📜

নমো তস্স ভগৰতো অরহতো সম্মাসম্বুদ্ধস্স

সংযুত্তনিকাযো

সল়াযতনৰগ্গো

১. সল়াযতনসংযুত্তং

১. অনিচ্চৰগ্গো

১. অজ্ঝত্তানিচ্চসুত্তং

১. এৰং ¶ ¶ ¶ ¶ মে সুতং. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘চক্খুং ¶ , ভিক্খৰে, অনিচ্চং. যদনিচ্চং তং দুক্খং; যং দুক্খং তদনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. সোতং অনিচ্চং. যদনিচ্চং…পে… ঘানং অনিচ্চং. যদনিচ্চং…পে… জিৰ্হা অনিচ্চা. যদনিচ্চং তং দুক্খং; যং দুক্খং তদনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. কাযো অনিচ্চো. যদনিচ্চং…পে… মনো অনিচ্চো. যদনিচ্চং তং দুক্খং; যং দুক্খং তদনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায ¶ দট্ঠব্বং. এৰং ¶ পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, সোতস্মিম্পি নিব্বিন্দতি, ঘানস্মিম্পি নিব্বিন্দতি, জিৰ্হাযপি নিব্বিন্দতি, কাযস্মিম্পি নিব্বিন্দতি ¶ , মনস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. পঠমং.

২. অজ্ঝত্তদুক্খসুত্তং

২. ‘‘চক্খুং, ভিক্খৰে, দুক্খং. যং দুক্খং তদনত্তা; যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. সোতং দুক্খং…পে… ঘানং দুক্খং… জিৰ্হা দুক্খা… কাযো দুক্খো… মনো দুক্খো. যং দুক্খং তদনত্তা; যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… নাপরং ইত্থত্তাযাতি পজানাতী’’তি. দুতিযং.

৩. অজ্ঝত্তানত্তসুত্তং

৩. ‘‘চক্খুং, ভিক্খৰে, অনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. সোতং অনত্তা…পে… ঘানং অনত্তা… জিৰ্হা অনত্তা… কাযো অনত্তা… মনো অনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… নাপরং ইত্থত্তাযাতি পজানাতী’’তি. ততিযং.

৪. বাহিরানিচ্চসুত্তং

৪. ‘‘রূপা ¶ ¶ , ভিক্খৰে, অনিচ্চা. যদনিচ্চং তং দুক্খং; যং দুক্খং তদনত্তা. যদনত্তা তং ‘নেতং মম, নেসোহমস্মি ¶ , ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. সদ্দা… গন্ধা… রসা… ফোট্ঠব্বা… ধম্মা অনিচ্চা. যদনিচ্চং তং দুক্খং; যং দুক্খং তদনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং, ভিক্খৰে, সুতৰা অরিযসাৰকো রূপেসুপি নিব্বিন্দতি, সদ্দেসুপি নিব্বিন্দতি, গন্ধেসুপি নিব্বিন্দতি, রসেসুপি নিব্বিন্দতি, ফোট্ঠব্বেসুপি নিব্বিন্দতি, ধম্মেসুপি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. চতুত্থং.

৫. বাহিরদুক্খসুত্তং

৫. ‘‘রূপা ¶ , ভিক্খৰে, দুক্খা. যং দুক্খং তদনত্তা; যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. সদ্দা… গন্ধা… রসা… ফোট্ঠব্বা… ধম্মা দুক্খা. যং দুক্খং তদনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… নাপরং ইত্থত্তাযাতি পজানাতী’’তি. পঞ্চমং.

৬. বাহিরানত্তসুত্তং

৬. ‘‘রূপা, ভিক্খৰে, অনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. সদ্দা… গন্ধা… রসা… ফোট্ঠব্বা… ধম্মা অনত্তা. যদনত্তা তং ¶ ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… নাপরং ইত্থত্তাযাতি পজানাতী’’তি. ছট্ঠং.

৭. অজ্ঝত্তানিচ্চাতীতানাগতসুত্তং

৭. ‘‘চক্খুং ¶ ¶ , ভিক্খৰে, অনিচ্চং অতীতানাগতং; কো পন ৰাদো পচ্চুপ্পন্নস্স! এৰং পস্সং, ভিক্খৰে, সুতৰা অরিযসাৰকো অতীতস্মিং চক্খুস্মিং অনপেক্খো হোতি; অনাগতং চক্খুং নাভিনন্দতি; পচ্চুপ্পন্নস্স চক্খুস্স নিব্বিদায ৰিরাগায নিরোধায পটিপন্নো হোতি. সোতং অনিচ্চং… ঘানং অনিচ্চং… জিৰ্হা অনিচ্চা অতীতানাগতা; কো পন ৰাদো পচ্চুপ্পন্নায! এৰং পস্সং, ভিক্খৰে, সুতৰা অরিযসাৰকো অতীতায জিৰ্হায অনপেক্খো হোতি; অনাগতং জিৰ্হং নাভিনন্দতি; পচ্চুপ্পন্নায জিৰ্হায নিব্বিদায ৰিরাগায নিরোধায পটিপন্নো হোতি. কাযো অনিচ্চো…পে… মনো অনিচ্চো অতীতানাগতো; কো পন ৰাদো পচ্চুপ্পন্নস্স! এৰং পস্সং, ভিক্খৰে, সুতৰা অরিযসাৰকো অতীতস্মিং মনস্মিং অনপেক্খো হোতি; অনাগতং মনং নাভিনন্দতি; পচ্চুপ্পন্নস্স মনস্স নিব্বিদায ৰিরাগায নিরোধায পটিপন্নো হোতী’’তি. সত্তমং.

৮. অজ্ঝত্তদুক্খাতীতানাগতসুত্তং

৮. ‘‘চক্খুং ¶ , ভিক্খৰে, দুক্খং অতীতানাগতং; কো পন ৰাদো পচ্চুপ্পন্নস্স! এৰং পস্সং, ভিক্খৰে, সুতৰা অরিযসাৰকো অতীতস্মিং চক্খুস্মিং অনপেক্খো হোতি; অনাগতং চক্খুং নাভিনন্দতি; পচ্চুপ্পন্নস্স চক্খুস্স নিব্বিদায ৰিরাগায নিরোধায পটিপন্নো হোতি. সোতং দুক্খং…পে… ঘানং দুক্খং…পে… জিৰ্হা ¶ দুক্খা অতীতানাগতা; কো পন ৰাদো পচ্চুপ্পন্নায! এৰং পস্সং, ভিক্খৰে, সুতৰা অরিযসাৰকো অতীতায জিৰ্হায অনপেক্খো হোতি; অনাগতং জিৰ্হং নাভিনন্দতি; পচ্চুপ্পন্নায জিৰ্হায নিব্বিদায ৰিরাগায নিরোধায পটিপন্নো হোতি. কাযো দুক্খো…পে… মনো দুক্খো অতীতানাগতো; কো পন ৰাদো পচ্চুপ্পন্নস্স! এৰং পস্সং, ভিক্খৰে, সুতৰা অরিযসাৰকো অতীতস্মিং মনস্মিং অনপেক্খো হোতি; অনাগতং মনং নাভিনন্দতি; পচ্চুপ্পন্নস্স মনস্স নিব্বিদায ৰিরাগায নিরোধায পটিপন্নো হোতী’’তি. অট্ঠমং.

৯. অজ্ঝত্তানত্তাতীতানাগতসুত্তং

৯. ‘‘চক্খুং ¶ , ভিক্খৰে, অনত্তা অতীতানাগতং; কো পন ৰাদো পচ্চুপ্পন্নস্স! এৰং পস্সং, ভিক্খৰে, সুতৰা অরিযসাৰকো ¶ অতীতস্মিং চক্খুস্মিং অনপেক্খো হোতি; অনাগতং চক্খুং নাভিনন্দতি; পচ্চুপ্পন্নস্স চক্খুস্স নিব্বিদায ৰিরাগায নিরোধায পটিপন্নো হোতি. সোতং অনত্তা…পে… ঘানং অনত্তা…পে… জিৰ্হা অনত্তা অতীতানাগতা; কো পন ৰাদো পচ্চুপ্পন্নায! এৰং পস্সং, ভিক্খৰে, সুতৰা অরিযসাৰকো অতীতায জিৰ্হায অনপেক্খো হোতি; অনাগতং জিৰ্হং নাভিনন্দতি; পচ্চুপ্পন্নায জিৰ্হায নিব্বিদায ৰিরাগায নিরোধায পটিপন্নো হোতি. কাযো অনত্তা…পে… মনো অনত্তা অতীতানাগতো; কো পন ৰাদো পচ্চুপ্পন্নস্স! এৰং পস্সং, ভিক্খৰে, সুতৰা অরিযসাৰকো অতীতস্মিং মনস্মিং অনপেক্খো হোতি; অনাগতং মনং নাভিনন্দতি; পচ্চুপ্পন্নস্স মনস্স নিব্বিদায ৰিরাগায নিরোধায পটিপন্নো হোতী’’তি. নৰমং.

১০. বাহিরানিচ্চাতীতানাগতসুত্তং

১০. ‘‘রূপা ¶ , ভিক্খৰে, অনিচ্চা অতীতানাগতা; কো পন ৰাদো পচ্চুপ্পন্নানং! এৰং পস্সং, ভিক্খৰে, সুতৰা অরিযসাৰকো অতীতেসু রূপেসু ¶ অনপেক্খো হোতি; অনাগতে রূপে নাভিনন্দতি; পচ্চুপ্পন্নানং রূপানং নিব্বিদায ৰিরাগায নিরোধায পটিপন্নো হোতি. সদ্দা… গন্ধা… রসা… ফোট্ঠব্বা… ধম্মা অনিচ্চা অতীতানাগতা; কো পন ৰাদো পচ্চুপ্পন্নানং! এৰং পস্সং, ভিক্খৰে, সুতৰা অরিযসাৰকো অতীতেসু ধম্মেসু অনপেক্খো হোতি; অনাগতে ধম্মে নাভিনন্দতি; পচ্চুপ্পন্নানং ধম্মানং নিব্বিদায ৰিরাগায নিরোধায পটিপন্নো হোতী’’তি. দসমং.

১১. বাহিরদুক্খাতীতানাগতসুত্তং

১১. ‘‘রূপা, ভিক্খৰে, দুক্খা অতীতানাগতা; কো পন ৰাদো পচ্চুপ্পন্নানং! এৰং পস্সং, ভিক্খৰে, সুতৰা অরিযসাৰকো অতীতেসু রূপেসু অনপেক্খো হোতি; অনাগতে রূপে নাভিনন্দতি ¶ ; পচ্চুপ্পন্নানং রূপানং নিব্বিদায ৰিরাগায নিরোধায পটিপন্নো হোতী’’তি…পে. ¶ …. একাদসমং.

১২. বাহিরানত্তাতীতানাগতসুত্তং

১২. ‘‘রূপা, ভিক্খৰে, অনত্তা অতীতানাগতা; কো পন ৰাদো পচ্চুপ্পন্নানং! এৰং পস্সং, ভিক্খৰে, সুতৰা অরিযসাৰকো অতীতেসু রূপেসু অনপেক্খো হোতি; অনাগতে রূপে নাভিনন্দতি; পচ্চুপ্পন্নানং রূপানং নিব্বিদায ৰিরাগায নিরোধায পটিপন্নো হোতি. সদ্দা… গন্ধা… রসা… ফোট্ঠব্বা… ধম্মা অনত্তা অতীতানাগতা; কো পন ৰাদো পচ্চুপ্পন্নানং! এৰং পস্সং, ভিক্খৰে ¶ , সুতৰা অরিযসাৰকো অতীতেসু ধম্মেসু অনপেক্খো হোতি; অনাগতে ধম্মে নাভিনন্দতি; পচ্চুপ্পন্নানং ধম্মানং নিব্বিদায ৰিরাগায নিরোধায পটিপন্নো হোতী’’তি. দ্ৰাদসমং.

অনিচ্চৰগ্গো পঠমো.

তস্সুদ্দানং –

অনিচ্চং দুক্খং অনত্তা চ, তযো অজ্ঝত্তবাহিরা;

যদনিচ্চেন তযো ৰুত্তা, তে তে অজ্ঝত্তবাহিরাতি.

