📜

নমো তস্স ভগৰতো অরহতো সম্মাসম্বুদ্ধস্স

সংযুত্তনিকাযো

নিদানৰগ্গো

১. নিদানসংযুত্তং

১. বুদ্ধৰগ্গো

১. পটিচ্চসমুপ্পাদসুত্তং

১. এৰং ¶ ¶ ¶ ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ – ‘‘পটিচ্চসমুপ্পাদং ৰো, ভিক্খৰে, দেসেস্সামি; তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমো ¶ চ, ভিক্খৰে, পটিচ্চসমুপ্পাদো? অৰিজ্জাপচ্চযা, ভিক্খৰে, সঙ্খারা; সঙ্খারপচ্চযা ৰিঞ্ঞাণং; ৰিঞ্ঞাণপচ্চযা নামরূপং; নামরূপপচ্চযা সল়াযতনং; সল়াযতনপচ্চযা ফস্সো; ফস্সপচ্চযা ৰেদনা; ৰেদনাপচ্চযা তণ্হা; তণ্হাপচ্চযা উপাদানং; উপাদানপচ্চযা ভৰো; ভৰপচ্চযা জাতি ¶ ; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি. অযং ৰুচ্চতি, ভিক্খৰে, পটিচ্চসমুপ্পাদো.

‘‘অৰিজ্জায ¶ ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ¶ ৰিঞ্ঞাণনিরোধো; ৰিঞ্ঞাণনিরোধা নামরূপনিরোধো; নামরূপনিরোধা সল়াযতননিরোধো; সল়াযতননিরোধা ফস্সনিরোধো; ফস্সনিরোধা ৰেদনানিরোধো; ৰেদনানিরোধা তণ্হানিরোধো; তণ্হানিরোধা উপাদাননিরোধো; উপাদাননিরোধা ভৰনিরোধো; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতী’’তি. ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি. পঠমং.

২. ৰিভঙ্গসুত্তং

২. সাৰত্থিযং ৰিহরতি…পে… ‘‘পটিচ্চসমুপ্পাদং ৰো, ভিক্খৰে, দেসেস্সামি ৰিভজিস্সামি. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমো চ, ভিক্খৰে, পটিচ্চসমুপ্পাদো? অৰিজ্জাপচ্চযা, ভিক্খৰে, সঙ্খারা; সঙ্খারপচ্চযা ৰিঞ্ঞাণং; ৰিঞ্ঞাণপচ্চযা নামরূপং; নামরূপপচ্চযা সল়াযতনং; সল়াযতনপচ্চযা ফস্সো; ফস্সপচ্চযা ৰেদনা; ৰেদনাপচ্চযা তণ্হা; তণ্হাপচ্চযা উপাদানং; উপাদানপচ্চযা ভৰো; ভৰপচ্চযা জাতি ¶ ; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি.

‘‘কতমঞ্চ, ভিক্খৰে, জরামরণং? যা তেসং তেসং সত্তানং তম্হি তম্হি সত্তনিকাযে জরা জীরণতা খণ্ডিচ্চং পালিচ্চং ৰলিত্তচতা আযুনো সংহানি ইন্দ্রিযানং পরিপাকো; অযং ৰুচ্চতি ¶ জরা. যা তেসং ¶ তেসং সত্তানং তম্হা তম্হা সত্তনিকাযা চুতি চৰনতা ভেদো অন্তরধানং মচ্চু মরণং কালকিরিযা খন্ধানং ভেদো কল়েৰরস্স নিক্খেপো ( ) [(জীৰিতিন্দ্রিযস্স উপচ্ছেদো) (স্যা. কং.) এৰমুপরিপি, অট্ঠকথাযং পন ন দিস্সতি], ইদং ৰুচ্চতি মরণং. ইতি অযঞ্চ জরা, ইদঞ্চ মরণং. ইদং ৰুচ্চতি, ভিক্খৰে, জরামরণং.

‘‘কতমা চ, ভিক্খৰে, জাতি? যা তেসং তেসং সত্তানং তম্হি তম্হি সত্তনিকাযে জাতি সঞ্জাতি ওক্কন্তি নিব্বত্তি অভিনিব্বত্তি খন্ধানং পাতুভাৰো আযতনানং পটিলাভো. অযং ৰুচ্চতি, ভিক্খৰে, জাতি.

‘‘কতমো ¶ চ, ভিক্খৰে, ভৰো? তযো মে, ভিক্খৰে, ভৰা – কামভৰো, রূপভৰো, অরূপভৰো. অযং ৰুচ্চতি, ভিক্খৰে, ভৰো.

‘‘কতমঞ্চ, ভিক্খৰে, উপাদানং? চত্তারিমানি, ভিক্খৰে, উপাদানানি – কামুপাদানং, দিট্ঠুপাদানং, সীলব্বতুপাদানং, অত্তৰাদুপাদানং. ইদং ৰুচ্চতি, ভিক্খৰে, উপাদানং.

‘‘কতমা চ, ভিক্খৰে, তণ্হা? ছযিমে, ভিক্খৰে, তণ্হাকাযা – রূপতণ্হা, সদ্দতণ্হা, গন্ধতণ্হা, রসতণ্হা, ফোট্ঠব্বতণ্হা, ধম্মতণ্হা. অযং ৰুচ্চতি, ভিক্খৰে, তণ্হা.

‘‘কতমা ¶ চ, ভিক্খৰে, ৰেদনা? ছযিমে, ভিক্খৰে, ৰেদনাকাযা – চক্খুসম্ফস্সজা ৰেদনা, সোতসম্ফস্সজা ৰেদনা, ঘানসম্ফস্সজা ৰেদনা, জিৰ্হাসম্ফস্সজা ৰেদনা, কাযসম্ফস্সজা ৰেদনা, মনোসম্ফস্সজা ৰেদনা. অযং ৰুচ্চতি, ভিক্খৰে, ৰেদনা.

‘‘কতমো চ, ভিক্খৰে, ফস্সো? ছযিমে, ভিক্খৰে, ফস্সকাযা – চক্খুসম্ফস্সো, সোতসম্ফস্সো, ঘানসম্ফস্সো, জিৰ্হাসম্ফস্সো, কাযসম্ফস্সো, মনোসম্ফস্সো. অযং ৰুচ্চতি, ভিক্খৰে, ফস্সো.

‘‘কতমঞ্চ, ভিক্খৰে, সল়াযতনং? চক্খাযতনং, সোতাযতনং, ঘানাযতনং, জিৰ্হাযতনং, কাযাযতনং, মনাযতনং – ইদং ৰুচ্চতি, ভিক্খৰে, সল়াযতনং.

‘‘কতমঞ্চ ¶ , ভিক্খৰে, নামরূপং? ৰেদনা, সঞ্ঞা, চেতনা, ফস্সো, মনসিকারো – ইদং ৰুচ্চতি নামং. চত্তারো চ ¶ মহাভূতা, চতুন্নঞ্চ মহাভূতানং উপাদাযরূপং. ইদং ৰুচ্চতি রূপং. ইতি ইদঞ্চ নামং, ইদঞ্চ রূপং. ইদং ৰুচ্চতি, ভিক্খৰে, নামরূপং.

‘‘কতমঞ্চ, ভিক্খৰে, ৰিঞ্ঞাণং? ছযিমে, ভিক্খৰে, ৰিঞ্ঞাণকাযা – চক্খুৰিঞ্ঞাণং, সোতৰিঞ্ঞাণং, ঘানৰিঞ্ঞাণং, জিৰ্হাৰিঞ্ঞাণং, কাযৰিঞ্ঞাণং, মনোৰিঞ্ঞাণং. ইদং ৰুচ্চতি, ভিক্খৰে, ৰিঞ্ঞাণং.

‘‘কতমে চ, ভিক্খৰে, সঙ্খারা? তযোমে, ভিক্খৰে, সঙ্খারা – কাযসঙ্খারো, ৰচীসঙ্খারো, চিত্তসঙ্খারো. ইমে ৰুচ্চন্তি, ভিক্খৰে, সঙ্খারা.

‘‘কতমা ¶ চ, ভিক্খৰে, অৰিজ্জা? যং খো, ভিক্খৰে, দুক্খে অঞ্ঞাণং, দুক্খসমুদযে অঞ্ঞাণং, দুক্খনিরোধে অঞ্ঞাণং, দুক্খনিরোধগামিনিযা পটিপদায অঞ্ঞাণং. অযং ৰুচ্চতি, ভিক্খৰে, অৰিজ্জা.

‘‘ইতি ¶ খো, ভিক্খৰে, অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. দুতিযং.

৩. পটিপদাসুত্তং

৩. সাৰত্থিযং ৰিহরতি…পে… ‘‘মিচ্ছাপটিপদঞ্চ ৰো, ভিক্খৰে, দেসেস্সামি সম্মাপটিপদঞ্চ. তং সুণাথ, সাধুকং মনসি করোথ; ভাসিস্সামী’’তি. ‘‘এৰং ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমা চ, ভিক্খৰে, মিচ্ছাপটিপদা? অৰিজ্জাপচ্চযা, ভিক্খৰে, সঙ্খারা; সঙ্খারপচ্চযা ¶ ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অযং ৰুচ্চতি, ভিক্খৰে, মিচ্ছাপটিপদা.

‘‘কতমা ¶ চ, ভিক্খৰে, সম্মাপটিপদা? অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি. অযং ৰুচ্চতি, ভিক্খৰে, সম্মাপটিপদা’’তি. ততিযং.

৪. ৰিপস্সীসুত্তং

৪. সাৰত্থিযং ৰিহরতি…পে… ‘‘ৰিপস্সিস্স, ভিক্খৰে, ভগৰতো অরহতো সম্মাসম্বুদ্ধস্স ¶ পুব্বেৰ সম্বোধা অনভিসম্বুদ্ধস্স বোধিসত্তস্সেৰ সতো এতদহোসি – ‘কিচ্ছং ৰতাযং লোকো আপন্নো জাযতি চ জীযতি চ মীযতি চ চৰতি চ উপপজ্জতি চ. অথ চ পনিমস্স দুক্খস্স নিস্সরণং নপ্পজানাতি জরামরণস্স. কুদাস্সু নাম ইমস্স দুক্খস্স নিস্সরণং পঞ্ঞাযিস্সতি জরামরণস্সা’’’তি?

‘‘অথ খো ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো সতি জরামরণং হোতি, কিংপচ্চযা জরামরণ’ন্তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘জাতিযা খো সতি জরামরণং হোতি, জাতিপচ্চযা জরামরণ’’’ন্তি.

‘‘অথ ¶ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো সতি জাতি হোতি, কিংপচ্চযা জাতী’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘ভৰে খো সতি জাতি হোতি, ভৰপচ্চযা জাতী’’’তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো সতি ভৰো হোতি, কিংপচ্চযা ভৰো’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা ¶ অহু পঞ্ঞায অভিসমযো – ‘উপাদানে খো সতি ভৰো হোতি, উপাদানপচ্চযা ভৰো’’’তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো সতি উপাদানং হোতি, কিংপচ্চযা উপাদান’ন্তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা ¶ অহু পঞ্ঞায অভিসমযো – ‘তণ্হায খো সতি উপাদানং ¶ হোতি, তণ্হাপচ্চযা উপাদান’’’ন্তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো সতি তণ্হা হোতি, কিংপচ্চযা তণ্হা’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘ৰেদনায খো সতি তণ্হা হোতি, ৰেদনাপচ্চযা তণ্হা’’’তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো সতি ৰেদনা হোতি, কিংপচ্চযা ৰেদনা’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘ফস্সে খো সতি ৰেদনা হোতি, ফস্সপচ্চযা ৰেদনা’’’তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো সতি ফস্সো হোতি, কিংপচ্চযা ফস্সো’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘সল়াযতনে খো সতি ফস্সো হোতি, সল়াযতনপচ্চযা ফস্সো’’’তি.

‘‘অথ ¶ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো সতি সল়াযতনং হোতি, কিংপচ্চযা সল়াযতন’ন্তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘নামরূপে খো সতি সল়াযতনং হোতি, নামরূপপচ্চযা সল়াযতন’’’ন্তি.

‘‘অথ ¶ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো সতি নামরূপং হোতি, কিংপচ্চযা নামরূপ’ন্তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘ৰিঞ্ঞাণে খো সতি নামরূপং হোতি ¶ , ৰিঞ্ঞাণপচ্চযা নামরূপ’’’ন্তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো সতি ৰিঞ্ঞাণং হোতি, কিংপচ্চযা ৰিঞ্ঞাণ’ন্তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘সঙ্খারেসু খো সতি ৰিঞ্ঞাণং হোতি, সঙ্খারপচ্চযা ৰিঞ্ঞাণ’’’ন্তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি ¶ – ‘কিম্হি নু খো সতি সঙ্খারা হোন্তি, কিংপচ্চযা সঙ্খারা’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘অৰিজ্জায খো সতি সঙ্খারা হোন্তি, অৰিজ্জাপচ্চযা সঙ্খারা’’’তি.

‘‘ইতি হিদং অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. ‘সমুদযো, সমুদযো’তি খো, ভিক্খৰে, ৰিপস্সিস্স বোধিসত্তস্স পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি জরামরণং ন হোতি, কিস্স নিরোধা জরামরণনিরোধো’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘জাতিযা খো অসতি জরামরণং ন হোতি, জাতিনিরোধা জরামরণনিরোধো’’’তি.

‘‘অথ ¶ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি জাতি ন হোতি ¶ , কিস্স নিরোধা জাতিনিরোধো’তি? অথ খো, ভিক্খৰে, ৰিপস্সিস্স বোধিসত্তস্স ¶ যোনিসো মনসিকারা অহু পঞ্ঞায অভিসমযো – ‘ভৰে খো অসতি জাতি ন হোতি, ভৰনিরোধা জাতিনিরোধো’’’তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি ভৰো ন হোতি, কিস্স নিরোধা ভৰনিরোধো’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘উপাদানে খো অসতি ভৰো ন হোতি, উপাদাননিরোধা ভৰনিরোধো’’’তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি উপাদানং ন হোতি, কিস্স নিরোধা উপাদাননিরোধো’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘তণ্হায খো অসতি উপাদানং ন হোতি, তণ্হানিরোধা উপাদাননিরোধো’’’তি.

‘‘অথ ¶ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি তণ্হা ন হোতি, কিস্স নিরোধা তণ্হানিরোধো’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘ৰেদনায খো অসতি তণ্হা ন হোতি, ৰেদনানিরোধা তণ্হানিরোধো’’’তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি ৰেদনা ন হোতি, কিস্স নিরোধা ৰেদনানিরোধো’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘ফস্সে খো অসতি ৰেদনা ন হোতি, ফস্সনিরোধা ¶ ৰেদনানিরোধো’’’তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি ফস্সো ন হোতি, কিস্স নিরোধা ফস্সনিরোধো’তি? অথ খো ভিক্খৰে, ৰিপস্সিস্স বোধিসত্তস্স যোনিসো মনসিকারা অহু ¶ পঞ্ঞায অভিসমযো – ‘সল়াযতনে খো অসতি ফস্সো ন হোতি, সল়াযতননিরোধা ফস্সনিরোধো’’’তি.

‘‘অথ ¶ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি সল়াযতনং ন হোতি, কিস্স নিরোধা সল়াযতননিরোধো’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘নামরূপে খো অসতি সল়াযতনং ন হোতি, নামরূপনিরোধা সল়াযতননিরোধো’’’তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি নামরূপং ন হোতি, কিস্স নিরোধা নামরূপনিরোধো’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘ৰিঞ্ঞাণে খো অসতি নামরূপং ন হোতি, ৰিঞ্ঞাণনিরোধা নামরূপনিরোধো’’’তি.

‘‘অথ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি ৰিঞ্ঞাণং ন হোতি, কিস্স নিরোধা ৰিঞ্ঞাণনিরোধো’তি? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘সঙ্খারেসু খো অসতি ৰিঞ্ঞাণং ন হোতি, সঙ্খারনিরোধা ৰিঞ্ঞাণনিরোধো’’’তি.

‘‘অথ ¶ খো, ভিক্খৰে, ৰিপস্সিস্স বোধিসত্তস্স এতদহোসি – ‘কিম্হি নু খো অসতি সঙ্খারা ন হোন্তি, কিস্স নিরোধা সঙ্খারনিরোধো’তি ¶ ? অথ খো, ভিক্খৰে, ৰিপস্সিস্স বোধিসত্তস্স যোনিসো মনসিকারা অহু পঞ্ঞায অভিসমযো – ‘অৰিজ্জায খো অসতি সঙ্খারা ন হোন্তি, অৰিজ্জানিরোধা সঙ্খারনিরোধো’’’তি.

‘‘ইতি হিদং অৰিজ্জানিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতীতি. ‘নিরোধো, নিরোধো’তি খো, ভিক্খৰে, ৰিপস্সিস্স বোধিসত্তস্স পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদি’’. চতুত্থং.

(সত্তন্নম্পি বুদ্ধানং এৰং ৰিত্থারেতব্বো).

৫. সিখীসুত্তং

৫. সিখিস্স ¶ ¶ , ভিক্খৰে, ভগৰতো অরহতো সম্মাসম্বুদ্ধস্স…পে….

৬. ৰেস্সভূসুত্তং

৬. ৰেস্সভুস্স, ভিক্খৰে, ভগৰতো অরহতো সম্মাসম্বুদ্ধস্স…পে….

৭. ককুসন্ধসুত্তং

৭. ককুসন্ধস্স, ভিক্খৰে, ভগৰতো অরহতো সম্মাসম্বুদ্ধস্স…পে….

৮. কোণাগমনসুত্তং

৮. কোণাগমনস্স, ভিক্খৰে, ভগৰতো অরহতো সম্মাসম্বুদ্ধস্স…পে….

৯. কস্সপসুত্তং

৯. কস্সপস্স, ভিক্খৰে, ভগৰতো অরহতো সম্মাসম্বুদ্ধস্স…পে….

১০. গোতমসুত্তং

১০. ‘‘পুব্বেৰ ¶ মে, ভিক্খৰে, সম্বোধা অনভিসম্বুদ্ধস্স বোধিসত্তস্সেৰ সতো এতদহোসি – ‘কিচ্ছং ৰতাযং লোকো আপন্নো জাযতি চ জীযতি চ মীযতি চ চৰতি চ উপপজ্জতি চ. অথ চ পনিমস্স দুক্খস্স নিস্সরণং নপ্পজানাতি জরামরণস্স. কুদাস্সু নাম ইমস্স দুক্খস্স নিস্সরণং পঞ্ঞাযিস্সতি জরামরণস্সা’’’তি?

‘‘তস্স ময্হং, ভিক্খৰে, এতদহোসি – ‘কিম্হি নু খো সতি জরামরণং হোতি, কিংপচ্চযা ¶ জরামরণ’ন্তি ¶ ? তস্স ময্হং, ভিক্খৰে, যোনিসো মনসিকারা অহু পঞ্ঞায অভিসমযো – ‘জাতিযা খো সতি জরামরণং হোতি, জাতিপচ্চযা জরামরণ’’’ন্তি.

‘‘তস্স ময্হং, ভিক্খৰে, এতদহোসি – ‘কিম্হি নু খো সতি জাতি হোতি…পে… ভৰো… উপাদানং… তণ্হা… ৰেদনা… ফস্সো… সল়াযতনং… নামরূপং… ৰিঞ্ঞাণং… সঙ্খারা হোন্তি, কিংপচ্চযা সঙ্খারা’তি? তস্স ময্হং, ভিক্খৰে ¶ , যোনিসো মনসিকারা অহু পঞ্ঞায অভিসমযো – ‘অৰিজ্জায খো সতি সঙ্খারা হোন্তি, অৰিজ্জাপচ্চযা সঙ্খারা’’’তি.

‘‘ইতি হিদং অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. ‘সমুদযো, সমুদযো’তি খো মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদি.

‘‘তস্স ময্হং, ভিক্খৰে, এতদহোসি – ‘কিম্হি নু খো অসতি জরামরণং ন হোতি, কিস্স নিরোধা জরামরণনিরোধো’তি? তস্স ময্হং, ভিক্খৰে, যোনিসো মনসিকারা অহু পঞ্ঞায অভিসমযো – ‘জাতিযা খো অসতি জরামরণং ন হোতি, জাতিনিরোধা জরামরণনিরোধো’’’তি.

‘‘তস্স ময্হং, ভিক্খৰে, এতদহোসি – ‘কিম্হি নু খো ¶ অসতি জাতি ন হোতি…পে… ভৰো… উপাদানং… তণ্হা… ৰেদনা… ফস্সো… সল়াযতনং… নামরূপং… ৰিঞ্ঞাণং… সঙ্খারা ন হোন্তি, কিস্স নিরোধা সঙ্খারনিরোধো’তি? তস্স ময্হং, ভিক্খৰে, যোনিসো মনসিকারা অহু ¶ পঞ্ঞায অভিসমযো – ‘অৰিজ্জায খো অসতি সঙ্খারা ন হোন্তি, অৰিজ্জানিরোধা সঙ্খারনিরোধো’’’তি.

‘‘ইতি হিদং অৰিজ্জানিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি. ‘নিরোধো, নিরোধো’তি ¶ খো মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদী’’তি. দসমো.

বুদ্ধৰগ্গো পঠমো.

তস্সুদ্দানং –

দেসনা ৰিভঙ্গপটিপদা চ,

ৰিপস্সী সিখী চ ৰেস্সভূ;

ককুসন্ধো কোণাগমনো কস্সপো,

মহাসক্যমুনি চ গোতমোতি.

২. আহারৰগ্গো

১. আহারসুত্তং

১১. এৰং ¶ ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে…পে… এতদৰোচ – ‘‘চত্তারোমে, ভিক্খৰে, আহারা ভূতানং ৰা সত্তানং ঠিতিযা সম্ভৰেসীনং ৰা অনুগ্গহায. কতমে চত্তারো? কবল়ীকারো [কবল়িংকারো (সী. পী.), কৰল়ীকারো (স্যা. কং.)] আহারো – ওল়ারিকো ৰা সুখুমো ৰা, ফস্সো দুতিযো, মনোসঞ্চেতনা ততিযা, ৰিঞ্ঞাণং চতুত্থং. ইমে খো, ভিক্খৰে, চত্তারো আহারা ভূতানং ৰা সত্তানং ঠিতিযা সম্ভৰেসীনং ৰা অনুগ্গহায’’.

‘‘ইমে, ভিক্খৰে, চত্তারো আহারা কিংনিদানা কিংসমুদযা ¶ কিংজাতিকা কিংপভৰা? ইমে চত্তারো আহারা তণ্হানিদানা তণ্হাসমুদযা তণ্হাজাতিকা তণ্হাপভৰা. তণ্হা চাযং, ভিক্খৰে, কিংনিদানা কিংসমুদযা কিংজাতিকা কিংপভৰা? তণ্হা ৰেদনানিদানা ৰেদনাসমুদযা ৰেদনাজাতিকা ¶ ৰেদনাপভৰা. ৰেদনা চাযং, ভিক্খৰে, কিংনিদানা কিংসমুদযা কিংজাতিকা কিংপভৰা? ৰেদনা ফস্সনিদানা ফস্সসমুদযা ফস্সজাতিকা ফস্সপভৰা. ফস্সো চাযং, ভিক্খৰে, কিংনিদানো কিংসমুদযো কিংজাতিকো কিংপভৰো? ফস্সো সল়াযতননিদানো সল়াযতনসমুদযো সল়াযতনজাতিকো সল়াযতনপভৰো. সল়াযতনঞ্চিদং, ভিক্খৰে, কিংনিদানং ¶ কিংসমুদযং কিংজাতিকং কিংপভৰং? সল়াযতনং নামরূপনিদানং নামরূপসমুদযং নামরূপজাতিকং নামরূপপভৰং. নামরূপঞ্চিদং, ভিক্খৰে, কিংনিদানং কিংসমুদযং কিংজাতিকং কিংপভৰং? নামরূপং ৰিঞ্ঞাণনিদানং ৰিঞ্ঞাণসমুদযং ৰিঞ্ঞাণজাতিকং ৰিঞ্ঞাণপভৰং. ৰিঞ্ঞাণঞ্চিদং, ভিক্খৰে, কিংনিদানং কিংসমুদযং কিংজাতিকং কিংপভৰং? ৰিঞ্ঞাণং সঙ্খারনিদানং সঙ্খারসমুদযং সঙ্খারজাতিকং সঙ্খারপভৰং. সঙ্খারা চিমে, ভিক্খৰে, কিংনিদানা কিংসমুদযা কিংজাতিকা কিংপভৰা? সঙ্খারা অৰিজ্জানিদানা অৰিজ্জাসমুদযা অৰিজ্জাজাতিকা অৰিজ্জাপভৰা.

‘‘ইতি খো, ভিক্খৰে, অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো ¶ …পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. পঠমং.

২. মোল়িযফগ্গুনসুত্তং

১২. সাৰত্থিযং ৰিহরতি…পে… ‘‘চত্তারোমে ¶ , ভিক্খৰে, আহারা ভূতানং ৰা সত্তানং ঠিতিযা সম্ভৰেসীনং ৰা অনুগ্গহায. কতমে চত্তারো? কবল়ীকারো আহারো – ওল়ারিকো ৰা সুখুমো ৰা, ফস্সো দুতিযো, মনোসঞ্চেতনা ততিযা, ৰিঞ্ঞাণং চতুত্থং. ইমে খো, ভিক্খৰে, চত্তারো আহারা ভূতানং ৰা সত্তানং ঠিতিযা সম্ভৰেসীনং ৰা অনুগ্গহাযা’’তি.

এৰং ৰুত্তে, আযস্মা মোল়িযফগ্গুনো ভগৰন্তং এতদৰোচ – ‘‘কো নু খো, ভন্তে, ৰিঞ্ঞাণাহারং আহারেতী’’তি? ‘‘নো কল্লো পঞ্হো’’তি ভগৰা অৰোচ – ‘‘‘আহারেতী’তি অহং ন ৰদামি. ‘আহারেতী’তি চাহং ¶ ৰদেয্যং, তত্রস্স কল্লো পঞ্হো – ‘কো নু খো, ভন্তে, আহারেতী’তি ¶ ? এৰং চাহং ন ৰদামি. এৰং মং অৰদন্তং যো এৰং পুচ্ছেয্য – ‘কিস্স নু খো, ভন্তে, ৰিঞ্ঞাণাহারো’তি, এস কল্লো পঞ্হো. তত্র কল্লং ৰেয্যাকরণং – ‘ৰিঞ্ঞাণাহারো আযতিং পুনব্ভৰাভিনিব্বত্তিযা পচ্চযো, তস্মিং ভূতে সতি সল়াযতনং, সল়াযতনপচ্চযা ফস্সো’’’তি.

‘‘কো নু খো, ভন্তে, ফুসতী’’তি? ‘‘নো কল্লো পঞ্হো’’তি ভগৰা অৰোচ – ‘‘‘ফুসতী’তি অহং ন ৰদামি. ‘ফুসতী’তি চাহং ৰদেয্যং, তত্রস্স কল্লো পঞ্হো – ‘কো নু খো, ভন্তে, ফুসতী’তি? এৰং চাহং ন ৰদামি. এৰং মং অৰদন্তং যো এৰং পুচ্ছেয্য – ‘কিংপচ্চযা নু খো, ভন্তে, ফস্সো’তি, এস কল্লো পঞ্হো. তত্র কল্লং ৰেয্যাকরণং – ‘সল়াযতনপচ্চযা ফস্সো, ফস্সপচ্চযা ৰেদনা’’’তি.

‘‘কো নু খো, ভন্তে, ৰেদযতী’’তি [ৰেদিযতীতি (সী. পী. ক.)]? ‘‘নো কল্লো পঞ্হো’’তি ভগৰা অৰোচ – ‘‘‘ৰেদযতী’তি অহং ন ৰদামি. ‘ৰেদযতী’তি চাহং ৰদেয্যং, তত্রস্স কল্লো পঞ্হো – ‘কো নু খো, ভন্তে, ৰেদযতী’তি? এৰং চাহং ন ৰদামি. এৰং মং অৰদন্তং যো এৰং পুচ্ছেয্য – ‘কিংপচ্চযা নু খো, ভন্তে, ৰেদনা’তি, এস কল্লো পঞ্হো. তত্র কল্লং ৰেয্যাকরণং – ‘ফস্সপচ্চযা ৰেদনা, ৰেদনাপচ্চযা তণ্হা’’’তি.

‘‘কো ¶ নু খো, ভন্তে, তসতী’’তি [তণ্হীযতীতি (সী. স্যা. কং.)]? ‘‘নো কল্লো পঞ্হো’’তি ভগৰা অৰোচ – ‘‘‘তসতী’তি অহং ন ৰদামি ¶ . ‘তসতী’তি চাহং ¶ ৰদেয্যং, তত্রস্স কল্লো পঞ্হো – ‘কো নু খো, ভন্তে, তসতী’তি? এৰং চাহং ন ৰদামি. এৰং মং অৰদন্তং যো এৰং পুচ্ছেয্য – ‘কিংপচ্চযা নু খো, ভন্তে, তণ্হা’তি, এস কল্লো পঞ্হো. তত্র কল্লং ৰেয্যাকরণং – ‘ৰেদনাপচ্চযা তণ্হা, তণ্হাপচ্চযা উপাদান’’’ন্তি.

‘‘কো নু খো, ভন্তে, উপাদিযতী’’তি? ‘‘নো কল্লো পঞ্হো’’তি ভগৰা অৰোচ – ‘‘‘উপাদিযতী’তি অহং ন ৰদামি. ‘উপাদিযতী’তি চাহং ৰদেয্যং, তত্রস্স কল্লো পঞ্হো – ‘কো নু খো, ভন্তে, উপাদিযতী’তি? এৰং চাহং ন ৰদামি. এৰং মং অৰদন্তং যো এৰং পুচ্ছেয্য – ‘কিংপচ্চযা নু খো, ভন্তে, উপাদান’ন্তি, এস কল্লো পঞ্হো. তত্র কল্লং ৰেয্যাকরণং ¶ – ‘তণ্হাপচ্চযা উপাদানং; উপাদানপচ্চযা ভৰো’তি…পে… এৰমেতস্স কেৰলস্স দুক্খক্খন্ধস্স সমুদযো হোতি.

‘‘ছন্নং ত্ৰেৰ, ফগ্গুন, ফস্সাযতনানং অসেসৰিরাগনিরোধা ফস্সনিরোধো; ফস্সনিরোধা ৰেদনানিরোধো; ৰেদনানিরোধা তণ্হানিরোধো; তণ্হানিরোধা উপাদাননিরোধো; উপাদাননিরোধা ভৰনিরোধো; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতী’’তি. দুতিযং.

৩. সমণব্রাহ্মণসুত্তং

১৩. সাৰত্থিযং ৰিহরতি…পে… ‘‘যে হি কেচি, ভিক্খৰে, সমণা ৰা ব্রাহ্মণা ¶ ৰা জরামরণং নপ্পজানন্তি, জরামরণসমুদযং নপ্পজানন্তি, জরামরণনিরোধং নপ্পজানন্তি, জরামরণনিরোধগামিনিং পটিপদং নপ্পজানন্তি; জাতিং…পে… ভৰং… উপাদানং… তণ্হং… ৰেদনং… ফস্সং… সল়াযতনং… নামরূপং… ৰিঞ্ঞাণং… সঙ্খারে নপ্পজানন্তি, সঙ্খারসমুদযং নপ্পজানন্তি, সঙ্খারনিরোধং নপ্পজানন্তি, সঙ্খারনিরোধগামিনিং পটিপদং নপ্পজানন্তি ¶ , ন মে তে, ভিক্খৰে, সমণা ৰা ব্রাহ্মণা ৰা সমণেসু ৰা সমণসম্মতা ব্রাহ্মণেসু ৰা ব্রাহ্মণসম্মতা; ন চ পন তে আযস্মন্তো সামঞ্ঞত্থং ৰা ব্রহ্মঞ্ঞত্থং ¶ [ব্রাহ্মঞ্ঞত্থং (স্যা. কং.) মোগ্গল্লানব্যাকরণং ওলোকেতব্বং] ৰা দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তি.

‘‘যে চ খো কেচি, ভিক্খৰে, সমণা ৰা ব্রাহ্মণা ৰা জরামরণং পজানন্তি, জরামরণসমুদযং পজানন্তি, জরামরণনিরোধং পজানন্তি, জরামরণনিরোধগামিনিং পটিপদং পজানন্তি; জাতিং…পে… ভৰং… উপাদানং… তণ্হং… ৰেদনং… ফস্সং… সল়াযতনং… নামরূপং… ৰিঞ্ঞাণং… সঙ্খারে পজানন্তি, সঙ্খারসমুদযং পজানন্তি, সঙ্খারনিরোধং পজানন্তি, সঙ্খারনিরোধগামিনিং পটিপদং পজানন্তি, তে খো মে, ভিক্খৰে, সমণা ৰা ব্রাহ্মণা ৰা সমণেসু চেৰ সমণসম্মতা ব্রাহ্মণেসু চ ব্রাহ্মণসম্মতা; তে চ পনাযস্মন্তো সামঞ্ঞত্থঞ্চ ব্রহ্মঞ্ঞত্থঞ্চ দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. ততিযং.

৪. দুতিযসমণব্রাহ্মণসুত্তং

১৪. সাৰত্থিযং ¶ ¶ ৰিহরতি…পে… ‘‘যে হি কেচি, ভিক্খৰে, সমণা ৰা ব্রাহ্মণা ৰা ইমে ধম্মে নপ্পজানন্তি, ইমেসং ধম্মানং সমুদযং নপ্পজানন্তি, ইমেসং ধম্মানং নিরোধং নপ্পজানন্তি, ইমেসং ধম্মানং নিরোধগামিনিং পটিপদং নপ্পজানন্তি, কতমে ধম্মে নপ্পজানন্তি, কতমেসং ধম্মানং সমুদযং নপ্পজানন্তি, কতমেসং ধম্মানং নিরোধং নপ্পজানন্তি, কতমেসং ধম্মানং নিরোধগামিনিং পটিপদং নপ্পজানন্তি’’?

‘‘জরামরণং নপ্পজানন্তি, জরামরণসমুদযং নপ্পজানন্তি, জরামরণনিরোধং নপ্পজানন্তি, জরামরণনিরোধগামিনিং পটিপদং নপ্পজানন্তি; জাতিং…পে… ভৰং… উপাদানং… তণ্হং… ৰেদনং… ফস্সং… সল়াযতনং… নামরূপং… ৰিঞ্ঞাণং… সঙ্খারে নপ্পজানন্তি, সঙ্খারসমুদযং নপ্পজানন্তি, সঙ্খারনিরোধং নপ্পজানন্তি, সঙ্খারনিরোধগামিনিং পটিপদং নপ্পজানন্তি. ইমে ধম্মে নপ্পজানন্তি, ইমেসং ধম্মানং সমুদযং নপ্পজানন্তি, ইমেসং ধম্মানং ¶ নিরোধং নপ্পজানন্তি, ইমেসং ধম্মানং নিরোধগামিনিং পটিপদং নপ্পজানন্তি. ন মে তে, ভিক্খৰে, সমণা ৰা ব্রাহ্মণা ৰা সমণেসু ৰা সমণসম্মতা ব্রাহ্মণেসু ৰা ব্রাহ্মণসম্মতা, ন চ পন তে আযস্মন্তো সামঞ্ঞত্থং ৰা ব্রহ্মঞ্ঞত্থং ৰা দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তি.

‘‘যে ¶ চ খো কেচি, ভিক্খৰে, সমণা ৰা ব্রাহ্মণা ৰা ইমে ধম্মে পজানন্তি, ইমেসং ধম্মানং সমুদযং পজানন্তি, ইমেসং ধম্মানং ¶ নিরোধং পজানন্তি, ইমেসং ধম্মানং নিরোধগামিনিং পটিপদং পজানন্তি, কতমে ধম্মে পজানন্তি, কতমেসং ধম্মানং সমুদযং পজানন্তি, কতমেসং ধম্মানং নিরোধং পজানন্তি, কতমেসং ধম্মানং নিরোধগামিনিং পটিপদং পজানন্তি?

‘‘জরামরণং পজানন্তি, জরামরণসমুদযং পজানন্তি, জরামরণনিরোধং পজানন্তি, জরামরণনিরোধগামিনিং পটিপদং পজানন্তি; জাতিং…পে… ভৰং… উপাদানং… তণ্হং… ৰেদনং… ফস্সং… সল়াযতনং… নামরূপং… ৰিঞ্ঞাণং… সঙ্খারে পজানন্তি, সঙ্খারসমুদযং পজানন্তি, সঙ্খারনিরোধং পজানন্তি, সঙ্খারনিরোধগামিনিং পটিপদং পজানন্তি. ইমে ধম্মে পজানন্তি ¶ , ইমেসং ধম্মানং সমুদযং পজানন্তি, ইমেসং ধম্মানং নিরোধং পজানন্তি, ইমেসং ধম্মানং নিরোধগামিনিং পটিপদং পজানন্তি. তে খো মে, ভিক্খৰে, সমণা ৰা ব্রাহ্মণা ৰা সমণেসু চেৰ সমণসম্মতা, ব্রাহ্মণেসু চ ব্রাহ্মণসম্মতা. তে চ পনাযস্মন্তো সামঞ্ঞত্থঞ্চ ব্রহ্মঞ্ঞত্থঞ্চ দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. চতুত্থং.

৫. কচ্চানগোত্তসুত্তং

১৫. সাৰত্থিযং ৰিহরতি. অথ ¶ খো আযস্মা কচ্চানগোত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা কচ্চানগোত্তো ভগৰন্তং এতদৰোচ – ‘‘‘সম্মাদিট্ঠি সম্মাদিট্ঠী’তি, ভন্তে, ৰুচ্চতি. কিত্তাৰতা নু খো, ভন্তে, সম্মাদিট্ঠি হোতী’’তি?

‘‘দ্ৰযনিস্সিতো ¶ খ্ৰাযং, কচ্চান, লোকো যেভুয্যেন – অত্থিতঞ্চেৰ নত্থিতঞ্চ. লোকসমুদযং খো, কচ্চান, যথাভূতং সম্মপ্পঞ্ঞায পস্সতো যা লোকে নত্থিতা সা ন হোতি. লোকনিরোধং খো, কচ্চান, যথাভূতং সম্মপ্পঞ্ঞায পস্সতো যা লোকে অত্থিতা সা ন হোতি. উপযুপাদানাভিনিৰেসৰিনিবন্ধো [উপাযুপাদানাভিনিৰেসৰিনিবন্ধো (সী. স্যা. কং. পী.)] খ্ৰাযং, কচ্চান, লোকো যেভুয্যেন. তঞ্চাযং উপযুপাদানং চেতসো অধিট্ঠানং অভিনিৰেসানুসযং ন উপেতি ন উপাদিযতি নাধিট্ঠাতি – ‘অত্তা মে’তি. ‘দুক্খমেৰ উপ্পজ্জমানং ¶ উপ্পজ্জতি, দুক্খং নিরুজ্ঝমানং নিরুজ্ঝতী’তি ন কঙ্খতি ন ৰিচিকিচ্ছতি অপরপচ্চযা ঞাণমেৰস্স এত্থ হোতি. এত্তাৰতা খো, কচ্চান, সম্মাদিট্ঠি হোতি.

‘‘‘সব্বং অত্থী’তি খো, কচ্চান, অযমেকো অন্তো. ‘সব্বং নত্থী’তি অযং দুতিযো অন্তো. এতে তে, কচ্চান, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’’তি. পঞ্চমং.

৬. ধম্মকথিকসুত্তং

১৬. সাৰত্থিযং ¶ ¶ …পে… অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু ভগৰন্তং এতদৰোচ – ‘‘‘ধম্মকথিকো ¶ ধম্মকথিকো’তি, ভন্তে, ৰুচ্চতি. কিত্তাৰতা নু খো, ভন্তে, ধম্মকথিকো হোতী’’তি?

‘‘জরামরণস্স চে ভিক্খু নিব্বিদায ৰিরাগায নিরোধায ধম্মং দেসেতি, ‘ধম্মকথিকো ভিক্খূ’তি অলং ৰচনায. জরামরণস্স চে ভিক্খু নিব্বিদায ৰিরাগায নিরোধায পটিপন্নো হোতি, ‘ধম্মানুধম্মপ্পটিপন্নো ভিক্খূ’তি অলং ৰচনায. জরামরণস্স চে ভিক্খু নিব্বিদা ৰিরাগা নিরোধা অনুপাদাৰিমুত্তো হোতি, ‘দিট্ঠধম্মনিব্বানপ্পত্তো ভিক্খূ’তি অলং ৰচনায.

‘‘জাতিযা চে ভিক্খু…পে… ভৰস্স চে ভিক্খু… উপাদানস্স চে ভিক্খু… তণ্হায চে ভিক্খু… ৰেদনায চে ভিক্খু… ফস্সস্স চে ভিক্খু… সল়াযতনস্স চে ভিক্খু… নামরূপস্স চে ভিক্খু… ৰিঞ্ঞাণস্স চে ভিক্খু… সঙ্খারানং চে ভিক্খু… অৰিজ্জায চে ভিক্খু নিব্বিদায ৰিরাগায নিরোধায ধম্মং দেসেতি, ‘ধম্মকথিকো ভিক্খূ’তি অলং ৰচনায. অৰিজ্জায চে ভিক্খু নিব্বিদায ৰিরাগায নিরোধায পটিপন্নো হোতি, ‘ধম্মানুধম্মপ্পটিপন্নো ভিক্খূ’তি অলং ৰচনায. অৰিজ্জায চে ভিক্খু নিব্বিদা ৰিরাগা নিরোধা অনুপাদাৰিমুত্তো হোতি, ‘দিট্ঠধম্মনিব্বানপ্পত্তো ভিক্খূ’তি অলং ৰচনাযা’’তি.

৭. অচেলকস্সপসুত্তং

১৭. এৰং ¶ মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. অথ ¶ খো ভগৰা পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পাৰিসি. অদ্দসা ¶ খো অচেলো কস্সপো ¶ ভগৰন্তং দূরতোৰ আগচ্ছন্তং. দিস্ৰান যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং অট্ঠাসি. একমন্তং ঠিতো খো অচেলো কস্সপো ভগৰন্তং এতদৰোচ – ‘‘পুচ্ছেয্যাম মযং ভৰন্তং গোতমং কঞ্চিদেৰ [কিঞ্চিদেৰ (ক.)] দেসং, সচে নো ভৰং গোতমো ওকাসং করোতি পঞ্হস্স ৰেয্যাকরণাযা’’তি.

‘‘অকালো খো তাৰ, কস্সপ, পঞ্হস্স; অন্তরঘরং পৰিট্ঠম্হা’’তি. দুতিযম্পি খো অচেলো কস্সপো ভগৰন্তং এতদৰোচ ‘‘পুচ্ছেয্যাম মযং ভৰন্তং গোতমং কঞ্চিদেৰ দেসং, সচে নো ভৰং গোতমো ওকাসং করোতি পঞ্হস্স ৰেয্যাকরণাযা’’তি. ‘‘অকালো খো তাৰ, কস্সপ, পঞ্হস্স; অন্তরঘরং পৰিট্ঠম্হা’’তি. ততিযম্পি খো অচেলো কস্সপো…পে… অন্তরঘরং পৰিট্ঠম্হাতি. এৰং ৰুত্তে, অচেলো কস্সপো ভগৰন্তং এতদৰোচ – ‘‘ন খো পন মযং ভৰন্তং গোতমং বহুদেৰ পুচ্ছিতুকামা’’তি. ‘‘পুচ্ছ, কস্সপ, যদাকঙ্খসী’’তি.

‘‘কিং নু খো, ভো গোতম, ‘সযংকতং দুক্খ’ন্তি? ‘মা হেৰং, কস্সপা’তি ভগৰা অৰোচ. ‘কিং পন, ভো গোতম, পরংকতং দুক্খ’ন্তি? ‘মা হেৰং, কস্সপা’তি ভগৰা অৰোচ. ‘কিং নু খো, ভো গোতম, সযংকতঞ্চ পরংকতঞ্চ দুক্খ’ন্তি? ‘মা হেৰং, কস্সপা’তি ভগৰা অৰোচ. ‘কিং ¶ পন ভো গোতম, অসযংকারং অপরংকারং অধিচ্চসমুপ্পন্নং দুক্খ’ন্তি? ‘মা হেৰং, কস্সপা’তি ভগৰা অৰোচ. ‘কিং নু ¶ খো, ভো গোতম, নত্থি দুক্খ’ন্তি? ‘ন খো, কস্সপ, নত্থি দুক্খং. অত্থি খো, কস্সপ, দুক্খ’ন্তি. ‘তেন হি ভৰং গোতমো দুক্খং ন জানাতি, ন পস্সতী’তি. ‘ন খ্ৰাহং, কস্সপ, দুক্খং ন জানামি, ন পস্সামি. জানামি খ্ৰাহং, কস্সপ, দুক্খং; পস্সামি খ্ৰাহং, কস্সপ, দুক্খ’’’ন্তি.

‘‘কি নু খো, ভো গোতম, ‘সযংকতং দুক্খ’ন্তি ইতি পুট্ঠো সমানো ‘মা হেৰং, কস্সপা’তি ৰদেসি. ‘কিং পন, ভো গোতম, পরংকতং দুক্খ’ন্তি ইতি ¶ পুট্ঠো সমানো ‘মা হেৰং, কস্সপা’তি ৰদেসি. ‘কিং নু খো, ভো গোতম, সযংকতঞ্চ পরংকতঞ্চ দুক্খ’ন্তি ইতি পুট্ঠো সমানো ‘মা হেৰং, কস্সপা’তি ৰদেসি. ‘কিং পন, ভো গোতম, অসযংকারং অপরংকারং অধিচ্চসমুপ্পন্নং দুক্খ’ন্তি ইতি পুট্ঠো সমানো ‘মা হেৰং, কস্সপা’তি ৰদেসি. ‘কিং নু খো, ভো গোতম, নত্থি দুক্খ’ন্তি ইতি পুট্ঠো সমানো ‘ন খো, কস্সপ, নত্থি দুক্খং ¶ , অত্থি খো, কস্সপ, দুক্খ’ন্তি ৰদেসি. ‘তেন হি ভৰং গোতমো দুক্খং ন জানাতি ন পস্সতী’তি ইতি পুট্ঠো সমানো ‘ন খ্ৰাহং, কস্সপ, দুক্খং ন জানামি ন পস্সামি. জানামি খ্ৰাহং, কস্সপ, দুক্খং; পস্সামি খ্ৰাহং, কস্সপ, দুক্খ’ন্তি ৰদেসি. আচিক্খতু চ [অযং চকারো সী. পোত্থকে নত্থি] মে, ভন্তে, ভগৰা দুক্খং. দেসেতু চ [অযং চকারো সী. পোত্থকে নত্থি] মে, ভন্তে, ভগৰা দুক্খ’’ন্তি.

‘‘‘সো করোতি সো পটিসংৰেদযতী’তি [পটিসংৰেদিযতীতি (সী. পী. ক.)] খো, কস্সপ, আদিতো সতো ‘সযংকতং দুক্খ’ন্তি ইতি ৰদং সস্সতং এতং পরেতি. ‘অঞ্ঞো করোতি অঞ্ঞো পটিসংৰেদযতী’তি খো, কস্সপ, ৰেদনাভিতুন্নস্স সতো ‘পরংকতং দুক্খ’ন্তি ¶ ইতি ৰদং উচ্ছেদং এতং পরেতি. এতে তে, কস্সপ, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা ¶ সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’’তি.

এৰং ৰুত্তে, অচেলো কস্সপো ভগৰন্তং এতদৰোচ – ‘‘অভিক্কন্তং, ভন্তে, অভিক্কন্তং, ভন্তে! সেয্যথাপি, ভন্তে, নিক্কুজ্জিতং ৰা উক্কুজ্জেয্য…পে… চক্খুমন্তো রূপানি দক্খন্তীতি; এৰমেৰং ভগৰতা অনেকপরিযাযেন ধম্মো পকাসিতো. এসাহং, ভন্তে, ভগৰন্তং সরণং গচ্ছামি ধম্মঞ্চ ভিক্খুসঙ্ঘঞ্চ. লভেয্যাহং, ভন্তে, ভগৰতো সন্তিকে পব্বজ্জং, লভেয্যং উপসম্পদ’’ন্তি.

‘‘যো খো, কস্সপ, অঞ্ঞতিত্থিযপুব্বো ইমস্মিং ধম্মৰিনযে আকঙ্খতি পব্বজ্জং, আকঙ্খতি উপসম্পদং, সো চত্তারো মাসে পরিৰসতি. চতুন্নং মাসানং অচ্চযেন [অচ্চযেন পরিৰুট্ঠপরিৰাসং (স্যা. কং. পী. ক.)] (পরিৰুত্থপরিৰাসং) আরদ্ধচিত্তা ভিক্খূ [ভিক্খূ আকঙ্খমানা (স্যা. কং. পী. ক.)] পব্বাজেন্তি উপসম্পাদেন্তি ভিক্খুভাৰায. অপি চ মযা পুগ্গলৰেমত্ততা ৰিদিতা’’তি.

‘‘সচে ¶ , ভন্তে, অঞ্ঞতিত্থিযপুব্বো ইমস্মিং ধম্মৰিনযে আকঙ্খতি পব্বজ্জং, আকঙ্খতি উপসম্পদং, চত্তারো মাসে পরিৰসতি. চতুন্নং মাসানং অচ্চযেন [অচ্চযেন পরিৰুট্ঠপরিৰাসং (স্যা. কং. পী. ক.)] (পরিৰুত্থপরিৰাসং) আরদ্ধচিত্তা ভিক্খূ [ভিক্খূ আকঙ্খমানা (স্যা. কং. পী. ক.)] পব্বাজেন্তি উপসম্পাদেন্তি ভিক্খুভাৰায. অহং চত্তারি ৰস্সানি পরিৰসিস্সামি ¶ ¶ , চতুন্নং ৰস্সানং অচ্চযেন [অচ্চযেন পরিৰুট্ঠপরিৰাসং (স্যা. কং. পী. ক.)] (পরিৰুত্থপরিৰাসং) আরদ্ধচিত্তা ভিক্খূ পব্বাজেন্তু উপসম্পাদেন্তু ভিক্খুভাৰাযা’’তি.

অলত্থ খো অচেলো কস্সপো ভগৰতো সন্তিকে পব্বজ্জং, অলত্থ উপসম্পদং. অচিরূপসম্পন্নো চ পনাযস্মা কস্সপো একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ – যস্সত্থায ¶ কুলপুত্তা সম্মদেৰ অগারস্মা অনগারিযং পব্বজন্তি তদনুত্তরং – ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি. ‘‘খীণা জাতি ৰুসিতং ব্রহ্মচরিযং, কতং করণীযং, নাপরং ইত্থত্তাযা’’তি অব্ভঞ্ঞাসি. অঞ্ঞতরো চ পনাযস্মা কস্সপো অরহতং অহোসীতি. সত্তমং.

৮. তিম্বরুকসুত্তং

১৮. সাৰত্থিযং ৰিহরতি. অথ খো তিম্বরুকো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো তিম্বরুকো পরিব্বাজকো ভগৰন্তং এতদৰোচ –

‘‘‘কিং নু খো, ভো গোতম, সযংকতং সুখদুক্খ’ন্তি? ‘মা হেৰং, তিম্বরুকা’তি ভগৰা অৰোচ. ‘কিং পন, ভো গোতম, পরংকতং সুখদুক্খ’ন্তি? ‘মা হেৰং, তিম্বরুকা’তি ভগৰা অৰোচ. ‘কিং নু খো, ভো গোতম, সযংকতঞ্চ পরংকতঞ্চ সুখদুক্খ’ন্তি? ‘মা হেৰং, তিম্বরুকা’তি ভগৰা অৰোচ. ‘কিং পন, ভো গোতম, অসযংকারং অপরংকারং অধিচ্চসমুপ্পন্নং সুখদুক্খ’ন্তি? ‘মা হেৰং, তিম্বরুকা’তি ভগৰা অৰোচ ¶ . ‘কিং নু খো, ভো গোতম, নত্থি সুখদুক্খ’ন্তি? ‘ন খো, তিম্বরুক, নত্থি সুখদুক্খং; অত্থি খো, তিম্বরুক, সুখদুক্খ’ন্তি. ‘তেন হি ভৰং গোতমো সুখদুক্খং ন জানাতি, ন পস্সতী’তি? ‘ন খ্ৰাহং, তিম্বরুক, সুখদুক্খং ন জানামি, ন পস্সামি. জানামি খ্ৰাহং, তিম্বরুক, সুখদুক্খং; পস্সামি খ্ৰাহং, তিম্বরুক, সুখদুক্খ’’’ন্তি.

‘‘‘কিং ¶ নু খো, ভো গোতম, সযংকতং সুখদুক্খ’ন্তি ইতি পুট্ঠো সমানো ‘মা হেৰং, তিম্বরুকা’তি ৰদেসি. ‘কিং ¶ পন, ভো গোতম, পরংকতং সুখদুক্খ’ন্তি ইতি পুট্ঠো সমানো ‘মা ¶ হেৰং, তিম্বরুকা’তি ৰদেসি. ‘কিং নু খো, ভো গোতম, সযংকতঞ্চ পরংকতঞ্চ সুখদুক্খ’ন্তি ইতি পুট্ঠো সমানো ‘মা হেৰং, তিম্বরুকা’তি ৰদেসি. ‘কিং পন, ভো গোতম, অসযংকারং অপরংকারং অধিচ্চসমুপ্পন্নং সুখদুক্খ’ন্তি ইতি পুট্ঠো সমানো ‘মা হেৰং, তিম্বরুকা’তি ৰদেসি. ‘কিং নু খো, ভো গোতম, নত্থি সুখদুক্খ’ন্তি ইতি পুট্ঠো সমানো ‘ন খো, তিম্বরুক, নত্থি সুখদুক্খং; অত্থি খো, তিম্বরুক, সুখদুক্খ’ন্তি ৰদেসি. ‘তেন হি ভৰং গোতমো সুখদুক্খং ন জানাতি, ন পস্সতী’তি ইতি পুট্ঠো সমানো ‘ন খ্ৰাহং, তিম্বরুক, সুখদুক্খং ন জানামি, ন পস্সামি. জানামি খ্ৰাহং, তিম্বরুক, সুখদুক্খং; পস্সামি খ্ৰাহং, তিম্বরুক, সুখদুক্খ’ন্তি ৰদেসি. আচিক্খতু চ মে ভৰং গোতমো সুখদুক্খং. দেসেতু চ মে ভৰং গোতমো সুখদুক্খ’’ন্তি.

‘‘‘সা ৰেদনা, সো ৰেদযতী’তি খো, তিম্বরুক, আদিতো সতো ‘সযংকতং সুখদুক্খ’ন্তি এৰম্পাহং ন ৰদামি. ‘অঞ্ঞা ৰেদনা, অঞ্ঞো ৰেদযতী’তি ¶ খো, তিম্বরুক, ৰেদনাভিতুন্নস্স সতো ‘পরংকতং সুখদুক্খ’ন্তি এৰম্পাহং ন ৰদামি. এতে তে, তিম্বরুক, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’’তি.

এৰং ৰুত্তে, তিম্বরুকো পরিব্বাজকো ভগৰন্তং এতদৰোচ – ‘‘অভিক্কন্তং, ভো গোতম…পে… এসাহং ভৰন্তং গোতমং সরণং গচ্ছামি ধম্মঞ্চ ভিক্খুসঙ্ঘঞ্চ. উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি. অট্ঠমং.

৯. বালপণ্ডিতসুত্তং

১৯. সাৰত্থিযং ৰিহরতি…পে… ‘‘অৰিজ্জানীৰরণস্স, ভিক্খৰে, বালস্স তণ্হায সম্পযুত্তস্স ¶ এৰমযং কাযো সমুদাগতো. ইতি অযঞ্চেৰ কাযো বহিদ্ধা চ নামরূপং, ইত্থেতং দ্ৰযং ¶ , দ্ৰযং পটিচ্চ ফস্সো সল়েৰাযতনানি ¶ [সল়াযতনানি (ক.)], যেহি ফুট্ঠো বালো সুখদুক্খং পটিসংৰেদযতি এতেসং ৰা অঞ্ঞতরেন’’.

‘‘অৰিজ্জানীৰরণস্স, ভিক্খৰে, পণ্ডিতস্স তণ্হায সম্পযুত্তস্স এৰমযং কাযো সমুদাগতো. ইতি অযঞ্চেৰ কাযো বহিদ্ধা চ নামরূপং, ইত্থেতং দ্ৰযং, দ্ৰযং পটিচ্চ ফস্সো সল়েৰাযতনানি, যেহি ফুট্ঠো পণ্ডিতো সুখদুক্খং পটিসংৰেদযতি এতেসং ৰা অঞ্ঞতরেন’’.

‘‘তত্র ¶ , ভিক্খৰে, কো ৰিসেসো কো অধিপ্পযাসো [অধিপ্পাযো (সী. পী. ক.), অধিপ্পাযসো (স্যা. কং.) অধি + প + যসু + ণ + সী = অধিপ্পযাসো] কিং নানাকরণং পণ্ডিতস্স বালেনা’’তি? ‘‘ভগৰংমূলকা নো, ভন্তে, ধম্মা, ভগৰংনেত্তিকা, ভগৰংপটিসরণা. সাধু ৰত, ভন্তে, ভগৰন্তংযেৰ পটিভাতু এতস্স ভাসিতস্স অত্থো. ভগৰতো সুত্ৰা ভিক্খূ ধারেস্সন্তী’’তি.

‘‘তেন হি, ভিক্খৰে, সুণাথ, সাধুকং মনসি করোথ, ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘যায চ, ভিক্খৰে, অৰিজ্জায নিৰুতস্স বালস্স যায চ তণ্হায সম্পযুত্তস্স অযং কাযো সমুদাগতো, সা চেৰ অৰিজ্জা বালস্স অপ্পহীনা সা চ তণ্হা অপরিক্খীণা. তং কিস্স হেতু? ন, ভিক্খৰে, বালো অচরি ব্রহ্মচরিযং সম্মা দুক্খক্খযায. তস্মা বালো কাযস্স ভেদা কাযূপগো হোতি, সো কাযূপগো সমানো ন পরিমুচ্চতি জাতিযা জরামরণেন সোকেহি পরিদেৰেহি দুক্খেহি দোমনস্সেহি উপাযাসেহি. ন পরিমুচ্চতি দুক্খস্মাতি ৰদামি.

‘‘যায চ, ভিক্খৰে, অৰিজ্জায নিৰুতস্স পণ্ডিতস্স যায চ তণ্হায সম্পযুত্তস্স অযং কাযো সমুদাগতো, সা চেৰ অৰিজ্জা পণ্ডিতস্স পহীনা, সা চ তণ্হা পরিক্খীণা. তং কিস্স হেতু? অচরি, ভিক্খৰে, পণ্ডিতো ব্রহ্মচরিযং ¶ সম্মা দুক্খক্খযায. তস্মা পণ্ডিতো কাযস্স ভেদা ন কাযূপগো হোতি. সো অকাযূপগো সমানো পরিমুচ্চতি জাতিযা জরামরণেন সোকেহি পরিদেৰেহি দুক্খেহি দোমনস্সেহি উপাযাসেহি. পরিমুচ্চতি দুক্খস্মাতি ৰদামি. অযং ¶ খো ¶ , ভিক্খৰে, ৰিসেসো ¶ , অযং অধিপ্পযাসো, ইদং নানাকরণং পণ্ডিতস্স বালেন যদিদং ব্রহ্মচরিযৰাসো’’তি. নৰমং.

১০. পচ্চযসুত্তং

২০. সাৰত্থিযং ৰিহরতি…পে… ‘‘পটিচ্চসমুপ্পাদঞ্চ ৰো, ভিক্খৰে, দেসেস্সামি পটিচ্চসমুপ্পন্নে চ ধম্মে. তং সুণাথ, সাধুকং মনসি করোথ, ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমো চ, ভিক্খৰে, পটিচ্চসমুপ্পাদো? জাতিপচ্চযা, ভিক্খৰে, জরামরণং. উপ্পাদা ৰা তথাগতানং অনুপ্পাদা ৰা তথাগতানং, ঠিতাৰ সা ধাতু ধম্মট্ঠিততা ধম্মনিযামতা ইদপ্পচ্চযতা. তং তথাগতো অভিসম্বুজ্ঝতি অভিসমেতি. অভিসম্বুজ্ঝিত্ৰা অভিসমেত্ৰা আচিক্খতি দেসেতি পঞ্ঞাপেতি পট্ঠপেতি ৰিৰরতি ৰিভজতি উত্তানীকরোতি. ‘পস্সথা’তি চাহ – ‘জাতিপচ্চযা, ভিক্খৰে, জরামরণং’’’.

‘‘ভৰপচ্চযা, ভিক্খৰে, জাতি…পে… উপাদানপচ্চযা, ভিক্খৰে, ভৰো… তণ্হাপচ্চযা, ভিক্খৰে, উপাদানং… ৰেদনাপচ্চযা, ভিক্খৰে, তণ্হা… ফস্সপচ্চযা, ভিক্খৰে, ৰেদনা… সল়াযতনপচ্চযা, ভিক্খৰে, ফস্সো… নামরূপপচ্চযা, ভিক্খৰে, সল়াযতনং… ৰিঞ্ঞাণপচ্চযা, ভিক্খৰে, নামরূপং… সঙ্খারপচ্চযা, ভিক্খৰে, ৰিঞ্ঞাণং… অৰিজ্জাপচ্চযা, ভিক্খৰে, সঙ্খারা উপ্পাদা ৰা তথাগতানং অনুপ্পাদা ৰা তথাগতানং, ঠিতাৰ সা ধাতু ধম্মট্ঠিততা ধম্মনিযামতা ইদপ্পচ্চযতা. তং তথাগতো অভিসম্বুজ্ঝতি অভিসমেতি ¶ . অভিসম্বুজ্ঝিত্ৰা অভিসমেত্ৰা আচিক্খতি ¶ দেসেতি পঞ্ঞাপেতি পট্ঠপেতি ৰিৰরতি ৰিভজতি উত্তানীকরোতি. ‘পস্সথা’তি চাহ ‘অৰিজ্জাপচ্চযা, ভিক্খৰে, সঙ্খারা’. ইতি খো, ভিক্খৰে, যা তত্র তথতা অৰিতথতা অনঞ্ঞথতা ইদপ্পচ্চযতা – অযং ৰুচ্চতি, ভিক্খৰে, পটিচ্চসমুপ্পাদো.

‘‘কতমে চ, ভিক্খৰে, পটিচ্চসমুপ্পন্না ধম্মা? জরামরণং, ভিক্খৰে, অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মং. জাতি, ভিক্খৰে, অনিচ্চা সঙ্খতা পটিচ্চসমুপ্পন্না ¶ খযধম্মা ৰযধম্মা ৰিরাগধম্মা নিরোধধম্মা. ভৰো, ভিক্খৰে, অনিচ্চো সঙ্খতো পটিচ্চসমুপ্পন্নো খযধম্মো ৰযধম্মো ৰিরাগধম্মো নিরোধধম্মো. উপাদানং ভিক্খৰে…পে… তণ্হা, ভিক্খৰে… ৰেদনা, ভিক্খৰে… ফস্সো, ভিক্খৰে… সল়াযতনং, ভিক্খৰে… নামরূপং, ভিক্খৰে… ৰিঞ্ঞাণং ¶ , ভিক্খৰে… সঙ্খারা, ভিক্খৰে… অৰিজ্জা, ভিক্খৰে, অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মা. ইমে ৰুচ্চন্তি, ভিক্খৰে, পটিচ্চসমুপ্পন্না ধম্মা.

‘‘যতো খো, ভিক্খৰে, অরিযসাৰকস্স ‘অযঞ্চ পটিচ্চসমুপ্পাদো, ইমে চ পটিচ্চসমুপ্পন্না ধম্মা’ যথাভূতং সম্মপ্পঞ্ঞায সুদিট্ঠা হোন্তি, সো ৰত পুব্বন্তং ৰা পটিধাৰিস্সতি – ‘অহোসিং নু খো অহং [নু খ্ৰাহং (স্যা. কং. পী. ক.)] অতীতমদ্ধানং, ননু খো অহোসিং অতীতমদ্ধানং, কিং নু খো অহোসিং অতীতমদ্ধানং, কথং নু খো অহোসিং অতীতমদ্ধানং, কিং হুত্ৰা কিং অহোসিং ¶ নু খো অহং অতীতমদ্ধান’ন্তি; অপরন্তং ৰা উপধাৰিস্সতি [অপধাৰিস্সতি (ক.)] – ‘ভৰিস্সামি নু খো অহং অনাগতমদ্ধানং, ননু খো ভৰিস্সামি অনাগতমদ্ধানং ¶ , কিং নু খো ভৰিস্সামি অনাগতমদ্ধানং, কথং নু খো ভৰিস্সামি অনাগতমদ্ধানং, কিং হুত্ৰা কিং ভৰিস্সামি নু খো অহং অনাগতমদ্ধান’ন্তি; এতরহি ৰা পচ্চুপ্পন্নং অদ্ধানং অজ্ঝত্তং কথংকথী ভৰিস্সতি – ‘অহং নু খোস্মি, নো নু খোস্মি, কিং নু খোস্মি, কথং নু খোস্মি, অযং নু খো সত্তো কুতো আগতো, সো কুহিং গমিস্সতী’তি – নেতং ঠানং ৰিজ্জতি. তং কিস্স হেতু? তথাহি, ভিক্খৰে, অরিযসাৰকস্স অযঞ্চ পটিচ্চসমুপ্পাদো ইমে চ পটিচ্চসমুপ্পন্না ধম্মা যথাভূতং সম্মপ্পঞ্ঞায সুদিট্ঠা’’তি. দসমং.

আহারৰগ্গো দুতিযো.

তস্সুদ্দানং –

আহারং ফগ্গুনো চেৰ, দ্ৰে চ সমণব্রাহ্মণা;

কচ্চানগোত্তো ধম্মকথিকং, অচেলং তিম্বরুকেন চ;

বালপণ্ডিততো চেৰ, দসমো পচ্চযেন চাতি.

৩. দসবলৰগ্গো

১. দসবলসুত্তং

২১. সাৰত্থিযং ¶ ¶ ৰিহরতি…পে… ‘‘দসবলসমন্নাগতো, ভিক্খৰে, তথাগতো চতূহি চ ৰেসারজ্জেহি সমন্নাগতো আসভং ঠানং পটিজানাতি, পরিসাসু ¶ সীহনাদং নদতি, ব্রহ্মচক্কং পৰত্তেতি – ইতি ¶ রূপং ইতি রূপস্স সমুদযো ইতি রূপস্স অত্থঙ্গমো, ইতি ৰেদনা ইতি ৰেদনায সমুদযো ইতি ৰেদনায অত্থঙ্গমো, ইতি সঞ্ঞা ইতি সঞ্ঞায সমুদযো ইতি সঞ্ঞায অত্থঙ্গমো, ইতি সঙ্খারা ইতি সঙ্খারানং সমুদযো ইতি সঙ্খারানং অত্থঙ্গমো, ইতি ৰিঞ্ঞাণং ইতি ৰিঞ্ঞাণস্স সমুদযো ইতি ৰিঞ্ঞাণস্স অত্থঙ্গমো. ইতি ইমস্মিং সতি ইদং হোতি, ইমস্সুপ্পাদা ইদং উপ্পজ্জতি. ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতি. যদিদং অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. পঠমং.

২. দুতিযদসবলসুত্তং

২২. সাৰত্থিযং ৰিহরতি…পে… ‘‘দসবলসমন্নাগতো, ভিক্খৰে, তথাগতো চতূহি চ ৰেসারজ্জেহি সমন্নাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেত্তি – ‘ইতি রূপং ইতি রূপস্স সমুদযো ইতি রূপস্স অত্থঙ্গমো, ইতি ৰেদনা ইতি ৰেদনায সমুদযো ইতি ৰেদনায ¶ অত্থঙ্গমো, ইতি সঞ্ঞা ইতি সঞ্ঞায সমুদযো ইতি সঞ্ঞায অত্থঙ্গমো, ইতি সঙ্খারা ইতি সঙ্খারানং সমুদযো ইতি সঙ্খারানং অত্থঙ্গমো, ইতি ৰিঞ্ঞাণং ইতি ৰিঞ্ঞাণস্স সমুদযো ইতি ৰিঞ্ঞাণস্স অত্থঙ্গমো. ইতি ইমস্মিং সতি ইদং হোতি, ইমস্সুপ্পাদা ইদং উপ্পজ্জতি; ইমস্মিং অসতি ইদং ন হোতি ইমস্স নিরোধা ইদং নিরুজ্ঝতি. যদিদং অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… ¶ এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি’’’.

‘‘এৰং স্ৰাক্খাতো, ভিক্খৰে, মযা ধম্মো উত্তানো ৰিৰটো পকাসিতো ছিন্নপিলোতিকো. এৰং স্ৰাক্খাতে খো, ভিক্খৰে, মযা ধম্মে উত্তানে ৰিৰটে পকাসিতে ছিন্নপিলোতিকে অলমেৰ সদ্ধাপব্বজিতেন কুলপুত্তেন ৰীরিযং আরভিতুং – ‘কামং তচো চ ন্হারু [নহারু (সী. স্যা. কং. পী.)] চ অট্ঠি ¶ চ অৰসিস্সতু, সরীরে উপসুস্সতু [অৰসুস্সতু ম. নি. ২.১৮৪] মংসলোহিতং. যং তং পুরিসথামেন পুরিসৰীরিযেন পুরিসপরক্কমেন পত্তব্বং, ন তং অপাপুণিত্ৰা ৰীরিযস্স সণ্ঠানং ভৰিস্সতী’’’তি.

‘‘দুক্খং ¶ , ভিক্খৰে, কুসীতো ৰিহরতি ৰোকিণ্ণো পাপকেহি অকুসলেহি ধম্মেহি, মহন্তঞ্চ সদত্থং পরিহাপেতি. আরদ্ধৰীরিযো চ খো, ভিক্খৰে, সুখং ৰিহরতি পৰিৰিত্তো পাপকেহি অকুসলেহি ধম্মেহি, মহন্তঞ্চ সদত্থং পরিপূরেতি. ন, ভিক্খৰে, হীনেন ¶ অগ্গস্স পত্তি হোতি. অগ্গেন চ খো, ভিক্খৰে, অগ্গস্স পত্তি হোতি. মণ্ডপেয্যমিদং, ভিক্খৰে, ব্রহ্মচরিযং, সত্থা সম্মুখীভূতো. তস্মাতিহ, ভিক্খৰে, ৰীরিযং আরভথ অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিরিযায. ‘এৰং নো অযং অম্হাকং পব্বজ্জা অৰঞ্ঝা ভৰিস্সতি সফলা সউদ্রযা. যেসঞ্চ [যেসং (সী. স্যা. কং.), যেসং হি (পী. ক.)] মযং পরিভুঞ্জাম চীৰর-পিণ্ডপাতসেনাসন-গিলানপ্পচ্চযভেসজ্জপরিক্খারং তেসং তে কারা অম্হেসু মহপ্ফলা ভৰিস্সন্তি মহানিসংসা’তি – এৰঞ্হি ৰো, ভিক্খৰে, সিক্খিতব্বং. অত্তত্থং ৰা হি, ভিক্খৰে, সম্পস্সমানেন অলমেৰ অপ্পমাদেন সম্পাদেতুং; পরত্থং ৰা হি, ভিক্খৰে, সম্পস্সমানেন অলমেৰ অপ্পমাদেন সম্পাদেতুং; উভযত্থং ৰা হি, ভিক্খৰে, সম্পস্সমানেন অলমেৰ অপ্পমাদেন সম্পাদেতু’’ন্তি. দুতিযং.

৩. উপনিসসুত্তং

২৩. সাৰত্থিযং ৰিহরতি…পে… ‘‘জানতো অহং, ভিক্খৰে, পস্সতো আসৰানং খযং ৰদামি, নো অজানতো নো অপস্সতো. কিঞ্চ, ভিক্খৰে, জানতো কিং পস্সতো আসৰানং খযো হোতি ¶ ? ইতি রূপং ইতি রূপস্স সমুদযো ইতি রূপস্স অত্থঙ্গমো, ইতি ৰেদনা…পে… ইতি সঞ্ঞা… ইতি সঙ্খারা… ইতি ৰিঞ্ঞাণং ইতি ৰিঞ্ঞাণস্স সমুদযো ইতি ৰিঞ্ঞাণস্স অত্থঙ্গমোতি. এৰং খো, ভিক্খৰে, জানতো এৰং পস্সতো আসৰানং খযো হোতি’’.

‘‘যম্পিস্স ¶ তং, ভিক্খৰে, খযস্মিং খযেঞ্ঞাণং, তম্পি সউপনিসং ৰদামি, নো অনুপনিসং. কা চ, ভিক্খৰে, খযেঞাণস্স উপনিসা? ‘ৰিমুত্তী’তিস্স ¶ ৰচনীযং. ৰিমুত্তিম্পাহং [ৰিমুত্তিম্পহং (সী. স্যা. কং.)], ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, ৰিমুত্তিযা ¶ উপনিসা? ‘ৰিরাগো’তিস্স ৰচনীযং. ৰিরাগম্পাহং, ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, ৰিরাগস্স উপনিসা? ‘নিব্বিদা’তিস্স ৰচনীযং. নিব্বিদম্পাহং, ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, নিব্বিদায উপনিসা? ‘যথাভূতঞাণদস্সন’ন্তিস্স ৰচনীযং. যথাভূতঞাণদস্সনম্পাহং, ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, যথাভূতঞাণদস্সনস্স উপনিসা? ‘সমাধী’তিস্স ৰচনীযং. সমাধিম্পাহং, ভিক্খৰে, সউপনিসং ৰদামি, নো অনুপনিসং.

‘‘কা চ, ভিক্খৰে, সমাধিস্স উপনিসা? ‘সুখ’ন্তিস্স ৰচনীযং. সুখম্পাহং, ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, সুখস্স উপনিসা? ‘পস্সদ্ধী’তিস্স ৰচনীযং. পস্সদ্ধিম্পাহং, ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, পস্সদ্ধিযা উপনিসা? ‘পীতী’তিস্স ৰচনীযং. পীতিম্পাহং, ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, পীতিযা উপনিসা? ‘পামোজ্জ’ন্তিস্স ৰচনীযং. পামোজ্জম্পাহং, ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, পামোজ্জস্স উপনিসা? ‘সদ্ধা’তিস্স ৰচনীযং. সদ্ধম্পাহং, ভিক্খৰে, সউপনিসং ৰদামি, নো অনুপনিসং.

‘‘কা ¶ চ, ভিক্খৰে, সদ্ধায উপনিসা? ‘দুক্খ’ন্তিস্স ৰচনীযং. দুক্খম্পাহং, ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, দুক্খস্স উপনিসা? ‘জাতী’তিস্স ৰচনীযং. জাতিম্পাহং ¶ , ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, জাতিযা উপনিসা? ‘ভৰো’তিস্স ৰচনীযং. ভৰম্পাহং, ভিক্খৰে, সউপনিসং ৰদামি ¶ , নো অনুপনিসং. কা চ, ভিক্খৰে, ভৰস্স উপনিসা? ‘উপাদান’ন্তিস্স ৰচনীযং. উপাদানম্পাহং, ভিক্খৰে, সউপনিসং ৰদামি, নো অনুপনিসং. কা চ, ভিক্খৰে, উপাদানস্স উপনিসা? ‘তণ্হা’তিস্স ৰচনীযং. তণ্হম্পাহং, ভিক্খৰে, সউপনিসং ৰদামি, নো অনুপনিসং.

‘‘কা চ, ভিক্খৰে, তণ্হায উপনিসা? ‘ৰেদনা’তিস্স ৰচনীযং…পে… ‘ফস্সো’তিস্স ৰচনীযং… ‘সল়াযতন’ন্তিস্স ৰচনীযং… ‘নামরূপ’ন্তিস্স ৰচনীযং… ‘ৰিঞ্ঞাণ’ন্তিস্স ৰচনীযং… ‘সঙ্খারা’তিস্স ৰচনীযং. সঙ্খারেপাহং, ভিক্খৰে, সউপনিসে ৰদামি, নো অনুপনিসে. কা চ, ভিক্খৰে, সঙ্খারানং উপনিসা? ‘অৰিজ্জা’তিস্স ৰচনীযং.

‘‘ইতি ¶ খো, ভিক্খৰে, অৰিজ্জূপনিসা সঙ্খারা, সঙ্খারূপনিসং ৰিঞ্ঞাণং, ৰিঞ্ঞাণূপনিসং নামরূপং, নামরূপূপনিসং সল়াযতনং, সল়াযতনূপনিসো ফস্সো, ফস্সূপনিসা ৰেদনা, ৰেদনূপনিসা তণ্হা, তণ্হূপনিসং উপাদানং, উপাদানূপনিসো ভৰো, ভৰূপনিসা জাতি, জাতূপনিসং দুক্খং, দুক্খূপনিসা সদ্ধা, সদ্ধূপনিসং পামোজ্জং, পামোজ্জূপনিসা পীতি, পীতূপনিসা পস্সদ্ধি, পস্সদ্ধূপনিসং সুখং, সুখূপনিসো সমাধি, সমাধূপনিসং যথাভূতঞাণদস্সনং, যথাভূতঞাণদস্সনূপনিসা ¶ নিব্বিদা, নিব্বিদূপনিসো ৰিরাগো, ৰিরাগূপনিসা ৰিমুত্তি, ৰিমুত্তূপনিসং খযেঞাণং.

‘‘সেয্যথাপি, ভিক্খৰে, উপরিপব্বতে থুল্লফুসিতকে দেৰে ৰস্সন্তে ¶ তং উদকং যথানিন্নং পৰত্তমানং পব্বতকন্দরপদরসাখা পরিপূরেতি. পব্বতকন্দরপদরসাখাপরিপূরা কুসোব্ভে [কুস্সুব্ভে (সী. স্যা. কং.), কুসুব্ভে (পী.) ণ্ৰাদি ১২৯ সুত্তং ওলোকেতব্বং] পরিপূরেন্তি. কুসোব্ভা পরিপূরা মহাসোব্ভে পরিপূরেন্তি. মহাসোব্ভা পরিপূরা কুন্নদিযো পরিপূরেন্তি. কুন্নদিযো পরিপূরা মহানদিযো পরিপূরেন্তি. মহানদিযো পরিপূরা মহাসমুদ্দং পরিপূরেন্তি.

‘‘এৰমেৰ খো, ভিক্খৰে, অৰিজ্জূপনিসা সঙ্খারা, সঙ্খারূপনিসং ৰিঞ্ঞাণং, ৰিঞ্ঞাণূপনিসং নামরূপং, নামরূপূপনিসং সল়াযতনং, সল়াযতনূপনিসো ফস্সো, ফস্সূপনিসা ৰেদনা, ৰেদনূপনিসা তণ্হা, তণ্হূপনিসং উপাদানং, উপাদানূপনিসো ভৰো, ভৰূপনিসা জাতি, জাতূপনিসং ¶ দুক্খং, দুক্খূপনিসা সদ্ধা, সদ্ধূপনিসং পামোজ্জং, পামোজ্জূপনিসা পীতি, পীতূপনিসা পস্সদ্ধি, পস্সদ্ধূপনিসং সুখং, সুখূপনিসো সমাধি, সমাধূপনিসং যথাভূতঞাণদস্সনং, যথাভূতঞাণদস্সনূপনিসা নিব্বিদা, নিব্বিদূপনিসো ৰিরাগো, ৰিরাগূপনিসা ৰিমুত্তি, ৰিমুত্তূপনিসং খযেঞাণ’’ন্তি. ততিযং.

৪. অঞ্ঞতিত্থিযসুত্তং

২৪. রাজগহে ৰিহরতি ৰেল়ুৰনে. অথ খো আযস্মা সারিপুত্তো পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পাৰিসি. অথ খো আযস্মতো সারিপুত্তস্স এতদহোসি – ‘‘অতিপ্পগো খো তাৰ রাজগহে পিণ্ডায চরিতুং. যংনূনাহং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্য’’ন্তি.

অথ ¶ খো আযস্মা সারিপুত্তো যেন অঞ্ঞতিত্থিযানং পরিব্বাজকানং ¶ আরামো তেনুপসঙ্কমি; উপসঙ্কমিত্ৰা ¶ তেহি অঞ্ঞতিত্থিযেহি পরিব্বাজকেহি সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো আযস্মন্তং সারিপুত্তং তে অঞ্ঞতিত্থিযা পরিব্বাজকা এতদৰোচুং –

‘‘সন্তাৰুসো, সারিপুত্ত, একে সমণব্রাহ্মণা কম্মৰাদা সযংকতং দুক্খং পঞ্ঞপেন্তি. সন্তি পনাৰুসো সারিপুত্ত, একে সমণব্রাহ্মণা কম্মৰাদা পরংকতং দুক্খং পঞ্ঞপেন্তি. সন্তাৰুসো সারিপুত্ত, একে সমণব্রাহ্মণা কম্মৰাদা সযংকতঞ্চ পরংকতঞ্চ দুক্খং পঞ্ঞপেন্তি. সন্তি পনাৰুসো সারিপুত্ত, একে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি. ইধ, পনাৰুসো সারিপুত্ত, সমণো গোতমো কিংৰাদী কিমক্খাযী? কথং ব্যাকরমানা চ মযং ৰুত্তৰাদিনো চেৰ সমণস্স গোতমস্স অস্সাম, ন চ সমণং গোতমং অভূতেন অব্ভাচিক্খেয্যাম, ধম্মস্স চানুধম্মং ব্যাকরেয্যাম, ন চ কোচি সহধম্মিকো ৰাদানুপাতো [ৰাদানুৰাদো (ক.) দী. নি. ১.৩৮১] গারয্হং ঠানং আগচ্ছেয্যা’’তি?

‘‘পটিচ্চসমুপ্পন্নং খো, আৰুসো, দুক্খং ৰুত্তং ভগৰতা. কিং পটিচ্চ? ফস্সং পটিচ্চ. ইতি ¶ ৰদং ৰুত্তৰাদী চেৰ ভগৰতো অস্স, ন চ ভগৰন্তং অভূতেন অব্ভাচিক্খেয্য, ধম্মস্স চানুধম্মং ব্যাকরেয্য, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্য.

‘‘তত্রাৰুসো, যে তে সমণব্রাহ্মণা কম্মৰাদা সযংকতং দুক্খং পঞ্ঞপেন্তি তদপি ফস্সপচ্চযা. যেপি তে সমণব্রাহ্মণা কম্মৰাদা পরংকতং দুক্খং পঞ্ঞপেন্তি তদপি ফস্সপচ্চযা. যেপি তে সমণব্রাহ্মণা কম্মৰাদা সযংকতঞ্চ পরংকতঞ্চ দুক্খং পঞ্ঞপেন্তি তদপি ফস্সপচ্চযা. যেপি ¶ ¶ তে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি তদপি ফস্সপচ্চযা.

‘‘তত্রাৰুসো, যে তে সমণব্রাহ্মণা কম্মৰাদা সযংকতং দুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতি. যেপি তে সমণব্রাহ্মণা কম্মৰাদা পরংকতং দুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতি. যেপি তে ¶ সমণব্রাহ্মণা কম্মৰাদা সযংকতঞ্চ পরংকতঞ্চ দুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতি. যেপি তে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতী’’তি.

অস্সোসি খো আযস্মা আনন্দো আযস্মতো সারিপুত্তস্স তেহি অঞ্ঞতিত্থিযেহি পরিব্বাজকেহি সদ্ধিং ইমং কথাসল্লাপং. অথ খো আযস্মা আনন্দো রাজগহে পিণ্ডায চরিত্ৰা পচ্ছাভত্তং পিণ্ডপাতপটিক্কন্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো যাৰতকো আযস্মতো সারিপুত্তস্স তেহি অঞ্ঞতিত্থিযেহি পরিব্বাজকেহি সদ্ধিং অহোসি কথাসল্লাপো তং সব্বং ভগৰতো আরোচেসি.

