে, পটিৰেদনেতি অত্থো.

ভিক্খনসীলতাতিআদীসু ভিক্খনসীলতা ভিক্খনেন আজীৰনসীলতা, ন কসিৰণিজ্জাদীহি আজীৰনসীলতা. ভিক্খনধম্মতা ‘‘উদ্দিস্স অরিযা তিট্ঠন্তী’’তি (পটি. ম. ১৫৩; মি. প. ৪.৫.৯) এৰং ৰুত্তভিক্খনসভাৰতা, ন সম্ভাৰনাকোহঞ্ঞসভাৰতা. ভিক্খনে সাধুকারিতা ‘‘উত্তিট্ঠে নপ্পমজ্জেয্যা’’তি (ধ. প. ১৬৮) ৰচনং অনুস্সরিত্ৰা তত্থ অপ্পমজ্জনা. অথ ৰা সীলং নাম পকতিসভাৰো, ইধ পন তদধিট্ঠানং. ধম্মোতি ৰতং. অপরে পন ‘‘সীলং নাম ৰতসমাদানং, ধম্মো নাম পৰেণীআগতং চারিত্তং, সাধুকারিতাতি সক্কচ্চকারিতা আদরকিরিযা’’তি ৰণ্ণেন্তি. হীনাধিকজনসেৰিতন্তি যে ভিক্খুভাৰে ঠিতাপি জাতিমদাদিৰসেন উদ্ধতা উন্নল়া. যে চ গিহিভাৰে পরেসু অত্থিকভাৰম্পি অনুপগততায ভিক্খাচরিযং পরমকাপঞ্ঞতং মঞ্ঞন্তি, তেসং উভযেসম্পি যথাক্কমং ‘‘ভিক্খৰো’’তি ৰচনেন হীনজনেহি দলিদ্দেহি পরমকাপঞ্ঞতং পত্তেহি পরকুলেসু ভিক্খাচরিযায জীৰিকং কপ্পেন্তেহি সেৰিতং ৰুত্তিং পকাসেন্তো উদ্ধতভাৰনিগ্গহং করোতি, অধিকজনেহি উল়ারভোগখত্তিযকুলাদিতো পব্বজিতেহি বুদ্ধাদীহি আজীৰৰিসোধনত্থং সেৰিতং ৰুত্তিং পকাসেন্তো দীনভাৰনিগ্গহং করোতীতি যোজেতব্বং. যস্মা ‘‘ভিক্খৰো’’তি ৰচনং আমন্তনভাৰতো অভিমুখীকরণং, পকরণতো সামত্থিযতো চ সুস্সূসাজননং সক্কচ্চসৰনমনসিকারনিযোজনঞ্চ হোতি. তস্মা তমত্থং দস্সেন্তো ‘‘ভিক্খৰোতি ইমিনা’’তিআদিমাহ.

তত্থ সাধুকসৰনমনসিকারেতি সাধুকসৰনে সাধুকমনসিকারে চ. কথং পন পৰত্তিতা সৰনাদযো সাধুকং পৰত্তিতা হোন্তীতি? ‘‘অদ্ধা ইমায সম্মাপটিপত্তিযা সকলসাসনসম্পত্তি হত্থগতা ভৰিস্সতী’’তি আদরগারৰযোগেন, কথাদীসু অপরিভৰনাদিনা চ. ৰুত্তং হি ‘‘পঞ্চহি, ভিক্খৰে, ধম্মেহি সমন্নাগতো সুণন্তো সদ্ধম্মং ভব্বো নিযামং ওক্কমিতুং কুসলেসু ধম্মেসু সম্মত্তং. কতমেহি পঞ্চহি? ন কথং পরিভোতি, ন কথিকং পরিভোতি, ন অত্তানং পরিভোতি, অৰিক্খিত্তচিত্তো ধম্মং সুণাতি একগ্গচিত্তো, যোনিসো চ মনসি করোতি. ইমেহি খো, ভিক্খৰে ¶ , পঞ্চহি ধম্মেহি সমন্নাগতো সুণন্তো সদ্ধম্মং ভব্বো নিযামং ওক্কমিতুং ¶ কুসলেসু ধম্মেসু সম্মত্ত’’ন্তি (অ. নি. ৫.১৫১). তেনেৰাহ ‘‘সাধুকসৰনমনসিকারাযত্তা হি সাসনসম্পত্তী’’তি. সাসনসম্পত্তি নাম সীলাদিনিপ্ফত্তি.

পঠমং উপ্পন্নত্তা অধিগমৰসেন. সত্থুচরিযানুৰিধাযকত্তা সীলাদিগুণানুট্ঠানেন. তিণ্ণং যানানং ৰসেন অনুধম্মপটিপত্তিসব্ভাৰতো সকলসাসনপটিগ্গাহকত্তা. সন্তিকত্তাতি সমীপভাৰতো. সন্তিকাৰচরত্তাতি সব্বকালং সম্পযুত্তভাৰতো. যথানুসিট্ঠন্তি অনুসাসনিঅনুরূপং, অনুসাসনিং অনৰসেসতো পটিগ্গহেত্ৰাতি অত্থো. একচ্চে ভিক্খূযেৰ সন্ধাযাতি যে সুত্তপরিযোসানে ‘‘তে ভিক্খূ ভগৰতো ভাসিতং অভিনন্দু’’ন্তি ৰুত্তা পঞ্চসতা ব্রাহ্মণপব্বজিতা, তে সন্ধায.

পুব্বে সব্বপরিসসাধারণত্তেপি ভগৰতো ধম্মদেসনায ‘‘জেট্ঠসেট্ঠা’’তিআদিনা ভিক্খূনং এৰ আমন্তনে কারণং দস্সেত্ৰা ইদানি ভিক্খূ আমন্তেত্ৰাৰ ধম্মদেসনায পযোজনং দস্সেতুং ‘‘কিমত্থং পন ভগৰা’’তি চোদনং সমুট্ঠাপেসি. তত্থ অঞ্ঞং চিন্তেন্তাতি অঞ্ঞৰিহিতা. ৰিক্খিত্তচিত্তাতি অসমাহিতচিত্তা. ধম্মং পচ্চৰেক্খন্তাতি তদা হিয্যো ততো পরদিৰসেসু ৰা সুতধম্মং পতি পতি মনসা অৰেক্খন্তা. ভিক্খূ আমন্তেত্ৰা ধম্মে দেসিযমানে আদিতো পট্ঠায দেসনং সল্লক্খেতুং সক্কোন্তীতি ইমমেৰত্থং ব্যতিরেকমুখেন দস্সেতুং ‘‘তে অনামন্তেত্ৰা’’তিআদি ৰুত্তং.

ভিক্খৰোতীতি চ সন্ধিৰসেন ই-কারলোপো দট্ঠব্বো ‘‘ভিক্খৰো ইতী’’তি. অযং হি ইতি-সদ্দো হেতু-পরিসমাপনাদিপদত্থৰিপরিযায-পকারাৰধারণনিদস্সনাদিঅনেকত্থপ্পভেদো. তথা হেস ‘‘রুপ্পতীতি খো, ভিক্খৰে, তস্মা ‘রূপ’ন্তি ৰুচ্চতী’’তিআদীসু (সং. নি. ৩.৭৯) হেতুঅত্থে দিস্সতি; ‘‘তস্মা তিহ মে, ভিক্খৰে, ধম্মদাযাদা ভৰথ, মা আমিসদাযাদা, অত্থি মে তুম্হেসু অনুকম্পা ‘কিন্তি মে সাৰকা ধম্মদাযাদা ভৰেয্যুং, নো আমিসদাযাদা’তি’’আদীসু পরিসমাপনে; ‘‘ইতি ৰা, ইতি এৰরূপা নচ্চগীতৰাদিতৰিসূকদস্সনা ¶ পটিৰিরতো’’তিআদীসু (দী. নি. ১.১৩) আদিঅত্থে; ‘‘মাগণ্ঠিযোতি তস্স ব্রাহ্মণস্স সঙ্খা সমঞ্ঞা পঞ্ঞত্তি ৰোহারো নামং নামকম্মং নামধেয্যং নিরুত্তি ব্যঞ্জনমভিলাপো’’তিআদীসু (মহানি. ৭৩) পদত্থৰিপরিযাযে; ‘‘ইতি খো, ভিক্খৰে, সপ্পটিভযো বালো, অপ্পটিভযো পণ্ডিতো, সউপদ্দৰো বালো, অনুপদ্দৰো পণ্ডিতো, সউপসগ্গো বালো, অনুপসগ্গো পণ্ডিতো’’তিআদীসু (ম. নি. ৩.১২৪) পকারে; ‘‘অত্থি ইদপ্পচ্চযা জরামরণন্তি ইতি পুট্ঠেন সতা, আনন্দ, অত্থীতিস্স ৰচনীযং, কিং পচ্চযা জরামরণন্তি ¶ ইতি চে ৰদেয্য, জাতিপচ্চযা জরামরণন্তি ইচ্চস্স ৰচনীয’’ন্তিআদীসু (দী. নি. ২.৯৬) অৰধারণে; ‘‘সব্বমত্থীতি খো, কচ্চান, অযমেকো অন্তো, সব্বং নত্থীতি খো, কচ্চান, অযং দুতিযো অন্তো’’তিআদীসু (সং. নি. ২.১৫) নিদস্সনে. ইধাপি নিদস্সনেৰ দট্ঠব্বো. ভিক্খৰোতি হি আমন্তিতাকারো, তমেস ইতি-সদ্দো নিদস্সেতি ‘‘ভিক্খৰোতি আমন্তেসী’’তি. ইমিনা নযেন ‘‘ভদ্দন্তে’’তিআদীসুপি যথারহং ইতি-সদ্দস্স অত্থো ৰেদিতব্বো. পুব্বে ‘‘ভগৰা আমন্তেসী’’তি ৰুত্তত্তা ‘‘ভগৰতো পচ্চস্সোসু’’ন্তি ইধ ‘‘ভগৰতো’’তি সামিৰচনং আমন্তনমেৰ সম্বন্ধীঅন্তরং অপেক্খতীতি ইমিনা অধিপ্পাযেন ‘‘ভগৰতো আমন্তনং পটিঅস্সোসু’’ন্তি ৰুত্তং. ‘‘ভগৰতো’’তি পন ইদং পটিস্সৰসম্বন্ধনেন সম্পদানৰচনং যথা ‘‘দেৰদত্তস্স পটিস্সুণোতী’’তি.

যং নিদানং ভাসিতন্তি সম্বন্ধো. এত্থাহ – কিমত্থং পন ধম্মৰিনযসঙ্গহে করিযমানে নিদানৰচনং, ননু ভগৰতা ভাসিতৰচনস্সেৰ সঙ্গহো কাতব্বোতি? ৰুচ্চতে – দেসনায ঠিতিঅসম্মোসসদ্ধেয্যভাৰসম্পাদনত্থং. কালদেসদেসকনিমিত্তপরিসাপদেসেহি উপনিবন্ধিত্ৰা ঠপিতা হি দেসনা চিরট্ঠিতিকা হোতি অসম্মোসধম্মা সদ্ধেয্যা চ, দেসকালকত্তুসোতুনিমিত্তেহি উপনিবদ্ধো ৰিয ৰোহারৰিনিচ্ছযো. তেনেৰ চ আযস্মতা মহাকস্সপেন ‘‘মূলপরিযাযসুত্তং আৰুসো, আনন্দ, কত্থ ভাসিত’’ন্তিআদিনা দেসাদিপুচ্ছাসু কতাসু তাসং ৰিস্সজ্জনং করোন্তেন ধম্মভণ্ডাগারিকেন ‘‘এৰং মে সুত’’ন্তিআদিনা ইমস্স সুত্তস্স নিদানং ভাসিতং. অপিচ সত্থুসম্পত্তিপকাসনত্থং নিদানৰচনং. তথাগতস্স হি ভগৰতো পুব্বরচনানুমানাগমতক্কাভাৰতো সম্মাসম্বুদ্ধভাৰসিদ্ধি ¶ . ন হি সম্মাসম্বুদ্ধস্স পুব্বরচনাদীহি অত্থো অত্থি সব্বত্থ অপ্পটিহতঞাণচারতায একপ্পমাণত্তা চ ঞেয্যধম্মেসু. তথা আচরিযমুট্ঠিধম্মমচ্ছরিযসাসনসাৰকানুরোধাভাৰতো খীণাসৰভাৰসিদ্ধি. ন হি সব্বসো খীণাসৰস্স তে সম্ভৰন্তীতি সুৰিসুদ্ধস্স পরানুগ্গহপ্পৰত্তি. এৰং দেসকসংকিলেসভূতানং দিট্ঠিসীলসম্পদাদূসকানং অৰিজ্জাতণ্হানং অচ্চন্তাভাৰসংসূচকেহি ঞাণসম্পদাপহানসম্পদাভিব্যঞ্জকেহি চ সম্বুদ্ধৰিসুদ্ধভাৰেহি পুরিমৰেসারজ্জদ্ৰযসিদ্ধি, ততো এৰ চ অন্তরাযিকনিয্যানিকধম্মেসু সম্মোহাভাৰসিদ্ধিতো পচ্ছিমৰেসারজ্জদ্ৰযসিদ্ধীতি ভগৰতো চতুৰেসারজ্জসমন্নাগমো অত্তহিতপরহিতপটিপত্তি চ নিদানৰচনেন পকাসিতা হোতি তত্থ তত্থ সম্পত্তপরিযায অজ্ঝাসযানুরূপং ঠানুপ্পত্তিকপটিভানেন ধম্মদেসনাদীপনতো, ইধ পন পথৰীআদীসু ৰত্থূসু পুথুজ্জনানং পটিপত্তিৰিভাগৰৰত্থাপকদেসনাদীপনতোতি যোজেতব্বং. তেন ৰুত্তং ‘‘সত্থুসম্পত্তিপকাসনত্থং নিদানৰচন’’ন্তি.

তথা ¶ সাসনসম্পত্তিপকাসনত্থং নিদানৰচনং. ঞাণকরুণাপরিগ্গহিতসব্বকিরিযস্স হি ভগৰতো নত্থি নিরত্থিকা পটিপত্তি, অত্তহিতত্থা ৰা. তস্মা পরেসং এৰ অত্থায পৰত্তসব্বকিরিযস্স সম্মাসম্বুদ্ধস্স সকলম্পি কাযৰচীমনোকম্মং যথাপৰত্তং ৰুচ্চমানং দিট্ঠধম্মিকসম্পরাযিকপরমত্থেহি যথারহং সত্তানং অনুসাসনট্ঠেন সাসনং, ন কব্যরচনা, তযিদং সত্থুচরিতং কালদেসদেসকপরিসাপদেসেহি সদ্ধিং তত্থ তত্থ নিদানৰচনেহি যথারহং পকাসীযতি, ইধ পন ‘‘পথৰিযাদীসু ৰত্থূসূ’’তি সব্বং পুরিমসদিসমেৰ. তেন ৰুত্তং ‘‘সাসনসম্পত্তিপকাসনত্থং নিদানৰচন’’ন্তি. অপিচ সত্থুনো পমাণভাৰপ্পকাসনেন সাসনস্স পমাণভাৰদস্সনত্থং নিদানৰচনং, তঞ্চ দেসকপ্পমাণভাৰদস্সনং হেট্ঠা ৰুত্তনযানুসারেন ‘‘ভগৰা’’তি চ ইমিনা পদেন ৰিভাৰিতন্তি ৰেদিতব্বং. ‘‘ভগৰা’’তি ইমিনা তথাগতস্স রাগদোসমোহাদিসব্বকিলেসমলদুচ্চরিতাদিদোসপ্পহানদীপনেন ৰচনেন অনঞ্ঞসাধারণসুপরিসুদ্ধঞাণকরুণাদিগুণৰিসেসযোগপরিদীপনেন ততো এৰ সব্বসত্তুত্তমভাৰদীপনেন অযমত্থো সব্বথা পকাসিতো হোতীতি ইদমেত্থ নিদানৰচনপ্পযোজনস্স মুখমত্তদস্সনং.

অব্ভন্তরনিদানৰণ্ণনা নিট্ঠিতা.

সুত্তনিক্খেপৰণ্ণনা

নিক্খিত্তস্সাতি ¶ দেসিতস্স. দেসনাপি হি দেসেতব্বস্স সীলাদিঅত্থস্স ৰিনেয্যসন্তানেসু নিক্খিপনতো ‘‘নিক্খেপো’’তি ৰুচ্চতি. সুত্তনিক্খেপং ৰিচারেত্ৰা ৰুচ্চমানা পাকটা হোতীতি সামঞ্ঞতো ভগৰতো দেসনাসমুট্ঠানস্স ৰিভাগং দস্সেত্ৰা ‘‘এত্থাযং দেসনা এৰংসমুট্ঠানা’’তি দেসনায সমুট্ঠানে দস্সিতে সুত্তস্স সম্মদেৰ নিদানপরিজাননেন ৰণ্ণনায সুৰিঞ্ঞেয্যত্তা ৰুত্তং. এৰঞ্হি ‘‘অস্সুতৰা ভিক্খৰে পুথুজ্জনো’’তিআদিনা, ‘‘যোপি সো, ভিক্খৰে, ভিক্খু অরহং খীণাসৰো’’তিআদিনা (ম. নি. ১.৮), ‘‘তথাগতোপি খো, ভিক্খৰে, অরহং সম্মাসম্বুদ্ধো’’তিআদিনা (ম. নি. ১.১২) চ পৰত্তদেসনা অনুসন্ধিদস্সনসুখতায সুৰিঞ্ঞেয্যা হোতি. তত্থ যথা অনেকসতঅনেকসহস্সভেদানিপি সুত্তন্তানি সংকিলেসভাগিযাদিপধাননযৰসেন সোল়সৰিধতং নাতিৰত্তন্তি, এৰং অত্তজ্ঝাসযাদিসুত্তনিক্খেপৰসেন চতুব্বিধভাৰন্তি আহ ‘‘চত্তারো হি সুত্তনিক্খেপা’’তি.

এত্থ চ যথা অত্তজ্ঝাসযস্স অট্ঠুপ্পত্তিযা চ পরজ্ঝাসযপুচ্ছাহি সদ্ধিং সংসগ্গভেদো সম্ভৰতি ¶ ‘‘অত্তজ্ঝাসযো চ পরজ্ঝাসযো চ, অত্তজ্ঝাসযো চ পুচ্ছাৰসিকো চ, অট্ঠুপ্পত্তিকো চ পরজ্ঝাসযো চ, অট্ঠুপ্পত্তিকো চ পুচ্ছাৰসিকো চা’’তি অজ্ঝাসযপুচ্ছানুসন্ধিসব্ভাৰতো, এৰং যদিপি অট্ঠুপ্পত্তিযা অত্তজ্ঝাসযেনপি সংসগ্গভেদো সম্ভৰতি, অত্তজ্ঝাসযাদীহি পন পুরতো ঠিতেহি অট্ঠুপ্পত্তিযা সংসগ্গো নত্থীতি নযিধ নিরৰসেসো ৰিত্থারনযো সম্ভৰতীতি ‘‘চত্তারো সুত্তনিক্খেপা’’তি ৰুত্তং, তদন্তোগধত্তা ৰা সম্ভৰন্তানং সেসনিক্খেপানং মূলনিক্খেপৰসেন চত্তারোৰ দস্সিতা. তথাদস্সনঞ্চেত্থ অযং সংসগ্গভেদো গহেতব্বোতি.

তত্রাযং ৰচনত্থো – নিক্খিপীযতীতি নিক্খেপো, সুত্তং এৰ নিক্খেপো সুত্তনিক্খেপো. অথ ৰা নিক্খিপনং নিক্খেপো, সুত্তস্স নিক্খেপো সুত্তনিক্খেপো, সুত্তদেসনাতি অত্থো. অত্তনো অজ্ঝাসযো অত্তজ্ঝাসযো, সো অস্স অত্থি কারণভূতোতি অত্তজ্ঝাসযো. অত্তনো অজ্ঝাসযো এতস্সাতি ৰা অত্তজ্ঝাসযো. পরজ্ঝাসযেপি এসেৰ নযো. পুচ্ছায ৰসো পুচ্ছাৰসো, সো এতস্স অত্থীতি ¶ পুচ্ছাৰসিকো. সুত্তদেসনাৰত্থুভূতস্স অত্থস্স উপ্পত্তি অত্থুপ্পত্তি, অত্থুপ্পত্তিযেৰ অট্ঠুপ্পত্তি ত্থ-কারস্স ট্ঠ-কারং কত্ৰা. সা এতস্স অত্থীতি অট্ঠুপ্পত্তিকো. অথ ৰা নিক্খিপীযতি সুত্তং এতেনাতি সুত্তনিক্খেপো, অত্তজ্ঝাসযাদি এৰ. এতস্মিং পন অত্তৰিকপ্পে অত্তনো অজ্ঝাসযো অত্তজ্ঝাসযো. পরেসং অজ্ঝাসযো পরজ্ঝাসযো. পুচ্ছীযতীতি পুচ্ছা, পুচ্ছিতব্বো অত্থো. পুচ্ছনৰসেন পৰত্তং ধম্মপটিগ্গাহকানং ৰচনং পুচ্ছাৰসিকং, তদেৰ নিক্খেপ-সদ্দাপেক্খায পুল্লিঙ্গৰসেন ‘‘পুচ্ছাৰসিকো’’তি ৰুত্তং. তথা অট্ঠুপ্পত্তি এৰ অট্ঠুপ্পত্তিকোতি এৰম্পেত্থ অত্থো ৰেদিতব্বো.

অপিচেত্থ পরেসং ইন্দ্রিযপরিপাকাদিকারণনিরপেক্খত্তা অত্তজ্ঝাসযস্স ৰিসুং সুত্তনিক্খেপভাৰো যুত্তো কেৰলং অত্তনো অজ্ঝাসযেনেৰ ধম্মতন্তিঠপনত্থং পৰত্তিতদেসনত্তা. পরজ্ঝাসযপুচ্ছাৰসিকানং পন পরেসং অজ্ঝাসযপুচ্ছানং দেসনাপৰত্তিহেতুভূতানং উপ্পত্তিযং পৰত্তিতানং কথমট্ঠুপ্পত্তিযং অনৰরোধো, পুচ্ছাৰসিকঅট্ঠুপ্পত্তিকানং ৰা পরজ্ঝাসযানুরোধেন পৰত্তিকানং কথং পরজ্ঝাসযে অনৰরোধোতি? ন চোদেতব্বমেতং. পরেসঞ্হি অভিনীহারপরিপুচ্ছাদিৰিনিমুত্তস্সেৰ সুত্তদেসনাকারণুপ্পাদস্স অট্ঠুপ্পত্তিভাৰেন গহিতত্তা পরজ্ঝাসযপুচ্ছাৰসিকানং ৰিসুং গহণং. তথা হি ব্রহ্মজাল (দী. নি. ১.১) ধম্মদাযাদসুত্তাদীনং (ম. নি. ১.২৯) ৰণ্ণাৰণ্ণআমিসুপ্পাদাদিদেসনানিমিত্তং ‘‘অট্ঠুপ্পত্তী’’তি ৰুচ্চতি. পরেসং পুচ্ছং ৰিনা অজ্ঝাসযং এৰ নিমিত্তং কত্ৰা দেসিতো পরজ্ঝাসযো, পুচ্ছাৰসেন দেসিতো পুচ্ছাৰসিকোতি পাকটোযমত্থোতি.

অত্তনো ¶ অজ্ঝাসযেনেৰ কথেসি ধম্মতন্তিঠপনত্থন্তি দট্ঠব্বং. সম্মপ্পধানসুত্তন্তহারকোতি অনুপুব্বেন নিক্খিত্তানং সংযুত্তকে সম্মপ্পধানপটিসংযুত্তানং সুত্তানং আৰল়ি. তথা ইদ্ধিপাদহারকাদযো.

ৰিমুত্তিপরিপাচনীযা ধম্মা সদ্ধিন্দ্রিযাদযো. অজ্ঝাসযন্তি অধিমুত্তিং. খন্তিন্তি দিট্ঠিনিজ্ঝানক্খন্তিং. মনন্তি চিত্তং. অভিনিহারন্তি পণিধানং. বুজ্ঝনভাৰন্তি বুজ্ঝনসভাৰং, পটিৰিজ্ঝনাকারং ৰা.

উপ্পন্নে মানে নিক্খিত্তন্তি সম্বন্ধো. ইত্থিলিঙ্গাদীনি তীণি লিঙ্গানি. নামাদীনি চত্তারি পদানি. পঠমাদযো সত্ত ৰিভত্তিযো. মুঞ্চিত্ৰা ন কিঞ্চি কথেতি সভাৰনিরুত্তিযা ¶ তথেৰ পৰত্তনতো. গণ্ঠিভূতং পদং. যথা হি রুক্খস্স গণ্ঠিট্ঠানং দুব্বিনিব্বেধং দুত্তচ্ছিতঞ্চ হোতি, এৰমেৰং যং পদং অত্থতো ৰিৰরিতুং ন সক্কা, তং ‘‘গণ্ঠিপদ’’ন্তি ৰুচ্চতি. অনুপহচ্চাতি অনুদ্ধরিত্ৰা.

যেন যেন সম্বন্ধং গচ্ছতি, তস্স তস্স অনৰসেসতং দীপেতীতি ইমিনা ইমস্স সব্ব-সদ্দস্স সপ্পদেসতং দস্সেতি. সব্ব-সদ্দো হি সব্বসব্বং পদেসসব্বং আযতনসব্বং সক্কাযসব্বন্তি চতূসু ৰিসযেসু দিট্ঠপ্পযোগো. তথা হেস ‘‘সব্বে ধম্মা সব্বাকারেন বুদ্ধস্স ভগৰতো ঞাণমুখে আপাথমাগচ্ছন্তী’’তিআদীসু (মহানি. ১৫৬; চূল়নি. ৮৫; পটি. ম. ৩.৬) সব্বসব্বস্মিং আগতো. ‘‘সব্বেসং ৰো, সারিপুত্ত, সুভাসিতং পরিযাযেনা’’তিআদীসু (ম. নি. ১.৩৪৫) পদেসসব্বস্মিং. ‘‘সব্বং ৰো, ভিক্খৰে, দেসেস্সামি…পে… চক্খুঞ্চেৰ রূপা চ…পে… মনো চেৰ ধম্মা চা’’তি (সং. নি. ৪.২৩) এত্থ আযতনসব্বস্মিং. ‘‘সব্বং সব্বতো সঞ্জানাতী’’তিআদীসু (ম. নি. ১.৫) সক্কাযসব্বস্মিং. তত্থ সব্বসব্বস্মিং আগতো নিপ্পদেসো, ইতরেসু তীসুপি আগতো সপ্পদেসো, ইধ পন সক্কাযসব্বস্মিং ৰেদিতব্বো. তথা হি ৰক্খতি ‘‘সক্কাযপরিযাপন্না পন তেভূমকধম্মাৰ অনৰসেসতো ৰেদিতব্বা’’তি (ম. নি. অট্ঠ. ১.১ সুত্তনিক্খেপৰণ্ণনা).

সচ্চেসূতি অরিযসচ্চেসু. এতে চতুরো ধম্মাতি ইদানি ৰুচ্চমানে সচ্চাদিকে চত্তারো ধম্মে সন্ধায ৰদতি. তত্থ সচ্চন্তি ৰচীসচ্চং. ঠিতীতি ৰীরিযং, ‘‘ধিতী’’তি ৰা পাঠো, সো এৰত্থো. চাগোতি অলোভো. দিট্ঠং সো অতিৰত্ততীতি যস্মিং এতে সচ্চাদযো ধম্মা উপলব্ভন্তি, সো দিট্ঠং অত্তনো অমিত্তং অতিক্কমতি, ন তস্স হত্থতং গচ্ছতি, অথ খো নং ¶ অভিভৰতি এৰাতি অত্থো. সভাৰে ৰত্ততি অসভাৰধম্মস্স কারণাসম্ভৰতো. ন হি নিস্সভাৰা ধম্মা কেনচি নিব্বত্তীযন্তি. অত্তনো লক্খণং ধারেন্তীতি যদিপি লক্খণৰিনিমুত্তা ধম্মা নাম নত্থি, তথাপি যথা দিট্ঠিতণ্হাপরিকপ্পিতাকারমত্তা অত্তসুভসুখসস্সতাদযো, পকতিযাদযো, দব্বাদযো, জীৰাদযো, কাযাদযো লোকৰোহারমত্তসিদ্ধা গগণকুসুমাদযোৰ সচ্চিকট্ঠপরমত্থতো ন উপলব্ভন্তি, ন এৰমেতে, এতে পন সচ্চিকট্ঠপরমত্থভূতা উপলব্ভন্তি, ততো এৰ সত্তাদিৰিসেসৰিরহতো ধম্মমত্তা সভাৰৰন্তোতি দস্সনত্থং ‘‘অত্তনো লক্খণং ধারেন্তী’’তি ৰুত্তং ¶ . ভৰতি হি ভেদাভাৰেপি সুখাৰবোধনত্থং উপচারমত্তসিদ্ধেন ভেদেন নিদ্দেসো যথা ‘‘সিলাপুত্তকস্স সরীর’’ন্তি. ধারীযন্তি ৰা যথাসভাৰতো অৰধারীযন্তি ঞাযন্তীতি ধম্মা, কক্খল়ফুসনাদযো.

অসাধারণহেতুম্হীতি অসাধারণকারণে, সক্কাযধম্মেসু তস্স তস্স আৰেণিকপচ্চযেতি অত্থো. কিং পন তন্তি? তণ্হামানদিট্ঠিযো, অৰিজ্জাদযোপি ৰা. যথেৰ হি পথৰীআদীসু মঞ্ঞনাৰত্থূসু উপ্পজ্জমানা তণ্হাদযো মঞ্ঞনা তেসং পৰত্তিযা মূলকারণং, এৰং অৰিজ্জাদযোপি. তথা হি ‘‘অস্সুতৰা পুথুজ্জনো’’তিআদিনা ‘‘অপরিঞ্ঞাতং তস্সাতি ৰদামী’’তি (ম. নি. ১.২) ‘‘নন্দী দুক্খস্স মূল’’ন্তি (ম. নি. ১.১৩) চ অন্ৰযতো, ‘‘খযা রাগস্স…পে… ৰীতমোহত্তা’’তি ব্যতিরেকতো চ তেসং মূলকারণভাৰো ৰিভাৰিতো.

পরিযাযেতি দেসেতব্বমত্থং অৰগমেতি বোধযতীতি পরিযাযো, দেসনা. পরিযাযতি অত্তনো ফলং পরিগ্গহেত্ৰা ৰত্ততি তস্স ৰা কারণভাৰং গচ্ছতীতি পরিযাযো, কারণং. পরিযাযতি অপরাপরং পরিৰত্ততীতি পরিযাযো, ৰারো. এৰং পরিযাযসদ্দস্স দেসনাকারণৰারেসু পৰত্তি ৰেদিতব্বা. যথারুতৰসেন অগ্গহেত্ৰা নিদ্ধারেত্ৰা গহেতব্বত্থং নেয্যত্থং. তেভূমকা ধম্মাৰ অনৰসেসতো ৰেদিতব্বা মঞ্ঞনাৰত্থুভূতানং সব্বেসং পথৰীআদিধম্মানং অধিপ্পেতত্তা.

কারণদেসনন্তি কারণঞাপনং দেসনং. তং অত্থন্তি তং সব্বধম্মানং মূলকারণসঙ্খাতং, কারণদেসনাসঙ্খাতং ৰা অত্থং. তেনেৰাহ ‘‘তং কারণং তং দেসন’’ন্তি. একত্থমেতন্তি এতং পদদ্ৰযং একত্থং. সাধু-সদ্দো এৰ হি ক-কারেন ৰড্ঢেত্ৰা ‘‘সাধুক’’ন্তি ৰুত্তো. তেনেৰ হি সাধুসদ্দস্স অত্থং ৰদন্তেন অত্থুদ্ধারৰসেন সাধুকসদ্দো উদাহটো. ধম্মরুচীতি পুঞ্ঞকামো. পঞ্ঞাণৰাতি পঞ্ঞৰা. অদ্দুব্ভোতি অদূসকো, অনুপঘাতকোতি অত্থো. ইধাপীতি ইমস্মিং মূলপরিযাযসুত্তেপি. অযন্তি সাধুকসদ্দো. এত্থেৰ দল়্হীকম্মেতি সক্কচ্চকিরিযাযং. আণত্তিযন্তি ¶ আণাপনে. ‘‘সুণাথ সাধুকং মনসি করোথা’’তি হি ৰুত্তে সাধুকসদ্দেন সৰনমনসিকারানং সক্কচ্চকিরিযা ৰিয তদাণাপনম্পি ৰুত্তং হোতি. আযাচনত্থতা ৰিয চস্স আণাপনত্থতা ৰেদিতব্বা.

ইদানেত্থ ¶ এৰং যোজনা ৰেদিতব্বাতি সম্বন্ধো. সোতিন্দ্রিযৰিক্খেপৰারণং সৰনে নিযোজনৰসেন কিরিযন্তরপটিসেধনভাৰতো, সোতং ওদহথাতি অত্থো. মনিন্দ্রিযৰিক্খেপনিৰারণং অঞ্ঞচিন্তাপটিসেধনতো. পুরিমন্তি ‘‘সুণাথা’’তি পদং. এত্থাতি সুণাথ, মনসি করোথা’’তি পদদ্ৰযে, এতস্মিং ৰা অধিকারে. ব্যঞ্জনৰিপল্লাসগ্গাহৰারণং সোতদ্ৰারে ৰিক্খেপপটিবাহকত্তা. ন হি যাথাৰতো সুণন্তস্স সদ্দতো ৰিপল্লাসগ্গাহো হোতি. অত্থৰিপল্লাসগ্গাহৰারণং মনিন্দ্রিযৰিক্খেপপটিবাহকত্তা. ন হি সক্কচ্চং ধম্মং উপধারেন্তস্স অত্থতো ৰিপল্লাসগ্গাহো হোতি. ধম্মস্সৰনে নিযোজেতি সুণাথাতি ৰিদহনতো. ধারণূপপরিক্খাসূতি উপপরিক্খগ্গহণেন তুলনতীরণাদিকে দিট্ঠিযা চ সুপ্পটিৰেধং সঙ্গণ্হাতি.

সব্যঞ্জনোতি এত্থ যথাধিপ্পেতমত্থং ব্যঞ্জযতীতি ব্যঞ্জনং, সভাৰনিরুত্তি. সহ ব্যঞ্জনেনাতি সব্যঞ্জনো, ব্যঞ্জনসম্পন্নোতি অত্থো. অরণীযতো উপগন্ধব্বতো অনুট্ঠাতব্বতো অত্থো, চতুপারিসুদ্ধিসীলাদিকো. সহ অত্থেনাতি সাত্থো, অত্থসম্পন্নোতি অত্থো. ধম্মগম্ভীরোতিআদীসু ধম্মো নাম তন্তি. দেসনা নাম তস্সা মনসা ৰৰত্থাপিতায তন্তিযা দেসনা. অত্থো নাম তন্তিযা অত্থো. পটিৰেধো নাম তন্তিযা তন্তিঅত্থস্স চ যথাভূতাৰবোধো. যস্মা চেতে ধম্মদেসনাঅত্থপটিৰেধা সসাদীহি ৰিয মহাসমুদ্দো মন্দবুদ্ধীহি দুক্খোগাল়্হা অলব্ভনেয্যপতিট্ঠা চ, তস্মা গম্ভীরা. তেন ৰুত্তং ‘‘যস্মা অযং ধম্মো…পে… সাধুকং মনসি করোথা’’তি. এত্থ চ পটিৰেধস্স দুক্করভাৰতো ধম্মত্থানং দেসনাঞাণস্স দুক্করভাৰতো দেসনায দুক্খোগাহতা, পটিৰেধস্স পন উপ্পাদেতুং অসক্কুণেয্যত্তা তব্বিসযঞাণুপ্পত্তিযা চ দুক্করভাৰতো দুক্খোগাহতা ৰেদিতব্বা.

দেসনং নাম উদ্দিসনং. তস্স নিদ্দিসনং ভাসনন্তি ইধাধিপ্পেতন্তি আহ ‘‘ৰিত্থারতোপি নং ভাসিস্সামীতি ৰুত্তং হোতী’’তি. পরিব্যত্তং কথনং ৰা ভাসনং. সাল়িকাযিৰ নিগ্ঘোসোতি সাল়িকায আলাপো ৰিয মধুরো কণ্ণসুখো পেমনীযো. পটিভানন্তি সদ্দো. উদীরযীতি উচ্চারীযতি, ৰুচ্চতি ৰা.

এৰং ¶ ৰুত্তে উস্সাহজাতাতি এৰং ‘‘সুণাথ সাধুকং মনসি করোথ ভাসিস্সামী’’তি ৰুত্তে ন ¶ কির সত্থা সঙ্খেপেনেৰ দেসেস্সতি, ৰিত্থারেনপি ভাসিস্সতীতি সঞ্জাতুস্সাহা হট্ঠতুট্ঠা হুত্ৰা. ইধাতি ইমিনা ৰুচ্চমানঅধিকরণং তস্স পুগ্গলস্স উপ্পত্তিট্ঠানভূতং অধিপ্পেতন্তি আহ ‘‘দেসাপদেসে নিপাতো’’তি. লোকন্তি ওকাসলোকং. ইধ তথাগতো লোকেতি হি জাতিখেত্তং, তত্থাপি অযং চক্কৰাল়ো অধিপ্পেতো. সমণোতি সোতাপন্নো. দুতিযো সমণোতি সকদাগামী. ৰুত্তঞ্হেতং ‘‘কতমো চ, ভিক্খৰে, সমণো? ইধ, ভিক্খৰে, ভিক্খু তিণ্ণং সংযোজনানং পরিক্খযা সোতাপন্নো হোতী’’তি (অ. নি. ৪.২৪১) ‘‘কতমো চ, ভিক্খৰে, দুতিযো সমণো? ইধ, ভিক্খৰে, ভিক্খু তিণ্ণং সংযোজনানং পরিক্খযা রাগদোসমোহানং তনুত্তা সকদাগামী হোতী’’তি চ (অ. নি. ৪.২৪১). ইধেৰ তিট্ঠমানস্সাতি ইমিস্সা এৰ ইন্দসালগুহাযং তিট্ঠমানস্স.

২. অস্সুতৰাতি এত্থ (অ. নি. টী. ১.১.৫১) সুতন্তি সোতদ্ৰারানুসারেন উপধারিতং, উপধারণং ৰা, সুতং অস্সত্থীতি সুতৰা. ৰা-সদ্দস্স হি অত্থো অত্থিতামত্তাদিৰসেন অনেকৰিধো. তথা হি ‘‘অন্তৰা অযং লোকো পরিৰটুমো’’তিআদীসু (দী. নি. ১.৫৪; পটি. ম. ১.১৪০) অত্থিতামত্তং অত্থো. ‘‘ধনৰা ভোগৰা, লাভী অন্নস্সা’’তি চ আদীসু বহুভাৰো. ‘‘রোগৰা হোতি রোগাভিভূতো’’তিআদীসু কাযাবাধো. ‘‘কুট্ঠী কুট্ঠচীৰরেনা’’তিআদীসু নিন্দা, ‘‘ইস্সুকী মচ্ছরী সঠো মাযাৰিনো কেটুভিনো’’তিআদীসু অভিণ্হযোগো. ‘‘দণ্ডী ছত্তী অলম্বরী’’তিআদীসু (ৰিসুদ্ধি. ১.১৪২) সংসগ্গো. ‘‘পণ্ডিতো ৰাপি তেন সো’’তিআদীসু (ধ. প. ৬৩) উপমানং, সদিসভাৰোতি অত্থো. ‘‘তং ৰাপি ধীরা মুনিং ৰেদযন্তী’’তিআদীসু (সু. নি. ২১৩) সমুচ্চযো. ‘‘কে ৰা ইমে কস্স ৰা’’তিআদীসু (পারা. ২৯৬) সংসযো. ‘‘অযং ৰা ইমেসং সমণব্রাহ্মণানং সব্ববালো সব্বমূল়্হো’’তিআদীসু (দী. নি. ১.১৮১) ৰিভাৰনো. ‘‘ন ৰাযং কুমারো মত্তমঞ্ঞাসী’’তিআদীসু (সং. নি. ২.১৫৪) পদপূরণং. ‘‘যে হি কেচি, ভিক্খৰে, সমণা ৰা ব্রাহ্মণা ৰা’’তিআদীসু (ম. নি. ১.১৭০) ৰিকপ্পো. ‘‘সক্যপুত্তস্স সিরীমতো ¶ (দী. নি. ৩.২৭৭), সীলৰতো সীলসম্পত্তিযা কল্যাণো কিত্তিসদ্দো অব্ভুগ্গচ্ছতী’’তি (দী. নি. ২.১৫০; ৩.৩১৬; অ. নি. ৫.২১৩; মহাৰ. ২৮৫) চ আদীসু পসংসা. ‘‘পঞ্ঞৰা হোতি উদযত্থগামিনিযা পঞ্ঞায সমন্নাগতো অরিযায নিব্বেধিকায সম্মা দুক্খক্খযগামিনিযা’’তিআদীসু (দী. নি. ৩.৩১৭, ৩৫৫) অতিসযো. ইধাপি অতিসযো, পসংসা ৰা অত্থো, তস্মা যস্স পসংসিতং, অতিসযেন ৰা সুতং অত্থি, সো সুতৰাতি সংকিলেসৰিদ্ধংসনসমত্থং পরিযত্তিধম্মস্সৰনং, তং সুত্ৰা ¶ তথত্তায পটিপত্তি চ ‘‘সুতৰা’’তি ইমিনা সদ্দেন পকাসিতা. অথ ৰা সোতব্বযুত্তং সুত্ৰা কত্তব্বনিপ্ফত্তিৰসেন সুণীতি সুতৰা, তপ্পটিক্খেপেন ন সুতৰাতি অস্সুতৰা.

অযঞ্হি অ-কারো ‘‘অহেতুকা ধম্মা (ধ. স. ২.দুকমাতিকা), অভিক্খুকো আৰাসো’’তিআদীসু (পাচি. ১০৪৬, ১০৪৭) তংসহযোগনিৰত্তিযং ইচ্ছিতো. ‘‘অপচ্চযা ধম্মা’’তি (ধ. স. ৭.দুকমাতিকা) তংসম্বন্ধীভাৰনিৰত্তিযং. পচ্চযুপ্পন্নঞ্হি পচ্চযসম্বন্ধীতি অপ্পচ্চযুপ্পন্নত্তা অতংসম্বন্ধিতা এত্থ জোতিতা. ‘‘অনিদস্সনা ধম্মা’’তি (ধ. স. ৯.দুকমাতিকা) তংসভাৰনিৰত্তিযং. নিদস্সনঞ্হি দট্ঠব্বতা. অথ ৰা পস্সতীতি নিদস্সনং, চক্খুৰিঞ্ঞাণং, তগ্গহেতব্বভাৰনিৰত্তিযং যথা ‘‘অনাসৰা ধম্মা’’তি (ধ. স. ১৫.দুকমাতিকা), ‘‘অপ্পটিঘা ধম্মা (ধ. স. ১০.দুকমাতিকা), অনারম্মণা ধম্মা’’তি (ধ. স. ৫৫.দুকমাতিকা) তংকিচ্চনিৰত্তিযং, ‘‘অরূপিনো ধম্মা (ধ. স. ১১.দুকমাতিকা) অচেতসিকা ধম্মা’’তি (ধ. স. ৫৭.দুকমাতিকা) তব্ভাৰনিৰত্তিযং. তদঞ্ঞথা হি এত্থ পকাসিতা. ‘‘অমনুস্সো’’তি তব্ভাৰমত্তনিৰত্তিযং. মনুস্সমত্তং নত্থি, অঞ্ঞং সমানন্তি. সদিসতা হি এত্থ সূচিতা. ‘‘অস্সমণো সমণপটিঞ্ঞো, অনরিযো’’তি (অ. নি. ৩.১৩) চ তংসম্ভাৰনীযগুণনিৰত্তিযং. গরহা হি ইধ ঞাযতি. ‘‘কচ্চি ভোতো অনামযং, অনুদরা কঞ্ঞা’’তি (জা. ২.২০.১২৯) তদনপ্পভাৰনিৰত্তিযং, ‘‘অনুপ্পন্না ধম্মা’’তি (ধ. স. ১৭.তিকমাতিকা) তংসদিসভাৰনিৰত্তিযং. অতীতানঞ্হি উপ্পন্নপুব্বত্তা উপ্পাদিধম্মানঞ্চ পচ্চযেকদেসনিপ্ফত্তিযা আরদ্ধুপ্পাদিভাৰতো কালৰিমুত্তস্স চ ৰিজ্জমানত্তা উপ্পন্নানুকূলতা পগেৰ পচ্চুপ্পন্নানন্তি তব্বিদূরতাৰ এত্থ ৰিঞ্ঞাযতি ‘‘অসেক্খা ধম্মা’’তি (ধ. স. ১১.তিকমাতিকা) তদপরিযোসাননিৰত্তিযং. তন্নিট্ঠানঞ্হি এত্থ পকাসিতন্তি. এৰমনেকেসং অত্থানং জোতকো. ইধ পন ‘‘অরূপিনো ধম্মা অচেতসিকা ধম্মা’’তিআদীসু ৰিয তব্ভাৰনিৰত্তিযং ¶ দট্ঠব্বো, অঞ্ঞত্থেতি অত্থো. এতেনস্স সুতাদিঞাণৰিরহতং দস্সেতি. তেন ৰুত্তং ‘‘আগমাধিগমাভাৰা ঞেয্যো অস্সুতৰা ইতী’’তি.

ইদানি তস্স অত্থং ৰিৰরন্তো যস্মা খন্ধধাত্ৰাদিকোসল্লেনপি মঞ্ঞনাপটিসেধনসমত্থং বাহুসচ্চং হোতি. যথাহ ‘‘কিত্তাৰতা নু খো, ভন্তে, বহুস্সুতো হোতি? যতো খো ভিক্খু খন্ধকুসলো হোতি ধাতু, আযতন, পটিচ্চসমুপ্পাদকুসলো হোতি, এত্তাৰতা খো ভিক্খু বহুস্সুতো হোতী’’তি, তস্মা ‘‘যস্স হি খন্ধধাতুআযতনসচ্চপচ্চযাকারসতিপট্ঠানাদীসূতিআদি ৰুত্তং. তত্থ ৰাচুগ্গতকরণং উগ্গহো. অত্থপরিপুচ্ছনং পরিপুচ্ছা. কুসলেহি সহ চোদনাপরিহরণৰসেন ৰিনিচ্ছযকরণং ৰিনিচ্ছযো. মগ্গফলনিব্বানানি অধিগমো.

বহূনং ¶ (ধ. স. মূলটী. ১০০৭) নানপ্পকারানং কিলেসসক্কাযদিট্ঠীনং অৰিহতত্তা তা জনেন্তি, তাহি ৰা জনিতাতি পুথুজ্জনা. অৰিঘাতমেৰ ৰা জন-সদ্দো ৰদতি. পুথু সত্থারানং মুখমুল্লোকিকাতি এত্থ পুথু জনা সত্থুপটিঞ্ঞা এতেসন্তি পুথুজ্জনাতি ৰচনত্থো. পুথু সব্বগতীহি অৰুট্ঠিতাতি এত্থ জনেতব্বা, জাযন্তি ৰা এত্থ সত্তাতি জনা, নানাগতিযো, তা পুথূ এতেসন্তি পুথুজ্জনা. ইতো পরে জাযন্তি এতেহীতি জনা, অভিসঙ্খারাদযো, তে এতেসং পুথূ ৰিজ্জন্তীতি পুথুজ্জনা. অভিসঙ্খরণাদিঅত্থো এৰ ৰা জন-সদ্দো দট্ঠব্বো. ওঘা কামোঘাদযো. রাগগ্গিআদযো সন্তাপা. তে এৰ, সব্বেপি ৰা কিলেসা পরিল়াহা. পুথু পঞ্চসু কামগুণেসু রত্তাতি এত্থ জাযতীতি জনো, রাগো গেধোতি এৰমাদিকো, পুথু জনো এতেসন্তি পুথুজ্জনা. পুথূসু ৰা জনা জাতা রত্তাতি এৰং রাগাদিঅত্থো এৰ ৰা জনসদ্দো দট্ঠব্বো. রত্তাতি ৰত্থং ৰিয রঙ্গজাতেন চিত্তস্স ৰিপরিণামকরেন ছন্দরাগেন রত্তা সারত্তা. গিদ্ধাতি অভিকঙ্খনসভাৰেন অভিজ্ঝানেন গিদ্ধা গেধং আপন্না. গধিতাতি গন্থিতা ৰিয দুম্মোচনীযভাৰেন তত্থ পটিবদ্ধা. মুচ্ছিতাতি কিলেসৰসেন ৰিসঞ্ঞীভূতা ৰিয অনঞ্ঞকিচ্চা মুচ্ছং মোহমাপন্না. অজ্ঝোসন্নাতি অনঞ্ঞসাধারণে ৰিয কত্ৰা গিলিত্ৰা পরিনিট্ঠপেত্ৰা ঠিতা. লগ্গাতি ৰঙ্কদণ্ডকে ৰিয আসত্তা মহাপলিপে ৰা যাৰ নাসিকগ্গা পলিপন্নপুরিসো ৰিয উদ্ধরিতুং অসক্কুণেয্যভাৰেন নিমুগ্গা ¶ , লগিতাতি মক্কটালেপে আলগ্গভাৰেন পচ্চুড্ডিতো ৰিয মক্কটো পঞ্চন্নং ইন্দ্রিযানং ৰসেন আলগ্গিতা. পলিবুদ্ধাতি বদ্ধা, উপদ্দুতা ৰা. আৰুটাতি আৰুনিতা, নিৰুতাতি নিৰারিতা. ওৰুতাতি পলিগুণ্ঠিতা, পরিযোনদ্ধা ৰা. পিহিতাতি পিদহিতা, পটিচ্ছন্নাতি পটিচ্ছাদিতা. পটিকুজ্জিতাতি হেট্ঠামুখজাতা. পুথূনং ৰা গণনপথমতীতানন্তিআদিনা পুথু জনো পুথুজ্জনোতি দস্সেতি.

‘‘অস্সুতৰা’’তি এতেন অৰিজ্জন্ধতা ৰুত্তাতি আহ ‘‘অন্ধপুথুজ্জনো ৰুত্তো হোতী’’তি. আরকত্তা (সং. নি. টী. ২.৩.১) কিলেসেহি মগ্গেন সমুচ্ছিন্নত্তা. অনযেতি অৰড্ঢিযং, অনত্থেতি অত্থো. অনযে ৰা অনুপাযে. নইরিযনতো অৰত্তনতো. অযেতি ৰড্ঢিযং, অত্থে, উপাযে ৰা. অরণীযতোতি পযিরুপাসিতব্বতো. নিরুত্তিনযেন পদসিদ্ধি ৰেদিতব্বা পুরিমেসু অত্থৰিকপ্পেসু. পচ্ছিমে পন সদ্দসত্থৰসেনপি. যদিপি অরিয-সদ্দো ‘‘যে হি ৰো অরিযা পরিসুদ্ধকাযকম্মন্তা’’তিআদীসু (ম. নি. ১.৩৫) ৰিসুদ্ধাসযপযোগেসু পুথুজ্জনেসুপি ৰত্ততি. ইধ পন অরিযমগ্গাধিগমেন সব্বলোকুত্তরভাৰেন চ অরিযভাৰো অধিপ্পেতোতি দস্সেন্তো আহ ‘‘বুদ্ধা’’তিআদি. তত্থ ‘‘পচ্চেকবুদ্ধা তথাগতসাৰকা চ সপ্পুরিসা’’তি ইদং অরিযা সপ্পুরিসাতি ইধ ৰুত্তপদানং অত্থং অসঙ্করতো দস্সেতুং ৰুত্তং. যস্মা পন নিপ্পরিযাযতো অরিযসপ্পুরিসভাৰা অভিন্নসভাৰা. তস্মা ‘‘সব্বেৰ ৰা’’তিআদি ৰুত্তং.

এত্তাৰতা ¶ হি বুদ্ধসাৰকো ৰুত্তো. তস্স হি একন্তেন কল্যাণমিত্তো ইচ্ছিতব্বো পরতোঘোসমন্তরেন পঠমমগ্গস্স অনুপ্পজ্জনতো. ৰিসেসতো চস্স ভগৰাৰ কল্যাণমিত্তো অধিপ্পেতো. ৰুত্তঞ্হেতং ‘‘মমঞ্হি, আনন্দ, কল্যাণমিত্তং আগম্ম জাতিধম্মা সত্তা জাতিযা পরিমুচ্চন্তী’’তিআদি (সং. নি. ৫.২). সো এৰ চ অৰেচ্চপসাদাধিগমেন দল়্হভত্তি নাম. ৰুত্তম্পি চেতং ‘‘যং মযা সাৰকানং সিক্খাপদং পঞ্ঞত্তং, তং মম সাৰকা জীৰিতহেতুপি নাতিক্কমন্তী’’তি (উদা. ৪৫). কতঞ্ঞুতাদীহি পচ্চেকবুদ্ধা বুদ্ধাতি এত্থ কতং জানাতীতি কতঞ্ঞূ. কতং ৰিদিতং পাকটং করোতীতি কতৰেদী. অনেকেসুপি হি কপ্পসতসহস্সেসু কতং উপকারং জানন্তি পচ্চেকবুদ্ধা পাকটঞ্চ করোন্তি সতিজননআমিসপটিগ্গহণাদিনা ¶ , তথা সংসারদুক্খদুক্খিতস্স সক্কচ্চং করোন্তি কিচ্চং, যং অত্তনা কাতুং সক্কা. সম্মাসম্বুদ্ধো পন কপ্পানং অসঙ্খ্যেয্যসহস্সেসুপি কতং উপকারং মগ্গফলানং উপনিস্সযঞ্চ জানাতি, পাকটঞ্চ করোতি, সীহো ৰিয চ এৰং সব্বত্থ সক্কচ্চমেৰ ধম্মদেসনং করোন্তো বুদ্ধকিচ্চং করোতি. যায পটিপত্তিযা দিট্ঠা নাম হোন্তি, তস্সা অপ্পটিপজ্জনভাৰো, তত্থ চ আদরাভাৰো অরিযানং অদস্সনসীলতা চ, ন চ দস্সনে সাধুকারিতা চ ৰেদিতব্বা. চক্খুনা অদস্সাৰীতি এত্ত চক্খু নাম ন মংসচক্খু এৰ, অথ খো দিব্বচক্খুপীতি আহ ‘‘দিব্বচক্খুনা ৰা’’তি. অরিযভাৰোতি যেহি যোগতো ‘‘অরিযা’’তি ৰুচ্চন্তি. তে মগ্গফলধম্মা দট্ঠব্বা.

তত্রাতি ঞাণদস্সনস্সেৰ দস্সনভাৰে. ৰত্থূতি অধিপ্পেতত্থঞাপনকারণং. এৰং ৰুত্তেপীতি এৰং অঞ্ঞাপদেসেন অত্তূপনাযিকং কত্ৰা ৰুত্তেপি. ধম্মন্তি লোকুত্তরধম্মং, চতুসচ্চধম্মং ৰা. অরিযকরধম্মা অনিচ্চানুপস্সনাদযো ৰিপস্সিযমানা অনিচ্চাদযো, চত্তারি ৰা অরিযসচ্চানি.

অৰিনীতোতি ন ৰিনীতো, অধিসীলসিক্খাদিৰসেন ন সিক্খিতো. যেসং সংৰরৰিনযাদীনং অভাৰেন অযং অৰিনীতোতি ৰুচ্চতি, তে তাৰ দস্সেতুং ‘‘দুৰিধো ৰিনযো নামা’’তিআদিমাহ. তত্থ সীলসংৰরোতি পাতিমোক্খসংৰরো ৰেদিতব্বো, সো চ অত্থতো কাযিকৰাচসিকো অৰীতিক্কমো. সতিসংৰরোতি ইন্দ্রিযরক্খা, সা চ তথাপৰত্তা সতি এৰ. ঞাণসংৰরোতি ‘‘সোতানং সংৰরং ব্রূমী’’তি (সু. নি. ১০৪০) ৰত্ৰা ‘‘পঞ্ঞাযেতে পিধীযরে’’তি ৰচনতো সোতসঙ্খাতানং তণ্হাদিট্ঠিদুচ্চরিতঅৰিজ্জাঅৰসিট্ঠকিলেসানং সংৰরো পিদহনং সমুচ্ছেদঞাণন্তি ৰেদিতব্বং. খন্তিসংৰরোতি অধিৰাসনা, সা চ তথাপৰত্তা খন্ধা, অদোসো ৰা. পঞ্ঞাতি একে, তং অট্ঠকথায ৰিরুজ্ঝতি. ৰীরিযসংৰরো কামৰিতক্কাদীনং ৰিনোদনৰসেন ¶ পৰত্তং ৰীরিযমেৰ. তেন তেন গুণঙ্গেন তস্স তস্স অগুণঙ্গস্স পহানং তদঙ্গপহানং. ৰিক্খম্ভনেন পহানং ৰিক্খম্ভনপহানং. সেসপদত্থযেপি এসেৰ নযো.

ইমিনা পাতিমোক্খসংৰরেনাতিআদি সীলসংৰরাদীনং ৰিৰরণং. তত্থ সমুপেতোতি এত্থ ইতি-সদ্দো আদিসত্থো. তেন ‘‘সহগতো সমুপগতো’’তিআদিনা ¶ ৰিভঙ্গে (ৰিভ. ৫১১) আগতং সংৰরৰিভঙ্গং দস্সেতি. এস নযো সেসেসুপি. যং পনেত্থ ৰত্তব্বং, তং অনন্তরসুত্তে আৰি ভৰিস্সতি.

কাযদুচ্চরিতাদীনন্তি দুস্সীল্যসঙ্খাতানং কাযৰচীদুচ্চরিতাদীনং মুট্ঠস্সচ্চসঙ্খাতস্স পমাদস্স অভিজ্ঝাদীনং ৰা অক্খন্তিঅঞ্ঞাণকোসজ্জানঞ্চ. সংৰরণতোতি পিদহনতো থকনতো. ৰিনযনতোতি কাযৰাচাচিত্তানং ৰিরূপপ্পৰত্তিযা ৰিনযনতো অপনযনতো, কাযদুচ্চরিতাদীনং ৰা ৰিনযনতো, কাযাদীনং ৰা জিম্হপ্পৰত্তিং ৰিচ্ছিন্দিত্ৰা উজুকং নযনতোতি অত্থো. পচ্চযসমৰাযে উপ্পজ্জনারহানং কাযদুচ্চরিতাদীনং তথা তথা অনুপ্পাদনমেৰ সংৰরণং ৰিনযনঞ্চ ৰেদিতব্বং.

যং পহানন্তি সম্বন্ধো. ‘‘নামরূপপরিচ্ছেদাদীসু ৰিপস্সনাঞাণেসূ’’তি কস্মা ৰুত্তং, ননু নামরূপপরিচ্ছেদপচ্চযপরিগ্গহকঙ্খাৰিতরণানি ন ৰিপস্সনাঞাণানি সম্মসনাকারেন অপ্পৰত্তনতো? সচ্চমেতং. ৰিপস্সনাঞাণস্স পন অধিট্ঠানভাৰতো এৰং ৰুত্তং. ‘‘নামরূপমত্তমিদং, নত্থি এত্থ অত্তা ৰা অত্তনিযং ৰা’’তি এৰং পৰত্তঞাণং নামরূপৰৰত্থানং. সতি ৰিজ্জমানে খন্ধপঞ্চকসঙ্খাতে কাযে, সযং ৰা সতী তস্মিং কাযে দিট্ঠীতি সক্কাযদিট্ঠি. ‘‘রূপং অত্ততো সমনুপস্সতী’’তি (সং. নি. ৩.৮১; ৪.৩৪৫) এৰং পৰত্তা মিচ্ছাদিট্ঠি. তস্সেৰ রূপারূপস্স কম্মাৰিজ্জাদিপচ্চযপরিগ্গণ্হনঞাণং পচ্চযপরিগ্গহো. ‘‘নত্থি হেতু নত্থি পচ্চযো সত্তানং সংকিলেসাযা’’তি (দী. নি. ১.১৬৮) আদিনযপ্পৰত্তা অহেতুকদিট্ঠি. ‘‘ইস্সরপুরিসপজাপতিপকতিঅণুকালাদীহি লোকো পৰত্ততি নিৰত্ততি চা’’তি পৰত্তা ৰিসমহেতুদিট্ঠি. তস্সেৰাতি পচ্চযপরিগ্গহস্সেৰ. কঙ্খাৰিতরণেনাতি যথা এতরহি নামরূপস্স কম্মাদিপচ্চযতো উপ্পত্তি, এৰং অতীতানাগতেসুপীতি তীসুপি কালেসু ৰিচিকিচ্ছাপনযনঞাণেন. কথংকথীভাৰস্সাতি ‘‘অহোসিং নু খো অহমতীতমদ্ধান’’ন্তি (ম. নি. ১.১৮; সং. নি. ২.২০) আদিনযপ্পৰত্তায সংসযপ্পৰত্তিযা. কলাপসম্মসনেনাতি ‘‘যং কিঞ্চি রূপং অতীতানাগতপচ্চুপ্পন্ন’’ন্তিআদিনা (ম. নি. ১.৩৬১; ২.১১৩; ৩.৮৬, ৮৯) খন্ধপঞ্চকং একাদসসু ওকাসেসু পক্খিপিত্ৰা সম্মসনৰসেন পৰত্তেন নযৰিপস্সনাঞাণেন ¶ . অহং মমাতি গাহস্সাতি অত্তত্তনিযগহণস্স. মগ্গামগ্গৰৰত্থানেনাতি মগ্গামগ্গঞাণৰিসুদ্ধিযা. অমগ্গে মগ্গসঞ্ঞাযাতি ওভাসাদিকে অমগ্গে ‘‘মগ্গো’’তি উপ্পন্নসঞ্ঞায.

যস্মা ¶ সম্মদেৰ সঙ্খারানং উদযং পস্সন্তো ‘‘এৰমেৰ সঙ্খারা অনুরূপকারণতো উপ্পজ্জন্তি, ন পন উচ্ছিজ্জন্তী’’তি গণ্হাতি, তস্মা ৰুত্তং ‘‘উদযদস্সনেন উচ্ছেদদিট্ঠিযা’’তি. যস্মা পন সঙ্খারানং ৰযং পস্সন্তো ‘‘যদিপিমে সঙ্খারা অৰিচ্ছিন্না ৰত্তন্তি, উপ্পন্নুপ্পন্না পন অপ্পটিসন্ধিকা নিরুজ্ঝন্তে ৰা’’তি পস্সতি, তস্সেৰং পস্সতো কুতো সস্সতগ্গাহো, তস্মা ৰুত্তং ‘‘ৰযদস্সনেন সস্সতদিট্ঠিযা’’তি. ভযদস্সনেনাতি ভযতুপট্ঠানঞাণেন. সভযেতি সব্বভযানং আকরভাৰতো সকলদুক্খৰূপসমসঙ্খাতস্স পরমস্সাসস্স পটিপক্খভাৰতো চ সভযে খন্ধপঞ্চকে. অভযসঞ্ঞাযাতি ‘‘অভযং খেম’’ন্তি উপ্পন্নসঞ্ঞায. অস্সাদসঞ্ঞা নাম পঞ্চুপাদানক্খন্ধেসু অস্সাদৰসেন পৰত্তসঞ্ঞা, যা ‘‘আলযাভিনিৰেসো’’তিপি ৰুচ্চতি. অভিরতিসঞ্ঞা তত্থেৰ অভিরতিৰসেন পৰত্তসঞ্ঞা, যা ‘‘নন্দী’’তিপি ৰুচ্চতি. অমুচ্চিতুকম্যতা আদানং. অনুপেক্খা সঙ্খারেহি অনিব্বিন্দনং, সালযতাতি অত্থো. ধম্মট্ঠিতিযং পটিচ্চসমুপ্পাদে পটিলোমভাৰো সস্সতুচ্ছেদগ্গাহো, পচ্চযাকারপটিচ্ছাদকমোহো ৰা, নিব্বানে পটিলোমভাৰো সঙ্খারেসু রতি, নিব্বানপটিচ্ছাদকমোহো ৰা. সঙ্খারনিমিত্তগ্গাহোতি যাদিসস্স কিলেসস্স অপ্পহীনত্তা ৰিপস্সনা সঙ্খারনিমিত্তং ন মুঞ্চতি, সো কিলেসো, যো ‘‘সংযোগাভিনিৰেসো’’তিপি ৰুচ্চতি. সঙ্খারনিমিত্তগ্গহণস্স অতিক্কমনমেৰ ৰা পহানং.

পৰত্তি এৰ পৰত্তিভাৰো, পরিযুট্ঠানন্তি অত্থো. নীৰরণাদিধম্মানন্তি এত্থ আদি-সদ্দেন নীৰরণপক্খিযা কিলেসা ৰিতক্কৰিচারাদযো চ গয্হন্তি.

চতুন্নং অরিযমগ্গানং ভাৰিতত্তা অচ্চন্তং অপ্পৰত্তিভাৰেন যং পহানন্তি সম্বন্ধো. কেন পহানন্তি? অরিযমগ্গেহেৰাতি ৰিঞ্ঞাযমানোযমত্থো তেসং ভাৰিতত্তা অপ্পৰত্তিৰচনতো. সমুদযপক্খিকস্সাতি এত্থ চত্তারোপি মগ্গা চতুসচ্চাভিসমযাতি কত্ৰা তেহি পহাতব্বেন তেন তেন সমুদযেন সহ পহাতব্বত্তা সমুদযসভাগত্তা, সচ্চৰিভঙ্গে চ সব্বকিলেসানং সমুদযভাৰস্স ৰুত্তত্তা ‘‘সমুদযপক্খিকা’’তি দিট্ঠিআদযো ৰুচ্চন্তি. পটিপ্পস্সদ্ধত্তং ৰুপসন্ততা. সঙ্খতনিস্সটতা সঙ্খারসভাৰাভাৰো. পহীনসব্বসঙ্খতন্তি ৰিরহিতসব্বসঙ্খতং, ৰিসঙ্খারন্তি ¶ অত্থো. পহানঞ্চ তং ৰিনযো চাতি পহানৰিনযো পুরিমেন অত্থেন, দুতিযেন পন পহীযতীতি পহানং, তস্স ৰিনযোতি যোজেতব্বং.

ভিন্নসংৰরত্তাতি ¶ নট্ঠসংৰরত্তা, সংৰরাভাৰতোতি অত্থো. তেন অসমাদিন্নসংৰরোপি সঙ্গহিতো হোতি. সমাদানেন হি সম্পাদেতব্বো সংৰরো তদভাৰে ন হোতীতি. এৰঞ্হি লোকে ৰত্তারো হোন্তি ‘‘মহা ৰত নো ভোগো, সো নট্ঠো তথা অকতত্তা’’তি. অরিযেতি অরিযো. পচ্চত্তৰচনঞ্হেতং. এসেসেতি এসো সো এৰ, অত্থতো অনঞ্ঞোতি অত্থো. তজ্জাতেতি অত্থতো তংসভাৰো, সপ্পুরিসো অরিযসভাৰো, অরিযো চ সপ্পুরিসসভাৰোতি অত্থো.

তং অত্থন্তি ‘‘সব্বধম্মমূলপরিযায’’ন্তি এৰং ৰুত্তমত্থং. কস্মা পনেত্থ পুগ্গলাধিট্ঠানা দেসনা কতাতি? যদেত্থ ৰত্তব্বং, তং ‘‘যস্মা পুথুজ্জনো অপরিঞ্ঞাতৰত্থুকো’’তিআদিনা (ম. নি. অট্ঠ. ১.২) সযমেৰ ৰক্খতি. ধম্মো অধিট্ঠানং এতিস্সাতি ধম্মাধিট্ঠানা, সভাৰধম্মে নিস্সায পৰত্তিতদেসনা. ধম্মৰসেনেৰ পৰত্তা পঠমা, পুগ্গলৰসেন উট্ঠহিত্ৰা পুগ্গলৰসেনেৰ গতা ততিযা, ইতরা ধম্মপুগ্গলানং ৰোমিস্সকৰসেন. কস্মা পন ভগৰা এৰং ৰিভাগেন ধম্মং দেসেতীতি? ৰেনেয্যজ্ঝাসযেন দেসনাৰিলাসেন চ. যে হি ৰেনেয্যা ধম্মাধিট্ঠানায ধম্মদেসনায সুখেন অত্থং পটিৰিজ্ঝন্তি, তেসং তথা ধম্মং দেসেতি. এস নযো সব্বত্থ. যস্সা চ ধম্মধাতুযা সুপ্পটিৰিদ্ধত্তা দেসনাৰিলাসপ্পত্তো হোতি, সাযং সুপ্পটিৰিদ্ধা, তস্মা দেসনাৰিলাসপ্পত্তো ধম্মিস্সরো ধম্মরাজা যথা যথা ইচ্ছতি, তথা তথা ধম্মং দেসেতীতি এৰং ইমিনা ৰেনেয্যজ্ঝাসযেন দেসনাৰিলাসেন চ এৰং ৰিভাগেন ধম্মং দেসেতীতি ৰেদিতব্বো.

ছধাতুরোতি পথৰিধাতু আপো-তেজো-ৰাযো-আকাসধাতু ৰিঞ্ঞাণধাতূতি ইমেসং ছন্নং ধাতূনং ৰসেন ছধাতুরো. ‘‘চক্খুনা রূপং দিস্ৰা সোমনস্সট্ঠানিযং রূপং উপৰিচরতী’’তিআদিনা (দী. নি. ৩.৩২৪) ৰুত্তানং ছন্নং সোমনস্সূপৰিচারানং, ছন্নং দোমনস্সউপেক্খূপৰিচারানঞ্চ ৰসেন অট্ঠারসমনোপৰিচারো. সচ্চাধিট্ঠানাদিৰসেন চতুরাধিট্ঠানো. পঞ্ঞাচক্খুনা দিট্ঠধম্মিকস্স সম্পরাযিকস্স চ অত্থস্স অদস্সনতো অন্ধো, দিট্ঠধম্মিকস্সেৰ দস্সনতো একচক্খু, দ্ৰিন্নম্পি দস্সনতো দ্ৰিচক্খু, ৰেদিতব্বো.

স্ৰাযং ¶ নিদ্দিসীতি সম্বন্ধো. স্ৰাযন্তি চ সো অযং, যথাৰুত্তদেসনাৰিভাগকুসলো ভগৰাতি অত্থো. অপরিঞ্ঞাতৰত্থুকোতি তীহি পরিঞ্ঞাহি অপরিঞ্ঞাতক্খন্ধো. খন্ধা হি পরিঞ্ঞাতৰত্থু. অপরিঞ্ঞামূলিকাতি পরিজাননাভাৰনিমিত্তা তস্মিং সতি ভাৰতো. পরিঞ্ঞানঞ্হি ¶ অৰিজ্জাদযো কিলেসা পটিপক্খা তম্মূলিকা চ সব্বমঞ্ঞনাতি. অরিযানং অদস্সাৰীতি এত্থ ইতি-সদ্দো আদিঅত্থো. তেন ‘‘অরিযধম্মস্স অকোৰিদো’’তিআদিকং পুথুজনস্স ৰিসেসনভাৰেন পৰত্তং পাল়িসেসং গণ্হাতি পুথুজ্জননিদ্দেসভাৰতো. তেনাহ ‘‘এৰং পুথুজ্জনং নিদ্দিসী’’তি.

সুত্তনিক্খেপৰণ্ণনা নিট্ঠিতা.

পথৰীৰারৰণ্ণনা

তস্সাতি পুথুজ্জনস্স. ৰসতি এত্থ আরম্মণকরণৰসেনাতি আরম্মণম্পি ৰত্থূতি ৰুচ্চতি পৰত্তিট্ঠানভাৰতোতি আহ ‘‘পথৰীআদীসু ৰত্থূসূ’’তি. সক্কাযধম্মানম্পি আরম্মণাদিনা সতিপি মঞ্ঞনাহেতুভাৰে মঞ্ঞনাহেতুকত্তেনেৰ তেসং নিব্বত্তিতোতি ৰুত্তং ‘‘সব্বসক্কাযধম্মজনিতং মঞ্ঞন’’ন্তি. এত্থ চ পথৰীধাতু সেসধাতূনং সসম্ভারাসম্ভারভাৰা সতিপি পমাণতো সমভাৰে সামত্থিযতো অধিকানধিকভাৰেন ৰেদিতব্বা. সম্ভারন্তীতি সম্ভারা, পরিৰারা. তংতংকলাপেহি লক্খণপথৰিযা সেসধম্মা যথারহং পচ্চযভাৰেন পরিৰারভাৰেন চ পৰত্তন্তি. তেনাহ ‘‘সা হি ৰণ্ণাদীহি সম্ভারেহি সদ্ধিং পথৰীতি সসম্ভারপথৰী’’তি. পথৰিতোতি এত্থ পুথুলট্ঠেন পুথুৰী, পুথুৰী এৰ পথৰী. সা হি সতিপি পরিচ্ছিন্নৰুত্তিযং সব্বেসং সকলাপভাৰানং আধারভাৰেন পৰত্তমানা পুথুলা পত্থটা ৰিত্থিণ্ণাতি ৰত্তব্বতং অরহতি, ন পন তং অনুপৰিসিত্ৰা পৰত্তমানা আপাদযো. সসম্ভারপথৰিযা পন পুথুলভাৰে ৰত্তব্বমেৰ নত্থি. আরম্মণপথৰিযং ৰড্ঢনফরণট্ঠেহি পুথুলট্ঠো, ইতরস্মিং রুল়্হিযাৰ দট্ঠব্বো. আরম্মণপথৰীতি ঝানস্স আরম্মণভূতং পথৰীসঙ্খাতং পটিভাগনিমিত্তং. তেনাহ ‘‘নিমিত্তপথৰীতিপি ৰুচ্চতী’’তি. আগমনৰসেনাতি পথৰীকসিণভাৰনাগমনৰসেন. তথা হি ৰুত্তং ‘‘আপো চ দেৰা পথৰী, তেজো ৰাযো তদাগমু’’ন্তি (দী. নি. ২.৩৪০).

সব্বাপীতি চতুব্বিধা পথৰীপি. অনুস্সৰাদিমত্তলদ্ধা মঞ্ঞনা ৰত্থু হোতিযেৰ. তথা হি ‘‘কক্খল়ং খরিগত’’ন্তিআদিনা (ৰিভ. ১৭৩) লক্খণপথৰীপি উদ্ধরীযতি. যং ¶ পনেকে ৰদন্তি ‘‘লক্খণে দিট্ঠে মঞ্ঞনা নত্থি, সঞ্জানাতীতি ৰুত্তসঞ্ঞা চ দিট্ঠিগ্গাহস্স মূলভূতা পিণ্ডগ্গাহিতা, সা লক্খণে নক্খমতি, তস্মা লক্খণপথৰী ন গহেতব্বা’’তি, তদযুত্তং লক্খণপটিৰেধস্স ইধ অনধিপ্পেতত্তা. তেনাহ ‘‘লোকৰোহারং গহেত্ৰা’’তি. ন চ সব্বসঞ্ঞা পিণ্ডগ্গাহিকা ¶ , নাপি দিট্ঠিগ্গাহস্সেৰ মূলভূতা, তস্মা লক্খণপথৰিযাপি কাযদ্ৰারানুসারেন অঞ্ঞথা চ উপট্ঠিতায মঞ্ঞনা পৰত্ততেৰ. তেনেৰ চ ‘‘অনুস্সৰাদিমত্তলদ্ধা’’তি ৰুত্তং. পথৰিতোতি পচ্চতে নিস্সক্কৰচনন্তি দস্সেন্তো ‘‘পথৰীতি সঞ্জানাতী’’তি আহ. যস্মা চতুব্বিধম্পি পথৰিং ‘‘পথৰী’তি সঞ্জানন্তো তেন তেন নযেন পথৰীকোট্ঠাসেনেৰ সঞ্জানাতীতি ৰুচ্চতি, ন আপাদিকোট্ঠাসেন, তস্মা ৰুত্তং ‘‘পথৰিভাগেন সঞ্জানাতী’’তি. লোকৰোহারং গহেত্ৰাতি লোকসমঞ্ঞং অৰিজহিত্ৰা. এতেন লক্খণপথৰিযম্পি ৰোহারমুখেনেৰস্সা পৰত্তীতি দস্সেতি.

যদি লোকৰোহারেন তত্থ পৰত্তি, কো এত্থ দোসো, ননু অরিযাপি ‘‘অযঞ্হি ভন্তে মহাপথৰী’’তিআদিনা লোকৰোহারেন পৰত্তন্তীতি? ন এত্থ ৰোহারমত্তে অৰট্ঠানং অধিপ্পেতং, অথ খো ৰোহারমুখেন মিচ্ছাভিনিৰেসোতি দস্সেন্তো ‘‘সঞ্ঞাৰিপল্লাসেন সঞ্জানাতী’’তি আহ. তস্সত্থো – অযোনিসোমনসিকারসম্ভূতায ‘‘সুভ’’ন্তিআদিনযপ্পৰত্তায ৰিপরীতসঞ্ঞায সঞ্জানাতীতি. এতেন দুব্বলা তণ্হামানদিট্ঠিমঞ্ঞনা দস্সিতাতি দট্ঠব্বং. যদি এৰং কস্মা সঞ্ঞা গহিতাতি? পাকটভাৰতো. যথা নাম অগ্গিম্হি মথিযমানে যদা ধূমো উপলব্ভতি, কিঞ্চাপি তদা ৰিজ্জতেৰ পাৰকো অৰিনাভাৰতো, পাকটভাৰতো পন ধূমো জাতোতি ৰুচ্চতি, ন অগ্গি জাতোতি, এৰংসম্পদমিদং দট্ঠব্বং. যদিপি তত্থ মঞ্ঞনাকিচ্চং অত্থি, ন পন ৰিভূতং অপাকটভাৰতো সঞ্ঞাকিচ্চমেৰ ৰিভূতং, তং পন মঞ্ঞনানুকূলং মঞ্ঞনাসহিতং চাতি আহ ‘‘সঞ্ঞাৰিপল্লাসেন সঞ্জানাতী’’তি. এৰং পথৰীভাগং অমুঞ্চন্তোযেৰ ৰা সঞ্জানাতীতি সম্বন্ধো. যো হি ৰুত্তপ্পভেদায পথৰিযা পথৰিভাগং অমুঞ্চন্তোযেৰ অৰিজহন্তোযেৰ সীসপিণ্ডে সুৰণ্ণসঞ্ঞী ৰিয অনত্তাদিসভাৰংযেৰ তং অত্তাদিৰসেন সঞ্জানাতি, তস্স ৰসেন ৰুত্তং ‘‘পথৰী’’তিআদি. ন ৰত্তব্বং পুথুজ্জনগ্গাহস্স যুত্তিমগ্গননিৰারণতোতি দস্সেন্তো আহ ‘‘উম্মত্তকো ৰিয…পে… গণ্হাতী’’তি ¶ . অরিযানং অদস্সাৰিতাদিভেদন্তি অরিযানং অদস্সাৰিতাদিৰিসেসং ৰদন্তেন ভগৰতাৰ এত্থ যথাৰুত্তসঞ্জাননে কারণং ৰুত্তন্তি যোজনা.

এৰন্তি ‘‘পথৰিভাগেন সঞ্জানাতী’’তিআদিনা ৰুত্তপ্পকারেন. সঞ্জানিত্ৰাতি পুব্বকালকিরিযানিদ্দেসোতি আহ ‘‘অপরভাগে…পে… গণ্হাতী’’তি. পপঞ্চসঙ্খাতি পপঞ্চকোট্ঠাসা. পপঞ্চন্তি সত্তা সংসারে চিরাযন্তি এতেহীতি পপঞ্চা, মঞ্ঞন্তি ‘‘এতং মমা’’তিআদিনা পরিকপ্পেন্তি এতাহীতি মঞ্ঞনাতি দ্ৰীহিপি পরিযাযেহি তণ্হাদযোৰ ৰুত্তাতি আহ ‘‘তণ্হামানদিট্ঠিপপঞ্চেহি ইধ মঞ্ঞনানামেন ৰুত্তেহী’’তি. অজঞ্ঞস্স জঞ্ঞতো, অসেয্যাদিকস্স ¶ সেয্যাদিতো গহণতো দিট্ঠিমঞ্ঞনা ৰিয তণ্হামানমঞ্ঞনাপি অঞ্ঞথা গাহো এৰাতি আহ ‘‘অঞ্ঞথা গণ্হাতী’’তি. আরম্মণাভিনিরোপনাদিনা ভিন্নসভাৰানম্পি ৰিতক্কাদীনং সাধারণো উপনিজ্ঝাযনসভাৰো ৰিয অনুগিজ্ঝনুণ্ণতিপরামসনসভাৰানম্পি তণ্হাদীনং সাধারণেন আরম্মণপরিকপ্পনাকারেন পৰত্তি মঞ্ঞনাতি দট্ঠব্বং. তেনাহ ‘‘তীহি মঞ্ঞনাহি মঞ্ঞতী’’তিআদি. অস্সাতি পুথুজ্জনস্স, উদযব্বযানুপস্সনাদীসু ৰিয সুখুমনযেনপি মঞ্ঞনাপৰত্তি অত্থীতি ৰিভাৰনসুখতায থূলংযেৰ তং দস্সেতুকামো ‘‘ওল়ারিকনযেনা’’তিআহ. ওল়ারিকে হি ৰিভাগে দস্সিতে সুখুমৰিভাৰনা সুকরাতি দস্সেতুং অযমত্থযোজনা ৰুচ্চতীতি সম্বন্ধো. অজ্ঝত্তিকাতি ইন্দ্রিযবদ্ধা সত্তসন্তানপরিযাপন্না নিযকজ্ঝত্তা ৰুত্তা ৰিভঙ্গে পটিসম্ভিদামগ্গে চ.

ৰিভঙ্গেতি ধাতুৰিভঙ্গে (ৰিভ. ১৭৩). বাহিরাতি অনিন্দ্রিযবদ্ধা সঙ্খারসন্তানপরিযাপন্না. কক্খল়ন্তি থদ্ধং. খরিগতন্তি ফরুসং. কক্খল়ভাৰো কক্খল়ত্তং. কক্খল়ভাৰোতি কক্খল়সভাৰো. বহিদ্ধাতি ইন্দ্রিযবদ্ধতো বহিদ্ধাভূতং. অনুপাদিন্নন্তি ন উপাদিন্নং. অযোতি কাল়লোহং. লোহন্তি জাতিলোহং ৰিজাতিলোহং কিত্তিমলোহং পিসাচলোহন্তি চতুব্বিধং. তত্থ অযো সজ্ঝু সুৰণ্ণং তিপু সীসং তম্বলোহং ৰেকন্তকলোহন্তি ইমানি সত্ত জাতিলোহানি নাম. নাগনাসিকালোহং ৰিজাতিলোহং নাম. কংসলোহং ৰট্টলোহং আরকুটন্তি তীণি কিত্তিমলোহানি নাম. মোরক্খকং পুথুকং মলিনকং চপলকং সলকং আটলং ভত্তকং ¶ দুসিলোহন্তি অট্ঠ পিসাচলোহানি নাম. তেসু ৰেকন্তকলোহং নাম সব্বলোহচ্ছেদনসমত্থা একা লোহজাতি. তথা হি তং ৰিকন্ততি ছিন্দতীতি ৰিকন্তকন্তি ৰুচ্চতি. ৰিকন্তকমেৰ ৰেকন্তকং. নাগনাসিকালোহং লোহসদিসং লোহৰিজাতি হলিদ্দাদিৰিজাতি ৰিয. তথা হি তং লোহাকারং লোহমলং ৰিয ঘনসংহতং হুত্ৰা তিট্ঠতি, তাপেত্ৰা তাল়িতং পন ভিন্নং ভিন্নং হুত্ৰা ৰিসরতি মুদু মট্ঠং কম্মনিযং ৰা ন হোতি. তিপুতম্বে মিস্সেত্ৰা কতং কংসলোহং. সীসতম্বে মিস্সেত্ৰা কতং ৰট্টলোহং. জসতম্বে মিস্সেত্ৰা কতং আরকুটং. তেনেৰ তং করণেন নিব্বত্তত্তা কিত্তিমলোহন্তি ৰুচ্চতি. যং পন কেৰলং রসকধাতু ৰিনিগ্গতং, তং ‘‘পিত্তল’’ন্তিপি ৰদন্তি. তং ইধ নাধিপ্পেতং, যথাৰুত্তং মিস্সকমেৰ কত্ৰা যোজিতং কিত্তিমন্তি ৰুত্তং. মোরক্খকাদীনি এৰংনামানেৰেতানি. তেসু যস্মা পঞ্চ জাতিলোহানি পাল়িযং ৰিসুং ৰুত্তানেৰ, তস্মা ৰেকন্তকলোহেন সদ্ধিং ৰুত্তাৰসেসং সব্বং ইধ লোহন্তি ৰেদিতব্বং.

তিপূতি সেততিপু. সীসন্তি কাল়তিপু. সজ্ঝন্তি রজতং. মুত্তাতি হত্থিকুম্ভজাদিকা অট্ঠৰিধাপি মুত্তা. তথা হি হত্থিকুম্ভং ৰরাহদাঠা ভূজঙ্গসীসং ৰলাহকূটং ৰেল়ূ মচ্ছসীরো সঙ্খো ¶ সিপ্পীতি অট্ঠ মুত্তাযোনিযো. তত্থ হত্থিকুম্ভজা পীতৰণ্ণা পভাহীনা. ৰরাহদাঠা ৰরাহদাঠৰণ্ণাৰ. ভুজঙ্গসীসজা নীলাদিৰণ্ণা সুৰিসুদ্ধা ৰট্টলা চ. ৰলাহকজা ভাসুরা দুব্বিভাগরূপা রত্তিভাগে অন্ধকারং ৰিধমন্তিযো তিট্ঠন্তি, দেৰূপভোগা এৰ চ হোন্তি. ৰেল়ুজা করকুপলসমানৰণ্ণা ন ভাসুরা, তে চ ৰেল়ূ অমনুস্সগোচরে এৰ পদেসে জাযন্তি. মচ্ছসীরজা পাঠীনপিট্ঠিসমানৰণ্ণা ৰট্টলা লঘৰো চ হোন্তি পভাৰিহীনা, তে চ মচ্ছা সমুদ্দমজ্ঝে এৰ জাযন্তি. সঙ্খজা সঙ্খোদরচ্ছৰিৰণ্ণা কোলপ্পমাণাপি হোন্তি পভাৰিহীনাৰ. সিপ্পিজা পভাৰিসেসযুত্তা হোন্তি নানাসণ্ঠানা. এৰং জাতিতো অট্ঠৰিধাসুপি মুত্তাসু যা মচ্ছসঙ্খসিপ্পিজা, তা সামুদ্দিকা হোন্তি, ভুজঙ্গজাপি কাচি সামুদ্দিকা হোন্তি, ইতরা অসামুদ্দিকা. যস্মা বহুলং সামুদ্দিকাৰ মুত্তা লোকে দিস্সন্তি, তত্থাপি সিপ্পিজাৰ, ইতরা কাদাচিকা. তস্মা সম্মোহৰিনোদনিযং (ৰিভ. অট্ঠ. ১৭৩) ‘‘মুত্তাতি সামুদ্দিকা মুত্তা’’তি ৰুত্তং.

মণীতি ¶ ঠপেত্ৰা পাল়িআগতে ৰেল়ুরিযাদিকে সেসো জোতিরসাদিভেদো সব্বোপি মণি. ৰেল়ুরিযন্তি ৰংসৰণ্ণমণি. সঙ্খোতি সামুদ্দিকসঙ্খো. সিলাতি কাল়সিলা পণ্ডুসিলা সেতসিলাদিভেদা অট্ঠপি সিলা. রজতন্তি কহাপণাদিকং ৰুত্তাৰসেসং রজতসম্মতং. জাতরূপন্তি সুৰণ্ণং. লোহিতঙ্গোতি রত্তমণি. মসারগল্লন্তি কবরমণি তিণাদীসু বহিভারা তালনাল়িকেরাদযোপি তিণং নাম. অন্তোসারং খদিরাদি অন্তমসো দারুখণ্ডম্পি কট্ঠং নাম. মুগ্গমত্ততো যাৰ মুট্ঠিপ্পমাণা মরুম্বা সক্খরা নাম. মুগ্গমত্ততো পট্ঠায হেট্ঠা ৰালিকা নাম. কঠলন্তি কপালখণ্ডং. ভূমীতি সসম্ভারপথৰী. পাসাণোতি অন্তোমুট্ঠিযং অসণ্ঠহনতো পট্ঠায যাৰ হত্থিপ্পমাণং পাসাণং, হত্থিপ্পমাণতো পন পট্ঠায উপরি পব্বতোতি. অযং অযোআদীসু ৰিভাগনিদ্দেসো. নিমিত্তপথৰীতি পটিভাগনিমিত্তভূতং পথৰিকসিণং. তম্পি হি ‘‘রূপাৰচরতিকচতুক্কজ্ঝানং কুসলতো চ ৰিপাকতো চ কিরিযতো চ চতুত্থস্স ঝানস্স ৰিপাকো ইমে ধম্মা বহিদ্ধারম্মণা’’তি ৰচনতো ‘‘বাহিরা পথৰী’’তি ৰুচ্চতি. তেন ৰুত্তং ‘‘যা চ অজ্ঝত্তারম্মণত্তিকে নিমিত্তপথৰী, তং গহেত্ৰা’’তি. উগ্গহনিমিত্তঞ্চেত্থ তংগতিকমেৰ দট্ঠব্বং, নিমিত্তুপ্পত্তিতো পন পুব্বে ভূমিগ্গহণেনেৰ গহিতন্তি.

তীহি মঞ্ঞনাহীতি ৰুত্তং মঞ্ঞনাত্তযং সপরসন্তানেসু সঙ্খেপতো যোজেত্ৰা দস্সেতুং ‘‘অহং পথৰী’’তিআদি ৰুত্তং. তত্থ অহং পথৰীতিআদীনা অজ্ঝত্তৰিসযং দিট্ঠিমঞ্ঞনং মানমঞ্ঞনঞ্চ দস্সেতি অত্তাভিনিৰেসাহংকারদীপনতো. মম পথৰীতি ইমিনা তণ্হামঞ্ঞনং মানমঞ্ঞনম্পি ৰা পরিগ্গহভূতাযপি পথৰিযা সেয্যাদিতো মানজপ্পনতো. সেসপদদ্ৰযেপি ইমিনানযেন মঞ্ঞনাৰিভাগো ¶ ৰেদিতব্বো. তত্থ পথৰিকসিণজ্ঝানলাভী ঝানচক্খুনা গহিতঝানারম্মণং ‘‘অত্তা’’তি অভিনিৰিসন্তো তঞ্চ সেয্যাদিতো দহন্তো অত্থতো ‘‘অহং পথৰী’’তি মঞ্ঞতি নাম, তমেৰ ‘‘অযং ময্হং অত্তা’’তি গহণে পন ‘‘মম পথৰী’’তি মঞ্ঞতি নাম. তথা তং ‘‘পরপুরিসো’’তি ৰা ‘‘দেৰো’’তি ৰা ৰাদৰসেন ‘‘অযমেৰ পরেসং অত্তা’’তি ৰা অভিনিৰিসন্তো ‘‘পরো পথৰী, পরস্স পথৰী’’তি মঞ্ঞতি নাম. ইমিনা নযেন সেসপথৰীসুপি যথারহং চতুক্কং নিদ্ধারেতব্বং.

এৰং ‘‘পথৰিং মঞ্ঞতী’’তি এত্থ চতুক্কৰসেন মঞ্ঞনং দস্সেত্ৰা ইদানি মঞ্ঞনাৰত্থুং মঞ্ঞনাযো চ ৰিভজিত্ৰা অনেকৰিহিতং তস্স মঞ্ঞনাকারং ¶ দস্সেতুং ‘‘অথ ৰা’’তিআদিমাহ. তত্থ অযন্তি যথাৰুত্তো পুথুজ্জনো. ছন্দরাগন্তি বহলরাগং. অস্সাদেতীতি নিকামেতি, ‘‘ইমে কেসা মুদুসিনিদ্ধকুঞ্চিতনীলোভাসা’’তিআদিনা তত্থ রসং ৰিন্দতি. অভিনন্দতীতি সপ্পীতিকায তণ্হায অভিমুখো নন্দতি পমোদতি. অভিৰদতীতি উপ্পন্নং তণ্হাভিনন্দনাৰেগং হদযেন সন্ধারেতুং অসক্কোন্তো ‘‘অহো মে কেসা’’তি ৰাচং নিচ্ছারেতি. অজ্ঝোসায তিট্ঠতীতি বলৰতণ্হাভিনিৰেসেন গিলিত্ৰা পরিনিট্ঠাপেত্ৰা তিট্ঠতি. অঞ্ঞতরং ৰা পন রজ্জনীযৰত্থুন্তি কেসাদিতো অঞ্ঞতরং ৰা করচরণাদিপ্পভেদং নিযকজ্ঝত্তপরিযাপন্নং রাগুপ্পত্তিহেতুভূতং ৰত্থুং. ইতীতি ইমিনা সিনিদ্ধাদিপ্পকারেনাতি পত্থযিতব্বাকারং পরামসতি. তত্থ নন্দিং সমন্নানেতীতি তেসু ভাৰীসু কেসাদীসু সিদ্ধং ৰিয কত্ৰা নন্দিং তণ্হং সমন্নাহরতি সমুপচারেতি. পণিদহতীতি পত্থনং ঠপেতি.

সম্পত্তিং নিস্সায ‘‘সেয্যোহমস্মী’’তি, ৰিপত্তিং নিস্সায ‘‘হীনোহমস্মী’’তি মানং জনেতীতি যোজনা. পথৰীকোট্ঠাসভূতানং কেসাদীনং সম্পত্তিৰিপত্তীহি মানজপ্পনা পথৰিযা মঞ্ঞনা হোতীতি আহ ‘‘এৰং অজ্ঝত্তিকং পথৰিং মানমঞ্ঞনায মঞ্ঞতী’’তি. অৰযৰব্যতিরেকেন সমুদাযস্স অভাৰতো সমুদাযো জীৰাভিনিৰেসো অৰযৰেপি হোতীতি দস্সেন্তো ‘‘তং জীৰং তং সরীরন্তি আগতনযেন পন কেসং ‘জীৰো’তি অভিনিৰিসতী’’তি আহ. ‘‘কেসা নামেতে ইস্সরৰিহিতা পজাপতিনিস্সিতা অণুসঞ্চযো পকতিপরিণামো’’তিআদিনা নযেনপেত্থ দিট্ঠিমঞ্ঞনা ৰেদিতব্বা.

ইমিস্সা পৰত্তিযাতি নিকন্তিমানদিট্ঠীনং পরিযাদানসমুগ্ঘাটপ্পৰত্তিযা. ‘‘এতং মমা’’তিআদিনা যদিপি তিস্সন্নম্পি মঞ্ঞনানং সম্ভৰো দস্সিতো. তণ্হামানমঞ্ঞনানং পন হেট্ঠা ¶ দস্সিতত্তা দিট্ঠিমঞ্ঞনা এৰেত্থ ৰিসেসতো উদ্ধটাতি ৰেদিতব্বং. তেনাহ ‘‘এৰম্পি অজ্ঝত্তিকং পথৰিং দিট্ঠিমঞ্ঞনায মঞ্ঞতী’’তি.

বাহিরম্পি পথৰিং তীহি মঞ্ঞনাহি মঞ্ঞতীতি যোজনা. তং পন মঞ্ঞনাৰিধিং দস্সেতুং ‘‘কথ’’ন্তি আহ. তস্সত্থো হেট্ঠা ৰুত্তনযেন ৰেদিতব্বো.

অযং ¶ জীৰোতি অযং কাল়লোহং ‘‘জীৰো অত্তা’’তি অভিনিৰিসতি একচ্চে নিগণ্ঠা ৰিয. এৰং বাহিরং পথৰিং দিট্ঠিমঞ্ঞনায মঞ্ঞতীতি এত্থাপি ‘‘যা চেৰ খো পন অজ্ঝত্তিকা পথৰীধাতু, যা চ বাহিরা পথৰীধাতূ’’তিআদিনা নযেন আনেত্ৰা ৰত্তব্বো.

পথৰীকসিণং অত্ততো সমনুপস্সতীতিআদীসু যং ৰত্তব্বং, তং হেট্ঠা ৰুত্তমেৰ. অযম্পি চ নযো ‘‘রূপং অত্ততো সমনুপস্সতী’’তি এত্থেৰ অন্তোগধোতি দট্ঠব্বো কসিণানম্পি রূপসমঞ্ঞাসম্ভাৰতো. পথৰিং মঞ্ঞতীতি এত্থ যাদিসো মঞ্ঞনাৰত্থুমঞ্ঞনানং ৰিত্থারনযো ৰুত্তো, তাদিসো ইতো পরং ৰুত্তনযোৰাতি আহ ‘‘ইতো পরং সঙ্খেপেনেৰ কথযিস্সামা’’তি, অতাদিসো পন ৰিত্থারতোপি কথযিস্সতীতি অত্থো.

তস্মাতি যস্মা ‘‘পথৰিযা’’তি ইদং ভুম্মৰচনং, তস্মা, সো অত্তপরত্তদুপকরণানং আধারভাৰেন তং মঞ্ঞনাৰত্থুং কপ্পেতীতি অত্থো. তেনাহ ‘‘অহং পথৰিযা’’তিআদি. ননু চ ইন্দ্রিযবদ্ধানিন্দ্রিযবদ্ধপভেদস্স ধম্মপ্পবন্ধস্স সসম্ভারপথৰী চ আধারনিস্সযো, ইতরা আরম্মণনিস্সযো তদারম্মণস্সাতি এত্থ নিব্বিরোধোতি? ন, মঞ্ঞনাৰত্থুং নিস্সযভাৰেন পরিকপ্পনতো. অযঞ্হি ‘‘অহ’’ন্তি দিট্ঠিমঞ্ঞনায মানমঞ্ঞনায চ ৰত্থুভূতস্স অত্তনো পথৰিসন্নিস্সযং কত্ৰা ‘‘অহং পথৰিযা’’তি মঞ্ঞতি, তণ্হামঞ্ঞনায ৰত্থুভূতস্স উপকরণস্স পথৰিং সন্নিস্সযং কত্ৰা ‘‘ময্হং কিঞ্চনং পলিবোধো পথৰিযা’’তি মঞ্ঞতি. পরোতিআদীসুপি ইমিনা নযেন অত্থো ৰেদিতব্বো.

য্ৰাযং অত্থনযোতি সম্বন্ধো. ৰুত্তো পটিসম্ভিদামগ্গে. এতেনেৰ নযেনাতি য্ৰাযং ‘‘সো খো পন মে অত্তা ইমস্মিং রূপে’’তি সমুদাযস্স আধারভাৰদীপনো অত্থনযো ৰুত্তো, এতেনেৰ নযেন. ন হি অৰযৰব্যতিরেকেন সমুদাযো লব্ভতি, তস্মা সমুদাযে ৰুত্তৰিধি অৰযৰেপি লব্ভতীতি অধিপ্পাযো. তেনাহ সো খো পন মে অযং অত্তা ইমিস্সা পথৰিযাতি মঞ্ঞন্তোতি. তস্মিংযেৰ পনস্স অত্তনীতি এত্থ অস্সাতি পুথুজ্জনস্স. তস্মিংযেৰ অত্তনীতি অজ্ঝত্তিকবাহিরপথৰীসন্নিস্সযে ¶ অত্তনি. ‘‘পথৰিযা মঞ্ঞতী’’তি পদস্সাযং ৰণ্ণনা. এৰং ‘‘পথৰিযা মঞ্ঞতী’’তি এত্থ অত্তৰসেন দিট্ঠিমানতণ্হামঞ্ঞনং দস্সেত্ৰা ইদানি পরৰসেন দস্সেতুং ‘‘যদা পনা’’তিআদি ৰুত্তং. তত্থ অস্সাতি ¶ পরস্স. তদাতি পরৰসেন মঞ্ঞনাযং. দিট্ঠিমঞ্ঞনা এৰ যুজ্জতি তত্থ নিচ্চাভিনিৰেসাদযো সম্ভৰন্তীতি কত্ৰা. অৰধারণেন মানতণ্হামঞ্ঞনা নিৰত্তেতি. ন হি ‘‘সেয্যোহমস্মী’’তিআদিনা, ‘‘ময্হ’’ন্তি চ পৰত্তলক্খণা মানতণ্হা পরস্মিং পরস্স সন্তকভাৰেন গহিতে চ পৰত্তন্তীতি অধিপ্পাযো. ইতরাযোপীতি মানতণ্হামঞ্ঞনাযোপি. ইচ্ছন্তি অট্ঠকথাচরিযা. পরস্সপি হি পথৰীসন্নিস্সযেন সম্পত্তিইস্সরিযাদিকস্স ৰসেন অত্তনি সেয্যাদিভাৰং দহতো পণিদহতো চ চিত্তং তথাভাৰায মানতণ্হামঞ্ঞনা সম্ভৰন্তীতি আচরিযানং অধিপ্পাযো. ‘‘পরো পথৰী পরস্স পথৰী’’তি এত্থাপি ইমে দ্ৰে পকারা সাধিপ্পাযা নিদ্ধারেতব্বা.

‘‘পথৰিতো সঞ্জানাতী’’তি, ‘‘আদিতো’’তি চ আদীসু অনিস্সক্কৰচনেপি তো-সদ্দো দিট্ঠোতি আহ ‘‘পথৰিতোতি নিস্সক্কৰচন’’ন্তি. সউপকরণস্সাতি হিরঞ্ঞসুৰণ্ণগতস্স দাসপোরিসাদিনা ৰিত্তুপকরণেন সউপকরণস্স, অত্তনো ৰা পরস্স ৰা তেসং উপকরণস্স ৰাতি অত্থো. যথাৰুত্তপ্পভেদতোতি লক্খণাদিঅজ্ঝত্তিকাদিৰুত্তপ্পকারৰিভাগতো. উপ্পত্তিং ৰা নিগ্গমনং ৰাতি ‘‘তং অণ্ডং অহোসি হেমমযং, তস্মিং সযং ব্রহ্মা উপ্পন্নো’’তি ব্রহ্মণ্ডৰাদৰসেন ৰা ‘‘দ্ৰীহি অণূহি দ্ৰিঅণুক’’ন্তি এৰং পৰত্তঅণুকৰাদৰসেন ৰা পথৰিতো উপ্পত্তিং ৰা ‘‘সব্বোযং লোকো ইস্সরতো ৰিনিগ্গতো’’তি ইস্সরৰাদৰসেন ইস্সরকুত্ততো পথৰিতো নিগ্গমনং ৰা মঞ্ঞমানোতি যোজনা. পথৰিতো ৰা অঞ্ঞো আপাদিকো অত্তাতি অধিপ্পাযো. এত্থ চ পুরিমস্মিং অত্থৰিকপ্পে কারকলক্খণং নিস্সক্কৰচনং, দুতিযস্মিং উপপদলক্খণন্তি দট্ঠব্বং. অত্তনো পরিগ্গহভূতপথৰিতো সুখপ্পত্তিং ততো এৰ চ পরেহি সেয্যাদিভাৰং কপ্পেন্তস্স ৰসেনপেত্থ তণ্হামানমঞ্ঞনা ৰেদিতব্বা. অপরেতি সারসমাসাচরিযা. ততো অঞ্ঞং অপ্পমাণং অত্তানং গহেত্ৰাতি পুব্বে ভাৰিতআপাদিঅপ্পমাণকসিণৰসেন ৰা কাপিলকাণাদদিট্ঠিৰসেন ৰা অপ্পমাণং ব্যাপিনং অত্তানং গহেত্ৰা. পথৰিতোতি পচ্ছা অভাৰিতঅৰড্ঢিতপথৰীকসিণসঙ্খাতপথৰিতো. বহিদ্ধাপি মে অত্তাতি ইতো পথৰিতো বহিপি মে অত্তাতি অধিপ্পাযো.

কেৰলন্তি ¶ অনৰসেসং. মহাপথৰিং তণ্হাৰসেন মমাযতি, অযঞ্চ নযো চতুদীপিস্সরিযে ঠিতস্স দীপচক্কৰত্তিনো চ লব্ভেয্য, মণ্ডলিকরাজমহামত্তকুটুম্বিকানম্পি ৰসেন লব্ভতেৰ তেসম্পি যথাপরিগ্গহং অনৰসেসেত্ৰা মঞ্ঞনায সম্ভৰতো. ‘‘এৰং মমা’’তি গাহস্স ‘‘এসোহমস্মিং, এসো মে অত্তা’’তি গাহৰিধূরতায ৰুত্তং ‘‘একা তণ্হামঞ্ঞনা এৰ লব্ভতী’’তি ¶ . ইমিনা নযেনাতি ৰুত্তমতিদেসং ৰিভাৰেতুং ‘‘সা চায’’ন্তিআদি ৰুত্তং. তত্থ সা চাযন্তি সা চ অযং তণ্হামঞ্ঞনা যোজেতব্বাতি সম্বন্ধো. যথা পন দিট্ঠিমঞ্ঞনামঞ্ঞিতে ৰত্থুস্মিং সিনেহং মানঞ্চ উপ্পাদযতো তণ্হামানমঞ্ঞনা সম্ভৰন্তি, এৰং তণ্হামঞ্ঞনামঞ্ঞিতেন ৰত্থুনা অত্তানং সেয্যাদিতো দহতো তঞ্চ অত্তনিযং নিচ্চং তথা তংসামিভূতং অত্তানঞ্চ পরিকপ্পেন্তস্স ইতরমঞ্ঞনাপি সম্ভৰন্তীতি সক্কা ৰিঞ্ঞাতুং. ‘‘মে’’তি হি ইমিনা অত্থগ্গহণমুখেনেৰ অত্তনিযসম্বন্ধো পকাসীযতীতি.

অভিনন্দতীতি ইমিনা তণ্হাদিট্ঠাভিনিৰেসানং সঙ্গহিতত্তা তে দস্সেন্তো ‘‘অস্সাদেতি পরামসতি চা’’তি আহ. দিট্ঠিৰিপ্পযুত্তচিত্তুপ্পাদৰসেন চেতস্স দ্ৰযস্স অসঙ্করতো পৰত্তি ৰেদিতব্বা, একচিত্তুপ্পাদেপি ৰা অধিপতিধম্মানং ৰিয পুব্বাভিসঙ্খারৰসেন তস্স তস্স বলৰভাৰেন পৰত্তি. এতস্মিং অত্থেতি তণ্হাদিট্ঠিৰসেন অভিনন্দনত্থে. এতন্তি ‘‘পথৰিং অভিনন্দতী’’তি এতং পদং. যেসং ৰিনেয্যানং যেহি পকারৰিসেসেহি ধম্মানং ৰিভাৰনে কতে ৰিসেসাধিগমো হোতি, তেসং তেহি পকারৰিসেসেহি ধম্মৰিভাৰনং. যেসং পন যেন একেনেৰ পকারেন ধম্মৰিভাৰনে কতে ৰিসেসাধিগমো হোতি, তেসম্পি তং ৰত্ৰা ধম্মিস্সরতায তদঞ্ঞনিরৰসেসপ্পকারৰিভাৰনঞ্চ দেসনাৰিলাসো. তেনাহ ‘‘পুব্বে মঞ্ঞনাৰসেন কিলেসুপ্পত্তিং দস্সেত্ৰা ইদানি অভিনন্দনাৰসেন দস্সেন্তো’’তি. ধম্মধাতুযাতি সম্মাসম্বোধিযা. সা হি সব্বঞেয্যধম্মং যথাসভাৰতো ধারেতি উপধারেতি, সকলঞ্চ ৰিনেয্যসত্তসঙ্খাতধম্মপ্পবন্ধং অপাযদুক্খসংসারদুক্খপতনতো ধারেতি, সযঞ্চ অৰিপরীতপৰত্তিআকারা ধাতূতি ধম্মধাতূতি ইধাধিপ্পেতা. সব্বঞ্ঞুতঞ্ঞাণপদট্ঠানঞ্হি মগ্গঞাণং, মগ্গঞাণপদট্ঠানঞ্চ সব্বঞ্ঞুতঞ্ঞাণং সম্মাসম্বোধীতি. সুপ্পটিৰিদ্ধত্তাতি ¶ সুট্ঠু পটিৰিদ্ধভাৰতো, সম্মা অধিগতত্তাতি অত্থো. অভিকঙ্খনসম্পগ্গহপরামসনানং ৰসেন আরম্মণে পরিকপ্পনাপৰত্তি মঞ্ঞনা. তত্থ ‘‘মমং, অহ’’ন্তি চ অভিনিৰেসনং পরিকপ্পনং. যেন অজ্ঝোসানং হোতি, অযং অভিনন্দনাতি অযমেতেসং ৰিসেসো. সুত্তাদিঅৰিরুদ্ধাযেৰ অত্তনোমতি ইচ্ছিতব্বা, ন ইতরাতি সুত্তেন তস্সা সঙ্গহং দস্সেতুং ‘‘ৰুত্তঞ্চেত’’ন্তিআদি ৰুত্তং. দেসনাৰিলাসৰিভাৰনস্স পন সহেতুকহেতুসম্পযুত্তদুকাদিদেসনায নিবদ্ধতা নিদ্ধারেতব্বা.

তস্সাতি তেন. ঞাতসদ্দসম্বন্ধেন হেতং কত্তরি সামিৰচনং. তস্মাতি অপরিঞ্ঞাতত্তা. ‘‘অপরিঞ্ঞাত’’ন্তি পটিক্খেপমুখেন যং পরিজাননং ৰুত্তং, তং অত্থতো তিৰিধা পরিঞ্ঞা হোতীতি তং সরূপতো পৰত্তিআকারতো চ ৰিভাৰেন্তো ‘‘যো হী’’তিআদিমাহ.

তত্থ ¶ যায পঞ্ঞায ৰিপস্সনাভূমিং পরিজানাতি পরিচ্ছিন্দতি, সা পরিজাননপঞ্ঞা ঞাতপরিঞ্ঞা. সা হি তেভূমকধম্মজাতং ‘‘অযং ৰিপস্সনাভূমী’’তি ঞাতং ৰিদিতং পাকটং করোন্তীযেৰ লক্খণরসাদিতো অজ্ঝত্তিকাদিৰিভাগতো চ পরিচ্ছিজ্জ জানাতি. ইধ পন পথৰীধাতুৰসেন ৰেদিতব্বাতি ৰুত্তং ‘‘পথৰীধাতুং পরিজানাতী’’তিআদি. তীরণপরিঞ্ঞাতি কীরণৰসেন পরিজাননকপঞ্ঞা. সা হি পরিৰারেহি অনিচ্চতাদিআকারেহি অনিচ্চতাদিসভাৰস্স উপাদানক্খন্ধপঞ্চকস্স তীরণৰসেন সম্মসনৰসেন তং পরিচ্ছিজ্জ জানাতি. অগ্গমগ্গেনাতি অরহত্তমগ্গেন. সো হি অনৰসেসতো ছন্দরাগং পজহতি. অগ্গমগ্গেনাতি ৰা অগ্গভূতেন মগ্গেন, লোকুত্তরমগ্গেনাতি অত্থো. উভযথাপি হি সমুচ্ছেদপহানকারী এৰ পঞ্ঞা নিপ্পরিযাযেন পহানপরিঞ্ঞাতি দস্সেতি.

নামরূপৰৰত্থানন্তি এতেন পচ্চযপরিগ্গহোপি সঙ্গহিতোতি দট্ঠব্বো নামরূপস্স হেতুৰৰত্থানভাৰতো. সোপি হি হেতুপচ্চযমুখেন নামরূপস্স ৰৰত্থানমেৰাতি. কলাপসম্মসনাদিৰসেন তীরণপরিঞ্ঞা অনিচ্চাদিৰসেন সম্মসনভাৰতো. তস্মাতি যস্মা তা পরিঞ্ঞাযো নত্থি, তস্মা. অথ ৰা তস্মা অপরিঞ্ঞাতত্তাতি যস্মা অপরিঞ্ঞাতা পথৰী, তস্মা অপরিঞ্ঞাতত্তা পথৰিযা তং পথৰিং মঞ্ঞতি চ অভিনন্দতি চাতি.

পথৰীৰারৰণ্ণনা নিট্ঠিতা.

আপোৰারাদিৰণ্ণনা

আপং ¶ আপতোতি এত্থ অপ্পোতি, অপ্পাযতীতি ৰা আপো, যস্মিং সঙ্ঘাতে সযং অত্থি, তং আবন্ধনৰসেন ব্যাপেত্ৰা তিট্ঠতি, পরিব্রূহেতীতি ৰা অত্থো. অত্থানং অধি অজ্ঝত্তং. পতি পতি অত্তানন্তি পচ্চত্তং. উভযেনপি সত্তসন্তানপরিযাপন্নমেৰ ৰদতি. আপো আপোগতন্তিআদীসু আবন্ধনমেৰ আপো, তদেৰ আপোসভাৰং গতত্তা আপোগতং, সভাৰেনেৰ আপভাৰং পত্তন্তি অত্থো. সিনেহনৰসেন সিনেহো, সোযেৰ সিনেহনসভাৰং গতত্তা সিনেহগতং. বন্ধনত্তং রূপস্সাতি অৰিনিব্ভোগরূপস্স বন্ধনভাৰো, অৰিপ্পকিরণৰসেন সম্পিণ্ডনন্তি অত্থো. উগ্গণ্হন্তোতি যথাপরিচ্ছিন্নে আপোমণ্ডলে যথা উগ্গহনিমিত্তং উপলব্ভতি, তথা নিমিত্তং গণ্হন্তো. ৰুত্তোতি ‘‘আপস্মি’’ন্তি এত্থ ৰুত্তআপো. সো হি সসম্ভারআপো, ন ‘‘আপোকসিণ’’ন্তি এত্থ ৰুত্তআপো. সেসন্তি আরম্মণসম্মুতিআপানং সরূপৰিভাৰনং. ‘‘আপং ¶ আপতো পজানাতী’’তিআদিপাল়িযা অত্থৰিভাৰনঞ্চেৰ তত্থ তত্থ মঞ্ঞনাৰিভাগদস্সনঞ্চ পথৰিযং ৰুত্তসদিসমেৰাতি. তত্থ ‘‘পথৰীকসিণমেকো সঞ্জানাতী’’তিআদিনা (দী. নি. ৩.৩৬০; অ. নি. ১০.২৫) ৰুত্তং, ইধ ‘‘আপোকসিণমেকো সঞ্জানাতী’’তিআদিনা ৰত্তব্বং. তত্থ চ ‘‘পথৰীতি সঞ্জানাতী’’তি ৰুত্তং, ইধ পন ‘‘আপোতি সঞ্জানাতী’’তিআদিনা ৰত্তব্বন্তি এৰমাদি এৰ ৰিসেসো. সেসং তাদিসমেৰ. তেন ৰুত্তং ‘‘পথৰিযং ৰুত্তসদিসমেৰা’’তি. যো পনেত্থ ৰিসেসো, তং দস্সেতুং ‘‘কেৰল’’ন্তিআদি ৰুত্তং. তত্থ মূলরসোতি মূলং পটিচ্চ নিব্বত্তরসো. খন্ধরসাদীসুপি এসেৰ নযো. খীরাদীনি পাকটানেৰ. যথা পন ভেসজ্জসিক্খাপদে (পারা. ৬১৮-৬২৫), ন এৰমিধ নিযমো অত্থি. যং কিঞ্চি খীরং খীরমেৰ. সেসেসুপি এসেৰ নযো. ভুম্মানীতি আৰাটাদীসু ঠিতউদকানি. অন্তলিক্খানীতি পথৰিং অপ্পত্তানি ৰস্সোদকানি, পত্তানি পন ভুম্মানেৰ. এৰং ৰুত্তা চাতি চ-সদ্দেন হিমোদককপ্পৰিনাসকউদকপথৰিযাঅন্তোউদকপথৰীসন্ধারকউদকাদিং পুব্বে অৰুত্তম্পি সমুচ্চিনোতি.

তেজং তেজতোতি এত্থ তেজনট্ঠেন তেজো, তেজনং নাম দহনপচনাদিসমত্থং নিসানং, যং উণ্হত্তন্তি ৰুচ্চতি. যেন চাতি যেন তেজোগতেন ¶ কুপিতেন. সন্তপ্পতীতি অযং কাযো সমন্ততো তপ্পতি একাহিকজরাদিভাৰেন উসুমজাতো হোতি. যেন চ জীরীযতীতি যেন অযং কাযো জীরীযতি, ইন্দ্রিযৰেকল্লতং বলপরিক্খযং ৰলিতাদিভাৰঞ্চ পাপুণাতি. যেন চ পরিডয্হতীতি যেন কুপিতেন অযং কাযো পরিতো ডয্হতি, সো চ পুগ্গলো ডয্হামীতি সতধোতসপ্পিগোসীতচন্দনাদিলেপঞ্চেৰ তালৰণ্টৰাতঞ্চ পচ্চাসীসতি. যেন চ অসিতপীতখাযিতসাযিতং সম্মা পরিণামং গচ্ছতীতি যেন অসিতং ৰা ওদনাদি, পীতং ৰা পানকাদি, খাযিতং ৰা পিঠখজ্জকাদি, সাযিতং ৰা অম্বপক্কমধুফাণিতাদি সম্মদেৰ পরিপাকং গচ্ছতি, রসাদিভাৰেন ৰিৰেকং গচ্ছতীতি অত্থো. এত্থ চ সরীরস্স পকতিউসুমং অতিক্কমিত্ৰা উণ্হভাৰো সন্তাপো, সরীরদহনৰসেন পৰত্তো মহাদাহো পরিদাহো, সতৰারং তাপেত্ৰা উদকে পক্খিপিত্ৰা উদ্ধটসপ্পি সতধোতসপ্পি, রসরুধিরমংসমেদঅট্ঠিঅট্ঠিমিঞ্জসুক্কা রসাদযো. তত্থ পুরিমা তযো তেজা চতুসমুট্ঠানা, পচ্ছিমো কম্মসমুট্ঠানোৰ.

তেজোভাৰং গতত্তা তেজোগতং. উস্মাতি উণ্হাকারো. উস্মাৰ উস্মাভাৰং গতত্তা উস্মাগতং. উসুমন্তি চণ্ডউসুমং. তদেৰ উসুমগতং, সভাৰেনেৰ উসুমভাৰং পত্তন্তি অত্থো. কট্ঠগ্গীতি কট্ঠুপাদানো অগ্গি. সকলিকগ্গীআদীসুপি এসেৰ নযো. সঙ্কারগ্গীতি কচৰরং পটিচ্চ উপ্পন্নঅগ্গি. ইন্দগ্গীতি অসনিঅগ্গি. সন্তাপোতি জালায ৰা ৰীতচ্চিতঙ্গারানং ৰা সন্তাপো ¶ . সূরিযসন্তাপোতি আতপো. কট্ঠসন্নিচযসন্তাপোতি কট্ঠরাসিং পটিচ্চ উপ্পন্নসন্তাপো. সেসেসুপি এসেৰ নযো. এৰং ৰুত্তা চাতি. চ-সদ্দেন পেতগ্গিকপ্পৰিনাসকগ্গিনিরযগ্গিআদিকে অৰুত্তেপি সমুচ্চিনোতি.

ৰাযং ৰাযতোতি এত্থ ৰাযনট্ঠেন ৰাযো. কিমিদং ৰাযনং নাম? ৰিত্থম্ভনং, সমুদীরণং ৰা, ৰাযনং গমনন্তি একে. উদ্ধঙ্গমা ৰাতাতি উগ্গারহিক্কাদিপৰত্তকা উদ্ধং আরোহনৰাতা. অধোগমা ৰাতাতি উচ্চারপস্সাৰাদিনীহরণতা অধো ওরোহনৰাতা. কুচ্ছিসযা ৰাতাতি অন্তানং বহিৰাতা. কোট্ঠাসযা ৰাতাতি অন্তানং অন্তোৰাতা. অঙ্গমঙ্গানুসারিনো ৰাতাতি ধমনীজালানুসারেন সকলসরীরে অঙ্গমঙ্গানি অনুসটা সমিঞ্জনপসারণাদিনিব্বত্তকা ৰাতা ¶ . সত্থকৰাতাতি সন্ধিবন্ধনানি কত্তরিযা ছিন্দন্তা ৰিয পৰত্তৰাতা. খুরকৰাতাতি খুরেন ৰিয হদযমংসছেদনফালনকৰাতা. উপ্পলকৰাতাতি হদযমংসস্স সমুপ্পাটনকৰাতা. অস্সাসোতি অন্তোপৰিসনকনাসিকাৰাতো. পস্সাসোতি বহিনিক্খমননাসিকাৰাতো. এত্থ চ পুরিমা সব্বে চতুসমুট্ঠানা, অস্সাসপস্সাসা চিত্তসমুট্ঠানাৰ.

ৰাযোগতন্তি ৰাযোৰ ৰাযোগতং, সভাৰেনেৰ ৰাযোভাৰং পত্তন্তি অত্থো. থম্ভিতত্তং রূপস্সাতি অৰিনিব্ভোগরূপস্স থম্ভিতভাৰো. পুরত্থিমা ৰাতাতি পুরত্থিমদিসতো আগতা ৰাতা. পচ্ছিমাদীসুপি এসেৰ নযো. সরজাদীসু সহ রজেন সরজা, রজৰিরহিতা সুদ্ধা অরজা. সীতউতুসমুট্ঠানা, সীতৰলাহকন্তরে ৰা জাতা সীতা. উণ্হউতুসমুট্ঠানা, উণ্হৰলাহকন্তরে ৰা জাতা উণ্হা. পরিত্তাতি মন্দা তনুকৰাতা. অধিমত্তাতি বলৰৰাতা. কাল়াতি কাল়ৰলাহকন্তরে সমুট্ঠিতা. যেহি অব্ভাহতো ছৰিৰণ্ণো কাল়কো হোতি, তেসং এতং অধিৰচনন্তিপি একে. ৰেরম্ভৰাতাতি যোজনতো উপরি ৰাযনৰাতা. পক্খৰাতাতি অন্তমসো মক্খিকাযপি পক্খাযূহনৰাতা. সুপণ্ণৰাতাতি গরুল়ৰাতা. কামং চেতেপি পক্খৰাতাৰ, উস্সদৰসেন পন ৰিসুং গহিতা. তালৰণ্টৰাতাতি তালৰণ্ণেহি কতেন, অঞ্ঞেহি ৰা কতেন কেনচি মণ্ডলসণ্ঠানেন সমুট্ঠাপিতৰাতা. ৰিধূপনৰাতাতি বীজনপত্তকেন সমুট্ঠাপিতৰাতা. ইমানি চ তালৰণ্টৰিধূপনানি অনুপ্পন্নম্পি ৰাতং উপ্পাদেন্তি, উপ্পন্নম্পি পরিৰত্তেন্তি. ইধাপি চ-সদ্দো উদকসন্ধারকৰাতকপ্পৰিনাসকৰাতজালাপেল্লনকৰাতাদিকে অৰুত্তেপি সমুচ্চিনোতি. এত্থ চ ‘‘আপং মঞ্ঞতী’’তিআদীসু যস্মা তীহি মঞ্ঞনাহি – ‘‘অহং আপোতি মঞ্ঞতি, মম আপোতি মঞ্ঞতী’’তিআদিনা পথৰীৰারে ৰুত্তনযেন সক্কা মঞ্ঞনাৰিভাগো ৰিভাৰেতুন্তি ৰুত্তং ‘‘সেসং ৰুত্তনযমেৰা’’তি. তস্মা তত্থ ৰুত্তনযানুসারেন ইমেসু তীসু ৰারেসু যথারহং মঞ্ঞনাৰিভাগো ৰিভাৰেতব্বো.

এত্তাৰতাতি ¶ এত্তকেন ইমিনা চতুৰারপরিমাণেন দেসনাৰিসেসেন. চ-সদ্দো ব্যতিরেকো. তেন ৰক্খমানংযেৰ ৰিসেসং জোতেতি. য্ৰাযন্তি যো অযং লক্খণো নাম হারো ৰুত্তোতি সম্বন্ধো. সো পন লক্খণহারো যংলক্খণো তত্থ ৰুত্তো, তং দস্সেতুং ¶ ‘‘ৰুত্তম্হী’’তিআদি ৰুত্তং. তত্থ ৰুত্তম্হি একধম্মেতি কুসলাদীসু খন্ধাদীসু ৰা যস্মিং কস্মিঞ্চি একধম্মে সুত্তে সরূপতো নিদ্ধারণৰসেন ৰা কথিতে. যে ধম্মা একলক্খণা তেনাতি যে কেচি ধম্মা কুসলাদিভাৰেন, রূপক্খন্ধাদিভাৰেন ৰা তেন ৰুত্তধম্মেন সমানলক্খণা. ৰুত্তা ভৰন্তি সব্বেতি সব্বেপি কুসলাদিসভাৰা, খন্ধাদিসভাৰা ৰা ধম্মা সুত্তে অৰুত্তাপি তায সমানলক্খণতায ৰুত্তা ভৰন্তি, আনেত্ৰা সংৰণ্ণনৰসেনাতি অধিপ্পাযো.

এত্থ চ একলক্খণাতি সমানলক্খণা ৰুত্তা. তেন সহচরিতা সমানকিচ্চতা সমানহেতুতা সমানফলতা সমানারম্মণতাতি এৰমাদীহিপি অৰুত্তানং ৰুত্তানং ৰিয নিদ্ধারণং ৰেদিতব্বং. ইতীতি ইমিনা পকারেন. তেনাহ ‘‘এৰং নেত্তিযং লক্খণো নাম হারো ৰুত্তো’’তি, নেত্তিপাল়িযং (নেত্তি. ২৩) পন ‘‘যে ধম্মা একলক্খণা কেচি সো হারো লক্খণো নামা’’তি পাঠো আগতো. তস্স ৰসেনাতি তস্স লক্খণহারস্স ৰসেন. রূপলক্খণং অনতীতত্তাতি রুপ্পনসভাৰেন সমানসভাৰত্তা. ৰদন্তেন ভগৰতা. এতাতি ‘‘রূপং অত্ততো সমনুপস্সতী’’তি এৰং ৰুত্তদিট্ঠী. এত্থ চ সক্কাযদিট্ঠিমঞ্ঞনাদস্সনেনেৰ সকলরূপৰত্থুকা তণ্হামানমঞ্ঞনাপি দস্সিতা এৰাতি দট্ঠব্বং. তথা হি ৰুত্তং ‘‘তস্মিংযেৰ পনস্স দিট্ঠিমঞ্ঞনায মঞ্ঞিতে ৰত্থুস্মিং সিনেহং মানঞ্চ উপ্পাদযতো তণ্হামানমঞ্ঞনাপি ৰেদিতব্বা’’তি. অথ ৰা পথৰিং আপং তেজং ৰাযং মেতি মঞ্ঞতি অভিনন্দতীতি চ ৰদন্তেন ৰুত্তনযেনেৰ সকলরূপৰত্থুকা তণ্হামঞ্ঞনা তদনুসারেন মানমঞ্ঞনাপি ৰুত্তাৰ হোতীতি এৰম্পেত্থ ইতরমঞ্ঞনাপি নিদ্ধারেতব্বা.

আপোৰারাদিৰণ্ণনা নিট্ঠিতা.

ভূতৰারাদিৰণ্ণনা

৩. ‘‘পথৰিং মঞ্ঞতি, পথৰিযা মঞ্ঞতী’’তিআদীহি পদেহি ‘‘রূপং অত্ততো সমনুপস্সতি, রূপস্মিং অত্তানং সমনুপস্সতী’’তিআদীনং সক্কাযদিট্ঠীনং নিদ্ধারিতত্তা ৰুত্তং ‘‘এৰং রূপমুখেন সঙ্খারৰত্থুকং মঞ্ঞনং ৰত্ৰা’’তি ¶ . তেসু সঙ্খারেসু সত্তেসুপীতি তদুপাদানেসুপি সত্তেসু ¶ . ধাতূসূতি পথৰীআদীসু চতূসু ধাতূসু. ‘‘জাতং ভূতং সঙ্খত’’ন্তিআদীসু (দী. নি. ২.২০৭; সং. নি. ৫.৩৭৯) ভূত-সদ্দো উপ্পাদে দিস্সতি, সউপসগ্গো পন ‘‘পভূতমরিযো পকরোতি পুঞ্ঞ’’ন্তিআদীসু ৰিপুলে, ‘‘যেভুয্যেন ভিক্খূনং পরিভূতরূপো’’তিআদীসু হিংসনে, ‘‘সম্ভূতো সাণৰাসী’’তিআদীসু (চূল়ৰ. ৪৫০) পঞ্ঞত্তিযং, ‘‘অভিভূতো মারো ৰিজিতো সঙ্গামো’’তিআদীসু ৰিমথনে, ‘‘পরাভূতরূপো খো অযং অচেলো পাথিকপুত্তো’’তিআদীসু (দী. নি. ৩.২৩, ২৫, ৩১, ৩২) পরাজযে, ‘‘অনুভূতং সুখদুক্খ’’ন্তিআদীসু ৰেদিযনে, ‘‘ৰিভূতং ৰিভাৰিতং পঞ্ঞাযা’’তিআদীসু পাকটীকরণে দিস্সতি. তে সব্বে রুক্খাদীসূতি. আদি-সদ্দেন সঙ্গহিতাতি দট্ঠব্বা. ‘‘কালো ঘসতি ভূতানীতি (জা. ১.২.১৯০), ভূতা লোকে সমুস্সয’’ন্তি (দী. নি. ২.২২০; সং. নি. ১.১৮৬) চ আদীসু অৰিসেসেন সত্তৰাচকোপি ভূতসদ্দো, উপরি দেৰাদিপদেহি সত্তৰিসেসানং গহিতত্তা ইধ তদৰসিট্ঠা ভূতসদ্দেন গয্হন্তীতি আহ ‘‘নো চ খো অৰিসেসেনা’’তি. তেনেৰাহ – ‘‘চাতুমহারাজিকানঞ্হি হেট্ঠা সত্তা ইধ ভূতাতি অধিপ্পেতা’’তি. যো হি সত্তনিকাযো পরিপুণ্ণযোনিকো চতূহিপি যোনীহি নিব্বত্তনারহো, তত্থাযং ভূতসমঞ্ঞা অণ্ডজাদিৰসেন ভৰনতো.

ভূতেতি ৰুত্তদেসআদেসিতে ভূতে. ভূততো সঞ্জানাতীতি ইমিনা ‘‘ভূতা’’তি লোকৰোহারং গহেত্ৰা যথা তত্থ তণ্হাদিমঞ্ঞনা সম্ভৰন্তি, এৰং ৰিপরীতসঞ্ঞায সঞ্জাননং পকাসীযতি. স্ৰাযমত্থো হেট্ঠা ‘‘পথৰিতো সঞ্জানাতী’’তি এত্থ ৰুত্তনযানুসারেন সক্কা জানিতুন্তি আহ ‘‘ৰুত্তনযমেৰা’’তি. যথা সুদ্ধাৰাসা সব্বদা অভাৰতো ইমং দেসনং নারুল়্হা, এৰং নেরযিকাপি সব্বমঞ্ঞনানধিট্ঠানতো. এতেনেৰ একচ্চপেতানম্পেত্থ অসঙ্গহো দট্ঠব্বো. অপরে পন ‘‘দিট্ঠিমঞ্ঞনাধিট্ঠানতো তেসম্পেত্থ সঙ্গহো ইচ্ছিতোযেৰা’’তি ৰদন্তি. ‘‘সমঙ্গিভূতং পরিচারেন্ত’’ন্তিআদিনা সুত্তে ৰুত্তনযেন. রজ্জতীতি ‘‘সুভা সুখিতা’’তি ৰিপল্লাসগ্গাহেন তত্থ রাগং জনেতি. এৰমেত্থ রজ্জন্তো চ ন কেৰলং দস্সনৰসেনেৰ, সৰনাদিৰসেনপি রজ্জতেৰাতি দস্সেন্তো ‘‘দিস্ৰাপি…পে… উত্ৰাপী’’তি আহ. তত্থ ঘাযনাদিৰসেন রজ্জনং তেহি অনুভূতগন্ধমালাদিৰসেন চেৰ ৰিসভাগৰত্থুভূতানং তেসং ¶ পরিভোগৰসেন চ যথানুভৰং অনুস্সরণৰসেন চ ৰেদিতব্বং. এৰং ভূতে তণ্হামঞ্ঞনায মঞ্ঞতীতি ৰুত্তনযেন ভূতে পটিচ্চ ছন্দরাগং জনেন্তো তেসং পটিপত্তিং অস্সাদেন্তো অভিনন্দন্তো অভিৰদন্তো অজ্ঝোসায তিট্ঠন্তো ‘‘ঈদিসী অৰত্থা মম অনাগতমদ্ধানং সিযা’’তিআদিনা ৰা পন নযেন তত্থ নন্দিং সমন্নানেন্তো ভূতে তণ্হামঞ্ঞনায মঞ্ঞতীতি অত্থো. অপ্পটিলদ্ধস্স খত্তিযমহাসালাদিভাৰস্স, সম্পত্তিং ৰিপত্তিন্তি জাতিৰসেন উক্কট্টনিহীনতং. দহতীতি ঠপেতি. যো ¶ এৰরূপো মানোতি যো এসো ‘‘অযং পুব্বে মযা সদিসো, ইদানি অযং সেট্ঠো অযং হীনতরো’’তি উপ্পন্নো মানো. অযং ৰুচ্চতি মানাতিমানোতি অযং ভারাতিভারো ৰিয পুরিমং সদিসমানং উপাদায মানাতিমানো নামাতি অত্থো.

নিচ্চাতিআদীসু উপ্পাদাভাৰতো নিচ্চা, মরণাভাৰতো ধুৰা, সব্বদা ভাৰতো সস্সতা. অনিচ্চপটিপক্খতো ৰা নিচ্চা, থিরভাৰতো ধুৰা, সস্সতিসমতায সস্সতা, জরাদিৰসেন ৰিপরিণামস্স অভাৰতো অৰিপরিণামধম্মাতি মঞ্ঞতি. সব্বে সত্তাতি ওট্ঠগোণগদ্রভাদযো অনৰসেসা সঞ্জনট্ঠেন সত্তা. সব্বে পাণাতি ‘‘একিন্দ্রিযো পাণো দ্ৰিন্দ্রিযো পাণো’’তিআদিৰসেন ৰুত্তা অনৰসেসা পাণনট্ঠেন পাণা. সব্বে ভূতাতি অনৰসেসা অণ্ডকোসাদীসু ভূতা সঞ্জাতাতি ভূতা. সব্বে জীৰাতি সালিযৰগোধূমাদযো অনৰসেসা জীৰনট্ঠেন জীৰা. তেসু হি সো ৰিরূহভাৰেন জীৰসঞ্ঞী. অৰসা অবলা অৰীরিযাতি তেসং অত্তনো ৰসো ৰা বলং ৰা ৰীরিযং ৰা নত্থীতি দস্সেতি. নিযতিসঙ্গতিভাৰপরিণতাতি এত্থ নিযতীতি. নিযততা, অচ্ছেজ্জসুত্তাৰুতঅভেজ্জমণি ৰিয অৰিজহিতপকতিতা. সঙ্গতীতি ছন্নং অভিজাতীনং তত্থ সঙ্গমো. ভাৰোতি সভাৰোযেৰ, কণ্ডকানং তিখিণতা, কপিট্ঠফলাদীনং পরিমণ্ডলাদিতা, মিগপক্খীনং ৰিচিত্তৰণ্ণাদিতাতি এৰমাদিকো. এৰং নিযতিযা চ সঙ্গতিযা চ ভাৰে চ পরিণতা নানপ্পকারতং পত্তা. যেন হি যথা ভৰিতব্বং, সো তথেৰ ভৰতি. যেন ন ভৰিতব্বং, সো ন ভৰতীতি দস্সেতি. ছস্ৰেৰাভিজাতীসূতি কণ্হাভিজাতিআদীসু ছসু এৰ অভিজাতীসু ঠত্ৰা সুখঞ্চ দুক্খঞ্চ পটিসংৰেদেন্তি, অঞ্ঞা সুখদুক্খভূমি নত্থীতি দস্সেতি. ৰা-সদ্দেন অন্তাদিভেদে দিট্ঠাভিনিৰেসে সঙ্গণ্হাতি.

উপপত্তিন্তি ¶ ইমিনা তস্মিং তস্মিং সত্তনিকাযে ভূতানং সহব্যতং আকঙ্খতীতি দস্সেতি. সুখুপ্পত্তিন্তি ইমিনা পন তত্থ তত্থ উপ্পন্নস্স সুখুপ্পত্তিং. একচ্চে ভূতে নিচ্চাতিআদিনা একচ্চসস্সতিকদিট্ঠিং দস্সেতি. অহম্পি ভূতেসু অঞ্ঞতরোস্মীতি ইমিনা পন চতুত্থং একচ্চসস্সতিকৰাদং দস্সেতি.

যতো কুতোচীতি ইস্সরপুরিসাদিভেদতো যতো কুতোচি. একা তণ্হামঞ্ঞনাৰ লব্ভতীতি ইধাপি হেট্ঠা ৰুত্তনযেন ইতরমঞ্ঞনানম্পি সম্ভৰো নিদ্ধারেতব্বো. ৰুত্তপ্পকারেযেৰ ভূতে তণ্হাদিট্ঠীহি অভিনন্দতীতিআদিনা ৰত্তব্বত্তা আহ ‘‘ৰুত্তনযমেৰা’’তি. যোজনা কাতব্বাতি ‘‘যো ভূতপঞ্ঞত্তিযা উপাদানভূতে খন্ধে পরিজানাতি, সো তীহি পরিঞ্ঞাহি পরিজানাতী’’তিআদিনা যোজনা কাতব্বা. অপরে পনেত্থ ভূতগামোপি ভূত-সদ্দেন সঙ্গহিতোতি রুক্খাদিৰসেনপি ¶ মঞ্ঞনাৰিভাগং যোজেত্ৰা দস্সেন্তি, তথা মহাভূতৰসেনপি, তং অট্ঠকথাযং নত্থি.

ভূমিৰিসেসাদিনা ভেদেনাতি ভূমিৰিসেসউপপত্তিৰিসেসাদিৰিভাগেন. ইদ্ধিযাতি পুঞ্ঞৰিসেসনিব্বত্তেন আনুভাৰেন. কিঞ্চাপি দেৰ-সদ্দো ‘‘ৰিদ্ধে ৰিগতৰলাহকে দেৰে’’তিআদীসু (সং. নি. ১.১১০; ৩.১০২; ৫.১৪৬-১৪৮; ম. নি. ১.৪৮৬; অ. নি. ১০.১৫; ইতিৰু. ২৭) অজটাকাসে আগতো, ‘‘দেৰো চ থোকং থোকং ফুসাযতী’’তিআদীসু মেঘে, ‘‘অযঞ্হি দেৰ কুমারো’’তিআদীসু (দী. নি. ২.৩৪, ৩৫, ৩৬) খত্তিযে আগতো, ‘‘পঞ্চহি কামগুণেহি সমপ্পিতো সমঙ্গিভূতো পরিচারেতি দেৰো মঞ্ঞে’’তিআদীসু (দী. নি. ১.১৮৩; ম. নি. ২.২১১) ৰিয ইধ উপপত্তিদেৰেসু আগতো, দেৰ-সদ্দেন পন ৰত্তব্বসত্তে অনৰসেসতো উদ্ধরিত্ৰা ততো ইধাধিপ্পেতে দস্সেতুং ‘‘তে তিৰিধা’’তিআদি ৰুত্তং. সেসা ছ কামাৰচরা ইধ দেৰাতি অধিপ্পেতা ইতরেসং পদন্তরেহি নিৰত্তিতত্তাতি অধিপ্পাযো. ভূতা দেৰাতি গহিতেসু সত্তেসু তণ্হাদিমঞ্ঞনানং পৰত্তাকারেনপি তিৰিধলক্খণন্তি আহ ‘‘ভূতৰারে ৰুত্তনযেন ৰেদিতব্বা’’তি.

‘‘অঞ্ঞতরস্স উপাসকস্স পজাপতি অভিরূপা হোতী’’তিআদীসু (পারা. ১৬৮) পজাপতি-সদ্দো ঘরণিযং আগতো, ‘‘পজাপতি কামদাযী সুৰণ্ণৰণ্ণা মে পজা হোতূ’’তিআদীসু দিট্ঠিগতিকপরিকপ্পিতে, ‘‘পজাপতিস্স দেৰরাজস্স ¶ ধজগ্গং উল্লোকেয্যাথা’’তিআদীসু (সং. নি. ১.২৪৯) দেৰজেট্ঠকে, ইধ পন অধিপতীতি ৰদন্তি, তং উপরি ব্রহ্মুনো গয্হমানত্তা তেসং মতিমত্তং. দেৰানন্তি চাতুমহারাজিকাদিদেৰানং. মহারাজাদীনন্তি আদি-সদ্দেন সক্কসুযামসন্তুস্সিতসুনিম্মিতৰসৰত্তিনো গহিতা. তেসন্তি মহারাজাদীনং. সত্তসঙ্খাতাযাতি কামভূমিযং সত্তসঙ্খাতায. পজাপতিন্তি পজাপতিভাৰং. পজাপতিভাৰেন হি মানং জপ্পেন্তো পজাপতিং মানমঞ্ঞনায মঞ্ঞতীতি ৰুত্তো.

একা দিট্ঠিমঞ্ঞনাৰ যুজ্জতীতি ৰুত্তং, পজাপতিনো পন সমিপতং সলোকতং ৰা আকঙ্খতো, তথাভাৰায চিত্তং পণিদহতো, তথালদ্ধব্বায সম্পত্তিযা অত্তনো সেয্যাদিভাৰং দহতো চ তণ্হামানমঞ্ঞনাপি সম্ভৰন্তীতি সক্কা ৰিঞ্ঞাতুং. যে চ ধম্মাতি আযুৰণ্ণাদিকে ৰদতি. পজাপতিন্তি এত্থাপি হেট্ঠা ৰুত্তনযেন ইতরমঞ্ঞনানম্পি সম্ভৰো ৰেদিতব্বো.

ব্রূহিতোতি ¶ পরিৰুদ্ধো. গুণৰিসেসেহীতি ঝানাদীহি ৰিসিট্ঠেহি গুণেহি উত্তরিমনুস্সধম্মতায. ব্রহ্ম-সদ্দস্স সতিপি অৰিসেসতো ৰিসিট্ঠৰাচকত্তে যত্থ যত্থ পনস্স গুণৰিসেসযুত্তাদিরূপা পৰত্তি, তং দস্সেতুং ‘‘অপিচা’’তিআদি ৰুত্তং. সহস্সোতি সহস্সিযা লোকধাতুযা অধিপতিভূতো. পঠমাভিনিব্বত্তোতি পণীতেন পঠমঝানেন নিব্বত্তো, পঠমজ্ঝানভূমিযং ৰা পঠমং অভিনিব্বত্তো. গহিতাতি ৰেদিতব্বা পধানগ্গহণেন অপ্পধানানম্পি কেনচি সম্বন্ধেন গহিতভাৰসিদ্ধিতো. এত্থ চ ব্রহ্মাতি মহাব্রহ্মা অধিপ্পেতো. সো হি ৰণ্ণৰন্ততায চেৰ দীঘাযুকতায চ ব্রহ্মপারিসজ্জাদীহি মহন্তো ব্রহ্মাতি মহাব্রহ্মা, তস্স পন পুরোহিতট্ঠানে ঠিতাতি ব্রহ্মপুরোহিতা, পরিসাযং ভৰা পরিচারকাতি ব্রহ্মপারিসজ্জাতি ৰেদিতব্বা. উক্কট্ঠেকপুগ্গলভাৰতো পজাপতিস্মিং ৰিয ব্রহ্মনি মঞ্ঞনা ৰত্ততীতি ৰুত্তং ‘‘পজাপতিৰারে ৰুত্তনযেনেৰ ৰেদিতব্বা’’তি. তথা হি বহুপুগ্গলভাৰসামঞ্ঞতো আভস্সরৰারাদীনং ভূতৰারসদিসতা ৰুত্তা.

যথাৰুত্তপভায আভাসনসীলা ৰা আভস্সরা. একতলৰাসিনোতি ইদং ঝানন্তরভূমীনং ৰিয হেট্ঠুপরিভাৰাভাৰতো ৰুত্তং, ঠানানি ¶ পন নেসং পরিচ্ছিন্নানেৰ. আভস্সরেহি পরিত্তা আভা এতেসন্তি পরিত্তাভা. অপ্পমাণা আভা এতেসন্তি অপ্পমাণাভা.

সুভাতি সোভনা পভা. কঞ্চনপিণ্ডো ৰিয সস্সিরিকা কঞ্চনপিণ্ডসস্সিরিকা. তত্থ সোভনায পভায কিণ্ণা সুভাকিণ্ণাতি ৰত্তব্বে ভা-সদ্দস্স রস্সত্তং, অন্তিম-ণ-কারস্স হ-কারঞ্চ কত্ৰা ‘‘সুভকিণ্হা’’তি ৰুত্তা. সুভাতি চ একগ্ঘনা নিচ্চলা পভা ৰুচ্চতি, পরিত্তা সুভা এতেসন্তি পরিত্তসুভা. অপ্পমাণা সুভা এতেসন্তি অপ্পমাণসুভা.

ৰিপুলফলাতি ৰিপুলসন্তসুখাযুৰণ্ণাদিফলা.

সতিপি দেৰব্রহ্মাদীনং পুঞ্ঞফলেন ঝানফলেন চ পটিপক্খাভিভৰে যেসং পন পুথুজ্জনঅসঞ্ঞসত্তেসু অভিভূৰোহারো পাকটো নিরুল়্হো চ, তেসং ৰসেনাযং দেসনা পৰত্তাতি দস্সেন্তো আহ ‘‘অসঞ্ঞভৰস্সেতং অধিৰচন’’ন্তি. যথা পজাপতিৰারে ‘‘ইধেকচ্চো পজাপতিস্মিংযেৰা’’তিআদিনা মঞ্ঞনাপৰত্তি দস্সিতা, তথা ইধাপি তং দস্সেতুং সক্কাতি আহ ‘‘সেসং পজাপতিৰারে ৰুত্তনযমেৰা’’তি.

ভূতৰারাদিৰণ্ণনা নিট্ঠিতা.

আকাসানঞ্চাযতনৰারাদিৰণ্ণনা

৪. এৰং ¶ সত্তৰসেন ভূমিক্কমদস্সনে সুদ্ধাৰাসানং অগ্গহণে কারণং নিদ্ধারেন্তো ‘‘এৰং ভগৰা’’তিআদিমাহ. তত্থ অনাগামিখীণাসৰাতি অনাগামিনো চ খীণাসৰা চ. কিঞ্চাপি সুদ্ধাৰাসা অত্থেৰ অনেককপ্পসহস্সাযুকা, উক্কংসপরিচ্ছেদতো পন সোল়সকপ্পসহস্সাযুকাৰ, ন ততো পরন্তি আহ ‘‘কতিপযকপ্পসহস্সাযুকা’’তি. কামরূপভৰেসু পৰত্তমানাপি আকাসানঞ্চাযতনাদিধম্মা অরূপাৰচরভাৰতো তংভূমিকৰোহারং ন লভন্তীতি ‘‘তত্রূপপন্নাযেৰা’’তি অৰধারেত্ৰা ৰুত্তং. অভিভূৰারে ৰুত্তনযেন ৰেদিতব্বা যথারহন্তি অধিপ্পাযো. ন হেত্থ ৰণ্ণৰন্ততাদি সম্ভৰতীতি. পজাপতিৰারে ৰুত্তনযেনাতি ¶ এত্থ ‘‘অহমস্মি অরূপো পহীনরূপপটিঘসঞ্ঞো’’তিআদিনা মানমঞ্ঞনা ৰেদিতব্বা.

আকাসানঞ্চাযতনৰারাদিৰণ্ণনা নিট্ঠিতা.

দিট্ঠসুতৰারাদিৰণ্ণনা

৫. রূপমুখেন মঞ্ঞনাৰত্থুদস্সনং সঙ্খেপোতি কত্ৰা ৰুত্তং ‘‘ৰিত্থারতোপী’’তি. তম্পি হি ‘‘যত্থ নেৰ পথৰী, ন আপো, ন তেজো, ন ৰাযো, ন আকাসানঞ্চাযতন’’ন্তিআদিগ্গহণং ৰিয সঙ্খেপতো পঞ্চৰোকারভৰদস্সনং হোতীতি.

দিট্ঠন্তি যং চক্খুদ্ৰারেন কতদস্সনকিরিযাসমাপনং, যঞ্চ চক্খু দ্ৰযং পস্সতি পস্সিস্সতি সতি সম্ভৰে পস্সেয্য, তং সব্বকালন্তি ৰিসেসৰচনিচ্ছায অভাৰতো দিট্ঠন্তেৰ ৰুত্তং যথা ‘‘দুদ্ধ’’ন্তি. তেনাহ ‘‘রূপাযতনস্সেতং অধিৰচন’’ন্তি. অযঞ্চ নযো সুতাদীসুপি যোজেতব্বো. সত্তাতি রূপাদীসু সত্তা ৰিসত্তাতি সত্তা. সঞ্জনট্ঠেন সামঞ্ঞসদ্দোপি চেস সত্ত-সদ্দো ‘‘ইত্থিরূপে’’তি ৰিসযৰিসেসিতত্তা ইধ পুরিসৰাচকো দট্ঠব্বো. রত্তাতি ৰত্থং ৰিয রঙ্গজাতেন চিত্তস্স ৰিপরিণামকারকেন ছন্দরাগেন রত্তা সারত্তা. গিদ্ধাতি অভিকঙ্খনসভাৰেন অভিগিজ্ঝনেন গিদ্ধা গেধং আপন্না. গধিতাতি গন্থিতা ৰিয লোভেন দুম্মোচনীযভাৰেন আরম্মণে পটিবদ্ধা. মুচ্ছিতাতি কিলেসৰসেন ৰিসঞ্ঞীভূতা ৰিয অনঞ্ঞকিচ্চা মুচ্ছং মোহং আপন্না. অজ্ঝোসন্নাতি ৰিসযে অঞ্ঞসাধারণে ৰিয কত্ৰা গিলিত্ৰা পরিনিট্ঠাপেত্ৰা ৰিয ঠিতা. ইমিনাতি সুৰণ্ণৰণ্ণাদিআকারেন. মঙ্গলং অমঙ্গলন্তি ঈদিসং দিট্ঠং মঙ্গলং, ঈদিসং অমঙ্গলন্তি ¶ . রূপস্মিং অত্তানং সমনুপস্সননযেনাতি ইদং ৰেদনাদিঅরূপধম্মে, রূপাযতনৰিনিমুত্তসব্বধম্মে ৰা অত্ততো গহেত্ৰা ততো অজ্ঝত্তিকং, বাহিরং ৰা রূপাযতনং তস্সোকাসভাৰেন পরিকপ্পেত্ৰা ‘‘সো খো পন মে অযং অত্তা ইমস্মিং রূপাযতনে’’তি মঞ্ঞন্তো দিট্ঠস্মিং মঞ্ঞতীতি ইমং নযং সন্ধায ৰুত্তং. ‘‘পথৰিতো মঞ্ঞতী’’তিআদীসু যথা ‘‘সউপকরণস্স অত্তনো ৰা পরস্স ¶ ৰা’’তিআদিমঞ্ঞনাপৰত্তি দস্সিতা, এৰং ‘‘দিট্ঠতো মঞ্ঞতী’’তিআদীসু সক্কা তং দস্সেতুন্তি আহ ‘‘তেসং পথৰীৰারে ৰুত্তনযেনেৰ ৰেদিতব্ব’’ন্তি.

আহচ্চাতি ৰিসযং অন্ৰায, পত্ৰাতি অত্থো. তেনাহ ‘‘উপগন্ত্ৰা’’তি. অঞ্ঞমঞ্ঞসংসিলেসেতি চক্খুরূপসোতসদ্দা ৰিয দুরে অহুত্ৰা অঞ্ঞমঞ্ঞং অল্লিযনে.

