📜

নমো তস্স ভগৰতো অরহতো সম্মাসম্বুদ্ধস্স

মজ্ঝিমনিকাযে

উপরিপণ্ণাস-টীকা

১. দেৰদহৰগ্গো

১. দেৰদহসুত্তৰণ্ণনা

১. দিব্বন্তি কামগুণেহি কীল়ন্তি, লল়ন্তি, তেসু ৰা ৰিহরন্তি, ৰিজযসমত্থতাযোগেন পচ্চত্থিকে ৰিজেতুং ইচ্ছন্তি; ইস্সরিযট্ঠানাদিসক্কারদানগ্গহণং তংতংঅত্থানুসাসনঞ্চ করোন্তা ৰোহরন্তি, পুঞ্ঞানুভাৰপ্পত্তায জুতিযা জোতেন্তি ৰাতি দেৰা ৰুচ্চন্তি রাজানো. তথা হি তে চতূহি সঙ্গহৰত্থূহি জনং রঞ্জযন্তা সযং যথাৰুত্তেহি ৰিসেসেহি রাজন্তি দিব্বন্তি সোভন্তীতি চ, ‘‘রাজানো’’তি ৰুচ্চন্তি. তত্থাতি তস্মিং নিগমদেসে. সাতি পোক্খরণী. তন্তি তং, ‘‘দেৰদহ’’ন্তি লদ্ধনামং পোক্খরণিং উপাদায, তস্স অদূরভৰত্তাতি কেচি. সব্বং সুখাদিভেদং ৰেদযিতং. পুব্বেতি পুরিমজাতিযং. কতকম্মপচ্চযাতি কতস্স কম্মস্স পচ্চযভাৰতো জাতং কম্মং পটিচ্চ. তেন সব্বাপি ৰেদনা কম্মফলভূতা এৰ অনুভৰিতব্বাতি দস্সেতি. তেনাহ ‘‘ইমিনা’’তিআদি. অনিযমেত্ৰা ৰুত্তন্তি, ‘‘সন্তি, ভিক্খৰে, একে সমণব্রাহ্মণা এৰংৰাদিনো’’তি এৰং ইমে নামাতি অৰিসেসেত্ৰা ৰুত্তমত্থং. নিযমেত্ৰাতি, ‘‘এৰংৰাদিনো, ভিক্খৰে, নিগণ্ঠা’’তি এৰং ৰিসেসেত্ৰা দস্সেতি.

কলিসাসনন্তি পরাজযং. কলীতি হি অনত্থো ৰুচ্চতি, কলীতি সসতি ৰিপ্ফরতীতি কলিসাসনং, পরাজযো. কলীতি ৰা কোধমানাদিকিলেসজাতি, তায পন অযুত্তৰাদিতা কলিসাসনং. তং আরোপেতুকামো ৰিভাৰেতুকামো. যে কম্মং কতং অকতং ৰাতি ন জানন্তি, তে কথং তং এদিসন্তি জানিস্সন্তি. যে চ কম্মং পভেদতো ন জানন্তি, তে কথং তস্স ৰিপাকং জানিস্সন্তি; ৰিপাকপরিযোসিতভাৰং জানিস্সন্তি, যে চ পাপস্স কম্মস্স পটিপক্খমেৰ ন জানন্তি; তে কথং তস্স পহানং কুসলকম্মস্স চ সম্পাদনৰিধিং জানিস্সন্তীতি ইমমত্থং দস্সেন্তো, ‘‘উত্তরি পুচ্ছাযপি এসেৰ নযো’’তি আহ.

২. কিঞ্চাপি চূল়দুক্খক্খন্ধেপি, (ম. নি. ১.১৮০) ‘‘এৰং সন্তে’’তি ইমিনা তেসং নিগণ্ঠানং অজাননভাৰো এৰ উজুকং পকাসিতো হেট্ঠা দেসনায তথা পৰত্তত্তা. তথা হি অট্ঠকথাযং (ম. নি. অট্ঠ. ১.১৮০) ৰুত্তং – ‘‘এৰং সন্তেতি তুম্হাকং এৰং অজাননভাৰে সতী’’তি, তথাপি তত্থ উপরিদেসনায সম্বদ্ধো এৰমত্থো ৰুচ্চমানো যুজ্জতি, ন অঞ্ঞথাতি দস্সেতুং ইধ, ‘‘মহানিগণ্ঠস্স ৰচনে সচ্চে সন্তেতি অত্থো’’তি ৰুত্তং. এত্তকস্স ঠানস্সাতি যথাৰুত্তস্স পঞ্চপরিমাণস্স কারণস্স.

৩. অনেকৰারং ৰিসরঞ্জনং ইধ গাল়্হাপলেপনং, ন সাটকস্স ৰিয লিত্ততাতি আহ – ‘‘বহলূপ…পে… লিত্তেন ৰিযা’’তি. ৰুত্তমেৰ, ন পুন ৰত্তব্বং, তত্থ ৰুত্তনযেনেৰ ৰেদিতব্বন্তি অধিপ্পাযো.

ইমেসং নিগণ্ঠানং তাদিসস্স তেসং অভাৰতো, ‘‘জাননকালো সিযা’’তি পরিকপ্পৰসেন ৰদতি. তেন এৰং জানিতুং তেহি সক্কা সিযা, তেসঞ্চ দস্সনং সচ্চং সিযা. যস্মা তেসং দস্সনং অসচ্চং, তস্মা তে ন জানিংসূতি দস্সেতি. চতূসু কালেসূতি ৰণমুখস্স পরিকন্তনকালো, সল্লস্স এসনকালো, অব্বুহনকালো, ৰণমুখে অগদঙ্গারওদহনকালোতি ইমেসু চতূসু কালেসু. সুদ্ধন্তেতি সুদ্ধকোট্ঠাসে, দুক্খস্স অনৰসেসতো নিজ্জীরণট্ঠেন নিদ্দুক্খভাৰেতি অত্থো. একায উপমাযাতি, ‘‘সল্লেন ৰিদ্ধস্স হি ৰিদ্ধকালে ৰেদনায পাকটকালো ৰিযা’’তি ইমায একায উপমায. তযো অত্থাতি পুব্বে অহুৰম্হা ৰা নো ৰা, পাপকম্মং অকরিম্হা ৰা নো ৰা, এৰরূপং ৰা পাপকম্মং অকরিম্হাতি ইমে তযো অত্থা. চতূহি উপমাহীতি ৰণমুখপরিকন্তনাদীহি চতূহি উপমাহি. একো অত্থোতি, ‘‘এত্তকং দুক্খং নিজ্জিণ্ণ’’ন্তিআদিনা ৰুত্তো একো অত্থো. সো হি দুক্খনিজ্জীরণভাৰসামঞ্ঞা একো অত্থোতি ৰুত্তো.

৪. ইমে পন নিগণ্ঠা. আসঙ্কায ৰিদ্ধোস্মীতি সঞ্ঞং উপ্পাদেত্ৰা. পচ্চাহরিতুন্তি পচ্চাৰত্তিতুং, পরিহরিতুন্তি অত্থো.

৫. অতীতৰাদং সদ্দহন্তানন্তি, ‘‘অত্থি খো, ভো, নিগণ্ঠা পুব্বে পাপকম্মং কত’’ন্তি এৰং অতীতংসং আরব্ভ পৰত্তং মহানিগণ্ঠস্স ৰাদং সদ্দহন্তানং. ভূতত্তাতি যথাভূতত্তা কিং অৰিপরীতমেৰ অত্থং আরম্মণং কত্ৰা পৰত্তাতি পুচ্ছতি. সেসপদেসুপি এসেৰ নযো. সহ ধম্মেনাতি সহধম্মো, সো এৰ সহধম্মিকো যথা ‘‘ৰেনযিকো’’তি (অ. নি. ৮.১১; পারা. ৮). ‘‘ধম্মো’’তি এত্থ কারণং অধিপ্পেতন্তি আহ – ‘‘সহেতুকং সকারণ’’ন্তি. পটিহরতি পটিৰত্তেতীতি পটিহারো, ৰাদো এৰ পটিহারো ৰাদপটিহারো; তং, উত্তরন্তি অত্থো. তেনাহ – ‘‘পচ্চাগমনকৰাদ’’ন্তি, চোদনং পরিৰত্তেত্ৰা পটিপাকতিককরণন্তি অত্থো. তেসন্তি ইদং আৰুত্তিৰসেন গহেতব্বং, ‘‘তেসং সদ্ধাছেদকৰাদং নাম তেসং দস্সেতী’’তি.

৬. অৰিজ্জা অঞ্ঞাণা সম্মোহাতি পরিযাযৰচনমেতং. অৰিজ্জাতি ৰা অৰিজ্জায করণভূতায. অঞ্ঞাণেনাতি অজাননেন. সম্মোহেনাতি সম্মুয্হনেন মহামুল়্হতায. সামংযেৰ ওপক্কমিকা এতরহি অত্তনো উপক্কমহেতু দুক্খৰেদনং ৰেদিযমানং – ‘‘যংকিঞ্চাযং…পে… পুব্বেকতহেতূ’’তি ৰিপরীততো সদ্দহথ. পুব্বেকতহেতুৰাদসঞ্ঞিতং ৰিপল্লাসগ্গাহং গণ্হথ.

৭. দিট্ঠধম্মো ৰুচ্চতি পচ্চক্খভূতো, তত্থ ৰেদিতব্বং ফলং দিট্ঠধম্মৰেদনীযং. তেনাহ – ‘‘ইমস্মিংযেৰ অত্তভাৰে ৰিপাকদাযক’’ন্তি. পযোগেনাতি কাযিকেন পযোগেন ৰা ৰাচসিকেন ৰা পযোগেন. পধানেনাতি পদহনেন চেতসিকেন উস্সাহনেন. আসন্নে ভৰন্তরে ৰিপাচেতুং ন সক্কা, পগেৰ দূরেতি দস্সেতুং, ‘‘দুতিযে ৰা ততিযে ৰা অত্তভাৰে’’তি ৰুত্তং. নিব্বত্তকভাৰতো সুখৰেদনায হিতন্তি সুখৰেদনীযং. সা পন ৰিপাকৰেদনাভাৰতো একন্ততো ইট্ঠারম্মণা এৰ হোতীতি আহ ‘‘ইট্ঠারম্মণৰিপাকদাযক’’ন্তি. ৰিপরীতন্তি অনিট্ঠারম্মণৰিপাকদাযকং. নিপ্ফন্নেতি সদ্ধিং অঞ্ঞেন কম্মেন নিব্বত্তে. সম্পরাযৰেদনীযস্সাতি উপপজ্জৰেদনীযস্স অপরাপরিযৰেদনীযস্স. এৰং সন্তেপীতি কামং পরিপক্কৰেদনীযন্তি দিট্ঠধম্মৰেদনীযমেৰ ৰুচ্চতি, তথাপি অত্থেত্থ অতিসযো দিট্ঠধম্মৰিসেসভাৰতো পরিপক্কৰেদনীযস্সাতি দস্সেতুং, ‘‘অযমেত্থা’’তিআদি ৰুত্তং. যস্মিং দিৰসে কতং, ততো সত্তদিৰসব্ভন্তরে.

তত্রাতি তস্মিং পরিপক্কৰেদনীযকম্মস্স সত্তদিৰসব্ভন্তরে ৰিপাকদানে. একৰারং কসিত্ৰা নিসীদি ছাতজ্ঝত্তো হুত্ৰা. আগচ্ছন্তী আহ – ‘‘উস্সূরে ভত্তং আহরীযিত্থা’’তি দোমনস্সং অনুপ্পাদেত্ৰা যথা কতপুঞ্ঞং অনুমোদতি. ৰিজ্জোতমানং দিস্ৰা, ‘‘কিং নু খো ইদম্পি তপ্পকারো, মম চিত্তৰিকপ্পমত্তং, উদাহু সুৰণ্ণমেৰা’’তি ৰীমংসন্তো যট্ঠিযা পহরিত্ৰা.

ৰাল়যক্খসঞ্চরণত্তা রাজগহূপচারস্স নগরে সহস্সভণ্ডিকং চারেসুং. উপ্পন্নরাগো চূল়ায ডংসি. রঞ্ঞো আচিক্খিত্ৰাতি তং পৰত্তিং রঞ্ঞো আচিক্খিত্ৰা. মল্লিকায ৰত্থু ধম্মপদৰত্থুম্হি (ধ. প. অট্ঠ. ২.মল্লিকাদেৰীৰত্থু) আগতেন নযেন কথেতব্বং.

মরণসন্তিকেপি কতং, পগেৰ ততো পুরেতরং অতীতত্তভাৰেসু চ কতং. ইধ নিব্বত্তিতৰিপাকোতি ৰুত্তো অৰস্সংভাৰিভাৰতো. সম্পরাযৰেদনীযমেৰ ভৰন্তরে ৰিপাকদাযকভাৰতো. ইধ নিব্বত্তিতগুণোত্ৰেৰ ৰুত্তো, ন ইধ নিব্বত্তিতৰিপাকোতি ৰিমুত্তিভাৰতো. পরিপক্কৰেদনীযন্তি ৰেদিতব্বং হেট্ঠা ৰুত্তপরিপক্কৰেদনীযলক্খণানতিৰত্তনতো. সব্বলহুং ফলদাযিকাতি এতেন ফলুপ্পাদনসমত্থতাযোগেন কম্মস্স পরিপক্কৰেদনীযতাতি দস্সেতি.

চতুপ্পঞ্চক্খন্ধফলতায সঞ্ঞাভৰূপগং কম্মং বহুৰেদনীযন্তি ৰুত্তং. একখন্ধফলত্তা অসঞ্ঞাভৰূপগং কম্মং অপ্পৰেদনীযং. কেচি পন, ‘‘অরূপাৰচরকম্মং বহুকালং ৰেদিতব্বফলত্তা বহুৰেদনীযং, ইতরং অপ্পৰেদনীযং. রূপারূপাৰচরকম্মং ৰা বহুৰেদনীযং, পরিত্তকম্মং অপ্পৰেদনীয’’ন্তি ৰদন্তি. সৰিপাকং কম্মন্তি পচ্চযন্তরসমৰাযে ৰিপাকুপ্পাদনসমত্থং, ন আরদ্ধৰিপাকমেৰ. অৰিপাকং কম্মন্তি পচ্চযৰেকল্লেন ৰিপচ্চিতুং অসমত্থং অহোসিকম্মাদিভেদং.

৮. দিট্ঠধম্মৰেদনীযাদীনন্তি দিট্ঠধম্মৰেদনীযাদীনং দসন্নং কম্মানং উপক্কমেন কম্মানং অঞ্ঞাথাভাৰস্স অনাপাদনীযত্তা যথাসভাৰেনেৰ কম্মানি তিট্ঠন্তি. তত্থ নিগণ্ঠানং উপক্কমো নিপ্পযোজনোতি আহ ‘‘অফলো’’তি. নিগণ্ঠানং পদহনস্স মিচ্ছাৰাযামস্স নিপ্ফলভাৰপ্পৰেদনো পধানচ্ছেদকৰাদো. পরেহি ৰুত্তকারণেহীতি যেহি কারণেহি নিগণ্ঠানং ৰাদেসু দোসং দস্সেন্তি. তেহি পরেহি ৰুত্তকারণেহি. ন হি লক্খণযুত্তেন হেতুনা ৰিনা পরৰাদেসু দোসং দস্সেতুং সক্কা. তেনাহ ‘‘সকারণা হুত্ৰা’’তি. নিগণ্ঠানং ৰাদা চ অনুৰাদা চাতি নিগণ্ঠেহি ৰুচ্চমানা সকসকসমযপ্পৰেদিকা ৰাদাচেৰ সাৰকেহি ৰুচ্চমানা তেসং অনুৰাদা চ. ৰিঞ্ঞূহি গরহিতব্বং কারণং আগচ্ছন্তীতি, ‘‘অযমেত্থ দোসো’’তি তত্থ তত্থ ৰিঞ্ঞূহি পণ্ডিতেহি গরহারহং কারণং উপগচ্ছন্তি, পাপুণন্তীতি অত্থো. তস্সত্থোতিআদীসু অযং সঙ্খেপত্থো, ‘‘ৰুত্তনযেন পরেহি ৰুত্তেন কারণেন সকারণা হুত্ৰা দোসদস্সনৰসেন নিগণ্ঠানং ৰাদা অনুপ্পত্তা, ততো এৰ তং ৰাদং অপ্পসাদনীযভাৰদস্সনেন সোসেন্তা হেতুসম্পত্তিৰোহারসুক্খনেন মিলাপেন্তা দুক্কটকম্মকারিনোতিআদযো দস গারয্হাপদেসা উপগচ্ছন্তী’’তি.

৯. সঙ্গতিভাৰহেতূতি তত্থ তত্থ যদিচ্ছায সমুট্ঠিতসঙ্গতিনিমিত্তং. সা পন সঙ্গতি নিযতিলক্খণাতি আহ ‘‘নিযতিভাৰকারণা’’তি. অচ্ছেজ্জসুত্তাৰুতঅভেজ্জমণি ৰিয হি পটিনিযততা নিযতিপৰত্তীতি. ছল়ভিজাতিহেতূতি কণ্হাভিজাতি নীলাভিজাতি লোহিতাভিজাতি হলিদ্দাভিজাতি সুক্কাভিজাতি পরমসুক্কাভিজাতীতি ইমাসু অভিজাতীসু জাতিনিমিত্তং. পাপসঙ্গতিকাতি নিহীনসঙ্গতিকা.

১০. অনদ্ধভূতন্তি এত্থ অধি-সদ্দেন সমানত্থো অদ্ধ-সদ্দোতি আহ – ‘‘অনদ্ধভূতন্তি অনধিভূত’’ন্তি. যথা আপাযিকো অত্তভাৰো মহতা দুক্খেন অভিভুয্যতি, ন তথা অযন্তি আহ – ‘‘দুক্খেন অনধিভূতো নাম মনুস্সত্তভাৰো ৰুচ্চতী’’তি. ‘‘অচেলকো হোতী’’তিআদিনা (দী. নি. ১.৩৯৪) ৰুত্তায নানপ্পকারায দুক্করকারিকায কিলমথেন. যদি এৰং কথং ধুতঙ্গধরাতি আহ ‘‘যে পনা’’তিআদি. নিয্যানিকসাসনস্মিঞ্হি ৰীরিযন্তি ৰিৰট্টসন্নিস্সিতং কত্ৰা পৰত্তিযমানং ৰীরিযং সরীরং খেদন্তম্পি সম্মাৰাযামো নাম হোতি ঞাযারদ্ধভাৰতো.

থেরোতি এত্থ আগতমহারক্খিতত্থেরো. তিস্সো সম্পত্তিযো মনুস্সদেৰনিব্বানসম্পত্তিযো, সীলসমাধিপঞ্ঞাসম্পত্তিযো ৰা. খুরগ্গেযেৰাতি খুরে সীসগ্গে এৰ, খুরে সীসগ্গতো অপনীতে এৰাতি অধিপ্পাযো. অযন্তি, ‘‘ইস্সরকুলে নিব্বত্তো’’তিআদিনা ৰুত্তো. ন সব্বে এৰ সক্কারপুব্বকং পব্বজিত্ৰা অরহত্তং পাপুণন্তীতি আহ ‘‘যো দাসিকুচ্ছিয’’ন্তিআদি. রজতমুদ্দিকন্তি রজতমযং অঙ্গুলিমুদ্দিকং. গোরকপিযঙ্গুমত্তেনপীতি কপিত্থছল্লিকঙ্গুপুপ্ফগন্ধমত্তেনপি.

ধম্মেন ঞাযেন আগতসুখং ধম্মসুখন্তি আহ – ‘‘সঙ্ঘতো ৰা…পে… পচ্চযসুখ’’ন্তি. অমুচ্ছিতোতি অনজ্ঝাপন্নো. ইদানি তং অনজ্ঝাপন্নতং তস্স চ ফলং দস্সেতুং ‘‘ধম্মিকং হী’’তিআদি ৰুত্তং. ইমস্সাতি সমুদযস্স. সো হি পঞ্চক্খন্ধস্স দুক্খস্স কারণভূতত্তা আসন্নো পচ্চক্খো কত্ৰা ৰুত্তো. তেনাহ ‘‘পচ্চুপ্পন্নান’’ন্তিআদি. সঙ্খারন্তি যথারদ্ধায সাতিসযং করণতো সঙ্খারন্তি লদ্ধনামং বলৰৰীরিযং উস্সোল়্হিং. পদহতোতি পযুঞ্জন্তস্স পৰত্তেন্তস্স. মগ্গেন ৰিরাগো হোতীতি অরিযমগ্গেন দুক্খনিদানস্স ৰিরজ্জনা হোতি. তেনাহ ‘‘ইদং ৰুত্তং হোতী’’তি. ইমিনা সুখাপটিপদা খিপ্পাভিঞ্ঞা কথিতা অকসিরেনেৰ সীঘতরং মগ্গপজানতায বোধিতত্তা. মজ্ঝত্ততাকারোতি ৰীরিযূপেক্খমাহ. সঙ্খারং তত্থ পদহতীতি পধানসঙ্খারং তত্থ দুক্খনিদানস্স ৰিরজ্জননিমিত্তং ৰিরজ্জনত্থং পদহতি. কথং? মগ্গপ্পধানেন চতুকিচ্চপ্পধানে অরিযমগ্গে ৰাযামেন পদহতি ৰাযমতি. অজ্ঝুপেক্খতোতি ৰীরিযস্স অনচ্চারদ্ধনাতিসিথিলতায ৰীরিযসমতাযোজনে ব্যাপারাকরণেন অজ্ঝুপেক্খতো. তেনাহ ‘‘উপেক্খং ভাৰেন্তস্সা’’তি. উপেক্খাভাৰনা চ নামেত্থ তথাপৰত্তা অরিযমগ্গভাৰনা এৰাতি আহ – ‘‘মগ্গভাৰনায ভাৰেতী’’তি.

এত্থ চ এৰং পাল়িযা পদযোজনা ৰেদিতব্বা, – ‘‘সো এৰং পজানাতি. কথং? সঙ্খারং মে পদহতো সঙ্খারপদহনা ইমস্স দুক্খনিদানস্স ৰিরাগো হোতি, অজ্ঝুপেক্খতো মে উপেক্খনা ইমস্স দুক্খনিদানস্স ৰিরাগো হোতী’’তি. পটিপজ্জমানস্স চাযং পুব্বভাগৰীমংসস্সাতি গহেতব্বং. তত্থ সঙ্খারপ্পধানাতি সম্মসনপদেন সুখেনেৰ খিপ্পতরং ভাৰনাউস্সুক্কাপনৰীরিযং দস্সিতন্তি সুখাপটিপদা খিপ্পাভিঞ্ঞা দস্সিতা. অজ্ঝুপেক্খতোতি এত্থ কস্সচি নাতিদল়্হং কত্ৰা পৰত্তিতৰীরিযেনপি দুক্খনিদানস্স ৰিরাগো হোতি ৰিপস্সনমনুযুঞ্জতীতি দস্সিতং. উভযত্থাপি চতুত্থীযেৰ পটিপদা ৰিভাৰিতাতি দট্ঠব্বং. ইদানি, ‘‘যস্স হি খ্ৰাস্স…পে… উপেক্খং তত্থ ভাৰেতী’’তি ৰারেহি তাসংযেৰ পটিপদানং ৰসেন তেসং পুগ্গলানং পটিপত্তি দস্সিতা. ৰট্টদুক্খনিদানস্স পরিজিণ্ণং ইমেহি ৰারেহি দুক্খক্খযো ৰিভাৰিতো.

১১. বদ্ধচিত্তোতি সম্বদ্ধচিত্তো. বহলচ্ছন্দোতি বহলতণ্হাছন্দো. অতিচরিত্ৰাতি অতিক্কমিত্ৰা. নটসত্থৰিধিনা নচ্চনকা নটা, নচ্চকা ইতরে. সোমনস্সং উপ্পজ্জতি, ‘‘ঈদিসং নাম ইত্থিং পরিচ্চজি’’ন্তি. ছিজ্জাতি দ্ৰিধা হোতু. ভিজ্জাতি ভিজ্জতু. ‘‘ছিজ্জ ৰা ভিজ্জৰা’’তি পদদ্ৰযেনপি ৰিনাসমেৰ ৰদতি. ঞত্ৰাতি পুব্বভাগঞাণেন জানিত্ৰা. তদুভযন্তি সঙ্খারপদহনউপেক্খাভাৰনং.

১২. পেসেন্তস্সাতি ৰাযমন্তস্স. তং সন্ধাযাতি দুক্খায পটিপদায নিয্যানতং সন্ধায.

উসুকারো ৰিয যোগী তেজনস্স ৰিয চিত্তস্স উজুকরণতো. গোমুত্তৰঙ্কং, চন্দলেখাকুটিলং, নঙ্গলকোটিজিম্হং চিত্তং. অলাতা ৰিয ৰীরিযং আতাপন-পরিতাপনতো. কঞ্চিকতেলং ৰিয সদ্ধা সিনেহনতো. নমনদণ্ডকো ৰিয লোকুত্তরমগ্গো নিব্বানারম্মণে চিত্তস্স নামনতো. লোকুত্তরমগ্গেন চিত্তস্স উজুকরণং ভাৰনাভিসমযতো দট্ঠব্বং. অন্তদ্ৰযৰজ্জিতা মজ্ঝিমা পটিপত্তীতি কত্ৰা কিলেসগণৰিজ্ঝনং পহানাভিসমযো. ইতরা পন পটিপদা দন্ধাভিঞ্ঞাতি ইমেসং দ্ৰিন্নং ভিক্খূনং ইমাসু দ্ৰীসু যথাৰুত্তাসু খিপ্পাভিঞ্ঞাসু কথিতাসু, ইতরাপি কথিতাৰ হোন্তি লক্খণহারনযেন পটিপদাসামঞ্ঞতো. সহাগমনীযাপি ৰা পটিপদা কথিতাৰ, ‘‘ন হেৰ অনদ্ধভূতং অত্থান’’ন্তিআদিনা পুব্বভাগপটিপদায কথিতত্তা. ‘‘আগমনীযপটিপদা পন ন কথিতা’’তি ইদং সৰিসেসং অজ্ঝুপেক্খস্স অকথিততং সন্ধায ৰুত্তন্তি দট্ঠব্বং. নিক্খমনদেসনন্তি নিক্খমনুপাযং দেসনং. সেসং সুৰিঞ্ঞেয্যমেৰ.

দেৰদহসুত্তৰণ্ণনায লীনত্থপ্পকাসনা সমত্তা.

২. পঞ্চত্তযসুত্তৰণ্ণনা

২১. একেতি এত্থ এক-সদ্দো অঞ্ঞত্থো, ন গণনাদিঅত্থোতি তং দস্সেন্তো ‘‘একচ্চে’’তি আহ. যং পন পাল়িযং ‘‘সন্তী’’তি ৰুত্তং. তেন তেসং দিট্ঠিগতিকানং ৰিজ্জমানতায অৰিচ্ছিন্নতা; ততো চ নেসং মিচ্ছাগহণতো সিথিলকরণৰিৰেচনেহি অত্তনো দেসনায কিচ্চকারিতা অৰিতথতা চ দীপিতা হোতি. পরমত্থসমণব্রাহ্মণেসু অপরন্তকপ্পিকতায লেসোপি নত্থীতি আহ ‘‘পরিব্বজুপগতভাৰেনা’’তিআদি. সস্সতাদিৰসেন অপরন্তং কপ্পেন্তীতি অপরন্তকপ্পিনো, তে এৰ অপরন্তকপ্পিকা. যস্মা তেহি অপরন্তং পুরিমতরসিদ্ধেহি তণ্হাদিট্ঠিকপ্পেহি কপ্পেত্ৰা আসেৰনবলৰতায চ ৰিকপ্পেত্ৰা অপরভাগসিদ্ধেহি অভিনিৰেসভূতেহি তণ্হাদিট্ঠিগ্গাহেহি গণ্হন্তি অভিনিৰিসন্তি পরামসন্তি; তস্মা ৰুত্তং – ‘‘অপরন্তং কপ্পেত্ৰা ৰিকপ্পেত্ৰা গণ্হন্তী’’তি. তণ্হুপাদানৰসেন কপ্পনগহণানি ৰেদিতব্বানি. তণ্হাপচ্চযা হি উপাদানং. ৰুত্তম্পি চেতং মহানিদ্দেসে উদ্দানতো সঙ্খেপতো. তণ্হাদিট্ঠিৰসেনাতি তণ্হায দিট্ঠিযা চ ৰসেন. দিট্টিযা ৰা উপনিস্সযভূতায সহজাতায অভিনন্দনকায চ তণ্হায সস্সতাদিআকারেন অভিনিৰিসন্তস্স মিচ্ছাগাহস্স চ ৰসেন. অনাগতধম্মৰিসযায অধিপ্পেতত্তা অনাগতকালৰাচকো ইধ অপর-সদ্দো. রূপাদিখন্ধৰিনিমুত্তস্স কপ্পনৰত্থুনো অভাৰা অন্ত-সদ্দো ভাগৰাচকোতি আহ – ‘‘অনাগতং খন্ধকোট্ঠাস’’ন্তি. কপ্পেত্ৰাতি চ তস্মিং অপরন্তে তণ্হায নাভিনিৰেসানং সমত্তনং পরিনিট্ঠাপনমাহ. ঠিতাতি তস্সা লদ্ধিযা অৰিজহনং.

অনুগতাতি আরম্মণকরণৰসেন অনু অনু গতা অপরন্তে পৰত্তা. আরব্ভাতি আলম্বিত্ৰা. ৰিসযো হি তস্সা দিট্ঠিযা অপরন্তো. ৰিসযভাৰতো এৰ হি সো তস্সা আগমনট্ঠানং আরম্মণপচ্চযো চাতি ৰুত্তং ‘‘আগম্ম পটিচ্চা’’তি. অধিৰচনপদানীতি পঞ্ঞত্তিপদানি, দাসাদীসু সিরিৰড্ঢকাদিসদ্দো ৰিয ৰচনমত্তমেৰ অধিকারং কত্ৰা পৰত্তিযা অধিৰচনং পঞ্ঞত্তি. অথ ৰা অধি-সদ্দো উপরিভাৰে, ৰুচ্চতীতি ৰচনং, উপরি ৰচনং অধিৰচনং, উপাদানভূতরূপাদীনং উপরি পঞ্ঞাপিযমানা উপাদাপঞ্ঞত্তীতি অত্থো, তস্মা পঞ্ঞত্তিদীপকপদানীতি অত্থো. পঞ্ঞত্তিমত্তঞ্হেতং ৰুচ্চতি, যদিদং, ‘‘অত্তা লোকো’’তি চ, ন রূপৰেদনাদযো ৰিয পরমত্থো. অধিকৰুত্তিতায ৰা অধিমুত্তিযোতি দিট্ঠিযো ৰুচ্চন্তি. অধিকঞ্হি সভাৰধম্মেসু সস্সতাদিং পকতিআদিং দ্রব্যাদিং জীৰাদিং কাযাদিঞ্চ অভূতমত্থং অজ্ঝারোপেত্ৰা দিট্ঠিযো পৰত্তন্তীতি. অভিৰদন্তীতি, ‘‘ইদমেৰ সচ্চং মোঘমঞ্ঞ’’ন্তি অভিনিৰিসিত্ৰা ৰদন্তি, ‘‘অযং ধম্মো, নাযং ধম্মো’’তিআদিনা ৰিৰদন্তি. অভিৰদনকিরিযায অজ্জাপি অৰিচ্ছেদভাৰদস্সনত্থং ৰত্তমানকালৰচনং.

সঞ্ঞা এতস্স অত্থীতি সঞ্ঞীতি আহ ‘‘সঞ্ঞাসমঙ্গী’’তি. নত্থি এতস্স রোগো ভঙ্গোতি অরোগোতি অরোগসদ্দস্স নিচ্চপরিযাযতা ৰেদিতব্বা. রোগরহিততাসীসেন ৰা নিব্বিকারতায নিচ্চতং পটিজানাতি দিট্ঠিগতিকোতি আহ ‘‘অরোগোতি নিচ্চো’’তি. ইমিনাতি, ‘‘সঞ্ঞী অত্তা অরোগো পরং মরণা’’তি ইমিনা ৰচনেন. সোল়স সঞ্ঞীৰাদাতি – রূপীচতুক্কং, অরূপীচতুক্কং, অন্তৰাচতুক্কং, একন্তসুখীচতুক্কন্তি – ইমেসং চতুন্নং চতুক্কানং ৰসেন সোল়স সঞ্ঞীৰাদা কথিতা. ইমেসুযেৰ পুরিমানং দ্ৰিন্নং চতুক্কানং ৰসেন অট্ঠ সঞ্ঞীৰাদা অট্ঠ চ নেৰসঞ্ঞীনাসঞ্ঞীৰাদা ৰেদিতব্বা. সত্ত উচ্ছেদৰাদাতি মনুস্সত্তভাৰে কামাৰচরদেৰত্তভাৰে রূপাৰচরদেৰত্তভাৰে চতুব্বিধারুপ্পত্তভাৰে চৰিত্ৰা সত্তস্স উচ্ছেদপঞ্ঞাপনৰসেন সত্ত উচ্ছেদৰাদা কথিতা. অসতো ৰিনাসাসম্ভৰতো অত্থিভাৰনিবন্ধনো উচ্ছেদৰাদোতি ৰুত্তং ‘‘সতোতি ৰিজ্জমানস্সা’’তি. যাৰাযং অত্তা ন উচ্ছিজ্জতি, তাৰ ৰিজ্জতি এৰাতি গহণতো নিরুদযৰিনাসো ইধ উচ্ছেদোতি অধিপ্পেতোতি আহ ‘‘উপচ্ছেদ’’ন্তি. ৰিসেসেন নাসো ৰিনাসো, অভাৰো, সো পন মংসচক্খু-পঞ্ঞাচক্খু-দস্সনপথাতিক্কমোৰাতি আহ ‘‘অদস্সন’’ন্তি. অদস্সনে হি নাস-সদ্দো লোকে নিরুল়্হো. ভৰৰিগমন্তি সভাৰাপগমনং যো হি নিরুদযৰিনাসৰসেন উচ্ছিজ্জতি, ন সো অত্তনো সভাৰেনেৰ তিট্ঠতি.

পঞ্চ দিট্ঠধম্মনিব্বানৰাদাতি পঞ্চকামগুণসুখমনুভোগৰসেন চতুব্বিধরূপজ্ঝানসুখপরিভোগৰসেন চ দিট্ঠধম্মে নিব্বানপ্পত্তিপঞ্ঞাপনৰাদা. দিট্ঠধম্মোতি দস্সনভূতেন ঞাণেন উপলদ্ধধম্মো. তত্থ যো অনিন্দ্রিযৰিসযো, সোপি সুপাকটভাৰেন ইন্দ্রিযৰিসযো ৰিয হোতীতি আহ – ‘‘দিট্ঠধম্মোতি পচ্চক্খধম্মো ৰুচ্চতী’’তি. তেনেৰ চ, ‘‘তত্থ তত্থ পটিলদ্ধঅত্তভাৰস্সেতং অধিৰচন’’ন্তি ৰুত্তং. সঞ্ঞীতি আদিৰসেন তীহাকারেহি সন্তন্তি সঞ্ঞী অসঞ্ঞী নেৰসঞ্ঞীনাসঞ্ঞীতি ইমেহি আকারেহি ৰিজ্জমানং, সদা উপলব্ভমানং সস্সতন্তি অত্থো. সঞ্ঞী অত্তাতিআদীনি তীণি দস্সনানি. সন্তঅত্থৰসেন একন্তি সস্সতস্স অত্তনো ৰসেন একং দস্সনং. ইতরানি দ্ৰেতি উচ্ছেদৰাদ-দিট্ঠধম্মনিব্বানৰাদসঞ্ঞিতানি দ্ৰে দস্সনানি. তীণি হুত্ৰা পঞ্চ হোন্তীতি ইদং, ‘‘সন্তঅত্থৰসেন এক’’ন্তি সঙ্গহৰসেন ৰুত্তস্স সঞ্ঞীতি আদিৰিভাগৰসেন ৰুত্তত্তা সুৰিঞ্ঞেয্যন্তি অট্ঠকথাযং ন উদ্ধটং.

২২. রূপীং ৰাতি এত্থ (দী. নি. টী. ১.৭৬-৭৭) যদি রূপং অস্স অত্থীতি রূপীতি অযমত্থো অধিপ্পেতো. এৰং সতি রূপৰিনিমুত্তেন অত্তনা ভৰিতব্বং সঞ্ঞায ৰিয রূপস্সপি অত্তনিযত্তা. ন হি সঞ্ঞী অত্তাতি এত্থ সঞ্ঞা অত্তা. তথা হি ৰুত্তং সুমঙ্গলৰিলাসিনিযং (দী. নি. অট্ঠ. ১.৭৬-৭৭) ‘‘তত্থ পৰত্তসঞ্ঞঞ্চস্স সঞ্ঞাতি গহেত্ৰাতি ৰুত্ত’’ন্তি. এৰং সন্তে, ‘‘কসিণরূপং অত্তাতি গণ্হাতী’’তি ইদং কথন্তি? ন খো পনেতং এৰং দট্ঠব্বং – ‘‘রূপং অস্স অত্থীতি রূপী’’তি, অথ খো ‘‘রুপ্পনসীলো রূপী’’তি. রুপ্পনঞ্চেত্থ রূপসরিক্খতায কসিণরূপস্স ৰড্ঢিতাৰড্ঢিতকালৰসেন ৰিসেসাপত্তি, সা চ নত্থীতি ন সক্কা ৰত্তুং পরিত্তৰিপুলতাদিৰিসেসসব্ভাৰতো. যদি এৰং ইমস্স ৰাদস্স সস্সতদিট্ঠিসঙ্গহো ন যুজ্জতীতি? নো ন যুজ্জতি কাযভেদতো উদ্ধং অত্তনো নিব্বিকারতায তেন অধিপ্পেতত্তা. তথা হি ৰুত্তং ‘‘অরোগো পরং মরণা’’তি. অথ ৰা ‘‘রূপং অস্স অত্থীতি রূপী’’তি ৰুচ্চমানেপি ন দোসো. কপ্পনাসিদ্ধেনপি হি ভেদেন সামিনিদ্দেসদস্সনতো যথা ‘‘সিলাপুত্তকস্স সরীর’’ন্তি. রুপ্পনং ৰা রুপ্পনসভাৰো রূপং, তং এতস্স অত্থীতি রূপী, অত্তা ‘‘রূপিনো ধম্মা’’তিআদীসু (ধ. স. ১১ দুকমাতিকা) ৰিয. এৰঞ্চ কত্ৰা রূপসভাৰত্তা অত্তনো ‘‘রূপং অত্তা’’তি ৰচনং ঞাযাগতমেৰাতি ‘‘কসিণরূপং অত্তাতি গণ্হাতী’’তি ৰুত্তং. অরূপিন্তি এত্তাপি ৰুত্তনযানুসারেন যথারহং অত্থো ৰত্তব্বো. সন্তসুখুমং মুঞ্চিত্ৰা তব্বিপরীতস্স গহণে কারণং নত্থীতি লাভী, ‘‘কসিণরূপং অত্তা’’তি গণ্হাতীতি লাভিতক্কিনো ঠপেত্ৰা, সেসতক্কী লাভিগ্গহণেনেৰ গহিতা. অনুস্সুতিতক্কিকোপি সুদ্ধতক্কিকোপি ৰা নিরঙ্কুসত্তা তক্কনস্স কসিণরূপম্পি অত্তাতি কদাচিপি গণ্হেয্যাতি ৰুত্তং – ‘‘উভোপি রূপানি গণ্হাতিযেৰা’’তি. সুদ্ধতক্কিকস্স উভযগ্গহণং ন কতং, তস্মা সাসঙ্কৰচনং.

কসিণুগ্ঘাটিমাকাস-পঠমারুপ্পৰিঞ্ঞাণ-নত্থিভাৰআকিঞ্চঞ্ঞাযতনানি অরূপসমাপত্তিনিমিত্তং. ঠপেত্ৰা সঞ্ঞাক্খন্ধন্তি ইদং সঞ্ঞায অত্তনিযতং হদযে কত্ৰা ৰুত্তং. ‘‘রূপিং ৰা’’তি এত্থ ৰুত্তনযেন পন অত্থে ৰুচ্চমানে সঞ্ঞাক্খন্ধং বহিদ্ধা অকত্ৰা ‘‘অরূপধম্মে’’ইচ্চেৰ ৰত্তব্বং সিযা. মিস্সকগ্গাহৰসেনাতি রূপারূপসমাপত্তীনং নিমিত্তানি একজ্ঝং কত্ৰা, ‘‘একো অত্তা’’তি, তত্থ পৰত্তসঞ্ঞঞ্চস্স, ‘‘সঞ্ঞা’’তি গহণৰসেন. অযঞ্হি দিট্ঠিগতিকো রূপারূপসমাপত্তিলাভিতায তংনিমিত্তং রূপভাৰেন অরূপভাৰেন চ গহেত্ৰা উপতিট্ঠতি, তস্মা, ‘‘রূপী অরূপী চা’’তি অভিনিৰেসং জনেতি অজ্ঝত্তৰাদিনো ৰিয তক্কমত্তেনেৰ ৰা রূপারূপধম্মে মিস্সকৰসেন গহেত্ৰা, ‘‘রূপী চ অরূপীচ অত্তা হোতী’’তি. তক্কগাহেনেৰাতি সঙ্খারাৰসেসসুখুমভাৰপ্পত্তধম্মা ৰিয চ অচ্চন্তসুখুমভাৰপত্তিযা সকিচ্চসাধনাসমত্থতায থম্ভকুট্টহত্থপাদানং সঙ্ঘাতো ৰিয নেৰ রূপী, রূপসভাৰানতিৰত্তনতো ন অরূপীতি এৰং পৰত্ততক্কগাহেন. লাভিৰসেনপি ৰা অন্তানন্তিকচতুত্থৰাদে ৰক্খমাননযেন অঞ্ঞমঞ্ঞপটিপক্খৰসেন অত্থো ৰেদিতব্বো. কেৰলং পন তত্থ দেসকালভেদৰসেন ততিযচতুত্থৰাদা ইচ্ছিতা; ইধ কালৰত্থু ভেদৰসেনাতি অযমেৰ ৰিসেসো. কালভেদৰসেন চেত্থ ততিযৰাদস্স পৰত্তি রূপারূপনিমিত্তানং সহ অনুপট্ঠানতো; চতুত্থৰাদস্স পন ৰত্থুভেদৰসেন পৰত্তি রূপারূপধম্মানং সমূহতো, ‘‘একো অত্তা’’তি তক্কৰসেনাতি তত্থ ৰক্খমাননযানুসারেন ৰেদিতব্বং.

যদিপি অট্ঠসমাপত্তিলাভিনো দিট্ঠিগতিকস্স ৰসেন সমাপত্তিভেদেন সঞ্ঞানানত্তসম্ভৰতো দুতিযদিট্ঠিপি সমাপন্নকৰসেন লব্ভতি; তথাপি সমাপত্তিযং একরূপেনেৰ সঞ্ঞায উপট্ঠানতো, ‘‘পঠমদিট্ঠি সমাপন্নকৰারেন কথিতা’’তি আহ. তেনেৰেত্থ সমাপন্নকগ্গহণং কতং. একসমাপত্তিলাভিনো এৰ ৰা ৰসেন অত্থো ৰেদিতব্বো. সমাপত্তি ভেদেন সঞ্ঞাভেদসম্ভৰেপি বহিদ্ধা পুথুত্তারম্মণে সঞ্ঞানানত্তেন ওল়ারিকেন নানত্তসঞ্ঞীতি, ‘‘দুতিযদিট্ঠি অসমাপন্নকৰারেনা’’তি আহ. অৰড্ঢিতকসিণৰসেন পরিত্তসঞ্ঞিতং, ৰড্ঢিতকসিণৰসেন অপ্পমাণসঞ্ঞিতং দস্সেতুং, ‘‘ততিযদিট্ঠি সুপ্পমত্তেন ৰা সরাৰমত্তেন ৰা’’তিআদি ৰুত্তং. ‘‘অঙ্গুট্ঠপ্পমাণো ৰা অত্তা যৰপ্পমাণো, অণুমত্তো ৰা অত্তা’’তিআদিদস্সনৰসেন (উদা. অট্ঠ. ৫৪; দী. নি. টী. ১.৭৬-৭৭) পরিত্তো সঞ্ঞীতি পরিত্তসঞ্ঞী. কপিলকণাদাদযো (ৰিভ. অনুটী. ১৮৯) ৰিয অত্তনো সব্বগতভাৰপটিজাননৰসেন অপ্পমাণো সঞ্ঞীতি অপ্পমাণসঞ্ঞীতি এৰম্পেত্থ অত্থো দট্ঠব্বো.

এতন্তি, ‘‘রূপিং ৰা’’তিআদিনা যথাৰুত্তঅত্তৰাদং. একেসন্তি একচ্চানং. উপাতিৰত্ততন্তি অতিক্কমন্তানং. নিদ্ধারণে চেতং সামিৰচনং. ৰিঞ্ঞাণকসিণমেকে অভিৰদন্তীতি যোজনা. তেনাহ – ‘‘সঞ্ঞং…পে… অভিৰদন্তী’’তি. তত্থ ‘‘সঞ্ঞং ঠপেত্ৰা সেসানি তীণী’’তি ইদং সঞ্ঞায চতুক্কম্পি পরিপুণ্ণমেৰ গহেত্ৰা, অপরে অট্ঠকন্তি ৰদন্তি. তদুভযন্তি তং সঞ্ঞাঅট্ঠকন্তি ৰুত্তং উভযং. পরতো আৰি ভৰিস্সতীতি, ‘‘চতস্সো রূপসঞ্ঞী’’তিআদিনা উপরি পকাসেস্সতি. ৰক্খতি হি – ‘‘কোট্ঠাসতো অট্ঠ, অত্থতো পন সত্ত সঞ্ঞা হোন্তী’’তি (ম. নি. অট্ঠ. ৩.২২). এত্থাতি, ‘‘এতং ৰা পনা’’তি এতস্মিং ৰাক্যে. সমতিক্কমিতুং সক্কোন্তি তত্থ আদীনৰদস্সনেন তদুদ্ধং আনিসংসদস্সনেন চ ব্রূহিতসদ্ধাদি গুণত্তা, ৰিপরিযাযেন অসক্কুণনং ৰেদিতব্বং. যে সক্কোন্তি, তেৰ গহিতা তেসংযেৰ ৰসেন ৰক্খমানস্স ৰিসেসস্স ৰত্তুং সক্কুণেয্যত্তা. সক্কোন্তানঞ্চ নেসং উপাতিৰত্তনং অত্তনো ঞাণবলানুরূপন্তি ইমমত্থং উপমায দস্সেতুং, ‘‘তেসং পনা’’তিআদি ৰুত্তং. তত্থ অপ্পমাণন্তি অপ্পমাণারম্মণো, অপ্পমাণারম্মণতা চস্স আগমনৰসেন ৰেদিতব্বা অনন্তারম্মণতো ৰা. ন হি আরম্মণে অনন্তন্তি পরমানন্তস্স পমাণং ৰা গণ্হাতি. সুখদুক্খেহি অনিঞ্জনতো রূপৰিরাগভাৰনাৰিসেসতায চ আনেঞ্জং পত্ৰা তিট্ঠতি, অযং নো অত্তাতি অভিৰদন্তা তিট্ঠন্তি. ৰিঞ্ঞাণকসিণমেকেতি ৰিঞ্ঞাণঞ্চাযতনং একে দিট্ঠিগতিকা অত্তাতি ৰদন্তি. তেনাহ – ‘‘ৰিঞ্ঞাণঞ্চাযতনং তাৰ দস্সেতু’’ন্তি. তস্স পন আরম্মণভূতং কসিণুগ্ঘাটিমাকাসে পৰত্তৰিঞ্ঞাণন্তি অপরে. তঞ্হি কসিণং মনসিকারৰসেন, ‘‘ৰিঞ্ঞাণকসিণ’’ন্তি, ৰিঞ্ঞাণঞ্চ তং আরম্মণট্ঠেন আযতনঞ্চাতি, ‘‘ৰিঞ্ঞাণঞ্চাযতন’’ন্তি চ ৰুচ্চতি. আকিঞ্চঞ্ঞাযতনমেকেতি এত্থাপি এসেৰ নযো.

তযিদন্তি য-কারো পদসন্ধিকরোতি আহ ‘‘তং ইদ’’ন্তি. দিট্ঠিগতন্তি যথা ৰুত্তং ‘‘সঞ্ঞী অত্তা’’তি এৰং ৰুত্তং দিট্ঠিং. দিট্ঠিযেৰ হি দিট্ঠিগতং ‘‘মুত্তগতং (ম. নি. ২.১১৯; অ. নি. ৯.১১), সঙ্খারগত’’ন্তিআদীসু (মহানি. ৪১) ৰিয. গন্তব্বাভাৰতো ৰা দিট্ঠিযা গতমত্তং দিট্ঠিগতং, দিট্ঠিযা গহণমত্তন্তি অত্থো. দিট্ঠিপকারো ৰা দিট্ঠিগতং. লোকিযা হি ৰিধযুত্তগতপকারসদ্দে সমানত্থে ইচ্ছন্তি. দিট্ঠিপচ্চযো দিট্ঠিকারণং, অৰিজ্জাদি দিট্ঠিট্ঠানন্তি অত্থো. তত্থ অৰিজ্জাপি হি দিট্ঠিট্ঠানং উপনিস্সযাদিভাৰতো. যথাহ – ‘‘অস্সুতৰা, ভিক্খৰে, পুথুজ্জনো অরিযানং অদস্সাৰী অরিযধম্মস্স অকোৰিদো’’তিআদি (ধ. স. ১০০৭). ফস্সোপি দিট্ঠিট্ঠানং. যথাহ ‘‘তদপি ফস্সপচ্চযা’’তি (দী. নি. ১.১১৮-১২৪). সঞ্ঞাপি দিট্ঠিট্ঠানং. যথাহ ‘‘সঞ্ঞানিদানা হি পপঞ্চসঙ্খা’’তি (সু. নি. ৮৮০; মহানি. ১০৯). ৰিতক্কোপি দিট্ঠিট্ঠানং. যথাহ – ‘‘তক্কঞ্চ দিট্ঠীসু পকপ্পযিত্ৰা, সচ্চং মুসাতি দ্ৰযধম্মমাহূ’’তি (সু. নি. ৮৯২; মহানি. ১২১). অযোনিসোমনসিকারোপি দিট্ঠিট্ঠানং. যথাহ – ‘‘তস্সেৰং মনসিকরোতো ছন্নং দিট্ঠীনং অঞ্ঞতরা দিট্ঠি উপ্পজ্জতি, অত্থি মে অত্তাতি তস্স সচ্চতো থেততো দিট্ঠি উপ্পজ্জতী’’তি (ম. নি. ১.১৯). দিট্ঠারম্মণন্তি দিট্ঠিআরম্মণভূতং উপাদানক্খন্ধপঞ্চকং. তেনাহ – ‘‘রূপং অত্ততো সমনুপস্সতী’’তিআদি (পটি. ম. ১.১৩০). রূপৰেদনাদিৰিনিমুত্তস্স দিট্ঠিযা আরম্মণস্স অভাৰতো অনাদিযিত্ৰা ইদমেৰ দস্সেতি – ‘‘ইমিনা পচ্চযেন ইদং নাম দস্সনং গহিত’’ন্তি. ইমিনা পচ্চযেনাতি ৰা এত্থ পচ্চযগ্গহণেন আরম্মণম্পি গহিতমেৰাতি দট্ঠব্বং.

তদেৰাতি দিট্ঠিগতঞ্চেৰ দিট্ঠিপচ্চযঞ্চ. রূপসঞ্ঞানন্তি এত্থ ইতি-সদ্দো আদিঅত্থো. এৰং-সদ্দো পকারত্থো, ‘‘যদি রূপসঞ্ঞান’’ন্তিআদিনা পকারেন ৰুত্তসঞ্ঞানন্তি অত্থো. নিরুপক্কিলেসা নীৰরণাদি উপক্কিলেসৰিমুত্তিতো. উত্তমা পণীতভাৰপ্পত্তিতো, ততো এৰ সেট্ঠা, সেট্ঠত্তা এৰ উত্তরিতরাভাৰতো অনুত্তরিযা. অক্খাযতীতি উপট্ঠাতি. আকিঞ্চঞ্ঞাযতনসঞ্ঞায ৰিসুং ৰুচ্চমানত্তা চতুত্থারুপ্পসঞ্ঞায চ ইমস্মিং সঞ্ঞীৰাদে অনোতরণতো, ‘‘যদি আরুপ্পসঞ্ঞানন্তি ইমিনা আকাসানঞ্চাযতন-ৰিঞ্ঞাণঞ্চাযতনসঞ্ঞা’’ইচ্চেৰ ৰুত্তং. ইতরেহি পন দ্ৰীহীতি, ‘‘যদি একত্তসঞ্ঞানং, যদি নানত্তসঞ্ঞান’’ন্তি ইমেহি দ্ৰীহি পদেহি. সমাপন্নকৰারো চ তথা ইধ কথিতোতি অধিপ্পাযো. কোট্ঠাসতো অট্ঠ সঞ্ঞা চতুক্কদ্ৰযসঙ্গহতো. একত্তসঞ্ঞীপদং ঠপেত্ৰা অত্থতো পন সত্ত সঞ্ঞা হোন্তি অগ্গহিতগ্গহণেনাতি অধিপ্পাযো. তেনাহ – ‘‘সমাপন্নক…পে… সঙ্গহিতোযেৰা’’তি.

সঞ্ঞাগতন্তি সঞ্ঞাৰসেন গতং, সঞ্ঞাসঙ্গহং গতং ৰা. তস্স পন অদিট্ঠিগতস্সপি উপলব্ভমানত্তা, ‘‘সদ্ধিং দিট্ঠিগতেনা’’তি ৰুত্তং. পচ্চযেহি সমাগন্ত্ৰা কতন্তি সহ কারণভূতেহি পচ্চযেহি তেনেৰ সহ কারণভাৰেন সমাগন্ত্ৰা নিব্বত্তিতং; পটিচ্চসমুপ্পন্নন্তি অত্থো. সঙ্খতত্তা ওল়ারিকং উপ্পাদৰযঞ্ঞথত্তসব্ভাৰতো. যস্স হি উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি, তং খণে খণে ভিজ্জনসভাৰতো পস্সন্তস্স পাকটভূতৰিকারং ওল়ারিকং সিযা. ন চেত্থ মগ্গফলধম্মা নিদস্সেতব্বা তেসং তথা অননুপস্সিতব্বতো; তেসম্পি সঙ্খতভাৰেন ইতরেহি সমানযোগক্খমতায দুন্নিৰারযভাৰতো. তথা হি ‘‘অসেসৰিরাগনিরোধা’’তি (উদা. ৩) ৰচনতো মগ্গস্সপি নিস্সরণভাৰেন ‘‘অত্থি খো পন সঙ্খারানং নিরোধো’’তি নিব্বানমেৰেত্থ পটিযোগভাৰেন উদ্ধটং ‘‘নিরুজ্ঝন্তি এত্থা’’তি কত্ৰা. নিরোধসঙ্খাতং নিব্বানং নাম অত্থীতি এত্থ, – ‘‘অত্থি, ভিক্খৰে, অজাতং অভূতং অসঙ্খত’’ন্তি সুত্তপদং (উদা. ৭৩) আনেত্ৰা ৰত্তব্বং. নিব্বানদস্সীতি সচ্ছিকিরিযাভিসমযৰসেন নিব্বানদস্সী, ততো এৰ ইতরাভিসমযত্থসিদ্ধিযা তং সঙ্খতং অতিক্কন্তো.

২৩. অট্ঠসু অসঞ্ঞীৰাদেসূতি ইদং ব্রহ্মজালে (দী. নি. ১.৭৮-৮০) আগতনযেন ৰুত্তমেৰ হি সন্ধায হেট্ঠা, ‘‘সঞ্ঞীতি ইমিনা অট্ঠ অসঞ্ঞীৰাদা কথিতা’’তি ৰুত্তং. ইধ পন চত্তারো ৰাদা এৰ উদ্ধটা. তেনাহ ‘‘অসঞ্ঞী’’তিআদি. এস নযো পরতো ‘‘অট্ঠসু নেৰসঞ্ঞীনাসঞ্ঞীৰাদেসূ’’তি এত্থাপি. সঞ্ঞায সতি তায ৰেদনাগাহসব্ভাৰতো ‘‘আবাধনট্ঠেন সঞ্ঞা রোগো’’তি ৰুত্তং. দুক্খতাসূলযোগতো কিলেসাসুচিপগ্ঘরণতো উপ্পাদজরাভঙ্গেহি উদ্ধুমাতপক্কপভিজ্জনতো চ সঞ্ঞা গণ্ডো; স্ৰাযমত্থো দোসদুট্ঠতায এৰ হোতীতি আহ – ‘‘সদোসট্ঠেন গণ্ডো’’তি. পীল়াজননতো অন্তোতুদনতো দুরুদ্ধরণতো চ সঞ্ঞা সল্লং; স্ৰাযমত্থো অত্তভাৰং অনুপৰিসিত্ৰা অৰট্ঠানেনাতি আহ ‘‘অনুপৰিট্ঠট্ঠেন সল্ল’’ন্তি. পটিসন্ধিগ্গহণে ৰিঞ্ঞাণং কুতোচি আগতং ৰিয হোতীতি ৰুত্তং ‘‘পটিসন্ধিৰসেন আগতি’’ন্তি. গতিন্তি পৰত্তিং. সা পন তাসু তাসু গতীসু ৰুত্তি হোতীতি ৰুত্তং – ‘‘চুতিৰসেন গতি’’ন্তি; ৰড্ঢনৰসেন ঘনপবন্ধৰসেনাতি অত্থো. তেনাহ ‘‘অপরাপর’’ন্তি. অপরাপরঞ্হি পবন্ধৰসেন পৰত্তমানং ৰিঞ্ঞাণং নন্দূপসেচনং; ইতরং খন্ধত্তযং ৰা নিস্সায অভিৰুদ্ধিং পতিট্ঠং মহন্তঞ্চ পাপুণাতীতি. পৰড্ঢৰসেন ৰা গতিং, নিক্খেপৰসেন চুতিং, ততো অপরাপরঞ্চ রূপপৰত্তনৰসেন উপপত্তিং, ইন্দ্রিযপরিপাকৰসেন ৰুড্ঢিং তস্স তস্স কম্মস্স কতূপচিতভাৰেন ৰিরুল়্হিং; তস্স কম্মস্স ফলনিব্বত্তিযা ৰেপুল্লন্তি যোজেতব্বং.

কামঞ্চাতিআদিনা ‘‘অঞ্ঞত্র রূপা’’তিআদিকা চোদনা লক্খণৰসেন ৰুত্তাতি দস্সেত্ৰা অযঞ্চ নযো চোদনায অৰিসিট্ঠৰিসযতায সিযা; ৰিসিট্ঠৰিসযা পনাযং চোদনাতি দস্সেতুং, ‘‘অযং পন পঞ্হো’’তিআদি ৰুত্তং. এত্তকে খন্ধেতি যথাৰুত্তে রূপৰেদনাদিকে চত্তারো খন্ধে. অঞ্ঞত্র রূপাতি ইমিনা যত্থ কত্থচি রূপেন ৰিনা ৰিঞ্ঞাণস্স পৰত্তি নত্থীতি দীপিতং হোতি. ভৰৰিসেসচোদনায সভাৰতো এৰ ৰিঞ্ঞাণেন ৰিনা রূপস্সপি পৰত্তি নত্থীতি দীপিতং হোতীতি আহ – ‘‘অরূপভৰেপি রূপং, অসঞ্ঞাভৰে চ ৰিঞ্ঞাণং অত্থী’’তি. নিরোধসমাপন্নস্সাতি সঞ্ঞাৰেদযিতনিরোধং সমাপন্নস্সপি ৰিঞ্ঞাণং অত্থি. ব্যঞ্জনচ্ছাযায চে অত্থং পটিবাহসীতি যদি সদ্দত্থমেৰ গহেত্ৰা অধিপ্পাযং ন গণ্হসি নেয্যত্থং সুত্তন্তি. এত্থ চ অসঞ্ঞভৰে নিব্বত্তসত্তৰসেন পঠমৰাদো; সঞ্ঞং অত্ততো সমনুপস্সতীতি এত্থ ৰুত্তনযেন সঞ্ঞংযেৰ অত্তাতি গহেত্ৰা তস্স কিঞ্চনভাৰেন ঠিতায অঞ্ঞায সঞ্ঞায অভাৰতো অসঞ্ঞীতি পৰত্তো দুতিযৰাদো; তথা সঞ্ঞায সহ রূপধম্মে সব্বে এৰ ৰা রূপারূপধম্মে অত্তাতি গহেত্ৰা পৰত্তো ততিযৰাদো; তক্কগ্গাহৰসেনেৰ পৰত্তো চতুত্থৰাদো. তেসু যং ৰত্তব্বং, তং হেট্ঠা ৰুত্তনযেনেৰ ৰেদিতব্বং. নেৰসঞ্ঞীনাসঞ্ঞীৰাদেপি অসঞ্ঞভৰে নিব্বত্তস্স সত্তস্স চুতিপটিসন্ধীসু; সব্বত্থ ৰা পটুসঞ্ঞাকিচ্চং কাতুং অসমত্থায সুখুমায সঞ্ঞায অত্থিভাৰপটিজাননৰসেন পঠমৰাদো; অসঞ্ঞীৰাদে ৰুত্তনযেন সুখুমায সঞ্ঞায ৰসেন সঞ্জাননসভাৰতাপটিজাননৰসেন চ দুতিযৰাদাদযো পৰত্তাতি. এৰমেত্থ এতেসং ৰাদানং সব্ভাৰো ৰেদিতব্বো. সেসং ৰুত্তনযমেৰ.

২৪. যত্থ ন সঞ্ঞা, তত্থ ঞাণস্স সম্ভৰো এৰ নত্থীতি আহ – ‘‘অসঞ্ঞা সম্মোহো’’তি, অসঞ্ঞভাৰো নাম সম্মোহপ্পৰত্তীতি অত্থো. যথা নিয্যন্তীতি নিয্যানিযাতি বহুলং ৰচনতো কত্তুসাধনো নিয্যানিযসদ্দো, এৰং ইধ ৰিঞ্ঞাতব্বসদ্দোতি আহ – ‘‘ৰিজানাতীতি ৰিঞ্ঞাতব্ব’’ন্তি, ৰিজাননং ৰিঞ্ঞাণন্তি অত্থো. তেন দিট্ঠসুতমুতৰিঞ্ঞাতব্বমত্তেনাতি দিট্ঠসুতমুতৰিঞ্ঞাণপ্পমাণেনাতি অত্থো দট্ঠব্বো. তেনাহ – ‘‘পঞ্চদ্ৰারিকসঞ্ঞাপৰত্তিমত্তেনা’’তি, নিব্বিকপ্পভাৰতো পঞ্চদ্ৰারিকসঞ্ঞাপৰত্তিসমেন ভাৰনাভিনীহারেনাতি অত্থো. ওল়ারিকসঙ্খারপ্পৰত্তিমত্তেনাতি ওল়ারিকানং সঙ্খারানং পৰত্তিযা. ওল়ারিকসঙ্খারাতি চেত্থ আকিঞ্চঞ্ঞাযতনপরিযোসানা সমাপত্তিধম্মা অধিপ্পেতা. উপসম্পদন্তি যে সঞ্ঞায, অসঞ্ঞিভাৰে চ দোসং দিস্ৰা নেৰসঞ্ঞানাসঞ্ঞাযতনং ৰণ্ণেন্তাপি রূপজ্ঝানপটিলাভমত্তেন তস্স সম্পাদনং পটিলাভং অধিগমং পঞ্ঞপেন্তি, তেসং তস্স ব্যসনং অক্খাযতি অনুপাযভাৰতো. তেনাহ ‘‘ৰিনাসো’’তিআদি. ৰুট্ঠানন্তি সদিসসমাপজ্জনপুব্বকং পরিৰুট্ঠানং. সমাপত্তি এৰ তেসং নত্থি অনধিগতত্তা. ওল়ারিকসঙ্খারপ্পৰত্তিযা অন্তমসো আকিঞ্চঞ্ঞাযতনসঙ্খারপ্পৰত্তিযাপি পত্তব্বন্তি ন অক্খাযতি তেপি সমতিক্কমিত্ৰা পত্তব্বতো. সঙ্খারানন্তি নিদ্ধারণে সামিৰচনং. অৰসেসাতি ইতো পরং সুখুমভাৰো নাম নত্থীতি সুখুমভাৰাপত্তিযা অৰসেসা. তেনাহ – ‘‘ভাৰনাৰসেন সব্বসুখুমভাৰং পত্তা সঙ্খারা’’তি. এতন্তি নেৰসঞ্ঞানাসঞ্ঞাযতনং, পত্তব্বং নাম হোতি তাদিসসঙ্খারপ্পত্তিযং তব্বোহারতো. সঙ্খতং সমেচ্চ সম্ভুয্য পচ্চযেহি কতত্তা.

২৫. ‘‘যে তে সমণব্রাহ্মণা সতো সত্তস্স উচ্ছেদং ৰিনাসং ৰিভৰং পঞ্ঞপেন্তী’’তি (ম. নি. ৩.২৫) ৰক্খমানত্তা সবুদ্ধিযং ৰিপরিৰত্তমানে একজ্ঝং গহেত্ৰা, ‘‘তত্রা’’তি ভগৰতা ৰুত্তন্তি আহ – ‘‘তত্রাতি সত্তসু উচ্ছেদৰাদেসু ভুম্ম’’ন্তি. উদ্ধং সরন্তি উদ্ধং গতং সরন্তাতি তং দস্সেন্তো আহ ‘‘উদ্ধং ৰুচ্চতী’’তিআদি. সরন্তাতি যত্থ পত্থেন্তি ন লভন্তি, তং জানন্তা. আসত্তিন্তি আসীসনং. পেচ্চাতি পরলোকে. ৰাণিজূপমা ৰিযাতি ভৰপরিযাপন্নফলৰিসেসাপেক্খায পটিপজ্জনতো. সক্কাযস্স ভযাতি সন্তো কাযোতি সক্কাযো, পরমত্থতো ৰিজ্জমানো ধম্মসমূহোতি কত্ৰা উপাদানক্খন্ধপঞ্চকং, ততো ভাযনেন. মা খীযি মা পরিক্খযং অগমাসি. মা ওসীদি মা হেট্ঠা ভস্সি. অব্ভন্তি আকাসং মা উন্দ্রিযি মা ভিজ্জিত্ৰা পতি. গদ্দুলেন বদ্ধো গদ্দুলবদ্ধো. দল়্হথম্ভো ৰিয খীলো ৰিয চ সক্কাযো দুম্মোচনীযতো. সা ৰিয দিট্ঠিগতিকো তস্স অনুপরিৰত্তনতো. দণ্ডকো ৰিয দিট্ঠি ছেদনকরণায অসমত্থভাৰকরণতো. রজ্জু ৰিয তণ্হা বন্ধনতো চ, আরম্মণকরণৰসেন সমন্নাগমনৰসেন চ সম্বদ্ধভাৰতো. তেন ৰুত্তং – ‘‘দিট্ঠিদণ্ডকে পৰেসিতায তণ্হারজ্জুযা’’তি.

২৬. ভগৰা অত্তনো দেসনাৰিলাসেন ৰেনেয্যজ্ঝাসযৰসেন (চতুচত্তারীস অপরন্তকপ্পিকৰাদা তত্থ তত্থ অন্তোগধাতি) উদ্দেসৰসেন পঞ্চেৰ সঙ্গহেত্ৰা যথুদ্দেসং নিগমেন্তো, ‘‘ইমানেৰ পঞ্চাযতনানী’’তি আহ. তত্থ দুক্খস্স নিমিত্তভাৰতো দিট্ঠিগতানং কারণট্ঠেন আযতনত্থোতি ৰুত্তং – ‘‘ইমানেৰ পঞ্চ কারণানী’’তি. সঞ্ঞীআদিৰসেন তীণি উচ্ছেদৰাদোতি চত্তারি ভাজিতানি. ইতরং পন দিট্ঠধম্মনিব্বানং কুহিং পৰিট্ঠং? সরূপতো অভাজিতত্তা যথাভাজিতেসু ৰাদেসু কত্থ অন্তোগধন্তি পুচ্ছতি. উদ্দেসে পন সরূপতো গহিতমেৰ, ‘‘দিট্ঠধম্মনিব্বানং ৰা পনেকে অভিৰদন্তী’’তি. ইতরো একত্তসঞ্ঞীৰাদে নানত্তসঞ্ঞীৰাদে অন্তোগধন্তি দস্সেন্তো ‘‘একত্ত…পে… ৰেদিতব্ব’’ন্তি আহ যথাসুখঞ্চেতং ৰুত্তং. পঠমো হি দিট্ঠধম্মনিব্বানৰাদো নানত্তসঞ্ঞীৰাদে অন্তোগধো, ইতরে চত্তারো একত্তসঞ্ঞীৰাদে.

২৭. অতীতকোট্ঠাসসঙ্খাতন্তি অতীতং খন্ধকোট্ঠাসসঙ্খাতং পুব্বন্তং. পুব্বে নিৰুত্থধম্মৰিসযা কপ্পনা ইধাধিপ্পেতা, তস্মা অতীতকালৰাচকো ইধ পুব্বসদ্দো, রূপাদিখন্ধৰিনিমুত্তঞ্চ কপ্পনাৰত্থু নত্থি, অন্তসদ্দো চ কোট্ঠাসৰাচকো. তেন ৰুত্তং ‘‘অতীতকোট্ঠাসসঙ্খাতং পুব্বন্তং কপ্পেত্ৰা’’তি. ‘‘কপ্পেত্ৰা’’তি চ তস্মিং পুব্বন্তে তণ্হাযনাভিনিৰিসানং সমত্থনং পরিনিট্ঠাপনং ৰদতি. সেসম্পীতি ‘‘পুব্বন্তানুদিট্ঠী’’তি এৰমাদিকং. পুব্বে ৰুত্তপ্পকারন্তি ‘‘অপরন্তানুদিট্ঠিনো’’তিআদীসু ৰুত্তপ্পকারং. একেকস্মিঞ্চ অত্তাতি আহিতো অহংমানো এত্থাতি কত্ৰা, লোকোতি লোকিযন্তি এত্থ পুঞ্ঞপাপানি তব্বিপাকা চাতি কত্ৰা, তং তং গহণৰিসেসং উপাদায পঞ্ঞাপনং হোতীতি আহ – ‘‘রূপাদীসু অঞ্ঞতরং অত্তাতি চ লোকোতি চ গহেত্ৰা’’তি. সব্বদাভাৰেন সস্সতো. অমরো নিচ্চো ধুৰোতি তস্সেৰ ৰেৰচনানি. মরণাভাৰেন অমরো, উপ্পাদাভাৰেন সব্বকালং ৰত্তনতো নিচ্চো, থিরট্ঠেন ৰিকারাভাৰেন ধুৰো, যথাহাতিআদিনা যথাৰুত্তমত্থং নিদ্দেসপটিসম্ভিদাপাল়ীহি ৰিভাৰেতি. অযঞ্চ অত্থো ‘‘রূপং অত্ততো সমনুপস্সতি, ৰেদনং… সঞ্ঞং… সঙ্খারে… ৰিঞ্ঞাণং অত্ততো সমনুপস্সতী’’তি (পটি. ম. ১.১৩০-১৩১) ইমিস্সা পঞ্চৰিধায সক্কাযদিট্ঠিযা ৰসেন ৰুত্তো. ‘‘রূপৰন্ত’’ন্তিআদিকায (পটি. ম. ১.১৩০-১৩১) পন পঞ্চদসৰিধায সক্কাযদিট্ঠিযা ৰসেন চত্তারো চত্তারো খন্ধে, ‘‘অত্তা’’তি গহেত্ৰা তদঞ্ঞং – ‘‘লোকো’’তি পঞ্ঞপেন্তীতি অযম্পি অত্থো লব্ভতি, তথা একং খন্ধং, ‘‘অত্তা’’তি গহেত্ৰা তদঞ্ঞে ‘‘লোকো’’তি পঞ্ঞপেন্তীতি এৰমেত্থ অত্থো দট্ঠব্বো. এসেৰ নযোতি ইমিনা যথা ‘‘রূপাদীসু অঞ্ঞতরং অত্তাতি চ লোকোতি চ গহেত্ৰা সস্সতো…পে… ধুৰো’’তি অত্থো ৰুত্তো; এৰং অসস্সতো অনিচ্চো অধুৰো উচ্ছিজ্জতি ৰিনস্সতি ন হোতি পরং মরণা; নিচ্চো চ অনিচ্চো চ নেৰনিচ্চো নানিচ্চোতি এৰমাদিমত্থং অতিদিসতি.

চত্তারো সস্সতৰাদাতি লাভীৰসেন তযো, তক্কীৰসেন একোতি এৰং চত্তারো. পুব্বেনিৰাসঞাণলাভী তিত্থিযো মন্দপঞ্ঞো অনেকজাতিসতসহস্সমত্তং অনুস্সরতি, মজ্ঝিমপঞ্ঞো দস সংৰট্টৰিৰট্টকপ্পানি, তিক্খপঞ্ঞো চত্তারীস সংৰট্টৰিৰট্টকপ্পানি, ন ততো পরং. সো এৰং অনুস্সরন্তো অত্তা চ লোকো চাতি অভিৰদতি. তক্কী পন তক্কপরিযাহতং ৰীমংসানুচরিতং সযংপটিভানং সস্সতো অত্তা চ লোকো চাতি অভিৰদতি. তেন ৰুত্তং – ‘‘লাভীৰসেন তযো, তক্কীৰসেন একোতি এৰং চত্তারো সস্সতৰাদা’’তি. এতেনেৰ চ অধিচ্চসমুপ্পত্তিকৰাদো ৰিয সস্সতৰাদো কস্মা দুৰিধেন ন ৰিভত্তোতি চে? পটিক্খিত্তত্তাতি দট্ঠব্বং.

এত্থ চ, ‘‘সস্সতো অত্তা চ লোকো চা’’তি ৰাদে অযমযুত্ততাৰিভাৰনা – যদি হি পরেন পরিকপ্পিতো অত্তা, লোকো ৰা সস্সতো সিযা, তস্স নিব্বিকারতায পুরিমরূপাৰিজহনতো কস্সচি ৰিসেসাধানস্স কাতুং অসক্কুণেয্যতায অহিততো নিৰত্তনত্থং হিতে চ পটিপত্তিঅত্থং উপদেসো এৰ নিপ্পযোজনো সিযা সস্সতৰাদিনো. কথং ৰা সো উপদেসো পৰত্তীযতি ৰিকারাভাৰতো; এৰঞ্চ অত্তনো অজটাকাসস্স ৰিয দানাদিকিরিযা হিংসাদিকিরিযা চ ন সম্ভৰতি; তথা সুখস্স দুক্খস্স চ অনুভৰননিবন্ধো এৰ সস্সতৰাদিনো ন যুজ্জতি কম্মবদ্ধাভাৰতো, জাতিআদীনং অসম্ভৰতো কুতো ৰিমোক্খো. অথ পন ধম্মমত্তং তস্স উপ্পজ্জতি চেৰ ৰিনস্সতি চ, যস্স ৰসেনাযং কিরিযাদিৰোহারোতি ৰদেয্য. এৰম্পি পুরিমরূপাৰিজহনেন অৰট্ঠিতস্স অত্তনো ধম্মমত্তন্তি ন সক্কা সম্ভাৰেতুং; তে ৰা পনস্স ধম্মা অৰত্থাভূতা ততো অঞ্ঞে ৰা সিযুং অনঞ্ঞে ৰা, যদি অঞ্ঞে, ন তাহি তস্স উপ্পন্নাহিপি কোচি ৰিসেসো অত্থি. যো হি করোতি পটিসংৰেদেতি চৰতি উপপজ্জতি চাতি ইচ্ছিতং. তস্মা তদৰত্থো এৰ যথাৰুত্তদোসো, কিঞ্চ ধম্মকপ্পনাপি নিরত্থকা সিযা. অথ অনঞ্ঞে, উপ্পাদৰিনাসৰন্তীহি অৰত্থাহি অনঞ্ঞস্স অত্তনো তাসং ৰিয উপ্পাদৰিনাসসম্ভৰাপত্তিতো কুতো নিচ্চতাৰকাসো. তাসম্পি ৰা অত্তনো ৰিয নিচ্চতাতি বন্ধনৰিমোক্খানং অসম্ভৰো এৰাতি ন যুজ্জতি এৰ সস্সতৰাদো; ন চেত্থ কোচি ৰাদী ধম্মানং সস্সতভাৰে পরিসুদ্ধং যুত্তিং ৰত্তুং সমত্থো অত্থি; যুত্তিরহিতঞ্চ ৰচনং ন পণ্ডিতানং চিত্তমারাধেতীতি ৰিঞ্ঞূহি ছড্ডিতো এৰাযং সস্সতৰাদোতি.

সত্ত উচ্ছেদৰাদাতি এত্থ তে সরূপমত্ততো হেট্ঠা দস্সিতা এৰ, তত্থ দ্ৰে জনা উচ্ছেদদিট্ঠিং গণ্হন্তি লাভী চ অলাভী চ. তত্থ লাভী নাম দিব্বচক্খুঞাণলাভী দিব্বেন চক্খুনা অরহতো চুতিং দিস্ৰা উপপত্তিং অপস্সন্তো. যো ৰা পুথুজ্জনানম্পি চুতিমত্তমেৰ দট্ঠুং সক্কোতি, পুব্বযোগাভাৰেন পরিকম্মাকরণেন ৰা উপপাতং দট্ঠুং ন সক্কোতি. সো ‘‘তত্থ তত্থেৰ অত্তা উচ্ছিজ্জতী’’তি উচ্ছেদদিট্ঠিং গণ্হাতি. অলাভী – ‘‘কো পরলোকং জানাতি, এত্তকো জীৰৰিসযো, যাৰ ইন্দ্রিযগোচরো’’তি অত্তনো ধীতুযা হত্থগ্গণ্হনকরাজা ৰিয কামসুখগিদ্ধতায ৰা, ‘‘যথা রুক্খপণ্ণানি রুক্খতো পতিতানি ন পটিসন্ধিযন্তি, এৰং সব্বেপি সত্তা অপ্পটিসন্ধিকমরণমেৰ গচ্ছন্তি, জলবুব্বুল়কূপমা সত্তা’’তি তক্কমত্তৰসেন ৰা উচ্ছেদদিট্ঠিং গণ্হাতি. তত্থ যং হেট্ঠা ৰুত্তং – ‘‘মনুস্সত্তভাৰে কামাৰচরদেৰত্তভাৰে রূপাৰচরদেৰত্তভাৰে চতুব্বিধঅরূপত্তভাৰে চৰিত্ৰা সত্তস্স উচ্ছেদপঞ্ঞাপনৰসেন সত্ত উচ্ছেদৰাদা কথিতা’’তি. তত্থ যুত্তং তাৰ পুরিমেসু তীসু ৰাদেসু ‘‘কাযস্স ভেদা’’তি ৰুত্তং; পঞ্চৰোকারভৰপরিযাপন্নং অত্তভাৰং আরব্ভ পৰত্তত্তা তেসং ৰাদানং, ন যুত্তং চতুৰোকারভৰপরিযাপন্নং অত্তভাৰং নিস্সায পৰত্তেসু চতুত্থাদীসু চতূসু ৰাদেসু, ‘‘কাযস্স ভেদা’’তি ৰুত্তং. ন হি অরূপীনং কাযো অত্থীতি? সচ্চমেতং, রূপভৰে পৰত্তৰোহারেনেৰ দিট্ঠিগতিকো অরূপভৰেপি কাযৰোহারমারোপেত্ৰা আহ ‘‘কাযস্স ভেদা’’তি. যথা দিট্ঠিগতিকেহি দিট্ঠিযো পঞ্ঞত্তা, তথেৰ ভগৰা দস্সেসীতি. অরূপকাযভাৰতো ৰা ফস্সাদিধম্মসমূহভূতে অরূপত্তভাৰে কাযনিদ্দেসো দট্ঠব্বো.

এত্থাহ – ‘‘কামাৰচরদেৰত্তভাৰাদিনিরৰসেসৰিভৰপতিট্ঠাপকানং দুতিযৰাদাদীনং যুত্তো অপরন্তকপ্পিকভাৰো অনাগতদ্ধৰিসযত্তা তেসং ৰাদানং; ন পন দিট্ঠিগতিক-পচ্চক্খভূত-মনুস্সত্তভাৰ-সমুচ্ছেদপতিট্ঠাপকস্স পঠমৰাদস্স পচ্চুপ্পন্নৰিসযত্তা’’তি. যদি এৰং যথা হি দুতিযাদিৰাদানং, পুরিমপুরিমৰাদসঙ্গহিতস্সেৰ অত্তনো উত্তরুত্তরভৰোপপত্তিযা সমুচ্ছেদনতো যুজ্জতি অপরন্তকপ্পিকতা, তথা চ ‘‘নো চ খো, ভো, অযং অত্তা এত্তাৰতা সম্মা সমুচ্ছিন্নো হোতী’’তিআদি ৰুত্তং. এৰং অনাগতস্সেৰ মনুস্সত্তভাৰসমুচ্ছেদস্স অধিপ্পেতত্তা পঠমৰাদস্সপি অপরন্তকপ্পিকতা যুজ্জতি. এৰং সব্বস্সপি পুব্বন্ততো আগতস্স উচ্ছেদপঞ্ঞাপনৰসেন ইধ পুব্বন্তকপ্পিকেসু দেসনা গতা. এতে উচ্ছেদৰাদা হেট্ঠা অপরন্তকপ্পিকেসু দেসনা গতা. এতে উচ্ছেদৰাদা হেট্ঠা অপরন্তকপ্পিকেসু তত্থ তত্থেৰ উচ্ছিজ্জতি, ন ততো উদ্ধং পৰত্তি অত্থীতি দস্সনত্থং ৰুত্তা. জলবুব্বুল়কূপমা হি সত্তাতি তস্স লদ্ধি.

ইধাতি পুব্বন্তকপ্পিকেসু. ইধেৰ মনুস্সত্তভাৰাদিকে উচ্ছিজ্জতি ৰিনট্ঠৰিনাসৰসেন. এৰং অনাগতে অনুপ্পত্তিদস্সনপরানং উচ্ছেদৰাদানং অপরন্তকপ্পিকেসু গহণং; পুব্বন্ততো পন আগতস্স অত্তনো ইধেৰ উচ্ছেদদস্সনপরানং পুব্বন্তকপ্পিকেসু গহণং. ইতো পরং ন গচ্ছতীতি পন ইদং অত্থতো আপন্নস্স অত্থস্স দস্সনং. সত্তেসু সঙ্খারেসু চ একচ্চসস্সতন্তি পৰত্তো একচ্চসস্সতৰাদো. সো পন ব্রহ্মকাযিক-খিড্ডাপদোসিক-মনোপদোসিকত্তভাৰতো চৰিত্ৰা ইধাগতানং তক্কিনো চ উপ্পজ্জনৰসেন চতুব্বিধোতি আহ ‘‘চত্তারো একচ্চসস্সতৰাদা’’তি. ‘‘সঙ্খারেকচ্চসস্সতিকা’’তি ইদং তেহি সস্সতভাৰেন গয্হমানানং ধম্মানং যথাসভাৰদস্সনৰসেন ৰুত্তং, ন পনেকচ্চসস্সতিকমতদস্সনৰসেন. তস্স হি সস্সতাভিমতং অসঙ্খতমেৰাতি লদ্ধি. তথা হি ৰুত্তং (দী. নি. ১.৪৯) ব্রহ্মজালে – ‘‘চিত্তন্তি ৰা মনোতি ৰা ৰিঞ্ঞাণন্তি ৰা অযং অত্তা নিচ্চো ধুৰো সস্সতো অৰিপরিণামধম্মো সস্সতিসমং তথেৰ ঠস্সতী’’তি. ন হি যস্স ভাৰস্স পচ্চযেহি অভিসঙ্খতভাৰং পটিজানাতি; তস্সেৰ নিচ্চধুৰাদিভাৰো অনুম্মত্তকেন ন সক্কা পটিঞ্ঞাতুং. এতেন, ‘‘উপ্পাদৰযধুৰতাযুত্তভাৰা সিযা নিচ্চা, সিযা অনিচ্চা, সিযা ন ৰত্তব্বা’’তিআদিনা পৰত্তস্স সত্তভঙ্গৰাদস্স অযুত্ততা ৰিভাৰিতা হোতি.

তত্থাযং (দী. নি. টী. ১.৩৮) অযুত্ততাৰিভাৰনা – যদি, ‘‘যেন সভাৰেন যো ধম্মো অত্থীতি ৰুচ্চতি, তেনেৰ সভাৰেন সো ধম্মো নত্থী’’তিআদিনা ৰুচ্চেয্য, সিযা অনেকন্তৰাদো; অথ অঞ্ঞেন, সিযা ন অনেকন্তৰাদো; ন চেত্থ দেসন্তরাদিসম্বদ্ধভাৰো যুত্তো ৰত্তুং তস্স সব্বলোকসিদ্ধত্তা ৰিৰাদাভাৰতো. যে পন ৰদন্তি – ‘‘যথা সুৰণ্ণঘটে মকুটে কতে ঘটভাৰো নস্সতি, মকুটভাৰো উপ্পজ্জতি, সুৰণ্ণভাৰো তিট্ঠতিযেৰ, এৰং সব্বভাৰানং কোচি ধম্মো নস্সতি, কোচি উপ্পজ্জতি, সভাৰো পন তিট্ঠতী’’তি. তে ৰত্তব্বা – কিং তং সুৰণ্ণং, যং ঘটে মকুটে চ অৰট্ঠিতং? যদি রূপাদি, সো সদ্দো ৰিয অনিচ্চো, অথ রূপাদিসমূহো, সমূহো নাম সম্মুতিমত্তং. তস্স ৰোহারমত্তস্স অত্থিতা নত্থিতা নিচ্চতা ৰা ন ৰত্তব্বা. তস্স পরমত্থসভাৰেন অনুপলব্ভনতোতি অনেকন্তৰাদো ন সিযা. ধম্মা চ ধম্মিতো অঞ্ঞে ৰা সিযুং অনঞ্ঞে ৰা. যদি অঞ্ঞে, ন তেসং অনিচ্চতায ধম্মী অনিচ্চো অঞ্ঞত্তা. ন হি রূপা চক্খুৰিঞ্ঞাণং অঞ্ঞত্তা, ন চ রূপে চক্খুৰিঞ্ঞাণসদ্দো হোতি; কিঞ্চ ধম্মকপ্পনাপি নিরত্থিকা সিযা ধম্মিনো নিচ্চানিচ্চতায অসিজ্ঝনতো অথ অনঞ্ঞে; উপ্পাদৰিনাসৰন্তেহি অনঞ্ঞস্স ধম্মিনো তেসং ৰিয উপ্পাদৰিনাসসব্ভাৰতো কুতো নিচ্চতাৰকাসো, তেসম্পি ৰা ধম্মিনো ৰিয নিচ্চতাপত্তি সিযা. অপিচ নিচ্চানিচ্চনৰত্তব্বরূপো অত্তা চ লোকো চ পরমত্থতো ৰিজ্জমানতাপটিজাননতো যথা নিচ্চাদীনং অঞ্ঞতরং রূপং, যথা ৰা দীপাদযো. ন হি দীপাদীনং উদযব্বযসভাৰানং নিচ্চানিচ্চনৰত্তব্বসভাৰতা সক্কা ৰত্তুং জীৰস্স নিচ্চাদীসু অঞ্ঞতরং রূপং ৰিযাতি এৰং সত্তভঙ্গস্স ৰিয সেসভঙ্গানম্পি অসম্ভৰোযেৰাতি সত্তভঙ্গৰাদস্স অযুত্ততা ৰেদিতব্বাতি.

এত্থ চ, ‘‘ইস্সরো নিচ্চো, অঞ্ঞে সত্তা অনিচ্চা’’তি এৰং পৰত্তৰাদা সত্তেকচ্চসস্সতৰাদা; সেয্যথাপি ইস্সরৰাদাদযো. ‘‘পরমাণৰো নিচ্চা ধুৰা, দ্ৰিঅণুকাদযো অনিচ্চা’’তি এৰং পৰত্তৰাদা সঙ্খারেকচ্চসস্সতৰাদা; সেয্যথাপি কণাদৰাদাদযো. ননু চ ‘‘একচ্চে ধম্মা সস্সতা, একচ্চে অসস্সতা’’তি; এতস্মিং ৰাদে চক্খাদীনং অসস্সততাসন্নিট্ঠানং যথাসভাৰাৰবোধো এৰ, তযিদং কথং মিচ্ছাদস্সনন্তি, কো এৰমাহ – ‘‘চক্খাদীনং অসস্সতভাৰসন্নিট্ঠানং মিচ্ছাদস্সন’’ন্তি? অসস্সতেসুযেৰ পন কেসঞ্চি ধম্মানং সস্সতভাৰাভিনিৰেসো ইধ মিচ্ছাদস্সনং; তেন পন একৰারে পৰত্তমানেন চক্খাদীনং অসস্সতভাৰাৰবোধো ৰিদূসিতো সংসট্ঠভাৰতো; ৰিসসংসট্ঠো ৰিয সপ্পিমণ্ডো সকিচ্চকারণাসমত্ততায সম্মাদস্সনপক্খে ঠপেতব্বতং নারহতি. অথ ৰা অসস্সতভাৰেন নিচ্ছিতাপি চক্খুআদযো সমারোপিতজীৰসভাৰা এৰ দিট্ঠিগতি কেহি গয্হন্তীতি তদৰবোধস্স মিচ্ছাদস্সনভাৰো ন সক্কা নিৰারেতুং. তথা হি ৰুত্তং ব্রহ্মজালে (দী. নি. ১.৪৯) – ‘‘চক্খুন্তি ৰা…পে… কাযোতি ৰা অযং মে অত্তা’’তিআদি. এৰঞ্চ কত্ৰা অসঙ্খতায সঙ্খতায চ ধাতুযা ৰসেন যথাক্কমং একচ্চে ধম্মা সস্সতা; একচ্চে অসস্সতাতি এৰং পৰত্তো ৰিভজ্জৰাদোপি একচ্চসস্সতৰাদো আপজ্জতীতি এৰংপকারা চোদনা অনোকাসা হোতি অৰিপরীতধম্মসভাৰসম্পটিপত্তিভাৰতো.

ন মরতীতি অমরা. কা সা? ‘‘এৰন্তিপি মে নো’’তিআদিনা (দী. নি. ১.৬২) নযেন পরিযন্তরহিতা দিট্ঠিগতিকস্স দিট্ঠি চ ৰাচা চ, অমরায দিট্ঠিযা ৰাচায ৰিৰিধো খেপোতি অমরাৰিক্খেপো. সো এতস্স অত্থীতি অমরাৰিক্খেপো. অথ ৰা অমরাতি একা মচ্ছজাতি, সা উম্মুজ্জননিম্মুজ্জনাদিৰসেন উদকে সন্ধাৰমানা গাহং ন গচ্ছতি; এৰমেৰং অযম্পি ৰাদো ইতো চিতো চ সন্ধাৰতি, গাহং নাগচ্ছতীতি অমরাৰিক্খেপো, সো এৰ অমরাৰিক্খেপিকো. স্ৰাযং ৰাদো মুসাৰাদঅনুযোগছন্দরাগমোহহেতুকতায চতুধা পৰত্তোতি আহ – ‘‘চত্তারো অমরাৰিক্খেপিকা ৰুত্তা’’তি. ননু চেত্থ (দী. নি. টী. ১.৬৫-৬৬) চতুব্বিধোপি অমরাৰিক্খেপিকো কুসলাদিকে ধম্মে পরলোকত্তিকাদীনি চ যথাভূতং অনৰবুজ্ঝমানো, তত্থ তত্থ পঞ্হং পুট্ঠো পুচ্ছায ৰিক্খেপনমত্তং আপজ্জতীতি তস্স কথং দিট্ঠিগতিকভাৰো. ন হি অৰত্তুকামস্স ৰিয পুচ্ছিতমত্থং অজানন্তস্স ৰিক্খেপকরণমত্তেন দিট্ঠিগতিকতা যুত্তাতি? ন হেৰং পুচ্ছাৰিক্খেপকরণমত্তেন তস্স দিট্ঠিগতিকতা ইচ্ছিতা, অথ খো মিচ্ছাভিনিৰেসেন. সস্সতৰসেন মিচ্ছাভিনিৰিট্ঠোযেৰ হি মন্দবুদ্ধিতায কুসলাদিধম্মে পরলোকত্তিকাদীনি চ, যাথাৰতো অপ্পটিপজ্জমানো অত্তনা অৰিঞ্ঞাতস্স অত্থস্স পরং ৰিঞ্ঞাপেতুং অসমত্থতায মুসাৰাদাদিভযেন চ ৰিক্খেপং আপজ্জতীতি. তথা হিস্স ৰাদস্স সস্সতদিট্ঠিসঙ্গহো ৰুত্তো. অথ ৰা পুঞ্ঞপাপানং, তব্বিপাকানঞ্চ অনৰবোধেন, অসদ্দহনেন চ, ‘‘তব্বিসযায পুচ্ছায ৰিক্খেপকরণংযেৰ যুত্তং সুন্দরঞ্চা’’তি, খন্তিং রুচিং উপ্পাদেত্ৰা অভিনিৰিসন্তস্স উপ্পন্না ৰিসুংযেৰেকা এসা দিট্ঠি সত্তভঙ্গদিট্ঠি ৰিযাতি দট্ঠব্বা. তথা চেৰ ৰুত্তং – ‘‘পরিযন্তরহিতা দিট্ঠিগতিকস্স দিট্ঠি চেৰ ৰাচা চা’’তি (দী. নি. অট্ঠ. ১.৬১). কথং পনস্সা সস্সতদিট্ঠিসঙ্গহো? উচ্ছেদৰসেন অনভিনিৰেসতো. ‘‘নত্থি কোচি ধম্মানং যথাভূতৰেদী ৰিৰাদবহুলত্তা লোকস্স; ‘এৰমেৰ’ন্তি পন সদ্দন্তরেন ধম্মে নিজ্ঝাননা অনাদিকালিকা লোকে’’তি গাহৰসেন সস্সতলেসোপেত্থ লব্ভতিযেৰ.

অমতি গচ্ছতি এত্থ সভাৰো ওসানন্তি অন্তো, মরিযাদো, সো এতস্স অত্থীতি অন্তৰা. তেনাহ ‘‘সপরিযন্তো’’তি. অৰড্ঢিতকসিণস্স পুগ্গলস্স এৰং হোতীতি যোজনা. দুতিযৰাদো ‘‘অনন্তৰা লোকো’’তি ৰাদো. ততিযৰাদো ‘‘অন্তৰা চ অনন্তৰা চা’’তি ৰাদো. চতুত্থৰাদো ‘‘নেৰন্তৰা নানন্তৰা’’তি ৰাদো. এতে এৰ চত্তারো ৰাদিনো সন্ধায ব্রহ্মজালে (দী. নি. ১.৫৩) – ‘‘অন্তানন্তিকা অন্তানন্তং লোকস্স পঞ্ঞপেন্তি চতূহি ৰত্থূহী’’তি ৰুত্তং. তত্থ (দী. নি. টী. ১.৫৩) যুত্তং তাৰ পুরিমানং তিণ্ণং ৰাদীনং অন্তত্তঞ্চ অনন্তত্তঞ্চ অন্তানন্তত্তঞ্চ আরব্ভ পৰত্তৰাদত্তা অন্তানন্তিকত্তং. পচ্ছিমস্স পন তদুভযপটিসেধৰসেন পৰত্তৰাদত্তা কথমন্তানন্তিকত্তন্তি? তদুভযপটিসেধৰসেন পৰত্তৰাদত্তা এৰ. যস্মা পটিসেধৰাদোপি অন্তানন্তৰিসযো এৰ তং আরব্ভ পৰত্তত্তা. অপরে আহু – ‘‘যথা ততিযৰাদে সম্ভেদৰসেন এতস্সেৰ অন্তৰন্ততা অনন্ততা চ সম্ভৰতি, এৰং তক্কীৰাদেপি কালভেদৰসেন উভযসম্ভৰতো অঞ্ঞমঞ্ঞপটিসেধেন উভযঞ্ঞেৰ ৰুচ্চতি. কথং? অন্তৰন্ততাপটিসেধেন হি অনন্ততা ৰুচ্চতি, অনন্ততাপটিসেধেন চ অন্তৰন্ততা, অন্তানন্তানঞ্চ ততিযৰাদভাৰো কালভেদস্স অধিপ্পেতত্তা. ইদং ৰুত্তং হোতি যস্মা অযং লোকসঞ্ঞিতো অত্তা ঝাযীহি অধিগতৰিসেসেহি অনন্তো কদাচি সক্খি দিট্ঠো অনুসুয্যতি; তস্মা নেৰন্তৰা. যস্মা পন তেহি এৰ কদাচি অন্তৰা সক্খি দিট্ঠো অনুসুয্যতি, তস্মা ন পন অনন্তৰা’’তি. যথা চ অনুস্সুতিতক্কীৰসেন, এৰং জাতিস্সরতক্কিআদীনঞ্চ ৰসেন যথাসম্ভৰং যোজেতব্বং. অযঞ্হি তক্কিকো অৰড্ঢিতভাৰপুব্বকত্তা পটিভাগনিমিত্তানং ৰড্ঢিতভাৰস্স ৰড্ঢিতকালৰসেন অপচ্চক্খকারিতায অনুস্সৰাদিমত্তে ঠত্ৰা – ‘‘নেৰন্তৰা’’তি পটিক্খিপতি, অৰড্ঢিতকালৰসেন পন ‘‘নানন্তো’’তি. ন পন অন্তৰন্ততানন্ততানং অচ্চন্তমভাৰেন যথা তং ‘‘নেৰসঞ্ঞীনাসঞ্ঞী’’তি, অৰস্সঞ্চ এতং এৰং ৰিঞ্ঞাতব্বং, অঞ্ঞথা ৰিক্খেপপক্খংযেৰ ভজেয্য চতুত্থৰাদো. ন হি অন্তৰন্ততানন্ততাতদুভযৰিনিমুত্তো অত্তনো পকারো অত্থি, তক্কীৰাদী চ যুত্তিমগ্গকো, কালভেদৰসেন চ তদুভযম্পি একস্মিং ন ন যুজ্জতীতি. অনন্তরচতুক্কন্তি একত্তসঞ্ঞীতি আগতসঞ্ঞীচতুক্কং.

একন্তসুখীতি একন্তেনেৰ সুখী. তং পনস্স সুখং দুক্খেন অৰোমিস্সং হোতীতি আহ ‘‘নিরন্তরসুখী’’তি. একন্তসুখমেৰাতি ইদং সুখবহুলতং সন্ধায ৰুত্তং. অতীতাসু সত্তসু জাতীসূতি ইদং ততো পরং জাতিস্সরঞাণেন অনুস্সরিতুং ন সক্কাতি কত্ৰা ৰুত্তং. তাদিসমেৰাতি সুখসমঙ্গিমেৰ অত্তভাৰং. ‘‘এৰং সুখসমঙ্গী’’তি তং অনুস্সরন্তস্স জাতিস্সরস্স অতীতজাতিযম্পি ইধ ৰিয দুক্খফুট্ঠস্স তং অনুস্সরন্তস্স.

সব্বেসম্পীতি লাভীনং তক্কীনম্পি. তথাতি ইমিনা ‘‘সব্বেসম্পী’’তি ইদং পদং আকড্ঢতি. কামাৰচরং নাম অদুক্খমসুখং অনুল়ারং অৰিভূতন্তি আহ ‘‘চতুত্থজ্ঝানৰসেনা’’তি. চতুত্থজ্ঝানং কারণভূতং এতস্স অত্থি, তেন ৰা নিব্বত্তন্তি চতুত্থজ্ঝানিকং. মজ্ঝত্তস্সাতি মজ্ঝত্তভূতস্স মজ্ঝত্তৰেদনাবহুলস্স. মজ্ঝত্তভূতট্ঠানমেৰ অত্তনো মজ্ঝত্ততাপত্তমেৰ ভূতপুব্বং অনুস্সরন্তস্স. একচ্চসস্সতিকাতি একচ্চসস্সতৰাদিনো ৰুত্তা. পুগ্গলাধিট্ঠানেন হি একচ্চসস্সতিকা. এস নযো সেসেসুপি. অধিচ্চসমুপ্পন্নৰাদো সস্সতৰাদসমুদ্দিট্ঠোতি কত্ৰা ‘‘দ্ৰে অধিচ্চসমুপ্পন্নিকা’’তি চ ৰুত্তং.

২৮. দিট্ঠুদ্ধারন্তি যথাৰুত্তানং দিট্ঠীনং অনিয্যানিকভাৰদস্সনৰসেন পদুদ্ধরণং. পচ্চত্তংযেৰ ঞাণন্তি অপরপ্পচ্চযং অত্তনিযেৰ ঞাণং. তং পন অত্তপচ্চক্খং হোতীতি আহ ‘‘পচ্চক্খঞাণ’’ন্তি. সুৰণ্ণস্স ৰিয দোসাপগমেন উপক্কিলেসৰিগমেন ঞাণস্স ৰিসুদ্ধন্তি আহ ‘‘পরিসুদ্ধন্তি নিরুপক্কিলেস’’ন্তি. কিলেসন্ধকারৰিগমতো সপ্পভাসমুজ্জলমেৰ হোতীতি ৰুত্তং – ‘‘পরিযোদাতন্তি পভস্সর’’ন্তি বাহিরসমযস্মিম্পি হোন্তি ঝানস্স সমিজ্ঝনতো. মযমিদং জানামাতি ‘‘সস্সতো অত্তা চ লোকো চ ইদমেৰ সচ্চং মোঘমঞ্ঞ’’ন্তি চ মিচ্ছাগাহৰসেন অঞ্ঞাণভাগমেৰ পরিব্রূহেত্ৰা ততো এৰ যথাগহিতং গাহং সন্ধায – ‘‘মযমিদং অত্থং তত্থ জানামা’’তি এৰং তত্থ মিচ্ছাগাহে অৰিজ্জমানং ঞাণকোট্ঠাসং ওতারেন্তিযেৰ অনুপ্পৰেসেন্তিযেৰ. ন তং ঞাণং, মিচ্ছাদস্সনং নামেতং, কিং পন তং মিচ্ছাদস্সনং নাম? সস্সতো অত্তা চ লোকো চাতিআদিনা মিচ্ছাভিনিৰেসভাৰতো. তেনাহ ‘‘তদপি…পে… অত্থো’’তি. যং তং দিট্ঠিযা উপনিস্সযভূতং ঞাণং, তং সন্ধাযাহ – ‘‘জাননমত্তলক্খণত্তা ঞাণভাগমত্তমেৰা’’তি. ঞাণম্পি হি দিট্ঠিযা উপনিস্সযো হোতিযেৰ লাভিনো ইতরস্স চ তথা তথা মিচ্ছাভিনিৰেসতো. অনুপাতিৰত্তনতো অনতিক্কমনতো. অসাধারণতো ন উপাতিৰত্তন্তি এতেনাতি অনুপাতিৰত্তনং, ততো. উপাদানপচ্চযতোতি উপাদানস্স পচ্চযভাৰতো. এতেন ফলূপচারেনেৰ উপাদানমাহ. যদি ব্রহ্মজালে আগতা সব্বাপি দিট্ঠিযো ইধ কথিতা হোন্তি, এৰং সন্তে ইদং সুত্তং ব্রহ্মজালসুত্তেন একসদিসন্তি আহ – ‘‘ব্রহ্মজালে পনা’’তিআদি. ‘‘অঞ্ঞত্র রূপং অঞ্ঞত্র ৰেদনা সক্কাযংযেৰ অনুপরিধাৰন্তী’’তি ৰচনতো ইধ সক্কাযদিট্ঠি আগতা. ব্রহ্মজালং কথিতমেৰ হোতি তত্থ আগতানং দ্ৰাসট্ঠিযাপি দিট্ঠীনং ইধাগতত্তা. সস্সতুচ্ছেদাভিনিৰেসো অত্তাভিনিৰেসপুব্বকো, ‘‘অত্তা সস্সতো অত্তা উচ্ছেদো’’তি পৰত্তনতো.

৩০. দ্ৰাসট্ঠি…পে… দস্সেতুন্তি কথং পনাযমত্থো ‘‘ইধ, ভিক্খৰে, একচ্চো’’তিআদিপাল়িযা দস্সিতো হোতীতি? অপ্পহীনসক্কাযদিট্ঠিকস্স পুব্বন্তাপরন্তদিট্ঠিউপাদিযনজোতনতো. পরিচ্চাগেনাতি ৰিক্খম্ভনেন. চতুত্থজ্ঝাননিরোধা ততিযজ্ঝানং উপসম্পজ্জ ৰিহরতীতি এত্থ ন পরিহীনচতুত্থজ্ঝানস্স ততিযজ্ঝানং ভৰতি, ততিযজ্ঝানা ৰুট্ঠিতস্স পন চতুত্থজ্ঝানা ৰুট্ঠিতস্স চ ততিযং পটিলোমনযেন সম্ভৰতি. তেনাহ ‘‘অযং পনেত্থা’’তিআদি. এৰংসম্পদমিদং ৰেদিতব্বন্তি ‘‘পৰিৰেকা পীতি নিরুজ্ঝতী’’তি ইদং, ‘‘নিরামিসসুখস্সনিরোধা’’তি এত্থ ৰিয ৰুট্ঠাননিরোধৰসেন ৰুত্তন্তি ৰেদিতব্বন্তি অত্থো. হীনজ্ঝানপরিযাদানকদোমনস্সন্তি নীৰরণসহগতদোমনস্সমাহ. তঞ্হি ঝানপরিযাদানকরং. কম্মনীযভাৰোতি সমাপত্তিং পত্তো ৰিয সমাপত্তিসমাপজ্জনভাৰে কম্মক্খমভাৰো. সোমনস্সৰিধুরত্তা দোমনস্সং ৰিযাতি দোমনস্সন্তি ৰুত্তং. ‘‘উপ্পজ্জতি পৰিৰেকা পীতী’’তি পুন ৰুত্তা পীতি ঝানদ্ৰযপীতি. যং ঠানং ছাযা জহতীতি যং পদেসং আতপেন অভিভুয্যমানং ছাযা জহতি. তত্থ আতপে ছাযাতি পদেসেন আতপসঞ্ঞিতানং ভূতসঙ্খতানং পহানট্ঠানমাহ. তেনাহ ‘‘যস্মিং ঠানে’’তিআদি.

৩১. নিরামিসং সুখন্তি ততিযজ্ঝানসুখং দূরসমুস্সারিতকামামিসত্তা.

৩২. অদুক্খমসুখন্তি চতুত্থজ্ঝানৰেদনং, ন যং কিঞ্চি উপেক্খাৰেদনং.

৩৩. নিগ্গহণোতি মমংকারভাৰেন কিঞ্চিপি অগণ্হন্তো. নিব্বানস্স সপ্পাযন্তি নিব্বানাধিগমস্স, নিব্বানস্সেৰ ৰা অৰিলোমৰসেন একন্তিকুপাযতায সপ্পাযং. তেনাহ ‘‘উপকারভূত’’ন্তি. সব্বত্থাতি সব্বেসু তেভূমকধম্মেসু. এতন্তি এতং যথাৰুত্তসমথভাৰনায কিলেসানং ৰিক্খম্ভনং. সব্বত্থ নিকন্তিযা অসুক্খাপিতত্তা কথং নিব্বানস্স উপকারপটিপদা নাম জাতং? ন জাযতে ৰাত্যধিপ্পাযো. সব্বত্থাতি পুব্বন্তানুদিট্ঠিআদিকে সব্বস্মিং. অগ্গণ্হনৰসেনাতি তণ্হাগাহেন অগ্গহণৰসেন. যত্থ হি তণ্হাগাহো ৰিমোচিতো, তত্থ দিট্ঠিমানগ্গাহা সুক্খা ৰিয হোন্তি তদেকট্ঠভাৰতো. তাদিসস্স নিব্বানগামিনী পটিপদা এৰ আসন্নে, ন দূরে. তেন ৰুত্তং – ‘‘উপকারপটিপদা নাম জাত’’ন্তি. তাদিসস্স চ সন্তোহমস্মীতিআদিকা সমনুপস্সনা অধিমানপক্খে তিট্ঠতীতি আহ – ‘‘অভিৰদতীতি অভিমানেন উপৰদতী’’তি. ইদমেৰ উপাদিযতীতি নিযমাভাৰতো ‘‘অট্ঠারসৰিধম্পী’’তি ৰুত্তং. সেসপদেপি এসেৰ নযো. দিট্ঠুপাদানে সতি সেসউপাদানসম্ভৰো অৰুত্তসিদ্ধোতি তদেৰ উদ্ধটং.

সে আযতনে ৰেদিতব্বেতি নিরোধস্স কারণং নিব্বানং ৰেদিতব্বং. দ্ৰিন্নং আযতনানন্তি চক্খাযতনাদীনং দ্ৰিন্নং আযতনানং. পটিক্খেপেন নিব্বানং দস্সিতং ৰেনেয্যজ্ঝাসযৰসেন.

ন গাধতীতি ন পতিট্ঠাতি. অতোতি অস্মা নিব্বানা. সরাতি তণ্হা. সঙ্খারপটিক্খেপেনাতি সঙ্খারেকদেসভূতানং চতুন্নং মহাভূতানং পটিক্খেপেন.

ৰিঞ্ঞাণন্তি ৰিসিট্ঠেন ঞাণেন জানিতব্বং. ততো এৰ অনিদস্সনং অচক্খুৰিঞ্ঞেয্যং অনিন্দ্রিযগোচরং. অনন্তন্তি অন্তরহিতং, নিচ্চন্তি অত্থো. সব্বতো পভন্তি কিলেসন্ধকারাভাৰতো চ সমন্ততো পভস্সরং. ‘‘সব্বতো পপ’’ন্তি ৰা পাঠো, সব্বতো পততিত্থন্তি অত্থো. চত্তারীসকম্মট্ঠানসঙ্খাতেহি তিত্থেহি ওতরিত্ৰা অনুপৰিসিতব্বং অমতসরন্তি ৰুত্তং হোতি. অনুপাদা কঞ্চি ধম্মং অগ্গহেত্ৰা ৰিমুচ্চন্তি এত্থাতি অনুপাদাৰিমোক্খো, নিব্বানং. অনুপাদা ৰিমুচ্চতি এতেনাতি অনুপাদাৰিমোক্খো, অগ্গমগ্গো. অনুপাদাৰিমোক্খন্তিকতায পন অরহত্তফলং অনুপাদাৰিমোক্খোতি ৰুত্তং. সেসং সুৰিঞ্ঞেয্যমেৰ.

পঞ্চত্তযসুত্তৰণ্ণনায লীনত্থপ্পকাসনা সমত্তা.