‘‘সাধু সাধু, আনন্দ, যথা তং সারিপুত্তো সম্মা ব্যাকরমানো ¶ ব্যাকরেয্য. পটিচ্চসমুপ্পন্নং খো, আনন্দ, দুক্খং ৰুত্তং মযা. কিং পটিচ্চ? ফস্সং পটিচ্চ. ইতি ৰদং ৰুত্তৰাদী চেৰ মে অস্স, ন চ মং অভূতেন অব্ভাচিক্খেয্য, ধম্মস্স চানুধম্মং ব্যাকরেয্য, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্য.

‘‘তত্রানন্দ ¶ , যে তে সমণব্রাহ্মণা কম্মৰাদা সযংকতং দুক্খং পঞ্ঞপেন্তি তদপি ফস্সপচ্চযা. যেপি ¶ তে…পে… যেপি তে…পে… যেপি তে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি তদপি ফস্সপচ্চযা.

‘‘তত্রানন্দ, যেপি তে সমণব্রাহ্মণা কম্মৰাদা সযংকতং দুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতি. যেপি তে…পে… যেপি তে…পে… যেপি তে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতি.

‘‘একমিদাহং, আনন্দ, সমযং ইধেৰ রাজগহে ৰিহরামি ৰেল়ুৰনে কলন্দকনিৰাপে. অথ খ্ৰাহং, আনন্দ, পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পাৰিসিং. তস্স ময্হং, আনন্দ, এতদহোসি – ‘অতিপ্পগো ¶ খো তাৰ রাজগহে পিণ্ডায চরিতুং. যংনূনাহং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্য’’’ন্তি.

‘‘অথ খ্ৰাহং, আনন্দ, যেন অঞ্ঞতিত্থিযানং পরিব্বাজকানং আরামো তেনুপসঙ্কমিং; উপসঙ্কমিত্ৰা তেহি অঞ্ঞতিত্থিযেহি পরিব্বাজকেহি ¶ সদ্ধিং সম্মোদিং. সম্মোদনীযং কথং সারণীযং ৰীতিসারেত্ৰা একমন্তং নিসীদিং. একমন্তং নিসিন্নং খো মং, আনন্দ, তে অঞ্ঞতিত্থিযা পরিব্বাজকা এতদৰোচুং –

‘সন্তাৰুসো গোতম, একে সমণব্রাহ্মণা কম্মৰাদা সযংকতং দুক্খং পঞ্ঞপেন্তি. সন্তি পনাৰুসো গোতম, একে সমণব্রাহ্মণা কম্মৰাদা পরংকতং দুক্খং পঞ্ঞপেন্তি. সন্তাৰুসো গোতম, একে সমণব্রাহ্মণা কম্মৰাদা সযংকতঞ্চ পরংকতঞ্চ দুক্খং পঞ্ঞপেন্তি. সন্তি পনাৰুসো গোতম, একে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি. ইধ নো আযস্মা গোতমো কিংৰাদী কিমক্খাযী? কথং ব্যাকরমানা চ মযং ৰুত্তৰাদিনো চেৰ আযস্মতো গোতমস্স অস্সাম, ন চ আযস্মন্তং গোতমং অভূতেন অব্ভাচিক্খেয্যাম ¶ , ধম্মস্স চানুধম্মং ব্যাকরেয্যাম, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্যা’’’তি?

‘‘এৰং ¶ ৰুত্তাহং, আনন্দ, তে অঞ্ঞতিত্থিযে পরিব্বাজকে এতদৰোচং – ‘পটিচ্চসমুপ্পন্নং খো, আৰুসো, দুক্খং ৰুত্তং মযা. কিং পটিচ্চ? ফস্সং পটিচ্চ. ইতি ৰদং ৰুত্তৰাদী চেৰ মে অস্স, ন চ মং অভূতেন অব্ভাচিক্খেয্য, ধম্মস্স চানুধম্মং ব্যাকরেয্য, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্যা’’’তি.

‘‘তত্রাৰুসো, যে তে সমণব্রাহ্মণা কম্মৰাদা সযংকতং দুক্খং পঞ্ঞপেন্তি তদপি ফস্সপচ্চযা. যেপি তে…পে… যেপি তে…পে… ¶ যেপি তে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি তদপি ফস্সপচ্চযা.

‘‘তত্রাৰুসো, যে তে সমণব্রাহ্মণা কম্মৰাদা সযংকতং দুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতি. যেপি তে…পে… যেপি তে…পে… যেপি তে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতী’’তি. ‘‘অচ্ছরিযং ভন্তে, অব্ভুতং ভন্তে ¶ ! যত্র হি নাম একেন পদেন সব্বো অত্থো ৰুত্তো ভৰিস্সতি. সিযা নু খো, ভন্তে, এসেৰত্থো ৰিত্থারেন ৰুচ্চমানো গম্ভীরো চেৰ অস্স গম্ভীরাৰভাসো চা’’তি?

‘‘তেন হানন্দ, তঞ্ঞেৰেত্থ পটিভাতূ’’তি. ‘‘সচে মং, ভন্তে, এৰং পুচ্ছেয্যুং – ‘জরামরণং, আৰুসো আনন্দ, কিংনিদানং কিংসমুদযং কিংজাতিকং কিংপভৰ’ন্তি? এৰং পুট্ঠোহং, ভন্তে, এৰং ব্যাকরেয্যং – ‘জরামরণং খো, আৰুসো, জাতিনিদানং জাতিসমুদযং জাতিজাতিকং জাতিপভৰ’ন্তি. এৰং পুট্ঠোহং, ভন্তে, এৰং ব্যাকরেয্যং.

‘‘সচে ¶ মং, ভন্তে, এৰং পুচ্ছেয্যুং – ‘জাতি পনাৰুসো আনন্দ, কিংনিদানা কিংসমুদযা কিংজাতিকা কিংপভৰা’তি? এৰং পুট্ঠোহং, ভন্তে, এৰং ব্যাকরেয্যং – ‘জাতি খো, আৰুসো, ভৰনিদানা ভৰসমুদযা ভৰজাতিকা ভৰপ্পভৰা’তি. এৰং পুট্ঠোহং, ভন্তে, এৰং ব্যাকরেয্যং ¶ .

‘‘সচে মং, ভন্তে, এৰং পুচ্ছেয্যুং – ‘ভৰো পনাৰুসো আনন্দ, কিংনিদানো কিংসমুদযো কিংজাতিকো কিংপভৰো’তি? এৰং পুট্ঠোহং, ভন্তে, এৰং ব্যাকরেয্যং – ‘ভৰো খো, আৰুসো, উপাদাননিদানো ¶ উপাদানসমুদযো উপাদানজাতিকো উপাদানপ্পভৰো’তি. এৰং পুট্ঠোহং, ভন্তে, এৰং ব্যাকরেয্যং.

‘‘সচে মং, ভন্তে, এৰং পুচ্ছেয্যুং – উপাদানং পনাৰুসো…পে… তণ্হা পনাৰুসো…পে… ৰেদনা পনাৰুসো…পে… সচে মং, ভন্তে, এৰং পুচ্ছেয্যুং – ‘ফস্সো পনাৰুসো আনন্দ, কিংনিদানো কিংসমুদযো কিংজাতিকো কিংপভৰো’তি? এৰং পুট্ঠোহং, ভন্তে, এৰং ব্যাকরেয্যং – ‘ফস্সো খো, আৰুসো, সল়াযতননিদানো সল়াযতনসমুদযো সল়াযতনজাতিকো সল়াযতনপ্পভৰো’তি. ‘ছন্নংত্ৰেৰ, আৰুসো, ফস্সাযতনানং অসেসৰিরাগনিরোধা ফস্সনিরোধো; ফস্সনিরোধা ৰেদনানিরোধো; ৰেদনানিরোধা তণ্হানিরোধো; তণ্হানিরোধা উপাদাননিরোধো; উপাদাননিরোধা ভৰনিরোধো; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতী’তি. এৰং পুট্ঠোহং, ভন্তে, এৰং ব্যাকরেয্য’’ন্তি. চতুত্থং.

৫. ভূমিজসুত্তং

২৫. সাৰত্থিযং ¶ ৰিহরতি. অথ খো আযস্মা ভূমিজো সাযন্হসমযং পটিসল্লানা ৰুট্ঠিতো যেনাযস্মা সারিপুত্তো তেনুপসঙ্কমি; উপসঙ্কমিত্ৰা ¶ আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো ¶ আযস্মা ভূমিজো আযস্মন্তং সারিপুত্তং এতদৰোচ –

‘‘সন্তাৰুসো সারিপুত্ত, একে সমণব্রাহ্মণা কম্মৰাদা সযংকতং সুখদুক্খং পঞ্ঞপেন্তি. সন্তি পনাৰুসো সারিপুত্ত, একে সমণব্রাহ্মণা কম্মৰাদা পরংকতং সুখদুক্খং পঞ্ঞপেন্তি. সন্তাৰুসো সারিপুত্ত, একে সমণব্রাহ্মণা কম্মৰাদা সযংকতঞ্চ পরংকতঞ্চ সুখদুক্খং পঞ্ঞপেন্তি. সন্তি পনাৰুসো সারিপুত্ত, একে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং সুখদুক্খং পঞ্ঞপেন্তি. ইধ নো, আৰুসো সারিপুত্ত, ভগৰা কিংৰাদী কিমক্খাযী ¶ , কথং ব্যাকরমানা চ মযং ৰুত্তৰাদিনো চেৰ ভগৰতো অস্সাম, ন চ ভগৰন্তং অভূতেন অব্ভাচিক্খেয্যাম, ধম্মস্স চানুধম্মং ব্যাকরেয্যাম, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্যা’’তি?

‘‘পটিচ্চসমুপ্পন্নং খো, আৰুসো, সুখদুক্খং ৰুত্তং ভগৰতা. কিং পটিচ্চ? ফস্সং পটিচ্চ. ইতি ৰদং ৰুত্তৰাদী চেৰ ভগৰতো অস্স, ন চ ভগৰন্তং অভূতেন অব্ভাচিক্খেয্য, ধম্মস্স চানুধম্মং ব্যাকরেয্য, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্য.

‘‘তত্রাৰুসো, যে তে সমণব্রাহ্মণা কম্মৰাদা সযংকতং সুখদুক্খং পঞ্ঞপেন্তি, তদপি ফস্সপচ্চযা. যেপি তে…পে… যেপি তে…পে… যেপি তে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং সুখদুক্খং পঞ্ঞপেন্তি, তদপি ফস্সপচ্চযা.

‘‘তত্রাৰুসো, যে তে সমণব্রাহ্মণা কম্মৰাদা সযংকতং সুখদুক্খং ¶ পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতি. যেপি তে…পে. ¶ … যেপি তে…পে… যেপি তে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং সুখদুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতী’’তি.

অস্সোসি ¶ খো আযস্মা আনন্দো আযস্মতো সারিপুত্তস্স আযস্মতা ভূমিজেন সদ্ধিং ইমং কথাসল্লাপং. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো যাৰতকো আযস্মতো সারিপুত্তস্স আযস্মতা ভূমিজেন সদ্ধিং অহোসি কথাসল্লাপো তং সব্বং ভগৰতো আরোচেসি.

‘‘সাধু সাধু, আনন্দ, যথা তং সারিপুত্তো সম্মা ব্যাকরমানো ব্যাকরেয্য. পটিচ্চসমুপ্পন্নং খো, আনন্দ, সুখদুক্খং ৰুত্তং মযা. কিং পটিচ্চ? ফস্সং পটিচ্চ. ইতি ৰদং ৰুত্তৰাদী চেৰ মে অস্স, ন চ মং অভূতেন অব্ভাচিক্খেয্য, ধম্মস্স চানুধম্মং ব্যাকরেয্য, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্য.

‘‘তত্রানন্দ ¶ , যে তে সমণব্রাহ্মণা কম্মৰাদা সযংকতং সুখদুক্খং পঞ্ঞপেন্তি তদপি ফস্সপচ্চযা. যেপি তে…পে… যেপি তে…পে… যেপি তে সমণব্রাহ্মণা কম্মৰাদা অসযংকারং অপরংকারং অধিচ্চসমুপ্পন্নং সুখদুক্খং পঞ্ঞপেন্তি তদপি ফস্সপচ্চযা.

‘‘তত্রানন্দ ¶ , যে তে সমণব্রাহ্মণা কম্মৰাদা সযংকতং সুখদুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতি. যেপি তে…পে… যেপি তে…পে… যেপি তে সমণব্রাহ্মণাকম্মৰাদা অসযংকারং অপরংকারং অধিচ্চসমুপ্পন্নং সুখদুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতি.

‘‘কাযে ৰা হানন্দ, সতি কাযসঞ্চেতনাহেতু উপ্পজ্জতি অজ্ঝত্তং ¶ সুখদুক্খং. ৰাচায ৰা হানন্দ, সতি ৰচীসঞ্চেতনাহেতু উপ্পজ্জতি অজ্ঝত্তং সুখদুক্খং. মনে ৰা হানন্দ, সতি মনোসঞ্চেতনাহেতু উপ্পজ্জতি অজ্ঝত্তং সুখদুক্খং অৰিজ্জাপচ্চযা চ.

‘‘সামং ৰা তং, আনন্দ, কাযসঙ্খারং অভিসঙ্খরোতি, যংপচ্চযাস্স [যংপচ্চযায (স্যা. কং.), যংপচ্চযা যং (ক.)] তং উপ্পজ্জতি অজ্ঝত্তং সুখদুক্খং. পরে ৰা তং [পরে ৰাস্স তং (সী. পী.), পরে ৰাযতং (স্যা. কং.)], আনন্দ, কাযসঙ্খারং অভিসঙ্খরোন্তি, যংপচ্চযাস্স তং উপ্পজ্জতি অজ্ঝত্তং সুখদুক্খং. সম্পজানো ৰা তং, আনন্দ, কাযসঙ্খারং অভিসঙ্খরোতি যংপচ্চযাস্স তং উপ্পজ্জতি অজ্ঝত্তং সুখদুক্খং. অসম্পজানো ¶ ৰা তং, আনন্দ, কাযসঙ্খারং অভিসঙ্খরোতি যংপচ্চযাস্স তং উপ্পজ্জতি অজ্ঝত্তং সুখদুক্খং.

‘‘সামং ৰা তং, আনন্দ, ৰচীসঙ্খারং অভিসঙ্খরোতি যংপচ্চযাস্স তং উপ্পজ্জতি অজ্ঝত্তং সুখদুক্খং. পরে ¶ ৰা তং, আনন্দ, ৰচীসঙ্খারং অভিসঙ্খরোন্তি যংপচ্চযাস্স তং উপ্পজ্জতি অজ্ঝত্তং সুখদুক্খং. সম্পজানো ৰা তং, আনন্দ…পে… অসম্পজানো ৰা তং, আনন্দ, ৰচীসঙ্খারং অভিসঙ্খরোতি যংপচ্চযাস্স তং উপ্পজ্জতি অজ্ঝত্তং সুখদুক্খং.

‘‘সামং ৰা তং, আনন্দ, মনোসঙ্খারং অভিসঙ্খরোতি যংপচ্চযাস্স তং উপ্পজ্জতি অজ্ঝত্তং সুখদুক্খং. পরে ৰা তং, আনন্দ, মনোসঙ্খারং অভিসঙ্খরোন্তি যংপচ্চযাস্স তং উপ্পজ্জতি অজ্ঝত্তং সুখদুক্খং. সম্পজানো ৰা তং, আনন্দ…পে… অসম্পজানো ৰা তং, আনন্দ, মনোসঙ্খারং অভিসঙ্খরোতি যংপচ্চযাস্স তং উপ্পজ্জতি অজ্ঝত্তং সুখদুক্খং.

‘‘ইমেসু ¶ , আনন্দ, ধম্মেসু অৰিজ্জা অনুপতিতা. অৰিজ্জায ত্ৰেৰ, আনন্দ, অসেসৰিরাগনিরোধা সো কাযো ন হোতি যংপচ্চযাস্স তং উপ্পজ্জতি অজ্ঝত্তং সুখদুক্খং. সা ৰাচা ন হোতি যংপচ্চযাস্স তং উপ্পজ্জতি অজ্ঝত্তং সুখদুক্খং. সো মনো ন হোতি যংপচ্চযাস্স তং উপ্পজ্জতি ¶ অজ্ঝত্তং সুখদুক্খং. খেত্তং তং ন হোতি…পে… ৰত্থু তং ন হোতি…পে… আযতনং তং ন হোতি…পে… অধিকরণং তং ন হোতি যংপচ্চযাস্স তং উপ্পজ্জতি অজ্ঝত্তং সুখদুক্খ’’ন্তি. পঞ্চমং.

৬. উপৰাণসুত্তং

২৬. সাৰত্থিযং ৰিহরতি. অথ খো আযস্মা উপৰাণো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা উপৰাণো ভগৰন্তং এতদৰোচ ¶ –

‘‘সন্তি, ভন্তে, একে সমণব্রাহ্মণা সযংকতং দুক্খং পঞ্ঞপেন্তি. সন্তি পন, ভন্তে, একে সমণব্রাহ্মণা পরংকতং দুক্খং পঞ্ঞপেন্তি. সন্তি পন, ভন্তে, একে সমণব্রাহ্মণা সযংকতঞ্চ পরংকতঞ্চ দুক্খং পঞ্ঞপেন্তি. সন্তি পন, ভন্তে, একে সমণব্রাহ্মণা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি. ইধ নো, ভন্তে, ভগৰা কিংৰাদী কিমক্খাযী কথং ব্যাকরমানা চ মযং ৰুত্তৰাদিনো চেৰ ভগৰতো অস্সাম, ন চ ভগৰন্তং অভূতেন ¶ অব্ভাচিক্খেয্যাম, ধম্মস্স চানুধম্মং ব্যাকরেয্যাম, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্যা’’তি?

‘‘পটিচ্চসমুপ্পন্নং খো, উপৰাণ, দুক্খং ৰুত্তং মযা. কিং পটিচ্চ? ফস্সং পটিচ্চ. ইতি ৰদং ৰুত্তৰাদী চেৰ মে অস্স, ন চ মং অভূতেন অব্ভাচিক্খেয্য, ধম্মস্স চানুধম্মং ব্যাকরেয্য, ন চ কোচি সহধম্মিকো ৰাদানুপাতো গারয্হং ঠানং আগচ্ছেয্য.

‘‘তত্র, উপৰাণ, যে তে সমণব্রাহ্মণা সযংকতং দুক্খং পঞ্ঞপেন্তি, তদপি ফস্সপচ্চযা. যেপি তে…পে… যেপি তে…পে… যেপি তে সমণব্রাহ্মণা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি তদপি ফস্সপচ্চযা.

‘‘তত্র ¶ ¶ , উপৰাণ, যে তে সমণব্রাহ্মণা সযংকতং দুক্খং পঞ্ঞপেন্তি, তে ৰত অঞ্ঞ ফস্সা পটিসংৰেদিস্সন্তীতি ¶ নেতং ঠানং ৰিজ্জতি. যেপি তে…পে… যেপি তে…পে… যেপি তে সমণব্রাহ্মণা অসযংকারং অপরংকারং অধিচ্চসমুপ্পন্নং দুক্খং পঞ্ঞপেন্তি, তে ৰত অঞ্ঞত্র ফস্সা পটিসংৰেদিস্সন্তীতি নেতং ঠানং ৰিজ্জতী’’তি. ছট্ঠং.

৭. পচ্চযসুত্তং

২৭. সাৰত্থিযং ৰিহরতি…পে… ‘‘অৰিজ্জাপচ্চযা, ভিক্খৰে, সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি.

‘‘কতমঞ্চ, ভিক্খৰে, জরামরণং? যা তেসং তেসং সত্তানং তম্হি তম্হি সত্তনিকাযে জরা জীরণতা খণ্ডিচ্চং পালিচ্চং ৰলিত্তচতা আযুনো সংহানি ইন্দ্রিযানং পরিপাকো – অযং ৰুচ্চতি জরা. যা তেসং তেসং সত্তানং তম্হা তম্হা সত্তনিকাযা চুতি চৰনতা ভেদো অন্তরধানং মচ্চু মরণং কালকিরিযা খন্ধানং ভেদো কল়েৰরস্স নিক্খেপো; ইদং ৰুচ্চতি মরণং. ইতি অযঞ্চ জরা ইদঞ্চ মরণং. ইদং ৰুচ্চতি, ভিক্খৰে, জরামরণং. জাতিসমুদযা জরামরণসমুদযো; জাতিনিরোধা জরামরণনিরোধো. অযমেৰ অরিযো অট্ঠঙ্গিকো মগ্গো জরামরণনিরোধগামিনী পটিপদা. সেয্যথিদং – সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি.

‘‘কতমা ¶ চ, ভিক্খৰে, জাতি…পে… কতমো চ, ভিক্খৰে, ভৰো… কতমঞ্চ, ভিক্খৰে, উপাদানং… কতমা ¶ চ, ভিক্খৰে, তণ্হা… কতমা চ, ভিক্খৰে, ৰেদনা… কতমো চ, ভিক্খৰে ¶ , ফস্সো… কতমঞ্চ, ভিক্খৰে, সল়াযতনং… কতমঞ্চ, ভিক্খৰে, নামরূপং… কতমঞ্চ, ভিক্খৰে, ৰিঞ্ঞাণং…?

‘‘কতমে ¶ চ, ভিক্খৰে, সঙ্খারা? তযোমে, ভিক্খৰে, সঙ্খারা – কাযসঙ্খারো, ৰচীসঙ্খারো, চিত্তসঙ্খারো. ইমে ৰুচ্চন্তি, ভিক্খৰে, সঙ্খারা. অৰিজ্জাসমুদযা সঙ্খারসমুদযো; অৰিজ্জানিরোধা সঙ্খারনিরোধো. অযমেৰ অরিযো অট্ঠঙ্গিকো মগ্গো সঙ্খারনিরোধগামিনী পটিপদা. সেয্যথিদং – সম্মাদিট্ঠি…পে… সম্মাসমাধি.

‘‘যতো খো, ভিক্খৰে, অরিযসাৰকো এৰং পচ্চযং পজানাতি, এৰং পচ্চযসমুদযং পজানাতি, এৰং পচ্চযনিরোধং পজানাতি, এৰং পচ্চযনিরোধগামিনিং পটিপদং পজানাতি. অযং ৰুচ্চতি, ভিক্খৰে, অরিযসাৰকো দিট্ঠিসম্পন্নো ইতিপি, দস্সনসম্পন্নো ইতিপি, আগতো ইমং সদ্ধম্মং ইতিপি, পস্সতি ইমং সদ্ধম্মং ইতিপি, সেক্খেন ঞাণেন সমন্নাগতো ইতিপি, সেক্খায ৰিজ্জায সমন্নাগতো ইতিপি, ধম্মসোতং সমাপন্নো ইতিপি, অরিযো নিব্বেধিকপঞ্ঞো ইতিপি, অমতদ্ৰারং আহচ্চ তিট্ঠতি ইতিপী’’তি. সত্তমং.

৮. ভিক্খুসুত্তং

২৮. সাৰত্থিযং ৰিহরতি…পে… ‘‘তত্র খো…পে… ইধ, ভিক্খৰে, ভিক্খু জরামরণং পজানাতি, জরামরণসমুদযং পজানাতি, জরামরণনিরোধং পজানাতি, জরামরণনিরোধগামিনিং পটিপদং পজানাতি, জাতিং পজানাতি…পে… ভৰং পজানাতি… উপাদানং পজানাতি… তণ্হং ¶ পজানাতি… ৰেদনং পজানাতি… ফস্সং পজানাতি… সল়াযতনং পজানাতি… নামরূপং পজানাতি… ৰিঞ্ঞাণং পজানাতি… সঙ্খারে পজানাতি, সঙ্খারসমুদযং পজানাতি ¶ , সঙ্খারনিরোধং পজানাতি, সঙ্খারনিরোধগামিনিং পটিপদং পজানাতি.

‘‘কতমঞ্চ, ভিক্খৰে, জরামরণং? যা তেসং তেসং সত্তানং তম্হি তম্হি সত্তনিকাযে জরা জীরণতা খণ্ডিচ্চং পালিচ্চং ৰলিত্তচতা আযুনো সংহানি ইন্দ্রিযানং পরিপাকো – অযং ৰুচ্চতি জরা. যা তেসং তেসং সত্তানং তম্হা তম্হা সত্তনিকাযা চুতি চৰনতা ভেদো অন্তরধানং মচ্চু মরণং কালকিরিযা খন্ধানং ভেদো কল়েৰরস্স নিক্খেপো; ইদং ৰুচ্চতি ¶ মরণং. ইতি অযং চ জরা ইদঞ্চ মরণং. ইদং ৰুচ্চতি, ভিক্খৰে, জরামরণং. জাতিসমুদযা ¶ জরামরণসমুদযো; জাতিনিরোধা জরামরণনিরোধো. অযমেৰ অরিযো অট্ঠঙ্গিকো মগ্গো জরামরণনিরোধগামিনী পটিপদা. সেয্যথিদং – সম্মাদিট্ঠি…পে… সম্মাসমাধি.

‘‘কতমা চ, ভিক্খৰে, জাতি…পে… কতমো চ, ভিক্খৰে, ভৰো… কতমঞ্চ, ভিক্খৰে, উপাদানং… ৰেদনা… ফস্সো… সল়াযতনং… নামরূপং… ৰিঞ্ঞাণং….

‘‘কতমে চ, ভিক্খৰে, সঙ্খারা? তযোমে, ভিক্খৰে, সঙ্খারা – কাযসঙ্খারো, ৰচীসঙ্খারো, চিত্তসঙ্খারো. ইমে ৰুচ্চন্তি, ভিক্খৰে, সঙ্খারা. অৰিজ্জাসমুদযা সঙ্খারসমুদযো; অৰিজ্জানিরোধা সঙ্খারনিরোধো. অযমেৰ অরিযো অট্ঠঙ্গিকো মগ্গো সঙ্খারনিরোধগামিনী পটিপদা. সেয্যথিদং – সম্মাদিট্ঠি…পে… সম্মাসমাধি.

‘‘যতো খো, ভিক্খৰে, ভিক্খু এৰং জরামরণং পজানাতি, এৰং জরামরণসমুদযং পজানাতি, এৰং জরামরণনিরোধং ¶ পজানাতি, এৰং জরামরণনিরোধগামিনিং পটিপদং পজানাতি, এৰং জাতিং পজানাতি…পে… ভৰং… উপাদানং… তণ্হং… ৰেদনং… ফস্সং… সল়াযতনং… নামরূপং… ৰিঞ্ঞাণং ¶ … সঙ্খারে… সঙ্খারসমুদযং… সঙ্খারনিরোধং… এৰং সঙ্খারনিরোধগামিনিং পটিপদং পজানাতি. অযং ৰুচ্চতি, ভিক্খৰে, ভিক্খু দিট্ঠিসম্পন্নো ইতিপি, দস্সনসম্পন্নো ইতিপি, আগতো ইমং সদ্ধম্মং ইতিপি, পস্সতি ইমং সদ্ধম্মং ইতিপি, সেক্খেন ঞাণেন সমন্নাগতো ইতিপি, সেক্খায ৰিজ্জায সমন্নাগতো ইতিপি, ধম্মসোতং সমাপন্নো ইতিপি, অরিযো নিব্বেধিকপঞ্ঞো ইতিপি, অমতদ্ৰারং আহচ্চ তিট্ঠতি ইতিপী’’তি. অট্ঠমং.

৯. সমণব্রাহ্মণসুত্তং

২৯. সাৰত্থিযং ৰিহরতি…পে… ‘‘তত্র খো…পে… যে হি কেচি, ভিক্খৰে, সমণা ৰা ব্রাহ্মণা ¶ ৰা জরামরণং ন পরিজানন্তি, জরামরণসমুদযং ন পরিজানন্তি, জরামরণনিরোধং ন পরিজানন্তি, জরামরণনিরোধগামিনিং পটিপদং ন পরিজানন্তি, জাতিং ন পরিজানন্তি…পে… ভৰং… উপাদানং… তণ্হং… ৰেদনং… ফস্সং… সল়াযতনং… নামরূপং… ৰিঞ্ঞাণং… সঙ্খারে… সঙ্খারসমুদযং… সঙ্খারনিরোধং… সঙ্খারনিরোধগামিনিং পটিপদং ন পরিজানন্তি. ন মেতে, ভিক্খৰে, সমণা ৰা ব্রাহ্মণা ৰা সমণেসু ৰা সমণসম্মতা ব্রাহ্মণেসু ৰা ব্রাহ্মণসম্মতা. ন চ পনেতে ¶ আযস্মন্তো সামঞ্ঞত্থং ৰা ব্রহ্মঞ্ঞত্থং ৰা দিট্ঠেৰ ধম্মে ¶ সযং অভিঞ্ঞা সচ্ছিকত্ৰা উপসম্পজ্জ ৰিহরন্তি’’.

‘‘যে চ খো কেচি, ভিক্খৰে, সমণা ৰা ব্রাহ্মণা ৰা জরামরণং পরিজানন্তি, জরামরণসমুদযং পরিজানন্তি, জরামরণনিরোধং পরিজানন্তি, জরামরণনিরোধগামিনিং পটিপদং পরিজানন্তি, জাতিং পরিজানন্তি…পে… ভৰং… উপাদানং… তণ্হং… ৰেদনং… ফস্সং… সল়াযতনং… নামরূপং… ৰিঞ্ঞাণং… সঙ্খারে পরিজানন্তি ¶ , সঙ্খারসমুদযং পরিজানন্তি, সঙ্খারনিরোধং পরিজানন্তি, সঙ্খারনিরোধগামিনিং পটিপদং পরিজানন্তি. তে খো মে, ভিক্খৰে, সমণা ৰা ব্রাহ্মণা ৰা সমণেসু চেৰ সমণসম্মতা ব্রাহ্মণেসু চ ব্রাহ্মণসম্মতা. তে চ পনাযস্মন্তো সামঞ্ঞত্থঞ্চ ব্রহ্মঞ্ঞত্থঞ্চ দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. নৰমং.

১০. দুতিযসমণব্রাহ্মণসুত্তং

৩০. সাৰত্থিযং ৰিহরতি…পে… ‘‘তত্র খো…পে… যে হি কেচি, ভিক্খৰে, সমণা ৰা ব্রাহ্মণা ৰা জরামরণং নপ্পজানন্তি, জরামরণসমুদযং নপ্পজানন্তি, জরামরণনিরোধং নপ্পজানন্তি, জরামরণনিরোধগামিনিং পটিপদং নপ্পজানন্তি তে ৰত জরামরণং সমতিক্কম্ম ঠস্সন্তীতি নেতং ঠানং ৰিজ্জতি. জাতিং নপ্পজানন্তি…পে… ভৰং… উপাদানং… তণ্হং… ৰেদনং… ফস্সং… সল়াযতনং… নামরূপং… ৰিঞ্ঞাণং… সঙ্খারে নপ্পজানন্তি, সঙ্খারসমুদযং নপ্পজানন্তি, সঙ্খারনিরোধং নপ্পজানন্তি, সঙ্খারনিরোধগামিনিং পটিপদং নপ্পজানন্তি তে ৰত সঙ্খারে সমতিক্কম্ম ঠস্সন্তীতি নেতং ঠানং ৰিজ্জতি’’.

‘‘যে ¶ ¶ চ খো কেচি, ভিক্খৰে, সমণা ৰা ব্রাহ্মণা ৰা জরামরণং পজানন্তি, জরামরণসমুদযং পজানন্তি, জরামরণনিরোধং পজানন্তি, জরামরণনিরোধগামিনিং পটিপদং পজানন্তি তে ৰত জরামরণং সমতিক্কম্ম ঠস্সন্তীতি ঠানমেতং ৰিজ্জতি. জাতিং পজানন্তি…পে… ভৰং… উপাদানং… তণ্হং… ৰেদনং… ফস্সং… সল়াযতনং… নামরূপং… ৰিঞ্ঞাণং… সঙ্খারে পজানন্তি, সঙ্খারসমুদযং পজানন্তি, সঙ্খারনিরোধং পজানন্তি, সঙ্খারনিরোধগামিনিং পটিপদং পজানন্তি. তে ৰত সঙ্খারে সমতিক্কম্ম ঠস্সন্তীতি ঠানমেতং ৰিজ্জতী’’তি. দসমং.

দসবলৰগ্গো ¶ ততিযো.

তস্সুদ্দানং –

দ্ৰে ¶ দসবলা উপনিসা চ, অঞ্ঞতিত্থিযভূমিজো;

উপৰাণো পচ্চযো ভিক্খু, দ্ৰে চ সমণব্রাহ্মণাতি.

৪. কল়ারখত্তিযৰগ্গো

১. ভূতসুত্তং

৩১. একং ¶ সমযং ভগৰা সাৰত্থিযং ৰিহরতি. তত্র খো ভগৰা আযস্মন্তং সারিপুত্তং আমন্তেসি – ‘‘ৰুত্তমিদং, সারিপুত্ত, পারাযনে [পারাযণে (সী.)] অজিতপঞ্হে –

‘‘যে চ সঙ্খাতধম্মাসে, যে চ সেক্খা পুথূ ইধ;

তেসং মে নিপকো ইরিযং, পুট্ঠো পব্রূহি মারিসা’’তি.

‘‘ইমস্স নু খো, সারিপুত্ত, সংখিত্তেন ভাসিতস্স কথং ৰিত্থারেন অত্থো দট্ঠব্বো’’তি? এৰং ¶ ৰুত্তে, আযস্মা সারিপুত্তো তুণ্হী অহোসি. দুতিযম্পি খো ভগৰা আযস্মন্তং সারিপুত্তং আমন্তেসি…পে… দুতিযম্পি খো আযস্মা সারিপুত্তো তুণ্হী অহোসি. ততিযম্পি খো ভগৰা আযস্মন্তং সারিপুত্তং আমন্তেসি – ‘‘ৰুত্তমিদং, সারিপুত্ত, পারাযনে অজিতপঞ্হে –

‘‘যে চ সঙ্খাতধম্মাসে, যে চ সেক্খা পুথূ ইধ;

তেসং মে নিপকো ইরিযং, পুট্ঠো পব্রূহি মারিসা’’তি.

‘‘ইমস্স ¶ নু খো, সারিপুত্ত, সংখিত্তেন ভাসিতস্স কথং ৰিত্থারেন অত্থো দট্ঠব্বো’’তি? ততিযম্পি খো আযস্মা সারিপুত্তো তুণ্হী অহোসি.

‘‘ভূতমিদন্তি, সারিপুত্ত, পস্সসী’’তি? ভূতমিদন্তি, ভন্তে, যথাভূতং ¶ সম্মপ্পঞ্ঞায পস্সতি. ভূতমিদন্তি যথাভূতং সম্মপ্পঞ্ঞায দিস্ৰা ভূতস্স নিব্বিদায ৰিরাগায নিরোধায পটিপন্নো হোতি. তদাহারসম্ভৰন্তি যথাভূতং সম্মপ্পঞ্ঞায পস্সতি. তদাহারসম্ভৰন্তি যথাভূতং সম্মপ্পঞ্ঞায দিস্ৰা আহারসম্ভৰস্স নিব্বিদায ৰিরাগায নিরোধায পটিপন্নো ¶ হোতি. তদাহারনিরোধা যং ভূতং তং নিরোধধম্মন্তি যথাভূতং সম্মপ্পঞ্ঞায পস্সতি. তদাহারনিরোধা যং ভূতং তং নিরোধধম্মন্তি যথাভূতং সম্মপ্পঞ্ঞায দিস্ৰা নিরোধধম্মস্স নিব্বিদায ৰিরাগায নিরোধায পটিপন্নো হোতি. এৰং খো, ভন্তে, সেক্খো হোতি.

‘‘কথঞ্চ, ভন্তে, সঙ্খাতধম্মো হোতি? ভূতমিদন্তি, ভন্তে, যথাভূতং সম্মপ্পঞ্ঞায পস্সতি. ভূতমিদন্তি যথাভূতং সম্মপ্পঞ্ঞায দিস্ৰা ভূতস্স নিব্বিদা ৰিরাগা নিরোধা অনুপাদা ৰিমুত্তো হোতি. তদাহারসম্ভৰন্তি যথাভূতং সম্মপ্পঞ্ঞায পস্সতি. তদাহারসম্ভৰন্তি যথাভূতং সম্মপ্পঞ্ঞায দিস্ৰা আহারসম্ভৰস্স নিব্বিদা ৰিরাগা নিরোধা অনুপাদা ৰিমুত্তো হোতি. তদাহারনিরোধা যং ভূতং তং নিরোধধম্মন্তি যথাভূতং সম্মপ্পঞ্ঞায পস্সতি. তদাহারনিরোধা যং ভূতং তং নিরোধধম্মন্তি যথাভূতং সম্মপ্পঞ্ঞায দিস্ৰা নিরোধধম্মস্স নিব্বিদা ৰিরাগা নিরোধা ¶ অনুপাদা ৰিমুত্তো হোতি. এৰং খো, ভন্তে, সঙ্খাতধম্মো হোতি. ইতি খো, ভন্তে, যং তং ৰুত্তং পারাযনে অজিতপঞ্হে –

‘‘যে ¶ ¶ চ সঙ্খাতধম্মাসে, যে চ সেক্খা পুথূ ইধ;

তেসং মে নিপকো ইরিযং, পুট্ঠো পব্রূহি মারিসা’’তি.

‘‘ইমস্স খ্ৰাহং, ভন্তে, সংখিত্তেন ভাসিতস্স এৰং ৰিত্থারেন অত্থং আজানামী’’তি.

‘‘সাধু সাধু, সারিপুত্ত, ভূতমিদন্তি, সারিপুত্ত, যথাভূতং সম্মপ্পঞ্ঞায পস্সতি. ভূতমিদন্তি যথাভূতং সম্মপ্পঞ্ঞায দিস্ৰা ভূতস্স নিব্বিদায ৰিরাগায নিরোধায পটিপ্পন্নো হোতি. তদাহারসম্ভৰন্তি যথাভূতং সম্মপ্পঞ্ঞায পস্সতি. তদাহারসম্ভৰন্তি যথাভূতং সম্মপ্পঞ্ঞায দিস্ৰা আহারসম্ভৰস্স নিব্বিদায ৰিরাগায নিরোধায পটিপন্নো হোতি. তদাহারনিরোধা যং ভূতং নিরোধধম্মন্তি যথাভূতং সম্মপ্পঞ্ঞায পস্সতি. তদাহারনিরোধা যং ভূতং তং নিরোধধম্মন্তি যথাভূতং সম্মপ্পঞ্ঞায দিস্ৰা নিরোধধম্মস্স নিব্বিদায ৰিরাগায নিরোধায পটিপন্নো হোতি. এৰং খো, সারিপুত্ত, সেক্খো হোতি.

‘‘কথঞ্চ, সারিপুত্ত, সঙ্খাতধম্মো হোতি? ভূতমিদন্তি, সারিপুত্ত, যথাভূতং সম্মপ্পঞ্ঞায পস্সতি. ভূতমিদন্তি যথাভূতং সম্মপ্পঞ্ঞায দিস্ৰা ¶ ভূতস্স নিব্বিদা ৰিরাগা নিরোধা অনুপাদা ৰিমুত্তো হোতি. তদাহারসম্ভৰন্তি যথাভূতং সম্মপ্পঞ্ঞায পস্সতি. তদাহারসম্ভৰন্তি যথাভূতং সম্মপ্পঞ্ঞায দিস্ৰা আহারসম্ভৰস্স নিব্বিদা ৰিরাগা নিরোধা অনুপাদা ৰিমুত্তো হোতি. তদাহারনিরোধা যং ভূতং তং নিরোধধম্মন্তি যথাভূতং সম্মপ্পঞ্ঞায পস্সতি. তদাহারনিরোধা ¶ যং ভূতং তং নিরোধধম্মন্তি যথাভূতং সম্মপ্পঞ্ঞা ¶ দিস্ৰা নিরোধধম্মস্স নিব্বিদা ৰিরাগা নিরোধা অনুপাদা ৰিমুত্তো হোতি. এৰং খো, সারিপুত্ত, সঙ্খাতধম্মো হোতি. ইতি খো, সারিপুত্ত, যং তং ৰুত্তং পারাযনে অজিতপঞ্হে –

‘‘যে চ সঙ্খাতধম্মাসে, যে চ সেক্খা পুথূ ইধ;

তেসং মে নিপকো ইরিযং, পুট্ঠো পব্রূহি মারিসা’’তি.

‘‘ইমস্স খো সারিপুত্ত সংখিত্তেন ভাসিতস্স এৰং ৰিত্থারেন অত্থো দট্ঠব্বো’’তি. পঠমং.

২. কল়ারসুত্তং

৩২. সাৰত্থিযং ¶ ৰিহরতি. অথ খো কল়ারখত্তিযো ভিক্খু যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো কল়ারখত্তিযো ভিক্খু আযস্মন্তং সারিপুত্তং এতদৰোচ – ‘‘মোল়িযফগ্গুনো, আৰুসো সারিপুত্ত, ভিক্খু সিক্খং পচ্চক্খায হীনাযাৰত্তোতি. ন হি নূন সো আযস্মা ইমস্মিং ধম্মৰিনযে অস্সাসমলত্থাতি. তেন হাযস্মা সারিপুত্তো ইমস্মিং ধম্মৰিনযে অস্সাসং পত্তো’’তি?

‘‘ন খ্ৰাহং, আৰুসো, কঙ্খামী’’তি. ‘‘আযতিং, পনাৰুসো’’তি?

‘‘ন খ্ৰাহং, আৰুসো, ৰিচিকিচ্ছামী’’তি.

অথ খো কল়ারখত্তিযো ভিক্খু উট্ঠাযাসনা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি ¶ . একমন্তং নিসিন্নো খো কল়ারখত্তিযো ভিক্খু ভগৰন্তং ¶ এতদৰোচ – ‘‘আযস্মতা, ভন্তে, সারিপুত্তেন অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি.

অথ খো ভগৰা অঞ্ঞতরং ভিক্খুং আমন্তেসি – ‘‘এহি ত্ৰং, ভিক্খু, মম ৰচনেন সারিপুত্তং আমন্তেহি – ‘সত্থা তং, আৰুসো সারিপুত্ত, আমন্তেতী’’’তি ¶ . ‘‘এৰং, ভন্তে’’তি খো সো ভিক্খু ভগৰতো পটিস্সুত্ৰা যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মন্তং সারিপুত্তং এতদৰোচ – ‘‘সত্থা তং, আৰুসো সারিপুত্ত, আমন্তেতী’’তি. ‘‘এৰং, আৰুসো’’তি খো আযস্মা সারিপুত্তো তস্স ভিক্খুনো পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং সারিপুত্তং ভগৰা এতদৰোচ – ‘‘সচ্চং কির তযা, সারিপুত্ত, অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি? ‘‘ন খো, ভন্তে, এতেহি পদেহি এতেহি ব্যঞ্জনেহি অত্থো [অত্থো চ (স্যা. কং. ক.)] ৰুত্তো’’তি. ‘‘যেন কেনচিপি, সারিপুত্ত, পরিযাযেন কুলপুত্তো অঞ্ঞং ব্যাকরোতি, অথ খো ব্যাকতং ব্যাকততো দট্ঠব্ব’’ন্তি. ‘‘ননু অহম্পি ¶ , ভন্তে, এৰং ৰদামি – ‘ন খো, ভন্তে, এতেহি পদেহি এতেহি ব্যঞ্জনেহি অত্থো ৰুত্তো’’’তি.

‘‘সচে তং, সারিপুত্ত, এৰং পুচ্ছেয্যুং – ‘কথং জানতা পন তযা, আৰুসো সারিপুত্ত, কথং পস্সতা অঞ্ঞা ¶ ব্যাকতা – খীণা জাতি ৰুসিতং ব্রহ্মচরিযং কতং করণীযং নাপরং ইত্থত্তাযাতি পজানামী’তি. এৰং পুট্ঠো ত্ৰং, সারিপুত্ত, কিন্তি ব্যাকরেয্যাসী’’তি?

‘‘সচে মং, ভন্তে, এৰং পুচ্ছেয্যুং – ‘কথং জানতা পন তযা, আৰুসো সারিপুত্ত, কথং পস্সতা অঞ্ঞা ব্যাকতা – খীণা ¶ জাতি ৰুসিতং ব্রহ্মচরিযং কতং করণীযং নাপরং ইত্থত্তাযাতি পজানামী’তি; এৰং পুট্ঠোহং [পুট্ঠো অহং (স্যা. কং.), পুট্ঠাহং (পী. ক.)], ভন্তে, এৰং ব্যাকরেয্যং – ‘যংনিদানা, আৰুসো, জাতি, তস্স নিদানস্স খযা খীণস্মিং খীণাম্হীতি ৰিদিতং. খীণাম্হীতি ৰিদিত্ৰা – খীণাজাতি ৰুসিতং ব্রহ্মচরিযং কতং করণীযং নাপরং ইত্থত্তাযাতি পজানামী’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সচে পন তং, সারিপুত্ত, এৰং পুচ্ছেয্যুং – ‘জাতি পনাৰুসো সারিপুত্ত, কিংনিদানা কিংসমুদযা কিংজাতিকা কিংপভৰা’তি? এৰং পুট্ঠো তং, সারিপুত্ত, কিন্তি ব্যাকরেয্যাসী’’তি? ‘‘সচে মং, ভন্তে, এৰং পুচ্ছেয্যুং – ‘জাতি পনাৰুসো সারিপুত্ত, কিংনিদানা কিংসমুদযা কিংজাতিকা কিংপভৰা’তি? এৰং পুট্ঠোহং, ভন্তে, এৰং ব্যাকরেয্যং – ‘জাতি খো, আৰুসো, ভৰনিদানা ভৰসমুদযা ¶ ভৰজাতিকা ভৰপ্পভৰা’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সচে পন তং, সারিপুত্ত, এৰং পুচ্ছেয্যুং – ‘ভৰো পনাৰুসো সারিপুত্ত, কিংনিদানো কিংসমুদযো কিংজাতিকো কিংপভৰো’তি? এৰং পুট্ঠো ত্ৰং, সারিপুত্ত, কিন্তি ব্যাকরেয্যাসী’’তি? ‘‘সচে মং, ভন্তে, এৰং পুচ্ছেয্যুং – ‘ভৰো পনাৰুসো সারিপুত্ত, কিংনিদানো কিংসমুদযো কিংজাতিকো কিংপভৰো’তি ¶ ? এৰং পুট্ঠোহং, ভন্তে, এৰং ব্যাকরেয্যং – ‘ভৰো খো, আৰুসো, উপাদাননিদানো উপাদানসমুদযো উপাদানজাতিকো উপাদানপ্পভৰো’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সচে ¶ পন তং, সারিপুত্ত, এৰং পুচ্ছেয্যুং – ‘উপাদানং পনাৰুসো…পে… সচে পন তং, সারিপুত্ত, এৰং পুচ্ছেয্যুং – তণ্হা পনাৰুসো সারিপুত্ত, কিংনিদানা কিংসমুদযা কিংজাতিকা কিংপভৰা’তি? এৰং পুট্ঠো ত্ৰং, সারিপুত্ত, কিন্তি ব্যাকরেয্যাসী’’তি? ‘‘সচে ¶ মং, ভন্তে, এৰং পুচ্ছেয্যুং – তণ্হা পনাৰুসো সারিপুত্ত, কিংনিদানা কিংসমুদযা কিংজাতিকা কিংপভৰা’তি? এৰং পুট্ঠোহং, ভন্তে, এৰং ব্যাকরেয্যং – ‘তণ্হা খো, আৰুসো, ৰেদনানিদানা ৰেদনাসমুদযা ৰেদনাজাতিকা ৰেদনাপভৰা’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সচে ¶ পন তং, সারিপুত্ত, এৰং পুচ্ছেয্যুং – ‘কথং জানতো পন তে, আৰুসো সারিপুত্ত, কথং পস্সতো যা ৰেদনাসু নন্দী সা ন উপট্ঠাসী’তি. এৰং পুট্ঠো ত্ৰং, সারিপুত্ত, কিন্তি ব্যাকরেয্যাসী’’তি? ‘‘সচে মং, ভন্তে, এৰং পুচ্ছেয্যুং – ‘কথং জানতো পন তে, আৰুসো সারিপুত্ত, কথং পস্সতো যা ৰেদনাসু নন্দী সা ন উপট্ঠাসী’তি এৰং পুট্ঠোহং, ভন্তে, এৰং ব্যাকরেয্যং – ‘তিস্সো খো ইমা, আৰুসো, ৰেদনা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা. ইমা খো, আৰুসো, তিস্সো ৰেদনা অনিচ্চা. যদনিচ্চং তং দুক্খন্তি ৰিদিতং [ৰিদিতা (টীকা)], যা ৰেদনাসু নন্দী সা ন উপট্ঠাসী’তি. এৰং, পুট্ঠোহং, ভন্তে, এৰং ব্যাকরেয্য’’ন্তি.

‘‘সাধু সাধু, সারিপুত্ত. অযম্পি খো, সারিপুত্ত, পরিযাযো, এতস্সেৰ অত্থস্স সংখিত্তেন ৰেয্যাকরণায – ‘যং কিঞ্চি ৰেদযিতং তং দুক্খস্মি’’’ন্তি.

‘‘সচে ¶ পন তং, সারিপুত্ত, এৰং পুচ্ছেয্যুং – ‘কথং ৰিমোক্খা পন তযা, আৰুসো সারিপুত্ত, অঞ্ঞা ব্যাকতা – খীণা জাতি ৰুসিতং ব্রহ্মচরিযং কতং করণীযং নাপরং ইত্থত্তাযাতি পজানামী’তি? এৰং পুট্ঠো ত্ৰং, সারিপুত্ত, কিন্তি ব্যাকরেয্যাসী’’তি? ‘‘সচে মং, ভন্তে, এৰং পুচ্ছেয্যুং – ‘কথং ৰিমোক্খা পন তযা, আৰুসো সারিপুত্ত, অঞ্ঞা ব্যাকতা ¶ – খীণা জাতি ৰুসিতং ব্রহ্মচরিযং কতং করণীযং নাপরং ইত্থত্তাযাতি পজানামী’তি. এৰং পুট্ঠোহং, ভন্তে, এৰং ব্যাকরেয্যং – ‘অজ্ঝত্তং ¶ ৰিমোক্খা খ্ৰাহং, আৰুসো, সব্বুপাদানক্খযা তথা সতো ৰিহরামি যথা সতং ৰিহরন্তং আসৰা নানুস্সৰন্তি, অত্তানঞ্চ নাৰজানামী’তি. এৰং পুট্ঠোহং, ভন্তে, এৰং ব্যাকরেয্য’’ন্তি.

‘‘সাধু ¶ সাধু, সারিপুত্ত. অযম্পি খো সারিপুত্ত, পরিযাযো এতস্সেৰ অত্থস্স সংখিত্তেন ৰেয্যাকরণায – যে আসৰা সমণেন ৰুত্তা তেস্ৰাহং ন কঙ্খামি, তে মে পহীনাতি ন ৰিচিকিচ্ছামী’’তি. ইদমৰোচ ভগৰা. ইদং ৰত্ৰা সুগতো উট্ঠাযাসনা ৰিহারং পাৰিসি.

তত্র খো আযস্মা সারিপুত্তো অচিরপক্কন্তস্স ভগৰতো ভিক্খূ আমন্তেসি – ‘‘পুব্বে অপ্পটিসংৰিদিতং মং, আৰুসো, ভগৰা পঠমং পঞ্হং অপুচ্ছি, তস্স মে অহোসি দন্ধাযিতত্তং. যতো চ খো মে, আৰুসো, ভগৰা পঠমং পঞ্হং অনুমোদি, তস্স ময্হং, আৰুসো, এতদহোসি – দিৰসং চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, দিৰসম্পাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি. রত্তিং চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, রত্তিম্পাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি. রত্তিন্দিৰং [রত্তিদিৰং (ক.)] চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি ¶ , রত্তিন্দিৰম্পাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি. দ্ৰে ¶ রত্তিন্দিৰানি চেপি মং ভগৰা এতমত্থং পুচ্ছেয্য…পে… দ্ৰে রত্তিন্দিৰানিপাহং ভগৰতো এতমত্থং ব্যাকরেয্যং…পে… তীণি রত্তিন্দিৰানি চেপি মং ভগৰা এতমত্থং পুচ্ছেয্য…পে… তীণি রত্তিন্দিৰানিপাহং ভগৰতো এতমত্থং ব্যাকরেয্যং…পে… চত্তারি রত্তিন্দিৰানি চেপি মং ভগৰা এতমত্থং পুচ্ছেয্য…পে… চত্তারি রত্তিন্দিৰানিপাহং ¶ ভগৰতো এতমত্থং ব্যাকরেয্যং…পে… পঞ্চ রত্তিন্দিৰানি চেপি মং ভগৰা এতমত্থং পুচ্ছেয্য…পে… পঞ্চ রত্তিন্দিৰানিপাহং ভগৰতো এতমত্থং ব্যাকরেয্যং…পে… ছ রত্তিন্দিৰানি চেপি মং ভগৰা এতমত্থং পুচ্ছেয্য…পে… ছ রত্তিন্দিৰানিপাহং ভগৰতো এতমত্থং ব্যাকরেয্যং…পে… সত্ত রত্তিন্দিৰানি চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, সত্ত রত্তিন্দিৰানিপাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহী’’তি.

অথ খো কল়ারখত্তিযো ভিক্খু উট্ঠাযাসনা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো কল়ারখত্তিযো ভিক্খু ভগৰন্তং এতদৰোচ – ‘‘আযস্মতা, ভন্তে, সারিপুত্তেন সীহনাদো নদিতো – পুব্বে অপ্পটিসংৰিদিতং মং, আৰুসো, ভগৰা পঠমং পঞ্হং অপুচ্ছি, তস্স মে অহোসি দন্ধাযিতত্তং. যতো ¶ চ খো মে, আৰুসো, ভগৰা পঠমং পঞ্হং অনুমোদি ¶ , তস্স ময্হং, আৰুসো, এতদহোসি – দিৰসং চেপি মং ভগৰা এতমত্থং পুচ্ছেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, দিৰসম্পাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি; রত্তিং চেপি…পে… রত্তিন্দিৰং চেপি মং ভগৰা…পে… দ্ৰে রত্তিন্দিৰানি চেপি মং ভগৰা…পে… তীণি… চত্তারি… পঞ্চ… ছ… সত্ত রত্তিন্দিৰানি চেপি মং ভগৰা এতমত্থং পুচ্ছেয্য ¶ অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, সত্ত রত্তিন্দিৰানিপাহং ভগৰতো এতমত্থং ব্যাকরেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহী’’তি.

‘‘সা হি, ভিক্খু, সারিপুত্তস্স ধম্মধাতু সুপ্পটিৰিদ্ধা, যস্সা ধম্মধাতুযা সুপ্পটিৰিদ্ধত্তা দিৰসং চেপাহং সারিপুত্তং এতমত্থং পুচ্ছেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, দিৰসম্পি মে সারিপুত্তো এতমত্থং ব্যাকরেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি. রত্তিং চেপাহং সারিপুত্তং এতমত্থং পুচ্ছেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, রত্তিম্পি মে সারিপুত্তো এতমত্থং ব্যাকরেয্য…পে… রত্তিন্দিৰং চেপাহং সারিপুত্তং এতমত্থং পুচ্ছেয্যং, রত্তিন্দিৰম্পি মে সারিপুত্তো এতমত্থং ব্যাকরেয্য… দ্ৰে রত্তিন্দিৰানি চেপাহং সারিপুত্তং এতমত্থং পুচ্ছেয্যং, দ্ৰে রত্তিন্দিৰানিপি মে সারিপুত্তো এতমত্থং ব্যাকরেয্য… তীণি রত্তিন্দিৰানি চেপাহং সারিপুত্তং এতমত্থং পুচ্ছেয্যং, তীণি রত্তিন্দিৰানিপি ¶ মে সারিপুত্তো এতমত্থং ¶ ব্যাকরেয্য… চত্তারি রত্তিন্দিৰানি চেপাহং সারিপুত্তং এতমত্থং পুচ্ছেয্যং, চত্তারি রত্তিন্দিৰানিপি মে সারিপুত্তো এতমত্থং ব্যাকরেয্য… পঞ্চ রত্তিন্দিৰানি চেপাহং সারিপুত্তং এতমত্থং পুচ্ছেয্যং, পঞ্চ রত্তিন্দিৰানিপি মে সারিপুত্তো এতমত্থং ব্যাকরেয্য… ছ রত্তিন্দিৰানি চেপাহং সারিপুত্তং এতমত্থং পুচ্ছেয্যং, ছ রত্তিন্দিৰানিপি মে সারিপুত্তো এতমত্থং ব্যাকরেয্য… সত্ত রত্তিন্দিৰানি চেপাহং সারিপুত্তং এতমত্থং পুচ্ছেয্যং অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহি, সত্ত রত্তিন্দিৰানিপি মে সারিপুত্তো এতমত্থং ব্যাকরেয্য অঞ্ঞমঞ্ঞেহি পদেহি অঞ্ঞমঞ্ঞেহি পরিযাযেহী’’তি. দুতিযং.

৩. ঞাণৰত্থুসুত্তং

৩৩. সাৰত্থিযং…পে… ‘‘চতুচত্তারীসং ৰো, ভিক্খৰে, ঞাণৰত্থূনি দেসেস্সামি, তং সুণাথ, সাধুকং ¶ মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমানি [কতমানি চ (স্যা. কং. পী. ক.)], ভিক্খৰে, চতুচত্তারীসং ঞাণৰত্থূনি? জরামরণে ¶ ঞাণং, জরামরণসমুদযে ঞাণং, জরামরণনিরোধে ঞাণং, জরামরণনিরোধগামিনিযা পটিপদায ঞাণং; জাতিযা ঞাণং, জাতিসমুদযে ঞাণং, জাতিনিরোধে ঞাণং, জাতিনিরোধগামিনিযা পটিপদায ঞাণং; ভৰে ঞাণং, ভৰসমুদযে ঞাণং, ভৰনিরোধে ঞাণং, ভৰনিরোধগামিনিযা পটিপদায ঞাণং; উপাদানে ঞাণং, উপাদানসমুদযে ঞাণং, উপাদাননিরোধে ঞাণং, উপাদাননিরোধগামিনিযা পটিপদায ¶ ঞাণং; তণ্হায ঞাণং, তণ্হাসমুদযে ঞাণং, তণ্হানিরোধে ঞাণং, তণ্হানিরোধগামিনিযা পটিপদায ঞাণং; ৰেদনায ঞাণং, ৰেদনাসমুদযে ঞাণং, ৰেদনানিরোধে ঞাণং, ৰেদনানিরোধগামিনিযা পটিপদায ঞাণং; ফস্সে ঞাণং…পে… সল়াযতনে ঞাণং… নামরূপে ঞাণং… ৰিঞ্ঞাণে ঞাণং… সঙ্খারেসু ঞাণং, সঙ্খারসমুদযে ঞাণং, সঙ্খারনিরোধে ঞাণং, সঙ্খারনিরোধগামিনিযা পটিপদায ঞাণং. ইমানি ৰুচ্চন্তি, ভিক্খৰে, চতুচত্তারীসং ঞাণৰত্থূনি.

‘‘কতমঞ্চ, ভিক্খৰে, জরামরণং? যা তেসং তেসং সত্তানং তম্হি তম্হি সত্তনিকাযে জরা জীরণতা খণ্ডিচ্চং পালিচ্চং ৰলিত্তচতা আযুনো সংহানি ¶ ইন্দ্রিযানং পরিপাকো, অযং ৰুচ্চতি জরা. যা তেসং তেসং সত্তানং তম্হা তম্হা সত্তনিকাযা চুতি চৰনতা ভেদো অন্তরধানং মচ্চু মরণং কালকিরিযা খন্ধানং ভেদো কল়েৰরস্স নিক্খেপো. ইদং ৰুচ্চতি মরণং. ইতি অযঞ্চ জরা, ইদঞ্চ মরণং; ইদং ৰুচ্চতি, ভিক্খৰে, জরামরণং.

‘‘জাতিসমুদযা জরামরণসমুদযো; জাতিনিরোধা জরামরণনিরোধো; অযমেৰ অরিযো অট্ঠঙ্গিকো মগ্গো জরামরণনিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, ভিক্খৰে, অরিযসাৰকো এৰং জরামরণং পজানাতি, এৰং জরামরণসমুদযং পজানাতি, এৰং জরামরণনিরোধং ¶ পজানাতি, এৰং জরামরণনিরোধগামিনিং পটিপদং পজানাতি, ইদমস্স ধম্মে ঞাণং ¶ . সো ইমিনা ধম্মেন দিট্ঠেন ৰিদিতেন অকালিকেন পত্তেন পরিযোগাল়্হেন অতীতানাগতেন যং নেতি.

‘‘যে ¶ খো কেচি অতীতমদ্ধানং সমণা ৰা ব্রাহ্মণা ৰা জরামরণং অব্ভঞ্ঞংসু, জরামরণসমুদযং অব্ভঞ্ঞংসু, জরামরণনিরোধং অব্ভঞ্ঞংসু, জরামরণনিরোধগামিনিং পটিপদং অব্ভঞ্ঞংসু, সব্বে তে এৰমেৰ অব্ভঞ্ঞংসু, সেয্যথাপাহং এতরহি.

‘‘যেপি হি কেচি অনাগতমদ্ধানং সমণা ৰা ব্রাহ্মণা ৰা জরামরণং অভিজানিস্সন্তি, জরামরণসমুদযং অভিজানিস্সন্তি, জরামরণনিরোধং অভিজানিস্সন্তি, জরামরণনিরোধগামিনিং পটিপদং অভিজানিস্সন্তি, সব্বে তে এৰমেৰ অভিজানিস্সন্তি, সেয্যথাপাহং এতরহীতি. ইদমস্স অন্ৰযে ঞাণং.

‘‘যতো খো, ভিক্খৰে, অরিযসাৰকস্স ইমানি দ্ৰে ঞাণানি পরিসুদ্ধানি হোন্তি পরিযোদাতানি – ধম্মে ঞাণঞ্চ অন্ৰযে ঞাণঞ্চ. অযং ৰুচ্চতি, ভিক্খৰে, অরিযসাৰকো দিট্ঠিসম্পন্নো ইতিপি, দস্সনসম্পন্নো ইতিপি, আগতো ইমং সদ্ধম্মং ইতিপি, পস্সতি ইমং সদ্ধম্মং ইতিপি, সেক্খেন ঞাণেন সমন্নাগতো ইতিপি, সেক্খায ৰিজ্জায সমন্নাগতো ইতিপি, ধম্মসোতং সমাপন্নো ইতিপি, অরিযো নিব্বেধিকপঞ্ঞো ইতিপি, অমতদ্ৰারং আহচ্চ তিট্ঠতি ইতিপীতি.

‘‘কতমা চ, ভিক্খৰে, জাতি…পে… কতমো চ, ভিক্খৰে, ভৰো… কতমঞ্চ, ভিক্খৰে, উপাদানং… কতমা চ, ভিক্খৰে তণ্হা… কতমা চ, ভিক্খৰে, ৰেদনা… কতমো চ, ভিক্খৰে, ফস্সো… কতমঞ্চ, ভিক্খৰে ¶ , সল়াযতনং… কতমঞ্চ, ভিক্খৰে, নামরূপং ¶ … কতমঞ্চ, ভিক্খৰে, ৰিঞ্ঞাণং… কতমে চ, ভিক্খৰে, সঙ্খারা? তযোমে, ভিক্খৰে ¶ , সঙ্খারা – কাযসঙ্খারো, ৰচীসঙ্খারো, চিত্তসঙ্খারোতি. ইমে ৰুচ্চন্তি, ভিক্খৰে, সঙ্খারা.

‘‘অৰিজ্জাসমুদযা সঙ্খারসমুদযো; অৰিজ্জানিরোধা সঙ্খারনিরোধো; অযমেৰ অরিযো অট্ঠঙ্গিকো মগ্গো সঙ্খারনিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি.

‘‘যতো খো, ভিক্খৰে, অরিযসাৰকো এৰং সঙ্খারে পজানাতি, এৰং সঙ্খারসমুদযং পজানাতি ¶ , এৰং সঙ্খারনিরোধং পজানাতি, এৰং সঙ্খারনিরোধগামিনিং পটিপদং পজানাতি, ইদমস্স ধম্মে ঞাণং. সো ইমিনা ধম্মেন দিট্ঠেন ৰিদিতেন অকালিকেন পত্তেন পরিযোগাল়্হেন অতীতানাগতেন যং নেতি.

‘‘যে খো কেচি অতীতমদ্ধানং সমণা ৰা ব্রাহ্মণা ৰা সঙ্খারে অব্ভঞ্ঞংসু, সঙ্খারসমুদযং অব্ভঞ্ঞংসু, সঙ্খারনিরোধং অব্ভঞ্ঞংসু, সঙ্খারনিরোধগামিনিং পটিপদং অব্ভঞ্ঞংসু, সব্বে তে এৰমেৰ অব্ভঞ্ঞংসু, সেয্যথাপাহং এতরহি.

‘‘যেপি হি কেচি অনাগতমদ্ধানং সমণা ৰা ব্রাহ্মণা ৰা সঙ্খারে অভিজানিস্সন্তি, সঙ্খারসমুদযং অভিজানিস্সন্তি, সঙ্খারনিরোধং অভিজানিস্সন্তি, সঙ্খারনিরোধগামিনিং পটিপদং অভিজানিস্সন্তি, সব্বে তে এৰমেৰ অভিজানিস্সন্তি, সেয্যথাপাহং এতরহি. ইদমস্স অন্ৰযে ঞাণং.

‘‘যতো খো, ভিক্খৰে, অরিযসাৰকস্স ইমানি দ্ৰে ঞাণানি পরিসুদ্ধানি ¶ হোন্তি পরিযোদাতানি – ধম্মে ঞাণঞ্চ অন্ৰযে ঞাণঞ্চ. অযং ৰুচ্চতি, ভিক্খৰে, অরিযসাৰকো দিট্ঠিসম্পন্নো ইতিপি, দস্সনসম্পন্নো ইতিপি, আগতো ইমং সদ্ধম্মং ইতিপি, পস্সতি ইমং সদ্ধম্মং ইতিপি, সেক্খেন ঞাণেন সমন্নাগতো ইতিপি, সেক্খায ৰিজ্জায সমন্নাগতো ইতিপি, ধম্মসোতং সমাপন্নো ইতিপি, অরিযো নিব্বেধিকপঞ্ঞো ইতিপি, অমতদ্ৰারং আহচ্চ তিট্ঠতি ইতিপী’’তি. ততিযং.

৪. দুতিযঞাণৰত্থুসুত্তং

৩৪. সাৰত্থিযং ৰিহরতি…পে… ‘‘সত্তসত্তরি ৰো, ভিক্খৰে, ঞাণৰত্থূনি দেসেস্সামি. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমানি ¶ ¶ , ভিক্খৰে, সত্তসত্তরি ঞাণৰত্থূনি? জাতিপচ্চযা জরামরণন্তি ঞাণং ¶ ; অসতি জাতিযা নত্থি জরামরণন্তি ঞাণং; অতীতম্পি অদ্ধানং জাতিপচ্চযা জরামরণন্তি ঞাণং, অসতি জাতিযা নত্থি জরামরণন্তি ঞাণং; অনাগতম্পি অদ্ধানং জাতিপচ্চযা জরামরণন্তি ঞাণং, অসতি জাতিযা নত্থি জরামরণন্তি ঞাণং; যম্পিস্স তং ধম্মট্ঠিতিঞাণং তম্পি খযধম্মং ৰযধম্মং ৰিরাগধম্মং নিরোধধম্মন্তি ঞাণং.

‘‘ভৰপচ্চযা জাতীতি ঞাণং…পে… উপাদানপচ্চযা ভৰোতি ঞাণং… তণ্হাপচ্চযা উপাদানন্তি ঞাণং… ৰেদনাপচ্চযা তণ্হাতি ঞাণং… ফস্সপচ্চযা ৰেদনাতি ঞাণং… সল়াযতনপচ্চযা ফস্সোতি ঞাণং… নামরূপপচ্চযা ¶ সল়াযতনন্তি ঞাণং… ৰিঞ্ঞাণপচ্চযা নামরূপন্তি ঞাণং… সঙ্খারপচ্চযা ৰিঞ্ঞাণন্তি ঞাণং; অৰিজ্জাপচ্চযা সঙ্খারাতি ঞাণং, অসতি অৰিজ্জায নত্থি সঙ্খারাতি ঞাণং; অতীতম্পি অদ্ধানং অৰিজ্জাপচ্চযা সঙ্খারাতি ঞাণং, অসতি অৰিজ্জায নত্থি সঙ্খারাতি ঞাণং; অনাগতম্পি অদ্ধানং অৰিজ্জাপচ্চযা সঙ্খারাতি ঞাণং, অসতি অৰিজ্জায নত্থি সঙ্খারাতি ঞাণং; যম্পিস্স তং ধম্মট্ঠিতিঞাণং তম্পি খযধম্মং ৰযধম্মং ৰিরাগধম্মং নিরোধধম্মন্তি ঞাণং. ইমানি ৰুচ্চন্তি, ভিক্খৰে, সত্তসত্তরি ঞাণৰত্থূনী’’তি. চতুত্থং.

৫. অৰিজ্জাপচ্চযসুত্তং

৩৫. সাৰত্থিযং ৰিহরতি…পে… ‘‘অৰিজ্জাপচ্চযা, ভিক্খৰে, সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতী’’তি. এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘‘কতমং নু খো, ভন্তে, জরামরণং, কস্স চ পনিদং জরামরণ’ন্তি? ‘নো কল্লো পঞ্হো’তি ভগৰা অৰোচ, ‘কতমং জরামরণং ¶ , কস্স চ পনিদং জরামরণ’ন্তি ইতি ৰা, ভিক্খু, যো ৰদেয্য, ‘অঞ্ঞং জরামরণং অঞ্ঞস্স চ পনিদং জরামরণ’ন্তি, ইতি ৰা, ভিক্খু, যো ৰদেয্য, উভযমেতং একত্থং ব্যঞ্জনমেৰ নানং. তং জীৰং তং সরীরন্তি ৰা, ভিক্খু, দিট্ঠিযা সতি ব্রহ্মচরিযৰাসো ন হোতি. অঞ্ঞং জীৰং অঞ্ঞং সরীরন্তি ৰা, ভিক্খু ¶ , দিট্ঠিযা সতি ব্রহ্মচরিযৰাসো ন হোতি. এতে ¶ তে, ভিক্খু, উভো অন্তে অনুপগম্ম মজ্ঝেন তথাগতো ধম্মং দেসেতি – ‘জাতিপচ্চযা জরামরণ’’’ন্তি.

‘‘কতমা নু খো, ভন্তে, জাতি, কস্স চ পনাযং জাতী’’তি? ‘‘নো কল্লো পঞ্হো’’তি ভগৰা অৰোচ, ‘‘‘কতমা জাতি, কস্স চ পনাযং জাতী’তি ইতি ¶ ৰা, ভিক্খু, যো ৰদেয্য, ‘অঞ্ঞা জাতি অঞ্ঞস্স চ পনাযং জাতী’তি ইতি ৰা, ভিক্খু, যো ৰদেয্য, উভযমেতং একত্থং ব্যঞ্জনমেৰ নানং. তং জীৰং তং সরীরন্তি ৰা, ভিক্খু, দিট্ঠিযা সতি ব্রহ্মচরিযৰাসো ন হোতি. অঞ্ঞং জীৰং অঞ্ঞং সরীরন্তি ৰা, ভিক্খু, দিট্ঠিযা সতি ব্রহ্মচরিযৰাসো ন হোতি. এতে তে, ভিক্খু, উভো অন্তে অনুপগম্ম মজ্ঝেন তথাগতো ধম্মং দেসেতি – ‘ভৰপচ্চযা জাতী’’’তি.

‘‘কতমো নু খো, ভন্তে, ভৰো, কস্স চ পনাযং ভৰো’’তি? ‘‘নো কল্লো পঞ্হো’’তি ভগৰা অৰোচ, ‘‘‘কতমো ভৰো, কস্স চ পনাযং ভৰো’তি ইতি ৰা, ভিক্খু, যো ৰদেয্য, ‘অঞ্ঞো ভৰো অঞ্ঞস্স চ পনাযং ভৰো’তি ইতি ৰা, ভিক্খু, যো ৰদেয্য, উভযমেতং একত্থং ব্যঞ্জনমেৰ নানং. তং জীৰং তং সরীরন্তি ৰা, ভিক্খু, দিট্ঠিযা সতি ব্রহ্মচরিযৰাসো ন হোতি; অঞ্ঞং জীৰং অঞ্ঞং সরীরন্তি ৰা, ভিক্খু, দিট্ঠিযা সতি ব্রহ্মচরিযৰাসো ন হোতি. এতে তে, ভিক্খু, উভো অন্তে অনুপগম্ম মজ্ঝেন তথাগতো ধম্মং দেসেতি – ‘উপাদানপচ্চযা ভৰো’তি…পে… ‘তণ্হাপচ্চযা উপাদানন্তি… ৰেদনাপচ্চযা ¶ তণ্হাতি… ফস্সপচ্চযা ৰেদনাতি… সল়াযতনপচ্চযা ফস্সোতি… নামরূপপচ্চযা সল়াযতনন্তি… ৰিঞ্ঞাণপচ্চযা ¶ নামরূপন্তি… সঙ্খারপচ্চযা ৰিঞ্ঞাণ’’’ন্তি.

‘‘কতমে নু খো, ভন্তে, সঙ্খারা, কস্স চ পনিমে সঙ্খারা’’তি? ‘‘নো কল্লো পঞ্হো’’তি ভগৰা অৰোচ, ‘‘‘কতমে সঙ্খারা কস্স চ পনিমে সঙ্খারা’তি ইতি ৰা, ভিক্খু, যো ৰদেয্য, ‘অঞ্ঞে সঙ্খারা অঞ্ঞস্স চ পনিমে সঙ্খারা’তি ইতি ৰা, ভিক্খু, যো ৰদেয্য, উভযমেতং একত্থং ব্যঞ্জনমেৰ নানং. তং জীৰং তং সরীরন্তি ৰা, ভিক্খু, দিট্ঠিযা সতি ব্রহ্মচরিযৰাসো ন হোতি; অঞ্ঞং জীৰং অঞ্ঞং সরীরন্তি ৰা, ভিক্খু, দিট্ঠিযা সতি ব্রহ্মচরিযৰাসো ন হোতি. এতে তে, ভিক্খু, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা’’’তি.

‘‘অৰিজ্জায ¶ ত্ৰেৰ, ভিক্খু, অসেসৰিরাগনিরোধা যানিস্স তানি ৰিসূকাযিকানি ৰিসেৰিতানি ৰিপ্ফন্দিতানি কানিচি কানিচি. ‘কতমং জরামরণং, কস্স চ পনিদং জরামরণং’ ইতি ৰা, ‘অঞ্ঞং জরামরণং, অঞ্ঞস্স চ পনিদং জরামরণং’ ইতি ৰা, ‘তং জীৰং তং সরীরং’ ইতি ৰা, ‘অঞ্ঞং জীৰং অঞ্ঞং সরীরং’ ইতি ৰা. সব্বানিস্স তানি পহীনানি ভৰন্তি উচ্ছিন্নমূলানি তালাৰত্থুকতানি অনভাৰঙ্কতানি আযতিং অনুপ্পাদধম্মানি.

‘‘অৰিজ্জায ¶ ত্ৰেৰ, ভিক্খু, অসেসৰিরাগনিরোধা যানিস্স তানি ৰিসূকাযিকানি ৰিসেৰিতানি ৰিপ্ফন্দিতানি কানিচি কানিচি. ‘কতমা জাতি, কস্স ¶ চ পনাযং জাতি’ ইতি ৰা, ‘অঞ্ঞা জাতি, অঞ্ঞস্স চ পনাযং জাতি’ ইতি ৰা, ‘তং জীৰং তং সরীরং’ ইতি ৰা, ‘অঞ্ঞং জীৰং অঞ্ঞং সরীরং’ ইতি ৰা. সব্বানিস্স তানি পহীনানি ভৰন্তি উচ্ছিন্নমূলানি তালাৰত্থুকতানি অনভাৰঙ্কতানি আযতিং অনুপ্পাদধম্মানি.

‘‘অৰিজ্জায ত্ৰেৰ, ভিক্খু, অসেসৰিরাগনিরোধা যানিস্স তানি ৰিসূকাযিকানি ৰিসেৰিতানি ৰিপ্ফন্দিতানি কানিচি কানিচি. কতমো ভৰো…পে… কতমং উপাদানং… কতমা তণ্হা… কতমা ¶ ৰেদনা… কতমো ফস্সো… কতমং সল়াযতনং… কতমং নামরূপং… কতমং ৰিঞ্ঞাণং…পে….

‘‘অৰিজ্জায ত্ৰেৰ, ভিক্খু, অসেসৰিরাগনিরোধা যানিস্স তানি ৰিসূকাযিকানি ৰিসেৰিতানি ৰিপ্ফন্দিতানি কানিচি কানিচি. ‘কতমে সঙ্খারা, কস্স চ পনিমে সঙ্খারা’ ইতি ৰা, ‘অঞ্ঞে সঙ্খারা, অঞ্ঞস্স চ পনিমে সঙ্খারা’ ইতি ৰা, ‘তং জীৰং তং সরীরং’ ইতি ৰা, ‘অঞ্ঞং জীৰং, অঞ্ঞং সরীরং’ ইতি ৰা. সব্বানিস্স তানি পহীনানি ভৰন্তি উচ্ছিন্নমূলানি তালাৰত্থুকতানি অনভাৰঙ্কতানি আযতিং অনুপ্পাদধম্মানী’’তি. পঞ্চমং.

৬. দুতিযঅৰিজ্জাপচ্চযসুত্তং

৩৬. সাৰত্থিযং ¶ ৰিহরতি…পে… ‘‘অৰিজ্জাপচ্চযা, ভিক্খৰে, সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি.

‘‘‘কতমং জরামরণং, কস্স চ পনিদং জরামরণ’ন্তি ইতি ৰা, ভিক্খৰে ¶ , যো ৰদেয্য, ‘অঞ্ঞং জরামরণং, অঞ্ঞস্স চ পনিদং জরামরণ’ন্তি ইতি ৰা, ভিক্খৰে, যো ৰদেয্য, উভযমেতং একত্থং ব্যঞ্জনমেৰ নানং. ‘তং জীৰং তং সরীরং’ ইতি ৰা, ভিক্খৰে, দিট্ঠিযা সতি ব্রহ্মচরিযৰাসো ন হোতি. ‘অঞ্ঞং জীৰং অঞ্ঞং সরীরং’ ইতি ৰা, ভিক্খৰে, দিট্ঠিযা সতি ব্রহ্মচরিযৰাসো ন হোতি. এতে তে, ভিক্খৰে, উভো অন্তে অনুপগম্ম মজ্ঝেন তথাগতো ধম্মং দেসেতি – ‘জাতিপচ্চযা জরামরণ’’’ন্তি.

‘‘কতমা ¶ জাতি…পে… কতমো ভৰো… কতমং উপাদানং… কতমা তণ্হা… কতমা ৰেদনা… কতমো ফস্সো… কতমং ¶ সল়াযতনং… কতমং নামরূপং… কতমং ৰিঞ্ঞাণং… কতমে সঙ্খারা, কস্স চ পনিমে সঙ্খারাতি ইতি ৰা, ভিক্খৰে, যো ৰদেয্য, ‘অঞ্ঞে সঙ্খারা অঞ্ঞস্স চ পনিমে সঙ্খারা’তি ইতি ৰা, ভিক্খৰে, যো ৰদেয্য, উভযমেতং একত্থং ব্যঞ্জনমেৰ নানং. ‘তং জীৰং তং সরীরং’ ইতি ৰা, ভিক্খৰে, দিট্ঠিযা সতি ব্রহ্মচরিযৰাসো ন হোতি. ‘অঞ্ঞং জীৰং অঞ্ঞং সরীরং’ ইতি ৰা, ভিক্খৰে, দিট্ঠিযা সতি ব্রহ্মচরিযৰাসো ন হোতি. এতে তে, ভিক্খৰে, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা’’’তি.

‘‘অৰিজ্জায ত্ৰেৰ, ভিক্খৰে, অসেসৰিরাগনিরোধা যানিস্স তানি ৰিসূকাযিকানি ৰিসেৰিতানি ৰিপ্ফন্দিতানি কানিচি কানিচি. ‘কতমং জরামরণং, কস্স চ পনিদং জরামরণং’ ইতি ৰা, ‘অঞ্ঞং জরামরণং, অঞ্ঞস্স চ পনিদং ¶ জরামরণং’ ইতি ৰা, ‘তং জীৰং ¶ তং সরীরং’ ইতি ৰা, ‘অঞ্ঞং জীৰং, অঞ্ঞং সরীরং’ ইতি ৰা. সব্বানিস্স তানি পহীনানি ভৰন্তি উচ্ছিন্নমূলানি তালাৰত্থুকতানি অনভাৰঙ্কতানি আযতিং অনুপ্পাদধম্মানি.

‘‘অৰিজ্জায ত্ৰেৰ, ভিক্খৰে, অসেসৰিরাগনিরোধা যানিস্স তানি ৰিসূকাযিকানি ৰিসেৰিতানি ৰিপ্ফন্দিতানি কানিচি কানিচি. কতমা জাতি…পে… কতমো ভৰো… কতমং উপাদানং… কতমা তণ্হা… কতমা ৰেদনা… কতমো ফস্সো… কতমং সল়াযতনং… কতমং নামরূপং… কতমং ৰিঞ্ঞাণং… ‘কতমে সঙ্খারা, কস্স চ পনিমে সঙ্খারা’ ইতি ৰা, ‘অঞ্ঞে সঙ্খারা, অঞ্ঞস্স চ পনিমে সঙ্খারা’ ইতি ৰা; ‘তং জীৰং তং সরীরং’ ইতি ৰা, ‘অঞ্ঞং জীৰং অঞ্ঞং সরীরং’ ইতি ৰা. সব্বানিস্স তানি পহীনানি ভৰন্তি উচ্ছিন্নমূলানি তালাৰত্থুকতানি অনভাৰঙ্কতানি আযতিং অনুপ্পাদধম্মানী’’তি. ছট্ঠং.

৭. নতুম্হসুত্তং

৩৭. সাৰত্থিযং ৰিহরতি…পে… ‘‘নাযং, ভিক্খৰে, কাযো তুম্হাকং নপি অঞ্ঞেসং. পুরাণমিদং ¶ , ভিক্খৰে, কম্মং অভিসঙ্খতং অভিসঞ্চেতযিতং ৰেদনিযং দট্ঠব্বং’’.

‘‘তত্র ¶ খো, ভিক্খৰে, সুতৰা অরিযসাৰকো পটিচ্চসমুপ্পাদঞ্ঞেৰ সাধুকং যোনিসো মনসি করোতি – ‘ইতি ইমস্মিং সতি ইদং হোতি, ইমস্সুপ্পাদা ¶ ইদং উপ্পজ্জতি; ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতি, যদিদং – অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’’তি. সত্তমং.

৮. চেতনাসুত্তং

৩৮. সাৰত্থিনিদানং ¶ . ‘‘যঞ্চ, ভিক্খৰে, চেতেতি যঞ্চ পকপ্পেতি যঞ্চ অনুসেতি, আরম্মণমেতং [আরমণমেতং (?)] হোতি ৰিঞ্ঞাণস্স ঠিতিযা. আরম্মণে সতি পতিট্ঠা ৰিঞ্ঞাণস্স হোতি. তস্মিং পতিট্ঠিতে ৰিঞ্ঞাণে ৰিরূল়্হে আযতিং পুনব্ভৰাভিনিব্বত্তি হোতি. আযতিং পুনব্ভৰাভিনিব্বত্তিযা সতি আযতিং জাতি জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘নো চে, ভিক্খৰে, চেতেতি নো চে পকপ্পেতি, অথ চে অনুসেতি, আরম্মণমেতং হোতি ৰিঞ্ঞাণস্স ঠিতিযা. আরম্মণে সতি পতিট্ঠা ৰিঞ্ঞাণস্স হোতি. তস্মিং পতিট্ঠিতে ৰিঞ্ঞাণে ৰিরূল়্হে আযতিং পুনব্ভৰাভিনিব্বত্তি হোতি. আযতিং পুনব্ভৰাভিনিব্বত্তিযা সতি আযতিং জাতিজরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি.