মনসা ৰিঞ্ঞাতং কেৰলন্তি অত্থো. ইতরানিপি হি মনসা ৰিঞ্ঞাযন্তীতি. সেসেহি সত্তহি আযতনেহি পঞ্ঞত্তিযা অসঙ্গহিতত্তা তম্পি সঙ্গহেত্ৰা দস্সেতুং ‘‘ধম্মারম্মণস্স ৰা’’তি ৰুত্তং. দ্ৰীসুপি ৰিকপ্পেসু লোকুত্তরানম্পি সঙ্গহো আপন্নোতি আহ ‘‘ইধ পন সক্কাযপরিযাপন্নমেৰ লব্ভতী’’তি. ৰিত্থারোতি মঞ্ঞনানং পৰত্তনাকারৰিত্থারো. এত্থাতি এতেসু সুতৰারাদীসু.

দিট্ঠসুতৰারাদিৰণ্ণনা নিট্ঠিতা.

একত্তৰারাদিৰণ্ণনা

৬. সমাপন্নকৰারেনাতি সমাপন্নকপ্পৰত্তিযা, রূপাৰচরারূপাৰচরঝানপ্পৰত্তিযাতি অত্থো. সা হি একস্মিংযেৰ আরম্মণে একাকারেন পৰত্ততীতি কত্ৰা ‘‘একত্ত’’ন্তি ৰুচ্চতি, এৰঞ্চ কত্ৰা ৰিপাকজ্ঝানপ্পৰত্তিপি ইধ সমাপন্নকৰারগ্গহণেনেৰ গহিতাতি দট্ঠব্বা. অসমাপন্নকৰারেনাতি কামাৰচরধম্মপ্পৰত্তিযা. উপচারজ্ঝানেনপি হি চিত্তং ন সম্মা একত্তং গতন্তি ৰুচ্চতীতি.

যোজনাতি মঞ্ঞনাযোজনা. ভিন্দিত্ৰাতি ৰিভজিত্ৰা. সাসননযেনাতি পাল়িনযেন. তত্থ ‘‘একত্তং মঞ্ঞতী’’তিআদীসু ‘‘ৰেদনং অত্ততো সমনুপস্সতী’’তিআদিনা নযেন, ‘‘নানত্তং মঞ্ঞতী’’তিআদীসু ¶ পন ‘‘রূপং অত্ততো সমনুপস্সতী’’তিআদিনা নযেন ৰুত্তৰিধিং অনুগন্ত্ৰা মঞ্ঞনা ৰেদিতব্বা.

পথৰীৰারাদীসু ৰুত্তেন চ অট্ঠকথানযেনাতি ‘‘অহং ৰেদনাতি মঞ্ঞতি, মম ৰেদনাতি মঞ্ঞতী’’তিআদিনা, ‘‘অহং রূপন্তি মঞ্ঞতি, মম রূপন্তি মঞ্ঞতী’’তিআদিনা চাতি অত্থো. তেনাহ ‘‘যথানুরূপং ¶ ৰীমংসিত্ৰা’’তি, একত্তনানত্তভাৰেসু যো যোজনানযো সম্ভৰতি, তদনুরূপং ৰিচারেত্ৰাতি অত্থো. কেচীতি অভযগিরিৰাসিনো. অপরেতি সারসমাসাচরিযা. দিট্ঠাভিনিৰেসং ৰদন্তীতি সম্বন্ধো. পুথুজ্জনস্স মঞ্ঞনা নাম সক্কাযং ভিন্দিত্ৰাৰ যথাউপট্ঠিতৰিসযৰসেনেৰ পৰত্ততীতি ন তত্থ অযমেকত্তনযো অযং নানত্তনযোতি ৰিভাগৰসেনেৰ, একত্তসঞ্ঞী অত্তা হোতীতিআদীসু চ অত্তনো একত্তনানত্তসঞ্ঞিতা ৰুত্তা, ন পন একত্তং নানত্তন্তি এৰং পৰত্তস্স দিট্ঠাভিনিৰেসস্স একত্তনানত্তভাৰোতি এৰমেত্থ তদুভযস্স ইধ অনধিপ্পেতভাৰো দট্ঠব্বো.

যং যথাৰুত্তপুথুজ্জনো অনৰসেসতো গণ্হন্তো গহেতুং সক্কোতি, তং তস্স অনৰসেসতো গহেতব্বতং উপাদায ‘‘সব্ব’’ন্তি ৰুচ্চতীতি দস্সেন্তো ‘‘তমেৰা’’তি আহ, সক্কাযসব্বন্তি অত্থো. সব্বস্মিম্পি তেভূমকধম্মে আদীনৰদস্সনে অসতি নিব্বিদাভাৰতো অস্সাদানুপস্সনায তণ্হা ৰড্ঢতেৰাতি আহ ‘‘সব্বং অস্সাদেন্তো সব্বং তণ্হামঞ্ঞনায মঞ্ঞতী’’তি. ৰুত্তঞ্হেতং ভগৰতা – ‘‘সংযোজনিযেসু, ভিক্খৰে, ধম্মেসু অস্সাদানুপস্সিনো ৰিহরতো তণ্হা পৰড্ঢতী’’তি (সং. নি. ২.৫৩, ৫৭). ‘‘সব্বমিদং মযা নিম্মিত’’ন্তি তেন নিম্মিতমঞ্ঞনায অত্তানং সেয্যাদিতো দহন্তো তেন মানেন নিম্মিতং মঞ্ঞতিযেৰ নাম নিম্মিতমঞ্ঞনায ৰিনা তথামানুপ্পত্তিযা অভাৰতোতি আহ ‘‘অত্তনা নিম্মিতং মঞ্ঞন্তো সব্বং মানমঞ্ঞনায মঞ্ঞতী’’তি. সব্বং নত্থীতিআদিনা নযেনাতি আদি-সদ্দেন নিযতিৰাদাদিকে সঙ্গণ্হাতি. মহা মে অত্তাতি ইমিনা সব্বতো অত্তনো ৰিভূতিপৰত্তিৰাদং দস্সেতি. ‘‘সব্বং সব্বত্থক’’ন্তি দিট্ঠিৰসেন – ‘‘অহং সব্বস্মিং ময্হং কিঞ্চনং পলিবোধো সব্বস্মিং, পরো সব্বস্মিং পরস্স কিঞ্চনং পলিবোধো সব্বস্মি’’ন্তিআদিনা নযেনপেত্থ মঞ্ঞনা সম্ভৰতীতি দস্সেন্তো আহ ‘‘সেসং পথৰীৰারে ৰুত্তনযেন ৰেদিতব্ব’’ন্তি. অপিচ ‘‘সব্বোযং লোকো পুরিসমযো’’তি এৰংদিট্ঠিকো পুরিসসঙ্খাততো সব্বতো, অত্তনো উপ্পত্তিং ৰা নিগ্গমনং ৰা মঞ্ঞন্তো দিট্ঠিমঞ্ঞনায সব্বতো মঞ্ঞতি, তস্মিংযেৰ পন দিট্ঠিমঞ্ঞনায মঞ্ঞিতে ৰত্থুস্মিং সিনেহং মানঞ্চ উপ্পাদযতো তণ্হামঞ্ঞনা মানমঞ্ঞনা চ ৰেদিতব্বা. তংযেৰ পন সব্বং ময্হং অত্তা কত্তা ¶ সামীতি ৰা মঞ্ঞন্তো ‘‘সব্বং ¶ মে’’তি মঞ্ঞতি, তথাযং দিট্ঠিতণ্হাভিনন্দনাহি অভিনন্দন্তো সব্বং অভিনন্দতীতি এৰম্পেত্থ মঞ্ঞনানং পৰত্তি ৰেদিতব্বা.

তন্তি সক্কাযং. উক্কংসগতসুখসহিতঞ্হি খন্ধপঞ্চকং দিট্ঠধম্মনিব্বানৰাদী নিব্বানন্তি মঞ্ঞতি, তং পনত্থতো সক্কাযোযেৰাতি. একধাতি পঞ্চৰিধম্পি নিব্বানভাৰেন একজ্ঝং কত্ৰা ৰুত্তং. যতোতি যস্মা. পঞ্চহি কামগুণেহীতি মনাপিযরূপাদীহি পঞ্চহি কামকোট্ঠাসেহি, বন্ধনেহি ৰা. সমপ্পিতো সুট্ঠু অপ্পিতো অল্লীনো হুত্ৰা ঠিতো. সমঙ্গিভূতোতি সমন্নাগতো. পরিচারেতীতি তেসু কামগুণেসু কামকোট্ঠাসেসু যথাসুখং ইন্দ্রিযানি চারেতি সঞ্চারেতি ইতো চিতো চ উপনেতি. অথ ৰা লল়তি রমতি কীল়তি. এত্থ দ্ৰিধা কামগুণা মানুসকা চেৰ দিব্বা চ. মানুসকা চ মন্ধাতুকামগুণসদিসা, দিব্বা পরনিম্মিতৰসৰত্তিদেৰরাজস্স কামগুণসদিসা. এৰরূপে কামে উপগতানঞ্হি তে দিট্ঠধম্মনিব্বানসম্পত্তিং পঞ্ঞপেন্তি. তেনাহ ‘‘এত্তাৰতা খো…পে… হোতী’’তি. দিট্ঠধম্মোতি পচ্চক্খধম্মো ৰুচ্চতি, তত্থ তত্থ পটিলদ্ধত্তভাৰস্সেতং অধিৰচনং, দিট্ঠধম্মে নিব্বানং ইমস্মিংযেৰ অত্তভাৰে দুক্খৰূপসমনং দিট্ঠধম্মনিব্বানং. পরমং উত্তমং দিট্ঠধম্মনিব্বানন্তি পরমদিট্ঠধম্মনিব্বানং, তং পত্তো হোতীতি অত্থো. পঞ্চধা আগতন্তি যথাৰুত্তকামগুণসুখস্স চেৰ চতুব্বিধরূপাৰচরজ্ঝানসুখস্স চ ৰসেন পাল়িযং পঞ্চপ্পকারেন আগতং. নিব্বানং অস্সাদেন্তোতি পরমং সুখং নিস্সরণন্তি মঞ্ঞনায অস্সাদেন্তো.

‘‘ইমস্মিং নিব্বানে পত্তে ন জাযতি, ন জীরতি, ন মীযতী’’তি এৰম্পি নিব্বানস্মিং মঞ্ঞতি. ‘‘ইতো পরং পরমস্সাসভূতং নত্থী’’তি গণ্হন্তো নিব্বানতো মঞ্ঞতি. তযিদং নিব্বানং মযা অধিগতং, তস্মা ‘‘নিব্বানং মে’’তি মঞ্ঞতি. ততোযেৰ তং নিব্বানং দিট্ঠাভিনন্দনায অভিনন্দতি. অযং তাৰেত্থ দিট্ঠিমঞ্ঞনা. তস্মিংযেৰ পন দিট্ঠিমঞ্ঞনায মঞ্ঞিতে ৰত্থুস্মিং সিনেহং মানঞ্চ উপ্পাদযতো তণ্হামানমঞ্ঞনাপি নিদ্ধারেতব্বা.

যাদিসোতি যথারূপো, যেহি জেগুচ্ছাদিসভাৰেহি পস্সিতব্বোতি অত্থো. এসাতি অযং. তেনস্স অত্তনো সুণন্তানঞ্চ পচ্চক্খসিদ্ধতমাহ. অসুভাদিসভাৰেন সহ ৰিজ্জমানানং রূপাদিধম্মানং কাযো সমূহোতি সক্কাযো, উপাদানক্খন্ধা. তথাতি তস্স ভাৰভূতেন পটিকূলতাদিপ্পকারেন. সব্বমঞ্ঞনাতি পথৰীআদিকে সরূপাৰধারণাদিৰিভাগভিন্নে ¶ ৰিসযে পৰত্তিযা অনেকৰিহিতা সব্বা তণ্হামঞ্ঞনা.

জেগুচ্ছোতি ¶ জিগুচ্ছনীযো. তেনস্স অসুভাজঞ্ঞদুগ্গন্ধপটিকূলভাৰং দস্সেতি. সিদুরোতি খণে খণে ভিজ্জনসভাৰো. তেনস্স অনিচ্চঅদ্ধুৰখযৰযপভঙ্গুরসভাৰং দস্সেতি. অযন্তি সক্কাযো. দুক্খোতি ন সুখো. তেনস্স কিচ্ছকসিরাবাধদুক্খৰুত্তিতং দস্সেতি. অপরিণাযকোতি পরিণাযকরহিতো. তেনস্স অত্তসুঞ্ঞঅসারৰুত্তিতং দস্সেতি. তন্তি সক্কাযং. পচ্চনীকতোতি সভাৰপটিপক্খতো, সুভনিচ্চসুখঅত্তাদিতোতি অত্থো. গণ্হন্তি গণ্হন্তো, তত্থ সুভাদিগাহৰসেন অভিনিৰিসন্তোতি অত্থো.

ইদানি তিস্সোপি মঞ্ঞনা উপমাহি ৰিভাৰেতুং ‘‘সুভতো’’তিআদি ৰুত্তং. তত্থ যথা মহাপরিল়াহে ৰিপুলানত্থাৰহে চ অগ্গিম্হি সলভস্স পতনং সুভসুখসঞ্ঞায, এৰং তাদিসে সক্কাযে সলভস্স তণ্হামঞ্ঞনাতি ইমমত্থং দস্সেতি ‘‘সুভতো…পে… তণ্হায মঞ্ঞনা’’তি ইমিনা.

গূথাদী কীটকো গূথরাসিং লদ্ধা অসম্পন্নেপি তস্মিং সম্পন্নাকারং পৰত্তযমানো অত্তানং উক্কংসেতি, এৰমনেকাদীনৰে একন্তভেদিনি সক্কাযে নিচ্চসঞ্ঞং উপট্ঠপেত্ৰা সম্পত্তিমদেন তত্থ বালো মানং জপ্পেতীতি ইমমত্থমাহ ‘‘নিচ্চসঞ্ঞং…পে… মানেন মঞ্ঞনা’’তি.

যথা বালো মুদ্ধধাতুকো সম্মূল়্হো কোচি আদাসে অত্তনো পটিবিম্বং দিস্ৰা ‘‘অযং মঞ্ঞে আদাসসামিকো, যদি অহমিমং গহেত্ৰা তিট্ঠেয্যং, অনত্থম্পি মে করেয্যা’’তি ছড্ডেত্ৰা পলাযন্তো তত্থ অৰিজ্জমানমেৰ কিঞ্চি ৰিজ্জমানং কত্ৰা গণ্হি, তথূপমো অযং বালো সক্কাযে অত্তত্তনিযগাহং গণ্হন্তোতি ইমমত্থং দীপেতি ‘‘অত্তা…পে… দিট্ঠিযা হোতি মঞ্ঞনা’’তি ইমিনা.

সুখুমং মারবন্ধনং ৰেপচিত্তিবন্ধনতোপি সুখুমতরত্তা. তেনাহ ভগৰা ‘‘অহো সুখুমতরং খো, ভিক্খৰে, মারবন্ধন’’ন্তি.

বহুন্তি অতিৰিয, অনেকক্খত্তুং ৰা. ৰিপ্ফন্দমানোপি সক্কাযং নাতিৰত্ততি সংসারং নাতিৰত্তনতো. যথাহ ‘‘যে তে, ভিক্খৰে, সমণা সতো সত্তস্স উচ্ছেদং ৰিনাসং ৰিভৰং পঞ্ঞপেন্তি, তে, সক্কাযংযেৰ অনুপরিধাৰন্তি সেয্যথাপি সা গদ্দুলবন্ধনো’’তিআদি. যথা হি সত্তসুপি ¶ উচ্ছেদৰিকপ্পেসু সংসারনাযিকানং তণ্হাদিট্ঠীনং পহানং সম্ভৰতি, এৰং সস্সতৰিকপ্পেসুপীতি ¶ কথঞ্চি পন দিট্ঠিগতিকস্স ভৰৰিপ্পমোক্খো. তেন ৰুত্তং ‘‘সক্কাযং নাতিৰত্ততী’’তি.

সসোতি সো এসো পুথুজ্জনো. নিচ্চন্তি সব্বকালং.

তন্তি তস্মা সক্কাযমলীনস্স জাতিযাদীনমনতিৰত্তনতো. অসাততোতি দুক্খতো.

পস্সং এৰমিমন্তি অসুভানিচ্চদুক্খানত্তসভাৰং তং সক্কাযং ৰুত্তপ্পকারেন যথাভূতৰিপস্সনাপঞ্ঞাসহিতায মগ্গপঞ্ঞায পস্সন্তো. পহাযাতি সমুচ্ছেদৰসেন সব্বা মঞ্ঞনাযো পজহিত্ৰা. সব্বদুক্খা পমুচ্চতীতি সকলস্মাপি ৰট্টদুক্খতো পমুচ্চতীতি.

একত্তৰারাদিৰণ্ণনা নিট্ঠিতা.

পঠমনযৰণ্ণনা নিট্ঠিতা.

সেক্খৰারদুতিযনযৰণ্ণনা

৭. অধিপ্পেতস্স অত্থস্স অনিযমেত্ৰা ৰচনং উদ্দেসো, নিযমেত্ৰা ৰচনং নিদ্দেসোতি আহ ‘‘যোতি উদ্দেসৰচনং, সোতি নিদ্দেসৰচন’’ন্তি. সম্পিণ্ডনত্থোতি সমুচ্চযত্থো. সম্পিণ্ডনঞ্চ সভাগতাৰসেন হোতীতি আহ – ‘‘আরম্মণসভাগেনা’’তি, আরম্মণস্স সভাগতায সদিসতাযাতি অত্থো. সেক্খং দস্সেতি সামঞ্ঞজোতনায ৰিসেসে অৰট্ঠানতো, সেক্খৰিসযত্তা চ তস্স ৰচনস্স.

কেনট্ঠেনাতি যস্মা ঞাণেন অরণীযতো অত্থো সভাৰো, তস্মা কেনট্ঠেন কেন সভাৰেন কেন লক্খণেন সেক্খো নাম হোতীতি অত্থো. যস্মা পন সেক্খধম্মাধিগমেন পুগ্গলে সেক্খৰোহারপ্পৰত্তি, তস্মা ‘‘সেক্খধম্মপটিলাভতো সেক্খো’’তি ৰুত্তং. সেক্খধম্মা নাম চতূসু মগ্গেসু, হেট্ঠিমেসু চ তীসু ফলেসু সম্মাদিট্ঠিআদযো. তেনাহ ‘‘সেক্খায সম্মাদিট্ঠিযা…পে… এত্তাৰতা খো ভিক্খু সেক্খো হোতী’’তি. এৰং অভিধম্মপরিযাযেন সেক্খলক্খণং দস্সেত্ৰা ¶ ইদানি সুত্তন্তিকপরিযাযেনপি তং দস্সেতুং ‘‘অপিচা’’তিআদি ৰুত্তং. তত্থ সিক্খতীতি ইমিনা সিক্খাত্তযসমঙ্গী অপরিনিট্ঠিতসিক্খো সেক্খোতি দস্সেতি. তেনাহ ‘‘সিক্খতী’’তিআদি ¶ . সিক্খাহি নিচ্চসমাযোগদীপনত্থঞ্চেত্থ ‘‘সিক্খতি সিক্খতী’’তি আমেডিতৰচনং. অথ ৰা সিক্খনং সিক্খা, সা এতস্স সীলন্তি সেক্খো. সো হি অপরিযোসিতসিক্খত্তা তদধিমুত্তত্তা চ একন্তেন সিক্খনসীলো, ন অসেক্খো ৰিয পরিনিট্ঠিতসিক্খো তত্থ পটিপ্পস্সদ্ধুস্সুক্কো, নাপি ৰিস্সট্ঠসিক্খো পচুরজনো ৰিয তত্থ অনধিমুত্তো. অথ ৰা অরিযায জাতিযা তীসু সিক্খাসু জাতো, তত্থ ৰা ভৰোতি সেক্খো. অথ ৰা ইক্খতি এতাযাতি ইক্খা, মগ্গফলসম্মাদিট্ঠি. সহ ইক্খাযাতি সেক্খো.

অনুলোমপটিপদায পরিপূরকারীতি যা সা সীলাদিকা ৰিপস্সনন্তা দুক্খনিরোধগামিনিযা লোকুত্তরায পটিপদায অনুলোমনতো অনুলোমপটিপদা, তস্সা সম্পাদনেন পরিপূরকারীতি. ইদানি তং পটিপদং পুগ্গলাধিট্ঠানেন দস্সেতুং ‘‘সীলসম্পন্নো’’তিআদি ৰুত্তং. তত্থ সীলসম্পন্নোতি পাতিমোক্খসংৰরসীলেন সমন্নাগতো, পরিপুণ্ণপাতিমোক্খসীলো ৰা. পাতিমোক্খসীলঞ্হি ইধ ‘‘সীল’’ন্তি অধিপ্পেতং পধানভাৰতো. রূপাদিআরম্মণেসু অভিজ্ঝাদীনং পৰত্তিনিৰারণসঙ্খাতেন মনচ্ছট্ঠানং ইন্দ্রিযানং পিধানেন ইন্দ্রিযেসু গুত্তদ্ৰারো. পরিযেসনাদিৰসেন ভোজনে পমাণজাননেন ভোজনে মত্তঞ্ঞূ. ৰিগতথিনমিদ্ধো হুত্ৰা রত্তিন্দিৰং কম্মট্ঠানমনসিকারে যুত্ততায জাগরিযানুযোগমনুযুত্তো. কথং পন জাগরিযানুযোগো হোতীতি তং দস্সেতুং ‘‘পুব্বরত্তা…পে… ৰিহরতী’’তি ৰুত্তং. যথাহ ‘‘কথঞ্চ পুব্বরত্তাপররত্তং জাগরিযানুযোগমনুযুত্তো হোতি? ইধ ভিক্খু দিৰসং চঙ্কমেন নিসজ্জায আৰরণীযেহি চিত্তং পরিসোধেতি, রত্তিযা পঠমং যামং চঙ্কমেন…পে… সোধেতি, এৰং খো ভিক্খু পুব্বরত্তাপররত্তং জাগরিযানুযোগমনুযুত্তো হোতী’’তি (ৰিভ. ৫১৯). ইমস্মিং পনত্থেতি ‘‘মঞ্ঞতি, ন মঞ্ঞতী’’তি চ ৰত্তব্বভাৰসঙ্খাতে অত্থে. নো পুথুজ্জনো অধিপ্পেতো ‘‘অপ্পত্তমানসো, অনুত্তরং যোগক্খেমং পত্থযমানো’’তি চ ৰুত্তত্তা.

সম্পযুত্তত্তা মনসি ভৰোতি রাগো মানসো, মনো এৰ মানসন্তি কত্ৰা চিত্তং মানসং, অনৰসেসতো মানং সীযতি সমুচ্ছিন্দতীতি অগ্গমগ্গো ¶ মানসং, তন্নিব্বত্তত্তা পন অরহত্তস্স মানসতা দট্ঠব্বা. জনেসুতাতি জনে সকলসত্তলোকে ৰিস্সুতা, পত্থটযসাতি অত্থো.

নত্থি ইতো উত্তরন্তি অনুত্তরং. তং পন সব্বসেট্ঠং হোন্তং একন্ততো সদিসরহিতমেৰ হোতি, তস্মা ৰুত্তং ‘‘অনুত্তরন্তি সেট্ঠং, অসদিসন্তি অত্থো’’তি. পত্থযমানস্সাতি তণ্হাযন্তস্স. পজপ্পিতানীতি মানজপ্পনানি. যস্মিঞ্হি ৰত্থুস্মিং তণ্হাযনা পত্থযমানমঞ্ঞনা সম্ভৰতি, তস্মিংযেৰ ‘‘সেয্যোহমস্মী’’তিআদীনি পজপ্পিতানি সম্ভৰন্তীতি অধিপ্পাযো. পৰেধীতন্তি পরিৰাসিতং. পকপ্পিতেসূতি তণ্হাদিট্ঠিকপ্পেহি পরিকপ্পিতেসু আরম্মণেসু. সোতন্তি কিলেসসোতং ¶ . তস্মিঞ্হি ছিন্নে ইতরসোতং ছিন্নমেৰাতি. ৰিদ্ধস্তন্তি ৰিনাসিতং. তঞ্চ খো লোমহংসমত্তম্পি অসেসেত্ৰাতি দস্সেন্তো আহ ‘‘ৰিনল়ীকত’’ন্তি, ৰিগতাৰসেসং কতন্তি অত্থো. অধিমুত্তিযা ইধাধিপ্পেতপত্থনা পাকটা হোতীতি ‘‘তন্নিন্নো’’তিআদি ৰুত্তং, ন পন কুসলচ্ছন্দস্স অধিমুত্তিভাৰতো. অধিমুচ্চন্তোতি ওকপ্পেন্তো.

সব্বাকারৰিপরীতাযাতি ‘‘সুভং সুখং নিচ্চ’’ন্তিআদীনং সব্বেসং অত্তনা গহেতব্বাকারানং ৰসেন তব্বিপরীততায, অনৰসেসতো ধম্মসভাৰৰিপরীতাকারগাহিনিযাতি অত্থো. অভিৰিসিট্ঠেন ঞাণেনাতি অসম্পজাননমিচ্ছাজাননানি ৰিয ন ধম্মসভাৰং অপ্পত্ৰা নাপি অতিক্কমিত্ৰা, অথ খো অৰিরজ্ঝিত্ৰা ধম্মসভাৰস্স অভিমুখভাৰপ্পত্তিযা অভিৰিসিট্ঠেন ঞাণেন, ঞাতপরিঞ্ঞাধিট্ঠানায তীরণপরিঞ্ঞায পহানপরিঞ্ঞেকদেসেন চাতি অত্থো. তেনাহ ‘‘পথৰীতি…পে… ৰুত্তং হোতী’’তি. পথৰীভাৰন্তি পথৰিযং অভিঞ্ঞেয্যভাৰং. লক্খণপথৰী হি ইধাধিপ্পেতা, পরিঞ্ঞেয্যভাৰো পনস্সা ‘‘অনিচ্চাতিপী’’তিআদিনা গহিতোতি. অভিঞ্ঞত্ৰাতি ঞাততীরণপহানপরিঞ্ঞাহি হেট্ঠিমমগ্গঞাণেহি চ অভিজানিত্ৰা. মামঞ্ঞীতি অপ্পহীনানং মঞ্ঞনানং ৰসেন মাতি মঞ্ঞতীতি মা, পহীনানং পন ৰসেন ন মঞ্ঞতীতি অমঞ্ঞী, মা চ সো অমঞ্ঞী চ মামঞ্ঞীতি এৰমেত্থ পদৰিভাগতো অত্থো ৰেদিতব্বো. তত্থ যেন ভাগেন অমঞ্ঞী, তেন মঞ্ঞীতি ন ৰত্তব্বো. যেন পন ভাগেন মঞ্ঞী, তেন অমঞ্ঞীতি ন ৰত্তব্বোতি. এৰং পটিক্খেপপ্পধানং অত্থং দস্সেতুং অট্ঠকথাযং ‘‘মঞ্ঞী চ ন মঞ্ঞী চ ন ৰত্তব্বো’’তি ৰুত্তং. পটিক্খেপপ্পধানতা চেত্থ ¶ লব্ভমানানম্পি মঞ্ঞনানং দুব্বলভাৰতো ৰেদিতব্বা. তেনেৰাহ – ‘‘ইতরা পন তনুভাৰং গতা’’তি. মাতি চ নিপাতপদমেতং, অনেকত্থা চ নিপাতাতি অধিপ্পাযেন ‘‘এতস্মিঞ্হি অত্থে ইমং পদং নিপাতেত্ৰা ৰুত্ত’’ন্তি ৰুত্তং. নিপাতেত্ৰাতি চ পকতিআদিৰিভাগনিদ্ধারণে অনুমাননযং মুঞ্চিত্ৰা যথাৰুত্তে অত্থে পচ্চক্খতোৰ দস্সেত্ৰাতি অত্থো. পুথুজ্জনো ৰিযাতি এতেনস্স উপরিমগ্গৰজ্ঝতণ্হামানৰসেন মঞ্ঞনা ন পটিক্খিত্তাতি দীপেতি.

অথ ৰা মা মঞ্ঞীতি পরিকপ্পকিরিযাপটিক্খেপৰচনমেতং ‘‘মা রন্ধযুং, মা জীরী’’তিআদীসু ৰিয, ন মঞ্ঞেয্যাতি ৰুত্তঞ্হোতি. যথা হি পুথুজ্জনো সব্বসো অপ্পহীনমঞ্ঞনত্তা ‘‘মঞ্ঞতি’’চ্চেৰ ৰত্তব্বো, যথা চ খীণাসৰো সব্বসো পহীনমঞ্ঞনত্তা ন মঞ্ঞতি এৰ, ন এৰং সেক্খো. তস্স হি একচ্চা মঞ্ঞনা পহীনা, একচ্চা অপ্পহীনা, তস্মা উভযভাৰতো উভযথাপি ন ৰত্তব্বো. ননু চ উভযভাৰতো উভযথাপি ৰত্তব্বোতি? ন. যা হি অপ্পহীনা, তাপিস্স তনুভাৰং গতাতি তাহিপি সো ন মঞ্ঞেয্য ৰিভূততরায ¶ মঞ্ঞনায অভাৰতো, পগেৰ ইতরাহি. তেনাহ ভগৰা ‘‘মা মঞ্ঞী’’তি. তেন ৰুত্তং ‘‘মা মঞ্ঞীতি পরিকপ্পকিরিযাপটিক্খেপৰচনমেতং ‘মা রন্ধযুং, মা জীরী’তিআদীসু ৰিয, ন মঞ্ঞেয্যাতি ৰুত্তং হোতী’’তি. অযঞ্চস্স অমঞ্ঞনা ৰত্থুনো পরিঞ্ঞেয্যত্তা, ন অসেক্খস্স ৰিয পরিঞ্ঞাতত্তা. যঞ্হি একন্ততো পরিজানিতব্বং পরিজানিতুং সক্কা, ন তত্থ তব্বিধুরে ৰিয পুথুজ্জনস্স মঞ্ঞনা সম্ভৰন্তি. তেনাহ ‘‘পরিঞ্ঞেয্যং তস্সাতি ৰদামী’’তি.

ওক্কন্তনিযামত্তাতি অনুপৰিট্ঠসম্মত্তনিযামত্তা, ওতিণ্ণমগ্গসোতত্তাতি অত্থো. সম্বোধিপরাযণত্তাতি উপরিমগ্গসম্বোধিপটিসরণত্তা, তদধিগমায নিন্নপোণপব্ভারভাৰতোতি অত্থো. উভযেনপি তস্স অৰস্সংভাৰিনী সেসপরিঞ্ঞাতি দস্সেতি. পরিঞ্ঞেয্যন্তি পরিজানিতব্বভাৰেন ঠিতং, পরিঞ্ঞাতুং ৰা সক্কুণেয্যং. তপ্পটিপক্খতো অপরিঞ্ঞেয্যং. পুথুজ্জনস্স ৰিযাতি এতেন ইধাধিপ্পেতপুথুজ্জনস্স পরিঞ্ঞেয্যভাৰাসঙ্কা এৰ নত্থি অনধিকারতোতি দস্সেতি. ‘‘মাভিনন্দী’’তি এত্থাপি ইমিনাৰ নযেন অত্থো ৰেদিতব্বো.

সেক্খৰারদুতিযনযৰণ্ণনা নিট্ঠিতা.

খীণাসৰৰারততিযাদিনযৰণ্ণনা

৮. সভাগো ¶ দিট্ঠসচ্চতাদিসামঞ্ঞেন. আরকা কিলেসেহি অরহন্তি পদস্স নিরুত্তিনযেন অত্থং ৰত্ৰা তং পাল়িযা সমানেন্তো ‘‘ৰুত্তঞ্চেত’’ন্তিআদিমাহ. তত্থ পাপকাতি লামকট্ঠেন দুগ্গতিসম্পাপনট্ঠেন চ পাপকা. সাৰজ্জট্ঠেন অকোসল্লসম্ভূতট্ঠেন চ অকুসলা. সংকিলেসং অরহন্তি, তত্থ ৰা নিযুত্তাতি সংকিলেসিকা. পুনব্ভৰস্স করণসীলা, পুনব্ভৰফলং অরহন্তীতি ৰা পোনোভৰিকা. সহ দরথেন পরিল়াহেন পৰত্তন্তীতি সদরা. দুক্খো কটুকো, দুক্খমো ৰা ৰিপাকো এতেসন্তি দুক্খৰিপাকা. অনাগতে জাতিযা চেৰ জরামরণানঞ্চ ৰড্ঢনেন জাতিজরামরণিযাতি. এৰমেতেসং পদানং অত্থো ৰেদিতব্বো. কামঞ্চাযং সুত্তন্তৰণ্ণনা, অভিধম্মনযো পন নিপ্পরিযাযোতি তেন দস্সেন্তো ‘‘চত্তারো আসৰা’’তিআদিমাহ. সমুচ্ছিন্না পটিপ্পস্সদ্ধাতি ন কেৰলং সমুচ্ছিন্না এৰ, অথ খো পটিপ্পস্সদ্ধাপীতি মগ্গকিচ্চেন সদিসং ফলকিচ্চম্পি নিদ্ধারেতি.

সীলৰিসোধনাদিনা ¶ গরূনং পটিপত্তিযা অনুকরণং গরুসংৰাসো. অরিযমগ্গপটিপত্তি এৰ অরিযমগ্গসংৰাসো. দস অরিযাৰাসা নাম পঞ্চঙ্গৰিপ্পহীনতাদযো. যে সন্ধায ৰুত্তং –

‘‘দসযিমে, ভিক্খৰে, অরিযাৰাসা, যে অরিযা আৰসিংসু ৰা আৰসন্তি ৰা আৰসিস্সন্তি ৰা. কতমে দস? ইধ, ভিক্খৰে, ভিক্খু পঞ্চঙ্গৰিপ্পহীনো হোতি ছল়ঙ্গসমন্নাগতো, একারক্খো, চতুরাপস্সেনো, পনুণ্ণপচ্চেকসচ্চো, সমৰযসট্ঠেসনো, অনাৰিলসঙ্কপ্পো, পস্সদ্ধকাযসঙ্খারো, সুৰিমুত্তচিত্তো, সুৰিমুত্তপঞ্ঞো. ইমে খো, ভিক্খৰে, দস অরিযাৰাসা’’তি (অ. নি. ১০.১৯).

ৰুস্সতীতি ৰা ৰুসিতং, অরিযমগ্গো, অরিযফলঞ্চ, তং এতস্স অত্থীতি অতিসযৰচনিচ্ছাৰসেন অরহা ‘‘ৰুসিতৰা’’তি ৰুত্তো. করণীযন্তি পরিঞ্ঞাপহানভাৰনাসচ্ছিকিরিযমাহ. তং পন যস্মা চতূহি মগ্গেহি চতূসু সচ্চেসু কত্তব্বত্তা সোল়সৰিধন্তি ৰেদিতব্বং. তেনাহ ‘‘চতূহি মগ্গেহি ¶ করণীয’’ন্তি. সম্মাৰিমুত্তস্সাতি অগ্গমগ্গফলপঞ্ঞাহি সমুচ্ছেদপটিপ্পস্সদ্ধীনং ৰসেন সুট্ঠু ৰিমুত্তস্স. সন্তচিত্তস্সাতি ততো এৰ সব্বকিলেসদরথপরিল়াহানং ৰূপসন্তচিত্তস্স. ভিন্নকিলেসস্স খীণাসৰস্স ভিক্খুনো. কতস্স পরিঞ্ঞাদিকিচ্চস্স পটিচযো পুন করণং নত্থি, ততো এৰ করণীযং ন ৰিজ্জতি ন উপলব্ভতি.

ভারাতি ওসীদাপনট্ঠেন ভারা ৰিযাতি ভারা. ৰুত্তঞ্হি ‘‘ভারা হৰে পঞ্চক্খন্ধা’’তিআদি (সং. নি. ৩.২২). অত্তনো যোনিসোমনসিকারাযত্তন্তি অত্তুপনিবন্ধং, সসন্তানপরিযাপন্নত্তা অত্তানং অৰিজহনং. তযিদং যদিপি সব্বস্মিং অনৰজ্জধম্মে সম্ভৰতি, অকুপ্পসভাৰাপরিহানধম্মেসু পন অগ্গভূতে অরহত্তে সাতিসযং, নেতরেসূতি দস্সেন্তো আহ ‘‘অত্তনো পরমত্থট্ঠেন ৰা’’তি, উত্তমট্ঠভাৰেনাতি অত্থো.

সুত্তন্তনযো নাম পরিযাযনযোতি নিপ্পরিযাযনযেন সংযোজনানি দস্সেন্তো ‘‘ভৰরাগইস্সামচ্ছরিযসংযোজন’’ন্তি আহ, ন পন ‘‘রূপরাগো’’তিআদিনা. ভৰেসু সংযোজন্তীতি কিলেসকম্মৰিপাকৰট্টানং পচ্চযো হুত্ৰা নিস্সরিতুং অপ্পদানৰসেন বন্ধন্তি. সতিপি হি অঞ্ঞেসং তপ্পচ্চযভাৰে ন ৰিনা সংযোজনানি তেসং তপ্পচ্চযভাৰো অত্থি, ওরম্ভাগিযউদ্ধম্ভাগিযসঙ্গহিতেহি চ তেহি তংতংভৰনিব্বত্তককম্মনিযমো ভৰনিযমো চ হোতি ¶ , ন চ উপচ্ছিন্নসংযোজনস্স কতানিপি কম্মানি ভৰং নিব্বত্তেন্তীতি তেসংযেৰ সংযোজনট্ঠো দট্ঠব্বো.

সম্মা অঞ্ঞাযাতি আজাননভূতায অগ্গমগ্গপঞ্ঞায সম্মা যথাভূতং দুক্খাদীসু যো যথা জানিতব্বো, তং তথা জানিত্ৰা. চিত্তৰিমুত্তি সব্বস্স চিত্তসংকিলেসস্স ৰিস্সগ্গো. নিব্বানাধিমুত্তি নিব্বানে অধিমুচ্চনং তত্থ নিন্নপোণপব্ভারতা. তন্তি পথৰীআদিকং. পরিঞ্ঞাতং, ন পুথুজ্জনস্স ৰিয অপরিঞ্ঞাতং, সেক্খস্স ৰিয পরিঞ্ঞেয্যং ৰা. তস্মাতি পরিঞ্ঞাতত্তা.

চতুত্থপঞ্চমছট্ঠৰারা তত্থ তত্থ কিলেসনিব্বানকিত্তনৰসেন পৰত্তত্তা নিব্বানৰারা নাম. তত্থ পথৰীআদীনং পরিঞ্ঞাতত্তা অমঞ্ঞনা, সা পন পরিঞ্ঞা রাগাদীনং খযেন সিদ্ধাতি ইমস্স অত্থস্স দীপনৰসেন পাল়ি পৰত্তাতি দস্সেন্তো ‘‘পরিঞ্ঞাতং তস্সাতি সব্বপদেহি যোজেত্ৰা পুন ¶ খযা রাগস্স ৰীতরাগত্তাতি যোজেতব্বং. এস নযো ইতরেসূ’’তি আহ. তত্থ ইতরেসূতি পঞ্চমছট্ঠৰারেসু. যদি এৰং কস্মা পাল়ি এৰং ন দিস্সতীতি আহ ‘‘দেসনা পন একত্থ ৰুত্তং সব্বত্থ ৰুত্তমেৰ হোতীতি সংখিত্তা’’তি.

ন খযা রাগস্স ৰীতরাগো সব্বসো অপ্পহীনরাগত্তা. ৰিক্খম্ভিতরাগো হি সোতি. বাহিরকগ্গহণঞ্চেত্থ তথাভাৰস্সেৰ তেসু লব্ভনতো, ন তেসু এৰ তথাভাৰস্স লব্ভনতো. ইদানি যা সা ‘‘পরিঞ্ঞাতং তস্সা’’তি সব্বপদেহি যোজনা ৰুত্তা, তং ৰিনাপি নিব্বানৰারঅত্থযোজনং দস্সেতুং ‘‘যথা চা’’তিআদি ৰুত্তং. তত্থ মঞ্ঞনং ন মঞ্ঞতীতি মঞ্ঞনা নপ্পৰত্ততীতি অত্থো. মঞ্ঞনায মঞ্ঞিতব্বত্তেপি তস্সা ৰত্থুঅন্তোগধত্তাতি এৰমেত্থ অত্থো দট্ঠব্বো.

যদিপি পরিঞ্ঞাতপদং অগ্গহেত্ৰা নিব্বানৰারদেসনা পৰত্তা, এৰম্পি ‘‘খযা’’তিআদিপদেহি পরিঞ্ঞাসিদ্ধি এৰ পকাসীযতীতি কো তেসং ৰিসেসোতি চোদনং সন্ধাযাহ ‘‘এত্থ চা’’তিআদি. মগ্গভাৰনাপারিপূরিদস্সনত্থং ৰুত্তো, মগ্গকিচ্চন্তা হি পরিঞ্ঞাযোতি অধিপ্পাযো. ইতরে…পে… ৰেদিতব্বা ৰীতরাগাদিকিত্তনতোতি. দ্ৰীহি ৰা কারণেহীতি যথাৰুত্তকারণদ্ৰযেন. অস্সাতি খীণাসৰস্স. অযং ৰিসেসোতি ইদানি ৰুচ্চমানো ৰিসেসো. যদিপি খীণাসৰো একন্তেন ৰীতরাগো ৰীতদোসো ৰীতমোহো এৰ চ হোতি, যায পন পুব্বভাগপটিপদায ৰীতরাগতাদযো সৰিসেসাতি ৰত্তব্বতং লভন্তি, তং দস্সেন্তো ‘‘তীসু হী’’তিআদিমাহ ¶ . ‘‘রত্তো অত্থং ন জানাতী’’তিআদিনা (নেত্তি. ১১) রাগে আদীনৰং পস্সতো ‘‘রাগো চ নাম সুখাভিসঙ্গেন উপ্পজ্জতি, সুখঞ্চ ৰিপরিণামতো দুক্খং. পগেৰ ইতর’’ন্তি সহেতুকে রাগে আদীনৰদস্সনং দুক্খানুপস্সনায নিমিত্তং, দুক্খানুপস্সনা চ পণিধিযা পটিপক্খভাৰতো অপ্পণিহিতৰিমোক্খং পরিপুরেতীতি আহ ‘‘রাগে…পে… ৰীতরাগো হোতী’’তি. তথা ‘‘দুট্ঠো অত্থং ন জানাতী’’তিআদিনা (ইতিৰু. ৮৮) দোসে আদীনৰং পস্সতো ‘‘দোসো চ নাম দুক্খং পটিচ্চ উপ্পজ্জতি, তঞ্চ উভযং অনৰট্ঠিতং ইত্তরং পভঙ্গূ’’তি সহেতুকে দোসে আদীনৰদস্সনং অনিচ্চানুপস্সনায নিমিত্তং, অনিচ্চানুপস্সনা চ নিচ্চনিমিত্তাদীনং পটিপক্খভাৰতো অনিমিত্তৰিমোক্খং পরিপূরেতীতি আহ ‘‘দোসে…পে… হোতী’’তি. তথা ‘‘মূল়্হো ¶ অত্থং ন জানাতী’’তিআদিনা (ইতিৰু. ৮৮) মোহে আদীনৰং পস্সতো ‘‘মোহো নাম যথাসভাৰগ্গহণস্স পরিব্ভমন্তো’’তি মোহস্স ৰিক্খম্ভনং অনত্তানুপস্সনায নিমিত্তং, অনত্তানুপস্সনায চ অত্তাভিনিৰেসস্স পটিপক্খভাৰতো সুঞ্ঞতং ৰিমোক্খং পরিপূরেতীতি আহ ‘‘মোহে…পে… ৰীতমোহো হোতী’’তি.

এৰং সন্তেতি যদি ৰীতরাগতাদযো ৰিমোক্খৰিভাগেন ৰুত্তা, এৰং সন্তে. তস্মাতি যস্মা ৰিমোক্খমুখৰিমোক্খানং ৰসেন নিযমেত্ৰা ন ৰুত্তং, তস্মা. যং কিঞ্চি অরহতো সম্ভৰন্তং ৰিভজিত্ৰা ৰুচ্চতীতি ৰারত্তযদেসনা কতাতি ইমমত্থং দস্সেতি ‘‘যং অরহতো’’তিআদিনা.

এৰং ৰিমুত্তিৰিভাগেন খীণাসৰস্স ৰিভাগং ৰারত্তযদেসনানিবন্ধনং দস্সেত্ৰা ইদানি অৰিভাগেনপি তত্থ পরিঞ্ঞাৰিসযস্স অনুসযৰিসযস্স চ ৰিভাগং তস্স নিবন্ধনং দস্সেন্তো ‘‘অৰিসেসেনা’’তিআদিমাহ. তত্থ উপেক্খাৰেদনা ৰিসেসতো সঙ্খারদুক্খং সম্মোহাধিট্ঠানন্তি ৰুত্তং ‘‘সঙ্খার…পে… মোহো’’তি. সেসং ৰুত্তনযত্তা সুৰিঞ্ঞেয্যমেৰ.

খীণাসৰৰারততিযাদিনযৰণ্ণনা নিট্ঠিতা.

তথাগতৰারসত্তমনযৰণ্ণনা

১২. যেহি (দী. নি. অভি. টী. ১.৭.চূল়সীলৰণ্ণনা; অ. নি. টী. ১.১.১৭০) গুণৰিসেসেহি নিমিত্তভূতেহি ভগৰতি ‘‘তথাগতো’’তি অযং সমঞ্ঞা পৰত্তা, তং দস্সনত্থং ¶ ‘‘অট্ঠহি কারণেহি ভগৰা তথাগতো’’তিআদি ৰুত্তং. গুণনেমিত্তকানেৰ হি ভগৰতো সব্বানি নামানি. যথাহ –

‘‘অসঙ্খ্যেয্যানি নামানি, সগুণেন মহেসিনো;

গুণেন নামমুদ্ধেয্যং, অপি নামসহস্সতো’’তি. (ধ. স. অট্ঠ. ১৩১৩; উদা. অট্ঠ. ৫৩; পটি. ম. অট্ঠ. ১.৭৬; দী. নি. অভি. টী. ১.৭.চূল়সীলৰণ্ণনা; অ. নি. টী. ১.১.১৭০) –

তথা আগতোতি এত্থ আকারনিযমনৰসেন ওপম্মসম্পটিপাদনত্থো তথা-সদ্দো. সামঞ্ঞজোতনা হি ৰিসেসে অৰতিট্ঠতীতি পটিপাদগমনত্থো আগত-সদ্দো, ন ঞাণগমনত্থো ‘‘তথলক্খণং আগতো’’তিআদীসু ¶ (দী. নি. অট্ঠ. ১.৭; ম. নি. অট্ঠ. ১.১২; সং. নি. অট্ঠ. ২.৩.৭৮; অ. নি. অট্ঠ. ১.১.১৭০; উদা. অট্ঠ. ১৮; ইতিৰু. অট্ঠ. ৩৮; থেরগা. অট্ঠ. ১.১.৩; বু. ৰং. অট্ঠ. ২.বাহিরনিদান; মহানি. অট্ঠ. ১৪) ৰিয, নাপি কাযগমনাদিঅত্থো ‘‘আগতো খো মহাসমণো, মাগধানং গিরিব্বজ’’ন্তিআদীসু (মহাৰ. ৬৩) ৰিয. তত্থ যদাকারনিযমনৰসেন ওপম্মসম্পটিপাদনত্থো তথা-সদ্দো, তং করুণাপ্পধানত্তা মহাকরুণামুখেন পুরিমবুদ্ধানং আগমনপটিপদং উদাহরণৰসেন সামঞ্ঞতো দস্সেন্তো যংতংসদ্দানং একন্তসম্বন্ধভাৰতো ‘‘যথা সব্বলোক…পে… আগতা’’তি সাধারণতো ৰত্ৰা পুন তং পটিপদং মহাপদানসুত্তাদীসু (দী. নি. ২.৪) সম্বহুলনিদ্দেসেন সুপাকটানং আসন্নানঞ্চ ৰিপস্সীআদীনং ছন্নং সম্মাসম্বুদ্ধানং ৰসেন দস্সেন্তো ‘‘যথা ৰিপস্সী ভগৰা’’তিআদিমাহ. তত্থ যেন অভিনীহারেনাতি মনুস্সত্ত-লিঙ্গসম্পত্তি-হেতু-সত্থারদস্সন-পব্বজ্জা-অভিঞ্ঞাদিগুণসম্পত্তি-অধিকার-ছন্দানং ৰসেন অট্ঠঙ্গসমন্নাগতেন কাযপণিধানমহাপণিধানেন. সব্বেসঞ্হি সম্মাসম্বুদ্ধানং কাযপণিধানং ইমিনাৰ নীহারেন সমিজ্ঝতীতি.

এৰং মহাভিনীহারৰসেন ‘‘তথাগতো’’তি পদস্স অত্থং ৰত্ৰা ইদানি পারমীপূরণৰসেন দস্সেতুং ‘‘অথ ৰা যথা ৰিপস্সী ভগৰা…পে… যথা কস্সপো ভগৰা দানপারমিং পূরেত্ৰা’’তিআদি ৰুত্তং. ইমস্মিং পন ঠানে সুত্তন্তিকানং মহাবোধিযানপটিপদায কোসল্লজননত্থং পারমীকথা ৰত্তব্বা, সা পন সব্বাকারসম্পন্না চরিযাপিটকৰণ্ণনায (চরিযা. পকিণ্ণককথা) ৰিত্থারতো নিদ্দিট্ঠা, তস্মা অত্থিকেহি তত্থ ৰুত্তনযেনেৰ ৰেদিতব্বা. যথা ¶ পন পুব্বে ৰিপস্সীআদযো সম্মাসম্বুদ্ধা অভিনীহারসম্পত্তিযং পতিট্ঠায সুৰিসুদ্ধায পটিপদায অনৰসেসতো সম্মদেৰ সব্বা পারমিযো পরিপূরেসুং, এৰং অম্হাকম্পি ভগৰা পরিপূরেসীতি ইমমত্থং সন্ধাযাহ ‘‘সমত্তিং সপারমিযো পূরেত্ৰা’’তি. সতিপি অঙ্গপরিচ্চাগাদীনং দানপারমিভাৰে পরিচ্চাগৰিসেসভাৰদস্সনত্থঞ্চেৰ সুদুক্করভাৰদস্সনত্থঞ্চ ‘‘পঞ্চ মহাপরিচ্চাগে’’তি ৰিসুং গহণং, ততোযেৰ চ অঙ্গপরিচ্চাগতো ৰিসুং নযনপরিচ্চাগগ্গহণম্পি কতং, পরিগ্গহপরিচ্চাগভাৰসামঞ্ঞেপি ধনরজ্জপরিচ্চাগতো পুত্তদারপরিচ্চাগগ্গহণঞ্চ কতং.

গতপচ্চাগতিকৰত্তপূরণাদিকায পুব্বভাগপটিপদায সদ্ধিং অভিঞ্ঞাসমাপত্তিনিপ্ফাদনং পুব্বযোগো, দানাদীসুযেৰ সাতিসযপটিপত্তিনিপ্ফাদনং পুব্বচরিযা ¶ , সা চরিযাপিটকসঙ্গহিতা. অভিনীহারো পুব্বযোগো, দানাদিপটিপত্তি, কাযৰিৰেকৰসেন একচরিযা ৰা পুব্বচরিযাতি কেচি. দানাদীনঞ্চেৰ অপ্পিচ্ছতাদীনঞ্চ সংসারনিব্বানেসু আদীনৰানিসংসানঞ্চ ৰিভাৰনৰসেন সত্তানং বোধিত্তযে পতিট্ঠাপনপরিপাচনৰসেন চ পৰত্তা কথা ধম্মক্খানং, ঞাতীনং অত্থচরিযা ঞাতত্থচরিযা, সাপি করুণায ৰসেনেৰ. আদি-সদ্দেন লোকত্থচরিযাদযো সঙ্গণ্হাতি. কম্মস্সকতঞাণৰসেন, অনৰজ্জকম্মাযতনসিপ্পাযতনৰিজ্জাট্ঠানপরিচযৰসেন খন্ধাযতনাদিপরিচযৰসেন, লক্খণত্তযতীরণৰসেন চ ঞাণচারো বুদ্ধিচরিযা, সা পন অত্থতো পঞ্ঞাপারমীযেৰ, ঞাণসম্ভারদস্সনত্থং ৰিসুং গহণং. কোটীতি পরিযন্তো, উক্কংসোতি অত্থো.

চত্তারো সতিপট্ঠানে ভাৰেত্ৰা ব্রূহেত্ৰাতি সম্বন্ধো. তত্থ ভাৰেত্ৰাতি উপ্পাদেত্ৰা. ব্রূহেত্ৰাতি ৰড্ঢেত্ৰা. সতিপট্ঠানাদিগ্গহণেন আগমনপটিপদং মত্থকং পাপেত্ৰা দস্সেতি. ৰিপস্সনাসহগতা এৰ ৰা সতিপট্ঠানাদযো দট্ঠব্বা. এত্থ চ ‘‘যেন অভিনীহারেনা’’তিআদিনা আগমনপটিপদায আদিং দস্সেতি, ‘‘দানপারমী’’তিআদিনা মজ্ঝং, ‘‘চত্তারো সতিপট্ঠানে’’তিআদিনা পরিযোসানন্তি ৰেদিতব্বং.

সম্পতিজাতোতি মুহুত্তজাতো মনুস্সানং হত্থতো মুত্তমত্তো, ন মাতুকুচ্ছিতো নিক্খন্তমত্তো. নিক্খন্তমত্তঞ্হি মহাসত্তং পঠমং ব্রহ্মানো সুৰণ্ণজালেন পটিগ্গণ্হিংসু, তেসং হত্থতো চত্তারো মহারাজানো অজিনপ্পৰেণিযা, তেসং হত্থতো মনুস্সা দুকূলচুম্বটকেন পটিগ্গণ্হিংসু, মনুস্সানং হত্থতো মুচ্চিত্ৰা পথৰিযং পতিট্ঠিতোতি. যথাহ ভগৰা মহাপদানদেসনাযং. সেতম্হি ছত্তেতি দিব্বসেতচ্ছত্তে. অনুধারীযমানেতি ধারীযমানে. এত্থ চ ছত্তগ্গহণেনেৰ খগ্গাদীনি পঞ্চ ককুধভণ্টানিপি ৰুত্তানেৰাতি দট্ঠব্বং. খগ্গতালৰণ্টমোরহত্থকৰালবীজনীউণ্হীসপট্টাপি ¶ হি ছত্তেন সহ তদা উপট্ঠিতা অহেসুং, ছত্তাদীনিযেৰ চ তদা পঞ্ঞাযিংসু, ন ছত্তাদিগ্গাহকা. সব্বা চ দিসাতি দসপি দিসা. নযিদং সব্বদিসাৰিলোকনং সত্তপদৰীতিহারুত্তরকালং দট্ঠব্বং. মহাসত্তো হি মনুস্সানং হত্থতো মুচ্চিত্ৰা পুরত্থিমদিসং ¶ ওলোকেসি. তত্থ দেৰমনুস্সা গন্ধমালাদীহি পূজযমানা ‘‘মহাপুরিস ইধ তুম্হেহি সদিসোপি নত্থি, কুতো উত্তরিতরো’’তি আহংসু. এৰং চতস্সো দিসা, চতস্সো অনুদিসা; হেট্ঠা, উপরীতি সব্বা দিসা অনুৰিলোকেত্ৰা সব্বত্থ অত্তনা সদিসং অদিস্ৰা ‘‘অযং উত্তরা দিসা’’তি তত্থ সত্তপদৰীতিহারেন অগমাসি. আসভিন্তি উত্তমং. অগ্গোতি সব্বপঠমো. জেট্ঠো সেট্ঠোতি চ তস্সেৰ ৰেৰচনং. অযমন্তিমা জাতি, নত্থি দানি পুনব্ভৰোতি ইমস্মিং অত্তভাৰে পত্তব্বং অরহত্তং ব্যাকাসি.

অনেকেসং ৰিসেসাধিগমানং পুব্বনিমিত্তভাৰেনাতি সংখিত্তেন ৰুত্তমত্থং ‘‘যঞ্হী’’তিআদিনা ৰিত্থারতো দস্সেতি. তত্থ এত্থাতি –

‘‘অনেকসাখঞ্চ সহস্সমণ্ডলং,

ছত্তং মরূ ধারযুমন্তলিক্খে;

সুৰণ্ণদণ্ডা ৰীতিপতন্তি চামরা,

ন দিস্সরে চামরছত্তগাহকা’’তি. (সু. নি. ৬৯৩);

ইমিস্সা গাথায. সব্বঞ্ঞুতঞ্ঞাণমেৰ সব্বত্থ অপ্পটিহতচারতায অনাৰরণঞাণন্তি আহ ‘‘সব্বঞ্ঞুতানাৰরণঞাণপটিলাভস্সা’’তি. তথা অযং ভগৰাপি গতো…পে… পুব্বনিমিত্তভাৰেনাতি এতেন অভিজাতিযং ধম্মতাৰসেন উপ্পজ্জনকৰিসেসা সব্ববোধিসত্তানং সাধারণাতি দস্সেতি. পারমিতানিস্সন্দা হি তেতি.

ৰিক্কমীতি অগমাসি. মরূতি দেৰা. সমাতি ৰিলোকনসমতায সমা সদিসিযো. মহাপুরিসো হি যথা একং দিসং ৰিলোকেসি, এৰং সেসদিসাপি, ন কত্থচি ৰিলোকনে ৰিবন্ধো তস্স অহোসীতি. সমাতি ৰা ৰিলোকেতুং যুত্তা, ৰিসমরহিতাতি অত্থো. ন হি তদা বোধিসত্তস্স ৰিরূপবীভচ্ছৰিসমরূপানি ৰিলোকেতুং অযুত্তানি দিসাসু উপট্ঠহন্তীতি.

এৰং ‘‘তথা গতো’’তি কাযগমনট্ঠেন গত-সদ্দেন তথাগত-সদ্দং নিদ্দিসিত্ৰা ইদানি ঞাণগমনট্ঠেন তং দস্সেতুং ‘‘অথ ৰা’’তিআদিমাহ. তত্থ নেক্খম্মেনাতি অলোভপ্পধানেন কুসলচিত্তুপ্পাদেন ¶ . কুসলা হি ¶ ধম্মা ইধ নেক্খম্মং, ন পব্বজ্জাদযো, ‘‘পঠমজ্ঝান’’ন্তি (দী. নি. অভি. টী. ১.৭.চূল়সীলৰণ্ণনা; অ. নি. টী. ১.১.১৭০) চ ৰদন্তি. পহাযাতি পজহিত্ৰা. গতো অধিগতো, পটিপন্নো উত্তরিৰিসেসন্তি অত্থো. পহাযাতি ৰা পহানহেতু, পহানলক্খণং ৰা. হেতুলক্খণত্থো হি অযং পহায-সদ্দো. কামচ্ছন্দাদিপ্পহানহেতুকং ‘‘গতো’’তি হেত্থ ৰুত্তং গমনং অৰবোধো, পটিপত্তি এৰ ৰা কামচ্ছন্দাদিপ্পহানেন চ লক্খীযতীতি. এস নযো পদালেত্ৰাতিআদীসুপি. অব্যাপাদেনাতি মেত্তায. আলোকসঞ্ঞাযাতি ৰিভূতং কত্ৰা মনসিকরণেন (দী. নি. অভি. টী. ১.৭.চূল়সীলৰণ্ণনা) উপট্ঠিতআলোকসঞ্চাননেন. অৰিক্খেপেনাতি সমাধিনা. ধম্মৰৰত্থানেনাতি কুসলাদিধম্মানং যাথাৰনিচ্ছযেন. ‘‘সপ্পচ্চযনামরূপৰৰত্থানেনা’’তিপি ৰদন্তি.

এৰং কামচ্ছন্দাদিনীৰরণপ্পহানেন ‘‘অভিজ্ঝং লোকে পহাযা’’তিআদিনা (ৰিভ. ৫০৮) ৰুত্তায পঠমজ্ঝানস্স পুব্বভাগপটিপদায ভগৰতো তথাগতভাৰং দস্সেত্ৰা ইদানি সহ উপাযেন অট্ঠহি সমাপত্তীহি অট্ঠারসহি চ মহাৰিপস্সনাহি তং দস্সেতুং ‘‘ঞাণেনা’’তিআদিমাহ. নামরূপপরিগ্গহকঙ্খাৰিতরণানঞ্হি ৰিনিবন্ধভূতস্স মোহস্স দূরীকরণেন ঞাতপরিঞ্ঞাযং ঠিতস্স অনিচ্চসঞ্ঞাদযো সিজ্ঝন্তি, তথা ঝানসমাপত্তীসু অভিরতিনিমিত্তেন পামোজ্জেন. তত্থ ‘‘অনভিরতিযা ৰিনোদিতায ঝানাদীনং সমধিগমো’’তি সমাপত্তিৰিপস্সনানং অরতিৰিনোদনঅৰিজ্জাপদালনাদীনি উপাযো, উপ্পটিপাটিনিদ্দেসো পন নীৰরণসভাৰায অৰিজ্জায হেট্ঠা নিৰরণেসুপি সঙ্গহদস্সনত্থন্তি দট্ঠব্বং. সমাপত্তিৰিহারপ্পৰেসৰিবন্ধনেন নীৰরণানি কৰাটসদিসানীতি আহ ‘‘নীৰরণকৰাটং উগ্ঘাটেত্ৰা’’তি. ‘‘রত্তিং অনুৰিতক্কেত্ৰা অনুৰিচারেত্ৰা দিৰা কম্মন্তে পযোজেতী’’তি (ম. নি. ১.২৫১) ৰুত্তট্ঠানে ৰিতক্কৰিচারা ধূমাযনাতি অধিপ্পেতাতি আহ ‘‘ৰিতক্কৰিচারধূম’’ন্তি. কিঞ্চাপি পঠমজ্ঝানুপচারেযেৰ দুক্খং, চতুত্থজ্ঝানুপচারে চ সুখং পহীযতি, অতিসযপ্পহানং পন সন্ধাযাহ ‘‘চতুত্থজ্ঝানেন সুখদুক্খং পহাযা’’তি.

অনিচ্চস্স, অনিচ্চন্তি চ অনুপস্সনা অনিচ্চানুপস্সনা, তেভূমকধম্মানং অনিচ্চতং গহেত্ৰা পৰত্তায ৰিপস্সনাযেতং নামং. নিচ্চসঞ্ঞন্তি সঙ্খতধম্মেসু ‘‘নিচ্চা সস্সতা’’তি এৰংপৰত্তমিচ্ছাসঞ্ঞং. সঞ্ঞাসীসেন দিট্ঠিচিত্তানম্পি ¶ গহণং দট্ঠব্বং. এস নযো ইতো পরেসুপি. নিব্বিদানুপস্সনাযাতি সঙ্খারেসু নিব্বিজ্জনাকারেন পৰত্তায অনুপস্সনায. নন্দিন্তি সপ্পীতিকতণ্হং. ৰিরাগানুপস্সনাযাতি সঙ্খারেসু ৰিরজ্জনাকারেন পৰত্তায অনুপস্সনায. নিরোধানুপস্সনাযাতি ¶ সঙ্খারানং নিরোধস্স অনুপস্সনায. যথা ৰা সঙ্খারা নিরুজ্ঝন্তিযেৰ, আযতিং পুনব্ভৰৰসেন ন উপ্পজ্জন্তি, এৰং অনুপস্সনা নিরোধানুপস্সনা. তেনেৰাহ ‘‘নিরোধানুপস্সনায নিরোধেতি, নো সমুদেতী’’তি. মুচ্চিতুকম্যতা হি অযং বলপ্পত্তাতি. পটিনিস্সজ্জনাকারেন পৰত্তা অনুপস্সনা পটিনিস্সগ্গানুপস্সনা, পটিসঙ্খাসন্তিট্ঠনা হি অযং. আদানন্তি নিচ্চাদিৰসেন গহণং. সন্ততিসমূহকিচ্চারম্মণানং ৰসেন একত্তগ্গহণং ঘনসঞ্ঞা. আযূহনং অভিসঙ্খরণং. অৰত্থাৰিসেসাপত্তি ৰিপরিণামো. ধুৰসঞ্ঞন্তি থিরভাৰগ্গহণং. নিমিত্তন্তি সমূহাদিঘনৰসেন সকিচ্চপরিচ্ছেদতায চ সঙ্খারানং সৰিগ্গহগ্গহণং. পণিধিন্তি রাগাদিপণিধিং. সা পনত্থতো তণ্হাৰসেন সঙ্খারেসু নিন্নতা. অভিনিৰেসন্তি অত্তানুদিট্ঠিং.

অনিচ্চদুক্খাদিৰসেন সব্বধম্মতীরণং অধিপঞ্ঞাধম্মৰিপস্সনা. সারাদানাভিনিৰেসন্তি অসারেসু সারগ্গহণৰিপল্লাসং. ইস্সরকুত্তাদিৰসেন লোকো সমুপ্পন্নোতি অভিনিৰেসো সম্মোহাভিনিৰেসো. কেচি পন ‘‘অহোসিং নু খো অহং অতীতমদ্ধানন্তিআদিনা (ম. নি. ১.১৮; সং. নি. ২.২০) পৰত্তসংসযাপত্তি সম্মোহাভিনিৰেসো’’তি ৰদন্তি. সঙ্খারেসু লেণতাণভাৰগ্গহণং আলযাভিনিৰেসো. ‘‘আলযরতা আলযসম্মুদিতা’’তি (দী. নি. ২.৬৪, ৬৭; ম. নি. ১.২৮১; ২.৩৩৭; সং. নি. ১.১৭২; মহাৰ. ৭, ৮) ৰচনতো আলযো তণ্হা, সাযেৰ চক্খাদীসু রূপাদীসু চ অভিনিৰিসনৰসেন পৰত্তিযা আলযাভিনিৰেসোতি কেচি. ‘‘এৰংৰিধা সঙ্খারা পটিনিস্সজ্জীযন্তী’’তি পৰত্তং ঞাণং পটিসঙ্খানুপস্সনা. ৰট্টতো ৰিগতত্তা ৰিৰট্টং, নিব্বানং, তত্থ আরম্মণকরণসঙ্খাতেন অনুপস্সনেন পৰত্তিযা ৰিৰট্টানুপস্সনা, গোত্রভূ. সংযোগাভিনিৰেসন্তি সংযুজ্জনৰসেন সঙ্খারেসু নিৰিসনং. দিট্ঠেকট্ঠেতি দিট্ঠিযা সহজাতেকট্ঠে পহানেকট্ঠে চ. ওল়ারিকেতি উপরিমগ্গৰজ্ঝকিলেসে অপেক্খিত্ৰা ৰুত্তং, অঞ্ঞথা দস্সনেন পহাতব্বাপি দুতিযমগ্গৰজ্ঝেহি ওল়ারিকাতি. অণুসহগতেতি অণুভূতে. ইদং হেট্ঠিমমগ্গৰজ্ঝে অপেক্খিত্ৰা ¶ ৰুত্তং. সব্বকিলেসেতি অৰসিট্ঠসব্বকিলেসে. ন হি পঠমাদিমগ্গেহি পহীনা কিলেসা পুন পহীযন্তীতি.

কক্খল়ত্তং কথিনভাৰো. পগ্ঘরণং দ্রৰভাৰো. লোকিযৰাযুনা ভস্তস্স ৰিয যেন ৰাযুনা তংতংকলাপস্স উদ্ধুমাযনং, থদ্ধভাৰো ৰা, তং ৰিত্থম্ভনং. ৰিজ্জমানেপি কলাপন্তরভূতানং কলাপন্তরভূতেহি সম্ফুট্ঠভাৰে তংতংভূতৰিৰিত্ততা রূপপরিযন্তো আকাসোতি যেসং যো পরিচ্ছেদো, তেহি সো অসম্ফুট্ঠোৰ, অঞ্ঞথা ভূতানং পরিচ্ছেদসভাৰো ন সিযা ব্যাপীভাৰাপত্তিতো, অব্যাপিতাৰ ¶ অসম্ফুট্ঠতাতি যস্মিং কলাপে ভূতানং পরিচ্ছেদো, তেহি অসম্ফুট্ঠভাৰো অসম্ফুট্ঠলক্খণং. তেনাহ ভগৰা আকাসধাতুনিদ্দেসে (ধ. স. ৬৩৭) ‘‘অসম্ফুট্ঠং চতূহি মহাভূতেহী’’তি.

ৰিরোধিপচ্চযসন্নিপাতে ৰিসদিসুপ্পত্তি রুপ্পনং. চেতনাপধানত্তা সঙ্খারক্খন্ধধম্মানং চেতনাৰসেনেতং ৰুত্তং ‘‘সঙ্খারানং অভিসঙ্খরণলক্খণ’’ন্তি. তথা হি সুত্তন্তভাজনীযে সঙ্খারক্খন্ধৰিভঙ্গে (ৰিভ. ৯২) ‘‘চক্খুসম্ফস্সজা চেতনা’’তিআদিনা চেতনাৰ ৰিভত্তা. অভিসঙ্খরণলক্খণা চ চেতনা. যথাহ ‘‘তত্থ কতমো পুঞ্ঞাভিসঙ্খারো? কুসলা চেতনা কামাৰচরা’’তিআদি. ফরণং সৰিপ্ফারিকতা. অস্সদ্ধিযেতি অসদ্ধিযহেতু. নিমিত্তত্থে ভুম্মং. এস নযো কোসজ্জেতিআদীসু. উপসমলক্খণন্তি কাযচিত্তপরিল়াহূপসমলক্খণং. লীনুদ্ধচ্চরহিতে অধিচিত্তে পৰত্তমানে পগ্গহনিগ্গহসম্পহংসনেসু অব্যাৰটতায অজ্ঝুপেক্খনং পটিসঙ্খানং পক্খপাতুপচ্ছেদতো.

মুসাৰাদাদীনং ৰিসংৰাদনাদিকিচ্চতায লূখানং অপরিগ্গাহকানং পটিপক্খভাৰতো পরিগ্গাহকসভাৰা সম্মাৰাচা সিনিদ্ধভাৰতো সম্পযুত্তধম্মে সম্মাৰাচাপচ্চযসুভাসিতানং সোতারঞ্চ পুগ্গলং পরিগ্গণ্হাতীতি তস্সা পরিগ্গাহলক্খণং ৰুত্তং. কাযিককিরিযা কিঞ্চি কত্তব্বং সমুট্ঠাপেতি, সযঞ্চ সমুট্ঠহনং ঘটনং হোতীতি সম্মাকম্মন্ত সঙ্খাতায ৰিরতিযা সমুট্ঠানলক্খণং দট্ঠব্বং. সম্পযুত্তধম্মানং ৰা উক্খিপনং সমুট্ঠাপনং কাযিককিরিযায ভারুক্খিপনং ৰিয. জীৰমানস্স সত্তস্স, সম্পযুত্তধম্মানং ৰা জীৰিতিন্দ্রিযপ্পৰত্তিযা, আজীৰস্সেৰ ৰা সুদ্ধি ৰোদানং. সসম্পযুত্তধম্মস্স চিত্তস্স সংকিলেসপক্খে পতিতুং অদত্ৰা সম্মদেৰ পগ্গণ্হনং পগ্গহো.

‘‘সঙ্খারা’’তি ¶ ইধ চেতনা অধিপ্পেতাতি ৰুত্তং ‘‘সঙ্খারানং চেতনালক্খণ’’ন্তি. নমনং আরম্মণাভিমুখভাৰো. আযতনং পৰত্তনং. আযতনানং ৰসেন হি আযসঙ্খাতানং চিত্তচেতসিকানং পৰত্তি. তণ্হায হেতুলক্খণন্তি ৰট্টস্স জনকহেতুভাৰো, মগ্গস্স পন নিব্বানসম্পাপকত্তন্তি অযমেতেসং ৰিসেসো.

তথলক্খণং অৰিপরীতসভাৰো. একরসো অঞ্ঞমঞ্ঞানতিৰত্তনং অনূনানধিকভাৰো. যুগনদ্ধা সমথৰিপস্সনাৰ. সদ্ধাপঞ্ঞা পগ্গহাৰিক্খেপাতিপি ৰদন্তি.

খীণোতি ¶ কিলেসে খেপতীতি খযো, মগ্গো. অনুপ্পাদপরিযোসানতায অনুপ্পাদো, ফলং. পস্সদ্ধি কিলেসৰূপসমো. ছন্দস্সাতি কত্তুকামতাছন্দস্স. মূললক্খণং পতিট্ঠাভাৰো. সমুট্ঠানভাৰো সমুট্ঠানলক্খণং আরম্মণপটিপাদকতায সম্পযুত্তধম্মানং উপ্পত্তিহেতুতা. সমোধানং ৰিসযাদিসন্নিপাতেন গহেতব্বাকারো, যা সঙ্গতীতি ৰুচ্চতি. সমং সহ ওদহন্তি অনেন সম্পযুত্তধম্মাতি ৰা সমোধানং, ফস্সো. সমোসরন্তি সন্নিপতন্তি এত্থাতি সমোসরণং. ৰেদনায ৰিনা অপ্পৰত্তমানা সম্পযুত্তধম্মা ৰেদনানুভৰননিমিত্তং সমোসটা ৰিয হোন্তীতি এৰং ৰুত্তং. গোপানসীনং কূটং ৰিয সম্পযুত্তানং পামোক্খভাৰো পমুখলক্খণং. ততো, তেসং ৰা সম্পযুত্তধম্মানং উত্তরি পধানন্তি ততুত্তরি, পঞ্ঞুত্তরা হি কুসলা ধম্মা. ৰিমুত্তিযাতি ফলস্স. তঞ্হি সীলাদিগুণসারস্স পরমুক্কংসভাৰেন সারং. অযঞ্চ লক্খণৰিভাগো ছধাতুপঞ্চঝানঙ্গাদিৰসেন তংতংসুত্তপদানুসারেন পোরাণট্ঠকথাযং আগতনযেন চ কতোতি দট্ঠব্বং. তথা হি পুব্বে ৰুত্তোপি কোচি ধম্মো পরিযাযন্তরপকাসনত্থং পুন দস্সিতো. ততো এৰ চ ‘‘ছন্দমূলকা কুসলা ধম্মা মনসিকারসমুট্ঠানা ফস্সসমোধানা ৰেদনাসমোসরণা’’তি, ‘‘পঞ্ঞুত্তরা কুসলা ধম্মা’’তি, ‘‘ৰিমুত্তিসারমিদং ব্রহ্মচরিয’’ন্তি, ‘‘নিব্বানোগধঞ্হি আৰুসো ব্রহ্মচরিযং নিব্বানপরিযোসান’’ন্তি (ম. নি. ১.৪৬৬) চ সুত্তপদানং ৰসেন ‘‘ছন্দস্স মূললক্খণ’’ন্তিআদি ৰুত্তং.

তথধম্মা নাম চত্তারি অরিযসচ্চানি অৰিপরীতসভাৰত্তা. তথানি তংসভাৰত্তা. অৰিতথানি অমুসাসভাৰত্তা. অনঞ্ঞথানি অঞ্ঞাকাররহিতত্তা. জাতিপচ্চযসম্ভূতসমুদাগতট্ঠোতি জাতিপচ্চযা সম্ভূতং ¶ হুত্ৰা সহিতস্স অত্তনো পচ্চযানুরূপস্স উদ্ধং আগতভাৰো, অনুপৰত্তনট্ঠোতি অত্থো. অথ ৰা সম্ভূতট্ঠো চ সমুদাগতট্ঠো চ সম্ভূতসমুদাগতট্ঠো, ন জাতিতো জরামরণং ন হোতি, ন চ জাতিং ৰিনা অঞ্ঞতো হোতীতি জাতিপচ্চযসম্ভূতট্ঠো. ইত্থঞ্চ জাতিতো সমুদাগচ্ছতীতি জাতিপচ্চযসমুদাগতট্ঠো, যা যা জাতি যথা যথা পচ্চযো হোতি, তদনুরূপং পাতুভাৰোতি অত্থো. অৰিজ্জায সঙ্খারানং পচ্চযট্ঠোতি এত্থাপি ন অৰিজ্জা সঙ্খারানং পচ্চযো ন হোতি, ন চ অৰিজ্জং ৰিনা সঙ্খারা উপ্পজ্জন্তি, যা যা অৰিজ্জা যেসং যেসং সঙ্খারানং যথা যথা পচ্চযো হোতি, অযং অৰিজ্জায সঙ্খারানং পচ্চযট্ঠো পচ্চযভাৰোতি অত্থো.

ভগৰা তং সব্বাকারতো জানাতি পস্সতীতি সম্বন্ধো. তেনাতি ভগৰতা. তং ৰিভজ্জমানন্তি যোজেতব্বং. তন্তি রুপাযতনং. ইট্ঠানিট্ঠাদীতি আদি-সদ্দেন মজ্ঝত্তং সঙ্গণ্হাতি, তথা অতীতানাগতপচ্চুপ্পন্নপরিত্তঅজ্ঝত্তবহিদ্ধাতদুভযাদিভেদং. লব্ভমানকপদৰসেনাতি ‘‘রূপাযতনং ¶ দিট্ঠং, সদ্দাযতনং সুতং, গন্ধাযতনং রসাযতনং ফোট্ঠব্বাযতনং মুতং, সব্বং রূপং মনসা ৰিঞ্ঞাত’’ন্তি (ধ. স. ৯৬৬) ৰচনতো দিট্ঠপদঞ্চ ৰিঞ্ঞাতপদঞ্চ রূপারম্মণে লব্ভতি, রূপারম্মণং ইট্ঠং অনিট্ঠং মজ্ঝত্তং পরিত্তং অতীতং অনাগতং পচ্চুপ্পন্নং অজ্ঝত্তং বহিদ্ধা দিট্ঠং ৰিঞ্ঞাতং রূপং রূপাযতনং রূপধাতু ৰণ্ণনিভা সনিদস্সনং সপ্পটিঘং নীলং পীতকন্তি এৰমাদীহি অনেকেহি নামেহি.

তেরসহি ৰারেহীতি রূপকণ্ডে (ধ. স. ৬১৬) আগতে তেরস নিদ্দেসৰারে সন্ধাযাহ. একেকস্মিঞ্চ ৰারে চতুন্নং চতুন্নং ৰৰত্থাপননযানং ৰসেন ‘‘দ্ৰেপঞ্ঞাসায নযেহী’’তি আহ. তথমেৰ অৰিপরীতদস্সিতায অপ্পটিৰত্তিযদেসনতায চ. ‘‘জানামি অভিঞ্ঞাসি’’ন্তি ৰত্তমানাতীতকালেসু ঞাণপ্পৰত্তিদস্সনেন অনাগতেপি ঞাণপ্পৰত্তি ৰুত্তাযেৰাতি দট্ঠব্বা. ৰিদিত-সদ্দো অনামট্ঠকালৰিসেসো ৰেদিতব্বো ‘‘দিট্ঠং সুতং মুত’’ন্তিআদীসু (ধ. স. ৯৬৬) ৰিয. ন উপট্ঠাসীতি অত্তত্তনিযৰসেন ন উপগচ্ছি. যথা রূপারম্মণাদযো ধম্মা যংসভাৰা যংপকারা চ, তথা নে পস্সতি জানাতি গচ্ছতীতি তথাগতোতি এৰং পদসম্ভৰো ৰেদিতব্বো. কেচি পন ‘‘নিরুত্তিনযেন পিসোদরাদিপক্খেপেন (পাণিনি ৬.৩.১০৯) ৰা দস্সি-সদ্দস্স লোপং, আগত-সদ্দস্স চাগমং কত্ৰা তথাগতো’’তি ৰণ্ণেন্তি.

নিদ্দোসতায ¶ অনুপৰজ্জং. পক্খিপিতব্বাভাৰেন অনূনং. অপনেতব্বাভাৰেন অনধিকং. অত্থব্যঞ্জনাদিসম্পত্তিযা সব্বাকারপরিপুণ্ণং. নো অঞ্ঞথাতি ‘‘তথেৰা’’তি ৰুত্তমেৰত্থং ব্যতিরেকেন সম্পাদেতি. তেন যদত্থং ভাসিতং, একন্তেন তদত্থনিপ্ফাদনতো যথা ভাসিতং ভগৰতা, তথেৰাতি অৰিপরীতদেসনতং দস্সেতি. গদঅত্থোতি এতেন তথং গদতীতি তথাগতোতি দ-কারস্স ত-কারো কতো নিরুত্তিনযেনাতি দস্সেতি.

তথা গতমস্সাতি তথাগতো. গতন্তি চ কাযৰাচাপৰত্তীতি অত্থো. তথাতি চ ৰুত্তে যংতংসদ্দানং অব্যভিচারিসম্বন্ধিতায যথাতি অযমত্থো উপট্ঠিতোযেৰ হোতি, কাযৰচীকিরিযানঞ্চ অঞ্ঞমঞ্ঞানুলোমেন ৰচনিচ্ছাযং কাযস্স ৰাচা, ৰাচায চ কাযো সম্বন্ধীভাৰেন উপতিট্ঠতীতি ইমমত্থং দস্সেন্তো আহ ‘‘ভগৰতো হী’’তিআদি. ইমস্মিং পন অত্থে তথাৰাদীতায তথাগতোতি অযম্পি অত্থো সিদ্ধো হোতি. সো পন পুব্বে পকারন্তরেন দস্সিতোতি আহ ‘‘এৰং তথাকারিতায তথাগতো’’তি.

তিরিযং অপরিমাণাসু লোকধাতূসূতি এতেন যদেকে ‘‘তিরিযং ৰিয উপরি অধো চ সন্তি লোকধাতুযো’’তি ¶ ৰদন্তি, তং পটিসেধেতি. দেসনাৰিলাসোযেৰ দেসনাৰিলাসমযো যথা ‘‘পুঞ্ঞমযং, দানময’’ন্তিআদীসু.

নিপাতানং ৰাচকসদ্দসন্নিধানে তদত্থজোতনভাৰেন পৰত্তনতো গত-সদ্দোযেৰ অৰগতত্থং অতীতত্থঞ্চ ৰদতীতি আহ ‘‘গতোতি অৰগতো অতীতো’’তি.

অথ ৰা অভিনীহারতো পট্ঠায যাৰ সম্মাসম্বোধি, এত্থন্তরে মহাবোধিযানপটিপত্তিযা হানট্ঠানসংকিলেসনিৰত্তীনং অভাৰতো যথা পণিধানং, তথা গতো অভিনীহারানুরূপং পটিপন্নোতি তথাগতো. অথ ৰা মহিদ্ধিকতায পটিসম্ভিদানং উক্কংসাধিগমেন অনাৰরণঞাণতায চ কত্থচিপি পটিঘাতাভাৰতো যথা রুচি, তথা কাযৰচীচিত্তানং গতানি গমনানি পৰত্তিযো এতস্সাতি তথাগতো. যস্মা চ লোকে ৰিধ-যুত্ত-গত-প্পকার-সদ্দা সমানত্থা দিস্সন্তি. তস্মা যথাৰিধা ৰিপস্সীআদযো ভগৰন্তো, অযম্পি ভগৰা তথাৰিধোতি তথাগতো ¶ , যথাযুত্তা চ তে ভগৰন্তো, অযম্পি ভগৰা তথাযুত্তোতি তথাগতো. অথ ৰা যস্মা সচ্চং তচ্ছং তথন্তি ঞাণস্সেতং অধিৰচনং, তস্মা তথেন ঞাণেন আগতোতি তথাগতো. এৰম্পি তথাগত-সদ্দস্স অত্থো ৰেদিতব্বো.

পহায কামাদিমলে যথা গতা,

সমাধিঞাণেহি ৰিপস্সিআদযো;

মহেসিনো সক্যমুনী জুতিন্ধরো,

তথা গতো তেন মতো তথাগতো.

তথঞ্চ ধাতাযতনাদিলক্খণং,

সভাৰসামঞ্ঞৰিভাগভেদতো;

সযম্ভুঞাণেন জিনো সমাগতো,

তথাগতো ৰুচ্চতি সক্যপুঙ্গৰো.

তথানি সচ্চানি সমন্তচক্খুনা,

তথা ইদপ্পচ্চযতা চ সব্বসো;

অনঞ্ঞনেয্যেন যতো ৰিভাৰিতা,

যাথাৰতো তেন জিনো তথাগতো.

অনেকভেদাসুপি ¶ লোকধাতুসু,

জিনস্স রূপাযতনাদিগোচরে;

ৰিচিত্রভেদং তথমেৰ দস্সনং,

তথাগতো তেন সমন্তলোচনো.

যতো চ ধম্মং তথমেৰ ভাসতি,

করোতি ৰাচাযনুলোমমত্তনো;

গুণেহি লোকং অভিভুয্যিরীযতি,

তথাগতো তেনপি লোকনাযকো.

যথাভিনীহারমতো যথারুচি,

পৰত্তৰাচা তনুচিত্তভাৰতো;

যথাৰিধা যেন পুরা মহেসিনো,

তথাৰিধো তেন জিনো তথাগতোতি. (ইতিৰু. অট্ঠ. ৩৮; দী. নি. টী. ১.৭ চূল়সীলৰণ্ণনা);

আরকত্তাতিআদীনং ¶ পদানং অত্থো ৰিসুদ্ধিমগ্গে (ৰিসুদ্ধি. ১.১২৫) বুদ্ধানুস্সতিসংৰণ্ণনায ৰুত্তনযেনেৰ ৰেদিতব্বো. সম্মা সামঞ্চ সব্বধম্মানং বুদ্ধত্তাতি ইমিনাস্স পরোপদেসরহিতস্স সব্বাকারেন সব্বধম্মাৰবোধনসমত্থস্স আকঙ্খাপটিবদ্ধৰুত্তিনো অনাৰরণঞাণসঙ্খাতস্স সব্বঞ্ঞুতঞ্ঞাণস্স অধিগমো দস্সিতো.

ননু চ (ইতিৰু. অট্ঠ. ৩৮) সব্বঞ্ঞুতঞ্ঞাণতো অঞ্ঞং অনাৰরণঞাণং, অঞ্ঞথা ছ অসাধারণঞাণানি বুদ্ধঞাণানীতি ৰচনং ৰিরুজ্ঝেয্যাতি? ন ৰিরুজ্ঝতি ৰিসযপ্পৰত্তিভেদৰসেন অঞ্ঞেহি অসাধারণঞাণভাৰদস্সনত্থং একস্সেৰ ঞাণস্স দ্ৰিধা ৰুত্তত্তা. একমেৰ হি তং ঞাণং অনৰসেসসঙ্খতাসঙ্খতসম্মুতিধম্মৰিসযতায সব্বঞ্ঞুতঞ্ঞাণং, তত্থ চ আৰরণাভাৰতো নিস্সঙ্গচারমুপাদায অনাৰরণঞাণন্তি ৰুত্তং. যথাহ পটিসম্ভিদাযং (পটি. ম. ১.১১৯) ‘‘সব্বং সঙ্খতাসঙ্খতমনৰসেসং জানাতীতি সব্বঞ্ঞুতঞ্ঞাণং, তত্থাৰরণং নত্থীতি অনাৰরণঞাণ’’ন্তিআদি, তস্মা নত্থি নেসং অত্থতো ভেদো, একন্তেন চেতং এৰমিচ্ছিতব্বং, অঞ্ঞথা সব্বঞ্ঞুতানাৰরণঞাণানং সাৰরণতা অসব্বধম্মারম্মণতা চ আপজ্জেয্য. ন হি ভগৰতো ঞাণস্স অণুমতম্পি আৰরণং অত্থি, অনাৰরণঞাণস্স চ অসব্বধম্মারম্মণভাৰে ¶ যত্থ তং নপ্পৰত্ততি, তত্থাৰরণসব্ভাৰতো অনাৰরণভাৰোযেৰ ন সিযা. অথ ৰা পন হোতু অঞ্ঞমেৰ অনাৰরণঞাণং সব্বঞ্ঞুতঞ্ঞাণতো, ইধ পন সব্বত্থ অপ্পটিহতৰুত্তিতায অনাৰরণঞাণন্তি সব্বঞ্ঞুতঞ্ঞাণমেৰ অধিপ্পেতং, তস্স চাধিগমেন ভগৰা সব্বঞ্ঞূ সব্বৰিদূ সম্মাসম্বুদ্ধোতি চ ৰুচ্চতি, ন সকিমেৰ সব্বধম্মাৰবোধতো. তথা চ ৰুত্তং পটিসম্ভিদাযং (পটি. ম. ১.১৬২) ‘‘ৰিমোক্খন্তিকমেতং বুদ্ধানং ভগৰন্তানং বোধিযা মূলে সহ সব্বঞ্ঞুতঞ্ঞাণস্স পটিলাভা সচ্ছিকা পঞ্ঞত্তি যদিদং বুদ্ধো’’তি. সব্বধম্মাৰবোধনসমত্থঞাণসমধিগমেন হি ভগৰতো সন্তানে অনৰসেসধম্মে পটিৰিজ্ঝিতুং সমত্থতা অহোসীতি.

এত্থাহ – কিং পনিদং ঞাণং পৰত্তমানং সকিংযেৰ সব্বস্মিং ৰিসযে পৰত্ততি, উদাহু কমেনাতি. কিঞ্চেত্থ – যদি তাৰ সকিংযেৰ সব্বস্মিং ৰিসযে পৰত্ততি, অতীতানাগতপচ্চুপ্পন্নঅজ্ঝত্তবহিদ্ধাদিভেদেন ভিন্নানং সঙ্খতধম্মানং ¶ অসঙ্খতসম্মুতিধম্মানঞ্চ একজ্ঝং উপট্ঠানে দূরতো চিত্তপটং অৰেক্খন্তস্স ৰিয পটিৰিভাগেনাৰবোধো ন সিযা, তথা চ সতি ‘‘সব্বে ধম্মা অনত্তা’’তি ৰিপস্সন্তানং অনত্তাকারেন ৰিয সব্বে ধম্মা অনিরূপিতরূপেন ভগৰতো ঞাণস্স ৰিসযা হোন্তীতি আপজ্জতি. যেপি ‘‘সব্বঞেয্যধম্মানং ঠিতলক্খণৰিসযং ৰিকপ্পরহিতং সব্বকালং বুদ্ধানং ঞাণং পৰত্ততি, তেন তে সব্বৰিদূতি ৰুচ্চন্তি. এৰঞ্চ কত্ৰা ‘চরং সমাহিতো নাগো, তিট্ঠন্তোপি সমাহিতো’তি ইদম্পি ৰচনং সুৰুত্তং হোতী’’তি ৰদন্তি, তেসম্পি ৰুত্তদোসানতিৰত্তি. ঠিতলক্খণারম্মণতায হি অতীতানাগতসম্মুতিধম্মানং তদভাৰতো একদেসৰিসযমেৰ ভগৰতো ঞাণং সিযা, তস্মা সকিংযেৰ ঞাণং পৰত্ততীতি ন যুজ্জতি.

অথ কমেন সব্বস্মিং ৰিসযে ঞাণং পৰত্ততি, এৰম্পি ন যুজ্জতি. ন হি জাতিভূমিসভাৰাদিৰসেন দিসাদেসকালাদিৰসেন চ অনেকভেদভিন্নে নেয্যে কমেন গয্হমানে তস্স অনৰসেসপটিৰেধো সম্ভৰতি অপরিযন্তভাৰতো ঞেয্যস্স. যে পন ‘‘অত্থস্স অৰিসংৰাদনতো ঞেয্যস্স একদেসং পচ্চক্খং কত্ৰা সেসেপি এৰন্তি অধিমুচ্চিত্ৰা ৰৰত্থাপনেন সব্বঞ্ঞূ ভগৰা, তঞ্চ ঞাণং অননুমানিকং সংসযাভাৰতো. সংসযানুবন্ধঞ্হি লোকে অনুমানঞাণ’’ন্তি ৰদন্তি, তেসম্পি তং ন যুত্তং. সব্বস্স হি অপ্পচ্চক্খভাৰে অত্থস্স অৰিসংৰাদনেন ঞেয্যস্স একদেসং পচ্চক্খং কত্ৰা সেসেপি এৰন্তি অধিমুচ্চিত্ৰা ৰৰত্থাপনস্স অসম্ভৰতো. যঞ্হি তং সেসং, তং অপ্পচ্চক্খন্তি. অথ তম্পি পচ্চক্খং, তস্স সেসভাৰো এৰ ন সিযাতি? সব্বমেতং অকারণং. কস্মা? অৰিসযৰিচারণভাৰতো. ৰুত্তঞ্হেতং ভগৰতা ¶ ‘‘বুদ্ধৰিসযো ভিক্খৰে, অচিন্তেয্যো ন চিন্তেতব্বো, যো চিন্তেয্য, উম্মাদস্স ৰিঘাতস্স ভাগী অস্সা’’তি (অ. নি. ৪.৭৭). ইদং পনেত্থ সন্নিট্ঠানং – যং কিঞ্চি ভগৰতা ঞাতুং ইচ্ছিতং সকলমেকদেসো ৰা, তত্থ অপ্পটিহতৰুত্তিতায পচ্চক্খতো ঞাণং পৰত্ততি, নিচ্চসমাধানঞ্চ ৰিক্খেপাভাৰতো, ঞাতুং ইচ্ছিতস্স চ সকলস্স অৰিসযভাৰে তস্স আকঙ্খাপটিবদ্ধৰুত্তিতা ন সিযা, একন্তেনেৰ চ সা ইচ্ছিতব্বা ‘‘সব্বে ধম্মা বুদ্ধস্স ভগৰতো আৰজ্জনপটিবদ্ধা আকঙ্খপটিবদ্ধা মনসিকারপটিবদ্ধা চিত্তুপ্পাদপটিবদ্ধা’’তি (মহানি. ৬৯, ১৫৬; চূল়নি. ৮৫; পটি. ম. ৩.৫) ৰচনতো. অতীতানাগতৰিসযম্পি ভগৰতো ঞাণং অনুমানাগমতক্কগহণৰিরহিতত্তা পচ্চক্খমেৰ.

ননু ¶ চ এতস্মিম্পি পক্খে যদা সকলং ঞাতুং ইচ্ছিতং, তদা সকিংযেৰ সকলৰিসযতায অনিরূপিতরূপেন ভগৰতো ঞাণং পৰত্তেয্যাতি ৰুত্তদোসানতিৰত্তিযেৰাতি? ন, তস্স ৰিসোধিতত্তা. ৰিসোধিতো হি সো বুদ্ধৰিসযো অচিন্তেয্যোতি. অঞ্ঞথা পচুরজনঞাণসমানৰুত্তিতায বুদ্ধানং ভগৰন্তানং ঞাণস্স অচিন্তেয্যতা ন সিযা, তস্মা সকলধম্মারম্মণম্পি তং একধম্মারম্মণং ৰিয সুৰৰত্থাপিতেযেৰ তে ধম্মে কত্ৰা পৰত্ততীতি ইদমেত্থ অচিন্তেয্যং, অনন্তঞ্চ ঞাণং ঞেয্যং ৰিয. ৰুত্তঞ্হেতং ‘‘যাৰতকং ঞেয্যং, তাৰতকং ঞাণং. যাৰতকং ঞাণং, তাৰতকং ঞেয্যং. ঞেয্যপরিযন্তিকং ঞাণং, ঞাণপরিযন্তিকং ঞেয্য’’ন্তি (মহানি. ৬৯, ১৫৬; চূল়নি. ৮৫; পটি. ম. ৩.৫). এৰমেকজ্ঝং, ৰিসুং সকিং, কমেন ৰা ইচ্ছানুরূপং সম্মা সামঞ্চ সব্বধম্মানং বুদ্ধত্তা সম্মাসম্বুদ্ধো.

তন্তি যথাৰুত্তং পথৰীআদিভেদং. পরিঞ্ঞাতন্তি পরিতো সমন্ততো সব্বাকারতো ঞাতং, তং পরিজানিতব্বভাৰং কিঞ্চি অসেসেত্ৰা ঞাতন্তি অত্থো. অযমেৰ হি অত্থো ‘‘পরিঞ্ঞাতন্ত’’ন্তি ইমিনাপি পদেন পকাসিতোতি দস্সেন্তো ‘‘পরিঞ্ঞাতন্তং নামা’’তিআদিমাহ. তেন তেন মগ্গেন কিলেসপ্পহানেন ৰিসেসো নত্থীতি ইদং তংতংমগ্গৰজ্ঝকিলেসানং বুদ্ধানং সাৰকানঞ্চ তেন তেন মগ্গেনেৰ পহাতব্বভাৰসামঞ্ঞং সন্ধায ৰুত্তং, ন সাৰকেহি বুদ্ধানং কিলেসপ্পহানৰিসেসাভাৰতো. তথা হি সম্মাসম্বুদ্ধা এৰ সৰাসনকিলেসে জহন্তি, ন সাৰকা. একদেসমেৰাতি অত্তনো সন্তানগতমেৰ. সসন্ততিপরিযাপন্নধম্মপরিঞ্ঞামত্তেনপি হি চতুসচ্চকম্মট্ঠানভাৰনা সমিজ্ঝতি. তেনেৰাহ – ‘‘ইমস্মিংযেৰ ব্যামমত্তে কল়েৰরে সসঞ্ঞিম্হি সমনকে লোকঞ্চ পঞ্ঞপেমি লোকসমুদযঞ্চ পঞ্ঞপেমী’’তিআদি (সং. নি. ১.১০৭; অ. নি. ৪.৪৫). অণুপ্পমাণম্পি ¶ …পে… নত্থি, যতো ছত্তিংসকোটিসতসহস্সমুখেন বুদ্ধানং মহাৰজিরঞাণং পৰত্ততীতি ৰদন্তি.

তথাগতৰারসত্তমনযৰণ্ণনা নিট্ঠিতা.

তথাগতৰারঅট্ঠমনযৰণ্ণনা

১৩. পুরিমতণ্হাতি ¶ পুরিমতরেসু ভৰেসু নিব্বত্তা পচ্চুপ্পন্নত্তভাৰহেতুভূতা তণ্হা. তগ্গহণেনেৰ চ অতীতদ্ধসঙ্গহা অৰিজ্জাসঙ্খারা সদ্ধিং উপাদানেন সঙ্গহিতাতি দট্ঠব্বা. এত্থাতি ‘‘ভৰা জাতী’’তি এতস্মিং পদে. তেন উপপত্তিভৰেনাতি ‘‘ভৰা জাতী’’তি জাতিসীসেন ৰুত্তউপপত্তিভৰেন. ভূতস্সাতি নিব্বত্তস্স. সো পন যস্মা সত্তো নাম হোতি, তস্মা ৰুত্তং ‘‘সত্তস্সা’’তি. এৰঞ্চ জানিত্ৰাতি ইমিনা ‘‘ভূতস্স জরামরণ’’ন্তি এত্থাপি ‘‘ইতি ৰিদিত্ৰা’’তি ইদং পদং আনেত্ৰা যোজেতব্বন্তি দস্সেতি.

যদিপি তেভূমকা উপাদানক্খন্ধা ‘‘যং কিঞ্চি রূপ’’ন্তিআদিনা (ৰিভ. ২; ম. নি. ১.২৪৪) একাদসসু ওকাসেসু পক্খিপিতব্বা সম্মসিতব্বা চ, তে পন যস্মা ভগৰতা ‘‘কিম্হি নু খো সতি জরামরণং হোতি, কিংপচ্চযা জরামরণ’’ন্তিআদিনা (দী. নি. ২.৫৭; সং. নি. ২.৪, ১০) পটিচ্চসমুপ্পাদমুখেন সম্মসিতা, পটিচ্চসমুপ্পাদো চ পৰত্তিপৰত্তিহেতুভাৰতো পুরিমসচ্চদ্ৰযমেৰ হোতি, তস্মা তদভিসমযং ‘‘মঞ্ঞনাভাৰহেতু পচ্চযাকারপটিৰেধো’’তি ৰিভাৰেন্তো ‘‘যং বোধিরুক্খমূলে…পে… দস্সেন্তো’’তি আহ. সংখিপ্পন্তি এত্থ অৰিজ্জাদযো ৰিঞ্ঞাণাদযো চাতি সঙ্খেপা, অতীতে হেতুআদযো ‘‘হেতু, ফল’’ন্তি এৰং সংখিপ্পন্তীতি ৰা সঙ্খেপা, অৰিজ্জাদযো ৰিঞ্ঞাণাদযো চ. সঙ্খেপ-সদ্দো ভাগাধিৰচনন্তি দট্ঠব্বো. তেনাহ ‘‘কোট্ঠাসাতি অত্থো’’তি. তে পন অতীতে হেতুসঙ্খেপো, এতরহি ফলসঙ্খেপো, এতরহি হেতুসঙ্খেপো, আযতিং ফলসঙ্খেপোতি চত্তারো সঙ্খেপা এতস্সাতি চতুসঙ্খেপো, তং চতুসঙ্খেপং. হেতুফলসন্ধি, ফলহেতুসন্ধি, পুন হেতুফলসন্ধীতি এৰং তযো সন্ধী এতস্সাতি তিসন্ধি, তং তিসন্ধিং. অতীতপচ্চুপ্পন্নানাগতভেদা তযো অদ্ধা এতস্সাতি তিযদ্ধো, তং তিযদ্ধং. সরূপতো অৰুত্তাপি তস্মিং তস্মিং সঙ্খেপে আকিরীযন্তি অৰিজ্জাসঙ্খারাদিগ্গহণেহি পকাসীযন্তীতি আকারা, অতীতহেতুআদীনং ৰা পকারা আকারা, তে একেকসঙ্খেপে পঞ্চ পঞ্চ কত্ৰা ৰীসতি আকারা এতস্সাতি ৰীসতাকারো, তং ৰীসতাকারং.

এস ¶ ¶ সব্বোতি এস চতুসঙ্খেপাদিপভেদো অনৰসেসো পচ্চযো. পচ্চযলক্খণেনাতি পচ্চযভাৰেন অত্তনো ফলস্স পটিসন্ধিৰিঞ্ঞাণস্স পচ্চযভাৰেন, অৰিনাভাৰলক্খণেনাতি অত্থো. যথা হি তণ্হং ৰিনা অৰিজ্জাদযো ৰিঞ্ঞাণস্স পচ্চযা ন হোন্তি, এৰং তণ্হাপি অৰিজ্জাদিকে ৰিনাতি. এত্থ দুক্খগ্গহণেন ৰিঞ্ঞাণনামরূপসল়াযতনফস্সৰেদনানং, ভৰগ্গহণেন চ তণ্হাসঙ্খারুপাদানানং গহিততা ৰুত্তনযা এৰাতি ন উদ্ধটা.

ইদানি তে ৰীসতি আকারে পটিসম্ভিদামগ্গপাল়িযা ৰিভাৰেতুং ‘‘এৰমেতে’’তিআদি ৰুত্তং. তত্থ (পটি. ম. অট্ঠ. ১.৪৭) পুরিমকম্মভৰস্মিন্তি পুরিমে কম্মভৰে, অতীতজাতিযং কম্মভৰে কযিরমানেতি অত্থো. মোহো অৰিজ্জাতি যো তদা দুক্খাদীসু মোহো, যেন মূল়্হো কম্মং করোতি, সা অৰিজ্জা. আযূহনা সঙ্খারাতি তং তং কম্মং করোন্তো দানুপকরণাদি সজ্জনাদিৰসেন যা পুরিমচেতনাযো, তে সঙ্খারা. পটিগ্গাহকানং পন হত্থে দেয্যধম্মং পতিট্ঠাপযতো চেতনা ভৰো. একাৰজ্জনজৰনেসু ৰা পুরিমা চেতনা আযূহনা সঙ্খারা, সত্তমা ভৰো. যা কাচি ৰা পন চেতনা ভৰো, সম্পযুত্তা আযূহনা সঙ্খারা. নিকন্তি তণ্হাতি যং কম্মং করোন্তস্স উপপত্তিভৰে তস্স ফলস্স নিকামনা পত্থনা, সা তণ্হা নাম. উপগমনং উপাদানন্তি যং কম্মভৰস্স পচ্চযভূতং ‘‘ইদং কম্মং কত্ৰা অসুকস্মিং নাম ঠানে কামে সেৰিস্সামি উচ্ছিজ্জিস্সামী’’তিআদিনা নযেন পৰত্তং উপগমনং গহণং পরামসনং, ইদং উপাদানং নাম. চেতনা ভৰোতি দ্ৰীসু অত্থৰিকপ্পেসু ৰুত্তস্স আযূহনস্স অৰসানে ৰুত্তচেতনা, ততিযে পন আযূহনসম্পযুত্তচেতনা ভৰো. ইতি ইমে পঞ্চ ধম্মা পুরিমকম্মভৰস্মিং ইধ পটিসন্ধিযা পচ্চযাতি ইমে যথাৰুত্তা মোহাদযো পঞ্চ ধম্মা অতীতকম্মভৰসিদ্ধা এতরহি পটিসন্ধিযা পচ্চযভূতাতি অত্থো.

ইধ পটিসন্ধিৰিঞ্ঞাণন্তি যং ভৰন্তরপটিসন্ধানৰসেন উপ্পন্নত্তা পটিসন্ধীতি ৰুচ্চতি, তং ৰিঞ্ঞাণং. ওক্কন্তি নামরূপন্তি যা গব্ভে রূপারূপধম্মানং ওক্কন্তি আগন্ত্ৰা পৰিসন্তী ৰিয, ইদং নামরূপং. পসাদো আযতনন্তি ইদং চক্খাদিপঞ্চাযতনৰসেন ৰুত্তং. ফুট্ঠো ফস্সোতি যো আরম্মণং ফুট্ঠো ফুসন্তো উপ্পন্নো, অযং ফস্সো. ৰেদযিতং ¶ ৰেদনাতি যং পটিসন্ধিৰিঞ্ঞাণেন ৰা সল়াযতনপচ্চযেন ৰা ফস্সেন সহুপ্পন্নং ৰিপাকৰেদযিতং, সা ৰেদনা. ইতি ইমে…পে… পচ্চযাতি ইমে ৰিঞ্ঞাণাদযো পঞ্চ কোট্ঠাসিকা ধম্মা পুরিমভৰে কতস্স কম্মস্স কম্মৰট্টস্স পচ্চযা, পচ্চযভাৰতো তং পটিচ্চ ইধ এতরহি উপপত্তিভৰস্মিং উপপত্তিভৰভাৰেন ৰা হোন্তীতি অত্থো.

ইধ ¶ পরিপক্কত্তা আযতনানং মোহোতি পরিপক্কাযতনস্স কম্মকরণকালে অসম্মোহং দস্সেতি. দহরস্স হি চিত্তপ্পৰত্তি ভৰঙ্গবহুলা যেভুয্যেন ভৰন্তরজনককম্মাযূহনসমত্থা ন হোতীতি. কম্মকরণকালেতি চ ইমিনা সব্বো কম্মস্স পচ্চযভূতো সম্মোহো গহিতো, ন সম্পযুত্তোৰ. সেসং ৰুত্তনযমেৰ.

পদযোজনাযাতি ‘‘তস্মা’’তিআদীনং পদানং সম্বন্ধেন সহ. অত্থনিগমনন্তি ইমস্মিং অট্ঠমৰারে দেসনত্থনিগমনং. নন্দীতি এৰং ৰুত্তানং সব্বতণ্হানন্তি ‘‘নন্দী দুক্খস্স মূল’’ন্তি এৰং নন্দনত্থসামঞ্ঞতো একৰচনেন ৰুত্তানং সব্বতণ্হানং সন্তানারম্মণসম্পযুত্তধম্মপ্পৰত্তিআকারাদিভেদেন অনেকভেদানং সব্বাসং তণ্হানং. খযৰেৰচনানেৰাতি সমুচ্ছেদপহানৰেৰচনানেৰ. ‘‘অচ্চন্তক্খযা’’তি হি ৰুত্তং. চতুমগ্গকিচ্চসাধারণমেতন্তি চতুন্নং অরিযমগ্গানং পহানকিচ্চস্স সাধারণং সামঞ্ঞতো গহণং এতং খযাদিৰচনন্তি অত্থো. তেসং পন মগ্গানং কমেন পৰত্তনং কিচ্চকমেনেৰ দস্সেতুং ‘‘ৰিরাগা’’তিআদি ৰুত্তন্তি দস্সেন্তো ‘‘ততো…পে… যোজেতব্ব’’ন্তি আহ. তথা সতিপি খযাদিসদ্দানং পহানপরিযাযভাৰে পহাতব্বায পন ৰিসযভেদভিন্নায তণ্হায অনৰসেসতো পহীনভাৰদীপনত্থং খযাদিপরিযাযন্তরগ্গহণং কতন্তি দস্সেন্তো ‘‘যাহী’’তিআদিমাহ. যথাৰুত্তসঞ্জননাদিহেতুভূতায তণ্হায পহীনত্তা তপ্পহানদীপনং কত্ৰা ৰুচ্চমানং খযাদিৰচনং ন কথঞ্চি ধম্মতং ৰিলোমেতীতি ৰুত্তং ‘‘ন কিঞ্চি ৰিরুজ্ঝতী’’তি.

উত্তরৰিরহিতন্তি অত্তানং উত্তরিতুং সমত্থত্তা উত্তরেন অধিকেন ৰিরহিতং. অযঞ্চস্স উত্তরৰিরহতা অত্তনো সেট্ঠভাৰেনাতি আহ ‘‘সব্বসেট্ঠ’’ন্তি. যথা সম্মা-সং-সদ্দা ‘‘অৰিপরীতং, সাম’’ন্তি ইমেসং পদানং অত্থং ৰদন্তি, এৰং পাসংসসোভনত্থেপীতি আহ ‘‘সম্মা সামঞ্চ বোধিং পসত্থং সুন্দরঞ্চ বোধি’’ন্তি. বুজ্ঝি এত্থ পটিৰিজ্ঝি চত্তারি অরিযসচ্চানি, সব্বম্পি ৰা নেয্যন্তি রুক্খো বোধি, বুজ্ঝতি এতেনাতি পন মগ্গো বোধি, তথা ¶ সব্বঞ্ঞুতঞ্ঞাণং, নিব্বানং পন বুজ্ঝিতব্বতো বোধীতি অযমেত্থ সাধনৰিভাগো দট্ঠব্বো. পণ্ণত্তিযম্পি অত্থেৰ বোধি-সদ্দো ‘‘বোধিরাজকুমারো’’তিআদীসু (ম. নি. ২.৩২৪; চূল়ৰ. ২৬৮). অপরেতি সারসমাসাচরিযা. এত্থ চ সউপসগ্গস্স বোধি-সদ্দস্স অত্থুদ্ধারে অনুপসগ্গানং উদাহরণে কারণং হেট্ঠা ৰুত্তমেৰ.

লোকুত্তরভাৰতো ৰা তত্থাপি হেট্ঠিমমগ্গানং ৰিয ততুত্তরিমগ্গাভাৰতো চ ‘‘সিযা নু খো অনুত্তরা বোধী’’তি আসঙ্কং সন্ধায তং ৰিধমিতুং ‘‘সাৰকান’’ন্তিআদি ৰুত্তং. অভিনীহারসম্পত্তিযা ফলৰিসেসভূতেহি ঞাণৰিসেসেহি একচ্চেহি সকলেহি সদ্ধিং সমিজ্ঝমানো ¶ মগ্গো অরিযানং তং তং ঞাণৰিসেসাদিং দেন্তো ৰিয হোতীতি তস্স অসব্বগুণদাযকত্তং ৰুত্তং. তেন অনঞ্ঞসাধারণাভিনীহারসম্পদাসিদ্ধস্স নিরতিসয-গুণানুবন্ধস্স ৰসেন অরহত্তমগ্গো অনুত্তরা বোধি নাম হোতীতি দস্সেতি. সাৰকপারমিঞাণং অঞ্ঞেহি সাৰকেহি অসাধারণং মহাসাৰকানংযেৰ আৰেণিকং ঞাণং. পচ্চেকং সচ্চানি বুদ্ধৰন্তোতি পচ্চেকবুদ্ধা. ননু চ সব্বেপি অরিযা পচ্চেকমেৰ সচ্চানি পটিৰিজ্ঝন্তি ধম্মস্স পচ্চত্তং ৰেদনীযভাৰতোতি? সচ্চং, নযিদমীদিসং পটিৰেধং সন্ধায ৰুত্তং, যথা পন সাৰকা অঞ্ঞসন্নিস্সযেন সচ্চানি পটিৰিজ্ঝন্তি পরতোঘোসেন ৰিনা তেসং দস্সনমগ্গস্স অনুপ্পজ্জনতো, যথা চ সম্মাসম্বুদ্ধো অঞ্ঞেসং নিস্সযভাৰেন সচ্চানি অভিসম্বুজ্ঝন্তি, ন এৰমেতে, এতে পন অপরনেয্যা হুত্ৰা অপরিণাযকভাৰেন সচ্চানি পটিৰিজ্ঝন্তি. তেন ৰুত্তং ‘‘পচ্চেকং সচ্চানি বুদ্ধৰন্তোতি পচ্চেকবুদ্ধা’’তি.

ইতীতি করীযতি উচ্চারীযতীতি ইতিকারো, ইতি-সদ্দো. কারণত্থো অনিযমরূপেনাতি অধিপ্পাযো, তস্মাতি ৰুত্তং হোতি. তেনাহ ‘‘যস্মা চা’’তি. পুব্বে পন ইতি-সদ্দং পকারত্থং কত্ৰা ‘‘এৰং জানিত্ৰা’’তি ৰুত্তং, ইধাপি তং পকারত্থমেৰ কত্ৰা অথো যুজ্জতি. কথং? ৰিদিত্ৰাতি হি পদং হেতুঅত্থে দট্ঠব্বং ‘‘পঞ্ঞায চস্স দিস্ৰা’’তি (ম. নি. ১.২৭১), ‘‘ঘতং পিৰিত্ৰা বলং হোতী’’তি চ এৰমাদীসু ৰিয, তস্মা পকারত্থেপি ইতি-সদ্দে পটিচ্চসমুপ্পাদস্স ৰিদিতত্তাতি অযং অত্থো লব্ভতেৰ. পটিচ্চসমুপ্পাদং ৰিদিত্ৰাতি এত্থাপি হেতুঅত্থে ৰিদিত্ৰা-সদ্দে যথাৰুত্তা অত্থযোজনা যুজ্জতেৰ. এত্থ চ পঠমৰিকপ্পে পটিচ্চসমুপাদস্স ৰিদিতত্থং মঞ্ঞনাভাৰস্স কারণং ¶ ৰত্ৰা তণ্হামূলকস্স পটিচ্চসমুপ্পাদস্স দস্সিতত্তা এত্থ তণ্হাপ্পহানং সম্মাসম্বোধিযা অধিগমনকারণং উদ্ধতন্তি দস্সিতং, তস্মা ‘‘পথৰিং ন মঞ্ঞতী’’তিআদি নিগমনং দট্ঠব্বং. দুতিযৰিকপ্পে পন পটিচ্চসমুপ্পাদৰেদনং তণ্হাপ্পহানস্স কারণং ৰুত্তং, তং অভিসম্বোধিযা অভিসম্বোধিমঞ্ঞনাভাৰস্সাতি অযমত্থো দস্সিতোতি অযমেতেসং দ্ৰিন্নং অত্থৰিকপ্পানং ৰিসেসো, তস্মা ‘‘নন্দী দুক্খস্স মূল’’ন্তি ৰুত্তং.

তং কুতো লব্ভতীতি চোদনং সন্ধাযাহ ‘‘যত্থ যত্থ হী’’তিআদি. সাসনযুত্তি অযং সাসনেপি এৰং সম্বন্ধো দিস্সতীতি কত্ৰা. লোকেপি হি যং-তং-সদ্দানং অব্যভিচারিসম্বন্ধতা সিদ্ধা.

এৰং অভিসম্বুদ্ধোতি ৰদামীতি অভিসম্বুদ্ধভাৰস্স গহিতত্তা, অসব্বঞ্ঞুনা এৰং দেসেতুং অসক্কুণেয্যত্তা চ ‘‘সব্বঞ্ঞুতঞ্ঞাণং দস্সেন্তো’’তিআদিমাহ.

ৰিচিত্রনযদেসনাৰিলাসযুত্তন্তি ¶ পুথুজ্জনৰারাদিৰিভাগভিন্নেহি ৰিচিত্তেহি তন্তি নযেহি, লক্খণকম্মতণ্হামঞ্ঞনাদিৰিভাগভিন্নেহি ৰিচিত্তেহি অত্থনযেহি, অভিনন্দনপচ্চযাকারাদিৰিসেসাপদেসসিদ্ধেন দেসনাৰিলাসেন চ যুত্তং. যথা তে ন জানন্তি, তথা দেসেসীতি ইমিনাপি ভগৰতো দেসনাৰিলাসংযেৰ ৰিভাৰেতি. তংযেৰ কির পথৰিন্তি এত্থ পথৰীগহণং উপলক্খণমত্তং আপাদিৰসেনপি, তথা ‘‘কীদিসা নু খো ইধ পথৰী অধিপ্পেতা, কস্মা চ ভূতরূপানিযেৰ গহিতানি, ন সেসরূপানী’’তিআদিনাপি তেসং সংসযুপ্পত্তি নিদ্ধারেতব্বা. অথ ৰা কথং নামিদন্তি এত্থ ইতি-সদ্দো পকারত্থো. তেন ইমস্মিং সুত্তে সব্বাযপি তেসং সংসযুপ্পত্তিযা পরিগ্গহিতত্তা দট্ঠব্বা. অন্তন্তি মরিযাদং, দেসনায অন্তং পরিচ্ছেদন্তি অত্থো, যো অনুসন্ধীতি ৰুচ্চতি. কোটিন্তি পরিযন্তং, দেসনায পরিযোসানন্তি অত্থো. উভযেন সুত্তে অজ্ঝাসযানুসন্ধি যথানুসন্ধীতি ৰদতি.

অন্তরাকথাতি কম্মট্ঠানমনসিকারউদ্দেসপরিপুচ্ছাদীনং অন্তরা অঞ্ঞা একা তথা. ৰিপ্পকথাতি অনিট্ঠিতা সিখং অপ্পত্তা. কঙ্খণানুরূপেনাতি তস্মিং খণে ধম্মসভাযং সন্নিপতিতানং ভিক্খূনং অজ্ঝাসযানুরূপেন. ইদন্তি ইদানি ৰুচ্চমানং মূলপরিযাযজাতকং.

দিসাপামোক্খোতি ¶ পণ্ডিতভাৰেন সব্বদিসাসু পমুখভূতো. ব্রাহ্মণোতি ব্রহ্মং অণতীতি ব্রাহ্মণো, মন্তে সজ্ঝাযতীতি অত্থো. তিণ্ণং ৰেদানন্তি ইরুৰেদ-যজুৰেদ-সামৰেদানং. পারগূতি অত্থসো ব্যঞ্জনসো চ পারং পরিযন্তং গতো. সহ নিঘণ্ডুনা চ কেটুভেন চাতি সনিঘণ্ডুকেটুভা, তেসং. নিঘণ্ডূতি রুক্খাদীনং ৰেৰচনপ্পকাসকং সত্থং. কেটুভন্তি কিরিযাকপ্পৰিকপ্পো, কৰীনং উপকারাৰহং সত্থং. সহ অক্খরপ্পভেদেনাতি সাক্খরপ্পভেদা, তেসং, সিক্খানিরুত্তিসহিতানন্তি অত্থো. ইতিহাসপঞ্চমানন্তি আথব্বণৰেদং চতুত্থং কত্ৰা ‘‘ইতিহ অস, ইতিহ অসা’’তি ঈদিসৰচনপটিসংযুত্তো পুরাণকথাসঙ্খাতো ইতিহাসো পঞ্চমো এতেসন্তি ইতিহাসপঞ্চমা, তেসং. পদং তদৰসেসঞ্চ ব্যাকরণং কাযতি অজ্ঝেতি ৰেদেতি চাতি পদকো, ৰেয্যাকরণো. লোকাযতং ৰুচ্চতি ৰিতণ্ডসত্থং. মহাপুরিসানং বুদ্ধাদীনং লক্খণদীপনগন্থো মহাপুরিসলক্খণং. তেসু অনূনো পরিপূরকারীতি অনৰযো.

মন্তেতি ৰেদে. যদিপি ৰেদো ‘‘মন্তো, ব্রহ্মং, কপ্পো’’তি তিৰিধো, মন্তো এৰ পন মূলৰেদো, তদত্থৰিৰরণং ব্রহ্মং, তত্থ ৰুত্তনযেন যঞ্ঞকিরিযাৰিধানং কপ্পো. তেন ৰুত্তং ‘‘মন্তেতি ৰেদে’’তি. পণ্ডিতাতি পঞ্ঞাৰন্তো. তথা হি তে পুথুপঞ্ঞাতায বহুং সহস্সদ্ৰিসহস্সাদিপরিমাণং গন্থং পাকটং কত্ৰা গণ্হন্তি উগ্গণ্হন্তি, জৰনপঞ্ঞতায লহুং সীঘং গণ্হন্তি, তিক্খপঞ্ঞতায ¶ সুট্ঠু অৰিরজ্ঝন্তা উপধারেন্তি, সতিনেপক্কসম্পত্তিযা গহিতঞ্চ নেসং ন ৰিনস্সতি ন সম্মুস্সতীতি. সব্বম্পি সিপ্পন্তি অট্ঠারসৰিজ্জাট্ঠানাদিভেদং সিক্খিতব্বট্ঠেন সিপ্পন্তি সঙ্খ্যং গতং সব্বং বাহিরকসত্থং মোক্খাৰহসম্মতম্পি ন মোক্খং আৰহতীতি আহ ‘‘দিট্ঠধম্মসম্পরাযহিত’’ন্তি. সম্পিণ্ডিতা হুত্ৰাতি যথা মিত্তা, তথা পিণ্ডিতৰসেন সন্নিপতিতা হুত্ৰা. ‘‘এৰং গয্হমানে আদিনা ৰিরুজ্ঝেয্য, এৰং অন্তেনা’’তি চিন্তেন্তা ঞাতুং ইচ্ছিতস্স অত্থস্স পুব্বেনাপরং অৰিরুদ্ধং নিচ্ছযং গহেতুং অসক্কোন্তা ন আদিং, ন অন্তং অদ্দসংসু.

লোমসানীতি লোমৰন্তানি, ঘনকেসমস্সুৰানীতি অত্থো. কেসাপি হি লোমগ্গহণেন গয্হন্তি যথা ‘‘লোমনখং ফুসিত্ৰা সুদ্ধি কাতব্বা’’তি. কণ্ণং ৰিযাতি কণ্ণং, পঞ্ঞা, তায সুত্ৰা কাতব্বকিচ্চসাধনতো ৰুত্তং ‘‘কণ্ণৰাতি পঞ্ঞৰা’’তি.

যস্মা ¶ সত্তানং গচ্ছন্তে গচ্ছন্তে কালে আযুৰণ্ণাদিপরিক্খযো হোতি, তস্মা তং কালেন কতং ৰিয কত্ৰা ৰুত্তং ‘‘নেসং আযু…পে… খাদতীতি ৰুচ্চতী’’তি.

অভিঞ্ঞাযাতি কুসলাদিভেদং খন্ধাদিভেদঞ্চ দেসেতব্বং ধম্মং, ৰেনেয্যানঞ্চ আসযানুসযচরিযাৰিমুত্তিআদিভেদং, তস্স চ নেসং দেসেতব্বপ্পকারং যাথাৰতো অভিজানিত্ৰা. ধম্মং দেসেমীতি দিট্ঠধম্মিকসম্পরাযিকনিব্বানহিতাৰহং সদ্ধম্মং কথযামি. নো অনভিঞ্ঞাযাতি যথা বাহিরকা অসম্মাসম্বুদ্ধত্তা ৰুত্তৰিধিং অজানন্তাযং কিঞ্চি তক্কপরিযাহতং ৰীমংসানুচরিতং সযংপটিভানং কথেন্তি, এৰং ন দেসেমীতি অত্থো. সনিদানন্তি সকারণং, ৰেনেয্যানং অজ্ঝাসযৰসেন ৰা পুচ্ছায ৰা অট্ঠুপ্পত্তিযা ৰা সনিমিত্তং হেতুউদাহরণসহিতঞ্চাতি অত্থো. সপ্পাটিহারিযন্তি সনিস্সরণং সপ্পটিহরণং, পচ্চনীকপটিহরণেন সপ্পাটিহারিযমেৰ কত্ৰা দেসেমীতি অত্থো. অপরে পন ‘‘যথারহং ইদ্ধিআদেসনানুসাসনিপাটিহারিযসহিত’’ন্তি ৰদন্তি, অনুসাসনিপাটিহারিযহিতা পন দেসনা নত্থীতি. হিতূপদেসনা ওৰাদো, সা এৰ অনুসাসনী. অনোতিণ্ণৰত্থুৰিসযো ৰা ওৰাদো, ওতিণ্ণৰত্থুৰিসযা অনুসাসনী. পঠমূপদেসো ৰা ওৰাদো, ইতরা অনুসাসনী. অলঞ্চ পনাতি যুত্তমেৰ. নিট্ঠমগমাসীতি অত্থসিদ্ধিং গতা.

তথাগতৰারঅট্ঠমনযৰণ্ণনা নিট্ঠিতা.

অযং তাৰেত্থ অট্ঠকথায লীনত্থৰণ্ণনা.

নেত্তিনযৰণ্ণনা

ইদানি ¶ (দী. নি. টী. ১.১৪৯; সং. নি. টী. ১.১.নেত্তিনযৰণ্ণনা; অ. নি. টী. নেত্তিনযৰণ্ণনা) পকরণনযেন পাল়িযা অত্থৰণ্ণনং করিস্সাম. সা পনাযং অত্থৰণ্ণনা যস্মা দেসনায সমুট্ঠানপযোজনভাজনেসু পিণ্ডত্থেসু চ নিদ্ধারিতেসু সুতরা হোতি সুৰিঞ্ঞেয্যা চ, তস্মা সুত্তদেসনায সমুট্ঠানাদীনি পঠমং নিদ্ধারযিস্সাম. তত্থ সমুট্ঠানং তাৰ পরিযত্তিং নিস্সায মানুপ্পাদো, পযোজনংমানমদ্দনং. ৰুত্তঞ্হি অট্ঠকথাযং ‘‘সুতপরিযত্তিং…পে… আরভী’’তি. অপিচ ৰেনেয্যানং পথৰীআদিভূতাদিভেদভিন্নে সক্কাযে পুথুজ্জনস্স সেক্খাদিঅরিযস্স চ সদ্ধিং হেতুনা মঞ্ঞনামঞ্ঞনৰসেন ¶ পৰত্তিৰিভাগানৰবোধো সমুট্ঠানং, যথাৰুত্তৰিভাগাৰবোধো পযোজনং, ৰেনেয্যানঞ্হি ৰুত্তপ্পকারে ৰিসযে যথাৰুত্তানং পুগ্গলানং সদ্ধিং হেতুনা মঞ্ঞনামঞ্ঞনৰসেন পৰত্তিৰিভাগাৰবোধো পযোজনং.

অপিচ সমুট্ঠানং নাম দেসনানিদানং. তং সাধারণং অসাধারণন্তি দুৰিধং. তত্থ সাধারণম্পি অজ্ঝত্তিকবাহিরভেদতো দুৰিধং. তত্থ সাধারণং অজ্ঝত্তিকসমুট্ঠানং নাম লোকনাথস্স মহাকরুণা. তায হি সমুস্সাহিতস্স ভগৰতো ৰেনেয্যানং ধম্মদেসনায চিত্তং উদপাদি. তং সন্ধায ৰুত্তং ‘‘সত্তেসু চ কারুঞ্ঞতং পটিচ্চ বুদ্ধচক্খুনা লোকং ৰোলোকেসী’’তিআদি (ম. নি. ১.২৮৩; সং. নি. ১.১৭২; মহাৰ. ৯). এত্থ চ হেতাৰত্থাযপি মহাকরুণায সঙ্গহো দট্ঠব্বো যাৰদেৰ সংসারমহোঘতো সদ্ধম্মদেসনাহত্থদানেহি সত্তসন্তারণত্থং তদুপ্পত্তিতো. যথা চ মহাকরুণা, এৰং সব্বঞ্ঞুতঞ্ঞাণং দসবলঞাণাদীনি চ দেসনায অব্ভন্তরসমুট্ঠানভাৰে ৰত্তব্বানি. সব্বম্পি হি ঞেয্যধম্মং, তেসং দেসেতব্বপ্পকারং, সত্তানঞ্চ আসযানুসযাদিং যাথাৰতো জানন্তো ভগৰা ঠানাট্ঠানাদীসু কোসল্লেন ৰেনেয্যজ্ঝাসযানুরূপং ৰিচিত্তনযদেসনং পৰত্তেসীতি. বাহিরং পন সাধারণং সমুট্ঠানং দসসহস্সব্রহ্মপরিৰারিতস্স সহম্পতিমহাব্রহ্মুনো অজ্ঝেসনং. তদজ্ঝেসনুত্তরকালঞ্হি ধম্মগম্ভীরতাপচ্চৰেক্খণাজনিতং অপ্পোস্সুক্কতং পটিপ্পস্সম্ভেত্ৰা ধম্মস্সামী ধম্মদেসনায উস্সাহজাতো অহোসি. অসাধারণম্পি অম্ভন্তরবাহিরভেদতো দুৰিধমেৰ. তত্থ অব্ভন্তরং যায মহাকরুণায যেন চ দেসনাঞাণেন ইদং সুত্তং পৰত্তিতং, তদুভযং ৰেদিতব্বং. বাহিরং পন পঞ্চসতানং ব্রাহ্মণজাতিকানং ভিক্খূনং পরিযত্তিং নিস্সায মানুপ্পাদনং, ৰুত্তমেৰ তং অট্ঠকথাযং.

পযোজনম্পি সাধারণং অসাধারণন্তি দুৰিধং. তত্থ সাধারণং অনুক্কমেন যাৰ অনুপাদাপরিনিব্বানং ¶ ৰিমুত্তিরসত্তা ভগৰতো দেসনায. তেনেৰাহ ‘‘এতদত্থা তথা, এতদত্থা মন্তনা’’তিআদি (পরি. ৩৬৬). এতেনেৰ চ সংসারচক্কনিৰত্তি সদ্ধম্মচক্কপ্পৰত্তি সস্সতাদিমিচ্ছাৰাদনিরাকরণং সম্মাৰাদপুরেক্খারো অকুসলমূলসমূহননং কুসলমূলসংরোপনং অপাযদ্ৰারপিদহনং সগ্গমোক্খদ্ৰারৰিৰরণং পরিযুট্ঠানৰূপসমনং অনুসযসমুগ্ঘাতনং ¶ ‘‘মুত্তো মোচেস্সামী’’তি (উদা. অট্ঠ. ১৮; ইতিৰু. অট্ঠ. ৩৮) পুরিমপটিঞ্ঞাঅৰিসংৰাদনং তপ্পটিপক্খমারমনোরথৰিসংৰাদনং তিত্থিযধম্মনিম্মথনং বুদ্ধধম্মপতিট্ঠাপনন্তি এৰমাদীনম্পি পযোজনানং সঙ্গহো দট্ঠব্বো. অসাধারণং পন তেসং ভিক্খূনং মানমদ্দনং. ৰুত্তঞ্চেতং অট্ঠকথাযং (ম. নি. অট্ঠ. ১.১) ‘‘দেসনাকুসলো ভগৰা মানভঞ্জনত্থং ‘সব্বধম্মমূলপরিযায’ন্তি দেসনং আরভী’’তি. উভযম্পেতং বাহিযমেৰ. সচে পন ৰেনেয্যসন্তানগতম্পি দেসনাবলসিদ্ধিসঙ্খাতং পযোজনং অধিপ্পাযসমিজ্ঝনভাৰতো যথাধিপ্পেতত্থসিদ্ধিযা যথাকারুণিকস্স ভগৰতোপি পযোজনমেৰাতি গণ্হেয্য, ইমিনা পরিযাযেনস্স অব্ভন্তরতাপি ৰেদিতব্বা.

অপিচ ৰেনেয্যানং পথৰীআদিভূতাদিৰিভাগভিন্নে সক্কাযে পুথুজ্জনস্স সেক্খাদিঅরিযস্স চ সদ্ধিং হেতুনা মঞ্ঞনামঞ্ঞনৰসেন পৰত্তিৰিভাগানৰবোধো সমুট্ঠানং, ইমস্স সুত্তস্স যথাৰুত্তৰিভাগাৰবোধো পযোজনন্তি ৰুত্তোৰাযমত্থো. ৰেনেয্যানঞ্হি ৰুত্তপ্পকারে ৰিসযে যথাৰুত্তানং পুগ্গলানং সদ্ধিং হেতুনা মঞ্ঞনামঞ্ঞনানং ৰসেন পৰত্তিৰিভাগাৰবোধো ইমং দেসনং পযোজেতি ‘‘তন্নিপ্ফাদনপরাযং দেসনা’’তি কত্ৰা. যঞ্হি দেসনায সাধেতব্বং ফলং, তং আকঙ্খিতব্বত্তা দেসকং দেসনায পযোজেতীতি পযোজনন্তি ৰুচ্চতি. তথা ৰেনেয্যানং সব্বসো একদেসতো চ মঞ্ঞনানং অপ্পহানং, তত্থ চ আদীনৰাদস্সনং, নিরঙ্কুসানং মঞ্ঞনানং অনেকাকারৰোহারস্স সক্কাযে পৰত্তিৰিসেসস্স অজাননং, তত্থ চ পহীনমঞ্ঞনানং পটিপত্তিযা অজাননং, তণ্হামুখেন পচ্চযাকারস্স চ অনৰবোধোতি এৰমাদীনি চ পযোজনানি ইধ ৰেদিতব্বানি.

ভূমিত্তযপরিযাপন্নেসু অসঙ্খাতধম্মৰিপ্পকতপরিঞ্ঞাদিকিচ্চসঙ্খাতধম্মানং সম্মাসম্বুদ্ধস্স চ পটিপত্তিং অজানন্তা অসদ্ধম্মস্সৰনধারণপরিচযমনসিকারপরা সদ্ধম্মস্সৰন-ধারণপরিচযপটিৰেধৰিমুখা চ ৰেনেয্যা ইমিস্সা দেসনায ভাজনং. পিণ্ডত্থা পন ‘‘অস্সুতৰা’’তিআদিনা অযোনিসোমনসিকারবহুলীকারো অকুসলমূল-সমাযোগো ওলীযনাতিধাৰনাপরিগ্গহো উপাযৰিনিবদ্ধানুব্রূহনা মিচ্ছাভিনিৰেসসমন্নাগমো অৰিজ্জাতণ্হা-পরিসুদ্ধি ¶ ৰট্টত্তযানুপরমো আসৰোঘযোগগন্থাগতিতণ্হুপ্পাদুপাদানাৰিযোগো চেতোখিল-চেতোৰিনিবদ্ধঅভিনন্দন-নীৰরণসঙ্গানতিক্কমো ¶ ৰিৰাদমূলাপরিচ্চাগো অনুসযানুপচ্ছেদো মিচ্ছত্তানতিৰত্তনং তণ্হামূলধম্মসন্নিস্সযতা অকুসলকম্মপথানুযোগো সব্বকিলেস-পরিল়াহসারদ্ধকাযচিত্ততাতি এৰমাদযো দীপিতা হোন্তি. ‘‘পথৰিং পথৰিতো সঞ্জানাতী’’তিআদিনা তণ্হাৰিচরিতনিদ্দেসো মানজপ্পনা ৰিপরিযেসাভিনিৰেসো সংকিলেসো সক্কাযপরিগ্গহো বাললক্খণাপদেসো ৰঙ্কত্তযৰিভাৰনানুযোগো বহুকারপটিপক্খদীপনা তিৰিধনিস্সযসংসূচনা আসৰক্খযকথনন্তি এৰমাদযো দীপিতা হোন্তি.

সোল়সহারৰণ্ণনা

১. দেসনাহারৰণ্ণনা

তত্থ যে উপাদানক্খন্ধধম্মে উপাদায পথৰীআদিভূতাদিভেদা পঞ্ঞত্তি, তে পঞ্ঞত্তিপটিপাদনভাৰেন জাতিজরামরণৰিসেসনদুক্খপরিযাযেন চ ৰুত্তা তণ্হাৰজ্জা তেভূমকধম্মা দুক্খসচ্চং. মঞ্ঞনাভিনন্দননন্দীপরিযাযেহি ৰুত্তা তণ্হা সমুদযসচ্চং. অযং তাৰ সুত্তন্তনযো. অভিধম্মনযে পন যথাৰুত্ততণ্হায সদ্ধিং ‘‘অস্সুতৰা’’তিআদিনা দীপিতা অৰিজ্জাদযো, মঞ্ঞনাপরিযাযেন গহিতা মানদিট্ঠিযো, ভৰপদেন গহিতো কম্মভৰো চাতি সব্বেপি কিলেসাভিসঙ্খারা সমুদযসচ্চং. উভিন্নং অপ্পৰত্তি নিরোধসচ্চং. অরিযধম্মগ্গহণেন, পরিঞ্ঞাভিক্খুসেক্খাভিঞ্ঞাগহণেহি, রাগাদিখযৰচনেহি, সম্মাসম্বোধিগহণেন চ মগ্গসচ্চং. কেচি পন তণ্হাক্খযাদিৰচনেহি নিরোধসচ্চং উদ্ধরন্তি, তং অট্ঠকথায ৰিরুজ্ঝতি তত্থ তণ্হাক্খযাদীনং মগ্গকিচ্চভাৰস্স উদ্ধটত্তা.

তত্থ সমুদযেন অস্সাদো, দুক্খেন আদীনৰো, মগ্গনিরোধেহি নিস্সরণং, তেসং ভিক্খূনং মানভঞ্জনং ফলং, তথা ‘‘যথাৰুত্তৰিভাগাৰবোধো’’তিআদিনা ৰুত্তং পযোজনঞ্চ. তস্স নিপ্ফত্তিকারণত্তা দেসনায ৰিচিত্ততা চতুন্নং পুগ্গলানং যাথাৰতো সভাৰূপধারণঞ্চ উপাযো ¶ , পথৰীআদীসু পুথুজ্জনাদীনং পৰত্তিদস্সনাপদেসেন পথৰীআদযো একন্ততো পরিজানিতব্বা, মঞ্ঞনা চ পহাতব্বাতি অযমেত্থ ভগৰতো আণত্তীতি. অযং দেসনাহারো.

২. ৰিচযহারৰণ্ণনা

মঞ্ঞনানং ¶ সক্কাযস্স অৰিসেসহেতুভাৰতো, কস্সচিপি তত্থ অসেসিতব্বতো চ সব্বগহণং, সভাৰধারণতো নিস্সত্তনিজ্জীৰতো চ ধম্মগ্গহণং, পতিট্ঠাভাৰতো আৰেণিকহেতুভাৰতো চ মূলগ্গহণং, কারণভাৰতো দেসনত্থসম্ভৰতো চ পরিযাযগ্গহণং, সম্মুখভাৰতো সম্পদানত্থসম্ভৰতো চ ‘‘ৰো’’তি ৰচনং, তথারূপগুণযোগতো অভিমুখীকরণতো চ ‘‘ভিক্খৰে’’তি আলপনং. দেসেতুং সমত্থভাৰতো তেসং সতুপ্পাদনত্থঞ্চ ‘‘দেসেস্সামী’’তি পটিজাননং, দেসেতব্বতায পটিঞ্ঞাতভাৰতো, যথাপটিঞ্ঞঞ্চ দেসনতো ‘‘ত’’ন্তি পচ্চামসনং, সোতব্বভাৰতো, সৰনত্থস্স চ একন্তেন নিপ্ফাদনতো ‘‘সুণাথা’’তি ৰুত্তং. সক্কাতব্বতো, সক্কচ্চকিরিযায এৰ চ তদত্থসিদ্ধিতো ‘‘সাধুক’’ন্তি ৰুত্তং. ধম্মস্স মনসিকরণীযতো তদধীনত্তা চ সব্বসম্পত্তীনং ‘‘মনসি করোথা’’তি ৰুত্তং যথাপরিঞ্ঞাতায দেসনায পরিব্যত্তভাৰতো ৰিত্থারত্থসম্ভৰতো চ ‘‘ভাসিস্সামী’’তি ৰুত্তং. ভগৰতো সদেৰকেন লোকেন সিরসা সম্পটিচ্ছিতব্বৰচনত্তা, তস্স চ যথাধিপ্পেতত্থসাধনতো ‘‘এৰ’’ন্তি ৰুত্তং. সত্থু উত্তমগারৰট্ঠানভাৰতো, তত্থ চ গারৰস্স উল়ারপুঞ্ঞভাৰতো ‘‘ভন্তে’’তি ৰুত্তং. ভিক্খূনং তথাকিরিযায নিচ্ছিতভাৰতো ৰচনালঙ্কারতো চ ‘‘খো’’তি ৰুত্তং. সৰনস্স পটিজানিতব্বতো, তথা তেহি পটিপন্নত্তা চ ‘‘পচ্চস্সোসু’’ন্তি ৰুত্তং পচ্চক্খভাৰতো, সকলস্সপি একজ্ঝং করণতো ‘‘এত’’ন্তি ৰুত্তং.

ৰুচ্চমানস্স পুগ্গলস্স লোকপরিযাপন্নত্তা লোকাধারত্তা চ লোকং উপাদায ‘‘ইধা’’তি ৰুত্তং. পটিৰেধবাহুসচ্চাভাৰতো পরিযত্তিবাহুসচ্চাভাৰতো চ ‘‘অস্সুতৰা’’তি ৰুত্তং. পুথূসু, পুথু ৰা জনভাৰতো ‘‘পুথুজ্জনো’’তি ৰুত্তং. অনরিযধম্মৰিরহতো অরিযধম্মসমন্নাগমতো চ ‘‘অরিযান’’ন্তি ৰুত্তং. অরিযভাৰকরায পটিপত্তিযা অভাৰতো, তত্থ কোসল্লদমথাভাৰতো ‘‘অরিযানং অদস্সাৰী’’তিআদি ৰুত্তং. অসন্তধম্মস্সৰনতো সন্তধম্মসমন্নাগমতো সব্ভি পাসংসিযতো ¶ চ ‘‘সপ্পুরিসান’’ন্তি ৰুত্তং. সপ্পুরিসভাৰকরায পটিপত্তিযা অভাৰতো, তত্থ চ কোসল্লদমথাভাৰতো ‘‘সপ্পুরিসানং অদস্সাৰী’’তিআদি ৰুত্তং. পথৰীৰত্থুকানং মঞ্ঞনানং, উপরি ৰুচ্চমানানঞ্চমঞ্ঞনানং মূলকত্তা পপঞ্চসঙ্খানং ‘‘পথৰিং পথৰিতো সঞ্জানাতী’’তি ৰুত্তং. অন্ধপুথুজ্জনস্স অহংকার-মমংকারানং কত্থচিপি অপ্পহীনত্তা ‘‘পথৰিং মঞ্ঞতী’’তিআদি ৰুত্তং.

পুব্বে ¶ অগ্গহিতত্তা, সামঞ্ঞতো চ গয্হমানত্তা, পুগ্গলস্স পথৰীআদিআরম্মণসভাগতায লব্ভমানত্তা চ ‘‘যোপী’’তি ৰুত্তং. ‘‘যো’’তি অনিযমেন গহিতস্স নিযমেতব্বতো পটিনিদ্দিসিতব্বতো চ; ‘‘সো’’তি ৰুত্তং সাতিসযং সংসারে ভযস্স ইক্খনতো কিলেসভেদনসম্ভৰতো চ ‘‘ভিক্খূ’’তি ৰুত্তং. সিক্খাহি সমন্নাগমতো সেক্খধম্মপটিলাভতো চ ‘‘সেক্খো’’তি ৰুত্তং. মনসা লদ্ধব্বস্স অরহত্তস্স অনধিগতত্তা অধিগমনীযতো চ ‘‘অপ্পত্তমানসো’’তি ৰুত্তং. অপরেন অনুত্তরণীযতো, পরং অনুচ্ছৰিকভাৰেন উত্তরিত্ৰা ঠিতত্তা চ ‘‘অনুত্তর’’ন্তি ৰুত্তং. যোগেন ভাৰনায কামযোগাদিতো চ খেমং সিৰং অনুপদ্দৰন্তি ‘‘যোগক্খেম’’ন্তি ৰুত্তং. ছন্দপ্পৰত্তিযা উস্সুক্কাপত্তিযা চ ‘‘পত্থযমানো’’তি ৰুত্তং. তদত্থস্স সব্বসো সব্বইরিযাপথৰিহারস্স সমথৰিপস্সনাৰিহারস্স দিব্বৰিহারস্স চ ৰসেন ‘‘ৰিহরতী’’তি ৰুত্তং. সেক্খস্স সব্বসো অভিঞ্ঞেয্যভাৰঞ্চেৰ পরিঞ্ঞেয্যভাৰঞ্চ ঞাণেন অভিভৰিত্ৰা জাননতো ‘‘অভিজানাতী’’তি ৰুত্তং. সেক্খস্স সব্বসো অপ্পহীনমঞ্ঞনতায অভাৰতো ‘‘মা মঞ্ঞী’’তি ৰুত্তং. সেসং ৰুত্তনযানুসারেন ৰেদিতব্বং. ইমিনা নযেন ইতো পরং সব্বপদেসু ৰিনিচ্ছযো কাতব্বো. সক্কা হি অট্ঠকথং তস্সা লীনত্থৰণ্ণনঞ্চ অনুগন্ত্ৰা অযমত্থো ৰিঞ্ঞূহি ৰিভাৰেতুন্তি অতিৰিত্থারভযেন ন ৰিত্থারযিম্হ. ইতি অনুপদৰিচযতো ৰিচযো হারো.

৩. যুত্তিহারৰণ্ণনা

সক্কাযস্স সব্বমঞ্ঞনানং মূলভাৰো যুজ্জতি পরিকপ্পমত্তকত্তা লোকৰিচিত্তস্স. ব্যাহুসচ্চদ্ৰযরহিতস্স অন্ধপুথুজ্জনভাৰো যুজ্জতি পুথুকিলেসাভিসঙ্খারজননাদিসভাৰত্তা. যথাৰুত্তপুথুজ্জনস্স ৰা ৰুত্তপ্পকারবাহুসচ্চাভাৰো যুজ্জতি তস্মিং সতি সব্ভাৰতো. তত্থ অস্সুতৰতো ¶ পুথুজ্জনস্স অরিযানং সপ্পুরিসানঞ্চ অদস্সাৰিতাদি যুজ্জতি অরিযকরধম্মানং অরিযভাৰস্স চ তেন অদিট্ঠত্তা অপ্পটিপন্নত্তা চ তথা তস্স পথৰিযা ‘‘অহং পথৰী, মম পথৰী, পরো পথৰী’’তি সঞ্জাননং যুজ্জতি অহংকারমমংকারানং সব্বেন সব্বং অপ্পহীনত্তা. তথা সঞ্জানতো চস্স পথৰিং কম্মাদিকরণাদিৰসেন গহেত্ৰা নানপ্পকারতো মঞ্ঞনাপৰত্তি যুজ্জতি সঞ্ঞানিদানত্তা পপঞ্চসঙ্খানং. যো মঞ্ঞতি, তস্স অপরিঞ্ঞাতৰত্থুকতা যুজ্জতি পরিঞ্ঞায ৰিনা মঞ্ঞনাপহানাভাৰতো. ‘‘আপং আপতো সঞ্জানাতী’’তিআদীসুপি এসেৰ নযো. অপরিযোসিতসিক্খস্স অপ্পত্তমানসতা যুজ্জতি কতকিচ্চতাভাৰতো. সেক্খস্স সতো যোগক্খেমপত্থনা যুজ্জতি তদধিমুত্তভাৰতো. তথা তস্স পথৰিযা অভিজাননা যুজ্জতি পরিঞ্ঞাপহানেসু মত্তসো কারিভাৰতো. ততো এৰ চস্স ‘‘মা মঞ্ঞী’’তি ৰত্তব্বতা যুজ্জতি ৰত্থুপরিঞ্ঞায ¶ ৰিয মঞ্ঞনাপহানস্সপি ৰিপ্পকতভাৰতো. সেক্খস্স পথৰিযা পরিঞ্ঞেয্যতা যুজ্জতি পরিঞ্ঞাতুং সক্কুণেয্যত্তা সব্বসো অপরিঞ্ঞাতত্তা চ. ‘‘আপং আপতো’’তিআদীসুপি এসেৰ নযো. অরহত্তাদিযুত্তস্স পথৰিযাদীনং অভিজাননা মঞ্ঞনাভাৰো চ যুজ্জতি সঙ্খাতধম্মত্তা, সব্বসো কিলেসানং পহীনত্তা, ততো এৰ চস্স ৰীতরাগাদিভাৰো ততো সম্মদেৰ চ পটিচ্চসমুপ্পাদস্স পটিৰিদ্ধতাতি. অযং যুত্তিহারো.

৪. পদট্ঠানহারৰণ্ণনা

কিস্সোপি মঞ্ঞনা সক্কাযস্স পদট্ঠানং, মঞ্ঞনানং অযোনিসোমনসিকারো পদট্ঠানং, সুতদ্ৰযৰিরহো অন্ধপুথুজ্জনভাৰস্স পদট্ঠানং, সো অরিযানং অদস্সাৰিতায পদট্ঠানং, সা অরিযধম্মস্স অকোৰিদতায পদট্ঠানং, সা অরিযধম্মে অৰিনীততায পদট্ঠানং. ‘‘সপ্পুরিসানং অদস্সাৰী’’তি এত্থাপি এসেৰ নযো. সঞ্ঞাৰিপল্লাসো মঞ্ঞনানং পদট্ঠানং. সঞ্ঞানিদানা হি পপঞ্চসঙ্খাতি. মঞ্ঞনাসু চ তণ্হামঞ্ঞনা ইতরমঞ্ঞনানং পদট্ঠানং ‘‘তণ্হাগতানং পরিতস্সিতৰিপ্ফন্দিত’’ন্তি, (দী. নি. ১.১০৫-১০৯) ‘‘তণ্হাপচ্চযা উপাদান’’ন্তি (ম. নি. ৩.১২৬; মহাৰ. ১) চ ৰচনতো, তণ্হাগতস্সেৰ চ ‘‘সেয্যোহমস্মি’’ন্তিআদিনা মানজপ্পনাসব্ভাৰতা. সব্বাপি ৰা মঞ্ঞনা সব্বাসং মঞ্ঞনানং পদট্ঠানং ¶ . ‘‘উপাদানপচ্চযা তণ্হা’’তি হি ৰচনতো দিট্ঠিপি তণ্হায পদট্ঠানং. ‘‘অহমস্মি ব্রহ্মা মহাব্রহ্মা’’তি (দী. নি. ১.৪২; ৩.৩৯) আদিৰচনতো মানোপি দিট্ঠিযা পদট্ঠানং. তথা ‘‘অস্মীতি সতি ইত্থংস্মীতি হোতি, এৰংস্মীতি হোতি, অঞ্ঞথাস্মীতি হোতী’’তিআদিৰচনতো মানস্সপি তণ্হায পদট্ঠানতা লব্ভতেৰ. সেক্খা ধম্মা সপ্পদেসতো মঞ্ঞনাপহানস্স পদট্ঠানং. অসেক্খা নিপ্পদেসতো মঞ্ঞনাপহানস্স পদট্ঠানং. কম্মভৰো চ জাতিযা পদট্ঠানং. জাতি জরামরণস্স পদট্ঠানং. পচ্চযাকারস্স যথাভূতাৰবোধো সম্মাসম্বোধিযা পদট্ঠানন্তি. অযং পদট্ঠানো হারো.