৩. কিন্তিসুত্তৰণ্ণনা

৩৪. ভৰোতি পরিত্তো. অভৰোতি মহন্তো. ৰুদ্ধিঅত্থো হি অযং অ-কারো, ‘‘সংৰরাসংৰরো, ফলাফল’’ন্তিআদীসু ৰিয, তস্মা ভৰাভৰহেতূতি খুদ্দকস্স মহন্তস্স ৰা ভৰস্স হেতু, তং পচ্চাসীসমানোতি অত্থো. তেনাহ – ‘‘তস্মিং তস্মিং ভৰে সুখং ৰেদিস্সামী’’তিআদি.

৩৫. লোকুত্তরবোধিপক্খিযধম্মে উদ্দিস্স পুথুজ্জনানং ৰিৰাদো সম্ভৰতীতি আহ – ‘‘লোকিযলোকুত্তরাৰ কথিতা’’তি. লোকিযাপি হি বোধিপক্খিযধম্মা লোকুত্তরধম্মাধিগমস্স আসন্নকারণত্তা ৰিসেসকারণন্তি যাৰ অঞ্ঞেহি লোকিযধম্মেহি অভিৰিসিট্ঠোতি কত্ৰা, ‘‘ইমেসু সত্ততিংসবোধিপক্খিযধম্মেসূ’’তি অৰিসেসেন ৰুত্তং. অত্থতো নানং হোতীতি অত্থতো ভেদো হোতি বোধিপক্খিযধম্মানং সমধিগতত্তা. ন হি কাযাদযো ভাৰেতব্বা, সতিযেৰ পন ভাৰেতব্বাতি. ব্যঞ্জনতো নানং ভেদং. ইমিনাপি কারণেনাতি ইমাযপি যুত্তিযা. ইদানি তং যুত্তিং দস্সেন্তো – ‘‘অত্থঞ্চ ব্যঞ্জনঞ্চা’’তিআদিমাহ. তত্থ সমানেত্ৰাতি সুত্তন্তরতো সমানেত্ৰা, সুত্তন্তরপদেহি চ সমানেত্ৰা. অঞ্ঞথাতি অঞ্ঞতো, ভূততো অপগতং কত্ৰাতি অত্থো. মিচ্ছা রোপিতভাৰোতি অযাথাৰতো ঠপিতভাৰো. অত্থঞ্চ ব্যঞ্জনঞ্চ ৰিঞ্ঞাপনকারণমেৰাতি অৰিপরীতত্থস্স সদ্দস্স চ বুজ্ঝনহেতুতায.

৩৭. ইধ ধম্মৰিনযট্ঠানে সতিযেৰ সতিপট্ঠানন্তি গহিতা, অত্থতো সমেতি নাম যাথাৰতো অত্থস্স গহিতত্তা. অসভাৰনিরুত্তিভাৰতো ব্যঞ্জনতো নানত্তন্তি তং লিঙ্গভেদেন ৰচনভেদেন চ দস্সেন্তো, ‘‘সতিপট্ঠানোতি ৰা সতিপট্ঠানাতি ৰা মিচ্ছা রোপেথা’’তি আহ. অপ্পমত্তকন্তি অণুমত্তং সল্লহুকং, ন গরুতরং অধনিতং কত্ৰা ৰত্তব্বম্পি ধনিতং ঘোসৰন্তং কত্ৰা রোপিতে ৰুত্তদোসাভাৰতোতি তেনাহ – ‘‘নিব্বুতিং পত্তুং সক্কা হোতী’’তি.

ব্যঞ্জনস্স মিচ্ছারোপনং ন ৰিসেসন্তরাযকরং হোতীতি ঞাপনত্থং, চতুসু মগ্গেসু পঞ্হং কথেত্ৰাৰ পরিনিব্বুতো. সুত্তন্তব্যঞ্জনং সন্ধাযেতং ৰুত্তং – ‘‘অপ্পমত্তকং খো পনা’’তি.

৩৮. অথ চতুত্থৰারে ৰিৰাদো কস্মা জাতো? যাৰতা নেসং ৰচনং অত্থতো চেৰ সমেতি ব্যঞ্জনতো চাতি অধিপ্পাযো. সঞ্ঞায ৰিৰাদোতি কিঞ্চাপি সমেতি অত্থতো চেৰ ব্যঞ্জনতো চ, সঞ্ঞা পন নেসং অৰিসুদ্ধা, তায সঞ্ঞায ৰসেন ৰিৰাদো জাতোতি দস্সেন্তো ‘‘অহ’’ন্তিআদিমাহ. অহং সতিপট্ঠানন্তি ৰদামি, অযং সতিপট্ঠানোতি ৰদতীতি এৰং তেসং ঞাণং হোতীতি ইমমত্থং, ‘‘এসেৰ নযো’’তি ইমিনা অতিদিসতি.

৩৯. ন চোদনত্থায ৰেগাযিতব্বন্তি সীঘং সীঘং ন চোদনা কাতব্বাতি অত্থো. তস্মাতি যস্মা একচ্চো কোধনভাৰেন এৰং পটিপ্ফরি, তস্মা. অনাদানদিট্ঠীতি আদিযিত্ৰা অনভিনিৰিসনতো অনাদানদিট্ঠী অদল়্হগ্গাহী. পক্খিপন্তো ৰিযাতি গিলিত্ৰা পক্খিপন্তো ৰিয.

উপঘাতোতি চিত্তপ্পঘাতো ফরসুপঘাতো ৰিয. ৰণঘট্টিতস্স ৰিযাতি ৰণে ঘট্টিতস্স ৰিয দুক্খুপ্পত্তি চিত্তদুক্খুপ্পত্তি. দ্ৰে ৰারে ৰত্ৰাপি ৰিসজ্জেতীতি সুপ্পটিনিস্সগ্গী এৰং পগেৰ চোদিতমত্তে ৰিস্সজ্জেতি চেতি অধিপ্পাযো. কথনৰসেন চ কাযচিত্তকিলমথো. এৰরূপোতি সহসা অৰিস্সজ্জেন্তেন চোদকস্স ৰিহেসাৰাদো হুত্ৰাপি অক্কোধনাদিসভাৰো.

উপেক্খাতি সকেন কম্মেন পঞ্ঞাযিস্সতীতি তস্মিং পুগ্গলে অজ্ঝুপেক্খণা. উপেক্খং অতিমঞ্ঞতি নাম তস্স অনাচারস্স অনজ্ঝুপেক্খণতো.

৪০. ৰচনসঞ্চারোতি পেসুঞ্ঞৰসেন অঞ্ঞথাৰচনুপসংহারো. দিট্ঠিপল়াসোতি যুগগ্গাহৰসেন লদ্ধি. সা পন চিত্তস্স অনারাধনিযভাৰো সত্থুচিত্তস্স অনারাধকভাৰো. কলহোতি অধিকরণুপ্পাদৰসেন পৰত্তো ৰিগ্গহো ভণ্ডনস্স পুব্বভাগো.

যেন কারণেনাতি যেন ধম্মেন সত্থুসাসনেন. তমেৰ হি সন্ধায ৰদতি – ‘‘ধম্মোতি সারণীযধম্মো অধিপ্পেতো’’তি. এত্থাতি ‘‘ধম্মস্স চানুধম্ম’’ন্তি এত্থ. ধম্মোতি সম্বুদ্ধস্স তস্স তথা পৰত্তং ব্যাকরণং যথা ৰিৰাদাপন্না সঞ্ঞত্তিং গচ্ছন্তি. তেনাহ – ‘‘তেসং ভিক্খূনং সঞ্ঞত্তিকরণ’’ন্তি. তদেৰ ব্যাকরণং অনুধম্মোতি ভিক্খুনা ৰুচ্চমানো অনুপৰত্তো ধম্মো. তেনাহ – ‘‘তদেৰ ব্যাকরোতি নামা’’তি. কোচীতি যো কোচি. সহধম্মিকো সকারণো. অঞ্ঞত্থো অযং কিং সদ্দোতি আহ ‘‘অঞ্ঞো’’তি. অস্সাতি ৰুত্তনযেন পটিপন্নভিক্খুনো, তস্স পটিপত্তি ন কেনচি গরহণীযা হোতীতি অত্থো. সেসং সব্বং সুৰিঞ্ঞেয্যমেৰ.

কিন্তিসুত্তৰণ্ণনায লীনত্থপ্পকাসনা সমত্তা.

৪. সামগামসুত্তৰণ্ণনা

৪১. দ্ৰেধিকজাতাতি জাতদ্ৰেধিকা সঞ্জাতভেদা. দ্ৰেজ্ঝজাতাতি দুৰিধভাৰং পত্তা. ভণ্ডন্তি পরিভাসন্তি এতেনাতি ভণ্ডনং, ৰিরুদ্ধচিত্ততা. তন্তি ভণ্ডনং. ধম্মৰিনযন্তি পাৰচনং. ৰিতুজ্জন্তা মুখসত্তীহি. সহিতং মেতি ময্হং ৰচনং সহিতং সিলিট্ঠং পুব্বাপরসম্বন্ধং অত্থযুত্তং. তেনাহ ‘‘অত্থসংহিত’’ন্তি. অধিচিণ্ণন্তি আচিণ্ণং. ৰিপরাৰত্তন্তি ৰিরোধদস্সনৰসেন পরাৰত্তিতং, পরাৰত্তং দূসিতন্তি অত্থো. তেনাহ – ‘‘চিরকালৰসেন…পে… নিৰত্ত’’ন্তি. পরিযেসমানো চর, তত্থ তত্থ গন্ত্ৰা সিক্খাহীতি অত্থো. সচে সক্কোসি, ইদানিমেৰ মযা ৰেঠিতদোসং নিব্বেঠেহি. মরণমেৰাতি অঞ্ঞমঞ্ঞঘাতৰসেন মরণমেৰ.

নাটপুত্তস্স ইমেতি নাটপুত্তিযা. তে পন তস্স সিস্সাতি আহ ‘‘অন্তেৰাসিকেসূ’’তি. পুরিমপটিপত্তিতো পটিনিৰত্তনং পটিৰানং, তং রূপং সভাৰো এতেসন্তি পটিৰানরূপা. তেনাহ ‘‘নিৰত্তনসভাৰা’’তি. কথনং অত্থস্স আচিক্খনং. পৰেদনং তস্স হেতুদাহরণানি আহরিত্ৰা বোধনং. ন উপসমায সংৰত্ততীতি অনুপসমসংৰত্তনং, তদেৰ অনুপসমসংৰত্তনিকং, তস্মিং. সমুস্সিতং হুত্ৰা পতিট্ঠাহেতুভাৰতো থূপং পতিট্ঠাতি আহ – ‘‘ভিন্নথূপেতি ভিন্নপতিট্ঠে’’তি. থূপোতি ৰা ধম্মস্স নিয্যানভাৰো ৰেদিতব্বো, অঞ্ঞধম্মে অভিভুয্য সমুস্সিতট্ঠেন. সো নিগণ্ঠস্স সমযে কেহিচি অভিন্নসম্মতোপি ভিন্নো ৰিনট্ঠোযেৰ সব্বেন সব্বং অভাৰতোতি ভিন্নথূপো. সো এৰ নিয্যানভাৰো ৰট্টদুক্খতো মুচ্চিতুকামানং পটিসরণং, তং এত্থ নত্থীতি অপ্পটিসরণো, তস্মিং ভিন্নথূপে অপ্পটিসরণেতি এৰমেত্থ অত্থো ৰেদিতব্বো.

আচরিযপ্পমাণন্তি আচরিযমুট্ঠি হুত্ৰা পমাণভূতং. নানানীহারেনাতি নানাকারেন. ‘‘ৰিৰাদো ন উপ্পজ্জী’’তি ৰত্ৰা তস্স অনুপ্পত্তিকারণং দস্সেন্তো, ‘‘সত্থা হি…পে… অৰিৰাদকারণং কত্ৰাৰ পরিনিব্বাযী’’তি ৰত্ৰা তং ৰিৰরিতুং ‘‘ভগৰতা হী’’তিআদি ৰুত্তং. পতিট্ঠা চ অৰস্সযো চ, ‘‘অযং ধম্মো অযং ৰিনযো ইদং সত্থুসাসন’’ন্তি ৰিনিচ্ছযনে মহাপদেসা, পঞ্হব্যাকরণানি চ, যস্মা তেসু পতিট্ঠায তে অৰস্সায ধম্মৰিনযধরা চ নিচ্ছযং গচ্ছন্তি. তথা হি সুত্তন্তমহাপদেসতো ৰিনযে কেনচি পুচ্ছিতো অত্থো চতুন্নং পঞ্হব্যাকরণানং ৰসেন সুৰিনিচ্ছিতরূপো, তস্মা ধম্মৰিনযো ইধ সত্থু কিচ্চং কাতুং সক্কোতীতি আহ – ‘‘তেনেৰা’’তিআদি, তস্মা উল়ারায দেসনায ভাজনন্তি অধিপ্পাযো.

৪২. পটিপৰিট্ঠং কত্ৰা আহরিতব্বতো, সচ্চং কারিতব্বতো পাভতং মূলন্তি আহ – ‘‘কথাপাভত’’ন্তি, ধম্মকথায মূলকারণন্তি অত্থো. যেসং ৰসেন ৰিৰাদো উপ্পন্নো, তেযেৰ অধম্মৰাদিনো, তেসং তাৰ সো অহিতায দুক্খায সংৰত্ততু, ততো অঞ্ঞেসং দেৰমনুস্সানং কথন্তি, চোদনা পরম্পরায সংকিলেসৰত্থুভাৰতোতি পরিহারো. তেনাহ – ‘‘কোসম্বকক্খন্ধকে ৰিযা’’তিআদি.

৪৩. অভিঞ্ঞা দেসিতাতি অভিৰিসিট্ঠায পঞ্ঞায জানিত্ৰা বোধিতা. পতিস্সযমানরূপাতি অপদিস্স পতিস্সযমানা গরুকৰসেন নিস্সযমানসভাৰা. তেনাহ – ‘‘উপনিস্সায ৰিহরন্তী’’তি, গরুতরং নিস্সযং কত্ৰা ৰিহরন্তীতি অত্থো. পরিৰারে পঞ্ঞত্তানীতি, ‘‘আজীৰহেতু আজীৰকারণা’’তি, এৰং নিদ্ধারেত্ৰা পরিৰারপাল়িযং (পরি. ৩৩৬) আসঙ্করৰসেন ঠপিতানি. ‘‘এৰঞ্চ পন, ভিক্খৰে, ইমং সিক্খাপদং উদ্দিসেয্যা’’তি (পারা. ৩৯, ৪২, ৪৩) ৰিভঙ্গপাঠৰসেনেৰ হি তানি ভগৰতা পঞ্ঞত্তানি. তানি ঠপেত্ৰা সেসানি সব্বসিক্খাপদানি অধিপাতিমোক্খং নামাতি, ইদং গোবলীবদ্দঞাযেন ৰুত্তন্তি দট্ঠব্বং তেসম্পি অধিপাতিমোক্খভাৰতো.

তত্রাযং নযোতি তস্মিং সুপ্পজহনায অপ্পমত্তকভাৰে অযং ৰক্খমানো. তানীতি পণীতভোজনানি. যো কোচীতি ভিক্খু ৰা ভিক্খুনী ৰা. দুক্কটৰত্থুকন্তি যং কিঞ্চি দুক্কটাপত্তিৰত্থুকং. তেনাতি সুপ্পজহনভাৰেন মূলাপত্তিৰীতিক্কমস্স অণুমত্ততায.

পুব্বভাগমগ্গন্তি লোকিযমগ্গং. তত্রাতি তস্মিং পুব্বভাগমগ্গং নিস্সায ৰিৰাদুপ্পাদে. ওভাসঞাণন্তি ওভাসস্স উপ্পত্তিহেতুভূতং ঞাণং. তত্থ পন সো মগ্গসঞ্ঞিভাৰেন মগ্গো চ চতুব্বিধোতি সুতত্তা, ‘‘পট্ঠমমগ্গো নামা’’তিআদিমাহ. এৰন্তি এৰং অসন্দিদ্ধং অপরিসঙ্কিতং পরিচ্চত্তং কত্ৰা কম্মট্ঠানং কথেতুং ন সক্কোতি.

চেতিযং ন দিট্ঠন্তি তস্স কতং থূপং ৰদতি. নিন্দিযে পুথুজ্জনভাৰে ঠিতং পাসংসং অরিযভাৰং আরোপেত্ৰা তং মিচ্ছালদ্ধিং অভিনিৰিস্স পগ্গয্হ ৰোহরণতো সগ্গোপি মগ্গোপি ৰারিতোযেৰাতি. ৰুত্তঞ্হেতং –

‘‘যো নিন্দিযং পসংসতি, তং ৰা নিন্দতি যো পসংসিযো;

ৰিচিনাতি মুখেন সো কলিং, কলিনা তেন সুখং ন ৰিন্দতী’’তি. (সু. নি. ৬৬৩; সং. নি. ১.১৮০-১৮১; অ. নি. ৪.৩; নেত্তি. ৯২);

‘‘খণেনেৰ অরহত্তং পাপুণিতুং সমত্থকম্মট্ঠানকথং আচিক্খিস্সামী’’তি হি ইমিনা তত্থ কোহঞ্ঞম্পি দিস্সতি; ইতরেসু পন ৰত্তব্বমেৰ নত্থি. উপ্পাটেত্ৰাতি উদ্ধরিত্ৰা. ‘‘অথ তে ভিক্খূ’’তিআদি সেসং নাম. ‘‘অমতং তে পরিভুঞ্জন্তি, যে কাযগতাসতিং পরিভুঞ্জন্তী’’তি (অ. নি. ১.৬০০) ৰচনং দুগ্গহিতং গণ্হাপেত্ৰা, ‘‘এত্তাৰতা ৰো অমতং পরিভুত্তং নাম ভৰিস্সতী’’তি আহ.

৪৪. এৰন্তি আকারলক্খণমেতং, ন আকারনিযমনং. তেন ইমিনাৰ কারণেন চ যো ৰিৰাদো উপ্পজ্জেয্যাতি ৰুত্তং হোতি. গরুস্মিং গরূতি পৰত্তং চিত্তং গরুৰিসযত্তা তংসহচরিতত্তা গরু, তস্স ভাৰো গারৰং, গরুকরণং, তং এত্থ নত্থীতি অগারৰো. তেনাহ ‘‘গারৰৰিরহিতো’’তি. গরুস্স গারৰৰসেন পতিস্সযনং পতিস্সোতি ৰুচ্চতি নীচৰুত্তিতা, তপ্পটিপক্খতো অপ্পতিস্সোতি আহ – ‘‘অপ্পতিস্সযো অনীচৰুত্তী’’তি. এত্থ যথাযং পুগ্গলো সত্থরি অগারৰো নাম হোতি, তং দস্সেতুং, ‘‘এত্থ পনা’’তিআদি ৰুত্তং. তত্থ তীসুকালেসু উপট্ঠানং ন যাতীতিআদি সমুদাযকিত্তনঅনৰসেসদস্সনং, অৰযৰতো পন অগারৰসিদ্ধি যথা তং সামঞ্ঞতো সিক্খাপদসমাদানং তব্বিসেসো ভেদো. এস নযো সেসেসুপি.

সক্কচ্চং ন গচ্ছতীতি আদরৰসেন ন গচ্ছতি. সঙ্ঘে কতোযেৰ হোতি সঙ্ঘপরিযাপন্নত্তা তস্স, যথা সঙ্ঘং উদ্দিস্স দিন্নং একেন ভিক্খুনা পটিগ্গহিতং সঙ্ঘস্স দিন্নমেৰ হোতি. অপরিপূরযমানোৰ সিক্খায অগারৰো. তেনাহ ভগৰা – ‘‘সিক্খায ন পরিপূরকারী’’তি (ম. নি. ২.১৩৫). অত্তনো পরিসায উপ্পন্নং ৰিৰাদমূলং ৰিসেসতো অত্তনা ৰূপসমেতব্বতো অত্তনো চ অনত্থাৰহতো ‘‘অজ্ঝত্ত’’ন্ত্ৰেৰ ৰুত্তং. এস নযো বহিদ্ধাতি এত্থাপি.

৪৬. ছঠানানীতি ছমূলানি. যথা সমনৰসেন সমথানং ৰিৰাদাদীসু অধিকত্তুভাৰো, এৰং ৰিৰাদাদীনং তেহি অধিকত্তব্বতাপীতি আহ – ‘‘ৰূপসমনত্থায…পে… অধিকরণানী’’তি. তেন অধিকরণসদ্দস্স কম্মত্থতং আহ. সমথা ৰা সমনৰসেন অধিকরীযন্তি এত্থাতি অধিকরণানি, ৰিৰাদাদযো.

ৰিৰাদো উপ্পন্নমত্তোৰ হুত্ৰা পরতো কক্খল়ত্থায সংৰত্তনতো যং ৰত্থুং নিস্সায পঠমং উপ্পন্নো ৰিৰাদানুসারেন মূলকং ৰিয অনুবন্ধরোগো তমেৰ তদঞ্ঞং ৰা ৰত্থুং কত্ৰা পৰড্ঢন্তো ৰিৰাদাধিকরণং পত্ৰা উপরি ৰড্ঢতি নাম, অনুৰাদাপত্তিকিচ্চাধিকরণং পত্ৰা ৰিৰাদস্স চ ৰড্ঢনং পাকটমেৰ. তেন ৰুত্তং – ‘‘চত্তারি অধিকরণানি পত্ৰা উপরি ৰড্ঢন্তো সো ৰিৰাদো’’তি. উপ্পন্নানং উপ্পন্নানন্তি (দী. নি. টী. ৩.৩৩১) উট্ঠিতানং উট্ঠিতানং. সমথত্থন্তি সমনত্থং.

অট্ঠারসহি ৰত্থূহীতি লক্খণৰচনমেতং যথা ‘‘যদি মে ব্যাধী দাহেয্যুং. দাতব্বমিদমোসধ’’ন্তি (সং. নি. টী. ২.৩.৩৯-৪২; কঙ্খা. অভি. টী. অধিকরণসমথৰণ্ণনা), তস্মা তেসু অঞ্ঞতরেন ৰিৰদন্তা, ‘‘অট্ঠারসহি ৰত্থূহি ৰিৰদন্তী’’তি ৰুচ্চন্তি. উপৰদনাতি অক্কোসো. চোদনাতি অনুযোগো.

অধিকরণস্স সম্মুখাৰ ৰিনযনতো সম্মুখাৰিনযো. সন্নিপতিতপরিসায ধম্মৰাদীনং যেভুয্যতায যেভুয্যসিককম্মস্স করণং যেভুয্যসিকা. কারকসঙ্ঘস্স সামগ্গিৰসেন সম্মুখীভাৰো, ন যথা তথা কারকপুগ্গলানং সম্মুখতামত্তং. ভূততাতি তচ্ছতা. সচ্চপরিযাযো হি ইধ ধম্ম-সদ্দো ‘‘ধম্মৰাদী’’তিআদীসু (দী. নি. ১.৯) ৰিয. ৰিনেতি এতেনাতি ৰিনযো, তস্স তস্স অধিকরণস্স ৰূপসমায ভগৰতা ৰুত্তৰিধি, তস্স ৰিনযস্স সম্মুখতা ৰিনযসম্মুখতা. ৰিৰাদৰত্থুসঙ্খাতে অত্থে পচ্চত্থিকা অত্থপচ্চত্থিকা, তেসং অত্থপচ্চত্থিকানং. সঙ্ঘসম্মুখতা পরিহাযতি সম্মতপুগ্গলেহেৰ ৰূপসমনতো.

নন্তি ৰিৰাদাধিকরণং. ‘‘ন ছন্দাগতিং গচ্ছতী’’তিআদিনা (পরি. ৩৮৩) ৰুত্তং পঞ্চঙ্গসমন্নাগতং. গুল়্হকাদীসু অলজ্জুস্সন্নায পরিসায গুল়্হকো সলাকগ্গাহো কাতব্বো; লজ্জুস্সন্নায ৰিৰটকো, বালুস্সন্নায সকণ্ণজপ্পকো. যস্সা কিরিযায ধম্মৰাদিনো বহুতরা, সা যেভুয্যসিকাতি আহ – ‘‘ধম্মৰাদীনং যেভুয্যতাযা’’তিআদি.

এৰং ৰিনিচ্ছিতন্তি আপত্তিং দস্সেত্ৰা রোপনৰসেন ৰিনিচ্ছিতং, পটিকম্মং পন আপত্তাধিকরণসমথে পরতো আগমিস্সতি. ন সমণসারুপ্পং অস্সামণকং, সমণেহি অকাতব্বং, তস্মিং. অজ্ঝাচারে ৰীতিক্কমেসতি. পটিচরতোতি পটিচ্ছাদেন্তস্স. পাপুস্সন্নতায পাপিযো, পুগ্গলো, তস্স কাতব্বকম্মং তস্সপাপিযসিকং.

সম্মুখাৰিনযেনেৰ ৰূপসমো নত্থি পটিঞ্ঞায, তথারূপায খন্তিযা ৰা ৰিনা অৰূপসমনতো. এত্থাতি আপত্তিদেসনাযং. পটিঞ্ঞাতে আপন্নভাৰাদিকে করণকিরিযা, ‘‘আযতিং সংৰরেয্যাসী’’তি, পরিৰাসদানাদিৰসেন চ পৰত্তং ৰচীকম্মং পটিঞ্ঞাতকরণং.

যথানুরূপন্তি ‘‘দ্ৰীহি চতূহি তিহি একেনা’’তি এৰং ৰুত্তনযেন যথানুরূপং. এত্থাতি ইমস্মিং সুত্তে, এতস্মিং ৰা সমথৰিচারে. ৰিনিচ্ছযনযোতি ৰিনিচ্ছযে নযমত্তং. তেনাহ ‘‘ৰিত্থারো পনা’’তিআদি.

৪৭. সঙ্খেপতোৰ ৰুত্তো, ন সমথক্খন্ধকে ৰিয ৰিত্থারতো. তথাতি ইমিনা ‘‘ধম্মা’’তি পদং আকড্ঢতি, এত্থ ইতি-সদ্দো আদিঅত্থো, এৰমাদিনা ইমিনা পকারেনাতি ৰাতি ৰুত্তং হোতি. বোধিপক্খিযধম্মানং একন্তানৰজ্জভাৰতো নত্থি অধম্মভাৰো, ভগৰতো দেসিতাকারং হাপেত্ৰা ৰড্ঢেত্ৰা ৰা কথনং যথাধম্মং অকতন্তি কত্ৰা অধম্মভাৰোতি দস্সেন্তো আহ – ‘‘তযো সতিপট্ঠানা’’তিআদি.

নিয্যানিকন্তি সপাটিহীরং অপ্পটিৰানং হুত্ৰা পৰত্ততি. তথেৰাতি ইমিনা ‘‘এৰং অম্হাক’’ন্তিআদিনা ৰুত্তমত্থং আকড্ঢতি. ভূতেন…পে… কাতব্বকম্মং ধম্মো নাম যথাধম্মং করণতো, ৰুত্তৰিপরিযাযতো ইতো পরং অধম্মো. অযং ৰিনযো নাম রাগাদীনং সংৰরণতো পহানতো পটিসঙ্খানতো চ. অযং অৰিনযো নাম রাগাদীনং অৰিনযনতো. অযং ৰিনযো নাম যথাৰিনযকরণতো, ৰুত্তৰিপরিযাযেন ইতরো অৰিনযো. ৰত্থুসম্পত্তিআদিনা এৰ সব্বেসং ৰিনযকম্মানং অকুপ্পতাতি আহ – ‘‘ৰত্থুসম্পত্তি…পে… অযং ৰিনযো নামা’’তি, তপ্পটিপক্খতো অৰিনযো ৰেদিতব্বো. তেনাহ ‘‘ৰত্থুৰিপত্তী’’তিআদি.

সম্মাপটিপত্তিযা নযনট্ঠেন যথাৰুত্তো ধম্মো এৰ নেত্তি, ততো এৰ সত্তস্স ৰিয রজ্জু অসিথিলপৰত্তিহেতুতায ধম্মরজ্জূতি অত্থো ৰুত্তো. সুত্তন্তপরিযাযেন তাৰ দস কুসলকম্মপথা ধম্মোতি এৰং ৰুত্তা. সা এৰ ৰা হোতু ধম্মনেত্তি, যো ইধ ইমিস্সা ৰণ্ণনায, ‘‘ছত্তিংস বোধিপক্খিযধম্মা’’তিআদিনা ধম্মেন চ ৰিনযেন চ ৰুত্তো, সো এৰ ৰা ধম্মনেত্তি হোতূতি আনেত্ৰা যোজনা. তায ধম্মনেত্তিযা সমেতি তায যথাৰুত্তায ধম্মনেত্তিযা সংসন্দতি, একলক্খণমেৰ হোতীতি অত্থো. এৰং ৰিৰাদৰত্থুভূতো ধম্মো চে ‘‘ধম্মো’’তি, অধম্মো চে ‘‘অধম্মো’’তি, ৰিনযো চে ‘‘ৰিনযো’’তি, অৰিনযো চে ‘‘অৰিনযো’’তি নিচ্ছিনন্তেন একচ্চানং ৰিৰাদাধিকরণমেৰ দস্সিতং তস্স ৰূপসমধম্মানং অপরিযোসাপিতত্তা.

৪৮. তং পনেতন্তি ৰিৰাদাধিকরণং পচ্চামসতি. ৰারে অত্থসংৰণ্ণনাৰসেন পত্তেপি. দ্ৰীহীতি যস্মিং আৰাসে ৰিৰাদাধিকরণং উপ্পন্নং, তত্থ ৰাসীহি দ্ৰীহিপি ভিক্খূহি অতিরেকতরা.

৪৯. খন্ধসামন্তন্তি আপত্তিক্খন্ধভাৰেন সমীপং. আপত্তিসামন্তং নাম পুব্বভাগা আপজ্জিতব্বআপত্তি. মেথুনরাগৰসেন কাযসংসগ্গে দুক্কটস্স ৰত্থূতি আহ – ‘‘পঠমপারাজিকস্স পুব্বভাগে দুক্কট’’ন্তি. সেসানং তিণ্ণং পারাজিকানং পুব্বভাগে থুল্লচ্চযমেৰ.

৫০. পরিক্কমিত্ৰা উপক্কমিত্ৰা. আপত্তাধিকরণং দস্সিতং তত্থেৰ ৰিসেসতো পটিঞ্ঞায কারেতব্বতায ইচ্ছিতব্বত্তা.

৫২. কম্মস্স ৰত্থু দস্সিতং ন সমথোতি অধিপ্পাযো. ননু চাযং সমথাধিকারোতি? সচ্চং, সমথস্স পন কারণে দস্সিতে সমথো দস্সিতোৰ হোতীতি দস্সেতুং ‘‘এৰরূপস্স হী’’তিআদি ৰুত্তং.

৫৩. ইদং কম্মন্তি ‘‘ইদং অম্হাকং ভণ্ডনজাতান’’ন্তিআদিনা ৰুত্তকম্মং. তিণৰত্থারকসদিসত্তাতি তংসদিসতায তব্বোহারোতি দস্সেতি যথা – ‘‘এস ব্রহ্মদত্তো’’তি. আকারমত্তমেৰ তিণৰত্থারককম্মং নাম, ন পন তস্স সব্বসো করণৰিধানং. তেনাহ ‘‘খন্ধকে’’তিআদি. গিহীনং হীনেন খুংসনৰম্ভনং যথা ‘‘তিলসংগুল়িকা নত্থী’’তি. ধম্মিকপটিস্সৰেসু ৰিসংৰাদনৰসেন আপন্না আপত্তি. অস্সাতি কিচ্চাধিকরণস্স. সম্মুখাৰিনযেনেৰ ৰূপসমো সঙ্ঘসম্মুখতাদিনাৰ ৰূপসমনতো.

৫৪. সোতাপত্তিফলসচ্ছিকিরিযৰচনতো কোসম্বিযসুত্তে (ম. নি. ১.৪৯২) সোতাপত্তিমগ্গসম্মাদিট্ঠি কথিতা, ইধ পন ‘‘দিট্ঠিসামঞ্ঞগতো ৰিহরতি’’চ্চেৰ ৰুত্তত্তা, ‘‘ইমস্মিং সুত্তে সোতাপত্তিফলসম্মাদিট্ঠি ৰুত্তাতি ৰেদিতব্বা’’তি ৰুত্তং. পাপকম্মস্স অপ্পতা মহন্ততা সাৰজ্জভাৰস্স মুদুতিক্খভাৰেন ৰেদিতব্বাতি আহ ‘‘অণুন্তি অপ্পসাৰজ্জং. থূলন্তি মহাসাৰজ্জ’’ন্তি. সেসং সুৰিঞ্ঞেয্যমেৰ.

সামগামসুত্তৰণ্ণনায লীনত্থপ্পকাসনা সমত্তা.

৫. সুনক্খত্তসুত্তৰণ্ণনা

৫৫. হেট্ঠিমমগ্গেহি ঞাতমরিযাদায পজাননতো অঞ্ঞা, মগ্গপঞ্ঞা. তস্স ফলভাৰতো অগ্গফলপঞ্ঞা, তংসহগতা সম্মাসঙ্কপ্পাদযো চ ‘‘অঞ্ঞা’’তি ৰুত্তাতি আহ ‘‘অঞ্ঞাতি অরহত্ত’’ন্তি. চতূহি পদেহি কথিতা, ‘‘পরিচিণ্ণা মে ভগৰা’’তিআদীসু ৰিয ন একপদেনেৰ. ‘‘লোকুত্তরো ধম্মো অধিগতো মযা’’তি মঞ্ঞনামত্তং অধিমানোতি দস্সেন্তো, ‘‘অপ্পত্তে পত্তসঞ্ঞিনো’’তিআদিমাহ.

৫৬. ইদং ঠানন্তি ইদং ওভাসাদিসম্মুতিহেতুভূতং উল়ারতরং উদযব্বযঞাণং. উল়ারতরভাৰেন হি তং মগ্গফলপঞ্ঞায পচ্চযো হুত্ৰা যাথাৰতো দুব্বিঞ্ঞেয্যতায ৰিপস্সকং ৰিসংৰাদেতি. তেনাহ ‘‘অৰিভূতং অন্ধকার’’ন্তি. ইমং পঞ্হন্তি ইমং সুত্তং গম্ভীরং লোকুত্তরপটিসংযুত্তং অত্তনা ঞাতুং ইচ্ছিতং অত্থং. উগ্গহেত্ৰাতি কেৰলং পিটকসম্পাদনৰসেনেৰ উগ্গণ্হিত্ৰা. তেনাহ ‘‘অজানিত্ৰা’’তি. ৰিসেৰমানাতি কিলেসৰিসে অৰমানেন্তা, সাসনস্স ৰা অনুপকারৰিরূপপচ্চযে সেৰমানা. এৰমস্সাতি এৰং ৰুত্তনযেন তেসং করণহেতু অস্স চিত্তস্স ধম্মদেসনাৰসেন পৰত্তস্স. অঞ্ঞথাভাৰো অদেসেতুকামতা হোতি. তন্তি যথাৰুত্তমত্থং সন্ধায. এতন্তি ‘‘তস্সপি হোতি অঞ্ঞথত্ত’’ন্তি এৰং ৰুত্তং.

৫৮. কিলেসেহি আমসীযতীতি আমিসং, লোকেপরিযাপন্নং আমিসন্তি ইধ পঞ্চ কামগুণা অধিপ্পেতাতি তেসু ৰট্টামিসভাৰেপি লভিতে কামামিসভাৰো সিদ্ধোতি আহ – ‘‘ৰট্টামিসকামামিসলোকামিসভূতেসূ’’তি. কামগুণা হি ৰট্টস্স ৰড্ঢনতো ৰট্টামিসং, কামেতব্বতো কামতণ্হায আমসিতব্বতো কামামিসং, যেভূয্যতো সত্তলোকস্স আমিসভাৰতো লোকামিসং. কামগুণসভাগাতি কামগুণানুলোমা কামগুণপটিসংযুত্তা. আনেঞ্জসমাপত্তিপটিসংযুত্তাযাতি কিলেসিঞ্জনরহিততায ইধ আনেঞ্জাতি অধিপ্পেতাহি হেট্ঠিমাহি অরূপসমাপত্তীহি পটিসংযুত্তায. এৰরূপোতি লোকামিসভূতেসু পচ্চযেসু অধিমুত্তো তন্নিন্নো তগ্গরুকো তপ্পব্ভারো. এত্তাৰতাতি এৰং সদ্ধানং মনুস্সানং দস্সনেন তেসং পৰত্তিতাসযেন চ. সীসং নিক্খন্তং হোতীতি লাভাসায সীসং বহি নিক্খন্তং ৰিয হোতি. উদরং ফলিতন্তি অতিবহুভণ্ডং পক্খিপিযমানং পসিব্বকং ৰিয লদ্ধব্বস্স অতিপহূতভাৰেন উদরং ফীতং হোতি.

৫৯. যথা পুরিমা দ্ৰে অরূপসমাপত্তিযো অত্তনো পচ্চনীককিলেসেহি অনিঞ্জনতো ‘‘অনিঞ্জা’’তি ৰুচ্চন্তি, এৰং ইতরাপি. তং পৰুত্তন্তি লোকামিসসংযোজনং ৰিগতং.

৬০. নিঘংসন্তি ‘‘এত্তকো অয’’ন্তি পরিচ্ছেদন্তি অত্থো. সিলেসেনাতি চম্মকারসিলেসাদিসিলেসেন, ৰজিরলেপসিলেসে ৰত্তব্বমেৰ নত্থি. তং ভিন্নন্তি আনেঞ্জসংযোজনং ভিন্নং ৰিধমিতং সমতিক্কন্তং তাসু সমাপত্তীসু অপেক্খাভাৰতো. অজ্ঝাসযেন অসম্বদ্ধত্তা ৰুত্তং – ‘‘দ্ৰেধাভিন্না সেলা ৰিয হোতী’’তি. তেনাহ – ‘‘তং সমাপজ্জিস্সামীতি চিত্তং ন উপ্পজ্জতী’’তি.

৬১. ৰন্তন্তি ছড্ডিতং, ৰিস্সট্ঠন্তি অত্থো.

৬২. উপরিসমাপত্তিলাভিনোতি এত্থ উপরিসমাপত্তীতি অরহত্তফলসমাপত্তি অধিপ্পেতা, অরহতো চ মগ্গাধিগমেনেৰ অনাগামিফলসমাপত্তি, সেক্খানং ৰিসযা হেট্ঠিমা ফলসমাপত্তিযো পটিপ্পস্সদ্ধা. লোকিযা পন নিকন্তিপ্পহানেন পটিনিস্সট্ঠাতি আহ – ‘‘হেট্ঠা…পে… ন উপ্পজ্জতী’’তি.

৬৩. ‘‘পঞ্চ খো ইমে, সুনক্খত্ত, কামগুণা’’তিআদিনা আরদ্ধদেসনা, ‘‘সম্মা নিব্বানাধিমুত্তো পুরিসপুগ্গলো’’তি অরহত্তকিত্তনেন নিট্ঠাপিতাতি ততো পরং, ‘‘ঠানং খো পনা’’তিআদিকা দেসনা, ‘‘পাটিযেক্কো অনুসন্ধী’’তি ৰুত্তা. তেনাহ ‘‘হেট্ঠা হী’’তিআদি. তত্থ যথা খীণাসৰস্স সমাপত্তিলাভিনোতি যোজনা, এৰং ৰা খীণাসৰস্স সুক্খৰিপস্সকস্সাতি যোজেতব্বা. পটিক্খিত্তং অট্ঠকথাযং. তস্স পটিক্খেপস্স কারণং দস্সেতুং ‘‘সমাপত্তিলাভিনো হী’’তিআদি ৰুত্তং. যথা সুক্খৰিপস্সকো অধিমানিকো সমাপত্তিলাভিনো সমানযোগক্খমো অপ্পত্তে পত্তসঞ্ঞিতায ভেদাভাৰতো, এৰং সুক্খৰিপস্সকো খীণাসৰো সমানযোগক্খমো খীণাসৰভাৰেন ৰিসেসাভাৰতো, তস্মা ‘‘সমাপত্তিলাভিম্হি কথিতে ইতরোপি কথিতোৰ হোতী’’তি ৰুত্তং. দ্ৰিন্নং ভিক্খূনন্তি সমাপত্তিলাভিনো অধিমানিকস্স খীণাসৰস্স চ. তেনেৰাহ ‘‘পুথুজ্জনস্স তাৰা’’তিআদি.

যদগ্গেনাতি যেন ভাগেন. যদিপি খীণাসৰস্স অসপ্পাযারম্মণং কিলেসানং উপ্পত্তিযা পচ্চযো ন হোতি তেসং সব্বসো সমুচ্ছিন্নত্তা. সন্তৰিহারপরিপন্থো পন সিযা ৰিসভাগতোতি ৰুত্তং – ‘‘খীণাসৰস্সপি অসপ্পাযমেৰা’’তি. তেনাহ – ‘‘ৰিসং নাম…পে… ৰিসমেৰা’’তি. এতেন ‘‘যথা ৰিসজাননং অপ্পমাণং, ৰিকারুপ্পাদনতো পন তং পরিহরিতব্বং, এৰং পরিঞ্ঞাতম্পি ৰত্তু অত্থৰিসেসাভাৰেন একরূপমেৰাতি তং পরিহরিতব্বমেৰা’’তি দস্সেতি. তেনাহ ‘‘ন হী’’তিআদি. ন হি অসংৰুতেন ভৰিতব্বং অসারুপ্পভাৰতো. যুত্তপযুত্তেনেৰাতি সভাগারম্মণস্স আলোকনাদীসু যুত্তেনেৰ ভৰিতুং ৰট্টতি.

৬৪. যত্থ সযং নিপততি উপ্পজ্জতি, তস্স সন্তানস্স ৰিপ্পসন্নৰসেন রুপ্পনতো, ৰিসসঙ্খাতস্স দুক্খস্স মূলভাৰতো চ ‘‘অৰিজ্জাসঙ্খাতো ৰিসদোসো’’তি ৰুত্তং. রুপ্পতীতি কত্তব্বাদিমুচ্ছাপাদনেন ৰিকারং উপ্পাদেতি. অনুদ্ধংসেয্যাতি ৰিবাধেয্য. রাগো হি উপ্পজ্জমানোৰ কুসলচিত্তপ্পৰত্তিযা ওকাসং অদেন্তো তং ৰিবাধতি; তথাভূতো সদ্ধাসিনেহস্স সমথৰিপস্সনাভিৰুড্ঢিযা ৰমনেন চ তং ৰিসোসেতি মিলাপেতি. তেনাহ ‘‘সোসেয্য মিলাপেয্যা’’তি. সগহণসেসন্তি গহেতব্বৰিসং সাৰসেসং কত্ৰাতি অত্থো. ন অলং ন সমত্থন্তি অনলং. সূকপরিযাযো পাল়িযং ৰুত্তো সুক-সদ্দোতি আহ – ‘‘ৰীহিসুকাদি চ সূক’’ন্তি.

সউপাদানসল্লুদ্ধারো ৰিয অপ্পহীনো অৰিজ্জাৰিসদোসো দট্ঠব্বো মহানত্থুপ্পাদনতো. অসপ্পায…পে… অসংৰুতকালো দট্ঠব্বো অত্তভাৰস্স অপরিহরণভাৰতো. মরণং ৰিয সিক্খং পচ্চক্খায হীনাযাৰত্তনং অধিসীলসঙ্খাতস্স আযুনো অপেতত্তা. মরণমত্তং দুক্খং ৰিয আপত্তিযা আপজ্জনং যথাৰুত্তস্স আযুনো উপপীল়নকভাৰতো. ইমিনাৰ নযেন ওপম্মসংসন্দনন্তি এত্থ অনুপাদিসেসসল্লুদ্ধারো ৰিয পহীনো অৰিজ্জাৰিসদোসো; সপ্পায…পে… সুসংৰুতকালো, তদুভযেন ৰণে পুথুত্তং ন গতে মরণাভাৰো ৰিয সিক্খায অপচ্চক্খানং, মরণমত্তদুক্খাভাৰো ৰিয অঞ্ঞতরায সংকিলিট্ঠায আপত্তিযা অনাপজ্জনন্তি যোজনা ৰেদিতব্বা.

৬৫. সতিযাতি এত্থ যস্মা ‘‘অরিযাযা’’তি ন ৰিসেসিতন্তি আহ – ‘‘সতি পঞ্ঞাগতিকা’’তিআদি. পঞ্ঞা চেত্থ লোকিযা অধিপ্পেতা, ন লোকুত্তরাতি আহ – ‘‘পরিসুদ্ধায ৰিপস্সনাপঞ্ঞাযা’’তি.

খীণাসৰস্স বলন্তি উল়ারতমেসু দিব্বসদিসেসুপি আরম্মণেসু মনচ্ছট্ঠানং ইন্দ্রিযানং অনুপনমনহেতুভূতং সুসংৰুতকারিসঙ্খাতং খীণাসৰবলং দস্সেন্তো, ‘‘সংৰুতকারী’’তি ৰুত্তং, উক্কংসগতসতিৰেপুল্লত্তা যথা অসংৰরস্স অসংৰরো হোতি, এৰং সতিসম্পজঞ্ঞবলেন চক্খাদিদ্ৰারানি সংৰরিত্ৰা দস্সনাদিকিচ্চকারী. এৰং জানিত্ৰাতি ‘‘উপধি দুক্খস্স মূল’’ন্তি এৰং ৰিপস্সনাপঞ্ঞাসহিতায মগ্গপঞ্ঞায জানিত্ৰা. উপধীযতি দুক্খং এতেহীতি উপধী, কিলেসাতি আহ – ‘‘কিলেসুপধিপহানা নিরুপধী’’তি. ততো এৰ উপাদীযতি দুক্খং এতেহীতি কিলেসা ‘‘উপাদানা’’তিপি ৰুচ্চন্তীতি আহ – ‘‘নিরুপাদানোতি অত্থো’’তি. উপধী সম্মদেৰ খীযন্তি এত্তাতি উপধিসঙ্খযো, নিব্বানন্তি আহ – ‘‘উপধীনং সঙ্খযভূতে নিব্বানে’’তি. আরম্মণতোতি আরম্মণং কত্ৰা তদারম্মণায ফলৰিমুত্তিযা ৰিমুত্তো. কামুপধিস্মিং কাযং উপসংহরিস্সতীতি ‘‘কামেসেৰিস্সামী’’তি তত্থ কাযং উপনামেস্সতি; কাযূপসংহারো তাৰ তিট্ঠতু, তথা চিত্তং ৰা উপ্পাদেস্সতীতি এতং কারণং নত্থীতি. সেসং সুৰিঞ্ঞেয্যমেৰ.

সুনক্খত্তসুত্তৰণ্ণনায লীনত্থপ্পকাসনা সমত্তা.

৬. আনেঞ্জসপ্পাযসুত্তৰণ্ণনা

৬৬. খণপভঙ্গুতায ন নিচ্চা ন ধুৰাতি অনিচ্চা. ততো এৰ পণ্ডিতেহি ন ইচ্চা ন উপগন্তব্বাতিপি অনিচ্চা. সো চাযং অনিচ্চত্থো উদযৰযপরিচ্ছিন্নতায ৰেদিতব্বোতি দস্সেন্তো, ‘‘হুত্ৰা অভাৰট্ঠেন অনিচ্চা’’তি আহ; উপ্পজ্জিত্ৰা ৰিনস্সনতোতি অত্থো. অযঞ্চ অনিচ্চতা ৰক্খমানা চ তুচ্ছাদিতা দ্ৰিন্নম্পি কামানং সাধারণোতি আহ – ‘‘ৰত্থুকামাপি কিলেসকামাপী’’তি. রিত্তা ৰিৰিত্তা, তেসং নিচ্চসারাদীনং অত্তনি অভাৰতো তেহি ৰিসুংভূতা. যথা পন সব্বসো সভাৰরহিতমাকাসং ‘‘তুচ্ছং রিত্ত’’ন্তি ৰুচ্চতি, ন এৰমেতে. এতে পন কেৰলং নিচ্চসারাদিৰিরহতো এৰ তুচ্ছা রিত্তাতি দস্সেন্তো ‘‘ন পনা’’তিআদিমাহ. ‘‘ন হি তুচ্ছমুট্ঠি নাম নত্থী’’তি ইদং লোকসমঞ্ঞাৰসেন ৰুত্তং, লোকসমঞ্ঞা লোকিযকথা ন লঙ্ঘিতব্বা.

মুসাতি ইত্তরপচ্চুপট্ঠানতায ন দিস্সতীতি আহ ‘‘মুসাতি নাসনকা’’তি. ৰিসংৰাদনট্ঠেন ৰা মুসা. এতে হি অসুভাদিসভাৰাপি বালানং সুভাদিভাৰেন উপট্ঠহন্তা সুভাদিগ্গহণস্স পচ্চক্খভাৰেন সত্তে ৰিসংৰাদেন্তি. নস্সনসভাৰাতি খণভঙ্গত্তা ইত্তরপচ্চুপট্ঠানতায দিস্সমানা ৰিযপি হুত্ৰা অপঞ্ঞাযনকপকতিকা. তেনাহ ‘‘খেত্তং ৰিযা’’তিআদি. ধম্মসদ্দো চেত্থ ‘‘জাতিধম্মান’’ন্তিআদীসু (দী. নি. ২.৩৯৮) ৰিয পকতিপরিযাযো, তথা সভাৰসদ্দো চাতি দট্ঠব্বং. মোসধম্মাতি মোসনপকতিকা, কুসলভণ্ডহরণসভাৰাতি অত্থো. মাযাকতন্তি মাযায কতং উদকাদিমণিআদিআকারেন মাযাদিনা উপট্ঠাপিতং; মাযাকতং ৰিয মাযাকতং অঞ্ঞসভাৰা হুত্ৰা অতথা উপট্ঠহনতো. তেনাহ ‘‘যথা’’তিআদি. চক্খুপথে এৰ কতৰিজ্জায, ন ততো পরন্তি ৰুত্তং – ‘‘দস্সনূপচারে ঠিতস্সেৰ তথা পঞ্ঞাযতী’’তি. তযিদং সম্বরৰিজ্জাৰসেন ৰুত্তং.

এৰং তাৰকালিকভাৰেন কামানং মাযাকতভাৰং দস্সেত্ৰা ইদানি ততো অঞ্ঞেনপি পকারেন দস্সেতুং ‘‘যথা চা’’তিআদি ৰুত্তং. অনিচ্চাদিসভাৰানং কামানং নিচ্চাদিসভাৰদস্সনং ৰিপল্লাসসহগততায ৰেদিতব্বং. বালানং লাপনতোতি অপরিঞ্ঞাতৰত্থুকানং অন্ধবালানং পুগ্গলানং ৰিপল্লাসহেতুতো. মনুস্সলোকে ঠত্ৰা মনুস্সানং ৰা ৰসেন ভগৰতা ভাসিতত্তা ৰুত্তং – ‘‘দিট্ঠধম্মিকা কামাতি মানুসকা পঞ্চ কামগুণা’’তি. ততো এৰ চ ‘‘সম্পরাযিকাতি তে ঠপেত্ৰা অৰসেসা’’তিআদি ৰুত্তং. তত্থ দিট্ঠধম্মা পচ্চক্খসভাৰা আরম্মণভূতা এতাসং অত্থীতি দিট্ঠধম্মিকা. সম্পরাযিকে কামে আরব্ভ উপ্পন্নসঞ্ঞা সম্পরাযিকা. তে সমেচ্চ ধীযতি এত্থ আণাতি ধেয্যং, আণাপৰত্তিট্ঠানং. মারস্স ধেয্যন্তি মারধেয্যং তস্স ইস্সরিযপৰত্তনত্তা. তেনাহ ‘‘যেহী’’তিআদি. গহিতন্তি ৰিসযৰিসযীভাৰেন গহিতং, আরম্মণৰসেন আরম্মণকরণৰসেন চ গহিতন্তি অত্থো. তত্থ আরম্মণকরণৰসেন গহণং নাম ‘‘ইদং ময্হ’’ন্তি অৰিভাগেন পরিগ্গহকরণং; আরম্মণৰসেন পন গহণং ভাগসো আরম্মণানুভৰনন্তি ৰদন্তি. উভযস্সপি পন তণ্হারাগৰসেন গহণং সন্ধায, ‘‘উভযমেতং গহিত’’ন্তি ৰুত্তং. মারোতি কিলেসমারো. যদগ্গেন কিলেসমারো, তদগ্গেন দেৰপুত্তমারোপি তে অত্তনো ৰসং ৰত্তেতি. তং সন্ধাযাতি ধম্মমুখেন পুগ্গলগ্গহণং সন্ধায.

অপ্পহীনৰিপল্লাসা হি পুগ্গলা কামাধিমুত্তা মারস্স ইস্সরিযৰত্তনট্ঠানতায ‘‘মারধেয্য’’ন্তি ৰুত্তা, তথা মারস্স নিৰাপগোচরপরিযাযেহিপি তে এৰং ৰুত্তাতি দস্সেন্তো, ‘‘যথা চোল়স্সা’’তিআদিমাহ. নিৰপতীতি নিৰাপো, সো এৰ বীজন্তি নিৰাপবীজং. তেতি কামগুণা. যত্থাতি যস্মিং পদেসে.

মনসি ভৰাতি মানসাতি আহ ‘‘চিত্তসম্ভূতা’’তি. তে পন অৰিজ্জাদযো পাল়িযং আগতা. এৰঞ্হি লোহিতসন্নিস্সযো পুব্বো ৰিয অনুরোধূপনিস্সযো ৰিরোধোতি দস্সেন্তো, ‘‘মমাযিতে ৰত্থুস্মি’’ন্তিআদিমাহ. তেধাতি এত্থ ইধাতি নিপাতমত্তং ‘‘ইধাহং, ভিক্খৰে, ভুত্তাৰী অস্স’’ন্তিআদীসু (ম. নি. ১.৩০) ৰিয. কামলোকন্তি কামগুণসঙ্খাতং সঙ্খারলোকং, যত্থ ৰা লোকে কামগুণৰন্তং লোকং. চিত্তেন অধিট্ঠহিত্ৰাতি ঝানারম্মণং পটিভাগনিমিত্তং ভাৰনাচিত্তেন উপ্পাদেত্ৰা. পরিত্তং নাম ৰিক্খম্ভনঅসমত্থত্তা কিলেসেহি পরিতো খণ্ডিতং ৰিয হোতি. তস্স পটিক্খেপেনাতি পরিত্তভাৰপটিক্খেপেন. পমাণন্তিপি কামাৰচরমেৰ পাপকানং পমাণকরণধম্মানং ৰিক্খম্ভনৰসেন অপ্পজহনতো. তপ্পটিক্খেপৰসেন অপ্পমাণং নাম মহগ্গতন্তি আহ – ‘‘রূপাৰচরং অরূপাৰচর’’ন্তি. সমুচ্ছেদৰসেন কিলেসানং অপ্পহানেন মহগ্গতজ্ঝানম্পি সুভাৰিতং নাম ন হোতি, পগেৰ পরিত্তজ্ঝানন্তি আহ – ‘‘সুভাৰিতন্তি…পে… লোকুত্তরস্সেৰেতং নাম’’ন্তি. এতস্স ৰসেনাতি ‘‘সুভাৰিত’’ন্তি পদস্স ৰসেন.

তমেৰ পটিপদন্তি তমেৰ অভিজ্ঝাদিপহানাৰহং ঝানপটিপদং. অরহত্তে তস্স উপাযভূতায ৰিপস্সনায ৰা চতুত্থজ্ঝানে তস্স উপাযভূতে উপচারে ৰা সতি চিত্তং পসন্নমেৰ হোতীতি আহ – ‘‘অরহত্তং ৰা…পে… উপচারং ৰা’’তি. অধিমোক্খসম্পসাদোতি ‘‘অজ্জেৰ অরহত্তং গণ্হিস্সামী’’তি ৰা ৰিপস্সনায ৰীথিপটিপন্নত্তা; ‘‘অজ্জেৰ চতুত্থজ্ঝানং নিব্বত্তেস্সামী’’তি ৰা উপচারসমাধিনা চিত্তস্স সমাহিতত্তা অধিমুচ্চনভূতো সম্পসাদো. পটিলাভসম্পসাদোতি অরহত্তস্স চতুত্থজ্ঝানস্স ৰা অধিগমসঙ্খাতো সম্পসাদো. পটিলাভোপি হি কিলেসকালুসিযাভিভৰনতো চিত্তস্স সুপ্পসন্নভাৰাৰহত্তা ‘‘সম্পসাদো’’তি ৰুত্তো. পচ্চযাতি নামরূপপচ্চযা অৰিজ্জাদযো. সব্বথাতি সমুদযতো অত্থঙ্গমতো অস্সাদতো আদীনৰতো নিস্সরণতোতি সব্বপ্পকারেন. আসাতি অধিমুচ্চনৰসেন আসীসনা. তেনাহ – ‘‘আসা সন্তিট্ঠতি, অধিমোক্খং পটিলভতী’’তি.

পাদকন্তি পদট্ঠানং. কিলেসা সন্নিসীদন্তীতি নীৰরণসহগতা এৰ কিলেসা ৰিক্খম্ভনৰসেন ৰূপসমন্তি. সতীতি উপচারজ্ঝানাৰহা সতি সন্তিট্ঠতি. সঙ্খারগতন্তি ভাৰনায সমতায পৰত্তমানত্তা, ইমে ধম্মৰিচযসম্বোজ্ঝঙ্গাদযো একরসা হুত্ৰা পৰত্তন্তীতি, ভাৰনাচিত্তুপ্পাদপরিযাপন্নং সঙ্খারগতং ৰিভূতং পাকটং হুত্ৰা উপট্ঠাতি. চিত্তুপ্পাদোতি ভাৰনাচিত্তুপ্পাদো. লেপপিণ্ডেতি সিলেসপিণ্ডে লগ্গমানো ৰিয অপ্পিতো ৰিয হোতি. উপচারেন সমাধিযতি উপচারজ্ঝানেন সমাধিযতি. অযন্তি অযং দুৰিধোপি অধিমুচ্চনাকারো অধিমোক্খসম্পসাদো নাম. তস্মিং সম্পসাদে সতীতি এতস্মিং ৰিপস্সনালক্খণে, উপচারজ্ঝানে ৰা অধিমোক্খসম্পসাদে সতি. যো পন অরহত্তং ৰা পটিলভতি চতুত্থজ্ঝানং ৰা, তস্স চিত্তং ৰিপ্পসন্নং হোতিযেৰ, অযং নিপ্পরিযাযতো পটিলাভসম্পসাদো, এৰং সন্তেপি ইধামিপ্পেতমেৰ দস্সেতুং, ‘‘ইধ পনা’’তিআদি ৰুত্তং. ৰিপস্সনা হীতিআদি ৰুত্তস্স সমত্থনং. তত্থ পঞ্ঞাযাতি অরহত্তপঞ্ঞায. অধিমুচ্চনস্সাতি সদ্দহনং উস্সুক্কাপজ্জনস্স. উপচারন্তি উপচারজ্ঝানং. আনেঞ্জসমাপত্তিযা অধিমুচ্চনস্স কারণন্তি যোজনা.

এতরহি ৰাতি ইদানিমেৰ. আনেঞ্জং ৰাতি চতুত্থজ্ঝানং ৰা. সমাপজ্জতীতি অধিগচ্ছতি. ইদং হীতিআদিনা সঙ্খেপতো ৰুত্তমত্থং ৰিৰরতি. অরহত্তসচ্ছিকিরিযা নাম অগ্গমগ্গভাৰনায সতি অত্থতো আপন্না হোতি, অগ্গমগ্গপঞ্ঞা এৰ তদত্থং অধিমুচ্চিতব্বাতি দস্সেন্তো, ‘‘অথ ৰা’’তি ৰিকপ্পন্তরমাহ. তত্থ যথা নাম পাসাদস্স অত্থায সমানীতদব্বসম্ভারাৰযৰে অপ্পহোন্তে কূটাগারং কাতুং ন পহোন্তিযেৰ, এৰংসম্পদমিদন্তি দস্সেন্তো, ‘‘তং অনভিসম্ভুণন্তো আনেঞ্জং ৰা সমাপজ্জতী’’তি আহ. চতুসচ্চং ৰা সচ্ছিকরোতি হেট্ঠিমমগ্গাধিগমনৰসেন আনেঞ্জং ৰা সমাপজ্জতি উভযস্সপি হেতুপরিগ্গহিতত্তা.

তত্রাতি তস্মিং ‘‘পঞ্ঞায ৰা অধিমুচ্চতি, আনেঞ্জং ৰা সমাপজ্জতী’’তি যথাৰুত্তে ৰিসেসাধিগমে অযং ইদানি ৰুচ্চমানো যোজনানযো. এৰং হোতীতি ইদানি ৰুচ্চমানাকারেন চিত্তাভিনীহারো হোতি. কিচ্চন্তি পব্বজিতকিচ্চং. ততোতি অরহত্তাধিগমনতো. ওসক্কিতমানসোতি সংকুচিতচিত্তো. অন্তরা ন তিট্ঠতীতি অসমাহিতভূমিযং ন তিট্ঠতি. ইদানি যথাৰুত্তমত্থং উপমায ৰিভাৰেতুং ‘‘যথা’’তিআদি ৰুত্তং. তত্রাযং সঙ্খেপত্থো – যথা তস্স পুরিসস্স ৰনমহিংসং গহেতুং উস্সাহৰতো ওসক্কন্তস্স সসগোধাদিগ্গহণে ৰত্তব্বমেৰ নত্থি, এৰং ইমস্সপি ভিক্খুনো অরহত্তং গহেতুং উস্সাহৰতো ততো ওসক্কিত্ৰা চতুত্থজ্ঝানসমাপজ্জনে ৰত্তব্বমেৰ নত্থীতি. এসেৰ নযোতি যথাৰুত্তং উপমং উপমাসংসন্দনঞ্চ মগ্গভাৰনাযোজনাযং চতুসচ্চসচ্ছিকিরিযাযোজনাযঞ্চ অতিদিসতি.

হেতুঅত্থজোতনো যন্তি নিপাতো, করণে ৰা এতং পচ্চত্তৰচনন্তি আহ ‘‘যেন কারণেনা’’তি. তস্স সংৰত্তনং অরহতি, তং ৰা পযোজনং এতস্সাতি তংসংৰত্তনিকং. ৰিঞ্ঞাণন্তি ৰিপাকৰিঞ্ঞাণং. আনেঞ্জসভাৰং উপগচ্ছতীতি আনেঞ্জূপগং. যথা কুসলং আনেঞ্জসভাৰং, এৰং তং ৰিপাকৰিঞ্ঞাণম্পি আনেঞ্জসভাৰং উপগতং অস্স ভৰেয্য. তেনাহ – ‘‘কাদিসমেৰ ভৰেয্যাতি অত্থো’’তি. কেচীতি অভযগিরিৰাসিনো. কুসলৰিঞ্ঞাণন্তি ৰিপাকৰিঞ্ঞাণম্পি তং কুসলং ৰিয ৰদন্তি. তন্নামকমেৰাতি কুসলং ৰিয আনেঞ্জনামকমেৰ সিযা. এত্থ চ পুরিমৰিকপ্পে ‘‘আনেঞ্জূপগ’’ন্তি তংসদিসতা ৰুত্তা, দুতিযৰিকপ্পে ততো এৰ তংসমঞ্ঞতা. সো পনাযমত্থোতি আনেঞ্জসদিসতায ৰিপাককালেপি তংনামকমেৰ অস্সাতি যথাৰুত্তো অত্থো. ইমিনা নযেনাতি ইমিনা ৰুত্তনযেন. এত্থ হি আনেঞ্জাভিসঙ্খারহেতুৰিপাকৰিঞ্ঞাণং ‘‘আনেঞ্জূপগং হোতি ৰিঞ্ঞাণ’’ন্তি ৰুত্তত্তা তংনামকমেৰ কত্ৰা দীপিতং. অরহত্তস্সাপীতি অপিসদ্দেন অগ্গমগ্গভাৰনাযপি হেট্ঠিমমগ্গভাৰনাযপীতি অত্থো সঙ্গহিতোতি দট্ঠব্বো. সমাধিৰসেন ওসক্কনা কথিতাতি ‘‘ৰিপুলেন মহগ্গতেন চেতসা ৰিহরেয্য’’ন্তি সমথনযং দস্সেত্ৰা দেসনা কথিতা.

৬৭. অযঞ্হি ভিক্খূতি যং উদ্দিস্স অযং দুতিযানেঞ্জসপ্পাযদেসনায ভিক্খু ৰুত্তো. পঞ্ঞৰন্ততরোতি ৰত্ৰা তং দস্সেতুং, ‘‘দ্ৰিন্নম্পি কম্মট্ঠানং একতো কত্ৰা সম্মসতী’’তি ৰুত্তং. হেট্ঠিমস্স হি ‘‘যে চ দিট্ঠধম্মিকা কামা’’তিআদিনা রূপসদ্দগন্ধরসফোট্ঠব্বানেৰ রূপমুখেন ৰিপস্সনাভিনিৰেসো কতো, ইমস্স পন ‘‘যং কিঞ্চি রূপ’’ন্তিআদিনা সকলরূপধম্মৰসেন. ভগৰা হি কম্মট্ঠানং কথেন্তো কম্মট্ঠানিকস্স ভিক্খুনো কারণবলানুরূপমেৰ পঠমং ভাৰনাভিনিৰেসং দস্সেতি; সো পচ্ছা ঞাণে ৰিপুলং গচ্ছন্তে অনৰসেসতো ধম্মং পরিগ্গণ্হাতি. রূপপটিবাহনেনাতি রূপৰিরাগভাৰনায সব্বসো সমতিক্কমেন. সব্বত্থাতি সব্বেসু ততিযানেঞ্জাদীসু.

পঞ্ঞৰন্ততরোতি পঞ্ঞুত্তরো. তিণ্ণম্পি কম্মট্ঠানং একতো কত্ৰাতি কামগুণা সব্বরূপধম্মা কামসঞ্ঞাতি এৰং তিণ্ণং পুগ্গলানং কম্মট্ঠানৰসেন তিধা ৰুত্তে সম্মসনূপগধম্মে একতো কত্ৰা, ‘‘সব্বমেতং অনিচ্চ’’ন্তি একজ্ঝং গহেত্ৰা, সম্মসতি যথা – ‘‘যং কিঞ্চি সমুদযধম্মং, সব্বং তং নিরোধধম্ম’’ন্তি (দী. নি. ১.২৯৮; সং. নি. ৫.১০৮১; মহাৰ. ১৬; চূল়নি. অজিতমাণৰপুচ্ছানিদ্দেস ৪, ৭, ৮; তিস্সমেত্তেয্যমাণৰপুচ্ছানিদ্দেস ১০, ১১; পটি. ম. ২.৩০). তেনাহ – ‘‘উভযমেতং অনিচ্চ’’ন্তিআদি. কামরূপসঞ্ঞাৰসেন দিট্ঠধম্মিকসম্পরাযিকভেদতো অট্ঠ একেককোট্ঠাসাতি এৰং কতং উভযন্তি ৰুত্তন্তি আহ – ‘‘দিট্ঠধম্মিক…পে… ৰসেন সঙ্খিপিত্ৰা উভযন্তি ৰুত্ত’’ন্তি. তণ্হাদিট্ঠিৰসেনাতি তণ্হাভিনন্দনাৰসেন ‘‘এতং মমা’’তি, দিট্ঠাভিনন্দনাৰসেন ‘‘এসো মে অত্তা’’তি এৰং অভিনন্দিতুং. এসেৰ নযোতি ইমিনা তণ্হাদিট্ঠিৰসেন ‘‘এতং মম, এসো মে অত্তা’’তি অভিনন্দিতুং অজ্ঝোসায গিলিত্ৰা পরিনিট্ঠাপেত্ৰা ঠাতুন্তি ইমমত্থং অতিদিসতি. কামপটিবাহনেনাতি ইদং আগমনপটিপদাদস্সনত্থং, ৰণ্ণভণনত্থঞ্চ ৰুত্তং. রূপপটিবাহনং হিস্স আসন্নং, ততোপি আকাসানঞ্চাযতনসমতিক্কমো, তংসমতিক্কমেন সহেৰ সব্বে তা ৰিপস্সনাৰসেন ওসক্কনা কথিতা ‘‘উভযমেতং অনিচ্চ’’ন্তিআদিৰচনতো.

৬৮. ইধ অত্তনো চাতি আকিঞ্চঞ্ঞাযতনকম্মট্ঠানং সন্ধাযাহ. নিরুজ্ঝন্তি তপ্পটিবদ্ধছন্দরাগনিরোধেন, সমাপজ্জনক্খণে পন অনুপ্পাদনেনপি. তেনাহ ‘‘আকিঞ্চঞ্ঞাযতনং পত্ৰা’’তি. অতপ্পকট্ঠেনাতি উল়ারতরভাৰেন ঝানসমাপত্তিযা অতিত্তিকরভাৰেন. তমেৰ পটিপদন্তি আকিঞ্চঞ্ঞাযতনভাৰনমাহ. সমাধিৰসেন ওসক্কনা কথিতা ততিযারুপ্পকম্মট্ঠানস্স ৰুত্তত্তা ‘‘যত্থেতা’’তিআদিনা.

ইধ অত্তনোতি দ্ৰিকোটিকসুঞ্ঞতামনসিকারসঙ্খাতং ৰিপস্সনাকম্মট্ঠানং. হেট্ঠা ৰুত্তপটিপদন্তি অনন্তরং ৰুত্তআকিঞ্চঞ্ঞাযতনকম্মট্ঠানং. সতি সমথভাৰনাযং সুঞ্ঞতামনসিকারস্স ইধ সাতিসযত্তা ৰুত্তং. ‘‘দুতিযাকিঞ্চঞ্ঞাযতনে ৰিপস্সনাৰসেন ওসক্কনা কথিতা’’তি.

৭০. ততিযাকিঞ্চঞ্ঞাযতনে অত্তনোতি চতুকোটিকসুঞ্ঞতামনসিকারসঙ্খাতং ৰিপস্সনাকম্মট্ঠানং. এত্থাতি এতস্মিং সুঞ্ঞতানুপস্সনাধিকারে. ক্ৰচীতি কত্থচি ঠানে, কালে, ধম্মে ৰা. অথ ৰা ক্ৰচীতি অজ্ঝত্তং, বহিদ্ধা ৰা. অত্তনো অত্তানন্তি সকত্তানং. ‘‘অযং খো, ভো ব্রহ্মা…পে… ৰসী পিতা ভূতভব্যান’’ন্তিআদিনা (দী. নি. ১.৪২) পরপরিকপ্পিতং অত্তানঞ্চ কস্সচি কিঞ্চনভূতং ন পস্সতীতি দস্সেন্তো ‘‘কস্সচী’’তিআদিমাহ. তত্থ পরস্সাতি ‘‘পরা পজা’’তি ‘‘পরো পুরিসো’’তি চ এৰং গহিতস্স. ন চ মম ক্ৰচনীতি এত্থ মম-সদ্দো অট্ঠানপযুত্তোতি আহ ‘‘মমসদ্দং তাৰ ঠপেত্ৰা’’তি. পরস্স চাতি অত্ততো অঞ্ঞস্স, ‘‘পরো পুরিসো নাম অত্থি মমত্থায সজিতো, তস্স ৰসেন ময্হং সব্বং ইজ্ঝতী’’তি এৰং একচ্চদিট্ঠিগতিকপরিকপ্পিতৰসেন পরং অত্তানং, তঞ্চ অত্তনো কিঞ্চনভূতং ন পস্সতীতি দস্সেন্তো, ‘‘ন চ ক্ৰচনী’’তিআদিমাহ. এত্থ চ নাহং ক্ৰচনীতি সকঅত্তনো অভাৰং পস্সতি. ন কস্সচি কিঞ্চনতস্মিন্তি সকঅত্তনো এৰ কস্সচি অনত্তনিযতং পস্সতি. ন চ, মমাতি এতং দ্ৰযং যথাসঙ্খ্যং সম্বন্ধিতব্বং, অত্থীতি পচ্চেকং. ‘‘ন চ ক্ৰচনি পরস্স অত্তা অত্থী’’তি পরস্স অত্তনো অভাৰং পস্সতি, ‘‘তস্স পরস্স অত্তনো মম কিস্মিঞ্চি কিঞ্চনতা ন চত্থী’’তি পরস্স অত্তনো অনত্তনিযতং পস্সতি. এৰং অজ্ঝত্তং বহিদ্ধা চ খন্ধানং অত্তত্তনিযসুঞ্ঞতা সুদ্ধসঙ্খারপুঞ্জতা চতুকোটিকসুঞ্ঞতাপরিগ্গণ্হনেন দিট্ঠা হোতি. হেট্ঠা ৰুত্তপটিপদন্তি ইধাপি আকিঞ্চঞ্ঞাযতনকম্মট্ঠানমেৰ ৰদতি. ৰিপস্সনাৰসেনেৰ ওসক্কনা কথিতা চতুকোটিকসুঞ্ঞতাদস্সনৰিসেসভাৰতো, তপ্পধানত্তা চস্স মনসিকারস্স.

ইধ অত্তনোতি নেৰসঞ্ঞানাসঞ্ঞাযতনকম্মট্ঠানমাহ. সব্বসঞ্ঞাতি রূপসঞ্ঞা পটিঘসঞ্ঞা নানত্তসঞ্ঞা হেট্ঠিমা তিস্সো অরূপসঞ্ঞাতি এৰং সব্বসঞ্ঞা অনৰসেসা নিরুজ্ঝন্তীতি ৰদন্তি. ‘‘হেট্ঠা ৰুত্তা’’তি পন ৰিসেসিতত্তা ইমস্মিং আগতা চতুত্থজ্ঝানসঞ্ঞাদযো অপি সঞ্ঞাতি অপরে. তন্তি সম্মুতিমত্তং কামসঞ্ঞাপটিবাহনৰসেনেৰ তেসং নানত্তসঞ্ঞাদিনিরোধস্স অত্থসিদ্ধত্তা. সমাধিৰসেন ওসক্কনা কথিতা নেৰসঞ্ঞানাসঞ্ঞাযতনভাৰনায সমথকম্মট্ঠানভাৰতো.

৭১. পুব্বে পঞ্চৰিধং কম্মৰট্টন্তি পুরিমকম্মভৰস্মিং মোহো অৰিজ্জা আযূহনা সঙ্খারা নিকন্তিতণ্হা উপগমনং উপাদানং চেতনা ভৰোতি এৰমাগতো সপরিক্খারো কম্মপ্পবন্ধো. ন আযূহিতং অস্সাতি ন চেতিতং পকপ্পিতং ভৰেয্য. এতরহি এৰং পঞ্চৰিধং ৰিপাকৰট্টন্তি ৰিঞ্ঞাণনামরূপসল়াযতনফস্সৰেদনাসঙ্খাতো পচ্চুপ্পন্নো ৰিপাকপ্পবন্ধো নপ্পৰত্তেয্য কারণস্স অনিপ্ফন্নত্তা. সচে আযূহিতং ন ভৰিস্সতীতি যদি চেতিতং পকপ্পিতং ন সিযা. যং অত্থীতি যং পরমত্থতো ৰিজ্জমানকং. তেনাহ ‘‘ভূত’’ন্তি. তঞ্হি পচ্চযনিব্বত্ততায ‘‘ভূত’’ন্তি ৰুচ্চতি. তং পজহামীতি তপ্পটিবদ্ধছন্দরাগপ্পহানেন ততো এৰ আযতিং অনুপ্পত্তিধম্মতাপাদনৰসেন পজহামি পরিচ্চজামি.

পরিনিব্বাযীতি সহ পরিকপ্পনেন অতীতত্থেতি আহ ‘‘পরিনিব্বাযেয্যা’’তি. পরিনিব্বাযেয্য নু খোতি ৰা পাঠো, সো এৰত্থো. ন কিঞ্চি কথিতন্তি নেৰসঞ্ঞানাসঞ্ঞাযতনসমাপত্তিযা সঙ্খারাৰসেসসুখুমভাৰেন ঞাণুত্তরস্সেৰ ৰিসযভাৰতো সরূপতো ন কিঞ্চি কথিতং, নযেন পনস্স ৰিসেসং ঞাপেতুকামত্তা. ভগৰতো কির এতদহোসি – ‘‘ইমিস্সংযেৰ পরিসতি নিসিন্নো আনন্দো অনুসন্ধিকুসলতায নেৰসঞ্ঞানাসঞ্ঞাযতনং পাদকং কত্ৰা ঠিতস্স ভিক্খুনো পটিসন্ধিং অরহত্তঞ্চ সন্ধায পঞ্হং পুচ্ছিস্সতি, ইমিনা পুচ্ছানুসন্ধিনা তমত্থং দেসেস্সামী’’তি. ওসক্কনায চ ইধাধিপ্পেতত্তা ভিন্নরসদেসনা হোতীতি পুচ্ছানুসন্ধি পুচ্ছিতা. তস্মিঞ্হি অসতি অনুসন্ধিভেদভিন্নেসা দেসনা, ন চ বুদ্ধাচিণ্ণা ভিন্নরসদেসনাতি. ৰিপস্সনানিস্সিতন্তি তন্নিস্সিতং. তস্স ভিক্খুনো. উপাদিযতি এতেনাতি চ উপাদানং. ন পরিনিব্বাযতি পহাতব্বস্স অপ্পজহনতো. তেনাহ ভগৰা – ‘‘ধম্মাপি খো, ভিক্খৰে, পহাতব্বা, পগেৰ অধম্মা’’তি (ম. নি. ১.২৪০). উপাদানসেট্ঠন্তি ইদং নেৰসঞ্ঞানাসঞ্ঞাযতনভৰস্স সব্বভৰগ্গতাদস্সনপরং, ন পন অরিযভৰগ্গস্স উপাদানসেট্ঠতাপটিসেধপরং.

৭৩. নিস্সাযাতি ভৰপরিযাপন্নং নাম ধম্মং নিস্সায তপ্পরিযাপন্নং নাম নিস্সায ওঘনিত্থরণা ভগৰতা অক্খাতা; অহো অচ্ছরিযমেতং, অহো অব্ভুতমেতন্তি.

নৰসুপি ঠানেসু সমথযানিকস্সেৰ ৰসেন দেসনায আগতত্তা, ইধ চ কস্সচিপি পাদকজ্ঝানস্স অনামট্ঠত্তা ৰুত্তং – ‘‘অরিযসাৰকোতি সুক্খৰিপস্সকো অরিযসাৰকো’’তি. নৰন্নম্পি কম্মট্ঠানং একতো কত্ৰা সম্মসতীতি ইদং ঝানধম্মেপি অনুস্সৰলদ্ধে গহেত্ৰা সম্মসনং সম্ভৰতীতি কত্ৰা ৰুত্তং; তেভূমকসঙ্খারগতং ইধ ৰুত্তন্তি অনৰসেসতো পরিগ্গহণং সন্ধায ৰুত্তং – ‘‘যাৰতা সক্কাযো’’তি.

এতং অমতন্তি অমতং নিব্বানং আরব্ভ পৰত্তিযা এতং অরহত্তং অমতরসং. তেনাহ – ‘‘এতং অমতং সন্তং, এতং পণীত’’ন্তি. ‘‘অনুপাদায কিঞ্চিপি অগ্গহেত্ৰা চিত্তং ৰিমুচ্চী’’তি ৰুত্তত্তাপি অনুপাদা চিত্তস্স ৰিমোক্খো নিব্বানং অঞ্ঞত্থ সুত্তে ৰুচ্চতি.

তিণ্ণং ভিক্খূনন্তি অভিনিৰেসভেদেন তিৰিধানং. পাদকং কত্ৰা ঠিতস্স ওসক্কনায অভাৰে কারণং হেট্ঠা ৰুত্তনযেনেৰ ৰেদিতব্বং. সমোধানেত্ৰাতি সম্মদেৰ ওদহিত্ৰা তস্মিং তস্মিং ঠানে অসঙ্করতো ৰৰত্থপেত্ৰা. সুকথিতং নাম হোতি কথেতব্বস্স অনৰসেসেত্ৰা কথিতত্তা.

আনেঞ্জসপ্পাযসুত্তৰণ্ণনায লীনত্থপ্পকাসনা সমত্তা.

৭. গণকমোগ্গল্লানসুত্তৰণ্ণনা

৭৪. যথা হেট্ঠিমসোপানফলকং ওরোহন্তস্স পচ্ছিমং নাম হোতি, এৰং আরোহন্তস্স পঠমং নাম হোতীতি ৰুত্তং – ‘‘যাৰ পচ্ছিমসোপানকল়েৰরাতি যাৰ পঠমসোপানফলকা’’তি. ৰত্থুং সোধেত্ৰাতি ৰত্থুৰিজ্জাচরিযেন ৰুত্তৰিধিনা পাসাদৰত্থুনো সোধনৰিধিং কত্ৰা. এত্থাতি পাসাদকরণে. সত্তধা ভিন্নস্স ৰালগ্গস্স অংসুকোটিৰেধকো ৰালৰেধি নাম. ঠানসম্পাদনন্তি ৰেসাখমণ্ডলাদীনং সম্পাদনং. মুট্ঠিকরণাদীহীতি উসুমুট্ঠিকরণজিযাগাহজিযাৰিজ্ঝাদীহি. এৰং গণাপেমাতি একং নাম একমেৰ, দ্ৰে দুকা চত্তারি, তীণি তিকানি নৰ, চত্তারি চতুক্কানি সোল়সাতিআদিনা এৰং গণনং সিক্খাপেম.

৭৫. কেরাটিকা হোন্তীতি সমযস্স অনুপক্কিলিট্ঠকরণমাযাসাঠেয্যেন সমন্নাগতা হোন্তি. তং দমনং জীৰিতহেতুপি নাতিক্কমতি, অযমস্স জাতিদোসাভাৰো.

৭৬. সতিসম্পজঞ্ঞাহি সমঙ্গিভাৰত্থাযাতি সততৰিহারিভাৰসাধনেহি সতিসম্পজঞ্ঞেহি সমন্নাগমত্থায. ননু চ খীণাসৰা সতিৰেপুল্লপ্পত্তা পঞ্ঞাৰেপুল্লপ্পত্তা চ, কথং তস্স সতিসম্পজঞ্ঞং পযোগসাধনীযং পৰত্তন্তি আহ ‘‘দ্ৰে হী’’তিআদি. সততৰিহারীতি সততং সমাপত্তিৰিহারিবহুলা, তস্মা তে ইচ্ছিতিচ্ছিতক্খণে ফলসমাপত্তিং সমাপজ্জন্তি. ৰুত্তৰিপরিযাযেন নোসততৰিহারিনো দট্ঠব্বা. তেনাহ ‘‘তত্থা’’তিআদি. অপ্পেতুং ন সক্কোতি অনাচিণ্ণভাৰতো.

তং ৰিতক্কেন্তোতি ‘‘সামণেরস্স সেনাসনং নত্থি, অরঞ্ঞঞ্চ সীহাদীহি সপরিস্সযং, কিং নু খো তস্স ভৰিস্সতী’’তি তং ৰিতক্কেন্তো. এৰরূপোতি এদিসো যথাৰুত্তসামণেরসদিসো খীণাসৰো. ইমে ধম্মেতি ইমস্মিং সুত্তে আগতে সীলাদিধম্মে. আৰজ্জিত্ৰাৰাতি অত্তনো পরিসুদ্ধসীলতাদিআৰজ্জনহেতু এৰ সমাপজ্জিতুং সক্খিস্সতি.

৭৮. ‘‘যেমে, ভো গোতমা’’তি ৰচনস্স সম্বন্ধং দস্সেতুং, ‘‘তথাগতে কিরা’’তিআদি ৰুত্তং. এৰন্তি ‘‘যেমে, ভো গোতমা’’তিআদিআকারেহি ৰত্তুমারদ্ধো.

অজ্জধম্মেসূতি অপুরাতনধম্মেসু. তক্কনমত্তানি হি তেহি কপ্পেত্ৰা সযংপটিভানং ৰিরচিতানি. পুরাতনতায পরিপুণ্ণতায একন্তনিয্যানিকতায চ পরমো উত্তমো. তেনাহ – ‘‘তেসু…পে… উত্তমোতি অত্থো’’তি. সেসং সুৰিঞ্ঞেয্যমেৰ.

গণকমোগ্গল্লানসুত্তৰণ্ণনায লীনত্থপ্পকাসনা সমত্তা.

৮. গোপকমোগ্গল্লানসুত্তৰণ্ণনা

৭৯. কম্মংযেৰ কম্মন্তো, সো এত্থ অত্থীতি কম্মকরণট্ঠানং ‘‘কম্মন্তো’’তি ৰুত্তং. তেনাহ ‘‘কম্মন্তট্ঠান’’ন্তি. তেহি ধম্মেহীতি বুদ্ধগুণেহি. তে পন সব্বঞ্ঞুতঞ্ঞাণপ্পমুখাতি কত্ৰা আহ ‘‘সব্বঞ্ঞুতঞ্ঞাণধম্মেহী’’তি. সব্বেন সব্বন্তি সব্বপ্পকারেন অনৰসেসং, এত্তকো গুণানং পকারভেদো, তেসু কিঞ্চিপি পকারং অনৰসেসেত্ৰা. সব্বকোট্ঠাসেহি সব্বন্তি যত্তকা গুণভাগা, তেহি সব্বেহি অনৰসেসং নিস্সেসমেৰ কত্ৰা. যোপি অহোসীতি যোপি কোসম্বিৰাসীনং ভিক্খূনং ৰসেন কোসম্বিযং কলহো অহোসি. সোপি তত্থেৰ উপ্পন্নট্ঠানেযেৰ উপ্পন্নমত্তো ৰূপসমিতো. পরিনিব্বুতকালে পনস্সাতি অস্স সম্মাসম্বুদ্ধস্স পরিনিব্বুতকালে পন. ভিয্যোসোমত্তায ভিক্খূ সমগ্গা জাতা, কথঞ্চ সংৰেগো জাতোতি দস্সেতুং ‘‘অট্ঠসট্ঠী’’তিআদি ৰুত্তং. সাতিসযং অভিণ্হঞ্চ উপসমপ্পত্তিযা অতিৰিয উপসন্তুপসন্তা. অনুসংযাযমানোতি অনু অনু সম্মদেৰ জানন্তো ৰিচারেন্তো ৰোসাসমানো. ‘‘অনুসঞ্ঞাযমানো’’তি ৰা পাঠো. তত্থ য-কারস্স ঞ-কারং কত্ৰা নিদ্দেসোতি আহ ‘‘অনুৰিচরমানো’’তি.

৮০. হেট্ঠিমপুচ্ছমেৰাতি গোপকমোগ্গল্লানেন পুচ্ছিতপুচ্ছমেৰ. সো হি ‘‘তেহি ধম্মেহী’’তিআদিনা, ‘‘অত্থি কোচি তুম্হাকং সাসনস্স সারভূতো ভিক্খূ’’তি পুচ্ছি. অযঞ্চ তমেৰ ‘‘পটিসরণো’’তি পরিযাযেন পুচ্ছি. অপ্পটিসরণেতি যং তুম্হে ভিক্খুং পটিবোধেয্যাথ, তাদিসস্স অভাৰেন অপ্পটিসরণে. তথাগতেন পৰেদিতো ধম্মো পটিসরণং এতেসন্তি ধম্মপটিসরণা. তেনাহ ‘‘ধম্মো অৰস্সযো’’তি.

৮১. আগচ্ছতীতি ৰাচুগ্গতভাৰেন আগচ্ছতি. ৰত্থুৰীতিক্কমসঙ্খাতে গরুগরুতরলহুলহুতরাদিভেদে অজ্ঝাচারে আপত্তিসমঞ্ঞাতি আহ – ‘‘আপত্তি…পে… আণাতিক্কমনমেৰা’’তি. যথাধম্মন্তি ধম্মানুরূপং. যথাসিট্ঠন্তি যথানুসিট্ঠং. ধম্মো নোতি এত্থ নো-সদ্দো অৰধারণে ‘‘ন নো সমং অত্থি তথাগতেনা’’তিআদীসু (খু. পা. ৬.৩; সু. নি. ২২৬) ৰিয. তেনেৰাহ ‘‘ধম্মোৰ কারেতী’’তি.

৮৩. ‘‘যথা তং তুম্হাদিসেহি রক্খকেহি গোপকেহী’’তি এৰং পসন্নৰেসেন অত্তানং উক্কংসাপেতুকামো. অরিযূপৰাদপাপং খমাপনে সতি অন্তরাযায ন হোতীতি আহ – ‘‘ইচ্চেতং কুসল’’ন্তি. গোনঙ্গলমক্কটোতি গোনঙ্গুট্ঠমক্কটো.

৮৪. অযং উক্কংসাপেতুং ইচ্ছিতং যথারদ্ধমত্থং ৰিসংৰাদেতি অৰণ্ণিতম্পি ৰণ্ণিতং কত্ৰা কথেন্তো; ইমস্স ৰচনস্স পটিক্খেপেন ইমিনা দাতব্বপিণ্ডপাতস্স অন্তরাযো মা হোতূতি এৰং পিণ্ডপাতং রক্খিতুং ন খো পন সক্কাতি যোজনা. ইদন্তি ‘‘ন খো, ব্রাহ্মণ, সো ভগৰা’’তিআদিদেসনং. অব্ভন্তরং করিত্ৰাতি নিব্বানন্তোগধং কত্ৰা, অন্তরং ৰা তস্স নিজ্ঝানস্স কারণং কত্ৰা. কামরাগৰসেন হি তং নিজ্ঝানং হোতীতি. ইধাতি ইমস্মিং সুত্তপদেসে. সব্বসঙ্গাহিকজ্ঝানন্তি লোকিযলোকুত্তরস্স অন্তরাযো মা হোতূতি এৰং কত্ৰাপি রূপাৰচরস্স মগ্গঝানস্স ফলঝানস্সাতি সব্বস্সপি সঙ্গণ্হনৰসেন দেসিতত্তা সব্বসঙ্গাহকজ্ঝানং নাম কথিতং.

যং নো মযন্তি এত্থ নোতি নিপাতমত্তং. তং নোতি এত্থ পন নোতি অম্হাকন্তি অত্থো. উসূযতি রাজকিচ্চপসুততাধীনতায একত্থাভিনিৰেসভাৰতো. মন্দপঞ্ঞতায ৰস্সকারগতইস্সাভিভূতচিত্ততায পরিপুণ্ণং কত্ৰা ৰুত্তম্পি অত্থং অনুপধারেন্তো আহ – ‘‘একদেসমেৰ কথেসী’’তি. সেসং সুৰিঞ্ঞেয্যমেৰ.

গোপকমোগ্গল্লানসুত্তৰণ্ণনায লীনত্থপ্পকাসনা সমত্তা.

৯. মহাপুণ্ণমসুত্তৰণ্ণনা

৮৫. তস্মিং অহূতি তস্মিং অহনীতি আহ ‘‘তস্মিং দিৰসে’’তি. অনসনেনাতি সব্বসো আহারস্স অভুঞ্জনেন সাসনিকসীলেন বাহিরকঅনসনেন উপেতা হুত্ৰাতি যোজনা. ৰা-সদ্দেন খীরপানমধুসাযনাদিৰিধিং সঙ্গণ্হাতি. উপেচ্চ ৰসিতব্বতো উপোসথো, পাতিমোক্খুদ্দেসো. উপেতেন সমন্নাগতেন হুত্ৰা ৰসিতব্বতো সন্তানে ৰাসেতব্বতো উপোসথো, সীলং. অনসনাদিধম্মাদিং ৰা উপেচ্চ ৰসনং উপৰাসো উপোসথো. তথারূপে হত্থিজাতিৰিসেসে উপোসথোতি সমঞ্ঞামত্তন্তি আহ – ‘‘উপোসথো নাম নাগরাজাতিআদীসু পঞ্ঞত্তী’’তি. ৰুত্তনযেন উপৰসন্তি এত্থাতি উপোসথো, দিৰসো. সো পনেস উপোসথো. মাসপুণ্ণতাযাতি মাসস্স পূরিতভাৰেন. সম্পুণ্ণাতি সব্বসো পুণ্ণা. তায হি রত্তিযা ৰসেন মাসো অনৰসেসতো পুণ্ণো হোতি. মাসদ্ধমাসাদিভেদং কালং মাতি মিনন্তো ৰিয হোতীতি চ ‘‘মা’’ইতি চন্দো ৰুচ্চতি. এত্থাতি এতিস্সা রত্তিযা. পুণ্ণো পরিপুণ্ণকলো জাতোতি পুণ্ণমা. তঞ্হি চন্দপারিপূরিযা মাসপারিপূরিযা এৰমাহ. এতেন তস্স উপোসথভাৰং দস্সেতি.

দিস্সতি ফলং সন্দিস্সতীতি দেসো, হেতূতি আহ ‘‘দেসন্তি কারণ’’ন্তি. সব্বং কথেন্তি সব্বং অত্তনা পরিগ্গহিতপ্পকারং কথেন্তি. কথেতুং ন সক্কোন্তি অৰিসযত্তা. পাসাদপরিৰেণেতি পাসাদস্স পুরতো ৰিৰটঙ্গণে. হেট্ঠা ৰুত্তনযেনাতি সেখসুত্তে (ম. নি. অট্ঠ. ২.২২) ৰুত্তনযেন ৰিত্থারেতব্বং.

৮৬. ইমে নু খোতি এত্থ নূতি সংসযজোতনোতি আহ – ‘‘ৰিমতিপুচ্ছা ৰিয কথিতা’’তি. জানন্তেনাতিআদি পুচ্ছাৰত্তদস্সনপরং দট্ঠব্বং, ন পুচ্ছকস্স সত্থু অত্তনো অজাননভাৰদীপনপরং. জানাতি হি ভগৰা. অজানন্তেন ৰিয হুত্ৰা পুচ্ছিতে. যথাভূতসভাৰং জানন্তো ৰিয পুচ্ছতি কোহঞ্ঞে ঠত্ৰা. তেনাহ – ‘‘থেরো এৰরূপং ৰচনং কিং করিস্সতী’’তি কারণস্স সুপ্পহীনত্তাতি অধিপ্পাযো.

ছন্দমূলকাতি তণ্হাছন্দমূলকা. তণ্হা হি দুক্খসমুদযো. কুসলসঞ্ঞো ৰা থিরৰিসদনিপুণসঞ্ঞো ৰা, কুসলসঙ্খারো ৰা তিখিণথিরৰিসদসঙ্খারো ৰা; সুৰিসুদ্ধৰিপুলোদারৰিঞ্ঞাণো ৰাতি ইমমত্থং ‘‘সঞ্ঞাদীসুপি এসেৰ নযো’’তি ইমিনা অতিদিসতি. কস্মা পনেত্থ অনাগতকালৰসেনেৰ দেসনা আগতাতি আহ ‘‘যস্মা পনা’’তিআদি.

খন্ধানং খন্ধপণ্ণত্তীতি খন্ধসদ্দাভিধেয্যানং রুপ্পনানুভৰনসঞ্জাননাভিসঙ্খরৰিজাননসভাৰানং অত্থানং ‘‘খন্ধো’’তি অযং সমঞ্ঞা. কিত্তকেনাতি কিংপরিমাণেন অত্থেন, রাসত্থভাগত্থাদীসু কীদিসেনাতি অধিপ্পাযো.

হেতুহেতূতি হেতুপচ্চযভূতো হেতু. যো হি লোভাদীনং সহজাতধম্মেসু মূলট্ঠেনুপকারকভাৰো নিপ্পরিযাযেন হেতুত্থো; সো পথৰীআদীসুপি পচ্চযভাৰমত্তেন হেতুপরিযাযদস্সনতো দুতিযেন হেতু-সদ্দেন ৰিসেসেত্ৰা ৰুত্তো ‘‘হেতুহেতূ’’তি. অৰিজ্জা পুঞ্ঞাভিসঙ্খারাদীনং সাধারণপচ্চযত্তা সাধারণহেতু, ‘‘অতীতানাগতপচ্চুপ্পন্নানং কম্মসমাদানানং ঠানসো হেতুসো ৰিপাক’’ন্তি এত্থ ৰিজ্জমানেসুপি অঞ্ঞেসু পচ্চযেসু ইট্ঠানিট্ঠৰিপাকনিযামকত্তা কম্মং তস্স পধানকারণন্তি আহ – ‘‘কুসলাকুসলং অত্তনো অত্তনো ৰিপাকদানে উত্তমহেতূ’’তি. ‘‘মহাভূতা হেতূ’’তি অযমেৰত্থো ‘‘মহাভূতা পচ্চযো’’তি ইমিনাপি ৰুত্তোতি হেতুসদ্দপচ্চযসদ্দানং সমানত্থত্তা পচ্চযো এৰ হেতু পচ্চযহেতু, যো চ রূপক্খন্ধস্স হেতু, সো এৰ তস্স পঞ্ঞাপনায পচ্চযোতি ৰুত্তোতি আহ – ‘‘ইধ পচ্চযহেতু অধিপ্পেতো’’তি. যদগ্গেন পচ্চযধম্মো অত্তনো পচ্চযুপ্পন্নস্স উপ্পাদায ঠিতিযা চ পচ্চযো, তদগ্গেন তস্স ভাৰতো সমঞ্ঞাতো পঞ্ঞাপনাযপি সো পচ্চযোতি ৰত্তব্বতং অরহতীতি. পাল়িযং অৰিভাগেন ৰুত্তমত্থং ৰিভাগেন দস্সেতুং, ‘‘তত্থ পথৰীধাতূ’’তিআদি ৰুত্তং. তত্থ পঞ্ঞাপনাযাতি সহেতুঅহেতুকন্তিআদিআকারেহি বোধনায. তং পন সব্বোধনং ঞাণেন দস্সনং হোতীতি ৰুত্তং ‘‘দস্সনত্থাযা’’তি.

ফস্সোতি ফস্সসমঙ্গীভাৰো. সো চেত্থ সকিচ্চনিপ্ফাদনসমত্থস্স ফস্সস্স নিব্বত্তি. নিব্বত্তো হি ফস্সো তথারূপায ৰেদনায পচ্চযো হোতীতি. এতদত্থমেৰেত্থ ভগৰতা পুগ্গলাধিট্ঠানা দেসনা কতা, তস্মা পচ্চুপ্পন্নাতীতকালৰসেন দ্ৰিকালিকো ফস্সসদ্দো ৰেদিতব্বো. ফস্সে সতি ৰেদেতি ফস্সপচ্চযা ৰেদনাইচ্চেৰ ৰুত্তং হোতি. সেসপদদ্ৰযেপি এসেৰ নযো. যথেৰ হি ৰেদনায এৰং সঞ্ঞায সঙ্খারানম্পি ফস্সো ৰিসেসপচ্চযো তস্মিং অসতি অভাৰতো. চেতনাগ্গহণেন আযূহনানুরূপতায তপ্পধানত্তা সঙ্খারক্খন্ধধম্মা গহিতা. তথা হি সুত্তন্তভাজনীযে সঙ্খারক্খন্ধভাজনীযে (ৰিভ. ২১, ২২) চ ‘‘চক্খুসম্ফস্সজা চেতনা’’তিআদিনা চেতনাৰ নিদ্দিট্ঠা. ৰিঞ্ঞাণক্খন্ধস্সাতি এত্থ একস্মিং ভৰে আদিভূতৰিঞ্ঞাণস্স নামরূপপচ্চযতং দস্সেতুং, ‘‘পটিসন্ধিৰিঞ্ঞাণেন তাৰা’’তিআদি ৰুত্তং. তত্থ গব্ভসেয্যকস্স সভাৰকস্স রূপপৰত্তিং সন্ধায ‘‘উপরিমপরিচ্ছেদেনা’’তি ৰুত্তং সমতিংসতো উপরি পটিসন্ধিক্খণে তস্স রূপানং অসম্ভৰতো. ইদানি পৰত্তিৰিঞ্ঞাণস্স নামরূপপচ্চযং দ্ৰারৰসেন দস্সেতুং, ‘‘চক্খুদ্ৰারে’’তিআদি ৰুত্তং. ননু চ ৰিঞ্ঞাণস্সপি ফস্সো পচ্চযো, কস্মা তযো এৰ খন্ধা ফস্সপচ্চযা ৰুত্তাতি? সচ্চমেতং, যথা পন ৰিঞ্ঞাণসহিতো ফস্সো ৰেদনাদীনং পচ্চযো, ন এৰং ৰিঞ্ঞাণস্স. তেনাহ ভগৰা – ‘‘তিণ্ণং সঙ্গতি ফস্সো’’তি (ম. নি. ১.২০৪; ম. নি. ৩.৪২১, ৪২৫, ৪২৬; সং. নি. ২.৪৪, ৪৫; ২.৪.৬০) ফস্সো ৰিয নামরূপং ৰিঞ্ঞাণস্স ৰিসেসপচ্চযো যথা নামরূপপচ্চযাপি ৰিঞ্ঞাণন্তি. তস্মা ইমং ৰিসেসং দস্সেতুং নামরূপস্সেৰ ৰিঞ্ঞাণপচ্চযতা ৰুত্তা, ন ফস্সস্স.

৮৭. যাৰ সক্কাযদিট্ঠি সমুপ্পজ্জতি, তাৰ ৰট্টস্স পরিযন্তো নত্থেৰাতি অপ্পহীনসক্কাযদিট্ঠিকো ৰট্টে পরিব্ভমতীতি আহ – ‘‘কথং পন, ভন্তেতি ৰট্টং পুচ্ছন্তো’’তি. যথা চ সক্কাযদিট্ঠিজোতনা ৰট্টপুচ্ছা, এৰং তব্ভেদনজোতনা ৰিৰট্টপুচ্ছাতি আহ – ‘‘সক্কাযদিট্ঠি ন হোতীতি ৰিৰট্টং পুচ্ছন্তো’’তি.

৮৮. অযং রূপে অস্সাদোতি যাথাৰতো দস্সনং পরিঞ্ঞাভিসমযো, দুক্খসচ্চপরিযাপন্নঞ্চ রূপন্তি আহ – ‘‘ইমিনা পরিঞ্ঞাপটিৰেধো চেৰ দুক্খসচ্চঞ্চ কথিত’’ন্তি. ‘‘যং রূপং অনিচ্চ’’ন্তিআদিৰচনতো অনিচ্চাদিভাৰো তত্থ আদীনৰো, সো চস্স পচ্চযাধীনৰুত্তিতায পচ্চযো সমুদযসচ্চন্তি সমুদযপ্পহানেন আদীনৰসমতিক্কমোতি আদীনৰগ্গহণেন সিদ্ধমত্থমাহ – ‘‘পহানপটিৰেধো চেৰ সমুদযসচ্চঞ্চা’’তি. সব্বসঙ্খতনিস্সরণং নিব্বানঞ্চ সচ্ছিকিরিযাভিসমযৰসেন পটিৰিজ্ঝিতব্বন্তি আহ – ‘‘ইমিনা সচ্ছিকিরিযাপটিৰেধো চেৰ নিরোধসচ্চঞ্চা’’তি. ইমেসু তীসু ঠানেসূতি যথাৰুত্তেসু দুক্খাদীসু তীসু অভিসমযট্ঠানেসু. যে সম্মাদিট্ঠিআদযো ধম্মাতি যে অরিযমগ্গসঞ্ঞিতা সম্মাদিট্ঠিআদযো অট্ঠ, সত্ত ৰা ধম্মা. ভাৰনাপটিৰেধো মগ্গসচ্চন্তি ভাৰনাভিসমযৰসেন পৰত্তং মগ্গসচ্চং. সেসপদেসুপীতি, ‘‘অযং ৰেদনায অস্সাদো’’তিআদিপদেসুপি.

৮৯. ইমস্মিন্তি আসন্নপচ্চক্খতায সকঅত্তভাৰো গহিতো, তদেৰ অজ্ঝত্তা খন্ধাতি তপ্পটিযোগিতায, ‘‘বহিদ্ধাতি পরস্স সৰিঞ্ঞাণকে কাযে’’তি ৰুত্তং. সব্বনিমিত্তেসূতি সব্বেসু রূপনিমিত্তাদীসুপি. তানি পন ইন্দ্রিযবদ্ধানিপি অনিন্দ্রিযবদ্ধানিপি তংসভাৰানীতি আহ ‘‘অনিন্দ্রিযবদ্ধম্পি সঙ্গণ্হাতী’’তি. ৰিঞ্ঞাণগ্গহণেনেৰেত্থ ৰেদনাদযোপি গহিতা অৰিনাভাৰতোতি, ‘‘সৰিঞ্ঞাণকে কাযে’’তি ৰুত্তং. ‘‘কাযো’’তি ৰা খন্ধসমূহোতি অত্থো.

৯০. অনত্তনি ঠত্ৰাতি অত্তরহিতে অনত্তসভাৰে খন্ধকোট্ঠাসে ঠত্ৰা তং আধারং কত্ৰা কতানি কম্মানি. কতরস্মিং অত্তনি ঠত্ৰাতি কীদিসে অত্তনি নিস্সযৰিপাকং দস্সন্তি ৰিপচ্চিস্সন্তি. এতেন কারকৰেদকরহিতত্তা অত্তপক্খকম্মকানি ন যুজ্জন্তীতি দস্সেতি, খন্ধানং খণিকত্তা চ কতনাসঅকতব্ভাগমদোসো চ আপজ্জতীতি.

তত্রাযং (ইতিৰু. অট্ঠ. ৭৪; সারত্থ. টী. ১.৫) চোদনাসোধনাৰিধি – পাণাতিপাতৰসেন তাৰ কম্মপথসম্বন্ধৰিভাৰনা, খণে খণে হি নিরুজ্ঝনসভাৰেসু সঙ্খারেসু কো হন্তি, কো ৰা হঞ্ঞতি, যদি চিত্তচেতসিকসন্তানো, সো অরূপত্তা ন ছেদনভেদনাদিৰসেন ৰিকোপনসমত্থো, নপি ৰিকোপনীযো. অথ রূপসন্তানো, সো অচেতনত্তা কট্ঠকলিঙ্গরূপমোতি ন তত্থ ছেদনাদিনা পাণাতিপাতাপুঞ্ঞং পসৰতি যথা মতসরীরে. পযোগোপি পাণাতিপাতস্স পহরণপ্পহারাদিকো অতীতেসু ৰা সঙ্খারেসু ভৰেয্য, অনাগতেসু, পচ্চুপ্পন্নেসু ৰা, তত্থ ন তাৰ অতীতানাগতেসু সম্ভৰতি তেসং অভাৰতো, পচ্চুপ্পন্নেসু চ সঙ্খারানং খণিকত্তা সরসেনেৰ নিরুজ্ঝনসভাৰতায ৰিনাসাভিমুখেসু নিপ্পযোজনো পযোগো সিযা, ৰিনাসস্স চ কারণরহিতত্তা ন পহরণপ্পহারাদিপ্পযোগহেতুকং মরণং, নিরীহকতায চ সঙ্খারানং কস্স সো পযোগো? খণিকত্তা ৰধাধিপ্পাযসমকালভিজ্জনকস্স কিরিযাপরিযোসানকালানৰট্ঠানতো কস্স পাণাতিপাতকম্মবদ্ধোতি?

ৰুচ্চতেযথাৰুত্তৰধকচেতনাসহিতো সঙ্খারপুঞ্জো সত্তসঙ্খাতো হন্তি. তেন পৰত্তিতৰধপ্পযোগনিমিত্তং অপগতউস্মাৰিঞ্ঞাণজীৰিতিন্দ্রিযো মতৰোহারপৰত্তিনিবন্ধনো যথাৰুত্তৰপ্পযোগকরণে উপ্পজ্জনারহো রূপারূপধম্মসমূহো হঞ্ঞতি, কেৰলো ৰা চিত্তচেতসিকসন্তানো. ৰধপ্পযোগাৰিসযভাৰেপি তস্স পঞ্চৰোকারভৰে রূপসন্তানাধীনৰুত্তিতায রূপসন্তানে পরেন পযোজিতজীৰিতিন্দ্রিযুপচ্ছেদকপযোগৰসেন তন্নিব্বত্তিতৰিবন্ধকৰিসদিরূপুপ্পত্তিযা ৰিগতে ৰিচ্ছেদো হোতীতি ন পাণাতিপাতস্স অসম্ভৰো; নাপি অহেতুকো পাণাতিপাতো, ন চ পযোগো নিপ্পযোজনো পচ্চুপ্পন্নেসু সঙ্খারেসু কতপ্পযোগৰসেন তদনন্তরং উপ্পজ্জনারহস্স সঙ্খারকলাপস্স তথা অনুপ্পত্তিতো. খণিকানং সঙ্খারানং খণিকমরণস্স ইধ মরণভাৰেন অনধিপ্পেতত্তা সন্ততিমরণস্স চ যথাৰুত্তনযেন সহেতুকভাৰতো ন অহেতুকং মরণং; ন চ কত্তুরহিতো পাণাতিপাতপ্পযোগো নিরীহকেসুপি সঙ্খারেসু সন্নিহিততামত্তেন উপকারকেসু অত্তনো অত্তনো অনুরূপফলুপ্পাদনে নিযতেসু কারণেসু কত্তুৰোহারসিদ্ধিতো যথা – ‘‘পদীপো পকাসেতি, নিসাকরো চন্দিমা’’তি. ন চ কেৰলস্স ৰচাধিপ্পাযসহভুনো চিত্তচেতসিককলাপস্স পাণাতিপাতো ইচ্ছিতো সন্তানৰসেন অৰট্ঠিতস্সেৰ পটিজাননতো; সন্তানৰসেন পৰত্তমানানঞ্চ পদীপাদীনং অত্থকিরিযসিদ্ধি দিস্সতীতি অত্থেৰ পাণাতিপাতেন কম্মুনা বদ্ধো; ততো এৰ যস্মিং সন্তানে পাণাতিপাতচেতনা পৰত্তা; তত্থেৰ সন্তানে পচ্চযন্তরসমৰাযেন ভৰন্তরে নিরযাদীসু তস্সা ফলপ্পৰত্তীতি নত্থেৰ কতৰিনাসো অকতব্ভাগমো চ. ইমিনা নযেন অদিন্নাদানাদীনঞ্চ ৰসেন যথারহং কম্মপথসম্বন্ধৰিভাৰনা ৰেদিতব্বাতি.

সব্বো দিট্ঠিগ্গাহো তণ্হাৰসগতস্সেৰ হোতীতি আহ ‘‘তণ্হাধিপতেয্যেনা’’তি. তেসু তেসু ধম্মেসূতি মযা দেসিযমানদস্সনধম্মেসু. পকতিকম্মট্ঠানন্তি তস্স থেরস্স সন্তিকে গহেত্ৰা পরিহরিযমানকম্মট্ঠানং. অঞ্ঞং নৰকম্মট্ঠানন্তি ভগৰতো দেসনানুসারেন গহিতং অঞ্ঞং নৰং কম্মট্ঠানং. সেসং সুৰিঞ্ঞেয্যমেৰ.

মহাপুণ্ণমসুত্তৰণ্ণনায লীনত্থপ্পকাসনা সমত্তা.