‘‘যতো চ খো, ভিক্খৰে, নো চেৰ চেতেতি নো চ পকপ্পেতি নো চ অনুসেতি, আরম্মণমেতং ন হোতি ৰিঞ্ঞাণস্স ঠিতিযা ¶ . আরম্মণে অসতি ¶ পতিট্ঠা ৰিঞ্ঞাণস্স ন হোতি. তদপ্পতিট্ঠিতে ৰিঞ্ঞাণে অৰিরূল়্হে আযতিং পুনব্ভৰাভিনিব্বত্তি ন হোতি. আযতিং পুনব্ভৰাভিনিব্বত্তিযা অসতি আযতিং জাতিজরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতী’’তি. অট্ঠমং.

৯. দুতিযচেতনাসুত্তং

৩৯. সাৰত্থিযং ¶ ৰিহরতি…পে… ‘‘যঞ্চ, ভিক্খৰে, চেতেতি যঞ্চ পকপ্পেতি যঞ্চ অনুসেতি, আরম্মণমেতং হোতি ৰিঞ্ঞাণস্স ঠিতিযা. আরম্মণে সতি পতিট্ঠা ৰিঞ্ঞাণস্স হোতি. তস্মিং পতিট্ঠিতে ৰিঞ্ঞাণে ৰিরূল়্হে নামরূপস্স অৰক্কন্তি হোতি. নামরূপপচ্চযা সল়াযতনং; সল়াযতনপচ্চযা ফস্সো; ফস্সপচ্চযা ৰেদনা…পে… তণ্হা… উপাদানং… ভৰো… জাতি… জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘নো ¶ চে, ভিক্খৰে, চেতেতি নো চে পকপ্পেতি, অথ চে অনুসেতি, আরম্মণমেতং হোতি ৰিঞ্ঞাণস্স ঠিতিযা. আরম্মণে সতি পতিট্ঠা ৰিঞ্ঞাণস্স হোতি. তস্মিং পতিট্ঠিতে ৰিঞ্ঞাণে ৰিরূল়্হে নামরূপস্স অৰক্কন্তি হোতি. নামরূপপচ্চযা সল়াযতনং…পে… এৰমেতস্স কেৰলস্স দুক্খক্খন্ধস্স সমুদযো হোতি.

‘‘যতো চ খো, ভিক্খৰে, নো চেৰ চেতেতি নো চ পকপ্পেতি নো চ অনুসেতি, আরম্মণমেতং ন হোতি ৰিঞ্ঞাণস্স ঠিতিযা. আরম্মণে ¶ অসতি পতিট্ঠা ৰিঞ্ঞাণস্স ন হোতি. তদপ্পতিট্ঠিতে ৰিঞ্ঞাণে অৰিরূল়্হে নামরূপস্স অৰক্কন্তি ন হোতি. নামরূপনিরোধা সল়াযতননিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. নৰমং.

১০. ততিযচেতনাসুত্তং

৪০. সাৰত্থিযং ৰিহরতি…পে… ‘‘যঞ্চ ¶ , ভিক্খৰে, চেতেতি যঞ্চ পকপ্পেতি যঞ্চ অনুসেতি আরম্মণমেতং হোতি ৰিঞ্ঞাণস্স ঠিতিযা. আরম্মণে সতি পতিট্ঠা ৰিঞ্ঞাণস্স হোতি. তস্মিং পতিট্ঠিতে ৰিঞ্ঞাণে ৰিরূল়্হে নতি হোতি. নতিযা সতি আগতিগতি হোতি. আগতিগতিযা সতি চুতূপপাতো হোতি. চুতূপপাতে সতি আযতিং জাতিজরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘নো চে, ভিক্খৰে, চেতেতি নো চে পকপ্পেতি অথ চে অনুসেতি, আরম্মণমেতং হোতি ৰিঞ্ঞাণস্স ঠিতিযা. আরম্মণে সতি পতিট্ঠা ৰিঞ্ঞাণস্স হোতি. তস্মিং পতিট্ঠিতে ৰিঞ্ঞাণে ৰিরূল়্হে নতি হোতি. নতিযা ¶ সতি আগতিগতি হোতি. আগতিগতিযা সতি চুতূপপাতো হোতি. চুতূপপাতে সতি আযতিং জাতিজরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি.

‘‘যতো চ খো, ভিক্খৰে, নো চেৰ চেতেতি নো চ পকপ্পেতি নো চ অনুসেতি, আরম্মণমেতং ¶ ন হোতি ৰিঞ্ঞাণস্স ঠিতিযা. আরম্মণে ¶ অসতি পতিট্ঠা ৰিঞ্ঞাণস্স ন হোতি. তদপ্পতিট্ঠিতে ৰিঞ্ঞাণে অৰিরূল়্হে নতি ন হোতি. নতিযা অসতি আগতিগতি ন হোতি. আগতিগতিযা অসতি চুতূপপাতো ন হোতি. চুতূপপাতে অসতি আযতিং জাতি জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতী’’তি. দসমং.

কল়ারখত্তিযৰগ্গো চতুত্থো.

তস্সুদ্দানং –

ভূতমিদং কল়ারঞ্চ, দুৰে চ ঞাণৰত্থূনি;

অৰিজ্জাপচ্চযা ¶ চ দ্ৰে, নতুম্হা চেতনা তযোতি.

৫. গহপতিৰগ্গো

১. পঞ্চৰেরভযসুত্তং

৪১. সাৰত্থিযং ¶ ৰিহরতি. অথ খো অনাথপিণ্ডিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৰা এতদৰোচ –

‘‘যতো খো, গহপতি, অরিযসাৰকস্স পঞ্চ ভযানি ৰেরানি ৰূপসন্তানি হোন্তি, চতূহি চ সোতাপত্তিযঙ্গেহি সমন্নাগতো হোতি, অরিযো চস্স ঞাযো পঞ্ঞায সুদিট্ঠো হোতি সুপ্পটিৰিদ্ধো, সো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযনো’’’তি.

‘‘কতমানি ¶ ¶ পঞ্চ ভযানি ৰেরানি ৰূপসন্তানি হোন্তি? যং, গহপতি, পাণাতিপাতী পাণাতিপাতপচ্চযা দিট্ঠধম্মিকম্পি ভযং ৰেরং পসৰতি, সম্পরাযিকম্পি ভযং ৰেরং পসৰতি, চেতসিকম্পি দুক্খং দোমনস্সং পটিসংৰেদযতি, পাণাতিপাতা পটিৰিরতস্স এৰং তং ভযং ৰেরং ৰূপসন্তং হোতি.

‘‘যং, গহপতি, অদিন্নাদাযী অদিন্নাদানপচ্চযা দিট্ঠধম্মিকম্পি ভযং ৰেরং পসৰতি, সম্পরাযিকম্পি ভযং ৰেরং পসৰতি, চেতসিকম্পি দুক্খং দোমনস্সং পটিসংৰেদযতি, অদিন্নাদানা পটিৰিরতস্স এৰং তং ভযং ৰেরং ৰূপসন্তং হোতি.

‘‘যং ¶ , গহপতি, কামেসুমিচ্ছাচারী কামেসুমিচ্ছাচারপচ্চযা ¶ দিট্ঠধম্মিকম্পি ভযং ৰেরং পসৰতি, সম্পরাযিকম্পি ভযং ৰেরং পসৰতি, চেতসিকম্পি দুক্খং দোমনস্সং পটিসংৰেদযতি, কামেসুমিচ্ছাচারা পটিৰিরতস্স এৰং তং ভযং ৰেরং ৰূপসন্তং হোতি.

‘‘যং, গহপতি, মুসাৰাদী মুসাৰাদপচ্চযা দিট্ঠধম্মিকম্পি ভযং ৰেরং পসৰতি, সম্পরাযিকম্পি ভযং ৰেরং পসৰতি, চেতসিকম্পি দুক্খং দোমনস্সং পটিসংৰেদযতি, মুসাৰাদা পটিৰিরতস্স এৰং তং ভযং ৰেরং ৰূপসন্তং হোতি.

‘‘যং, গহপতি, সুরামেরযমজ্জপমাদট্ঠাযী সুরামেরযমজ্জপমাদট্ঠানপচ্চযা দিট্ঠধম্মিকম্পি ভযং ৰেরং পসৰতি, সম্পরাযিকম্পি ভযং ৰেরং পসৰতি, চেতসিকম্পি দুক্খং দোমনস্সং পটিসংৰেদযতি, সুরামেরযমজ্জপমাদট্ঠানা পটিৰিরতস্স এৰং তং ভযং ৰেরং ৰূপসন্তং হোতি. ইমানি পঞ্চ ভযানি ৰেরানি ৰূপসন্তানি হোন্তি.

‘‘কতমেহি চতূহি সোতাপত্তিযঙ্গেহি সমন্নাগতো হোতি? ইধ, গহপতি, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’’’তি.

‘‘ধম্মে ¶ অৰেচ্চপ্পসাদেন সমন্নাগতো হোতি – ‘স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’’তি.

‘‘সঙ্ঘে ¶ অৰেচ্চপ্পসাদেন সমন্নাগতো হোতি – ‘সুপ্পটিপন্নো ভগৰতো সাৰকসঙ্ঘো, উজুপ্পটিপন্নো ভগৰতো সাৰকসঙ্ঘো, ঞাযপ্পটিপন্নো ভগৰতো সাৰকসঙ্ঘো, সামীচিপ্পটিপন্নো ভগৰতো সাৰকসঙ্ঘো ¶ , যদিদং চত্তারি পুরিসযুগানি অট্ঠ পুরিসপুগ্গলা, এস ভগৰতো সাৰকসঙ্ঘো ¶ আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সা’’’তি.

‘‘অরিযকন্তেহি সীলেহি সমন্নাগতো হোতি অখণ্ডেহি অচ্ছিদ্দেহি অসবলেহি অকম্মাসেহি ভুজিস্সেহি ৰিঞ্ঞুপ্পসত্থেহি অপরামট্ঠেহি সমাধিসংৰত্তনিকেহি. ইমেহি চতূহি সোতাপত্তিযঙ্গেহি সমন্নাগতো হোতি.

‘‘কতমো চস্স অরিযো ঞাযো পঞ্ঞায সুদিট্ঠো হোতি সুপ্পটিৰিদ্ধো? ইধ, গহপতি, অরিযসাৰকো পটিচ্চসমুপ্পাদঞ্ঞেৰ সাধুকং যোনিসো মনসি করোতি – ‘ইতি ইমস্মিং সতি ইদং হোতি, ইমস্মিং অসতি ইদং ন হোতি; ইমস্সুপ্পাদা ইদং উপ্পজ্জতি, ইমস্স নিরোধা ইদং নিরুজ্ঝতি. যদিদং অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’’তি. অযমস্স অরিযো ঞাযো পঞ্ঞায সুদিট্ঠো হোতি সুপ্পটিৰিদ্ধো.

‘‘যতো খো, গহপতি, অরিযসাৰকস্স ইমানি পঞ্চ ভযানি ৰেরানি ৰূপসন্তানি হোন্তি, ইমেহি চতূহি সোতাপত্তিযঙ্গেহি সমন্নাগতো হোতি, অযঞ্চস্স অরিযো ঞাযো পঞ্ঞায সুদিট্ঠো হোতি সুপ্পটিৰিদ্ধো, সো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি ¶ খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযনো’’’তি.

২. দুতিযপঞ্চৰেরভযসুত্তং

৪২. সাৰত্থিযং ¶ ৰিহরতি…পে… ‘‘যতো ¶ খো, ভিক্খৰে, অরিযসাৰকস্স পঞ্চ ভযানি ৰেরানি ৰূপসন্তানি হোন্তি, চতূহি চ সোতাপত্তিযঙ্গেহি সমন্নাগতো হোতি, অরিযো চস্স ঞাযো পঞ্ঞায সুদিট্ঠো হোতি ¶ সুপ্পটিৰিদ্ধো, সো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযনো’’’তি.

‘‘কতমানি পঞ্চ ভযানি ৰেরানি ৰূপসন্তানি হোন্তি? যং, ভিক্খৰে, পাণাতিপাতী …পে… যং, ভিক্খৰে, অদিন্নাদাযী…পে… যং, ভিক্খৰে, কামেসুমিচ্ছাচারী… যং, ভিক্খৰে, মুসাৰাদী… যং, ভিক্খৰে, সুরামেরযমজ্জপমাদট্ঠাযী…পে… ইমানি পঞ্চ ভযানি ৰেরানি ৰূপসন্তানি হোন্তি.

‘‘কতমেহি চতূহি সোতাপত্তিযঙ্গেহি সমন্নাগতো হোতি? ইধ, ভিক্খৰে, অরিযসাৰকো বুদ্ধে…পে… ধম্মে… সঙ্ঘে… অরিযকন্তেহি সীলেহি সমন্নাগতো হোতি. ইমেহি চতূহি সোতাপত্তিযঙ্গেহি সমন্নাগতো হোতি.

‘‘কতমো চস্স অরিযো ঞাযো পঞ্ঞায সুদিট্ঠো হোতি সুপ্পটিৰিদ্ধো ¶ ? ইধ, ভিক্খৰে, অরিযসাৰকো পটিচ্চসমুপ্পাদঞ্ঞেৰ সাধুকং যোনিসো মনসি করোতি…পে… অযমস্স অরিযো ঞাযো পঞ্ঞায সুদিট্ঠো হোতি সুপ্পটিৰিদ্ধো.

‘‘যতো খো, ভিক্খৰে, অরিযসাৰকস্স ইমানি পঞ্চ ভযানি ৰেরানি ৰূপসন্তানি হোন্তি, ইমেহি চ চতূহি সোতাপত্তিযঙ্গেহি সমন্নাগতো হোতি, অযঞ্চস্স অরিযো ঞাযো পঞ্ঞায সুদিট্ঠো হোতি সুপ্পটিৰিদ্ধো, সো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযনো’’’তি. দুতিযং.

৩. দুক্খসুত্তং

৪৩. সাৰত্থিযং ¶ ৰিহরতি…পে… ‘‘দুক্খস্স ¶ , ভিক্খৰে, সমুদযঞ্চ অত্থঙ্গমঞ্চ দেসেস্সামি. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমো চ, ভিক্খৰে, দুক্খস্স সমুদযো? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. অযং খো, ভিক্খৰে, দুক্খস্স সমুদযো.

‘‘সোতঞ্চ ¶ পটিচ্চ সদ্দে চ উপ্পজ্জতি সোতৰিঞ্ঞাণং…পে… ঘানঞ্চ পটিচ্চ গন্ধে চ…পে… জিৰ্হঞ্চ পটিচ্চ রসে চ…পে… কাযঞ্চ পটিচ্চ ফোট্ঠব্বে চ…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. অযং ¶ খো, ভিক্খৰে, দুক্খস্স সমুদযো.

‘‘কতমো চ, ভিক্খৰে, দুক্খস্স অত্থঙ্গমো? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো; উপাদাননিরোধা ভৰনিরোধো; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতি. অযং খো, ভিক্খৰে, দুক্খস্স অত্থঙ্গমো.

‘‘সোতঞ্চ পটিচ্চ সদ্দে চ উপ্পজ্জতি সোতৰিঞ্ঞাণং…পে… ঘানঞ্চ পটিচ্চ গন্ধে চ…পে… জিৰ্হঞ্চ পটিচ্চ রসে চ…পে… কাযঞ্চ পটিচ্চ ফোট্ঠব্বে চ…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো; উপাদাননিরোধা ভৰনিরোধো; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা ¶ নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতি. অযং খো, ভিক্খৰে, দুক্খস্স অত্থঙ্গমো’’তি. ততিযং.

৪. লোকসুত্তং

৪৪. সাৰত্থিযং ¶ ৰিহরতি…পে… ‘‘লোকস্স, ভিক্খৰে, সমুদযঞ্চ অত্থঙ্গমঞ্চ দেসেস্সামি. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমো চ, ভিক্খৰে, লোকস্স সমুদযো? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং ¶ সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা; তণ্হাপচ্চযা উপাদানং; উপাদানপচ্চযা ভৰো; ভৰপচ্চযা জাতি; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. অযং খো, ভিক্খৰে, লোকস্স সমুদযো.

‘‘সোতঞ্চ ¶ পটিচ্চ সদ্দে চ…পে… ঘানঞ্চ পটিচ্চ গন্ধে চ… জিৰ্হঞ্চ পটিচ্চ রসে চ… কাযঞ্চ পটিচ্চ ফোট্ঠব্বে চ… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা…পে… জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. অযং খো, ভিক্খৰে, লোকস্স সমুদযো.

‘‘কতমো চ, ভিক্খৰে, লোকস্স অত্থঙ্গমো? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো; উপাদাননিরোধা ভৰনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি. অযং খো, ভিক্খৰে, লোকস্স অত্থঙ্গমো.

‘‘সোতঞ্চ পটিচ্চ সদ্দে চ…পে… ঘানঞ্চ ¶ পটিচ্চ গন্ধে চ… জিৰ্হঞ্চ পটিচ্চ রসে চ… কাযঞ্চ পটিচ্চ ফোট্ঠব্বে চ… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো; উপাদাননিরোধা ভৰনিরোধো…পে… এৰমেতস্স কেৰলস্স ¶ দুক্খক্খন্ধস্স নিরোধো হোতি. অযং খো, ভিক্খৰে, লোকস্স অত্থঙ্গমো’’তি. চতুত্থং.

৫. ঞাতিকসুত্তং

৪৫. এৰং ¶ মে সুতং – একং সমযং ভগৰা ঞাতিকে ৰিহরতি গিঞ্জকাৰসথে. অথ খো ভগৰা রহোগতো পটিসল্লানো ইমং ধম্মপরিযাযং অভাসি –

‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা, ৰেদনাপচ্চযা তণ্হা; তণ্হাপচ্চযা উপাদানং…পে… এৰমেতস্স কেৰলস্স দুক্খক্খন্ধস্স সমুদযো হোতি.

‘‘সোতঞ্চ পটিচ্চ সদ্দে চ…পে… ঘানঞ্চ পটিচ্চ গন্ধে চ… জিৰ্হঞ্চ পটিচ্চ রসে চ… কাযঞ্চ পটিচ্চ ফোট্ঠব্বে চ… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা; তণ্হাপচ্চযা উপাদানং…পে… এৰমেতস্স কেৰলস্স দুক্খক্খন্ধস্স সমুদযো হোতি.

‘‘চক্খুঞ্চ ¶ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো; উপাদাননিরোধা ভৰনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি.

‘‘সোতঞ্চ ¶ পটিচ্চ সদ্দে চ…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা ¶ উপাদাননিরোধো; উপাদাননিরোধা ভৰনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি.

তেন খো পন সমযেন অঞ্ঞতরো ভিক্খু ভগৰতো উপস্সুতি [উপস্সুতিং (সী. পী.)] ঠিতো হোতি. অদ্দসা খো ভগৰা তং ভিক্খুং উপস্সুতি ঠিতং. দিস্ৰান তং ভিক্খুং এতদৰোচ – ‘‘অস্সোসি নো ত্ৰং, ভিক্খু, ইমং ধম্মপরিযায’’ন্তি? ‘‘এৰং, ভন্তে’’তি. ‘‘উগ্গণ্হাহি ত্ৰং, ভিক্খু, ইমং ধম্মপরিযাযং; পরিযাপুণাহি ত্ৰং, ভিক্খু, ইমং ধম্মপরিযাযং; ধারেহি ত্ৰং, ভিক্খু, ইমং ধম্মপরিযাযং. অত্থসংহিতো অযং [অত্থসংহিতোযং (সী. স্যা. কং.), অত্থসংহিতাযং (পী. ক.)], ভিক্খু, ধম্মপরিযাযো আদিব্রহ্মচরিযকো’’তি. পঞ্চমং.

৬. অঞ্ঞতরব্রাহ্মণসুত্তং

৪৬. সাৰত্থিযং ¶ ৰিহরতি. অথ খো অঞ্ঞতরো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো সো ব্রাহ্মণো ভগৰন্তং এতদৰোচ –

‘‘কিং নু খো, ভো গোতম, সো করোতি সো পটিসংৰেদযতী’’তি? ‘‘‘সো করোতি সো পটিসংৰেদযতী’তি খো, ব্রাহ্মণ, অযমেকো অন্তো’’.

‘‘কিং ¶ পন, ভো গোতম, অঞ্ঞো করোতি, অঞ্ঞো পটিসংৰেদযতী’’তি? ‘‘‘অঞ্ঞো করোতি, অঞ্ঞো পটিসংৰেদযতী’তি খো, ব্রাহ্মণ, অযং দুতিযো অন্তো. এতে তে, ব্রাহ্মণ, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ¶ ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো ¶ …পে… এৰমেতস্স কেৰলস্স দুক্খক্খন্ধস্স নিরোধো হোতী’’’তি.

এৰং ৰুত্তে, সো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম,…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি. ছট্ঠং.

৭. জাণুস্সোণিসুত্তং

৪৭. সাৰত্থিযং ৰিহরতি. অথ খো জাণুস্সোণি ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং…পে… একমন্তং নিসিন্নো খো জাণুস্সোণি ব্রাহ্মণো ভগৰন্তং এতদৰোচ –

‘‘কিং ¶ নু খো, ভো, গোতম, সব্বমত্থী’’তি? ‘‘‘সব্বমত্থী’তি খো, ব্রাহ্মণ, অযমেকো অন্তো’’.

‘‘কিং পন, ভো গোতম, সব্বং নত্থী’’তি? ‘‘‘সব্বং নত্থী’তি খো, ব্রাহ্মণ, অযং দুতিযো অন্তো. এতে তে, ব্রাহ্মণ, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’’তি.

এৰং ৰুত্তে, জাণুস্সোণি ব্রাহ্মণো ভগৰন্তং এতদৰোচ ¶ – ‘‘অভিক্কন্তং ভো গোতম…পে… পাণুপেতং সরণং গত’’ন্তি. সত্তমং.

৮. লোকাযতিকসুত্তং

৪৮. সাৰত্থিযং ৰিহরতি. অথ খো লোকাযতিকো ব্রাহ্মণো যেন ¶ ভগৰা…পে… একমন্তং নিসিন্নো খো লোকাযতিকো ব্রাহ্মণো ভগৰন্তং এতদৰোচ –

‘‘কিং নু খো, ভো গোতম, সব্বমত্থী’’তি? ‘‘‘সব্বমত্থী’তি খো, ব্রাহ্মণ, জেট্ঠমেতং লোকাযতং’’.

‘‘কিং ¶ পন, ভো গোতম, সব্বং নত্থী’’তি? ‘‘‘সব্বং নত্থী’তি খো, ব্রাহ্মণ, দুতিযমেতং লোকাযতং’’.

‘‘কিং নু খো, ভো গোতম, সব্বমেকত্ত’’ন্তি? ‘‘‘সব্বমেকত্ত’ন্তি খো, ব্রাহ্মণ, ততিযমেতং লোকাযতং’’.

‘‘কিং ¶ পন, ভো গোতম, সব্বং পুথুত্ত’’ন্তি? ‘‘‘সব্বং পুথুত্ত’ন্তি খো, ব্রাহ্মণ, চতুত্থমেতং লোকাযতং’’.

‘‘এতে তে, ব্রাহ্মণ, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’’তি.

এৰং ৰুত্তে, লোকাযতিকো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে… অজ্জতগ্গে পাণুপেতং সরণং গত’’ন্তি. অট্ঠমং.

৯. অরিযসাৰকসুত্তং

৪৯. সাৰত্থিযং ৰিহরতি…পে… ‘‘ন ¶ , ভিক্খৰে, সুতৰতো অরিযসাৰকস্স এৰং হোতি – ‘কিং নু খো কিস্মিং সতি কিং হোতি, কিস্সুপ্পাদা কিং উপ্পজ্জতি? (কিস্মিং সতি সঙ্খারা হোন্তি, কিস্মিং সতি ৰিঞ্ঞাণং হোতি,) [( ) এত্থন্তরে পাঠা কেসুচি পোত্থকেসু ন দিস্সন্তীতি সী. পী. পোত্থকেসু দস্সিতা. তথা সতি অনন্তরসুত্তটীকায সমেতি] কিস্মিং সতি নামরূপং হোতি, কিস্মিং সতি সল়াযতনং হোতি, কিস্মিং সতি ফস্সো হোতি, কিস্মিং সতি ৰেদনা ¶ হোতি, কিস্মিং সতি তণ্হা হোতি, কিস্মিং সতি উপাদানং হোতি, কিস্মিং সতি ভৰো হোতি, কিস্মিং সতি জাতি হোতি, কিস্মিং সতি জরামরণং হোতী’’’তি?

‘‘অথ খো, ভিক্খৰে, সুতৰতো অরিযসাৰকস্স অপরপ্পচ্চযা ঞাণমেৰেত্থ হোতি – ‘ইমস্মিং সতি ইদং হোতি, ইমস্সুপ্পাদা ইদং উপ্পজ্জতি. (অৰিজ্জায সতি সঙ্খারা হোন্তি; সঙ্খারেসু সতি ৰিঞ্ঞাণং হোতি;) [( ) এত্থকেসু পাঠা কেসুচি পোত্থকেসু ন দিস্সন্তীতি সী. পী. পোত্থকেসু দস্সিতা. তথা সতি অনন্তরসুত্তটীকায সমেতি] ৰিঞ্ঞাণে সতি নামরূপং হোতি; নামরূপে সতি সল়াযতনং হোতি ¶ ; সল়াযতনে সতি ফস্সো হোতি; ফস্সে সতি ৰেদনা হোতি; ৰেদনায সতি তণ্হা হোতি; তণ্হায সতি উপাদানং হোতি; উপাদানে সতি ভৰো হোতি; ভৰে সতি জাতি হোতি; জাতিযা সতি জরামরণং হোতী’তি. সো এৰং পজানাতি – ‘এৰমযং লোকো সমুদযতী’’’তি.

‘‘ন ¶ , ভিক্খৰে, সুতৰতো অরিযসাৰকস্স এৰং হোতি – ‘কিং নু খো কিস্মিং অসতি কিং ন হোতি, কিস্স নিরোধা কিং নিরুজ্ঝতি? (কিস্মিং অসতি সঙ্খারা ন হোন্তি, কিস্মিং অসতি ৰিঞ্ঞাণং ন হোতি,) [( ) এত্থন্তরে পাঠাপি তত্থ তথেৰ দস্সিতা] কিস্মিং অসতি নামরূপং ন হোতি, কিস্মিং অসতি সল়াযতনং ন হোতি, কিস্মিং অসতি ফস্সো ন হোতি, কিস্মিং অসতি ৰেদনা ন হোতি, কিস্মিং অসতি তণ্হা ন হোতি, কিস্মিং অসতি উপাদানং ন হোতি, কিস্মিং অসতি ভৰো ন হোতি, কিস্মিং অসতি জাতি ন হোতি, কিস্মিং অসতি জরামরণং ন হোতী’’’তি?

‘‘অথ খো, ভিক্খৰে, সুতৰতো অরিযসাৰকস্স অপরপ্পচ্চযা ঞাণমেৰেত্থ হোতি – ‘ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতি. (অৰিজ্জায অসতি সঙ্খারা ন হোন্তি; সঙ্খারেসু অসতি ৰিঞ্ঞাণং ন হোতি;) [( ) এত্থন্তরে পাঠাপি তত্থ তথেৰ দস্সিতা] ৰিঞ্ঞাণে অসতি নামরূপং ন হোতি; নামরূপে অসতি সল়াযতনং ¶ ন হোতি…পে… ভৰো ন হোতি… জাতি ন হোতি… জাতিযা অসতি জরামরণং ন হোতী’তি. সো এৰং পজানাতি – ‘এৰমযং লোকো নিরুজ্ঝতী’’’তি.

‘‘যতো ¶ খো, ভিক্খৰে, অরিযসাৰকো এৰং লোকস্স সমুদযঞ্চ অত্থঙ্গমঞ্চ যথাভূতং পজানাতি, অযং ৰুচ্চতি, ভিক্খৰে, অরিযসাৰকো দিট্ঠিসম্পন্নো ইতিপি…পে… অমতদ্ৰারং আহচ্চ তিট্ঠতি ইতিপী’’তি. নৰমং.

১০. দুতিযঅরিযসাৰকসুত্তং

৫০. সাৰত্থিযং ৰিহরতি…পে… ‘‘ন, ভিক্খৰে, সুতৰতো অরিযসাৰকস্স এৰং হোতি – ‘কিং নু খো কিস্মিং সতি কিং হোতি, কিস্সুপ্পাদা কিং উপ্পজ্জতি? কিস্মিং সতি সঙ্খারা হোন্তি, কিস্মিং সতি ৰিঞ্ঞাণং হোতি, কিস্মিং সতি নামরূপং হোতি, কিস্মিং সতি সল়াযতনং হোতি, কিস্মিং সতি ¶ ফস্সো হোতি, কিস্মিং সতি ৰেদনা হোতি, কিস্মিং সতি তণ্হা হোতি, কিস্মিং সতি উপাদানং হোতি, কিস্মিং সতি ভৰো হোতি, কিস্মিং সতি জাতি হোতি, কিস্মিং সতি জরামরণং হোতী’’’তি?

‘‘অথ খো, ভিক্খৰে, সুতৰতো অরিযসাৰকস্স অপরপ্পচ্চযা ঞাণমেৰেত্থ হোতি – ‘ইমস্মিং ¶ সতি ইদং হোতি, ইমস্সুপ্পাদা ইদং উপ্পজ্জতি. অৰিজ্জায সতি সঙ্খারা হোন্তি; সঙ্খারেসু সতি ৰিঞ্ঞাণং হোতি; ৰিঞ্ঞাণে সতি নামরূপং হোতি; নামরূপে সতি সল়াযতনং হোতি; সল়াযতনে সতি ফস্সো হোতি; ফস্সে সতি ৰেদনা হোতি ¶ ; ৰেদনায সতি তণ্হা হোতি; তণ্হায সতি উপাদানং হোতি; উপাদানে সতি ভৰো হোতি; ভৰে সতি জাতি হোতি; জাতিযা সতি জরামরণং হোতী’তি. সো এৰং পজানাতি – ‘এৰমযং লোকো সমুদযতী’’’তি.

‘‘ন, ভিক্খৰে, সুতৰতো অরিযসাৰকস্স এৰং হোতি – ‘কিং নু খো কিস্মিং অসতি কিং ন হোতি, কিস্স নিরোধা কিং নিরুজ্ঝতি? কিস্মিং অসতি সঙ্খারা ন হোন্তি, কিস্মিং অসতি ৰিঞ্ঞাণং ন হোতি, কিস্মিং অসতি নামরূপং ন হোতি, কিস্মিং অসতি সল়াযতনং ন হোতি, কিস্মিং অসতি ফস্সো ন হোতি, কিস্মিং অসতি ৰেদনা ন হোতি, কিস্মিং অসতি তণ্হা ন হোতি…পে… উপাদানং… ভৰো… জাতি… কিস্মিং অসতি জরামরণং ন হোতী’’’তি?

‘‘অথ খো, ভিক্খৰে, সুতৰতো অরিযসাৰকস্স অপরপ্পচ্চযা ঞাণমেৰেত্থ হোতি – ‘ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতি. অৰিজ্জায অসতি সঙ্খারা ¶ ন হোন্তি; সঙ্খারেসু অসতি ৰিঞ্ঞাণং ন হোতি; ৰিঞ্ঞাণে অসতি নামরূপং ন হোতি; নামরূপে অসতি সল়াযতনং ন হোতি…পে… জাতিযা অসতি জরামরণং ন হোতী’তি. সো এৰং পজানাতি – ‘এৰমযং লোকো নিরুজ্ঝতী’’’তি.

‘‘যতো খো, ভিক্খৰে, অরিযসাৰকো এৰং লোকস্স সমুদযঞ্চ অত্থঙ্গমঞ্চ যথাভূতং পজানাতি, অযং ৰুচ্চতি, ভিক্খৰে, অরিযসাৰকো দিট্ঠিসম্পন্নো ইতিপি, দস্সনসম্পন্নো ইতিপি, আগতো ইমং সদ্ধম্মং ইতিপি, পস্সতি ইমং সদ্ধম্মং ইতিপি, সেক্খেন ঞাণেন সমন্নাগতো ইতিপি ¶ , সেক্খায ¶ ৰিজ্জায সমন্নাগতো ইতিপি, ধম্মসোতং সমাপন্নো ইতিপি, অরিযো নিব্বেধিকপঞ্ঞো ইতিপি, অমতদ্ৰারং আহচ্চ তিট্ঠতি ইতিপী’’তি. দসমং.

গহপতিৰগ্গো পঞ্চমো.

তস্সুদ্দানং –

দ্ৰে ¶ পঞ্চৰেরভযা ৰুত্তা, দুক্খং লোকো চ ঞাতিকং;

অঞ্ঞতরং জাণুস্সোণি চ, লোকাযতিকেন অট্ঠমং;

দ্ৰে অরিযসাৰকা ৰুত্তা, ৰগ্গো তেন পৰুচ্চতীতি.

৬. দুক্খৰগ্গো

১. পরিৰীমংসনসুত্তং

৫১. এৰং ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কিত্তাৰতা নু খো, ভিক্খৰে, ভিক্খূ পরিৰীমংসমানো পরিৰীমংসেয্য সব্বসো সম্মা দুক্খক্খযাযা’’তি? ‘‘ভগৰংমূলকা নো, ভন্তে, ধম্মা ভগৰংনেত্তিকা ভগৰংপটিসরণা ¶ . সাধু ৰত, ভন্তে, ভগৰন্তংযেৰ পটিভাতু এতস্স ভাসিতস্স অত্থো. ভগৰতো সুত্ৰা ভিক্খূ ধারেস্সন্তী’’তি. ‘‘তেন হি, ভিক্খৰে, সুণাথ, সাধুকং মনসি করোথ, ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ইধ, ভিক্খৰে, ভিক্খু পরিৰীমংসমানো পরিৰীমংসতি – ‘যং খো ইদং অনেকৰিধং নানপ্পকারকং দুক্খং লোকে উপ্পজ্জতি জরামরণং; ইদং নু খো দুক্খং কিংনিদানং কিংসমুদযং কিংজাতিকং কিংপভৰং? কিস্মিং সতি জরামরণং হোতি, কিস্মিং অসতি জরামরণং ন হোতী’তি? সো পরিৰীমংসমানো এৰং পজানাতি – ‘যং খো ইদং অনেকৰিধং নানপ্পকারকং দুক্খং লোকে উপ্পজ্জতি ¶ জরামরণং, ইদং খো দুক্খং জাতিনিদানং জাতিসমুদযং জাতিজাতিকং জাতিপ্পভৰং. জাতিযা সতি জরামরণং হোতি, জাতিযা অসতি জরামরণং ন হোতী’’’তি.

‘‘সো ¶ জরামরণঞ্চ পজানাতি, জরামরণসমুদযঞ্চ পজানাতি, জরামরণনিরোধঞ্চ ¶ পজানাতি, যা চ জরামরণনিরোধসারুপ্পগামিনী পটিপদা তঞ্চ পজানাতি, তথা পটিপন্নো চ হোতি অনুধম্মচারী; অযং ৰুচ্চতি, ভিক্খৰে, ভিক্খু সব্বসো সম্মা দুক্খক্খযায পটিপন্নো জরামরণনিরোধায.

‘‘অথাপরং পরিৰীমংসমানো পরিৰীমংসতি – ‘জাতি পনাযং কিংনিদানা কিংসমুদযা কিংজাতিকা কিংপভৰা, কিস্মিং সতি জাতি হোতি, কিস্মিং অসতি জাতি ন হোতী’তি? সো পরিৰীমংসমানো এৰং পজানাতি – ‘জাতি ভৰনিদানা ভৰসমুদযা ভৰজাতিকা ভৰপ্পভৰা; ভৰে সতি জাতি হোতি, ভৰে অসতি জাতি ন হোতী’’’তি.

‘‘সো জাতিঞ্চ পজানাতি, জাতিসমুদযঞ্চ পজানাতি, জাতিনিরোধঞ্চ পজানাতি, যা চ জাতিনিরোধসারুপ্পগামিনী পটিপদা তঞ্চ পজানাতি, তথা পটিপন্নো চ হোতি অনুধম্মচারী; অযং ৰুচ্চতি, ভিক্খৰে, ভিক্খু সব্বসো সম্মা দুক্খক্খযায পটিপন্নো জাতিনিরোধায.

‘‘অথাপরং পরিৰীমংসমানো পরিৰীমংসতি – ‘ভৰো পনাযং কিংনিদানো…পে… উপাদানং পনিদং কিংনিদানং… তণ্হা পনাযং কিংনিদানা… ৰেদনা… ফস্সো… সল়াযতনং পনিদং কিংনিদানং… নামরূপং পনিদং… ৰিঞ্ঞাণং পনিদং… সঙ্খারা পনিমে কিংনিদানা কিংসমুদযা কিংজাতিকা কিংপভৰা; কিস্মিং সতি সঙ্খারা হোন্তি, কিস্মিং অসতি সঙ্খারা ন হোন্তী’তি? সো পরিৰীমংসমানো এৰং পজানাতি – ‘সঙ্খারা অৰিজ্জানিদানা ¶ অৰিজ্জাসমুদযা অৰিজ্জাজাতিকা অৰিজ্জাপভৰা; অৰিজ্জায ¶ সতি সঙ্খারা হোন্তি, অৰিজ্জায অসতি সঙ্খারা ন হোন্তী’’’তি.

‘‘সো সঙ্খারে চ পজানাতি, সঙ্খারসমুদযঞ্চ পজানাতি, সঙ্খারনিরোধঞ্চ পজানাতি, যা চ সঙ্খারনিরোধসারুপ্পগামিনী পটিপদা তঞ্চ পজানাতি, তথা পটিপন্নো চ হোতি অনুধম্মচারী ¶ ; অযং ৰুচ্চতি, ভিক্খৰে, ভিক্খু সব্বসো সম্মা দুক্খক্খযায পটিপন্নো সঙ্খারনিরোধায.

‘‘অৰিজ্জাগতো ¶ যং, ভিক্খৰে, পুরিসপুগ্গলো পুঞ্ঞং চে সঙ্খারং অভিসঙ্খরোতি, পুঞ্ঞূপগং হোতি ৰিঞ্ঞাণং. অপুঞ্ঞং চে সঙ্খারং অভিসঙ্খরোতি, অপুঞ্ঞূপগং হোতি ৰিঞ্ঞাণং. আনেঞ্জং চে সঙ্খারং অভিসঙ্খরোতি আনেঞ্জূপগং হোতি ৰিঞ্ঞাণং. যতো খো, ভিক্খৰে, ভিক্খুনো অৰিজ্জা পহীনা হোতি ৰিজ্জা উপ্পন্না, সো অৰিজ্জাৰিরাগা ৰিজ্জুপ্পাদা নেৰ পুঞ্ঞাভিসঙ্খারং অভিসঙ্খরোতি ন অপুঞ্ঞাভিসঙ্খারং অভিসঙ্খরোতি ন আনেঞ্জাভিসঙ্খারং অভিসঙ্খরোতি. অনভিসঙ্খরোন্তো অনভিসঞ্চেতযন্তো ন কিঞ্চি লোকে উপাদিযতি; অনুপাদিযং ন পরিতস্সতি, অপরিতস্সং পচ্চত্তঞ্ঞেৰ পরিনিব্বাযতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি.

‘‘সো সুখং চে ৰেদনং ৰেদযতি, সা অনিচ্চাতি পজানাতি, অনজ্ঝোসিতাতি পজানাতি, অনভিনন্দিতাতি পজানাতি. দুক্খং চে ৰেদনং ৰেদযতি, সা অনিচ্চাতি পজানাতি, অনজ্ঝোসিতাতি পজানাতি, অনভিনন্দিতাতি পজানাতি. অদুক্খমসুখং চে ৰেদনং ৰেদযতি, সা অনিচ্চাতি ¶ পজানাতি, অনজ্ঝোসিতাতি পজানাতি, অনভিনন্দিতাতি পজানাতি. সো সুখং চে ৰেদনং ৰেদযতি, ৰিসংযুত্তো নং ৰেদযতি. দুক্খং চে ৰেদনং ৰেদযতি, ৰিসংযুত্তো নং [তং ৰেদনং (সী. পী.), ৰেদনং (ক.)] ৰেদযতি. অদুক্খমসুখং চে ৰেদনং ৰেদযতি, ৰিসংযুত্তো নং ৰেদযতি.

‘‘সো ¶ কাযপরিযন্তিকং ৰেদনং ৰেদযমানো কাযপরিযন্তিকং ৰেদনং ৰেদযামীতি পজানাতি, জীৰিতপরিযন্তিকং ৰেদনং ৰেদযমানো জীৰিতপরিযন্তিকং ৰেদনং ৰেদযামীতি পজানাতি. কাযস্স ভেদা উদ্ধং জীৰিতপরিযাদানা ইধেৰ সব্বৰেদযিতানি অনভিনন্দিতানি সীতীভৰিস্সন্তি, সরীরানি অৰসিস্সন্তীতি পজানাতি.

‘‘সেয্যথাপি, ভিক্খৰে, পুরিসো কুম্ভকারপাকা উণ্হং কুম্ভং উদ্ধরিত্ৰা সমে ভূমিভাগে পটিসিস্সেয্য [পটিৰিসেয্য (সী.), পতিট্ঠপেয্য (স্যা. কং. পী.), পটিসেৰেয্য (টীকা)]. তত্র যাযং উস্মা সা তত্থেৰ ৰূপসমেয্য, কপল্লানি অৰসিস্সেয্যুং. এৰমেৰ খো, ভিক্খৰে, ভিক্খু কাযপরিযন্তিকং ৰেদনং ৰেদযমানো কাযপরিযন্তিকং ৰেদনং ৰেদযামীতি পজানাতি, জীৰিতপরিযন্তিকং ৰেদনং ৰেদযমানো জীৰিতপরিযন্তিকং ¶ ৰেদনং ৰেদযামীতি পজানাতি. কাযস্স ¶ ভেদা উদ্ধং জীৰিতপরিযাদানা ইধেৰ সব্বৰেদযিতানি অনভিনন্দিতানি সীতীভৰিস্সন্তি, সরীরানি অৰসিস্সন্তীতি পজানাতি.

‘‘তং কিং মঞ্ঞথ, ভিক্খৰে, অপি নু খো খীণাসৰো ভিক্খু পুঞ্ঞাভিসঙ্খারং ৰা অভিসঙ্খরেয্য অপুঞ্ঞাভিসঙ্খারং ৰা অভিসঙ্খরেয্য আনেঞ্জাভিসঙ্খারং ৰা অভিসঙ্খরেয্যা’’তি? ‘‘নো হেতং, ভন্তে’’. ‘‘সব্বসো ৰা ¶ পন সঙ্খারেসু অসতি, সঙ্খারনিরোধা অপি নু খো ৰিঞ্ঞাণং পঞ্ঞাযেথা’’তি? ‘‘নো হেতং, ভন্তে’’. ‘‘সব্বসো ৰা পন ৰিঞ্ঞাণে অসতি, ৰিঞ্ঞাণনিরোধা অপি নু খো নামরূপং পঞ্ঞাযেথা’’তি? ‘‘নো হেতং, ভন্তে’’. ‘‘সব্বসো ৰা পন নামরূপে অসতি, নামরূপনিরোধা অপি নু খো সল়াযতনং পঞ্ঞাযেথা’’তি? ‘‘নো হেতং, ভন্তে’’. ‘‘সব্বসো ৰা পন সল়াযতনে অসতি, সল়াযতননিরোধা অপি নু খো ফস্সো পঞ্ঞাযেথা’’তি? ‘‘নো হেতং, ভন্তে’’. ‘‘সব্বসো ¶ ৰা পন ফস্সে অসতি, ফস্সনিরোধা অপি নু খো ৰেদনা পঞ্ঞাযেথা’’তি? ‘‘নো হেতং, ভন্তে’’. ‘‘সব্বসো ৰা পন ৰেদনায অসতি, ৰেদনানিরোধা অপি নু খো তণ্হা পঞ্ঞাযেথা’’তি? ‘‘নো হেতং, ভন্তে’’. ‘‘সব্বসো ৰা পন তণ্হায অসতি, তণ্হানিরোধা অপি নু খো উপাদানং পঞ্ঞাযেথা’’তি? ‘‘নো হেতং, ভন্তে’’. ‘‘সব্বসো ৰা পন উপাদানে অসতি, উপাদাননিরোধা অপি নু খো ভৰো পঞ্ঞাযেথা’’তি. ‘‘নো হেতং, ভন্তে’’. ‘‘সব্বসো ৰা পন ভৰে অসতি, ভৰনিরোধা অপি নু খো জাতি পঞ্ঞাযেথা’’তি? ‘‘নো হেতং, ভন্তে’’. ‘‘সব্বসো ৰা পন জাতিযা অসতি, জাতিনিরোধা অপি নু খো জরামরণং পঞ্ঞাযেথা’’তি? ‘‘নো হেতং, ভন্তে’’.

‘‘সাধু সাধু, ভিক্খৰে, এৰমেতং, ভিক্খৰে, নেতং অঞ্ঞথা. সদ্দহথ মে তং, ভিক্খৰে, অধিমুচ্চথ, নিক্কঙ্খা এত্থ হোথ নিব্বিচিকিচ্ছা. এসেৰন্তো দুক্খস্সা’’তি. পঠমং.

২. উপাদানসুত্তং

৫২. সাৰত্থিযং ¶ ৰিহরতি…পে… ‘‘উপাদানিযেসু, ভিক্খৰে, ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং; উপাদানপচ্চযা ভৰো; ভৰপচ্চযা জাতি; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘সেয্যথাপি ¶ ¶ , ভিক্খৰে, দসন্নং ৰা কট্ঠৰাহানং ৰীসায ¶ ৰা কট্ঠৰাহানং তিংসায ৰা কট্ঠৰাহানং চত্তারীসায ৰা কট্ঠৰাহানং মহাঅগ্গিক্খন্ধো জলেয্য. তত্র পুরিসো কালেন কালং সুক্খানি চেৰ তিণানি পক্খিপেয্য, সুক্খানি চ গোমযানি পক্খিপেয্য, সুক্খানি চ কট্ঠানি পক্খিপেয্য. এৰঞ্হি সো, ভিক্খৰে, মহাঅগ্গিক্খন্ধো তদাহারো তদুপাদানো চিরং দীঘমদ্ধানং জলেয্য. এৰমেৰ খো, ভিক্খৰে, উপাদানিযেসু ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং…পে… এৰমেতস্স কেৰলস্স দুক্খক্খন্ধস্স সমুদযো হোতি.

‘‘উপাদানিযেসু, ভিক্খৰে, ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো; উপাদাননিরোধা ভৰনিরোধো; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতি.

‘‘সেয্যথাপি, ভিক্খৰে, দসন্নং ৰা কট্ঠৰাহানং ৰীসায ৰা তিংসায ¶ ৰা চত্তারীসায ৰা কট্ঠৰাহানং মহাঅগ্গিক্খন্ধো জলেয্য; তত্র পুরিসো ন কালেন কালং সুক্খানি চেৰ তিণানি পক্খিপেয্য, ন সুক্খানি চ গোমযানি পক্খিপেয্য, ন সুক্খানি চ কট্ঠানি পক্খিপেয্য. এৰঞ্হি সো, ভিক্খৰে, মহাঅগ্গিক্খন্ধো পুরিমস্স চ উপাদানস্স পরিযাদানা অঞ্ঞস্স চ অনুপহারা [অনুপাহারা (পী.)] অনাহারো নিব্বাযেয্য. এৰমেৰ খো, ভিক্খৰে, উপাদানিযেসু ধম্মেসু আদীনৰানুপস্সিনো ৰিহরতো তণ্হা নিরুজ্ঝতি, তণ্হানিরোধা উপাদাননিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. দুতিযং.

৩. সংযোজনসুত্তং

৫৩. সাৰত্থিযং ৰিহরতি ¶ …পে… ‘‘সংযোজনিযেসু, ভিক্খৰে, ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং; উপাদানপচ্চযা ভৰো; ভৰপচ্চযা জাতি; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘সেয্যথাপি ¶ ¶ , ভিক্খৰে, তেলঞ্চ পটিচ্চ ৰট্টিঞ্চ পটিচ্চ তেলপ্পদীপো ঝাযেয্য. তত্র পুরিসো কালেন কালং তেলং আসিঞ্চেয্য ৰট্টিং উপসংহরেয্য. এৰঞ্হি সো, ভিক্খৰে, তেলপ্পদীপো তদাহারো তদুপাদানো চিরং দীঘমদ্ধানং জলেয্য. এৰমেৰ খো, ভিক্খৰে, সংযোজনিযেসু ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং; উপাদানপচ্চযা ভৰো; ভৰপচ্চযা জাতি ¶ ; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি.

‘‘সংযোজনিযেসু, ভিক্খৰে, ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো; উপাদাননিরোধা ভৰনিরোধো; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতি.

‘‘সেয্যথাপি, ভিক্খৰে, তেলঞ্চ পটিচ্চ ৰট্টিঞ্চ পটিচ্চ তেলপ্পদীপো ঝাযেয্য. তত্র পুরিসো ন কালেন কালং তেলং আসিঞ্চেয্য ন ৰট্টিং উপসংহরেয্য. এৰঞ্হি সো, ভিক্খৰে, তেলপ্পদীপো পুরিমস্স চ উপাদানস্স পরিযাদানা অঞ্ঞস্স চ অনুপহারা অনাহারো নিব্বাযেয্য. এৰমেৰ খো, ভিক্খৰে, সংযোজনিযেসু ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. ততিযং.

৪. দুতিযসংযোজনসুত্তং

৫৪. সাৰত্থিযং ৰিহরতি ¶ …পে… ‘‘সেয্যথাপি, ভিক্খৰে, তেলঞ্চ পটিচ্চ ৰট্টিঞ্চ পটিচ্চ তেলপ্পদীপো ঝাযেয্য. তত্র পুরিসো কালেন কালং তেলং আসিঞ্চেয্য ৰট্টিং উপসংহরেয্য. এৰঞ্হি সো, ভিক্খৰে, তেলপ্পদীপো তদাহারো তদুপাদানো চিরং দীঘমদ্ধানং জলেয্য. এৰমেৰ খো, ভিক্খৰে, সংযোজনিযেসু ধম্মেসু অস্সাদানুপস্সিনো ¶ ৰিহরতো তণ্হা পৰড্ঢতি. তণ্হাপচ্চযা উপাদানং…পে… এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘সেয্যথাপি ¶ , ভিক্খৰে, তেলঞ্চ পটিচ্চ ৰট্টিঞ্চ পটিচ্চ তেলপ্পদীপো ঝাযেয্য. তত্র পুরিসো ন কালেন কালং তেলং আসিঞ্চেয্য ন ৰট্টিং উপসংহরেয্য ¶ . এৰঞ্হি সো, ভিক্খৰে, তেলপ্পদীপো পুরিমস্স চ উপাদানস্স পরিযাদানা অঞ্ঞস্স চ অনুপহারা অনাহারো নিব্বাযেয্য. এৰমেৰ খো, ভিক্খৰে, সংযোজনিযেসু ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. চতুত্থং.

৫. মহারুক্খসুত্তং

৫৫. সাৰত্থিযং ৰিহরতি…পে… ‘‘উপাদানিযেসু, ভিক্খৰে, ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং; উপাদানপচ্চযা ভৰো…পে… এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘সেয্যথাপি, ভিক্খৰে, মহারুক্খো. তস্স যানি চেৰ মূলানি অধোগমানি, যানি চ তিরিযঙ্গমানি, সব্বানি তানি উদ্ধং ওজং অভিহরন্তি. এৰঞ্হি সো, ভিক্খৰে, মহারুক্খো তদাহারো তদুপাদানো চিরং দীঘমদ্ধানং তিট্ঠেয্য. এৰমেৰ খো, ভিক্খৰে, উপাদানিযেসু ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং…পে… এৰমেতস্স ¶ কেৰলস্স দুক্খক্খন্ধস্স সমুদযো হোতি.

‘‘উপাদানিযেসু ¶ , ভিক্খৰে, ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো; উপাদাননিরোধা ভৰনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি.

‘‘সেয্যথাপি, ভিক্খৰে, মহারুক্খো. অথ পুরিসো আগচ্ছেয্য কুদ্দালপিটকং [কুদালপিটকং (অঞ্ঞত্থ)] আদায. সো তং রুক্খং মূলে ছিন্দেয্য, মূলং ছিন্দিত্ৰা পলিখণেয্য [পলিংখণেয্য (পী. ক.)], পলিখণিত্ৰা মূলানি উদ্ধরেয্য অন্তমসো উসীরনাল়িমত্তানিপি. সো তং রুক্খং খণ্ডাখণ্ডিকং ছিন্দেয্য, খণ্ডাখণ্ডিকং ছিন্দিত্ৰা ফালেয্য, ফালেত্ৰা সকলিকং সকলিকং করেয্য, সকলিকং সকলিকং করিত্ৰা ৰাতাতপে ৰিসোসেয্য; ৰাতাতপে ৰিসোসেত্ৰা অগ্গিনা ডহেয্য, অগ্গিনা ডহেত্ৰা মসিং করেয্য, মসিং ¶ করিত্ৰা মহাৰাতে ৰা ওফুণেয্য [ওপুনেয্য (সী. পী.), ওফুনেয্য (স্যা. কং. ক.)] নদিযা ৰা সীঘসোতায পৰাহেয্য. এৰঞ্হি সো, ভিক্খৰে, মহারুক্খো উচ্ছিন্নমূলো ¶ অস্স তালাৰত্থুকতো অনভাৰংকতো [অনভাৰকতো (সী.), অনভাৰঙ্গতো (স্যা. কং.)] আযতিং অনুপ্পাদধম্মো. এৰমেৰ খো, ভিক্খৰে, উপাদানিযেসু ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো; উপাদাননিরোধা ভৰনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. পঞ্চমং.

৬. দুতিযমহারুক্খসুত্তং

৫৬. সাৰত্থিযং ৰিহরতি…পে… ‘‘সেয্যথাপি, ভিক্খৰে, মহারুক্খো. তস্স যানি চেৰ মূলানি অধোগমানি, যানি চ তিরিযঙ্গমানি ¶ , সব্বানি তানি উদ্ধং ওজং অভিহরন্তি. এৰঞ্হি সো, ভিক্খৰে, মহারুক্খো তদাহারো তদুপাদানো চিরং দীঘমদ্ধানং তিট্ঠেয্য. এৰমেৰ খো, ভিক্খৰে, উপাদানিযেসু ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং ¶ …পে… এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘সেয্যথাপি, ভিক্খৰে, মহারুক্খো. অথ পুরিসো আগচ্ছেয্য কুদ্দালপিটকং আদায. সো তং রুক্খং মূলে ছিন্দেয্য, মূলে ছেত্ৰা পলিখণেয্য, পলিখণিত্ৰা মূলানি উদ্ধরেয্য…পে… নদিযা ৰা সীঘসোতায পৰাহেয্য. এৰঞ্হি সো, ভিক্খৰে, মহারুক্খো উচ্ছিন্নমূলো অস্স তালাৰত্থুকতো অনভাৰঙ্কতো আযতিং অনুপ্পাদধম্মো. এৰমেৰ খো, ভিক্খৰে, উপাদানিযেসু ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. ছট্ঠং.

৭. তরুণরুক্খসুত্তং

৫৭. সাৰত্থিযং ৰিহরতি…পে… ‘‘সংযোজনিযেসু, ভিক্খৰে, ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং…পে… এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘সেয্যথাপি, ভিক্খৰে, তরুণো রুক্খো. তস্স পুরিসো কালেন কালং মূলানি পলিমজ্জেয্য [পলিসন্নেয্য (সী.), পলিসজ্জেয্য (স্যা. কং. পী.), পলিপট্ঠেয্য (ক.), পলিসন্দেয্য, পলিবন্ধেয্য (টীকানুরূপং)] কালেন কালং পংসুং দদেয্য, কালেন ¶ কালং ¶ ¶ উদকং দদেয্য. এৰঞ্হি সো, ভিক্খৰে, তরুণো রুক্খো তদাহারো তদুপাদানো ৰুদ্ধিং ৰিরূল়্হিং ৰেপুল্লং আপজ্জেয্য. এৰমেৰ খো, ভিক্খৰে, সংযোজনিযেসু ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং…পে… এৰমেতস্স কেৰলস্স দুক্খক্খন্ধস্স সমুদযো হোতি.

‘‘সংযোজনিযেসু, ভিক্খৰে, ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি.

‘‘সেয্যথাপি ¶ , ভিক্খৰে, তরুণো রুক্খো. অথ পুরিসো আগচ্ছেয্য কুদ্দালপিটকং আদায…পে… নদিযা ৰা সীঘসোতায পৰাহেয্য. এৰঞ্হি সো, ভিক্খৰে, তরুণো রুক্খো উচ্ছিন্নমূলো অস্স তালাৰত্থুকতো অনভাৰঙ্কতো আযতিং অনুপ্পাদধম্মো. এৰমেৰ খো, ভিক্খৰে, সংযোজনিযেসু ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. সত্তমং.

৮. নামরূপসুত্তং

৫৮. সাৰত্থিযং ৰিহরতি…পে… ‘‘সংযোজনিযেসু, ভিক্খৰে, ধম্মেসু অস্সাদানুপস্সিনো ৰিহরতো নামরূপস্স অৰক্কন্তি হোতি. নামরূপপচ্চযা সল়াযতনং…পে… এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘সেয্যথাপি, ভিক্খৰে, মহারুক্খো. তস্স যানি চেৰ মূলানি ¶ অধোগমানি, যানি চ তিরিযঙ্গমানি, সব্বানি তানি উদ্ধং ওজং অভিহরন্তি. এৰঞ্হি সো, ভিক্খৰে, মহারুক্খো তদাহারো তদুপাদানো চিরং দীঘমদ্ধানং তিট্ঠেয্য. এৰমেৰ খো, ভিক্খৰে, সংযোজনিযেসু ধম্মেসু অস্সাদানুপস্সিনো ৰিহরতো নামরূপস্স অৰক্কন্তি হোতি…পে….

‘‘সংযোজনিযেসু, ভিক্খৰে, ধম্মেসু আদীনৰানুপস্সিনো ৰিহরতো নামরূপস্স অৰক্কন্তি ন হোতি. নামরূপনিরোধা ¶ সল়াযতননিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি.

‘‘সেয্যথাপি ¶ ¶ , ভিক্খৰে, মহারুক্খো. অথ পুরিসো আগচ্ছেয্য কুদ্দালপিটকং আদায…পে… আযতিং অনুপ্পাদধম্মো. এৰমেৰ খো, ভিক্খৰে, সংযোজনিযেসু ধম্মেসু আদীনৰানুপস্সিনো ৰিহরতো নামরূপস্স অৰক্কন্তি ন হোতি. নামরূপনিরোধা সল়াযতননিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. অট্ঠমং.

৯. ৰিঞ্ঞাণসুত্তং

৫৯. সাৰত্থিযং ৰিহরতি…পে… ‘‘সংযোজনিযেসু, ভিক্খৰে, ধম্মেসু অস্সাদানুপস্সিনো ৰিহরতো ৰিঞ্ঞাণস্স অৰক্কন্তি হোতি. ৰিঞ্ঞাণপচ্চযা নামরূপং…পে… এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘সেয্যথাপি, ভিক্খৰে, মহারুক্খো. তস্স যানি চেৰ মূলানি ¶ …পে… এৰমেৰ খো, ভিক্খৰে, সংযোজনিযেসু ধম্মেসু অস্সাদানুপস্সিনো ৰিহরতো ৰিঞ্ঞাণস্স অৰক্কন্তি হোতি…পে….

‘‘সংযোজনিযেসু, ভিক্খৰে, ধম্মেসু আদীনৰানুপস্সিনো ৰিহরতো ৰিঞ্ঞাণস্স অৰক্কন্তি ন হোতি. ৰিঞ্ঞাণনিরোধা নামরূপনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি.

‘‘সেয্যথাপি, ভিক্খৰে, মহারুক্খো. অথ পুরিসো আগচ্ছেয্য কুদ্দালপিটকং আদায…পে… আযতিং অনুপ্পাদধম্মো. এৰমেৰ খো, ভিক্খৰে, সংযোজনিযেসু ধম্মেসু আদীনৰানুপস্সিনো ৰিহরতো ৰিঞ্ঞাণস্স অৰক্কন্তি ন হোতি. ৰিঞ্ঞাণস্স নিরোধা নামরূপনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. নৰমং.

১০. নিদানসুত্তং

৬০. একং ¶ ¶ সমযং ভগৰা কুরূসু ৰিহরতি কম্মাসধম্মং নাম কুরূনং নিগমো. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘অচ্ছরিযং, ভন্তে, অব্ভুতং, ভন্তে! যাৰ গম্ভীরো চাযং, ভন্তে, পটিচ্চসমুপ্পাদো গম্ভীরাৰভাসো ¶ চ, অথ চ পন মে উত্তানকুত্তানকো ৰিয খাযতী’’তি.

‘‘মা ¶ হেৰং, আনন্দ, মা হেৰং, আনন্দ [মা হেৰং আনন্দ অৰচ মা হেৰং আনন্দ অৰচ (দী. নি. ২ মহানিদানসুত্তে)]! গম্ভীরো চাযং, আনন্দ, পটিচ্চসমুপ্পাদো গম্ভীরাৰভাসো চ. এতস্স, আনন্দ, ধম্মস্স অননুবোধা অপ্পটিৰেধা এৰমযং পজা তন্তাকুলকজাতা কুলগণ্ঠিকজাতা [গুল়াগুণ্ঠিকজাতা (সী.), গুল়ীগুণ্ঠিকজাতা (স্যা. কং.)] মুঞ্জপব্বজভূতা [মুঞ্জবব্বজভূতা (সী.)] অপাযং দুগ্গতিং ৰিনিপাতং সংসারং নাতিৰত্ততি.

‘‘উপাদানিযেসু, আনন্দ, ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং; উপাদানপচ্চযা ভৰো; ভৰপচ্চযা জাতি; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি.

‘‘সেয্যথাপি, আনন্দ, মহারুক্খো. তস্স যানি চেৰ মূলানি অধোগমানি, যানি চ তিরিযঙ্গমানি, সব্বানি তানি উদ্ধং ওজং অভিহরন্তি. এৰঞ্হি সো, আনন্দ, মহারুক্খো তদাহারো তদুপাদানো চিরং দীঘমদ্ধানং তিট্ঠেয্য. এৰমেৰ খো, আনন্দ, উপাদানিযেসু ধম্মেসু অস্সাদানুপস্সিনো ৰিহরতো তণ্হা পৰড্ঢতি. তণ্হাপচ্চযা উপাদানং ¶ ; উপাদানপচ্চযা ভৰো…পে… এৰমেতস্স কেৰলস্স দুক্খক্খন্ধস্স সমুদযো হোতি.

‘‘উপাদানিযেসু, আনন্দ, ধম্মেসু আদীনৰানুপস্সিনো ৰিহরতো তণ্হা ¶ নিরুজ্ঝতি. তণ্হানিরোধা উপাদাননিরোধো; উপাদাননিরোধা ভৰনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি.

‘‘সেয্যথাপি ¶ , আনন্দ, মহারুক্খো. অথ পুরিসো আগচ্ছেয্য কুদ্দালপিটকং আদায. সো তং রুক্খং মূলে ছিন্দেয্য, মূলে ছেত্ৰা পলিখণেয্য, পলিখণিত্ৰা মূলানি উদ্ধরেয্য অন্তমসো উসীরনাল়িমত্তানিপি. সো তং রুক্খং খণ্ডাখণ্ডিকং ছিন্দেয্য. খণ্ডাখণ্ডিকং ছিন্দিত্ৰা ফালেয্য; ফালেত্ৰা সকলিকং সকলিকং করেয্য, সকলিকং সকলিকং করিত্ৰা ৰাতাতপে ৰিসোসেয্য, ৰাতাতপে ৰিসোসেত্ৰা অগ্গিনা ডহেয্য, অগ্গিনা ডহেত্ৰা মসিং করেয্য, মসিং করিত্ৰা মহাৰাতে ৰা ওফুণেয্য, নদিযা ৰা সীঘসোতায পৰাহেয্য. এৰঞ্হি সো, আনন্দ, মহারুক্খো উচ্ছিন্নমূলো অস্স তালাৰত্থুকতো অনভাৰঙ্কতো আযতিং অনুপ্পাদধম্মো ¶ . এৰমেৰ খো, আনন্দ, উপাদানিযেসু ধম্মেসু আদীনৰানুপস্সিনো ৰিহরতো তণ্হা নিরুজ্ঝতি. তণ্হানিরোধা উপাদাননিরোধো; উপাদাননিরোধা ভৰনিরোধো; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতী’’তি. দসমং.

দুক্খৰগ্গো ছট্ঠো.

তস্সুদ্দানং –

পরিৰীমংসনুপাদানং, ¶ দ্ৰে চ সংযোজনানি চ;

মহারুক্খেন দ্ৰে ৰুত্তা, তরুণেন চ সত্তমং;

নামরূপঞ্চ ৰিঞ্ঞাণং, নিদানেন চ তে দসাতি.

৭. মহাৰগ্গো

১. অস্সুতৰাসুত্তং

৬১. এৰং ¶ ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে…পে… ‘‘অস্সুতৰা, ভিক্খৰে, পুথুজ্জনো ইমস্মিং চাতুমহাভূতিকস্মিং কাযস্মিং নিব্বিন্দেয্যপি ৰিরজ্জেয্যপি ৰিমুচ্চেয্যপি. তং কিস্স হেতু? [চাতুম্মহাভূতিকস্মিং (সী. স্যা. কং.)] দিস্সতি, ভিক্খৰে [দিস্সতি হি ভিক্খৰে (সী. স্যা. কং.)], ইমস্স ¶ চাতুমহাভূতিকস্স কাযস্স আচযোপি অপচযোপি আদানম্পি নিক্খেপনম্পি. তস্মা তত্রাস্সুতৰা পুথুজ্জনো নিব্বিন্দেয্যপি ৰিরজ্জেয্যপি ৰিমুচ্চেয্যপি’’.

‘‘যঞ্চ খো এতং, ভিক্খৰে, ৰুচ্চতি চিত্তং ইতিপি, মনো ইতিপি, ৰিঞ্ঞাণং ইতিপি, তত্রাস্সুতৰা পুথুজ্জনো নালং নিব্বিন্দিতুং নালং ৰিরজ্জিতুং নালং ৰিমুচ্চিতুং. তং কিস্স হেতু? দীঘরত্তঞ্হেতং, ভিক্খৰে, অস্সুতৰতো পুথুজ্জনস্স অজ্ঝোসিতং মমাযিতং পরামট্ঠং – ‘এতং মম, এসোহমস্মি, এসো মে অত্তা’তি. তস্মা তত্রাস্সুতৰা পুথুজ্জনো নালং নিব্বিন্দিতুং নালং ৰিরজ্জিতুং নালং ৰিমুচ্চিতুং.

‘‘ৰরং ¶ , ভিক্খৰে, অস্সুতৰা পুথুজ্জনো ইমং চাতুমহাভূতিকং কাযং অত্ততো উপগচ্ছেয্য, ন ত্ৰেৰ চিত্তং. তং কিস্স হেতু? দিস্সতাযং, ভিক্খৰে, চাতুমহাভূতিকো কাযো একম্পি ৰস্সং তিট্ঠমানো দ্ৰেপি ৰস্সানি তিট্ঠমানো তীণিপি ৰস্সানি তিট্ঠমানো চত্তারিপি ৰস্সানি তিট্ঠমানো পঞ্চপি ৰস্সানি তিট্ঠমানো দসপি ৰস্সানি তিট্ঠমানো ৰীসতিপি ৰস্সানি তিট্ঠমানো তিংসম্পি ৰস্সানি তিট্ঠমানো চত্তারীসম্পি ¶ ৰস্সানি তিট্ঠমানো পঞ্ঞাসম্পি ৰস্সানি তিট্ঠমানো ৰস্সসতম্পি তিট্ঠমানো, ভিয্যোপি ¶ তিট্ঠমানো.

‘‘যঞ্চ খো এতং, ভিক্খৰে, ৰুচ্চতি চিত্তং ইতিপি, মনো ইতিপি, ৰিঞ্ঞাণং ইতিপি, তং রত্তিযা চ দিৰসস্স চ অঞ্ঞদেৰ উপ্পজ্জতি অঞ্ঞং নিরুজ্ঝতি. সেয্যথাপি, ভিক্খৰে, মক্কটো অরঞ্ঞে পৰনে চরমানো সাখং গণ্হতি, তং মুঞ্চিত্ৰা অঞ্ঞং গণ্হতি, তং মুঞ্চিত্ৰা অঞ্ঞং গণ্হতি; এৰমেৰ খো, ভিক্খৰে, যমিদং ৰুচ্চতি চিত্তং ইতিপি, মনো ইতিপি, ৰিঞ্ঞাণং ইতিপি, তং রত্তিযা চ দিৰসস্স চ অঞ্ঞদেৰ উপ্পজ্জতি অঞ্ঞং নিরুজ্ঝতি.

‘‘তত্র, ভিক্খৰে, সুতৰা অরিযসাৰকো পটিচ্চসমুপ্পাদংযেৰ সাধুকং যোনিসো মনসি করোতি – ‘ইতি ইমস্মিং সতি ইদং হোতি, ইমস্সুপ্পাদা ইদং উপ্পজ্জতি; ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতি – যদিদং অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে… এৰমেতস্স কেৰলস্স দুক্খক্খন্ধস্স সমুদযো হোতি. অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ¶ ৰিঞ্ঞাণনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’’তি.

‘‘এৰং পস্সং, ভিক্খৰে, সুতৰা অরিযসাৰকো রূপস্মিম্পি নিব্বিন্দতি, ৰেদনাযপি নিব্বিন্দতি, সঞ্ঞাযপি নিব্বিন্দতি, সঙ্খারেসুপি ¶ নিব্বিন্দতি, ৰিঞ্ঞাণস্মিম্পি নিব্বিন্দতি; নিব্বিন্দং ৰিরজ্জতি, ৰিরাগা ৰিমুচ্চতি, ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. পঠমং.

২. দুতিযঅস্সুতৰাসুত্তং

৬২. সাৰত্থিযং ৰিহরতি…পে… ‘‘অস্সুতৰা, ভিক্খৰে, পুথুজ্জনো ইমস্মিং চাতুমহাভূতিকস্মিং কাযস্মিং নিব্বিন্দেয্যপি ৰিরজ্জেয্যপি ৰিমুচ্চেয্যপি. তং কিস্স হেতু? দিস্সতি, ভিক্খৰে, ইমস্স চাতুমহাভূতিকস্স কাযস্স আচযোপি ¶ অপচযোপি আদানম্পি নিক্খেপনম্পি ¶ . তস্মা তত্রাস্সুতৰা পুথুজ্জনো নিব্বিন্দেয্যপি ৰিরজ্জেয্যপি ৰিমুচ্চেয্যপি. যঞ্চ খো এতং, ভিক্খৰে, ৰুচ্চতি চিত্তং ইতিপি, মনো ইতিপি, ৰিঞ্ঞাণং ইতিপি, তত্রাস্সুতৰা পুথুজ্জনো নালং নিব্বিন্দিতুং নালং ৰিরজ্জিতুং নালং ৰিমুচ্চিতুং. তং কিস্স হেতু? দীঘরত্তঞ্হেতং, ভিক্খৰে, অস্সুতৰতো পুথুজ্জনস্স অজ্ঝোসিতং মমাযিতং পরামট্ঠং – ‘এতং মম, এসোহমস্মি, এসো মে অত্তা’তি. তস্মা তত্রাস্সুতৰা পুথুজ্জনো নালং নিব্বিন্দিতুং নালং ৰিরজ্জিতুং নালং ৰিমুচ্চিতুং’’.

‘‘ৰরং, ভিক্খৰে, অস্সুতৰা পুথুজ্জনো ইমং চাতুমহাভূতিকং কাযং অত্ততো উপগচ্ছেয্য, ন ত্ৰেৰ চিত্তং. তং কিস্স হেতু? দিস্সতাযং, ভিক্খৰে, চাতুমহাভূতিকো কাযো একম্পি ৰস্সং তিট্ঠমানো দ্ৰেপি ৰস্সানি তিট্ঠমানো তীণিপি ৰস্সানি তিট্ঠমানো চত্তারিপি ৰস্সানি তিট্ঠমানো পঞ্চপি ৰস্সানি তিট্ঠমানো দসপি ৰস্সানি তিট্ঠমানো ¶ ৰীসতিপি ৰস্সানি তিট্ঠমানো তিংসম্পি ৰস্সানি তিট্ঠমানো চত্তারীসম্পি ৰস্সানি তিট্ঠমানো পঞ্ঞাসম্পি ৰস্সানি তিট্ঠমানো ৰস্সসতম্পি তিট্ঠমানো, ভিয্যোপি তিট্ঠমানো. যঞ্চ খো এতং, ভিক্খৰে, ৰুচ্চতি চিত্তং ইতিপি, মনো ইতিপি, ৰিঞ্ঞাণং ইতিপি, তং রত্তিযা চ দিৰসস্স চ অঞ্ঞদেৰ উপ্পজ্জতি অঞ্ঞং নিরুজ্ঝতি.

‘‘তত্র ¶ , ভিক্খৰে, সুতৰা অরিযসাৰকো পটিচ্চসমুপ্পাদংযেৰ সাধুকং যোনিসো মনসি করোতি – ‘ইতি ইমস্মিং সতি ইদং হোতি, ইমস্সুপ্পাদা ইদং উপ্পজ্জতি; ইমস্মিং অসতি ইদং ন হোতি, ইমস্স নিরোধা ইদং নিরুজ্ঝতী’তি. সুখৰেদনিযং, ভিক্খৰে, ফস্সং পটিচ্চ উপ্পজ্জতি সুখৰেদনা. তস্সেৰ সুখৰেদনিযস্স ফস্সস্স নিরোধা যং তজ্জং ৰেদযিতং সুখৰেদনিযং ফস্সং পটিচ্চ উপ্পন্না সুখৰেদনা সা নিরুজ্ঝতি সা ৰূপসম্মতি. দুক্খৰেদনিযং, ভিক্খৰে, ফস্সং পটিচ্চ উপ্পজ্জতি দুক্খৰেদনা. তস্সেৰ দুক্খৰেদনিযস্স ফস্সস্স নিরোধা যং তজ্জং ৰেদযিতং দুক্খৰেদনিযং ¶ ফস্সং পটিচ্চ উপ্পন্না দুক্খৰেদনা সা নিরুজ্ঝতি সা ৰূপসম্মতি. অদুক্খমসুখৰেদনিযং, ভিক্খৰে, ফস্সং পটিচ্চ উপ্পজ্জতি অদুক্খমসুখৰেদনা. তস্সেৰ অদুক্খমসুখৰেদনিযস্স ফস্সস্স নিরোধা যং তজ্জং ৰেদযিতং অদুক্খমসুখৰেদনিযং ফস্সং পটিচ্চ উপ্পন্না অদুক্খমসুখৰেদনা সা নিরুজ্ঝতি সা ৰূপসম্মতি.

‘‘সেয্যথাপি ¶ , ভিক্খৰে, দ্ৰিন্নং কট্ঠানং সঙ্ঘট্টনসমোধানা উস্মা জাযতি তেজো অভিনিব্বত্ততি. তেসংযেৰ দ্ৰিন্নং কট্ঠানং নানাকতৰিনিব্ভোগা ¶ [নানাভাৰাৰিনিক্খেপা (সী. পী.) ম. নি. ৩.৩৫৭] যা তজ্জা উস্মা সা নিরুজ্ঝতি সা ৰূপসম্মতি; এৰমেৰ খো, ভিক্খৰে, সুখৰেদনিযং ফস্সং পটিচ্চ উপ্পজ্জতি সুখৰেদনা. তস্সেৰ সুখৰেদনিযস্স ফস্সস্স নিরোধা যং তজ্জং ৰেদযিতং সুখৰেদনিযং ফস্সং পটিচ্চ উপ্পন্না সুখৰেদনা সা নিরুজ্ঝতি সা ৰূপসম্মতি…পে… অদুক্খমসুখৰেদনিযং ফস্সং পটিচ্চ উপ্পজ্জতি অদুক্খমসুখৰেদনা. তস্সেৰ অদুক্খমসুখৰেদনিযস্স ফস্সস্স নিরোধা যং তজ্জং ৰেদযিতং অদুক্খমসুখৰেদনিযং ফস্সং পটিচ্চ উপ্পন্না অদুক্খমসুখৰেদনা সা নিরুজ্ঝতি সা ৰূপসম্মতি.

‘‘এৰং পস্সং, ভিক্খৰে, সুতৰা অরিযসাৰকো ফস্সেপি নিব্বিন্দতি, ৰেদনাযপি নিব্বিন্দতি, সঞ্ঞাযপি নিব্বিন্দতি, সঙ্খারেসুপি নিব্বিন্দতি, ৰিঞ্ঞাণস্মিম্পি নিব্বিন্দতি; নিব্বিন্দং ৰিরজ্জতি, ৰিরাগা ৰিমুচ্চতি, ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. দুতিযং.

৩. পুত্তমংসূপমসুত্তং

৬৩. সাৰত্থিযং ¶ …পে… ‘‘চত্তারোমে ¶ , ভিক্খৰে, আহারা ভূতানং ৰা সত্তানং ঠিতিযা সম্ভৰেসীনং ৰা অনুগ্গহায ¶ . কতমে চত্তারো? কবল়ীকারো আহারো ওল়ারিকো ৰা সুখুমো ৰা, ফস্সো দুতিযো, মনোসঞ্চেতনা ততিযা, ৰিঞ্ঞাণং চতুত্থং. ইমে খো, ভিক্খৰে, চত্তারো আহারা ভূতানং ৰা সত্তানং ঠিতিযা সম্ভৰেসীনং ৰা অনুগ্গহায’’.

‘‘কথঞ্চ, ভিক্খৰে, কবল়ীকারো আহারো দট্ঠব্বো? সেয্যথাপি, ভিক্খৰে, দ্ৰে জাযম্পতিকা [জযম্পতিকা (সী. পী.) টীকা ওলোকেতব্বা] পরিত্তং সম্বলং আদায কন্তারমগ্গং পটিপজ্জেয্যুং. তেসমস্স একপুত্তকো পিযো মনাপো. অথ খো তেসং, ভিক্খৰে, দ্ৰিন্নং জাযম্পতিকানং কন্তারগতানং যা পরিত্তা সম্বলমত্তা, সা পরিক্খযং পরিযাদানং গচ্ছেয্য. সিযা চ নেসং কন্তারাৰসেসো অনতিণ্ণো. অথ খো তেসং, ভিক্খৰে, দ্ৰিন্নং জাযম্পতিকানং এৰমস্স – ‘অম্হাকং খো যা পরিত্তা সম্বলমত্তা সা পরিক্খীণা পরিযাদিণ্ণা [পরিযাদিন্না (স্যা. কং.)]. অত্থি ¶ চাযং কন্তারাৰসেসো অনিত্তিণ্ণো [অনিত্থিণ্ণো (স্যা. কং.), অনতিণ্ণো (ক.)]. যংনূন মযং ইমং একপুত্তকং পিযং মনাপং ৰধিত্ৰা ৰল্লূরঞ্চ সোণ্ডিকঞ্চ করিত্ৰা পুত্তমংসানি খাদন্তা এৰং তং কন্তারাৰসেসং নিত্থরেয্যাম, মা সব্বেৰ তযো ৰিনস্সিম্হা’তি. অথ খো তে, ভিক্খৰে, দ্ৰে জাযম্পতিকা তং একপুত্তকং পিযং মনাপং ৰধিত্ৰা ৰল্লূরঞ্চ সোণ্ডিকঞ্চ করিত্ৰা পুত্তমংসানি খাদন্তা এৰং তং কন্তারাৰসেসং নিত্থরেয্যুং. তে পুত্তমংসানি চেৰ খাদেয্যুং, উরে চ পটিপিসেয্যুং – ‘কহং, একপুত্তক, কহং, একপুত্তকা’তি.

‘‘তং কিং মঞ্ঞথ, ভিক্খৰে, অপি নু তে দৰায ৰা আহারং আহারেয্যুং, মদায ৰা আহারং ¶ আহারেয্যুং, মণ্ডনায ¶ ৰা আহারং আহারেয্যুং, ৰিভূসনায ৰা আহারং আহারেয্যু’’ন্তি? ‘‘নো হেতং, ভন্তে’’. ‘‘ননু তে, ভিক্খৰে, যাৰদেৰ কন্তারস্স নিত্থরণত্থায আহারং আহারেয্যু’’ন্তি? ‘‘এৰং, ভন্তে’’. ‘‘এৰমেৰ খ্ৰাহং, ভিক্খৰে, কবল়ীকারো আহারো দট্ঠব্বো’’তি ৰদামি. কবল়ীকারে, ভিক্খৰে, আহারে পরিঞ্ঞাতে পঞ্চকামগুণিকো রাগো পরিঞ্ঞাতো হোতি. পঞ্চকামগুণিকে রাগে পরিঞ্ঞাতে নত্থি তং সংযোজনং যেন সংযোজনেন সংযুত্তো অরিযসাৰকো পুন ইমং লোকং আগচ্ছেয্য.

‘‘কথঞ্চ, ভিক্খৰে, ফস্সাহারো দট্ঠব্বো? সেয্যথাপি, ভিক্খৰে, গাৰী নিচ্চম্মা কুট্টং চে [কুড্ডঞ্চে (সী. স্যা. কং. পী.)] ¶ নিস্সায তিট্ঠেয্য. যে কুট্টনিস্সিতা পাণা তে নং খাদেয্যুং. রুক্খং চে নিস্সায তিট্ঠেয্য, যে রুক্খনিস্সিতা পাণা তে নং খাদেয্যুং. উদকং চে নিস্সায তিট্ঠেয্য, যে উদকনিস্সিতা পাণা তে নং খাদেয্যুং. আকাসং চে নিস্সায তিট্ঠেয্য, যে আকাসনিস্সিতা পাণা তে নং খাদেয্যুং. যং যদেৰ হি সা, ভিক্খৰে, গাৰী নিচ্চম্মা নিস্সায তিট্ঠেয্য, যে তন্নিস্সিতা [যে তন্নিস্সিতা তন্নিস্সিতা (সী. স্যা. কং. পী.)] পাণা তে নং খাদেয্যুং. এৰমেৰ খ্ৰাহং, ভিক্খৰে, ‘‘ফস্সাহারো দট্ঠব্বো’’তি ৰদামি. ফস্সে, ভিক্খৰে, আহারে পরিঞ্ঞাতে তিস্সো ৰেদনা পরিঞ্ঞাতা হোন্তি. তীসু ৰেদনাসু পরিঞ্ঞাতাসু অরিযসাৰকস্স নত্থি কিঞ্চি উত্তরিকরণীযন্তি [উত্তরিংকরণীযন্তি (সী. পী.)] ৰদামি.

‘‘কথঞ্চ ¶ , ভিক্খৰে, মনোসঞ্চেতনাহারো দট্ঠব্বো? সেয্যথাপি ¶ , ভিক্খৰে, অঙ্গারকাসু সাধিকপোরিসা পুণ্ণা অঙ্গারানং ৰীতচ্চিকানং ৰীতধূমানং. অথ পুরিসো আগচ্ছেয্য জীৰিতুকামো অমরিতুকামো সুখকামো দুক্খপ্পটিকূলো. তমেনং দ্ৰে বলৰন্তো পুরিসা নানাবাহাসু গহেত্ৰা তং অঙ্গারকাসুং উপকড্ঢেয্যুং. অথ খো, ভিক্খৰে, তস্স পুরিসস্স আরকাৰস্স চেতনা আরকা পত্থনা আরকা পণিধি. তং ¶ কিস্স হেতু? এৰঞ্হি, ভিক্খৰে, তস্স পুরিসস্স হোতি – ‘ইমং চাহং অঙ্গারকাসুং পপতিস্সামি, ততোনিদানং মরণং ৰা নিগচ্ছামি মরণমত্তং ৰা দুক্খ’ন্তি. এৰমেৰ খ্ৰাহং, ভিক্খৰে, ‘মনোসঞ্চেতনাহারো দট্ঠব্বো’তি ৰদামি. মনোসঞ্চেতনায, ভিক্খৰে, আহারে পরিঞ্ঞাতে তিস্সো তণ্হা পরিঞ্ঞাতা হোন্তি. তীসু তণ্হাসু পরিঞ্ঞাতাসু অরিযসাৰকস্স নত্থি কিঞ্চি উত্তরিকরণীযন্তি ৰদামি.