৫. লক্খণহারৰণ্ণনা

‘‘সব্বধম্মমূলপরিযায’’ন্তি এত্থ মূলগ্গহণেন মূলপরিযাযগ্গহণেন ৰা যথা তণ্হামানদিট্ঠিযো গয্হন্তি, এৰং দোসমোহাদীনম্পি সক্কাযমূলধম্মানং সঙ্গহো দট্ঠব্বো সক্কাযস্স মূলভাৰেন একলক্খণত্তা. ‘‘অস্সুতৰা’’তি ইমিনা যথা তস্স পুগ্গলস্স পরিযত্তিপটিৰেধসদ্ধম্মানং অভাৰো গয্হতি, এৰং পটিপত্তিসদ্ধম্মস্সপি অভাৰো গয্হতি সদ্ধম্মভাৰেন একলক্খণত্তা. অরিযানং অদস্সনকামতাদিলক্খণা. ‘‘অরিযধম্মস্স অকোৰিদো’’তি ¶ ইমিনা অরিযধম্মাধিগমস্স ৰিবন্ধভূতং অঞ্ঞাণং. ‘‘অরিযধম্মে অৰিনীতো’’তি ইমিনা অরিযৰিনযাভাৰো. সো পনত্থতো অরিযৰিনযে অপ্পটিপত্তি এৰ ৰাতি তীহিপি পদেহি যথাৰুত্তৰিসযা মিচ্ছাদিট্ঠি ৰিচিকিচ্ছা চ গহিতাৰ হোন্তি. তগ্গহণেন চ সব্বেপি অকুসলা ধম্মা সঙ্গহিতাৰ হোন্তি সংকিলেসলক্খণেন একলক্খণত্তা. ‘‘সপ্পুরিসানং অদস্সাৰী’’তি এত্থাপি এসেৰ নযো.

‘‘পথৰিং পথৰিতো সঞ্জানাতী’’তি ইদং দিট্ঠিমঞ্ঞনাদীনং সঞ্ঞায কারণভাৰদস্সনং. তত্থ যথা সঞ্ঞা, এৰং ৰিতক্কফস্সাৰিজ্জাঅযোনিসোমনসিকারাদযোপি তাসং কারণন্তি অত্থতো তেসম্পেত্থ সঙ্গহো ৰুত্তো হোতি মঞ্ঞনানং কারণভাৰেন একলক্খণত্তা. ‘‘মঞ্ঞতী’’তি ইমিনা মঞ্ঞনাকিচ্চেন তণ্হামানদিট্ঠিযো গহিতা ¶ তাসং কিলেসসভাৰত্তা. তগ্গহণেনেৰ ৰিচিকিচ্ছাদিনম্পি সঙ্গহো দট্ঠব্বো কিলেসলক্খণেন একলক্খণত্তা. তথা তণ্হায হেতুসভাৰত্তা তগ্গহণেনেৰ অৰসিট্ঠাকুসলহেতূনং সঙ্গহো দট্ঠব্বো হেতুলক্খণেন একলক্খণত্তা. তথা তণ্হাদিট্ঠীনং আসৰাদিসভাৰত্তা তগ্গহণেনেৰ অৰসিট্ঠাসৰোঘযোগগন্থনীৰরণাদীনম্পি সঙ্গহো দট্ঠব্বো আসৰাদিসভাৰত্তা একলক্খণত্তা. তথা ‘‘পথৰিং মঞ্ঞতী’’তিআদিনা পথৰীআদীনং রূপসভাৰত্তা তব্বিসযানঞ্চ মঞ্ঞনানং রূপৰিসযত্তা তগ্গহণেনেৰ সকলরূপক্খন্ধৰিসযাপি মঞ্ঞনা দস্সিতা হোন্তি রূপৰিসযলক্খণেন আসং একলক্খণত্তা. এৰং চক্খাযতনাদিৰিসযাপি মঞ্ঞনা নিদ্ধারেতব্বা. ‘‘অপরিঞ্ঞাত’’ন্তি পরিঞ্ঞাপটিক্খেপেন তপ্পটিবদ্ধকিলেসানং পহানপটিক্খেপোতি দট্ঠব্বো মগ্গকিচ্চভাৰেন পরিঞ্ঞাপহানানং একলক্খণত্তা. ইমিনা নযেন সেসেসুপি যথারহং একলক্খণা নিদ্ধারেতব্বাতি. অযং লক্খণো হারো.

৬. চতুব্যূহহারৰণ্ণনা

পথৰীআদীসু ৰত্থূসু ব্যঞ্জনচ্ছাযায অত্থং গহেত্ৰা ধম্মগম্ভীরতং অসল্লক্খেত্ৰা অসদ্ধম্মস্সৰনাদিনা ৰঞ্চিতা হুত্ৰা সদ্ধম্মস্সৰনধারণপরিচযমনসিকারৰিমুখা পথৰীআদীসু ৰত্থূসু পুথুজ্জনসেক্খাসেক্খতথাগতানং পটিপত্তিৰিসেসং অজানন্তা চ ৰেনেয্যা ইমিস্সা দেসনায নিদানং. তে ‘‘কথং নু খো যথাৰুত্তদোসৰিনিমুত্তা যথাৰুত্তঞ্চ ৰিসেসং জানন্তা সম্মাপটিপত্তিযা উভযহিতপরাযণা সৰেয্যু’’ন্তি অযমেত্থ ভগৰতো অধিপ্পাযো. পদনিব্বচনং নিরুত্তং, তং ‘‘এৰ’’ন্তিআদিনিদানপদানং, ‘‘সব্বধম্মমূলপরিযায’’ন্তিআদিপাল়িপদানঞ্চ ¶ অট্ঠকথাযং, তস্সা লীনত্থৰণ্ণনাযঞ্চেৰ ৰুত্তনযেন সুৰিঞ্ঞেয্যত্তা অতিৰিত্থারভযেন ন ৰিত্থারযিম্হ.

পদপদত্থদেসনানিক্খেপসুত্তসন্ধিৰসেন পঞ্চৰিধা সন্ধি. তত্থ পদস্স পদন্তরেন সম্বন্ধো পদসন্ধি, তথা পদত্থস্স পদত্থন্তরেন সম্বন্ধো পদত্থসন্ধি, যো ‘‘কিরিযাকারকসম্বন্ধো’’তি ৰুচ্চতি. নানানুসন্ধিকস্স সুত্তস্স তংতংঅনুসন্ধীহি সম্বন্ধো, একানুসন্ধিকস্স পন পুব্বাপরসম্বন্ধো দেসনাসন্ধি. যা অট্ঠকথাযং ‘‘পুচ্ছানুসন্ধি অজ্ঝাসযানুসন্ধি যথানুসন্ধী’’তি ¶ তিধা ৰিভত্তা. অজ্ঝাসযো চেত্থ অত্তজ্ঝাসযো পরজ্ঝাসযোতি দ্ৰিধা ৰেদিতব্বো. যং পনেত্থ ৰত্তব্বং, তং হেট্ঠা নিদানৰণ্ণনাযং ৰুত্তমেৰ. নিক্খেপসন্ধি চতুন্নং সুত্তনিক্খেপানং ৰসেন ৰেদিতব্বো. সুত্তসন্ধি ইধ পঠমনিক্খেপৰসেনেৰ ৰেদিতব্বো. কস্মা পনেত্থ মূলপরিযাযসুত্তমেৰ পঠমং নিক্খিত্তন্তি? নাযমনুযোগো কত্থচি নপ্পৰত্ততি, অপিচ যস্মা মঞ্ঞনামূলকং সক্কাযং, সব্বমঞ্ঞনা চ তত্থ এৰ অনেকভেদভিন্না পৰত্ততি, ন তস্সা সৰিসযায লেসমত্তম্পি সারং অত্থীতি পথৰীআদিৰিভাগভিন্নেসু মঞ্ঞনাসু চ সাতিসযং নিব্বেধৰিরাগসঞ্জননী উপরি সেক্খাসেক্খতথাগতগুণৰিভাৰনী চ অযং দেসনা. সুত্তন্তদেসনা চ ৰিসেসতো দিট্ঠিৰিনিৰেঠনকথা, তস্মা সনিস্সযস্স দিট্ঠিগ্গাহস্স আদিতো অসারভাৰদীপনং উপরি চ সব্বেসং অরিযানং গুণৰিসেসৰিভাৰনমিদং সুত্তং পঠমং নিক্খিত্তং. কিঞ্চ সক্কাযে মঞ্ঞনামঞ্ঞনামুখেন পৰত্তিনিৰত্তীসু আদীনৰানিসংসৰিভাৰনতো সব্বেসং পুগ্গলানং পটিপত্তিৰিভাগতো চ ইদমেৰ সুত্তং পঠমং নিক্খিত্তং.

যং পন একিস্সা দেসনায দেসনন্তরেন সদ্ধিং সংসন্দনং, অযম্পি দেসনাসন্ধি, সা এৰং ৰেদিতব্বা. ‘‘অস্সুতৰা পুথুজ্জনো…পে… নিব্বানং অভিনন্দতী’’তি অযং দেসনা. ‘‘ইধ, ভিক্খৰে, অস্সুতৰা পুথুজ্জনো…পে… সপ্পুরিসধম্মে অৰিনীতো মনসিকরণীযে ধম্মে নপ্পজানাতি, অমনসিকরণীযে চ ধম্মে নপ্পজানাতি, সো মনসিকরণীযে ধম্মে অপ্পজানন্তো অমনসিকরণীযে চ ধম্মে অপ্পজানন্তো যে ধম্মা ন মনসিকরণীযা, তে ধম্মে মনসি করোতি…পে… অনুপ্পন্নো ৰা কামাসৰো উপ্পজ্জতি, উপ্পন্নো ৰা কামাসৰো পৰড্ঢতি. অনুপ্পন্নো ৰা ভৰাসৰো উপ্পজ্জতি, উপ্পন্নো ৰা ভৰাসৰো পৰড্ঢতি, অনুপ্পন্নো ৰা অৰিজ্জাসৰো উপ্পজ্জতি, উপ্পন্নো ৰা অৰিজ্জাসৰো পৰড্ঢতী’’তি (ম. নি. ১.১৭) ইমায দেসনায সংসন্দতি. তথা ‘‘তস্সেতং পাটিকঙ্খং সুভনিমিত্তং মনসি করিস্সতি, তস্স সুভনিমিত্তস্স মনসিকারা রাগো চিত্তং অনুদ্ধংসেস্সতি, সো সরাগো সদোসো সমোহো সাঙ্গণো সংকিলিট্ঠচিত্তো কালং করিস্সতী’’তি (ম. নি. ১.৫৯) ইমায দেসনায সংসন্দতি. তথা ‘‘চক্খুঞ্চাৰুসো ¶ পটিচ্চ রূপে চ উপ্পজ্জতি চক্খুৰিঞ্ঞাণং, তিণ্ণং সঙ্গতি ফস্সো, ফস্সপচ্চযা ¶ ৰেদনা. যং ৰেদেতি তং সঞ্জানাতি, যং সঞ্জানাতি তং ৰিতক্কেতি, যং ৰিতক্কেতি তং পপঞ্চেতি, যং পপঞ্চেতি ততোনিদানং পুরিসং পপঞ্চসঞ্ঞাসঙ্খা সমুদাচরন্তী’’তি (ম. নি. ১.২০৪) ইমায দেসনায সংসন্দতি. তথা ‘‘ইধ, ভিক্খৰে, অসুতৰা পুথুজ্জনো…পে… সপ্পুরিসধম্মে অৰিনীতো রূপং ‘এতং মম, এসোহমস্মি, এসো মে অত্তা’তি সমনুপস্সতি. ৰেদনং…পে…, সঞ্ঞং…পে…, সঙ্খারে…পে…, ৰিঞ্ঞাণং ‘এতং মম, এসোহমস্মি, এসো মে অত্তা’তি সমনুপস্সতি. যম্পি তং দিট্ঠং…পে… যম্পি তং দিট্ঠিট্ঠানং, সো লোকো সো অত্তা সো পেচ্চ ভৰিস্সামি নিচ্চো ধুৰো সস্সতো অৰিপরিণামধম্মো সস্সতিসমং তথেৰ ঠস্সামীতি, তম্পি ‘এতং মম, এসোহমস্মি, এসো মে অত্তা’তি সমনুপস্সতী’’তি (ম. নি. ১.২৪১) ইমায দেসনায সংসন্দতি.

‘‘যোপি সো, ভিক্খৰে, ভিক্খু…পে… নিব্বানং মাভিনন্দী’’তি অযং দেসনা. ‘‘ইধ, দেৰানমিন্দ, ভিক্খুনো সুতং হোতি ‘সব্বে ধম্মা নালং অভিনিৰেসাযা’তি, এৰঞ্চেতং, দেৰানমিন্দ, ভিক্খুনো সুতং হোতি ‘সব্বে ধম্মা নালং অভিনিৰেসাযা’তি, সো সব্বং ধম্মং অভিজানাতি, সব্বং ধম্মং অভিঞ্ঞায সব্বং ধম্মং পরিজানাতি, সব্বং ধম্মং পরিঞ্ঞায যং কিঞ্চি ৰেদনং ৰেদেতি সুখং ৰা দুক্খং ৰা অদুক্খমসুখং ৰা, সো তাসু ৰেদনাসু অনিচ্চানুপস্সী ৰিহরতি, ৰিরাগানুপস্সী ৰিহরতি, নিরোধানুপস্সী ৰিহরতি, পটিনিস্সগ্গানুপস্সী ৰিহরতী’’তি (ম. নি. ১.৩৯০) ইমায দেসনায সংসন্দতি. ‘‘যোপি সো, ভিক্খৰে, ভিক্খু অরহং…পে… অভিসম্বুদ্ধোতি ৰদামী’’তি অযং দেসনা ‘‘সুতৰা চ খো, ভিক্খৰে, অরিযসাৰকো…পে… সপ্পুরিসধম্মে সুৰিনীতো রূপং ‘নেতং মম, নেসোহমস্মি, ন মেসো অত্তা’তি সমনুপস্সতি, ৰেদনং…পে…, সঞ্ঞং…পে…, সঙ্খারে…পে…, ৰিঞ্ঞাণং ‘নেতং মম, নেসোহমস্মি, ন মেসো অত্তা’তি সমনুপস্সতি. যম্পি তং দিট্ঠং সুতং ৰিঞ্ঞাতং পত্তং পরিযেসিতং অনুৰিচরিতং মনসা, তম্পি ‘নেতং মম, নেসোহমস্মি, ন মেসো অত্তা’তি সমনুপস্সতি. যম্পি তং দিট্ঠিট্ঠানং, সো লোকো সো অত্তা সো পেচ্চ ভৰিস্সামি ‘নিচ্চো ধুৰো সস্সতো অপি পরিণামধম্মো সস্সতিসমং তথেৰ ঠস্সামী’তি, তম্পি ‘নেতং মম, নেসোহমস্মি, ন মেসো অত্তা’তি সমনুপস্সতি. সো এৰং সমনুপস্সন্তো ন পরিতস্সতী’’তি (ম. নি. ১.২৪১) এৰমাদিদেসনাহি সংসন্দতীতি, অযং চতুব্যূহো হারো.

৭. আৰত্তহারৰণ্ণনা

‘‘অস্সুতৰা ¶ ¶ পুথুজ্জনো’’তি ইমিনা যোনিসোমনসিকারপটিক্খেপমুখেন অযোনিসোমনসিকারপরিগ্গহো দীপিতো. ‘‘অরিযানং অদস্সাৰী’’তিআদিনা সপ্পুরিসূপনিস্সযাদিপটিক্খেপমুখেন অসপ্পুরিসূপনিস্সযাদিপরিগ্গহো দীপিতো. তেসু পুরিমনযেন আসযৰিপত্তি কিত্তিতা, দুতিযেন পযোগৰিপত্তি. পুরিমেন চস্স কিলেসৰট্টং, তঞ্চ যতো ৰিপাকৰট্টন্তি সকলং সংসারচক্কমাৰত্ততি. ‘‘পথৰিং মঞ্ঞতী’’তিআদিনা তত্থ তিস্সো মঞ্ঞনা ৰুত্তা. তাসু তণ্হামঞ্ঞনা ‘‘এতং মমা’’তি তণ্হাগ্গাহো, মানমঞ্ঞনা ‘‘এসোহমস্মী’’তি মানগ্গাহো, দিট্ঠিমঞ্ঞনা ‘‘এসো মে অত্তা’’তি দিট্ঠিগ্গাহো. তত্থ তণ্হাগ্গাহেন ‘‘তণ্হং পটিচ্চপরিযেসনা’’তিআদিকা (দী. নি. ২.১০৩; দী. নি. ৩.৩৫৯; অ. নি. ৩.২৩; ৰিভ. ৯৬৩) নৰ তণ্হামূলকা ধম্মা আৰত্তন্তি. মানগ্গাহেন ‘‘সেয্যোহমস্মী’’তিআদিকা নৰ মানৰিধা আৰত্তন্তি. দিট্ঠিগ্গাহেন ‘‘রূপং অত্ততো সমনুপস্সতী’’তিআদিকা (সং. নি. ৪.৩৪৫) ৰীসতিৰত্থুকা সক্কাযদিট্ঠি আৰত্ততি. তীসু চ গাহেসু যায সঞ্ঞায তণ্হাগ্গাহস্স ৰিক্খম্ভনা, সা দুক্খসঞ্ঞা দুক্খানুপস্সনা. যায সঞ্ঞায মানগ্গাহস্স ৰিক্খম্ভনা, সা অনিচ্চসঞ্ঞা অনিচ্চানুপস্সনা. যায পন সঞ্ঞায দিট্ঠিগ্গাহস্স ৰিক্খম্ভনা, সা অনত্তসঞ্ঞা অনত্তানুপস্সনা. তত্থ পঠমগ্গাহৰিসভাগতো অপ্পণিহিতৰিমোক্খমুখং আৰত্ততি, দুতিযগ্গাহৰিসভাগতো অনিমিত্তৰিমোক্খমুখং আৰত্ততি, ততিযগ্গাহৰিসভাগতো সুঞ্ঞতৰিমোক্খমুখং আৰত্ততি.

সেক্খগ্গহণেন অরিযায সম্মাদিট্ঠিযা সঙ্গহো, ততো চ পরতোঘোসযোনিসোমনসিকারা দীপিতা হোন্তি. পরতোঘোসেন চ সুতৰা অরিযসাৰকোতি আৰত্ততি, যোনিসোমনসিকারেন নৰ যোনিসোমনসিকারমূলকা ধম্মা আৰত্তন্তি, চতুব্বিধঞ্চ সম্পত্তিচক্কং. ‘‘মা মঞ্ঞী’’তি মঞ্ঞনানং ৰিপ্পকতপ্পহানতাগহণেন একচ্চাসৰপরিক্খযো দীপিতো হোতি, তেন চ সদ্ধাৰিমুত্তদিট্ঠিপ্পত্তকাযসক্খিভাৰা আৰত্তন্তি. ‘‘অরহং খীণাসৰো’’তিআদিনা অসেক্খা সীলক্খন্ধাদযো দস্সিতা হোন্তি, সীলক্খন্ধাদিপারিপূরিযা চ দস নাথকরণা ধম্মা আৰত্তন্তি. ‘‘ন মঞ্ঞতী’’তি মঞ্ঞনাপটিক্খেপেন পঞ্চসু উপাদানক্খন্ধেসু ‘‘নেতং মম, নেসোহমস্মি, ন মেসো অত্তা’’তি সম্মাপটিপত্তি দস্সিতা, তায চ সাতিসযা নিকন্তিপরিযাদানমানসমুগ্ঘাটনদিট্ঠিউগ্ঘাটনানি ¶ পকাসিতানীতি অপ্পণিহিতানিমিত্ত-সুঞ্ঞতৰিমোক্খা আৰত্তন্তি.

‘‘তথাগতো’’তিআদিনা ¶ সব্বঞ্ঞুগুণা ৰিভাৰিতাতি তদৰিনাভাৰতো দসবল-চতুৰেসারজ্জঅসাধারণঞাণআৰেণিকবুদ্ধধম্মা আৰত্তন্তি. ‘‘নন্দী দুক্খস্স মূল’’ন্তিআদিনা সদ্ধিং হেতুনা ৰট্টৰিৰট্টং কথিতন্তি পৰত্তিনিৰত্তিতদুভযহেতুৰিভাৰনেন চত্তারি অরিযসচ্চানি আৰত্তন্তি. ‘‘তণ্হানং খযা’’তিআদিনা তণ্হপ্পহানাপদেসেন তদেকট্ঠভাৰতো দিযড্ঢস্স কিলেসসহস্সস্স পহানং আৰত্ততি. ‘‘সব্বসো তণ্হানং খযা সম্মাসম্বোধিং অভিসম্বুদ্ধো’’তি চ ৰুত্তত্তা ‘‘নন্দী দুক্খস্স মূল’’ন্তি, ‘‘ইতি ৰিদিত্ৰা’’তিআদিনা ৰুত্তস্স মঞ্ঞনাভাৰহেতুভূতস্স পচ্চযাকারৰেদনস্স সাৰকেহি অসাধারণঞাণচারভাৰো দস্সিতো, তেন চতুৰীসতিকোটিসতসহস্সসমাপত্তিসঞ্চারি ভগৰতো মহাৰজিরঞাণং আৰত্ততীতি. অযং আৰত্তো হারো.

৮. ৰিভত্তিহারৰণ্ণনা

‘‘সব্বধম্মমূলপরিযায’’ন্তি এত্থ সব্বধম্মা নাম তেভূমকা ধম্মা সক্কাযস্স অধিপ্পেতত্তা. তেসং মঞ্ঞনা পদট্ঠানং পপঞ্চসঙ্খানিমিত্তত্তা লোকৰিচিত্তস্স. তযিমে কুসলা অকুসলা অব্যাকতাতি তিৰিধা. তেসু কুসলানং যোনিসোমনসিকারাদি পদট্ঠানং, অকুসলানং অযোনিসোমনসিকারাদি, অব্যাকতানং কম্মভৰআৰজ্জনভূতরূপাদি পদট্ঠানং. তত্থ কুসলা কামাৰচরাদিৰসেন ভূমিতো তিৰিধা, তথা অব্যাকতা চিত্তুপ্পাদসভাৰা, অচিত্তুপ্পাদসভাৰা পন কামাৰচরাৰ তথা অকুসলা. পরিযত্তিপটিপত্তিপটিৰেধসুতকিচ্চাভাৰেন তিৰিধো অস্সুতৰা. অন্ধকল্যাণৰিভাগেন দুৰিধো পুথুজ্জনো. সম্মাসম্বুদ্ধপচ্চেকবুদ্ধসাৰকভেদেন তিৰিধা অরিযা. মংসচক্খুদিব্বচক্খুপঞ্ঞাচক্খূহি দস্সনাভাৰেন তিৰিধো অদস্সাৰী. মগ্গফলনিব্বানভেদেন তিৰিধো, নৰৰিধো ৰা অরিযধম্মো. সৰনধারণপরিচযমনসিকারপটিৰেধৰসেন পঞ্চৰিধা অরিযধম্মস্স কোৰিদতা. তদভাৰতো অকোৰিদো. সংৰরপহানভেদেন দুৰিধো, দসৰিধো ৰা অরিযধম্মৰিনযো, তদভাৰতো অরিযধম্মে অৰিনীতো. এত্থ পদট্ঠানৰিভাগো হেট্ঠা দস্সিতোযেৰ. ‘‘সপ্পুরিসানং অদস্সাৰী’’তিআদীসুপি এসেৰ নযো. ‘‘পথৰিং মঞ্ঞতী’’তিআদীসু মঞ্ঞনাৰত্থুৰিভাগো পাল়িযং আগতোৰ, তথা অজ্ঝত্তিকবাহিরাদিকো চ অন্তরৰিভাগো.

মঞ্ঞনা ¶ পন তণ্হামানদিট্ঠিৰসেন সঙ্খেপতো তিৰিধা, ৰিত্থারতো পন তণ্হামঞ্ঞনা তাৰ কামতণ্হাদিৰসেন অট্ঠসতৰিধা, তথা ‘‘অস্মীতি সতি ইত্থংস্মীতি হোতী’’তিআদিনা. এৰং মানমঞ্ঞনাপি. ‘‘অস্মীতি সতি ইত্থংস্মীতি হোতী’’তিআদিনা পপঞ্চত্তযং উদ্দিট্ঠং নিদ্দিট্ঠঞ্চাতি ¶ . এতেন দিট্ঠিমঞ্ঞনাযপি অট্ঠসতৰিধতা ৰুত্তাতি ৰেদিতব্বা. অপিচ সেয্যস্স ‘‘সেয্যোহমস্মী’’তিআদিনা মানমঞ্ঞনায নৰৰিধতা তদন্তরভেদেন অনেকৰিধতা চ ৰেদিতব্বা. অযঞ্চ অত্থো হীনত্তিকত্থৰণ্ণনায ৰিভাৰেতব্বো. দিট্ঠিমঞ্ঞনায পন ব্রহ্মজালে আগতনযেন দ্ৰাসট্ঠিৰিধতা তদন্তরভেদেন অনেকৰিধতা চ ৰেদিতব্বা. ‘‘অপরিঞ্ঞাত’’ন্তি এত্থ ঞাতপরিঞ্ঞাদিৰসেন চেৰ রূপমুখাদিঅভিনিৰেসভেদাদিৰসেন চ পরিঞ্ঞানং অনেকৰিধতা ৰেদিতব্বা. তথা অট্ঠমকাদিৰসেন সেক্খৰিভাগো পঞ্ঞাৰিমুত্তাদিৰসেন অসেক্খৰিভাগো চ. অযমেত্থ ধম্মৰিভাগো. পদট্ঠানৰিভাগো চ ভূমিৰিভাগো চ ৰুত্তনযানুসারেন ৰেদিতব্বাতি. অযং ৰিভত্তিহারো.

৯. পরিৰত্তহারৰণ্ণনা

‘‘সব্বধম্মমূলপরিযায’’ন্তি এত্থ ‘‘সব্বধম্মা’’তি পঞ্চুপাদানক্খন্ধা গহিতা, তেসং মূলকারণন্তি চ তণ্হামানদিট্ঠিযো. তথা অস্সুতৰা পুথুজ্জনো…পে… সপ্পুরিসধম্মে অৰিনীতোতি. যাৰকীৰঞ্চ পঞ্চসু উপাদানক্খন্ধেসু সুভতো সুখতো নিচ্চতো অত্ততো সমনুপস্সনৰসেন ‘‘এতং মম, এসোহমস্মি, এসো মে অত্তা’’তি তণ্হামানদিট্ঠিগাহা ন সমুচ্ছিজ্জন্তি, তাৰ নেসং পবন্ধূপরমো সুপিনন্তেপি ন কেনচি লদ্ধপুব্বো. যদা পন নেসং অসুভতো দুক্খতো অনিচ্চতো অনত্ততো সমনুপস্সনৰসেন ‘‘নেতং মম, নেসোহমস্মি, ন মেসো অত্তা’’তি পৰত্তমানা অপ্পণিহিতানিমিত্তসুঞ্ঞতানুপস্সনা উস্সক্কিত্ৰা অরিযমগ্গাধিগমায সংৰত্তন্তি, অথ নেসং পবন্ধূপরমো হোতি অচ্চন্তঅপ্পঞ্ঞত্তিকভাৰূপগমনতো. তেন ৰুত্তং ‘‘সব্বধম্মাতি পঞ্চুপাদানক্খন্ধা গহিতা, তেসং মূলকারণন্তি চ তণ্হামানদিট্ঠিযো’’তি. তথা অস্সুতৰা পুথুজ্জনো…পে… সপ্পুরিসধম্মে অৰিনীতো তীহিপি মঞ্ঞনাহি পথৰিং মঞ্ঞতি যাৰ নিব্বানং অভিনন্দতি, তীহিপি পরিঞ্ঞাহি তস্স তং ৰত্থু অপরিঞ্ঞাতন্তি কত্ৰা. যস্স পন তং ৰত্থু তীহি পরিঞ্ঞাহি পরিঞ্ঞাতং, ন সো ইতরো ৰিয তং মঞ্ঞতি. তেনাহ ¶ ভগৰা ‘‘সুতৰা চ খো, ভিক্খৰে, অরিযসাৰকো…পে… সপ্পুরিসধম্মে সুৰিনীতো রূপং ‘নেতং মম, নেসোহমস্মি, ন মেসো অত্তা’তি সমনুপস্সতি, ৰেদনং…পে… অসতি ন পরিতস্সতী’’তি (ম. নি. ১.২৪১). সেক্খো পথৰিং মা মঞ্ঞি, যাৰ নিব্বানং মাভিনন্দি, অরহা সম্মাসম্বুদ্ধো চ পথৰিং ন মঞ্ঞতি, যাৰ নিব্বানং নাভিনন্দতি, মঞ্ঞনামঞ্ঞিতেসু ৰত্থূসু মত্তসো সব্বসো চ পরিঞ্ঞাভিসমযসংসিদ্ধিযা পহানাভিসমযনিব্বত্তিতো. যস্স পন তেসু ৰত্থূসু সব্বসো মত্তসো ৰা পরিঞ্ঞা এৰ নত্থি, কুতো পহানং, সো যথাপরিকপ্পং নিরঙ্কুসাহি মঞ্ঞনাহি ‘‘এতং মমা’’তিআদিনা ¶ মঞ্ঞতেৰ. তেনাহ ভগৰা ‘‘ইধ, ভিক্খৰে, অস্সুতৰা পুথুজ্জনো…পে… সপ্পুরিসধম্মে অৰিনীতো রূপং ‘এতং মম, এসোহমস্মি, এসো মে অত্তা’তি সমনুপস্সতি, ৰেদনং…পে…, সঞ্ঞ…পে…’’ন্তিআদি (ম. নি. ১.২৪১). অযং পরিৰত্তো হারো.

১০. ৰেৰচনহারৰণ্ণনা

‘‘সব্বধম্মা সকলধম্মা অনৰসেসধম্মা’’তি পরিযাযৰচনং, ‘‘মূলপরিযাযং মূলকারণং অসাধারণহেতু’’ন্তি পরিযাযৰচনং, ‘‘মূলপরিযাযন্তি ৰা মূলদেসনং কারণতথন’’ন্তি পরিযাযৰচনং, ‘‘ৰো তুম্হাকং তুম্হ’’ন্তি পরিযাযৰচনং, ‘‘ভিক্খৰে, সমণা তপস্সিনো’’তি পরিযাযৰচনং, ‘‘দেসেস্সামী কথেস্সামী পঞ্ঞপেস্সামী’’তি পরিযাযৰচনং, ‘‘সুণাথ সোতং ওদহথ সোতদ্ৰারানুসারেন উপধারেথা’’তি পরিযাযৰচনং, ‘‘সাধুকং সম্মা সক্কচ্চ’’ন্তি পরিযাযৰচনং, ‘‘মনসি করোথ চিত্তে ঠপেথ সমন্নাহরথা’’তি পরিযাযৰচনং, ‘‘ভাসিস্সামি ব্যত্তং কথেস্সামি ৰিভজিস্সামী’’তি পরিযাযৰচনং, ‘‘এৰং, ভন্তে, সাধু সুট্ঠু ভন্তে’’তি পরিযাযৰচনং, ‘‘পচ্চস্সোসুং সম্পটিচ্ছিংসু সম্পটিগ্গহেসু’’ন্তি পরিযাযৰচনং. ইমিনা নযেন সব্বপদেসু ৰেৰচনং ৰত্তব্বন্তি. অযং ৰেৰচনো হারো.

১১. পঞ্ঞত্তিহারৰণ্ণনা

‘‘সব্বধম্মমূলপরিযায’’ন্তি এত্থ সব্বধম্মা নাম সক্কাযধম্মা, তে খন্ধৰসেন পঞ্চধা পঞ্ঞত্তা, আযতনৰসেন দ্ৰাদসধা, ধাতুৰসেন অট্ঠারসধা ¶ পঞ্ঞত্তা. ‘‘মূল’’ন্তি ৰা ‘‘মূলপরিযায’’ন্তি ৰা মঞ্ঞনা ৰুত্তা, তা তণ্হামানদিট্ঠিৰসেন তিধা অন্তরভেদেন অনেকধা চ পঞ্ঞত্তা. অথ ৰা ‘‘সব্বধম্মা’’তি তেভূমকধম্মানং সঙ্গহপঞ্ঞত্তি, ‘‘মূলপরিযায’’ন্তি তেসং পভৰপঞ্ঞত্তি, ‘‘ৰো’’তি সম্পদানপঞ্ঞতি, ‘‘দেসেস্সামি ভাসিস্সামী’’তি পটিঞ্ঞাপঞ্ঞত্তি, ‘‘সুণাথ সাধুকং মনসি করোথা’’তি চ আণাপনপঞ্ঞত্তি, ‘‘অস্সুতৰা’’তি পটিৰেধৰিমুখতাপঞ্ঞত্তি চেৰ পরিযত্তিৰিমুখতাপঞ্ঞত্তি চ, ‘‘পুথুজ্জনো’’তি অনরিযপঞ্ঞত্তি, সা অরিযধম্মপটিক্খেপপঞ্ঞত্তি চেৰ অরিযধম্মৰিরহপঞ্ঞত্তি চ, ‘‘অরিযান’’ন্তি অসমপঞ্ঞত্তি চেৰ সমপঞ্ঞত্তি চ. তত্থ অসমপঞ্ঞত্তি তথাগতপঞ্ঞত্তি, সমপঞ্ঞত্তি পচ্চেকবুদ্ধানঞ্চেৰ উভতোভাগৰিমুত্তাদীনঞ্চ ৰসেন অট্ঠৰিধা ৰেদিতব্বা. ‘‘অরিযানং অদস্সাৰী’’তিআদি দস্সনভাৰনাপটিক্খেপপঞ্ঞত্তি, ‘‘পথৰিং মঞ্ঞতী’’তিআদি পঞ্চন্নং উপাদানক্খন্ধানং দ্ৰাদসন্নং আযতনানং অট্ঠারসন্নং ধাতূনং সম্মসনুপগানং ইন্দ্রিযানং নিক্খেপপঞ্ঞত্তি ¶ চেৰ পভৰপঞ্ঞত্তি চ, তথা ৰিপল্লাসানং কিচ্চপঞ্ঞত্তি পরিযুট্ঠানং দস্সনপঞ্ঞত্তি কিলেসানং ফলপঞ্ঞত্তি অভিসঙ্খারানং ৰিরূহনপঞ্ঞত্তি তণ্হায অস্সাদনপঞ্ঞত্তি দিট্ঠিযা ৰিপ্ফন্দনপঞ্ঞত্তি, ‘‘সেক্খা’’তি সদ্ধানুসারীসদ্ধাৰিমুত্তদিট্ঠিপ্পত্তকাযসক্খীনং দস্সনপঞ্ঞত্তি চেৰ ভাৰনাপঞ্ঞত্তি চ ‘‘অপ্পত্তমানসো’’তি সেক্খধম্মানং ঠিতিপঞ্ঞত্তি, ‘‘অনুত্তরং যোগক্খেমং পত্থযমানো’’তি পঞ্ঞায অভিনিব্বিদাপঞ্ঞত্তি, ‘‘অভিজানাতী’’তি অভিঞ্ঞেয্যধম্মানং অভিঞ্ঞাপঞ্ঞত্তি, দুক্খস্স পরিঞ্ঞাপঞ্ঞত্তি, সমুদযস্স পহানপঞ্ঞত্তি, নিরোধস্স সচ্ছিকিরিযাপঞ্ঞত্তি, মগ্গস্স ভাৰনাপঞ্ঞত্তি, ‘‘মা মঞ্ঞী’’তি মঞ্ঞনানং পটিক্খেপপঞ্ঞত্তি, সমুদযস্স পহানপঞ্ঞত্তি. ইমিনা নযেন সেসপদেসুপি ৰিত্থারেতব্বং. অযং পঞ্ঞত্তি হারো.

১২. ওতরণহারৰণ্ণনা

‘‘সব্বধম্মমূলপরিযায’’ন্তি এত্থ সব্বধম্মা নাম লোকিযা পঞ্চক্খন্ধা দ্ৰাদসাযতনানি অট্ঠারস ধাতুযো দ্ৰে সচ্চানি একূনৰিসতি ইন্দ্রিযানি দ্ৰাদসপদিকো পচ্চযাকারোতি, অযং সব্বধম্মগ্গহণেন খন্ধাদিমুখেন দেসনায ওতরণং. ‘‘মূল’’ন্তি ৰা ‘‘মূলপরিযায’’ন্তি ৰা মঞ্ঞনা ৰুত্তা, তা অত্থতো তণ্হা মানো দিট্ঠি চাতি তেসং সঙ্খারক্খন্ধসঙ্গহোতি অযং খন্ধমুখেন ওতরণং. তথা ‘‘ধম্মাযতনধম্মধাতূহি সঙ্গহো’’তি অযং আযতনমুখেন ধাতুমুখেন চ ওতরণং. ‘‘অস্সুতৰা’’তি ইমিনা সুতস্স ¶ ৰিবন্ধভূতা অৰিজ্জাদযো গহিতা, ‘‘পুথুজ্জনো’’তি ইমিনা যেসং কিলেসাভিসঙ্খারানং জননাদিনা পুথুজ্জনোতি ৰুচ্চতি, তে কিলেসাভিসঙ্খারাদযো গহিতা, ‘‘অরিযানং অদস্সাৰী’’তিআদিনা যেসং কিলেসধম্মানং ৰসেন অরিযানং অদস্সাৰিআদিভাৰো হোতি, তে দিট্ঠিমানাৰিজ্জাদযো গহিতাতি সব্বেহি তেহি সঙ্খারক্খন্ধসঙ্গহোতি পুব্বে ৰুত্তনযেনেৰ ওতরণং ৰেদিতব্বং. ‘‘সঞ্জানাতি মঞ্ঞতি অভিজানাতি ন মঞ্ঞতী’’তি এত্থাপি সঞ্জাননমঞ্ঞনাঅভিজাননানুপস্সনানং সঙ্খারক্খন্ধপরিযাপন্নত্তা ৰুত্তনযেনেৰ ওতরণং ৰেদিতব্বং. তথা সেক্খগ্গহণেন সেক্খা, ‘‘অরহ’’ন্তিআদিনা অসেক্খা সীলক্খন্ধাদযো গহিতাতি এৰম্পি খন্ধমুখেন ওতরণং, আযতনধাতাদিমুখেন চ ওতরণং ৰেদিতব্বং. তথা ‘‘ন মঞ্ঞতী’’তি তণ্হাগাহাদিপটিক্খেপেন দুক্খানুপস্সনাদযো গহিতা, তেসং ৰসেন অপ্পণিহিতৰিমোক্খমুখাদীহি ওতরণং ৰেদিতব্বং. ‘‘পরিঞ্ঞাত’’ন্তি ইমিনা পরিজাননকিচ্চেন পৰত্তমানা বোধিপক্খিযধম্মা গয্হন্তীতি সতিপট্ঠানাদিমুখেন ওতরণং ৰেদিতব্বং. নন্দিগ্গহণেন ভৰগ্গহণেন তণ্হাগহণেন চ সমুদযসচ্চং, দুক্খগ্গহণেন জাতিজরামরণগ্গহণেন চ দুক্খসচ্চং, ‘‘তণ্হানং খযা’’তিআদিনা ¶ নিরোধসচ্চং, অভিসম্বোধিযা গহণেন মগ্গসচ্চং গহিতন্তি অরিযসচ্চেহি ওতরণন্তি. অযং ওতরণো হারো.

১৩. সোধনহারৰণ্ণনা

‘‘সব্বধম্মমূলপরিযাযং ৰো, ভিক্খৰে…পে… ইধ, ভিক্খৰে, অস্সুতৰা…পে… পথৰিং পথৰিতো সঞ্জানাতী’’তি আরম্ভো. ‘‘পথৰিং পথৰিযা সঞ্ঞত্ৰা পথৰিং মঞ্ঞতী’’তি পদসুদ্ধি, নো আরম্ভসুদ্ধি. তথা ‘‘পথৰিযা মঞ্ঞতি পথৰিতো মঞ্ঞতি পথৰিং মেতি মঞ্ঞতি পথৰিং অভিনন্দতী’’তি পদসুদ্ধি, নো আরম্ভসুদ্ধি. ‘‘তং কিস্স হেতু অপরিঞ্ঞাতং তস্সাতি ৰদামী’’তি পদসুদ্ধি চেৰ আরম্ভসুদ্ধি চ. সেসৰারেসুপি এসেৰ নযোতি. অযং সোধনো হারো.

১৪. অধিট্ঠানহারৰণ্ণনা

‘‘সব্বধম্মমূলপরিযায’’ন্তি এত্থ সব্বধম্মগ্গহণং সামঞ্ঞতো অধিট্ঠানং. ‘‘পথৰিং আপ’’ন্তিআদি পন তং অৰিকপ্পেত্ৰা ৰিসেসৰচনং. তথা ‘‘মূলপরিযায’’ন্তি ¶ সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘পথৰিং মঞ্ঞতি…পে… অভিনন্দতী’’তি. ‘‘পথৰিং মঞ্ঞতী’’তি চ সামঞ্ঞতো অধিট্ঠানং তণ্হাদিগ্গাহানং সাধারণত্তা মঞ্ঞনায, তং অৰিকপ্পেত্ৰা ৰিসেসৰচনং ‘‘এতং মম, এসোহমস্মি, এসো মে অত্তা’’তি, এৰং সুত্তন্তরপদানিপি আনেত্ৰা ৰিসেসৰচনং নিদ্ধারেতব্বং. সেসৰারেসুপি এসেৰ নযো. ‘‘সেক্খো’’তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘কাযসক্খী দিট্ঠিপ্পত্তো সদ্ধাৰিমুত্তো সদ্ধানুসারী ধম্মানুসারী’’তি. তথা ‘‘সেক্খো’’তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘ইধ, ভিক্খৰে, ভিক্খু সেক্খায সম্মাদিট্ঠিযা সমন্নাগতো হোতি…পে… সেক্খেন সম্মাসমাধিনা সমন্নাগতো হোতী’’তি (সং. নি. ৫.১৩). ‘‘অরহ’’ন্তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘উভতোভাগৰিমুত্তো পঞ্ঞাৰিমুত্তো (পু. প. ১৩.২; ১৫.১ মাতিকা), তেৰিজ্জো ছল়ভিঞ্ঞো’’তি (পু. প. ৭.২৬, ২৭ মাতিকা) চ. ‘‘খীণাসৰো’’তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘কামাসৰাপি চিত্তং ৰিমুচ্চিত্থ, ভৰাসৰাপি চিত্তং ৰিমুচ্চিত্থা’’তিআদি (পারা. ১৪). সেসপদেসুপি এসেৰ নযো. ‘‘অভিজানাতী’’তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘মঞ্ঞতী’’তি. মঞ্ঞনাভাৰো হিস্স পহানপটিৰেধসিদ্ধো, পহানপটিৰেধো ¶ চ পরিঞ্ঞাসচ্ছিকিরিযাভাৰনাপটিৰেধেহি ন ৰিনাতি সব্বেপি অভিঞ্ঞাৰিসেসা মঞ্ঞনাপটিক্খেপেন অত্থতো গহিতাৰ হোন্তীতি. তথা ‘‘অরহ’’ন্তি সামঞ্ঞতো অধিট্ঠানং, তং অৰিকপ্পেত্ৰা ৰিসেসৰচনং ‘‘ৰীতরাগত্তা ৰীতদোসত্তা ৰীতমোহত্তা’’তি. ইমিনা নযেন সেসপদেসুপি সামঞ্ঞৰিসেসনিদ্ধারণা ৰেদিতব্বা. অযং অধিট্ঠানো হারো.

১৪. পরিক্খারহারৰণ্ণনা

‘‘সব্বধম্মমূলপরিযায’’ন্তি এত্থ সব্বধম্মা নাম পরিযাপন্নধম্মা, তে কুসলাকুসলাব্যাকতভেদেন তিৰিধা. তেসু কুসলানং যোনিসোমনসিকারো অলোভাদযো চ হেতূ, অকুসলানং অযোনিসোমনসিকারো লোভাদযো চ হেতূ, অব্যাকতেসু ৰিপাকানং যথাসকং কম্মং, ইতরেসং ভৰঙ্গমাৰজ্জনসমন্নাহারাদি চ হেতূ. এত্থ চ সপ্পুরিসূপনিস্সযাদিকো পচ্চযো হেতুম্হি এৰ সমৰরুল়্হো, সো তত্থ ¶ আদি-সদ্দেন সঙ্গহিতোতি দট্ঠব্বো. ‘‘মূল’’ন্তি ৰুত্তানং মঞ্ঞনানং হেতুভাৰো পাল়িযং ৰুত্তো এৰ. মঞ্ঞনাসু পন তণ্হামঞ্ঞনায অস্সাদানুপস্সনা হেতু. ‘‘সঞ্ঞোজনিযেসু ধম্মেসু অস্সাদানুপস্সিনো তণ্হা পৰড্ঢতী’’তি (সং. নি. ২.৫২) হি ৰুত্তং. মানমঞ্ঞনায দিট্ঠিৰিপ্পযুত্তলোভো হেতু কেৰলং সংসগ্গৰসেন ‘‘অহমস্মী’’তি পৰত্তনতো. দিট্ঠিমঞ্ঞনায একত্তনযাদীনং অযাথাৰগ্গাহো হেতু, অস্সুতভাৰো পুথুজ্জনভাৰস্স হেতু, সো অরিযানং অদস্সনসীলতায, সা অরিযধম্মস্স অকোৰিদতায, সা অরিযধম্মে অৰিনীততায হেতু, সব্বা চাযং হেতুপরম্পরা পথৰীআদীসু ‘‘এতং মম, এসোহমস্মি, এসো মে অত্তা’’তি তিস্সন্নং মঞ্ঞনানং হেতু, সেক্খারহাদিভাৰা পন মত্তসো সব্বসো চ মঞ্ঞনাভাৰস্স হেতূতি. অযং পরিক্খারো হারো.

১৬. সমারোপনহারৰণ্ণনা

‘‘সব্বধম্মমূলপরিযায’’ন্তিআদীসু মূলপরিযাযগ্গহণেন অস্সুতৰাগহণেন সঞ্জাননমঞ্ঞনাপরিঞ্ঞাগহণেহি চ সংকিলেসধম্মা দস্সিতা, তে চ সঙ্খেপতো তিৰিধা তণ্হাসংকিলেসো দিট্ঠিসংকিলেসো দুচ্চরিতসংকিলেসোতি. তত্থ তণ্হাসংকিলেসো তণ্হাসংকিলেসস্স, দিট্ঠিসংকিলেসস্স, দুচ্চরিতসংকিলেসস্স চ পদট্ঠানং, তথা দিট্ঠিসংকিলেসো দিট্ঠিসংকিলেসস্স, তণ্হাসংকিলেসস্স, দুচ্চরিতসংকিলেসস্স চ পদট্ঠানং, দুচ্চরিতসংকিলেসোপি দুচ্চরিতসংকিলেসস্স, তণ্হাসংকিলেসস্স, দিট্ঠিসংকিলেসস্স চ পদট্ঠানং. তেসু তণ্হাসংকিলেসো অত্থতো লোভোৰ, যো ‘‘লোভো লুব্ভনা লুব্ভিতত্তং সারাগো সারজ্জনা সারজ্জিতত্ত’’ন্তিআদিনা ¶ (ধ. স. ৩৮৯) অনেকেহি পরিযাযেহি ৰিভত্তো. তথা দিট্ঠিযেৰ দিট্ঠিসংকিলেসো, যো ‘‘দিট্ঠিগতং দিট্ঠিগহনং দিট্ঠিকন্তারো দিট্ঠিৰিসূকং দিট্ঠিৰিপ্ফন্দিত’’ন্তিআদিনা (ধ. স. ১১০৫) অনেকেহি পরিযাযেহি, ‘‘সন্তি, ভিক্খৰে, একে সমণব্রাহ্মণা’’তিআদিনা (দী. নি. ১.৩০) দ্ৰাসট্ঠিযা পভেদেহি চ ৰিভত্তো. দুচ্চরিতসংকিলেসো পন অত্থতো দুস্সীল্যচেতনা চেৰ চেতনাসম্পযুত্তধম্মা চ, যা ‘‘কাযদুচ্চরিতং ৰচীদুচ্চরিতং কাযৰিসমং ৰচীৰিসম’’ন্তি (ৰিভ. ৯১৩, ৯২৪), ‘‘পাণাতিপাতো অদিন্নাদান’’ন্তি (ৰিভ. ৯১৩) চ আদিনা অনেকেহি পরিযাযেহি, অনেকেহি পভেদেহি চ ৰিভত্তা.

তেসু ¶ তণ্হাসংকিলেসস্স সমথো পটিপক্খো, দিট্ঠিসংকিলেসস্স ৰিপস্সনা, দুচ্চরিতসংকিলেসস্স সীলং পটিপক্খো. তে পন সীলাদযো ধম্মা ইধ পরিঞ্ঞাগহণেন সেক্খগ্গহণেন ‘‘অরহ’’ন্তিআদিনা অরিযতাদিগ্গহণেন চ গহিতা. তত্থ সীলেন দুচ্চরিতসংকিলেসপ্পহানং সিজ্ঝতি, তথা তদঙ্গপ্পহানং ৰীতিক্কমপ্পহানঞ্চ, সমথেন তণ্হাসংকিলেসপ্পহানং সিজ্ঝতি, তথা ৰিক্খম্ভনপ্পহানং পরিযুট্ঠানপ্পহানঞ্চ. ৰিপস্সনায দিট্ঠিসংকিলেসপ্পহানং সিজ্ঝতি, তথা সমুচ্ছেদপ্পহানং অনুসযপ্পহানঞ্চ. তত্থ পুব্বভাগে সীলে পতিট্ঠিতস্স সমথো, সমথে পতিট্ঠিতস্স ৰিপস্সনা, মগ্গক্খণে পন সমকালমেৰ ভৰন্তি. পুব্বেযেৰ হি সুপরিসুদ্ধকাযৰচীকম্মস্স সুপরিসুদ্ধাজীৰস্স চ সমথৰিপস্সনা আরদ্ধা গব্ভং গণ্হন্তিযো পরিপাকং গচ্ছন্তিযো ৰুট্ঠানগামিনিৰিপস্সনং পরিব্রূহেন্তি, ৰুট্ঠানগামিনিৰিপস্সনা ভাৰনাপারিপূরিং গচ্ছন্তী মগ্গেন ঘটেন্তি মগ্গক্খণে সমথৰিপস্সনা পরিপূরেতি. অথ মগ্গক্খণে সমথৰিপস্সনাভাৰনাপারিপূরিযা অনৰসেসসংকিলেসধম্মং সমুচ্ছিন্দন্তিযো নিরোধং নিব্বানং সচ্ছিকরোন্তীতি. অযং সমারোপনো হারো.

সোল়সহারৰণ্ণনা নিট্ঠিতা.

পঞ্চৰিধনযৰণ্ণনা

১. নন্দিযাৰট্টনযৰণ্ণনা

‘‘সব্বধম্মমূলপরিযায’’ন্তিআদীসু ¶ সব্বধম্মমূলগ্গহণেন মঞ্ঞনাগহণেন চ তণ্হামানদিট্ঠিযো গহিতা. মঞ্ঞনানম্পি হি মঞ্ঞনা কারণন্তি দস্সিতোযমত্থো. ‘‘অস্সুতৰা’’তিআদিনা অৰিজ্জামানদিট্ঠিযো গহিতা, সব্বেপি ৰা সংকিলেসধম্মা, তথা সঞ্ঞাঅপরিঞ্ঞাতগ্গহণেন. ‘‘খীণাসৰো পরিক্খীণভৰসঞ্ঞোজনো’’তি এত্থ পন আসৰা সঞ্ঞোজনানি চ সরূপতো গহিতানি, তথা নন্দিগ্গহণেন তণ্হাগহণেন চ তণ্হা, এৰম্পেত্থ সরূপতো পরিযাযতো চ তণ্হা অৰিজ্জা তপ্পক্খিযধম্মা চ গহিতা. তত্থ তণ্হায ৰিসেসতো রূপধম্মা অধিট্ঠানং, অৰিজ্জায অরূপধম্মা, তে পন সব্বধম্মগ্গহণেন পথৰীআদিগ্গহণেন চ দস্সিতা এৰ. তাসং সমথো ৰিপস্সনা চ পটিপক্খো, তেসমেত্থ গহেতব্বাকারো হেট্ঠা দস্সিতো এৰ. সমথস্স চেতোৰিমুত্তি ফলং ¶ , ৰিপস্সনায পঞ্ঞাৰিমুত্তি. তথা হি তা ‘‘রাগৰিরাগা’’তিআদিনা ৰিসেসেত্ৰা ৰুচ্চন্তি, ইমাসমেত্থ গহণং সম্মদঞ্ঞাৰিমুত্তৰীতরাগাদিৰচনেহি ৰেদিতব্বং. তত্থ তণ্হাৰিজ্জা সমুদযসচ্চং, তপ্পক্খিযধম্মা পন তগ্গহণেনেৰ গহিতাতি ৰেদিতব্বা. তেসং অধিট্ঠানভূতা ৰুত্তপ্পভেদা রূপারূপধম্মা দুক্খসচ্চং, তেসং অপ্পৰত্তি নিরোধসচ্চং, নিরোধপজাননা পটিপদা মগ্গসচ্চং. তণ্হাগহণেন চেত্থ মাযা-সাঠেয্য-মানাতিমান-মদপ্পমাদ-পাপিচ্ছতা-পাপমিত্ততা-অহিরিকানোত্তপ্পাদিৰসেন অকুসলপক্খো নেতব্বো, অৰিজ্জাগহণেন ৰিপরীতমনসিকার-কোধূপনাহ-মক্খ-পল়াস-ইস্সা-মচ্ছরিয- সারম্ভদোৰচস্সতা-ভৰদিট্ঠি-ৰিভৰদিট্ঠিআদিৰসেন অকুসলপক্খো নেতব্বো, ৰুত্তৰিপরিযাযেন অমাযাঅসাঠেয্যাদিঅৰিপরীতমনসিকারাদিৰসেন, তথা সমথপক্খিযানং সদ্ধিন্দ্রিযাদীনং ৰিপস্সনাপক্খিযানং অনিচ্চসঞ্ঞাদীনঞ্চ ৰসেন ৰোদানপক্খো নেতব্বোতি. অযং নন্দিযাৰট্টস্স ন যস্স ভূমি.

২. তিপুক্খলনযৰণ্ণনা

তথা ৰুত্তনযেন সরূপতো পরিযাযতো চ গহিতেসু তণ্হাৰিজ্জাতপ্পক্খিযধম্মেসু তণ্হা লোভো, অৰিজ্জা মোহো, অৰিজ্জায সম্পযুত্তো লোহিতে সতি পুব্বো ৰিয তণ্হায সতি সিজ্ঝমানো আঘাতো দোসো, ইতি তীহি অকুসলমূলেহি গহিতেহি, তপ্পটিপক্খতো মঞ্ঞনাপটিক্খেপপরিঞ্ঞাগহণাদীহি চ কুসলমূলানি সিদ্ধানিযেৰ হোন্তি. ইধাপি ‘‘লোভো সব্বানি ¶ ৰা সাসৰকুসলাকুসলমূলানি সমুদযসচ্চং, তেহি নিব্বত্তা, তেসং অধিট্ঠানগোচরভূতা চ উপাদানক্খন্ধা দুক্খসচ্চ’’ন্তিআদিনা সচ্চযোজনা ৰেদিতব্বা. ফলং পনেত্থ তযো ৰিমোক্খা, তীহি পন অকুসলমূলেহি তিৰিধদুচ্চরিত-সংকিলেসমল-ৰিসমঅকুসল-সঞ্ঞা-ৰিতক্কাদিৰসেন অকুসলপক্খো নেতব্বো. তথা তীহি কুসলমূলেহি তিৰিধসুচরিত-সমকুসল-সঞ্ঞা-ৰিতক্ক-সদ্ধম্ম-সমাধি-ৰিমোক্খমুখ-ৰিমোক্খা-দিৰসেন কুসলপক্খো নেতব্বোতি. অযং তিপুক্খলস্স নযস্স ভূমি.

৩. সীহৰিক্কীল়িতনযৰণ্ণনা

তথা ৰুত্তনযেন সরূপতো পরিযাযতো চ গহিতেসু তণ্হাৰিজ্জাতপ্পক্খিযধম্মেসু ৰিসেসতো তণ্হাদিট্ঠীনং ৰসেন অসুভে ‘‘সুভ’’ন্তি ¶ , দুক্খে ‘‘সুখ’’ন্তি চ ৰিপল্লাসা, অৰিজ্জাদিট্ঠীনং ৰসেন অনিচ্চে ‘‘নিচ্চ’’ন্তি, অনত্তনি ‘‘অত্তা’’তি চ ৰিপল্লাসা ৰেদিতব্বা. তেসং পটিপক্খতো মঞ্ঞনাপটিক্খেপপরিঞ্ঞাগহণাদিসিদ্ধেহি সতিৰীরিযসমাধিপঞ্ঞিন্দ্রিযেহি চত্তারি সতিপট্ঠানানি সিদ্ধানেৰ হোন্তি. তত্থ চতূহি ইন্দ্রিযেহি চত্তারো পুগ্গলা নিদ্দিসিতব্বা. কথং? দুৰিধো হি তণ্হাচরিতো মুদিন্দ্রিযো তিক্খিন্দ্রিযোতি, তথা দিট্ঠিচরিতো. তেসং পঠমো অসুভে ‘‘সুভ’’ন্তি ৰিপরিযাসগ্গাহী সতিবলেন যথাভূতং কাযসভাৰং সল্লক্খেন্তো তং ৰিপল্লাসং সমুগ্ঘাটেত্ৰা সম্মত্তনিযামং ওক্কমতি. দুতিযো অসুখে ‘‘সুখ’’ন্তি ৰিপরিযাসগ্গাহী ‘‘উপ্পন্নং কামৰিতক্কং নাধিৰাসেতী’’তিআদিনা (দী. নি. ৩.৩১০; ম. নি. ১.২৬; অ. নি. ৪.১৪, ১১৪; অ. নি. ৬.৫৮) ৰুত্তেন ৰীরিযসংৰরভূতেন ৰীরিযবলেন তং ৰিপল্লাসং ৰিধমেন্তো সম্মত্তনিযামং ওক্কমতি. ততিযো অনিচ্চে ‘‘নিচ্চ’’ন্তি অযাথাৰগ্গাহী সমাধিবলেন সমাহিতচিত্তো সঙ্খারানং খণিকভাৰসল্লক্খণেন তং ৰিপল্লাসং সমুগ্ঘাটেন্তো অরিযভূমিং ওক্কমতি. চতুত্থো সন্ততিসমূহকিচ্চারম্মণঘনৰঞ্চিততায ফস্সাদিধম্মপুঞ্জমত্তে অনত্তনি ‘‘অত্তা’’তি মিচ্ছাভিনিৰেসী চতুকোটিকসুঞ্ঞতামনসিকারেন তং মিচ্ছাভিনিৰেসং ৰিদ্ধংসেন্তো সামঞ্ঞফলং সচ্ছিকরোতি.

ইধাপি সুভসঞ্ঞাসুখসঞ্ঞাহি চতূহিপি ৰা ৰিপল্লাসেহি সমুদযসচ্চং, তেসং অধিট্ঠানারম্মণভূতা পঞ্চুপাদানক্খন্ধা দুক্খসচ্চন্তিআদিনা সচ্চযোজনা ৰেদিতব্বা. ফলং পনেত্থ চত্তারি সামঞ্ঞফলানি, চতূহি চিত্তৰিপল্লাসেহি চতুরাসৰোঘ-যোগ-কাযগন্থ-অগতি-তণ্হুপ্পাদ-সল্লুপাদান-ৰিঞ্ঞাণট্ঠিতি-অপরিঞ্ঞাদিৰসেন অকুসলপক্খো নেতব্বো. তথা চতূহি সতিপট্ঠানেহি ¶ চতুব্বিধঝান-ৰিহারাধিট্ঠান-সুখভাগিযধম্ম-অপ্পমঞ্ঞা-সম্মপ্পধান-ইদ্ধিপাদা- দিৰসেন ৰোদানপক্খো নেতব্বোতি. অযং সীহৰিক্কীল়িতস্স নযস্স ভূমি.

৪-৫. দিসালোচন-অঙ্কুসনযদ্ৰযৰণ্ণনা

ইমেসং পন তিণ্ণং অত্থনযানং সিদ্ধিযা ৰোহারেন নযদ্ৰযং সিদ্ধমেৰ হোতি. তথা হি অত্থনযানং দিসাভূতধম্মানং সমালোচনং দিসালোচনং, তেসং সমানযনং অঙ্কুসোতি পঞ্চপি নযা নিযুত্তাতি ৰেদিতব্বা.

পঞ্চৰিধনযৰণ্ণনা নিট্ঠিতা.

সাসনপট্ঠানৰণ্ণনা

ইদঞ্চ ¶ সুত্তং সোল়সৰিধে সুত্তন্তপট্ঠানে সংকিলেসনিব্বেধাসেক্খভাগিযং, সব্বভাগিযমেৰ ৰা ‘‘সব্বধম্মমূলপরিযায’’ন্তি এত্থ সব্বধম্মগ্গহণেন লোকিযকুসলানম্পি সঙ্গহিতত্তা. অট্ঠৰীসতিৰিধেন পন সুত্তন্তপট্ঠানে লোকিযলোকুত্তরসব্বধম্মাধিট্ঠানং ঞাণঞেয্যং দস্সনভাৰনং সকৰচনং ৰিস্সজ্জনীযং কুসলাকুসলং অনুঞ্ঞাতং পটিক্খিত্তং চাতি ৰেদিতব্বং.

নেত্তিনযৰণ্ণনা নিট্ঠিতা.

মূলপরিযাযসুত্তৰণ্ণনায লীনত্থপ্পকাসনা সমত্তা.

২. সব্বাসৰসুত্তৰণ্ণনা

১৪. অপুব্বপদৰণ্ণনাতি ¶ অত্থসংৰণ্ণনাৰসেন হেট্ঠা অগ্গহিততায অপুব্বস্স অভিনৰস্স পদস্স ৰণ্ণনা অত্থৰিভজনা. ‘‘হিত্ৰা পুনপ্পুনাগতমত্থ’’ন্তি হি ৰুত্তং. নিৰাসট্ঠানভূতা ভূতপুব্বনিৰাসট্ঠানভূতা, নিৰাসট্ঠানে ৰা ভূতা নিব্বত্তা নিৰাসট্ঠানভূতা, তত্থ মাপিতাতি অত্থো. যথা কাকন্দী মাকন্দী কোসম্বীতি যথা কাকন্দস্স ইসিনো নিৰাসট্ঠানে মাপিতা নগরী কাকন্দী, মাকন্দস্স নিৰাসট্ঠানে মাপিতা মাকন্দী, কুসম্বস্সনিৰাসট্ঠানে মাপিতা কোসম্বীতি ৰুচ্চতি, এৰং সাৰত্থীতি দস্সেতি. উপনেত্ৰা সমীপে কত্ৰা ভুঞ্জিতব্বতো উপভোগো, সৰিঞ্ঞাণকৰত্থু. পরিতো সব্বদা ভুঞ্জিতব্বতো পরিভোগো, নিৰাসনপারুপনাদি অৰিঞ্ঞাণকৰত্থু. সব্বমেত্থ অত্থীতি নিরুত্তিনযেন সাৰত্থী-সদ্দসিদ্ধিমাহ. সত্থসমাযোগেতি সত্থস্স নগরিযা সমাগমে, সত্থে তং নগরং উপগতেতি অত্থো. পুচ্ছিতে সত্থিকজনেহি.

সমোহিতন্তি সন্নিচিতং. রম্মন্তি অন্তো বহি চ ভূমিভাগসম্পত্তিযা চেৰ আরামুয্যানসম্পত্তিযা চ রমণীযং. দস্সনেয্যন্তি ৰিসিখাসন্নিৰেসসম্পত্তিযা চেৰ পাসাদকূটাগারাদিসম্পত্তিযা চ দস্সনীযং পস্সিতব্বযুত্তং. উপভোগপরিভোগৰত্থুসম্পত্তিযা চেৰ নিৰাসসুখতায চ নিবদ্ধৰাসং ৰসন্তানং ইতরেসঞ্চ সত্তানং মনং রমেতীতি মনোরমং. দসহি সদ্দেহীতি হত্থিসদ্দো, অস্স-রথ-ভেরি-সঙ্খ-মুদিঙ্গ-ৰীণা-গীত সম্মতাল়সদ্দো, অস্নাথ-পিৰথ-খাদথাতি-সদ্দোতি ¶ ইমেহি দসহি সদ্দেহি. অৰিৰিত্তন্তি ন ৰিৰিত্তং, সব্বকালং ঘোসিতন্তি অত্থো.

ৰুদ্ধিং ৰেপুল্লতং পত্তন্তি তন্নিৰাসী সত্তৰুদ্ধিযা ৰুদ্ধিং, তায পরিৰুদ্ধিতাযেৰ ৰিপুলভাৰং পত্তং, বহুজনং আকিণ্ণমনুস্সন্তি অত্থো. ৰিত্তূপকরণসমিদ্ধিযা ইদ্ধং. সব্বকালং সুভিক্খভাৰেন ফীতং. অন্তমসো ৰিঘাসাদে উপাদায সব্বেসং কপণদ্ধিকৰনিব্বকযাচকানম্পি ইচ্ছি তত্থনিপ্ফত্তিযা মনুঞ্ঞং জাতং, পগেৰ ইস্সরিযে ঠিতানন্তি দস্সনত্থং পুন ‘‘মনোরম’’ন্তি ৰুত্তং. অল়কমন্দাৰাতি আটানাটাদীসু দসসু ৰেস্সৰণমহারাজস্স নগরীসু অল়কমন্দা নাম একা নগরী, যা লোকে অল়াকা এৰ ৰুচ্চতি ¶ . সা যথা পুঞ্ঞকম্মীনং আৰাসভূতা আরামরামণেয্যকাদিনা সোভগ্গপ্পত্তা, এৰং সাৰত্থীপীতি ৰুত্তং ‘‘অল়কমন্দাৰা’’তি. দেৰানন্তি ৰেস্সৰণপক্খিযানং চাতুমহারাজিকদেৰানং.

জিনাতীতি ইমিনা সোত-সদ্দো ৰিয কত্তুসাধনো জেত-সদ্দোতি দস্সেতি. রঞ্ঞাতি পসেনদিকোসলরাজেন. রাজগতং জযং আরোপেত্ৰা কুমারো জিতৰাতি জেতোতি ৰুত্তো. মঙ্গলকব্যতাযাতিআদিনা ‘‘জেয্যো’’তি এতস্মিং অত্থে ‘‘জেতো’’তি ৰুত্তন্তি দস্সেতি. সব্বকামসমিদ্ধিতাযাতি সব্বেহি উপভোগপরিভোগৰত্থূহি ফীতভাৰেন ৰিভৰসম্পন্নতাযাতি অত্থো. সমিদ্ধাপি মচ্ছরিনো কিঞ্চি ন দেন্তীতি আহ ‘‘ৰিগতমলমচ্ছেরতাযা’’তি, রাগদোসাদিমলানঞ্চেৰ মচ্ছরিযস্স চ অভাৰেনাতি অত্থো. সমিদ্ধা অমচ্ছরিনোপি চ করুণাসদ্ধাদিগুণৰিরহিতা অত্তনো সন্তকং পরেসং ন দদেয্যুন্তি আহ ‘‘করুণাদিগুণসমঙ্গিতায চা’’তি. তেনাতি অনাথানং পিণ্ডদানেন. সদ্দত্থতো পন দাতব্বভাৰেন সব্বকালং উপট্ঠপিতো অনাথানং পিণ্ডো এতস্স অত্থীতি অনাথপিণ্ডিকো. পঞ্চৰিধসেনাসনঙ্গসম্পত্তিযাতি ‘‘নাতিদূরং নচ্চাসন্নং গমনাগমনসম্পন্ন’’ন্তি একং অঙ্গং, ‘‘দিৰা অপ্পাকিণ্ণং রত্তিং অপ্পসদ্দং অপ্পনিগ্ঘোস’’ন্তি একং, ‘‘অপ্পডংসমকসৰাতাতপসরীসপসম্ফস্স’’ন্তি একং, ‘‘তস্মিং খো পন সেনাসনে ৰিহরন্তস্স অপ্পকসিরেন উপ্পজ্জন্তি চীৰর…পে… পরিক্খারা’’তি একং, ‘‘তস্মিং খো পন সেনাসনে থেরা ভিক্খূ ৰিহরন্তি বহুস্সুতা’’তি একং, এৰমেতেহি পঞ্চৰিধসেনাসনঙ্গেহি সম্পন্নতায. যদি জেতৰনং তথং অনাথপিণ্ডিকস্স আরামোতি আহ ‘‘সো হী’’তিআদি.

কীতকালতো ¶ পট্ঠায অনাথপিণ্ডিকস্সেৰ তং ৰনং, অথ কস্মা উভিন্নং পরিকিত্তনন্তি আহ ‘‘জেতৰনে’’তিআদি. ‘‘যদিপি সো ভূমিভাগো কোটিসন্থরেন মহাসেট্ঠিনা কীতো, রুক্খা পন জেতেন ন ৰিক্কীতাতি জেতৰনন্তি ৰত্তব্বতং লভী’’তি ৰদন্তি.

কস্মা ইদং সুত্তমভাসীতি কথেতুকম্যতায সুত্তনিক্খেপং পুচ্ছতি. সামঞ্ঞতো হি ভগৰতো দেসনাকারণং পাকটমেৰাতি. কো পনাযং সুত্তনিক্খেপোতি? অত্তজ্ঝাসযো. পরেহি অনজ্ঝিট্ঠো এৰ হি ভগৰা অত্তনো অজ্ঝাসযেন ইমং সুত্তং দেসেতীতি আচরিযা. যস্মা পনেস ভিক্খূনং উপক্কিলিট্ঠচিত্ততং ৰিদিত্ৰা ‘‘ইমে ভিক্খূ ইমায দেসনায উপক্কিলেসৰিসোধনং কত্ৰা আসৰক্খযায পটিপজ্জিস্সন্তী’’তি অযং দেসনা আরদ্ধা, তস্মা পরজ্ঝাসযোতি অপরে. উভযম্পি পন যুত্তং. অত্তজ্ঝাসযাদীনঞ্হি সংসগ্গভেদস্স সম্ভৰো হেট্ঠা দস্সিতোৰাতি. তেসং ভিক্খূনন্তি তদা ধম্মপটিগ্গাহতভিক্খূনং. উপক্কিলেসৰিসোধনন্তি সমথৰিপস্সনুপক্কিলেসতো ¶ চিত্তস্স ৰিসোধনং. পঠমঞ্হি ভগৰা অনুপুব্বিকথাদিনা পটিপত্তিযা সংকিলেসং নীহরিত্ৰা পচ্ছা সামুক্কংসিকং দেসনং দেসেতি খেত্তে খাণুকণ্টকগুম্বাদিকে অৰহরিত্ৰা কসনং ৰিয, তস্মা কম্মট্ঠানমেৰ অৰত্ৰা ইমায অনুপুব্বিযা দেসনা পৰত্তাতি অধিপ্পাযো.

সংৰরভূতন্তি সীলসংৰরাদিসংৰরভূতং সংৰরণসভাৰং কারণং, তং পন অত্থতো দস্সনাদি এৰাতি ৰেদিতব্বং. সংৰরিতাতি পৰত্তিতুং অপ্পদানৰসেন সম্মা, সব্বথা ৰা ৰারিতা. এৰংভূতা চ যস্মা পৰত্তিদ্ৰারপিধানেন পিহিতা নাম হোন্তি, তস্মা ৰুত্তং ‘‘ৰিদহিতা হুত্ৰা’’তি. এৰং অচ্চন্তিকস্স সংৰরস্স কারণভূতং অনচ্চন্তিকং সংৰরং দস্সেত্ৰা ইদানি অচ্চন্তিকমেৰ সংৰরং দস্সেন্তো যস্মিং দস্সনাদিম্হি সতি উপ্পজ্জনারহা আসৰা ন উপ্পজ্জন্তি, সো তেসং অনুপ্পাদো নিরোধো খযো পহানন্তি চ ৰুচ্চমানো অত্থতো অপ্পৰত্তিমত্তন্তি তস্স চ দস্সনাদি কারণন্তি আহ ‘‘যেন কারণেন অনুপ্পাদনিরোধসঙ্খাতং খযং গচ্ছন্তি পহীযন্তি নপ্পৰত্তন্তি, তং কারণন্তি অত্থো’’তি.

চক্খুতোপি…পে… মনতোপীতি (ধ. স. মূলটী. ১৪-১৯) চক্খুৰিঞ্ঞাণাদিৰীথীসু তদনুগতমনোৰিঞ্ঞাণৰীথীসু চ কিঞ্চাপি কুসলাদীনম্পি পৰত্তি অত্থি, কামাসৰাদযো ¶ এৰ পন ৰণতো যূসং ৰিয পগ্ঘরণকঅসুচিভাৰেন সন্দন্তি, তস্মা তে এৰ ‘‘আসৰা’’তি ৰুচ্চন্তি. তত্থ হি পগ্ঘরণঅসুচিম্হি নিরুল়্হো আসৰ-সদ্দোতি. ধম্মতো যাৰ গোত্রভুন্তি ততো পরং মগ্গফলেসু অপ্পৰত্তনতো ৰুত্তং. এতে হি আরম্মণৰসেন ধম্মে গচ্ছন্তা ততো পরং ন গচ্ছন্তি. ননু ততো পরং ভৰঙ্গাদীনিপি গচ্ছন্তীতি চে? ন, তেসম্পি পুব্বে আলম্বিতেসু লোকিযধম্মেসু সাসৰভাৰেন অন্তোগধত্তা ততো পরতাভাৰতো. এত্থ চ গোত্রভুৰচনেন গোত্রভুৰোদানফলসমাপত্তিপুরেচারিকপরিকম্মানি ৰুত্তানীতি ৰেদিতব্বানি. পঠমমগ্গপুরেচারিকমেৰ ৰা গোত্রভু অৰধিনিদস্সনভাৰেন গহিতং, ততো পরং পন মগ্গফলসমানতায অঞ্ঞেসু মগ্গেসু মগ্গৰীথিযং সমাপত্তিৰীথিযং নিরোধানন্তরঞ্চ পৰত্তমানেসু ফলেসু নিব্বানে চ আসৰানং পৰত্তি নিৰারিতাতি ৰেদিতব্বং. সৰন্তীতি গচ্ছন্তি, আরম্মণকরণৰসেন পৰত্তন্তীতি অত্থো. অৰধিঅত্থো আ-কারো, অৰধি চ মরিযাদাভিৰিধিভেদতো দুৰিধো. তত্থ মরিযাদং কিরিযং বহি কত্ৰা পৰত্ততি যথা ‘‘আপাটলিপুত্তা ৰুট্ঠো দেৰো’’তি. অভিৰিধি পন কিরিযং ব্যাপেত্ৰা পৰত্ততি যথা ‘‘আভৰগ্গা ভগৰতো যসো পৰত্ততী’’তি. অভিৰিধিঅত্থো চাযং আ-কারো ইধ গহিতোতি ৰুত্তং ‘‘অন্তোকরণত্থো’’তি.

মদিরাদযোতি ¶ আদি-সদ্দেন সিন্ধৰকাদম্বরিকাপোতিকাদীনং সঙ্গহো দট্ঠব্বো. চিরপারিৰাসিযট্ঠো ৰিরপরিৰুত্থতা পুরাণভাৰো. অৰিজ্জা নাহোসীতিআদীতি এত্থ আদি-সদ্দেন ‘‘পুরিমা, ভিক্খৰে, কোটি ন পঞ্ঞাযতি ভৰতণ্হাযা’’তি (অ. নি. ১০.৬২) ইদং সুত্তং সঙ্গহিতং. অৰিজ্জাসৰভৰাসৰানং চিরপরিৰুত্থতায দস্সিতায তব্ভাৰভাৰিনো কামাসৰস্স চিরপরিৰুত্থতা দস্সিতাৰ হোতি. অঞ্ঞেসু চ যথাৰুত্তে ধম্মে ওকাসঞ্চ আরম্মণং কত্ৰা পৰত্তমানেসু মানাদীসু ৰিজ্জমানেসু অত্তত্তনিযাদিগ্গাহৰসেন অভিব্যাপনং মদকরণৰসেন আসৰসদিসতা চ এতেসংযেৰ, ন অঞ্ঞেসন্তি এতেস্ৰেৰ আসৰ-সদ্দো নিরুল়্হোতি দট্ঠব্বো. ন চেত্থ দিট্ঠাসৰো নাগতোতি গহেতব্বং ভৰতণ্হায ৰিয ভৰদিট্ঠিযাপি ভৰাসৰগ্গহণেনেৰ গহিতত্তা. আযতং অনাদিকালিকত্তা. পসৰন্তীতি ফলন্তি. ন হি তং কিঞ্চি সংসারদুক্খং ¶ অত্থি, যং আসৰেহি ৰিনা উপ্পজ্জেয্য. পুরিমানি চেত্থাতি এত্থ এতেসু চতূসু অত্থৰিতপ্পেসু পুরিমানি তীণি. যত্থাতি যেসু সুত্তাভিধম্মপদেসেসু. তত্থ যুজ্জন্তি কিলেসেসুযেৰ যথাৰুত্তস্স অত্থত্তযস্স সম্ভৰতো. পচ্ছিমং ‘‘আযতং ৰা সংসারদুক্খং সৰন্তী’’তি ৰুত্তনিব্বচনং. কম্মেপি যুজ্জতি দুক্খপ্পসৰনস্স কিলেসকম্মসাধারণত্তা.

দিট্ঠধম্মা ৰুচ্চন্তি পচ্চক্খভূতা খন্ধা, দিট্ঠধম্মে ভৰা দিট্ঠধম্মিকা. ৰিৰাদমূলভূতাতি ৰিৰাদস্স মূলকারণভূতা কোধূপনাহ-মক্খ-পল়াস-ইস্সা-মচ্ছরিয-মাযা-সাঠেয্য-থম্ভ-সারম্ভ-মানাতিমানা.

যেন দেৰূপপত্যস্সাতি যেন কম্মকিলেসপ্পকারেন আসৰেন দেৰেসু উপপত্তি নিব্বত্তি অস্স ময্হন্তি সম্বন্ধো. গন্ধব্বো ৰা ৰিহঙ্গমো আকাসচারী অস্সন্তি ৰিভত্তিং পরিণামেত্ৰা যোজেতব্বং. এত্থ চ যক্খগন্ধব্বতায ৰিনিমুত্তা সব্বা দেৰগতি দেৰগ্গহণেন গহিতা. অৰসেসা চ অকুসলা ধম্মাতি অকুসলকম্মতো অৰসেসা অকুসলা ধম্মা আসৰাতি আগতাতি সম্বন্ধো.

পটিঘাতাযাতি পটিসেধনায. পরূপৰা…পে… উপদ্দৰাতি ইদং যদি ভগৰা সিক্খাপদং ন পঞ্ঞপেয্য, ততো অসদ্ধম্মপ্পটিসেৰনঅদিন্নাদানপাণাতিপাতাদিহেতু যে উপ্পজ্জেয্যুং পরূপৰাদাদযো দিট্ঠধম্মিকা নানপ্পকারা অনত্থা, যে চ তন্নিমিত্তা এৰ নিরযাদীসু নিব্বত্তস্স পঞ্চৰিধবন্ধনকম্মকারণাদিৰসেন মহাদুক্খানুভৰাদিপ্পকারা অনত্থা, তে সন্ধায ৰুত্তং. তে পনেতেতি এতে কামরাগাদিকিলেস-তেভূমককম্মপরূপৰাদাদিউপদ্দৰপ্পকারা আসৰা. যত্থাতি ¶ যস্মিং ৰিনযাদিপাল়িপদেসে. যথাতি যেন দুৰিধাদিপ্পকারেন অঞ্ঞেসু চ সুত্তন্তেসু আগতাতি সম্বন্ধো.

নিরযং গমেন্তীতি নিরযগামিনিযা. ছক্কনিপাতে আহুনেয্যসুত্তে. তত্থ হি আসৰা ছধা আগতা আসৰ-সদ্দাভিধেয্যস্স অত্থস্স পভেদোপচারেন আসৰ-পদে পভেদোতি ৰুত্তো, কোট্ঠাসত্থো ৰা পদ-সদ্দোতি আসৰপদেতি আসৰপ্পকারে সদ্দকোট্ঠাসে অত্থকোট্ঠাসে ৰাতি অত্থো.

তথা ¶ হীতি তস্মা সংৰরণং পিদহনং পৰত্তিতুং অপ্পদানং, তেনেৰ কারণেনাতি অত্থো. সীলাদিসংৰরে অধিপ্পেতে পৰত্তিতুং অপ্পদানৰসেন থকনভাৰসামঞ্ঞতো দ্ৰারং সংৰরিত্ৰাতি গেহদ্ৰারসংৰরণম্পি উদাহটং. সীলসংৰরোতিআদি হেট্ঠা মূলপরিযাযৰণ্ণনায ৰুত্তম্পি ইমস্স সুত্তস্স অত্থৰণ্ণনং পরিপুণ্ণং কত্ৰা ৰত্তুকামো পুন ৰদতি. যুত্তং তাৰ সীলসতিঞাণানং সংৰরত্থো পাল়িযং তথা আগতত্তা, খন্তিৰীরিযানং পন কথন্তি আহ ‘‘তেসঞ্চা’’তিআদি. তস্সত্থো – যদিপি ‘‘খমো হোতি…পে… সীতস্স উপ্পন্নং কামৰিতক্কং নাধিৰাসেতী’’তিআদিনিদ্দেসে খন্তিৰীরিযানং সংৰরপরিযাযো নাগতো, উদ্দেসে পন সব্বাসৰসংৰরপরিযাযন্তি সংৰরপরিযাযেন গহিতত্তা অত্থেৰ তেসং সংৰরভাৰোতি.

পুব্বে সীলসতিঞাণানং পাঠন্তরেন সংৰরভাৰো দস্সিতোতি ইদানি তং ইমিনাপি সুত্তেন গহিতভাৰং দস্সেতুং ‘‘অপিচা’’তিআদি ৰুত্তং. খন্তিৰীরিযসংৰরা ৰুত্তাযেৰ ‘‘খমো হোতি সীতস্সা’’তিআদিনা (ম. নি. ১.১৪) পাল়িযা দস্সনৰসেন. ‘‘তঞ্চ অনাসনং, তঞ্চ অগোচর’’ন্তি অযং পনেত্থ সীলসংৰরোতি তঞ্চ ‘‘যথারূপে’’তিআদিনা ৰুত্তং অযুত্তং অনিযতৰত্থুকং রহো পটিচ্ছন্নাসনং, তঞ্চ যথাৰুত্তং অযুত্তং ৰেসিযাদিগোচরং, ‘‘পটিসঙ্খাযোনিসো পরিৰজ্জেতী’’তি আগতং যং পরিৰজ্জনং, অযং পন এত্থ এতস্মিং সুত্তে আগতো সীলসংৰরোতি অত্থো. অনাসনপরিৰজ্জনেন হি অনাচারপরিৰজ্জনং ৰুত্তং, অনাচারাগোচরপরিৰজ্জনং চারিত্তসীলতাযসীলসংৰরো. তথা হি ভগৰতা ‘‘পাতিমোক্খসংৰরসংৰুতো ৰিহরতী’’তি (ৰিভ. ৫০৮) সীলসংৰরৰিভজনে আচারগোচরসম্পত্তিং দস্সেন্তেন ‘‘অত্থি অনাচারো, অত্থি অগোচরো’’তিআদিনা (ৰিভ. ৫১৩, ৫১৪) অনাচারাগোচরা ৰিভজিত্ৰা দস্সিতা. ইদঞ্চ একদেসেন সমুদাযনিদস্সনং দট্ঠব্বং সমুদ্দপব্বতনিদস্সনং ৰিয.

সব্বত্থ পটিসঙ্খা ঞাণসংৰরোতি এত্থ ‘‘যোনিসোমনসিকারো, পটিসঙ্খা ঞাণসংৰরো’’তি ৰত্তব্বং ¶ . ন হি দস্সনপহাতব্বনিদ্দেসে পটিসঙ্খাগহণং অত্থি, ‘‘যোনিসো মনসি করোতী’’তি পন ৰুত্তং. যোনিসোমনসিকরণম্পি অত্থতো পটিসঙ্খা ঞাণসংৰরমেৰাতি এৰং পন অত্থে গয্হমানে যুত্তমেতং সিযা. কেচি পন ‘‘যত্থ যত্থ ‘ইধ পটিসঙ্খা যোনিসো’তি আগতং ¶ , তং সব্বং সন্ধায ‘সব্বত্থ পটিসঙ্খা ঞাণসংৰরো’তি ৰুত্ত’’ন্তি ৰদন্তি. তেসং মতেন ‘‘ইদং দুক্খন্তি যোনিসো মনসি করোতী’’তিআদিকস্স ঞাণসংৰরেন চ অসঙ্গহো সিযা, ‘‘দস্সনং পটিসেৰনা ভাৰনা চ ঞাণসংৰরো’’তি চ ৰচনং ৰিরুজ্ঝেয্য, তস্মা ৰুত্তনযেনেৰেত্থ অত্থো ৰেদিতব্বো. ‘‘সব্বত্থ পটিসঙ্খা ঞাণসংৰরো’’তি ইমিনা সত্তসুপি ঠানেসু যং ঞাণং, সো ঞাণসংৰরোতি পরিৰজ্জনাদিৰসেন ৰুত্তা সীলাদযো সীলসংৰরাদযোতি অযমত্থো দস্সিতো. এৰং সতি সংৰরানং সঙ্করো ৰিয হোতীতি তে অসঙ্করতো দস্সেতুং ‘‘অগ্গহিতগ্গহণেনা’’তি ৰুত্তং পরিৰজ্জনৰিসেসসংৰরাধিৰাসনৰিনোদনানং সীলসংৰরাদিভাৰেন গহিতত্তা, তথা অগ্গহিতানং গহণেনাতি অত্থো. তে পন অগ্গহিতে সরূপতো দস্সেন্তো ‘‘দস্সনং পটিসেৰনা ভাৰনা’’তি আহ.

এতেন সীলসংৰরাদিনা করণভূতেন, কারণভূতেন ৰা. ধম্মাতি কুসলাকুসলধম্মা. সীলসংৰরাদিনা হি সহজাতকোটিযা, উপনিস্সযকোটিযা ৰা পচ্চযভূতেন অনুপ্পন্না কুসলা ধম্মা উপ্পত্তিং গচ্ছন্তি উপ্পজ্জন্তি, তথা অনিরুদ্ধা অকুসলা ধম্মা নিরোধং গচ্ছন্তি নিরুজ্ঝন্তীতি অত্থো. পাল়িযং পন ‘‘অনুপ্পন্না চেৰ আসৰা ন উপ্পজ্জন্তি, উপ্পন্না চ আসৰা পহীযন্তী’’তি অকুসলধম্মানং অনুপ্পাদপহানানি এৰ ৰুত্তানি, ন কুসলধম্মানং উপ্পাদাদযোতি? নযিদমেৰং দট্ঠব্বং, ‘‘যোনিসো চ খো, ভিক্খৰে, মনসিকরোতো’’তিআদিনা কুসলধম্মানম্পি উপ্পত্তি পকাসিতাৰ আসৰসংৰরণস্স পধানভাৰেন গহিতত্তা. তথা হি পরিযোসানেপি ‘‘যে আসৰা দস্সনা পহাতব্বা, তে দস্সনা পহীনা হোন্তী’’তিআদিনা (ম. নি. ১.২৮) আসৰপ্পহানমেৰ পধানং কত্ৰা নিগমিতং.

১৫. জানতো পস্সতোতি এত্থ দস্সনম্পি পঞ্ঞাচক্খুনাৰ দস্সনং অধিপ্পেতং, ন মংসচক্খুনা দিব্বচক্খুনা ৰাতি আহ ‘‘দ্ৰেপি পদানি একত্থানী’’তি. এৰং সন্তেপীতি পদদ্ৰযস্স একত্থত্থেপি. ঞাণলক্খণন্তি ঞাণস্স সভাৰং, ৰিসযস্স যথাসভাৰাৰবোধনন্তি অত্থো. তেনাহ ‘‘জাননলক্খণঞ্হি ঞাণ’’ন্তি. ঞাণপ্পভাৰন্তি ঞাণানুভাৰং, ঞাণকিচ্চং ৰিসযোভাসনন্তি ¶ অত্থো. তেনেৰাহ ‘‘ঞাণেন ৰিৰটে ধম্মে’’তি. ‘‘জানতো পস্সতো’’তি চ জাননদস্সনমুখেন পুগ্গলাধিট্ঠানা দেসনা পৰত্তাতি আহ ‘‘ঞাণলক্খণং ঞাণপ্পভাৰং উপাদায পুগ্গলং নিদ্দিসতী’’তি. জানতো পস্সতোতি ‘‘যোনিসো চ মনসিকারং অযোনিসো চ মনসিকার’’ন্তি ¶ ৰক্খমানত্তা যোনিসোমনসিকারৰিসযজাননং, অযোনিসোমনসিকারৰিসযদস্সনং. তঞ্চ খো পন নেসং আসৰানং খযূপাযসভাৰস্স অধিপ্পেতত্তা উপ্পাদনানুপ্পাদনৰসেন ন আরম্মণমত্তেনাতি অযমত্থো যুত্তোতি আহ ‘‘যোনিসোমনসিকারং…পে… অযমেত্থ সারো’’তি.

‘‘জানতো’’তি ৰত্ৰা জাননঞ্চ অনুস্সৰাকারপটিৰিতক্কমত্তৰসেন ন ইধাধিপ্পেতং, অথ খো রূপাদি ৰিয চক্খুৰিঞ্ঞাণেন যোনিসোমনসিকারাযোনিসোমনসিকারে পচ্চক্খে কত্ৰা তেসং উপ্পাদৰসেন দস্সনন্তি ইমমত্থং ৰিভাৰেতুং ‘‘পস্সতো’’তি ৰুত্তন্তি এৰং ৰা এত্থ অত্থো দট্ঠব্বো. অঞ্ঞত্থাপি হি ‘‘এৰং জানতো এৰং পস্সতো (ইতিৰু. ১০২), জানং জানাতি পস্সং পস্সতি (ম. নি. ১.২০৩), এৰং জানন্তা এৰং পস্সন্তা (ম. নি. ১.৪০৭), অজানতং অপস্সত’’ন্তি চ আদীসু ঞাণকিচ্চস্স সামঞ্ঞৰিসেসদীপনৰসেনেতং পদদ্ৰযং আগতন্তি. কেচীতি অভযগিরিৰাসিসারসমাসাচরিযা. তে হি ‘‘সমাধিনা জানতো ৰিপস্সনায পস্সতো জানং জানাতি পস্সং পস্সতি, এৰং জাননা সমথো, পস্সনা ৰিপস্সনা’’তি চ আদিনা পপঞ্চেন্তি. তেতি পপঞ্চা. ইমস্মিং অত্থেতি ‘‘জানতো’’তিআদিনযপ্পৰত্তে ইমস্মিং সুত্তপদঅত্থে নিদ্ধারিযমানে. ন যুজ্জন্তি জাননদস্সনানং যোনিসোমনসিকারাযোনিসোমনসিকারৰিসযভাৰস্স পাল়িযং ৰুত্তত্তা.

আসৰপ্পহানং আসৰানং অচ্চন্তপ্পহানং. সো পন নেসং অনুপ্পাদো সব্বেন সব্বং খীণতা অভাৰো এৰাতি আহ ‘‘আসৰানং অচ্চন্তখযমসমুপ্পাদং খীণাকারং নত্থিভাৰ’’ন্তি. উজুমগ্গানুসারিনোতি কিলেসৰঙ্কস্স কাযৰঙ্কাদীনঞ্চ পহানেন উজুভূতে সৰিপস্সনে হেট্ঠিমমগ্গে অনুস্সরন্তস্স. তদেৰ হিস্স সিক্খনং. খযস্মিং পঠমং ঞাণং. ততো অঞ্ঞা অনন্তরাতি খযসঙ্খাতে অগ্গমগ্গে তপ্পরিযাপন্নমেৰ ঞাণং পঠমং উপ্পজ্জতি ¶ , তদনন্তরং পন অঞ্ঞং অরহত্তন্তি. যদিপি গাথাযং ‘‘খযস্মিং’’ইচ্চেৰ ৰুত্তং, সমুচ্ছেদৰসেন পন আসৰেহি খীণোতীতি মগ্গো খযোতি ৰুচ্চতীতি আহ ‘‘মগ্গো আসৰক্খযোতি ৰুত্তো’’তি. সমণোতি সমিতপাপো অধিপ্পেতো. সো পন খীণাসৰো হোতীতি ‘‘আসৰানং খযা’’তি ইমস্স ফলপরিযাযতা ৰুত্তা, নিপ্পরিযাযেন পন আসৰক্খযো মগ্গো, তেন পত্তব্বতো ফলং. এতেনেৰ নিব্বানস্সপি আসৰক্খযভাৰো ৰুত্তোতি ৰেদিতব্বো.

‘‘জানতো পস্সতো’’তি জানতো এৰ পস্সতো এৰাতি এৰমেত্থ নিযমো ইচ্ছিতো, ন অঞ্ঞথা ৰিসেসাভাৰতো অনিট্ঠসাধনতো চাতি তস্স নিযমস্স ফলং দস্সেতুং ‘‘নো অজানতো নো ¶ অপস্সতো’’তি ৰুত্তন্তি আহ ‘‘যো পন ন জানাতি ন পস্সতি, তস্স নেৰ ৰদামীতি অত্থো’’তি. ইমিনা দূরীকতাযোনিসোমনসিকারো ইধাধিপ্পেতো, যোনিসোমনসিকারো চ আসৰক্খযস্স একন্তিককারণন্তি দস্সেতি. এতেনাতি ‘‘নো অজানতো নো অপস্সতো’’তি ৰচনেন. তে পটিক্খিত্তাতি কে পন তেতি? ‘‘বালে চ পণ্ডিতে চ সন্ধাৰিত্ৰা সংসরিত্ৰা দুক্খস্সন্তং করিস্সন্তি (দী. নি. ১.১৬৮; ম. নি. ২.২২৮), অহেতূ অপচ্চযা সত্তা ৰিসুজ্ঝন্তী’’তি (দী. নি. ১.১৬৮; ম. নি. ২.২২৭) এৰমাদিৰাদা. তেসু হি কেচি অভিজাতিসঙ্কন্তিমত্তেন ভৰসঙ্কন্তিমত্তেন চ সংসারসুদ্ধিং পটিজানন্তি, অঞ্ঞে ইস্সরপজাপতিকালাদিৰসেন, তযিদং সব্বং ‘‘সংসারাদীহী’’তি এত্থেৰ সঙ্গহিতন্তি দট্ঠব্বং.

পুরিমেন ৰা পদদ্ৰযেনাতি ‘‘জানতো, পস্সতো’’তি ইমিনা পদদ্ৰযেন. উপাযো ৰুত্তো ‘‘আসৰক্খযস্সা’’তি অধিকারতো ৰিঞ্ঞাযতি. ইমিনাতি ‘‘নো অজানতো, নো অপস্সতো’’তি ইমিনা পদদ্ৰযেন. অনুপাযো এৰ হি আসৰানং খযস্স যদিদং যোনিসো চ অযোনিসো চ মনসিকারস্স অজাননং অদস্সনঞ্চ, তেন তথত্তায অপ্পটিপত্তিতো মিচ্ছাপটিপত্তিতো চ. ননু ‘‘পস্সতো’’তি ইমিনা অযোনিসোমনসিকারো যথা ন উপ্পজ্জতি, এৰং দস্সনে অধিপ্পেতে পুরিমেনেৰ অনুপাযপটিসেধো ৰুত্তো হোতীতি? ন হোতি, অযোনিসোমনসিকারানুপ্পাদনস্সপি উপাযভাৰতো সতিবলেন সংৰুতচক্খুন্দ্রিযাদিতা ৰিয সম্পজঞ্ঞবলেনেৰ নিচ্চাদিৰসেন অভূতজাননাভাৰো ¶ হোতীতি. তেনাহ ‘‘সঙ্খেপেন…পে… হোতী’’তি. তত্থ সঙ্খেপেনাতি সমাসেন, অন্ৰযতো ব্যতিরেকতো চ ৰিত্থারং অকত্ৰাতি অত্থো. ঞাণং…পে… দস্সিতং হোতি ‘‘জানতো’’তিআদিনা ঞাণস্সেৰ গহিতত্তা. যদি এৰং ‘‘স্ৰাযং সংৰরো’’তিআদি কথং নীযতীতি? ঞাণস্স পধানভাৰদস্সনত্থং এৰমযং দেসনা কতাতি নাযং দোসো, তথা অঞ্ঞত্থাপি ‘‘অরিযং ৰো ভিক্খৰে সম্মাসমাধিং দেসেস্সামি সউপনিসং সপরিক্খার’’ন্তি (ম. নি. ৩.১৩৬) ৰিত্থারো.

দব্বজাতিকোতি দব্বরূপো. সো হি দ্রব্যোতি ৰুচ্চতি ‘‘দ্রব্যং ৰিনস্সতি নাদ্রব্য’’ন্তিআদীসু. দব্বজাতিকো ৰা সারসভাৰো, সারুপ্পসীলাচারোতি অত্থো. যথাহ ‘‘ন খো দব্ব দব্বা এৰং নিব্বেঠেন্তী’’তি (পারা. ৩৮৪, ৩৯১; চূল়ৰ. ১৯৩). ৰত্তসীসে ঠত্ৰাতি ৰত্তং উত্তমঙ্গং, ধুরং ৰা কত্ৰা. যো হি পরিসুদ্ধাজীৰো কাতুং অজানন্তানং সব্রহ্মচারীনং, অত্তনো ৰা ৰাতাতপাদিপটিবাহনত্থং ছত্তাদীনি করোতি, সো ৰত্তসীসে ঠত্ৰা করোতি নাম. পদট্ঠানং ন হোতীতি ন ৰত্তব্বা নাথকরণধম্মভাৰেন উপনিস্সযভাৰতো. ৰুত্তঞ্হি ¶ ‘‘যানি তানি সব্রহ্মচারীনং উচ্চাৰচানি কিচ্চকরণীযানি, তত্থ দক্খো হোতী’’তিআদি (ম. নি. ১.৪৯৭).

উপাযমনসিকারোতি কুসলধম্মপ্পৰত্তিযা কারণভূতো মনসিকারো. পথমনসিকারোতি তস্সা এৰ মগ্গভূতো মনসিকারো. অনিচ্চাদীসু অনিচ্চন্তিআদিনাতি অনিচ্চদুক্খঅসুভঅনত্তসভাৰেসু ধম্মেসু ‘‘অনিচ্চং দুক্খং অসুভং অনত্তা’’তিআদিনা এৰ নযেন, অৰিপরীতসভাৰেনাতি অত্থো. সচ্চানুলোমিকেন ৰাতি সচ্চাভিসমযস্স অনুলোমৰসেন. চিত্তস্স আৰট্টনাতিআদিনা আৰট্টনায পচ্চযভূতা ততো পুরিমুপ্পন্না মনোদ্ৰারিকা কুসলজৰনপ্পৰত্তি ফলৰোহারেন তথা ৰুত্তা. তস্সা হি ৰসেন সা কুসলুপ্পত্তিযা উপনিস্সযো হোতি. আৰজ্জনা হি ভৰঙ্গচিত্তং আৰট্টযতীতি আৰট্টনা. অনু অনু আৰট্টেতীতি অন্ৰাৰট্টনা. ভৰঙ্গারম্মণতো অঞ্ঞং আভুজতীতি আভোগো. সমন্নাহরতীতি সমন্নাহারো. তদেৰারম্মণং অত্তানং অনুবন্ধিত্ৰা উপ্পজ্জমানং মনসি করোতি ঠপেতীতি মনসিকারো. অযং ৰুচ্চতীতি অযং উপাযপথমনসিকারলক্খণো যোনিসোমনসিকারো নাম ৰুচ্চতি, যস্স ৰসেন পুগ্গলো দুক্খাদীনি সচ্চানি আৰজ্জিতুং সক্কোতি ¶ . অযোনিসোমনসিকারে সচ্চপটিকূলেনাতি সচ্চাভিসমযস্স অননুলোমৰসেন. সেসং যোনিসোমনসিকারে ৰুত্তৰিপরিযাযেন ৰেদিতব্বং.

যুত্তিন্তি উপপত্তিসাধনযুত্তিং, হেতুন্তি অত্থো. তেনেৰাহ ‘‘যস্মা’’তিআদি. এত্থাতি ‘‘অযোনিসো ভিক্খৰে…পে… পহীযন্তী’’তি এতস্মিং পাঠে. তত্থাতি ৰাক্যোপঞ্ঞাসনং. কস্মা পনেত্থ অযমুদ্দেসনিদ্দেসো পরিৰত্তোতি চোদনং সন্ধাযাহ ‘‘যোনিসো’’তিআদি. তত্থ মনসিকারপদং দ্ৰিন্নং সাধারণন্তি অধিপ্পাযেন ‘‘যোনিসো অযোনিসোতি ইমেহি তাৰ দ্ৰীহি পদেহী’’তি ৰুত্তং. যোনিসোতি হি যোনিসোমনসিকারো, অযোনিসোতি চ অযোনিসোমনসিকারো তত্থ অনুৰত্তনতো ৰক্খমানত্তা চ. সতিপি অনত্থুপ্পত্তিসামঞ্ঞে ভৰাদীসু পুগ্গলস্স বহুলিসামঞ্ঞং দস্সেত্ৰা তং পরিৰত্তিত্ৰা ৰিসেসদস্সনত্তং নাৰাদি উপমাত্তযগ্গহণং দট্ঠব্বং. চক্কযন্তং আহটঘটীযন্তন্তি ৰদন্তি.

অনুপ্পন্নাতি অনিব্বত্তা. আরম্মণৰিসেসৰসেন তস্স অনুপ্পত্তি ৰেদিতব্বা, ন রূপারম্মণাদিআরম্মণসামঞ্ঞেন, নাপি আসৰৰসেন. তেনাহ ‘‘অননুভূতপুব্বং আরম্মণং…পে… অঞ্ঞথা হি অনমতগ্গে সংসারে অনুপ্পন্না নাম আসৰা ন সন্তী’’তি. ৰত্থুন্তি সৰিঞ্ঞাণকাৰিঞ্ঞাণকপ্পভেদং আসৰুপ্পত্তিকারণং. আরম্মণং আরম্মণপচ্চযভূতরূপাদীনি ¶ . ইদানি আসৰৰসেনপি অনুপ্পন্নপরিযাযো লব্ভতীতি দস্সেতুং ‘‘অনুভূতপুব্বেপী’’তিআদি ৰুত্তং. পকতিসুদ্ধিযাতি পুব্বচরিযতো কিলেসদূরীভাৰসিদ্ধায সুদ্ধিপকতিতায. পাল়িযা উদ্দিসনং উদ্দেসো, অত্থকথনং পরিপুচ্ছা. অজ্ঝযনং পরিযত্তি, চীৰরসিব্বাদি নৰকম্মং, সমথৰিপস্সনানুযোগো যোনিসোমনসিকারো. তাদিসেনাতি যাদিসেন ‘‘মনুঞ্ঞৰত্থূ’’তিমনসিকারাদিনা কামাসৰাদযো সম্ভৰেয্যুং, তাদিসেন. আসৰানং ৰড্ঢি নাম পরিযুট্ঠানতিব্বতায ৰেদিতব্বা, সা চ অভিণ্হুপ্পত্তিযা বহুলীকারতোতি তে লদ্ধাসেৰনা বহুলভাৰং পত্তা মদ্দন্তা ফরন্তা ছাদেন্তা অন্ধাকারং করোন্তা অপরাপরং উপ্পজ্জমানা একসন্তাননযেন ‘‘উপ্পন্না পৰড্ঢন্তী’’তি ৰুচ্চন্তি. তেন ৰুত্তং ‘‘পুনপ্পুনং উপ্পজ্জমানা উপ্পন্না পৰড্ঢন্তীতি ৰুচ্চন্তী’’তি. ইতো অঞ্ঞথাতি ইতো ¶ অপরাপরুপ্পন্নানং একত্তগ্গহণতো অঞ্ঞথা ৰড্ঢি নাম নত্থি খণিকভাৰতো.

সো চ জানাতীতি ধম্মুদ্ধচ্চৰিগ্গহাভাৰমাহ. কারকস্সেৰাতি যুত্তযোগস্সেৰ. যস্স পনাতিআদিনা অনুদ্দেসিকং কত্ৰা ৰুত্তমত্থং পুরাতনস্স পুরিসাতিসযস্স পটিপত্তিদস্সনেন পাকটতরং কাতুং ‘‘মণ্ডলারামৰাসীমহাতিস্সভূতত্থেরস্স ৰিযা’’তিআদি ৰুত্তং. তঞ্হি সব্রহ্মচারীনং আযতিং তথাপটিপত্তিকারণং হোতি, যতো এদিসং ৰত্থু ৰুচ্চতি. তস্মিং যেৰাতি মণ্ডলারামেযেৰ. আচরিযং আপুচ্ছিত্ৰাতি অত্তনো উদ্দেসাচরিযং কম্মট্ঠানগ্গহণত্থং গন্তুং আপুচ্ছিত্ৰা. আচরিযং ৰন্দিত্ৰাতি কম্মট্ঠানদাযকং মহারক্খিতত্থেরং ৰন্দিত্ৰা. উদ্দেসমগ্গন্তি যথাআরদ্ধং উদ্দেসপবন্ধং. তদা কির মুখপাঠেনেৰ বহূ একজ্ঝং উদ্দিসাপেত্ৰা মনোসজ্ঝাযৰসেন ধম্মং সজ্ঝাযন্তি. তত্থাযং থেরো পঞ্ঞৰন্ততায উদ্দেসং গণ্হন্তানং ভিক্খূনং ধোরয্হো, সো ‘‘ইদানাহং অনাগামী, কিং ময্হং উদ্দেসেনা’’তি সঙ্কোচং অনাপজ্জিত্ৰা দুতিযদিৰসে উদ্দেসকালে আচরিযং উপসঙ্কমি. ‘‘উপ্পন্না পহীযন্তী’’তি এত্থ উপ্পন্নসদিসা ‘‘উপ্পন্না’’তি ৰুত্তা, ন পচ্চুপ্পন্না. ন হি পচ্চুপ্পন্নেসু আসৰেসু মগ্গেন পহানং সম্ভৰতীতি আহ ‘‘যে পন…পে… নত্থী’’তি. ৰত্তমানুপ্পন্না খণত্তযসমঙ্গিনো. তেসং পটিপত্তিযা পহানং নত্থি উপ্পজ্জনারহানং পচ্চযঘাতেন অনুপ্পাদনমেৰ তায পহানন্তি.

১৬. যদি এৰং দুতিযপদং কিমত্থিযন্তি? পদদ্ৰযগ্গহণং আসৰানং উপ্পন্নানুপ্পন্নভাৰসম্ভৰদস্সনত্থঞ্চেৰ পহাযকৰিভাগেন পহাতব্বৰিভাগদস্সনত্থঞ্চ. তেনাহ ‘‘ইদমেৰ পদং গহেত্ৰা’’তি. অঞ্ঞম্পীতি ঞাণতো অঞ্ঞম্পি সতিসংৰরাদিং. দস্সনাতি ইদং হেতুম্হি নিস্সক্কৰচনন্তি দস্সনেনাতি হেতুম্হি করণৰচনেন তদত্থং ৰিৰরতি. এস নযোতি তমেৰত্থং অতিদিসতি. দস্সনেনাতি সোতাপত্তিমগ্গেন. সো হি পঠমং নিব্বানদস্সনতো ‘‘দস্সন’’ন্তি ¶ ৰুচ্চতি. যদিপি তং গোত্রভু পঠমতরং পস্সতি, দিস্ৰা পন কত্তব্বকিচ্চস্স কিলেসপ্পহানস্স অকরণতো ন তং দস্সনন্তি ৰুচ্চতি. আৰজ্জনট্ঠানিযঞ্হি তং ঞাণং মগ্গস্স, নিব্বানারম্মণত্তসামঞ্ঞেন চেতং ৰুত্তং, ন নিব্বানপটিৰিজ্ঝনেন, তস্মা ধম্মচক্খু পুনপ্পুনং নিব্বত্তনেন ভাৰনং অপ্পত্তং দস্সনং নাম, ধম্মচক্খুঞ্চ পরিঞ্ঞাদিকিচ্চকরণৰসেন চতুসচ্চধম্মদস্সনং তদভিসমযোতি নুত্থেত্থ গোত্রভুস্স দস্সনভাৰপ্পত্তি ¶ . অযঞ্চ ৰিচারো পরতো অট্ঠকথাযমেৰ (ম. নি. অট্ঠ. ১.২২) আগমিস্সতি. সব্বত্থাতি ‘‘সংৰরা পহাতব্বা’’তিআদীসু. সংৰরাতি সংৰরেন, ‘‘সংৰরো’’তি চেত্থ সতিসংৰরো ৰেদিতব্বো. পটিসেৰতি এতেনাতি পটিসেৰনং, পচ্চযেসু ইদমত্থিকতাঞাণং. অধিৰাসেতি খমতি এতাযাতি অধিৰাসনা, সীতাদীনং খমনাকারেন পৰত্তো অদোসো, তপ্পধানা ৰা চত্তারো কুসলক্খন্ধা. পরিৰজ্জেতি এতেনাতি পরিৰজ্জনং, ৰাল়মিগাদীনং পরিহরণৰসেন পৰত্তা চেতনা, তথাপৰত্তা ৰা চত্তারো কুসলক্খন্ধা. কামৰিতক্কাদিকে ৰিনোদেতি ৰিতুদতি এতেনাতি ৰিনোদনং, কুসলৰীরিযং. পঠমমগ্গেন দিট্ঠে চতুসচ্চধম্মে ভাৰনাৰসেন উপ্পজ্জনতো ভাৰনা, সেসমগ্গত্তযং. ন হি তং অদিট্ঠপুব্বং কিঞ্চি পস্সতি, এৰং দস্সনাদীনং ৰচনত্থো ৰেদিতব্বো.

দস্সনাপহাতব্বআসৰৰণ্ণনা

১৭. কুসলাকুসলধম্মেহি আলম্বিযমানাপি আরম্মণধম্মা আৰজ্জনমুখেনেৰ তব্ভাৰং গচ্ছন্তীতি দস্সেন্তো ‘‘মনসিকরণীযে’’তি পদস্স ‘‘আৰজ্জিতব্বে’’তি অত্থমাহ. হিতসুখাৰহভাৰেন মনসিকরণং অরহন্তীতি মনসিকরণীযা, তপ্পটিপক্খতো অমনসিকরণীযাতি আহ ‘‘অমনসিকরণীযেতি তব্বিপরীতে’’তি. সেসপদেসূতি ‘‘মনসিকরণীযে ধম্মে অপ্পজানন্তো’’তিআদীসু. যস্মা কুসলধম্মেসুপি সুভসুখনিচ্চাদিৰসেন মনসিকারো অস্সাদনাদিহেতুতায সাৰজ্জো অহিতদুক্খাৰহো অকুসলধম্মেসুপি অনিচ্চাদিৰসেন মনসিকারো নিব্বিদাদিহেতুতায অনৰজ্জো হিতসুখাৰহো, তস্মা ‘‘ধম্মতো নিযমো নত্থী’’তি ৰত্ৰা ‘‘আকারতো পন অত্থী’’তি আহ.

ৰা-সদ্দো যেভুয্যেন ‘‘মমং ৰা হি ভিক্খৰে (দী. নি. ১.৫, ৬), দেৰো ৰা ভৰিস্সামি দেৰঞ্ঞতরো ৰা’’তিআদীসু (ম. নি. ১.১৮৬; ম. নি. ২.৭৯, ৮০) ৰিকপ্পত্থো দিট্ঠো, ন সমুচ্চযত্থোতি তত্থ সমুচ্চযত্থে পযোগং দস্সেতুং ‘‘যথা’’তিআদি ৰুত্তং. এৰঞ্চ কত্ৰা সমুচ্চযত্থদীপকং পনেতং সুত্তপদং সমুদাহটং.

কামাসৰোতি ¶ পঞ্চকামগুণসঙ্খাতে কামে আসৰো কামাসৰো. তেনাহ ‘‘পঞ্চকামগুণিকো রাগো’’তি. ভৰাসৰং পন ঠপেত্ৰা সব্বো ¶ লোভো কামাসৰোতি যুত্তং সিযা. রূপারূপভৰেতি কম্মুপপত্তিভেদতো দুৰিধেপি রূপারূপভৰে ছন্দরাগো. ঝাননিকন্তীতি ঝানস্সাদো. ‘‘সুন্দরমিদং ঠানং নিচ্চং ধুৰ’’ন্তিআদিনা অস্সাদেন্তস্স উপ্পজ্জমানো সস্সতুচ্ছেদদিট্ঠিসহগতো রাগো ভৰে আসৰোতি ভৰাসৰো. এৰন্তি সব্বদিট্ঠীনং সস্সতুচ্ছেদদিট্ঠিসঙ্গহতো ভৰাসৰেনেৰ দিট্ঠাসৰো গহিতো তংসহগতরাগতাযাতি অধিপ্পাযো. অপরে পন ‘‘দিট্ঠাসৰো অৰিজ্জাসৰেন চ সঙ্গহিতো’’তি ৰদন্তি. এত্থ চ ‘‘ভৰাসৰো চতূসু দিট্ঠিগতৰিপ্পযুত্তলোভসহগতচিত্তুপ্পাদেসু উপ্পজ্জতী’’তি (ধ. স. ১৪৬৫) ৰচনতো দিট্ঠিসম্পযুত্তরাগস্স ভৰাসৰভাৰো ৰিচারেতব্বো, অথ ‘‘কামসহগতা সঞ্ঞামনসিকারা’’তিআদীসু (সং. নি. ৪.৩৩২) ৰিয আরম্মণকরণত্থো সহগতত্থো, এৰং সতি ভৰাসৰে দিট্ঠাসৰস্স সমোধানগমনং কতং ন সিযা. ন হি তম্পযোগতব্ভাৰাদিকে অসতি তংসঙ্গহো যুত্তো, তস্মা যথাৰুত্তপাল়িং অনুসারেন দিট্ঠিগতসম্পযুত্তলোভোপি কামাসৰোতি যুত্তং সিযা. দিট্ঠধম্মিকসম্পরাযিকদুক্খানঞ্হি কারণভূতা কামাসৰাদযোপি দ্ৰিধা ৰুত্তা.

অভিধম্মে (ধ. স. ১১০৩) চ কামাসৰনিদ্দেসে ‘‘কামেসূতি কামরাগদিট্ঠিরাগাদীনং আরম্মণভূতেসু তেভূমকেসু ৰত্থুকামেসূ’’তি অত্থো সম্ভৰতি. তত্থ হি উপ্পজ্জমানা সা তণ্হা সব্বাপি ন কামচ্ছন্দাদিনামং ন লভতীতি. যদি পন লোভো কামাসৰভৰাসৰৰিনিমুত্তোপি সিযা, সো যদা দিট্ঠিগতৰিপ্পযুত্তেসু চিত্তেসু উপ্পজ্জতি, তদা তেন সম্পযুত্তো অৰিজ্জাসৰো আসৰৰিপ্পযুত্তোতি দোমনস্সৰিচিকিচ্ছুদ্ধচ্চসম্পযুত্তস্স ৰিয তস্সপি আসৰৰিপ্পযুত্ততা ৰত্তব্বা সিযা ‘‘চতূসু দিট্ঠিগতৰিপ্পযুত্তলোভসহগতচিত্তুপ্পাদেসু উপ্পন্নো মোহো সিযা আসৰসম্পযুত্তো, সিযা আসৰৰিপ্পযুত্তো’’তি. ‘‘কামাসৰো অট্ঠসু লোভসহগতচিত্তুপ্পাদেসু উপ্পজ্জতী’তি (ধ. স. ১৪৬৫), ‘‘কামাসৰং পটিচ্চ দিট্ঠাসৰো অৰিজ্জাসৰো’’তি (পট্ঠা. ৩.৩.১০৯) চ ৰচনতো দিট্ঠিসহগতরাগো কামাসৰো ন হোতীতি ন সক্কা ৰত্তুং. কিঞ্চ অভিজ্ঝাকামরাগানং ৰিসেসো আসৰদ্ৰযএকাসৰভাৰো সিযা, ন অভিজ্ঝায চ নোআসৰভাৰোতি নোআসৰলোভস্স সব্ভাৰো ৰিচারেতব্বো. ন হি অত্থি অভিধম্মে ‘‘আসৰো চ ¶ নোআসৰো চ ধম্মা আসৰস্স ধম্মস্স আসৰস্স চ নোআসৰস্স চ ধম্মস্স হেতুপচ্চযো’’তি (পট্ঠা. ৩.৩.১৬-১৭) সত্তমো নৰমো চ পঞ্হো. গণনাযঞ্চ ‘‘হেতুযা সত্তা’’তি (পট্ঠা. ৩.৩.৪০) ৰুত্তং, নো ‘‘নৰা’’তি. দিট্ঠিসম্পযুত্তে পন লোভে নোআসৰে ৰিজ্জমানে সত্তমনৰমাপি পঞ্হা ৰিস্সজ্জনং লভেয্যুং, গণনায চ ‘‘হেতুযা নৰা’’তি ৰত্তব্বং সিযা, ন পন ৰুত্তং. দিট্ঠিৰিপ্পযুত্তে চ লোভে নোআসৰে ৰিজ্জমানে ৰত্তব্বং ¶ ৰুত্তমেৰ. যস্মা পন সুত্তন্তদেসনা নাম পরিযাযকথা, ন অভিধম্মদেসনা ৰিয নিপ্পরিযাযকথা, তস্মা বলৰকামরাগস্সেৰ কামাসৰং দস্সেতুং ‘‘কামাসৰোতি পঞ্চকামগুণিকো রাগো’’তি ৰুত্তং, তথা ভৰাভিনন্দনন্তি.

সামঞ্ঞেন ভৰাসৰো দিট্ঠাসৰং অন্তোগধং কত্ৰা ইধ তযো এৰ আসৰা ৰুত্তাতি তস্স তদন্তোগধতং দস্সেতুং ‘‘এৰং দিট্ঠাসৰো’’তিআদি ৰুত্তং. তথা হি ৰক্খতি ভৰাসৰস্স অনিমিত্তৰিমোক্খপটিপক্খতং. চতূসু সচ্চেসু অঞ্ঞাণন্তি ইদং সুত্তন্তনযং নিস্সায ৰুত্তং. সুত্তন্তসংৰণ্ণনা হেসাতি, তদন্তোগধত্তা ৰা পুব্বন্তাদীনং. যথা অত্থতো কামাসৰাদযো ৰৰত্থাপিতা, তথা নেসং উপ্পাদৰড্ঢিযো দস্সেন্তো ‘‘কামগুণে’’তিআদিমাহ. অস্সাদতো মনসিকরোতোতি ‘‘সুভসুখা’’তিআদিনা অস্সাদনৰসেন মনসি করোন্তস্স. চতুৰিপল্লাসপদট্ঠানভাৰেনাতি সুভসঞ্ঞাদীনং ৰত্থুভাৰেন. ৰুত্তনযপচ্চনীকতোতি ‘‘কামা নামেতে অনিচ্চা দুক্খা ৰিপরিণামধম্মা’’তিআদিনা কামগুণেসু আদীনৰদস্সনপুব্বকনেক্খম্মপটিপত্তিযা ছন্দরাগং ৰিক্খম্ভযতো সমুচ্ছিন্দন্তস্স চ অনুপ্পন্নো চ কামাসৰো ন উপ্পজ্জতি, উপ্পন্নো চ পহীযতি. তথা মহগ্গতধম্মেসু চেৰ সকলতেভূমকধম্মেসু চ আদীনৰদস্সনপুব্বকঅনিচ্চাদিমনসিকারৰসেন নিস্সরণপটিপত্তিযা অনুপ্পন্না চ ভৰাসৰঅৰিজ্জাসৰা ন উপ্পজ্জন্তি, উপ্পন্না চ পহীযন্তীতি এৰং তণ্হাপক্খে ৰুত্তস্স নযস্স পটিপক্খতো সুক্কপক্খে ৰিত্থারো ৰেদিতব্বো.

তযো এৰাতি অভিধম্মে ৰিয ‘‘চত্তারো’’তি অৰত্ৰা কস্মা তযো এৰ আসৰা ইধ ইমিস্সং দস্সনাপহাতব্বকথাযং ৰুত্তা? তত্থ কামাসৰস্স তণ্হাপণিধিভাৰতো অপ্পণিহিতৰিমোক্খপটিপক্খতা ৰেদিতব্বা. ভৰেসু নিচ্চগ্গাহানুসারতো যেভুয্যতো ভৰরাগসম্পত্তিতো ভৰাসৰস্স অনিমিত্তৰিমোক্খপটিপক্খতা, ভৰদিট্ঠিযা পন ¶ ভৰাসৰভাৰে ৰত্তব্বমেৰ নত্থি, অনত্তসঞ্ঞায ঞাণানুভাৰসিদ্ধিতো অৰিজ্জাসৰস্স সুঞ্ঞতৰিমোক্খপটিপক্খতা. এত্থাতি এতিস্সং আসৰকথাযং. ৰণ্ণিতন্তি কথিতং. অভেদতোতি সামঞ্ঞতো.

১৮. কামাসৰাদীনন্তি মনুস্সলোকদেৰলোকগমনীযানং কামাসৰাদীনং. নিরযাদিগমনীযা পন কামাসৰাদযো ‘‘দস্সনা পহাতব্বে আসৰে’’তি এত্থেৰ সমারুল়্হা. অথ ৰা যদগ্গেন সো পুগ্গলোদস্সনাপহাতব্বানং আসৰানং অধিট্ঠানং, তদগ্গেন কামাসৰাদীনম্পি অধিট্ঠানং. ন হি সমঞ্ঞাভেদেন ৰত্থুভেদো অত্থীতি দস্সেতুং ‘‘এত্তাৰতা’’তিআদি ¶ ৰুত্তং. তেনেৰাহ ‘‘সামঞ্ঞতো ৰুত্তান’’ন্তি. কস্মা পনেত্থ দস্সনাপহাতব্বেসু আসৰেসু দস্সেতব্বেসু ‘‘অহোসিং নু খো অহ’’ন্তিআদিনা ৰিচিকিচ্ছা দস্সিতাতি আহ ‘‘ৰিচিকিচ্ছাসীসেন চেত্থা’’তিআদি. এৰন্তি যথা সোল়সৰত্থুকা ৰিচিকিচ্ছা উপ্পজ্জতি, এৰং অযোনিসোমনসিকারোতি.

ৰিজ্জমানতং অৰিজ্জমানতঞ্চাতি (সং. নি. টী. ২.২.২০) সস্সতাসঙ্কং নিস্সায ‘‘অহোসিং নু খো অহমতীতমদ্ধান’’ন্তি অতীতে অত্তনো ৰিজ্জমানতং, অধিচ্চসমুপ্পত্তিআসঙ্কং নিস্সায ‘‘যতো পভুতি অহং, ততো পুব্বে ন নু খো অহোসি’’ন্তি অতীতে অত্তনো অৰিজ্জমানতঞ্চ কঙ্খতি. কস্মা? ৰিচিকিচ্ছায আকারদ্ৰযাৰলম্বনতো. তস্সা পন অতীতৰত্থুতায গহিতত্তা সস্সতাধিচ্চসমুপ্পত্তিআকারনিস্সযতা দস্সিতা. এৰং আসপ্পনপরিসপ্পনাপৰত্তিকং কত্থচিপি অপ্পটিৰত্তিহেতুভূতং ৰিচিকিচ্ছং কস্মা উপ্পাদেতীতি ন চোদেতব্বমেতন্তি দস্সেন্তো আহ ‘‘কিং কারণন্তি ন ৰত্তব্ব’’ন্তি. স্ৰেৰ পুথুজ্জনভাৰো এৰ. যদি এৰং তস্স অযোনিসোমনসিকারেনেৰ ভৰিতব্বন্তি আপন্নন্তি আহ ‘‘ননু চ পুথুজ্জনোপি যোনিসো মনসি করোতী’’তি. তত্থাতি যোনিসোমনসিকরণে.

জাতিলিঙ্গূপপত্তিযোতি খত্তিযব্রাহ্মণাদিজাতিং গহট্ঠপব্বজিতাদিলিঙ্গং দেৰমনুস্সাদিউপপত্তিঞ্চ. নিস্সাযাতি উপাদায.

তস্মিং কালে সত্তানং মজ্ঝিমপ্পমাণং, তেন যুত্তো পমাণিকো, তদভাৰতো, ততো অতীতভাৰতো ৰা অপ্পমাণিকো ৰেদিতব্বো. কেচীতি সারসমাসাচরিযা. তে হি ‘‘কথং নু খোতি ইস্সরেন ¶ ৰা ব্রহ্মুনা ৰা পুব্বকতেন ৰা অহেতুতো ৰা নিব্বত্তোতি চিন্তেতী’’তি আহু. তেন ৰুত্তং ‘‘হেতুতো কঙ্খতীতি ৰদন্তী’’তি. অহেতুতো নিব্বত্তিকঙ্খাপি হি হেতুপরামসনমেৰাতি.

পরম্পরন্তি পুব্বাপরপ্পৰত্তিং. অদ্ধানন্তি কালাধিৰচনং, তঞ্চ ভুম্মত্থে উপযোগৰচনং দট্ঠব্বং.

ৰিজ্জমানতং অৰিজ্জমানতঞ্চাতি সস্সতাসঙ্কং নিস্সায ‘‘ভৰিস্সামি নু খো অহমনাগতমদ্ধান’’ন্তি অনাগতে অত্তনো ৰিজ্জমানতং, উচ্ছেদাসঙ্কং নিস্সায ‘‘যস্মিঞ্চ অত্তভাৰে অহং, ততো পরং ন নু খো ভৰিস্সামী’’তি অনাগতে অত্তনো অৰিজ্জমানতঞ্চ কঙ্খতীতি হেট্ঠা ৰুত্তনযেন যোজেতব্বং.

পচ্চুপ্পন্নমদ্ধানন্তি ¶ অদ্ধাপচ্চুপ্পন্নস্স ইধাধিপ্পেতত্তা ‘‘পটিসন্ধিং আদিং কত্ৰা’’তিআদি ৰুত্তং. ‘‘ইদং কথং ইদং কথ’’ন্তি পৰত্তনতো কথংকথা, ৰিচিকিচ্ছা, সা অস্স অত্থীতি কথংকথীতি আহ ‘‘ৰিচিকিচ্ছো হোতী’’তি. কা এত্থ চিন্তা, উম্মত্তকো ৰিয হি বালপুথুজ্জনোতি পটিকচ্চেৰ ৰুত্তন্তি অধিপ্পাযো. তং মহামাতায পুত্তং. মুণ্ডেসুন্তি মুণ্ডেন অনিচ্ছন্তং জাগরণকালে ন সক্কাতি সুত্তং মুণ্ডেসুং কুলধম্মতায যথা তং একচ্চে কুলতাপসা, রাজভযেনাতি চ ৰদন্তি.

সীতিভূতন্তি ইদং মধুরকভাৰপ্পত্তিযা কারণৰচনং. ‘‘সেতিভূত’’ন্তিপি পাঠো, উদকে চিরট্ঠানেন সেতভাৰং পত্তন্তি অত্থো.

অত্তনো খত্তিযভাৰং কঙ্খতি কণ্ণো ৰিয সূতপুত্তসঞ্ঞী. জাতিযা ৰিভাৰিযমানায ‘‘অহ’’ন্তি তস্স অত্তনো পরামসনং সন্ধাযাহ ‘‘এৰঞ্হি সিযা কঙ্খা’’তি. মনুস্সাপি চ রাজানো ৰিযাতি মনুস্সাপি কেচি একচ্চে রাজানো ৰিযাতি অধিপ্পাযো.

ৰুত্তনযমেৰ ‘‘সণ্ঠানাকারং নিস্সাযা’’তিআদিনা. এত্থাতি ‘‘কথং নু খোস্মী’’তি পদে. অব্ভন্তরে জীৰোতি পরপরিকপ্পিতং অন্তরত্তানং ৰদতি. সোল়সংসাদীনন্তি আদি-সদ্দেন সরীর-পরিমাণ-পরিমণ্ডল-অঙ্গুট্ঠযৰপরমাণু-পরিমাণতাদিকে সঙ্গণ্হাতি.

‘‘সত্তপঞ্ঞত্তি ¶ জীৰৰিসযা’’তি দিট্ঠিগতিকানং মতিমত্তং, পরমত্থতো পন সা অত্তভাৰৰিসযাৰাতি আহ ‘‘অত্তভাৰস্স আগতিগতিট্ঠান’’ন্তি, যতাযং আগতো, যত্থ চ গমিস্সতি, তং ঠানন্তি অত্থো.

১৯. যথা অযং ৰিচিকিচ্ছা উপ্পজ্জতীতি অযং ৰুত্তপ্পভেদা ৰিচিকিচ্ছা যথা উপ্পজ্জতি, এৰং অযোনিসো মনসিকরোতো. এতেন ৰিচিকিচ্ছায অত্তাভিনিৰেসসন্নিস্সযতমাহ. যথা হি ৰিচিকিচ্ছা অত্তাভিনিৰেসং নিস্সায পৰত্ততি, যতো সা সস্সতাধিচ্চসমুপ্পত্তিসস্সতুচ্ছেদাকারাৰলম্বিনী ৰুত্তা, এৰং অত্তাভিনিৰেসোপি তং নিস্সায পৰত্ততি ‘‘অহোসিং নু খো অহ’’ন্তিআদিনা অন্তোগধাহংকারস্স কথংকথিভাৰস্স অত্তগ্গাহসন্নিস্সযভাৰতো. তেনেৰাহ ‘‘সৰিচিকিচ্ছস্স অযোনিসোমনসিকারস্স থামগতত্তা’’তি. ৰিকপ্পত্থোতি অনিযমত্থো. ‘‘অঞ্ঞতরা দিট্ঠি উপ্পজ্জতী’’তি হি ৰুত্তং. সুট্ঠু দল়্হভাৰেনাতি অভিনিৰেসস্স অতিৰিয থামগতভাৰেন. তত্থ তত্থাতি তস্মিং ভৰে. পচ্চুপ্পন্নমেৰাতি অৰধারণেন ¶ অনাগতে অত্থিভাৰং নিৰত্তেতি, ন অতীতে তত্থপি সতি অত্থিতায উচ্ছেদগ্গাহস্স সব্ভাৰতো. অতীতে এৰ নত্থি, ন অনাগতেপীতি অধিপ্পাযো.

সঞ্ঞাক্খন্ধসীসেনাতি সঞ্ঞাক্খন্ধপমুখেন, সঞ্ঞাক্খন্ধং পমুখং কত্ৰাতি অত্থো. খন্ধেতি পঞ্চপি খন্ধে. অত্তাতি গহেত্ৰাতি ‘‘সঞ্জাননসভাৰো মে অত্তা’’তি অভিনিৰিস্স. পকাসেতব্বং ৰত্থুং ৰিয, অত্তানম্পি পকাসেন্তো পদীপো ৰিয, সঞ্জানিতব্বং নীলাদিআরম্মণং ৰিয অত্তানম্পি সঞ্জানাতীতি এৰংদিট্ঠিতোপি দিট্ঠিগতিতো হোতীতি ৰুত্তং ‘‘অত্তনাৰ অত্তানং সঞ্জানামী’’তি. স্ৰাযমত্থো সঞ্ঞং তদঞ্ঞতরধম্মে চ ‘‘অত্তা অনত্তা’’তি চ গহণৰসেন হোতীতি ৰুত্তং ‘‘সঞ্ঞাক্খন্ধসীসেনা’’তিআদি. এত্থ চ খন্ধৰিনিমুত্তো অত্তাতি গণ্হতো সস্সতদিট্ঠি, খন্ধং পন ‘‘অত্তা’’তি গণ্হতো উচ্ছেদদিট্ঠীতি আহ ‘‘সব্বাপি সস্সতুচ্ছেদদিট্ঠিযোৰা’’তি.

অভিনিৰেসাকারাতি ৰিপরিযেসাকারা. ৰদতীতি ইমিনা কারকৰেদকসত্তানং হিতসুখাৰবোধনসমত্থতং অত্তনো দীপেতি. তেনাহ ‘‘ৰচীকম্মস্স কারকো’’তি. ৰেদেতীতি ৰেদিযো, ৰেদিযোৰ ৰেদেয্যো. ঈদিসানঞ্হি পদানং বহুলা কত্তুসাধনতং সদ্দসত্থৰিদূ মঞ্ঞন্তি. উপ্পাদৰতো একন্তেনেৰ ৰযো ইচ্ছিতব্বো, সতি চ উদযব্বযত্তে নেৰ ¶ নিচ্চতাতি ‘‘নিচ্চো’’তি ৰদন্তস্স অধিপ্পাযং ৰিৰরন্তো আহ ‘‘উপ্পাদৰযরহিতো’’তি. সারভূতোতি নিচ্চতায এৰ সারভাৰো. সব্বকালিকোতি সব্বস্মিং কালে ৰিজ্জমানো. পকতিভাৰন্তি সভাৰভূতং পকতিং, ‘‘ৰদো’’তিআদিনা ৰা ৰুত্তং পকতিসঙ্খাতং সভাৰং. সস্সতিসমন্তি সস্সতিযা সমং সস্সতিসমং, থাৰরং নিচ্চকালন্তি অত্থো. তথেৰ ঠস্সতীতি যেনাকারেন পুব্বে অট্ঠাসি, এতরহি তিট্ঠতি, তথেৰ তেনাকারেন অনাগতেপি ঠস্সতীতি অত্থো.

পচ্চক্খনিদস্সনং ইদং-সদ্দস্স আসন্নপচ্চক্খভাৰং কত্ৰা. দিট্ঠিযেৰ দিট্ঠিগতন্তি গত-সদ্দস্স পদৰড্ঢনমত্ততং আহ. দিট্ঠীসুগতন্তি মিচ্ছাদিট্ঠীসু পরিযাপন্নন্তি অত্থো. তেনেৰাহ ‘‘দ্ৰাসট্ঠিদিট্ঠিঅন্তোগধত্তা’’তি. দিট্ঠিযা গমনমত্তন্তি দিট্ঠিযা গহণমত্তং. যথা পন পব্বতজলৰিদুগ্গানি দুন্নিগ্গমনানি, এৰং দিট্ঠিগ্গাহোপীতি আহ ‘‘দুন্নিগ্গমনট্ঠেন গহন’’ন্তি. তং নাম উদকং, তং গহেত্ৰা তং অতিক্কমিতব্বতো কন্তারো, নিরুদকৰনং, তং পৰনন্তিপি ৰুচ্চতি. অঞ্ঞো পন অরঞ্ঞপদেসো দুরতিক্কমনট্ঠেন কন্তারো ৰিযাতি, এৰং দিট্ঠিপীতি আহ ‘‘দুরতিক্কমনট্ঠেনা’’তিআদি. ৰিনিৰিজ্ঝনং ৰিতুদনং. ৰিলোমনং ৰিপরিণামভাৰো. অনৰট্ঠিতসভাৰতায ৰিচলিতং ৰিপ্ফন্দিতন্তি আহ ‘‘কদাচী’’তিআদি. অন্দুবন্ধনাদি ৰিয নিস্সরিতুং ¶ অপ্পদানৰসেন অসেরিভাৰকরণং বন্ধনট্ঠো, কিলেসকম্মৰিপাকৰট্টানং পচ্চযভাৰেন দূরগতম্পি আকড্ঢিত্ৰা সংযোজনং সংযোজনট্ঠো, দিট্ঠিপি তথারূপাতি ৰুত্তং ‘‘দিট্ঠিসংযোজন’’ন্তি. বন্ধনত্থং দস্সেন্তো কিচ্চসিদ্ধিযাতি অধিপ্পাযো. তেনেৰাহ ‘‘দিট্ঠিসংযোজনেন…পে… মুচ্চতী’’তি. তত্থ এতেহীতি ইমিনা জাতিআদিদুক্খস্স পচ্চযভাৰমাহ. জাতিআদিকে দুক্খধম্মে সরূপতো দস্সেত্ৰাপি ‘‘ন পরিমুচ্চতি দুক্খস্মা’’তি ৰদন্তেন ভগৰতা দিট্ঠিসংযোজনং নাম সব্বানত্থকরং মহাসাৰজ্জং সব্বস্সপি দুক্খস্স মূলভূতন্তি অযমত্থো ৰিভাৰিতোতি দস্সেতুং ‘‘কিং ৰা বহুনা, সকলৰট্টদুক্খতোপি ন মুচ্চতী’’তি ৰুত্তং.

২০. ননু চেত্থ দিট্ঠিসংযোজনদস্সনেন সীলব্বতপরামাসোপি দস্সেতব্বো, এৰঞ্হি দস্সনেন পহাতব্বা আসৰা অনৰসেসতো দস্সিতা হোন্তীতি চোদনং সন্ধাযাহ ‘‘যস্মা’’তিআদি. সীলব্বতপরামাসো কামাসৰাদিগ্গহণেনেৰ গহিতো হোতি কামাসৰাদিহেতুকত্তা তস্স. অপ্পহীনকামরাগাদিকো হি কামসুখত্থং ৰা ভৰসুদ্ধত্থং ¶ ৰা এৰং ভৰৰিসুদ্ধি হোতীতি সীলব্বতানি পরামসন্তি, ‘‘ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা দেৰো ৰা ভৰিস্সামি দেৰঞ্ঞতরো ৰা’’তি (ম. নি. ১.১৮৬; ম. নি. ২.৭৯), ‘‘তত্থ নিচ্চো ধুৰো সস্সতো অৰিপরিণামধম্মো সস্সতিসমং তথেৰ ঠস্সামী’’তি (ম. নি. ১.১৯), ‘‘সীলেন সুদ্ধি ৰতেন সুদ্ধি সীলব্বতেন সুদ্ধী’’তি (ধ. স. ১২২২) চ সুত্তেৰুত্তং সীলব্বতং পরামসন্তি. তত্থ ভৰসুখভৰৰিসুদ্ধিঅত্থন্তি ভৰসুখত্থঞ্চ ভৰৰিসুদ্ধিঅত্থঞ্চ. তস্স গহিতত্তাতি সীলব্বতপরামাসস্স দিট্ঠিগ্গহণেন গহিতত্তা যথা ‘‘দিট্ঠিগতানং পহানাযা’’তিআদীসু (ধ. স. ২৭৭). তেসন্তি দস্সনপহাতব্বানং. দস্সেতুং পুগ্গলাধিট্ঠানায দেসনায. তব্বিপরীতস্সাতি যোনিসোমনসিকরোতো কল্যাণপুথুজ্জনস্স.

তস্সাতি ‘‘সুতৰা’’তিআদিপাঠস্স. তাৰাতি ‘‘সুতৰা’’তি ইতো পট্ঠায যাৰ ‘‘সো ইদং দুক্খ’’ন্তি পদং, তাৰ ইমং পদং অৰধিং কত্ৰাতি অত্থো. হেট্ঠা ৰুত্তনযেনাতি অরিযসপ্পুরিস-অরিযধম্ম-সপ্পুরিসধম্ম-মনসিকরণীয-অমনসিকরণীযপদানং যথাক্কমং মূলপরিযাযে ইধ গহেত্ৰা ৰুত্তনযেন অত্থো ৰেদিতব্বোতি সম্বন্ধো. ৰুত্তপচ্চনীকতোতি ‘‘সুতৰা অরিযসাৰকো, অরিযানং দস্সাৰী, সপ্পুরিসানং দস্সাৰী’’তি এতেসং পদানং সব্বাকারেন ৰুত্তৰিপরীততো অত্থো ৰেদিতব্বো, কোৰিদৰিনীতপদানং পন ন সব্বপ্পকারেন ৰুত্তৰিপরীততো. অরহা হি নিপ্পরিযাযেন অরিযধম্মে কোৰিদো অরিযধম্মে সুৰিনীতো চ নাম. তেনাহ ‘‘পচ্চনীকতো চ সব্বাকারেন…পে… অরিযসাৰকোতি ৰেদিতব্বো’’তি. সঙ্খারুপেক্খাঞাণং সিখাপ্পত্তৰিপস্সনা. কেচি পন ‘‘ভঙ্গঞাণতো পট্ঠায সিখাপত্তৰিপস্সনা’’তি ৰদন্তি, তদযুত্তং ¶ . তদনুরূপেন অত্থেনাতি তস্স পুগ্গলস্স অনুরূপেন অরিযট্ঠেন, ন পটিৰেধৰসেনাতি অধিপ্পাযো. কল্যাণপুথুজ্জনো হি অযং. যথা চস্স ‘‘যোপি কল্যাণপুথুজ্জনো’’তি আরভিত্ৰা ‘‘সোপি ৰুচ্চতি সিক্খতীতি সেক্খো’’তি পরিযাযেন সেক্খসুত্তে (সং. নি. ৫.১৩) সেক্খভাৰো ৰুত্তো, এৰং ইধ অরিযসাৰকভাৰো ৰুত্তো. ৰুট্ঠানগামিনীৰিপস্সনালক্খণেহি যে অরিযসপ্পুরিসধম্মৰিনযসঙ্খাতা বোধিপক্খিযধম্মা তিস্সো সিক্খা এৰ ৰা সম্ভৰন্তি, তেসং ৰসেন ইমস্স অরিযসাৰকাদিভাৰো ৰুত্তো ¶ . তেনাহ ‘‘তদনুরূপেন অত্থেনা’’তি. অরিযস্স সাৰকোতি ৰা অরিযসাৰকত্থেন এৰ ৰুত্তো যথা ‘‘অগমা রাজগহং বুদ্ধো’’তি (সু. নি. ৪১০). সিখাপ্পত্তৰিপস্সনাগ্গহণঞ্চেত্থ ৰিপস্সনং উস্সুক্কাপেত্ৰা অনিৰত্তিপটিপদাযং ঠিতস্স গহণত্থন্তি যথাৰুত্তা অত্থসংৰণ্ণনা সুট্ঠুতরং যুজ্জতেৰ.

২১. যথা ধাতুমুখেন ৰিপস্সনং অভিনিৰিট্ঠো ধাতুকম্মট্ঠানিকো আযতনাদিমুখেন অভিনিৰিট্ঠো আযতনাদিকম্মট্ঠানিকো, এৰং সচ্চমুখেন অভিনিৰিট্ঠোতি ৰুত্তং ‘‘চতুসচ্চকম্মট্ঠানিকো’’তি. চতুরোঘনিত্থরণত্থিকেহি কাতব্বতো কম্মং, ভাৰনা. কম্মমেৰ ৰিসেসাধিগমস্স ঠানং কারণন্তি, কম্মে ৰা যথাৰুত্তনট্ঠেন ঠানং অৰট্ঠানং ভাৰনারম্ভোকম্মট্ঠানং, তদেৰ চতুসচ্চমুখেন পৰত্তং এতস্স অত্থীতি চতুসচ্চকম্মট্ঠানিকো. উভযং নপ্পৰত্ততি এত্থাতি অপ্পৰত্তি. উগ্গহিতচতুসচ্চকম্মট্ঠানোতি চ চতুসচ্চকম্মট্ঠানং পাল়িতো অত্থতো চ উগ্গহেত্ৰা মনসিকারযোগ্গং কত্ৰা ঠিতো. ৰিপস্সনামগ্গং সমারুল়্হোতি সপ্পচ্চযনামরূপদস্সনে পতিট্ঠায তদেৰ নামরূপং অনিচ্চাদিতো সম্মসন্তো. সমন্নাহরতীতি ৰিপস্সনাৰজ্জনং সন্ধাযাহ, তস্মা যথা ‘‘ইদং দুক্খ’’ন্তি ৰিপস্সনাঞাণং পৰত্ততি, এৰং সমন্নাহরতি আৰজ্জতীতি অত্থো. কথং পনেত্থ ‘‘মনসি করোতী’’তি ইমিনা ‘‘ৰিপস্সতী’’তি অযমত্থো ৰুত্তো হোতীতি আহ ‘‘এত্থ…পে… ৰুত্তা’’তি. এত্থাতি চ ইমস্মিং সুত্তেতি অত্থো. ৰিপস্সতীতি চ যথা উপরি ৰিসেসাধিগমো হোতি, এৰং ঞাণচক্খুনা ৰিপস্সতি, ওলোকেতীতি অত্থো. মগ্গোপি ৰত্তব্বো. পুরিমঞ্হি সচ্চদ্ৰযং গম্ভীরত্তা দুদ্দসং, ইতরং দুদ্দসত্তা গম্ভীরং.

অভিনিৰেসোতি ৰিপস্সনাভিনিৰেসো ৰিপস্সনাপটিপত্তি. তদারম্মণেতি তং রূপক্খন্ধং আরম্মণং কত্ৰা পৰত্তে. যাথাৰসরসলক্খণং ৰৰত্থপেত্ৰাতি অৰিপরীতং অত্তনো আরম্মণং সভাৰচ্ছেদনাদিকিচ্চঞ্চেৰ অঞ্ঞাণাদিলক্খণঞ্চ অসঙ্করতো হদযে ঠপেত্ৰা. ইমিনা পুব্বে নামরূপপরিচ্ছেদে কতেপি ধম্মানং সলক্খণৰৰত্থাপনং পচ্চযপরিগ্গহেন সুৰৰত্থাপিতং নাম হোতীতি দস্সেতি যথা ‘‘দ্ৰিক্খত্তুং বদ্ধং সুবদ্ধ’’ন্তি. এৰঞ্হি ঞাতপরিঞ্ঞায কিচ্চং সিদ্ধং নাম ¶ হোতি. পচ্চযতো পচ্চযুপ্পন্নতো চ ৰৰত্থাপিতত্তা পাকটভাৰেন সিদ্ধেনপি সিদ্ধভাৰো পাকটো হোতীতি ৰুত্তং ‘‘অহুত্ৰা হোন্তী’’তি. অনিচ্চলক্খণং আরোপেতীতি অসতো হি ¶ উপ্পাদেন ভৰিতব্বং, ন সতো, উপ্পাদৰন্ততো চ নেসং একন্তেন ইচ্ছিতব্বা পচ্চযাযত্তৰুত্তিভাৰতো, সতি উপ্পাদে অৰস্সংভাৰী নিরোধোতি নত্থেৰ নিচ্চতাৰকাসোতি. সূপট্ঠিতানিচ্চতায চ উদযব্বযধম্মেহি অভিণ্হপটিপীল়নতো দুক্খমনট্ঠেন দুক্খং. তেনাহ ‘‘উদযব্বযপটিপীল়িতত্তা দুক্খাতি দুক্খলক্খণং আরোপেতী’’তি. কত্থচিপি সঙ্খারগতে ‘‘মা জীরি মা ব্যাধিযী’’তি অলব্ভনতো নত্থি ৰসৰত্তনন্তি আহ ‘‘অৰসৰত্তনতো অনত্তাতি অনত্তলক্খণং আরোপেতী’’তি. পটিপাটিযাতি উদযব্বযঞাণাদিপরম্পরায.

তস্মিং খণেতি সোতাপত্তিমগ্গক্খণে. একপটিৰেধেনেৰাতি একঞাণেনেৰ পটিৰিজ্ঝনেন. পটিৰেধো পটিঘাতাভাৰেন ৰিসযে নিস্সঙ্গচারসঙ্খাতং নিব্বিজ্ঝনং. অভিসমযো অৰিরজ্ঝিত্ৰা ৰিসযস্স অধিগমসঙ্খাতো অৰবোধো. ‘‘ইদং দুক্খং, এত্তকং দুক্খং, ন ইতো ভিয্যো’’তি পরিচ্ছিন্দিত্ৰা জাননমেৰ ৰুত্তনযেন পটিৰেধোতি পরিঞ্ঞাপটিৰেধো. অযং যথা ঞাণে পৰত্তে পচ্ছা দুক্খস্স সরূপাদিপরিচ্ছেদে সম্মোহো ন হোতি, তথা পৰত্তিং গহেত্ৰা ৰুত্তো, ন পন মগ্গঞাণস্স ‘‘ইদং দুক্খ’’ন্তিআদিনাপি ৰত্তনতো. তেনাহ ‘‘ন হিস্স তস্মিং সমযে’’তিআদি. পহীনস্স পুন অপ্পহাতব্বতায পকট্ঠং হানং চজনং সমুচ্ছিন্দনং পহানং, পহানমেৰ ৰুত্তনযেন পটিৰেধোতি পহানপটিৰেধো. অযম্পি যেন কিলেসেন অপ্পহীযমানেন মগ্গভাৰনায ন ভৰিতব্বং, অসতি চ মগ্গভাৰনায যো উপ্পজ্জেয্য, তস্স কিলেসস্স পদঘাতং করোন্তস্স অনুপ্পত্তিধম্মতং আপাদেন্তস্স ঞাণস্স তথাপৰত্তিযা পটিঘাতাভাৰেন নিস্সঙ্গচারং উপাদায এৰং ৰুত্তো. সচ্ছিকিরিযা পচ্চক্খকরণং, অনুস্সৰাকারপরিৰিতক্কাদিকে মুঞ্চিত্ৰা সরূপতো আরম্মণকরণং ইদং তন্তি যথাসভাৰতো গহণং, সা এৰ ৰুত্তনযেন পটিৰেধোতি সচ্ছিকিরিযাপটিৰেধো. অযং পন যস্স আৰরণস্স অসমুচ্ছিন্দনতো ঞাণং নিরোধং আলম্বিতুং ন সক্কোতি, তস্স সমুচ্ছিন্দনতো তং সরূপতো ৰিভাৰিতমেৰ পৰত্ততীতি এৰং ৰুত্তো.

ভাৰনা উপ্পাদনা ৰড্ঢনা চ, তত্থ পঠমমগ্গে উপ্পাদনট্ঠেন, দুতিযাদীসু ৰড্ঢনট্ঠেন, উভযত্থাপি ৰা উভযথাপি ৰেদিতব্বং. পঠমমগ্গোপি হি যথারহং ৰুট্ঠানগামিনিযং পৰত্তং পরিজাননাদিং ৰড্ঢেন্তো পৰত্তোতি তত্থাপি ৰড্ঢনট্ঠেন ভাৰনা ¶ সক্কা ৰিঞ্ঞাতুং. দুতিযাদীসুপি অপ্পহীনকিলেসপ্পহানতো পুগ্গলন্তরসাধনতো উপ্পাদনট্ঠেন ভাৰনা, সা এৰ ৰুত্তনযেন পটিৰেধোতি ভাৰনা পটিৰেধো. অযম্পি হি যথা ঞাণে পৰত্তে পচ্ছা মগ্গধম্মানং সরূপপরিচ্ছেদে ¶ সম্মোহো ন হোতি, তথা পৰত্তিমেৰ গহেত্ৰা ৰুত্তো, তিট্ঠতু তাৰ যথাধিগতমগ্গধম্মং যথাপৰত্তেসু ফলধম্মেসুপি অযং যথাধিগতসচ্চধম্মেসু ৰিয ৰিগতসম্মোহোৰ হোতি. তেন ৰুত্তং ‘‘দিট্ঠধম্মো পত্তধম্মো ৰিদিতধম্মো পরিযোগাল়্হধম্মো’’তি (দী. নি. ১.২৯৯, ৩৫৬; মহাৰ. ২৭, ৫৭). যতো চস্স ধম্মতাসঞ্চোদিতা যথাধিগতসচ্চধম্মাৰলম্বিনিযো মগ্গৰীথিতো পরতো মগ্গফলপহীনাৰসিট্ঠকিলেসনিব্বানানং পচ্চৰেক্খণা পৰত্তন্তি. দুক্খসচ্চধম্মা হি সক্কাযদিট্ঠিআদযো. অযঞ্চ অত্থৰণ্ণনা ‘‘পরিঞ্ঞাভিসমযেনা’’তিআদীসুপি ৰিভাৰেতব্বা. একাভিসমযেন অভিসমেতীতি ৰুত্তমেৰত্থং ৰিভূততরং কত্ৰা দস্সেতুং ‘‘নো চ খো অঞ্ঞমঞ্ঞেন ঞাণেনা’’তিআদি ৰুত্তং.