১০. চূল়পুণ্ণমসুত্তৰণ্ণনা

৯১. তুণ্হীভূতং তুণ্হীভূতন্তি আমেডিতৰচনং ব্যাপনিচ্ছাৰসেন ৰুত্তন্তি আহ – ‘‘যং যং দিস’’ন্তিআদি. অনুৰিলোকেত্ৰাতি এত্থ অনুসদ্দোপি ব্যাপনিচ্ছাযমেৰাতি অনু অনু ৰিলোকেত্ৰাতি অত্থো. তেনেৰাহ – ‘‘ততো ততো ৰিলোকেত্ৰা’’তি. অসন্তো নীচো পুরিসোতি অসপ্পুরিসোতি আহ – ‘‘পাপপুরিসো লামকপুরিসো’’তি. সোতি অসপ্পুরিসো. তন্তি অসপ্পুরিসং জানিতুং ন সক্কোতি অসপ্পুরিসধম্মানং যাথাৰতো অজাননতো. পাপধম্মসমন্নাগতোতি কাযদুচ্চরিতাদিঅসন্তুট্ঠিতাদিলামকধম্মসমন্নাগতো. অসপ্পুরিসে ভত্তি এতস্সাতি অসপ্পুরিসভত্তি. তেনাহ – ‘‘অসপ্পুরিসসেৰনো’’তি. অসপ্পুরিসধম্মো অসপ্পুরিসো উত্তরপদলোপেন, তেসং চিন্তনসীলোতি অসপ্পুরিসচিন্তী. তেনাহ ‘‘অসপ্পুরিসচিন্তায চিন্তকো’’তি, দুচ্চিন্তিতচিন্তীতি অত্থো. অসপ্পুরিসমন্তনন্তি অসাধুজনৰিচারং অসপ্পুরিসৰীমংসং. অসপ্পুরিসৰাচন্তি চতুব্বিধং দুব্ভাসিতং. অসপ্পুরিসকম্মং নাম তিৰিধম্পি কাযদুচ্চরিতং. অসপ্পুরিসদিট্ঠি নাম ৰিসেসতো দসৰত্থুকা মিচ্ছাদিট্ঠি, তায সমন্নাগতো অসপ্পুরিসদিট্ঠিযা সমন্নাগতো, অসপ্পুরিসদানং নাম অসক্কচ্চদানাদি. সব্বোপাযমত্থো পাল়িতো এৰ ৰিঞ্ঞাযতি.

‘‘পাণং হনিস্সামী’’তিআদিকা চেতনা কামং পরব্যাবাধাযপি হোতিযেৰ, যথা পন সা অত্তনো বলৰতরদুক্খত্থায হোতি, তথা ন পরস্সাতি ইমমত্থং দস্সেতুং, ‘‘অত্তনো দুক্খত্থায চিন্তেতি’’ইচ্চেৰ ৰুত্তো. যথা অসুকো অসুকন্তিআদীহি পাপকো পাপৰিপাকেকদেসং বলৰং গরুতরং ৰা পচ্চনুভোন্তোপি যথা পরো পচ্চনুভোতি, ন তথা সযন্তি দস্সেতি. তেনাহ ‘‘পরব্যাবাধাযা’’তি. গহেত্ৰাতি পাপকিরিযায সহাযভাৰেন গহেত্ৰা.

অসক্কচ্চন্তি অনাদরং কত্ৰা. দেয্যধম্মস্স অসক্করণং অপ্পসন্নাকারো, পুগ্গলস্স অসক্করণং অগরুকরণন্তি ইমমত্থং দস্সেন্তো, ‘‘দেয্যধম্মং ন সক্করোতি নামা’’তিআদিমাহ. অচিত্তীকত্ৰাতি ন চিত্তে কত্ৰা, ন পূজেত্ৰাতি অত্থো. পূজেন্তো হি পূজেতব্বৰত্থুং চিত্তে ঠপেতি, ততো ন বহি করোতি. চিত্তং ৰা অচ্ছরিযং কত্ৰা পটিপত্তি চিত্তীকরণং, সম্ভাৰনকিরিযা. তপ্পটিক্খেপতো অচিত্তীকরণং, অসম্ভাৰনকিরিযা. অপৰিদ্ধন্তি উচ্ছিট্ঠাদিছড্ডনীযধম্মং ৰিয অৰখিত্তকং. তেনাহ – ‘‘ছড্ডেতুকামো ৰিযা’’তিআদি. রোগং পক্খিপন্তো ৰিযাতি রোগিকসরীরং ওদনাদীহি পমজ্জিত্ৰা ৰম্মিকে রোগং পক্খিপন্তো ৰিয. অদ্ধা ইমস্স দানস্স ফলং মমেৰ আগচ্ছতীতি এৰং যস্স তথা দিট্ঠি অত্থি, সো আগমনদিট্ঠিকো, অযং পন ন তাদিসোতি আহ ‘‘অনাগমনদিট্ঠিকো’’তি. তেনাহ – ‘‘নো ফলপাটিকঙ্খী হুত্ৰা দেতী’’তি.

কামঞ্চাযং যথাৰুত্তপুগ্গলো অসদ্ধম্মাদীহি পাপধম্মেহি সমন্নাগতো, তেহি পন সব্বেহিপি মিচ্ছাদস্সনং মহাসাৰজ্জন্তি দস্সেতুং, ‘‘তায মিচ্ছাদিট্ঠিযা নিরযে উপপজ্জতী’’তি ৰুত্তং. ৰুত্তপটিপক্খনযেনাতি কণ্হপক্খে ৰুত্তস্স অত্থস্স ৰিপরিযাযেন সুক্কপক্খে অত্থো ৰেদিতব্বো. ‘‘সদেৰকং লোক’’ন্তিআদীসু (পারা. ১) দেৰসদ্দো ছকামাৰচরদেৰেসু, এৰমিধাতি আহ ‘‘ছকামাৰচরদেৰা’’তি. তত্থ ব্রহ্মানং ৰিসুং গহিতত্তা কামাৰচরদেৰগ্গহণন্তি চে? ইধ দানফলস্স অধিপ্পেতত্তা কামাৰচরদেৰগ্গহণং, তত্থাপি ছকামাৰচরগ্গহণং দট্ঠব্বং দেৰমহত্ততাদিৰচনতো. তিণ্ণং কুলানং সম্পত্তীতি খত্তিযমহত্তাদীনং তিণ্ণং কুলানং সম্পত্তি, ন কেৰলং কুলসম্পদা এৰ অধিপ্পেতা, অথ খো তত্থ আযুৰণ্ণযসভোগইস্সরিযাদিসম্পদাপি অধিপ্পেতাতি দট্ঠব্বং উল়ারস্স দানমযপুঞ্ঞস্স ৰসেন তেসম্পি সমিজ্ঝনতো. সুদ্ধৰট্টৰসেনেৰ কথিতং সুক্কপক্খেপি সব্বসো ৰিৰট্টস্স অনামট্ঠত্তা. সদ্ধাদযো হি লোকিযকুসলসম্ভারা এৰেত্থ অধিপ্পেতাতি. সেসং সুৰিঞ্ঞেয্যমেৰ.

চূল়পুণ্ণমসুত্তৰণ্ণনায লীনত্থপ্পকাসনা সমত্তা.

নিট্ঠিতা চ দেৰদহৰগ্গৰণ্ণনা.

২. অনুপদৰগ্গো

১. অনুপদসুত্তৰণ্ণনা

৯৩. ইদ্ধিমাতি গুণো পাকটো পরতোঘোসেন ৰিনা পাসাদকম্পনদেৰচারিকাদীহি সযমেৰ পকাসভাৰতো; ধুতৰাদাদিগুণানম্পি তথাভাৰে এতেনেৰ নযেন তেসং গুণানং পাকটযোগতো চ পরেসং নিচ্ছিতভাৰতো চ. পঞ্ঞৰতো গুণাতি পঞ্ঞাপভেদপভাৰিতে গুণৰিসেসে সন্ধায ৰদতি. তে হি যেভুয্যেন পরেসং অৰিসযা. তেনাহ – ‘‘ন সক্কা অকথিতা জানিতু’’ন্তি. ৰিসভাগা সভাগা নাম অযোনিসোমনসিকারবহুলেসু পুথুজ্জনেসু, তে পন অপ্পহীনরাগদোসতায পরস্স ৰিজ্জমানম্পি গুণং মক্খেত্ৰা অৰিজ্জমানং অৰণ্ণমেৰ ঘোসেন্তীতি আহ – ‘‘ৰিসভাগ…পে… কথেন্তী’’তি.

যা অট্ঠারসন্নং ধাতূনং সমুদযতো অত্থঙ্গমতো অস্সাদতো আদীনৰতো যথাভূতং পজাননা, অযং ধাতুকুসলতা. আযতনকুসলতাযপি এসেৰ নযো. অৰিজ্জাদীসু দ্ৰাদসসু পটিচ্চসমুপ্পাদঙ্গেসু কোসল্লং পটিচ্চসমুপ্পাদকুসলতা. ইদং ইমস্স ফলস্স ঠানং কারণং, ইদং অট্ঠানং অকারণন্তি এৰং ঠানঞ্চ ঠানতো, অট্ঠানঞ্চ অট্ঠানতো যথাভূতং পজাননা, অযং ঠানাট্ঠানকুসলতা. যো পন ইমেসু ধাতুআদীসু পরিঞ্ঞাভিসমযাদিৰসেন নিস্সঙ্গগতিযা পণ্ডাতি লদ্ধনামেন ঞাণেন ইতো গতো পৰত্তো, অযং পণ্ডিতো নামাতি আহ – ‘‘ইমেহি চতূহি কারণেহি পণ্ডিতো’’তি. মহন্তানং অত্থানং পরিগ্গণ্হনতো মহতী পঞ্ঞা এতস্সাতি মহাপঞ্ঞো. সেসপদেসুপি এসেৰ নযোতি আহ – ‘‘মহাপঞ্ঞাদীহি সমন্নাগতোতি অত্থো’’তি.

নানত্তন্তি যাহি মহাপঞ্ঞাদীহি সমন্নাগতত্তা থেরো ‘‘মহাপঞ্ঞো’’তিআদিনা কিত্তীযতি, তাসং মহাপঞ্ঞাদীনং ইদং নানত্তং অযং ৰেমত্ততা. যস্স কস্সচি (দী. নি. টী. ৩.২১৬; সং. নি. টী. ১.১.১১০; অ. নি. টী. ১.১.৫৮৪) ৰিসেসতো অরূপধম্মস্স মহত্তং নাম কিচ্চসিদ্ধিযা ৰেদিতব্বন্তি তদস্স কিচ্চসিদ্ধিযা দস্সেন্তো, ‘‘মহন্তে সীলক্খন্ধে পরিগ্গণ্হাতীতি মহাপঞ্ঞা’’তিআদিমাহ. তত্থ হেতুমহন্ততায পচ্চযমহন্ততায নিস্সযমহন্ততায পভেদমহন্ততায কিচ্চমহন্ততায ফলমহন্ততায আনিসংসমহন্ততায চ সীলক্খন্ধস্স মহন্তভাৰো ৰেদিতব্বো. তত্থ হেতূ অলোভাদযো, পচ্চযা হিরোত্তপ্পসদ্ধাসতিৰীরিযাদযো. নিস্সযা সাৰকবোধিপচ্চেকবোধিসম্মাসম্বোধিনিযততা তংসমঙ্গিনো চ পুরিসৰিসেসা. পভেদো চারিত্তাদিৰিভাগো. কিচ্চং তদঙ্গাদিৰসেন পটিপক্খস্স ৰিধমনং. ফলং সগ্গসম্পদা নিব্বানসম্পদা চ. আনিসংসো পিযমনাপতাদি. অযমেত্থ সঙ্খেপো, ৰিত্থারো পন ৰিসুদ্ধিমগ্গে (ৰিসুদ্ধি. ১.৯) আকঙ্খেয্যসুত্তাদীসু (ম. নি. ১.৬৪ আদযো) চ আগতনযেন ৰেদিতব্বো. ইমিনা নযেন সমাধিক্খন্ধাদীনম্পি মহন্ততা যথারহং নিদ্ধারেত্ৰা ৰেদিতব্বা, ঠানাট্ঠানাদীনং পন মহন্তভাৰো মহাৰিসযতায ৰেদিতব্বো. তত্থ ঠানাট্ঠানানং মহাৰিসযতা বহুধাতুকসুত্তে (ম. নি. ৩.১২৪ আদযো) সযমেৰ আগমিস্সতি. ৰিহারসমাপত্তীনং সমাধিক্খন্ধে নিদ্ধারিতনযেন ৰেদিতব্বা, অরিযসচ্চানং সকলসাসনসঙ্গহণতো সচ্চৰিভঙ্গে (ৰিভ. ১৮৯ আদযো) তংসংৰণ্ণনাসু (ৰিভ. অট্ঠ. ১৮৯ আদযো) আগতনযেন. সতিপট্ঠানাদীনং ৰিভঙ্গাদীসু (ৰিভ. ৩৫৫ আদযো) তংসংৰণ্ণনাদীসু (ৰিভ. অট্ঠ. ৩৫৫ আদযো) চ আগতনযেন. সামঞ্ঞফলানং মহতো হিতস্স মহতো সুখস্স মহতো অত্থস্স মহতো যোগক্খেমস্স নিপ্ফত্তিভাৰতো সন্তপণীতনিপুণঅতক্কাৰচরপণ্ডিতৰেদনীযভাৰতো চ. অভিঞ্ঞানং মহাসম্ভারতো মহাৰিসযতো মহাকিচ্চতো মহানুভাৰতো মহানিপ্ফত্তিতো চ. নিব্বানস্স মদনিম্মদনাদিমহত্থসিদ্ধিতো মহন্ততা ৰেদিতব্বা.

পুথুপঞ্ঞাতি এত্থাপি ৰুত্তনযানুসারেন অত্থো ৰেদিতব্বো. অযং পন ৰিসেসো – নানাখন্ধেসু ঞাণং পৰত্ততীতি, ‘‘অযং রূপক্খন্ধো নাম…পে… অযং ৰিঞ্ঞাণক্খন্ধো নামা’’তি, এৰং পঞ্চন্নং খন্ধানং নানাকরণং পটিচ্চ ঞাণং পৰত্ততি. তেসুপি ‘‘একৰিধেন রূপক্খন্ধো, একাদসৰিধেন রূপক্খন্ধো, একৰিধেন ৰেদনাক্খন্ধো, বহুৰিধেন ৰেদনাক্খন্ধো, একৰিধেন সঞ্ঞাক্খন্ধো…পে… একৰিধেন ৰিঞ্ঞাণক্খন্ধো, বহুৰিধেন ৰিঞ্ঞাণক্খন্ধো’’তি এৰং একেকস্স খন্ধস্স একৰিধাদিৰসেন অতীতাদিভেদৰসেনপি নানাকরণং পটিচ্চ ঞাণং পৰত্ততি. তথা ‘‘ইদং চক্খাযতনং নাম…পে… ইদং ধম্মাযতনং নাম. তত্থ দসাযতনা কামাৰচরা, দ্ৰে চতুভূমকা’’তি এৰং আযতননানত্তং পটিচ্চ ঞাণং পৰত্ততি.

নানাধাতূসূতি ‘‘অযং চক্খুধাতু নাম…পে… অযং মনোৰিঞ্ঞাণধাতু নাম. তত্থ সোল়স ধাতুযো কামাৰচরা, দ্ৰে চতুভূমকা’’তি এৰং নানাধাতূসু পটিচ্চ ঞাণং পৰত্ততি. তযিদং উপাদিণ্ণকধাতুৰসেন ৰুত্তন্তি ৰেদিতব্বং. পচ্চেকবুদ্ধানঞ্হি দ্ৰিন্নঞ্চ অগ্গসাৰকানং উপাদিণ্ণকধাতূসুযেৰ নানাকরণং পটিচ্চ ঞাণং পৰত্ততি. তঞ্চ খো একদেসতোৰ, নো নিপ্পদেসতো, অনুপাদিণ্ণকধাতূনং পন নানাকরণং ন জানন্তিযেৰ. সব্বঞ্ঞুবুদ্ধানংযেৰ পন, ‘‘ইমায নাম ধাতুযা উস্সন্নত্তা ইমস্স রুক্খস্স খন্ধো সেতো হোতি, ইমস্স কণ্হো, ইমস্স বহলত্তচো, ইমস্স তনুত্তচো, ইমস্স পত্তং ৰণ্ণসণ্ঠানাদিৰসেন এৰরূপং, ইমস্স পুপ্ফং নীলং পীতং লোহিতং ওদাতং সুগন্ধং দুগ্গন্ধং, ফলং খুদ্দকং মহন্তং দীঘং ৰট্টং সুসণ্ঠানং মট্ঠং ফরুসং সুগন্ধং মধুরং তিত্তকং অম্বিলং কটুকং কসাৰং, কণ্টকো তিখিণো অতিখিণো উজুকো কুটিলো লোহিতো ওদাতো হোতী’’তি ধাতুনানত্তং পটিচ্চ ঞাণং পৰত্ততি.

অত্থেসূতি রূপাদীসু আরম্মণেসু. নানাপটিচ্চসমুপ্পাদেসূতি অজ্ঝত্তবহিদ্ধাভেদতো সন্তানভেদতো চ নানপ্পভেদেসু পটিচ্চসমুপ্পাদঙ্গেসু. অৰিজ্জাদিঅঙ্গানঞ্হি পচ্চেকং পটিচ্চসমুপ্পাদসঞ্ঞিতাতি. তেনাহ – সঙ্খারপিটকে ‘‘দ্ৰাদস পচ্চযা দ্ৰাদস পটিচ্চসমুপ্পাদা’’তি. নানাসুঞ্ঞতমনুপলব্ভেসূতি নানাসভাৰেসু নিচ্চসারাদিৰিরহতো সুঞ্ঞসভাৰেসু, ততো এৰ ইত্থিপুরিসঅত্তঅত্তনিযাদিৰসেন অনুপলব্ভেসু সভাৰেসু. ম-কারো হেত্থ পদসন্ধিকরো. নানাঅত্থেসূতি অত্থপটিসম্ভিদাৰিসযেসু পচ্চযুপ্পন্নাদিনানাঅত্থেসু. ধম্মেসূতি ধম্মপটিসম্ভিদাৰিসযেসু পচ্চযাদিনানাধম্মেসু. নিরুত্তীসূতি তেসংযেৰ অত্থধম্মানং নিদ্ধারণৰচনসঙ্খাতাসু নানানিরুত্তীসু. পটিভানেসূতি এত্থ অত্থপটিসম্ভিদাদীসু ৰিসযভূতেসু, ‘‘ইমানি ইদমত্থজোতকানী’’তি (ৰিভ. ৭২৫-৭৪৫) তথা তথা পটিভানতো পটিভানানীতি লদ্ধনামেসু ঞাণেসু. পুথু নানাসীলক্খন্ধেসূতিআদীসু সীলস্স পুথুত্তং নানত্তঞ্চ ৰুত্তমেৰ. ইতরেসং পন ৰুত্তনযানুসারেন সুৰিঞ্ঞেয্যত্তা পাকটমেৰ. যং পন অভিন্নং একমেৰ নিব্বানং, তত্থ উপচারৰসেন পুথুত্তং গহেতব্বন্তি আহ – ‘‘পুথু নানাজনসাধারণে ধম্মে সমতিক্কম্মা’’তি. তেনস্স মদনিম্মদনাদিপরিযাযেন পুথুত্তং পরিদীপিতং হোতি.

এৰং ৰিসযৰসেন পঞ্ঞায মহত্তং পুথুত্তঞ্চ দস্সেত্ৰা ইদানি সম্পযুত্তধম্মৰসেন হাসভাৰং, পৰত্তিআকারৰসেন জৰনভাৰং, কিচ্চৰসেন তিক্খাদিভাৰঞ্চ দস্সেতুং, ‘‘কতমা হাসপঞ্ঞা’’তিআদি ৰুত্তং. তত্থ হাসবহুলোতি পীতিবহুলো. সেসপদানি তস্সেৰ ৰেৰচনানি. সীলং পরিপূরেতীতি হট্ঠপহট্ঠো উদগ্গুদগ্গো হুত্ৰা পীতিসহগতায পঞ্ঞায. পীতিসোমনস্সসহগতা হি পঞ্ঞা অভিরতিৰসেন আরম্মণে ফুল্লা ৰিকসিতা ৰিয পৰত্ততি; ন উপেক্খাসহগতাতি পাতিমোক্খসীলং ঠপেত্ৰা হাসনীযং পরং তিৰিধম্পি সীলং পরিপূরেতীতি অত্থো. ৰিসুং ৰুত্তত্তা পুন সীলক্খন্ধমাহ. সমাধিক্খন্ধন্তিআদীসুপি এসেৰ নযো.

রূপং অনিচ্চতো খিপ্পং জৰতীতি রূপক্খন্ধং অনিচ্চন্তি সীঘং ৰেগেন পৰত্তিযা পটিপক্খদূরীভাৰেন পুব্বাভিসঙ্খারস্স সাতিসযত্তা ইন্দেন ৰিস্সট্ঠৰজিরং ৰিয লক্খণং পটিৰিজ্ঝন্তী অদন্ধাযন্তী রূপক্খন্ধে অনিচ্চলক্খণং ৰেগসা পটিৰিজ্ঝতি, তস্মা সা জৰনপঞ্ঞা নামাতি অত্থো. সেসপদেসুপি এসেৰ নযো. এৰং লক্খণারম্মণিকৰিপস্সনাৰসেন জৰনপঞ্ঞং দস্সেত্ৰা বলৰৰিপস্সনাৰসেন দস্সেতুং, ‘‘রূপ’’ন্তিআদি ৰুত্তং. তত্থ খযট্ঠেনাতি যত্থ যত্থ উপ্পজ্জতি, তত্থ তত্থেৰ ভিজ্জনতো খযসভাৰত্তা. ভযট্ঠেনাতি ভযানকভাৰতো. অসারকট্ঠেনাতি অত্তসারৰিরহতো নিচ্চসারাদিৰিরহতো চ. তুলযিত্ৰাতি তুলাভূতায ৰিপস্সনাপঞ্ঞায তুলেত্ৰা. তীরযিত্ৰাতি তায এৰ তীরণভূতায তীরেত্ৰা. ৰিভাৰযিত্ৰাতি যাথাৰতো পকাসেত্ৰা পঞ্চক্খন্ধং ৰিভূতং কত্ৰা. রূপনিরোধেতি রূপক্খন্ধস্স নিরোধভূতে নিব্বানে নিন্নপোণপব্ভারৰসেন. ইদানি সিখাপ্পত্তৰিপস্সনাৰসেন জৰনপঞ্ঞং দস্সেতুং, পুন ‘‘রূপ’’ন্তিআদি ৰুত্তং. ৰুট্ঠানগামিনিৰিপস্সনাৰসেনাতি কেচি.

ঞাণস্স তিক্খভাৰো নাম সৰিসেসং পটিপক্খসমুচ্ছিন্দনেন ৰেদিতব্বোতি, ‘‘খিপ্পং কিলেসে ছিন্দতীতি তিক্খপঞ্ঞা’’তি ৰত্ৰা তে পন কিলেসে ৰিভাগেন দস্সেন্তো, ‘‘উপ্পন্নং কামৰিতক্ক’’ন্তিআদিমাহ. তিক্খপঞ্ঞো হি খিপ্পাভিঞ্ঞো হোতি, পটিপদা চস্স ন চলতীতি আহ – ‘‘একস্মিং আসনে চত্তারো অরিযমগ্গা অধিগতা হোন্তী’’তিআদি.

‘‘সব্বে সঙ্খারা অনিচ্চা দুক্খা ৰিপরিণামধম্মা সঙ্খতা পটিচ্চসমুপ্পন্না খযধম্মা ৰযধম্মা নিরোধধম্মা’’তি যাথাৰতো দস্সনেন সচ্চসম্পটিৰেধো ইজ্ঝতি, ন অঞ্ঞথাতি কারণমুখেন নিব্বেধিকপঞ্ঞং দস্সেতুং, ‘‘সব্বসঙ্খারেসু উব্বেগবহুলো হোতী’’তিআদি ৰুত্তং. তত্থ উব্বেগবহুলোতি ৰুত্তনযেন সব্বসঙ্খারেসু অভিণ্হং পৰত্তসংৰেগো. উত্তাসবহুলোতি ঞাণুত্রাসৰসেন সব্বসঙ্খারেসু বহুসো উত্রস্তমানসো. তেন আদীনৰানুপস্সনমাহ. উক্কণ্ঠনবহুলোতি পন ইমিনা নিব্বিদানুপস্সনং আহ – অরতিবহুলোতিআদিনা তস্সা এৰ অপরাপরুপ্পত্তিং. বহিমুখোতি সব্বসঙ্খারতো বহিভূতং নিব্বানং উদ্দিস্স পৰত্তঞাণমুখো, তথা ৰা পৰত্তিতৰিমোক্খমুখো. নিব্বিজ্ঝনং নিব্বেধো, সো এতিস্সা অত্থি, নিব্বিজ্ঝতীতি ৰা নিব্বেধা, সাৰ পঞ্ঞা নিব্বেধিকা. যং পনেত্থ অত্থতো অৰিভত্তং, তং হেট্ঠা ৰুত্তনযত্তা সুৰিঞ্ঞেয্যমেৰ.

পজ্জতি এতেন ৰিপস্সনাদিকোতি পদং, সমাপত্তি, তস্মা অনুপদন্তি অনুসমাপত্তিযোতি অত্থো. পদং ৰা সম্মসনুপগা ধম্মা ৰিপস্সনায পৰত্তিট্ঠানভাৰতো. তেনাহ ‘‘সমাপত্তিৰসেন ৰা’’তি. ঝানঙ্গৰসেন ৰাতি ঝানঙ্গৰসেনাতি চ অত্থো. অট্ঠকথাযং পন কমত্থো ইধ পদসদ্দো, তস্মা অনুপদং অনুক্কমেনাতি অযমেত্থ অত্থোতি আহ ‘‘অনুপটিপাটিযা’’তি. ধম্মৰিপস্সনন্তি তংতংসমাপত্তিচিত্তুপ্পাদপরিযাপন্নানং ধম্মানং ৰিপস্সনং. ৰিপস্সতীতি সমাপত্তিযো ঝানমুখেন তে তে ধম্মে যাথাৰতো পরিগ্গহেত্ৰা, ‘‘ইতিপি দুক্খা’’তিআদিনা সম্মসতি. অদ্ধমাসেন অরহত্তং পত্তো উক্কংসগতস্স সাৰকানং সম্মসনচারস্স নিপ্পদেসেন পৰত্তিযমানত্তা, সাৰকপারমীঞাণস্স চ তথা পটিপাদেতব্বত্তা. এৰং সন্তেপীতি যদিপি মহামোগ্গল্লানত্থেরো ন চিরস্সেৰ অরহত্তং পত্তো; ধম্মসেনাপতি পন ততো চিরেন, এৰং সন্তেপি যস্মা মোগ্গল্লানত্থেরোপি মহাপঞ্ঞোৰ, তস্মা সারিপুত্তত্থেরোৰ মহাপঞ্ঞতরোতি. ইদানি তমত্থং পাকটতরং কাতুং, ‘‘মহামোগ্গল্লানত্থেরো হী’’তিআদি ৰুত্তং. সম্মসনং চরতি এত্থাতি সম্মসনচারো, ৰিপস্সনাভূমি, তং সম্মসনচারং. একদেসমেৰাতি সকঅত্তভাৰে সঙ্খারে অনৰসেসতো পরিগ্গহেতুঞ্চ সম্মসিতুঞ্চ অসক্কোন্তং অত্তনো অভিনীহারসমুদাগতঞাণবলানুরূপং একদেসমেৰ পরিগ্গহেত্ৰা সম্মসন্তো. ননু চ ‘‘সব্বং, ভিক্খৰে, অনভিজানং অপরিজানং অৰিরাজযং অপ্পজহং অভব্বো দুক্খক্খযাযা’’তি (সং. নি. ৪.২৬) ৰচনতো ৰট্টদুক্খতো মুচ্চিতুকামেন সব্বং পরিঞ্ঞেয্যং পরিজানিতব্বমেৰ? সচ্চমেতং, তঞ্চ খো সম্মসনুপগধম্মৰসেন ৰুত্তং. তস্মা সসন্তানগতে সব্বধম্মে, পরসন্তানগতে চ তেসং সন্তানৰিভাগং অকত্ৰা বহিদ্ধাভাৰসামঞ্ঞতো সম্মসনং, অযং সাৰকানং সম্মসনচারো. থেরো পন বহিদ্ধাধম্মেপি সন্তানৰিভাগেন কেচি কেচি উদ্ধরিত্ৰা সম্মসি, তঞ্চ খো ঞাণেন ফুট্ঠমত্তং কত্ৰা. তেন ৰুত্তং – ‘‘যট্ঠিকোটিযা উপ্পীল়েন্তো ৰিয একদেসমেৰ সম্মসন্তো’’তি. তত্থ ঞাণেন নাম যাৰতা নেয্যং পৰত্তিতব্বং, তথা অপৰত্তনতো ‘‘যট্ঠিকোটিযা উপ্পীল়েন্তো ৰিযা’’তিআদি ৰুত্তং. অনুপদধম্মৰিপস্সনায অভাৰতো ‘‘একদেসমেৰ সম্মসন্তো’’তি ৰুত্তং.

বুদ্ধানং সম্মসনচারো দসসহস্সিলোকধাতুযং সত্তসন্তানগতা, অনিন্দ্রিযবদ্ধা চ সঙ্খারাতি ৰদন্তি, কোটিসতসহস্সচক্কৰাল়েসূতি অপরে. তথা হি অদ্ধত্তযৰসেন পটিচ্চসমুপ্পাদনযং ওসরিত্ৰা ছত্তিংসকোটিসতসহস্সমুখেন বুদ্ধানং মহাৰজিরঞাণং পৰত্তং. পচ্চেকবুদ্ধানং সসন্তানগতেহি সদ্ধিং মজ্ঝিমদেসৰাসিসত্তসন্তানগতা অনিন্দ্রিযবদ্ধা চ সম্মসনচারোতি ৰদন্তি, জম্বুদীপৰাসিসত্তসন্তানগতাতি কেচি. ধম্মসেনাপতিনোপি যথাৰুত্তসাৰকানং ৰিপস্সনাভূমিযেৰ সম্মসনচারো. তত্থ পন থেরো সাতিসযং নিরৰসেসং অনুপদধম্মং ৰিপস্সি. তেন ৰুত্তং – ‘‘সাৰকানং সম্মসনচারং নিপ্পদেসং সম্মসী’’তি.

তত্থ ‘‘সাৰকানং ৰিপস্সনাভূমী’’তি এত্থ সুক্খৰিপস্সকা লোকিযাভিঞ্ঞপ্পত্তা পকতিসাৰকা অগ্গসাৰকা পচ্চেকবুদ্ধা সম্মাসম্বুদ্ধাতি ছসু জনেসু সুক্খৰিপস্সকানং ঝানাভিঞ্ঞাহি অনধিগতপঞ্ঞানেপুঞ্ঞত্তা অন্ধানং ৰিয ইচ্ছিতপদেসোক্কমনং ৰিপস্সনাকালে ইচ্ছিকিচ্ছিতধম্মৰিপস্সনা নত্থি. তে যথাপরিগ্গহিতধম্মমত্তেযেৰ ঠত্ৰা ৰিপস্সনং ৰড্ঢেন্তি. লোকিযাভিঞ্ঞপ্পত্তা পন পকতিসাৰকা যেন মুখেন ৰিপস্সনং আরভন্তি; ততো অঞ্ঞেন ৰিপস্সনং ৰিত্থারিকং কাতুং সক্কোন্তি ৰিপুলঞাণত্তা. মহাসাৰকা অভিনীহারসম্পন্নত্তা ততো সাতিসযং ৰিপস্সনং ৰিত্থারিকং কাতুং সক্কোন্তি. অগ্গসাৰকেসু দুতিযো অভিনীহারসম্পত্তিযা সমাধানস্স সাতিসযত্তা ৰিপস্সনং ততোপি ৰিত্থারিকং করোতি. পঠমো পন ততো মহাপঞ্ঞতায সাৰকেহি অসাধারণং ৰিত্থারিকং করোতি. পচ্চেকবুদ্ধো তেহিপি মহাভিনীহারতায অত্তনো অভিনীহারানুরূপং ততোপি ৰিত্থারিকৰিপস্সনং করোন্তি. বুদ্ধানং, সম্মদেৰ, পরিপূরিতপঞ্ঞাপারমিপভাৰিত-সব্বঞ্ঞুতঞ্ঞাণাধিগমনস্স অনুরূপাযাতি. যথা নাম কতৰালৰেধপরিচযেন সরভঙ্গসদিসেন ধনুগ্গহেন খিত্তো সরো অন্তরা রুক্খলতাদীসু অসজ্জমানো লক্খণেযেৰ পততি; ন সজ্জতি ন ৰিরজ্ঝতি, এৰং অন্তরা অসজ্জমানা অৰিরজ্ঝমানা ৰিপস্সনা সম্মসনীযধম্মেসু যাথাৰতো নানানযেহি পৰত্ততি. যং মহাঞাণন্তি ৰুচ্চতি, তস্স পৰত্তিআকারভেদো গণতো ৰুত্তোযেৰ.

এতেসু চ সুক্খৰিপস্সকানং ৰিপস্সনাচারো খজ্জোতপভাসদিসো, অভিঞ্ঞপ্পত্তপকতিসাৰকানং দীপপভাসদিসো, মহাসাৰকানং ওক্কাপভাসদিসো, অগ্গসাৰকানং ওসধিতারকাপভাসদিসো, পচ্চেকবুদ্ধানং চন্দপভাসদিসো, সম্মাসম্বুদ্ধানং রস্মিসহস্সপটিমণ্ডিতসরদসূরিযমণ্ডলসদিসো উপট্ঠাসি. তথা সুক্খৰিপস্সকানং ৰিপস্সনাচারো অন্ধানং যট্ঠিকোটিযা গমনসদিসো, লোকিযাভিঞ্ঞপ্পত্তপকতিসাৰকানং দণ্ডকসেতুগমনসদিসো, মহাসাৰকানং জঙ্ঘসেতুগমনসদিসো, অগ্গসাৰকানং সকটসেতুগমনসদিসো, পচ্চেকবুদ্ধানং মহাজঙ্ঘমগ্গগমনসদিসো, সম্মাসম্বুদ্ধানং মহাসকমগ্গগমনসদিসোতি ৰেদিতব্বো.

অরহত্তঞ্চ কির পত্ৰাতি এত্থ কির-সদ্দো অনুস্সৰলদ্ধোযমত্থোতি দীপেতুং ৰুত্তো. পত্ৰা অঞ্ঞাসি অত্তনো ৰিপস্সনাচারস্স মহাৰিসযত্তা তিক্খৰিসদসূরভাৰস্স চ সল্লক্খণেন. কথং পনাযং মহাথেরো দন্ধং অরহত্তং পাপুণন্তো সীঘং অরহত্তং পত্ততো পঞ্ঞায অত্তানং সাতিসযং কত্ৰা অঞ্ঞাসীতি আহ – ‘‘যথা হী’’তিআদি. মহাজটন্তি মহাজালসাখং অতিৰিয সিব্বিতজালং. যট্ঠিং পন সারং ৰা উজুং ৰা ন লভতি ৰেণুগ্গহণে অনুচ্চিনিত্ৰা ৰেণুস্স গহিতত্তা. এৰংসম্পদন্তি যথা তেসু পুরিসেসু একো ৰেল়ুগ্গহণে অনুচ্চিনিত্ৰা ৰেল়ুযট্ঠিং গণ্হাতি, একো উচ্চিনিত্ৰা, এৰং নিপ্ফত্তিকং. পধানন্তি ভাৰনানুযুঞ্জনং.

সত্তসট্ঠি ঞাণানীতি পটিসম্ভিদামগ্গে (পটি. ম. ১.৭৩ মাতিকা) আগতেসু তেসত্ততিযা ঞাণেসু ঠপেত্ৰা ছ অসাধারণঞাণানি সুতমযঞাণাদীনি পটিভানপটিসম্ভিদাঞাণপরিযোসানানি সত্তসট্ঠি ঞাণানি. তানি হি সাৰকেহি পৰিচিতব্বানি, ন ইতরানি. সোল়সৰিধং পঞ্ঞন্তি (সং. নি. অট্ঠ. ৩.৫.৩৭৯; সং. নি. টী. ৩.৫.৩৭৯) মহাপঞ্ঞাদিকা, নৰানুপুব্বৰিহারসমাপত্তিপঞ্ঞাতি ইদং সোল়সৰিধং পঞ্ঞং.

তত্রাতি তস্স. ইদং হোতীতি ইদং দানি ৰুচ্চমানং অনুপুব্বসম্মসনং হোতি. ৰিপস্সনাকোট্ঠাসন্তি ৰিতক্কাদিসম্মসিতব্বধম্মৰিভাগেন ৰিভত্তৰিপস্সনাভাগং.

৯৪. পঠমে ঝানেতি উপসিলেসে ভুম্মং, তস্মা যে পঠমে ঝানে ধম্মাতি যে পঠমজ্ঝানসংসট্ঠা ধম্মাতি অত্থো. অন্তোসমাপত্তিযন্তি চ সমাপত্তিসহগতে চিত্তুপ্পাদে সমাপত্তিসমঞ্ঞং আরোপেত্ৰা ৰুত্তং. ৰৰত্থিতাতি কতৰৰত্থনা নিচ্ছিতা. পরিচ্ছিন্নাতি ঞাণেন পরিচ্ছিন্না সলক্খণতো পরিচ্ছিজ্জ ঞাতা. ওলোকেন্তোতি ঞাণচক্খুনা পচ্চক্খতো পস্সন্তো. অভিনিরোপনং আরম্মণে চিত্তস্স আরোপনং. অনুমজ্জনং আরম্মণে চিত্তস্স অনুৰিচারণং. ফরণং পণীতরূপেহি কাযস্স ব্যাপনং, ৰিপ্ফারিকভাৰো ৰা. সাতন্তি সাতমধুরতা. অধিক্খেপো ৰিক্খেপস্স পটিপক্খভূতং সমাধানং. ফুসনং ইন্দ্রিযৰিসযৰিঞ্ঞাণস্স ততো উপ্পজ্জিত্ৰা আরম্মণে ফুসনাকারেন ৰিয পৰত্তি. ৰেদযিতং আরম্মণানুভৰনং. সঞ্জাননং নীলাদিৰসেন আরম্মণস্স সল্লক্খণং. চেতযিতং চেতসো ব্যাপারো. ৰিজাননং আরম্মণূপলদ্ধি. কত্তুকম্যতা চিত্তস্স আরম্মণেন অত্থিকতা. তস্মিং আরম্মণে অধিমুচ্চনং, সন্নিট্ঠানং ৰা অধিমোক্খো. কোসজ্জপক্খে পতিতুং অদত্ৰা চিত্তস্স পগ্গণ্হনং পগ্গাহো, অধিগ্গহোতি অত্থো. আরম্মণং উপগন্ত্ৰা ঠানং, অনিস্সজ্জনং ৰা উপট্ঠানং. সমপ্পৰত্তেসু অস্সেসু সারথি ৰিয সকিচ্চপসুতেসু সম্পযুত্তেসু অজ্ঝুপেক্খনং মজ্ঝত্ততা. সম্পযুত্তধম্মানং আরম্মণে অনুনযনং সংচরণং অনুনযো. সভাৰতোতি যথাভূতসভাৰতো. সোল়সন্নং এৰ চেত্থ ধম্মানং গহণং তেসংযেৰ থেরেন ৰৰত্থাপিতভাৰতো, তে এৰস্স তদা উপট্ঠহিংসু, ন ইতরেতি ৰদন্তি. ৰীরিযসতিগ্গহণেন চেত্থ ইন্দ্রিযভাৰসামঞ্ঞতো সদ্ধাপঞ্ঞা; সতিগ্গহণেনেৰ একন্তানৰজ্জভাৰসামঞ্ঞতো পস্সদ্ধিআদযো ছ যুগল়া; অলোভাদোসা চ সঙ্গহিতা ঝানচিত্তুপ্পাদপরিযাপন্নত্তা তেসং ধম্মানং. থেরেন চ ধম্মা ৰৰত্থানসামঞ্ঞতো আরদ্ধা. তে ন উপট্ঠহিংসূতি ন সক্কা ৰত্তুন্তি অপরে.

ৰিদিতা উপ্পজ্জন্তীতি উপ্পাদেপি নেসং ৰেদনানং পজাননং হোতিযেৰাতি অত্থো. সেসপদদ্ৰযেপি এসেৰ নযো. তং জানাতীতি তংঞাণো, তস্স ভাৰো তংঞাণতা, ঞাণস্স অত্তসংৰেদনন্তি অত্থো. তংসমানযোগক্খমাহি সম্পযুত্তধম্মা. ঞাণবহুতাতি ঞাণস্স বহুভাৰো, একচিত্তুপ্পাদে অনেকঞাণতাতি অত্থো. ইদানি তমেৰত্থং ৰিৰরিতুং, ‘‘যথা হী’’তিআদি ৰুত্তং. ন সক্কা জানিতুং আরম্মণকরণস্স অভাৰতো. অসম্মোহাৰবোধো চ ঈদিসস্স ঞাণস্স নত্থি. একেকমেৰ ঞাণং উপ্পজ্জতি তস্মিং খণে একস্সেৰ আৰজ্জনস্স উপ্পজ্জনতো, ন চ আৰজ্জনেন ৰিনা চিত্তুপ্পত্তি অত্থি. ৰুত্তঞ্হেতং –

‘‘চুল্লাসীতিসহস্সানি, কপ্পা তিট্ঠন্তি যে মরূ;

ন ত্ৰেৰ তেপি জীৰন্তি, দ্ৰীহি চিত্তেহি সংযুতা’’তি. (মহানি. ১০, ৩৯) চ,

‘‘নত্থি চিত্তে যুগা গহী’’তি চ –

ৰত্থারম্মণানং পরিগ্গহিততাযাতি যস্মিঞ্চ আরম্মণে যে ঝানধম্মা পৰত্তন্তি, তেসং ৰত্থারম্মণানং পগেৰ ঞাণেন পরিচ্ছিজ্জ গহিতত্তা. যথা নাম মিগসূকরাদীনং আসযেপরিগ্গহিতে তত্র ঠিতা মিগা ৰা সূকরা ৰা ততো উট্ঠানতোপি আগমনতোপি নেসাদস্স সুখগ্গহণা হোন্তি, এৰংসম্পদমিদং. তেনাহ ‘‘থেরেন হী’’তিআদি. তেনাতি ৰত্থারম্মণানং পরিগ্গহিতভাৰেন. অস্সাতি থেরস্স. তেসং ধম্মানন্তি ঝানচিত্তুপ্পাদপরিযাপন্নানং ধম্মানং. উপ্পাদং আৰজ্জন্তস্সাতিআদিনা উপ্পাদাদীসু যং যদেৰ আরব্ভ ঞাণং উপ্পজ্জতি; তস্মিং তস্মিং খণে তস্স তস্সেৰ চস্স পাকটভাৰো দীপিতো. ন হি আৰজ্জনেন ৰিনা ঞাণং উপ্পজ্জতি. অহুত্ৰা সম্ভোন্তীতি পুব্বে অৰিজ্জমানা হুত্ৰা সম্ভৰন্তি, অনুপ্পন্না উপ্পজ্জন্তীতি অত্থো. উদযং পস্সতি তেসং ধম্মানং, ‘‘অহুত্ৰা সম্ভোন্তী’’তি উপ্পাদক্খণসমঙ্গিভাৰদস্সনতো. পুব্বে অভাৰবোধকো হি অত্তলাভো ধম্মানং উদযো. হুত্ৰাতি উপ্পজ্জিত্ৰা. পটিৰেন্তীতি পটি খণে খণে ৰিনস্সন্তি. ৰযং পস্সতি, ‘‘হুত্ৰা পটিৰেন্তী’’তি তেসং ধম্মানং ভঙ্গক্খণসমঙ্গিভাৰদস্সনতো. ৰিদ্ধংসভাৰবোধকো হি ধম্মানং ৰিজ্জমানতো ৰযো.

তেসু ধম্মেসু নত্থি এতস্স উপযো রাগৰসেন উপগমনন্তি অনুপযো, অননুরোধো. হুত্ৰা ৰিহরতীতি যোজনা. তথা নত্থি এতস্স অপাযো পটিঘৰসেন অপগমনন্তি অনপাযো, অৰিরোধো. ‘‘এতং মম, এসো মে অত্থা’’তি তস্স তণ্হাদিট্ঠিঅভিনিৰেসাভাৰতো তণ্হাদিট্ঠিনিস্সযেহি অনিস্সিতো. অপ্পটিবদ্ধোতি অনুপযানিস্সিতভাৰতো ৰিপস্সনায পরিবন্ধৰসেন ছন্দরাগেন ন পটিবদ্ধো ন ৰিবন্ধিতো. ৰিপ্পমুত্তোতি ততো এৰ ৰিক্খম্ভনৰিমুত্তিৰসেন কামরাগতো ৰিমুত্তো. ৰিসংযুত্তো ৰিক্খম্ভনৰসেনেৰ পটিপক্খধম্মেহি ৰিসংযুত্তো.

কিলেসমরিযাদা তেন কতা ভৰেয্যাতি অন্তোসমাপত্তিযং পৰত্তে সোল়স ধম্মে আরব্ভ পৰত্তমানং ৰিপস্সনাৰীথিং ভিন্দিত্ৰা সচে রাগাদযো উপ্পজ্জেয্যুং; তস্স ৰিপস্সনাৰীথিযা কিলেসমরিযাদা তেন চিত্তেন, চিত্তসমঙ্গিনা ৰা কতা ভৰেয্য. তেসূতি তেসু ধম্মেসু. অস্সাতি থেরস্স. একোপীতি রাগাদীসু একোপীতি চ ৰদন্তি. ৰুত্তাকারেন একচ্চানং অনাপাথগমনে সতি ৰিপস্সনা ন তেসু ধম্মেসু নিরন্তরপ্পৰত্তাতি আরম্মণমরিযাদা ভৰেয্য. ৰিক্খম্ভিতপচ্চনীকত্তাতি ৰিপস্সনায পটিপক্খধম্মানং পগেৰ ৰিক্খম্ভিতত্তা ইদানিপি ৰিক্খম্ভেতব্বা কিলেসা নত্থীতি ৰুত্তং.

ইতোতি পঠমজ্ঝানতো. অনন্তরোতি উপরিমো ঝানাদিৰিসেসো. তস্স পজাননস্সাতি, ‘‘অত্থি উত্তরি নিস্সরণ’’ন্তি এৰং পৰত্তজাননস্স. বহুলীকরণেনাতি পুনপ্পুনং উপ্পাদনেন.

সম্পসাদনট্ঠেনাতি কিলেসকালুসিযাপগমনেন, তস্স ৰিচারক্খোভৰিগমেন ৰা চেতসো সম্মদেৰ পাসাদিকভাৰেন.

ৰীরিযং সতি উপেক্খাতি আগতট্ঠানে পারিসুদ্ধিউপেক্খা, অদুক্খমসুখাৰেদনাতি এত্থ ঝানুপেক্খাতি, ‘‘সুখট্ঠানে ৰেদনুপেক্খাৰা’’তি ৰুত্তং. সুখট্ঠানেতি চ পঠমজ্ঝানাদীসু সুখস্স ৰুত্তট্ঠানে. পস্সদ্ধত্তাতি সমধুরচেতযিতভাৰেন আরম্মণে ৰিসটৰিত্থতভাৰতো যো সো চেতসো আভোগো ৰুত্তো. সামঞ্ঞফলাদীসু সতিযা পারিসুদ্ধি, সা থন অত্থতো সতিৰিনিমুত্তা নত্থীতি আহ ‘‘পরিসুদ্ধাসতিযেৰা’’তি. পারিসুদ্ধিউপেক্খা, ন ঝানুপেক্খাদযো.

৯৫. ঈদিসেসু ঠানেসু সতিযা ন কদাচিপি ঞাণৰিরহো অত্থীতি আহ – ‘‘ঞাণেন সম্পজানো হুত্ৰা’’তি. তথা হি ততিযজ্ঝানে, ‘‘সতিমা সুখৰিহারী’’তি এত্থ সম্পজানোতি অযমত্থো ৰুত্তো এৰ হোতি. ন সাৰকানং অনুপদধম্মৰিপস্সনা হোতি সঙ্খারাৰসেসসুখুমপ্পৰত্তিযা দুৰিঞ্ঞেয্যত্তা ৰিনিব্ভুজিত্ৰা গহেতুং অসক্কুণেয্যভাৰতো. তেনাহ – ‘‘কলাপৰিপস্সনং দস্সেন্তো এৰমাহা’’তি.

৯৬. পঞ্ঞায চস্সদিস্ৰা আসৰা পরিক্খীণা হোন্তীতি দস্সনসমকালং খীযমানা আসৰা, ‘‘দিস্ৰা পরিক্খীণা হোন্তী’’তি ৰুত্তা. সমানকালেপি হি এদিসো সদ্দপ্পযোগো দিস্সতি –

‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি (ম. নি. ১.২০৪, ৪০০; ৩.৪২১, ৪২৫, ৪২৬; সং. নি. ২.৪৩-৪৫; ২.৪.৬০; কথা. ৪৬৫, ৪৬৭).

‘‘নিহন্ত্ৰা তিমিরং সব্বং, উগ্গতেজো সমুগ্গতো;

ৰেরোচনো রস্মিমালী, লোকচক্খুপভঙ্করো’’তি. (পট্ঠা. অনুটী. ১.২৫-৩৪; ৰিসুদ্ধি. মহাটী. ২.৫৮০) চ –

এৰমাদীসু. হেতুঅত্থো ৰা অযং দিস্ৰাসদ্দো অসমানকত্তুকো যথা – ‘‘ঘতং পিৰিত্ৰা বলং হোতি, সীহং দিস্ৰা ভযং হোতী’’তি (ৰিসুদ্ধি. মহাটী. ২.৮০২). দস্সনহেতুকো হি আসৰানং পরিক্খযো পরিঞ্ঞাসচ্ছিকিরিযাভাৰনাভিসমযে সতি পহানাভিসমযস্স লব্ভনতো. যুগনদ্ধং আহরিত্ৰাতি পঠমজ্ঝানং সমাপজ্জিত্ৰা ৰুট্ঠায তত্থ ঝানধম্মে সম্মসন্তো সমথৰিপস্সনং যুগনদ্ধং ভাৰেতি. এৰং যাৰ নেৰসঞ্ঞানাসঞ্ঞাযতনং সমাপজ্জিত্ৰা ৰুট্ঠায তত্থ সম্মসন্তো সমথৰিপস্সনং যুগনদ্ধং কত্ৰা যথা থেরো অরহত্তং পাপুণি. তং সন্ধায ৰুত্তং – ‘‘অরহত্তং পত্তৰারো ইধ গহিতো’’তি. ইধাতি ইমস্মিং সুত্তে. দীঘনখসুত্তদেসনায (ম. নি. ২.২০৫-২০৬) হি থেরো অরহত্তং পত্তো. তদা চ অনাগামী হুত্ৰা নিরোধং সমাপজ্জতীতি ৰচনঅৰসরো নত্থি, তস্মা ৰুত্তং – ‘‘অরহত্তং পত্তৰারো ইধ গহিতো’’তি. যদি এৰং – ‘‘সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতী’’তি ইদং কস্মা ৰুত্তন্তি? থেরে ৰিজ্জমানে পণ্ডিতগুণে অনৰসেসতো দস্সেত্ৰা অরহত্তনিকূটেন দেসনং নিট্ঠাপেতুং. নিরোধসমাপজ্জনং পন থেরস্স আচিণ্ণসমাচিণ্ণং. তেনাহ ‘‘নিরোধং পন…পে… ৰদন্তী’’তি. তেন ফলসমাপত্তিম্পি অন্তরা সমাপজ্জতিযেৰাতি দস্সেতি.

ৰোমিস্সং ৰিৰরিতুং ‘‘তত্থস্সা’’তিআদি ৰুত্তং. তত্থ ‘‘নিরোধং সমাপজ্জিস্সামী’’তি আভোগেন সমথৰিপস্সনং যুগনদ্ধং আহরিত্ৰা ঠিতস্স নিরোধসমাপত্তি সীসং নাম হোতি, তস্স আভোগৰসেন নিরোধস্স ৰারো আগচ্ছতি. ফলসমাপত্তি গূল়্হো হোতি, ‘‘ফলসমাপত্তিং সমাপজ্জিস্সামী’’তি আভোগস্স অভাৰতো. ফলসমাপত্তি সীসং হোতীতি এত্থাপি ৰুত্তনযেন অত্থো ৰেদিতব্বো. এতেন আভোগপটিবদ্ধমেতেসং আগমনন্তি দীপিতন্তি ৰেদিতব্বং. জম্বুদীপৰাসিনো থেরা পনাতিআদি অট্ঠকথারুল়্হমেৰ তং ৰচনং. অন্তোসমাপত্তিযন্তি নিরোধং সমাপন্নকালে. তিসমুট্ঠানিকরূপধম্মেতি উতুকম্মাহারৰসেন তিসমুট্ঠানিকরূপধম্মে.

৯৭. চিণ্ণৰসিতন্তি পটিপক্খদূরিভাৰেন সুভাৰিতৰসীভাৰং. নিপ্ফত্তিং পত্তোতি উক্কংসপরিনিপ্ফত্তিং পত্তো. উরে ৰাযামজনিতায ওরসো. পভাৰিতন্তি উপ্পাদিতং. ধম্মেনাতি অরিযমগ্গধম্মেন. তস্স হি অধিগমেন অরিযায জাতিযা জাতো নিব্বত্তোতি কত্ৰা, ‘‘ধম্মজো ধম্মনিম্মিতো’’তি ৰুচ্চতি. ধম্মদাযস্সাতি নৰৰিধস্স লোকুত্তরধম্মদাযস্স. আদিযনতোতি গণ্হনতো, সসন্তানে উপ্পাদনতোতি অত্থো. সেসং সুৰিঞ্ঞেয্যমেৰ.

অনুপদসুত্তৰণ্ণনায লীনত্থপ্পকাসনা সমত্তা.

২. ছব্বিসোধনসুত্তৰণ্ণনা

৯৮. খীণা জাতীতি অত্তনো জাতিক্খযং পটিজানন্তেন অরহত্তং ব্যাকতং হোতি অরহতো তদভাৰতো. তথা ৰুসিতং ব্রহ্মচরিযন্তি মগ্গব্রহ্মচরিযৰাসো মে পরিযোসিতোতি পটিজানন্তেনপি. কতং করণীযন্তি চতূহি মগ্গেহি চতূসু সচ্চেসু পরিঞ্ঞাদিৰসেন সোল়সৰিধস্সপি কিচ্চস্স অত্তনা নিট্ঠাপিতভাৰং পটিজানন্তেনপি. নাপরং ইত্থত্তাযাতি আযতিং পুনব্ভৰাভাৰং, আযতিং ৰা পরিঞ্ঞাদিকরণীযাভাৰং পটিজানন্তেনপীতি আহ – ‘‘একেনপি পদেন অঞ্ঞা ব্যাকতাৰ হোতী’’তি. দ্ৰিক্খত্তুং বদ্ধং পন সুবদ্ধং ৰিযাতি ৰুত্তং. ইধ পন অঞ্ঞাব্যাকরণং চতূহি পদেহি আগতং, তস্মা ৰত্তব্বমেৰ চেত্থ নত্থীতি অধিপ্পাযো. চেতনায দিট্ঠৰাদিতা নাম অরিযৰোহারো. সভাৰোতি পকতিঅত্থো হি অযং ধম্মসদ্দো, ‘‘জাতিধম্মা জরাধম্মা’’তিআদীসু (ম. নি. ১.২৭৪-২৭৫) ৰিয তস্মা, অনুধম্মোতি অরিযভাৰং অনুগতা পকতীতি অত্থো. পরমপ্পিচ্ছতায অরিযা অত্তনো গুণে অনাৰিকরোন্তাপি সাসনস্স নিয্যানিকভাৰপৰেদনত্থঞ্চেৰ সব্রহ্মচারীনং সম্মাপটিপত্তিযং উস্সাহজননত্থঞ্চ তাদিসানং পরিনিব্বানসমযেযেৰ আৰিকরোন্তীতি অধিপ্পাযেনাহ – ‘‘পরিনিব্বুতস্স…পে… কাতব্বো’’তি.

৯৯. দুব্বলন্তি ফেগ্গু ৰিয সুভেজ্জনীযং বলৰিরহিতং, অসারন্তি অত্থো. ৰিরাগুতন্তি পলুজ্জনসভাৰং. ৰিগচ্ছনসভাৰন্তি ৰিনাসগমনসভাৰং. অনিচ্চদুক্খৰিপরিণামত্তা অস্সাসলেসস্সপি অভাৰতো অস্সাসৰিরহিতং. আরম্মণকরণৰসেন সমন্নাগমনৰসেন চ যথারহং উপেন্তি উপগচ্ছন্তীতি উপযা, ‘‘এতং মম, এসো মে অত্তা’’তি উপাদিযন্তি দল়্হগ্গাহং গণ্হন্তীতি উপাদানা. অধিতিট্ঠতি চেতসো অভিনন্দনভূতাতি চেতসো অধিট্ঠানং. তাহীতি তণ্হাদিট্ঠীহি. তন্তি চিত্তং. অভিনিৰিসতীতি অভিরতিৰসেন নিৰিসতি, অযঞ্হেত্থ অত্থো – সক্কাযধম্মেসু চিত্তং অভিনিৰিসতি ‘‘এতং মমং, এসো মে অত্তা’’তি অজ্ঝোসায তিট্ঠতি এতাহি অভিনিৰেসাহি, তথা সক্কাযধম্মেসু চিত্তং অনুসেতি এতাহীতি অনুসযা, তণ্হাদিট্ঠিযো. যদগ্গেন হি তেভূমকধম্মেসু রাগাদযো অনুসেন্তি, তদগ্গেন তংসহগতধম্মা তত্থ অনুসেন্তীতি পরিযাযেন, ‘‘তং অনুসেতী’’তি ৰুত্তং. খযা ৰিরাগাতি হেতুম্হি নিস্সক্কৰচনন্তি ‘‘খযেন ৰিরাগেনা’’তি হেতুম্হি করণৰসেন অত্থো ৰুত্তো. ৰিরাগেনাতি চ ইতিসদ্দো আদি অত্থো. তেন ‘‘নিরোধেনা’’তি এৰমাদিকং গহিতং হোতি. অঞ্ঞমঞ্ঞৰেৰচনানেৰ উপযাদীনং সমুচ্ছেদস্সেৰ বোধনতো.

১০০. পতিট্ঠাতি এত্থ সেসভূতত্তযং উপাদারূপঞ্চাতি পতিট্ঠানা, নিজ্জীৰট্ঠেন ধাতুচাতি পতিট্ঠানধাতু. ন্হানীযচুণ্ণং বাহিরউদকং ৰিয সেসভূতত্তযং আবন্ধতীতি আবন্ধনং. পচনীযভত্তং বাহিরতেজো ৰিয সেসভূতত্তযং পরিপাচেতীতি পরিপাচনং. বাহিরৰাতো ৰিয সেসভূতত্তযং ৰিত্থম্ভেতীতি ৰিত্থম্ভনং. ধাতুসদ্দত্থো ৰুত্তোযেৰ. অসম্ফুট্ঠধাতূতি অসম্ফুসিতভাৰো তেসং ৰিপরিমট্ঠতাভাৰতো. ৰিজাননং আরম্মণূপলদ্ধি. অহং অত্তাতি অহং, ‘‘রূপধম্মো মে অত্তা’’তি অত্তকোট্ঠাসেন অত্তভাৰেন ন উপগমিং ন গণ্হিং. নিস্সিতনিস্সিতাপি নিস্সিতা এৰ নামাতি আহ ‘‘পথৰীধাতুনিস্সিতাৰা’’তি. অত্তনা ৰা পন তন্নিস্সিতাতি ‘‘একেন পরিযাযেনা’’তি. উপাদারুপম্পি কামং নিস্সিতম্পি হোতি. তথাপি তং নিস্সিতং হোতিযেৰাতি তং ন উদ্ধটং. পরিচ্ছেদকরত্তা পরিচ্ছেদাকাসস্স ‘‘অৰিনিব্ভোগৰসেনা’’তি ৰুত্তং. তেন চ তথা পরিচ্ছিন্নত্তা সব্বম্পি ভূতুপাদারূপং আকাসধাতুনিস্সিতং নাম. তং নিস্সায পৰত্তিযা উপাদারূপং ৰিয ভূতরূপানি, অরূপক্খন্ধা ৰিয চ ৰত্থুরূপানি, ‘‘তংনিস্সিতরূপৰত্থুকা অরূপক্খন্ধা’’তি ৰুত্তনযেন আকাসধাতুনিস্সিতচক্খাদিরূপধম্মৰত্থুকা ৰেদনাদযো অরূপক্খন্ধা আকাসধাতুনিস্সিতা নামাতি ইমমত্থং তথা-সদ্দেন উপসংহরতি. ইধাপীতি আকাসধাতুনিস্সিতপদেপি, ন পথৰীধাতুনিস্সিতপদাদীসু এৰ. রূপারূপন্তি সব্বম্পি রূপারূপং গহিতমেৰ হোতি, অগ্গহিতং নত্থি. সহজাতা…পে… নিস্সিতন্তি ইদং নিপ্পরিযাযসিদ্ধং নিস্সযত্তং গহেত্ৰা ৰুত্তং. হেট্ঠা ৰুত্তনযেন পরিযাযসিদ্ধে নিস্সযত্তে গয্হমানে – ‘‘পচ্ছাজাতপচ্চযোতি পচ্ছাজাতা চিত্তচেতসিকা ধম্মা পুরেজাতস্স ইমস্স কাযস্স পচ্ছাজাতপচ্চযেন পচ্চযো’’তি (পট্ঠা. ১.১.১১) ৰচনতো সব্বং চতুসমুট্ঠানিকরূপং, ‘‘ৰিঞ্ঞাণধাতুনিস্সিত’’ন্তি ৰত্তব্বং. তথা অনন্তরৰিঞ্ঞাণধাতুপচ্চযা পৰত্তনতো, ‘‘ৰিঞ্ঞাণধাতুনিস্সিত’’ন্তি ৰত্তব্বং.

১০১. রুপ্পতি ৰণ্ণৰিকারং আপজ্জমানং হদযঙ্গতভাৰং পকাসেতীতি রূপন্তি অযমত্থো চক্খুদ্ৰারে আপাথগতে রূপাযতনে নিপ্পরিযাযতো লব্ভতি, ন আপাথমনাগতে. চক্খুৰিঞ্ঞাণৰিঞ্ঞাতব্বভাৰো পন আপাথমনাগতেপি তস্মিং লব্ভতেৰ তংসভাৰানতিৰত্থনতো. রূপাযতনং দ্ৰিধা ৰিভজিত্ৰা. থেরো পন আপাথং অনাগতস্সাপি রূপাযতনস্স রূপভাৰং ন সক্কা পটিক্খিপিতুন্তি দ্ৰিধাকরণং নানুজানন্তো ছন্নোৰাদং নিদস্সেতি, ‘‘উপরি ছন্নোৰাদে কিন্তি করিস্সথা’’তি. তত্থ হি ‘‘চক্খুং, আৰুসো ছন্ন, চক্খুৰিঞ্ঞাণং চক্খুৰিঞ্ঞাণৰিঞ্ঞাতব্বে ধম্মে’’তি (ম. নি. ৩.৩৯১) আগতং, ন চেত্থ চক্খুদ্ৰারে আপাথং আগতমেৰ রূপাযতনং চক্খুৰিঞ্ঞাণৰিঞ্ঞাতব্বপদেন গহিতং, ন আপাথং অনাগতন্তি সক্কা ৰিঞ্ঞাতুং অৰিসেসেনেৰ রূপাযতনেন তণ্হামানদিট্ঠিগাহাভাৰস্স জোতিতত্তা. তেনাহ ‘‘ন যিদং লব্ভতী’’তি. রূপমেৰাতি রূপাযতনমেৰ. যদি এৰং ‘‘চক্খুৰিঞ্ঞাণৰিঞ্ঞাতব্বেসু ধম্মেসূ’’তি পদং কথং নেতব্বন্তি আহ – ‘‘চক্খুৰিঞ্ঞাণসম্পযুত্তা পনা’’তিআদি. চক্খুৰিঞ্ঞাণেন সদ্ধিং ৰিঞ্ঞাতব্বেসূতি যেন মনোৰিঞ্ঞাণেন চক্খুৰিঞ্ঞাণং অনিচ্চন্তিআদিনা চক্খুৰিঞ্ঞাণেন সদ্ধিং তেন ৰিঞ্ঞাতব্বেসু তংসম্পযুত্তধম্মেসূতি অত্থো. তণ্হাছন্দোতি তস্সনসভাৰো ছন্দো, ন কত্তুকম্যতা ছন্দোযেৰাতি তণ্হাছন্দো. রজ্জনৰসেনাতি ৰত্থং ৰিয রঙ্গজাতং চিত্তস্স অনুরঞ্জনৰসেন. অভিনন্দনৰসেনাতি আরম্মণে অভিরমিত্ৰা নন্দনৰসেন. সপ্পীতিকতণ্হা হি নন্দীতি ৰুচ্চতি. তণ্হাযনৰসেন তণ্হা.

১০২. অহঙ্কারোতি ‘‘সেয্যোহমস্মী’’তিআদিনা (ধ. স. ১১২১, ১২৩৯; ৰিভ. ৮৩২, ৮৬৬; সং. নি. ৪.১০৮; মহানি. ২১, ১৭৮) অহংকরণং. যেন হি মমং করোতি, এতং মমঙ্কারো. স্ৰেৰাতি ‘‘অহঙ্কারো’’তি ৰুত্তমানো. এৰং চতুত্থজ্ঝানে নিদ্দিট্ঠে সব্বাসু লোকিযাভিঞ্ঞাসু ৰুচ্চমানাসু হেট্ঠা ৰিজ্জাদ্ৰযং ৰত্তব্বন্তি অধিপ্পাযেন, ‘‘পুব্বেনিৰাসং দিব্বচক্খুঞ্চ অৰত্ৰা কস্মা ৰুত্ত’’ন্তি আহ? ইতরো ইধ সব্বৰারেসুপি লোকুত্তরধম্মপুচ্ছা অধিকতা তস্মা ‘‘সো এৰং সমাহিতে’’তিআদিনা ততিযা ৰিজ্জা কথিতাতি দস্সেন্তো, ‘‘ভিক্খূ লোকিযধম্মং ন পুচ্ছন্তী’’তিআদিমাহ. একৰিস্সজ্জিতসুত্তং নামেতং ততিযৰিজ্জায এৰ আগতত্তা. অরিযধম্মৰসেনপিস্স সমঞ্ঞা অত্থেৰাতি দস্সেন্তো, ‘‘ছব্বিসোধনন্তিপিস্স নাম’’ন্তি ৰত্ৰা তেসু ধম্মেসু ভেদং দস্সেতুং, ‘‘এত্থ হী’’তিআদি ৰুত্তং. ৰিসুদ্ধাতি তস্সা চোদনায সোধনৰসেন ৰিসোধিতা. একমেৰ কত্ৰাতি একৰারৰসেনেৰ পাল়িযং একজ্ঝং আগতত্তা একমেৰ কোট্ঠাসং কত্ৰা. যদি এৰং কথং ৰা ছব্বিসোধনতাতি আহ – ‘‘চতূহি আহারেহি সদ্ধি’’ন্তি কথং পনেত্থ চত্তারো আহারা গহেতব্বাতি? কেচি তাৰ আহু – ‘‘সাধূতি ভাসিতং অভিনন্দিত্ৰা অনুমোদিত্ৰা উত্তরি পঞ্হো পুচ্ছিতব্বো’’তি হেট্ঠা আগতেন নযেন আহারৰারো আহরিত্ৰা ৰত্তব্বোতি. ‘‘বহিদ্ধা সব্বনিমিত্তেসূ’’তি এত্থ আহারানম্পি সঙ্গহিতত্তা আহারা অত্থতো আগতা এৰাতি অঞ্ঞে. অপরে পন রূপক্খন্ধগ্গহণেন কবল়ীকারো আহারো, সঙ্খারক্খন্ধগ্গহণেন ফস্সাহারো, মনোসঞ্চেতনাহারগ্গহণেন ৰিঞ্ঞাণাহারো সরূপতোপি গহিতোতি ৰদন্তি.

‘‘ছব্বিসোধন’’ন্তি ইমস্স সুত্তস্স সমঞ্ঞায অন্ৰত্থতং দস্সেত্ৰা আযতিম্পি তাদিসেন ব্যাকরণেন ভিক্খূনং পটিপত্তিম্পি দস্সনত্থং, ‘‘ইমে পনা’’তিআদি আরদ্ধং. ৰিনযনিদ্দেসপরিযাযেনাতি ৰিনযনিদ্দেসে আগতেন কারণেন. ৰিনযে ৰা আগতনিদ্দেসানুক্কমেন.

অধিগন্তব্বতো অধিগমো, ঝানাদিঅধিগমপুচ্ছা. তেনাহ – ‘‘ঝানৰিমোক্খাদীসূ’’তিআদি. উপাযপুচ্ছাতি অধিগমোপাযপুচ্ছা. কিন্তীতি কেন পকারেন ৰিধিনাতি অত্থো.

কতমেসং ত্ৰং ধম্মানং লাভীতি ইদং পন পুব্বে ‘‘কিং তে অধিগত’’ন্তি অনিদ্ধারিতভেদা ঝানাদিৰিসেসা পুচ্ছিতাতি ইদানি তেসং নিদ্ধারেত্ৰা পুচ্ছনাকারদস্সনং. তস্মাতি যস্মা যথাৰুত্তেহি আকারেহি অধিগমব্যাকরণং সোধেতব্বং, তস্মা. এত্তাৰতাৰাতি এত্তকেন ব্যাকরণমত্তেনেৰ ন সক্কারো কাতব্বো. ব্যাকরণঞ্হি একচ্চস্স অযাথাৰতোপি হোতি, যথা নাম জাতরূপপতিরূপং জাতরূপং ৰিয খাযতীতি জাতরূপং নিঘংসনতাপনছেদনেহি সোধেতব্বং এৰমেৰং ইমেসু ইদানেৰ ৰুত্তেসু ছসু ঠানেসু পক্খিপিত্ৰা সোধনত্থং ৰত্তব্বো ৰিমোক্খাদীসূতি আদি-সদ্দেন সমাধি-সমাপত্তি-ঞাণদস্সন-মগ্গভাৰনা-ফলসচ্ছিকিরিযা সঙ্গণ্হাতি.

পাকটো হোতি অধিগতৰিসেসস্স সতিসম্মোসাভাৰতো. সেসপুচ্ছাসুপি ‘‘পাকটো হোতী’’তি পদে এসেৰ নযো. উগ্গহপরিপুচ্ছাকুসলাতি সজ্ঝাযমগ্গসংৰণ্ণনাসু নিপুণা. যায পটিপদায যস্স অরিযমগ্গো আগচ্ছতি, সা পুব্বভাগপটিপত্তি আগমনপটিপদা. সোধেতব্বাতি সুদ্ধা উদাহু অসুদ্ধাতি ৰিচারণৰসেন সোধেতব্বা. ন সুজ্ঝতীতি তত্থ তত্থ পমাদপটিপত্তিভাৰতো. অপনেতব্বো অত্তনো পটিঞ্ঞায. ‘‘সুজ্ঝতী’’তি ৰত্ৰা সুজ্ঝনাকারং দস্সেতুং, ‘‘দীঘরত্ত’’ন্তিআদি ৰুত্তং. পঞ্ঞাযতীতি এত্থ ‘‘যদী’’তি পদং আনেত্ৰা যদি সো ভিক্খু তায পটিপদায যদি পঞ্ঞাযতীতি সম্বন্ধো. খীণাসৰপটিপত্তিসদিসা পটিপদা হোতি দীঘরত্তং ৰিক্খম্ভিতকিলেসত্তা.

নদিযা সমুদ্দং পক্খন্দনট্ঠানং নদীমুখদ্ৰারং. মদ্দমানোতি বদরসাল়ৰং সরসং পত্তে পক্খিত্তো হুত্ৰা মদ্দমানো. সেসং সুৰিঞ্ঞেয্যমেৰ.

ছব্বিসোধনসুত্তৰণ্ণনায লীনত্থপ্পকাসনা সমত্তা.

৩. সপ্পুরিসধম্মসুত্তৰণ্ণনা

১০৫. সপ্পুরিসধম্মন্তি সপ্পুরিসভাৰকরং ধম্মং. সো পন যস্মা সপ্পুরিসানং পৰেণিকো ধম্মো হোতি. তস্মা আহ – ‘‘সপ্পুরিসানং ধম্ম’’ন্তি, এস নযো অসপ্পুরিসধম্মন্তি এত্থাপি. এৰং পধানং অনুট্ঠাতব্বঞ্চ সপ্পুরিসধম্মং আদিং কত্ৰা মাতিকং ঠপেত্ৰা অযথানুপুব্বিযা নিদ্দিসন্তো ‘‘কতমো চ, ভিক্খৰে, অসপ্পুরিসধম্মো’’তিআদিমাহ. তথা পন নিদ্দিসন্তো উদাহরণপুব্বকং হেতুং দস্সেতুং, ‘‘যথা নামা’’তিআদি ৰুত্তং. তেন ইচ্ছিতব্বপরিচ্চাগপুব্বকং গহেতব্বগ্গহণং নাম ঞাযপটিপত্তি, তস্মা সপ্পুরিসধম্মা সম্পাদেতব্বাতি দীপেন্তো সত্থা অযথানুপুব্বিযা নিদ্ধারীযতীতি ইমমত্থং দস্সেতি. তথা অঞ্ঞত্থাপি ‘‘অসেৰনা চ বালানং, পণ্ডিতানঞ্চ সেৰনা’’তি. এতদেৰ হি কুলদ্ৰযং ‘‘উচ্চকুল’’ন্তি ৰুচ্চতি নিপ্পরিযাযতো. তথাহি অন্তিমভৰিকা বোধিসত্তা তত্থেৰ পটিসন্ধিং গণ্হন্তি. সোতি সামীচিপ্পটিপন্নো ভিক্খু. অন্তরং করিত্ৰাতি তং কারণং কত্ৰা. পটিপদা হি ৰিঞ্ঞূনং পূজায কারণং, ন উচ্চকুলীনতা. মহাকুলাতি ৰিপুলকুলা উপাদিতোদিতকুলসম্পৰত্তিকাতি অত্থো.

১০৬. যসসদ্দো পরিৰারৰাচকো. যসস্সীতি চ সাতিসযপরিৰারৰন্ততা ৰুচ্চতীতি আহ ‘‘পরিৰারসম্পন্নো’’তি. আধিপতেয্যাভাৰতো পরেসং উপরিনত্তি এতেসং ঈসো ঈসনং ইস্সরিযন্তি অক্খাতব্বাতি অপ্পেসক্খা. তেনাহ ‘‘অপ্পপরিৰারা’’তি. অভাৰত্থো হি ইধ অপ্প-সদ্দো.

১০৭. নৰেৰ ধুতঙ্গানি আগতানীতি এত্থ যথা উক্কট্ঠপংসুকূলিকস্স তেচীৰরিকতা সুকরা. এৰং উক্কট্ঠপিণ্ডপাতিকস্স সপদানচারিকতা সুকরা. একাসনিকস্স চ পত্তপিণ্ডিকখলুপচ্ছাভত্তিকতা সুকরা এৰাতি – ‘‘পংসুকূলিকো হোতী’’তিআদিৰচনেনেৰ পাল়িযা অনাগতানম্পি আগতভাৰো ৰেদিতব্বো পরিহরণসুকরতায তেসম্পি সমাদানসম্ভৰতো. তেনাহ ‘‘তেরস হোন্তী’’তি.

১০৮. কামতণ্হাদিকায তায তণ্হায নিব্বত্তাতি তম্মযা, পুথুজ্জনা, পকতিভাৰূপগমনেন তেসং ভাৰো তম্মযতা, তপ্পটিক্খেপতো অতম্মযতা, নিত্তণ্হতা. তংযেৰ কারণং কত্ৰাতি পঠমজ্ঝানেপি তণ্হাপহানংযেৰ কারণং কত্ৰা. চিত্তে উপ্পাদেত্ৰাতি অতম্মযতাপরিযাযেন ৰুত্তে তণ্হায পটিপক্খধম্মে সম্পাদেত্ৰা. ন মঞ্ঞতীতি মঞ্ঞনানং অরিযমগ্গেন সব্বসো সমুচ্ছিন্নত্তা কিস্মিঞ্চি ওকাসে কামভৰাদিকে কেনচি ৰত্থুনা হত্থিঅস্সখেত্তৰত্থাদিনা পত্তচীৰরৰিহারপরিৰেণাদিনা চ পুগ্গলং ন মঞ্ঞতি. সেসং সুৰিঞ্ঞেয্যমেৰ.

সপ্পুরিসধম্মসুত্তৰণ্ণনায লীনত্থপ্পকাসনা সমত্তা.

৪. সেৰিতব্বাসেৰিতব্বসুত্তৰণ্ণনা

১০৯. অঞ্ঞমঞ্ঞন্তি অঞ্ঞং অঞ্ঞং. তেনাহ ‘‘অঞ্ঞং সেৰিতব্ব’’ন্তিআদি. সত্তহি পদেহীতি সত্তহি ৰাক্যেহি. পজ্জতি এতেন যথাধিপ্পেতো অত্থোতি পদং, ৰাক্যং. সারিপুত্তত্থেরস্স ওকাসকরণং ধম্মদাযাদে (ম. নি. ১.৩১) ৰুত্তনযেন ৰেদিতব্বং.

১১৩. দিট্ঠিযেৰ পচ্চযৰসেন পটিলদ্ধতায দিট্ঠিপটিলাভো. সঞ্ঞাপটিলাভেপি এসেৰ নযো. মিচ্ছাদিট্ঠিসম্মাদিট্ঠিযো…পে… ন গহিতা কম্মপথপ্পত্তানং তেসং মনোসমাচারভাৰেন গহিতত্তা. যদি এৰং কস্মা দিট্ঠি চিত্তুপ্পাদৰারে ন গহিতাতি? কামং মিচ্ছাদিট্ঠিযা অৰযৰিভাৰো লব্ভতি, তথাপি চিত্তুপ্পাদক্খণে লোকিযলোকুত্তরচিত্তুপ্পাদেসু কম্মপথকোট্ঠাসো ন উদ্ধটো.

১১৫. কামসঞ্ঞাদীনন্তি এত্থ আদি-সদ্দেন যথা ব্যাপাদৰিহিংসাসঞ্ঞা সঙ্গহিতা, এৰং অনভিজ্ঝাঅব্যাপাদঅৰিহিংসাসঞ্ঞা সঙ্গহিতা পঠমেন আদিসদ্দেন ‘‘অনভিজ্ঝাসহগতায সঞ্ঞাযা’’তিআদিপাঠস্স সঙ্গহিতত্তা.

১১৭. তি কামভৰাদীনং অপরিযোসানায পরিযোসানং ইচ্ছতোপি তাদিসস্স ভৰানং অপরিযোসানমেৰ হোতি. চত্তারো হোন্তি পুগ্গলৰসেন. তেনাহ ‘‘পুথুজ্জনোপি হী’’তিআদি. অকুসলা ধম্মা ৰড্ঢন্তীতি তেসং পহানায অপ্পটিপজ্জমানস্সাতি অধিপ্পাযো, ততো এৰ কুসলা ধম্মা পরিহাযন্তি. তেনস্স কিলেসদুক্খেন ৰিপাকদুক্খেন চ সদুক্খমেৰ অত্তভাৰং অভিনিব্বত্তেতি. ওরম্ভাগিযসংযোজনানি পহায সুদ্ধাৰাসেসু নিব্বত্তনারহো অনাগামী কথং…পে… অভিৰড্ঢন্তীতি আহ ‘‘অনাগামীপী’’তিআদি. সদুক্খমেৰ অত্তভাৰং অভিনিব্বত্তেতি, যায লব্ভমানঅকুসলাভিৰুদ্ধিং কুসলপরিহানিঞ্চ গহেত্ৰা অনাগামিনোপি সব্যাবজ্ঝঅত্তভাৰাভিনিব্বত্তনং ৰুত্তং. এৰং যথালব্ভমানং অকুসলপরিহানিং কুসলাভিৰুদ্ধিঞ্চ গহেত্ৰা পুথুজ্জনস্সপি অন্তিমভৰিকস্স অব্যাবজ্ঝঅত্তভাৰাভিনিব্বত্তনং ৰুত্তন্তি দট্ঠব্বং. তেনাহ ‘‘পুথুজ্জনোপী’’তিআদি. অকুসলমেৰ হাযতি,ন কুসলং তস্স বুদ্ধিপক্খে ঠিতত্তা. তত্থাপি ৰিপস্সনমেৰ গব্ভং গণ্হাপেতি, ন ৰট্টগব্ভং অন্তিমভৰিকতায ৰিৰট্টূপনিস্সিতত্তা অজ্ঝাসযস্স, ঞাণস্স চ পাকগমনতো.

১১৯. একচ্চস্সাতি সামিৰচনং ‘‘অভিনন্দতী’’তিআদীসু পচ্চত্তৰসেন পরিণামেতব্বং, তথা ‘‘নিব্বিন্দতী’’তিআদীসুপি. উগ্গণ্হিত্ৰাপীতি পি-সদ্দো লুত্তনিদ্দিট্ঠো. ভগৰতো ভাসিতস্স অত্থং অজানন্তা তাৰ দীঘরত্তং হিতসুখতো পরিবাহিরা হোন্তু জানন্তানম্পি সব্বেসং দীঘরত্তং হিতায সুখায হোতীতি অনেকংসিকতং চোদেন্তো ‘‘এৰং সন্তেপী’’তিআদিমাহ. ইতরো সব্বেসম্পি দীঘরত্তং হিতায সুখায হোতিযেৰাতি, ‘‘অপ্পটিসন্ধিকা’’তিআদিনা অনেকংসিকতং পরিহরতি. সেসং সুৰিঞ্ঞেয্যমেৰ.

সেৰিতব্বাসেৰিতব্বসুত্তৰণ্ণনায লীনত্থপ্পকাসনা সমত্তা.

৫. বহুধাতুকসুত্তৰণ্ণনা

১২৪. ভযন্তি (অ. নি. টী. ২.৩.১) চিত্তসংসপ্পতাতি আহ ‘‘চিত্তুত্রাসো’’তি. উপদ্দৰোতি অন্তরাযো. তস্স পন ৰিক্খেপকারণত্তা ৰুত্তং ‘‘অনেকগ্গতাকারো’’তি. উপসগ্গোতি উপসজ্জনং. ততো অপ্পতীকারৰিঘাতাপত্তি যস্মা পতীকারাভাৰেন ৰিহঞ্ঞমানস্স কিঞ্চি কাতুং অসমত্থস্স ওসীদনকারণং, তস্মা ৰুত্তং – ‘‘তত্থ তত্থ লগ্গনাকারো’’তি. ৰঞ্চেত্ৰা আগন্তুং যথাৰুত্তে দিৰসে অনাগচ্ছন্তেসু. বহি অনিক্খমনত্থায দ্ৰারে অগ্গিং দত্ৰা.

নল়েহীতি নল়চ্ছন্নসঙ্খেপেন উপরি ছাদেত্ৰা তেহিযেৰ দারুকচ্ছদননিযামেন পরিতোপি ছাদিতা. এসেৰ নযোতি ইমিনা তিণেহি ছন্নতং, সেসসম্ভারানং রুক্খমযতঞ্চ অতিদিসতি. ৰিধৰাপুত্তেতি অদন্তভাৰোপলক্খণং. তে হি নিপ্পিতিকা অৰিনীতা অসংযতা অকিচ্চকারিনো হোন্তি.

মত্থকং অপাপেত্ৰাৰ নিট্ঠাপিতাতি কস্মা ভগৰা এৰমকাসীতি? আনন্দত্থেরস্স পুচ্ছাকোসল্লদীপনত্থমেৰ, তত্থ নিসিন্নানং সন্নিপতিতভিক্খূনং দেসনায জাননত্থঞ্চ. তে কির সঙ্খেপতো ৰুত্তমত্থং অজানন্তা অন্ধকারং পৰিট্ঠা ৰিয ঠিতা. পুচ্ছানুসন্ধিৰসেন পরিগ্গয্হ জানিস্সন্তীতি.

১২৫. রূপপরিগ্গহোৰ কথিতো, ন অঞ্ঞং কিঞ্চীতি অত্থো. ইদানি ততো সচ্চানি নিদ্ধারেত্ৰা চতুসচ্চকম্মট্ঠানং দস্সেতুং, ‘‘সব্বাপী’’তিআদি ৰুত্তং. পঞ্চক্খন্ধা হোন্তীতি অদ্ধেকাদস ধাতুযো রূপক্খন্ধো, অদ্ধট্ঠমা ধাতুযো যথারহং ৰেদনাদযো চত্তারো অরূপিনো খন্ধাতি এৰং অট্ঠারস ধাতুযো পঞ্চক্খন্ধা হোন্তি. পঞ্চপি খন্ধা তণ্হাৰজ্জা দুক্খসচ্চং. অপ্পৰত্তীতি অপ্পৰত্তিনিমিত্তং. নিরোধপজাননাতি পঞ্ঞাসীসেন মগ্গকিচ্চমাহ. সম্মাদিট্ঠিপমুখো হি অরিযমগ্গো. মত্থকং পাপেত্ৰা কথিতং হোতি সম্মসনস্স ভূমিযা নিপ্ফত্তিযা চ কথিতত্তা. জানাতি পস্সতীতি ইমিনা ঞাণদস্সনং কথিতং তং পন লোকিযং লোকুত্তরন্তি দুৰিধন্তি তদুভযম্পি দস্সেন্তো আহ – ‘‘সহ ৰিপস্সনায মগ্গো ৰুত্তো’’তি.

এত্তাৰতাপি খোতি পি-সদ্দগ্গহণেন অঞ্ঞেন পরিযাযেন সত্থা ধাতুকোসল্লং দেসেতুকামোতি থেরো, ‘‘সিযা পন, ভন্তে’’তি পুচ্ছতীতি ভগৰা পথৰীধাতুআদিৰসেনপি ধাতুকোসল্লং ৰিভাৰেতি. তত্থ পথৰীধাতুআদিসদ্দেন দেসনাকারণং ৰিভাৰেন্তো, ‘‘পথৰীধাতু…পে… ৰুত্তা’’তি আহ. তাপি হি আদিতো ছ ধাতুযো. ‘‘ৰিঞ্ঞাণধাতুতো নীহরিত্ৰা পূরেতব্বা’’তি ৰত্ৰা কথং রূপধাতুযো নীহরীযন্তীতি চোদনং সন্ধায তং নযং দস্সেতুং, ‘‘ৰিঞ্ঞাণধাতূ’’তিআদি ৰুত্তং. কামঞ্চেত্থ কাযৰিঞ্ঞাণধাতুযা আরম্মণং ফোট্ঠব্বধাতুপথৰীধাতু আদিৰসেন দেসনারুল়মেৰ, কাযধাতু পন নীহরিতব্বাতি একংসমেৰ নীহরণৰিধিং দস্সেন্তো, ‘‘এস নযো সব্বত্থা’’তি আহ. পুরিমপচ্ছিমৰসেন মনোধাতূতি পচ্ছিমভাগৰসেন কিরিযামনোধাতু গহেতব্বা তস্সানুরূপভাৰতো. ননু চেত্থ মনোধাতু নামাযং মনোৰিঞ্ঞাণধাতুযা অসংসট্ঠা, ৰিসুংযেৰ চেসা ধাতূতি? সচ্চমেতং অট্ঠারসধাতুদেসনায, চিত্তৰিভত্তিনিদ্দেসে ছৰিঞ্ঞাণকাযদেসনাযং পন সা মনোৰিঞ্ঞাণকাযসঙ্গহিতাৰাতি দট্ঠব্বং. যং পনেত্থ ৰত্তব্বং তং ৰিসুদ্ধিমগ্গসংৰণ্ণনাযং (ৰিসুদ্ধি. মহাটী. ২.৫১৭) ৰুত্তনযেন ৰেদিতব্বং. অথ ৰা পুরিমপচ্ছিমৰসেনাতি পুরেচরানুচরৰসেন. মনোধাতূতি ৰিপাকমনোধাতু গহেতব্বা পুরেচরণতো, পরতো উপ্পজ্জনকিরিযামনোৰিঞ্ঞাণধাতুযা অনন্তরং মনোধাতুযা, কিরিযামনোধাতুযা অনন্তরং মনোৰিঞ্ঞাণধাতুযা অনুপ্পজ্জনতো চ.

ধম্মানং যাৰদেৰ নিস্সত্তনিজ্জীৰৰিভাৰনত্থায সত্থু ধাতুদেসনাতি অঞ্ঞেসু সভাৰধারণাদিঅত্থেসু লব্ভমানেসুপি অযমেত্থ অত্থো পধানোতি আহ – ‘‘এসনযো সব্বত্থা’’তি. সপ্পটিপক্খৰসেনাতি সপ্পটিভাগৰসেন সুখং দুক্খেন সপ্পটিভাগং, দুক্খং সুখেন, এৰং সোমনস্সদোমনস্সাতি. যথা সুখাদীনংযেৰ সমুদাচারো ৰিভূতো, ন উপেক্খায, এৰং রাগাদীনংযেৰ সমুদাচারো ৰিভূতো, ন মোহস্স, তেন ৰুত্তং ‘‘অৰিভূতভাৰেনা’’তি. কাযৰিঞ্ঞাণধাতু পরিগ্গহিতাৰ হোতি তদৰিনাভাৰতো. সেসাসু সোমনস্সধাতুআদীসু, পরিগ্গহিতাৰ হোতি অৰিনাভাৰতো এৰ. ন হি সোমনস্সাদযো মনোধাতুযা ৰিনা ৰত্তন্তি. উপেক্খাধাতুতো নীহরিত্ৰাতি এত্থ চক্খুৰিঞ্ঞাণধাতুআদযো চতস্সো ৰিঞ্ঞাণধাতুযো তাসং ৰত্থারম্মণভূতা চক্খুধাতুআদযো চাতি অট্ঠ রূপধাতুযো, মনোধাতু, উপেক্খাসহগতা মনোৰিঞ্ঞাণধাতু, উপেক্খাসহগতা এৰ ধম্মধাতূতি এৰং পন্নরস ধাতুযো উপেক্খাধাতুতো নীহরিতব্বা. সোমনস্সধাতুআদযো পন চতস্সো ধাতুযো ধম্মধাতুঅন্তোগধা, এৰং সুখধাতুতো কাযৰিঞ্ঞাণধাতুযা তস্সা ৰত্থারম্মণভূতানং কাযধাতুফোট্ঠব্বধাতূনঞ্চ নীহরণা হেট্ঠা দস্সিতনযাতি, ‘‘উপেক্খাধাতুতো নীহরিত্ৰা পূরেতব্বা’’ইচ্চেৰ ৰুত্তং.

কামৰিতক্কাদযো ইধ কামধাতুআদিপরিযাযেন ৰুত্তাতি ‘‘কামধাতুআদীনং দ্ৰেধাৰিতক্কে কামৰিতক্কাদীসু ৰুত্তনযেন অত্থো ৰেদিতব্বো’’তি আহ. তত্থ হি ‘‘কামৰিতক্কোতি কামপটিসংযুত্তো ৰিতক্কো, ব্যাপাদৰিতক্কোতি ব্যাপাদপটিসংযুত্তো ৰিতক্কো, ৰিহিংসাৰিতক্কোতি ৰিহিংসাপটিসংযুত্তো ৰিতক্কো, নেক্খম্মপটিসংযুত্তো ৰিতক্কো নেক্খম্মৰিতক্কো, সো যাৰ পঠমজ্ঝানা ৰট্টতি. অব্যাপাদপটিসংযুত্তো ৰিতক্কো অব্যাপাদৰিতক্কো, সো মেত্তাপুব্বভাগতো পট্ঠায যাৰ পঠমজ্ঝানা ৰট্টতি. অৰিহিংসাপটিসংযুত্তো ৰিতক্কো অৰিহিংসাৰিতক্কো, সো করুণায পুব্বভাগতো পট্ঠায যাৰ পঠমজ্ঝানা ৰট্টতী’’তি ৰুত্তং. অযং পনত্থো অভিধম্মে ৰিত্থারতো আগতো এৰাতি দস্সেতুং, ‘‘অভিধম্মে’’তিআদি ৰুত্তং. কামধাতুতো নীহরিত্ৰাতি এত্থ কামগ্গহণেন গহিতা রূপধাতুআদযো ছ, তংৰিসযা সত্তৰিঞ্ঞাণধাতুযো, তত্থ পঞ্চন্নং ৰিঞ্ঞাণধাতূনং চক্খুধাতুআদযো পঞ্চাতি অট্ঠারস. নেক্খম্মধাতুআদযো পন ধম্মধাতুঅন্তোগধা এৰ.

কামতণ্হায ৰিসযভূতা ধম্মা কামধাতূতি আহ – ‘‘পঞ্চ কামাৰচরক্খন্ধা কামধাতূ’’তি. তথা রূপতণ্হায ৰিসযভূতা ধম্মা রূপধাতু, অরূপতণ্হায ৰিসযভূতা ধম্মা অরূপধাতূতি আহ – ‘‘চত্তারো অরূপাৰচরক্খন্ধা’’তিআদি. কামতণ্হা কামো উত্তরপদলোপেন, এৰং রূপারূপতণ্হা রূপারূপং. আরম্মণকরণৰসেন তা যত্থ অৰচরন্তি, তে কামাৰচরাদযোতি এৰং কামাৰচরক্খন্ধাদীনং কামতণ্হাদিভাৰো ৰেদিতব্বো. আদিনা নযেনাতি এতেন ‘‘উপরিতো পরনিম্মিতৰসৰত্তিদেৰে অন্তোকরিত্ৰা এত্থাৰচরা’’তিআদিপাল়িং (ৰিভ. ১০২০) সঙ্গণ্হাতি. এত্থাৰচরাতি অৰীচিপরনিম্মিতপরিচ্ছিন্নোকাসায কামতণ্হায ৰিসযভাৰং সন্ধায ৰুত্তং, তদোকাসতা চ তণ্হায তন্নিন্নত্তা ৰেদিতব্বা. সেসপদদ্ৰযেপি এসেৰ নযো. পরিপুণ্ণঅট্ঠারসধাতুকত্তা কামাৰচরধম্মানং ‘‘কামধাতুতো নীহরিত্ৰা পূরেতব্বা’’তি ৰুত্তং. মনোৰিঞ্ঞাণধাতুধম্মধাতু একদেসমত্তমেৰ হি রূপারূপাৰচরধম্মাতি.

সমাগন্ত্ৰাতি সহিতা হুত্ৰা. যত্তকঞ্হি পচ্চযধম্মা অত্তনো ফলস্স কারণং, তত্থ তন্নিব্বত্তনে সমাগতা ৰিয হোতি ৰেকল্লে তদনিব্বত্তনতো. সঙ্খতধাতুতো নীহরিত্ৰা পূরেতব্বা অসঙ্খতায ধাতুযা ধম্মধাতুএকদেসভাৰতো.

১২৬. এৰং পৰত্তমানা মযং অত্তাতি গহণং গমিস্সামাতি ইমিনা ৰিয অধিপ্পাযেন অত্তানং অধিকিচ্চ উদ্দিস্স পৰত্তা অজ্ঝত্তা, তেসু ভৰা তপ্পরিযাপন্নত্তাতি অজ্ঝত্তিকানি. ততো বহিভূতানি বাহিরানি. আযতনকথা পটিচ্চসমুপ্পাদকথা চ ৰিসুদ্ধিমগ্গে (ৰিসুদ্ধি. ২.৫১০, ৫৭০, ৫৭১) ৰুত্তনযেনেৰ ৰেদিতব্বাতি ন ৰিত্থারিতা.

১২৭. অৰিজ্জমানং ঠানং অট্ঠানং (অ. নি. টী. ১.১.২৬৮; ৰিভ. মূলটী. ৮০৯), নত্থি ঠানন্তি ৰা অট্ঠানং. অনৰকাসোতি এত্থ এসেৰ নযো. তদত্থনিগমনমেৰ হি ‘‘নেতং ঠানং ৰিজ্জতী’’তি ৰচনন্তি. তেনাহ ‘‘উভযেনপী’’তিআদি. যন্তি কারণে পচ্চত্তৰচনং, হেতুঅত্থো চ কারণত্থোতি আহ – ‘‘যন্তি যেন কারণেনা’’তি. উক্কট্ঠনিদ্দেসেন এত্থ দিট্ঠিসম্পত্তি ৰেদিতব্বাতি ৰুত্তং ‘‘মগ্গদিট্ঠিযা সম্পন্নো’’তি. কুতো পনাযমত্থো লব্ভতীতি? লিঙ্গতো. লিঙ্গঞ্হেতং, যদিদং নিচ্চতো উপগমনপটিক্খেপো. চতুভূমকেসূতি ইদং চতুত্থভূমকসঙ্খারানং অরিযসাৰকস্স ৰিসযভাৰূপগমনতো ৰুত্তং; ন পন তে আরব্ভ নিচ্চতো উপগমনসব্ভাৰতো. ৰক্খতি চ ‘‘চতুত্থভূমকসঙ্খারা পনা’’তিআদিনা. অভিসঙ্খতসঙ্খারঅভিসঙ্খরণকসঙ্খারানং সপ্পদেসত্তা নিপ্পদেসসঙ্খারগ্গহণত্থং ‘‘সঙ্খতসঙ্খারেসূ’’তি ৰুত্তং. লোকুত্তরসঙ্খারানং পন নিৰত্তনে কারণং সযমেৰ ৰক্খতি. এতং কারণং নত্থি সেতুঘাতত্তা. তেজুস্সদত্তাতি সংকিলেসৰিধমনতেজস্স অধিকভাৰতো. তথা হি তে গম্ভীরভাৰেন দুদ্দসা. অকুসলানং আরম্মণং ন হোন্তীতি ইদং পকরণৰসেন ৰুত্তং. অপ্পহীনৰিপল্লাসানং সত্তানং কুসলধম্মানম্পি তে আরম্মণং ন হোন্তি.

অসুখে ‘‘সুখ’’ন্তি ৰিপল্লাসো চ ইধ সুখতো উপগমনস্স ঠানন্তি অধিপ্পেতন্তি দস্সেন্তো, ‘‘একন্ত…পে… ৰুত্ত’’ন্তি. অত্তদিট্ঠিৰসেনাতি পধানদিট্ঠিমাহ. দিট্ঠিযা নিব্বানস্স অৰিসযভাৰো হেট্ঠা ৰুত্তো এৰাতি ‘‘কসিণাদিপণ্ণত্তিসঙ্গহত্থ’’ন্তি ৰুত্তং. পরিচ্ছেদোতি সঙ্খারানং পরিচ্ছেদো সঙ্খারানং পরিচ্ছিজ্জগহণং. স্ৰাযং যেসং নিচ্চাদিতো উপগমনং ভৰতি তেসংযেৰ ৰসেন কাতব্বোতি দস্সেন্তো ‘‘সব্বৰারেসূ’’তিআদিমাহ. সব্বৰারেসূতি নিচ্চাদিসব্বৰারেসু. পুথুজ্জনো হীতি হি-সদ্দো হেতুঅত্থো. যস্মা যং যং সঙ্খারং নিচ্চাদিৰসেন পুথুজ্জনকালে উপগচ্ছতি, তং তং অরিযমগ্গাধিগমেন অনিচ্চাদিৰসেন গণ্হন্তো যাথাৰতো জানন্তো তং গাহং তং দিট্ঠিং ৰিনিৰেঠেতি ৰিস্সজ্জেতি. তস্মা যত্থ গাহো তত্থ ৰিস্সজ্জনাতি চতুত্থভূমকসঙ্খারা ইধ সঙ্খারগ্গহণেন ন গয্হতীতি অত্থো.

১২৮. পুত্তসম্বন্ধেন মাতাপিতুসমঞ্ঞা, দত্তকিত্তিমাদিৰসেনপি পুত্তৰোহারো লোকে দিস্সতি, সো চ খো পরিযাযতো নিপ্পরিযাযসিদ্ধং তং দস্সেতুং, ‘‘জনিকা ৰ মাতা জনকো পিতা’’তি ৰুত্তং. তথা আনন্তরিযকম্মস্স অধিপ্পেতত্তা ‘‘মনুস্সভূতোৰ খীণাসৰো অরহাতি অধিপ্পেতো’’তি ৰুত্তং. ‘‘অট্ঠানমেত’’ন্তিআদিনা মাতুআদীনংযেৰ জীৰিতা ৰোরোপনে অরিযসাৰকস্স অভব্বভাৰদস্সনতো তদঞ্ঞং অরিযসাৰকো জীৰিতা ৰোরোপেতীতি ইদং অত্থতো আপন্নমেৰাতি মঞ্ঞমানো ৰদতি – ‘‘কিং পন অরিযসাৰকো অঞ্ঞং জীৰিতা ৰোরোপেয্যা’’তি? ‘‘অট্ঠানমেতং, ভিক্খৰে, অনৰকাসো, যং দিট্ঠিসম্পন্নো পুগ্গলো সঞ্চিচ্চ পাণং জীৰিতা ৰোরোপেয্য, নেতং ঠানং ৰিজ্জতী’’তি ৰচনতো, ‘‘এতম্পি অট্ঠান’’ন্তি ৰুত্তং. তেনাহ ‘‘সচেপি হী’’তিআদি. বলদীপনত্থন্তি সদ্ধাদিবলসমন্নাগমদীপনত্থং. অরিযমগ্গেনাগতসদ্ধাদিবলৰসেন হি অরিযসাৰকো তাদিসং সাৰজ্জং ন করোতি.

পঞ্চহি কারণেহীতি ইদং অত্থনিপ্ফাদকানি তেসং পুব্বভাগিযানি চ কারণানি কারণভাৰসামঞ্ঞেন একজ্ঝং গহেত্ৰা ৰুত্তং, ন পন সব্বেসং পঞ্চন্নং সহযোগক্খমতো. আকারেহীতি কারণেহি. অনুস্সাৰনেনাতি অনুরূপং সাৰনেন. ভেদস্স অনুরূপং যথা ভেদো হোতি, এৰং ভিন্দিতব্বানং ভিক্খূনং অত্তনো ৰচনস্স সাৰনেন ৰিঞ্ঞাপনেন. তেনাহ ‘‘ননু তুম্হে’’তিআদি. কণ্ণমূলে ৰচীভেদং কত্ৰাতি এতেন ‘‘পাকটং কত্ৰা ভেদকরৰত্থুদীপনং ৰোহারো, তত্থ অত্তনো নিচ্ছিতমত্থং রহস্সৰসেন ৰিঞ্ঞাপনং অনুস্সাৰন’’ন্তি দস্সেতি.

কম্মমেৰ উদ্দেসো ৰা পমাণন্তি তেহি সঙ্ঘভেদসিদ্ধিতো ৰুত্তং, ইতরে পন তেসং পুব্বভাগভূতা. তেনাহ ‘‘ৰোহারা’’তিআদি. তত্থাতি ৰোহারে. চুতিঅনন্তরং ফলং অনন্তরং নাম, তস্মিং অনন্তরে নিযুত্তানি তন্নিব্বত্তনেন অনন্তরকরণসীলানি, অনন্তরপ্পযোজনানি চাতি আনন্তরিযানি, তানি এৰ ‘‘আনন্তরিযকম্মানী’’তি ৰুত্তানি.

কম্মতোতি ‘‘এৰং আনন্তরিযকম্মং হোতি, এৰং অনন্তরিযকম্মসদিস’’ন্তি এৰং কম্মৰিভাগতো. দ্ৰারতোতি কাযাদিদ্ৰারতো. কপ্পট্ঠিতিযতোতি ‘‘ইদং কপ্পট্ঠিতিকৰিপাকং, ইদং ন কপ্পট্ঠিতিকৰিপাক’’ন্তি এৰং কপ্পট্ঠিতিযৰিভাগতো. পাকাতি ‘‘ইদমেত্থ ৰিপচ্চতি, ইদং ন ৰিপচ্চতী’’তি ৰিপচ্চনৰিভাগতো. সাধারণাদীহীতি গহট্ঠপব্বজিতানং সাধারণাসাধারণতো, আদি-সদ্দেন ৰেদনাদিৰিভাগতো চ.

যস্মা মনুস্সত্তভাৰে ঠিতস্সেৰ চ কুসলধম্মানং তিক্খৰিসদসূরভাৰাপত্তি, যথা তং তিণ্ণম্পি বোধিসত্তানং বোধিত্তযনিব্বত্তিযং, এৰং মনুস্সভাৰে ঠিতস্সেৰ অকুসলধম্মানম্পি তিক্খৰিসদসূরভাৰাপত্তীতি আহ ‘‘মনুস্সভূতস্সেৰা’’তি. পাকতিকমনুস্সানম্পি চ কুসলধম্মানং ৰিসেসপ্পত্তি ৰিমানৰত্থুঅট্ঠকথাযং (ৰি. ৰ. অট্ঠ. ৩) ৰুত্তনযেন ৰেদিতব্বা. যথা ৰুত্তো চ অত্থো সমানজাতিযস্স ৰিকোপনে কম্মং গরুতরং, ন তথা ৰিজাতিযস্সাতি ৰুত্তং – ‘‘মনুস্সভূতং মাতরং ৰা পিতরং ৰা’’তি. লিঙ্গে পরিৰত্তে চ সো এৰ এককম্মনিব্বত্তো ভৰঙ্গপ্পবন্ধো, জীৰিতিন্দ্রিযপ্পবন্ধো চ, ন অঞ্ঞোতি আহ ‘‘অপি পরিৰত্তলিঙ্গ’’ন্তি. অরহন্তেপি এসেৰ নযো. তস্স ৰিপাকন্তিআদি কম্মস্স আনন্তরিযভাৰসমত্থনং, চতুকোটিকঞ্চেত্থ সম্ভৰতি. তত্থ পঠমা কোটি দস্সিতা, ইতরাসু ৰিসঙ্কেতং দস্সেতুং, ‘‘যো পনা’’তিআদি ৰুত্তং. যদিপি তত্থ ৰিসঙ্কেতো, কম্মং পন গরুতরং আনন্তরিযসদিসং ভাযিতব্বন্তি আহ – ‘‘আনন্তরিযং আহচ্চেৰ তিট্ঠতী’’তি. অযং পঞ্হোতি ঞাপনিচ্ছানিব্বত্তা কথা.

আনন্তরিযং ফুসতি মরণাধিপ্পাযেনেৰ আনন্তরিযৰত্থুনো ৰিকোপিতত্তা. আনন্তরিযং ন ফুসতি আনন্তরিযৰত্থুঅভাৰতো. সব্বত্থ হি পুরিমং অভিসন্ধিচিত্তং অপ্পমাণং, ৰধকচিত্তং পন তদারম্মণং জীৰিতিন্দ্রিযঞ্চ আনন্তরিযনানন্তরিযভাৰে পমাণন্তি দট্ঠব্বং. সঙ্গামচতুক্কং সম্পত্তৰসেন যোজেতব্বং.

তেনেৰাতি তেনেৰ পযোগেন. অরহন্তঘাতো হোতিযেৰ অরহতো মারিতত্তা. পুথুজ্জনস্সেৰ দিন্নং হোতীতি যস্মা যথা ৰধকচিত্তং পচ্চুপ্পন্নারম্মণম্পি পবন্ধৰিচ্ছেদৰসেন চ জীৰিতিন্দ্রিযং আরম্মণং কত্ৰা পৰত্ততি, ন এৰং চাগচেতনা, সা হি চজিতব্বৰত্থুং আরম্মণং কত্ৰা চজনমত্তমেৰ হোতি, অঞ্ঞসন্তকভাৰকরণঞ্চ তস্স চজনং, তস্মা যস্স তং সন্তকং কতং. তস্সেৰ দিন্নং হোতীতি.

লোহিতং সমো সরতীতি অভিঘাতেন পকুপ্পমানং সঞ্চিতং হোতি. মহন্ততরন্তি গরুতরং. সরীরপটিজগ্গনে ৰিযাতি সত্থুরূপকাযপটিজগ্গনে ৰিয.

অসন্নিপতিতেতি ইদং সামগ্গিযদীপনং. ভেদো চ হোতীতি সঙ্ঘস্স ভেদো হোতি. ৰট্টতীতি সঞ্ঞাযাতি ঈদিসকরণং সঙ্ঘস্স ভেদায ন হোতীতি সঞ্ঞায. নৰতো ঊনপরিসাযং করোন্তস্স তথাতি যোজেতব্বং, তথাতি ইমিনা ‘‘ন আনন্তরিযকম্মন্তি’’ ইমং আকড্ঢতি, ন পন ‘‘ভেদো হোতী’’তি ইদং. হেট্ঠিমন্তেন হি নৰন্নমেৰ ৰসেন সঙ্ঘভেদো. ধম্মৰাদিনো অনৰজ্জা যথাধম্মং অৰট্ঠানতো. সঙ্ঘভেদস্স পুব্বভাগো সঙ্ঘরাজি.

কাযদ্ৰারমেৰ পূরেন্তি কাযকম্মভাৰেনেৰ লক্খিতব্বতো.

‘‘সণ্ঠহন্তে হি…পে… মুচ্চতী’’তি ইদং কপ্পট্ঠকথায ন সমেতি. তথা হি কপ্পট্ঠকথাযং (কথা. অট্ঠ. ৬৫৪-৬৫৭) ৰুত্তং – ‘‘আপাযিকোতি ইদং সুত্তং যং সো একং কপ্পং অসীতিভাগে কত্ৰা ততো একভাগমত্তং কালং তিট্ঠেয্য, তং আযুকপ্পং সন্ধায ৰুত্ত’’ন্তি. কপ্পৰিনাসেযেৰাতি পন আযুকপ্পৰিনাসেযেৰাতি অত্থে সতি নত্থি ৰিরোধো. এত্থ চ সণ্ঠহন্তেতি ইদম্পি ‘‘স্ৰেৰৰিনস্সিস্সতী’’তি ৰিয অভূতপরিকপ্পৰসেন ৰুত্তং. একদিৰসমেৰ নিরযে পচ্চতি ততো পরং কপ্পাভাৰে আযুকপ্পস্সপি অভাৰতোতি অৰিরোধতো অত্থযোজনা দট্ঠব্বা. সেসানীতি সঙ্ঘভেদতো অঞ্ঞানি আনন্তরিযকম্মানি.

অহোসিকম্মং…পে… সঙ্খ্যং গচ্ছন্তি, এৰং সতি কথং নেসং আনন্তরিযতা চুতিঅনন্তরং ৰিপাকদানাভাৰতো. অথ সতি ফলদানে চুতিঅনন্তরো এৰ এতেসং ফলকালো, ন অঞ্ঞোতি ফলকালনিযমেন নিযততা নিচ্ছিতা, ন ফলদাননিযমেন, এৰম্পি নিযতফলকালানং অঞ্ঞেসম্পি উপপজ্জৰেদনীযানং দিট্ঠধম্মৰেদনীযানঞ্চ নিযততা আপজ্জেয্য. তস্মা ৰিপাকধম্মধম্মানং পচ্চযন্তরৰিকলতাদীহি অৰিপচ্চমানানম্পি অত্তনো সভাৰেন ৰিপাকধম্মতা ৰিয বলৰতা আনন্তরিযেন ৰিপাকে দিন্নে অৰিপচ্চমানানম্পি আনন্তরিযানং ফলদানে নিযতসভাৰা আনন্তরিযসভাৰা চ পৰত্তীতি অত্তনো সভাৰেন ফলদাননিযমেনেৰ নিযততা আনন্তরিযতা চ ৰেদিতব্বা. অৰস্সঞ্চ আনন্তরিযসভাৰা ততো এৰ নিযতসভাৰা চ তেসং পৰত্তীতি সম্পটিচ্ছিতব্বমেতং অঞ্ঞস্স বলৰতো আনন্তরিযস্স অভাৰে চুতিঅনন্তরং একন্তেন ফলদানতো.