‘‘কথঞ্চ, ভিক্খৰে, ৰিঞ্ঞাণাহারো দট্ঠব্বো? সেয্যথাপি, ভিক্খৰে, চোরং আগুচারিং গহেত্ৰা রঞ্ঞো দস্সেয্যুং – ‘অযং তে, দেৰ, চোরো আগুচারী, ইমস্স যং ইচ্ছসি তং দণ্ডং পণেহী’তি. তমেনং রাজা এৰং ৰদেয্য – ‘গচ্ছথ, ভো, ইমং পুরিসং পুব্বণ্হসমযং সত্তিসতেন হনথা’তি. তমেনং পুব্বণ্হসমযং সত্তিসতেন হনেয্যুং. অথ রাজা মজ্ঝন্হিকসমযং এৰং ৰদেয্য – ‘অম্ভো, কথং সো পুরিসো’তি? ‘তথেৰ, দেৰ, জীৰতী’তি. তমেনং রাজা এৰং ৰদেয্য – ‘গচ্ছথ, ভো, তং পুরিসং মজ্ঝন্হিকসমযং সত্তিসতেন হনথা’তি. তমেনং মজ্ঝন্হিকসমযং সত্তিসতেন হনেয্যুং. অথ রাজা সাযন্হসমযং এৰং ৰদেয্য – ‘অম্ভো, কথং ¶ সো পুরিসো’তি? ‘তথেৰ, দেৰ, জীৰতী’তি. তমেনং রাজা এৰং ৰদেয্য – ‘গচ্ছথ, ভো, তং পুরিসং সাযন্হসমযং সত্তিসতেন হনথা’তি. তমেনং সাযন্হসমযং সত্তিসতেন হনেয্যুং. তং কিং মঞ্ঞথ ¶ , ভিক্খৰে, অপি নু সো পুরিসো দিৰসং তীহি সত্তিসতেহি হঞ্ঞমানো ততোনিদানং দুক্খং দোমনস্সং পটিসংৰেদিযেথা’’তি? ‘‘একিস্সাপি, ভন্তে, সত্তিযা হঞ্ঞমানো ততোনিদানং দুক্খং দোমনস্সং পটিসংৰেদিযেথ; কো পন ৰাদো তীহি সত্তিসতেহি হঞ্ঞমানো’’তি! ‘‘এৰমেৰ খ্ৰাহং, ভিক্খৰে, ৰিঞ্ঞাণাহারো দট্ঠব্বোতি ৰদামি. ৰিঞ্ঞাণে, ভিক্খৰে, আহারে পরিঞ্ঞাতে নামরূপং পরিঞ্ঞাতং হোতি, নামরূপে পরিঞ্ঞাতে অরিযসাৰকস্স নত্থি কিঞ্চি উত্তরিকরণীযন্তি ৰদামী’’তি. ততিযং.

৪. অত্থিরাগসুত্তং

৬৪. সাৰত্থিযং ¶ ¶ ৰিহরতি…পে… ‘‘চত্তারোমে, ভিক্খৰে, আহারা ভূতানং ৰা সত্তানং ঠিতিযা সম্ভৰেসীনং ৰা অনুগ্গহায. কতমে চত্তারো? কবল়ীকারো আহারো ওল়ারিকো ৰা সুখুমো ৰা, ফস্সো দুতিযো, মনোসঞ্চেতনা ততিযা, ৰিঞ্ঞাণং চতুত্থং. ইমে খো, ভিক্খৰে, চত্তারো আহারা ভূতানং ৰা সত্তানং ঠিতিযা সম্ভৰেসীনং ৰা অনুগ্গহায’’.

‘‘কবল়ীকারে চে, ভিক্খৰে, আহারে অত্থি রাগো অত্থি নন্দী অত্থি তণ্হা, পতিট্ঠিতং তত্থ ৰিঞ্ঞাণং ৰিরূল়্হং. যত্থ পতিট্ঠিতং ৰিঞ্ঞাণং ৰিরূল়্হং, অত্থি তত্থ নামরূপস্স অৰক্কন্তি. যত্থ অত্থি নামরূপস্স অৰক্কন্তি, অত্থি তত্থ সঙ্খারানং ৰুদ্ধি. যত্থ ¶ অত্থি সঙ্খারানং ৰুদ্ধি, অত্থি তত্থ আযতিং পুনব্ভৰাভিনিব্বত্তি. যত্থ অত্থি আযতিং পুনব্ভৰাভিনিব্বত্তি, অত্থি তত্থ আযতিং জাতিজরামরণং. যত্থ অত্থি আযতিং জাতিজরামরণং, সসোকং তং, ভিক্খৰে, সদরং সউপাযাসন্তি ৰদামি.

‘‘ফস্সে চে, ভিক্খৰে, আহারে…পে… মনোসঞ্চেতনায চে, ভিক্খৰে, আহারে… ৰিঞ্ঞাণে চে, ভিক্খৰে, আহারে অত্থি রাগো অত্থি নন্দী অত্থি তণ্হা, পতিট্ঠিতং তত্থ ৰিঞ্ঞাণং ৰিরূল়্হং. যত্থ পতিট্ঠিতং ৰিঞ্ঞাণং ৰিরূল়্হং, অত্থি তত্থ নামরূপস্স অৰক্কন্তি. যত্থ অত্থি নামরূপস্স অৰক্কন্তি, অত্থি তত্থ সঙ্খারানং ৰুদ্ধি. যত্থ অত্থি সঙ্খারানং ৰুদ্ধি, অত্থি তত্থ আযতিং পুনব্ভৰাভিনিব্বত্তি. যত্থ অত্থি আযতিং পুনব্ভৰাভিনিব্বত্তি, অত্থি তত্থ আযতিং জাতিজরামরণং. যত্থ অত্থি আযতিং জাতিজরামরণং, সসোকং তং, ভিক্খৰে, সদরং সউপাযাসন্তি ৰদামি.

‘‘সেয্যথাপি ¶ , ভিক্খৰে, রজকো ৰা চিত্তকারকো ৰা সতি রজনায ৰা লাখায ৰা হলিদ্দিযা ৰা নীলিযা ৰা মঞ্জিট্ঠায ¶ ৰা সুপরিমট্ঠে ৰা ফলকে ভিত্তিযা ৰা দুস্সপট্টে ৰা ইত্থিরূপং ৰা পুরিসরূপং ৰা অভিনিম্মিনেয্য সব্বঙ্গপচ্চঙ্গং; এৰমেৰ খো, ভিক্খৰে, কবল়ীকারে চে আহারে অত্থি রাগো অত্থি নন্দী অত্থি তণ্হা, পতিট্ঠিতং তত্থ ৰিঞ্ঞাণং ৰিরূল়্হং. যত্থ পতিট্ঠিতং ৰিঞ্ঞাণং ৰিরূল়্হং, অত্থি তত্থ নামরূপস্স অৰক্কন্তি. যত্থ অত্থি নামরূপস্স অৰক্কন্তি, অত্থি তত্থ সঙ্খারানং ৰুদ্ধি. যত্থ অত্থি সঙ্খারানং ৰুদ্ধি, অত্থি তত্থ ¶ আযতিং পুনব্ভৰাভিনিব্বত্তি. যত্থ অত্থি আযতিং পুনব্ভৰাভিনিব্বত্তি, অত্থি তত্থ ¶ আযতিং জাতিজরামরণং. যত্থ অত্থি আযতিং জাতিজরামরণং, সসোকং তং, ভিক্খৰে, সদরং সউপাযাসন্তি ৰদামি.

‘‘ফস্সে চে, ভিক্খৰে, আহারে…পে… মনোসঞ্চেতনায চে, ভিক্খৰে, আহারে… ৰিঞ্ঞাণে চে, ভিক্খৰে, আহারে অত্থি রাগো অত্থি নন্দী অত্থি তণ্হা, পতিট্ঠিতং তত্থ ৰিঞ্ঞাণং ৰিরূল়্হং. যত্থ পতিট্ঠিতং ৰিঞ্ঞাণং ৰিরূল়্হং, অত্থি তত্থ নামরূপস্স অৰক্কন্তি. যত্থ অত্থি নামরূপস্স অৰক্কন্তি, অত্থি তত্থ সঙ্খারানং ৰুদ্ধি. যত্থ অত্থি সঙ্খারানং ৰুদ্ধি, অত্থি তত্থ আযতিং পুনব্ভৰাভিনিব্বত্তি. যত্থ অত্থি আযতিং পুনব্ভৰাভিনিব্বত্তি, অত্থি তত্থ আযতিং জাতিজরামরণং. যত্থ অত্থি আযতিং জাতিজরামরণং, সসোকং তং, ভিক্খৰে, সদরং সউপাযাসন্তি ৰদামি.

‘‘কবল়ীকারে চে, ভিক্খৰে, আহারে নত্থি রাগো নত্থি নন্দী নত্থি তণ্হা, অপ্পতিট্ঠিতং তত্থ ৰিঞ্ঞাণং অৰিরূল়্হং. যত্থ অপ্পতিট্ঠিতং ৰিঞ্ঞাণং অৰিরূল়্হং, নত্থি তত্থ নামরূপস্স অৰক্কন্তি. যত্থ নত্থি নামরূপস্স অৰক্কন্তি, নত্থি তত্থ সঙ্খারানং ৰুদ্ধি. যত্থ নত্থি সঙ্খারানং ৰুদ্ধি, নত্থি তত্থ আযতিং পুনব্ভৰাভিনিব্বত্তি. যত্থ নত্থি আযতিং পুনব্ভৰাভিনিব্বত্তি, নত্থি তত্থ আযতিং জাতিজরামরণং. যত্থ নত্থি আযতিং জাতিজরামরণং, অসোকং তং, ভিক্খৰে, অদরং অনুপাযাসন্তি ৰদামি.

‘‘ফস্সে ¶ চে, ভিক্খৰে, আহারে…পে… মনোসঞ্চেতনায চে, ভিক্খৰে, আহারে… ৰিঞ্ঞাণে চে, ভিক্খৰে, আহারে ¶ নত্থি রাগো নত্থি নন্দী নত্থি তণ্হা, অপ্পতিট্ঠিতং তত্থ ৰিঞ্ঞাণং অৰিরূল়্হং. যত্থ অপ্পতিট্ঠিতং ৰিঞ্ঞাণং অৰিরূল়্হং, নত্থি তত্থ নামরূপস্স অৰক্কন্তি ¶ . যত্থ নত্থি নামরূপস্স অৰক্কন্তি, নত্থি তত্থ সঙ্খারানং ৰুদ্ধি. যত্থ নত্থি সঙ্খারানং ৰুদ্ধি, নত্থি তত্থ আযতিং পুনব্ভৰাভিনিব্বত্তি. যত্থ নত্থি আযতিং পুনব্ভৰাভিনিব্বত্তি, নত্থি তত্থ আযতিং জাতিজরামরণং. যত্থ নত্থি আযতিং জাতিজরামরণং, অসোকং তং, ভিক্খৰে, অদরং অনুপাযাসন্তি ৰদামি.

‘‘সেয্যথাপি, ভিক্খৰে, কূটাগারং ৰা কূটাগারসালং ৰা উত্তরায ৰা দক্খিণায ৰা পাচীনায ৰা ৰাতপানা সূরিযে উগ্গচ্ছন্তে ৰাতপানেন রস্মি পৰিসিত্ৰা ক্ৰাস্স পতিট্ঠিতা’’ [কত্থ পতিট্ঠিতা (ক.)] তি? ‘‘পচ্ছিমাযং, ভন্তে, ভিত্তিয’’ন্তি. ‘‘পচ্ছিমা চে, ভিক্খৰে, ভিত্তি নাস্স ক্ৰাস্স পতিট্ঠিতা’’তি? ‘‘পথৰিযং, ভন্তে’’তি. ‘‘পথৰী চে, ভিক্খৰে ¶ , নাস্স ক্ৰাস্স পতিট্ঠিতা’’তি? ‘‘আপস্মিং, ভন্তে’’তি. ‘‘আপো চে, ভিক্খৰে, নাস্স ক্ৰাস্স পতিট্ঠিতা’’তি? ‘‘অপ্পতিট্ঠিতা, ভন্তে’’তি. ‘‘এৰমেৰ খো, ভিক্খৰে, কবল়ীকারে চে আহারে নত্থি রাগো নত্থি নন্দী নত্থি তণ্হা…পে….

‘‘ফস্সে চে, ভিক্খৰে, আহারে… মনোসঞ্চেতনায চে, ভিক্খৰে, আহারে… ৰিঞ্ঞাণে চে, ভিক্খৰে, আহারে নত্থি রাগো নত্থি নন্দী নত্থি তণ্হা, অপ্পতিট্ঠিতং তত্থ ৰিঞ্ঞাণং অৰিরূল়্হং. যত্থ অপ্পতিট্ঠিতং ৰিঞ্ঞাণং অৰিরূল়্হং, নত্থি তত্থ নামরূপস্স অৰক্কন্তি. যত্থ নত্থি নামরূপস্স অৰক্কন্তি, নত্থি তত্থ সঙ্খারানং ৰুদ্ধি. যত্থ নত্থি সঙ্খারানং ¶ ৰুদ্ধি, নত্থি তত্থ আযতিং পুনব্ভৰাভিনিব্বত্তি ¶ . যত্থ নত্থি আযতিং পুনব্ভৰাভিনিব্বত্তি, নত্থি তত্থ আযতিং জাতিজরামরণং. যত্থ নত্থি আযতিং জাতিজরামরণং অসোকং তং, ভিক্খৰে, অদরং অনুপাযাসন্তি ৰদামী’’তি. চতুত্থং.

৫. নগরসুত্তং

৬৫. সাৰত্থিযং ৰিহরতি…পে… ‘‘পুব্বে মে, ভিক্খৰে, সম্বোধা অনভিসম্বুদ্ধস্স বোধিসত্তস্সেৰ সতো এতদহোসি – ‘কিচ্ছা ৰতাযং লোকো আপন্নো জাযতি চ জীযতি চ মীযতি চ চৰতি চ উপপজ্জতি চ. অথ চ পনিমস্স দুক্খস্স নিস্সরণং নপ্পজানাতি জরামরণস্স. কুদাস্সু নাম ইমস্স দুক্খস্স নিস্সরণং পঞ্ঞাযিস্সতি জরামরণস্সা’তি? তস্স ময্হং, ভিক্খৰে, এতদহোসি – ‘কিম্হি নু খো সতি জরামরণং হোতি, কিংপচ্চযা জরামরণ’ন্তি ¶ ? তস্স ময্হং, ভিক্খৰে, যোনিসো মনসিকারা অহু পঞ্ঞায অভিসমযো – ‘জাতিযা খো সতি জরামরণং হোতি, জাতিপচ্চযা জরামরণ’’’ন্তি.

‘‘তস্স ময্হং, ভিক্খৰে, এতদহোসি – ‘কিম্হি নু খো সতি জাতি হোতি…পে… ভৰো হোতি… উপাদানং হোতি… তণ্হা হোতি… ৰেদনা হোতি… ফস্সো হোতি… সল়াযতনং হোতি… নামরূপং হোতি… কিংপচ্চযা নামরূপ’ন্তি? তস্স ময্হং, ভিক্খৰে, যোনিসো মনসিকারা অহু পঞ্ঞায অভিসমযো – ‘ৰিঞ্ঞাণে খো সতি নামরূপং হোতি, ৰিঞ্ঞাণপচ্চযা নামরূপ’ন্তি. তস্স ময্হং, ভিক্খৰে, এতদহোসি – ‘কিম্হি নু খো সতি ৰিঞ্ঞাণং হোতি, কিংপচ্চযা ৰিঞ্ঞাণ’ন্তি ¶ ? তস্স ময্হং, ভিক্খৰে, যোনিসো মনসিকারা অহু পঞ্ঞায অভিসমযো – ‘নামরূপে খো সতি ৰিঞ্ঞাণং হোতি, নামরূপপচ্চযা ৰিঞ্ঞাণ’’’ন্তি.

‘‘তস্স ¶ ময্হং, ভিক্খৰে, এতদহোসি – পচ্চুদাৰত্ততি খো ইদং ৰিঞ্ঞাণং নামরূপম্হা ন পরং গচ্ছতি. এত্তাৰতা জাযেথ ৰা জীযেথ ৰা মীযেথ ৰা চৰেথ ৰা উপপজ্জেথ ৰা, যদিদং নামরূপপচ্চযা ৰিঞ্ঞাণং; ৰিঞ্ঞাণপচ্চযা নামরূপং; নামরূপপচ্চযা সল়াযতনং; সল়াযতনপচ্চযা ফস্সো…পে… এৰমেতস্স ¶ কেৰলস্স দুক্খক্খন্ধস্স সমুদযো হোতি. ‘সমুদযো, সমুদযো’তি খো মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি ঞাণং উদপাদি পঞ্ঞা উদপাদি ৰিজ্জা উদপাদি আলোকো উদপাদি.

‘‘তস্স ময্হং, ভিক্খৰে, এতদহোসি – ‘কিম্হি নু খো অসতি, জরামরণং ন হোতি; কিস্স নিরোধা জরামরণনিরোধো’তি? তস্স ময্হং, ভিক্খৰে, যোনিসো মনসিকারা অহু পঞ্ঞায অভিসমযো – ‘জাতিযা খো অসতি, জরামরণং ন হোতি; জাতিনিরোধা জরামরণনিরোধো’তি. তস্স ময্হং, ভিক্খৰে, এতদহোসি – ‘কিম্হি নু খো অসতি জাতি ন হোতি…পে… ভৰো ন হোতি… উপাদানং ন হোতি… তণ্হা ন হোতি… ৰেদনা ন হোতি… ফস্সো ন হোতি… সল়াযতনং ন হোতি… নামরূপং ন হোতি. কিস্স নিরোধা নামরূপনিরোধো’তি? তস্স ময্হং, ভিক্খৰে, যোনিসো মনসিকারা অহু পঞ্ঞায অভিসমযো ¶ – ‘ৰিঞ্ঞাণে খো অসতি, নামরূপং ন হোতি; ৰিঞ্ঞাণনিরোধা নামরূপনিরোধো’’’তি ¶ .

‘‘তস্স ময্হং, ভিক্খৰে, এতদহোসি – ‘কিম্হি নু খো অসতি ৰিঞ্ঞাণং ন হোতি; কিস্স নিরোধা ৰিঞ্ঞাণনিরোধো’তি? তস্স ময্হং, ভিক্খৰে, যোনিসো মনসিকারা অহু পঞ্ঞায অভিসমযো – ‘নামরূপে খো অসতি, ৰিঞ্ঞাণং ন হোতি; নামরূপনিরোধা ৰিঞ্ঞাণনিরোধো’’’তি.

‘‘তস্স ময্হং, ভিক্খৰে, এতদহোসি – অধিগতো খো ম্যাযং মগ্গো বোধায যদিদং – নামরূপনিরোধা ৰিঞ্ঞাণনিরোধো; ৰিঞ্ঞাণনিরোধা নামরূপনিরোধো; নামরূপনিরোধা সল়াযতননিরোধো; সল়াযতননিরোধা ফস্সনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতি. ‘নিরোধো, নিরোধো’তি খো মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি ঞাণং উদপাদি পঞ্ঞা উদপাদি ৰিজ্জা উদপাদি আলোকো উদপাদি.

‘‘সেয্যথাপি, ভিক্খৰে, পুরিসো অরঞ্ঞে পৰনে চরমানো পস্সেয্য পুরাণং মগ্গং পুরাণঞ্জসং পুব্বকেহি মনুস্সেহি অনুযাতং. সো তমনুগচ্ছেয্য ¶ . তমনুগচ্ছন্তো পস্সেয্য পুরাণং নগরং পুরাণং রাজধানিং পুব্বকেহি ¶ মনুস্সেহি অজ্ঝাৰুট্ঠং [অজ্ঝাৰুত্থং (সী. স্যা. কং. পী.)] আরামসম্পন্নং ৰনসম্পন্নং পোক্খরণীসম্পন্নং উদ্ধাপৰন্তং [উদ্দাপৰন্তং (সী. স্যা. কং. পী.)] রমণীযং. অথ খো সো, ভিক্খৰে, পুরিসো রঞ্ঞো ৰা রাজমহামত্তস্স ৰা আরোচেয্য – ‘যগ্ঘে, ভন্তে, জানেয্যাসি – অহং অদ্দসং অরঞ্ঞে পৰনে চরমানো পুরাণং মগ্গং পুরাণঞ্জসং পুব্বকেহি মনুস্সেহি অনুযাতং তমনুগচ্ছিং. তমনুগচ্ছন্তো অদ্দসং পুরাণং নগরং পুরাণং রাজধানিং পুব্বকেহি মনুস্সেহি অজ্ঝাৰুট্ঠং ¶ আরামসম্পন্নং ৰনসম্পন্নং পোক্খরণীসম্পন্নং উদ্ধাপৰন্তং রমণীযং. তং, ভন্তে, নগরং মাপেহী’তি. অথ খো সো, ভিক্খৰে, রাজা ৰা রাজমহামত্তো ৰা তং নগরং মাপেয্য. তদস্স নগরং অপরেন সমযেন ইদ্ধঞ্চেৰ ফীতঞ্চ বাহুজঞ্ঞং আকিণ্ণমনুস্সং ৰুদ্ধিৰেপুল্লপ্পত্তং. এৰমেৰ খ্ৰাহং, ভিক্খৰে, অদ্দসং পুরাণং মগ্গং পুরাণঞ্জসং পুব্বকেহি সম্মাসম্বুদ্ধেহি অনুযাতং.

‘‘কতমো চ সো, ভিক্খৰে, পুরাণমগ্গো পুরাণঞ্জসো পুব্বকেহি সম্মাসম্বুদ্ধেহি অনুযাতো ¶ ? অযমেৰ অরিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে… সম্মাসমাধি. অযং খো সো, ভিক্খৰে, পুরাণমগ্গো পুরাণঞ্জসো পুব্বকেহি সম্মাসম্বুদ্ধেহি অনুযাতো, তমনুগচ্ছিং; তমনুগচ্ছন্তো জরামরণং অব্ভঞ্ঞাসিং; জরামরণসমুদযং অব্ভঞ্ঞাসিং; জরামরণনিরোধং অব্ভঞ্ঞাসিং; জরামরণনিরোধগামিনিং পটিপদং অব্ভঞ্ঞাসিং. তমনুগচ্ছিং; তমনুগচ্ছন্তো জাতিং অব্ভঞ্ঞাসিং…পে… ভৰং অব্ভঞ্ঞাসিং… উপাদানং অব্ভঞ্ঞাসিং… তণ্হং অব্ভঞ্ঞাসিং… ৰেদনং অব্ভঞ্ঞাসিং… ফস্সং অব্ভঞ্ঞাসিং… সল়াযতনং অব্ভঞ্ঞাসিং… নামরূপং অব্ভঞ্ঞাসিং… ৰিঞ্ঞাণং অব্ভঞ্ঞাসিং. তমনুগচ্ছিং; তমনুগচ্ছন্তো সঙ্খারে অব্ভঞ্ঞাসিং; সঙ্খারসমুদযং অব্ভঞ্ঞাসিং; সঙ্খারনিরোধং অব্ভঞ্ঞাসিং; সঙ্খারনিরোধগামিনিং পটিপদং অব্ভঞ্ঞাসিং. তদভিঞ্ঞা ¶ আচিক্খিং ভিক্খূনং ভিক্খুনীনং উপাসকানং উপাসিকানং. তযিদং, ভিক্খৰে ¶ , ব্রহ্মচরিযং ইদ্ধঞ্চেৰ ফীতঞ্চ ৰিত্থারিকং বাহুজঞ্ঞং পুথুভূতং যাৰ দেৰমনুস্সেহি সুপ্পকাসিত’’ন্তি. পঞ্চমং.

৬. সম্মসসুত্তং

৬৬. এৰং মে সুতং – একং সমযং ভগৰা কুরূসু ৰিহরতি কম্মাসধম্মং নাম কুরূনং নিগমো. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি ¶ তে ভিক্খূ ভগৰতো পচ্চস্সোসুং. ভগৰা এতদৰোচ – ‘‘সম্মসথ নো তুম্হে, ভিক্খৰে, অন্তরং সম্মস’’ন্তি [অন্তরা সম্মসনন্তি (সী.)]. এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘অহং খো, ভন্তে, সম্মসামি অন্তরং সম্মস’’ন্তি. ‘‘যথা কথং পন ত্ৰং, ভিক্খু, সম্মসসি অন্তরং সম্মস’’ন্তি? অথ খো সো ভিক্খু ব্যাকাসি. যথা সো ভিক্খু ব্যাকাসি ন সো ভিক্খু ভগৰতো চিত্তং আরাধেসি.

এৰং ৰুত্তে, আযস্মা আনন্দো ভগৰন্তং এতদৰোচ – ‘‘এতস্স, ভগৰা, কালো; এতস্স, সুগত, কালো; যং ভগৰা অন্তরং সম্মসং ভাসেয্য. ভগৰতো সুত্ৰা ভিক্খূ ধারেস্সন্তী’’তি. ‘‘তেনহানন্দ, সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ইধ ¶ , ভিক্খৰে, ভিক্খু সম্মসমানো সম্মসতি অন্তরং সম্মসং [সম্মসনং (সী.)] – ‘যং খো ইদং অনেকৰিধং নানপ্পকারকং দুক্খং লোকে উপ্পজ্জতি জরামরণং. ইদং খো দুক্খং কিংনিদানং কিংসমুদযং কিংজাতিকং ¶ কিংপভৰং, কিস্মিং সতি জরামরণং হোতি, কিস্মিং অসতি জরামরণং ন হোতী’তি? সো সম্মসমানো এৰং জানাতি – ‘যং খো ইদং অনেকৰিধং নানপ্পকারকং দুক্খং ¶ লোকে উপ্পজ্জতি জরামরণং. ইদং খো দুক্খং উপধিনিদানং উপধিসমুদযং উপধিজাতিকং উপধিপভৰং, উপধিস্মিং সতি জরামরণং হোতি, উপধিস্মিং অসতি জরামরণং ন হোতী’তি. সো জরামরণঞ্চ পজানাতি জরামরণসমুদযঞ্চ পজানাতি জরামরণনিরোধঞ্চ পজানাতি যা চ জরামরণনিরোধসারুপ্পগামিনী পটিপদা তঞ্চ পজানাতি. তথাপটিপন্নো চ হোতি অনুধম্মচারী. অযং ৰুচ্চতি, ভিক্খৰে, ভিক্খু সব্বসো সম্মা দুক্খক্খযায পটিপন্নো জরামরণনিরোধায.

‘‘অথাপরং সম্মসমানো সম্মসতি অন্তরং সম্মসং – ‘উপধি পনাযং কিংনিদানো কিংসমুদযো কিংজাতিকো কিংপভৰো, কিস্মিং সতি উপধি হোতি, কিস্মিং অসতি উপধি ন হোতী’তি? সো সম্মসমানো এৰং জানাতি – ‘উপধি তণ্হানিদানো তণ্হাসমুদযো তণ্হাজাতিকো তণ্হাপভৰো, তণ্হায সতি উপধি হোতি, তণ্হায অসতি উপধি ন হোতী’তি. সো উপধিঞ্চ পজানাতি উপধিসমুদযঞ্চ পজানাতি উপধিনিরোধঞ্চ ¶ পজানাতি যা চ উপধিনিরোধসারুপ্পগামিনী পটিপদা তঞ্চ পজানাতি. তথা পটিপন্নো চ হোতি অনুধম্মচারী. অযং ৰুচ্চতি, ভিক্খৰে, ভিক্খু সব্বসো সম্মা দুক্খক্খযায পটিপন্নো উপধিনিরোধায.

‘‘অথাপরং সম্মসমানো সম্মসতি অন্তরং সম্মসং – ‘তণ্হা পনাযং কত্থ উপ্পজ্জমানা উপ্পজ্জতি, কত্থ নিৰিসমানা নিৰিসতী’তি? সো সম্মসমানো এৰং জানাতি – যং খো লোকে পিযরূপং সাতরূপং এত্থেসা তণ্হা উপ্পজ্জমানা উপ্পজ্জতি, এত্থ নিৰিসমানা নিৰিসতি ¶ . কিঞ্চ লোকে পিযরূপং সাতরূপং? চক্খুং লোকে পিযরূপং, সাতরূপং. এত্থেসা তণ্হা উপ্পজ্জমানা উপ্পজ্জতি, এত্থ নিৰিসমানা নিৰিসতি. সোতং লোকে পিযরূপং সাতরূপং…পে… ঘানং ¶ লোকে পিযরূপং সাতরূপং… জিৰ্হা লোকে পিযরূপং সাতরূপং… কাযো লোকে পিযরূপং সাতরূপং… মনো লোকে পিযরূপং সাতরূপং এত্থেসা তণ্হা উপ্পজ্জমানা উপ্পজ্জতি এত্থ নিৰিসমানা নিৰিসতি.

‘‘যে ¶ হি কেচি, ভিক্খৰে, অতীতমদ্ধানং সমণা ৰা ব্রাহ্মণা ৰা যং লোকে পিযরূপং সাতরূপং তং নিচ্চতো অদ্দক্খুং সুখতো অদ্দক্খুং অত্ততো অদ্দক্খুং আরোগ্যতো অদ্দক্খুং খেমতো অদ্দক্খুং. তে তণ্হং ৰড্ঢেসুং. যে তণ্হং ৰড্ঢেসুং তে উপধিং ৰড্ঢেসুং. যে উপধিং ৰড্ঢেসুং তে দুক্খং ৰড্ঢেসুং. যে দুক্খং ৰড্ঢেসুং তে ন পরিমুচ্চিংসু জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, ন পরিমুচ্চিংসু দুক্খস্মাতি ৰদামি.

‘‘যেপি হি কেচি, ভিক্খৰে, অনাগতমদ্ধানং সমণা ৰা ব্রাহ্মণা ৰা যং লোকে পিযরূপং সাতরূপং তং নিচ্চতো দক্খিস্সন্তি [দক্খিন্তি (সী.)] সুখতো দক্খিস্সন্তি অত্ততো দক্খিস্সন্তি আরোগ্যতো দক্খিস্সন্তি খেমতো দক্খিস্সন্তি. তে তণ্হং ৰড্ঢিস্সন্তি. যে তণ্হং ৰড্ঢিস্সন্তি তে উপধিং ৰড্ঢিস্সন্তি. যে উপধিং ৰড্ঢিস্সন্তি তে দুক্খং ৰড্ঢিস্সন্তি. যে দুক্খং ৰড্ঢিস্সন্তি তে ন পরিমুচ্চিস্সন্তি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, ন পরিমুচ্চিস্সন্তি দুক্খস্মাতি ৰদামি.

‘‘যেপি হি কেচি, ভিক্খৰে, এতরহি সমণা ¶ ৰা ব্রাহ্মণা ৰা যং লোকে পিযরূপং সাতরূপং তং নিচ্চতো পস্সন্তি সুখতো পস্সন্তি অত্ততো পস্সন্তি আরোগ্যতো পস্সন্তি খেমতো পস্সন্তি. তে তণ্হং ৰড্ঢেন্তি ¶ . যে তণ্হং ৰড্ঢেন্তি তে উপধিং ৰড্ঢেন্তি. যে উপধিং ৰড্ঢেন্তি তে দুক্খং ৰড্ঢেন্তি. যে দুক্খং ৰড্ঢেন্তি তে ন পরিমুচ্চন্তি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, ন পরিমুচ্চন্তি দুক্খস্মাতি ৰদামি.

‘‘সেয্যথাপি ¶ , ভিক্খৰে, আপানীযকংসো ৰণ্ণসম্পন্নো গন্ধসম্পন্নো রসসম্পন্নো. সো চ খো ৰিসেন সংসট্ঠো. অথ পুরিসো আগচ্ছেয্য ঘম্মাভিতত্তো ঘম্মপরেতো কিলন্তো তসিতো পিপাসিতো. তমেনং এৰং ৰদেয্যুং – ‘অযং তে, অম্ভো পুরিস, আপানীযকংসো ৰণ্ণসম্পন্নো গন্ধসম্পন্নো রসসম্পন্নো; সো চ খো ৰিসেন সংসট্ঠো. সচে আকঙ্খসি পিৰ. পিৰতো হি খো তং ছাদেস্সতি ৰণ্ণেনপি গন্ধেনপি রসেনপি, পিৰিত্ৰা চ পন ততোনিদানং মরণং ৰা নিগচ্ছসি মরণমত্তং ৰা দুক্খ’ন্তি. সো তং আপানীযকংসং সহসা অপ্পটিসঙ্খা পিৰেয্য, নপ্পটিনিস্সজ্জেয্য. সো ততোনিদানং মরণং ৰা নিগচ্ছেয্য মরণমত্তং ৰা দুক্খং. এৰমেৰ খো, ভিক্খৰে, যে হি কেচি অতীতমদ্ধানং সমণা ৰা ব্রাহ্মণা ৰা যং লোকে পিযরূপং…পে… অনাগতমদ্ধানং…পে… এতরহি সমণা ৰা ব্রাহ্মণা ৰা যং লোকে পিযরূপং ¶ সাতরূপং তং নিচ্চতো পস্সন্তি সুখতো ¶ পস্সন্তি অত্ততো পস্সন্তি আরোগ্যতো পস্সন্তি খেমতো পস্সন্তি, তে তণ্হং ৰড্ঢেন্তি. যে তণ্হং ৰড্ঢেন্তি তে উপধিং ৰড্ঢেন্তি. যে উপধিং ৰড্ঢেন্তি তে দুক্খং ৰড্ঢেন্তি. যে দুক্খং ৰড্ঢেন্তি তে ন পরিমুচ্চন্তি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, ন পরিমুচ্চন্তি দুক্খস্মাতি ৰদামি.

‘‘যে চ খো কেচি, ভিক্খৰে, অতীতমদ্ধানং সমণা ৰা ব্রাহ্মণা ৰা যং লোকে পিযরূপং সাতরূপং তং অনিচ্চতো অদ্দক্খুং দুক্খতো অদ্দক্খুং অনত্ততো অদ্দক্খুং রোগতো অদ্দক্খুং ভযতো অদ্দক্খুং, তে তণ্হং পজহিংসু. যে তণ্হং পজহিংসু তে উপধিং পজহিংসু. যে উপধিং পজহিংসু তে দুক্খং পজহিংসু. যে দুক্খং পজহিংসু তে পরিমুচ্চিংসু জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, পরিমুচ্চিংসু দুক্খস্মাতি ৰদামি.

‘‘যেপি হি কেচি, ভিক্খৰে, অনাগতমদ্ধানং সমণা ৰা ¶ ব্রাহ্মণা ৰা যং লোকে পিযরূপং সাতরূপং তং অনিচ্চতো দক্খিস্সন্তি দুক্খতো দক্খিস্সন্তি অনত্ততো ¶ দক্খিস্সন্তি রোগতো দক্খিস্সন্তি ভযতো দক্খিস্সন্তি, তে তণ্হং পজহিস্সন্তি. যে তণ্হং পজহিস্সন্তি…পে… পরিমুচ্চিস্সন্তি দুক্খস্মাতি ৰদামি.

‘‘যেপি হি কেচি, ভিক্খৰে, এতরহি সমণা ৰা ব্রাহ্মণা ৰা যং লোকে পিযরূপং সাতরূপং তং অনিচ্চতো পস্সন্তি দুক্খতো পস্সন্তি অনত্ততো পস্সন্তি রোগতো পস্সন্তি ভযতো ¶ পস্সন্তি, তে তণ্হং পজহন্তি. যে তণ্হং পজহন্তি তে উপধিং পজহন্তি. যে উপধিং পজহন্তি তে দুক্খং পজহন্তি. যে দুক্খং পজহন্তি তে পরিমুচ্চন্তি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, পরিমুচ্চন্তি দুক্খস্মাতি ৰদামি.

‘‘সেয্যথাপি, ভিক্খৰে, আপানীযকংসো ৰণ্ণসম্পন্নো গন্ধসম্পন্নো রসসম্পন্নো. সো চ খো ৰিসেন সংসট্ঠো. অথ পুরিসো আগচ্ছেয্য ঘম্মাভিতত্তো ঘম্মপরেতো কিলন্তো তসিতো পিপাসিতো. তমেনং এৰং ৰদেয্যুং – ‘অযং তে, অম্ভো পুরিস, আপানীযকংসো ৰণ্ণসম্পন্নো গন্ধসম্পন্নো রসসম্পন্নো সো চ খো ৰিসেন সংসট্ঠো. সচে আকঙ্খসি পিৰ. পিৰতো হি খো তং ছাদেস্সতি ৰণ্ণেনপি গন্ধেনপি রসেনপি; পিৰিত্ৰা চ পন ততোনিদানং মরণং ৰা নিগচ্ছসি ¶ মরণমত্তং ৰা দুক্খ’ন্তি. অথ খো, ভিক্খৰে, তস্স পুরিসস্স এৰমস্স – ‘সক্কা খো মে অযং সুরাপিপাসিতা [সুরাপিপাসা (?)] পানীযেন ৰা ৰিনেতুং দধিমণ্ডকেন ৰা ৰিনেতুং ভট্ঠলোণিকায [মট্ঠলোণিকায (সী. স্যা. কং. পী.)] ৰা ৰিনেতুং লোণসোৰীরকেন ৰা ৰিনেতুং, ন ত্ৰেৰাহং তং পিৰেয্যং, যং মম অস্স দীঘরত্তং হিতায সুখাযা’তি. সো তং আপানীযকংসং পটিসঙ্খা ন পিৰেয্য, পটিনিস্সজ্জেয্য ¶ . সো ততোনিদানং ন মরণং ৰা নিগচ্ছেয্য মরণমত্তং ৰা দুক্খং. এৰমেৰ খো, ভিক্খৰে, যে হি কেচি অতীতমদ্ধানং সমণা ৰা ব্রাহ্মণা ৰা যং লোকে পিযরূপং সাতরূপং তং ¶ অনিচ্চতো অদ্দক্খুং দুক্খতো অদ্দক্খুং অনত্ততো অদ্দক্খুং রোগতো অদ্দক্খুং ভযতো অদ্দক্খুং, তে তণ্হং পজহিংসু. যে তণ্হং পজহিংসু তে উপধিং পজহিংসু. যে উপধিং পজহিংসু তে দুক্খং পজহিংসু. যে দুক্খং পজহিংসু তে পরিমুচ্চিংসু জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, পরিমুচ্চিংসু দুক্খস্মাতি ৰদামি.

‘‘যেপি ¶ হি কেচি, ভিক্খৰে, অনাগতমদ্ধানং…পে… এতরহি সমণা ৰা ব্রাহ্মণা ৰা যং লোকে পিযরূপং সাতরূপং তং অনিচ্চতো পস্সন্তি দুক্খতো পস্সন্তি অনত্ততো পস্সন্তি রোগতো পস্সন্তি ভযতো পস্সন্তি, তে তণ্হং পজহন্তি. যে তণ্হং পজহন্তি তে উপধিং পজহন্তি. যে উপধিং পজহন্তি তে দুক্খং পজহন্তি. যে দুক্খং পজহন্তি তে পরিমুচ্চন্তি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, পরিমুচ্চন্তি দুক্খস্মাতি ৰদামী’’তি. ছট্ঠং.

৭. নল়কলাপীসুত্তং

৬৭. একং সমযং আযস্মা চ সারিপুত্তো আযস্মা চ মহাকোট্ঠিকো [মহাকোট্ঠিতো (সী. স্যা. কং. পী.)] বারাণসিযং ৰিহরন্তি ইসিপতনে মিগদাযে. অথ খো আযস্মা মহাকোট্ঠিকো সাযন্হসমযং পটিসল্লানা ৰুট্ঠিতো যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা মহাকোট্ঠিকো আযস্মন্তং ¶ সারিপুত্তং এতদৰোচ – ‘‘কিং নু খো, আৰুসো সারিপুত্ত, সযংকতং জরামরণং, পরংকতং জরামরণং, সযংকতঞ্চ ¶ পরংকতঞ্চ জরামরণং, উদাহু অসযংকারং অপরংকারং অধিচ্চসমুপ্পন্নং জরামরণ’’ন্তি? ‘‘ন খো, আৰুসো কোট্ঠিক, সযংকতং ¶ জরামরণং, ন পরংকতং জরামরণং, ন সযংকতঞ্চ পরংকতঞ্চ জরামরণং, নাপি অসযংকারং অপরংকারং অধিচ্চসমুপ্পন্নং জরামরণং. অপি চ, জাতিপচ্চযা জরামরণ’’ন্তি.

‘‘কিং নু খো, আৰুসো সারিপুত্ত, সযংকতা জাতি, পরংকতা জাতি, সযংকতা চ পরংকতা চ জাতি, উদাহু অসযংকারা অপরংকারা অধিচ্চসমুপ্পন্না জাতী’’তি? ‘‘ন খো, আৰুসো কোট্ঠিক, সযংকতা জাতি, ন পরংকতা জাতি, ন সযংকতা চ পরংকতা চ জাতি, নাপি অসযংকারা অপরংকারা অধিচ্চসমুপ্পন্না জাতি. অপি চ, ভৰপচ্চযা জাতী’’তি.

‘‘কিং নু খো, আৰুসো সারিপুত্ত, সযংকতো ভৰো…পে… সযংকতং উপাদানং… সযংকতা তণ্হা… সযংকতা ৰেদনা… সযংকতো ফস্সো… সযংকতং সল়াযতনং… সযংকতং নামরূপং, পরংকতং নামরূপং, সযংকতঞ্চ পরংকতঞ্চ নামরূপং, উদাহু অসযংকারং অপরংকারং অধিচ্চসমুপ্পন্নং নামরূপ’’ন্তি ¶ ? ‘‘ন খো, আৰুসো কোট্ঠিক, সযংকতং নামরূপং, ন পরংকতং নামরূপং, ন সযংকতঞ্চ পরংকতঞ্চ নামরূপং, নাপি অসযংকারং অপরংকারং, অধিচ্চসমুপ্পন্নং নামরূপং. অপি চ, ৰিঞ্ঞাণপচ্চযা নামরূপ’’ন্তি.

‘‘কিং নু খো, আৰুসো সারিপুত্ত, সযঙ্কতং ৰিঞ্ঞাণং, পরঙ্কতং ৰিঞ্ঞাণং, সযংকতঞ্চ পরংকতঞ্চ ৰিঞ্ঞাণং, উদাহু ¶ অসযংকারং অপরংকারং অধিচ্চসমুপ্পন্নং ৰিঞ্ঞাণ’’ন্তি? ‘‘ন খো, আৰুসো কোট্ঠিক, সযংকতং ৰিঞ্ঞাণং, ন পরংকতং ৰিঞ্ঞাণং ন সযংকতঞ্চ পরংকতঞ্চ ৰিঞ্ঞাণং, নাপি অসযংকারং অপরংকারং অধিচ্চসমুপ্পন্নং ৰিঞ্ঞাণং. অপি চ, নামরূপপচ্চযা ৰিঞ্ঞাণ’’ন্তি.

‘‘ইদানেৰ ¶ খো মযং আযস্মতো সারিপুত্তস্স ভাসিতং এৰং আজানাম – ‘ন খ্ৰাৰুসো কোট্ঠিক, সযংকতং নামরূপং, ন পরংকতং নামরূপং, ন সযংকতঞ্চ পরংকতঞ্চ নামরূপং, নাপি অসযংকারং অপরংকারং অধিচ্চসমুপ্পন্নং নামরূপং. অপি চ, ৰিঞ্ঞাণপচ্চযা নামরূপ’’’ন্তি.

‘‘ইদানেৰ চ পন মযং আযস্মতো সারিপুত্তস্স ভাসিতং এৰং আজানাম – ‘ন খ্ৰাৰুসো কোট্ঠিক, সযংকতং ৰিঞ্ঞাণং, ন পরংকতং ৰিঞ্ঞাণং, ন সযংকতঞ্চ পরংকতঞ্চ ৰিঞ্ঞাণং ¶ , নাপি অসযংকারং অপরংকারং অধিচ্চসমুপ্পন্নং ৰিঞ্ঞাণং. অপি চ, নামরূপপচ্চযা ৰিঞ্ঞাণ’’’ন্তি.

‘‘যথা কথং পনাৰুসো সারিপুত্ত, ইমস্স ভাসিতস্স অত্থো দট্ঠব্বো’’তি? ‘‘তেনহাৰুসো, উপমং তে করিস্সামি. উপমাযপিধেকচ্চে ৰিঞ্ঞূ পুরিসা ভাসিতস্স অত্থং জানন্তি. সেয্যথাপি, আৰুসো, দ্ৰে নল়কলাপিযো অঞ্ঞমঞ্ঞং নিস্সায তিট্ঠেয্যুং. এৰমেৰ খো, আৰুসো, নামরূপপচ্চযা ৰিঞ্ঞাণং; ৰিঞ্ঞাণপচ্চযা নামরূপং; নামরূপপচ্চযা সল়াযতনং; সল়াযতনপচ্চযা ফস্সো…পে… এৰমেতস্স কেৰলস্স দুক্খক্খন্ধস্স সমুদযো হোতি. তাসং চে, আৰুসো ¶ , নল়কলাপীনং একং আকড্ঢেয্য, একা পপতেয্য; অপরং চে আকড্ঢেয্য, অপরা পপতেয্য. এৰমেৰ খো, আৰুসো, নামরূপনিরোধা ৰিঞ্ঞাণনিরোধো; ৰিঞ্ঞাণনিরোধা নামরূপনিরোধো; নামরূপনিরোধা সল়াযতননিরোধো; সল়াযতননিরোধা ফস্সনিরোধো…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি. ‘‘অচ্ছরিযং ¶ , আৰুসো সারিপুত্ত; অব্ভুতং, আৰুসো সারিপুত্ত! যাৰসুভাসিতং চিদং আযস্মতা সারিপুত্তেন. ইদঞ্চ পন মযং আযস্মতো সারিপুত্তস্স ভাসিতং ইমেহি ছত্তিংসায ৰত্থূহি অনুমোদাম – ‘জরামরণস্স চে, আৰুসো, ভিক্খু নিব্বিদায ৰিরাগায নিরোধায ধম্মং দেসেতি, ধম্মকথিকো ভিক্খূতি অলং ¶ ৰচনায. জরামরণস্স চে, আৰুসো, ভিক্খু নিব্বিদায ৰিরাগায নিরোধায পটিপন্নো হোতি, ধম্মানুধম্মপ্পটিপন্নো ভিক্খূতি অলং ৰচনায. জরামরণস্স চে, আৰুসো, ভিক্খু নিব্বিদা ৰিরাগা নিরোধা অনুপাদা ৰিমুত্তো হোতি, দিট্ঠধম্মনিব্বানপ্পত্তো ভিক্খূতি অলং ৰচনায. জাতিযা চে… ভৰস্স চে… উপাদানস্স চে… তণ্হায চে… ৰেদনায চে… ফস্সস্স চে… সল়াযতনস্স চে… নামরূপস্স চে… ৰিঞ্ঞাণস্স চে… সঙ্খারানং চে… অৰিজ্জায চে, আৰুসো, ভিক্খু নিব্বিদায ৰিরাগায নিরোধায ধম্মং দেসেতি, ধম্মকথিকো ভিক্খূতি অলং ৰচনায. অৰিজ্জায চে, আৰুসো, ভিক্খু নিব্বিদায ৰিরাগায নিরোধায পটিপন্নো হোতি, ধম্মানুধম্মপ্পটিপন্নো ভিক্খূতি অলং ৰচনায ¶ . অৰিজ্জায চে, আৰুসো, ভিক্খু নিব্বিদা ৰিরাগা নিরোধা অনুপাদা ৰিমুত্তো হোতি, দিট্ঠধম্মনিব্বানপ্পত্তো ভিক্খূতি অলং ৰচনাযা’’’তি. সত্তমং.

৮. কোসম্বিসুত্তং

৬৮. একং ¶ সমযং আযস্মা চ মুসিলো [মূসিলো (সী.), মুসীলো (পী.)] আযস্মা চ পৰিট্ঠো [সৰিট্ঠো (সী. পী.)] আযস্মা চ নারদো আযস্মা চ আনন্দো কোসম্বিযং ৰিহরন্তি ঘোসিতারামে. অথ খো আযস্মা পৰিট্ঠো আযস্মন্তং মুসিলং এতদৰোচ – ‘‘অঞ্ঞত্রেৰ, আৰুসো মুসিল, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অত্থাযস্মতো মুসিলস্স পচ্চত্তমেৰ ঞাণং – ‘জাতিপচ্চযা জরামরণ’’’ন্তি? ‘‘অঞ্ঞত্রেৰ, আৰুসো পৰিট্ঠ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অহমেতং জানামি অহমেতং পস্সামি – ‘জাতিপচ্চযা জরামরণ’’’ন্তি.

‘‘অঞ্ঞত্রেৰ ¶ , আৰুসো মুসিল, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অত্থাযস্মতো মুসিলস্স ¶ পচ্চত্তমেৰ ঞাণং – ‘ভৰপচ্চযা জাতীতি…পে… উপাদানপচ্চযা ভৰোতি… তণ্হাপচ্চযা উপাদানন্তি… ৰেদনাপচ্চযা তণ্হাতি… ফস্সপচ্চযা ৰেদনাতি… সল়াযতনপচ্চযা ফস্সোতি… নামরূপপচ্চযা সল়াযতনন্তি… ৰিঞ্ঞাণপচ্চযা নামরূপন্তি… সঙ্খারপচ্চযা ৰিঞ্ঞাণন্তি… অৰিজ্জাপচ্চযা ¶ সঙ্খারা’’’তি? ‘‘অঞ্ঞত্রেৰ, আৰুসো পৰিট্ঠ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অহমেতং জানামি অহমেতং পস্সামি – ‘অৰিজ্জাপচ্চযা সঙ্খারা’’’তি.

‘‘অঞ্ঞত্রেৰ, আৰুসো মুসিল, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অত্থাযস্মতো মুসিলস্স পচ্চত্তমেৰ ঞাণং – ‘জাতিনিরোধা জরামরণনিরোধো’’’তি? ‘‘অঞ্ঞত্রেৰ, আৰুসো পৰিট্ঠ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অহমেতং জানামি অহমেতং পস্সামি – ‘জাতিনিরোধা জরামরণনিরোধো’’’তি.

‘‘অঞ্ঞত্রেৰ ¶ , আৰুসো মুসিল, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অত্থাযস্মতো মুসিলস্স পচ্চত্তমেৰ ঞাণং – ‘ভৰনিরোধা জাতিনিরোধোতি…পে… উপাদাননিরোধা ভৰনিরোধোতি… তণ্হানিরোধা উপাদাননিরোধোতি… ৰেদনানিরোধা তণ্হানিরোধোতি… ফস্সনিরোধা ৰেদনানিরোধোতি… সল়াযতননিরোধা ফস্সনিরোধোতি… নামরূপনিরোধা সল়াযতননিরোধোতি… ৰিঞ্ঞাণনিরোধা নামরূপনিরোধোতি ¶ … সঙ্খারনিরোধা ৰিঞ্ঞাণনিরোধোতি… অৰিজ্জানিরোধা সঙ্খারনিরোধো’’’তি? ‘‘অঞ্ঞত্রেৰ, আৰুসো পৰিট্ঠ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা ¶ অহমেতং জানামি অহমেতং পস্সামি – ‘অৰিজ্জানিরোধা সঙ্খারনিরোধো’’’তি.

‘‘অঞ্ঞত্রেৰ, আৰুসো মুসিল, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অত্থাযস্মতো মুসিলস্স পচ্চত্তমেৰ ঞাণং – ‘ভৰনিরোধো নিব্বান’’’ন্তি? ‘‘অঞ্ঞত্রেৰ, আৰুসো পৰিট্ঠ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র ¶ আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অহমেতং জানামি অহমেতং পস্সামি – ‘ভৰনিরোধো নিব্বান’’’ন্তি.

‘‘তেনহাযস্মা মুসিলো অরহং খীণাসৰো’’তি? এৰং ৰুত্তে, আযস্মা মুসিলো তুণ্হী অহোসি. অথ খো আযস্মা নারদো আযস্মন্তং পৰিট্ঠং এতদৰোচ – ‘‘সাধাৰুসো পৰিট্ঠ, অহং এতং পঞ্হং লভেয্যং. মং এতং পঞ্হং পুচ্ছ. অহং তে এতং পঞ্হং ব্যাকরিস্সামী’’তি. ‘‘লভতাযস্মা নারদো এতং পঞ্হং. পুচ্ছামহং আযস্মন্তং নারদং এতং পঞ্হং. ব্যাকরোতু চ মে আযস্মা নারদো এতং পঞ্হং’’.

‘‘অঞ্ঞত্রেৰ, আৰুসো নারদ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অত্থাযস্মতো নারদস্স পচ্চত্তমেৰ ঞাণং – ‘জাতিপচ্চযা জরামরণ’’’ন্তি? ‘‘অঞ্ঞত্রেৰ, আৰুসো পৰিট্ঠ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অহমেতং ¶ জানামি অহমেতং পস্সামি – ‘জাতিপচ্চযা জরামরণ’’’ন্তি.

‘‘অঞ্ঞত্রেৰ ¶ , আৰুসো নারদ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অত্থাযস্মতো নারদস্স পচ্চত্তমেৰ ঞাণং – ভৰপচ্চযা জাতি…পে… অৰিজ্জাপচ্চযা সঙ্খারা’’তি? ‘‘অঞ্ঞত্রেৰ, আৰুসো পৰিট্ঠ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অহমেতং জানামি অহমেতং পস্সামি – ‘অৰিজ্জাপচ্চযা সঙ্খারা’’’তি.

‘‘অঞ্ঞত্রেৰ, আৰুসো নারদ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অত্থাযস্মতো নারদস্স পচ্চত্তমেৰ ঞাণং – ‘জাতিনিরোধা জরামরণনিরোধো’’’তি? ‘‘অঞ্ঞত্রেৰ, আৰুসো পৰিট্ঠ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অহমেতং জানামি অহমেতং পস্সামি – ‘জাতিনিরোধা জরামরণনিরোধো’’’তি.

‘‘অঞ্ঞত্রেৰ, আৰুসো নারদ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অত্থাযস্মতো নারদস্স ¶ পচ্চত্তমেৰ ঞাণং – ‘ভৰনিরোধা জাতিনিরোধোতি…পে… অৰিজ্জানিরোধা সঙ্খারনিরোধো’’’তি? ‘‘অঞ্ঞত্রেৰ, আৰুসো পৰিট্ঠ, সদ্ধায অঞ্ঞত্র ¶ রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অহমেতং জানামি অহমেতং পস্সামি – ‘অৰিজ্জানিরোধা সঙ্খারনিরোধো’’’তি.

‘‘অঞ্ঞত্রেৰ, আৰুসো নারদ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অত্থাযস্মতো নারদস্স পচ্চত্তমেৰ ঞাণং – ‘ভৰনিরোধো নিব্বান’’’ন্তি? ‘‘অঞ্ঞত্রেৰ, আৰুসো পৰিট্ঠ, সদ্ধায অঞ্ঞত্র রুচিযা অঞ্ঞত্র অনুস্সৰা অঞ্ঞত্র আকারপরিৰিতক্কা অঞ্ঞত্র দিট্ঠিনিজ্ঝানক্খন্তিযা অহমেতং জানামি অহমেতং পস্সামি – ‘ভৰনিরোধো নিব্বান’’’ন্তি.

‘‘তেনহাযস্মা নারদো অরহং খীণাসৰো’’তি? ‘‘‘ভৰনিরোধো ¶ নিব্বান’ন্তি খো মে, আৰুসো, যথাভূতং সম্মপ্পঞ্ঞায সুদিট্ঠং, ন চম্হি অরহং খীণাসৰো. সেয্যথাপি, আৰুসো, কন্তারমগ্গে ¶ উদপানো. তত্র নেৰস্স রজ্জু ন উদকৰারকো. অথ পুরিসো আগচ্ছেয্য ঘম্মাভিতত্তো ঘম্মপরেতো কিলন্তো তসিতো পিপাসিতো, সো তং উদপানং ওলোকেয্য. তস্স ‘উদক’ন্তি হি খো ঞাণং অস্স, ন চ কাযেন ফুসিত্ৰা ৰিহরেয্য. এৰমেৰ খো, আৰুসো, ‘ভৰনিরোধো নিব্বান’ন্তি যথাভূতং সম্মপ্পঞ্ঞায সুদিট্ঠং, ন চম্হি অরহং খীণাসৰো’’তি.

এৰং ৰুত্তে, আযস্মা আনন্দো আযস্মন্তং পৰিট্ঠং এতদৰোচ – ‘‘এৰংৰাদী [এৰংৰাদিং (?)] ত্ৰং, আৰুসো পৰিট্ঠ, আযস্মন্তং নারদং কিং ৰদেসী’’তি? ‘‘এৰংৰাদাহং, আৰুসো আনন্দ, আযস্মন্তং নারদং ন কিঞ্চি ৰদামি অঞ্ঞত্র কল্যাণা অঞ্ঞত্র কুসলা’’তি. অট্ঠমং.

৯. উপযন্তিসুত্তং

৬৯. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো…পে… ‘‘মহাসমুদ্দো, ভিক্খৰে, উপযন্তো মহানদিযো উপযাপেতি, মহানদিযো উপযন্তিযো কুন্নদিযো ¶ উপযাপেন্তি, কুন্নদিযো উপযন্তিযো মহাসোব্ভে উপযাপেন্তি, মহাসোব্ভা ¶ উপযন্তা কুসোব্ভে উপযাপেন্তি. এৰমেৰ খো, ভিক্খৰে, অৰিজ্জা উপযন্তী সঙ্খারে উপযাপেতি, সঙ্খারা উপযন্তা ৰিঞ্ঞাণং উপযাপেন্তি, ৰিঞ্ঞাণং উপযন্তং নামরূপং উপযাপেতি, নামরূপং উপযন্তং সল়াযতনং উপযাপেতি, সল়াযতনং উপযন্তং ফস্সং উপযাপেতি, ফস্সো উপযন্তো ৰেদনং উপযাপেতি, ৰেদনা উপযন্তী তণ্হং উপযাপেতি, তণ্হা উপযন্তী উপাদানং উপযাপেতি, উপাদানং উপযন্তং ভৰং ¶ উপযাপেতি, ভৰো উপযন্তো জাতিং উপযাপেতি, জাতি উপযন্তী জরামরণং উপযাপেতি.

‘‘মহাসমুদ্দো, ভিক্খৰে, অপযন্তো মহানদিযো অপযাপেতি, মহানদিযো অপযন্তিযো কুন্নদিযো অপযাপেন্তি, কুন্নদিযো অপযন্তিযো মহাসোব্ভে অপযাপেন্তি, মহাসোব্ভা অপযন্তা কুসোব্ভে অপযাপেন্তি. এৰমেৰ খো, ভিক্খৰে, অৰিজ্জা অপযন্তী সঙ্খারে অপযাপেতি, সঙ্খারা অপযন্তা ৰিঞ্ঞাণং অপযাপেন্তি, ৰিঞ্ঞাণং অপযন্তং নামরূপং অপযাপেতি, নামরূপং অপযন্তং সল়াযতনং অপযাপেতি, সল়াযতনং অপযন্তং ফস্সং অপযাপেতি, ফস্সো অপযন্তো ৰেদনং অপযাপেতি, ৰেদনা অপযন্তী তণ্হং অপযাপেতি, তণ্হা অপযন্তী উপাদানং অপযাপেতি, উপাদানং ¶ অপযন্তং ভৰং অপযাপেতি, ভৰো অপযন্তো জাতিং অপযাপেতি, জাতি অপযন্তী জরামরণং অপযাপেতী’’তি. নৰমং.

১০. সুসিমসুত্তং

৭০. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে ¶ কলন্দকনিৰাপে. তেন খো পন সমযেন ভগৰা সক্কতো হোতি গরুকতো মানিতো পূজিতো অপচিতো লাভী চীৰর-পিণ্ডপাত-সেনাসন-গিলানপ্পচ্চয-ভেসজ্জপরিক্খারানং. ভিক্খুসঙ্ঘোপি সক্কতো হোতি গরুকতো মানিতো পূজিতো অপচিতো লাভী চীৰর-পিণ্ডপাত-সেনাসনগিলানপ্পচ্চয-ভেসজ্জপরিক্খারানং. অঞ্ঞতিত্থিযা পন পরিব্বাজকা অসক্কতা হোন্তি অগরুকতা অমানিতা অপূজিতা অনপচিতা, ন লাভিনো চীৰর-পিণ্ডপাত-সেনাসনগিলানপ্পচ্চয-ভেসজ্জপরিক্খারানং.

তেন ¶ খো পন সমযেন সুসিমো [সুসীমো (সী. ক.)] পরিব্বাজকো রাজগহে পটিৰসতি মহতিযা পরিব্বাজকপরিসায সদ্ধিং. অথ ¶ খো সুসিমস্স পরিব্বাজকস্স পরিসা সুসিমং পরিব্বাজকং এতদৰোচুং – ‘‘এহি ত্ৰং, আৰুসো সুসিম, সমণে গোতমে ব্রহ্মচরিযং চর. ত্ৰং ধম্মং পরিযাপুণিত্ৰা অম্হে ৰাচেয্যাসি [ৰাচেস্সসি (পী. ক.)]. তং মযং ধম্মং পরিযাপুণিত্ৰা গিহীনং ভাসিস্সাম. এৰং মযম্পি সক্কতা ভৰিস্সাম গরুকতা মানিতা পূজিতা অপচিতা লাভিনো চীৰর-পিণ্ডপাতসেনাসন-গিলানপ্পচ্চয-ভেসজ্জপরিক্খারান’’ন্তি. ‘‘এৰমাৰুসো’’তি খো সুসিমো পরিব্বাজকো সকায পরিসায পটিস্সুণিত্ৰা যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো সুসিমো পরিব্বাজকো আযস্মন্তং আনন্দং এতদৰোচ – ‘‘ইচ্ছামহং, আৰুসো আনন্দ, ইমস্মিং ধম্মৰিনযে ব্রহ্মচরিযং চরিতু’’ন্তি.

অথ ¶ খো আযস্মা আনন্দো সুসিমং পরিব্বাজকং আদায যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘অযং, ভন্তে, সুসিমো পরিব্বাজকো এৰমাহ – ‘ইচ্ছামহং, আৰুসো আনন্দ, ইমস্মিং ধম্মৰিনযে ব্রহ্মচরিযং চরিতু’’ন্তি. ‘‘তেনহানন্দ, সুসিমং পব্বাজেথা’’তি ¶ . অলত্থ খো সুসিমো পরিব্বাজকো ভগৰতো সন্তিকে পব্বজ্জং, অলত্থ উপসম্পদং.

তেন খো পন সমযেন সম্বহুলেহি ভিক্খূহি ভগৰতো সন্তিকে অঞ্ঞা ব্যাকতা হোতি – ‘‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামা’’তি. অস্সোসি খো আযস্মা সুসিমো – ‘‘সম্বহুলেহি কির ভিক্খূহি ¶ ভগৰতো সন্তিকে অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামা’’তি. অথ খো আযস্মা সুসিমো যেন তে ভিক্খূ তেনুপসঙ্কমি; উপসঙ্কমিত্ৰা তেহি ভিক্খূহি সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা সুসিমো তে ভিক্খূ এতদৰোচ – ‘‘সচ্চং কিরাযস্মন্তেহি ¶ ভগৰতো সন্তিকে অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামা’’তি? ‘‘এৰমাৰুসো’’তি.

‘‘অপি পন [অপি নু (সী. স্যা. কং.) এৰমুপরিপি] তুম্হে আযস্মন্তো এৰং জানন্তা এৰং পস্সন্তা ¶ অনেকৰিহিতং ইদ্ধিৰিধং পচ্চনুভোথ – একোপি হুত্ৰা বহুধা হোথ, বহুধাপি হুত্ৰা একো হোথ; আৰিভাৰং, তিরোভাৰং, তিরোকুট্টং তিরোপাকারং তিরোপব্বতং অসজ্জমানা গচ্ছথ, সেয্যথাপি আকাসে; পথৰিযাপি উম্মুজ্জনিমুজ্জং করোথ, সেয্যথাপি উদকে; উদকেপি অভিজ্জমানে গচ্ছথ, সেয্যথাপি পথৰিযং; আকাসেপি পল্লঙ্কেন কমথ, সেয্যথাপি পক্খী সকুণো; ইমেপি চন্দিমসূরিযে এৰংমহিদ্ধিকে এৰংমহানুভাৰে পাণিনা পরিমসথ পরিমজ্জথ, যাৰ ব্রহ্মলোকাপি কাযেন ৰসং ৰত্তেথা’’তি? ‘‘নো হেতং, আৰুসো’’.

‘‘অপি পন তুম্হে আযস্মন্তো এৰং জানন্তা এৰং পস্সন্তা দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণাথ দিব্বে চ মানুসে চ যে দূরে সন্তিকে চা’’তি? ‘‘নো হেতং, আৰুসো’’.

‘‘অপি পন তুম্হে আযস্মন্তো এৰং জানন্তা এৰং পস্সন্তা পরসত্তানং পরপুগ্গলানং চেতসা চেতো পরিচ্চ পজানাথ – সরাগং ৰা চিত্তং সরাগং চিত্তন্তি পজানাথ; ৰীতরাগং ৰা চিত্তং ৰীতরাগং চিত্তন্তি পজানাথ; সদোসং ৰা চিত্তং সদোসং চিত্তন্তি পজানাথ; ৰীতদোসং ৰা ¶ চিত্তং ৰীতদোসং চিত্তন্তি পজানাথ; সমোহং ৰা চিত্তং সমোহং ¶ চিত্তন্তি পজানাথ; ৰীতমোহং ৰা চিত্তং ৰীতমোহং চিত্তন্তি পজানাথ; সংখিত্তং ৰা চিত্তং সংখিত্তং চিত্তন্তি পজানাথ; ৰিক্খিত্তং ৰা চিত্তং ৰিক্খিত্তং চিত্তন্তি পজানাথ; মহগ্গতং ৰা চিত্তং মহগ্গতং চিত্তন্তি পজানাথ; অমহগ্গতং ৰা চিত্তং অমহগ্গতং চিত্তন্তি পজানাথ ¶ ; সউত্তরং ৰা চিত্তং সউত্তরং চিত্তন্তি পজানাথ; অনুত্তরং ৰা চিত্তং অনুত্তরং চিত্তন্তি পজানাথ; সমাহিতং ৰা চিত্তং সমাহিতং চিত্তন্তি পজানাথ; অসমাহিতং ৰা চিত্তং অসমাহিতং চিত্তন্তি পজানাথ; ৰিমুত্তং ৰা চিত্তং ৰিমুত্তং চিত্তন্তি পজানাথ ¶ ; অৰিমুত্তং ৰা চিত্তং অৰিমুত্তং চিত্তন্তি পজানাথা’’তি? ‘‘নো হেতং, আৰুসো’’.

‘‘অপি পন তুম্হে আযস্মন্তো এৰং জানন্তা এৰং পস্সন্তা অনেকৰিহিতং পুব্বেনিৰাসং অনুস্সরথ, সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তারীসম্পি জাতিযো পঞ্ঞাসম্পি জাতিযো জাতিসতম্পি জাতিসহস্সম্পি জাতিসতসহস্সম্পি, অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – ‘অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপটিসংৰেদী এৰমাযুপরিযন্তো, সো ততো চুতো অমুত্র উদপাদিং; তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপটিসংৰেদী এৰমাযুপরিযন্তো, সো ততো চুতো ইধূপপন্নো’তি. ইতি সাকারং সউদ্দেসং অনেকৰিহিতং পুব্বেনিৰাসং অনুস্সরথা’’তি? ‘‘নো হেতং, আৰুসো’’.

‘‘অপি পন তুম্হে আযস্মন্তো এৰং জানন্তা এৰং পস্সন্তা দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সথ চৰমানে উপপজ্জমানে ¶ হীনে পণীতে সুৰণ্ণে দুব্বণ্ণে, সুগতে দুগ্গতে যথাকম্মূপগে সত্তে পজানাথ – ‘ইমে ৰত ভোন্তো সত্তা কাযদুচ্চরিতেন সমন্নাগতা ¶ ৰচীদুচ্চরিতেন সমন্নাগতা মনোদুচ্চরিতেন সমন্নাগতা, অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা, তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না; ইমে ৰা পন ভোন্তো সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা, অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা তে কাযস্স ভেদা পরং মরণা সুগতিং সগ্গং লোকং উপপন্না’তি, ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সথ চৰমানে উপপজ্জমানে হীনে পণীতে ¶ সুৰণ্ণে দুব্বণ্ণে, সুগতে দুগ্গতে যথাকম্মূপগে সত্তে পজানাথা’’তি? ‘‘নো হেতং, আৰুসো’’.

‘‘অপি পন তুম্হে আযস্মন্তো এৰং জানন্তা এৰং পস্সন্তা যে তে সন্তা ৰিমোক্খা অতিক্কম্ম রূপে আরুপ্পা, তে কাযেন ফুসিত্ৰা ৰিহরথা’’তি? ‘‘নো হেতং, আৰুসো’’.

‘‘এত্থ ¶ দানি আযস্মন্তো ইদঞ্চ ৰেয্যাকরণং ইমেসঞ্চ ধম্মানং অসমাপত্তি; ইদং নো, আৰুসো, কথ’’ন্তি? ‘‘পঞ্ঞাৰিমুত্তা খো মযং, আৰুসো সুসিমা’’তি.

‘‘ন খ্ৰাহং ইমস্স আযস্মন্তানং সংখিত্তেন ভাসিতস্স ৰিত্থারেন অত্থং আজানামি. সাধু মে আযস্মন্তো তথা ভাসন্তু যথাহং ইমস্স আযস্মন্তানং সংখিত্তেন ভাসিতস্স ¶ ৰিত্থারেন অত্থং আজানেয্য’’ন্তি. ‘‘আজানেয্যাসি ¶ ৰা ত্ৰং, আৰুসো সুসিম, ন ৰা ত্ৰং আজানেয্যাসি অথ খো পঞ্ঞাৰিমুত্তা ময’’ন্তি.

অথ খো আযস্মা সুসিমো উট্ঠাযাসনা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা সুসিমো যাৰতকো তেহি ভিক্খূহি সদ্ধিং অহোসি কথাসল্লাপো তং সব্বং ভগৰতো আরোচেসি. ‘‘পুব্বে খো, সুসিম, ধম্মট্ঠিতিঞাণং, পচ্ছা নিব্বানে ঞাণ’’ন্তি.

‘‘ন খ্ৰাহং, ভন্তে, ইমস্স ভগৰতা [ভগৰতো (পী.)] সংখিত্তেন ভাসিতস্স ৰিত্থারেন অত্থং আজানামি. সাধু মে, ভন্তে, ভগৰা তথা ভাসতু যথাহং ইমস্স ভগৰতা সংখিত্তেন ভাসিতস্স ৰিত্থারেন অত্থং আজানেয্য’’ন্তি. ‘‘আজানেয্যাসি ৰা ত্ৰং, সুসিম, ন ৰা ত্ৰং আজানেয্যাসি, অথ খো ধম্মট্ঠিতিঞাণং পুব্বে, পচ্ছা নিব্বানে ঞাণং’’.

‘‘তং কিং মঞ্ঞসি, সুসিম, রূপং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’. ‘‘যং পনানিচ্চং দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’. ‘‘ৰেদনা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’ ¶ . ‘‘যং পনানিচ্চং, দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো ¶ মে অত্তা’’’তি? ‘‘নো হেতং, ভন্তে’’. ‘‘সঞ্ঞা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘সঙ্খারা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’. ‘‘যং পনানিচ্চং দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’. ‘‘ৰিঞ্ঞাণং নিচ্চং ৰা অনিচ্চং ৰা’’তি? ‘‘অনিচ্চং ¶ , ভন্তে’’. ‘‘যং পনানিচ্চং ¶ দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’.

‘‘তস্মাতিহ, সুসিম, যং কিঞ্চি রূপং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, সব্বং রূপং নেতং মম নেসোহমস্মি ন মেসো অত্তাতি; এৰমেতং যথাভূতং সম্মপ্পঞ্ঞায দট্ঠব্বং. যা কাচি ৰেদনা অতীতানাগতপচ্চুপ্পন্না অজ্ঝত্তং ৰা বহিদ্ধা ৰা ওল়ারিকা ৰা সুখুমা ৰা হীনা ৰা পণীতা ৰা যা দূরে সন্তিকে ৰা, সব্বা ৰেদনা নেতং মম নেসোহমস্মি ন মেসো অত্তাতি; এৰমেতং যথাভূতং সম্মপ্পঞ্ঞায দট্ঠব্বং. যা কাচি সঞ্ঞা…পে… যে কেচি সঙ্খারা অতীতানাগতপচ্চুপ্পন্না অজ্ঝত্তং ৰা বহিদ্ধা ৰা ওল়ারিকা ৰা সুখুমা ৰা হীনা ৰা পণীতা ৰা যে দূরে সন্তিকে ৰা, সব্বে সঙ্খারা নেতং মম নেসোহমস্মি ন ¶ মেসো অত্তাতি; এৰমেতং যথাভূতং সম্মপ্পঞ্ঞায দট্ঠব্বং. যং কিঞ্চি ৰিঞ্ঞাণং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, সব্বং ৰিঞ্ঞাণং নেতং মম নেসোহমস্মি ন মেসো অত্তাতি; এৰমেতং যথাভূতং সম্মপ্পঞ্ঞায দট্ঠব্বং.

‘‘এৰং পস্সং, সুসিম, সুতৰা অরিযসাৰকো রূপস্মিম্পি নিব্বিন্দতি, ৰেদনাযপি নিব্বিন্দতি, সঞ্ঞাযপি নিব্বিন্দতি, সঙ্খারেসুপি নিব্বিন্দতি, ৰিঞ্ঞাণস্মিম্পি নিব্বিন্দতি. নিব্বিন্দং ৰিরজ্জতি, ৰিরাগা ৰিমুচ্চতি, ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি.

‘‘‘জাতিপচ্চযা ¶ জরামরণ’ন্তি, সুসিম, পস্সসী’’তি? ‘‘এৰং, ভন্তে’’. ‘‘‘ভৰপচ্চযা জাতী’তি, সুসিম, পস্সসী’’তি? ‘‘এৰং, ভন্তে’’. ‘‘‘উপাদানপচ্চযা ভৰো’তি, সুসিম, পস্সসী’’তি? ‘‘এৰং, ভন্তে’’. ‘‘‘তণ্হাপচ্চযা ¶ উপাদান’ন্তি, সুসিম, পস্সসী’’তি? ‘‘এৰং, ভন্তে’’. ‘‘ৰেদনাপচ্চযা তণ্হাতি… ফস্সপচ্চযা ৰেদনাতি… সল়াযতনপচ্চযা ফস্সোতি… নামরূপপচ্চযা সল়াযতনন্তি… ৰিঞ্ঞাণপচ্চযা নামরূপন্তি… সঙ্খারপচ্চযা ৰিঞ্ঞাণন্তি… অৰিজ্জাপচ্চযা সঙ্খারাতি, সুসিম, পস্সসী’’তি? ‘‘এৰং, ভন্তে’’.

‘‘‘জাতিনিরোধা ¶ জরামরণনিরোধো’তি, সুসিম, পস্সসী’’তি? ‘‘এৰং, ভন্তে’’ ¶ . ‘‘‘ভৰনিরোধা জাতিনিরোধো’তি সুসিম, পস্সসী’’তি? ‘‘এৰং, ভন্তে’’. ‘‘উপাদাননিরোধা ভৰনিরোধোতি… তণ্হানিরোধা উপাদাননিরোধোতি… ৰেদনানিরোধা তণ্হানিরোধোতি… ফস্সনিরোধা ৰেদনানিরোধোতি… সল়াযতননিরোধা ফস্সনিরোধোতি… নামরূপনিরোধা সল়াযতননিরোধোতি… ৰিঞ্ঞাণনিরোধা নামরূপনিরোধোতি… সঙ্খারনিরোধা ৰিঞ্ঞাণনিরোধোতি… অৰিজ্জানিরোধা সঙ্খারনিরোধোতি, সুসিম, পস্সসী’’তি? ‘‘এৰং, ভন্তে’’.

‘‘অপি পন ত্ৰং, সুসিম, এৰং জানন্তো এৰং পস্সন্তো অনেকৰিহিতং ইদ্ধিৰিধং পচ্চনুভোসি – একোপি হুত্ৰা বহুধা হোসি, বহুধাপি হুত্ৰা একো হোসি; আৰিভাৰং, তিরোভাৰং, তিরোকুট্টং তিরোপাকারং তিরোপব্বতং অসজ্জমানো গচ্ছসি, সেয্যথাপি আকাসে; পথৰিযাপি উম্মুজ্জনিমুজ্জং করোসি, সেয্যথাপি উদকে; উদকেপি অভিজ্জমানো গচ্ছসি, সেয্যথাপি পথৰিযং; আকাসেপি পল্লঙ্কেন কমসি, সেয্যথাপি পক্খী সকুণো; ইমেপি চন্দিমসূরিযে এৰংমহিদ্ধিকে এৰংমহানুভাৰে পাণিনা পরিমসসি পরিমজ্জসি, যাৰ ব্রহ্মলোকাপি কাযেন ৰসং ৰত্তেসী’’তি? ‘‘নো হেতং, ভন্তে’’.

‘‘অপি পন ত্ৰং, সুসিম, এৰং জানন্তো এৰং পস্সন্তো দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণসি দিব্বে চ মানুসে চ যে দূরে সন্তিকে চা’’তি? ‘‘নো ¶ হেতং, ভন্তে’’.

‘‘অপি ¶ পন ত্ৰং, সুসিম, এৰং জানন্তো এৰং পস্সন্তো পরসত্তানং পরপুগ্গলানং চেতসা চেতো ¶ পরিচ্চ পজানাসি – সরাগং ৰা চিত্তং সরাগং চিত্তন্তি পজানাসি…পে… ৰিমুত্তং ৰা চিত্তং ৰিমুত্তং চিত্তন্তি পজানাসী’’তি? ‘‘নো হেতং, ভন্তে’’.

‘‘অপি পন ত্ৰং, সুসিম, এৰং জানন্তো এৰং পস্সন্তো অনেকৰিহিতং পুব্বেনিৰাসং অনুস্সরসি, সেয্যথিদং – একম্পি জাতিং…পে… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরসী’’তি? ‘‘নো হেতং, ভন্তে’’.

‘‘অপি পন ত্ৰং, সুসিম, এৰং জানন্তো এৰং পস্সন্তো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সসি চৰমানে…পে… যথাকম্মূপগে সত্তে পজানাসী’’তি? ‘‘নো হেতং, ভন্তে’’.

‘‘অপি ¶ পন ত্ৰং, সুসিম, এৰং জানন্তো এৰং পস্সন্তো যে তে সন্তা ৰিমোক্খা অতিক্কম্ম রূপে, আরুপ্পা তে কাযেন ফুসিত্ৰা ৰিহরসী’’তি? ‘‘নো হেতং, ভন্তে’’.

‘‘এত্থ দানি, সুসিম, ইদঞ্চ ৰেয্যাকরণং ইমেসঞ্চ ধম্মানং অসমাপত্তি, ইদং নো, সুসিম, কথ’’ন্তি?

অথ খো আযস্মা সুসিমো ভগৰতো পাদেসু সিরসা নিপতিত্ৰা ভগৰন্তং এতদৰোচ – ‘‘অচ্চযো মং, ভন্তে, অচ্চগমা যথাবালং যথামূল়্হং যথাঅকুসলং, য্ৰাহং এৰং স্ৰাক্খাতে ধম্মৰিনযে ধম্মত্থেনকো পব্বজিতো. তস্স মে, ভন্তে, ভগৰা অচ্চযং অচ্চযতো পটিগ্গণ্হাতু আযতিং সংৰরাযা’’তি.

‘‘তগ্ঘ ¶ ত্ৰং, সুসিম, অচ্চযো অচ্চগমা যথাবালং যথামূল়্হং যথাঅকুসলং, যো ত্ৰং এৰং স্ৰাক্খাতে ধম্মৰিনযে ধম্মত্থেনকো পব্বজিতো. সেয্যথাপি ¶ , সুসিম, চোরং আগুচারিং গহেত্ৰা রঞ্ঞো দস্সেয্যুং – ‘অযং তে, দেৰ, চোরো আগুচারী, ইমস্স যং ইচ্ছসি তং দণ্ডং পণেহী’তি. তমেনং রাজা এৰং ৰদেয্য – ‘গচ্ছথ, ভো, ইমং পুরিসং দল়্হায রজ্জুযা পচ্ছাবাহং গাল়্হবন্ধনং বন্ধিত্ৰা খুরমুণ্ডং করিত্ৰা খরস্সরেন পণৰেন রথিযায রথিযং সিঙ্ঘাটকেন সিঙ্ঘাটকং পরিনেত্ৰা দক্খিণেন দ্ৰারেন নিক্খামেত্ৰা দক্খিণতো নগরস্স সীসং ছিন্দথা’তি ¶ . তমেনং রঞ্ঞো পুরিসা দল়্হায রজ্জুযা পচ্ছাবাহং গাল়্হবন্ধনং বন্ধিত্ৰা খুরমুণ্ডং করিত্ৰা খরস্সরেন পণৰেন রথিযায রথিযং সিঙ্ঘাটকেন সিঙ্ঘাটকং পরিনেত্ৰা দক্খিণেন দ্ৰারেন নিক্খামেত্ৰা দক্খিণতো নগরস্স সীসং ছিন্দেয্যুং. তং কিং মঞ্ঞসি, সুসিম, অপি নু সো পুরিসো ততোনিদানং দুক্খং দোমনস্সং পটিসংৰেদিযেথা’’তি? ‘‘এৰং, ভন্তে’’.

‘‘যং খো সো, সুসিম, পুরিসো ততোনিদানং দুক্খং দোমনস্সং পটিসংৰেদিযেথ [পটিসংৰেদিযেথ ৰা, ন ৰা পটিসংৰেদিযেথ (ক.)]. যা এৰং স্ৰাক্খাতে ধম্মৰিনযে ধম্মত্থেনকস্স পব্বজ্জা, অযং ততো দুক্খৰিপাকতরা চ কটুকৰিপাকতরা চ, অপি চ ৰিনিপাতায সংৰত্ততি. যতো চ খো ত্ৰং, সুসিম, অচ্চযং অচ্চযতো দিস্ৰা যথাধম্মং পটিকরোসি তং তে মযং পটিগ্গণ্হাম. ৰুদ্ধি হেসা, সুসিম, অরিযস্স ৰিনযে ¶ যো অচ্চযং অচ্চযতো দিস্ৰা যথাধম্মং ¶ পটিকরোতি, আযতিঞ্চ [আযতিং (স্যা. কং.)] সংৰরং আপজ্জতী’’তি. দসমং.

মহাৰগ্গো সত্তমো.

তস্সুদ্দানং –

দ্ৰে অস্সুতৰতা ৰুত্তা, পুত্তমংসেন চাপরং;

অত্থিরাগো চ নগরং, সম্মসং নল়কলাপিযং;

কোসম্বী উপযন্তি চ, দসমো সুসিমেন চাতি [দসমো ৰুত্তো সুসীমেনাতি (সী.)].