২. যমকৰগ্গো

১. পঠমপুব্বেসম্বোধসুত্তং

১৩. সাৰত্থিনিদানং ¶ . ‘‘পুব্বেৰ ¶ মে, ভিক্খৰে, সম্বোধা অনভিসম্বুদ্ধস্স বোধিসত্তস্সেৰ ¶ সতো এতদহোসি – ‘কো নু খো চক্খুস্স অস্সাদো, কো আদীনৰো, কিং নিস্সরণং? কো সোতস্স…পে… কো ঘানস্স… কো জিৰ্হায… কো কাযস্স… কো মনস্স ¶ অস্সাদো, কো আদীনৰো, কিং নিস্সরণ’ন্তি? তস্স ময্হং, ভিক্খৰে, এতদহোসি – ‘যং খো চক্খুং পটিচ্চ উপ্পজ্জতি সুখং সোমনস্সং, অযং চক্খুস্স অস্সাদো. যং চক্খুং অনিচ্চং দুক্খং ৰিপরিণামধম্মং, অযং চক্খুস্স আদীনৰো. যো চক্খুস্মিং ছন্দরাগৰিনযো ছন্দরাগপ্পহানং, ইদং চক্খুস্স নিস্সরণং. যং সোতং…পে… যং ঘানং…পে… যং জিৰ্হং পটিচ্চ উপ্পজ্জতি সুখং সোমনস্সং, অযং জিৰ্হায অস্সাদো. যং [যা (সী. স্যা. কং. পী.)] জিৰ্হা অনিচ্চা দুক্খা ৰিপরিণামধম্মা, অযং জিৰ্হায আদীনৰো. যো জিৰ্হায ছন্দরাগৰিনযো ছন্দরাগপ্পহানং, ইদং জিৰ্হায নিস্সরণং. যং কাযং…পে… যং মনং পটিচ্চ উপ্পজ্জতি সুখং সোমনস্সং, অযং মনস্স অস্সাদো. যং [যো (সী. স্যা. কং. ক.)] মনো অনিচ্চো দুক্খো ৰিপরিণামধম্মো, অযং মনস্স আদীনৰো. যো মনস্মিং ছন্দরাগৰিনযো ছন্দরাগপ্পহানং, ইদং মনস্স নিস্সরণ’’’ন্তি.

‘‘যাৰকীৰঞ্চাহং, ভিক্খৰে, ইমেসং ছন্নং অজ্ঝত্তিকানং আযতনানং এৰং অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং নাব্ভঞ্ঞাসিং, নেৰ তাৰাহং, ভিক্খৰে, সদেৰকে লোকে সমারকে সব্রহ্মকে ¶ সস্সমণব্রাহ্মণিযা পজায সদেৰমনুস্সায ‘অনুত্তরং সম্মাসম্বোধিং অভিসম্বুদ্ধো’তি [সব্বত্থাপি এৰমেৰ ইতিসদ্দেন সহ দিস্সতি] পচ্চঞ্ঞাসিং. যতো চ খ্ৰাহং, ভিক্খৰে, ইমেসং ছন্নং অজ্ঝত্তিকানং আযতনানং এৰং অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং অব্ভঞ্ঞাসিং, অথাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায ‘অনুত্তরং সম্মাসম্বোধিং অভিসম্বুদ্ধো’তি পচ্চঞ্ঞাসিং. ঞাণঞ্চ ¶ পন মে দস্সনং উদপাদি – ‘অকুপ্পা মে ৰিমুত্তি [চেতোৰিমুত্তি (সী. পী. ক.) এৰমুপরিপি], অযমন্তিমা জাতি, নত্থি দানি পুনব্ভৰো’’’তি. পঠমং.

২. দুতিযপুব্বেসম্বোধসুত্তং

১৪. ‘‘পুব্বেৰ ¶ মে, ভিক্খৰে, সম্বোধা অনভিসম্বুদ্ধস্স বোধিসত্তস্সেৰ সতো এতদহোসি – ‘কো নু খো রূপানং অস্সাদো, কো আদীনৰো, কিং নিস্সরণং? কো সদ্দানং…পে… কো গন্ধানং… কো রসানং… কো ফোট্ঠব্বানং… কো ধম্মানং অস্সাদো, কো আদীনৰো, কিং নিস্সরণ’ন্তি? তস্স ময্হং, ভিক্খৰে, এতদহোসি – ‘যং খো রূপে পটিচ্চ উপ্পজ্জতি সুখং সোমনস্সং, অযং রূপানং অস্সাদো. যং রূপা অনিচ্চা দুক্খা ৰিপরিণামধম্মা, অযং রূপানং আদীনৰো. যো রূপেসু ছন্দরাগৰিনযো ছন্দরাগপ্পহানং, ইদং রূপানং ¶ নিস্সরণং. যং সদ্দে… গন্ধে… রসে… ফোট্ঠব্বে… যং ধম্মে পটিচ্চ উপ্পজ্জতি সুখং সোমনস্সং, অযং ধম্মানং অস্সাদো. যং ধম্মা অনিচ্চা দুক্খা ৰিপরিণামধম্মা ¶ , অযং ধম্মানং আদীনৰো. যো ধম্মেসু ছন্দরাগৰিনযো ছন্দরাগপ্পহানং, ইদং ধম্মানং নিস্সরণ’’’ন্তি.

‘‘যাৰকীৰঞ্চাহং, ভিক্খৰে, ইমেসং ছন্নং বাহিরানং আযতনানং এৰং অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং নাব্ভঞ্ঞাসিং, নেৰ তাৰাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায ‘অনুত্তরং সম্মাসম্বোধিং অভিসম্বুদ্ধো’তি পচ্চঞ্ঞাসিং. যতো চ খ্ৰাহং, ভিক্খৰে, ইমেসং ছন্নং বাহিরানং আযতনানং এৰং অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং অব্ভঞ্ঞাসিং, অথাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায ‘অনুত্তরং সম্মাসম্বোধিং অভিসম্বুদ্ধো’তি পচ্চঞ্ঞাসিং. ঞাণঞ্চ পন মে দস্সনং উদপাদি – ‘অকুপ্পা মে ৰিমুত্তি, অযমন্তিমা জাতি, নত্থি দানি পুনব্ভৰো’’’তি. দুতিযং.

৩. পঠমঅস্সাদপরিযেসনসুত্তং

১৫. ‘‘চক্খুস্সাহং, ভিক্খৰে, অস্সাদপরিযেসনং অচরিং. যো চক্খুস্স অস্সাদো তদজ্ঝগমং. যাৰতা চক্খুস্স অস্সাদো পঞ্ঞায মে সো সুদিট্ঠো. চক্খুস্সাহং, ভিক্খৰে ¶ , আদীনৰপরিযেসনং অচরিং. যো চক্খুস্স আদীনৰো তদজ্ঝগমং. যাৰতা চক্খুস্স আদীনৰো পঞ্ঞায মে সো সুদিট্ঠো. চক্খুস্সাহং, ভিক্খৰে, নিস্সরণপরিযেসনং অচরিং. যং চক্খুস্স নিস্সরণং তদজ্ঝগমং. যাৰতা চক্খুস্স নিস্সরণং ¶ , পঞ্ঞায মে তং সুদিট্ঠং. সোতস্সাহং ¶ , ভিক্খৰে… ঘানস্সাহং, ভিক্খৰে… জিৰ্হাযাহং ভিক্খৰে, অস্সাদপরিযেসনং অচরিং. যো জিৰ্হায অস্সাদো তদজ্ঝগমং. যাৰতা জিৰ্হায অস্সাদো পঞ্ঞায মে সো সুদিট্ঠো. জিৰ্হাযাহং, ভিক্খৰে, আদীনৰপরিযেসনং অচরিং. যো জিৰ্হায আদীনৰো তদজ্ঝগমং. যাৰতা জিৰ্হায আদীনৰো পঞ্ঞায মে সো সুদিট্ঠো. জিৰ্হাযাহং, ভিক্খৰে, নিস্সরণপরিযেসনং অচরিং. যং জিৰ্হায নিস্সরণং তদজ্ঝগমং. যাৰতা জিৰ্হায নিস্সরণং, পঞ্ঞায মে তং সুদিট্ঠং. মনস্সাহং, ভিক্খৰে, অস্সাদপরিযেসনং অচরিং. যো মনস্স অস্সাদো তদজ্ঝগমং. যাৰতা মনস্স অস্সাদো পঞ্ঞায মে সো সুদিট্ঠো. মনস্সাহং, ভিক্খৰে ¶ , আদীনৰপরিযেসনং অচরিং. যো মনস্স আদীনৰো তদজ্ঝগমং. যাৰতা মনস্স আদীনৰো পঞ্ঞায মে সো সুদিট্ঠো. মনস্সাহং, ভিক্খৰে, নিস্সরণপরিযেসনং অচরিং. যং মনস্স নিস্সরণং তদজ্ঝগমং. যাৰতা মনস্স নিস্সরণং, পঞ্ঞায মে তং সুদিট্ঠং.

‘‘যাৰকীৰঞ্চাহং, ভিক্খৰে, ইমেসং ছন্নং অজ্ঝত্তিকানং আযতনানং অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং নাব্ভঞ্ঞাসিং…পে… পচ্চঞ্ঞাসিং. ঞাণঞ্চ পন মে দস্সনং উদপাদি – ‘অকুপ্পা মে ৰিমুত্তি, অযমন্তিমা জাতি, নত্থি দানি পুনব্ভৰো’’’তি. ততিযং.

৪. দুতিযঅস্সাদপরিযেসনসুত্তং

১৬. ‘‘রূপানাহং, ভিক্খৰে, অস্সাদপরিযেসনং অচরিং. যো রূপানং অস্সাদো ¶ তদজ্ঝগমং. যাৰতা রূপানং অস্সাদো পঞ্ঞায মে সো সুদিট্ঠো. রূপানাহং, ভিক্খৰে, আদীনৰপরিযেসনং ¶ অচরিং. যো রূপানং আদীনৰো তদজ্ঝগমং. যাৰতা রূপানং আদীনৰো পঞ্ঞায মে সো সুদিট্ঠো. রূপানাহং, ভিক্খৰে, নিস্সরণপরিযেসনং অচরিং. যং রূপানং নিস্সরণং তদজ্ঝগমং. যাৰতা রূপানং নিস্সরণং, পঞ্ঞায মে তং সুদিট্ঠং. সদ্দানাহং, ভিক্খৰে… গন্ধানাহং, ভিক্খৰে… রসানাহং, ভিক্খৰে… ফোট্ঠব্বানাহং, ভিক্খৰে… ধম্মানাহং, ভিক্খৰে, অস্সাদপরিযেসনং অচরিং. যো ধম্মানং অস্সাদো তদজ্ঝগমং. যাৰতা ধম্মানং অস্সাদো পঞ্ঞায মে সো সুদিট্ঠো. ধম্মানাহং, ভিক্খৰে, আদীনৰপরিযেসনং অচরিং. যো ধম্মানং আদীনৰো তদজ্ঝগমং. যাৰতা ধম্মানং আদীনৰো পঞ্ঞায মে সো সুদিট্ঠো. ধম্মানাহং, ভিক্খৰে, নিস্সরণপরিযেসনং অচরিং. যং ধম্মানং নিস্সরণং তদজ্ঝগমং. যাৰতা ধম্মানং নিস্সরণং, পঞ্ঞায ¶ মে তং সুদিট্ঠং.

‘‘যাৰকীৰঞ্চাহং, ভিক্খৰে, ইমেসং ছন্নং বাহিরানং আযতনানং অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং নাব্ভঞ্ঞাসিং…পে… পচ্চঞ্ঞাসিং. ঞাণঞ্চ পন মে দস্সনং উদপাদি – ‘অকুপ্পা মে ৰিমুত্তি, অযমন্তিমা জাতি, নত্থি দানি পুনব্ভৰো’’’তি. চতুত্থং.