ননু এৰং অঞ্ঞেসম্পি উপপজ্জৰেদনীযানং অঞ্ঞস্মিং ৰিপাকদাযকে অসতি চুতিঅনন্তরমেকন্তেন ফলদানতো নিযতসভাৰা অনন্তরিযসভাৰা চ পৰত্তি আপজ্জতীতি? নাপজ্জতি. অসমানজাতিকেন চেতোপণিধিৰসেন উপঘাতকেন চ নিৰত্তেতব্বৰিপাকত্তা অনন্তরে একন্তফলদাযকত্তাভাৰা. ন পন আনন্তরিযকানং পঠমজ্ঝানাদীনং দুতিযজ্ঝানাদীনি ৰিয অসমানজাতিকং ফলনিৰত্তকং অত্থি সব্বানন্তরিযানং অৰীচিফলত্তা. ন চ হেট্ঠূপপত্তিং ইচ্ছতো সীলৰতো চেতোপণিধি ৰিয উপরূপপত্তিজনককম্মফলং আনন্তরিযফলং নিৰত্তেতুং সমত্থো চেতোপণিধি অত্থি অনিচ্ছন্তস্সেৰ অৰীচিপাতনতো, ন চ আনন্তরিযোপঘাতকং কিঞ্চি কম্মং অত্থি, তস্মা তেসংযেৰ অনন্তরে একন্তৰিপাকজনকসভাৰা পৰত্তীতি. অনেকানি চ আনন্তরিযানি কতানি একন্তেনেৰ ৰিপাকে নিযতসভাৰত্তা উপরতাৰিপচ্চনসভাৰাসঙ্কত্তা নিচ্ছিতানি সভাৰতো নিযতানেৰ. তেসু পন সমানসভাৰেসু একেন ৰিপাকে দিন্নে ইতরানি অত্তনা কাতব্বকিচ্চস্স তেনেৰ কতত্তা ন দুতিযং ততিযং ৰা পটিসন্ধিং করোন্তি. ন সমত্থতাৰিঘাতত্তাতি নত্থি তেসং আনন্তরিযকতা নিৰত্তি; গরুতরভাৰো পন তেসু লব্ভতেৰাতি সঙ্ঘভেদস্স সিযা গরুতরভাৰোতি, ‘‘যেন…পে… ৰিপচ্চতী’’তি আহ. একস্স পন অঞ্ঞানি উপত্থম্ভকানি হোন্তীতি দট্ঠব্বানি. পটিসন্ধিৰসেন ৰিপচ্চতীতি ৰচনেন ইতরেসং পৰত্তিৰিপাকদাযিতা অনুঞ্ঞাতা ৰিয দিস্সতি. নো ৰা তথা সীলৰতীতি যথা পিতা সীলৰা, তথা সীলৰতী নো ৰা হোতীতি যোজনা. সচে মাতা সীলৰতী, মাতুঘাতো পটিসন্ধিৰসেন ৰিপচ্চতীতি যোজনা.

পকতত্তোতি অনুক্খিত্তো. সমানসংৰাসকোতি অপারাজিকো. সমানসীমাযন্তি একসীমাযং.

সত্থুকিচ্চং কাতুং অসমত্থোতি যং সত্থারা কাতব্বকিচ্চং অনুসাসনাদি, তং কাতুং অসমত্থোতি ভগৰন্তং পচ্চক্খায. অঞ্ঞং তিত্থকরন্তি অঞ্ঞং সত্থারং.

১২৯. অভিজাতিআদিসু (অ. নি. টী. ১.১.২৭৭) পকপ্পনেন দেৰতূপসঙ্কমনাদিনা জাতচক্কৰাল়েন সমানযোগক্খেমং দসসহস্সপরিমাণং ঠানং জাতিখেত্তং, সরসেনেৰ আণাপৰত্তিট্ঠানং আণাখেত্তং, ৰিসযভূতং ঠানং ৰিসযখেত্তং. দসসহস্সী লোকধাতূতি ইমায লোকধাতুযা সদ্ধিং ইমং লোকধাতুং পরিৰারেত্ৰা ঠিতা দসসহস্সী লোকধাতু. তত্তকানংযেৰ জাতিখেত্তভাৰো ধম্মতাৰসেন ৰেদিতব্বো. ‘‘পরিগ্গহৰসেনা’’তি কেচি. ‘‘সব্বেসম্পি বুদ্ধানং তত্তকং এৰ জাতিখেত্তং তন্নিৰাসীনংযেৰ চ দেৰতানং ধম্মাভিসমযো’’তি চ ৰদন্তি. মাতুকুচ্ছিওক্কমনকালাদীনং ছন্নং এৰ গহণং নিদস্সনমত্তং মহাভিনীহারাদিকালেপি তস্স পকম্পনস্স লব্ভমানতো. আণাখেত্তং নাম যং একজ্ঝং সংৰট্টতি চ ৰিৰট্টতি চ. আণা ৰত্ততি আণায তন্নিৰাসীনং দেৰতানং সিরসা সম্পটিচ্ছনেন, তঞ্চ খো কেৰলং বুদ্ধানং আনুভাৰেনেৰ, ন অধিপ্পাযৰসেন, অধিপ্পাযৰসেন পন ‘‘যাৰতা ৰা পন আকঙ্খেয্যা’’তি (অ. নি. ৩.৮১) ৰচনতো ততো পরম্পি আণা পৰত্তেয্য.

ন উপ্পজ্জন্তীতি পন অত্থীতি, ‘‘ন মে আচরিযো অত্থি, সদিসো মে ন ৰিজ্জতী’’তিআদিং (ম. নি. ১.২৮৫; ২.৩৪১; মহাৰ. ১১; কথা. ৪০৫; মি. প. ৪.৫.১১) ইমিস্সং লোকধাতুযং ঠত্ৰা ৰদন্তেন ভগৰতা, ‘‘কিং পনাৰুসো সারিপুত্ত, অত্থেতরহি অঞ্ঞে সমণা ৰা ব্রাহ্মণা ৰা ভগৰতা সমসমা সম্বোধিযন্তি, এৰং পুট্ঠো অহং, ভন্তে, নোতি ৰদেয্য’’ন্তি (দী. নি. ৩.১৬১), ৰত্ৰা তস্স কারণং দস্সেতুং, ‘‘অট্ঠানমেতং অনৰকাসো, যং একিস্সা লোকধাতুযা দ্ৰে অরহন্তো সম্মাসম্বুদ্ধা’’তি ইমং সুত্তং (দী. নি. ৩.১৬১; মি. প. ৫.১.১) দস্সেন্তেন ধম্মসেনাপতিনা চ বুদ্ধখেত্তভূতং ইমং লোকধাতুং ঠপেত্ৰা অঞ্ঞত্থ অনুপ্পত্তি ৰুত্তা হোতীতি অধিপ্পাযো.

একতোতি সহ, একস্মিং কালেতি অত্থো. সো পন কালো কথং পরিচ্ছিন্নোতি চরিমভৰে পটিসন্ধিগ্গহণতো পট্ঠায যাৰ ধাতুপরিনিব্বানাতি দস্সেন্তো ‘‘তত্থা’’তিআদিমাহ. নিসিন্নকালতো পট্ঠাযাতি পটিলোমক্কমেন ৰদতি. পরিনিব্বানতো পট্ঠাযাতি অনুপাদিসেসায নিব্বানধাতুযা পরিনিব্বানতো পট্ঠায. এত্থন্তরেতি চরিমভৰে বোধিসত্তস্স পটিসন্ধিগ্গহণং ধাতুপরিনিব্বানন্তি এতেসং অন্তরে.

অঞ্ঞস্স বুদ্ধস্স উপ্পত্তি ন নিৰারিতা, তত্থ কারণং দস্সেতুং ‘‘তীণি হী’’তিআদি ৰুত্তং. পটিপত্তিঅন্তরধানেন হি সাসনস্স ওসক্কিতত্তা অপরস্স বুদ্ধস্স উপ্পত্তি লদ্ধাৰসরা হোতি. পটিপদাতি পটিৰেধাৰহা পুব্বভাগপটিপদা. ‘‘পরিযত্তি পমাণ’’ন্তি ৰত্ৰা তমত্থং বোধিসত্তং নিদস্সনং কত্ৰা দস্সেতুং, ‘‘যথা’’তিআদি ৰুত্তং তযিদং হীনং কতন্তি দট্ঠব্বং. নিয্যানিকধম্মস্স ঠিতিঞ্হি দস্সেন্তো অনিয্যানিকধম্মং নিদস্সেতি.

মাতিকায অন্তরহিতাযাতি, ‘‘যো পন ভিক্খূ’’তিআদিনযপ্পত্তা সিক্খাপদপাল়ি মাতিকা, তায অন্তরহিতায নিদানুদ্দেসসঙ্খাতে পাতিমোক্খুদ্দেসে পব্বজ্জাযুপসম্পদাকম্মেসু চ সাসনং তিট্ঠতীতি অত্থো. অথ ৰা পাতিমোক্খে ধরন্তেযেৰ পব্বজ্জা উপসম্পদা চ, এৰং সতি তদুভযং পাতিমোক্খে অন্তোগধং তদুভযাভাৰে পাতিমোক্খাভাৰতো, তস্মা তযিদং তযং সাসনস্স ঠিতিহেতূতি আহ – ‘‘পাতিমোক্খপব্বজ্জাউপসম্পদাসু ঠিতাসু সাসনং তিট্ঠতী’’তি. যস্মা ৰা উপসম্পদাধীনং পাতিমোক্খং, উপসম্পদা চ পব্বজ্জাধীনা, তস্মা পাতিমোক্খে সিদ্ধে, সিদ্ধাসু পব্বজ্জাউপসম্পদাসু চ সাসনং তিট্ঠতি. পচ্ছিমপটিৰেধতো হি পরং পটিৰেধসাসনং, পচ্ছিমসীলতো চ পরং পটিপত্তিসাসনং ৰিনট্ঠং নাম হোতি. ওসক্কিতং নামাতি পচ্ছিমকপটিৰেধসীলভেদদ্ৰযং একতো কত্ৰা ততো পরং ৰিনট্ঠং নাম হোতীতি অত্থো.

তেন কামং ‘‘সাসনট্ঠিতিযা পরিযত্তি পমাণ’’ন্তি ৰুত্তং, পরিযত্তি পন পটিপত্তিহেতুকাতি পটিপত্তিযা অসতি অপ্পতিট্ঠা হোতি, তস্মা পটিপত্তিঅন্তরধানং সাসনোসক্কনস্স ৰিসেসকারণন্তি দস্সেত্ৰা তযিদং সাসনোসক্কনং ধাতুপরিনিব্বানোসানন্তি দস্সেতুং, ‘‘তীণি পরিনিব্বানানী’’তি ৰুত্তং.

কারুঞ্ঞন্তি পরিদেৰনকারুঞ্ঞং. জম্বুদীপে দীপন্তরেসু দেৰনাগব্রহ্মলোকেসু চ ৰিপ্পকিরিত্ৰা ঠিতানং ধাতূনং মহাবোধিপল্লঙ্কে একজ্ঝং সন্নিপতনং, রস্মিৰিস্সজ্জনং, তত্থ তেজোধাতুযা উট্ঠানং, একজালীভাৰো চাতি সব্বমেতং সত্থু অধিট্ঠানৰসেনেৰ ৰেদিতব্বং.

অনচ্ছরিযত্তাতি দ্ৰীসুপি উপ্পজ্জমানেসু অচ্ছরিযত্তাভাৰদোসতোতি অত্থো. বুদ্ধা নাম মজ্ঝে ভিন্নং সুৰণ্ণং ৰিয একসদিসাতি তেসং দেসনাপি একরসা এৰাতি আহ – ‘‘দেসনায চ ৰিসেসাভাৰতো’’তি. এতেনপি অনচ্ছরিযত্তমেৰ সাধেতি. ৰিৰাদভাৰতোতি এতেন ৰিৰাদাভাৰত্থং দ্ৰে একতো ন উপ্পজ্জন্তীতি দস্সেতি.

তত্থাতি মিলিন্দপঞ্হে. একং বুদ্ধং ধারেতীতি একবুদ্ধধারণী. এতেন এৰং সভাৰা এতে বুদ্ধগুণা, যেন দুতিযবুদ্ধগুণে ধারেতুং অসমত্থা অযং লোকধাতূতি দস্সেতি. পচ্চযৰিসেসনিপ্ফন্নানঞ্হি গুণধম্মানং ভারিযো ৰিসেসো ন সক্কা ধারেতুন্তি, ‘‘ন ধারেয্যা’’তি ৰত্ৰা তমেৰ অধারণং পরিযাযন্তরেনপি পকাসেন্তো ‘‘চলেয্যা’’তিআদিমাহ. তত্থ চলেয্যাতি পরিপ্ফন্দেয্য. কম্পেয্যাতি পৰেধেয্য. নমেয্যাতি একপস্সেন নমেয্য. ওনমেয্যাতি ওসীদেয্য. ৰিনমেয্যাতি ৰিৰিধং ইতোচিতো চ নমেয্য. ৰিকিরেয্যাতি ৰাতেন থুসমুট্ঠি ৰিয ৰিপ্পকিরেয্য. ৰিধমেয্যাতি ৰিনস্সেয্য. ৰিদ্ধংসেয্যাতি সব্বসো ৰিদ্ধস্তা ভৰেয্য. তথাভূতা চ কত্থচি ন তিট্ঠেয্যাতি আহ ‘‘ন ঠানমুপগচ্ছেয্যা’’তি.

ইদানি তত্থ নিদস্সনং দস্সেন্তো, ‘‘যথা, মহারাজা’’তিআদিমাহ. তত্থ সমুপাদিকাতি সমং উদ্ধং পজ্জতি পৰত্ততীতি সমুপাদিকা, উদকস্স উপরি সমং গামিনীতি অত্থো. ৰণ্ণেনাতি সণ্ঠানেন. পমাণেনাতি আরোহেন. কিসথূলেনাতি কিসথূলভাৰেন, পরিণাহেনাতি অত্থো.

ছাদেন্তন্তি রোচেন্তং রুচিং উপ্পাদেন্তং. তন্দীকতোতি তেন ভোজনেন তন্দীভূতো. অনোনমিতদণ্ডজাতোতি যাৰদত্থং ভোজনেন ওনমিতুং অসক্কুণেয্যতায অনোনমিতদণ্ডো ৰিয জাতো. সকিং ভুত্তো ৰমেয্যাতি একম্পি আলোপং অজ্ঝোহরিত্ৰা ৰমেয্যাতি অত্থো.

অতিধম্মভারেন পথৰী চলতীতি ধম্মেন নাম পথৰী তিট্ঠেয্য. সা কিং তেনেৰ চলতি ৰিনস্সতীতি অধিপ্পাযেন পুচ্ছতি. পুন থেরো ‘‘রতনং নাম লোকে কুটুম্বং সন্ধারেন্তং অভিমতঞ্চ লোকেন অত্তনো গরুসভাৰতায সকটভঙ্গস্স কারণং অতিভারভূতং দিট্ঠং. এৰংধম্মো চ হিতসুখৰিসেসেহি তংসমঙ্গিনং ধারেন্তো অভিমতো চ ৰিঞ্ঞূনং গম্ভীরপ্পমেয্যভাৰেন গরুসভাৰত্তা অতিভারভূতো পথৰীচলনস্স কারণং হোতী’’তি দস্সেন্তো, ‘‘ইধ, মহারাজ, দ্ৰে সকটা’’তিআদিমাহ. এতেনেৰ তথাগতস্স মাতুকুচ্ছিওক্কমনাদিকালে পথৰীকম্পনকারণং সংৰণ্ণিতন্তি দট্ঠব্বং. একসকটতো রতনন্তি একস্মা, একস্স ৰা সকটস্স রতনং, তস্মা সকটতো গহেত্ৰাতি অত্থো.

ওসারিতন্তি উচ্চারিতং, ৰুত্তন্তি অত্থো. অগ্গোতি সব্বসত্তেহি অগ্গো.

সভাৰপকতীতি সভাৰভূতা অকিত্তিমা পকতি. কারণমহন্ততাযাতি মহন্তেহি বুদ্ধকারকধম্মেহি পারমিতাসঙ্খাতেহি কারণেহি বুদ্ধগুণানং নিব্বত্তিতোতি ৰুত্তং হোতি. পথৰিআদীনি মহন্তানি ৰত্থূনি, মহন্তা চ সক্কভাৰাদযো অত্তনো অত্তনো ৰিসযে একেকা এৰ, সম্মাসম্বুদ্ধোপি মহন্তো অত্তনো ৰিসযে একোৰ, কো চ তস্স ৰিসযো? বুদ্ধভূমি, যাৰতকং ৰা ঞেয্যং. এৰং ‘‘আকাসো ৰিয অনন্তৰিসযো ভগৰা একোৰ হোতী’’তি ৰদন্তো পরচক্কৰাল়েসু দুতিযস্স বুদ্ধস্স অভাৰং দস্সেতি.

ইমিনাৰ পদেনাতি ‘‘একিস্সা লোকধাতুযা’’তি ইমিনা এৰ পদেন. দসচক্কৰাল়সহস্সানি গহিতানি জাতিখেত্তত্তা. একচক্কৰাল়েনেৰাতি ইমিনা একচক্কৰাল়েনেৰ. যথা – ‘‘ইমস্মিংযেৰ চক্কৰাল়ে উপ্পজ্জন্তী’’তি ৰুত্তে ইমস্মিম্পি চক্কৰাল়ে জম্বুদীপেযেৰ, তত্থপি মজ্ঝিমপদেসে এৰাতি পরিচ্ছিন্দিতুং ৰট্টতি; এৰং ‘‘একিস্সা লোকধাতুযা’’তি জাতিখেত্তে অধিপ্পেতেপি ইমিনাৰ চক্কৰাল়েন পরিচ্ছিন্দিতুং ৰট্টতি.

ৰিৰাদূপচ্ছেদতোতি ৰিৰাদূপচ্ছেদকারণা. দ্ৰীসু উপ্পন্নেসু যো ৰিৰাদো ভৰেয্য, তস্স অনুপ্পাদোযেৰেত্থ ৰিৰাদুপচ্ছেদো. একস্মিং দীপেতিআদিনা দীপন্তরেপি একজ্ঝং ন উপ্পজ্জন্তি, পগেৰ একদীপেতি দস্সেতি. সো পরিহাযেথাতি চক্কৰাল়স্স পদেসে এৰ ৰত্তিতব্বত্তা পরিহাযেয্য.

১৩০. মনুস্সত্তন্তি মনুস্সভাৰো তস্সেৰ পব্বজ্জাদিগুণসম্পত্তিআদীনং যোগ্গভাৰতো. লিঙ্গসম্পত্তীতি পুরিসভাৰো. হেতূতি মনোৰচীপণিধানপুব্বিকা হেতুসম্পদা. সত্থারদস্সনন্তি সত্থুসম্মুখীভাৰো. পব্বজ্জাতি কম্মকিরিযৰাদীসু তাপসেসু, ভিক্খূসু ৰা পব্বজ্জা. গুণসম্পত্তীতি অভিঞ্ঞাদিগুণসম্পদা. অধিকারোতি বুদ্ধং উদ্দিস্স অধিকো সক্কারো. ছন্দতাতি সম্মাসম্বোধিং উদ্দিস্স সাতিসযো কত্তুকম্যতাকুসলচ্ছন্দো. অট্ঠধম্মসমোধানাতি এতেসং অট্ঠন্নং ধম্মানং সমাযোগেন. অভিনীহারোতি কাযপণিধানং. সমিজ্ঝতীতি নিপ্ফজ্জতীতি অযমেত্থ সঙ্খেপো, ৰিত্থারো পন পরমত্থদীপনিযা চরিযাপিটকৰণ্ণনায (চরিযা. অট্ঠ. পকিণ্ণককথা) ৰুত্তনযেনেৰ ৰেদিতব্বো.

সব্বাকারপরিপূরমেৰাতি পরিপুণ্ণলক্খণতায সত্তুস্সদাদীহি সব্বাকারেহি সম্পন্নমেৰ. ন হি ইত্থিযা কোসোহিতৰত্থগুয্হতা সম্ভৰতি, দুতিযপকতি চ নাম পঠমপকতিতো নিহীনা এৰ. তেনেৰাহ অনন্তরৰারে ‘‘যস্মা’’তিআদি.

ইধ পুরিসস্স তত্থ নিব্বত্তনতোতি ইমস্মিং মনুস্সলোকে পুরিসভূতস্স তত্থ ব্রহ্মলোকে ব্রহ্মত্তভাৰেন নিব্বত্তনতো. তেন অসতিপি পুরিসলিঙ্গে পুরিসাকারা ব্রহ্মানো হোন্তীতি দস্সেতি. তংযেৰ হি পুরিসাকারং সন্ধায ৰুত্তং – ‘‘যং পুরিসো ব্রহ্মত্তং করেয্যা’’তি. তেনেৰাহ ‘‘সমানেপী’’তিআদি. যদি এৰং ইত্থিযো ব্রহ্মলোকে ন উপ্পজ্জন্তীতি আহ ‘‘ব্রহ্মত্ত’’ন্তিআদি.

১৩১. কাযদুচ্চরিতস্সাতিআদিপাল়িযা কম্মনিযামো নাম কথিতো. সমঞ্জনং সমঙ্গো, সো এতস্স অত্থীতি সমঙ্গী, সমন্নাগতো. সমঞ্জনসীলো ৰা সমঙ্গী. পুব্বভাগে আযূহনসমঙ্গিতা, সন্নিট্ঠাপকচেতনাৰসেন চেতনাসমঙ্গিতা. চেতনাসন্ততিৰসেন ৰা আযূহনসমঙ্গিতা, তংতংচেতনাখণৰসেন চেতনাসমঙ্গিতা. কতূপচিতস্স অৰিপক্কৰিপাকস্স কম্মস্স ৰসেন কম্মসমঙ্গিতা, কম্মে পন ৰিপচ্চিতুং আরদ্ধে ৰিপাকপ্পৰত্তিৰসেন ৰিপাকসমঙ্গিতা. কম্মাদীনং উপট্ঠানকালৰসেন উপট্ঠানসমঙ্গিতা. কুসলাকুসলকম্মাযূহনক্খণেতি কুসলকম্মস্স চ অকুসলকম্মস্স চ সমীহনক্খণে. তথাতি ইমিনা কুসলাকুসলকম্মপদং আকড্ঢতি. যথা কতং কম্মং ফলদানসমত্থং হোতি, তথা কতং উপচিতং. ৰিপাকারহন্তি দুতিযভৰাদীসু ৰিপচ্চনারহং. উপ্পজ্জমানানং উপপত্তিনিমিত্তং উপট্ঠাতীতি যোজনা. চলতীতি পরিৰত্ততি. একেন হি কম্মুনা তজ্জে নিমিত্তে উপট্ঠাপিতে পচ্চযৰিসেসৰসেন ততো অঞ্ঞেন কম্মুনা অঞ্ঞস্স নিমিত্তস্স উপট্ঠানং পরিৰত্তনং.

সুনখজীৰিকোতি সুনখেহি জীৰনসীলো. তলসন্থরণপূজন্তি ভূমিতলস্স পুপ্ফেহি সন্তরণপূজং. আযূহনচেতনাকম্মসমঙ্গিতাৰসেনাতি কাযদুচ্চরিতস্স অপরাপরং আযূহনেন সন্নিট্ঠাপকচেতনায তস্সেৰ পকপ্পনে কম্মক্খযকরঞাণেন অখেপিতত্তা যথূপচিতকম্মুনা চ সমঙ্গিভাৰস্স ৰসেন.

১৩২. এৰং সস্সিরিকন্তি ৰুত্তপ্পকারেন অনেকধাতুৰিভজনাদিনা নানানযৰিচিত্ততায পরমনিপুণগম্ভীরতায চ অত্থতো ব্যঞ্জনতো চ সসোভং কত্ৰা.

নং ধারেহীতি এত্থ নন্তি নিপাতমত্তং. ধাতুআদিৰসেন পরিৰট্টীযন্তি অত্থা এতেহীতি পরিৰট্টা, দেসনাভেদা. চত্তারো পরিৰট্টা এতস্স, এতস্মিং ৰাতি চতুপরিৰট্টো, ধম্মপরিযাযো. ধম্মো চ সো পরিযত্তিভাৰতো যথাৰুত্তেনত্থেন আদাসোতি ধম্মাদাসো. উপট্ঠানট্ঠেন যথাধম্মানং আদাসোতিপি ধম্মাদাসো. যথা হি আদাসেন সত্তানং মুখে মলদোসহরণং, এৰং ইমিনাপি সুত্তেন যোগীনং মুখে মলদোসহরণং. তস্মাতি যস্মা ইমিনা সুত্তেন কিলেসে মদ্দিত্ৰা সমথাধিগমেন যোগিনো জযপ্পত্তা; তস্মা অমতপুরপ্পৰেসনে উগ্ঘোসনমহাভেরিতায চ অমতদুন্দুভি. ইধ ৰুত্তন্তি ইমস্মিং সুত্তে ৰুত্তং. অনুত্তরো সঙ্গামৰিজযোতি অনুত্তরভাৰতো কিলেসসঙ্গামৰিজযো, ‘‘ৰিজেতি এতেনা’’তি কত্ৰা. সেসং সুৰিঞ্ঞেয্যমেৰ.

বহুধাতুকসুত্তৰণ্ণনায লীনত্থপ্পকাসনা সমত্তা.

৬. ইসিগিলিসুত্তৰণ্ণনা

১৩৩. সমঞ্ঞাযতি এতাযাতি সমঞ্ঞা, নামন্তি অত্থো. অযমযং নামাতি পঞ্ঞাপেন্তি এতায, তথাপঞ্ঞাপনমত্তন্তি ৰা পঞ্ঞত্তি, নামমেৰ. তেনাহ ‘‘পুরিমপদস্সেৰ ৰেৰচন’’ন্তি. সেসেসুপীতি ‘‘পণ্ডৰস্স পব্বতস্সা’’তিআদীসু তীসু ৰারেসুপি.

সমুট্ঠানং তাৰ সুত্তস্স কথেত্ৰা অত্থসংৰণ্ণনং কাতুং ‘‘তদা কিরা’’তিআদি ৰুত্তং. ন পব্বতেহি অত্থোতি ন ভগৰতো পব্বতেহি কথিতেহি অত্থো অত্থি. ইসিগিলিভাৰোতি ইসিগিলিনামতা. ইতীতি ইমিনা কারণেন, ইমং অট্ঠুপ্পত্তিং অৰেক্খন্তোতি অত্থো.

চেতিযগব্ভেতি চেতিযঘরে চেতিযস্স অব্ভন্তরে. যমকমহাদ্ৰারন্তি যমককৰাটযুত্তং মহন্তং দ্ৰারং. দ্ৰেধা কত্ৰাতি পব্বতস্স অব্ভন্তরে মণ্ডপসঙ্খেপেন লেণং নিম্মিনিত্ৰা দ্ৰেধা কত্ৰা তদা তে তত্থ ৰসিংসু.

ৰসিতকালঞ্চ কথেন্তো তেসং মাতুযা যাৰ ততিযভৰতো পট্ঠায সমুদাগমং দস্সেতুং, ‘‘অতীতে কিরা’’তিআদি ৰুত্তং. পত্থেসীতি তস্সা কির খেত্তকুটিযা ৰীহযো ভজ্জন্তিযা তত্থ মহাকরঞ্জপুপ্ফপ্পমাণা মহন্তা মনোহরা পঞ্চসতমত্তা লাজা জাযিংসু. সা তা গহেত্ৰা মহন্তে পদুমিনিপত্তে ঠপেসি. তস্মিঞ্চ সমযে একো পচ্চেকবুদ্ধো তস্সা অনুগ্গহত্থং অৰিদূরে খেত্তপাল়িযা গচ্ছতি. সা তং দিস্ৰা পসন্নমানসা সুপুপ্ফিতং মহন্তং একং পদুমং গহেত্ৰা তত্থ লাজে পক্খিপিত্ৰা পচ্চেকবুদ্ধং উপসঙ্কমিত্ৰা পঞ্চপতিট্ঠিতেন ৰন্দিত্ৰা, ‘‘ইমস্স, ভন্তে, পুঞ্ঞস্স আনুভাৰেন আনুভাৰসম্পন্নে পঞ্চসতপুত্তে লভেয্য’’ন্তি পঞ্চ পুত্তসতানি পত্থেসি. তস্মিংযেৰ খণেতি যদা সা যথাৰুত্তং পত্থনং পট্ঠপেসি; তস্মিংযেৰ খণে পঞ্চসতা মিগলুদ্দকা সম্ভতসম্ভারা পরিপক্কপচ্চেকবোধিঞাণা তস্সেৰ পচ্চেকবুদ্ধস্স মধুরমংসং দত্ৰা, ‘‘এতিস্সা পুত্তা ভৰেয্যামা’’তি পত্থযিংসু. অতীতাসু অনেকজাতীসু তস্সা পুত্তভাৰেন আগতত্তা তথা তেসং অহোসীতি ৰদন্তি. পাদুদ্ধারেতি পাদুদ্ধারে পাদুদ্ধারে. পাদুদ্ধারসীসেন চেত্থ নিক্খিপনং আহ.

গব্ভমলং নিস্সাযাতি বহি নিক্খন্তং গব্ভমলং নিস্সযং কত্ৰা সংসেদজভাৰেন নিব্বত্তা. ওপপাতিকভাৰেনাতি কেচি. খযৰযং পট্ঠপেত্ৰাতি ৰিপস্সনং আরভিত্ৰা. ৰিপস্সনাতি অনিচ্চানুপস্সনাপুব্বিকা সপ্পচ্চযনামরূপদস্সনপুব্বিকা চ, সঙ্খারে সম্মসন্তস্স অনিচ্চলক্খণে দিট্ঠে, ‘‘যদনিচ্চং তং দুক্খং, যং দুক্খং তদনত্তা’’তি সেসলক্খণানি সুৰিঞ্ঞেয্যানেৰ হোন্তি. পচ্চেকবোধিঞাণং নিব্বত্তযিংসূতি দ্ৰে অসঙ্খ্যেয্যানি কপ্পানং সতসহস্সঞ্চ পচ্চেকবোধিপারমিতায পরিনিপ্ফন্নত্তা ঞাণস্স পরিপাকত্তা ৰুত্তনযেন সযমেৰ ৰিপস্সনং পৰত্তেত্ৰা মত্থকং পাপেত্ৰা পচ্চেকবোধিঞাণং অধিগচ্ছিংসু. সব্বেপি তে তংযেৰ গাথং অভাসিংসূতি আহ – ‘‘অযং তেসং ব্যাকরণগাথা অহোসী’’তি.

সরোরুহন্তি সরসি জাতং. পদুমপলাসপত্তজন্তি খুদ্দকমহন্তেহি কমলদলেহি সহজাতং. খুদ্দকমহন্তকমলদলসঙ্খাতানি ৰা পদুমপলাসপত্তানি এত্থ সন্তীতি পদুমপলাসপত্তং, পদুমগচ্ছং. তত্থ জাতন্তি পদুমপলাসপত্তজং. সুপুপ্ফিতন্তি সুট্ঠু পুপ্ফিতং সম্মা ৰিকসিতং. ভমরগণানুচিণ্ণন্তি ভমরগণেহি অনুকুলঞ্চেৰ অনুপরিব্ভমিতঞ্চ. অনিচ্চতাযুপগতন্তি খণে খণে ৰণ্ণভেদাদিৰসেন অনিচ্চতায উপগতং. ৰিদিত্ৰাতি ৰিপস্সনাপঞ্ঞাসহিতায মগ্গপঞ্ঞায জানিত্ৰা. একো চরেতি তস্মা অঞ্ঞোপি মাদিসো হোতুকামো এৰং পটিপজ্জিত্ৰা একো চরে খগ্গৰিসাণকপ্পোতি.

১৩৫. সতিসারসীলসারাদিসমন্নাগমনেন সত্তেসু সারভূতা. সব্বসো ৰট্টদুক্খস্স ৰিগতত্তা নিদ্দুক্খা. সমুচ্ছিন্নতণ্হতায নিত্তণ্হা. মানচ্ছিদোতি থুতিৰচনং.

এতেসং একনামকাযেৰাতি এতেসং আগতানং পচ্চেকবুদ্ধানং পাল়িযং অনাগতা অঞ্ঞে পচ্চেকবুদ্ধা সমাননামকা এৰ. ৰুত্তমেৰত্থং পাকটীকরণত্থং ‘‘ইমেসু হী’’তিআদি ৰুত্তং. ৰিসুং ৰিসুং অৰত্ৰাতি পচ্চেকং সরূপতো অৰত্ৰা. অঞ্ঞে চাতি অসাধারণত্তা আহ. সেসং সুৰিঞ্ঞেয্যমেৰ.

ইসিগিলিসুত্তৰণ্ণনায লীনত্থপ্পকাসনা সমত্তা.

৭. মহাচত্তারীসকসুত্তৰণ্ণনা

১৩৬. দোসেহি আরকাতি অরিযং. তেনাহ ‘‘নিদ্দোস’’ন্তি. সা পন নিদ্দোসতা লোকুত্তরভাৰেন সৰিসেসাতি আহ ‘‘লোকুত্তর’’ন্তি. সম্মা সুন্দরো পসত্থো নিয্যানিকো সমাধি সম্মাসমাধীতি আহ – ‘‘সম্মাসমাধিন্তি মগ্গসমাধি’’ন্তি. উপনিসীদতি এত্থ ফলং তপ্পটিবদ্ধৰুত্তিতাযাতি উপনিসং, কারণন্তি আহ – ‘‘সউপনিসন্তি সপ্পচ্চয’’ন্তি. পরিকরোতি পরিৰারেতীতি পরিক্খারোতি আহ – ‘‘সপরিক্খারন্তি সপরিৰার’’ন্তি.

পরিৰারিতাতি সহজাতাদিপচ্চযভাৰেন পরিৰারন্তেহি ৰিয উপগতা. পুরেচারিকাতি ৰুট্ঠানগামিনিভাৰনা সহজাতাদিপচ্চযৰসেন পচ্চযত্তা পুরস্সরা. তেনাহ – ‘‘ৰিপস্সনাসম্মাদিট্ঠি চা’’তি. ইদানি তানি কিচ্চতো দস্সেতুং, ‘‘ৰিপস্সনাসম্মাদিট্ঠী’’তিআদি ৰুত্তং. তত্থ পরিৰীমংসগ্গহণং তত্থ তত্থ চিত্তুপ্পাদে ৰীমংসাধিপতেয্যেন পৰত্তিযা সম্মাদিট্ঠিযা পুব্বঙ্গমভাৰদস্সনত্থং. তেনস্স মগ্গসমাধিস্স নানাখণিকং পুব্বঙ্গমভাৰং দস্সেতি. ৰীমংসনপরিযোসানেতি তথাপৰত্তঅনুলোমঞাণস্স ওসানে. ভূমিলদ্ধং ৰট্টং সমুগ্ঘাটযমানাতি অত্তনো সন্তানে দীঘরত্তং অনুসযিতং কিলেসৰট্টং সমুচ্ছিন্দন্তি. ৰূপসমযমানাতি তস্সেৰ ৰেৰচনং. ৰূপসমযমানাতি ৰা ততো এৰ অৰসিট্ঠম্পি ৰট্টং অপ্পৰত্তিকরণৰসেন ৰূপসমেন্তি. তেনেৰাহ – ‘‘মগ্গসম্মাদিট্ঠি…পে… উপ্পজ্জতী’’তি. সাতি সম্মাদিট্ঠি. দুৰিধাপীতি যথাৰুত্তা দুৰিধাপি. ইধ অধিপ্পেতা ৰিপস্সনাপঞ্ঞাসহিতায মগ্গপঞ্ঞায কিচ্চস্স দস্সিতত্তা.

লক্খণে পটিৰিজ্ঝমানে লক্খণিকো ধম্মো পটিৰিদ্ধো হোতীতি আহ – ‘‘মিচ্ছাদিট্ঠিং…পে… আরম্মণতো পজানাতী’’তি. ৰিপস্সনাসম্মাদিট্ঠিযম্পি এসেৰ নযো. কিচ্চতোতি ভাৰনাকিচ্চতো. সম্মাদিট্ঠিযং তদধিগতঅসম্মোহতায অসম্মোহতো পজানাতি. কিচ্চতোতি পটিৰেধকিচ্চতো. তং পন সব্বথা অসম্মুয্হনমেৰাতি আহ ‘‘অসম্মোহতো’’তি. এৰং পজাননাতি মিচ্ছাদিট্ঠি মিচ্ছাদিট্ঠীতি যাথাৰতো অৰবোধো. অস্সাতি তংসমঙ্গিনো পুগ্গলস্স.

দ্ৰাযন্তি -কারো দীঘং কত্ৰা ৰুত্তো. তেনাহ ‘‘দ্ৰযং ৰদামী’’তি. দ্ৰে অৰযৰা এতস্সাতি দ্ৰযং. তেনাহ ‘‘দুৰিধকোট্ঠাসং ৰদামী’’তি. পুঞ্ঞস্স একো ভাগো সো এৰ পুঞ্ঞভাগিকো, ক-কারস্স য-কারং কত্ৰা ইত্থিলিঙ্গৰসেন ‘‘পুঞ্ঞভাগিযা’’তি ৰুত্তং. উপধিসঙ্খাতস্সাতি খন্ধপবন্ধসঙ্খাতস্স.

অমতদ্ৰারন্তি অরিযমগ্গং. পঞ্ঞপেতীতি নিয্যানাদিপকারতো পঞ্ঞপেতি. তেনাহ ‘‘ৰিভজিত্ৰা দস্সেতী’’তি. তত্থ সম্মোহস্স ৰিদ্ধংসনেন অসম্মোহতো দস্সেতি. তস্মিং অত্থেতি অমতদ্ৰারপঞ্ঞাপনে অত্থে. বোজ্ঝঙ্গপ্পত্তাতি বোজ্ঝঙ্গভাৰপ্পত্তা. মগ্গভাৰেন নিয্যানভাৰেন পৰত্তিযা মগ্গপঞ্ঞায অট্ঠন্নম্পি সাধারণত্তা সমুদাযস্স চ অৰযৰো অঙ্গন্তি কত্ৰা সেসধম্মে অঙ্গিকভাৰেন দস্সেন্তো ‘‘অরিযমগ্গস্স অঙ্গ’’ন্তি আহ. সো ভিক্খূতি মিচ্ছাদিট্ঠিং ‘‘মিচ্ছাদিট্ঠী’’তি সম্মাদিট্ঠিং ‘‘সম্মাদিট্ঠী’’তি জানন্তো ভিক্খু. পজহনত্থাযাতি সমুচ্ছেদৰসেন পজহনায. পটিলাভত্থাযাতি মগ্গসম্মাদিট্ঠিযা অধিগমায. কুসলৰাযামোতি ৰিপস্সনাসম্পযুত্তোৰ কোসল্লসম্ভূতো ৰাযামো. সরতীতি সতো, তং পনস্স সরণং সতিসমঙ্গিতাযাতি আহ ‘‘সতিযা সমন্নাগতো’’তি. কামঞ্চেত্থ ৰিপস্সনাসম্মাদিট্ঠিং যথাভূতা সম্মাৰাযামসতিযো সহজাতা চ পুরেজাতা চ হুত্ৰা পরিৰারেন্তি, ‘‘ইতিযিমে তযো ধম্মা সম্মাদিট্ঠিং অনুপরিধাৰন্তি অনুপরিৰত্তন্তী’’তি পন ৰচনতো, ‘‘এত্থ হী’’তিআদিনা মগ্গসম্মাদিট্ঠিযা এৰ সেসধম্মানং যথারহং সহচরণভাৰেন পরিৰারণং যোজিতং. সম্মাসঙ্কপ্পাদীনন্তি আদি-সদ্দেন সম্মাৰাচাকম্মন্তাজীৰানং গহণং ইতরেসং পরিৰারভাৰেন গহিতত্তা. ন হি সক্কা তে এৰ পরিৰারে পরিৰারৰন্তে চ কত্ৰা ৰত্তুং সঙ্করতো সম্মোহজননতো চ. তযোতি সম্মাদিট্ঠিৰাযামসতিযো সহজাতপরিৰারাৰ হোন্তি মগ্গক্খণিকানং তেসং অধিপ্পেতত্তা ৰিপস্সনাখণৰিরতীনং অসম্ভৰতো.

১৩৭. তক্কনৰসেন লোকসিদ্ধেনাতি অধিপ্পাযো. ‘‘এৰঞ্চেৰঞ্চ ভৰিতব্ব’’ন্তি ৰিৰিধং তক্কনং কূপে ৰিয উদকস্স আরম্মণস্স আকড্ঢনং ৰিতক্কনং ৰিতক্কো. সঙ্কপ্পনৰসেনাতি তং তং আরম্মণং গহেত্ৰা কপ্পনৰসেন. তক্কনং কপ্পনন্তি চ অতংসহজাতানমেৰাতি দট্ঠব্বং. একগ্গোতি ইমিনা সমাধিনা লদ্ধুপকারস্সেৰ ৰিতক্কস্স অপ্পনাপরিযাযো হোতীতি দস্সেতি. ৰিসেসেন ৰা অপ্পনা ৰিতক্কস্স ৰসেন চিত্তং আরম্মণং অভিরোপেতি, ৰিতক্কে অসতি কথন্তি আহ ‘‘ৰিতক্কে পনা’’তিআদি. অত্তনোযেৰ ধম্মতায চিত্তং আরম্মণং অভিরুহতীতি, এতেন আরম্মণধম্মানং গহণং নাম সভাৰসিদ্ধং, ন ধম্মন্তরমপেক্খতি, ৰিতক্কো পন পৰত্তমানো আরম্মণাভিনিরোপনৰসেনেৰ পৰত্ততীতি দস্সেতি. এৰং সন্তেপি সভাৰাৰিতক্কচিত্তুপ্পাদতো সৰিতক্কচিত্তুপ্পাদস্স আরম্মণগ্গহণৰিসেসো ৰিতক্কেন জাতোতি কত্ৰা ৰিতক্কো চিত্তস্স আরম্মণগ্গহণে ৰিসেসপচ্চযোতি পাকটোযমত্থো. অপরে পন ভণন্তি – যথা কোচি রাজৰল্লভং, তংসম্বন্ধীনং মিত্তং ৰা নিস্সায রাজগেহং আরোহতি অনুপৰিসতি, এৰং ৰিতক্কং নিস্সায চিত্তং আরম্মণং আরোহতি ৰিতক্কস্স আরম্মণাভিনিরোপনসভাৰত্তা, অঞ্ঞেসং ধম্মানঞ্চ অৰিতক্কসভাৰতো. তেনাহ ভগৰা – ‘‘চেতসো অভিনিরোপনা’’তি (ধ. স. ৭).

যদি এৰং কথং অৰিতক্কচিত্তং আরম্মণং আরোহতীতি? ৰিতক্কবলেনেৰ. যথা হি সো পুরিসো পরিচযেন তেন ৰিনাপি নিরাসঙ্কো রাজগেহং পৰিসতি, এৰং পরিচযেন ৰিতক্কেন ৰিনাপি অৰিতক্কং চিত্তং আরম্মণং আরোহতি. পরিচযেনাতি চ সন্তানে পৰত্তৰিতক্কভাৰনাসঙ্খাতেন পরিচযেন. ৰিতক্কস্স হি সন্তানে অভিণ্হং পৰত্তস্স ৰসেন চিত্তস্স আরম্মণাভিরুহনং চিরপরিচিতং; তেন তং কদাচি ৰিতক্কেন ৰিনাপি তত্থ পৰত্ততেৰ; যথা ঞাণসহগতং চিত্তং সম্মসনৰসেন চিরপরিচিতং কদাচি ঞাণরহিতম্পি সম্মসনৰসেন পৰত্ততি; যথা ৰা কিলেসসহিতং হুত্ৰা পৰত্তং সব্বসো কিলেসরহিতম্পি পরিচযেন কিলেসৰাসনাৰসেন পৰত্ততি, এৰং সম্পদমিদং দট্ঠব্বং.

ৰাচং সঙ্খরোতীতি ৰাচং উপ্পাদেতি, ৰচীঘোসুপ্পত্তিযা ৰিসেসপচ্চযো হোতীতি অত্থো. লোকিযৰিতক্কো দ্ৰত্তিংসচিত্তসহগতো ৰাচং সঙ্খরোতি ৰচীৰিঞ্ঞত্তিজননতো. ৰচীসঙ্খারোত্ৰেৰ পনস্স নামং হোতি রুল়্হিতো, তংসমত্থতানিরোধতো ৰা সম্ভৰতো পন সঙ্খারোতি. ‘‘লোকুত্তরসম্মাসঙ্কপ্পং পরিৰারেন্তী’’তি ৰত্ৰা তিৰিধে সম্মাসঙ্কপ্পে কদাচি কতমং পরিৰারেন্তীতি? চোদনং সন্ধাযাহ ‘‘এত্থা’’তিআদি. নানাচিত্তেসু লব্ভন্তি নানাসমন্নাহারহেতুকত্তা, পুব্বভাগেযেৰ চ তে উপ্পজ্জন্তীতি. তীণি নামানি লভতি তিৰিধস্সপি পটিপক্খস্স সমুচ্ছিন্দনেন সাতিসযং তিণ্ণম্পি কিচ্চকরণতো. এস নযো সম্মাৰাচাদীসুপি.

১৩৮. ৰিরমতি এতাযাতি ৰেরমণী ৰিরতি ৰুচ্চতি. সা মুসাৰাদতো ৰিরমণস্স কারণভাৰতো চেতনাপি ৰেরস্স মণনতো ৰিনাসনতো ৰিরতিপীতি আহ – ‘‘ৰিরতিপি চেতনাপি ৰট্টতী’’তি. আরকা রমতীতি সমুচ্ছিন্নেহি দূরতো সমুস্সারেতি. ৰিনা তেহি রমতীতি অচ্চন্তমেৰ তেহি ৰিনা ভৰতি. ততো ততোতি দিট্ঠে অদিট্ঠৰাদাদিতো মুসাৰাদা. ৰিসেসতো অনুপ্পত্তিধম্মত্তা পটিনিৰত্তা হুত্ৰা.

১৪০. তিৰিধেন কুহনৰত্থুনাতি পচ্চযপটিসেৰন-সামন্তজপ্পন-ইরিযাপথপৰত্তনসঙ্খাতেন পাপিচ্ছতা নিব্বত্তেন তিৰিধেন কুহনৰত্থুনা. এতায কুহনায করণভূতায পচ্চযুপ্পাদনত্থং নিমিত্তং সীলং এতেসন্তি যোজনা. অত্তৰিসযলাভহেতু অক্কোসনখুংসনৰম্ভনাদিৰসেন পিসনং ঘট্টনং ৰিহেঠনং নিপ্পেসো. ইতো লদ্ধং অঞ্ঞস্স, ততো লদ্ধং পরস্স দত্ৰা এৰং লাভেন লাভং নিজিগীংসতীতি লাভেন লাভং নিজিগীংসনা. পাল়িযং আগতো কুহনাদিৰসেন মিচ্ছাআজীৰো. কো পন সোতি আহ ‘‘আজীৰহেতূ’’তিআদি. তাসংযেৰাতি অৰধারণং, ‘‘আজীৰো কুপ্পমানো কাযৰচীদ্ৰারেসু এৰ কুপ্পতী’’তি কত্ৰা ৰুত্তং.

১৪১. সম্মা পসত্থা সোভনা নিয্যানিকা দিট্ঠি এতস্সাতি সম্মাদিট্ঠি, পুগ্গলো. তস্স পন যস্মা সম্মাদিট্ঠি সচ্চাভিসমযস্স নিব্বানসচ্ছিকিরিযায অৰস্সযো, তস্মা ৰুত্তং – ‘‘মগ্গসম্মাদিট্ঠিযং ঠিতস্সা’’তি. পহোতি ভৰতি তায সহেৰ উপ্পজ্জতি পৰত্ততি. পচ্চৰেক্খণঞাণং যাথাৰতো জাননট্ঠেন সম্মাঞাণন্তি ইধাধিপ্পেতং, তঞ্চ খো মগ্গসমাধিম্হি ঠিতে এৰ হোতীতি ইমমত্থং দস্সেতুং আহ – ‘‘মগ্গসম্মাসমাধিম্হি…পে… সম্মাঞাণং পহোতী’’তিআদি. ইমিনা কিং দস্সেতীতি? যথা মগ্গসম্মাদিট্ঠিযং ঠিতো পুগ্গলো, ‘‘সম্মাদিট্ঠী’’তি ৰুত্তো, এৰং মগ্গফলপচ্চৰেক্খণঞাণে ঠিতো, ‘‘সম্মাঞাণো’’তি ৰুত্তো, তস্স চ মগ্গফলসম্মাসমাধিপৰত্তিযা পহোতি সম্মাঞাণস্স সম্মাৰিমুত্তিযা পহোতীতি ইমমত্থং দস্সেতি. ফলসমাধি তাৰ পৰত্ততু, মগ্গসমাধি পন কথন্তি? তম্পি অকুপ্পভাৰতায অচ্চন্তসমাধিভাৰতো কিচ্চনিপ্ফত্তিযা পৰত্ততেৰাতি ৰত্তব্বতং লভতি. ঠপেত্ৰা অট্ঠফলঙ্গানীতি ফলভূতানি সম্মাদিট্ঠিআদীনি অট্ঠঙ্গানি, ‘‘সম্মাদিট্ঠিস্স সম্মাসঙ্কপ্পো পহোতী’’তিআদিনা ৰিসুং গহিতত্তা ঠপেত্ৰা. সম্মাঞাণং পচ্চৰেক্খণং কত্ৰাতি পচ্চৰেক্খণঞাণং সম্মাঞাণং কত্ৰা. ফলং কাতুন্তি ফলধম্মসহচরিততায ৰিপাকসভাৰতায চ ‘‘ফল’’ন্তি লদ্ধনামে ফলসম্পযুত্তধম্মে সম্মাৰিমুত্তিং কাতুং ৰট্টতীতি ৰুত্তং. তথা চ ৰুত্তং সল্লেখসুত্তৰণ্ণনাযং (ম. নি. অট্ঠ. ১.৮৩) ‘‘ফলসম্পযুত্তানি পন সম্মাদিট্ঠিআদীনি অট্ঠঙ্গানি ঠপেত্ৰা সেসধম্মা সম্মাৰিমুত্তীতি ৰেদিতব্বা’’তি.

১৪২. নিজ্জিণ্ণাতি নিজ্জীরিতা, ৰিদ্ধস্তা ৰিনাসিতাতি অত্থো. ফলং কথিতন্তি ‘‘সম্মাদিট্ঠিস্স, ভিক্খৰে, মিচ্ছাদিট্ঠি নিজ্জিণ্ণা হোতী’’তি ইমিনা ৰারেন সামঞ্ঞফলং কথিতন্তি ৰদন্তি, নিজ্জীরণং পটিপ্পস্সম্ভনন্তি অধিপ্পাযো. নিজ্জীরণং পন সমুচ্ছিন্দনন্তি কত্ৰা, মজ্ঝিমভাণকা…পে… মগ্গো কথিতোতি ৰদন্তি. দস্সনট্ঠেনাতি পরিঞ্ঞাভিসমযাদিৰসেন চতুন্নং সচ্চানং পচ্চক্খতো দস্সনট্ঠেন. ৰিদিতকরণট্ঠেনাতি পচ্চক্খেন যথাদিট্ঠানং মগ্গফলানং পাকটকরণট্ঠেন. তদধিমুত্তট্ঠেনাতি তস্মিং যথাসচ্ছিকতে নিব্বানে অধিমুচ্চনভাৰেন.

কুসলপক্খাতি অনৰজ্জকোট্ঠাসা. মহাৰিপাকদানেনাতি মহতো ৰিপুলস্স লোকুত্তরস্স সুখৰিপাকস্স চেৰ কাযিকাদিদুক্খৰিপাকস্স চ দানেন.

যথা মহাৰিপাকস্স দানেন মহাচত্তারীসকং, তথা বহুতাযপি মহাচত্তারীসকোতি দস্সেতুং, ‘‘ইমস্মিঞ্চ পন সুত্তে পঞ্চ সম্মাদিট্ঠিযো কথিতা’’তিআদি ৰুত্তং. বহুঅত্থোপি হি মহা-সদ্দো হোতি ‘‘মহাজনো’’তিআদীসু (ম. নি. ২.৬৫). এত্থ চ ‘‘নত্থি দিন্ন’’ন্তিআদিনা ৰত্থুভেদেন দস মিচ্ছাদিট্ঠিধম্মা কথিতা, ৰত্থুভেদেনেৰ, ‘‘অত্থি দিন্ন’’ন্তিআদিনা দস সম্মাদিট্ঠিধম্মাতি ৰীসতি হোতি. যথা ‘‘সম্মাদিট্ঠিস্স, ভিক্খৰে, সম্মাসঙ্কপ্পো পহোতী’’তিআদিনা মগ্গৰসেন দস সম্মত্তধম্মা, তপ্পটিপক্খভূতা ‘‘মিচ্ছাদিট্ঠিস্স মিচ্ছাসঙ্কপ্পো পহোতী’’তিআদিনা অত্থতো দস মিচ্ছত্তধম্মাতি ৰীসতি, তথা ফলৰসেন তেসু এৰং ৰীসতি. কথং ৰারেপি সম্মাদিট্ঠিআদযো দসাতি ৰীসতি? এৰমেতে দ্ৰে চত্তারীসকানি পুরিমেন সদ্ধিং তযো চত্তারীসকা ৰিভাৰিতাতি ৰেদিতব্বা.

১৪৩. পসংসিযস্স উজুৰিপচ্চনীকং নিন্দিযং পসংসন্তোপি অত্থতো পসংসিযং নিন্দন্তো নাম হোতি. পসংসিযস্স গুণপরিধংসনমুখেনেৰ হি নিন্দিযস্স পসংসায পৰত্তনতোতি আহ – ‘‘মিচ্ছাদিট্ঠিনামাযং সোভনাতি ৰদন্তোপি সম্মাদিট্ঠিং গরহতি নামা’’তিআদি. এৰমাদীতি আদিসদ্দেন ‘‘নত্থি হেতু নত্থি পচ্চযো সত্তানং সংকিলেসাযা’’তি (দী. নি. ১.১৬৮; ম. নি. ২.২২৭) এৰমাদিং সঙ্গণ্হাতি; তস্মা এৰংৰাদিনোতি এৰং হেতু পটিক্খেপৰাদিনোতি অত্থো. ওক্কন্তনিযামাতি ওগাল়্হমিচ্ছত্তনিযামা. এৰরূপং লদ্ধিং গহেত্ৰাতিআদীসু যং ৰত্তব্বং, তং চূল়পুণ্ণমসুত্তৰণ্ণনাযং ৰুত্তনযমেৰ তস্মা তত্থ ৰুত্তনযেনেৰ ৰেদিতব্বং. এদিসো হি ‘‘বুদ্ধানম্পি অতেকিচ্ছো’’তিআদি ৰুত্তসদিসো.

অত্তনো নিন্দাভযেনাতি ‘‘সম্মাদিট্ঠিঞ্চ নামেতে গরহন্তী’’আদিনা উপরি পরেহি ৰত্তব্বনিন্দাভযেন. ঘট্টনভযেনাতি তথা পরেসং আসাদনাভযেন. সহধম্মেন পরেন অত্তনো উপরি কাতব্বনিগ্গহো উপারম্ভো, গরহতো পরিত্তাসো উপারম্ভভযং, তং পন অত্থতো উপৰাদভযং হোতীতি আহ ‘‘উপৰাদভযেনা’’তি. সেসং সুৰিঞ্ঞেয্যমেৰ.

মহাচত্তারীসকসুত্তৰণ্ণনায লীনত্থপ্পকাসনা সমত্তা.

৮. আনাপানস্সতিসুত্তৰণ্ণনা

১৪৪. পুব্বেনাতি নিস্সক্কে করণৰচনং. ‘‘অপরং ৰিসেস’’ন্তি ৰুত্তত্তা ৰিসেসৰিসযো চ পুব্বসদ্দোতি আহ – ‘‘সীলপরিপূরণাদিতো পুব্বৰিসেসতো’’তি.

১৪৫. আরদ্ধো যথানুসিট্ঠং পটিপত্তিযা আরাধিতো. যদত্থায সাসনে পব্বজ্জা, ৰিসেসাপত্তি চ, তদেৰেত্থ অপ্পত্তন্তি অধিপ্পেতং, তং ঝানৰিপস্সনানিমিত্তন্তি আহ – ‘‘অপ্পত্তস্স অরহত্তস্সা’’তি. কোমুদীতি কুমুদৰতী. তদা কির কুমুদানি সুপুপ্ফিতানি হোন্তি. তেনাহ – ‘‘কুমুদানং অত্থিতায কোমুদী’’তি. কুমুদানং সমূহো, কুমুদানি এৰ ৰা কোমুদা, তে এত্থ অত্থীতি কোমুদীতি. পৰারণসঙ্গহন্তি মহাপৰারণং অকত্ৰা আগমনীযসঙ্গহণং.

আরদ্ধৰিপস্সকস্সাতি আরভিতৰিপস্সনস্স, ৰিপস্সনং ৰড্ঢেত্ৰা উস্সুক্কাপেত্ৰা ৰিপস্সিস্স. ভিক্খূ ইধ ওসরিস্সন্তি ৰুত্থৰস্সা পৰারিতপৰারণা ‘‘ভগৰন্তং ৰন্দিস্সাম, কম্মট্ঠানং সোধেস্সাম, যথালদ্ধং ৰিসেসঞ্চ পৰেদিস্সামা’’তি অজ্ঝাসযেন. ইমে ভিক্খূতি ইমে তরুণসমথৰিপস্সনা ভিক্খূ. ৰিসেসং নিব্বত্তেতুং ন সক্খিস্সন্তি সেনাসনসপ্পাযাদিঅলাভেন. অপলিবুদ্ধন্তি অঞ্ঞেহি অনুপদ্দুতং. সেনাসনং গহেতুং ন লভন্তি অন্তোৰস্সভাৰতো. একস্স দিন্নোপি সব্বেসং দিন্নোযেৰ হোতি, তস্মা সুতসুতট্ঠানেযেৰ একমাসং ৰসিত্ৰা ওসরিংসু.

১৪৬. অলন্তি যুত্তং, ওপাযিকন্তি অত্থো, ‘‘অলমেৰ নিব্বিন্দিতু’’ন্তিআদীসু (দী. নি. ২.২৭২; সং. নি. ২.১২৪, ১২৮, ১৩৪, ১৪৩) ৰিয. পুটবদ্ধং পরিহরিত্ৰা অসিতং পুটোসং অ-কারস্স ও-কারং কত্ৰা. তেনাহ ‘‘পাথেয্য’’ন্তি.

১৪৭. ৰিপস্সনা কথিতাতি অনিচ্চসঞ্ঞামুখেনেৰ ৰিপস্সনাভাৰনা কথিতা. ন হি কেৰলায অনিচ্চানুপস্সনায ৰিপস্সনাকিচ্চং সমিজ্ঝতি. বহূ ভিক্খূ তে চ ৰিত্থাররুচিকাতি অধিপ্পাযো. তেনাহ ‘‘তস্মা’’তিআদি.

১৪৯. সব্বত্থাতি সব্বৰারেসু. ‘‘তস্মা তিহ, ভিক্খৰে, ৰেদনানুপস্সী’’তিআদীসুপি পীতিপটিসংৰেদিতাদিৰসেনেৰ ৰেদনানুপস্সনায ৰুত্তত্তা, ‘‘সুখৰেদনং সন্ধাযেতং ৰুত্ত’’ন্তি আহ. সতিপট্ঠানভাৰনামনসিকারতায ৰুত্তং – ‘‘সাধুকং মনসিকার’’ন্তি. সঞ্ঞানামেন পঞ্ঞা ৰুত্তা তেসং পযোগত্তা. মনসিকারনামেন ৰেদনা ৰুত্তা, ভাৰনায পরিচিতত্তা আরম্মণস্স মনসিকারন্তি কত্ৰা. ৰিতক্কৰিচারে ঠপেত্ৰাতি ৰুত্তং ৰচীসঙ্খারত্তা তেসং.

এৰং সন্তেপীতি যদিপি মনসিকারপরিযাপন্নতায ‘‘মনসিকারো’’তি ৰুত্তং, এৰং সন্তে ৰেদনানুপস্সনাভাৰো ন যুজ্জতি, অস্সাসপস্সাসা হিস্স আরম্মণং. ৰত্থুন্তি সুখাদীনং ৰেদনানং পৰত্তিট্ঠানভূতং ৰত্থুং আরম্মণং কত্ৰা ৰেদনাৰ ৰেদিযতি, ৰেদনায একন্তভাৰদস্সনেন তস্স ৰেদনানুপস্সনাভাৰো যুজ্জতি এৰাতি ইমমত্থং দস্সেতি. এতস্স অনুযোগস্স.

দ্ৰীহাকারেহীতি যে সন্ধায ৰুত্তং, তে দস্সেন্তো ‘‘আরম্মণতো অসম্মোহতো চা’’তি আহ. সপ্পীতিকে দ্ৰে ঝানেতি পীতিসহগতানি পঠমদুতিযজ্ঝানানি পটিপাটিযা সমাপজ্জতি. সমাপত্তিক্খণেতি সমাপজ্জনক্খণে. ঝানপটিলাভেনাতি ঝানেন সমঙ্গীভাৰেন. আরম্মণতো আরম্মণমুখেন তদারম্মণঝানপরিযাপন্না পীতি পটিসংৰিদিতা হোতি আরম্মণস্স পটিসংৰিদিতত্তা. যথা নাম সপ্পপরিযেসনং চরন্তেন তস্স আসযে পটিসংৰিদিতে সোপি পটিসংৰিদিতোৰ হোতি মন্তাগদবলেন তস্স গহণস্স সুকরত্তা; এৰং পীতিযা আসযভূতে আরম্মণে পটিসংৰিদিতে সা পীতি পটিসংৰিদিতা এৰ হোতি সলক্খণতো সামঞ্ঞলক্খণতো চ তস্সা গহণস্স সুকরত্তা. ৰিপস্সনাক্খণেতি ৰিপস্সনাপঞ্ঞাপুব্বঙ্গমায মগ্গপঞ্ঞায ৰিসেসতো দস্সনক্খণে. লক্খণপটিৰেধাতি পীতিযা সলক্খণস্স সামঞ্ঞলক্খণস্স চ পটিৰিজ্ঝনেন. যঞ্হি পীতিযা ৰিসেসতো সামঞ্ঞতো চ লক্খণং, তস্মিং ৰিদিতে সা যাথাৰতো ৰিদিতা হোতি. তেনাহ – ‘‘অসম্মোহতো পীতি পটিসংৰিদিতা হোতী’’তি.

ইদানি তমত্থং পাল়িযা ৰিভাৰেতুং, ‘‘ৰুত্তম্পি চেত’’ন্তিআদি ৰুত্তং. তত্থ দীঘং অস্সাসৰসেনাতি দীঘস্স অস্সাসস্স আরম্মণভূতস্স ৰসেন. চিত্তস্স একগ্গতং অৰিক্খেপং পজানতোতি ঝানপরিযাপন্নং অৰিক্খেপোতি লদ্ধনামং চিত্তস্সেকগ্গতং তংসম্পযুত্তায পঞ্ঞায পজানতো. যথেৰ হি আরম্মণমুখেন পীতি পটিসংৰিদিতা হোতি, এৰং তংসম্পযুত্তধম্মাপি আরম্মণমুখেন পটিসংৰিদিতা এৰ হোন্তি. সতি উপট্ঠিতা হোতীতি দীঘং অস্সাসৰসেন ঝানসম্পযুত্তা সতি তস্মিং আরম্মণে উপট্ঠিতে আরম্মণমুখেন ঝানেপি উপট্ঠিতা এৰ নাম হোতি. তায সতিযাতি এৰং উপট্ঠিতায তায সতিযা যথাৰুত্তেন তেন ঞাণেন সুপ্পটিৰিদিতত্তা আরম্মণস্স তস্স ৰসেন তদারম্মণা সা পীতি পটিসংৰিদিতা হোতি. অৰসেসপদানিপীতি ‘‘দীঘং পস্সাসৰসেনা’’তিআদিপদানিপি.

এৰং পটিসম্ভিদামগ্গে ৰুত্তমত্থং ইমস্মিং সুত্তে যোজেত্ৰা দস্সেতুং, ‘‘ইতী’’তিআদি ৰুত্তং. ইমিনাপি যোগিনা মনসিকারেন পটিলভিতব্বতো পটিলাভোতি ৰুত্তং – ‘‘ঝানসম্পযুত্তে ৰেদনাসঙ্খাতমনসিকারপটিলাভেনা’’তি.

অস্সাসপস্সাসনিমিত্তন্তি অস্সাসপস্সাসে নিস্সায পটিলদ্ধপটিভাগনিমিত্তং আরম্মণং কিঞ্চাপি করোতি; সতিঞ্চ সম্পজঞ্ঞঞ্চ উপট্ঠপেত্ৰা পৰত্তনতো আরম্মণমুখেন তদারম্মণস্স পটিসংৰিদিতত্তা চিত্তে চিত্তানুপস্সীযেৰ নামেস হোতি. এৰং চিত্তানুপস্সনাপি সতিসম্পজঞ্ঞবলেনেৰ হোতীতি আহ ‘‘ন হী’’তিআদি. পজহতি এতেন, সযং ৰা পজহতীতি পহানং, ঞাণং. দোমনস্সৰসেন ব্যাপাদনীৰরণং দস্সিতং তদেকট্ঠভাৰতো. তস্সাতি নীৰরণপব্বস্স. পহানকরঞাণন্তি পজহনঞাণং. ৰিপস্সনাপরম্পরন্তি পটিপাটিযা ৰিপস্সনমাহ. সমথপটিপন্নন্তি মজ্ঝিমসমথনিমিত্তং পটিপন্নচিত্তং অজ্ঝুপেক্খতি. একতো উপট্ঠানন্তি পটিপক্খৰিগমেন একভাৰেন উপট্ঠানং. সহজাতানং অজ্ঝুপেক্খনা হোতীতি পগ্গহনিগ্গহসম্পহংসনেসু ব্যাপারস্স অনাপজ্জিতত্তা আরম্মণানং অজ্ঝুপেক্খনা, ‘‘যদত্থি যং ভূতং তং পজহতি উপেক্খং পটিলভতী’’তি, এৰং ৰুত্তঅজ্ঝুপেক্খনা পৰত্তাতি পটিপন্না. কেৰলং নীৰরণাদিধম্মেতি নীৰরণাদিধম্মে এৰ পহীনে দিস্ৰা, অথ খো তেসং পজহনঞাণম্পি যাথাৰতো পঞ্ঞায দিস্ৰা অজ্ঝুপেক্খিতা হোতি. ৰুত্তঞ্হেতং ভগৰতা ‘‘ধম্মাপি খো, ভিক্খৰে, পহাতব্বা, পগেৰ অধম্মা’’তি (ম. নি. ১.২৪০).

১৫০. অনিচ্চাদিৰসেন পৰিচিনতীতি অনিচ্চাদিপ্পকারেহি ৰিচিনতি পস্সতি. নিরামিসাতি কিলেসামিসরহিতা. কাযিকচেতসিকদরথপটিপ্পস্সদ্ধিযাতি কাযচিত্তানং সাধুভাৰূপগমনেন ৰিক্খম্ভিতত্তা. সহজাতধম্মানং একসভাৰেন পৰত্তিযা সহজাতঅজ্ঝুপেক্খনায অজ্ঝুপেক্খিতা হোতি.

তস্মিং কাযে পৰত্তা কাযারম্মণা সতি, পুব্বভাগিযো সতিসম্বোজ্ঝঙ্গো. এস নযো সেসেসুপি. সোমনস্সসহগতচিত্তুপ্পাদৰসেন চেতং ওক্কমনং ওলিযনং কোসজ্জং, ততো অতিৰত্তনং অতিধাৰনং উদ্ধচ্চং, তদুভযৰিধুরা বোজ্ঝঙ্গুপেক্খাভূতা অনোসক্কনঅনতিৰত্তনসঙ্খাতা মজ্ঝত্তাকারতা. ইদানি যথেৰ হীতিআদিনা তমেৰ মজ্ঝত্তাকারং উপমায ৰিভাৰেতি. তুদনং ৰা পতোদেন. আকড্ঢনং ৰা রস্মিনা. নত্থি ন কাতব্বং অত্থি. একচিত্তক্খণিকাতি একেকস্মিং চিত্তে ৰিপস্সনাৰসেন সহ উপ্পজ্জনকা. নানারসলক্খণাতি নানাকিচ্চা চেৰ নানাসভাৰা চ.

১৫২. ৰুত্তত্থানেৰ সব্বাসৰসুত্তৰণ্ণনাযং (ম. নি. অট্ঠ. ২৭) আনাপানারম্মণা অপরাপরং পৰত্তসতিযো আরম্মণসীসেন তদারম্মণা ধম্মা গহিতা, তা পনেকসন্তানে লোকিযচিত্তসম্পযুত্তাতি লোকিযা, তা ৰড্ঢমানা লোকিযং চতুব্বিধম্পি সতিপট্ঠানং পরিপূরেন্তি. ৰিজ্জাৰিমুত্তিফলনিব্বানন্তি ৰিমুত্তীনং ফলভূতং তেহিযেৰ ৰেদিতব্বং কিলেসনিব্বানং, অমতমহানিব্বানমেৰ ৰিজ্জাৰিমুত্তীনং অধিগমেন অধিগন্তব্বতায তথা ৰুত্তং. পরিপূরণঞ্চস্স আরম্মণং কত্ৰা অমতস্সানুভৰনমেৰ. ইধ সুত্তে লোকিযাপি বোজ্ঝঙ্গা কথিতা লোকুত্তরাপীতি এত্তকং গহেত্ৰা, ‘‘ইতি লোকিযস্স আগতট্ঠানে লোকিযং কথিত’’ন্তি চ অত্থৰণ্ণনাৰসেন অট্ঠকথাযং কথিতং. থেরোতি মহাধম্মরক্খিতত্থেরো. অঞ্ঞত্থ এৰং হোতীতি অঞ্ঞস্মিং লোকিযলোকুত্তরধম্মানং তত্থ তত্থ ৰোমিস্সকনযেন আগতসুত্তে এৰং লোকিযং আগতং, ইধ লোকুত্তরং আগতন্তি কথেতব্বং হোতি. লোকুত্তরং উপরি আগতন্তি ৰিজ্জাৰিমুত্তিং পরিপূরেন্তীতি এৰং লোকুত্তরং উপরি দেসনাযং আগতং; তস্মা লোকিযা এৰ বোজ্ঝঙ্গা ৰিজ্জাৰিমুত্তি পরিপূরিকা কথেতব্বা লোকুত্তরানং বোজ্ঝঙ্গানং ৰিজ্জাগহণেন গহিতত্তা, তস্মা থেরেন ৰুত্তোযেৰেত্থ অত্থো গহেতব্বো. সেসং ৰুত্তনযত্তা সুৰিঞ্ঞেয্যমেৰ.

আনাপানস্সতিসুত্তৰণ্ণনায লীনত্থপ্পকাসনা সমত্তা.

৯. কাযগতাসতিসুত্তৰণ্ণনা

১৫৩-৪. তপ্পটিসরণানং কামাৰচরসত্তানং পটিসরণট্ঠেন গেহা কামগুণা, গেহে সিতা আরব্ভ পৰত্তিযা অল্লীনাতি গেহস্সিতা. সরন্তীতি ৰেগসা পৰত্তন্তি. ৰেগেন হি পৰত্তি ধাৰতীতি ৰুচ্চতি. সঙ্কপ্পাতি যে কেচি মিচ্ছাসঙ্কপ্পা, ব্যাপাদৰিহিংসাসঙ্কপ্পাদযোপি কামগুণসিতা এৰাতি. গোচরজ্ঝত্তস্মিংযেৰাতি পরিগ্গহিতে কম্মট্ঠানে এৰ ৰত্তন্তি. তঞ্হি ধম্মৰসেন উপট্ঠিতায ভাৰনায গোচরভাৰতো ‘‘গোচরজ্ঝত্ত’’ন্তি ৰুত্তং. অস্সাসপস্সাসকাযে গতা পৰত্তাতি কাযগতা, তং কাযগতাসতিং. সতিসীসেন তংসহগতে ভাৰনাধম্মে ৰদতি অস্সাসপস্সাসকাযাদিকে তংতংকোট্ঠাসে সমথৰত্থুভাৰেন পরিগ্গহেত্ৰা সতিযা পরিগ্গহিতত্তা; তথাপরিগ্গহিতে ৰা তে আরব্ভ অনিচ্চাদিমনসিকারৰসেন পৰত্তা কাযারম্মণা সতী সতিভাৰেন ৰত্ৰা একজ্ঝং দস্সেন্তো ‘‘কাযপরিগ্গাহিক’’ন্তিআদিমাহ.

সতিপট্ঠানেতি মহাসতিপট্ঠানসুত্তে (দী. নি. ২.৩৭৮; ম. নি. ১.১১১), চুদ্দসৰিধেন কাযানুপস্সনা কথিতা, চুণ্ণকজাতানি অট্ঠিকানি পরিযোসানং কত্ৰা কাযানুপস্সনা নিদ্দিট্ঠা, ইধ পন কেসাদীসু ৰণ্ণকসিণৰসেন নিব্বত্তিতানং চতুন্নং ঝানানং ৰসেন উপরিদেসনায ৰড্ঢিতত্তা অট্ঠারসৰিধেন কাযগতাসতিভাৰনা.

১৫৬. তস্স ভিক্খুনোতি যো কাযগতাসতিভাৰনায ৰসীভূতো, তস্স ভিক্খুনো. সম্পযোগৰসেন ৰিজ্জং ভজন্তীতি সহজাত-অঞ্ঞমঞ্ঞ-নিস্সয-সম্পযুত্ত-অত্থি-অৰিগতপচ্চযৰসেন ৰিজ্জং ভজন্তি, তায সহ একীভাৰমিৰ গচ্ছন্তীতি অত্থো. ৰিজ্জাভাগে ৰিজ্জাকোট্ঠাসে ৰত্তন্তীতি ৰিজ্জাসভাগতায তদেকদেসে ৰিজ্জাকোট্ঠাসে ৰত্তন্তি. তাহি সম্পযুত্তধম্মা ফস্সাদযো. ননু চেত্থ ৰিজ্জানং ৰিজ্জাভাগিযতা ন সম্ভৰতীতি? নো ন সম্ভৰতি. যায হি ৰিজ্জায ৰিজ্জাসম্পযুত্তানং ৰিজ্জাভাগিযতা, সা তংনিমিত্তায ৰিজ্জায উপচরীযতীতি. একা ৰিজ্জা ৰিজ্জা, সেসা ৰিজ্জাভাগিযাতি অট্ঠসু ৰিজ্জাসু একং ‘‘ৰিজ্জা’’তি গহেত্ৰা ইতরা তস্সা ভাগতায ‘‘ৰিজ্জাভাগিযা’’তি ৰেদিতব্বা. সদ্ধিং পৰত্তনসভাৰাসু অযমেৰ ৰিজ্জাতি ৰত্তব্বাতি নিযমস্স অভাৰতো ৰিজ্জাভাগো ৰিয ৰিজ্জাভাগিযাপি পৰত্ততি এৰাতি ৰত্তব্বং. আপোফরণন্তি পটিভাগনিমিত্তভূতেন আপোকসিণেন সব্বসো মহাসমুদ্দফরণং আপোফরণং নাম. দিব্বচক্খুঞাণস্স কিচ্চং ফরণন্তি কত্ৰা, দিব্বচক্খুঅত্থং ৰা আলোকফরণং দিব্বচক্খুফরণন্তি দট্ঠব্বং. উভযস্মিম্পি পক্খে সমুদ্দঙ্গমানং কুন্নদীনং সমুদ্দন্তোগধত্তা তেসং চেতসা ফুটতা ৰেদিতব্বা. কুন্নদিগ্গহণঞ্চেত্থ কঞ্চিমেৰ কালং সন্দিত্ৰা তাসং উদকস্স সমুদ্দপরিযাপন্নভাৰূপগমনত্তা, ন বহি মহানদিযো ৰিয পরিত্তকালট্ঠিতিকাতি.

ওতারন্তি কিলেসুপ্পত্তিযা অৰসরং, তং পন ৰিৰরং ছিদ্দন্তি চ ৰুত্তং. আরম্মণন্তি কিলেসুপ্পত্তিযা ওলম্বনং. যাৰ পরিযোসানাতি মত্তিকাপুঞ্জস্স যাৰ পরিযোসানা.

১৫৮. অভিঞ্ঞাযাতি ইদ্ধিৰিধাদিঅভিঞ্ঞায. সচ্ছিকাতব্বস্সাতি পচ্চক্খতো কাতব্বস্স অধিট্ঠানৰিকুব্বনাদিধম্মস্স. অভিঞ্ঞাৰ কারণন্তি আহ – ‘‘সচ্ছিকিরিযাপেক্খায, অভিঞ্ঞাকারণস্স পন সিদ্ধিযা পাকটা’’তি. মরিযাদবদ্ধাতি উদকমাতিকামুখে কতা.

যুত্তযানং ৰিয কতায ইচ্ছিতিচ্ছিতে কালে সুখেন পচ্চৰেক্খিতব্বত্তা. পতিট্ঠাকতাযাতি সম্পত্তীনং পতিট্ঠাভাৰং পাপিতায. অনুপ্পৰত্তিতাযাতি ভাৰনাবহুলীকারেহি অনুপ্পৰত্তিতায. পরিচযকতাযাতি আসেৰনদল়্হতায সুচিরং পরিচযায. সুসম্পগ্গহিতাযাতি সব্বসো উক্কংসং পাপিতায. সুসমারদ্ধাযাতি অতিৰিয সম্মদেৰ নিব্বত্তিকতায. সেসং সুৰিঞ্ঞেয্যমেৰ.

কাযগতাসতিসুত্তৰণ্ণনায লীনত্থপ্পকাসনা সমত্তা.

১০. সঙ্খারুপপত্তিসুত্তৰণ্ণনা

১৬০. সঙ্খারুপপত্তিন্তি ৰিপাকক্খন্ধসঞ্ঞিতানং সঙ্খারানং উপ্পত্তিং, নিব্বত্তিন্তি অত্থো. যস্মা অৰধারণং এতস্মিং পদে ইচ্ছিতব্বন্তি, ‘‘সঙ্খারানংযেৰ উপপত্তি’’ন্তি ৰত্ৰা তেন নিৰত্তিতং দস্সেন্তো, ‘‘ন সত্তস্সা’’তি আহ. তেন সত্তো জীৰো উপ্পজ্জতীতি মিচ্ছাৰাদং পটিক্খিপতি. এৰং উপ্পজ্জনকধম্মৰসেন উপ্পত্তিং দস্সেত্ৰা ইদানি উপ্পত্তিজনকধম্মৰসেনপি তং দস্সেতুং, ‘‘পুঞ্ঞাভিসঙ্খারেন ৰা’’তিআদি ৰুত্তং. তত্থ কামেসু পুঞ্ঞাভিসঙ্খারেনপি উপপত্তি হোতি, সা পন ইমস্মিং সুত্তে গহিতাতি. পুঞ্ঞাভিসঙ্খারেন ৰাতি ৰা-সদ্দো অৰুত্তত্থাপেক্খণৰিকপ্পত্থো, অৰুত্তত্থাপেক্খায পন ন আগতো ‘‘আনেঞ্জাভিসঙ্খারেনা’’তি. অথ ৰা উপপত্তি আগতা, এৰং কিচ্চং আগতং, আনেঞ্জাভিসঙ্খারো পনেত্থ সরূপেন অনাগতোপি পুঞ্ঞাভিসঙ্খারগ্গহণেনেৰ গহিতোতি দট্ঠব্বং. কেচি পন ‘‘পুঞ্ঞানেঞ্জাভিসঙ্খারেনা’’তি পঠন্তি. ভৰূপগক্খন্ধানন্তি সুগতিভৰূপগানং উপাদানক্খন্ধানং.

১৬১. লোকিকা ৰট্টন্তি কম্মৰট্টস্স গহণতো. ভৰূপপত্তিহেতুভূতা ওকপ্পনীযসদ্ধা চতুপারিসুদ্ধিসীলং তাদিসং বুদ্ধৰচনবাহুসচ্চং আমিসপরিচ্চাগো কম্মস্সকতাঞাণং কম্মফলদিট্ঠি চ ইমে সদ্ধাদযো ৰেদিতব্বা. ঠপেতীতি পণিদহনৰসেন ঠপেতি. পণিদহতীতি হি অযমেত্থ অত্থো. পতিট্ঠাপেতীতি তত্থ সুপ্পতিট্ঠিতং কত্ৰা ঠপেতি. সহপত্থনাযাতি, ‘‘অহো ৰতাহং…পে… উপপজ্জেয্য’’ন্তি এৰং পৰত্তপত্থনায সহ. সদ্ধাদযোৰাতি যথাৰুত্তা সদ্ধাদযো এৰ পঞ্চ ধম্মা উপপত্তিযা সঙ্খরণট্ঠেন সঙ্খারা, তস্মা এৰ অঞ্ঞেহি ৰিসিট্ঠভৰূপহরণট্ঠেন ৰিহারা নামাতি. তস্মিং ঠানেতি তস্মিং উপপত্তিট্ঠানে.

পঞ্চধম্মাৰ তংসমঙ্গীপুগ্গলো উপপত্তিং মগ্গতি গৰেসতি এতেনাতি মগ্গো. পটিপজ্জতি এতাযাতি পটিপদা. চেতনা পনেত্থ সুদ্ধসঙ্খারতায সদ্ধাদিগ্গহণেনেৰ গহিতা, তস্মা অৰধারণং কতং. উপপত্তিপকপ্পনৰসেনেৰ পৰত্তিযা পত্থনাগহণেনেৰ তস্সা গহণন্তি কেচি. চিত্তকরযুত্তগতিনিব্বত্তনধম্মৰসেন অৰধারণস্স কতত্তা. চেতনা হি নাম কম্মং, তস্সা উপপত্তিনিব্বত্তনে ৰত্তব্বমেৰ নত্থি, তস্সা পন কিচ্চকরণা সদ্ধাদযো পত্থনা চাতি ইমে ধম্মা সহকারিনো ভৰূপপত্তিযা নিযামকা হোন্তীতি তত্রূপপত্তিযা পৰত্তন্তীতি তেসং মগ্গাদিভাৰো ৰুত্তো. তেনাহ ‘‘যস্স হী’’তিআদি. তেন সদ্ধা পত্থনা চাতি উভযে ধম্মা সহিতা হুত্ৰা কম্মং ৰিসেসেন্তা গতিং নিযমেন্তীতি দস্সেতি, পটিসন্ধিগ্গহণং অনিযতং কেৰলস্স কম্মস্স ৰসেনাতি অধিপ্পাযো. কামঞ্চেত্থ ‘‘কম্মং কত্ৰা’’তি ৰুত্তং, কম্মাযূহনতো পন পগেৰ পত্থনং ঠপেতুম্পি ৰট্টতিযেৰ. কম্মং কত্ৰাতি চেত্থ ‘‘তাপেত্ৰা ভুঞ্জতি, ভুত্ৰা সযতী’’তিআদীসু ৰিয ন কালনিযমো, কম্মং কত্ৰা যদা কদাচি পত্থনং কাতুং ৰট্টতীতি চ ইদং চারিত্তদস্সনং ৰিয ৰুত্তং. যথা হি ভৰপত্থনা যাৰ মগ্গেন ন সমুচ্ছিজ্জতি, তাৰ অনুপ্পন্নাভিনৰকতূপচিতস্স কম্মস্স পচ্চযো হোতিযেৰ. পুন তথা ৰিসেসপচ্চযো, যথা নিযমেত্ৰা উপ্পাদিতা. তেন ৰুত্তং – ‘‘যস্স পঞ্চ ধম্মা অত্থি, ন পত্থনা তস্স গতি অনিবদ্ধা’’তি.

১৬৫. সব্বসোৰাতি ‘‘ইদং কাল়কং সামং সেতং হরিতং মণ্ডলং অপরিমণ্ডলং চতুরংসং পরিপুণ্ণং খুদ্দকং মহন্ত’’ন্তিআদিনা সব্বসোৰ পাকটং হোতি.

১৬৭. সুন্দরোতি কাল়কাদিদোসরহিততায সোভনো. আকরসম্পন্নো সম্পন্নআকরুপ্পত্তিযা. ধোৰনাদীহীতি ধোৰনতাপনমজ্জনাদীহি.

১৬৮. লোকধাতূনং সতসহস্সং অত্তনো ৰসে ৰত্তনতো সতসহস্সো. তস্স পন তত্থ ওভাসকরণং পাকটন্তি আহ ‘‘আলোকফরণব্রহ্মা’’তি. অযমেৰ নযো হেট্ঠা ‘‘সহস্সো ব্রহ্মা’’তিআদীসুপি. নিক্খেন কতন্তি নিক্খপরিমাণেন জম্বোনদেন কতং. নিক্খং পন ৰীসতিসুৰণ্ণন্তি কেচি. পঞ্চৰীসতিসুৰণ্ণন্তি অপরে. সুৰণ্ণং নাম চতুধরণন্তি ৰদন্তি. ঘট্টনমজ্জনক্খমং ন হোতি পরিত্তভাৰতো. অতিরেকেনাতি পঞ্চসুৰণ্ণঅতিরেকেন নিক্খপ্পমাণং অসম্পত্তেন. ৰণ্ণৰন্তং পন ন হোতি অৰিপুলতায উল়ারং হুত্ৰা অনুপট্ঠানতো. অৰণ্ণৰন্ততায এৰ ফরুসধাতুকং খাযতি. তাসূতি তাসু ভূমীসু, যত্থ সাখা ৰড্ঢিত্ৰা ঠিতা. তেতি সুৰণ্ণঙ্কুরা. পচিত্ৰাতি তাপেত্ৰা. সম্পহট্ঠন্তি সমুজ্জলীকতন্তি আহ – ‘‘ধোতঘট্টিতপমজ্জিত’’ন্তি, তম্বমত্তিকলেপং কত্ৰা ধোতঞ্চেৰ পাসাণাদিনা ঘট্টিতঞ্চ এল়কলোমাদিনা পমজ্জিতঞ্চাতি অত্থো.

এতদেৰাতি আলোকং ৰড্ঢেত্ৰা এত্থ আলোকফরণমেৰ. অথ ৰা যং দিব্বচক্খুফরণং, আলোকফরণম্পি এতদেৰ. যত্তকঞ্হি ঠানং যোগী কসিণালোকেন ফরতি; তত্তকং ঠানং দিব্বচক্খুঞাণং ফুসতীতি দিব্বচক্খুফরণে দস্সিতে আলোকফরণং দস্সিতমেৰাতি অত্থো. সব্বত্থাতি সব্বস্মিং ‘‘ফরিত্ৰা’’তি আগতট্ঠানে. অৰিনাসেন্তেনাতি অসম্ভিন্নেন.

কসিণফরণং ৰিযাতি কসিণোভাসেন ফরণং ৰিয দিস্সতি উপট্ঠাতি, মণিপভাফরণস্স ৰিয ব্রহ্মলোকে ধাতুফরণস্স দস্সিতত্তাতি অধিপ্পাযো. সরীরপভা পন নিক্খপভাসদিসাতি, ‘‘নিক্খোপম্মে সরীরফরণং ৰিয দিস্সতী’’তি ৰুত্তং. অট্ঠকথা নাম নত্থীতি পাল়িপদস্স অত্থৰণ্ণনায নাম নিচ্ছিতায ভৰিতব্বং, অৰিনিচ্ছিতায পন নত্থি ৰিযাতি অকথনং নাম অট্ঠকথায অনাচিণ্ণন্তি তস্স ৰাদং পটিক্খিপিত্ৰা. যথা হি ৰত্তব্বং, তথা অৰত্ৰা ‘‘ৰিযা’’তি ৰচনং কিমত্থিযন্তি অধিপ্পাযো. বুদ্ধানং ব্যামপ্পভা ব্যামপ্পদেসে সব্বকালং অধিট্ঠাতি ৰিয তস্স ব্রহ্মুনো সরীরফরণং সরীরাভায পত্থরণং সব্বকালিকং. চত্তারিমানি ইতরানি ফরণানি অৰিনাসেত্ৰা অঞ্ঞমঞ্ঞমভিন্দিত্ৰা কথেতব্বং. ফরণপদস্সেৰ ৰেৰচনং ‘‘অধিমুচ্চনেনেৰ ফরণ’’ন্তি. পত্থরতীতি যথাৰুত্তং ফরণৰসেন পত্থরতি. জানাতীতি অধিমুচ্চনৰসেন জানাতি.

১৬৯. আদযোতি আদি-সদ্দেন সুভে সঙ্গণ্হাতি. আভাতি দুতিযজ্ঝানভূমিকে দেৰে একজ্ঝং গহেত্ৰা সাধারণতো ৰুত্তং. ততো সুভাতি ততিযজ্ঝানভূমিকে. তেনাহ – ‘‘পাটিযেক্কা দেৰা নত্থী’’তিআদি. সাধারণতো কতাযপি পত্থনায ঝানঙ্গং পরিত্তং ভাৰিতঞ্চে, পরিত্তাভেসু উপপত্তি হোতি, মজ্ঝিমঞ্চে, অপ্পমাণাভেসু, পণীতঞ্চে, আভস্সরেসু উপপত্তি হোতীতি দট্ঠব্বং. সুভাতি এত্থাপি এসেৰ নযো. হেট্ঠা ৰুত্তনযেনেৰ সুৰিঞ্ঞেয্যোতি আহ – ‘‘ৰেহপ্ফলাদিৰারা পাকটাযেৰা’’তি.

কামাৰচরেসু নিব্বত্ততূতিআদিনা সদ্ধাদীনং অজ্ঝানৰিপস্সনানং কথং তদধিট্ঠানং হোতীতি আসঙ্কতি. ইতরো সদ্ধাদীনং অজ্ঝানসভাৰত্তেপি ঝানৰিপস্সনানং অধিট্ঠানং নিস্সযপচ্চযাদিৰসেন সপ্পচ্চযত্তা ব্রহ্মলোকূপপত্তিং নিব্বানঞ্চ আৰহন্তীতি দস্সেন্তো, ‘‘ইমে পঞ্চ ধম্মা’’তিআদিমাহ. তত্থ সীলন্তি সম্ভারসীলং. অনাগামী সমুচ্ছিন্নওরম্ভাগিযসংযোজনো সমানো সচে সব্বসো উপপত্তিযো অতিক্কমিতুং ন সক্কোতি, অরিযভূমীসু এৰ নিব্বত্ততি যথূপচিতঝানকম্মুনাতি আহ – ‘‘অনাগামি…পে… নিব্বত্ততী’’তি. উপরিমগ্গন্তি অগ্গমগ্গং ভাৰেত্ৰা. আসৰক্খযন্তি সব্বসো আসৰানং খযং পহানং পাপুণাতি. সেসং সুৰিঞ্ঞেয্যমেৰ.

সঙ্খারুপপত্তিসুত্তৰণ্ণনায লীনত্থপ্পকাসনা সমত্তা.

নিট্ঠিতা চ অনুপদৰগ্গৰণ্ণনা.

৩. সুঞ্ঞতৰগ্গো

১. চূল়সুঞ্ঞতসুত্তৰণ্ণনা

১৭৬. কালপরিচ্ছেদং কত্ৰাতি সমাপজ্জন্তেহি নাম কালপরিচ্ছেদো কাতব্বো. থেরো পন ভগৰতো ৰত্তকরণত্থং কালপরিচ্ছেদং করোতি, ‘‘এত্তকে কালে ৰীতিৰত্তে ইদং নাম ভগৰতো কাতব্ব’’ন্তি. সো তত্থকংযেৰ সমাপত্তিং সমাপজ্জিত্ৰা ৰুট্ঠাতি, তং সন্ধায ৰুত্তং ‘‘কালপরিচ্ছেদং কত্ৰা’’তি. সুঞ্ঞতাফলসমাপত্তিং অপ্পেত্ৰাতি এতেন ইতরে, ‘‘ন সোতাপন্নসকদাগামী ফলসমাপত্তিং সমাপজ্জন্তী’’তি ৰদন্তি, তং ৰাদং পটিসেধেতি. সুঞ্ঞতোতি অত্তসুঞ্ঞতো চ নিচ্চসুঞ্ঞতো চ সঙ্খারা উপট্ঠহিংসু. সেক্খানঞ্হি সুঞ্ঞতাপটিৰেধো পাদেসিকো সুভসুখসঞ্ঞানং অপ্পহীনত্তা, তস্মা সো থেরো সুঞ্ঞতাকথং সোতুকামো জাতো. ধুরেন ধুরং পহরন্তেন ৰিযাতি রথধুরেন রথধুরং পহরন্তেন ৰিয কত্ৰা উজুকমেৰ সুঞ্ঞতা…পে… ৰত্থুং ন সক্কাতি যোজনা. একং পদন্তি একং সুঞ্ঞতাপদং.

পুব্বেপাহন্তিআদিনা ভগৰা পঠমবোধিযম্পি অত্তনো সুঞ্ঞতাৰিহারবাহুল্লং পকাসেতীতি দস্সেন্তো ‘‘পঠমবোধিযম্পী’’তি আহ. একোতিআদি থেরস্স সুঞ্ঞতাকথায ভাজনভাৰদস্সনত্থং. সোতুন্তি অট্ঠিং কত্ৰা মনসি কত্ৰা সব্বচেতসা সমন্নাহরিত্ৰা সোতুম্পি. উগ্গহেতুম্পিতি যথাভূতং ধম্মং ধারণপরিপুচ্ছাপরিচযৰসেন হদযেন উগ্গহিতং সুৰণ্ণভাজনে পক্খিত্তসীহৰসা ৰিয অৰিনট্ঠে কাতুম্পি. কথেতুম্পীতি ৰিত্থারেন পরেসং দস্সেতুম্পি সক্কা. তত্থাতি মিগারমাতুপাসাদে. কট্ঠরূপপোত্থকরূপচিত্তরূপৰসেন কতাতি থম্ভাদীসু উত্তিরিত্ৰা কতানং কট্ঠরূপানং, নিয্যূহাদীসু পটিমাৰসেন রচিতানং পোত্থকরূপানং, সিত্তিপস্সে চিত্তকম্মৰসেন ৰিরচিতানং চিত্তরূপানঞ্চ কতা নিট্ঠপিতা. ৰেস্সৰণমন্ধাতাদীনন্তি পটিমারূপেন কতানং ৰেস্সৰণমন্ধাতুসক্কাদীনং. চিত্তকম্মৰসেনাতি আরামাদিচিত্তকম্মৰসেন. সণ্ঠিতম্পীতি অৰযৰভাৰেন সণ্ঠিতং হুত্ৰা ঠিতম্পি. জিণ্ণপটিসঙ্খরণত্থন্তি জিণ্ণানং নিয্যূহকূটাগারপাসাদাৰযৰানং অভিসঙ্খরণত্থায তস্মিং তস্মিং ঠানে রহস্সসঞ্ঞাণেন ঠপিতং. ‘‘পরিভুঞ্জিস্সামী’’তি তস্মিং তস্মিং কিচ্চে ৰিনিযুঞ্জনৰসেন পরিভুঞ্জিতব্বস্স. এতং ৰুত্তন্তি, ‘‘অযং মিগারমাতুপাসাদো সুঞ্ঞো’’তিআদিকং ৰুত্তং.

নিচ্চন্তি সব্বকালং রত্তিঞ্চ দিৰা চ. একভাৰং একং অসুঞ্ঞতন্তি পচ্চত্তে উপযোগৰচনং, একত্তং একো অসুঞ্ঞতোতি অত্থো. গামোতি পৰত্তনৰসেনাতি গেহসন্নিৰেসৰীথিচচ্চরসিঙ্ঘাটকাদিকে উপাদায গামোতি লোকুপ্পত্তিৰসেন. কিলেসৰসেনাতি তত্থ অনুনযপটিঘৰসেন. এসেৰ নযোতি ইমিনা ‘‘পৰত্তৰসেন ৰা কিলেসৰসেন ৰা উপ্পন্নং মনুস্সসঞ্ঞ’’ন্তি ইমমত্থং অতিদিসতি. এত্থ চ যথা গামগ্গহণেন ঘরাদিসঞ্ঞা সঙ্গহিতা, এৰং মনুস্সগ্গহণেন ইত্থিপুরিসাদিসঞ্ঞা সঙ্গহিতা. যস্মা রুক্খাদিকে পটিচ্চ অরঞ্ঞসঞ্ঞা তত্থ পব্বতৰনসণ্ডাদযো অন্তোগধা, তস্মা তত্থ ৰিজ্জমানম্পি তং ৰিভাগং অগ্গহেত্ৰা একং অরঞ্ঞংযেৰ পটিচ্চ অরঞ্ঞসঞ্ঞং মনসি করোতি. ওতরতীতি অনুপ্পৰিসতি. অধিমুচ্চতীতি নিচ্ছিনোতি. পৰত্তদরথাতি তথারূপায পস্সদ্ধিযা অভাৰতো ওল়ারিকধম্মপ্পৰত্তিসিদ্ধা দরথা. কিলেসদরথাতি অনুনযপটিঘসম্ভৰা কিলেসদরথা. দুতিযপদেতি ‘‘যে অস্সু দরথা মনুস্সসঞ্ঞং পটিচ্চা’’তি ইমস্মিং পদে. মনসিকারসন্ততায, – ‘‘নাযং পুব্বে ৰিয ওল়ারিকা, ধম্মপ্পৰত্তী’’তি সঙ্খারদস্সনদরথানং সুখুমতা সল্লহুকতা চ চরিতত্থাতি আহ ‘‘পৰত্তদরথমত্তা অত্থী’’তি.

যং কিলেসদরথজাতং, তং ইমিস্সা দরথসঞ্ঞায ন হোতীতি যোজনা. পৰত্তদরথমত্তং অৰসিট্ঠং হোতি, ৰিজ্জমানমেৰ অত্থি ইদন্তি পজানাতীতি যোজনা. সুঞ্ঞতা নিব্বত্তীতি সুঞ্ঞতন্তি পৰত্তি. সুঞ্ঞতা সহচরিতঞ্হি সুঞ্ঞং, ইধ সুঞ্ঞতাতি ৰুত্তা.

১৭৭. অস্সাতি ভগৰতো এৰং ইদানি ৰুচ্চমানাকারেন চিত্তপ্পৰত্তি অহোসি. অচ্চন্তসুঞ্ঞতন্তি ‘‘পরমানুত্তর’’ন্তি ৰুত্তং অরহত্তং দেসেস্সামীতি. অরঞ্ঞসঞ্ঞায ৰিসেসানধিগমনতোতি, ‘‘অরঞ্ঞং অরঞ্ঞ’’ন্তি মনসিকারেন ঝানাদিৰিসেসস্স অধিগমাভাৰতো, ‘‘পথৰী’’তি মনসিকারেন ৰিসেসাধিগমনতো. ইদানি তমেৰত্থং উপমায ৰিভাৰেতুং ‘‘যথা হী’’তিআদি ৰুত্তং. এৰং সন্তেতি এৰং ৰপিতে সালিআদযো সম্পজ্জন্তি. ধুৰসেৰনন্তি নিযতসেৰনং পারিহারিযকম্মট্ঠানং. পটিচ্চাতি এত্থ ‘‘সম্ভূত’’ন্তি ৰচনসেসো ইচ্ছিতোতি আহ ‘‘পটিচ্চ সম্ভূত’’ন্তি. পথৰিং পটিচ্চ সম্ভূতা হি সঞ্ঞাতি.

পথৰীকসিণে সো পথৰীসঞ্ঞী হোতি, ন পকতিপথৰিযং. তস্সাতি পথৰীকসিণস্স. তেহীতি গণ্ডাদীহি. সুট্ঠু ৰিহতন্তি যথা ৰলীনং লেসোপি ন হোতি, এৰং সম্মদেৰ আকোটিতং. নদীতল়াকাদীনং তীরপ্পদেসো উদকস্স আকরট্ঠেন কূলং, উন্নতভাৰতো উগ্গতং কূলং ৰিযাতি উক্কূলং, ভূমিযা উচ্চট্ঠানং. ৰিগতং কূলন্তি ৰিক্কূলং, নীচট্ঠানং. তেনাহ ‘‘উচ্চনীচ’’ন্তি. একং সঞ্ঞন্তি একং পথৰীতিসঞ্ঞংযেৰ.

১৮২. সতিপি সঙ্খারনিমিত্তৰিরহে যাদিসানং নিমিত্তানং অভাৰেন ‘‘অনিমিত্ত’’ন্তি ৰুচ্চতি, তানি দস্সেতুং, ‘‘নিচ্চনিমিত্তাদিৰিরহিতো’’তি ৰুত্তং. চতুমহাভূতিকং চতুমহাভূতনিস্সিতং. সল়াযতনপটিসংযুত্তং চক্খাযতনাদিসল়াযতনসহিতং.

১৮৩. ৰিপস্সনায পটিৰিপস্সনন্তি ধম্মানঞ্চ পুন ৰিপস্সনং. ইধাতি অত্তনো পচ্চক্খভূতযথাধিগতমগ্গফলং ৰদতীতি আহ – ‘‘অরিযমগ্গে চেৰ অরিযফলে চা’’তি. উপাদিসেসদরথদস্সনত্থন্তি সব্বসো কিলেসুপধিযা পহীনায খন্ধোপধি অৰিসিট্ঠা, তপ্পচ্চযা দরথা উপাদিসেসদরথা, তং দস্সনত্থং. যস্মা ৰিসযতো গামসঞ্ঞা ওল়ারিকা, মনুস্সসঞ্ঞা সুখুমা, তস্মা মনুস্সসঞ্ঞায গামসঞ্ঞং নিৰত্তেত্ৰা. যস্মা পন মনুস্সসঞ্ঞাপি সভাগৰত্থুপরিগ্গহতো ওল়ারিকা, সভাগৰত্থুতো অরঞ্ঞসঞ্ঞা সুখুমা, তস্মা অরঞ্ঞসঞ্ঞায মনুস্সসঞ্ঞং নিৰত্তেত্ৰা. পথৰীসঞ্ঞাদিনিৰত্তনে কারণং হেট্ঠা সুত্তন্তরেসু চ ৰুত্তমেৰ. অনুপুব্বেনাতি মগ্গপ্পটিপাটিযা. নিচ্চসারাদীনং সব্বসো অৰত্থুতায অচ্চন্তমেৰ সুঞ্ঞত্তা অচ্চন্তসুঞ্ঞতা.

১৮৪. সুঞ্ঞতফলসমাপত্তিন্তি সুঞ্ঞতৰিমোক্খস্স ফলভূতত্তা, সুঞ্ঞতানুপস্সনায ৰসেন সমাপজ্জিতব্বত্তা চ সুঞ্ঞতফলসমাপত্তিন্তি লদ্ধনামং অরহত্তফলসমাপত্তিং. যস্মা অতীতে পচ্চেকসম্বুদ্ধা অহেসুং, অনাগতে ভৰিস্সন্তি, ইদানি পন বুদ্ধসাসনস্স ধরমানত্তা পচ্চেকবুদ্ধা ন ৰত্তন্তি, তস্মা পচ্চেকবুদ্ধগ্গহণং অকত্ৰা, ‘‘এতরহিপি বুদ্ধবুদ্ধসাৰকসঙ্খাতা’’ইচ্চেৰ ৰুত্তং. ন হি বুদ্ধসাসনে ধরন্তে পচ্চেকবুদ্ধা ভৰন্তি. সেসং সুৰিঞ্ঞেয্যমেৰ.

চূল়সুঞ্ঞতসুত্তৰণ্ণনায লীনত্থপ্পকাসনা সমত্তা.

২. মহাসুঞ্ঞতসুত্তৰণ্ণনা

১৮৫. ছৰিৰণ্ণেন সো কাল়ো, ন নামেন. পলালসন্থারোতি আদীনীতি আদি-সদ্দেন কোচ্ছচিমিলিকাকটসারাদীনং গহণং. গণভিক্খূনন্তি গণবন্ধনৰসেন ভিক্খূনং.

যদি সংসযো নাম নত্থি, ‘‘সম্বহুলা নু খো’’তি ইদং কথন্তি আহ ‘‘ৰিতক্কপুব্বভাগা’’তিআদি. তত্থ ৰিতক্কো পুব্বভাগো এতিস্সাতি ৰিতক্কপুব্বভাগা, পুচ্ছা. সা ‘‘সম্বহুলা নো এত্থ ভিক্খূৰিহরন্তী’’তি ৰচনং, ৰিতক্কো পন ‘‘সম্বহুলা নু খো ইধ ভিক্খূ ৰিহরন্তী’’তি ইমিনা আকারেন তদা ভগৰতো উপ্পন্নো চিত্তসঙ্কপ্পো, তস্স পরিৰিতক্কস্স তব্ভাৰজোতনোযং নু-কারো ৰুত্তোতি দস্সেন্তো আহ – ‘‘ৰিতক্কপুব্বভাগে চাযং নু-কারো নিপাতমত্তো’’তি. কিঞ্চাপি গচ্ছন্তো দিস্ৰা, ‘‘সম্বহুলা নো এত্থ ভিক্খূ ৰিহরন্তী’’তি পুচ্ছাৰসেন ভগৰতা ৰুত্তো, অথ খো ‘‘ন খো, আনন্দ, ভিক্খু সোভতি সঙ্গণিকারামো’’তিআদি (ম. নি. ৩.১৮৫) উপরিদেসনাৰসেন মত্থকং গচ্ছন্তে অৰিনিচ্ছিতো নাম ন হোতি, অথ খো ৰিসুং ৰিনিচ্ছিতো এৰ হোতি, দিস্ৰা নিচ্ছিনিত্ৰাৰ কথাসমুট্ঠাপনত্থং তথা পুচ্ছতি. তথা হি ৰুত্তং – ‘‘জানন্তাপি তথাগতা পুচ্ছন্তী’’তি (পারা. ১৬). তেনাহ ‘‘ইতো কিরা’’তিআদি.

যথা নদীওতিণ্ণং উদকং যথানিন্নং পক্খন্দতি, এৰং সত্তা ধাতুসো সংসন্দন্তি, তস্মা ‘‘গণৰাসো নদীওতিণ্ণউদকসদিসো’’তি ৰুত্তং. ইদানি তমত্থং ৰিত্থারতো দস্সেতুং – ‘‘নিরযতিরচ্ছানযোনী’’তিআদি ৰুত্তং. কুরুৰিন্দাদিন্হানীযচুণ্ণানি সণ্হসুখুমভাৰতো নাল়িযং পক্খিত্তানি নিরন্তরানেৰ তিট্ঠন্তীতি আহ – ‘‘চুণ্ণভরিতা নাল়ি ৰিযা’’তি. সত্তপণ্ণাস কুলসতসহস্সানীতি সত্তসতসহস্সাধিকানি পঞ্ঞাস কুলানংযেৰ সতসহস্সানি, মনুস্সানং পন ৰসেন সত্ত কোটিযো তদা তত্থ ৰসিংসু.

ততো চিন্তেসি, কথং? কামঞ্চাযং লোকপকতি, ময্হং পন সাসনে অযুত্তোৰ সোতি আহ – ‘‘মযা’’তিআদি. ধম্মন্তি সভাৰসিদ্ধং. সংৰেগোতি সহোত্তপ্পঞাণং ৰুচ্চতি. ন খো পনেতং সক্কা গিলানুপট্ঠানওৰাদানুসাসনিআদিৰসেন সমাগমস্স ইচ্ছিতব্বত্তা. গণভেদনন্তি গণসঙ্গণিকায ৰিৰেচনং.

১৮৬. কতপরিভণ্ডন্তি পুব্বে কতসংৰিধানস্স চীৰরস্স ৰুত্তাকারেন পটিসঙ্খরণং. নোতি অম্হাকং. অনত্তমনোতি অনারাধিতচিত্তো.

সকগণেন সহভাৰতো সঙ্গণিকাতি আহ ‘‘সকপরিসসমোধান’’ন্তি. গণোতি পন ইধ জনসমূহোতি ৰুত্তং ‘‘নানাজনসমোধান’’ন্তি. সোভতি যথানুসিট্ঠং পটিপজ্জমানতো. কামতো নিক্খমতীতি নিক্খমো, এৰং নিক্খমৰসেন উপ্পন্নং সুখং. গণসঙ্গণিকাকিলেসসঙ্গণিকাহি পৰিৰিত্তি পৰিৰেকো. পৰিৰেকৰসেন উপ্পন্নং সুখং. রাগাদীনং উপসমাৰহং সুখং উপসমসুখং. মগ্গসম্বোধাৰহং সুখং সম্বোধিসুখং. নিকামেতব্বস্স, নিকামং ৰা লাভী নিকামলাভী. নিদুক্খং সুখেনেৰ লভতীতি অদুক্খলাভী. কসিরং ৰুচ্চতি অপ্পকন্তি আহ – ‘‘অকসিরলাভীতি ৰিপুললাভী’’তি.

সামাযিকন্তি সমযে কিলেসৰিমুচ্চনং অচ্চন্তমেৰাতি সামাযিকং ম-কারে অ-কারস্স দীঘং কত্ৰা. তেনাহ – ‘‘অপ্পিতপ্পিতসমযে কিলেসেহি ৰিমুত্ত’’ন্তি. কন্তন্তি অঙ্গসন্ততায আরম্মণসন্ততায চ কমনীযং মনোরম্মং. অসামাযিকং অচ্চন্তৰিমুত্তং.

এত্তাৰতাতিআদিনা সঙ্গণিকারামস্স ৰিসেসাধিগমস্স অন্তরাযিকভাৰং অন্ৰযতো ব্যতিরেকতো চ সহ নিদস্সনেন দস্সেতি. তত্থ সা দুৰিধা অন্তরাযিকতা ৰোদানধম্মানং অনুপ্পত্তিহেতুকা, সংকিলেসধম্মানং উপ্পত্তিহেতুকা চ.