৮. সমণব্রাহ্মণৰগ্গো

১. জরামরণসুত্তং

৭১. এৰং ¶ ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা…পে… ‘‘যে হি কেচি, ভিক্খৰে ¶ , সমণা ৰা ব্রাহ্মণা ৰা জরামরণং নপ্পজানন্তি, জরামরণসমুদযং নপ্পজানন্তি, জরামরণনিরোধং নপ্পজানন্তি, জরামরণনিরোধগামিনিং পটিপদং নপ্পজানন্তি, ন মে তে, ভিক্খৰে, সমণা ৰা ব্রাহ্মণা ৰা সমণেসু ৰা সমণসম্মতা ব্রাহ্মণেসু ৰা ব্রাহ্মণসম্মতা, ন চ পন তে আযস্মন্তো সামঞ্ঞত্থং ৰা ব্রহ্মঞ্ঞত্থং ৰা দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তি.

‘‘যে চ খো কেচি, ভিক্খৰে, সমণা ৰা ব্রাহ্মণা ৰা জরামরণং পজানন্তি…পে… পটিপদং পজানন্তি, তে খো মে, ভিক্খৰে, সমণা ৰা ব্রাহ্মণা ৰা সমণেসু চেৰ সমণসম্মতা ব্রাহ্মণেসু চ ব্রাহ্মণসম্মতা, তে চ পনাযস্মন্তো সামঞ্ঞত্থঞ্চ ব্রহ্মঞ্ঞত্থঞ্চ দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. (সুত্তন্তো একো). পঠমং.

২-১১. জাতিসুত্তাদিদসকং

৭২. সাৰত্থিযং ¶ ৰিহরতি…পে… জাতিং নপ্পজানন্তি…পে….

(৩) ভৰং নপ্পজানন্তি…পে….

(৪) উপাদানং নপ্পজানন্তি…পে….

(৫) তণ্হং নপ্পজানন্তি…পে….

(৬) ৰেদনং নপ্পজানন্তি…পে….

(৭) ফস্সং ¶ নপ্পজানন্তি…পে….

(৮) সল়াযতনং নপ্পজানন্তি…পে….

(৯) নামরূপং ¶ নপ্পজানন্তি…পে….

(১০) ৰিঞ্ঞাণং নপ্পজানন্তি…পে….

(১১) ‘‘সঙ্খারে ¶ নপ্পজানন্তি, সঙ্খারসমুদযং নপ্পজানন্তি, সঙ্খারনিরোধং নপ্পজানন্তি, সঙ্খারনিরোধগামিনিং পটিপদং নপ্পজানন্তি…পে… সঙ্খারে পজানন্তি…পে… সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. একাদসমং.

সমণব্রাহ্মণৰগ্গো অট্ঠমো.

তস্সুদ্দানং –

পচ্চযেকাদস ৰুত্তা, চতুসচ্চৰিভজ্জনা;

সমণব্রাহ্মণৰগ্গো, নিদানে ভৰতি অট্ঠমো.

ৰগ্গুদ্দানং –

বুদ্ধো আহারো দসবলো, কল়ারো গহপতিপঞ্চমো;

দুক্খৰগ্গো মহাৰগ্গো, অট্ঠমো সমণব্রাহ্মণোতি.

৯. অন্তরপেয্যালং

১. সত্থুসুত্তং

৭৩. সাৰত্থিযং ¶ ¶ ৰিহরতি…পে… ‘‘জরামরণং, ভিক্খৰে, অজানতা অপস্সতা যথাভূতং জরামরণে যথাভূতং ঞাণায সত্থা পরিযেসিতব্বো; জরামরণসমুদযং অজানতা অপস্সতা যথাভূতং জরামরণসমুদযে যথাভূতং ¶ ঞাণায সত্থা পরিযেসিতব্বো; জরামরণনিরোধং অজানতা অপস্সতা যথাভূতং জরামরণনিরোধে যথাভূতং ঞাণায সত্থা পরিযেসিতব্বো; জরামরণনিরোধগামিনিং পটিপদং অজানতা অপস্সতা যথাভূতং জরামরণনিরোধগামিনিযা পটিপদায যথাভূতং ঞাণায সত্থা পরিযেসিতব্বো’’তি. (সুত্তন্তো একো). পঠমং.

(সব্বেসং পেয্যালো এৰং ৰিত্থারেতব্বো)

২-১১. দুতিযসত্থুসুত্তাদিদসকং

(২) জাতিং ¶ , ভিক্খৰে, অজানতা অপস্সতা যথাভূতং…পে….

(৩) ভৰং, ভিক্খৰে, অজানতা অপস্সতা যথাভূতং…পে….

(৪) উপাদানং, ভিক্খৰে, অজানতা অপস্সতা যথাভূতং…পে….

(৫) তণ্হং, ভিক্খৰে, অজানতা অপস্সতা যথাভূতং…পে….

(৬) ৰেদনং, ভিক্খৰে, অজানতা অপস্সতা যথাভূতং…পে….

(৭) ফস্সং, ভিক্খৰে, অজানতা অপস্সতা যথাভূতং…পে….

(৮) সল়াযতনং ¶ , ভিক্খৰে, অজানতা অপস্সতা যথাভূতং…পে….

(৯) নামরূপং, ভিক্খৰে, অজানতা অপস্সতা যথাভূতং…পে….

(১০) ৰিঞ্ঞাণং, ভিক্খৰে, অজানতা অপস্সতা যথাভূতং…পে….

(১১) ‘‘সঙ্খারে, ভিক্খৰে, অজানতা অপস্সতা যথাভূতং সঙ্খারেসু যথাভূতং ঞাণায সত্থা পরিযেসিতব্বো; সঙ্খারসমুদযং অজানতা অপস্সতা যথাভূতং সঙ্খারসমুদযে যথাভূতং ঞাণায সত্থা পরিযেসিতব্বো; সঙ্খারনিরোধং অজানতা অপস্সতা যথাভূতং ¶ সঙ্খারনিরোধে যথাভূতং ঞাণায সত্থা পরিযেসিতব্বো; সঙ্খারনিরোধগামিনিং পটিপদং অজানতা অপস্সতা যথাভূতং সঙ্খারনিরোধগামিনিযা পটিপদায যথাভূতং ঞাণায সত্থা পরিযেসিতব্বো’’তি. একাদসমং.

(সব্বেসং চতুসচ্চিকং কাতব্বং).

২-১২. সিক্খাসুত্তাদিপেয্যালএকাদসকং

(২) ‘‘জরামরণং ¶ , ভিক্খৰে, অজানতা অপস্সতা যথাভূতং জরামরণে যথাভূতং ঞাণায সিক্খা করণীযা.

(পেয্যালো. চতুসচ্চিকং কাতব্বং).

(৩) জরামরণং, ভিক্খৰে, অজানতা…পে… যোগো করণীযো…পে….

(৪) জরামরণং, ভিক্খৰে, অজানতা…পে… ছন্দো ¶ করণীযো…পে….

(৫) জরামরণং, ভিক্খৰে, অজানতা…পে… উস্সোল়্হী করণীযা…পে….

(৬) জরামরণং ¶ , ভিক্খৰে, অজানতা…পে… অপ্পটিৰানী করণীযা…পে….

(৭) জরামরণং, ভিক্খৰে, অজানতা…পে… আতপ্পং করণীযং…পে….

(৮) জরামরণং, ভিক্খৰে, অজানতা…পে… ৰীরিযং করণীযং…পে….

(৯) জরামরণং, ভিক্খৰে, অজানতা…পে… সাতচ্চং করণীযং…পে….

(১০) জরামরণং, ভিক্খৰে, অজানতা…পে… সতি করণীযা…পে….

(১১) জরামরণং, ভিক্খৰে, অজানতা…পে… সম্পজঞ্ঞং করণীযং…পে….

(১২) জরামরণং, ভিক্খৰে, অজানতা…পে… অপ্পমাদো করণীযো…পে….

অন্তরপেয্যালো নৰমো.

তস্সুদ্দানং –

সত্থা সিক্খা চ যোগো চ, ছন্দো উস্সোল়্হিপঞ্চমী;

অপ্পটিৰানি আতপ্পং, ৰীরিযং ¶ সাতচ্চমুচ্চতি;

সতি চ সম্পজঞ্ঞঞ্চ, অপ্পমাদেন দ্ৰাদসাতি.

সুত্তন্তা অন্তরপেয্যালা নিট্ঠিতা.

পরে ¶ তে দ্ৰাদস হোন্তি, সুত্তা দ্ৰত্তিংস সতানি;

চতুসচ্চেন তে ৰুত্তা, পেয্যালঅন্তরম্হি যেতি [পেয্যালা অন্তরম্হি যেতি (সী. স্যা. কং.)].

অন্তরপেয্যালেসু উদ্দানং সমত্তং.

নিদানসংযুত্তং সমত্তং.

২. অভিসমযসংযুত্তং

১. নখসিখাসুত্তং

৭৪. এৰং ¶ ¶ ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো ভগৰা পরিত্তং নখসিখাযং পংসুং আরোপেত্ৰা ভিক্খূ আমন্তেসি – ‘‘তং কিং মঞ্ঞথ, ভিক্খৰে, কতমং নু খো বহুতরং, যো ৰাযং [যো চাযং (সব্বত্থ) দুতিযসুত্তাদীসু পন ৰাসদ্দোযেৰ দিস্সতি] মযা পরিত্তো নখসিখাযং পংসু আরোপিতো, অযং ৰা মহাপথৰী’’তি?

‘‘এতদেৰ, ভন্তে, বহুতরং, যদিদং মহাপথৰী. অপ্পমত্তকো ভগৰতা পরিত্তো নখসিখাযং পংসু আরোপিতো. নেৰ সতিমং কলং উপেতি ন সহস্সিমং কলং উপেতি ন সতসহস্সিমং কলং উপেতি মহাপথৰিং উপনিধায ভগৰতা পরিত্তো নখসিখাযং পংসু আরোপিতো’’তি. ‘‘এৰমেৰ খো, ভিক্খৰে, অরিযসাৰকস্স দিট্ঠিসম্পন্নস্স পুগ্গলস্স অভিসমেতাৰিনো এতদেৰ বহুতরং দুক্খং যদিদং পরিক্খীণং পরিযাদিণ্ণং; অপ্পমত্তকং অৰসিট্ঠং. নেৰ সতিমং কলং উপেতি ন সহস্সিমং ¶ কলং উপেতি ন সতসহস্সিমং কলং উপেতি পুরিমং দুক্খক্খন্ধং পরিক্খীণং পরিযাদিণ্ণং উপনিধায যদিদং সত্তক্খত্তুংপরমতা. এৰং মহত্থিযো খো, ভিক্খৰে, ধম্মাভিসমযো; এৰং মহত্থিযো ধম্মচক্খুপটিলাভো’’তি. পঠমং.

২. পোক্খরণীসুত্তং

৭৫. সাৰত্থিযং ৰিহরতি…পে… ‘‘সেয্যথাপি, ভিক্খৰে, পোক্খরণী পঞ্ঞাসযোজনানি আযামেন পঞ্ঞাসযোজনানি ৰিত্থারেন পঞ্ঞাসযোজনানি ¶ উব্বেধেন, পুণ্ণা উদকস্স সমতিত্তিকা কাকপেয্যা. ততো পুরিসো কুসগ্গেন উদকং উদ্ধরেয্য. তং কিং মঞ্ঞথ, ভিক্খৰে ¶ , কতমং নু খো বহুতরং, যং ৰা কুসগ্গেন উদকং উব্ভতং যং ৰা পোক্খরণিযা উদক’’ন্তি?

‘‘এতদেৰ, ভন্তে, বহুতরং, যদিদং পোক্খরণিযা উদকং. অপ্পমত্তকং কুসগ্গেন উদকং উব্ভতং. নেৰ সতিমং কলং উপেতি ¶ ন সহস্সিমং কলং উপেতি ন সতসহস্সিমং কলং উপেতি পোক্খরণিযা উদকং উপনিধায কুসগ্গেন উদকং উব্ভত’’ন্তি. ‘‘এৰমেৰ খো, ভিক্খৰে, অরিযসাৰকস্স দিট্ঠিসম্পন্নস্স পুগ্গলস্স অভিসমেতাৰিনো এতদেৰ বহুতরং দুক্খং যদিদং পরিক্খীণং পরিযাদিণ্ণং; অপ্পমত্তকং অৰসিট্ঠং. নেৰ সতিমং কলং উপেতি ন সহস্সিমং কলং উপেতি ন সতসহস্সিমং কলং উপেতি পুরিমং দুক্খক্খন্ধং পরিক্খীণং পরিযাদিণ্ণং উপনিধায, যদিদং সত্তক্খত্তুংপরমতা. এৰং মহত্থিযো খো, ভিক্খৰে, ধম্মাভিসমযো; এৰং মহত্থিযো ধম্মচক্খুপটিলাভো’’তি. দুতিযং.

৩. সম্ভেজ্জউদকসুত্তং

৭৬. সাৰত্থিযং ৰিহরতি…পে… ‘‘সেয্যথাপি ¶ , ভিক্খৰে, যত্থিমা মহানদিযো সংসন্দন্তি সমেন্তি, সেয্যথিদং – গঙ্গা যমুনা অচিরৰতী সরভূ মহী, ততো পুরিসো দ্ৰে ৰা তীণি ৰা উদকফুসিতানি উদ্ধরেয্য. তং কিং মঞ্ঞথ, ভিক্খৰে, কতমং নু খো বহুতরং, যানি ৰা দ্ৰে ৰা তীণি ৰা উদকফুসিতানি উব্ভতানি যং ৰা সম্ভেজ্জউদক’’ন্তি?

‘‘এতদেৰ, ভন্তে, বহুতরং যদিদং সম্ভেজ্জউদকং; অপ্পমত্তকানি ¶ দ্ৰে ৰা তীণি ৰা উদকফুসিতানি উব্ভতানি. নেৰ সতিমং কলং উপেন্তি ন সহস্সিমং কলং উপেন্তি ন সতসহস্সিমং কলং উপেন্তি সম্ভেজ্জউদকং উপনিধায দ্ৰে ৰা তীণি ৰা উদকফুসিতানি উব্ভতানী’’তি. ‘‘এৰমেৰ খো, ভিক্খৰে…পে… ধম্মচক্খুপটিলাভো’’তি. ততিযং.

৪. দুতিযসম্ভেজ্জউদকসুত্তং

৭৭. সাৰত্থিযং ৰিহরতি…পে… ‘‘সেয্যথাপি, ভিক্খৰে, যত্থিমা মহানদিযো সংসন্দন্তি সমেন্তি, সেয্যথিদং – গঙ্গা যমুনা অচিরৰতী সরভূ মহী, তং উদকং পরিক্খযং পরিযাদানং গচ্ছেয্য ¶ ঠপেত্ৰা দ্ৰে ৰা তীণি ৰা উদকফুসিতানি. তং কিং মঞ্ঞথ, ভিক্খৰে, কতমং নু খো বহুতরং, যং ৰা সম্ভেজ্জউদকং পরিক্খীণং পরিযাদিণ্ণং যানি ৰা দ্ৰে ৰা তীণি ৰা উদকফুসিতানি অৰসিট্ঠানী’’তি?

‘‘এতদেৰ, ভন্তে, বহুতরং সম্ভেজ্জউদকং যদিদং পরিক্খীণং পরিযাদিণ্ণং; অপ্পমত্তকানি দ্ৰে ৰা তীণি ৰা উদকফুসিতানি অৰসিট্ঠানি. নেৰ সতিমং কলং ¶ উপেন্তি ন সহস্সিমং কলং উপেন্তি ন সতসহস্সিমং কলং উপেন্তি সম্ভেজ্জউদকং পরিক্খীণং পরিযাদিণ্ণং উপনিধায দ্ৰে ৰা তীণি ৰা উদকফুসিতানি অৰসিট্ঠানী’’তি. ‘‘এৰমেৰ খো, ভিক্খৰে…পে… ধম্মচক্খুপটিলাভো’’তি. চতুত্থং.

৫. পথৰীসুত্তং

৭৮. সাৰত্থিযং ৰিহরতি…পে… ‘‘সেয্যথাপি ¶ , ভিক্খৰে, পুরিসো ¶ মহাপথৰিযা সত্ত কোলট্ঠিমত্তিযো গুল়িকা উপনিক্খিপেয্য. তং কিং মঞ্ঞথ, ভিক্খৰে, কতমং নু খো বহুতরং, যা ৰা সত্ত কোলট্ঠিমত্তিযো গুল়িকা উপনিক্খিত্তা অযং [যা (স্যা. ক.)] ৰা মহাপথৰী’’তি?

‘‘এতদেৰ, ভন্তে, বহুতরং, যদিদং মহাপথৰী; অপ্পমত্তিকা সত্ত কোলট্ঠিমত্তিযো গুল়িকা উপনিক্খিত্তা. নেৰ সতিমং কলং উপেন্তি ন সহস্সিমং কলং উপেন্তি ন সতসহস্সিমং কলং উপেন্তি মহাপথৰিং উপনিধায সত্ত কোলট্ঠিমত্তিযো গুল়িকা উপনিক্খিত্তা’’তি. ‘‘এৰমেৰ খো, ভিক্খৰে…পে… ধম্মচক্খুপটিলাভো’’তি. পঞ্চমং.

৬. দুতিযপথৰীসুত্তং

৭৯. সাৰত্থিযং ৰিহরতি…পে… ‘‘সেয্যথাপি, ভিক্খৰে, মহাপথৰী পরিক্খযং পরিযাদানং গচ্ছেয্য, ঠপেত্ৰা সত্ত কোলট্ঠিমত্তিযো গুল়িকা. তং কিং মঞ্ঞথ, ভিক্খৰে, কতমং নু খো বহুতরং, যং ৰা মহাপথৰিযা পরিক্খীণং পরিযাদিণ্ণং যা ৰা সত্ত কোলট্ঠিমত্তিযো গুল়িকা অৰসিট্ঠা’’তি?

‘‘এতদেৰ ¶ ভন্তে, বহুতরং, মহাপথৰিযা, যদিদং পরিক্খীণং পরিযাদিণ্ণং; অপ্পমত্তিকা সত্ত কোলট্ঠিমত্তিযো গুল়িকা অৰসিট্ঠা. নেৰ সতিমং কলং উপেন্তি ন সহস্সিমং কলং উপেন্তি ন সতসহস্সিমং কলং উপেন্তি মহাপথৰিযা পরিক্খীণং পরিযাদিণ্ণং উপনিধায সত্ত কোলট্ঠিমত্তিযো গুল়িকা অৰসিট্ঠা’’তি. ‘‘এৰমেৰ খো, ভিক্খৰে…পে… ধম্মচক্খুপটিলাভো’’তি. ছট্ঠং.

৭. সমুদ্দসুত্তং

৮০. সাৰত্থিযং ¶ ৰিহরতি…পে… ‘‘সেয্যথাপি, ভিক্খৰে, পুরিসো মহাসমুদ্দতো দ্ৰে ৰা তীণি ৰা উদকফুসিতানি উদ্ধরেয্য. তং কিং মঞ্ঞথ, ভিক্খৰে ¶ , কতমং নু খো বহুতরং, যানি ৰা দ্ৰে ৰা তীণি ৰা উদকফুসিতানি উব্ভতানি যং ৰা মহাসমুদ্দে উদক’’ন্তি?

‘‘এতদেৰ ¶ , ভন্তে, বহুতরং, যদিদং মহাসমুদ্দে উদকং; অপ্পমত্তকানি দ্ৰে ৰা তীণি ৰা উদকফুসিতানি উব্ভতানি. নেৰ সতিমং কলং উপেন্তি ন সহস্সিমং কলং উপেন্তি ন সতসহস্সিমং কলং উপেন্তি মহাসমুদ্দে উদকং উপনিধায দ্ৰে ৰা তীণি ৰা উদকফুসিতানি উব্ভতানী’’তি. ‘‘এৰমেৰ খো, ভিক্খৰে…পে… ধম্মচক্খুপটিলাভো’’তি. সত্তমং.

৮. দুতিযসমুদ্দসুত্তং

৮১. সাৰত্থিযং ৰিহরতি…পে… ‘‘সেয্যথাপি, ভিক্খৰে, মহাসমুদ্দো পরিক্খযং পরিযাদানং গচ্ছেয্য, ঠপেত্ৰা দ্ৰে ৰা তীণি ৰা উদকফুসিতানি. তং কিং মঞ্ঞথ, ভিক্খৰে, কতমং নু খো বহুতরং, যং ৰা মহাসমুদ্দে উদকং পরিক্খীণং পরিযাদিন্নং যানি ৰা দ্ৰে ৰা তীণি ৰা উদকফুসিতানি অৰসিট্ঠানী’’তি?

‘‘এতদেৰ, ভন্তে, বহুতরং মহাসমুদ্দে উদকং, যদিদং পরিক্খীণং পরিযাদিণ্ণং; অপ্পমত্তকানি দ্ৰে ৰা তীণি ৰা উদকফুসিতানি অৰসিট্ঠানি. নেৰ সতিমং কলং উপেন্তি ন সহস্সিমং কলং উপেন্তি ন সতসহস্সিমং কলং উপেন্তি মহাসমুদ্দে উদকং পরিক্খীণং পরিযাদিণ্ণং ¶ উপনিধায দ্ৰে ৰা তীণি ৰা উদকফুসিতানি অৰসিট্ঠানী’’তি. ‘‘এৰমেৰ ¶ খো ভিক্খৰে…পে… ধম্মচক্খুপটিলাভো’’তি. অট্ঠমং.

৯. পব্বতসুত্তং

৮২. সাৰত্থিযং ৰিহরতি…পে… ‘‘সেয্যথাপি, ভিক্খৰে, পুরিসো হিমৰতো পব্বতরাজস্স সত্ত সাসপমত্তিযো পাসাণসক্খরা উপনিক্খিপেয্য. তং কিং মঞ্ঞথ, ভিক্খৰে, কতমং নু খো বহুতরং, যা ৰা সত্ত সাসপমত্তিযো পাসাণসক্খরা উপনিক্খিত্তা যো ৰা হিমৰা [উপনিক্খিত্তা, হিমৰা ৰা (সী.)] পব্বতরাজা’’তি?

‘‘এতদেৰ, ভন্তে, বহুতরং যদিদং হিমৰা পব্বতরাজা; অপ্পমত্তিকা সত্ত সাসপমত্তিযো পাসাণসক্খরা ¶ উপনিক্খিত্তা. নেৰ সতিমং কলং উপেন্তি ন সহস্সিমং কলং উপেন্তি ¶ ন সতসহস্সিমং কলং উপেন্তি হিমৰন্তং পব্বতরাজানং উপনিধায সত্ত সাসপমত্তিযো পাসাণসক্খরা উপনিক্খিত্তা’’তি. ‘‘এৰমেৰ খো…পে… ধম্মচক্খুপটিলাভো’’তি. নৰমং.

১০. দুতিযপব্বতসুত্তং

৮৩. সাৰত্থিযং ৰিহরতি…পে… ‘‘সেয্যথাপি, ভিক্খৰে, হিমৰা পব্বতরাজা পরিক্খযং পরিযাদানং গচ্ছেয্য, ঠপেত্ৰা সত্ত সাসপমত্তিযো পাসাণসক্খরা. তং কিং মঞ্ঞথ, ভিক্খৰে, কতমং নু খো বহুতরং, যং ৰা হিমৰতো পব্বতরাজস্স পরিক্খীণং পরিযাদিণ্ণং যা ৰা সত্ত সাসপমত্তিযো পাসাণসক্খরা অৰসিট্ঠা’’তি?

‘‘এতদেৰ, ভন্তে, বহুতরং হিমৰতো পব্বতরাজস্স যদিদং পরিক্খীণং পরিযাদিণ্ণং; অপ্পমত্তিকা সত্ত সাসপমত্তিযো পাসাণসক্খরা অৰসিট্ঠা. নেৰ সতিমং ¶ কলং উপেন্তি ন সহস্সিমং কলং উপেন্তি ন সতসহস্সিমং কলং উপেন্তি হিমৰতো পব্বতরাজস্স পরিক্খীণং পরিযাদিণ্ণং উপনিধায সত্ত সাসপমত্তিযো পাসাণসক্খরা অৰসিট্ঠা’’তি.

‘‘এৰমেৰ খো, ভিক্খৰে, অরিযসাৰকস্স দিট্ঠিসম্পন্নস্স পুগ্গলস্স অভিসমেতাৰিনো এতদেৰ ¶ বহুতরং দুক্খং যদিদং পরিক্খীণং পরিযাদিণ্ণং; অপ্পমত্তকং অৰসিট্ঠং. নেৰ সতিমং কলং উপেতি ন সহস্সিমং কলং উপেতি ন সতসহস্সিমং কলং উপেতি পুরিমং দুক্খক্খন্ধং পরিক্খীণং পরিযাদিণ্ণং উপনিধায যদিদং সত্তক্খত্তুংপরমতা. এৰং মহত্থিযো খো, ভিক্খৰে, ধম্মাভিসমযো, এৰং মহত্থিযো ধম্মচক্খুপটিলাভো’’তি. দসমং.

১১. ততিযপব্বতসুত্তং

৮৪. সাৰত্থিযং ৰিহরতি…পে… ‘‘সেয্যথাপি ¶ , ভিক্খৰে, পুরিসো সিনেরুস্স পব্বতরাজস্স সত্ত মুগ্গমত্তিযো পাসাণসক্খরা উপনিক্খিপেয্য. তং কিং মঞ্ঞথ, ভিক্খৰে, কতমং নু খো বহুতরং, যা ৰা সত্ত মুগ্গমত্তিযো পাসাণসক্খরা উপনিক্খিত্তা যো ৰা সিনেরু [উপনিক্খিত্তা, সিনেরু ৰা (সী.)] পব্বতরাজা’’তি?

‘‘এতদেৰ, ভন্তে, বহুতরং যদিদং সিনেরু পব্বতরাজা; অপ্পমত্তিকা সত্ত মুগ্গমত্তিযো পাসাণসক্খরা উপনিক্খিত্তা. নেৰ সতিমং কলং উপেন্তি ন সহস্সিমং ¶ কলং উপেন্তি ন সতসহস্সিমং কলং উপেন্তি সিনেরুং পব্বতরাজানং উপনিধায সত্ত মুগ্গমত্তিযো পাসাণসক্খরা উপনিক্খিত্তা’’তি. ‘‘এৰমেৰ খো, ভিক্খৰে, অরিযসাৰকস্স দিট্ঠিসম্পন্নস্স পুগ্গলস্স ¶ অধিগমং উপনিধায অঞ্ঞতিত্থিযসমণব্রাহ্মণপরিব্বাজকানং অধিগমো নেৰ সতিমং কলং উপেতি ন সহস্সিমং কলং উপেতি ন সতসহস্সিমং কলং উপেতি. এৰং মহাধিগমো, ভিক্খৰে, দিট্ঠিসম্পন্নো পুগ্গলো, এৰং মহাভিঞ্ঞো’’তি. একাদসমং.

অভিসমযসংযুত্তং সমত্তং.

তস্সুদ্দানং –

নখসিখা পোক্খরণী, সম্ভেজ্জউদকে চ দ্ৰে;

দ্ৰে পথৰী দ্ৰে সমুদ্দা, তযো চ পব্বতূপমাতি.

৩. ধাতুসংযুত্তং

১. নানত্তৰগ্গো

১. ধাতুনানত্তসুত্তং

৮৫. সাৰত্থিযং ¶ ¶ ¶ ¶ ৰিহরতি…পে… ‘‘ধাতুনানত্তং ৰো, ভিক্খৰে, দেসেস্সামি. তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘কতমঞ্চ, ভিক্খৰে, ধাতুনানত্তং? চক্খুধাতু রূপধাতু চক্খুৰিঞ্ঞাণধাতু, সোতধাতু সদ্দধাতু সোতৰিঞ্ঞাণধাতু, ঘানধাতু গন্ধধাতু ঘানৰিঞ্ঞাণধাতু, জিৰ্হাধাতু রসধাতু জিৰ্হাৰিঞ্ঞাণধাতু, কাযধাতু ফোট্ঠব্বধাতু কাযৰিঞ্ঞাণধাতু, মনোধাতু ধম্মধাতু মনোৰিঞ্ঞাণধাতু – ইদং ৰুচ্চতি, ভিক্খৰে, ধাতুনানত্ত’’ন্তি. পঠমং.

২. ফস্সনানত্তসুত্তং

৮৬. সাৰত্থিযং ৰিহরতি…পে… ‘‘ধাতুনানত্তং, ভিক্খৰে, পটিচ্চ উপ্পজ্জতি ফস্সনানত্তং. কতমঞ্চ, ভিক্খৰে, ধাতুনানত্তং? চক্খুধাতু সোতধাতু ঘানধাতু জিৰ্হাধাতু কাযধাতু মনোধাতু – ইদং ৰুচ্চতি, ভিক্খৰে, ধাতুনানত্তং’’.

‘‘কথঞ্চ, ভিক্খৰে, ধাতুনানত্তং পটিচ্চ উপ্পজ্জতি ফস্সনানত্তং? চক্খুধাতুং, ভিক্খৰে, পটিচ্চ উপ্পজ্জতি চক্খুসম্ফস্সো. সোতধাতুং পটিচ্চ… ঘানধাতুং পটিচ্চ ¶ … জিৰ্হাধাতুং ¶ পটিচ্চ… কাযধাতুং পটিচ্চ… মনোধাতুং পটিচ্চ উপ্পজ্জতি মনোসম্ফস্সো. এৰং খো ¶ , ভিক্খৰে, ধাতুনানত্তং পটিচ্চ উপ্পজ্জতি ফস্সনানত্ত’’ন্তি. দুতিযং.

৩. নোফস্সনানত্তসুত্তং

৮৭. সাৰত্থিযং ৰিহরতি…পে… ‘‘ধাতুনানত্তং, ভিক্খৰে, পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি ধাতুনানত্তং. কতমঞ্চ, ভিক্খৰে, ধাতুনানত্তং? চক্খুধাতু…পে… মনোধাতু – ইদং ৰুচ্চতি, ভিক্খৰে, ধাতুনানত্তং’’.

‘‘কথঞ্চ ¶ , ভিক্খৰে, ধাতুনানত্তং পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি ধাতুনানত্তং? চক্খুধাতুং, ভিক্খৰে, পটিচ্চ উপ্পজ্জতি চক্খুসম্ফস্সো, নো চক্খুসম্ফস্সং পটিচ্চ উপ্পজ্জতি চক্খুধাতু…পে… মনোধাতুং পটিচ্চ উপ্পজ্জতি মনোসম্ফস্সো, নো মনোসম্ফস্সং পটিচ্চ উপ্পজ্জতি মনোধাতু. এৰং খো, ভিক্খৰে, ধাতুনানত্তং পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি ধাতুনানত্ত’’ন্তি. ততিযং.

৪. ৰেদনানানত্তসুত্তং

৮৮. সাৰত্থিযং ৰিহরতি…পে… ‘‘ধাতুনানত্তং, ভিক্খৰে, পটিচ্চ উপ্পজ্জতি ফস্সনানত্তং, ফস্সনানত্তং পটিচ্চ উপ্পজ্জতি ৰেদনানানত্তং. কতমঞ্চ, ভিক্খৰে, ধাতুনানত্তং? চক্খুধাতু ¶ …পে… মনোধাতু – ইদং ৰুচ্চতি, ভিক্খৰে, ধাতুনানত্তং’’.

‘‘কথঞ্চ, ভিক্খৰে, ধাতুনানত্তং পটিচ্চ উপ্পজ্জতি ফস্সনানত্তং, ফস্সনানত্তং পটিচ্চ উপ্পজ্জতি ৰেদনানানত্তং? চক্খুধাতুং, ভিক্খৰে, পটিচ্চ উপ্পজ্জতি চক্খুসম্ফস্সো, চক্খুসম্ফস্সং পটিচ্চ উপ্পজ্জতি চক্খুসম্ফস্সজা ৰেদনা…পে… মনোধাতুং পটিচ্চ উপ্পজ্জতি ¶ মনোসম্ফস্সো, মনোসম্ফস্সং পটিচ্চ উপ্পজ্জতি মনোসম্ফস্সজা ৰেদনা. এৰং খো, ভিক্খৰে, ধাতুনানত্তং পটিচ্চ উপ্পজ্জতি ফস্সনানত্তং, ফস্সনানত্তং পটিচ্চ উপ্পজ্জতি ৰেদনানানত্ত’’ন্তি. চতুত্থং.

৫. দুতিযৰেদনানানত্তসুত্তং

৮৯. সাৰত্থিযং ¶ ৰিহরতি…পে… ‘‘ধাতুনানত্তং, ভিক্খৰে, পটিচ্চ উপ্পজ্জতি ফস্সনানত্তং, ফস্সনানত্তং পটিচ্চ উপ্পজ্জতি ৰেদনানানত্তং, নো ৰেদনানানত্তং পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি ধাতুনানত্তং. কতমঞ্চ, ভিক্খৰে, ধাতুনানত্তং? চক্খুধাতু…পে… মনোধাতু – ইদং ৰুচ্চতি, ভিক্খৰে, ধাতুনানত্তং’’.

‘‘কথঞ্চ, ভিক্খৰে, ধাতুনানত্তং পটিচ্চ উপ্পজ্জতি ফস্সনানত্তং, ফস্সনানত্তং পটিচ্চ উপ্পজ্জতি ৰেদনানানত্তং, নো ৰেদনানানত্তং পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি ধাতুনানত্তং? চক্খুধাতুং, ভিক্খৰে, পটিচ্চ উপ্পজ্জতি চক্খুসম্ফস্সো, চক্খুসম্ফস্সং পটিচ্চ উপ্পজ্জতি চক্খুসম্ফস্সজা ৰেদনা, নো চক্খুসম্ফস্সজং ৰেদনং পটিচ্চ ¶ উপ্পজ্জতি চক্খুসম্ফস্সো, নো চক্খুসম্ফস্সং পটিচ্চ উপ্পজ্জতি চক্খুধাতু…পে… মনোধাতুং পটিচ্চ উপ্পজ্জতি মনোসম্ফস্সো, মনোসম্ফস্সং ¶ পটিচ্চ উপ্পজ্জতি মনোসম্ফস্সজা ৰেদনা, নো মনোসম্ফস্সজং ৰেদনং পটিচ্চ উপ্পজ্জতি মনোসম্ফস্সো, নো মনোসম্ফস্সং পটিচ্চ উপ্পজ্জতি মনোধাতু. এৰং ¶ খো, ভিক্খৰে, ধাতুনানত্তং পটিচ্চ উপ্পজ্জতি ফস্সনানত্তং, ফস্সনানত্তং পটিচ্চ উপ্পজ্জতি ৰেদনানানত্তং, নো ৰেদনানানত্তং পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি ধাতুনানত্ত’’ন্তি. পঞ্চমং.

৬. বাহিরধাতুনানত্তসুত্তং

৯০. সাৰত্থিযং ৰিহরতি…পে… ‘‘ধাতুনানত্তং ৰো, ভিক্খৰে, দেসেস্সামি. তং সুণাথ…পে… কতমঞ্চ, ভিক্খৰে, ধাতুনানত্তং? রূপধাতু সদ্দধাতু গন্ধধাতু রসধাতু ফোট্ঠব্বধাতু ধম্মধাতু – ইদং ৰুচ্চতি, ভিক্খৰে, ধাতুনানত্ত’’ন্তি. ছট্ঠং.

৭. সঞ্ঞানানত্তসুত্তং

৯১. সাৰত্থিযং ৰিহরতি…পে… ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ ¶ – ‘‘ধাতুনানত্তং, ভিক্খৰে, পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং, সঙ্কপ্পনানত্তং পটিচ্চ উপ্পজ্জতি ছন্দনানত্তং, ছন্দনানত্তং পটিচ্চ উপ্পজ্জতি পরিল়াহনানত্তং, পরিল়াহনানত্তং পটিচ্চ উপ্পজ্জতি পরিযেসনানানত্তং. কতমঞ্চ, ভিক্খৰে, ধাতুনানত্তং? রূপধাতু…পে… ধম্মধাতু – ইদং ৰুচ্চতি, ভিক্খৰে, ধাতুনানত্তং’’.

‘‘কথঞ্চ ¶ , ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং, সঙ্কপ্পনানত্তং পটিচ্চ উপ্পজ্জতি ছন্দনানত্তং, ছন্দনানত্তং পটিচ্চ উপ্পজ্জতি পরিল়াহনানত্তং, পরিল়াহনানত্তং পটিচ্চ উপ্পজ্জতি পরিযেসনানানত্তং?

‘‘রূপধাতুং, ভিক্খৰে, পটিচ্চ উপ্পজ্জতি রূপসঞ্ঞা ¶ , রূপসঞ্ঞং পটিচ্চ উপ্পজ্জতি রূপসঙ্কপ্পো, রূপসঙ্কপ্পং পটিচ্চ উপ্পজ্জতি রূপচ্ছন্দো, রূপচ্ছন্দং পটিচ্চ উপ্পজ্জতি রূপপরিল়াহো, রূপপরিল়াহং পটিচ্চ উপ্পজ্জতি রূপপরিযেসনা…পে… ধম্মধাতুং পটিচ্চ উপ্পজ্জতি ধম্মসঞ্ঞা, ধম্মসঞ্ঞং পটিচ্চ উপ্পজ্জতি ধম্মসঙ্কপ্পো, ধম্মসঙ্কপ্পং পটিচ্চ উপ্পজ্জতি ধম্মচ্ছন্দো, ধম্মচ্ছন্দং পটিচ্চ উপ্পজ্জতি ধম্মপরিল়াহো, ধম্মপরিল়াহং পটিচ্চ উপ্পজ্জতি ধম্মপরিযেসনা.

‘‘এৰং, খো, ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং, সঙ্কপ্পনানত্তং পটিচ্চ উপ্পজ্জতি ছন্দনানত্তং, ছন্দনানত্তং ¶ পটিচ্চ উপ্পজ্জতি পরিল়াহনানত্তং, পরিল়াহনানত্তং পটিচ্চ উপ্পজ্জতি পরিযেসনানানত্ত’’ন্তি. সত্তমং.

৮. নোপরিযেসনানানত্তসুত্তং

৯২. সাৰত্থিযং ৰিহরতি…পে… ‘‘ধাতুনানত্তং, ভিক্খৰে, পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং, সঙ্কপ্পনানত্তং পটিচ্চ উপ্পজ্জতি ছন্দনানত্তং, ছন্দনানত্তং পটিচ্চ উপ্পজ্জতি পরিল়াহনানত্তং, পরিল়াহনানত্তং পটিচ্চ উপ্পজ্জতি পরিযেসনানানত্তং; নো পরিযেসনানানত্তং পটিচ্চ উপ্পজ্জতি পরিল়াহনানত্তং ¶ , নো পরিল়াহনানত্তং পটিচ্চ উপ্পজ্জতি ছন্দনানত্তং, নো ছন্দনানত্তং পটিচ্চ উপ্পজ্জতি সঙ্কপ্পনানত্তং ¶ , নো সঙ্কপ্পনানত্তং পটিচ্চ উপ্পজ্জতি সঞ্ঞানানত্তং, নো সঞ্ঞানানত্তং পটিচ্চ উপ্পজ্জতি ধাতুনানত্তং. কতমঞ্চ, ভিক্খৰে, ধাতুনানত্তং? রূপধাতু…পে… ধম্মধাতু – ইদং ৰুচ্চতি, ভিক্খৰে, ধাতুনানত্তং’’.

‘‘কথঞ্চ ¶ , ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি…পে… পরিযেসনানানত্তং; নো পরিযেসনানানত্তং পটিচ্চ উপ্পজ্জতি পরিল়াহনানত্তং, নো পরিল়াহনানত্তং পটিচ্চ উপ্পজ্জতি ছন্দনানত্তং, নো ছন্দনানত্তং পটিচ্চ উপ্পজ্জতি সঙ্কপ্পনানত্তং, নো সঙ্কপ্পনানত্তং পটিচ্চ উপ্পজ্জতি সঞ্ঞানানত্তং, নো সঞ্ঞানানত্তং পটিচ্চ উপ্পজ্জতি ধাতুনানত্তং?

‘‘রূপধাতুং, ভিক্খৰে, পটিচ্চ উপ্পজ্জতি রূপসঞ্ঞা…পে… ধম্মধাতুং পটিচ্চ উপ্পজ্জতি ধম্মসঞ্ঞা, ধম্মসঞ্ঞং ¶ পটিচ্চ উপ্পজ্জতি…পে… ধম্মপরিযেসনা; নো ধম্মপরিযেসনং পটিচ্চ উপ্পজ্জতি ধম্মপরিল়াহো, নো ধম্মপরিল়াহং পটিচ্চ উপ্পজ্জতি ধম্মচ্ছন্দো, নো ধম্মচ্ছন্দং পটিচ্চ উপ্পজ্জতি ধম্মসঙ্কপ্পো, নো ধম্মসঙ্কপ্পং পটিচ্চ উপ্পজ্জতি ধম্মসঞ্ঞা, নো ধম্মসঞ্ঞং পটিচ্চ উপ্পজ্জতি ধম্মধাতু.

‘‘এৰং খো, ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি…পে… পরিযেসনানানত্তং; নো পরিযেসনানানত্তং পটিচ্চ উপ্পজ্জতি পরিল়াহনানত্তং, নো পরিল়াহনানত্তং পটিচ্চ উপ্পজ্জতি ছন্দনানত্তং, নো ছন্দনানত্তং পটিচ্চ উপ্পজ্জতি সঙ্কপ্পনানত্তং, নো সঙ্কপ্পনানত্তং পটিচ্চ উপ্পজ্জতি সঞ্ঞানানত্তং, নো সঞ্ঞানানত্তং পটিচ্চ উপ্পজ্জতি ধাতুনানত্ত’’ন্তি. অট্ঠমং.

৯. বাহিরফস্সনানত্তসুত্তং

৯৩. সাৰত্থিযং ¶ ৰিহরতি…পে… ‘‘ধাতুনানত্তং, ভিক্খৰে, পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং, সঙ্কপ্পনানত্তং পটিচ্চ উপ্পজ্জতি ফস্সনানত্তং ¶ , ফস্সনানত্তং পটিচ্চ উপ্পজ্জতি ৰেদনানানত্তং, ৰেদনানানত্তং পটিচ্চ উপ্পজ্জতি ছন্দনানত্তং, ছন্দনানত্তং পটিচ্চ উপ্পজ্জতি পরিল়াহনানত্তং, পরিল়াহনানত্তং পটিচ্চ উপ্পজ্জতি পরিযেসনানানত্তং ¶ , পরিযেসনানানত্তং পটিচ্চ উপ্পজ্জতি লাভনানত্তং. কতমঞ্চ, ভিক্খৰে, ধাতুনানত্তং? রূপধাতু…পে… ধম্মধাতু – ইদং ৰুচ্চতি, ভিক্খৰে, ধাতুনানত্তং’’.

‘‘কথঞ্চ, ভিক্খৰে, ধাতুনানত্তং পটিচ্চ উপ্পজ্জতি ¶ সঞ্ঞানানত্তং, সঞ্ঞানানত্তং পটিচ্চ উপ্পজ্জতি…পে… লাভনানত্তং?

‘‘রূপধাতুং, ভিক্খৰে, পটিচ্চ উপ্পজ্জতি রূপসঞ্ঞা, রূপসঞ্ঞং পটিচ্চ উপ্পজ্জতি রূপসঙ্কপ্পো, রূপসঙ্কপ্পং পটিচ্চ উপ্পজ্জতি রূপসম্ফস্সো, রূপসম্ফস্সং পটিচ্চ উপ্পজ্জতি রূপসম্ফস্সজা ৰেদনা, রূপসম্ফস্সজং ৰেদনং পটিচ্চ উপ্পজ্জতি রূপচ্ছন্দো, রূপচ্ছন্দং পটিচ্চ উপ্পজ্জতি রূপপরিল়াহো, রূপপরিল়াহং পটিচ্চ উপ্পজ্জতি রূপপরিযেসনা, রূপপরিযেসনং পটিচ্চ উপ্পজ্জতি রূপলাভো…পে… ধম্মধাতুং পটিচ্চ উপ্পজ্জতি ধম্মসঞ্ঞা, ধম্মসঞ্ঞং পটিচ্চ উপ্পজ্জতি ধম্মসঙ্কপ্পো, ধম্মসঙ্কপ্পং পটিচ্চ উপ্পজ্জতি ধম্মসম্ফস্সো, ধম্মসম্ফস্সং পটিচ্চ উপ্পজ্জতি ধম্মসম্ফস্সজা ৰেদনা, ধম্মসম্ফস্সজং ৰেদনং পটিচ্চ উপ্পজ্জতি ধম্মচ্ছন্দো, ধম্মচ্ছন্দং পটিচ্চ উপ্পজ্জতি ধম্মপরিল়াহো, ধম্মপরিল়াহং পটিচ্চ উপ্পজ্জতি ধম্মপরিযেসনা, ধম্মপরিযেসনং পটিচ্চ উপ্পজ্জতি ধম্মলাভো ¶ .

‘‘এৰং খো, ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি…পে… পরিযেসনানানত্তং, পরিযেসনানানত্তং পটিচ্চ উপ্পজ্জতি লাভনানত্ত’’ন্তি. নৰমং.

১০. দুতিযবাহিরফস্সনানত্তসুত্তং

৯৪. সাৰত্থিযং ৰিহরতি…পে… ‘‘ধাতুনানত্তং, ভিক্খৰে, পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং ¶ , ফস্স… ৰেদনা… ছন্দ… পরিল়াহ… পরিযেসনানানত্তং পটিচ্চ উপ্পজ্জতি লাভনানত্তং; নো লাভনানত্তং পটিচ্চ উপ্পজ্জতি পরিযেসনানানত্তং, নো পরিযেসনানানত্তং পটিচ্চ উপ্পজ্জতি পরিল়াহনানত্তং, নো পরিল়াহনানত্তং পটিচ্চ উপ্পজ্জতি…পে… ছন্দ… ৰেদনা… ফস্স… সঙ্কপ্প… সঞ্ঞানানত্তং ¶ , নো সঞ্ঞানানত্তং পটিচ্চ ¶ উপ্পজ্জতি ধাতুনানত্তং. কতমঞ্চ, ভিক্খৰে, ধাতুনানত্তং? রূপধাতু…পে… ধম্মধাতু – ইদং ৰুচ্চতি, ভিক্খৰে, ধাতুনানত্তং’’.

‘‘কথঞ্চ, ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং? ফস্স… ৰেদনা… ছন্দ… পরিল়াহ… পরিযেসনা… লাভ… নো লাভনানত্তং পটিচ্চ উপ্পজ্জতি পরিযেসনানানত্তং, নো পরিযেসনানানত্তং পটিচ্চ উপ্পজ্জতি পরিল়াহ… ছন্দ… ৰেদনা… ফস্স… নো সঙ্কপ্পনানত্তং পটিচ্চ উপ্পজ্জতি সঞ্ঞানানত্তং, নো সঞ্ঞানানত্তং পটিচ্চ উপ্পজ্জতি ধাতুনানত্তং?

‘‘রূপধাতুং, ভিক্খৰে, পটিচ্চ উপ্পজ্জতি রূপসঞ্ঞা…পে… ধম্মধাতুং ¶ পটিচ্চ উপ্পজ্জতি ধম্মসঞ্ঞা, ধম্মসঞ্ঞং পটিচ্চ উপ্পজ্জতি…পে… ধম্মপরিযেসনা, ধম্মপরিযেসনং পটিচ্চ উপ্পজ্জতি ধম্মলাভো; নো ধম্মলাভং পটিচ্চ উপ্পজ্জতি ধম্মপরিযেসনা, নো ধম্মপরিযেসনং পটিচ্চ উপ্পজ্জতি ধম্মপরিল়াহো ¶ , নো ধম্মপরিল়াহং পটিচ্চ উপ্পজ্জতি ধম্মচ্ছন্দো, নো ধম্মচ্ছন্দং পটিচ্চ উপ্পজ্জতি ধম্মসম্ফস্সজা ৰেদনা, নো ধম্মসম্ফস্সজং ৰেদনং পটিচ্চ উপ্পজ্জতি ধম্মসম্ফস্সো, নো ধম্মসম্ফস্সং পটিচ্চ উপ্পজ্জতি ধম্মসঙ্কপ্পো, নো ধম্মসঙ্কপ্পং পটিচ্চ উপ্পজ্জতি ধম্মসঞ্ঞা, নো ধম্মসঞ্ঞং পটিচ্চ উপ্পজ্জতি ধম্মধাতু.

‘‘এৰং খো, ভিক্খৰে, ধাতুনানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি…পে… সঙ্কপ্প… ফস্স… ৰেদনা… ছন্দ… পরিল়াহ… পরিযেসনা… লাভ… নো লাভনানত্তং পটিচ্চ উপ্পজ্জতি পরিযেসনানানত্তং, নো পরিযেসনানানত্তং পটিচ্চ উপ্পজ্জতি পরিল়াহনানত্তং, নো পরিল়াহনানত্তং পটিচ্চ উপ্পজ্জতি ছন্দনানত্তং, নো ছন্দনানত্তং পটিচ্চ উপ্পজ্জতি ৰেদনানানত্তং, নো ৰেদনানানত্তং পটিচ্চ উপ্পজ্জতি ফস্সনানত্তং, নো ফস্সনানত্তং পটিচ্চ উপ্পজ্জতি সঙ্কপ্পনানত্তং, নো সঙ্কপ্পনানত্তং পটিচ্চ উপ্পজ্জতি সঞ্ঞানানত্তং, নো সঞ্ঞানানত্তং পটিচ্চ উপ্পজ্জতি ধাতুনানত্ত’’ন্তি. দসমং.

নানত্তৰগ্গো পঠমো.

তস্সুদ্দানং –

ধাতুফস্সঞ্চ ¶ ¶ নো চেতং, ৰেদনা অপরে দুৰে;

এতং অজ্ঝত্তপঞ্চকং, ধাতুসঞ্ঞঞ্চ নো চেতং;

ফস্সস্স অপরে দুৰে, এতং বাহিরপঞ্চকন্তি.

২. দুতিযৰগ্গো

১. সত্তধাতুসুত্তং

৯৫. সাৰত্থিযং ¶ ¶ ৰিহরতি…পে… ‘‘সত্তিমা ¶ , ভিক্খৰে, ধাতুযো. কতমা সত্ত? আভাধাতু, সুভধাতু, আকাসানঞ্চাযতনধাতু, ৰিঞ্ঞাণঞ্চাযতনধাতু, আকিঞ্চঞ্ঞাযতনধাতু, নেৰসঞ্ঞানাসঞ্ঞাযতনধাতু, সঞ্ঞাৰেদযিতনিরোধধাতু – ইমা খো, ভিক্খৰে, সত্ত ধাতুযো’’তি.

এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘যা চাযং, ভন্তে, আভাধাতু যা চ সুভধাতু যা চ আকাসানঞ্চাযতনধাতু যা চ ৰিঞ্ঞাণঞ্চাযতনধাতু যা চ আকিঞ্চঞ্ঞাযতনধাতু যা চ নেৰসঞ্ঞানাসঞ্ঞাযতনধাতু যা চ সঞ্ঞাৰেদযিতনিরোধধাতু – ইমা নু খো, ভন্তে, ধাতুযো কিং পটিচ্চ পঞ্ঞাযন্তী’’তি?

‘‘যাযং, ভিক্খু, আভাধাতু – অযং ধাতু অন্ধকারং পটিচ্চ পঞ্ঞাযতি. যাযং, ভিক্খু, সুভধাতু – অযং ধাতু অসুভং পটিচ্চ পঞ্ঞাযতি. যাযং, ভিক্খু, আকাসানঞ্চাযতনধাতু – অযং ধাতু রূপং পটিচ্চ পঞ্ঞাযতি. যাযং, ভিক্খু, ৰিঞ্ঞাণঞ্চাযতনধাতু – অযং ধাতু আকাসানঞ্চাযতনং পটিচ্চ পঞ্ঞাযতি. যাযং, ভিক্খু, আকিঞ্চঞ্ঞাযতনধাতু – অযং ধাতু ৰিঞ্ঞাণঞ্চাযতনং পটিচ্চ পঞ্ঞাযতি. যাযং, ভিক্খু, নেৰসঞ্ঞানাসঞ্ঞাযতনধাতু – অযং ধাতু আকিঞ্চঞ্ঞাযতনং পটিচ্চ পঞ্ঞাযতি. যাযং, ভিক্খু, সঞ্ঞাৰেদযিতনিরোধধাতু – অযং ধাতু নিরোধং পটিচ্চ পঞ্ঞাযতী’’তি.

‘‘যা ¶ চাযং ¶ , ভন্তে, আভাধাতু যা চ সুভধাতু যা চ আকাসানঞ্চাযতনধাতু যা চ ৰিঞ্ঞাণঞ্চাযতনধাতু যা চ আকিঞ্চঞ্ঞাযতনধাতু যা চ নেৰসঞ্ঞানাসঞ্ঞাযতনধাতু যা চ সঞ্ঞাৰেদযিতনিরোধধাতু – ইমা নু খো, ভন্তে, ধাতুযো কথং সমাপত্তি পত্তব্বা’’তি?

‘‘যা চাযং, ভিক্খু, আভাধাতু যা চ সুভধাতু যা চ আকাসানঞ্চাযতনধাতু যা চ ৰিঞ্ঞাণঞ্চাযতনধাতু যা চ ¶ আকিঞ্চঞ্ঞাযতনধাতু – ইমা ধাতুযো সঞ্ঞাসমাপত্তি পত্তব্বা. যাযং, ভিক্খু, নেৰসঞ্ঞানাসঞ্ঞাযতনধাতু – অযং ধাতু সঙ্খারাৰসেসসমাপত্তি পত্তব্বা ¶ . যাযং, ভিক্খু, সঞ্ঞাৰেদযিতনিরোধধাতু – অযং ধাতু নিরোধসমাপত্তি পত্তব্বা’’তি. পঠমং.

২. সনিদানসুত্তং

৯৬. সাৰত্থিযং ৰিহরতি…পে… ‘‘সনিদানং, ভিক্খৰে, উপ্পজ্জতি কামৰিতক্কো, নো অনিদানং; সনিদানং উপ্পজ্জতি ব্যাপাদৰিতক্কো, নো অনিদানং; সনিদানং উপ্পজ্জতি ৰিহিংসাৰিতক্কো, নো অনিদানং’’.

‘‘কথঞ্চ, ভিক্খৰে, সনিদানং উপ্পজ্জতি কামৰিতক্কো, নো অনিদানং; সনিদানং উপ্পজ্জতি ব্যাপাদৰিতক্কো, নো অনিদানং; সনিদানং উপ্পজ্জতি ৰিহিংসাৰিতক্কো, নো অনিদানং? কামধাতুং, ভিক্খৰে, পটিচ্চ উপ্পজ্জতি কামসঞ্ঞা, কামসঞ্ঞং পটিচ্চ উপ্পজ্জতি কামসঙ্কপ্পো, কামসঙ্কপ্পং পটিচ্চ উপ্পজ্জতি কামচ্ছন্দো, কামচ্ছন্দং পটিচ্চ উপ্পজ্জতি ¶ কামপরিল়াহো, কামপরিল়াহং পটিচ্চ উপ্পজ্জতি কামপরিযেসনা. কামপরিযেসনং, ভিক্খৰে, পরিযেসমানো অস্সুতৰা পুথুজ্জনো তীহি ঠানেহি মিচ্ছা পটিপজ্জতি – কাযেন, ৰাচায, মনসা.

‘‘ব্যাপাদধাতুং, ভিক্খৰে, পটিচ্চ উপ্পজ্জতি ব্যাপাদসঞ্ঞা, ব্যাপাদসঞ্ঞং পটিচ্চ উপ্পজ্জতি ব্যাপাদসঙ্কপ্পো…পে… ব্যাপাদচ্ছন্দো… ব্যাপাদপরিল়াহো… ব্যাপাদপরিযেসনা… ব্যাপাদপরিযেসনং, ভিক্খৰে, পরিযেসমানো অস্সুতৰা পুথুজ্জনো তীহি ঠানেহি মিচ্ছা পটিপজ্জতি – কাযেন, ৰাচায, মনসা.

‘‘ৰিহিংসাধাতুং ¶ , ভিক্খৰে, পটিচ্চ উপ্পজ্জতি ৰিহিংসাসঞ্ঞা; ৰিহিংসাসঞ্ঞং পটিচ্চ উপ্পজ্জতি ৰিহিংসাসঙ্কপ্পো…পে… ৰিহিংসাছন্দো… ৰিহিংসাপরিল়াহো… ৰিহিংসাপরিযেসনা… ৰিহিংসাপরিযেসনং, ভিক্খৰে ¶ , পরিযেসমানো অস্সুতৰা পুথুজ্জনো তীহি ঠানেহি মিচ্ছা পটিপজ্জতি – কাযেন, ৰাচায, মনসা.

‘‘সেয্যথাপি, ভিক্খৰে, পুরিসো আদিত্তং তিণুক্কং সুক্খে তিণদাযে নিক্খিপেয্য; নো চে হত্থেহি চ পাদেহি চ খিপ্পমেৰ নিব্বাপেয্য. এৰঞ্হি, ভিক্খৰে, যে তিণকট্ঠনিস্সিতা পাণা তে অনযব্যসনং আপজ্জেয্যুং. এৰমেৰ খো, ভিক্খৰে, যো হি কোচি সমণো ৰা ব্রাহ্মণো ৰা উপ্পন্নং ৰিসমগতং সঞ্ঞং ন খিপ্পমেৰ পজহতি ৰিনোদেতি ব্যন্তীকরোতি অনভাৰং ¶ গমেতি, সো দিট্ঠে চেৰ ধম্মে দুক্খং ৰিহরতি সৰিঘাতং সউপাযাসং সপরিল়াহং; কাযস্স চ ভেদা পরং মরণা দুগ্গতি পাটিকঙ্খা.

‘‘সনিদানং, ভিক্খৰে, উপ্পজ্জতি নেক্খম্মৰিতক্কো, নো অনিদানং; সনিদানং ¶ উপ্পজ্জতি অব্যাপাদৰিতক্কো, নো অনিদানং; সনিদানং উপ্পজ্জতি অৰিহিংসাৰিতক্কো, নো অনিদানং.

‘‘কথঞ্চ, ভিক্খৰে, সনিদানং উপ্পজ্জতি নেক্খম্মৰিতক্কো, নো অনিদানং; সনিদানং উপ্পজ্জতি অব্যাপাদৰিতক্কো, নো অনিদানং; সনিদানং উপ্পজ্জতি অৰিহিংসাৰিতক্কো, নো অনিদানং? নেক্খম্মধাতুং, ভিক্খৰে, পটিচ্চ উপ্পজ্জতি নেক্খম্মসঞ্ঞা, নেক্খম্মসঞ্ঞং পটিচ্চ উপ্পজ্জতি নেক্খম্মসঙ্কপ্পো, নেক্খম্মসঙ্কপ্পং পটিচ্চ উপ্পজ্জতি নেক্খম্মচ্ছন্দো, নেক্খম্মচ্ছন্দং পটিচ্চ উপ্পজ্জতি নেক্খম্মপরিল়াহো, নেক্খম্মপরিল়াহং পটিচ্চ উপ্পজ্জতি নেক্খম্মপরিযেসনা; নেক্খম্মপরিযেসনং, ভিক্খৰে, পরিযেসমানো সুতৰা অরিযসাৰকো তীহি ঠানেহি সম্মা পটিপজ্জতি – কাযেন, ৰাচায, মনসা.

‘‘অব্যাপাদধাতুং, ভিক্খৰে, পটিচ্চ উপ্পজ্জতি অব্যাপাদসঞ্ঞা, অব্যাপাদসঞ্ঞং পটিচ্চ উপ্পজ্জতি অব্যাপাদসঙ্কপ্পো…পে… অব্যাপাদচ্ছন্দো… অব্যাপাদপরিল়াহো… অব্যাপাদপরিযেসনা, অব্যাপাদপরিযেসনং, ভিক্খৰে, পরিযেসমানো সুতৰা অরিযসাৰকো তীহি ঠানেহি সম্মা পটিপজ্জতি – কাযেন, ৰাচায, মনসা.

‘‘অৰিহিংসাধাতুং ¶ , ভিক্খৰে, পটিচ্চ উপ্পজ্জতি অৰিহিংসাসঞ্ঞা ¶ , অৰিহিংসাসঞ্ঞং পটিচ্চ উপ্পজ্জতি অৰিহিংসাসঙ্কপ্পো, অৰিহিংসাসঙ্কপ্পং পটিচ্চ উপ্পজ্জতি অৰিহিংসাছন্দো, অৰিহিংসাছন্দং পটিচ্চ উপ্পজ্জতি অৰিহিংসাপরিল়াহো, অৰিহিংসাপরিল়াহং পটিচ্চ উপ্পজ্জতি অৰিহিংসাপরিযেসনা; অৰিহিংসাপরিযেসনং, ভিক্খৰে, পরিযেসমানো সুতৰা অরিযসাৰকো তীহি ¶ ঠানেহি সম্মা পটিপজ্জতি – কাযেন, ৰাচায, মনসা.

‘‘সেয্যথাপি, ভিক্খৰে, পুরিসো আদিত্তং তিণুক্কং সুক্খে তিণদাযে নিক্খিপেয্য; তমেনং হত্থেহি চ পাদেহি চ খিপ্পমেৰ নিব্বাপেয্য. এৰঞ্হি, ভিক্খৰে, যে তিণকট্ঠনিস্সিতা পাণা তে ন অনযব্যসনং আপজ্জেয্যুং. এৰমেৰ খো, ভিক্খৰে, যো হি কোচি সমণো ৰা ব্রাহ্মণো ৰা উপ্পন্নং ৰিসমগতং সঞ্ঞং খিপ্পমেৰ পজহতি ৰিনোদেতি ব্যন্তীকরোতি ¶ অনভাৰং গমেতি, সো দিট্ঠে চেৰ ধম্মে সুখং ৰিহরতি অৰিঘাতং অনুপাযাসং অপরিল়াহং; কাযস্স চ ভেদা পরং মরণা সুগতি পাটিকঙ্খা’’তি. দুতিযং.

৩. গিঞ্জকাৰসথসুত্তং

৯৭. একং সমযং ভগৰা ঞাতিকে ৰিহরতি গিঞ্জকাৰসথে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ধাতুং, ভিক্খৰে, পটিচ্চ উপ্পজ্জতি সঞ্ঞা, উপ্পজ্জতি দিট্ঠি, উপ্পজ্জতি ৰিতক্কো’’তি. এৰং ৰুত্তে, আযস্মা কচ্চানো [সদ্ধো কচ্চানো (ক.)] ভগৰন্তং এতদৰোচ – ‘‘যাযং, ভন্তে, দিট্ঠি – ‘অসম্মাসম্বুদ্ধেসু সম্মাসম্বুদ্ধা’তি, অযং নু খো, ভন্তে, দিট্ঠি কিং পটিচ্চ পঞ্ঞাযতী’’তি?

‘‘মহতি খো এসা, কচ্চান, ধাতু যদিদং অৰিজ্জাধাতু. হীনং ¶ , কচ্চান, ধাতুং পটিচ্চ উপ্পজ্জতি হীনা সঞ্ঞা, হীনা দিট্ঠি, হীনো ৰিতক্কো, হীনা চেতনা, হীনা পত্থনা, হীনো পণিধি, হীনো পুগ্গলো, হীনা ৰাচা; হীনং আচিক্খতি দেসেতি পঞ্ঞপেতি পট্ঠপেতি ¶ ৰিৰরতি ৰিভজতি উত্তানীকরোতি; হীনা তস্স উপপত্তীতি ৰদামি.

‘‘মজ্ঝিমং ¶ , কচ্চান, ধাতুং পটিচ্চ উপ্পজ্জতি মজ্ঝিমা সঞ্ঞা, মজ্ঝিমা দিট্ঠি, মজ্ঝিমো ৰিতক্কো, মজ্ঝিমা চেতনা, মজ্ঝিমা পত্থনা, মজ্ঝিমো পণিধি, মজ্ঝিমো পুগ্গলো, মজ্ঝিমা ৰাচা; মজ্ঝিমং আচিক্খতি দেসেতি পঞ্ঞপেতি পট্ঠপেতি ৰিৰরতি ৰিভজতি উত্তানীকরোতি; মজ্ঝিমা তস্স উপপত্তীতি ৰদামি.

‘‘পণীতং, কচ্চান, ধাতুং পটিচ্চ উপ্পজ্জতি পণীতা সঞ্ঞা, পণীতা দিট্ঠি, পণীতো ৰিতক্কো, পণীতা চেতনা, পণীতা পত্থনা, পণীতো পণিধি, পণীতো পুগ্গলো, পণীতা ৰাচা; পণীতং আচিক্খতি দেসেতি পঞ্ঞপেতি পট্ঠপেতি ৰিৰরতি ৰিভজতি উত্তানীকরোতি; পণীতা তস্স উপপত্তীতি ৰদামী’’তি. ততিযং.

৪. হীনাধিমুত্তিকসুত্তং

৯৮. সাৰত্থিযং ¶ ৰিহরতি…পে… ‘‘ধাতুসোৰ [ধাতুসো (সী. পী.) অযঞ্চ পঠমারম্ভৰাক্যেযেৰ, ন সব্বত্থ. তীসু পন অদ্ধাসু চ উপমাসংসন্দননিগমনট্ঠানে চ ইদং পাঠনানত্তং নত্থি], ভিক্খৰে, সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি; কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তি’’.

‘‘অতীতম্পি খো [খোসদ্দো সী. স্যা. কং. পী. পোত্থকেসু নত্থি], ভিক্খৰে, অদ্ধানং ধাতুসোৰ [ঈদিসেসু ঠানেসু পাঠনানত্তং নত্থি] সত্তা সংসন্দিংসু সমিংসু. হীনাধিমুত্তিকা হীনাধিমুত্তিকেহি সদ্ধিং সংসন্দিংসু সমিংসু; কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দিংসু সমিংসু.

‘‘অনাগতম্পি খো [খোসদ্দো সী. স্যা. কং. পী. পোত্থকেসু নত্থি], ভিক্খৰে, অদ্ধানং ধাতুসোৰ [ঈদিসেসু ঠানেসু পাঠনানত্তং নত্থি] সত্তা সংসন্দিস্সন্তি সমেস্সন্তি. হীনাধিমুত্তিকা হীনাধিমুত্তিকেহি সদ্ধিং সংসন্দিস্সন্তি ¶ সমেস্সন্তি; কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দিস্সন্তি সমেস্সন্তি.

‘‘এতরহিপি ¶ খো [খোসদ্দো সী. স্যা. কং. পী. পোত্থকেসু নত্থি], ভিক্খৰে, পচ্চুপ্পন্নং অদ্ধানং ধাতুসোৰ [ঈদিসেসু ঠানেসু পাঠনানত্তং নত্থি] সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি; কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তী’’তি. চতুত্থং.

৫. চঙ্কমসুত্তং

৯৯. একং ¶ সমযং ভগৰা রাজগহে ৰিহরতি গিজ্ঝকূটে পব্বতে. তেন খো পন সমযেন আযস্মা সারিপুত্তো সম্বহুলেহি ভিক্খূহি সদ্ধিং ভগৰতো অৰিদূরে চঙ্কমতি; আযস্মাপি খো মহামোগ্গল্লানো সম্বহুলেহি ভিক্খূহি সদ্ধিং ভগৰতো অৰিদূরে চঙ্কমতি; আযস্মাপি খো মহাকস্সপো সম্বহুলেহি ভিক্খূহি সদ্ধিং ভগৰতো অৰিদূরে চঙ্কমতি; আযস্মাপি খো অনুরুদ্ধো সম্বহুলেহি ভিক্খূহি সদ্ধিং ভগৰতো অৰিদূরে চঙ্কমতি; আযস্মাপি খো পুণ্ণো মন্তানিপুত্তো সম্বহুলেহি ভিক্খূহি সদ্ধিং ভগৰতো অৰিদূরে চঙ্কমতি; আযস্মাপি খো উপালি সম্বহুলেহি ভিক্খূহি সদ্ধিং ভগৰতো অৰিদূরে চঙ্কমতি; আযস্মাপি খো আনন্দো সম্বহুলেহি ভিক্খূহি সদ্ধিং ভগৰতো অৰিদূরে চঙ্কমতি; দেৰদত্তোপি খো সম্বহুলেহি ভিক্খূহি সদ্ধিং ভগৰতো অৰিদূরে চঙ্কমতি.

অথ ¶ খো ভগৰা ভিক্খূ আমন্তেসি – ‘‘পস্সথ নো তুম্হে, ভিক্খৰে, সারিপুত্তং সম্বহুলেহি ভিক্খূহি সদ্ধিং চঙ্কমন্ত’’ন্তি? ‘‘এৰং, ভন্তে’’. ‘‘সব্বে খো এতে, ভিক্খৰে, ভিক্খূ মহাপঞ্ঞা. পস্সথ ¶ নো তুম্হে, ভিক্খৰে, মোগ্গল্লানং সম্বহুলেহি ভিক্খূহি সদ্ধিং চঙ্কমন্ত’’ন্তি? ‘‘এৰং, ভন্তে’’. ‘‘সব্বে খো এতে, ভিক্খৰে, ভিক্খূ মহিদ্ধিকা. পস্সথ নো তুম্হে, ভিক্খৰে, কস্সপং সম্বহুলেহি ভিক্খূহি সদ্ধিং চঙ্কমন্ত’’ন্তি? ‘‘এৰং ¶ , ভন্তে’’. ‘‘সব্বে খো এতে, ভিক্খৰে, ভিক্খূ ধুতৰাদা. পস্সথ নো তুম্হে, ভিক্খৰে, অনুরুদ্ধং সম্বহুলেহি ভিক্খূহি সদ্ধিং চঙ্কমন্ত’’ন্তি? ‘‘এৰং, ভন্তে’’. ‘‘সব্বে খো এতে, ভিক্খৰে, ভিক্খূ দিব্বচক্খুকা. পস্সথ নো তুম্হে, ভিক্খৰে, পুণ্ণং মন্তানিপুত্তং সম্বহুলেহি ভিক্খূহি সদ্ধিং চঙ্কমন্ত’’ন্তি? ‘‘এৰং, ভন্তে’’. ‘‘সব্বে খো এতে, ভিক্খৰে, ভিক্খূ ধম্মকথিকা. পস্সথ নো তুম্হে, ভিক্খৰে, উপালিং সম্বহুলেহি ভিক্খূহি সদ্ধিং চঙ্কমন্ত’’ন্তি? ‘‘এৰং, ভন্তে’’. ‘‘সব্বে খো এতে, ভিক্খৰে, ভিক্খূ ৰিনযধরা. পস্সথ নো তুম্হে, ভিক্খৰে, আনন্দং সম্বহুলেহি ভিক্খূহি সদ্ধিং চঙ্কমন্ত’’ন্তি? ‘‘এৰং, ভন্তে’’. ‘‘সব্বে খো এতে, ভিক্খৰে, ভিক্খূ বহুস্সুতা. পস্সথ নো তুম্হে, ভিক্খৰে, দেৰদত্তং সম্বহুলেহি ভিক্খূহি সদ্ধিং চঙ্কমন্ত’’ন্তি? ‘‘এৰং, ভন্তে’’. ‘‘সব্বে খো এতে, ভিক্খৰে, ভিক্খূ পাপিচ্ছা’’.

‘‘ধাতুসোৰ, ভিক্খৰে, সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং ¶ সংসন্দন্তি সমেন্তি; কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তি. অতীতম্পি খো, ভিক্খৰে, অদ্ধানং ধাতুসোৰ সত্তা সংসন্দিংসু সমিংসু. হীনাধিমুত্তিকা হীনাধিমুত্তিকেহি সদ্ধিং সংসন্দিংসু সমিংসু; কল্যাণাধিমুত্তিকা কল্যাণাধিমুত্তিকেহি ¶ সদ্ধিং সংসন্দিংসু সমিংসু.

‘‘অনাগতম্পি খো, ভিক্খৰে, অদ্ধানং ধাতুসোৰ সত্তা সংসন্দিস্সন্তি সমেস্সন্তি. হীনাধিমুত্তিকা হীনাধিমুত্তিকেহি সদ্ধিং সংসন্দিস্সন্তি সমেস্সন্তি; কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দিস্সন্তি সমেস্সন্তি.

‘‘এতরহিপি ¶ খো, ভিক্খৰে, পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি; কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তী’’তি. পঞ্চমং.

৬. সগাথাসুত্তং

১০০. সাৰত্থিযং ¶ ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি. অতীতম্পি খো, ভিক্খৰে, অদ্ধানং ধাতুসোৰ সত্তা সংসন্দিংসু সমিংসু. হীনাধিমুত্তিকা হীনাধিমুত্তিকেহি সদ্ধিং সংসন্দিংসু সমিংসু’’.

‘‘অনাগতম্পি খো, ভিক্খৰে, অদ্ধানং ধাতুসোৰ সত্তা সংসন্দিস্সন্তি সমেস্সন্তি. হীনাধিমুত্তিকা হীনাধিমুত্তিকেহি সদ্ধিং সংসন্দিস্সন্তি সমেস্সন্তি.

‘‘এতরহিপি খো, ভিক্খৰে, পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি.

‘‘সেয্যথাপি, ভিক্খৰে, গূথো গূথেন সংসন্দতি সমেতি; মুত্তং মুত্তেন সংসন্দতি সমেতি; খেল়ো খেল়েন সংসন্দতি সমেতি; পুব্বো পুব্বেন সংসন্দতি সমেতি; লোহিতং লোহিতেন সংসন্দতি সমেতি ¶ ; এৰমেৰ খো, ভিক্খৰে, ধাতুসোৰ [সব্বত্থপি এৰমেৰ দিস্সতি] সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি ¶ সদ্ধিং সংসন্দন্তি সমেন্তি. অতীতম্পি খো অদ্ধানং…পে… অনাগতম্পি খো অদ্ধানং…পে… এতরহিপি খো পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. হীনাধিমুত্তিকা হীনাধিমুত্তিকেহি সদ্ধিং সংসন্দন্তি সমেন্তি.

‘‘ধাতুসোৰ ¶ ভিক্খৰে, সত্তা সংসন্দন্তি সমেন্তি. কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তি. অতীতম্পি খো, ভিক্খৰে, অদ্ধানং ধাতুসোৰ সত্তা সংসন্দিংসু সমিংসু. কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দিংসু সমিংসু.

‘‘অনাগতম্পি খো, ভিক্খৰে, অদ্ধানং…পে… এতরহিপি খো, ভিক্খৰে, পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তি.

‘‘সেয্যথাপি, ভিক্খৰে, খীরং খীরেন সংসন্দতি সমেতি; তেলং তেলেন সংসন্দতি সমেতি; সপ্পি সপ্পিনা সংসন্দতি সমেতি; মধু মধুনা সংসন্দতি সমেতি; ফাণিতং ফাণিতেন সংসন্দতি সমেতি; এৰমেৰ খো, ভিক্খৰে, ধাতুসোৰ ¶ সত্তা সংসন্দন্তি সমেন্তি. কল্যাণাধিমুত্তিকা কল্যাণাধিমুত্তিকেহি সদ্ধিং সংসন্দন্তি সমেন্তি. অতীতম্পি খো অদ্ধানং… অনাগতম্পি খো অদ্ধানং… এতরহিপি খো পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. কল্যাণাধিমুত্তিকা কল্যাণাধিমুত্তিকেহি সদ্ধিং ¶ সংসন্দন্তি সমেন্তী’’তি.

ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘সংসগ্গা ৰনথো জাতো, অসংসগ্গেন ছিজ্জতি;

পরিত্তং দারুমারুয্হ, যথা সীদে মহণ্ণৰে.

‘‘এৰং কুসীতমাগম্ম, সাধুজীৰিপি সীদতি;

তস্মা তং পরিৰজ্জেয্য, কুসীতং হীনৰীরিযং.

‘‘পৰিৰিত্তেহি ¶ অরিযেহি, পহিতত্তেহি ঝাযীহি [ঝাযিহি (সী.), ঝাযিভি (স্যা. কং.)];

নিচ্চং আরদ্ধৰীরিযেহি, পণ্ডিতেহি সহাৰসে’’তি.

৭. অস্সদ্ধসংসন্দনসুত্তং

১০১. সাৰত্থিযং ¶ ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. অস্সদ্ধা অস্সদ্ধেহি সদ্ধিং সংসন্দন্তি সমেন্তি; অহিরিকা অহিরিকেহি সদ্ধিং সংসন্দন্তি সমেন্তি; অনোত্তপ্পিনো অনোত্তপ্পীহি সদ্ধিং সংসন্দন্তি সমেন্তি; অপ্পস্সুতা অপ্পস্সুতেহি সদ্ধিং সংসন্দন্তি সমেন্তি; কুসীতা কুসীতেহি সদ্ধিং সংসন্দন্তি সমেন্তি; মুট্ঠস্সতিনো মুট্ঠস্সতীহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি’’.

‘‘অতীতম্পি খো, ভিক্খৰে, অদ্ধানং ধাতুসোৰ সত্তা সংসন্দিংসু সমিংসু. অস্সদ্ধা অস্সদ্ধেহি সদ্ধিং সংসন্দিংসু সমিংসু; অহিরিকা অহিরিকেহি সদ্ধিং সংসন্দিংসু সমিংসু; অনোত্তপ্পিনো অনোত্তপ্পীহি সদ্ধিং সংসন্দিংসু সমিংসু; অপ্পস্সুতা অপ্পস্সুতেহি ¶ সদ্ধিং সংসন্দিংসু সমিংসু; কুসীতা কুসীতেহি সদ্ধিং সংসন্দিংসু সমিংসু; মুট্ঠস্সতিনো মুট্ঠস্সতীহি সদ্ধিং সংসন্দিংসু সমিংসু; দুপ্পঞ্ঞা দুপ্পঞ্ঞেহি সদ্ধিং সংসন্দিংসু সমিংসু.

‘‘অনাগতম্পি ¶ খো, ভিক্খৰে, অদ্ধানং ধাতুসোৰ সত্তা সংসন্দিস্সন্তি সমেস্সন্তি. অস্সদ্ধা অস্সদ্ধেহি সদ্ধিং সংসন্দিস্সন্তি সমেস্সন্তি; অহিরিকা অহিরিকেহি সদ্ধিং সংসন্দিস্সন্তি সমেস্সন্তি; অনোত্তপ্পিনো অনোত্তপ্পীহি সদ্ধিং…পে… অপ্পস্সুতা ¶ অপ্পস্সুতেহি সদ্ধিং…পে… কুসীতা কুসীতেহি সদ্ধিং…পে… মুট্ঠস্সতিনো মুট্ঠস্সতীহি সদ্ধিং…পে… দুপ্পঞ্ঞা দুপ্পঞ্ঞেহি সদ্ধিং সংসন্দিস্সন্তি সমেস্সন্তি.

‘‘এতরহিপি খো, ভিক্খৰে, পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. অস্সদ্ধা অস্সদ্ধেহি সদ্ধিং সংসন্দন্তি সমেন্তি; অহিরিকা অহিরিকেহি সদ্ধিং…পে… অনোত্তপ্পিনো অনোত্তপ্পীহি সদ্ধিং…পে… অপ্পস্সুতা অপ্পস্সুতেহি সদ্ধিং…পে… ¶ কুসীতা কুসীতেহি সদ্ধিং…পে… মুট্ঠস্সতিনো মুট্ঠস্সতীহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি.

‘‘ধাতুসোৰ, ভিক্খৰে, সত্তা সংসন্দন্তি সমেন্তি. সদ্ধা সদ্ধেহি সদ্ধিং সংসন্দন্তি সমেন্তি; হিরিমনা হিরিমনেহি সদ্ধিং সংসন্দন্তি সমেন্তি; ওত্তপ্পিনো ওত্তপ্পীহি সদ্ধিং সংসন্দন্তি সমেন্তি; বহুস্সুতা বহুস্সুতেহি সদ্ধিং সংসন্দন্তি সমেন্তি; আরদ্ধৰীরিযা আরদ্ধৰীরিযেহি সদ্ধিং সংসন্দন্তি সমেন্তি; উপট্ঠিতস্সতিনো উপট্ঠিতস্সতীহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং ¶ সংসন্দন্তি সমেন্তি. অতীতম্পি খো, ভিক্খৰে, অদ্ধানং…পে… অনাগতম্পি খো, ভিক্খৰে…পে… এতরহিপি খো, ভিক্খৰে, পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. সদ্ধা সদ্ধেহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তী’’তি. সত্তমং.

৮. অস্সদ্ধমূলকসুত্তং

১০২. সাৰত্থিযং ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. অস্সদ্ধা ¶ অস্সদ্ধেহি সদ্ধিং সংসন্দন্তি সমেন্তি; অহিরিকা অহিরিকেহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; সদ্ধা সদ্ধেহি সদ্ধিং সংসন্দন্তি সমেন্তি; হিরিমনা হিরিমনেহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তি. অতীতম্পি খো, ভিক্খৰে, অদ্ধানং ধাতুসোৰ সত্তা সংসন্দিংসু সমিংসু…পে… ¶ অনাগতম্পি খো, ভিক্খৰে, অদ্ধানং ধাতুসোৰ সত্তা সংসন্দিস্সন্তি সমেস্সন্তি…পে….