৫. পঠমনোচেঅস্সাদসুত্তং

১৭. ‘‘নো ¶ চেদং, ভিক্খৰে, চক্খুস্স অস্সাদো অভৰিস্স, নযিদং সত্তা চক্খুস্মিং সারজ্জেয্যুং. যস্মা চ খো, ভিক্খৰে, অত্থি চক্খুস্স অস্সাদো ¶ তস্মা সত্তা চক্খুস্মিং সারজ্জন্তি. নো চেদং, ভিক্খৰে, চক্খুস্স আদীনৰো অভৰিস্স, নযিদং সত্তা চক্খুস্মিং নিব্বিন্দেয্যুং. যস্মা চ খো, ভিক্খৰে, অত্থি চক্খুস্স আদীনৰো তস্মা সত্তা চক্খুস্মিং নিব্বিন্দন্তি. নো চেদং, ভিক্খৰে, চক্খুস্স নিস্সরণং অভৰিস্স, নযিদং সত্তা চক্খুস্মা নিস্সরেয্যুং. যস্মা চ খো, ভিক্খৰে, অত্থি চক্খুস্স নিস্সরণং তস্মা সত্তা চক্খুস্মা নিস্সরন্তি. নো চেদং, ভিক্খৰে, সোতস্স অস্সাদো অভৰিস্স… নো ¶ চেদং, ভিক্খৰে, ঘানস্স অস্সাদো অভৰিস্স… নো চেদং, ভিক্খৰে, জিৰ্হায অস্সাদো অভৰিস্স, নযিদং সত্তা জিৰ্হায সারজ্জেয্যুং. যস্মা চ খো, ভিক্খৰে, অত্থি জিৰ্হায অস্সাদো, তস্মা সত্তা জিৰ্হায সারজ্জন্তি. নো চেদং, ভিক্খৰে, জিৰ্হায আদীনৰো অভৰিস্স, নযিদং সত্তা জিৰ্হায নিব্বিন্দেয্যুং. যস্মা চ খো, ভিক্খৰে, অত্থি জিৰ্হায আদীনৰো, তস্মা সত্তা জিৰ্হায নিব্বিন্দন্তি. নো চেদং, ভিক্খৰে, জিৰ্হায নিস্সরণং অভৰিস্স, নযিদং সত্তা জিৰ্হায নিস্সরেয্যুং. যস্মা চ খো, ভিক্খৰে, অত্থি জিৰ্হায নিস্সরণং, তস্মা সত্তা জিৰ্হায নিস্সরন্তি. নো চেদং, ভিক্খৰে, কাযস্স অস্সাদো অভৰিস্স… নো চেদং, ভিক্খৰে, মনস্স অস্সাদো অভৰিস্স, নযিদং সত্তা মনস্মিং সারজ্জেয্যুং. যস্মা চ খো, ভিক্খৰে, অত্থি মনস্স অস্সাদো, তস্মা সত্তা মনস্মিং সারজ্জন্তি. নো চেদং, ভিক্খৰে, মনস্স আদীনৰো অভৰিস্স, নযিদং সত্তা মনস্মিং নিব্বিন্দেয্যুং ¶ . যস্মা চ খো, ভিক্খৰে, অত্থি মনস্স আদীনৰো, তস্মা সত্তা মনস্মিং নিব্বিন্দন্তি. নো চেদং, ভিক্খৰে, মনস্স নিস্সরণং অভৰিস্স, নযিদং সত্তা মনস্মা নিস্সরেয্যুং. যস্মা চ খো, ভিক্খৰে, অত্থি মনস্স নিস্সরণং, তস্মা সত্তা মনস্মা নিস্সরন্তি.

‘‘যাৰকীৰঞ্চ, ভিক্খৰে, সত্তা ইমেসং ছন্নং অজ্ঝত্তিকানং আযতনানং ¶ অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং নাব্ভঞ্ঞংসু, নেৰ তাৰ, ভিক্খৰে, সত্তা সদেৰকা লোকা সমারকা সব্রহ্মকা সস্সমণব্রাহ্মণিযা পজায সদেৰমনুস্সায নিস্সটা ৰিসঞ্ঞুত্তা ৰিপ্পমুত্তা ৰিমরিযাদীকতেন [ৰিপরিযাদিকতেন (সী. পী.), ৰিপরিযাদিকতেন (স্যা. কং. ক.)] চেতসা ৰিহরিংসু. যতো চ খো, ভিক্খৰে, সত্তা ইমেসং ছন্নং অজ্ঝত্তিকানং আযতনানং অস্সাদঞ্চ অস্সাদতো, আদীনৰঞ্চ ¶ আদীনৰতো, নিস্সরণঞ্চ নিস্সরণতো যথাভূতং অব্ভঞ্ঞংসু ¶ , অথ, ভিক্খৰে, সত্তা সদেৰকা লোকা সমারকা সব্রহ্মকা সস্সমণব্রাহ্মণিযা পজায সদেৰমনুস্সায নিস্সটা ৰিসঞ্ঞুত্তা ৰিপ্পমুত্তা ৰিমরিযাদীকতেন চেতসা ৰিহরন্তী’’তি. পঞ্চমং.

৬. দুতিযনোচেঅস্সাদসুত্তং

১৮. ‘‘নো চেদং, ভিক্খৰে, রূপানং অস্সাদো অভৰিস্স, নযিদং সত্তা রূপেসু সারজ্জেয্যুং. যস্মা চ খো, ভিক্খৰে, অত্থি রূপানং অস্সাদো, তস্মা সত্তা রূপেসু সারজ্জন্তি. নো চেদং, ভিক্খৰে, রূপানং আদীনৰো অভৰিস্স, নযিদং সত্তা রূপেসু নিব্বিন্দেয্যুং. যস্মা ¶ চ খো, ভিক্খৰে, অত্থি রূপানং আদীনৰো, তস্মা সত্তা রূপেসু নিব্বিন্দন্তি. নো চেদং, ভিক্খৰে, রূপানং নিস্সরণং অভৰিস্স, নযিদং সত্তা রূপেহি নিস্সরেয্যুং. যস্মা চ খো, ভিক্খৰে, অত্থি রূপানং নিস্সরণং, তস্মা সত্তা রূপেহি নিস্সরন্তি. নো চেদং, ভিক্খৰে, সদ্দানং… গন্ধানং… রসানং… ফোট্ঠব্বানং… ধম্মানং অস্সাদো অভৰিস্স, নযিদং সত্তা ধম্মেসু সারজ্জেয্যুং. যস্মা চ খো, ভিক্খৰে, অত্থি ধম্মানং অস্সাদো, তস্মা সত্তা ধম্মেসু সারজ্জন্তি. নো চেদং, ভিক্খৰে, ধম্মানং আদীনৰো অভৰিস্স, নযিদং সত্তা ধম্মেসু নিব্বিন্দেয্যুং. যস্মা চ খো, ভিক্খৰে, অত্থি ধম্মানং আদীনৰো, তস্মা সত্তা ধম্মেসু নিব্বিন্দন্তি. নো চেদং, ভিক্খৰে, ধম্মানং নিস্সরণং অভৰিস্স, নযিদং সত্তা ধম্মেহি নিস্সরেয্যুং. যস্মা চ খো, ভিক্খৰে, অত্থি ধম্মানং নিস্সরণং, তস্মা সত্তা ধম্মেহি নিস্সরন্তি.

‘‘যাৰকীৰঞ্চ, ভিক্খৰে, সত্তা ইমেসং ছন্নং বাহিরানং আযতনানং অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং নাব্ভঞ্ঞংসু ¶ , নেৰ তাৰ, ভিক্খৰে, সত্তা সদেৰকা লোকা সমারকা সব্রহ্মকা সস্সমণব্রাহ্মণিযা ¶ পজায সদেৰমনুস্সায নিস্সটা ৰিসঞ্ঞুত্তা ৰিপ্পমুত্তা ৰিমরিযাদীকতেন চেতসা ৰিহরিংসু. যতো চ খো, ভিক্খৰে, সত্তা ইমেসং ছন্নং বাহিরানং আযতনানং অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং অব্ভঞ্ঞংসু, অথ, ভিক্খৰে ¶ , সত্তা সদেৰকা লোকা সমারকা সব্রহ্মকা সস্সমণব্রাহ্মণিযা পজায সদেৰমনুস্সায নিস্সটা ৰিসঞ্ঞুত্তা ৰিপ্পমুত্তা ৰিমরিযাদীকতেন চেতসা ৰিহরন্তী’’তি. ছট্ঠং.

৭. পঠমাভিনন্দসুত্তং

১৯. ‘‘যো ¶ , ভিক্খৰে, চক্খুং অভিনন্দতি, দুক্খং সো অভিনন্দতি. যো দুক্খং অভিনন্দতি, অপরিমুত্তো সো দুক্খস্মাতি ৰদামি. যো সোতং…পে… যো ঘানং…পে… যো জিৰ্হং অভিনন্দতি, দুক্খং সো অভিনন্দতি. যো দুক্খং অভিনন্দতি, অপরিমুত্তো সো দুক্খস্মাতি ৰদামি. যো কাযং…পে… যো মনং অভিনন্দতি, দুক্খং সো অভিনন্দতি. যো দুক্খং অভিনন্দতি, অপরিমুত্তো সো দুক্খস্মা’’তি ৰদামি.

‘‘যো চ খো, ভিক্খৰে, চক্খুং নাভিনন্দতি, দুক্খং সো নাভিনন্দতি. যো দুক্খং নাভিনন্দতি, পরিমুত্তো সো দুক্খস্মাতি ৰদামি. যো সোতং…পে… যো ঘানং…পে… যো জিৰ্হং নাভিনন্দতি, দুক্খং সো নাভিনন্দতি. যো দুক্খং নাভিনন্দতি, পরিমুত্তো সো দুক্খস্মাতি ৰদামি. যো কাযং…পে… যো মনং নাভিনন্দতি, দুক্খং সো নাভিনন্দতি. যো দুক্খং নাভিনন্দতি, পরিমুত্তো সো দুক্খস্মা’’তি ৰদামি. সত্তমং.

৮. দুতিযাভিনন্দসুত্তং

২০. ‘‘যো, ভিক্খৰে, রূপে অভিনন্দতি, দুক্খং সো অভিনন্দতি. যো দুক্খং অভিনন্দতি, অপরিমুত্তো সো দুক্খস্মাতি ৰদামি. যো সদ্দে…পে… গন্ধে… রসে… ফোট্ঠব্বে… ধম্মে অভিনন্দতি, দুক্খং সো অভিনন্দতি. যো দুক্খং অভিনন্দতি, অপরিমুত্তো সো দুক্খস্মা’’তি ৰদামি.

‘‘যো ¶ চ খো, ভিক্খৰে, রূপে নাভিনন্দতি, দুক্খং সো নাভিনন্দতি. যো দুক্খং নাভিনন্দতি, পরিমুত্তো সো দুক্খস্মাতি ৰদামি ¶ . যো সদ্দে…পে… গন্ধে… রসে… ফোট্ঠব্বে… ধম্মে নাভিনন্দতি, দুক্খং সো নাভিনন্দতি. যো দুক্খং নাভিনন্দতি, পরিমুত্তো সো দুক্খস্মা’’তি ৰদামি. অট্ঠমং.

৯. পঠমদুক্খুপ্পাদসুত্তং

২১. ‘‘যো ¶ ¶ , ভিক্খৰে, চক্খুস্স উপ্পাদো ঠিতি অভিনিব্বত্তি পাতুভাৰো, দুক্খস্সেসো উপ্পাদো, রোগানং ঠিতি, জরামরণস্স পাতুভাৰো. যো সোতস্স…পে… যো ঘানস্স… যো জিৰ্হায… যো কাযস্স… যো মনস্স উপ্পাদো ঠিতি অভিনিব্বত্তি পাতুভাৰো, দুক্খস্সেসো উপ্পাদো, রোগানং ঠিতি, জরামরণস্স পাতুভাৰো.

‘‘যো চ খো, ভিক্খৰে, চক্খুস্স নিরোধো ৰূপসমো অত্থঙ্গমো, দুক্খস্সেসো নিরোধো, রোগানং ৰূপসমো, জরামরণস্স অত্থঙ্গমো. যো সোতস্স… যো ঘানস্স… যো জিৰ্হায… যো কাযস্স… যো মনস্স নিরোধো ৰূপসমো অত্থঙ্গমো, দুক্খস্সেসো নিরোধো, রোগানং ৰূপসমো, জরামরণস্স অত্থঙ্গমো’’তি. নৰমং.

১০. দুতিযদুক্খুপ্পাদসুত্তং

২২. ‘‘যো, ভিক্খৰে, রূপানং উপ্পাদো ঠিতি অভিনিব্বত্তি পাতুভাৰো, দুক্খস্সেসো উপ্পাদো, রোগানং ঠিতি, জরামরণস্স পাতুভাৰো. যো সদ্দানং…পে… যো গন্ধানং… যো রসানং… যো ফোট্ঠব্বানং… যো ধম্মানং উপ্পাদো ঠিতি অভিনিব্বত্তি পাতুভাৰো, দুক্খস্সেসো উপ্পাদো, রোগানং ঠিতি, জরামরণস্স পাতুভাৰো.

‘‘যো চ খো, ভিক্খৰে, রূপানং নিরোধো ৰূপসমো অত্থঙ্গমো, দুক্খস্সেসো নিরোধো, রোগানং ৰূপসমো, জরামরণস্স অত্থঙ্গমো. যো ¶ সদ্দানং…পে… যো গন্ধানং… যো রসানং… যো ফোট্ঠব্বানং… যো ¶ ধম্মানং নিরোধো ৰূপসমো অত্থঙ্গমো, দুক্খস্সেসো নিরোধো, রোগানং ৰূপসমো, জরামরণস্স অত্থঙ্গমো’’তি. দসমং.

যমকৰগ্গো দুতিযো.

তস্সুদ্দানং –

সম্বোধেন ¶ দুৰে ৰুত্তা, অস্সাদেন অপরে দুৰে;

নো চেতেন দুৰে ৰুত্তা, অভিনন্দেন অপরে দুৰে;

উপ্পাদেন দুৰে ৰুত্তা, ৰগ্গো তেন পৰুচ্চতীতি.