তে পঠমং ‘‘সঙ্গণিকারামো’’তিআদিনা ৰিভাৰেত্ৰা ইতরং ৰিভাৰেতুং, ‘‘ইদানি দোসুপ্পত্তিং দস্সেন্তো’’তিআদি ৰুত্তং. ‘‘অট্ঠিঞ্চ পটিচ্চ ন্হারুঞ্চ পটিচ্চ চম্মঞ্চ পটিচ্চ মংসঞ্চ পটিচ্চ আকাসো পরিৰারিতো রূপন্ত্ৰেৰ সঙ্খং গচ্ছতী’’তিআদীসু (ম. নি. ১.৩০৬) ৰিয ইধ রূপসদ্দো করজকাযপরিযাযোতি ‘‘রূপন্তি সরীর’’ন্তি আহ. ‘‘নাহং, আনন্দ…পে… দোমনস্সুপাযাসা’’তি কস্মা ৰুত্তং? ননু কাযে চ জীৰিতে চ অনপেক্খচিত্তানং আরদ্ধৰিপস্সকানম্পি অসপ্পাযৰজ্জনসপ্পাযসেৰনৰসেন কাযস্স পরিহরণং হোতীতি? সচ্চং, তং পন যো কল্লসরীরং নিস্সায ধম্মসাধনায অনুযুঞ্জিতুকামো হোতি, তস্সেৰ ধম্মসাধনতাৰসেন. ধম্মসাধনভাৰঞ্হি অপেক্খিত্ৰা অসপ্পাযং ৰজ্জেত্ৰা সপ্পাযৰসেন পোসেত্ৰা সুট্ঠুতরং হুত্ৰা অনুযুঞ্জনতো কাযস্স পরিহরণং, ন সো কাযে অভিরতো নাম হোতি পচ্চৰেক্খণাযত্তত্তা অপেক্খায ৰিনোদিতব্বো তাদিসোতি. উপালিগহপতিনোতি এত্থাপি ‘‘দসবলসাৰকত্তুপগমনসঙ্খাতেনা’’তি আনেত্ৰা যোজেতব্বং.

১৮৭. মহাকরুণাৰসেন পরিৰুতায পরিসায মজ্ঝে নিসিন্নোপি একন্তৰিৰেকজ্ঝাসযত্তা এককোৰ. এতেন সত্থুনো পৰিৰিত্তস্স পৰিৰেকত্তেন ৰিৰিত্ততং দস্সেতি. রূপারূপপটিভাগনিমিত্তেহি নিৰত্তনত্থং ‘‘রূপাদীনং সঙ্খতনিমিত্তান’’ন্তি ৰুত্তং. অতিৰিয সন্ততরপণীততমভাৰেন ৰিসেসতো সিনোতি বন্ধতীতি ৰিসযো, সো এৰ সসন্ততিপরিযাপন্নতায অজ্ঝত্তং. কিং পন তন্তি আহ – ‘‘সুঞ্ঞতন্তি সুঞ্ঞতফলসমাপত্তি’’ন্তি. উপধিৰিৰেকতায অসঙ্খতা ধাতু ইধ ৰিৰেকোতি অধিপ্পেতোতি আহ – ‘‘ৰিৰেকনিন্নেনা’’তিআদি. ভঙ্গমত্তম্পি অসেসেত্ৰা আসৰট্ঠানিযানঞ্চ ধম্মানং তত্থ ৰিগতত্তা তেসং ৰসেন ৰিগতন্তেন, এৰংভূতং তেসং ব্যন্তিভাৰং পত্তন্তি পাল়িযং ‘‘ব্যন্তিভূতেনা’’তি ৰুত্তং. উয্যোজনং ৰিস্সজ্জনং, তং এতস্স অত্থি, উয্যোজেতি ৰিস্সজ্জেতীতি ৰা উয্যোজনিকং. যস্মা ন সব্বকথা উয্যোজনৰসেনেৰ পৰত্ততি, তস্মা ৰুত্তং ‘‘উয্যোজনিকপটিসংযুত্ত’’ন্তি.

তেলপাকং গণ্হন্তো ৰিযাতি যথা তেলপাকো নাম পরিচ্ছিন্নকালো ন অতিক্কমিতব্বো, এৰং অত্তনো সমাপত্তিকালং অনতিক্কমিত্ৰা. যথা হি কুসলো ৰেজ্জো তেলং পচন্তো তং তং তেলকিচ্চং চিন্তেত্ৰা যদি ৰা পত্থিন্নপাকো, যদি ৰা মজ্ঝিমপাকো, যদি ৰা খরপাকো ইচ্ছিতব্বো, তস্স কালং উপধারেত্ৰা পচতি, এৰং ভগৰা ধম্মং দেসেন্তো ৰেনেয্যানং ঞাণপরিপাকং উপধারেত্ৰা তং তং কালং অনতিক্কমিত্ৰা ধম্মং দেসেত্ৰা পরিসং উয্যোজেন্তো চ ৰিৰেকনিন্নেনেৰ চিত্তেন উয্যোজেতি. দ্ৰে পঞ্চৰিঞ্ঞাণানিপি তদভিনীহতমনোৰিঞ্ঞাণৰসেন নিব্বাননিন্নানেৰ. বুদ্ধানঞ্হি সঙ্খারানং সুট্ঠু পরিঞ্ঞাততায পণীতানম্পি রূপাদীনং আপাথগমনে পগেৰ ইতরেসং পটিকূলতাৰ সুপাকটা হুত্ৰা উপট্ঠাতি, তস্মা ঘম্মাভিতত্তস্স ৰিয সীতজলট্ঠাননিন্নতা নিব্বাননিন্নমেৰ চিত্তং হোতি, তস্স অতিৰিয সন্তপণীতভাৰতো.

১৮৮. অজ্ঝত্তমেৰাতি ইধ ঝানারম্মণং অধিপ্পেতন্তি আহ ‘‘গোচরজ্ঝত্তমেৰা’’তি. ইধ নিযকজ্ঝত্তং সুঞ্ঞতং. অপগুণপাদকজ্ঝানঞ্হি এত্থ ‘‘নিযকজ্ঝত্ত’’ন্তি অধিপ্পেতং ৰিপস্সনাৰিসেসস্স অধিপ্পেতত্তা, নিযকজ্ঝত্তং নিজ্জীৰনিস্সত্ততং, অনত্ততন্তি অত্থো. অসম্পজ্জনভাৰজাননেনাতি ইদানি মে কম্মট্ঠানং ৰীথিপটিপন্নং ন হোতি, উপ্পথমেৰ পৰত্ততীতি জাননেন.

কস্মা পনেত্থ ভগৰতা ৰিপস্সনায এৰ পাদকে ঝানে অৰত্ৰা পাদকজ্ঝানং গহিতন্তি আহ – ‘‘অপ্পগুণপাদকজ্ঝানতো’’তিআদি. ন পক্খন্দতি সম্মা ন সমাহিতত্তা. সো পন ‘‘অজ্ঝত্তধম্মা ময্হং নিজ্জটা নিগুম্বা হুত্ৰা ন উপট্ঠহন্তি, হন্দাহং বহিদ্ধাধম্মে মনসি করেয্যং একচ্চেসু সঙ্খারেসু উপট্ঠিতেসু ইতরেপি উপট্ঠহেয্যুমেৰা’’তি পরস্স…পে… মনসি করোতি. পাদকজ্ঝানৰসেন ৰিয সম্মসিতজ্ঝানৰসেনপি উভতোভাগৰিমুত্তো হোতিযেৰাতি আহ – ‘‘অরূপসমাপত্তিযং নু খো কথন্তি আনেঞ্জং মনসি করোতী’’তি. ন মে চিত্তং পক্খন্দতীতি ময্হং ৰিপস্সনাচিত্তং ৰীথিপটিপন্নং হুত্ৰা ন ৰহতীতি. পাদকজ্ঝানমেৰাতি ৰিপস্সনায পাদকভূতমেৰ ঝানং. পুনপ্পুনং মনসি কাতব্বন্তি পুনপ্পুনং সমাপজ্জিতব্বং ৰিপস্সনায তিক্খৰিসদতাপাদনায. অৰহন্তে নিপুণাভাৰেন ছেদনকিরিযায অপ্পৰত্তন্তে. সমাপজ্জিত্ৰা ৰিপস্সনায তিক্খকম্মকরণং সমথৰিপস্সনাৰিহারেনাতি আহ – ‘‘কম্মট্ঠানে মনসিকারো ৰহতী’’তি.

১৮৯. সম্পজ্জতি মেতি ৰীথিপটিপত্তিযা পুব্বেনাপরং ৰিসেসাভাৰতো সম্পজ্জতি মে কম্মট্ঠানন্তি জাননেন. ইরিযাপথং অহাপেত্ৰাতি যথা পরিস্সমো নাগচ্ছতি, এৰং অত্তনো বলানুরূপং তস্স কালং নেত্ৰা পমাণমেৰ পৰত্তনেন ইরিযাপথং অহোপেত্ৰা. সব্বৰারেসূতি ঠাননিসজ্জাসযনৰারেসু. কথাৰারেসু পন ৰিসেসং তত্থ তত্থ ৰদন্তি. ইদং ৰুত্তন্তি ইদং, ‘‘ইমিনা ৰিহারেনা’’তিআদিৰচনং ৰুত্তং.

১৯০. কামৰিতক্কাদযো ওল়ারিককামরাগব্যাপাদসভাগাতি আহ – ‘‘ৰিতক্কপহানেন দ্ৰে মগ্গে কথেত্ৰা’’তি. কামগুণেসূতি নিদ্ধারণে ভুম্মং. কিস্মিঞ্চিদেৰ কিলেসুপ্পত্তিকারণেতি তস্স পুগ্গলস্স কিলেসুপ্পত্তিকারণং সন্ধায ৰুত্তং, অঞ্ঞথা সব্বেপি পঞ্চ কামগুণা কিলেসুপ্পত্তিকারণমেৰ. সমুদাচরতীতি সমুদাচারোতি আহ ‘‘সমুদাচরণতো’’তি. সো পন যস্মা চিত্তস্স, ন সত্তস্স, তস্মা ৰুত্তং পাল়িযং ‘‘চেতসো’’তি. ম-কারো পদসন্ধিকরো এ-কারস্স চ অকারো কতোতি আহ ‘‘এৰং সন্তে এতন্তি.

১৯১. অনুসযোতি মানানুসযো ভৰরাগানুসযো অৰিজ্জানুসযোতি তিৰিধোপি অনুসযো পহীযতি অরহত্তমগ্গেন. ৰুত্তনযেনেৰাতি, ‘‘ততো মগ্গানন্তরং ফলং, ফলতো ৰুট্ঠায পচ্চৰেক্খমানো পহীনভাৰং জানাতি, তস্স জাননেন সম্পজানো হোতী’’তি ৰুত্তনযেন.

কুসলতো আযাতীতি আযতো, সো এতেসন্তি কুসলাযতিকা. তেনাহ ‘‘কুসলতো আগতা’’তি. তং পন নেসং কুসলাযতিকত্তং উপনিস্সযৰসেন হোতি সহজাতৰসেনপীতি তদুভযং দস্সেতুং, ‘‘সেয্যথিদ’’ন্তিআদি ৰুত্তং.

যস্মা পন যথাৰুত্তধম্মেসু কেচি লোকিযা, কেচি লোকুত্তরা; অথ কস্মা ৰিসেসেন ‘‘লোকুত্তরা’’তি ৰুত্তন্তি আহ – ‘‘লোকে উত্তরা ৰিসিট্ঠা’’তি. তেন লোকিযধম্মেসু উত্তমভাৰেন ঝানাদযো লোকুত্তরা ৰুত্তা, ন লোকস্স উত্তরণতোতি দস্সেতি. যং কিঞ্চি মহগ্গতচিত্তং মারস্স অৰিসযো অকামাৰচরত্তা, পগেৰ তং ৰিপস্সনায পাদকভূতং সুৰিক্খালিতমলন্তি আহ – ‘‘জানিতুং ন সক্কোতী’’তি. একো আনিসংসো অত্থি ভাৰনানুযোগস্স সপ্পাযধম্মকথাপটিলাভো.

১৯২. এতদত্থন্তি কেৰলস্স সুতস্স অত্থায. সপ্পাযাসপ্পাযৰসেনাতি কস্মা ৰুত্তং? ননু সপ্পাযৰসেন দসকথাৰত্থূনি আগতানীতি? সচ্চমেতং, অসপ্পাযকথাৰজ্জনপুব্বিকায সপ্পায কথায ৰসেন আগতত্তা ‘‘সপ্পাযাসপ্পাযৰসেন আগতানী’’তি ৰুত্তং. সুতপরিযত্তিৰসেনাতি সরূপেন তত্থ অনাগতানিপি দসকথাৰত্থূনি সুত্তগেয্যাদিঅন্তোগধত্তা, ‘‘সুতপরিযত্তিৰসেন আগতানী’’তি ৰুত্তং. পরিপূরণৰসেন সরূপতো আগতত্তা ইমস্মিং ঠানে ঠত্ৰা কথেতব্বানি. অত্থোতি সামঞ্ঞত্থো.

১৯৩. অনুআৰত্তন্তীতি অনুঅনু অভিমুখা হুত্ৰা ৰত্তন্তি, পযিরুপাসনাদিৰসেন অনুকূলযন্তি. মুচ্ছনতণ্হন্তি পচ্চযেসু মুচ্ছনাকারং. তণ্হায পত্থনা নাম তেনাকারেন পৰত্তীতি আহ – ‘‘পত্থেতি পৰত্তেতী’’তি. কিলেসূপদ্দৰেনাতি কিলেসসঙ্খাতেন উপদ্দৰেন. কিলেসা হি সত্তানং মহানত্থকরণতো ‘‘উপদ্দৰো’’তি ৰুচ্চন্তি. অত্তনো অব্ভন্তরে উপ্পন্নেন কিলেসূপদ্দৰেন অন্তেৰাসিনো, উপদ্দৰো অন্তেৰাসূপদ্দৰো, ব্রহ্মচরিযস্স উপদ্দৰো ব্রহ্মচারুপদ্দৰোতি ইমমত্থং ‘‘সেসুপদ্দৰেসুপি এসেৰ নযো’’তি ইমিনা অতিদিসতি. গুণমরণং কথিতং, ন জীৰিতমরণং.

অপ্পলাভাতি অপ্পমত্তকলাভী ৰিসেসানং. এৰং ৰুত্তোতি যথাৰুত্তব্রহ্মচারুপদ্দৰো দুক্খৰিপাকতরো চেৰ কটুকৰিপাকতরো চাতি এৰং ৰুত্তো. আচরিযন্তেৰাসিকূপদ্দৰো হি বাহিরকসমযৰসেন ৰুত্তো, ব্রহ্মচারুপদ্দৰো পন সাসনৰসেন. দুরক্খাতে হি ধম্মৰিনযে দুপ্পটিপত্তি ন মহাসাৰজ্জা মিচ্ছাভিনিৰেসস্স সিথিলৰাযামভাৰতো; স্ৰাখ্যাতে পন ধম্মৰিনযে দুপ্পটিপত্তি মহাসাৰজ্জা মহতো অত্থস্স বাহিরভাৰকরণতো. তেনাহ ‘‘সাসনে পনা’’তিআদি.

১৯৬. তস্মাতি ইদং পুব্বপরাপেক্খং পুরিমস্স চ অত্থস্স কারণভাৰেন পচ্চামসনন্তি আহ ‘‘যস্মা’’তিআদি. মিত্তং এতস্স অত্থীতি মিত্তৰা, তস্স ভাৰো মিত্তৰতা, তায. মিত্তৰসেন পটিপজ্জনন্তি আহ ‘‘মিত্তপটিপত্তিযা’’তি. সপত্তৰতাযাতি এত্থাপি এসেৰ নযো.

দুক্কটদুব্ভাসিতমত্তম্পীতি ইমিনা পগেৰ ইতরং ৰীতিক্কমন্তোতি দস্সেতি. সাৰকেসু হিতপরক্কমনং ওৰাদানুসাসনীহি পটিপজ্জনন্তি আহ – ‘‘তথা ন পটিপজ্জিস্সামী’’তি. আমকমত্তন্তি কুলালভাজনং ৰুচ্চতি. নাহং তুম্হেসু তথা পটিপজ্জিস্সামীতি কুম্ভকারো ৰিয আমকভাজনেসু অহং তুম্হেসু কেৰলং জানাপেন্তো ন পটিপজ্জিস্সামি. নিগ্গণ্হিত্ৰাতি নীহরিত্ৰা. লোকিযগুণাপি ইধ সারোত্ৰেৰ অধিপ্পেতা লোকুত্তরগুণানং অধিট্ঠানভাৰতো. সেসং সুৰিঞ্ঞেয্যমেৰ.

মহাসুঞ্ঞতসুত্তৰণ্ণনায লীনত্থপ্পকাসনা সমত্তা.

৩. অচ্ছরিযব্ভুতসুত্তৰণ্ণনা

১৯৭. ৰিভত্তিপতিরূপকা চ নিপাতা হোন্তীতি যথারহং তংতংৰিভত্তিঅত্থদীপকা, ইধ পচ্চত্তৰচনো যত্রসদ্দো, হিসদ্দো হেতুঅত্থো, নামসদ্দো অচ্ছরিযত্থো, পদত্তযস্স পন অচ্ছরিযত্থনিদ্দিট্ঠতায ‘‘অচ্ছরিযত্থে নিপাতো’’তি ৰুত্তং. একংসতো পনেতং পদত্তযং. তথা হি ৰক্খতি, ‘‘যত্রাতি নিপাতৰসেন অনাগতৰচন’’ন্তি. পপঞ্চসদ্দো হেট্ঠা ৰুত্তো. ছিন্নৰটুমেতি ইমিনা সব্বকিলেসৰট্টস্স অকুসলকম্মৰট্টস্স চ ছিন্নত্তা ৰিপাকৰট্টস্স চ উপরি ৰক্খমানত্তা আহ – ‘‘ৰটুমন্তি কুসলাকুসলকম্মৰট্টং ৰুচ্চতী’’তি. নিপাতৰসেন যত্রসদ্দযোগেন. অনাগতৰচনন্তি ইদং অনাগতৰচনসদিসত্তা ৰুত্তং. অনাগতত্থৰাচী হি অনাগতৰচনং, অত্থো চেত্থ অতীতোতি. অনুস্সরীতি ইদং অনুস্সরিতভাৰং সন্ধায ৰুত্তং – ‘‘ন অনুস্সরিস্সতী’’তি সদ্দপযোগস্স অতীতৰিসযত্তা. যদা পন তেহি ভিক্খূহি যা কথা পৰত্তিতা, ততো পচ্ছাপি ভগৰতো তেসং বুদ্ধানং অনুস্সরণং হোতিযেৰ.

খত্তিযজচ্চাতিআদিকালতো পট্ঠায অসম্ভিন্নায খত্তিযজাতিযা উদিতোদিতায. ব্রহ্মজচ্চাতি ব্রাহ্মণজচ্চা. এৰংগোত্তেপি এসেৰ নযো. লোকিযলোকুত্তরসীলেনাতি পারমিতাসম্ভূতেন বুদ্ধাৰেণিকত্তা অনঞ্ঞসাধারণেন লোকিযেন লোকুত্তরেন চ সীলেন. এৰংসীলাতি অনৰসেসসীলানং ৰিসুং পচ্চৰেক্খণকরণেন এৰংসীলাতি অনুস্সরিস্সতি. এস নযো সেসেসু. যথা ৰিজ্জাভাগিযা ৰিজ্জাসম্পযুত্তধম্মা, এৰং সমাধিপক্খা সমাধিসম্পযুত্তধম্মাপি সতিৰীরিযাদযোতি আহ – ‘‘হেট্ঠা সমাধিপক্খানং ধম্মানং গহিতত্তা ৰিহারো গহিতোৰা’’তি. তস্মা সমাধিপক্খধম্মৰিনিমুত্তো এৰ ইধ ৰিহারো অধিপ্পেতোতি ৰুত্তং ‘‘ইদং হী’’তিআদি.

যথা ৰা অট্ঠসমাপত্তিৰিপস্সনামগ্গফলসঙ্গহিতা লোকিযলোকুত্তরা সমাধিপঞ্ঞা ‘‘এৰংধম্মা এৰংপঞ্ঞা’’তি পদেহি হেট্ঠা গহিতাপি যথাসকং পটিপক্খতো মুচ্চনস্স পৰত্তিৰিসেসং উপাদায ‘‘এৰংৰিমুত্তা’’তি এত্থ পুন গহিতা, তথা ‘‘এৰংধম্মা’’তি এত্থ গহিতাপি সমাধিপক্খধম্মা দিব্বব্রহ্মআনেঞ্জঅরিযৰিহারসঙ্খাতং অত্তনো পৰত্তিৰিসেসং উপাদায, ‘‘এৰংৰিহারী’’তি এত্থ পুন গহিতাতি ৰুচ্চমানে ন কোচি ৰিরোধো. ফলধম্মানং পৰত্তিকালেপি কিলেসানং পটিপ্পস্সদ্ধি ন তংআনুভাৰজাতা, অথ খো অরিযমগ্গেন কিলেসানং সমুচ্ছিন্নত্তাতি আহ – ‘‘মগ্গানুভাৰেন কিলেসানং পটিপস্সদ্ধন্তে উপ্পন্নত্তা’’তি. যো যং পজহতি, সো পহাযকো পহাতব্বতো ৰিমুত্তোতি ৰুচ্চতি ৰিসংসট্ঠভাৰতোতি পহানৰিভাগেন ৰুচ্চমানে অপহাযকস্স নিব্বানস্স কথং ৰিমুত্ততা? ৰিসংসট্ঠাভাৰতো এৰ. তঞ্হি পকতিযাৰ সব্বসো কিলেসেহি ৰিসংসট্ঠং ৰিনিস্সটং সুৰিদূরৰিদূরে ঠিতং, তস্মাস্স ততো নিস্সটত্তা নিস্সরণৰিমুত্তি নিস্সরণপহানন্তি ৰুচ্চতীতি আহ ‘‘নিব্বান’’ন্তিআদি.

১৯৯. ইমে তথাগতস্স অচ্ছরিযঅব্ভুতধম্মা, ন সাৰকৰিসযা, মম পন দেসনা তযা সুতা এৰাতি তে থেরস্সেৰ ভারং করোন্তো, ‘‘তং ভিয্যোসোমত্তায পটিভন্তূ’’তি আহ. সতো সম্পজানোতি এত্থ কালভেদৰসেন লব্ভমানম্পি সম্পজানভাৰং অনামসিত্ৰা গতিৰিভাগেন তং দস্সেতুং, ‘‘দ্ৰে সম্পজঞ্ঞানী’’তিআদি ৰুত্তং – অট্ঠ ৰরে গণ্হন্তোতি এত্থ কথং ৰরং দেৰতা দেতি, পরস্স দীযমানঞ্চ তং কথং পরস্স সমিজ্ঝতীতি? কম্মবলেনেৰ. যদি হি তং কম্মং কতোকাসং যস্স তদপদেসেন ফলং ৰিপচ্চতি, এৰং দেৰতায তস্স ৰরং দিন্নং, ইতরেন চ লদ্ধন্তি ৰোহারো হোতীতি. অপিচ পরস্স পত্থিতৰরানি নাম ৰিপচ্চমানস্স কম্মস্স পচ্চযভূতো পযোগৰিসেসোতি দট্ঠব্বং. তানি ৰিপচ্চনে একন্তিকানিপি অপ্পেসক্খা দেৰতা – ‘‘অযমস্স পত্থনা সমিজ্ঝিস্সতি, নো’’তি ন জানন্তি, সক্কো পন পঞ্ঞৰা তানি একচ্চং জানাতিযেৰ. তেন ৰুত্তং – ‘‘সক্কেন পসীদিত্ৰা দিন্নে অট্ঠ ৰরে গণ্হন্তো’’তিআদি.

পঠমজৰনৰারেতি উপ্পন্নস্স সব্বপঠমজৰনৰারে. সো হি পটিসন্ধিযা আসন্নভাৰতো অৰিসদো হোতি, দেৰভাৰে নিকন্তিৰসেন উপ্পজ্জনতো ন জানাতি. অঞ্ঞাহি দেৰতাহি অসাধারণজাননং হোতি দুতিযজৰনৰারতো পট্ঠায পৰত্তনতো.

অঞ্ঞেপি দেৰাতিআদিনা বোধিসত্তস্স তত্থ সম্পজঞ্ঞেনেৰ ঠিতভাৰং ব্যতিরেকমুখেন ৰিভাৰেতি. আহারূপচ্ছেদেন কালঙ্করোন্তীতি ইদং খিড্ডাপদোসিকৰসেন ৰুত্তং. ইতরেসম্পি দিব্বভোগেহি মুচ্ছিততং অজ্ঝাপন্নানং তিট্ঠন্তানং সম্পজঞ্ঞাভাৰো হোতিযেৰ. কিং তথারূপং আরম্মণং নত্থীতি যথারূপং উল়ারং পণীতঞ্চ আরম্মণং পটিচ্চ তে দেৰা সংমুচ্ছিতা আহারূপচ্ছেদম্পি করোন্তি, কিং তথারূপং উল়ারং পণীতঞ্চ আরম্মণং বোধিসত্তস্স নত্থীতি বোধিসত্তস্স সম্পজঞ্ঞানুভাৰং ৰিভাৰেতুং চোদনং সমুট্ঠাপেতি? বোধিসত্তো হি যত্থ যত্থ নিব্বত্ততি, তত্থ তত্থ অঞ্ঞে সত্তে দসহি ৰিসেসেহি অধিগ্গণ্হাতি, পগেৰ তত্থ দেৰভূতো, তথাপি ‘‘সতো সম্পজানো’’তি অযমেত্থ অচ্ছরিযধম্মো ৰুত্তো.

২০০. সম্পত্তিভৰে দীঘাযুকতা নাম পঞ্ঞাবলেন হোতি, বোধিসত্তো চ মহাপঞ্ঞো, তস্মা তত্থ তত্থ ভৰে তেন দীঘাযুকেন ভৰিতব্বন্তি অধিপ্পাযেন, ‘‘সেসত্তভাৰেসু কিং যাৰতাযুকং ন তিট্ঠতী’’তি চোদেতি. ইতরো ‘‘আম ন তিট্ঠতী’’তি পটিজানিত্ৰা, ‘‘অঞ্ঞদা হী’’তিআদিনা তত্থ কারণমাহ. ‘‘ইধ ন ভৰিস্সামী’’তি অধিমুচ্চনৰসেন কালকিরিযা অধিমুত্তিকালকিরিযা. পারমিধম্মানঞ্হি উক্কংসপ্পত্তিযা তস্মিং তস্মিং অত্তভাৰে অভিঞ্ঞাসমাপত্তীহি সন্তানস্স ৰিসেসিতত্তা অত্তসিনেহস্স তনুভাৰেন সত্তেসু চ মহাকরুণায উল়ারভাৰেন অধিট্ঠানস্স তিক্খৰিসদভাৰাপত্তিযা বোধিসত্তানং অধিপ্পাযা সমিজ্ঝন্তি, চিত্তে ৰিয কম্মেসু চ তেসং ৰসিভাৰো, তস্মা যত্থুপপন্নানং পারমিযো সম্মদেৰ পরিব্রূহেন্তি, ৰুত্তনযেন কালং কত্ৰা তত্থ উপপজ্জন্তি. তথা হি অযং মহাসত্তো ইমস্মিংযেৰ কপ্পে নানাজাতীসু অপরিহীনজ্ঝানো কালং কত্ৰা ব্রহ্মলোকে নিব্বত্তো অপ্পকমেৰ কালং তত্থ ঠত্ৰা ততো চৰিত্ৰা ইধ নিব্বত্তো. তেনাহ – ‘‘অযং কালকিরিযা অঞ্ঞেসং ন হোতী’’তি. সব্বপারমীনং পূরিতত্তাতি ইমিনা পযোজনাভাৰতো তত্থ ঠত্ৰা অধিমুত্তিকালকিরিযা নাম ন হোতীতি দস্সেতি. অপিচ চরিমভৰে চতুমহানিধিসমুট্ঠানপুব্বিকায দিব্বসম্পত্তিসদিসায মহাসম্পত্তিযা নিব্বত্তি ৰিয বুদ্ধভূতস্স অসদিসদানাদিৰসেন অনঞ্ঞসাধারণলাভুপ্পত্তি ৰিয চ ইতো পরং মহাপুরিসস্স দিব্বসম্পত্তিঅনুভৰনং নাম নত্থীতি যাৰতাযুকট্ঠানং উস্সাহজাতস্স পুঞ্ঞসম্ভারস্স ৰসেনাতি দট্ঠব্বং. অযঞ্হেত্থ ধম্মতা.

মনুস্সগণনাৰসেন, ন দেৰগণনাৰসেন. পুব্বনিমিত্তানীতি চুতিযা পুব্বনিমিত্তানি. অমিলাযিত্ৰাতি এত্থ অমিলাতগ্গহণেনেৰ তাসং মালানং ৰণ্ণসম্পদাপি গন্ধসম্পদাপি সোভাসম্পদাপি দস্সিতাতি দট্ঠব্বং. বাহিরব্ভন্তরানং রজোজল্লানং লেসস্সপি অভাৰতো দেৰানং সরীরগতানি ৰত্থানি সব্বকালং পরিসুদ্ধপভস্সরানেৰ হুত্ৰা তিট্ঠন্তীতি আহ ‘‘ৰত্থেসুপি এসেৰ নযো’’তি. নেৰ সীতং ন উণ্হন্তি যস্স সীতস্স পতীকারৰসেন অধিকং সেৰিযমানং উণ্হং, সযমেৰ ৰা খরতরং হুত্ৰা অধিভৰন্তং সরীরে সেদং উপ্পাদেয্য, তাদিসং নেৰ সীতং ন উণ্হং হোতি. তস্মিং কালেতি যথাৰুত্তে মরণাসন্নকালে. বিন্দুবিন্দুৰসেনাতি মুত্তগুল়িকা ৰিয বিন্দু বিন্দু হুত্ৰা সেদা মুচ্চন্তি. দন্তানং খণ্ডিতভাৰো খণ্ডিচ্চং. কেসানং পলিতভাৰো পালিচ্চং. আদি-সদ্দেন ৰলিত্তচতং সঙ্গণ্হাতি. কিলন্তরূপো অত্তভাৰো হোতি, ন পন খণ্ডিচ্চপালিচ্চাদীহীতি অধিপ্পাযো. উক্কণ্ঠিতাতি অনভিরতি, সা নত্থি উপরূপরি উল়ারুল়ারানমেৰ ভোগানং ৰিসেসতো রুচিজনকানং উপতিট্ঠনতো.

পণ্ডিতা এৰাতি বুদ্ধিসম্পন্না এৰ দেৰতা. যথা দেৰতা ‘‘সম্পতি জাতা কীদিসেন পুঞ্ঞকম্মেন ইধ নিব্বত্তা’’তি চিন্তেত্ৰা, ‘‘ইমিনা নাম পুঞ্ঞকম্মেন ইধ নিব্বত্তা’’তি জানন্তি, এৰং অতীতভৰে অত্তনা কতং একচ্চং অঞ্ঞম্পি পুঞ্ঞং জানন্তিযেৰ মহাপুঞ্ঞাতি আহ – ‘‘যে মহাপুঞ্ঞা’’তিআদি.

ন পঞ্ঞাযন্তি চিরতরকালত্তা পরমাযুনো. অনিয্যানিকন্তি ন নিয্যানাৰহং সত্তানং অভাজনভাৰতো. সত্তা ন পরমাযুনো হোন্তি নাম পাপুস্সন্নতাযাতি আহ – ‘‘তদা হি সত্তা উস্সন্নকিলেসা হোন্তী’’তি. এত্থাহ – ‘‘কস্মা সম্বুদ্ধা মনুস্সলোকে এৰ উপ্পজ্জন্তি, ন দেৰব্রহ্মলোকেসূ’’তি. দেৰলোকে তাৰ নুপ্পজ্জন্তি ব্রহ্মচরিযৰাসস্স অনোকাসভাৰতো তথা অনচ্ছরিযভাৰতো. অচ্ছরিযধম্মা হি বুদ্ধা ভগৰন্তো, তেসং সা অচ্ছরিযধম্মতা দেৰত্তভাৰে ঠিতানং ন পাকটা হোতি যথা মনুস্সভূতানং. দেৰভূতে হি সম্মাসম্বুদ্ধে দিস্সমানং বুদ্ধানুভাৰং দেৰানুভাৰতোৰ লোকো দহতি, ন বুদ্ধানুভাৰতো, তথা সতি সম্মাসম্বুদ্ধে নাধিমুচ্চতি ন সম্পসীদতি ইস্সরকুত্তগ্গাহং ন ৰিস্সজ্জেতি, দেৰত্তভাৰস্স চ চিরকালপৰত্তনতো একচ্চসস্সতৰাদতো ন পরিমুচ্চতি. ‘‘ব্রহ্মলোকে নুপ্পজ্জন্তী’’তি এত্থাপি এসেৰ নযো. সত্তানং তাদিসগাহৰিমোচনত্থঞ্হি বুদ্ধা ভগৰন্তো মনুস্সসুগতিযংযেৰ উপ্পজ্জন্তি; ন দেৰসুগতিযং, মনুস্সসুগতিযং উপ্পজ্জন্তাপি ওপপাতিকা ন হোন্তি, সতি চ ওপপাতিকূপপত্তিযং ৰুত্তদোসানতিৰত্তনতো. ধম্মৰেনেয্যানং অত্থায ধম্মতন্তিযা ঠপনস্স ৰিয ধাতুৰেনেয্যানং অত্থায ধাতূনং ঠপনস্স ইচ্ছিতব্বত্তা চ. ন হি ওপপাতিকানং পরিনিব্বানতো উদ্ধং সরীরধাতুযো তিট্ঠন্তি, তস্মা ন ওপপাতিকা হোন্তি, চরিমভৰে চ মহাবোধিসত্তা, মনুস্সভাৰস্স পাকটকরণায দারপরিগ্গহম্পি করোন্তা যাৰ পুত্তমুখদস্সনা অগারমজ্ঝে তিট্ঠন্তি. পরিপাকগতসীলনেক্খম্মপঞ্ঞাদিপারমিকাপি ন অভিনিক্খমন্তি, কিং ৰা এতায কারণচিন্তায? সব্ববুদ্ধেহি আচিণ্ণসমাচিণ্ণা, যদিদং মনুস্সভূতানংযেৰ অভিসম্বুজ্ঝনা, ন দেৰভূতানন্তি অযমেত্থ ধম্মতা. তথা হি তদত্থো মহাভিনীহারোপি মনুস্সভূতানংযেৰ ইজ্ঝতি, ন ইতরেসং.

কস্মা পন সম্মাসম্বুদ্ধা জম্বুদীপেযেৰ উপ্পজ্জন্তি, ন সেসদীপেসূতি? কেচি তাৰ আহু – ‘‘যস্মা পথৰিযা নাভিভূতা বুদ্ধানুভাৰসহিতা অচলট্ঠানভূতা বোধিমণ্ডভূমি জম্বুদীপেযেৰ উপ্পজ্জতি, তস্মা জম্বুদীপেযেৰ উপ্পজ্জন্তী’’তি; ‘‘তথা ইতরেসম্পি অৰিজহিতট্ঠানানং তত্থেৰ লব্ভমানতো’’তি. অযং পনেত্থ অম্হাকং খন্তি – যস্মা পুরিমবুদ্ধানং মহাবোধিসত্তানং পচ্চেকবুদ্ধানঞ্চ নিব্বত্তিযা সাৰকবোধিসত্তানং সাৰকবোধিযা অভিনীহারো সাৰকপারমীনং সম্ভরণং পরিপাচনঞ্চ বুদ্ধখেত্তভূতে ইমস্মিং চক্কৰাল়ে জম্বুদীপেযেৰ ইজ্ঝতি, ন অঞ্ঞত্থ. ৰেনেয্যানং ৰিনযনত্থো চ বুদ্ধুপ্পাদোতি অগ্গসাৰকাদিৰেনেয্যৰিসেসাপেক্খায একস্মিং জম্বুদীপেযেৰ বুদ্ধা নিব্বত্তন্তি, ন সেসদীপেসু. অযঞ্চ নযো সব্ববুদ্ধানং আচিণ্ণসমাচিণ্ণোতি তেসং উত্তমপুরিসানং তত্থেৰ উপ্পত্তি সম্পত্তিচক্কানং ৰিয অঞ্ঞমঞ্ঞুপনিস্সযতো অপরাপরং ৰত্ততীতি দট্ঠব্বং. তেনাহ – ‘‘তীসু দীপেসু বুদ্ধা ন নিব্বত্তন্তি, জম্বুদীপেযেৰ নিব্বত্তন্তীতি দীপং পস্সতী’’তি. ইমিনা নযেন দেসনিযমেপি কারণং ৰত্তব্বং.

ইদানি চ খত্তিযকুলং লোকসম্মতং ব্রাহ্মণানম্পি পূজনীযভাৰতো. রাজা মে পিতা ভৰিস্সতীতি কুলং পস্সি পিতুৰসেন কুলস্স নিদ্দিসিতব্বতো. দসন্নং মাসানং উপরি সত্ত দিৰসানীতি পস্সি তেন অত্তনো অন্তরাযাভাৰং অঞ্ঞাসি, তস্সা চ তুসিতভৰে দিব্বসম্পত্তিপচ্চনুভৰনং.

তা দেৰতাতি দসসহস্সিচক্কৰাল়দেৰতা. কথং পন তা বোধিসত্তস্স পূরিতপারমিভাৰং ভাৰিনঞ্চ সম্বুদ্ধভাৰং জানন্তীতি? মহেসক্খানং দেৰতানং ৰসেন, যেভুয্যেন চ তা দেৰতা অভিসমযভাগিনো. তথা হি ভগৰতো চ ধম্মদানসংৰিভাগে অনেকৰারং দসসহস্সচক্কৰাল়ৰাসিদেৰতাসন্নিপাতো অহোসি.

চৰামীতি পজানাতি চুতিআসন্নজৰনেহি ঞাণসহিতেহি চুতিযা উপট্ঠিতভাৰস্স পটিসংৰিদিতত্তা. চুতিচিত্তং ন জানাতি চুতিচিত্তক্খণস্স ইত্তরভাৰতো. তথা হি তং চুতূপপাতঞাণস্সপি অৰিসযো এৰ. পটিসন্ধিচিত্তেপি এসেৰ নযো. আৰজ্জনপরিযাযোতি আৰজ্জনক্কমো. যস্মা একৰারং আৰজ্জিতমত্তেন আরম্মণং নিচ্ছিনিতুং ন সক্কা, তস্মা তমেৰারম্মণং দুতিযং ততিযঞ্চ আৰজ্জিত্ৰা নিচ্ছীযতি, আৰজ্জনসীসেন চেত্থ জৰনৰারো গহিতো. তেনাহ – ‘‘দুতিযততিযচিত্তৰারেযেৰ জানিস্সতী’’তি. চুতিযা পুরেতরং কতিপযচিত্তৰারতো পট্ঠায মরণং মে আসন্নন্তি জাননতো, ‘‘চুতিক্খণেপি চৰামীতি পজানাতী’’তি ৰুত্তং. পটিসন্ধিযা পন অপুব্বভাৰতো পটিসন্ধিচিত্তং ন জানাতি. নিকন্তিযা উপ্পত্তিতো পরতো অসুকস্মিং ঠানে মযা পটিসন্ধি গহিতাতি পজানাতি, দুতিযজৰনতো পট্ঠায জানাতীতি ৰুত্তোৰাযমত্থো. তস্মিং কালেতি পটিসন্ধিগ্গহণকালে. দসসহস্সী কম্পতীতি এত্থ কম্পনকারণং হেট্ঠা ৰুত্তমেৰ. মহাকারুণিকা বুদ্ধা ভগৰন্তো সত্তানং হিতসুখৰিধানতপ্পরতায বহুলং সোমনস্সিকাৰ হোন্তীতি তেসং পঠমমহাৰিপাকচিত্তেন পটিসন্ধিগ্গহণং অট্ঠকথাযং (দী. নি. অট্ঠ. ২.১৭; ধ. স. ৪৯৮; ম. নি. অট্ঠ. ৩.১৯৯) ৰুত্তং. মহাসীৰত্থেরো পন যদিপি মহাকারুণিকা বুদ্ধা ভগৰন্তো সত্তানং হিতসুখৰিধানতপ্পরা, ৰিৰেকজ্ঝাসযা পন ৰিসঙ্খারনিন্না সব্বসঙ্খারেসু অজ্ঝুপেক্খণবহুলাতি পঞ্চমেন মহাৰিপাকচিত্তেন পটিসন্ধিগ্গহণমাহ.

পুরে পুণ্ণমায সত্তমদিৰসতো পট্ঠাযাতি পুণ্ণমায পুরে সত্তমদিৰসতো পট্ঠায, সুক্কপক্খে নৰমিতো পট্ঠাযাতি অত্থো. সত্তমে দিৰসেতি আসাল়্হীপুণ্ণমায. ইদং সুপিনন্তি ইদানি ৰুচ্চমানাকারং সুপিনং. নেসং দেৰিযোতি মহারাজূনং দেৰিযো.

সো চ খো পুরিসগব্ভো, ন ইত্থিগব্ভো, পুত্তো তে ভৰিস্সতীতি এত্তকমেৰ তে ব্রাহ্মণা অত্তনো সুপিনসত্থনযেন কথেসুং. সচে অগারং অজ্ঝাৰসিস্সতীতিআদি পন দেৰতাৰিগ্গহেন ভাৰিনমত্থং যাথাৰতো পৰেদেসুং.

গব্ভাৰক্কন্তিযোতি এত্থ গব্ভো ৰুচ্চতি মাতুকুচ্ছি, তত্থ উপ্পত্তি অৰক্কন্তি, তাৰ গব্ভাৰক্কন্তি, যাৰ ন নিক্খমতি. ঠিতকাৰ নিক্খমন্তি ধম্মাসনতো ওতরন্তো ধম্মকথিকো ৰিয.

২০১. ৰত্তমানসমীপে ৰত্তমানে ৰিয ৰোহরীযতীতি ওক্কমতীতি ৰুত্তন্তি আহ – ‘‘ওক্কন্তো হোতীতি অত্থো’’তি. এৰং হোতীতি এৰং ৰুত্তপ্পকারেনস্স সম্পজাননা হোতি. ন ওক্কমমানে পটিসন্ধিক্খণস্স দুৰিঞ্ঞেয্যত্তা. তথা চ ৰুত্তং – ‘‘পটিসন্ধিচিত্তং ন জানাতী’’তি. দসসহস্সচক্কৰাল়পত্থরণেন ৰা অপ্পমাণো. অতিৰিয সমুজ্জলভাৰেন উল়ারো. দেৰানুভাৰন্তি দেৰানং পভানুভাৰং. দেৰানঞ্হি পভংসো ওভাসো অধিভৰতি, ন তেসং আধিপচ্চং. তেনাহ ‘‘দেৰান’’ন্তিআদি.

রুক্খগচ্ছাদিনা কেনচি ন হঞ্ঞতীতি অঘা, অবাধা. তেনাহ ‘‘নিচ্চৰিৰটা’’তি. অসংৰুতাতি হেট্ঠা উপরি চ কেন চি ন পিহিতা. তেনাহ ‘‘হেট্ঠাপি অপ্পতিট্ঠা’’তি. তত্থ পি-সদ্দেন যথা হেট্ঠা উদকস্স পিধাযিকা পথৰী নত্থীতি অসংৰুতা লোকন্তরিকা, এৰং উপরিপি চক্কৰাল়েসু ৰিয দেৰৰিমানানং অভাৰতো অসংৰুতা অপ্পতিট্ঠাতি দস্সেতি. অন্ধকারো এত্থ অত্থীতি অন্ধকারা. চক্খুৰিঞ্ঞাণং ন জাযতি আলোকস্সাভাৰতো, ন চক্খুনো. তথা হি ‘‘তেন ওভাসেন অঞ্ঞমঞ্ঞং সঞ্জানন্তী’’তি ৰুত্তং. জম্বুদীপে ঠিতমজ্ঝন্হিকৰেলাযং পুব্বৰিদেহৰাসীনং অত্থঙ্গমনৰসেন উপড্ঢং সূরিযমণ্ডলং পঞ্ঞাযতি, অপরগোযানৰাসীনং উগ্গমনৰসেন, এৰং সেসদীপেসুপীতি আহ – ‘‘একপ্পহারেনেৰ তীসু দীপেসু পঞ্ঞাযন্তী’’তি. ইতো অঞ্ঞথা পন দ্ৰীসু এৰ দীপেসু একপ্পহারেনেৰ পঞ্ঞাযতীতি. একেকায দিসায নৰ নৰ যোজনসতসহস্সানি অন্ধকারৰিধমনম্পি ইমিনা নযেন দট্ঠব্বং. পভায নপ্পহোন্তীতি অত্তনো পভায ওভাসিতুং ন অভিসম্ভুণন্তি. যুগন্ধরপব্বতমত্থকপ্পমাণে আকাসে ৰিচরণতো, ‘‘চক্কৰাল়পব্বতস্স ৰেমজ্ঝেন চরন্তী’’তি ৰুত্তং.

ৰাৰটাতি খাদনত্থং গণ্হিতুং উপক্কমন্তা. ৰিপরিৰত্তিত্ৰাতি ৰিৰট্টিত্ৰা. ছিজ্জিত্ৰাতি মুচ্ছাপত্তিযা ঠিতট্ঠানতো মুচ্চিত্ৰা, অঙ্গপচ্চঙ্গচ্ছেদনৰসেন ৰা ছিজ্জিত্ৰা. অচ্চন্তখারেতি আতপসন্তাপাভাৰেন অতিসীতভাৰং সন্ধায অচ্চন্তখারতা ৰুত্তা সিযা. ন হি তং কপ্পসণ্ঠানউদকং সম্পত্তিকরমহামেঘৰুট্ঠং পথৰীসন্ধারকং কপ্পৰিনাসকউদকং ৰিয খারং ভৰিতুমরহতি. তথা হি সতি পথৰীপি ৰিলীযেয্য. তেসং ৰা পাপকম্মবলেন পেতানং পকতিউদকস্স পুব্বখেল়ভাৰাপত্তি ৰিয তস্স উদকস্স তদা খারভাৰাপত্তি হোতীতি ৰুত্তং ‘‘অচ্চন্তখারে উদকে’’তি. সমন্ততোতি সব্বভাগতো ছপ্পকারম্পি.

২০২. চতুন্নং মহারাজূনং ৰসেনাতি ৰেস্সৰণাদিচতুমহারাজভাৰসামঞ্ঞেন.

২০৩. সভাৰেনেৰাতি পরস্স সন্তিকে গহণেন ৰিনা অত্তনো সভাৰেনেৰ সযমেৰ অধিট্ঠহিত্ৰা সীলসম্পন্না.

মনুস্সেসূতি ইদং পকতিচারিত্তৰসেন ৰুত্তং – ‘‘মনুস্সিত্থিযা নাম মনুস্সপুরিসেসু পুরিসাধিপ্পাযচিত্তং উপ্পজ্জেয্যা’’তি, বোধিসত্তমাতু পন দেৰেসূপি তাদিসং চিত্তং নুপ্পজ্জতেৰ. যথা বোধিসত্তস্স আনুভাৰেন বোধিসত্তস্স মাতু পুরিসাধিপ্পাযচিত্তং নুপ্পজ্জতি, এৰং তস্স আনুভাৰেনেৰ সা কেনচি পুরিসেন অনতিক্কমনীযাতি আহ – ‘‘পাদা ন ৰহন্তি, দিব্বসঙ্খলিকা ৰিয বজ্ঝন্তী’’তি.

পুব্বে ‘‘কামগুণূপসংহিতং চিত্তং নুপ্পজ্জতী’’তি ৰুত্তং, পুন ‘‘পঞ্চহি কামগুণেহি সমপ্পিতা সমঙ্গীভূতা পরিচারেতী’’তি ৰুত্তং, কথমিদং অঞ্ঞমঞ্ঞং ন ৰিরুজ্ঝতীতি আহ ‘‘পুব্বে’’তিআদি. ৰত্থুপটিক্খেপোতি অব্রহ্মচরিযৰত্থুপটিসেধো. তেনাহ ‘‘পুরিসাধিপ্পাযৰসেনা’’তি. আরম্মণপটিলাভোতি রূপাদিপঞ্চকামগুণারম্মণস্সেৰ পটিলাভো.

২০৪. কিলমথোতি খেদো. কাযস্স হি গরুভাৰকঠিনভাৰাদযোপি তস্সা তদা ন হোন্তি এৰ. ‘‘তিরোকুচ্ছিগতং পস্সতী’’তি ৰুত্তং, কদা পট্ঠায পস্সতীতি আহ – ‘‘কললাদিকালং অতিক্কমিত্ৰা’’তিআদি. দস্সনে পযোজনং সযমেৰ ৰদতি, তস্স অভাৰতো কললাদিকালে ন পস্সতি. পুত্তেনাতি দহরেন মন্দেন উত্তানসেয্যকেন. যং তং মাতূতিআদি পকতিচারিত্তৰসেন ৰুত্তং. চক্কৰত্তিগব্ভতোপি হি সৰিসেসং বোধিসত্তগব্ভো পরিহারং লভতি পুঞ্ঞসম্ভারস্স সাতিসযত্তা, তস্মা বোধিসত্তমাতা অতিৰিয সপ্পাযাহারাচারা চ হুত্ৰা সক্কচ্চং পরিহরতি. পুরত্থাভিমুখোতি মাতু পুরত্থাভিমুখো. ইদানি তিরোকুচ্ছিগতস্স দিস্সমানতায অব্ভন্তরং বাহিরঞ্চ কারণং দস্সেতুং, ‘‘পুব্বে কতকম্ম’’ন্তিআদি ৰুত্তং. অস্সাতি দেৰিযা. ৰত্থুন্তি কুচ্ছিং. ফলিকঅব্ভপটলাদিনো ৰিয বোধিসত্তমাতুকুচ্ছিতচস্স পটলভাৰেন আলোকস্স ৰিবন্ধাভাৰতো যথা বোধিসত্তমাতা কুচ্ছিগতং বোধিসত্তং পস্সতি, কিমেৰং বোধিসত্তোপি মাতরং অঞ্ঞঞ্চ পুরতো রূপগতং পস্সতি, নোতি আহ, ‘‘বোধিসত্তো পনা’’তিআদি. কস্মা পন সতি চক্খুম্হি আলোকে চ ন পস্সতীতি আহ – ‘‘ন হি অন্তোকুচ্ছিযং চক্খুৰিঞ্ঞাণং উপ্পজ্জতী’’তি. অস্সাসপস্সাসা ৰিয হি তত্থ চক্খুৰিঞ্ঞাণম্পি ন উপ্পজ্জতি তজ্জাসমন্নাহারস্সাভাৰতো.

২০৫. যথা অঞ্ঞা ইত্থিযো ৰিজাতপচ্চযা তাদিসেন রোগেন অভিভূতাপি হুত্ৰা মরন্তি, বোধিসত্তমাতু পন বোধিসত্তে কুচ্ছিগতে ন কোচি রোগো উপ্পজ্জতি; কেৰলং আযুপরিক্খযেনেৰ কালং করোতি, স্ৰাযমত্থো হেট্ঠা ৰুত্তোযেৰ. বোধিসত্তেন ৰসিতট্ঠানং হীতিআদিনা তত্থ কারণমাহ. অপনেত্ৰাতি অগ্গমহেসিট্ঠানতো নীহরিত্ৰা. অনুরক্খিতুং ন সক্কোতীতি সম্মা গব্ভপরিহারং নানুযুঞ্জতি, তেন গব্ভো বহ্ৰাবাধো হোতি. ৰত্থুৰিসদং হোতীতি গব্ভাসযো পরিসুদ্ধো হোতি. মাতু মজ্ঝিমৰযস্স ততিযকোট্ঠাসে বোধিসত্তস্স গব্ভোক্কমনম্পি তস্সা আযুপরিমাণৰিলোকনেনেৰ সঙ্গহিতং ৰযোৰসেন উপ্পজ্জনকৰিকারস্স পরিৰজ্জনতো, ইত্থিসভাৰেন উপ্পজ্জনকৰিকারো পন বোধিসত্তস্স আনুভাৰেনেৰ ৰূপসম্মতি.

সত্তমাসজাতোতি পটিসন্ধিগ্গহণতো সত্তমে মাসে জাতো. সো সীতুণ্হক্খমো ন হোতি অতিৰিয সুখুমালতায. অট্ঠমাসজাতো কামং সত্তমাসজাততো বুদ্ধিঅৰযৰো, একচ্চে পন চম্মপদেসা বুদ্ধিং পাপুণন্তা ঘট্টনং ন সহন্তি, তেন সো ন জীৰতি. সত্তমাসজাতস্স পন ন তাৰ তে জাতাতি ৰদন্তি.

ঠিতাৰ হুত্ৰাতি নিদ্দুক্খতায ঠিতা এৰ হুত্ৰা. দুক্খস্স হি বলৰভাৰতো তং দুক্খং অসহমানা অঞ্ঞা ইত্থিযো নিসিন্না ৰা নিপন্না ৰা ৰিজাযন্তি. উপৰিজঞ্ঞাতি উপগতৰিজাযনকালা. সকলনগরৰাসিনোতি কপিলৰত্থুং পরিৰারেত্ৰা ঠিতেসু দেৰদহাদীসু ছসু নগরেসু ৰসন্তা.

দেৰা নং পঠমং পটিগ্গণ্হন্তীতি লোকনাথং মহাপুরিসং মযমেৰ পঠমং পটিগ্গণ্হামাতি সঞ্জাতগারৰবহুমানা অত্তনো পীতিং পৰেদেন্তা খীণাসৰা সুদ্ধাৰাসব্রহ্মানো আদিতো পটিগ্গণ্হন্তি. সূতিৰেসন্তি সূতিজগ্গনধাতিৰেসং. একেতি উত্তরৰিহারৰাসিনো. মচ্ছক্খিসদিসং ছৰিৰসেন.

২০৬. অজিনপ্পৰেণিযাতি অজিনচম্মেহি সিব্বেত্ৰা কতপৰেণিযা. মহাতেজোতি মহানুভাৰো. মহাযসোতি মহাপরিৰারো ৰিপুলকিত্তিঘোসো চ.

ভগ্গৰিভগ্গাতি সম্বাধট্ঠানতো নিক্খমনেন ৰিভাৰিতত্তা ভগ্গা ৰিভগ্গা ৰিয চ হুত্ৰা. তেন নেসং অৰিসদভাৰমেৰ দস্সেতি. অলগ্গো হুত্ৰাতি গব্ভাসযে যোনিপদেসে চ কত্থচি অলগ্গো অসত্তো হুত্ৰা. উদকেনাতি গব্ভাসযগতেন উদকেন অমক্খিতো নিক্খমতি সম্মক্খিতস্স তাদিসস্স উদকসেম্হাদিকস্সেৰ তত্থ অভাৰতো. বোধিসত্তস্স হি পুঞ্ঞানুভাৰেন পটিসন্ধিগ্গহণতো পট্ঠায তং ঠানং ৰিসুদ্ধং পরমসুগন্ধগন্ধকুটি ৰিয চন্দনগন্ধং ৰাযন্তং তিট্ঠতি. উদকৰট্টিযোতি উদকক্খন্ধা.

২০৭. মুহুত্তজাতোতি মুহুত্তেন জাতো হুত্ৰা মুহুত্তমত্তোৰ. অনুধারিযমানেতি অনুকূলৰসেন নীযমানে. আগতানেৰাতি তং ঠানং উপগতানি এৰ.

অনেকসাখন্তি রতনমযানেকসতপতিট্ঠানহীরকং. সহস্সমণ্ডলন্তি তেসং উপরি পতিট্ঠিতং অনেকসহস্সমণ্ডলহীরকং. মরূতি দেৰা.

ন খো পনেৰং দট্ঠব্বন্তি সত্তপদৰীতিহারতো পগেৰ দিসাৰিলোকনস্স কতত্তা. তেনাহ ‘‘মহাসত্তো হী’’তিআদি. একঙ্গণানীতি ৰিৰটভাৰেন ৰিহারঙ্গণপরিৰেণঙ্গণানি ৰিয একঙ্গণসদিসানি অহেসুং. সদিসোপি নত্থীতি তুম্হাকং ইদং ৰিলোকনং ৰিসিট্ঠে পস্সিতুং ইধ তুম্হেহি সদিসোপি নত্থি, কুতো উত্তরিতরোতি আহংসু. সব্বপঠমোতি সব্বপ্পধানো. পধানপরিযাযো হি ইধ পঠমসদ্দো. তেনাহ ‘‘ইতরানী’’তিআদি. এত্থ চ মহেসক্খা তাৰ দেৰা তথা ৰদন্তি, ইতরে পন কথন্তি? মহাসত্তস্স আনুভাৰদস্সনেনেৰ. মহেসক্খানঞ্হি দেৰানং মহাসত্তস্স আনুভাৰো ৰিয তেন সদিসানম্পি আনুভাৰো পচ্চক্খো অহোসি. ইতরে পন তেসং ৰচনং সুত্ৰা সদ্দহন্তা অনুমিনন্তা তথা আহংসু.

জাতমত্তস্সেৰ বোধিসত্তস্স ঠানাদীনি যেসং ৰিসেসাধিগমানং পুব্বনিমিত্তভূতানীতি তে নিদ্ধারেত্ৰা দস্সেন্তো, ‘‘এত্থ চা’’তিআদিমাহ. তত্থ পতিট্ঠানং চতুইদ্ধিপাদপটিলাভস্স পুব্বনিমিত্তং ইদ্ধিপাদৰসেন লোকুত্তরধম্মেসু সুপ্পতিট্ঠিতভাৰসমিজ্ঝনতো. উত্তরাভিমুখভাৰো লোকস্স উত্তরণৰসেন গমনস্স পুব্বনিমিত্তং. সত্তপদগমনং সত্তবোজ্ঝঙ্গাদিগমনস্স পুব্বনিমিত্তং, ৰিসুদ্ধছত্তধারণং সুৰিসুদ্ধৰিমুত্তিছত্তধারণস্স পুব্বনিমিত্তং, পঞ্চরাজককুধভণ্ডানি পঞ্চৰিধৰিমুত্তিগুণপরিৰারতায পুব্বনিমিত্তং, অনাৰটদিসানুৰিলোকনং অনাৰটঞাণতায পুব্বনিমিত্তং, ‘‘অগ্গোহমস্মী’’তিআদিৰচনং অপ্পটিৰত্তিযধম্মচক্কপৰত্তনস্স পুব্বনিমিত্তং; অযমন্তিমা জাতীতি আযতিং জাতিযা অভাৰকিত্তনা অনুপাদি…পে… পুব্বনিমিত্তন্তি ৰেদিতব্বং; তস্স তস্স অনাগতে লদ্ধব্বৰিসেসস্স তং তং নিমিত্তং অব্যভিচারীনিমিত্তন্তি দট্ঠব্বং. ন আগতোতি ইমস্মিং সুত্তে অঞ্ঞত্থ চ ৰক্খমানায অনুপুব্বিযা অনাগততং সন্ধায ৰুত্তং. আহরিত্ৰাতি তস্মিং তস্মিং সুত্তে অট্ঠকথাসু চ আগতনযেন আহরিত্ৰা দীপেতব্বো.

দসসহস্সিলোকধাতু কম্পীতি পন ইদং সতিপি ইধ পাল়িযং আগতত্তে ৰক্খমানানমচ্ছরিযানং মূলভূতং দস্সেতুং ৰুত্তং, এৰং অঞ্ঞম্পীদিসং দট্ঠব্বং. তন্তি বদ্ধা ৰীণা, চম্মবদ্ধা ভেরিযোতি পঞ্চঙ্গিকতূরিযস্স নিদস্সনমত্তং, চ-সদ্দেন ৰা ইতরেসম্পি সঙ্গহো দট্ঠব্বো. ভিজ্জিংসূতি পাদেসু বদ্ধট্ঠানেসুযেৰ ভিজ্জিংসু. ৰিগচ্ছিংসূতি ৰূপসমিংসু. সকতেজোভাসিতানীতি অতিৰিয সমুজ্জলায অত্তনো পভায ওভাসিতানি অহেসুং. ন পৰত্তীতি ন সন্দী. ৰাতো ন ৰাযীতি খরো ৰাতো ন ৰাযি, মুদুসুখো পন সত্তানং সুখাৰহো ৰাযি. পথৰীগতা অহেসুং উচ্চট্ঠানে ঠাতুং অৰিসহন্তা. উতুসম্পন্নোতি অনুণ্হাসীততাসঙ্খাতেন উতুনা সম্পন্নো. ৰামহত্থং উরে ঠপেত্ৰা দক্খিণেন পুথুপাণিনা হত্থতাল়নেন সদ্দকরণং অপ্ফোটনং. মুখেন উস্সেল়নং সদ্দমুঞ্চনং সেল়নং. একদ্ধজমালা অহোসীতি এত্থ ইতি-সদ্দো আদিঅত্থো. তেন ৰিচিত্তপুপ্ফসুগন্ধপুপ্ফৰস্সদেৰা ৰস্সিংসু, সূরিযে দিব্বমানে এৰ তারকা ওভাসিংসু, অচ্ছং ৰিপ্পসন্নং উদকং পথৰিতো উব্ভিজ্জি, বিলাসযা দরিসযা তিরচ্ছানা আসযতো নিক্খমিংসু; রাগদোসমোহাপি তনু ভৰিংসু, পথৰিযং রজো ৰূপসমি, অনিট্ঠগন্ধো ৰিগচ্ছি, দিব্বগন্ধো ৰাযি, রূপিনো দেৰা সরূপেনেৰ মনুস্সানং আপাথমগমংসু, সত্তানং চুতুপপাতা নাহেসুন্তি ইমেসং সঙ্গহো দট্ঠব্বো. যানি মহাভিনীহারসমযে উপ্পন্নানি দ্ৰত্তিংস পুব্বনিমিত্তানি, তানি অনৰসেসানি তদা অহেসুন্তি.

তত্রাপীতি তেসুপি পথৰিকম্পাদীসু এৰং পুব্বনিমিত্তভাৰো ৰেদিতব্বো, ন কেৰলং সম্পতিজাতস্স ঠানাদীসু এৰাতি অধিপ্পাযো. সব্বঞ্ঞুতঞ্ঞাণপটিলাভস্স পুব্বনিমিত্তং সব্বস্স ঞেয্যস্স তিত্থকরমতস্স চ চালনতো. কেনচি অনুস্সাহিতানংযেৰ ইমস্মিংযেৰ একচক্কৰাল়ে সন্নিপাতো, কেনচি অনুস্সাহিতানংযেৰ একপ্পহারেনেৰ সন্নিপতিত্ৰা ধম্মপটিগ্গণ্হনস্স পুব্বনিমিত্তং, পঠমং দেৰতানং পটিগ্গহণং দিব্বৰিহারপটিলাভস্স, পচ্ছা মনুস্সানং পটিগ্গহণং তত্থেৰ ঠানস্স নিচ্চলসভাৰতো আনেঞ্জৰিহারপটিলাভস্স পুব্বনিমিত্তং. ৰীণানং সযং ৰজ্জনং পরূপদেসেন ৰিনা সযমেৰ অনুপুব্বৰিহারপটিলাভস্স পুব্বনিমিত্তং. ভেরীনং ৰজ্জনং চক্কৰাল়পরিযন্তায পরিসায পৰেদনসমত্থস্স ধম্মভেরিযা অনুসাৰনস্স অমতদুন্দুভিঘোসনস্স পুব্বনিমিত্তং. অন্দুবন্ধনাদীনং ছেদো মানৰিনিবন্ধছেদনস্স পুব্বনিমিত্তং; সুপট্টনসম্পাপুণনং অত্থাদি অনুরূপং অত্থাদীসু ঞাণস্স ভেদাধিগমস্স পুব্বনিমিত্তং.

নিব্বানরসেনাতি কিলেসানং নিব্বাযনরসেন. একরসভাৰস্সাতি সাসনস্স সব্বত্থ একরসভাৰস্স. ৰাতস্স অৰাযনং কিস্স পুব্বনিমিত্তন্তি আহ ‘‘দ্ৰাসট্ঠিদিট্ঠিগতভিন্দনস্সা’’তি. আকাসাদিঅপ্পতিট্ঠৰিসমচঞ্চলট্ঠানং পহায সকুণানং পথৰীগমনং তাদিসং মিচ্ছাগাহং পহায সত্তানং পাণেহি রতনত্তযসরণগমনস্স পুব্বনিমিত্তং. দেৰতানং অপ্ফোটনাদীহি কীল়নং পমোদনুপ্পত্তিউদানস্স ভৰৰন্তগমনেন ধম্মসভাৰবোধনেন চ পমোদৰিভাৰনস্স পুব্বনিমিত্তং. ধম্মৰেগৰস্সনস্সাতি দেসনাঞাণৰেগেন ধম্মামতস্স ৰস্সনস্স পুব্বনিমিত্তং. কাযগতাসতিৰসেন লদ্ধজ্ঝানং পাদকং কত্ৰা উপ্পাদিতমগ্গফলসুখানুভৰো কাযগতাসতিঅমতপটিলাভো, তস্স পন কাযস্সপি অতপ্পকসুখাৰহত্তা খুদাপিপাসাপীল়নাভাৰো পুব্বনিমিত্তং ৰুত্তো. অরিযদ্ধজমালামালিতাযাতি সদেৰকস্স লোকস্স অরিযমগ্গবোজ্ঝঙ্গধজমালাহি মালিতভাৰস্স পুব্বনিমিত্তং. যং পনেত্থ অনুদ্ধটং, তং সুৰিঞ্ঞেয্যমেৰ.

এত্থাতি ‘‘সম্পতিজাতো’’তিআদিনা আগতে ইমস্মিং ঠানে. ৰিস্সজ্জিতোৰ, তস্মা অম্হেহি ইধ অপুব্বং ৰত্তব্বং নত্থীতি অধিপ্পাযো. তদা পথৰিযং গচ্ছন্তোপি মহাসত্তো আকাসেন গচ্ছন্তো ৰিয মহাজনস্স উপট্ঠাসীতি অযমেত্থ নিযতি ধম্মনিযামো বোধিসত্তানং ধম্মতাতি ইদং নিযতিৰাদৰসেন কথনং. ‘‘পুব্বে পুরিমজাতীসু তাদিসস্স পুঞ্ঞসম্ভারকম্মস্স কতত্তা উপচিতত্তা মহাজনস্স তথা উপট্ঠাসী’’তি ইদং পুব্বেকতকম্মৰাদৰসেন কথনং. ইমেসং সত্তানং উপরি ঈসনসীলতায যথাসকং কম্মমেৰ ইস্সরো নাম, তস্স নিম্মানং অত্তনো ফলস্স নিব্বত্তনং, মহাপুরিসোপি সদেৰকং লোকং অভিভৰিতুং সমত্থেন উল়ারেন পুঞ্ঞকম্মুনা নিব্বত্তিতো তেন ইস্সরেন নিম্মিতো নাম, তস্স চাযং নিম্মানৰিসেসো, যদিদং মহানুভাৰতা. যায মহাজনস্স তথা উপট্ঠাসীতি ইদং ইস্সরনিম্মানৰাদৰসেন কথনং. এৰং তং তং বহুং ৰত্ৰা কিং ইমায পরিযাযকথাযাতি অৰসানে উজুকমেৰ এৰং ব্যাকাসি. সম্পতিজাতো পথৰিযং কথং পদসা গচ্ছতি, এৰংমহানুভাৰো আকাসেন মঞ্ঞে গচ্ছতীতি পরিকপ্পনস্স ৰসেন আকাসেন গচ্ছন্তো ৰিয অহোসি. সীঘতরং পন সত্তপদৰীতিহারেন গতত্তা দিস্সমানরূপোপি মহাজনস্স অদিস্সমানো ৰিয অহোসি. অচেলকভাৰো খুদ্দকসরীরতা চ তাদিসস্স ইরিযাপথস্স অননুচ্ছৰিকাতি কম্মানুভাৰসঞ্জনিতপাটিহারিযৰসেন অলঙ্কারপটিযত্তো ৰিয; সোল়সৰস্সুদ্দেসিকো ৰিয চ মহাজনস্স উপট্ঠাসীতি ৰেদিতব্বং; বুদ্ধভাৰানুচ্ছৰিকস্স বোধিসত্তানুভাৰস্স যাথাৰতো পৰেদিতত্তা বুদ্ধেন ৰিয…পে… অত্তমনা অহোসি.

পাকটা হুত্ৰাতি ৰিভূতা হুত্ৰা. বুদ্ধানং যে যে সঙ্খারে ৰৰত্থপেতুকামা, তে তে উপ্পাদক্খণেপি সব্বসো সুপ্পটিৰিদিতা সুপাকটা হত্থতলে আমলকং ৰিয সুট্ঠু ৰিভূতা এৰ হুত্ৰা উপট্ঠহন্তি. তেনাহ ‘‘যথা হী’’তিআদি. অনোকাসগতেতি পরিগ্গহস্স অনোকাসকালে পৰত্তে. নিপ্পদেসেতি নিরৰসেসে. ওকাসপ্পত্তেতি ঠানগমনাদিকালে উপ্পন্নে, তে হি সম্মসনস্স যোগ্যকালে উপ্পত্তিযা ওকাসপ্পত্তাতি অধিপ্পাযো. সত্তদিৰসব্ভন্তরেতি ইদং বুদ্ধানং পাকতিকসম্মসনৰসেন ৰুত্তং, আকঙ্খন্তা পন তে যদা কদাচি উপ্পন্নসঙ্খারে সম্মসন্তিযেৰ. সেসং সুৰিঞ্ঞেয্যমেৰ.

অচ্ছরিযব্ভুতসুত্তৰণ্ণনায লীনত্থপ্পকাসনা সমত্তা.

৪. বাকুলসুত্তৰণ্ণনা

২০৯. যথা ‘‘দ্ৰত্তিংসা’’তি ৰত্তব্বে দ্ৰি-সদ্দস্স বা-আদেসং কত্ৰা বাত্তিংসাতি ৰুচ্চতি, এৰং এত্থ বা-কারাদেসং কত্ৰা বাকুলোতি সমঞ্ঞা অহোসি, সাযং তস্স অন্ৰত্থসঞ্ঞাতি দস্সেতুং, ‘‘তস্স হী’’তিআদি ৰুত্তং. সীসং ন্হাপেত্ৰাতি মঙ্গলত্থং মহাগঙ্গায সীসং ন্হাপেত্ৰা. নিমুজ্জনৰসেনাতি জণ্ণুপমাণে উদকে থোকংযেৰ নিমুজ্জনৰসেন. ছড্ডেত্ৰা পলাতা মরণভযতজ্জিতা. পহরিযমানা মরন্তি, ন জালেন বন্ধিতমত্তেন. দারকস্স তেজেনাতি দারকস্স পুঞ্ঞতেজেন. নীহটমত্তোৰ মতো, তস্স মরণত্থং উপক্কমো ন কতো, যেন উপক্কমেন দারকস্স বাধো সিযা. তন্তি মচ্ছং. সকলমেৰাতি পরিপুণ্ণাৰযৰমেৰ.

ন কেলাযতীতি ন মমাযতি কিস্মিঞ্চি ন মঞ্ঞতি. দারকস্স পুঞ্ঞতেজেন পিট্ঠিতো ফালেন্তী. দারকং লভতীতি উগ্ঘোসনৰসেন ভেরিং চরাপেত্ৰা. পৰত্তিং আচিক্খি, অত্তনো পুত্তভাৰং কথেসি. কুচ্ছিযা ধারিতত্তা অমাতা কাতুং ন সক্কা জননীভাৰতো. মচ্ছং গণ্হন্তাপীতি মচ্ছং কিণিত্ৰা গণ্হন্তাপি. তথা গণ্হন্তা চ তপ্পরিযাপন্নং সব্বং গণ্হাতি নামাতি আহ – ‘‘ৰক্কযকনাদীনি বহি কত্ৰা গণ্হন্তা নাম নত্থী’’তি. অযম্পি অমাতা কাতুং ন সক্কা সামিকভাৰতো. দারকো উভিন্নম্পি কুলানং দাযাদো হোতু দ্ৰিন্নং পুত্তভাৰতো.

অসীতিমেতি জাতিযা অসীতিমে ৰস্সে. পব্বজ্জামত্তেন কিলেসানং অসমুচ্ছিজ্জনতো ৰীতিক্কমিতুং কামসঞ্ঞা উপ্পন্নপুব্বাতি পুচ্ছা পন পুচ্ছিতব্বা. তেনাহ – ‘‘এৰঞ্চ খো মং, আৰুসো কস্সপ, পুচ্ছিতব্ব’’ন্তি.

২১০. নিযমেত্ৰাতি তং তংৰারে সেসৰারেন নিযমেত্ৰা. কম্মপথভেদকোতি কম্মপথৰিসেসকরো. তত্থ কামৰিতক্কো যথা কাযৰচীদ্ৰারেসু চোপনপ্পত্তো কম্মপথপ্পত্তো নাম হোতি; মনোদ্ৰারে পরভণ্ডস্স অত্তনো পরিণামনৰসেন পৰত্তঅভিজ্ঝাসহগতো; এৰং কামসঞ্ঞাতি, তথা ব্যাপাদৰিহিংসাৰিতক্কসঞ্ঞাতি থেরো, ‘‘উভযম্পেতং কম্মপথভেদকমেৰা’’তি আহ. কম্মপথং অপ্পত্তং সঞ্ঞং সন্ধায, ‘‘সঞ্ঞা উপ্পন্নমত্তাৰা’’তি ৰুচ্চমানে ৰিতক্কিতম্পি সমানং কম্মপথং অপ্পত্তমেৰ, উভযস্স পন ৰসেন সুত্তপদং পৰত্তন্তি থেরস্স অধিপ্পাযো.

২১১. আযূহনকম্মন্তি অত্তনা আযূহিতব্বকম্মং. লোমকিলিট্ঠানীতি কিলিট্ঠলোমানি, কিলিট্ঠংসূনীতি অত্থো. কিমেৰং ভোগেসু পরনিম্মিতভৰে ৰসৰত্তিদেৰানং ৰিয সব্বসো আযূহনকম্মেন ৰিনা অঞ্ঞস্সপি পব্বজিতস্স পচ্চযলাভো দিট্ঠপুব্বো সুতপুব্বোতি আহ ‘‘অনচ্ছরিযঞ্চেত’’ন্তি. কুলূপকথেরানমেতং কম্মং, থেরো পন কদাচিপি কুলূপকো নাহোসি.

গদ্দুহনমত্তন্তি গোদুহনমত্তকালং. ইধ পন সকলো গোদুহনো অধিপ্পেতোতি দস্সেন্তো, ‘‘গাৰিং…পে… কালমত্তম্পী’’তি আহ. নিবন্ধীতি নিবদ্ধদাতব্বং কত্ৰা ঠপেসি.

সকিলেসপুগ্গলস্স অসেরিভাৰকরণেন রণেন সদিসতায রণো, সংকিলেসো. অঞ্ঞা উদপাদীতি পনাহ, তস্মা অরহত্তং ন পটিঞ্ঞাতন্তি দস্সেতি. ননু তথা ৰচনং পটিজাননং ৰিয হোতীতি আহ ‘‘অপিচা’’তিআদি.

২১২. অৰাপুরতি দ্ৰারং এতেনাতি অৰাপুরণং. পঠমসঙ্গহতো পচ্ছা দেসিতত্তা দুতিযসঙ্গহে সঙ্গিতং. সেসং সুৰিঞ্ঞেয্যমেৰ.

বাকুলসুত্তৰণ্ণনায লীনত্থপ্পকাসনা সমত্তা.

৫. দন্তভূমিসুত্তৰণ্ণনা

২১৩. ফুসেয্যাতি ঞাণফুসনা নাম অধিপ্পেতা, তস্মা লভেয্যাতি অধিগচ্ছেয্য. এৰং পটিপন্নোতি, ‘‘অপ্পমত্তো আতাপী পহিতত্তো’’তি ৰুত্তপ্পকারেন পটিপন্নো. অজাননকোট্ঠাসেযেৰাতি অৰধারণেন অত্তনি কতং দোসারোপনং নিৰত্তেতি.

২১৪. অপ্পনাউপচারন্তি অপ্পনঞ্চেৰ উপচারঞ্চ পাপেত্ৰা কথেসীতি অত্থং ৰদন্তি, অপ্পনাসহিতো পন উপচারো অপ্পনাউপচারো, তং পাপেত্ৰা কথেসীতি অত্থো.

নিক্খমতীতি নিক্খমো, অৰগ্গাহকামতো নিক্খমনং নিক্খমো এৰ নেক্খম্মো, পঠমজ্ঝানাদি. সতি কিলেসকামে অত্তনো উপহারং উপচারেত্ৰা অস্সাদেত্ৰা পরিভুঞ্জতি নামাতি আহ – ‘‘দুৰিধেপি কামে পরিভুঞ্জমানো’’তি. দুৰিধেপীতি হীনপণীতাদিৰসেন দুৰিধে.

২১৫. কূটাকারন্তি গাল়্হসাঠেয্যং অপ্পতিরূপে ঠানে খন্ধগতপাতনাদি. দন্তগমনন্তি দন্তেহি নিব্বিসেৰনেহি গন্ধব্বগতিং. পত্তব্বং ভূমিন্তি সম্মাকিরিযায লদ্ধব্বসম্পত্তিং.

২১৬. ব্যতিহরণৰসেন লঙ্ঘকং ৰিলঙ্ঘকং, অঞ্ঞমঞ্ঞহত্থগ্গহণং. তেনাহ – ‘‘হত্থেন হত্থং গহেত্ৰা’’তি.

২১৭. গহেতুং সমত্থোতি গণিকারহত্থিনীহি উপলাপেত্ৰা অরঞ্ঞহত্থিং ৰচনৰসেন গহেতুং সমত্থো. অতিপস্সিত্ৰা অতিট্ঠানৰসেন পস্সিত্ৰা. এত্থগেধাতি এতস্মিং অরঞ্ঞে নাগৰনে পৰত্তগেধা. সুখাযতীতি সুখং অযতি পৰত্তেতি, ‘‘সুখং হরতী’’তি ৰা পাঠো. ডিণ্ডিমো আনকো. নিহিতসব্বৰঙ্কদোসোতি অপগতসব্বসাঠেয্যদোসো. অপনীতকসাৰোতি অপেতসারম্ভকসাৰো.

২১৯. পঞ্চকামগুণনিস্সিতসীলানন্তি অকুসলানং. গেহস্সিতসীলানন্তি ৰা ৰট্টসন্নিস্সিতসীলানং.

২২২. এস নযো সব্বত্থাতি, ‘‘মজ্ঝিমো, দহরো’’তি আগতেসু উপমাৰারেসু, ‘‘থেরো’’তিআদিনা আগতেসু উপমেয্যৰারেসূতি পঞ্চসু সংকিলেসপক্খিযেসু ৰারেসু এস যথাৰুত্তোৰ নযোতি ৰেদিতব্বো. সেসং সুৰিঞ্ঞেয্যমেৰ.

দন্তভূমিসুত্তৰণ্ণনায লীনত্থপ্পকাসনা সমত্তা.

৬. ভূমিজসুত্তৰণ্ণনা

২২৩. আসঞ্চেপি করিত্ৰাতি, ‘‘ইমিনাহং ব্রহ্মচরিযেন দেৰো ৰা ভৰেয্যং দেৰঞ্ঞতরো ৰা, দুক্খতো ৰা মুচ্চেয্য’’ন্তি পত্থনং কত্ৰা চেপি চরন্তি, অভব্বা ফলস্স অধিগমায তণ্হায ব্রহ্মচরিযস্স ৰিদূসিতত্তাতি অধিপ্পাযো. অনাসঞ্চেপি করিত্ৰাতি ৰুত্তনযেন পত্থনং অকত্ৰা. অভব্বা ফলস্স অধিগমায অনিযমিতভাৰতো. পণিধানৰসেন হি পুঞ্ঞফলং নিযতং নাম হোতি, তদভাৰতো কতং পুঞ্ঞং ন লভতীতি অধিপ্পাযো. ততিযপক্খে উভযট্ঠানেহি ৰুত্তং, চতুত্থপক্খো সম্মাৰতারো ইতি চতুকোটিকো পঞ্হো জালৰসেন আহটো, তত্থ আসা নাম পত্থনা, মিচ্ছাগাহস্মিং সতি ন ৰিপচ্চতি, সম্মাগাহস্মিং সতি ৰিপচ্চতি, উভযথাপি উভযাপেক্খানাম, যো মিচ্ছত্তধম্মে পুরক্খত্ৰা ব্রহ্মচরিযং চরতি, তস্স যথাধিপ্পাযফলং সমিজ্ঝতীতি ন ৰত্তব্বং অযোনিসো ব্রহ্মচরিযস্স চিণ্ণত্তা; যো পন সম্মত্তং পুরক্খত্ৰা ব্রহ্মচরিযং চরতি, তস্স যথাধিপ্পাযং ব্রহ্মচরিযফলং ন সমিজ্ঝতীতি ন ৰত্তব্বং যোনিসো ব্রহ্মচরিযস্স চিণ্ণত্তা. তেন ৰুত্তং – ‘‘আসঞ্চেপি করিত্ৰা অযোনিসো ব্রহ্মচরিযং চরন্তী’’তিআদি. সেসং সুৰিঞ্ঞেয্যমেৰ.

ভূমিজসুত্তৰণ্ণনায লীনত্থপ্পকাসনা সমত্তা.

৭. অনুরুদ্ধসুত্তৰণ্ণনা

২৩০. উপসঙ্কমিত্ৰা এৰমাহংসূতি ৰুত্তং উপসঙ্কমনকারণং দস্সেন্তো, ‘‘তস্স উপাসকস্স অফাসুককালো অহোসী’’তি আহ. অৰিরাধিতন্তি অৰিরজ্ঝনকং. যদি ৰা তে ধম্মা নানত্থা, যদি ৰা একত্থা, যং তত্থ অৰিরজ্ঝনকং, তং তংযেৰ পটিভাতূতি যোজনা. ঝানমেৰাতি অপ্পমাণজ্ঝানমেৰ, ‘‘চেতোৰিমুত্তী’’তি পন ৰুত্তত্তা চিত্তেকগ্গতাযেৰ এৰং ৰুচ্চতীতি উপাসকস্স অধিপ্পাযো.

২৩১. যাৰতা মজ্ঝন্হিকে কালে ছাযা ফরতি, নিৰাতে পণ্ণানি পতন্তি, এত্তাৰতা ‘‘রুক্খমূল’’ন্তি ৰুচ্চতীতি এৰং ৰুত্তং একরুক্খমূলপ্পমাণট্ঠানং. কসিণনিমিত্তেন ওত্থরিত্ৰাতি কসিণারম্মণং ঝানং সমাপজ্জন্তো তস্মিং কসিণ…পে… ৰিহরতীতি ৰুত্তো. আভোগো নত্থি ঝানক্খণে. কামং সমাপত্তিক্খণে আভোগো নত্থি ততো পন পুব্বে ৰা সিযা সো আভোগো, তম্পি সন্ধায মহগ্গতন্তি কেচি. ইদানি তাসং চেতোৰিমুত্তীনং সতিপি কেনচি ৰিসেসেন অভেদে ৰিসযাদিতো লব্ভমানভেদং দস্সেতুং, ‘‘এত্থা’’তিআদি ৰুত্তং. নিমিত্তং ন ৰড্ঢতি ৰড্ঢেতব্বস্স নিমিত্তস্সেৰ অভাৰতো. পথৰীকসিণাদীনং ৰিয আকাসভাৰনায উগ্ঘাটনং ন জাযতি. তানি ঝানানীতি ব্রহ্মৰিহারজ্ঝানানি. চুদ্দসৰিধেন পরিদমনাভাৰতো অভিঞ্ঞানং পাদকানি ন হোন্তি. নিমিত্তুগ্ঘাটস্সেৰ অভাৰতো অরূপজ্ঝানানং অনধিট্ঠানতায নিরোধস্স পাদকানি ন হোন্তীতি. কম্মৰট্টভাৰেন কিলেসৰট্টৰিপাকৰট্টানং তিণ্ণং ৰট্টানং পচ্চযভাৰো ৰট্টপাদকতা. উপপজ্জনৰসেনেৰ তং তং ভৰং ওক্কমতি এতেহীতি ভৰোক্কমনানি. দুতিযনযস্স ৰুত্তৰিপরিযাযেন অত্থো ৰেদিতব্বো. উগ্ঘাটনস্স লব্ভনতো অরূপজ্ঝানোপরি সমতিক্কমো হোতীতি অযমেৰ ৰিসেসো. এৰন্তি যথাৰুত্তেন নিমিত্তাৰড্ঢননিমিত্তৰড্ঢনাদিপ্পকারেন. নানত্থাতি নানাসভাৰা. এৰন্তি অপ্পমাণমহগ্গতসদ্দৰচনীযতায নানাব্যঞ্জনা. কামঞ্চেত্থ অপ্পমাণসমাপত্তিতোপি নীহরিত্ৰা ৰক্খমানভৰূপপত্তিকারণং দস্সেতুং সক্কা, অট্ঠকথাযং পন কসিণঝানতোৰ নীহরিত্ৰা যোজনা কতাতি তথা ৰুত্তং. অথ ৰা মহগ্গতগহণেনেত্থ অপ্পমাণাতি ৰুত্তব্রহ্মৰিহারানম্পি সঙ্গহো ৰেদিতব্বো তস্সা সমঞ্ঞায উভযেসম্পি সাধারণভাৰতো.

২৩২. এৰং ৰুত্তোতি অসতিপি তথারূপে আভোগে ‘‘পরিত্তাভাতি ফরিত্ৰা অধিমুচ্চিত্ৰা ৰিহরতী’’তি ৰুত্তো. অপ্পমাণং কত্ৰা কসিণং ৰড্ঢেন্তস্স কসিণৰড্ঢনৰসেন বহুলীকারসম্ভৰতো সিযা ঝানস্স বলৰতরতা, তদভাৰে চ দুব্বলতা, আচিণ্ণৰসিতায পন পচ্চনীকধম্মানং সম্মা অপরিসোধনে ৰত্তব্বমেৰ নত্থীতি পঞ্চহাকারেহি ঝানস্স অপ্পগুণতং দস্সেন্তো, ‘‘সুপ্পমত্তে ৰা’’তিআদিমাহ. ঝানস্স অপ্পানুভাৰতায এৰ তন্নিমিত্তা পভাপি অপ্পতরা অপরিসুদ্ধাৰ হোতীতি আহ – ‘‘ৰণ্ণো…পে… সংকিলিট্ঠো চা’’তি. দুতিযনযো ৰুত্তৰিপরিযাযেন ৰেদিতব্বো. তত্থাপি কসিণস্স পরিত্তভাৰেন ৰণ্ণস্স পরিত্ততা, পরিত্তারম্মণায অনুরূপতায ৰা নিমিত্তং পভামণ্ডলকম্পি পরিত্তমেৰ সিযাতি অধিপ্পাযো. ৰিপুলপরিকম্মন্তি ৰিপুলভাৰেন পরিকম্মং. সেসং ততিযচতুত্থনযেসু ৰত্তব্বং পঠমদুতিযনযেসু ৰুত্তসদিসমেৰ.

ৰণ্ণনানত্তন্তি যদি পীতং যদি লোহিতং যদি ৰা ওদাতন্তি সরীরৰণ্ণনানত্তং. আভানানত্তন্তি পরিত্তৰিপুলতাৰসেন পভায নানত্তং. অচ্চিনানত্তন্তি তেজোধাতুস্স দীঘাদিৰসেন ৰেমত্ততা. অভিনিৰিসন্তীতি অভিরতিৰসেন নিৰিসন্তি নিসীদন্তি তিট্ঠন্তি. তেনাহ ‘‘ৰসন্তী’’তি.

২৩৪. আভন্তি দিব্বন্তীতি আভাতি আহ ‘‘আভাসম্পন্না’’তি. তদঙ্গেনাতি ৰা তস্সা পরিত্ততায অপ্পমাণতায চ আভাকারণং, তং পন অত্থতো ভৰূপপত্তিকারণমেৰাতি আহ – ‘‘তস্সা ভৰূপপত্তিযা অঙ্গেনা’’তি. কাযালসিযভাৰো তন্দীআদীনং হেতুভূতা কাযস্স ৰিত্থাযিততা.

২৩৫. পারমিযোতি মহাসাৰকসংৰত্তনিকা সাৰকপারমিযো পূরেন্তো. ব্রহ্মলোকেতি ব্রহ্মত্তভাৰে, ব্রহ্মলোকে ৰা উপ্পত্তিং পটিলভি, ৰুত্তম্পি চেতং থেরগাথাসু. অৰোকিণ্ণন্তি অঞ্ঞেহি অসম্মিস্সন্তি অত্থো. পুব্বে সঞ্চরিতন্তি অতীতভৰেসু জাতিৰসেন সঞ্চরণং মম, সঞ্চরিতন্তি তং মমস্সাতি অত্থো. সেসং সুৰিঞ্ঞেয্যমেৰ.

অনুরুদ্ধসুত্তৰণ্ণনায লীনত্থপ্পকাসনা সমত্তা.

৮. উপক্কিলেসসুত্তৰণ্ণনা

২৩৬. তস্মাতি অত্থকামত্তা এৰমাহ, ন ভগৰতো ৰচনং অনাদিযন্তো. যে পন তদা সত্থুৰচনং ন গণ্হিংসু, তে কিঞ্চি অৰত্ৰা তুণ্হীভূতা মঙ্কুভূতা অট্ঠংসু, তস্মা উভযেসম্পি সত্থরি অগারৰপটিপত্তি নাহোসি.

যেনপি জনেন ন দিট্ঠোতি যেন উভযজনেন অঞ্ঞৰিহিততায কুড্ডকৰাটাদিঅন্তরিকতায ৰা ন দিট্ঠো. দমনত্থন্তি তেহি উপাসকেহি নিম্মদভাৰং আপাদিতানং তেসং ভিক্খূনং দমনত্থং. ঠপযিংসূতি যো ইমেসং ভিক্খূনং দেতি, তস্স সতং দণ্ডোতি, সহস্সন্তি চ ৰদন্তি.

২৩৭. ৰগ্গভাৰেনেৰ (সারত্থ. টী. মহাৰগ্গো ৩.৪৬৪) নানাসদ্দো অস্সাতি পুথুসদ্দো. সমজনোতি ভণ্ডনে সমজ্ঝাসযো জনো. বাললক্খণে ঠিতোপি ‘‘অহং বালো’’তি ন মঞ্ঞতি. ভিয্যো চাতি অত্তনো বালভাৰস্স অজাননতোপি ভিয্যো চ ভণ্ডনস্স উপরি ফোটো ৰিয সঙ্ঘভেদস্স অত্তনো কারণভাৰম্পি উপ্পজ্জমানং ন মঞ্ঞি নঞ্ঞাসি.

কলহৰসেন পৰত্তৰাচাযেৰ গোচরো এতেসন্তি ৰাচাগোচরা হুত্ৰা. মুখাযামন্তি ৰিৰাদৰসেন মুখং আযমেত্ৰা ভাণিনো. ন তং জানন্তীতি তং কলহং ন জানন্তি. কলহং করোন্তো চ তং ন জানন্তো নাম নত্থি. যথা পন ন জানন্তি, তং দস্সেতুং আহ – ‘‘এৰং সাদীনৰো অয’’ন্তি. অযং কলহো নাম অত্তনো পরেসঞ্চ অত্থজাপনতো অনত্থুপ্পাদনতো দিট্ঠেৰ ধম্মে সম্পরাযে চ সাদীনৰো, সদোসোতি অত্থো.

উপনয্হন্তীতি উপনাহৰসেন অনুবন্ধন্তি. পোরাণোতি পুরিমেহি বুদ্ধাদীহি আচিণ্ণসমাচিণ্ণতায পুরাতনো.

ন জানন্তীতি অনিচ্চসঞ্ঞং ন পচ্চুপট্ঠাপেন্তি.

তথা পৰত্তৰেরানন্তি অট্ঠিছিন্নাদিভাৰং নিস্সায উপনযৰসেন চিরকালং পৰত্তৰেরানং.

বালসহাযতায ইমে ভিক্খূ কলহপসুতা, পণ্ডিতসহাযানং পন ইদং ন সিযাতি পণ্ডিতসহাযস্স বালসহাযস্স চ ৰণ্ণাৰণ্ণদীপনত্থং ৰুত্তা. সীহব্যগ্ঘাদিকে পাকটপরিস্সযে রাগদোসাদিকে পটিচ্ছন্নপরিস্সযে চ অভিভৰিত্ৰা.

মাতঙ্গো অরঞ্ঞে মাতঙ্গরঞ্ঞেতি সরলোপেন সন্ধি. মাতঙ্গসদ্দেনেৰ হত্থিভাৰস্স ৰুত্তত্তা নাগৰচনং তস্স মহত্তৰিভাৰনত্থন্তি আহ – ‘‘নাগোতি মহন্তাধিৰচনমেত’’ন্তি. মহন্তপরিযাযোপি হি নাগ-সদ্দো হোতি ‘‘এৰং নাগস্স নাগেন, ঈসাদন্তস্স হত্থিনো’’তিআদীসু (উদা. ২৫; মহাৰ. ৪৬৭).

২৩৮. কিরসদ্দো অনুস্সৰসূচনত্থো নিপাতো. তেন অযমেত্থ সুতিপরম্পরাতি দস্সেতি. ভগৰতা হি সো আদীনৰো পগেৰ পরিঞ্ঞাতো, ন তেন সত্থা নিব্বিণ্ণো হোতি; তস্মিং পন অন্তোৰস্সে কেচি বুদ্ধৰেনেয্যা নাহেসুং; তেন অঞ্ঞত্থ গমনং তেসং ভিক্খূনং দমনুপাযোতি পালিলেয্যকং উদ্দিস্স গচ্ছন্তো একৰিহারিং আযস্মন্তং ভগুং, সমগ্গৰাসং ৰসন্তে চ অনুরুদ্ধত্থেরাদিকে সম্পহংসেতুং অনুরুদ্ধত্থেরস্স চ. ইমং উপক্কিলেসোৰাদং দাতুং তত্থ গতো, তস্মা কলহকারকে কিরস্সাতি এত্থাপি কিরসদ্দগ্গহণে এসেৰ নযো. ৰুত্তনযমেৰ গোসিঙ্গসালসুত্তে (ম. নি. ১.৩২৫ আদযো).

২৪১. ‘‘যথা কথং পনা’’তি ৰুত্তপুচ্ছানং পচ্ছিমভাৰতো ‘‘অত্থি পন ৰোতি পচ্ছিমপুচ্ছাযা’’তি ৰুত্তং, ন পুন ‘‘অত্থি পন ৰো’’তি পৰত্তনস্স পুচ্ছনস্স অত্থিভাৰতো. সো পন লোকুত্তরধম্মো. থেরানন্তি অনুরুদ্ধত্থেরাদীনং নত্থি. পরিকম্মোভাসং পুচ্ছতীতি দিব্বচক্খুঞাণে কতাধিকারত্তা তস্স উপ্পাদনত্থং পরিকম্মোভাসং পুচ্ছতি. পরিকম্মোভাসন্তি পরিকম্মসমাধিনিব্বত্তং ওভাসং, উপচারজ্ঝানসঞ্জনিতং ওভাসন্তি অত্থো. চতুত্থজ্ঝানলাভী হি দিব্বচক্খুপরিকম্মত্থং ওভাসকসিণং ভাৰেত্ৰা উপচারে ঠপিতো সমাধি পরিকম্মসমাধি, তত্থ ওভাসো পরিকম্মোভাসোতি ৰুত্তো. তং সন্ধাযাহ – ‘‘ওভাসঞ্চেৰ সঞ্জানামাতি পরিকম্মোভাসং সঞ্জানামা’’তি. যত্তকে হি ঠানে দিব্বচক্খুনা রূপগতং দট্ঠুকামো, তত্তকং ঠানং ওভাসকসিণং ফরিত্ৰা ঠিতো. তং ওভাসং তত্থ চ রূপগতং দিব্বচক্খুঞাণেন পস্সতি, থেরা চ তথা পটিপজ্জিংসু. তেন ৰুত্তং – ‘‘ওভাসঞ্চেৰ সঞ্জানাম দস্সনঞ্চ রূপান’’ন্তি. যস্মা পন তেসং রূপগতং পস্সন্তানং পরিকম্মৰারো অতিক্কমি, ততো ওভাসো অন্তরধাযি, তস্মিং অন্তরহিতে রূপগতম্পি ন পঞ্ঞাযতি. পরিকম্মন্তি হি যথাৰুত্তকসিণারম্মণং উপচারজ্ঝানং, রূপগতং পস্সন্তানং কসিণোভাসৰসেন রূপগতদস্সনং, কসিণোভাসো চ পরিকম্মৰসেনাতি তদুভযম্পি পরিকম্মস্স অপ্পৰত্তিযা নাহোসি, তযিদং কারণং আদিকম্মিকভাৰতো থেরা ন মঞ্ঞিংসু, তস্মা ৰুত্তং ‘‘নপ্পটিৰিজ্ঝামা’’তি.

নিমিত্তং পটিৰিজ্ঝিতব্বন্তি কারণং পচ্চক্খতো দস্সেত্ৰা সুৰিসুদ্ধদিব্বচক্খুঞাণে থেরং পতিট্ঠাপেতুকামো সত্থা ৰদতি. কিং ন আল়ুলেস্সন্তীতি কিং ন ব্যামোহেস্সন্তি, ব্যামোহেস্সন্তি এৰাতি অত্থো. ৰিচিকিচ্ছা উদপাদীতি দিব্বচক্খুনো যথাউপট্ঠিতেসু রূপগতেসু অপুব্বতায, ‘‘ইদং নু খো রূপগতং কিং, ইদং নু খো কি’’ন্তি মগ্গেন অসমুচ্ছিন্নত্তা ৰিচিকিচ্ছা সংসযো উপ্পজ্জি. সমাধি চৰীতি ৰিচিকিচ্ছায উপ্পন্নত্তা পরিকম্মসমাধি ৰিগচ্ছি. ততো এৰ হি পরিকম্মোভাসোপি অন্তরধাযি, দিব্বচক্খুনাপি রূপং ন পস্সি. ন মনসি করিস্সামীতি মনসিকারৰসেন মে রূপানি উপট্ঠহিংসু, রূপানি পস্সতো ৰিচিকিচ্ছা উপ্পজ্জতি, তস্মা ইদানি কিঞ্চি ন মনসি করিস্সামীতি তুণ্হী অহোসি তং পন তুণ্হীভাৰপ্পত্তিং সন্ধাযাহ ‘‘অমনসিকারো উদপাদী’’তি.

তথাভূতস্স অমনসিকারস্স অভাৰং আগম্ম উপ্পিলং উদপাদি. ৰীরিযং গাল়্হং পগ্গহিতন্তি থিনমিদ্ধছম্ভিতত্তানং ৰূপসমনত্থং অচ্চারদ্ধৰীরিযং অহোসি, তেন চিত্তে সমাধিদূসিকা গেহস্সিতা বলৰপীতি উপ্পন্না. তেনাহ ‘‘উপ্পিলং উপ্পন্ন’’ন্তি. ততোতি সিথিলৰীরিযত্তা. পতমেয্যাতি অতিৰিয খিন্নং ভৰেয্য. তং মমাতি পত্থনাঅভিভৰনীযমনসীসেন জপ্পেতীতি অভিজপ্পা, তণ্হা. নানত্তা নানাসভাৰা সঞ্ঞা নানত্তসঞ্ঞা. অতিৰিয উপরি কত্ৰা নিজ্ঝানং পেক্খনং অতিনিজ্ঝাযিতত্তং.

২৪৩. পরিকম্মোভাসমেৰাতি পরিকম্মসমুট্ঠিতং ওভাসমেৰ. ন চ রূপানি পস্সামীতি ওভাসমনসিকারপসুততায দিব্বচক্খুনা রূপানি ন পস্সামি. ৰিসযরূপমেৰাতি তেন ফরিত্ৰা ঠিতট্ঠানেৰ দিব্বচক্খুনো ৰিসযভূতং রূপগতমেৰ মনসি করোমি.

কসিণরূপানং ৰসেনেত্থ ওভাসস্স পরিত্ততাতি আহ ‘‘পরিত্তট্ঠানে ওভাস’’ন্তি. পরিত্তানি রূপানীতি কতিপযানি, সা চ নেসং পরিত্ততা ঠানৰসেনেৰাতি আহ ‘‘পরিত্তকট্ঠানে রূপানী’’তি. ‘‘অপ্পমাণঞ্চেৰা’’তিআদিনা ৰুত্তো দুতিযৰারো. ওভাসপরিত্ততং সন্ধায পরিকম্মসমাধি ‘‘পরিত্তো’’তি ৰুত্তো তস্সেৰ ওভাসস্স অপ্পমাণতায অপ্পমাণসমাধীতি ৰচনতো. তস্মিং সমযেতি তস্মিং পরিত্তসমাধিনো উপ্পন্নসমযে. দিব্বচক্খুপি পরিত্তকং হোতি পরিত্তরূপগতদস্সনতো.

২৪৫. দুকতিকজ্ঝানসমাধিন্তি চতুক্কনযে দুকজ্ঝানসমাধিং, পঞ্চকনযে তিকজ্ঝানসমাধিন্তি যোজনা. দুকজ্ঝানসমাধিন্তি চতুক্কনযে ততিযচতুত্থৰসেন দুকজ্ঝানসমাধিং, পঞ্চকনযে চতুত্থপঞ্চমৰসেন দুকজ্ঝানসমাধিং. তিকচতুক্কজ্ঝানসমাধিন্তি চতুক্কনযে তিকজ্ঝানসমাধিং, পঞ্চকনযে চতুক্কজ্ঝানসমাধিন্তি যোজনা.

তিৰিধন্তি সপ্পীতিকৰসেন তিপ্পকারং সমাধিং. তদন্তোগধাতি সপ্পীতিকাদিসভাৰা. কামং ভগৰা পুরিমযামে পুব্বেনিৰাসানুস্সতিঞাণং, পচ্ছিমযামে দিব্বচক্খুঞাণং নিব্বত্তেন্তোপি ইমানি ঞাণানি ভাৰেসিযেৰ. ৰিপস্সনাপাদকানি পন ঞাণানি সন্ধায, ‘‘পচ্ছিমযামে’’তি ৰুত্তং, তেনাহ ‘‘ভগৰতো হী’’তিআদি. পঞ্চমজ্ঝানস্সাতি পঞ্চমজ্ঝানিকস্স ৰসেন পঠমজ্ঝানিকো মগ্গো নত্থি. সোতি পঞ্চকনযো ভগৰতো লোকিযো অহোসি. এতন্তি এতং, ‘‘সৰিতক্কম্পি সৰিচারং সমাধিং ভাৰেমী’’তিআদিৰচনং. লোকিযলোকুত্তরমিস্সকং সন্ধায ৰুত্তং, ন ‘‘লোকিযং ৰা লোকুত্তরমেৰ ৰা’’তি. সেসং সুৰিঞ্ঞেয্যমেৰাতি.

উপক্কিলেসসুত্তৰণ্ণনায লীনত্থপ্পকাসনা সমত্তা.

৯. বালপণ্ডিতসুত্তৰণ্ণনা

২৪৬. এতেহীতি দুচিন্তিতাদীহি. এতেন লক্খণসদ্দস্স করণত্থতমাহ. তানেৰাতি লক্খণানি এৰ. তস্সাতি বালস্স. ‘‘অযং বালো’’তি নিমীযতি সঞ্চানীযতি এতেহীতি বালনিমিত্তানি. অপদানং ৰুচ্চতি ৰিখ্যাতং কম্মং. দুচিন্তিতাদীনি চ বালে ৰিখ্যাতানি, অৰধারণভাৰে ৰা, তস্মা বালস্স অপদানানীতি বালাপদানানি. অভিজ্ঝাদীহি দুট্ঠং দূসিতং চিন্তেতীতি দুচিন্তিতচিন্তী. লোভাদীহি দুট্ঠং ভাসিতং মুসাৰাদাদিং ভাসতীতি দুব্ভাসিতভাসী. তেসং তেসংযেৰ ৰসেন কত্তব্বতো দুক্কটকম্মং পাণাতিপাতাদিং করোতীতি দুক্কটকম্মকারী. তেনাহ ‘‘চিন্তযন্তো’’তিআদি. তানি উপনিস্সায জাতন্তি তজ্জং. ততো এৰ তেসং সারুপ্পং অনুরূপন্তি তস্সারুপ্পং. তেনাহ ‘‘তজ্জাতিক’’ন্তিআদি. কচ্ছমানাযাতি কথিযমানায.

২৪৮. যস্মা সত্তানং যথূপচিতানি কম্মানি কতোকাসানি তদুপট্ঠাপিতানি কম্মনিমিত্তগতিনিমিত্তানি মরণস্স আসন্নকালে চিত্তস্স আপাথং আগচ্ছন্তানি, তদা ওলম্বন্তানি ৰিয অভিভৰন্তানি ৰিয অজ্ঝোত্থরন্তানি ৰিয উপট্ঠহন্তি, তস্মা ৰুত্তং – ‘‘ওলম্বনাদিআকারেন হি তানি উপট্ঠহন্তী’’তি. উপট্ঠানাকারো এৰ তদা চিত্তস্স গোচরভাৰং গচ্ছতীতি আহ – ‘‘তস্মিং উপট্ঠানাকারে আপাথগতে’’তি.

২৪৯. ন সক্কাতি ন ৰদতীতি এতেন দ্ৰেপি পটিসেধা পকতিঅত্থাতি অযমত্থো ৰুত্তো হোতি. ন সুকরাতি পন ইমিনা দুক্করভাৰো দীপিতো, দুক্করঞ্চ তাৰ উপাযেন সক্কা কাতুন্তি দস্সেন্তো আহ – ‘‘ন সুকরং পনা’’তিআদি. তেনাতি ৰিনিৰিজ্ঝিত্ৰা গমনেন অঞ্ঞমঞ্ঞং সংৰিজ্ঝনেন. অস্সাতি চোরস্স. ইতো উত্তরিপীতি মজ্ঝন্হিকসমযং সাযন্হসমযঞ্চ সত্তিসতেন.

২৫০. সঙ্খম্পি ন উপেতীতি ইমিনা সঙ্খাতব্বমত্তং নত্থীতি দীপিতং হোতীতি আহ – ‘‘গণনামত্তম্পি ন গচ্ছতী’’তি. উপনিক্খেপনমত্তম্পীতি এত্থাপি এসেৰ নযো. কলভাগন্তি কলানং সঙ্গণনকোট্ঠাসং. তেনাহ ‘‘সতিমং কল’’ন্তিআদি. ওলোকিতমত্তম্পীতি উপনিক্খেপনৰসেন ওলোকনমত্তকম্পি. তং কম্মকারণন্তি তং পঞ্চৰিধবন্ধনকম্মকারণং চতুন্নম্পি পস্সানং ৰসেন সম্পরিৰত্তেত্ৰা করোন্তিযেৰ, পাল়িযং পন একপস্সৰসেন আগতা. গেহস্সাতি মহতো গেহস্স. সব্বতোতি সব্বাৰযৰতো. সম্পজ্জলিতে একজালীভূতে. সুপক্কুথিতাযাতি সুট্ঠু নিপক্কায.

ৰিভত্তোতি তত্থ নিব্বত্তকসত্তানং সাধারণকম্মুনা ৰিভত্তো ৰিয নিব্বত্তো. অযোপাকারেন পরিতো অত্তো গহিতোতি অযোপাকারপরিযত্তো পরিক্খিত্তো.

যমকগোল়কাতি দারকানং কীল়নযুগল়া. এৰম্পি দুক্খোতি যথাৰুত্তউস্সদনিরযৰসেনপি সোত-ঘান-জিৰ্হা-কায-মনো-গোচরতাৰসেনপি ইমিনা আকারেন দুক্খোতি.

২৫১. দন্তেহি উল্লেহিত্ৰাতি উত্তরদন্তেহি অঞ্ছিত্ৰা. রসৰসেন অতিত্তো অস্সাদো রসাদো. তেনাহ ‘‘রসগেধেন পরিভুত্তরসো’’তি.

২৫২. দুরূপোতি ৰিরূপো. দুদ্দসোতি তেনেৰ ৰিরূপভাৰেন অনিট্ঠদস্সনো. লকুণ্ঠকোতি রস্সো. পৰিট্ঠগীৰোতি খন্ধন্তরং অনুপৰিট্ঠগীৰো. মহোদরোতি ৰিপুলকুচ্ছি. যেভুয্যেন হি লকুণ্টকা সত্তা রস্সগীৰা পুথুলকুচ্ছিকাৰ হোন্তীতি তথা ৰুত্তং. কাণো নাম চক্খুৰিকলোতি ৰুত্তং – ‘‘একক্খিকাণো ৰা উভযক্খিকাণো ৰা’’তি. কুণীতি হত্থৰিকলো ৰুচ্চতীতি আহ – ‘‘একহত্থকুণী ৰা উভযহত্থকুণী ৰা’’তি. ৰাতাদিনা উপহতকাযপক্খো ইধ পক্খহতোতি অধিপ্পেতো, ন পক্খিহতোতি আহ – ‘‘পক্খহতোতি পীঠসপ্পী’’তি. দুক্খানুপবন্ধদস্সনত্থন্তি অপরাপরজাতীসু ৰিপাকদুক্খস্স অনুপবন্ধৰসেন পৰত্তিদস্সনত্থং.

কলীযতি খলীযতি অপ্পহীযতি সাসনং এতেনাতি কলি, জুতপরাজযো. সো এৰ গহসদিসতায ‘‘কলিগ্গহো’’তি ৰুত্তো. অধিবন্ধন্তি কুটুম্বস্স অধিৰুত্থস্স মূলভূতস্স অত্তনো বন্ধিতব্বতং. তেনাহ ‘‘অত্তনাপি বন্ধং নিগচ্ছেয্যা’’তি. বালভূমিযা বালভাৰস্স মত্থকপ্পত্তি নিরযগামিকম্মকারিতাতি ‘‘নিরযে নিব্বত্ততি’’চ্চেৰ ৰুত্তং. তগ্গহণেনেৰ পন ততো মুদুমুদুতরাদিকম্মৰসেন সেসাপাযেসু অপরাপরনিব্বত্তাদিবালভূমি ৰিভাৰিতা হোতীতি.

২৫৩. ৰুত্তানুসারেনাতি ‘‘বালো অয’’ন্তিআদিনা ৰুত্তস্স অত্থৰচনস্স ‘‘পণ্ডিতো অয’’ন্তি এতেহি লক্খীযতীতিআদিনা অনুসারেন. মনোসুচরিতাদীনং ৰসেনাতি চিন্তেন্তো অনভিজ্ঝা-অব্যাপাদ-সম্মাদস্সনং সুচিন্তিতমেৰ চিন্তেতীতিআদিনা মনোসুচরিতানং তিণ্ণং সুচরিতানং ৰসেন যোজেতব্বানি.