‘‘এতরহিপি ¶ খো, ভিক্খৰে, পচ্চুপ্পন্নং অদ্ধানং ধাতুসোৰ সত্তা সংসন্দন্তি সমেন্তি. অস্সদ্ধা অস্সদ্ধেহি সদ্ধিং সংসন্দন্তি সমেন্তি; অহিরিকা অহিরিকেহি সদ্ধিং সংসন্দন্তি সমেন্তি, দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; সদ্ধা সদ্ধেহি সদ্ধিং সংসন্দন্তি সমেন্তি; হিরিমনা হিরিমনেহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তীতি. (১)

‘‘ধাতুসোৰ, ভিক্খৰে, সত্তা সংসন্দন্তি সমেন্তি. অস্সদ্ধা অস্সদ্ধেহি সদ্ধিং সংসন্দন্তি সমেন্তি; অনোত্তপ্পিনো অনোত্তপ্পীহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি ¶ ; সদ্ধা সদ্ধেহি সদ্ধিং সংসন্দন্তি সমেন্তি; ওত্তপ্পিনো ওত্তপ্পীহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তি…পে… পঠমৰারো ৰিয ৰিত্থারেতব্বো. (২)

‘‘ধাতুসোৰ ¶ , ভিক্খৰে…পে… অস্সদ্ধা অস্সদ্ধেহি সদ্ধিং সংসন্দন্তি সমেন্তি; অপ্পস্সুতা অপ্পস্সুতেহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; সদ্ধা সদ্ধেহি সদ্ধিং সংসন্দন্তি সমেন্তি; বহুস্সুতা বহুস্সুতেহি সদ্ধিং সংসন্দন্তি সমেন্তি, পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তি…পে… ¶ . (৩)

‘‘ধাতুসোৰ, ভিক্খৰে…পে… অস্সদ্ধা অস্সদ্ধেহি সদ্ধিং সংসন্দন্তি সমেন্তি; কুসীতা কুসীতেহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; সদ্ধা সদ্ধেহি সদ্ধিং সংসন্দন্তি সমেন্তি; আরদ্ধৰীরিযা আরদ্ধৰীরিযেহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তি…পে…. (৪)

‘‘ধাতুসোৰ ¶ , ভিক্খৰে…পে… অস্সদ্ধা অস্সদ্ধেহি সদ্ধিং সংসন্দন্তি সমেন্তি; মুট্ঠস্সতিনো মুট্ঠস্সতীহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; সদ্ধা সদ্ধেহি সদ্ধিং সংসন্দন্তি সমেন্তি; উপট্ঠিতস্সতিনো উপট্ঠিতস্সতীহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তীতি…পে…. অট্ঠমং. (৫)

৯. অহিরিকমূলকসুত্তং

১০৩. সাৰত্থিযং ৰিহরতি…পে… ‘‘ধাতুসোৰ…পে… অহিরিকা অহিরিকেহি সদ্ধিং সংসন্দন্তি ¶ সমেন্তি, অনোত্তপ্পিনো ¶ অনোত্তপ্পীহি সদ্ধিং সংসন্দন্তি সমেন্তি ¶ , দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; হিরিমনা হিরিমনেহি সদ্ধিং সসন্দন্তি সমেন্তি, ওত্তপ্পিনো ওত্তপ্পীহি সদ্ধিং সংসন্দন্তি সমেন্তি, পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তি…পে… ¶ . (১)

‘‘অহিরিকা অহিরিকেহি সদ্ধিং সংসন্দন্তি সমেন্তি, অপ্পস্সুতা অপ্পস্সুতেহি সদ্ধিং সংসন্দন্তি সমেন্তি, দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; হিরিমনা হিরিমনেহি সদ্ধিং সংসন্দন্তি সমেন্তি, বহুস্সুতা বহুস্সুতেহি সদ্ধিং সংসন্দন্তি সমেন্তি, পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তি…পে…. (২)

‘‘অহিরিকা অহিরিকেহি সদ্ধিং সংসন্দন্তি সমেন্তি, কুসীতা কুসীতেহি সদ্ধিং সংসন্দন্তি সমেন্তি, দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; হিরিমনা হিরিমনেহি সদ্ধিং সংসন্দন্তি সমেন্তি, আরদ্ধৰীরিযা আরদ্ধৰীরিযেহি সদ্ধিং সংসন্দন্তি সমেন্তি, পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তি…পে…. (৩)

‘‘অহিরিকা অহিরিকেহি সদ্ধিং সংসন্দন্তি সমেন্তি, মুট্ঠস্সতিনো মুট্ঠস্সতীহি সদ্ধিং সংসন্দন্তি সমেন্তি, দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; হিরিমনা হিরিমনেহি সদ্ধিং সংসন্দন্তি সমেন্তি, উপট্ঠিতস্সতিনো উপট্ঠিতস্সতীহি সদ্ধিং সংসন্দন্তি সমেন্তি, পঞ্ঞৰন্তো ¶ পঞ্ঞৰন্তেহি সদ্ধিং সংসন্দন্তি সমেন্তীতি…পে…. নৰমং. (৪)

১০. অনোত্তপ্পমূলকসুত্তং

১০৪. সাৰত্থিযং ¶ ৰিহরতি…পে… ‘‘ধাতুসোৰ ¶ , ভিক্খৰে, সত্তা সংসন্দন্তি সমেন্তি. অনোত্তপ্পিনো অনোত্তপ্পীহি সদ্ধিং সংসন্দন্তি সমেন্তি; অপ্পস্সুতা অপ্পস্সুতেহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; ওত্তপ্পিনো ওত্তপ্পীহি সদ্ধিং সংসন্দন্তি সমেন্তি; বহুস্সুতা বহুস্সুতেহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তি…পে…. (১)

‘‘অনোত্তপ্পিনো ¶ অনোত্তপ্পীহি সদ্ধিং সংসন্দন্তি সমেন্তি; কুসীতা কুসীতেহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; ওত্তপ্পিনো ওত্তপ্পীহি সদ্ধিং সংসন্দন্তি সমেন্তি; আরদ্ধৰীরিযা আরদ্ধৰীরিযেহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তি…পে…. (২)

‘‘অনোত্তপ্পিনো ¶ অনোত্তপ্পীহি সদ্ধিং সংসন্দন্তি সমেন্তি; মুট্ঠস্সতিনো মুট্ঠস্সতীহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; ওত্তপ্পিনো ওত্তপ্পীহি সদ্ধিং সংসন্দন্তি সমেন্তি; উপট্ঠিতস্সতিনো উপট্ঠিতস্সতীহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তীতি…পে…. দসমং. (৩)

১১. অপ্পস্সুতমূলকসুত্তং

১০৫. সাৰত্থিযং ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. অপ্পস্সুতা অপ্পস্সুতেহি সদ্ধিং সংসন্দন্তি ¶ সমেন্তি; কুসীতা কুসীতেহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; বহুস্সুতা বহুস্সুতেহি সদ্ধিং সংসন্দন্তি ¶ সমেন্তি; আরদ্ধৰীরিযা আরদ্ধৰীরিযেহি ¶ সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তি…পে…. (১)

‘‘অপ্পস্সুতা অপ্পস্সুতেহি সদ্ধিং সংসন্দন্তি সমেন্তি; মুট্ঠস্সতিনো মুট্ঠস্সতীহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি; বহুস্সুতা বহুস্সুতেহি সদ্ধিং সংসন্দন্তি সমেন্তি; উপট্ঠিতস্সতিনো উপট্ঠিতস্সতীহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তীতি…পে…. একাদসমং. (২)

১২. কুসীতমূলকসুত্তং

১০৬. সাৰত্থিযং ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. কুসীতা কুসীতেহি সদ্ধিং সংসন্দন্তি সমেন্তি; মুট্ঠস্সতিনো মুট্ঠস্সতীহি সদ্ধিং সংসন্দন্তি সমেন্তি; দুপ্পঞ্ঞা ¶ দুপ্পঞ্ঞেহি সদ্ধিং সংসন্দন্তি সমেন্তি; আরদ্ধৰীরিযা আরদ্ধৰীরিযেহি সদ্ধিং সংসন্দন্তি সমেন্তি; উপট্ঠিতস্সতিনো উপট্ঠিতস্সতীহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তীতি…পে…. দ্ৰাদসমং.

দুতিযো ৰগ্গো.

তস্সুদ্দানং –

সত্তিমা ¶ ¶ সনিদানঞ্চ, গিঞ্জকাৰসথেন চ;

হীনাধিমুত্তি চঙ্কমং, সগাথা অস্সদ্ধসত্তমং.

অস্সদ্ধমূলকা ¶ পঞ্চ, চত্তারো অহিরিকমূলকা;

অনোত্তপ্পমূলকা তীণি, দুৰে অপ্পস্সুতেন চ.

কুসীতং এককং ৰুত্তং, সুত্তন্তা তীণি পঞ্চকা;

বাৰীসতি ৰুত্তা সুত্তা, দুতিযো ৰগ্গো পৰুচ্চতীতি.

৩. কম্মপথৰগ্গো

১. অসমাহিতসুত্তং

১০৭. সাৰত্থিযং ¶ ¶ ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. অস্সদ্ধা অস্সদ্ধেহি সদ্ধিং সংসন্দন্তি সমেন্তি; অহিরিকা অহিরিকেহি সদ্ধিং সংসন্দন্তি সমেন্তি; অনোত্তপ্পিনো অনোত্তপ্পীহি সদ্ধিং সংসন্দন্তি সমেন্তি; অসমাহিতা অসমাহিতেহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি’’.

‘‘সদ্ধা সদ্ধেহি সদ্ধিং সংসন্দন্তি সমেন্তি; হিরিমনা হিরিমনেহি সদ্ধিং সংসন্দন্তি সমেন্তি; ওত্তপ্পিনো ওত্তপ্পীহি সদ্ধিং সংসন্দন্তি সমেন্তি; সমাহিতা সমাহিতেহি সদ্ধিং সংসন্দন্তি সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তী’’তি. পঠমং.

২. দুস্সীলসুত্তং

১০৮. সাৰত্থিযং ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. অস্সদ্ধা অস্সদ্ধেহি সদ্ধিং সংসন্দন্তি সমেন্তি; অহিরিকা অহিরিকেহি সদ্ধিং সংসন্দন্তি সমেন্তি; অনোত্তপ্পিনো অনোত্তপ্পীহি সদ্ধিং সংসন্দন্তি সমেন্তি; দুস্সীলা দুস্সীলেহি সদ্ধিং সংসন্দন্তি সমেন্তি; দুপ্পঞ্ঞা দুপ্পঞ্ঞেহি সদ্ধিং সংসন্দন্তি সমেন্তি’’.

‘‘সদ্ধা সদ্ধেহি সদ্ধিং সংসন্দন্তি সমেন্তি; হিরিমনা হিরিমনেহি সদ্ধিং সংসন্দন্তি সমেন্তি; ওত্তপ্পিনো ওত্তপ্পীহি সদ্ধিং সংসন্দন্তি সমেন্তি; সীলৰন্তো ¶ ¶ সীলৰন্তেহি সদ্ধিং সংসন্দন্তি ¶ সমেন্তি; পঞ্ঞৰন্তো পঞ্ঞৰন্তেহি সদ্ধিং সংসন্দন্তি সমেন্তী’’তি. দুতিযং.

৩. পঞ্চসিক্খাপদসুত্তং

১০৯. সাৰত্থিযং ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. পাণাতিপাতিনো ¶ পাণাতিপাতীহি সদ্ধিং সংসন্দন্তি সমেন্তি; অদিন্নাদাযিনো অদিন্নাদাযীহি সদ্ধিং সংসন্দন্তি সমেন্তি; কামেসুমিচ্ছাচারিনো কামেসুমিচ্ছাচারীহি সদ্ধিং সংসন্দন্তি সমেন্তি; মুসাৰাদিনো মুসাৰাদীহি সদ্ধিং সংসন্দন্তি সমেন্তি; সুরামেরযমজ্জপ্পমাদট্ঠাযিনো সুরামেরযমজ্জপ্পমাদট্ঠাযীহি সদ্ধিং সংসন্দন্তি সমেন্তি’’.

‘‘পাণাতিপাতা পটিৰিরতা পাণাতিপাতা পটিৰিরতেহি সদ্ধিং সংসন্দন্তি সমেন্তি; অদিন্নাদানা পটিৰিরতা অদিন্নাদানা পটিৰিরতেহি সদ্ধিং সংসন্দন্তি সমেন্তি; কামেসুমিচ্ছাচারা পটিৰিরতা কামেসুমিচ্ছাচারা পটিৰিরতেহি সদ্ধিং সংসন্দন্তি সমেন্তি; মুসাৰাদা পটিৰিরতা মুসাৰাদা পটিৰিরতেহি সদ্ধিং সংসন্দন্তি সমেন্তি; সুরামেরযমজ্জপ্পমাদট্ঠানা পটিৰিরতা সুরামেরযমজ্জপ্পমাদট্ঠানা পটিৰিরতেহি সদ্ধিং সংসন্দন্তি সমেন্তী’’তি. ততিযং.

৪. সত্তকম্মপথসুত্তং

১১০. সাৰত্থিযং ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. পাণাতিপাতিনো পাণাতিপাতীহি সদ্ধিং ¶ সংসন্দন্তি সমেন্তি; অদিন্নাদাযিনো অদিন্নাদাযীহি সদ্ধিং সংসন্দন্তি সমেন্তি; কামেসুমিচ্ছাচারিনো কামেসুমিচ্ছাচারীহি সদ্ধিং সংসন্দন্তি সমেন্তি; মুসাৰাদিনো মুসাৰাদীহি সদ্ধিং সংসন্দন্তি সমেন্তি; পিসুণৰাচা পিসুণৰাচেহি সদ্ধিং সংসন্দন্তি সমেন্তি; ফরুসৰাচা ফরুসৰাচেহি সদ্ধিং সংসন্দন্তি সমেন্তি; সম্ফপ্পলাপিনো সম্ফপ্পলাপীহি সদ্ধিং সংসন্দন্তি সমেন্তি’’.

‘‘পাণাতিপাতা পটিৰিরতা…পে… অদিন্নাদানা পটিৰিরতা… কামেসুমিচ্ছাচারা পটিৰিরতা… মুসাৰাদা পটিৰিরতা… পিসুণায ৰাচায পটিৰিরতা পিসুণায ৰাচায পটিৰিরতেহি সদ্ধিং সংসন্দন্তি সমেন্তি; ফরুসায ৰাচায পটিৰিরতা ফরুসায ৰাচায পটিৰিরতেহি সদ্ধিং সংসন্দন্তি সমেন্তি; সম্ফপ্পলাপা পটিৰিরতা সম্ফপ্পলাপা পটিৰিরতেহি সদ্ধিং সংসন্দন্তি সমেন্তী’’তি. চতুত্থং.

৫. দসকম্মপথসুত্তং

১১১. সাৰত্থিযং ¶ ¶ ৰিহরতি…পে… ‘‘ধাতুসোৰ ¶ , ভিক্খৰে, সত্তা সংসন্দন্তি সমেন্তি. পাণাতিপাতিনো পাণাতিপাতীহি সদ্ধিং সংসন্দন্তি সমেন্তি; অদিন্নাদাযিনো…পে… কামেসুমিচ্ছাচারিনো… মুসাৰাদিনো… পিসুণৰাচা… ফরুসৰাচা… সম্ফপ্পলাপিনো সম্ফপ্পলাপীহি সদ্ধিং সংসন্দন্তি সমেন্তি; অভিজ্ঝালুনো অভিজ্ঝালূহি সদ্ধিং সংসন্দন্তি সমেন্তি; ব্যাপন্নচিত্তা ব্যাপন্নচিত্তেহি সদ্ধিং সংসন্দন্তি সমেন্তি; মিচ্ছাদিট্ঠিকা মিচ্ছাদিট্ঠিকেহি সদ্ধিং সংসন্দন্তি সমেন্তি’’.

‘‘পাণাতিপাতা ¶ পটিৰিরতা পাণাতিপাতা পটিৰিরতেহি সদ্ধিং সংসন্দন্তি সমেন্তি; অদিন্নাদানা পটিৰিরতা…পে… কামেসুমিচ্ছাচারা পটিৰিরতা… মুসাৰাদা পটিৰিরতা… পিসুণায ৰাচায… ফরুসায ৰাচায… সম্ফপ্পলাপা পটিৰিরতা সম্ফপ্পলাপা পটিৰিরতেহি সদ্ধিং সংসন্দন্তি সমেন্তি; অনভিজ্ঝালুনো অনভিজ্ঝালূহি সদ্ধিং সংসন্দন্তি সমেন্তি; অব্যাপন্নচিত্তা অব্যাপন্নচিত্তেহি সদ্ধিং সংসন্দন্তি সমেন্তি; সম্মাদিট্ঠিকা সম্মাদিট্ঠিকেহি সদ্ধিং সংসন্দন্তি সমেন্তী’’তি. পঞ্চমং.

৬. অট্ঠঙ্গিকসুত্তং

১১২. সাৰত্থিযং ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. মিচ্ছাদিট্ঠিকা মিচ্ছাদিট্ঠিকেহি সদ্ধিং সংসন্দন্তি সমেন্তি; মিচ্ছাসঙ্কপ্পা…পে… মিচ্ছাৰাচা… মিচ্ছাকম্মন্তা… মিচ্ছাআজীৰা… মিচ্ছাৰাযামা… মিচ্ছাসতিনো ¶ … মিচ্ছাসমাধিনো মিচ্ছাসমাধীহি সদ্ধিং সংসন্দন্তি সমেন্তি. সম্মাদিট্ঠিকা সম্মাদিট্ঠিকেহি সদ্ধিং সংসন্দন্তি সমেন্তি; সম্মাসঙ্কপ্পা…পে… সম্মাৰাচা… সম্মাকম্মন্তা… সম্মাআজীৰা… সম্মাৰাযামা… সম্মাসতিনো… সম্মাসমাধিনো সম্মাসমাধীহি সদ্ধিং সংসন্দন্তি সমেন্তী’’তি. ছট্ঠং.

৭. দসঙ্গসুত্তং

১১৩. সাৰত্থিযং ৰিহরতি…পে… ‘‘ধাতুসোৰ, ভিক্খৰে, সত্তা সংসন্দন্তি সমেন্তি. মিচ্ছাদিট্ঠিকা মিচ্ছাদিট্ঠিকেহি সদ্ধিং সংসন্দন্তি সমেন্তি; মিচ্ছাসঙ্কপ্পা…পে… মিচ্ছাৰাচা… মিচ্ছাকম্মন্তা… মিচ্ছাআজীৰা… মিচ্ছাৰাযামা… মিচ্ছাসতিনো ¶ … মিচ্ছাসমাধিনো ¶ ¶ মিচ্ছাসমাধীহি সদ্ধিং সংসন্দন্তি সমেন্তি; মিচ্ছাঞাণিনো মিচ্ছাঞাণীহি সদ্ধিং সংসন্দন্তি সমেন্তি; মিচ্ছাৰিমুত্তিনো মিচ্ছাৰিমুত্তীহি সদ্ধিং সংসন্দন্তি সমেন্তি’’.

‘‘সম্মাদিট্ঠিকা সম্মাদিট্ঠিকেহি সদ্ধিং সংসন্দন্তি সমেন্তি; সম্মাসঙ্কপ্পা…পে… সম্মাৰাচা… সম্মাকম্মন্তা… সম্মাআজীৰা… সম্মাৰাযামা… সম্মাসতিনো… সম্মাসমাধিনো… সম্মাঞাণিনো সম্মাঞাণীহি সদ্ধিং সংসন্দন্তি সমেন্তি; সম্মাৰিমুত্তিনো সম্মাৰিমুত্তীহি সদ্ধিং সংসন্দন্তি সমেন্তী’’তি. সত্তমং.

সত্তন্নং সুত্তন্তানং উদ্দানং –

অসমাহিতং ¶ দুস্সীলং, পঞ্চ সিক্খাপদানি চ;

সত্ত কম্মপথা ৰুত্তা, দসকম্মপথেন চ;

ছট্ঠং অট্ঠঙ্গিকো ৰুত্তো, দসঙ্গেন চ সত্তমং.

কম্মপথৰগ্গো ততিযো.

৪. চতুত্থৰগ্গো

১. চতুধাতুসুত্তং

১১৪. একং ¶ সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে…পে… ‘‘চতস্সো ইমা, ভিক্খৰে, ধাতুযো. কতমা চতস্সো? পথৰীধাতু, আপোধাতু, তেজোধাতু, ৰাযোধাতু – ইমা খো, ভিক্খৰে, চতস্সো ধাতুযো’’তি. পঠমং.

২. পুব্বেসম্বোধসুত্তং

১১৫. সাৰত্থিযং ৰিহরতি…পে… ‘‘পুব্বেৰ ¶ মে, ভিক্খৰে, সম্বোধা অনভিসম্বুদ্ধস্স বোধিসত্তস্সেৰ সতো এতদহোসি – ‘কো নু খো পথৰীধাতুযা অস্সাদো, কো আদীনৰো, কিং নিস্সরণং; কো আপোধাতুযা অস্সাদো, কো আদীনৰো, কিং নিস্সরণং; কো তেজোধাতুযা ¶ অস্সাদো, কো আদীনৰো, কিং নিস্সরণং; কো ৰাযোধাতুযা অস্সাদো, কো আদীনৰো, কিং নিস্সরণ’’’ন্তি?

‘‘তস্স ময্হং, ভিক্খৰে, এতদহোসি – ‘যং খো পথৰীধাতুং পটিচ্চ উপ্পজ্জতি সুখং সোমনস্সং, অযং পথৰীধাতুযা অস্সাদো; যং [যা (সী.)] পথৰীধাতু অনিচ্চা দুক্খা ৰিপরিণামধম্মা, অযং পথৰীধাতুযা আদীনৰো; যো পথৰীধাতুযা ছন্দরাগৰিনযো ছন্দরাগপ্পহানং, ইদং পথৰীধাতুযা নিস্সরণং. যং আপোধাতুং পটিচ্চ…পে… যং তেজোধাতুং পটিচ্চ…পে… যং ৰাযোধাতুং পটিচ্চ উপ্পজ্জতি সুখং সোমনস্সং, অযং ৰাযোধাতুযা অস্সাদো; যং ৰাযোধাতু অনিচ্চা ¶ দুক্খা ৰিপরিণামধম্মা, অযং ৰাযোধাতুযা আদীনৰো; যো ৰাযোধাতুযা ছন্দরাগৰিনযো ছন্দরাগপ্পহানং, ইদং ৰাযোধাতুযা নিস্সরণং’’’.

‘‘যাৰকীৰঞ্চাহং ¶ , ভিক্খৰে, ইমাসং চতুন্নং ধাতূনং এৰং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং ন অব্ভঞ্ঞাসিং, নেৰ তাৰাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায অনুত্তরং সম্মাসম্বোধিং অভিসম্বুদ্ধোতি [অভিসম্বুদ্ধো (সী. স্যা. কং.)] পচ্চঞ্ঞাসিং.

‘‘যতো চ খ্ৰাহং, ভিক্খৰে, ইমাসং চতুন্নং ধাতূনং এৰং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং অব্ভঞ্ঞাসিং, অথাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায অনুত্তরং সম্মাসম্বোধিং অভিসম্বুদ্ধোতি পচ্চঞ্ঞাসিং. ঞাণঞ্চ ¶ পন মে দস্সনং উদপাদি – ‘অকুপ্পা মে ৰিমুত্তি [চেতোৰিমুত্তি (সী. পী. ক.)], অযমন্তিমা জাতি, নত্থি দানি পুনব্ভৰো’’’তি. দুতিযং.

৩. অচরিংসুত্তং

১১৬. সাৰত্থিযং ৰিহরতি…পে… ‘‘পথৰীধাতুযাহং, ভিক্খৰে, অস্সাদপরিযেসনং অচরিং, যো পথৰীধাতুযা অস্সাদো তদজ্ঝগমং, যাৰতা পথৰীধাতুযা অস্সাদো পঞ্ঞায মে সো সুদিট্ঠো. পথৰীধাতুযাহং, ভিক্খৰে, আদীনৰপরিযেসনং অচরিং, যো পথৰীধাতুযা আদীনৰো তদজ্ঝগমং ¶ , যাৰতা পথৰীধাতুযা আদীনৰো পঞ্ঞায মে সো সুদিট্ঠো. পথৰীধাতুযাহং, ভিক্খৰে, নিস্সরণপরিযেসনং অচরিং, যং পথৰীধাতুযা নিস্সরণং তদজ্ঝগমং, যাৰতা পথৰীধাতুযা নিস্সরণং পঞ্ঞায মে তং সুদিট্ঠং’’.

‘‘আপোধাতুযাহং, ভিক্খৰে…পে… তেজোধাতুযাহং, ভিক্খৰে… ৰাযোধাতুযাহং, ভিক্খৰে, অস্সাদপরিযেসনং ¶ অচরিং, যো ৰাযোধাতুযা অস্সাদো তদজ্ঝগমং, যাৰতা ৰাযোধাতুযা অস্সাদো পঞ্ঞায মে সো সুদিট্ঠো. ৰাযোধাতুযাহং, ভিক্খৰে, আদীনৰপরিযেসনং অচরিং, যো ৰাযোধাতুযা আদীনৰো তদজ্ঝগমং, যাৰতা ৰাযোধাতুযা আদীনৰো পঞ্ঞায মে সো ¶ সুদিট্ঠো. ৰাযোধাতুযাহং, ভিক্খৰে, নিস্সরণপরিযেসনং অচরিং, যং ৰাযোধাতুযা নিস্সরণং তদজ্ঝগমং, যাৰতা ৰাযোধাতুযা নিস্সরণং পঞ্ঞায মে তং সুদিট্ঠং.

‘‘যাৰকীৰঞ্চাহং, ভিক্খৰে, ইমাসং চতুন্নং ধাতূনং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং ন অব্ভঞ্ঞাসিং, নেৰ ¶ তাৰাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায অনুত্তরং সম্মাসম্বোধিং অভিসম্বুদ্ধোতি পচ্চঞ্ঞাসিং.

‘‘যতো চ খ্ৰাহং, ভিক্খৰে, ইমাসং চতুন্নং ধাতূনং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং অব্ভঞ্ঞাসিং, অথাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায অনুত্তরং সম্মাসম্বোধিং অভিসম্বুদ্ধোতি পচ্চঞ্ঞাসিং. ঞাণঞ্চ পন মে দস্সনং উদপাদি – ‘অকুপ্পা মে ৰিমুত্তি, অযমন্তিমা জাতি, নত্থি দানি পুনব্ভৰো’’’তি. ততিযং.

৪. নোচেদংসুত্তং

১১৭. সাৰত্থিযং ৰিহরতি…পে… ‘‘নো চেদং, ভিক্খৰে, পথৰীধাতুযা অস্সাদো অভৰিস্স, নযিদং সত্তা পথৰীধাতুযা সারজ্জেয্যুং ¶ . যস্মা ¶ চ খো, ভিক্খৰে, অত্থি পথৰীধাতুযা অস্সাদো, তস্মা সত্তা পথৰীধাতুযা সারজ্জন্তি. নো চেদং, ভিক্খৰে, পথৰীধাতুযা আদীনৰো অভৰিস্স, নযিদং সত্তা পথৰীধাতুযা নিব্বিন্দেয্যুং. যস্মা চ খো, ভিক্খৰে, অত্থি পথৰীধাতুযা আদীনৰো, তস্মা সত্তা পথৰীধাতুযা নিব্বিন্দন্তি. নো চেদং, ভিক্খৰে, পথৰীধাতুযা নিস্সরণং অভৰিস্স, নযিদং সত্তা পথৰীধাতুযা নিস্সরেয্যুং. যস্মা চ খো, ভিক্খৰে, অত্থি পথৰীধাতুযা নিস্সরণং, তস্মা সত্তা পথৰীধাতুযা নিস্সরন্তি’’.

‘‘নো চেদং, ভিক্খৰে, আপোধাতুযা অস্সাদো অভৰিস্স…পে… নো চেদং, ভিক্খৰে, তেজোধাতুযা…পে… নো চেদং, ভিক্খৰে, ৰাযোধাতুযা অস্সাদো অভৰিস্স, নযিদং সত্তা ৰাযোধাতুযা সারজ্জেয্যুং. যস্মা চ খো, ভিক্খৰে, অত্থি ৰাযোধাতুযা অস্সাদো, তস্মা সত্তা ৰাযোধাতুযা সারজ্জন্তি. নো ¶ চেদং, ভিক্খৰে, ৰাযোধাতুযা আদীনৰো অভৰিস্স, নযিদং ¶ সত্তা ৰাযোধাতুযা নিব্বিন্দেয্যুং. যস্মা চ খো, ভিক্খৰে, অত্থি ৰাযোধাতুযা আদীনৰো, তস্মা সত্তা ৰাযোধাতুযা নিব্বিন্দন্তি. নো চেদং, ভিক্খৰে, ৰাযোধাতুযা নিস্সরণং অভৰিস্স, নযিদং সত্তা ৰাযোধাতুযা নিস্সরেয্যুং. যস্মা চ খো, ভিক্খৰে, অত্থি ৰাযোধাতুযা নিস্সরণং, তস্মা সত্তা ৰাযোধাতুযা নিস্সরন্তি.

‘‘যাৰকীৰঞ্চিমে, ভিক্খৰে, সত্তা ইমাসং চতুন্নং ধাতূনং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং ন অব্ভঞ্ঞংসু, নেৰ তাৰিমে ভিক্খৰে, সত্তা সদেৰকা লোকা ¶ সমারকা সব্রহ্মকা সস্সমণব্রাহ্মণিযা পজায সদেৰমনুস্সায নিস্সটা ৰিসংযুত্তা ৰিপ্পমুত্তা ৰিমরিযাদিকতেন চেতসা ৰিহরিংসু.

‘‘যতো চ খো, ভিক্খৰে, সত্তা ইমাসং চতুন্নং ধাতূনং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং অব্ভঞ্ঞংসু, অথ, ভিক্খৰে, সত্তা সদেৰকা লোকা সমারকা সব্রহ্মকা সস্সমণব্রাহ্মণিযা পজায সদেৰমনুস্সায নিস্সটা ৰিসংযুত্তা ৰিপ্পমুত্তা ৰিমরিযাদিকতেন চেতসা ৰিহরন্তী’’তি. চতুত্থং.

৫. একন্তদুক্খসুত্তং

১১৮. সাৰত্থিযং ¶ ৰিহরতি…পে… ‘‘পথৰীধাতু চে [চ (সী. স্যা. কং.)] হিদং, ভিক্খৰে, একন্তদুক্খা অভৰিস্স দুক্খানুপতিতা দুক্খাৰক্কন্তা অনৰক্কন্তা সুখেন, নযিদং সত্তা পথৰীধাতুযা সারজ্জেয্যুং. যস্মা চ খো, ভিক্খৰে, পথৰীধাতু সুখা সুখানুপতিতা সুখাৰক্কন্তা অনৰক্কন্তা দুক্খেন, তস্মা সত্তা পথৰীধাতুযা সারজ্জন্তি’’.

‘‘আপোধাতু ¶ চে হিদং, ভিক্খৰে…পে… তেজোধাতু চে হিদং, ভিক্খৰে… ৰাযোধাতু চে হিদং, ভিক্খৰে, একন্তদুক্খা অভৰিস্স দুক্খানুপতিতা দুক্খাৰক্কন্তা অনৰক্কন্তা সুখেন, নযিদং সত্তা ৰাযোধাতুযা সারজ্জেয্যুং. যস্মা চ খো, ভিক্খৰে, ৰাযোধাতু সুখা সুখানুপতিতা সুখাৰক্কন্তা অনৰক্কন্তা দুক্খেন, তস্মা সত্তা ৰাযোধাতুযা সারজ্জন্তি.

‘‘পথৰীধাতু চে হিদং, ভিক্খৰে, একন্তসুখা অভৰিস্স সুখানুপতিতা সুখাৰক্কন্তা অনৰক্কন্তা ¶ দুক্খেন, নযিদং সত্তা পথৰীধাতুযা ¶ নিব্বিন্দেয্যুং. যস্মা চ খো, ভিক্খৰে, পথৰীধাতু দুক্খা দুক্খানুপতিতা দুক্খাৰক্কন্তা অনৰক্কন্তা সুখেন, তস্মা সত্তা পথৰীধাতুযা নিব্বিন্দন্তি.

‘‘আপোধাতু চে হিদং, ভিক্খৰে…পে… তেজোধাতু চে হিদং, ভিক্খৰে… ৰাযোধাতু চে হিদং, ভিক্খৰে, একন্তসুখা অভৰিস্স সুখানুপতিতা সুখাৰক্কন্তা অনৰক্কন্তা দুক্খেন, নযিদং সত্তা ৰাযোধাতুযা নিব্বিন্দেয্যুং. যস্মা চ খো, ভিক্খৰে, ৰাযোধাতু দুক্খা দুক্খানুপতিতা দুক্খাৰক্কন্তা অনৰক্কন্তা সুখেন, তস্মা সত্তা ৰাযোধাতুযা নিব্বিন্দন্তী’’তি. পঞ্চমং.

৬. অভিনন্দসুত্তং

১১৯. সাৰত্থিযং ৰিহরতি…পে… ‘‘যো, ভিক্খৰে, পথৰীধাতুং অভিনন্দতি, দুক্খং সো অভিনন্দতি. যো দুক্খং অভিনন্দতি, অপরিমুত্তো সো দুক্খস্মাতি ৰদামি. যো আপোধাতুং অভিনন্দতি…পে… যো তেজোধাতুং… যো ৰাযোধাতুং অভিনন্দতি, দুক্খং সো অভিনন্দতি. যো দুক্খং অভিনন্দতি, অপরিমুত্তো সো দুক্খস্মাতি ৰদামি’’.

‘‘যো ¶ ¶ চ খো, ভিক্খৰে, পথৰীধাতুং নাভিনন্দতি, দুক্খং সো নাভিনন্দতি. যো দুক্খং নাভিনন্দতি, পরিমুত্তো সো দুক্খস্মাতি ৰদামি. যো আপোধাতুং…পে… যো তেজোধাতুং… যো ৰাযোধাতুং নাভিনন্দতি, দুক্খং সো নাভিনন্দতি. যো দুক্খং নাভিনন্দতি, পরিমুত্তো সো দুক্খস্মাতি ৰদামী’’তি. ছট্ঠং.

৭. উপ্পাদসুত্তং

১২০. সাৰত্থিযং ৰিহরতি…পে… ‘‘যো, ভিক্খৰে, পথৰীধাতুযা ¶ উপ্পাদো ঠিতি অভিনিব্বত্তি পাতুভাৰো, দুক্খস্সেসো উপ্পাদো রোগানং ঠিতি জরামরণস্স পাতুভাৰো. যো আপোধাতুযা…পে… যো তেজোধাতুযা… যো ৰাযোধাতুযা উপ্পাদো ঠিতি অভিনিব্বত্তি পাতুভাৰো, দুক্খস্সেসো উপ্পাদো রোগানং ঠিতি জরামরণস্স পাতুভাৰো’’.

‘‘যো ¶ চ খো, ভিক্খৰে, পথৰীধাতুযা নিরোধো ৰূপসমো অত্থঙ্গমো, দুক্খস্সেসো নিরোধো রোগানং ৰূপসমো জরামরণস্স অত্থঙ্গমো. যো আপোধাতুযা…পে… যো তেজোধাতুযা… যো ৰাযোধাতুযা নিরোধো ৰূপসমো অত্থঙ্গমো, দুক্খস্সেসো নিরোধো রোগানং ৰূপসমো জরামরণস্স অত্থঙ্গমো’’তি. সত্তমং.

৮. সমণব্রাহ্মণসুত্তং

১২১. সাৰত্থিযং ৰিহরতি…পে… ‘‘চতস্সো ইমা, ভিক্খৰে, ধাতুযো. কতমা চতস্সো? পথৰীধাতু, আপোধাতু, তেজোধাতু, ৰাযোধাতু. যে হি কেচি, ভিক্খৰে, সমণা ৰা ব্রাহ্মণা ৰা ইমাসং চতুন্নং ধাতূনং অস্সাদঞ্চ আদীনৰঞ্চ নিস্সরণঞ্চ যথাভূতং ¶ নপ্পজানন্তি, ন মে তে, ভিক্খৰে, সমণা ৰা ব্রাহ্মণা ৰা সমণেসু ৰা সমণসম্মতা ব্রাহ্মণেসু ৰা ব্রাহ্মণসম্মতা; ন চ পন তে আযস্মন্তো সামঞ্ঞত্থং ৰা ব্রহ্মঞ্ঞত্থং ৰা দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তি’’.

‘‘যে চ খো কেচি, ভিক্খৰে, সমণা ৰা ব্রাহ্মণা ৰা ইমাসং চতুন্নং ধাতূনং অস্সাদঞ্চ আদীনৰঞ্চ নিস্সরণঞ্চ যথাভূতং পজানন্তি ¶ , তে চ খো ¶ মে, ভিক্খৰে, সমণা ৰা ব্রাহ্মণা ৰা সমণেসু চেৰ সমণসম্মতা ব্রাহ্মণেসু চ ব্রাহ্মণসম্মতা; তে চ পনাযস্মন্তো সামঞ্ঞত্থঞ্চ ব্রহ্মঞ্ঞত্থঞ্চ দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. অট্ঠমং.

৯. দুতিযসমণব্রাহ্মণসুত্তং

১২২. সাৰত্থিযং ৰিহরতি…পে… ‘‘চতস্সো ইমা, ভিক্খৰে, ধাতুযো. কতমা চতস্সো? পথৰীধাতু, আপোধাতু, তেজোধাতু, ৰাযোধাতু. যে হি কেচি, ভিক্খৰে, সমণা ৰা ব্রাহ্মণা ৰা ইমাসং চতুন্নং ধাতূনং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানন্তি…পে… পজানন্তি…পে… সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. নৰমং.

১০. ততিযসমণব্রাহ্মণসুত্তং

১২৩. সাৰত্থিযং ¶ ৰিহরতি…পে… ‘‘যে হি কেচি, ভিক্খৰে, সমণা ৰা ব্রাহ্মণা ৰা পথৰীধাতুং নপ্পজানন্তি, পথৰীধাতুসমুদযং নপ্পজানন্তি, পথৰীধাতুনিরোধং নপ্পজানন্তি, পথৰীধাতুনিরোধগামিনিং পটিপদং নপ্পজানন্তি…পে… আপোধাতুং ¶ নপ্পজানন্তি… তেজোধাতুং নপ্পজানন্তি… ৰাযোধাতুং নপ্পজানন্তি, ৰাযোধাতুসমুদযং নপ্পজানন্তি, ৰাযোধাতুনিরোধং নপ্পজানন্তি, ৰাযোধাতুনিরোধগামিনিং পটিপদং নপ্পজানন্তি, ন মে তে, ভিক্খৰে, সমণা ৰা ব্রাহ্মণা ৰা সমণেসু ৰা সমণসম্মতা ব্রাহ্মণেসু ৰা ব্রাহ্মণসম্মতা; ন চ পন তে আযস্মন্তো সামঞ্ঞত্থং ৰা ব্রহ্মঞ্ঞত্থং ৰা দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তি’’.

‘‘যে ¶ চ খো কেচি, ভিক্খৰে, সমণা ৰা ব্রাহ্মণা ৰা পথৰীধাতুং পজানন্তি, পথৰীধাতুসমুদযং পজানন্তি, পথৰীধাতুনিরোধং পজানন্তি, পথৰীধাতুনিরোধগামিনিং পটিপদং পজানন্তি… যে চ খো কেচি, ভিক্খৰে, সমণা ৰা ব্রাহ্মণা ৰা…পে… আপোধাতুং পজানন্তি… তেজোধাতুং পজানন্তি… ৰাযোধাতুং পজানন্তি, ৰাযোধাতুসমুদযং পজানন্তি, ৰাযোধাতুনিরোধং পজানন্তি, ৰাযোধাতুনিরোধগামিনিং পটিপদং পজানন্তি, তে ¶ চ খো মে, ভিক্খৰে, সমণা ৰা ব্রাহ্মণা ৰা সমণেসু চেৰ সমণসম্মতা ব্রাহ্মণেসু চ ব্রাহ্মণসম্মতা; তে চ পনাযস্মন্তো সামঞ্ঞত্থঞ্চ ব্রহ্মঞ্ঞত্থঞ্চ দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. দসমং.

চতুত্থো ৰগ্গো.

তস্সুদ্দানং –

চতস্সো পুব্বে অচরিং, নোচেদঞ্চ দুক্খেন চ;

অভিনন্দঞ্চ উপ্পাদো, তযো সমণব্রাহ্মণাতি.

ধাতুসংযুত্তং সমত্তং.

৪. অনমতগ্গসংযুত্তং

১. পঠমৰগ্গো

১. তিণকট্ঠসুত্তং

১২৪. এৰং ¶ ¶ ¶ ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘অনমতগ্গোযং [অনমতগ্গাযং (পী. ক.)] ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. সেয্যথাপি, ভিক্খৰে, পুরিসো যং ইমস্মিং জম্বুদীপে তিণকট্ঠসাখাপলাসং তং ছেত্ৰা [তচ্ছেত্ৰা (বহূসু)] একজ্ঝং সংহরিত্ৰা চতুরঙ্গুলং চতুরঙ্গুলং ঘটিকং কত্ৰা নিক্খিপেয্য – ‘অযং মে মাতা, তস্সা মে মাতু অযং মাতা’তি, অপরিযাদিন্নাৰ [অপরিযাদিণ্ণাৰ (সী.)] ভিক্খৰে, তস্স পুরিসস্স মাতুমাতরো অস্সু, অথ ইমস্মিং জম্বুদীপে তিণকট্ঠসাখাপলাসং পরিক্খযং পরিযাদানং গচ্ছেয্য. তং কিস্স হেতু? অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. এৰং দীঘরত্তং ৰো, ভিক্খৰে, দুক্খং পচ্চনুভূতং তিব্বং পচ্চনুভূতং ব্যসনং পচ্চনুভূতং, কটসী [কটসি (সী. পী. ক.) কটা ছৰা সযন্তি এত্থাতি কটসী] ৰড্ঢিতা. যাৰঞ্চিদং, ভিক্খৰে, অলমেৰ সব্বসঙ্খারেসু নিব্বিন্দিতুং অলং ৰিরজ্জিতুং অলং ৰিমুচ্চিতু’’ন্তি. পঠমং.

২. পথৰীসুত্তং

১২৫. সাৰত্থিযং ¶ ৰিহরতি…পে… ‘‘অনমতগ্গোযং, ভিক্খৰে ¶ , সংসারো. পুব্বা কোটি ন পঞ্ঞাযতি ¶ অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. সেয্যথাপি, ভিক্খৰে, পুরিসো ইমং মহাপথৰিং কোলট্ঠিমত্তং কোলট্ঠিমত্তং মত্তিকাগুল়িকং করিত্ৰা নিক্খিপেয্য – ‘অযং মে পিতা, তস্স মে পিতু অযং পিতা’তি, অপরিযাদিন্নাৰ ভিক্খৰে, তস্স পুরিসস্স পিতুপিতরো অস্সু, অথাযং মহাপথৰী পরিক্খযং পরিযাদানং গচ্ছেয্য ¶ . তং কিস্স হেতু? অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. এৰং দীঘরত্তং ৰো, ভিক্খৰে, দুক্খং পচ্চনুভূতং তিব্বং পচ্চনুভূতং ব্যসনং পচ্চনুভূতং, কটসী ৰড্ঢিতা. যাৰঞ্চিদং, ভিক্খৰে, অলমেৰ সব্বসঙ্খারেসু নিব্বিন্দিতুং, অলং ৰিরজ্জিতুং, অলং ৰিমুচ্চিতু’’ন্তি. দুতিযং.

৩. অস্সুসুত্তং

১২৬. সাৰত্থিযং ৰিহরতি…পে… ‘‘অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. তং কিং মঞ্ঞথ, ভিক্খৰে, কতমং নু খো বহুতরং, যং ৰা ৰো ইমিনা দীঘেন অদ্ধুনা সন্ধাৰতং সংসরতং অমনাপসম্পযোগা মনাপৰিপ্পযোগা কন্দন্তানং রোদন্তানং [রুদন্তানং (সী.)] অস্সু পস্সন্নং [পস্সন্দং (ক. সী.), পসন্দং (স্যা. কং.), পসন্নং (পী. ক.)] পগ্ঘরিতং, যং ৰা চতূসু মহাসমুদ্দেসু উদক’’ন্তি? ‘‘যথা খো মযং, ভন্তে, ভগৰতা ধম্মং দেসিতং আজানাম, এতদেৰ, ভন্তে, বহুতরং যং নো ইমিনা ¶ দীঘেন অদ্ধুনা সন্ধাৰতং সংসরতং অমনাপসম্পযোগা মনাপৰিপ্পযোগা কন্দন্তানং রোদন্তানং অস্সু পস্সন্নং পগ্ঘরিতং, ন ত্ৰেৰ চতূসু মহাসমুদ্দেসু উদক’’ন্তি.

‘‘সাধু ¶ সাধু, ভিক্খৰে, সাধু খো মে তুম্হে, ভিক্খৰে, এৰং ধম্মং দেসিতং আজানাথ. এতদেৰ, ভিক্খৰে, বহুতরং যং ৰো ইমিনা দীঘেন অদ্ধুনা সন্ধাৰতং সংসরতং অমনাপসম্পযোগা মনাপৰিপ্পযোগা কন্দন্তানং রোদন্তানং অস্সু পস্সন্নং পগ্ঘরিতং, ন ত্ৰেৰ চতূসু মহাসমুদ্দেসু উদকং. দীঘরত্তং ৰো, ভিক্খৰে, মাতুমরণং পচ্চনুভূতং; তেসং ৰা মাতুমরণং পচ্চনুভোন্তানং অমনাপসম্পযোগা মনাপৰিপ্পযোগা কন্দন্তানং রোদন্তানং অস্সু পস্সন্নং পগ্ঘরিতং, ন ত্ৰেৰ চতূসু মহাসমুদ্দেসু উদকং. দীঘরত্তং ৰো, ভিক্খৰে, পিতুমরণং পচ্চনুভূতং …পে… ভাতুমরণং পচ্চনুভূতং… ভগিনিমরণং পচ্চনুভূতং… পুত্তমরণং পচ্চনুভূতং… ধীতুমরণং পচ্চনুভূতং… ঞাতিব্যসনং পচ্চনুভূতং… ভোগব্যসনং পচ্চনুভূতং. দীঘরত্তং ৰো, ভিক্খৰে ¶ , রোগব্যসনং পচ্চনুভূতং, তেসং ৰো রোগব্যসনং পচ্চনুভোন্তানং অমনাপসম্পযোগা মনাপৰিপ্পযোগা কন্দন্তানং রোদন্তানং অস্সু পস্সন্নং পগ্ঘরিতং, ন ত্ৰেৰ চতূসু মহাসমুদ্দেসু উদকং. তং কিস্স হেতু? অনমতগ্গোযং, ভিক্খৰে, সংসারো ¶ …পে… যাৰঞ্চিদং, ভিক্খৰে, অলমেৰ সব্বসঙ্খারেসু নিব্বিন্দিতুং, অলং ৰিরজ্জিতুং, অলং ৰিমুচ্চিতু’’ন্তি. ততিযং.

৪. খীরসুত্তং

১২৭. সাৰত্থিযং ৰিহরতি…পে… ‘‘অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. তং কিং মঞ্ঞথ, ভিক্খৰে, কতমং নু খো বহুতরং, যং ৰা ৰো ইমিনা দীঘেন অদ্ধুনা সন্ধাৰতং ¶ সংসরতং মাতুথঞ্ঞং পীতং, যং ৰা চতূসু মহাসমুদ্দেসু উদক’’ন্তি? ‘‘যথা খো মযং ¶ , ভন্তে, ভগৰতা ধম্মং দেসিতং আজানাম, এতদেৰ, ভন্তে, বহুতরং যং নো ইমিনা দীঘেন অদ্ধুনা সন্ধাৰতং সংসরতং মাতুথঞ্ঞং পীতং, ন ত্ৰেৰ চতূসু মহাসমুদ্দেসু উদক’’ন্তি.

‘‘সাধু সাধু, ভিক্খৰে, সাধু খো মে তুম্হে, ভিক্খৰে, এৰং ধম্মং দেসিতং আজানাথ. এতদেৰ, ভিক্খৰে, বহুতরং যং ৰো ইমিনা দীঘেন অদ্ধুনা সন্ধাৰতং সংসরতং মাতুথঞ্ঞং পীতং, ন ত্ৰেৰ চতূসু মহাসমুদ্দেসু উদকং. তং কিস্স হেতু? অনমতগ্গোযং, ভিক্খৰে, সংসারো…পে… অলং ৰিমুচ্চিতু’’ন্তি. চতুত্থং.

৫. পব্বতসুত্তং

১২৮. সাৰত্থিযং ৰিহরতি…পে… আরামে. অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কীৰদীঘো নু খো, ভন্তে, কপ্পো’’তি? ‘‘দীঘো খো, ভিক্খু, কপ্পো. সো ন সুকরো সঙ্খাতুং এত্তকানি ৰস্সানি ইতি ৰা, এত্তকানি ৰস্সসতানি ইতি ৰা, এত্তকানি ৰস্সসহস্সানি ইতি ৰা, এত্তকানি ৰস্সসতসহস্সানি ইতি ৰা’’তি.

‘‘সক্কা পন, ভন্তে, উপমং কাতু’’ন্তি? ‘‘সক্কা, ভিক্খূ’’তি ভগৰা অৰোচ. ‘‘সেয্যথাপি ¶ , ভিক্খু, মহাসেলো পব্বতো যোজনং আযামেন যোজনং ৰিত্থারেন যোজনং উব্বেধেন অচ্ছিন্নো অসুসিরো একগ্ঘনো. তমেনং পুরিসো ৰস্সসতস্স ৰস্সসতস্স অচ্চযেন কাসিকেন ৰত্থেন ¶ সকিং সকিং পরিমজ্জেয্য. খিপ্পতরং খো সো, ভিক্খু, মহাসেলো পব্বতো ইমিনা উপক্কমেন পরিক্খযং পরিযাদানং গচ্ছেয্য ¶ , ন ত্ৰেৰ কপ্পো. এৰং দীঘো, ভিক্খু, কপ্পো. এৰং দীঘানং খো, ভিক্খু ¶ , কপ্পানং নেকো কপ্পো সংসিতো, নেকং কপ্পসতং সংসিতং, নেকং কপ্পসহস্সং সংসিতং, নেকং কপ্পসতসহস্সং সংসিতং. তং কিস্স হেতু? অনমতগ্গোযং, ভিক্খু, সংসারো. পুব্বা কোটি…পে… যাৰঞ্চিদং, ভিক্খু, অলমেৰ সব্বসঙ্খারেসু নিব্বিন্দিতুং, অলং ৰিরজ্জিতুং, অলং ৰিমুচ্চিতু’’ন্তি. পঞ্চমং.

৬. সাসপসুত্তং

১২৯. সাৰত্থিযং ৰিহরতি. অথ খো অঞ্ঞতরো ভিক্খু যেন ভগৰা…পে… একমন্তং নিসিন্নো খো সো ভিক্খু ভগৰন্তং এতদৰোচ – ‘‘কীৰদীঘো, নু খো, ভন্তে, কপ্পো’’তি? ‘‘দীঘো খো, ভিক্খু, কপ্পো. সো ন সুকরো সঙ্খাতুং এত্তকানি ৰস্সানি ইতি ৰা…পে… এত্তকানি ৰস্সসতসহস্সানি ইতি ৰা’’তি.

‘‘সক্কা পন, ভন্তে, উপমং কাতু’’ন্তি? ‘‘সক্কা, ভিক্খূ’’তি ভগৰা অৰোচ. ‘‘সেয্যথাপি, ভিক্খু, আযসং নগরং যোজনং আযামেন যোজনং ৰিত্থারেন যোজনং উব্বেধেন, পুণ্ণং সাসপানং গুল়িকাবদ্ধং [চূল়িকাবদ্ধং (সী. পী.)]. ততো পুরিসো ৰস্সসতস্স ৰস্সসতস্স অচ্চযেন একমেকং সাসপং উদ্ধরেয্য. খিপ্পতরং খো সো, ভিক্খু মহাসাসপরাসি ইমিনা উপক্কমেন পরিক্খযং পরিযাদানং গচ্ছেয্য, ন ত্ৰেৰ কপ্পো. এৰং দীঘো খো, ভিক্খু, কপ্পো. এৰং দীঘানং খো, ভিক্খু, কপ্পানং নেকো কপ্পো সংসিতো, নেকং কপ্পসতং সংসিতং, নেকং কপ্পসহস্সং সংসিতং, নেকং কপ্পসতসহস্সং সংসিতং. তং কিস্স হেতু? অনমতগ্গোযং, ভিক্খু, সংসারো ¶ …পে… অলং ৰিমুচ্চিতু’’ন্তি. ছট্ঠং.

৭. সাৰকসুত্তং

১৩০. সাৰত্থিযং ৰিহরতি. অথ ¶ খো সম্বহুলা ভিক্খূ যেন ভগৰা…পে… একমন্তং ¶ নিসিন্না খো তে ভিক্খূ ভগৰন্তং এতদৰোচুং – ‘‘কীৰবহুকা নু খো, ভন্তে, কপ্পা অব্ভতীতা অতিক্কন্তা’’তি? ‘‘বহুকা খো, ভিক্খৰে ¶ , কপ্পা অব্ভতীতা অতিক্কন্তা. তে ন সুকরা সঙ্খাতুং – ‘এত্তকা কপ্পা ইতি ৰা, এত্তকানি কপ্পসতানি ইতি ৰা, এত্তকানি কপ্পসহস্সানি ইতি ৰা, এত্তকানি কপ্পসতসহস্সানি ইতি ৰা’’’তি.

‘‘সক্কা পন, ভন্তে, উপমং কাতু’’ন্তি? ‘‘সক্কা, ভিক্খৰে’’তি ভগৰা অৰোচ. ‘‘ইধস্সু, ভিক্খৰে, চত্তারো সাৰকা ৰস্সসতাযুকা ৰস্সসতজীৰিনো. তে দিৰসে দিৰসে কপ্পসতসহস্সং কপ্পসতসহস্সং অনুস্সরেয্যুং. অননুস্সরিতাৰ ভিক্খৰে, তেহি কপ্পা অস্সু, অথ খো তে চত্তারো সাৰকা ৰস্সসতাযুকা ৰস্সসতজীৰিনো ৰস্সসতস্স অচ্চযেন কালং করেয্যুং. এৰং বহুকা খো, ভিক্খৰে, কপ্পা অব্ভতীতা অতিক্কন্তা. তে ন সুকরা সঙ্খাতুং – ‘এত্তকা কপ্পা ইতি ৰা, এত্তকানি কপ্পসতানি ইতি ৰা, এত্তকানি কপ্পসহস্সানি ইতি ৰা, এত্তকানি কপ্পসতসহস্সানি ইতি ৰা’তি. তং কিস্স হেতু? অনমতগ্গোযং, ভিক্খৰে, সংসারো…পে… অলং ৰিমুচ্চিতু’’ন্তি. সত্তমং.

৮. গঙ্গাসুত্তং

১৩১. রাজগহে ৰিহরতি ৰেল়ুৰনে. অথ খো অঞ্ঞতরো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ¶ ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো সো ব্রাহ্মণো ভগৰন্তং এতদৰোচ – ‘‘কীৰবহুকা নু খো, ভো গোতম, কপ্পা অব্ভতীতা অতিক্কন্তা’’তি? ‘‘বহুকা খো, ব্রাহ্মণ, কপ্পা অব্ভতীতা অতিক্কন্তা. তে ন সুকরা সঙ্খাতুং – ‘এত্তকা কপ্পা ইতি ৰা, এত্তকানি কপ্পসতানি ইতি ৰা, এত্তকানি কপ্পসহস্সানি ইতি ৰা, এত্তকানি কপ্পসতসহস্সানি ইতি ৰা’’’তি.

‘‘সক্কা ¶ পন, ভো গোতম, উপমং কাতু’’ন্তি? ‘‘সক্কা, ব্রাহ্মণা’’তি ভগৰা অৰোচ. ‘‘সেয্যথাপি, ব্রাহ্মণ, যতো চাযং গঙ্গা নদী পভৰতি যত্থ চ মহাসমুদ্দং অপ্পেতি, যা এতস্মিং অন্তরে ৰালিকা সা ন সুকরা সঙ্খাতুং – ‘এত্তকা ৰালিকা ইতি ৰা, এত্তকানি ৰালিকসতানি ইতি ৰা, এত্তকানি ৰালিকসহস্সানি ইতি ৰা, এত্তকানি ৰালিকসতসহস্সানি ¶ ইতি ৰা’তি. ততো বহুতরা খো, ব্রাহ্মণ, কপ্পা অব্ভতীতা অতিক্কন্তা. তে ন সুকরা সঙ্খাতুং – ‘এত্তকা কপ্পা ইতি ¶ ৰা, এত্তকানি কপ্পসতানি ইতি ৰা, এত্তকানি কপ্পসহস্সানি ইতি ৰা, এত্তকানি কপ্পসতসহস্সানি ইতি ৰা’তি. তং কিস্স হেতু? অনমতগ্গোযং, ব্রাহ্মণ, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. এৰং দীঘরত্তং খো, ব্রাহ্মণ, দুক্খং পচ্চনুভূতং তিব্বং পচ্চনুভূতং ব্যসনং পচ্চনুভূতং, কটসী ৰড্ঢিতা. যাৰঞ্চিদং ¶ , ব্রাহ্মণ, অলমেৰ সব্বসঙ্খারেসু নিব্বিন্দিতুং, অলং ৰিরজ্জিতুং, অলং ৰিমুচ্চিতু’’ন্তি.

এৰং ৰুত্তে, সো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি. অট্ঠমং.

৯. দণ্ডসুত্তং

১৩২. সাৰত্থিযং ৰিহরতি…পে… ‘‘অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. সেয্যথাপি, ভিক্খৰে, দণ্ডো উপরিৰেহাসং খিত্তো সকিম্পি মূলেন নিপততি, সকিম্পি মজ্ঝেন নিপততি, সকিম্পি অন্তেন নিপততি; এৰমেৰ খো, ভিক্খৰে, অৰিজ্জানীৰরণা ¶ সত্তা তণ্হাসংযোজনা সন্ধাৰন্তা সংসরন্তা সকিম্পি অস্মা লোকা পরং লোকং গচ্ছন্তি, সকিম্পি পরস্মা লোকা ইমং লোকং আগচ্ছন্তি. তং কিস্স হেতু? অনমতগ্গোযং, ভিক্খৰে, সংসারো…পে… অলং ৰিমুচ্চিতু’’ন্তি. নৰমং.

১০. পুগ্গলসুত্তং

১৩৩. একং সমযং ভগৰা রাজগহে ৰিহরতি গিজ্ঝকূটে পব্বতে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘অনমতগ্গোযং ¶ , ভিক্খৰে, সংসারো…পে… একপুগ্গলস্স, ভিক্খৰে, কপ্পং সন্ধাৰতো সংসরতো সিযা এৰং মহা অট্ঠিকঙ্কলো অট্ঠিপুঞ্জো অট্ঠিরাসি যথাযং ৰেপুল্লো পব্বতো, সচে ¶ সংহারকো অস্স, সম্ভতঞ্চ ন ৰিনস্সেয্য. তং কিস্স হেতু? অনমতগ্গোযং, ভিক্খৰে, সংসারো…পে… অলং ৰিমুচ্চিতু’’ন্তি.

ইদমৰোচ ¶ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘একস্সেকেন কপ্পেন, পুগ্গলস্সট্ঠিসঞ্চযো;

সিযা পব্বতসমো রাসি, ইতি ৰুত্তং মহেসিনা.

‘‘সো খো পনাযং অক্খাতো, ৰেপুল্লো পব্বতো মহা;

উত্তরো গিজ্ঝকূটস্স, মগধানং গিরিব্বজে.

‘‘যতো চ অরিযসচ্চানি, সম্মপ্পঞ্ঞায পস্সতি;

দুক্খং দুক্খসমুপ্পাদং, দুক্খস্স চ অতিক্কমং;

অরিযং চট্ঠঙ্গিকং মগ্গং, দুক্খূপসমগামিনং.

‘‘স সত্তক্খত্তুংপরমং, সন্ধাৰিত্ৰান পুগ্গলো;

দুক্খস্সন্তকরো ¶ হোতি, সব্বসংযোজনক্খযা’’তি. দসমং;

পঠমো ৰগ্গো.

তস্সুদ্দানং –

তিণকট্ঠঞ্চ পথৰী, অস্সু খীরঞ্চ পব্বতং;

সাসপা সাৰকা গঙ্গা, দণ্ডো চ পুগ্গলেন চাতি.

২. দুতিযৰগ্গো

১. দুগ্গতসুত্তং

১৩৪. একং ¶ ¶ সমযং ভগৰা সাৰত্থিযং ৰিহরতি. তত্র খো ভগৰা ভিক্খু আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ – ‘‘অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. যং, ভিক্খৰে, পস্সেয্যাথ দুগ্গতং দুরূপেতং নিট্ঠমেত্থ গন্তব্বং – ‘অম্হেহিপি এৰরূপং পচ্চনুভূতং ইমিনা দীঘেন অদ্ধুনা’তি. তং কিস্স হেতু…পে… যাৰঞ্চিদং, ভিক্খৰে, অলমেৰ সব্বসঙ্খারেসু নিব্বিন্দিতুং অলং ৰিরজ্জিতুং অলং ৰিমুচ্চিতু’’ন্তি. পঠমং.

২. সুখিতসুত্তং

১৩৫. সাৰত্থিযং ¶ ৰিহরতি…পে… ‘‘অনমতগ্গোযং, ভিক্খৰে, সংসারো…পে… যং, ভিক্খৰে, পস্সেয্যাথ সুখিতং সুসজ্জিতং, নিট্ঠমেত্থ ¶ গন্তব্বং – ‘অম্হেহিপি এৰরূপং পচ্চনুভূতং ইমিনা দীঘেন অদ্ধুনা’তি. তং কিস্স হেতু? অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি…পে… অলং ৰিমুচ্চিতু’’ন্তি. দুতিযং.

৩. তিংসমত্তসুত্তং

১৩৬. রাজগহে ৰিহরতি ৰেল়ুৰনে. অথ খো তিংসমত্তা পাৰেয্যকা [পাঠেয্যকা (কত্থচি) ৰিনযপিটকে মহাৰগ্গে কথিনক্খন্ধকেপি] ভিক্খূ সব্বে আরঞ্ঞিকা সব্বে পিণ্ডপাতিকা সব্বে পংসুকূলিকা সব্বে তেচীৰরিকা সব্বে সসংযোজনা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. অথ খো ভগৰতো এতদহোসি – ‘‘ইমে খো তিংসমত্তা পাৰেয্যকা ভিক্খূ সব্বে আরঞ্ঞিকা সব্বে পিণ্ডপাতিকা সব্বে পংসুকূলিকা ¶ সব্বে তেচীৰরিকা সব্বে সসংযোজনা. যংনূনাহং ইমেসং তথা ধম্মং দেসেয্যং যথা নেসং ইমস্মিংযেৰ আসনে অনুপাদায আসৰেহি চিত্তানি ৰিমুচ্চেয্যু’’ন্তি. অথ ¶ খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. তং কিং মঞ্ঞথ, ভিক্খৰে, কতমং নু খো বহুতরং, যং ৰা ৰো ইমিনা দীঘেন অদ্ধুনা সন্ধাৰতং সংসরতং সীসচ্ছিন্নানং লোহিতং পস্সন্নং পগ্ঘরিতং, যং ৰা চতূসু মহাসমুদ্দেসু উদক’’ন্তি? ‘‘যথা খো মযং, ভন্তে, ভগৰতা ধম্মং দেসিতং আজানাম, এতদেৰ, ভন্তে, বহুতরং, যং নো ইমিনা দীঘেন অদ্ধুনা সন্ধাৰতং সংসরতং সীসচ্ছিন্নানং ¶ লোহিতং পস্সন্নং পগ্ঘরিতং, ন ত্ৰেৰ চতূসু মহাসমুদ্দেসু উদক’’ন্তি.

‘‘সাধু সাধু, ভিক্খৰে, সাধু খো মে তুম্হে, ভিক্খৰে, এৰং ধম্মং দেসিতং আজানাথ. এতদেৰ, ভিক্খৰে, বহুতরং, যং ৰো ইমিনা দীঘেন অদ্ধুনা সন্ধাৰতং সংসরতং সীসচ্ছিন্নানং লোহিতং পস্সন্নং পগ্ঘরিতং, ন ত্ৰেৰ চতূসু মহাসমুদ্দেসু ¶ উদকং. দীঘরত্তং ৰো, ভিক্খৰে, গুন্নং সতং গোভূতানং সীসচ্ছিন্নানং লোহিতং পস্সন্নং পগ্ঘরিতং, ন ত্ৰেৰ চতূসু মহাসমুদ্দেসু উদকং. দীঘরত্তং ৰো, ভিক্খৰে, মহিংসানং [মহিসানং (সী. পী.)] সতং মহিংসভূতানং সীসচ্ছিন্নানং লোহিতং পস্সন্নং পগ্ঘরিতং ¶ …পে… দীঘরত্তং ৰো, ভিক্খৰে, উরব্ভানং সতং উরব্ভভূতানং…পে… অজানং সতং অজভূতানং… মিগানং সতং মিগভূতানং… কুক্কুটানং সতং কুক্কুটভূতানং… সূকরানং সতং সূকরভূতানং… দীঘরত্তং ৰো, ভিক্খৰে, চোরা গামঘাতাতি গহেত্ৰা সীসচ্ছিন্নানং লোহিতং পস্সন্নং পগ্ঘরিতং. দীঘরত্তং ৰো, ভিক্খৰে, চোরা পারিপন্থিকাতি গহেত্ৰা সীসচ্ছিন্নানং লোহিতং পস্সন্নং পগ্ঘরিতং. দীঘরত্তং ৰো, ভিক্খৰে, চোরা পারদারিকাতি গহেত্ৰা সীসচ্ছিন্নানং লোহিতং পস্সন্নং পগ্ঘরিতং, ন ত্ৰেৰ চতূসু মহাসমুদ্দেসু উদকং. তং কিস্স হেতু? অনমতগ্গোযং, ভিক্খৰে, সংসারো…পে… অলং ৰিমুচ্চিতু’’ন্তি.

‘‘ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি. ইমস্মিঞ্চ ¶ পন ৰেয্যাকরণস্মিং ভঞ্ঞমানে তিংসমত্তানং পাৰেয্যকানং ভিক্খূনং অনুপাদায আসৰেহি চিত্তানি ৰিমুচ্চিংসূ’’তি. ততিযং.

৪. মাতুসুত্তং

১৩৭. সাৰত্থিযং ¶ ৰিহরতি…পে… ‘‘অনমতগ্গোযং, ভিক্খৰে, সংসারো…পে… ন সো, ভিক্খৰে, সত্তো সুলভরূপো যো নমাতাভূতপুব্বো ইমিনা দীঘেন অদ্ধুনা. তং কিস্স হেতু? অনমতগ্গোযং, ভিক্খৰে, সংসারো…পে… অলং ৰিমুচ্চিতু’’ন্তি. চতুত্থং.

৫. পিতুসুত্তং

১৩৮. সাৰত্থিযং ৰিহরতি…পে… ‘‘অনমতগ্গোযং, ভিক্খৰে, সংসারো…পে… ন সো, ভিক্খৰে, সত্তো সুলভরূপো যো নপিতাভূতপুব্বো ¶ …পে… অলং ৰিমুচ্চিতু’’ন্তি. পঞ্চমং.

৬. ভাতুসুত্তং

১৩৯. সাৰত্থিযং ৰিহরতি…পে… ‘‘ন সো, ভিক্খৰে, সত্তো সুলভরূপো যো নভাতাভূতপুব্বো…পে… অলং ৰিমুচ্চিতু’’ন্তি. ছট্ঠং.

৭. ভগিনিসুত্তং

১৪০. সাৰত্থিযং ¶ ৰিহরতি…পে… ‘‘ন সো, ভিক্খৰে, সত্তো সুলভরূপো যো নভগিনিভূতপুব্বো…পে… অলং ৰিমুচ্চিতু’’ন্তি. সত্তমং.

৮. পুত্তসুত্তং

১৪১. সাৰত্থিযং ¶ ৰিহরতি…পে… ‘‘ন সো, ভিক্খৰে, সত্তো সুলভরূপো যো নপুত্তভূতপুব্বো…পে… অলং ৰিমুচ্চিতু’’ন্তি. অট্ঠমং.

৯. ধীতুসুত্তং

১৪২. সাৰত্থিযং ¶ ৰিহরতি…পে… ‘‘অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. ন সো, ভিক্খৰে, সত্তো সুলভরূপো যো ন ধীতাভূতপুব্বো ইমিনা দীঘেন অদ্ধুনা. তং কিস্স হেতু? অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. এৰং দীঘরত্তং ৰো, ভিক্খৰে, দুক্খং পচ্চনুভূতং তিব্বং পচ্চনুভূতং ব্যসনং পচ্চনুভূতং, কটসী ৰড্ঢিতা. যাৰঞ্চিদং, ভিক্খৰে, অলমেৰ সব্বসঙ্খারেসু নিব্বিন্দিতুং, অলং ৰিরজ্জিতুং, অলং ৰিমুচ্চিতু’’ন্তি. নৰমং.

১০. ৰেপুল্লপব্বতসুত্তং

১৪৩. একং ¶ সমযং ভগৰা রাজগহে ৰিহরতি গিজ্ঝকূটে পব্বতে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘অনমতগ্গোযং, ভিক্খৰে, সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. ভূতপুব্বং, ভিক্খৰে, ইমস্স ৰেপুল্লস্স পব্বতস্স ‘পাচীনৰংসো’ত্ৰেৰ সমঞ্ঞা উদপাদি. তেন খো পন, ভিক্খৰে ¶ , সমযেন মনুস্সানং ‘তিৰরা’ত্ৰেৰ সমঞ্ঞা উদপাদি. তিৰরানং, ভিক্খৰে, মনুস্সানং চত্তারীস ৰস্সসহস্সানি আযুপ্পমাণং অহোসি. তিৰরা, ভিক্খৰে, মনুস্সা পাচীনৰংসং পব্বতং চতূহেন আরোহন্তি, চতূহেন ওরোহন্তি. তেন খো পন, ভিক্খৰে ¶ , সমযেন ককুসন্ধো ভগৰা অরহং সম্মাসম্বুদ্ধো লোকে উপ্পন্নো হোতি. ককুসন্ধস্স, ভিক্খৰে, ভগৰতো অরহতো সম্মাসম্বুদ্ধস্স ৰিধুরসঞ্জীৰং নাম সাৰকযুগং অহোসি অগ্গং ভদ্দযুগং. পস্সথ, ভিক্খৰে, সা চেৰিমস্স পব্বতস্স সমঞ্ঞা অন্তরহিতা, তে চ মনুস্সা কালঙ্কতা, সো চ ভগৰা পরিনিব্বুতো. এৰং অনিচ্চা, ভিক্খৰে, সঙ্খারা; এৰং অদ্ধুৰা, ভিক্খৰে, সঙ্খারা; এৰং অনস্সাসিকা, ভিক্খৰে, সঙ্খারা. যাৰঞ্চিদং, ভিক্খৰে, অলমেৰ সব্বসঙ্খারেসু নিব্বিন্দিতুং, অলং ৰিরজ্জিতুং, অলং ৰিমুচ্চিতুং.

‘‘ভূতপুব্বং ¶ , ভিক্খৰে, ইমস্স ৰেপুল্লস্স পব্বতস্স ‘ৰঙ্ককো’ত্ৰেৰ ¶ সমঞ্ঞা উদপাদি. তেন খো পন, ভিক্খৰে, সমযেন মনুস্সানং ‘রোহিতস্সা’ত্ৰেৰ সমঞ্ঞা উদপাদি. রোহিতস্সানং, ভিক্খৰে, মনুস্সানং তিংসৰস্সসহস্সানি আযুপ্পমাণং অহোসি. রোহিতস্সা, ভিক্খৰে, মনুস্সা ৰঙ্ককং পব্বতং তীহেন আরোহন্তি, তীহেন ওরোহন্তি. তেন খো পন, ভিক্খৰে, সমযেন কোণাগমনো ভগৰা অরহং সম্মাসম্বুদ্ধো লোকে উপ্পন্নো হোতি. কোণাগমনস্স, ভিক্খৰে, ভগৰতো অরহতো সম্মাসম্বুদ্ধস্স ভিয্যোসুত্তরং নাম সাৰকযুগং অহোসি অগ্গং ভদ্দযুগং. পস্সথ, ভিক্খৰে, সা চেৰিমস্স পব্বতস্স সমঞ্ঞা অন্তরহিতা, তে চ মনুস্সা কালঙ্কতা, সো চ ভগৰা পরিনিব্বুতো. এৰং ¶ অনিচ্চা, ভিক্খৰে, সঙ্খারা…পে… অলং ৰিমুচ্চিতুং.

‘‘ভূতপুব্বং, ভিক্খৰে, ইমস্স ৰেপুল্লস্স পব্বতস্স ‘সুপস্সো’ত্ৰেৰ [সুফস্সোত্ৰেৰ (সী.)] সমঞ্ঞা উদপাদি. তেন খো পন, ভিক্খৰে, সমযেন মনুস্সানং ‘সুপ্পিযা’ত্ৰেৰ [অপ্পিযাত্ৰেৰ (সী.)] সমঞ্ঞা উদপাদি. সুপ্পিযানং, ভিক্খৰে, মনুস্সানং ৰীসতিৰস্সসহস্সানি আযুপ্পমাণং অহোসি. সুপ্পিযা, ভিক্খৰে, মনুস্সা সুপস্সং পব্বতং দ্ৰীহেন আরোহন্তি, দ্ৰীহেন ওরোহন্তি. তেন খো পন, ভিক্খৰে, সমযেন কস্সপো ভগৰা অরহং সম্মাসম্বুদ্ধো লোকে উপ্পন্নো হোতি. কস্সপস্স, ভিক্খৰে, ভগৰতো অরহতো সম্মাসম্বুদ্ধস্স তিস্সভারদ্ৰাজং নাম সাৰকযুগং অহোসি অগ্গং ভদ্দযুগং. পস্সথ, ভিক্খৰে, সা চেৰিমস্স পব্বতস্স সমঞ্ঞা অন্তরহিতা, তে চ মনুস্সা কালঙ্কতা, সো চ ভগৰা পরিনিব্বুতো. এৰং অনিচ্চা ¶ , ভিক্খৰে, সঙ্খারা; এৰং অদ্ধুৰা, ভিক্খৰে, সঙ্খারা…পে… অলং ৰিমুচ্চিতুং.

‘‘এতরহি ¶ খো পন, ভিক্খৰে, ইমস্স ৰেপুল্লস্স পব্বতস্স ‘ৰেপুল্লো’ত্ৰেৰ সমঞ্ঞা উদপাদি. এতরহি খো পন, ভিক্খৰে, ইমেসং মনুস্সানং ‘মাগধকা’ত্ৰেৰ সমঞ্ঞা উদপাদি. মাগধকানং, ভিক্খৰে, মনুস্সানং অপ্পকং আযুপ্পমাণং পরিত্তং লহুকং [লহুসং (সী.)]; যো চিরং জীৰতি সো ৰস্সসতং অপ্পং ৰা ভিয্যো. মাগধকা, ভিক্খৰে, মনুস্সা ৰেপুল্লং পব্বতং মুহুত্তেন আরোহন্তি মুহুত্তেন ওরোহন্তি. এতরহি খো পনাহং, ভিক্খৰে, অরহং সম্মাসম্বুদ্ধো লোকে উপ্পন্নো. ময্হং খো পন, ভিক্খৰে, সারিপুত্তমোগ্গল্লানং নাম সাৰকযুগং অগ্গং ভদ্দযুগং. ভৰিস্সতি, ভিক্খৰে, সো সমযো যা অযঞ্চেৰিমস্স পব্বতস্স ¶ সমঞ্ঞা অন্তরধাযিস্সতি, ইমে ¶ চ মনুস্সা কালং করিস্সন্তি, অহঞ্চ পরিনিব্বাযিস্সামি. এৰং অনিচ্চা, ভিক্খৰে, সঙ্খারা; এৰং অদ্ধুৰা, ভিক্খৰে, সঙ্খারা; এৰং অনস্সাসিকা, ভিক্খৰে, সঙ্খারা. যাৰঞ্চিদং, ভিক্খৰে, অলমেৰ সব্বসঙ্খারেসু নিব্বিন্দিতুং, অলং ৰিরজ্জিতুং, অলং ৰিমুচ্চিতু’’ন্তি.

ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘পাচীনৰংসো তিৰরানং, রোহিতস্সান ৰঙ্ককো;

সুপ্পিযানং সুপস্সোতি, মাগধানঞ্চ ৰেপুল্লো.

‘‘অনিচ্চা ¶ ৰত সঙ্খারা, উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখো’’তি. দসমং;

দুতিযো ৰগ্গো.

তস্সুদ্দানং –

দুগ্গতং সুখিতঞ্চেৰ, তিংস মাতাপিতেন চ;

ভাতা ভগিনী পুত্তো চ, ধীতা ৰেপুল্লপব্বতং.

অনমতগ্গসংযুত্তং সমত্তং.

৫. কস্সপসংযুত্তং

১. সন্তুট্ঠসুত্তং

১৪৪. সাৰত্থিযং ¶ ¶ ¶ ¶ ৰিহরতি…পে… ‘‘সন্তুট্ঠাযং [সন্তুট্ঠোযং (সী.)], ভিক্খৰে, কস্সপো ইতরীতরেন চীৰরেন, ইতরীতরচীৰরসন্তুট্ঠিযা চ ৰণ্ণৰাদী; ন চ চীৰরহেতু অনেসনং অপ্পতিরূপং আপজ্জতি; অলদ্ধা চ চীৰরং ন পরিতস্সতি; লদ্ধা চ চীৰরং অগধিতো [অগথিতো (সী.)] অমুচ্ছিতো অনজ্ঝাপন্নো আদীনৰদস্সাৰী নিস্সরণপঞ্ঞো পরিভুঞ্জতি’’.

‘‘সন্তুট্ঠাযং, ভিক্খৰে, কস্সপো ইতরীতরেন পিণ্ডপাতেন, ইতরীতরপিণ্ডপাতসন্তুট্ঠিযা চ ৰণ্ণৰাদী; ন চ পিণ্ডপাতহেতু অনেসনং অপ্পতিরূপং আপজ্জতি; অলদ্ধা চ পিণ্ডপাতং ন পরিতস্সতি; লদ্ধা চ পিণ্ডপাতং অগধিতো অমুচ্ছিতো অনজ্ঝাপন্নো আদীনৰদস্সাৰী নিস্সরণপঞ্ঞো পরিভুঞ্জতি.

‘‘সন্তুট্ঠাযং, ভিক্খৰে, কস্সপো ইতরীতরেন সেনাসনেন, ইতরীতরসেনাসনসন্তুট্ঠিযা চ ৰণ্ণৰাদী; ন চ সেনাসনহেতু অনেসনং অপ্পতিরূপং আপজ্জতি; অলদ্ধা চ সেনাসনং ন পরিতস্সতি; লদ্ধা চ সেনাসনং অগধিতো অমুচ্ছিতো অনজ্ঝাপন্নো আদীনৰদস্সাৰী নিস্সরণপঞ্ঞো পরিভুঞ্জতি.

‘‘সন্তুট্ঠাযং, ভিক্খৰে, কস্সপো ইতরীতরেন গিলানপ্পচ্চযভেসজ্জপরিক্খারেন, ইতরীতরগিলানপ্পচ্চযভেসজ্জপরিক্খারসন্তুট্ঠিযা চ ৰণ্ণৰাদী; ন চ গিলানপ্পচ্চযভেসজ্জপরিক্খারহেতু অনেসনং অপ্পতিরূপং আপজ্জতি; অলদ্ধা চ গিলানপ্পচ্চযভেসজ্জপরিক্খারং ন পরিতস্সতি; লদ্ধা চ গিলানপ্পচ্চযভেসজ্জপরিক্খারং অগধিতো অমুচ্ছিতো ¶ অনজ্ঝাপন্নো আদীনৰদস্সাৰী নিস্সরণপঞ্ঞো পরিভুঞ্জতি.

‘‘তস্মাতিহ ¶ , ভিক্খৰে, এৰং সিক্খিতব্বং – ‘সন্তুট্ঠা ভৰিস্সাম ইতরীতরেন চীৰরেন, ইতরীতরচীৰরসন্তুট্ঠিযা চ ¶ ৰণ্ণৰাদিনো; ন চ চীৰরহেতু অনেসনং অপ্পতিরূপং আপজ্জিস্সাম; অলদ্ধা চ চীৰরং ন চ পরিতস্সিস্সাম; লদ্ধা চ চীৰরং অগধিতা অমুচ্ছিতা অনজ্ঝাপন্না আদীনৰদস্সাৰিনো নিস্সরণপঞ্ঞা পরিভুঞ্জিস্সাম’’’. (এৰং সব্বং কাতব্বং).

‘‘‘সন্তুট্ঠা ¶ ভৰিস্সাম ইতরীতরেন পিণ্ডপাতেন…পে… সন্তুট্ঠা ভৰিস্সাম ইতরীতরেন সেনাসনেন…পে… সন্তুট্ঠা ভৰিস্সাম ইতরীতরেন গিলানপ্পচ্চযভেসজ্জপরিক্খারেন, ইতরীতরগিলানপ্পচ্চযভেসজ্জপরিক্খারসন্তুট্ঠিযা চ ৰণ্ণৰাদিনো; ন চ গিলানপ্পচ্চযভেসজ্জপরিক্খারহেতু অনেসনং অপ্পতিরূপং আপজ্জিস্সাম অলদ্ধা চ গিলানপ্পচ্চযভেসজ্জপরিক্খারং ন পরিতস্সিস্সাম; লদ্ধা চ গিলানপ্পচ্চযভেসজ্জপরিক্খারং অগধিতা অমুচ্ছিতা অনজ্ঝাপন্না আদীনৰদস্সাৰিনো নিস্সরণপঞ্ঞা পরিভুঞ্জিস্সামা’তি. এৰঞ্হি ৰো, ভিক্খৰে, সিক্খিতব্বং. কস্সপেন ৰা হি ৰো, ভিক্খৰে, ওৰদিস্সামি যো ৰা পনস্স [যো ৰা পন (সী.), যো ৰা (পী.)] কস্সপসদিসো, ওৰদিতেহি চ পন ৰো তথত্তায পটিপজ্জিতব্ব’’ন্তি. পঠমং.

২. অনোত্তপ্পীসুত্তং

১৪৫. এৰং মে সুতং – একং সমযং আযস্মা চ মহাকস্সপো আযস্মা চ সারিপুত্তো বারাণসিযং ৰিহরন্তি ইসিপতনে মিগদাযে. অথ ¶ খো আযস্মা সারিপুত্তো সাযন্হসমযং পটিসল্লানা ৰুট্ঠিতো যেনাযস্মা মহাকস্সপো তেনুপসঙ্কমি; উপসঙ্কমিত্ৰা আযস্মতা মহাকস্সপেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা সারিপুত্তো আযস্মন্তং মহাকস্সপং এতদৰোচ – ‘‘ৰুচ্চতি হিদং, আৰুসো কস্সপ, অনাতাপী অনোত্তপ্পী অভব্বো সম্বোধায অভব্বো নিব্বানায অভব্বো অনুত্তরস্স যোগক্খেমস্স অধিগমায; আতাপী চ খো ওত্তপ্পী ¶ ভব্বো সম্বোধায ভব্বো নিব্বানায ভব্বো অনুত্তরস্স যোগক্খেমস্স অধিগমাযা’’তি.

‘‘কিত্তাৰতা নু খো, আৰুসো, অনাতাপী হোতি অনোত্তপ্পী অভব্বো সম্বোধায অভব্বো নিব্বানায অভব্বো অনুত্তরস্স যোগক্খেমস্স অধিগমায; কিত্তাৰতা চ পনাৰুসো, আতাপী ¶ হোতি ওত্তপ্পী ভব্বো সম্বোধায ভব্বো নিব্বানায ভব্বো অনুত্তরস্স যোগক্খেমস্স অধিগমাযা’’তি? ‘‘ইধাৰুসো, ভিক্খু ‘অনুপ্পন্না মে পাপকা অকুসলা ধম্মা উপ্পজ্জমানা অনত্থায সংৰত্তেয্যু’ন্তি ¶ ন আতপ্পং করোতি, ‘উপ্পন্না মে পাপকা অকুসলা ধম্মা অপ্পহীযমানা অনত্থায সংৰত্তেয্যু’ন্তি ন আতপ্পং করোতি, ‘অনুপ্পন্না মে কুসলা ধম্মানুপ্পজ্জমানা অনত্থায সংৰত্তেয্যু’ন্তি ন আতপ্পং করোতি, ‘উপ্পন্না মে কুসলা ধম্মা নিরুজ্ঝমানা অনত্থায সংৰত্তেয্যু’ন্তি ন ¶ আতপ্পং করোতি. এৰং খো, আৰুসো, অনাতাপী হোতি’’.

‘‘কথঞ্চাৰুসো, অনোত্তপ্পী হোতি? ইধাৰুসো, ভিক্খু ‘অনুপ্পন্না মে পাপকা অকুসলা ধম্মা উপ্পজ্জমানা অনত্থায সংৰত্তেয্যু’ন্তি ন ওত্তপ্পতি, ‘উপ্পন্না মে পাপকা অকুসলা ধম্মা অপ্পহীযমানা অনত্থায সংৰত্তেয্যু’ন্তি ন ওত্তপ্পতি, ‘অনুপ্পন্না মে কুসলা ধম্মানুপ্পজ্জমানা অনত্থায সংৰত্তেয্যু’ন্তি ন ওত্তপ্পতি, ‘উপ্পন্না মে কুসলা ধম্মা নিরুজ্ঝমানা অনত্থায সংৰত্তেয্যু’ন্তি ন ওত্তপ্পতি. এৰং ¶ খো, আৰুসো, অনোত্তপ্পী হোতি. এৰং খো, আৰুসো, অনাতাপী অনোত্তপ্পী অভব্বো সম্বোধায অভব্বো নিব্বানায অভব্বো অনুত্তরস্স যোগক্খেমস্স অধিগমায.

‘‘কথঞ্চাৰুসো, আতাপী হোতি? ইধাৰুসো, ভিক্খু ‘অনুপ্পন্না মে পাপকা অকুসলা ধম্মা উপ্পজ্জমানা অনত্থায সংৰত্তেয্যু’ন্তি আতপ্পং করোতি, ‘উপ্পন্না মে পাপকা অকুসলা ধম্মা অপ্পহীযমানা অনত্থায সংৰত্তেয্যু’ন্তি আতপ্পং করোতি, অনুপ্পন্না মে কুসলা ধম্মা…পে… আতপ্পং করোতি. এৰং খো, আৰুসো, আতাপী হোতি.