৩. সব্বৰগ্গো

১. সব্বসুত্তং

২৩. সাৰত্থিনিদানং ¶ . ‘‘সব্বং ¶ ৰো, ভিক্খৰে, দেসেস্সামি. তং সুণাথ. কিঞ্চ, ভিক্খৰে, সব্বং? চক্খুঞ্চেৰ রূপা চ, সোতঞ্চ [সোতঞ্চেৰ (?) এৰমিতরযুগলেসুপি] সদ্দা চ, ঘানঞ্চ গন্ধা চ, জিৰ্হা চ রসা চ, কাযো চ ফোট্ঠব্বা চ, মনো চ ধম্মা চ – ইদং ৰুচ্চতি, ভিক্খৰে, সব্বং. যো, ভিক্খৰে, এৰং ৰদেয্য – ‘অহমেতং সব্বং পচ্চক্খায অঞ্ঞং সব্বং পঞ্ঞাপেস্সামী’তি, তস্স ৰাচাৰত্থুকমেৰস্স [ৰাচাৰত্থুরেৰস্স (সী. পী.), ৰাচাৰত্থুদেৰস্স (স্যা. কং.)]; পুট্ঠো চ ন সম্পাযেয্য, উত্তরিঞ্চ ৰিঘাতং আপজ্জেয্য. তং কিস্স হেতু? যথা তং, ভিক্খৰে, অৰিসযস্মি’’ন্তি. পঠমং.

২. পহানসুত্তং

২৪. ‘‘সব্বপ্পহানায [সব্বং পহানায (স্যা. কং. ক.)] ৰো, ভিক্খৰে, ধম্মং দেসেস্সামি. তং সুণাথ. কতমো চ, ভিক্খৰে, সব্বপ্পহানায ধম্মো? চক্খুং, ভিক্খৰে, পহাতব্বং, রূপা পহাতব্বা, চক্খুৰিঞ্ঞাণং পহাতব্বং, চক্খুসম্ফস্সো পহাতব্বো ¶ , যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি পহাতব্বং…পে… যম্পিদং সোতসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি পহাতব্বং… যম্পিদং ঘানসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি পহাতব্বং. জিৰ্হা পহাতব্বা, রসা পহাতব্বা, জিৰ্হাৰিঞ্ঞাণং পহাতব্বং, জিৰ্হাসম্ফস্সো পহাতব্বো, যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা ¶ তম্পি পহাতব্বং. কাযো পহাতব্বো… মনো পহাতব্বো, ধম্মা পহাতব্বা, মনোৰিঞ্ঞাণং ¶ পহাতব্বং, মনোসম্ফস্সো পহাতব্বো, যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি পহাতব্বং. অযং খো, ভিক্খৰে, সব্বপ্পহানায ধম্মো’’তি. দুতিযং.

৩. অভিঞ্ঞাপরিঞ্ঞাপহানসুত্তং

২৫. ‘‘সব্বং অভিঞ্ঞা পরিঞ্ঞা পহানায ৰো, ভিক্খৰে, ধম্মং দেসেস্সামি. তং সুণাথ. কতমো চ, ভিক্খৰে, সব্বং অভিঞ্ঞা পরিঞ্ঞা পহানায ধম্মো? চক্খুং, ভিক্খৰে, অভিঞ্ঞা পরিঞ্ঞা পহাতব্বং, রূপা অভিঞ্ঞা পরিঞ্ঞা পহাতব্বা ¶ , চক্খুৰিঞ্ঞাণং অভিঞ্ঞা পরিঞ্ঞা পহাতব্বং, চক্খুসম্ফস্সো অভিঞ্ঞা পরিঞ্ঞা পহাতব্বো, যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অভিঞ্ঞা পরিঞ্ঞা পহাতব্বং…পে… জিৰ্হা অভিঞ্ঞা পরিঞ্ঞা পহাতব্বা, রসা অভিঞ্ঞা পরিঞ্ঞা পহাতব্বা, জিৰ্হাৰিঞ্ঞাণং অভিঞ্ঞা পরিঞ্ঞা পহাতব্বং, জিৰ্হাসম্ফস্সো অভিঞ্ঞা পরিঞ্ঞা পহাতব্বো, যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অভিঞ্ঞা পরিঞ্ঞা পহাতব্বং. কাযো অভিঞ্ঞা পরিঞ্ঞা পহাতব্বো… মনো অভিঞ্ঞা পরিঞ্ঞা পহাতব্বো, ধম্মা অভিঞ্ঞা পরিঞ্ঞা ¶ পহাতব্বা, মনোৰিঞ্ঞাণং অভিঞ্ঞা পরিঞ্ঞা পহাতব্বং, মনোসম্ফস্সো অভিঞ্ঞা পরিঞ্ঞা পহাতব্বো, যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা ¶ তম্পি অভিঞ্ঞা পরিঞ্ঞা পহাতব্বং. অযং খো, ভিক্খৰে, সব্বং অভিঞ্ঞা পরিঞ্ঞা পহানায ধম্মো’’তি. ততিযং.

৪. পঠমঅপরিজাননসুত্তং

২৬. ‘‘সব্বং ¶ , ভিক্খৰে, অনভিজানং অপরিজানং অৰিরাজযং অপ্পজহং অভব্বো দুক্খক্খযায. কিঞ্চ, ভিক্খৰে, অনভিজানং অপরিজানং অৰিরাজযং অপ্পজহং অভব্বো দুক্খক্খযায? চক্খুং, ভিক্খৰে, অনভিজানং অপরিজানং অৰিরাজযং অপ্পজহং অভব্বো দুক্খক্খযায. রূপে অনভিজানং অপরিজানং অৰিরাজযং অপ্পজহং অভব্বো দুক্খক্খযায. চক্খুৰিঞ্ঞাণং অনভিজানং অপরিজানং অৰিরাজযং অপ্পজহং অভব্বো দুক্খক্খযায. চক্খুসম্ফস্সং অনভিজানং অপরিজানং অৰিরাজযং অপ্পজহং অভব্বো দুক্খক্খযায. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনভিজানং অপরিজানং অৰিরাজযং অপ্পজহং অভব্বো দুক্খক্খযায…পে… জিৰ্হং অনভিজানং অপরিজানং অৰিরাজযং অপ্পজহং অভব্বো দুক্খক্খযায. রসে…পে… জিৰ্হাৰিঞ্ঞাণং…পে… জিৰ্হাসম্ফস্সং…পে… যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনভিজানং অপরিজানং অৰিরাজযং অপ্পজহং অভব্বো দুক্খক্খযায. কাযং…পে… মনং অনভিজানং অপরিজানং অৰিরাজযং অপ্পজহং অভব্বো দুক্খক্খযায. ধম্মে…পে… মনোৰিঞ্ঞাণং…পে… মনোসম্ফস্সং…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনভিজানং অপরিজানং অৰিরাজযং ¶ অপ্পজহং অভব্বো দুক্খক্খযায. ইদং খো, ভিক্খৰে, সব্বং অনভিজানং অপরিজানং অৰিরাজযং অপ্পজহং অভব্বো দুক্খক্খযায.

‘‘সব্বঞ্চ খো, ভিক্খৰে, অভিজানং পরিজানং ৰিরাজযং পজহং ভব্বো ¶ দুক্খক্খযায. কিঞ্চ ¶ , ভিক্খৰে, সব্বং অভিজানং পরিজানং ৰিরাজযং পজহং ভব্বো দুক্খক্খযায? চক্খুং, ভিক্খৰে, অভিজানং পরিজানং ৰিরাজযং পজহং ভব্বো দুক্খক্খযায. রূপে অভিজানং পরিজানং ৰিরাজযং পজহং ভব্বো দুক্খক্খযায. চক্খুৰিঞ্ঞাণং অভিজানং পরিজানং ৰিরাজযং পজহং ভব্বো দুক্খক্খযায. চক্খুসম্ফস্সং অভিজানং পরিজানং ৰিরাজযং পজহং ভব্বো দুক্খক্খযায. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অভিজানং পরিজানং ৰিরাজযং পজহং ভব্বো দুক্খক্খযায…পে… ¶ জিৰ্হং অভিজানং পরিজানং ৰিরাজযং পজহং ভব্বো দুক্খক্খযায. রসে…পে… জিৰ্হাৰিঞ্ঞাণং…পে… জিৰ্হাসম্ফস্সং…পে… যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অভিজানং পরিজানং ৰিরাজযং পজহং ভব্বো দুক্খক্খযায. কাযং…পে… মনং অভিজানং পরিজানং ৰিরাজযং পজহং ভব্বো দুক্খক্খযায. ধম্মে…পে… মনোৰিঞ্ঞাণং…পে… মনোসম্ফস্সং…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অভিজানং পরিজানং ৰিরাজযং পজহং ভব্বো দুক্খক্খযায. ইদং খো, ভিক্খৰে, সব্বং অভিজানং পরিজানং ৰিরাজযং পজহং ভব্বো দুক্খক্খযাযা’’তি. চতুত্থং.

৫. দুতিযঅপরিজাননসুত্তং

২৭. ‘‘সব্বং ¶ , ভিক্খৰে, অনভিজানং অপরিজানং অৰিরাজযং অপ্পজহং অভব্বো দুক্খক্খযায. কিঞ্চ, ভিক্খৰে, সব্বং অনভিজানং অপরিজানং অৰিরাজযং অপ্পজহং অভব্বো দুক্খক্খযায? যঞ্চ, ভিক্খৰে ¶ , চক্খু, যে ¶ চ রূপা, যঞ্চ চক্খুৰিঞ্ঞাণং, যে চ চক্খুৰিঞ্ঞাণৰিঞ্ঞাতব্বা ধম্মা…পে… যা ¶ চ জিৰ্হা, যে চ রসা, যঞ্চ জিৰ্হাৰিঞ্ঞাণং, যে চ জিৰ্হাৰিঞ্ঞাণৰিঞ্ঞাতব্বা ধম্মা; যো চ কাযো, যে চ ফোট্ঠব্বা, যঞ্চ কাযৰিঞ্ঞাণং, যে চ কাযৰিঞ্ঞাণৰিঞ্ঞাতব্বা ধম্মা; যো চ মনো, যে চ ধম্মা, যঞ্চ মনোৰিঞ্ঞাণং, যে চ মনোৰিঞ্ঞাণৰিঞ্ঞাতব্বা ধম্মা – ইদং খো, ভিক্খৰে, সব্বং অনভিজানং অপরিজানং অৰিরাজযং অপ্পজহং অভব্বো দুক্খক্খযায.

‘‘সব্বং, ভিক্খৰে, অভিজানং পরিজানং ৰিরাজযং পজহং ভব্বো দুক্খক্খযায. কিঞ্চ, ভিক্খৰে, সব্বং অভিজানং পরিজানং ৰিরাজযং পজহং ভব্বো দুক্খক্খযায? যঞ্চ, ভিক্খৰে, চক্খু, যে চ রূপা, যঞ্চ চক্খুৰিঞ্ঞাণং, যে চ চক্খুৰিঞ্ঞাণৰিঞ্ঞাতব্বা ধম্মা…পে… যা চ জিৰ্হা, যে চ রসা, যঞ্চ জিৰ্হাৰিঞ্ঞাণং, যে চ জিৰ্হাৰিঞ্ঞাণৰিঞ্ঞাতব্বা ধম্মা; যো চ কাযো, যে চ ফোট্ঠব্বা, যঞ্চ কাযৰিঞ্ঞাণং, যে চ কাযৰিঞ্ঞাণৰিঞ্ঞাতব্বা ধম্মা; যো চ মনো, যে চ ধম্মা, যঞ্চ মনোৰিঞ্ঞাণং, যে চ মনোৰিঞ্ঞাণৰিঞ্ঞাতব্বা ধম্মা – ইদং খো, ভিক্খৰে, সব্বং অভিজানং পরিজানং ৰিরাজযং পজহং ভব্বো দুক্খক্খযাযা’’তি. পঞ্চমং.