ৰিতণ্ডৰাদী পনাহ ‘‘অরিযমগ্গঞাণং চতূসু সচ্চেসু নানাভিসমযৰসেন কিচ্চকরণং, ন একাভিসমযৰসেন. তঞ্হি কালেন দুক্খং পজানাতি, কালেন সমুদযং পজহতি, কালেন নিরোধং সচ্ছিকরোতি, কালেন মগ্গং ভাৰেতি, অঞ্ঞথা একস্স ঞাণস্স একস্মিং খণে চতুকিচ্চকরণং ন যুজ্জতি. ন হিদং কত্থচি দিট্ঠম্পি সুত্তং অত্থী’’তি. সো ৰত্তব্বো – যদি অরিযমগ্গঞাণং নানাভিসমযৰসেন সচ্চানি অভিসমেতি, ন একাভিসমযৰসেন, এৰং সন্তে পচ্চেকম্পি সচ্চেসু নানক্খণেনেৰ পৰত্তেয্য, ন একক্খণেন, তথা সতি দুক্খাদীনং একদেসেকদেসমেৰ পরিজানাতি পজহতীতি আপজ্জতীতি নানাভিসমযে পঠমমগ্গাদীহি পহাতব্বানং সঞ্ঞোজনত্তযাদীনং একদেসেকদেসপ্পহানং সিযাতি একদেসসোতাপত্তিমগ্গট্ঠাদিতা, ততো এৰ একদেসসোতাপন্নাদিতা চ আপজ্জতি অনন্তরফলত্তা লোকুত্তরকুসলানং, ন চ তং যুত্তং. ন হি কালভেদেন ৰিনা সো এৰ সোতাপন্নো চ অসোতাপন্নো চাতি সক্কা ৰিঞ্ঞাতুং.

অপিচাযং নানাভিসমযৰাদী এৰং পুচ্ছিতব্বো ‘‘মগ্গঞাণং সচ্চানি পটিৰিজ্ঝন্তং কিং আরম্মণতো পটিৰিজ্ঝতি, উদাহু কিচ্চতো’’তি? জানমানো ‘‘কিচ্চতো’’তি ৰদেয্য, ‘‘কিচ্চতো পটিৰিজ্ঝন্তস্স কিং নানাভিসমযেনা’’তি ৰত্ৰা পটিপাটিযানিদস্সনেন ¶ সঞ্ঞাপেতব্বো. অথ ‘‘আরম্মণতো’’তি ৰদেয্য, এৰং সন্তে তস্স ঞাণস্স ৰিপস্সনাঞাণস্স ৰিয দুক্খসমুদযানং অচ্চন্তপরিঞ্ঞাসমুচ্ছেদা ন যুত্তা অনিস্সটত্তা. তথা মগ্গদস্সনং. ন হি মগ্গো সযমেৰ অত্তানং আরব্ভ পৰত্ততীতি যুত্তং, মগ্গন্তরপরিকপ্পনায পন অনৰট্ঠানং আপজ্জতি, তস্মা তীণি সচ্চানি কিচ্চতো, নিরোধং কিচ্চতো চ আরম্মণতো চ পটিৰিজ্ঝতীতি এৰং অসম্মোহতো পটিৰিজ্ঝন্তস্স মগ্গঞাণস্স নত্থেৰ নানাভিসমযো. ৰুত্তঞ্হেতং ‘‘যো ভিক্খৰে দুক্খং পস্সতি, দুক্খসমুদযম্পি সো পস্সতী’’তিআদি. ন চেতং কালন্তরদস্সনং সন্ধায ৰুত্তং ‘‘যো নু খো, আৰুসো, দুক্খং পস্সতি, দুক্খসমুদযম্পি ¶ …পে… দুক্খনিরোধগামিনিপটিপদম্পি সো পস্সতী’’তি (সং. নি. ৫.১১০০) একচ্চদস্সনসমঙ্গিনো অঞ্ঞসচ্চদস্সনসমঙ্গিভাৰৰিচারণাযং তদত্থসাধনত্থং আযস্মতা গৰম্পতিত্থেরেন আভতত্তা, পচ্চেকঞ্চ সচ্চত্তযদস্সনস্স যোজিতত্তা, অঞ্ঞথা পুরিমদিট্ঠস্স পুন অদস্সনতো সমুদযাদিদস্সনমযোজনিযং সিযা. ন হি লোকুত্তরমগ্গো লোকিযমগ্গো ৰিয কতকারীভাৰেন পৰত্ততি সমুচ্ছেদকত্তা, তথা যোজনেন চ সব্বদস্সনং দস্সনন্তরপরমন্তি দস্সনানুপরমো সিযাতি এৰং আগমতো যুত্তিতো চ নানাভিসমযো ন যুজ্জতীতি সঞ্ঞাপেতব্বো. এৰং চে সঞ্ঞত্তিং গচ্ছতি, ইচ্চেতং কুসলং. নো চে গচ্ছতি, অভিধম্মে (কথা. ২৭৪) ওধিসোকথায সঞ্ঞাপেতব্বোতি.

নিরোধং আরম্মণতোতি নিরোধমেৰ আরম্মণতোতি নিযমো গহেতব্বো, ন আরম্মণতোৰাতি. তেন নিরোধে কিচ্চতোপি পটিৰেধো সিদ্ধো হোতি. তস্মিং সমযেতি সচ্চানং অভিসমযে. ৰীসতিৰত্থুকাতিআদি ‘‘তীণি সঞ্ঞোজনানী’’তি ৰুত্তানং সরূপদস্সনং. চতূসু আসৰেসূতি ইদং অভিধম্মনযেন ৰুত্তং, ন সুত্তন্তনযেন. ন হি সুত্তে কত্থচি চত্তারো আসৰা আগতা অত্থি. যদি ৰিচিকিচ্ছা ন আসৰো, অথ কস্মা ‘‘সক্কাযদিট্ঠি ৰিচিকিচ্ছা সীলব্বতপরামাসো, ইমে ৰুচ্চন্তি, ভিক্খৰে, আসৰা দস্সনা পহাতব্বা’’তি ৰুত্তন্তি আহ ‘‘দস্সনা পহাতব্বা’’তিআদি. এত্থ পরিযাপন্নত্তাতি এতেন সম্মাসঙ্কপ্পস্স ৰিয পঞ্ঞাক্খন্ধে কিচ্চসভাগতায ইধ ৰিচিকিচ্ছায আসৰসঙ্গহো কতোতি দস্সেতি.

সব্বো ¶ অত্তগ্গাহো সক্কাযদিট্ঠিৰিনিমুত্তো নত্থীতি ৰুত্তং ‘‘ছন্নং দিট্ঠীনং…পে… ৰিভত্তা’’তি. সা হি দিট্ঠি একস্মিং চিত্তুপ্পাদে সন্তানে চ ঠিতং একট্ঠং, তত্থ পঠমং সহজাতেকট্ঠং, ইতরং পহানেকট্ঠং, তদুভযম্পি নিদ্ধারেত্ৰা দস্সেতুং ‘‘দিট্ঠাসৰেহী’’তিআদি ৰুত্তং. সব্বথাপীতি সব্বপ্পকারেন, সহজাতেকট্ঠপহানেকট্ঠপ্পকারেহীতি অত্থো. অৰসেসাতি দিট্ঠাসৰতো অৰসিট্ঠা. তযোপি আসৰাতি কামাসৰভৰাসৰঅৰিজ্জাসৰা. তথা হি পুব্বে ‘‘চতূসু আসৰেসূ’’তি ৰুত্তং. তস্মাতি যস্মা বহূ এৰেত্থ আসৰা পহাতব্বা, তস্মা বহুৰচননিদ্দেসো কতো ‘‘ইমে ৰুচ্চন্তি, ভিক্খৰে, আসৰা দস্সনা পহাতব্বা’’তি. পোরাণানন্তি অট্ঠকথাচরিযানং, ‘‘পুরাতনানং মজ্ঝিমভাণকান’’ন্তি চ ৰদন্তি.

দস্সনা পহাতব্বাতিআদীসু যং ৰত্তব্বং, তং হেট্ঠা ৰুত্তমেৰ.

দস্সনাপহাতব্বআসৰৰণ্ণনা নিট্ঠিতা.

সংৰরাপহাতব্বআসৰৰণ্ণনা

২২. সংৰরাদীহীতি ¶ সংৰরপটিসেৰনঅধিৰাসনপরিৰজ্জনৰিনোদনেহি. সব্বেসম্পীতি চতুন্নম্পি অরিযমগ্গানং. অযন্তি সংৰরাপহাতব্বাদিকথা পুব্বভাগপটিপদাতি ৰেদিতব্বা. তথা হি হেট্ঠা ‘‘উপক্কিলেসৰিসোধনং আদিং কত্ৰা আসৰক্খযপটিপত্তিদস্সনত্থ’’ন্তি সুত্তন্তদেসনায পযোজনং ৰুত্তং. ন হি সক্কা আদিতো এৰ অরিযমগ্গং ভাৰেতুং, অথ খো সমাদিন্নসীলো ইন্দ্রিযেসু গুত্তদ্ৰারো ‘‘সঙ্খাযেকং পটিসেৰতি, সঙ্খাযেকং অধিৰাসেতি, সঙ্খাযেকং পরিৰজ্জেতি, সঙ্খাযেকং ৰিনোদেতী’’তি (দী. নি. ৩.৩৪৮; ম. নি. ২.১৬৮) এৰং ৰুত্তং চতুরাপস্সেনপটিপত্তিং পটিপজ্জমানো সম্মসনৰিধিং ওতরিত্ৰা অনুক্কমেন ৰিপস্সনং উস্সুক্কাপেত্ৰা মগ্গপটিপাটিযা আসৰে খেপেতি. তেনাহ ভগৰা ‘‘সেয্যথাপি, ভিক্খৰে, মহাসমুদ্দো অনুপুব্বনিন্নো অনুপুব্বপোণো অনুপুব্বপব্ভারো, ন আযতকেনেৰ পপাতো, এৰং খো, ভিক্খৰে, ইমস্মিং ধম্মৰিনযে অনুপুব্বসিক্খা অনুপুব্বকিরিযা অনুপুব্বপটিপদা, ন আযতকেনেৰ অঞ্ঞাপটিৰেধো’’তি (অ. নি. ৮.২০; উদা. ৪৫; চূল়ৰ. ৩৮৫).

ইধাতি ¶ অযং ইধ-সদ্দো সব্বাকারতো ইন্দ্রিযসংৰরসংৰুতস্স পুগ্গলস্স সন্নিস্সযভূতসাসনপরিদীপনো, অঞ্ঞসাসনস্স তথাভাৰপটিসেধনো চাতি ৰুত্তং ‘‘ইমস্মিং সাসনে’’তি. আদীনৰপটিসঙ্খাতি আদীনৰপচ্চৰেক্খণা. সম্পলিমট্ঠন্তি (অ. নি. টী. ৩.৬.৫৮) ঘংসিতং. অনুব্যঞ্জনসোতি হত্থপাদহসিতকথিতৰিলোকিতাদিপ্পকারভাগসো. তঞ্হি অযোনিসো মনসিকরোতো কিলেসানং অনু অনু ব্যঞ্জনতো ‘‘অনুব্যঞ্জন’’ন্তি ৰুচ্চতি. নিমিত্তগ্গাহোতি ইত্থিপুরিসনিমিত্তাদিকস্স ৰা কিলেসৰত্থুভূতস্স ৰা নিমিত্তস্স গাহো. আদিত্তপরিযাযনযেনাতি আদিত্তপরিযাযে (সং. নি. ৪.২৮; মহাৰ. ৫৪) আগতনযেন ৰেদিতব্বা আদীনৰপটিসঙ্খাতি যোজনা. যথা ইত্থিযা ইন্দ্রিযন্তি ইত্থিন্দ্রিযং, ন এৰমিদং, ইদং পন চক্খুমেৰ ইন্দ্রিযন্তি চক্খুন্দ্রিযন্তি. তিত্থকাকো ৰিযাতি তিত্থে কাকো তিত্থকাকো, নদিযা সমতিক্কমনতিত্থে নিযতট্ঠিতিকো. আৰাটকচ্ছপোতিআদীসুপি এসেৰ নযো.

এৰং তপ্পটিবদ্ধৰুত্তিতায চক্খুন্দ্রিযে নিযতট্ঠানো সংৰরো চক্খুন্দ্রিযসংৰরো. মুট্ঠস্সচ্চং সতিপটিপক্খা অকুসলধম্মা. যদিপি অঞ্ঞত্থ অসঙ্খেয্যম্পি ভৰঙ্গচিত্তং নিরন্তরং উপ্পজ্জতি, পসাদঘট্টনাৰজ্জনুপ্পাদানং পন অন্তরে দ্ৰে এৰ ভৰঙ্গচিত্তানি উপ্পজ্জন্তীতি অযং চিত্তনিযামোতি আহ ভৰঙ্গে ‘‘দ্ৰিক্খত্তুং উপ্পজ্জিত্ৰা নিরুদ্ধে’’তি.

জৰনক্খণে ¶ পন সচে দুস্সীল্যং ৰাতিআদি (ৰিসুদ্ধি. টী. ১.১৫; ধ. স. মূলটী. ১৩৫২) পুন অৰচনত্থং ইধেৰ সব্বং ৰুত্তন্তি ছসু দ্ৰারেসু যথাসম্ভৰং যোজেতব্বং. ন হি পঞ্চদ্ৰারে কাযৰচীদুচ্চরিতসঙ্খাতো দুস্সীল্যসংৰরো অত্থীতি সো মনোদ্ৰারৰসেন, ইতরো ছন্নম্পি দ্ৰারানং ৰসেন যোজেতব্বো. মুট্ঠস্সচ্চাদীনঞ্হি সতিপটিপক্খাদিলক্খণানং অকুসলধম্মানং সিযা পঞ্চদ্ৰারে উপ্পত্তি, ন ত্ৰেৰ কাযিকৰাচসিকৰীতিক্কমভূতস্স দুস্সীল্যস্স তত্থ উপ্পত্তি পঞ্চদ্ৰারিকজৰনানং অৰিঞ্ঞত্তিজনকত্তাতি.

যথা কিন্তি যেন পকারেন জৰনে উপ্পজ্জমানো অসংৰরো ‘‘চক্খুদ্ৰারে অসংৰরো’’তি ৰুচ্চতি, তং নিদস্সনং কিন্তি অত্থো. যথাতিআদিনা নগরদ্ৰারে অসংৰরে সতি তংসম্বন্ধানং ঘরাদীনং অসংৰুততা ¶ ৰিয জৰনে অসংৰরে সতি তংসম্বন্ধানং দ্ৰারাদীনং অসংৰুততাতি অঞ্ঞাসংৰরে অঞ্ঞাসংৰুততাসামঞ্ঞমেৰ নিদস্সেতি, ন পুব্বাপরসামঞ্ঞং, অন্তোবহিসামঞ্ঞং ৰা. সম্বন্ধো চ জৰনেন দ্ৰারাদীনং একসন্ততিপরিযাপন্নতায এৰ দট্ঠব্বো. পচ্চযভাৰেন পুরিমনিপ্ফন্নং জৰনকালে অসন্তম্পি ভৰঙ্গাদি ফলনিপ্ফত্তিযা চক্খাদি ৰিয সন্তংযেৰ নাম. ন হি ধরমানংযেৰ ‘‘সন্ত’’ন্তি ৰুচ্চতি, তস্মা সতি দ্ৰারভৰঙ্গাদিকে পচ্ছা উপ্পজ্জমানং জৰনং বাহিরং ৰিয কত্ৰা নগরদ্ৰারসমানং ৰুত্তং. ইতরঞ্চ অন্তোনগরঘরাদিসমানং. জৰনস্স হি পরমত্থতো অসতিপি বাহিরভাৰে ইতরস্স চ অব্ভন্তরভাৰে ‘‘পভস্সরমিদং, ভিক্খৰে, চিত্তং, তঞ্চ খো আগন্তুকেহি উপক্কিলেসেহি উপক্কিলিট্ঠ’’ন্তি (অ. নি. ১.৪৯) আদিৰচনতো আগন্তুকভূতস্স কদাচি কদাচি উপ্পজ্জমানস্স জৰনস্স বাহিরভাৰো, তব্বিধুরসভাৰস্স ইতরস্স অব্ভন্তরভাৰো চ পরিযাযতো ৰেদিতব্বো. জৰনে ৰা অসংৰরে উপ্পন্নে ততো পরং দ্ৰারভৰঙ্গাদীনং অসংৰরহেতুভাৰাপত্তিতো নগরদ্ৰারসদিসেন জৰনেন পৰিসিত্ৰা দুস্সীল্যাদিচোরানং দ্ৰারভৰঙ্গাদীসু মুসনং কুসলভণ্ডৰিনাসনং দট্ঠব্বং. উপ্পন্নে হি অসংৰরে দ্ৰারাদীনং তস্স হেতুভাৰো পঞ্ঞাযতি, সো চ উপ্পজ্জমানোযেৰ দ্ৰারাদীনং সংৰরূপনিস্সযভাৰং পটিবাহেন্তোযেৰ পৰত্ততীতি অযঞ্হেত্থ অসংৰরাদীনং পৰত্তিনযো. পঞ্চদ্ৰারে রূপাদিআরম্মণে আপাথগতে যথাপচ্চযং অকুসলজৰনে উপ্পজ্জিত্ৰা ভৰঙ্গং ওতিণ্ণে মনোদ্ৰারিকজৰনং তংযেৰ আরম্মণং কত্ৰা ভৰঙ্গং ওতরতি, পুন তস্মিংযেৰ দ্ৰারে ‘‘ইত্থী পুরিসো’’তিআদিনা ৰিসযং ৰৰত্থপেত্ৰা জৰনং ভৰঙ্গং ওতরতি, পুন ৰারে রজ্জনাদিৰসেন জৰনং জৰতি, পুনপি যদি তাদিসং আরম্মণং আপাথমাগচ্ছতি, তংসদিসমেৰ পঞ্চদ্ৰারে রূপাদীসু জৰনং উপ্পজ্জতি. তং সন্ধায ৰুত্তং ‘‘এৰমেৰ জৰনে দুস্সীল্যাদীসু উপ্পন্নেসু তস্মিং অসংৰরে সতি দ্ৰারম্পি অগুত্ত’’ন্তিআদি. অযং তাৰ অসংৰরপক্খে অত্থৰণ্ণনা.

সংৰরপক্খেপি ¶ ইমিনাৰ নযেন অত্থো ৰেদিতব্বো. সংৰরেন সমন্নাগতো পুগ্গলো সংৰুতোতি ৰুত্তোতি আহ ‘‘উপেতোতি ৰুত্তং হোতী’’তি. একজ্ঝং কত্ৰাতি ‘‘পাতিমোক্খসংৰরসংৰুতো’’তি পদঞ্চ অত্থতো অভিন্নং সমানং কত্ৰা. অযমেৰ চেত্থ অত্থো সুন্দরতরো ¶ উপরিপাল়িযা সংসন্দনতো. তেনাহ ‘‘তথাহী’’তিআদি. যন্তি আদেসোতি ইমিনা লিঙ্গৰিপল্লাসেন সদ্ধিং ৰচনৰিপল্লাসো কতোতি দস্সেতি, নিপাতপদং ৰা এতং পচ্চত্তপুথুৰচনত্থং. ৰিঘাতকরাতি চিত্তৰিঘাতকরণা চিত্তদুক্খনিব্বত্তকা চ. যথাৰুত্তকিলেসহেতুকা দাহানুবন্ধা ৰিপাকা এৰ ৰিপাকপরিল়াহা. যথা পনেত্থ আসৰা অঞ্ঞে চ ৰিঘাতকরা কিলেসৰিপাকপরিল়াহা সম্ভৰন্তি, তং দস্সেতুং ‘‘চক্খুদ্ৰারেহী’’তিআদি ৰুত্তং, তং সুৰিঞ্ঞেয্যমেৰ. এত্থ চ সংৰরণূপাযো, সংৰরিতব্বং, সংৰরো, যতো সো সংৰরো, যত্থ সংৰরো, যঞ্চ সংৰরফলন্তি অযং ৰিভাগো ৰেদিতব্বো. কথং? পটিসঙ্খা যোনিসোতি হি সংৰরণূপাযো. চক্খুন্দ্রিযং সংৰরিতব্বং. সংৰরগ্গহণেন গহিতা সতি সংৰরো. অসংৰুতস্সাতি সংৰরণাৰধি. অসংৰরতো হি সংৰরণং. সংৰরিতব্বগ্গহণেন সিদ্ধো ইধ সংৰরৰিসযো. চক্খুন্দ্রিযঞ্হি সংৰরঞাণং রূপারম্মণে সংৰরীযতীতি অৰুত্তসিদ্ধোযমত্থো. আসৰতন্নিমিত্তকিলেসাদিপরিল়াহাভাৰো ফলং. এৰং সোতদ্ৰারাদীসুপি যোজেতব্বং. সব্বত্থেৰাতি মনোদ্ৰারে পঞ্চদ্ৰারে চাতি সব্বস্মিং দ্ৰারে.

সংৰরাপহাতব্বআসৰৰণ্ণনা নিট্ঠিতা.

পটিসেৰনাপহাতব্বআসৰৰণ্ণনা

২৩. পটিসঙ্খা যোনিসো চীৰরন্তিআদীসু ‘‘সীতস্স পটিঘাতাযা’’তিআদিনা ৰুত্তং পচ্চৰেক্খণমেৰ যোনিসো পটিসঙ্খা. ঈদিসন্তি এৰরূপং ইট্ঠারম্মণং. ভৰপত্থনায অস্সাদযতোতি ভৰপত্থনামুখেন ভাৰিতং আরম্মণং অস্সাদেন্তস্স. চীৰরন্তি নিৰাসনাদি যং কিঞ্চি চীৰরং. পটিসেৰতীতি নিৰাসনাদিৰসেন পরিভুঞ্জতি. যাৰদেৰাতি পযোজনপরিমাণনিযমনং. সীতপটিঘাতাদিযেৰ হি যোগিনো চীৰরপটিসেৰনে পযোজনং. সীতস্সাতি ধাতুক্খোভতো ৰা উতুপরিণামতো ৰা উপ্পন্নসীতস্স. পটিঘাতাযাতি পটিবাহনত্থং তপ্পচ্চযস্স ৰিকারস্স ৰিনোদনত্থং. উণ্হস্সাতি অগ্গিসন্তাপতো উপ্পন্নস্স উণ্হস্স. ডংসাদযো পাকটাযেৰ. পুন যাৰদেৰাতি নিযতপযোজনপরিমাণনিযমনং. নিযতঞ্হি পযোজনং চীৰরপটিসেৰনস্স হিরিকোপীনপটিচ্ছাদনং, ইতরং কদাচি কদাচি ¶ . হিরিকোপীনন্তি সম্বাধট্ঠানং ¶ . যস্মিঞ্হি অঙ্গে ৰিৰটে হিরীকুপ্পতি ৰিনস্সতি, তং হিরিযা কোপনতো হিরিকোপীনং, তস্স পটিচ্ছাদনত্থং চীৰরং পটিসেৰতি.

পিণ্ডপাতন্তি যং কিঞ্চি আহারং. সো হি পিণ্ডোল্যেন ভিক্খনায পত্তে পতনতো তত্থ তত্থ লদ্ধভিক্খাপিণ্ডানং পাতো সন্নিপাতোতি ‘‘পিণ্ডপাতো’’তি ৰুচ্চতি. নেৰ দৰাযাতি ন কীল়নায. ন মদাযাতি ন বলমদমানমদপুরিসমদত্থং. ন মণ্ডনাযাতি ন অঙ্গপচ্চঙ্গানং পীণনভাৰত্থং. ন ৰিভূসনাযাতি ন তেসংযেৰ সোভনত্থং, ছৰিসম্পতিঅত্থন্তি অত্থো. ইমানি চ পদানি যথাক্কমং মোহ-দোস-সণ্ঠান-ৰণ্ণ-রাগূপনিস্সয-পহানত্থানি ৰেদিতব্বানি. পুরিমং ৰা দ্ৰযং অত্তনো অত্তনো সংকিলেসুপ্পত্তিনিসেধনত্থং, ইতরং পরস্সপি. চত্তারিপি কামসুখল্লিকানুযোগস্স পহানত্থং ৰুত্তানীতি ৰেদিতব্বানি. কাযস্সাতি রূপকাযস্স. ঠিতিযা যাপনাযাতি পবন্ধট্ঠিতত্থঞ্চেৰ পৰত্তিযা অৰিচ্ছেদনত্থঞ্চ চিরকালট্ঠিতত্থং জীৰিতিন্দ্রিযস্স পৰত্তাপনত্থং. ৰিহিংসূপরতিযাতি জিঘচ্ছাদুক্খস্স উপরমণত্থং. ব্রহ্মচরিযানুগ্গহাযাতি সাসনমগ্গব্রহ্মচরিযানং অনুগ্গহত্থং. ইতীতি এৰং ইমিনা উপাযেন. পুরাণঞ্চ ৰেদনং পটিহঙ্খামীতি পুরাণং অভুত্তপচ্চযা উপ্পজ্জনকৰেদনং পটিহনিস্সামি. নৰঞ্চ ৰেদনং ন উপ্পাদেস্সামীতি নৰং ভুত্তপচ্চযা উপ্পজ্জনকৰেদনং ন উপ্পাদেস্সামীতি. তস্সা হি অনুপ্পন্নায অনুপ্পজ্জনত্থমেৰ আহারং পরিভুঞ্জতি. এত্থ চ অভুত্তপচ্চযা উপ্পজ্জনকৰেদনা নাম যথাপৰত্তা জিঘচ্ছানিমিত্তা ৰেদনা. সা হি অভুঞ্জন্তস্স ভিয্যো ভিয্যো পৰড্ঢনৰসেন উপ্পজ্জতি, ভুত্তপচ্চযা উপ্পজ্জনকৰেদনাপি খুদানিমিত্তাৰ অঙ্গদাহসূলাদিৰেদনা অপ্পৰত্তা. সা হি ভুত্তপচ্চযা অনুপ্পন্নাৰ ন উপ্পজ্জিস্সতীতি. ৰিহিংসানিমিত্ততা চেতাসং ৰিহিংসায ৰিসেসো.

যাত্রা চ মে ভৰিস্সতীতি যাপনা চ মে চতুন্নং ইরিযাপথানং ভৰিস্সতি. যাপনাযাতি ইমিনা জীৰিতিন্দ্রিযযাপনা ৰুত্তা, ইধ চতুন্নং ইরিযাপথানং অৰিচ্ছেদসঙ্খাতা যাপনাতি অযমেতাসং ৰিসেসো. অনৰজ্জতা চ ফাসুৰিহারো চাতি অযুত্তপরিযেসনপটিগ্গহণপরিভোগপরিৰজ্জনেন অনৰজ্জতা, পরিমিতপরিভোগেন ফাসুৰিহারো. অসপ্পাযাপরিমিতভোজনপচ্চযা অরতিতন্দীৰিজম্ভিতাৰিঞ্ঞুগরহাদিদোসাভাৰেন ৰা অনৰজ্জতা, সপ্পাযপরিমিতভোজনপচ্চযা কাযবলসম্ভৰেন ¶ ফাসুৰিহারো. যাৰদত্থউদরাৰদেহকভোজনপরিৰজ্জনেন সেয্যসুখপস্সসুখমিদ্ধসুখাদীনং অভাৰতো অনৰজ্জতা, চতুপঞ্চালোপমত্তঞ্ঞীনভোজনেন চতুইরিযাপথযোগ্যতাপাদনতো ফাসুৰিহারো. ৰুত্তঞ্হেতং –

‘‘চত্তারো ¶ পঞ্চ আলোপে, অভুত্ৰা উদকং পিৰে;

অলং ফাসুৰিহারায, পহিতত্তস্স ভিক্খুনো’’তি. (থেরগা. ৯৮৩);

এত্তাৰতা পযোজনপরিগ্গহো, মজ্ঝিমা চ পটিপদা দীপিতা হোতি.

সেনাসনন্তি সযনঞ্চ আসনঞ্চ. যত্থ হি ৰিহারাদিকে সেতি নিপজ্জতি, আসতি নিসীদতি, তং সেনাসনং. উতুপরিস্সযৰিনোদনপটিসল্লানারামত্থন্তি উতুযেৰ পরিসহনট্ঠেন পরিস্সযো, সরীরাবাধচিত্তৰিক্খেপকরো, অথ ৰা যথাৰুত্তো উতু চ সীহব্যগ্ঘাদিপাকটপরিস্সযো চ রাগদোসাদিপটিচ্ছন্নপরিস্সযো চ উতুপরিস্সযো, তস্স ৰিনোদনত্থঞ্চেৰ একীভাৰসুখত্থঞ্চ. ইদঞ্চ চীৰরপটিসেৰনে হিরিকোপীনপটিচ্ছাদনং ৰিয তস্স নিযতপযোজনন্তি পুন ‘‘যাৰদেৰা’’তি ৰুত্তং.

গিলানপচ্চযভেসজ্জপরিক্খারন্তি রোগস্স পচ্চনীকপ্পৰত্তিযা গিলানপচ্চযো, ততো এৰ ভিসক্কস্স অনুঞ্ঞাতৰত্থুতায ভেসজ্জং, জীৰিতস্স পরিৰারসম্ভারভাৰেহি পরিক্খারো চাতি গিলানপচ্চযভেসজ্জপরিক্খারো, তং. উপ্পন্নানন্তি জাতানং নিব্বত্তানং. ৰেয্যাবাধিকানন্তি ব্যাবাধতো ধাতুক্খোভতো চ তন্নিব্বত্তরোগতো চ জাতানং. ৰেদনানন্তি দুক্খৰেদনানং. অব্যাবজ্ঝপরমতাযাতি নিদ্দুক্খপরমভাৰায পটিসেৰামীতি যোজনা. এৰমেত্থ সঙ্খেপেনেৰ পাল়িৰণ্ণনা ৰেদিতব্বা. নৰৰেদনুপ্পাদনতোপীতি ন কেৰলং আযতিং এৰ ৰিপাকপরিল়াহা, অথ খো অতিভোজনপচ্চযা অলংসাটকাদীনং ৰিয নৰৰেদনুপ্পাদনতোপি ৰেদিতব্বাতি অত্থো.

পটিসেৰনাপহাতব্বআসৰৰণ্ণনা নিট্ঠিতা.

অধিৰাসনাপহাতব্বআসৰৰণ্ণনা

২৪. খমোতি ¶ খমনকো. কম্মট্ঠানিকস্স চলনং নাম কম্মট্ঠানপরিচ্চাগোতি আহ ‘‘চলতি কম্পতি কম্মট্ঠানং ৰিজহতী’’তি. অধিমত্তম্পি উণ্হং সহতি, সহন্তো চ ন নগ্গসমণাদযো ৰিয সহতি, অথ খো কম্মট্ঠানাৰিজহনেনাতি আহ ‘‘স্ৰেৰ থেরো ৰিযা’’তি. বহিচঙ্কমেতি লেণতো বহি চঙ্কমে. উণ্হভযেনেৰাতি নরকগ্গিউণ্হভযেনেৰ. তেনাহ ‘‘অৰীচিমহানিরযং পচ্চৰেক্খিত্ৰা’’তি, তম্পি ‘‘মযা অনেকক্খত্তুং অনুভূতং, ইদং পন ততো মুদুতর’’ন্তি ¶ এৰং পচ্চৰেক্খিত্ৰা. এত্থাতি এতস্মিং ঠানে. অগ্গিসন্তাপোৰ ৰেদিতব্বো সূরিযসন্তাপস্স পরতো ৰুচ্চমানত্তা.

পরিসুদ্ধসীলোহমস্মীতি সব্বথাপি ‘‘ৰিসুদ্ধসীলোহমস্মী’’তি মরণং অগ্গহেত্ৰা অৰিপ্পটিসারমূলিকং পীতিং উপ্পাদেসি. সহ পীতুপ্পাদাতি ফরণপীতিযা উপ্পাদেন সহেৰ. ৰিসং নিৰত্তিত্ৰাতি পীতিৰেগেন অজ্ঝোত্থতং দট্ঠমুখেনেৰ ভস্সিত্ৰা. তত্থেৰাতি সপ্পেন দট্ঠট্ঠানেযেৰ. চিত্তেকগ্গতং লভিত্ৰাতি ‘‘পীতিমনস্স কাযো পস্সম্ভতী’’তিআদিনা (দী. নি. ১.৪৬৬; ৩.৩৫৯; সং. নি. ৫.৩৭৬; অ. নি. ৩.৯৬; ১১.১২) নযেন সমাধানং পাপুণিত্ৰা.

পচ্চযেসু সন্তোসো ভাৰনায চ আরমিতব্বট্ঠানতায আরামো অস্সাতি পচ্চযসন্তোসভাৰনারামো, তস্স ভাৰো পচ্চয…পে… রামতা, তায. মহাথেরোতি ৰুড্ঢতরো থেরো. ৰচনমেৰ তদত্থং ঞাপেতুকামানং পথোতি ৰচনপথো.

অসুখট্ঠেন ৰা তিব্বা. যঞ্হি ন সুখং, তং অনিট্ঠং ‘‘তিব্ব’’ন্তি ৰুচ্চতি. এৰংসভাৰোতি ‘‘অধিৰাসনজাতিযো’’তি পদস্স অত্থমাহ. মুহুত্তেন খণেৰ ৰাতে হদযং ফালেতুং আরদ্ধেযেৰ. অনাগামী হুত্ৰা পরিনিব্বাযীতি অরহত্তং পত্ৰা পরিনিব্বাযি.

এৰং সব্বত্থাতি ‘‘উণ্হেন ফুট্ঠস্স সীতং পত্থযতো’’তিআদিনা সব্বত্থ উণ্হাদিনিমিত্তং কামাসৰুপ্পত্তি ৰেদিতব্বা, সীতং ৰা উণ্হং ৰা অনিট্ঠন্তি অধিপ্পাযো. অত্তগ্গাহে সতি অত্তনিযগ্গাহোতি আহ ‘‘ময্হং সীতং উণ্হন্তি গাহো দিট্ঠাসৰো’’তি. সীতাদিকে উপগতে সহন্তী খমন্তী তে অত্তনো উপরি ৰাসেন্তী ৰিয হোতীতি ৰুত্তং ‘‘আরোপেত্ৰা ৰাসেতিযেৰা’’তি ¶ . ন নিরস্সতীতি ন ৰিধুনতি. যো হি সীতাদিকে ন সহতি, সো তে নিরস্সন্তো ৰিধুনন্তো ৰিয হোতীতি.

অধিৰাসনাপহাতব্বআসৰৰণ্ণনা নিট্ঠিতা.

পরিৰজ্জনাপহাতব্বআসৰৰণ্ণনা

২৫. অহং ¶ সমণোতি (অ. নি. টী. ৩.৬.৫৮) ‘‘অহং সমণো, কিং মম জীৰিতেন ৰা মরণেন ৰা’’তি এৰং অচিন্তেত্ৰাতি অধিপ্পাযো. পচ্চৰেক্খিত্ৰাতি গামপ্পদেসং পযোজনাদিঞ্চ পচ্চৰেক্খিত্ৰা. পটিক্কমতীতি হত্থিআদীনং সমীপগমনতো অপক্কমতি. কণ্টকা যত্থ তিট্ঠন্তি, তং কণ্টকট্ঠানং. অমনুস্সদুট্ঠানীতি অমনুস্সসঞ্চারেন দূসিতানি, সপরিস্সযানীতি অত্থো. সমানন্তি সমং, অৰিসমন্তি অত্থো. অকাসি ৰা তাদিসং অনাচারং.

সীলসংৰরসঙ্খাতেনাতি ‘‘কথং পরিৰজ্জনং সীল’’ন্তি যদেত্থ ৰত্তব্বং, তং হেট্ঠা ৰুত্তমেৰ. অপিচ ‘‘চণ্ডং হত্থিং পরিৰজ্জেতী’’তি ৰচনতো হত্থিআদিপরিৰজ্জনম্পি ভগৰতো ৰচনানুট্ঠানন্তি কত্ৰা আচারসীলমেৰাতি ৰেদিতব্বং.

পরিৰজ্জনাপহাতব্বআসৰৰণ্ণনা নিট্ঠিতা.

ৰিনোদনাপহাতব্বআসৰৰণ্ণনা

২৬. ইতিপীতি ইমিনা কারণেন, অযোনিসোমনসিকারসমুট্ঠিতত্তাপি লোভাদিসহগতত্তাপি কুসলপটিপক্খতোপীতিআদীহি কারণেহি অযং ৰিতক্কো অকুসলোতি অত্থো. ইমিনা নযেন সাৰজ্জোতিআদীসুপি অত্থো ৰেদিতব্বো. এত্থ চ অকুসলোতিআদিনা দিট্ঠধম্মিকং কামৰিতক্কস্স আদীনৰং দস্সেতি, দুক্খৰিপাকোতি ইমিনা সম্পরাযিকং. অত্তব্যাবাধায সংৰত্ততীতিআদীসুপি ইমিনাৰ নযেন আদীনৰৰিভাৰনা ৰেদিতব্বা. উপ্পন্নস্স কামৰিতক্কস্স অনধিৰাসনং নাম পুন তাদিসস্স অনুপ্পাদনং, তং পনস্স পহানং ৰিনোদনং ব্যন্তিকরণং অনভাৰগমনন্তি ¶ চ ৰত্তুং ৰট্টতীতি পাল়িযং ‘‘উপ্পন্নং কামৰিতক্কং নাধিৰাসেতী’’তি ৰত্ৰা ‘‘পজহতী’’তিআদি ৰুত্তন্তি তমত্থং দস্সেন্তো ‘‘অনধিৰাসেন্তো কিং করোতীতি পজহতী’’তিআদিমাহ. পহানঞ্চেত্থ ৰিক্খম্ভনমেৰ, ন সমুচ্ছেদোতি দস্সেতুং ‘‘ৰিনোদেতী’’তিআদি ৰুত্তন্তি ৰিক্খম্ভনৰসেনেৰ অত্থো দস্সিতো.

কামৰিতক্কোতি সম্পযোগতো আরম্মণতো চ কামসহগতো ৰিতক্কো. তেনাহ ‘‘কামপটিসংযুত্তো ¶ তক্কো’’তিআদি. কামপটিসংযুত্তোতি হি কামরাগসঙ্খাতেন কামেন সম্পযুত্তো ৰত্থুকামসঙ্খাতেন পটিবদ্ধো চ. উপ্পন্নুপ্পন্নেতি তেসং পাপৰিতক্কানং উপ্পাদাৰত্থাগহণং ৰা কতং সিযা অনৰসেসগ্গহণং ৰা. তেসু পঠমং সন্ধাযাহ ‘‘উপন্নমত্তে’’তি, সম্পতিজাতেতি অত্থো. অনৰসেসগ্গহণং ব্যাপনিচ্ছায হোতীতি দস্সেতুং ‘‘সতক্খত্তুম্পি উপ্পন্নে’’তি ৰুত্তং. ঞাতিৰিতক্কোতি ‘‘অম্হাকং ঞাতযো সুখজীৰিনো সম্পত্তিযুত্তা’’তিআদিনা গেহস্সিতপেমৰসেন ঞাতকে আরব্ভ উপ্পন্নৰিতক্কো. জনপদৰিতক্কোতি ‘‘অম্হাকং জনপদো সুভিক্খো সম্পন্নসস্সো রমণীযো’’তিআদিনা গেহস্সিতপেমৰসেনেৰ জনপদং আরব্ভ উপ্পন্নৰিতক্কো. উক্কুটিকপ্পধানাদীহি দুক্খে নিজ্জিণ্ণে সম্পরাযে অত্তা সুখী হোতি অমরোতি দুক্করকারিকায পটিসংযুত্তো অমরত্থায ৰিতক্কো, তং ৰা আরব্ভ অমরাৰিক্খেপদিট্ঠিসহগতো অমরো চ সো ৰিতক্কো চাতি অমরৰিতক্কো. পরানুদ্দযতাপটিসংযুত্তোতি পরেসু উপট্ঠাকাদীসু সহনন্দিকাদিৰসেন পৰত্তো অনুদ্দযতাপতিরূপকো গেহস্সিতপেমেন পটিসংযুত্তো ৰিতক্কো. লাভসক্কারসিলোকপটিসংযুত্তোতি চীৰরাদিলাভেন চেৰ সক্কারেন চ কিত্তিসদ্দেন চ আরম্মণকরণৰসেন পটিসংযুত্তো. অনৰঞ্ঞত্তিপটিসংযুত্তোতি ‘‘অহো ৰত মং পরে ন অৰজানেয্যুং, ন হেট্ঠা কত্ৰা মঞ্ঞেয্যুং, পাসাণচ্ছত্তং ৰিয গরুং করেয্যু’’ন্তি উপ্পন্নৰিতক্কো.

কামৰিতক্কো কামসঙ্কপ্পনসভাৰত্তা কামসঙ্কপ্পপৰত্তিযা সাতিসযত্তা চ কামনাকারোতি আহ ‘‘কামৰিতক্কো পনেত্থ কামাসৰো’’তি. তব্বিসেসোতি কামাসৰৰিসেসো, রাগসহৰুত্তীতি অধিপ্পাযো. কামৰিতক্কাদিকে ৰিনোদেতি অত্তনো সন্তানতো ¶ নীহরতি এতেনাতি ৰিনোদনং, ৰীরিযন্তি আহ ‘‘ৰীরিযসংৰরসঙ্খাতেন ৰিনোদনেনা’’তি.

ৰিনোদনাপহাতব্বআসৰৰণ্ণনা নিট্ঠিতা.

ভাৰনাপহাতব্বআসৰৰণ্ণনা

২৭. ‘‘সত্ত বোজ্ঝঙ্গা ভাৰিতা বহুলীকতা ৰিজ্জাৰিমুত্তিযো পরিপূরেন্তী’’তি (সং. নি. ৫.১৮৭) ৰচনতো ৰিজ্জাৰিমুত্তীনং অনধিগমো ততো চ সকলৰট্টদুক্খানতিৰত্তি অভাৰনায আদীনৰো, ৰুত্তৰিপরিযাযেন ভগৰতো ওরসপুত্তভাৰাদিৰসেন চ ভাৰনায আনিসংসো ৰেদিতব্বো. উপরিমগ্গত্তযসমযসম্ভূতাতি দুতিযাদিমগ্গক্খণে জাতা, ভাৰনাধিকারতো দুতিযমগ্গাদিপরিযাপন্নাতি অত্থো. ননু চ তে লোকুত্তরা এৰ, কস্মা ৰিসেসনং ¶ কতন্তি? নযিদং ৰিসেসনং, ৰিসেসিতব্বং পনেতং, লোকুত্তরবোজ্ঝঙ্গা এৰ অধিপ্পেতা, তে চ খো উপরিমগ্গত্তযসমযসম্ভূতাতি. বোজ্ঝঙ্গেসু অসম্মোহত্থন্তি ৰিপস্সনাঝানমগ্গফলবোজ্ঝঙ্গেসু সম্মোহাভাৰত্থং. মিস্সকনযেন হি বোজ্ঝঙ্গেসু ৰুচ্চমানেসু তদঙ্গাদিৰিৰেকদস্সনৰসেন ৰিপস্সনাবোজ্ঝঙ্গাদযো ৰিভজিত্ৰা ৰুচ্চন্তি, ন নিব্বত্তিতলোকুত্তরবোজ্ঝঙ্গা এৰাতি বোজ্ঝঙ্গেসু সম্মোহো ন হোতি বোজ্ঝঙ্গভাৰনাপটিপত্তিযা চ সম্মদেৰ পকাসিতত্তা. ইধ পনাতি ইমস্মিং সুত্তে, ইমস্মিং ৰা অধিকারে. লোকুত্তরনযো এৰ গহেতব্বো ভাৰনামগ্গস্স অধিকতত্তা.

আদিপদানন্তি (অ. নি. টী. ১.১.৪১৮) ‘‘সতিসম্বোজ্ঝঙ্গ’’ন্তি এৰমাদীনং তস্মিং তস্মিং ৰাক্যে আদিভূতানং পদানং. অত্থতোতি ৰিসেসৰসেন সামঞ্ঞৰসেন চ পদত্থতো. লক্খণাদীহীতি লক্খণরসপচ্চুপট্ঠানতো. কমতোতি অনুপুব্বিতো. অনূনাধিকতোতি তাৰত্তকতো. ৰিভাৰিনাতি ৰিঞ্ঞুনা.

সতিসম্বোজ্ঝঙ্গেতি সতিসম্বোজ্ঝঙ্গপদে. সরণট্ঠেনাতি অনুস্সরণট্ঠেন. চিরকতাদিভেদং আরম্মণং উপগন্ত্ৰা ঠানং, অনিস্সজ্জনং ৰা উপট্ঠানং. উদকে অলাবু ৰিয পিলৰিত্ৰা গন্তুং অদত্ৰা পাসাণস্স ৰিয নিচ্চলস্স আরম্মণস্স ঠপনং সারণং অসম্মুট্ঠতাকরণং অপিলাপনং. ৰুত্তম্পি ¶ হেতং মিলিন্দপঞ্হে. ভণ্ডাগারিকোতি ভণ্ডগোপকো. অপিলাপে করোতি অপিলাপেতি. থেরেনাতি নাগসেনত্থেরেন. সম্মোসপচ্চনীকং কিচ্চং অসম্মোসো, ন সম্মোসাভাৰমত্তং. গোচরাভিমুখভাৰপচ্চুপট্ঠানাতি কাযাদিআরম্মণাভিমুখভাৰপচ্চুপট্ঠানা.

বোধিযা ধম্মসামগ্গিযা, অঙ্গো অৰযৰো, বোধিস্স ৰা অরিযসাৰকস্স অঙ্গো কারণং. পতিট্ঠানাযূহনা ওঘতরণসুত্তৰণ্ণনাযং (সং. নি. অট্ঠ. ১.১.১) –

‘‘কিলেসৰসেন পতিট্ঠানং, অভিসঙ্খারৰসেন আযূহনা. তণ্হাদিট্ঠীহি পতিট্ঠানং, অৰসেসকিলেসাভিসঙ্খারেহি আযূহনা. তণ্হাৰসেন পতিট্ঠানং, দিট্ঠিৰসেন আযূহনা. সস্সতদিট্ঠিযা পতিট্ঠানং, উচ্ছেদদিট্ঠিযা আযূহনা. লীনৰসেন পতিট্ঠানং, উদ্ধচ্চৰসেন আযূহনা. কামসুখানুযোগৰসেন পতিট্ঠানং, অত্তকিলমথানুযোগৰসেন আযূহনা. সব্বাকুসলাভিসঙ্খারৰসেন পতিট্ঠানং, সব্বলোকিযকুসলাভিসঙ্খারৰসেন আযূহনা’’তি –

ৰুত্তেসু পকারেসু ইধ অৰুত্তানং ৰসেন ৰেদিতব্বা. যা হি অযং বোধীতি ৰুচ্চতীতি যোজেতব্বং ¶ . ‘‘বুজ্ঝতী’’তি পদস্স পটিবুজ্ঝতীতি অত্থোতি আহ ‘‘কিলেসসন্তাননিদ্দায উট্ঠহতী’’তি. তং পন পটিবুজ্ঝনং অত্থতো চতুন্নং সচ্চানং পটিৰেধো, নিব্বানস্সেৰ ৰা সচ্ছিকিরিযাতি আহ ‘‘চত্তারী’’তিআদি. ঝানঙ্গমগ্গঙ্গাদযো ৰিযাতি যথা অঙ্গানি এৰ ঝানমগ্গা, ন অঙ্গৰিনিমুত্তা, এৰমিধাপীতি অত্থো. সেনঙ্গরথঙ্গাদযো ৰিযাতি এতেন পুগ্গলপঞ্ঞত্তিযা অৰিজ্জমানপঞ্ঞত্তিভাৰং দস্সেতি.

বোধায সংৰত্তন্তীতি বোজ্ঝঙ্গাতি ইদং কারণত্থো অঙ্গ-সদ্দোতি কত্ৰা ৰুত্তং. বুজ্ঝন্তীতি বোধিযো, বোধিযো এৰ অঙ্গাতি বোজ্ঝঙ্গাতি ৰুত্তং ‘‘বুজ্ঝন্তীতি বোজ্ঝঙ্গা’’তি. অনুবুজ্ঝন্তীতি ৰিপস্সনাদীনং কারণানং বুজ্ঝিতব্বানঞ্চ সচ্চানং অনুরূপং বুজ্ঝন্তি. পটিবুজ্ঝন্তীতি কিলেসনিদ্দায উট্ঠহনতো পচ্চক্খভাৰেন ৰা পটিমুখং বুজ্ঝন্তি. সম্বুজ্ঝন্তীতি অৰিপরীতভাৰেন সম্মা চ বুজ্ঝন্তি. এৰং উপসগ্গানং অত্থৰিসেসদীপনতা দট্ঠব্বা. বোধি-সদ্দো হি সব্বৰিসেসযুত্তং বুজ্ঝনং সামঞ্ঞেন গহেত্ৰা ঠিতো.

ৰিচিনাতীতি ¶ ‘‘তযিদং দুক্খ’’ন্তিআদিনা ৰীমংসতি. ওভাসনং ধম্মানং যথাভূতসভাৰপটিচ্ছাদকস্স সম্মোহস্স ৰিদ্ধংসনং যথা আলোকো অন্ধকারস্স. যস্মিং ধম্মে সতি ৰীরো নাম হোতি, সো ধম্মো ৰীরভাৰো. ঈরযিতব্বতোতি পৰত্তেতব্বতো. কোসজ্জপক্খতো পতিতুং অপ্পদানৰসেন সম্পযুত্তানং পগ্গণ্হনং পগ্গহো. উপত্থম্ভনং অনুবলপ্পদানং. ওসীদনং লযাপত্তি, তপ্পটিপক্খতো অনোসীদনং দট্ঠব্বং. পীণযতীতি তপ্পেতি ৰড্ঢেতি ৰা. ফরণং পণীতরূপেহি কাযস্স ব্যাপনং. তুট্ঠি নাম পীতি. উদগ্গভাৰো ওদগ্যং, কাযচিত্তানং উক্খিপনন্তি অত্থো. কাযচিত্তদরথপস্সম্ভনতোতি কাযদরথস্স চিত্তদরথস্স চ পস্সম্ভনতো ৰূপসমনতো. কাযোতি চেত্থ ৰেদনাদযো তযো খন্ধা. দরথো সারম্ভো, দুক্খদোমনস্সপচ্চযানং উদ্ধচ্চাদিকিলেসানং, তপ্পধানানং ৰা চতুন্নং খন্ধানং অধিৰচনং. উদ্ধচ্চাদিকিলেসপটিপক্খভাৰো দট্ঠব্বো, এৰঞ্চেত্থ পস্সদ্ধিযা অপরিপ্ফন্দনসীতিভাৰো দট্ঠব্বো অসারদ্ধভাৰতো. তেনাহ ভগৰা ‘‘পস্সদ্ধো কাযো অসারদ্ধো’’তি (ম. নি. ১.৫২).

সমাধানতোতি সম্মা চিত্তস্স আধানতো ঠপনতো. অৰিক্খেপো সম্পযুত্তানং অৰিক্খিত্ততা, যেন সসম্পযুত্তা ধম্মা অৰিক্খিত্তা হোন্তি, সো ধম্মো অৰিক্খেপোতি. অৰিসারো অত্তনো এৰ অৰিসরণসভাৰো. সম্পিণ্ডনং সম্পযুত্তানং অৰিপ্পকিণ্ণভাৰাপাদনং ন্হানীযচুণ্ণানং উদকং ৰিয. চিত্তট্ঠিতিপচ্চুপট্ঠানোতি ‘‘চিত্তস্স ঠিতী’’তি (ধ. স. ১১) ৰচনতো চিত্তস্স পবন্ধঠিতিপচ্চুপট্ঠানো. অজ্ঝুপেক্খনতোতি উদাসীনভাৰতো. সাতি বোজ্ঝঙ্গউপেক্খা ¶ . সমপ্পৰত্তে ধম্মে পটিসঞ্চিক্খতি উপপত্তিতো ইক্খতি তদাকারা হুত্ৰা পৰত্ততীতি পটিসঙ্খানলক্খণা, এৰঞ্চ কত্ৰা ‘‘পটিসঙ্খা সন্তিট্ঠনা গহণে মজ্ঝত্ততা’’তি উপেক্খাকিচ্চাধিমত্ততায সঙ্খারুপেক্খা ৰুত্তা. সম্পযুত্তধম্মানং যথাসককিচ্চকরণৰসেন সমং পৰত্তনপচ্চযতা সমৰাহিতা. অলীনানুদ্ধতপ্পৰত্তিপচ্চযতা ঊনাধিকতানিৰারণং. সম্পযুত্তানং অসমপ্পৰত্তিহেতুকপক্খপাতং উপচ্ছিন্দন্তী ৰিয হোতীতি ৰুত্তং ‘‘পক্খপাতুপচ্ছেদরসা’’তি. অজ্ঝুপেক্খনমেৰ মজ্ঝত্তভাৰো.

সব্বস্মিং লীনপক্খে উদ্ধচ্চপক্খে চ অত্থিকা পত্থনীযা ইচ্ছিতব্বাতি সব্বত্থিকা, তং সব্বত্থিকং. সমানক্খণপৰত্তীসু সত্তসুপি সম্বোজ্ঝঙ্গেসু ৰাচায ¶ কমপ্পৰত্তিতো পটিপাটিযা ৰত্তব্বেসু যং কিঞ্চি পঠমং অৰত্ৰা সতিসম্বোজ্ঝঙ্গস্সেৰ পঠমং ৰচনস্স কারণং সব্বেসং উপকারকত্তন্তি ৰুত্তং ‘‘সব্বেস’’ন্তিআদি. সব্বেসন্তি চ লীনুদ্ধচ্চপক্খিকানং, অঞ্ঞথা সব্বেপি সব্বেসং পচ্চযাতি.

‘‘কস্মা সত্তেৰ বোজ্ঝঙ্গা ৰুত্তা’’তি চোদকো সদ্ধালোভাদীনম্পি বোজ্ঝঙ্গভাৰং আসঙ্কতি, ইতরো সতিআদীনংযেৰ ভাৰনায উপকারতং দস্সেন্তো ‘‘লীনুদ্ধচ্চপটিপক্খতো সব্বত্থিকতো চা’’তিআদিমাহ. তত্থ লীনস্সাতি অতিসিথিলৰীরিযতাদীহি ভাৰনাৰীথিং অনোতরিত্ৰা সংকুটিতস্স চিত্তস্স. তদা হি পস্সদ্ধিসমাধিউপেক্খাসম্বোজ্ঝঙ্গা ন ভাৰেতব্বা. তঞ্হি এতেহি অল্লতিণাদীহি ৰিয পরিত্তো অগ্গি দুস্সমুট্ঠাপিযং হোতীতি. তেনাহ ভগৰা ‘‘সেয্যথাপি, ভিক্খৰে, পুরিসো পরিত্তং অগ্গিং উজ্জালেতুকামো অস্স, সো তত্থ অল্লানি চেৰ তিণানি পক্খিপেয্যা’’তিআদি (সং. নি. ৫.২৩৪). ধম্মৰিচযৰীরিযপীতিসম্বোজ্ঝঙ্গা পন ভাৰেতব্বা, সুক্খতিণাদীহি ৰিয পরিত্তো অগ্গি লীনং চিত্তং এতেহি সুসমুট্ঠাপিযং হোতীতি. তেন ৰুত্তং ‘‘যস্মিঞ্চ খো’’তিআদি. তত্থ যথাসকং আহারৰসেন ধম্মৰিচযসম্বোজ্ঝঙ্গাদীনং ভাৰনা ৰেদিতব্বা. ৰুত্তঞ্হেতং ‘‘অত্থি, ভিক্খৰে, কুসলাকুসলা ধম্মা…পে… পীতিসম্বোজ্ঝঙ্গস্স ভিয্যোভাৰায…পে… সংৰত্ততী’’তি (সং. নি. ৫.২৩২). তত্থ সভাৰসামঞ্ঞলক্খণপটিৰেধৰসেন পৰত্তমনসিকারো…পে… ধম্মৰিচযসম্বোজ্ঝঙ্গাদযো ভাৰেতি নাম.

উদ্ধচ্চস্সাতি চিত্তস্স অচ্চারদ্ধৰীরিযতাদীহি সীতিভাৰপতিট্ঠিতভাৰং অনোতিণ্ণতায, তদা ধম্মৰিচযৰীরিযপীতিসম্বোজ্ঝঙ্গা ন ভাৰেতব্বা. তঞ্হি এতেহি সুক্খতিণাদীহি ৰিয অগ্গিক্খন্ধো দুৰূপসমযং হোতি. তেনাহ ভগৰা ‘‘সেয্যথাপি, ভিক্খৰে, পুরিসো মহন্তং অগ্গিক্খন্ধং ¶ নিব্বাপেতুকামো অস্স, সো তত্থ সুক্খানি চেৰ তিণানি পক্খিপেয্যা’’তিআদি (সং. নি. ৫.২৩৪). পস্সদ্ধিসমাধিউপেক্খাসম্বোজ্ঝঙ্গা পন ভাৰেতব্বা, অল্লতিণাদীহি ৰিয অগ্গিক্খন্ধো উদ্ধতং চিত্তং এতেহি সুৰূপসমযং হোতি. তেন ৰুত্তং ‘‘যস্মিঞ্চ খো’’তিআদি. এত্থাপি যথাসকং আহারৰসেন পস্সদ্ধিসম্বোজ্ঝঙ্গাদীনং ভাৰনা ৰেদিতব্বা. ৰুত্তঞ্হেতং ‘‘অত্থি, ভিক্খৰে, কাযপস্সদ্ধি ¶ চিত্তপস্সদ্ধি…পে… উপেক্খাসম্বোজ্ঝঙ্গস্স ভিয্যোভাৰায সংৰত্ততী’’তি (সং. নি. ৫.২৩২). তত্থ যথাস্স পস্সদ্ধিআদযো উপ্পন্নপুব্বা, তং আকারং সল্লক্খেত্ৰা তেসং উপ্পাদনৰসেন তথা মনসিকরোন্তোৰ পস্সদ্ধিসম্বোজ্ঝঙ্গাদযো ভাৰেতি নাম. সতিসম্বোজ্ঝঙ্গো পন সব্বত্থ বহূপকারো. সো হি চিত্তং লীনপক্খিকানং পস্সদ্ধিআদীনং ৰসেন লযাপত্তিতো, উদ্ধচ্চপক্খিকানঞ্চ ধম্মৰিচযাদীনং ৰসেন উদ্ধচ্চপাততো রক্খতি, তস্মা সো লোণধূপনং ৰিয সব্বব্যঞ্জনেসু সব্বকম্মিকঅমচ্চো ৰিয চ রাজকিচ্চেসু সব্বত্থ ইচ্ছিতব্বো. তেনাহ ‘‘সতিঞ্চ খ্ৰাহং, ভিক্খৰে, সব্বত্থিকং ৰদামী’’তি (সং. নি. ৫.২৩৪).

ঞত্ৰা ঞাতব্বাতি (সং. নি. টী. ১.১.১২৯) সম্বন্ধো. ৰড্ঢি নাম ৰেপুল্লং ভিয্যোভাৰো পুনপ্পুনং উপ্পাদো এৰাতি আহ ‘‘পুনপ্পুনং জনেতী’’তি. অভিৰুদ্ধিং পাপেন্তো নিব্বত্তেতি. ৰিৰিত্ততাতি ৰিৰিত্তভাৰো. যো হি ৰিৰেচনীযতো ৰিৰিচ্চতি, যং ৰিৰিচ্চিত্ৰা ঠিতং, তদুভযং ইধ ৰিৰিত্তভাৰসামঞ্ঞেন ‘‘ৰিৰিত্ততা’’তি ৰুত্তং. তেসু পুরিমো ৰিৰেচনীযতো ৰিৰিচ্চমানতায ৰিৰেকসঙ্খাতায ৰিৰিচ্চনকিরিযায সমঙ্গী ধম্মসমূহো তায এৰ ৰিৰিচ্চনকিরিযায ৰসেন ৰিৰেকোতি গহিতো. ইতরো সব্বসো ততো ততো ৰিৰিত্তসভাৰতায. তত্থ যস্মিং ধম্মপুঞ্জে সতিসম্বোজ্ঝঙ্গো ৰিৰিচ্চনকিরিযায পৰত্ততি, তং যথাৰুত্তায ৰিৰিচ্চমানতায ৰিৰেকসঙ্খাতং নিস্সাযেৰ পৰত্ততি, ইতরং পন তন্নিন্নতাতদারম্মণতাহীতি ৰুত্তং ‘‘ৰিৰেকে নিস্সিত’’ন্তি. যথা ৰা ৰিৰেকৰসেন পৰত্তং ঝানং ‘‘ৰিৰেকজ’’ন্তি ৰুত্তং, এৰং ৰিৰেকৰসেন পৰত্তো বোজ্ঝঙ্গো ‘‘ৰিৰেকনিস্সিতো’’তি দট্ঠব্বো. নিস্সযট্ঠো চ ৰিপস্সনামগ্গানং ৰসেন মগ্গফলানং ৰেদিতব্বো. অসতিপি পুব্বাপরভাৰে ‘‘পটিচ্চসমুপ্পাদা’’তি এত্থ পচ্চযানং সমুপ্পাদনং ৰিয অভিন্নধম্মাধারা নিস্সযনভাৰনা সম্ভৰন্তীতি. অযমেৰাতি ৰিৰেকো এৰ. ৰিৰেকো হি পহানৰিনযৰিরাগনিরোধা চ সমানত্থা.

তদঙ্গসমুচ্ছেদনিস্সরণৰিৰেকনিস্সিততং ৰত্ৰা পটিপস্সদ্ধিৰিৰেকনিস্সিততায অৰচনং ‘‘সতিসম্বোজ্ঝঙ্গং ভাৰেতী’’তিআদিনা ভাৰেতব্বানং বোজ্ঝঙ্গানং ইধ ৰুত্তত্তা. ভাৰিতব্বোজ্ঝঙ্গস্স হি যে সচ্ছিকাতব্বা ফলবোজ্ঝঙ্গা, তেসং কিচ্চং পটিপস্সদ্ধিৰিৰেকো. অজ্ঝাসযতোতি ¶ ‘‘নিব্বানং সচ্ছিকরিস্সামী’’তি মহন্তঅজ্ঝাসযতো. যদিপি ৰিপস্সনাক্খণে সঙ্খারারম্মণং ¶ চিত্তং, সঙ্খারেসু পন আদীনৰং সুট্ঠু দিস্ৰা তপ্পটিপক্খে নিব্বানে অধিমুত্ততায অজ্ঝাসযতো নিস্সরণৰিৰেকনিস্সিততা দাহাভিভূতস্স পুগ্গলস্স সীতনিন্নচিতত্তা ৰিয. ন পটিসিদ্ধা ৰিপস্সনাপাদকেসু কসিণারম্মণাদিঝানেসু সতিআদীনং নিব্বেধভাগিযত্তা. অনুদ্ধরন্তা পন ৰিপস্সনা ৰিয বোধিযা মগ্গস্স আসন্নকারণং ঝানং ন হোতি, নাপি তথা একন্তিকং কারণং, ন চ ৰিপস্সনাকিচ্চস্স ৰিয ঝানকিচ্চস্স নিট্ঠানং মগ্গোতি কত্ৰা ন উদ্ধরন্তি. এত্থ চ কসিণগ্গহণেন তদাযত্তানি আরুপ্পানিপি গহিতানীতি দট্ঠব্বানি. তানিপি হি ৰিপস্সনাপাদকানি নিব্বেধভাগিযানি চ হোন্তীতি ৰত্তুং ৰট্টতি তন্নিন্নভাৰসব্ভাৰতো. যদগ্গেন হি নিব্বাননিন্নতা, তদগ্গেন ফলনিন্নতাপি সিযা. ‘‘কুদাস্সু নামাহং তদাযতনং উপসম্পজ্জ ৰিহরেয্য’’ন্তি (ম. নি. ১.৪৬৫) আদিৰচনম্পেতস্স অত্থস্স সাধকং.

ৰোস্সগ্গ-সদ্দো পরিচ্চাগত্থো পক্খন্দনত্থো চাতি ৰোস্সগ্গস্স দুৰিধতা ৰুত্তা. ৰোস্সজ্জনঞ্হি পহানং, ৰিস্সট্ঠভাৰেন নিরাসঙ্কপৰতি চ, তস্মা ৰিপস্সনাক্খণে তদঙ্গৰসেন, মগ্গক্খণে সমুচ্ছেদৰসেন পটিপক্খস্স পহানং ৰোস্সগ্গো, তথা ৰিপস্সনাক্খণে তন্নিন্নভাৰেন, মগ্গক্খণে আরম্মণকরণেন ৰিস্সট্ঠসভাৰতো ৰোস্সগ্গোতি ৰেদিতব্বং. যথাৰুত্তেন পকারেনাতি তদঙ্গসমুচ্ছেদপকারেন তন্নিন্নতদারম্মণকরণপকারেন চ. পুব্বে ৰোস্সগ্গ-পদস্সেৰ অত্থস্স ৰুত্তত্তা আহ ‘‘সকলেন ৰচনেনা’’তি. পরিণমন্তং ৰিপস্সনাক্খণে, পরিণতং মগ্গক্খণে. পরিণামো নাম পরিপাকোতি আহ ‘‘পরিপচ্চন্তং পরিপক্কঞ্চা’’তি. পরিপাকো চ আসেৰনলাভেন আহিতসামত্থিযস্স কিলেসস্স পরিচ্চজিতুং নিব্বানঞ্চ পক্খন্দিতুং তিক্খৰিসদসভাৰো. তেনাহ ‘‘অযঞ্হী’’তিআদি. এস নযোতি য্ৰাযং ‘‘তদঙ্গৰিৰেকনিস্সিত’’ন্তিআদিনা সতিসম্বোজ্ঝঙ্গে ৰুত্তো, সেসেসু ধম্মৰিচযসম্বোজ্ঝঙ্গাদীসুপি এস নযোতি এৰং তত্থ নেতব্বন্তি অত্থো.

এৰং আদিকম্মিকানং বোজ্ঝঙ্গেসু অসম্মোহত্থং মিস্সকনযং ৰত্ৰা ইদানি নিব্বত্তিতলোকুত্তরবোজ্ঝঙ্গৰসেন অত্থং ৰিভাৰেতুং ‘‘ইধ পনা’’তিআদি ৰুত্তং. ইধ পনাতি ইমস্মিং সব্বাসৰসুত্তন্তে. মগ্গো এৰ ৰোস্সগ্গৰিপরিণামী ভাৰনামগ্গস্স ইধ অধিপ্পেতত্তা. তঞ্চ খোতি সতিসম্বোজ্ঝঙ্গং. সমুচ্ছেদতোতি সমুচ্ছিন্দনতো.

দিট্ঠাসৰস্স ¶ পঠমমগ্গৰজ্ঝত্তা ‘‘তযো আসৰা’’তি ৰুত্তং. তেপি অনপাযগমনীযা এৰ ৰেদিতব্বা ¶ অপাযগমনীযানং দস্সনেনেৰ পহীনত্তা. সতিপি সম্বোজ্ঝঙ্গানং যেভুয্যেন মগ্গভাৰে তত্থ তত্থ সম্বোজ্ঝঙ্গসভাৰানং মগ্গধম্মানং ৰসেন ৰুত্তমগ্গত্তযসম্পযুত্তা বোজ্ঝঙ্গাতি পচ্চেকবোজ্ঝঙ্গে ‘‘বোজ্ঝঙ্গভাৰনাযা’’তি ইমিনা গণ্হন্তো ‘‘মগ্গত্তযসম্পযুত্তাযা’’তি আহ.

ভাৰনাপহাতব্বআসৰৰণ্ণনা নিট্ঠিতা.

২৮. থোমেন্তোতি আসৰপ্পহানস্স সুদুক্করত্তা তায এৰ দুক্করকিরিযায তং অভিত্থৰন্তো. অস্সাতি পহীনাসৰভিক্খুনো. আনিসংসন্তি তণ্হাচ্ছেদাদিদুক্খক্খযপরিযোসানং উদ্রযং. এতেহি পহানাদিসংকিত্তনেহি. উস্সুক্কং জনেন্তোতি এৰং ধম্মস্সামিনাপি অভিত্থৰনীযং মহানিসংসঞ্চ আসৰপ্পহানন্তি তত্থ আদরসহিতং উস্সাহং উপ্পাদেন্তো. দস্সনেনেৰ পহীনাতি দস্সনেন পহীনা এৰ. তেন ৰুত্তং ‘‘ন অপ্পহীনেসুযেৰ পহীনসঞ্ঞী’’তি.

সব্ব-সদ্দেন আসৰানং, আসৰসংৰরানঞ্চ সম্বন্ধৰসেন দুতিযপঠমৰিকপ্পানং ভেদো দট্ঠব্বো. দস্সনাভিসমযাতি পরিঞ্ঞাভিসমযা পরিঞ্ঞাকিচ্চসিদ্ধিযা. তেনাহ ‘‘কিচ্চৰসেনা’’তি, অসম্মোহপটিৰেধেনাতি অত্থো. সমুস্সযো কাযো, অত্তভাৰো ৰা.

অনৰজ্জপীতিসোমনস্সসহিতং চিত্তং ‘‘অত্তনো’’তি ৰত্তব্বতং অরহতি অত্থাৰহত্তা, ন তব্বিপরীতং অনত্থাৰহত্তাতি পীতিসম্পযুত্তচিত্ততং সন্ধাযাহ ‘‘অত্তমনাতি সকমনা’’তি. তেনাহ ‘‘তুট্ঠমনা’’তি. অত্তমনাতি ৰা পীতিসোমনস্সেহি গহিতমনা. যস্মা পন তেহি গহিততা সম্পযুত্ততাৰ, তস্মা ৰুত্তং ‘‘পীতিসোমনস্সেহি ৰা সম্পযুত্তমনা’’তি. যদেত্থ অত্থতো ন ৰিভত্তং, তং ৰুত্তনযত্তা সুৰিঞ্ঞেয্যত্তা চাতি ৰেদিতব্বং.

সব্বাসৰসুত্তৰণ্ণনায লীনত্থপ্পকাসনা সমত্তা.

৩. ধম্মদাযাদসুত্তৰণ্ণনা

২৯. তস্মা ¶ ¶ তং দস্সেত্ৰাতি যস্মা সুত্তন্তৰণ্ণনা সুত্তনিক্খেপং দস্সেত্ৰা ৰুচ্চমানা পাকটা হোতি, যস্মা চস্স ধম্মদাযাদসুত্তস্স অট্ঠুপ্পত্তিকো নিক্খেপো, তস্মা তং নিক্খেপং দস্সেত্ৰা, কথেত্ৰাতি অত্থো. লাভসক্কারেতি (সং. নি. টী. ২.২.৬৩) লাভসক্কারসঙ্খাতায অট্ঠুপ্পত্তিযাতি কেচি, লাভসক্কারে ৰা অট্ঠুপ্পত্তিযাতি অপরে. যা হি লাভসক্কারনিমিত্তং তদা ভিক্খূসু পচ্চযবাহুল্লিকতা জাতা, তং অট্ঠুপ্পত্তিং কত্ৰা ভগৰা ইমং দেসেসীতি. যমকমহামেঘোতি হেট্ঠাওলম্বনউপরিউগ্গমনৰসেন সতপটলো সহস্সপটলো যুগল়মহামেঘো. তিট্ঠন্তি চেৰ ভগৰতি কত্থচি নিবদ্ধৰাসং ৰসন্তে, চারিকং পন গচ্ছন্তে অনুবন্ধন্তি চ. ভিক্খূনম্পি যেভুয্যেন কপ্পসতসহস্সং ততো ভিয্যোপি পূরিতদানপারমিসঞ্চযত্তা তদা মহালাভসক্কারো উপ্পজ্জীতি ৰুত্তং ‘‘এৰং ভিক্খুসঙ্ঘস্সপী’’তি.

সক্কতোতি সক্কারপ্পতো. গরুকতোতি গরুকারপ্পত্তো. মানিতোতি বহুমতো মনসা পিযাযিতো চ. পূজিতোতি মালাদিপূজায চেৰ চতুপচ্চযাভিপূজায চ পূজিতো. অপচিতোতি অপচাযনপ্পত্তো. যস্স হি চত্তারো পচ্চযে সক্কত্ৰাপি অভিসঙ্খতে পণীতপণীতে উপনেন্তি, সো সক্কতো. যস্মিং গরুভাৰং পচ্চুপট্ঠপেত্ৰা তে দেন্তি, সো গরুকতো. যং মনসা পিযাযন্তি বহুমঞ্ঞন্তি চ, সো বহুমতো. যস্স সব্বমেতং পূজাৰসেন করোন্তি, সো পূজিতো. যস্স অভিৰাদনপচ্চুট্ঠানঞ্জলিকম্মাদিৰসেন পরমনিপচ্চকারং করোন্তি, সো অপচিতো. ভগৰতি ভিক্খুসঙ্ঘে চ লোকো এৰং পটিপন্নো. তেন ৰুত্তং ‘‘তেন খো পন…পে… পরিক্খারান’’ন্তি. লাভগ্গযসগ্গপত্তন্তি লাভস্স চ যসস্স চ অগ্গং উক্কংসং পত্তং.

পচ্চযা চীৰরাদযো গরুকাতব্বা এতেসন্তি পচ্চযগরুকা, আমিসচক্খুকাতি অত্থো. পচ্চযেসু গিদ্ধা গধিতা পচ্চযানং বহুলভাৰায পটিপন্নাতি পচ্চযবাহুলিকা. ভগৰতোপি পাকটা অহোসি পকতিচারিত্তৰসেনাতি অধিপ্পাযো অঞ্ঞথা অপাকটস্সেৰ অভাৰতো. ধম্মসভাৰচিন্তাৰসেন পৰত্তং সহোত্তপ্পঞাণং ধম্মসংৰেগো, ইধ ¶ পন সো ভিক্খূনং লাভগরুতাধম্মৰসেন ¶ ৰেদিতব্বো. সমণধম্মৰুত্তীতি সমণধম্মকরণং. সাতি ধম্মদাযাদদেসনা. পটিবিম্বদস্সনৰসেন সব্বকাযস্স দস্সনযোগ্গো আদাসোতি সব্বকাযিকআদাসো.

পিতু-দাযং, তেন দাতব্বং, ততো লদ্ধব্বং অরহভাৰেন আদিযন্তীতি দাযাদা, পুত্তা. তঞ্চ লোকে আমিসমেৰ, সাসনে পন ধম্মোপীতি তত্থ যং সাৰজ্জং অনিয্যানিকঞ্চ, তং পটিক্খিপিত্ৰা, যং নিয্যানিকং অনৰজ্জঞ্চ, তত্থ ভিক্খূ নিযোজেন্তো ভগৰা অৰোচ ‘‘ধম্মদাযাদা মে, ভিক্খৰে, ভৰথ, মা আমিসদাযাদা’’তি. ধম্মস্স মে দাযাদাতি মম ধম্মস্স ওগাহিনো, ধম্মভাগভাগিনোতি অত্থো. তথা হি ৰক্খতি ‘‘ধম্মকোট্ঠাসস্সেৰ সামিনো’’তি (ম. নি. অট্ঠ.১.২৯). নিব্বত্তিতধম্মোতি অসংকিলেসিকানুত্তরাদিভাৰেন ধম্মসামঞ্ঞতো নিদ্ধারিতধম্মো. পরিযাযেতি সভাৰতো পরিৰত্তেত্ৰা ঞাপেতি এতেনাতি পরিযাযো, লেসো, লেসকারণং ৰা. তদভাৰতো নিপ্পরিযাযধম্মো মগ্গপ্পত্তিযা অপাযপতনাদিতো অচ্চন্তমেৰ ৰারণতো. ইতরো ৰুত্তৰিপরিযাযতো পরিযাযধম্মো অচ্চন্তং অপাযদুক্খৰট্টদুক্খপাতনতো পরম্পরায ৰারণতো. যথা হি লোকিযং কুসলং দানসীলাদি ৰিৰট্টং উদ্দিস্স নিব্বত্তিতং, অযং তং অসম্পাদেন্তম্পি তং সম্পাপকস্স ধম্মস্স নিব্বত্তকারণভাৰপরিযাযেন পরিযাযধম্মো নাম হোতি, এৰং তং ৰট্টং উদ্দিস্স নিব্বত্তিতং, যং তণ্হাদীহি সৰিসেসং আমসিতব্বতো আমিসন্তি লোকে পাকটং অচ্ছাদনভোজনাদি, তস্স, তংসদিসস্স চ ফলৰিসেসস্স নিমিত্তভাৰপরিযাযেন পরিযাযামিসন্তি ৰুচ্চতীতি দস্সেন্তো আহ ‘‘যং পনিদং…পে… ইদং পরিযাযামিসং নামা’’তি.

‘‘সকলমেৰ হিদং, আনন্দ, ব্রহ্মচরিযস্স যদিদং কল্যাণমিত্ততা’’তি (সং. নি. ৫.২, ৩) আদিৰচনতো সাৰকেহি অধিগতোপি লোকুত্তরধম্মো সত্থুযেৰাতি ৰত্তব্বতং অরহতীতি ৰুত্তং ‘‘নিপ্পরিযাযধম্মোপি ভগৰতোযেৰ সন্তকো’’তি. সাৰকানঞ্হি ধম্মদিট্ঠিপচ্চযস্সপি যোনিসোমনসিকারস্স ৰিসেসপচ্চযো পরতোঘোসো চ তথাগতাধীনোতি তেহি পটিৰিদ্ধোপি ধম্মো ধম্মস্সামিনোযেৰাতি ৰত্তুং যুত্তং. তেনাহ ‘‘ভগৰতা হী’’তিআদি. তত্থ অনুপ্পন্নস্স মগ্গস্সাতি কস্সপস্স ভগৰতো সাসনন্তরধানতো পভুতি যাৰ ইমস্মা বুদ্ধুপ্পাদা অসম্বোধৰসেন ন উপ্পন্নস্স অরিযমগ্গস্স. উপ্পাদেতাতি নিব্বত্তেতা. তং পনেতং মগ্গস্স ¶ ভগৰতো নিব্বত্তনং, ন পচ্চেকবুদ্ধানং ৰিয সসন্তানেযেৰ, অথ খো পরসন্তানেপীতি দস্সেতুং ‘‘অসঞ্জাতস্স মগ্গস্স সঞ্জনেতা, অনক্খাতস্স মগ্গস্স অক্খাতা’’তি ৰুত্তং. তযিদং মগ্গস্স উপ্পাদনং সঞ্জাননঞ্চ অত্থতো জাননঞ্ঞেৰ অসম্মোহপটিৰেধভাৰতোতি ৰুত্তং ‘‘মগ্গঞ্ঞূ মগ্গৰিদূ’’তি. অক্খানং পনস্স সুকুসলভাৰেনাতি ৰুত্তং ‘‘মগ্গকোৰিদো’’তি. সত্থারা ¶ যথাগতং মগ্গং অনুগচ্ছন্তীতি মগ্গানুগা ভগৰতো এৰ তং মগ্গং সুট্ঠু অধিগমনতো. পচ্ছা পরতো সম্মা অনু অনু আগতা পটিপন্নাতি পচ্ছা সমন্নাগতা.

জানং জানাতীতি জানিতব্বমেৰ অভিঞ্ঞেয্যাদিভেদং জানাতি একন্তহিতপটিপত্তিতো. পস্সং পস্সতীতি তথা পস্সিতব্বমেৰ পস্সতি. অথ ৰা জানং জানাতীতি সব্বঞ্ঞুতঞ্ঞাণেন জানিতব্বং জানাতিযেৰ. ন হি পদেসঞাণেন জানিতব্বং সব্বং একন্ততো জানাতি. পস্সং পস্সতীতি দিব্বচক্খু পঞ্ঞাচক্খু ধম্মচক্খু বুদ্ধচক্খু সমন্তচক্খুসঙ্খাতেহি পঞ্চহি চক্খূহি পস্সিতব্বং পস্সতিযেৰ. অথ ৰা জানং জানাতীতি যথা অঞ্ঞে সৰিপল্লাসা কামরূপপরিঞ্ঞাৰাদিনো জানন্তাপি ৰিপল্লাসৰসেন জানন্তি, ন এৰং ভগৰা. ভগৰা পন পহীনৰিপল্লাসত্তা জানন্তো জানাতিযেৰ, দিট্ঠিদস্সনস্স চ অভাৰা পস্সন্তো পস্সতিযেৰাতি অত্থো. চক্খুভূতোতি পঞ্ঞাচক্খুমযত্তা তস্স চ পত্তত্তা সত্তেসু চ তদুপ্পাদনতো দস্সনপরিণাযকট্ঠেন লোকস্স চক্খু ৰিয ভূতো. ঞাণভূতোতি এতস্স চ এৰমেৰ অত্থো দট্ঠব্বো. ধম্মা বোধিপক্খিযা, ব্রহ্মা মগ্গো, তেহি উপ্পন্নত্তা, তেসংৰা পত্তত্তা অধিগতত্তা, লোকস্স চ তদুপ্পাদনতো ‘‘ধম্মভূতো, ব্রহ্মভূতো’’তি চ ৰেদিতব্বো. ৰত্তাতি চতুসচ্চধম্মং ৰদতীতি ৰত্তা. চিরং সচ্চপ্পটিৰেধং পৰত্তেন্তো ৰদতীতি পৰত্তা. অত্থস্স নিন্নেতাতি ধম্মতাসঙ্খাতং পরমত্থং নিব্বানঞ্চ নিদ্ধারেত্ৰা দস্সেতা, পাপযিতা ৰা. অমতস্স দাতাতি অমতং সচ্ছিকিরিযং সত্তেসু উপ্পাদেন্তো অমতং দদাতীতি অমতস্স দাতা. বোধিপক্খিযধম্মানং তদাযত্তভাৰতো ধম্মস্সামী.

‘‘যা চ নিব্বানসম্পত্তি, সব্বমেতেন লব্ভতি;

সুখো ৰিপাকো পুঞ্ঞানং, অধিপ্পাযো সমিজ্ঝতি. (পেটকো. ২৩);

নিব্বানপটিসংযুত্তো, সব্বসম্পত্তিদাযকো’’তি –

এৰমাদিং ¶ ভগৰতো ৰচনং সুত্ৰা এৰ ভিক্খূ দানাদিপুঞ্ঞানং ৰিৰট্টসন্নিস্সযতং জানন্তি, ন অঞ্ঞথাতি ৰুত্তং ‘‘পরিযাযধম্মোপি…পে… পটিলভতী’’তি. ‘‘এদিসং পরিভুঞ্চিতব্ব’’ন্তি কপ্পিযস্স চ চীৰরাদিপচ্চযস্স ভগৰতো ৰচনেন ৰিনা পটিগ্গহোপি ভিক্খূনং ন সম্ভৰতি, কুতো পরিভোগোতি আহ ‘‘নিপ্পরিযাযামিসম্পী’’তিআদি.

পরিযাযামিসস্স ভগৰতো সন্তকভাৰো পরিযাযধম্মস্স তব্ভাৰেনেৰ দীপিতো. তদেৰ সামিভাৰং ¶ দস্সেন্তোতি সম্বন্ধো. তস্মাতি অত্তাধীনপটিলাভপটিগ্গহতায অত্তনো সন্তকত্তা চ. তত্থাতি তস্মিং ধম্মামিসে.

পচ্চযা চীৰরাদযো পরমা পাপুণিতব্বভাৰেন উত্তমমরিযাদা এতস্স ন উত্তরিমনুস্সধম্মা অপ্পিচ্ছতাদযো চাতি পচ্চযপরমো, লাভগরূতি অত্থো. তণ্হুপ্পাদেসূতি ‘‘চীৰরহেতু ৰা, ভিক্খৰে, ভিক্খুনো তণ্হা উপ্পজ্জমানা উপ্পজ্জতি, পিণ্ডপাতসেনাসনইতিভৰাভৰহেতু ৰা, ভিক্খৰে, ভিক্খুনো তণ্হা উপ্পজ্জমানা উপ্পজ্জতী’’তি (দী. নি. ৩.৩১১; অ. নি. ৪.৯; ইতিৰু. ১০৫) এৰং ৰুত্তেসু চতূসু তণ্হুপ্পত্তিকোট্ঠাসেসু. অপ্পিচ্ছতাসন্তুট্ঠিসল্লেখপৰিৰেকাদযো অপ্পিচ্ছতাদযো.

তত্থাতি তস্মিং ওৰাদে, তেসু ৰা ধম্মপটিগ্গাহকেসু ভিক্খূসু. ভৰিস্সতি ৰা যেসং তত্থাতি যোজনা. ইমস্মিং পক্খে তত্থাতি তস্মিং ওৰাদে ইচ্চেৰ অত্থো দট্ঠব্বো. অধিপ্পাযো আমিসদাযাদতায উপ্পজ্জনকঅনত্থানুপ্পাদস্স ধম্মদাযাদতায উপ্পজ্জনকঅট্ঠুপ্পত্তিযা চ আকঙ্খা. তেনাহ ‘‘পস্সতী’’তিআদি. তত্থ আমিসে উপক্খলিতানন্তি আমিসহেতু ৰিপ্পটিপন্নানং. অতীতকালেতি কস্সপসম্মাসম্বুদ্ধকালে. কপিলস্স ভিক্খুনো ৰত্থু কপিলসুত্তেন, ‘‘সঙ্ঘাটিপিআদিত্তা হোতী’’তিআদিনা লক্খণসুত্তেন (সং. নি. ২.২১৮) চ ৰিভাৰেতব্বং. আমিসগরুকো অপ্পগ্ঘভাৰেন কূটকহাপণো ৰিয নিত্তেজো সমণতেজেন অনুজ্জলতো নিব্বুতঙ্গারো ৰিয নিপ্পভো চ হোতীতি যোজনা. ততোতি পচ্চযগরুকভাৰতো. ৰিৰত্তিতচিত্তোতি ৰিনিৰত্তিতমানসো, সল্লেখৰুত্তীতি অত্থো.

ধম্মদাযাদাতি ¶ এত্তাৰতা অন্তোগধাৰধারণং ৰচনন্তি তেন অৰধারণেন নিৰত্তিতমত্থং ৰিভাৰেতুং ‘‘মা আমিসদাযাদা’’তি পটিক্খেপো দস্সিতো. তথেৰ চ ৰিভাৰেতুং অধিপ্পাযানিসংসৰিভাৰনেসুপি দস্সিতো, তথা আদীনৰৰিভাৰনেন ধম্মদাযাদতাপটিক্খেপো. অপদিসিতব্বাতি হেট্ঠা কত্ৰা ৰত্তব্বাতি. আদিযাতি এত্থ যস্মা আ-কারো মরিযাদত্থো, তস্মা ধম্মদাযাদতাৰিধুরেন আমিসদাযাদভাৰেন হেতুভূতেন, করণভূতেন ৰা আদিযং ৰিৰেচনং ৰিঞ্ঞূহি ৰিসুং করণং ৰৰত্থানস্স হোতীতি আহ ‘‘ৰিসুং কাতব্বা’’তি. তেনাহ ‘‘ৰিঞ্ঞূহি গারয্হা ভৰেয্যাথাতি ৰুত্তং হোতী’’তি.

‘‘অত্থি মে তুম্হেসু অনুকম্পা…পে… নো আমিসদাযাদা’’তি ভিক্খূসু অত্তনো করুণাযনাকিত্তনং ¶ তেসং মুদুকরণং, ‘‘অহম্পি তেনা’’তিআদি পন ততোপি সৰিসেসং মুদুকরণন্তি আহ ‘‘অতীৰ মুদুকরণত্থ’’ন্তি.

নাল়কপটিপদাদযো নাল়কসুত্তাদীসু (সু. নি. ৬৮৪-৭২৮) আগতপটিপত্তিযো. তা পন যস্মা নাল়কত্থেরাদীহি পটিপন্না পরমসল্লেখৰুত্তিভূতা অতিউক্কট্ঠপটিপত্তিযো, তস্মা ইধ ধম্মদাযাদপটিপদায উদাহরণভাৰেন উদ্ধটা. সক্খিভূতাতি তায পটিপত্তিযা ৰুচ্চমানায ‘‘কিং মে ৰিনা পটিপজ্জনকো অত্থী’’তি অসদ্দহন্তানং পচ্চক্খকরণেন সক্খিভূতা. ইমস্মিন্তি ‘‘তুম্হে চ মে ভিক্খৰে ধম্মদাযাদা’’তিআদিকে ৰাক্যে. সেসন্তি ‘‘তুম্হে চ মে’’তিআদিকং সুক্কপক্খে আগতং পাল়িপদং. ৰুত্তনযপচ্চনীকেনাতি ‘‘তেন ধম্মদাযাদভাৰেন নো আমিসদাযাদভাৰেনা’’তি এৰং কণ্হপক্খে ৰুত্তনযস্স পটিপক্খেন.

৩০. থোমনং সুত্ৰাতি পটিপজ্জনকস্স পুগ্গলস্স পসংসনং সুত্ৰা যথা তং সপরিসস্স আযস্মতো উপসেনস্স পটিপত্তিযা সীলথোমনং সুত্ৰা. নিপাতপদন্তি ইমিনা ইধ-সদ্দস্স অনত্থকতমাহ. পৰারিতোতি পটিক্খেপিতো. যো হি ভুঞ্জন্তো ভোজনেন তিত্তো পরিৰেসকেন উপনীতভোজনং পটিক্খিপতি, সো তেন পৰারিতেন পটিক্খেপিতো নাম হোতি. তেনাহ ‘‘পৰারিতোতি…পে… ৰুত্তং হোতী’’তি. পকারেহি দিট্ঠাদীহি ৰারেতি সঙ্ঘাদিকে যাচাপেতি ভত্তে ¶ করোতি এতাযাতি পৰারণা, আপত্তিৰিসোধনায অত্তৰোস্সগ্গো ওকাসদানং. সা পন যস্মা যেভুয্যেন ৰস্সংৰুত্থেহি কাতব্বা ৰুত্তা, তস্মা ‘‘ৰস্সংৰুত্থপৰারণা’’তি ৰুত্তং. পৰারেতি পচ্চযে ইচ্ছাপেতি এতাযাতি পৰারণা, চীৰরাদীহি উপনিমন্তনা. পকারযুত্তা ৰারণাতি পৰারণা, ৰিপ্পকতভোজনতাদিচতুরঙ্গসহিতো ভোজনপটিক্খেপো. সা পন যস্মা অনতিরিত্তভোজননিমিত্তায আপত্তিযা কারণং হোতি, তস্মা ‘‘অনতিরিত্তপৰারণা’’তি ৰুত্তা. যাৰদত্থভোজনস্স পৰারণা যাৰদত্থপৰারণা, পরিযোসিতভোজনস্স উপনীতাহারপটিক্খেপোতি অত্থো.

‘‘ভুত্তাৰী’’তি ৰচনতো ভোজনপারিপূরিতা ইধাধিপ্পেতাতি আহ ‘‘পরিপুণ্ণোতি ভোজনেন পরিপুণ্ণো’’তি. পরিযোসিতোতি এত্থাপি এসেৰ নযো ‘‘ভোজনেন ভোজনকিরিযায পরিযোসিতো’’তি. অট্ঠকথাযং পন অধিপ্পেতত্থং পাকটং কত্ৰা দস্সেতুং ভোজন-সদ্দস্স লোপো ৰুত্তো. ধাতোতি তিত্তো. সাধকানীতি ঞাপকানি. পরিযোসিতভোজনং সুহিতযাৰদত্থতাগহণেহি ভুত্তাৰিতাদযো, ভুত্তাৰিতাদিগ্গহণেহি ৰা ইতরে বোধিতা হোন্তীতি অঞ্ঞমঞ্ঞং নেসং ঞাপকঞাপেতব্বতং দস্সেতুং ‘‘যো হী’’তিআদি ৰুত্তং. এৰং ছহিপি পদেহি উদরাৰদেহকং ভোজনং দস্সিতং ¶ , তঞ্চ খো পরিকপ্পনাৰসেন. ন হি ভগৰা এৰং ভুঞ্জতি. তেনাহ ‘‘সব্বঞ্চেতং পরিকপ্পেত্ৰা ৰুত্ত’’ন্তি.

‘‘সিযা এৰ, নাপি সিযা’’তি চ ইদং অত্থদ্ৰযম্পি ইধ সম্ভৰতীতি ৰুত্তং ‘‘ইধ উভযম্পি ৰট্টতী’’তি. অথাতি অনন্তরং, মম ভোজনসমনন্তরমেৰাতি অত্থো. তং পন যস্মা যথাৰুত্তকালপচ্চামসনং হোতি, তস্মা ‘‘তম্হি কালে’’তি ৰুত্তং. অপ্পরুল়্হহরিতেতি রুহমানতিণাদিহরিতরহিতে. অভাৰত্থো চ অযং অপ্প-সদ্দো ‘‘অপ্পিচ্ছো’’তিআদীসু (ম. নি. ১.২৫২, ৩৩৬; সং. নি. ২.১৪৮) ৰিয.

কথিতেপীতি পি-সদ্দো অৰুত্তসমুচ্চযত্থো. তেন ৰাপসমীকরণাদিং সঙ্গণ্হাতি. তথা হেস ৰুত্ত-সদ্দো ‘‘নো চ খো পটিৰুত্ত’’ন্তিআদীসু (পারা. ২৮৯) ৰাপসমীকরণে দিস্সতি, ‘‘পন্নলোমো পরদত্তৰুত্তো’’তিআদীসু (চূল়ৰ. ৩৩২) জীৰিতৰুত্তিযং, ‘‘পণ্ডুপলাসো বন্ধনা পৰুত্তো’’তিআদীসু (পারা. ৯২; পাচি. ৬৬৬; মহাৰ. ১২৯; ম. নি. ৩.৫৯) অপগমে, ‘‘গীতং পৰুত্তং ¶ সমিহিত’’ন্তিআদীসু (দী. নি. ১.২৮৫) পাৰচনভাৰেন পৰত্তিতে, লোকে পন ‘‘ৰুত্তং পরাযণ’’ন্তিআদীসু (মহাভাস ৭.২.২৬) অজ্ঝেনে দিস্সতীতি.

ন এত্থ পিণ্ডপাতভোজনেন ধম্মদাযাদতা নিৰারিতা, পিণ্ডপাতভোজনং পন অনাদরিত্ৰা ধম্মানুধম্মপটিপত্তীতি এত্থ কারণং দস্সেন্তো আহ ‘‘পিণ্ডপাতং…পে… ৰীতিনামেয্যা’’তি. তত্থ ৰীতিনামেয্যাতি কম্মট্ঠানানুযোগেন খেপেয্য. তেনাহ ‘‘আদিত্তসীসূপমং পচ্চৰেক্খিত্ৰা’’তি. আদিত্তসীসূপমন্তিআদিত্তসীসূপমসুত্তং.

কিঞ্চাপীতি অযং ‘‘যদিপী’’তি ইমিনা সমানত্থো নিপাতো. নিপাতো চ নাম যত্থ যত্থ ৰাক্যে পযুজ্জতি, তেন তেন ৰত্তব্বত্থজোতকো হোতীতি ইধ ‘‘পিণ্ডপাত’’ন্তিআদিনা অনুঞ্ঞাপসংসাৰসেন ৰুচ্চমানস্স অত্থস্স জোতকোতি অধিপ্পাযেন ‘‘অনুজাননপসংসনত্থে নিপাতো’’তি ৰুত্তং, অনুঞ্ঞাপসংসারম্ভে পন ‘‘অসম্ভাৰনত্থে’’তি ৰুত্তং সিযা পুরিমেযেৰ সম্ভাৰনাৰিভাৰনতো অধিকত্তানুলোমতো চ.

একৰারং পৰত্তং পিণ্ডপাতপটিক্খিপনং কথং দীঘরত্তং অপ্পিচ্ছতাদীনং কারণং হোতীতি চোদনং সন্ধাযাহ ‘‘তস্স হী’’তিআদি. তত্থ অত্রিচ্ছতাতি অত্র ইচ্ছতীতি অত্রিচ্ছো, তস্স ভাৰো অত্রিচ্ছতা, অত্থতো পরলাভপত্থনা. তথা হি ৰুত্তং ‘‘পুরিমেযেৰ সকলাভেন অসন্তুট্ঠি, পরলাভে ¶ চ পত্থনা, এতং অত্রিচ্ছতালক্খণ’’ন্তি (ৰিভ. অট্ঠ. ৮৪৯). পাপিচ্ছতাতি অসন্তগুণসম্ভাৰনাধিপ্পাযতা. পাপা ইচ্ছা এতস্সাতি পাপিচ্ছো, তস্স ভাৰো পাপিচ্ছতা. যথাহ ‘‘অসন্তগুণসম্ভাৰনতা পটিগ্গহণে চ অমত্তঞ্ঞুতা, এতং পাপিচ্ছলক্খণ’’ন্তি (ৰিভ. অট্ঠ. ৮৫১). মহন্তানি ৰত্থূনি ইচ্ছতি, মহতী ৰা তস্স ইচ্ছাতি মহিচ্ছো, তস্স ভাৰো মহিচ্ছতা. যং সন্ধায ৰুত্তং ‘‘সন্তগুণসম্ভাৰনতা পটিগ্গহণে চ অমত্তঞ্ঞুতা, এতং মহিচ্ছলক্খণ’’ন্তি. পচ্চৰেক্খমানো নিৰারেস্সতীতি যোজনা. অস্স ভিক্খুনো সংৰত্তিস্সতি পিণ্ডপাতপটিক্খেপো.

মহিচ্ছো পুগ্গলো যথা পচ্চযদানৰসেন পচ্চযদাযকেহি ভরিতুং অসক্কুণেয্যো, এৰং পচ্চযপরিযেসনৰসেন অত্তনাপীতি ৰুত্তং ‘‘অত্তনোপি ¶ উপট্ঠাকানম্পি দুব্ভরো হোতী’’তি. সদ্ধাদেয্যস্স ৰিনিপাতৰসেন পৰত্তিযা অঞ্ঞস্স ঘরে ছড্ডেন্তো. রিত্তপত্তোৰাতি যেসু কুলেসু পটিপিণ্ডৰসেন পৰত্ততি, তেসং সব্বপচ্ছিমং অত্তনো যথালদ্ধং দত্ৰা তত্থ কিঞ্চি অলদ্ধা রিত্তপত্তো ৰিহারং পৰিসিত্ৰা নিপজ্জতি জিঘচ্ছাদুব্বল্যেনাতি অধিপ্পাযো. যথালদ্ধপচ্চযপরিভোগেন, পুন পরিযেসনানাপজ্জনেন অত্তনো সুভরতা, যথালদ্ধপচ্চযেন অৰঞ্ঞং অকত্ৰা সন্তোসাপত্তিযা উপট্ঠাকানং সুভরতা ৰেদিতব্বা.

কথাৰত্থূনীতি অপ্পিচ্ছতাদিপটিসংযুত্তানং কথানং ৰত্থূনীতি কথাৰত্থূনি, অপ্পিচ্ছতাদযো এৰ. তীণীতি তীণি কথাৰত্থূনি. অভিসল্লেখিকাতি অতিৰিয কিলেসে সল্লিখতীতি অভিসল্লেখো, অপ্পিচ্ছ তাদিগুণসমুদাযো, সো এতিস্সা অত্থীতি অভিসল্লেখিকা, মহিচ্ছতাদীনং তনুভাৰায যুত্তরূপা অপ্পিচ্ছতাদিপটিসংযুত্ততা. চেতোৰিনীৰরণসপ্পাযাতি কুসলচিত্তুপ্পত্তিযা নিৰারকানং নীৰরণানং দূরীভাৰকরণেন চেতোৰিনীৰরণসঙ্খাতানং সমথৰিপস্সনানং সপ্পাযা. সমথৰিপস্সনাচিত্তস্সেৰ ৰা ৰিভূতিভাৰকরণায সপ্পাযা উপকারিকাতি চেতোৰিনীৰরণসপ্পাযা. একন্তনিব্বিদাযাতিআদি যেন নিব্বিদাদিআনিসংসেন অযং কথা অভিসল্লেখিকা চেতোৰিনীৰরণসপ্পাযা চ নাম হোতি, তং দস্সেতুং ৰুত্তং. তত্থ একন্তনিব্বিদাযাতি একংসেন ৰট্টদুক্খতো নিব্বিন্দনত্থায. ৰিরাগায নিরোধাযাতি তস্সেৰ ৰিরজ্জনত্থঞ্চ নিরুজ্ঝনত্থঞ্চ. উপসমাযাতি সব্বকিলেসৰূপসমায. অভিঞ্ঞাযাতি সব্বস্সপি অভিঞ্ঞেয্যস্স অভিজাননায. সম্বোধাযাতি চতুমগ্গসম্বোধায. নিব্বানাযাতি অনুপাদিসেসনিব্বানায. এতেসু হি আদিতো তীহি ৰিপস্সনা ৰুত্তা, পুন তীহি মগ্গো, ইতরেন নিব্বানং. তেন সমথৰিপস্সনা আদিং কত্ৰা নিব্বানপরিযোসানো অযং সব্বো উত্তরিমনুস্সধম্মো দসকথাৰত্থুলাভিনো সম্ভৰতীতি দস্সেতি. পরিপূরেস্সন্তীতি তংসভাৰতো উপকারতো ¶ চ সংৰত্তিস্সন্তি. অপ্পিচ্ছতাদযো হি একৰারউপ্পন্না উপরি তদত্থায সংৰত্তিস্সন্তি. কথাৰত্থুপরিপূরণং সিক্খাপরিপূরণঞ্চ ৰুত্তনযেনেৰ ৰেদিতব্বং.

অমতং নিব্বানন্তি অনুপাদিসেসনিব্বানধাতুং. ইতরা পন সেক্খাসেক্খধম্মপারিপূরিযা পরিপুণ্ণা. নিব্বানপারিপূরি চেত্থ তদাৰহধম্মপারিপূরিৰসেন পরিযাযতো ¶ ৰুত্তাতি ৰেদিতব্বা. ইদানি যাযং অপ্পিচ্ছতাদীনং অনুক্কমপরিৰুদ্ধিযা গুণপারিপূরিতা, তং উপমায সাধেন্তো ‘‘সেয্যথাপী’’তিআদিমাহ. তত্থ পাৰুস্সকোতি ৰস্সানমাসে উট্ঠিতো. সো হি চিরানুপ্পৰত্তি হোতি. পব্বতকন্দরা পব্বতেসু উপচ্চকাধিচ্চকাপভৰনিজ্ঝরাদিনদিযো. সরসাখাতি যত্থ উপরিউন্নতপদেসতো উদকং আগন্ত্ৰা তিট্ঠতি চেৰ সন্দতি চ, তে. কুসোব্ভা খুদ্দকতল়াকা. কুন্নদিযোতি পব্বতপাদতো নিক্খন্তা খুদ্দকনদিযো. তা হি মহানদিযো ওতরন্তিযো পরিপূরেন্তি. পরমধম্মদাযাদন্তি পরমং উত্তমং ধম্মদাযাদভাৰং, পরমং ধম্মদাযজ্জং ৰা. তে ভিক্খূতি তে ধম্মপটিগ্গাহকে ভিক্খূ. সন্নিযোজেন্তোতি মূলগুণেহি অপ্পিচ্ছতাদীহি যোজেন্তো.

উগ্গহেত্ৰাতি অত্থতো ব্যঞ্জনতো চ উপধারণৰসেন গহেত্ৰা অৰিপরীতং গহেত্ৰা. সংসন্দেত্ৰাতি মম দেসনানুসারেন মমজ্ঝাসযং অৰিরজ্ঝিত্ৰা. যথা ইধেৰ চিন্তেসীতি যথা ইমিস্সা ধম্মদাযাদদেসনায চিন্তেসি, এৰং অঞ্ঞত্থাপি ধম্মথোমনত্থং গন্ধকুটিং পৰিসন্তো চিন্তেসি. একজ্ঝাসযাযাতি সমানাধিপ্পাযায. মতিযাতি পঞ্ঞায. অযং দেসনা অগ্গাতিআদি ভগৰা ধম্মসেনাপতিং গুণতো এৰ পগ্গণ্হাতীতি কত্ৰা ৰুত্তং.

চিত্তগতিযাতি চিত্তৰসেন কাযস্স পরিণামনেন ‘‘অযং কাযো ইদং চিত্তং ৰিয হোতূ’’তি কাযস্স চিত্তেন সমানগতিকতাধিট্ঠানেন. কথং পন কাযো দন্ধপ্পৰত্তিকো লহুপরিৰত্তনচিত্তেন সমানগতিকো হোতীতি? ন সব্বথা সমানগতিকো. যথেৰ হি কাযৰসেন চিত্তপরিণামনে চিত্তং সব্বথা কাযেন সমানগতিকং ন হোতি. ন হি তদা চিত্তং সভাৰসিদ্ধেন অত্তনো খণেন অৰত্তিত্ৰা দন্ধৰুত্তিকস্স রূপধম্মস্স খণেন ৰত্তিতুং সক্কোতি, ‘‘ইদং চিত্তং অযং কাযো ৰিয হোতূ’’তি পন অধিট্ঠানেন দন্ধগতিকস্স কাযস্স অনুৰত্তনতো যাৰ ইচ্ছিতট্ঠানপ্পত্তি, তাৰ কাযগতিং অনুলোমেন্তমেৰ হুত্ৰা সন্তানৰসেন পৰত্তমানং চিত্তং কাযগতিকং কত্ৰা পরিণামিতং নাম হোতি, এৰং ‘‘অযং কাযো ইদং চিত্তং ৰিয হোতূ’’তি অধিট্ঠানেন পগেৰ লহুসঞ্ঞায সুখুমসঞ্ঞায চ সম্পাদিতত্তা অভাৰিতিদ্ধিপাদানং ৰিয দন্ধং অৰত্তিত্ৰা যথা লহুং কতিপযচিত্তৰারেহেৰ ইচ্ছিতট্ঠানপ্পত্তি হোতি ¶ , এৰং পৰত্তমানো কাযো চিত্তগতিকভাৰেনেৰ পরিণামিতো নাম হোতি, ন একচিত্তক্খণেনেৰ পৰত্তিযা. এৰঞ্চ কত্ৰা ¶ বাহুসমিঞ্জনপ্পসারণূপমাপি উপচারেন ৰিনা সুট্ঠুতরং যুত্তা হোতি, অঞ্ঞথা ধম্মতাৰিলোমিতা সিযা. ন হি ধম্মানং লক্খণঞ্ঞথত্তং ইদ্ধিবলেন কাতুং সক্কা, ভাৰঞ্ঞথত্তমেৰ পন সক্কাতি.

৩১. ভগৰতো অধিপ্পাযানুরূপং ভিক্খূনঞ্চ অজ্ঝাসযং ঞত্ৰাতি ৰচনসেসো. দেসকালে ৰিয ভাজনম্পি ওলোকেত্ৰা এৰ মহাথেরো ধম্মং কথেতি. পক্কন্তস্সাতি ইদং অনাদরে সামিৰচনন্তি দস্সেন্তো ‘‘পক্কন্তস্স সতো’’তিআদিমাহ. কিত্তকেনাতি কেন পরিমাণেন. তং পন পরিমাণং যস্মা পরিমেয্যস্স অত্থস্স পরিচ্ছিন্দনং হোতি, তস্মা ‘‘কিত্তাৰতাতি পরিচ্ছেদৰচন’’ন্তি আহ. নুকারো পুচ্ছাযন্তি অযং নু-সদ্দো ইধেৰ পুচ্ছাযং আগতোতি কত্ৰা ৰুত্তং. নু-সদ্দেন হেত্থ জোতিযমানো অত্থো কিং-সদ্দেন পরিমাণো অত্থো পরিমেয্যত্থো চ. এত্থ সংকিলেসপক্খো ৰিৰেকস্স অননুসিক্খনং আমিসদাযাদতা, ৰোদানপক্খো তস্স অনুসিক্খনং ধম্মদাযাদতাতি. তীহি ৰিৰেকেহীতি ৰিৰেকত্তযগ্গহণং তদন্তোগধত্তা ৰিৰেকপঞ্চকস্স. ৰিৰেকপঞ্চকগ্গহণে পনস্স সরূপেন কাযৰিৰেকো গহিতো ন সিযা, তদাযত্তত্তা ৰা সত্থারা তদা পযুজ্জমানৰিৰেকদস্সনৰসেন ‘‘তীহি ৰিৰেকেহী’’তিআদি ৰুত্তং. অঞ্ঞতরম্পীতি কস্মা ৰুত্তং. ন হি কাযৰিৰেকমত্তেন ধম্মদাযাদভাৰো সিজ্ঝতীতি? ন, ৰিৰেকদ্ৰযসন্নিস্সযস্সেৰ কাযৰিৰেকস্স ইধাধিপ্পেতত্তা. এৰঞ্চ কত্ৰা চিত্তৰিৰেকগ্গহণম্পি সমত্থিতং হোতি. ন হি লোকিযজ্ঝানাধিগমমত্তেন নিপ্পরিযাযতো সত্থুধম্মদাযাদভাৰো ইচ্ছিতো, নিব্বানাধিগমেন পন সো ইচ্ছিতো, তস্মা সব্বাপি সাসনে ৰিৰেকানুসিক্খনা নিব্বানপোণা নিব্বানপব্ভারা নিব্বানোগধা চাতি ৰুত্তং ‘‘তিণ্ণং ৰিৰেকানং অঞ্ঞতরম্পী’’তি. অসতি আলোকে অন্ধকারো ৰিয অসতি ধম্মদাযাদতায একংসিযা আমিসদাযাদতাতি আহ ‘‘আমিসদাযাদাৰ হোন্তী’’তি. এস নযো সুক্কপক্খেপীতি কণ্হপক্খতো সাধারণৰসেন লব্ভমানং অত্থসামঞ্ঞং অতিদিসতি, ন অত্থৰিসেসং তস্স ৰিসদিসত্তা, অত্থৰিসেসমেৰ ৰা অতিদিসতি ৰিসদিসূদাহরণূপাযঞাযেন. ‘‘তিণ্ণং ৰিৰেকানং অঞ্ঞতর’’ন্তি ইদং ইধ ন লব্ভতি. তযোপি ¶ হি ৰিৰেকা, তেসু একো ৰা ইতরদ্ৰযসন্নিস্সযো ইধ লব্ভতি.

দূরতোপীতি দূরট্ঠানতোপি. তেনাহ ‘‘তিরোরট্ঠতোপী’’তিআদি. কামং ‘‘পটিভাতূ’’তি এত্থ পটি-সদ্দাপেক্খায ‘‘সারিপুত্ত’’ন্তি উপযোগৰচনং, অত্থো পন সামিৰচনৰসেনেৰ ৰেদিতব্বোতি দস্সেন্তো আহ ‘‘আযস্মতোযেৰ সারিপুত্তস্সা’’তি. ভাগো হোতূতি ইমিনাভাগত্থো পটি-সদ্দোতি দস্সেতি লক্খণাদিঅত্থানং ইধ অযুজ্জনতো. তেনাহ ‘‘এৰং সদ্দলক্খণেন সমেতী’’তি. দিস্সতূতি ঞাণেন দিস্সতু, পস্সতূতি ৰা অত্থো. উপট্ঠাতূতি ঞাণস্স পচ্চুপতিট্ঠতু. উগ্গহেস্সন্তীতি ¶ ৰাচুগ্গতং করিস্সন্তি. ৰাচুগ্গতকরণঞ্হি উগ্গহো. পরিযাপুণিস্সন্তীতি তস্সেৰ ৰেৰচনং. পুরিপুচ্ছনাদিনা ৰা অত্থস্স চিত্তে আপাদনং পট্ঠপনং পরিযাপুণনং. কারণৰচনন্তি যথাৰুত্তস্স কারণভাৰেন ৰচনং ‘‘হেতুম্হি করণৰচন’’ন্তি কত্ৰা. ৰুত্তত্থপচ্চামসনং তং-সদ্দেন করীযতীতি. তেনাহ ‘‘যস্মা’’তিআদি.

একেনেৰাকারেনাতি আমিসদাযাদতাসিদ্ধেন আদিযতাসঙ্খাতেন একেনেৰ পকারেন. তমেৰ হি আকারং সন্ধাযাহ ‘‘ভগৰতা ৰুত্তমত্থ’’ন্তি. অঞ্ঞথা ‘‘সত্থু পৰিৰিত্তস্স ৰিহরতো সাৰকা ৰিৰেকং নানুসিক্খন্তী’তি একেনেৰ আকারেন সো অত্থো থেরেনপি ৰুত্তো. তীহি আকারেহীতি আমিসদাযাদপটিপদাভূতেহি তিণ্ণং ৰিৰেকানং অননুসিক্খনাকারেহি. এত্তাৰতাতি ‘‘ইধাৰুসো…পে… নানুসিক্খন্তী’’তি এত্তকেন কণ্হপক্খে উদ্দেসপাঠেন.

ৰিত্থারতো সুৰিভত্তো হোতি অনৰসেসতো সম্মদেৰ নিদ্দিট্ঠত্তা. ননু চ উদ্দেসে সত্থুনোপি আদিযতা ভগৰতা গহিতা, সা ন নিদ্দিট্ঠাতি অনুযোগং সন্ধাযাহ ‘‘সো চ খো’’তিআদি. সাৰকে অনুগ্গণ্হন্তস্সাতি ‘‘আমিসদাযাদা সত্থু সাৰকা’’তি সত্থু পরপ্পৰাদপরিহরণত্থম্পি ‘‘তুম্হেহি ধম্মদাযাদেহি ভৰিতব্ব’’ন্তি এৰং সাৰকে অনুকম্পমানস্স. সাৰকানং তং ন যুত্তং সামীচিঅভাৰতোতি যোজনা. এস নযোতি যদিদং ‘‘এত্তাৰতাযং ভগৰা’’তিআদিনা কণ্হপক্খে উদ্দেসস্স অত্থৰিভাগদস্সনমুখেন সম্বন্ধদস্সনং, এস নযো সুক্কপক্খেপি সম্বন্ধদস্সনেতি অধিপ্পাযো. তেনাহ ‘‘অযং তাৰেত্থ অনুসন্ধিক্কমযোজনা’’তি, সত্থারা দেসিতায উদ্দেসদেসনায মহাথেরেন ¶ দেসিতায চ অনুসন্ধিক্কমেন সম্বন্ধোতি অত্থো. যথানুসন্ধি এৰ চেত্থ অনুসন্ধি ৰেদিতব্বো.

অচ্চন্তপৰিৰিত্তস্সাতি একন্তউপধিৰিৰেকো ৰিয ইতরেপি ৰিৰেকো সত্থু একন্তিকাৰাতি. অনুসিক্খনং নাম অনু অনু পূরণন্তি তপ্পটিক্খেপেন আহ ‘‘ন পরিপূরেন্তী’’তি, ন পরিব্রূহেন্তীতি অত্থো, ন পরিপূরেন্তীতি ৰা ন পরিপালেন্তীতি অত্থো. যদগ্গেন হি ৰিৰেকং নানুসিক্খন্তি, তদগ্গেন ন পরিব্রূহেন্তি, ন পরিপালেন্তীতি ৰা ৰত্তব্বতং লভন্তীতি. কস্মা পনেত্থ ‘‘ৰিৰেকং নানুসিক্খন্তী’’তি উদ্দেসে ৰিয অৰিসেসৰচনে কাযৰিৰেকস্সেৰ গহণং কতন্তি চোদনং সন্ধাযাহ ‘‘যদি পনা’’তিআদি. পুচ্ছাযাতি পুচ্ছাতো অৰিসেসো সিযা ৰিভাগস্স অলব্ভমানত্তা ৰিস্সজ্জনস্স. ননু চ ‘‘ৰিৰেকং নানুসিক্খন্তী’’তি অৰিসেসৰচনতো পাল়িযং ৰিভাগো ন লব্ভতেৰাতি? ন, পদন্তরেন ৰিভাৰিতত্তা. তেনাহ ‘‘যেসঞ্চ ধম্মান’’ন্তিআদি. ব্যাকরণপক্খোতি ৰিস্সজ্জনপক্খো. ৰিস্সজ্জনঞ্চ ন পুচ্ছা ৰিয অৰিসেসজোতনা ¶ , অথ খো যথাধিপ্পেতত্থৰিভজনন্তি অধিপ্পাযো. ইমিনা পদেনাতি ‘‘ৰিৰেকং নানুসিক্খন্তী’’তি ইমিনা পদেন কাযৰিৰেকং অপরিপূরিযমানং দস্সেতীতি অধিপ্পাযো. চিত্তৰিৰেকং উপধিৰিৰেকন্তি এত্থাপি এসেৰ নযো.

এত্থ চ নপ্পজহন্তীতি পহাতব্বধম্মানং পহানাভাৰৰচনং পহানলক্খণৰিৰেকাভাৰদীপনং, তং ৰত্ৰা পুন ‘‘ৰিৰেকে নিক্খিত্তধুরা’’তি ৰচনং ততো সাতিসযৰিৰেকাভাৰদীপনন্তি তদুভযৰিৰেকাভাৰদস্সনেন ‘‘যেসঞ্চ ধম্মান’’ন্তিআদিনাৰ পারিসেসঞাযেন ‘‘ৰিৰেকং নানুসিক্খন্তী’’তি ইমিনা ৰিৰেকদ্ৰযমূলভূতকাযৰিৰেকাভাৰদস্সনং কতন্তি দট্ঠব্বং. অৰিগততণ্হতায তং তং পরিক্খারজাতং বহুং লন্তি আদিযন্তীতি বহুলা, বহুলা এৰ বাহুলিকা যথা ‘‘ৰেনযিকো’’তি (ম. নি. ১.২৪৬; অ. নি. ৮.১১; পারা. ৮). তে পন যস্মা পচ্চযবহুলভাৰায যুত্তপ্পযুত্তা নাম হোন্তি, তস্মা আহ ‘‘চীৰরাদিবাহুল্লায পটিপন্না’’তি. সিক্খায আদরভাৰাভাৰতো সিথিলং অদল়্হং গণ্হন্তীতি ‘‘সাথলিকা’’তি ৰুত্তং. সিথিলন্তি ভাৰনপুংসকনিদ্দেসো, সিথিল-সদ্দেন ৰা সমানত্থস্স সাথল-সদ্দস্স ৰসেন ‘‘সাথলিকা’’তি পদসিদ্ধি ৰেদিতব্বা. অৰগমনট্ঠেনাতি অধোগমনট্ঠেন ¶ , ওরম্ভাগিযভাৰেনাতি অত্থো. উপধিৰিৰেকেতি সব্বূপধিপটিনিস্সগ্গতায উপধীহি ৰিৰিত্তে. ওরোপিতধুরাতি উজ্ঝিতুস্সাহা.

অনিযমেনেৰাতি কিঞ্চি ৰিসেসং অনামসিত্ৰা ‘‘সাৰকা’’তি অৰিসেসেনেৰ. নিযমেন্তো‘‘থেরা’’তিআদিনা. দসৰস্সে উপাদাযাতি দসৰস্সতো পট্ঠায. ইস্সরিযেতি ‘‘সেট্ঠিট্ঠানং সেনাপতিট্ঠান’’ন্তিআদীসু ৰিয. অচিরক্খণোভাসেন লক্খৰেধকো অক্খণৰেধি. ঠিতিযন্তি অৰট্ঠানে. ঠানসোতি তঙ্খণেযেৰ. তিট্ঠতীতি আধারাধেয্যভাৰেনাতি আহ ‘‘তদাযত্তৰুত্তিভাৰেনা’’তি. উপেক্খানুব্রূহনা সত্তসঙ্খারেসু উদাসীনতাপি অসঙ্খতাধিগমস্স উপাযোতি তব্বিপরিযাযতো চীৰরাদিমণ্ডনা ন উপধিৰিৰেকপারিপূরিযা সংৰত্ততীতি আহ ‘‘চীৰরপত্ত…পে… অপূরযমানা’’তি. তত্থাতি থেরৰারে. ইধাতি মজ্ঝিমনৰকৰারেসু. তথা হি ‘‘মজ্ঝিমথেরকালে’’তিআদি ৰুত্তং.

৩২. ইমস্মিঞ্চ কণ্হপক্খেতি ইমস্মিঞ্চ নিদ্দেসৰারে কণ্হপক্খে, ন উদ্দেসৰারে কণ্হপক্খে. উদ্দেসৰারে পন কণ্হপক্খে ৰুত্তৰিপরিযাযেন গহেতব্বত্থো ‘‘এস নযো সুক্কপক্খেপী’’তি অতিদেসেন দস্সিতো. ৰুত্তপচ্চনীকনযেনাতি ‘‘কাযৰিৰেকং নানুসিক্খন্তি ন পরিপূরেন্তী’’তিআদিনা ৰুত্তস্স অত্থস্স পচ্চনীকনযেন, ‘‘কাযৰিৰেকং অনুসিক্খন্তি পরিপূরেন্তী’’তিআদিনা ¶ নযেন. এত্থাতি এতস্মিং সুক্কপক্খে. সঙ্খেপোতি অত্থসঙ্খেপো. যোজনপরম্পরাযাতি গামন্ততো দূরভাৰেন একং দ্ৰে তীণীতি এৰং যোজনানং পটিপাটিযা. অরঞ্ঞৰনপত্থানীতি অরঞ্ঞেসু ৰনসণ্ডভূতানি. পন্তানীতি পরিযন্তানি. উপগন্তুং যুত্তকালো জরাজিণ্ণকালো গোচরগামে দূরে গমনাগমনসমত্থতাভাৰতো. ‘‘এৰং গুণৰন্তেসু দিন্নং অহো সুদিন্ন’’ন্তি পচ্চযদাযকানং পসাদং জনেন্তি. পাসংসাতি পসংসিতব্বা. অযম্পি মহাথেরোতিআদি একং অপ্পমাদৰিহারিনং ৰুদ্ধতরং নিদ্দিসিত্ৰা ৰদন্তানং ৰসেন ৰুত্তং. পৰিট্ঠো ৰিৰেকট্ঠানং. সাযং নিক্খমতি যোনিসোমনসিকারং উপব্রূহেত্ৰাতি অধিপ্পাযো. কসিণপরিকম্মং করোতি, ন যং কিঞ্চি কিচ্চন্তরং. সমাপত্তিযো নিব্বত্তেতি, ন মোঘমনসিকারং. সব্বথাতিআদিতো তাৰ তদঙ্গৰসেন কিলেসেহি চিত্তং ৰিৰেচেন্তো ততো ৰিক্খম্ভনৰসেন সমুচ্ছেদৰসেন পটিপস্সদ্ধিৰসেনাতি সব্বপ্পকারেন চিত্তৰিৰেকং পূরেতি. পংসুকূলানি ধারেতীতি ইমিনা বাহুলিকতাভাৰং দস্সেতি, অসিথিলং সাসনং ¶ গহেত্ৰাতি ইমিনা সাথলিকতাভাৰং, ৰিগতনীৰরণোতি ইমিনা ওক্কমনে নিক্খিত্তধুরতং, ফলসমাপত্তিন্তিআদিনা পৰিৰেকপুব্বঙ্গমতং দস্সেতি.

৩৩. তত্রাৰুসোতি এত্থ ইতি-সদ্দো আদিঅত্থো. তেন ‘‘লোভো চ পাপকো’’তিআদিনযপ্পৰত্তং উপরিদেসনং অনৰসেসতো পরিযাদিযতি. কো অনুসন্ধীতি যা সা ভগৰতা সংকিলেসপক্খেন সহ ধম্মদাযাদপটিপত্তিভাৰিনী ‘‘ধম্মদাযাদা মে, ভিক্খৰে, ভৰথ, মা আমিসদাযাদা’’তিআদিনা দেসনা উদ্দিট্ঠা, তং ‘‘সত্থু পৰিৰিত্তস্স ৰিহরতো’’তিআদিনা আরভিত্ৰা অট্ঠারসৰারপটিমণ্ডিতায নিদ্দেসদেসনায ৰিভজিত্ৰা ততো পরং ‘‘তত্রাৰুসো লোভো চ পাপকো’’তিআদিনযায উপরিদেসনায সম্বন্ধং পুচ্ছতি. এৰন্তি সংকিলেসপক্খে ‘‘নপ্পজহন্তী’’তি পহানাভাৰদস্সনৰসেন, ৰোদানপক্খে ‘‘পজহন্তী’’তি পহানসব্ভাৰদস্সনৰসেনাতি এৰং. অনিদ্ধারিতসরূপা যং-তং-সদ্দেহি ধম্ম-সদ্দেন সামঞ্ঞতো যে পহাতব্বধম্মা ৰুত্তা, তে সরূপতো দস্সেতুন্তি যোজনা. ইমে তেতি এত্থ কস্মা লোভাদযো এৰ পহাতব্বধম্মা ৰুত্তা, ননু ইতো অঞ্ঞেপি মোহদিট্ঠিৰিচিকিচ্ছাদযো পহাতব্বধম্মা সন্তীতি? সচ্চং সন্তি, তে পন লোভাদীহি তদেকট্ঠতা গহিতা এৰ হোন্তীতি ৰুত্তা. অথ ৰা ইমেসংযেৰেত্থ গহণে কারণং পরতো আৰি ভৰিস্সতি.

ইদানি উপচযেন অনুসন্ধিং দস্সেতুং ‘‘অপিচা’’তিআদি ৰুত্তং. তত্থ সাৰকানং যস্স ধম্মস্স দাযাদভাৰো সত্থু অভিরুচিতো, সো ‘‘চত্তারো সতিপট্ঠানে ভাৰেতী’’তিআদিনা অকত্থেত্ৰা ‘‘ৰিৰেকং অনুসিক্খন্তি, তে চ ধম্মে পজহন্তি, ন চ বাহুলিকা’’তিআদিনা কথিতত্তা ¶ হেট্ঠা পরিযাযেনেৰ ধম্মো কথিতোতি ৰুত্তং. ‘‘তে চ ধম্মে নপ্পজহন্তি, ওক্কমনে পুব্বঙ্গমা’’তিআদিনা আমিসং পরিযাযেনপি কথিতং. ‘‘সিযা চ মে পিণ্ডপাতো’’তিআদিনা, ‘‘বাহুলিকা চ হোন্তী’’তিআদিনা চ আমিসং নিপ্পরিযাযেনপি কথিতং. অথ ৰা যাযং ভগৰতা আমিসদাযাদপটিক্খেপনা ধম্মদাযাদতা ৰুত্তা, যঞ্চ তদত্থং ৰিভজন্তেন মহাথেরেন অত্তনা ৰিৰেকানুসিক্খনাদি ৰুত্তং, তদুভযং হেতুৰসেন ৰিভাৰেতুং ‘‘তত্রাৰুসো, লোভো চা’’তিআদি ৰুত্তং ¶ . হেতুনিরোধেন হি সংকিলেসপক্খস্স, নিরোধহেতুসম্পাদনেন চ ৰোদানপক্খস্স তপ্পাপকতা.

অতীতদেসনানিদস্সনন্তি অতীতায থেরেন যথাদেসিতায দেসনায চ পচ্চামসনং. তেনেৰাহ ‘‘সত্থু পৰিৰিত্তস্স…পে… দেসনাযন্তি ৰুত্তং হোতী’’তি. তত্থাতি যং ৰুত্তং ৰিসেসতো ‘‘যেসং ধম্মানং সত্থা পহানমাহা’’তি, এতস্মিং পদে. তত্থ হি পহাতব্বধম্মা লোভাদযো সামঞ্ঞতো ৰুত্তা. লামকাতি নিহীনা. লোভদোসা হি হেতুতো পচ্চযতো সভাৰতো ফলতো নিস্সন্দতো সংকিলিট্ঠপকতিকা, আযতিং দুক্খস্স পাপনট্ঠেন ৰা পাপকা. লুব্ভনলক্খণোতি আরম্মণস্স অভিগিজ্ঝনলক্খণো. তথা হি সো লুব্ভন্তি তেন, সযং ৰা লুব্ভতি, লুব্ভনমত্তমেৰ ৰা তন্তি ‘‘লোভো’’তি ৰুচ্চতি. রসাদীসু অভিসঙ্গরসো, অপরিচ্চাগপচ্চুপট্ঠানো, সংযোজনিযেসু ধম্মেসু অস্সাদদস্সনপদট্ঠানো. দুস্সনলক্খণোতি আরম্মণে ব্যাপজ্জনলক্খণো. তথা হি সো দুস্সন্তি তেন, সযং ৰা দুস্সতি, দুস্সনমত্তমেৰ ৰা তন্তি ‘‘দোসো’’তি ৰুচ্চতি. রসাদীসু ৰিসপ্পনরসো, সনিস্সযদহনরসো ৰা, দুস্সনপচ্চুপট্ঠানো, আঘাতৰত্থুপদট্ঠানো.

তেসূতিআদিনা দস্সনেন লোভদোসানং একন্ততো পহাতব্বতাদস্সনং. আমিসদাযাদস্স পচ্চযানং লাভে হোতীতি ইদং লোভস্স আরম্মণগ্গহণসভাৰতং সন্ধায ৰুত্তং, তণ্হায ৰসেন পন অনুগিজ্ঝনং সন্ধায ‘‘অলদ্ধং পত্থেতী’’তি আহ. অলাভে পচ্চযানং আমিসদাযাদস্স হোতীতি আনেত্ৰা যোজনা. অলভন্তোতি এত্থ ‘‘পচ্চযে’’তি ৰিভত্তিং পরিণামেত্ৰা যোজেতব্বং. ৰিঘাতৰাতি ‘‘যম্পিচ্ছং ন লভতি, তম্পি দুক্খ’’ন্তি (ম. নি. ১.১২০; ৰিভ. ১৯০) ৰচনতো ইচ্ছাৰিঘাতৰা. লোভো চ দেয্যধম্মে হোতি আমিসদাযাদস্সাতি সম্বন্ধো. এস নযো অনন্তরপদেপি. দেয্যধম্মেতি চ ইদং নিদস্সনমত্তং সত্তকেলাযনাদিৰসেনপি তস্স লোভুপ্পত্তিসব্ভাৰতো. ‘‘তণ্হং পটিচ্চ পরিযেসনা, পরিযেসনং পটিচ্চ লাভো’’তি এৰমাদযো নৰ তণ্হামূলকা. পরিপূরেতি আমিসদাযাদোতি ৰিভত্তিৰিপরিণামো ৰেদিতব্বো. আৰাসমচ্ছরিযাদীনি পঞ্চ মচ্ছরিযানি.

মগ্গন্তি ¶ ¶ অরিযমগ্গং. সো হি কিলেসে মারেন্তো গচ্ছতি, নিব্বানত্থিকেহি চ মগ্গীযতি, সযং ৰা সচ্ছিকিরিযাভিসমযৰসেন নিব্বানং মগ্গতীতি নিপ্পরিযাযেন ‘‘মগ্গো’’তি ৰুচ্চতি. একো অন্তোতি ইতরেন অসম্মিস্সো একো কোট্ঠাসো, হীনতায ৰা লামকট্ঠেন একো অন্তো. কামং অঞ্ঞেপি কুসলধম্মা এতে অন্তে অসম্পযোগতো ন উপেন্তি, তেহি ৰিমুত্তা এৰ, অযং পন অচ্চন্তৰিমুত্তিযা ন উপেতীতি আহ ‘‘ৰিমুত্তো এতেহি অন্তেহী’’তি. তস্মাতি অন্তদ্ৰযৰিমুত্তত্তা. এতেসং মজ্ঝে ভৰত্তাতি ইদং মগ্গস্স উভযন্তৰিমুত্ততায এৰ ৰুত্তং, ন তপ্পরিযাপন্নতায, ৰট্টদুক্খনিস্সরণত্থিকেহি পটিপজ্জিতব্বতো চ. তথাতি যথা ইতরেন অসম্মিস্সট্ঠেন লামকট্ঠেন চ লোভো একো অন্তো, তথা কামসুখল্লিকানুযোগোতি অত্থো. এস নযো সেসেসুপি. মগ্গস্স অনুপগমনঞ্চ নেসং অন্তানং সব্বসো অপ্পৰত্তিকরণেনেৰ দট্ঠব্বং. পুরিমনযেনাতি ‘‘এতে দ্ৰে অন্তে ন উপেতী’’তিআদিনা পুব্বে ৰুত্তনযেন.

সচ্চানন্তি চতুন্নং অরিযসচ্চানং. দস্সনপরিণাযকট্ঠেনাতি দস্সনস্স পরিঞ্ঞাভিসমযাদিভেদস্স পরিতো সব্বথা নযনট্ঠেন পৰত্তনট্ঠেন. চক্খুকরণীতি ধম্মচক্খুস্স করণী নিপ্ফাদিকা. তযিদং সতিপি পটিপদায ধম্মচক্খুতো অনঞ্ঞত্তে অৰযৰৰসেন সিজ্ঝমানো অত্থো সমুদাযেন কতো নাম হোতীতি উপচারৰসেন ৰুত্তন্তি দট্ঠব্বং. তথা হি ৰক্খতি ‘‘মগ্গোযেৰ হি মগ্গত্থায সংৰত্ততি মগ্গেন কাতব্বকিচ্চকরণতো’’তি. ঞাণাযাতি যাথাৰতো জাননায. তেনাহ ‘‘ৰিদিতকরণট্ঠেনা’’তি. ৰিসেসঞাতভাৰাপাদনঞ্হি ৰিদিতকরণং. ৰূপসমনতোতি সমুচ্ছিন্দনৰসেন ৰূপসমনতো. দুক্খাদীনং পরিঞ্ঞেয্যাদিভাৰো ৰিয অভিঞ্ঞেয্যভাৰোপি মগ্গৰসেনেৰ পাকটো হোতীতি আহ ‘‘চতুন্নম্পি সচ্চানং অভিঞ্ঞেয্যভাৰদস্সনতো’’তি, ৰিভাৰনতোতি অত্থো. সম্বোধোতি মগ্গো ‘‘সম্বুজ্ঝতি এতেনা’’তি কত্ৰা. তস্সত্থাযাতি মগ্গকিচ্চত্থায. ন হি মগ্গতো অঞ্ঞো মগ্গকিচ্চকরো অত্থি. তেনাহ ‘‘মগ্গোযেৰ হী’’তিআদি. অথ ৰা সম্মাদিট্ঠি উপ্পজ্জমানা সহজাতাদিপচ্চযভাৰেন ইতরে উপ্পাদেতি, এৰং সেসমগ্গধম্মাপীতি এৰম্পি মগ্গত্থায সংৰত্তনং ৰেদিতব্বং. সচ্ছিকিরিযায পচ্চক্খকম্মাযাতি সচ্ছিকরণসঙ্খাতপচ্চক্খকম্মায. নিব্বানাযাতি ৰা অনুপাদিসেসনিব্বানায. উপসমাযাতি ¶ ইমিনা সউপাদিসেসনিব্বানং গহিতন্তি. অযন্তি ‘‘সা হি সচ্চান’’ন্তিআদিনা যথাৰুত্তো অত্থনযো. এত্থাতি ‘‘চক্খুকরণী’’তিআদীসু পদেসু. সারো সুন্দরো অনপনীতো. ইতো অঞ্ঞথাতি ‘‘দুক্খস্স পরিঞ্ঞায দিট্ঠিৰিসুদ্ধিং করোতীতি চক্খুকরণী’’তিআদিনা অত্থৰণ্ণনাপপঞ্চো কেৰলং ৰিত্থারত্থায.

অযমেৰাতি এত্থ অযন্তি ইমিনা অত্তনো অঞ্ঞেসঞ্চ তস্সং পরিসাযং অরিযানং মগ্গস্স ¶ পচ্চক্খভাৰং দস্সেতি. আসন্নপচ্চক্খৰাচী হি অযং-সদ্দো. অঞ্ঞমগ্গপটিসেধনত্থন্তি অঞ্ঞস্স নিব্বানগামিমগ্গস্স অত্থিভাৰপটিসেধনত্থং. সত্তাপটিক্খেপো হি ইধ পটিসেধনং অলব্ভমানত্তা অঞ্ঞস্স মগ্গস্স. বুদ্ধাদীনং সাধারণভাৰো অনঞ্ঞতা. তেনাহ ব্রহ্মা সহম্পতি –

‘‘একাযনং জাতিখযন্তদস্সী,

মগ্গং পজানাতি হিতানুকম্পী;

এতেন মগ্গেন তরিংসু পুব্বে,

তরিস্সন্তি যে চ তরন্তি ওঘ’’ন্তি. (সং. নি. ৫.৩৮৪, ৪০৯; মহানি. ১৯১; চূল়নি. ১০৭, ১২১; নেত্তি. ১৭০);

আরকত্তাতি ইমিনা নিরুত্তিনযেন অরিয-সদ্দসিদ্ধিমাহ. অরিপহানাযাতি অত্থৰচনমত্তং. অরযো পাপধম্মা যন্তি অপগমন্তি এতেনাতি অরিযো. অরিযেন দেসিতোতি এত্থ অরিযস্স ভগৰতো অযন্তি অরিযো. অরিযভাৰপ্পটিলাভাযাতি এত্থ অরিযকরো অরিযোতি উত্তরপদলোপেন অরিয-সদ্দসিদ্ধি ৰেদিতব্বা. যস্মা মগ্গঙ্গসমুদাযে মগ্গৰোহারো হোতি, সমুদাযো চ সমুদাযীহি সমন্নাগতো নাম হোতীতি আহ ‘‘অট্ঠহি অঙ্গেহি উপেতত্তা’’তি, তস্মা অত্তনো অৰযৰভূতানি অট্ঠ অঙ্গানি এতস্স সন্তীতি অট্ঠঙ্গিকো. যস্মা পন পরমত্থতো অঙ্গানিযেৰ মগ্গো, তস্মা ৰুত্তং ‘‘ন চ অঙ্গৰিনিমুত্তো’’তি যথা ‘‘ছল়ঙ্গো ৰেদো’’তি. সদিসূদাহরণং পন দস্সেন্তো ‘‘পঞ্চঙ্গিকতূরিযাদীনি ৰিযা’’তি আহ. আদি-সদ্দেন চতুরঙ্গিনী সেনাতি এৰমাদীনং সঙ্গহো. মারেন্তো গচ্ছতীতি নিরুত্তিনযেন সদ্দসিদ্ধিমাহ. মগ্গতীতি গৰেসতি. অরিযমগ্গো হি নিব্বানং আরম্মণং করোন্তো তং গৰেসন্তো ৰিয হোতীতি. মগ্গীযতি নিব্বানত্থিকেহি ৰিৰট্টূপনিস্সযপুঞ্ঞকরণতো ¶ পট্ঠায তদত্থং পটিপত্তিতো. গম্মতীতি এতেন আদিঅন্তৰিপরিযাযেন সদ্দসিদ্ধিমাহ যথা ‘‘ককূ’’তি. ‘‘সেয্যথিদন্তি নিপাতো’’তি ৰত্ৰা তস্স সব্বলিঙ্গৰিভত্তিৰচনসাধারণতায ‘‘কতমানি তানি অট্ঠঙ্গানী’’তি ৰুত্তং. ননু চ অঙ্গানি সমুদিতানি মগ্গো অন্তমসো সত্তঙ্গৰিকলস্স অরিযমগ্গস্স অভাৰতোতি? সচ্চমেতং সচ্চপটিৰেধেন, মগ্গপচ্চযতায পন যথাসকং কিচ্চকরণেন পচ্চেকম্পি তানি মগ্গোযেৰাতি আহ ‘‘একমেকঞ্হি অঙ্গং মগ্গোযেৰা’’তি, অঞ্ঞথা সমুদিতানম্পি নেসং মগ্গকিচ্চং ন সম্ভৰেয্যাতি. ইদানি তমেৰত্থং পাল়িযা সমত্থেতুং ‘‘সম্মাদিট্ঠিমগ্গো চেৰ হেতু চা’’তি ৰুত্তং.

সম্মা অৰিপরীতং পরিঞ্ঞাভিসমযাদিৰসেন চতুন্নং সচ্চানং দস্সনং পটিৰিজ্ঝনং লক্খণং ¶ এতিস্সাতি সম্মাদস্সনলক্খণা. সম্মা অৰিপরীতং সম্পযুত্তধম্মে নিব্বানারম্মণে অভিনিরোপনং অপ্পনালক্খণং এতস্সাতি সম্মাঅভিনিরোপনলক্খণো মুসাৰাদাদীনং ৰিসংৰাদনাদিকিচ্চতায লূখানং অপরিগ্গাহকানং পটিপক্খভাৰতো সিনিদ্ধসভাৰত্তা সম্পযুত্তধম্মে, সম্মাৰাচপ্পচ্চযসুভাসিতসোতারঞ্চ জনং সম্মদেৰ পরিগ্গণ্হাতীতি সম্মাৰাচা সম্মাপরিগ্গহো লক্খণং এতিস্সাতি সম্মাপরিগ্গহলক্খণা. যথা কাযিকা কিরিযা কিঞ্চি কত্তব্বং সমুট্ঠাপেতি, সযঞ্চ সমুট্ঠহনং ঘটনং হোতি, তথা সম্মাকম্মন্তসঙ্খাতা ৰিরতিপীতি সম্মাসমুট্ঠানলক্খণো সম্মাকম্মন্তো. সম্পযুত্তধম্মানং ৰা উক্খিপনং সমুট্ঠানং কাযিককিরিযায ভারুক্খিপনং ৰিয. জীৰমানস্স সত্তস্স, সম্পযুত্তধম্মানং ৰা সুদ্ধি ৰোদানং, আজীৰস্সেৰ ৰা জীৰিতপ্পৰত্তিযা সুদ্ধি ৰোদানং এতেনাতি সম্মাৰোদানলক্খণো সম্মাআজীৰো. কোসজ্জপক্খে পতিতুং অদত্ৰা সম্পযুত্তধম্মানং পগ্গণ্হনং অনুবলপ্পদানং পগ্গহো. আরম্মণং উপগন্ত্ৰা ঠানং, তস্স ৰা অনিস্সজ্জনং উপট্ঠানং. আরম্মণে সম্পযুত্তধম্মানং সম্মা, সমং ৰা আধানং সমাধানং. সম্মা সঙ্কপ্পেতি সম্পযুত্তধম্মে আরম্মণে অভিনিরোপেতীতি সম্মাসঙ্কপ্পো. সম্মা ৰদতি এতাযাতি সম্মাৰাচা. সম্মা করোতি এতেনাতি সম্মাকম্মং, তদেৰ সম্মাকম্মন্তো. সম্মা আজীৰতি এতেনাতি সম্মাআজীৰো. সম্মা ৰাযমতি উস্সহতি এতেনাতি সম্মাৰাযামো. সম্মা সরতি অনুস্সরতীতি সম্মাসতি ¶ . সম্মা সমাধিযতি চিত্তং এতেনাতি সম্মাসমাধীতি এৰং সম্মাসঙ্কপ্পাদীনং নিব্বচনং ৰেদিতব্বং.

মিচ্ছাদিট্ঠিন্তি সব্বম্পি মিচ্ছাদস্সনং. তপ্পচ্চনীযকিলেসেতি এত্থ তং-সদ্দেন সম্মাদিট্ঠি. ন হি মিচ্ছাদিট্ঠিযা কিলেসা পচ্চনীযা, অথ খো সম্মাদিট্ঠিযা. অৰিজ্জঞ্চাতি অৰিজ্জাগ্গহণং তস্সা সংকিলেসধম্মানং পমুখভাৰতো. তেনাহ ‘‘অৰিজ্জা, ভিক্খৰে, পুব্বঙ্গমা অকুসলানং ধম্মানং সমাপত্তিযা’’তি (সং. নি. ৫.১). দস্সননিৰারকস্স সম্মোহস্স সমুগ্ঘাতেন অসম্মোহতো. এত্থ চ মিচ্ছাদিট্ঠিং…পে… পজহতীতি এতেন পহানাভিসমযং, নিব্বানং আরম্মণং করোতীতি এতেন সচ্ছিকিরিযাভিসমযং, সম্পযুত্তধম্মেতিআদিনা ভাৰনাভিসমযং সম্মাদিট্ঠিকিচ্চং দস্সেতি. পরিঞ্ঞাভিসমযো পন নানন্তরিযতায অত্থতো ৰুত্তো এৰ হোতীতি দট্ঠব্বো.

কথং পন একমেৰ ঞাণং একস্মিং খণে চত্তারি কিচ্চানি সাধেন্তং পৰত্ততি. ন হি তাদিসং লোকে দিট্ঠং, ন আগমো ৰা তাদিসো অত্থীতি ন ৰত্তব্বং. যথা হি পদীপো একস্মিংযেৰ খণে ৰট্টিং দহতি, স্নেহং পরিযাদিযতি, অন্ধকারং ৰিধমতি, আলোকঞ্চ ৰিদংসেতি, এৰমেতং ঞাণন্তি দট্ঠব্বং. মগ্গসমঙ্গিস্স ঞাণং দুক্খেপেতং ঞাণং, দুক্খসমুদযেপেতং ঞাণং ¶ , দুক্খনিরোধেপেতং ঞাণং, দুক্খনিরোধগামিনিযা পটিপদাযপেতং ঞাণন্তি সুত্তপদং (ৰিভ. ৭৫৪) এত্থ উদাহরিতব্বং. যথা চ সম্মাদিট্ঠি পুব্বভাগে দুক্খাদীসু ৰিসুং ৰিসুং পৰত্তিত্ৰা মগ্গক্খণে একাৰ চতুন্নং ঞাণানং কিচ্চং সাধেন্তী পৰত্ততি, এৰং সম্মাসঙ্কপ্পাদযো পুব্বভাগে নেক্খম্মসঙ্কপ্পাদিনামকা হুত্ৰা কামসঙ্কপ্পাদীনং পজহনৰসেন ৰিসুং ৰিসুং পৰত্তিত্ৰা মগ্গক্খণে তিণ্ণং চতুন্নঞ্চ কিচ্চং সাধেন্তা পৰত্তন্তি. সম্মাসমাধি পন পুব্বভাগেপি মগ্গক্খণেপি নানাযেৰ হুত্ৰা পৰত্ততীতি কামঞ্চেত্থ সম্মাদিট্ঠিযা সব্বেপি পাপধম্মা পটিপক্খা, উজুৰিপচ্চনীকতাদস্সনৰসেন পন সম্মাদিট্ঠিযা কিচ্চনিদ্দেসে মিচ্ছাদিট্ঠিগ্গহণং কতং. তেনেৰ চ ‘‘তপ্পচ্চনীযকিলেসে চা’’তি ৰুত্তং.

যেসং কিলেসানং অনুপচ্ছিন্দনে সম্মাদিট্ঠি ন উপ্পজ্জেয্য, তে মিচ্ছাদিট্ঠিযা সহজেকট্ঠতায তদেকট্ঠাৰ তপ্পচ্চনীযকিলেসা দট্ঠব্বা. সম্মাসঙ্কপ্পাদীনং কিচ্চনিদ্দেসেপি এসেৰ নযো. সোতাপত্তিমগ্গাদিৰসেন চত্তারো লোকুত্তরমগ্গভাৰসামঞ্ঞেন একতো কত্ৰা. লোভদোসা সমুদযসচ্চং, যস্স পন সো সমুদযো তং দুক্খসচ্চং, পহানভাৰো মগ্গসচ্চং, যত্থ তং ¶ পহানং, তং নিরোধসচ্চন্তি ইমানি চত্তারি সচ্চানি. কস্মা পনেত্থ লোভদোসানং ৰিসুং আদিতো চ গহণং? ৰিসুং গহণং তাৰ তথাবুজ্ঝনকানং পুগ্গলানং অজ্ঝাসযৰসেন, ইমেহি লোভদোসেহি আমিসদাযাদতা, তপ্পহানেন চ ধম্মদাযাদতাতি দস্সনত্থং, তদনুসারেন চতুসচ্চযোজনায এৰং একেকস্স নিয্যানমুখং হোতীতি দস্সনত্থঞ্চ. সেসৰারেসুপি এসেৰ নযো. আদিতো গহণং পন অতিৰিয ওল়ারিকতায সুপাকটভাৰতো ৰক্খমানানং অঞ্ঞেসঞ্চ পাপধম্মানং মূলভাৰতো তদেকট্ঠতায চ ৰেদিতব্বং.

কুজ্ঝনলক্খণোতি কুপ্পনসভাৰো, চিত্তস্স ব্যাপজ্জনাতি অত্থো. চণ্ডিক্কং লুদ্দতা, কুরুরভাৰোতি অত্থো. আঘাতকরণরসোতি ‘‘অনত্থং মে অচরী’’তিআদিনা চিত্তে আঘাতস্স করণরসো. দুস্সনপচ্চুপট্ঠানোতি সপরসন্তানস্স ৰিনাসনপচ্চুপট্ঠানো লদ্ধোকাসো ৰিয সপত্তো. উপনন্ধনং নানপ্পকারস্স উপরূপরি নন্ধনং ৰিয হোতীতি কত্ৰা. তথা হেস ‘‘ৰেরঅপ্পটিনিস্সজ্জনরসো, কোধানুপবন্ধভাৰপচ্চুপট্ঠানো’’তি চ ৰুত্তো. অপরকালে উপনাহোতিআদীতি আদি-সদ্দেন ‘‘উপনয্হনা উপনয্হিতত্তং আঠপনা ঠপনা সণ্ঠপনা অনুসংসন্দনা অনুপ্পবন্ধনা দল়্হীকম্ম’’ন্তিআদীনং (ৰিভ. ৮৯১) নিদ্দেসপদানং অত্থৰণ্ণনং সঙ্গয্হতি. উপনাহসমঙ্গী হি পুগ্গলো ৰেরস্স অনিস্সজ্জনতো আদিত্তপূতিঅলাতং ৰিয জলতি এৰ, চিত্তঞ্চস্স ধোৰিযমানং অচ্ছচম্মং ৰিয, মসিমক্খিতপিলোতিকা ৰিয চ ন সুজ্ঝতেৰ.

পরগুণমক্খনলক্খণোতি ¶ উদকপুঞ্ছনিযা উদকং ৰিয পরেসং গুণানং মক্খনসভাৰো. তথাভূতো চাযং অত্তনো কারকং গূথেন পহরন্তং গূথো ৰিয পঠমতরং মক্খেতি এৰাতি দট্ঠব্বো. তথা হেস্স সপরসন্তানেসু গুণং মক্খেতীতি মক্খোতি ৰুচ্চতি. যুগগ্গাহো সমধুরগ্গহণং অসমানস্সপি অভূতস্স সমারোপনং. সমভাৰকরণং সমীকরণং. পরেসং গুণপ্পমাণেন অত্তনো গুণানং উপট্ঠানং পচ্চুপট্ঠপেতীতি আহ ‘‘পরেসং গুণপ্পমাণেন উপট্ঠানপচ্চুপট্ঠানো’’তি. তথা হেস পরেসং গুণে ডংসিত্ৰা ৰিয অত্তনো গুণেহি সমে করোতীতি পল়াসোতি ৰুচ্চতি.

পরসম্পত্তিখীযনং ¶ পরসম্পত্তিযা উসূযনং. ইস্সতি পরসম্পত্তিং ন সহতীতি ইস্সা. তথা হেসা ‘‘পরসম্পত্তিযা অক্খমনলক্খণা’’তি ৰুচ্চতি. তত্থাতি পরসম্পত্তিযং. অনভিরতিরসা অভিরতিপটিপক্খকিচ্চা. ৰিমুখভাৰপচ্চুপট্ঠানা পরসম্পত্তিং পস্সিতুম্পি অপ্পদানতো. নিগূহনলক্খণং অত্তনো সম্পত্তিযা পরেহি সাধারণভাৰাসহনতো. অসুখাযনং ন সুখনং দুক্খনং, অরোচনন্তি অধিপ্পাযো.

কতস্স কাযদুচ্চরিতাদিপাপস্স পটিচ্ছাদনং কতপাপপটিচ্ছাদনং. তস্স পাপস্স আৰরণভাৰেন পচ্চুপতিট্ঠতীতি তদাৰরণপচ্চুপট্ঠানা, মাযা, যায সমন্নাগতো পুগ্গলো ভস্মছন্নো ৰিয অঙ্গারো, উদকছন্নো ৰিয খাণু, পিলোতিকপটিচ্ছাদিতং ৰিয চ সত্থং হোতি. অৰিজ্জমানগুণপ্পকাসনং অত্তনি অৰিজ্জমানসীলাদিগুণৰিভাৰনং, যেন সাঠেয্যেন সমন্নাগতস্স পুগ্গলস্স অসন্তগুণসম্ভাৰনেন চিত্তানুরূপকিরিযাৰিহরতো ‘‘এৰংচিত্তো, এৰংকিরিযো’’তি দুব্বিঞ্ঞেয্যত্তা কুচ্ছিং ৰা পিট্ঠিং ৰা জানিতুং ন সক্কা. যতো –

‘‘ৰামেন সূকরো হোতি, দক্খিণেন অজামিগো;

সরেন নেলকো হোতি, ৰিসাণেন জরগ্গৰো’’তি. (দী. নি. অট্ঠ. ২.২৯৬; ৰিভ. অট্ঠ. ৮৯৪; মহানি. অট্ঠ. ১৬৬) –

এৰং ৰুত্তযক্কসূকরসদিসো হোতি.