‘‘কথঞ্চাৰুসো, ওত্তপ্পী হোতি? ইধাৰুসো, ভিক্খু ‘অনুপ্পন্না ¶ মে পাপকা অকুসলা ধম্মা উপ্পজ্জমানা অনত্থায সংৰত্তেয্যু’ন্তি ওত্তপ্পতি, ‘উপ্পন্না মে পাপকা অকুসলা ধম্মা অপ্পহীযমানা অনত্থায সংৰত্তেয্যু’ন্তি ওত্তপ্পতি, ‘অনুপ্পন্না মে কুসলা ধম্মা অনুপ্পজ্জমানা অনত্থায সংৰত্তেয্যু’ন্তি ওত্তপ্পতি, ‘উপ্পন্না মে কুসলা ধম্মা নিরুজ্ঝমানা অনত্থায সংৰত্তেয্যু’ন্তি ওত্তপ্পতি. এৰং খো, আৰুসো, ওত্তপ্পী হোতি. এৰং খো, আৰুসো, আতাপী ওত্তপ্পী ভব্বো সম্বোধায ভব্বো নিব্বানায ভব্বো অনুত্তরস্স যোগক্খেমস্স অধিগমাযা’’তি. দুতিযং.

৩. চন্দূপমসুত্তং

১৪৬. সাৰত্থিযং ¶ ৰিহরতি…পে… ‘‘চন্দূপমা, ভিক্খৰে, কুলানি উপসঙ্কমথ – অপকস্সেৰ ¶ কাযং, অপকস্স চিত্তং, নিচ্চনৰকা কুলেসু অপ্পগব্ভা [অপ্পগব্বা (ক.)]. সেয্যথাপি ¶ , ভিক্খৰে, পুরিসো জরুদপানং ৰা ওলোকেয্য পব্বতৰিসমং ৰা নদীৰিদুগ্গং ৰা – অপকস্সেৰ কাযং, অপকস্স চিত্তং; এৰমেৰ খো, ভিক্খৰে, চন্দূপমা কুলানি উপসঙ্কমথ – অপকস্সেৰ কাযং, অপকস্স চিত্তং, নিচ্চনৰকা কুলেসু অপ্পগব্ভা’’.

‘‘কস্সপো, ভিক্খৰে, চন্দূপমো কুলানি উপসঙ্কমতি – অপকস্সেৰ কাযং, অপকস্স চিত্তং, নিচ্চনৰকো কুলেসু অপ্পগব্ভো. তং কিং মঞ্ঞথ, ভিক্খৰে, কথংরূপো ভিক্খু অরহতি কুলানি উপসঙ্কমিতু’’ন্তি? ‘‘ভগৰংমূলকা নো, ভন্তে, ধম্মা ভগৰংনেত্তিকা ভগৰংপটিসরণা. সাধু ৰত, ভন্তে, ভগৰন্তংযেৰ পটিভাতু এতস্স ভাসিতস্স অত্থো. ভগৰতো সুত্ৰা ভিক্খূ ধারেস্সন্তী’’তি.

অথ খো ¶ ভগৰা আকাসে পাণিং চালেসি. ‘‘সেয্যথাপি, ভিক্খৰে, অযং আকাসে পাণি ন সজ্জতি ন গয্হতি ন বজ্ঝতি; এৰমেৰ খো, ভিক্খৰে, যস্স কস্সচি ভিক্খুনো কুলানি উপসঙ্কমতো কুলেসু চিত্তং ন সজ্জতি ন গয্হতি ন বজ্ঝতি – ‘লভন্তু লাভকামা, পুঞ্ঞকামা করোন্তু পুঞ্ঞানী’তি; যথাসকেন লাভেন অত্তমনো হোতি সুমনো, এৰং পরেসং লাভেন অত্তমনো হোতি সুমনো; এৰরূপো খো, ভিক্খৰে, ভিক্খু অরহতি কুলানি উপসঙ্কমিতুং.

‘‘কস্সপস্স, ভিক্খৰে, কুলানি উপসঙ্কমতো কুলেসু চিত্তং ন সজ্জতি ন গয্হতি ন বজ্ঝতি – ‘লভন্তু লাভকামা, পুঞ্ঞকামা করোন্তু পুঞ্ঞানী’তি; যথাসকেন লাভেন অত্তমনো হোতি সুমনো; এৰং পরেসং লাভেন অত্তমনো হোতি সুমনো.

‘‘তং ¶ কিং মঞ্ঞথ, ভিক্খৰে, কথংরূপস্স ভিক্খুনো অপরিসুদ্ধা ধম্মদেসনা হোতি, কথংরূপস্স ভিক্খুনো পরিসুদ্ধা ধম্মদেসনা হোতী’’তি? ‘‘ভগৰংমূলকা নো, ভন্তে, ধম্মা ভগৰংনেত্তিকা ভগৰংপটিসরণা. সাধু ৰত, ভন্তে, ভগৰন্তংযেৰ পটিভাতু এতস্স ভাসিতস্স অত্থো ¶ . ভগৰতো সুত্ৰা ভিক্খূ ধারেস্সন্তী’’তি. ‘‘তেন হি, ভিক্খৰে, সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘যো হি কোচি, ভিক্খৰে, ভিক্খু এৰংচিত্তো পরেসং ধম্মং দেসেতি – ‘অহো ৰত মে ধম্মং সুণেয্যুং, সুত্ৰা চ পন ধম্মং পসীদেয্যুং, পসন্না চ ¶ মে পসন্নাকারং ¶ করেয্যু’ন্তি; এৰরূপস্স খো, ভিক্খৰে, ভিক্খুনো অপরিসুদ্ধা ধম্মদেসনা হোতি.

‘‘যো চ খো, ভিক্খৰে, ভিক্খু এৰংচিত্তো পরেসং ধম্মং দেসেতি – ‘স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহীতি [ৰিঞ্ঞূহি (?)]. অহো, ৰত মে ধম্মং সুণেয্যুং, সুত্ৰা চ পন ধম্মং আজানেয্যুং, আজানিত্ৰা চ পন তথত্তায পটিপজ্জেয্যু’ন্তি. ইতি ধম্মসুধম্মতং পটিচ্চ পরেসং ধম্মং দেসেতি, কারুঞ্ঞং পটিচ্চ অনুদ্দযং [অনুদযং (বহূসু) দ্ৰিত্তকারণং পন গৰেসিতব্বং] পটিচ্চ অনুকম্পং উপাদায পরেসং ধম্মং দেসেতি. এৰরূপস্স খো, ভিক্খৰে, ভিক্খুনো পরিসুদ্ধা ধম্মদেসনা হোতি.

‘‘কস্সপো, ভিক্খৰে, এৰংচিত্তো পরেসং ধম্মং দেসেতি – ‘স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহীতি. অহো, ৰত ¶ মে ধম্মং সুণেয্যুং, সুত্ৰা চ পন ধম্মং আজানেয্যুং, আজানিত্ৰা চ পন তথত্তায পটিপজ্জেয্যু’ন্তি. ইতি ধম্মসুধম্মতং পটিচ্চ পরেসং ধম্মং দেসেতি, কারুঞ্ঞং পটিচ্চ অনুদ্দযং পটিচ্চ অনুকম্পং উপাদায পরেসং ধম্মং দেসেতি. কস্সপেন ৰা হি ৰো, ভিক্খৰে, ওৰদিস্সামি যো ৰা পনস্স কস্সপসদিসো, ওৰদিতেহি চ পন ৰো তথত্তায পটিপজ্জিতব্ব’’ন্তি. ততিযং.

৪. কুলূপকসুত্তং

১৪৭. সাৰত্থিযং ৰিহরতি…পে… ‘‘তং কিং মঞ্ঞথ, ভিক্খৰে, কথংরূপো ভিক্খু ¶ অরহতি কুলূপকো হোতুং, কথংরূপো ভিক্খু ন অরহতি কুলূপকো হোতু’’ন্তি? ভগৰংমূলকা নো, ভন্তে, ধম্মা…পে… ভগৰা এতদৰোচ –

‘‘যো ¶ হি কোচি, ভিক্খৰে, ভিক্খু এৰংচিত্তো কুলানি উপসঙ্কমতি – ‘দেন্তুযেৰ মে, মা নাদংসু; বহুকঞ্ঞেৰ মে দেন্তু, মা থোকং; পণীতঞ্ঞেৰ মে দেন্তু, মা লূখং; সীঘঞ্ঞেৰ মে দেন্তু, মা দন্ধং; সক্কচ্চঞ্ঞেৰ মে দেন্তু, মা অসক্কচ্চ’ন্তি. তস্স চে, ভিক্খৰে, ভিক্খুনো এৰংচিত্তস্স কুলানি উপসঙ্কমতো ন দেন্তি, তেন ভিক্খু সন্দীযতি; সো ততোনিদানং দুক্খং দোমনস্সং পটিসংৰেদযতি. থোকং দেন্তি, নো বহুকং…পে… লূখং দেন্তি, নো পণীতং… দন্ধং দেন্তি, নো সীঘং, তেন ভিক্খু সন্দীযতি; সো ততোনিদানং ¶ দুক্খং দোমনস্সং পটিসংৰেদযতি. অসক্কচ্চং দেন্তি, নো সক্কচ্চং; তেন ভিক্খু সন্দীযতি; সো ¶ ততোনিদানং দুক্খং দোমনস্সং পটিসংৰেদযতি. এৰরূপো খো, ভিক্খৰে, ভিক্খু ন অরহতি কূলূপকো হোতুং.

‘‘যো চ খো, ভিক্খৰে, ভিক্খু এৰংচিত্তো কুলানি উপসঙ্কমতি – ‘তং কুতেত্থ লব্ভা পরকুলেসু – দেন্তুযেৰ মে, মা নাদংসু; বহুকঞ্ঞেৰ মে দেন্তু, মা থোকং; পণীতঞ্ঞেৰ মে দেন্তু, মা লূখং; দীঘঞ্ঞেৰ মে দেন্তু, মা দন্ধং; সক্কচ্চঞ্ঞেৰ মে দেন্তু, মা অসক্কচ্চ’ন্তি. তস্স চে, ভিক্খৰে, ভিক্খুনো এৰংচিত্তস্স কুলানি উপসঙ্কমতো ন দেন্তি; তেন ভিক্খু ন সন্দীযতি; সো ন ততোনিদানং দুক্খং দোমনস্সং ¶ পটিসংৰেদযতি. থোকং দেন্তি, নো বহুকং; তেন ভিক্খু ন সন্দীযতি; সো ন ততোনিদানং দুক্খং দোমনস্সং পটিসংৰেদযতি. লূখং দেন্তি, নো পণীতং; তেন ভিক্খু ন সন্দীযতি; সো ন ততোনিদানং দুক্খং দোমনস্সং পটিসংৰেদযতি. দন্ধং দেন্তি, নো সীঘং; তেন ভিক্খু ন সন্দীযতি; সো ন ততোনিদানং দুক্খং দোমনস্সং পটিসংৰেদযতি. অসক্কচ্চং দেন্তি, নো সক্কচ্চং; তেন ভিক্খু ন সন্দীযতি; সো ন ততোনিদানং দুক্খং দোমনস্সং পটিসংৰেদযতি. এৰরূপো খো, ভিক্খৰে, ভিক্খু অরহতি কুলূপকো হোতুং.

‘‘কস্সপো, ভিক্খৰে, এৰংচিত্তো কুলানি উপসঙ্কমতি – ‘তং কুতেত্থ লব্ভা পরকুলেসু – দেন্তুযেৰ মে, মা নাদংসু; বহুকঞ্ঞেৰ মে দেন্তু, মা থোকং; পণীতঞ্ঞেৰ মে দেন্তু, মা লূখং; সীঘঞ্ঞেৰ মে দেন্তু, মা দন্ধং; সক্কচ্চঞ্ঞেৰ মে দেন্তু, মা অসক্কচ্চ’ন্তি. তস্স চে, ভিক্খৰে, কস্সপস্স এৰংচিত্তস্স কুলানি উপসঙ্কমতো ন দেন্তি; তেন কস্সপো ন সন্দীযতি; সো ন ততোনিদানং দুক্খং দোমনস্সং পটিসংৰেদযতি. থোকং দেন্তি, নো বহুকং; তেন কস্সপো ন সন্দীযতি; সো ন ততোনিদানং দুক্খং দোমনস্সং পটিসংৰেদযতি. লূখং দেন্তি ¶ , নো পণীতং; তেন কস্সপো ন সন্দীযতি; সো ন ততোনিদানং দুক্খং দোমনস্সং পটিসংৰেদযতি. দন্ধং দেন্তি, নো সীঘং; তেন কস্সপো ন সন্দীযতি; সো ন ততোনিদানং দুক্খং দোমনস্সং পটিসংৰেদযতি. অসক্কচ্চং দেন্তি, নো সক্কচ্চং; তেন কস্সপো ন সন্দীযতি ¶ ; সো ন ততোনিদানং দুক্খং দোমনস্সং পটিসংৰেদযতি. কস্সপেন ৰা হি ৰো, ভিক্খৰে, ওৰদিস্সামি যো ৰা পনস্স কস্সপসদিসো. ওৰদিতেহি চ পন ৰো তথত্তায পটিপজ্জিতব্ব’’ন্তি. চতুত্থং.

৫. জিণ্ণসুত্তং

১৪৮. এৰং ¶ ¶ মে সুতং…পে… রাজগহে ৰেল়ুৰনে. অথ খো আযস্মা মহাকস্সপো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং মহাকস্সপং ভগৰা এতদৰোচ – ‘‘জিণ্ণোসি দানি ত্ৰং, কস্সপ, গরুকানি চ তে ইমানি সাণানি পংসুকূলানি নিব্বসনানি. তস্মাতিহ ত্ৰং, কস্সপ, গহপতানি [গহপতিকানি (সী.)] চেৰ চীৰরানি ধারেহি, নিমন্তনানি চ ভুঞ্জাহি, মম চ সন্তিকে ৰিহরাহী’’তি.

‘‘অহং খো, ভন্তে, দীঘরত্তং আরঞ্ঞিকো চেৰ আরঞ্ঞিকত্তস্স চ ৰণ্ণৰাদী, পিণ্ডপাতিকো চেৰ পিণ্ডপাতিকত্তস্স চ ৰণ্ণৰাদী, পংসুকূলিকো চেৰ পংসুকূলিকত্তস্স চ ৰণ্ণৰাদী, তেচীৰরিকো চেৰ তেচীৰরিকত্তস্স চ ৰণ্ণৰাদী, অপ্পিচ্ছো চেৰ অপ্পিচ্ছতায চ ৰণ্ণৰাদী, সন্তুট্ঠো চেৰ সন্তুট্ঠিযা চ ৰণ্ণৰাদী, পৰিৰিত্তো চেৰ পৰিৰেকস্স চ ৰণ্ণৰাদী, অসংসট্ঠো চেৰ অসংসগ্গস্স চ ৰণ্ণৰাদী, আরদ্ধৰীরিযো চেৰ ৰীরিযারম্ভস্স [ৰীরিযারব্ভস্স (ক.)] চ ৰণ্ণৰাদী’’তি.

‘‘কিং [কং (ক.)] পন ত্ৰং, কস্সপ, অত্থৰসং সম্পস্সমানো দীঘরত্তং আরঞ্ঞিকো চেৰ আরঞ্ঞিকত্তস্স চ ৰণ্ণৰাদী, পিণ্ডপাতিকো চেৰ…পে… পংসুকূলিকো চেৰ… তেচীৰরিকো চেৰ… অপ্পিচ্ছো চেৰ… সন্তুট্ঠো চেৰ… পৰিৰিত্তো চেৰ… অসংসট্ঠো চেৰ… আরদ্ধৰীরিযো চেৰ ৰীরিযারম্ভস্স চ ৰণ্ণৰাদী’’তি?

‘‘দ্ৰে ¶ ¶ খ্ৰাহং, ভন্তে, অত্থৰসে সম্পস্সমানো দীঘরত্তং আরঞ্ঞিকো চেৰ আরঞ্ঞিকত্তস্স চ ৰণ্ণৰাদী, পিণ্ডপাতিকো ¶ চেৰ…পে… পংসুকূলিকো চেৰ… তেচীৰরিকো চেৰ… অপ্পিচ্ছো চেৰ… সন্তুট্ঠো চেৰ… পৰিৰিত্তো চেৰ… অসংসট্ঠো চেৰ… আরদ্ধৰীরিযো চেৰ ৰীরিযারম্ভস্স চ ৰণ্ণৰাদী. অত্তনো চ দিট্ঠধম্মসুখৰিহারং সম্পস্সমানো, পচ্ছিমঞ্চ জনতং অনুকম্পমানো – ‘অপ্পেৰ নাম পচ্ছিমা জনতা দিট্ঠানুগতিং আপজ্জেয্যুং’ [আপজ্জেয্য (সী. স্যা. কং.)]. ‘যে কির তে অহেসুং বুদ্ধানুবুদ্ধসাৰকা তে দীঘরত্তং আরঞ্ঞিকা চেৰ অহেসুং আরঞ্ঞিকত্তস্স চ ৰণ্ণৰাদিনো…পে… পিণ্ডপাতিকা চেৰ অহেসুং ¶ …পে… পংসুকূলিকা চেৰ অহেসুং… তেচীৰরিকা চেৰ অহেসুং… অপ্পিচ্ছা চেৰ অহেসুং… সন্তুট্ঠা চেৰ অহেসুং… পৰিৰিত্তা চেৰ অহেসুং… অসংসট্ঠা চেৰ অহেসুং… আরদ্ধৰীরিযা চেৰ অহেসুং ৰীরিযারম্ভস্স চ ৰণ্ণৰাদিনো’তি. তে তথত্তায পটিপজ্জিস্সন্তি, তেসং তং ভৰিস্সতি দীঘরত্তং হিতায সুখায.

‘‘ইমে খ্ৰাহং, ভন্তে, দ্ৰে অত্থৰসে সম্পস্সমানো দীঘরত্তং আরঞ্ঞিকো চেৰ আরঞ্ঞিকত্তস্স চ ৰণ্ণৰাদী, পিণ্ডপাতিকো চেৰ…পে… পংসুকূলিকো চেৰ… তেচীৰরিকো চেৰ… অপ্পিচ্ছো চেৰ… সন্তুট্ঠো চেৰ… পৰিৰিত্তো চেৰ… অসংসট্ঠো চেৰ… আরদ্ধৰীরিযো চেৰ ৰীরিযারম্ভস্স চ ৰণ্ণৰাদী’’তি.

‘‘সাধু সাধু, কস্সপ. বহুজনহিতায কির ত্ৰং, কস্সপ, পটিপন্নো ¶ বহুজনসুখায লোকানুকম্পায অত্থায হিতায সুখায দেৰমনুস্সানং. তস্মাতিহ ত্ৰং, কস্সপ, সাণানি চেৰ পংসুকূলানি ধারেহি নিব্বসনানি, পিণ্ডায চ চরাহি, অরঞ্ঞে চ ৰিহরাহী’’তি. পঞ্চমং.

৬. ওৰাদসুত্তং

১৪৯. রাজগহে ৰেল়ুৰনে. অথ খো আযস্মা মহাকস্সপো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং মহাকস্সপং ভগৰা এতদৰোচ – ‘‘ওৰদ, কস্সপ, ভিক্খূ; করোহি, কস্সপ, ভিক্খূনং ধম্মিং কথং. অহং ৰা, কস্সপ ¶ , ভিক্খূ ওৰদেয্যং ত্ৰং ৰা; অহং ৰা ভিক্খূনং ধম্মিং কথং করেয্যং ত্ৰং ৰা’’তি.

‘‘দুব্বচা ¶ খো, ভন্তে, এতরহি ভিক্খূ, দোৰচস্সকরণেহি ধম্মেহি সমন্নাগতা, অক্খমা, অপ্পদক্খিণগ্গাহিনো অনুসাসনিং. ইধাহং, ভন্তে, অদ্দসং ভণ্ডঞ্চ [ভণ্ডুঞ্চ (সী.)] নাম ভিক্খুং আনন্দস্স সদ্ধিৰিহারিং অভিজিকঞ্চ [আভিঞ্জিকঞ্চ (সী. ক.), আভিজ্জিকঞ্চ (স্যা. কং.)] নাম ভিক্খুং অনুরুদ্ধস্স সদ্ধিৰিহারিং অঞ্ঞমঞ্ঞং সুতেন অচ্চাৰদন্তে – ‘এহি, ভিক্খু, কো বহুতরং ভাসিস্সতি, কো সুন্দরতরং ভাসিস্সতি, কো চিরতরং ভাসিস্সতী’’’তি.

অথ ¶ খো ভগৰা অঞ্ঞতরং ভিক্খুং আমন্তেসি – ‘‘এহি ত্ৰং, ভিক্খু, মম ৰচনেন ভণ্ডঞ্চ ভিক্খুং আনন্দস্স সদ্ধিৰিহারিং অভিজিকঞ্চ ভিক্খুং অনুরুদ্ধস্স সদ্ধিৰিহারিং আমন্তেহি – ‘সত্থা আযস্মন্তে আমন্তেতী’’’তি. ‘‘এৰং, ভন্তে’’তি খো সো ভিক্খু ভগৰতো পটিস্সুত্ৰা যেন তে ভিক্খূ তেনুপসঙ্কমি; উপসঙ্কমিত্ৰা তে ভিক্খূ ¶ এতদৰোচ – ‘‘সত্থা আযস্মন্তে আমন্তেতী’’তি.

‘‘এৰমাৰুসো’’তি খো তে ভিক্খূ তস্স ভিক্খুনো পটিস্সুত্ৰা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্নে খো তে ভিক্খূ ভগৰা এতদৰোচ – ‘‘সচ্চং কির তুম্হে, ভিক্খৰে, অঞ্ঞমঞ্ঞং সুতেন অচ্চাৰদথ – ‘এহি, ভিক্খু, কো বহুতরং ভাসিস্সতি, কো সুন্দরতরং ভাসিস্সতি, কো চিরতরং ভাসিস্সতী’’’তি? ‘‘এৰং, ভন্তে’’. ‘‘কিং নু খো মে তুম্হে, ভিক্খৰে, এৰং ধম্মং দেসিতং আজানাথ – ‘এথ তুম্হে, ভিক্খৰে, অঞ্ঞমঞ্ঞং সুতেন অচ্চাৰদথ – এহি, ভিক্খু, কো বহুতরং ভাসিস্সতি, কো সুন্দরতরং ভাসিস্সতি, কো চিরতরং ভাসিস্সতী’’’তি? ‘‘নো ¶ হেতং, ভন্তে’’. ‘‘নো চে কির মে তুম্হে, ভিক্খৰে, এৰং ধম্মং দেসিতং আজানাথ, অথ কিং চরহি তুম্হে, মোঘপুরিসা, কিং জানন্তা কিং পস্সন্তা এৰং স্ৰাক্খাতে ধম্মৰিনযে পব্বজিতা সমানা অঞ্ঞমঞ্ঞং সুতেন অচ্চাৰদথ – ‘এহি, ভিক্খু, কো বহুতরং ভাসিস্সতি, কো সুন্দরতরং ভাসিস্সতি, কো চিরতরং ভাসিস্সতী’’’তি.

অথ খো তে ভিক্খূ ভগৰতো পাদেসু সিরসা নিপতিত্ৰা ভগৰন্তং এতদৰোচুং – ‘‘অচ্চযো নো, ভন্তে, অচ্চগমা, যথাবালে যথামূল়্হে যথাঅকুসলে [যথা বালে যথা মূল়্হে যথা অকুসলে (পী.), যথাবালং যথামূল়্হং যথাঅকুসলং (?)], যে মযং এৰং স্ৰাক্খাতে ধম্মৰিনযে পব্বজিতা সমানা অঞ্ঞমঞ্ঞং সুতেন অচ্চাৰদিম্হ – ‘এহি, ভিক্খু, কো বহুতরং ভাসিস্সতি ¶ , কো সুন্দরতরং ভাসিস্সতি, কো চিরতরং ভাসিস্সতী’তি. তেসং ¶ নো, ভন্তে, ভগৰা অচ্চযং অচ্চযতো পটিগ্গণ্হাতু আযতিং সংৰরাযা’’তি.

‘‘তগ্ঘ তুম্হে, ভিক্খৰে, অচ্চযো অচ্চগমা যথাবালে যথামূল়্হে যথাঅকুসলে, যে তুম্হে এৰং স্ৰাক্খাতে ধম্মৰিনযে পব্বজিতা সমানা অঞ্ঞমঞ্ঞং সুতেন অচ্চাৰদিত্থ – ‘এহি, ভিক্খু, কো বহুতরং ভাসিস্সতি, কো ¶ সুন্দরতরং ভাসিস্সতি, কো চিরতরং ভাসিস্সতী’তি. যতো চ খো তুম্হে, ভিক্খৰে, অচ্চযং অচ্চযতো দিস্ৰা যথাধম্মং পটিকরোথ, তং ৰো মযং [মযং অচ্চযং (সী.)] পটিগ্গণ্হাম. ৰুদ্ধি হেসা, ভিক্খৰে, অরিযস্স ৰিনযে যো অচ্চযং অচ্চযতো দিস্ৰা যথাধম্মং পটিকরোতি আযতিঞ্চ সংৰরং আপজ্জতী’’তি. ছট্ঠং.

৭. দুতিযওৰাদসুত্তং

১৫০. রাজগহে ৰিহরতি ৰেল়ুৰনে [সাৰত্থি, তত্র-এতদৰোচ (সী.)]. অথ খো আযস্মা মহাকস্সপো যেন ভগৰা তেনুপসঙ্কমি…পে… একমন্তং নিসিন্নং খো আযস্মন্তং মহাকস্সপং ভগৰা এতদৰোচ – ‘‘ওৰদ, কস্সপ, ভিক্খূ; করোহি, কস্সপ, ভিক্খূনং ধম্মিং কথং. অহং ৰা, কস্সপ ¶ , ভিক্খূ ওৰদেয্যং ত্ৰং ৰা; অহং ৰা ভিক্খূনং ধম্মিং কথং করেয্যং ত্ৰং ৰা’’তি.

‘‘দুব্বচা খো, ভন্তে, এতরহি ভিক্খূ, দোৰচস্সকরণেহি ধম্মেহি সমন্নাগতা অক্খমা অপ্পদক্খিণগ্গাহিনো অনুসাসনিং. যস্স কস্সচি, ভন্তে, সদ্ধা নত্থি কুসলেসু ধম্মেসু, হিরী [হিরি (সব্বত্থ)] নত্থি কুসলেসু ধম্মেসু, ওত্তপ্পং নত্থি কুসলেসু ধম্মেসু, ৰীরিযং নত্থি কুসলেসু ধম্মেসু, পঞ্ঞা নত্থি কুসলেসু ধম্মেসু, তস্স যা ¶ রত্তি ৰা দিৰসো ৰা আগচ্ছতি [আগচ্ছন্তি (সী.)], হানিযেৰ পাটিকঙ্খা কুসলেসু ধম্মেসু, নো ৰুদ্ধি.

‘‘সেয্যথাপি, ভন্তে, কাল়পক্খে চন্দস্স যা রত্তি ৰা দিৰসো ৰা আগচ্ছতি, হাযতেৰ ৰণ্ণেন, হাযতি মণ্ডলেন, হাযতি আভায, হাযতি আরোহপরিণাহেন. এৰমেৰ খো, ভন্তে, যস্স কস্সচি সদ্ধা নত্থি কুসলেসু ধম্মেসু…পে… হিরী নত্থি… ওত্তপ্পং নত্থি ¶ … ৰীরিযং নত্থি… পঞ্ঞা নত্থি… কুসলেসু ধম্মেসু তস্স যা রত্তি ৰা দিৰসো ৰা আগচ্ছতি, হানিযেৰ পাটিকঙ্খা কুসলেসু ধম্মেসু, নো ৰুদ্ধি.

‘‘‘অস্সদ্ধো পুরিসপুগ্গলো’তি, ভন্তে, পরিহানমেতং; ‘অহিরিকো পুরিসপুগ্গলো’তি, ভন্তে, পরিহানমেতং; ‘অনোত্তপ্পী পুরিসপুগ্গলো’তি, ভন্তে, পরিহানমেতং; ‘কুসীতো পুরিসপুগ্গলো’তি, ভন্তে, পরিহানমেতং; ‘দুপ্পঞ্ঞো পুরিসপুগ্গলো’তি, ভন্তে, পরিহানমেতং; ‘কোধনো ¶ পুরিসপুগ্গলো’তি, ভন্তে, পরিহানমেতং; ‘উপনাহী পুরিসপুগ্গলো’তি, ভন্তে, পরিহানমেতং; ‘ন সন্তি ভিক্খূ ওৰাদকা’তি, ভন্তে, পরিহানমেতং.

‘‘যস্স কস্সচি, ভন্তে, সদ্ধা অত্থি কুসলেসু ধম্মেসু, হিরী অত্থি কুসলেসু ধম্মেসু, ওত্তপ্পং অত্থি কুসলেসু ধম্মেসু, ৰীরিযং অত্থি কুসলেসু ধম্মেসু, পঞ্ঞা অত্থি কুসলেসু ধম্মেসু, তস্স যা রত্তি ৰা দিৰসো ৰা আগচ্ছতি, ৰুদ্ধিযেৰ পাটিকঙ্খা কুসলেসু ধম্মেসু, নো পরিহানি.

‘‘সেয্যথাপি, ভন্তে, জুণ্হপক্খে চন্দস্স যা রত্তি ৰা দিৰসো ৰা আগচ্ছতি, ৰড্ঢতেৰ ৰণ্ণেন, ৰড্ঢতি মণ্ডলেন ¶ , ৰড্ঢতি আভায, ৰড্ঢতি আরোহপরিণাহেন. এৰমেৰ ¶ খো, ভন্তে, যস্স কস্সচি সদ্ধা অত্থি কুসলেসু ধম্মেসু… হিরী অত্থি…পে… ওত্তপ্পং অত্থি… ৰীরিযং অত্থি… পঞ্ঞা অত্থি কুসলেসু ধম্মেসু তস্স যা রত্তি ৰা দিৰসো ৰা আগচ্ছতি, ৰুদ্ধিযেৰ পাটিকঙ্খা কুসলেসু ধম্মেসু, নো পরিহানি.

‘‘‘সদ্ধো পুরিসপুগ্গলো’তি, ভন্তে, অপরিহানমেতং; ‘হিরিমা পুরিসপুগ্গলো’তি, ভন্তে, অপরিহানমেতং; ‘ওত্তপ্পী পুরিসপুগ্গলো’তি, ভন্তে, অপরিহানমেতং; ‘আরদ্ধৰীরিযো পুরিসপুগ্গলো’তি, ভন্তে, অপরিহানমেতং; ‘পঞ্ঞৰা পুরিসপুগ্গলো’তি, ভন্তে, অপরিহানমেতং; ‘অক্কোধনো পুরিসপুগ্গলো’তি, ভন্তে, অপরিহানমেতং; ‘অনুপনাহী পুরিসপুগ্গলো’তি, ভন্তে, অপরিহানমেতং; ‘সন্তি ভিক্খূ ওৰাদকা’তি, ভন্তে, অপরিহানমেত’’ন্তি.

‘‘সাধু সাধু, কস্সপ. যস্স কস্সচি, কস্সপ, সদ্ধা নত্থি কুসলেসু ধম্মেসু…পে… হিরী ¶ নত্থি… ওত্তপ্পং নত্থি… ৰীরিযং নত্থি… পঞ্ঞা নত্থি কুসলেসু ধম্মেসু তস্স যা রত্তি ৰা দিৰসো ৰা আগচ্ছতি, হানিযেৰ পাটিকঙ্খা কুসলেসু ধম্মেসু, নো ৰুদ্ধি.

‘‘সেয্যথাপি, কস্সপ, কাল়পক্খে চন্দস্স যা রত্তি ৰা দিৰসো ৰা আগচ্ছতি, হাযতেৰ ৰণ্ণেন…পে… হাযতি আরোহপরিণাহেন. এৰমেৰ খো, কস্সপ, যস্স কস্সচি সদ্ধা নত্থি কুসলেসু ধম্মেসু…পে… হিরী নত্থি… ওত্তপ্পং নত্থি… ৰীরিযং নত্থি… পঞ্ঞা নত্থি কুসলেসু ধম্মেসু তস্স যা রত্তি ৰা দিৰসো ৰা আগচ্ছতি, হানিযেৰ পাটিকঙ্খা কুসলেসু ধম্মেসু, নো ৰুদ্ধি. ‘অস্সদ্ধো ¶ পুরিসপুগ্গলো’তি, কস্সপ, পরিহানমেতং ¶ ; অহিরিকো…পে… অনোত্তপ্পী… কুসীতো… দুপ্পঞ্ঞো… কোধনো… ‘উপনাহী পুরিসপুগ্গলো’তি, কস্সপ, পরিহানমেতং; ‘ন সন্তি ভিক্খূ ওৰাদকা’তি, কস্সপ, পরিহানমেতং.

‘‘যস্স কস্সচি, কস্সপ, সদ্ধা অত্থি কুসলেসু ধম্মেসু…পে… হিরী অত্থি… ওত্তপ্পং অত্থি… ৰীরিযং অত্থি… পঞ্ঞা অত্থি কুসলেসু ধম্মেসু তস্স যা রত্তি ৰা দিৰসো ৰা আগচ্ছতি, ৰুদ্ধিযেৰ পাটিকঙ্খা কুসলেসু ধম্মেসু, নো পরিহানি.

‘‘সেয্যথাপি, কস্সপ, জুণ্হপক্খে চন্দস্স যা রত্তি ৰা দিৰসো ¶ ৰা আগচ্ছতি, ৰড্ঢতেৰ ৰণ্ণেন, ৰড্ঢতি মণ্ডলেন, ৰড্ঢতি আভায, ৰড্ঢতি আরোহপরিণাহেন. এৰমেৰ খো, কস্সপ, যস্স কস্সচি সদ্ধা অত্থি কুসলেসু ধম্মেসু হিরী অত্থি… ওত্তপ্পং অত্থি… ৰীরিযং অত্থি… পঞ্ঞা অত্থি কুসলেসু ধম্মেসু তস্স যা রত্তি ৰা দিৰসো ৰা আগচ্ছতি, ৰুদ্ধিযেৰ পাটিকঙ্খা কুসলেসু ধম্মেসু, নো পরিহানি.

‘‘‘সদ্ধো পুরিসপুগ্গলো’তি, কস্সপ, অপরিহানমেতং; হিরিমা…পে… ওত্তপ্পী… আরদ্ধৰীরিযো… পঞ্ঞৰা… অক্কোধনো… ‘অনুপনাহী পুরিসপুগ্গলো’তি, কস্সপ, অপরিহানমেতং; ‘সন্তি ভিক্খূ ওৰাদকা’তি, কস্সপ, অপরিহানমেত’’ন্তি. সত্তমং.

৮. ততিযওৰাদসুত্তং

১৫১. রাজগহে কলন্দকনিৰাপে [সাৰত্থি, আরামে (সী.)]. অথ খো আযস্মা মহাকস্সপো যেন ভগৰা তেনুপসঙ্কমি ¶ ; উপসঙ্কমিত্ৰা ভগৰন্তং ¶ অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং মহাকস্সপং ভগৰা এতদৰোচ – ‘‘ওৰদ, কস্সপ, ভিক্খূ; করোহি, কস্সপ, ভিক্খূনং ধম্মিং কথং. অহং ৰা, কস্সপ, ভিক্খূনং ওৰদেয্যং ত্ৰং ৰা; অহং ৰা ভিক্খূনং ধম্মিং কথং করেয্যং ত্ৰং ৰা’’তি.

‘‘দুব্বচা খো, ভন্তে, এতরহি ভিক্খূ, দোৰচস্সকরণেহি ধম্মেহি সমন্নাগতা, অক্খমা, অপ্পদক্খিণগ্গাহিনো অনুসাসনী’’ন্তি. ‘‘তথা হি পন, কস্সপ, পুব্বে থেরা ভিক্খূ আরঞ্ঞিকা চেৰ অহেসুং আরঞ্ঞিকত্তস্স চ ৰণ্ণৰাদিনো, পিণ্ডপাতিকা চেৰ অহেসুং পিণ্ডপাতিকত্তস্স চ ৰণ্ণৰাদিনো ¶ , পংসুকূলিকা চেৰ অহেসুং পংসুকূলিকত্তস্স চ ৰণ্ণৰাদিনো, তেচীৰরিকা চেৰ অহেসুং তেচীৰরিকত্তস্স চ ৰণ্ণৰাদিনো, অপ্পিচ্ছা চেৰ অহেসুং অপ্পিচ্ছতায চ ৰণ্ণৰাদিনো, সন্তুট্ঠা চেৰ অহেসুং সন্তুট্ঠিযা চ ৰণ্ণৰাদিনো, পৰিৰিত্তা চেৰ অহেসুং পৰিৰেকস্স চ ৰণ্ণৰাদিনো, অসংসট্ঠা চেৰ অহেসুং ¶ অসংসগ্গস্স চ ৰণ্ণৰাদিনো, আরদ্ধৰীরিযা চেৰ অহেসুং ৰীরিযারম্ভস্স চ ৰণ্ণৰাদিনো.

‘‘তত্র যো হোতি ভিক্খু আরঞ্ঞিকো চেৰ আরঞ্ঞিকত্তস্স চ ৰণ্ণৰাদী, পিণ্ডপাতিকো চেৰ পিণ্ডপাতিকত্তস্স চ ৰণ্ণৰাদী, পংসুকূলিকো চেৰ পংসুকূলিকত্তস্স চ ৰণ্ণৰাদী, তেচীৰরিকো চেৰ তেচীৰরিকত্তস্স চ ৰণ্ণৰাদী, অপ্পিচ্ছো চেৰ অপ্পিচ্ছতায চ ৰণ্ণৰাদী, সন্তুট্ঠো চেৰ সন্তুট্ঠিযা চ ৰণ্ণৰাদী, পৰিৰিত্তো চেৰ পৰিৰেকস্স চ ৰণ্ণৰাদী, অসংসট্ঠো ¶ চেৰ অসংসগ্গস্স চ ৰণ্ণৰাদী, আরদ্ধৰীরিযো চেৰ ৰীরিযারম্ভস্স চ ৰণ্ণৰাদী, তং থেরা ভিক্খূ আসনেন নিমন্তেন্তি – ‘এহি, ভিক্খু, কো নামাযং ভিক্খু, ভদ্দকো ৰতাযং ভিক্খু, সিক্খাকামো ৰতাযং ভিক্খু; এহি, ভিক্খু, ইদং আসনং নিসীদাহী’’’তি.

‘‘তত্র, কস্সপ, নৰানং ভিক্খূনং এৰং হোতি – ‘যো কির সো হোতি ভিক্খু আরঞ্ঞিকো চেৰ আরঞ্ঞিকত্তস্স চ ৰণ্ণৰাদী, পিণ্ডপাতিকো চেৰ…পে… পংসুকূলিকো চেৰ… তেচীৰরিকো চেৰ… অপ্পিচ্ছো চেৰ… সন্তুট্ঠো চেৰ… পৰিৰিত্তো চেৰ… অসংসট্ঠো চেৰ… আরদ্ধৰীরিযো চেৰ ৰীরিযারম্ভস্স চ ৰণ্ণৰাদী, তং থেরা ভিক্খূ আসনেন নিমন্তেন্তি – এহি, ভিক্খু, কো নামাযং ভিক্খু, ভদ্দকো ৰতাযং ভিক্খু, সিক্খাকামো ৰতাযং ¶ ভিক্খু; এহি, ভিক্খু, ইদং আসনং নিসীদাহী’তি. তে তথত্তায পটিপজ্জন্তি; তেসং তং হোতি দীঘরত্তং হিতায সুখায.

‘‘এতরহি পন, কস্সপ, থেরা ভিক্খূ ন চেৰ আরঞ্ঞিকা ন চ আরঞ্ঞিকত্তস্স ৰণ্ণৰাদিনো, ন চেৰ পিণ্ডপাতিকা ন চ পিণ্ডপাতিকত্তস্স ৰণ্ণৰাদিনো, ন চেৰ পংসুকূলিকা ন চ পংসুকূলিকত্তস্স ৰণ্ণৰাদিনো, ন চেৰ তেচীৰরিকা ন চ তেচীৰরিকত্তস্স ৰণ্ণৰাদিনো, ন চেৰ অপ্পিচ্ছা ন চ অপ্পিচ্ছতায ৰণ্ণৰাদিনো, ন চেৰ সন্তুট্ঠা ন চ সন্তুট্ঠিযা ৰণ্ণৰাদিনো, ন চেৰ পৰিৰিত্তা ন চ পৰিৰেকস্স ৰণ্ণৰাদিনো, ন চেৰ অসংসট্ঠা ন চ অসংসগ্গস্স ৰণ্ণৰাদিনো ¶ , ন চেৰ আরদ্ধৰীরিযা ন ¶ চ ৰীরিযারম্ভস্স ৰণ্ণৰাদিনো.

‘‘তত্র ¶ যো হোতি ভিক্খু ঞাতো যসস্সী লাভী চীৰর-পিণ্ডপাত-সেনাসনগিলানপ্পচ্চযভেসজ্জপরিক্খারানং তং থেরা ভিক্খূ আসনেন নিমন্তেন্তি – ‘এহি, ভিক্খু, কো নামাযং ভিক্খু, ভদ্দকো ৰতাযং ভিক্খু, সব্রহ্মচারিকামো ৰতাযং ভিক্খু; এহি, ভিক্খু, ইদং আসনং নিসীদাহী’’’তি.

‘‘তত্র, কস্সপ, নৰানং ভিক্খূনং এৰং হোতি – ‘যো কির সো হোতি ভিক্খু ঞাতো যসস্সী লাভী চীৰর-পিণ্ডপাত-সেনাসন-গিলানপ্পচ্চযভেসজ্জপরিক্খারানং তং থেরা ভিক্খূ আসনেন নিমন্তেন্তি – এহি, ভিক্খু, কো নামাযং ভিক্খু, ভদ্দকো ৰতাযং ভিক্খু, সব্রহ্মচারিকামো ৰতাযং ভিক্খু; এহি, ভিক্খু, ইদং আসনং নিসীদাহী’তি. তে তথত্তায পটিপজ্জন্তি. তেসং তং হোতি দীঘরত্তং অহিতায দুক্খায. যঞ্হি তং, কস্সপ, সম্মা ৰদমানো ৰদেয্য – ‘উপদ্দুতা ব্রহ্মচারী ব্রহ্মচারূপদ্দৰেন অভিপত্থনা [অভিভৰনা (সী.)] ব্রহ্মচারী ব্রহ্মচারিঅভিপত্থনেনা’তি [ব্রহ্মচারিঅভিভৰনেনাতি (সী.)], এতরহি তং, কস্সপ, সম্মা ৰদমানো ৰদেয্য – ‘উপদ্দুতা ব্রহ্মচারী ব্রহ্মচারূপদ্দৰেন অভিপত্থনা ব্রহ্মচারী ব্রহ্মচারিঅভিপত্থনেনা’’’তি. অট্ঠমং.

৯. ঝানাভিঞ্ঞসুত্তং

১৫২. সাৰত্থিযং ৰিহরতি…পে… ‘‘অহং, ভিক্খৰে, যাৰদেৰ আকঙ্খামি ৰিৰিচ্চেৰ কামেহি ¶ ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরামি. কস্সপোপি ¶ , ভিক্খৰে, যাৰদেৰ আকঙ্খতি ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি’’.

‘‘অহং ¶ , ভিক্খৰে, যাৰদেৰ আকঙ্খামি ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরামি. কস্সপোপি, ভিক্খৰে, যাৰদেৰ আকঙ্খতি ৰিতক্কৰিচারানং ৰূপসমা…পে… দুতিযং ঝানং উপসম্পজ্জ ৰিহরতি.

‘‘অহং, ভিক্খৰে, যাৰদেৰ আকঙ্খামি পীতিযা চ ৰিরাগা উপেক্খকো চ ৰিহরামি সতো চ সম্পজানো সুখঞ্চ কাযেন পটিসংৰেদেমি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরামি. কস্সপোপি, ভিক্খৰে, যাৰদেৰ আকঙ্খতি পীতিযা ¶ চ ৰিরাগা উপেক্খকো চ ৰিহরতি সতো চ সম্পজানো, সুখঞ্চ কাযেন পটিসংৰেদেতি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরতি.

‘‘অহং, ভিক্খৰে, যাৰদেৰ আকঙ্খামি সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরামি. কস্সপোপি, ভিক্খৰে, যাৰদেৰ আকঙ্খতি সুখস্স চ পহানা …পে… চতুত্থং ঝানং উপসম্পজ্জ ৰিহরতি.

‘‘অহং, ভিক্খৰে, যাৰদেৰ আকঙ্খামি সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা অনন্তো আকাসোতি আকাসানঞ্চাযতনং উপসম্পজ্জ ৰিহরামি. কস্সপোপি ¶ , ভিক্খৰে, যাৰদেৰ আকঙ্খতি সব্বসো রূপসঞ্ঞানং সমতিক্কমা…পে… আকাসানঞ্চাযতনং উপসম্পজ্জ ৰিহরতি.

‘‘অহং, ভিক্খৰে, যাৰদেৰ আকঙ্খামি সব্বসো আকাসানঞ্চাযতনং সমতিক্কম্ম অনন্তং ¶ ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরামি. কস্সপোপি ¶ , ভিক্খৰে, যাৰদেৰ আকঙ্খতি সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরতি.

‘‘অহং, ভিক্খৰে, যাৰদেৰ আকঙ্খামি সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরামি. কস্সপোপি, ভিক্খৰে, যাৰদেৰ আকঙ্খতি…পে… আকিঞ্চঞ্ঞাযতনং উপসম্পজ্জ ৰিহরতি.

‘‘অহং, ভিক্খৰে, যাৰদেৰ আকঙ্খামি সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরামি. কস্সপোপি, ভিক্খৰে, যাৰদেৰ আকঙ্খতি…পে… নেৰসঞ্ঞানাসঞ্ঞাযতনং উপসম্পজ্জ ৰিহরতি.

‘‘অহং, ভিক্খৰে, যাৰদেৰ আকঙ্খামি সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরামি. কস্সপোপি, ভিক্খৰে…পে… সঞ্ঞাৰেদযিতনিরোধং উপসম্পজ্জ ৰিহরতি.

‘‘অহং ¶ , ভিক্খৰে, যাৰদেৰ আকঙ্খামি অনেকৰিহিতং ইদ্ধিৰিধং পচ্চনুভোমি ¶ – একোপি হুত্ৰা বহুধা হোমি, বহুধাপি হুত্ৰা একো হোমি; আৰিভাৰং, তিরোভাৰং, তিরোকুট্টং, তিরোপাকারং, তিরোপব্বতং, অসজ্জমানো গচ্ছামি, সেয্যথাপি আকাসে; পথৰিযাপি উম্মুজ্জনিমুজ্জং করোমি, সেয্যথাপি উদকে; উদকেপি অভিজ্জমানে গচ্ছামি, সেয্যথাপি পথৰিযং; আকাসেপি পল্লঙ্কেন কমামি, সেয্যথাপি পক্খী সকুণো; ইমেপি চন্দিমসূরিযে এৰংমহিদ্ধিকে এৰংমহানুভাৰে পাণিনা পরিমসামি পরিমজ্জামি; যাৰ ব্রহ্মলোকাপি কাযেন ৰসং ৰত্তেমি. কস্সপোপি, ভিক্খৰে, যাৰদেৰ আকঙ্খতি অনেকৰিহিতং ইদ্ধিৰিধং পচ্চনুভোতি…পে… যাৰ ব্রহ্মলোকাপি কাযেন ৰসং ৰত্তেতি.

‘‘অহং, ভিক্খৰে, যাৰদেৰ আকঙ্খামি দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণামি, দিব্বে চ মানুসে চ, যে দূরে সন্তিকে চ. কস্সপোপি, ভিক্খৰে, যাৰদেৰ আকঙ্খতি দিব্বায সোতধাতুযা…পে… দূরে সন্তিকে চ.

‘‘অহং ¶ ¶ , ভিক্খৰে, যাৰদেৰ আকঙ্খামি পরসত্তানং পরপুগ্গলানং চেতসা চেতো পরিচ্চ পজানামি – সরাগং ৰা চিত্তং সরাগং চিত্তন্তি পজানামি, ৰীতরাগং ৰা চিত্তং ৰীতরাগং চিত্তন্তি পজানামি, সদোসং ৰা চিত্তং…পে… ৰীতদোসং ৰা চিত্তং… সমোহং ৰা চিত্তং… ৰীতমোহং ৰা চিত্তং… সংখিত্তং ৰা চিত্তং… ৰিক্খিত্তং ৰা চিত্তং… মহগ্গতং ৰা চিত্তং… অমহগ্গতং ৰা চিত্তং… সউত্তরং ৰা চিত্তং… অনুত্তরং ৰা চিত্তং… সমাহিতং ৰা চিত্তং… অসমাহিতং ৰা চিত্তং… ৰিমুত্তং ৰা চিত্তং… অৰিমুত্তং ৰা চিত্তং অৰিমুত্তং চিত্তন্তি পজানামি. কস্সপোপি, ভিক্খৰে, যাৰদেৰ আকঙ্খতি পরসত্তানং ¶ পরপুগ্গলানং চেতসা চেতো পরিচ্চ পজানাতি – সরাগং ৰা চিত্তং সরাগং চিত্তন্তি পজানাতি…পে… অৰিমুত্তং ৰা চিত্তং অৰিমুত্তং চিত্তন্তি পজানাতি.

‘‘অহং, ভিক্খৰে, যাৰদেৰ আকঙ্খামি অনেকৰিহিতং পুব্বেনিৰাসং অনুস্সরামি, সেয্যথিদং – একম্পি জাতিং দ্ৰেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৰীসম্পি জাতিযো তিংসম্পি জাতিযো চত্তালীসম্পি জাতিযো পঞ্ঞাসম্পি জাতিযো জাতিসতম্পি জাতিসহস্সম্পি জাতিসতসহস্সম্পি, অনেকেপি সংৰট্টকপ্পে অনেকেপি ৰিৰট্টকপ্পে অনেকেপি সংৰট্টৰিৰট্টকপ্পে – ‘অমুত্রাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো ¶ , সো ততো চুতো অমুত্র উদপাদিং; তত্রাপাসিং এৰংনামো এৰংগোত্তো এৰংৰণ্ণো এৰমাহারো এৰংসুখদুক্খপ্পটিসংৰেদী এৰমাযুপরিযন্তো, সো ততো চুতো ইধূপপন্নো’তি. ইতি সাকারং সউদ্দেসং অনেকৰিহিতং পুব্বেনিৰাসং অনুস্সরামি. কস্সপোপি, ভিক্খৰে, যাৰদেৰ আকঙ্খতি অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং…পে… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি.

‘‘অহং, ভিক্খৰে, যাৰদেৰ আকঙ্খামি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সামি চৰমানে ¶ উপপজ্জমানে হীনে পণীতে সুৰণ্ণে দুব্বণ্ণে, সুগতে দুগ্গতে যথাকম্মূপগে সত্তে ¶ পজানামি – ‘ইমে ৰত, ভোন্তো, সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা; তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না, ইমে ৰা পন, ভোন্তো, সত্তা কাযসুচরিতেন সমন্নাগতা ৰচীসুচরিতেন ¶ সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা; তে কাযস্স ভেদা পরং মরণা সুগতিং সগ্গং লোকং উপপন্না’তি. ইতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সামি চৰমানে উপপজ্জমানে হীনে পণীতে সুৰণ্ণে দুব্বণ্ণে, সুগতে দুগ্গতে যথাকম্মূপগে সত্তে পজানামি. কস্সপোপি, ভিক্খৰে, যাৰদেৰ আকঙ্খতি দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে…পে… যথাকম্মূপগে সত্তে পজানাতি.

‘‘অহং, ভিক্খৰে, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরামি. কস্সপোপি, ভিক্খৰে, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি. নৰমং.

১০. উপস্সযসুত্তং

১৫৩. এৰং মে সুতং – একং সমযং আযস্মা মহাকস্সপো সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো আযস্মা ¶ আনন্দো পুব্বণ্হসমযং নিৰাসেত্ৰা ¶ পত্তচীৰরমাদায যেনাযস্মা ¶ মহাকস্সপো তেনুপসঙ্কমি; উপসঙ্কমিত্ৰা আযস্মন্তং মহাকস্সপং এতদৰোচ – ‘‘আযাম, ভন্তে কস্সপ, যেন অঞ্ঞতরো ভিক্খুনুপস্সযো তেনুপসঙ্কমিস্সামা’’তি. ‘‘গচ্ছ ত্ৰং, আৰুসো আনন্দ, বহুকিচ্চো ত্ৰং বহুকরণীযো’’তি. দুতিযম্পি খো আযস্মা আনন্দো আযস্মন্তং মহাকস্সপং এতদৰোচ – ‘‘আযাম, ভন্তে কস্সপ, যেন অঞ্ঞতরো ভিক্খুনুপস্সযো তেনুপসঙ্কমিস্সামা’’তি. ‘‘গচ্ছ ত্ৰং, আৰুসো আনন্দ, বহুকিচ্চো ত্ৰং বহুকরণীযো’’তি. ততিযম্পি খো আযস্মা আনন্দো আযস্মন্তং মহাকস্সপং এতদৰোচ – ‘‘আযাম, ভন্তে কস্সপ, যেন অঞ্ঞতরো ভিক্খুনুপস্সযো তেনুপসঙ্কমিস্সামা’’তি.

অথ খো আযস্মা মহাকস্সপো পুব্বণ্হসমযং নিৰাসেত্ৰা পত্তচীৰরমাদায আযস্মতা আনন্দেন পচ্ছাসমণেন যেন অঞ্ঞতরো ভিক্খুনুপস্সযো তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো সম্বহুলা ভিক্খুনিযো যেনাযস্মা মহাকস্সপো তেনুপসঙ্কমিংসু; উপসঙ্কমিত্ৰা ¶ আযস্মন্তং মহাকস্সপং অভিৰাদেত্ৰা একমন্তং নিসীদিংসু. একমন্তং নিসিন্না খো তা ভিক্খুনিযো আযস্মা মহাকস্সপো ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো আযস্মা মহাকস্সপো তা ভিক্খুনিযো ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা উট্ঠাযাসনা পক্কামি.

অথ ¶ খো থুল্লতিস্সা ভিক্খুনী অনত্তমনা অনত্তমনৰাচং নিচ্ছারেসি – ‘‘কিং পন অয্যো মহাকস্সপো, অয্যস্স আনন্দস্স ৰেদেহমুনিনো সম্মুখা ধম্মং ভাসিতব্বং মঞ্ঞতি? সেয্যথাপি নাম সূচিৰাণিজকো সূচিকারস্স ¶ সন্তিকে সূচিং ৰিক্কেতব্বং মঞ্ঞেয্য; এৰমেৰ অয্যো মহাকস্সপো অয্যস্স আনন্দস্স ৰেদেহমুনিনো সম্মুখা ধম্মং ভাসিতব্বং মঞ্ঞতী’’তি.

অস্সোসি খো আযস্মা মহাকস্সপো থুল্লতিস্সায ভিক্খুনিযা ইমং ৰাচং ভাসমানায. অথ খো আযস্মা মহাকস্সপো আযস্মন্তং আনন্দং এতদৰোচ – ‘‘কিং নু খো, আৰুসো আনন্দ, অহং সূচিৰাণিজকো, ত্ৰং সূচিকারো; উদাহু অহং সূচিকারো, ত্ৰং সূচিৰাণিজকো’’তি? ‘‘খম ¶ , ভন্তে কস্সপ, বালো মাতুগামো’’তি. ‘‘আগমেহি ত্ৰং, আৰুসো আনন্দ, মা তে সঙ্ঘো উত্তরি উপপরিক্খি’’.

‘‘তং কিং মঞ্ঞসি, আৰুসো আনন্দ, অপি নু ত্ৰং ভগৰতো সম্মুখা ভিক্খুসঙ্ঘে উপনীতো – ‘অহং, ভিক্খৰে, যাৰদেৰ আকঙ্খামি ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরামি. আনন্দোপি, ভিক্খৰে, যাৰদেৰ আকঙ্খতি ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতী’’’তি? ‘‘নো হেতং, ভন্তে’’.

‘‘অহং খো, আৰুসো, ভগৰতো সম্মুখা ভিক্খুসঙ্ঘে উপনীতো – ‘অহং, ভিক্খৰে, যাৰদেৰ আকঙ্খামি ৰিৰিচ্চেৰ কামেহি ¶ ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরামি. কস্সপোপি, ভিক্খৰে, যাৰদেৰ আকঙ্খতি ৰিৰিচ্চেৰ কামেহি ৰিৰিচ্চ অকুসলেহি ধম্মেহি…পে… পঠমং ঝানং উপসম্পজ্জ ৰিহরতী’তি…পে… ¶ . (নৰন্নং অনুপুব্বৰিহারসমাপত্তীনং পঞ্চন্নঞ্চ অভিঞ্ঞানং এৰং ৰিত্থারো ৰেদিতব্বো.)

‘‘তং ¶ ¶ কিং মঞ্ঞসি, আৰুসো আনন্দ, অপি নু ত্ৰং ভগৰতো সম্মুখা ভিক্খুসঙ্ঘে উপনীতো – ‘অহং, ভিক্খৰে, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরামি. আনন্দোপি, ভিক্খৰে, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’’তি? ‘‘নো হেতং, ভন্তে’’.

‘‘অহং খো, আৰুসো, ভগৰতো সম্মুখা ভিক্খুসঙ্ঘে উপনীতো – ‘অহং, ভিক্খৰে, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরামি. কস্সপোপি, ভিক্খৰে, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’’তি.

‘‘সত্তরতনং ৰা, আৰুসো, নাগং অড্ঢট্ঠমরতনং ৰা তালপত্তিকায ছাদেতব্বং মঞ্ঞেয্য, যো মে ছ অভিঞ্ঞা ছাদেতব্বং মঞ্ঞেয্যা’’তি.

চৰিত্থ চ পন থুল্লতিস্সা ভিক্খুনী ব্রহ্মচরিযম্হাতি. দসমং.

১১. চীৰরসুত্তং

১৫৪. একং ¶ ¶ সমযং আযস্মা মহাকস্সপো রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন আযস্মা আনন্দো দক্খিণগিরিস্মিং চারিকং চরতি মহতা ভিক্খুসঙ্ঘেন সদ্ধিং.

তেন খো পন সমযেন আযস্মতো আনন্দস্স তিংসমত্তা সদ্ধিৰিহারিনো ভিক্খূ সিক্খং পচ্চক্খায হীনাযাৰত্তা ভৰন্তি যেভুয্যেন কুমারভূতা. অথ ¶ খো আযস্মা আনন্দো দক্খিণগিরিস্মিং যথাভিরন্তং চারিকং চরিত্ৰা যেন রাজগহং ৰেল়ুৰনং কলন্দকনিৰাপো যেনাযস্মা মহাকস্সপো তেনুপসঙ্কমি; উপসঙ্কমিত্ৰা আযস্মন্তং মহাকস্সপং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং আনন্দং আযস্মা মহাকস্সপো ¶ এতদৰোচ – ‘‘কতি নু খো, আৰুসো আনন্দ, অত্থৰসে পটিচ্চ ভগৰতা কুলেসু তিকভোজনং পঞ্ঞত্ত’’ন্তি?

‘‘তযো খো, ভন্তে কস্সপ, অত্থৰসে পটিচ্চ ভগৰতা কুলেসু তিকভোজনং পঞ্ঞত্তং – দুম্মঙ্কূনং পুগ্গলানং নিগ্গহায পেসলানং ভিক্খূনং ফাসুৰিহারায, মা পাপিচ্ছা পক্খং নিস্সায সঙ্ঘং ভিন্দেয্যুং [ৰিনযপিটকে চূল়ৰগ্গে সংঘভেদকক্খন্ধকে ৰজিরবুদ্ধিযং অঞ্ঞথা সম্বন্ধো দস্সিতো], কুলানুদ্দযতায চ. ইমে খো, ভন্তে কস্সপ, তযো অত্থৰসে পটিচ্চ ভগৰতা কুলেসু তিকভোজনং পঞ্ঞত্ত’’ন্তি.

‘‘অথ কিঞ্চরহি ত্ৰং, আৰুসো আনন্দ, ইমেহি নৰেহি ভিক্খূহি ইন্দ্রিযেসু অগুত্তদ্ৰারেহি ভোজনে অমত্তঞ্ঞূহি জাগরিযং অননুযুত্তেহি সদ্ধিং চারিকং চরসি? সস্সঘাতং মঞ্ঞে চরসি, কুলূপঘাতং মঞ্ঞে চরসি. ওলুজ্জতি [উল্লুজ্জতি (সী. অট্ঠকথাসু চ)] খো তে, আৰুসো আনন্দ, পরিসা; পলুজ্জন্তি খো ¶ তে, আৰুসো, নৰপ্পাযা. ন ৰাযং কুমারকো মত্তমঞ্ঞাসী’’তি.

‘‘অপি মে, ভন্তে কস্সপ, সিরস্মিং পলিতানি জাতানি. অথ চ পন মযং অজ্জাপি আযস্মতো মহাকস্সপস্স কুমারকৰাদা ন মুচ্চামা’’তি. ‘‘তথা ¶ হি পন ত্ৰং, আৰুসো আনন্দ, ইমেহি নৰেহি ভিক্খূহি ইন্দ্রিযেসু অগুত্তদ্ৰারেহি ভোজনে অমত্তঞ্ঞূহি জাগরিযং অননুযুত্তেহি সদ্ধিং চারিকং চরসি, সস্সঘাতং মঞ্ঞে চরসি, কুলূপঘাতং মঞ্ঞে চরসি. ওলুজ্জতি ¶ খো তে, আৰুসো আনন্দ, পরিসা; পলুজ্জন্তি খো তে, আৰুসো, নৰপ্পাযা. [পলুজ্জতি খো তে আৰুসো আনন্দ পরিসা (ক. সী.)] ন ৰাযং কুমারকো মত্তমঞ্ঞাসী’’তি.

অস্সোসি খো থুল্লনন্দা ভিক্খুনী – ‘‘অয্যেন কির মহাকস্সপেন অয্যো আনন্দো ৰেদেহমুনি কুমারকৰাদেন অপসাদিতো’’তি.

অথ খো থুল্লনন্দা ভিক্খুনী অনত্তমনা অনত্তমনৰাচং নিচ্ছারেসি – ‘‘কিং পন অয্যো মহাকস্সপো অঞ্ঞতিত্থিযপুব্বো সমানো অয্যং আনন্দং ৰেদেহমুনিং কুমারকৰাদেন অপসাদেতব্বং মঞ্ঞতী’’তি! অস্সোসি খো আযস্মা মহাকস্সপো থুল্লনন্দায ভিক্খুনিযা ইমং ৰাচং ভাসমানায.

অথ ¶ খো আযস্মা মহাকস্সপো আযস্মন্তং আনন্দং এতদৰোচ – ‘‘তগ্ঘাৰুসো আনন্দ, থুল্লনন্দায ভিক্খুনিযা সহসা অপ্পটিসঙ্খা ৰাচা ভাসিতা. যত্ৰাহং, আৰুসো, কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজিতো, নাভিজানামি অঞ্ঞং সত্থারং উদ্দিসিতা [উদ্দিসিতুং (সী. পী. ক.)], অঞ্ঞত্র তেন ভগৰতা অরহতা ¶ সম্মাসম্বুদ্ধেন. পুব্বে মে, আৰুসো, অগারিকভূতস্স সতো এতদহোসি – ‘সম্বাধো ঘরাৰাসো রজাপথো [রজোপথো (সী.)], অব্ভোকাসো পব্বজ্জা. নযিদং সুকরং অগারং অজ্ঝাৰসতা একন্তপরিপুণ্ণং একন্তপরিসুদ্ধং সঙ্খলিখিতং ব্রহ্মচরিযং চরিতুং. যংনূনাহং কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজেয্য’ন্তি. সো খ্ৰাহং, আৰুসো, অপরেন সমযেন পটপিলোতিকানং ¶ সঙ্ঘাটিং কারেত্ৰা [করিত্ৰা (সী. স্যা. কং. পী.)] যে লোকে অরহন্তো তে উদ্দিস্স কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজিং.

সো এৰং পব্বজিতো সমানো অদ্ধানমগ্গপ্পটিপন্নো অদ্দসং ভগৰন্তং অন্তরা চ রাজগহং অন্তরা চ নাল়ন্দং বহুপুত্তে চেতিযে নিসিন্নং. দিস্ৰান মে এতদহোসি – ‘সত্থারঞ্চ ৰতাহং পস্সেয্যং, ভগৰন্তমেৰ পস্সেয্যং; সুগতঞ্চ ৰতাহং পস্সেয্যং, ভগৰন্তমেৰ পস্সেয্যং; সম্মাসম্বুদ্ধঞ্চ ৰতাহং পস্সেয্যং; ভগৰন্তমেৰ পস্সেয্য’ন্তি. সো খ্ৰাহং, আৰুসো, তত্থেৰ ভগৰতো পাদেসু সিরসা নিপতিত্ৰা ভগৰন্তং এতদৰোচং – ‘সত্থা মে, ভন্তে, ভগৰা, সাৰকোহমস্মি; সত্থা মে, ভন্তে, ভগৰা, সাৰকোহমস্মী’তি ¶ . এৰং ৰুত্তে মং, আৰুসো, ভগৰা এতদৰোচ – ‘যো খো, কস্সপ, এৰং সব্বচেতসা সমন্নাগতং সাৰকং অজানঞ্ঞেৰ ৰদেয্য জানামীতি, অপস্সঞ্ঞেৰ ৰদেয্য পস্সামীতি, মুদ্ধাপি তস্স ৰিপতেয্য. অহং খো পন, কস্সপ, জানঞ্ঞেৰ ৰদামি জানামীতি, পস্সঞ্ঞেৰ ¶ ৰদামি পস্সামী’তি.

তস্মাতিহ তে, কস্সপ, এৰং সিক্খিতব্বং – ‘তিব্বং মে হিরোত্তপ্পং পচ্চুপট্ঠিতং ভৰিস্সতি থেরেসু নৰেসু মজ্ঝিমেসূ’তি. এৰঞ্হি তে, কস্সপ, সিক্খিতব্বং.

তস্মাতিহ তে, কস্সপ, এৰং সিক্খিতব্বং – ‘যং কিঞ্চি ধম্মং সুণিস্সামি কুসলূপসংহিতং সব্বং তং অট্ঠিং কত্ৰা মনসি করিত্ৰা সব্বচেতসা সমন্নাহরিত্ৰা ওহিতসোতো ধম্মং সুণিস্সামী’তি. এৰঞ্হি তে, কস্সপ, সিক্খিতব্বং.

তস্মাতিহ ¶ তে, কস্সপ, এৰং সিক্খিতব্বং – ‘সাতসহগতা চ মে কাযগতাসতি ন ৰিজহিস্সতী’তি. এৰঞ্হি তে, কস্সপ, সিক্খিতব্বন্তি.

‘‘অথ খো মং, আৰুসো, ভগৰা ইমিনা ওৰাদেন ওৰদিত্ৰা উট্ঠাযাসনা পক্কামি. সত্তাহমেৰ ¶ খ্ৰাহং, আৰুসো, সরণো [সাণো (সী.)] রট্ঠপিণ্ডং ভুঞ্জিং’’. অট্ঠমিযা অঞ্ঞা উদপাদি.

‘‘অথ খো, আৰুসো, ভগৰা মগ্গা ওক্কম্ম যেন অঞ্ঞতরং রুক্খমূলং তেনুপসঙ্কমি. অথ খ্ৰাহং, আৰুসো, পটপিলোতিকানং সঙ্ঘাটিং চতুগ্গুণং পঞ্ঞপেত্ৰা ভগৰন্তং এতদৰোচং – ‘ইধ, ভন্তে, ভগৰা নিসীদতু, যং মমস্স দীঘরত্তং হিতায সুখাযা’তি. নিসীদি খো, আৰুসো, ভগৰা পঞ্ঞত্তে আসনে. নিসজ্জ খো মং, আৰুসো, ভগৰা এতদৰোচ – ‘মুদুকা খো ত্যাযং, কস্সপ, পটপিলোতিকানং সঙ্ঘাটী’তি. ‘পটিগ্গণ্হাতু মে, ভন্তে, ভগৰা পটপিলোতিকানং সঙ্ঘাটিং অনুকম্পং উপাদাযা’তি. ‘ধারেস্সসি পন মে ত্ৰং, কস্সপ, সাণানি পংসুকূলানি নিব্বসনানী’তি. ‘ধারেস্সামহং, ভন্তে, ভগৰতো সাণানি পংসুকূলানি নিব্বসনানী’তি. ‘‘সো ¶ খ্ৰাহং, আৰুসো, পটপিলোতিকানং সঙ্ঘাটিং ভগৰতো পাদাসিং. অহং পন ভগৰতো সাণানি পংসুকূলানি নিব্বসনানি পটিপজ্জিং’’.

‘‘যঞ্হি তং, আৰুসো, সম্মা ৰদমানো ৰদেয্য – ‘ভগৰতো পুত্তো ওরসো মুখতো জাতো ধম্মজো ধম্মনিম্মিতো ধম্মদাযাদো, পটিগ্গহিতানি ¶ [পটিগ্গহেতা (সী.)] সাণানি পংসুকূলানি নিব্বসনানী’তি, মমং তং সম্মা ৰদমানো ৰদেয্য – ‘ভগৰতো পুত্তো ওরসো মুখতো জাতো ধম্মজো ধম্মনিম্মিতো ধম্মদাযাদো, পটিগ্গহিতানি সাণানি পংসুকূলানি নিব্বসনানী’’’তি.

‘‘অহং খো, আৰুসো, যাৰদেৰ আকঙ্খামি ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং ¶ পীতিসুখং পঠমং ঝানং উপসম্পজ্জ ৰিহরামি. অহং খো, আৰুসো, যাৰদে আকঙ্খামি…পে… (নৰন্নং অনুপুব্বৰিহারসমাপত্তিনং পঞ্চন্নঞ্চ অভিঞ্ঞানং এৰং ৰিত্থারো ৰেদিতব্বো) ¶ .

‘‘অহং খো, আৰুসো, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরামি; সত্তরতনং ৰা, আৰুসো, নাগং অড্ঢট্ঠমরতনং ৰা তালপত্তিকায ছাদেতব্বং মঞ্ঞেয্য, যো মে ছ অভিঞ্ঞা ছাদেতব্বং মঞ্ঞেয্যা’’তি.

চৰিত্থ চ পন থুল্লনন্দা ভিক্খুনী ব্রহ্মচরিযম্হাতি. একাদসমং.

১২. পরংমরণসুত্তং

১৫৫. একং সমযং আযস্মা চ মহাকস্সপো আযস্মা চ সারিপুত্তো ¶ বারাণসিযং ৰিহরন্তি ইসিপতনে মিগদাযে. অথ খো আযস্মা সারিপুত্তো সাযন্হসমযং পটিসল্লানা ৰুট্ঠিতো যেনাযস্মা মহাকস্সপো তেনুপসঙ্কমি; উপসঙ্কমিত্ৰা আযস্মতা মহাকস্সপেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা সারিপুত্তো আযস্মন্তং মহাকস্সপং এতদৰোচ – ‘‘কিং নু খো, আৰুসো কস্সপ, হোতি তথাগতো পরং মরণা’’তি? ‘‘অব্যাকতং খো এতং, আৰুসো, ভগৰতা – ‘হোতি তথাগতো পরং মরণা’’’তি. ‘‘কিং পনাৰুসো, ন হোতি তথাগতো পরং মরণা’’তি? ‘‘এৰম্পি খো, আৰুসো, অব্যাকতং ভগৰতা – ‘ন হোতি তথাগতো পরং মরণা’’’তি. ‘‘কিং ¶ নু খো, আৰুসো, হোতি চ ন চ হোতি তথাগতো পরং মরণা’’তি? ‘‘অব্যাকতং খো এতং, আৰুসো, ভগৰতা – ‘হোতি চ ন চ হোতি তথাগতো পরং মরণা’’’তি. ‘‘কিং পনাৰুসো, নেৰ হোতি, ন ন হোতি তথাগতো পরং মরণা’’তি? ‘‘এৰম্পি খো, আৰুসো, অব্যাকতং ভগৰতা – ‘নেৰ হোতি ন ন হোতি তথাগতো ¶ পরং মরণা’’’তি. ‘‘কস্মা চেতং, আৰুসো ¶ , অব্যাকতং ভগৰতা’’তি? ‘‘ন হেতং, আৰুসো, অত্থসংহিতং নাদিব্রহ্মচরিযকং ন নিব্বিদায ন ৰিরাগায ন নিরোধায ন উপসমায ন অভিঞ্ঞায ন সম্বোধায ন নিব্বানায সংৰত্ততি. তস্মা তং অব্যাকতং ভগৰতা’’তি.

‘‘অথ কিঞ্চরহাৰুসো, ব্যাকতং ভগৰতা’’তি? ‘‘ইদং ‘দুক্খ’ন্তি খো ¶ , আৰুসো, ব্যাকতং ভগৰতা; অযং ‘দুক্খসমুদযো’তি ব্যাকতং ভগৰতা; অযং ‘দুক্খনিরোধো’তি ব্যাকতং ভগৰতা; অযং ‘দুক্খনিরোধগামিনী পটিপদা’তি ব্যাকতং ভগৰতা’’তি. ‘‘কস্মা চেতং, আৰুসো, ব্যাকতং ভগৰতা’’তি? ‘‘এতঞ্হি, আৰুসো, অত্থসংহিতং এতং আদিব্রহ্মচরিযকং এতং নিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততি. তস্মা তং ব্যাকতং ভগৰতা’’তি. দ্ৰাদসমং.

১৩. সদ্ধম্মপ্পতিরূপকসুত্তং

১৫৬. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো আযস্মা মহাকস্সপো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং ¶ নিসিন্নো খো আযস্মা মহাকস্সপো ভগৰন্তং এতদৰোচ – ‘‘কো নু খো, ভন্তে, হেতু কো পচ্চযো, যেন পুব্বে অপ্পতরানি চেৰ সিক্খাপদানি অহেসুং বহুতরা চ ভিক্খূ অঞ্ঞায সণ্ঠহিংসু? কো পন, ভন্তে, হেতু কো পচ্চযো, যেনেতরহি বহুতরানি চেৰ সিক্খাপদানি অপ্পতরা চ ভিক্খূ অঞ্ঞায সণ্ঠহন্তী’’তি? ‘‘এৰঞ্চেতং, কস্সপ, হোতি সত্তেসু হাযমানেসু সদ্ধম্মে অন্তরধাযমানে, বহুতরানি চেৰ সিক্খাপদানি হোন্তি অপ্পতরা চ ভিক্খূ অঞ্ঞায সণ্ঠহন্তি. ন তাৰ, কস্সপ, সদ্ধম্মস্স অন্তরধানং হোতি যাৰ ন সদ্ধম্মপ্পতিরূপকং লোকে উপ্পজ্জতি. যতো চ খো, কস্সপ, সদ্ধম্মপ্পতিরূপকং লোকে উপ্পজ্জতি, অথ সদ্ধম্মস্স অন্তরধানং হোতি’’.

‘‘সেয্যথাপি, কস্সপ, ন তাৰ জাতরূপস্স অন্তরধানং ¶ হোতি যাৰ ন জাতরূপপ্পতিরূপকং লোকে উপ্পজ্জতি. যতো চ খো, কস্সপ, জাতরূপপ্পতিরূপকং লোকে উপ্পজ্জতি, অথ জাতরূপস্স অন্তরধানং হোতি. এৰমেৰ খো, কস্সপ, ন তাৰ সদ্ধম্মস্স অন্তরধানং হোতি যাৰ ¶ ¶ ন সদ্ধম্মপ্পতিরূপকং লোকে উপ্পজ্জতি. যতো চ খো, কস্সপ, সদ্ধম্মপ্পতিরূপকং লোকে উপ্পজ্জতি, অথ সদ্ধম্মস্স অন্তরধানং হোতি.

‘‘ন খো, কস্সপ, পথৰীধাতু সদ্ধম্মং অন্তরধাপেতি, ন আপোধাতু সদ্ধম্মং অন্তরধাপেতি, ন তেজোধাতু সদ্ধম্মং অন্তরধাপেতি, ন ৰাযোধাতু সদ্ধম্মং অন্তরধাপেতি; অথ খো ইধেৰ তে উপ্পজ্জন্তি মোঘপুরিসা যে ইমং সদ্ধম্মং অন্তরধাপেন্তি. সেয্যথাপি, কস্সপ, নাৰা আদিকেনেৰ ওপিলৰতি; ন খো, কস্সপ, এৰং সদ্ধম্মস্স অন্তরধানং হোতি.

‘‘পঞ্চ খোমে, কস্সপ, ওক্কমনিযা ধম্মা সদ্ধম্মস্স সম্মোসায অন্তরধানায সংৰত্তন্তি. কতমে পঞ্চ? ইধ, কস্সপ, ভিক্খূ ভিক্খুনিযো উপাসকা উপাসিকাযো সত্থরি অগারৰা ৰিহরন্তি অপ্পতিস্সা, ধম্মে অগারৰা ৰিহরন্তি অপ্পতিস্সা, সঙ্ঘে অগারৰা ৰিহরন্তি অপ্পতিস্সা, সিক্খায ¶ অগারৰা ৰিহরন্তি অপ্পতিস্সা, সমাধিস্মিং অগারৰা ৰিহরন্তি অপ্পতিস্সা – ইমে খো, কস্সপ, পঞ্চ ওক্কমনিযা ধম্মা সদ্ধম্মস্স সম্মোসায অন্তরধানায সংৰত্তন্তি.

‘‘পঞ্চ খোমে, কস্সপ, ধম্মা সদ্ধম্মস্স ঠিতিযা অসম্মোসায ¶ অনন্তরধানায সংৰত্তন্তি. কতমে পঞ্চ? ইধ, কস্সপ, ভিক্খূ ভিক্খুনিযো উপাসকা উপাসিকাযো সত্থরি সগারৰা ৰিহরন্তি সপ্পতিস্সা, ধম্মে সগারৰা ৰিহরন্তি সপ্পতিস্সা, সঙ্ঘে সগারৰা ৰিহরন্তি সপ্পতিস্সা, সিক্খায সগারৰা ৰিহরন্তি সপ্পতিস্সা, সমাধিস্মিং সগারৰা ৰিহরন্তি সপ্পতিস্সা – ইমে খো, কস্সপ, পঞ্চ ধম্মা সদ্ধম্মস্স ঠিতিযা অসম্মোসায অনন্তরধানায সংৰত্তন্তী’’তি. তেরসমং.

কস্সপসংযুত্তং সমত্তং.

তস্সুদ্দানং –

সন্তুট্ঠঞ্চ অনোত্তপ্পী, চন্দূপমং কুলূপকং;

জিণ্ণং তযো চ ওৰাদা, ঝানাভিঞ্ঞা উপস্সযং;

চীৰরং পরংমরণং, সদ্ধম্মপ্পতিরূপকন্তি.

৬. লাভসক্কারসংযুত্তং

১. পঠমৰগ্গো

১. দারুণসুত্তং

১৫৭. এৰং ¶ ¶ ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা ¶ এতদৰোচ –

‘‘দারুণো, ভিক্খৰে, লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায. তস্মাতিহ, ভিক্খৰে, এৰং সিক্খিতব্বং – ‘উপ্পন্নং লাভসক্কারসিলোকং পজহিস্সাম, ন চ নো উপ্পন্নো লাভসক্কারসিলোকো চিত্তং পরিযাদায ঠস্সতী’তি. এৰঞ্হি ৰো, ভিক্খৰে, সিক্খিতব্ব’’ন্তি. পঠমং.

২. বল়িসসুত্তং

১৫৮. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায. সেয্যথাপি, ভিক্খৰে, বাল়িসিকো আমিসগতং বল়িসং গম্ভীরে উদকরহদে পক্খিপেয্য. তমেনং অঞ্ঞতরো আমিসচক্খু মচ্ছো গিলেয্য. এৰঞ্হি সো, ভিক্খৰে, মচ্ছো গিলবল়িসো বাল়িসিকস্স অনযং আপন্নো ব্যসনং আপন্নো যথাকামকরণীযো বাল়িসিকস্স’’.

‘‘বাল়িসিকোতি খো, ভিক্খৰে, মারস্সেতং পাপিমতো অধিৰচনং. বল়িসন্তি খো, ভিক্খৰে ¶ , লাভসক্কারসিলোকস্সেতং অধিৰচনং. যো হি কোচি ¶ , ভিক্খৰে, ভিক্খু উপ্পন্নং লাভসক্কারসিলোকং অস্সাদেতি নিকামেতি, অযং ৰুচ্চতি, ভিক্খৰে, ভিক্খু গিলবল়িসো মারস্স অনযং আপন্নো ব্যসনং আপন্নো যথাকামকরণীযো পাপিমতো. এৰং দারুণো খো, ভিক্খৰে ¶ , লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায. তস্মাতিহ, ভিক্খৰে, এৰং সিক্খিতব্বং – ‘উপ্পন্নং লাভসক্কারসিলোকং পজহিস্সাম, ন চ নো উপ্পন্নো লাভসক্কারসিলোকো চিত্তং পরিযাদায ঠস্সতী’তি. এৰঞ্হি ৰো, ভিক্খৰে, সিক্খিতব্ব’’ন্তি. দুতিযং.

৩. কুম্মসুত্তং

১৫৯. সাৰত্থিযং ৰিহরতি…পে… ‘‘দারুণো ¶ , ভিক্খৰে, লাভসক্কারসিলোকো…পে… অধিগমায. ভূতপুব্বং, ভিক্খৰে, অঞ্ঞতরস্মিং উদকরহদে মহাকুম্মকুলং চিরনিৰাসি অহোসি. অথ খো, ভিক্খৰে, অঞ্ঞতরো কুম্মো অঞ্ঞতরং কুম্মং এতদৰোচ – ‘মা খো ত্ৰং, তাত কুম্ম, এতং পদেসং অগমাসী’তি. অগমাসি খো, ভিক্খৰে, সো কুম্মো তং পদেসং. তমেনং লুদ্দো পপতায ৰিজ্ঝি. অথ খো, ভিক্খৰে, সো কুম্মো যেন সো কুম্মো তেনুপসঙ্কমি. অদ্দসা খো, ভিক্খৰে, সো কুম্মো তং কুম্মং দূরতোৰ আগচ্ছন্তং. দিস্ৰান তং কুম্মং এতদৰোচ – ‘কচ্চি ত্ৰং, তাত কুম্ম, ন তং পদেসং অগমাসী’তি? ‘অগমাসিং খ্ৰাহং, তাত কুম্ম, তং পদেস’ন্তি. ‘কচ্চি ¶ পনাসি, তাত কুম্ম, অক্খতো অনুপহতো’তি? ‘অক্খতো খোম্হি, তাত কুম্ম, অনুপহতো, অত্থি চ মে ইদং সুত্তকং পিট্ঠিতো পিট্ঠিতো অনুবন্ধ’ন্তি. ‘তগ্ঘসি, তাত কুম্ম, খতো, তগ্ঘ উপহতো. এতেন হি তে, তাত কুম্ম, সুত্তকেন পিতরো চ পিতামহা চ অনযং আপন্না ব্যসনং আপন্না. গচ্ছ দানি ত্ৰং, তাত কুম্ম, ন দানি ত্ৰং অম্হাক’’’ন্তি.

‘‘লুদ্দোতি খো, ভিক্খৰে, মারস্সেতং পাপিমতো অধিৰচনং. পপতাতি খো, ভিক্খৰে, লাভসক্কারসিলোকস্সেতং অধিৰচনং. সুত্তকন্তি খো, ভিক্খৰে, নন্দিরাগস্সেতং অধিৰচনং. যো হি কোচি, ভিক্খৰে, ভিক্খু উপ্পন্নং লাভসক্কারসিলোকং অস্সাদেতি নিকামেতি – অযং ৰুচ্চতি, ভিক্খৰে, ভিক্খু গিদ্ধো পপতায [ভিক্খু পপতায (স্যা. কং.), ভিক্খু ৰিদ্ধো পপতায (?)] অনযং আপন্নো ব্যসনং আপন্নো যথাকামকরণীযো ¶ পাপিমতো. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ¶ ৰো, ভিক্খৰে, সিক্খিতব্ব’’ন্তি. ততিযং.