৬. আদিত্তসুত্তং

২৮. একং সমযং ভগৰা গযাযং ৰিহরতি গযাসীসে সদ্ধিং ভিক্খুসহস্সেন. তত্র খো ভগৰা ভিক্খূ আমন্তেসি – ‘‘সব্বং, ভিক্খৰে, আদিত্তং. কিঞ্চ, ভিক্খৰে, সব্বং আদিত্তং? চক্খু [চক্খুং (সী. স্যা. কং. পী.)], ভিক্খৰে, আদিত্তং, রূপা আদিত্তা, চক্খুৰিঞ্ঞাণং আদিত্তং, চক্খুসম্ফস্সো আদিত্তো. যম্পিদং চক্খুসম্ফস্সপচ্চযা উপ্পজ্জতি ৰেদযিতং ¶ সুখং ৰা দুক্খং ৰা অদুক্খমসুখং ৰা তম্পি আদিত্তং. কেন আদিত্তং? ‘রাগগ্গিনা, দোসগ্গিনা, মোহগ্গিনা আদিত্তং, জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি আদিত্ত’ন্তি ৰদামি…পে… জিৰ্হা আদিত্তা, রসা আদিত্তা, জিৰ্হাৰিঞ্ঞাণং আদিত্তং, জিৰ্হাসম্ফস্সো আদিত্তো ¶ . যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি আদিত্তং. কেন আদিত্তং? ‘রাগগ্গিনা, দোসগ্গিনা, মোহগ্গিনা আদিত্তং, জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি আদিত্ত’ন্তি ৰদামি…পে… মনো আদিত্তো, ধম্মা আদিত্তা, মনোৰিঞ্ঞাণং আদিত্তং, মনোসম্ফস্সো আদিত্তো. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি আদিত্তং. কেন আদিত্তং? ‘রাগগ্গিনা, দোসগ্গিনা, মোহগ্গিনা আদিত্তং, জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি আদিত্ত’ন্তি ৰদামি. এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি, যম্পিদং চক্খুসম্ফস্সপচ্চযা উপ্পজ্জতি ¶ ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি ¶ …পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ¶ ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুং. ইমস্মিঞ্চ পন ৰেয্যাকরণস্মিং ভঞ্ঞমানে তস্স ভিক্খুসহস্সস্স অনুপাদায আসৰেহি চিত্তানি ৰিমুচ্চিংসূতি. ছট্ঠং.

৭. অদ্ধভূতসুত্তং

২৯. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তত্র খো ভগৰা ভিক্খূ আমন্তেসি – ‘‘সব্বং, ভিক্খৰে, অদ্ধভূতং [অন্ধভূতং (সী. স্যা. কং.)]. কিঞ্চ ¶ , ভিক্খৰে, সব্বং অদ্ধভূতং? চক্খু, ভিক্খৰে, অদ্ধভূতং, রূপা অদ্ধভূতা, চক্খুৰিঞ্ঞাণং অদ্ধভূতং, চক্খুসম্ফস্সো অদ্ধভূতো, যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অদ্ধভূতং. কেন অদ্ধভূতং? ‘জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি অদ্ধভূত’ন্তি ৰদামি…পে… জিৰ্হা অদ্ধভূতা, রসা অদ্ধভূতা, জিৰ্হাৰিঞ্ঞাণং অদ্ধভূতং, জিৰ্হাসম্ফস্সো অদ্ধভূতো, যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অদ্ধভূতং. কেন অদ্ধভূতং? ‘জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি অদ্ধভূত’ন্তি ৰদামি. কাযো অদ্ধভূতো…পে… মনো অদ্ধভূতো, ধম্মা অদ্ধভূতা, মনোৰিঞ্ঞাণং অদ্ধভূতং, মনোসম্ফস্সো অদ্ধভূতো, যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা ¶ তম্পি অদ্ধভূতং. কেন অদ্ধভূতং? ‘জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি অদ্ধভূত’ন্তি ৰদামি. এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি…পে… ¶ যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. নিব্বিন্দং ৰিরজ্জতি ¶ , ৰিরাগা ৰিমুচ্চতি, ৰিমুত্তস্মিং ‘ৰিমুত্ত’মিতি ঞাণং হোতি, ‘খীণা জাতি ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. সত্তমং.

৮. সমুগ্ঘাতসারুপ্পসুত্তং

৩০. ‘‘সব্বমঞ্ঞিতসমুগ্ঘাতসারুপ্পং ৰো, ভিক্খৰে, পটিপদং ¶ দেসেস্সামি. তং সুণাথ, সাধুকং মনসি করোথ; ভাসিস্সামীতি. কতমা চ সা, ভিক্খৰে, সব্বমঞ্ঞিতসমুগ্ঘাতসারুপ্পা পটিপদা? ইধ, ভিক্খৰে, ভিক্খু চক্খুং ন মঞ্ঞতি, চক্খুস্মিং ন মঞ্ঞতি, চক্খুতো ন মঞ্ঞতি, চক্খুং মেতি ন মঞ্ঞতি. রূপে ন মঞ্ঞতি, রূপেসু ন মঞ্ঞতি, রূপতো ন মঞ্ঞতি, রূপা মেতি ন মঞ্ঞতি. চক্খুৰিঞ্ঞাণং ন মঞ্ঞতি, চক্খুৰিঞ্ঞাণস্মিং ন মঞ্ঞতি, চক্খুৰিঞ্ঞাণতো ন মঞ্ঞতি, চক্খুৰিঞ্ঞাণং মেতি ন মঞ্ঞতি. চক্খুসম্ফস্সং ন মঞ্ঞতি, চক্খুসম্ফস্সস্মিং ন মঞ্ঞতি, চক্খুসম্ফস্সতো ন মঞ্ঞতি, চক্খুসম্ফস্সো মেতি ন মঞ্ঞতি. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞতি ¶ , তস্মিম্পি ন মঞ্ঞতি, ততোপি ন মঞ্ঞতি, তং মেতি ন মঞ্ঞতি…পে… জিৰ্হং ন মঞ্ঞতি, জিৰ্হায ন মঞ্ঞতি, জিৰ্হাতো ন মঞ্ঞতি, জিৰ্হা মেতি ন মঞ্ঞতি. রসে ন মঞ্ঞতি, রসেসু ন মঞ্ঞতি, রসতো ন মঞ্ঞতি, রসা মেতি ন মঞ্ঞতি. জিৰ্হাৰিঞ্ঞাণং ন মঞ্ঞতি, জিৰ্হাৰিঞ্ঞাণস্মিং ন মঞ্ঞতি, জিৰ্হাৰিঞ্ঞাণতো ন মঞ্ঞতি, জিৰ্হাৰিঞ্ঞাণং মেতি ন মঞ্ঞতি. জিৰ্হাসম্ফস্সং ন মঞ্ঞতি, জিৰ্হাসম্ফস্সস্মিং ন মঞ্ঞতি, জিৰ্হাসম্ফস্সতো ন মঞ্ঞতি, জিৰ্হাসম্ফস্সো মেতি ন মঞ্ঞতি. যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞতি, তস্মিম্পি ন মঞ্ঞতি, ততোপি ন মঞ্ঞতি, তং মেতি ন মঞ্ঞতি…পে… মনং ন মঞ্ঞতি, মনস্মিং ন মঞ্ঞতি, মনতো ন মঞ্ঞতি, মনো মেতি ন মঞ্ঞতি. ধম্মে ন মঞ্ঞতি, ধম্মেসু ন মঞ্ঞতি, ধম্মতো ন মঞ্ঞতি, ধম্মা মেতি ¶ ন মঞ্ঞতি. মনোৰিঞ্ঞাণং ন মঞ্ঞতি, মনোৰিঞ্ঞাণস্মিং ন মঞ্ঞতি, মনোৰিঞ্ঞাণতো ন মঞ্ঞতি, মনোৰিঞ্ঞাণং মেতি ন মঞ্ঞতি. মনোসম্ফস্সং ন মঞ্ঞতি, মনোসম্ফস্সস্মিং ন মঞ্ঞতি, মনোসম্ফস্সতো ন মঞ্ঞতি, মনোসম্ফস্সো মেতি ন মঞ্ঞতি ¶ . যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞতি, তস্মিম্পি ন মঞ্ঞতি, ততোপি ন মঞ্ঞতি, তং মেতি ন ¶ মঞ্ঞতি. সব্বং ন মঞ্ঞতি, সব্বস্মিং ন মঞ্ঞতি, সব্বতো ন মঞ্ঞতি, সব্বং মেতি ন মঞ্ঞতি. সো এৰং অমঞ্ঞমানো ¶ ন চ কিঞ্চি লোকে উপাদিযতি. অনুপাদিযং ন পরিতস্সতি. অপরিতস্সং পচ্চত্তঞ্ঞেৰ পরিনিব্বাযতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি. অযং খো সা, ভিক্খৰে, সব্বমঞ্ঞিতসমুগ্ঘাতসারুপ্পা পটিপদা’’তি. অট্ঠমং.

৯. পঠমসমুগ্ঘাতসপ্পাযসুত্তং

৩১. ‘‘সব্বমঞ্ঞিতসমুগ্ঘাতসপ্পাযং ৰো, ভিক্খৰে, পটিপদং দেসেস্সামি. তং সুণাথ. কতমা চ সা, ভিক্খৰে, সব্বমঞ্ঞিতসমুগ্ঘাতসপ্পাযা পটিপদা? ইধ, ভিক্খৰে, ভিক্খু চক্খুং ন মঞ্ঞতি, চক্খুস্মিং ন মঞ্ঞতি, চক্খুতো ন মঞ্ঞতি, চক্খুং মেতি ন মঞ্ঞতি. রূপে ন মঞ্ঞতি…পে… চক্খুৰিঞ্ঞাণং ন মঞ্ঞতি, চক্খুসম্ফস্সং ন মঞ্ঞতি, যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞতি, তস্মিম্পি ন মঞ্ঞতি, ততোপি ন মঞ্ঞতি, তং মেতি ন মঞ্ঞতি. যঞ্হি, ভিক্খৰে, মঞ্ঞতি, যস্মিং মঞ্ঞতি, যতো মঞ্ঞতি, যং মেতি মঞ্ঞতি, ততো তং হোতি অঞ্ঞথা. অঞ্ঞথাভাৰী ভৰসত্তো লোকো ভৰমেৰাভিনন্দতি…পে… জিৰ্হং ন মঞ্ঞতি, জিৰ্হায ন মঞ্ঞতি, জিৰ্হাতো ন মঞ্ঞতি, জিৰ্হা মেতি ন মঞ্ঞতি. রসে ন মঞ্ঞতি…পে… জিৰ্হাৰিঞ্ঞাণং ন মঞ্ঞতি, জিৰ্হাসম্ফস্সং ন মঞ্ঞতি. যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং ¶ সুখং ৰা দুক্খং ৰা অদুক্খমসুখং ¶ ৰা তম্পি ন মঞ্ঞতি, তস্মিম্পি ন মঞ্ঞতি, ততোপি ন মঞ্ঞতি, তং মেতি ন মঞ্ঞতি. যঞ্হি, ভিক্খৰে, মঞ্ঞতি, যস্মিং মঞ্ঞতি, যতো মঞ্ঞতি, যং মেতি মঞ্ঞতি, ততো তং হোতি অঞ্ঞথা. অঞ্ঞথাভাৰী ভৰসত্তো লোকো ভৰমেৰাভিনন্দতি…পে… মনং ন মঞ্ঞতি, মনস্মিং ন মঞ্ঞতি, মনতো ন মঞ্ঞতি, মনো মেতি ন মঞ্ঞতি. ধম্মে ন মঞ্ঞতি…পে… মনোৰিঞ্ঞাণং ন মঞ্ঞতি, মনোসম্ফস্সং ন মঞ্ঞতি. যম্পিদং মনোসম্ফস্সপচ্চযা ¶ উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞতি, তস্মিম্পি ন মঞ্ঞতি, ততোপি ন মঞ্ঞতি, তং মেতি ন মঞ্ঞতি. যঞ্হি, ভিক্খৰে, মঞ্ঞতি, যস্মিং মঞ্ঞতি, যতো মঞ্ঞতি, যং মেতি মঞ্ঞতি, ততো তং হোতি অঞ্ঞথা. অঞ্ঞথাভাৰী ভৰসত্তো লোকো ভৰমেৰাভিনন্দতি. যাৰতা, ভিক্খৰে, খন্ধধাতুআযতনং তম্পি ন মঞ্ঞতি, তস্মিম্পি ন মঞ্ঞতি, ততোপি ন মঞ্ঞতি, তং মেতি ন মঞ্ঞতি. সো এৰং অমঞ্ঞমানো ন চ কিঞ্চি লোকে উপাদিযতি. অনুপাদিযং ন পরিতস্সতি. অপরিতস্সং পচ্চত্তঞ্ঞেৰ পরিনিব্বাযতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি ¶ . অযং খো সা, ভিক্খৰে, সব্বমঞ্ঞিতসমুগ্ঘাতসপ্পাযা পটিপদা’’তি. নৰমং.

১০. দুতিযসমুগ্ঘাতসপ্পাযসুত্তং

৩২. ‘‘সব্বমঞ্ঞিতসমুগ্ঘাতসপ্পাযং ৰো, ভিক্খৰে, পটিপদং দেসেস্সামি. তং সুণাথ. কতমা চ সা, ভিক্খৰে, সব্বমঞ্ঞিতসমুগ্ঘাতসপ্পাযা ¶ পটিপদা?

‘‘তং কিং মঞ্ঞথ, ভিক্খৰে, চক্খুং নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং ¶ , ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং ভন্তে’’.

‘‘রূপা…পে… চক্খুৰিঞ্ঞাণং… চক্খুসম্ফস্সো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’…পে….

‘‘যম্পিদং ¶ চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’…পে….

‘‘জিৰ্হা নিচ্চা ৰা অনিচ্চা ৰা’’তি?

‘‘অনিচ্চা ভন্তে’’…পে….