চক্করতনৰণ্ণনা

২৫৬. উপোসথং (দী. নি. টী. ২.২৪৩) ৰুচ্চতি অট্ঠঙ্গসমন্নাগতং সব্বদিৰসেসু গহট্ঠেহি রক্খিতব্বসীলং, সমাদানৰসেন তং এতস্স অত্থীতি উপোসথিকো, তস্স. তেনাহ ‘‘সমাদিন্নউপোসথঙ্গস্সা’’তি. তদাতি তস্মিং কালে, যস্মিং পন কালে চক্কৰত্তিভাৰসংৰত্তনিয-দান-সীলাদি-পুঞ্ঞসম্ভারসমুদাগমসম্পন্নো পূরিতচক্কৰত্তিৰত্তো কাদীপদেসৰিসেসপচ্চাজাতিযা চেৰ কুলরূপভোগাধিপতেয্যাদিগুণৰিসেসসম্পত্তিযা চ তদনুরূপে অত্তভাৰে ঠিতো হোতি, তস্মিং কালে. তাদিসে হি কালে চক্কৰত্তিভাৰী পুরিসুত্তমো যথাৰুত্তগুণসমন্নাগতো রাজা খত্তিযো হুত্ৰা মুদ্ধাৰসিত্তো ৰিসুদ্ধসীলো অনুপোসথং সতসহস্সৰিস্সজ্জনাদিনা সম্মাপটিপত্তিং পটিপজ্জতি, ন যদা চক্করতনং উপ্পজ্জতি, তদা এৰ. তেনাহ – ‘‘পাতো…পে… ধম্মতা’’তি. (তত্থ দমো ইন্দ্রিযসংৰরো, সংযমো সীলসংৰরো.)

ৰুত্তপ্পকারপুঞ্ঞকম্মপচ্চযন্তি চক্কৰত্তিভাৰাৰহদানদমসংযমাদিপুঞ্ঞকম্মহেতুকং. নীলমণিসঙ্ঘাটসদিসন্তি ইন্দনীলমণিসঞ্চযসমানং. দিব্বানুভাৰযুত্তত্তাতি দস্সনীযতা মনুঞ্ঞঘোসতা আকাসগামিতা ওভাসৰিস্সজ্জনা অপ্পটিঘাততা রঞ্ঞো ইচ্ছিতত্থনিপ্ফত্তিকারণতাতি এৰমাদীহি দিব্বসদিসেহি আনুভাৰেহি সমন্নাগতত্তা. সব্বেহি আকারেহীতি সব্বেহি সুন্দরেহি আকারেহি. পরিপূরন্তি পরিপুণ্ণং. সা চস্স পারিপূরি ইদানেৰ ৰিত্থারীযতি.

পনাল়ীতি ছিদ্দং. সুদ্ধসিনিদ্ধদন্তপন্তিযা নিব্বিৰরাযাতি অধিপ্পাযো. নাভিপনাল়ি পরিক্খেপপট্টেসূতি নাভিপরিক্খেপপট্টে চেৰ নাভিযা পনাল়িপরিক্খেপপট্টে চ. সুৰিভত্তাৰাতি অঞ্ঞমঞ্ঞং অসংকিণ্ণত্তা সুট্ঠু ৰিভত্তা. পরিচ্ছেদলেখন্তরেসু মণিকা সুৰিভত্তা হুত্ৰা পঞ্ঞাযন্তীতি ৰদন্তি.

পরিচ্ছেদলেখাদীনীতি আদি-সদ্দেন মালাকম্মাদিং সঙ্গণ্হাতি. সুরত্তাতিআদীসু সুরত্তগ্গহণেন মহানামৰণ্ণতং পটিক্খিপতি, সুদ্ধগ্গহণেন সংকিলিট্ঠতং, সিনিদ্ধগ্গহণেন লূখতং. কামং তস্স চক্করতনস্স নেমিমণ্ডলং অসন্ধিকংৰ নিব্বত্তং, সব্বত্থকমেৰ পন কেৰলং পৰাল়ৰণ্ণোৰ ন সোভতীতি পকতিচক্কস্স সন্ধিযুত্তেসু ঠানেসু রত্তজম্বুনদপরিক্খতং অহোসি, তং সন্ধায ৰুত্তং ‘‘সন্ধীসু পনস্সা’’তিআদি.

নেমিমণ্ডলপিট্ঠিযন্তি নেমিমণ্ডলস্স পিট্ঠিপদেসে. দসন্নং দসন্নং অরানমন্তরেতি দসন্নং দসন্নং অরানং অন্তরসমীপে পদেসে. ছিদ্দমণ্ডলচিত্তোতি মণ্ডলসণ্ঠানছিদ্দৰিচিত্তো. সুকুসলসমন্নাহতস্সাতি সুট্ঠু কুসলেন সিপ্পিনা পহতস্স, ৰাদিতস্সাতি অত্থো. ৰগ্গূতি মনোরমো রজনীযোতি সুণন্তানং রাগুপ্পাদকো. কমনীযোতি কন্তো. সমোসরিতকুসুমদামাতি ওলম্বিতসুগন্ধকুসুমদামা. নেমিপরিক্খেপস্সাতি নেমিপরিযন্তপরিক্খেপস্স. নাভিপনাল়িযা দ্ৰিন্নং পস্সানং ৰসেন ‘‘দ্ৰিন্নম্পি নাভিপনাল়ীন’’ন্তি ৰুত্তং. একা এৰ হি সা পনাল়ি. যেহীতি যেহি দ্ৰীহি সীহমুখেহি. পুন যেহীতি মুত্তাকলাপেহি.

ওধাপযমানন্তি সোতুং অৰহিতানি কুরুমানং. চন্দো পুরতো, চক্করতনং পচ্ছাতি এৰং পুব্বাপরিযেন পুব্বাপরভাগেন.

অন্তে পুরস্সাতি অনুরাধপুরে রঞ্ঞো অন্তেপুরস্স উত্তরসীহপঞ্জরআসন্নে তদা রঞ্ঞো পাসাদে তাদিসস্স উত্তরদিসায সীহপঞ্জরস্স লব্ভমানত্তা ৰুত্তং. সুখেন সক্কাতি কিঞ্চি অনারুহিত্ৰা সরীরঞ্চ অনুল্লঙ্ঘিত্ৰা যথাঠিতেনেৰ হত্থেন পুপ্ফমুট্ঠিযো খিপিত্ৰা সুখেন সক্কা হোতি পূজেতুং.

নানাৰিরাগরতনপ্পভাসমুজ্জলন্তি নানাৰিধচিত্তৰণ্ণরতনোভাসপভস্সরং. আকাসং অব্ভুগ্গন্ত্ৰা পৰত্তেতি. আগন্ত্ৰা ঠিতট্ঠানতো উপরি আকাসং অব্ভুগ্গন্ত্ৰা পৰত্তে.

সন্নিৰেসক্খমোতি খন্ধৰারসন্নিৰেসযোগ্যো. সুলভাহারূপকরণোতি সুখেনেৰ লদ্ধব্বধঞ্ঞগোরসদারুতিণাদিভোজনসাধনো. পরচক্কন্তি পরস্স রঞ্ঞো সেনা, আণা ৰা.

আগতনন্দনোতি আগতো হুত্ৰা নন্দিজননো. আগতং ৰা আগমনং, তেন নন্দতীতি আগতনন্দনো. গমনেন সোচেতীতি গমনসোচনো. উপকপ্পেথাতি উপরূপরি কপ্পেথ সংৰিদহথ, উপনেথাতি অত্থো. উপপরিক্খিত্ৰাতি হেতুতোপি সভাৰতোপি ফলতোপি দিট্ঠধম্মিকসম্পরাযিকআদীনৰতোপি ৰীমংসিত্ৰা.

ৰিভাৰেন্তি পঞ্ঞায অত্থং ৰিভূতং করোন্তীতি ৰিভাৰিনো, পঞ্ঞৰন্তো. অনুযন্তাতি অনুৰত্তকা. ওগচ্ছমানন্তি ওসীদন্তং. যোজনমত্তন্তি ৰিত্থারতো যোজনমত্তং পদেসং. গম্ভীরভাৰেন পন যথা ভূমি দিস্সতি, এৰং ওগচ্ছতি. তেনাহ ‘‘মহাসমুদ্দতল’’ন্তিআদি. অন্তে চক্করতনং উদকেন সেনায অনজ্ঝোত্থরণত্থং.

২৫৭. পুরত্থিমো সমুদ্দো পরিযন্তো অস্সাতি পুরত্থিমসমুদ্দপরিযন্তো, পুরত্থিমসমুদ্দং পরিযন্তং কত্ৰা. চাতুরন্তাযাতি চাতুসমুদ্দন্তায পুব্বৰিদেহাদিচতুকোট্ঠাসন্তায.

হত্থিরতনৰণ্ণনা

২৫৮. হরিচন্দনাদীহীতি আদি-সদ্দেন চতুজ্জাতিযগন্ধাদিং সঙ্গণ্হাতি. আগমনং চিন্তেথাতি ৰদন্তি চক্কৰত্তিৰত্তস্স পূরিততায পরিচিতত্তা. ভূমিফুসনকেহি ৰালধি, ৰরঙ্গং হত্থোতি ইমেহি চ তীহি, চতূহি পাদেহি চাতি সত্তহি অৰযৰেহি ঠিতত্তা সত্তপতিট্ঠো. ইতরেসং অমচ্চাদীনং চিন্তযন্তানং ন আগচ্ছতি. অপনেত্ৰাতি অত্তনো আনুভাৰেন অপনেত্ৰা. গন্ধমেৰ হি তস্স ইতরে হত্থিনো ন সহন্তি.

অস্সরতনৰণ্ণনা

সিন্ধৰকুলতোতি সিন্ধৰস্সাজানীযকুলতো.

মণিরতনৰণ্ণনা

সকটনাভিসমপ্পমাণন্তি পরিণাহতো মহাসকটস্স নাভিযা সমপ্পমাণং. উভোসু অন্তেসূতি হেট্ঠা উপরি চাতি দ্ৰীসু অন্তেসু. কণ্ণিকপরিযন্ততোতি দ্ৰিন্নং কঞ্চনপদুমানং কণ্ণিকায পরিযন্ততো. মুত্তাজালকে ঠপেত্ৰাতি সুৰিসুদ্ধে মুত্তামযে জালকে পতিট্ঠপেত্ৰা.

ইত্থিরতনৰণ্ণনা

‘‘ইত্থিরতনং পাতুভৰতী’’তি ৰত্ৰা অস্স পাতুভৰনাকারং দস্সেতুং, ‘‘মদ্দরাজকুলতো ৰা’’তিআদি ৰুত্তং. মদ্দরট্ঠং কির অভিরূপানং ইত্থীনং উপ্পত্তিট্ঠানং. সণ্ঠানপারিপূরিযাতি হত্থপাদাদিসরীরাৰযৰানং সুসণ্ঠিততায. অৰযৰপারিপূরিযা হি সমুদাযপারিপূরিসিদ্ধি. রূপন্তি সরীরং. দস্সনীযাতি সুরূপভাৰেন পস্সিতব্বযুত্তা. সোমনস্সৰসেন চিত্তং পসাদেতি যোনিসো চিন্তেন্তানং কম্মফলসদ্ধায ৰসেন. পসাদাৰহত্তাতি কারণৰচনেন যথা পাসাদিকতায ৰণ্ণপোক্খরতাসিদ্ধি ৰুত্তা, এৰং দস্সনীযতায পাসাদিকতাসিদ্ধি, অভিরূপতায চ দস্সনীযতাসিদ্ধি ৰত্তব্বাতি নযং দস্সেতি. পটিলোমতো ৰা ৰণ্ণপোক্খরতায পাসাদিকতাসিদ্ধি, পাসাদিকতায দস্সনীযতাসিদ্ধি, দস্সনীযতায অভিরূপতাসিদ্ধি যোজেতব্বা. এৰং সরীরসম্পত্তিৰসেন অভিরূপতাদিকে দস্সেত্ৰা ইদানি সরীরে দোসাভাৰৰসেনপি তে দস্সেতুং, ‘‘অভিরূপা ৰা’’তিআদি ৰুত্তং. তত্থ যথা পমাণযুত্তা, এৰং আরোহপরিণাহযোগতো চ পাসাদিকা নাতিদীঘতাদযো. এৰং মনুস্সানং দিব্বরূপতাসম্পত্তিপীতি ‘‘অপ্পত্তা দিব্বৰণ্ণ’’ন্তি ৰুত্তং. কাযৰিপত্তিযাতি সরীরদোসস্স. অভাৰোতি অচ্চন্তমেৰ দূরীভাৰো.

সতৰিহতস্সাতি সতক্খত্তুং ৰিহতস্স. সতৰিহতস্সাতি চ ইদং কপ্পাসপিচুৰসেন ৰুত্তং, তূলপিচুনো পন ৰিহননমেৰ নত্থি. কুঙ্কুমতগরতুরুক্খযৰনপুপ্ফানি চতুজ্জাতি. তমালতগরতুরুক্খযৰনপুপ্ফানীতি অপরে.

অগ্গিদড্ঢা ৰিযাতি আসনগতেন অগ্গিনা দড্ঢা ৰিয. পঠমমেৰাতি অঞ্ঞকিচ্চতো পঠমমেৰ, দস্সনসমকালমেৰাতি অত্থো. তং তং অত্তনা রঞ্ঞো কাতব্বকিচ্চং কিং করোমীতি পুচ্ছিতব্বতায কিং করণন্তি পটিস্সাৰেতীতি কিঙ্কারপটিস্সাৰিনী.

মাতুগামো নাম যেভুয্যেন সঠজাতিকো, ইত্থিরতনস্স পন তং নত্থীতি দস্সেতুং, ‘‘স্ৰাস্সা’’তিআদি ৰুত্তং. গুণাতি রূপগুণা চেৰ আচারগুণা চ. পুরিমকম্মানুভাৰেনাতি তস্সা পুরিমকম্মানুভাৰেন. ইত্থিরতনস্স তব্ভাৰসংৰত্তনিযপুরিমকম্মস্স আনুভাৰেন, চক্কৰত্তিনোপি পরিৰারসংৰত্তনিযং পুঞ্ঞকম্মং তাদিসস্স ফলৰিসেসস্স উপনিস্সযো হোতিযেৰ. তেনাহ ‘‘চক্কৰত্তিনো পুঞ্ঞং উপনিস্সাযা’’তি. এতেন সেসরতনেসুপি তেসং ৰিসেসানং তদুপনিস্সযতা ৰিভাৰিতা এৰাতি দট্ঠব্বং. পুব্বে একদেসৰসেন লব্ভমানপারিপূরী রঞ্ঞো চক্কৰত্তিভাৰূপগমনতো পট্ঠায সব্বাকারপারিপূরা জাতা.

গহপতিরতনৰণ্ণনা

পকতিযাৰাতি সভাৰেনেৰ, চক্করতনপাতুভাৰতো পুব্বেপি.

পরিণাযকরতনৰণ্ণনা

নিস্সাযাতি উপনিস্সায.

২৬০. কটগ্গহো ৰুচ্চতি জযগ্গহো সকানং পণানং কটভাৰেন অত্থসিদ্ধিৰসেন সঙ্গণ্হনন্তি কত্ৰা. তেনাহ ‘‘জযগ্গাহেনা’’তি. একপ্পহারেনেৰাতি একপ্পযোগেনেৰ সতসহস্সানি অধিগচ্ছেয্যাতি যোজনা. সেসং ৰুত্তনযত্তা সুৰিঞ্ঞেয্যমেৰ.

বালপণ্ডিতসুত্তৰণ্ণনায লীনত্থপ্পকাসনা সমত্তা.

১০. দেৰদূতসুত্তৰণ্ণনা

২৬১. দ্ৰে অগারাতিআদীতি আদি-সদ্দেন ‘‘সদ্ৰারা…পে… অনুৰিচরন্তেপী’’তি এতমত্থং সঙ্গণ্হাতি. এত্তকমেৰ হি অস্সপুরসুত্তে (ম. নি. ১.৪৩২; ম. নি. অট্ঠ. ১.৪৩২) ৰিত্থারিতং ৰেদিতব্বং. ‘‘দিব্বেন চক্খুনা’’তিআদি পন ৰিসুদ্ধিমগ্গে (ৰিসুদ্ধি. ২.৩৯৭) তথা ৰিত্থারিতম্পি সুত্তসংৰণ্ণনা হোতীতি কত্ৰা, ‘‘অস্সপুরসুত্তে ৰিত্থারিতমেৰা’’তি ৰুত্তং.

২৬২. নিরযতো পট্ঠায দেসনং দেৰলোকেন ওসাপেতীতি সংকিলেসধম্মেহি সংৰেজেত্ৰা ৰোদানধম্মেহি নিট্ঠাপেন্তো. দুতিযং পন ৰুত্তৰিপরিযাযেন ৰেদিতব্বং, তদিদং ৰেনেয্যজ্ঝাসযৰিসিট্ঠন্তি দট্ঠব্বং. ইদানি সঙ্খিপিত্ৰা ৰুত্তমত্থং ৰিৰরিতুং, ‘‘সচে’’তিআদি ৰুত্তং. সোতি ভগৰা.

একচ্চে থেরাতি (কথা. অনুটী. ৮৬৬-৮৬৮; অ. নি. টী. ২.৩.৩৬) অন্ধকাদিকে, ৰিঞ্ঞাণৰাদিনো চ সন্ধায ৰদতি. নেরযিকে নিরযে পালেন্তি ততো নিগ্গন্তুমপ্পদানৰসেন রক্খন্তীতি নিরযপালা. নেরযিকানং নরকদুক্খেন পরিযোনদ্ধায অলং সমত্থাতি ৰা নিরযপালা. তন্তি ‘‘নত্থি নিরযপালা’’তিৰচনং. পটিসেধিতমেৰাতি ‘‘অত্থি নিরযে নিরযপালা, অত্থি চ কারণিকা’’তিআদিনা নযেন অভিধম্মে (কথা. ৮৬৬) পটিসেধিতমেৰ. যদি নিরযপালা নাম ন সিযুং, কম্মকারণাপি ন ভৰেয্য. সতি হি কারণিকে কম্মকারণায ভৰিতব্বন্তি অধিপ্পাযো. তেনাহ ‘‘যথা হী’’তিআদি. এত্থাহ – ‘‘কিং পনেতে নিরযপালা নেরযিকা, উদাহু অনেরযিকা’’তি. কিঞ্চেত্থ – যদি তাৰ নেরযিকা, ইমে নিরযসংৰত্তনিযেন কম্মুনা নিব্বত্তাতি সযম্পি নিরযদুক্খং অনুভৰেয্যুং, তথা সতি অঞ্ঞেসং নেরযিকানং যাতনায অসমত্থা সিযুং, ‘‘ইমে নেরযিকা, ইমে নিরযপালা’’তি ৰৰত্থানঞ্চ ন সিযা, যে চ যে যাতেন্তি, তেহি সমানরূপবলপ্পমাণেহি ইতরেসং ভযসন্তাসা ন সিযুং. অথ অনেরযিকা, নেসং তত্থ কথং সম্ভৰোতি ৰুচ্চতে – অনেরযিকা নিরযপালা অনিরযগতিসংৰত্তনিযকম্মনিব্বত্তিতো. নিরযূপপত্তিসংৰত্তনিযকম্মতো হি অঞ্ঞেনেৰ কম্মুনা তে নিব্বত্তন্তি রক্খসজাতিকত্তা. তথা হি ৰদন্তি সব্বত্থিৰাদিনো –

‘‘কোধনা কুরূরকম্মন্তা, পাপাভিরুচিনো সদা;

দুক্খিতেসু চ নন্দন্তি, জাযন্তি যমরক্খসা’’তি. (কথা. অনুটী. ৮৬৬-৮৬৮; অ. নি. টী. ২.৩.৩৬);

তত্থ যদেকে ৰদন্তি ‘‘যাতনাদুক্খং পটিসংৰেদেয্যুং, অথ ৰা অঞ্ঞমঞ্ঞং যাতেয্যু’’ন্তিআদি, তযিদং অসারং নিরযপালানং নেরযিকভাৰস্সেৰ অভাৰতো. যদিপি অনেরযিকা নিরযপালা, অযোমযায পন আদিত্তায সম্পজ্জলিতায সজোতিভূতায নিরযভূমিযা পরিক্কমমানা কথং দাহদুক্খং নানুভৰন্তীতি? কম্মানুভাৰতো. যথা হি ইদ্ধিমন্তো চেতোৰসিপ্পত্তা মহামোগ্গল্লানাদযো নেরযিকে অনুকম্পন্তা ইদ্ধিবলেন নিরযভূমিং উপগতা দাহদুক্খেন ন বাধীযন্তি, এৰংসম্পদমিদং দট্ঠব্বং.

ইদ্ধিৰিসযস্স অচিন্তেয্যভাৰতোতি চে? ইদম্পি তংসমানং কম্মৰিপাকস্স অচিন্তেয্যভাৰতো. তথারূপেন হি কম্মুনা তে নিব্বত্তা. যথা নিরযদুক্খেন অবাধিতা এৰ হুত্ৰা নেরযিকে যাতেন্তি, ন চেত্তকেন বাহিরৰিসযাভাৰো যুজ্জতি ইট্ঠানিট্ঠতায পচ্চেকং দ্ৰারপুরিসেসু ৰিভত্তসভাৰত্তা. তথা হি একচ্চস্স দ্ৰারস্স পুরিসস্স চ ইট্ঠং একচ্চস্স অনিট্ঠং, একচ্চস্স চ অনিট্ঠং একচ্চস্স ইট্ঠং হোতি. এৰঞ্চ কত্ৰা যদেকে ৰদন্তি – ‘‘নত্থি কম্মৰসেন তেজসা পরূপতাপন’’ন্তিআদি, তদপাহতং হোতি. যং পন ৰদন্তি – ‘‘অনেরযিকানং নেসং কথং তত্থ সম্ভৰো’’তি নিরযে নেরযিকানং যাতনাসব্ভাৰতো. নেরযিকসত্তযাতনাযোগ্যঞ্হি অত্তভাৰং নিব্বত্তেন্তং কম্মং তাদিসনিকন্তিৰিনামিতং নিরযট্ঠানেযেৰ নিব্বত্তেতি. তে চ নেরযিকেহি অধিকতরবলারোহপরিণাহা অতিৰিয ভযানকদস্সনা কুরূরতরপযোগা চ হোন্তি. এতেনেৰ তত্থ নেরযিকানং ৰিবাধককাকসুনখাদীনম্পি নিব্বত্তি সংৰণ্ণিতাতি দট্ঠব্বং.

কথং অঞ্ঞগতিকেহি অঞ্ঞগতিকবাধনন্তি চ ন ৰত্তব্বং অঞ্ঞত্থাপি তথা দস্সনতো. যং পনেকে ৰদন্তি – ‘‘অসত্তসভাৰা এৰ নিরযপালা নিরযসুনখাদযো চা’’তি তম্পি তেসং মতিমত্তং অঞ্ঞত্থ তথা অদস্সনতো. ন হি কাচি অত্থি তাদিসী ধম্মপ্পৰত্তি, যা অসত্তসভাৰা, সম্পতিসত্তেহি অপ্পযোজিতা চ সত্তকিচ্চং সাধেন্তী দিট্ঠপুব্বা. পেতানং পানীযনিৰারকানং দণ্ডাদিহত্থপুরিসানম্পি সব্ভাৰে, অসত্তভাৰে চ ৰিসেসকারণং নত্থি. সুপিনোপঘাতোপি অত্থি, কিচ্চসমত্থতা পন অপ্পমাণং দস্সনাদিমত্তেনপি তদত্থসিদ্ধিতো. তথা হি সুপিনে আহারূপভোগাদিনা ন অত্থসিদ্ধি, ইদ্ধিনিম্মানরূপং পনেত্থ লদ্ধপরিহারং ইদ্ধিৰিসযস্স অচিন্তেয্যভাৰতো. ইধাপি কম্মৰিপাকস্স অচিন্তেয্যভাৰতোতি চে? তং ন, অসিদ্ধত্তা. নেরযিকানং কম্মৰিপাকতো নিরযপালাতি অসিদ্ধমেতং, ৰুত্তনযেন পন পাল়িতো চ তেসং সত্তভাৰো এৰ সিদ্ধোতি. সক্কা হি ৰত্তুং, ‘‘সত্তসঙ্খাতা নিরযপালসঞ্ঞিতা ধম্মপ্পৰত্তি সাভিসন্ধিকপরূপঘাতী অত্থি কিচ্চসব্ভাৰতো ওজাহারাদিরক্খসসন্ততি ৰিযা’’তি. অভিসন্ধিপুব্বকতা চেত্থ ন সক্কা পটিক্খিপিতুং তথা তথা অভিসন্ধিযা যাতনতো, ততো এৰ ন সঙ্ঘাতপব্বতাদীহি অনেকন্তিকতা. যে পন ৰদন্তি – ‘‘ভূতৰিসেসা এৰ এতে ৰণ্ণসণ্ঠানাদিৰিসেসৰন্তো ভেরৰাকারা ‘নরকপালা’তি সমঞ্ঞং লভন্তী’’তি. তদসিদ্ধং উজুকমেৰ পাল়িযং, – ‘‘অত্থি নিরযেসু নিরযপালা’’তি (কথা. ৮৬৬) ৰাদস্স পতিট্ঠাপিতত্তা.

অপিচ যথা অরিযৰিনযে নরকপালানং ভূতমত্ততা অসিদ্ধা, তথা পঞ্ঞত্তিমত্তৰাদিনোপি তেসং ভূতমত্ততা অসিদ্ধাৰ সব্বসো রূপধম্মানং অত্থি ভাৰস্সেৰ অপ্পটিজাননতো. ন হি তস্স ভূতানি নাম পরমত্থতো সন্তি. যদি পরমত্থং গহেত্ৰা ৰোহরতি, অথ কস্মা চক্খুরূপাদীনি পটিক্খিপতীতি? তিট্ঠতেসা অনৰট্ঠিততক্কানং অপ্পহীনসম্মোহৰিপল্লাসানং ৰাদৰীমংসা, এৰং, ‘‘অত্থেৰ নিরযে নিরযপালা’’তি নিট্ঠমেত্থ গন্তব্বং. সতি চ নেসং সব্ভাৰে, অসতিপি বাহিরে ৰিসযে নরকে ৰিয দেসাদিনিযমো হোতীতি ৰাদো ন সিজ্ঝতি, সতি এৰ পন বাহিরে ৰিসযে দেসাদিনিযমোতি দট্ঠব্বং.

দেৰদূতসরাপনৰসেন সত্তে যথূপচিতে পুঞ্ঞকম্মে যমেতি নিযমেতীতি যমো, তস্স যমস্স ৰেমানিকপেতানং রাজভাৰতো রঞ্ঞো. তেনাহ – ‘‘যমরাজা নাম ৰেমানিকপেতরাজা’’তি. কম্মৰিপাকন্তি অকুসলকম্মৰিপাকং. ৰেমানিকপেতাতি কণ্হসুক্কৰসেন মিস্সককম্মং কত্ৰা ৰিনিপাতিকদেৰতা ৰিয সুক্কেন কম্মুনা পটিসন্ধিং গণ্হন্তি. তথা হি তে মগ্গফলভাগিনোপি হোন্তি, পৰত্তিযং পন কম্মানুরূপং কদাচি পুঞ্ঞফলং, কদাচি অপুঞ্ঞফলং পচ্চনুভৰন্তি. যেসং পন অরিযমগ্গো উপ্পজ্জতি, তেসং মগ্গাধিগমতো পট্ঠায পুঞ্ঞফলমেৰ উপ্পজ্জতীতি দট্ঠব্বং. অপুঞ্ঞফলং পুব্বে ৰিয কটুকং ন হোতি. মনুস্সত্তভাৰে ঠিতানং মুদুকমেৰ হোতীতি অপরে. ধম্মিকো রাজাতি এত্থ তস্স ধম্মিকভাৰো ধম্মদেৰপুত্তস্স ৰিয উপ্পত্তিনিযমিতধম্মৰসেনেৰ ৰেদিতব্বো. দ্ৰারেসূতি অৰীচিমহানরকস্স চতূসু দ্ৰারেসু.

জাতিধম্মোতি কম্মকিলেসৰসেন জাতিপকতিকো. তেনাহ ‘‘জাতিসভাৰো’’তি. সভাৰো চ নাম তেজোধাতুযা উণ্হতা ৰিয ন কদাচিপি ৰিগচ্ছতীতি আহ ‘‘অপরিমুত্তো জাতিযা’’তিআদি.

২৬৩. ইদানি জাতিযা দেৰদূতভাৰং নিদ্ধারেত্ৰা দস্সেতুং, ‘‘দহরকুমারো’’তিআদি ৰুত্তং. অত্থতো এৰং ৰদতি নামাতি ৰাচায অৰদন্তোপি অত্থাপত্তিতো এৰং ৰদন্তো ৰিয হোতি ৰিঞ্ঞূনন্তি অত্থো. এৰং তুম্হাকম্পি জাতি আগমিস্সতীতি এৰং সংকিলিট্ঠজেগুচ্ছঅসমত্থদহরাৰত্থা জাতি তুম্হাকং আগমিস্সতি. কামঞ্চাযং আগতা এৰ, সা পন অতীতানাগতায উপরিপি আগমনায পযোগো ইচ্ছিতব্বো, অনাগতায ন ইচ্ছিতব্বোতি আহ ‘‘জাতি আগমিস্সতী’’তি. তেনেৰাহ – ‘‘ইতি তস্সা…পে… করোথা’’তি. তেনাতি তেন কারণেন ৰিঞ্ঞূনং ৰেদৰত্থুভাৰেনাতি অত্থো.

ঊরুবলন্তি ঊরুবলী. তেন দূরেপি গমনাগমনলঙ্ঘনাদিসমত্থতং দস্সেতি, বাহুবলন্তি পন ইমিনা হত্থেহি কাতব্বকিচ্চসমত্থতং, জৰগ্গহণেন ৰেগস্স পৰত্তিসমত্থতং. অন্তরহিতা নট্ঠা. সেসং পঠমদেৰদূতে ৰুত্তনযমেৰ.

ৰিৰিধং দুক্খং আদহতীতি ব্যাধি, ৰিসেসেন ৰা আধীযতি এতেনাতি ব্যাধি, তেন ব্যাধিনা. অভিহতোতি বাধিতো, উপদ্দুতোতি অত্থো.

২৬৫. কারণা নাম ‘‘হত্থচ্ছেদাদিভেদা অধিকপীল়া করীযতি এতাযা’’তি কত্ৰা যাতনা, সা এৰ কারণিকেহি কাতব্বট্ঠেন কম্মন্তি কম্মকারণা যাতনাকম্মন্তি অত্থো.

২৬৬. বহুং পাপং কতন্তি বহুসো পাপং কতং. তেন পাপস্স বহুলীকরণমাহ. বহূতি ৰা মহন্তং. মহত্থোপি হি বহুসদ্দো দিস্সতি, ‘‘বহু ৰত কতং অস্সা’’তিআদীসু, গরুকন্তি ৰুত্তং হোতি. সোতি গরুকং বহুলং ৰা পাপং কত্ৰা ঠিতো নিরযে নিব্বত্ততিযেৰ, ন যমপুরিসেহি যমস্স সন্তিকং নীযতি. পরিত্তন্তি পমাণপরিত্ততায কালপরিত্ততায চ পরিত্তং, পুরিমস্মিং পক্খে অগরুন্তি অত্থো, দুতিযস্মিং অবহুলন্তি. যথাৰুত্তমত্থং উপমায ৰিভাৰেতুং, ‘‘যথা হী’’তিআদি ৰুত্তং. কত্তব্বমেৰাতি দণ্ডমেৰ. অনুৰিজ্জিত্ৰা ৰীমংসিত্ৰা. ৰিনিচ্ছযট্ঠানন্তি অট্টকরণট্ঠানং. পরিত্তপাপকম্মাতি দুব্বলপাপকম্মা. তে হি পাপকম্মস্স দুব্বলভাৰতো কতূপচিতস্স চ ওকাসারহকুসলকম্মস্স বলৰভাৰতো অত্তনো ধম্মতাযপি সরন্তি.

আকাসচেতিযন্তি গিরিসিখরে ৰিৰটঙ্গণে কতচেতিযং. অগ্গিজালসদ্দন্তি ‘‘পটপটা’’তি পৰত্তমানং অগ্গিজালায সদ্দং সুত্ৰা, ‘‘মযা তদা আকাসচেতিযে পূজিতরত্তপটা ৰিযা’’তি অত্তনো পূজিতপটং অনুস্সরি. পঞ্চহিপি ন সরতীতি বলৰতা পাপকম্মেন ব্যামোহিতো পঞ্চ সঞ্ঞাণানি ন গণ্হাতি. তুণ্হী হোতি কম্মারহো অযন্তি তত্থ পতীকারং অপস্সন্তো.

২৬৭. অৰীচিমহানিরযো উব্বেধেনপি যোজনসতমেৰাতি ৰদন্তি. নৰনৰযোজনিকা হোতি পুথুলতো. মহানিরযস্স মহন্তত্তা তথাপি ভিত্তিসতং যোজনসহস্সং হোতীতি উস্সদস্স সব্বস্স পরিক্খেপতো ‘‘দসযোজনসহস্সং হোতী’’তি ৰুত্তং.

২৬৮. ঝাযতীতি পটিপাকতিকং হোতি. তাদিসমেৰাতি পুরিমসদিসত্তা ‘‘উব্ভতং সদিসমেৰ হোতী’’তি এৰং ৰুত্তং. বহুসম্পত্তোতি ৰা বহুট্ঠানং অতিক্কমিত্ৰা পুরত্থিমদ্ৰারং সম্পত্তো হোতি.

ছন্নং জালানন্তি চতূহি দিসাহি হেট্ঠা উপরি চ উব্ভতানং ছন্নং জালানং. সত্তানং নিরন্তরতা নিরযসংৰত্তনিযকম্মকতানঞ্চ বহুভাৰতো জালানং তাৰ সত্তানঞ্চ নিরন্তরত্তা অৰীচি হোতু; দুক্খস্স পন কথং নিরন্তরতাতি তং দস্সেন্তো, ‘‘কাযদ্ৰারে…পে… একং দুক্খসহগত’’ন্তিআদিমাহ. তত্থ আৰজ্জনং সম্পটিচ্ছনং সন্তীরণং ৰোট্ঠব্বনং দ্ৰে তদারম্মণচিত্তানীতি ছ উপেক্খাসহগতানি. এৰং সন্তেপীতি যদিপি তত্থ উপেক্খাসহগতচিত্তানিপি পৰত্তন্তি উপেক্খাৰেদনাপি লদ্ধাৰসরা; দুক্খৰেদনা পন বলৰতরা নিসিতনিসিতেন তিখিণেন সত্থেন নিরন্তরং সরীরং ছিন্দন্তী ৰিয দুক্খং উপনেন্তী ৰিয তা ৰেদনা অভিভৰন্তী অজ্ঝোত্থরন্তী উপ্পজ্জন্তী নিরন্তরা ৰিয হোতি. তেনাহ ‘‘অনুদহনবলৰতাযা’’তিআদি. উপেক্খাৰেদনাতি ৰা তত্থ অতিৰিয অনিট্ঠফলতায অনিট্ঠারম্মণা উপেক্খাৰেদনা দুক্খাতি ৰুচ্চতি, যথা ইট্ঠফলবহুতায ইট্ঠারম্মণা ঝানাদিপরিযাপন্নে চ সুগতিভৰে চ উপেক্খাৰেদনা সুখাতি ৰুচ্চতি, এৰং দুক্খস্স নিরন্তরতায অৰীচীতি ৰেদিতব্বং.

২৬৯. একো পাদো মহানিরযে হোতি, একো গূথনিরযে নিপততি, কম্মৰেগুক্খিত্তো অন্তরা পদমাৰহতি সেসারম্ভতায. হত্থিগীৰপ্পমাণা পরিণাহেন. একদোণিকনাৰাপ্পমাণা আযামেন.

পোক্খরপত্তানীতি খুরধারাসদিসানি তিখিণগ্গানি অযোসূলমযানেৰ পদুমপত্তানি. হেট্ঠা খুরধারাতি হেট্ঠাভূমিযং নিক্খিত্তা, ৰেত্তলতাযো চ তিখিণধারকণ্টকা অযোমযা এৰ. তেনাহ – ‘‘সো তত্থ দুক্খা’’তিআদি. কুসতিণানীতি কুসতিণজাতিতায তথা ৰুত্তানি. খরৰালিকাতি খরা তিখিণকোটিকা সিঙ্ঘাটকসণ্ঠানা ৰালিকা.

২৭০. দন্তে সম্ফুসেতীতি হেট্ঠিমদন্তে যথা কিঞ্চি মুখে পক্খিপিতুং ন সক্কা, এৰং সুফুসিতে করোতি. তম্বলোহপানতো পট্ঠাযাতি ৰুত্তকারণতো পটিলোমতোপি এৰং কম্মকারণানং কারণমাহ. দুতিযেনাতি কুঠারীহি তচ্ছনেন. ততিযেনাতি ৰাসীহি তচ্ছনেন. অৰিজহিতমেৰ সংৰেগহেতুতায লোকস্স মহতো অত্থস্স সংৰত্তনতো.

২৭১. হীনকাযং হীনং ৰা অত্তভাৰং উপগতা. উপাদানেতি চতুব্বিধেপি উপাদানে. তং অত্থতো তণ্হাদিট্ঠিগ্গাহোতি আহ ‘‘তণ্হাদিট্ঠিগহণে’’তি. সম্ভৰতি জরামরণং এতেনাতি সম্ভৰো, উপাদানন্তি আহ – ‘‘জাতিযা মরণস্স চ কারণভূতে’’তি. অনুপাদাতি অনুপাদায. তেনাহ ‘‘অনুপাদিযিত্ৰা’’তি.

সব্বদুক্খাতিক্কন্তা নামাতি সকলম্পি ৰট্টদুক্খং অতিক্কন্তা এৰ হোন্তি চরিমচিত্তনিরোধেন ৰট্টদুক্খলেসস্সপি অসম্ভৰতো.

দেৰদূতসুত্তৰণ্ণনায লীনত্থপ্পকাসনা সমত্তা.

নিট্ঠিতা চ সুঞ্ঞতৰগ্গৰণ্ণনা.

৪. ৰিভঙ্গৰগ্গো

১. ভদ্দেকরত্তসুত্তৰণ্ণনা

২৭২. একা রত্তি একরত্তো, ভদ্দো একরত্তো এতস্সাতি ভদ্দেকরত্তং, ৰিপস্সনং পরিব্রূহেন্তো পুগ্গলো. তেনাহ – ‘‘ৰিপস্সনানুযোগসমন্নাগতত্তা’’তি. তং উদ্দিস্স পৰত্তিযা পন ভদ্দেকরত্তসহচরণতো ভদ্দেকরত্তো. তেনাহ ভগৰা – ‘‘ভদ্দেকরত্তস্স ৰো, ভিক্খৰে, উদ্দেসঞ্চ ৰিভঙ্গঞ্চ দেসেস্সামী’’তি. দেসেতব্বমত্থং উদ্দিসতি এতেনাতি উদ্দেসো, সঙ্খেপদেসনা এৰ. যস্মা পন নিদ্দেসপদানং জননিট্ঠানে ঠিতত্তা মাতা ৰিযাতি মাতিকাতি ৰুচ্চতি, তস্মাহ ‘‘উদ্দেসন্তি মাতিক’’ন্তি. উদ্দিট্ঠমত্থং ৰিভজতি এতেনাতি ৰিভঙ্গো ৰিত্থারদেসনা, তেনাহ – ‘‘ৰিত্থারভাজনিয’’ন্তি ‘‘যথাউদ্দিট্ঠমত্থং ৰিত্থারতো ভাজেতি ৰিভজতি এতেনা’’তি কত্ৰা.

উপ্পাদাদিখণত্তযং পত্ৰা অতিক্কমং অতিক্কন্তং অতীতং. তং পন অত্থতো ৰিগতং খন্ধপঞ্চকন্তি আহ ‘‘অতীতে খন্ধপঞ্চকে’’তি. তণ্হাদিট্ঠীহি নানুগচ্ছেয্যাতি তণ্হাদিট্ঠাভিনন্দনাহি নানুভৰেয্য, নাভিনন্দেয্যাতি অত্থো. যথা ‘‘নিচ্চ’’ন্তিআদিনা ৰিপরীতগ্গাহৰসেন অতীতেসু রূপাদীসু মিচ্ছাঅভিনিৰিসনং পরামাসো দিট্ঠাভিনন্দনা; এৰং ‘‘নিচ্চ’’ন্তিআদিনা ৰিপরীতগ্গাহৰসেন অনাগতেসু রূপাদীসু মিচ্ছাঅভিনিৰিসনং পরামাসো দিট্ঠি কম্মসমাদানং দিট্ঠিপত্থনাতি তং পটিক্খিপন্তো আহ – ‘‘তণ্হাদিট্ঠীহি ন পত্থেয্যা’’তি. যদতীতন্তি এত্থ ইতি-সদ্দো আদিঅত্থো. তেন ‘‘অপত্ত’’ন্তি পদং সঙ্গণ্হাতি. তম্পি হি কারণৰচনং. তেনাহ ‘‘যস্মা চা’’তি. তত্থাযমধিপ্পাযো, ‘‘অতীতং তণ্হাদিৰসেন নাভিনন্দিতব্বং সব্বসো অৰিজ্জমানত্তা সসৰিসাণং ৰিয, তথা অনাগতম্পি ন পত্থেতব্ব’’ন্তি. তত্থ সিযা – অতীতং নাভিনন্দিতব্বং অভিনন্দনায নিপ্পযোজনত্তা, অনাগতপত্থনা পন সফলাপি সিযাতি ন সব্বসো পটিক্খিপিতব্বাতি? ন, তস্সাপি সৰিঘাতভাৰেন পটিক্খিপিতব্বতো. তেনাহ ‘‘যস্মা’’তিআদি. তত্থ পহীনন্তি নিস্সট্ঠসভাৰং. নিরুদ্ধন্তি ভগ্গং. অত্থঙ্গতন্তি ৰিনাসং. অপ্পত্তন্তি সভাৰং উপ্পাদাদিকং অসম্পত্তং. অজাতন্তি ন জাতং. অনিব্বত্তন্তি তস্সেৰ ৰেৰচনং.

যত্থ যত্থাতি যস্মিং যস্মিং খণে, যস্মিং যস্মিং ৰা ধম্মপুঞ্জে উপ্পন্নং, তং সব্বম্পি অসেসেত্ৰা. অরঞ্ঞাদীসু ৰাতি ৰা-সদ্দো অনিযমত্থো. তেন অরঞ্ঞে ৰা রুক্খমূলে ৰা পব্বতকন্দরাদীসু ৰাতি ঠাননিযমাভাৰা অনুপস্সনায সাতচ্চকারিতং দস্সেতি. যমকাদিৰসেন পরিব্রূহিযমানা ৰিপস্সনা ৰিয পটিপক্খেহি অকোপনিযাৰ হোতীতি আহ – ‘‘অসংহীরং অসংকুপ্পন্তি ইদং ৰিপস্সনাপটিৰিপস্সনাদস্সনত্থং ৰুত্ত’’ন্তি. গাথাযমযমত্থো ৰিপস্সনাৰসেন যুজ্জতীতি আহ – ‘‘ৰিপস্সনা হী’’তিআদি. কিং এতায পরিযাযকথাযাতি নিপ্পরিযাযতোৰ অসংহীরং অসংকুপ্পং দস্সেতুং, ‘‘অথ ৰা’’তিআদি ৰুত্তং. কথং পন নিচ্চস্স নিব্বানস্স অনুব্রূহনা হোতীতি আহ ‘‘পুনপ্পুন’’ন্তিআদি. এতেন তদারম্মণধম্মা ব্রূহনায, তেসং আরম্মণম্পি অত্থতো অনুব্রূহিতং নাম হোতি বহুলং মনসিকারেনাতি দস্সেতি.

আদিতো তাপনং আতাপনং, তেন আরম্ভধাতুমাহ. পরিতো তাপনং পরিতাপনং, তেন নিক্কমধাতুপরক্কমধাতুযো চাতি. তস্স সেনাতি তস্স মচ্চুনো সহকরণট্ঠেন সেনা ৰিযাতি সেনা. সঙ্গরোতিআদীসু মিত্তাকারগ্গহণেন সামপযোগমাহ. লঞ্জগ্গহণেন লঞ্জদানং, তেন দানপ্পযোগং. বলরাসীতি হত্থিঅস্সাদিবলকাযো. তেন দণ্ডভেদানি ৰদতি. ভেদোপি হি বলৰতো এৰ ইজ্ঝতি, স্ৰাযং চতুব্বিধোপি উপাযযোগেন সম্পৰত্তীযতি. তত্থ তত্থ চ সঙ্গং আসত্তিং অরতি দেতীতি সঙ্গরো পুব্বভাগে ৰা সঙ্গরণৰসেন তস্স পটিজাননৰসেন পৰত্তনতো.

উট্ঠাহকং উট্ঠানৰীরিযসম্পন্নং. সপরহিতসীৰনলক্খণেন অসাধুভাৰপরম্মুখভাৰগমনেন ৰা সন্তো.

২৭৩. মনুঞ্ঞরূপৰসেনেৰ এৰংরূপো অহোসীন্তি অতীতং অন্ৰাগমেতি তত্থ নন্দিযাসমন্ৰানযনতো. ৰেদনাদীসুপি এসেৰ নযো. কুসলসুখসোমনস্সৰেদনাৰসেনাতি কুসলৰেদনাৰসেন সুখৰেদনাৰসেন সোমনস্সৰেদনাৰসেনাতি পচ্চেকং ৰেদনাসদ্দো যোজেতব্বো. তণ্হাভিনন্দনায সতি দিট্ঠাভিনন্দনা সিদ্ধা এৰাতি – ‘‘তণ্হং সমন্ৰানেতি’’ইচ্চেৰ ৰুত্তং. হীনরূপাদি…পে… ন মঞ্ঞতি অমনুঞ্ঞোপি সমানো সমনুঞ্ঞভাৰস্সেৰ ৰসেন মঞ্ঞনায পৰত্তনতো. নানুপৰত্তযতি ৰিক্খম্ভনৰসেন নন্দিযা দূরীকতত্তা.

২৭৪. উল়ারসুন্দরভাৰমুখেনেৰ অনাগতেসুপি রূপাদীসু তণ্হাদিট্ঠিকপ্পনা পৰত্ততীতি আহ – ‘‘এৰংরূপো…পে… ৰেদিতব্বা’’তি.

২৭৫. ৰত্তব্বং সিযাতি যথা নন্দিযা অসমন্ৰানযনজোতনং ব্যতিরেকমুখেন পতিট্ঠপেতুং, ‘‘অতীতং ন ন্ৰাগমেয্যা’’তি উদ্দেসস্স, ‘‘কথঞ্চ, ভিক্খৰে, অতীতং অন্ৰাগমেতী’’তিআদিনা (ম. নি. ৩.২৭৩) ৰিভঙ্গো ৰুত্তো, এৰং ‘‘পচ্চুপ্পন্নঞ্চ যো ধম্ম’’ন্তিআদিকস্স উদ্দেসস্স ব্যতিরেকমুখেন ৰিভঙ্গে ৰুচ্চমানে ৰিপস্সনাপটিক্খেপৰসেন, ‘‘কথঞ্চ…পে… ৰত্তব্বং সিযা’’তি ৰুত্তং. তযিদং পরমগম্ভীরং সত্থুদেসনানযং অনুপধারেত্ৰা চোদিতং, যস্মা ‘‘পচ্চুপ্পন্নঞ্চ যো ধম্ম’’ন্তিআদিকস্স উদ্দেসস্স ব্যতিরেকমুখেনেৰ ৰিপস্সনাপটিক্খেপৰসেন, ‘‘কথঞ্চ, ভিক্খৰে, পচ্চুপ্পন্নেসূ’’তি ৰিভঙ্গদেসনা সম্পৰত্ততি. তেনাহ ‘‘যস্মা পনা’’তিআদি. তত্থ তস্সা এৰাতি ৰিপস্সনায এৰ. অভাৰং দস্সেতুং সংহীরতীতি মাতিকং উদ্ধরিত্ৰাতি কথেতুকম্যতায মাতিকাৰসেন পদুদ্ধারং কত্ৰা, ‘‘ইধ, ভিক্খৰে, অসুতৰা সুতৰা’’তি চ আদিনা ৰিত্থারো ৰুত্তো. ৰিপস্সনায অভাৰতোতি ৰিপস্সনায অভাৰিততায অৰিক্খম্ভিততায তণ্হাদিট্ঠীহি সপত্তেহি ৰিয তত্থ তত্থ ঠপনায আকড্ঢীযতি, তত্থ তত্থ ৰিসযে ততো এৰ অপাযসমুদ্দং সংসারসমুদ্দং আনীযতি. সুক্কপক্খো ৰুত্তৰিপরিযাযেন ৰেদিতব্বো. সেসং সুৰিঞ্ঞেয্যমেৰ.

ভদ্দেকরত্তসুত্তৰণ্ণনায লীনত্থপ্পকাসনা সমত্তা.

২. আনন্দভদ্দেকরত্তসুত্তৰণ্ণনা

২৭৬. বহিদ্ধা পুথুত্তারম্মণতো নিৰত্তেত্ৰা একস্মিংযেৰ আরম্মণে চিত্তস্স সম্মদেৰ লযনং অপ্পনং পটিসল্লানং, যো কোচি সমাপত্তিৰিহারো, ইধ পন অরিযৰিহারো অধিপ্পেতোতি আহ – ‘‘পটিসল্লানা ৰুট্ঠিতো’’তিআদি. জানন্তোৰ ভগৰা কথাসমুট্ঠাপনত্থং পুচ্ছি. ৰুত্তঞ্হেতং – ‘‘জানন্তাপি তথাগতা পুচ্ছন্তি, জানন্তাপি ন পুচ্ছন্তী’’তিআদি (পারা. ১৬).

২৭৮. সাধুকারমদাসীতি সাধুসদ্দং সাৰেসি. তং পন পসংসা হোতীতি পসংসত্থো সাধুসদ্দো. তেনাহ ‘‘দেসনং পসংসন্তো’’তি. ৰিজ্জমানেহি ৰণ্ণেহি গুণৰন্তে উদগ্গতাকরণং সম্পহংসনং, কেৰলং গুণসংকিত্তনৰসেন থোমনা পসংসাতি অযমেতেসং ৰিসেসো.

আনন্দভদ্দেকরত্তসুত্তৰণ্ণনায লীনত্থপ্পকাসনা সমত্তা.

৩. মহাকচ্চানভদ্দেকরত্তসুত্তৰণ্ণনা

২৭৯. উণ্হভাৰেন তপনতো তপং উদকং এতস্সাতি তপোদা, রহদো. তেনাহ ‘‘তত্তোদকস্স রহদস্সা’’তি. সঙ্খেপেন ৰুত্তমত্থং ৰিত্থারতো দস্সেতুং, ‘‘ৰেভারপব্বতস্সা’’তিআদি ৰুত্তং. ততো উদকরহদতো, তং রহদং উপনিস্সাযাতি অত্থো. নাগভৰনাগতোপি হি সো রহদো ততো উপরি মনুস্সলোকে জলাসযেন সম্বদ্ধো হোতি. তেন ৰুত্তং – ‘‘তপোদা নাম নদী সন্দতী’’তি. এদিসাতি কুথিতা উণ্হা, অন্ৰত্থনামৰসেন তপোদাতি চ ৰুচ্চতীতি অত্থো. পেতলোকোতি পেতানং ৰসনট্ঠানং পচ্চেকনিরযং সন্ধাযাহ. ইমস্স পন আরামস্সাতি তপোদারামস্স. ততোতি তপোদাসঙ্খাতনদিতো. মহাউদকরহদোতি মহাউদকভরিতং পল্ললং.

২৮০. সমিদ্ধোতি উল়ারো, পরিপুণ্ণোযেৰাতি অত্থো. আদিম্হি ব্রহ্মচরিযমস্সাতি আদিব্রহ্মচরিযো, সো এৰ আদিব্রহ্মচরিযকো. তেনাহ ‘‘পুব্বভাগপ্পটিপত্তিভূতো’’তি. ‘‘অতীতং অনাগতং পচ্চুপ্পন্ন’’ন্তি অদ্ধভেদমুখেন সঙ্খতধম্মবোধৰচনং.

২৮২. কামং খন্ধাদিৰসেন ৰিভজনং সাধারণং, পঠমদুতিযচতুত্থসুত্তেসু পন খন্ধৰসেন ৰিভজনং কত্ৰা ইধ তথা অকত্ৰা এৰং দেসনায ঠপনং ততো অঞ্ঞথা আযতনৰসেন ৰিভজনত্থং. এৰং ৰিভিন্না হি সঙ্খেপৰিত্থারতো অনৰসেসা সম্মসনুপগা ধম্মা ৰিভজিত্ৰা দস্সিতা হোন্তি; অযং কিরেত্থ ভগৰতো অজ্ঝাসযো থেরেন নযতো গহিতোতি দস্সেতুং, ‘‘ইমস্মিং কিরা’’তিআদি ৰুত্তং. তত্থ দ্ৰাদসাযতনৰসেনেৰ মাতিকং ঠপেসীতি লোকিযানি দ্ৰাদসাযতনানি এৰ সন্ধায মাতিকং ঠপেসি, যথা তীসু সুত্তেসু খন্ধৰসেন ৰিভত্তং, এৰং যদি ভগৰতা ইধাপি ৰিভজনং ইচ্ছিতং সিযা, তথা ৰিভজেয্য, যস্মা পন তথা অৰিভজিত্ৰাৰ গন্ধকুটিং পৰিট্ঠো, তস্মা দ্ৰাদসাযতনৰসেনেৰেত্থ ৰিভজনং ভগৰতা চ অধিপ্পেতন্তি নযগ্গাহে ঠত্ৰা থেরো ৰিভজি. তেনাহ – ‘‘নযং পটিলভিত্ৰা এৰমাহা’’তি. ভারিযং কতন্তি দুক্করং কতং. অপদে পদং দস্সিতং আকাসে পদং কতং সাধারণস্স অত্থস্স ৰিসিট্ঠৰিসযতায দস্সিতত্তা. নিকন্তিৰিঞ্ঞাণন্তি নিকন্তিতণ্হায সম্পযুত্তং ৰিঞ্ঞাণং, ‘‘ছন্দরাগপ্পটিবদ্ধং হোতী’’তি ৰচনতো. মনোতি ভৰঙ্গচিত্তং মনোদ্ৰারিকজৰনানং দ্ৰারভূতং.

২৮৩. পত্থনাৰসেন ঠপেসীতি পত্থনাৰসেন চিত্তং পৰত্তেসি.

মহাকচ্চানভদ্দেকরত্তসুত্তৰণ্ণনায লীনত্থপ্পকাসনা

সমত্তা.

৪. লোমসককঙ্গিযভদ্দেকরত্তসুত্তৰণ্ণনা

২৮৬. ঘননিচিতলোমো লোমসো, অযং পন অপ্পতায লোমসকোতি আহ – ‘‘ঈসকলোমসাকারতাযা’’তি, লোমসকো অঙ্গিকো লোমসককঙ্গিযো, পঠমো ক-কারো অপ্পত্থো, দুতিযং পন পদৰড্ঢনমেৰ. রত্তকম্বলসিলাযন্তি রত্তকম্বলৰণ্ণসিলাযং. ওরুয্হাতি আকাসতো ওতরিত্ৰা. পাটিহারিযং দিস্ৰা দিন্নলাভসক্কারস্স অসাদিযনতো মনুস্সপথে ন ৰসন্তি.

দসহি চক্কৰাল়সহস্সেহীতি নিস্সক্কৰচনতো আগন্ত্ৰাতি অধিপ্পাযো. সন্নিপতিতাহি দেৰতাহীতি করণৰচনং. পঞ্ঞাপযোগমন্দতায পটিৰিজ্ঝিতুং অসক্কোন্তানং দেৰানং ঞাণস্স তিক্খৰিসদভাৰাপাদনেন সমুত্তেজেতুং সংৰেগজননত্থং…পে… অভাসি. তত্রাতি তস্মিং দেৰসন্নিপাতে, তিস্সং ৰা দেসনাযং. দেৰত্তস্সাতি দেৰভাৰস্স, দিব্বসম্পত্তিযাতি অত্থো. ভদ্দেকরত্তস্স সুত্তস্স এতাতি ভদ্দেকরত্তিযা.

সৰনমুখেন ব্যঞ্জনসো অত্থসো চ উপধারণং উগ্গণ্হনন্তি আহ – ‘‘তুণ্হীভূতো নিসীদিত্ৰা সুণন্তো উগ্গণ্হাতি নামা’’তি. ৰাচুগ্গতকরণং পরিযাপুণনন্তি আহ – ‘‘ৰাচায সজ্ঝাযং করোন্তো পরিযাপুণাতি নামা’’তি. গন্থস্স পরিহণং ধারণং, তং পন পরেসু পতিট্ঠাপনং পাকটং হোতীতি আহ – ‘‘অঞ্ঞেসং ৰাচেন্তো ধারেতি নামা’’তি. সেসং হেট্ঠা ৰুত্তনযমেৰ.

লোমসককঙ্গিযভদ্দেকরত্তসুত্তৰণ্ণনায লীনত্থপ্পকাসনা

সমত্তা.

৫. চূল়কম্মৰিভঙ্গসুত্তৰণ্ণনা

২৮৯. অঙ্গসুভতাযাতি অঙ্গানং হত্থপাদাদিসরীরাৰযৰানং সুন্দরভাৰেন. যং অপচ্চং কুচ্ছিতং মুদ্ধং ৰা, তত্থ লোকে মাণৰৰোহারো, যেভুয্যেন সত্তা দহরকালে সুদ্ধধাতুকা হোন্তীতি ৰুত্তং, ‘‘তরুণকালে ৰোহরিংসূ’’তি. অধিপতিত্তাতি ইস্সরভাৰতো.

সমাহারন্তি সন্নিচযং. পণ্ডিতো ঘরমাৰসেতি যস্মা অপ্পতরেপি ব্যযমানে ভোগা খীযন্তি, অপ্পতরেপি সঞ্চযমানে ৰড্ঢন্তি, তস্মা ৰিঞ্ঞুজাতিকো কিঞ্চি ব্যযং অকত্ৰা অযমেৰ উপ্পাদেন্তো ঘরাৰাসং অনুতিট্ঠেয্যাতি লোভাদেসিতমত্থং ৰদতি.

ধনলোভেন…পে… নিব্বত্তো. লোভৰসিকস্স হি গতি নিরযো ৰা তিরচ্ছানযোনি ৰা. ৰুত্তঞ্হেতং – ‘‘নিমিত্তস্সাদগথিতং ৰা, ভিক্খৰে, ৰিঞ্ঞাণং তিট্ঠমানং তিট্ঠতি অনুব্যঞ্জনস্সাদগথিতং ৰা. তস্মিং সমযে কালঙ্করেয্য, দ্ৰিন্নং গতীনং অঞ্ঞতরং গতিং ৰদামি – নিরযং ৰা তিরচ্ছানযোনিং ৰা’’তি (সং. নি. ৪.২৩৫). নিরযে নিব্বত্তিস্সতি কতোকাসস্স কম্মস্স পটিবাহিতুং অসক্কুণেয্যভাৰতো.

পত্তক্খন্ধঅধোমুখভাৰং সন্ধায ‘‘ওনামেত্ৰা’’তি ৰুত্তং. ব্রাহ্মণচারিত্তস্স ভাৰিততং সন্ধাযাহ ‘‘ব্রহ্মলোকে নিব্বত্তো’’তি. তং পৰত্তিং পুচ্ছীতি সুতমেতং মযা, ‘‘ময্হং পিতা সুনখো হুত্ৰা নিব্বত্তো’’তি, এতং ভোতা গোতমেন ৰুত্তন্তি. কিমিদং ৰুত্তন্তি ইমং পৰত্তিং পুচ্ছি.

তথেৰ ৰত্ৰাতি যথা সুনখস্স ৰুত্তং, তথেৰ ৰত্ৰা. অৰিসংৰাদনত্থন্তি, ‘‘তোদেয্যব্রাহ্মণো সুনখো জাতো’’তি অত্তনো ৰচনস্স অৰিসংৰাদনত্থং, ৰিসংৰাদনাভাৰদস্সনত্থন্তি অধিপ্পাযো. ঞাতোম্হি ইমিনাতি ইমিনা মম পুত্তেন ময্হং পুরিমজাতিযং পিতাতি এৰং ঞাতো অম্হীতি জানিত্ৰা. বুদ্ধানুভাৰেন কির সুনখো তথা দস্সেতি, ন জাতিস্সরতায. ভগৰন্তং দিস্ৰা ভুক্করণং পন পুরিমজাতিসিদ্ধৰাসনায. ভৰপটিচ্ছন্নন্তি ভৰন্তরভাৰেন পটিচ্ছন্নং. নাম-সদ্দো সম্ভাৰনে. পটিসন্ধিঅন্তরন্তি অঞ্ঞজাতিপটিসন্ধিগ্গহণেন হেট্ঠিমজাতং গতিং. অঙ্গৰিজ্জাপাঠকো কিরেস, তেন অপ্পাযুকদীঘাযুকতাদিৰসেন চুদ্দস পঞ্হে অভিসঙ্খরি; এৰং কিরস্স অহোসি, ‘‘ইমেসং সত্তানং অপ্পাযুকতাদযো ৰিসেসা অঙ্গপচ্চঙ্গৰসেন সল্লক্খিযন্তি. ন খো পনেতং যুত্তং ‘অঙ্গপচ্চঙ্গানি যাৰ তেসং তেসং কারণ’ন্তি; তস্মা ভৰিতব্বমেত্থ অঞ্ঞেনেৰ কারণেন. সমণো গোতমো তং কারণং ৰিভজিত্ৰা কথেস্সতি, এৰাযং সব্বঞ্ঞূতি নিচ্ছযো মে অপণ্ণকো ভৰিস্সতী’’তি. অপরে পন ভণন্তি, ‘‘তিরচ্ছানগতং মনুস্সং ৰা আৰিসিত্ৰা ইচ্ছিতত্থকসাৰনং নাম মহামন্তৰিজ্জাৰসেন হোতি; তস্মা ন এত্তাৰতা সমণস্স গোতমস্স সব্বঞ্ঞুতা সুনিচ্ছিতা হোতি. যং নূনাহং কম্মফলমস্স উদ্দিস্স পঞ্হং পুচ্ছেয্যং, তত্থ চ মে চিত্তং আরাধেন্তো পঞ্হং ব্যাকরিস্সতি. এৰাযং সব্বঞ্ঞূতি ৰিনিচ্ছযো মে ভৰিস্সতীতি তে পঞ্হে পুচ্ছতী’’তি.

ভণ্ডকন্তি সাপতেয্যং, সন্তকন্তি অত্থো. কম্মুনা দাতব্বং আদিযন্তীতি কম্মদাযাদা, অত্তনা কতূপচিতকম্মফলভাগীতি অত্থো. তং পন কম্মদাযজ্জং কারণোপচারেন ৰদন্তো, ‘‘কম্মং এতেসং দাযজ্জং ভণ্ডকন্তি অত্থো’’তি আহ – যথা ‘‘কুসলানং, ভিক্খৰে, ধম্মানং সমাদানহেতু এৰমিদং পুঞ্ঞং পৰড্ঢতী’’তি (দী. নি. ৩.৮০). যৰতি ফলং সভাৰতো ভিন্নম্পি অভিন্নং ৰিয মিস্সিতং হোতি, এতেনাতি যোনীতি আহ – ‘‘কম্মং এতেসং যোনি কারণ’’ন্তি. মমত্তৰসেন বজ্ঝতি সংবজ্ঝতীতি বন্ধু, ঞাতি সালোহিতো চ. কম্মং পন একন্তসম্বন্ধমেৰাতি আহ – ‘‘কম্মং এতেসং বন্ধূ’’তি. পতিট্ঠাতি অৰস্সযো. কম্মসদিসো হি সত্তানং অৰস্সযো নত্থি, অঞ্ঞো কোচি ইস্সরো ব্রহ্মা ৰা ন করোতি তাদিসং কত্তুং সজ্জিতুং অসমত্থভাৰতো. যং পনেত্থ ৰত্তব্বং, তং ৰিসুদ্ধিমগ্গসংৰণ্ণনাযং ৰুত্তনযেন ৰেদিতব্বং. কম্মমেৰাতি কস্মা অৰধারিতং, ননু কিলেসাপি সত্তানং হীনপণীতভাৰকারণং, ন কেৰলন্তি? সচ্চমেতং, কিলেসপযোগেন ৰিপাকৰট্টং নিব্বত্তং কম্মপৰত্তিতমেৰাতি কত্ৰা ৰুত্তং. ‘‘কথিতস্স অত্থং ন সঞ্জানাসী’’তি সঙ্খেপতো ৰত্ৰা ননু ভগৰা মহাকারুণিকো পরেসং ঞাপনত্থমেৰ ধম্মং দেসেতীতি আহ – ‘‘মাননিস্সিতো কিরেসা’’তিআদি.

২৯০. সমত্তেনাতি পরিযত্তেন, যথা তং ফলং দাতুং সমত্থং হোতি, এৰং কতেন, উপচিতেনাতি অত্থো. তাদিসং পন অত্তনো কিচ্চে অনূনং নাম হোতীতি আহ ‘‘পরিপুণ্ণেনা’’তি. সমাদিন্নেনাতি এত্থ সমাদানং নাম তণ্হাদিট্ঠীহি গহণং পরামসনন্তি আহ – ‘‘গহিতেন পরামট্ঠেনা’’তি. পটিপজ্জতি এতায সুগতিদুগ্গতীতি পটিপদা, কম্মং. তথা হি তং ‘‘কম্মপথো’’তি ৰুচ্চতি.

এসাতি পটিপদা. দুব্বলং উপঘাতকমেৰ সিযাতি উপপীল়কস্স ৰিসযং দস্সেতুং, ‘‘বলৰকম্মেনা’’তিআদি ৰুত্তং. বলৰকম্মেনাতি পুঞ্ঞকম্মেন. ৰদতি নামাতি ৰদন্তো ৰিয হোতি. নিব্বত্তাপেয্যন্তি কস্মা ৰুত্তং, ননু উপপীল়কসভাৰং কম্মং জনকসভাৰং ন হোতীতি? সব্বমেতং পরিকপ্পনৰচনং, যথা মনুস্সা পচ্চত্থিকং পটিপক্খং কিঞ্চি কাতুং অসমত্থাপি কেচি আলম্বনৰসেন সমত্থা ৰিয অত্তানং দস্সেন্তি, এৰংসম্পদমিদন্তি কেচি. অপরে পন ভণন্তি – যস্সিদং কম্মস্সৰিপাকং পীল়েতি, সচে তস্মিং অনোকাসে এৰ সযং ৰিপচ্চিতুং ওকাসং লভেয্য, অপাযেসু এৰ তংসমঙ্গিপুগ্গলং নিব্বত্তাপেয্য, যস্মা তং কম্মং বলৰং হুত্ৰা অৰসেসপচ্চযসমৰাযেন ৰিপচ্চিতুং আরদ্ধং, তস্মা ইতরং তস্স ৰিপাকং ৰিবাধেন্তং উপপীল়কং নাম জাতং. এতদত্থমেৰ চেত্থ ‘‘বলৰকম্মেন নিব্বত্ত’’ন্তি বলৰগ্গহণং কতং. কিচ্চৰসেন হি নেসং কম্মানং এতা সমঞ্ঞা, যদিদং উপপীল়কং উপচ্ছেদকং জনকং উপত্থম্ভকন্তি, ন কুসলানি ৰিয উপত্থম্ভানি হোন্তি নিব্বত্তত্থায. পীল়েত্ৰাতি ৰিহেঠেত্ৰা পটিঘাটনাদিৰসেন উচ্ছুতেলযন্তাদযো ৰিয উচ্ছুতিলাদিকে ৰিবাধেত্ৰা. নিরোজন্তি নিত্তেজং. নিযূসন্তি নিরসং. কসটন্তি নিস্সারং. পরিস্সযন্তি উপদ্দৰং.

ইদানি পরিস্সযস্স উপনযনাকারং দস্সেন্তেন তত্থ, ‘‘দারকস্সা’’তিআদিং ৰত্ৰা ভোগানং ৰিনাসনাকারং দস্সেতুং, পুন ‘‘দারকস্সা’’তিআদি ৰুত্তং. কুম্ভদোহনাতি কুম্ভপূরখীরা. গোমণ্ডলেতি গোযূথে.

অট্ঠুসভগমনং কত্ৰাতি অট্ঠউসভপ্পমাণং পদেসং পচ্চত্থিকং উদ্দিস্স ধনুগ্গহো অনুযাযিং কত্ৰা. তন্তি সরং. অঞ্ঞোতি পচ্চত্থিকো. তত্থেৰ পাতেয্য অচ্চাসন্নং কত্ৰা সরস্স খিত্তত্তা. ৰাল়মচ্ছোদকন্তি মকরাদিৰাল়মচ্ছৰন্তং উদকং.

পটিসন্ধিনিব্বত্তকং কম্মং জনককম্মং নাম পরিপুণ্ণৰিপাকদাযিভাৰতো, ন পৰত্তিৰিপাকমত্তনিব্বত্তকং. ভোগসম্পদাদীতি আদি-সদ্দেন আরোগ্যসম্পদাদি-পরিৰারসম্পদাদীনি গণ্হাতি. ন দীঘাযুকতাদীনি হি অপ্পাযুকতাসংৰত্তনিকেন কম্মুনা নিব্বত্তানি; অঞ্ঞং দীঘাযুকতাকরণেন উপত্থম্ভেতুং সক্কোতি; ন অতিদুব্বণ্ণং অপ্পেসক্খং নীচকুলীনং দুপ্পঞ্ঞং ৰা ৰণ্ণৰন্ততাদিৰসেন. তথা হি ৰক্খতি, ‘‘ইমস্মিং পন পঞ্হৰিস্সজ্জনে’’তিআদি, তং পন নিদস্সনৰসেন ৰুত্তন্তি দট্ঠব্বং.

পুরিমানীতি উপপীল়কোপচ্ছেদকানি. উপপীল়কুপঘাতা নাম কুসলৰিপাকপটিবাহকাতি অধিপ্পাযেন ‘‘দ্ৰে অকুসলানেৰা’’তি ৰুত্তং. উপত্থম্ভকং কুসলমেৰাতি এত্থ যথা জনকং উভযসভাৰং, এৰং ইতরেসম্পি উভযসভাৰতায ৰুচ্চমানায ন কোচি ৰিরোধো. দেৰদত্তাদীনঞ্হি নাগাদীনং ইতো অনুপ্পৰচ্ছিতানং পেতাদীনঞ্চ নরকাদীসু অকুসলকম্মৰিপাকস্স উপত্থম্ভনুপপীল়নুপঘাতনানি ন ন সম্ভৰন্তি. এৰঞ্চ কত্ৰা যা হেট্ঠা বহূসু আনন্তরিযেসু একেন গহিতপটিসন্ধিকস্স ইতরেসং তস্স অনুবলপ্পদাযিতা ৰুত্তা, সাপি সমত্থিতা হোতি. যস্মিঞ্হি কম্মে কতে জনকনিব্বত্তং কুসলফলং ৰা অকুসলফলং ৰা ব্যাধিধাতুসমতাদিনিমিত্তং ৰিবাধীযতি, তমুপত্থম্ভকং. যস্মিং পন কতে জাতিসমত্থস্স পটিসন্ধিযং পৰত্তিযঞ্চ ৰিপাককটত্তারূপানং উপ্পত্তি হোতি, তং জনকং. যস্মিং পন কতে অঞ্ঞেন জনিতস্স ইট্ঠস্স ৰা অনিট্ঠস্স ৰা ফলস্স ৰিবাধাৰিচ্ছেদপচ্চযানুপ্পত্তিযা উপব্রূহনপচ্চযুপ্পত্তিযা চ জনকসামত্থিযানুরূপং পরিৰুত্তিচিরতরপবন্ধা হোতি, এতং উপত্থম্ভকং. তথা যস্মিং কতে জনকনিব্বত্তং কুসলফলং অকুসলফলং ৰা ব্যাধিধাতুসমতাদিনিমিত্তং ৰিবাধীযতি, তং উপপীল়কং. যস্মিং পন কতে জনকসামত্থিযৰসেন চিরতরপবন্ধারহম্পি সমানং ফলং ৰিচ্ছেদকপচ্চযুপ্পত্তিযা ৰিচ্ছিজ্জতি, তং উপঘাতকন্তি অযমেত্থ সারো.

তত্থাতি তেসু কম্মেসু. উপচ্ছেদককম্মেনাতি আযুনো উপঘাতককম্মেন. স্ৰাযমুপঘাতকভাৰো দ্ৰিধা ইচ্ছিতব্বোতি তং দস্সেতুং ‘‘পাণাতিপাতিনা’’তিআদি ৰুত্তং. ন সক্কোতি পাণাতিপাতকম্মুনা সন্তানস্স তথাভিসঙ্খতত্তা. যস্মিঞ্হি সন্তানে নিব্বত্তং, তস্স তেন অভিসঙ্খততা অৰস্সং ইচ্ছিতব্বা তত্থেৰ তস্স ৰিপাকস্স ৰিনিবন্ধনতো. এতেন কুসলস্স কম্মস্স আযূহনক্খণেযেৰ পাণাতিপাতো তাদিসং সামত্থিযুপঘাতং করোতীতি দস্সেতি, ততো কম্মং অপ্পফলং হোতি. ‘‘দীঘাযুকা’’তিআদিনা উপঘাতসামত্থিযেন খেত্তে উপ্পন্নসস্সং ৰিয উপপত্তিনিযামকা ধম্মাতি দস্সেতি. উপপত্তি নিযতৰিসেসে ৰিপচ্চিতুং ওকাসে করোন্তে এৰ কুসলকম্মে আকড্ঢিযমানপটিসন্ধিকং পাণাতিপাতকম্মং অপ্পাযুকত্থায নিযমেতীতি আহ – ‘‘পটিসন্ধিমেৰ ৰা নিযামেত্ৰা অপ্পাযুকং করোতী’’তি. পাণাতিপাতচেতনায অচ্চন্তকটুকৰিপাকত্তা সন্নিট্ঠানচেতনায নিরযে নিব্বত্ততি তস্সা অত্থস্স খীণাভাৰতো; ইতরে পন ন তথা ভারিযাতি আহ – ‘‘পুব্বা…পে… হোতী’’তি. ইধ পন যং হেট্ঠা ৰুত্তসদিসং, তং ৰুত্তনযেন ৰেদিতব্বং.

মনুস্সামনুস্সপরিস্সযাতি মানুসকা অমানুসকা চ উপদ্দৰা. পুরতোতি পুব্বদ্ৰারতো. পচ্ছতোতি পচ্ছিমৰত্থুতো. পৰট্টমানাতি পরিজনস্স, দেৰতানং ৰা দেসেন পৰট্টমানা. পরেহীতি পুরাতনেহি পরেহি. সম্মুখীভাৰন্তি সামিভাৰৰসেন পচ্চক্খত্তং. আহরিত্ৰা দেন্তি ইণাযিকা. কম্মন্তাতি ৰণিজ্জাদিকম্মানি. অপাণাতিপাতকম্মন্তি পাণাতিপাতস্স পটিপক্খভূতং কম্মং; পাণাতিপাতা ৰিরতিৰসেন পৰত্তিতকম্মন্তি অত্থো. দীঘাযুকসংৰত্তনিকং হোতি ৰিপাকস্স কম্মসরিক্খভাৰতো. ইমিনা নযেনাতি ইমিনা অপ্পাযুকদীঘাযুকসংৰত্তনিকেসু কম্মেসু যথাৰুত্তেন তং সংৰত্তনিকৰিভাৰননযেন.

ৰিহেঠনকম্মাদীনিপীতি পি-সদ্দেন কোধইস্সামনকমচ্ছেরথদ্ধঅৰিদ্দসুভাৰৰসেন পৰত্তিতকম্মানি সঙ্গণ্হাতি. তথেৰাতি যথা পাণাতিপাতকম্মং অত্থতো এৰং ৰদতি নামাতি ৰুত্তং, তথেৰ ৰদমানানি ৰিয. ‘‘যং যদেৰাতিপত্থেন্তি, সব্বমেতেন লব্ভতী’’তি (খু. পা. ৮.১০) ৰচনতো যথা সব্বকুসলং সব্বাসং সম্পত্তীনং উপনিস্সযো, এৰং সব্বং অকুসলং সব্বাসং ৰিপত্তীনং উপনিস্সযোতি, ‘‘উপপীল়নেন নিব্ভোগতং আপাদেত্ৰা’’তিআদি ৰুত্তং. তথা হি পাণাতিপাতকম্মৰসেনপি অযং নযো দস্সিতো. অৰিহেঠনাদীনীতি এত্থ আদি-সদ্দেন অক্কোধন-অনিস্সামন-দান-অনতিমান-ৰিদ্দসুভাৰেন পৰত্তকম্মানি সঙ্গণ্হাতি.

২৯৩. ইস্সা মনো এতস্সাতি ইস্সামনকোতি আহ ‘‘ইস্সাসম্পযুত্তচিত্তো’’তি. উপক্কোসন্তোতি অক্কোসৰত্থূহি অক্কোসন্তো. ইস্সং বন্ধতীতি ইস্সং অনুবন্ধতি ইস্সাসহিতমেৰ চিত্তং অনুপৰত্তেতি. অপ্পেসক্খোতি অপ্পানুভাৰো অপ্পঞ্ঞাতো. তেনাহ ‘‘ন পঞ্ঞাযতী’’তি. সা পনস্স অপ্পানুভাৰতা পরিৰারাভাৰেন পাকটা হোতীতি আহ ‘‘অপ্পপরিৰারো’’তি.

২৯৪. মচ্ছরিযৰসেন ন দাতা হোতীতি সব্বসো দেয্যধম্মস্স অভাৰেন ন দাতা ন হোতি. অমচ্ছরী হি পুগ্গলো সতি দেয্যধম্মে যথারহং দেতিযেৰ.

২৯৫. অভিৰাদেতব্বং খেত্তৰসেন মত্থকপ্পত্তং দস্সেতুং, ‘‘বুদ্ধং ৰা’’তিআদি ৰুত্তং. অঞ্ঞেপি মাতুপিতুজেট্ঠভাতরাদযো অভিৰাদনাদিঅরহা সন্তি, তেসু থদ্ধাদিৰসেন করণং নীচকুলসংৰত্তনিকমেৰ. ন হি পৰত্তে সক্কা কাতুন্তি সম্বন্ধো. তেন পৰত্তিৰিপাকদাযিনো কম্মস্স ৰিসযো এসোতি দস্সেতি. তেনাহ ‘‘পটিসন্ধিমেৰ পনা’’তিআদি.

২৯৬. অপরিপুচ্ছনেনাতি অপরিপুচ্ছামত্তেন নিরযে ন নিব্বত্ততি; অপরিপুচ্ছাহেতু পন কত্তব্বাকরণাদীহি সিযা নিরযনিব্বত্তীতি পাল়িযং, ‘‘ন পরিপুচ্ছিতা হোতী’’তিআদি ৰুত্তন্তি দস্সেন্তো, ‘‘অপরিপুচ্ছকো পনা’’তিআদিমাহ. যথানুসন্ধিং পাপেসীতি দেসনং যথানুসন্ধিনিট্ঠানং পাপেসি. সেসং ৰুত্তনযত্তা সুৰিঞ্ঞেয্যমেৰ.

চূল়কম্মৰিভঙ্গসুত্তৰণ্ণনায লীনত্থপ্পকাসনা সমত্তা.

৬. মহাকম্মৰিভঙ্গসুত্তৰণ্ণনা

২৯৮. কম্মস্স মোঘভাৰো নাম ফলেন তুচ্ছতা ফলাভাৰোতি আহ – ‘‘মোঘন্তি তুচ্ছং অফল’’ন্তি. তথং ভূতন্তি সচ্চসদ্দস্স অত্থমাহ. পরিব্বাজকো পন ‘‘সচ্চ’’ন্তি ইমিনা তমেৰ সফলন্তি ৰদতি. সফলঞ্হি কম্মং সত্থু অভিমতমনোকম্মন্তি অধিপ্পাযো. ইদঞ্চ ‘‘মোঘং কাযকম্ম’’ন্তিআদিৰচনং. তং গহেত্ৰাতি পরম্পরায গহেত্ৰা. এসাতি পোতলিপুত্তো পরিব্বাজকো. অভিসঞ্ঞানিরোধকথং সন্ধায ৰদতি. সাপি হি তিত্থিযানং অন্তরে পাকটা জাতাতি. থেরোতি সমিদ্ধিত্থেরো. যথা ভগৰতা ৰুত্তং, ততো চ অঞ্ঞথাৰ দোসারোপনভযেন গহেত্ৰা ততো ভগৰন্তং থেরো রক্খতীতি অধিপ্পাযেন পরিব্বাজকো, ‘‘পরিরক্খিতব্বং মঞ্ঞিস্সতী’’তি অৰোচাতি আহ – ‘‘পরিরক্খিতব্বন্তি গরহতো মোচনেন রক্খিতব্ব’’ন্তি. সঞ্চেতনা অস্স অত্থীতি সঞ্চেতনিকং. কম্মন্তি সঞ্চেতনিকস্সপি কম্মস্স অত্তনো সমযে ইচ্ছিতত্তা পরিব্বাজকেন ৰুত্তং.

সঙ্খতসঙ্খারতায রূপমেৰ ‘‘তিলমত্তম্পি সঙ্খার’’ন্তি ৰুত্তং. তেনাহ – ‘‘মংসচক্খুনাৰ পস্সতী’’তি. সমাগমদস্সনং সন্ধাযাতি কত্থচিপি তস্স দস্সনং সন্ধায, ন পরিঞ্ঞাদস্সনং. তেনাহ ভগৰা – ‘‘কুতো পনেৰরূপং কথাসল্লাপ’’ন্তি.

২৯৯. ৰট্টদুক্খন্তি সংসারদুক্খং. কিলেসদুক্খন্তি কিলেসসম্ভৰরাগপরিল়াহদুক্খং. সঙ্খারদুক্খন্তি যদনিচ্চং, তং দুক্খন্তি এৰং ৰুত্তদুক্খং. সচে ভাসিতং ভৰেয্যাতি ইমং ঈদিসং দুক্খং সন্ধায আযস্মতা সমিদ্ধিনা ভাসিতং সিযা নু ভগৰা, অৰিভজিত্ৰা ব্যাকরণং যুত্তমেৰাতি অধিপ্পাযো.

৩০০. উম্মঙ্গন্তি উম্মুজ্জনং, কথামুল়্হেন অন্তরা অঞ্ঞাণৰিসযপঞ্হা উম্মঙ্গং. তেনাহ – ‘‘পঞ্হাউম্মঙ্গ’’ন্তি নেৰ দিব্বচক্খুনাতি কস্মা ৰুত্তং. ন হি তং অযোনিসো উম্মুজ্জনং দিব্বচক্খুৰিসযন্তি? কামঞ্চেতং ন দিব্বচক্খুৰিসযং, দিব্বচক্খুপরিভণ্ডঞাৰিসযং পন সিযাতি তথা ৰুত্তং. অধিপ্পাযেনেৰাতি উদাযিত্থেরস্স অধিপ্পাযেনেৰ গয্হমানেন তং অযোনিযো উম্মুজ্জনং অঞ্ঞাসি. সন্নিসীদিতুং পুব্বে নিসিন্নাকারেন সন্নিসীদিতুং ন সক্কোতি. সমিদ্ধিত্থেরেন অনভিসঙ্খতস্সেৰ অত্থস্স কথিতত্তা, ‘‘যং অভূতং, তদেৰ কথেস্সতী’’তি ৰুত্তং. তেনাহ ‘‘অযোনিসো উম্মুজ্জিস্সতী’’তি. তিস্সো ৰেদনা পুচ্ছিতা, ‘‘কিং সো ৰেদিযতী’’তি অৰিভাগেন ৰেদিযমানস্স জাতিতত্তা. সুখায ৰেদনায হিতন্তি সুখৰেদনিযং. তেনাহ – ‘‘সুখৰেদনায পচ্চযভূত’’ন্তি. সেসেসূতি, ‘‘দুক্খৰেদনিয’’ন্তিআদীসু.

হেট্ঠা তিকজ্ঝানচেতনাতি এত্থ, ‘‘কুসলতো’’তি অধিকারতো রূপাৰচরকুসলতো হেট্ঠা তিকজ্ঝানচেতনাতি অত্থো. এত্থাতি এতেসু কামাৰচররূপাৰচরসুখৰেদনিযকম্মেসু. অদুক্খমসুখম্পীতি পি-সদ্দেন ইট্ঠারম্মণে সুখম্পীতি ইমমত্থং সম্পিণ্ডেতি.

যদি কাযদ্ৰারে পৰত্ততো অঞ্ঞত্থ অদুক্খমসুখং জনেতি, অথ কস্মা, ‘‘দুক্খস্সেৰ জননতো’’তি ৰুত্তন্তি আহ – ‘‘সা পন ৰেদনা’’তিআদি.

চতুত্থজ্ঝানচেতনাতি এত্থ অরূপাৰচরকুসলচেতনাতিপি ৰত্তব্বং. যথা হি ‘‘কাযেন ৰাচায মনসা’’তি এত্থ যথালাভগ্গহণৰসেন মনসা সুখৰেদনিযং অদুক্খমসুখৰেদনিযন্তি অযমত্থো অরূপাৰচরকুসলেপি লব্ভতীতি সুখম্পি জনেতি উক্কট্ঠস্স ঞাণসম্পযুত্তকুসলস্স সোল়সৰিপাকচিত্তনিব্বত্তনতো, অযঞ্চ নযো হেট্ঠা, ‘‘অদুক্খমসুখম্পী’’তি এত্থাপি ৰত্তব্বো. পুব্বে পরিযাযতো দুক্খৰেদনা ৰুত্তা, সুত্তন্তসংৰণ্ণনা হেসাতি ইদানি নিপ্পরিযাযতো পুন দস্সেতুং, ‘‘অপিচা’’তিআদি ৰুত্তং. তেন এত্থ দুক্খৰেদনিযং পৰত্তিৰসেনেৰ ৰট্টতীতি. এতস্সাতি দুক্খৰেদনিযস্স পৰত্তিৰসেনেৰ যুজ্জমানত্তা এতস্স ৰসেন সব্বং সুখৰেদনিযং অদুক্খমসুখৰেদনিযঞ্চ পৰত্তিৰসেনেৰ ৰত্তুং ৰট্টতি.

আলযোতি অভিরুচি. মহাকম্মৰিভঙ্গঞাণন্তি মহতি কম্মৰিভজনে ঞাণং, মহন্তং ৰা কম্মৰিভজনঞাণং. ভাজনং নাম নিদ্দেসো, অযং পন উদ্দেসোতি কত্ৰা আহ – ‘‘কতমে চত্তারো…পে… মাতিকাট্ঠপন’’ন্তি.

৩০১. পাটিযেক্কো অনুসন্ধি যথাউদ্দিট্ঠস্স মহাকম্মৰিভঙ্গঞাণস্স অভাজনভাৰতো, পুচ্ছানুসন্ধিঅজ্ঝাসযানুসন্ধীসু চ অনন্তোগধত্তা. তেনাহ ‘‘ইদং হী’’তিআদি. ইদং আরম্মণং কত্ৰাতি ইধ, ‘‘পাণাতিপাতিং অদিন্নাদাযি’’ন্তিআদিনা পুগ্গলাধিট্ঠানেন ৰুত্তং কম্মৰিভঙ্গং আরব্ভ. ইমং পচ্চযং লভিত্ৰাতি তস্সেৰ ৰেৰচনং. ইদং দস্সনং গণ্হন্তীতি ইদং, ‘‘অত্থি কির, ভো, পাপকানি কম্মানি, নত্থি কির, ভো, পাপকানি কম্মানী’’তি চ আদীনি হত্থিদস্সকঅন্ধাৰিয দিট্ঠমত্তে এৰ ঠত্ৰা অচিত্তকদস্সনঞ্চ গণ্হন্তি. ৰীরিযং কিলেসানং আতাপনৰসেন আতপ্পং, তদেৰ পদহৰসেন পধানং, পুনপ্পুনং যুঞ্জনৰসেন অনুযোগো, তথা ভাৰনায নপ্পমজ্জতি এতেনাতি অপ্পমাদো, সম্মা যোনিসো মনসি করোতি এতেনাতি সম্মামনসিকারোতি ৰুচ্চতীতি অধিপ্পাযেন, ‘‘পঞ্চপি ৰীরিযস্সেৰ নামানী’’তি আহ. অপ্পমাদো ৰা সতিযা অৰিপ্পৰাসো. যস্মিং মনসিকারে সতি তস্স দিব্বচক্খুঞাণং ইজ্ঝতি, অযমেত্থ সম্মামনসিকারোতি এত্থ অত্থো দট্ঠব্বো. চেতোসমাধিন্তি দিব্বচক্খুঞাণসহগতং চিত্তসমাধিং. তেনাহ ‘‘দিব্বচক্খুসমাধি’’ন্তি. অঞ্ঞথাতি অকুসলকম্মকরণতো অঞ্ঞথা, তং পন কুসলকম্মকরণং হোতীতি আহ – ‘‘যে দস্সন্নং কুসলানং কম্মপথানং পূরিতত্তা’’তি দিট্ঠিথামেনাতি দিট্ঠিৰসেন দিট্ঠিবলেন. দিট্ঠিপরামাসেনাতি দিট্ঠিৰসেন ধম্মসভাৰং অতিক্কমিত্ৰা পরামাসেন. অধিট্ঠহিত্ৰাতি, ‘‘ইদমেৰ সচ্চং, মোঘমঞ্ঞ’’ন্তি অধিট্ঠায অভিনিৰিসিত্ৰা. আদিযিত্ৰাতি দল়্হগ্গাহং গহেত্ৰা. ৰোহরতীতি অত্তনো গহিতগ্গহণং পরেসং দীপেন্তো ৰোহরতি.

৩০২. তত্রানন্দাতি এত্থ ইতি-সদ্দো আদিঅত্থো. ইদম্পীতি ইদং ৰচনং. ‘‘তত্রানন্দা’’তি এৰমাদিৰচনম্পীতি অত্থো. ন মহাকম্মৰিভঙ্গঞাণস্স ভাজনং তস্স অনিদ্দেসভাৰতো. অস্সাতি মহাকম্মৰিভঙ্গঞাণস্স মাতিকাট্ঠপনমেৰ দিব্বচক্খুকানং সমণব্রাহ্মণানং ৰসেন অনুঞ্ঞাতব্বস্স চ দস্সনৰসেন উদ্দেসভাৰতো. তেনাহ ‘‘এত্থ পনা’’তিআদি. তত্থ এত্থ পনাতি ‘‘তত্রানন্দা’’তিআদিপাঠে. এতেসং দিব্বচক্খুকানন্তি এতেসং হেট্ঠা চতূসুপি ৰারেসু আগতানং দিব্বচক্খুকানং. এত্তকাতি একচ্চিযা সচ্চগিরা. অনুঞ্ঞাতাতি অনুজানিতা. অননুঞ্ঞাতাতি পটিক্খেপিতা. ইধ অননুঞ্ঞাতমুখেন দীপিতং অননুঞ্ঞাতভাৰমত্তং. তত্রানন্দাতিআদিকে তত্রাতি নিদ্ধারণে ভুম্মন্তি দস্সেন্তো, ‘‘তেসু চতূসু সমণব্রাহ্মণেসূ’’তি আহ. ইদং ৰচনং ‘‘অত্থি কির, ভো…পে… ৰিপাকো’’তি ইদং এৰং ৰুত্তং. অস্সাতি তথাৰাদিনো সমণব্রাহ্মণস্স. অঞ্ঞেনাকারেনাতি ‘‘যো কির, ভো’’তিআদিনা ৰুত্তকারণতো অঞ্ঞেন কারণেন. দ্ৰীসু ঠানেসূতি ‘‘অত্থি কির, ভো…পে… ৰিপাকো’’তি চ, ‘‘অপাযং…পে… নিরযং উপপন্ন’’ন্তি চ ইমেসু দ্ৰীসু পাঠপদেসেসু. অনুঞ্ঞাতা তদত্থস্স অত্থিভাৰতো. তীসু ঠানেসূতি ‘‘যো কির, ভো…পে… নিরযং উপপজ্জতি’’, ‘‘যম্পি সো…পে… তে সঞ্জানন্তি’’, ‘‘যম্পি সো যদেৰ…পে… মোঘমঞ্ঞ’’ন্তি ইমেসু তীসু পাঠপদেসেসু. অননুঞ্ঞাতা তদত্থস্সানেকন্তিকত্তা মিচ্ছাভিনিৰেসতো চ. তেনাহ ভগৰা – ‘‘অঞ্ঞথা হি, আনন্দ, তথাগতস্স মহাকম্মৰিভঙ্গঞাণ’’ন্তি. যথা তে অপ্পহীনৰিপল্লাসা পদেসঞাণসমণব্রাহ্মণা কম্মৰিভঙ্গং সঞ্জানন্তি, ততো অঞ্ঞথাৰ সব্বসো পহীনৰিপল্লাসস্স তথা আগমনাদিঅত্থেন তথাগতস্স সম্মাসম্বুদ্ধস্স মহাকম্মৰিভঙ্গঞাণং হোতীতি অত্থো.

৩০৩. ইমিনা দিব্বচক্খুকেন যং কম্মং করোন্তো দিট্ঠো, ততো পুব্বেতি যোজনা. ততোতি ততো করিযমানকম্মতো পুব্বে. খন্দোতি কুমারো. সিৰোতি ইস্সরো. পিতামহোতি ব্রহ্মা. ইস্সরাদীহীতি ইস্সরব্রহ্মপজাপতিআদীহি. ৰিসট্ঠোতি নিম্মিতো. মিচ্ছাদস্সনেনাতি মিচ্ছাদস্সনৰসেন. যন্তি যং কম্মং. তত্থাতি তেসু পাণাতিপাতাদিৰসেন পৰত্তকম্মেসু. দিট্ঠেৰ ধম্মেতি তস্মিংযেৰ অত্তভাৰে ৰিপাকং পটিসংৰেদেতীতি যোজনা. উপপজ্জিত্ৰাতি দুতিযভৰে নিব্বত্তিত্ৰা. অপরস্মিং পরিযাযেতি অঞ্ঞস্মিং যত্থ কত্থচি ভৰে.

একং কম্মরাসিন্তি পাণাতিপাতাদিভেদেন একং কম্মসমুদাযং. একং ৰিপাকরাসিন্তি তস্সেৰ অঙ্গেন একং ৰিপাকসমুদাযং. ইমিনাতি যথাৰুত্তেন দিব্বচক্খুকেন সমণেন ব্রাহ্মণেন ৰা অদিট্ঠা. তযোতি ‘‘পুব্বে ৰাস্স তং কতং হোতী’’তিআদিনা ৰুত্তা তযো. দ্ৰে ৰিপাকরাসীতি দিট্ঠধম্মৰেদনিযো অপরাপরিযাযৰেদনিযোতি দ্ৰে ৰিপাকরাসী. উপপজ্জৰেদনিযং পন তেন দিট্ঠং, তস্মা ‘‘দ্ৰে’’তি ৰুত্তং. দিট্ঠো একো, অদিট্ঠা তযোতি দিট্ঠে চ অদিট্ঠে চ চত্তারো কম্মরাসী, তথা দিট্ঠো একো, অদিট্ঠা দ্ৰেতি তযো ৰিপাকরাসী. ইমানি সত্ত ঠানানীতি যথাৰুত্তানি সত্ত ঞাণস্স পৰত্তনট্ঠানানি. ‘‘ইমস্স নাম কম্মস্স ইদং ফলং নিব্বত্ত’’ন্তি কম্মস্স, ফলস্স ৰা অদিট্ঠত্তা, ‘‘দুতিযৰারে দিব্বচক্খুকেন কিঞ্চি ন দিট্ঠ’’ন্তি ৰুত্তং. পঠমং ৰুত্তনযেন তযো কম্মরাসী ৰেদিতব্বা, ইধ দিব্বচক্খুকেন দিট্ঠস্স অভাৰতো, ‘‘পচ্চত্তট্ঠানানী’’তি ৰুত্তং.

ভৰতি ৰড্ঢতি এতেনাতি ভব্বং, ৰড্ঢিনিমিত্তং. ন ভব্বং অভব্বন্তি আহ ‘‘ভূতৰিরহিত’’ন্তি. অত্তনো ফলে ভাসনং দিব্বনং আভাসনন্তি আহ – ‘‘আভাসতি অভিভৰতি পটিবাহতী’’তি. বলৰকম্মন্তি মহাসাৰজ্জং কম্মং গরুসমাসেৰিতাদিভেদং. আসন্নেতি মরণে, অভিণ্হং উপট্ঠানেন ৰা তস্স মরণচিত্তস্স আসন্নে. বলৰকম্মন্তি গরুসমাসেৰিততাদিৰসেন বলৰং কুসলকম্মং. দুব্বলকম্মস্সাতি অত্তনো দুব্বলস্স. আসন্নে কুসলং কতন্তি ইধাপি আসন্নতা পুব্বে ৰুত্তনযেনেৰ ৰেদিতব্বা.

উপট্ঠানাকারেনাতি মরণস্স আসন্নকালে কম্মস্স উপট্ঠানাকারেন. তস্সাতি তস্স পুগ্গলস্স. নিব্বত্তিকারণভূতং হুত্ৰা উপট্ঠাতি অকুসলন্তি যোজনা. তিত্থিযা কম্মন্তরৰিপাকন্তরেসু অকুসলতায যং কিঞ্চি কম্মং যস্স কস্সচি ৰিপাকস্স কারণং কত্ৰা গণ্হন্তি হত্থিদস্সকঅন্ধাদযো ৰিয দিট্ঠমত্তাভিনিৰেসিনোতি, ‘‘অঞ্ঞতিত্থিযা…পে… উপট্ঠাতী’’তি ৰুত্তং. ইতরস্মিন্তি ভব্বঞ্চেৰ ভব্বাভাসঞ্চ, ভব্বং অভব্বাভাসন্তি ইমস্মিং দ্ৰযে. এসেৰ নযো পঠমদুতিযপুগ্গলৰসেন পুরিমানং দ্ৰিন্নং কম্মানং যোজনানযো ৰুত্তো উপট্ঠানাকারৰসেন. অযমেৰ ততিযচতুত্থপুগ্গলৰসেন পচ্ছিমানং দ্ৰিন্নং কম্মানং যোজনানযো. ততিযস্স হি কম্মস্স কুসলত্তা তস্স চ সগ্গে নিব্বত্তত্তা তত্থ কারণভূতং কুসলং হুত্ৰা উপট্ঠাতি; তথা চতুত্থস্সপি কম্মস্স কুসলত্তা, তস্স পন নিরযে নিব্বত্তত্তা তত্থ নিব্বত্তিকারণভূতং অঞ্ঞতিত্থিযানং অকুসলং হুত্ৰা উপট্ঠাতীতি. যং পনেত্থ অত্থতো অৰিভত্তং, তং সুৰিঞ্ঞেয্যমেৰ.

মহাকম্মৰিভঙ্গসুত্তৰণ্ণনায লীনত্থপ্পকাসনা সমত্তা.

৭. সল়াযতনৰিভঙ্গসুত্তৰণ্ণনা

৩০৪. ৰেদিতব্বানীতি এত্থ যথা ৰিদিতানি ছ অজ্ঝত্তিকানি আযতনানি ৰট্টদুক্খসমতিক্কমায হোন্তি, তথা ৰেদনং অধিপ্পেতন্তি আহ – ‘‘সহৰিপস্সনেন মগ্গেন জানিতব্বানী’’তি. তত্থ ৰিপস্সনায আরম্মণতো মগ্গেন অসম্মোহতো জাননং দট্ঠব্বং. সেসপদেসুপি এসেৰ নযো. মনো সৰিসেসং উপৰিচরতি আরম্মণে পৰত্ততি এতেহীতি মনোপৰিচারা, ৰিতক্কৰিচারা. আরম্মণে হি অভিনিরোপনানুমজ্জনেহি ৰিতক্কৰিচারেহি সহ চিত্তং পৰত্ততি, ন তব্বিরহিতং. তেনাহ ‘‘ৰিতক্কৰিচারা’’তিআদি. সত্তা পজ্জন্তি এতেহি যথারহং ৰট্টং ৰিৰট্টঞ্চাতি সত্তপদা, গেহনিস্সিতা ৰট্টপদা. যোগ্গানং দমনআচরিযা যোগ্গাচরিযা. তেনাহ ‘‘দমেতব্বদমকান’’ন্তি. সেসন্তি ৰুত্তাৰসেসং একসত্ততিৰিধৰিঞ্ঞাণং সফস্সরূপকস্সেৰ অধিপ্পেতত্তা.

৩০৫. ইধাতি ইমিস্সং ছৰিঞ্ঞাণকাযদেসনাযং. মনোধাতুত্তযৰিনিমুত্তমেৰ মনোৰিঞ্ঞাণধাতূতি ৰেদিতব্বং.

চক্খুম্হি সম্ফস্সোতি চক্খুং নিস্সায উপ্পন্নো সম্ফস্সো. তেনাহ – ‘‘চক্খুৰিঞাণসম্পযুত্তসম্ফস্সস্সেতং অধিৰচন’’ন্তি.

যথা কেৰলেন ৰিঞ্ঞাণেন রূপদস্সনং ন হোতি, এৰং কেৰলেন চক্খুপসাদেনপীতি ৰুত্তং ‘‘চক্খুৰিঞ্ঞাণেনা’’তি. তেন পাল়িযং চক্খুনাতি নিস্সযমুখেন নিস্সিতকিচ্চং ৰুত্তন্তি দস্সেতি. আরম্মণৰসেনাতি আরম্মণপচ্চযভাৰেন. ‘‘উপৰিচরতি’’চ্চেৰ কস্মা ৰুত্তং, ননু তত্থ ৰিতক্কব্যাপারোপি অত্থীতি? সচ্চং অত্থি. সো পনেত্থ তগ্গতিকোতি আহ – ‘‘ৰিতক্কো তংসম্পযুত্তো চা’’তি. সম্পযুত্তধম্মানম্পি উপৰিচরণং ৰিতক্কৰিচারানংযেৰেত্থ কিচ্চন্তি ‘‘ৰিতক্কৰিচারসঙ্খাতা মনোপৰিচারা’’তি ৰুত্তং. সোমনস্সযুত্তো উপৰিচারো সোমনস্সূপৰিচারো যথা ‘‘আজঞ্ঞরথো’’তি আহ ‘‘সোমনস্সেন সদ্ধি’’ন্তিআদি.

৩০৬. উপৰিচারানং উপস্সযট্ঠেন গেহং ৰিযাতি গেহং, রূপাদযোতি আহ – ‘‘গেহস্সিতানীতি কামগুণনিস্সিতানী’’তি. নিচ্চসঞ্ঞাদিনিক্খমনতো নেক্খম্মং ৰিপস্সনাতি, ‘‘নেক্খম্মস্সিতানীতি ৰিপস্সনানিস্সিতানী’’তি ৰুত্তং. ইট্ঠানন্তি কসিৰণিজ্জাদিৰসেন পরিযিট্ঠানন্তি আহ ‘‘পরিযেসিতান’’ন্তি. পিযভাৰো পন কন্তসদ্দেনেৰ কথিতোতি কামিতব্বানং মনো রমেতীতি মনোরমানং. লোকেন আমসীযতীতি লোকামিসং, তণ্হা. তায গহেতব্বতায ইট্ঠভাৰাপাদনেন পটিসঙ্খততায চ পটিসংযুত্তানং. অতীতে কতং উপ্পজ্জতি আরম্মণিকঅনুভৰনস্স অসম্ভৰতোতি অধিপ্পাযো. এদিসং অনুস্সরণং দিট্ঠগ্গহণানুস্সরেন চ হোতীতি দস্সেতুং, ‘‘যথাহ’’ন্তিআদি ৰুত্তং.

অনিচ্চাকারন্তি হুত্ৰা অভাৰাকারং. ৰিপরিণামৰিরাগনিরোধন্তি জরায মরণেন চাতি দ্ৰেধা ৰিপরিণামেতব্বঞ্চেৰ, ততো এৰ পলোকিতং ভঙ্গঞ্চ. অট্ঠকথাযং পন যস্মা উপ্পন্নং রূপং তেনেৰাকারেন ন তিট্ঠতি, অথ খো উপ্পাদাৰত্থাসঙ্খাতং পকতিং ৰিজহতি, ৰিজহিতঞ্চ জরাৰত্থায ততো ৰিগচ্ছতি, ৰিগচ্ছন্তঞ্চ ভঙ্গুপ্পত্তিযা নিরুজ্ঝতীতি ইমং ৰিসেসং দস্সেতুং, ‘‘পকতিৰিজহনেনা’’তিআদি ৰুত্তং. কামঞ্চেত্থ ‘‘যথাভূতং সম্মপ্পঞ্ঞায পস্সতো’’তি ৰুত্তং, অনুবোধঞাণং পন অধিপ্পেতং ৰীথিপটিপন্নায ৰিপস্সনায ৰসেনাতি ‘‘ৰিপস্সনাপঞ্ঞাযা’’তি ৰুত্তং উপৰিচারনিদ্দেসভাৰতো. তথা হি ৰক্খতি – ‘‘ছসুদ্ৰারেসু ইট্ঠারম্মণে আপাথগতে’’তিআদি. সঙ্খারানং ভেদং পস্সতোতি সব্বেসং সঙ্খারানং খণে খণে ভিজ্জনসভাৰং ৰীথিপটিপন্নেন ৰিপস্সনাঞাণেন পস্সতো. তেনাহ ‘‘সঙ্খারগতম্হি তিক্খে’’তিআদি. তত্থ সঙ্খাগতম্হীতি সঙ্খারগতে ৰিসযভূতে. তিক্খেতি ভাৰনাবলেন ইন্দ্রিযানঞ্চ সমতায তিব্বে. সূরেতি পটিপক্খেহি অনভিভূততায, তেসঞ্চ অভিভৰনসমত্থতায ৰিসদে পটুভূতে পৰত্তন্তে.

কিলেসানং ৰিক্খম্ভনৰসেন ৰূপসন্ততায সন্তচিত্তস্স, সংসারে ভযস্স ইক্খনতো ভিক্খুনো, উত্তরিমনুস্সধম্মসন্নিস্সিতত্তা অমানুসী রতীতি ৰিৰেকরতি নেক্খম্মরতি. যতো যতোতি যথা যথা নযৰিপস্সনাদীসু যেন যেন সম্মসনাকারেনাতি অত্থো. খন্ধানং উদযব্বযন্তি পঞ্চুপাদানক্খন্ধানং উপ্পাদঞ্চ ভঙ্গঞ্চ. অমতন্তং ৰিজানতন্তি ৰিজানন্তানং ৰিঞ্ঞূনং আরদ্ধৰিপস্সনানং তং পীতিপামোজ্জং অমতাধিগমহেতুতায অমতন্তি ৰেদিতব্বং.

ছসু দ্ৰারেসু ইট্ঠারম্মণে আপাথগতেতি রূপাদিৰসেন ছব্বিধে ইট্ঠারম্মণে যথারহং ছসু দ্ৰারেসু আপাথগতে. ৰিসযে চেতং ভুম্মৰচনং.

৩০৭. পচ্চুপ্পন্নন্তি সন্ততিপচ্চুপ্পন্নং. অনুত্তরৰিমোক্খো নাম অরহত্তং ইধ অধিপ্পেতং উক্কট্ঠনিদ্দেসেন. কথং পন তত্থ পিহং উপট্ঠপেতি, ন হি অধিগতং অরহত্তং আরম্মণং হোতি, ন চ তং আরব্ভ পিহা পৰত্ততীতি? কো ৰা এৰমাহ – ‘‘অরহত্তং আরম্মণং কত্ৰা পিহং উপট্ঠপেতী’’তি. অনুস্সুতিলদ্ধং পন পরিকপ্পসিদ্ধং অরহত্তং উদ্দিস্স পত্থনং ঠপেতি, তত্থ চিত্তং পণিদহতি. তেনাহ ভগৰা – ‘‘কুদাস্সু নামাহং তদাযতনং উপসম্পজ্জ ৰিহরিস্সামী’’তি. আযতনন্তি অরহত্তমেৰ ছল়ঙ্গসমন্নাগমাদিকারণভাৰতো, মনাযতনধম্মাযতনভাৰতো চ তথা ৰুত্তং, তং পনেতং দোমনস্সং পত্থনং পট্ঠপেন্তস্স উপ্পজ্জতি পত্থনায সহাৰত্তনতো. ন হি লোভদোসানং সহ ৰুত্তি অত্থি. পত্থনামূলকত্তাতি ইমিনা উপট্ঠাপযতো পদস্স হেতুঅত্থজোতকতমাহ. এৰন্তি ‘‘কুদাস্সুনামা’’তিআদিনা ৰুত্তাকারেন. উস্সুক্কাপেতুন্তি যথা মগ্গেন ঘটেতি, এৰং উস্সুক্কাপেতুং.

৩০৮. অঞ্ঞাণুপেক্খাতি অঞ্ঞাণসহিতা উপেক্খা অসমপেক্খনপৰত্তা. তেন তেন মগ্গোধিনা তস্স তস্স অপাযগমনীযকিলেসোধিস্স অনৰসেসতো জিতত্তা খীণাসৰো নিপ্পরিযাযতো ওধিজিনো নাম; তদভাৰতো পুথুজ্জনো নিপ্পরিযাযতোৰ অনোধিজিনো নাম; সেখো পন সিযা পরিযাযতো ওধিজিনোতি. তম্পি নিৰত্তেন্তো, ‘‘অখীণাসৰস্সাতি অত্থো’’তি আহ. আযতিং ৰিপাকং জিনিত্ৰাতি অপ্পৰত্তিকরণৰসেন সব্বসো আযতিং ৰিপাকং জিনিত্ৰা ঠিতত্তা খীণাসৰোৰ নিপ্পরিযাযতো ৰিপাকজিনো নাম; তদভাৰতো পুথুজ্জনো নিপ্পরিযাযতো অৰিপাকজিনো নাম; সেখো পন সিযা পরিযাযতো ৰিপাকজিনোতি. তম্পি নিৰত্তেন্তো ‘‘অখীণাসৰস্সেৰাতি অত্থো’’তি আহ. অপস্সন্তস্স রূপন্তি পাল়িতো পদং আনেত্ৰা সম্বন্ধিতব্বং. পাল়িযং পুব্বে ‘‘পুথুজ্জনস্সা’’তি ৰত্ৰা পুন ‘‘অস্সুতৰতো পুথুজ্জনস্সা’’তি ৰচনং অন্ধপুথুজ্জনস্সাযং উপেক্খা, ন কল্যাণপুথুজ্জনস্সাতি দস্সনত্থং. গেহস্সিতা উপেক্খা হি যং কিঞ্চি আরম্মণৰত্থুং অপেক্খস্সেৰ, ন নিরপেক্খস্সাতি ইট্ঠে, ইট্ঠমজ্ঝত্তে ৰা আরম্মণে সিযাতি ৰুত্তং ‘‘ইট্ঠারম্মণে আপাথগতে’’তি. অঞ্ঞাণেন পন তত্থ অজ্ঝুপেক্খনাকারপ্পত্তি হোতি. তেনাহ ‘‘গুল়পিণ্ডকে’’তিআদি.

ইট্ঠে অরজ্জন্তস্স অনিট্ঠে অদুস্সন্তস্সাতি ইদং যেভুয্যেন সত্তানং ইট্ঠে রজ্জনং, অনিট্ঠে দুস্সনন্তি কত্ৰা ৰুত্তং. অযোনিযোমনসিকারো হি তংতংআরম্মণৰসেন ন কত্থচিপি জৰননিযমং করোতীতি ৰুত্তৰিপরীতেপি আরম্মণে রজ্জনদুস্সনং সম্ভৰতি, তথাপিস্স রজ্জনদুস্সনং অত্থতো পটিক্খিত্তমেৰাতি দট্ঠব্বং. অসমপেক্খনেতি অসমং অযুত্তদস্সনে অযোনিসো সম্মোহপুব্বকং আরম্মণস্স গহণে.