চিত্তস্স উদ্ধুমাতভাৰো থদ্ধলূখভাৰো. অপ্পতিস্সযৰুত্তীতি অনিৰাতৰুত্তি. অমদ্দৰাকারেন পচ্চুপতিট্ঠতি, অমদ্দৰতং ৰা পচ্চুপট্ঠপেতীতি অমদ্দৰতাপচ্চুপট্ঠানো, থম্ভো, যেন সমন্নাগতো পুগ্গলো গিলিতনঙ্গলসীসো ৰিয অজগরো, ৰাতভরিতভস্তা ৰিয চ থদ্ধো হুত্ৰা গরুট্ঠানিযে চ ¶ দিস্ৰা ওনমিতুম্পি ন ইচ্ছতি, পরিযন্তেনেৰ চরতি. করণস্স উত্তরকিরিযা করণুত্তরিযং. ৰিসেসতো পচ্চনীকভাৰো ৰিপচ্চনীকতা. পরেন হি কিস্মিঞ্চি কতে তদ্দিগুণং করণৰসেন সারম্ভো পৰত্ততি.

সেয্যাদিআকারেহি উন্নমনং উন্নতি. ওমানোপি হি এৰং করণমুখেন সম্পগ্গহৰসেনেৰ পৰত্ততি. ‘‘অহমস্মি সেয্যো’’তিআদিনা অহংকরণং সম্পগ্গহো অহঙ্কারো. পরে অভিভৰিত্ৰা অধিকং উন্নমনং অব্ভুন্নতি ¶ . যং সন্ধায ৰুত্তং ‘‘পুব্বকালে অত্তানং হীনতো দহতি অপরকালে সেয্যতো’’তি (ৰিভ. ৮৭৭).

মত্তভাৰো জাতিআদিং পটিচ্চ চিত্তস্স মজ্জনাকারো, যস্স ৰা ধম্মস্স ৰসেন পুগ্গলো মত্তো নাম হোতি, সো ধম্মো মত্তভাৰো. মদগ্গাহণরসো মদস্স গাহণকিচ্চো. মদো হি অত্তনো মজ্জনাকারং সম্পযুত্তধম্মে গাহেন্তো ৰিয পৰত্তমানো তংসমঙ্গিং পুগ্গলম্পি তথা করোন্তো ৰিয হোতি. অহঙ্কারৰসেন পুগ্গলং অনিট্ঠং করোন্তো চিত্তস্স উম্মাদভাৰো ৰিয হোতীতি উম্মাদপচ্চুপট্ঠানো. সতিযা অনিগ্গণ্হিত্ৰা চিত্তস্স ৰোস্সজ্জনং চিত্তৰোস্সগ্গো, সতিৰিরহিতোতি অত্থো. যথাৰুত্তস্স ৰোস্সগ্গস্স অনুপ্পদানং পুনপ্পুনং ৰিস্সজ্জনং ৰোস্সগ্গানুপ্পদানং. ইমেসং কোধাদীনং লোভাদীনম্পি ৰা. লক্খণাদীনীতি লক্খণরসপচ্চুপট্ঠানানি. পদট্ঠানং পন ধম্মন্তরতায ন গহিতং. নিব্বচনং ‘‘কুজ্ঝতীতি কোধো, উপনয্হতীতি উপনাহো’’তিআদিনা সুৰিঞ্ঞেয্যমেৰাতি ন ৰুত্তং, অত্থতো পন কোধো দোসো এৰ, তথা উপনাহো. পৰত্তিআকারমত্ততো হি কতো নেসং ভেদো, মক্খপল়াসসারম্ভা তদাকারপ্পৰত্তা পটিঘসহগতচিত্তুপ্পাদধম্মা, মাযাসাঠেয্যথম্ভমদপ্পমাদা তদাকারপ্পৰত্তা লোভসহগতচিত্তুপ্পাদধম্মা. থম্ভো ৰা মানৰিসেসো চিত্তস্স থদ্ধভাৰেন গহেতব্বতো, তথা মদো. তথা হি সো ‘‘মানো মঞ্ঞনা’’তিআদিনা ৰিভঙ্গে (ৰিভ. ৮৭৮) নিদ্দিট্ঠো. ইধ পন মানাতিমানানং ৰিসুং গহিতত্তা মজ্জনাকারেন পৰত্তধম্মা এৰ ‘‘মদো’’তি গহেতব্বা. সেসানং ধম্মন্তরভাৰো পাকটো এৰ.

কস্মা পনেত্থ এতে এৰ অট্ঠ দুকা গহিতা, কিমিতো অঞ্ঞেপি কিলেসধম্মা নত্থীতি? নো নত্থি, ইমে পন আমিসদাযাদস্স সৰিসেসং কিলেসায সংৰত্তন্তীতি তং ৰিসেসং ৰিভাৰেন্তেন আমিসদাযাদস্স লোভাদীনং পৰত্তনাকারং দস্সেতুং ‘‘ৰিসেসতো’’তিআদি আরদ্ধং. তত্থ এত্থাতি এতেসু লোভাদীসু. অলভন্তো আমিসন্তি অধিপ্পাযো. ততুত্তরি উপ্পন্নো কোধোতি আনেত্ৰা সম্বন্ধিতব্বং. সন্তেপীতি ৰিজ্জমানেপি. ইস্সতীতি ইস্সং জনেতি. পদুস্সতীতি তস্সেৰ ৰেৰচনং. তথা হি সা ‘‘ইস্সতি দুস্সতি পদুস্সতী’’তিআদিনা নিদ্দিট্ঠা. যস্মা ৰা ইস্সং ¶ ¶ জনেন্তো একংসতো পদুট্ঠচিত্তো এৰ হোতি, তস্মা ‘‘পদুস্সতী’’তি ৰুত্তং. অস্সাতি আমিসদাযাদস্স. এৰং পটিপন্নোতি এৰং অসন্তগুণপ্পকাসনং পটিপদং পটিপন্নো. ওৰদিতুং অসক্কুণেয্যোতি এতেন থম্ভো নাম দোৰচস্সকরণো ধম্মোতি দস্সেতি. কিঞ্চি ৰদতি ওৰাদদানৰসেন. থম্ভেন…পে… মঞ্ঞন্তোতি ইমিনা চ থম্ভস্স মানৰিসেসভাৰং দস্সেতি, থম্ভেন ৰা হেতুনাতি অত্থো. মত্তো সমানোতি মত্তো হোন্তো. কাম…পে… পমজ্জতীতি এতেন মদৰসেন একংসতো পমাদমাপজ্জতীতি দস্সেতি.

এৰন্তি ইমিনা আমিসদাযাদস্স লোভাদীনং উপ্পত্তিক্কমদস্সনেনেৰ ইধ পাল়িযং নেসং দেসনাক্কমোপি দস্সিতোতি দট্ঠব্বো. ন কেৰলং ইমেহেৰ, অথ খো অঞ্ঞেহি চ এৰরূপেহি পাপকেহি ধম্মেহি অপরিমুত্তো হোতীতি সম্বন্ধো. কে পন তেতি? অত্রিচ্ছতামহিচ্ছতাদযোতি. এৰং মহাদীনৰা আমিসদাযাদতাতি ততো বলৰতরো সংৰেগো জনেতব্বোতি অযমেত্থ ওৰাদো ৰেদিতব্বো. এত্থাতি এতস্মিং সুত্তে. সব্বত্থাতি সব্বেসু ৰারেসু. নিব্বিসেসোযেৰাতি এতেনেৰ পঠমতরং ইধ দস্সিতসচ্চযোজনানযেন সব্বৰারেসু যোজেতব্বোতি ৰেদিতব্বো.

ঞাণপরিচযপাটৰত্থন্তি মগ্গস্স অট্ঠঙ্গসত্তঙ্গতাদিৰিসেসৰিভাৰনায ঞাণস্স আসেৰনট্ঠেন পরিচযো ঞাণপরিচযো, তস্স পটুভাৰত্থং কোসল্লত্থং. এত্থাতি অরিযমগ্গে. ভেদোতি ৰিসেসো. কমোতি অঙ্গানং দেসনানুপুব্বী. ভাৰনানযোতি ভাৰনাৰিধি. ‘‘কদাচি অট্ঠঙ্গিকো, কদাচি সত্তঙ্গিকো’’তি সঙ্খেপতো ৰুত্তমত্থং ৰিৰরন্তো পুন ‘‘অযং হী’’তিআদিমাহ. তত্থ লোকুত্তরপঠমজ্ঝানৰসেনাতি লোকুত্তরস্স পঠমজ্ঝানস্স ৰসেন. এত্থ চ কেচি ঝানধম্মা মগ্গসভাৰাতি একন্ততো ঝানং মগ্গতো ৰিসুং কত্ৰা ৰত্তুং ন সক্কাতি ‘‘লোকুত্তরপঠমজ্ঝানসহিতো’’তি অৰত্ৰা ‘‘লোকুত্তরপঠমজ্ঝানৰসেন’’ইচ্চেৰ ৰুত্তং. অথ ৰা লোকুত্তরপঠমজ্ঝানৰসেনাতি লোকুত্তরা হুত্ৰা পঠমজ্ঝানস্স ৰসেনাতি এৰমেত্থ অত্থো ৰেদিতব্বো. অরিযমগ্গো হি ৰিপস্সনায পাদকভূতস্স, সম্মসিতস্স ৰা পঠমজ্ঝানস্স ৰসেন অট্ঠঙ্গিকো হোতি. অথ ৰা অঝানলাভিনো সুক্খৰিপস্সকস্স, ঝানলাভিনো ৰা পাদকমকত্ৰা পঠমজ্ঝানস্স, পকিণ্ণকসঙ্খারানং ৰা সম্মসনে ¶ উপ্পন্নো অরিযমগ্গো অট্ঠঙ্গিকো হোতি, স্ৰাস্স অট্ঠঙ্গিকভাৰো পঠমজ্ঝানিকভাৰেনাতি দস্সেন্তো ‘‘পঠমজ্ঝানৰসেনা’’তি আহ. এৰং ‘‘অৰসেসজ্ঝানৰসেনা’’তি এত্থাতি যথারহং অত্থো ৰেদিতব্বো.

যদি অরিযমগ্গো সত্তঙ্গিকোপি হোতি, অথ কস্মা পাল়িযং ‘‘অট্ঠঙ্গিকো’’ইচ্চেৰ ৰুত্তন্তি আহ ‘‘উক্কট্ঠনিদ্দেসতো’’তিআদি. যথা চেত্থ পটিপদায মগ্গৰসেন অট্ঠঙ্গিকসত্তঙ্গিকভেদো ¶ , এৰং বোজ্ঝঙ্গৰসেন সত্তঙ্গিকছল়ঙ্গিকভেদো ৰেদিতব্বো অপ্পীতিকজ্ঝানৰসেন ছল়ঙ্গিকত্তা, মগ্গৰসেন পন দেসনা আগতাতি স্ৰাযং ভেদো অট্ঠকথাযং ন উদ্ধটো. ইতো পরন্তি ইতো অট্ঠঙ্গতো পরং উক্কংসতো, অৰকংসতো পন সত্তঙ্গতো পরং মগ্গঙ্গং নাম নত্থীতি. ননু মগ্গৰিভঙ্গে (ৰিভ. ৪৯৩-৫০২) পঞ্চঙ্গিকৰারে পঞ্চেৰ মগ্গঙ্গানি উদ্ধটানি, মহাসল়াযতনে (ম. নি. ৩.৪৩১) চ ‘‘যা তথাভূতস্স দিট্ঠি, যো তথাভূতস্স সঙ্কপ্পো, যো তথাভূতস্স ৰাযামো, যা তথাভূতস্স সতি, যো তথাভূতস্স সমাধি, স্ৰাস্স হোতি সম্মাসমাধী’’তি ৰত্ৰা পুব্বভাগৰসেন পন ‘‘পুব্বেৰ খো পনস্স কাযকম্মং ৰচীকম্মং আজীৰো সুপরিসুদ্ধো হোতী’’তি সম্মাৰাচাদযো আগতাতি? সচ্চমেতং, তং পন সম্মাদিট্ঠিআদীনং পঞ্চন্নং কারাপকঙ্গানং অতিরেককিচ্চদস্সনৰসেন ৰুত্তং, তস্মা ন অরিযমগ্গো সম্মাৰাচাদিৰিরহিতো অত্থীতি ‘‘ইতো পরঞ্হি মগ্গঙ্গং নত্থী’’তি সুৰুত্তমেতন্তি দট্ঠব্বং.

সব্বকুসলানন্তি সব্বেসং কুসলধম্মানং. নিদ্ধারণে চেতং সামিৰচনং. কামাৰচরাদিৰসেন তংতংকুসলধম্মেসু সা সম্মাদিট্ঠি সেট্ঠা. তস্সা সেট্ঠভাৰেন হি ‘‘পঞ্ঞাজীৰিং জীৰিতমাহু সেট্ঠ’’ন্তি (সং. নি. ১.২৪৬; সু. নি. ১৮৪) ৰুত্তং, মগ্গসম্মাদিট্ঠিযা পন সব্বসেট্ঠভাৰে ৰত্তব্বমেৰ নত্থি. কুসলৰারেতি কুসলুপ্পত্তিসমযে. পুব্বঙ্গমা কুসলাদিধম্মানং যাথাৰসভাৰবোধেন সম্পযুত্তধম্মানং পরিণাযকভাৰতো. তেনেৰাহ ‘‘সম্মাদিট্ঠিং সম্মাদিট্ঠীতি পজানাতী’’তিআদি. সা সম্মাদিট্ঠি পভৰো এতস্সাতি তপ্পভৰো, সম্মাসঙ্কপ্পো. সম্মাদস্সনৰসেন হি সম্মাসঙ্কপ্পো হোতি. ততো অভিনিব্বত্তানীতি তপ্পভৰাভিনিব্বত্তানি. তপ্পভৰাভিনিব্বত্তানিপি ‘‘তদভিনিব্বত্তানী’’তি ৰুচ্চন্তি কারণকারণেপি কারণূপচারতোতি আহ ‘‘তপ্পভৰাভিনিব্বত্তানি সেসঙ্গানী’’তি. তেনাহ ‘‘সম্মাদিট্ঠিস্সা’’তিআদি. যথা হি সম্মাদস্সনং ¶ সম্মাৰিতক্কনস্স ৰিসেসপচ্চযো, এৰং সম্মাৰিতক্কনং সম্মাপরিগ্গহস্স সম্মাপরিগ্গহো সম্মাসমুট্ঠানস্স, সম্মাসমুট্ঠানং সম্মাৰোদানস্স, সম্মাৰোদানং সম্মাৰাযামস্স, সম্মাৰাযামো সম্মাউপট্ঠানস্স, সম্মাউপট্ঠানং সম্মাধানস্স ৰিসেসপচ্চযো, তস্মা ‘‘পুরিমং পুরিমং পচ্ছিমস্স পচ্ছিমস্স ৰিসেসপচ্চযো হোতী’’তি ইমিনা ৰিসেসপচ্চযভাৰদস্সনত্থেন কমেন এতানি সম্মাদিট্ঠিআদীনি অঙ্গানি ৰুত্তানীতি দস্সিতানি.

ভাৰনানযোতি সমথৰিপস্সনানং যুগনদ্ধভাৰেন পৰত্তো ভাৰনাৰিধি. অযঞ্হি অরিযমগ্গক্খণে ভাৰনাৰিধি. তস্স পন পুব্বভাগে ভাৰনানযো কস্সচি সমথপুব্বঙ্গমো হোতি ¶ , কস্সচি ৰিপস্সনাপুব্বঙ্গমোতি. তং ৰিধিং দস্সেতুং ‘‘কোচী’’তিআদি আরদ্ধং. তত্থ পঠমো সমথযানিকস্স ৰসেন ৰুত্তো, দুতিযো ৰিপস্সনাযানিকস্স. তেনাহ ‘‘ইধেকচ্চো’’তিআদি. তন্তি সমথং সমাধিং, ঝানধম্মেতি ৰা অত্থো. তংসম্পযুত্তেতি সমাধিসম্পযুত্তে, ঝানসম্পযুত্তে ৰা ধম্মে. অযঞ্চ নযো যেভুয্যেন সমথযানিকা অরূপমুখেন, তত্থাপি ঝানমুখেন ৰিপস্সনাভিনিৰেসং করোন্তীতি কত্ৰা ৰুত্তো. ৰিপস্সনং ভাৰযতোতি পটিপদাঞাণদস্সনৰিসুদ্ধিং আরভিত্ৰা যথাধিগতং তরুণৰিপস্সনং ৰড্ঢেন্তস্স. মগ্গো সঞ্জাযতীতি পুব্বভাগিযো লোকিযমগ্গো উপ্পজ্জতি. আসেৰতি নিব্বিদানুপস্সনাৰসেন. ভাৰেতি মুঞ্চিতুকম্যতাৰসেন. বহুলীকরোতি পটিসঙ্খানুপস্সনাৰসেন. আসেৰতি ৰা ভযতূপট্ঠানঞাণৰসেন. বহুলীকরোতি ৰুট্ঠানগামিনিৰিপস্সনাৰসেন. সংযোজনানি পহীযন্তি, অনুসযা ব্যন্তী হোন্তি মগ্গপটিপাটিযা.

সমথং অনুপ্পাদেত্ৰাৰাতি অৰধারণেন উপচারসমাধিং নিৰত্তেতি, ন খণিকসমাধিং. ন হি খণিকসমাধিং ৰিনা ৰিপস্সনা সম্ভৰতি. ৰিপস্সনাপারিপূরিযাতি ৰিপস্সনায পরিপুণ্ণতায ৰুট্ঠানগামিনিভাৰপ্পত্তিযা. তত্থজাতানন্তি তস্মিং অরিযমগ্গক্খণে উপ্পন্নানং সম্মাদিট্ঠিআদীনং ধম্মানং. নিদ্ধারণে চেতং সামিৰচনং. ৰৰস্সগ্গারম্মণতোতি ৰৰস্সগ্গস্স আরম্মণতায. ৰৰস্সগ্গো ৰোস্সগ্গো পটিনিস্সগ্গোতি চ অপৰগ্গোতি চ অত্থতো একং, নিব্বানন্তি ৰুত্তং হোতি, তস্মা নিব্বানস্স আরম্মণকরণেনাতি অত্থো. চিত্তস্স একগ্গতাতি মগ্গসম্মাসমাধিমাহ. অরিযমগ্গো হি একন্ত সমাহিতো অসমাধানহেতূনং কিলেসানং সমুচ্ছেদনতো. সেসং ৰুত্তনযমেৰ.

যুগনদ্ধাৰ ¶ হোন্তি তদা সমাধিপঞ্ঞানং সমরসতায ইচ্ছিতব্বতো. মগ্গক্খণে হি ন সমথভাৰনাযং ৰিয সমাধি, ৰিপস্সনাভাৰনাযং ৰিয চ পঞ্ঞা কিচ্চতো অধিকা ইচ্ছিতব্বা, সমরসতায পন অঞ্ঞমঞ্ঞস্স অনতিৰত্তনট্ঠেন দ্ৰেপি যুগনদ্ধা ৰিয পৰত্তন্তি. তেন ৰুত্তং ‘‘সমথৰিপস্সনা যুগনদ্ধাৰ হোন্তী’’তি.

ধম্মদাযাদসুত্তৰণ্ণনায লীনত্থপ্পকাসনা সমত্তা.

৪. ভযভেরৰসুত্তৰণ্ণনা

৩৪. এৰং ¶ মে সুতন্তি ভযভেরৰসুত্তং. কো নিক্খেপো? কেচি তাৰ এৰমাহু ‘‘পুচ্ছাৰসিকো নিক্খেপো’’তি. দুৰিধা হি পুচ্ছা পাকটাপাকটভেদতো. তত্থ যস্সা দেসনায নিমিত্তভূতো ঞাতুং ইচ্ছিতো অত্থো কিং-সদ্দপুব্বকেন পকাসীযতি, সা পাকটা পুচ্ছা যথা ‘‘কিংসূধ ৰিত্তং পুরিসস্স সেট্ঠ’’ন্তি এৰমাদি (সং. নি. ১.২৪৬; সু. নি. ১৮৩). যস্সা পন দেসনায নিমিত্তভূতো ঞাতুং ইচ্ছিতো অত্থো কিং-সদ্দরহিতেন কেৰলেনেৰ সদ্দপযোগেন পকাসীযতি, সা অপাকটা পুচ্ছা. ঞাতুং ইচ্ছিতো হি অত্থো ‘‘পঞ্হা, পুচ্ছা’’তি ৰুচ্চতি, তস্মাযেৰ ইধ ‘‘যে মে ভো গোতমা’’তিআদিকা অপাকটাতি ‘‘পুচ্ছাৰসিকো নিক্খেপো’’তি. তযিদং অকারণং, যস্মা সো ব্রাহ্মণো ‘‘যেমে ভো গোতমা’’তিআদীনি ৰদন্তো ন তত্থ কঙ্খী ৰিচিকিচ্ছী সংসযমাপন্নো অৰোচ, অথ খো অত্তনা যথানিচ্ছিতমত্থং ভগৰতি পসাদভাৰবহুমানং পৰেদেন্তো কথেসি. তেনাহ ‘‘ভগৰতি পসাদং অলত্থা’’তিআদি (ম. নি. অট্ঠ. ১.৩৪). ৰিহারেতি ৰিহারকে নিৰাসে. অৰিচ্ছিন্নেযেৰাতি পৰত্তমানেযেৰ. পদদ্ৰযস্সপি ৰসন্তে এৰাতি অত্থো. এতং পুরোহিতট্ঠানং উণ্হীসাদিককুধভণ্ডেহি সদ্ধিং লদ্ধং, তথা চ ‘‘অস্স রঞ্ঞা দিন্ন’’ন্তি ৰদন্তি. তেনাহ ‘‘তং তস্স রঞ্ঞা দিন্ন’’ন্তি. ব্রহ্মন্তি ৰেদং. সো পন মন্তব্রহ্মকপ্পৰসেন তিৰিধো. তত্থ মন্তা পধানং মূলভাৰতো, যে অট্ঠকাদীহি পৰুত্তা, ইতরে তন্নিস্সযেন জাতা, তেন তেসংযেৰ গহণং ‘‘মন্তে সজ্ঝাযতী’’তি ¶ . তে হি গুত্তভাসিতব্বতায ‘‘মন্তা’’তি ৰুচ্চন্তি. ইদমেৰ হীতি অৰধারণেন ‘‘ব্রহ্মতো জাতা’’তিআদিকং নিরুত্তিং পটিক্খিপতি.

যেন ৰা কারণেনাতি (সারত্থ. টী. ৰেরঞ্জকণ্ডৰণ্ণনাযং ২; সং. নি. টী. ১.১.১; অ. নি. টী. ২.২.১৬) হেতুম্হি ইদং করণৰচনং. হেতুঅত্থো হি কিরিযাকারণং, ন করণং ৰিয কিরিযত্থো, তস্মা নানপ্পকারগুণৰিসেসাধিগমত্থা ইধ উপসঙ্কমনকিরিযাতি ‘‘অন্নেন ৰসতী’’তিআদীসু ৰিয হেতুঅত্থমেৰেতং করণৰচনং যুত্তং, ন করণত্থং তস্স অযুজ্জমানত্তাতি ৰুত্তং ‘‘যেন ৰা কারণেনা’’তিআদি. ভগৰতো সততপ্পৰত্তনিরতিসযসাদুৰিপুলামতরসসদ্ধম্মফলতায সাদুফলনিচ্চফলিতমহারুক্খেন ভগৰা উপমিতো, সাদুফলূপভোগাধিপ্পাযগ্গহণেনেৰ হি মহারুক্খস্স সাদুফলতা গহিতাতি.

উপসঙ্কমীতি ¶ উপসঙ্কন্তো. সম্পত্তুকামতায হি কিঞ্চি ঠানং গচ্ছন্তো তংতংপদেসাতিক্কমনেন উপসঙ্কমি, উপসঙ্কন্তোতি ৰা ৰত্তব্বতং লভতি. তেনাহ ‘‘গতোতি ৰুত্তং হোতী’’তি, উপগতোতি অত্থো. উপসঙ্কমিত্ৰাতি পুব্বকালকিরিযানিদ্দেসোতি আহ ‘‘উপসঙ্কমনপরিযোসানদীপন’’ন্তি. ততোতি যং ঠানং পত্তো ‘‘উপসঙ্কমী’’তি ৰুত্তো, ততো উপগতট্ঠানতো. যথা খমনীযাদীনি পুচ্ছন্তোতি (সং. নি. টী. ১.১.১১২) যথা ভগৰা ‘‘কচ্চি তে ব্রাহ্মণ খমনীযং, কচ্চি যাপনীয’’ন্তিআদিনা খমনীযাদীনি পুচ্ছন্তো তেন ব্রাহ্মণেন সদ্ধিং সমপ্পৰত্তমোদো অহোসি পুব্বভাসিতায, তদনুকরণেন এৰং সোপি ব্রাহ্মণো ভগৰতা সদ্ধিং সমপ্পৰত্তমোদো অহোসীতি যোজনা. তং পন সমপ্পৰত্তমোদতং উপমায দস্সেতুং ‘‘সীতোদকং ৰিযা’’তিআদি ৰুত্তং. তত্থ সম্মোদিতন্তি সংসন্দিতং. একীভাৰন্তি সম্মোদনকিরিযায সমানতং একরূপতং. খমনীযন্তি ‘‘ইদং চতুচক্কং নৰদ্ৰারং সরীরযন্তং খণভঙ্গুরতায সভাৰতো দুস্সহং, কচ্চি খমিতুং সক্কুণেয্য’’ন্তি পুচ্ছতি. যাপনীযন্তি পচ্চযাযত্তৰুত্তিকং চিরপ্পবন্ধসঙ্খাতায যাপনায কচ্চি যাপেতুং সক্কুণেয্যং. সীসরোগাদিআবাধাভাৰেন কচ্চি অপ্পাবাধং. দুক্খজীৰিকাভাৰেন কচ্চি অপ্পাতঙ্কং. তংতংকিচ্চকরণে উট্ঠানসুখতায কচ্চি লহুট্ঠানং. তদনরূপবলযোগতো কচ্চি বলং. সুখৰিহারসব্ভাৰেন কচ্চি ফাসুৰিহারো অত্থীতি তত্থ তত্থ কচ্চি-সদ্দং যোজেত্ৰা অত্থো ৰেদিতব্বো.

বলৰপ্পত্তা ¶ পীতি পীতিযেৰ. তরুণপীতি পামোজ্জং. সম্মোদনং জনেতি করোতীতি সম্মোদনিকং, তদেৰ সম্মোদনীযন্তি আহ ‘‘সম্মোদজননতো’’তি. সম্মোদিতব্বতো সম্মোদনীযন্তি ইমং পন অত্থং দস্সেন্তো ‘‘সম্মোদিতুং যুত্তভাৰতো’’তি আহ. সরিতব্বভাৰতোতি অনুস্সরিতব্বভাৰতো. ‘‘সরণীয’’ন্তি ৰত্তব্বে দীঘং কত্ৰা ‘‘সারণীয’’ন্তি ৰুত্তং. সুয্যমানসুখতোতি আপাথমধুরতং আহ, অনুস্সরিযমানসুখতোতি ৰিমদ্দরমণীযতং. ব্যঞ্জনপরিসুদ্ধতাযাতি সভাৰনিরুত্তিভাৰেন তস্সা কথায ৰচনচাতুরিযমাহ, অত্থপরিসুদ্ধতাযাতি অত্থস্স নিরুপক্কিলেসতং. অনেকেহি পরিযাযেহীতি অনেকেহি কারণেহি.

অভিদূরঅচ্চাসন্নপটিক্খেপেন নাতিদূরনাচ্চাসন্নং নাম গহিতং, তং পন অৰকংসতো উভিন্নং পসারিতহত্থসঙ্ঘট্টনেন দট্ঠব্বং. গীৰং পসারেত্ৰাতি গীৰং পরিৰত্তনৰসেন পসারেত্ৰা.

যেমেতি এত্থ সন্ধিৰসেন ইকারলোপোতি দস্সেন্তো ‘‘যে ইমে’’তিআদিমাহ. উচ্চাকুলীনতায জাতিৰসেন অভিজাতা জাতিকুলপুত্তা. তেনাহ ‘‘উচ্চাকুলপ্পসুতা’’তি. আচারসম্পত্তিযা ¶ অভিজাতা আচারকুলপুত্তা. তেনাহ ‘‘আচারসম্পন্না’’তি. যত্থ কত্থচি অপাকটেপি কুলে. তেন ব্রাহ্মণেন অধিপ্পেতা ভিক্খূসু দুৰিধাপি সংৰিজ্জন্তীতি আহ ‘‘ইধ পন দ্ৰীহিপি কারণেহি কুলপুত্তাযেৰা’’তি.

সদ্ধাতি ইদং করণত্থে পচ্চত্তৰচনন্তি আহ ‘‘সদ্ধাযা’’তি, সদ্ধাতি ৰা সদ্দহিত্ৰাতি অত্থো. ইমস্মিং পক্খে পাল়িযং য-কারলোপেন নিদ্দেসোতি দট্ঠব্বং. অগারতোতি অগারৰাসতো, উত্তরপদলোপেন, নিস্সযূপচারেন ৰা অযং নিদ্দেসোতি. ভিক্খনসীলতাদিলক্খণো ভিক্খুভাৰো পব্বজ্জাসহচরিতায সদ্ধিং ভিক্খুভাৰং অন্ৰাচিনন্তোতি আহ ‘‘পব্বজ্জং ভিক্খুভাৰঞ্চা’’তি. কম্মৰাচালক্খণে পন ভিক্খুভাৰে অধিপ্পেতে সমুচ্চযত্থো চ-সদ্দো দট্ঠব্বো. অনগারস্স ভাৰোতি এতেন পব্বজ্জানিস্সিতো সুৰিসুদ্ধো সীলাচারগুণৰিসেসো গহিতো, কসিগোরক্খাদিকম্মপটিক্খেপো ইধ অনুপ্পাদাদীহি ৰেদিতব্বো. সেসগ্গহণে পন সরণগমনাদিৰসেন পব্বজ্জায, সরণগমনাদিৰসেন উপসম্পদায চ অনেকভেদত্তা আহ ‘‘সব্বথাপী’’তি, তেন তেন পকারেনাতি অত্থো. পুরতোগামিতা পটিপত্তিগমনেন, ন কাযগমনেনাতি আহ ‘‘নাযকো’’তি ¶ , সম্মাপটিপত্তিযা নিব্বানসম্পাপকোতি অত্থো. হিতকিরিযাযাতি দিট্ঠধম্মিকাদিহিতচরিযায. গাহণং অধিসীলাদীসু অচ্চন্তায নিযোজনং, ন কথনমত্তন্তি দস্সেন্তো ‘‘গাহেতা’’তি ৰত্ৰা ‘‘সিক্খাপেতা’’তি আহ. দিট্ঠানুগতিন্তি দিট্ঠিযা অনুগমনন্তি দস্সেন্তো ‘‘দস্সনানুগতি’’ন্তি ৰত্ৰা সিক্খাত্তযসঙ্গহং ভগৰতো সাসনং তেন দিট্ঠত্তা দিট্ঠি, তস্স তস্সেৰ খমনৰসেন খন্তি, রুচ্চনৰসেন রুচি, তংদিট্ঠিখন্তিরুচিকাৰ ভগৰতো সাৰকাতি আহ ‘‘যংদিট্ঠিকো’’তিআদি.

এস কির অলত্থাতি সম্বন্ধো. দেৰপুত্তে ৰিযাতিআদি কস্সচি পারিজুঞ্ঞস্স অভাৰদীপনতো ‘‘সদ্ধাযা’’তিআদিনা ৰুত্তস্স পব্বজিতভাৰস্স পাকটীকরণং. সদ্ধায ঘরা নিক্খম্ম পব্বজিত্ৰাতি ইদং হট্ঠপহট্ঠাদিভাৰস্স কারণৰচনং. ঘাসচ্ছাদনপরমতায সন্তুট্ঠেতি ইদং অনুস্সঙ্কিতাপরিসঙ্কিততায কারণৰচনন্তি দট্ঠব্বং.

এৰমেতন্তিআদিনা আমেডিতৰচনং সম্পহংসনৰসেন, পসাদৰসেন ৰা কতন্তি দট্ঠব্বং. তথা হি এৰং-সদ্দো সম্পটিচ্ছনত্থো অব্ভনুমোদনত্থো চ ৰুত্তো. মমন্তি উপযোগত্থে সামিৰচনং, নিপাতপদং ৰা এতং ‘‘ম’’ন্তি ইমিনা সমানত্থন্তি দট্ঠব্বং. আদীনীতি আদি-সদ্দেন নজীৰিকাপকতাদিং সঙ্গণ্হাতি ঈদিসানংযেৰাতি সদ্ধাপব্বজ্জায ৰিভাৰিতঅনভিজ্ঝালুআদিসভাৰানংযেৰ, ন ইতরেসং অভিজ্ঝালুসভাৰানং. ৰুত্তঞ্হেতং –

‘‘সঙ্ঘাটিকণ্ণে ¶ চেপি মে, ভিক্খৰে, ভিক্খু গহেত্ৰা পিট্ঠিতো পিট্ঠিতো অনুবন্ধো অস্স পদে পদং নিক্খিপন্তো, সো চ হোতি অভিজ্ঝালু কামেসু তিব্বসারাগো ব্যাপন্নচিত্তো পদুট্ঠমনসঙ্কপ্পো মুট্ঠস্সতি অসম্পজানো অসমাহিতো ৰিব্ভন্তচিত্তো পাকটিন্দ্রিযো, অথ খো আরকাৰ মম অহঞ্চ তস্সা’’তি (ইতিৰু. ৯২).

অজ্ঝোগাহেত্ৰা অধিপ্পেতত্থং সম্ভৰিতুং সাধেতুং দুক্খানীতি দুরভিসম্ভৰানি. অট্ঠকথাযং পন তত্থ নিৰাসোযেৰ দুক্খোতি দস্সেতুং ‘‘সম্ভৰিতুং দুক্খানি দুস্সহানী’’তি ৰুত্তং. অরঞ্ঞৰনপত্থানীতি অরঞ্ঞলক্খণপ্পত্তানি ৰনসণ্ডানি. ৰনপত্থ-সদ্দো হি সণ্ডভূতে রুক্খসমূহেপি ৰত্ততীতি ¶ অরঞ্ঞগ্গহণং. কিঞ্চাপীতি অনুজাননসম্ভাৰনত্থে নিপাতো. কিং অনুজানাতি? নিপ্পরিযাযতো অরঞ্ঞাভাৰং ‘‘গামতো বহি অরঞ্ঞ’’ন্তি. তেনাহ ‘‘নিপ্পরিযাযেনা’’তিআদি. কিং সম্ভাৰেতি? আরঞ্ঞকঙ্গনিপ্ফাদকত্তং. যঞ্হি আরঞ্ঞকঙ্গনিপ্ফাদকং, তং ৰিসেসতো ‘‘অরঞ্ঞ’’ন্তি ৰুত্তন্তি. তেনেৰাহ ‘‘যং তং পঞ্চধনুসতিক’’ন্তিআদি. নিক্খমিত্ৰা বহি ইন্দখীলাতি ইন্দখীলতো বহি নিক্খমিত্ৰা, ততো বহি পট্ঠাযাতি অত্থো. বহি ইন্দখীলাতি যত্থ দ্ৰে তীণি ইন্দখীলানি, তত্থ বহিদ্ধা ইন্দখীলতো পট্ঠায, যত্থ তং নত্থি, তত্থ তদরহট্ঠানতো পট্ঠাযাতি ৰদন্তি. যস্মা বহি ইন্দখীলতো পট্ঠায মনুস্সূপচারে ভযভেরৰং নত্থি, তস্মা ইধ নাধিপ্পেতন্তি দট্ঠব্বং.

গামন্তন্তি গামসমীপং. অনুপচারট্ঠানন্তি নিচ্চকিচ্চৰসেন নুপচরিতব্বট্ঠানং. তেনাহ ‘‘যত্থ ন কসীযতি ন ৰপীযতী’’তি. পন্তানীতি ইমিনা ‘‘পরিযন্তান’’ন্তি ইমস্স পরিযাযস্স ইধ পাল়িযং গহিতত্তা ৰুত্তং ‘‘পরিযন্তানন্তি ইমমেকং পরিযাযং ঠপেত্ৰা’’তি. দূরানন্তি পন অযং পরিযাযো ঠপেতব্বো সিযা তস্সাপি ‘‘পন্তানী’’তি ইমিনাৰ অত্থতো গহিতত্তা, তথা সতি ‘‘ন মনুস্সূপচারান’’ন্তি এদিসানম্পি ঠপেতব্বতা আপজ্জতি, তস্মা সদ্দতো এৰ ঠপনং দট্ঠব্বং. পৰিৰেকন্তি পকারতো, পকারেহি ৰা ৰিৰেচনং, রূপাদিপুথুত্তারম্মণে পকারতো গমনাদিইরিযাপথপ্পকারেহি অত্তনো কাযস্স ৰিৰেচনং গচ্ছতোপি তিট্ঠতোপি নিসজ্জতোপি একস্সেৰ পৰত্ততি. তেনেৰ হি ৰিৰেচেতব্বানং ৰিৰেচনাকারস্স চ ভেদতো বহুৰিধত্তা তে একত্তেন গহেত্ৰা ‘‘পৰিৰেক’’ন্তি একৰচনেন ৰুত্তং. দুক্করং পৰিৰেকন্তি ৰা পৰিৰেকং কত্তুং ন সুখন্তি অত্থো. একীভাৰেতি একিকভাৰে. দ্ৰযংদ্ৰযারামোতি দ্ৰিন্নং দ্ৰিন্নং ভাৰাভিরতো. হরন্তি ৰিযাতি সংহরন্তি ৰিয ৰিঘাতুপ্পাদনেন. তেনাহ ‘‘ঘসন্তি ৰিযা’’তি, ভযসন্তাসুপ্পাদনেন খাদিতুং আগতা যক্খরক্খসপিসাচাদযো ৰিযাতি অধিপ্পাযো. ঈদিসস্সাতি অলদ্ধসমাধিনো. তিণপণ্ণমিগাদিসদ্দেহীতি ৰাতেরিতানং তিণপণ্ণাদীনং মিগপক্খিআদীনঞ্চ ¶ ভিংসনকেহি ভেরৰেহি সদ্দেহি ৰিৰিধেহি চ অঞ্ঞেহি খাণুআদীহি যক্খাদিআকারেহি উপট্ঠিতেহি ভিংসনকেহি. এৰং দুক্করং দুরভিসম্ভৰং নাম করোন্তো অহো অচ্ছরিযা এতেতি ৰিম্হিতো.

কাযকম্মন্তৰারকথাৰণ্ণনা

৩৫. সোল়সসু ¶ ঠানেসূতি ‘‘যে খো কেচী’’তিআদিনা পাল়িযং ৰক্খমানেসু সোল়সসু কারণেসু. অপরিসুদ্ধকাযকম্মন্ততাদযো অরঞ্ঞে ৰিহরন্তানং চিত্তুত্রাসনিমিত্ততায ৰিসেসতো ৰিক্খেপাৰহা, পরিসুদ্ধকাযকম্মন্ততাদযো পন তদভাৰতো তেসং অৰিক্খেপাৰহা. তেনাহ ‘‘অপরিসুদ্ধকাযকম্মন্তসন্দোসহেতূ’’তিআদি. সোল়সসূতি চ ৰোদানপক্খংযেৰ গহেত্ৰা ৰুত্তং. সংকিলেসগ্গহণম্পি যাৰদেৰ ৰোদানদস্সনত্থন্তি. আরম্মণপরিগ্গহরহিতানন্তি অপরিসুদ্ধকাযকম্মন্তাদিকস্স অরঞ্ঞে দিট্ঠস্স তস্স আরম্মণস্স ‘‘যে খো কেচী’’তিআদিনা পাল়িযং আগতনযেন পরিগ্গণ্হনঞাণরহিতানং. আরম্মণপরিগ্গহযুত্তানন্তি এত্থ ৰুত্তৰিপরিযাযেন অত্থো ৰেদিতব্বো. অত্তনাতি ভগৰন্তং সন্ধায ৰদতি, সযন্তি অত্থো. তাদিসোতি আরম্মণপরিগ্গহযুত্তো.

সম্বুজ্ঝতি এতেনাতি সম্বোধো, অরিযমগ্গোতি আহ ‘‘অরিযমগ্গপ্পত্তিতো’’তি. অগ্গমগ্গাধিগমাধীনো বুদ্ধানং সব্বঞ্ঞুতঞ্ঞাণাধিগমোতি আহ ‘‘অনভিসম্বুদ্ধস্সাতি অপ্পটিৰিদ্ধচতুসচ্চস্সা’’তি. অনৰসেসতো ঞেয্যং, বুজ্ঝিতুং অরহতীতি বোধি, মহাৰীরিযতাদিনা তত্থ ৰিসেসযোগতো সত্তোতি আহ ‘‘বুজ্ঝনকসত্তস্সা’’তি. তেনাহ ‘‘সম্মাসম্বোধি’’ন্তিআদি. নিযতভাৰপ্পত্তিতো পট্ঠায মহাসত্তা যথা মহাবোধিযানপটিপদা হানভাগিযা, ঠিতিভাগিযা ৰা ন হোতি, অথ খো ৰিসেসভাগিযা নিব্বেধভাগিযা চ হোতি, তথা পটিপজ্জনতো বোধিযং নিন্নগোণপব্ভারা এৰাতি আহ ‘‘বোধিযা ৰা সত্তস্সেৰ লগ্গস্সেৰা’’তি. তেনাহ ‘‘দীপঙ্করস্স হী’’তিআদি. অট্ঠধম্মসমোধানেনাতি –

‘‘মনুস্সত্তং লিঙ্গসম্পত্তি, হেতু সত্থারদস্সনং;

পব্বজ্জা গুণসম্পত্তি, অধিকারো চ ছন্দতা’’তি. (বু. ৰং. ২.৫৯) –

ইমেসং অভিনীহারস্স অঙ্গভূতানং অট্ঠন্নং ধম্মানং সমোধানেন সমৰধানেন.

পব্বজ্জূপগতাতি ¶ ¶ পব্বজ্জং উপগতা. তেন পব্বজ্জামত্তেন সমণা, ন সমিতপাপতাযাতি দস্সেতি. জাতিমত্তেন ইধ ব্রাহ্মণাতি অধিপ্পেতাতি আহ ‘‘ভোৰাদিনো ৰা’’তি. তে হি ‘‘ভো ভো’’তি ৰদনসীলা, তেনাহ ‘‘ভোৰাদী নাম সো হোতি, সচে হোতি সকিঞ্চনো’’তি (ধ. প. ৩৯৬; সু. নি. ৬২৫). পাণাতিপাতাদিনাতি আদি-সদ্দেন অদিন্নাদানং অব্রহ্মচরিযঞ্চ সঙ্গণ্হাতি. অপরিসুদ্ধেনাতি চ ৰিসেসনং কাযকম্মন্তাপেক্খায, ন পাণাতিপাতাদিঅপেক্খায. ন হি পাণাতিপাতাদিকো তস্স পুব্বভাগপযোগো চ কোচি পরিসুদ্ধো নাম অত্থি. ভাযনট্ঠেন ভযং, ভীরুতাৰহট্ঠেন ভেরৰং. সন্দোসহেতূতি সদোসহেতু. স-সদ্দো হি ইধ সানুসারো ৰুত্তো. তেনাহ ‘‘অত্তনো দোসস্স হেতূ’’তি. একন্তেন চিত্তুত্রাসলক্খণস্স ভযস্স ৰসেন ‘‘সাৰজ্জ’’ন্তি ৰুত্তং. চিত্তুত্রাসো হি একন্তসাৰজ্জো ভাযনট্ঠেন ভযঞ্চাতি. অক্খেমন্তি ইদং উভযৰসেন. চিত্তুত্রাসোপি হি সরীরচিত্তানং অনত্থাৰহতো অক্খেম, তথা ভযানকারম্মণম্পীতি. অট্ঠকথাযং পন অত্থদ্ৰযং যথাসঙ্খ্যং যোজিতং. সযং পরিকপ্পিতভযানকারম্মণনিমিত্তং চিত্তুত্রাসসমুপ্পাদনৰসেন আনেন্তা ভযভেরৰং অৰ্হাযন্তি ৰিয হোন্তীতি ৰুত্তং ‘‘অৰ্হাযন্তীতি পক্কোসন্তী’’তি. তেতি মারিতমনুস্সানং ঞাতিমিত্তাদযো. গচ্ছং গহনভূতং মহন্তং কণ্টকসণ্ডং, গুম্বং নাতিমহন্তন্তি ৰদন্তি. গচ্ছন্তি পন তিণৰনং ৰেদিতব্বং, ‘‘গচ্ছে রুল়্হতিণে’’তি ৰুত্তং, গুম্বং কণ্টকলতাদিভরিতাৰিরুল়্হং. বদ্ধা ৰধিতা ৰিযাতি বদ্ধা হুত্ৰা তাল়িযমানা ৰিয.

‘‘ন খো পনাতি এত্থ খোতি অৰধারণত্থে নিপাতো, পনা’’তি ৰিসেসত্থে. তেনেতং দস্সেতি ‘‘অঞ্ঞে সমণব্রাহ্মণা ৰিয অহং অপরিসুদ্ধকাযকম্মন্তো হুত্ৰা অরঞ্ঞৰনপত্থানি পন্তানি সেনাসনানি ন খো পন পটিসেৰামি, পরিসুদ্ধকাযকম্মন্তোযেৰ পন হুত্ৰা তানি পটিসেৰামী’’তি. এৰং ৰা এত্থ অত্থযোজনা ৰেদিতব্বা. ‘‘পরিসুদ্ধকাযকম্মন্তোহমস্মী’’তি হি তেন অৰধারণেন ৰিভাৰিতত্থদস্সনং. তেসমহং অঞ্ঞতরোতি তায পরিসুদ্ধকাযকম্মতায তেসং অরিযানং অহং অঞ্ঞতরোতি কাযকম্মপারিসুদ্ধিযা মহাসত্তো অত্তানং অরিযেসু পক্খিপতি. পরমসল্লেখভাৰপ্পত্তা হি তদা বোধিসত্তস্স কাযকম্মপারিসুদ্ধি ¶ , তথা ৰচীকম্মাদিপারিসুদ্ধি, যতো মারো রন্ধগৰেসী হুত্ৰা ছব্বস্সানি নিরন্তরং অনুবন্ধো অন্তরং ন লভতি. তেনাহ –

‘‘সত্ত ৰস্সানি ভগৰন্তং, অনুবন্ধিং পদাপদং;

ওতারং নাধিগচ্ছিস্সং, সম্বুদ্ধস্স সতীমতো’’তি. (সু. নি. ৪৪৮);

ভিয্যোতি ¶ অধিকং সৰিসেসং, উপরূপরি ৰা. ভীততসিতা ভযূপদ্দৰেন ছম্ভিতসরীরা হট্ঠলোমা হোন্তি, অভীতাতসিতা পন ভযূপদ্দৰাভাৰতো অহট্ঠলোমা খেমেন সোত্থিনা তিট্ঠন্তীতি তেসং খেমপ্পত্তি সোত্থিভাৰো ৰা পন্নলোমতায পাকটো হোতীতি পাল়িযং ‘‘পল্লোম’’ন্তি ৰুত্তং. তেনাহ ‘‘পন্নলোমত’’ন্তিআদি. এত্থ চ ভিয্যো পল্লোমমাপাদিং অরঞ্ঞে ৰিহারাযাতি পটিঞ্ঞানিদ্দেসো. পরিসুদ্ধকাযকম্মন্তোহমস্মীতি হেতুদস্সনং. ‘‘যে হি ৰো অরিযা’’তি সদিসূদাহরণদস্সনং. যে খো কেচি সমণা ৰা ব্রাহ্মণা ৰাতি ৰিসদিসূদাহরণদস্সনং. সেসানি অন্ৰযব্যতিরেকৰিভাৰনানীতি দট্ঠব্বন্তি অযমেত্থ যুত্তিৰিভাৰনা. ইমিনা নযেন সেসৰারেসুপি যুত্তিৰিভাৰনা ৰেদিতব্বা.

কাযকম্মন্তৰারকথাৰণ্ণনা নিট্ঠিতা.

ৰচীকম্মন্তৰারাদিকথাৰণ্ণনা

৩৬. অপরিসুদ্ধেন মুসাৰাদাদিনাতি এত্থ যং ৰত্তব্বং, তং হেট্ঠা ৰুত্তনযমেৰ. আদি-সদ্দেন পন সঙ্গহিতং তেসঞ্চ মুসাৰাদাদীনং পৰত্তিভেদং ভযভেরৰাৰ্হানমুখেন দস্সেতুং ‘‘কথ’’ন্তিআদি ৰুত্তং. তত্থ যং ৰত্তব্বং, তং হেট্ঠা ৰুত্তমেৰ.

ভণ্ডেসূতি সৰিঞ্ঞাণকাৰিঞ্ঞাণকেসু ভণ্ডেসু. উপ্পাদেত্ৰাতি অত্তনো পরিণামৰসেন অভিজ্ঝাসঙ্খাতং ৰিসমলোভং উপ্পাদেত্ৰা. কুজ্ঝিত্ৰাতি ৰিনাসচিন্তাৰসেন পরস্স কুজ্ঝিত্ৰা. এৰঞ্হি নেসং ‘‘যেসং অপরজ্ঝিম্হা, তে ইদানি অনুবন্ধিত্ৰা’’তিআদিনা পচ্ছা আসঙ্কুপ্পত্তি সিযা. ‘‘এতে অম্হাকং পরিগ্গহৰত্থুং গহেতুকামা মঞ্ঞে, ৰিনাসং কাতুকামা মঞ্ঞে’’তি যথা পরে পরতো তেসং অভিজ্ঝাব্যাপাদপ্পৰত্তিং পরিগ্গণ্হন্তি, তাদিসং ¶ মনোকম্মন্তং সন্ধায ‘‘তে পরেস’’ন্তিআদি ৰুত্তন্তি দট্ঠব্বং. কামং অকুসলকাযকম্মৰচীকম্মপৰত্তিকালেপি অভিজ্ঝাদযো পৰত্তন্তিযেৰ, তদা পন তে চেতনাপক্খিকা ৰা অব্বোহারিকা ৰাতি মনোকম্মন্তৰারে এৰ অভিজ্ঝাদিৰসেন যোজনা কতা. অথ ৰা দ্ৰারন্তরে পৰত্তানম্পি পাণাতিপাতাদীনং ৰচীকম্মাদিভাৰাভাৰো ৰিয দ্ৰারন্তরে পৰত্তানম্পি অভিজ্ঝাদীনং কাযকম্মাদিভাৰাভাৰো, মনোকম্মভাৰো এৰ পন সিদ্ধোতি কত্ৰা মনোকম্মন্তৰারে এৰ অভিজ্ঝাদযো উদ্ধটা. তথা হি ৰুত্তং –

‘‘দ্ৰারে ¶ চরন্তি কম্মানি, ন দ্ৰারা দ্ৰারচারিনো;

তস্মা দ্ৰারেহি কম্মানি, অঞ্ঞমঞ্ঞং ৰৰত্থিতা’’তি. (ধ. স. অট্ঠ. ১.কাযকম্মদ্ৰার);

কিঞ্চাপি অট্ঠকথাযং সাসনে পব্বজিতৰসেন আজীৰৰারে ভযভেরৰাৰ্হানং যোজিতং, ‘‘যে খো কেচি সমণা ৰা ব্রাহ্মণা ৰা’’তি পন ৰচনতো বাহিরকৰসেন গহট্ঠৰসেন চ যোজনা ৰেদিতব্বা. গহট্ঠানম্পি হি জাতিধম্মকুলধম্মদেসধম্মৰিলোমনৰসেন অঞ্ঞথাপি মিচ্ছাজীৰো লব্ভতেৰ, তায এৰ চ আজীৰৰিপত্তিযা অঞ্ঞথা ৰা নেসং অরঞ্ঞৰাসো সম্ভৰেয্যাতি.

৩৭. এৰং আজীৰট্ঠমকসীলৰসেন ভযভেরৰং দস্সেত্ৰা ততো পরং নীৰরণপ্পহানাদিৰসেন তং দস্সেতুং দেসনা ৰড্ঢিতাতি তদত্থং ৰিৰরন্তো ‘‘ইতো পর’’ন্তিআদিমাহ. তত্থ নীৰরণৰসেন পুন ৰুত্তাতি অযমধিপ্পাযো – এৰং সীলৰিসুদ্ধিমত্তম্পি অরঞ্ঞে ৰিহরতো ভযভেরৰাভাৰং আৰহতি, কিমঙ্গং পন নীৰরণানি পহায অপ্পনাসমাধিং, উপচারসমাধিমেৰ ৰা সম্পাদযতোতি সমাধিসম্পদায ভযভেরৰাভাৰহেতুকং দস্সেতুং উপরি দেসনা ৰড্ঢিতাতি অকুসলমনোকম্মন্তভাৰেন গহিতাপি অভিজ্ঝাব্যাপাদা নীৰরণৰসেন পুন ৰুত্তাতি অধিপ্পাযো. অভি-পুব্বো ঝা-সদ্দো অভিজ্ঝাযনত্থোতি আহ ‘‘পরভণ্ডাদিঅভিজ্ঝাযনসীলা’’তি. ৰত্থুকামেসূতি রূপাদীসু কিলেসকামস্স ৰত্থুভূতেসু কামেসু. বহলকিলেসরাগাতি থিরমূলদুম্মোচনীযতাহি অজ্ঝোসানে পভূতকিলেসকামা. অভিজ্ঝা চেত্থ অপ্পত্তৰিসযপত্থনা, তিব্বসারাগো সম্পত্তিৰিসযাভিনিৰেসো. তে ¶ হি লোভাভিভূতা পুগ্গলা অত্তনি তিব্বসাপেক্খতায এৰ লোভাভিভূততায অৰৰত্থিতারম্মণা অৰিনিচ্ছিতৰিসযা অরঞ্ঞে তং তং ৰিসযং অনুপধারিত্ৰা ৰিহরন্তি, রজ্জুআদীনি যাথাৰতো ন সল্লক্খেন্তি. তেনাহ ‘‘তেস’’ন্তিআদি. উপট্ঠাতি সন্তচিত্ততায. তথা হি ৰুত্তং ‘‘আকুলচিত্তা’’তি. ‘‘ইদানিম্হ নট্ঠা’’তি তসন্তি ৰিতসন্তি, আগন্ত্ৰা বাধিযমানা ৰিয হোন্তি, এৰং তং ভযভেরৰং অত্তনি সমারোপনট্ঠেন অৰ্হাযন্তি পক্কোসন্তীতি যোজনং সন্ধাযাহ ‘‘সেসং তাদিসমেৰা’’তি. ‘‘অনভিজ্ঝালুহমস্মী’’তি পাল়িপদে চিরপরিচিতঅলোভজ্ঝাসযতায কমলদলে জলবিন্দু ৰিয অলগ্গমানসত্তা সব্বত্থ অনপেক্খোহমস্মীতি অত্থো.

৩৮. পকতিভাৰৰিজহনেনাতি পরিসুদ্ধভাৰসঙ্খাতস্স চ পকতিভাৰস্স ৰিজহনেন. সাৰজ্জধম্মসমুপ্পত্তিযা হি চিত্তস্স অনৰজ্জভাৰো জহিতো হোতীতি. ৰিপন্নচিত্তাতি কিলেসাসুচিদূসিততায ¶ কুথিতচিত্তা. তেনাহ ‘‘কিলেসানুগতং…পে… পূতিকং হোতী’’তি. পদুট্ঠমনসঙ্কপ্পাতি ৰিসসংসট্ঠমুত্তং ৰিয দোসেন পদূসিতচিত্তসঙ্কপ্পা. ৰুত্তনযেনেৰাতি ‘‘তে অৰৰত্থিতারম্মণা হোন্তী’’তিআদিনা অভিজ্ঝালুৰারে ৰুত্তনযেনেৰ. যথা হি লোভৰসেন, এৰং দোসাদিৰসেনপি অৰৰত্থিতারম্মণা হোন্তীতি. সব্বত্থাতি হেট্ঠা উপরি চাতি সব্বত্থ ঠানেসু ৰণ্ণেতব্বা.

৩৯. ‘‘যা চিত্তস্স অকল্লতা অকম্মঞ্ঞতা’’তি ৰচনতো থিনং চিত্তস্স গেলঞ্ঞভাৰেন গহণং গচ্ছতীতি আহ ‘‘চিত্তগেলঞ্ঞভূতেন থিনেনা’’তি. তথা ‘‘যা কাযস্স অকল্লতা অকম্মঞ্ঞতা’’তি (ধ. স. ১১৬৩) ৰচনতো মিদ্ধং ৰিসেসতো নামকাযস্স গেলঞ্ঞভাৰেন গহণং গচ্ছতীতি আহ ‘‘সেসনামকাযগেলঞ্ঞভূতেন মিদ্ধেনা’’তি. সেসগ্গহণঞ্চেত্থ চিত্তনিৰত্তনত্থং. ইদঞ্চ মিদ্ধং রূপকাযস্সপি গেলঞ্ঞাৰহন্তি দট্ঠব্বং নিদ্দায হেতুভাৰতো. তথা হি তং ‘‘নিদ্দা চপলাযিকা’’তি নিদ্দিট্ঠং. তেনাহ ‘‘তে নিদ্দাবহুলা হোন্তী’’তি.

৪০. উদ্ধচ্চপকতিকাতি উদ্ধচ্চসীলা অনৰট্ঠিতসভাৰা. অনৰট্ঠানরসঞ্হি উদ্ধচ্চং. তেনাহ ‘‘ৰিপ্ফন্দমানচিত্তা’’তিআদি. ইধাতি ‘‘অৰূপসন্তচিত্তা’’তি ইমস্মিং ¶ পদে. কুক্কুচ্চং গহেতুং ৰট্টতি সংৰণ্ণনাৰসেন পচ্ছানুতাপস্সপি চিত্তস্স অৰূপসমকরত্তা. উদ্ধচ্চং পন সরূপেনেৰ গহিতন্তি অধিপ্পাযো.

৪১. একমেৰিদং পঞ্চমং নীৰরণং যদিদং কঙ্খা ৰিচিকিচ্ছাতি চ. যদি এৰং কস্মা দ্ৰিধা কত্ৰা ৰুত্তন্তি আহ ‘‘কিং নু খো’’তিআদি. কঙ্খনতোতি সংসযনতো. ৰিচিকিচ্ছাতি ৰুচ্চতি ‘‘ধম্মসভাৰং ৰিচিনন্তো এতায কিচ্ছতি, ৰিগতা তিকিচ্ছা ৰা’’তি কত্ৰা.

৪২. এৰং নীৰরণাভাৰকিত্তনমুখেন সমাধিসম্পদায ভযভেরৰাভাৰং দস্সেত্ৰা ইদানি অত্তুক্কংসনাদিঅভাৰকিত্তনমুখেন পঞ্ঞাসম্পদায ভযভেরৰাভাৰং দস্সেতুং ‘‘যে খো কেচী’’তিআদিনা উপরি দেসনা ৰড্ঢিতা, তদত্থং ৰিৰরিতুং ‘‘অত্তুক্কংসনকা’’তিআদি ৰুত্তং. উক্কংসেন্তি মানৰসেন পগ্গণ্হনেন. তেনাহ ‘‘উচ্চে ঠানে ঠপেন্তী’’তি. থিনমিদ্ধউদ্ধচ্চকুক্কুচ্চৰিচিকিচ্ছাৰারেসু গয্হমানং অভিজ্ঝালুৰারসদিসন্তি তত্থ তং অনামসিত্ৰা অত্তুক্কংসকৰারে কিঞ্চি ৰিসদিসং অত্থীতি তং দস্সেতুং ‘‘তে কথ’’ন্তিআদি ৰুত্তং.

৪৩. ছম্ভনং ¶ ছম্ভো, কাযস্স ছম্ভিতত্তহেতুভূতো বলৰচিত্তুত্রাসো. সো এতেসং অত্থীতি ছম্ভী. তেনাহ ‘‘কাযথম্ভনা’’তিআদি. ভীরুকজাতিকাতি ভাযনকসীলা. একমেৰ চেতং সাৰজ্জভযং কাযে ছম্ভিতত্তস্স, চিত্তে চ কাযে চ থদ্ধভাৰস্স উপ্পাদনৰসেন ‘‘ছম্ভো ভীরুতা’’তি চ ৰুচ্চতীতি তংসমঙ্গিনো সমণব্রাহ্মণা ‘‘ছম্ভী ভীরুকজাতিকা’’তি ৰুত্তা, ইধ ভযভেরৰং সরূপেনেৰ গহিতং.

৪৪. লব্ভতি পাপুণীযতীতি লাভসদ্দস্স কম্মসাধনত্তমাহ. সক্কচ্চং কাতব্বো দাতব্বোতি সক্কারো. তদত্থদীপকন্তি লাভাদিং পহায অরঞ্ঞে ৰসতো ভযভেরৰাৰ্হাযনং নত্থীতি দীপকং. সো কির লাভগরুতাযেৰ পিযো গামো এতস্সাতি ‘‘পিযগামিকো’’তি নামং লভতি. কম্মমুত্তোতি জরাজিণ্ণত্তা কম্মং কাতুং ন সক্কোতীতি সামিকেহি ৰিস্সট্ঠো.

৪৫. অলসভাৰেন ¶ সম্মাৰাযামস্স অকরণতো কুচ্ছিতং সীদন্তীতি কুসীতা. ৰীরস্স ভাৰো, কম্মং ৰা ৰীরিযং, ৰিধিনা ৰা ঈরেতব্বং পৰত্তেতব্বন্তি ৰীরিযং, সম্মাৰাযামো. তেন হীনা হীনৰীরিযা. কাযৰিঞ্ঞত্তিযা সমুট্ঠানৰসেন পৰত্তৰীরিযং কাযিকৰীরিযং, ৰত্তকরণচঙ্কমনাদীসু দট্ঠব্বং. নিসজ্জ সযিত্ৰা চ কম্মট্ঠানমনসিকারৰসেন পৰত্তৰীরিযং চেতসিকৰীরিযং. তত্থ পুরিমং ৰিসেসতো কোসজ্জপটিপক্খতাৰসেন, দুতিযং ৰীরিযারম্ভতাৰসেন পাকটং হোতীতি দস্সেন্তো ‘‘কুসীতা’’তিআদিমাহ. তে হি হীনৰীরিযা অলসতাযেৰ আরম্মণৰৰত্থানমত্তম্পি কাতুং ন সক্কোন্তি.

৪৬. নট্ঠস্সতীতি অলব্ভমানস্সতি, পচ্চযৰেকল্লেন ৰিজ্জমানাযপি সতিযা সতিকিচ্চং কাতুং অসমত্থতায এৰং ৰুত্তং. ন সম্পজানাতি অসম্পজানা. তংযোগনিৰত্তিযঞ্চাযং অ-কারো ‘‘অহেতুকা ধম্মা (ধ. স. ২.দুকমাতিকা), অভিক্খুকো আৰাসো’’তিআদীসু (চূল়ৰ. ৭৬) ৰিযাতি আহ ‘‘পঞ্ঞারহিতা’’তি. ননু সোল়সমো পঞ্ঞাৰারো, অযং সতিৰারো, তত্থ কস্মা সংকিলেসপক্খে পঞ্ঞা গহিতাতি চোদনং সন্ধাযাহ ‘‘ইমস্স চা’’তিআদি. সতিভাজনীযমেৰেতং, যদিদং চুদ্দসমো ৰারো, পঞ্ঞা পনেত্থ চুদ্দসমে ৰারে কেৰলা সতি দুব্বলাতি সতিদুব্বল্যদীপনত্থং ‘‘অসম্পজানা’’তি পটিক্খেপমুখেন ৰুত্তা. ইদানি ৰুত্তমেৰত্থং পাকটতরং কাতুং ‘‘দুৰিধা হী’’তিআদি ৰুত্তং.

৪৭. অপ্পনাসমাধিনা, উপচারসমাধিনা ৰা চিত্তং আরম্মণে সমং, সম্মা ৰা আহিতং নাম হোতি, নাঞ্ঞথাতি দস্সেন্তো ‘‘অসমাহিতাতি উপচারপ্পনাসমাধিৰিরহিতা’’তি আহ ¶ . ৰিব্ভন্তচিত্তাতি অনৰট্ঠিতচিত্তা. পুব্বে নীৰরণভাৰসামঞ্ঞেন উদ্ধচ্চং গহিতং ‘‘উদ্ধতা অৰূপসন্তচিত্তা’’তি, ইধ সমাধানাভাৰেন উদ্ধচ্চহেতুকো চিত্তৰিব্ভমো ৰুত্তো ‘‘অসমাহিতা ৰিব্ভন্তচিত্তা’’তি, অযমেতেসং ৰিসেসো. পুব্বে ৰুত্তনযেনাতি পুব্বে ‘‘উদ্ধচ্চেন হি একারম্মণে চিত্তং ৰিপ্ফন্দতি ধজযট্ঠিযং ৰাতেন পটাকা ৰিযা’’তি (ম. নি. অট্ঠ. ১.৪০) ৰুত্তনযেন. সব্বং পুব্বসদিসমেৰাতি ভযভেরৰাৰ্হাযনস্স অভিজ্ঝালুৰারে ৰুত্তসদিসতং সন্ধায ৰদতি.

৪৮. দুপ্পঞ্ঞাতি ¶ এত্থ দু-সদ্দো ‘‘দুস্সীলো’’তিআদীসু ৰিয অভাৰত্থো, ন ‘‘দুগ্গতি, দুপ্পটিপন্নো’’তিআদীসু ৰিয গরহত্থোতি দস্সেতুং ‘‘নিপ্পঞ্ঞানমেতং অধিৰচন’’ন্তি ৰত্ৰা ‘‘পঞ্ঞা পন দুট্ঠা নাম নত্থী’’তি ৰুত্তং. তেতি দুপ্পঞ্ঞা. সব্বত্থাতি চতূসুপি পাঠৰিকপ্পেসু. এলন্তি ৰা দোসো ৰুচ্চতি. তেনাহ ‘‘যা সা ৰাচা নেলা কণ্ণসুখা’’তি. তথা হি সীলং ‘‘নেলঙ্গ’’ন্তি ৰুত্তং. দুপ্পঞ্ঞা চ কথেন্তা সদোসমেৰ কথং কথেন্তি অপণ্ডিতভাৰতো. তেনেৰাহ ‘‘দুব্ভাসিতভাসী’’তি. তস্মা এলসব্ভাৰতো এলং মুখং এতেসন্তি এলমূগাতি ৰুত্তাতি এৰম্পি ৰা এত্থ অত্থো দট্ঠব্বো. যায পঞ্ঞায ৰসেন ‘‘পঞ্ঞাসম্পন্নো’’তি ৰুত্তং, তং ব্যতিরেকমুখেন দস্সেতুং ‘‘নো চ খো’’তিআদি ৰুত্তং. ননু চ বোধিসত্তা বহুলৰিপস্সনাপঞ্ঞায সমন্নাগতা হোন্তীতি? হোন্তি, তদা পন বোধিসত্তেন ন ৰিপস্সনারম্ভো কতো, নো চ ৰিপস্সনাপঞ্ঞা অধিপ্পেতাতি ৰুত্তং ‘‘নো চ খো ৰিপস্সনাপঞ্ঞাযা’’তি.

কেচি পনেত্থ ‘‘সদ্ধাৰিরহিতা অপরিসুদ্ধকাযকম্মন্তাদযো ৰিয ভযভেরৰাৰ্হাযনস্স ৰিসেসকারণং, নাপি সদ্ধালুতা পল্লোমতাযাতি সদ্ধাৰারো অনুদ্ধটো’’তি ৰদন্তি, তং অকারণং. কম্মফলে হি সদ্দহন্তো কম্মপটিসরণতংযেৰ নিস্সায ভযভেরৰং তিণাযপি অমঞ্ঞমানো পল্লোমতমাপজ্জেয্য. যস্মা পন ৰীরিযাদযো সদ্ধায ৰিনা নপ্পৰত্তন্তীতি তেসং উপনিস্সযভূতা সহজাতা চ সা তগ্গহণেনেৰ গহিতা হোতীতি ৰিসুং ন উদ্ধটা. তথা হি সা ঝানস্স পুব্বভাগপটিপদাযম্পি ন উদ্ধটা, কিং ৰা এতায সদ্ধায, অদ্ধা সা ইমস্মিং আরম্মণপরিগ্গহট্ঠানে ন গহেতব্বাৰ, ততো ধম্মস্সামিনা ইধ ন উদ্ধটা, এৰং অঞ্ঞেসুপি এদিসেসু ঠানেসু নিচ্ছযো কাতব্বো. যথানুলোমদেসনা হি সুত্তন্তকথাতি.

ৰচীকম্মন্তৰারাদিকথাৰণ্ণনা নিট্ঠিতা.

সোল়সট্ঠানারম্মণপরিগ্গহো নিট্ঠিতো.

ভযভেরৰসেনাসনাদিৰণ্ণনা

৪৯. সোল়সারম্মণানীতি ¶ সোল়সট্ঠানানি আরম্মণানি. এৰরূপাসু রত্তীসূতি চাতুদ্দসীআদিকা উপরি ৰক্খমানা রত্তিযো সন্ধায ৰদতি ¶ . এৰরূপে সেনাসনেতি এত্থাপি এসেৰ নযো. যাতি অনিযমতো উদ্দিট্ঠানং পুন ‘‘তা’’তি ৰচনং নিদ্দেসো ৰিয হোতীতি ৰুত্তং ‘‘যা তাতি উভযমেতং রত্তীনংযেৰ উদ্দেসনিদ্দেসৰচন’’ন্তি. অভীতি লক্খণত্থে ‘‘অঞ্ঞে চ অভিঞ্ঞাতা ব্রাহ্মণমহাসালা’’তিআদীসু ৰিয. কথং পনেত্থ লক্খণত্থতা ৰেদিতব্বা? লক্খীযতি এতেনাতি লক্খণন্তি আহ ‘‘চন্দপারিপূরিযা’’তিআদি. পুণ্ণমাসিযং চন্দপারিপূরিযা অমাৰাসিযং চন্দপরিক্খযেন. আদি-সদ্দেন চন্দস্স উপড্ঢমণ্ডলতারাহুগ্গহতাদীনং সঙ্গহো দট্ঠব্বো. উপসগ্গমত্তমেৰ অভি-সদ্দো লক্খিতসদ্দেনেৰ লক্খণত্থস্স ৰিঞ্ঞাযমানত্তাতি অধিপ্পাযো.

পঠমদিৰসতো পভুতীতি পঠমপাটিপদদিৰসতো পট্ঠায. যস্মা চোদকো ভগৰতো কালে অনভিলক্খিতাপি অপরভাগে অভিলক্খিতা জাতা, তস্মা তং অভিলক্খণীযতং উপাদায ‘‘সব্বদস্সিনা ভগৰতা পঞ্চমী কস্মা ন গহিতা’’তি চোদেতি, ইতরো সব্বকালিকাসু চাতুদ্দসীআদীসু গয্হমানাসু অসব্বকালিকায কথং গহণন্তি অধিপ্পাযেন ‘‘অসব্বকালিকত্তা’’তি পরিহরতি.

তথাৰিধাসূতি ‘‘অভিঞ্ঞাতা’’তিআদিনা যথা ৰুত্তা, তথাৰিধাসু. দেৰতাধিট্ঠিতভাৰেন আরামাদীনং লোকস্স চেতিযভাৰোতি আহ ‘‘পূজনীযট্ঠেনা’’তি. মনুস্সা যেভুয্যেন গামাদীনং দ্ৰারেসু তথারূপে রুক্খে চেতিযট্ঠানিযে কত্ৰা ৰোহরন্তীতি আহ ‘‘গামনিগমাদিদ্ৰারেসূ’’তিআদি. দস্সনমত্তেনপি সৰনমত্তেনপি ভযুপ্পাদনেন পাকতিকসত্তে ভিংসেন্তীতি ভিংসনকানি. তেনাহ ‘‘ভযজনকানী’’তিআদি. ভাযতি এতস্মাতি ভযং, অতিৰিয সপ্পটিভযং ভেরৰং.

আযাচনউপহারকরণারহন্তি তংতংবলিকম্মপণিধিকম্মকরণযোগ্গং. পুপ্ফধূপ…পে… ধরণিতলন্তি ইদং যথাপটিসূতেন সুপ্পাদিনা উপহারকরণদস্সনং. কোট্টেন্তোতি পহরন্তো, সিঙ্গপ্পহারখুরপ্পহারেহি সদ্দং করোন্তোতি অধিপ্পাযো. সব্বচতুপ্পদানং ইধ মগোতি নামং, ন ‘‘অচ্ছচম্মং মিগচম্মং এল়কচম্ম’’ন্তিআদীসু (মহাৰ. ২৫৯) ৰিয, রোহিতোতিআদি মিগৰিসেসানন্তি ¶ অধিপ্পাযো. চালেত্ৰাতি অগ্গমদ্দনেন চালেত্ৰা. মোরগ্গহণঞ্চেত্থ উপলক্খণন্তি দস্সেন্তো আহ ‘‘ইধ সব্বপক্খিগহণং অধিপ্পেত’’ন্তি. এস নযোতি ইদং যথা ‘‘মোরো ৰা’’তি ¶ এত্থ ৰা-সদ্দো অৰুত্তৰিকপ্পনত্থো, এৰং ‘‘মিগো ৰা’’তি এত্থাপীতি মিগসদ্দস্স ৰিসেসত্থৰুত্তিতং সন্ধাযাহ. ইতো পভূতীতি ‘‘যংনূনাহং যা তা রত্তিযো’’তিআদিনা ভযভেরৰস্স গৰেসনচিন্তনতো পভুতি, ন গৰেসনারম্ভতো পভুতি. ‘‘অপ্পেৰ নামাহং ভযভেরৰং পস্সেয্য’’ন্তি এত্থাপি হি আরম্মণমেৰ ভযভেরৰং. সুখারম্মণং রূপং সুখমিৰ ‘‘রূপং সুখং সুখানুপতিতং সুখাৰক্কন্ত’’ন্তিআদীসু (সং. নি. ৩.৬০). কথং ভযগ্গহণেন চ রূপারম্মণগ্গহণন্তি আহ ‘‘পরিত্তস্স চা’’তিআদি. ‘‘আগচ্ছতী’’তি ৰচনতো গৰেসনারম্ভতো পভুতি ‘‘এতং ভয’’ন্তি আরম্মণং অধিপ্পেতন্তি কেচি ‘‘তং ন পস্সেয্য’’ন্তি চক্খুনা দস্সনস্স অধিপ্পেতত্তা, তস্মা ৰুত্তনযেনেৰ অত্থো গহেতব্বো. ভযং আকঙ্খমানোতি উপপরিক্খনৰসেন অহং ভযৰত্থুং আকঙ্খন্তো ৰিহরামি, তং কিমত্থিযং, এত্তকোপি ভযসমন্নাহারো ময্হং অযুত্তোতি অধিপ্পাযো.

যং পকারং ভূতো যথাভূতো, সো পনেত্থ পকারো ইরিযাপথৰসেন যুত্তো পাল়িযং তথা আগতত্তাতি আহ ‘‘যেন যেন ইরিযাপথেন ভূতস্সা’’তি. ভৰিতস্সাতি ইদং ‘‘ভূতস্সা’’তি ইমিনা সমানত্থং পদন্তি দট্ঠব্বং. ‘‘সমঙ্গীভূতস্সা’’তি পদং পুরিমপদলোপেন ভূতস্সাতি ৰুত্তন্তি দস্সেন্তো ‘‘সমঙ্গীভূতস্স ৰা’’তি আহ. ভযভেরৰারম্মণেতি ভযভেরৰাভিমতে আরম্মণে. নেৰ মহাসত্তো তিট্ঠতীতিআদি ‘‘তথাভূতো চ তং পটিৰিনেয্য’’ন্তি যথা চিন্তিতং, তথা পটিপন্নভাৰদস্সনং. ইরিযাপথপটিপাটি নাম ঠানগমননিসজ্জানিপজ্জাতি ৰদন্তি, উপ্পটিপাটি পন পঠমং নিপজ্জা, পুন নিসজ্জা, পুন ঠানং, পচ্ছা গমনন্তি এৰং ৰেদিতব্বা. আসন্নপটিপাটিযাতি গমনস্স তাৰ ঠানং আসন্নং, ঠানস্স নিসজ্জা গমনঞ্চ, নিসজ্জায নিপজ্জা ঠানঞ্চ, নিপজ্জায নিসজ্জা আসন্না. ইধ পন গমনস্স ঠানং, ঠানস্স চ গমনং, নিসজ্জায চ নিপজ্জা, নিপজ্জায চ নিসজ্জা আসন্নভাৰেন গহিতা, ইতরে পরম্পরাৰসেনাতি ৰেদিতব্বা. ভিক্খুস্স পন ইরিযাপথা সম্পত্তপটিপাটিযা ৰিয অপরাপরুপ্পত্তিৰসেন ৰুচ্চন্তি.

ভযভেরৰসেনাসনাদিৰণ্ণনা নিট্ঠিতা.

অসম্মোহৰিহারৰণ্ণনা

৫০. অযঞ্চ ¶ মে সব্বসো ভযভেরৰাভাৰো ৰিসেসতো অসম্মোহধম্মত্তাতি দস্সেতুং ‘‘সন্তি ¶ খো পনা’’তিআদিনা উপরি দেসনা ৰড্ঢিতাতি অযং ৰা এত্থ অনুসন্ধি. ঝাযীনং সম্মোহট্ঠানেসূতি ইমিনা অজ্ঝাযীনং সম্মোহট্ঠানেসু ৰত্তব্বমেৰ নত্থীতি দস্সেতি. অত্থীতি ইদং নিপাতপদং পুথুৰচনম্পি হোতি ‘‘অত্থি ইমস্মিং কাযে কেসা’’তিআদীসু (দী. নি. ২.৩৭৩-৩৭৪; ম. নি. ১.১১০; ৩.১৫৪; সং. নি. ৪.১২৭; খু. পা. ৩.দ্ৰতিংসাকার) ৰিযাতি ‘‘সন্তী’’তি পদস্স অত্থদস্সনৰসেন ৰুত্তং. কিং খণত্তযসমঙ্গিতায তে অত্থি, নোতি আহ ‘‘সংৰিজ্জন্তি উপলব্ভন্তী’’তি, মহতি লোকসন্নিৰাসে এদিসাপি সংৰিজ্জন্তি ঞাণেন গহেতব্বতায উপলব্ভন্তীতি. ওদাতকসিণলাভীতি অপ্পমাণওদাতকসিণলাভী. এৰং হিস্স সমন্ততো আলোকো ৰিয উপট্ঠাতি. পরিকম্মন্তি সমাপত্তিপুব্বভাগমাহ. এত্তকং সূরিযে গতে ৰুট্ঠহামীতি, নো চ খো অদ্ধানপরিচ্ছেদে কুসলো হোতি, কেৰলং ‘‘দিৰা এৰ ৰুট্ঠহামী’’তি মনসিকারং উপ্পাদেসি. ৰিসদং হোতি সব্বং আরম্মণজাতং, দিব্বচক্খুনা পস্সন্তস্স ৰিয ৰিভূতং. অৰিসদন্তি এত্থ ৰুত্তৰিপরিযাযেন অত্থো ৰেদিতব্বো. এৰংসঞ্ঞিনোতি রত্তিং ‘‘দিৰা’’তি, দিৰা চ ‘‘রত্তী’’তি এৰংসঞ্ঞিনো.

অন্তোসেনাসনে রত্তিং নিসিন্নো হোতীতি রত্তি-সদ্দো অজ্ঝাহরিতব্বো. পরিত্তাসনাদীহি, অঞ্ঞেহি ৰা কারণেহি. গম্ভীরায ভূমিগব্ভসদিসায ঘনৰনপটিচ্ছন্নায বহলতরজালৰনপটলপটিচ্ছন্নায. অন্তরহিতসূরিযালোকে কালেতি এতেনেৰ দিৰাতি অৰুত্তসিদ্ধো. সম্মোহৰিহারো নাম বহুৰিধোতি আহ ‘‘সম্মোহৰিহারানং অঞ্ঞতর’’ন্তি.

পাকটো বোধিসত্তস্স রত্তিন্দিৰপরিচ্ছেদো অন্তমসো লৰতুটিখণস্সপি উপাদায সুৰৰত্থিতত্তা, তথা রত্তিদিৰসকোট্ঠাসপরিচ্ছেদো অত্তনা কাতব্বকিচ্চৰসেন কালঞাণৰসেন চ.

কালথম্ভে ¶ লদ্ধব্বছাযাৰসেন দ্ৰঙ্গুলকালে. যামঘণ্টিকং পহরতি সঙ্ঘস্স তংতংৰত্তকরণত্থং. মুগ্গরন্তি ঘণ্টিকপ্পহরণমুগ্গরং. যামযন্তং পততি অঞ্ঞেহি ভিক্খূহি যোজিতন্তি অধিপ্পাযো. যাৰ অঞ্ঞে ভিক্খূ ভোজনসালং উপগচ্ছন্তি, তাৰ দিৰাৰিহারট্ঠানং গন্ত্ৰা সমণধম্মং করোতি.

যং খো তন্তি এত্থ যন্তি অনিযমুদ্দেসো, খোতি অৰধারণে, যমেৰ পুগ্গলন্তি অত্থো. তন্তি ৰুচ্চমানাকারৰচনং. মমেৰাতি মং এৰ. অসম্মোহসভাৰোতি সভাৰভূতঅসম্মোহো. ‘‘উপ্পন্নো’’তি ৰুত্তত্তা ‘‘মনুস্সলোকে’’তি ৰুত্তং. পঞ্ঞাসম্পত্তিযাতি যাথাৰতো হিতস্স জাননসমত্থেন অত্তনো পঞ্ঞাগুণেন, ন কেৰলং অজ্ঝাসযেনেৰ হিতেসিতা, অথ খো পযোগেনাতি ¶ দস্সেন্তো ‘‘হিতূপদেসকো’’তি আহ. অজ্ঝাসযেন পন হিতেসিতা ‘‘লোকানুকম্পাযা’’তি ইমিনা দস্সিতা. উপকরণেহি ৰিনা ন কদাচি ভোগসুখং উপকরণদানঞ্চ চাগসম্পত্তিহেতুকন্তি আহ ‘‘চাগসম্পত্তিযা…পে… দাযকো’’তি. মেত্তাসম্পত্তিযা হিতূপসংহারেন রক্খিতা. করুণাসম্পত্তিযা দুক্খাপনযনেন গোপাযিতা. ননু চ পুব্বেপি ৰুত্তং ‘‘হিতায সুখাযা’’তি, অথ কস্মা পুন তং গহিতন্তি চোদনং সন্ধাযাহ ‘‘ইধ দেৰমনুস্সগ্গহণেনা’’তিআদি. তেন পুব্বে অৰিসেসতো হিতাদীনি দস্সিতানি, ইদানি ৰিসেসতো সহ পযোজনেন তানি দস্সিতানীতি দীপেতি. নিব্বানতো পরো পরমো অত্থো নাম নত্থীতি আহ ‘‘পরমত্থত্তাযা’’তি. হিনোতি নিব্বানং গচ্ছতীতি হিতং, মগ্গো. উক্কংসতো সুখত্থং অরিযফলন্তি আহ ‘‘ততো উত্তরি সুখাভাৰতো’’তি.

অসম্মোহৰিহারৰণ্ণনা নিট্ঠিতা.

পুব্বভাগপটিপদাদিৰণ্ণনা

৫১. অসম্মোহৰিহারন্তি অসম্মোহৰুত্তিং, অসম্মোহসম্বোধিন্তি ৰা অত্থো. তন্তি সমথৰিপস্সনাভাৰনাসঙ্খাতং পটিপদং. পুব্বভাগতো পভুতীতি ভাৰনায পুব্বভাগৰীরিযারম্ভাদিতো পট্ঠায. কেচীতি উত্তরৰিহারৰাসিনো.

বোধিমণ্ডেতি ¶ (সারত্থ. টী. ১.১১.ৰেরঞ্জকণ্ডৰণ্ণনা; অ. নি. টী. ৩.৮.১১) বোধিসঙ্খাতস্স ঞাণস্স মণ্ডভাৰপ্পত্তে ঠানে. চতুরঙ্গন্তি ‘‘কামং তচো চ ন্হারু চ, অট্ঠি চ অৰসিস্সতূ’’তিআদিনা (ম. নি. ২.১৮৪; সং. নি. ২.২৩৭; অ. নি. ২.৫; ৮.১৩; মহানি. ১৭, ১৯৬) ৰুত্তচতুরঙ্গসমন্নাগতং. পগ্গহিতন্তি আরম্ভং সিথিলং অকত্ৰা দল়্হপরক্কমসঙ্খাতুস্সহনভাৰেন গহিতং. তেনাহ ‘‘অসিথিলপ্পৰত্তিতন্তি ৰুত্তং হোতী’’তি. অসল্লীনন্তি অসঙ্কুচিতং কোসজ্জৰসেন সঙ্কোচং অনাপন্নং.

উপট্ঠিতাতি ওগাহনসঙ্খাতেন অপিলাপনভাৰেন আরম্মণং উপগন্ত্ৰা ঠিতা. তেনাহ ‘‘আরম্মণাভিমুখীভাৰেনা’’তি. সম্মোসস্স ৰিদ্ধংসনৰসেন পৰত্তিযা ন সম্মুট্ঠাতি অসম্মুট্ঠা. কিঞ্চাপি চিত্তমিৰ চিত্তপস্সদ্ধিৰসেন কাযপস্সদ্ধিৰসেনেৰ কাযো পস্সদ্ধো হোতি, তথাপি যস্মা কাযপস্সদ্ধি উপ্পজ্জমানা চিত্তপস্সদ্ধিযা সহেৰ উপ্পজ্জতি, ন ৰিনা, তস্মা ৰুত্তং ‘‘কাযচিত্তপস্সদ্ধিসম্ভৰেনা’’তি ¶ . রূপকাযোপি পস্সদ্ধোযেৰ হোতি কাযপস্সদ্ধিযা উভযেসম্পি কাযানং পস্সম্ভনাৰহত্তা. সো চ খো কাযো. ৰিগতদরথোতি ৰিগতকিলেসদরথো. নামকাযে হি ৰিগতদরথে রূপকাযোপি ৰূপসন্তদরথপরিল়াহো হোতি. সম্মা আহিতন্তি নানারম্মণেসু ৰিধাৰনসঙ্খাতৰিক্খেপং ৰিচ্ছিন্দিত্ৰা একস্মিংযেৰ আরম্মণে অৰিক্খিত্তভাৰাপাদানেন সম্মদেৰ আহিতং. তেনাহ ‘‘সুট্ঠু ঠপিত’’ন্তিআদি. চিত্তস্স অনেকগ্গভাৰো ৰিক্খেপৰসেন চঞ্চলতা, সা সতি একগ্গতায ন হোতীতি আহ ‘‘একগ্গং অচলং নিপ্ফন্দন’’ন্তি. এত্তাৰতাতি ‘‘আরদ্ধং খো পনা’’তিআদিনা ৰীরিযসতিপস্সদ্ধিসমাধীনং কিচ্চসিদ্ধিদস্সনেন. ননু চ সদ্ধাপঞ্ঞানম্পি কিচ্চসিদ্ধি ঝানস্স পুব্বপটিপদায ইচ্ছিতব্বাতি? সচ্চং ইচ্ছিতব্বা, সা পন নানন্তরিযভাৰেন অৰুত্তসিদ্ধাতি ন গহিতা. অসতি হি সদ্ধায ৰীরিযারম্ভাদীনং অসম্ভৰোযেৰ, পঞ্ঞাপরিগ্গহে চ নেসং অসতি পঞ্ঞাযারম্ভাদিভাৰো ন সিযা. তথা অসল্লীনাসম্মোসতাদযো ৰীরিযাদীনন্তি অসল্লীনতাদিগ্গহণেনেৰেত্থ পঞ্ঞাকিচ্চসিদ্ধি গহিতাতি দট্ঠব্বং. ঝানভাৰনাযং ৰা সমাধিকিচ্চং অধিকং ইচ্ছিতব্বন্তি দস্সেতুং সমাধিপরিযোসানাৰ ঝানস্স পুব্বপটিপদা কথিতাতি দট্ঠব্বং.

ৰুত্তং, তস্মা ইধ ন ৰত্তব্বং. ৰিসুদ্ধিমগ্গো হি ইমিস্সা সংৰণ্ণনায একদেসভূতোতি ৰুত্তোৰাযমত্থোতি. ৰিহরতীতি আগতং পরুদ্দেসিকত্তা ¶ ৰিহারস্স. ইধ ৰিহাসিন্তি আগতং অত্থুদ্দেসিকত্তা. ইদং কির সব্ববুদ্ধানং অৰিজহিতন্তি আহ ‘‘আনাপানস্সতিকম্মট্ঠান’’ন্তি. রূপৰিরাগভাৰনাৰসেন (সারত্থ. টী. ১.১২.নেরঞ্জকণ্ডৰণ্ণনা) পৰত্তো চতুব্বিধোপি অরূপজ্ঝানৰিসেসো চতুত্থজ্ঝানসঙ্গহো এৰাতি আহ ‘‘চত্তারি ঝানানী’’তি. যুত্তং তাৰ চিত্তেকগ্গতা ভৰোক্কমনত্থতা ৰিয ৰিপস্সনাপাদকতাপি চতুন্নং ঝানানং সাধারণাতি তেসং ৰসেন ‘‘চত্তারি ঝানানী’’তি ৰচনং, অভিঞ্ঞাপাদকতা পন নিরোধপাদকতা চ চতুত্থস্সেৰ ঝানস্স আৰেণিকা, সা কথং চতুন্নং ঝানানং সাধারণা ৰুত্তাতি? পরম্পরাধিট্ঠানভাৰতো. পদট্ঠানপদট্ঠানম্পি হি পদট্ঠানন্তেৰ ৰুচ্চতি, কারণকারণম্পি কারণন্তি যথা ‘‘তিণেহি সত্তং সিদ্ধ’’ন্তি, এৰঞ্চ কত্ৰা পযোজননিদ্দেসে অট্ঠসমাপত্তিগ্গহণং সমত্থিতং হোতি. চিত্তেকগ্গতত্থানীতি চিত্তসমাধানত্থানি, দিট্ঠধম্মসুখৰিহারত্থানীতি অত্থো. চিত্তেকগ্গতাসীসেন হি দিট্ঠধম্মসুখৰিহারো ৰুত্তো, সুক্খৰিপস্সকখীণাসৰৰসেন চেতং ৰুত্তং. তেনাহ ‘‘একগ্গচিত্তা সুখং দিৰসং ৰিহরিস্সামা’’তি. ভৰোক্কমনত্থানীতি ভৰেসু নিব্বত্তিঅত্থানি.

যস্মা (সারত্থ. টী. ১.১২.নেরঞ্জকণ্ডৰণ্ণনা) বোধিসত্তেন বোধিমণ্ডূপসঙ্কমনতো পুব্বেপি চরিমভৰে চতুত্থজ্ঝানং নিব্বত্তিতপুব্বং, তদা পন তং নিব্বত্তিতমত্তমেৰ অহোসি, ন ৰিপস্সনাদিপাদকং ¶ , তস্মা ‘‘বোধিরুক্খমূলে নিব্বত্তিত’’ন্তি ততো ৰিসেসেত্ৰা ৰুত্তং. ৰিপস্সনাপাদকন্তি ৰিপস্সনারম্ভে ৰিপস্সনায পাদকং. অভিঞ্ঞাপাদকন্তি এত্থাপি এসেৰ নযো. বুদ্ধানঞ্হি পঠমারম্ভে এৰ পাদকজ্ঝানেন পযোজনং অহোসি, ন ততো পরং উপরিমগ্গাধিগমফলসমাপত্তিঅভিঞ্ঞাৰল়ঞ্জনাদিঅত্থং. অভিসম্বোধিসমধিগমতো পট্ঠায হি সব্বং ঞাণসমাধিকিচ্চং আকঙ্খমত্তপটিবদ্ধমেৰাতি. সব্বকিচ্চসাধকন্তি অনুপুব্বৰিহারাদিসব্বকিচ্চসাধকং. সব্বলোকিযলোকুত্তরগুণদাযকন্তি এত্থ ৰিপস্সনাভিঞ্ঞাপাদকত্তা এৰ চতুত্থস্স ঝানস্স ভগৰতো সব্বলোকিযলোকুত্তরগুণদাযকতা ৰেদিতব্বা. সব্বঞ্ঞুতঞ্ঞাণপদট্ঠানঞ্হি মগ্গঞাণং, মগ্গঞাণপদট্ঠানঞ্চ সব্বঞ্ঞুতঞ্ঞাণং অভিসম্বোধি, তদধিগমসমকালমেৰ ভগৰতো সব্বে বুদ্ধগুণা হত্থগতা অহেসুং, চতুত্থজ্ঝানসন্নিস্সযো চ মগ্গাধিগমোতি.

পুব্বভাগপটিপদাদিৰণ্ণনা নিট্ঠিতা.

পুব্বেনিৰাসকথাৰণ্ণনা

৫২. দ্ৰিন্নং ¶ ৰিজ্জানন্তি পুব্বেনিৰাসঞাণদিব্বচক্খুঞাণসঙ্খাতানং দ্ৰিন্নং ৰিজ্জানং. অনুপদৰণ্ণনাতি তাসং ৰিজ্জানং নিদ্দেসপাল়িযা অনুপদৰণ্ণনা. ভাৰনানযোতি উপ্পাদনৰিধি. ‘‘সো’’তি পচ্চত্তৰচনস্স অহং-সদ্দেন সম্বন্ধনে কারণং দস্সেতুং ‘‘অভিনিন্নামেসি’’ন্তিআদি ৰুত্তং. পাল়িযং ৰা ‘‘অভিনিন্নামেসি’’ন্তি উত্তমপুরিসস্স যোগোতি অহং-সদ্দেন আনেত্ৰা ৰুচ্চমানে তদত্থো পাকটো হোতীতি ‘‘সো অহ’’ন্তি ৰুত্তং. অভিনীহরিন্তি চিত্তং ঝানারম্মণতো অপনেত্ৰা পুব্বেনিৰাসাভিমুখং পেসেসিং, পুব্বেনিৰাসনিন্নং পুব্বেনিৰাসপোণং পুব্বেনিৰাসপব্ভারং অকাসিন্তি অত্থো.

পুব্বেঅতীতজাতীসু নিৰুত্থক্খন্ধা পুব্বেনিৰাসো. নিৰুত্থাতি চ অজ্ঝাৰুত্থা অনুভূতা অত্তনো সন্তানে উপ্পজ্জিত্ৰা নিরুদ্ধা, গোচরনিৰাসেন নিৰুত্থধম্মা ৰা অত্তনো ৰিঞ্ঞাণেনৰিঞ্ঞাতা, পরৰিঞ্ঞাণৰিঞ্ঞাতাপি ৰা ছিন্নৰটুমকানুস্সরণাদীসু, তং পুব্বেনিৰাসং যায সতিযা অনুস্সরতি, তায সম্পযুত্তং ঞাণং পুব্বেনিৰাসানুস্সতিঞ্ঞাণং. পটিনিৰত্তন্তস্সাতি পুব্বেনিৰাসং অনুস্সরণৰসেন যাৰদিচ্ছকং গন্ত্ৰা পচ্চাগচ্ছন্তস্স. তস্মাতি ৰুত্তস্সেৰত্থস্স কারণভাৰেন পচ্চামসনং, পটিনিৰত্তন্তস্স পচ্চৰেক্খণভাৰতোতি ৰুত্তং হোতি. ইধূপপত্তিযাতি ইধ ¶ চরিমভৰে উপপত্তিযা. অনন্তরন্তি অতীতানন্তরমাহ. অমুত্রাতি অমুকস্মিং ভৰেতি অত্থো. উদপাদিন্তি উপ্পজ্জিং. তাহি দেৰতাহীতি তুসিতাদেৰতাহি. একগোত্তোতি তুসিতগোত্তেন একগোত্তো. মহাবোধিসত্তানং সন্তানস্স পরিযোসানাৰত্থায দেৰলোকূপপত্তিজনকং নাম অকুসলেন কম্মুনা অনুপদ্দুতমেৰ হোতীতি অধিপ্পাযেন ‘‘দুক্খং পন সঙ্খারদুক্খমেৰা’’তি ৰুত্তং. মহাপুঞ্ঞানম্পি পন দেৰপুত্তানং পুব্বনিমিত্তুপ্পত্তিকালাদীসু অনিট্ঠারম্মণসমাযোগো হোতিযেৰাতি ‘‘কদাচি দুক্খদুক্খস্সপি সম্ভৰো নত্থী’’তি ন সক্কা ৰত্তুং. সত্তপঞ্ঞাস…পে… পরিযন্তোতি ইদং মনুস্সানং ৰস্সগণনাৰসেন ৰুত্তং. তত্থ দেৰানং ৰস্সগণনায পন চতুসহস্সমেৰ.

অতীতভৰে (সারত্থ. টী. ১.১২.পুব্বেনিৰাসকথাযং) খন্ধা তপ্পটিবদ্ধনামগোত্তানি চ সব্বং পুব্বেনিৰাসন্তেৰ সঙ্গহিতন্তি আহ ‘‘কিং ৰিদিতং করোতি? পুব্বেনিৰাস’’ন্তি. মোহো পটিচ্ছাদকট্ঠেন ‘‘তমো’’তি ৰুচ্চতি ‘‘তমো ৰিযা’’তি কত্ৰা. ওভাসকরণট্ঠেনাতি ¶ কাতব্বতো করণং, ওভাসোৰ করণং, অত্তনো পচ্চযেন ওভাসভাৰেন নিব্বত্তেতব্বট্ঠেনাতি অত্থো. সেসং পসংসাৰচনন্তি পটিপক্খৰিধমনপৰত্তিৰিসেসানং বোধনতো ৰুত্তং. অৰিজ্জা ৰিহতাতি এতেন ৰিজ্জনট্ঠেন ৰিজ্জাতি অযম্পি অত্থো দীপিতোতি দট্ঠব্বং. যস্মা ৰিজ্জা উপ্পন্নাতি এতেন ৰিজ্জাপটিপক্খা অৰিজ্জা, পটিপক্খতা চস্সা পহাতব্বভাৰেন ৰিজ্জায চ পহাযকভাৰেনাতি দস্সেতি. এস নযো ইতরস্মিম্পি পদদ্ৰযেতি ইমিনা তমো ৰিহতো ৰিনট্ঠো. কস্মা? যস্মা আলোকো উপ্পন্নোতি ইমমত্থং অতিদিসতি. পেসিতত্তস্সাতি যথাধিপ্পেতত্থসিদ্ধিং পতি ৰিস্সট্ঠচিত্তস্স. যথা অপ্পমত্তস্সাতি অঞ্ঞস্সপি কস্সচি মাদিসস্সাতি অধিপ্পাযো.

পুব্বেনিৰাসকথাৰণ্ণনা নিট্ঠিতা.

দিব্বচক্খুঞাণকথাৰণ্ণনা

৫৩. ইধাতি ভযভেরৰসুত্তে ৰুত্তং. ইধ অযং ৰিসেসোতি যোজনা. ৰুত্তসদিসমেৰ ‘‘মেতি মযা’’তিআদিনা. পরিকম্মকিচ্চন্তি ‘‘অভিঞ্ঞাপাদকচতুত্থজ্ঝানতো ৰুট্ঠায সব্বপচ্ছিমা নিসজ্জা আৰজ্জিতব্বা’’তিআদিনা, কসিণারম্মণং অভিঞ্ঞাপাদকজ্ঝানং সব্বাকারেন অভিনীহারক্খমং কত্ৰা’’তিআদিনা চ ৰুত্তেন পরিকম্মেন কিচ্চং পযোজনং নত্থি. ন ¶ তেন ইধ অত্থোতি তেন ভাৰনানযেন ইধ পাল়িযা অত্থৰণ্ণনাযং অত্থো নত্থি তথাভাৰনায ইধ অনধিপ্পেতত্তাতি অধিপ্পাযো.

দিব্বচক্খুঞাণকথাৰণ্ণনা নিট্ঠিতা.

আসৰক্খযঞাণকথাৰণ্ণনা

৫৪. ৰিপস্সনাপাদকন্তি (সারত্থ. টী. ১.১৪.আসৰক্খযঞাণকথাযং; দী. নি. টী. ১.২৪৮; অ. নি. টী. ২.৩.৫৯) ৰিপস্সনায পদট্ঠানভূতং. ৰিপস্সনা চ তিৰিধা ৰিপস্সনকপুগ্গলভেদেন. মহাবোধিসত্তানঞ্হি পচ্চেকবোধিসত্তানঞ্চ ৰিপস্সনা চিন্তামযঞাণসংৰদ্ধিতত্তা সযম্ভুঞাণভূতা, ইতরেসং ¶ সুতমযঞাণসংৰদ্ধিতত্তা পরোপদেসসম্ভূতা, সা ‘‘ঠপেত্ৰা নেৰসঞ্ঞানাসঞ্ঞাযতনং অৰসেসরূপারূপজ্ঝানানং অঞ্ঞতরতো ৰুট্ঠাযা’’তিআদিনা অনেকধা অরূপমুখৰসেন চতুধাতুৰৰত্থানে ৰুত্তানং তেসং তেসং ধাতুপরিগ্গহমুখানং অঞ্ঞতরমুখৰসেন অনেকধাৰ ৰিসুদ্ধিমগ্গে (ৰিসুদ্ধি. ১.৩০৬) নানানযতো ৰিভাৰিতা. মহাবোধিসত্তানং পন চতুৰীসতিকোটিসতসহস্সমুখেন পভেদগমনতো নানানযং সব্বঞ্ঞুতঞ্ঞাণসন্নিস্সযস্স অরিযমগ্গঞাণস্স অধিট্ঠানভূতং পুব্বভাগঞাণগব্ভং গণ্হাপেন্তং পরিপাকং গচ্ছন্তং পরমগম্ভীরসণ্হসুখুমতরং অনঞ্ঞসাধারণং ৰিপস্সনাঞাণং হোতি, যং অট্ঠকথাসু মহাৰজিরঞাণন্তি ৰুচ্চতি. যস্স চ পৰত্তিৰিভাগেন চতুৰীসতিকোটিসতসহস্সপ্পভেদস্স পাদকভাৰেন সমাপজ্জিযমানা চতুৰীসতিকোটিসতসহস্সসঙ্খা দেৰসিকং সত্থু ৰল়ঞ্জনকসমাপত্তিযো ৰুচ্চন্তি, স্ৰাযং বুদ্ধানং ৰিপস্সনাচারো পরমত্থমঞ্জূসায ৰিসুদ্ধিমগ্গসংৰণ্ণনায (ৰিসুদ্ধি. মহাটী. ১.১৪৪) উদ্দেসতো দস্সিতো, অত্থিকেহি ততো গহেতব্বোতি.

আসৰানং খেপনতো সমুচ্ছিন্দনতো আসৰক্খযো, অরিযমগ্গো, উক্কট্ঠনিদ্দেসৰসেন অরহত্তমগ্গগ্গহণং. আসৰানং খযে ঞাণং আসৰক্খযঞাণন্তি দস্সেন্তো ‘‘তত্র চেতং ঞাণ’’ন্তি ৰত্ৰা খযেতি চ আধারে ভুম্মং, ন ৰিসযেতি দস্সেন্তো ‘‘তপ্পরিযা পন্নত্তা’’তি আহ. ইদং দুক্খন্তি দুক্খস্স অরিযসচ্চস্স তদা পচ্চক্খতো গহিতভাৰদস্সনং. এত্তকং দুক্খন্তি দুক্খস্স অরিযসচ্চস্স তদা পচ্চক্খতো গহিতভাৰদস্সনং. এত্তকং দুক্খন্তি তস্স পরিচ্ছিজ্জ গহিতভাৰদস্সনং. ন ইতো ভিয্যোতি অনৰসেসেত্ৰা গহিতভাৰদস্সনং. তেনাহ ‘‘সব্বম্পি ¶ দুক্খসচ্চ’’ন্তিআদি. সরসলক্খণপটিৰেধেনাতি সভাৰসঙ্খাতস্স লক্খণস্স অসম্মোহতো পটিৰিজ্ঝনেন. অসম্মোহপটিৰেধোতি চ যথা তস্মিং ঞাণে পৰত্তে পচ্ছা দুক্খস্স সরূপাদিপরিচ্ছেদে সম্মোহো ন হোতি, তথা পৰত্তি. তেনাহ ‘‘যথাভূতং অব্ভঞ্ঞাসি’’ন্তি. যং ঠানং পত্ৰাতি যং নিব্বানং মগ্গস্স আরম্মণপচ্চযট্ঠেন কারণভূতং আগম্ম. তদুভযৰতো হি পুগ্গলস্স পত্তি তদুভযস্স পত্তীতি ৰুত্তং. পত্ৰাতি ৰা পাপুণনহেতু. অপ্পৰত্তিন্তি অপ্পৰত্তিনিমিত্তং. তে ৰা নপ্পৰত্তন্তি এত্থাতি অপ্পৰত্তি, নিব্বানং. তস্সাতি দুক্খনিরোধস্স. সম্পাপকন্তি সচ্ছিকিরিযাৰসেন সম্মদেৰ পাপকং.

কিলেসৰসেনাতি ¶ আসৰসঙ্খাতকিলেসৰসেন. যস্মা আসৰানং দুক্খসচ্চপরিযাযো তপ্পরিযাপন্নত্তা, সেসসচ্চানঞ্চ তংসমুদযাদিপরিযাযো অত্থি, তস্মা ৰুত্তং. ‘‘পরিযাযতো’’তি. দস্সেন্তো সচ্চানীতি যোজনা. আসৰানংযেৰ চেত্থ গহণং ‘‘আসৰানং খযঞাণাযা’’তি আরদ্ধত্তা. তথা হি আসৰৰিমুত্তি সীসেনেৰ সব্বসংকিলেসৰিমুত্তি ৰুত্তা. ‘‘ইদং দুক্খন্তি যথাভূতং অব্ভঞ্ঞাসি’’ন্তিআদিনা মিস্সকমগ্গো ইধ কথিতোতি ‘‘সহ ৰিপস্সনায কোটিপ্পত্তং মগ্গং কথেতী’’তি ৰুত্তং. এত্থ চ সচ্চপটিৰেধস্স তদা অতীতকালিকত্তা ‘‘যথাভূতং অব্ভঞ্ঞাসি’’ন্তি ৰত্ৰাপি অভিসমযকালে তস্স পচ্চুপ্পন্নতং উপাদায ‘‘এৰং জানতো এৰং পস্সতো’’তি ৰত্তমানকালেন নিদ্দেসো কতো. সো চ কামং মগ্গক্খণতো পরং যাৰজ্জতনা অতীতকালিকো এৰ, সব্বপঠমং পনস্স অতীতকালিকত্তং ফলক্খণেন ৰেদিতব্বন্তি আহ ‘‘ৰিমুচ্চিত্থাতি ইমিনা ফলক্খণং দস্সেতী’’তি. জানতো পস্সতোতি ৰা হেতুনিদ্দেসোযং. জাননহেতু দস্সনহেতু কামাসৰা চিত্তং ৰিমুচ্চিত্থাতি যোজনা. ভৰাসৰগ্গহণেনেৰ চেত্থ ভৰরাগস্স ৰিয ভৰদিট্ঠিযাপি সমৰরোধোতি দিট্ঠাসৰস্সপি সঙ্গহো দট্ঠব্বো.

খীণাজাতীতিআদীহি পদেহি. তস্সাতি পচ্চৰেক্খণঞাণস্স. ভূমীন্তি পৰত্তিট্ঠানং. ন তাৰস্স অতীতা জাতি খীণা মগ্গভাৰনাযাতি অধিপ্পাযো. তত্থ কারণমাহ ‘‘পুব্বেৰ খীণত্তা’’তি. ন অনাগতা অস্সজাতি খীণাতি যোজনা. ন অনাগতাতি চ অনাগতত্তসামঞ্ঞং গহেত্ৰা লেসেন চোদেতি. তেনাহ ‘‘অনাগতে ৰাযামাভাৰতো’’তি, অনাগতৰিসেসো পনেত্থ অধিপ্পেতো, তস্স চ খেপনে ৰাযামোপি লব্ভতেৰ. তেনাহ ‘‘যা পন মগ্গস্সা’’তিআদি. একচতুপঞ্চৰোকারভৰেসূতি ভৰত্তযগ্গহণং ৰুত্তনযেন অনৰসেসতো জাতিযা খীণভাৰদস্সনত্থং. তন্তি যথাৰুত্তং জাতিং. সোতি ভগৰা.

ব্রহ্মচরিযৰাসো নাম ইধ মগ্গব্রহ্মচরিযস্স নিব্বত্তনমেৰাতি আহ ‘‘নিট্ঠিত’’ন্তি. সম্মাদিট্ঠিযা ¶ চতূসু সচ্চেসু পরিঞ্ঞাদিকিচ্চসাধনৰসেন পৰত্তমানায সম্মা সঙ্কপ্পাদীনম্পি দুক্খসচ্চে পরিঞ্ঞাভিসমযানুগুণা পৰত্তি, ইতরসচ্চেসু চ নেসং পহানাভিসমযাদিৰসেন পৰত্তি পাকটা এৰ. তেন ৰুত্তং ‘‘চতূহি মগ্গেহি পরিঞ্ঞাপহানসচ্ছিকিরিযাভাৰনাৰসেনা’’তি. ইত্থত্তাযাতি ইমে পকারা ইত্থং, তব্ভাৰো ইত্থত্তং, তদত্থন্তি ৰুত্তং ¶ হোতি. তে পন পকারা অরিযমগ্গব্যাপারভূতা পরিঞ্ঞাদযো ইধাধিপ্পেতাতি আহ ‘‘এৰংসোল়সকিচ্চভাৰাযা’’তি. তে হি মগ্গং পচ্চৰেক্খতো মগ্গানুভাৰেন পাকটা হুত্ৰা উপট্ঠহন্তি, পরিঞ্ঞাদীসু চ পহানমেৰ পধানং তদত্থত্তা ইতরেসন্তি আহ ‘‘কিলেসক্খযাযৰা’’তি. পহীনকিলেসপচ্চৰেক্খণৰসেন ৰা এতং ৰুত্তং. ইত্থত্তাযাতি নিস্সক্কে সম্পদানৰচনন্তি আহ ‘‘ইত্থভাৰতো’’তি. অপরং অনাগতং. ইমে পন চরিমত্তভাৰসঙ্খাতা পঞ্চক্খন্ধা. পরিঞ্ঞাতা তিট্ঠন্তীতি এতেন তেসং অপ্পতিট্ঠতং দস্সেতি. অপরিঞ্ঞামূলকা হি পতিট্ঠা. যথাহ ‘‘কবল়ীকারে চে, ভিক্খৰে, আহারে অত্থি রাগো অত্থি নন্দী অত্থি তণ্হা, পতিট্ঠিতং তত্থ ৰিঞ্ঞাণং ৰিরূল়্হ’’ন্তিআদি (সং. নি. ২.৬৪; মহানি. ৭; কথা. ২৯৬). তেনেৰাহ ‘‘ছিন্নমূলকা রুক্খা ৰিযা’’তিআদি.

পচ্চৰেক্খণঞাণপরিগ্গহিতং, ন পঠমদুতিযঞাণদ্ৰযাধিগমং ৰিয কেৰলন্তি অধিপ্পাযো. দস্সেন্তো নিগমনৰসেনাতি অধিপ্পাযো. সরূপতো হি তং পুব্বে দস্সিতমেৰাতি. পুব্বেনিৰাসঞাণেন অতীতারম্মণসভাগতায তব্ভাৰীভাৰতো চ অতীতংসঞাণং সঙ্গহেত্ৰাতি যোজনা. তত্থ অতীতংসঞাণন্তি অতীতখন্ধাযতনধাতুসঙ্খাতে অতীতকোট্ঠাসে অপ্পটিহতং ঞাণং. দিব্বচক্খুনাতি সপরিভণ্ডেন দিব্বচক্খুঞাণেন. পচ্চুপ্পন্নংসো চ অনাগতংসো চ পচ্চুপ্পন্নানাগতংসং, তত্থ ঞাণং পচ্চুপ্পন্নানাগতংসঞাণং. সকললোকিযলোকুত্তরগুণন্তি এতেন সব্বং লোকং উত্তরিত্ৰা অভিভুয্য ঠিতত্তা সব্বঞ্ঞুতঞ্ঞাণস্স ৰিয সেসাসাধারণঞাণস্স বলঞাণআৰেণিকবুদ্ধধম্মাদীনম্পি অনঞ্ঞসাধারণানং বুদ্ধগুণানং সঙ্গহো ৰেদিতব্বো. তেনাহ ‘‘সব্বেপি সব্বঞ্ঞুগুণে সঙ্গহেত্ৰা’’তি.

আসৰক্খযঞাণকথাৰণ্ণনা নিট্ঠিতা.

অরঞ্ঞৰাসকারণৰণ্ণনা

৫৫. সিযা খো পন তে ব্রাহ্মণাতি এত্থ সিযাতি ‘‘অপ্পেৰা’’তি ইমিনা সমানত্থো নিপাতো ¶ , তস্মা ‘ব্রাহ্মণ, অপ্পেৰ খো পন তে এৰমস্সা’তি ¶ অত্থো. যং পন অট্ঠকথাযং ‘‘কদাচী’’তি ৰুত্তং, তম্পি ইমমেৰত্থং সন্ধায ৰুত্তং অকারণং ব্রাহ্মণেন পরিকপ্পিতমত্থং পটিপক্খিপিত্ৰা অত্তনো অধিপ্পেতং কারণং দস্সেন্তো. অত্থোৰ ফলং তদধীনৰুত্তিতায ৰসো এতস্সাতি অত্থৰসো, হেতূতি এৰং ৰা এত্থ অত্থো দট্ঠব্বো. অত্তনো চ দিট্ঠধম্মসুখৰিহারন্তি এতেন সত্থা অত্তনো ৰিৰেকাভিরতিং পকাসেতীতি দস্সেন্তো ‘‘দিট্ঠধম্মো নামা’’তিআদিমাহ. তত্থ ইরিযাপথৰিহারানন্তি ইরিযাপথপৰত্তীনং. তপ্পৰত্তিযো হি একস্মিং ইরিযাপথে উপ্পন্নদুক্খং অঞ্ঞেন ইরিযাপথেন ৰিচ্ছিন্দিত্ৰা হরণতো ৰিহারাতি ৰুচ্চন্তি. পচ্ছিমঞ্চ জনতং অনুকম্পমানোতি এতেন যো আদিতো ব্রাহ্মণেন ‘‘ভৰং তেসং গোতমো পুব্বঙ্গমো…পে… দিট্ঠানুগতিং আপজ্জতী’’তি ৰুত্তো, যো চ তথা ‘‘এৰমেতং ব্রাহ্মণা’’তিআদিনা অত্তনা সম্পটিচ্ছিতো, তমেৰ অত্থং নিগমনৰসেন দস্সেন্তো যথানুসন্ধিনাৰ সত্থা দেসনং নিট্ঠাপেসি.

অরঞ্ঞৰাসকারণৰণ্ণনা নিট্ঠিতা.

দেসনানুমোদনাৰণ্ণনা

৫৬. এৰং নিট্ঠাপিতায দেসনায ব্রাহ্মণো তত্থ ভগৰতি পসাদং পৰেদেন্তো ‘‘অভিক্কন্ত’’ন্তিআদিমাহ. অভিক্কন্তাতি (সারত্থ. টী. ১.১৫.দেসনানুমোদনকথা; দী. নি. টী. ১.২৫০; সং. নি. টী. ১.১.১; অ. নি. টী. ২.২.১৬) অতিক্কন্তা, ৰিগতাতি অত্থোতি আহ ‘‘খযে দিস্সতী’’তি. তেনেৰ হি ‘‘নিক্খন্তো পঠমো যামো’’তি ৰুত্তং. অভিক্কন্ততরোতি অতিৰিয কন্ততরো মনোরমো. তাদিসো চ সুন্দরো ভদ্দকো নাম হোতীতি আহ ‘‘সুন্দরে দিস্সতী’’তি.

কোতি দেৰনাগযক্খগন্ধব্বাদীসু কো কতমো. মেতি মম. পাদানীতি পাদে. ইদ্ধিযাতি ইমায এৰরূপায দেৰিদ্ধিযা. যসসাতি ইমিনা এদিসেন পরিৰারেন পরিজনেন. জলন্তি ৰিজ্জোতমানো. অভিক্কন্তেনাতি অতিৰিয কন্তেন কমনীযেন অভিরূপেন. ৰণ্ণেনাতি ছৰিৰণ্ণেন সরীরৰণ্ণনিভায. সব্বা ওভাসযং দিসাতি দসপি দিসা ওভাসেন্তো পভাসেন্তো, চন্দো ৰিয সূরিযো ৰিয চ একোভাসং একালোকং ¶ করোন্তোতি গাথায অত্থো. অভিরূপেতি উল়াররূপে সম্পন্নরূপে.

‘‘চোরো ¶ চোরো, সপ্পো সপ্পো’’তিআদীসু ভযে আমেডিতং. ‘‘ৰিজ্ঝ ৰিজ্ঝ, পহর পহরা’’তিআদীসু কোধে, ‘‘সাধু সাধূতিআদীসু (ম. নি. ১.৩২৭; সং. নি. ২.১২৭; ৩.৩৫; ৫.১০৮৫) পসংসাযং, ‘‘গচ্ছ গচ্ছ, লুনাহি লুনাহী’’তিআদীসু তুরিতে, ‘‘আগচ্ছ আগচ্ছা’’তিআদীসু কোতূহলে, ‘‘বুদ্ধো বুদ্ধোতি চিন্তেন্তো’’তিআদীসু (বু. ৰং. ২.৪৪) অচ্ছরে, ‘‘অভিক্কমথাযস্মন্তো, অভিক্কমথাযস্মন্তো’’তিআদীসু (দী. নি. ৩.২০; অ. নি. ৯.১১) হাসে, ‘‘কহং একপুত্তক, কহং একপুত্তকা’’তিআদীসু (ম. নি. ২.৩৫৩; সং. নি. ২.৬৩) সোকে, ‘‘অহো সুখং অহো সুখ’’ন্তিআদীসু (উদা. ২০; দী. নি. ৩.৩০৫; চূল়ৰ. ৩৩২) পসাদে. চ-সদ্দো অৰুত্তসমুচ্চযত্থো. তেন গরহাঅসম্মানাদীনং সঙ্গহো দট্ঠব্বো. তত্থ ‘‘পাপো পাপো’’তিআদীসু গরহাযং. ‘‘অভিরূপক অভিরূপকা’’তিআদীসু অসম্মানে দট্ঠব্বং.

নযিদং আমেডিতৰসেন দ্ৰিক্খত্তুং ৰুত্তং, অথ খো অত্থদ্ৰযৰসেনাতি দস্সেন্তো ‘‘অথ ৰা’’তিআদিমাহ. অভিক্কন্তন্তি ৰচনং অপেক্খিত্ৰা নপুংসকলিঙ্গৰসেন ৰুত্তং, তং পন ভগৰতো ৰচনং ধম্মস্স দেসনাতি কত্ৰা তথা ৰুত্তং. অত্থমত্তদস্সনং ৰা এতং, তস্মা অত্থৰসেন লিঙ্গৰিভত্তিৰিপরিণামো ৰেদিতব্বো. দুতিযপদেপি এসেৰ নযো. দোসনাসনতোতি রাগাদিকিলেসদোসৰিধমনতো, গুণাধিগমনতোতি সীলাদিগুণানং সম্পাপনতো. যে গুণে দেসনা অধিগমেতি, তেসু পধানভূতা দস্সেতব্বাতি তে পধানভূতে তাৰ দস্সেতুং ‘‘সদ্ধাজননতো পঞ্ঞাজননতো’’তি ৰুত্তং. সদ্ধাপমুখা হি লোকিযা গুণা, পঞ্ঞাপমুখা লোকুত্তরা. সীলাদিঅত্থসম্পত্তিযা সাত্থতো, সভাৰনিরুত্তিসম্পত্তিযা সব্যঞ্জনতো. সুৰিঞ্ঞেয্যসদ্দপযোগতায উত্তানপদতো, সণ্হসুখুমভাৰেন দুব্বিঞ্ঞেয্যত্থতায গম্ভীরত্থতো. সিনিদ্ধমুদুমধুরসদ্দপযোগতায কণ্ণসুখতো, ৰিপুলৰিসুদ্ধপেমনীযত্থতায হদযঙ্গমতো. মানাতিমানৰিধমনেন অনত্তুক্কংসনতো, থম্ভসারম্ভমদ্দনেন অপরৰম্ভনতো. হিতাধিপ্পাযপৰত্তিযা পরেসং রাগপরিল়াহাদিৰূপসমনেন চ করুণাসীতলতো, কিলেসন্ধকারৰিধমনেন ¶ পঞ্ঞাৰদাততো. করৰীকরুতমঞ্জুতায আপাথরমণীযতো, পুব্বাপরাৰিরুদ্ধসুৰিসুদ্ধত্থতায ৰিমদ্দক্খমতো. আপাথরমণীযতায এৰ সুয্যমানসুখতো, ৰিমদ্দক্খমতায হিতজ্ঝাসযপ্পৰত্তিততায চ ৰীমংসিযমানহিততো. এৰমাদীহীতি আদিসদ্দেন সংসারচক্কনিৰত্তনতো, সদ্ধম্মচক্কপ্পৰত্তনতো, মিচ্ছাৰাদৰিধমনতো, সম্মাৰাদপতিট্ঠাপনতো, অকুসলমূলসমুদ্ধরণতো, কুসলমূলসংরোপনতো, অপাযদ্ৰারপিধানতো, সগ্গমগ্গদ্ৰারৰিৰরণতো, পরিযুট্ঠানৰূপসমনতো, অনুসযসমুগ্ঘাতনতোতি এৰমাদীনং সঙ্গহো দট্ঠব্বো.

অধোমুখট্ঠপিতন্তি ¶ কেনচি অধোমুখং ঠপিতং. হেট্ঠামুখজাতন্তি সভাৰেনেৰ হেট্ঠামুখজাতং. উগ্ঘাটেয্যাতি ৰিৰটং করেয্য. হত্থে গহেত্ৰাতি ‘‘পুরত্থাভিমুখো, উত্তরাভিমুখো ৰা গচ্ছা’’তিআদীনি অৰত্ৰা হত্থে গহেত্ৰা ‘‘নিস্সন্দেহং এস মগ্গো, এৰং গচ্ছা’’তি ৰদেয্য. কাল়পক্খচাতুদ্দসীতি কাল়পক্খে চাতুদ্দসী.

নিকুজ্জিতং আধেয্যস্স অনাধারভূতং ভাজনং আধারভাৰাপাদনৰসেন উক্কুজ্জেয্য. হেট্ঠামুখজাততায সদ্ধম্মৰিমুখং, অধোমুখট্ঠপিততায অসদ্ধম্মে পতিতন্তি এৰং পদদ্ৰযং যথারহং যোজেতব্বং, ন যথাসঙ্খ্যং. কামং কামচ্ছন্দাদযোপি পটিচ্ছাদকা, মিচ্ছাদিট্ঠি পন সৰিসেসং পটিচ্ছাদিকাতি আহ ‘‘মিচ্ছাদিট্ঠিগহনপটিচ্ছন্ন’’ন্তি. তেনাহ ভগৰা ‘‘মিচ্ছাদিট্ঠিপরমাহং, ভিক্খৰে, ৰজ্জং ৰদামী’’তি (অ. নি. ১.৩১০). সব্বো অপাযগামিমগ্গো কুম্মগ্গো ‘‘কুচ্ছিতো মগ্গো’’তি কত্ৰা. সম্মাদিট্ঠিআদীনং উজুপটিপক্খতায মিচ্ছাদিট্ঠিআদযো অট্ঠ মিচ্ছত্তধম্মা মিচ্ছামগ্গো. তেনেৰ হি তদুভযপটিপক্খতং সন্ধায ‘‘সগ্গমোক্খমগ্গং আচিক্খন্তেনা’’তি ৰুত্তং. সপ্পিআদিসন্নিস্সযো পদীপো ন তথা উজ্জলো, যথা তেলসন্নিস্সযোতি তেলপজ্জোতগ্গহণং. এতেহি পরিযাযেহীতি এতেহি নিকুজ্জিতুক্কুজ্জনপটিচ্ছন্নৰিৰরণাদিউপমোপমিতব্বপকারেহি, এতেহি ৰা যথাৰুত্তেহি সোল়সারম্মণপরিগ্গহঅসম্মোহৰিহারদিব্বৰিহারৰিভাৰনপরিযাযেহি ৰিজ্জাত্তযৰিভাৰনাপদেসেন অত্তনো সব্বঞ্ঞুগুণৰিভাৰনপরিযাযেহি চ. তেনাহ ‘‘অনেকপরিযাযেন ধম্মো পকাসিতো’’তি.

দেসনানুমোদনাৰণ্ণনা নিট্ঠিতা.

পসন্নকারৰণ্ণনা

পসন্নকারন্তি ¶ পসন্নেহি কাতব্বং সক্কারং. সরণন্তি পটিসরণং. তেনাহ ‘‘পরাযণ’’ন্তি. পরাযণভাৰো চ অনত্থনিসেধনেন অত্থসম্পটিপাদনেন চ হোতীতি আহ ‘‘অঘস্স তাতা হিতস্স চ ৰিধাতা’’তি. অঘস্সাতি দুক্খতোতি ৰদন্তি, পাপতোতি পন যুত্তং. নিস্সক্কে চেতং সামিৰচনং. এত্থ চ নাযং গমি-সদ্দো নী-সদ্দাদযো ৰিয দ্ৰিকম্মকো, তস্মা যথা ‘‘অজং গামং নেতী’’তি ৰুচ্চতি, এৰং ‘‘গোতমং সরণং গচ্ছামী’’তি ৰত্তুং ন সক্কা, ‘‘সরণন্তি গচ্ছামী’’তি পন ৰত্তব্বং. ইতি-সদ্দো চেত্থ লুত্তনিদ্দিট্ঠো, তস্স চাযমত্থো – গমনঞ্চ তদধিপ্পাযেন ভজনং, তথা জাননং ৰাতি দস্সেন্তো ‘‘ইতি ইমিনা অধিপ্পাযেনা’’তিআদিমাহ ¶ . তত্থ ভজামীতিআদীসু পুরিমস্স পুরিমস্স পচ্ছিমং পচ্ছিমং অত্থৰচনং. ভজনং ৰা সরণাধিপ্পাযেন উপসঙ্কমনং, সেৰনং সন্তিকাৰচরতা, পযিরুপাসনং ৰত্তপটিৰত্তকরণেন উপট্ঠানন্তি এৰং সব্বথাপি অনঞ্ঞসরণতংযেৰ দীপেতি. ‘‘গচ্ছামী’’তি পদস্স কথং ‘‘বুজ্ঝামী’’তি অযমত্থো লব্ভতীতি আহ ‘‘যেসঞ্হী’’তিআদি.

অধিগতমগ্গে, সচ্ছিকতনিরোধেতি পদদ্ৰযেনপি ফলট্ঠা এৰ দস্সিতা, ন মগ্গট্ঠাতি তে দস্সেন্তো ‘‘যথানুসিট্ঠং পটিপজ্জমানে চা’’তি আহ. ননু চ কল্যাণপুথুজ্জনোপি যথানুসিট্ঠং পটিপজ্জতীতি ৰুচ্চতীতি? কিঞ্চাপি ৰুচ্চতি, নিপ্পরিযাযেন পন মগ্গট্ঠা এৰ তথা ৰত্তব্বা, ন ইতরে নিযামোক্কমনাভাৰতো. তথা হি তে এৰ ‘‘অপাযেসু অপতমানে ধারেতী’’তি ৰুত্তা. সম্মত্তনিযামোক্কমনেন হি অপাযৰিনিমুত্তিসম্ভৰো. অক্খাযতীতি এত্থ ইতি-সদ্দো আদিঅত্থো, পকারত্থো ৰা. তেন ‘‘যাৰতা, ভিক্খৰে, ধম্মা সঙ্খতা ৰা অসঙ্খতা ৰা, ৰিরাগো তেসং অগ্গমক্খাযতী’’তি সুত্তপদং (অ. নি. ৪.৩৪; ইতিৰু. ৯০) সঙ্গণ্হাতি, ৰিত্থারোতি ৰা ইমিনা. এত্থ চ অরিযমগ্গো নিয্যানিকতায, নিব্বানং তস্স তদত্থসিদ্ধিহেতুতাযাতি উভযমেৰেত্থ নিপ্পরিযাযেন ধম্মোতি ৰুত্তো. নিব্বানঞ্হি আরম্মণপচ্চযভূতং লভিত্ৰা অরিযমগ্গস্স তদত্থসিদ্ধি, অরিযফলানং ‘‘যস্মা তায সদ্ধায অৰূপসন্তাযা’’তিআদিৰচনতো মগ্গেন সমুচ্ছিন্নানং কিলেসানং পটিপ্পস্সদ্ধিপহানকিচ্চতায নিয্যানানুগুণতায নিয্যানপরিযোসানতায চ. পরিযত্তিধম্মস্স পন নিয্যানধম্মসমধিগমহেতুতাযাতি ইমিনা ¶ পরিযাযেন ধম্মভাৰো লব্ভতি এৰ, স্ৰাযমত্থো পাঠারুল়্হো এৰাতি দস্সেন্তো ‘‘ন কেৰল’’ন্তিআদিমাহ.

কামরাগো ভৰরাগোতি এৰমাদিভেদো সব্বোপি রাগো ৰিরজ্জতি পহীযতি এতেনাতি রাগৰিরাগোতি মগ্গো কথিতো. এজাসঙ্খাতায তণ্হায অন্তোনিজ্ঝানলক্খণস্স সোকস্স চ তদুপ্পত্তিযং সব্বসো পরিক্খীণত্তা অনেজমসোকন্তি ফলং কথিতং. অপ্পটিকূলন্তি অৰিরোধদীপনতো কেনচি অৰিরুদ্ধং, ইট্ঠং পণীতন্তি ৰা অত্থো. পগুণরূপেন পৰত্তিতত্তা, পকট্ঠগুণৰিভাৰনতো ৰা পগুণং. যথাহ ‘‘ৰিহিংসসঞ্ঞী পগুণং ন ভাসিং, ধম্মং পণীতং মনুজেসু ব্রহ্মে’’তি. সব্বধম্মক্খন্ধা কথিতাতি যোজনা.

দিট্ঠিসীলসঙ্ঘাতেনাতি ‘‘যাযং দিট্ঠি অরিযা নিয্যানিকা নিয্যাতি তক্করস্স সম্মা দুক্খক্খযায, তথারূপায দিট্ঠিযা দিট্ঠিসামঞ্ঞগতো ৰিহরতী’’তি (দী. নি. ৩.৩২৪, ৩৫৬; ম. নি. ১.৪৯২; ৩.৫৪) এৰং ৰুত্তায দিট্ঠিযা, ‘‘যানি তানি সীলানি অখণ্ডানি অচ্ছিদ্দানি অসবলানি অকম্মাসানি ভুজিস্সানি ৰিঞ্ঞুপ্পসত্থানি অপরামট্ঠানি সমাধিসংৰত্তনিকানি ¶ , তথারূপেহি সীলেহি সীলসামঞ্ঞগতো ৰিহরতী’’তি (দী. নি. ৩.৩২৪; ম. নি. ১.৪৯২; ৩.৫৪; অ. নি. ৬.১২; পরি. ২৭৪) এৰং ৰুত্তানং সীলানঞ্চ সংহতভাৰেন, দিট্ঠিসীলসামঞ্ঞেনাতি অত্থো. সংহতোতি ঘটিতো. অরিযপুগ্গলা হি যত্থ কত্থচি দূরে ঠিতাপি অত্তনো গুণসামগ্গিযা সংহতা এৰ. অট্ঠ চ পুগ্গল ধম্মদসা তেতি তে পুরিসযুগৰসেন চত্তারোপি পুগ্গলৰসেন অট্ঠেৰ অরিযধম্মস্স পচ্চক্খদস্সাৰিতায ধম্মদসা. তীণি ৰত্থূনি সরণন্তি গমনেন তিক্খত্তুং গমনেন চ তীণি সরণগমনানি. পটিৰেদেসীতি অত্তনো হদযগতং ৰাচায পৰেদেসি.

পসন্নকারৰণ্ণনা নিট্ঠিতা.

সরণগমনকথাৰণ্ণনা

সরণগমনস্স ৰিসযপভেদফলসংকিলেসভেদানং ৰিয কত্তু চ ৰিভাৰনা তত্থ কোসল্লায হোতীতি ‘‘সরণগমনেসু কোসল্লত্থং ¶ সরণং…পে… ৰেদিতব্বো’’তি ৰুত্তং তেন ৰিনা সরণগমনস্সেৰ অসম্ভৰতো. কস্মা পনেত্থ ৰোদানং ন গহিতং, ননু ৰোদানৰিভাৰনাপি তত্থ কোসল্লাৰহাতি? সচ্চমেতং, তং পন সংকিলেসগ্গহণেনেৰ অত্থতো দীপিতং হোতীতি ন গহিতং. যানি হি তেসং সংকিলেসকারণানি অঞ্ঞাণাদীনি, তেসং সব্বেন সব্বং অনুপ্পন্নানং অনুপ্পাদনেন, উপ্পন্নানঞ্চ পহানেন ৰোদানং হোতীতি. হিংসত্থস্স সর-সদ্দস্স ৰসেনেতং পদং দট্ঠব্বন্তি ‘‘হিংসতীতি সরণ’’ন্তি ৰত্ৰা তং পন হিংসনং কেসং, কথং, কস্স ৰাতি চোদনং সোধেন্তো ‘‘সরণগতান’’ন্তিআদিমাহ. তত্থ ভযন্তি ৰট্টভযং. সন্তাসন্তি চিত্তুত্রাসং. তেনেৰ চেতসিকদুক্খস্স গহিতত্তা দুক্খন্তি ইধ কাযিকং দুক্খং. দুগ্গতিপরিকিলেসন্তি দুগ্গতিপরিযাপন্নং সব্বং দুক্খং. তযিদং সব্বং পরতো ফলকথাযং আৰি ভৰিস্সতি. এতন্তি ‘‘সরণ’’ন্তি পদং.

এৰং অৰিসেসতো সরণসদ্দস্স অত্থং দস্সেত্ৰা ইদানি ৰিসেসতো দস্সেতুং ‘‘অথ ৰা’’তিআদি ৰুত্তং. হিতে পৰত্তমানেনাতি ‘‘সম্পন্নসীলা, ভিক্খৰে, ৰিহরথা’’তিআদিনা (ম. নি. ১.৬৪, ৬৯) অত্থে নিযোজনেন. অহিতা চ নিৰত্তনেনাতি ‘‘পাণাতিপাতস্স খো পাপকো ৰিপাকো পাপকং অভিসম্পরায’’ন্তিআদিনা আদীনৰদস্সনাদিমুখেন অনত্থতো ৰিনিৰত্তনেন. ভযং হিংসতীতি হিতাহিতেসু অপ্পৰত্তিপৰত্তিহেতুকং ব্যসনং অপ্পৰত্তিকরণেন ৰিনাসেতি ¶ . ভৰকন্তারা উত্তারণেন মগ্গসঙ্খাতো ধম্মো, ইতরো অস্সাসদানেন সত্তানং ভযং হিংসতীতি যোজনা. কারানন্তি দানৰসেন পূজাৰসেন চ উপনীতানং সক্কারানং. ৰিপুলফলপটিলাভকরণেন সত্তানং ভযং হিংসতি অনুত্তরদক্খিণেয্যভাৰতোতি অধিপ্পাযো. ইমিনাপি পরিযাযেনাতি ইমিনাপি ৰিভজিত্ৰা ৰুত্তেন কারণেন.

‘‘সম্মাসম্বুদ্ধো ভগৰা, স্ৰাক্খাতো ধম্মো, সুপ্পটিপন্নো সঙ্ঘো’’তি এৰং পৰত্তো তত্থ রতনত্তযে পসাদো তপ্পসাদো, তদেৰ রতনত্তযং গরু এতস্সাতি তগ্গরু, তস্স ভাৰো তগ্গরুতা, তপ্পসাদো চ তগ্গরুতা চ তপ্পসাদতগ্গরুতা, তাহি. ৰিধুতদিট্ঠিৰিচিকিচ্ছাসম্মোহঅস্সদ্ধিযাদিতায ৰিহতকিলেসো. ‘‘তদেৰ রতনত্তযং পরাযণং গতি ¶ তাণং লেণ’’ন্তি এৰং আকারেন পৰত্তিযা তপ্পরাযণতাকারপৰত্তো চিত্তুপ্পাদো সরণগমনং ‘‘সরণন্তি গচ্ছতি এতেনা’’তি. তংসমঙ্গীতি তেন যথাৰুত্তচিত্তুপ্পাদেন সমন্নাগতো. এৰং উপেতীতি এৰং ভজতি সেৰতি পযিরুপাসতি, এৰং ৰা জানাতি বুজ্ঝতীতি এৰমত্থো ৰেদিতব্বো. এত্থ চ পসাদগ্গহণেন লোকিযসরণগমনমাহ. তঞ্হি পসাদপ্পধানং, ন ঞাণপ্পধানং. গরুতাগহণেন লোকুত্তরং. অরিযা হি রতনত্তযং গুণাভিঞ্ঞাতায পাসাণচ্ছত্তং ৰিয গরুং কত্ৰা পস্সন্তি, তস্মা তপ্পসাদেন ৰিক্খম্ভনৰসেন ৰিহতকিলেসো তগ্গরুতায সমুচ্ছেদৰসেনাতি যোজেতব্বং. তপ্পরাযণতা পনেত্থ তগ্গতিকতাতি তায চতুব্বিধম্পি ৰক্খমানং সরণগমনং গহিতন্তি দট্ঠব্বং. অৰিসেসেন ৰা পসাদগরুতা জোতিতাতি পসাদগ্গহণেন অৰেচ্চপ্পসাদস্স ইতরস্স চ গহণং, তথা গরুতাগহণেনাতি উভযেনপি উভযং সরণগমনং যোজেতব্বং.

মগ্গক্খণে ইজ্ঝতীতি যোজনা. নিব্বানারম্মণং হুত্ৰাতি এতেন অত্থতো চতুসচ্চাধিগমোযেৰ লোকুত্তরং সরণগমনন্তি দস্সেতি. তত্থ হি নিব্বানধম্মো সচ্ছিকিরিযাভিসমযৰসেন, মগ্গধম্মো ভাৰনাভিসমযৰসেন পটিৰিজ্ঝিযমানোযেৰ সরণগমনত্তং সাধেতি, বুদ্ধগুণা পন সাৰকগোচরভূতা পরিঞ্ঞাভিসমযৰসেন, তথা অরিযসঙ্ঘগুণা. তেনাহ ‘‘কিচ্চতো সকলেপি রতনত্তযে ইজ্ঝতী’’তি, ইজ্ঝন্তঞ্চ সহেৰ ইজ্ঝতি, ন লোকিযং ৰিয পটিপাটিযা অসম্মোহপটিৰেধেন পটিৰিদ্ধত্তাতি অধিপ্পাযো. যে পন ৰদন্তি ‘‘ন সরণগমনং নিব্বানারম্মণং হুত্ৰা পৰত্ততি, মগ্গস্স অধিগতত্তা পন অধিগতমেৰ হোতি একচ্চানং তেৰিজ্জাদীনং লোকিযৰিজ্জাদযো ৰিযা’’তি, তেসং লোকিযমেৰ সরণগমনং সিযা, ন লোকুত্তরং, তঞ্চ অযুত্তং দুৰিধস্সপি ইচ্ছিতব্বত্তা. তন্তি লোকিযসরণগমনং. সদ্ধাপটিলাভো ‘‘সম্মাসম্বুদ্ধো ভগৰা’’তিআদিনা. সদ্ধামূলিকাতি যথাৰুত্তসদ্ধাপুব্বঙ্গমা সম্মাদিট্ঠি বুদ্ধসুবুদ্ধতং ধম্মসুধম্মতং সঙ্ঘসুপ্পটিপতিঞ্চ লোকিযাৰবোধৰসেনেৰ ¶ সম্মা ঞাযেন দস্সনতো. ‘‘সদ্ধামূলিকা সম্মাদিট্ঠী’’তি এতেন সদ্ধূপনিস্সযা যথাৰুত্তলক্খণা পঞ্ঞা লোকিযসরণগমনন্তি দস্সেতি. তেনাহ ‘‘দিট্ঠিজুকম্মন্তি ৰুচ্চতী’’তি ‘‘দিট্ঠি এৰ অত্তনো পচ্চযেহি উজুং করীযতী’’তি কত্ৰা. দিট্ঠি ৰা উজুং করীযতি এতেনাতি দিট্ঠিজুকম্মং, তথা পৰত্তো চিত্তুপ্পাদো ¶ . এৰঞ্চ কত্ৰা ‘‘তপ্পরাযণতাকারপৰত্তো চিত্তুপ্পাদো’’তি ইদঞ্চ ৰচনং সমত্থিতং হোতি. সদ্ধাপুব্বঙ্গমসম্মাদিট্ঠিগ্গহণং পন চিত্তুপ্পাদস্স তপ্পধানতাযাতি দট্ঠব্বং. ‘‘সদ্ধাপটিলাভো’’তি ইমিনা মাতাদীহি উস্সাহিতদারকাদীনং ৰিয ঞাণৰিপ্পযুত্তসরণগমনং দস্সেতি, ‘‘সম্মাদিট্ঠী’’তি ইমিনা ঞাণসম্পযুত্তসরণগমনং.

তযিদং লোকিযং সরণগমনং. অত্তা সন্নিয্যাতীযতি অপ্পীযতি পরিচ্চজীযতি এতেনাতি অত্তসন্নিয্যাতনং, যথাৰুত্তং দিট্ঠিজুকম্মং. তং রতনত্তযং পরাযণং পটিসরণং এতস্সাতি তপ্পরাযণো, পুগ্গলো, চিত্তুপ্পাদো ৰা, তস্স ভাৰো তপ্পরাযণতা, যথাৰুত্তদিট্ঠিজুকম্মমেৰ. সরণন্তি অধিপ্পাযেন সিস্সভাৰং অন্তেৰাসিকভাৰং উপগচ্ছতি এতেনাতি সিস্সভাৰূপগমনং. সরণগমনাধিপ্পাযেনেৰ পণিপততি এতেনাতি পণিপাতো. সব্বত্থ যথাৰুত্তদিট্ঠিজুকম্মৰসেনেৰ অত্থো ৰেদিতব্বো. অত্তপরিচ্চজনন্তি সংসারদুক্খনিত্থরণত্থং অত্তনো অত্তভাৰস্স পরিচ্চজনং. এস নযো সেসেসুপি. বুদ্ধাদীনংযেৰাতি অৰধারণং ইতরেসুপি সরণগমনৰিসেসেসু যথারহং ৰত্তব্বং. এৰঞ্হি তদঞ্ঞনিৰত্তনং কতং হোতি.

এৰং অত্তসন্নিযাতনাদীনি একেন পকারেন দস্সেত্ৰা ইদানি অপরেহিপি পকারেহি দস্সেতুং ‘‘অপিচা’’তিআদি আরদ্ধং. তেন পরিযাযন্তরেহিপি অত্তসন্নিয্যাতনাদি কতমেৰ হোতি অত্থস্স অভিন্নত্তাতি দস্সেতি. আল়ৰকাদীনন্তি আদি-সদ্দেন সাতাগিরিহেমৰতাদীনং সঙ্গহো দট্ঠব্বো. ননু চেতে আল়ৰকাদযো মগ্গেনেৰ আগতসরণগমনা, কথং তেসং তপ্পরাযণতাসরণগমনং ৰুত্তন্তি? মগ্গেনাগতসরণগমনেহিপি ‘‘সো অহং ৰিচরিস্সামি গামা গাম’’ন্তিআদিনা (সং. নি. ১.২৪৬) তেহি তপ্পরাযণতাকারস্স পৰেদিতত্তা তথা ৰুত্তং.

ঞাতি…পে… ৰসেনাতি এত্থ ঞাতিৰসেন ভযৰসেন আচরিযৰসেন দক্খিণেয্যৰসেনাতি পচ্চেকং ‘‘ৰসেনা’’তি পদং যোজেতব্বং. তত্থ ঞাতিৰসেনাতি ঞাতিভাৰৰসেন. এৰং সেসেসুপি. দক্খিণেয্যপণিপাতেনাতি দক্খিণেয্যতাহেতুকেন পণিপাতেন. ইতরেহীতি ঞাতিভাৰাদিৰসপ্পৰত্তেহি তীহি পণিপাতেহি. ইতরেহীতিআদিনা সঙ্খেপতো ¶ ৰুত্তমত্থং ৰিত্থারতো দস্সেতুং ‘‘তস্মা’’তিআদি ৰুত্তং. ৰন্দতীতি পণিপাতস্স লক্খণৰচনং. এৰরূপন্তি দিট্ঠধম্মিকং ¶ সন্ধায ৰদতি. সম্পরাযিকঞ্হি নিয্যানিকং ৰা অনুসাসনং পচ্চাসীসন্তো দক্খিণেয্যপণিপাতমেৰ করোতীতি অধিপ্পাযো. সরণগমনপ্পভেদোতি সরণগমনৰিভাগো.

অরিযমগ্গোযেৰ লোকুত্তরসরণগমনন্তি আহ ‘‘চত্তারি সামঞ্ঞফলানি ৰিপাকফল’’ন্তি. সব্বদুক্খক্খযোতি সকলস্স ৰট্টদুক্খস্স অনুপ্পাদনিরোধো. এতন্তি ‘‘চত্তারি অরিযসচ্চানি, সম্মপ্পঞ্ঞায পস্সতী’’তি (ধ. প. ১৯০) এৰং ৰুত্তং অরিযসচ্চদস্সনং.

নিচ্চতো অনুপগমনাদিৰসেনাতি নিচ্চন্তি অগ্গহণাদিৰসেন. অট্ঠানন্তি হেতুপটিক্খেপো. অনৰকাসোতি পচ্চযপটিক্খেপো. উভযেনপি কারণমেৰ পটিক্খিপতি. যন্তি যেন কারণেন. দিট্ঠিসম্পন্নোতি মগ্গদিট্ঠিযা সম্পন্নো সোতাপন্নো. কঞ্চি সঙ্খারন্তি চতুভূমকেসু সঙ্খতসঙ্খারেসু একসঙ্খারম্পি. নিচ্চতো উপগচ্ছেয্যাতি ‘‘নিচ্চো’’তি গণ্হেয্য. সুখতো উপগচ্ছেয্যাতি ‘‘একন্তসুখী অত্তা হোতি অরোগো পরং মরণা’’তি (দী. নি. ১.৭৬) এৰং অত্তদিট্ঠিৰসেন সুখতো গাহং সন্ধাযেতং ৰুত্তং. দিট্ঠিৰিপ্পযুত্তচিত্তেন পন অরিযসাৰকো পরিল়াহৰূপসমনত্থং মত্তহত্থিপরিত্তাসিতো ৰিয চোক্খব্রাহ্মণো উক্কারভূমিং কঞ্চি সঙ্খারং সুখতো উপগচ্ছতি. অত্তৰারে কসিণাদিপঞ্ঞত্তিসঙ্গহণত্থং ‘‘সঙ্খার’’ন্তি অৰত্ৰা ‘‘কঞ্চি ধম্ম’’ন্তি ৰুত্তং. ইমেসুপি ৰারেসু চতুভূমকৰসেনেৰ পরিচ্ছেদো ৰেদিতব্বো তেভূমকৰসেনেৰ ৰা. যং যঞ্হি পুথুজ্জনো গাহৰসেন গণ্হাতি, ততো ততো অরিযসাৰকো গাহং ৰিনিৰেঠেতি. মাতরন্তিআদীসু জনিকা মাতা, জনকো পিতা, মনুস্সভূতো খীণাসৰো অরহাতি অধিপ্পেতো. কিং পন অরিযসাৰকো অঞ্ঞং জীৰিতা ৰোরোপেয্যাতি? এতম্পি অট্ঠানং, পুথুজ্জনভাৰস্স পন মহাসাৰজ্জভাৰদস্সনত্থং অরিযসাৰকস্স ফলদীপনত্থঞ্চেৰং ৰুত্তং. দুট্ঠচিত্তো ৰধকচিত্তেন পদুট্ঠচিত্তো. লোহিতং উপ্পাদেয্যাতি জীৰমানকসরীরে খুদ্দকমক্খিকায পিৰনমত্তম্পি লোহিতং উপ্পাদেয্য. সঙ্ঘং ভিন্দেয্যাতি সমানসংৰাসকং সমানসীমাযং ঠিতং সঙ্ঘং ‘কম্মেন উদ্দেসেন ৰোহরন্তো অনুস্সাৰনেন সলাকগ্গাহেনা’’তি (পরি. ৪৫৮) এৰং ৰুত্তেহি পঞ্চহি কারণেহি ভিন্দেয্য ¶ . অঞ্ঞং সত্থারন্তি অঞ্ঞং তিত্থকরং ‘‘অযং মে সত্থা’’তি এৰং গণ্হেয্যাতি নেতং ঠানং ৰিজ্জতীতি অত্থো.

ন তে গমিস্সন্তি অপাযভূমিন্তি তে বুদ্ধং সরণং গতা তন্নিমিত্তং অপাযভূমিং ন গমিস্সন্তি, দেৰকাযং পন পরিপূরেস্সন্তীতি অত্থো.

দসহি ¶ ঠানেহীতি দসহি কারণেহি. অধিগ্গণ্হন্তীতি অধিভৰন্তি. ৰেলামসুত্তাদিৰসেনাপীতি এত্থ ‘‘চতুরাসীতিসহস্সসঙ্খানং সুৰণ্ণপাতিরূপিযপাতিকংসপাতীনং যথাক্কমং রূপিযসুৰণ্ণহিরঞ্ঞপূরানং করীসস্স চতুত্থভাৰপ্পমাণানং সব্বালঙ্কারপটিমণ্ডিতানং চতুরাসীতিযা হত্থিসহস্সানং চতুরাসীতিযা অস্সসহস্সানং চতুরাসীতিযা রথসহস্সানং চতুরাসীতিযা ধেনুসহস্সানং চতুরাসীতিযা কঞ্ঞাসহস্সানং চতুরাসীতিযা পল্লঙ্কসহস্সানং চতুরাসীতিযা ৰত্থকোটিসহস্সানং অপরিমাণস্স চ খজ্জভোজ্জাদিভেদস্স আহারস্স পরিচ্চজনৰসেন সত্তমাসাধিকানি সত্ত সংৰচ্ছরানি নিরন্তরং পৰত্তৰেলামমহাদানতো একস্স সোতাপন্নস্স দিন্নদানং মহপ্ফলতরং, ততো সতং সোতাপন্নানং দিন্নদানতো একস্স সকদাগামিস্স, ততো একস্স অনাগামিস্স, ততো একস্স অরহতো, ততো একস্স পচ্চেকবুদ্ধস্স, ততো সম্মাসম্বুদ্ধস্স, ততো বুদ্ধপ্পমুখস্স সঙ্ঘস্স দিন্নদানং মহপ্ফলতরং, ততো চাতুদ্দিসং সঙ্ঘং উদ্দিস্স ৰিহারকরণং, ততো সরণগমনং মহপ্ফলতর’’ন্তি ইমমত্থং দীপেন্তস্স ৰেলামসুত্তস্স (অ. নি. ৯.২০) ৰসেন. ৰুত্তঞ্হেতং ‘‘যং গহপতি, ৰেলামো ব্রাহ্মণো দানং অদাসি মহাদানং, যো একং দিট্ঠিসম্পন্নং ভোজেয্য, ইদং ততো মহপ্ফলতর’’ন্তিআদি (অ. নি. ৯.২০). ৰেলামসুত্তাদীতি আদি-সদ্দেন অগ্গপ্পসাদসুত্তাদীনং (অ. নি. ৪.৩৪; ইতিৰু. ৯০) সঙ্গহো দট্ঠব্বো.