‘‘রসা… জিৰ্হাৰিঞ্ঞাণং… জিৰ্হাসম্ফস্সো…পে… যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’…পে… ধম্মা… মনোৰিঞ্ঞাণং… মনোসম্ফস্সো নিচ্চো ৰা অনিচ্চো ৰাতি?

‘‘অনিচ্চো, ভন্তে’’.

‘‘যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং ভন্তে’’.

‘‘যং ¶ পনানিচ্চং দুক্খং ৰিপরিণামধম্মং, কল্লং ¶ নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘এৰং ¶ পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি…পে… জিৰ্হাযপি নিব্বিন্দতি, রসেসুপি…পে… যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. মনস্মিম্পি নিব্বিন্দতি, ধম্মেসুপি নিব্বিন্দতি, মনোৰিঞ্ঞাণেপি নিব্বিন্দতি, মনোসম্ফস্সেপি নিব্বিন্দতি. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি ¶ . অযং খো সা, ভিক্খৰে, সব্বমঞ্ঞিতসমুগ্ঘাতসপ্পাযা পটিপদা’’তি. দসমং.

সব্বৰগ্গো ততিযো.

তস্সুদ্দানং –

সব্বঞ্চ দ্ৰেপি পহানা, পরিজানাপরে দুৰে;

আদিত্তং অদ্ধভূতঞ্চ, সারুপ্পা দ্ৰে চ সপ্পাযা;

ৰগ্গো তেন পৰুচ্চতীতি.

৪. জাতিধম্মৰগ্গো

১-১০. জাতিধম্মাদিসুত্তদসকং

৩৩. সাৰত্থিনিদানং ¶ ¶ . তত্র খো…পে… ‘‘সব্বং, ভিক্খৰে, জাতিধম্মং. কিঞ্চ, ভিক্খৰে, সব্বং জাতিধম্মং? চক্খু, ¶ ভিক্খৰে, জাতিধম্মং. রূপা… চক্খুৰিঞ্ঞাণং… চক্খুসম্ফস্সো জাতিধম্মো. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি জাতিধম্মং…পে… জিৰ্হা… রসা… জিৰ্হাৰিঞ্ঞাণং… জিৰ্হাসম্ফস্সো… যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি জাতিধম্মং. কাযো…পে... মনো জাতিধম্মো, ধম্মা জাতিধম্মা, মনোৰিঞ্ঞাণং জাতিধম্মং, মনোসম্ফস্সো জাতিধম্মো. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি জাতিধম্মং. এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি… চক্খুৰিঞ্ঞাণেপি… চক্খুসম্ফস্সেপি…পে… নাপরং ইত্থত্তাযাতি পজানাতী’’তি. পঠমং.

৩৪. ‘‘সব্বং ¶ , ভিক্খৰে, জরাধম্মং…পে… সংখিত্তং. দুতিযং.

৩৫. ‘‘সব্বং, ভিক্খৰে, ব্যাধিধম্মং…পে…. ততিযং.

৩৬. ‘‘সব্বং, ভিক্খৰে, মরণধম্মং…পে…. চতুত্থং.

৩৭. ‘‘সব্বং, ভিক্খৰে, সোকধম্মং…পে…. পঞ্চমং.

৩৮. ‘‘সব্বং, ভিক্খৰে, সংকিলেসিকধম্মং…পে…. ছট্ঠং.

৩৯. ‘‘সব্বং ¶ ¶ ¶ , ভিক্খৰে, খযধম্মং…পে…. সত্তমং.

৪০. ‘‘সব্বং, ভিক্খৰে, ৰযধম্মং…পে…. অট্ঠমং.

৪১. ‘‘সব্বং, ভিক্খৰে, সমুদযধম্মং…পে…. নৰমং.

৪২. ‘‘সব্বং, ভিক্খৰে, নিরোধধম্মং…পে…. দসমং.

জাতিধম্মৰগ্গো চতুত্থো.

তস্সুদ্দানং –

জাতিজরাব্যাধিমরণং, সোকো চ সংকিলেসিকং;

খযৰযসমুদযং, নিরোধধম্মেন তে দসাতি.

৫. সব্বঅনিচ্চৰগ্গো

১-৯. অনিচ্চাদিসুত্তনৰকং

৪৩. সাৰত্থিনিদানং ¶ ¶ . তত্র খো…পে… ‘‘সব্বং, ভিক্খৰে, অনিচ্চং. কিঞ্চ, ভিক্খৰে, সব্বং অনিচ্চং? চক্খু, ভিক্খৰে, অনিচ্চং, রূপা অনিচ্চা, চক্খুৰিঞ্ঞাণং অনিচ্চং, চক্খুসম্ফস্সো অনিচ্চো. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং…পে… জিৰ্হা অনিচ্চা, রসা অনিচ্চা, জিৰ্হাৰিঞ্ঞাণং অনিচ্চং, জিৰ্হাসম্ফস্সো অনিচ্চো. যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং. কাযো অনিচ্চো…পে… মনো অনিচ্চো, ধম্মা অনিচ্চা, মনোৰিঞ্ঞাণং অনিচ্চং, মনোসম্ফস্সো অনিচ্চো. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং. এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি…পে… মনস্মিম্পি নিব্বিন্দতি, ধম্মেসুপি নিব্বিন্দতি, মনোৰিঞ্ঞাণেপি নিব্বিন্দতি, মনোসম্ফস্সেপি নিব্বিন্দতি, যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ¶ ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. পঠমং.

৪৪. ‘‘সব্বং ¶ , ভিক্খৰে, দুক্খং…পে…. দুতিযং.

৪৫. ‘‘সব্বং, ভিক্খৰে, অনত্তা…পে…. ততিযং.

৪৬. ‘‘সব্বং ¶ , ভিক্খৰে, অভিঞ্ঞেয্যং…পে… ¶ . চতুত্থং.

৪৭. ‘‘সব্বং, ভিক্খৰে, পরিঞ্ঞেয্যং…পে…. পঞ্চমং.

৪৮. ‘‘সব্বং, ভিক্খৰে, পহাতব্বং…পে…. ছট্ঠং.

৪৯. ‘‘সব্বং, ভিক্খৰে, সচ্ছিকাতব্বং…পে… ¶ . সত্তমং.

৫০. ‘‘সব্বং, ভিক্খৰে, অভিঞ্ঞাপরিঞ্ঞেয্যং…পে…. অট্ঠমং.

৫১. ‘‘সব্বং ¶ , ভিক্খৰে, উপদ্দুতং…পে…. নৰমং.

১০. উপস্সট্ঠসুত্তং

৫২. ‘‘সব্বং ¶ , ভিক্খৰে, উপস্সট্ঠং [উপসট্ঠং (ক.)]. কিঞ্চ, ভিক্খৰে, সব্বং উপস্সট্ঠং? চক্খু, ভিক্খৰে, উপস্সট্ঠং, রূপা উপস্সট্ঠা, চক্খুৰিঞ্ঞাণং উপস্সট্ঠং, চক্খুসম্ফস্সো উপস্সট্ঠো. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি উপস্সট্ঠং…পে… জিৰ্হা উপস্সট্ঠা, রসা উপস্সট্ঠা, জিৰ্হাৰিঞ্ঞাণং উপস্সট্ঠং, জিৰ্হাসম্ফস্সো উপস্সট্ঠো. যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি উপস্সট্ঠং. কাযো উপস্সট্ঠো… মনো উপস্সট্ঠো, ধম্মা উপস্সট্ঠা, মনোৰিঞ্ঞাণং উপস্সট্ঠং, মনোসম্ফস্সো উপস্সট্ঠো. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ¶ ৰা দুক্খং ৰা অদুক্খমসুখং ৰা তম্পি উপস্সট্ঠং. এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি…পে… মনস্মিম্পি নিব্বিন্দতি, ধম্মেসুপি নিব্বিন্দতি, মনোৰিঞ্ঞাণেপি নিব্বিন্দতি, মনোসম্ফস্সেপি নিব্বিন্দতি. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি ¶ . ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. দসমং.

সব্বঅনিচ্চৰগ্গো পঞ্চমো.

তস্সুদ্দানং –

অনিচ্চং ¶ দুক্খং অনত্তা, অভিঞ্ঞেয্যং পরিঞ্ঞেয্যং;

পহাতব্বং সচ্ছিকাতব্বং, অভিঞ্ঞেয্যপরিঞ্ঞেয্যং [অভিঞ্ঞেয্যং পরিঞ্ঞেয্যং (সী. স্যা. কং.), অভিঞ্ঞাতং পরিঞ্ঞেয্যং (পী. ক.)];

উপদ্দুতং উপস্সট্ঠং, ৰগ্গো তেন পৰুচ্চতীতি.

সল়াযতনৰগ্গে পঠমপণ্ণাসকো সমত্তো.

তস্স ৰগ্গুদ্দানং –

অনিচ্চৰগ্গং ¶ যমকং, সব্বং ৰগ্গং জাতিধম্মং;

অনিচ্চৰগ্গেন পঞ্ঞাসং, পঞ্চমো তেন পৰুচ্চতীতি.

৬. অৰিজ্জাৰগ্গো

১. অৰিজ্জাপহানসুত্তং

৫৩. সাৰত্থিনিদানং ¶ . অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং ¶ নিসিন্নো খো সো ভিক্খু ভগৰন্তং এতদৰোচ – ‘‘কথং নু খো, ভন্তে, জানতো কথং পস্সতো অৰিজ্জা পহীযতি, ৰিজ্জা উপ্পজ্জতী’’তি?

‘‘চক্খুং খো, ভিক্খু, অনিচ্চতো জানতো পস্সতো অৰিজ্জা পহীযতি, ৰিজ্জা উপ্পজ্জতি. রূপে অনিচ্চতো জানতো পস্সতো অৰিজ্জা পহীযতি, ৰিজ্জা উপ্পজ্জতি. চক্খুৰিঞ্ঞাণং… চক্খুসম্ফস্সং… যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চতো জানতো পস্সতো অৰিজ্জা পহীযতি, ৰিজ্জা উপ্পজ্জতি. সোতং… ঘানং… জিৰ্হং… কাযং… মনং অনিচ্চতো জানতো পস্সতো অৰিজ্জা পহীযতি, ৰিজ্জা উপ্পজ্জতি. ধম্মে ¶ … মনোৰিঞ্ঞাণং… মনোসম্ফস্সং… যম্পিদং মনোসম্ফস্সপচ্চযা ¶ উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চতো জানতো পস্সতো অৰিজ্জা পহীযতি, ৰিজ্জা উপ্পজ্জতি. এৰং খো, ভিক্খু, জানতো এৰং পস্সতো অৰিজ্জা পহীযতি, ৰিজ্জা উপ্পজ্জতী’’তি. পঠমং.

২. সংযোজনপহানসুত্তং

৫৪. ‘‘কথং নু খো, ভন্তে, জানতো, কথং পস্সতো, সংযোজনা পহীযন্তী’’তি? ‘‘চক্খুং খো, ভিক্খু, অনিচ্চতো জানতো পস্সতো সংযোজনা পহীযন্তি. রূপে… ¶ চক্খুৰিঞ্ঞাণং… চক্খুসম্ফস্সং… যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চতো জানতো পস্সতো সংযোজনা পহীযন্তি. সোতং… ঘানং… জিৰ্হং… কাযং… মনং… ধম্মে… মনোৰিঞ্ঞাণং… মনোসম্ফস্সং… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চতো জানতো পস্সতো সংযোজনা পহীযন্তি. এৰং খো, ভিক্খু, জানতো এৰং পস্সতো সংযোজনা পহীযন্তী’’তি. দুতিযং.

৩. সংযোজনসমুগ্ঘাতসুত্তং

৫৫. ‘‘কথং নু খো, ভন্তে, জানতো, কথং পস্সতো সংযোজনা সমুগ্ঘাতং গচ্ছন্তী’’তি? ‘‘চক্খুং খো, ভিক্খু, অনত্ততো জানতো পস্সতো সংযোজনা ¶ সমুগ্ঘাতং গচ্ছন্তি. রূপে অনত্ততো… চক্খুৰিঞ্ঞাণং… চক্খুসম্ফস্সং… যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনত্ততো জানতো পস্সতো সংযোজনা সমুগ্ঘাতং গচ্ছন্তি. সোতং… ঘানং… জিৰ্হং… কাযং… মনং… ধম্মে… মনোৰিঞ্ঞাণং… মনোসম্ফস্সং… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনত্ততো জানতো পস্সতো সংযোজনা সমুগ্ঘাতং গচ্ছন্তি. এৰং খো, ভিক্খু, জানতো এৰং পস্সতো সংযোজনা সমুগ্ঘাতং গচ্ছন্তী’’তি. ততিযং.