৩০৯. পৰত্তনৰসেনাতি উপ্পাদনৰসেন চেৰ বহুলীকরণৰসেন চ. নিস্সায চেৰ আগম্ম চাতি আগমনট্ঠানভূতে নিস্সযপচ্চযভূতে চ কত্ৰা. অতিক্কন্তানি নাম হোন্তি ৰিক্খম্ভনেন উস্সারেন্তা সমুস্সারেন্তা.

সোমনস্সভাৰসামঞ্ঞং গহেত্ৰা, ‘‘সরিক্খকেনেৰ সরিক্খকং জহাপেত্ৰা’’তি ৰুত্তং. ইধাপি পহাযকং নাম পহাতব্বতো বলৰমেৰ, সংকিলেসধম্মানং বলৰভাৰতো সাতিসযং পন বলৰভাৰং সন্ধায ‘‘ইদানি বলৰতা’’তিআদি ৰুত্তং. বলৰভাৰতো ৰোদানধম্মানং অধিগমস্স অধিপ্পেতত্তা হেত্থ নেক্খম্মস্সিতদোমনস্সানম্পি পহানং জোতিতং.

উপেক্খায পহাযকভাৰেন অধিপ্পেতত্তা ‘‘উপেক্খাকথা ৰেদিতব্বা’’তি ৰুত্তং. ঝানস্স অলাভিনো চ লাভিনো চ পকিণ্ণকসঙ্খারসম্মসনং সন্ধায, ‘‘সুদ্ধসঙ্খারে চ পাদকে কত্ৰা’’তি. উপেক্খাসহগতাতি ভাৰনায পগুণভাৰং আগম্ম কদাচি অজ্ঝুপেক্খনৰসেনপি হি সম্মসনং হোতীতি. পাদকজ্ঝানৰসেন, সম্মসিতধম্মৰসেন ৰা আগমনৰিপস্সনায বহুলং সোমনস্সসহগতভাৰতো ‘‘ৰুট্ঠানগামিনী পন ৰিপস্সনা সোমনস্সসহগতাৰা’’তি নিযমেত্ৰা ৰুত্তং. উপেক্খাসহগতা হোতীতি এত্থাপি এসেৰ নযো. চতুত্থজ্ঝানাদীনীতি আদি-সদ্দেন অরূপজ্ঝানানি সঙ্গণ্হাতি. পুরিমসদিসাৰাতি পুরিমসদিসা এৰ, উপেক্খাসহগতা ৰা হোতি সোমনস্সসহগতা ৰাতি অত্থো. ইদং সন্ধাযাতি যং চতুত্থজ্ঝানাদিপাদকতো এৰ উপেক্খাসহগতং ৰুট্ঠানগামিনিৰিপস্সনং নিস্সায সোমনস্সসহগতায ৰিপস্সনায পহানং, ইদং সন্ধায. পহানন্তি চেত্থ সমতিক্কমলক্খণং ৰেদিতব্বং.

এতং ৰিসেসং ৰিপস্সনায আৰজ্জনট্ঠানভূতং. ৰুট্ঠানগামিনিযা আসন্নে সমাপন্নজ্ঝানৰিপস্সনা পাদকজ্ঝানৰিপস্সনা, সম্মসিতধম্মোতি ৰিপস্সনায আরম্মণভূতা খন্ধা. পুগ্গলজ্ঝাসযোতি পাদকজ্ঝানস্স সম্মসিতজ্ঝানস্স চ ভেদে সতি পটিপজ্জনকস্স পুগ্গলস্স, ‘‘অহো ৰত ময্হং পঞ্চঙ্গিকং ঝানং ভৰেয্য চতুরঙ্গিক’’ন্তিআদিনা পুব্বে পৰত্তঅজ্ঝাসযো. তেসম্পি ৰাদেতি এত্থ পঠমথেরৰাদে. অযমেৰ…পে… নিযমেতি ততো ততো দুতিযাদিপাদকজ্ঝানতো উপ্পন্নস্স সঙ্খারুপেক্খাঞাণস্স পাদকজ্ঝানাতিক্কন্তানং অঙ্গানং অসমাপজ্জিতুকামতা ৰিরাগভাৰনাভাৰতো ইতরস্স চ অতব্ভাৰতো. এতেনেৰ হি পঠমথেরৰাদে অপাদকপঠমজ্ঝানপাদকমগ্গা পঠমজ্ঝানিকাৰ হোন্তি, ইতরে চ দুতিযজ্ঝানিকাদিমগ্গা পাদকজ্ঝানৰিপস্সনানিযমেহি তংতংঝানিকাৰ. এৰং সেসৰাদেসুপি ৰিপস্সনানিযমো যথাসম্ভৰং যোজেতব্বো. তেনাহ – ‘‘তেসম্পি ৰাদে অযমেৰ পুব্বভাগে ৰুট্ঠানগামিনিৰিপস্সনাৰ নিযমেতী’’তি. ৰুত্তাৰ, তস্মা ন ইধ ৰত্তব্বাতি অধিপ্পাযো.

৩১০. নানত্তাদি কামাৰচরাদিকুসলাদিৰিভাগতো নানাৰিধা. তেনাহ ‘‘অনেকপ্পকারা’’তি. নানত্তসিতাতি রূপসদ্দাদিনানারম্মণনিস্সযা. একত্তা একসভাৰা জাতিভূমিআদিৰিভাগাভাৰতো. একারম্মণনিস্সিতাতি একপ্পকারেনেৰ আরম্মণে পৰত্তা. হেট্ঠা অঞ্ঞাণুপেক্খা ৰুত্তা ‘‘বালস্স মুল়্হস্সা’’তিআদিনা (ম. নি. ৩.৩০৮). উপরি ছল়ঙ্গুপেক্খা ৰক্খতি ‘‘উপেক্খকো ৰিহরতী’’তিআদিনা (ম. নি. ৩.৩১১). দ্ৰে উপেক্খা গহিতা দ্ৰিন্নম্পি একত্তা, একজ্ঝং গহেতব্বতো, নানত্তসিতায উপেক্খায পকাসিতভাৰতো চ.

অঞ্ঞাণুপেক্খা অঞ্ঞা সদ্দাদীসু তত্থ তত্থেৰ ৰিজ্জমানত্তা. রূপেসূতি চ ইমিনা ন কেৰলং রূপাযতনৰিসেসা এৰ গহিতা, অথ খো কসিণরূপানিপীতি আহ – ‘‘রূপে উপেক্খাভাৰঞ্চ অঞ্ঞা’’তিআদি. একত্তসিতভাৰোপি ইধ একত্তৰিসযসম্পযোগৰসেনেৰ ইচ্ছিতো, ন আরম্মণৰসেন চাতি দস্সেতুং, ‘‘যস্মা পনা’’তিআদি ৰুত্তং. তেনেৰাহ ‘‘তত্থা’’তিআদি. সম্পযুত্তৰসেনাতি সম্পযোগৰসেন. আকাসানঞ্চাযতনং নিস্সযতীতি আকাসানঞ্চাযতননিস্সিতা, আকাসানঞ্চাযতনখন্ধনিস্সিতা. সেসাসুপীতি ৰিঞ্ঞাণঞ্চাযতননিস্সিতাদীসুপি.

অরূপাৰচরৰিপস্সনুপেক্খাযাতি অরূপাৰচরধম্মারম্মণায ৰিপস্সনুপেক্খায. রূপাৰচরৰিপস্সনুপেক্খন্তি এত্থাপি এসেৰ নযো. তায কামরূপারূপভেদায তণ্হায নিব্বত্তাতি তম্মযা, তেভূমকধম্মা, তেসং ভাৰো তম্মযতা, তণ্হা যস্স গুণস্স ৰসেন অত্থে সদ্দনিৰেসো, তদভিধানকোতি আহ – ‘‘তম্মযতা নাম তণ্হা’’তি. অতম্মযতা তম্মযতায পটিপক্খোতি কত্ৰা. ৰিপস্সনুপেক্খন্তি, ‘‘যদত্থি যং ভূতং, তং পজহতি উপেক্খং পটিলভতী’’তি (দী. নি. ৩.৭১; অ. নি. ৭.৫৫) এৰমাগতং সঙ্খারৰিচিননে মজ্ঝত্তভূতং উপেক্খং.

৩১১. যদরিযোতি এত্থ দ-কারো পদসন্ধিকরো, উপযোগপুথুৰচনে চ য-সদ্দোতি দস্সেন্তো, ‘‘যে সতিপট্ঠানে অরিযো’’তি আহ. কামং ‘‘অরিযো’’তি পদং সব্বেসম্পি পটিৰিদ্ধসচ্চানং সাধারণং, ৰক্খমানস্স পন ৰিসেসস্স বুদ্ধাৰেণিকত্তা, ‘‘অরিযো সম্মাসম্বুদ্ধো’’তি ৰুত্তং. ন হি পচ্চেকবুদ্ধাদীনং অযমানুভাৰো অত্থি. তীসু ঠানেসূতি ন সুস্সূসন্তীতি ৰা, একচ্চে ন সুস্সূসন্তি একচ্চে সুস্সূসন্তীতি ৰা, সুস্সূসন্তীতি ৰা, পটিপন্নাপটিপন্নানং সাৰকানং পটিপত্তিসঙ্খাতেসু তীসু সতিপট্ঠানেসু. সতিং পট্ঠপেন্তোতি পটিঘানুনযেহি অনৰস্সুতত্তা তদুভযনিৰত্তত্তা সব্বদা সতিং উপট্ঠপেন্তো. বুদ্ধানমেৰ সা নিচ্চং উপট্ঠিতসতিতা, ন ইতরেসং আৰেণিকধম্মভাৰতো. আদরেন সোতুমিচ্ছা ইধ সুস্সূসাতি তদভাৰং দস্সেন্তো, ‘‘সদ্দহিত্ৰা সোতুং ন ইচ্ছন্তী’’তি আহ. ন অঞ্ঞাতি ‘‘ন অঞ্ঞাযা’’তি ৰত্তব্বে যকারলোপেন নিদ্দেসোতি আহ ‘‘ন জাননত্থাযা’’তি. সত্থু ওৰাদস্স অনাদিযনমেৰ ৰোক্কমনন্তি আহ – ‘‘অতিক্কমিত্ৰা…পে… মঞ্ঞন্তী’’তি.

গেহস্সিতদোমনস্সৰসেনাতি ইদং ইধ পটিক্খিপিতব্বমত্তদস্সনপদং দট্ঠব্বং. নেক্খম্মস্সিতদোমনস্সস্সপি সত্থু পসঙ্গৰসেন ‘‘ন চেৰ অত্তমনো হোতী’’তি অত্তমনপটিক্খেপেন অনত্তমনতা ৰুত্তা ৰিয হোতীতি তং পটিসেধেন্তো – ‘‘অপ্পতীতো হোতীতি ন এৰমত্থো দট্ঠব্বো’’তি. তস্স সেতুঘাতো হি তথাগতানং. যদি এৰং কস্মা অত্তমনতাপটিক্খেপোতি আহ – ‘‘অপ্পটিপন্নকেসু পন অনত্তমনতাকারণস্স অভাৰেনেতং ৰুত্ত’’ন্তি. পটিঘঅৰস্সৰেনাতি ছহি দ্ৰারেহি পটিঘৰিস্সন্দনেন, পটিঘপ্পৰত্তিযাতি অত্থো. উপ্পিলাৰিতোতি ন এৰমত্থো দট্ঠব্বো উপ্পিলাৰিতত্তস্স বোধিমূলে এৰ পহীনত্তা. পটিপন্নকেসূতি ইদং অধিকারৰসেন ৰুত্তং, অপ্পটিপন্নকেসুপি তথাগতস্স অনত্তমনতাকারণং নত্থেৰ. এতং ৰুত্তন্তি এতং ‘‘অত্তমনো চেৰ হোতী’’তিআদিৰচনং ৰুত্তং সাৰকানং সম্মাপটিপত্তিযা সত্থু অনৰজ্জায চিত্তারাধনায সম্ভৰতো.

৩১২. দমিতোতি নিব্বিসেৰনভাৰাপাদনেন সিক্খাপিতো. ইরিযাপথপরিৰত্তনৰসেন অপরিৰত্তিত্ৰা একদিসায এৰ সত্তদিসাৰিধাৰনস্স ইধাধিপ্পেতত্তা সারিতানং হত্থিদম্মাদীনং একদিসাধাৰনম্পি অনিৰত্তনৰসেনেৰ যুত্তন্তি আহ – ‘‘অনিৰত্তিত্ৰা ধাৰন্তো একংযেৰ দিসং ধাৰতী’’তি. কাযেন অনিৰত্তিত্ৰাৰাতি কাযেন অপরিৰত্তিত্ৰা এৰ. ৰিমোক্খৰসেন অট্ঠ দিসা ৰিধাৰতি, ন পুরত্থিমাদিদিসাৰসেন. একপ্পহারেনেৰাতি একনীহারেনেৰ, একস্মিংযেৰ ৰা দিৰসে একভাগেন. ‘‘পহারো’’তি হি দিৰসস্স ততিযো ভাগো ৰুচ্চতি. ৰিধাৰনঞ্চেত্থ ঝানসমাপজ্জনৰসেন অকলঙ্কমপ্পতিসাতং জৰনচিত্তপৰত্তন্তি আহ ‘‘সমাপজ্জতিযেৰা’’তি. সেসং সুৰিঞ্ঞেয্যমেৰ.

সল়াযতনৰিভঙ্গসুত্তৰণ্ণনায লীনত্থপ্পকাসনা সমত্তা.

৮. উদ্দেসৰিভঙ্গসুত্তৰণ্ণনা

৩১৩. দেসেতব্বস্স অত্থস্স উদ্দিসনং উদ্দেসো, ৰিভজনং ৰিভঙ্গোতি আহ – ‘‘মাতিকঞ্চ ৰিভজনঞ্চা’’তি তুলেয্যাতিআদীনি চত্তারিপি পদানি পঞ্ঞাৰেৰচনানি. অথ ৰা তুলেয্যাতি তুলনভূতায পঞ্ঞায তস্স ধম্মস্স পগ্গহাদিৰিধিনা পরিতুলেয্য. তীরেয্যাতি তীরণভূতায পঞ্ঞায তত্থ ঞাণকিরিযাসমাপনৰসেন তীরেয্য. পরিগ্গণ্হেয্যাতি তথাসমাপন্নো আনিসংসে অস্সাদআদীনৰে চ ৰিচিনেয্য. পরিচ্ছিন্দেয্যাতি পরিচ্ছিন্দভূতেন ঞাণেন অত্থং পরিচ্ছিন্দিত্ৰা জানেয্য. আরম্মণেসূতি রূপাদিপুথুত্তারম্মণেসু. নিকন্তিৰসেনাতি নিকামনৰসেন অপেক্খাৰসেন. তিট্ঠমানন্তি পৰত্তমানং. গোচরজ্ঝত্তেতি ঝানারম্মণভূতে. তঞ্হি ভাৰনাচিত্তেনাভিভুয্য অৰিস্সজ্জিত্ৰা গয্হমানং অজ্ঝত্তং ৰিয হোতীতি ‘‘গোচরজ্ঝত্ত’’ন্তি ৰুচ্চতি. ভাৰনং আরদ্ধস্স ভিক্খুনো যদি ভাৰনারম্মণে নিকন্তি উপ্পজ্জেয্য, তায নিকন্তিযা উপরি ভাৰনং ৰিস্সজ্জেত্ৰা চিত্তসংকোচৰসেন সণ্ঠিতং নাম, তদভাৰেন অসণ্ঠিতং নাম হোতীতি, ‘‘অজ্ঝত্তং অসণ্ঠিত’’ন্তি ৰুত্তন্তি দস্সেন্তো, ‘‘গোচরজ্ঝত্তে নিকন্তিৰসেন অসণ্ঠিত’’ন্তি আহ. তথা হি ৰক্খতি – ‘‘নিকন্তিৰসেন হি অতিট্ঠমানং হানভাগিযং ন হোতি, ৰিসেসভাগিযমেৰ হোতী’’তি. অগ্গহেত্ৰাতি রূপাদীসু কিঞ্চি তণ্হাদিগ্গাহৰসেন অগ্গহেত্ৰা. তথা অগ্গহণেনেৰ হি তণ্হাপরিতাসাদিৰসেন ন পরিতস্সেয্য. অৰসেসস্স চ দুক্খস্সাতি সোকাদিদুক্খস্স. অৰসেসস্স চ দুক্খস্সাতি ৰা জাতিজরামরণসীসেন ৰিপাকদুক্খস্স গহিতত্তা কিলেসদুক্খস্স চেৰ সংসারদুক্খস্স চাতি অত্থো.

৩১৬. রূপমেৰ কিলেসুপ্পত্তিযা কারণভাৰতো রূপনিমিত্তং. রাগাদিৰসেন তং অনুধাৰতীতি রূপনিমিত্তানুসারী.

৩১৮. নিকন্তিৰসেন অসণ্ঠিতন্তি অপেক্খাৰসেন সণ্ঠিতং নিকন্তিং পহায পৰত্তমানং উপরি ৰিসেসাৰহতোতি. তেনাহ ‘‘নিকন্তিৰসেন হী’’তিআদি.

৩২০. অগ্গহেত্ৰা অপরিতস্সনাতি পঞ্চুপাদানক্খন্ধে, ‘‘এতং মমা’’তিআদিনা তণ্হাদিগ্গাহৰসেন উপাদিযিত্ৰা তণ্হাপরিতাসাদিৰসেন পরিতস্সনা, ৰুত্তৰিপরিযাযেন অগ্গহেত্ৰা অপরিতস্সনা ৰেদিতব্বা. কথং পনেসা অনুপাদাপরিতস্সনা হোতীতি মহাথেরস্স অধিপ্পাযং ৰিৰরিতুং চোদনং সমুট্ঠপেতি? উপাদাতব্বস্স অভাৰতোতি তস্স অনুপাদাপরিতস্সনাভাৰে কারণৰচনং. যদি হীতিআদি তস্স সমত্থনং. উপাদাপরিতস্সনাৰ অস্স তথা উপাদাতব্বস্স তথেৰ উপাদিন্নত্তা. এৰন্তি নিচ্চাদিআকারেন. উপাদিন্নাপীতি গহিতপরামট্ঠাপি. অনুপাদিন্নাৰ হোন্তি অযোনিসো গহিতত্তা, ৰিঞ্ঞূসু নিস্সায জানিতব্বত্তা চ. দিট্ঠিৰসেনাতি মিচ্ছাদিট্ঠিযা গহণাকারৰসেন, তস্স পন অযথাভূতগাহিতায পরমত্থতো চ অভাৰতো. অত্থতোতি পরমত্থতো. অনুপাদাপরিতস্সনাযেৰ নাম হোতি উপাদাতব্বাকারস্স অভাৰেন তং অনুপাদিযিত্ৰা এৰ পরিতস্সনাতি কত্ৰা.

পরিৰত্ততীতি ন তদেৰ রূপং অঞ্ঞথা পৰত্তং পরিৰত্ততি, অথ খো পকতিজহনেন সভাৰৰিগমেন নস্সতি ভিজ্জতি. ৰিপরিণতন্তি অঞ্ঞথত্তং গতং ৰিনট্ঠং. কম্মৰিঞ্ঞাণন্তি অভিসঙ্খারৰিঞ্ঞাণং. ‘‘রূপং অত্তা’’তিআদি মিচ্ছাগাহৰসেন ৰিঞ্ঞাণস্স রূপভেদেন ৰুত্তস্স ভেদানুপরিৰত্তি হোতি. ৰিপরিণামং অনুগন্ত্ৰা ৰিপরিৰত্তনতং আরব্ভ পৰত্তং ৰিপরিণামানুপরিৰত্তং; ততো সমুপ্পন্না পরিতস্সনা ৰিপরিণামানুপরিৰত্তজা পরিতস্সনাতি দস্সেন্তো আহ – ‘‘ৰিপরিণামস্স…পে… পরিতস্সনা’’তি. অকুসলধম্মসমুপ্পাদা চাতি, ‘‘যং অহু ৰত মে, তং ৰত মে নত্থী’’তিআদিনা পৰত্তা অকুসলচিত্তুপ্পাদধম্মা. খেপেত্ৰাতি পৰত্তিতুং অপ্পদানৰসেন অনুপ্পত্তিনিমিত্ততায খেপেত্ৰা. ভযতাসেনাতি ভাযনৰসেনপি চিত্তুত্রাসেন. তণ্হাতাসেনাতি তস্সনেন. সৰিঘাতোতি চিত্তৰিঘাতনৰিঘাতেন সৰিঘাতো. ততো এৰ চেতোদুক্খেন সদুক্খো. মণিকরণ্ডকসঞ্ঞাযাতি রিত্তকরণ্ডংযেৰ মণিপরিপুণ্ণকরণ্ডোতি উপ্পন্নসঞ্ঞায. অগ্গহেত্ৰা পরিতস্সনাতি গহেতব্বস্স অভাৰেন গহণম্পি অৰিজ্জমানপক্খিযমেৰাতি অগ্গহেত্ৰা পরিতস্সনা নাম হোতি.

৩২১. কম্মৰিঞ্ঞাণমেৰ নত্থি সতি কম্মৰিঞ্ঞাণে রূপভেদানুপরিৰত্তি সিযাতি কম্মৰিঞ্ঞাণাভাৰদস্সনমুখেন খীণাসৰস্স সব্বসো কিলেসাভাৰং দস্সেতি. সেসং সুৰিঞ্ঞেয্যমেৰ.

উদ্দেসৰিভঙ্গসুত্তৰণ্ণনায লীনত্থপ্পকাসনা সমত্তা.

৯. অরণৰিভঙ্গসুত্তৰণ্ণনা

৩২৩. গেহস্সিতৰসেনাতি কিলেসনিস্সিতৰসেন অনুরোধৰসেন. নেৰ উক্খিপেয্যাতি ন অনুগ্গণ্হেয্য. ন অৰক্খিপেয্যাতি গেহস্সিতৰসেন ৰিরোধৰসেন ন নিগ্গণ্হেয্য. অনুরোধেন ৰিনা সম্পহংসনৰসেন যথাভূতগুণকথনং নেৰুস্সাদনা ৰজ্জাভাৰতো; তথা ৰিরোধেন ৰিনা ৰিৰেচনৰসেন যথাভূতদোসকথনং ন অপসাদনং. সভাৰমেৰাতি যথাভূতসভাৰমেৰ কস্সচি পুগ্গলস্স অনাদেসকরণৰসেন কথেয্য, সেয্যথাপি আযস্মা সুভূতিত্থেরো. ৰিনিচ্ছিতসুখন্তি, ‘‘অজ্ঝত্তং অনৰজ্জ’’ন্তিআদিনা ৰিসেসতো ৰিনিচ্ছিতসুখায হোতি. পরম্মুখা অৰণ্ণন্তি স্ৰাযং রহোৰাদো পেসুঞ্ঞূপসংহারৰসেন পৰত্তো ইধাধিপ্পেতোতি আহ ‘‘পিসুণৰাচন্তি অত্থো’’তি. খীণাতীতি খীণো, যো ভাসতি, যঞ্চ উদ্দিস্স ভাসতি, দ্ৰেপি হিংসতি ৰিবাধতীতি অত্থো, তং খীণৰাদং. স্ৰাযং যস্মা কিলেসেহি আকিণ্ণো সংকিলিট্ঠো এৰ চ হোতি, তস্মা ৰুত্তং – ‘‘আকিণ্ণং সংকিলিট্ঠং ৰাচ’’ন্তি. তেন অৰসিট্ঠং তিৰিধম্পি ৰচীদুচ্চরিতমাহ. অধিট্ঠহিত্ৰাতি, ‘‘ইদমেৰ সচ্চ’’ন্তি অজ্ঝোসায. আদাযাতি পগ্গয্হ. ৰোহরেয্যাতি সমুদাচরেয্য. লোকসমঞ্ঞন্তি লোকসঙ্কেতং.

৩২৪. আরম্মণতো সম্পযোগতো কামেহি পটিসংহিতত্তা কামপটিসন্ধি, কামসুখং. তেনাহ ‘‘কামূপসংহিতেন সুখেনা’’তি. সদুক্খোতি ৰিপাকদুক্খেন সংকিলেসদুক্খেন সদুক্খো. তথা সপরিল়াহোতি ৰিপাকপরিল়াহেন চেৰ কিলেসপরিল়াহেন চ সপরিল়াহো.

৩২৬. ৰট্টতো নিস্সরিতুং অদত্ৰা তত্থেৰ সীদাপনতো মিচ্ছাপটিপদাভাৰেন সত্তে সংযোজেতীতি সংযোজনং, ৰিসেসতো ভৰসংযোজনং তণ্হাতি আহ ‘‘তণ্হাযেতং নাম’’ন্তি. ন তণ্হাযেৰ মানাদযোপি সংযোজনত্তং সাধেন্তি নাম সব্বসো সংযোজনতো সুট্ঠু বন্ধনতো. তেন ৰুত্তং – ‘‘অৰিজ্জানীৰরণানং, ভিক্খৰে, সত্তানং তণ্হাসংযোজনান’’ন্তি (সং. নি. ২.১২৫-১২৬).

ইমং চতুক্কন্তি, ‘‘যে কামপটিসন্ধিসুখিনো সোমনস্সানুযোগং অনুযুত্তা, যে অত্তকিলমথানুযোগং অনুযুত্তা’’তি এৰমাগতং ইমং চতুক্কং নিস্সায. ‘‘এতদগ্গে ঠপিতো’’তি, ৰত্ৰা তং নিস্সায ঠপিতভাৰং ৰিত্থারতো দস্সেতুং, ‘‘ভগৰতো হী’’তিআদি ৰুত্তং. উস্সাদনাঅপসাদনা পঞ্ঞাযন্তি তথাগতেন ৰিনেতব্বপুগ্গলৰসেন ধম্মদেসনায পৰত্তেতব্বতো. অযং পুগ্গলো…পে… আচারসম্পন্নোতি ৰা নত্থি পরেসং অনুদ্দেসকৰসেন ধম্মদেসনায পৰত্তনতো.

৩২৯. পরম্মুখা অৰণ্ণন্তি নিন্দিযস্স দোসস্স নিন্দনং. ন হি কদাচি নিন্দিযো পসংসিযো হোতি, তং পন কালং ঞত্ৰাৰ কথেতব্বন্তি আহ, ‘‘যুত্তপত্তকালং ঞত্ৰাৰা’’তি. খীণৰাদেপি এসেৰ নযো তস্স রহোৰাদেন সমানযোগক্খমত্তা.

৩৩০. ঘাতীযতীতি ৰধীযতি. সদ্দোপি ভিজ্জতি নস্সতি, ভেদো হোতীতি অত্থো. গেলঞ্ঞপ্পত্তোতি খেদং পরিস্সমং পত্তো. অপলিবুদ্ধন্তি দোসেহি অননুপতিতং.

৩৩১. অভিনিৰিস্স ৰোহরতীতি এৰমেতং, ন ইতো অঞ্ঞথাতি তং জনপদনিরুত্তিং অভিনিৰিসিত্ৰা সমুদাচরতি. অতিধাৰনন্তি সমঞ্ঞং নামেতং লোকসঙ্কেতসিদ্ধা পঞ্ঞত্তীতি পঞ্ঞত্তিমত্তে অট্ঠত্ৰা পরমত্থতো থামসা পরামস্স ৰোহরণং.

৩৩২. অপরামসন্তোতি অনভিনিৰিসন্তো সমঞ্ঞামত্ততোৰ ৰোহরতি.

৩৩৩. মরিযাদভাজনীযন্তি যথাৰুত্তসম্মাপটিপদায মিচ্ছাপটিপদায চ অঞ্ঞমঞ্ঞং সঙ্করভাৰৰিভাজনং. রণন্তি সত্তা এতেহি কন্দন্তি অকন্দন্তাপি কন্দনকারণভাৰতোতি রণা; রাগদোসমোহা, দসপি ৰা কিলেসা, সব্বেপি ৰা একন্তাকুসলা, তেহি নানপ্পকারদুক্খনিব্বত্তকেহি অভিভূতা সত্তা কন্দন্তি; সহ রণেহীতি সরণো. রণসদ্দো ৰা রাগাদিরেণূসু নিরুল়্হো. তেনাহ ‘‘সরজো সকিলেসো’’তি. পাল়িযং পন ‘‘সদুক্খো এসো ধম্মো’’তিআদিনা আগতত্তা কামসুখানুযোগাদযোপি ‘‘সরণো’’তি ৰুত্তাতি দুক্খাদীনং রণভাৰো তন্নিব্বত্তকসভাৰানং অকুসলানং সরণতা চ ৰেদিতব্বা. অরণোতিআদীনং পদানং ৰুত্তৰিপরিযাযেন অত্থো ৰেদিতব্বো.

ৰত্থুং সোধেতীতি নিরোধসমাপজ্জনেন মহপ্ফলভাৰকরণেন দক্খিণেয্যৰত্থুভূতং অত্তানং ৰিসোধেতি; নিরোধসমাপত্তিযা ৰত্থুৰিসোধনং নিরোধং সমাপজ্জিত্ৰা ৰুট্ঠিতানং পচ্চেকবুদ্ধানং মহাকস্সপত্থেরাদীনং দিন্নদক্খিণাৰিসুদ্ধিযা দীপেতব্বং. তেনাহ ‘‘তথা হী’’তিআদি. তথেৰাতি ইমিনা ‘‘পিণ্ডায চরন্তো’’তিআদিং উপসংহরতি. মেত্তাভাৰনায মুদুভূতচিত্তবহুমানপুব্বকং দেন্তীতি, ‘‘সুভূতিত্থেরো দক্খিণং ৰিসোধেতী’’তি ৰুত্তং. তেন দাযকতোপি দক্খিণাৰিসুদ্ধিং দস্সেতি. ৰত্থুসোধনং পন পটিভাগতো. এৰং পন কাতুং সক্কাতি সাৰকানম্পি কিমেৰং লহুৰুট্ঠানাধিট্ঠানং সাৰকেসু চিণ্ণৰসীভাৰো সম্ভৰতীতি পুচ্ছতি. ইতরো অগ্গসাৰকমহাসাৰকেসু কিং ৰত্তব্বং, পকতিসাৰকেসুপি ৰসিপ্পত্তেসু লব্ভতীতি তে দস্সেন্তো, ‘‘আম সক্কা’’তিআদিমাহ. সেসং সুৰিঞ্ঞেয্যমেৰ.

অরণৰিভঙ্গসুত্তৰণ্ণনায লীনত্থপ্পকাসনা সমত্তা.

১০. ধাতুৰিভঙ্গসুত্তৰণ্ণনা

৩৪২. অপরিক্খীণাযুকং পুক্কুসাতিকুলপুত্তং উদ্দিস্স গমনন্তি কত্ৰা ৰুত্তং ‘‘তুরিতগমনচারিক’’ন্তি. মম ৰাসুপগমনেন তৰ চিত্তস্স অফাসুকং অনিট্ঠং সচে নত্থি. সোতি পুব্বুপগতো. দিন্নং দিন্নমেৰ ৰট্টতীতি একৰারং দিন্নং দিন্নমেৰ যুত্তং, ন পুন দাতব্বন্তি অধিপ্পাযো. কতং কতমেৰাতি সঙ্গহত্থং কতং অনুচ্ছৰিককম্মং কতমেৰ, ন তং পুন ৰিপরিৰত্তেতব্বন্তি অধিপ্পাযো.

পুক্কুসাতিম্হি উভযথাপি কুলপুত্তভাৰো পরিপুণ্ণো এৰাতি আহ – ‘‘জাতিকুলপুত্তোপি আচারকুলপুত্তোপী’’তি. তত্রাতি তস্মিং তক্কসীলতো আগমনে. অঙ্কে নিপন্নদারকং ৰিয জনং তোসেতি তুট্ঠিং পাপেতি. রতনানি উপ্পজ্জন্তি পব্বতসমুদ্দাদিসন্নিস্সিতত্তা পচ্চন্তদেসস্স. দস্সনীযন্তি দস্সনেনেৰ সুখাৰহং. এৰরূপন্তি দস্সনীযং সৰনীযঞ্চ.

অনগ্ঘকম্বলে মহগ্ঘকম্বলে. সারকরণ্ডকেতি চন্দনসারাদিসারমযকরণ্ডকে. লিখাপেত্ৰা উক্কিরাপেত্ৰা. লাখায ৰট্টাপেত্ৰাতি মুখং পিদহিত্ৰা লাখাপরিকম্মং কারেত্ৰা.

অন্তো দুস্সভণ্ডিকং অত্থীতি অঞ্ঞাসি নাতিগরুকভাৰতো. অনগ্ঘা অহেসুন্তি ৰণ্ণসম্পত্তিফস্সসম্পত্তিপমাণমহত্তদুন্নিম্মাপিযতাহি মহগ্ঘা অহেসুং, মহাপুঞ্ঞো রাজা তস্স অত্থেৰাতি অধিপ্পাযো.

যদি এৰং, ‘‘কিন্নু খো পেসেমী’’তি কস্মা ৰীমংসং আপজ্জীতি আহ – ‘‘অপিচ খো পনা’’তিআদি. সোতি বিম্বিসারো রাজা. ৰিচিনিতুং আরদ্ধো রতনস্স অনেকৰিধত্তা উত্তরুত্তরিঞ্চ পণীততরাদিভাৰতো. সুৰণ্ণরজতাদীতি সুৰণ্ণরজতপৰাল়মণিমুত্তাৰেল়ুরিযাদি. ইন্দ্রিযবদ্ধন্তি চক্খাদিইন্দ্রিযপটিবদ্ধং. পদেসন্তি গুণৰসেন একদেসং ন পাপুণাতি.

সামং সচ্চানং অভিসম্বুদ্ধতাসামঞ্ঞেন, ‘‘বুদ্ধরতনম্পি দুৰিধ’’ন্তি ৰুত্তং. বুদ্ধরতনসমং রতনং নাম নত্থি, যস্মা পন ইমস্মিং লোকে পরস্মিং ৰা পন বুদ্ধেন সদিসো ন ৰিজ্জতীতি. পঠমবোধিযংযেৰ পৰত্ততীতি কত্ৰা ৰুত্তং ‘‘ঘোসোপী’’তিআদি.

রাজা তুট্ঠো চিন্তেসি, ‘‘তত্থ অৰিজ্জমানংযেৰ পেসেতুং লদ্ধ’’ন্তি. তস্মাতি যস্মা পরিপুণ্ণং একদিৰসম্পি তস্মিং পদেসে বুদ্ধানং আৰাসপরিগ্গহো নত্থি, তস্মা. পুব্বদিসামুখন্তি পুব্বদিসাভিমুখং সীহপঞ্জরং. তেনস্স সুৰিভূতালোকতং দস্সেতি.

এৰং অনঞ্ঞসাধারণস্স ভগৰতো ঈদিসো সমুদাগমোতি দস্সেতুং, ‘‘এৰং দস পারমিযো পূরেত্ৰা’’তিআদি ৰুত্তং. এৰং সম্পন্নসমুদাগমস্স তদনুরূপা অযং ফলসম্পদাতি দস্সেতুং, ‘‘তুসিতভৰনতো’’তিআদি ৰুত্তং.

অরিযধম্মো নাম অরিযমগ্গপ্পধানো, অরিযমগ্গো চ সত্ততিংসবোধিপক্খিযসঙ্গহো, তে চ উদ্দেসমত্তেনেৰ গহিতাতি আহ – ‘‘সত্ততিংসবোধিপক্খিযে একদেসেন লিখিত্ৰা’’তি. চূল়সীলাদীনি ব্রহ্মজালে (দী. নি. ১.৮-৯) আগতনযেন ৰেদিতব্বানি. ছদ্ৰারসংৰরং সতিসম্পজঞ্ঞন্তি মনচ্ছট্ঠানং দ্ৰারানং সংৰরণৰসেন সত্তট্ঠানিকং সতিসম্পজঞ্ঞং. দ্ৰাদসপ্পভেদং চীৰরাদিচতুপ্পচ্চযসন্তোসং. অরঞ্ঞরুক্খমূলাদীনঞ্চ ৰিভঙ্গং ভাৰনানুকূলং সেনাসনং. ‘‘অভিজ্ঝং লোকে পহাযা’’তিআদিনা ৰুত্তং নীৰরণপ্পহানং. পরিকম্মন্তি কসিণাদিপরিকম্মং. পাল়িযং আগতনযেন অট্ঠতিংস কম্মট্ঠানানি. ৰিসুদ্ধিপটিপাটিযা যাৰ আসৰক্খযা ইমং পটিপত্তিং একদেসেন লিখি. সোল়সৰিধন্তি সোল়সৰিধভাৰনায পযোগং.

কিলঞ্জমযেতি নানাৰিধভিত্তিৰিভত্তে সণ্হসুখুমরতনপরিসিব্বিতে কিলঞ্জমযসমুগ্গে. বহি ৰত্থেন ৰেঠেত্ৰাতি পঠমং সুখুমকম্বলেন ৰেঠেত্ৰা পটিপাটিযা তেত্তিংসায সমুগ্গেসু পক্খিপিত্ৰা ততো বহি সুখুমৰত্থেন ৰেঠেত্ৰা ছাদেত্ৰা. তিণগচ্ছপহানসম্মজ্জনাদিনা সোধিতমত্তকমেৰ হোতু, কদলিপুণ্ণঘটঠপনধজপটাকুস্সাপনাদিঅলঙ্করণেন মা নিট্ঠাপেথাতি অত্থো. রাজানুভাৰেন পটিযাদেথাতি মম রাজানুরূপং সজ্জেথ, অলঙ্করোথাতি অত্থো. অন্তরভোগিকানন্তি অনুযুত্তরাজমহামত্তানং. জৰনদূতেতি খিপ্পং গচ্ছন্তকদূতপুরিসে. তাল়েহি সহ অৰচরন্তীতি তাল়াৰচরা.

রঞ্ঞা পণ্ণাকারং উদ্দিস্স কতপূজাসক্কারস্স অমচ্চতো সুতত্তা পণ্ণাকারং উচ্চট্ঠানে ঠপেত্ৰা সযং নীচাসনে নিসিন্নো. নাযং অঞ্ঞস্স রতনস্স ভৰিস্সতীতি অযং পরিহারো অঞ্ঞস্স মণিমুত্তাদিভেদস্স রতনস্স ন ভৰিস্সতি মণিমুত্তাদীহি অভিসঙ্খতত্তা. বলৰসোমনস্সং উপ্পজ্জি চিরতনকালং বুদ্ধসাসনে ভাৰিতভাৰনতায ৰাসিতৰাসনতায ঘটে দীপো ৰিয অব্ভন্তরে এৰ সমুজ্জলমানপরিপক্কতিহেতুকভাৰতো.

ধারেমীতি ইচ্ছামি, গণ্হামীতি অত্থো. দ্ৰেজ্ঝৰচনন্তি দ্ৰেল়্হকভাৰো. অন্তরং করোতীতি দ্ৰিন্নং পাদানং অন্তরং তং লেখং করোতি, একেন পাদেন অতিক্কমীতি অত্থো. তস্সা গতমগ্গেনাতি তায দেৰিযা ৰিৰট্টমানায নাসিতায গতমগ্গেন. তং পন লেখন্তি পুক্কুসাতিনা কতলেখং. পণ্ণচ্ছত্তকন্তি তালপত্তমুট্ঠিং.

সত্থুগারৰেনাতি সত্থরি উপ্পন্নপসাদপেমবহুমানসম্ভৰেন. তদা সত্থারংযেৰ মনসি কত্ৰা তন্নিন্নভাৰেন গচ্ছন্তো, ‘‘পুচ্ছিস্সামী’’তিপি চিত্তং ন উপ্পাদেসি, ‘‘এত্থ নু খো সত্থা ৰসতী’’তি পরিৰিতক্কস্সেৰ অভাৰতো; রাজগহং পন পত্ৰা রঞ্ঞো পেসিতসাসনৰসেন তত্থ চ ৰিহারস্স বহুভাৰতো সত্থা কহং ৰসতীতি পুচ্ছি. সত্থু এককস্সেৰ নিক্খমনং পঞ্চচত্তালীস যোজনানি পদসা গমনঞ্চ ধম্মপূজাৰসেন কতন্তি দট্ঠব্বং. ধম্মপূজায চ বুদ্ধানং আচিণ্ণভাৰো হেট্ঠা ৰিত্থারিতোযেৰ. বুদ্ধসোভং পন পটিচ্ছাদেত্ৰা অঞ্ঞাতকৰেসেন তত্থ গমনং তস্স কুলপুত্তস্স ৰিস্সত্থৰসেন মগ্গদরথপটিপস্সম্ভনত্থং. অপ্পটিপস্সদ্ধমগ্গদরথো হি ধম্মদেসনায ভাজনং ন হোতীতি. তথাহি ৰক্খতি, ‘‘ননু চ ভগৰা’’তিআদি.

উরুদ্ধন্তি ৰিসালন্তি কেচি. অতিরেকতিযোজনসতন্তিআদিনা অন্ৰযতো ব্যতিরেকতো চ মচ্ছেরৰিনযনে সব্রহ্মচারীনং ওৰাদদানং. অচ্চন্তসুখুমালোতিআদিনা সত্থু ধম্মগারৰেন সদ্ধিং কুলপুত্তস্সপি ধম্মগারৰং সংসন্দতি সমেতীতি দস্সেতি. তেন ভগৰতো কতস্স পচ্চুগ্গমনস্স ঠানগতভাৰং ৰিভাৰেন্তো অঞ্ঞেসম্পি ভব্বরূপানং কুলপুত্তানং যথারহং সঙ্গহো কাতব্বোতি দস্সেতি.

ব্রহ্মলোকপ্পমাণন্তি উচ্চভাৰেন. আনুভাৰেনাতি ইদ্ধানুভাৰেন যথা সো সোতপথং ন উপগচ্ছতি, এৰং ৰূপসমেতুং সক্কোতি. অৰিব্ভন্তন্তি ৰিব্ভমরহিতং নিল্লোলুপ্পং. ‘‘ভাৰনপুংসকং পনেত’’ন্তি ৰত্ৰা তস্স ৰিৰরণত্থং, ‘‘পাসাদিকেন ইরিযাপথেনা’’তি ৰুত্তং. ইত্থম্ভূতলক্খণে এতং করণৰচনং দট্ঠব্বং. তেনাহ ‘‘যথা ইরিযতো’’তিআদি. অমনাপো হোতি পস্সন্তানং. সীহসেয্যায নিপন্নস্সপি হি একচ্চে সরীরাৰযৰা অধোখিত্তৰিক্খিত্তা ৰিয দিস্সন্তি. কটিযং দ্ৰিন্নং ঊরুসন্ধীনং দ্ৰিন্নঞ্চ জাণুসন্ধীনং ৰসেন চতুসন্ধিকপল্লঙ্কং. ন পতিট্ঠাতীতি নপ্পৰত্ততি, ‘‘কংসি ত্ৰ’’ন্তিআদিনা অপুচ্ছিতে কথাপৰত্তি এৰ ন হোতি. অপ্পতিট্ঠিতায কথায ন সঞ্জাযতীতি তথা পন পুচ্ছাৰসেন কথায অপ্পৰত্তিতায উপরি ধম্মকথা ন সঞ্জাযতি ন উপ্পজ্জতি. ইতীতি তস্মা. কথাপতিট্ঠাপনত্থং কথাপৰত্তনত্থং কথাসমুট্ঠাপনত্থং ৰা পুচ্ছি.

সভাৰমেৰ কথেতীতি অত্তনো ভগৰতো অদিট্ঠপুব্বত্তা ‘‘অদিট্ঠপুব্বকং কথমহং জানেয্য’’ন্তি সভাৰমেৰ কেৰলং অত্তনো অজ্ঝাসযমেৰ কথেতি; ন পন সদেৰকস্স লোকস্স সুপাকটং সভাৰসিদ্ধং বুদ্ধরূপকাযসভাৰং. অথ ৰা সভাৰমেৰ কথেতীতি ‘‘ইদমেৰ’’ন্তি জানন্তোপি তদা ভগৰতো রুচিযা তথাপৰত্তমানং রূপকাযসভাৰমেৰ কথেতি অপ্পৰিক্খম্ভন্তি অধিপ্পাযো. তেনাহ – ‘‘তথা হি ন’’ন্তিআদি, ৰিপস্সনালক্খণমেৰ পটিপদন্তি অধিপ্পাযো.

৩৪৩. ‘‘পুব্বভাগপটিপদং অকথেত্ৰা’’তি ৰত্ৰা পুব্বভাগপটিপদায অকথনে কারণং পুব্বভাগপটিপদঞ্চ সরূপতো দস্সেতুং, ‘‘যস্স হী’’তিআদি ৰুত্তং. অপরিসুদ্ধাযপি পুব্বভাগপটিপদায ৰিপস্সনা তথা ন কিচ্চকারী, পগেৰ অৰিজ্জমানাযাতি, ‘‘যস্স হি…পে… অপরিসুদ্ধা হোতি’’চ্চেৰ ৰুত্তং. পুব্বভাগপটিপদা চ নাম সঙ্খেপতো পন্নরস চরণধম্মাতি আহ – ‘‘সীলসংৰরং…পে… ইমং পুব্বভাগপটিপদং আচিক্খতী’’তি. যানকিচ্চং সাধেতি মগ্গগমনেন অকিলন্তভাৰসাধনত্তা. চিরকালং পরিভাৰিতায পরিপক্কগতায হেতুসম্পদায উপট্ঠাপিতং সামণেরসীলম্পি পরিপুণ্ণং অখণ্ডাদিভাৰপ্পত্তিযা, যং পুব্বহেতুত্তা ‘‘সীল’’ন্তি ৰুচ্চতি.

ধাতুযো পরমত্থতো ৰিজ্জমানা, পঞ্ঞত্তিমত্থো পুরিসো অৰিজ্জমানো. অথ কস্মা ভগৰা অরহত্তস্স পদট্ঠানভূতং ৰিপস্সনং কথেন্তো ‘‘ছধাতুরো’’তি অৰিজ্জমানপ্পধানং দেসনং আরভীতি আহ – ‘‘ভগৰা হী’’তিআদি. কত্থচি ‘‘তেৰিজ্জো ছল়ভিঞ্ঞো’’তিআদীসু ৰিজ্জমানেন অৰিজ্জমানং দস্সেতি. কত্থচি – ‘‘ইত্থিরূপং, ভিক্খৰে, পুরিসস্স চিত্তং পরিযাদায তিট্ঠতী’’তিআদীসু (অ. নি. ১.১) অৰিজ্জমানেন ৰিজ্জমানং দস্সেতি. কত্থচি ‘‘চক্খুৰিঞ্ঞাণং সোতৰিঞ্ঞাণ’’ন্তিআদীসু (ৰিভ. ১২১) ৰিজ্জমানেন ৰিজ্জমানং দস্সেতি. কত্থচি – ‘‘খত্তিযকুমারো ব্রাহ্মণকঞ্ঞায সদ্ধিং সংৰাসং কপ্পেতী’’তিআদীসু (দী. নি. ১.২৭৫) অৰিজ্জমানেন অৰিজ্জমানং দস্সেতি. ইধ পন ৰিজ্জমানেন অৰিজ্জমানং দস্সেতি. ‘‘ছধাতুরো’’তি হি সমাসত্থো অৰিজ্জমানো পুগ্গলৰিসযত্তা, তস্স পদস্স অৰযৰত্থো পন অপ্পধানত্থো ৰিজ্জমানো, সো সদ্দক্কমেন অপ্পধানোপি অত্থক্কমেন পধানোতি আহ – ‘‘ৰিজ্জমানেন অৰিজ্জমানং দস্সেন্তো’’তি. পুগ্গলাধিট্ঠানাযেত্থ দেসনায কারণং দস্সেতুং, ‘‘সচে হী’’তিআদি ৰুত্তং. উপট্ঠাপেয্যাতি – ‘‘ধাতুযো’’ইচ্চেৰ কুলপুত্তস্স চিত্তং নিৰেসেয্য তথা সঞ্জানেয্য, এৰং ধম্মং দেসেয্যাতি অত্থো. সন্দেহং করেয্যাতি অসতি পুরিসে কো করোতি? কো পটিসংৰেদেতি, ধাতুযো এৰাতি কিং নু খো ইদং, কথং নু খো ইদন্তি সংসযং উপ্পাদেয্য? সম্মোহং আপজ্জেয্যাতি চতুরঙ্গসমন্নাগতে অন্ধকারে ৰত্তমানং ৰিয দেসিযমানে অত্থে সম্মোহং আপজ্জেয্য. তথাভূতো চ দেসনায অভাজনভূতত্তা দেসনং সম্পটিচ্ছিতুং ন সক্কুণেয্য. এৰমাহাতি এৰং ‘‘ছধাতুরো’’তি আহ.

যং ত্ৰং পুরিসোতি সঞ্জানাসীতি যং রূপারূপধম্মসমূহং পবন্ধৰসেন পৰত্তমানং অধিট্ঠানৰিসেসৰিসিট্ঠং – ‘‘পুরিসো সত্তো ইত্থী’’তিআদিনা ত্ৰং সঞ্জানাসি, সো ছধাতুরো. সন্তেসুপি ছধাতুৰিনিমুত্তেসু ধাত্ৰন্তরেসু সুখাৰগ্গহণত্থং তথা ৰুত্তং তগ্গহণেনেৰ চ তেসং গহেতব্বতো, স্ৰাযমত্থো হেট্ঠা দস্সিতো এৰ. সেসপদেসূতি ‘‘ছফস্সাযতনো’’তিআদিপদেসুপি. চত্তারি অধিট্ঠানানি চতস্সো পতিট্ঠা এতস্সাতি চতুরাধিট্ঠানো, অধিতিট্ঠতি পতিট্ঠহতি এতেনাতি অধিট্ঠানং, যেসু পতিট্ঠায উত্তমত্থং অরহত্তং অধিগচ্ছতি, তেসং পঞ্ঞাদীনং এতং অধিৰচনং. তেনাহ ‘‘স্ৰাযং ভিক্খূ’’তিআদি. এত্তোতি ৰট্টতো. ৰিৰট্টিত্ৰাতি ৰিনিৰট্টিত্ৰা অপসক্কিত্ৰা. এত্তোতি ৰা এতেহি ছধাতুআদীহি. এত্থ হি নিৰিট্ঠস্স আযত্তস্স উত্তমায সিদ্ধিযা অসম্ভৰোতি. পতিট্ঠিতন্তি অরিযমগ্গাধিগমৰসেন সুপ্পতিট্ঠিতং. এৰঞ্হি সব্বসো পটিপক্খসমুচ্ছিন্দনেন তত্থ পতিট্ঠিতো হোতি. মঞ্ঞস্সৰা নপ্পৰত্তন্তীতি ছহিপি দ্ৰারেহি পৰত্তমানসোতায মগ্গেন ৰিসোসিতায সব্বসো ৰিগতায সব্বসো ৰিচ্ছেদপ্পত্তিযা ন সন্দন্তি. তেনাহ ‘‘নপ্পৰত্তন্তী’’তি. যস্মা মানে সব্বসো সমুচ্ছিন্নে অসমুচ্ছিন্নো অনুপসন্তো কিলেসো নাম নত্থি, তস্মা আহ – ‘‘মুনি সন্তোতি ৰুচ্চতী’’তি রাগগ্গিআদীনং নিব্বানেন নিব্বুতো.

পঞ্ঞং নপ্পমজ্জেয্যাতি, ‘‘দিৰসং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতী’’তিআদিনযপ্পৰত্তায (ম. নি. ১.৪২৩; ২.২৪; ৩.৭৫; সং. নি. ৪.১২০; অ. নি. ৩.১৫; ৰিভ. ৫১৯; মহানি. ১৬১) অপ্পমাদপ্পটিপত্তিযা সমাধিৰিপস্সনাপঞ্ঞং নপ্পমজ্জেয্য. এতেন পুব্বভাগিযং সমথৰিপস্সনাভাৰনমাহ. সচ্চমনুরক্খেয্যাতি সচ্চানুরক্খনাপদেসেন সীলৰিসোধনমাহ; সচ্চে ঠিতো সমাদিন্নসীলং অৰিকোপেত্ৰা পরিপূরেন্তো সমাধিসংৰত্তনিযতং করোতি. তেনাহ ‘‘ৰচীসচ্চং রক্খেয্যা’’তি. কিলেসপরিচ্চাগং ব্রূহেয্যাতি তদঙ্গাদিৰসেন কিলেসানং পরিচ্চজনৰিধিং ৰড্ঢেয্য. কিলেসৰূপসমনং সিক্খেয্যাতি যথা তে কিলেসা তদঙ্গাদিৰসেন পরিচ্চত্তা যথাসমুদাচারপ্পৰত্তিযা সন্তানে পরিল়াহং ন জনেন্তি; এৰং কিলেসানং ৰূপসমনৰিধিং সিক্খেয্য পঞ্ঞাধিট্ঠানাদীনন্তি লোকুত্তরানং পঞ্ঞাধিট্ঠানাদীনং. অধিগমত্থাযাতি পটিলাভত্থায.

৩৪৭. পুব্বে ৰুত্তানন্তি, ‘‘চতুরাধিট্ঠানো, যত্থ ঠিতং মঞ্ঞস্সৰা নপ্পৰত্তন্তী’’তি (ম. নি. ৩.৩৪৩) এৰং পুব্বে ৰুত্তানং.

৩৪৮. ৰত্তব্বং ভৰেয্যাতি নিদ্দেসৰসেন ৰত্তব্বং ভৰেয্য. আদীহীতি এৰমাদীহি. কিচ্চং নত্থি কিচ্চাভাৰতো. উপ্পটিপাটিধাতুকন্তি অযথানুপুব্বিকং. যথাধম্মৰসেনেৰাতি দেসেতব্বধম্মানং যথাসভাৰেনেৰ. সপ্পাযং ধুতঙ্গন্তি অত্তনো কিলেসনিগ্গণ্হনযোগ্গং ধুতঙ্গং. চিত্তরুচিতন্তি অত্তনো চিত্তপকতিযা আচরিযেহি ৰিরোচেতব্বং, চরিযানুকূলন্তি অত্থো. হত্থিপদোপমসুত্তাদীসূতি আদি-সদ্দেন ৰিসুদ্ধিমগ্গধাতুৰিভঙ্গাদিং সঙ্গণ্হাতি.

৩৫৪. অযম্পেত্থাতি পি-সদ্দো সম্পিণ্ডনত্থো. তেন ‘‘অথাপরং উপেক্খাযেৰ অৰসিস্সতী’’তি উপরিদেসনং সম্পিণ্ডেতি. সোপি হি পাটিযেক্কো অনুসন্ধীতি. ননু চাযং যথাউদ্দিট্ঠায ৰিঞ্ঞাণধাতুযা নিদ্দেসোপি ভৰিস্সতীতি যথানুসন্ধিনযো ৰিজ্জতীতি? ন, ৰিঞ্ঞাণধাতুনিদ্দেসনযেন দেসনায অপ্পৰত্তত্তা তেনাহ ‘‘হেট্ঠতো’’তিআদি. যং ৰা পনাতিআদিনা পন দেসনায সানুসন্ধিতং ৰিভাৰেতি. ন হি বুদ্ধা ভগৰন্তো অননুসন্ধিকং দেসনং দেসেন্তি. আগমনীযৰিপস্সনাৰসেনাতি যস্সা পুব্বে পৰত্তত্তা আগমনীযট্ঠানে ঠিতা ৰিপস্সনা, তস্সা ৰসেন. কম্মকারকৰিঞ্ঞাণন্তি ‘‘নেতং মম নেসোহমস্মি, ন মেসো অত্তা’’তি এৰং ৰিপস্সনাকিচ্চকারকং ৰিপস্সনাসহিতং ৰিঞ্ঞাণং. ৰিঞ্ঞাণধাতুৰসেনাতি যথাউদ্দিট্ঠায ৰিঞ্ঞাণধাতুযা ভাজনৰসেন. সত্থু কথনত্থাযাতি সত্থারা উদ্দেসমেৰ কত্ৰা ঠপিতত্তা নিদ্দেসৰসেন কথনত্থায. অকথিতভাৰো এৰ হিস্স অৰসিট্ঠতা কথনত্থায পটিৰিজ্ঝনত্থায চ. পটিপক্খৰিগমেন তস্স চিত্তস্স পরিসুদ্ধতাতি আহ ‘‘নিরুপক্কিলেস’’ন্তি. উপক্কিলেসানং পন পহীনভাৰতো পরিযোদাতং. সমুদযৰসেন উদযদস্সনত্থঞ্চেৰ পচ্চযনিরোধৰসেন অত্থঙ্গমদস্সনত্থঞ্চ. কারণভাৰেন সুখায ৰেদনায হিতন্তি সুখৰেদনিযং. তেনাহ ‘‘সুখৰেদনায পচ্চযভূত’’ন্তি.

৩৬০. রূপকম্মট্ঠানম্পি চতুধাতুৰৰত্থানৰসেন, অরূপকম্মট্ঠানম্পি সুখদুক্খৰেদনামুখেন পগুণং জাতং.

সত্থু কথনত্থংযেৰ অৰসিস্সতীতি, ‘‘কুলপুত্তস্স পটিৰিজ্ঝনত্থ’’ন্তি ৰুত্তমেৰত্থং নিসেধেতি, তস্মা ৰুত্তমেৰত্থং সমত্থেতুং, ‘‘ইমস্মিং হী’’তিআদি ৰুত্তং. কুলপুত্তস্স রূপাৰচরজ্ঝানেতি কুলপুত্তেন অধিগতরূপাৰচরজ্ঝানে. তেনাহ – ‘‘ভিক্খু পগুণং তৰ ইদং রূপাৰচরচতুত্থজ্ঝান’’ন্তি. যং কিঞ্চি সুৰণ্ণতাপনযোগ্যং অঙ্গারভাজনং ইধ ‘‘উক্কা’’তি অধিপ্পেতন্তি আহ ‘‘অঙ্গারকপল্ল’’ন্তি. সজ্জেয্যাতি যথা তত্থ পক্খিত্তসুৰণ্ণঞ্চ তপ্পতি, এৰং পটিযাদিযেয্য. নীহটদোসন্তি ৰিগতীভূতকাল়কং. অপনীতকসাৰন্তি অপগতসুখুমকাল়কং.

অরিযমগ্গে পতিট্ঠাপেতুকামেন নাম সব্বস্মিম্পি লোকিযধম্মে ৰিরজ্জনত্থায ধম্মো কথেতব্বোতি অধিপ্পাযেন, ‘‘কস্মা পনা’’তিআদিনা চোদনা কতা. ৰিনেয্যদমনকুসলেন ভগৰতা ৰেনেয্যজ্ঝাসযৰসেন তাৰ চতুত্থজ্ঝানুপেক্খায ৰণ্ণো কথিতোতি তস্স পরিহারং ৰদন্তো, ‘‘কুলপুত্তস্সা’’তিআদিমাহ.

৩৬১. তদনুধম্মন্তি তস্স অরূপাৰচরস্স কুসলস্স অনুরূপধম্মং, যায পটিপদায তস্স অধিগমো হোতি, তস্স পুব্বভাগপটিপদন্তি অত্থো. তেনাহ ‘‘রূপাৰচরজ্ঝান’’ন্তি. তগ্গহণাতি তস্স গহণেন তস্সা পটিপত্তিযা পটিপজ্জমানেন. ইতো উত্তরিন্তি ‘‘ৰিঞ্ঞাণঞ্চাযতন’’ন্তিআদীসু.

৩৬২. তস্সেৰাতি অরূপাৰচরজ্ঝানস্স. এতং পন সৰিপাকং অরূপাৰচরজ্ঝানং সমেচ্চ সম্ভুয্য পচ্চযেহি কতত্তা সঙ্খতং. পকপ্পিতন্তি পচ্চযৰসেন সৰিহিতং. আযূহিতন্তি সম্পিণ্ডিতং. করোন্তেন করীযতীতি পটিপজ্জনকেন পটিপজ্জীযতি সঙ্খরীযতি. নিব্বানং ৰিয ন নিচ্চং ন সস্সতং. অথ খো খণে খণে ভিজ্জনসভাৰতায তাৰকালিকং. ততো এৰ চৰনাদিসভাৰন্তি সব্বমেতং রূপাৰচরধম্মেসু আদীনৰৰিভাৰনং. দুক্খে পতিট্ঠিতন্তি সঙ্খারদুক্খে পতিট্ঠিতং. অতাণন্তি চৰনসভাৰাদিতায তাণরহিতং. অলেণন্তি ততো অরক্খত্তা লীযনট্ঠানরহিতং. অসরণন্তি অপ্পটিসরণং. অসরণীভূতন্তি সব্বকালম্পি অপ্পটিসরণং.

সমত্তপত্তৰিসে খন্ধাদীসু গহিতে দুত্তিকিচ্ছা সিযাতি, ‘‘খন্ধং ৰা সীসং ৰা গহেতুং অদত্ৰা’’তি ৰুত্তং. এৰমেৰাতি এত্থাযং উপমাসংসন্দনা – ছেকো ভিসক্কো ৰিয সম্মাসম্বুদ্ধো. ৰিসৰিকারো ৰিয কিলেসদুক্খানুবন্ধো, ভিসক্কস্স ৰিসং ঠানতো চাৰেত্ৰা উপরি আরোপনং ৰিয ভগৰতো দেসনানুভাৰেন কুলপুত্তস্স কামভৰে নিকন্তিং পরিযাদায অরূপজ্ঝানে ভৰনং. ভিসক্কস্স ৰিসং ওতারেত্ৰা পথৰিযং পাতনং ৰিয কুলপুত্তস্স ওরম্ভাগিযকিলেসদুক্খাপনযনং.

অসম্পত্তস্সাতি অরূপাৰচরজ্ঝানং অনধিগতস্স. অপ্পটিলদ্ধস্সেৰাতি তস্স ৰেৰচনং. সব্বমেতন্তি ‘‘অনিচ্চং অধুৰ’’ন্তিআদিনা ৰিত্থারতো ৰুত্তং সব্বমেতং আদীনৰং. একপদেনেৰ ‘‘সঙ্খতমেত’’ন্তি কথেসি সঙ্খতপদেনেৰ তস্স অত্থস্স অনৰসেসতো পরিযাদিন্নত্তা.

নাযূহতীতি ভৰকারণচেতনাৰসেন ব্যাপারং ন সমূহেতি ন সম্পিণ্ডেতি. তেনাহ – ‘‘ন রাসিং করোতী’’তি. অভিসঙ্খরণং নাম চেতনাব্যাপারোতি আহ – ‘‘ন অভিসঞ্চেতযতী’’তি. তং পন ফলুপ্পাদনসমত্থতায ফলেন কপ্পনন্তি আহ ‘‘ন কপ্পেতী’’তি. সচে অভিসঙ্খারচেতনা উল়ারা, ফলমহত্তসঙ্খাতায ৰুড্ঢিযা হোতি, অনুল়ারা চ অৰুড্ঢিযাতি আহ – ‘‘ৰুড্ঢিযা ৰা পরিহানিযা ৰা’’তি. বুদ্ধৰিসযে ঠত্ৰাতি ভগৰা অত্তনো বুদ্ধসুবুদ্ধতায সীহসমানৰুত্তিতায চ দেসনং উক্কংসতো সাৰকেহি পত্তব্বং ৰিসেসং অনৰসেসেন্তো তথা ৰদতি, ন সাৰকৰিসযং অতিক্কমিত্ৰা অত্তনো বুদ্ধৰিসযমেৰ দেসেন্তো. তেনাহ – ‘‘অরহত্তনিকূটং গণ্হী’’তি. যদি কুলপুত্তো অত্তনো…পে… পটিৰিজ্ঝি, অথ কস্মা ভগৰা দেসনায অরহত্তনিকূটং গণ্হীতি আহ ‘‘যথা নামা’’তিআদি.

ইতো পুব্বেতি ইতো অনাগামিফলাধিগমতো উত্তরি উপরি. অস্সাতি কুলপুত্তস্স. কথেন্তস্স ভগৰতো ধম্মে নেৰ কঙ্খা ন ৰিমতি পঠমমগ্গেনেৰ কঙ্খায সমুচ্ছিন্নত্তা. একচ্চেসু ঠানেসূতি তথা ৰিনেয্যঠানেসু. তথা হি অযম্পি কুলপুত্তো অনাগামিফলং পত্ৰা ভগৰন্তং সঞ্জানি. তেন ৰুত্তং ‘‘যতো অনেনা’’তিআদি.

৩৬৩. অনজ্ঝোসিতাতি অনজ্ঝোসনীযাতি অযমত্থোতি আহ – ‘‘গিলিত্ৰা পরিনিট্ঠাপেত্ৰা গহেতুং ন যুত্তা’’তি.

৩৬৪. রাগোৰ অনুসযো রাগানুসযো, সো চ পচ্চযসমৰাযে উপ্পজ্জনারহোতি ৰত্তব্বতং লভতীতি ৰুত্তং – ‘‘সুখৰেদনং আরব্ভ রাগানুসযো উপ্পজ্জেয্যা’’তি. ন পন তস্স উপ্পাদনং অত্থি খণত্তযসমাযোগাসম্ভৰতো. এস নযো সেসেসুপি. ইতরন্তি অদুক্খমসুখৰেদনং. ৰিসংযুত্তোতি কেনচি সঞ্ঞোজনেন অসংযুত্ততায এৰ নিযতৰিপ্পযুত্তো. কাযস্স কোটি পরমো অন্তো এতস্সাতি কাযকোটিকং. দুতিযপদেতি ‘‘জীৰিতপরিযন্তিক’’ন্তি ইমস্মিং পদে. ৰিসেৰনস্সাতি উপাদানস্স. সীতীভৰিস্সন্তীতি পদস্স ‘‘নিরুজ্ঝিস্সন্তী’’তি অত্থো ৰুত্তো, কথং পন ৰেদযিতানং দ্ৰাদসসু আযতনেসু নিরুজ্ঝনং সীতিভাৰপ্পত্তীতি চোদনং সন্ধাযাহ – ‘‘কিলেসা হী’’তিআদি. সমুদযপঞ্হেনাতি মহাসতিপট্ঠানে (দী. নি. ২.৪০০; ম. নি. ১.১৩৩) সমুদযসচ্চনিরোধপঞ্হেন. ননু সব্বসো কিলেসপরিল়াহৰিগমে সীতিভাৰো নাম ৰেদনানিরোধমত্তেন অধিপ্পেতো; তেন ইধ ৰেদযিতানি ৰুত্তানি, ন কিলেসাতি ৰেদযিতানং অচ্চন্তনিরোধসঙ্খাতো সীতিভাৰোপি কিলেসসমুচ্ছেদেনেৰাতি আহ ‘‘ৰেদযিতানিপী’’তিআদি.

৩৬৫. ইদং ওপম্মসংসন্দনন্তি এত্থ সঞ্ঞোজনা দীপসিখা ৰিয, অধিট্ঠানকপল্লিকা ৰিয ৰেদনায নিস্সযভূতা চত্তারো খন্ধা, তেলং ৰিয কিলেসা, ৰট্টি ৰিয কম্মৰট্টং, উপহরণকপুরিসো ৰিয ৰট্টগামী পুথুজ্জনো, তস্স সীসচ্ছেদকপুরিসো ৰিয অরহত্তমগ্গো সন্তানস্স সমুচ্ছেদকরণতো, অনাহারায দীপসিখায নিব্বাযনং ৰিয কম্মকিলেসানং অনন্তরপচ্চযতো অনাহারায ৰেদনায অনুপাদিসেসৰসেন নিব্বাযনং.

আদিম্হি সমাধিৰিপস্সনাপঞ্ঞাহীতি পুব্বভাগপটিপদাভূতা তযা পগুণসমাধিতো অরহত্তস্স পদট্ঠানভূতৰিপস্সনাপঞ্ঞাতো চ. উত্তরিতরাতি ৰিসিট্ঠতরা. এৰং সমন্নাগতোতি এত্থ এৰং-সদ্দো ইদংসদ্দত্থৰচনোতি আহ – ‘‘ইমিনা উত্তমেন অরহত্তফলপঞ্ঞাধিট্ঠানেনা’’তি. সব্বং ৰট্টদুক্খং খেপেতীতি সব্বদুক্খক্খযো, অগ্গমগ্গো, তংপরিযাপন্নতায তত্থ ঞাণন্তি আহ – ‘‘সব্বদুক্খক্খযে ঞাণং নাম অরহত্তমগ্গে ঞাণ’’ন্তি. অরহত্তফলে ঞাণং অধিপ্পেতং ৰুত্তনযেন সব্বদুক্খক্খযে সন্তে তন্নিমিত্তং ৰা উপ্পন্নঞাণন্তি কত্ৰা. তস্সাতি, ‘‘এৰং সমন্নাগতো ভিক্খু ইমিনা পরমেন পঞ্ঞাধিট্ঠানেন সমন্নাগতো হোতী’’তি ৰুত্তভিক্খুনো.

৩৬৬. হীতি যস্মা. ৰিমুত্তীতি অরহত্তফলৰিমুত্তি, তস্মা সব্বদুক্খক্খযে ঞাণন্তি অরহত্তফলঞাণং অধিপ্পেতং. সচ্চন্তি পরমত্থসচ্চং নিব্বানং, ন মগ্গসচ্চং. কামং অরহত্তফলৰিমুত্তি পটিপক্খেহি অকোপনীযতায অকুপ্পা, ‘‘সচ্চে ঠিতা’’তি পন ৰচনতো, ‘‘অকুপ্পারম্মণকরণেন অকুপ্পাতি ৰুত্তা’’তি আহ. ৰিতথন্তি নট্ঠং, জরায মরণেন চ ৰিপরিণামেতব্বতায যাদিসং উপ্পাদাৰত্থায জাতং, ততো অঞ্ঞাদিসন্তি অত্থো. তথা হি তং জরামরণেহি পরিমুসিতব্বরূপতায ‘‘মুসা’’তি ৰুত্তং. তেনাহ – ‘‘মোসধম্মন্তি নস্সনসভাৰ’’ন্তি. তং অৰিতথন্তি তং ৰুত্তনযেন অৰিতথং নাম, তং সভাৰো সব্বকালং তেনেৰ লব্ভনতো. সমথৰিপস্সনাৰসেন ৰচীসচ্চতোতি সমথৰিপস্সনাৰসেন যং ৰিসুদ্ধিমত্তং ৰচীসচ্চং, ততো. দুক্খসচ্চসমুদযসচ্চেহি তচ্ছৰিপল্লাসভূতসভাৰেহি. ইতি নেসং যথাসকং সভাৰেন অৰিতথভাৰে অমোসধম্মতায তেহিপি অৰিতথভাৰা পরমত্থসচ্চং নিব্বানমেৰ উত্তরিতরং. তস্মাতি নিব্বানস্সেৰ উত্তরিতরভাৰতো.

৩৬৭. উপধীযতি এত্থ দুক্খন্তি উপধী, খন্ধা কামগুণা চ. উপদহন্তি দুক্খন্তি উপধী, কিলেসাভিসঙ্খারা. পরিপূরা গহিতা পরামট্ঠাতি পরিযত্তভাৰেন তণ্হায গহিতা দিট্ঠিযা পরামট্ঠা. সমথৰিপস্সনাৰসেন কিলেসপরিচ্চাগতোতি ৰিক্খম্ভনৰসেন তদঙ্গপ্পহানৰসেন চ কিলেসানং পরিচ্চজনতো. উত্তরিতরো ৰিসিট্ঠতরস্স পহানপ্পকারস্স অভাৰতো.

৩৬৮. আঘাতকরণৰসেনাতি চেতসিকাঘাতস্স উপ্পজ্জনৰসেন. ব্যাপজ্জনৰসেনাতি চিত্তস্স ৰিপত্তিভাৰৰসেন. সম্পদুস্সনৰসেনাতি সব্বসো দুস্সনৰসেন. তীহি পদেহি যদি অরহত্তমগ্গেন কিলেসানং পরিচ্চাগো চাগাধিট্ঠানং, অরহত্তমগ্গেনেৰ নেসং ৰূপসমো উপসমাধিট্ঠানং হোতীতি দস্সেতি. এত্থ ৰিসেসেন পরিচ্চাগো সম্পজহনং অনুপ্পত্তিধম্মতাপাদনং চাগো, তথা পন পরিচ্চাগেন যো সো নেসং তদা ৰূপসন্ততায অভাৰো, অযং উপসমোতি অযমেতেসং ৰিসেসো.

৩৬৯. মঞ্ঞিতন্তি মঞ্ঞনা, ‘‘এতং মমা’’তিআদিনা কপ্পনাতি অত্থো. অৰিজ্জাৰিবন্ধনতণ্হাগাহাদীনং সাধারণভাৰতো অযমহন্তি এত্থ অহন্তি দিট্ঠিমঞ্ঞনাদস্সনং, সা পন দিট্ঠি মানমঞ্ঞনায অত্তনিযগাহৰসেন হোতীতি স্ৰেৰ ‘‘অয’’ন্তি ইমিনা গহিতোতি আহ – ‘‘অযমহন্তি একং তণ্হামঞ্ঞিতমেৰ ৰট্টতী’’তি. আবাধট্ঠেনাতি পটিপীল়নট্ঠেন. মঞ্ঞনাৰসেন হি সত্তানং তথা হোতি. অন্তোদোসট্ঠেনাতি অব্ভন্তরদুট্ঠভাৰেন. মঞ্ঞনাদূসিতত্তা হি সত্তানং অত্তভাৰো দুক্খতামূলাযত্তো, কিলেসাসুচিপগ্ঘরণতো উপ্পাদনিরোধভঙ্গেহি উদ্ধমুদ্ধং পক্কপভিন্নো হোতীতি ফলূপচারেন ‘‘মঞ্ঞিতং গণ্ডো’’তি ৰুত্তো. অনুপৰিট্ঠট্ঠেনাতি অনুপৰিসিত্ৰা হদযমাহচ্চ অধিট্ঠানেন. মঞ্ঞিতঞ্হি পীল়াজননতো অন্তোতুদনতো দুরুদ্ধরণতো সল্লং. খীণাসৰমুনি সব্বসো কিলেসানং সন্তত্তা, ততো এৰ পরিল়াহানং পরিনিব্বুতত্তা ৰূপসন্তত্তা সন্তো উপসন্তো নিব্বুতোতি ৰুচ্চতি. যত্থ ঠিতন্তি যস্মিং অসেক্খভূমিযং ঠিতং. যদি ভগৰা অত্তনো দেসনাঞাণানুরূপং দেসনং পৰত্তাপেয্য, মহাপথৰিং পত্থরন্তস্স ৰিয, আকাসং পসারেন্তস্স ৰিয, অনন্তাপরিমেয্যলোকধাতুযো পটিচ্চ তেসং ঠিতাকারং অনুপ্পূরং ৰিচিনন্তস্স ৰিয দেসনা পরিযোসানং ন গচ্ছেয্য. যস্মা পনস্স ৰিনেয্যজ্ঝাসযানুরূপমেৰ দেসনা পৰত্তি, ন ততো পরং অণুমত্তম্পি ৰড্ঢতি. তস্মা ৰুত্তং – ‘‘সব্বাপি ধম্মদেসনা সংখিত্তাৰ, ৰিত্থারদেসনা নাম নত্থী’’তি. ননু সত্তপকরণদেসনা ৰিত্থারকথাতি? ন সাপি ৰিত্থারকথাতি আহ – ‘‘সমন্তপট্ঠানকথাপি সংখিত্তাযেৰা’’তি. সন্নিপতিতদেৰপরিসায অজ্ঝাসযানুরূপমেৰ হি তস্সাপি পৰত্তি, ন সত্থুদেসনাঞাণানুরূপন্তি. যথানুসন্ধিং পাপেসি যথাউদ্দিট্ঠে অনুপুব্বেন অনৰসেসতো ৰিভজনৰসেন দেসনায নিট্ঠাপিতত্তা. ৰিপঞ্চিতঞ্ঞূ…পে… কথেসি নাতিসঙ্খেপৰিত্থারৰসেন দেসিতত্তা.

৩৭০. অট্ঠন্নং পরিক্খারানন্তি নযিদমনৰসেসপরিযাদানং, লক্খণৰচনং পনেতং, অঞ্ঞতরস্সাতি ৰচনসেসো. তথা হি, ‘‘ময্হং ইদ্ধিমযপরিক্খারলাভায পচ্চযো হোতূ’’তি পত্থনং পট্ঠপেত্ৰা পত্তচীৰরং, পত্তং, চীৰরমেৰ ৰা দিন্নে চরিমভৰে ইদ্ধিমযপরিক্খারো নিব্বত্ততীতি ৰদন্তি. অদিন্নত্তাতি কেচিৰাদো, তেনাহ ‘‘কুলপুত্তো’’তিআদি. ওকাসাভাৰতোতি উপসম্পদালক্খণস্স অসম্ভৰতো. তেনাহ – ‘‘কুলপুত্তস্স আযুপরিক্খীণ’’ন্তি. উদকতিত্থ…পে… আরদ্ধো পরমপ্পিচ্ছভাৰতো.

ৰিব্ভন্তাতি ভন্তচিত্তা. সিঙ্গেন ৰিজ্ঝিত্ৰা ঘাতেসি পুরিমজাতিবদ্ধাঘাততাযাতি ৰদন্তি.

মানুসং যোগন্তি মনুস্সত্তভাৰং. অত্তভাৰো হি যুজ্জতি কম্মকিলেসেহীতি ‘‘যোগো’’তি ৰুচ্চতি. উপচ্চগুন্তি উপগচ্ছিংসু. উপকোতিআদি তেসং নামানি.

গন্ধকট্ঠেহীতি চন্দনাগরুসল়লদেৰদারুআদীহি গন্ধদারূহি. সেসং সুৰিঞ্ঞেয্যমেৰ.

ধাতুৰিভঙ্গসুত্তৰণ্ণনায লীনত্থপ্পকাসনা সমত্তা.

১১. সচ্চৰিভঙ্গসুত্তৰণ্ণনা

৩৭১. আচিক্খনাতি – ‘‘ইদং দুক্খং অরিযসচ্চং, অযং দুক্খনিরোধগামিনী পটিপদা অরিযসচ্চ’’ন্তি আদিতো কথনং. দেসনাতি তস্সেৰ অত্থস্স অতিসজ্জনং পবোধনং. পঞ্ঞাপনাতি পকারেহি ঞাপনা, সা পন যস্মা ইত্থমিদন্তি ৰেনেয্যানং পচ্চক্খতো দস্সনা, তেসং ৰা সন্তানে পতিট্ঠাপনা হোতি, তস্মা আহ – ‘‘দুক্খসচ্চাদীনং ঠপনা’’তি. পট্ঠপনাতি পতিট্ঠাপনা. যস্মা পট্ঠপিযমানসভাৰা দেসনা ভাজনং উপগচ্ছন্তী ৰিয হোতি, তস্মা ৰুত্তং – ‘‘পঞ্ঞাপনা’’তি, জানাপনাতি অত্থো. ৰিৰটকরণাতি দেসিযমানস্স অত্থস্স ৰিৰটভাৰকরণং. ৰিভাগকিরিযাতি যথাৰুত্তস্স অত্থৰিভাগস্স ৰিত্থারকরণং. পাকটভাৰকরণন্তি অগম্ভীরভাৰাপাদনং. অপরো নযো – চতুসচ্চসঞ্ঞিতস্স অত্থস্স পচ্চেকং সরূপতো দস্সনৰসেন ইদন্তি আদিতো সিক্খাপনং কথনং আচিক্খনা, এৰং পরসন্তানে পবোধনৰসেন পৰত্তাপনা দেসনা, এৰং ৰিনেয্যানং চিত্তপরিতোসজননেন তেসং বুদ্ধিপরিপাচনং ‘‘পঞ্ঞাপনা’’তি ৰুচ্চতি. এৰং পঞ্ঞাপেন্তী চ সা দেসিযমানং অত্থং ৰেনেয্যসন্তানে পকারতো ঠপেতি পতিট্ঠপেতীতি ‘‘পট্ঠপনা’’তি ৰুচ্চতি. পকারতো ঠপেন্তী পন সংখিত্তস্স ৰিত্থারতো পটিৰুত্তস্স পুনাভিধানতো ‘‘ৰিৰরণা’’তি, তস্সেৰত্থস্স ৰিভাগকরণতো ‘‘ৰিভজনা’’তি, ৰুত্তস্স ৰিত্থারেনাভিধানতো ৰিভত্তস্স হেতুদাহরণদস্সনতো, ‘‘উত্তানীকম্ম’’ন্তি ৰুচ্চতি. তেনাহ – ‘‘পাকটভাৰকরণ’’ন্তি, হেতূপমাৰসেনত্থস্স পাকটভাৰকরণতোতি অত্থো.

অনুগ্গাহকাতি অনুগ্গণ্হনকামা. স্ৰাযমনুগ্গহো সঙ্গহৰত্থুৰসেন পাকটো হোতীতি আহ ‘‘আমিসসঙ্গহেনা’’তিআদি. জনেতা জনেত্তীতি আহ ‘‘জনিকা মাতা’’তি. ৰুদ্ধিং পরিসং আপাদেতীতি আপাদেতা. তেনাহ ‘‘পোসেতা’’তি. ইদানি দ্ৰিন্নং মহাথেরানং যথাক্কমং সব্রহ্মচারীনং ভগৰতা ৰুত্তেহি জনিকপোসিকমাতুট্ঠানিযেহি সঙ্গাহকতং ৰিত্থারতো দস্সেতুং, ‘‘জনিকমাতা হী’’তিআদি ৰুত্তং. পরতোঘোসেন ৰিনাপি উপরিমগ্গাধিগমো হোতীতি ‘‘পচ্চত্তপুরিসকারেনা’’তি ৰুত্তং. পঠমমগ্গো এৰ হি সাৰকানং একন্ততো ঘোসাপেক্খোতি. পত্তেসুপীতি পি-সদ্দেন পগেৰ অপ্পত্তেসূতি দস্সেতি. ভৰস্স অপ্পমত্তকতা নাম ইত্তরকালতাযাতি আহ ‘‘অচ্ছরাসঙ্ঘাতমত্তম্পী’’তি. জনেতাতি জনকো, থেরো পন অরিযায জনযিতা. আপাদেতাতি ৰড্ঢেতা পরিব্রূহেতা. পুরিমস্মিং সচ্চদ্ৰযে সম্মসনগ্গহণং লোকিযত্তা তস্স, ইতরস্মিং তস্স অগ্গহণং লোকুত্তরত্তা.

কামেহি নিক্খন্তো সঙ্কপ্পো নেক্খম্মসঙ্কপ্পো. স্ৰাযমস্স ততো নিক্খমনত্থো তেসং পটিপক্খভাৰতো তেহি ৰিসংসগ্গতো ৰিরজ্জনতো সমুচ্ছিন্দনতো সব্বসো ৰিৰিত্তভাৰতো চ হোতীতি দস্সেতুং, ‘‘কামপচ্চনীকট্ঠেনা’’তিআদি ৰুত্তং. তত্থ কামপদঘাতন্তি যথা কামো পদং পতিট্ঠং ন লভতি, এৰং হননং, কামসমুচ্ছেদন্তি অত্থো. কামেহি সব্বসো ৰিৰিত্তত্তা কামৰিৰিত্তো, অরিযমগ্গো, তস্স অন্তো, অরিযফলং, তস্মিং কামৰিৰিত্তন্তে. এসেৰ নযোতি ইমিনা ‘‘ব্যাপাদপচ্চনীকট্ঠেনা’’তিআদিযোজনং অতিদিসতি. সব্বে চেতে নেক্খম্মসঙ্কপ্পাদযো নানাচিত্তেসু লব্ভন্তীতি যোজনা. যদি একচিত্তে লব্ভন্তি, কথং তিৰিধমিচ্ছাসঙ্কপ্পানং সমুগ্ঘাতোতি আহ ‘‘তত্র হী’’তিআদি. ন নানা লব্ভতীতি ইমিনা তিৰিধকিচ্চকারিতং সম্মাসঙ্কপ্পস্স দস্সেতি. কিচ্চৰসেন হি তস্স নামস্স লাভো. সম্মাৰাচাদীনম্পি মগ্গক্খণে একচিত্তে লব্ভমানানম্পি চতুকিচ্চকারিতায চতুব্বিধনামাদিতা ৰেদিতব্বা. সেসং সুৰিঞ্ঞেয্যমেৰ.

সচ্চৰিভঙ্গসুত্তৰণ্ণনায লীনত্থপ্পকাসনা সমত্তা.

১২. দক্খিণাৰিভঙ্গসুত্তৰণ্ণনা

৩৭৬. মহাপজাপতিগোতমীতি এত্থ গোতমীতি তস্স গোতমগোত্ততো আগতং নামং, মহাপজাপতি পন গুণতো. তং ৰিৰরিতুং, ‘‘নামকরণদিৰসে পনস্সা’’তিআদি ৰুত্তং. মহতিং উল়ারং পজং জননপোসনেহি পরিরক্খতীতি মহাপজাপতি. পরিভোগৰসেন ন হঞ্ঞতীতি অহতং. সিপ্পিকানন্তি তন্তৰাযানং. ৰাযনট্ঠানন্তি ৰীনট্ঠানং. তানি মং ন তোসেন্তি কাযিকস্স পুঞ্ঞস্স অভাৰতো. তেনাহ – ‘‘সহত্থা কতমেৰ মং তোসেতী’’তি. পিসিত্ৰা নিব্বত্তনং কত্ৰা. পোথেত্ৰাতি সুখুমভাৰাপাদনত্থং ধনুকেন নেত্ৰা. কালানুকালঞ্চ ধাতিগণপরিৰুতা গন্ত্ৰা ৰেমকোটিং অগ্গহেসি একদিৰসন্তি অধিপ্পাযো. এৰঞ্হি ‘‘একদিৰসং পন…পে… অকাসী’’তি পুরিমৰচনেন তং ন ৰিরুজ্ঝেয্য.

ছ চেতনাতি ছব্বিধা চেতনা. ন হি তা ছযেৰ চেতনাতি. সঙ্ঘে গোতমি দেহি…পে… সঙ্ঘো চাতি ইদমেৰ সুত্তপদং. সঙ্ঘে গোতমি দেহীতি সঙ্ঘস্স দানায নিযোজেসি, তস্মা সঙ্ঘোৰ দক্খিণেয্যতরোতি অযমেৰেত্থ অত্থো. যদি এৰন্তিআদিনা তত্থ ব্যভিচারং দস্সেতি. রাজমহামত্তাদযোতিআদিনা তত্থ ব্যতিরেকতো নিদস্সনং আহ. মহন্ততরা ভৰেয্যুন্তি আনুভাৰাদিনা মহন্ততরা ভৰেয্যুং, ন চ তং অত্থীতি. তস্মাতি যস্মা গুণৰিসিট্ঠহেতুকং দক্খিণেয্যতং অনপেক্খিত্ৰা অত্তনো দীযমানস্স দাপনং লভতি, তস্মা. মা এৰং গণ্হাতি সম্মাসম্বুদ্ধতো সঙ্ঘোৰ দক্খিণেয্যো’’তি মা গণ্হ.

তত্থ নিচ্ছযসাধকং সুত্তপদং দস্সেন্তো, ‘‘নযিমস্মিং লোকে…পে… ৰিপুলফলেসিন’’ন্তি আহ. স্ৰাযমত্থো রতনসুত্তে (খু. পা. ৬.৩; সু. নি. ২২৬), ‘‘যং কিঞ্চি ৰিত্ত’’ন্তি গাথায, অগ্গপসাদসুত্তাদীহি (ইতিৰু. ৯০) চ ৰিভাৰেতব্বোতি. তেনাহ – ‘‘সত্থারা উত্তরিতরো দক্খিণেয্যো নাম নত্থী’’তি.

গোতমিযা অন্তিমভৰিকতায দানস্স দীঘরত্তং হিতায সুখায অনুপ্পাদনতো ন তং গরুতরং সঙ্ঘস্স পাদাপনে কারণন্তি আহ – ‘‘পচ্ছিমায জনতাযা’’তিআদি. ৰচনতোপীতি তস্স ৰত্থযুগস্স সত্থু এৰ পটিগ্গহণায ৰচনতোপি. তেনাহ ‘‘ন হী’’তিআদি.

সত্থা সঙ্ঘপরিযাপন্নোৰ ঈদিসে ঠানে অগ্গফলট্ঠতায অট্ঠ-অরিযপুগ্গলভাৰতো, সচে পনস্স ন সযং সঙ্ঘপরিযাপন্নতা, কথং সঙ্ঘে পূজিতে সত্থা পূজিতো নাম সিযাতি অধিপ্পাযো. তীণি সরণগমনানি তযো এৰ অগ্গপসাদাতি ৰক্খতীতি অধিপ্পাযো. অভিধেয্যানুরূপানি হি লিঙ্গৰচনানি. ন রুহতি অযাথাৰপটিপত্তিভাৰতো, ন গিহিৰেসগ্গহণাদিনা গিহিভাৰস্স পটিক্খিপিতত্তা. ন ৰত্তব্বমেতং ‘‘সত্থা সঙ্ঘপরিযাপন্নো’’তি সত্থুভাৰতো. সাৰকসমূহো হি সঙ্ঘো. সঙ্ঘগণে হি সত্থা উত্তরিতরো অনঞ্ঞসাধারণগুণেহি সমন্নাগতভাৰতো মূলরতনভাৰতো চ.

৩৭৭. সম্পতিজাতস্স মহাসত্তস্স সত্তপদৰীতিহারগমনং ধম্মতাৰসেন জাতং, পরং তদঞ্ঞদহরসদিসী পটিপত্তীতি আহ – ‘‘হত্থপাদকিচ্চং অসাধেন্তেসূ’’তি.

৩৭৮. পচ্চূপকারং ন সুকরং ৰদামি অনুচ্ছৰিককিরিযায কাতুং অসক্কুণেয্যত্তা. অভিৰাদেন্তি এতেনাতি অভিৰাদনং. ৰন্দমানেহি অন্তেৰাসিকেহি আচরিযং ‘‘সুখী হোতূ’’তিআদিনা অভিৰাদেন্তি নাম. তেন ৰুত্তং ‘‘অভিৰাদন’’ন্তি. তদভিমুখো…পে… ৰন্দিত্ৰা নিপজ্জতি, সেয্যথাপি আযস্মা সারিপুত্তো. কালানুকালং উপট্ঠানং বীজযনপাদসম্বাহনাদি অনুচ্ছৰিককম্মস্স করণং নাম. অনুচ্ছৰিকং কিরিযং কাতুং ন সক্কোতিযেৰ, যস্মা আচরিযেন কতস্স ধম্মানুগ্গহস্স অন্তেৰাসিনা করিযমানো আমিসানুগ্গহো সঙ্খম্পি কলম্পি কলভাগম্পি ন উপেতিযেৰাতি. তেন ৰুত্তং ‘‘ন সুপ্পতিকারং ৰদামী’’তি.

৩৭৯. পাটিপুগ্গলিকং দক্খিণং আরব্ভ সমুট্ঠিতং, ‘‘তং মে ভগৰা পটিগ্গণ্হতূ’’তি মহাপজাপতিগোতমিযা ৰচনং নিমিত্তং কত্ৰা দেসনায উট্ঠিতত্তা. ন কেৰলঞ্চ তস্সা এৰ ৰচনং, অথ খো আনন্দত্থেরোপি…পে… সমাদপেসি, তস্মা ৰিভাগতো চুদ্দসসু…পে… হোতীতি দস্সেতুং, ইমং দেসনং আরভি. তত্থ পতিপচ্চেকং পুগ্গলং দীযতীতি পাটিপুগ্গলিকং. পঠমসদ্দো যথা অগ্গত্থো, এৰং সেট্ঠপরিযাযোপীতি আহ ‘‘জেট্ঠকৰসেনপী’’তি. অগ্গা উত্তমে খেত্তে পৰত্তত্তা. দুতিযততিযাপি পরমদক্খিণাযেৰ সব্বসো সম্মাৰিক্খম্ভিতরাগাদিকিলেসত্তা. রাগাদযো হি অদক্খিণেয্যভাৰস্স কারণং. তেনেৰাহ – ‘‘তিণদোসানি খেত্তানি, রাগদোসা অযং পজা’’তিআদি (ধ. প. ৩৫৬). যস্মা পন সৰাসনং সব্বসো সমুচ্ছিন্নকিলেসেহি ততো এৰ সব্বসো অপ্পটিহতঞাণচারেহি অনন্তাপরিমেয্যগুণগণাধারেহি সম্মাসম্বুদ্ধেহি সদিসো সদেৰকে লোকে কোচি দক্খিণেয্যো নত্থি. তস্মা ‘‘পরমদক্খিণাযেৰা’’তি সাসঙ্কং ৰদতি. যস্মা পঞ্চাভিঞ্ঞো অট্ঠসমাপত্তিলাভী এৰ হোতি লোকিযাভিঞ্ঞানং অট্ঠসমাপত্তিঅধিট্ঠানত্তা, তস্মা ‘‘লোকিযপঞ্চাভিঞ্ঞে’’ইচ্চেৰ ৰুত্তং, ন ‘‘অট্ঠসমাপত্তিলাভিম্হী’’তি তায অৰুত্তসিদ্ধত্তা. গোসীলধাতুকোতি গোসীলসভাৰো, সীলৰতা সদিসসীলোতি অত্থো. তেনাহ ‘‘অসঠো’’তিআদি. তেন ন অলজ্জিধাতুকো পকতিসিদ্ধো ইধ পুথুজ্জনসীলৰাতি অধিপ্পেতোতি দস্সেতি.

পরিচ্ছিন্দন্তোতি এত্তকোতি পচ্চেকপ্পমাণতো ততো এৰ অঞ্ঞমঞ্ঞং অসঙ্করতোৰ পরিচ্ছিন্দন্তো. কথং পন অসঙ্খ্যেয্যভাৰেন ৰুচ্চমানো ৰিপাকো পরিচ্ছিন্নো হোতি? সোপি তস্স পরিচ্ছেদো এৰ ইতরেহি অসংকিণ্ণভাৰদীপনতো, এতদত্থমেৰ পুব্বে অসঙ্করগ্গহণং কতং. গুণৰসেনাতি লক্খণসম্পন্নাদিগুণৰসেন. উপকারৰসেনাতি ভোগরক্খাদিউপকারৰসেন. যং পোসনত্থং দিন্নং, ইদং ন গহিতং দানলক্খণাযোগতো. অনুগ্গহপূজনিচ্ছাৰসেন হি অত্তনো দেয্যৰত্থুপরিচ্চাগো দানং ভযরাগলদ্ধুকামকুলাদিৰসেন সাৰজ্জাভাৰতো. তম্পি ন গহিতং অযাৰদত্থতাঅপরিপুণ্ণভাৰেন যথাধিপ্পেতফলদানাসমত্থভাৰতো. সম্পত্তস্সাতি সন্তিকাগতস্স. তেন সম্পত্তিপযোজনে অনপেক্খতং দস্সেতি. ফলং পটিকঙ্খিত্ৰাতি ‘‘ইদং মে দানমযং পুঞ্ঞং আযতিং সুখহিতভাৰায হোতূ’’তিআদিনা ফলং পচ্চাসীসিত্ৰা. তেনস্স ফলদানে নমিযতং দস্সেতি, যাৰদত্থন্তি ইমিনা পরিপুণ্ণফলতং. সতগুণাতি এত্থ গুণসদ্দো ন ‘‘গুণেন নামং উদ্ধরেয্য’’ন্তিআদীসু (ধ. স. অট্ঠ. ১৩১৩; উদা. অট্ঠ. ৫৩; পটি. ম. অট্ঠ. ১.১.৭৬; নেত্তি. অট্ঠ. ৪.৩৮) ৰিয সম্পত্তিঅত্থো, ‘‘তদ্দিগুণ’’ন্তিআদীসু ৰিয ন ৰড্ঢনত্থো, ‘‘পঞ্চ কামগুণা লোকে, মনোছট্ঠা পৰেদিতা’’তিআদীসু (সু. নি. ১৭৩) ৰিয ন কোট্ঠাসত্থো, ‘‘অন্তং অন্তগুণ’’ন্তিআদীসু (দী. নি. ২.৩৭৭; ম. নি. ১.১১০; খু. পা. ৩) ৰিয ন অন্তভাগত্থো, অথ খো আনিসংসত্থোতি দস্সেন্তো, ‘‘সতানিসংসা’’তি আহ, তে আনিসংসে সরূপতো দস্সেতুং, ‘‘আযুসত’’ন্তিআদি ৰুত্তং. সতগুণাতি ৰা সতৰড্ঢিকাতি এৰমেত্থ অত্থো দট্ঠব্বো. নিপ্পরিতসং করোতীতি আযুআদীনং আনিসংসানং অপরিত্তাসং করোতি. অথ ৰা নিপ্পরিতসং করোতীতি আযুআদিনিমিত্তং অপরিত্তাসং করোতি. অথ ৰা নিপ্পরিতসং করোতীতি আযুআদীনি ততো উত্তরিম্পি আহারাদিহেতু অপরিত্তাসং করোতি. অত্তভাৰৰিনিমুত্তসঞ্চরণস্স অভাৰা, ‘‘ভৰসতেপি ৰুত্তে অযমেৰত্থো’’তি ৰুত্তং. সব্বত্থাতি, ‘‘পুথুজ্জনদুস্সীলে’’তিআদীসু সব্বৰারেসু. নযো নেতব্বোতি, ‘‘আযুসহস্সং ৰণ্ণসহস্স’’ন্তিআদিকো নযো.

সাসনাৰতরণং নাম যাৰদেৰ ৰট্টদুক্খনিত্থরণত্থং, তঞ্চ মগ্গপটিৰেধনং, তস্মা নিব্বেধভাগিযসরণগমনং সিক্খাপদসমাদানং পব্বজ্জা উপসম্পদা সীলপরিপূরণং অধিচিত্তসিক্খানুযোগো ৰিপস্সনাভাৰনাতি সব্বাপেসা সোতাপত্তিফলসচ্ছিকিরিযায পটিপত্তি এৰ হোতীতি আহ – ‘‘তিসরণং গতো উপাসকোপী’’তিআদি. তত্থ যথা নিব্বেধভাগিযো সমাধি তাৰ নাম পরম্পরায অরিযমগ্গাধিগমস্স পচ্চযভাৰতো উপনিস্সযো; তথা নিব্বেধভাগিযং সীলপরিপূরণং উপসম্পদা পব্বজ্জা উপাসকস্স দসসু পঞ্চসু সীলেসু পতিট্ঠানং অন্তমসো সরণাদিগমনম্পি নিব্বেধভাগিযং অরিযমগ্গাধিগমস্স উপনিস্সযো হোতিযেৰাতি, ‘‘সব্বাপেসা সোতাপত্তিফলসচ্ছিকিরিযায পটিপত্তী’’তি ৰুত্তা. তত্থ অনঞ্ঞসাধারণ-ৰিজ্জাচরণাদি-অসঙ্খ্যেয্যঅপরিমেয্য-গুণ-সমুদযপূরিতে ভগৰতি সদ্ধম্মে অরিযসঙ্ঘে উল়ারতরবহুমানগারৰতং গতো. ‘‘সম্মাসম্বুদ্ধো ভগৰা, স্ৰাখাতো ধম্মো, সুপ্পটিপন্নো সঙ্ঘো’’তি তপ্পরাযণতাদিআকারপ্পত্তো ঞাণপরিসোধিতো পসাদো সরণগমনন্তি তেন ৰত্থুগতেন পসাদেন পরিভাৰিতে সন্তানে কতং পুঞ্ঞক্খেত্তসম্পত্তিযা মহপ্ফলং মহানিসংসমেৰ হোতীতি আহ – ‘‘তস্মিং দিন্নদানম্পি অসঙ্খ্যেয্যং অপ্পমেয্য’’ন্তি. তযিদং সরণং ৰত্থুত্তযে পসাদভাৰেন অজ্ঝাসযসম্পত্তিমত্তং, তাদিসস্স পন পঞ্চসীলং অজ্ঝাসযসম্পত্তিউপথম্ভিতো কাযৰচীসংযমোতি তত্থ দিন্নং ততো উত্তরি মহপ্ফলন্তি, দসসীলং পন পরিপুণ্ণুপোসথসীলং, তত্থ দিন্নং মহপ্ফলন্তি, ‘‘ততো উত্তরি মহপ্ফল’’ন্তি ৰুত্তং. সামণেরসীলাদীনং পন উত্তরি ৰিসিট্ঠতরাদিভাৰতো তত্থ তত্থ দিন্নস্স ৰিসেসমহপ্ফলতা ৰুত্তা.

মগ্গসমঙ্গিতা নাম মগ্গচিত্তক্খণপরিচ্ছিন্না, তস্মিঞ্চ খণে কথং দাতুং পটিগ্গহেতুঞ্চ সম্ভৰতীতি চোদেতি ‘‘কিং পন মগ্গসমঙ্গিস্স সক্কা দানং দাতু’’ন্তি. ইতরো তাদিসে সতি সমযেতি দস্সেন্তো, ‘‘আম সক্কা’’তি পটিজানিত্ৰা, ‘‘আরদ্ধৰিপস্সকো’’তিআদিনা তমত্থং ৰিৰরতি. তস্মিং খণেতি তস্মিং পক্খিপনক্খণে. যদি অট্ঠমকস্স সোতাপন্নস্স দিন্নদানং ফলতো অসঙ্খ্যেয্যমেৰ, কো নেসং ৰিসেসোতি আহ ‘‘তত্থা’’তিআদি. তেন সতিপি অসঙ্খ্যেয্যভাৰসামঞ্ঞে অত্থি নেসং অপ্পবহুভাৰো সংৰট্টট্ঠাযী অসঙ্খ্যেয্যমহাকপ্পাসঙ্খ্যেয্যানং ৰিযাতি দস্সেতি. মগ্গসমঙ্গীনং তেন তেন ওধিনা সংকিলেসধম্মানং পহীযমানত্তা ৰোদানধম্মানং ৰড্ঢমানত্তা অপরিযোসিতকিচ্চত্তা অপরিপুণ্ণগুণতা, পরিযোসিতকিচ্চত্তা ফলসমঙ্গীনং পরিপুণ্ণগুণতাতি তংতংমগ্গট্ঠেহি ফলট্ঠানং খেত্তাতিসযতা ৰেদিতব্বা. হেট্ঠিমহেট্ঠিমেহি পন মগ্গট্ঠেহি উপরিমানং মগ্গট্ঠানং ফলট্ঠেহি ফলট্ঠানং উত্তরিতরতা পাকটা এৰ. তথা হি উপরিমানং দিন্নদানস্স মহপ্ফলতা ৰুত্তা.

৩৮০. কামঞ্চেত্থ বুদ্ধপ্পমুখে উভতোসঙ্ঘে কেৰলে চ ভিক্খুসঙ্ঘে দানং অত্থি এৰ, ন পন বুদ্ধপ্পমুখে ভিক্খুসঙ্ঘে, তং পন বুদ্ধপ্পমুখউভতোসঙ্ঘেনেৰ সঙ্গহিতন্তি অৰিরুদ্ধং. ন পাপুণন্তি মহপ্ফলভাৰেন সদিসতম্পি, কুতো অধিকতং.

‘‘তথাগতে পরিনিব্বুতে উভতোসঙ্ঘস্স’’ ইচ্চেৰ ৰুত্তত্তা – ‘‘কিং পনা’’তিআদিনা চোদেতি. ইতরো পরিনিব্বুতে তথাগতে তং উদ্দিস্স গন্ধপুপ্ফাদিপরিচ্চাগো ৰিয চীৰরাদিপরিচ্চাগোপি মহপ্ফলো হোতিযেৰাতি কত্ৰা পটিপজ্জনৰিধিং দস্সেতুং, ‘‘উভতোসঙ্ঘস্সা’’তিআদি ৰুত্তং. ‘‘এত্তকাযেৰ, ভিক্খূ উদ্দিসথা’’তি এৰং পরিচ্ছেদস্স অকরণেন উপচারসীমাপরিযাপন্নানং খেত্তপরিযাপন্নানং ৰসেন অপরিচ্ছিন্নকমহাভিক্খুসঙ্ঘে.

গোত্তং ৰুচ্চতি সাধারণনামং, মত্তসদ্দো লুত্তনিদ্দিট্ঠো, তস্মা সমণাতি গোত্তমত্তং অনুভৰন্তি ধারেন্তীতি গোত্রভুনো. তেনাহ ‘‘নামমত্তসমণা’’তি. দিট্ঠিসীলসামঞ্ঞেন সংহতো সমণগণো সঙ্ঘো, তস্মা সঙ্ঘো দুস্সীলো নাম নত্থি. গুণসঙ্খাযাতি আনিসংসগণনায, মহপ্ফলতাযাতি অত্থো. কাসাৰ…পে… অসঙ্খ্যেয্যাতি ৰুত্তা সঙ্ঘং উদ্দিস্স দিন্নত্তা. যথা পন সঙ্ঘং উদ্দিস্স দানং হোতি, তং ৰিধিং দস্সেতুং, ‘‘সঙ্ঘগতা দক্খিণা’’তিআদি ৰুত্তং. তত্থ চিত্তীকারন্তি গারৰং.

সঙ্ঘতো ন পুগ্গলতো. অঞ্ঞথত্তং আপজ্জতীতি ‘‘ইমস্স মযা দিন্নং সঙ্ঘস্স দিন্নং হোতী’’তি এৰং চিত্তং অনুপ্পাদেত্ৰা, ‘‘সঙ্ঘস্স দস্সামী’’তি দেয্যধম্মং পটিযাদেত্ৰা সামণেরস্স নাম দাতব্বং জাতন্তি অঞ্ঞথত্তং আপজ্জতি; তস্মা তস্স দক্খিণা সঙ্ঘগতা ন হোতিযেৰ পুগ্গলৰসেন চিত্তস্স পরিণামিতত্তা. নিব্বেমতিকো হুত্ৰাতি ‘‘কিং নু খো মযা ইমস্স দিন্নং হোতি ৰা ন ৰা’’তি ৰিমতিং অনুপ্পাদেত্ৰা, ‘‘যো পনা’’তিআদিনা ৰুত্তাকারেন করোতি.

তত্থাতিআদিনা ৰুত্তস্সেৰত্থস্স পাকটকরণত্থং ৰত্থুং নিদস্সেতি, ‘‘পরসমুদ্দৰাসিনো’’তিআদিনা. ওপুঞ্জাপেত্ৰা পরিভণ্ডং কারেত্ৰা, হরিতগোমযেন উপলিম্পিত্ৰাতি অত্থো. কাসাৰকণ্ঠসঙ্ঘস্সাতি কাসাৰকণ্ঠসমূহস্স. কো সোধেতীতি মহপ্ফলভাৰকরণেন কো ৰিসোধেতি. মহপ্ফলভাৰাপত্তিযা হি দক্খিণা ৰিসুজ্ঝতি নাম. তত্থ যেসং হত্থে দিন্নং, তেসং ৰসেন পটিগ্গাহকতো দক্খিণায ৰিসুদ্ধত্তা, – ‘‘তদাপাহং, আনন্দ, সঙ্ঘগতং দক্খিণং অসঙ্খ্যেয্যং অপ্পমেয্যং ৰদামী’’তি (ম. নি. ৩.৩৮০) চ ৰুত্তং, তস্মা কম্মৰসেনেৰ দক্খিণাৰিসুদ্ধিং পুচ্ছতি. ইতরো অরিযসঙ্ঘে দিন্নদক্খিণায নিব্বিসিট্ঠং কত্ৰা ৰুত্তত্তা মত্থকপ্পত্তস্সেৰ অরিযসঙ্ঘস্স ৰসেন দক্খিণাৰিসুদ্ধিং দস্সেন্তো, ‘‘সারিপুত্ত…পে… সোধেন্তী’’তি ৰত্ৰা পুন, ‘‘যে কেচি অরহন্তো সোধেন্তী’’তি দস্সেন্তো, ‘‘অপিচা’’তিআদিমাহ. থেরা চিরপরিনিব্বুতাতি ইদং অজ্জতনানম্পি অরিযানং সাৰকতং দস্সেন্তেন মগ্গসোধনৰসেন ৰুত্তন্তি দট্ঠব্বং, ন উদ্দিস্স পুঞ্ঞকরণে সতি অকরণপ্পত্তিযা. এৰঞ্হি ‘‘অসীতিমহাথেরা সোধেন্তী’’তি ইদং সুৰুত্তং হোতি, ন অঞ্ঞথা.

‘‘সঙ্ঘগতায দক্খিণাযা’’তি কামঞ্চেতং সাধারণৰচনং, তথাপি তত্থ তত্থ পুগ্গলৰিসেসো ঞাতব্বোতি দস্সেন্তো, ‘‘অত্থি বুদ্ধপ্পমুখো সঙ্ঘো’’তিআদিমাহ. ন উপনেতব্বো ভগৰতো কালে ভিক্খূনং অভিঞ্ঞাপটিসম্ভিদাগুণৰসেন অতিৰিয উল়ারভাৰতো, এতরহি তদভাৰতো. এতরহি সঙ্ঘো…পে… ন উপনেতব্বোতি এত্থ নযানুসারেন অত্থো ৰত্তব্বো. তেন তেনেৰ সমযেনাতি তস্স তস্স কালস্স সম্পত্তিৰিপত্তিমুখেন পটিপত্তিযা উল়ারতং অনুল়ারতঞ্চ উল্লিঙ্গেতি. যত্থ হি ভিক্খূ গুণেহি সব্বসো পরিপুণ্ণা হোন্তি, তস্মিং সমযে সঙ্ঘগতা দক্খিণা ইতরস্মিং সমযে দক্খিণতো মহপ্ফলতরাতি দট্ঠব্বা. সঙ্ঘে চিত্তীকারং কাতুং সক্কোন্তস্সাতি সুপ্পটিপন্নতাদিং সঙ্ঘে আৰজ্জিত্ৰা সঙ্ঘগতেন পসাদেন সঙ্ঘস্স সম্মুখা ৰিয তস্মিং পুগ্গলে চ গারৰৰসেন দেন্তস্স পুথুজ্জনসমণে দিন্নং মহপ্ফলতরং সঙ্ঘতো উদ্দিসিত্ৰা গহিতত্তা, ‘‘সঙ্ঘস্স দেমী’’তিযেৰ দিন্নত্তা চ.

এসেৰ নযোতি ইমিনা, ‘‘সোতাপন্নে দিন্নং মহপ্ফলতর’’ন্তি এৰমাদিং অতিদিসতি. আদি-সদ্দেন উদ্দিসিত্ৰা গহিতো সকদাগামী, পাটিপুগ্গলিকো অনাগামীতি এৰমাদি সঙ্গহিতং. মহপ্ফলতরমেৰ. তেনাহ ভগৰা – ‘‘ন ত্ৰেৰাহং, আনন্দ, কেনচি পরিযাযেন সঙ্ঘগতায দক্খিণায পাটিপুগ্গলিকং দানং মহপ্ফলতরং ৰদামী’’তি (ম. নি. ৩.৩৮০). যদি খীণাসৰে দিন্নদানতো সঙ্ঘতো উদ্দিসিত্ৰা গহিতদুস্সীলেপি দিন্নদানং মহপ্ফলং, এৰং সন্তে – ‘‘সীলৰতো, মহারাজ, দিন্নং মহপ্ফলং, নো তথা দুস্সীলে’’তি ইদং কথন্তি আহ – ‘‘তং ইমং নযং গহাযা’’তিআদি. সঙ্ঘতো উদ্দিসিত্ৰা গহণৰিধিং পহায দুস্সীলস্সেৰ গহণৰসেন ৰুত্তং. ইমস্মিং চতুক্কে দট্ঠব্বন্তি ইমস্স পদস্স ৰসেন দট্ঠব্বং. তত্থ হি ‘‘পটিগ্গাহকা হোন্তি দুস্সীলা পাপধম্মা’’তি আগতং.