অঞ্ঞাণং ৰত্থুত্তযস্স গুণানং অজাননং তত্থ সম্মোহো, ‘‘বুদ্ধো নু খো, ন নু খো বুদ্ধো’’তিআদিনা ৰিচিকিচ্ছা সংসযো, মিচ্ছাঞাণং তস্স গুণানং অগুণভাৰপরিকপ্পনেন ৰিপরীতগ্গাহো. আদি-সদ্দেন অনাদরাগারৰাদীনং সঙ্গহো. ন মহাজুতিকন্তি ন উজ্জলং, অপরিসুদ্ধং অপরিযোদাতন্তি অত্থো. ন মহাৰিপ্ফারন্তি অনুল়ারং. সাৰজ্জোতি দিট্ঠিতণ্হাদিৰসেন সদোসো. লোকিযং সরণগমনং সিক্খাসমাদানং ৰিয ¶ অগ্গহিতকালপরিচ্ছেদং জীৰিতপরিযন্তমেৰ হোতি, তস্মা তস্স খন্ধভেদেন ভেদোতি আহ ‘‘অনৰজ্জো কালকিরিযাযা’’তি. সোতি অনৰজ্জো সরণগমনভেদো. সতিপি অনৰজ্জত্তে ইট্ঠফলোপি ন হোতীতি আহ ‘‘অফলো’’তি.

সরণগমনকথাৰণ্ণনা নিট্ঠিতা.

উপাসকৰিধিকথাৰণ্ণনা

কো ¶ উপাসকোতি সরূপপুচ্ছা, তস্মা কিংলক্খণো উপাসকোতি ৰুত্তং হোতি. কস্মাতি হেতুপুচ্ছা. তেন কেন পৰত্তিনিমিত্তেন উপাসকসদ্দো তস্মিং পুগ্গলে নিরুল়্হোতি দস্সেতি. কিমস্স সীলন্তি কীদিসং অস্স উপাসকস্স সীলং, কিত্তকেন সীলেনাযং সীলসম্পন্নো নাম হোতীতি অত্থো. কো আজীৰোতি কো অস্স সম্মাআজীৰো, সো পন মিচ্ছাজীৰস্স পরিৰজ্জনেন হোতীতি সোপি ৰিভজীযতীতি. কা ৰিপত্তীতি কা অস্স সীলস্স, আজীৰস্স ৰা ৰিপত্তি. অনন্তরস্স হি ৰিধি ৰা পটিসেধো ৰা. কা সম্পত্তীতি এত্থাপি এসেৰ নযো.

যো কোচীতি খত্তিযাদীসু যো কোচি. তেন সরণগমনমেৰেত্থ কারণং, ন জাতিআদিৰিসেসোতি দস্সেতি. উপাসনতোতি তেনেৰ সরণগমনেন তত্থ চ সক্কচ্চকারিতায আদরগারৰবহুমানাদিযোগেন পযিরুপাসনতো. ৰেরমণিযোতি ৰেরং ৰুচ্চতি পাণাতিপাতাদিদুস্সীল্যং, তস্স মণনতো হননতো ৰিনাসনতো ৰেরমণিযো, পঞ্চ ৰিরতিযো ৰিরতিপ্পধানত্তা তস্স সীলস্স. তেনেৰাহ তত্থ তত্থ ‘‘পটিৰিরতো হোতী’’তি.

মিচ্ছাৰণিজ্জাতি ন সম্মাৰণিজ্জা অযুত্তৰণিজ্জা অসারুপ্পৰণিজ্জা. পহাযাতি অকরণেনেৰ পজহিত্ৰা. ধম্মেনাতি ধম্মতো অনপেতেন. তেন অঞ্ঞম্পি অধম্মিকং জীৰিকং পটিক্খিপতি. সমেনাতি অৰিসমেন. তেন কাযৰিসমাদিদুচ্চরিতং ৰজ্জেত্ৰা কাযসমাদিনা সুচরিতেন জীৰনং দস্সেতি. সত্থৰণিজ্জাতি আৰুধভণ্ডং কত্ৰা ৰা কারেত্ৰা ৰা যথাকতং ৰা পটিলভিত্ৰা তস্স ৰিক্কযো. সত্থৰণিজ্জাতি মনুস্সৰিক্কযো ¶ . মংসৰণিজ্জাতি সূনকারাদযো ৰিয মিগসূকরাদিকে পোসেত্ৰা মংসং সম্পাদেত্ৰা ৰিক্কযো. মজ্জৰণিজ্জাতি যং কিঞ্চি মজ্জং যোজেত্ৰা তস্স ৰিক্কযো. ৰিসৰণিজ্জাতি ৰিসং যোজেত্ৰা, ৰিসং গহেত্ৰা ৰা তস্স ৰিক্কযো. তত্থ সত্থৰণিজ্জা পরোপরোধনিমিত্ততায অকরণীযা ৰুত্তা, সত্তৰণিজ্জা অভুজিস্সভাৰকরণতো, মংসৰিসৰণিজ্জা ৰধহেতুতো, মজ্জৰণিজ্জা পমাদট্ঠানতো.

তস্সেৰাতি পঞ্চৰেরমণিলক্খণস্স সীলস্স চেৰ পঞ্চমিচ্ছাৰণিজ্জালক্খণস্স আজীৰস্স চ. ৰিপত্তীতি ভেদো পকোপো চ. যাযাতি যায পটিপত্তিযা. চণ্ডালোতি উপাসকচণ্ডালো. মলন্তি উপাসকমলং. পতিকিট্ঠোতি উপাসকনিহীনো. বুদ্ধাদীসু কম্মকম্মফলেসু চ সদ্ধাৰিপরিযাযো অস্সদ্ধিযং মিচ্ছাধিমোক্খো. যথাৰুত্তেন অস্সদ্ধিযেন সমন্নাগতো অস্সদ্ধো. যথাৰুত্ত সীলৰিপত্তি আজীৰৰিপত্তিৰসেন দুস্সীলো. ‘‘ইমিনা দিট্ঠাদিনা ¶ ইদং নাম মঙ্গলং ভৰিস্সতী’’তি এৰং বালজনপরিকপ্পিতকোতূহলসঙ্খাতেন দিট্ঠসুতমুতমঙ্গলেন সমন্নাগতো কোতূহলমঙ্গলিকো. মঙ্গলং পচ্চেতীতি দিট্ঠমঙ্গলাদিভেদং মঙ্গলমেৰ পত্তিযাযতি. নো কম্মন্তি কম্মস্সকতং নো পত্তিযাযতি. ইতো বহিদ্ধাতি ইতো সব্বঞ্ঞুবুদ্ধসাসনতো বহিদ্ধা বাহিরকসমযে. দক্খিণেয্যং পরিযেসতীতি দুপ্পটিপন্নং দক্খিণারহসঞ্ঞী গৰেসতি. পুব্বকারং করোতীতি দানমাননাদিকং কুসলকিরিযং পঠমং করোতি. এত্থ চ দক্খিণেয্যপরিযেসনপুব্বকারে একং কত্ৰা পঞ্চ ধম্মা ৰেদিতব্বা.

ৰিপত্তিযং ৰুত্তৰিপরিযাযেন সম্পত্তি ঞাতব্বা. অযং পন ৰিসেসো – চতুন্নম্পি পরিসানং রতিজননট্ঠেন উপাসকোৰ রতনং উপাসকরতনং. গুণসোভাকিত্তিসদ্দসুগন্ধতাহি উপাসকোৰ পদুমং উপাসকপদুমং. তথা উপাসকপুণ্ডরীকো.

আদিম্হীতি আদিঅত্থে. কোটিযন্তি পরিযন্তকোটিযং. ৰিহারগ্গেনাতি ওৰরককোট্ঠাসেন, ‘‘ইমস্মিং গব্ভে ৰসন্তানং ইদং নাম পনসফলং পাপুণাতী’’তিআদিনা তংতংৰসনট্ঠানকোট্ঠাসেনাতি অত্থো. অজ্জতন্তি অজ্জইচ্চেৰ অত্থো.

পাণেহি ¶ উপেতন্তি ইমিনা তস্স সরণগমনস্স আপাণকোটিকতং দস্সেন্তো ‘‘যাৰ মে জীৰিতং পৰত্ততী’’তিআদিনা ৰত্ৰা পুন জীৰিতেন তং ৰত্থুত্তযং পটিপূজেন্তো ‘‘সরণগমনং রক্খামী’’তি উপ্পন্নং তস্স ব্রাহ্মণস্স অধিপ্পাযং ৰিভাৰেন্তো ‘‘অহঞ্হী’’তিআদিমাহ. পাণেহি উপেতন্তি হি যাৰ মে পাণা ধরন্তি, তাৰ সরণং উপেতং, উপেন্তো চ ন ৰাচামত্তেন, ন একৰারং চিত্তুপ্পাদনমত্তেন, অথ খো পাণে পরিচ্চজিত্ৰাপি যাৰজীৰং উপেতন্তি এৰমেত্থ অত্থো ৰেদিতব্বোতি.

উপাসকৰিধিকথাৰণ্ণনা নিট্ঠিতা.

ভযভেরৰসুত্তৰণ্ণনায লীনত্থপ্পকাসনা সমত্তা.

৫. অনঙ্গণসুত্তৰণ্ণনা

৫৭. আযস্মা ¶ সারিপুত্তোতি এত্থ ইতি-সদ্দো আদিঅত্থো, এৰমাদিকন্তি অত্থো. তেন ‘‘ভিক্খূ আমন্তেসী’’তিআদিকং সব্বং সুত্তং সঙ্গণ্হাতি. তেনাহ ‘‘অনঙ্গণসুত্ত’’ন্তি. তস্স কো নিক্খেপো? অত্তজ্ঝাসযো. পরেহি অনজ্ঝিট্ঠোযেৰ হি মহাথেরো ইমং দেসনং আরভি. কেচি পনাহু ‘‘একচ্চে ভিক্খূ সংকিলিট্ঠচিত্তে দিস্ৰা তেসং চিত্তসংকিলেসপ্পহানায চেৰ একচ্চানং আযতিং অনুপ্পাদনায চ অযং দেসনা আরদ্ধা’’তি. এৰং সব্বসুত্তেসূতি যথা এত্থ অনঙ্গণসুত্তে, এৰং ইতো পরেসূতি সব্বেসুপি সুত্তেসু অনুত্তানঅপুব্বপদৰণ্ণনা এৰ করীযতি. তেনাহ ‘‘তস্মা’’তিআদি. গণনপরিচ্ছেদোতি গণনেন পরিচ্ছিন্দনং. ইদঞ্হি অপ্পরজক্খমহারজক্খতাৰসেন দুৰিধে সত্তে পচ্চেকং অত্থঞ্ঞুতানত্থঞ্ঞুতাৰসেন দ্ৰিধা কত্ৰা ‘‘চত্তারো’’তি অনৰসেসপরিযাদানং. ৰজ্জীপুত্তকাদযো ৰিয পুগ্গলৰাদীতি ন গহেতব্বং লোকসমঞ্ঞানুসারেন অত্থং পটিৰিজ্ঝিতুং সমত্থানং ৰসেন দেসনায আরদ্ধত্তা, অযঞ্চ দেসনানযো সত্থু নিস্সায এৰাতি দস্সেন্তো ‘‘অযঞ্হী’’তিআদিমাহ.

সম্মুতিপরমত্থদেসনাকথাৰণ্ণনা

তত্থ (অ. নি. টী. ১.১.১৭০) সম্মুতিযা দেসনা সম্মুতিদেসনা, পরমত্থস্স দেসনা পরমত্থদেসনা. তত্থাতি সম্মুতিপরমত্থদেসনাসু, ন সম্মুতিপরমত্থেসু. তেনাহ ¶ ‘‘এৰরূপা সম্মুতিদেসনা, এৰরূপা পরমত্থদেসনা’’তি. তত্রিদং সম্মুতিপরমত্থানং লক্খণং – যস্মিং ভিন্নে, বুদ্ধিযা অৰযৰৰিনিব্ভোগে ৰা কতে ন তংসমঞ্ঞা, সা ঘটপটাদিপ্পভেদা সম্মুতি, তব্বিপরিযাযতো পরমত্থো. ন হি কক্খল়ফুসনাদিসভাৰে অযং নযো লব্ভতি, তত্থ রূপাদিধম্মং সমূহসন্তানৰসেন পৰত্তমানং উপাদায পুগ্গলৰোহারোতি আহ ‘‘পুগ্গলোতি সম্মুতিদেসনা’’তি. সেসপদেসুপি এসেৰ নযো. উপ্পাদৰযৰন্তো সভাৰধম্মা ন নিচ্চাতি আহ ‘‘অনিচ্চন্তি পরমত্থদেসনা’’তি. এস নযো সেসপদেসুপি. ননু খন্ধদেসনাপি সম্মুতিদেসনাৰ. খন্ধট্ঠো হি রাসট্ঠো, কোট্ঠাসট্ঠো ৰাতি? সচ্চমেতং, অযং পন খন্ধসমঞ্ঞা ফস্সাদীসু তজ্জাপঞ্ঞত্তি ৰিয পরমত্থসন্নিস্সযা তস্স আসন্নতরা, পুগ্গলসমঞ্ঞাদযো ৰিয ন দূরেতি পরমত্থসঙ্গহতা ৰুত্তা, খন্ধসীসেন ৰা তদুপাদানা সভাৰধম্মা এৰ গহিতা. ননু চ সভাৰধম্মা সব্বেপি সম্মুতিমুখেনেৰ দেসনং আরোহন্তি, ন সমুখেনাতি সব্বাপি দেসনা সম্মুতিদেসনাৰ ¶ সিযাতি? নযিদমেৰং দেসেতব্বধম্মৰিভাগেন দেসনাৰিভাগস্স অধিপ্পেতত্তা, ন চ সদ্দো কেনচি পৰত্তিনিমিত্তেন ৰিনা অত্থং পকাসেতীতি.

সম্মুতিৰসেন দেসনং সুত্ৰাতি ‘‘ইধেকচ্চো পুগ্গলো অত্তন্তপো হোতি অত্তপরিতাপানুযোগমনুযুত্তো’’তিআদিনা (ম. নি. ২.৪১৩; পু. প. ১০.২৫ মাতিকা) সম্মুতিমুখেন পৰত্তিতং দেসনং সুতমযঞাণুপ্পাদনৰসেন সুত্ৰা. অত্থং পটিৰিজ্ঝিত্ৰাতি তদনুসারেন চতুসচ্চসঙ্খাতং অত্থং সহ ৰিপস্সনায মগ্গেন পটিৰিজ্ঝিত্ৰা. মোহং পহাযাতি তদেকট্ঠেহি কিলেসেহি সদ্ধিং অনৰসেসং মোহং পজহিত্ৰা. ৰিসেসন্তি নিব্বানসঙ্খাতং অরহত্তসঙ্খাতঞ্চ ৰিসেসং. তেসন্তি তাদিসানং ৰিনেয্যানং. পরমত্থৰসেনাতি ‘‘পঞ্চিমানি, ভিক্খৰে, ইন্দ্রিযানী’’তিআদিনা (সং. নি. ৫.৪৭২-৪৭৪) পরমত্থধম্মৰসেন. সেসং অনন্তরনযে ৰুত্তসদিসমেৰ. তত্থাতি তস্সং সম্মুতিৰসেন পরমত্থৰসেন চ দেসনাযং. দেসভাসাকুসলোতি নানাদেসভাসাসু কুসলো. তিণ্ণং ৰেদানন্তি নিদস্সনমত্তং, তিণ্ণং ৰেদানং সিপ্পগন্থানম্পীতি অধিপ্পাযো সিপ্পুগ্গহণঞ্হি পরতো ৰক্খতি. সিপ্পানি ৰা ৰেদন্তোগধে কত্ৰা ‘‘তিণ্ণং ৰেদান’’ন্তি ৰুত্তং. কথেতব্বভাৰেন ঠিতানি, ন কত্থচি সন্নিহিতভাৰেনাতি ৰেদানম্পি কথেতব্বভাৰেনেৰ অৰট্ঠানং দীপেন্তো ‘‘গুয্হা তযী ¶ নিহিতা গয্হতী’’তি মিচ্ছাৰাদং পটিক্খিপতি. নানাৰিধা দেসভাসা এতেসন্তি নানাদেসভাসা.

পরমো উত্তমো অত্থো পরমত্থো, ধম্মানং যথাভূতসভাৰো. লোকসঙ্কেতমত্তসিদ্ধা সম্মুতি. যদি এৰং কথং সম্মুতিকথায সচ্চতাতিআহ ‘‘লোকসম্মুতিকারণা’’তি, লোকসমঞ্ঞং নিস্সায পৰত্তনতো. লোকসমঞ্ঞায হি অভিনিৰেসেন ৰিনা ঞাপনা একচ্চস্স সুতস্স সাৰনা ৰিয ন মুসা অনতিধাৰিতব্বতো তস্সা. তেনাহ ভগৰা ‘‘জনপদনিরুত্তিং নাভিনিৰেসেয্য, সমঞ্ঞং নাতিধাৰেয্যা’’তি (ম. নি. ৩.৩৩২). ধম্মানন্তি সভাৰধম্মানং. ভূতকারণাতি যথাভূতসভাৰং নিস্সায পৰত্তনতো. সম্মুতিং ৰোহরন্তস্সাতি ‘‘পুগ্গলো সত্তো’’তিআদিনা লোকসমঞ্ঞং কথেন্তস্স.

হিরোত্তপ্পদীপনত্থন্তি লোকপালনকিচ্চে হিরোত্তপ্পধম্মে কিচ্চতো পকাসেতুং. তেসঞ্হি কিচ্চং সত্তসন্তানেযেৰ পাকটং হোতীতি পুগ্গলাধিট্ঠানায কথায তং ৰত্তব্বং. এস নযো সেসেসুপি. যস্মিঞ্হি চিত্তুপ্পাদে কম্মং উপ্পন্নং, তংসন্তানে এৰ তস্স ফলস্স উপ্পত্তি কম্মস্সকতা. এৰঞ্হি কতৰিঞ্ঞাণনাসো অকতাগমো ৰা নত্থীতি সা পুগ্গলাধিট্ঠানায এৰ কথায ¶ দীপেতব্বা. তেহি সত্তেহি কাতব্বা পুঞ্ঞাদিকিরিযা পচ্চত্তপুরিসকারোপি সন্তানৰসেন নিপ্ফাদেতব্বতো পুগ্গলাধিট্ঠানায এৰ কথায দীপেতব্বো.

আনন্তরিযদীপনত্থন্তি চুতিঅনন্তরং ফলং অনন্তরং নাম, তস্মিং অনন্তরে নিযুত্তানি, তন্নিব্বত্তনেন অনন্তরকরণসীলানি, অনন্তরপযোজনানি ৰাতি আনন্তরিযানি, মাতুঘাতাদীনি, তেসং দীপনত্থং. তানিপি হি সন্তানৰসেন নিপ্ফাদেতব্বতো ‘‘মাতরং জীৰিতা ৰোরোপেতী’’তিআদিনা (পট্ঠা. ১.১.৪২৩) পুগ্গলাধিট্ঠানায এৰ কথায দীপেতব্বানি, তথা ‘‘সো মেত্তাসহগতেন চেতসা একং দিসং ফরিত্ৰা ৰিহরতী’’তিআদিনা (দী. নি. ১.৫৫৬; ৩.৩০৮; ম. নি. ১.৭৭; ২.৩০৯; ৩.২৩০; ৰিভ. ৬৪২, ৬৪৩) ‘‘সো অনেকৰিহিতং পুব্বেনিৰাসং অনুস্সরতি একম্পি জাতি’’ন্তিআদিনা (দী. নি. ১.২৪৪, ২৪৫; ম. নি. ১.১৪৮, ৩৮৪, ৪৩১; পারা. ১২) ‘‘অত্থি দক্খিণা দাযকতো ৰিসুজ্ঝতি, নো পটিগ্গাহকতো’’তিআদিনা (ম. নি. ৩.৩৮১) চ পৰত্তা ব্রহ্মৰিহারপুব্বেনিৰাসদক্খিণাৰিসুদ্ধিকথা ¶ পুগ্গলাধিট্ঠানায এৰ কথায দীপেতব্বা সত্তসন্তানৰিসযত্তা. ‘‘অট্ঠ পুরিসপুগ্গলা (সং. নি. ১.২৪৯), ন সমযৰিমুত্তো পুগ্গলো’’তিআদিনা (পু. প. ১) চ পরমত্থং কথেন্তোপি লোকসম্মুতিযা অপ্পহানত্থং পুগ্গলকথং কথেসি. এতেন ৰুত্তাৰসেসায কথায পুগ্গলাধিট্ঠানভাৰে পযোজনং সামঞ্ঞৰসেন সঙ্গহিতন্তি দট্ঠব্বং. কামঞ্চেতং সব্বং অপরিঞ্ঞাতৰত্থুকানং ৰসেন ৰুত্তং, পরিঞ্ঞাতৰত্থুকানম্পি পন এৰং দেসনা সুখাৰহা হোতি.

মহাজনোতি লোকিযমহাজনো. ন জানাতি ঘনৰিনিব্ভোগাভাৰেন ধম্মকিচ্চস্স অসল্লক্খণেন. তত্থ ‘‘কিং নামেতং, কথং নামেত’’ন্তি সংসযপক্খন্দতায সম্মোহং আপজ্জতি. ৰিরুদ্ধাভিনিৰেসিতায পটিসত্তু হোতি. জানাতি চিরপরিচিতত্থা ৰোহারকথায. ততো এৰ ন সম্মোহমাপজ্জতি, ন পটিসত্তু হোতি.

নপ্পজহন্তি ৰোহারমুখেন পরমত্থস্স দীপনতো. সমঞ্ঞাগহণৰসেন লোকেন ঞাযতি সমঞ্ঞাযতি ৰোহরীযতীতি লোকসমঞ্ঞা, তায লোকসমঞ্ঞায. তস্স তস্স অত্থস্স ৰিভাৰনে লোকেন নিচ্ছিতং, নিযতং ৰা ৰুচ্চতি ৰোহরীযতীতি লোকনিরুত্তি, তস্সং লোকনিরুত্তিযং. তথা লোকেন অভিলপীযতীতি লোকসমঞ্ঞতায লোকাভিলাপো, তস্মিং লোকাভিলাপে ঠিতাযেৰ অপ্পহানতো. পুগ্গলৰাদিনো ৰিয পরমত্থৰসেন অগ্গহেত্ৰা.

সন্তোতি ¶ এত্থ সন্তসদ্দো ‘‘দীঘং সন্তস্স যোজন’’ন্তিআদীসু (ধ. প. ৭০) কিলন্তভাৰে আগতো, ‘‘অযঞ্চ ৰিতক্কো অযঞ্চ ৰিচারো সন্তা হোন্তি সমিতা’’তিআদীসু (ৰিভ. ৫৭৬) নিরুদ্ধভাৰে আগতো, ‘‘অধিগতো খো ম্যাযং ধম্মো গম্ভীরো দুদ্দসো দুরনুবোধো সন্তো পণীতো’’তিআদীসু (দী. নি. ২.৬৭; ম. নি. ১.২৮১; ২.৩৩৭; সং. নি. ২.১৭২; মহাৰ. ৭) সন্তঞাণগোচরতায, ‘‘উপসন্তস্স সদা সতিমতো’’তিআদীসু (উদা. ২৭) কিলেসৰূপসমে, ‘‘সন্তো হৰে সব্ভি পৰেদযন্তী’’তিআদীসু (ধ. প. ১৫) সাধূসু, ‘‘পঞ্চিমে, ভিক্খৰে, মহাচোরা সন্তো সংৰিজ্জমানা’’তিআদীসু (পারা. ১৯৫) অত্থিভাৰে, ইধাপি অত্থিভাৰেযেৰ. সো চ পুগ্গলসম্বন্ধেন ৰুত্তত্তা লোকসমঞ্ঞাৰসেনাতি ¶ দস্সেন্তো ‘‘লোকসঙ্কেতৰসেন অত্থী’’তি আহ. অত্থীতি চেতং নিপাতপদং দট্ঠব্বং ‘‘অত্থি ইমস্মিং কাযে কেসা’’তিআদীসু (দী. নি. ২.৩৭৩-৩৭৪; ম. নি. ১.১১০; ৩.১৫৪; অ. নি. ৬.২৯; ১০.৬০) ৰিয. সংৰিজ্জমানাতি পদস্স অত্থং দস্সেন্তো ‘‘উপলব্ভমানা’’তি আহ. যঞ্হি সংৰিজ্জতি, তং উপলব্ভতীতি. অঙ্গন্তি এতেহি তংসমঙ্গিপুগ্গলা নিহীনভাৰং গচ্ছন্তীতি অঙ্গণানি, রাগাদযো. অঞ্জতি মক্খেতীতি অঙ্গণং, মলাদি. অঞ্জেতি তত্থ ঠিতং অহুন্দরতায অভিব্যঞ্জেতীতি অঙ্গণং, ৰিৰটো ভূমিপদেসো. দোসাদীনং পৰত্তিআকারৰিসেসতায নানপ্পকারা বহুলপ্পৰত্তিযা তিব্বকিলেসা. পাপকানন্তি লামকানং. অকুসলানন্তি অকোসল্লসম্ভূতানং. ইচ্ছাৰচরানন্তি ইচ্ছাৰসেন পৰত্তানং. সহ অঙ্গণেনাতি অঙ্গণন্তি লদ্ধনামেন যথাৰুত্তকিলেসেন সহ ৰত্ততি.

অত্থীতিপি ন জানাতি তাদিসস্স যোনিসোমনসিকারস্স অভাৰা. যেসং কিলেসানং অত্থিতা, তেসং সপ্পটিভযতা ৰিসেসতো জানিতব্বাতি দস্সেতুং ‘‘ইমে কিলেসা নামা’’তিআদি ৰুত্তং. তত্থ কক্খল়াতি ফরুসা. ৰাল়াতি কুরুরা. ন গহিতব্বাতি ন উপ্পাদেতব্বা. যাথাৰসরসতোতি যথাভূতসভাৰতো. এৰঞ্চাতি ‘‘ইমে কিলেসা নামা’’তিআদিনা ৰুত্তপ্পকারেন. যেন ৰা তেন ৰাতি নৰকম্মেসু ৰা পরিযত্তিধুতঙ্গাদীসু ৰা যেন ৰা তেন ৰা. তত্রাতি নিদ্ধারণে ভুম্মং. তং পন নিদ্ধারণং সঙ্গণানঙ্গণসমুদাযতোতি দস্সেন্তো ‘‘চতূসু পুগ্গলেসূ’’তি ৰত্ৰা পুন তদেকদেসতো দস্সেন্তো ‘‘তেসু ৰা দ্ৰীসু সাঙ্গণেসূ’’তি আহ. তঞ্হি দ্ৰযং পঠমং হীনসেট্ঠভাৰেন নিদ্ধারীযতি পঠমং উদ্দিট্ঠত্তা. নিদ্ধারণঞ্হি ক্ৰচি কুতোচি কেনচি হোতীতি.

৫৮. কিঞ্চাপি অঞ্ঞত্থ ‘‘জনকো হেতু, পরিগ্গাহতো পচ্চযো, অসাধারণো হেতু, সাধারণো পচ্চযো, সভাগো হেতু, অসভাগো পচ্চযো, পুব্বকালিকো হেতু, সহপ্পৰত্তো পচ্চযো’’তিআদিনা ¶ হেতুপচ্চযা ৰিভজ্জ ৰুচ্চন্তি, ইধ পন ‘‘চত্তারো খো, ভিক্খৰে, মহাভূতা হেতূ, চত্তারো মহাভূতা পচ্চযা রূপক্খন্ধস্স পঞ্ঞাপনাযা’’তিআদীসু (ম. নি. ৩.৮৫) ৰিয হেতুপচ্চযসদ্দা সমানত্থাতি দস্সেতুং ‘‘উভযেনপি কারণমেৰ ¶ পুচ্ছতী’’তি ৰুত্তং. তত্থ উভযেনাতি হেতুপচ্চযৰচনদ্ৰযেন. পুচ্ছতি আযস্মা মহামোগ্গল্লানো দেসনং ৰড্ঢেতুকামো. কিঞ্চাপীতি অনুজাননসম্ভাৰনত্থে নিপাতো. কিং অনুজানাতি? সমানেপি দ্ৰিন্নং সাঙ্গণভাৰে তস্সা পজাননাপ্পজাননহেতুকতং তেসং সেট্ঠহীনতং. কিং সম্ভাৰেতি? থেরস্স ৰিচিত্তপটিভানতায নানাহেতূপমাহি অলঙ্কত্ৰা যথাপুচ্ছিতস্স অত্থস্স পাকটকরণং. তেনাহ ‘‘নপ্পজানাতী’’তিআদি. হেতু চেৰ পচ্চযো চ সেট্ঠহীনভাৰে. তথাঅক্খাতব্বতাপি হি তেসং তন্নিমিত্তা এৰাতি.

৫৯. তন্তি তেসং দ্ৰিন্নং পুগ্গলানং হীনসেট্ঠতায কারণং. ওপম্মেহি পাকটতরং কত্ৰা দস্সেতুং. এতন্তি সুত্তে অনন্তরং ৰুচ্চমানং ৰীরিযারম্ভাভাৰেন অঙ্গণস্স অপ্পহানং. তেনাহ ‘‘ন ছন্দং…পে… সন্ধাযাহা’’তি. কত্তুকম্যতাছন্ধন্তি কত্তুকম্যতাসঙ্খাতং অঙ্গণস্স পহাতুকম্যতাৰসেন উপ্পজ্জনককুসলধম্মচ্ছন্দং. ন জনেস্সতীতি ন উপ্পাদেস্সতি. কুসলো ৰাযামো নাম ছন্দতো বলৰাতি আহ ‘‘ততো বলৰতরং ৰাযামং ন করিস্সতী’’তি, ছন্দম্পি অনুপ্পাদেন্তো কথং তজ্জং ৰাযামং করিস্সতীতি অধিপ্পাযো. থামগতৰীরিযং উস্সোল়্হীভাৰপ্পত্তং দল়্হং ৰীরিযং. সাঙ্গণগ্গহণেনেৰ অঙ্গণানং কিলেসৰত্থুতায চিত্তস্স সংকিলিট্ঠতায সদ্ধায পুন সংকিলিট্ঠগ্গহণং সৰিসেসং কিলিট্ঠভাৰৰিভাৰনন্তি আহ ‘‘সুট্ঠুতরং কিলিট্ঠচিত্তো’’তি. মলিনচিত্তোতিআদীসুপি ‘‘তেহিযেৰা’’তি আনেত্ৰা সম্বন্ধিতব্বং. উক্খলিপুচ্ছনচোল়কস্স ৰিয ৰসাপীতপিলোতিকা ৰিয চ দুম্মোচনীযভাৰেন মলগ্গহণং মলীনতা, পীল়নং হিংসনং অৰিপ্ফারিকতাকরণং ৰিবাধনং দরথপরিল়াহুপ্পাদনেন পরিদহনং উপতাপনং, কালন্তি কালনং, যথাগহিতস্স অত্তভাৰস্স খেপনং আযুক্খযন্তি অত্থো. করিস্সতীতি পৰত্তেস্সতি, পাপুণিস্সতীতি ৰুত্তং হোতি. তথাভূতো চ পাণং চজিস্সতি নামাতি আহ ‘‘মরিস্সতী’’তি.

সেয্যথাপীতি উপমানিদস্সনে নিপাতো. তদত্থং দস্সেন্তো ‘‘যথা নামা’’তি আহ. পংসুআদিনাতি আদি-সদ্দেন জল্লাদীনং সঙ্গহো, ঘংসনাদীহীতি আদি-সদ্দেন ছারিকাপরিমজ্জনাদীনং সঙ্গহোতি. ‘‘অভিরূপায কঞ্ঞা দাতব্বা’’তিআদীসু ৰিয অন্তরেনপি অতিসযত্থবোধকসদ্দেন অতিসযত্থো ঞাযতীতি আহ ‘‘মলগ্গহিততরাতি ৰুত্তং হোতী’’তি. পটিপুচ্ছাৰচনন্তি অনুমতিপুচ্ছাৰিসেসো. এৰং ¶ করিযমানাতি অপরিভোগ-অপরিযোদপনরজোপথনিক্খিপনেহি কিলিট্ঠভাৰং আপাদিযমানা. ওপম্মং সম্পটিপাদেন্তোতি যথূপনীতং উপমং উপমেয্যত্থেন ¶ সমং কত্ৰা পটিপাদেন্তো, সংসন্দেন্তোতি অত্থো. সাঙ্গণো পুগ্গলোতি সাঙ্গণো তস্মিং অত্তভাৰে অসুজ্ঝনকপুগ্গলো. আপণাদিতো কুলঘরং আনীতস্স মলগ্গহিতকংসভাজনস্স তত্থ লদ্ধব্বায ৰিসুদ্ধিযা অলাভতো যথা অনুক্কমেন সংকিলিট্ঠতরভাৰো, এৰং ঘরতো নিক্খন্তস্স পুগ্গলস্স পব্বজ্জায লদ্ধব্বায ৰিসুদ্ধিযা অলাভতো অনুক্কমেন সংকিলিট্ঠতরভাৰোতি দস্সেন্তো ‘‘সংকিলিট্ঠকংসপাতিযা’’তিআদিমাহ. সংকিলিট্ঠতরভাৰো চ নাম পব্বজিতস্স আজীৰৰিপত্তিৰসেন ৰা সিযা আচারদিট্ঠিসীলৰিপত্তীসু অঞ্ঞতরৰসেন ৰাতি তং সব্বং সঙ্গহেত্ৰা দস্সেতুং ‘‘তস্স পুগ্গলস্সা’’তিআদি ৰুত্তং. পাচিত্তিযৰীতিক্কমনগ্গহণেন হি একচ্চদিট্ঠিৰিপত্তিযাপি সঙ্গহো হোতীতি. এত্থ ঠিতস্সাতি এতিস্সং আজীৰৰিপত্তিযং ঠিতস্স. ইমিনা নযেন সেসেসুপি যথারহং ৰত্তব্বং. সব্বপরিসসাধারণা মহাথেরস্স দেসনা, তস্মা গহপতিৰসেনপি যোজেতব্বং. তত্থ উক্কংসগতসংকিলিট্ঠতরভাৰং দস্সেন্তো ‘‘মাতুঘাতাদিআনন্তরিযকরণ’’ন্তি আহ. অৰিসোধেত্ৰাতি যথা অত্তনো সীলে ৰা দিট্ঠিযা ৰা ৰিসুদ্ধি হোতি, এৰং কিলেসমলিনচিত্তসন্তানং অৰিসোধেত্ৰা.

ভব্বপুগ্গলোতি উপনিস্সযাদিসম্পত্তিযা তস্মিং অত্তভাৰে ৰিসুদ্ধপুগ্গলো. আদিং কত্ৰাতি ইমিনা ধোৰনঘংসনাদীহি পরিযোদপনং আদিমন্তং কত্ৰা ৰদতি. সুদ্ধট্ঠানং যত্থ ৰা ন রজেন ওকিরীযতি. দণ্ডকম্মং কত্ৰাতি ‘‘এত্তকা উদকা, ৰালুকা ৰা আনেতব্বা’’তি দণ্ডকম্মং কত্ৰা. এত্থ ঠিতস্সাতি পরিসুদ্ধে সীলে ঠিতস্স. সম্মাৰত্তপটিপত্তিসীলেহি সীলৰিসুদ্ধি দস্সিতা. ৰত্তপটিপত্তিযাপি হি অঙ্গণানং ৰিক্খম্ভনং সিযা. তথা হিস্সা সংকিলিট্ঠকংসপাতিযা পরিসুদ্ধপরিযোদাতভাৰো উপমাভাৰেন ৰুত্তো. পন্তসেনাসনৰাসো কিলেসৰিক্খম্ভনং কিলেসানং তদঙ্গনিৰারণং. সোতাপত্তিফলাধিগমো…পে… অরহত্তসচ্ছিকিরিযাতি সত্তসুপি ঠানেসু ‘‘পরিসুদ্ধপরিযোদাতভাৰো ৰিযা’’তি পদং আনেত্ৰা সম্বন্ধিতব্বং. পব্বজিতস্স হি ৰিসুদ্ধি নাম হেট্ঠিমন্তেন সীলৰিসুদ্ধিযা ৰা সিযা কম্মট্ঠানানুযোগৰসেন ৰিৰেকৰাসেন ঝানস্সাধিগমেন ৰা ৰিপস্সনাভাৰনায ৰা সামঞ্ঞফলাধিগমেন ৰাতি.

রাগট্ঠানিযন্তি ¶ রাগুপ্পত্তিহেতুভূতং. ৰিসভাগারম্মণং সন্ধায ৰদতি ‘‘ইট্ঠারম্মণ’’ন্তি. তস্মিন্তি ইট্ঠারম্মণে. ৰিপন্নস্সতীতি মুট্ঠস্সতি. তং নিমিত্তন্তি সুভনিমিত্তং. আৰজ্জিস্সতীতি অযোনিসো আৰজ্জিস্সতি. সযমেৰ অঞ্ঞেন অৰোমিস্সো. কুসলৰারপচ্ছিন্দনমেৰ চেত্থ অনুদ্ধংসনং দট্ঠব্বং. সেসন্তি ‘‘সাঙ্গণো সংকিলিট্ঠচিত্তো’’তিআদি. ৰুত্তনযানুসারেনাতি পঠমৰারে ৰুত্তনযানুসারেন. সব্বন্তি মাতুঘাতাদিআনন্তরিযকরণপরিযোসানং সব্বং উপমাসংসন্দনৰচনং.

অতিৰিরহাভাৰতোতি ¶ সতিসম্মোসাভাৰতো, উপট্ঠিতস্সতি ভাৰতোতি অত্থো. সেসন্তি ‘‘সো অরাগো’’তিআদি. ‘‘ধোৰনঘংসনসণ্হছারিকাপরিমজ্জনাদীহী’’তিআদিনা দুতিযৰারানুসারেন. ‘‘কো নু খো’’তিআদি পুচ্ছাৰসেন আগতং, ইদং নিগমনৰসেনাতি অযমেৰ ৰিসেসো.

৬০. অঙ্গণন্তি তত্থ তত্থ নামতো এৰ ৰিভাৰিতং, ন পন সভাৰতো, পভেদতো ৰাতি সভাৰাদিতো ৰিভাৰনং সন্ধাযাহ ‘‘নানপ্পকারতো পাকটং কারাপেতুকামেনা’’তি. ইচ্ছায অৰচরানন্তি ইচ্ছাৰসেন অৰচরণানং. ওতিণ্ণানন্তি চিত্তসন্তানং অনুপৰিট্ঠানং. তে পন তত্থ পচ্চযৰসেন নিব্বত্তত্তা পৰত্তা নাম হোন্তীতি আহ ‘‘পৰত্তান’’ন্তি. নানপ্পকারানন্তি ৰিসযভেদেন পৰত্তিআকারভেদেন চ নানাৰিধানং. যেনকারণেন. ন কেৰলং লাভত্থিকতা এৰ, অথ খো পুঞ্ঞৰন্ততা সক্কতগরুকতা চ এত্থ কারণভাৰেন গহেতব্বাতি দস্সেন্তো ‘‘পকতিযাপি চা’’তিআদিমাহ. তেন লাভত্থিকোপি ন যো কোচি এৰং চিত্তং উপ্পাদেতি পুঞ্ঞৰা সম্ভাৰনীযোতি দস্সেতি. থেরা অৰজ্জপটিচ্ছাদনভযেন মজ্ঝিমানং আরোচেন্তি, তথা মজ্ঝিমা নৰকানং, নৰকা পন অত্তনো নৰকভাৰেন ৰিঘাসাদাদীনং আরোচেন্তি ‘‘পস্সথ তুম্হাকং থেরস্স কম্ম’’ন্তি. ৰিঘাসাদাদযো নাম ‘‘ঈদিসস্স সন্তিকে ওৰাদত্থং তুম্হে আগতা’’তি ভিক্খুনীনং আরোচেন্তি. ন চ মং ভিক্খূ জানেয্যুন্তি ন চ ৰত মং ভিক্খূ জানেয্যুং, অহো ৰত মং ভিক্খূ ন জানেয্যুন্তি যোজনা. ঠানং খো পনেতন্তি এত্থ খো-সদ্দো অৰধারণত্থো, পন-সদ্দো ৰচনালঙ্কারোতি আহ ‘‘অত্থিযেৰা’’তি. পুব্বে ইচ্ছুপ্পাদৰারৰণ্ণনায ৰুত্তনযেন. ইতি-সদ্দো ইধ আসন্নকারণত্থোতি তং দস্সেন্তো ‘‘ইমিনা কারণেনা’’তি আহ ¶ . ইদঞ্চ কোপঅপ্পচ্চযানমেৰ গহণং. তাদিসানন্তি কোপঅপ্পচ্চযাধিভূতানন্তি অধিপ্পাযো.

অনুরহোতি অনুরূপে রহসি. এৰমেৰ হি অত্থং দস্সেতুং ‘‘ৰিহারপচ্চন্তে’’তিআদি ৰুত্তং. পুরিমসদিসমেৰাতি ‘‘লাভত্থিকো হী’’তিআদিনা ৰুত্তেন পুরিমেন যোজনানযেন সদিসমেৰ.

চোদনায পটিপুগ্গলভাৰো, চোদনা চ আপত্তিযাতি চুদিতকেন চোদকস্স সমানভাৰো আপত্তিআপন্নতাযাতি আহ ‘‘সমানোতি সাপত্তিকো’’তি. সপ্পটিপুগ্গলেনেৰস্স চোদনিচ্ছায কারণং ৰিভাৰেতুং ‘‘অয’’ন্তিআদি ৰুত্তং. ন চাযং সাপত্তিকতায এৰ সমানতং ইচ্ছতি, অথ খো অঞ্ঞথাপীতি দস্সেন্তো ‘‘অপিচা’’তিআদিমাহ. অঞ্ঞেন ৰা পটিপুগ্গলেন সপ্পটিপুগ্গলো. অযঞ্হি ‘‘সপ্পটিপুগ্গলোৰ মং চোদেয্যা’’তি ইচ্ছতি ‘‘এৰাহং তস্স পটিপুগ্গলেহি সদ্ধিং একজ্ঝাসযো হুত্ৰা তস্স উপরি কিঞ্চি ৰত্তুং কাতুং ৰা লভিস্সামী’’তি মঞ্ঞমানো ¶ . ইমস্মিং পন পক্খে নো অপ্পটিপুগ্গলোতি নত্থি এতস্স পটিপুগ্গলোতি অপ্পটিপুগ্গলোতি এৰমত্থো ৰেদিতব্বো.

‘‘অহো ৰতা’’তি ইদং পদং দিস্সতীতি সম্বন্ধো, ইমস্স পুগ্গলস্স ইচ্ছাচারে ঠিতত্তা ভিক্খূনং ধম্মং দেসেয্যাতি ৰচনতো ‘‘তঞ্চ খো অনুমতিপুচ্ছাযা’’তি ৰুত্তং. ন হেস ‘‘সচ্চং কির ত্ৰং ভিক্খূ’’তিআদিনা কিঞ্চি ৰীতিক্কমং উদ্দিস্স ভগৰতা পুচ্ছিতব্বতং ইচ্ছতি. নো মগ্গং ৰা ফলং ৰা ৰিপস্সনং ৰা অন্তরং কত্ৰাতি মগ্গভাৰনং ৰা ফলসচ্ছিকিরিযং ৰা সিখাপ্পত্তৰিপস্সনানুযোগং ৰা নিরোধসমাপজ্জনং ৰা ঝানসমাপজ্জনমেৰ ৰা অন্তরং কারণং কত্ৰা ভগৰতা অত্তানং পটিপুচ্ছিতব্বং নো ইচ্ছতি. নিচ্চং অনিচ্চন্তিআদিনা অনুমতিগ্গহণৰসেন পুচ্ছিতব্বং ইচ্ছতি, উত্তানমেৰ কত্ৰা পুচ্ছিতব্বং ইচ্ছতীতি অত্থো. উপহরন্তে পস্সতীতি সম্বন্ধো. অভব্বট্ঠানভিক্খুতায নিহরিস্সন্তি সাসনতো.

তং সম্পত্তিন্তি পরিৰারসম্পত্তিঞ্চেৰ ভিক্খূহি করিযমানং সক্কারগরুকারসম্পত্তিঞ্চ. গহেত্ৰা পরিভুঞ্জন্তি মযা সংৰিভাগে করিযমানে. সযমেৰ পঞ্ঞাযতীতি সযমেৰ গন্ত্ৰা ভিক্খূনং পুরতো অত্তানং দস্সেতি, পুরতো ৰসন্তং পন ভিক্খু পুরক্খত্ৰা গচ্ছন্তিযেৰাতি অধিপ্পাযো.

দক্খিণোদকন্তি ¶ অগ্গতো উপনীযমানং দক্খিণোদকং. যতো এৰ-কারো, ততো অঞ্ঞত্থ নিযমো ইচ্ছিতো. অৰধারণত্থং ৰা এৰ-কারগ্গহণন্তি কত্ৰা অহমেৰ লভেয্যন্তি অহং লভেয্যমেৰাতি এৰমেতং অৰধারণং দট্ঠব্বন্তি অধিপ্পাযেনাহ ‘‘অহমেৰ লভেয্যন্তি ইচ্ছা নাতিমহাসাৰজ্জা’’তি, অঞ্ঞথা যথারুতৰসেন অৰধারণে গয্হমানে ‘‘ন অঞ্ঞে লভেয্যু’’ন্তি অযমেৰেত্থ অত্থো সিযাতি. পাসাদিকো হোতীতি ইদং তস্স অগ্গাসনাদিপচ্চাসীসনায কারণদস্সনং.

অনুমোদনন্তি মঙ্গলামঙ্গলেসু অনুমোদনাৰসেন পৰত্তেতব্বধম্মকথং. খণ্ডানুমোদনন্তি অনুমোদনেকদেসং. ‘‘পুব্বে অনুমোদিতপুব্বো অনুমোদতূ’’তি অৰত্ৰা থেরেন ৰুত্তমত্তেযেৰ.

তাদিসেসু ঠানেসূতি তাদিসেসু পেসলানং বহুস্সুতানং ৰসনট্ঠানেসু. সব্বম্পি রতিং পৰত্তনতো সব্বরত্তিকানি. ৰিনিচ্ছযকুসলানন্তি অনেকৰিহিতেসু কঙ্খট্ঠানিযেসু কঙ্খাৰিনযনায তং তং পঞ্হানং ৰিনিচ্ছযে কুসলানং ছেকানং. তেসু তেসু ধম্মকথিকেসু অজ্ঝিট্ঠেসু ৰারেন ধম্মং কথেন্তেসু ‘‘অযং ব্যত্তো’’তি ধম্মজ্ঝেসকেন অজ্ঝিট্ঠত্তা ওকাসং অলভমানো.

সক্কচ্চঞ্চ ¶ করেয্যুন্তি ভিক্খূ যং মম অভিৰাদনপচ্চুট্ঠানঞ্জলিকম্মসামীচিকম্মাদিং করোন্তি. তং আদরেনেৰ করেয্যুং, যঞ্চ মে পরিক্খারজাতং পটিযাদেন্তি, তম্পি সুন্দরং সম্মদেৰ অভিসঙ্খতং করেয্যুন্তি অত্থো. ভারিযন্তি পাসাণচ্ছত্তং ৰিয গরুকাতব্বং. এতং ৰিধিন্তি এতং ‘‘সক্করেয্যু’’ন্তিআদিনা ৰুত্তসক্কারাদিৰিধিং. তেনাতি তেন কারণেন, বাহুসচ্চাদিগুণৰিসেসৰতো এৰ সক্কারাদীনং অরহত্তাতি অত্থো. এৰরূপন্তি ঈদিসং ‘‘পিযো গরূ’’তিআদিনা (অ. নি. ৭.৩৭) ৰুত্তপ্পকারং. এৰং করেয্যুন্তি এৰং ‘‘সক্করেয্যু’’ন্তিআদিনা ৰুত্তপ্পকারং সক্কারাদিং করেয্যুং. এস নযোতি যোযং ভিক্খুৰারে ৰুত্তৰিধি, এসেৰ নযো. ইতো পরেসু ভিক্খুনীৰারাদীসু ৰারেসু.

অহমেৰ লাভী অস্সন্তি এত্থাপি হেট্ঠা ৰুত্তনযেনেৰ অৰধারণং গহেতব্বং. পিণ্ডপাতস্স পণীততা উপসেচনাদিৰসেনাতি আহ ‘‘সপ্পিতেলমধুসক্খরাদিপূরিতান’’ন্তি ¶ . মঞ্চপীঠাদীনন্তি নিদস্সনমত্তং উতুসপ্পাযানং নিৰাতানং ফস্সিততলানং পিহিতদ্ৰারকৰাল়ৰাতপানাদীনম্পি পণীতসেনাসনভাৰতো. আদি-সদ্দেন ৰা তেসম্পি গহণং দট্ঠব্বং. সব্বত্থাপীতি সব্বেসু তেসু চতূসুপি পচ্চযৰারেসু.

৬১. কাযকম্মং দিস্ৰাতি ইদং ন কাযকম্মং চক্খুৰিঞ্ঞেয্যং, কাযকম্মুনা পন সহ পৰত্তং ওট্ঠপরিপ্ফন্দনং ভাকুটিকরণং কাযঙ্গাদিদস্সনং কাযকম্মদস্সনং ৰিয হোতীতি কত্ৰা ৰুত্তং. ৰচীকম্মং সুত্ৰাতি এত্থাপি এসেৰ নযো, তস্মা কাযৰিকারজনকা ধম্মা ‘‘দিস্সন্তী’’তি ৰুত্তা, ৰচীৰিকারজনকা ‘‘সূযন্তী’’তি. ততো এৰ চ তে পচ্চক্খকালে সম্মুখকালে দিস্সন্তি নাম. তিরোক্খকালে অসম্মুখকালে সূযন্তি নাম. অনুরূপতো গহণং অনুগ্গহো. আরঞ্ঞিকত্তন্তি তস্স ভিক্খুনো ধুতগুণত্তানুরূপতো গণ্হাতি. তেনাহ ‘‘আরঞ্ঞিকত্তং অনুগ্গণ্হাতী’’তি. অরঞ্ঞে নিৰাসো অস্সাতি আরঞ্ঞিকো. পন্তং পরিযন্তং দূরতরং সেনাসনং অস্সাতি পন্তসেনাসনো. তং পন অত্থমত্তেন দস্সেন্তেন ‘‘পন্তসেনাসনে ৰসতী’’তি ৰুত্তং. ভিক্খাসঙ্খাতানং পিণ্ডানং পাতো পিণ্ডাপাতো, তং পিণ্ডপাতং উঞ্ছতি গৰেসতীতি পিণ্ডপাতিকো. পিণ্ডায পতিতুং চরিতুং ৰতমেতস্সাতি ৰা পিণ্ডপাতি, সো এৰ পিণ্ডপাতিকো. দানতো অৰখণ্ডনতো অপেতং অপদানং, সহ অপদানেন সপদানং, অনৰখণ্ডনং. অনুঘরং চরণসীলো সপদানচারী. উন্নতভাৰেন পংসুকূলং ৰিয পংসুকূলং, পংসু ৰিয ৰা কুচ্ছিতভাৰং উলতি গচ্ছতীতি পংসুকূলং, তস্স ধারণং ইধ পংসুকূলং, তং সীলমস্সাতি পংসুকূলিকো.

তীহি ¶ কারণেহি লূখং ৰেদিতব্বং অগ্ঘফস্সৰণ্ণপরিহানিতো অপংসুকূলম্পি, কো পন ৰাদো পংসুকূলন্তি অধিপ্পাযো. থূলদীঘসুত্তকেনাতি থূলেন ওলম্বমানেন দীঘসুত্তকেন. ৰণ্ণেনাতি এত্থ ফস্সেনপি পরিহাযতীতি ৰত্তব্বং. তঞ্হি তত্থ খরফস্সম্পি হোতিযেৰাতি. কস্মা পন পাল়িযং আরঞ্ঞিকাদিগ্গহণেন চত্তারোৰ ধুতগুণা ৰুত্তাতি? পধানত্তা, তগ্গহণেনেৰ চ ইতো পরেসম্পি সুখপরিভোগতায গহণসম্ভৰতো. যো হি আরঞ্ঞিকো পন্তসেনাসনো, তস্স অব্ভোকাসিক-রুক্খমূলিক-নেসজ্জিক-যথাসন্থতিক-সোসানিকঙ্গানি সুপরিপূরানি. যো চ পিণ্ডপাতিকো সপদানচারী চ, তস্স পত্তপিণ্ডিকখলুপচ্ছাভত্তিকএকাসনিকঙ্গানি. যো পন পংসুকূলিকো, তস্স ¶ তেচীৰরিকঙ্গং সুপরিহরমেৰাতি. পধানত্তা হি ভগৰতাপি ‘‘কদাহং নন্দং পস্সেয্যং, আরঞ্ঞং পংসুকূলিক’’ন্তিআদিনা (সং. নি. ২.২৪২; নেত্তি. ১০০) তত্থ তত্থ আরঞ্ঞিকাদযো এৰ গয্হন্তি. এত্তকাতি পাল়িযং আগতানং পরিচ্ছিজ্জ গহণমেতং, ন এত্তকা সব্বেপি একস্স একংসতো সম্ভৰন্তি, নাপি এত্তকাযেৰ পাপধম্মা পহাতব্বা. ন হি মক্খপল়াসাদীনং অপ্পহীনভাৰেপি সব্রহ্মচারী নেৰ সক্করোন্তি…পে… ন পূজেন্তীতি.

তমত্থন্তি ‘‘যস্স কস্সচী’’তিআদিনা ৰুত্তমত্থং. উপমায পাকটং করোন্তোতি অন্ৰযতো ব্যতিরেকতো চ উদাহরণেন ৰিভাৰেন্তো. অহিকুণপাদীনং অতিপটিকূলজিগুচ্ছনীযতা অতিৰিয দুগ্গন্ধতায. সা চ অহীনং তিখিণকোপতায, কুক্কুরমনুস্সানং ওদনকুম্মাসূপচযতায সরীরস্স হোতীতি ৰদন্তি. ইমেসন্তি অহিআদীনং. ৰড্ঢেত্ৰাতি উপরূপরি খিপনেন রচিতং কত্ৰা. তং পন ৰড্ঢিতং তেন চ ভাজনং পূরিতং হোতীতি আহ ‘‘ৰড্ঢেত্ৰা পরিপূরেত্ৰা’’তি. জনস্স দস্সনযোগ্যং দস্সনীযং জঞ্ঞং, তং পরমপরিসুদ্ধং মনোহরঞ্চ হোতীতি আহ ‘‘চোক্খচোক্খ’’ন্তি. অভিনৰনিৰিট্ঠা মহামাতা ৰধুকা. সা পন পুত্তলাভযোগ্যতং উপাদায মঙ্গলৰচনেন ‘‘জনী’’তি ৰুচ্চতি, তস্সা নিয্যমানং পণ্ণাকারং জনিযা হরতীতি জঞ্ঞং. উভযত্থাতি অত্থদ্ৰযে. পুনরুত্তন্তি আমেডিতৰচনমাহ. ন মনাপং এতস্সাতি অমনাপো, তস্স ভাৰো অমনাপতা, তথাপৰত্তো চিত্তুপ্পাদোতি আহ ‘‘অমনাপং ইদন্তি…পে… অধিৰচন’’ন্তি. বুদ্ধৰেসত্তা লিঙ্গস্স পরিসুদ্ধকংসপাতিসদিসকা. কুণপরচনং ৰিয ইচ্ছাৰচরেহি সন্তানস্স ভরিতভাৰো. সো পন তেসং অপ্পহীনতাযাতি আহ ‘‘ইচ্ছাৰচরানং অপ্পহান’’ন্তি.

৬২. ‘‘তেন গামন্তৰিহারং অনুগ্গণ্হাতী’’তি ৰত্তব্বে ‘‘আরঞ্ঞিকত্ত’’ন্তি পন পোত্থকে লিখিতং. ন হি সুক্কপক্খে পাল়িযং আরঞ্ঞিকগ্গহণং অত্থি, সতি চ ইচ্ছাৰচরপ্পহানে গামন্তৰিহারো একন্তেন ন পটিক্খিপিতব্বো, ইচ্ছিতব্বোৰ তাদিসানং উত্তরিমনুস্সধম্মপটিচ্ছাদনতো ¶ . তথা হি ৰক্খতি ‘‘অপ্পিচ্ছতাসমুট্ঠানেহী’’তিআদি. সালিৰরভত্তরচনং ৰিয ইচ্ছাৰচরপ্পহানং মনুঞ্ঞভাৰতো তিত্তিহেতুতো চ.

৬৩. মং ¶ তন্তি চ উপযোগৰচনং পটি-সদ্দযোগেন, অত্থো পন সম্পদানমেৰাতি আহ ‘‘ময্হং তুয্হ’’ন্তি চ. ‘‘সমযে’’তি ভুম্মত্থে ‘‘সময’’ন্তি উপযোগৰচনং. গিজ্ঝকূটপণ্ডৰইসিগিলিৰেভারৰেপুল্লপব্বতানং ৰসেন সমন্ততো গিরিপরিক্খেপেন. রাজগহেতি সমীপত্থে ভুম্মৰচনন্তি আহ ‘‘তং নিস্সায ৰিহরামী’’তি.

পুরাণযানকারপুত্তোতি পুরাণে পব্বজিততো পুব্বে যানকারপুত্তো তথাপঞ্ঞাতো. জিম্হন্তি গোমুত্তকুটিলং. তেনাহ ‘‘সপ্পগতমগ্গসদিস’’ন্তি. সোতি পণ্ডুপুত্তো. ইতরোতি সমিতি. চিন্তিতট্ঠানমেৰাতি চিন্তিতচিন্তিতট্ঠানমেৰ তচ্ছতি, তঞ্চ খো ন তস্স চিত্তানুসারেন, অথ খো অত্তনো সুত্তানুসারেন তচ্ছন্তো যানকারপুত্তো. চিত্তন্তি অত্তনো চিত্তেন মম চিত্তং জানিত্ৰা ৰিয.

‘‘ন সদ্ধায পব্বজিতো’’তি ইমিনাৰ কম্মফলসদ্ধায অভাৰো নেসং পকাসিতোতি আহ ‘‘অস্সদ্ধাতি বুদ্ধধম্মসঙ্ঘেসু সদ্ধাৰিরহিতা’’তি. পব্বজিতানং জীৰিকা অত্থো এতেসন্তি জীৰিকত্থা. তেনাহ ‘‘ইণভযাদীহী’’তিআদি. কেরাটিকং ৰুচ্চতি সাঠেয্যং. সঠানং গুণৰাণিজকানং কম্মং সাঠেয্যন্তি আহ ‘‘সাঠেয্যঞ্হী’’তিআদি. তুচ্ছসভাৰেন মানো নল়ো ৰিযাতি নল়ো, মানসঙ্খাতো উগ্গতো নল়ো এতেসন্তি উন্নল়া. তেনাহ ‘‘উট্ঠিততুচ্ছমানা’’তি. লহুকতায ৰা চপলা. ফরুসৰচনতায খরৰচনা. তিরচ্ছানকথাবহুলতায নিরত্থকৰচনপলাপিনো. অসংৰুতকম্মদ্ৰারাতি ইদং কম্মদ্ৰারাদীনং অসংৰুতভাৰো উপ্পত্তিদ্ৰারানং অসংৰুততায এৰ হোতীতি কত্ৰা ৰুত্তং. অথ ৰা ছসু ইন্দ্রিযেসূতি নিমিত্তে ভুম্মং, ছসু ইন্দ্রিযেসু নিমিত্তভূতেসু অসংৰুতকম্মদ্ৰারাতি অত্থো. যা মত্তাতি ভোজনে অযুত্তপরিযেসন-অযুত্তপটিগ্গহণ-অযুত্তপরিভোগে ৰজ্জেত্ৰা যুত্তপরিযেসন-যুত্তপটিগ্গহণ-যুত্তপরিভোগসঙ্খাতা যা মত্তা অপ্পমত্তেহি জানিতব্বা. তেনাহ ‘‘যুত্ততা’’তি. জাগরেতি রত্তিন্দিৰং আৰরণিযেহি ধম্মেহি চিত্তপরিসোধনসঙ্খাতে জাগরে. তেসং জাগরিতায অধিসীলসিক্খায গারৰরহিতানং ইতরসিক্খাসু পতিট্ঠা এৰ নত্থীতি দস্সেন্তো ‘‘সিক্খাপদেসু বহুলগারৰা ন হোন্তী’’তি ৰত্ৰা তমেৰ গারৰাভাৰং সরূপেন ৰিভাৰেন্তো ‘‘আপত্তিৰীতিক্কমবহুলা’’তি আহ.

পকতিযাপি ¶ ¶ সিদ্ধায রতনত্তযসদ্ধায কম্মফলসদ্ধায চ সদ্ধা. পিৰন্তি মঞ্ঞে যথা তং দ্রৰভূতং অমতং লদ্ধা. ঘসন্তি মঞ্ঞে যথা তং বহলপিণ্ডিকসুধাভোজনং লদ্ধা. অত্তমনৰাচং নিচ্ছারেন্তা ‘‘সাধু সাধূ’’তি. তমেৰ পন সাধুকারং হদযে ঠপেত্ৰা অব্ভনুমোদন্তা. এত্থ চ অত্তমনৰাচানিচ্ছারণং পিৰনসদিসং কত্ৰা ৰুত্তং বহিদ্ধাভাৰতো, মনসা অব্ভনুমোদনং পন অব্ভন্তরভাৰতো ঘসনসদিসং ৰুত্তং. সঙ্খাদনজ্ঝোহরণঞ্হি ঘসনন্তি. রস্সঞ্চ একৰচনং হোতীতি আহ ‘‘রস্সে সতি সারিপুত্তস্স উপরি হোতী’’তি. দীঘঞ্চ বহুৰচনং হোতীতি আহ ‘‘দীঘে সতি সব্রহ্মচারীন’’ন্তি. ‘‘উপরি হোতী’’তি আনেত্ৰা সম্বন্ধো. আলসিযব্যসনাদীহীতি আলসিযেন ৰা ঞাতিব্যসনাদীহি ৰা. ‘‘মহানাগাতি ৰুচ্চন্তী’’তি ৰত্ৰা তত্থ কারণং ৰিভাৰেন্তো ‘‘তত্রা’’তিআদিমাহ. তত্থ ‘‘ন গচ্ছন্তীতি নাগা, ন আগচ্ছন্তীতি নাগা, ন আগুং করোন্তীতি নাগা’’তি যো ৰিৰিধো ৰচনত্থো ইচ্ছিতো, তং ৰিচারেত্ৰা দস্সেতুং ‘‘ছন্দাদীহী’’তিআদি ৰুত্তং, তং পন ঞেয্যাৰবোধায ৰচনতো অপ্পমত্তকারণং.

সযমেৰ আগুং ন করোতি সব্বথা মগ্গেন পহীনআগুত্তা. সো কামযোগাদিকে সব্বসংযোগে দসৰিধসংযোজনপ্পভেদানি চ সব্ববন্ধনানি ৰিসজ্জ জহিত্ৰা সব্বত্থ যক্খাদীসু, সব্বেসু ৰা ভৰেসু কেনচি সঙ্গেন ন সজ্জতি তীহি চ ৰিমুত্তীহি ৰিমুত্তো, ততো এৰ ইট্ঠাদীসু তাদিভাৰপ্পত্তিযা তাদি, সো ৰুত্তলক্খণেন তথত্তা তংসভাৰত্তা নাগো পৰুচ্চতেতি অত্থো ৰেদিতব্বো. তেনাহ ‘‘এৰমেত্থ অত্থো ৰেদিতব্বো’’তি. অঞ্ঞেহি খীণাসৰনাগেহি অগ্গসাৰকত্তা গুণৰিসেসযোগতো পুজ্জতরা চ পাসংসতরা চ. সমং অনুমোদিসুন্তি অঞ্ঞমঞ্ঞস্স সুভাসিততো সম্পটিচ্ছনেন সমপ্পৰত্তমোদতায সমং সদিসং অব্ভনুমোদিংসু. তং পন সমনুমোদনং ‘‘তত্থা’’তিআদিনা পাল়িৰসেনেৰ দস্সেতি.

সম্মুতিপরমত্থদেসনাকথাৰণ্ণনা নিট্ঠিতা.

অনঙ্গণসুত্তৰণ্ণনায লীনত্থপ্পকাসনা সমত্তা.

৬. আকঙ্খেয্যসুত্তৰণ্ণনা

৬৪. সম্পন্নন্তি ¶ ¶ পরিপুণ্ণং, সমন্ততো পন্নং পত্তন্তি সম্পন্নং. তেনাহ ‘‘ইদং পরিপুণ্ণসম্পন্নং নামা’’তি. নন্তি ‘‘সুৰা’’তি ৰুত্তং সুৰগণং. সম্পন্নোতি সম্মদেৰ পন্নো গতো উপগতো. তেনাহ ‘‘সমন্নাগতো’’তি. সম্পন্নন্তি সম্পত্তিযুত্তং. সা পনেত্থ রসসম্পত্তি অধিপ্পেতা সামঞ্ঞজোতনায ৰিসেসে অৰট্ঠানতো. তেনাহ ‘‘সেয্যথাপি খুদ্দমধুং অনেল়ক’’ন্তি, নিদ্দোসন্তি অত্থো. তেন ৰুত্তং ‘‘ইদং মধুরসম্পন্নং নামা’’তি. সীলস্স অনৰসেসসমাদানেন অখণ্ডাদিভাৰাপত্তিযা চ পরিপুণ্ণসীলা. সমাদানতো পট্ঠায অচ্ছিন্দনতো সীলসমঙ্গিনো. সমাদানতো হি অচ্চন্তৰিরোধিধম্মানুপ্পত্তিযা সীলসমঙ্গিতা ৰেদিতব্বা, চেতনাদীনং পন সীলনলক্খণানং ধম্মানং পৰত্তিক্খণে ৰত্তব্বমেৰ নত্থি. ৰিসুদ্ধিমগ্গে (ৰিসুদ্ধি. ১.৯) ৰুত্তা, তস্মা তত্থ ৰুত্তনযেনেৰ ৰিত্থারকথা ৰেদিতব্বাতি অধিপ্পাযো.

খেত্তপারিপূরীতি নিস্সিতপারিপূরিযা নিস্সযপারিপূরিমাহ নিস্সিতকম্মৰিপত্তিসম্পত্তিৰিসযত্তা যথা ‘‘মঞ্চা উক্কুট্ঠিং করোন্তী’’তি. তথা হি খেত্তেন খণ্ডপূতিআদিদোসো ৰুত্তো. খেত্তং খণ্ডং হোতীতি অপরিপূরং হোতি সস্সপারিপূরিযা অভাৰতো. তেনেৰাহ ‘‘সস্সং ন উট্ঠেতী’’তি. পাদমত্তস্সপি অনেকম্বণফলনতো মহপ্ফলং হোতি. কিসলযপলালাদিবহুতায মহানিসংসং. এৰমেৰন্তি যথা খিত্তং বীজং খণ্ডাদিচতুদোসৰসেন অপরিপুণ্ণং হোতি, তদভাৰেন চ পরিপুণ্ণং, এৰং সীলং খণ্ডাদিচতুদোসৰসেন অপরিপুণ্ণং হোতি, তদভাৰেন চ পরিপুণ্ণন্তি, চতুদোসতদভাৰসামঞ্ঞমেৰ নিদস্সননিদস্সিতব্বৰিপত্তিসম্পত্তীসু দস্সেতি. মহপ্ফলং হোতি ৰিপাকফলেন. মহানিসংসন্তি ৰিপুলানিসংসং. স্ৰাযং আনিসংসো ইধ পাল়িযং নানপ্পকারেন ৰিত্থারীযতি.

এত্তাৰতা কিরাতি (অ. নি. টী. ২.২.৩৭; অ. নি. টী. ৩.১০.৭১-৭৪) কির-সদ্দো অরুচিসূচনত্থো. তেনেত্থ আচরিযৰাদস্স অত্তনো অরুচ্চনভাৰং দীপেতি. সম্পন্নসীলাতি অনামট্ঠৰিসেসং সামঞ্ঞতো সীলসঙ্খেপেন গহিতং. তঞ্চ চতুব্বিধন্তি আচরিযত্থেরো ‘‘চতুপারিসুদ্ধিসীলং উদ্দিসিত্ৰা’’তি আহ. তত্থাতি চতুপারিসুদ্ধিসীলে. জেট্ঠকসীলন্তি (সং. নি. টী. ৩.৫.৪১২) পধানসীলং. উভযত্থাতি উদ্দেসনিদ্দেসে. ইধ ¶ নিদ্দেসে ৰিয উদ্দেসেপি পাতিমোক্খসংৰরো ভগৰতা ৰুত্তো ‘‘সম্পন্নসীলা’’তি ৰুত্তত্তাতি অধিপ্পাযো ¶ . সীলগ্গহণঞ্হি পাল়িযং পাতিমোক্খসংৰরৰসেন আগতং. তেনাহ ‘‘পাতিমোক্খসংৰরোযেৰা’’তিআদি. তত্থ অৰধারণেন ইতরেসং তিণ্ণং একদেসেন পাতিমোক্খন্তোগধভাৰং দীপেতি. তথা হি অনোলোকিযোলোকনে আজীৰহেতু ছসিক্খাপদৰীতিক্কমে গিলানপচ্চযস্স অপচ্চৰেক্খিতপরিভোগে চ আপত্তি ৰিহিতাতি. তীণীতি ইন্দ্রিযসংৰরসীলাদীনি. সীলন্তি ৰুত্তট্ঠানং নাম অত্থীতি সীলপরিযাযেন তেসং কত্থচি সুত্তে গহিতট্ঠানং নাম কিং অত্থি যথা পাতিমোক্খসংৰরোতি আচরিযস্স সম্মুখত্তা অপটিক্খিপন্তোৰ উপচারেন পুচ্ছন্তো ৰিয ৰদতি. তেনাহ ‘‘অননুজানন্তো’’তি. ছদ্ৰাররক্খামত্তকমেৰাতি তস্স সল্লহুকভাৰমাহ চিত্তাধিট্ঠানমত্তেন পটিপাকতিকভাৰাপত্তিতো. ইতরদ্ৰযেপি এসেৰ নযো. পচ্চযুপ্পত্তিমত্তকন্তি ফলেন হেতুং দস্সেতি. উপ্পাদনহেতুকা হি পচ্চযানং উপ্পত্তি. ইদমত্থন্তি ইদং পযোজনং ইমস্স পচ্চযস্স পরিভুঞ্জনেতি অধিপ্পাযো. নিপ্পরিযাযেনাতি ইমিনা ইন্দ্রিযসংৰরাদীনি তীণি পধানস্স সীলস্স পরিৰারৰসেন পৰত্তিযা পরিযাযসীলানি নামাতি দস্সেতি.

ইদানি পাতিমোক্খসংৰরস্সেৰ পধানভাৰং ব্যতিরেকতো অন্ৰযতো চ উপমায ৰিভাৰেতুং ‘‘যস্সা’’তিআদিমাহ. তত্থ সোতি পাতিমোক্খসংৰরো. সেসানীতি ইন্দ্রিযসংৰরাদীনি. তস্সেৰাতি ‘‘সম্পন্নসীলা’’তি এত্থ যং সীলং ৰুত্তং, তস্সেৰ. সম্পন্নপাতিমোক্খাতি এত্থ পাতিমোক্খগ্গহণেন ৰেৰচনং ৰত্ৰা তং ৰিত্থারেত্ৰা…পে… আদিমাহ. যথা অঞ্ঞথাপি ‘‘ইধ ভিক্খু সীলৰা হোতী’’তি (মহানি. ১৯৯) পুগ্গলাধিট্ঠানায দেসনায উদ্দিট্ঠং সীলং ‘‘পাতিমোক্খসংৰরসংৰুতো ৰিহরতী’’তি (ৰিভ. ৫০৮; মহানি. ১৯৯) নিদ্দিট্ঠং.

পাতিমোক্খসংৰরসংৰুতাতি যো নং পাতি রক্খতি, তং মোক্খেতি মোচেতি আপাযিকাদীহি দুক্খেহীতি ‘‘পাতিমোক্খ’’ন্তি লদ্ধনামেন সিক্খাপদসীলেন পিহিতকাযৰচীদ্ৰারা. তে পন যস্মা এৰংভূতা তেন সমন্নাগতা নাম হোন্তি, তস্মা ৰুত্তং ‘‘পাতিমোক্খসংৰরেন সমন্নাগতা’’তি.

অপরো ¶ নযো (উদা. অট্ঠ. ৩১; ইতিৰু. অট্ঠ. ৯৭) – কিলেসানং বলৰভাৰতো, পাপকিরিযায সুকরভাৰতো, পুঞ্ঞকিরিযায চ দুক্করভাৰতো বহুক্খত্তুং অপাযেসু পতনসীলোতি পাতী, পুথুজ্জনো. অনিচ্চতায ৰা ভৰাদীসু কম্মৰেগক্খিত্তো ঘটীযন্তং ৰিয অনৰট্ঠানেন পরিব্ভমনতো গমনসীলোতি পাতী, মরণৰসেন ৰা তম্হি তম্হি সত্তনিকাযে অত্তভাৰস্স পাতনসীলোতি পাতী, সত্তসন্তানো, চিত্তমেৰ ৰা, তং পাতিং সংসারদুক্খতো মোক্খেতীতি ¶ পাতিমোক্খং. চিত্তস্স হি ৰিমোক্খেন সত্তো ৰিমুত্তোতি ৰুচ্চতি. ৰুত্তঞ্হি ‘‘চিত্তৰোদানা ৰিসুজ্ঝন্তী’’তি, ‘‘অনুপাদায আসৰেহি চিত্তং ৰিমুত্ত’’ন্তি (মহাৰ. ২৮) চ.

অথ ৰা অৰিজ্জাদিনা হেতুনা সংসারে পততি গচ্ছতি পৰত্ততীতি পাতী. ‘‘অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরত’’ন্তি (সং. নি. ২.১২৫) হি ৰুত্তং. তস্স পাতিনো সত্তস্স তণ্হাদিসংকিলেসত্তযতো মোক্খো এতেনাতি পাতিমোক্খো. ‘‘কণ্ঠেকালো’’তিআদীনং ৰিয সমাসসিদ্ধি ৰেদিতব্বা.

অথ ৰা পাতেতি ৰিনিপাতেতি দুক্খেতি পাতি, চিত্তং. ৰুত্তঞ্হি ‘‘চিত্তেন নীযতি লোকো, চিত্তেন পরিকস্সতী’’তি (সং. নি. ১.৬২). তস্স পাতিনো মোক্খো এতেনাতি পাতিমোক্খো. পততি ৰা এতেন অপাযদুক্খে সংসারদুক্খে চাতি পাতী, তণ্হাদিসংকিলেসো. ৰুত্তঞ্হি ‘‘তণ্হা জনেতি পুরিসং (সং. নি. ১.৫৭), তণ্হাদুতিযো পুরিসো’’তি (ইতিৰু. ১৫, ১০৫; অ. নি. ৪.৯) চ আদি. ততো পাতিতো মোক্খোতি পাতিমোক্খো.

অথ ৰা পততি এত্থাতি পাতী, ছ অজ্ঝত্তিকবাহিরানি আযতনানি. ৰুত্তঞ্হি ‘‘ছসু লোকো সমুপ্পন্নো, ছসু কুব্বতি সন্থৰ’’ন্তি (সং. নি. ১.৭০; সু. নি. ১৭১). ততো অজ্ঝত্তিকবাহিরাযতনসঙ্খাততো পাতিতো মোক্খোতি পাতিমোক্খো. অথ ৰা পাতো ৰিনিপাতো অস্স অত্থীতি পাতী, সংসারো. ততো মোক্খোতি পাতিমোক্খো. অথ ৰা সব্বলোকাধিপতিভাৰতো ধম্মিস্সরো ভগৰা ‘‘পতী’’তি ৰুচ্চতি, মুচ্চতি এতেনাতি মোক্খো, পতিনো মোক্খো তেন পঞ্ঞত্তত্তাতি পাতিমোক্খো ¶ . পাতিমোক্খো এৰ পাতিমোক্খো. সব্বগুণানং ৰা মূলভাৰতো উত্তমট্ঠেন পতি চ সো যথাৰুত্তত্থেন মোক্খো চাতি পাতিমোক্খো. পাতিমোক্খো এৰ পাতিমোক্খো. তথা হি ৰুত্তং ‘‘পাতিমোক্খন্তিআদিমেতং মুখমেতং পমুখমেত’’ন্তি (মহাৰ. ১৩৫) ৰিত্থারো.

অথ ৰা প-ইতি পকারে, অতীতি অচ্চন্তত্থে নিপাতো, তস্মা পকারেহি অচ্চন্তং মোক্খেতীতি পাতিমোক্খো. ইদঞ্হি সীলং সযং তদঙ্গৰসেন, সমাধিসহিতং পঞ্ঞাসহিতঞ্চ ৰিক্খম্ভনৰসেন, সমুচ্ছেদৰসেন চ অচ্চন্তং মোক্খেতি মোচেতীতি পাতিমোক্খো. পতি পতি মোক্খোতি ৰা পাতিমোক্খো, তম্হা তম্হা ৰীতিক্কমদোসতো পচ্চেকং মোক্খোতি অত্থো. পাতিমোক্খো এৰ পাতিমোক্খো. মোক্খো ৰা নিব্বানং, তস্স মোক্খস্স পতিবিম্বভূতোতি পাতিমোক্খো ¶ . সীলসংৰরো হি নিব্বেধভাগিযো সূরিযস্স অরুণুগ্গমনং ৰিয নিব্বানস্স উদযভূতো তপ্পটিভাগো ৰিয হোতি যথারহং কিলেসনিব্বাপনতোতি পাতিমোক্খো. পাতিমোক্খোযেৰ পাতিমোক্খো. অথ ৰা মোক্খং পতি ৰত্ততি মোক্খাভিমুখন্তি ৰা পাতিমোক্খং. পাতিমোক্খমেৰ পাতিমোক্খন্তি এৰমেত্থ পাতিমোক্খসদ্দস্স অত্থো ৰেদিতব্বো.

আচারগোচরসম্পন্নাতি কাযিকৰাচসিকঅৰীতিক্কমসঙ্খাতেন আচারেন চেৰ নৰেসিযগোচরতাদিসঙ্খাতেন গোচরেন চ সম্পন্না, সম্পন্নআচারগোচরাতি অত্থো. অপ্পমত্তেসূতি অতিপরিত্তকেসু অনাপত্তিগমনীযেসু, দুক্কটদুব্ভাসিতমত্তেসূতি অপরে. ৰজ্জেসূতি গারয্হেসু. তে পন একন্ততো অকুসলসভাৰা হোন্তীতি আহ ‘‘অকুসলধম্মেসূ’’তি. ভযদস্সিনোতি ভযতো দস্সনসীলা, পরমাণুমত্তম্পি ৰজ্জং সিনেরুপ্পমাণং ৰিয কত্ৰা ভাযনসীলা. সম্মা আদিযিত্ৰাতি সম্মদেৰ সক্কচ্চং সব্বসো চ আদিযিত্ৰা. সিক্খাপদেসূতি নিদ্ধারণে ভুম্মন্তি সমুদাযতো অৰযৰনিদ্ধারণং দস্সেন্তো ‘‘সিক্খাপদেসু তং তং সিক্খাপদং সমাদিযিত্ৰা সিক্খথা’’তি অত্থমাহ. সিক্খাপদমেৰ হি সমাদাতব্বং সিক্খিতব্বঞ্চাতি অধিপ্পাযো. যং কিঞ্চি সিক্খাকোট্ঠাসেসূতি সিক্খাকোট্ঠাসেসু মূলপঞ্ঞত্তিঅনুপঞ্ঞতিসব্বত্থপঞ্ঞত্তিপদেসপঞ্ঞত্তিআদিভেদং যং কিঞ্চি সিক্খিতব্বং পটিপজ্জিতব্বং পূরেতব্বং সীলং. তং পন দ্ৰারৰসেন দুৰিধমেৰাতি আহ ¶ ‘‘কাযিকং ৰাচসিকঞ্চা’’তি. ইমস্মিং অত্থৰিকপ্পে সিক্খাপদেসূতি আধারে ভুম্মং সিক্খাভাগেসু কস্সচি ৰিসুং অগ্গহণতো. তেনাহ ‘‘তং সব্ব’’ন্তি.

৬৫. কস্মা আরদ্ধন্তি (অ. নি. টী. ৩.১০.৭১-৭৪) দেসনায কারণপুচ্ছা. সীলানিসংসদস্সনত্থন্তি পযোজননিদ্দেসো. কো অত্থো ক্ৰ অত্থো ক্ৰ নিপাতিতাতি? নযিদমেৰং দট্ঠব্বং. সীলানিসংসদস্সনত্থন্তি হি এত্থ ব্যতিরেকতো যং সীলানিসংসস্স অদস্সনং, তং ইমিস্সা দেসনায কারণন্তি কস্মা আরদ্ধন্তি ৰিনেয্যানং সীলানিসংসস্স অদস্সনতোতি অত্থতো আপন্নো এৰ হোতীতি. তেনাহ ‘‘সচেপী’’তিআদি. সীলানিসংসদস্সনত্থন্তি পন ইমস্স অত্থং ৰিৰরিতুং ‘‘তেস’’ন্তিআদি ৰুত্তং. আনিসংসোতি উদযো. ‘‘সীলৰা সীলসম্পন্নো কাযস্স ভেদা পরং মরণা সুগতিং সগ্গলোকং উপপজ্জতী’’তিআদীসু (দী. নি. ২.১৫০; ৩.৩১৬; অ. নি. ৫.২১৩; মহাৰ. ২৮৫) পন ৰিপাকফলম্পি ‘‘আনিসংসো’’তি ৰুত্তং. কো ৰিসেসোতি কো ফলৰিসেসো. কা ৰড্ঢীতি কো অব্ভুদযো. ৰিজ্জমানোপি গুণো যাথাৰতো ৰিভাৰিতো এৰ অভিরুচিং উপ্পাদেতি, ন অৰিভাৰিতো, তস্মা একন্ততো আনিসংসকিত্তনং ইচ্ছিতব্বমেৰাতি দস্সেতুং ৰিসকণ্টকৰাণিজো উদাহটো.

তত্থ ¶ গুল়ো নাম উচ্ছুরসং পচিত্ৰা চুণ্ণাদীহি মিস্সিত্ৰা সম্পিণ্ডনে পিণ্ডীভূতং. ফাণিতং অপিণ্ডিতং দ্রৰীভূতং. খণ্ডং ভিজ্জনক্খমং. সক্খরা নাম ফলিকসদিসা. সক্খরাদীনিতি আদি-সদ্দেন মচ্ছণ্ডিকানং সঙ্গহো. তস্মিং কালে গুল়াদীসু ৰিসকণ্টকৰোহারো অপচ্চন্তদেসে পচুরোতি ‘‘পচ্চন্তগামং গন্ত্ৰা’’তি ৰুত্তং. দারকে চ পলাপেসুং ‘‘ৰিসকণ্টকং মা গণ্হন্তূ’’তি.

পিযোতি পিযাযিতব্বো. পিযস্স নাম দস্সনং একন্ততো অভিনন্দিতব্বং হোতীতি আহ ‘‘ৰিযচক্খূহি সম্পস্সিতব্বো’’তি. পীতিসমুট্ঠানপসন্নসোম্মরূপপরিগ্গহঞ্হি চক্খু ‘‘পিযচক্খূ’’তি ৰুচ্চতি. তেসন্তি সব্রহ্মচারীনং. মনৰড্ঢনকোতি পীতিমনস্স পরিব্রূহনতো উপরূপরি পীতিচিত্তস্স উপ্পাদকো. গরুট্ঠানিযোতি গরুকরণস্স ঠানভূতো. জানং জানাতীতি ঞাণেন জানিতব্বং জানাতি. যথা ৰা অঞ্ঞে অজানন্তাপি জানন্তা ৰিয পৰত্তন্তি, ন এৰমযং, অযং পন জানন্তো এৰ জানাতি ¶ . পস্সং পস্সতীতি দস্সনভূতেন পঞ্ঞাচক্খুনা পস্সিতব্বং পস্সতি, পস্সন্তো এৰ ৰা পস্সতি. এৰং সম্ভাৰনীযোতি এৰং ৰিঞ্ঞুতায পণ্ডিতভাৰেন সম্ভাৰেতব্বো.

সীলেস্ৰেৰস্স পরিপূরকারীতি সীলেসু পরিপূরকারী এৰ ভৰেয্যাতি এৰং উত্তরপদাৰধারণং দট্ঠব্বং. এৰঞ্হি ইমিনা পদেন উপরিসিক্খাদ্ৰযং অনিৰত্তিতমেৰ হোতি. যথা পন সীলেসু পরিপূরকারী নাম হোতি, তং ফলেন দস্সেতুং ‘‘অজ্ঝত্ত’’ন্তিআদি ৰুত্তং. ৰিপস্সনাধিট্ঠানসমাধিসংৰত্তনিকতায হি ইধ সীলস্স পারিপূরী, ন কেৰলং অখণ্ডাদিভাৰমত্তং. তেনাহ ‘‘যানি খো পন তানি অখণ্ডানি…পে… সমাধিসংৰত্তনিকানী’’তি. এৰঞ্চ কত্ৰা উপরি সিক্খাদ্ৰযং সীলস্স সম্ভারভাৰেন গহিতন্তি সীলস্সেৰেত্থ পধানগ্গহণং সিদ্ধং হোতি. তথা হি চিত্তেকগ্গতাসঙ্খারপরিগ্গহানং সীলস্সানুরক্খণভাৰং ৰক্খতি. যং পন ৰক্খতি ‘‘সিক্খত্তযদেসনা জাতা’’তি (ম. নি. অট্ঠ. ১.৬৫), তং ইতরাসম্পি সিক্খানং ইধ গহিততামত্তং সন্ধায ৰুত্তং, ন পধানভাৰেন গহিততং. যদি এৰং কথং সীলস্স অপ্পমত্তকতাৰচনং. ৰুত্তঞ্হেতং ‘‘অপ্পমত্তকং খো পনেতং, ভিক্খৰে, ওরমত্তক’’ন্তি (দী. নি. ১.৭). তং পুথুজ্জনগোচরং সন্ধায ৰুত্তং. তথা হি তত্থ ন নিপ্পদেসতো সীলং ৰিভত্তং, এৰং কত্ৰা তত্থ সীলমত্তকন্তি মত্তগ্গহণং সমত্থিতন্তি দট্ঠব্বং. অনূনেনাতি অখণ্ডাদিভাৰেন, কস্সচি ৰা অহাপনেন উপপন্নেন. আকারেনাতি করণেন সম্পাদনেন. চিত্তসমথেতি চিত্তসমাধানে. যুত্তোতি অৰিযুত্তো পসুতো. যো সব্বেন সব্বং ঝানভাৰনং অননুযুত্তো, সো তং বহি নীহরতি নাম. যো আরভিত্ৰা অন্তরা সঙ্কোচং আপজ্জতি ¶ , সো তং ৰিনাসেতি নাম. যো পন ঈদিসো অহুত্ৰা ঝানং উপসম্পজ্জ ৰিহরতি, সো অনিরাকতজ্ঝানোতি দস্সেন্তো ‘‘বহি অনীহটজ্ঝানো’’তিআদিমাহ.

অনিচ্চস্স তেভূমকধম্মস্স, অনিচ্চন্তি ৰা অনুপস্সনা অনিচ্চানুপস্সনা. তথা দুক্খানুপস্সনা অনত্তানুপস্সনা চ. তস্সেৰ নিব্বিন্দনাকারেন পৰত্তা অনুপস্সনা নিব্বিদানুপস্সনা. ৰিরজ্জনাকারেন পৰত্তা অনুপস্সনা ৰিরাগানুপস্সনা. নিরোধস্স অনুপস্সনা নিরোধানুপস্সনা. পটিনিস্সজ্জনৰসেন পৰত্তা অনুপস্সনা পটিনিস্সগ্গানুপস্সনা. সুঞ্ঞাগারগতো ভিক্খু তত্থ লদ্ধকাযৰিৰেকতায সমথৰিপস্সনাৰসেন চিত্তৰিৰেকং ¶ পরিব্রূহেন্তো যথানুসিট্ঠং পটিপত্তিযা লোকং সাসনঞ্চ অত্তনো ৰিসেসাধিগমট্ঠানভূতং সুঞ্ঞাগারঞ্চ উপসোভযমানো গুণৰিসেসাধিট্ঠানভাৰাপাদনেন ৰিঞ্ঞূনং অত্থতো তং ব্রূহেন্তো নাম হোতীতি ৰুত্তং ‘‘ব্রূহেতা সুঞ্ঞাগারান’’ন্তি. তেনাহ ‘‘এত্থ চা’’তিআদি. অযমেৰ সুঞ্ঞাগারানুব্রূহনৰিঞ্ঞুপ্পসত্থানং ভাজনং, ন সেনাসনপতিট্ঠাপনন্তি দস্সেন্তো আহ ‘‘একভূমকাদি…পে… দট্ঠব্বো’’তি. সুঞ্ঞাগারগ্গহণেন চেত্থ অরঞ্ঞরুক্খমূলাদি সব্বং পধানানুযোগক্খমং সেনাসনং গহিতন্তি দট্ঠব্বং.

তণ্হাৰিচরিতদেসনাতি ‘‘অজ্ঝত্তিকস্স উপাদাযা’’তি (ৰিভ. ৯৩৭) আদিনযপ্পৰত্তং তণ্হাৰিচরিতসুত্তং. তণ্হাপদট্ঠানত্তাতি তণ্হাসন্নিস্সযত্তা. ন হি তণ্হাৰিরহিতা মানদিট্ঠিপৰত্তি অত্থি. মানদিট্ঠিযো ওসরিত্ৰাতি দস্সেতব্বতায মানদিট্ঠিযো ওগাহেত্ৰাতি অত্থো. গহণত্থমেৰ হি দেসেতব্বধম্মস্স দেসনায ওসরণং. তণ্হামানদিট্ঠিযো পপঞ্চত্তযং সত্তসন্তানস্স সংসারে পপঞ্চনতো অনুপ্পবন্ধনৰসেন ৰিত্থারণতো. সীলপদট্ঠানত্তাতি সীলাধিট্ঠানত্তা.

অধিচিত্তসিক্খা ৰুত্তাতি আনেত্ৰা সম্বন্ধো. ৰিপস্সনাৰসেন সুঞ্ঞাগারৰড্ঢনেতি যোজনা. দ্ৰেপি সিক্খাতি অধিচিত্তাধিপঞ্ঞাসিক্খা. সঙ্গহেত্ৰাতি অধিসীলসিক্খায সদ্ধিং সঙ্গহেত্ৰা ৰুত্তা. যদি এৰমযং সিক্খত্তযদেসনা জাতাতি সিক্খত্তযানিসংসপ্পকাসনী সিযাতি অনুযোগং সন্ধাযাহ ‘‘এত্থ চা’’তিআদি. তত্থ যং ৰত্তব্বং, তং হেট্ঠা ৰুত্তমেৰ. ইন্দ্রিযসংৰরো ৰিয পাতিমোক্খসংৰরস্স চতুপারিসুদ্ধিসীলস্স আরক্খভূতা চিত্তেকগ্গতা ৰিপস্সনা চ ইধ গহিতাতি তদুভযং অপ্পধানং, সীলমেৰ পন পধানভাৰেন গহিতন্তি ৰেদিতব্বং. তেনাহ ‘‘সীলানুরক্খিকা এৰা’’তিআদি.

বলৰতরসুখন্তি ¶ সমুপ্পন্নব্যাধিদুক্খতো বলৰতরং, তং অভিভৰিতুং সমত্থং ঝানসুখং উপ্পজ্জতি. বলৰমমত্তং হোতি, তেন দল়্হঅত্তসিনেহেন ৰিলুত্তহদযো কুসলধম্মে ছড্ডেন্তো সো তথারূপেসু…পে… পোসেতা হোতি. বলৰমমত্তং ৰা সিনেহো ন হোতি ‘‘সুদ্ধো সঙ্খারপুঞ্জো’’তি যাথাৰদস্সনেন ¶ অহংকারমমংকারাভাৰতো. দুব্ভিক্খভযে খুদাভিভৰং সন্ধাযাহ ‘‘সচেপিস্স অন্তানি বহি নিক্খমন্তী’’তি. ব্যাধিভযং সন্ধাযাহ ‘‘উস্সুস্সতি ৰিসুস্সনী’’তি. আদি-সদ্দেন গহিতং চোরভযং সন্ধাযাহ ‘‘খণ্ডাখণ্ডিকো ৰা’’তি. উভযস্সাতি সমথৰিপস্সনাদ্ৰযস্স. এত্থ চ ‘‘অজ্ঝত্তং চেতো…পে… সুঞ্ঞাগারান’’ন্তি ইমেহি ৰিসেসনিব্বেধভাগিযভাৰাপাদনেন সীলং রক্খিতুং সমত্থা এৰ চিত্তেকগ্গতাৰিপস্সনা গহিতা. যস্মা পরতো ঝানৰিমোক্খফলাভিঞ্ঞাণঅধিট্ঠানভাৰো সীলস্স উদ্ধটো, তস্মা তস্স ভিয্যোপি সম্ভারভূতা এৰ চিত্তেকগ্গতা ৰিপস্সনা তত্থ তত্থ গহিতাতি ৰেদিতব্বা.

সীলাদীতি আদি-সদ্দেন যথাৰুত্তচিত্তেকগ্গতাৰিপস্সনা সঙ্গণ্হাতি, সীলস্স ৰা মূলকারণভূতং সব্বং কম্মস্সকতঞাণঞ্চ সঙ্গণ্হাতি কম্মপথসম্মাদিট্ঠিং ৰা. সীলঞ্হি তদঞ্ঞম্পি পুঞ্ঞকিরিযাৰত্থু তেনেৰ পরিসোধিতং মহপ্ফলং হোতি মহানিসংসন্তি. লাভী অস্সন্তি লাভা সায সংৰরণসীলপরিপূরণং পাল়িযং আগতং কিমীদিসং ভগৰা অনুজানাতীতি? ন ভগৰা সভাৰেন ঈদিসং অনুজানাতি, মহাকারুণিকতায পন পুগ্গলজ্ঝাসযেন এৰং ৰুত্তন্তি দস্সেন্তো ‘‘ন চেত্থা’’তিআদিমাহ. তত্থ ঘাসেসনং ছিন্নকথো ন ৰাচং পযুত্তং ভণেতি ছিন্নকথো মূগো ৰিয হুত্ৰা ওভাসপরিকথানিমিত্তৰিঞ্ঞত্তিপযুত্তং ঘাসেসনং ৰাচং ন ভণে ন কথেয্যাতি অত্থো. পুগ্গলজ্ঝাসযৰসেনাতি সঙ্খেপতো ৰুত্তমত্থং ৰিৰরন্তো ‘‘যেসঞ্হী’’তিআদিমাহ. রসো সভাৰভূতো আনিসংসো রসানিসংসো.

পচ্চযদানকারাতি চীৰরাদিপচ্চযৰসেন দানকারা. ‘‘দেৰানং ৰা’’তি ৰুত্তৰচনং পাকটীকাতুমাহ ‘‘দেৰাপী’’তিআদি. ‘‘পঞ্চিমে গহপতযো আনিসংসা’’তিআদীসু (দী. নি. ২.১৫০) অনিসংসসদ্দো ফলপরিযাযোপি হোতীতি আহ ‘‘উভযমেতং অত্থতো এক’’ন্তি.

সস্সুসসুরা চ তপ্পক্খিকা চ সস্সুসসুরপক্খিকা. তে ঞাতিযোনিসম্বন্ধেন আৰাহৰিৰাহসম্বন্ধৰসেন সম্বন্ধা ঞাতী. সালোহিতাতি যোনিসম্বন্ধৰসেন. একলোহিতসম্বদ্ধাতি একেন সমানেন লোহিতসম্বন্ধেন সম্বদ্ধা. পেচ্চভাৰং গতাতি পেতূপপত্তিৰসেন নিব্বত্তিং ¶ উপগতা. তে পন যস্মা ইধ কতকালকিরিযা কালেন কতজীৰিতুপচ্ছেদা হোন্তি, তস্মা ৰুত্তং ‘‘কালকতা’’তি. পসন্নচিত্তোতি পসন্নচিত্তকো. কালকতো ¶ পিতা ৰা মাতা ৰা পেতযোনিং উপপন্নোতি অধিকারতো ৰিঞ্ঞাযতীতি ৰুত্তং ‘‘মহানিসংসমেৰ হোতী’’তি, তস্স তথা সীলসম্পন্নত্তাতি অধিপ্পাযো. অরিযভাৰে পন সতি ৰত্তব্বমেৰ নত্থি. তেনাহ ‘‘অনেকানি কপ্পসতসহস্সানী’’তিআদি. বহুকারন্তি বহুপকারং. উপসঙ্কমনন্তি অভিৰাদনাদিৰসেন উপগমনং. পযিরুপাসনন্তি উপট্ঠানন্তি.

৬৬. অজ্ঝোত্থরিতাতি মদ্দিতা. উক্কণ্ঠাতি রিঞ্চনা অনভিরতি অননুযোগো. সীলৰা ভিক্খু অত্তনো সীলখণ্ডভযেন সমাহিতো ৰিপস্সকো চ পচ্চযঘাতেন অরতিযা রতিযা চ সহিতা অভিভৰিতাৰ হোতীতি আহ ‘‘সীলাদিগুণযুত্তেনেৰা’’তিআদি.

চিত্তুত্রাসো ভাযতীতি ভযং. আরম্মণং ভাযতি এতস্মাতি ভযং. পুরিমৰারসদিসত্তা ৰুত্তনযমেৰাতি অতিদিসিত্ৰাপি পুন তং দস্সেতুং ‘‘সীলাদিগুণযুত্তো হী’’তিআদি ৰুত্তং. থেরস্স হেট্ঠা নিসিন্নত্তা দেৰতায দারকা সকভাৰেন সণ্ঠাতুং সুখেন ৰত্তিতুং অসক্কোন্তা অসমত্থা.

অধিকং চেতোতি অভিচেতো, উপচারজ্ঝানচিত্তং. তস্স পন অধিকতা পাকতিককামাৰচরচিত্তেহি সুন্দরতায সপটিপক্খতো ৰিসুদ্ধিযা চাতি আহ ‘‘অভিক্কন্তং ৰিসুদ্ধিচিত্ত’’ন্তি. অধিচিত্তন্তি সমাধিমাহ, সো চ উপচারসমাধি দট্ঠব্বো. ৰিৰেকজং পীতিসুখং, সমাধিজং পীতিসুখং, অপীতিজং ঝানসুখং, সতিপারিসুদ্ধিজং ঝানসুখন্তি চতুব্বিধম্পি ঝানসুখং পটিপক্খতো নিক্খন্ততং উপাদায ‘‘নেক্খম্মসুখ’’ন্তি ৰুচ্চতীতি আহ ‘‘নেক্খম্মসুখং ৰিন্দন্তী’’তি. ইচ্ছিতিচ্ছিতক্খণে সমাপজ্জিতুং সমত্থোতি ইমিনা তেসু ঝানেসু সমাপজ্জনৰসীভাৰমাহ, ‘‘নিকামলাভী’’তি পন ৰচনতো আৰজ্জনাধিট্ঠানপচ্চৰেক্খণৰসিযোপি ৰুত্তা এৰাতি ৰেদিতব্বা. সুখেনেৰ পচ্চনীকধম্মে ৰিক্খম্ভেত্ৰাতি এতেন তেসং ঝানসুখখিপ্পাভিঞ্ঞতঞ্চ দস্সেতি. ৰিপুলানন্তি ৰেপুল্লং পাপিতানং. ঝানানং ৰিপুলতা নাম সুভাৰিতভাৰেন চিরতরপ্পত্তি, সা চ পরিচ্ছেদানুরূপাৰ ইচ্ছিতব্ব্বাতি ‘‘ৰিপুলান’’ন্তি ৰত্ৰা ‘‘যথাপরিচ্ছেদেযেৰ ৰুট্ঠাতুং সমত্থোতি ৰুত্তং হোতী’’তি ¶ আহ. পরিচ্ছেদকালঞ্হি অপ্পত্ৰাৰ ৰুট্ঠহন্তো অকসিরলাভী ন হোতি যাৰদিচ্ছকং পৰত্তেতুং অসমত্থত্তা. ইদানি তেযেৰ যথাৰুত্তে সমাপজ্জনাদিৰসীভাৰে ব্যতিরেকৰসেন ৰিভাৰেতুং ‘‘একচ্চো হী’’তিআদি ৰুত্তং. তত্থ লাভীযেৰ হোতীতি ইদং পটিলদ্ধমত্তস্স ঝানস্স ৰসেন ৰুত্তং. তথাতি ইচ্ছিতিচ্ছিতক্খণে. পারিবন্ধিকেতি ৰসীভাৰস্স পচ্চনীকধম্মে. ঝানাধিগমস্স পন পচ্চনীকধম্মা পগেৰ ৰিক্খম্ভিতা, অঞ্ঞথা ঝানাধিগমো এৰ ন সিযা. কিচ্ছেন ৰিক্খম্ভেতীতি কিচ্ছেন ৰিসোধেতি. কামাদীনৰপচ্চৰেক্খণাদীহি কামচ্ছন্দাদীনং ৰিয ¶ অঞ্ঞেসম্পি সমাধিপারিবন্ধিকানং দূরসমুস্সারণং ইধ ৰিক্খম্ভনং ৰিসোধনঞ্চাতি ৰেদিতব্বং. নাল়িকাযন্তন্তি কালমাননাল়িকাযন্তং আহ.

ৰিসেসেন রূপাৰচরচতুত্থজ্ঝানং সব্বসো ৰসীভাৰাপাদিতং অভিঞ্ঞাপাদকন্তি অধিপ্পাযেনাহ ‘‘অভিঞ্ঞাপাদকে ঝানে ৰুত্তে’’তি. অরূপজ্ঝানম্পি পন অধিট্ঠানতায পাদকমেৰ চুদ্দসধা চিত্তপরিদমনেন ৰিনা তদভাৰতো. ‘‘এৰমভিঞ্ঞাপাদকে রূপাৰচরজ্ঝানে ৰুত্তে রূপাৰচরতায কিঞ্চাপি অভিঞ্ঞানং লোকিযৰারো আগতো’’তি অযঞ্হেত্থ অধিপ্পাযো. নন্তি অভিঞ্ঞাৰারং. চত্তারি…পে… অরিযমগ্গা সীলানং আনিসংসো সম্পন্নসীলস্সেৰ লাভতো. পরিযাদিযিত্ৰাতি গহেত্ৰা.

অঙ্গসন্ততাযাতি নীৰরণাদীনং পচ্চনীকধম্মানং সুদূরতরভাৰেন ঝানঙ্গানং ৰূপসন্ততায, নিব্বুতসব্বদরথপরিল়াহতাযাতি অত্থো, যতো তেসং ঝানানং পণীততরাদিভাৰো. আরম্মণসন্ততাযাতি রূপপটিঘাদিৰিগমনেন সণ্হসুখুমাদিভাৰপ্পত্তসন্তভাৰেন. যদগ্গেন হি নেসং ভাৰনাভিসমযসব্ভাৰিতসণ্হসুখুমাকারানি আরম্মণানি সন্তানি, তদগ্গেন ঝানঙ্গানং সন্ততা ৰেদিতব্বা. আরম্মণসন্ততায সন্ততা লোকুত্তরধম্মারম্মণাহি পচ্চৰেক্খণাহি দীপেতব্বা. ৰিমুত্তা ৰিসেসেন মুত্তা. যে হি ঝানধম্মা তথাপৰত্তপুব্বভাগভাৰনাহি তব্বিসেসতায সাতিসযং পটিপক্খধম্মেহি ৰিমুত্তিৰসেন পৰত্তন্তি, ততো এৰ তথাৰিমুত্ততায পিতু অঙ্কে ৰিস্সট্ঠঅঙ্গপচ্চঙ্গো ৰিয কুমারো নিরাসঙ্কভাৰেন আরম্মণে অধিমুত্তা চ পৰত্তন্তি, তে ৰিমোক্খাতি ৰুচ্চন্তি. তেনাহ ‘‘ৰিমোক্খাতি পচ্চনীকধম্মেহি ৰিমুত্তত্তা আরম্মণে চ অধিমুত্তত্তা’’তি ¶ . যদিপি আরম্মণসমতিক্কমৰসেন পত্তব্বানি আরুপ্পানি, ন অঙ্গাতিক্কমৰসেন, তথাপি যস্মা আরম্মণে অৰিরত্তস্স ঝানসমতিক্কমো ন হোতি, সমতিক্কন্তেসু চ ঝানেসু আরম্মণং সমতিক্কন্তমেৰ হোতি, তস্মা আরম্মণসমতিক্কমং অৰত্ৰা ‘‘রূপাৰচরজ্ঝানে অতিক্কমিত্ৰা’’তি ইচ্চেৰ ৰুত্তং. অতিক্কম্ম রূপেতি পাল়িযং ‘‘সম্পাদেতব্বা, পস্সিতব্বা’’তি ৰা কিঞ্চি পদং ইচ্ছিতব্বং, অসুতপরিকপ্পনেন পন পযোজনং নত্থীতি ‘‘সন্তাতি পদসম্বন্ধো’’তি ৰুত্তং. এৰঞ্চ কত্ৰা তেন ৰিরাগভাৰেন তেসং সন্ততাতি অযম্পি অত্থো ৰিভাৰিতো হোতি. রূপজ্ঝানাদীনং ৰিয নত্থি এতেসং আরম্মণভূতং ৰা ফলভূতং ৰা রূপন্তি অরূপা. অরূপা এৰ আরুপ্পা. তেনাহ ‘‘আরম্মণতো চ ৰিপাকতো চ রূপৰিরহিতা’’তি. নামকাযেনাতি সহজাতনামসমূহেন.

৬৭. সংযোজেন্তীতি বন্ধন্তি. কেহীতি আহ ‘‘খন্ধগতী’’তিআদি. অসমুচ্ছিন্নরাগাদিকস্স ¶ হি খন্ধাদীনং আযতিং খন্ধাদীহি সম্বন্ধো, সমুচ্ছিন্নরাগাদিকস্স পন তং নত্থি কতানম্পি কম্মানং অসমত্থভাৰাপত্তিতোতি. রাগাদীনং অন্ৰযতো চ সংযোজনট্ঠো সিদ্ধোতি আহ ‘‘খন্ধগতি…পে… ৰুচ্চন্তী’’তি. পরিক্খযেনাতি সমুচ্ছেদেন সব্বসো আযতিং অনুপ্পজ্জনেন. পটিপক্খধম্মানং অনৰসেসতো সৰনতো পীল়নতো সোতো, অরিযমগ্গোতি আহ ‘‘সোতোতি চ মগ্গস্সেতং অধিৰচন’’ন্তি. তং সোতং আদিতো পন্নো অধিগচ্ছীতি সোতাপন্নো, অট্ঠমকো. তেনাহ ‘‘তংসমঙ্গীপুগ্গলস্সা’’তি, পঠমমগ্গক্খণে পুগ্গলস্সাতি অধিপ্পাযো. ইধ পন পন্ন-সদ্দো ‘‘ফলসচ্ছিকিরিযায পটিপন্নো’’তিআদীসু (অ. নি. ৮.৫৯) ৰিয ৰত্তমানকালিকোতি আহ ‘‘মগ্গেন ফলস্স নামং দিন্ন’’ন্তি. অভীতকালিকত্তে পন সরসতোৰ নামলাভো সিযা. ৰিরূপং সদুক্খং সউপাযাসং নিপাতেতীতি ৰিনিপাতো, অপাযদুক্খে খিপনকো. ধম্মোতি সভাৰো. তেনাহ ‘‘অত্তান’’ন্তিআদি. কস্মাতি অৰিনিপাতধম্মতায কারণং পুচ্ছতি. অপাযং গমেন্তীতি অপাযগমনীযা. সম্বুজ্ঝতীতি সম্বোধি, অরিযমগ্গো. সো পন পঠমমগ্গস্স অধিগতত্তা অৰসিট্ঠো এৰ অধিগন্ধব্বভাৰেন ইচ্ছিতব্বোতি আহ ‘‘উপরিমগ্গত্তয’’ন্তি.

ৰণ্ণভণনত্থং ৰুত্তানি,ন পহাতব্বানীতি অধিপ্পাযো. ওল়ারিকানং রাগাদীনং সমুচ্ছিন্দনৰসেন পৰত্তমানো দুতিযমগ্গো অৰসিট্ঠানং তেসং তনুভাৰাপত্তিযা ¶ উপ্পন্নো নাম হোতীতি ৰুত্তং ‘‘রাগদোসমোহানং তনুত্তা’’তি. অধিচ্চুপ্পত্তিযাতি কদাচি করহচি উপ্পজ্জনেন. পরিযুট্ঠানমন্দতাযাতি সমুদাচারমুদুতায. অভিণ্হং ন উপ্পজ্জন্তি তজ্জস্স অযোনিসোমনসিকারস্স অনিবদ্ধভাৰতো. মন্দমন্দা উপ্পজ্জন্তি ৰিপল্লাসানং তপ্পচ্চযানঞ্চ মোহমানাদীনং মুদুতরভাৰতো. বহলাৰ উপ্পজ্জন্তি ৰত্থুপটিসেৰনতোতি অধিপ্পাযো. তেনাহ ‘‘তথা হী’’তিআদি.

সকিং আগমনধম্মোতি পটিসন্ধিৰসেন সকিংযেৰ আগমনসভাৰো. একৰারংযেৰ…পে… আগন্ত্ৰাতি ইমিনা পঞ্চসু সকদাগামীসু চত্তারো ৰজ্জেত্ৰা একোযেৰ গহিতোতি দস্সেন্তো ‘‘যোপি হী’’তিআদিমাহ. তত্থ য্ৰাযং পঞ্চমকো সকদাগামী ‘‘ইধ মগ্গং ভাৰেত্ৰা দেৰলোকে নিব্বত্তো, তত্থ যাৰতাযুকং ঠত্ৰা পুন ইধূপপজ্জিত্ৰা পরিনিব্বাযতী’’তি ৰুত্তো, তস্স একবীজিনা সদ্ধিং কিং নানাকরণন্তি? একবীজিস্স একা পটিসন্ধি, সকদাগামিস্স দ্ৰে পটিসন্ধিযোতি ইদং তেসং নানাকরণং. যস্স হি সোতাপন্নস্স একংযেৰ খন্ধবীজং, ন একং অত্তভাৰগ্গহণং, সো একবীজীতি.

হেট্ঠাতি ¶ ‘‘অমহগ্গতভূমিয’’ন্তি হেট্ঠা সম্বন্ধনেন. হেট্ঠাভাগস্স হিতাতি হেট্ঠাভাগিযা, তেসং. তানীতি ওরব্ভাগিযসংযোজনানি. কামাৰচরে নিব্বত্ততিযেৰ অজ্ঝত্তং সংযোজনত্তা. তথা হেস দূরতোপি আৰত্তিধম্মো এৰাতি দস্সেতুং গিলবল়িসমচ্ছাদযো উপমাভাৰেন ৰুত্তা. ওপপাতিকোতি ইমিনা গব্ভৰাসদুক্খাভাৰমাহ. তত্থ পরিনিব্বাযীতি ইমিনা সেসদুক্খাভাৰং. তত্থ পরিনিব্বানতা চস্স কামলোকে খন্ধবীজস্স অপুনারোহৰসেনেৰাতি দস্সেতুং ‘‘অনাৰত্তিধম্মো’’তি ৰুত্তং.

৬৮. কেৰলাতি লোকিযাভিঞ্ঞাহি অসম্মিস্সা. লোকিযপঞ্চাভিঞ্ঞাযোপি সীলানং আনিসংসো তদৰিনাভাৰতো. তাপি দস্সেতুং আকঙ্খেয্য চে…পে… এৰমাদিমাহাতি যোজনা. আসৰানং অনৰসেসপ্পহানতো অরহত্তমগ্গোযেৰ ৰিসেসতো ‘‘আসৰক্খযো’’তি ৰত্তব্বতং অরহতীতি ৰুত্তং ‘‘আসৰক্খযে কথিতে’’তি, অঞ্ঞথা সব্বাপি ছল়ভিঞ্ঞা আসৰক্খযো এৰাতি. ইমেসং গুণানন্তি লোকিযাভিঞ্ঞানং ¶ . যথা পুরিসস্স মুণ্ডিতং সীসং সিখাৰিরহিতত্তা ন সোভতি, এৰং দেসনায সীসভূতাপি অগ্গমগ্গকথা লোকিযাভিঞ্ঞারহিতা ন সোভতীতি আহ ‘‘অযং কথা মুণ্ডাভিঞ্ঞাকথা নাম ভৰেয্যা’’তি. ইদ্ধিৰিকুব্বনাতি ইদ্ধি চ ৰিকুব্বনা চ. ৰিকুব্বনগ্গহণেন চেত্থ ৰিকুব্বনিদ্ধিমাহ, ইদ্ধিগ্গহণেন তদঞ্ঞং সব্বঞ্চ অভিঞ্ঞাকিচ্চং. যুত্তট্ঠানেযেৰাতি লোকিযাভিঞ্ঞানং নিব্বত্তনস্স ৰিয দেসনায যুত্তট্ঠানেযেৰ. এতেন ন কেৰলং দেসনক্কমেনেৰাযং দেসনা, অথ খো পটিপত্তিক্কমেনপীতি দস্সেতি. ৰিসুদ্ধিমগ্গে (ৰিসুদ্ধি. ২.৩৬৯) ৰুত্তা, তস্মা তত্থ ৰুত্তনযেনেৰ ৰেদিতব্বাতি অধিপ্পাযো.

৬৯. আসৰানং খযাতি হেট্ঠিমমগ্গেন খেপিতাৰসিট্ঠানং আসৰানং অরহত্তমগ্গেন সমুচ্ছিন্দনতো. যস্মা অরহত্তমগ্গো ন কেৰলং আসৰেযেৰ খেপেতি, অথ খো অৰসিট্ঠে সব্বকিলেসেপি, তস্মা আহ ‘‘সব্বকিলেসানং খযা’’তি. লক্খণমত্তঞ্হেত্থ আসৰগ্গহণং, আসৰানং আরম্মণভাৰস্সপি অনুপগমনতো অনাসৰং. যস্মা পন তত্থ আসৰানং লেসোপি নত্থি, তস্মা ৰুত্তং ‘‘আসৰৰিরহিত’’ন্তি. সমাধি ৰুত্তো চেতোসীসেন যথা ‘‘চিত্তং পঞ্ঞঞ্চ ভাৰয’’ন্তি (সং. নি. ১.২৩, ১৯২; পেটকো. ২২; মি. প. ২.১.৯) অধিপ্পাযো. রাগতো ৰিমুত্তত্তা অৰিজ্জায ৰিমুত্তত্তাতি ইদং উজুৰিপচ্চনীকপটিপ্পস্সদ্ধিদস্সনং দট্ঠব্বং, ন তদঞ্ঞেসং পাপধম্মানং অপ্পটিপ্পস্সদ্ধত্তা. ইদানি তমেৰ সমাধিপঞ্ঞানং রাগাৰিজ্জাপটিপক্খতং আগমেন দস্সেতুং ‘‘ৰুত্তং চেত’’ন্তিআদি ৰুত্তং. সমথফলন্তি সমথস্স ফলং লোকিযসমথভাৰনায হি ৰিপস্সনাগতায আহিতফলস্স লোকুত্তরসমথস্স সরিক্খকফলো চেতোৰিমুত্তি. ৰিপস্সনাফলন্তি এত্থাপি এসেৰ নযো. অত্তনোযেৰাতি সুতমযঞাণাদিনা ৰিয পরপচ্চযতং ¶ নযগ্গাহঞ্চ মুঞ্চিত্ৰা পরতোঘোসানুগতভাৰনাধিগমভূততায অত্তনোযেৰ পঞ্ঞায পচ্চক্খং কত্ৰা সযম্ভুঞাণভূতাযাতি অধিপ্পাযো. তেনাহ ‘‘অপরপ্পচ্চযেন ঞত্ৰা’’তি.

সব্বম্পি তন্তি সব্বম্পি সত্তরসৰিধং তং যথাৰুত্তং সীলানিসংসং. যথা আনিসংসৰন্তে সম্মদেৰ সম্পাদিতে তদানিসংসা দস্সিতা এৰ হোন্তি তদাযত্তভাৰতো, এৰং আনিসংসপধানযোগ্যভাৰেন দস্সিতে ¶ তদানিসংসা দস্সিতা এৰ হোন্তীতি আহ ‘‘সম্পিণ্ডেত্ৰা দস্সেন্তো’’তি. ৰুত্তস্সেৰ অত্থস্স পুনৰচনং নিগমনন্তি ৰুত্তং ‘‘নিগমনং আহা’’তি. পুব্বেতি দেসনারম্ভে. এৰং ৰুত্তন্তি ‘‘সম্পন্নসীলা’’তি এৰমাদিনা আকারেন ৰুত্তং. ইদং সব্বম্পীতি ইদং ‘‘সম্পন্নসীলা’’তিআদিকং সব্বম্পি ৰচনং. এতং পটিচ্চাতি এতং সম্পন্নসীলস্স ভিক্খুনো যথাৰুত্তসত্তরসৰিধানিসংসভাগিতং সন্ধায ৰুত্তং. ইদমেৰ হি ‘‘ইতি যং তং ৰুত্তং, ইদমেতং পটিচ্চ ৰুত্ত’’ন্তি ৰচনং সন্ধায ‘‘সব্বম্পি তং সীলানিসংসং সম্পিণ্ডেত্ৰা দস্সেন্তো’’তি ৰুত্তং. এত্থআদিতো ছহি আনিসংসেহি পরিত্তভূমিকা সম্পত্তি গহিতা, তদন্তরং পঞ্চহি লোকিযাভিঞ্ঞাহি চ মহগ্গতভূমিকা, ইতরেহি লোকুত্তরভূমিকাতি এৰং চতুভূমিকসম্পদানিসংসসীলং নামেতং মহন্তং মহানুভাৰং, তস্মা তংসম্পাদনে সক্কচ্চকারিতা অপ্পমত্তেন ভৰিতব্বং.

আকঙ্খেয্যসুত্তৰণ্ণনায লীনত্থপ্পকাসনা সমত্তা.

৭. ৰত্থসুত্তৰণ্ণনা

৭০. ছাদেতব্বং ¶ ঠানং ৰসতি পটিচ্ছাদেতীতি ৰত্থং. যং সমানং ৰিয ন সব্বসো মিনোতি, মানস্স পন সমীপে, তং উপমানং. উপমীযতি এতাযাতি উপমা, উপমায বোধকৰচনং উপমাৰচনং. কত্থচি সুত্তে. অত্থন্তি উপমিযত্থং. পঠমং উপমং ৰত্ৰা তদনন্তরং অত্থং ৰত্ৰা পুন উপমং ৰদন্তো ‘‘উপমায অত্থং পরিৰারেত্ৰা দস্সেতী’’তি ৰুত্তো. অত্থেন উপমং পরিৰারেত্ৰাতি এত্থাপি এসেৰ নযো. ইদানি তে চত্তারোপি পকারে সুত্তে আগতনযেনেৰ দস্সেন্তো ‘‘সেয্যথাপিস্সু, ভিক্খৰে’’তিআদিমাহ. তত্থ দ্ৰে অগারাতি দ্ৰে পটিৰিস্সকঘরা. সদ্ৰারাতি সম্মুখদ্ৰারা.

স্ৰাযন্তি সো অযং এৰং উপমাদস্সনৰসেনপি নানানযেনপি ধম্মদেসকো ভগৰা. একচ্চানং ৰেনেয্যানং অত্থস্স সুখাৰবোধো পঠমং উপমাদস্সনে হেতু, এৰং পঠমং অত্থদস্সনে, উপমায অত্থপরিৰারণে, অত্থেন উপমাপরিৰারণে চা’’তি ইমমত্থং দস্সেতি ‘‘এস নযো সব্বত্থা’’তি ¶ ইমিনা. ধম্মধাতুযাতি সব্বঞ্ঞুতঞ্ঞাণস্স. তঞ্হি ধম্মধাতুপরিযাপন্নত্তা যথাৰুত্তধম্মে চ সব্বেপি ঞেয্যধম্মে চ পদহতি যথাসভাৰতো বুজ্ঝতি বোধেতি চাতি ধাতু, ধীযন্তি ৰা ধম্মা এতায সব্বাকারতো ঞাযন্তি ঞাপিযন্তি চাতি ধম্মধাতু. তস্সা পন সুট্ঠু সচ্চসম্পটিৰেধৰসেন লদ্ধত্তা সুপ্পটিৰিদ্ধত্তাতি, যদগ্গেন ৰা ঞেয্যং তায সুপ্পটিৰিদ্ধং, তদগ্গেন সাপিস্স সুপ্পটিৰিদ্ধা এৰাতি আহ ‘‘সুপ্পটিৰিদ্ধত্তা’’তি.

পকতিপরিযোদাতস্স চিত্তস্স আগন্তুকেহি উপক্কিলেসেহি উপক্কিলিট্ঠভাৰদস্সনত্থং সংকিলিট্ঠৰত্থদস্সনন্তি কত্ৰা ৰুত্তং ‘‘পকতিপরিসুদ্ধং ৰত্থ’’ন্তি. রজাদিনাতি এত্থরজো নাম রেণু. আদি-সদ্দেন অণুতজ্জারিধূমাদিকং ৰত্থস্স অপরিসুদ্ধিকারণং সঙ্গণ্হাতি. সব্বসো কিলিস্সতি ৰিনস্সতি ৰিসুদ্ধি এতেনাতি সংকিলেসো, তেন সংকিলেসেন পংসুরজাদিনা সংকিলিট্ঠং ৰণ্ণৰিনাসনেন ৰিদূসিতং. মলং মসি. জল্লিকা ৰুচ্চতি লোণপটলাদি ছৰিযা উপরি ঠিতং সরীরমলং. আদিসদ্দেন সরীরজল্লমেৰ অস্সুখেল়সিঙ্ঘাণিকাদিকং তদঞ্ঞমলং সঙ্গণ্হাতি. গহিতত্তাতি পরিযোনন্ধনৰসেন গহিতত্তা. রজন্তি সত্তা তেনাতি রঙ্গং, রঙ্গমেৰ রঙ্গজাতং যথা কোপমেৰ কোপজাতং. উপনামেয্যাতি পক্খিপেয্য. নীলকত্থাযাতি নীলৰণ্ণত্থায. পলাসনীলাদিকেতি আদি-সদ্দেন কাল়সামাদিং সঙ্গণ্হাতি. হলিদ্দিককুধসেলাদিকে পীতকরঙ্গে. লাখাপত্তঙ্গরসাদিকে ¶ লোহিতকরঙ্গে. মহারজনলোদ্দকন্দুলাদিকে মন্দরত্তরঙ্গে. দুট্ঠু রজিতৰণ্ণং অপভস্সরং. তেনাহ ‘‘অপরিসুদ্ধৰণ্ণমেৰস্সা’’তি. ঈদিসন্তি দুরত্তৰণ্ণং. তস্মিং ৰত্থে রঙ্গজাতং সযং সুপরিসুদ্ধং সমানং কিস্স হেতু কেন রত্তৰণ্ণং অপরিসুদ্ধং হোতীতি রঙ্গজাতস্স নিদ্দোসতং ৰদতি. তেনাহ ‘‘যস্মা পনা’’তিআদি.

সংকিলেসপক্খং দস্সেন্তেন অসংকিলিট্ঠমেৰ ৰত্থং উদাহরিতব্বন্তি পাকটোযমত্থো, সংকিলিট্ঠৰত্থনিদস্সনেন পন ‘‘সিযা নু খো অঞ্ঞোপি কোচি ৰিসেসো’’তি অধিপ্পাযেন পুচ্ছতি ‘‘কস্মা পনা’’তিআদিনা. ইতরো অত্থৰিসেসোতি দস্সেন্তো ‘‘ৰাযামমহপ্ফলদস্সনত্থ’’ন্তিআদিমাহ. এত্থ চ সংকিলিট্ঠচিত্তৰিসোধনৰিধানে সংকিলিট্ঠৰত্থং নিদস্সতব্বন্তি পটিঞ্ঞা, ৰাযামমহপ্ফলদস্সনত্থন্তি হেতুঅত্থো. যথা হীতিআদি অন্ৰযত্থো. ন তত্থ জাতিকাল়কে ৰিযাতিআদি ব্যতিরেকত্থো. সদিসূদাহরণং পন মলগ্গহিতকংসপাতিআদি দট্ঠব্বং. এৰং চিত্তম্পীতিআদি ¶ ওপম্মত্থস্স উপমেয্যউপনযনং. তত্থ পকতিযাতি অকিত্তিমেন সভাৰেন. তন্তি চিত্তং. সামঞ্ঞগ্গহণঞ্চেতং চিত্তভাৰাৰিসেসতো. তেনাহ ‘‘সকলেপী’’তি. পণ্ডরমেৰ ন সংকিলিট্ঠং সংকিলেসেহি অসমন্নাগতভাৰতো. ননু কিরিযামযচিত্তেহি ৰিপাকসন্তানে ৰিসেসাধানং লব্ভতি, অঞ্ঞথা কতৰিনাসা কতব্ভাগমা আপজ্জেয্যুং? কিঞ্চাপি লব্ভতি, তস্স সংকিলেসো ৰট্টুপনিস্সযো, অসুদ্ধি ৰা ন হোতি, অসংকিলেসো ৰিৰট্টুপনিস্সযো, ৰিসুদ্ধি ৰা ন হোতি এৰ. উপক্কিলিট্ঠন্তি পনেতং উপক্কিলেসনারহস্স চিত্তস্স ৰসেন ৰুত্তং, ন ৰিপাকপবন্ধস্স. তেনাহ ‘‘পভস্সরমিদং ভিক্খৰে চিত্ত’’ন্তি, ‘‘পণ্ডরমেৰা’’তি চ. তঞ্চ খোতি পন সকসন্ততিপরিযাপন্নতায নেসং কেৰলং একত্তনযৰসেন ৰুত্তং, ন ৰিপাকধম্মানং কিলেসাসমঙ্গিভাৰতো. অথ ৰা উপক্কিলিট্ঠন্তি ইমিনা উপক্কিলেসহেতু তত্থ ৰিজ্জমানং ৰিসেসাধানমাহ, ন ‘‘সংকিলিট্ঠা ধম্মা’’তিআদীসু (ধ. স. ৭৭.দুকমাতিকা) ৰিয তংসমঙ্গিতন্তি দট্ঠব্বং. ৰিসোধিযমানন্তি ৰিপস্সনাপঞ্ঞায অনুক্কমেন সব্বুপক্কিলেসেহি ৰিমোচিযমানং. সক্কা অগ্গমগ্গক্খণে পভস্সরতরং কাতুং, যতো ন পুন উপক্কিলিস্সতি. এৰন্তিআদি ৰুত্তস্সেৰত্থস্স নিগমনং.

দুট্ঠগতিপরিপূরণৰসেন পটিপজ্জনং পটিপত্তি. সা এৰ কিলেসদরথপরিল়াহাদিৰসেন উপাযাসদুক্খা, কুচ্ছিতা ৰা গতি পৰত্তি, দুগ্গতিহেতূতি ৰা দুগ্গতি, দুগ্গতিযা পন পটিপত্তিযা গন্ধব্বতো, তস্সা ৰা নিপ্ফন্নভাৰতো কুচ্ছিতো, দুক্খা চ গতীতি দুগ্গতি. সংকিলিট্ঠচিত্তোতি ইদং তস্সা পটিপত্তিযা দুগ্গতিভাৰদস্সনত্থং, ন ৰিসেসনত্থং. ন হি অসংকিলিট্ঠচিত্তস্স পাণঘাতাদিৰসেন পৰত্তি. সংকিলিট্ঠচিত্তোতি লাভাসায সব্বসো কিলিট্ঠচিত্তো ¶ . দূতেয্যপহিণগমনন্তি দূতেয্যং ৰুচ্চতি দুতকম্মং, গিহীনং পণ্ণং ৰা সাসনং ৰা গহেত্ৰা তত্থ তত্থ গমনং, পহিণগমনং ঘরাঘরং পেসিতস্স খুদ্দকগমনং, দূতেয্যগমনং পহিণগমনঞ্চ গচ্ছতি. ৰেজ্জকম্মন্তি অননুঞ্ঞাতে ঠানে লাভাসায গহট্ঠানং ভেসজ্জং করোতি. সঙ্ঘভেদকথা পরতো আগমিস্সতি. ৰেল়ুদানাদীহীতি ৰেল়ুদানপত্তদানপুপ্ফদানাদীহি মিচ্ছাজীৰেন জীৰিকং কপ্পেতি. সকলম্পীতি ‘‘অত্থি অনাচারো, অত্থি অগোচরো’’তিআদিনা ৰিভঙ্গে (ৰিভ. ৫১৩, ৫১৪) আগতং সব্বম্পি অনাচারং অগোচরঞ্চ চরণৰসেন পরিপূরেতি.

‘‘নিরযম্পি ¶ …পে… পেত্তিৰিসযম্পি গচ্ছতী’’তি ৰত্ৰা তত্থ পেত্তিৰিসযগমনং দস্সেন্তো ‘‘সমণযক্খো নাম হোতী’’তিআদিমাহ.

সুক্কপক্খে পরিসুদ্ধন্তি সব্বসো ৰিসুদ্ধং অসংকিলিট্ঠং. পরিসুদ্ধত্তা এৰ পরিযোদাতং, পভস্সরন্তি অত্থো. সুরত্তৰণ্ণমেৰস্সাতি সুট্ঠু রত্তৰণ্ণমেৰ অস্স. পরিসুদ্ধৰণ্ণমেৰস্সাতি নীলৰণ্ণোপিস্স পরিসুদ্ধো চ ভৰেয্যাতি এৰমাদিং সন্ধাযাহ ‘‘কণ্হপক্খে ৰুত্তপচ্চনীকেনেৰ ৰেদিতব্বা’’তি. রঙ্গজাতন্তিআদি পন তত্থ ৰুত্তৰসেনেৰ ৰেদিতব্বং. পটিপত্তিসুগতিআদীসু যং ৰত্তব্বং, তং পটিপত্তিদুগ্গতিআদীসু ৰুত্তৰিপরিযাযেন ৰেদিতব্বং. পরিসুদ্ধচিত্তোতি সুদ্ধাসযো. দস কুসলকম্মপথে পরিপূরেতীতি ইদং কণ্হপক্খে ‘‘দস অকুসলকম্মপথে পরিপূরেতী’’তি ৰুত্তস্স পটিপক্খদস্সনৰসেন ৰুত্তং. যথা হি তত্থ অভিজ্ঝাব্যাপাদমিচ্ছাদিট্ঠিগ্গহণেন কম্মপথসংসন্দননযেন কম্মপথং অপ্পত্তায চ অগারিযস্স তথারূপায মিচ্ছাপটিপত্তিযা সঙ্গহো ইচ্ছিতো, এৰং ইধাপি অনভিজ্ঝাঅব্যাপাদসম্মাদিট্ঠিগ্গহণেন অলোভাদোসামোহৰসেন পৰত্তা অগারিযস্স সম্মাপটিপত্তি সঙ্গহিতাতি দট্ঠব্বং, ন কম্মপথপ্পত্তাৰাতি. মনুস্সমহন্ততন্তি জাতিরূপভোগাধিপতেয্যাদিৰসেন মনুস্সেসু মহন্তভাৰং. দসহি ঠানেহি অঞ্ঞেসং দেৰানং অভিভৰো দেৰমহন্ততা. পটিপত্তি সুগতিযা ভাজিযমানত্তা ‘‘অনাগামিমগ্গং ভাৰেতী’’তি তথা অনাগামিভাৰনং পাপেত্ৰা ঠপিতা. গহিতগ্গহণেন সুখানুভৰট্ঠানস্স অধিপ্পেতত্তা তদভাৰতো অসঞ্ঞিভৰং অনাদিযন্তো ‘‘দসসু ৰা ব্রহ্মভৰনেসূ’’তিআদিমাহ.

৭১. সকভণ্ডে ছন্দরাগো অভিজ্ঝাযনট্ঠেন অভিজ্ঝা, অভিজ্ঝাযনাতি অত্থো. পরভণ্ডে ছন্দরাগো ৰিসমং লুব্ভতীতি ৰিসমলোভো. এৰম্পি অভিজ্ঝাৰিসমলোভানং ৰিসেসো হোতীতি দস্সেন্তো ‘‘অথ ৰা’’তিআদিমাহ. তত্থ অত্তনো সন্তকং তংসদিসঞ্চ যুত্তট্ঠানং. যং যাচিতং, অপ্পকসিরেন ৰা সক্কা লদ্ধুং, তং পত্তট্ঠানং. পরদারগরুদারাতি অযুত্তট্ঠানং. যং অপত্থনিযং, যস্স ¶ ৰা পত্থনায ব্যসনং আপজ্জতি, তং অপ্পত্তট্ঠানং. থেরোতি মহাসঙ্ঘরক্খিতত্থেরো, যেন অট্ঠকথা পোত্থকং আরোপিতা. সো হি অন্তেৰাসিকেসু সাকচ্ছন্তেসু এৰমাহ. সোপি ইমস্মিংযেৰ সুত্তে ৰিনিব্ভোগো ন লব্ভতি চিত্তসংকিলেসস্স অধিপ্পেতত্তা. তেনাহ ‘‘যুত্তে ৰা’’তিআদি. অযোনিসোমনসিকারৰসেন ¶ উপ্পজ্জনতো সম্পত্তি আযতিঞ্চ দুক্খস্সেৰ উপ্পাদনতো ন কোচি লোভো অৰিসমো নাম. অভিজ্ঝাযনট্ঠেনাতি যস্স কস্সচি আরম্মণস্স যুত্তস্স অযুত্তস্স অপ্পত্তস্স চ অভিজ্জাযনৰসেন অভিপত্থনাৰসেন চ পৰত্তা তণ্হা অভিজ্ঝাতি লোভতো নিব্বিসেসন্তি দস্সেতি. তেনাহ ‘‘একত্থমেতং ব্যঞ্জনমেৰ নান’’ন্তি. দূসেতীতি সভাৰসন্তং অসংকিলেসং ৰিনাসেতি অৰিসুদ্ধং করোতি. তেনাহ ‘‘ওভাসিতুং ন দেতী’’তি. ‘‘ইমে সত্তা উচ্ছিজ্জন্তু ৰিনস্সন্তূ’’তি সত্তেসু ব্যাপজ্জনাকারপ্পৰত্তিযা ব্যাপাদো নৰৰিধআঘাতৰত্থুসম্ভৰো ৰুত্তো. কোধো পন সঙ্খারেসুপি পৰত্তনতো দসৰিধআঘাতৰত্থুসম্ভৰো ৰুত্তো. উভযম্পি পটিঘমেৰ, পৰত্তনানত্ততো ভিন্দিত্ৰা ৰুত্তো. কুজ্ঝনৰসেনেৰ চিত্তপরিযোনন্ধনো ‘‘অক্কোচ্ছি মং অৰধি ম’’ন্তিআদিনা.

সুট্ঠু কতং করণং সুকতং, তস্স পুব্বকারিতালক্খণস্স গুণস্স ৰিনাসনো উদকপুঞ্ছনিযা ৰিয সরীরানুগতং উদকং পুঞ্ছন্তো মক্খো. তথা হি সো পরেসং গুণানং মক্খনট্ঠেন ‘‘মক্খো’’তি ৰুচ্চতি. ইদানি অনগারিযস্স ৰাতিআদিনা সঙ্খেপেন ৰুত্তত্থং ৰিত্থারেন দস্সেতুং ‘‘অনগারিযোপী’’তিআদি ৰুত্তং. নিসিন্নকথাপরিকথাদিৰসেন ধম্মস্স কথা ধম্মকথানযো, একত্তাদিধম্মনীতি এৰ ৰা. পকরণং সত্ত পকরণানি, তত্থ কোসল্লং ধম্মকথানযপকরণকোসল্লং. আদি-সদ্দেন ৰিনযক্কমে চতূসু মহানিকাযেসু চ কোসল্লং সঙ্গণ্হাতি. অচিত্তীকতোতি চিত্তীকাররহিতো. যথা চাযন্তি ইমিনা যথাযং মক্খো চিত্তং দূসেতি, এৰং পল়াসোপি চিত্তং দূসেতি, তস্মা উপক্কিলেসোতি দস্সেতি. অনিযতা গতি নিযামোক্কমনাভাৰতো. আদি-সদ্দেন ‘‘রত্তঞ্ঞূ চিরপব্বজিতে পুগ্গলে অজ্ঝোত্থরিত্ৰা ‘ত্ৰম্পি ইমস্মিং সাসনে পব্বজিতো, অহম্পি পব্বজিতো, ত্ৰম্পি সীলমত্তে ঠিতো অহম্পী’তি’’ এৰমাদীনং সঙ্গহো. যুগগ্গাহগাহীতি ‘‘তৰ ৰা মম ৰা কো ৰিসেসো’’তি অসমম্পি সমং কত্ৰা সমধুরগ্গাহগণ্হনকো. খীযনা উসূযনা. অত্তনো সম্পত্তিযা নিগূহনং তস্স পরেহি সাধারণভাৰাসহনেন হোতীতি ‘‘পরেহি সাধারণভাৰং অসহমানং’’ইচ্চেৰ ৰুত্তং. কারণে হি গহিতে ফলম্পি গহিতমেৰ হোতীতি. অঞ্ঞথা অত্তনো পৰেদনকপুগ্গলো কেরাটিকো, ‘‘নেকতিকৰাণিজো’’তিপি ৰদন্তি. সপ্পমুখা ¶ মচ্ছৰালা একা মচ্ছজাতি আযতনমচ্ছো. তেনাহ ‘‘আযতনমচ্ছো নামা’’তিআদি. বদ্ধচরোতি অন্তেৰাসী.

সব্বসো ¶ অমদ্দিতসভাৰেন ৰা তভরিতভত্তসদিসস্স থদ্ধভাৰস্স অনোনমিতদণ্ডসদিসতায পগ্গহিতসিরঅনিৰাতৰুত্তিকারস্স চ করণতো ৰা তভরিত…পে… করণো. তদুত্তরিকরণোতি যং যেন কতং দুচ্চরিতং ৰা সুচরিতং ৰা, তদুত্তরি, তস্স দ্ৰিগুণং ৰা করণো. অত্তনো মণ্ডনাদিঅত্থং পরেন কতং অলঙ্কারাদিং. পরিযাপুণাতি ৰা কথেতি ৰা অত্তনো বলানুরূপং. কামং নিকাযদ্ৰযগ্গহণাদিৰসেন পৰত্তো সেৰিতব্বমানো এৰ, তথাপিস্স সংকিলেসপক্খত্তা ৰুত্তং ‘‘মানং অনিস্সাযা’’তি.

উণ্ণতিৰসেনাতি ‘‘সেয্যোহমস্মী’’তিআদিনা চিত্তস্স পগ্গহণৰসেন. পুব্বে কেনচি অত্তানং সদিসং কত্ৰা পচ্ছা ততো অধিকতো দহনতো উপ্পজ্জনকো অতিমানো. মদগ্গহণাকারো জাতিআদিং পটিচ্চ মজ্জনাকারো, সোপি অত্থতো মানো এৰ. পমাদো তথাপৰত্তো চিত্তুপ্পাদো.

তস্মা লোভমাদিং কত্ৰা দস্সেতীতি লোভস্স আদিতো গহণে কারণং ৰিভাৰেতুকামো পুচ্ছতি. পঠমুপ্পত্তিতোতি তত্থ তত্থ ভৰে সব্বপঠমং উপ্পজ্জনতো. সত্তানঞ্হি যথাধিগতং ঝানাদিৰিসেসং আরব্ভ পচ্চৰেক্খণা ৰিয যথালদ্ধং উপপতিভৰং আরব্ভ নিকন্তি এৰ. তেনাহ ‘‘সব্বসত্তান’’ন্তিআদি. যথাসম্ভৰং ইতরেতি ইতরে ব্যাপাদাদযো যথাপচ্চযং উপ্পজ্জন্তি, লোভস্স ৰিয আদিতো অসুকস্স অনন্তরং অসুকোতি ৰা ন নেসং নিযমো অত্থীতি অত্থো. কিং পন এতে সোল়সেৰ চিত্তস্স উপক্কিলেসা, উদাহু অঞ্ঞেপি সন্তীতি অনুযোগং সন্ধায অঞ্ঞেপি সন্তীতি দস্সেন্তো ‘‘ন চ এতে’’তিআদিমাহ. যদি এৰং কস্মা এত্তকা এৰ ইধ ৰুত্তাতি. নযদস্সনৰসেনাতি দস্সেন্তো আহ ‘‘এতেন পন…পে… ৰেদিতব্বা’’তি. তেন থিনমিদ্ধউদ্ধচ্চকুক্কুচ্চ-ৰিচিকিচ্ছা-অত্তুক্কংসন-পরৰব্ভনছম্ভিতত্তা- ভীরুকতা-অহিরিকানোত্তপ্প-অত্তিচ্ছতা-পাপিচ্ছতা-মহিচ্ছতাদযো সঙ্গহিতাতি ৰেদিতব্বং.

৭২. সংকিলেসং ¶ দস্সেত্ৰাতি সংকিলিট্ঠৰত্তনিদস্সনেন সঙ্খেপেন ৰুত্তং সংকিলেসং ৰিভাগেন দস্সেত্ৰা. ৰোদানং দস্সেন্তোতি এত্থাপি এসেৰ নযো. এৰং জানিত্ৰাতি ‘‘অভিজ্ঝা ৰিসমলোভো একন্তেনেৰ চিত্তস্স উপ্পক্কিলেসো’’তি সভাৰতো সমুদযতো নিরোধতো নিরোধূপাযতো চ পুব্বভাগপঞ্ঞায চেৰ হেট্ঠিমমগ্গদ্ৰযপঞ্ঞায চ জানিত্ৰা. পজহতীতি এত্থ অচ্চন্তপ্পহানমেৰ অধিপ্পেতন্তি দস্সেন্তো ‘‘সমুচ্ছেদপ্পহানৰসেন অরিযমগ্গেন পজহতী’’তি আহ. অরিযমগ্গেনাতি অনাগামিমগ্গেন. তেন হি পহানং ইধ সব্বৰারেসু অধিপ্পেতং. কিলেসপটিপাটি ইধ কিলেসানং দেসনাক্কমো. মগ্গপটিপাটিপন চতুন্নং অরিযমগ্গানং দেসনাক্কমোপি তায দেসনায পটিপজ্জনক্কমোপি ¶ তায পটিপত্তিযা উপ্পত্তিক্কমোপি. তত্থ যে যে কিলেসা যেন যেন মগ্গেন পহীযন্তি, মগ্গপটিপাটিং অনোলোকেত্ৰা তেসং তেসং কিলেসানং তেন তেন মগ্গেন পহানদস্সনং কিলেসপটিপাটি ন কিলেসানং উপ্পত্তিক্কমো ইধ দেসনাক্কমো চাতি দস্সেন্তো ‘‘অভিজ্ঝা ৰিসমলোভো’’তিআদিমাহ. যেন যেন পন মগ্গেন যে যে কিলেসা পহীযন্তি মগ্গানুপুব্বিযা, তেন তেন মগ্গেন তেসং তেসং কিলেসানং পহানদস্সনং মগ্গপটিপাটিযা পহানদস্সনন্তি দস্সেন্তো ‘‘সোতাপত্তিমগ্গেনা’’তিআদিমাহ.

ইমস্মিং পন ঠানেতি ‘‘স খো সো, ভিক্খৰে, ভিক্খূ’’তিআদিনা আগতো ইমস্মিং পহানৰারে. ইমে কিলেসাতি ইমে যথাৰুত্তা কিলেসা. সোতাপত্তিমগ্গৰজ্ঝা ৰা হোন্তু সেসমগ্গৰজ্ঝা ৰাহেট্ঠা দস্সিতমগ্গপটিপাটিৰসেন. তত্থ পন যে ততিযমগ্গৰজ্ঝা, তেসং অনাগামিমগ্গেনেৰ পহানে ৰত্তব্বং নত্থি, যেসং পনেত্থ হেট্ঠিমমগ্গৰজ্ঝানং ইধ সঙ্গহে কারণং পচ্ছা ৰত্তুকামেন অগ্গমগ্গৰজ্ঝানং অনাদিযিত্ৰা কস্মা ততিযমগ্গৰজ্ঝানমেৰ গহণং কতন্তি আহ ‘‘অযমেত্থ পৰেণিমগ্গাগতো সম্ভৰো’’তি, অযং ইমস্স সুত্তস্স এতস্মিং ঠানে আচরিযপৰেণিযা কথামগ্গো ততো আগতো অত্থসম্ভৰো অত্থতত্ৰন্তি অত্থো. তত্থ হেট্ঠিমমগ্গৰজ্ঝানং ইধ সঙ্গহে কারণং পচ্ছা ৰত্তুকামো অগ্গমগ্গৰজ্ঝানং অগ্গহণে যুত্তিং দস্সেন্তো ‘‘সো চা’’তিআদিমাহ. তেনাতি চতুত্থমগ্গেন. সেসানন্তি ব্যাপাদাদীনং ¶ . যেপীতি মক্খাদিকে সন্ধাযাহ. তংসমুট্ঠাপকচিত্তানন্তি তেসং মক্খাদীনং সমুট্ঠাপকচিত্তুপ্পাদানং. তত্থ মক্খ-পল়াস-ইস্সা-মচ্ছরিয-সমুট্ঠাপকং পটিঘদ্ৰযচিত্তং, ৰিসেসতো পঞ্চকামগুণলোভেন সঠো মাযাৰী চ হোতি, পঞ্চকামগুণিকরাগো চ অনাগামিমগ্গেনেৰ নিরৰসেসতো পহীযতি, তস্মা ৰুত্তং ‘‘তংসমুট্ঠাপকচিত্তানং অপ্পহীনত্তা’’তি. তেপি সুপ্পহীনা হোন্তীতি সম্বন্ধো. তন্তি পঠমমগ্গেনেৰ পহানং পুব্বাপরেন ন সন্ধিযতি ‘‘যথোধি খো’’তি এত্থ ওধিৰচনস্স মগ্গত্তযৰাচকত্তা. রতনত্তযে অৰেচ্চপ্পসাদো নাম অরিযকন্তসীলং ৰিয সোতাপন্নস্স অঙ্গানি, তে চ পহানতো পচ্ছা নিদ্দিট্ঠা, তস্মা ইধ ৰুত্তপ্পহানং ৰিক্খম্ভনপহানমেৰাতি কেচি ৰদন্তি. তেসং ইচ্ছামত্তমেৰ যথাৰুত্তপহানস্সেৰ ৰসেন অৰেচ্চপ্পসাদানং ওধিসো পহানস্স ৰিভাৰিতত্তা, স্ৰাযমত্থো হেট্ঠা যুত্তিতোপি পকাসিতোযেৰ.

৭৪. একমেকেন পদেন যোজেতব্বং, যতো একমেকস্সপি উপক্কিলেসস্স সভাৰাদিতো দস্সনং নিয্যানমুখং হোতি, তথা চেৰ হেট্ঠা সংৰণ্ণিতং. অনাগামিমগ্গৰসেন পহানং ৰত্ৰা পসাদস্স উদ্ধটত্তা ৰুত্তং ‘‘অনাগামিমগ্গেন লোকুত্তরপ্পসাদো আগতো’’তি. যদি এৰং কস্মা ‘‘লোকিযো উপ্পজ্জতী’’তি ৰুত্তন্তি? ‘‘ইতিপি সো ভগৰা’’তিআদিনযপ্পৰত্তস্স লোকিযত্তা. নিব্বানারম্মণো ¶ এৰ হি লোকুত্তরো পসাদো. ‘‘ইতিপি সো ভগৰা’’তিআদিৰচনেন লোকিযং, অৰেচ্চপ্পসাদৰচনেন লোকুত্তরন্তি লোকিযলোকুত্তরমিস্সকং পসাদং দস্সেন্তো. অৰেচ্চ রতনত্তযগুণে যাথাৰতো ঞত্ৰা পসাদো অৰেচ্চপ্পসাদো. সো পন যস্মা মগ্গেনাগতত্তা কেনচি অকম্পনিযো অপ্পধংসিযো চ হোতি, তস্মা ৰুত্তং ‘‘অচলেন অচ্চুতেনা’’তি. তত্থ লোকুত্তরো সব্বসো বুদ্ধগুণাদীসু সম্মোহং ৰিদ্ধংসেন্তো তত্থ কিচ্চতো পৰত্ততি, ইতরো আরম্মণৰসেন তে আরব্ভ. তং ৰিধিন্তি তং তস্স উপ্পন্নপ্পকারং. অনুস্সতিট্ঠানানীতি অনুস্সতিকম্মট্ঠানানি.

৭৫. সোমনস্সাদীতি আদি-সদ্দেন ঞাণাদীনি সঙ্গণ্হাতি. চোরানং অভিণ্হং সঞ্চরণট্ঠানতায পচ্চন্তগ্গহণং. পচ্চৰেক্খতোতি ‘‘অসুকস্মিঞ্চ ঠানে ইমে চিমে চোরা এৰঞ্চ এৰঞ্চ ৰিনাসিতা’’তি পচ্চৰেক্খতো রঞ্ঞো ৰিয.

যো ¶ যো ওধি যথোধি. যথা-সদ্দো ব্যাপনিচ্ছাযং, খো সদ্দো অৰধারণেতি দস্সেন্তো ‘‘সকসকওধিৰসেন চত্তমেৰ হোতী’’তিআদিমাহ. তেন ‘‘ৰন্ত’’ন্তিআদীসুপি অৰধারেতব্বন্তি দস্সেতি. সকসকওধিৰসেনাতি সঙ্খেপতো ৰুত্তমত্থং ৰিৰরিতুং ‘‘দ্ৰে ওধী’’তিআদি আরদ্ধং. তত্থ যংমগ্গৰজ্ঝাতি যেন মগ্গেন অনৰসেসতো পহাতব্বা. অনৰসেসপ্পহানৰসেন হি তংতংমগ্গৰজ্ঝানং কিলেসানং তদঞ্ঞমগ্গৰজ্ঝেহি অসম্মিস্সতা, অঞ্ঞথা যে সকসকওধিৰসেন উপরিমগ্গৰজ্ঝা, তে হেট্ঠিমমগ্গেহি পহীনাপাযগমনীযাদিসভাৰা এৰ তেহি পহীযন্তীতি পহানৰসেন সম্মিস্সা সিযুং. তেন তেযেৰ পহীনা হোন্তীতি এত্থাপি এসেৰ নযো. ততুত্তরিপীতি ততো পহাননিমিত্তসোমনস্সুপ্পত্তিতো উদ্ধম্পি. পটিপক্খেসু ওধিসো পৰত্তিকিচ্চত্তা ওধীতি হেট্ঠা তযো মগ্গা ৰুচ্চন্তি. তে হীতিআদি ৰুত্তস্সেৰত্থস্স ৰিৰরণং. ইমস্স ভিক্খুনোতি অনাগামিং সন্ধাযাহ. তেন ৰুত্তং ‘‘হেট্ঠামগ্গত্তযেন চত্ত’’ন্তি.