৪. আসৰপহানসুত্তং

৫৬. ‘‘কথং ¶ নু খো, ভন্তে, জানতো, কথং পস্সতো আসৰা পহীযন্তী’’তি…পে…. চতুত্থং.

৫. আসৰসমুগ্ঘাতসুত্তং

৫৭. ‘‘কথং ¶ নু খো, ভন্তে, জানতো, কথং পস্সতো আসৰা সমুগ্ঘাতং গচ্ছন্তী’’তি…পে… ¶ . পঞ্চমং.

৬. অনুসযপহানসুত্তং

৫৮. ‘‘কথং নু খো…পে… ¶ অনুসযা পহীযন্তী’’তি…পে…. ছট্ঠং.

৭. অনুসযসমুগ্ঘাতসুত্তং

৫৯. ‘‘কথং নু খো…পে… অনুসযা সমুগ্ঘাতং গচ্ছন্তী’’তি? ‘‘চক্খুং খো, ভিক্খু, অনত্ততো জানতো পস্সতো অনুসযা সমুগ্ঘাতং গচ্ছন্তি…পে… সোতং… ঘানং… জিৰ্হং… কাযং… মনং… ধম্মে… মনোৰিঞ্ঞাণং… মনোসম্ফস্সং… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনত্ততো জানতো পস্সতো অনুসযা সমুগ্ঘাতং গচ্ছন্তি. এৰং খো, ভিক্খু, জানতো এৰং পস্সতো অনুসযা সমুগ্ঘাতং গচ্ছন্তী’’তি. সত্তমং.

৮. সব্বুপাদানপরিঞ্ঞাসুত্তং

৬০. ‘‘সব্বুপাদানপরিঞ্ঞায ¶ ৰো, ভিক্খৰে, ধম্মং দেসেস্সামি. তং সুণাথ. কতমো চ, ভিক্খৰে, সব্বুপাদানপরিঞ্ঞায ধম্মো? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা. এৰং পস্সং ¶ , ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি, ৰেদনাযপি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমোক্খা [ৰিমোক্খং (ক.), ৰিমোক্খ (স্যা. কং.)] ‘পরিঞ্ঞাতং মে উপাদান’ন্তি পজানাতি. সোতঞ্চ পটিচ্চ সদ্দে চ উপ্পজ্জতি… ঘানঞ্চ পটিচ্চ গন্ধে চ… জিৰ্হঞ্চ পটিচ্চ রসে চ… কাযঞ্চ পটিচ্চ ফোট্ঠব্বে চ… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা. এৰং পস্সং, ভিক্খৰে, সুতৰা অরিযসাৰকো মনস্মিম্পি নিব্বিন্দতি ¶ , ধম্মেসুপি নিব্বিন্দতি, মনোৰিঞ্ঞাণেপি নিব্বিন্দতি, মনোসম্ফস্সেপি নিব্বিন্দতি, ৰেদনাযপি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমোক্খা ‘পরিঞ্ঞাতং মে উপাদান’ন্তি ¶ পজানাতি. অযং খো, ভিক্খৰে, সব্বুপাদানপরিঞ্ঞায ধম্মো’’তি. অট্ঠমং.

৯. পঠমসব্বুপাদানপরিযাদানসুত্তং

৬১. ‘‘সব্বুপাদানপরিযাদানায ৰো, ভিক্খৰে, ধম্মং দেসেস্সামি. তং সুণাথ. কতমো চ, ভিক্খৰে, সব্বুপাদানপরিযাদানায ধম্মো? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা. এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি, ৰেদনাযপি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমোক্খা ‘পরিযাদিন্নং [সব্বত্থপি এৰমেৰ দিস্সতি দন্তজ-নকারেনেৰ] মে উপাদান’ন্তি পজানাতি…পে… ¶ জিৰ্হঞ্চ পটিচ্চ রসে চ উপ্পজ্জতি জিৰ্হাৰিঞ্ঞাণং…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা. এৰং পস্সং, ভিক্খৰে, সুতৰা অরিযসাৰকো মনস্মিম্পি নিব্বিন্দতি, ধম্মেসুপি নিব্বিন্দতি, মনোৰিঞ্ঞাণেপি নিব্বিন্দতি ¶ মনোসম্ফস্সেপি নিব্বিন্দতি, ৰেদনাযপি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমোক্খা ‘পরিযাদিন্নং মে উপাদান’ন্তি পজানাতি. অযং খো, ভিক্খৰে, সব্বুপাদানপরিযাদানায ধম্মো’’তি. নৰমং.

১০. দুতিযসব্বুপাদানপরিযাদানসুত্তং

৬২. ‘‘সব্বুপাদানপরিযাদানায ৰো, ভিক্খৰে, ধম্মং দেসেস্সামি. তং সুণাথ ¶ . কতমো চ, ভিক্খৰে, সব্বুপাদানপরিযাদানায ধম্মো’’?

‘‘তং কিং মঞ্ঞথ, ভিক্খৰে, চক্খু নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘রূপা…পে… চক্খুৰিঞ্ঞাণং নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’…পে….

‘‘চক্খুসম্ফস্সো ¶ নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’…পে….

‘‘যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’…পে….

‘‘সোতং… ঘানং… জিৰ্হা… কাযো… মনো… ধম্মা… মনোৰিঞ্ঞাণং… মনোসম্ফস্সো… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা, তম্পি নিচ্চং ৰা অনিচ্চং ৰা’’তি?

‘‘অনিচ্চং ¶ , ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘এৰং ¶ পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি…পে… জিৰ্হাযপি নিব্বিন্দতি, রসেসুপি নিব্বিন্দতি, জিৰ্হাৰিঞ্ঞাণেপি ¶ নিব্বিন্দতি, জিৰ্হাসম্ফস্সেপি নিব্বিন্দতি, যম্পিদং জিৰ্হাসম্ফস্সপচ্চযা উপ্পজ্জতি…পে… মনস্মিম্পি নিব্বিন্দতি, ধম্মেসুপি নিব্বিন্দতি, মনোৰিঞ্ঞাণেপি নিব্বিন্দতি, মনোসম্ফস্সেপি নিব্বিন্দতি. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ¶ ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি. অযং খো, ভিক্খৰে, সব্বুপাদানপরিযাদানায ধম্মো’’তি. দসমং.

অৰিজ্জাৰগ্গো ছট্ঠো.

তস্সুদ্দানং –

অৰিজ্জা সংযোজনা দ্ৰে, আসৰেন দুৰে ৰুত্তা;

অনুসযা অপরে দ্ৰে, পরিঞ্ঞা দ্ৰে পরিযাদিন্নং;

ৰগ্গো তেন পৰুচ্চতীতি.

৭. মিগজালৰগ্গো

১. পঠমমিগজালসুত্তং

৬৩. সাৰত্থিনিদানং ¶ . অথ খো আযস্মা মিগজালো যেন ভগৰা…পে… একমন্তং নিসিন্নো খো আযস্মা মিগজালো ভগৰন্তং এতদৰোচ – ‘‘‘একৰিহারী, একৰিহারী’তি, ভন্তে, ৰুচ্চতি. কিত্তাৰতা ¶ নু খো, ভন্তে, একৰিহারী হোতি, কিত্তাৰতা চ পন সদুতিযৰিহারী হোতী’’তি?

‘‘সন্তি খো, মিগজাল, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায ¶ তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী [নন্দি (সী. স্যা. কং. পী.)]. নন্দিযা সতি সারাগো হোতি; সারাগে সতি সংযোগো হোতি. নন্দিসংযোজনসংযুত্তো খো, মিগজাল, ভিক্খু সদুতিযৰিহারীতি ৰুচ্চতি. সন্তি…পে… সন্তি খো, মিগজাল, জিৰ্হাৰিঞ্ঞেয্যা রসা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি ¶ নন্দী. নন্দিযা সতি সারাগো হোতি; সারাগে সতি সংযোগো হোতি. নন্দিসংযোজনসংযুত্তো খো, মিগজাল, ভিক্খু সদুতিযৰিহারীতি ৰুচ্চতি. এৰংৰিহারী চ, মিগজাল, ভিক্খু কিঞ্চাপি অরঞ্ঞৰনপত্থানি পন্তানি সেনাসনানি পটিসেৰতি ¶ অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি [মনুস্সরাহসেয্যকানি (সী. স্যা. কং. পী.)] পটিসল্লানসারুপ্পানি; অথ খো সদুতিযৰিহারীতি ৰুচ্চতি. তং কিস্স হেতু? তণ্হা হিস্স দুতিযা, সাস্স অপ্পহীনা. তস্মা সদুতিযৰিহারী’’তি ৰুচ্চতি.

‘‘সন্তি চ খো, মিগজাল, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো নন্দী নিরুজ্ঝতি. নন্দিযা অসতি সারাগো ন হোতি; সারাগে অসতি সংযোগো ¶ ন হোতি. নন্দিসংযোজনৰিসংযুত্তো খো, মিগজাল, ভিক্খু একৰিহারীতি ৰুচ্চতি…পে… সন্তি চ খো, মিগজাল, জিৰ্হাৰিঞ্ঞেয্যা রসা…পে… সন্তি চ খো, মিগজাল, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো নন্দী নিরুজ্ঝতি. নন্দিযা অসতি সারাগো ন হোতি; সারাগে অসতি সংযোগো ন হোতি. নন্দিসংযোজনৰিপ্পযুত্তো খো, মিগজাল, ভিক্খু একৰিহারীতি ৰুচ্চতি. এৰংৰিহারী চ, মিগজাল, ভিক্খু কিঞ্চাপি গামন্তে ৰিহরতি আকিণ্ণো ভিক্খূহি ভিক্খুনীহি উপাসকেহি উপাসিকাহি রাজূহি রাজমহামত্তেহি তিত্থিযেহি তিত্থিযসাৰকেহি ¶ . অথ খো একৰিহারীতি ৰুচ্চতি. তং কিস্স হেতু? তণ্হা হিস্স দুতিযা, সাস্স পহীনা. তস্মা একৰিহারীতি ৰুচ্চতী’’তি. পঠমং.

২. দুতিযমিগজালসুত্তং

৬৪. অথ ¶ খো আযস্মা মিগজালো যেন ভগৰা তেনুপসঙ্কমি…পে… একমন্তং নিসিন্নো খো আযস্মা মিগজালো ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি.

‘‘সন্তি ¶ খো, মিগজাল, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী. নন্দিসমুদযা দুক্খসমুদযো, মিগজালাতি ৰদামি…পে… সন্তি চ খো, মিগজাল, জিৰ্হাৰিঞ্ঞেয্যা রসা…পে… সন্তি চ খো, মিগজাল, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী ¶ . নন্দিসমুদযা দুক্খসমুদযো, মিগজালাতি ৰদামি.

‘‘সন্তি চ খো, মিগজাল, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায ¶ তিট্ঠতো নন্দী নিরুজ্ঝতি. নন্দিনিরোধা দুক্খনিরোধো, মিগজালাতি ৰদামি…পে… সন্তি চ খো, মিগজাল, জিৰ্হাৰিঞ্ঞেয্যা রসা ইট্ঠা কন্তা…পে… সন্তি চ খো, মিগজাল, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো নন্দী নিরুজ্ঝতি. নন্দিনিরোধা দুক্খনিরোধো, মিগজালাতি ৰদামী’’তি.

অথ খো আযস্মা মিগজালো ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো আযস্মা মিগজালো একো ৰূপকট্ঠো অপ্পমত্তো আতাপী পহিতত্তো ৰিহরতো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি তদনুত্তরং – ব্রহ্মচরিযপরিযোসানং দিট্ঠেৰ ¶ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি অব্ভঞ্ঞাসি. অঞ্ঞতরো চ পনাযস্মা মিগজালো অরহতং অহোসীতি. দুতিযং.

৩. পঠমসমিদ্ধিমারপঞ্হাসুত্তং

৬৫. একং ¶ সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. অথ খো আযস্মা সমিদ্ধি যেন ভগৰা…পে… ভগৰন্তং এতদৰোচ – ‘‘‘মারো, মারো’তি, ভন্তে, ৰুচ্চতি. কিত্তাৰতা নু খো, ভন্তে, মারো ৰা অস্স মারপঞ্ঞত্তি ৰা’’তি?

‘‘যত্থ খো, সমিদ্ধি, অত্থি ¶ চক্খু, অত্থি রূপা, অত্থি চক্খুৰিঞ্ঞাণং ¶ , অত্থি চক্খুৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা. অত্থি সোতং, অত্থি সদ্দা, অত্থি সোতৰিঞ্ঞাণং, অত্থি সোতৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা. অত্থি ঘানং, অত্থি গন্ধা, অত্থি ঘানৰিঞ্ঞাণং, অত্থি ঘানৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা. অত্থি জিৰ্হা, অত্থি রসা, অত্থি জিৰ্হাৰিঞ্ঞাণং, অত্থি জিৰ্হাৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা. অত্থি কাযো, অত্থি ফোট্ঠব্বা, অত্থি কাযৰিঞ্ঞাণং, অত্থি কাযৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা. অত্থি মনো, অত্থি ধম্মা, অত্থি মনোৰিঞ্ঞাণং, অত্থি মনোৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা.