৩৮১. ৰিসুজ্ঝতীতি ন কিলিস্সতি, মহাজুতিকারী মহাৰিপ্ফারা হোতীতি অত্থো. সুচিধম্মোতি রাগাদিঅসুচিৰিধমনেন সুচিসভাৰো. ন পাপধম্মোতি ন নিহীনসভাৰো পাপকিরিযায. অকুসলধম্মো হি একন্তনিহীনো. জূজকো সীলৰা কল্যাণধম্মো ন হোতি. তস্স মহাবোধিসত্তস্স অত্তনো পুত্তদানং দানপারমিযা মত্থকং গণ্হন্তং মহাপথৰীকম্পনসমত্থং জাতং, স্ৰাযং দানগুণো ৰেস্সন্তরমহারঞ্ঞা কথেতব্বোতি.

উদ্ধরতীতি বহুলং কতপাপকম্মৰসেন লদ্ধৰিনিপাততো উদ্ধরতি. তস্মা নত্থি ময্হং কিঞ্চি চিত্তস্স অঞ্ঞথত্তন্তি অধিপ্পাযো.

পেতদক্খিণন্তি পেতে উদ্দিস্স দাতব্বদক্খিণং. পাপিতকালেযেৰাতি, ‘‘ইদং দানং অসুকস্স পেতস্স হোতূ’’তি উদ্দিসনৰসেন পত্তে পাপিতকালেযেৰ. অস্সাতি পেতস্স. পাপুণীতি ফলসমাপত্তিযা ৰসেন পাপুণি. অযঞ্হি পেতে উদ্দিস্স দানে ধম্মতা.

তদা কোসলরঞ্ঞো পরিচ্চাগৰসেন অতিৰিয উল়ারজ্ঝাসযতং, বুদ্ধপ্পমুখস্স চ ভিক্খুসঙ্ঘস্স উক্কংসগতগুণৰিসিট্ঠতং সন্ধাযাহ, ‘‘অসদিসদানং কথেতব্ব’’ন্তি.

অসারম্পি খেত্তন্তি সারহীনং দুক্খেত্তং. সমযেতি কসনারহে কালে. পংসুং অপনেত্ৰাতি নিস্সারং পংসুং নীহরিত্ৰা. সারবীজানীতি সভাৰতো অভিসঙ্খারতো চ সারভূতানি বীজানি. পতিট্ঠপেত্ৰাতি ৰপিত্ৰা. এৰন্তি যথা কস্সকো অত্তনো পযোগসম্পত্তিযা অসারেপি খেত্তে ফলং অধিগচ্ছতি. এৰং সীলৰা অত্তনো পযোগসম্পত্তিযা দুস্সীলস্সপি দত্ৰা ফলং মহন্তং অধিগচ্ছতি. ইমিনা উপাযেনাতি ইমিনা পঠমপদে ৰুত্তনযেন. সব্বপদেসূতি সব্বকোট্ঠাসেসু ৰিসুজ্ঝনং ৰুত্তং, ততিযপদে পন ৰিসুজ্ঝনং পটিক্খিত্তমেৰ.

৩৮২. অরহতো দিন্নদানমেৰ অগ্গং দানচেতনায কেনচি উপক্কিলেসেন অনুপক্কিলিট্ঠত্তা, পটিগ্গাহকস্স অগ্গদক্খিণেয্যত্তা. তেনাহ – ‘‘ভৰালযস্স ভৰপত্থনায অভাৰতো’’তি, ‘‘উভিন্নম্পী’’তি ৰচনসেসো. খীণাসৰো দানফলং ন সদ্দহতীতি ইদং তস্স অপ্পহীনকিলেসজনস্স ৰিয কম্মকম্মফলানং সদ্দহনাকারেন পৰত্তি নত্থীতি কত্ৰা ৰুত্তং, যতো অরহা ‘‘অসদ্ধো অকতঞ্ঞূ চ…পে… পোরিসো’’তি (ধ. প. ৯৭) থোমীযতি. অসদ্দহনং অনুমানপক্খিকং, অনুমানঞ্চ সংসযপুব্বকং, নিস্সন্দিদ্ধো চ কম্মকম্মফলেসু পচ্চক্খভাৰং গতো. তমেৰ হি নিচ্ছিতভাৰসিদ্ধং নিস্সন্দিদ্ধতং সন্ধায – ‘‘দানফলং সদ্দহন্তা’’তিআদি ৰুত্তং. যদি এৰং তেন কতকম্মং কম্মলক্খণপ্পত্তং হোতীতি আহ ‘‘খীণাসৰেনা’’তিআদি. তেনেৰাহ – ‘‘নিচ্ছন্দরাগত্তা’’তি, এতঞ্চ লক্খণৰচনং, কেনচি কিলেসেন অনুপক্কিলিট্ঠত্তাতি অধিপ্পাযো. অস্সাতি খীণাসৰস্স দানং.

কিং পন সম্মাসম্বুদ্ধেনাতিআদিনা দাযকতো দক্খিণাৰিসুদ্ধি চোদিতা, সারিপুত্তত্থেরেনাতিআদিনা পন পটিগ্গাহকতোতি ৰদন্তি; তদযুত্তং, সাৰকস্স মহপ্ফলভাৰে সংসযাভাৰতো, হেট্ঠা নিচ্ছিতত্তা চ, তস্মা উভযেনপি দাযকতো দক্খিণাৰিসুদ্ধি এৰ চোদিতা. সা হি ইধ সাধারণৰসেন নিচ্ছিতত্তা সংসযৰত্থু. তেনাহ – ‘‘সম্মাসম্বুদ্ধেন…পে… ৰদন্তী’’তি. সম্মাসম্বুদ্ধং হীতিআদি যথাৰুত্তঅত্থস্স কারণৰচনং. অঞ্ঞো দানস্স ৰিপাকং জানিতুং সমত্থো নাম নত্থি সব্বসো সত্তানং কম্মৰিপাকৰিভাগজাননঞাণস্স অননুঞ্ঞাতত্তা. তেনাহ ভগৰা – ‘‘যস্মা চ খো, ভিক্খৰে, সত্তা ন জানন্তি, দানসংৰিভাগস্স ৰিপাকং যথাহং জানামি, তস্মা অদত্ৰা ভুঞ্জন্তী’’তিআদি (ইতিৰু. ২৬). এতেন এত্থ ঞাণৰিসোধনং নাম কথিতং, ন দক্খিণায ৰিসুদ্ধি নাম দাযকতো পটিগ্গাহকতো চ ৰসেন হোতীতি; সম্মাসম্বুদ্ধেন সারিপুত্তত্থেরস্স দিন্নদানং সব্বসো উপক্কিলেসৰিসুদ্ধিযা ঞাণস্স চ অতিৰিয উল়ারত্তা মহানুভাৰং নাম সিযা মহাতেজৰন্তঞ্চ; ন মহপ্ফলং তেসং সন্তানে পরিপুণ্ণফলস্স অসম্ভৰতো. যদি দিন্নদানং পরিপুণ্ণফলং ন হোতি উভযৰিপাকদানাভাৰতো, পৰত্তিৰিপাকদাযী পন হোতীতি দস্সেন্তো, ‘‘দানং হী’’তিআদিমাহ.

চতূহীতি সহযোগে করণৰচনং, চতূহি সম্পদাহি সহগতা সহিতং কত্ৰাতি অত্থো. ইমা চতস্সো সম্পদা সব্বসাধারণৰসেন ৰুত্তা, ন যথাধিগতপুগ্গলৰসেন. তেনাহ – ‘‘দেয্যধম্মস্স ধম্মেনা’’তিআদি. তস্মিংযেৰ অত্তভাৰেতি যস্মিং অত্তভাৰে তং দানমযং পুঞ্ঞং উপ্পন্নং, তস্মিংযেৰ অত্তভাৰে ৰিপাকং দেতি, চেতনায মহন্তত্তা দিট্ঠধম্মৰেদনীযং হুত্ৰা ৰিপচ্চতীতি অত্থো. পুব্বচেতনাদিৰসেনাতি সন্নিট্ঠাপকজৰনৰীথিতো পুব্বাপরৰীথিচেতনাৰসেন, অঞ্ঞথা সন্নিট্ঠাপকৰীথিযংযেৰ পুব্বচেতনাদিৰসেনাতি ৰত্তব্বং সিযা. সা হি চেতনা দিট্ঠধম্মৰেদনীযভূতা তস্মিংযেৰ অত্তভাৰে ৰিপাকং দেতি, ন ইতরা. মহত্ততাতি পুব্বাভিসঙ্খারৰসেন ঞাণসম্পযোগাদিৰসেন চেতনায উল়ারতা. খীণাসৰভাৰেনাতি যস্স দেতি, তস্স খীণাসৰভাৰেন. ৰত্থুসম্পন্নতাতি এত্থ যথা পটিঘসঞ্ঞা নানত্তসঞ্ঞানং ৰিগমেন দিব্বৰিহারানং ৰসেন, ব্যাপাদসঞ্ঞাদীনং ৰিগমেন ব্রহ্মৰিহারানং ৰসেন, সব্বসো রূপসঞ্ঞানানত্তসঞ্ঞানং ৰিগমেন আনেঞ্জৰিহারানং ৰসেন সব্বসো নিচ্চসঞ্ঞাদীনং পটিপ্পস্সদ্ধিযা সব্বসঙ্খারৰিমুখতায অরিযৰিহারানং ৰসেন ৰত্থুসম্পন্নতা ইচ্ছিতা. তংতংসমাপত্তিসমাপজ্জনেন সন্তানস্স নিরোধসাধনতা তং দিৰসং নিরোধস্স সাধনতা নাম. ৰত্থুসম্পন্নতাতি সব্বসো নিরোধসমাপত্তিসমাপজ্জনেন ৰত্থুসম্পন্নতা ইচ্ছিতা; ন সব্বসো অনৰসেসসঞ্ঞানিরোধতাযাতি আহ – ‘‘তং দিৰসং নিরোধতো ৰুট্ঠিতভাৰেন ৰত্থুসম্পন্নতা’’তি. সঞ্ঞানিরোধস্স চেত্থ অচ্চাসন্নতং সন্ধায, ‘‘তং দিৰস’’ন্তি ৰুত্তং. যং পনেত্থ অত্থতো অৰিভত্তং, তং সুৰিঞ্ঞেয্যমেৰ.

দক্খিণাৰিভঙ্গসুত্তৰণ্ণনায লীনত্থপ্পকাসনা সমত্তা.

নিট্ঠিতা চ ৰিভঙ্গৰগ্গৰণ্ণনা.

৫. সল়াযতনৰগ্গো

১. অনাথপিণ্ডিকোৰাদসুত্তৰণ্ণনা

৩৮৩. অধিমত্তগিলানোতি অধিকায মত্তায মরণস্স আসন্নতায অতিৰিয গিলানোতি অত্থো. তেনাহ ‘‘মরণসেয্যং উপগতো’’তি. অখণ্ডং অকাসি গহপতিনো সত্থরি পরমপেমত্তা. যত্তকং চস্সাতি, ‘‘সকিং ৰা দ্ৰিক্খত্তুং ৰা’’তি ৰুত্তং যত্তকং অস্স গহপতিস্স.

৩৮৪. ওসক্কন্তীতি পরিহাযন্তি. ওত্থরন্তীতি অভিভৰন্তি. উস্মা নাম কম্মজতেজোধাতু, সা সহ জীৰিতিন্দ্রিযনিরোধা পরিযাদিযতি, যাৰ তা আযুউস্মা ৰত্তন্তি, তাৰ মরণন্তিকা ৰেদনা ৰত্তন্তেৰ ৰিঞ্ঞাণস্স অনিরুদ্ধত্তা. তেনাহ ‘‘যাৰ উস্মা’’তিআদি.

৩৮৫. তীহি গাহেহীতি তণ্হামানদিট্ঠিগ্গাহেহি. পটিবাহিতুং ৰিক্খম্ভেতুং. চক্খুং তীহি গাহেহি ন গণ্হিস্সামীতি মানগ্গাহপটিক্খেপমুখেন চক্খুস্মিং অনিচ্চানুপস্সনাতি দস্সেতি. অনিচ্চানুপস্সনায হি সতি অপ্পতিট্ঠো মানগ্গাহো, দুক্খানুপস্সনায সতি অপ্পতিট্ঠো তণ্হাগ্গাহো, অনত্তানুপস্সনায সতি অপ্পতিট্ঠো দিট্ঠিগ্গাহোতি, গাহো চ নাম ওল়ারিকো, তস্মিং ৰিগতেপি নিকন্তি তিট্ঠেয্যাতি তং ৰিজহাপেতুকামেন, – ‘‘ন চ মে চক্খুনিস্সিতং ৰিঞ্ঞাণং ভৰিস্সতী’’তি ৰুত্তন্তি আহ – ‘‘ৰিঞ্ঞাণঞ্চাপি মে চক্খুনিস্সিতং ন ভৰিস্সতী’’তি. সব্বং কামভৰরূপন্তি কামভূমিপরিযাপন্নং সব্বং রূপক্খন্ধমাহ – ‘‘কামরূপভৰরূপ’’ন্তি ৰা পাঠো. সো যুত্তো ইমস্স ৰারস্স এৰ অনৰসেসপঞ্চৰোকারভৰপরিযাপন্নতো. তথা হি উপরি চতুৰোকারভৰো অনৰসেসতো ৰুত্তো.

৩৮৬. ইধলোকন্তি এত্থ সঙ্খারলোকৰিসযোতি অধিপ্পাযেন, ‘‘ৰসনট্ঠানং ৰা’’তিআদি ৰুত্তং, তঞ্চ খো পঠমদুতিযৰারেহি ইধলোকো গহিতোতি কত্ৰা. পঠমদুতিযৰারেহি পন ইধলোকো পরলোকোতি ৰিভাগেন ৰিনা পঞ্চৰোকারভৰো গহিতো; তথা ততিযৰারে পঞ্চৰোকারভৰো চতুৰোকারভৰো চ গহিতোতি পুন দিট্ঠধম্মসম্পরাযৰসেন তং ৰিভজিত্ৰা দস্সেতুং, ‘‘ন ইধলোক’’ন্তিআদি ৰুত্তং. ইধলোকন্তি চ সত্তসঙ্খারৰসেনেৰ গহিতং. সব্বম্পি সঙ্খারৰসেন পরিগ্গহেত্ৰা দস্সেতুং, ‘‘যম্পি মে দিট্ঠ’’ন্তিআদি ৰুত্তন্তি কেচি. অপরিতস্সনত্থং তণ্হাপরিতস্সনায অনুপ্পাদনত্থং. যস্স দিট্ঠধম্মোতি ৰুচ্চতি, তস্স পন অভাৰতো, ‘‘মনুস্সলোকং ঠপেত্ৰা সেসা পরলোকা নামা’’তি ৰুত্তং. যেসং পন ‘‘ইধলোক’’ন্তি ইমিনা সত্তলোকস্সপি গহণং ইচ্ছিতং. তেসং মতেন, ‘‘মনুস্সলোকং ঠপেত্ৰা’’তি যোজনা.

৩৮৭. অল্লীযসীতি অত্তভাৰে ভোগেসু চ অপেক্খং করোসীতি অত্থো. এৰরূপীতি যাদিসী তদা ধম্মসেনাপতিনা কথিতা, এৰরূপী. ধম্মকথা ন সুতপুব্বাতি যথাকথিতাকারমেৰ সন্ধায পটিক্খেপো, ন সুখুমগম্ভীরসুঞ্ঞতাপটিসংযুত্ততাসামঞ্ঞং. তেনাহ ‘‘এৰং পনা’’তিআদি.

মযা গতমগ্গমেৰ অনুগচ্ছসীতি দানমযপুঞ্ঞভাৰসামঞ্ঞং গহেত্ৰা ৰদতি, ন বোধিসত্তদানভূতং দানপারমিতং. ন পটিভাতীতি রুচ্চনৰসেন চিত্তে ন উপতিট্ঠতি. তেনাহ ‘‘ন রুচ্চতী’’তি. তথা হেস ৰট্টাভিরতোতি. উজুমগ্গাৰহা ৰিপস্সনা ভগৰতা পনস্স কথিতপুব্বা.

৩৮৮. এসিতগুণত্তা এসিযমানগুণত্তা চ ইসি, অসেক্খা সেক্খা কল্যাণপুথুজ্জনা চ, ইসীনং সঙ্ঘো, তেন নিসেৰিতন্তি ইসিসঙ্ঘনিসেৰিতং. কামং তস্স ৰিহারস্স গন্ধকুটিপাসাদকূটাগারাদিৰসেন নিসীদননিপজ্জনায রুক্খলতাদিৰসেন ভূমিসযাদিৰসেন চ অনঞ্ঞসাধারণা মহতী রমণীযতা অত্থেৰ, সা পন গেহস্সিতভাৰেন অরিযানং চিত্তং তথা ন তোসেতি; যথা অরিযানং নিসেৰিতভাৰেনাতি আহ – ‘‘পঠমগাথায জেতৰনস্স ৰণ্ণং কথেত্ৰা’’তি. তেনাহ ভগৰা – ‘‘যত্থ অরহন্তো ৰিহরন্তি, তং ভূমিরামণেয্যক’’ন্তি (ধ. প. ৯৮; থেরগা. ৯৯১; সং. নি. ১.২৬১). অপচযগামিনী চেতনা সত্তানং সুদ্ধিমাৰহতীতি আহ – ‘‘কম্মন্তি মগ্গচেতনা’’তি. চতুন্নং অরিযসচ্চানং ৰিদিতকরণট্ঠেন কিলেসানং ৰিক্খম্ভনট্ঠেন চ ৰিজ্জা, মগ্গসম্মাদিট্ঠীতি আহ – ‘‘ৰিজ্জাতি মগ্গপঞ্ঞা’’তি. সমাধিপক্খিকো ধম্মো নাম সম্মাৰাযামসতিসমাধযো. তথা হি ৰিজ্জাভাগিযো সমাধিপি সমাধিপক্খিকো. সীলং তস্স অত্থীতি সীলন্তি আহ – ‘‘সীলে পতিট্ঠিতস্স জীৰিতং উত্তম’’ন্তি. দিট্ঠিসঙ্কপ্পোতি সম্মাসঙ্কপ্পো. তত্থ সম্মাসঙ্কপ্পস্স উপকারকভাৰেন ৰিজ্জাভাগো. তথা হি সো পঞ্ঞাক্খন্ধসঙ্গহিতোতি ৰুচ্চতি, যথা সম্মাসঙ্কপ্পো পঞ্ঞাক্খন্ধেন সঙ্গহিতো, এৰং ৰাযামসতিযো সমাধিক্খন্ধসঙ্গহিতাতি. তেনাহ – ‘‘ধম্মোতি ৰাযামসতিসমাধযো’’তি. ‘‘ধম্মো’’তি হি ইধ সম্মাসমাধি অধিপ্পেতো, – ‘‘এৰং ধম্মা তে ভগৰন্তো অহেসু’’ন্তিআদীসু (দী. নি. ২.১৩; ম. নি. ৩.১৯৮; সং. নি. ৫.৩৭৮) ৰিয. ৰাচাকম্মন্তাজীৰাতি সম্মাৰাচাকম্মন্তাজীৰা মগ্গপরিযাপন্না এৰ, তে সব্বেপি গহিতাতি. তেনাহ – ‘‘এতেন অট্ঠঙ্গিকেন মগ্গেনা’’তি.

উপাযেনাতি যেন ৰিধিনা অরিযমগ্গো ভাৰেতব্বো, তেন সমাধিপক্খিযং ৰিপস্সনাধম্মঞ্চেৰ মগ্গধম্মঞ্চ. ‘‘অরিযং ৰো, ভিক্খৰে, সম্মাসমাধিং দেসেস্সামি সউপনিসং সপরিক্খার’’ন্তি (ম. নি. ৩.১৩৬) হি ৰচনতো সম্মাসমাধিআদযো মগ্গধম্মাপি সমাধিপক্খিযা. ৰিচিনেয্যাতি ৰীমংসেয্য, ভাৰেয্যাতি অত্থো. তত্থাতি হেতুম্হি ভুম্মৰচনং. অরিযমগ্গহেতুকা হি সত্তানং ৰিসুদ্ধি. তেনাহ – ‘‘তস্মিং অরিযমগ্গে ৰিসুজ্ঝতী’’তি. পঞ্চক্খন্ধধম্মং ৰিচিনেয্য, পঞ্চুপাদানক্খন্ধে ৰিপস্সেয্য. তেসু হি ৰিপস্সিযমানেসু ৰিপস্সনা উক্কংসগতা. যদগ্গেন দুক্খসচ্চং পরিঞ্ঞাপটিৰেধেন পটিৰিজ্ঝীযতি, তদগ্গেন সমুদযসচ্চং পহানপটিৰেধেন নিরোধসচ্চং সচ্ছিকিরিযাপটিৰেধেন, মগ্গসচ্চং ভাৰনাপটিৰেধেন পটিৰিজ্ঝীযতি, এৰং অচ্চন্তৰিসুদ্ধিযা সুজ্ঝতি. তেনাহ – ‘‘এৰং তেসু চতূসু সচ্চেসু ৰিসুজ্ঝতী’’তি. ইধাপি নিমিত্তত্থে ভুম্মৰচনং. সচ্চেসু ৰা পটিৰিজ্ঝিযমানেসূতি ৰচনসেসো.

অৰধারণৰচনন্তি ৰৰত্থাপনৰচনং, অৰধারণন্তি অত্থো. সারিপুত্তোৰাতি চ অৰধারণং তস্স সাৰকভাৰতো সাৰকেসু সারিপুত্তোৰ সেয্যোতি ইমমত্থং দীপেতি. কিলেসউপসমেনাতি ইমিনা মহাথেরস্স তাদিসো কিলেসূপসমোতি দস্সেতি, যস্স সাৰকস্স ৰিসযে পঞ্ঞায পারমিপ্পত্তি অহোসি. যদি এৰং – ‘‘যোপি পারঙ্গতো ভিক্খু, এতাৰপরমো সিযা’’তি ইদং কথন্তি? তেসং তেসং বুদ্ধানং সাসনে পঞ্ঞায পারমিপ্পত্তসাৰকৰসেনেতং ৰুত্তন্তি দট্ঠব্বং. অথ ৰা – ‘‘নত্থি ৰিমুত্তিযা নানত্ত’’ন্তি (দী. নি. টী. ৩.১৪১; ৰিভ. মূলটী. সুত্তন্তভাজনীযৰণ্ণনা) ৰচনতো সাৰকেহি ৰিমুত্তিপঞ্ঞামত্তং সন্ধাযেতং ৰুত্তং. তেনাহ – ‘‘পারঙ্গতোতি নিব্বানং গতো’’তিআদি. সেসং সুৰিঞ্ঞেয্যমেৰ.

অনাথপিণ্ডিকোৰাদসুত্তৰণ্ণনায লীনত্থপ্পকাসনা সমত্তা.

২. ছন্নোৰাদসুত্তৰণ্ণনা

৩৮৯. ছন্নোতি ইদং তস্স নামন্তি আহ ‘‘এৰংনামকো থেরো’’তি. যস্স পন সত্থারা পরিনিব্বানকালে ব্রহ্মদণ্ডো আণত্তো, অযং সো ন হোতীতি দস্সেন্তো আহ – ‘‘ন অভিনিক্খমনং নিক্খন্তত্থেরো’’তি, লোকনাথস্স অভিনিক্খমনকালে কপিলপুরতো নিক্খন্তোতি অত্থো. গিলানপুচ্ছকাতি গিলানস্স পুচ্ছনকা, গিলানভাৰস্স অৰত্থং সোতুকামাতি অত্থো. সসনতো হিংসনতো সত্থন্তি আহ ‘‘জীৰিতহারকসত্থ’’ন্তি.

৩৯০. উপৰজ্জং এতস্স নত্থীতি অনুপৰজ্জং, করজকাযং কত্ৰা আযতিং উপ্পত্তিরহিতন্তি অত্থো. তেনাহ ‘‘অনুপ্পত্তিক’’ন্তি.

৩৯১. খযৰযং ঞত্ৰাতি সঙ্খারগতং খণভঙ্গং নেত্ৰা ঞাণেন যাথাৰতো ঞত্ৰা. নেতং মমাতি দুক্খতো সমনুপস্সনা সঙ্খারেসু দিট্ঠেসু মমংকারাভাৰতো. নেসোহমস্মীতি অনিচ্চতো সমনুপস্সনা অনিচ্চতো তেসু দিট্ঠেসু অহংকারাভাৰতো. ন মেসো অত্তাতি অনত্ততো সমনুপস্সনা অনত্ততো তেসু দিট্ঠেসু অত্তগ্গাহাভাৰতোতি আহ – ‘‘নেতং মম…পে… অত্তাতি সমনুপস্সামী’’তি.

৩৯৩. তস্মা পুথুজ্জনোতি যস্মা অরিযো সব্বসো পরিঞ্ঞাতৰত্থুকো দুক্খৰেদনং অধিৰাসেতুং অসক্কোন্তো নাম নত্থি, তস্মা পুথুজ্জনো, কেৰলং পন অধিমানেনেৰ – ‘‘নাভিকঙ্খামি জীৰিতং, পরিচিণ্ণো মে সত্থা, নিরোধং দিস্ৰা’’তি ৰদতীতি অধিপ্পাযো. ইদম্পীতি ইদম্পি, ‘‘নিস্সিতস্স চলিত’’ন্তিআদি. তণ্হানিস্সিতভাৰেন হি আযস্মা ছন্নো মারণন্তিকং ৰেদনং অধিৰাসেতুং অসক্কোন্তো ইতো চিতো পরিৰত্তন্তো চলতি ৰিপ্ফন্দতি, তস্মা ‘‘নিস্সিতস্স চলিত’’ন্তিআদি মনসিকাতব্বং, তেন ইদং সব্বং তং ৰিপ্ফন্দিতং ন ভৰিস্সতীতি অধিপ্পাযো. কপ্পসদ্দো কালপরিযাযোপি হোতি, ন কালৰিসেসৰাচকো এৰাতি আহ – ‘‘নিচ্চকপ্পন্তি নিচ্চকাল’’ন্তি. যথা অপ্পহীনতণ্হাদিট্ঠিকো পুগ্গলো তংনিস্সিতো অল্লিনো, এৰং তাহিপি নিস্সিতো অমুত্তভাৰতোতি আহ – ‘‘তণ্হাদিট্ঠীহি নিস্সিতস্সা’’তি. চলিতন্তি যথা যথা অসমারদ্ধায সম্মাপটিপত্তিযা আদীনৰৰসেন চলন্তং পন যস্মা অরিযস্স ৰিনযে ৰিরূপং চলিতং নাম হোতি, তস্মা আহ – ‘‘ৰিপ্ফন্দিতং হোতী’’তি. তাদিসে পন পপঞ্চৰিক্খম্ভনৰসেন চিত্তস্স চলিতে অসতি ভাৰনায ৰীথিপটিপন্নতায কিলেসপটিপ্পস্সদ্ধি এৰ হোতীতি আহ ‘‘চলিতে অসতি পস্সদ্ধী’’তি. তেন ৰুত্তং – ‘‘কিলেসপস্সদ্ধি নাম হোতী’’তি.

ভৰন্তরং দিস্ৰা নমনট্ঠেন নতি. তেনাহ – ‘‘নতিযা অসতীতি ভৰত্থায আলযনিকন্তিপরিযুট্ঠানেসু অসতী’’তি. পটিসন্ধিৰসেন আগতি নামাতি পটিসন্ধিগ্গহণৰসেন ভৰন্তরতো ইধেৰ আগমনং নাম, চুতিৰসেন চৰনৰসেন ইতো ভৰন্তরস্স গমনং নাম ন হোতি আগতিগতিযা অসতি কতূপচিতস্সপি কম্মস্স উপ্পত্তিপরিকপ্পৰসেন পৰত্তিযা অভাৰতো. চৰনৰসেনাতি নিব্বত্তভৰতো চৰনৰসেন চুতি, আযতিং উপপজ্জনৰসেন উপপাতো ন হোতি. যতো গতি আগতি চৰনং উপপাতো ন হোতি, ততো এৰ নেৰিধ, ন হুরং, ন উভযমন্তরেন, কাযস্স গতিযা আগতিযা চ অভাৰতো সব্বসো চুতূপপাতো নত্থি; তেন ন ইধলোকে ঠিতোতি ৰত্তব্বো. ন পরলোকে ঠিতোতি ৰত্তব্বো, ন উভযমন্তরেন ঠিতোতি ৰত্তব্বো. তেনাহ ‘‘নযিধ লোকে’’তিআদি. তত্থ ইধলোকপরলোকৰিনিমুত্তস্স সংসরণপদেসস্স অভাৰতো, ‘‘ন উভযমন্তরেনা’’তি ৰুত্তোতি উভযপরিযাপন্নো ন হোতীতি পটিক্খিপন্তো, ‘‘ন উভযত্থ হোতী’’তি আহ. অযমেৰ অন্তোতি যো ইধলোকে পরলোকে চ অভাৰো অৰিজ্জমানতা অনুপ্পজ্জনং, অযমেৰ সকলস্স দুক্খমূলস্স অন্তো পরিযোসানং.

৩৯৪. কণ্ঠনাল়িং ছিন্দীতি নাল়িং ছিন্দিতুং আরভি. তস্মিং ছিন্দিতুং আরদ্ধক্খণে ছেদো চ ৰত্ততি; মরণভযঞ্চ ওক্কমি অৰীতরাগভাৰতো, ততো এৰ গতিনিমিত্তং উপট্ঠাতি. ‘‘সোপি নাম সব্রহ্মচারীনং অনুপৰজ্জতং ব্যাকরিত্ৰা সরাগমরণং মরিস্সতী’’তি সংৰিগ্গমানসো সঙ্খারে অনিচ্চাদিৰসেন পরিগ্গণ্হন্তো. অরহত্তং পত্ৰাতি পুব্বে বহুসো ৰিপস্সনায উদযব্বযঞাণং পাৰিতত্তা তাৰদেৰ অরহত্তং পত্ৰা অরহত্তফলপচ্চৰেক্খণানন্তরং কণ্ঠনাল়িচ্ছেদপচ্চযা জীৰিতনিরোধেন সমসীসী হুত্ৰা পরিনিব্বাযি. ন হি অন্তিমভৰিকস্স অরহত্তং অপ্পত্ৰা জীৰিতন্তরাযো হোতি. থেরস্সাতি আযস্মতো ছন্নত্থেরস্স. ব্যাকরণেনাতি হেতুম্হি করণৰচনং ‘‘ব্যাকরণেন হেতুনা’’তি. তন্নিমিত্তঞ্হি থেরো ৰীরিযং পগ্গণ্হন্তো ৰিপস্সনং উস্সুক্কাপেতি. ইমিনাতি, ‘‘অত্থি, ভন্তে’’তিআদিৰচনেন. থেরোতি আযস্মা সারিপুত্তত্থেরো. পুচ্ছতীতি, ভন্তে, তথা কুলসংসগ্গপসুতো কথং পরিনিব্বাযিস্সতীতি পুচ্ছতি. ‘‘পুব্বে কুলেসু সংসট্ঠৰিহারী’’তি সব্রহ্মচারীনং পঞ্ঞাতস্সপি ইমস্মিং ‘‘হোন্তি হেতে সারিপুত্তা’’তিআদিনা ভগৰতো ৰুত্ত-ট্ঠানে অসংসট্ঠভাৰো পাকটো অহোসি. পক্কম্পি নিপক্কং ৰিয সম্মাপটিপজ্জমানাপি কেচি অসঞ্ঞতা উপট্ঠহন্তি. সেসং সুৰিঞ্ঞেয্যমেৰ.

ছন্নোৰাদসুত্তৰণ্ণনায লীনত্থপ্পকাসনা সমত্তা.

৩. পুণ্ণোৰাদসুত্তৰণ্ণনা

৩৯৫. অনন্তরসুত্তে ‘‘পটিসল্লানাতি ফলসমাপত্তিতো’’তি ৰুত্তং, তত্থ ধম্মসেনাপতিনো অরিযৰিহারস্স অধিপ্পেতত্তা, ইধ পন অকতকিচ্চস্স পটিসল্লানং নাম কাযৰিৰেকোতি আহ – ‘‘পটিসল্লানাতি একীভাৰা’’তি. ‘‘চক্খুৰিঞ্ঞেয্যা রূপা’’তি পনেত্থ ৰিঞ্ঞেয্যরূপং ৰিজানন্তস্স দ্ৰারভূতং চক্খুন্তি উভযং অজ্ঝত্তিকং বাহিরঞ্চ আযতনং অভিনন্দিতাদিসামঞ্ঞেন তঞ্চেতি এত্থ তং-সদ্দেন একজ্ঝং পচ্চামট্ঠন্তি আহ – ‘‘তঞ্চেতি তং চক্খুঞ্চেৰ রূপঞ্চা’’তি. যং পনেত্থ ৰিঞ্ঞেয্যসদ্দেন জোতিতং ৰিঞ্ঞাণং তং সম্পযুত্তধম্মাতি তদুভযং, ‘‘মনোৰিঞ্ঞেয্যা ধম্মা’’তি পদেন কথিতমেৰাতি ইধ ন গহিতং. এস নযো সেসেসুপি. সমোধানেনাতি সহাৰট্ঠানেন, চিত্তেন নন্দিযা তণ্হায সহ পৰত্তিযা চিত্তসহুপ্পত্তিযাতি অত্থো. তেনাহ – ‘‘উপ্পজ্জতি নন্দী’’তি. পঞ্চক্খন্ধদুক্খস্স সমোধানন্তি পঞ্চক্খন্ধসঙ্খাতস্স দুক্খসচ্চস্স পচ্চৰোকারে সহপ্পৰত্তি হোতি. যস্মা দুক্খং উপ্পজ্জমানং ছন্নং দ্ৰারানংযেৰ ৰসেন উপ্পজ্জতি, তথা সমুদযোতি, তস্মা আহ – ‘‘ইতি ছসু দ্ৰারেসূ’’তিআদি. কিলেসৰট্টস্স কম্মৰট্টস্স ৰিপাকৰট্টস্স চ কথিতত্তা আহ – ‘‘ৰট্টং মত্থকং পাপেত্ৰা দস্সেতী’’তি. দুতিযনযেতি ‘‘সন্তি চ খো’’তিআদিনা ৰুত্তে দুতিযে দেসনানযে. পাটিযেক্কো অনুসন্ধীতি ন যথানুসন্ধি নাপি অজ্ঝাসযানুসন্ধীতি অধিপ্পাযো, পুচ্ছানুসন্ধিস্স পন ইধ সম্ভৰো এৰ নত্থীতি. সত্তসু ঠানেসূতি অক্কোসনে পরিভাসনে পাণিপ্পহারে লেড্ডুপ্পহারে দণ্ডপ্পহারে সত্থপ্পহারে জীৰিতাৰোরোপনেতি ইমেসু সত্তসু. ‘‘ভদ্দকা ৰতিমে’’তিআদিনা খন্তিপটিসংযুত্তং সীহনাদং নদাপেতুং.

৩৯৬. চণ্ডাতি কোধনা, তেন দূসিতচিত্ততায দুট্ঠাতি ৰুত্তা. কিব্বিসাতি পাপা. ফরুসাতি ঈসকম্পি পসাদসিনেহাভাৰেন লুদ্দা. ফরুসৰচনতায ৰা ফরুসা, তথাভূতা পন লুদ্দা নাম হোন্তি, তস্মা ৰুত্তং ‘‘কক্খল়া’’তি. ইদঞ্চ তেতি, ‘‘হত্থচ্ছেদং নাসিকচ্ছেদ’’ন্তি এৰমাদিং ইদঞ্চ অনিট্ঠং করিস্সামাতি ভযদস্সনেন তজ্জেস্সন্তি.

ঘটিকমুগ্গরেনাতি দণ্ডানং কির অগ্গপস্সে ঘটাকারং দস্সেন্তি, তেন সো ‘‘ঘটিকমুগ্গরো’’তি ৰুচ্চতি. একতোধারাদিনা সত্থেন করৰালখগ্গাদিনা. ‘‘ইন্দ্রিযসংৰরাদীনং এতং নাম’’ন্তি ৰত্ৰা যত্থ যত্থ ইন্দ্রিযসংৰরাদযো ‘‘দমো’’তি ৰুত্তা, তং পাঠপদেসং দস্সেন্তো ‘‘সচ্চেনা’’তিআদিমাহ. মনচ্ছট্ঠানি ইন্দ্রিযানি দমেতি সংৰরেতীতি ইন্দ্রিযসংৰরো, দমো. রাগাদিপাপধম্মে দমেতি উপসমেতীতি দমো, পঞ্ঞা. পাণাতিপাতাদিকম্মকিলেসে দমেতি উপসমেতি ৰিক্খম্ভেতীতি দমো উপোসথো. ব্যাপাদৰিহেসাদিকে দমেতি ৰিনেতীতি দমোতি আহ – ‘‘ইমস্মিং পন সুত্তে খন্তি ‘দমো’তি ৰেদিতব্বা’’তি. উপসমোতি তস্সেৰ দমস্স ৰেৰচনং, তস্মা দমো চ সো ব্যাপাদাদীনং ৰিনযনট্ঠেন তেসংযেৰ উপসমনট্ঠেন উপসমো চাতি দমূপসমো, অধিৰাসনখন্তি.

৩৯৭. তত্থ খন্তিযং কতাধিকারো তং জনপদং গন্ত্ৰা মহাজনস্স অৰস্সযো হোতি, তস্মা তদস্স অপদানং সমুদাগমতো পট্ঠায ৰিভাৰেতুং, ‘‘কো পনেস পুণ্ণো’’তিআদি আরদ্ধং. এত্থাতি এতস্মিং সুনাপরন্তজনপদে. অসপ্পাযৰিহারন্তি ভাৰনাভিযোগস্স ন সপ্পাযং ৰিহারং.

দ্ৰে ভাতরোতি অৰিভত্তসাপতেয্যা অৰিভত্তৰোহারসংযোগা. তেনাহ ‘‘তেসূ’’তিআদি. জনপদচারিকং চরন্তো ভণ্ডং গহেত্ৰা জনপদেসু ৰিক্কযং করোন্তো.

‘‘বুদ্ধপূজং ধম্মপূজং সঙ্ঘপূজং করিস্সামা’’তি তন্নিন্না. অট্ঠিমিঞ্জং আহচ্চ অট্ঠাসীতি, ‘‘বুদ্ধো’’তি ৰচনং অস্সুতপুব্বং সোতপথং উপগতং অনপ্পকং পীতিসোমনস্সং সমুট্ঠাপেন্তং পীতিসমুট্ঠানপণীতরূপেহি ছৰিচম্মাদীনি ছিন্দিত্ৰা অট্ঠিমিঞ্জং আহচ্চ অট্ঠাসি. ৰিস্সজ্জিতন্তি ৰিক্কিণনৰসেন ৰিনিযোজিতং. কম্মট্ঠানং ন উপট্ঠাতীতি ভাৰনাৰীথিং ন ওতরতি. ময্হং অসপ্পাযোতি ময্হং কম্মট্ঠানভাৰনায সপ্পাযো উপকারো ন হোতি.

কোচি চঙ্কমিতুং সমত্থো নাম নত্থি মহতা সমুদ্দৰীচিসদ্দেন উপদ্দুতত্তা ভাৰনামনসিকারস্স অনভিসম্ভুণনতো. তেনাহ ‘‘সমুদ্দৰীচিযো’’তিআদি. সোতি মকুল়ৰিহারো.

উত্তমজৰেন গচ্ছমানা যথাধিপ্পেতং মগ্গং অতিক্কমিত্ৰা অঞ্ঞতরং দীপকং পাপুণি.

উপ্পাদিকং উট্ঠাপেত্ৰাতি মহাৰাতমণ্ডলসমুট্ঠাপনেন তস্মিং পদেসে মহাসমুদ্দং সংখোভেন্তো মহন্তং উপ্পাদং উট্ঠপেত্ৰা.

থেরো, ‘‘অম্হে আৰজ্জেয্যাথা’’তি কনিট্ঠস্স ৰচনং সরিত্ৰা অন্তরন্তরা আৰজ্জেতি, তস্মা তদাপি আৰজ্জেতি, তং সন্ধায ৰুত্তং – ‘‘তস্মিংযেৰ খণে আৰজ্জিত্ৰা’’তি. সম্মুখেতি সীসট্ঠানে. পটিৰেদেসুন্তি পৰেদেসুং, উপাসকা মযন্তি পটিজানিংসু. ইমিনাতি ইমিনা ময্হং পরিচ্চত্তকোট্ঠাসেন. মণ্ডলমাল়ন্তি মুণ্ডমণ্ডলমাল়সদিসং পটিস্সযং. পরিচারকাতি অৰসেসগামিনো.

সচ্চবন্ধস্স ওকাসং করোন্তো ‘‘একূনপঞ্চসতান’’ন্তি আহ. তং দিৰসং…পে… অগ্গহেসি, তেন সো থেরো পঠমং সলাকং গণ্হন্তানং এতদগ্গে ঠপিতো.

ৰাণিজগামং গন্ত্ৰাতি ৰাণিজগামসমীপং গন্ত্ৰা. বুদ্ধকোলাহলন্তি বুদ্ধানং উপগম্ম সত্তানং উপ্পজ্জনকুতূহলং.

মহাগন্ধকুটিযংযেৰাতি জেতৰনমহাৰিহারে মহাগন্ধকুটিযংযেৰ. পরিচরিতব্বন্তি উপট্ঠাতব্বং.

গন্ধকট্ঠানীতি চন্দনঅগরুসলল়াদীনি সুগন্ধকট্ঠানি. সেসং সুৰিঞ্ঞেয্যমেৰাতি.

পুণ্ণোৰাদসুত্তৰণ্ণনায লীনত্থপ্পকাসনা সমত্তা.

৪. নন্দকোৰাদসুত্তৰণ্ণনা

৩৯৮. সঙ্ঘস্স ভারং অকাসি উপাযেন নন্দকত্থেরস্স ওৰাদেন ৰিনেতব্বানং ভিক্খুনীনং ৰিনযত্থং. তেনাহ ‘‘ইমং পনা’’তিআদি. পরিযাযতি পৰত্ততীতি পরিযাযো, পটিপাটীতি আহ – ‘‘পরিযাযেনাতি ৰারেনা’’তি. অস্সাতি নন্দকত্থেরস্স. ৰদাপেসি অঞ্ঞেহি অত্তনো অনোকাসভাৰং. পরিযাযেন ওৰদন্তীতি ওৰদিতুং সমত্থা ভিক্খুনিযো ৰারেন ওৰদন্তি. ইদং পরিযাযেন ওৰদনং. চিত্তং একগ্গং হোতি পসীদতি পুব্বচরিযসিদ্ধেন গারৰবহুমানেন গেহস্সিতপেমৰসেন.

গোতমীতি মহাপজাপতিগোতমী. সেট্ঠিস্সাতি বারাণসিসেট্ঠিনো.

তেতি পচ্চেকবুদ্ধে. কিং নু খোতি পুচ্ছি চিরতরকালং পুঞ্ঞকিরিযায পরিভাৰিতসন্তানতায, পচ্চেকবুদ্ধেসু চ গারৰবহুমানতায. দুগ্গতেহিপি সক্কা কাতুন্তি দুগ্গতেহিপি যথাৰিভৰং কতা কুটি তুম্হাকং ৰসিতুং সক্কাতি পুচ্ছি.

হত্থকম্মং দেথাতি হত্থকম্মং কত্ৰা দেথাতি অত্থো. আনিসংসং আচিক্খিত্ৰাতি ‘‘তাদিসানং মহেসীনং কতং ৰেয্যাৰচ্চং অম্হাকম্পি দীঘরত্তং হিতায হোতি. আৰাসদানঞ্চ নাম মহপ্ফলং মহানিসংসং নিব্বত্তট্ঠানে মহাসম্পত্তিআৰহং ভৰিস্সতী’’তিআদিনা আনিসংসং আচিক্খিত্ৰা. গাল়্হেন ওৰাদেন তজ্জেত্ৰাতি, ‘‘ইমেসু নাম করোন্তেসু ত্ৰং কস্মা ন করোসি, মম জেট্ঠকদাসস্স ভরিযভাৰং ন জানাসি. সব্বেহিপি করিযমানস্স হত্থকম্মস্স অকরণে তুয্হং ইদঞ্চিদঞ্চ দুক্খং আগমিস্সতী’’তি ভযেন তজ্জেত্ৰা. সতং সতং হুত্ৰাতি সতং সতং দাসপুত্তা একজ্ঝং হুত্ৰা একঞ্চ একঞ্চ কুটিং কত্ৰা অদাসি. চঙ্কমনাদিপরিৰারন্তি চঙ্কমনরত্তিট্ঠানদিৰাট্ঠানভোজনাদিপরিৰারট্ঠানসহিতং. জগ্গিত্ৰা উপট্ঠাপেত্ৰা. ৰিস্সজ্জাপেসীতি পরিচ্চজাপেসি. পরিৰত্তাপেত্ৰাতি চেতাপেত্ৰা. তিচীৰরানীতি সহস্সগ্ঘনিকানি তিচীৰরানি কত্ৰা অদাসি. কালেন কালন্তি কালে কালে, কিস্মিঞ্চি কালেতি অত্থো. রজ্জে ঠিতস্সাতি সব্বভূতূপকাররজ্জে ঠিতস্স.

নন্দকত্থেরোপীতি তদা জেট্ঠকদাসো এতরহি নন্দকত্থেরো পব্বজিত্ৰা অরহত্তং পত্তো. জেট্ঠকদাসিধীতা …পে… অগ্গমহেসিট্ঠানে ঠিতাতি মহাপজাপতিগোতমিং সন্ধায ৰদতি. অযমাযস্মা নন্দকোতি অযমেৰ সমুদাগমতো আযস্মা নন্দকত্থেরো. এতাৰ তা ভিক্খুনিযোতি এতাৰতা সমুদাগমতো পঞ্চসতা ভিক্খুনিযো.

৩৯৯. হেতুনাতি ঞাযেন অৰিপরীতপটিপত্তিযা. পুব্বভাগা হি পুরিমা পুরিমা পটিপদা পচ্ছিমায কারণং. যাথাৰসরসতো দিট্ঠন্তি যথাভূতসভাৰতো পচ্চক্খং ৰিয.

৪০১. তং সভাৰং তংসভাৰন্তি তস্সা ৰেদনায পচ্চযভাৰেন অনুরূপং.

৪০৩. পঠমতরংযেৰ অনিচ্চাতি তস্সাপি ছাযায অনিচ্চভাৰো পঠমতরংযেৰ সিদ্ধো. ন হি কদাচি অনিচ্চং নিস্সায পৰত্তং কিঞ্চি নিচ্চং নাম অত্থীতি.

৪০৪. অনুপহনিত্ৰাতি অৰিনাসেত্ৰা. কথং পন মংসকাযং চম্মকাযঞ্চ অৰিনাসেত্ৰা ইতরেসং কন্তনং হোতীতি ব্যতিরেকমুখেন দস্সেতুং, ‘‘তত্থা’’তিআদি ৰুত্তং. চম্মং অল্লিযাপেন্তোতি চম্মে লগ্গাপেন্তো চম্মপটিবদ্ধং করোন্তো. চম্মং বদ্ধং কত্ৰাতি ৰিৰরকালে ন ফালেন্তো চম্মবদ্ধে কত্ৰা. এৰং অকত্ৰাতি এৰং মংসচম্মকাযানং ৰিনাসনং অকত্ৰা, ৰিলিমংসাদিৰিকন্তনেন অঞ্ঞমঞ্ঞং ৰিৰেচেত্ৰা. তত্থ ৰিলিমংসন্তি চম্মনিস্সিতমংসং, পটিচ্ছন্নকিলোমকন্তি চ ৰদন্তি. ন্হারূতি সুখুমন্হারু. বন্ধনন্তি চম্মমংসানং সম্বন্ধং. তেনাহ – ‘‘সব্বচম্মে লগ্গৰিলিপনমংসমেৰা’’তি. অন্তরকিলেসমেৰাতি অন্তরে চিত্তে জাতত্তা সত্তসন্তানন্তোগধতায অব্ভন্তরভূতকিলেসমেৰ.

৪০৫. তজ্জং ৰাযামন্তি নিদস্সনমত্তং দট্ঠব্বং. তথা হি পুরিসেন কুঠারিনা ছেজ্জং ছিন্দিতে ছেজ্জট্ঠানস্স সল্লক্খণং ইচ্ছিতব্বং, তস্স পটিঘাতভাৰো ইচ্ছিতব্বো, কাযপরিল়াহাভাৰো ইচ্ছিতব্বো, তস্স অৰট্ঠানং ইচ্ছিতব্বং, কিচ্চন্তরে অজ্ঝুপেক্খণং ইচ্ছিতব্বং, এৰং পঞ্ঞায কিলেসে ছিন্দন্তস্স যোগিনো ৰীরিযবলেন সদ্ধিং সতি-পীতি-পস্সদ্ধি-সমাধি-উপেক্খাসম্বোজ্ঝঙ্গং ইচ্ছিতব্বন্তি আহ – ‘‘এৰং ন ৰিনা ছহি…পে… সক্কোতী’’তি.

৪০৭. তেন কারণেনাতি যেন তাসং ভিক্খুনীনং সা ধম্মদেসনা সপ্পাযা, আসেৰনমন্দতায পন অজ্ঝাসযেন পরিপুণ্ণসঙ্কপ্পা ন জাতাযেৰ; পুন তথা দেসনায সতি আসেৰনবলৰতায পরিপুণ্ণসঙ্কপ্পা ভৰিস্সন্তি; তেন কারণেন ত্ৰম্পি তা ভিক্খুনিযো তেনেৰ ওৰাদেন ওৰদেয্যাসীতি.

৪১৫. সব্বপচ্ছিমিকাতি সব্বাসং কনিট্ঠা সোতাপন্না, অনরিযা তত্থ কাচি নত্থীতি অত্থো. তেনাহ – ‘‘সেসা পন…পে… খীণাসৰা চা’’তি. যদি এৰন্তি অখীণাসৰাপি তাদিসা ভিক্খুনী অত্থি. এৰং সতি সুক্খৰিপস্সকভাৰেনপি সতি খীণাসৰভাৰে অরিযস্স ৰিনযে অপরিপুণ্ণসঙ্কপ্পাৰাতি অধিপ্পাযেন চোদেতি, ‘‘কথং পরিপুণ্ণসঙ্কপ্পা’’তি? ইতরো অজ্ঝাসযপারিপূরিযাতি কারণং ৰত্ৰা, ‘‘যস্স হী’’তিআদিনা তমত্থং ৰিৰরতি. অজ্ঝাসযপারিপূরিযাতি তত্থ অধিপ্পাযপারিপূরিযা, ন সব্বসো গুণপারিপূরিযাতি অধিপ্পাযো. তেনাহ ‘‘কদা নু খো’’তিআদি. এতেন পাদকজ্ঝানসম্মসিতজ্ঝানানং ৰিসদিসতায পুগ্গলস্স ৰিপস্সনাকালে পৰত্তঅজ্ঝাসযৰসেন অরিযমগ্গে বোজ্ঝঙ্গমগ্গঙ্গঝানঙ্গানং ৰিসেসতাতি অযমত্থো দীপিতোতি ৰেদিতব্বো. সেসং সুৰিঞ্ঞেয্যমেৰ.

নন্দকোৰাদসুত্তৰণ্ণনায লীনত্থপ্পকাসনা সমত্তা.

৫. রাহুলোৰাদসুত্তৰণ্ণনা

৪১৬. ৰিমুত্তিং পরিপাচেন্তীতি কিলেসানং পটিপ্পস্সদ্ধিৰিমুত্তিভূতং অরহত্তং সব্বসো পাচেন্তি সাধেন্তি নিব্বাপেন্তীতি ৰিমুত্তিপরিপাচনীযা. ধম্মাতি কারণধম্মা. তেনাহ – ‘‘ৰিসুদ্ধিকারণৰসেনা’’তি, অরহত্তসঙ্খাতায ৰিসুদ্ধিযা সম্পাদনৰসেনাতি অত্থো. সদ্ধিন্দ্রিযাদযো ৰিসুজ্ঝমানা মগ্গপটিপাটিযাৰ সব্বসো অস্সদ্ধিযাদীহি চিত্তং ৰিমোচেন্তা অগ্গফলৰিমুত্তিং সম্পাদেন্তি. তেসং পন ৰিসুদ্ধি বালপরিৰজ্জনেন পণ্ডিতপযিরুপাসনেন পসাদাৰহধম্মপচ্চৰেক্খণায চ হোতি. ততো ইধ পন্নরস ধম্মা অধিপ্পেতাতি দস্সেন্তো, ‘‘ৰুত্তঞ্হেত’’ন্তিআদিমাহ.

তত্থ অস্সদ্ধে পুগ্গলেতি সদ্ধারহিতে পুগ্গলে. তে হি নিস্সায ন কদাচি সদ্ধা সম্ভৰতি, তেসং পন দিট্ঠানুগতিআপজ্জনেন অঞ্ঞদত্থু অসদ্ধিযমেৰ ৰড্ঢতি, তস্মা তে পটিভযমগ্গো ৰিয দূরতো ৰজ্জেতব্বা. অস্সদ্ধিযন্তি চ সদ্ধায পটিপক্খভূতা অসদ্ধেয্যৰত্থুস্মিং অধিমুচ্চনাকারেন পৰত্তা সংকিলেসধম্মা ৰেদিতব্বা. সদ্ধে পুগ্গলেতি সদ্ধাসম্পন্নে পুগ্গলে. তে হি নিস্সায সদ্ধেয্যৰত্থুস্মিং অনুপ্পন্না উপ্পজ্জতি, উপ্পন্না ভিয্যোভাৰং ৰেপুল্লং আপজ্জতি. সদ্ধেয্যৰত্থূতি চ বুদ্ধাদীনি রতনানি কম্মকম্মফলানি চ. সেৰতোতি লব্ভমানং সদ্ধাসম্পদং উপ্পাদেতুং ৰড্ঢেতুঞ্চ নিসেৰতো. সেসপদানি তস্সেৰ ৰেৰচনানি. অথ ৰা সেৰতো উপসঙ্কমতো. ভজতো তেসং পটিপত্তিযং ভত্তিং কুব্বতো. পযিরুপাসতোতি তেসং ওৰাদানুসাসনিকরণৰসেন উপট্ঠহতো. পসাদনীযসুত্তন্তা নাম বুদ্ধাদিগুণপটিসংযুত্তা পসাদাৰহা সম্পসাদনীযসুত্তাদযো. তে হি পচ্চৰেক্খতো বুদ্ধাদীসু অনুপ্পন্না পসন্না উপজ্জতি, উপ্পন্না ভিয্যোভাৰং ৰেপুল্লং আপজ্জতি. ইমেহি তীহাকারেহীতি ইমেহি যথাৰুত্তেহি তীহি কারণেহি. পটিপক্খদূরীভাৰতো পচ্চেকং সূপহারতো চ আসেৰনং ভাৰনং লভন্তি. সদ্ধিন্দ্রিযং ৰিসুজ্ঝতি মগ্গফলাৰহভাৰেন অচ্ছতি ৰিসুদ্ধিং পাপুণাতি. ইমিনা নযেন সেসপদেসুপি অত্থো ৰেদিতব্বো.

অযং পন ৰিসেসো – কুসীতেতি অলসে সম্মাপটিপত্তিযং নিক্খিত্তধুরে. আরদ্ধৰীরিযেতি পগ্গহিতৰীরিযে সম্মাপটিপন্নে. সম্মপ্পধানেতি অনুপ্পন্নানং অকুসলানং অনুপ্পাদনাদিৰসেন পৰত্তে চত্তারো উপাযপ্পধানে. পচ্চৰেক্খতো পটিপত্তিং অৰেক্খতো. তে হি পচ্চৰেক্খতো লীনং অভিভৰিত্ৰা সম্মদেৰ আরম্ভধাতুআদি অনুপ্পন্নানং ৰিধিনা সতিসম্পদায উপ্পাদায ভিয্যোভাৰায সংৰত্ততি. অসমাহিতে ভন্তমিগভন্তগোণসপ্পটিভাগে ৰিব্ভন্তচিত্তে. সমাহিতে উপচারসমাধিনা অপ্পনাসমাধিনা চ সম্মদেৰ সমাহিতচিত্তে. ঝানৰিমোক্খেতি সৰিতক্কসৰিচারাদিঝানানি পঠমাদিৰিমোক্খে চ. তেসঞ্হি পচ্চৰেক্খণা উপরূপরি অচ্চন্তমেৰ সমাধানায সংৰত্ততি. দুপ্পঞ্ঞেতি নিপ্পঞ্ঞে, অরিযধম্মস্স উগ্গহপরিপুচ্ছাসৰনসম্মসনাভাৰেন সব্বসো পঞ্ঞারহিতে চ. পঞ্ঞৰন্তেতি ৰিপস্সনাপঞ্ঞায চেৰ মগ্গপঞ্ঞায চ সমন্নাগতে. গম্ভীরঞাণচরিযন্তি গম্ভীরং খন্ধাযতনধাতুসচ্চপটিচ্চসমুপ্পাদাদিভেদং ঞাণস্স চরিতব্বট্ঠানং, যত্থ ৰা গম্ভীরঞাণস্স চরিযং পৰত্ততি. তত্থ হি পচ্চৰেক্খণা সম্মোহং ৰিধমতি, অনুপ্পন্নায পঞ্ঞায উপ্পাদায ভিয্যোভাৰায সংৰত্ততি. সুত্তন্তক্খন্ধেতি সুত্তসমূহে.

পুব্বে সদ্ধিন্দ্রিযাদীনং ৰিসুদ্ধিকারণানি, ‘‘ৰিমুত্তিপরিপাচনীযা ধম্মা’’তি ৰুত্তানীতি ইধ সদ্ধাদিকে অঞ্ঞে চ ধম্মে দস্সেন্তো, ‘‘অপরেপী’’তিআদিমাহ. তত্থ সদ্ধাদীনং ৰিমুত্তিপরিপাচনীযতা দস্সিতা এৰ, অনিচ্চসঞ্ঞাদীনং পন ৰিমুত্তিপরিপাচনীযতায ৰত্তব্বমেৰ নত্থি ৰিপস্সনাভাৰতো. তেনাহ – ‘‘ইমে পঞ্চ নিব্বেধভাগিযা সঞ্ঞা’’তি. কল্যাণমিত্ততাদযোতি কল্যাণমিত্ততা সীলসংৰরো অভিসল্লেখকথা ৰীরিযারম্ভো নিব্বেধিকা পঞ্ঞা ইমে কল্যাণমিত্ততাদযো পঞ্চ ধম্মা. অযমেত্থ সঙ্খেপো, ৰিত্থারো পন ‘‘মেঘিযসুত্তসংৰণ্ণনাযং’’ (উদা. অট্ঠ. ৩১) ৰুত্তনযেন ৰেদিতব্বো. লোকং ৰোলোকেন্তস্সাতি বুদ্ধৰেনেয্যসত্তলোকং বুদ্ধচক্খুনা ৰিসেসতো ওলোকেন্তস্স.

৪১৯. আযস্মতো রাহুলস্স ইন্দ্রিযানং পরিপক্কত্তা সদ্ধিং পট্ঠপিতপত্থনা দেৰতা উদিক্খমানা তিট্ঠন্তি, – ‘‘কদা নু খো উত্তরি আসৰানং খযে ৰিনেস্সতী’’তি. যদা পন সত্থা এৰং পরিৰিতক্কেসি, তাৰদেৰ সমানজ্ঝাসযতায সব্বকালং তঙ্খণং আগমেন্তিযো তা দেৰতাযো তং সমৰাযং দিস্ৰা একস্মিং অন্ধৰনস্মিংযেৰ সন্নিপতিতা. উপালিস্স গহপতিনো দীঘনখপরিব্বাজকস্স চতুসচ্চধম্মেসু দস্সনকিচ্চেন পৰত্তো সোতাপত্তিমগ্গোতি তেসু সুত্তেসু (পটি. ম. অট্ঠ. ২.২.৩০) পঠমমগ্গো ‘‘ধম্মচক্খু’’ন্তি ৰুত্তো, তস্স দস্সনত্থস্স সাতিসযত্তা, ব্রহ্মাযুনো পন ফলঞাণানি হেট্ঠিমানি তীণি সাতিসযানীতি ব্রহ্মাযুসুত্তে(ম. নি. ২.৩৮৩ আদযো) তীণি ফলানি ‘‘ধম্মচক্খু’’ন্তি ৰুত্তানি. ইদং পনেত্থ আযস্মতো রাহুলস্স মগ্গঞাণং ফলঞাণঞ্চ দস্সনত্থো সাতিসযো, তাহি চ দেৰতাহি যং ঞাণং অধিগতং, তং সাতিসযমেৰাতি ৰুত্তং – ‘‘ইমস্মিং সুত্তে চত্তারো মগ্গা, চত্তারি চ ফলানি ধম্মচক্খুন্তি ৰেদিতব্বানী’’তি. কিং পন সাৰকানং সচ্চাভিসমযঞাণে অত্থি কোচি ৰিসেসোতি? আম অত্থি. সো চ খো পুব্বভাগে ৰুট্ঠানগামিনিৰিপস্সনায পৰত্তিযাকারৰিসেসেন লভেয্য কাচি ৰিসেসমত্তা. স্ৰাযমত্থো অভিধম্মে ‘‘নো চ খো যথা দিট্ঠিপ্পত্তস্সা’’তি সদ্ধাৰিমুত্ততো দিট্ঠিপ্পত্তস্স কিলেসপ্পহানং পতি ৰিসেসকিত্তনেন দীপেতব্বো. কিং পন আযস্মা রাহুলো ৰিয তা দেৰতা সব্বা একচিত্তা পগেৰ চত্তারি ফলানি অধিগণ্হিংসূতি? নোতি দস্সেন্তো ‘‘তত্থ হী’’তিআদিমাহ. কিত্তকা পন তা দেৰতাতি আহ ‘‘তাসঞ্চ পনা’’তিআদি.

রাহুলোৰাদসুত্তৰণ্ণনায লীনত্থপ্পকাসনা সমত্তা.

৬. ছছক্কসুত্তৰণ্ণনা

৪২০. আদিম্হি কল্যাণন্তি আদিকোট্ঠাসে কল্যাণং এতস্সাতি ৰা আদিকল্যাণো, তং আদিকল্যাণং, আদিকল্যাণভাৰো চ দোসৰিগমেন ইচ্ছিতব্বো. যঞ্হি সব্বসো ৰিগতদোসং, তং পরিপুণ্ণগুণমেৰ হোতীতি ‘‘নিদ্দোস’’ন্তি ৰুত্তং. কত্ৰাতি চ পদং, ‘‘কল্যাণং কত্ৰা ভদ্দকং কত্ৰা’’তি পুরিমপদদ্ৰযেনপি যোজেতব্বং. দেসনাকারো হি ইধ কল্যাণসদ্দেন গহিতো. তেনেৰাহ – ‘‘দেসেতব্বধম্মস্স কল্যাণতা দস্সিতা হোতী’’তি, দুতিযে পন অত্থৰিকপ্পে দেসেতব্বধম্মস্স কল্যাণতা মুখ্যেনেৰ কথিতা ইতরস্স অত্থাপত্তিতো. মজ্ঝেকল্যাণং পরিযোসানকল্যাণন্তি এত্থাপি এসেৰ নযো. অযঞ্চ দেসনায থোমনা বুদ্ধানং আচিণ্ণসমাচিণ্ণাৰাতি দস্সেতুং, ‘‘ইতি ভগৰা অরিযৰংস’’ন্তিআদি ৰুত্তং. ধম্মগ্গহণম্পি দেসনায থোমনা এৰাতি ‘‘নৰহি পদেহী’’তি ৰুত্তং.

ৰেদনা যাথাৰতো জাননং, তঞ্চ মগ্গকিচ্চং, তস্স উপাযো ৰিপস্সনাতিআহ – ‘‘সহৰিপস্সনেন মগ্গেন জানিতব্বানী’’তি. পরিঞ্ঞাভিসমযাদিকিচ্চেন নিব্বত্তিযা অসম্মোহতো চ পটিৰিজ্ঝিতব্বো. তেভূমকচিত্তমেৰ কথিতং সম্মসনট্ঠানস্স অধিপ্পেতত্তা. এস নযো ধম্মাযতনাদীসুপি. ধম্মাযতনস্স ৰা আযতনভাৰতো বহিদ্ধাগহণং, ন সব্বসো অনজ্ঝত্তভাৰতো. ৰিপাকৰেদনাপচ্চযা জৰনক্খণে উপ্পন্নতণ্হাতি ছত্তিংসৰিপাকৰেদনং নিস্সায এৰং অস্সাদেন্তী অনুভৰেয্যন্তি অকুসলজৰনক্খণতো উপ্পন্নতণ্হা.

৪২২. পাটিযেক্কো অনুসন্ধীতি যথানুসন্ধিআদীনং অসম্ভৰতোতি অধিপ্পাযেন ৰুত্তং. হেট্ঠাতি ৰিঞ্ঞাণফস্সৰেদনাতণ্হানং পচ্চযাযত্তৰুত্তিতাদস্সনেন চক্খাযতনাদীনং রূপাযতনাদীনঞ্চ পচ্চযাযত্তৰুত্তিতা দীপিতা অপচ্চযুপ্পন্নস্স পচ্চযাভাৰতো, যঞ্চ পচ্চযাযত্তৰুত্তিকং, তং অনিচ্চং উপ্পাদসম্ভৰতো, যদনিচ্চং তং দুক্খং, যং দুক্খং তদনত্তাতি খন্ধপঞ্চকে চ ছন্নং ছক্কানং ৰসেন ঘনৰিনিব্ভোগকরণেন অত্থতো অনত্তলক্খণং ৰিভাৰিতং. ন সরূপতোতি সরূপতোপি তং ৰিভাৰেতুকামো তেনেৰ ছছক্কানং ৰসেন ঘনৰিনিব্ভোগনযেন ব্যতিরেকতো চ অন্ৰযতো চ দস্সেন্তো ভগৰা – ‘‘চক্খু অত্তাতি যো ৰদেয্যা’’তিআদিমাহাতি যথানুসন্ধিকাৰ দেসনা ৰিভাৰিতা. তেনাহ ‘‘হেট্ঠা কথিতানং হী’’তিআদি. হেট্ঠা পন ছন্নং ছক্কানং ৰসেন ৰিনিব্ভোগদস্সনমত্তং, ন অনত্তলক্খণং ৰিভাৰিতং, ইধ পন সরূপতো অনত্তলক্খণং ৰিভাৰিতন্তি অধিপ্পাযেন অনুসন্ধন্তরভাৰজোতনা. যদিপি অনত্তভাৰো নাম চতূসুপি সচ্চেসু লব্ভতেৰ, সব্বেপি হি ধম্মা অনত্তা, ইমে পনেত্থ দ্ৰেপি নযা সম্মসনৰসেন পৰত্তাতি ৰুত্তং – ‘‘দ্ৰিন্নং সচ্চানং অনত্তভাৰদস্সনত্থ’’ন্তি. ন উপপজ্জতীতি উপপত্তিসঙ্খাতযুত্তিযা ন সমেতীতি অযমেত্থ অত্থোতি আহ ‘‘ন যুজ্জতী’’তি. অত্তৰাদিনা – ‘‘নিচ্চো ধুৰো সস্সতো’’তি অভিমতো, চক্খুঞ্চ উপ্পাদৰন্ততায অনিচ্চং, যং পচ্চযাযত্থৰুত্তিতা, তস্মা ‘‘চক্খু অত্তাতি যো ৰদেয্য, তং ন উপপজ্জতী’’তিআদি. সক্কাযৰত্থু চক্খু অনত্তা অনিচ্চভাৰতো সেয্যথাপি ঘটো, চক্খুং অনিচ্চং পচ্চযাযত্তৰুত্তিভাৰতো সেয্যথাপি ঘটো, চক্খু পচ্চযাযত্তৰুত্তি উপ্পাদাদিসম্ভৰতো সেয্যথাপি ঘটো. ৰিগচ্ছতীতি ভঙ্গুপ্পত্তিযা সভাৰাৰিগমেন ৰিগচ্ছতি. তেনাহ ‘‘নিরুজ্ঝতী’’তি.

৪২৪. যস্মা কিলেসৰট্টমূলকং কম্মৰট্টং, কম্মৰট্টমূলকঞ্চ ৰিপাকৰট্টং. কিলেসুপ্পত্তি চ তণ্হাদিগ্গাহপুব্বিকা, তস্মা ‘‘তিণ্ণং ৰা গাহানং ৰসেন ৰট্টং দস্সেতু’’ন্তি আহ. যস্মা পন তণ্হাপক্খিকা ধম্মা সমুদযসচ্চং, চক্খাদযো দুক্খসচ্চং, তস্মা ৰুত্তং – ‘‘দ্ৰিন্নং সচ্চানং ৰসেন ৰট্টং দস্সেতু’’ন্তি. তণ্হামানদিট্ঠিগ্গাহাৰ ৰেদিতব্বা সক্কাযগামিনিপটিপদায অধিপ্পেতত্তা. ‘‘এতং মমা’’তিআদিনা গহণমেৰেত্থ অনুপস্সনাতি আহ – ‘‘গাহত্তযৰসেন পস্সতী’’তি.

তিণ্ণং গাহানং পটিপক্খৰসেনাতি তণ্হাদিগ্গাহপটিপক্খভূতানং দুক্খানিচ্চানত্তানুপস্সনানং ৰসেন, তাহি ৰা তিণ্ণং গাহানং পটিপক্খৰসেন ৰিনিৰেঠনৰসেন অনুপ্পাদনৰসেনাতি অত্থো. পটিপক্খৰসেন ৰিৰট্টং দস্সেতুন্তি যোজনা. সক্কাযনিরোধগামিনী পটিপদাতি এত্থ নিরোধধম্মো সরূপেনেৰ দস্সিতোতি আহ – ‘‘নিরোধো…পে… দস্সেতু’’ন্তি. পটিসেধৰচনানীতি পটিক্খেপৰচনানি.

৪২৫. তণ্হাদীনং অনুপাদিযনৰচনানি তণ্হাদিট্ঠিৰসেনেৰ ৰুত্তানি তণ্হাদিট্ঠীনংযেৰ অভিনন্দনাদিৰসেন পৰত্তিসব্ভাৰতো. অপ্পহীনত্থো অনুসযত্থোতি আহ – ‘‘অনুসেতীতি অপ্পহীনো হোতী’’তি অরিযমগ্গেন হি অপ্পহীনো থামগতো রাগাদিকিলেসো অনুসযো কারণলাভে সতি উপ্পজ্জনারহভাৰতো. যং পনেত্থ ৰত্তব্বং, তং হেট্ঠা ৰুত্তমেৰ. ৰট্টদুক্খকিলেসদুক্খস্সাতি ৰট্টদুক্খস্স চেৰ কিলেসদুক্খস্স চ. সউপাদিসেসনিব্বানঞ্হি কিলেসদুক্খস্স অন্তকরণং, অনুপাদিসেসনিব্বানং ৰট্টদুক্খস্স.

৪২৬. তেসন্তি অনুসযানং. পটিক্খেপৰসেনাতি পজহনৰসেন, অপ্পৰত্তিকরণৰসেনাতি অত্থো. অৰিজ্জং পজহিত্ৰাতি অনৰসেসতো অৰিজ্জং অপ্পৰত্তিধম্মতং আপাদেত্ৰা. কামং হেট্ঠিমমগ্গঞাণম্পি অৰিজ্জাপহাযিনী ৰিজ্জা এৰ, তং পন ঞাণং অৰিজ্জায অনৰসেসপ্পহাযকং ন হোতি, অগ্গমগ্গঞাণে পন উপ্পন্নে অৰিজ্জায লেসোপি নাৰসিস্সতীতি তদেৰ অৰিজ্জায পহাযকন্তি আহ – ‘‘অরহত্তমগ্গৰিজ্জং উপ্পাদেত্ৰা’’তি.

৪২৭. সযমেৰ তথাগতে অত্তনো বুদ্ধানুভাৰেন দেসেন্তে সট্ঠি ভিক্খূ অরহত্তং পত্তাতি অনচ্ছরিযমেতং, অথ কিং অচ্ছরিযন্তি আহ ‘‘ইম’’ন্তিআদি. কথেন্তেপীতি এত্থ ইতিসদ্দো পকারত্থো, ইমিনাৰ পকারেনাতি অত্থো. পত্তা এৰাতি সট্ঠি ভিক্খূ অরহত্তং পত্তা এৰাতি যোজনা. এতম্পি অনচ্ছরিযং, সত্থু সম্মুখা সাৰকা সমুদাগমা মহাভিঞ্ঞা পভিন্নপটিসম্ভিদা তথা তথা সপ্পাটিহারিযং ধম্মং দেসেন্তীতি. তেনাহ – ‘‘মহাভিঞ্ঞপ্পত্তা হি তে সাৰকা’’তি.

মহামণ্ডপেতি লোহপাসাদস্স পুরতো এৰ মহাভিক্খুসন্নিপাতো জাতোতি তেসং পহোনকৰসেন কতে মহতি সাণিমণ্ডপেতি ৰদন্তি. তেসুপি ঠানেসূতি তেসু যথাৰুত্তমহামণ্ডপাদীসু ঠানেসু. মহাথেরো অত্থীতি পদং আনেত্ৰা সম্বন্ধিতব্বং. দেৰত্থেরস্স গুণে সুত্ৰা পসন্নমানসো মহাথেরো, তথাপি ৰত্থসম্পত্তিযা পসীদিত্ৰা ‘‘ত্ৰং পন ন্হাপেহী’’তি আহ.

হেট্ঠাপাসাদেতি চ কল্যাণিযমহাৰিহারে উপোসথাগারে হেট্ঠাপাসাদে একদা উপরিপাসাদে একদা, কথেসীতি. চূল়নাগস্স তথা মহতী পরিসা দেৰতানুভাৰেন অভিঞ্ঞাপাদনং অহোসীতি কেচি. থেরো পন মহিদ্ধিকো অহোসি, তস্মা তাৰ মহতিং পরিসং অভিঞ্ঞাপেসীতি অপরে.

ততো ততোতি তস্সং তস্সং দিসাযং. একোৰাতি একচ্চো এৰ, ন বহুসো, কতিপযাৰ পুথুজ্জনা অহেসুন্তি অত্থো. সেসং হেট্ঠা ৰুত্তনযত্তা সুৰিঞ্ঞেয্যমেৰ.

ছছক্কসুত্তৰণ্ণনায লীনত্থপ্পকাসনা সমত্তা.

৭. মহাসল়াযতনিকসুত্তৰণ্ণনা

৪২৮. মহন্তানি সল়াযতনানি অধিকিচ্চ পৰত্তত্তা মহাসল়াযতনিকং, মহন্ততা চ তেসং মহন্তং লোকসন্নিৰাসং অভিব্যাপেত্ৰা ঠিতত্তা অযোনিসো গয্হমানানং মহতো অনত্থায সংৰত্তনতো, যোনিসো গয্হমানানং মহতো অত্থায হিতায সুখায সংৰত্তনতো চ দট্ঠব্বা. জোতকন্তি বোধকং.

৪২৯. সিখাপ্পত্তায ৰিপস্সনায জাননম্পি যথাভূতজাননমেৰ মগ্গেন জাননস্স আসন্নকারণভাৰতোতি আহ – ‘‘সহৰিপস্সনেন মগ্গেন অজানন্তো’’তি. ৰুড্ঢিং গচ্ছন্তীতি পচ্চযসমোধানেন ভৰযোনিগতিঠিতিসত্তাৰাসপাল়িযা অপরাপরং পরিৰুদ্ধিং গচ্ছন্তি. এৰংভূতা পগুণভাৰমাপাদিতা সমথৰিপস্সনাধম্মা ৰিয সুট্ঠুতরং ৰসীভাৰং পাপিতা ঝানাভিঞ্ঞা ৰিয চ ৰসীভূতা হুত্ৰা উপরূপরি ব্রূহেন্তীতি আহ – ‘‘ৰসীভাৰং গচ্ছন্তী’’তি. তথা হি তে কদাচি ভৰপত্থনায অনুপ্পাদিতাযপি অপ্পহীনভাৰেনেৰস্সা তিট্ঠন্তি. অকুসলা ধম্মাৰ যেভুয্যেন দস্সনাযতনেন ৰিনাসদস্সনতো পৰত্তন্তি পরিৰড্ঢন্তি চ. পঞ্চদ্ৰারিকদরথাতি পঞ্চদ্ৰারিকজৰনসহগতা অকুসলদরথা. এৰং মনোদ্ৰারিকদরথা ৰেদিতব্বা. সন্তাপাতি দরথেহি বলৰন্তো সম্পযুত্তধম্মানং নিস্সযস্স চ সন্তাপনকরা. পরিল়াহাতি ততোপি বলৰতরা তেসংযেৰ পরিদহনকরা.

৪৩০. পঞ্চদ্ৰারিকসুখং, ন কাযপ্পসাদসন্নিস্সিতসুখমেৰ. মনোদ্ৰারিকসুখন্তি মনোদ্ৰারিকচিত্তসন্নিস্সিতসুখং, ন যং কিঞ্চি চেতসিকসুখং তস্স কাযিকসুখগ্গহণেনেৰ গহিতত্তা. পঞ্চদ্ৰারিকজৰনেন সমাপজ্জনং ৰা ৰুট্ঠানং ৰা নত্থীতি ইদং মনোদ্ৰারিকজৰনেন তস্স সম্ভৰং দস্সেতুং, মগ্গস্স ৰসেন ৰুত্তং, ন পন তপ্পসঙ্গসঙ্কানিৰত্তনত্থং. ৰিঞ্ঞত্তিমত্তম্পি জনেতুং অসমত্থং সমাপজ্জনস্স কথং পচ্চযো হোতি, বুদ্ধানং পন ভগৰন্তানং হোতীতি চে? তথাপি তস্স আসন্নট্ঠানে পঞ্চদ্ৰারিকচিত্তপ্পৰত্তিযা অসম্ভৰো এৰ তাদিসস্স পুব্বাভোগস্স তস্মিং কালে অসম্ভৰতো. এতেনেৰ যা কেসঞ্চি অরিযধম্মে অকোৰিদানং ঘটসভাৰাদীসু বুদ্ধিতুল্যকারিতাপত্তিচোদনা; সা পটিক্খিত্তাতি দট্ঠব্বা তংতংপুরিমাভোগৰসেন তেন তেন পঞ্চদ্ৰারিকাভিনিযতমনোৰিঞ্ঞাণস্স পরতো পৰত্তমানমনোৰিঞ্ঞাণেন তস্মিং তস্মিং অত্থে ৰণ্ণসণ্ঠানাদিৰিসেসস্স ৰিনিচ্ছিনিতব্বতো. উপ্পন্নমত্তকমেৰ হোতীতি পঞ্চদ্ৰারিকজৰনং তাদিসং কিঞ্চি অত্থনিচ্ছযকিচ্চং কাতুং ন সক্কোতি, কেৰলং উপ্পন্নমত্তমেৰ হোতি. অযন্তি ‘‘আদীনৰানুপস্সিনো’’তিআদিনা ৰুত্তা.

৪৩১. কুসলচিত্ত…পে… ভূতস্সাতি ৰুট্ঠানগামিনিৰিপস্সনাসহগতকুসলচিত্তস্স সম্পযুত্তচেতোসুখসমঙ্গীভূতস্স. পুব্বসুদ্ধিকাতি মগ্গুপ্পত্তিতো, ৰিপস্সনারম্ভতোপি ৰা পুব্বেৰ সুদ্ধা. তেনাহ – ‘‘আদিতো পট্ঠায পরিসুদ্ধাৰ হোন্তী’’তি. সব্বত্থককারাপকঙ্গানীতি সীলৰিসোধনস্স চিত্তসমাধানস্স ৰিপস্সনাভিযোগস্স মগ্গেন পহাতব্বকিলেসপহানস্সাতি সব্বস্সপি মগ্গসম্ভারকিচ্চস্স কারাপকঙ্গানি. অট্ঠঙ্গিকো ৰাতি পঠমজ্ঝানিকো ৰা অট্ঠঙ্গিকো, দুতিযজ্ঝানিকো ৰা সত্তঙ্গিকো হোতি.

ইমমেৰ সুত্তপদেসং গহেত্ৰাতি, ‘‘যা তথাভূতস্স দিট্ঠী’’তিআদিনা সম্মাদিট্ঠিআদীনং পঞ্চন্নংযেৰ তস্মিং ঠানে গহিতত্তা লোকুত্তরমগ্গো পঞ্চঙ্গিকোতি ৰদতি. সোতি তথা ৰদন্তো ৰিতণ্ডৰাদী. অনন্তরৰচনেনেৰাতি, ‘‘যা তথাভূতস্স দিট্ঠী’’তিআদিৰচনস্স, ‘‘এৰমস্সায’’ন্তিআদিনা অনন্তরৰচনেন. পটিসেধিতব্বোতি পটিক্খিপিতব্বো. ‘‘অরিযো অট্ঠঙ্গিকো মগ্গো’’তি হি ইদং ৰচনং অরিযমগ্গস্স পঞ্চঙ্গিকভাৰং উজুকমেৰ পটিক্খিপতি. যদি এৰং ‘‘যা তথাভূতস্স দিট্ঠী’’তিআদিনা তত্থ পঞ্চন্নং এৰ অঙ্গানং গহণং কিমত্থিযন্তি আহ ‘‘উত্তরি চা’’তিআদি. সম্মাৰাচং ভাৰেতি অরিযমগ্গসমঙ্গী. তেনাহ ‘‘মিচ্ছাৰাচং পজহতী’’তি. যস্মিঞ্হি খণে সম্মাৰাচা ভাৰনাপারিপূরিং গচ্ছতি, তস্মিংযেৰ মিচ্ছাৰাচা পজহীযতীতি. সহেৰ ৰিরতিযা পূরেন্তি সমুচ্ছেদৰিরতিযা ৰিনা দুক্খপরিঞ্ঞাদীনং অসম্ভৰতো. আদিতো পট্ঠায পরিসুদ্ধানেৰ ৰট্টন্তি পরিসুদ্ধে সীলে পতিট্ঠিতস্সেৰ ভাৰনায ইজ্ঝনতো. যথাৰুত্তমত্থং গন্থন্তরেনপি সমত্থেতুং, ‘‘সুভদ্দসুত্তেপি চা’’তিআদি ৰুত্তং. অনেকেসু সুত্তসতেসু অট্ঠঙ্গিকোৰ মগ্গো আগতো, ন পঞ্চঙ্গিকোতি অধিপ্পাযো.

সম্মাসতি মগ্গক্খণে কাযানুপস্সনাদিচতুকিচ্চসাধিকা হোতীতি তং চতুব্বিধং কত্ৰা দস্সেন্তো, ‘‘মগ্গসম্পযুত্তাৰ চত্তারো সতিপট্ঠানা’’তি আহ. ন চতুমগ্গসম্পযুত্ততাৰসেন. এস নযো সম্মপ্পধানাদীসুপি. অঞ্ঞমঞ্ঞানতিৰত্তমানা যুগনদ্ধা যুত্তা ৰিয অরিযমগ্গযুগনদ্ধা অঞ্ঞমঞ্ঞং পটিবদ্ধাতি যুগনদ্ধা. তেনাহ – ‘‘একক্খণিকযুগনন্ধা’’তি অরিযমগ্গক্খণে এৰ হি সমথৰিপস্সনা একক্খণিকা হুত্ৰা সমধুরং ৰত্তন্তি. তেনেৰাহ ‘‘এতে হী’’তিআদি. অঞ্ঞস্মিং খণে সমাপত্তি, অঞ্ঞস্মিং ৰিপস্সনাতি ইদং তেসং তত্থ তত্থ কিচ্চতো অধিকভাৰং সন্ধায ৰুত্তং, ন অঞ্ঞথা. ন হি পঞ্ঞারহিতা সমাপত্তি, সমাধিরহিতা চ ৰিপস্সনা অত্থি. অরিযমগ্গে পন একক্খণিকা সমধুরতায একরসভাৰেনাতি অত্থো. ফলৰিমুত্তীতি অরহত্তফলৰিমুত্তি. সেসং হেট্ঠা ৰুত্তনযত্তা সুৰিঞ্ঞেয্যমেৰ.

মহাসল়াযতনিকসুত্তৰণ্ণনায লীনত্থপ্পকাসনা সমত্তা.

৮. নগরৰিন্দেয্যসুত্তৰণ্ণনা

৪৩৫. সমৰিসমং চরন্তীতি কাযসমাদিং সমঞ্ঞেৰ, কাযৰিসমাদিং ৰিসমঞ্ঞেৰ চরন্তি করোন্তি পটিপজ্জন্তি. তং পন সমৰিসমং অঞ্ঞমঞ্ঞং ৰিরুদ্ধত্তা ৰিসদিসত্তা ন একস্মিং কালে সম্ভৰতীতি আহ – ‘‘কালেন সমং কালেন ৰিসম’’ন্তি. সমচরিযম্পি হি এতন্তি পুব্বে সমচরিযায জোতিতত্তা ৰুত্তং.

৪৩৭. আকরোন্তি অধিপ্পেতমত্থং ঞাপেন্তি পবোধেন্তীতি আকারা, ঞাপককারণন্তি আহ – ‘‘কে আকারাতি কানি কারণানী’’তি. অনুবুদ্ধিযোতি অনুমানঞাণানি. তঞ্হি যথাদিট্ঠমত্থং দিট্ঠভাৰেন অন্ৰেতি অনুগচ্ছতীতি ‘‘অন্ৰযা’’তি ৰুচ্চতি. হরিততিণচম্পকৰনাদিৰসেনাতি হরিতকম্বলাদিসদিসতিণাদিৰসেন ৰিত্থারিতকনকপটাদিসদিৰিকসিতচম্পকৰনাদিৰসেন. আদিসদ্দেন চেত্থ কীচকৰেণুসদ্দমধুরসফলাফলৰসেন সদ্দরসানং অত্থিভাৰো ৰেদিতব্বোতি. চম্পকৰসেনেৰ পন ফস্সগন্ধানম্পি অত্থিভাৰো ৰুত্তোতি. তেনাহ – ‘‘রূপাদযো পঞ্চ কামগুণা অত্থী’’তি. ‘‘ইত্থিরূপাদীনি সন্ধাযেতং কথিত’’ন্তি ৰত্ৰা ইন্দ্রিযবদ্ধা ৰা হোন্তু রূপাদযো অনিন্দ্রিযবদ্ধা ৰা, সব্বেপি চেতে কিলেসুপ্পত্তিনিমিত্ততায কামগুণা এৰাতি চোদনং সন্ধায ৰিসভাগিত্থিগতা রূপাদযো সৰিসেসং কিলেসুপ্পত্তিনিমিত্তন্তি দস্সেন্তো, ‘‘তানি হী’’তিআদিমাহ.

তত্থ তানীতি রূপাদীনি. হি-সদ্দো হেতুঅত্থো. তেন যথাৰুত্তমত্থং সমত্থেতি, ‘‘যস্মা পুরিসস্স চিত্তং পরিযাদায তিট্ঠন্তি, তস্মা ইত্থিরূপাদীনি সন্ধায এতং কথিত’’ন্তি. পুরিসস্স চিত্তন্তি পুরিসস্স চতুভূমকং কুসলচিত্তং পরিযাদায গহেত্ৰা অন্তোমুট্ঠিগতং ৰিয কত্ৰা. ‘‘হত্থিকাযং পরিযাদিযিত্ৰা’’তিআদীসু (সং. নি. ১.১২৬) হি গহণং পরিযাদানং নাম, ‘‘অনিচ্চসঞ্ঞা ভাৰিতা বহুলীকতা সব্বং কামরাগং পরিযাদিযতী’’তিআদীসু (সং. নি. ৩.১০২) খেপনং পরিযাদানং, ইধ উভযম্পি ৰট্টতি. ইদানি যথাৰুত্তমত্থং সুত্তেনেৰ সাধেতুং, ‘‘যথাহা’’তিআদি ৰুত্তং. তত্থ ‘‘নাহং, ভিক্খৰে’’তিআদীসু ন-কারো পটিসেধত্থো. অহন্তি ভগৰা অত্তানং নিদ্দিসতি. ভিক্খৰেতি ভিক্খূ আলপতি. অঞ্ঞন্তি ইদানি ৰত্তব্বং ইত্থিরূপতো অঞ্ঞং. একরূপম্পীতি একম্পি রূপং. সমনুপস্সামীতি ঞাণস্স সমনুপস্সনা অধিপ্পেতা, হেট্ঠা ন-কারং আনেত্ৰা সম্বন্ধিতব্বং. অযঞ্হেত্থ অত্থো – ‘‘অহং, ভিক্খৰে, সব্বঞ্ঞুতঞ্ঞাণেন সব্বসো ওলোকেন্তো অঞ্ঞং একরূপম্পি ন সমনুপস্সামী’’তি. যং এৰং পুরিসস্স চিত্তং পরিযাদায তিট্ঠতীতি যং রূপং রূপগরুকস্স পুরিসস্স সব্বম্পি কুসলচিত্তং পৰত্তিতুং অপ্পদানৰসেন পরিযাদিযিত্ৰা গহেত্ৰা খেপেত্ৰা চ তিট্ঠতি. যথযিদং ইত্থিরূপন্তি ইত্থিযা রূপকাযং. রূপসদ্দো খন্ধাদিঅনেকত্থৰাচকো, ইধ পন ইত্থিযা চতুসমুট্ঠানে রূপাযতনে ৰণ্ণধাতুযং দট্ঠব্বো. ‘‘ইত্থিরূপং, ভিক্খৰে, পুরিসস্স চিত্তং পরিযাদায তিট্ঠতী’’তি ইদং পুরিমস্সেৰ দল়্হীকরণত্থং ৰুত্তং. পুরিমং ‘‘যথযিদং, ভিক্খৰে, ইত্থিরূপ’’ন্তি ইদং ওপম্মৰসেন ৰুত্তং, ইদং পরিযাদানভাৰে নিদস্সনন্তি দট্ঠব্বং. সেসং সুৰিঞ্ঞেয্যমেৰ.

নগরৰিন্দেয্যসুত্তৰণ্ণনায লীনত্থপ্পকাসনা সমত্তা.

৯. পিণ্ডপাতপারিসুদ্ধিসুত্তৰণ্ণনা

৪৩৮. ধম্মসেনাপতিনো পটিসল্লীযনস্স অধিপ্পেতত্তা, উপরি চ পাল়িযং, ‘‘সুঞ্ঞতাৰিহারেন খো অহং, ভন্তে, এতরহি বহুলং ৰিহরামী’’তি (ম. নি. ৩.৪৩৮) ৰুত্তত্তা ‘‘পটিসল্লানাতি ফলসমাপত্তিতো’’তি আহ.

ৰিপ্পসন্নানীতি ৰিসেসতো পসন্নানি. ওকাসৰসেনাতি ইন্দ্রিযানং পতিট্ঠিতোকাসৰসেন. ননু তানি ইন্দ্রিযানি সভাৰতো ৰিপ্পসন্নানি হোন্তীতি? সচ্চং হোন্তি. ন হিদং তাদিসং পসন্নতং সন্ধায ৰুত্তং, ইদং পন সন্তপণীতসমাপত্তিসমুট্ঠিতানং পচ্চুপট্ঠিতানং চিত্তজরূপানং ৰসেন সেসতিসন্ততিরূপানং সেট্ঠতরং পণীতভাৰাপত্তিং সন্ধায ৰুত্তং. ফলসমাপত্তিতোতি সুঞ্ঞতানুপস্সনাৰসেন সমাপন্নফলসমাপত্তিতো. মহন্তানং বুদ্ধাদীনং পুরিসানং ৰিহারো মহাপুরিসৰিহারো. তেনাহ – ‘‘বুদ্ধ…পে… ৰিহারো’’তি. ৰিহারতো পট্ঠাযাতি পরিক্খিত্তে চ ৰিহারে পরিক্খেপতো পট্ঠায, অপরিক্খিত্তে চ পরিক্খেপারহট্ঠানতো পট্ঠায. কেচি পন ‘‘ৰিহারব্ভন্তরতো পট্ঠাযা’’তি ৰদন্তি. যাৰ গামস্স ইন্দখীলাতি গামস্স অব্ভন্তরিন্দখীলো. গেহপটিপাটিযাচরিত্ৰাতি পিণ্ডায চরিত্ৰা. যাৰ নগরদ্ৰারেন নিক্খমনাতি নগরদ্ৰারেন যাৰ নিক্খমনপদেসা. যাৰ ৰিহারাতি যাৰ ৰিহারব্ভন্তরা. পটিক্কন্তমগ্গোতি নিৰত্তনমগ্গো. আরম্মণে পটিহঞ্ঞনাকারেন পৰত্তমানম্পি পটিঘসম্পযুত্তং চিত্তে পটিহনন্তং ৰিয পৰত্ততীতি আহ – ‘‘চিত্তে পটিহঞ্ঞনকিলেসজাত’’ন্তি. দিৰসঞ্চ রত্তিঞ্চ অনুসিক্খন্তেনাতি এতংযেৰ রাগাদিপ্পহাযিনিং সম্মাপটিপত্তিং দিৰা চ রত্তিঞ্চ অনু অনু সিক্খন্তেন উপরূপরি ৰড্ঢেন্তেন.

৪৪০. পহীনা নু খো মে পঞ্চ কামগুণাতি এত্থ কামগুণপ্পহানং নাম তপ্পটিবদ্ধছন্দরাগপ্পহানং. তথা হি ৰুত্তং – ‘‘তিট্ঠন্তি চিত্রানি তথেৰ লোকে, অথেত্থ ধীরা ৰিনযন্তি ছন্দ’’ন্তি. একভিক্খুস্স পচ্চৰেক্খণা নানাতি একস্সেৰ ভিক্খুনো, ‘‘পহীনা নু খো মে পঞ্চ কামগুণা’’তিআদিনা পাল়িযং আগতা নানাপচ্চৰেক্খণা হোন্তি. নানাভিক্খূনন্তি ৰিসুং ৰিসুং অনেকেসং ভিক্খূনং. পচ্চৰেক্খণা নানাতি ৰুত্তনানাপচ্চৰেক্খণা. ইদানি তমেৰ সঙ্খেপতো ৰুত্তমত্থং ৰিত্থারতো দস্সেতুং, ‘‘কথ’’ন্তিআদি ৰুত্তং. তত্থ ‘‘পচ্চৰেক্খতী’’তি ৰুত্তং, কথং পন পচ্চৰেক্খতীতি আহ ‘‘পহীনা নু খো’’তিআদি. ৰীরিযং পগ্গয্হাতি চতুব্বিধসম্মপ্পধানৰীরিযং আরভিত্ৰা ৰিপস্সনং ৰড্ঢিত্ৰা. মগ্গানন্তরং অনাগামিফলং পত্ৰাতি ৰচনসেসো. ফলানন্তরং মগ্গন্তি তস্মিং অনাগামিমগ্গে ঠিতো ফলসমাপত্তিতো ৰুট্ঠায অগ্গমগ্গত্থায ৰিপস্সনং আরভিত্ৰা তস্মিংযেৰ আসনে ন চিরেনেৰ ৰিপস্সনং উস্সুক্কাপেত্ৰা অরহত্তমগ্গং গণ্হন্তো নিরোধধম্মানুপ্পত্তিযা ৰিপস্সনাপরিৰাসাভাৰতো ফলানন্তরং মগ্গপ্পত্তো নাম হোতীতি কত্ৰা.

ততো ৰুট্ঠাযাতি মগ্গানন্তরফলতো ৰুট্ঠায. মগ্গানন্তরতো হি ৰুট্ঠিতো মগ্গতো ৰুট্ঠিতো ৰিয হোতীতি তথা ৰুত্তং. ‘‘ফলানন্তরং মগ্গ’’ন্তি এত্থ ফলং অনন্তরং এতস্সাতি ফলানন্তরং. ‘‘ফলানন্তরং মগ্গ’’ন্তি পদদ্ৰযেনপি অনাগামিমগ্গফলানি চেৰ ৰদতীতি এৰমেত্থ অত্থো দট্ঠব্বো. নীৰরণাদীসুপি এসেৰ নযোতি এত্থ, ‘‘পহীনা নু খো মে পঞ্চ নীৰরণা’’তিআদিনা যোজনা ৰেদিতব্বা. এতেসন্তি এত্থ এতেসং নীৰরণপঞ্চুপাদানক্খন্ধসতিপট্ঠানাদীনং. পহানাদীনীতি পহানপরিঞ্ঞাভাৰনাসচ্ছিকিরিযা. নানাপচ্চৰেক্খণা হোতীতি তা পচ্চৰেক্খণা নানাতি অধিপ্পাযো. এতাসু পন পচ্চৰেক্খণাসূতি এতাসু কামগুণপচ্চৰেক্খণাদীসু দ্ৰাদসসু পচ্চৰেক্খণাসু. একং পচ্চৰেক্খণং পচ্চৰেক্খতি দ্ৰাদসসু নযেসু একেনেৰ কিচ্চসিদ্ধিতো. অঞ্ঞো ভিক্খু. একন্তি অঞ্ঞং পচ্চৰেক্খতি. অঞ্ঞত্থো হি অযং একসদ্দো ‘‘ইত্থেকে’’তিআদীসু (ম. নি. ৩.২১, ২৭) ৰিযাতি. নানাভিক্খূনং পন একা পচ্চৰেক্খণা, নানাভিক্খূনং নানাপচ্চৰেক্খণাতি এৰং চতুক্কপচ্চৰেক্খণম্পি এত্থ সম্ভৰতি. ইমস্স পন দ্ৰযস্স ৰসেন অভিসমযো নত্থীতি তদুভযং অট্ঠকথাযং ন উদ্ধটং. সেসং সুৰিঞ্ঞেয্যমেৰ.

পিণ্ডপাতপারিসুদ্ধিসুত্তৰণ্ণনায লীনত্থপ্পকাসনা সমত্তা.

১০. ইন্দ্রিযভাৰনাসুত্তৰণ্ণনা

৪৫৩. এৰংনামকেতি ‘‘গজঙ্গলা’’তি এৰং ইত্থিলিঙ্গৰসেন লদ্ধনামকে মজ্ঝিমপদেসস্স মরিযাদট্ঠানভূতে নিগমে. সুৰেল়ু নাম নিচলরুক্খোতি ৰদন্তি. ততো অঞ্ঞং এৰাতি পন অধিপ্পাযেন ‘‘একা রুক্খজাতী’’তি ৰুত্তং. চক্খুসোতানং যথাসকৰিসযতো নিৰারণং দমনং ইন্দ্রিযভাৰনা, তঞ্চ খো সব্বসো অদস্সনেন অসৰনেনাতি আহ – ‘‘চক্খুনা রূপং ন পস্সতি, সোতেন সদ্দং ন সুণাতী’’তি. সতি হি দস্সনে সৰনে চ তানি অদন্তানি অভাৰিতানেৰাতি অধিপ্পাযো. চক্খুসোতানি চ অসম্পত্তগ্গাহিতায দুরক্খিতানীতি ব্রাহ্মণো তেসংযেৰ ৰিসযগ্গহণং পটিক্খিপি. অসদিসাযাতি অঞ্ঞতিত্থিযসমযেহি অসাধারণায. আলযন্তি কথেতুকামতাকারন্তি অত্থো.

৪৫৪. ৰিপস্সনুপেক্খাতি আরদ্ধৰিপস্সকস্স ৰিপস্সনাঞাণেন লক্খণত্তযে দিট্ঠে সঙ্খারানং অনিচ্চভাৰাদিৰিচিননে মজ্ঝত্তভূতা ৰিপস্সনাসঙ্খাতা উপেক্খা. সা পন যস্মা ভাৰনাৰিসেসপ্পত্তিযা হেট্ঠিমেহি ৰিপস্সনাৰারেহি সন্তা চেৰ পণীতা চ, পগেৰ চক্খুৰিঞ্ঞাণাদিসহগতাহি উপেক্খাহি, তস্মা আহ – ‘‘এসা সন্তা এসা পণীতা’’তি. অতপ্পিকাতি সন্তপণীতভাৰনারসৰসেন তিত্তিং ন জনেতি. তেনেৰাহ –

‘‘সুঞ্ঞাগারং পৰিট্ঠস্স, সন্তচিত্তস্স ভিক্খুনো;

অমানুসী রতী হোতি, সম্মা ধম্মং ৰিপস্সতো’’তি. (ধ. প. ৩৭৩);

ইতীতি এৰং ৰক্খমানাকারেনাতি অত্থো. অযং ভিক্খূতি অযং আরদ্ধৰিপস্সকো ভিক্খূতি যোজনা. চক্খুদ্ৰারে রূপারম্মণম্হীতি চক্খুদ্ৰারে আপাথগতে রূপারম্মণে. মনাপন্তি মনাপভাৰেন পৰত্তনকং. মজ্ঝত্তে মনাপামনাপন্তি ইট্ঠমজ্ঝত্তে মনাপভাৰেন অমনাপভাৰেন চ পৰত্তনকং মনাপামনাপং নামাতি. তেনাহ (‘‘নেৰ মনাপং ন অমনাপ’’ন্তি). ইমিনা মনাপভাৰো গহিতো, ‘‘নেৰ মনাপ’’ন্তি ইমিনা মনাপভাৰো মজ্ঝত্তো চ উভযং একদেসতো লব্ভতীতি, ‘‘মনাপামনাপ’’ন্তি ৰুত্তং. এৰং আরম্মণে লব্ভমানৰিসেসৰসেন তদারম্মণস্স চিত্তস্স পাকতিকং পৰত্তিআকারং দস্সেত্ৰা ইদানি তপ্পটিসেধেন অরিযস্স ৰিনযে অনুত্তরং ইন্দ্রিযভাৰনং দস্সেতুং, ‘‘তস্স রজ্জিতুং ৰা’’তিআদি ৰুত্তং. তত্রাযং যোজনা – তস্স চিত্তং ইট্ঠে আরম্মণে রজ্জিতুং ৰা অনিট্ঠে আরম্মণে দুস্সিতুং ৰা মজ্ঝত্তে আরম্মণে মুয্হিতুং ৰা. অদত্ৰাতি নিসেধেত্ৰা. পরিগ্গহেত্ৰাতি পরিজাননৰসেন ঞাণেন গহেত্ৰা ঞাততীরণপহানপরিঞ্ঞাহি পরিজানিত্ৰা. ৰিপস্সনং মজ্ঝত্তে ঠপেতীতি অনুক্কমেন ৰিপস্সনুপেক্খং নিব্বত্তেত্ৰা তং সঙ্খারুপেক্খং পাপেত্ৰা ঠপেতি. চক্খুমাতি ন পসাদচক্খুনো অত্থিতামত্তজোতনং; অথ খো তস্স অতিসযেন অত্থিতাজোতনং, ‘‘সীলৰা’’তিআদীসু ৰিযাতি আহ – ‘‘চক্খুমাতি সম্পন্নচক্খু ৰিসুদ্ধনেত্তো’’তি.

৪৫৬. ঈসকং পোণেতি মজ্ঝে উচ্চং হুত্ৰা ঈসকং পোণে, ন অন্তন্তেন ৰঙ্কে. তেনাহ – ‘‘রথীসা ৰিয উট্ঠহিত্ৰা ঠিতে’’তি.

৪৬১. পটিকূলেতি অমনুঞ্ঞে আরম্মণে. অপ্পটিকূলসঞ্ঞীতি ন পটিকূলসঞ্ঞী. তং পন অপ্পটিকূলসঞ্ঞিতং দস্সেতুং, ‘‘মেত্তাফরণেন ৰা’’তিআদি ৰুত্তং. তত্থ পটিকূলে অনিট্ঠে ৰত্থুস্মিং সত্তসঞ্ঞিতে মেত্তাফরণেন ৰা ধাতুসো উপসংহারেন ৰা সঙ্খারসঞ্ঞিতে পন ধাতুসো উপসংহারেন ৰাতি যোজেতব্বং. অপ্পটিকূলসঞ্ঞী ৰিহরতীতি হিতেসিতায ধম্মসভাৰচিন্তনায চ নপ্পটিকূলসঞ্ঞী হুত্ৰা ইরিযাপথৰিহারেন ৰিহরতি. অপ্পটিকূলে ইট্ঠে ৰত্থুস্মিং সত্তসঞ্ঞিতে কেসাদিঅসুচিকোট্ঠাসমত্তমেৰাতি অসুভফরণেন ৰাতি অসুভতো মনসিকারৰসেন. ইদং রূপারূপমত্তং অনিচ্চং সঙ্খতন্তি অনিচ্চতো উপসংহারেন ৰা. ততো এৰ, ‘‘দুক্খং ৰিপরিণামধম্ম’’ন্তি মনসি করোন্তো পটিকূলসঞ্ঞী ৰিহরতি. সেসপদেসূতি, ‘‘পটিকূলে চ অপ্পটিকূলে চা’’তিআদিনা আগতেসু সেসেসু দ্ৰীসু পদেসু. তত্থ হি ইট্ঠানিট্ঠৰত্থূনি একজ্ঝং গহেত্ৰা ৰুত্তং যথা সত্তানং পঠমং পটিকূলতো উপট্ঠিতমেৰ পচ্ছা গহণাকারৰসেন অৰত্থন্তরেন ৰা অপ্পটিকূলতো উপট্ঠাতি. যঞ্চ অপ্পটিকূলতো উপট্ঠিতমেৰ পচ্ছা পটিকূলতো উপট্ঠাতি, তদুভযেপি খীণাসৰো সচে আকঙ্খতি, ৰুত্তনযেন অপ্পটিকূলসঞ্ঞী ৰিহরেয্য পটিকূলসঞ্ঞী ৰাতি.

তদুভযং অভিনিৰজ্জেত্ৰাতি সভাৰতো ভাৰনানুভাৰতো চ উপট্ঠিতং আরম্মণং পটিকূলসভাৰং অপ্পটিকূলসভাৰং ৰাতি তং উভযং পহায অগ্গহেত্ৰা. সব্বস্মিং ৰত্থুস্মিং পন, ‘‘মজ্ঝত্তো হুত্ৰা ৰিহরিতুকামো কিং করোতী’’তি, ৰত্ৰা তত্থ পটিপজ্জনৰিধিং দস্সেন্তো, ‘‘ইট্ঠানিট্ঠেসু…পে… দোমনস্সিতো হোতী’’তি আহ. ইদানি যথাৰুত্তমত্থং পটিসম্ভিদামগ্গপাল়িযা ৰিভাৰেতুং, ‘‘ৰুত্তং হেত’’ন্তিআদিমাহ. তস্সত্থো হেট্ঠা ৰুত্তনযো এৰ. সতোতি সতিৰেপুল্লপ্পত্তিযা সতিমা. সম্পজানোতি পঞ্ঞাৰেপুল্লপ্পত্তিযা সম্পজানকারী. চক্খুনা রূপং দিস্ৰাতি কারণৰসেন চক্খূতি লদ্ধৰোহারেন রূপদস্সনসমত্থেন চক্খুৰিঞ্ঞাণেন, চক্খুনা ৰা করণভূতেন রূপং পস্সিত্ৰা. নেৰ সুমনো হোতি গেহস্সিতসোমনস্সপটিক্খেপেন নেক্খম্মপক্খিকায কিরিযাসোমনস্সৰেদনায.

ইমেসু চাতি ‘‘অঞ্ঞথা চ পনানন্দ, অরিযস্স ৰিনযে অনুত্তরা ইন্দ্রিযভাৰনা হোতী’’তিআদিনা (ম. নি. ৩.৪৫৩), – ‘‘কথঞ্চানন্দ, সেখো হোতি পটিপদো’’তিআদিনা (ম. নি. ৩.৪৬০); – ‘‘কথঞ্চানন্দ, অরিযো হোতি ভাৰিতিন্দ্রিযো’’তিআদিনা (ম. নি. ৩.৪৬১) চ আগতেসু তিৰিধেসু নযেসু. মনাপং অমনাপং মনাপামনাপন্তি এত্থ মনাপগ্গহণেন সোমনস্সযুত্তকুসলাকুসলানং, অমনাপগ্গহণেন দোমনস্সযুত্তঅকুসলানং, মনাপামনাপগ্গহণেন তব্বিধুরুপেক্খাযুত্তানং সঙ্গহিতত্তা পঠমনযে ‘‘সংকিলেসং ৰট্টতি, নিক্কিলেসং ৰট্টতী’’তি ৰুত্তং. পঠমনযে হি পুথুজ্জনস্স অধিপ্পেতত্তা সংকিলেসকিলেসৰিপ্পযুত্তম্পি যুজ্জতি. দুতিযনযে পন ‘‘সো…পে… অড্ডীযতী’’তিআদিৰচনতো ‘‘পঠমং সংকিলেসং ৰট্টতী’’তি ৰুত্তং. সেক্খস্স অধিপ্পেতত্তা চস্স অপ্পহীনকিলেসৰসেন, ‘‘সংকিলেসম্পি ৰট্টতী’’তি ৰুত্তং. ততিযনযে অরহতো অধিপ্পেতত্তা, ‘‘ততিযং নিক্কিলেসমেৰ ৰট্টতী’’তি ৰুত্তং. সেক্খৰারে পন ‘‘চক্খুমা পুরিসো’’তিআদিকা উপমা একমেৰ অত্থং ঞাপেতুং আহ. তস্মা চক্খুদ্ৰারস্স উপ্পন্নে রাগাদিকে ৰিক্খম্ভেত্ৰা ৰিপস্সনুপেক্খায পতিট্ঠানং অরিযা ইন্দ্রিযভাৰনাতি. পঠমনযো ৰিপস্সকৰসেন আগতো, দুতিযো সেক্খস্স ৰসেন, পঠমদুতিযো চ সেক্খপুথুজ্জনানং মূলকম্মট্ঠানৰসেন, ততিযো খীণাসৰস্স অরিযৰিহারৰসেন আগতো. পঠমনযে চ পুথুজ্জনস্স ৰসেন, দুতিযনযে সেক্খস্স ৰসেন কুসলং ৰুত্তং, ততিযনযে অসেক্খস্স ৰসেন কিরিযাব্যাকতং ৰুত্তন্তি অযং ৰিসেসো ৰেদিতব্বো.

পপঞ্চসূদনিযা মজ্ঝিমনিকাযট্ঠকথায

ইন্দ্রিযভাৰনাসুত্তৰণ্ণনায লীনত্থপ্পকাসনা সমত্তা.

নিট্ঠিতা চ সল়াযতনৰগ্গৰণ্ণনা.

উপরিপণ্ণাসটীকা সমত্তা.