কেচি চত্তম্পি গণ্হন্তি, নযিদমেৰন্তি দস্সনত্থং ‘‘ৰন্ত’’ন্তি ৰুত্তং. ন হি যং যেন ৰন্তং, সো পুন তং আদিযতি. তেনাহ ‘‘অনাদিযনভাৰদস্সনৰসেনা’’তি. ৰন্তম্পি কিঞ্চি সসন্ততিলগ্গং সিযা, নযিদমেৰন্তি দস্সনত্থং ‘‘মুত্ত’’ন্তি ৰুত্তং. তেনাহ ‘‘সন্ততিতো ৰিনিমোচনৰসেনা’’তি. মুত্তম্পি কিঞ্চি মুত্তবন্ধনা ৰিয ফলং কুহিঞ্চি তিট্ঠতি, ন এৰমিদন্তি দস্সনত্থং ‘‘পহীন’’ন্তি ৰুত্তং. তেনাহ ‘‘ক্ৰচি অনৰট্ঠানদস্সনৰসেনা’’তি. যথা কিঞ্চি দুন্নিস্সট্ঠং পুন আদায সম্মদেৰ নিস্সট্ঠং পটিনিস্সট্ঠন্তি ৰুচ্চতি, এৰং ৰিপস্সনায নিস্সট্ঠং আদিন্নসদিসং মগ্গেন পহীনং পটিনিস্সট্ঠং নাম হোতীতি দস্সনত্থং ‘‘পটিনিস্সট্ঠ’’ন্তি ৰুত্তং. তেনাহ ‘‘আদিন্নপুব্বস্স পটিনিস্সগ্গদস্সনৰসেনা’’তি. ন কাপুরিসেন ৰিয পরম্মুখেন নিস্সট্ঠং ¶ , অথ খো অভিমুখেনেৰ নিস্সট্ঠন্তি দস্সনত্থং ‘‘পটিনিস্সট্ঠ’’ন্তি ৰুত্তং. তেনাহ ‘‘পটিমুখং ৰা’’তিআদি. উপগন্তব্বতোতি অত্তনো হিতসুখং পচ্চাসীসন্তেন একন্তেন অধিগন্তব্বতো. ধারণতোতি তংসমঙ্গীনং অপাযপাততো সন্ধারণেন. গন্থো ‘‘ৰেদো’’তি ৰুচ্চতি ‘‘ৰিদন্তি এতেনা’’তি, ৰেদেহি ঞাণেহি গতো পটিপন্নোতি ৰেদগূ. অভিজঞ্ঞাতি জানেয্য. ৰেদজাতাতি উপ্পন্নসোমনস্সা. ঞাণং ‘‘ৰেদো’’তি ৰুচ্চতি ‘‘ৰেদিতব্বং ৰেদেতী’’তি. সোমনস্সং ‘‘ৰেদো’’তি ৰুচ্চতি আরম্মণরসং ৰিন্দতি অনুভৰতীতি.

উপ্পন্নন্তি ¶ অৰেচ্চপ্পসাদং নিস্সায উপ্পন্নং. ৰুত্তপ্পকারমেৰ ৰেদন্তি ‘‘সোমনস্সং সোমনস্সমযঞাণঞ্চা’’তি এৰং ৰুত্তপ্পকারমেৰ. অত্থৰেদন্তি অত্থে হেতুফলে ৰেদং. ধম্মৰেদন্তি ধম্মে হেতুম্হি ৰেদং. তেনাহ ‘‘অৰেচ্চপ্পসাদস্স হেতু’’ন্তিআদি. ইধ ধম্মত্থসদ্দা হেতুফলপরিযাযাতি ইমমত্থং পাল়িযা এৰ দস্সেতুং ‘‘ৰুত্তঞ্হেত’’ন্তিআদি ৰুত্তং. তমেৰ অত্থঞ্চ ধম্মঞ্চাতি অত্থো ধম্মোতি চ ৰুত্তং অৰেচ্চপ্পসাদনিমিত্তং যথাৰুত্তং কিলেসপ্পহানঞ্চ. অত্থধম্মানিসংসভূতং ৰেদন্তি যথাৰুত্তঅত্থধম্মানিসংসভূতং সোমনস্সমযঞাণসঙ্খাতং ৰেদঞ্চ. পামোজ্জন্তি তরুণপীতিং আহ. পচ্চৰেক্খণাকারপ্পৰত্তেনাতি এতেন পচ্চৰেক্খণা এৰেত্থ অনৰজ্জসভাৰতায ধম্মোতি ৰুত্তোতি দট্ঠব্বং. পীতি জাযতীতি পরপ্পচ্চযং বলৰপীতিমাহ. পীণিতমনস্সাতি পস্সদ্ধিআৰহেহি উল়ারেহি পীতিৰেগেহি তিত্তচিত্তস্স. কাযোতি নামকাযো. ৰূপসন্তদরথোতি কিলেসপরিল়াহানং দূরীভাৰেন সুট্ঠু উপসন্তদরথো. পচ্চৰেক্খণহেতুকং চিত্তস্স সমাধানং ইধ অধিপ্পেতন্তি আহ ‘‘অপ্পিতং ৰিয অচলং তিট্ঠতী’’তি.

৭৬. কামং ‘‘বুদ্ধে অৰেচ্চপ্পসাদেন সমন্নাগতোম্হি, ধম্মে সঙ্ঘে অৰেচ্চপ্পসাদেন সমন্নাগতোম্হী’’তি ইদম্পি তস্সা পচ্চৰেক্খণায পৰত্তিআকারপকাসনমেৰ, ইদং পন ৰিসেসতো রতনত্তযে উপ্পন্নসোমনস্সাদিপ্পকাসনপদং. ‘‘যথোধি খো পনা’’তি ইদম্পি সৰিসেসং পচ্চৰেক্খণাকারপ্পকাসনপদন্তি অধিপ্পাযেন ‘‘ইদানি যথোধি…পে… পকাসেত্ৰা’’তি ৰুত্তং. চত্তারোপি পন ৰারা পচ্চৰেক্খণাকারপ্পকাসনৰসেন চেৰ সোমনস্সাদিআনিসংসদস্সনৰসেন চ ৰুত্তাতি সক্কা ৰিঞ্ঞাতুং উভযত্থাপি উভযস্স ৰুত্তত্তা. যদিপি অরিযমগ্গো একচিত্তক্খণিকো ন পুন উপ্পজ্জতি, পটিপক্খস্স পন তেন সুপ্পহীনত্তা তংসমঙ্গী অপরিহানধম্মো তংসীলাদিভাৰেনেৰ ৰুচ্চতীতি আহ ‘‘তস্স অনাগামিমগ্গসম্পযুত্তং সীলক্খন্ধং দস্সেতী’’তিআদি. ‘‘এৰংধম্মা তে ভগৰন্তো অহেসু’’ন্তিআদীসু (দী. নি. ২.১৩; ম. নি. ৩.১৯৭-১৯৮; সং. নি. ৫.৩৭৮) ৰিয ইধ ধম্ম-সদ্দো সমাধিপরিযাযোতি আহ ‘‘সমাধিক্খন্ধং পঞ্ঞাক্খন্ধঞ্চ দস্সেতী’’তি. তথা হি সো সম্পযুত্তধম্মে একারম্মণে অৰিক্খিপমানে ¶ অৰিপ্পকিণ্ণে অৰিসটে কত্ৰা সমং, সম্মা চ আদহন্তো তথা তে ধারেতীতি চ ৰত্তব্বতং অরহতীতি ¶ ধম্মোতি চ ৰুচ্চতি. অনেকরূপানন্তি অনেকপ্পকারানং. অন্তরাযো নাম অপ্পটিলদ্ধস্স ৰা অলব্ভনৰসেন, পটিলদ্ধস্স ৰা পরিহানৰসেন, তদুভযম্পি ইধ নত্থীতি দস্সেন্তো ‘‘মগ্গস্স ৰা’’তিআদিমাহ. নেৰস্স তং হোতি অন্তরাযাযাতি তস্স অনাগামিনো পিণ্ডপাতভোজনং নেৰ হোতি অন্তরাযায উক্কংসগতায পচ্চৰেক্খণায পচ্চৰেক্খিত্ৰা পরিভুঞ্জনতো. তঞ্চস্সা উক্কংসগমনং হতপটিপক্খত্তাতি দস্সেন্তো ‘‘মগ্গেন ৰিসুদ্ধচিত্তত্তা’’তি আহ.

এত্থাতি এতস্মিং অন্তরাযাভাৰে. এতদেৰ ৰিসুদ্ধচিত্তত্তমেৰ কারণং. এত্থ চ ‘‘নেৰস্স তং হোতি অন্তরাযাযা’’তি ইমিনা হেট্ঠা ৰুত্তপ্পহানং অনাগামিমগ্গেনেৰাতি সিদ্ধং হোতি. অনাগামিনো হি সব্বসো কামরাগো পহীনো হোতি, রসতণ্হায অভাৰতো তাদিসপিণ্ডপাতপরিভোগো অগ্গমগ্গাধিগমে কথঞ্চিপি অন্তরাযায ন হোতীতি. ‘‘সেয্যথাপি, ভিক্খৰে, ৰত্থ’’ন্তি ৰদন্তো ভগৰাআদিম্হি অত্তনা উপনীতৰত্থূপমং অনুসন্ধেতি. উদকস্স অচ্ছভাৰো পঙ্কসেৰালপণকাদিমলাভাৰেন পসন্নতায, তব্বিপরিযাযতো বহলতাতি আহ ‘‘অচ্ছন্তি ৰিপ্পসন্ন’’ন্তি. ৰণ্ণনিভায ৰিগতসংকিলেসতায সমুজ্জলনং পভস্সরতায ৰত্থস্স, তং পরিযোদাতন্তি ৰত্তব্বতং লভতীতি আহ ‘‘পরিযোদাতং পভস্সরতাযা’’তি. উক্কং বন্ধেয্যাতি অঙ্গারকপল্লং যথা দারুঘটিকঙ্গারাদিকেন ন ভিজ্জতি, এৰং তনুমত্তিকালেপাদিনা বন্ধেয্য. মেঘপটলতো ৰেরম্ভৰাতধারাসঙ্ঘট্টনতো ৰিজ্জুতা ৰিয কেৰলং ৰাতধারাসঙ্ঘট্টনজনিতা পভা উক্কাপভা, সা পন যস্মা দ্ৰিন্নং ৰাতধারানং ৰেগসম্ভূতসঙ্ঘট্টনহেতুকা, তস্মা কারণৰসেন ‘‘ৰাতৰেগো উক্কা’’তি ৰুত্তং.

৭৭. যথানুসন্ধিৰসেনাতিআদিম্হি উট্ঠিতদেসনায অনুরূপা অনুসন্ধি যথানুসন্ধি, তস্সা ৰসেন. ব্যতিরেকদস্সনং ৰিয হি সাধেতব্বস্স আদিম্হি উট্ঠিতদেসনায পটিপক্খদস্সনম্পি অনুরূপদেসনাৰ সম্মদেৰ পতিট্ঠাপনভাৰতো, যথা তং আৰত্তহারযোজনাযং ৰিসভাগধম্মাৰত্তন্তি দট্ঠব্বং. ‘‘যথানুসন্ধিৰসেন দেসনা আগতা’’তি সঙ্খেপতো ৰুত্তমত্থং ৰিত্থারেন্তো তপ্পসঙ্গেন ইতরেপি অনুসন্ধী দস্সেতুং ‘‘তযো হী’’তিআদিমাহ. বহিদ্ধাতি বাহিরেসু ৰত্থূসু. অসতি পরিতস্সনাতি তণ্হাদিট্ঠিপরিতস্সনাভাৰো. ৰিস্সজ্জিতসুত্তৰসেনাতি ‘‘ইধ ভিক্খু একচ্চস্সা’’তিআদিনা ¶ (ম. নি. ১.২৪২) ৰিস্সজ্জিতসুত্তৰসেন. যেন ধম্মেনাতি সীলাদিৰোদানধম্মেসু অক্খন্তিযাদিসংকিলেসধম্মেসু চ যেন যেন ধম্মেন. ছ অভিঞ্ঞা আগতাতি ইমিনা ‘‘অনুরূপধম্মৰসেন ৰা’’তি ৰুত্তৰিকপ্পং দস্সেতি, সেসেহি ‘‘পটিপক্খৰসেন ৰা’’তি ¶ ৰুত্তৰিকপ্পং. অক্খন্তিযা হি ককচূপমোৰাদো (ম. নি. ১.২২২) পটিপক্খো, তথা দিট্ঠিযা ‘‘নেতং মম, নেসোহমস্মি, ন মেসো অত্তা’’তি এৰং পটিভাগা সুঞ্ঞতাকারেন. সেসদ্ৰযেপি এসেৰ নযো. ‘‘চিত্তে সংকিলিট্ঠে দুগ্গতি পাটিকঙ্খা’’তি (ম. নি. ১.৭০) হেট্ঠা কিলেসদেসনা আগতা. সব্বোতি অনৰসেসো. সব্বাকারেনাতি আদীনৰানিসংসপচ্চৰেক্খণপুগ্গলদোসজাননাদিনা সব্বপ্পকারেন.

৭৮. ‘‘মেত্তা ভাৰেতব্বা ব্যাপাদস্স পহানাযা’’তিআদিৰচনতো (অ. নি. ৯.১) মেত্তাদযো ব্যাপাদৰিহেসারতিরাগানং পটিপক্খা. যস্মা ‘‘সো অত্থী’’তিআদিনা ভগৰতা অনাগামিনো অগ্গমগ্গাধিগমনং চতুসচ্চকম্মট্ঠানং মত্থকং পাপেত্ৰা কথিতং, তস্মা তং দস্সেন্তো ‘‘ইদানিস্সা’’তিআদিমাহ.

ব্রহ্মৰিহারধম্মেতি ব্রহ্মৰিহারে চেৰ ব্রহ্মৰিহারসহগতধম্মে চ. তেনাহ ‘‘নামৰসেনা’’তি. ৰৰত্থপেত্ৰাতি আনেত্ৰা সম্বন্ধিতব্বং. নামন্তিপি হি ঈদিসেসু ঠানেসু চত্তারো অরূপিনো খন্ধা ৰুচ্চন্তি. ইমিনা নযেনাতি এতেন ভূতনিস্সিতানং সেসুপাদাযধম্মানং সব্বেসম্পি পহাতব্বতণ্হাৰজ্জানং তেভূমকধম্মানং পরিগ্গহৰিধিং উল্লিঙ্গেতি. সভাৰতো ৰিজ্জমানং তং অত্তপচ্চক্খং কত্ৰা ঞাণেন যাথাৰতো পটিৰিজ্ঝিযমানতং উপাদায ‘‘অত্থি ইদ’’ন্তি যথাৰৰত্থাপিতং নামরূপং. তেনেৰাহ ‘‘এত্তাৰতানেন দুক্খসচ্চৰৰত্থানং কতং হোতী’’তি. সাৰধারণঞ্চেতং ৰচনং, লোকসমঞ্ঞাসিদ্ধং সত্তইত্থিপুরিসাদি ৰিয, ইতো বাহিরকপরিকপ্পিতং পকতিআদি দ্রব্যাদি জীৰাদি কাযাদি ৰিয চ ন পরমত্থতো নত্থি, অত্থেৰাতি ৰুত্তং হোতি. পজানাতীতি পুব্বভাগে তাৰ লক্খণরসাদিৰসেন চেৰ পটিগ্গহৰিভাগৰসেন চ পকারতো জানাতি, অপরভাগে পন পরিঞ্ঞাভিসমযৰসেন পটিৰিজ্ঝন্তো জানাতি. একন্তহীনা নাম অকুসলধম্মা সম্পতি আযতিঞ্চ দুক্খমূলত্তা, তত্থাপি ৰিসেসতো তণ্হাতি আহ ‘‘দুক্খস্স সমুদযং পটিৰিজ্ঝন্তো অত্থি হীনন্তি ¶ পজানাতী’’তি. অত্তনো পচ্চযেহি পধানভাৰং নীতত্তা পণীতন্তি ইমিনা অত্থেন অরিযমগ্গোৰ ‘‘পণীত’’ন্তি ৰুচ্চতীতি আহ ‘‘পহানুপাযং ৰিচিনন্তো অত্থি পণীতন্তি পজানাতী’’তি. ‘‘উত্তমট্ঠেন চ পণীত’’ন্তি ৰুচ্চমানে নিরোধসচ্চস্সপি সঙ্গহো সিযা, তস্স পন পদন্তরেন সঙ্গহিতত্তা ৰুত্তনযেনেৰেত্থ অত্থো ৰেদিতব্বো. অপ্পমঞ্ঞামুখেন ৰিপস্সনাভিনিৰেসস্সেৰ কতত্তা ‘‘ব্রহ্মৰিহারসঞ্ঞাগতস্সা’’তি ৰুত্তং. ‘‘সব্বস্সপি তেভূমকস্স সঞ্ঞাগতস্সা’’তি ৰত্তুং ৰট্টতিযেৰ. ন চেত্থ অসঙ্গহো তস্সাপি সঞ্ঞায আগতভাৰতো. লোকং উত্তরিত্ৰা সমতিক্কমিত্ৰা নিস্সরিত্ৰা ৰিসংযুত্তং হুত্ৰা ঠিতত্তা ৰুত্তং ‘‘উত্তরি নিস্সরণং নিব্বান’’ন্তি.

চতূহি ¶ আকারেহীতি ‘‘অত্থি হীন’’ন্তিআদীহি চতূহি পকারেহি. অন্ৰযঞাণতায অনুবোধভূতায ৰিপস্সনাপঞ্ঞায জাননত্থো ধম্মঞাণতায পটিৰেধভূতায মগ্গপঞ্ঞায দস্সনত্থো সভাৰসিদ্ধোতি দস্সেন্তো ‘‘ৰিপস্সনাপঞ্ঞায চত্তারি সচ্চানি জাননতো মগ্গপঞ্ঞায পস্সতো’’তি ৰুত্তং. ভযভেরৰে ৰুত্তনযেনেৰাতি ভযভেরৰসুত্তৰণ্ণনাযং অত্তনা ৰুত্তঅত্থৰচনত্থপাঠেন ইধ পাঠস্স সদিসত্তা অতিদিসন্তো ‘‘কামাসৰাপি…পে… পজানাতী’’তি আহ. এত্থ চ যস্মা ‘‘কামাসৰাপি চিত্তং ৰিমুচ্চতি…পে… অৰিজ্জাসৰাপি চিত্তং ৰিমুচ্চতী’’তি ‘‘খীণা জাতী’’তিআদীনি ৰদতা ভগৰতা চতুত্থমগ্গো নিদ্দিট্ঠো, তস্মা যং হেট্ঠা অট্ঠকথাযং ৰুত্তং ‘‘সো চ উপরি চতুত্থমগ্গস্সেৰ নিদ্দিট্ঠত্তা যুজ্জতী’’তি, তং সুৰুত্তমেৰাতি দট্ঠব্বং.

তস্স চোদনত্থাযাতি তস্স ব্রাহ্মণস্স ভগৰা অত্তনো চোদনত্থায ‘‘পুচ্ছ মং ত্ৰং ব্রাহ্মণ যদেত্থ তযা মনসাভিসমীহিত’’ন্তি চোদনায, ওকাসদানত্থাযাতি অধিপ্পাযো. দেসনাসন্নিস্সযো ব্রাহ্মণস্স তথারূপো এত্থ অজ্ঝাসযোপি নত্থীতি যথাৰুত্তঅনুসন্ধিত্তযৰিনিমুত্তত্তা ‘‘পাটিযেক্কং অনুসন্ধিং আহা’’তি ৰুত্তং. চিত্তগতত্তা অব্ভন্তরেন. কিলেসৰুট্ঠানসিনানেনাতি কিলেসমলপৰাহনেন রাগপরিল়াহাদিৰূপসমকরেন চ অট্ঠঙ্গিকঅরিযমগ্গসলিলসিনানেন.

৭৯. ধম্মসভামণ্ডপং তাৰদেৰ উপগতত্তা বাহুকা নদিতো আগতং ৰিয মঞ্ঞমানো. অরিযফলমদ্দনচুণ্ণাদযো তেলসিনেহস্স ৰিৰেচনেন ¶ . লূখভাৰো লোকং, তং এতিস্সা অত্থীতি লোকাতি সম্মতা. লোক্খসম্মতগ্গহণেন ‘‘তথা সা নদী লোকে পাকটা’’তি এৰং পৰত্তং অত্তনো মিচ্ছাগাহং দীপেতি. তেনাহ ‘‘ৰিসুদ্ধভাৰং দেতীতি এৰং সম্মতা’’তি. পাপপৰাহনেন সম্পরাযিকাদিসম্পত্তিআৰহতো লোকস্স হিতা লোক্যা. লোক্যাতি সম্মতাতি সব্বং পুরিমসদিসং. তেনাহ ‘‘সেট্ঠং লোকং গমযতীতি এৰং সম্মতা’’তি. পুঞ্ঞসম্মতাতি পুজ্জভৰফলনিব্বত্তনেন সত্তানং পুননেন ৰিসোধনেন পুঞ্ঞাতি সম্মতা. তদত্থদীপনত্থমেৰাতি তস্সা পুব্বে আগতদেসনায অত্থদীপনত্থমেৰ. ৰুত্তস্সেৰত্থস্স পুন দীপনং কিমত্থিযন্তি আহ ‘‘গাথারুচিকান’’ন্তি. চুণ্ণিকৰচনং অসম্ভাৰেন্তা তথা চ ৰুত্তে অত্থমবুজ্ঝনকা পজ্জৰচনং সম্ভাৰেন্তা তথা চ ৰুত্তে বুজ্ঝনকা গাথারুচিকা. ৰিসেসত্থদীপনত্থন্তি ৰিসিট্ঠদীপনত্থং, পুরিমদেসনায অঞ্ঞদীপনত্থন্তি অত্থো.

‘‘গচ্ছতি পন ভৰং গোতমো বাহুকং নদিং সিনাযিতু’’ন্তি (ম. নি. ১.৭৮) হেট্ঠা ৰুত্তত্তা ¶ বাহুকন্তি ইদমেৰ এত্থ তদত্থদীপকং. সেসানি অধিকক্কাদিৰচনানি ততো ৰিসিট্ঠস্স অত্থস্স বোধনতো ৰিসেসত্থদীপকানি. কস্মা পনেত্থ ভগৰতা ব্রাহ্মণেন অৰুত্তানি অধিকক্কাদীনি গহিতানীতি আহ ‘‘যথেৰ হী’’তিআদি. কক্কন্তি ন্হানপিণ্ডং অধিপ্পেতং, ন্হাযিত্ৰা অধিকং কক্কং এত্থ গণ্হন্তীতি অধিকক্কং. তেনাহ ‘‘ন্হানসম্ভারৰসেনা’’তিআদি. মণ্ডলৰাপিসণ্ঠানন্তি ৰট্টপোক্খরণীসণ্ঠানং. নদিযোতি ৰিসুং নদিযো, ন অধিকক্কাদীনি ৰিয তিত্থমত্তং.

তীহি পদেহীতি সুন্দরিকাপযাগবাহুকাপদেহি. চত্তারীতি অধিকক্কাদীনি চত্তারি. ৰুত্তানেৰ হোন্তীতি লোকসম্মতালক্খণেন একলক্খণতা ব্রাহ্মণস্স অধিপ্পাযেন, পরমত্থতো পন পাপপৰাহলক্খণেন একলক্খণত্তা. তেনাহ ‘‘তস্মা’’তিআদি. কিঞ্চি পাপসুদ্ধিং ন করোন্তিযেৰ. ন হি নং সোধযেতি নং পুগ্গলং ন সোধযে. ৰেরকিব্বিসভাৰং অপ্পত্তা নাম কম্মপথভাৰং অপ্পত্তা. তেনাহ ‘‘খুদ্দকেহী’’তি.

পটিহনন্তোতি অযুত্তভাৰদস্সনেন তং দিট্ঠিং পটিবাহন্তো. তত্থাযং পটিবাহনৰিধি যথা যং কিঞ্চি উদকোরোহনং ন পাপপৰাহনং, এৰং ¶ যো কোচি নক্খত্তযোগো পাপহেতূনং পটিপক্খাভাৰতো. যঞ্হি ৰিনাসেতি, সো তস্স পটিপক্খো. যথা আলোকো অন্ধকারস্স ৰিজ্জা চ অৰিজ্জায, ন এৰং উদকোরোহনং নক্খত্তযোগো ৰা পাপহেতূনং লোভাদীনং পটিপক্খো, তস্মা নিট্ঠমেত্থ গন্তব্বং ‘‘ন উদকোরোহনাদি পাপপৰাহন’’ন্তি. নিচ্চং ফগ্গুনীনক্খত্তন্তি সুদ্ধসীলাদিকস্স সব্বকালং মঙ্গলদিৰসো এৰাতি অধিপ্পাযো. ইতরোতি সীলাদিৰসেন অসুদ্ধো. নিচ্চমেৰ উপোসথো অরিযুপোসথেন উপৰুত্থভাৰতো. সুদ্ধস্সাতি পরিসুদ্ধমনোসমাচারস্স. সুচিকম্মস্সাতি পরিসুদ্ধকাযৰচীসমাচারস্স. তেনাহ ‘‘নিক্কিলেসতাযা’’তিআদি. কুসলূপসঞ্হিতন্তি অনৰজ্জভাৰূপগতং. ৰতসমাদানন্তি ধুতধম্মসমাদানাদি সম্পন্নমেৰ হোতি, নাস্স ৰিপত্তি অত্থীতি অত্থো. মম সাসনেযেৰ সিনাহি, যদি অচ্চন্তমেৰ সুদ্ধিং ইচ্ছসীতি অধিপ্পাযো. তেনাহ ‘‘সচে’’তিআদি. খেমতন্তি খেমভাৰং. যথা সব্বভূতানি তপৰসেন খেমপ্পত্তানি অভযপ্পত্তানি হোন্তি, এৰং করোহীতি তং হেট্ঠা দস্সিতং মেত্তাদিভাৰনং ব্রাহ্মণস্স সঙ্খেপেন উপদিসন্তেনস্স একচ্চসমাধিসম্পদা তদৰিনাভাৰিনী পঞ্ঞাসম্পদা চ দস্সিতাতি দট্ঠব্বং. তেনাহ ‘‘মনোদ্ৰারসুদ্ধি দস্সিতা’’তি.

তস্স পন সম্পদাদ্ৰযস্স নিস্সযভূতং সীলসম্পদং দস্সেতুং ‘‘সচে মুসা ন ভণসী’’তিআদি ৰুত্তং. এত্থ চ যথা ‘‘সচে মুসা ন ভণসী’’তিআদিনা মুসাৰাদ-পাণাতিপাত-অদিন্নাদান-পটিৰিরতিৰচনেন ¶ অৰসেসকাযৰচীদুচ্চরিতৰিরতীপি ৰুত্তা এৰ হোতি লক্খণহারনযেন, এৰং ‘‘সদ্দহানো অমচ্ছরী’’তি সদ্ধাদিধনসম্পদানিযোজনেনেৰ অৰসেসঅরিযধনসম্পদানিযোজনম্পি সিদ্ধমেৰ হোতীতি সদ্ধাদযো ৰিমুত্তিপরিপাচনীযধম্মা ব্রাহ্মণস্স পকাসিতা এৰাতি ৰেদিতব্বা. তেনেৰাহ ‘‘ইমায এৰ পটিপত্তিযা কিলেসসুদ্ধী’’তি. গযা সম্মততরা বাহুকাদীহিপীতি অধিপ্পাযো.

৮০. একোতি অসহাযো, এসা পনস্স অসহাযতা একীভাৰেনাতি. ন হিস্স তাৰ তণ্হাদুতিযতা ৰিগতা. তেনেৰাহ ‘‘ন চিরস্সেৰা’’তিআদি. একগ্গহণেনেৰ কাযেন ৰূপকট্ঠতা ৰুত্তাতি আহ ‘‘ৰুপকট্ঠো চিত্তৰিৰেকেনা’’তি. তেন ‘‘দিৰা চঙ্কমেন নিসজ্জাযা’’তিআদিনা (ম. নি. ১.৪২৩; ৩.৭৫; ৰিভ. ৫১৯; মহানি. ১৬১) আগতং জাগরিযানুযোগমাহ. তথাভূতস্স চস্স ¶ একাদসহি অগ্গীহি আদিত্তে তযো ভৰে পস্সতো যথা পমাদস্স লেসোপি নাহোসি, এৰং কম্মট্ঠানং ব্রূহেন্তো সম্মদেৰ পদহতি. কত্থচি সঙ্খারগতে অনপেক্খচিত্তো নিব্বানাধিমুত্তো এৰ ৰিহাসীতি দস্সেতুং ‘‘অপ্পমত্তো’’তিআদি ৰুত্তং. খীণা জাতীতিআদীসু যং ৰত্তব্বং, তং হেট্ঠা ৰুত্তমেৰ. সেসং সুৰিঞ্ঞেয্যমেৰ.

ৰত্থসুত্তৰণ্ণনায লীনত্থপ্পকাসনা সমত্তা.

৮. সল্লেখসুত্তৰণ্ণনা

৮১. ‘‘চুন্দো’’তি ¶ তস্স মহাথেরস্স নামং, পূজাৰসেন পন মহাচুন্দোতি ৰুচ্চতি যথা ‘‘মহামোগ্গল্লানো’’তি. অত্তনো ৰা চুন্দং নাম ভাগিনেয্যত্থেরং উপাদায আযস্মতো সারিপুত্তত্থেরস্স ভাতা অযং মহাথেরো ‘‘মহাচুন্দো’’তি পঞ্ঞাযিত্থ যথা ‘‘মহাপন্থকো’’তি. সাযন্হসমযন্তি ভুম্মত্থে একং উপযোগৰচনন্তি আহ ‘‘সাযন্হকালে’’তি. ন হেত্থ অচ্চন্ত সংযোগো সম্ভৰতীতি. সত্তসঙ্খারেহীতি সদ্ধিৰিহারিকঅন্তেৰাসিকউপাসকাদিসত্তেহি চেৰ রূপারম্মণাদিসঙ্খারেহি চ. পটিনিৰত্তিত্ৰাতি অপসক্কিত্ৰা. নিলীযনন্তি ৰিৰেচনং কাযচিত্তেহি ততো ৰিৰিত্ততা. একীভাৰোতি হি কাযৰিৰেকমাহ, পৰিৰেকোতি চিত্তৰিৰেকং. ততো ৰুট্ঠিতোতি ততো দুৰিধৰিৰেকতো ভৰঙ্গুপ্পত্তিযা, সব্রহ্মচারীহি সমাগমেন চ অপেতো. অভিৰাদাপেত্ৰাতি অভিৰাদং কারেত্ৰা. এৰন্তি যথাৰুত্তঅভিৰাদৰসেন. পগ্গয্হাতি উন্নামেত্ৰা. অনুপচ্ছিন্নভৰমূলানং তাৰ এৰং অভিৰাদো হোতু, উচ্ছিন্নভৰমূলানং কিমত্থিযোতি আহ ‘‘এতং আচিণ্ণং তথাগতান’’ন্তি. তেন ন তথাগতা সম্পরাযিকংযেৰ সত্তানং সুখং আসীসন্তি, অথ খো দিট্ঠধম্মিকম্পীতি দট্ঠব্বং. কস্মা এৰং তথাগতা অভিৰদন্তীতি তত্থ কারণমাহ ‘‘সুখকামা হী’’তিআদি. পুথুকাযাতি বহূ সত্তকাযা. যক্খাতি দেৰা. তে হি পূজনীযতায ‘‘যক্খা’’তি ৰুচ্চন্তি. অভিৰদন্তীতি আসীসিতমেৰত্থং ঞাণকরুণাহি অভিমুখং কত্ৰা ৰদন্তি.

যাতি অনিযমতো গহিতা নিযমতো দস্সেন্তো ‘‘ইমা’’তি আহ. ইমাতি চ আসন্নপচ্চক্খৰচনন্তি আহ ‘‘অভিমুখং করোন্তো ৰিযা’’তি ¶ , তং তং দিট্ঠিগতিকং চিত্তগতং সম্মুখা ৰিয করোন্তোতি অত্থো. দিট্ঠিযোতি পুরিমপদলোপেন পাল়িযং ৰুত্তন্তি দস্সেন্তো ‘‘মিচ্ছাদিট্ঠিযো’’তি আহ. সত্তেসু দিট্ঠিগতচিত্তুপ্পাদেসু উপ্পজ্জমানা, সত্তেসু ৰা ৰিসযভূতেসু আরব্ভ উপ্পজ্জমানা ‘‘সত্তেসু পাতুভৰন্তী’’তি ৰুত্তা. অত্তৰাদেনাতি অত্তানং আরব্ভ পৰত্তেন ৰচনেন. পটিসংযুত্তাতি ‘‘অত্থি অত্তা’’তি গাহে গাহণে চ ৰিসযভাৰেন পটিসংযুত্তা. দিট্ঠিগতিকেন দিট্ঠিং গাহন্তেহি গহণে গাহাপণে চ দিট্ঠি দিট্ঠিৰাদস্স ৰিসযোতি তেন পটিসংযুত্তা নাম হোতি. ‘‘অত্থি অত্তা’’তি এৰং পৰত্তা দিট্ঠি ইধ অত্তৰাদপটিসংযুত্তা, ন তস্সা ৰিসযভূতো অত্তা. সা চ ৰিসযভাৰতো তথাপৰত্তেন ৰাদেন পটিসংযুত্তা. লোকৰাদপ্পটিসংযুত্তাতি এত্থাপি এসেৰ নযো. ৰীসতি ভৰন্তি ততো পরং অত্তৰাদৰত্থুনো অভাৰা ¶ . পঞ্চপি হি উপাদানক্খন্ধে পচ্চেকং ‘‘অত্তা’’তি তে চ অত্তনো নিস্সযভাৰেন গণ্হতো এতাসং দিট্ঠীনং সম্ভৰো, তব্বিনিমুত্তো পনাযং ৰিসযো অত্তগ্গহণাকারো চ নত্থীতি. সস্সতো অত্তা চ লোকো চাতি রূপাদীসু অঞ্ঞতরং ‘‘অত্তা’’তি, ‘‘লোকো’’তি ৰা গহেত্ৰা তং সস্সতো সব্বকালভাৰী নিচ্চো ধুৰোতি. যথাহ ‘‘রূপী অত্তা চেৰ লোকো চ সস্সতো চাতি অত্তানঞ্চ লোকঞ্চ পঞ্ঞপেতী’’তিআদি. সস্সতোতিআদীসু পঠমো সস্সতৰাদৰসেন অত্তগ্গাহো, দুতিযো উচ্ছেদৰাদৰসেন, ততিযো একচ্চসস্সতৰাদৰসেন, চতুত্থো তক্কীৰাদৰসেন পৰত্তো, অমরাৰিক্খেপৰসেন ৰা পৰত্তো অত্তগ্গাহো. অন্তৰাতি অত্তনো পরিচ্ছেদতাৰসেন. অনন্তৰাতি অপরিচ্ছেদতাৰসেন. অন্তৰা চ অনন্তৰা চাতি তদুভযৰসেন, ইতরো তক্কীৰাদৰসেন পৰত্তো অত্তগ্গাহো. এৰং পৰত্তত্তা অট্ঠ হোন্তীতি যোজনা.

আদিমেৰাতি আদিমনসিকারমেৰ. তং পন সরূপতো দস্সেন্তো ‘‘ৰিপস্সনামিস্সকপঠমমনসিকারমেৰা’’তি আহ. অপ্পত্ৰাপি সোতাপত্তিমগ্গন্তি ইমিনা অৰধারণেন নিৰত্তিতং দস্সেতি. নামরূপপরিচ্ছেদতো পভুতি যাৰ উদযব্বযদস্সনং, অযং ইধ আদিমনসিকারোতি অধিপ্পেতো পঞ্ঞাভাৰনায আরম্ভভাৰতো. উদযব্বযানুপস্সনাসহিততায চস্স ৰিপস্সনামিস্সকতা ৰচনং. এৰন্তি ইমস্স অত্থৰচনং ‘‘এত্তকেনেৰ উপাযেনা’’তি ¶ , যথাৰুত্তআদিমনসিকারেনাতি অত্থো. এতাসন্তি যথাৰুত্তানং অত্তৰাদলোকৰাদপটিসংযুত্তানং দিট্ঠীনং. কামঞ্চ তাসং তেন তদঙ্গৰসেন পহানং হোতিযেৰ, তং পন নাধিপ্পেতং, তস্মা সমুচ্ছেদৰসেন পহানং পটিনিস্সগ্গো চ হোতীতি পুচ্ছতি. সব্বসো সমুচ্ছিন্নসংযোজনতায অনধিমানিকোপি সমানো. ‘‘অরিযধম্মো অধিগতো’’তি মানো অধিমানো, সো যেসং অত্থি তে অধিমানিকা, তেসং উদযব্বযঞাণাধিগমেন অধিমানুপ্পত্তি তদৰসানো চ মনসিকারোতি অধিপ্পেতো. তেন দিট্ঠীনং পহানং ন হোতীতি কথাপনত্থং অযং পুচ্ছাতি আহ ‘‘অধিমানপ্পহানত্থং পুচ্ছতী’’তি. ‘‘আদিমেৰ নু খো…পে… পটিনিস্সগ্গো হোতী’’তি অনভিসমেতাৰী ৰিয ৰদন্তো অধিমানে ঠিতো ৰিয হোতীতি আহ ‘‘অধিমানিকো ৰিয হুত্ৰা’’তি. সোতি থেরো. তেসং অত্থাযাতি তেসং অত্তনো অন্তেৰাসিকানং ভগৰতা এতস্স মিচ্ছাগাহস্স ৰিৰেচনত্থায. থেরো কির ধম্মসেনাপতি ৰিয সদ্ধিং অত্তনো অন্তেৰাসিকেহি ভগৰন্তং উপসঙ্কমি.

৮২. যত্থাতি ৰিসযে ভুম্মং. দিট্ঠীনঞ্হি আরম্মণনিদস্সনমেতন্তি. যস্মা দিট্ঠীনং অনুসযনভূমিপি সমুদাচরণট্ঠানম্পি খন্ধা এৰ, তস্মা আহ ‘‘যত্থ চেতা দিট্ঠিযো উপ্পজ্জন্তী তিআদি পঞ্চক্খন্ধে সন্ধায ৰুত্ত’’ন্তি. রূপং অভিনিৰিস্সাতি ‘‘ইদং রূপং মম অত্তা’’তি ¶ দিট্ঠাভিনিৰেসৰসেন অভিনিৰিসিত্ৰা আরব্ভ. অভিনিৰিসমানা এৰ হি দিট্ঠি নং আরম্মণং কত্ৰা উপ্পজ্জতি. ‘‘সো অত্তা’’তিআদীসু যদিদং চক্খাদিসঙ্গহং রূপং, সহবুদ্ধিনিবন্ধনতায সো মে অত্তা, সুখাসুখং এত্থ লোকিযতীতি সো লোকো. ‘‘সোএৰাহং পেচ্চ পরলোকে ভৰিস্সামীতি তথাভাৰেন নিচ্চো, থিরভাৰেন ধুৰো, সব্বদাভাৰিতায সস্সতো, নিব্বিকারতায অৰিপরিণামধম্মোতি অত্থো. যদি পঞ্চক্খন্ধে সন্ধায ৰুত্তং, কথমেকৰচনন্তি আহ ‘‘আরম্মণৰসেনা’’তিআদি. নানা করীযতি এতেনাতি নানাকরণং, ৰিসেসো. জাতিৰসেনাতি উপ্পত্তিৰসেন. যে হি অনিব্বত্তপুব্বা সমানাৰত্থা, তে উপ্পাদসঙ্খাতৰিকারসমঙ্গিতায উপ্পজ্জন্তীতি সমঞ্ঞং লভন্তি. তেনাহ ‘‘জাতিৰসেনা’’তিআদি. পুনপ্পুনং আসেৰিতাতি অনাদিমতি সংসারে অপরাপরুপ্পত্তিযা লদ্ধাসেৰনা. এতেন কিলেসানং ভাৰনট্ঠেন অনুসযত্থং ৰিসেসেতি ¶ . থামগতাতি থামভাৰং উপগতা. এতেন অনুসযে সভাৰতো দস্সেতি. থামগমনন্তি চ কামরাগাদীনং অনঞ্ঞসাধারণো সভাৰো. তথা হি ৰুত্তং ‘‘থামগতো অনুসযে পজহতী’’তি (পটি. ম. ৩.২১). অপ্পটিৰিনীতাতি সমুচ্ছেদৰিনযৰসেন ন পটিৰিনীতা. অপ্পহীনা হি থামগতা কিলেসা অনুসেন্তীতি ৰুচ্চন্তি. এতেন তেসং কারণলাভে সতি উপ্পজ্জনারহতং দস্সেতি. সমুদাচরন্তীতি অভিভৰন্তি. এতেন তেসং ৰীতিক্কমপ্পত্ততং দস্সেতি. উপ্পজ্জন্তীতি পন ইমিনাৰ পরিযুট্ঠানাৰত্থা দস্সিতা.

তং পঞ্চক্খন্ধপ্পভেদং আরম্মণন্তি যং তং ‘‘যত্থ চেতা দিট্ঠিযো উপ্পজ্জন্তী’’তিআদিনা ৰুত্তং রূপুপাদানক্খন্ধাদিপঞ্চক্খন্ধপভেদং দিট্ঠীনং আরম্মণং. এতং ময্হং ন হোতীতি এতং খন্ধপঞ্চকং ময্হং সন্তকং ন হোতি মম কিঞ্চনপলিবোধভাৰেন গহেতব্বতায অভাৰতো. তেনস্স পরমত্থতো তণ্হাৰত্থুভাৰং পটিক্খিপতি তাৰকালিকাদিভাৰতো. অহম্পি এসো ন অস্মীতি এসো পঞ্চক্খন্ধপভেদো অহম্পি ন অস্মি, অহন্তি সো গহেতব্বো ন হোতীতি অত্থো. এতেনস্স মানৰত্থুভাৰং পটিক্খিপতি অনিচ্চদুক্খজেগুচ্ছাদিভাৰতো. এসো মে অত্তাপি ন হোতি অত্তসভাৰস্স তত্থ অভাৰতো মমঞ্চস্স কিঞ্চনপলিবোধভাৰেন গহেতব্বতায অভাৰতো.

তণ্হাৰ মমন্তি গণ্হাতি এতেনাতি তণ্হাগাহো. তং গণ্হন্তোতি তং উপ্পাদেন্তো. তেনাহ ‘‘তণ্হাপপঞ্চং গণ্হাতী’’তি. পপঞ্চেতি সন্তানং ৰিত্থারেন্তো সত্তে সংসারে চিরাযতীতি পপঞ্চো. যথা ৰুত্তপভেদন্তি অট্ঠসততণ্হাৰিচরিতপভেদং. তণ্হাপপঞ্চং পটিক্খিপতি খন্ধপঞ্চকস্স তণ্হাৰত্থুকাভাৰৰিভাৰনেনাতি অধিপ্পাযো. পরতো পদদ্ৰযেপি এসেৰ নযো. দিট্ঠেকট্ঠাতি দিট্ঠিযা ¶ পহানেকট্ঠা. তেন তেসং পঠমমগ্গৰজ্ঝতং দস্সেতি. সহজেকট্ঠা পন দিট্ঠিযা তণ্হা এৰ, ন মানো, সা চ খো অপাযগমনীযা. যথা অত্থীতি যেন অনিচ্চদুক্খাসুভানত্তাকারেন অত্থি, তথা পস্সন্তো যথাভূতং পস্সতি নাম. তেনাহ ‘‘খন্ধপঞ্চকঞ্হী’’তিআদি. এতেনেৰ আকারেনাতি রুপ্পনাদিঅনিচ্চাদিআকারেনেৰ. গয্হমানম্পি অপ্পহীনৰিপল্লাসেহি. তেনাকারেনাতি ‘‘এতং মম’’ন্তিআদিআকারেন. নেৰত্থি যথাভূতদস্সনৰিপল্লাসানং ¶ তদভাৰতো. সুট্ঠু পস্সন্তস্সাতি যথা পুন তথা ন পস্সিতব্বং, এৰং সুট্ঠু সাতিসযং পস্সন্তস্স.

ন আদিমনসিকারেনেৰ দিট্ঠিপ্পহানং হোতি, অধিমানিকানং পন অধিমানমত্তমেতং দস্সনং. মগ্গেনেৰ তং হোতীতি ইমমত্থং ৰিভাৰেন্তো ‘‘সোতাপত্তিমগ্গেন দিট্ঠিপ্পহানং দস্সেত্ৰা’’তি আহ. ৰিভজন্তোতি অধিমানিকানং ঝানানি অসল্লেখভাৰেন ৰিভজন্তো. বালপুথুজ্জনানং নেৰ উপ্পজ্জতি অকারকভাৰতো. ন অরিযসাৰকানং পহীনাধিমানপচ্চযত্তা. ন অট্ঠাননিযোজকো সপ্পাযকম্মট্ঠানেযেৰ নিযোজনতো.

থেরো ‘‘যদত্থং সঙ্ঘো পক্কোসতি, সো অত্থো তত্থ ৰাসীনং আগতাগতানং ইধ ইজ্ঝতী’’তি তং উদিক্খন্তো সঙ্ঘেন যাৰততিযং পহিতোপি ন গতো ন অগারৰেন. তেনাহ ‘‘কিমেত’’ন্তিআদি. পণ্ডিতো হি তত্থ অত্তনো কিচ্চমেৰ করোতীতি অঞ্ঞতরং ৰুড্ঢপব্বজিতং পাহেসি. কিমেতন্তি সঙ্ঘস্স আণায অকরণং নাম কিমেতন্তি করণে আদরং দীপেন্তো এৰমাহ. সট্ঠিৰস্সাতীতোতি অপ্পত্তে পত্তসঞ্ঞী এৰ সট্ঠিৰস্সাতীতো. যস্মা পেসলা পেসলেহি সদ্ধিং সংসন্দন্তি সমানাধিমুত্তিতায, তস্মা থেরো ‘‘সাধাৰুসো’’তি ৰত্ৰা হত্থিমাপনাদিং সব্বং অকাসি.

তাদিসোৰাতি অনন্তরং ৰুত্তত্থেরসদিসোৰ অপ্পত্তে পত্তসঞ্ঞী এৰ সট্ঠিৰস্সাতীতোতি অত্থো. পদুমগুম্বন্তি কমলসণ্ডং. পাসাদং পাৰিসি ৰিস্সট্ঠং ওলোকনেনস্স পুথুজ্জনভাৰো অত্তনাৰ পঞ্ঞাযিস্সতীতি. তিস্সমহাৰিহারে কির থেরা ভিক্খূ তদা ‘‘সকচিত্তং পসীদতী’’তি ৰচনং পূজেন্তা কালস্সেৰ চেতিযঙ্গণং সম্মজ্জিত্ৰা এত্তকারম্মণমেৰ বুদ্ধারম্মণপীতিং উপ্পাদেত্ৰা দিৰসে দিৰসে তথা করোন্তি. তেন ৰুত্তং ‘‘তস্মিঞ্চ সমযে’’তিআদি. ‘‘ধম্মদিন্ন, ইধ পত্তচীৰরং ঠপেতী’’তি ৰত্তাপি পটিসন্থারৰসেন কিঞ্চি পুচ্ছিতাপি নাহোসি. গুণং জানাতীতি নিমুজ্জনাদীসু ৰিৰরদানাদিনা গুণং জানাতি ৰিয. তুম্হে পন ন জানিত্থ আগন্তুকৰত্তস্সপি অকরণতো. সত্থুআণাৰিলঙ্ঘিনী কীদিসী সা সঙ্ঘস্স ¶ কতিকা? কতিকা চ নাম সিক্খাপদাৰিরোধেন অনুৰত্তেতব্বা, এত্তকম্পি অজানন্তেহি মে সংৰাসো নত্থীতি আকাসে অব্ভুক্কমি.

যং ¶ তস্স এৰমস্স সল্লেখেন ৰিহরামীতি যো ‘‘পঠমজ্ঝানং উপসম্পজ্জ ৰিহরেয্যা’’তি ৰুত্তো, তস্স ভিক্খুনো যং ‘‘পঠমজ্ঝানসঙ্খাতং পটিপত্তিৰিধানং কিলেসে সল্লেখতি, তেন সল্লেখেন অহং ৰিহরামী’’তি অধিমানৰসেন এৰমস্স এৰং ভৰেয্য ঠানমেতং ৰিজ্জতীতি এৰমেত্থ সম্বন্ধো ৰেদিতব্বো. তং ন যুজ্জতীতি তং অধিমানিকস্স ‘‘যথাৰিভঙ্গং পঠমজ্ঝানং সল্লেখো’’তি পরিৰিতক্কিতং ন যুজ্জতি যুত্তং ন হোতি. তেনাহ ‘‘ন হী’’তিআদি. তত্থ সম্মা সব্বসো চ কিলেসে লিখতীতি সল্লেখো, অরিযমগ্গো. তদুপাযৰিপস্সনা সল্লেখপটিপদা. যং পন ঝানং ৰিপস্সনাপাদকং, তম্পি ঝানং পরিযাযেন মগ্গপাদকং হোতিযেৰ. তেনাহ ‘‘অৰিপস্সনাপাদকত্তা’’তিআদি.

ঝানধম্মৰসেনাতি ৰিতক্কাদিপঞ্চকজ্ঝানধম্মৰসেন. চিত্তুপ্পাদৰসেন অনেকৰারং পৰত্তমানম্পি ঝানং একাৰজ্জনতায একৰীথিপরিযাপন্নত্তা একা সমাপত্তি এৰাতি ‘‘পুনপ্পুনং সমাপত্তিৰসেনা’’তি ৰুত্তং. চত্তারি অরূপজ্ঝানানি যথাসকং একেকস্মিংযেৰ আরম্মণে পৰত্তন্তীতি আহ ‘‘আরম্মণভেদাভাৰতো’’তি. পুরিমকারণদ্ৰযৰসেনেৰাতি ‘‘ঝানধম্মৰসেন, পুনপ্পুনং সমাপত্তিৰসেনা’’তি পুব্বে ৰুত্তপ্পকারকারণদ্ৰযৰসেনেৰ.

তেসং অরূপজ্ঝানানং কিলেসপরিল়াহাভাৰেন নিব্বুতানি অঙ্গানি, ভাৰনাৰিসেসৰসেন সুখুমানি আরম্মণানি. তস্মা তানীতি তেসং ৰসেন তানি ঝানানি সন্তানি, তস্মা ‘‘সন্তা এতে ৰিহারা’’তি ৰুত্তং. তেসং চতুন্নম্পীতি চতুন্নম্পি তেসং অরূপজ্ঝানানং.

৮৩. সোতি অধিমানিকো ভিক্খু, অঞ্ঞো ৰা ইতো বাহিরকো তাপসপরিব্বাজকাদিকো ন হি সম্মসতি. তত্থ অধিমানিকো অপ্পত্তে পত্তসঞ্ঞিতায ন সম্মসতি, ইতরো অৰিসযতায. যত্থাতি যস্মিং সল্লেখৰত্থুস্মিং, অৰিহিংসকতাদীহি চতুচত্তালীসায আকারেহি.

অট্ঠ সমাপত্তিযো নাম কিলেসানং ৰিক্খম্ভনৰসেন পৰত্তা উত্তরুত্তরি সন্তপণীতা ধম্মা, ন তথা লোকিযা অৰিহিংসাদযো. তত্থ কথং অৰিহিংসাদযো এৰ সল্লেখভাৰেন ৰুত্তা, ন ইতরাতি ইমমত্থং ৰিভাৰেন্তো চোদকো ‘‘কস্মা পনা’’তিআদিমাহ. ইতরো কামং সমাপত্তিযো ¶ ¶ সন্তপণীতসভাৰা, ৰট্টপাদকতায পন কিলেসানং সল্লেখপটিপদা ন হোন্তি, অৰিহিংসাদযো পন ৰিৰট্টপাদকা সল্লেখপটিপদাতি ইমমত্থং ৰিভাৰেন্তো ‘‘লোকুত্তরপাদকত্তা’’তিআদিমাহ. ইমিনাযেৰ অট্ঠসমাপত্তীহি অৰিহিংসাদীনং ৰিসেসদীপকেন সুত্তেন যথা মহপ্ফলতরং হোতি, তং পকারজাতং ৰেদিতব্বং. ইদঞ্হি দক্খিণেয্যতরতায দক্খিণায মহপ্ফলতরতং সন্ধায ৰুত্তন্তি সম্বন্ধো. ননু তত্থ ‘‘সোতাপত্তিফলসচ্ছিকিরিযায পটিপন্নো’’তি আগতং, ন ‘‘সরণগতো’’তি চোদনং সন্ধাযাহ ‘‘সরণগমনতো পট্ঠাযা’’তিআদি. ৰুত্তঞ্হেতং অট্ঠকথাযং (ম. নি. অট্ঠ. ৩.৩৭৯) ‘‘হেট্ঠিমকোটিযা তিসরণং গতো উপাসকোপি সোতাপত্তিফলসচ্ছিকিরিযায পটিপন্নো নামা’’তি. যো হি ৰট্টদুক্খং সমতিক্কমিতুকামো পসন্নচিত্তো রতনত্তযং সরণং গচ্ছতি, তস্স তং অধিসীলাদীনং উপনিস্সযো হুত্ৰা অনুক্কমেন দস্সনমগ্গাধিগমায সংৰত্তেয্যাতি.

ৰিহিংসাদিৰত্থুন্তি যদেতং ৰিহিংসাদীনং ৰত্থুং ৰদাম, ইমস্মিং ৰিহিংসাদিৰত্থুস্মিং. অন্তমিচ্ছাদিট্ঠিঞ্চ মিচ্ছত্তানং আদিমিচ্ছাদিট্ঠিঞ্চাতি ইদং দেসনাক্কমং সন্ধায ৰুত্তং. মিস্সেত্ৰাতি মিচ্ছাদিট্ঠিভাৰসামঞ্ঞেন একজ্ঝং কত্ৰা. তথাতি ইমিনা যথা কম্মপথমিচ্ছত্তানং অন্তে আদিম্হি চ ৰুত্তমিচ্ছাদিট্ঠিং মিস্সেত্ৰা একজ্ঝং ৰুত্তং, তথা তেসং অন্তে ৰুত্তসম্মাদিট্ঠীতি ইমমত্থং উপসংহরতি.

পাণন্তি ৰোহারতো সত্তং, পরমত্থতো জীৰিতিন্দ্রিযং. অতিপাতেন্তি সরসেনেৰ পতনসভাৰং অতিচ্চ অন্তরা এৰ পাতেন্তি, অতিক্কম্ম ৰা সত্থাদীহি অভিভৰিত্ৰা পাতেন্তি. অদিন্নন্তি পরসন্তকং. আদিযন্তীতি গণ্হন্তি. সল্লেখতীতি সমং লেখতি, পজহতীতি অত্থো. কম্মপথকথা এসাতি ‘‘অত্থভঞ্জনক’’ন্তি ৰুত্তং. পিযসুঞ্ঞকরণতো পিসুণা, পিসতি পরে সত্তে হিংসতীতি ৰা পিসুণা. ফরুসাতি লূখা, নিট্ঠুরাতি অত্থো. নিরত্থকন্তি অত্থরহিতং অত্তনো পরেসঞ্চ হিতৰিনিমুত্তং. মিচ্ছাতি ৰিপরীতা নিচ্চাদিৰসেন পৰত্তিযা. পাপিকাতি লামিকা. একন্তাকুসলতায ৰিঞ্ঞূহি বুদ্ধাদীহি গরহিতা. নত্থি দিন্নন্তি আদিৰত্থুকাযাতি দসৰত্থুকমিচ্ছাদিট্ঠিমাহ. নত্থিকভাৰাভিনিৰেসনৰসেন কম্মপথপ্পত্তিযেৰস্সা কম্মপথপরিযাপন্নতা. ‘‘রূপং অত্তা’’’তিআদিনযপ্পৰত্তা অত্তদিট্ঠি ¶ মগ্গন্তরাযকরত্তা অনিয্যানিকদিট্ঠি. অনিয্যানিকত্তা এৰ হিস্সা মিচ্ছত্তপরিযাপন্নতা. সম্মাতি অৰিপরীতা, ততো এৰ সোভনা সুন্দরা, বুদ্ধাদীহি পসত্থত্তা ৰিঞ্ঞুপ্পসত্থা. সেসমেত্থ মিচ্ছাদিট্ঠিযং ৰুত্তনযেন ৰেদিতব্বং.

অসুভাদীসু ¶ সুভাদিআকারগ্গহণতো অযাথাৰঅনিয্যানিকা অযোনিসো উপ্পত্তিযা. অকুসলাতি অযাথাৰাঅনিয্যানিকা অকুসলা সঙ্কপ্পা. এস নযোতি ইমিনা ‘‘অযাথাৰা অনিয্যানিকা অকুসলা ৰাচা’’তিআদিনা তত্থ তত্থ অযাথাৰাদিঅত্থং অতিদিসতি. ৰাচাতি চেতনা অধিপ্পেতা, তথা কম্মন্তাজীৰাসতি চ. যেভুয্যেন অতীতানুস্সরণৰসেন পৰত্তিতো ‘‘অতীতং চিন্তযতো’’তি ৰুত্তং. তথা হি লোকে এৰং ৰদন্তি ‘‘যং মে পহূতং ধনং অহোসি, তং পমাদৰসেন পন বহুং খীণ’’ন্তি. সতিপতিরূপকেনাতি ‘‘চিরকতম্পি চিরভাসিতম্পি সরিতা’’তি এৰং ৰুত্তসতুপ্পত্তিপতিরূপকেন. উপ্পত্তিন্তি চিত্তুপ্পত্তিং. তথাপৰত্তচিত্তুপ্পাদো হি মিচ্ছাসতি. সা পন কোধৰসেন ৰা ‘‘অক্কোচ্ছি মং অৰধি ম’’ন্তিআদিনা (ধ. প. ৩) উপনয্হন্তস্স, রাগৰসেন ৰা ‘‘যানিস্স তানি পুব্বে মাতুগামেন সদ্ধিং হসিতলপিতকীল়িতানি অনুস্সরতী’’তি (অ. নি. ৭.৫০) ৰুত্তনযেন সুভতো অনুস্সরন্তস্স, দিট্ঠিৰসেন ৰা ‘‘সো খো পন মে অত্তো নিচ্চো ধুৰো’’তিআদিনা মিচ্ছাঅভিনিৰিসন্তস্সাতি এৰমাদিনা নযেন পৰত্ততীতি ৰেদিতব্বা.

উপাযচিন্তাৰসেনাতি খিপ্পজালকুমিনাদুহলাদিউপকরণসংৰিধানাদীসু যুত্তিচিন্তনাদিৰসেন পাপং কত্ৰা ৰিপ্পটিসারনিমিত্তং, ‘‘সুকতং মযা’’তি পামোজ্জনিমিত্তং কত্ৰা পচ্চৰেক্খণাকারেন মোহো অঞ্ঞাণং. তত্থ পন ‘‘অসিৰে সিৰা’’তি ৰোহারো ৰিয ঞাণৰোহারো. মিচ্ছাসভাৰত্তা পন মিচ্ছাঞাণংত্ৰেৰ ৰুচ্চতি. একূনৰীসতিভেদং পচ্চৰেক্খণঞাণং সম্মা পেক্খিতত্তা সম্মাঞাণং ৰুচ্চতি, ইতরং পন ঝানাদিপচ্চৰেক্খণঞাণং সম্মাদিট্ঠিযাৰ সঙ্গয্হতি. রূপারূপসমাপত্তিলাভিতামত্তেন ৰট্টতো অৰিমুত্তাযেৰ সমানা ‘‘ৰিমুত্তা ময’’ন্তি এৰংসঞ্ঞিনো. পকতিপুরিসন্তরঞাণসঙ্খাতাযং, গুণৰিযুত্তস্স অত্তনো সকত্তনি অৰট্ঠানসঙ্খাতাযং, অত্তনো মহাব্রহ্মুনা সলোকতা তস্স সমীপতাসংযুজ্জনসঙ্খাতাযং ¶ ৰা অৰিমুত্তিযং ৰিমুত্তিসঞ্ঞিনো. একন্তাকুসলতায হীনত্তা পাপিকা. অযাথাৰতায ৰিপরীতা. যথাৰুত্তেনাতি ‘‘অৰিমুত্তাযেৰ সমানা’’তি ৰুত্তপ্পকারেন. ‘‘মযমেত্থ সম্মাদিট্ঠি ভৰিস্সামা’’তিআদীসু ফলসম্মাদিট্ঠিআদীনিপি মগ্গসম্মাদিট্ঠিআদিপক্খিকানেৰাতি অধিপ্পাযেন ‘‘ফলসম্পযুত্তানি…পে… ৰেদিতব্বা’’তি ৰুত্তং. সব্বেপি পন ফলধম্মে ৰিমুত্তিক্খন্ধসঙ্গহতো ‘‘ৰিমুত্তী’’তি ৰুচ্চমানে ন কোচি ৰিরোধো. এত্থ সম্মাৰিমুত্তিসঙ্খাতে সল্লেখৰত্থুম্হি.

যদি নীৰরণৰসেন ৰুত্তানি, তস্মা তীণেৰ ৰুত্তানীতি আহ ‘‘অভিজ্ঝালূ’’তিআদি. পরিযুট্ঠানপ্পত্তা থিনমিদ্ধপরিযুট্ঠিতা. যস্স ধম্মস্স অত্থিতায উদ্ধতা নাম হোন্তি, সো ধম্মো উদ্ধচ্চন্তি আহ ‘‘উদ্দচ্চেন সমন্নাগতাতি উদ্ধতা’’তি. ৰিচিনন্তাতি ধম্মোতি ৰা অধম্মোতি ৰা ¶ আদিনা যং কিঞ্চি সভাৰং ৰিনিচ্ছিনন্তা. উপনাহনসীলাতি পরস্স অত্তনো চিত্তে অনুবন্ধনসীলা. ইস্সন্তীতি উসূযন্তি. সঠযন্তীতি সঠা অঞ্ঞথা অত্তানং অঞ্ঞথা পৰেদনকা. তে পন যস্মা ন যথাভূতৰাদিনো, তস্মা আহ ‘‘ন সম্মা ভাসন্তীতি ৰুত্তং হোতী’’তি. ৰুত্তপচ্চনীকনযেনাতি ‘‘ন কোধনা অক্কোধনা’’তিআদিনা ৰুত্তঅত্থপটিপক্খনযেন.

দুক্খং ৰচো এতেসু ৰিপ্পটিকূলগ্গাহিতায ৰিপচ্চনীকগাহেসূতি দুব্বচা. তে পন ৰচনক্খমা ন হোন্তীতি আহ ‘‘ৰত্তুং দুক্খা’’তিআদি. হীনাচারতায দুক্খস্স ৰা সম্পাপকতায পাপকা. অসদ্ধম্মৰসেনাতি অসপ্পুরিসধম্মৰসেন. অত্তনা ৰিসেসিতব্বৰসেন কাযৰিঞ্ঞত্তিআদীনং কাযকম্মদ্ৰারাদিভাৰো ৰিয অস্সদ্ধিযাদিঅসদ্ধম্মসমন্নাগমেনঅসতং অসপ্পুরিসানং ধম্মানন্তি তানিযেৰ অস্সদ্ধিযাদীনি অসদ্ধম্মা নাম, তেসং ৰসেনাহ ‘‘সদ্ধা এতেসং নত্থী’’তি যথা তং ‘‘দুপ্পঞ্ঞা’’তি. সুত্তগেয্যাদি অপ্পং সুতং এতেসন্তি অপ্পস্সুতা, সুতেন অনুপপন্না. নত্থীতি গহেতব্বন্তি ইমিনা অভাৰত্থো অযং অপ্প-সদ্দো ‘‘অপ্পডংসমকসৰাতাতপসরীসপসম্ফস্সান’’ন্তিআদীসু (অ. নি. ১০.১১) ৰিযাতি দস্সেতি. সম্মাপটিপত্তিযা অনারম্ভনতো কুচ্ছিতা গারয্হা সীদন্তি ওসীদন্তি সংকিলেসপক্খেতি কুসীতা দ-কারস্স ত-কারং কত্ৰা. অকুসলানং ধম্মানং পহানায কুসলানং ধম্মানং উপসম্পদায আরদ্ধং পগ্গহিতং ৰীরিযং এতেসন্তি আরদ্ধৰীরিযা. অনুপ্পাদনেন ¶ মুট্ঠা নট্ঠা সতি এতেসন্তি মুট্ঠস্সতী. দুট্ঠাতি দূসিতা. দুপ্পঞ্ঞা নাম দূসিতভাৰো পটিপক্খেন ৰিনাসিতভাৰোতি আহ ‘‘নট্ঠপঞ্ঞাতি ৰুত্তং হোতী’’তি. হেট্ঠা সম্মাদিট্ঠিগ্গহণেন কম্মস্সকতাপঞ্ঞায মগ্গসম্মাদিট্ঠিযা চ গহিতত্তা সুব্বচকল্যাণমিত্ততাপরিৰারাহি ইধ সদ্ধাদীহি ৰিপস্সনাসম্ভারস্স উদ্ধটত্তা চ ৰুত্তং ‘‘ইধ ৰিপস্সনাপঞ্ঞা ৰেদিতব্বা’’তি. তেনাহ ‘‘ৰিপস্সনাসম্ভারো হী’’তিআদি. যুত্তিং অনপেক্খিত্ৰাপি অযমত্থো গহেতব্বোতি দস্সেন্তো আহ ‘‘পোরাণানং আণা’’তি.

লোকুত্তরগুণানং অন্তরাযকরন্তি লোকুত্তরগুণানং অধিগমস্স অন্তরাযকরং. সন্দিট্ঠিন্তি সং অত্তনো দিট্ঠিং, যং ৰা তং ৰা অত্তনা যথাগহিতদিট্ঠিন্তি অত্থো. সভাৰং অতিক্কমিত্ৰা পরতো আমসনতো পরামাসী. দল়্হগ্গাহীতি ‘‘ইদমেৰ সচ্চ’’ন্তি থিরগ্গাহগ্গাহী. পটিনিস্সগ্গীতি পটিনিস্সজ্জনকো. কুম্মোৰাতি যথা কচ্ছপো অত্তনো পাদাদিকে অঙ্গে কেনচি ঘট্টিতো সব্বানি অঙ্গানি অত্তনো কপালেযেৰ সমোদহতি, ন বহি নীহরতি, এৰমযম্পি ‘‘ন সুন্দরো তৰ গাহো, ছড্ডেহি ন’’ন্তি ৰুত্তো তং ন ৰিস্সজ্জেতি. অন্তোযেৰ অত্তনো হদযে এৰ ঠপেত্ৰা তং ৰদতি. কুম্ভীলগ্গাহন্তি সংসুমারগ্গাহং. গণ্হন্তীতি যথা সংসুমারা গহিতং ন ৰিস্সজ্জেন্তি, এৰং গণ্হন্তি.

৮৪. এৰং ¶ চতুচত্তালীসায আকারেহীতি অৰিহিংসনাদীহি চতুঅধিকচত্তালীসপ্পকারেহি. কস্মা পনেত্থ অৰিহিংসা আদিতো ৰুত্তা? সব্বগুণানং মূলভাৰতো. অৰিহিংসাতি হি করুণাযেতং অধিৰচনং, সা চ ৰিসেসতো সীলস্স মূলকারণং পরূপঘাতলক্খণা দুস্সীল্যা ওরমাপনতো. যথা হি পাণাতিপাতো পরূপঘাতলক্খণো, তথা পরেসং সাপতেয্যাৰহরণং, সত্তিপ্পহারতোপি ধনস্সাৰহারো গরুতরোতি. তথা অব্রহ্মচরিযং গব্ভধারণাদিদুক্খাৰহনতো, পরদারাতিক্কমে পন ৰত্তব্বমেৰ নত্থি. পরেসং ৰিসংৰাদনভেদনমম্মঘট্টনানং পরূপঘাতভাৰো পাকটো এৰ, সম্ফপ্পলাপো অত্থগ্গাহাপনতো অনত্থুপ্পাদনতো, অভিজ্ঝা অদিন্নাদানাদিহেতুতো, ব্যাপাদো পাণাতিপাতাদিহেতুতো, মিচ্ছাদিট্ঠি সব্বানত্থহেতুতো ¶ পরূপঘাতলক্খণা, মিচ্ছাদিট্ঠি ধম্মিকপটিঞ্ঞোপি পাণাতিপাতাদীনি করোতি, পরে চ তত্থ নিযোজেতি, কিমঙ্গং পন ইতরে. ৰিহিংসলক্খণা দুস্সীল্যা ওরমা অৰিহিংসলক্খণা ৰিসেসতো সীলস্স বলৰকারণং. সীলপদট্ঠানো চ সমাধি, সমাধিপদট্ঠানা চ পঞ্ঞাতি সব্বগুণানং মূলভূতা অৰিহিংসা. অপিচ উল়ারজ্ঝাসযানং নিসম্মকারীনং ধীরানং উত্তমপুরিসানং সীলং ৰিয সমাধিপঞ্ঞাপি পরেসং হিতসুখাৰহাৰ সম্পজ্জন্তীতি এৰম্পি করুণা সব্বগুণানং মূলন্তি সা আদিতো ৰুত্তা.

ততো পরং ৰিসেসতো ‘‘অৰিহিংসাসমুট্ঠানা ইমে ধম্মা’’তি দস্সনত্থং কুসলকম্মপথধম্মা গহিতা. ততো ইদং গুণানং মূলভূতং সীলং, এত্থ পতিট্ঠিতেন ইমে ধম্মা উপ্পাদেতব্বাতি দস্সনত্থং অট্ঠ সম্মত্তা গহিতা. তেসং ৰিসোধনায পটিপন্নস্স আদিতো এৰং হোতীতি দস্সনত্থং নীৰরণৰিৰেকো গহিতো, আদিতো নীৰরণদ্ৰযস্স অগ্গহণে গহিতাগহিতকারণং অট্ঠকথায ৰুত্তমেৰ. কোধস্স পন ব্যাপাদতো ভেদো ৰত্থসুত্তৰণ্ণনাযং (ম. নি. অট্ঠ. ১.৭১) ৰুত্তনযেনেৰ ৰেদিতব্বো. কোধাদিপ্পহানেন চেত্থ সল্লেখসিদ্ধীতি দস্সনত্থং ততো উপক্কিলেসৰিসুদ্ধি গহিতা. সা চ সুব্বচকল্যাণমিত্তঅপ্পমত্ততাহি সিজ্ঝতীতি দস্সনত্থং পকিণ্ণকা গহিতা. সম্পন্নসোৰচস্সতাদিগুণস্স ইমে ধম্মা পারিপূরিং গচ্ছন্তি, ৰিপস্সনং পরিব্রূহেত্ৰা অরিযমগ্গাধিগমায সংৰত্তন্তীতি দস্সনত্থং সদ্ধম্মা গহিতা. এৰংভূতস্স অযং মিচ্ছাগাহো লোকুত্তরগুণাধিগমস্স অন্তরাযকরো, তস্মা সো দূরতো ৰজ্জেতব্বো, এৰং যথাৰুত্তায সম্মাপটিপত্তিযা অরিযমগ্গং অধিগচ্ছন্তো সল্লেখং মত্থকং পাপেতীতি দস্সনত্থং ‘‘সন্দিট্ঠিপরামাসী’’তিআদি ৰুত্তন্তি এৰমেতেসং চতুচত্তালীসায সল্লেখাকারানং গহণপযোজনং অনুপুব্বী চ ৰেদিতব্বা. পযোগতো সল্লেখপটিপদং পটিপজ্জিতুং অসক্কোন্তানং চিত্তুপ্পাদোপি বহূপকারোতি আহ ‘‘চিত্তুপ্পাদস্সপি বহূপকারতং দস্সেতু’’ন্তি.

কুসলেসু ¶ ধম্মেসূতি অৰিহিংসাদীসু যথাৰুত্তঅনৰজ্জধম্মেসু. অনুৰিধিযনাতি চিত্তুপ্পাদস্স কাযৰাচাহি অনুৰিধানা. তেসং ধম্মানন্তি অৰিহিংসাদিধম্মানং, তেসং ৰা চিত্তুপ্পাদৰসেন পৰত্তধম্মানং. ইদানি ¶ যথাৰুত্তধম্মং ৰিত্থারতো দস্সেতুং ‘‘কস্মা পনা’’তিআদি আরদ্ধং. সরণগমনং ৰাচায ৰিঞ্ঞাপেতুং অসক্কোন্তস্স ৰসেন ৰুত্তং ‘‘কাযেন ৰা’’তি. ‘‘সীলং কাযেন সমাদিযতী’’তি এত্থাপি এসেৰ নযো. এত্থ চ তথা তথা পৰত্তসল্লহুককামাৰচরকুসলচিত্তুপ্পত্তিং উপাদায তথারূপকুসলকাযৰচীকম্মানং বহূপকারতা ৰুত্তাতি ন সভাৰতো চিত্তুপ্পাদস্স বহূপকারতং ঞাযতীতি দট্ঠব্বং.

৮৫. হিতাধিগমাযাতি দিট্ঠধম্মিকাদিহিতসম্পত্তিযা, অরিযমগ্গাধিগমায এৰ ৰা. অরিযমগ্গো হি একন্তহিতত্তা হিতো নাম. পরিৰজ্জনৰসেন কমনং পৰত্তি পরিক্কমনন্তি আহ ‘‘পরিক্কমনায পরিৰজ্জনত্থাযা’’তি. সম্মাদস্সনুপাযসংৰিধানেন অৰিহিংসা পটিযত্তা সম্মাসম্বুদ্ধেন. সুখেনেৰাতি অকিচ্ছেনেৰ. এতেনেৰ উপাযেনাতি এতেনেৰ অৰিহিংসাপদে ৰুত্তেন ৰিধিনা. সব্বপদানীতি সেসানি তেচত্তালীস পদানি.

৮৬. অকুসলা পটিসন্ধিঅজনকা নাম উদ্ধচ্চসহগতচিত্তুপ্পাদধম্মা অঞ্ঞেপি পৰত্তিৰিপাকমত্তদাযিনো, দিন্নায পটিসন্ধিযা ৰিপাকজনকা, পচ্চযৰেকল্লেন ৰিপচ্চিতুং অলদ্ধোকাসা অহোসিকম্মাদযো ৰা অজনকা. জাতিৰসেনাতি অকুসলজাতিৰসেন. অধোভাগঙ্গমনীযাতি অপাযগমনীযা. এৰংনামাতি নামগ্গহণেন সভাৰং উপলক্খেতি সতি পচ্চযসমৰাযে তংসভাৰানতিৰত্তনতো. তেনাহ ‘‘ৰিপাককালে অনিট্ঠাকন্তৰিপাকত্তা’’তি. ৰুত্তনযেনেৰ কুসলপক্খো ৰেদিতব্বো. অযং পন ৰিসেসো, ইধ পটিসন্ধিঅজনকা অভিঞ্ঞাসহগতধম্মা, সেসং ৰুত্তসদিসমেৰ. সব্বে অকুসলাতি এত্থ ৰিহিংসমেকং ঠপেত্ৰা ইতরে সব্বে অকুসলা উপমাভূতা. ৰিহিংসা হি উপমেয্যং. সব্বে কুসলাতি এত্থাপি এসেৰ নযো. এতেনেৰ উপাযেনাতি যথা ৰিহিংসানং উপমেয্যতা, তদৰসেসানং কুসলাকুসলানং উপমাভাৰো ৰুত্তো, ইমিনা নযেন অকুসলং পাণাতিপাতাদিঅকুসলেন ইতরেন, কুসলঞ্চ পাণাতিপাতাপটিৰিরতিআদিকুসলেন ইতরেন উপমেতব্বং.

৮৭. পরিনিব্বাপনেতি কিলেসপরিল়াহৰূপসমনে. পরিতো লিম্পনট্ঠেন পলিপং ৰুচ্চতি মহাকদ্দমং, তং পন একন্ততো গম্ভীরম্পি হোতীতি ‘‘গম্ভীরকদ্দমে ¶ নিমুগ্গো’’তি ৰুত্তং. পলিপং ৰিয ¶ পলিপন্তি পঞ্চ কামগুণা ৰুচ্চন্তি, তস্মা এৰং ইদানি ৰুচ্চমানেন উপমোপমেয্যসংসন্দননযেন এত্থ ইমস্মিং ঠানে অত্থযোজনা ৰেদিতব্বা. ন হি তং কারণন্তি এত্থ কারণং নাম হত্থস্স ৰা পাদস্স ৰা অপলিপন্নভাৰো, সো পন নত্থি. এস নযো উপমেয্যেপি.

তত্থ সিযা কস্সচি পরিৰিতক্কো ‘‘ভগৰতো দেসনানুভাৰেন ভিক্খুআদযো কথেন্তী’’তি. ‘‘ভগৰাযেৰ হি তত্থ উদ্ধরতী’’তি ৰত্ৰা উপমায তদত্থং ৰিভাৰেতুং ‘‘রঞ্ঞো’’তিআদি ৰুত্তং. পুথুজ্জনা তাৰতিট্ঠন্তু, সাৰকসিখাপ্পত্তৰিসেসানম্পি অরিযানং দেসনা সত্থুযেৰ দেসনাতি দস্সেতুং ‘‘কিঞ্চাপী’’তিআদিমাহ. তথা হি তেহি দেসিতসুত্তানি বুদ্ধৰচনমেৰ, তেসং দেসনায লদ্ধৰিসেসাপি অরিযা বুদ্ধপুত্তাযেৰাতি.

অনিব্বিসতাযাতি অনিব্বিসেৰনতায. অসিক্খিতৰিনযতাযাতি পঞ্চন্নং ৰিনযানং সাদরং অসিক্খিতভাৰেন. তে পন ৰিনযা তিস্সন্নং সিক্খানং সিক্খাপনেন হোতীতি আহ ‘‘তিস্সো সিক্খা সিক্খাপেস্সতী’’তি. কিং পন তন্তি? ‘‘ঠানমেতং ৰিজ্জতী’’তি এত্থ ৰুত্তং কিং পন ঠানন্তি আহ ‘‘অপলিপপলিপন্নত্ত’’ন্তিআদি. যস্মা পাল়িযং ‘‘সো ৰত চুন্দা’’তিআদিনা সামঞ্ঞত্থং উপমাভাৰেন গহেত্ৰা ৰিসেসত্থো উপমেয্যভাৰেন ৰুত্তো, তস্মা তমত্থং ‘‘এৰমত্থো ৰেদিতব্বো’’তিআদিনা সাধারণতো ৰত্ৰা পুন অসাধারণতো ৰিৰরন্তো ‘‘কিং ৰুত্তং হোতী’’তিআদিমাহ. পরস্স ৰিহিংসাচেতনং নিব্বাপেস্সতীতি ইদং যো অৰিহিংসাসঙ্খাতং সম্মাপটিপত্তিং দিস্ৰা দিট্ঠানুগতিং আপজ্জন্তো ধম্মদেসনায পরো অৰিহিংসকো হোতি, তাদিসং সন্ধায ৰুত্তং. আদেসনঞ্হি তস্স ৰচনন্তি. তেনাহ ‘‘অযং যা এসা ৰিহিংসকস্সা’’তি. পুব্বে ৰিহিংসকস্স মিচ্ছাপটিপজ্জন্তস্স. ৰিহিংসাপহানায মগ্গং ভাৰযতোতিআদিনা অত্তনো এৰ অৰিহিংসায ৰিহিংসাপরিনিব্বানায সংৰত্তনমাহ. তেনাহ ‘‘পরিনিব্বুতো ৰিযা’’তিআদি. সব্বপদেসূতি ‘‘পাণাতিপাতিস্সা’’তিআদিনা আগতেসু তেচত্তালীসায পদেসু.

৮৮. এৰন্তি দেসিতাকারপরামসনং. তস্সাতি সল্লেখস্স. ‘‘অত্থি খ্ৰেস ব্রাহ্মণ, পরিযাযো’’তিআদীসু (অ. নি. ৮.১১; পারা. ৩-১০) ৰিয পরিযায-সদ্দো কারণত্থোতি ¶ আহ ‘‘সল্লেখকারণ’’ন্তি. তেসং ৰসেনাতি সল্লেখানং ৰসেন. মেত্তায উপসংহরণৰসেন হিতং এসন্তেন. করুণায ৰসেন অনুকম্পমানেন. পরিগ্গহেত্ৰাতি পরিতো গহেত্ৰা, পরিত্ৰাতি অত্থো. পরিচ্চাতি পরিতো ইত্ৰা, সমন্ততো ফরিত্ৰা ইচ্চেৰ অত্থো. মা পমজ্জিত্থাতি ‘‘ঝাযথা’’তি ৰুত্তসমথৰিপস্সনানং অঞ্ঞাণেন, অঞ্ঞেন ৰা কেনচি পমাদকারণেন ¶ মা পমাদং আপজ্জিত্থ. নিয্যানিকসাসনে হি অকত্তব্বকরণম্পি পমাদোতি. ৰিপত্তিকালেতি সত্তঅসপ্পাযাদিৰিপত্তিযুত্তকালে. যথাৰুত্তা পঞ্চ পরিযাযা অঞ্ঞেপি সব্বে সাসনগুণা ইধেৰ সঙ্গহং গচ্ছন্তীতি আহ ‘‘ঝাযথ, মা পমাদত্থাতি তুম্হাকং অনুসাসনী’’তি.

সল্লেখসুত্তৰণ্ণনায লীনত্থপ্পকাসনা সমত্তা.

৯. সম্মাদিট্ঠিসুত্তৰণ্ণনা

৮৯. কথেতুকম্যতাপুচ্ছা ¶ এৰাতি অৰধারণেন ইতরা চতস্সো পুচ্ছা নিৰত্তেতি ইতরাসং অসম্ভৰতো, তত্থ যথাপুচ্ছিতস্স অত্থস্স ৰিস্সজ্জনতো চ ‘‘অযং সম্মাদিট্ঠী’’তি যাথাৰতো অজানন্তাপি পুথুজ্জনা বাহিরকতাপসাদযো অত্তনো সমানসীলে ঠিতং সম্মাদিট্ঠীতি ৰদন্তি. অনুস্সৰাদিৰসেনাপীতি অনুস্সৰাকারপরিৰিতক্কদিট্ঠিনিজ্ঝানক্খন্তিৰসেনপি. যথাসমঙ্গিতাকারস্স অত্থস্স এৰমেতন্তি নিজ্ঝানক্খমাপনতো একন্ততো যাথাৰগ্গাহো হোতীতি আহ ‘‘অত্তপচ্চক্খেনপী’’তি, যাথাৰতো লক্খণস্স পটিৰিদ্ধত্তা অত্তনো পচ্চক্খভাৰেনাতি অত্থো. বহুন্নং ৰচনং উপাদাযাতি ইমিনা সাসনে লোকে চ নিরুল়্হতায অযং আমেডিতপযোগোতি সাসনস্স নিরুল়্হতায চ সম্পসাদং উপাদাযপি তদুভযিকো আমেডিতপযোগো দট্ঠব্বো. অত্থন্তি ৰচনত্থং. লক্খণন্তি সভাৰং. উপাদাযাতি গহেত্ৰা. সোভনাযাতি সুন্দরায. পসত্থাযাতি পসংসায. তেসু পুরিমেন ধম্মানং যথাসভাৰাৰবোধসঙ্খাতং সম্মাদিট্ঠিসভাৰং দস্সেতি. তেন হি সা সব্বধম্মে অভিভৰিত্ৰা সোভতি. দুতিযেন সম্পযুত্তধম্মেসু পরিণাযিকভাৰং. তেন হি সা সম্পযুত্তধম্মে ঞাণমযে ৰিয তংসমঙ্গিনঞ্চ পুগ্গলং ঞাণপিণ্ডং ৰিয করোতি, তস্স ‘‘পণ্ডিতো নিপুণো ছেকো ৰিঞ্ঞূ ৰিভাৰী’’তিআদিনা দিসাসু পসংসা পত্থরতি.

কম্মস্সকতাঞাণন্তি ¶ কম্মং সকো এতস্সাতি কম্মস্সকো, তস্স ভাৰো কম্মস্সকতা, তত্থ ঞাণং ‘‘ইদং কম্মং সত্তানং সকং, ইদং নো সক’’ন্তি এৰং জাননঞাণং. সচ্চানুলোমিকঞাণন্তি অরিযসচ্চানং পটিৰেধস্স অনুলোমতো সচ্চানুলোমিকং ঞাণং, ৰিপস্সনাঞাণং. নো সচ্চানুলোমিকাযাতি বাহিরকো সচ্চানুলোমিকায সম্মাদিট্ঠিযা নো সম্মাদিট্ঠি সব্বেন সব্বং তস্স অভাৰতো. তত্থ কারণমাহ ‘‘অত্তদিট্ঠিপরামাসকত্তা’’তি. কম্মস্স কতাদিট্ঠি পন বাহিরকস্স অত্তদিট্ঠিং অনুরুজ্ঝন্তী পৰত্ততি ‘‘অত্থি দিন্ন’’ন্তিআদিনযপ্পৰত্তিতো. সাসনিকো দ্ৰীহিপীতি সাসনিকো পুথুজ্জনো কম্মস্সকতাঞাণাদীহি দ্ৰীহিপি সম্মাদিট্ঠি. ওক্কন্তসম্মত্তনিযামত্তা ‘‘সেক্খো নিযতাযা’’তি ৰুত্তং. অসেক্খায সম্মাদিট্ঠিযা সম্মাদিট্ঠীতি আনেত্ৰা সম্বন্ধিতব্বং. তীসুপি পুগ্গলেসু সেক্খো ইধ সম্মাদিট্ঠীতি অধিপ্পেতোতি দস্সেন্তো ‘‘নিযতায নিয্যানিকাযা’’তিআদিমাহ.

ইদানি ¶ যথাৰুত্তমত্থং পাল়িযা ৰিভাৰেতুং ‘‘তেনেৰাহা’’তিআদি ৰুত্তং. অন্তদ্ৰযন্তি ‘‘সস্সতং, উচ্ছেদং, কামসুখং, অত্তকিলমথ’’ন্তি এতং অন্তদ্ৰযং. লীনুদ্ধচ্চপতিট্ঠানাযূহনন্তদ্ৰযস্স অনুপগমনং অত্থসিদ্ধমেৰ. উজুভাৰেনাতি উজুসভাৰেন মগ্গেন, মজ্ঝিমায পটিপত্তিযাতি অত্থো. ধম্মে পসাদগ্গহণেন সত্থরি সঙ্ঘে চ পসাদোপি গহিতোযেৰ হোতীতি ‘‘ধম্মে’’ইচ্চেৰ ৰুত্তো তদৰিনাভাৰতো. যস্মা এস নিযতায সম্মাদিট্ঠিযা সমন্নাগতো সম্মাদিট্ঠীতি অধিপ্পেতো, তঞ্চ ৰট্টতো নিয্যানং ৰিৰট্টাধিগমেন হোতীতি আহ ‘‘আগতো ইমং সদ্ধম্ম’’ন্তি. নিব্বানঞ্হি সন্তো সদা ৰিজ্জমানো ধম্মোতি কত্ৰা সদ্ধম্মোতি ইমং ফলেহি অসাধারণেন পরিযাযেন ৰত্তব্বতং লভতি. তযিদমস্স আগমং সচ্ছিকিরিযাভিসমযো, সো চ পহানাভিসমযাদীহি সহেৰ ইধ ইজ্ঝতীতি দস্সেন্তো ‘‘সব্বদিট্ঠিগহনানী’’তিআদিমাহ. তত্থ সব্বদিট্ঠিগহনানি ৰিনিব্বেঠেন্তো সব্বকিলেসে পজহন্তোতি পদদ্ৰযেন পন পহানাভিসমযমাহ, জাতিসংসারা নিক্খমন্তোতি ইমিনা পরিঞ্ঞাভিসমযং. সমতিক্কমত্থো হি পরিঞ্ঞত্থো. পটিপত্তিং পরিনিট্ঠপেন্তোতি ইমিনা ভাৰনাভিসমযন্তি দট্ঠব্বং.

কালপরিচ্ছেদৰচনন্তি পরিচ্ছিজ্জতীতি পরিচ্ছেদো, কালো এৰ পরিচ্ছেদো কালপরিচ্ছেদো, যো সো অকুসলপজাননাদিনা পরিচ্ছিন্নো ¶ মগ্গৰুট্ঠানকালো মগ্গক্খণো, তস্স ৰচনন্তি অত্থো. তেনাহ ‘‘যস্মিং কালে’’তি. অকুসলঞ্চাতি চ-সদ্দো সমুচ্চযত্থো. তেন ৰক্খমানং অকুসলমূলাদিং সমুচ্চিনোতি. দসাকুসলকম্মপথন্তি কুতোযং ৰিসেসো, যাৰতা অনিদ্ধারিতৰিসেসং অকুসলং গহিতন্তি? ন সামঞ্ঞজোতনায ৰিসেসে অৰট্ঠানতো. কিং ৰা ইমায যুত্তিচিন্তায, যস্মা পঠমৰারেন উদ্দেসৰসেন দেসিতস্স অত্থস্স ৰিত্থারদেসনা দুতিযৰারো. তেনেৰাহ ‘‘কতমং পনাৰুসো’’তিআদি. যস্মা লোকুত্তরা সম্মাদিট্ঠি ইধ অধিপ্পেতা, তস্মা নিরোধারম্মণায পজাননায মগ্গপঞ্ঞায কিচ্চৰসেন সম্মোহতো ‘‘ইদং দুক্খ’’ন্তি দসঅকুসলকম্মপথং পটিৰিজ্ঝন্তো ‘‘অকুসলং পজানাতী’’তি ৰুচ্চতীতি অত্থো. তস্সাতি অকুসলকম্মপথসঙ্খাতস্স দুক্খস্স. তেনেৰ পকারেনাতি ‘‘নিরোধারম্মণায পজাননায কিচ্চৰসেনা’’তি ৰুত্তপ্পকারেন.

কুসলন্তি এত্থাযং ৰচনত্থো – কুচ্ছিতে পাপধম্মে সলযতি চলযতি কম্পেতীতি কুসলং, কুচ্ছিতেন ৰা আকারেন সযন্তীতি কুসা, পাপকা ধম্মা. তে কুসে লুনাতি ছিন্দতীতি কুসলং. কুচ্ছিতানং ৰা সানতো তনুকরণতো ঞাণং কুসং নাম, তেন লাতব্বং গহেতব্বং পৰত্তেতব্বন্তি কুসলং. যথা ৰা কুসো উভযভাগগতং হত্থপদেসং লুনাতি, এৰমিদং উপ্পন্নানুপ্পন্নৰসেন উভযভাগগতং সংকিলেসপক্খং লুনাতি ছিন্দতি, তস্মা কুসো ৰিয লুনাতীতি ¶ কুসলং. কুচ্ছিতানং ৰা সাৰজ্জধম্মানং সলনতো সংৰরণতো কুসলং. কুসলধম্মৰসেন হি অকুসলা মনচ্ছট্ঠেসু দ্ৰারেসু অপ্পৰত্তিযা সংৰুতা হোন্তি. কুচ্ছিতে ৰা পাপধম্মে সলযতি গমেতি অপনেতীতি কুসলং. কুচ্ছিতানং ৰা পাণাতিপাতাদীনং সানতো নিসানতো তেজনতো কুসা, দোসলোভাদযো. সাদীনৰৰসেন চেতনায তিক্খভাৰপ্পত্তিযা পাণাতিপাতাদীনং মহাসাৰজ্জতা. তে কুসে লুনাতি ছিন্দতীতি কুসলং. কুচ্ছিতানং ৰা সানতো অন্তকরণতো ৰিনাসনতো কুসানি, পুঞ্ঞকিরিযৰসেন পৰত্তানি সদ্ধাদীনি ইন্দ্রিযানি. তেহি লাতব্বং পৰত্তেতব্বন্তি কুসলং. ‘‘কু’’ইতি ৰা ভূমি ৰুচ্চতি, অধিট্ঠানভাৰেন তংসদিসস্স অত্তনো নিস্সযভূতস্স রূপারূপপবন্ধস্স সম্পতি আযতিঞ্চ অনুদহেন ৰিনাসনতো কুং সসন্তীতি কুসা, রাগাদযো. তে ৰিয অত্তনো ¶ নিস্সযস্স লৰনতো ছিন্দনতো কুসলং. পযোগসম্পাদিতা হি কুসলধম্মা অচ্চন্তমেৰ রূপারূপধম্মে অপ্পৰত্তিকরণেন সমুচ্ছিন্দন্তি. কুসলস্স মূলন্তি কুসলমূলং, সুপ্পতিট্ঠিতভাৰসাধনেন কুসলস্স পতিট্ঠা নিদানন্তি অত্থো. অকুসলমূলন্তি এত্থাপি এসেৰ নযো.

অকুসলন্তি পন ন কুসলং অকুসলং, কুসলধম্মানং পটিপক্খৰসেন অকুসলন্তি পদস্স অত্থো ৰেদিতব্বো. এৰঞ্হি আরোগ্যানৰজ্জসুখৰিপাককোসল্লসম্ভূতট্ঠেন কুসলং ৰুচ্চতীতি. যথা যং ধম্মজাতং ন অরোগং ন অৰজ্জং ন সুখৰিপাকং ন চ কোসল্লসম্ভূতং, তং অকুসলন্তি অযমত্থো দস্সিতো হোতি. এৰং যং ন কুচ্ছিতানং সলনসভাৰং, ন কুসেন, কুসেহি ৰা পৰত্তেতব্বং, ন চ কুসো ৰিয লৰনকং, তং অকুসলং নামাতি অযম্পি অত্থো দস্সিতোতি ৰেদিতব্বো. ৰত্থুপজাননাতি দুক্খাদিৰত্থুনো পজাননা পটিৰেধো. তথা বুজ্ঝনকপুগ্গলানং অজ্ঝাসযৰসেন দেসনা পৰত্তাতি আহ ‘‘অকুসলাদিপজাননেনাপী’’তি. তেনেৰ চ সংখিত্তেন দেসনা পৰত্তা. ভাৰনামনসিকারো পন ‘‘সব্বং ভিক্খৰে অভিঞ্ঞেয্য’’ন্তি (সং. নি. ৪.৪৬; পটি. ম. ১.৩) ৰচনতো অনৰসেসতো রূপারূপধম্মানং পরিগ্গহৰসেনেৰ পৰত্ততি. তেনাহ ‘‘দেসনাযেৰা’’তিআদি. তত্থ মনসিকারপটিৰেধোতি পুব্বভাগে পৰত্তৰিপস্সনামনসিকারো অরিযমগ্গপটিৰেধো চ. কস্সচি অকোপনতো ৰিত্থারৰসেনেৰ ৰুত্তং ৰিপস্সনং অনুযুঞ্জন্তা মগ্গং পটিৰিজ্ঝন্তাপি ৰিত্থারনযেনেৰ পটিৰিজ্ঝন্তীতি অত্থো ৰিসুদ্ধিক্কমস্স অভাৰতো.

ভিক্খূতি মহাৰিহারে ধম্মসঙ্গীতিৰসেন পঞ্চনিকাযমণ্ডলে নিসিন্নভিক্খূ. থেরোতি তত্থ সঙ্ঘত্থেরোতি ৰদন্তি. ৰত্থসুত্তৰণ্ণনাযং ৰুত্তনযেন পন মহাসঙ্ঘরক্খিতত্থেরস্স অন্তেৰাসিকভিক্খূ ¶ সন্ধায ‘‘আহংসূ’’তি ৰুত্তং. থেরোতি পন মহাসঙ্ঘরক্খিতত্থেরো. সো হি ইমস্মিং মজ্ঝিমনিকাযে তং তং ৰিনিচ্ছযং কথেসি. রাসিতোতি পিণ্ডতো, একজ্ঝন্তি অত্থো.

অকুসলকম্মপথৰণ্ণনা

অকোসল্লপ্পৰত্তিযাতি কোসল্লপটিপক্খতো অকোসল্লং ৰুচ্চতি অঞ্ঞাণং, ততো পৰত্তনতো, অকোসল্লসম্ভূতত্তাতি অত্থো. ঞাণপটিপক্খো ¶ অঞ্ঞাণং মিত্তপটিপক্খো অমিত্তো ৰিয কুসলপটিপক্খো অকুসলং কুসলেন পহাতব্বত্তা, ন পন কুসলানং পহাযতত্তা. কুসলমেৰ হি পযোগসম্পাদিতং অকুসলং পজহতি. সহ অৰজ্জেহি লোভাদীহি ৰত্ততীতি সাৰজ্জং. দুক্খো অনিট্ঠো চতুক্খন্ধ-সঙ্খাতো ৰিপাকো এতস্সাতি দুক্খৰিপাকং. তত্থ সাৰজ্জৰচনেন অকুসলানং পৰত্তিদুক্খতং দস্সেতি, দুক্খৰিপাকৰচনেন ৰিপাকদুক্খতং. পুরিমঞ্হি পৰত্তিসম্ভৰৰসেন অকুসলস্স লক্খণৰচনং, পচ্ছিমং তালন্তরে ৰিপাকুপ্পাদনসমত্থতাৰসেন. তথা পুরিমেন অকুসলস্স অৰিসুদ্ধসভাৰতং দস্সেতি, পচ্ছিমেন অৰিসুদ্ধৰিপাকতং. পুরিমেন অকুসলং কুসলসভাৰতো নিৰত্তেতি, পচ্ছিমেন অব্যাকতসভাৰতো সৰিপাকত্তদীপকত্তা পচ্ছিমস্স. পুরিমেন ৰা অৰজ্জৰন্ততাদস্সনতো কিচ্চট্ঠেন রসেন অনত্থজননরসতং দস্সেতি, পচ্ছিমেন সম্পত্তিঅত্থেন অনিট্ঠৰিপাকরসতং. পুরিমেন চ উপট্ঠানাকারট্ঠেন পচ্চুপট্ঠানেন সংকিলেসপচ্চুপট্ঠানতং, পচ্ছিমেন ফলট্ঠেন দুক্খৰিপাকপচ্চুপট্ঠানতং. পুরিমেন চ অযোনিসোমনসিকারং অকুসলস্স পদট্ঠানং পকাসেতি. ততো হি তং সাৰজ্জং জাতং, পচ্ছিমেন অকুসলস্স অঞ্ঞেসং পদট্ঠানভাৰং ৰিভাৰেতি. তঞ্হি দুক্খৰিপাকস্স কারণন্তি. সংকিলিট্ঠন্তি সংকিলেসেহি সমন্নাগতং, দসহি কিলেসৰত্থূহি ৰিবাধিতং, উপতাপিতং ৰা তেহি ৰিদূসিতং মলীনকতঞ্চাতি অত্থো. ইদঞ্চস্স দুক্খৰিপাকতঞ্চাতি অত্থে ইদঞ্চ দুক্খৰিপাকতং অপচ্চক্খতায অসদ্দহন্তানং পচ্চক্খতো আদীনৰদস্সনেন সংৰেজনত্থং ৰুত্তং. সাধারণা সব্বস্সপি অকুসলস্স.

সরসেনেৰ (ধ. স. মূলটী. ১) পতনসভাৰস্স অন্তরা এৰ অতীৰ পাতনং অতিপাতো, সণিকং পতিতুং অদত্ৰা সীঘং পাতনন্তি অত্থো. অতিক্কম্মৰা সত্থাদীহি অভিভৰিত্ৰা পাতনং অতিপাতো. পযোগৰত্থুমহন্ততাদীহি মহাসাৰজ্জতা তেহি পচ্চযেহি উপ্পজ্জমানায চেতনায বলৰভাৰতো. একস্স হি পযোগস্স সহসা নিপ্ফাদনৰসেন সকিচ্চসাধিকায বহুক্খত্তুং পৰত্তজৰনেহি লদ্ধাসেৰনায চ সন্নিট্ঠাপকচেতনায ৰসেন পযোগস্স মহন্তভাৰো. সতিপি কদাচি খুদ্দকে চেৰ মহন্তে চ পাণে পযোগস্স সমভাৰে মহন্তং ¶ হনন্তস্স চেতনা তিব্বাকারা উপ্পজ্জতীতি ৰত্থুস্স মহন্তভাৰো. ইতি উভযম্পেতং চেতনায ¶ বলৰভাৰেনেৰ হোতীতি. যথাৰুত্তপচ্চযপরিযাযেপি তংতংপচ্চযেহি চেতনায বলৰতায এৰ মহাসাৰজ্জভাৰো ৰেদিতব্বো. পযোগৰত্থুআদিপচ্চযানঞ্হি অমহত্তেপি হন্তব্বস্স গুণৰন্ততায মহাসাৰজ্জতা, তব্বিপরিযাযেন অপ্পসাৰজ্জতা চ ৰত্থুস্স মহত্তামহত্তেসু ৰিয দট্ঠব্বা. কিলেসানং উপক্কমানং দ্ৰিন্নঞ্চ মুদুতায তিব্বতায চ অপ্পসাৰজ্জতা মহাসাৰজ্জতাপি যোজেতব্বা. পাণো পাণসঞ্ঞিতা ৰধকচিত্তঞ্চ পুব্বভাগিযাপি হোন্তি, উপক্কমো ৰধকচেতনাসমুট্ঠাপিতো. পঞ্চ সম্ভারা হি পাণাতিপাতচেতনাতি সা পঞ্চসম্ভারৰিনিমুত্তা দট্ঠব্বা. অযঞ্চ ৰিচারো অদিন্নাদানাদীসুপি যথারহং ৰত্তব্বো. ৰিজ্ঝনপহরণাদিৰসেন সহত্থেননিব্বত্তো সাহত্থিকো, আণাপনৰসেন পৰত্তো আণত্তিকো, উসুসত্তিযন্তপাসাণাদিনিস্সজ্জনৰসেন পৰত্তো নিস্সগ্গিযো, অদুহলসজ্জনাদিৰসেন পৰত্তো থাৰরো, আথব্বণিকাদীনং ৰিয মন্তপরিজপ্পনৰসেন পৰত্তো ৰিজ্জামযো, কম্মৰিপাকজিদ্ধিমযো ইদ্ধিমযো দাঠাকোটনাদীনি ৰিয.

যদি ‘‘মম ইদ’’ন্তি পরেন পরিগ্গহিতং অদিন্নং, উত্তানসেয্যকদারকসন্তকে কথং তস্স পরিগ্গহসঞ্ঞায এৰ অভাৰতোতি আহ ‘‘যত্থ পরো’’তিআদি. পরো নাম ৰিঞ্ঞূ ৰা অৰিঞ্ঞূ ৰা অত্থি তস্স ৰত্থুস্স সামিকো. অৰিঞ্ঞূপি হি ৰিঞ্ঞুকালে যথাকামং করোন্তো অদণ্ডারহোতি. মন্তপরিজপ্পনেন পরসন্তকহরণং ৰিজ্জামযো, ৰিনা মন্তেন পরসন্তকস্স কাযৰচীপযোগেহি পরিকড্ঢনং তাদিসেনিদ্ধিৰসেন ইদ্ধিমযো পযোগোতি অদিন্নাদানে ছ পযোগা সাহত্থিকাদযো ৰুত্তা. যথানুরূপন্তি এত্থ সাহত্থিকো তাৰ পঞ্চন্নম্পি অৰহারানং ৰসেন পৰত্ততি, তথা আণত্তিযো নিস্সগ্গিযো চ. থাৰরো থেয্যাৰহারপসয্হাৰহারপটিচ্ছন্নাৰহারৰসেন. তথা সেসাপীতি দট্ঠব্বং.

মেথুনসমাচারেসূতি সদারাসন্তোস-পরদারগমনৰসেন দুৰিধেসু মেথুনসমাচারেসু. অযমেৰহি ভেদো ইধাধিপ্পেতো. গোত্তরক্খিতা সগোত্তেহি রক্খিতা. ধম্মরক্খিতা সহধম্মিকেহি রক্খিতা. সারক্খা সসামিকা. যস্সা গমনে রঞ্ঞা দণ্ডো ঠপিতো, সা সপরিদণ্ডা. ভরিযভাৰত্থং ধনেন কীতা ধনক্কীতা. ছন্দেন ৰসন্তী ছন্দৰাসিনী. ভোগত্থং ৰসন্তী ভোগৰাসিনী. পটত্থং ৰসন্তী পটৰাসিনী. উদকপত্তং আমসিত্ৰা গহিতা ওদপত্তকিনী. চুম্বটকং অপনেত্ৰা গহিতা ¶ ওভটচুম্বটা. করমরানীতা ধজাহতা. তঙ্খণিকা মুহুত্তিকা. অভিভৰিত্ৰা ৰীতিক্কমে মিচ্ছাচারো মহাসাৰজ্জো, ন তথা দ্ৰিন্নং সমানছন্দতায. অভিভৰিত্ৰা ৰীতিক্কমনে সতিপি মগ্গেনমগ্গপটিপত্তিঅধিৰাসনে পুরিমুপ্পন্নসেৰনাভিসন্ধিপযোগাভাৰতো মিচ্ছাচারো ¶ ন হোতি অভিভুয্যমানস্সাতি ৰদন্তি. সেৰনাচিত্তে সতি পযোগাভাৰো অপ্পমাণং যেভুয্যেন ইত্থিযা সেৰনাপযোগস্স অভাৰতো. তথা সতি পুরেতরং সেৰনাচিত্তস্স উপট্ঠানেপি তস্সা মিচ্ছাচারো ন সিযা, তথা পুরিসস্সপি সেৰনাপযোগাভাৰেতি, তস্মা অত্তনো রুচিযা পৰত্তিতস্স ৰসেন তযো, বলক্কারেন পৰত্তিতস্স ৰসেন তযোতি সব্বেপি অগ্গহিতগ্গহণেন চত্তারো সম্ভারাতি ৰুত্তন্তি ৰেদিতব্বং.

অত্থভঞ্জকোতি কম্মপথৰসেন ৰুত্তং. কম্মপথকথা হেসাতি. অস্সাতি ৰিসংৰাদকস্স. মুসা ৰদতি এতেনাতি চেতনা মুসাৰাদো, ইমস্মিং পক্খে অতথাকারেন ৰত্থুনো ৰিঞ্ঞাপনপযোগো মুসা, তংসমুট্ঠাপিকা চেতনামুসাৰাদোতি ৰুত্তত্তা ততো অঞ্ঞথা ৰত্তুং ‘‘অপরো নযো’’তিআদি ৰুত্তং. অত্তনো সন্তকং অদাতুকামতাযাতিআদি মুসাৰাদসামঞ্ঞেন ৰুত্তং. হসাধিপ্পাযেনপি ৰিসংৰাদনপুরক্খারস্স মুসাৰাদো. পরস্সাতি ৰিসংৰাদনৰসেন ৰিঞ্ঞাপেতব্বস্স. সোতি মুসাৰাদপযোগো.

সুঞ্ঞভাৰন্তি পীতিৰিরহিততায রিত্তভাৰং. ফরুসসদ্দতায নেৰ কণ্ণসুখা. অত্থৰিপন্নতায ন হদযসুখা. সংকিলিট্ঠচিত্তস্সাতি দোসেন, লোভেন ৰা দূসিতচিত্তস্স.

একন্তফরুসা চেতনাতি এতেন দুট্ঠচিত্ততংযেৰ ৰিভাৰেতি, দুট্ঠচিত্ততা চস্স অমরণাধিপ্পাযৰসেন দট্ঠব্বা. সতি হি মরণাধিপ্পাযে অত্থসিদ্ধি, তদভাৰে পাণাতিপাতব্যাপাদা সিযুন্তি. যং পটিচ্চ ফরুসৰাচা পযুজ্জতি, তস্স সম্মুখাৰ সীসং এতি. পরম্মুখাপি সীসং এতি এৰাতি অপরে. তত্থাযং অধিপ্পাযো যুত্তো সিযা – সম্মুখা পযোগে অগারৰাদীনং বলৰভাৰতো সিযা চেতনা বলৰতী, পরস্স চ তদত্থৰিঞ্ঞাপনং, ন তথা অসম্মুখাতি. যথা চ অক্কোসিতে মতে আল়হনে কতা খমাপনা উপৰাদন্তরাযং নিৰত্তেতি, এৰং পরম্মুখা পযুত্তা ফরুসৰাচা হোতিযেৰাতি সক্কা ৰিঞ্ঞাতুং. তস্সাতি একন্তফরুসচেতনায এৰ ¶ ফরুসৰাচাভাৰস্স আৰিভাৰত্থং. মম্মচ্ছেদকো সৰনফরুসতাযাতি অধিপ্পাযো. চিত্তসণ্হাতায ফরুসৰাচা ন হোতি কম্মপথা’প্পত্তত্তা, কম্মভাৰং পন ন সক্কা ৰারেতুং. এৰং অন্ৰযৰসেন চেতনাফরুসতায ফরুসৰাচং সাধেত্ৰা ইদানি তমেৰ ব্যতিরেকৰসেন সাধেতুং ‘‘ৰচনসণ্হতাযা’’তিআদি ৰুত্তং. এসাতি ফরুসৰাচা. কম্মপথভাৰং অপ্পত্তা অপ্পসাৰজ্জা, ইতরা মহাসাৰজ্জা. তথা কিলেসানং মুদুতিব্বতাভেদেহি সব্বং পুরিমসদিসং.

আসেৰনং বহুলীকরণং. যং উদ্দিস্স পৰত্তিতো, তেন অগ্গহিতে অপ্পসাৰজ্জো, গহিতে মহাসাৰজ্জো ¶ কম্মপথপ্পত্তিতো. যো কোচি পন সম্ফপ্পলাপো দ্ৰীহি সম্ভারেহি সিজ্ঝতি. কিলেসানং মুদুতিব্বতাৰসেনপি অপ্পসাৰজ্জমহাসাৰজ্জতা ৰেদিতব্বা.

অত্তনো পরিণামনং চিত্তেনেৰাতি ৰেদিতব্বং. হিতসুখং ব্যাপাদযতীতি যো তং উপ্পাদেতি, তস্স হিতসুখং ৰিনাসেতি. অহো ৰতাতি ইমিনা অচ্চন্তৰিনাসচিন্তনং দীপেতি. এৰং হিস্স দারুণপৰত্তিযা কম্মপথপ্পত্তি. যথাভুচ্চগহণাভাৰেনাতি যাথাৰগ্গাহস্স অভাৰেন অনিচ্চাদিসভাৰস্স নিচ্চাদিতো গহণেন. মিচ্ছা পস্সতীতি ৰিতথং পস্সতি. সম্ফপ্পলাপো ৰিযাতি ইমিনা আসেৰনস্স মন্দতায অপ্পসাৰজ্জতং, মহন্ততায মহাসাৰজ্জতং দস্সেতি. গহিতাকারৰিপরীততাতি মিচ্ছাদিট্ঠিযা গহিতাকারস্স ৰিপরীতভাৰো. ৰত্থুনোতি তস্সা অযথাভূতসভাৰমাহ. তথাভাৰেনাতি গহিতাকারেনেৰ তস্স দিট্ঠিগতিকস্স, তস্স ৰা ৰত্থুনো উপট্ঠানং এৰমেতং, ন ইতো অঞ্ঞথাতি.

ধম্মতোতি সভাৰতো. কোট্ঠাসতোতি ফস্সপঞ্চমকাদীসু চিত্তঙ্গকোট্ঠাসেসু যং কোট্ঠাসা হোন্তি, ততোতি অত্থো. চেতনাধম্মাতি চেতনাসভাৰা.

পটিপাটিযা সত্তাতি এত্থ ননু চেতনা অভিধম্মে কম্মপথেসু ন ৰুত্তাতি পটিপাটিযা সত্তন্নং কম্মপথভাৰো ন যুত্তোতি? ন, অৰচনস্স অঞ্ঞহেতুকত্তা. ন হি তত্থ চেতনায অকম্মপথত্তা কম্মপথরাসিম্হি অৰচনং, কদাচি পন কম্মপথো হোতি, ন সব্বদাতি কম্মপথভাৰস্স অনিযতত্তা ¶ অৰচনং. যদা পন কম্মপথো হোতি, তদা কম্মপথরাসিসঙ্গহো ন নিৰারিতো. এত্থাহ – যদি চেতনায সব্বদা কম্মপথভাৰাভাৰতো অনিযতো কম্মপথভাৰোতি কম্মপথরাসিম্হি অৰচনং, ননু অভিজ্ঝাদীনং কম্মপথভাৰং অপ্পত্তানং অত্থিতায অনিযতো কম্মপথভাৰোতি তেসম্পি কম্মপথরাসিম্হি অৰচনং আপজ্জতীতি? নাপজ্জতি কম্মপথতাতংসভাগতাহি তেসং তত্থ ৰুত্তত্তা. যদি এৰং চেতনাপি তত্থ ৰত্তব্বা সিযা? সচ্চমেতং, সা পন পাণাতিপাতাদিকাতি পাকটো, তস্সা কম্মপথভাৰোতি ন ৰুত্তা সিযা. চেতনায হি – ‘‘চেতনাহং, ভিক্খৰে, কম্মং ৰদামি (অ. নি. ৬.৬৩; কথা. ৫৩৯), তিৰিধা, ভিক্খৰে, কাযসঞ্চেতনা অকুসলং কাযকম্ম’’ন্তিআদিৰচনতো (কথা. ৫৩৯) কম্মভাৰো পাকটো, কম্মংযেৰ চ সুগতিদুগ্গতীনং তত্থ উপ্পজ্জনকসুখদুক্খানঞ্চ পথভাৰেন পৰত্তং কম্মপথোতি ৰুচ্চতীতি পাকটো তস্সা কম্মপথভাৰো, অভিজ্ঝাদীনং পন চেতনাসমীহনভাৰেন সুচরিতদুচ্চরিতভাৰো চেতনাজনিতপিট্ঠিৰট্টকভাৰেন সুগতিদুগ্গতিতদুপ্পজ্জনকসুখদুক্খানং পথভাৰো চাতি ন তথা পাকটো কম্মপথভাৰোতি তেযেৰ তেন সভাৰেন দস্সেতুং অভিধম্মে চেতনা কম্মপথরাসিভাৰেন ন ৰুত্তা ¶ , অতথাজাতিযকত্তা ৰা চেতনা তেহি সদ্ধিং ন ৰুত্তাতি দট্ঠব্বং. মূলং পত্ৰাতি মূলদেসনং পত্ৰা, মূলসভাৰেসু ধম্মেসু ৰুচ্চমানেসূতি অত্থো.

অদিন্নাদানং সত্তারম্মণন্তি ইদং ‘‘পঞ্চ সিক্খাপদা পরিত্তারম্মণা এৰ ৰা’’তি ইমায পঞ্হপুচ্ছকপাল়িযা ৰিরুজ্ঝতি. যঞ্হি পাণাতিপাতাদিদুস্সীল্যস্স আরম্মণং, তদেৰ তং ৰেরমণিযা আরম্মণং. ৰীতিক্কমিতব্বৰত্থুতো এৰ হি ৰিরতীতি. সত্তারম্মণন্তি ৰা সত্তসঙ্খাতং সঙ্খারারম্মণমেৰ উপাদায ৰুত্তন্তি নাযং ৰিরোধো. তথা হি ৰুত্তং সম্মোহৰিনোদনিযং (ৰিভ. অট্ঠ. ৭১৪) ‘‘যানি সিক্খাপদানি এত্থ সত্তারম্মণানীতি ৰুত্তানি, তানি যস্মা সত্তোতি সঙ্খ্যং গতং সঙ্খারমেৰ আরম্মণং করোন্তী’’তি. ৰিসভাগৰত্থুনো ‘‘ইত্থী, পুরিসো’’তি গহেতব্বতো সত্তারম্মণোতি একে. ‘‘একো দিট্ঠো, দ্ৰে সুতা’’তিআদিনা সম্ফপ্পলপনে দিট্ঠসুতমুতৰিঞ্ঞাতৰসেন. তথা অভিজ্ঝাতি এত্থ তথা-সদ্দো ‘‘দিট্ঠসুতমুতৰিঞ্ঞাতৰসেনা’’তি ইদম্পি উপসংহরতি, ন সত্তসঙ্খারারম্মণতং এৰ দস্সনাদিৰসেন অভিজ্ঝাযনতো. ‘‘নত্থি সত্তা ওপপাতিকা’’তি পৰত্তমানাপি মিচ্ছাদিট্ঠি ¶ তেভূমকধম্মৰিসযাৰাতি অধিপ্পাযেনস্সা সঙ্খারারম্মণতা ৰুত্তা. কথং পন মিচ্ছাদিট্ঠিযা সব্বে তেভূমকধম্মা আরম্মণং হোন্তীতি? সাধারণতো. ‘‘নত্থি সুকতদুক্কটানং কম্মানং ফলং ৰিপাকো’’তি হি পৰত্তমানায অত্থতো রূপারুপাৰচরধম্মাপি গহিতা এৰ হোন্তীতি.

সুখবহুলতায রাজানো হসমানাপি ‘‘চোরং ঘাতেথা’’তি ৰদন্তি, হাসো পন তেসং অঞ্ঞৰিসযোতি আহ ‘‘সন্নিট্ঠাপক…পে… হোতী’’তি.

কেসঞ্চীতি সহজাতানং অদিন্নাদানাদীনং. সম্পযুত্তপভাৰকট্ঠেনাতি সম্পযুত্তো হুত্ৰা উপ্পাদকট্ঠেন. কেসঞ্চীতি অসহজাতানং. উপনিস্সযপচ্চযট্ঠেনাতি এতেন মূলট্ঠেন লোভস্স উপকারতং নিৰত্তেতি. সুপ্পতিট্ঠিতভাৰসাধনট্ঠো হি মূলট্ঠো, সো চ হেতুপচ্চযতাঅৰিনাভাৰী, তেন চেত্থ মূলমিৰ মূলন্তি গহেতব্বং, নিপ্পরিযাযতো পন পুব্বে ‘‘কেসঞ্চী’’তি ৰুত্তানং সহজাতানং মূলভাৰো ৰেদিতব্বো. রত্তো খোতিআদিনা সুত্তপদেনপি পাণাতিপাতাদীনং অকুসলানং লোভস্স মূলকারণতং ৰিভাৰেতি, ন মূলট্ঠেনুপকারত্থং অৰিসেসতো তেসং হেতুপচ্চযত্তাভাৰতো.

অকুসলকম্মপথৰণ্ণনা নিট্ঠিতা.

কুসলকম্মপথৰণ্ণনা

ৰেরন্তি ¶ পাণাতিপাতাদিপাপধম্মং. সো হি ৰেরহেতুতায ‘‘ৰের’’ন্তি ৰুচ্চতি, তং মণতি ‘‘মযি ইধ ঠিতায কথমাগচ্ছসী’’তি তজ্জেন্তী ৰিয নিৰারেতীতি ৰেরমণী. তেনাহ ‘‘পজহতী’’তি. ‘‘ৰিরমণী’’তি ৰত্তব্বে নিরুত্তিনযেন এৰ-কারং কত্ৰা এৰং ৰুত্তং. ৰিভঙ্গে (ৰিভ. ৭০৩, ৭০৪) এৰ নিদ্দিসনৰসেন এৰং ৰুত্তা. অসমাদিন্নসীলস্স সম্পত্ততো যথাউপট্ঠিতৰীতিক্কমিতব্বৰত্থুতো ৰিরতি সম্পত্তৰিরতি, সমাদানৰসেন উপ্পন্না ৰিরতি সমাদানৰিরতি, সমাদানৰসেন উপ্পন্না ৰিরতি সমাদানৰিরতি, কিলেসানং সমুচ্ছিন্দনৰসেন পৰত্তাৰিরতি সমুচ্ছেদৰিরতি.

জীৰমানসসস্স ¶ মংসরুধিরসম্মিস্সতায অল্লসসমংসং. মুঞ্চি সব্বত্থ সমকরুণতায. সচ্চং ৰত্ৰা ‘‘এতেন সচ্চৰজ্জেন ময্হং মাতু রোগো সম্মতূ’’তি অধিট্ঠাসি.

মহাসপ্পোতি অজগরো. মুঞ্চিত্ৰা অগমাসি সীলতেজেন.

কোসল্লং ৰুচ্চতি ঞাণং, কোসল্লেন, কোসল্লতো ৰা পৰত্তিযা উপগমনতো. কুচ্ছিতসযনতোতি কুচ্ছিতেনাকারেন সযনতো অনুসযনতো, পৰত্তনতো ৰা. ‘‘ৰেরমণিকুসলা’’তি ৰত্তব্বাপি পুচ্ছানুরূপং ৰিস্সজ্জনন্তি ‘‘কুসলা’’তি ন ৰুত্তা, ‘‘কুসল’’ন্ত্ৰেৰ ৰুত্তা.

কামঞ্চেত্থ পাল়িযং ৰিরতিযোৰ আগতা, সিক্খাপদৰিভঙ্গে (ৰিভ. ৭০৪) পন চেতনাপি আহরিত্ৰা দীপিতাতি তদুভযম্পি গণ্হন্তো ‘‘চেতনাপি ৰট্টন্তি ৰিরতিযোপী’’তি আহ.

অনভিজ্ঝা হি মূলং পত্ৰা কম্মপথকোট্ঠাসং পত্ৰা অনভিজ্ঝাতি ৰুত্তধম্মো মূলতো অলোভো কুসলমূলং হোতীতি এৰমত্থো দট্ঠব্বো. সেসপদদ্ৰযেপি এসেৰ নযো.

দুস্সীল্যারম্মণা তদারম্মণা জীৰিতিন্দ্রিযাদিআরম্মণা কথং দুস্সীল্যানি পজহন্তীতি তং দস্সেতুং ‘‘যথা পনা’’তিআদি ৰুত্তং.

অনভিজ্ঝা ¶ …পে… ৰিরমন্তস্সাতি অভিজ্ঝং পজহন্তস্সাতি অত্থো. ন হি মনোদুচ্চরিততো ৰিরতি অত্থি অনভিজ্ঝাদীহেৰ তপ্পহানসিদ্ধিতো. তেসু অলোভোতিআদীসু যং ৰত্তব্বং, তং অকুসলমূলেসু ৰুত্তনযেনেৰ ৰেদিতব্বং.

অপ্পনাৰারন্তি নিগমনৰারং. একেন নযেনাতি ৰেদনাদিৰসেন অরূপমুখেনেৰ অনেকৰিধেসু ৰিপস্সনাকম্মট্ঠানেসু একেন কম্মট্ঠাননযেন. ‘‘ঠপেত্ৰা অভিজ্ঝং নৰ অকুসলকম্মপথা’’তি ৰত্তব্বং. দসাতি ৰা ইদং ‘‘কুসলকম্মপথা’’তি ইমিনা সম্বন্ধিতব্বং ‘‘অকুসলকম্মপথা চ দস কুসলকম্মপথা চা’’তি. ‘‘ঠপেত্ৰা অভিজ্ঝ’’ন্তি হি ইমিনাৰ অকুসলকম্মপথানং নৰভাৰো ৰুত্তো হোতি. অথ ৰা দসাতি ইদং উভযথাপি সম্বন্ধিতব্বং. অভিজ্ঝা হি পহাতব্বাপি সতি পরিঞ্ঞেয্যতং নাতিৰত্ততীতি. তথা হি ৰুত্তং ‘‘রূপতণ্হা পিযরূপং সাতরূপ’’ন্তিআদি, তস্মা ¶ সা তায পরিঞ্ঞেয্যতায দুক্খসচ্চেপি সঙ্গহং লভতেৰ, পহাতব্বং পন উপাদায ‘‘ঠপেত্ৰা অভিজ্ঝ’’ন্তি ৰুত্তং. তেনেৰাহ ‘‘পরিযাযেন পন সব্বেপি কম্মপথা দুক্খসচ্চ’’ন্তি. অভিজ্ঝালোভানং পৰত্তিআকারসিদ্ধভেদং উপাদায ‘‘ইমে দ্ৰে ধম্মা’’তি ৰুত্তং. সুত্তন্তনযেন তণ্হা ‘‘সমুদযসচ্চ’’ন্তি ৰুত্তাতি আহ ‘‘নিপ্পরিযাযেন সমুদযসচ্চ’’ন্তি. অপ্পৰত্তীতি অপ্পৰত্তিনিমিত্তমাহ যথা ‘‘রাগক্খযো দোসক্খযো’’তি (সং. নি. ৪.৩১৪). সপ্পচ্চযতায সঙ্খতসভাৰে দুক্খসচ্চে গহিতে অপ্পচ্চযতায অসঙ্খতং নিরোধসচ্চং পটিপক্খতো আৰত্ততি, একন্তসাৰজ্জে আচযগামিলক্খণে সমুদযসচ্চে গহিতে সাৰজ্জা ৰিগমনং অপচযগামিলক্খণং মগ্গসচ্চংপটিপক্খতো আৰত্ততীতি দ্ৰে আৰত্তহারৰসেন ৰেদিতব্বানীতি ৰুত্তং. তেনেৰাহ নেত্তিযং (নেত্তি. ৪.নিদ্দেসৰার) –

‘‘একম্হি পদট্ঠানে, পরিযেসতি সেসকং পদট্ঠানং;

আৰত্ততি পটিপক্খে, আৰত্তো নাম সো হারো’’তি.

সব্বাকারেনাতি কামরাগরূপরাগাদিসব্বপ্পকারেহি, সব্বতো ৰা অপাযগমনীযাদিআকারতো, তত্থ কিঞ্চিপি অনৰসেসেত্ৰা ৰা. সব্বাকারেনেৰাতি সব্বাকারতো. নীহরিত্ৰাতি অপনেত্ৰা, সমুচ্ছিন্দিত্ৰাইচ্চেৰ অত্থো. কঞ্চি ধম্মং অনৰকারীকরিত্ৰাতি রূপৰেদনাদীসু কঞ্চি একধম্মম্পি অৰিনিব্ভোগং কত্ৰা, একেকতো অগ্গহেত্ৰা সমূহতোৰ গহেত্ৰাতি অত্থো. অস্মীতি অহমস্মীতি মানগ্গাহৰসেন. সো পন যস্মা পঞ্চক্খন্ধে নিরৰসেসতো গণ্হাতি, তস্মা ৰুত্তং ‘‘সমূহগ্গহণাকারেনা’’তি. যস্মা চেত্থ অগ্গমগ্গচিত্তং ৰুচ্চতি, তস্মা আহ ‘‘দিট্ঠিসদিসং মানানুসয’’ন্তি. ‘‘যং রূপং তং অহ’’ন্তিআদিনা ¶ যথা দিট্ঠি রূপাদিং ‘‘অহমস্মী’’তি গণ্হন্তী পৰত্ততি, এৰং মানোপি ‘‘সেয্যোহমস্মী’’তিআদিনাতি আহ ‘‘মানানুসযো অস্মীতি পৰত্তত্তা দিট্ঠিসদিসো’’তি. পরিচ্ছেদকরোতি ওসানপরিচ্ছেদকরো ইতো পরং দুক্খস্সাভাৰকরণতো. কম্মপথদেসনাযাতি কম্মপথমুখেন পৰত্তচতুসচ্চদেসনায. মনসিকারপ্পটিৰেধৰসেনাতি ৰিপস্সনামনসিকারমগ্গপ্পটিৰেধৰসেন.

কুসলকম্মপথৰারৰণ্ণনা নিট্ঠিতা.

আহারৰারৰণ্ণনা

৯০. আহরতীতি ¶ (সং. নি. টী. ২.২.১১) আনেতি, উপ্পাদেতি উপত্থম্ভেতি চাতি অত্থো. নিব্বত্তাতি পসুতা. ততো পট্ঠায হি লোকে জাতৰোহারো. পটিসন্ধিগ্গহণতো পন পট্ঠায যাৰ মাতুকুচ্ছিতো নিক্খমনং, তাৰ সম্ভৰেসিনো. এস তাৰ গব্ভসেয্যকেসু ভূতসম্ভৰেসিৰিভাগো, ইতরেসু পন পঠমচিত্তাদিৰসেন ৰুত্তো. সম্ভৰ-সদ্দো চেত্থ গব্ভসেয্যকানং ৰসেন পসূতিপরিযাযো, ইতরেসং ৰসেন উপ্পত্তিপরিযাযো. পঠমচিত্তপঠমইরিযাপথক্খণেসু হি তে সম্ভৰং উপ্পত্তিং এসন্তি উপগচ্ছন্তি নাম, ন তাৰ ভূতা উপ্পত্তিযা ন সুপ্পতিট্ঠিতত্তা. ভূতাযেৰ সব্বসো ভৰেসনায সমুচ্ছিন্নত্তা. ন পুন ভৰিস্সন্তীতি অৰধারণেন নিৰত্তিতমত্থং দস্সেতি, ‘‘যো চ কালঘসো ভূতো’’তিআদীসু (জা. ১.২.১৯০) ভূত-সদ্দস্স খীণাসৰৰাচিতা দট্ঠব্বা. ৰা-সদ্দো চেত্থ সম্পিণ্ডনত্থো ‘‘অগ্গিনা ৰা উদকেন ৰা’’তিআদীসু (উদা. ৭৬) ৰিয.

যথাসকং পচ্চযভাৰেন অত্তভাৰস্স পট্ঠপনমেৰেত্থআহারেহি কাতব্বঅনুগ্গহোতি অধিপ্পাযেনাহ ‘‘ৰচনভেদো…পে… একোযেৰা’’তি. সত্তস্স উপ্পন্নধম্মানন্তি সত্তস্সসন্তানে উপ্পন্নধম্মানং. যথা ‘‘ৰস্সসতং তিট্ঠতী’’তি ৰুত্তে অনুপ্পবন্ধৰসেন পৰত্ততীতি ৰুত্তং হোতি, এৰং ঠিতিযাতি অনুপ্পবন্ধৰসেন পৰত্তিযাতি অত্থো, সা পন অৰিচ্ছেদোতি আহ ‘‘অৰিচ্ছেদাযা’’তি. অনুপ্পবন্ধধম্মুপ্পত্তিযা সত্তসন্তানো অনুগ্গহিতো নাম হোতীতি আহ ‘‘অনুপ্পন্নানং উপ্পাদাযা’’তি. এতানীতি ঠিতিঅনুগ্গহপদানি. উভযত্থ দট্ঠব্বানি, ন যথাসঙ্খ্যং.

ৰত্থুগতা ¶ ওজা ৰত্থু ৰিয তেন সদ্ধিং আহরিতব্বতং গচ্ছতীতি ৰুত্তং ‘‘অজ্ঝোহরিতব্বতো আহারো’’তি. নিব্বত্তিতওজং পন সন্ধায ‘‘কবল়ীকারাহারো ওজট্ঠমকরূপানি আহরতী’’তি ৰক্খতি. ওল়ারিকতা অপ্পোজতায, ন ৰত্থুনো থূলতায, কথিনতায ৰা, তস্মা যস্মিং ৰত্থুস্মিং পরিত্তা ওজা হোতি, তং ওল়ারিকং. সপ্পাদযো দুক্খুপ্পাদকতায ওল়ারিকাৰেদিতব্বা. ৰিসাণাদীনং তিৰস্সছড্ডিতানং পূতিভূত্ততা মুদুকতাতি ৰদন্তি, তরচ্ছখেল়তেমিকতায পন তথাভূতানং তেসং মুদুকতা. ধম্মসভাৰো হেস. সসানং ¶ আহারো সুখুমো তরুণতিণসস্সখাদনতো. সকুণানং আহারো সুখুমো তিণবীজাদিখাদনতো. পচ্চন্তৰাসীনং সুখুমো, তেসঞ্হি সাকপণ্ণসুক্খকুরপদুমপত্তম্পি আহারোতি. তেসং পরনিম্মিতৰসৰত্তীনং. সুখুমোত্ৰেৰাতি ন কিঞ্চি উপাদায, অথ খো সুখুমো ইচ্চেৰ নিট্ঠং পত্তো ততো পরং সুখুমস্স অভাৰতো.

ৰত্থুৰসেন পনেত্থ আহারস্স ওল়ারিকসুখুমতা ৰুত্তা, সা চস্স অপ্পোজমহোজতাহি ৰেদিতব্বাতি দস্সেতুং ‘‘এত্থ চা’’তিআদি ৰুত্তং. পরিস্সমন্তি খুদাৰসেন উপ্পন্নং সরীরখেদং. ৰিনোদেতীতি ৰত্থু তস্স ৰিনোদনমত্তং করোতি. ন পন সক্কোতি পালেতুন্তি সরীরং যাপেতুং নপ্পহোতি নিস্সারত্তা. ন সক্কোতি পরিস্সমং ৰিনোদেতুং আমাসযস্স অপূরণতো.

ছব্বিধোপীতি ইমিনা কস্সচিপি ফস্সস্স অনৰসেসিতব্বতমাহ. আহারস্সদেসনাক্কমেনেৰেত্থ ফস্সাদীনং দুতিযাদিতা, ন অঞ্ঞেন কারণেনাতি আহ ‘‘দেসনানযো এৰা’’তিআদি. মনসো সঞ্চেতনা, ন সত্তস্সাতি দস্সনত্থং মনোগহণং যথা ‘‘চিত্তস্স ঠিতি (ধ. স. ১১), চেতোৰিমুত্তি চা’’তি (ম. নি. ১.৬৯) আহ ‘‘মনোসঞ্চেতনাতি চেতনা এৰা’’তি. চিত্তন্তি যং কিঞ্চি চিত্তং, ন ৰিপাকৰিঞ্ঞাণমেৰ.

পুব্বে ‘‘আহারন্তি পচ্চয’’ন্তি ৰুত্তত্তা ‘‘যদি পচ্চযট্ঠো আহারট্ঠো’’তিআদিনা চোদেতি. অথ কস্মা ইমেযেৰ চত্তারো ৰুত্তাতি অথ কস্মা চত্তারোৰ ৰুত্তা, ইমে এৰ চ ৰুত্তাতি যোজনা. ৰিসেসপচ্চযত্তাতি এতেন যথা অঞ্ঞে পচ্চযধম্মা অত্তনো পচ্চযুপ্পন্নস্স পচ্চযাৰ হোন্তি, ইমে পন তথা চ হোন্তি অঞ্ঞথা চাতি সমানেপি পচ্চযত্তে অতিরেকপচ্চযা হোন্তি, তস্মা আহারাতি ৰুত্তাতি ইমমত্থং দস্সেতি. ইদানি তং অতিরেকপচ্চযতং দস্সেতুং ‘‘ৰিসেসপচ্চযো হী’’তিআদি আরদ্ধং. ৰিসেসপচ্চযো রূপকাযস্স কবল়ীকারো আহারো উপত্থম্ভকভাৰতো. তেনাহ অট্ঠকথাযং (ৰিসুদ্ধি. ২.৭০৮; পট্ঠা. অট্ঠ. পচ্চযুদ্দেসৰণ্ণনা) ‘‘রূপারূপানং উপত্থম্ভকত্তেন উপকারকা চত্তারো আহারা আহারপচ্চযো’’তি. উপত্থম্ভকত্তঞ্হি ¶ সতিপি জনকত্তে অরূপীনং আহারানং আহারজরূপসমুট্ঠাপকরূপাহারস্স ¶ চ হোতি, অসতি পন উপত্থম্ভকত্তে আহারানং জনকত্তং নত্থীতি উপত্থম্ভকত্তং পধানং. জনযমানোপি হি আহারো অৰিচ্ছেদৰসেন উপত্থম্ভযমানো এৰ জনেতীতি উপত্তম্ভকভাৰো এৰ আহারভাৰো. ৰেদনায ফস্সো ৰিসেসপচ্চযো. ‘‘ফস্সপচ্চযা ৰেদনা’’তি হি ৰুত্তং. ‘‘সঙ্খারপচ্চযা ৰিঞ্ঞাণ’’ন্তি (উদা. ১; ম. নি. ৩.১২৬) ৰচনতো ৰিঞ্ঞাণস্সমনোসঞ্চেতনা. ‘‘চেতনা তিৰিধং ভৰং জনেতী’’তি হি ৰুত্তং. ‘‘ৰিঞ্ঞাণপচ্চযা নামরূপ’’ন্তি পন ৰচনতো নামরূপস্স ৰিঞ্ঞাণং ৰিসেসপচ্চযা. ন হি ওক্কন্তিৰিঞ্ঞাণাভাৰে নামরূপস্স অত্তসম্ভৰো. যথাহ ‘‘ৰিঞ্ঞাণঞ্চ হি, আনন্দ, মাতুকুচ্ছিস্মিং ন ওক্কমিস্সথ, অপি নু খো নামরূপং মাতুকুচ্ছিস্মিং সমুচ্চিস্সথা’’তিআদি (দী. নি. ২.১১৫). ৰুত্তমেৰত্থং সুত্তেন সাধেতুং ‘‘যথাহা’’তিআদি ৰুত্তং.

এৰং যদিপি পচ্চযট্ঠো আহারট্ঠো, ৰিসেসপচ্চযতায পন ইমে এৰ আহারাতি ৰুত্তাতি তং নেসং ৰিসেসপচ্চযতং অৰিভাগতো দস্সেত্ৰা ইদানি ৰিভাগতো দস্সেতুং ‘‘কো পনেত্থা’’তিআদি আরদ্ধং. মুখে ঠপিতমত্তোযেৰ অসঙ্খাদিতো, তত্তকেনপি অব্ভন্তরস্স আহারস্স পচ্চযো হোতি এৰ. তেনাহ ‘‘অট্ঠ রূপানি সমুট্ঠাপেতী’’তি. সুখৰেদনায হিতো সুখৰেদনিযো. সব্বথাপীতি চক্খুসম্ফস্সাদিৰসেন. যত্তকা ফস্সস্স পকারভেদা, তেসং ৰসেন সব্বপ্পকারোপি ফস্সাহারো. যথারহং তিস্সো ৰেদনা আহরতি, অনাহারকো নত্থি.

সব্বথাপীতি ইধাপি ফস্সাহারে ৰুত্তনযানুসারেন অত্থো ৰেদিতব্বো. তিসন্ততিৰসেনাতি কাযদসকং ভাৰদসকং ৰত্থুদসকন্তি তিৰিধসন্ততিৰসেন. সহজাতাদিপচ্চযনযেনাতি সহজাতাদিপচ্চযৰিধিনা. পটিসন্ধিৰিঞ্ঞাণঞ্হি অত্তনা সহজাতনামস্স সহজাতঅঞ্ঞমঞ্ঞনিস্সযৰিপাকিন্দ্রিযসম্পযুত্তঅত্থিঅৰিগতপচ্চযেহি পচ্চযো হোন্তোযেৰ আহারপচ্চযতায তং আহারেতী ৰুত্তং, সহজাতরূপেসু পন ৰত্থুনো সম্পযুত্তপচ্চযং ঠপেত্ৰা ৰিপ্পযুত্তপচ্চযেন, সেসরূপস্স অঞ্ঞমঞ্ঞপচ্চযঞ্চ ঠপেত্ৰা ৰুত্তনযেনেৰযোজনা কাতব্বা. তানীতি নপুংসকনিদ্দেসো অনপুংসকানম্পি নপুংসকেহি সহ ৰচনতো.

সাসৰা ¶ কুসলাকুসলচেতনাৰ ৰুত্তা. ৰিসেসপচ্চযভাৰদস্সনং হেতন্তি. তেনাহ ‘‘অৰিসেসেন পনা’’তিআদি. পটিসন্ধিৰিঞ্ঞাণমেৰ ৰুত্তন্তি এত্থাপি এসেৰ নযো. যথা তস্স তস্স ফলস্স ৰিসেসতো পচ্চযতায এতেসং আহারট্ঠো, এৰং অৰিসেসতোপীতি দস্সন্তেন ‘‘অৰিসেসেন পনা’’তিআদি ¶ ৰুত্তং. তত্থ তংসম্পযুত্ততংসমুট্ঠানধম্মানন্তি তেহি ফস্সাদীহি সম্পযুত্তধম্মানঞ্চেৰ তংসমুট্ঠানরূপধম্মানঞ্চ. তত্থ সম্পযুত্তগ্গহণং যথারহতো দট্ঠব্বং, সমুট্ঠানগ্গহণং পন অৰিসেসতো.

উপত্থম্ভেন্তো আহারকিচ্চং সাধেতীতি উপত্থম্ভেন্তোযেৰ রূপং সমুট্ঠাপেতি, ওজট্ঠমকরূপসমুট্ঠাপনেনেৰ পনস্স উপত্থম্ভনকিচ্চসিদ্ধি. ফুসন্তোযেৰাতি ফুসনকিচ্চং করোন্তো এৰ. আযূহমানাৰাতি চেতযমানা এৰ অভিসন্দহন্তী এৰ. ৰিজানন্তমেৰাতি উপপত্তিপরিকপ্পনৰসেন ৰিজানন্তমেৰ আহারকিচ্চং সাধেতীতি যোজনা. সেসপদদ্ৰযেপি এসেৰ নযো. আহারকিচ্চসাধনঞ্চ তেসং ৰেদনাদিউপ্পত্তিহেতুতায অত্তভাৰস্স পৰত্তনমেৰ.

কাযট্ঠপনেনাতি কস্মা ৰুত্তং? ননু কম্মজাদিরূপং কম্মাদিনাৰ পৰত্ততীতি চোদনং সন্ধাযাহ ‘‘কম্মজনিতোপী’’তিআদি. উপাদিন্নরূপসন্ততিযা উপত্থম্ভনেনেৰ উতুচিত্তজরূপসন্ততীনম্পি উপত্থম্ভনসিদ্ধি হোতীতি ‘‘দ্ৰিন্নং রূপসন্ততীন’’ন্তি ৰুত্তং. উপত্থম্ভনমেৰ সন্ধায ‘‘অনুপালকো হুত্ৰা’’তি চ ৰুত্তং. রূপকাযস্স ঠিতিহেতুতা হি যাপনা অনুপালনা.

সুখাদিৰত্থুভূতন্তি সুখাদীনং পৰত্তিট্ঠানভূতং. আরম্মণম্পি হি ৰসতি এত্থ আরম্মণকরণৰসেন তদারম্মণা ধম্মাতি ৰত্থূতি ৰুচ্চতি. ফুসন্তোযেৰাতি ইদং ফস্সস্স ফুসনসভাৰত্তা ৰুত্তং. ন হি ধম্মানং সভাৰেন ৰিনা পৰত্তি অত্থি. ৰেদনাপৰত্তিযা ৰিনা সত্তানং সন্ধাৰনতা নত্থীতি আহ ‘‘সুখাদি…পে… হোতী’’তি, ন চেত্থ সঞ্ঞীভৰকথাযং অসঞ্ঞীভৰো দস্সেতব্বো, তস্সাপি ৰা কারণভূতৰেদনাপৰত্তিৰসেনেৰ ঠিতিযা হেতুনো অব্যাপিতা. তথা হি ‘‘মনোসঞ্চেতনা…পে… ভৰমূলনিপ্ফাদনতো সত্তানং ঠিতিযা হোতী’’তি ৰুত্তা, ততো এৰ ‘‘ৰিঞ্ঞাণং ৰিজানন্তমেৰাতি উপপত্তিপরিকপ্পনৰসেন ৰিজানন্তমেৰা’’তি ৰুত্তোৰাযমত্থোতি.

চত্তারি ¶ ভযানি দট্ঠব্বানি আদীনৰৰিভাৰনতো. নিকন্তীতি নিকামনা. রসতণ্হং সন্ধায ৰদতি. সা হি কবল়ীকারে আহারে বলৰতী. তেনেৰ তত্থ অৰধারণং কতং. ভাযতি এতস্মাতি ভযং, নিকন্তিযেৰভযং মহানত্থহেতুতো. উপগমনং ৰিসযিন্দ্রিযৰিঞ্ঞাণেসু ৰিসযৰিঞ্ঞাণেসু এৰ চ সঙ্গতিৰসেন পৰত্তি, তং ৰেদনাদিউপ্পত্তিহেতুতায ‘‘ভয’’ন্তি ৰুত্তং. অৰধারণে পযোজনং ৰুত্তনযমেৰ. সেসদ্ৰযেপি এসেৰনযো. আযূহনং অভিসন্দহনং, সংৰিধানন্তিপি ¶ ৰদন্তি. তং ভৰূপপত্তিহেতুতায ‘‘ভয’’ন্তি ৰুত্তং. অভিনিপাতো তত্থ তত্থ ভৰে পটিসন্ধিগ্গহণৰসেন নিব্বত্তি. সো ভৰূপপত্তিহেতুকানং সব্বেসং অনত্থানং মূলকারণত্তা ‘‘ভয’’ন্তি ৰুত্তো. ইদানি নিকন্তিআদীনং সপ্পটিভযতং ৰিত্থারতো দস্সেতুং ‘‘কিংকারণা’’তিআদি আরদ্ধং. তত্থ নিকন্তিং কত্ৰাতি আলযং জনেত্ৰা, তণ্হং উপ্পাদেত্ৰাতি অত্থো.

ফস্স উপগচ্ছন্তাতি চক্খুসম্ফস্সাদিভেদং ফস্সং পৰত্তেন্তা. ফস্সস্সাদিনোতি কাযসম্ফস্সৰসেন ফোট্টব্বসঙ্খাতস্স ফস্সস্স অস্সাদনসীলা. কাযসম্ফস্সৰসেন হি সত্তানং ফোট্ঠব্বতণ্হা পৰত্ততীতি দস্সেতুং ফস্সাহারাদীনৰদস্সনে ফোট্ঠব্বারম্মণং উদ্ধটং ‘‘পরেসং রক্খিতগোপিতেসূ’’তিআদিনা. ফস্সস্সাদিনোতি ৰা ফস্সাহারস্সাদিনোতি অত্থো. সতি হি ফস্সাহারে সত্তানং ফস্সারম্মণে অস্সাদো, নাসতীতি. তেনাহ ‘‘ফস্সস্সাদমূলক’’ন্তিআদি.

জাতিনিমিত্তস্স ভযস্স অভিনিপাতসভাৰেন গহিতত্তা ‘‘তম্মূলক’’ন্তি ৰুত্তং, কম্মাযূহননিমিত্তন্তি অত্থো.

অভিনিপততীতি অভিনিব্বত্ততি. পঠমাভিনিব্বত্তি হি সত্তানং তত্থ তত্থ অঙ্গারকাসুসদিসে ভৰে অভিনিপাতসদিসীতি. তম্মূলকত্তাতি নামরূপনিব্বত্তিমূলকত্তা.

তত্রাতি তাসু উপমাসু. ভূতমত্থং কত্ৰাতি ন পরিকপ্পিতমত্থং, অথ খো ভূতং ভূতপুব্বং অত্থং কত্ৰা. পাথেয্যহত্থেসু গচ্ছন্তেসু পাথেয্যং, গচ্ছন্তং ৰিয হোতীতি ৰুত্তং ‘‘গন্ত্ৰা পাথেয্যং নিট্ঠাসী’’তি. গন্ত্ৰাতি ৰাগমনহেতূতি অত্থো. খুপ্পিপাসাতুরতায ঘনচ্ছাযং রুক্খং উপগন্তুং অসমত্থা ৰিরল়্হচ্ছাযাযং নিসীদিংসু. ন দানি সক্কা তং মযা কাতুং ¶ অতিদুব্বলভাৰতো. পরিক্খলিতগতিতরুণদারকো খুপ্পিপাসাভিভূতো চ, তস্মা গচ্ছন্তোযেৰ মতো.

সজাতিমংসতাযাতি (সং. নি. টী. ২.২.৬৩) সমানজাতিমংসতায, মনুস্সমংসতাযাতি অত্থো. যং মনুস্সমংসং, তঞ্হি লোকে জিগুচ্ছনীযত্তা পটিকুলং. তথা হি তং ৰিঞ্ঞূহি ৰজ্জিতং, মনুস্সমংসেসুপি ঞাতিমংসং অযুত্তপরিভোগতায পটিকূলং, তত্থাপি পুত্তমংসং, তত্থাপি পিযপুত্তমংসং, তত্থাপি তরুণমংসং, তত্থাপি আমকমংসং, তত্থাপি অগোরসাভিসঙ্খতং, তত্থাপি অলোণং, তত্থাপি অধূপিতন্তি এৰং হেট্ঠিমতো উত্তরুত্তরস্স পটিকূলতরভাৰকারণতা ¶ দট্ঠব্বা. পুত্তমংসসদিসন্তি পটিকূলতাউপট্ঠাপনেন পুত্তমংসসদিসং কত্ৰা পস্সতি. তত্থ নিকন্তিং পরিযাদিযতীতি অরিযমগ্গেন আহারে সাপেক্খং খেপেতি.

সা গাৰীতি ‘‘সেয্যথাপি ভিক্খৰে গাৰী’’তি (সং. নি. ২.৬৩) এৰং সুত্তে ৰুত্তগাৰী. উদ্দালেত্ৰাতি উপ্পাটেত্ৰা. নিস্সায তিট্ঠতীতি পটিচ্চপচ্চযং কত্ৰা পৰত্ততি. দুক্খদুক্খতাদিৰসেন তিণ্ণম্পি ৰেদযিতানং দুক্খভাৰং সন্ধাযাহ ‘‘ৰেদযিতদুক্খস্সা’’তি.

সাধুসম্মতাপি গতি ৰিপরিণামসঙ্খারদুক্খতাৰসেন কিলেসদুক্খৰসেন চ মহাপরিল়াহাযেৰাতি ৰুত্তং ‘‘মহাপরিল়াহট্ঠেন তযো ভৰা’’তি. যথা উপকড্ঢকা দ্ৰে পুরিসা, এৰং কুসলাকুসলৰসেন দ্ৰে মনোসঞ্চেতনা. যথা মনোসঞ্চেতনা ন পৰত্ততি, তথা পটিপজ্জন্তো তত্থ নিকন্তিং পরিযাদিযতীতি ৰেদিতব্বো.

সত্তিসতেন হতা এৰ উপমা সত্তিসতহতূপমা, তস্সং সত্তিসতহতূপমাযং. তং সত্তিসতং. অস্স পুরিসস্স. পতিতোকাসেতি পুরিমসত্তীহি পতিতপ্পদেসে. দুক্খস্স পমাণং নত্থি অনেকস্স অপরাপরং উপ্পজ্জনতো. খন্ধজননন্তি খন্ধানং অপরাপরুপ্পাদো, পঠমাভিনিব্বত্তি পন পটিসন্ধি এৰ. আগুচারী পুরিসো ৰিয পটিসন্ধিৰিঞ্ঞাণং নানপ্পকারদুক্খুপ্পাদসন্নিস্সযতো, তেহি চ দুক্খেহি উপগন্তব্বতো. সম্পযুত্তধম্মানং পমুখভাৰেন পৰত্তিযা ‘‘ৰিঞ্ঞাণস্স দুক্খুপ্পাদোতি ৰুত্তা. তথা হি ৰুত্তং ‘‘মনোপুব্বঙ্গমা ধম্মা’’তি (ধ. প. ১, ২) যথা ৰিঞ্ঞাণং আযতিং পটিসন্ধিৰসেন ন পৰত্ততি, এৰং করণং তত্থ নিকন্তিপরিযাদানং দট্ঠব্বং.

পরিঞ্ঞাতং ¶ ৰত্থূতি দুক্খসচ্চমাহ. পঞ্চকামগুণিকো রাগোতি পঞ্চকামগুণারম্মণো রাগো. পরিঞ্ঞাতো হোতীতি পরিচ্ছিজ্জ জাননেন সমতিক্কন্তো হোতি. রসতণ্হায হি সম্মদেৰ ৰিগতায রূপতণ্হাদযোপি ৰিগতাযেৰ হোন্তি. তথা চ সতি কামরাগসংযোজনং সমুচ্ছিন্নমেৰ হোতি, এৰং করণং তত্থ নিকন্তিপরিযাদানং দট্ঠব্বং. পরিঞ্ঞাভিসমযে হি সিদ্ধে পহানাভিসমযো সিদ্ধো এৰাতি. পহীনে চ কামরাগসংযোজনে ওরম্ভাগিযসংযোজনানং লেসোপি নাৰসিস্সতীতি দস্সেন্তো আহ ‘‘নত্থি তং সংযোজন’’ন্তিআদি. তেন কবল়ীকারাহারপরিঞ্ঞা অনাগামিতং পাপেতীতি দস্সেতি. সেসাহারপরিঞ্ঞা পন অরহত্তনিট্ঠা এৰাতি দস্সেন্তো ‘‘ফস্সে ভিক্খৰে’’তিআদিমাহ. তত্থ তিস্সো তণ্হাতি কামতণ্হা রূপতণ্হা অরূপতণ্হাতি ইমা তিস্সো তণ্হা.