৪. দীঘলোমিকসুত্তং

১৬০. সাৰত্থিযং ¶ ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… অধিগমায. সেয্যথাপি, ভিক্খৰে, দীঘলোমিকা এল়কা কণ্টকগহনং পৰিসেয্য. সা তত্র তত্র সজ্জেয্য, তত্র তত্র গয্হেয্য [গচ্ছেয্য (সী.), গণ্হেয্য (স্যা. কং. পী. ক.)], তত্র তত্র বজ্ঝেয্য, তত্র তত্র অনযব্যসনং আপজ্জেয্য. ‘এৰমেৰ খো, ভিক্খৰে, ইধেকচ্চো ভিক্খু লাভসক্কারসিলোকেন অভিভূতো পরিযাদিণ্ণচিত্তো পুব্বণ্হসমযং নিৰাসেত্ৰা পত্তচীৰরমাদায গামং ৰা নিগমং ৰা ¶ পিণ্ডায পৰিসতি. সো তত্র তত্র সজ্জতি, তত্র তত্র গয্হতি, তত্র তত্র বজ্ঝতি, তত্র তত্র অনযব্যসনং আপজ্জতি. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’’ন্তি. চতুত্থং.

৫. মীল়্হকসুত্তং

১৬১. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… অধিগমায. সেয্যথাপি, ভিক্খৰে, মীল়্হকা গূথাদী গূথপূরা পুণ্ণা গূথস্স. পুরতো চস্স মহাগূথপুঞ্জো. সা তেন অঞ্ঞা মীল়্হকা অতিমঞ্ঞেয্য – ‘অহম্হি গূথাদী গূথপূরা পুণ্ণা গূথস্স, পুরতো চ ম্যাযং মহাগূথপুঞ্জো’তি. এৰমেৰ ¶ খো, ভিক্খৰে, ইধেকচ্চো ভিক্খু লাভসক্কারসিলোকেন অভিভূতো পরিযাদিণ্ণচিত্তো পুব্বণ্হসমযং নিৰাসেত্ৰা পত্তচীৰরমাদায গামং ৰা নিগমং ৰা পিণ্ডায পৰিসতি. সো তত্থ ভুত্তাৰী চ হোতি যাৰদত্থো, নিমন্তিতো চ স্ৰাতনায, পিণ্ডপাতো চস্স পূরো. সো আরামং গন্ত্ৰা ভিক্খুগণস্স মজ্ঝে ৰিকত্থতি – ‘ভুত্তাৰী চম্হি যাৰদত্থো, নিমন্তিতো চম্হি স্ৰাতনায, পিণ্ডপাতো চ ম্যাযং পূরো, লাভী চম্হি চীৰর-পিণ্ডপাত-সেনাসন-গিলানপ্পচ্চয-ভেসজ্জপরিক্খারানং, ইমে পনঞ্ঞে ভিক্খূ অপ্পপুঞ্ঞা অপ্পেসক্খা ন লাভিনো চীৰর-পিণ্ডপাতসেনাসন-গিলানপ্পচ্চয-ভেসজ্জ-পরিক্খারান’ন্তি. সো তেন লাভসক্কারসিলোকেন অভিভূতো পরিযাদিণ্ণচিত্তো অঞ্ঞে পেসলে ভিক্খূ অতিমঞ্ঞতি. তঞ্হি তস্স, ভিক্খৰে ¶ , মোঘপুরিসস্স ¶ হোতি দীঘরত্তং অহিতায দুক্খায. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো ভিক্খৰে, সিক্খিতব্ব’’ন্তি. পঞ্চমং.

৬. অসনিসুত্তং

১৬২. সাৰত্থিযং ¶ ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… অধিগমায. [উপরি ততিযৰগ্গে ততিযচতুত্থসুত্তেসু ‘‘মা চ খো ত্ৰং তাত সেখং… অনুপাপুণাতূ’’তি আগতং. তেন নযেন ইধাপি অত্থো গহেতব্বো. এত্থ হি কিং সদ্দেন পটিক্খেপত্থোপি সক্কা ঞাতুং, যথা ‘‘সযং অভিঞ্ঞায কমুদ্দিসেয্য’’ন্তি. তস্মা কং… আগচ্ছতূতি এত্থ কমপি… মা আগচ্ছতূতি চ, কং সেখং… অনুপাপুণাতূতি এত্থ কমপি সেখং… মা পাপুণাতূতি চ অত্থো ৰেদিতব্বো. অট্ঠকথাটীকাসু চ অযমেৰত্থো ঞাপিতো] কং, ভিক্খৰে, অসনিৰিচক্কং আগচ্ছতু [উপরি ততিযৰগ্গে তরিযচতুত্থসুত্তেসু ‘‘মা চ খো ত্ৰং তাত সেখং… অনুপাপুণাতূ’’তি আগতং. তেন নযেন ইধাপি অত্থো গহেতব্বো. এত্থ হি কিং সদ্দেন পটিক্খেপত্থোপি সক্কা ঞাতুং, যথা ‘‘সযং অভিঞ্ঞায কমুদ্দিসেয্য’’ন্তি. তস্মা কং… আগচ্ছতূতি এত্থ কমপি… মা আগচ্ছতূতিচ, তং সেখং… অনুপাপুণাতূতি এত্থ কমপি সেখং… মা পাপুণাতূতি চ অত্থো ৰেদিতব্বো. অট্ঠকথাটীকাসু চ অযমেৰত্থো ঞাপিতো], সেখং [অসনিৰিচক্কং, তং সেখং (পী. ক.), অসনিৰিচক্কং, সেখং (স্যা. কং.), অসনিৰিচক্কং আগচ্ছতু, কং সেখং (?)] অপ্পত্তমানসং লাভসক্কারসিলোকো অনুপাপুণাতু’’ [অনুপাপুণাতি (পী. ক.)].

‘‘অসনিৰিচক্কন্তি খো, ভিক্খৰে, লাভসক্কারসিলোকস্সেতং অধিৰচনং. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. ছট্ঠং.

৭. দিদ্ধসুত্তং

১৬৩. সাৰত্থিযং ৰিহরতি…পে… ‘‘দারুণো ¶ , ভিক্খৰে, লাভসক্কারসিলোকো…পে… অধিগমায. কং, ভিক্খৰে, দিদ্ধগতেন ৰিসল্লেন সল্লেন [দিট্ঠিগতেন ৰিসল্লেন (ক. সী.), দিট্ঠিগতেন সল্লেন (স্যা. কং.), দিট্ঠিগতেন ৰিসল্লেন সল্লেন (ক.), দিট্ঠগতেন ৰিসল্লেন সল্লেন (পী.)] ৰিজ্ঝতু, সেখং [ৰিজ্ঝতু, তং সেখং (সী.), ৰিজ্ঝতি, তং সেখং (পী. ক.)] অপ্পত্তমানসং লাভসক্কারসিলোকো অনুপাপুণাতু’’ [অনুপাপুণাতি (পী. ক.)].

‘‘সল্লন্তি খো, ভিক্খৰে, লাভসক্কারসিলোকস্সেতং অধিৰচনং. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. সত্তমং.

৮. সিঙ্গালসুত্তং

১৬৪. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… অধিগমায. অস্সুত্থ নো তুম্হে, ভিক্খৰে, রত্তিযা পচ্চূসসমযং ¶ জরসিঙ্গালস্স [সিঙ্গালস্স (ক.), জরসিগালস্স (সী. স্যা. কং.)] ৰস্সমানস্সা’’তি? ‘‘এৰং, ভন্তে’’. ‘‘এসো খো, ভিক্খৰে, জরসিঙ্গালো উক্কণ্ডকেন ¶ [উক্কণ্ডকেন (সী.), উক্কণ্ণকেন (স্যা. কং. পী.)] নাম রোগজাতেন ফুট্ঠো নেৰ বিলগতো রমতি, ন রুক্খমূলগতো রমতি, ন অজ্ঝোকাসগতো রমতি; যেন ¶ যেন গচ্ছতি, যত্থ যত্থ তিট্ঠতি, যত্থ যত্থ নিসীদতি, যত্থ যত্থ নিপজ্জতি; তত্থ তত্থ অনযব্যসনং আপজ্জতি. এৰমেৰ খো, ভিক্খৰে, ইধেকচ্চো ভিক্খু লাভসক্কারসিলোকেন অভিভূতো পরিযাদিণ্ণচিত্তো নেৰ সুঞ্ঞাগারগতো রমতি, ন রুক্খমূলগতো রমতি, ন অজ্ঝোকাসগতো রমতি; যেন যেন গচ্ছতি, যত্থ যত্থ তিট্ঠতি, যত্থ যত্থ নিসীদতি, যত্থ যত্থ নিপজ্জতি; তত্থ তত্থ অনযব্যসনং আপজ্জতি. এৰং ¶ দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. অট্ঠমং.

৯. ৰেরম্ভসুত্তং

১৬৫. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… অধিগমায. উপরি, ভিক্খৰে, আকাসে ৰেরম্ভা [ৰেরম্বা (সী. পী.)] নাম ৰাতা ৰাযন্তি. তত্থ যো পক্খী গচ্ছতি তমেনং ৰেরম্ভা ৰাতা খিপন্তি. তস্স ৰেরম্ভৰাতক্খিত্তস্স অঞ্ঞেনেৰ পাদা গচ্ছন্তি, অঞ্ঞেন পক্খা গচ্ছন্তি, অঞ্ঞেন সীসং গচ্ছতি, অঞ্ঞেন কাযো গচ্ছতি. এৰমেৰ খো, ভিক্খৰে, ইধেকচ্চো ভিক্খু লাভসক্কারসিলোকেন অভিভূতো পরিযাদিণ্ণচিত্তো পুব্বণ্হসমযং নিৰাসেত্ৰা পত্তচীৰরমাদায গামং ৰা নিগমং ৰা পিণ্ডায পৰিসতি অরক্খিতেনেৰ কাযেন অরক্খিতায ৰাচায অরক্খিতেন চিত্তেন, অনুপট্ঠিতায সতিযা, অসংৰুতেহি ইন্দ্রিযেহি. সো তত্থ ¶ পস্সতি মাতুগামং দুন্নিৰত্থং ৰা দুপ্পারুতং ৰা. তস্স মাতুগামং দিস্ৰা দুন্নিৰত্থং ৰা দুপ্পারুতং ৰা রাগো চিত্তং অনুদ্ধংসেতি. সো রাগানুদ্ধংসিতেন চিত্তেন সিক্খং পচ্চক্খায হীনাযাৰত্ততি. তস্স অঞ্ঞে চীৰরং হরন্তি, অঞ্ঞে পত্তং হরন্তি, অঞ্ঞে নিসীদনং হরন্তি, অঞ্ঞে সূচিঘরং হরন্তি, ৰেরম্ভৰাতক্খিত্তস্সেৰ সকুণস্স. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. নৰমং.

১০. সগাথকসুত্তং

১৬৬. সাৰত্থিযং ¶ ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… অধিগমায. ইধাহং, ভিক্খৰে, একচ্চং পুগ্গলং পস্সামি সক্কারেন ¶ অভিভূতং পরিযাদিণ্ণচিত্তং, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্নং. ইধ পনাহং, ভিক্খৰে ¶ , একচ্চং পুগ্গলং পস্সামি অসক্কারেন অভিভূতং পরিযাদিণ্ণচিত্তং, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্নং. ইধ পনাহং, ভিক্খৰে, একচ্চং পুগ্গলং পস্সামি সক্কারেন চ অসক্কারেন চ তদুভযেন অভিভূতং পরিযাদিণ্ণচিত্তং, কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্নং. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি.

ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘যস্স ¶ সক্করিযমানস্স, অসক্কারেন চূভযং;

সমাধি ন ৰিকম্পতি, অপ্পমাণৰিহারিনো [অপ্পমাদৰিহারিনো (পী. ক.) অপ্পমাণোতি হেত্থ ফলসমাধি, ন সতি].

‘‘তং ঝাযিনং সাততিকং, সুখুমং দিট্ঠিৰিপস্সকং;

উপাদানক্খযারামং, আহু সপ্পুরিসো ইতী’’তি. দসমং;

পঠমো ৰগ্গো.

তস্সুদ্দানং –

দারুণো বল়িসং কুম্মং, দীঘলোমি চ মীল়্হকং;

অসনি দিদ্ধং সিঙ্গালং, ৰেরম্ভেন সগাথকন্তি.

২. দুতিযৰগ্গো

১. সুৰণ্ণপাতিসুত্তং

১৬৭. সাৰত্থিযং ¶ ¶ ¶ ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… অধিগমায. ইধাহং, ভিক্খৰে, একচ্চং পুগ্গলং এৰং চেতসা চেতো পরিচ্চ পজানামি – ‘ন চাযমাযস্মা ¶ সুৰণ্ণপাতিযাপি রূপিযচুণ্ণপরিপূরায হেতু সম্পজানমুসা ভাসেয্যা’তি. তমেনং পস্সামি অপরেন সমযেন লাভসক্কারসিলোকেন অভিভূতং পরিযাদিণ্ণচিত্তং সম্পজানমুসা ভাসন্তং. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. পঠমং.

২. রূপিযপাতিসুত্তং

১৬৮. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… ইধাহং, ভিক্খৰে, একচ্চং পুগ্গলং এৰং চেতসা চেতো পরিচ্চ পজানামি – ‘ন চাযমাযস্মা রূপিযপাতিযাপি সুৰণ্ণচুণ্ণপরিপূরায হেতু সম্পজানমুসা ভাসেয্যা’তি. তমেনং পস্সামি অপরেন সমযেন লাভসক্কারসিলোকেন অভিভূতং পরিযাদিণ্ণচিত্তং সম্পজানমুসা ভাসন্তং. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. দুতিযং.

৩-১০. সুৰণ্ণনিক্খসুত্তাদিঅট্ঠকং

১৬৯. সাৰত্থিযং ৰিহরতি…পে… ‘‘ইধাহং ¶ , ভিক্খৰে, একচ্চং পুগ্গলং এৰং চেতসা চেতো পরিচ্চ পজানামি – ‘ন চাযমাযস্মা সুৰণ্ণনিক্খস্সাপি ¶ হেতু…পে… সুৰণ্ণনিক্খসতস্সাপি হেতু… সিঙ্গীনিক্খস্সাপি হেতু… সিঙ্গীনিক্খসতস্সাপি হেতু… পথৰিযাপি জাতরূপপরিপূরায হেতু… আমিসকিঞ্চিক্খহেতুপি… জীৰিতহেতুপি… জনপদকল্যাণিযাপি হেতু সম্পজানমুসা ভাসেয্যা’তি. তমেনং পস্সামি অপরেন সমযেন লাভসক্কারসিলোকেন অভিভূতং পরিযাদিণ্ণচিত্তং সম্পজানমুসা ভাসন্তং. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. দসমং.

দুতিযো ৰগ্গো.

তস্সুদ্দানং –

দ্ৰে ¶ ¶ পাতি দ্ৰে সুৰণ্ণা চ, সিঙ্গীহি অপরে দুৰে;

পথৰী কিঞ্চিক্খজীৰিতং, জনপদকল্যাণিযা দসাতি.

৩. ততিযৰগ্গো

১. মাতুগামসুত্তং

১৭০. সাৰত্থিযং ¶ ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… ন ¶ তস্স, ভিক্খৰে, মাতুগামো একো একস্স চিত্তং পরিযাদায তিট্ঠতি যস্স লাভসক্কারসিলোকো চিত্তং পরিযাদায তিট্ঠতি. এৰং দারুণো খো, ভিক্খৰে, লাভসক্কারসিলোকো …পে… এৰঞ্হি ৰো, ভিক্খৰে, সিক্খিতব্ব’’ন্তি. পঠমং.

২. কল্যাণীসুত্তং

১৭১. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… ন তস্স, ভিক্খৰে, জনপদকল্যাণী একা একস্স চিত্তং পরিযাদায তিট্ঠতি যস্স লাভসক্কারসিলোকো চিত্তং পরিযাদায তিট্ঠতি. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. দুতিযং.

৩. একপুত্তকসুত্তং

১৭২. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… সদ্ধা, ভিক্খৰে, উপাসিকা একপুত্তকং পিযং মনাপং এৰং সম্মা আযাচমানা আযাচেয্য – ‘তাদিসো, তাত, ভৰাহি যাদিসো চিত্তো চ গহপতি হত্থকো চ আল়ৰকো’তি. এসা, ভিক্খৰে ¶ , তুলা এতং পমাণং মম সাৰকানং উপাসকানং, যদিদং চিত্তো ¶ চ গহপতি হত্থকো চ আল়ৰকো. সচে খো ত্ৰং, তাত, অগারস্মা অনগারিযং পব্বজসি; তাদিসো, তাত, ভৰাহি যাদিসা সারিপুত্তমোগ্গল্লানাতি. এসা, ভিক্খৰে, তুলা এতং পমাণং মম সাৰকানং ভিক্খূনং, যদিদং সারিপুত্তমোগ্গলানা ¶ . মা চ খো ত্ৰং, তাত, সেখং অপ্পত্তমানসং লাভসক্কারসিলোকো অনুপাপুণাতূতি. তঞ্চে, ভিক্খৰে, ভিক্খুং ¶ সেখং অপ্পত্তমানসং লাভসক্কারসিলোকো অনুপাপুণাতি, সো তস্স হোতি অন্তরাযায. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. ততিযং.

৪. একধীতুসুত্তং

১৭৩. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো…পে… সদ্ধা ভিক্খৰে উপাসিকা একং ধীতরং পিযং মনাপং এৰং সম্মা আযাচমানা আযাচেয্য – ‘তাদিসা, অয্যে, ভৰাহি যাদিসা খুজ্জুত্তরা চ উপাসিকা ৰেল়ুকণ্ডকিযা [ৰেল়ুকণ্ডকী (সী. ছক্কঙ্গুত্তরেপি)] চ নন্দমাতা’তি. এসা, ভিক্খৰে, তুলা এতং পমাণং মম সাৰিকানং উপাসিকানং, যদিদং খুজ্জুত্তরা চ উপাসিকা ৰেল়ুকণ্ডকিযা চ নন্দমাতা. সচে খো ত্ৰং, অয্যে, অগারস্মা অনগারিযং পব্বজসি; তাদিসা, অয্যে, ভৰাহি যাদিসা খেমা চ ভিক্খুনী উপ্পলৰণ্ণা চাতি. এসা, ভিক্খৰে, তুলা এতং পমাণং মম সাৰিকানং ভিক্খুনীনং, যদিদং খেমা ¶ চ ভিক্খুনী উপ্পলৰণ্ণা চ. মা চ খো ত্ৰং, অয্যে, সেখং অপ্পত্তমানসং লাভসক্কারসিলোকো অনুপাপুণাতূতি. তং চে, ভিক্খৰে, ভিক্খুনিং সেখং অপ্পত্তমানসং লাভসক্কারসিলোকো অনুপাপুণাতি, সো তস্সা হোতি অন্তরাযায. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. চতুত্থং.

৫. সমণব্রাহ্মণসুত্তং

১৭৪. সাৰত্থিযং ৰিহরতি…পে… ‘‘যে ¶ হি কেচি, ভিক্খৰে, সমণা ৰা ব্রাহ্মণা ৰা লাভসক্কারসিলোকস্স অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানন্তি, ন মে তে, ভিক্খৰে, সমণা ৰা ব্রাহ্মণা ৰা সমণেসু ৰা সমণসম্মতা ব্রাহ্মণেসু ৰা ব্রাহ্মণসম্মতা, ন চ পন তে আযস্মন্তা সামঞ্ঞত্থং ৰা ব্রহ্মঞ্ঞত্থং ৰা দিট্ঠেৰ ধম্মে সযং অভিঞ্ঞা ¶ সচ্ছিকত্ৰা উপসম্পজ্জ ৰিহরন্তি. যে চ খো কেচি, ভিক্খৰে, সমণা ৰা ব্রাহ্মণা ৰা লাভসক্কারসিলোকস্স অস্সাদঞ্চ আদীনৰঞ্চ ¶ নিস্সরণঞ্চ যথাভূতং পজানন্তি, তে চ খো মে, ভিক্খৰে, সমণা ৰা ব্রাহ্মণা ৰা সমণেসু চেৰ সমণসম্মতা ব্রাহ্মণেসু চ ব্রাহ্মণসম্মতা, তে চ পনাযস্মন্তো সামঞ্ঞত্থঞ্চ ব্রহ্মঞ্ঞত্থঞ্চ দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. পঞ্চমং.

৬. দুতিযসমণব্রাহ্মণসুত্তং

১৭৫. সাৰত্থিযং ৰিহরতি…পে… ‘‘যে হি কেচি, ভিক্খৰে, সমণা ৰা ব্রাহ্মণা ৰা লাভসক্কারসিলোকস্স সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানন্তি…পে… পজানন্তি…পে… সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. ছট্ঠং.

৭. ততিযসমণব্রাহ্মণসুত্তং

১৭৬. সাৰত্থিযং ৰিহরতি…পে… ‘‘যে হি কেচি, ভিক্খৰে, সমণা ৰা ব্রাহ্মণা ¶ ৰা লাভসক্কারসিলোকং যথাভূতং নপ্পজানন্তি, লাভসক্কারসিলোকসমুদযং নপ্পজানন্তি, লাভসক্কারসিলোকনিরোধং নপ্পজানন্তি, লাভসক্কারসিলোকনিরোধগামিনিং পটিপদং নপ্পজানন্তি …পে… পজানন্তি…পে… সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. সত্তমং.

৮. ছৰিসুত্তং

১৭৭. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো. লাভসক্কারসিলোকো ¶ , ভিক্খৰে, ছৰিং ছিন্দতি, ছৰিং ছেত্ৰা চম্মং ছিন্দতি, চম্মং ছেত্ৰা মংসং ছিন্দতি, মংসং ছেত্ৰা ন্হারুং ছিন্দতি, ন্হারুং ছেত্ৰা অট্ঠিং ছিন্দতি, অট্ঠিং ছেত্ৰা অট্ঠিমিঞ্জং ¶ আহচ্চ তিট্ঠতি. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো ভিক্খৰে, সিক্খিতব্ব’’ন্তি. অট্ঠমং.

৯. রজ্জুসুত্তং

১৭৮. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো. লাভসক্কারসিলোকো, ভিক্খৰে, ছৰিং ছিন্দতি, ছৰিং ছেত্ৰা চম্মং ছিন্দতি, চম্মং ছেত্ৰা মংসং ছিন্দতি, মংসং ছেত্ৰা ন্হারুং ছিন্দতি, ন্হারুং ছেত্ৰা অট্ঠিং ছিন্দতি, অট্ঠিং ছেত্ৰা অট্ঠিমিঞ্জং আহচ্চ তিট্ঠতি’’.

‘‘সেয্যথাপি ¶ , ভিক্খৰে, বলৰা পুরিসো দল়্হায ৰাল়রজ্জুযা জঙ্ঘং ৰেঠেত্ৰা ঘংসেয্য. সা ছৰিং ছিন্দেয্য, ছৰিং ছেত্ৰা চম্মং ছিন্দেয্য, চম্মং ছেত্ৰা মংসং ছিন্দেয্য, মংসং ছেত্ৰা ন্হারুং ছিন্দেয্য, ন্হারুং ছেত্ৰা অট্ঠিং ছিন্দেয্য, অট্ঠিং ছেত্ৰা অট্ঠিমিঞ্জং আহচ্চ তিট্ঠেয্য. এৰমেৰ খো, ভিক্খৰে, লাভসক্কারসিলোকো ¶ ছৰিং ছিন্দতি, ছৰিং ছেত্ৰা চম্মং ছিন্দতি, চম্মং ছেত্ৰা মংসং ছিন্দতি, মংসং ছেত্ৰা ন্হারুং ছিন্দতি, ন্হারুং ছেত্ৰা অট্ঠিং ছিন্দতি, অট্ঠিং ছেত্ৰা অট্ঠিংমিঞ্জং আহচ্চ তিট্ঠতি. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. নৰমং.

১০. ভিক্খুসুত্তং

১৭৯. সাৰত্থিযং ৰিহরতি…পে… ‘‘যোপি ¶ সো, ভিক্খৰে, ভিক্খু অরহং খীণাসৰো তস্সপাহং লাভসক্কারসিলোকো অন্তরাযায ৰদামী’’তি. এৰং ৰুত্তে, আযস্মা আনন্দো ভগৰন্তং এতদৰোচ – ‘‘কিস্স পন, ভন্তে, খীণাসৰস্স ভিক্খুনো লাভসক্কারসিলোকো অন্তরাযাযা’’তি? ‘‘যা হিস্স সা, আনন্দ, অকুপ্পা চেতোৰিমুত্তি নাহং তস্সা লাভসক্কারসিলোকং অন্তরাযায ৰদামি. যে চ খ্ৰস্স, আনন্দ, অপ্পমত্তস্স আতাপিনো পহিতত্তস্স ৰিহরতো দিট্ঠধম্মসুখৰিহারা অধিগতা তেসাহমস্স লাভসক্কারসিলোকং অন্তরাযায ৰদামি. এৰং দারুণো খো, আনন্দ, লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায. তস্মাতিহানন্দ, এৰং সিক্খিতব্বং – ‘উপ্পন্নং ¶ লাভসক্কারসিলোকং পজহিস্সাম, ন চ নো উপ্পন্নো লাভসক্কারসিলোকো চিত্তং পরিযাদায ঠস্সতী’তি. এৰঞ্হি ৰো, আনন্দ, সিক্খিতব্ব’’ন্তি. দসমং.

ততিযো ৰগ্গো.

তস্সুদ্দানং –

মাতুগামো ¶ চ কল্যাণী, পুত্তো চ একধীতু চ;

সমণব্রাহ্মণা তীণি, ছৰি রজ্জু চ ভিক্খুনাতি.

৪. চতুত্থৰগ্গো

১. ভিন্দিসুত্তং

১৮০. সাৰত্থিযং ¶ ¶ ৰিহরতি…পে… ‘‘দারুণো, ভিক্খৰে, লাভসক্কারসিলোকো. লাভসক্কারসিলোকেন ¶ অভিভূতো পরিযাদিণ্ণচিত্তো, ভিক্খৰে, দেৰদত্তো সঙ্ঘং ভিন্দি. এৰং দারুণো খো, ভিক্খৰে, লাভসক্কারসিলোকো…পে… সিক্খিতব্ব’’ন্তি. পঠমং.

২. কুসলমূলসুত্তং

১৮১. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো. লাভসক্কারসিলোকেন অভিভূতস্স পরিযাদিণ্ণচিত্তস্স, ভিক্খৰে, দেৰদত্তস্স কুসলমূলং সমুচ্ছেদমগমা. এৰং দারুণো খো, ভিক্খৰে, লাভসক্কারসিলোকো…পে… সিক্খিতব্ব’’ন্তি. দুতিযং.

৩. কুসলধম্মসুত্তং

১৮২. সাৰত্থিযং ¶ ৰিহরতি…পে… ‘‘দারুণো, ভিক্খৰে, লাভসক্কারসিলোকো. লাভসক্কারসিলোকেন অভিভূতস্স পরিযাদিণ্ণচিত্তস্স, ভিক্খৰে, দেৰদত্তস্স কুসলো ধম্মো সমুচ্ছেদমগমা. এৰং দারুণো খো, ভিক্খৰে, লাভসক্কারসিলোকো…পে… সিক্খিতব্ব’’ন্তি. ততিযং.

৪. সুক্কধম্মসুত্তং

১৮৩. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো. লাভসক্কারসিলোকেন অভিভূতস্স পরিযাদিণ্ণচিত্তস্স, ভিক্খৰে, দেৰদত্তস্স সুক্কো ধম্মো সমুচ্ছেদমগমা. এৰং দারুণো খো, ভিক্খৰে, লাভসক্কারসিলোকো…পে… সিক্খিতব্ব’’ন্তি ¶ . চতুত্থং.

৫. অচিরপক্কন্তসুত্তং

১৮৪. একং ¶ সমযং ভগৰা রাজগহে ৰিহরতি গিজ্ঝকূটে পব্বতে অচিরপক্কন্তে দেৰদত্তে. তত্র খো ভগৰা দেৰদত্তং আরব্ভ ভিক্খূ আমন্তেসি ¶ – ‘‘অত্তৰধায, ভিক্খৰে, দেৰদত্তস্স লাভসক্কারসিলোকো উদপাদি, পরাভৰায দেৰদত্তস্স লাভসক্কারসিলোকো উদপাদি’’.

‘‘সেয্যথাপি, ভিক্খৰে, কদলী অত্তৰধায ফলং দেতি, পরাভৰায ফলং দেতি; এৰমেৰ খো, ভিক্খৰে, অত্তৰধায দেৰদত্তস্স লাভসক্কারসিলোকো উদপাদি, পরাভৰায দেৰদত্তস্স লাভসক্কারসিলোকো উদপাদি.

‘‘সেয্যথাপি, ভিক্খৰে, ৰেল়ু অত্তৰধায ফলং দেতি, পরাভৰায ফলং দেতি; এৰমেৰ খো, ভিক্খৰে, অত্তৰধায দেৰদত্তস্স লাভসক্কারসিলোকো উদপাদি, পরাভৰায দেৰদত্তস্স লাভসক্কারসিলোকো উদপাদি.

‘‘সেয্যথাপি ¶ , ভিক্খৰে, নল়ো অত্তৰধায ফলং দেতি, পরাভৰায ফলং দেতি; এৰমেৰ খো, ভিক্খৰে, অত্তৰধায দেৰদত্তস্স লাভসক্কারসিলোকো উদপাদি, পরাভৰায দেৰদত্তস্স লাভসক্কারসিলোকো উদপাদি.

‘‘সেয্যথাপি, ভিক্খৰে, অস্সতরী অত্তৰধায গব্ভং গণ্হাতি, পরাভৰায গব্ভং গণ্হাতি; এৰমেৰ খো, ভিক্খৰে, অত্তৰধায দেৰদত্তস্স লাভসক্কারসিলোকো উদপাদি, পরাভৰায দেৰদত্তস্স লাভসক্কারসিলোকো ¶ উদপাদি. এৰং দারুণো খো, ভিক্খৰে, লাভসক্কারসিলোকো. এৰঞ্হি ৰো, ভিক্খৰে, সিক্খিতব্ব’’ন্তি.

ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘ফলং ৰে কদলিং হন্তি, ফলং ৰেল়ুং ফলং নল়ং;

সক্কারো কাপুরিসং হন্তি, গব্ভো অস্সতরিং যথাতি’’. পঞ্চমং;

৬. পঞ্চরথসতসুত্তং

১৮৫. রাজগহে ¶ ৰিহরতি ৰেল়ুৰনে কলন্দকনিৰাপে. তেন খো পন সমযেন দেৰদত্তস্স অজাতসত্তুকুমারো পঞ্চহি রথসতেহি সাযং পাতং ¶ উপট্ঠানং গচ্ছতি, পঞ্চ চ থালিপাকসতানি ভত্তাভিহারো অভিহরীযতি. অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং – ‘‘দেৰদত্তস্স, ভন্তে, অজাতসত্তুকুমারো পঞ্চহি রথসতেহি সাযং পাতং উপট্ঠানং গচ্ছতি, পঞ্চ চ থালিপাকসতানি ভত্তাভিহারো অভিহরীযতী’’তি. ‘‘মা, ভিক্খৰে, দেৰদত্তস্স লাভসক্কারসিলোকং পিহযিত্থ. যাৰকীৰঞ্চ, ভিক্খৰে, দেৰদত্তস্স অজাতসত্তুকুমারো পঞ্চহি রথসতেহি সাযং পাতং উপট্ঠানং গমিস্সতি, পঞ্চ চ থালিপাকসতানি ভত্তাভিহারো আহরীযিস্সতি, হানিযেৰ, ভিক্খৰে, দেৰদত্তস্স পাটিকঙ্খা কুসলেসু ধম্মেসু, নো ৰুদ্ধি’’.

‘‘সেয্যথাপি, ভিক্খৰে, চণ্ডস্স কুক্কুরস্স নাসায পিত্তং ভিন্দেয্যুং ¶ , এৰঞ্হি সো, ভিক্খৰে ¶ , কুক্কুরো ভিয্যোসোমত্তায চণ্ডতরো অস্স; এৰমেৰ, ভিক্খৰে, যাৰকীৰঞ্চ দেৰদত্তস্স অজাতসত্তুকুমারো পঞ্চহি রথসতেহি সাযং পাতং উপট্ঠানং গমিস্সতি, পঞ্চ চ থালিপাকসতানি ভত্তাভিহারো আহরীযিস্সতি, হানিযেৰ, ভিক্খৰে, দেৰদত্তস্স পাটিকঙ্খা কুসলেসু ধম্মেসু, নো ৰুদ্ধি. এৰং দারুণো খো, ভিক্খৰে, লাভসক্কারসিলোকো…পে… এৰঞ্হি ৰো, ভিক্খৰে, সিক্খিতব্ব’’ন্তি. ছট্ঠং.

৭. মাতুসুত্তং

১৮৬. সাৰত্থিযং ৰিহরতি…পে… ‘‘দারুণো, ভিক্খৰে, লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায. ইধাহং ¶ , ভিক্খৰে, একচ্চং পুগ্গলং এৰং চেতসা চেতো পরিচ্চ পজানামি – ‘ন চাযমাযস্মা মাতুপি হেতু সম্পজানমুসা ভাসেয্যা’তি. তমেনং পস্সামি অপরেন সমযেন লাভসক্কারসিলোকেন অভিভূতং পরিযাদিণ্ণচিত্তং সম্পজানমুসা ভাসন্তং. এৰং দারুণো খো, ভিক্খৰে, লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায. তস্মাতিহ, ভিক্খৰে, এৰং সিক্খিতব্বং – ‘উপ্পন্নং লাভসক্কারসিলোকং পজহিস্সাম. ন চ নো উপ্পন্নো লাভসক্কারসিলোকো চিত্তং পরিযাদায ঠস্সতী’তি. এৰঞ্হি ৰো, ভিক্খৰে, সিক্খিতব্ব’’ন্তি. সত্তমং.

৮-১৩. পিতুসুত্তাদিছক্কং

১৮৭. সাৰত্থিযং ¶ ৰিহরতি…পে… ‘‘দারুণো, ভিক্খৰে, লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায. ইধাহং ¶ , ভিক্খৰে, একচ্চং পুগ্গলং এৰং চেতসা চেতো পরিচ্চ পজানামি – ‘ন চাযমাযস্মা পিতুপি হেতু…পে… ভাতুপি হেতু… ভগিনিযাপি হেতু… পুত্তস্সপি হেতু… ধীতুযাপি হেতু… পজাপতিযাপি হেতু সম্পজানমুসা ভাসেয্যা’তি. তমেনং পস্সামি অপরেন সমযেন লাভসক্কারসিলোকেন অভিভূতং পরিযাদিণ্ণচিত্তং সম্পজানমুসা ভাসন্তং. এৰং দারুণো খো, ভিক্খৰে, লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায. তস্মাতিহ, ভিক্খৰে, এৰং সিক্খিতব্বং – ‘উপ্পন্নং ¶ লাভসক্কারসিলোকং পজহিস্সাম, ন চ নো উপ্পন্নো লাভসক্কারসিলোকো ¶ চিত্তং পরিযাদায ঠস্সতী’তি. এৰঞ্হি ৰো, ভিক্খৰে, সিক্খিতব্ব’’ন্তি. তেরসমং.

চতুত্থো ৰগ্গো.

তস্সুদ্দানং –

ভিন্দি মূলং দুৰে ধম্মা, পক্কন্তং রথ মাতরি;

পিতা ভাতা চ ভগিনী, পুত্তো ধীতা পজাপতীতি.

লাভসক্কারসংযুত্তং সমত্তং.

৭. রাহুলসংযুত্তং

১. পঠমৰগ্গো

১. চক্খুসুত্তং

১৮৮. এৰং ¶ ¶ ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো আযস্মা রাহুলো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা রাহুলো ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি.

‘‘তং কিং মঞ্ঞসি, রাহুল, চক্খুং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’. ‘‘যং পনানিচ্চং দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং ¶ পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’. ‘‘সোতং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’…পে…. ‘‘ঘানং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’…পে… ‘‘জিৰ্হা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘কাযো নিচ্চো ৰা অনিচ্চো ৰা’’তি? ‘‘অনিচ্চো, ভন্তে’’ ¶ …পে… ‘‘মনো নিচ্চো ৰা অনিচ্চো ৰা’’তি? ‘‘অনিচ্চো, ভন্তে’’. ‘‘যং পনানিচ্চং দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’.

‘‘এৰং পস্সং, রাহুল, সুতৰা অরিযসাৰকো চক্খুস্মিম্পি নিব্বিন্দতি ¶ …পে… সোতস্মিম্পি নিব্বিন্দতি… ঘানস্মিম্পি নিব্বিন্দতি… জিৰ্হাযপি নিব্বিন্দতি… কাযস্মিম্পি নিব্বিন্দতি… মনস্মিম্পি নিব্বিন্দতি; নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. পঠমং.

২. রূপসুত্তং

১৮৯. সাৰত্থিযং ¶ ৰিহরতি…পে… ‘‘তং কিং মঞ্ঞসি, রাহুল, রূপা নিচ্চা ৰা অনিচ্চা ৰা’’তি? ‘‘অনিচ্চা ¶ , ভন্তে’’…পে… সদ্দা… গন্ধা… রসা… ফোট্ঠব্বা… ধম্মা নিচ্চা ৰা অনিচ্চা ৰাতি? ‘‘অনিচ্চা, ভন্তে’’…পে… ‘‘এৰং পস্সং, রাহুল, সুতৰা অরিযসাৰকো রূপেসুপি নিব্বিন্দতি… সদ্দেসুপি নিব্বিন্দতি… গন্ধেসুপি নিব্বিন্দতি… রসেসুপি নিব্বিন্দতি… ফোট্ঠব্বেসুপি নিব্বিন্দতি… ধম্মেসুপি নিব্বিন্দতি; নিব্বিন্দং ৰিরজ্জতি…পে… পজানাতী’’তি. দুতিযং.

৩. ৰিঞ্ঞাণসুত্তং

১৯০. সাৰত্থিযং ¶ ৰিহরতি…পে… ‘‘তং কিং মঞ্ঞসি, রাহুল, চক্খুৰিঞ্ঞাণং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’…পে… ‘‘সোতৰিঞ্ঞাণং…পে… ঘানৰিঞ্ঞাণং… জিৰ্হাৰিঞ্ঞাণং… কাযৰিঞ্ঞাণং… মনোৰিঞ্ঞাণং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’ ¶ …পে… ‘‘এৰং পস্সং, রাহুল, সুতৰা অরিযসাৰকো চক্খুৰিঞ্ঞাণস্মিম্পি নিব্বিন্দতি…পে… সোতৰিঞ্ঞাণস্মিম্পি নিব্বিন্দতি… ঘানৰিঞ্ঞাণস্মিম্পি নিব্বিন্দতি… জিৰ্হাৰিঞ্ঞাণস্মিম্পি নিব্বিন্দতি… কাযৰিঞ্ঞাণস্মিম্পি নিব্বিন্দতি… মনোৰিঞ্ঞাণস্মিম্পি নিব্বিন্দতি; নিব্বিন্দং ৰিরজ্জতি…পে… পজানাতী’’তি. ততিযং.

৪. সম্ফস্সসুত্তং

১৯১. সাৰত্থিযং ৰিহরতি…পে… ‘‘তং কিং মঞ্ঞসি, রাহুল, চক্খুসম্ফস্সো নিচ্চো ৰা অনিচ্চো ৰা’’তি? ‘‘অনিচ্চো, ভন্তে’’…পে… ‘‘সোতসম্ফস্সো…পে… ঘানসম্ফস্সো… জিৰ্হাসম্ফস্সো… কাযসম্ফস্সো… মনোসম্ফস্সো নিচ্চো ৰা অনিচ্চো ৰা’’তি? ‘‘অনিচ্চো, ভন্তে’’…পে… ‘‘এৰং পস্সং, রাহুল, সুতৰা অরিযসাৰকো চক্খুসম্ফস্সস্মিম্পি নিব্বিন্দতি…পে… সোতসম্ফস্সস্মিম্পি নিব্বিন্দতি… ঘানসম্ফস্সস্মিম্পি নিব্বিন্দতি… জিৰ্হাসম্ফস্সস্মিম্পি নিব্বিন্দতি… কাযসম্ফস্সস্মিম্পি নিব্বিন্দতি… মনোসম্ফস্সস্মিম্পি নিব্বিন্দতি; নিব্বিন্দং ¶ ৰিরজ্জতি…পে… পজানাতী’’তি. চতুত্থং.

৫. ৰেদনাসুত্তং

১৯২. সাৰত্থিযং ¶ ৰিহরতি…পে… ‘‘তং কিং মঞ্ঞসি, রাহুল, চক্খুসম্ফস্সজা ¶ ৰেদনা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘সোতসম্ফস্সজা ৰেদনা…পে… ঘানসম্ফস্সজা ৰেদনা… জিৰ্হাসম্ফস্সজা ৰেদনা… কাযসম্ফস্সজা ৰেদনা… মনোসম্ফস্সজা ৰেদনা নিচ্চা ৰা অনিচ্চা ৰা’’তি? ‘‘অনিচ্চা ¶ , ভন্তে’’…পে… ‘‘এৰং পস্সং, রাহুল, সুতৰা অরিযসাৰকো চক্খুসম্ফস্সজায ৰেদনাযপি নিব্বিন্দতি…পে… সোত… ঘান… জিৰ্হা… কায… মনোসম্ফস্সজায ৰেদনাযপি নিব্বিন্দতি…পে… পজানাতী’’তি. পঞ্চমং.

৬. সঞ্ঞাসুত্তং

১৯৩. সাৰত্থিযং ৰিহরতি…পে… ‘‘তং কিং মঞ্ঞসি, রাহুল, রূপসঞ্ঞা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘সদ্দসঞ্ঞা…পে… গন্ধসঞ্ঞা… রসসঞ্ঞা… ফোট্ঠব্বসঞ্ঞা… ধম্মসঞ্ঞা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘এৰং পস্সং, রাহুল, সুতৰা অরিযসাৰকো রূপসঞ্ঞাযপি নিব্বিন্দতি…পে… সদ্দসঞ্ঞাযপি নিব্বিন্দতি… গন্ধসঞ্ঞাযপি নিব্বিন্দতি… রসসঞ্ঞাযপি নিব্বিন্দতি… ফোট্ঠব্বসঞ্ঞাযপি নিব্বিন্দতি… ধম্মসঞ্ঞাযপি নিব্বিন্দতি…পে… পজানাতী’’তি. ছট্ঠং.

৭. সঞ্চেতনাসুত্তং

১৯৪. সাৰত্থিযং ¶ ৰিহরতি…পে… ‘‘তং কিং মঞ্ঞসি, রাহুল, রূপসঞ্চেতনা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘সদ্দসঞ্চেতনা…পে… গন্ধসঞ্চেতনা… রসসঞ্চেতনা ¶ … ফোট্ঠব্বসঞ্চেতনা… ধম্মসঞ্চেতনা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘এৰং পস্সং, রাহুল, সুতৰা অরিযসাৰকো রূপসঞ্চেতনাযপি নিব্বিন্দতি…পে… সদ্দসঞ্চেতনাযপি নিব্বিন্দতি… গন্ধসঞ্চেতনাযপি নিব্বিন্দতি… রসসঞ্চেতনাযপি নিব্বিন্দতি… ফোট্ঠব্বসঞ্চেতনাযপি ¶ নিব্বিন্দতি… ধম্মসঞ্চেতনাযপি নিব্বিন্দতি…পে… পজানাতী’’তি. সত্তমং.

৮. তণ্হাসুত্তং

১৯৫. সাৰত্থিযং ৰিহরতি…পে… ‘‘তং কিং মঞ্ঞসি, রাহুল, রূপতণ্হা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘সদ্দতণ্হা…পে… গন্ধতণ্হা… রসতণ্হা… ফোট্ঠব্বতণ্হা… ধম্মতণ্হা নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘এৰং পস্সং, রাহুল, সুতৰা অরিযসাৰকো রূপতণ্হাযপি নিব্বিন্দতি…পে… সদ্দতণ্হাযপি নিব্বিন্দতি… গন্ধতণ্হাযপি নিব্বিন্দতি… রসতণ্হাযপি নিব্বিন্দতি… ফোট্ঠব্বতণ্হায নিব্বিন্দতি… ধম্মতণ্হাযপি নিব্বিন্দতি ¶ …পে… পজানাতী’’তি. অট্ঠমং.

৯. ধাতুসুত্তং

১৯৬. সাৰত্থিযং ¶ ৰিহরতি…পে… ‘‘তং কিং মঞ্ঞসি, রাহুল, পথৰীধাতু নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘আপোধাতু…পে… তেজোধাতু… ৰাযোধাতু… আকাসধাতু… ৰিঞ্ঞাণধাতু নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… ‘‘এৰং পস্সং, রাহুল, সুতৰা অরিযসাৰকো পথৰীধাতুযাপি নিব্বিন্দতি…পে… আপোধাতুযাপি নিব্বিন্দতি… তেজোধাতুযাপি নিব্বিন্দতি… ৰাযোধাতুযাপি ¶ ¶ নিব্বিন্দতি… আকাসধাতুযাপি নিব্বিন্দতি… ৰিঞ্ঞাণধাতুযাপি নিব্বিন্দতি…পে… পজানাতী’’তি. নৰমং.

১০. খন্ধসুত্তং

১৯৭. সাৰত্থিযং ৰিহরতি…পে… ‘‘তং কিং মঞ্ঞসি, রাহুল, রূপং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’…পে… ‘‘ৰেদনা…পে… সঞ্ঞা… সঙ্খারা… ৰিঞ্ঞাণং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’…পে… ‘‘এৰং পস্সং, রাহুল, সুতৰা অরিযসাৰকো রূপস্মিম্পি নিব্বিন্দতি…পে… ৰেদনাযপি নিব্বিন্দতি… সঞ্ঞাযপি নিব্বিন্দতি… সঙ্খারেসুপি নিব্বিন্দতি… ৰিঞ্ঞাণস্মিম্পি নিব্বিন্দতি; নিব্বিন্দং ৰিরজ্জতি ¶ ; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. দসমং.

পঠমো ৰগ্গো.

তস্সুদ্দানং –

চক্খু রূপঞ্চ ৰিঞ্ঞাণং, সম্ফস্সো ৰেদনায চ;

সঞ্ঞা সঞ্চেতনা তণ্হা, ধাতু খন্ধেন তে দসাতি.

২. দুতিযৰগ্গো

১. চক্খুসুত্তং

১৯৮. এৰং ¶ মে সুতং – একং সমযং ভগৰা সাৰত্থিযং ৰিহরতি. অথ ¶ খো আযস্মা রাহুলো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং রাহুলং ¶ ভগৰা এতদৰোচ – ‘‘তং কিং মঞ্ঞসি, রাহুল, চক্খুং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’. ‘‘যং পনানিচ্চং, দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’. ‘‘সোতং…পে… ঘানং… জিৰ্হা… কাযো… মনো নিচ্চো ৰা অনিচ্চো ৰা’’তি? ‘‘অনিচ্চো, ভন্তে’’. ‘‘যং পনানিচ্চং, দুক্খং ৰা তং সুখং ৰা’’তি? ‘‘দুক্খং, ভন্তে’’. ‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি? ‘‘নো হেতং, ভন্তে’’. ‘‘এৰং পস্সং, রাহুল, সুতৰা অরিযসাৰকো চক্খুস্মিম্পি নিব্বিন্দতি…পে… সোতস্মিম্পি নিব্বিন্দতি… ঘানস্মিম্পি নিব্বিন্দতি ¶ … জিৰ্হাযপি নিব্বিন্দতি… কাযস্মিম্পি নিব্বিন্দতি… মনস্মিম্পি নিব্বিন্দতি; নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা ¶ জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. এতেন পেয্যালেন দস সুত্তন্তা কাতব্বা. পঠমং.

২-১০. রূপাদিসুত্তনৰকং

১৯৯. সাৰত্থিযং ৰিহরতি…পে… ‘‘তং কিং মঞ্ঞসি, রাহুল, রূপা ¶ নিচ্চা ৰা অনিচ্চা ৰা’’তি? ‘‘অনিচ্চা, ভন্তে’’…পে… সদ্দা… গন্ধা… রসা… ফোট্ঠব্বা… ধম্মা….

‘‘চক্খুৰিঞ্ঞাণং…পে… সোতৰিঞ্ঞাণং… ঘানৰিঞ্ঞাণং… জিৰ্হাৰিঞ্ঞাণং… কাযৰিঞ্ঞাণং… মনোৰিঞ্ঞাণং….

‘‘চক্খুসম্ফস্সো…পে… সোতসম্ফস্সো… ঘানসম্ফস্সো… জিৰ্হাসম্ফস্সো… কাযসম্ফস্সো… মনোসম্ফস্সো….

‘‘চক্খুসম্ফস্সজা ৰেদনা…পে… সোতসম্ফস্সজা ৰেদনা… ঘানসম্ফস্সজা ৰেদনা… জিৰ্হাসম্ফস্সজা ৰেদনা… কাযসম্ফস্সজা ৰেদনা… মনোসম্ফস্সজা ৰেদনা….

‘‘রূপসঞ্ঞা…পে… সদ্দসঞ্ঞা… গন্ধসঞ্ঞা… রসসঞ্ঞা… ফোট্ঠব্বসঞ্ঞা… ধম্মসঞ্ঞা….

‘‘রূপসঞ্চেতনা…পে… সদ্দসঞ্চেতনা… গন্ধসঞ্চেতনা… রসসঞ্চেতনা… ফোট্ঠব্বসঞ্চেতনা… ধম্মসঞ্চেতনা….

‘‘রূপতণ্হা ¶ ¶ …পে… সদ্দতণ্হা… গন্ধতণ্হা… রসতণ্হা… ফোট্ঠব্বতণ্হা… ধম্মতণ্হা….

‘‘পথৰীধাতু…পে… আপোধাতু… তেজোধাতু… ৰাযোধাতু… আকাসধাতু ¶ … ৰিঞ্ঞাণধাতু….

‘‘রূপং ¶ …পে… ৰেদনা… সঞ্ঞা… সঙ্খারা… ৰিঞ্ঞাণং নিচ্চং ৰা অনিচ্চং ৰা’’তি? অনিচ্চং, ভন্তে…পে… এৰং পস্সং রাহুল…পে… নাপরং ইত্থত্তাযাতি পজানাতীতি. দসমং.

১১. অনুসযসুত্তং

২০০. সাৰত্থিযং ৰিহরতি. অথ খো আযস্মা রাহুলো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা রাহুলো ভগৰন্তং এতদৰোচ – ‘‘কথং নু খো, ভন্তে, জানতো কথং পস্সতো ইমস্মিঞ্চ সৰিঞ্ঞাণকে কাযে বহিদ্ধা চ সব্বনিমিত্তেসু অহঙ্কারমমঙ্কারমানানুসযা ন হোন্তী’’তি? ‘‘যং কিঞ্চি, রাহুল, রূপং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, সব্বং রূপং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায পস্সতি. যা কাচি ৰেদনা…পে… যা কাচি সঞ্ঞা… যে কেচি সঙ্খারা… যং কিঞ্চি ৰিঞ্ঞাণং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, সব্বং ৰিঞ্ঞাণং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায পস্সতি. এৰং খো, রাহুল, জানতো এৰং পস্সতো ইমস্মিঞ্চ সৰিঞ্ঞাণকে কাযে বহিদ্ধা চ সব্বনিমিত্তেসু অহঙ্কারমমঙ্কারমানানুসযা ¶ ন হোন্তী’’তি. একাদসমং.

১২. অপগতসুত্তং

২০১. সাৰত্থিনিদানং ¶ ¶ . অথ খো আযস্মা রাহুলো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা রাহুলো ভগৰন্তং এতদৰোচ – ‘‘কথং নু খো, ভন্তে, জানতো কথং পস্সতো ইমস্মিং চ সৰিঞ্ঞাণকে কাযে ¶ বহিদ্ধা চ সব্বনিমিত্তেসু অহঙ্কারমমঙ্কারমানাপগতং মানসং হোতি ৰিধা সমতিক্কন্তং সন্তং সুৰিমুত্ত’’ন্তি? ‘‘যং কিঞ্চি, রাহুল, রূপং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা সব্বং রূপং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দিস্ৰা অনুপাদা ৰিমুত্তো হোতি’’.

‘‘যা কাচি ৰেদনা…পে… যা কাচি সঞ্ঞা… যে কেচি সঙ্খারা… যং কিঞ্চি ৰিঞ্ঞাণং অতীতানাগতপচ্চুপ্পন্নং অজ্ঝত্তং ৰা বহিদ্ধা ৰা ওল়ারিকং ৰা সুখুমং ৰা হীনং ৰা পণীতং ৰা যং দূরে সন্তিকে ৰা, সব্বং ৰিঞ্ঞাণং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দিস্ৰা অনুপাদা ৰিমুত্তো হোতি. এৰং খো, রাহুল, জানতো এৰং পস্সতো ইমস্মিঞ্চ সৰিঞ্ঞাণকে কাযে বহিদ্ধা চ সব্বনিমিত্তেসু অহঙ্কারমমঙ্কারমানাপগতং মানসং হোতি ¶ ৰিধা সমতিক্কন্তং সন্তং সুৰিমুত্ত’’ন্তি. দ্ৰাদসমং.

দুতিযো ৰগ্গো.

তস্সুদ্দানং –

চক্খু ¶ রূপঞ্চ ৰিঞ্ঞাণং, সম্ফস্সো ৰেদনায চ;

সঞ্ঞা সঞ্চেতনা তণ্হা, ধাতু খন্ধেন তে দস;

অনুসযং অপগতঞ্চেৰ, ৰগ্গো তেন পৰুচ্চতীতি.

রাহুলসংযুত্তং সমত্তং.

৮. লক্খণসংযুত্তং

১. পঠমৰগ্গো

১. অট্ঠিসুত্তং

২০২. এৰং ¶ ¶ ¶ মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন আযস্মা চ লক্খণো আযস্মা চ মহামোগ্গল্লানো [মহামোগ্গলানো (ক.)] গিজ্ঝকূটে পব্বতে ৰিহরন্তি. অথ খো আযস্মা মহামোগ্গল্লানো পুব্বণ্হসমযং নিৰাসেত্ৰা পত্তচীৰরমাদায যেনাযস্মা লক্খণো তেনুপসঙ্কমি; উপসঙ্কমিত্ৰা আযস্মন্তং লক্খণং এতদৰোচ – ‘‘আযামাৰুসো [এহি আৰুসো (স্যা. কং. ক.)] লক্খণ, রাজগহং পিণ্ডায পৰিসিস্সামা’’তি. ‘‘এৰমাৰুসো’’তি খো আযস্মা লক্খণো আযস্মতো মহামোগ্গল্লানস্স পচ্চস্সোসি. অথ খো আযস্মা মহামোগ্গল্লানো গিজ্ঝকূটা পব্বতা ওরোহন্তো অঞ্ঞতরস্মিং পদেসে সিতং পাত্ৰাকাসি. অথ খো আযস্মা লক্খণো আযস্মন্তং মহামোগ্গল্লানং এতদৰোচ – ‘‘কো নু খো, আৰুসো মোগ্গল্লান, হেতু কো পচ্চযো সিতস্স পাতুকম্মাযা’’তি? ‘‘অকালো খো, আৰুসো লক্খণ, এতস্স পঞ্হস্স. ভগৰতো মং সন্তিকে এতং পঞ্হং পুচ্ছা’’তি.

অথ ¶ খো আযস্মা চ লক্খণো আযস্মা চ মহামোগ্গল্লানো ¶ রাজগহে পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্নো খো আযস্মা লক্খণো আযস্মন্তং মহামোগ্গল্লানং এতদৰোচ – ‘‘ইধাযস্মা মহামোগ্গল্লানো গিজ্ঝকূটা পব্বতা ওরোহন্তো অঞ্ঞতরস্মিং পদেসে সিতং পাত্ৰাকাসি. কো নু খো, আৰুসো মোগ্গল্লান, হেতু কো পচ্চযো সিতস্স পাতুকম্মাযা’’তি?

‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং অট্ঠিকসঙ্খলিকং ৰেহাসং গচ্ছন্তিং. তমেনং গিজ্ঝাপি কাকাপি কুললাপি অনুপতিত্ৰা ¶ ¶ অনুপতিত্ৰা ফাসুল়ন্তরিকাহি ৰিতুদেন্তি ৰিতচ্ছেন্তি ৰিরাজেন্তি [ৰিতুদেন্তি (সী.), ৰিতচ্ছেন্তি ৰিভজেন্তি (পী. ক.)]. সা সুদং অট্টস্সরং করোতি. তস্স ময্হং, আৰুসো, এতদহোসি – ‘অচ্ছরিযং ৰত, ভো, অব্ভুতং ৰত, ভো! এৰরূপোপি নাম সত্তো ভৰিস্সতি! এৰরূপোপি নাম যক্খো ভৰিস্সতি! এৰরূপোপি নাম অত্তভাৰপটিলাভো ভৰিস্সতী’’’তি!!

অথ খো ভগৰা ভিক্খূ আমন্তেসি – ‘‘চক্খুভূতা ৰত, ভিক্খৰে, সাৰকা ৰিহরন্তি; ঞাণভূতা ৰত, ভিক্খৰে, সাৰকা ৰিহরন্তি, যত্র হি নাম সাৰকো এৰরূপং ঞস্সতি ৰা দক্খতি ৰা সক্খিং ৰা করিস্সতি. পুব্বেৰ মে সো, ভিক্খৰে, সত্তো দিট্ঠো অহোসি, অপি চাহং ন ব্যাকাসিং. অহঞ্চেতং [অহমেৰেতং (সী.)] ব্যাকরেয্যং, পরে চ মে [পরে মে (সী.)] ন সদ্দহেয্যুং. যে মে ন সদ্দহেয্যুং, তেসং তং অস্স দীঘরত্তং অহিতায দুক্খায. এসো, ভিক্খৰে, সত্তো ইমস্মিংযেৰ রাজগহে গোঘাতকো ¶ অহোসি. সো তস্স কম্মস্স ৰিপাকেন বহূনি ৰস্সানি বহূনি ৰস্সসতানি বহূনি ৰস্সসহস্সানি বহূনি ৰস্সসতসহস্সানি নিরযে পচ্চিত্ৰা তস্সেৰ কম্মস্স ৰিপাকাৰসেসেন ¶ এৰরূপং অত্তভাৰপটিলাভং পটিসংৰেদযতী’’তি. (সব্বেসং সুত্তন্তানং এসেৰ পেয্যালো). পঠমং.

২. পেসিসুত্তং

২০৩. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং মংসপেসিং ৰেহাসং গচ্ছন্তিং. তমেনং গিজ্ঝাপি কাকাপি কুললাপি অনুপতিত্ৰা অনুপতিত্ৰা ৰিতচ্ছেন্তি ৰিরাজেন্তি [ৰিরাজেন্তি (সী. স্যা. কং.), ৰিভজেন্তি (পী. ক.)]. সা সুদং অট্টস্সরং করোতি…পে… এসো, ভিক্খৰে, সত্তো ইমস্মিংযেৰ রাজগহে গোঘাতকো অহোসি…পে…. দুতিযং.

৩. পিণ্ডসুত্তং

২০৪. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং মংসপিণ্ডং ৰেহাসং গচ্ছন্তং. তমেনং গিজ্ঝাপি কাকাপি কুললাপি অনুপতিত্ৰা অনুপতিত্ৰা ৰিতচ্ছেন্তি ৰিরাজেন্তি ¶ . সা সুদং অট্টস্সরং করোতি…পে… এসো, ভিক্খৰে, সত্তো ইমস্মিংযেৰ রাজগহে সাকুণিকো অহোসি…পে…. ততিযং.

৪. নিচ্ছৰিসুত্তং

২০৫. ‘‘ইধাহং ¶ , আৰুসো, গিজ্ঝকূটা পব্বতা ওরোহন্তো অদ্দসং নিচ্ছৰিং পুরিসং ৰেহাসং গচ্ছন্তং. তমেনং গিজ্ঝাপি কাকাপি কুললাপি অনুপতিত্ৰা অনুপতিত্ৰা ৰিতচ্ছেন্তি ৰিরাজেন্তি. সো সুদং অট্টস্সরং করোতি…পে… এসো, ভিক্খৰে, সত্তো ইমস্মিংযেৰ রাজগহে ওরব্ভিকো অহোসি…পে…. চতুত্থং.

৫. অসিলোমসুত্তং

২০৬. ‘‘ইধাহং ¶ ¶ , আৰুসো, গিজ্ঝকূটা পব্বতা ওরোহন্তো অদ্দসং অসিলোমং পুরিসং ৰেহাসং গচ্ছন্তং. তস্স তে অসী উপ্পতিত্ৰা উপ্পতিত্ৰা তস্সেৰ কাযে নিপতন্তি. সো সুদং অট্টস্সরং করোতি…পে… এসো, ভিক্খৰে, সত্তো ইমস্মিংযেৰ রাজগহে সূকরিকো অহোসি…পে…. পঞ্চমং.

৬. সত্তিসুত্তং

২০৭. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং সত্তিলোমং পুরিসং ৰেহাসং গচ্ছন্তং. তস্স তা সত্তিযো উপ্পতিত্ৰা উপ্পতিত্ৰা তস্সেৰ কাযে নিপতন্তি. সো সুদং অট্টস্সরং করোতি…পে… এসো, ভিক্খৰে, সত্তো ইমস্মিংযেৰ রাজগহে মাগৰিকো অহোসি…পে…. ছট্ঠং.

৭. উসুলোমসুত্তং

২০৮. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং উসুলোমং পুরিসং ৰেহাসং গচ্ছন্তং. তস্স তে উসূ উপ্পতিত্ৰা উপ্পতিত্ৰা তস্সেৰ কাযে নিপতন্তি. সো সুদং অট্টস্সরং ¶ করোতি…পে… এসো, ভিক্খৰে, সত্তো ইমস্মিংযেৰ রাজগহে কারণিকো অহোসি…পে…. সত্তমং.

৮. সূচিলোমসুত্তং

২০৯. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং সূচিলোমং পুরিসং ৰেহাসং গচ্ছন্তং. তস্স তা সূচিযো উপ্পতিত্ৰা উপ্পতিত্ৰা তস্সেৰ কাযে নিপতন্তি. সো সুদং অট্টস্সরং করোতি…পে… এসো ¶ , ভিক্খৰে, সত্তো ইমস্মিংযেৰ রাজগহে সূতো [সারথিকো (ক. ৰিনযেপি)] অহোসি…পে…. অট্ঠমং.

৯. দুতিযসূচিলোমসুত্তং

২১০. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং সূচিলোমং পুরিসং ৰেহাসং গচ্ছন্তং. তস্স ¶ তা সূচিযো সীসে পৰিসিত্ৰা মুখতো নিক্খমন্তি; মুখে পৰিসিত্ৰা উরতো নিক্খমন্তি; উরে পৰিসিত্ৰা উদরতো নিক্খমন্তি; উদরে পৰিসিত্ৰা ঊরূহি নিক্খমন্তি; ঊরূসু পৰিসিত্ৰা ¶ জঙ্ঘাহি নিক্খমন্তি; জঙ্ঘাসু পৰিসিত্ৰা পাদেহি নিক্খমন্তি; সো সুদং অট্টস্সরং করোতি…পে… এসো, ভিক্খৰে, সত্তো ইমস্মিংযেৰ রাজগহে সূচকো অহোসি…পে…. নৰমং.

১০. কুম্ভণ্ডসুত্তং

২১১. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং কুম্ভণ্ডং পুরিসং ৰেহাসং গচ্ছন্তং. সো গচ্ছন্তোপি তেৰ অণ্ডে খন্ধে আরোপেত্ৰা গচ্ছতি. নিসীদন্তোপি তেস্ৰেৰ অণ্ডেসু নিসীদতি. তমেনং গিজ্ঝাপি কাকাপি কুললাপি অনুপতিত্ৰা অনুপতিত্ৰা ৰিতচ্ছেন্তি ৰিরাজেন্তি. সো সুদং অট্টস্সরং করোতি…পে… এসো, ভিক্খৰে, সত্তো ইমস্মিংযেৰ রাজগহে গামকূটকো অহোসি…পে…. দসমং.

পঠমো ৰগ্গো.

তস্সুদ্দানং ¶ –

অট্ঠি পেসি উভো গাৰঘাতকা,

পিণ্ডো সাকুণিযো নিচ্ছৰোরব্ভি;

অসি সূকরিকো সত্তিমাগৰি,

উসু কারণিকো সূচি সারথি;

যো চ সিব্বিযতি সূচকো হি সো,

অণ্ডভারি অহু গামকূটকোতি.

২. দুতিযৰগ্গো

১. সসীসকসুত্তং

২১২. এৰং ¶ ¶ ¶ মে সুতং – একং সমযং রাজগহে ৰেল়ুৰনে. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং পুরিসং গূথকূপে সসীসকং নিমুগ্গং…পে… এসো, ভিক্খৰে, সত্তো ইমস্মিংযেৰ রাজগহে পারদারিকো অহোসি…পে…. পঠমং.

২. গূথখাদসুত্তং

২১৩. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং পুরিসং গূথকূপে নিমুগ্গং উভোহি হত্থেহি গূথং খাদন্তং…পে… এসো, ভিক্খৰে, সত্তো ইমস্মিংযেৰ রাজগহে দুট্ঠব্রাহ্মণো অহোসি. সো কস্সপস্স সম্মাসম্বুদ্ধস্স পাৰচনে ভিক্খুসঙ্ঘং ভত্তেন নিমন্তেত্ৰা দোণিযো [দোণিযা (স্যা. কং. পী. ক.)] গূথস্স পূরাপেত্ৰা এতদৰোচ – অহো ভোন্তো, যাৰদত্থং ভুঞ্জন্তু চেৰ হরন্তু চাতি…পে…. দুতিযং.

৩. নিচ্ছৰিত্থিসুত্তং

২১৪. ‘‘ইধাহং ¶ , আৰুসো, গিজ্ঝকূটা পব্বতা ওরোহন্তো অদ্দসং নিচ্ছৰিং ইত্থিং ৰেহাসং গচ্ছন্তিং. তমেনং গিজ্ঝাপি কাকাপি কুললাপি অনুপতিত্ৰা অনুপতিত্ৰা ৰিতচ্ছেন্তি ৰিরাজেন্তি. সা সুদং অট্টস্সরং করোতি…পে… এসা, ভিক্খৰে, ইত্থী ইমস্মিংযেৰ রাজগহে অতিচারিনী অহোসি…পে…. ততিযং.

৪. মঙ্গুলিত্থিসুত্তং

২১৫. ‘‘ইধাহং ¶ , আৰুসো, গিজ্ঝকূটা পব্বতা ওরোহন্তো অদ্দসং ইত্থিং দুগ্গন্ধং মঙ্গুলিং ৰেহাসং গচ্ছন্তিং. তমেনং গিজ্ঝাপি কাকাপি কুললাপি ¶ অনুপতিত্ৰা অনুপতিত্ৰা ৰিতচ্ছেন্তি ৰিরাজেন্তি. সা সুদং অট্টস্সরং করোতি…পে… এসা, ভিক্খৰে, ইত্থী ইমস্মিংযেৰ রাজগহে ইক্খণিকা অহোসি…পে…. চতুত্থং.

৫. ওকিলিনীসুত্তং

২১৬. ‘‘ইধাহং ¶ , আৰুসো, গিজ্ঝকূটা পব্বতা ওরোহন্তো অদ্দসং ইত্থিং উপ্পক্কং ওকিলিনিং ওকিরিনিং ৰেহাসং গচ্ছন্তিং. সা সুদং অট্টস্সরং করোতি…পে… এসা, ভিক্খৰে, ইত্থী কলিঙ্গস্স রঞ্ঞো অগ্গমহেসী অহোসি. সা ইস্সাপকতা সপত্তিং অঙ্গারকটাহেন ওকিরি…পে…. পঞ্চমং.

৬. অসীসকসুত্তং

২১৭. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং অসীসকং কবন্ধং [কৰন্ধং (সী. পী.)] ৰেহাসং গচ্ছন্তং. তস্স উরে অক্খীনি চেৰ হোন্তি মুখঞ্চ. তমেনং গিজ্ঝাপি কাকাপি কুললাপি অনুপতিত্ৰা অনুপতিত্ৰা ৰিতচ্ছেন্তি ৰিরাজেন্তি. সো সুদং অট্টস্সরং করোতি…পে… এসো, ভিক্খৰে, সত্তো ইমস্মিংযেৰ রাজগহে হারিকো নাম চোরঘাতকো অহোসি…পে…. ছট্ঠং.

৭. পাপভিক্খুসুত্তং

২১৮. ‘‘ইধাহং ¶ , আৰুসো, গিজ্ঝকূটা পব্বতা ওরোহন্তো অদ্দসং ভিক্খুং ৰেহাসং গচ্ছন্তং. তস্স সঙ্ঘাটিপি আদিত্তা সম্পজ্জলিতা সজোতিভূতা [সঞ্জোতিভূতা (স্যা. কং.)], পত্তোপি আদিত্তো সম্পজ্জলিতো সজোতিভূতো, কাযবন্ধনম্পি ¶ আদিত্তং সম্পজ্জলিতং সজোতিভূতং, কাযোপি আদিত্তো সম্পজ্জলিতো সজোতিভূতো. সো সুদং অট্টস্সরং করোতি…পে… এসো, ভিক্খৰে, ভিক্খু কস্সপস্স সম্মাসম্বুদ্ধস্স পাৰচনে পাপভিক্খু অহোসি…পে…. সত্তমং.

৮. পাপভিক্খুনীসুত্তং

২১৯. ‘‘অদ্দসং ¶ ভিক্খুনিং ৰেহাসং গচ্ছন্তিং. তস্সা সঙ্ঘাটিপি আদিত্তা…পে… পাপভিক্খুনী অহোসি…পে…. অট্ঠমং.

৯. পাপসিক্খমানসুত্তং

২২০. ‘‘অদ্দসং ¶ সিক্খমানং ৰেহাসং গচ্ছন্তিং. তস্সা সঙ্ঘাটিপি আদিত্তা…পে… পাপসিক্খমানা অহোসি…পে…. নৰমং.

১০. পাপসামণেরসুত্তং

২২১. ‘‘অদ্দসং সামণেরং ৰেহাসং গচ্ছন্তং. তস্স সঙ্ঘাটিপি আদিত্তা…পে… পাপসামণেরো অহোসি…পে…. দসমং.

১১. পাপসামণেরীসুত্তং

২২২. ‘‘ইধাহং, আৰুসো, গিজ্ঝকূটা পব্বতা ওরোহন্তো অদ্দসং সামণেরিং ৰেহাসং গচ্ছন্তিং. তস্সা সঙ্ঘাটিপি আদিত্তা সম্পজ্জলিতা সজোতিভূতা, পত্তোপি আদিত্তো সম্পজ্জলিতো ¶ সজোতিভূতো, কাযবন্ধনম্পি আদিত্তং সম্পজ্জলিতং সজোতিভূতং, কাযোপি আদিত্তো সম্পজ্জলিতো সজোতিভূতো. সা সুদং অট্টস্সরং করোতি. তস্স ময্হং, আৰুসো, এতদহোসি – ‘অচ্ছরিযং ৰত, ভো, অব্ভুতং ৰত, ভো! এৰরূপোপি নাম সত্তো ভৰিস্সতি! এৰরূপোপি নাম যক্খো ভৰিস্সতি! এৰরূপোপি নাম অত্তভাৰপটিলাভো ভৰিস্সতী’’’তি!!

অথ খো ভগৰা ভিক্খূ আমন্তেসি – ‘‘চক্খুভূতা ৰত, ভিক্খৰে, সাৰকা ৰিহরন্তি; ঞাণভূতা ৰত, ভিক্খৰে, সাৰকা ৰিহরন্তি, যত্র হি নাম সাৰকো এৰরূপং ঞস্সতি ৰা দক্খতি ৰা সক্খিং ৰা করিস্সতি. পুব্বেৰ ¶ মে সা, ভিক্খৰে, সামণেরী দিট্ঠা অহোসি. অপি চাহং ন ব্যাকাসিং. অহঞ্চেতং ব্যাকরেয্যং, পরে চ মে ন সদ্দহেয্যুং. যে মে ন সদ্দহেয্যুং, তেসং তং অস্স দীঘরত্তং অহিতায ¶ দুক্খায. এসা, ভিক্খৰে, সামণেরী কস্সপস্স সম্মাসম্বুদ্ধস্স পাৰচনে পাপসামণেরী অহোসি. সা তস্স কম্মস্স ৰিপাকেন বহূনি ৰস্সানি বহূনি ৰস্সসতানি বহূনি ৰস্সসহস্সানি বহূনি ৰস্সসতসহস্সানি নিরযে পচ্চিত্ৰা তস্সেৰ কম্মস্স ৰিপাকাৰসেসেন এৰরূপং অত্তভাৰপটিলাভং পটিসংৰেদযতী’’তি. একাদসমং.

দুতিযো ৰগ্গো.

তস্সুদ্দানং –

কূপে ¶ নিমুগ্গো হি সো পারদারিকো;

গূথখাদি অহু দুট্ঠব্রাহ্মণো.

নিচ্ছৰিত্থি অতিচারিনী অহু;

মঙ্গুলিত্থি অহু ইক্খণিত্থিকা.

ওকিলিনি সপত্তঙ্গারোকিরি;

সীসচ্ছিন্নো অহু চোরঘাতকো.

ভিক্খু ¶ ভিক্খুনী সিক্খমানা;

সামণেরো অথ সামণেরিকা.

কস্সপস্স ৰিনযস্মিং পব্বজ্জং;

পাপকম্মং করিংসু তাৰদেতি.

লক্খণসংযুত্তং সমত্তং.

৯. ওপম্মসংযুত্তং

১. কূটসুত্তং

২২৩. এৰং ¶ ¶ ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র ¶ খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ – ‘‘সেয্যথাপি, ভিক্খৰে, কূটাগারস্স যা কাচি গোপানসিযো সব্বা তা কূটঙ্গমা কূটসমোসরণা কূটসমুগ্ঘাতা সব্বা তা সমুগ্ঘাতং গচ্ছন্তি; এৰমেৰ খো, ভিক্খৰে, যে কেচি অকুসলা ধম্মা সব্বে তে অৰিজ্জামূলকা অৰিজ্জাসমোসরণা অৰিজ্জাসমুগ্ঘাতা, সব্বে তে সমুগ্ঘাতং গচ্ছন্তি. তস্মাতিহ, ভিক্খৰে, এৰং সিক্খিতব্বং – ‘অপ্পমত্তা ৰিহরিস্সামা’তি. এৰঞ্হি ৰো, ভিক্খৰে, সিক্খিতব্ব’’ন্তি. পঠমং.

২. নখসিখসুত্তং

২২৪. সাৰত্থিযং ৰিহরতি. অথ খো ভগৰা পরিত্তং নখসিখাযং পংসুং আরোপেত্ৰা ভিক্খূ আমন্তেসি – ‘‘তং কিং মঞ্ঞথ ভিক্খৰে, কতমং নু খো বহুতরং, যো ৰাযং [যো চাযং (বহূসু)] মযা পরিত্তো নখসিখাযং পংসু আরোপিতো অযং ৰা [যা চাযং (স্যা. ক.)] মহাপথৰী’’তি? ‘‘এতদেৰ, ভন্তে, বহুতরং যদিদং মহাপথৰী. অপ্পমত্তকোযং ভগৰতা পরিত্তো নখসিখাযং পংসু আরোপিতো. সঙ্খম্পি ন উপেতি উপনিধিম্পি ন উপেতি কলভাগম্পি ন উপেতি মহাপথৰিং উপনিধায ভগৰতা পরিত্তো নখসিখাযং পংসু আরোপিতো’’তি. ‘‘এৰমেৰ খো, ভিক্খৰে, অপ্পকা তে সত্তা যে মনুস্সেসু পচ্চাজাযন্তি; অথ খো এতেযেৰ বহুতরা সত্তা যে অঞ্ঞত্র মনুস্সেহি পচ্চাজাযন্তি. তস্মাতিহ, ভিক্খৰে, এৰং সিক্খিতব্বং ¶ – ‘অপ্পমত্তা ৰিহরিস্সামা’তি. এৰঞ্হি ৰো, ভিক্খৰে, সিক্খিতব্ব’’ন্তি. দুতিযং.

৩. কুলসুত্তং

২২৫. সাৰত্থিযং ¶ ৰিহরতি…পে… ‘‘সেয্যথাপি ¶ , ভিক্খৰে, যানি কানিচি কুলানি বহুত্থিকানি অপ্পপুরিসানি তানি সুপ্পধংসিযানি হোন্তি চোরেহি কুম্ভত্থেনকেহি ¶ ; এৰমেৰ খো, ভিক্খৰে, যস্স কস্সচি ভিক্খুনো মেত্তাচেতোৰিমুত্তি অভাৰিতা অবহুলীকতা সো সুপ্পধংসিযো হোতি অমনুস্সেহি. সেয্যথাপি, ভিক্খৰে, যানি কানিচি কুলানি অপ্পিত্থিকানি বহুপুরিসানি তানি দুপ্পধংসিযানি হোন্তি চোরেহি কুম্ভত্থেনকেহি, এৰমেৰ খো, ভিক্খৰে, যস্স কস্সচি ভিক্খুনো মেত্তাচেতোৰিমুত্তি ভাৰিতা বহুলীকতা সো দুপ্পধংসিযো হোতি অমনুস্সেহি. তস্মাতিহ, ভিক্খৰে, এৰং সিক্খিতব্বং – ‘মেত্তা নো চেতোৰিমুত্তি ভাৰিতা ভৰিস্সতি বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা’তি. এৰঞ্হি ৰো, ভিক্খৰে, সিক্খিতব্ব’’ন্তি. ততিযং.

৪. ওক্খাসুত্তং

২২৬. সাৰত্থিযং ৰিহরতি…পে… ‘‘যো, ভিক্খৰে, পুব্বণ্হসমযং ওক্খাসতং দানং দদেয্য, যো মজ্ঝন্হিকসমযং ওক্খাসতং দানং দদেয্য, যো সাযন্হসমযং ওক্খাসতং দানং দদেয্য, যো ৰা পুব্বণ্হসমযং অন্তমসো গদ্দুহনমত্তম্পি মেত্তচিত্তং ভাৰেয্য, যো ৰা মজ্ঝন্হিকসমযং অন্তমসো গদ্দুহনমত্তম্পি মেত্তচিত্তং ভাৰেয্য, যো ¶ ৰা সাযন্হসমযং অন্তমসো গদ্দুহনমত্তম্পি মেত্তচিত্তং ভাৰেয্য, ইদং ততো মহপ্ফলতরং. তস্মাতিহ, ভিক্খৰে, এৰং সিক্খিতব্বং – ‘মেত্তা নো চেতোৰিমুত্তি ভাৰিতা ভৰিস্সতি বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা’তি. এৰঞ্হি ৰো, ভিক্খৰে, সিক্খিতব্ব’’ন্তি. চতুত্থং.

৫. সত্তিসুত্তং

২২৭. সাৰত্থিযং ¶ ৰিহরতি…পে… ‘‘সেয্যথাপি, ভিক্খৰে, সত্তি তিণ্হফলা. অথ পুরিসো আগচ্ছেয্য – ‘অহং ইমং সত্তিং তিণ্হফলং পাণিনা ৰা মুট্ঠিনা ৰা পটিলেণিস্সামি পটিকোট্টিস্সামি পটিৰট্টেস্সামী’তি. তং কিং মঞ্ঞথ, ভিক্খৰে, ভব্বো নু খো সো পুরিসো অমুং সত্তিং তিণ্হফলং পাণিনা ৰা মুট্ঠিনা ৰা পটিলেণেতুং পটিকোট্টেতুং পটিৰট্টেতু’’ন্তি? ‘‘নো হেতং ¶ , ভন্তে’’. ‘‘তং কিস্স হেতু’’? ‘‘অসু হি, ভন্তে, সত্তি তিণ্হফলা ন সুকরা পাণিনা ৰা মুট্ঠিনা ৰা পটিলেণেতুং পটিকোট্টেতুং পটিৰট্টেতুং. যাৰদেৰ চ পন সো পুরিসো কিলমথস্স ৰিঘাতস্স ভাগী অস্সা’’তি.

‘‘এৰমেৰ ¶ খো, ভিক্খৰে, যস্স কস্সচি ভিক্খুনো মেত্তাচেতোৰিমুত্তি ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা, তস্স চে অমনুস্সো চিত্তং খিপিতব্বং মঞ্ঞেয্য; অথ খো স্ৰেৰ অমনুস্সো কিলমথস্স ৰিঘাতস্স ভাগী অস্স. তস্মাতিহ, ভিক্খৰে, এৰং সিক্খিতব্বং – ‘মেত্তা নো চেতোৰিমুত্তি ভাৰিতা ভৰিস্সতি বহুলীকতা যানীকতা ৰত্থুকতা অনুট্ঠিতা ¶ পরিচিতা সুসমারদ্ধা’তি. এৰঞ্হি ৰো, ভিক্খৰে, সিক্খিতব্ব’’ন্তি. পঞ্চমং.

৬. ধনুগ্গহসুত্তং

২২৮. সাৰত্থিযং ৰিহরতি…পে… ‘‘সেয্যথাপি, ভিক্খৰে, চত্তারো দল়্হধম্মা ধনুগ্গহা ¶ সুসিক্খিতা কতহত্থা কতূপাসনা চতুদ্দিসা ঠিতা অস্সু. অথ পুরিসো আগচ্ছেয্য – ‘অহং ইমেসং চতুন্নং দল়্হধম্মানং ধনুগ্গহানং সুসিক্খিতানং কতহত্থানং কতূপাসনানং চতুদ্দিসা কণ্ডে খিত্তে অপ্পতিট্ঠিতে পথৰিযং গহেত্ৰা আহরিস্সামী’তি. তং কিং মঞ্ঞথ, ভিক্খৰে, ‘জৰনো পুরিসো পরমেন জৰেন সমন্নাগতো’তি অলং ৰচনাযা’’তি?

‘‘একস্স চেপি, ভন্তে, দল়্হধম্মস্স ধনুগ্গহস্স সুসিক্খিতস্স কতহত্থস্স কতূপাসনস্স কণ্ডং খিত্তং অপ্পতিট্ঠিতং পথৰিযং গহেত্ৰা আহরেয্য – ‘জৰনো পুরিসো পরমেন জৰেন সমন্নাগতো’তি অলং ৰচনায, কো পন ৰাদো চতুন্নং দল়্হধম্মানং ধনুগ্গহানং সুসিক্খিতানং কতহত্থানং কতূপাসনান’’ন্তি?

‘‘যথা চ, ভিক্খৰে, তস্স পুরিসস্স জৰো, যথা চ চন্দিমসূরিযানং জৰো, ততো সীঘতরো. যথা চ, ভিক্খৰে, তস্স পুরিসস্স জৰো যথা চ চন্দিমসূরিযানং জৰো যথা চ যা দেৰতা চন্দিমসূরিযানং পুরতো ধাৰন্তি তাসং দেৰতানং জৰো, ( ) [(ততো সীঘতরো. যথা চ ভিক্খৰে তস্স পুরিসস্স জৰো, যথা চ চন্দিমসুরিযানং জৰো, যথা চ যা দেৰতা চন্দিমসুরিযানং পুরতো ধাৰন্তি, তাসং দেৰতানং জৰো,) (সী. স্যা. কং.)] ততো সীঘতরং আযুসঙ্খারা ¶ খিযন্তি. তস্মাতিহ ¶ , ভিক্খৰে, এৰং সিক্খিতব্বং – ‘অপ্পমত্তা ৰিহরিস্সামা’তি. এৰঞ্হি ৰো, ভিক্খৰে, �