‘‘পুরিমতণ্হাসমুদযা’’তি ¶ সঙ্খেপতো ৰুত্তমত্থং ৰিত্থারতো দস্সেতুং ‘‘কথ’’ন্তিআদি আরদ্ধং. তত্থ তণ্হাপচ্চযনিব্বত্তাতি তণ্হাপচ্চযা নিব্বত্তা. পটিসন্ধিক্খণে পুরিমতণ্হাসমুদযা আহারানং সমুদযদস্সনেনেৰ পৰত্তিক্খণেপি উপাদিন্নকআহারসমুদযো দস্সিতো হোতীতি তং অনামসিত্ৰা অনুপাদিন্নকানং তণ্হাসমুদযং দস্সেতুং ‘‘যস্মা পনা’’তিআদি ৰুত্তং. ইধাতি ইমস্মিং সুত্তে মিস্সিত্ৰা কথিতা অৰিসেসিতত্তা. সহজাততণ্হাপচ্চযনিব্বত্তোতি এত্থ সহজাতগ্গহণং অসহজাততণ্হাপচ্চযনিব্বত্তোপি অনুপাদিন্নকআহারো লব্ভতীতি দস্সনত্থং. সো পন অসহজাততণ্হাপচ্চযনিব্বত্ততাসামঞ্ঞেনপি যথাৰুত্তউপাদিন্নকাহারেন সংসযং জনেয্যাতি ন উদ্ধটো, ন চ এতং কারণং ‘‘রাগং উপনিস্সায দোমনস্সং উপ্পজ্জতী’’তি ৰচনতো, তণ্হোপনিস্সযপটিঘচিত্তসমুট্ঠানায চ ওজায ৰসেন অনুপাদিন্নকআহারস্স লব্ভনতো. কথং পন তণ্হা ওজায উপনিস্সযপচ্চযো; ন হি পট্ঠানে কত্থচি রূপস্স উপনিস্সযপচ্চযো ৰুত্তো অত্থীতি. নাযং ৰিরোধো ‘‘যস্মিং সতি যং হোতি, সো তস্স উপনিস্সযো’’তি সুত্তন্তনযস্স অধিপ্পেতত্তা যথাৰুত্তত্থসম্ভৰতো. তেনেৰাহ ‘‘ইমিস্সা…পে… তণ্হায নিরোধেনা’’তি.

কারণে সব্বসো নিরুদ্ধে ফলম্পি সব্বসো নিরুজ্ঝতীতি আহ ‘‘আহারনিরোধো পঞ্ঞাযতী’’তি. আহারানং দুক্খসচ্চেকদেসত্তা আহারগ্গহণং ¶ দুক্খসচ্চগ্গহণমেৰ হোতীতি আহ ‘‘ইধ চত্তারিপি সচ্চানি সরূপেনেৰ ৰুত্তানী’’তি. সচ্চদেসনা দুক্খাদীনং যাৰদেৰ পরিঞ্ঞেয্যাদিভাৰসন্দস্সনত্থা, তস্মা জরামরণাদীসু পরিঞ্ঞেয্যাদিভাৰো অসম্মোহতো সল্লক্খেতব্বোতি দস্সেন্তো ‘‘সব্বত্থ অসম্মুয্হন্তেন সচ্চানি উদ্ধরিতব্বানী’’তি আহ.

আহারৰারৰণ্ণনা নিট্ঠিতা.

সচ্চৰারৰণ্ণনা

৯১. যেন যেন পরিযাযেন ব্যাকরোতীতি যেন যেন দুক্খাদিজরামরণাদিপরিযাযেন অরিযসচ্চানি সঙ্খেপতো চ ৰিত্থারতো চ কথেতি. দুক্খন্তি দুক্খসচ্চং দুক্খং, ন দুক্খমত্তং.

সচ্চৰারৰণ্ণনা নিট্ঠিতা.

জরামরণৰারৰণ্ণনা

৯২. তেসং ¶ তেসন্তি ব্যাপনিচ্ছাৰসেনাযং নিদ্দেসো কতো, তস্মা যথা ‘‘গামো গামো রমণীযো’’তি ৰুত্তে রমণীযতায তাদিসা সব্বেপি গামা সঙ্গহং গচ্ছন্তি, এৰং ‘‘তেসং তেসং সত্তানং জাতী’’তি ৰুত্তে জাতিসঙ্খাতৰিকারৰসেন সব্বেপি সত্তা সঙ্গহং গচ্ছন্তি. তেনাহ ‘‘সঙ্খেপতো অনেকেসং সত্তানং সাধারণনিদ্দেসো’’তি.

গতিজাতিৰসেনাতি (সং. নি. টী. ২.১.২) পঞ্চগতিৰসেন, তত্থাপি একেকায গতিযা খত্তিযাদিভুম্মদেৰাদিহত্থিআদিজাতিৰসেন চ. নিকিয্যন্তি সত্তা এত্থ, এতেন ৰাতি নিকাযো, গোত্তচরণাদিৰিভাগো. জরায সভাৰো নাম ৰযোহানি, তস্মা জরাতি ৰযোহানিসঙ্খাতস্স সভাৰস্স নিদ্দেসো, পাকটজরাৰসেন নিদ্দেসো খণ্ডিচ্চাদিৰসেন গহণতো. জীরণমেৰ জীরণতা, জীরন্তস্স ৰা আকারো তা-সদ্দেন ৰুত্তো. তেনাহ ‘‘অযং আকারনিদ্দেসো’’তি. দন্তাদীনং ৰসেন খণ্ডং জাতং এতস্সাতি ¶ খণ্ডিতো, পুগ্গলো. তস্স ভাৰো খণ্ডিচ্চং. পলিতং এতস্স অত্থীতি পলিতো, তস্স ভাৰো পালিচ্চং. ৰলি তচো এতস্সাতি ৰলিত্তচো, তস্স ভাৰো ৰলিত্তচতা. ইমে খণ্ডিচ্চাদযো জরা. ৰিকারানং দস্সনৰসেনাতি ৰিপত্তিদস্সনৰসেন. ৰাতস্সাতি মহতো ৰাতক্খন্ধস্স. খণ্ডিচ্চাদিৰসেন গতমগ্গো পাকটো, তস্মা খণ্ডিচ্চাদিগ্গহণং জরায কিচ্চনিদ্দেসোতি ৰুত্তন্তি দস্সেতি. ন চ খণ্ডিচ্চাদীনেৰ জরাতি কললকালতো পভুতি পুরিমরূপানং জরাপত্তক্খণে উপ্পজ্জমানানি পচ্ছিমরূপানি পরিপক্করূপানুরূপানি পরিণতপরিণতানি উপ্পজ্জন্তীতি অনুক্কমেন সুপরিণতরূপানং পরিপাককালে উপ্পজ্জমানানি খণ্ডিচ্চাদিসভাৰানি উপ্পজ্জন্তি, তানি উদকাদিমগ্গেসু তিণরুক্খসংভগ্গতাদযো ৰিয পরিপাকগতমগ্গসঙ্খাতেসু পরিপক্করূপেসু উপ্পন্নানি ‘‘জরায গতো মগ্গো’’ইচ্চেৰ ৰুত্তানি, ন জরাতি.

পকতিযাতি ফলৰিপচ্চনপকতিযা, জরায ৰা পাপুণিতব্বং ফলমেৰপকতি, তায জরা দীপিতা. সুপ্পসন্নানীতি সুট্ঠু পসন্নানি. তমেৰ সুপ্পসন্নতং কিচ্চতো দস্সেতুং ‘‘সুখুমম্পী’’তিআদি ৰুত্তং. তিক্খৰিসদতা হি তেসং ইন্দ্রিযানং সুপ্পসন্নতা. আলুল়িতানীতি আকুলানি. অৰিসদানীতি অব্যত্তানি.

কামং রূপধম্মেসুপি খণিকজরা দুরুপলক্খিতা পটিচ্ছন্নাৰ, সা পন যস্মা সন্তানৰসেন পৰত্তিযা পরিব্যত্তাৰ হোতীতি ‘‘পাকটজরা’’ইচ্চেৰ ৰুত্তা. অৰীচি নিরন্তরা জরা ¶ অৰীচিজরা সতি সন্তানে সত্তানং অনুপ্পবন্ধতো. ততো অঞ্ঞেসূতি মন্দদসকাদীসু পুব্বদসকাদিপরিচ্ছেদতো অঞ্ঞেসু যথাৰুত্তেসু. অন্তরন্তরাতি তেসু এৰ ৰুত্তপ্পকারেসু পুরিমদসকাদিতো পচ্ছিমদসকাদীনং অন্তরন্তরা. ৰণ্ণৰিসেসাদীনন্তি ৰণ্ণৰিসেসসণ্ঠানৰিসেসসম্ফস্সৰিসেসাদীনং.

ৰচনকৰসেনাতি ক-কারেন হি পদং ৰড্ঢেত্ৰা ৰুত্তং, তস্মা চৰনং চুতীতি ৰুত্তং হোতি. তং পন একচতুপঞ্চৰোকারভৰেসু চুতিযা অৰিসেসতো গহণন্তি আহ ‘‘একচতুপঞ্চক্খন্ধানং সামঞ্ঞৰচন’’ন্তি. চৰনকৰসেনাতি ৰা চৰনকস্স পুগ্গলস্স ৰসেনাতি অত্থো. চৰনমেৰ চৰনতাতি আহ ‘‘ভাৰৰচনেনা’’তি. লক্খণনিদস্সনন্তি ৰযসঙ্খাতস্স লক্খণস্স নিদস্সনং. চৰন্তস্স ৰা আকারো তা-সদ্দেন ৰুত্তো ¶ ‘‘চৰনতা’’তি. ভিজ্জনং ভেদোতি ৰুত্তং ‘‘চুতিক্খন্ধানং ভঙ্গুপ্পত্তিপরিদীপন’’ন্তি. যথা ভিন্নস্স ঘটস্স কেনচি পরিযাযেন ঘনঘটভাৰেন ঠানং নত্থি, এৰং ভিন্নানং খন্ধানন্তি চৰনং অন্তরহিতং নামাতি আহ ‘‘অন্তরধানন্তি…পে… পরিদীপন’’ন্তি. যো মচ্চূতি ৰুচ্চতি ভেদো, যঞ্চ মরণং পাণচাগো, তদুভযং একজ্ঝং কত্ৰা ৰুত্তং ‘‘মচ্চু মরণ’’ন্তি এৰং ৰা এত্থ অত্থো দট্ঠব্বো. কালস্স অন্তকস্স কিরিযাতি যা লোকে ৰুচ্চতি, সা চুতি, মরণন্তি অত্থো. চৰনকালো এৰ ৰা অনতিক্কমনীযত্তা ৰিসেসেন কালোতি ৰুত্তোতি তস্স কিরিযা অত্থতো চুতিক্খন্ধানং ভেদপ্পত্তিযেৰ. ‘‘চুতি চৰনতা’’তিআদিনা পুব্বে ৰোহারমিস্সকেন নিদ্দিট্ঠং.

ইদানি নিব্বত্তিতপরমত্থনযেনেৰ নিদ্দেসোতি দস্সেতুং ‘‘পরমত্থেন দীপেতু’’ন্তি ৰুত্তং. ‘‘চৰনকৰসেনা’’তিআদিনা হি পুগ্গলৰসেন চ ৰোহারাধিট্ঠানা সংৰণ্ণনা কতা. ন কিঞ্চি কল়েৰরং নিক্খিপকি ওপপাতিকানং চুতিক্খন্ধানং অন্তরধানমেৰহোতি, ততো পরং উতুসমুট্ঠানরূপসন্ততি ন পৰত্ততি. ‘‘জাতিসমুদযা’’তিআদীসু যং ৰত্তব্বং, তং ‘‘তণ্হাসমুদযা’’তিআদীসু ৰুত্তনযনেৰ সক্কা ৰিঞ্ঞাতুন্তি ন ৰুত্তং.

জরামরণৰারৰণ্ণনা নিট্ঠিতা.

জাতিৰারৰণ্ণনা

৯৩. জাযনট্ঠেনাতিআদি আযতনৰসেন যোনিৰসেন চ দ্ৰীহি দ্ৰীহি পদেহি সব্বসত্তে পরিযাদিযিত্ৰা জাতিং দস্সেতুং ৰুত্তং. সম্মোহৰিনোদনিযং (ৰিভ. অট্ঠ. ১৯১) পন ‘‘জাযমানকৰসেন ¶ জাতি, সঞ্জাযনৰসেন সঞ্জাতী’’তি ৰুত্তত্তা তত্থ একেকেনেৰ পদেন সব্বসত্তে পরিযাদিযিত্ৰা জাতিং দস্সেতীতি দট্ঠব্বং. সম্পুণ্ণা জাতি সঞ্জাতীতি কত্ৰা ‘‘সা পরিপুণ্ণাযতনৰসেন যুত্তা’’তি ৰুত্তং. এতেনেৰ কেৰলং জাতিসদ্দেন ৰুত্তায জাতিযা অপরিপুণ্ণাযতনতা দট্ঠব্বা. অভিব্যত্তা নিব্বত্তি অভিনিব্বত্তি, পাকটা নিব্বত্তীতি অত্থো. ‘‘তেসং তেসং সত্তানং…পে… অভিনিব্বত্তী’’তি সত্তৰসেন পৰত্তত্তা ৰোহারদেসনা.

তত্র ¶ তত্রাতি এত্থ চতুৰোকারভৰে দ্ৰিন্নং, একৰোকারভৰে দ্ৰিন্নং, সেসরূপধাতুযং পটিসন্ধিক্খণে উপ্পজ্জমানানং পঞ্চন্নং, কামধাতুযং ৰিকলাৰিকলিন্দ্রিযৰসেন সত্তন্নং নৰন্নং দসন্নং, পুন দসন্নং, একাদসন্নঞ্চ আযতনানং ৰসেন সঙ্গহো ৰেদিতব্বো. যদিপি চুতিক্খন্ধা অনন্তরানং পটিসন্ধিকধম্মানং অনন্তরাদিনা পচ্চযা হোন্তি, যে পন সমুদযা অজনকা, তে এত্থ উপপত্তিভৰোতি অধিপ্পেতা. জনকো এৰ ভৰোতি অধিপ্পেতোতি দস্সেন্তো ‘‘জাতিযা পচ্চযভূতো কম্মভৰো ৰেদিতব্বো’’তি আহ.

জাতিৰারৰণ্ণনা নিট্ঠিতা.

ভৰৰারৰণ্ণনা

৯৪. ভাৰনভৰনট্ঠেন ভৰো দুৰিধো. তত্থ কম্মভৰো ‘‘ভৰতি এতস্মা উপপত্তিভৰো’’তি ভাৰনট্ঠেন ভৰো. অট্ঠকথাযং পন উপপত্তিভৰং ‘‘ভৰতীতি ভৰো’’তি ৰত্ৰা তস্স কারণত্তা কম্মং ফলূপচারেন ভৰোতি অযমত্থো ৰুত্তো, উভযত্থাপি উপপত্তিভৰহেতুভাৰনেত্থ কম্মস্স কম্মভৰপরিযাযোতি দস্সিতং হোতি. সব্বথাপীতি ভাৰনভৰনকুসলাকুসলউপপত্তিসম্পত্তিভৰহীনপণীতাদিনা সব্বপ্পকারেনপি. কামভৰোতি ৰুত্তং কামতণ্হাহেতুকতো কামতণ্হায আরম্মণভাৰতো চ. রূপভৰূপগকম্মং রূপভৰো, তথা অরূপভৰূপগকম্মং অরূপভৰো, তংতংনিব্বত্তক্খন্ধা রূপারূপুপত্তিভৰা, রূপারূপভৰভাৰো পন তেসং ‘‘কামভৰো’’তি এত্থ ৰুত্তনযেনেৰ ৰেদিতব্বো.

ভৰৰারৰণ্ণনা নিট্ঠিতা.

উপাদানৰারৰণ্ণনা

৯৫. উপাদানন্তি ¶ চতুব্বিধম্পি উপাদানং. যথা হি কামস্সাদৰসেন, ভৰস্সাদৰসেন ৰা তংতংসুগতিভৰূপগং কম্মং করোন্তস্স কামুপাদানং, এৰং উচ্ছেদাদিমিচ্ছাভিনিৰেসৰসেনাতি চত্তারিপি উপাদানানি যথারহং তস্স তস্স কুসলকম্মভৰস্স উপনিস্সযৰসেনেৰ পচ্চযা হোন্তি, অকুসলকম্মভৰস্স অসহজাতস্স অনন্তরস্স উপনিস্সযৰসেনপি আরম্মণৰসেনপি ¶ . সহজাতস্স কামুপাদানং সহজাত-অঞ্ঞমঞ্ঞ-নিস্সয-সম্পযুত্ত-অত্থি-অৰিগত-হেতু-ৰসেন সত্তধা, সেসউপাদানানি তত্থ হেতুপচ্চযভাৰং পহায মগ্গপচ্চযং পক্খিপিত্ৰা সত্তধাৰ পচ্চযা হোন্তি. অনন্তরস্স পন অনন্তরসমনন্তরঅনন্তরূপনিস্সযনত্থিৰিগতাসেৰনৰসেন পচ্চযা হোন্তি. তস্সিদম্পি সহজাতাদীতি আদি-সদ্দেন সঙ্গহিতন্তি দট্ঠব্বং. ৰত্থুকামং উপাদিযতি চিত্তং, পুগ্গলো ৰা এতেনাতি অত্থো. তন্তি ৰত্থুকামং. কামেতীতি কামো চ সো উপাদিযতীতি উপাদানঞ্চাতি যোজনা. ৰুত্তনযেনাতি অভিধম্মে ৰুত্তনযেন.

সস্সতো অত্তাতি ইদং পুরিমদিট্ঠিং উপাদিযমানং উত্তরদিট্ঠিং নিদস্সেতুং ৰুত্তং. যথা এসা দিট্ঠি দল়্হীকরণৰসেন পুরিমং পুরিমং উত্তরা উত্তরা উপাদিযতি, এৰং ‘‘নত্থি দিন্ন’’ন্তিআদিকাপীতি. অত্তগ্গহণং পন অত্তৰাদুপাদানন্তি নযিদং দিট্ঠুপাদানদস্সনন্তি দট্ঠব্বং. লোকো চাতি অত্তগ্গহণৰিনিমুত্তগহণং দিট্ঠুপাদানভূতং ইধ পুরিমদিট্ঠিউত্তরদিট্ঠিৰচনেহি ৰুত্তন্তি ৰেদিতব্বং. সব্বদিট্ঠিগতস্স ‘‘দিট্ঠুপাদান’’ন্তি এতং অধিৰচনং ‘‘সব্বাপি দিট্ঠি দিট্ঠুপাদান’’ন্তি ৰচনতো.

সীলব্বতং উপাদিযন্তীতি সীলব্বতং ‘‘সুদ্ধিমগ্গো’’তি উপাদিযন্তি. এতেন মিচ্ছাভিনিৰেসেন. সযং ৰা তং মিচ্ছাভিনিৰেসসহগতং. সীলব্বতসহচরণতো সীলব্বতঞ্চ তং দল়্হগ্গাহভাৰতো উপাদানঞ্চাতি সীলব্বতুপাদানং. এৰং সুদ্ধীতি অভিনিৰেসতোতি এৰং গোসীলগোৰতাদিচরণেন সংসারসুদ্ধীতি অভিনিৰেসভাৰতো. এতেন তং সহচরণতো অভিনিৰেসস্স তংসদ্দারহতং দস্সেতি.

ৰদন্তীতি ‘‘অত্থি মে অত্তা’’তিআদিনা ৰোহরন্তি. এতেন দিট্ঠিগতেন. অত্তৰাদমত্তমেৰাতি অত্তাতি ৰাচামত্তমেৰ. এতেন ৰাচাৰত্থুমত্তমেতং, যদিদং বাহিরকপরিকপ্পিতো অত্তাতি দস্সেতি.

তণ্হা ¶ কামুপাদানস্সাতি এত্থ ‘‘তত্থ কতমং কামুপাদানং? যো কামেসু কামচ্ছন্দো কামরাগো কামনন্দী কামতণ্হা কামস্নেহো কামপরিল়াহো কামমুচ্ছা কামজ্ঝোসানং. ইদং ৰুচ্চতি কামুপাদান’’ন্তি ৰচনতো তণ্হাদল়্হত্তং কামুপাদানং. তণ্হাদল়্হত্তন্তি চ পুরিমতণ্হাউপনিস্সযপচ্চযতো দল়্হভূতা উত্তরতণ্হা এৰ. কেচি পনাহু –

‘‘অপ্পত্তৰিসযপত্থনা ¶ তণ্হা অন্ধকারে চোরস্সহত্থপ্পসারণং ৰিয, সম্পত্তৰিসযগ্গহণং উপাদানং তস্সেৰ ভণ্ডগ্গহণং ৰিযা’’তি. অপ্পিচ্ছসন্তুট্ঠিপটিপক্খা এতে ধম্মা পরিযেসনারক্খদুক্খমূলানি, তস্মা ৰুত্তলক্খণা তণ্হা ৰুত্তলক্খণস্সেৰ উপাদানস্স অনানন্তরস্স উপনিস্সযৰসেন পচ্চযো, আরম্মণাদিৰসেনপি পচ্চযো হোতিযেৰ, অনন্তরাদীনং পন অনন্তরাদিৰসেন পচ্চযো. সব্বস্সপি হি লোভস্স তণ্হাপরিযাযোপি কামুপাদানপরিযাযোপি লব্ভতেৰাতি. অৰসেসানন্তি দিট্ঠুপাদানাদীনং. সহজাতাদিৰসেনাতি সহজাতানং সহজাতাদিৰসেন, অসহজাতানং অনন্তরউপনিস্সযাদিৰসেনাতি সব্বং হেট্ঠা ৰুত্তনযেনেৰ ৰেদিতব্বং.

উপাদানৰারৰণ্ণনা নিট্ঠিতা.

তণ্হাৰারৰণ্ণনা

৯৬. ‘‘চক্খুসম্ফস্সো’’তিআদি ফস্সস্স মাতিতো নামং ৰিয পুত্তস্স ৰত্থুতো তস্স নিস্সযভাৰেন উপ্পত্তিহেতুত্তা, আরম্মণং পন কেৰলং উপ্পত্তিহেতূতি ৰুত্তং ‘‘সেট্ঠি…পে… নাম’’ন্তি. কামরাগভাৰেনাতি ৰত্থুকামস্স রজ্জনৰসেন. রূপং অস্সাদেন্তীতি রুপারম্মণং তণ্হাভিনন্দনাৰসেন অভিরমমানা এৰ অস্সাদেন্তী. নিচ্চন্তিআদিনা দিট্ঠাভিনন্দনামুখেন রূপং অভিরমন্তী. পেচ্চ ন ভৰিস্সতীতি ভিজ্জিত্ৰা ন হোতি পুন অনুপ্পজ্জনতো. তথা সদ্দকণ্হাদযোপীতি যথা রূপতণ্হা কামরাগভাৰেন সস্সতরাগৰসেন উচ্ছেদরাগৰসেনাতি চ পৰত্তিযা তিস্সো তণ্হা, তথা সদ্দতণ্হা গন্ধরসফোট্ঠব্বধম্মতণ্হাপি. তণ্হাৰিচরিতানীতি তণ্হাসমুদাচারা, সমুদাচারৰসেন পৰত্ততণ্হাতি অত্থো.

অজ্ঝত্তিকস্সুপাদাযাতি (ৰিভ. অট্ঠ. ৯৭৩; সং. নি. টী. ২.২.২) অজ্ঝত্তিকং খন্ধপঞ্চকং উপাদায. উপযোগত্থে হি ইদং সামিৰচনং. অস্মীতি হোতীতি যদেতং অজ্ঝত্তং খন্ধপঞ্চকং ¶ উপাদায তণ্হামানদিট্ঠিৰসেন সমূহগাহতো অস্মীতি এৰং হোতি, তস্মিং সতীতি অত্থো. ইত্থস্মীতি হোতীতি খত্তিযাদীসু ‘‘ইদংপকারো অহ’’ন্তি এৰং ¶ তণ্হামানদিট্ঠিৰসেন হোতীতি ইদমেত্থ অনুপনিধায গহণং. এৰমাদিনাতি আদি-সদ্দেন ‘‘এৰংস্মীতি, অঞ্ঞথাস্মীতি, ভৰিস্সন্তি, ইত্থং ভৰিস্সন্তি, এৰং ভৰিস্সন্তি, অঞ্ঞথা ভৰিস্সন্তি, অসস্মীতি, সতস্মীতি, সিযন্তি, ইত্থং সিযন্তি, এৰং সিযন্তি, অঞ্ঞথা সিযন্তি, অপাহং সিযন্তি, অপাহং ইত্থং সিযন্তি, অপাহং এৰং সিযন্তি, অপাহং অঞ্ঞথা সিয’’ন্তি (ৰিভ. ৯৭৩) ইমেসং তণ্হাৰিচরিতানং গহণং. তত্থ এৰংস্মীতি ইদং সমতো উপনিধায গহণং, যথা অযং খত্তিযো, যথা অযং ব্রাহ্মণো, এৰং অহম্পীতি অত্থো. অঞ্ঞথাস্মীতি ইদং অসমণো উপনিধায গহণং, যথা অযং খত্তিযো, যথা অযং ব্রাহ্মণো, ততো অঞ্ঞথা অহং হীনো ৰা অধিকো ৰাতি অত্থো. ইতি ইমানি পুব্বে ৰুত্তানি দ্ৰেতি এতানি পচ্চুপ্পন্নৰসেন চত্তারি তণ্হাৰিচরিতানি. ভৰিস্সন্তিআদীনি পন চত্তারি অনাগতৰসেন ৰুত্তানি. তেসং পুরিমচতুক্কে ৰুত্তনযেনেৰ অত্থো ৰেদিতব্বো. অসস্মীতি অসতীতি অসং. নিচ্চস্সেতং অধিৰচনং, তস্মা সস্সতো অস্মীতি অত্থো. সতস্মীতি সীদতীতি সতং. অনিচ্চস্সেতং অধিৰচনং, তস্মা অসস্সতো অস্মীতি অত্থো. ইতি ইমানি দ্ৰে সস্সতুচ্ছেদৰসেন ৰুত্তানি. ইতো পরানি সিযন্তিআদীনি চত্তারি সংসযপরিৰিতক্কৰসেন ৰুত্তানি, তানি পুরিমচতুক্কে ৰুত্তনযেন অত্থতো ৰেদিতব্বানি. অপাহং সিযন্তিআদীনি চত্তারি ‘‘অপি নামাহং ভৰেয্য’’ন্তি এৰং পত্থনাকপ্পনৰসেন ৰুত্তানি, তানি পুরিমচতুক্কে ৰুত্তনযেনেৰ ৰেদিতব্বানি.

এত্থ চ সস্সতুচ্ছেদৰসেন ৰুত্তা দ্ৰে দিট্ঠিসীসা নাম, অস্মি, ভৰিস্সং, সিযং, অপাহং সিযন্তি এতে পন চত্তারো সুদ্ধসীসা এৰ, ‘‘ইত্থস্মী’’তিআদযো তযো তযোতি দ্ৰাদস সীসমূলকা নাম. এৰমেতানি দ্ৰে দিট্ঠিসীসা, চত্তারো সুদ্ধসীসা, দ্ৰাদস সীসমূলকাতি অজ্ঝত্তিকস্সুপাদায অট্ঠারস্স তণ্হাৰিচরিতানি ৰেদিতব্বানি.

বাহিরস্সুপাদাযাতি বাহিরং খন্ধপঞ্চকং উপাদায. ইদম্পি হি উপযোগত্থে সামিৰচনং. ইমিনাতি ইমিনা রুপেন ৰা…পে… ৰিঞ্ঞাণেন ৰাতি এৰং রূপাদীসু একমেৰ ‘‘অহ’’ন্তি, ইতরং কিঞ্চনপলিবোধভাৰেন গহেত্ৰা তণ্হাদিৰসেন ‘‘অস্মী’’তি অভিনিৰিসতি, ‘‘ইমিনা’’তি অযমেত্থ ৰিসেসো. অস্মীতি ইমিনা খগ্গেন ৰা ছত্তেন ৰা অভিসেকেন ৰা ‘‘খত্তিযোহমস্মী’’তি ¶ অভিনিৰিসতি. বাহিররূপাদিনিস্সিতানীতি বাহিরানি পরসন্ততিপরিযাপন্নানি রূপৰেদনাদীনি নিস্সিতানি. অট্ঠারসাতি ইমিনা ‘‘অস্মী’’তিআদিনযপ্পৰত্তানি অট্ঠারস, তানি পুব্বে ৰুত্তনযেনেৰ ৰেদিতব্বানি. ‘‘ইমিনা’’তি হি ¶ অযমেৰেত্থ ৰিসেসো, তস্মা ‘‘দ্ৰে দিট্ঠিসীসা’’তিআদিনা ৰুত্তনযেনেৰ নিদ্ধারেত্ৰা ৰেদিতব্বা. উভযং পন একজ্ঝং কত্ৰা আহ ‘‘ছত্তিংসা’’তি.

নিদ্দেসত্থেনাতি ‘‘ছযিমে আৰুসো তণ্হাকাযা’’তিআদিনিদ্দেসপাল়িযা অত্থৰচনেন. নিদ্দেসৰিত্থারাতি তস্স চ নিদ্দেসস্স অট্ঠসততণ্হাৰিচরিতৰসেন ৰিত্থারেন. ৰিত্থারস্স চ পুন সঙ্গহতোতি দ্ৰীহি আকারেহি ৰিত্থারিতস্স অট্ঠারসতণ্হাৰিচরিতপভেদস্স ছল়েৰ তিস্সোযেৰাতি চ পুন সঙ্গহণতো চ.

ৰিপাকৰেদনা অধিপ্পেতা ৰিসেসতো অত্তানং অস্সাদেতব্বতো. তমেৰ হিস্সা অস্সাদেতব্বতং পকাসেতুং ‘‘কথ’’ন্তিআদি ৰুত্তং. অস্সাদনেনাতি অভিরতিযা. মমাযন্তাতি ধনাযন্তা. চিত্তকারাদীনন্তি আদি-সদ্দেন ইট্ঠৰণ্ণারম্মণদাযকানং সঙ্গহো. সিপ্পসন্দস্সনকাদীনন্তি আদি-সদ্দেন ৰেজ্জাদীনং সঙ্গহো. ৰেজ্জা হি রসাযতনোজাৰসেন তদুপত্থম্ভিতৰসেন চ ধম্মারম্মণস্স দাযকা. স্ৰাযং আদি-সদ্দো ‘‘ৰীণাৰাদকাদী’’তিআদিনা পচ্চেকঞ্চ যোজেতব্বো, পুত্তং মমাযন্তাতি পুত্তং সম্পিযাযন্তা. পুত্তো ৰিয চেত্থ ৰেদনা দট্ঠব্বা, সপ্পাযসপ্পিখীরাদীনি ৰিয ৰেদনায পচ্চযভূতানি ইট্ঠরূপাদিআরম্মণানি, ধাতি ৰিয রূপাদিছল়ারম্মণদাযকা চিত্তকারাদযো দট্ঠব্বা.

তণ্হাৰারৰণ্ণনা নিট্ঠিতা.

ৰেদনাৰারৰণ্ণনা

৯৭. চক্খুসম্ফস্সজা এৰ ৰেদনা অতীতাদিভেদভিন্না রাসিৰসেন একজ্ঝং গহেত্ৰা একো ৰেদনাকাযো যথা ৰেদনাক্খন্ধো, এৰং সোতসম্ফস্সজাদিকাতি পাল়িযং ‘‘ছযিমে আৰুসো ৰেদনাকাযা’’তি ৰুত্তন্তি আহ ‘‘ৰেদনাকাযাতি ৰেদনাসমূহা’’তি. চক্খুসম্ফস্সতো জাতা চক্খুসম্ফস্সজা ৰেদনা. সা পন উপাদিন্নাপি অনুপাদিন্নাপি, তদুভযস্সপি সঙ্গণ্হন্তেন অত্থৰণ্ণনায কতত্তা আহ ‘‘অযং তাৰেত্থ সব্বসঙ্গাহিককথা’’তি. ইদানি ‘‘ৰিপাকৰিধি অয’’ন্তি উপাদিন্নযেৰ ¶ গণ্হন্তো ‘‘ৰিপাকৰসেনা’’তিআদিমাহ. মনোদ্ৰারে মনোৰিঞ্ঞাণধাতুসম্পযুত্তাতি তদারম্মণমনোৰিঞ্ঞাণধাতুসম্পযুত্তা.

অৰসেসানন্তি ¶ সম্পটিচ্ছনাদিৰেদনানং. উপনিস্সযাদীতি আদি-সদ্দেন অনন্তরাদীনং সঙ্গহো দট্ঠব্বো. অনন্তরানঞ্হি অনন্তরাদিৰসেন, ইতরেসং উপনিস্সযৰসেন ফস্সো পচ্চযো হোতি, মনোদ্ৰারে পন তদারম্মণৰেদনানং মনোসম্ফস্সো উপনিস্সযৰসেন পচ্চযো. অদ্ৰারিকানন্তি দ্ৰাররহিতানং. ন হি পটিসন্ধিআদিৰেদনানং কিঞ্চি দ্ৰারং অত্থি. সহজাতমনোসম্ফস্সসমুদযাতি এতেনস্স তাসং সহজাতকোটিযা পচ্চযভাৰমাহ.

ৰেদনাৰারৰণ্ণনা নিট্ঠিতা.

ফস্সৰারৰণ্ণনা

৯৮. চক্খুং নিস্সায উপ্পন্নো সম্ফস্সো চক্খুসম্ফস্সো. পঞ্চৰত্থুকাতি চক্খাদিপঞ্চৰত্থুকা চক্খাদিপঞ্চৰত্থুসন্নিস্সযা. ‘‘উপাদিন্নককথা এসা’’তি বাৰীসতিগ্গহণং, পৰত্তিকথাভাৰতো লোকিযগ্গহণং. ৰিপাকমনসম্পযুত্তফস্সাতি ৰিপাকমনোৰিঞ্ঞাণসম্পযুত্তা ফস্সা. পচ্চযুপ্পন্নেন ৰিয পচ্চযেনপি উপাদিন্নকেনেৰ ভৰিতব্বন্তি ‘‘ছন্নং চক্খাদীনং আযতনান’’ন্তি ৰুত্তং.

ফস্সৰারৰণ্ণনা নিট্ঠিতা.

সল়াযতনৰারৰণ্ণনা

৯৯. নিদস্সনমত্তঞ্চেতং, তস্মা যথা এত্থ অরূপলোকাপেক্খায ছট্ঠাযতনঞ্চ সল়াযতনঞ্চ সল়াযতনন্তি একসেসো ইচ্ছিতব্বো, এৰং যেসং পচ্চযুপ্পন্নো উপাদিন্নো, পচ্চযো পন অনুপাদিন্নোতিপি ইচ্ছিতব্বো. তেসং মতেন বাহিরাযতনৰসেনপি একসেসো ৰেদিতব্বো ‘‘ছট্ঠাযতনঞ্চ সল়াযতনঞ্চ সল়াযতনঞ্চ সল়াযতন’’ন্তি. ৰিসুদ্ধিমগ্গোপি ইমস্স আগমস্স ¶ অত্থসংৰণ্ণনাতি আহ ‘‘ৰিসুদ্ধিমগ্গে…পে… ৰুত্তনযমেৰা’’তি. এস নযো অঞ্ঞত্থাপি ৰিসুদ্ধিমগ্গগ্গহণে.

সল়াযতনৰারৰণ্ণনা নিট্ঠিতা.

নামরূপৰারৰণ্ণনা

১০০. নমনলক্খণন্তি ¶ আরম্মণাভিমুখং নমনসভাৰং তেন ৰিনা অপৰত্তনতো. রুপ্পনং সীতাদিৰিরোধিপচ্চযসন্নিপাতে ৰিসদিসুপ্পত্তি. ইমে পন তযোতিআদিনা সব্বচিত্তুপ্পাদসাধারণৰসেনেৰ তংসঙ্খারক্খন্ধগ্গহণং, তস্মা যে যত্থ অসাধারণা, তেপি অত্থতো গহিতাযেৰাতি দস্সেতি.

উপাদিযিত্ৰাতি পচ্চযে কত্ৰা. পচ্চযকরণমেৰ হি পচ্চযুপ্পন্নস্স পচ্চযভূতধম্মানং উপাদিযনং. সমূহসম্বন্ধে সামিৰচনং এতন্তি ‘‘সমূহত্থে এতং সামিৰচন’’ন্তি ৰুত্তং তেন ৰিনা সম্বন্ধস্স অভাৰতো. তেনাতি তস্মা. তং সব্বম্পীতি তং ভূতুপাদাযপভেদং সব্বম্পি সত্তৰীসতিৰিধং. যস্স নামস্সাতি চতুৰোকারভৰে নামস্স. ৰিঞ্ঞাণম্পি তপ্পরিযাপন্নমেৰ ৰেদিতব্বং. রূপস্সাতি একৰোকারভৰে রূপস্স. ৰিঞ্ঞাণং পন পঞ্চৰোকারভৰে সঙ্খারৰিঞ্ঞাণমেৰ. যস্স পঞ্চৰোকারভৰে নামরূপস্স. তস্স ৰসেনাতি সহজাতস্স সহজাতাদিৰসেন, অনন্তরস্স অনন্তরাদিৰসেন, ইতরস্স উপনিস্সযাদিৰসেন তস্স নামস্স যথারহং তস্স তস্স ৰিঞ্ঞাণস্স পচ্চযভাৰো ৰেদিতব্বো.

নামরূপৰারৰণ্ণনা নিট্ঠিতা.

ৰিঞ্ঞাণৰারৰণ্ণনা

১০১. তেভূমকৰিপাকগ্গহণে কারণং হেট্ঠা ৰুত্তমেৰ. সঙ্খারো যস্স ৰিঞ্ঞাণস্সাতি এত্থ অট্ঠৰিধোপি কামাৰচরপুঞ্ঞাভিসঙ্খারো সোল়সৰিধস্স কামাৰচরৰিপাকৰিঞ্ঞাণস্স, পঞ্চৰিধোপি রূপাৰচরপুঞ্ঞাভিসঙ্খারো পঞ্চৰিধস্স রূপাৰচরৰিপাকৰিঞ্ঞাণস্স, দ্ৰাদসৰিধোপি অপুঞ্ঞাভিসঙ্খারো সত্তৰিধস্স অকুসলৰিপাকৰিঞ্ঞাণস্স, চতুব্বিধোপি আনেঞ্জাভিসঙ্কারো ¶ চতুব্বিধস্স অরূপাৰচরৰিপাকৰিঞ্ঞাণস্স যথারহং পটিসন্ধিপৰত্তীসু কম্মপচ্চযেন চেৰ উপনিস্সযপচ্চযেন চ পচ্চযো হোতি. অযমেত্থ সঙ্খেপো, ৰিত্থারো পন ৰিসুদ্ধিমগ্গে (ৰিসুদ্ধি. ২.৬২০) ৰুত্তনযেন ৰেদিতব্বো.

ৰিঞ্ঞাণৰারৰণ্ণনা নিট্ঠিতা.

সঙ্খারৰারৰণ্ণনা

১০২. অভিসঙ্খরণলক্খণোতি ¶ অভিসঞ্চেতযিতসভাৰো, আযূহনলক্খণোতি অত্থো. চোপনৰসেনাতি কাযৰিঞ্ঞত্তিসঙ্খাতচোপনৰসেন. তেন পঞ্চদ্ৰারিকচেতনা পটিক্খিপতি. ৰচনভেদৰসেনাতি ৰাচানিচ্ছারণৰসেন. ৰচীৰিঞ্ঞত্তিসমুট্ঠাপনৰসেনাতি অত্থো. যথাৰুত্তা ৰীসতি, নৰ মহগ্গতকুসলচেতনা চাতি একূনতিংস মনোসঞ্চেতনা. ‘‘কুসলানং উপনিস্সযৰসেনা’’তি ৰুত্তং, একচ্চানং আরম্মণৰসেনপীতি ৰত্তব্বং. সহজাতাদিৰসেনাতি সহজাত-অঞ্ঞমঞ্ঞ-নিস্সয-সম্পযুত্ত-অত্থি-অৰিগতহেতুৰসেন, অনন্তরানং অনন্তরসমনন্তরঅনন্তরূপনিস্সযনত্থিৰিগতাসেৰনসেন পচ্চযো. অপি-সদ্দেন উপনিস্সযং সঙ্গণ্হাতি.

সঙ্খারৰারৰণ্ণনা নিট্ঠিতা.

অৰিজ্জাৰারৰণ্ণনা

১০৩. ‘‘দুক্খসচ্চেঅঞ্ঞাণ’’ন্তি সঙ্খেপতো ৰুত্তমত্থং ৰিৰরিতুং ‘‘তত্থা’’তিআদি আরদ্ধং. তন্তি অঞ্ঞাণং. সতিপি পহাতব্বত্তে পরিঞ্ঞেয্যত্তৰসেন অন্তোগধং. দুক্খসচ্চঞ্চস্সাতি ৰত্থুসঙ্খাতং সম্পযুত্তখন্ধসঙ্খাতঞ্চ দুক্খসচ্চং অস্স অঞ্ঞাণস্স. তং হিস্স নিস্সযপচ্চযো হোতি. তস্সাতি দুক্খসচ্চস্স. যাথাৰলক্খণপটিৰেধনিৰারণেনাতি সঙ্খতঅৰিপরীতসভাৰপটিৰিজ্ঝনস্স নিৰারণেন. এতেনস্স পরিঞ্ঞাভিসমযসঙ্খাতস্স অরিযমগ্গপটিৰেধস্স ৰিবন্ধকভাৰমাহ. ঞাণপ্পৰত্তিযাতি ‘‘ইদং দুক্খং, এত্তকং দুক্খ’’ন্তি ¶ অনুবুজ্ঝনাকারায পুব্বভাগঞাণপ্পৰত্তিযা. এত্থাতি দুক্খসচ্চে. অপ্পদানেনাতি অৰিস্সজ্জনেন. এতেনস্সা অনুবোধঞাণস্সপি ৰিবন্ধকতমাহ.

তীহি কারণেহি ৰেদিতব্বং অন্তোগধাভাৰতো. ইধ সম্পযুত্তখন্ধৰসেনেৰ ৰত্থুতো সমুদযে অঞ্ঞাণং দট্ঠব্বং. একেনেৰাতি ইতরং কারণত্তযং পটিক্খিপতি. যদিপি অঞ্ঞাণং নিরোধমগ্গে আরম্মণং ন করোতি, কুতো তদন্তোগধতব্বত্থুতা, তে পন জানিতুকামস্স তপ্পটিচ্ছাদনৰসেন অনিরোধমগ্গেসু নিরোধমগ্গগ্গাহহেতুতাৰসেন চ পৰত্তমানং ‘‘নিরোধে পটিপদাযঞ্চ অঞ্ঞাণ’’ন্তি ৰুচ্চতি. তেনাহ ‘‘পটিচ্ছাদনতো’’তিআদি. তস্সত্থো ৰুত্তোযেৰ. গম্ভীরত্তাতি সভাৰেনেৰ গম্ভীরত্তা. অগাধঅপতিট্ঠাভাৰেন তংৰিসযস্স ঞাণস্স উপ্পাদেতুং অসক্কুণেয্যত্তা দুদ্দসং. পুরিমং ¶ পন সচ্চদ্ৰযং. ৰঞ্চনীযট্ঠেনাতি ৰঞ্চকভাৰেন অযাথাৰভাৰেন উপট্ঠানতো দুদ্দসত্তা গম্ভীরং, ন সভাৰতো, তস্মা তংৰিসযং অঞ্ঞাণং উপ্পজ্জতি. তত্থাতি তস্মিং পুরিমসচ্চদ্ৰযে অনিচ্চাদিসভাৰলক্খণস্স দুদ্দসত্তা এৰ নিচ্চাদিৰিপল্লাসৰসেন পৰত্ততি অঞ্ঞাণন্তি আনেত্ৰা সম্বন্ধিতব্বং.

ইদানি নিদ্দেসৰিভাগেনপি অৰিজ্জায সচ্চেসু পৰত্তিৰিভাগং দস্সেতুং ‘‘অপিচা’’তিআদি ৰুত্তং. তত্থ দুক্খেতি এত্তকেন ভুম্মনিদ্দেসেন. সঙ্গহতোতি পরিঞ্ঞেয্যতায দুক্খেন সঙ্গহেতব্বতো. তেন নিদ্ধারণত্থং দস্সেতি. দুক্খস্মিঞ্হি অৰিজ্জা নিদ্ধারীযতি, ন অঞ্ঞস্মিং. ৰত্থুতোতি আধারত্থং. দুক্খসন্নিস্সযা হি অৰিজ্জা. আরম্মণতোতি ৰিসযত্থং তং আরব্ভ পৰত্তনতো. কিচ্চতোতি ব্যাপনত্থং ছাদনৰসেন তং ব্যাপেত্ৰা পৰত্তনতো. ইমিনা নযেন সেসেসুপি অত্থো ৰেদিতব্বো. অৰিসেসতোতি ৰিসেসাভাৰতো, ৰুত্তনযেন দুক্খাদীসু পৰত্তিআকারৰিসেসং অগ্গহেত্ৰাতি অত্থো. সভাৰতোতি সরসলক্খণতো. চতুন্নম্পি সচ্চানং অজাননসভাৰা হি অৰিজ্জা. কামরাগভৰরাগা কামাসৰভৰাসৰাতি আহ ‘‘সহজাতাদিৰসেনা’’তি. ননু অৰিজ্জা এৰ অৰিজ্জাসৰো, সো কথং অৰিজ্জায পচ্চযোতি আহ ‘‘পুব্বুপ্পন্না’’তিআদি.

অৰিজ্জাৰারৰণ্ণনা নিট্ঠিতা.

আসৰৰারৰণ্ণনা

১০৪. আসৰৰারে ¶ আসৰ-সদ্দত্থো আসৰৰিচারো চ হেট্ঠা ৰুত্তোযেৰ. কস্মা পনাযং ৰারো ৰুত্তো, ননু অৰিজ্জাদিকাৰ পটিচ্চসমুপ্পাদদেসনাতি চোদনং সন্ধায ‘‘অযং ৰারো’’তিআদি আরদ্ধং. পটিচ্চসমুপ্পাদপদেসূতি পটিচ্চসমুপ্পাদকোট্ঠাসেসু. দ্ৰাদসকোট্ঠাসা হি সত্থু পটিচ্চসমুপ্পাদদেসনা. তস্সাপি পচ্চযদস্সনৰসেনাতি নাযং কাপিলানং মূলপকতি ৰিয অপ্পচ্চযা, অথ খো সপ্পচ্চযাতি অৰিজ্জাযপি পচ্চযদস্সনৰসেন. আসৰসমুদযেনাতি অতীতভৰে আসৰানং সমুদযেন এতরহি অৰিজ্জায সমুদযো, এতরহি অৰিজ্জায সমুদযেন অনাগতে আসৰসমুদযোতি এৰং আসৰাৰিজ্জানং পচ্চযপচ্চযুপ্পন্নকভাৰেন অপরাপরং পৰত্তমানং আদিকোটিঅভাৰেনেৰ তন্নিমিত্তস্স সংসারস্স আদিকোটিঅভাৰতো অনমতগ্গতাসিদ্ধি ৰেদিতব্বা.

দ্ৰত্তিংস ¶ ঠানানীতি দ্ৰত্তিংস সচ্চপ্পটিৰেধকারণানি, দ্ৰত্তিংস ৰা চতুসচ্চকম্মট্ঠানানি. ইমম্হা সম্মাদিট্ঠিসুত্তাতি যায অরিযসাৰকো সম্মাদিট্ঠি নাম হোতি, সা অরিযা সম্মাদিট্ঠি এত্থ ৰুত্তাতি সম্মাদিট্ঠিসুত্তং, ইতো সম্মাদিট্ঠিসুত্ততো.

চতুসচ্চপরিযাযেহীতি চতুসচ্চাধিগমকারণেহি. অরহত্তপরিযাযেহীতি ‘‘সো সব্বসো রাগানুসযং পহাযা’’তিআদিনা অরহত্তাধিগমকারণেহি. তেনাহ ‘‘চতুসট্ঠিযা কারণেহী’’তি.

আসৰৰারৰণ্ণনা নিট্ঠিতা.

সম্মাদিট্ঠিসুত্তৰণ্ণনায লীনত্থপ্পকাসনা সমত্তা.

১০. সতিপট্ঠানসুত্তৰণ্ণনা

১০৫. জানপদিনোতি ¶ (দী. নি. টী. ২.৯৫) জনপদৰন্তো, জনপদস্স ৰা ইস্সরা রাজকুমারা. গোত্তৰসেন কুরূ নাম. তেসং নিৰাসো যদি একো জনপদো, কথং বহুৰচনন্তি আহ ‘‘রুল়্হীসদ্দেনা’’তি. অক্খরচিন্তকা হি ঈদিসেসু ঠানেসু যুত্তে ৰিয সলিঙ্গৰচনানি (পাণিনি ১.২৫১) ইচ্ছন্তি, অযমেত্থ রুল়্হী যথা ¶ অঞ্ঞত্থাপি ‘‘অঙ্গেসু ৰিহরতি, মল্লেসু ৰিহরতী’’তি চ. তব্বিসেসনে পন জনপদ-সদ্দে জাতি-সদ্দে একৰচনমেৰ. অট্ঠকথাচরিযা পনাতি পন-সদ্দো ৰিসেসত্থজোতনো. তেন পুথুঅত্থৰিসযতায এৰং তং বহুৰচনন্তি ‘‘বহুকে পনা’’তিআদিনা ৰক্খমানং ৰিসেসং দীপেতি. সুত্ৰাতি মন্ধাতুমহারাজস্স আনুভাৰদস্সনানুসারেন পরম্পরাগতং কথং সুত্ৰা. অনুসংযাযন্তেনাতি অনুৰিচরন্তেন. এতেসং ঠানন্তি চন্দিমসূরিযমুখেন চাতুমহারাজিকভৰনমাহ. তেনাহ ‘‘তত্থ অগমাসী’’তিআদি. সোতি মন্ধাতুমহারাজা. তন্তি চাতুমহারাজিকরজ্জং. গহেত্ৰাতি সম্পটিচ্ছিত্ৰা. পুন পুচ্ছি পরিণাযকরতনং. দোৰারিকভূমিযং তিট্ঠন্তি সুধম্মায দেৰসভায দেৰপুরস্স চ চতূসু দ্ৰারেসু আরক্খায অধিকতত্তা. দিব্বরুক্খসহস্সপটিমণ্ডিতন্তি ইদং ‘‘চিত্তলতাৰন’’ন্তিআদীসুপি যোজেতব্বং.

পথৰিযং পতিট্ঠাসীতি ভস্সিত্ৰা পথৰিযা আসন্নে ঠানে অট্ঠাসি, ঠত্ৰা চ নচিরস্সেৰ অন্তরধাযি তেনত্তভাৰেন রঞ্ঞো চক্কৰত্তিস্সরিযস্স অভাৰতো. ‘‘চিরতরং কালং ঠত্ৰা’’তি অপরে. দেৰভাৰো পাতুরহোসি দেৰলোকে পৰত্তিৰিপাকদাযিনো অপরাপরিযাযৰেদনীযস্স কম্মস্স কতোকাসত্তা. অৰযৰে সিদ্ধো ৰিসেসো সমুদাযস্স ৰিসেসকো হোতীতি একম্পি রট্ঠং বহুৰচনেন ৰোহরীযতি.

দ-কারেন অত্থং ৰণ্ণযন্তি নিরুত্তিনযেন. কম্মাসোতি কম্মাসপাদো ৰুচ্চতি উত্তরপদলোপেন যথা ‘‘রূপভৰো রূপ’’ন্তি. কথং পন সো কম্মাসপাদোতি আহ ‘‘তস্স কিরা’’তিআদি. দমিতোতি এত্থ কীদিসং দমনং অধিপ্পেতন্তি আহ ‘‘পোরিসাদভাৰতো পটিসেধিতো’’তি. ইমে পন থেরাতি মজ্ঝিমভাণকে ৰদতি, তে পন চূল়কম্মাসদম্মং সন্ধায তথা ৰদন্তি. যক্খিনিপুত্তো হি কম্মাসপাদো অলীনসত্তুকুমারকালে বোধিসত্তেন তত্থ দমিতো, সুতসোমকালে ¶ পন বারাণসিরাজা পোরিসাদভাৰপটিসেধনেন যত্থ দমিতো, তং মহাকম্মাসদম্মং নাম. পুত্তোতি ৰত্ৰা অত্রজোতি ৰচনং ওরসপুত্তভাৰদস্সনত্থং.

যেহি আৰসিতপদেসো কুরুরট্ঠন্তি নামং লভি, তে উত্তরকুরুতো আগতা মনুস্সা তত্থ রক্খিতনিযামেনেৰ পঞ্চ সীলানি রক্খিংসু, তেসং দিট্ঠানুগতিযা ¶ পচ্ছিমা জনতাতি, সো দেসধম্মৰসেন অৰিচ্ছেদতো ৰত্তমানো কুরুৰত্তধম্মোতি পঞ্ঞাযিত্থ, অযঞ্চ অত্থো কুরুধম্মজাতকেন (জা. ১.৩.৭৬-৭৮) দীপেতব্বো. সো অপরভাগে যত্থ পঠমং সংকিলিট্ঠো জাতো, তং দস্সেতুং ‘‘কুরুরট্ঠৰাসীন’’ন্তিআদি ৰুত্তং. যত্থ ভগৰতো ৰসনোকাসো কোচি ৰিহারো ন হোতি, তত্থ কেৰলং গোচরগামকিত্তনং নিদানকথায পকতি, যথা তংসক্কেসু ৰিহরতি দেৰদহং নাম সক্কানং নিগমোতি ইমমত্থং দস্সেন্তো ‘‘অৰসনোকাসতো’’তিআদিমাহ.

উদ্দেসৰারকথাৰণ্ণনা

১০৬. কস্মা ভগৰা ইমং সুত্তমভাসীতি অসাধারণসমুট্ঠানং পুচ্ছতি, সাধারণং পন পাকটন্তি অনামট্ঠং, তেন সুত্তনিক্খেপো পুচ্ছিতোতি কত্ৰা ইতরো ‘‘কুরুরট্ঠৰাসীন’’ন্তিআদিনা অপরজ্ঝাসযোযং সুত্তনিক্খেপোতি দস্সেতি. এতেন বাহিরসমুট্ঠানং ৰিভাৰিতন্তি দট্ঠব্বং. অজ্ঝত্তিকং পন অসাধারণঞ্চ মূলপরিযাযসুত্তাদিটীকাযং ৰুত্তনযেনেৰ ৰেদিতব্বং. কুরুরট্ঠং কির (দী. নি. টী. ২.৩৭৩) তদা তন্নিৰাসীনং সত্তানং যেভুয্যেন যোনিসোমনসিকারৰন্ততায পুব্বে চ কতপুঞ্ঞতাবলেন উতুআদিসম্পন্নমেৰ অহোসি. তেন ৰুত্তং ‘‘উতুপচ্চযাদিসম্পন্নত্তা’’তি. আদি-সদ্দেন ভোজনাদিসম্পত্তিং সঙ্গণ্হাতি. কেচি পন ‘‘পুব্বে কুরুৰত্তধম্মানুট্ঠানৰাসনায উত্তরকুরু ৰিয যেভুয্যেন উতুআদিসম্পন্নমেৰ হোন্তং ভগৰতো কালে সাতিসযং উতুসপ্পাযাদিযুত্তং তং রট্ঠং অহোসী’’তি ৰদন্তি. চিত্তসরীরকল্লতাযাতি চিত্তস্স সরীরস্স চ অরোগতায. অনুগ্গহিতপঞ্ঞাবলাতি লদ্ধুপকারঞাণানুভাৰা, অনু অনু ৰা আচিণ্ণপঞ্ঞাতেজা. একৰীসতিযা ঠানেসূতি কাযানুপস্সনাৰসেন চুদ্দসসুঠানেসু, ৰেদনানুপস্সনাৰসেন একস্মিং ঠানে, তথা চিত্তানুপস্সনাৰসেন, ধম্মানুপস্সনাৰসেন পঞ্চসু ঠানেসূতি এৰং একৰীসতিযা ঠানেসু. কম্মট্ঠানং অরহত্তে পক্খিপিত্ৰাতি চতুসচ্চকম্মট্ঠানং যথা অরহত্তং পাপেতি, এৰং দেসনাৰসেন অরহত্তে পক্খিপিত্ৰা. সুৰণ্ণচঙ্কোটকসুৰণ্ণমঞ্জূসাসু পক্খিত্তানি সুমনচম্পকাদিনানাপুপ্ফানি মণিপুত্তাদিসত্তরতনানি চ যথা ভাজনসম্পত্তিযা সৰিসেসং সোভন্তি, কিচ্চকরানি ¶ চ হোন্তি মনুঞ্ঞাভাৰতো, এৰং সীলদস্সনাদিসম্পত্তিযা ভাজনৰিসেসভূতায কুরুরট্ঠৰাসিপরিসায দেসিতা ¶ চ ভগৰতো অযং দেসনা ভিয্যোসোমত্তায সোভতি, কিচ্চকারী চ হোতীতি ইমমত্থং দস্সেতি ‘‘যথা হি পুরিসো’’তিআদিনা. এত্থাতি কুরুরট্ঠে.

পকতিযাতি সরসতো, ইমিস্সা সতিপট্ঠানসুত্তদেসনায পুব্বেপীতি অধিপ্পাযো. অনুযুত্তা ৰিহরন্তি সত্থু দেসনানুসারতোতি অধিপ্পাযো. ৰিস্সট্ঠঅত্তভাৰনাতি অনিচ্চাদিৰসেন কিস্মিঞ্চি যোনিসোমনসিকারে চিত্তং অনিযোজেত্ৰা রূপাদিআরম্মণে অভিরতিৰসেন ৰিস্সট্ঠচিত্তেন ভৰিতুং ন ৰট্টতি, পমাদৰিহারং পহায অপ্পমত্তেন ভৰিতব্বন্তি অধিপ্পাযো.

একাযনোতি এত্থ অযন-সদ্দো মগ্গপরিযাযো. ন কেৰলমযনমেৰ, অথ খো অঞ্ঞেপি বহূ মগ্গপরিযাযাতি পদুদ্ধারং করোন্তো ‘‘মগ্গস্স হী’’তিআদি ৰত্ৰা যদি মগ্গপরিযাযো অযন-সদ্দো, কস্মা পুন মগ্গোতি ৰুত্তন্তি চোদনং সন্ধাযাহ ‘‘তস্মা’’তিআদি. তত্থ একমগ্গোতি একো এৰ মগ্গো. ন হি নিব্বানগামী মগ্গো অঞ্ঞো অত্থীতি. ননু সতিপট্ঠানং ইধ ‘‘মগ্গো’’তি অধিপ্পেতং, তদঞ্ঞে চ বহূ মগ্গধম্মা অত্থীতি? সচ্চং অত্থি, তে পন সতিপট্ঠানগ্গহণেনেৰ গহিতা তদৰিনাভাৰতো. তথা হি ঞাণৰীরিযাদযো নিদ্দেসে গহিতা. উদ্দেসে পন সতিযা এৰ গহণং ৰেনেয্যজ্ঝাসযৰসেনাতি দট্ঠব্বং. ন দ্ৰেধাপথভূতোতি ইমিনা ইমস্স মগ্গস্স অনেকমগ্গতাভাৰং ৰিয অনিব্বানগামিভাৰাভাৰঞ্চ দস্সেতি. একেনাতি অসহাযেন. অসহাযতা চ দুৰিধা অত্তদুতিযতাভাৰেন ৰা, যা ‘‘ৰূপকট্ঠকাযতা’’তি ৰুচ্চতি, তণ্হাদুতিযতাভাৰেন ৰা, যা ‘‘পৰিৰিত্তচিত্ততা’’তি ৰুচ্চতি. তেনাহ ‘‘ৰূপকট্ঠেন পৰিৰিত্তচিত্তেনা’’তি. সেট্ঠোপি লোকে ‘‘একো’’তি ৰুচ্চতি ‘‘যাৰ পরে একতো করোসী’’তিআদীসূতি আহ ‘‘একস্সাতি সেট্ঠস্সা’’তি. যদি সংসারতো নিস্সরণট্ঠো অযনট্ঠো অঞ্ঞেসম্পি উপনিস্সযসম্পন্নানং সাধারণো কথং ভগৰতোতি আহ ‘‘কিঞ্চাপী’’তিআদি. ইমস্মিং খোতি এত্থ খো-সদ্দো অৰধারণে, তস্মা ইমস্মিং যেৰাতি অত্থো. দেসনাভেদোযেৰ হেসো, যদিদং মগ্গোতি ৰা অযনোতি ৰা. তেনাহ ‘‘অত্থো পনেকো’’তি.

নানামুখভাৰনানযপ্পৰত্তোতি ¶ কাযানুপস্সনাদিমুখেন তত্থাপি আনাপানাদিমুখেন ভাৰনানযেন পৰত্তো. একাযনন্তি একগামিনং, নিব্বানগামিনন্তি অত্থো. নিব্বানঞ্হি অদুতিযত্তা সেট্ঠত্তা চ ‘‘এক’’ন্তি ৰুচ্চতি. যথাহ ‘‘একঞ্হি সচ্চং ন দুতীযমত্থী’’তি (সু. নি. ৮৯০) ‘‘যাৰতা, ভিক্খৰে, ধম্মা সঙ্খতা ৰা অসঙ্খতা ৰা, ৰিরাগো তেসং অগ্গমক্খাযতী’’তি (অ. নি. ৪.৩৪; ইতিৰু. ৯০) চ. খযো এৰ অন্তোতি খযন্তো ¶ , জাতিযা খযন্তং দিট্ঠৰাতি জাতিখযন্তদস্সী. অৰিভাগেন সব্বেপি সত্তে হিতেন অনুকম্পতীতি হিতানুকম্পী. অতরিংসূতি তরিংসু. পুব্বেতি পুরিমকা বুদ্ধা, পুব্বে ৰা অতীতকালে.

তন্তি তং তেসং ৰচনং, তং ৰা কিরিযাৰুত্তিৰাচকত্তং ন যুজ্জতি. ন হি সঙ্খেয্যপ্পধানতায সত্তৰাচিনো এক-সদ্দস্স কিরিযাৰুত্তিৰাচকতা অত্থি. ‘‘সকিম্পি উদ্ধং গচ্ছেয্যা’’তিআদীসু (অ. নি. ৭.৭২) ৰিয ‘‘সকিং অযনো’’তি ইমিনা ব্যঞ্জনেন ভৰিতব্বং. এৰং অত্থং যোজেত্ৰাতি এৰং পদত্থং যোজেত্ৰা. উভযথাপীতি পুরিমনযেন পচ্ছিমনযেন চ. ন যুজ্জতি ইধাধিপ্পেতমগ্গস্স অনেকৰারং পৰত্তিসব্ভাৰতো. তেনাহ ‘‘কস্মা’’তিআদি. অনেকৰারম্পি অযতীতি পুরিমনযস্স, অনেকঞ্চস্স অযনং হোতীতি পচ্ছিমনযস্স চ পটিক্খেপো.

ইমস্মিং পদেতি ‘‘একাযনো অযং ভিক্খৰে মগ্গো’’তি ইমস্মিং ৰাক্যে, ইমস্মিং ৰা ‘‘পুব্বভাগমগ্গো লোকুত্তরমগ্গো’’তি সংসযট্ঠানে. মিস্সকমগ্গোতি লোকিযেন মিস্সকো লোকুত্তরমগ্গো. ৰিসুদ্ধিআদীনং নিপ্পরিযাযহেতুং সঙ্গণ্হন্তো আচরিযত্থেরো ‘‘মিস্সকমগ্গো’’তি আহ, ইতরো পরিযাযহেতু ইধাধিপ্পেতোতি ‘‘পুব্বভাগমগ্গো’’তি.

সদ্দং সুত্ৰাৰাতি ‘‘কালো, ভন্তে, ধম্মস্সৰনাযা’’তি কালারোচনসদ্দং সুত্ৰা. এৰং উক্খিপিত্ৰাতি. এৰং ‘‘মধুরং ইমং কুহিং ছড্ডেমা’’তি অছড্ডেন্তা উচ্ছুভারং ৰিয পগ্গহেত্ৰা ন ৰিচরন্তি. আলুল়েতীতি ৰিলুল়িতো আকুলো হোতীতি অত্থো. একাযনমগ্গো ৰুচ্চতি পুব্বভাগসতিপট্ঠানমগ্গোতি. এত্তাৰতা ইধাধিপ্পেতত্থে সিদ্ধে তস্সেৰ অলঙ্কারত্থং সো পন যস্স পুব্বভাগমগ্গো, তং দস্সেতুং ‘‘মগ্গানট্ঠঙ্গিকো’’তিআদিকা ¶ গাথাপি পটিসম্ভিদামগ্গতোৰ আনেত্ৰা ঠপিতা.

নিব্বানগমনট্ঠেনাতি নিব্বানং গচ্ছতি অধিগচ্ছতি এতেনাতি নিব্বানগমনং, সো এৰ অৰিপরীতসভাৰতায অত্থো, তেন নিব্বানগমনট্ঠেন, নিব্বানাধিগমুপাযতাযাতি অত্থো. মগ্গনীযট্ঠেনাতি গৰেসিতব্বতায, ‘‘গমনীযট্ঠেনা’’তি ৰা পাঠো, উপগন্তব্বত্তাতি অত্থো. রাগাদীহীতি. ইমিনা রাগদোসমোহানংযেৰ গহণং ‘‘রাগো মলং, দোসো মলং, মোহো মল’’ন্তি (ৰিভ. ৯২৪) ৰচনতো. ‘‘অভিজ্ঝাৰিসমলোভাদীহী’’তি পন ইমিনা সব্বেসম্পি উপক্কিলেসানং সঙ্গণ্হনত্থং তে ৰিসুং উদ্ধটা. সত্তানং ৰিসুদ্ধিযাতি ৰুত্তস্স অত্থস্স একন্তিকতং ¶ দস্সেন্তো ‘‘তথা হী’’তিআদিমাহ. কামং ‘‘ৰিসুদ্ধিযা’’তি সামঞ্ঞজোতনা, চিত্তৰিসুদ্ধি এৰ পনেত্থ অধিপ্পেতাতি দস্সেতুং ‘‘রূপমলৰসেন পনা’’তিআদি ৰুত্তং. ন কেৰলং অট্ঠকথাৰচনমেৰ, অথ খো ইদমেত্থ আহচ্চভাসিতন্তি দস্সেন্তো ‘‘তথা হী’’তিআদিমাহ.

সা পনাযং চিত্তৰিসুদ্ধি সিজ্ঝমানা যস্মা সোকাদীনং অনুপ্পাদায সংৰত্ততি, তস্মা ৰুত্তং ‘‘সোকপরিদেৰানং সমতিক্কমাযা’’তিআদি. তত্থ সোচনং ঞাতিব্যসনাদিনিমিত্তং চেতসো সন্তাপো অন্তোনিজ্ঝানং সোকো. ঞাতিব্যসনাদিনিমিত্তমেৰ সোকাধিকতায ‘‘কহং, একপুত্তক, কহং, একপুত্তকা’’তি পরিদেৰৰসেন লপনং পরিদেৰো, আযতিং অনুপ্পজ্জনং ইধ সমতিক্কমোতি আহ ‘‘পহানাযা’’তি. তং পনস্স সমতিক্কমাৰহতং নিদস্সনৰসেন দস্সেন্তো ‘‘অযং হী’’তিআদিমাহ.

তত্থ যং পুব্বে তং ৰিসোধেহীতি অতীতেসু খন্ধেসু তণ্হাসংকিলেসৰিসোধনং ৰুত্তং. পচ্ছাতি পরতো. তেতি তুয্হং. মাহূতি মা অহু. কিঞ্চনন্তি রাগাদিকিঞ্চনং. এতেন অনাগতেসু খন্ধেসু সংকিলেসৰিসোধনং ৰুত্তং. মজ্ঝেতি তদুভযৰেমজ্ঝে. নো চে গহেস্সসীতি ন উপাদিযিস্সসি চে. এতেন পচ্চুপ্পন্নে খন্ধপবন্ধে উপাদানপ্পৰত্তি ৰুত্তা. উপসন্তো চরিস্সসীতি এৰং অদ্ধত্তযগতসংকিলেসৰিসোধনে সতি নিব্বুতসব্বপরিল়াহতায উপসন্তো হুত্ৰা ৰিহরিস্সসীতি অরহত্তনিকূটেন গাথং নিট্ঠপেসি. তেনাহ ‘‘ইমং গাথ’’ন্তিআদি.

পুত্তাতি ¶ ওরসা, অঞ্ঞেপি ৰা যে কেচি. পিতাতি জনকো. বন্ধৰাতি ঞাতকা. অযঞ্হেত্থ অত্থো – পুত্তা ৰা পিতা ৰা বন্ধৰা ৰা অন্তকেন মচ্চুনা অধিপন্নস্স অভিভূতস্স মরণতো তাণায ন হোন্তি, তস্মা নত্থি ঞাতীসু তাণতাতি. ন হি ঞাতীনং ৰসেন মরণতো আরক্খা অত্থি, তস্মা পটাচারে ‘‘উভো পুত্তা কালকতা’’তিআদিনা (অপ. থেরী ২.২.৪৯৮) মা নিরত্থকং পরিদেৰি, ধম্মংযেৰ পন যাথাৰতো পস্সাতি অধিপ্পাযো.

সোতাপত্তিফলে পতিট্ঠিতাতি যথানুলোমং পৰত্তিতায সামুক্কংসিকায ধম্মদেসনায পরিযোসানে সহস্সনযপটিমণ্ডিতে সোতাপত্তিফলে পতিট্ঠহি. কথং পনাযং সতিপট্ঠানমগ্গৰসেন সোতাপত্তিফলে পতিট্ঠাসীতি আহ ‘‘যস্মা পনা’’তিআদি. ন হি চতুসচ্চকম্মট্ঠানকথায ৰিনা সাৰকানং অরিযমগ্গাধিগমো অত্থি. ‘‘ইমং গাথং সুত্ৰা’’তি পন ইদং সোকৰিনোদনৰসেন পৰত্তিতায গাথায পঠমং সুতত্তা ৰুত্তং. এস নযো ইতরগাথাযপি. ভাৰনাতি ¶ পঞ্ঞাভাৰনা. সা হি ইধাধিপ্পেতা. তস্মাতি যস্মা রূপাদীনং অনিচ্চাদিতো অনুপস্সনাপি সতিপট্ঠানভাৰনা, তস্মা. তেপীতি সন্ততিমহামত্তপটাচারা.

পঞ্চসতে চোরেতি সতসতচোরপরিৰারে পঞ্চ চোরে পটিপাটিযা পেসেসি. তে অরঞ্ঞং পৰিসিত্ৰা থেরং পরিযেসন্তা অনুক্কমেন থেরস্স সমীপে সমাগচ্ছিংসু. তেনাহ ‘‘তে গন্ত্ৰা থেরং পরিৰারেত্ৰা নিসীদিংসূ’’তি. ৰেদনং ৰিক্খম্ভেত্ৰা পীতিপামোজ্জং উপ্পজ্জীতি সম্বন্ধো. থেরস্স হি সীলং পচ্চৰেক্খতো সুপরিসুদ্ধং সীলং নিস্সায উল়ারং পীতিপামোজ্জং উপ্পজ্জমানং ঊরুট্ঠিভেদজনিতং দুক্খৰেদনং ৰিক্খম্ভেসি. পাদানীতি পাদে. সঞ্ঞপেস্সামীতি সঞ্ঞত্তিং করিস্সামি. অড্ডিযামীতি জিগুচ্ছামি. হরাযামীতি লজ্জামি. ৰিপস্সিসন্তি সম্মসিং.

পচলাযন্তানন্তি পচলাযনং নিদ্দং উপগতানং. ৰতসম্পন্নোতি ধুতচরণসম্পন্নো. পমাদন্তি পচলাযনং সন্ধাযাহ. ওরুদ্ধমানসোতি উপরুদ্ধঅধিচিত্তো. পঞ্জরস্মিন্তি সরীরে. সরীরঞ্হি ন্হারুসম্বন্ধঅট্ঠিসঙ্ঘাততায ইধ ‘‘পঞ্জর’’ন্তি ৰুত্তং.

পীতৰণ্ণায পটাকায পরিহরণতো মল্লযুদ্ধচিত্তকতায চ পীতমল্লো. তীসু রজ্জেসূতি পণ্ডুচোল়গোল়রজ্জেসু. মল্লা সীহল়দীপে সক্কারসম্মানং ¶ লভন্তীতি তম্বপণ্ণিদীপং আগম্ম. তংযেৰ অঙ্কুসং কত্ৰাতি ‘‘রূপাদযো ‘মমা’তি ন গহেতব্বা’’তি ন তুম্হাকৰগ্গেন (সং. নি. ৩.৩৩-৩৪) পকাসিতমত্থং অত্তনো চিত্তমত্তহত্থিনো অঙ্কুসং কত্ৰা. জণ্ণুকেহি চঙ্কমতি ‘‘নিসিন্নে নিদ্দায অৰসরো হোতী’’তি. ব্যাকরিত্ৰাতি অত্তনো ৰীরিযারম্ভস্স সফলতাপৰেদনমুখেন সব্রহ্মচারীনং উস্সাহং জনেন্তো অঞ্ঞং ব্যাকরিত্ৰা. ভাসিতন্তি ৰচনং. কস্স পন তন্তি আহ ‘‘বুদ্ধসেট্ঠস্স, সব্বলোকগ্গৰাদিনো’’তি. ন তুম্হাকন্তিআদি তস্স পৰত্তিআকারদস্সনং. তযিদং মে সঙ্খারানং অচ্চন্তৰূপসমকারণন্তি দস্সেন্তো ‘‘অনিচ্চা ৰতা’’তি গাথং আহরি. তেন ইদানাহং সঙ্খারানং খণে খণে ভঙ্গসঙ্খাতস্স রোগস্স অভাৰেন অরোগো পরিনিব্বুতোতি দস্সেতি.

অস্সাতি সক্কস্স. উপপত্তীতি দেৰূপপত্তি. পুনপাকতিকাৰ অহোসি সক্কভাৰেনেৰ উপপন্নত্তা. সুব্রহ্মাতি এৰং নামো. অচ্ছরানং নিরযূপপত্তিং দিস্ৰা ততো পভুতি সততং পৰত্তমানং অত্তনো চিত্তুত্রাসং সন্ধাযাহ ‘‘নিচ্চং উত্রস্তমিদং চিত্ত’’ন্তিআদি. তত্থ উত্রস্তন্তি সন্তস্তং ভীতং. উব্বিগ্গন্তি সংৰিগ্গং. উত্রস্তন্তি ৰা সংৰিগ্গং. উব্বিগ্গন্তি ভযৰসেন সহ কাযেন সঞ্চলিতং. অনুপ্পন্নেসূতি অনাগতেসু. কিচ্ছেসূতি দুক্খেসু. নিমিত্তত্থে ভুম্মৰচনং, ভাৰীদুক্খপৰত্তিনিমিত্তন্তি ¶ অত্থো. উপ্পতিতেসূতি উপ্পন্নেসু কিচ্ছেসূতি যোজনা, তদা অত্তনো পরিৰারস্স উপ্পন্নদুক্খনিমিত্তন্তি অধিপ্পাযো.

বোজ্ঝাতি বোধিতো, অরিযমগ্গতোতি অত্থো. অঞ্ঞত্রাতি চ পদং অপেক্খিত্ৰা নিস্সক্কৰচনং, তস্মা বোধিং ঠপেত্ৰাতি অত্থো. এস নযো সেসেসুপি. তপসাতি তপোকম্মতো. তেন মগ্গাধিগমস্স উপাযভূতং ধুতঙ্গসেৰনাদিসল্লেখপটিপদং দস্সেতি. ইন্দ্রিযসংৰরাতি মনচ্ছট্ঠানং ইন্দ্রিযানং সংৰরণতো. এতেন সতিসংৰরসীসেন সব্বম্পি সংৰরসীলং, লক্খণহারনযেন ৰা সব্বম্পি চতুপারিসুদ্ধিসীলং দস্সেতি. সব্বনিস্সগ্গাতি সব্বুপধিনিস্সজ্জনতো সব্বকিলেসপ্পহানতো. কিলেসেসু হি নিস্সট্ঠেসু কম্মৰট্টং ৰিপাকৰট্টঞ্চ নিস্সট্ঠমেৰ হোতীতি. সোত্থিন্তি খেমং অনুপদ্দৰতং.

ঞাযতি নিচ্ছযেন কমতি নিব্বানং, তং ৰা ঞাযতি পটিৰিজ্ঝীযতি এতেনাতি ঞাযো, অরিযমগ্গোতি আহ ‘‘ঞাযো ৰুচ্চতি অরিযো অট্ঠঙ্গিকো মগ্গো’’তি ¶ . তণ্হাৰানৰিরহিতত্তাতি তণ্হাসঙ্খাতৰানৰিৰিত্তত্তা. তণ্হা হি খন্ধেহি খন্ধং, কম্মুনা ৰা ফলং, সত্তেহি ৰা দুক্খং ৰিনতি সংসিব্বতীতি ৰানন্তি ৰুচ্চতি. তযিদং নত্থি এত্থ ৰানং, ন ৰা এতস্মিং অধিগতে পুগ্গলস্স ৰানন্তি নিব্বানং, অসঙ্খতা ধাতু. পরপচ্চযেন ৰিনা পচ্চক্খকরণং সচ্ছিকিরিযাতি আহ ‘‘অত্তপচ্চক্খতাযা’’তি.

ননু ‘‘ৰিসুদ্ধিযা’’তি চিত্তৰিসুদ্ধিযা অধিপ্পেতত্তা ৰিসুদ্ধিগ্গহণেনেৰেত্থ সোকসমতিক্কমাদযোপি গহিতা এৰ হোন্তি, তে পুন কস্মা গহিতাতি অনুযোগং সন্ধায ‘‘তত্থ কিঞ্চাপী’’তিআদি ৰুত্তং. সাসনযুত্তিকোৰিদেতি সচ্চপটিচ্চসমুপ্পাদাদিলক্খণাযং ধম্মনীতিযং ছেকে. তং তং অত্থং ঞাপেতীতি যে যে বোধনেয্যপুগ্গলা সঙ্খেপৰিত্থারাদিৰসেন যথা যথা বোধেতব্বা, অত্তনো দেসনাৰিলাসেন ভগৰা তে তে তথা তথা বোধেন্তো তং তমত্থং ঞাপেতি. তং তং পাকটং কত্ৰা দস্সেন্তোতি অত্থাপত্তিং অগণেন্তো তং তং অত্থং পাকটং কত্ৰা দস্সেন্তো. ন হি সম্মাসম্বুদ্ধা অত্থাপত্তিঞাপকাদিসাধনীযৰচনাতি. সংৰত্ততীতি জাযতি, হোতীতি অত্থো. যস্মা অনতিক্কন্তসোকপরিদেৰস্স ন কদাচি চিত্তৰিসুদ্ধি অত্থি সোকপরিদেৰসমতিক্কমমুখেনেৰ চিত্তৰিসুদ্ধিযা ইজ্ঝনতো, তস্মা আহ ‘‘সোকপরিদেৰানং সমতিক্কমেন হোতী’’তি. যস্মা পন দোমনস্সপচ্চযেহি দুক্খধম্মেহি পুট্ঠং পুথুজ্জনং সোকাদযো অভিভৰন্তি, পরিঞ্ঞাতেসু চ তেসু তে ন হোন্তি, তস্মা ৰুত্তং ‘‘সোকপরিদেৰানং সমতিক্কমো দুক্খদোমনস্সানং অত্থঙ্গমেনা’’তি. ঞাযস্সাতি অগ্গমগ্গস্স ততিযমগ্গস্স চ. তদধিগমেন হি যথাক্কমং ¶ দুক্খদোমনস্সানং অত্থঙ্গমো. সচ্ছিকিরিযাভিসমযসহভাৰীপি ইতরাভিসমযো তদৰিনাভাৰতো সচ্ছিকিরিযাভিসমযহেতুকো ৰিয ৰুত্তো ‘‘ঞাযস্সাধিগমো নিব্বানস্স সচ্ছিকিরিযাযা’’তি. ফলঞাণেন ৰা পচ্চক্খকরণং সন্ধায ৰুত্তং ‘‘নিব্বানস্স সচ্ছিকিরিযাযা’’তি. সম্পদানৰচনঞ্চেতং দট্ঠব্বং.

ৰণ্ণভণনন্তি পসংসাৰচনং. তযিদং ন ইধেৰ, অথ খো অঞ্ঞত্থাপি সত্থা অকাসিযেৰাতি দস্সেন্তো ‘‘যথেৰ হী’’তিআদিমাহ. তত্থআদিম্হি কল্যাণং, আদি ৰা কল্যাণং এতস্সাতি আদিকল্যাণং. সেসপদদ্ৰযেপি এসেৰ নযো. অত্থসম্পত্তিযা সাত্থং. ব্যঞ্জনসম্পত্তিযা সব্যঞ্জনং. সীলাদিপঞ্চধম্মক্খন্ধপারিপূরিতো উপনেতব্বস্স অভাৰা চ কেৰলপরিপুণ্ণং. নিরুপক্কিলেসতো অপনেতব্বস্স অভাৰা ¶ চ পরিসুদ্ধং. সেট্ঠচরিযভাৰতো সাসন ব্রহ্মচরিযং মগ্গব্রহ্মচরিযঞ্চ ৰো পকাসেস্সামীতি অযমেত্থ সঙ্খেপো, ৰিত্থারো পন ৰিসুদ্ধিমগ্গে (ৰিসুদ্ধি. ১.১৪৭) ৰুত্তনযেন ৰেদিতব্বো. অরিযৰংসাতি অরিযানং বুদ্ধাদীনং ৰংসা পৰেণিযো. অগ্গঞ্ঞাতি ‘‘অগ্গা’’তি জানিতব্বা সব্বৰংসেহি সেট্ঠভাৰতো. রত্তঞ্ঞাতি ‘‘চিররত্তা’’তি জানিতব্বা. ৰংসঞ্ঞাতি ‘‘বুদ্ধাদীনং ৰংসা’’তি জানিতব্বা. পোরাণাতি পুরাতনা অনধুনাতনত্তা. অসংকিণ্ণাতি অৰিকিণ্ণা অনপনীতা. অসংকিণ্ণপুব্বাতি ‘‘কিং ইমেহী’’তি অরিযেহি ন অপনীতপুব্বা. ন সংকীযন্তীতি ইদানিপি তেহি ন অপনীযন্তি. ন সংকীযিস্সন্তীতি অনাগতেপি তেহি ন অপনীযিস্সন্তি. অপ্পটিকুট্ঠা…পে… ৰিঞ্ঞূহীতি যে লোকে ৰিঞ্ঞূ সমণব্রাহ্মণা, তেহি অপচ্চক্খতা অনিন্দিতা, অগরহিতাতি অত্থো. ৰিসুদ্ধিযাতিআদীহীতি ৰিসুদ্ধিআদিদীপনেহি. পদেহীতি ৰাক্যেহি, ৰিসুদ্ধিঅত্থতাদিভেদভিন্নেহি ৰা ধম্মকোট্ঠাসেহি.

উপদ্দৰেতি অনত্থে. ৰিসুদ্ধিন্তি ৰিসুজ্ঝনং সংকিলেসপ্পহানং. ৰাচুগ্গতকরণং উগ্গহো. পরিযাপুণনং পরিচযো. অত্থস্স হদযে ঠপনং ধারণং. পরিৰত্তনং ৰাচনং. গন্ধারকোতি গন্ধারদেসে উপ্পন্নো. পহোন্তীতি সক্কোন্তি অনিয্যানমগ্গাতি মিচ্ছামগ্গা, মিচ্ছত্তনিযতানিযতমগ্গাপি ৰা. সুৰণ্ণন্তি কূটসুৰণ্ণম্পি ৰুচ্চতি. পণীতি কাচমণিপি. মুত্তাতি ৰেল়ুজাপি. পৰাল়ন্তি পল্লৰোপি ৰুচ্চতীতি রত্তজম্বুনদাদিপদেহি তে ৰিসেসিতা.

ন ততো হেট্ঠাতি (সং. নি. টী. ২.৫.৩৬৭; দী. নি. টী. ২.৩৭৩) ইধাধিপ্পেতকাযাদীনং ৰেদনাদিসভাৰত্তাভাৰা, কাযৰেদনাচিত্তৰিমুত্তস্স তেভূমকধম্মস্স ৰিসুং ৰিপল্লাসৰত্থন্তরভাৰেন গহিতত্তা চ হেট্ঠাগহণেসু ৰিপল্লাসৰত্থূনং অনিট্ঠানং সন্ধায ৰুত্তং, পঞ্চমস্স ¶ পন ৰিপল্লাসৰত্থুনো অভাৰা ‘‘ন উদ্ধ’’ন্তি আহ. আরম্মণৰিভাগেন হেত্থ সতিপট্ঠানৰিভাগোতি. তযো সতিপট্ঠানাতি সতিপট্ঠানসদ্দস্স অত্থুদ্ধারদস্সনং, ন ইধ পাল়িযং ৰুত্তস্স সতিপট্ঠানসদ্দস্স অত্থদস্সনন্তি. আদীসু হি সতিগোচরোতি এত্থ আদি-সদ্দেন ‘‘ফস্সসমুদযা ৰেদনানং সমুদযো, নামরূপসমুদযা চিত্তস্স সমুদযো, মনসিকারসমুদযা ধম্মানং সমুদযো’’তি সতিপট্ঠানাতি ৰুত্তানং ¶ সতিগোচরানং পকাসকে সুত্তপদেসে সঙ্গণ্হাতি. এৰং পটিসম্ভিদাপাল়িযম্পি (পটি. ম. ৩.৩৪) অৰসেসপাল়িপ্পদেসদস্সনত্থো আদি-সদ্দো দট্ঠব্বো. সতিযা পট্ঠানন্তি সতিযা পতিট্ঠাতব্বট্ঠানং. দানাদীনি সতিযা করোন্তস্স রূপাদীনি কসিণাদীনি চ সতিযা ঠানং হোন্তীতি তংনিৰারণত্থমাহ ‘‘পধানং ঠান’’ন্তি. প-সদ্দো হি ইধ ‘‘পণীতা ধম্মা’’তিআদীসু (ধ. স. ১৪ তিকমাতিকা) ৰিয পধানত্থদীপকোতি অধিপ্পাযো.

অরিযোতি অরিযং সব্বসত্তসেট্ঠং সম্মাসম্বুদ্ধমাহ. এত্থাতি এতস্মিং সল়াযতনৰিভঙ্গসুত্তে (ম. নি. ৩.৩১১). সুত্তেকদেসেন হি সুত্তং দস্সেতি. তত্থ হি –

‘‘তযো সতিপট্ঠানা যদরিযো…পে… মরহতীতি ইতি খো পনেতং ৰুত্তং, কিঞ্চেতং পটিচ্চ ৰুত্তং. ইধ, ভিক্খৰে, সত্থা সাৰকানং ধম্মং দেসেতি অনুকম্পকো হিতেসী অনুকম্পং উপাদায ‘‘ইদং ৰো হিতায ইদং ৰো সুখাযা’তি. তস্স সাৰকা ন সুস্সূসন্তি, ন সোতং ওদহন্তি, ন অঞ্ঞা চিত্তং উপট্ঠপেন্তি, ৰোক্কম্ম চ সত্থুসাসনা ৰত্তন্তি. তত্র, ভিক্খৰে, তথাগতো ন চেৰ অনত্তমনো হোতি, ন চ অনত্তমনতং পটিসংৰেদেতি, অনৰস্সুতো চ ৰিহরতি সতো সম্পজানো. ইদং, ভিক্খৰে, পঠমং সতিপট্ঠানং, যদরিযো…পে… অরহতি.

পুন চপরং, ভিক্খৰে, সত্থা…পে… ইদং ৰো সুখাযাতি. তস্স একচ্চে সাৰকা ন সুস্সূসন্তি…পে… ৰত্তন্তি. একচ্চে সাৰকা সুস্সূসন্তি…পে… ন চ ৰোক্কম্ম সত্থুসাসনা ৰত্তন্তি. তত্র, ভিক্খৰে, তথাগতো ন চেৰ অনত্তমনো হোতি, ন চ অনত্তমনতং পটিসংৰেদেতি, ন চেৰ অত্তমনো হোতি, ন চ অত্তমনতং পটিসংৰেদেতি. অনত্তমনতঞ্চ অত্তমনতঞ্চ তদুভযং অভিনিৰজ্জেত্ৰা উপেক্খতো ৰিহরতি সতো সম্পজানো. ইদং ৰুচ্চতি, ভিক্খৰে, দুতিযং সতিপট্ঠানং…পে… অরহতি.

পুন চপরং…পে… সুখাযাতি. তস্স সাৰকা সুস্সূসন্তি…পে… ৰত্তন্তি. তত্র, ভিক্খৰে, তথাগতো অত্তমনো চেৰ হোতি, অত্তমনতঞ্চ পটিসংৰেদেতি, অনৰস্সুতো চ ৰিহরতি ¶ সতো সম্পজানো ¶ . ইদং ৰুচ্চতি, ভিক্খৰে, ততিযং সতিপট্ঠানং…পে… অরহতী’’তি (ম. নি. ৩.৩১১) –

এৰং পটিঘানুনযেহি অনৰস্সুততা, নিচ্চং উপট্ঠিতস্সতিতায তদুভযৰীতিৰত্ততা ‘‘সতিপট্ঠান’’ন্তি ৰুত্তা. বুদ্ধানংযেৰ হি নিচ্চং উপট্ঠিতস্সতিতা হোতি আৰেণিকধম্মভাৰতো, ন পচ্চেকবুদ্ধাদীনং. প-সদ্দো আরম্ভং জোতেতি, আরম্ভো চ পৰত্তীতি কত্ৰা আহ ‘‘পৰত্তযিতব্বতোতি অত্থো’’তি. সতিযা করণভূতায পট্ঠানং পট্ঠপেতব্বং সতিপট্ঠানং. অন-সদ্দো হি বহুলৰচনেন কম্মত্থোপি হোতীতি.

তথাস্স কত্তুঅত্থোপি লব্ভতীতি ‘‘পতিট্ঠাতীতি পট্ঠান’’ন্তি ৰুত্তং. তত্থ প-সদ্দো ভূসত্থৰিসিট্ঠং পক্খন্ধনং দীপেতীতি ‘‘ওক্কন্তিত্ৰা পক্খন্দিত্ৰা পৰত্ততীতি অত্থো’’তি আহ. পুন ভাৰত্থং সতি-সদ্দং পট্ঠান-সদ্দঞ্চ ৰণ্ণেন্তো ‘‘অথ ৰা’’তিআদিমাহ. তেন পুরিমৰিকপ্পে সতি-সদ্দো পট্ঠান-সদ্দো চ কত্থুঅত্থোতি ৰিঞ্ঞাযতি. সরণট্ঠেনাতি চিরকতস্স চিরভাসিতস্স চ অনুস্সরণট্ঠেন. ইদন্তি যং ‘‘সতিযেৰ সতিপট্ঠান’’ন্তি ৰুত্তং, ইদং ইধ ইমস্মিং সুত্তপদেসে অধিপ্পেতং.

যদি এৰন্তি যদি সতি এৰ সতিপট্ঠানং, সতি নাম একো ধম্মো, এৰং সন্তে কস্মা ‘‘সতিপট্ঠানা’’তি বহুৰচনন্তি আহ ‘‘সতিবহুত্তা’’তিআদি. যদি বহুকা এতা সতিযো, অথ কস্মা ‘‘মগ্গো’’তি একৰচনন্তি যোজনা. মগ্গট্ঠেনাতি নিয্যানট্ঠেন. নিয্যানিকো হি মগ্গধম্মো, তেনেৰ নিয্যানিকভাৰেন একত্তুপগতো একন্ততো নিব্বানং গচ্ছতি, অত্থিকেহি চ তদত্থং মগ্গীযতীতি অত্তনাৰ পুব্বে ৰুত্তং পচ্চাহরতি ‘‘ৰুত্তঞ্চেত’’ন্তি. তত্থ চতস্সোপি চেতাতি কাযানুপস্সনাদিৰসেন চতুব্বিধাপি চ এতা সতিযো. অপরভাগেতি অরিযমগ্গক্খণে. কিচ্চং সাধযমানাতি পুব্বভাগে কাযাদীসু আরম্মণেসু সুভসঞ্ঞাদিৰিধমনেন ৰিসুং ৰিসুং পৰত্তিত্ৰা মগ্গক্খণে সকিংযেৰ তত্থ চতুব্বিধস্সপি ৰিপল্লাসস্স সমুচ্ছেদৰসেন পহানকিচ্চং সাধযমানা আরম্মণকরণৰসেন নিব্বানং গচ্ছন্তি. চতুব্বিধকিচ্চসাধনেনেৰ হেত্থ বহুৰচননিদ্দেসো. এৰঞ্চ সতীতি মগ্গট্ঠেন একত্তং উপাদায ‘‘মগ্গো’’তি একৰচনেন আরম্মণভেদেন ¶ চতুব্বিধতং উপাদায ‘‘চত্তারো’’তি চ ৰত্তব্বতায সতিৰিজ্জমানত্তা. ৰচনানুসন্ধিনা ‘‘একাযনো অয’’ন্তিআদিকা দেসনা সানুসন্ধিকাৰ, ন অননুসন্ধিকাতি অধিপ্পাযো. ৰুত্তমেৰত্থং নিদস্সনেন পটিপাদেতুং ‘‘মারসেনপ্পমদ্দন’’ন্তি সুত্তপদং (সং. নি. ৫.২২৪) আনেত্ৰা ¶ ‘‘যথা’’তিআদিনা নিদস্সনং সংসন্দেতি. তস্মাতিআদি নিগমনং.

ৰিসেসতো কাযো চ ৰেদনা চ অস্সাদস্সকারণন্তি তপ্পহানত্থং তেসু তণ্হাৰত্থূসু ওল়ারিকসুখুমেসু অসুভদুক্খভাৰদস্সনানি মন্দতিক্খপঞ্ঞেহি তণ্হাচরিতেহি সুকরানীতি তানি তেসং ‘‘ৰিসুদ্ধিমগ্গো’’তি ৰুত্তানি তথা ‘‘নিচ্চং অত্তা’’তি অভিনিৰেসৰত্থুতায দিট্ঠিযা ৰিসেসকারণেসু চিত্তধম্মেসু অনিচ্চানত্ততাদস্সনানি সরাগাদিৰসেন সঞ্ঞাফস্সাদিৰসেন নীৰরণাদিৰসেন চ নাতিপ্পভেদঅতিপ্পভেদগতেসু তেসু তপ্পহানত্থং মন্দতিক্খপঞ্ঞানং দিট্ঠিচরিতানং সুকরানীতি তেসং তানি ‘‘ৰিসুদ্ধিমগ্গো’’তি ৰুত্তানি. এত্থ চ যথা চিত্তধম্মানম্পি তণ্হায ৰত্থুভাৰো সম্ভৰতি, তথা কাযৰেদনানম্পি দিট্ঠিযাতি সতিপি নেসং চতুন্নম্পি তণ্হাদিট্ঠিযা ৰত্থুভাৰে যো যস্স সাতিসযপচ্চযো, তংদস্সনত্থং ৰিসেসগ্গহণং কতন্তি দট্ঠব্বং. তিক্খপঞ্ঞসমথযানিকো ওল়ারিকারম্মণং পরিগ্গণ্হন্তো তত্থ অট্ঠত্ৰা ঝানং সমাপজ্জিত্ৰা ৰুট্ঠায ৰেদনং পরিগ্গণ্হাতীতি ৰুত্তং. ‘‘ওল়ারিকারম্মণে অসণ্ঠহনতো’’তি. ৰিপস্সনাযানিকস্স পন সুখুমে চিত্তে ধম্মেসু চ চিত্তং পক্খন্দতীতি চিত্তধম্মানুপস্সনানং মন্দতিক্খপঞ্ঞাৰিপস্সনাযানিকানং ৰিসুদ্ধিমগ্গতা ৰুত্তা.

তেসং তত্থাতি এত্থ তত্থ-সদ্দস্স ‘‘পহানত্থ’’ন্তি এতেন যোজনা. পরতো তেসং তত্থাতি এত্থাপি এসেৰনযো. পঞ্চ কামগুণা সৰিসেসা কাযে লব্ভন্তীতি ৰিসেসেন কাযো কামোঘস্স ৰত্থু, ভৰেসু সুখগ্গহণৰসেন ভৰস্সাদো হোতি ভৰোঘস্স ৰেদনা ৰত্থু, সন্ততিঘনগহণৰসেন ৰিসেসতো চিত্তে অত্তাভিনিৰেসো হোতীতি দিট্ঠোঘস্স চিত্তং ৰত্থু, ধম্মেসু ৰিনিব্ভোগস্স দুক্করত্তা ধম্মানং ধম্মমত্ততায দুপ্পটিৰিজ্ঝত্তা সম্মোহো হোতীতি অৰিজ্জোঘস্স ধম্মা ৰত্থু, তস্মা তেসং পহানত্থং চত্তারোৰ ৰুত্তা.

যদগ্গেন ¶ চ কাযো কামোঘস্স ৰত্থু, তদগ্গেন অভিজ্ঝাকাযগন্থস্স ৰত্থু, দুক্খায ৰেদনায পটিঘানুসযো অনুসেতীতি দুক্খদুক্খৰিপরিণামদুক্খসঙ্খারদুক্খভূতা ৰেদনা ৰিসেসেন ব্যাপাদকাযগন্থস্স ৰত্থু, চিত্তে নিচ্চগ্গহণৰসেন সস্সতস্স অত্তনো সীলেন সুদ্ধীতিআদি পরামসনং হোতীতি সীলব্বতপরামাসস্স চিত্তং ৰত্থু, নামরূপপরিচ্ছেদেন ভূতং ভূততো অপস্সন্তস্স ভৰৰিভৰদিট্ঠিসঙ্খাতো ইদংসচ্চাভিনিৰেসো হোতীতি তস্স ধম্মা ৰত্থু, সুখৰেদনাস্সাদৰসেন পরলোকনিরপেক্খো ‘‘নত্থি দিন্ন’’ন্তিআদিকং পরামাসং উপ্পাদেতীতি দিট্ঠুপাদানস্স ৰেদনা ৰত্থু সন্ততিঘনগহণৰসেন সরাগাদিচিত্তে সম্মোহো হোতীতি মোহাগতিযা চিত্তং ¶ ৰত্থু, ধম্মসভাৰানৰবোধেন ভযং হোতীতি ভযাগতিযা ধম্মা ৰত্থু. যে পনেত্থ অৰুত্তা, তেসং ৰুত্তনযেন ৰত্থুভাৰো যোজেতব্বো. তথা হি ওঘেসু ৰুত্তনযা এৰ যোগাসৰেসুপি যোজনা অত্থতো অভিন্নত্তা. তথা পঠমোঘততিযচতুত্থগন্থযোজনায ৰুত্তনযা এৰ কাযচিত্তধম্মানং ইতরূপাদানৰত্থুতা যোজনা, তথা কামোঘব্যাপাদকাযগন্থযোজনায ৰুত্তনযা এৰ কাযৰেদনানং ছন্দদোসাগতি ৰত্থুতা যোজনা ৰা.

‘‘আহারসমুদযা কাযসমুদযো, ফস্সসমুদযা ৰেদনাসমুদযো, (সং. নি. ৫.৪০৮) সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপ’’ন্তি (ম. নি. ৩.১২৬; উদা. ১; ৰিভ. ২২৫) ৰচনতো কাযাদীনং সমুদযভূতা কবল়ীকারাহারফস্সমনোসঞ্চেতনাৰিঞ্ঞাণাহারা কাযাদিপরিজাননেন পরিঞ্ঞাতা হোন্তীতি আহ ‘‘চতুব্বিধাহারপরিঞ্ঞত্থ’’ন্তি পকরণনযোতি নেত্তিপকরণৰসেন সুত্তন্তসংৰণ্ণনানযো.

সরণৰসেনাতি কাযাদীনং কুসলাদিধম্মানঞ্চ উপধারণৰসেন. সরন্তি গচ্ছন্তি নিব্বানং এতাযাতি সতীতি ইমস্মিং অত্থে একত্তে একসভাৰে নিব্বানে সমোসরণং সমাগমো একত্তসমোসরণং. এতদেৰ হি দস্সেতুং ‘‘যথা হী’’তিআদি ৰুত্তং. একনিব্বানপৰেসহেতুভূতা ৰা সমানতা একো সতিপট্ঠানস্স ভাৰো একত্তং, তত্থ সমোসরণং ¶ তংসভাগতা একত্তসমোসরণং. একনিব্বানপৰেসহেতুভাৰং পন দস্সেতুং ‘‘যথা হী’’তিআদিমাহ. এতস্মিং অত্থে সরণেকত্তসমোসরণানি সহেৰ সতিপট্ঠানেকভাৰস্স কারণত্থেন ৰুত্তানীতি দট্ঠব্বানি, পুরিমস্মিং ৰিসুং. সরণৰসেনাতি ৰা ‘‘গমনৰসেনা’’তি অত্থে সতি তদেৰ গমনং সমোসরণন্তি, সমোসরণে ৰা সতিসদ্দত্থৰসেন অৰুচ্চমানে ধারণতাৰ সতীতি সতিসদ্দত্থন্তরাভাৰা পুরিমং সতিভাৰস্স কারণং, পচ্ছিমং একভাৰস্সাতি নিব্বানসমোসরণেপি সহিতানেৰ তানি সতিপট্ঠানেকভাৰস্স কারণানি ৰুত্তানি হোন্তি. চুদ্দসৰিধেন, নৰৰিধেন, সোল়সৰিধেন, পঞ্চৰিধেনাতি ইদং উপরি পাল়িযং (ম. নি. ১.১০৭) আগতানং আনাপানপব্বাদীনং ৰসেন ৰুত্তং, তেসং পন অন্তরভেদৰসেন তদনুগতভেদৰসেন চ ভাৰনায অনেকৰিধতা লব্ভতিযেৰ. চতূসু দিসাসু উট্ঠানকভণ্ডসদিসতা কাযানুপস্সনাদিতংতংসতিপট্ঠানভাৰনানুভাৰস্স দট্ঠব্বা.

‘‘গোচরে, ভিক্খৰে, চরথ সকে পেত্তিকে ৰিসযে’’তিআদিৰচনতো (দী. নি. ৩.৮০; সং. নি. ৫.৩৭২) ভিক্খুগোচরা এতে ধম্মা, যদিদং কাযানুপস্সনাদযো. তত্থ যস্মা কাযানুপস্সনাদিপটিপত্তিযা ভিক্খু হোতি, তস্মা ‘‘কাযানুপস্সী ৰিহরতী’’তিআদিনা ভিক্খুং দস্সেতি, ভিক্খুম্হি তং নিযমতোতি আহ ‘‘পটিপত্তিযা ভিক্খুভাৰদস্সনতো’’তি. সত্থু চরিযানুৰিধাযকত্তা ¶ সকলসাসনসম্পটিগ্গাহকত্তা চ সব্বপ্পকারায অনুসাসনিযা ভাজনভাৰো.

সমং চরেয্যাতি কাযাদিৰিসমচরিযং পহায কাযাদীহি সমং চরেয্য. রাগাদিৰূপসমেন সন্তো. ইন্দ্রিযদমেন দন্তো. চতুমগ্গনিযামেন নিযতো. সেট্ঠচরিতায ব্রহ্মচারী. কাযদণ্ডাদিওরোপনেন নিধায দণ্ডং. অরিযভাৰে ঠিতো সো এৰরূপো বাহিতপাপসমিতপাপভিন্নকিলেসতাহি ব্রাহ্মণো সমণো ভিক্খূতি ৰেদিতব্বো.

‘‘অযঞ্চেৰ কাযো বহিদ্ধো চ নামরূপ’’ন্তিআদীসু (দী. নি. টী. ২.৩৭৩) খন্ধপঞ্চকং, ‘‘সুখঞ্চ কাযেন পটিসংৰেদেতী’’তিআদীসু (ম. নি. ১.২৭১, ২৮৭; পারা. ১১) নামকাযো কাযোতি ৰুচ্চতীতি ততো ৰিসেসনত্থং ‘‘কাযেতি রূপকাযে’’তি আহ.

অসম্মিস্সতোতি ¶ ‘‘ৰেদনাদযোপি এত্থ সিতা এত্থ পটিবদ্ধা’’তি কাযে ৰেদনাদিঅনুপস্সনাপসঙ্গেপি আপন্নে ততো অসম্মিস্সতোতি অত্থো. সমূহৰিসযতায চস্স কায-সদ্দস্স সমুদাযুপাদানতায চ অসুভাকারস্স ‘‘কাযে’’তি একৰচনং, তথা আরম্মণাদিৰিভাগেন অনেকভেদভিন্নম্পি চিত্তং চিত্তভাৰসামঞ্ঞেন একজ্ঝং গহেত্ৰা ‘‘চিত্তে’’তি একৰচনং, ৰেদনা পন সুখাদিভেদভিন্না ৰিসুং ৰিসুং অনুপস্সিতব্বাতি দস্সেন্তেন ‘‘ৰেদনাসূ’’তি বহুৰচনেন ৰুত্তা, তথেৰ চ নিদ্দেসো পৰত্তিতো, ধম্মা চ পরোপণ্ণাসভেদা অনুপস্সিতব্বাকারেন চ অনেকভেদা এৰাতি তেপি বহুৰচনৰসেনেৰ ৰুত্তা. অৰযৰীগাহ-সমঞ্ঞাতিধাৰন-সারাদানাভিনিৰেসনিসেধনত্থং কাযং অঙ্গপচ্চঙ্গেহি, তানি চ কেসাদীহি, কেসাদিকে চ ভূতুপাদাযরূপেহি ৰিনিব্ভুজ্জন্তো ‘‘তথা ন কাযে’’তিআদিমাহ. পাসাদাদিনগরাৰযৰসমূহে অৰযৰীৰাদিনোপি অৰযৰীগাহং ন করোন্তি, নগরং নাম কোচি অত্থো অত্থীতি পন কেসঞ্চি সমঞ্ঞাতিধাৰনং সিযাতি ইত্থিপুরিসাদিসমঞ্ঞাতিধাৰনে নগরনিদস্সনং ৰুত্তং. অঙ্গপচ্চঙ্গসমূহো, কেসলোমাদিসমূহো ভূতুপাদাযসমূহো চ যথাৰুত্তসমূহে তব্বিনিমুত্তো কাযোপি নাম কোচি নত্থি, পগেৰ ইত্থিআদযোতি আহ ‘‘কাযো ৰা…পে… দিস্সতী’’তি. কোচি ধম্মোতি ইমিনা সত্তজীৰাদিং পটিক্খিপতি, অৰযৰী পন কাযপটিক্খেপেনেৰ পটিক্খিত্তোতি. যদি এৰং কথং কাযাদিসঞ্ঞাভিধানানীতিআহ ‘‘যথাৰুত্ত…পে… করোন্তী’’তি.

যং পস্সতি ইত্থিং পুরিসং ৰা. ননু চক্খুনা ইত্থিপুরিসদস্সনং নত্থীতি? সচ্চমেতং, ‘‘ইত্থিং ¶ পস্সামি, পুরিসং পস্সামী’’তি পন পৰত্তসঞ্ঞায ৰসেন ‘‘যং পস্সতী’’তি ৰুত্তং. মিচ্ছাদস্সনেন ৰা দিট্ঠিযা যং পস্সতি, ন তং দিট্ঠং, তং রূপাযতনং ন হোতীতি অত্থো ৰিপরীতগ্গাহৰসেন মিচ্ছাপরিকপ্পিতরূপত্তা. অথ ৰা তং কেসাদিভূতুপাদাযসমূহসঙ্খাতং দিট্ঠং ন হোতি অচক্খুৰিঞ্ঞাণৰিঞ্ঞেয্যত্তা, দিট্ঠং ৰা তং ন হোতি. যং দিট্ঠং তং ন পস্সতীতি যং রূপাযতনং কেসাদিভূতুপাদাযসমূহসঙ্খাতং দিট্ঠং, তং পঞ্ঞাচক্খুনা ভূততো ন পস্সতীতি অত্থো. অপস্সং বজ্ঝতেতি ইমং অত্তভাৰং যথাভূতং পঞ্ঞাচক্খুনা অপস্সন্তো ‘‘এতং মম, এসোহমস্মি, এসো মে অত্তো’’তি কিলেসবন্ধনেন বজ্ঝতি.

ন ¶ অঞ্ঞধম্মানুপস্সীতি ন অঞ্ঞসভাৰানুপস্সী, অসুভাদিতো অঞ্ঞাকারানুপস্সী ন হোতীতি অত্থো. কিং ৰুত্তং হোতীতিআদিনা তমেৰত্থং পাকটং করোতি. পথৰীকাযন্তি কেসাদিকোট্ঠাসপথৰিং ধম্মসমূহত্তা ‘‘কাযো’’তি ৰদতি, লক্খণপথৰিমেৰ ৰা অনেকপ্পভেদং সকলসরীরগতং পুব্বাপরিযভাৰেন চ পৰত্তমানং সমূহৰসেন গহেত্ৰা ‘‘কাযো’’তি ৰদতি. আপোকাযন্তিআদীসুপি এসেৰ নযো.

এৰং গহেতব্বস্সাতি ‘‘অহং মম’’ন্তি এৰং অত্তত্তনিযভাৰেন অন্ধবালেহি গহেতব্বস্স. ইদানি সত্তন্নং অনুপস্সনাকারানম্পি ৰসেন কাযানুপস্সনং দস্সেতুং ‘‘অপিচা’’তিআদি আরদ্ধং. তত্থ অনিচ্চতো অনুপস্সতীতি চতুসমুট্ঠানিককাযং ‘‘অনিচ্চ’’ন্তি অনুপস্সতি, এৰং পস্সন্তো এৰং চস্স অনিচ্চাকারম্পি অনুপস্সতীতি ৰুচ্চতি. তথাভূতস্স চস্স নিচ্চগ্গাহস্স লেসোপি ন হোতীতি ৰুত্তং ‘‘নো নিচ্চতো’’তি তথাহেস ‘‘নিচ্চসঞ্ঞং পজহতী’’তি (পটি. ম. ৩.৩৫) ৰুত্তো. এত্থ চ ‘‘অনিচ্চতো এৰ অনুপস্সতী’’তি এৰ-কারো লুত্তনিদ্দিট্ঠোতি তেন নিৰত্তিতমত্থং দস্সেতুং ‘‘নো নিচ্চতো’’তি ৰুত্তং. ন চেত্থ দুক্খতো অনুপস্সনাদিনিৰত্তনমাসঙ্কিতব্বং পটিযোগীনিৰত্তনপরত্তা এৰ-কারস্স, উপরিদেসনারুল়্হত্তা চ তাসং.

দুক্খতো অনুপস্সতীতিআদীসুপি এসেৰ নযো. অযং পন ৰিসেসো – অনিচ্চস্স দুক্খত্তা তমেৰ কাযং দুক্খতো অনুপস্সতি, দুক্খস্স অনত্তত্তা অনত্ততো অনুপস্সতি. যস্মা পন যং অনিচ্চং দুক্খং অনত্তা, তং অনভিনন্দিতব্বং, ন তত্থ রজ্জিতব্বং, তস্মা ৰুত্তং ‘‘নিব্বিন্দতি নো নন্দতি, ৰিরজ্জতি নো রজ্জতী’’তি. সো এৰং অরজ্জন্তো রাগং নিরোধেতি নো সমুদেতি, সমুদযং ন করোতীতি অত্থো. এৰং পটিপন্নো চ পটিনিস্সজ্জতি নো আদিযতি. অযঞ্হি অনিচ্চাদিঅনুপস্সনা তদঙ্গৰসেন সদ্ধিং কাযতন্নিস্সযখন্ধাভিসঙ্খারেহি কিলেসানং ¶ পরিচ্চজনতো, সঙ্খতদোসদস্সনেন তব্বিপরীতে নিব্বানে তন্নিন্নতায পক্খন্দনতো ‘‘পরিচ্চাগপটিনিস্সগ্গো চেৰ পক্খন্দনপটিনিস্সগ্গো চা’’তি ৰুচ্চতি, তস্মা তায সমন্নাগতো ভিক্খু ৰুত্তনযেন কিলেসে চ পরিচ্চজতি, নিব্বানে চ পক্খন্দতি ¶ , তথাভূতো চ নিব্বত্তনৰসেন কিলেসে ন আদিযতি, নাপি অদোসদস্সিতাৰসেন সঙ্খতারম্মণং. তেন ৰুত্তং ‘‘পটিনিস্সজ্জতি নো আদিযতী’’তি. ইদানিস্স তাহি অনুপস্সনাহি যেসং ধম্মানং পহানং হোতি, তং দস্সেতুং ‘‘সো তং অনিচ্চতো অনুপস্সন্তো নিচ্চসঞ্ঞং পজহতী’’তি. তত্থ নিচ্চসঞ্ঞন্তি ‘‘সঙ্খারা নিচ্চা’’তি এৰং পৰত্তৰিপরীতসঞ্ঞং. দিট্ঠিচিত্তৰিপল্লাসপহানমুখেনেৰ সঞ্ঞাৰিপল্লাসপ্পহানন্তি সঞ্ঞাগহণং, সঞ্ঞাসীসেন ৰা তেসম্পি গহণং দট্ঠব্বং. নন্দিন্তি সপ্পীতিকতণ্হং. সেসং ৰুত্তনযেমেৰ.

ৰিহরতীতি ইমিনা কাযানুপস্সনাসমঙ্গিনো ইরিযাপথৰিহারো ৰুত্তোতি আহ ‘‘ইরিযতী’’তি ইরিযাপথং পৰত্তেতীতি অত্থো. আরম্মণকরণৰসেন অভিব্যাপনতো ‘‘তীসু ভৰেসূ’’তি ৰুত্তং, উপ্পজ্জনৰসেন পন কিলেসা পরিত্তভূমকা এৰাতি. যদিপি কিলেসানং পহানং আতাপনন্তি তং সম্মাদিট্ঠিআদীনম্পি অত্থেৰ, আতাপ-সদ্দো পন ৰীরিযেযেৰ নিরুল়্হোতি ৰুত্তং ‘‘ৰীরিযস্সেতং নাম’’ন্তি. অথ ৰা পটিপক্খপহানে সম্পযুত্তধম্মানং অব্ভুস্সহনৰসেন পৰত্তমানস্স ৰীরিযস্স সাতিসযং তদাতাপনন্তি ৰীরিযমেৰ তথা ৰুচ্চতি, ন অঞ্ঞে ধম্মা. আতাপীতি চাযমীকারো পসংসায, অতিসযস্স ৰা দীপকোতি আতাপীগহণেন সম্মপ্পধানসমঙ্গিতং দস্সেতি. সম্মা, সমন্ততো, সামঞ্চ পজানন্তো সম্পজানো, অসম্মিস্সতো ৰৰত্থানে অঞ্ঞধম্মানুপস্সিতাভাৰেন সম্মা অৰিপরীতং, সব্বাকারপজাননেন সমন্ততো, উপরূপরি ৰিসেসাৰহভাৰেন পৰত্তিযা সযং পজানন্তোতি অত্থো. যদি পঞ্ঞায অনুপস্সতি, কথং সতিপট্ঠানতাতি আহ ‘‘ন হী’’তিআদি. সব্বত্থিকন্তি সব্বত্থ ভৰং সব্বত্থ লীনে উদ্ধতে চ চিত্তে ইচ্ছিতব্বত্তা, সব্বে ৰা লীনে উদ্ধতে চ ভাৰেতব্বা বোজ্ঝঙ্গা অত্থিকা এতাযাতি সব্বত্থিকা. সতিযা লদ্ধূপকারায এৰ পঞ্ঞায এত্থ যথাৰুত্তে কাযে কম্মট্ঠানিকো ভিক্খু কাযানুপস্সী ৰিহরতি. অন্তোসঙ্খেপো অন্তো ওলীযনো, কোসজ্জন্তি অত্থো. উপাযপরিগ্গহেতি এত্থ সীলৰিসোধনাদি গণনাদি উগ্গহকোসল্লাদি চ উপাযো, তব্বিপরিযাযতো অনুপাযো ৰেদিতব্বো. যস্মা চ উপট্ঠিতস্সতি যথাৰুত্তউপাযং ন পরিচ্চজতি, অনুপাযঞ্চ ন উপাদিযতি, তস্মা ৰুত্তং ‘‘মুট্ঠস্সতি…পে… অসমত্থো ¶ হোতী’’তি. তেনাতি উপাযানুপাযানং পরিগ্গহপরিৰজ্জনেসু অপরিচ্চাগাপরিগ্গহেসু চ অসমত্থভাৰেন অস্স যোগিনো.

যস্মা ¶ সতিযেৰেত্থ সতিপট্ঠানং ৰুত্তা, তস্মাস্স সম্পযুত্তা ধম্মা ৰীরিযাদযো অঙ্গন্তি আহ ‘‘সম্পযোগঙ্গঞ্চস্স দস্সেত্ৰা’’তি. অঙ্গ-সদ্দো চেত্থ কারণপরিযাযো দট্ঠব্বো, সতিগ্গহণেনেৰ চেত্থ সমাধিস্সতি গহণং দট্ঠব্বং তস্সা সমাধিক্খন্ধে সঙ্গহিতত্তা. যস্মা ৰা সতিসীসেনাযং দেসনা. ন হি কেৰলায সতিযা কিলেসপ্পহানং হোতি, নিব্বানাধিগমো ৰা, ন চ কেৰলা সতি পৰত্ততি, তস্মাস্স ঝানদেসনাযং সৰিতক্কাদিৰচনস্স ৰিয সম্পযোগঙ্গদস্সনতাতি অঙ্গ-সদ্দস্স অৰযৰপরিযাযতা দট্ঠব্বা. পহানঙ্গন্তি ‘‘ৰিৰিচ্চেৰ কামেহী’’তিআদীসু (দী. নি. ১.২২৬; ম. নি. ১.২৭১, ২৮৭; সং. নি. ২.১৫২; অ. নি. ৪.১২৩; পারা. ১১) ৰিয পহাতব্বঙ্গং দস্সেতুং. যস্মা এত্থ লোকিযমগ্গো অধিপ্পেতো, ন লোকুত্তরমগ্গো, তস্মা পুব্বভাগিযমেৰ ৰিনযং দস্সেন্তো ‘‘তদঙ্গৰিনযেন ৰা ৰিক্খম্ভনৰিনযেন ৰা’’তি আহ. তেসং ধম্মানন্তি ৰেদনাদিধম্মানং. তেসঞ্হি তত্থ অনধিপ্পেতত্তা ‘‘অত্থুদ্ধারনযেনেতং ৰুত্ত’’ন্তি ৰুত্তং.

অৰিসেসেন দ্ৰীহিপি নীৰরণপ্পহানং ৰুত্তন্তি কত্ৰা পুন একেকেন ৰুত্তং পহানৰিসেসং দস্সেতুং ‘‘ৰিসেসেনা’’তি আহ. অথ ৰা ‘‘ৰিনেয্য নীৰরণানী’’তি অৰত্ৰা অভিজ্ঝাদোমনস্সৰচনস্স পযোজনং দস্সেন্তো ‘‘ৰিসেসেনা’’তিআদিমাহ. কাযানুপস্সনাভাৰনায হি উজুৰিপচ্চনীকানং অনুরোধাদীনং পহানং দস্সনং এতস্স পযোজনন্তি. কাযসম্পত্তিমূলকস্সাতি রূপ-বল-যোব্বনারোগ্যাদি-সরীরসম্পদা-নিমিত্তস্স. ৰুত্তৰিপরিযাযতো কাযৰিপত্তিমূলকো ৰিরোধো ৰেদিতব্বো. কাযভাৰনাযাতি কাযানুপস্সনাভাৰনায. সা হি ইধ ‘‘কাযভাৰনা’’তি অধিপ্পেতা. তেনাতি অনুরোধাদিপ্পহানৰচনেন. যোগানুভাৰো হীতিআদি ৰুত্তস্সেৰত্থস্স পাকটকরণং.

সতিসম্পজঞ্ঞেনাতি অতিসম্পজঞ্ঞগ্গহণেন. সব্বত্থিককম্মট্ঠানন্তি বুদ্ধানুস্সতি মেত্তা মরণস্সতি অসুভভাৰনা চ. ইদঞ্হি চতুক্কং যোগিনা পরিহরিযমানং ‘‘সব্বত্থিককম্মট্ঠান’’ন্তি ৰুচ্চতি অতিসম্পজঞ্ঞবলেন অৰিচ্ছিন্নস্স তস্স পরিহরিতব্বত্তা, সতিযা ৰা সমথো ৰুত্তো তস্সা সমাদ্ধিক্খন্ধেন সঙ্গহিতত্তা.

তেনাতি ¶ সদ্দত্থং অনাদিযিত্ৰা ভাৰত্থস্সেৰ ৰিভজনৰসেন পৰত্তেন ৰিভঙ্গপাঠেন সহ. অট্ঠকথানযোতি সদ্দত্থস্সপি ৰিৰরণৰসেন যথারহং ৰুত্তো অত্থসংৰণ্ণনানযো. যথা সংসন্দতীতি যথা অত্থতো অধিপ্পাযতো চ অৰিলোমেন্তো অঞ্ঞদত্থু সংসন্দতি সমেতি, এৰং ৰেদিতব্বো.

ৰেদনাদীনং ¶ পুন ৰচনেতি এত্থ নিস্সযপচ্চযভাৰৰসেন চিত্তধম্মানং ৰেদনাসন্নিস্সিতত্তা পঞ্চৰোকারভৰে অরূপধম্মানং রূপপটিবদ্ধৰুত্তিতো চ ৰেদনায কাযাদিঅনুপস্সনাপসঙ্গেপি আপন্নে তদসম্মিস্সতো ৰৰত্থানদস্সনত্থং ঘনৰিনিব্ভোগাদিদস্সনত্থঞ্চ দুতিযৰেদনাগহণং. তেন ন ৰেদনাযং কাযানুপস্সী, চিত্তধম্মানুপস্সী ৰা, অথ খো ৰেদনানুপস্সীযেৰাতি ৰেদনাসঙ্খাতে ৰত্থুস্মিং ৰেদনানুপস্সনাকারস্সেৰ দস্সনেন অসম্মিস্সতো ৰৰত্থানং দস্সিতং হোতি. তথা ‘‘যস্মিং সমযে সুখা ৰেদনা, ন তস্মিং সমযে দুক্খা অদুক্খমসুখা ৰা ৰেদনা. যস্মিং ৰা পন সমযে দুক্খা অদুক্খমসুখা ৰা ৰেদনা, ন তস্মিং সমযে ইতরা ৰেদনা’’তি ৰেদনাভাৰসামঞ্ঞে অট্ঠত্ৰা তং তং ৰেদনং ৰিনিব্ভুজিত্ৰা দস্সনেন ঘনৰিনিব্ভোগো ধুৰভাৰৰিৰেকো দস্সিতো হোতি. তেন তাসং খণমত্তাৰট্ঠানদস্সনেন অনিচ্চতায ততো এৰ দুক্খতায অনত্ততায চ দস্সনং ৰিভাৰিতং হোতি. ঘনৰিনিব্ভোগাদীতি আদি-সদ্দেন অযম্পি অত্থো ৰেদিতব্বো. অযঞ্হি ৰেদনাযং ৰেদনানুপস্সীযেৰ, ন অঞ্ঞধম্মানুপস্সী. কিং ৰুত্তং হোতি – যথা নাম বালো অমণিসভাৰেপি উদকবুব্বুল়কে মণিআকারানুপস্সী হোতি, ন এৰমযং ঠিতিরমণীযেপি ৰেদযিতে, পগেৰ ইতরস্মিং মনুঞ্ঞাকারানুপস্সী, অথ খো খণভঙ্গুরতায অৰসৰত্তিতায কিলেসাসুচিপগ্ঘরণতায চ অনিচ্চঅনত্তঅসুভাকারানুপস্সী, ৰিপরিণামদুক্খতায সঙ্খারদুক্খতায চ ৰিসেসতো দুক্খানুপস্সীযেৰাতি ৰুত্তং হোতি. এৰং চিত্তধম্মেসুপি যথারহং পুন ৰচনে পযোজনং ৰত্তব্বং. ‘‘কেৰলং পনিধা’’তিআদিনা ইধ ‘এত্তকং ৰেদিতব্ব’’ন্তি ৰেদিতব্বপরিচ্ছেদং দস্সেতি. এস নযোতি ইমিনা যথা চিত্তং ধম্মা চ অনুপস্সিতব্বা, তথা তানি অনুপস্সন্তো ‘‘চিত্তে চিত্তানুপস্সী, ধম্মেসু ধম্মানুপস্সী’’তি ৰেদিতব্বোতি ইমমত্থং অতিদিসতি.

যো ¶ সুখং দুক্খতো অদ্দাতি যো ভিক্খু সুখৰেদনং ৰিপরিণামদুক্খতায ‘‘দুক্খ’’ন্তি পঞ্ঞাচক্খুনা অদ্দক্খি. দুক্খমদ্দক্খি সল্লতোতি দুক্খৰেদনং পীল়াজননতো অন্তোতুদনতো দুন্নীহরণতো চ সল্লন্তি অদ্দক্খি পস্সি. অদুক্খমসুখন্তি উপেক্খাৰেদনং. সন্তন্তি সুখদুক্খানি ৰিয অনোল়ারিকতায পচ্চযৰসেন ৰূপসন্তসভাৰতায চ সন্তং. অনিচ্চতোতি হুত্ৰা অভাৰতো উদযব্বযৰন্ততো তাৰকালিকতোনিচ্চপটিক্খেপতো চ ‘‘অনিচ্চ’’ন্তি যো অদ্দক্খি. স ৰে সম্মদ্দসো ভিক্খু একংসেন পরিব্যত্তং ৰা ৰেদনায সম্মা পস্সনকোতি অত্থো.

দুক্খাতিপীতি সঙ্খারদুক্খতায দুক্খা ইতিপি. সব্বং তং দুক্খস্মিন্তি সব্বং তং ৰেদযিতং দুক্খস্মিং অন্তোগধং পরিযাপন্নং ৰদামি সঙ্খারদুক্খতানতিৰত্তনতো. সুখদুক্খতোপি চাতি ¶ সুখাদীনং ঠিতিৰিপরিণামঞ্ঞাণসুখতায ৰিপরিণামঠিতিঅঞ্ঞাণদুক্খতায চ ৰুত্তত্তা তিস্সোপি সুখতো, তিস্সোপি চ দুক্খতো অনুপস্সিতব্বাতি অত্থো. রূপাদি-আরম্মণছন্দাদি-অধিপতি-ঞাণাদি-সহজাত- কামাৰচরাদি-ভূমিনানত্তভেদানং কুসলাকুসল-তংৰিপাককিরিযা-নানত্তাদিভেদানঞ্চ, আদি-সদ্দেন সঙ্খারিকাসঙ্খারিকস-ৰত্থুকাৰত্থুকাদি-নানত্তভেদানঞ্চ ৰসেনাতি যোজেতব্বং. সুঞ্ঞতধম্মস্সাতি ‘‘ধম্মা হোন্তী’’তিআদিনা (ধ. স. ১২১) সুঞ্ঞতৰারে আগতসুঞ্ঞতসভাৰস্স ৰসেন. ‘‘কামঞ্চেত্থা’’তিআদিনা পুব্বে পহীনত্তা পুন পহানং ন ৰত্তব্বন্তি চোদনং দস্সেতি, মগ্গচিত্তক্খণে ৰা একত্থ পহীনং সব্বত্থ পহীনমেৰ হোতীতি ৰিসুং ৰিসুং ন ৰত্তব্বন্তি. তত্থ পুরিমায চোদনায নানাপুগ্গলপরিহারো, পচ্ছিমায নানাচিত্তক্খণিকপরিহারো. লোকিযভাৰনায হি কাযে পহীনং ন ৰেদনাদীসু পহীনং হোতি যদিপি ন পৰত্তেয্য, ন পটিপক্খভাৰনায তত্থ সা অভিজ্ঝাদোমনস্সস্স অপ্পৰত্তি হোতীতি পুন তপ্পহানং ৰত্তব্বমেৰাতি. একত্থ পহীনং সেসেসুপি পহীনং হোতীতি মগ্গসতিপট্ঠানভাৰনং, লোকিযভাৰনায ৰা সব্বত্থ অপ্পৰত্তিমত্তং সন্ধায ৰুত্তং. ‘‘পঞ্চপি খন্ধা লোকো’’তি হি ৰিভঙ্গে (ৰিভ. ৩৬২, ৩৬৪, ৩৬৬, ৩৭৩) চতূসুপি ঠানেসু ৰুত্তন্তি.

উদ্দেসৰারৰণ্ণনায লীনত্থপ্পকাসনা সমত্তা.

কাযানুপস্সনাৰণ্ণনা

আনাপানপব্বৰণ্ণনা

১০৭. বাহিরকেসুপি ¶ ইতো একদেসস্স সম্ভৰতো সব্বপ্পকারগ্গহণং কতং ‘‘সব্বপ্পকারকাযানুপস্সনানিব্বত্তকস্সা’’তি. তেন যে ইমে আনাপানপব্বাদিৰসেন আগতা চুদ্দসপ্পকারা, তদন্তোগধা চ অজ্ঝত্তাদিঅনুপস্সনা পকারা, তথা কাযগতাসতিসুত্তে (ম. নি. ৩.১৫৪) ৰুত্তা কেসাদিৰণ্ণসণ্ঠানকসিণারম্মণচতুক্কজ্ঝানপ্পকারা, লোকিযাদিপ্পকারা চ, তে সব্বেপি অনৰসেসতো সঙ্গণ্হাতি. ইমে চ পকারা ইমস্মিংযেৰ সাসনে, ন ইতো বহিদ্ধাতি ৰুত্তং ‘‘সব্বপ্পকার…পে… পটিসেধনো চা’’তি. তত্থ তথাভাৰপটিসেধনোতি সব্বপ্পকারকাযানুপস্সনানিব্বত্তকস্স পুগ্গলস্স অঞ্ঞসাসনস্স নিস্সযভাৰপটিসেধনো. এতেন ‘‘ইধ, ভিক্খৰে’’তি এত্থ ইধ-সদ্দো অন্তোগধএৰসদ্দত্থোতি দস্সেতি ¶ . সন্তি হি একপদানিপি সাৰধারণানি যথা ‘‘ৰাযুভক্খো’’তি (দী. নি. টী. ২.৩৭৪). তেনাহ ‘‘ইধেৰ সমণো’’তিআদি. পরিপুণ্ণসমণকরণধম্মো হি সো, যো সব্বপ্পকারকাযানুপস্সনানিব্বত্তকো. পরপ্পৰাদাতি পরেসং অঞ্ঞতিত্থিযানং নানপ্পকারা ৰাদা তিত্থাযতনানি.

অরঞ্ঞাদিকস্সেৰ ভাৰনানুরূপসেনাসনতং দস্সেতুং ‘‘ইমস্স হী’’তিআদি ৰুত্তং. দুদ্দমো দমথং অনুপগতো গোণো কূটগোণো. দোহনকালে যথা থনেহি অনৰসেসতো খীরং ন পগ্ঘরতি, এৰং দোহপটিবন্ধিনী কূটধেনু. রূপসদ্দাদিকে পটিচ্চ উপ্পজ্জনকঅস্সাদো রূপারম্মণাদিরসো. পুব্বে আচিণ্ণারম্মণন্তি পব্বজ্জাতো পুব্বে, অনাদিমতি ৰা সংসারে পরিচিতারম্মণং.

নিবন্ধেয্যাতি বন্ধেয্য. সতিযাতি সম্মদেৰ কম্মট্ঠানস্স সল্লক্খণৰসেন পৰত্তায সতিযা. আরম্মণেতি কম্মট্ঠানারম্মণে. দল়্হন্তি থিরং, যথা সতোকারিস্স উপচারপ্পনাভেদো সমাধি ইজ্ঝতি, তথা থামগতং কত্ৰাতি অত্থো.

ৰিসেসাধিগমদিট্ঠধম্মসুখৰিহারপদট্ঠানন্তি সব্বেসং বুদ্ধানং, একচ্চানং পচ্চেকবুদ্ধানং, বুদ্ধসাৰকানঞ্চ ৰিসেসাধিগমস্স, অঞ্ঞেন কম্মট্ঠানেন অধিগতৰিসেসানং ¶ দিট্ঠধম্মসুখৰিহারস্স চ পদট্ঠানভূতং. ৰত্থুৰিজ্জাচরিযো ৰিয ভগৰা যোগীনং অনুরূপনিৰাসট্ঠানুপদিসনতো. ভিক্খু দীপিসদিসো অরঞ্ঞে একাকী ৰিহরিত্ৰা পটিপক্খনিম্মথনেন ইচ্ছিতত্থসাধনতো. ফলমুত্তমন্তি সামঞ্ঞফলং সন্ধাযাহ. পরক্কমজৰযোগ্গভূমিন্তি ভাৰনুস্সাহজৰস্স যোগ্গকরণভূমিভূতং.

অস্সাসপস্সাসানং ৰসেন সিক্খতোতি অস্সাসপস্সাসানং দীঘরস্সতাপজানন-সব্বকাযপটিসংৰেদন-ওল়ারিকোল়ারিকপটিপ্পস্সম্ভনৰসেন ভাৰনানুযোগং সিক্খতো, তথাভূতো ৰা হুত্ৰা তিস্সো সিক্খা পৰত্তযতো. অস্সাসপস্সাসনিমিত্তেতি অস্সাসপস্সাসসন্নিস্সযেন উপট্ঠিতপটিভাগনিমিত্তে. অস্সাসপস্সাসে পরিগ্গণ্হাতি রূপমুখেন ৰিপস্সনং অভিনিৰিসন্তো, যো ‘‘অস্সাসপস্সাসকম্মিকো’’তি ৰুত্তো. ঝানঙ্গানি পরিগ্গণ্হাতি অরূপমুখেন ৰিপস্সনং অভিনিৰিসন্তো. ৰত্থু নাম করজকাযো চিত্তচেতসিকানং পৰত্তিট্ঠানভাৰতো. অঞ্ঞো সত্তো ৰা পুগ্গলো ৰা নত্থীতি ৰিসুদ্ধদিট্ঠি ‘‘তযিদং ধম্মমত্তং ন অহেতুকং, নাপি ইস্সরাদিৰিসমহেতুকং, অথ খো অৰিজ্জাদীহি এৰ সহেতুক’’ন্তি অদ্ধত্তযেপি কঙ্খাৰিতরণেন ৰিতিণ্ণকঙ্খো ‘‘যং কিঞ্চি রূপ’’ন্তিআদিনা (ম. নি. ১.৩৬১; ম. নি. ২.১১৩; ম. নি. ৩.৮৬; অ. নি. ৪.১৮১; পটি. ম. ১.৪৮) কলাপসম্মসনৰসেন ¶ তিলক্খণং আরোপেত্ৰা উদযব্বযানুপস্সনাদিৰসেন ৰিপস্সনং ৰড্ঢেন্তো অনুক্কমেন মগ্গপটিপাটিযা.

পরস্স ৰা অস্সাসপস্সাসকাযেতি ইদং সম্মসনচারৰসেনাযং পাল়ি পৰত্তাতি কত্ৰা ৰুত্তং, সমথৰসেন পন পরস্স অস্সাসপস্সাসকাযে অপ্পনানিমিত্তুপ্পত্তি এৰ নত্থীতি. ইদং উভযং ন লব্ভতীতি ‘‘অজ্ঝত্তং, বহিদ্ধা’’তি চ ৰুত্তং ইদং ধম্মদ্ৰযঘটিতং একতো আরম্মণভাৰেন ন লব্ভতি.

সমুদেতি এতস্মাতি সমুদযো, সো এৰ কারণট্ঠেন ধম্মোতি সমুদযধম্মো, অস্সাসপস্সাসানং পৰত্তিহেতুকরজকাযাদি. তস্স অনুপস্সনসীলো সমুদযধম্মানুপস্সী. তং পন সমুদযধম্মং উপমামুখেন দস্সেন্তো ‘‘যথা নামা’’তিআদিমাহ. তত্থ ভস্তন্তি রুত্তিং. গগ্গরনাল়িন্তি উক্কাপনাল়িং. তেতি করজকাযাদিকে. যথা অস্সাসপস্সাসকাযো করজকাযাদিসম্বন্ধী ফলভাৰেন, এৰং তেপি অস্সাসপস্সাসকাযসম্বন্ধিনো হেতুভাৰেনাতি ‘‘সমুদযধম্মা কাযস্মি’’ন্তি ৰত্তব্বতং ¶ লভন্তীতি ৰুত্তং ‘‘সমুদয…পে… ৰুচ্চতী’’তি. পকতিৰাচী ৰা ধম্ম-সদ্দো ‘‘জাতিধম্মান’’ন্তিআদীসু (ম. নি. ১.১৩১; ম. নি. ৩.৩৭৩; পটি. ম. ১.৩৩) ৰিযাতি কাযস্স পচ্চযসমৰাযে উপ্পজ্জনপকতিকানুপস্সী ‘‘সমুদযধম্মানুপস্সী’’তি ৰুত্তো. তেনাহ – ‘‘করজকাযঞ্চা’’তিআদি. এৰঞ্চ কত্ৰা কাযস্মিন্তি ভুম্মৰচনঞ্চ সমত্থিতং হোতি. ৰযধম্মানুপস্সীতি এত্থ অহেতুকত্তেপি ৰিনাসস্স যেসং হেতুধম্মানং অভাৰে যং ন হোতি, তদভাৰো তস্স অভাৰস্স হোতু ৰিয ৰোহরীযতীতি উপচারতো করজকাযাদিঅভাৰো অস্সাসপস্সাসকাযস্স ৰযকারণং ৰুত্তো. তেনাহ ‘‘যথা ভস্তাযা’’তিআদি. অযং তাৰেত্থ পঠমৰিকপ্পৰসেন অত্থৰিভাৰনা. দুতিযৰিকপ্পৰসেন পন উপচারেন ৰিনাযেৰ অত্থো ৰেদিতব্বো. অজ্ঝত্তবহিদ্ধানুপস্সনা ৰিয ভিন্নৰত্থুৰিসযতায সমুদযৰযধম্মানুপস্সনাপি এককালে ন লব্ভতীতি আহ ‘‘কালেন সমুদযং কালেন ৰযং অনুপস্সন্তো’’তি.

অত্থি কাযোতি এৰ-সদ্দো লুত্তনিদ্দিট্ঠোতি ‘‘কাযোৰ অত্থী’’তি ৰত্ৰা অৰধারণেন নিৰত্থিতং দস্সেন্তো ‘‘ন সত্তো’’তিআদিমাহ. তস্সত্থো – যো রূপাদীসু সত্তৰিসত্ততায পরেসঞ্চ সজ্জাপনট্ঠেন, সত্ৰগুণযোগতো ৰা ‘‘সত্তো’’তি পরেহি পরিকপ্পিতো. তস্স সত্তনিকাযস্স পূরণতো চ চৰনুপপজ্জনধম্মতায গলনতো চ ‘‘পুগ্গলো’’তি. থীযতি সংহঞ্ঞতি এত্থ গব্ভোতি ‘‘ইত্থী’’তি. পুরি পুরে ভাগে সেতি পৰত্ততীতি ‘‘পুরিসো’’তি. আহিতো ¶ অহংমানো এত্থাতি ‘‘অত্তা’’তি, অত্তনো সন্তকভাৰেন ‘‘অত্তনিয’’ন্তি. পরো ন হোতীতি কত্ৰা ‘‘অহ’’ন্তি, মম সন্তকন্তি কত্ৰা ‘‘মম’’ন্তি. ৰুত্তপ্পকারৰিনিমুত্তো অঞ্ঞোতি কত্ৰা ‘‘কোচী’’তি, তস্স সন্তকভাৰেন ‘‘কস্সচী’’তি পরিকপ্পেতব্বো কোচি নত্থি, কেৰলং কাযো এৰ অত্থীতি অত্তত্তনিযসুঞ্ঞতমেৰ কাযস্স ৰিভাৰেতি. এৰন্তি ‘‘কাযোৰ অত্থী’’তিআদিনা ৰুত্তপ্পকারেন. ঞাণপমাণত্থাযাতি কাযানুপস্সনাঞাণপরং পমাণং পাপনত্থায. সতিপমাণত্থাযাতি কাযপরিগ্গাহিকসতিপৰত্তং সতিপরং পমাণং পাপনত্থায. ইমস্স হি ৰুত্তনযেন ‘‘অত্থি কাযো’’তি অপরাপরুপ্পত্তিৰসেন পচ্চুপট্ঠিতা সতি ভিয্যোসো মত্তায তত্থ ঞাণস্স সতিযা চ পরিব্রূহনায হোতি. তেনাহ ‘‘সতিসম্পজঞ্ঞানং ৰড্ঢত্থাযা’’তি.

ইমিস্সা ¶ ভাৰনায তণ্হাদিট্ঠিগাহানং উজুপটিপক্খত্তা ৰুত্তং ‘‘তণ্হা…পে… ৰিহরতী’’তি. তথাভূতো চ লোকে কিঞ্চি ‘‘অহ’’ন্তি ৰা ‘‘মম’’ন্তি ৰা গহেতব্বং ন পস্সতি, কুতো গণ্হেয্য. তেনাহ ‘‘ন চ কিঞ্চী’’তিআদি. এৰম্পীতি এত্থ পি-সদ্দো হেট্ঠা নিদ্দিট্ঠস্স তাদিসস্স অত্থস্স অভাৰতো অৰুত্তসমুচ্চযত্থোতি দস্সেন্তো ‘‘উপরি অত্থং উপাদাযা’’তি আহ. ‘‘এৰ’’ন্তি পন নিদ্দিট্ঠাকারস্স পচ্চামসনং নিগমনৰসেন কতন্তি আহ ‘‘ইমিনা পন…পে… দস্সেতী’’তি. পুব্বভাগসতিপট্ঠানস্স ইধাধিপ্পেতত্তা ৰুত্তং ‘‘সতি দুক্খসচ্চ’’ন্তি. সা পন সতি যস্মিং অত্তভাৰে, তস্স সমুট্ঠাপিকা তণ্হা তস্সাপি সমুট্ঠাপিকা এৰ নাম হোতি তদভাৰে অভাৰতোতি আহ ‘‘তস্সা সমুট্ঠাপিকা পুরিমতণ্হা’’তি. অপ্পৰত্তীতি অপ্পৰত্তিনিমিত্তং, ন পৰত্ততি এত্থাতি ৰা অপ্পৰত্তি. চতুসচ্চৰসেনাতি চতুসচ্চকম্মট্ঠানৰসেন. উস্সক্কিত্ৰাতি ৰিসুদ্ধিপরম্পরায আরুহিত্ৰা, ভাৰনং উপরি নেত্ৰাতি অত্থো. নিয্যানমুখন্তি ৰট্টদুক্খতো নিস্সরণূপাযো.

আনাপানপব্বৰণ্ণনা নিট্ঠিতা.

ইরিযাপথপব্বৰণ্ণনা

১০৮. ইরিযাপথৰসেনাতি ইরিযনং ইরিযা, কিরিযা, ইধ পন কাযিকপযোগো ৰেদিতব্বো. ইরিযানং পথো পৰত্তিমগ্গোতি ইরিযাপথো, গমনাদিসরীরাৰত্থা. গচ্ছন্তো ৰা হি সত্তো কাযেন কত্তব্বকিরিযং করেয্য ঠিতো ৰা নিসিন্নো ৰা নিপন্নো ৰাতি. তেসং ৰসেন, ইরিযাপথৰিভাগেনাতি ¶ অত্থো. পুন চপরন্তি পুন চ অপরং, যথাৰুত্তআনাপানকম্মট্ঠানতো ভিয্যোপি অঞ্ঞং কাযানুপস্সনাকম্মট্ঠানং কথেমি, সুণাথাতি ৰা অধিপ্পাযো. গচ্ছন্তো ৰাতিআদি গমনাদিমত্তজাননস্স গমনাদিগতৰিসেসজাননস্স চ সাধারণৰচনং. তত্থ গমনাদিমত্তজাননং ইধ নাধিপ্পেতং, গমনাদিগতৰিসেসজাননং পন অধিপ্পেতন্তি তং ৰিভজিত্ৰা দস্সেতুং ‘‘তত্থ কাম’’ন্তিআদি ৰুত্তং. সত্তূপলদ্ধিন্তি সত্তো অত্থীতি উপলদ্ধিং সত্তগ্গাহং ন জহতি ন পরিচ্চজতি ‘‘অহং গচ্ছামি, মম গমন’’ন্তি গাহসব্ভাৰতো. ততো এৰ অত্তসঞ্ঞং ‘‘অত্থি অত্তা কারকো ৰেদকো’’তি এৰং পৰত্তং ৰিপরীতসঞ্ঞং ন উগ্ঘাটেতি ¶ নাপনেতি অপটিপক্খভাৰতো, অননব্রূহনতো ৰা. এৰং ভূতস্স চস্স কুতো কম্মট্ঠানাদিভাৰোতি আহ ‘‘কম্মট্ঠানং ৰা সতিপট্ঠানভাৰনা ৰা ন হোতী’’তি. ইমস্স পনাতিআদিসুক্কপক্খস্স ৰুত্তৰিপরিযাযেন অত্থো ৰেদিতব্বো. তমেৰ হি অত্থং ৰিৰরিতুং ‘‘ইদং হী’’তিআদি ৰুত্তং. তত্থ কো গচ্ছতীতি গমনকিরিযায কত্তুপুচ্ছা, সা কত্তুভাৰৰিসিট্ঠঅত্তপটিক্খেপত্থা ধম্মমত্তস্সেৰ গমনসিদ্ধিদস্সনতো. কস্স গমনন্তি অকত্তুতাৰিসিট্ঠঅত্তগ্গাহপটিক্খেপত্থা. কিংকারণাতি পন পটিক্খিত্তকত্তুকায গমনকিরিযায অৰিপরীতকারণপুচ্ছা ‘‘গমনন্তি অত্তা মনসা সংযুজ্জতি, মনো ইন্দ্রিযেহি, ইন্দ্রিযানি অত্তেহী’’তি এৰমাদিগমনকারণপটিক্খেপনতো. তেনাহ ‘‘তত্থা’’তিআদি.

ন কোচি সত্তো ৰা পুগ্গলো ৰা গচ্ছতি ধম্মমত্তস্সেৰ গমনসিদ্ধিতো তব্বিনিমুত্তস্স চ কস্সচি অভাৰতো. ইদানি ধম্মমত্তস্সেৰ গমনসিদ্ধিং দস্সেতুং ‘‘চিত্তকিরিযৰাযোধাতুৰিপ্ফারেনা’’তিআদি ৰুত্তং. তত্থ চিত্তকিরিযা চ সা ৰাযোধাতুযা ৰিপ্ফারো ৰিপ্ফন্দনঞ্চাতি চিত্তকিরিযৰাযোধাতুৰিপ্ফারো, তেন. এত্থ চ চিত্তকিরিযগ্গহণেন অনিন্দ্রিযবদ্ধৰাযোধাতুৰিপ্ফারং নিৰত্তেতি, ৰাযোধাতুৰিপ্ফারগ্গহণেন চেতনাৰচীৰিঞ্ঞত্তিভেদং চিত্তকিরিযং নিৰত্তেতি, উভযেন পন কাযৰিঞ্ঞত্তিং ৰিভাৰেতি. ‘‘গচ্ছতী’’তি ৰত্ৰা যথা পৰত্তমানে কাযে ‘‘গচ্ছতী’’তি ৰোহারো হোতি, তং দস্সেতুং ‘‘তস্মা’’তিআদি ৰুত্তং. তন্তি গন্তুকামতাৰসেন পৰত্তচিত্তং. ৰাযং জনেতীতি ৰাযোধাতুঅধিকং রূপকলাপং জনেতি, অধিকতা চেত্থ সামত্থিযতো, ন পমাণতো. গমনচিত্তসমুট্ঠিতং সহজাতরূপকাযস্স থম্ভনসন্ধারণচলনানং পচ্চযভূতেন আকারৰিসেসেন পৰত্তমানং ৰাযোধাতুং সন্ধাযাহ ‘‘ৰাযো ৰিঞ্ঞত্তিং জনেতী’’তি. অধিপ্পাযসহভাৰী হি ৰিকারো ৰিঞ্ঞত্তি, যথাৰুত্তঅধিকভাৰেনেৰ চ ৰাযোগহণং, ন ৰাযোধাতুযা এৰ জনকভাৰতো, অঞ্ঞথা ৰিঞ্ঞত্তিযা উপাদাযরূপভাৰো দুরুপপাদো সিযা. পুরতো অভিনীহারো পুরতোভাগেন কাযস্স পৰত্তনং, যো ‘‘অভিক্কমো’’তি ৰুচ্চতি.

‘‘এসেৰ ¶ নযো’’তি অতিদেসৰসেন সঙ্খেপতো ৰত্ৰা তমেৰত্থং ৰিৰরিতুং ‘‘তত্রাপি হী’’তিআদি ৰুত্তং. কোটিতো পট্ঠাযাতি হেট্ঠিমকোটিতো পট্ঠায. উস্সিতভাৰোতি উব্বিদ্ধভাৰো.

এৰং ¶ পজানতোতি এৰং চিত্তকিরিযৰাযোধাতুৰিপ্ফারেনেৰ গমনাদিভাৰো হোতীতি পজানতো তস্স এৰং পজাননায নিচ্ছযগমনত্থং ‘‘এৰং হোতী’’তি ৰিচারণা ৰুচ্চতি লোকে যথাভূতং অজানন্তেহি মিচ্ছাভিনিৰেসৰসেন, লোকৰোহারৰসেন ৰা. অত্থি পনাতি অত্তনো এৰ ৰীমংসনৰসেন পুচ্ছাৰচনং. নত্থীতি নিচ্ছযৰসেন সত্তস্স পটিক্খেপৰচনং. যথা পনাতিআদি তস্সেৰত্থস্স উপমায ৰিভাৰনং.

নাৰা মালুতৰেগেনাতি যথা অচেতনা নাৰা ৰাতৰেগেন দেসন্তরং যাতি, যথা চ অচেতনো তেজনং কণ্ডো জিযাৰেগেন দেসন্তরং যাতি, তথা অচেতনো কাযো ৰাতাহতো যথাৰুত্তৰাযুনা নীতো দেসন্তরং যাতীতি এৰং উপমাসংসন্দনং ৰেদিতব্বং. সচে পন কোচি ৰদেয্য ‘‘যথা নাৰায তেজনস্স চ পেল্লকস্স পুরিসস্স ৰসেন দেসন্তরগমনং, এৰং কাযস্সাপী’’তি, হোতু, এৰং ইচ্ছিতোৰাযমত্থো. যথা হি নাৰা তেজনানং সংহতলক্খণস্সেৰ পুরিসস্স ৰসেন গমনং, ন অসংহতলক্খণস্স, এৰং কাযস্সাপীতি কা নো হানি, ভিয্যোপি ধম্মমত্ততাৰ পতিট্ঠং লভতি, ন পুরিসৰাদো. তেনাহ ‘‘যন্তং সুত্তৰসেনা’’তিআদি.

তত্থ পযুত্তন্তি হেট্ঠা ৰুত্তনযেন গমনাদিকিরিযাৰসেন পযোজিতং. ঠাতীতি তিট্ঠতি. এত্থাতি ইমস্মিং লোকে. ৰিনা হেতুপচ্চযেতি গন্তুকামতাচিত্ত-তংসমুট্ঠান-ৰাযোধাতু-আদিহেতুপচ্চযেহি ৰিনা. তিট্ঠেতি তিট্ঠেয্য. ৰজেতি ৰজেয্য গচ্ছেয্য কো নামাতি সম্বন্ধো. পটিক্খেপত্থো চেত্থ কিং-সদ্দোতি হেতুপচ্চযৰিরহেন ঠানগমনপটিক্খেপমুখেন সব্বাযপি ধম্মপ্পৰত্তিযা পচ্চযাধীনৰুত্তিতাৰিভাৰনেন অত্তসুঞ্ঞতা ৰিয অনিচ্চদুক্খতাপি ৰিভাৰিতাতি দট্ঠব্বা.

পণিহিতোতি যথা যথা পচ্চযেহি পকারতো নিহিতো ঠপিতো. সব্বসঙ্গাহিকৰচনন্তি সব্বেসং চতুন্নম্পি ইরিযাপথানং সঙ্গণ্হনৰচনং, পুব্বে ৰিসুং ৰিসুং ইরিযাপথানং ৰুত্তত্তা ইদং তেসং একজ্ঝং গহেত্ৰা ৰচনন্তি অত্থো. পুরিমনযো ৰা ইরিযাপথপ্পধানো ৰুত্তোতি তত্থ কাযো অপ্পধানো অনুনিপ্ফাদীতি ইধ কাযং পধানং অপ্পধানঞ্চ ইরিযাপথং অনুনিপ্ফাদং কত্ৰা দস্সেতুং দুতিযনযো ৰুত্তোতি এৰম্পেত্থ দ্ৰিন্নং নযানং ৰিসেসো ৰেদিতব্বো. ঠিতোতি পৰত্তো.