‘‘যত্থ চ খো, সমিদ্ধি, নত্থি চক্খু, নত্থি রূপা, নত্থি চক্খুৰিঞ্ঞাণং, নত্থি চক্খুৰিঞ্ঞাণৰিঞ্ঞাতব্বা ধম্মা, নত্থি তত্থ মারো ৰা মারপঞ্ঞত্তি ৰা. নত্থি সোতং…পে… নত্থি ঘানং…পে… নত্থি জিৰ্হা, নত্থি রসা, নত্থি জিৰ্হাৰিঞ্ঞাণং, নত্থি জিৰ্হাৰিঞ্ঞাণৰিঞ্ঞাতব্বা ধম্মা, নত্থি তত্থ মারো ৰা মারপঞ্ঞত্তি ৰা. নত্থি কাযো…পে…. নত্থি মনো, নত্থি ধম্মা, নত্থি মনোৰিঞ্ঞাণং, নত্থি মনোৰিঞ্ঞাণৰিঞ্ঞাতব্বা ধম্মা, নত্থি তত্থ মারো ৰা মারপঞ্ঞত্তি ৰা’’তি. ততিযং.

৪. সমিদ্ধিসত্তপঞ্হাসুত্তং

৬৬. ‘‘‘সত্তো ¶ , সত্তো’তি, ভন্তে, ৰুচ্চতি. কিত্তাৰতা নু খো, ভন্তে, সত্তো ৰা অস্স সত্তপঞ্ঞত্তি ৰা’’তি…পে…. চতুত্থং.

৫. সমিদ্ধিদুক্খপঞ্হাসুত্তং

৬৭. ‘‘‘দুক্খং ¶ ¶ , দুক্খ’ন্তি, ভন্তে, ৰুচ্চতি. কিত্তাৰতা নু খো, ভন্তে, দুক্খং ৰা অস্স দুক্খপঞ্ঞত্তি ৰা’’তি…পে…. পঞ্চমং.

৬. সমিদ্ধিলোকপঞ্হাসুত্তং

৬৮. ‘‘‘লোকো, লোকো’তি, ভন্তে, ৰুচ্চতি. কিত্তাৰতা নু খো, ভন্তে, লোকো ৰা অস্স লোকপঞ্ঞত্তি ৰা’’তি? যত্থ খো, সমিদ্ধি, অত্থি চক্খু, অত্থি রূপা, অত্থি চক্খুৰিঞ্ঞাণং, অত্থি চক্খুৰিঞ্ঞাণৰিঞ্ঞাতব্বা ধম্মা, অত্থি তত্থ লোকো ৰা লোকপঞ্ঞত্তি ৰাতি…পে… অত্থি জিৰ্হা…পে… অত্থি ¶ মনো, অত্থি ধম্মা, অত্থি মনোৰিঞ্ঞাণং, অত্থি মনোৰিঞ্ঞাণৰিঞ্ঞাতব্বা ধম্মা, অত্থি তত্থ লোকো ৰা লোকপঞ্ঞত্তি ৰা.

‘‘যত্থ চ খো, সমিদ্ধি, নত্থি চক্খু, নত্থি রূপা, নত্থি চক্খুৰিঞ্ঞাণং, নত্থি চক্খুৰিঞ্ঞাণৰিঞ্ঞাতব্বা ধম্মা, নত্থি তত্থ লোকো ৰা লোকপঞ্ঞত্তি ৰা…পে… নত্থি জিৰ্হা…পে… নত্থি মনো, নত্থি ধম্মা, নত্থি মনোৰিঞ্ঞাণং, নত্থি মনোৰিঞ্ঞাণৰিঞ্ঞাতব্বা ধম্মা, নত্থি তত্থ লোকো ৰা লোকপঞ্ঞত্তি ৰা’’তি. ছট্ঠং.

৭. উপসেনআসীৰিসসুত্তং

৬৯. একং সমযং আযস্মা চ সারিপুত্তো আযস্মা চ উপসেনো রাজগহে ৰিহরন্তি সীতৰনে সপ্পসোণ্ডিকপব্ভারে. তেন খো পন সমযেন আযস্মতো উপসেনস্স কাযে আসীৰিসো পতিতো ¶ হোতি. অথ খো আযস্মা উপসেনো ভিক্খূ আমন্তেসি – ‘‘এথ মে, আৰুসো, ইমং কাযং মঞ্চকং আরোপেত্ৰা বহিদ্ধা নীহরথ. পুরাযং কাযো ইধেৰ ৰিকিরতি; সেয্যথাপি ভুসমুট্ঠী’’তি.

এৰং ¶ ৰুত্তে, আযস্মা সারিপুত্তো আযস্মন্তং উপসেনং এতদৰোচ – ‘‘ন খো পন মযং পস্সাম আযস্মতো উপসেনস্স কাযস্স ৰা অঞ্ঞথত্তং ইন্দ্রিযানং ৰা ৰিপরিণামং. অথ চ পনাযস্মা উপসেনো এৰমাহ – ‘এথ মে, আৰুসো, ইমং কাযং মঞ্চকং আরোপেত্ৰা বহিদ্ধা নীহরথ. পুরাযং কাযো ইধেৰ ৰিকিরতি; সেয্যথাপি ভুসমুট্ঠী’’’তি. ‘‘যস্স নূন, আৰুসো সারিপুত্ত, এৰমস্স – ‘অহং চক্খূতি ৰা মম চক্খূতি ৰা…পে… অহং জিৰ্হাতি ৰা মম ¶ জিৰ্হাতি ৰা… অহং মনোতি ৰা মম মনোতি ৰা’. তস্স, আৰুসো সারিপুত্ত, সিযা কাযস্স ৰা অঞ্ঞথত্তং ইন্দ্রিযানং ৰা ৰিপরিণামো. ময্হঞ্চ খো, আৰুসো সারিপুত্ত, ন এৰং হোতি ¶ – ‘অহং চক্খূতি ৰা মম চক্খূতি ৰা…পে… অহং জিৰ্হাতি ৰা মম জিৰ্হাতি ৰা…পে… অহং মনোতি ৰা মম মনোতি ৰা’. তস্স ময্হঞ্চ খো, আৰুসো সারিপুত্ত, কিং কাযস্স ৰা অঞ্ঞথত্তং ভৰিস্সতি, ইন্দ্রিযানং ৰা ৰিপরিণামো’’তি!

‘‘তথা হি পনাযস্মতো উপসেনস্স দীঘরত্তং অহঙ্কারমমঙ্কারমানানুসযো সুসমূহতো. তস্মা আযস্মতো উপসেনস্স ন এৰং হোতি – ‘অহং চক্খূতি ৰা মম চক্খূতি ৰা…পে… অহং জিৰ্হাতি ৰা মম জিৰ্হাতি ৰা…পে… অহং মনোতি ৰা মম মনোতি ৰা’’’তি. অথ ¶ খো তে ভিক্খূ আযস্মতো উপসেনস্স কাযং মঞ্চকং আরোপেত্ৰা বহিদ্ধা নীহরিংসু. অথ খো আযস্মতো উপসেনস্স কাযো তত্থেৰ ৰিকিরি; সেয্যথাপি ভুসমুট্ঠীতি. সত্তমং.

৮. উপৰাণসন্দিট্ঠিকসুত্তং

৭০. অথ খো আযস্মা উপৰাণো যেন ভগৰা তেনুপসঙ্কমি…পে… একমন্তং নিসিন্নো খো আযস্মা উপৰাণো ভগৰন্তং এতদৰোচ – ‘‘‘সন্দিট্ঠিকো ধম্মো, সন্দিট্ঠিকো ধম্মো’তি, ভন্তে, ৰুচ্চতি. কিত্তাৰতা নু খো, ভন্তে, সন্দিট্ঠিকো ধম্মো হোতি, অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি?

‘‘ইধ পন, উপৰাণ, ভিক্খু চক্খুনা রূপং দিস্ৰা রূপপ্পটিসংৰেদী চ হোতি রূপরাগপ্পটিসংৰেদী চ. সন্তঞ্চ অজ্ঝত্তং রূপেসু রাগং ‘অত্থি মে অজ্ঝত্তং রূপেসু রাগো’তি পজানাতি. যং তং, উপৰাণ, ভিক্খু চক্খুনা রূপং দিস্ৰা রূপপ্পটিসংৰেদী চ হোতি রূপরাগপ্পটিসংৰেদী ¶ চ. সন্তঞ্চ অজ্ঝত্তং রূপেসু রাগং ‘অত্থি মে অজ্ঝত্তং রূপেসু রাগো’তি পজানাতি. এৰম্পি খো, উপৰাণ, সন্দিট্ঠিকো ধম্মো হোতি অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি…পে….

‘‘পুন ¶ চপরং, উপৰাণ, ভিক্খু জিৰ্হায রসং সাযিত্ৰা রসপ্পটিসংৰেদী চ হোতি রসরাগপ্পটিসংৰেদী চ. সন্তঞ্চ অজ্ঝত্তং রসেসু রাগং ‘অত্থি মে অজ্ঝত্তং রসেসু রাগো’তি পজানাতি. যং তং, উপৰাণ, ভিক্খু জিৰ্হায রসং সাযিত্ৰা রসপ্পটিসংৰেদী চ হোতি রসরাগপ্পটিসংৰেদী ¶ চ. সন্তঞ্চ অজ্ঝত্তং রসেসু ¶ রাগং ‘অত্থি মে অজ্ঝত্তং রসেসু রাগো’তি পজানাতি. এৰম্পি খো, উপৰাণ, সন্দিট্ঠিকো ধম্মো হোতি অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি…পে….

‘‘পুন চপরং, উপৰাণ, ভিক্খু মনসা ধম্মং ৰিঞ্ঞায ধম্মপ্পটিসংৰেদী চ হোতি ধম্মরাগপ্পটিসংৰেদী চ. সন্তঞ্চ অজ্ঝত্তং ধম্মেসু রাগং ‘অত্থি মে অজ্ঝত্তং ধম্মেসু রাগো’তি পজানাতি. যং তং, উপৰাণ, ভিক্খু মনসা ধম্মং ৰিঞ্ঞায ধম্মপ্পটিসংৰেদী চ হোতি ধম্মরাগপ্পটিসংৰেদী চ. সন্তঞ্চ অজ্ঝত্তং ধম্মেসু রাগং ‘অত্থি মে অজ্ঝত্তং ধম্মেসু রাগো’তি পজানাতি. এৰম্পি খো, উপৰাণ, সন্দিট্ঠিকো ধম্মো হোতি…পে… পচ্চত্তং ৰেদিতব্বো ৰিঞ্ঞূহী’’তি…পে….

‘‘ইধ পন, উপৰাণ, ভিক্খু চক্খুনা রূপং দিস্ৰা রূপপ্পটিসংৰেদী চ হোতি, নো চ রূপরাগপ্পটিসংৰেদী. অসন্তঞ্চ অজ্ঝত্তং রূপেসু রাগং ‘নত্থি মে অজ্ঝত্তং রূপেসু রাগো’তি পজানাতি. যং তং, উপৰাণ, ভিক্খু চক্খুনা রূপং দিস্ৰা রূপপ্পটিসংৰেদীহি খো হোতি, নো চ রূপরাগপ্পটিসংৰেদী. অসন্তঞ্চ অজ্ঝত্তং রূপেসু রাগং ‘নত্থি মে অজ্ঝত্তং রূপেসু রাগো’তি পজানাতি. এৰম্পি খো, উপৰাণ, সন্দিট্ঠিকো ধম্মো হোতি, অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি…পে….

‘‘পুন ¶ চপরং, উপৰাণ, ভিক্খু জিৰ্হায রসং সাযিত্ৰা রসপ্পটিসংৰেদীহি খো হোতি, নো চ রসরাগপ্পটিসংৰেদী. অসন্তঞ্চ অজ্ঝত্তং রসেসু রাগং ‘নত্থি মে অজ্ঝত্তং রসেসু রাগো’তি পজানাতি…পে….

‘‘পুন ¶ ¶ চপরং, উপৰাণ, ভিক্খু মনসা ধম্মং ৰিঞ্ঞায ধম্মপ্পটিসংৰেদীহি খো হোতি, নো চ ধম্মরাগপ্পটিসংৰেদী. অসন্তঞ্চ অজ্ঝত্তং ধম্মেসু রাগং ‘নত্থি মে অজ্ঝত্তং ধম্মেসু রাগো’তি পজানাতি. যং তং, উপৰাণ, ভিক্খু মনসা ধম্মং ৰিঞ্ঞায ধম্মপ্পটিসংৰেদীহি খো হোতি, নো চ ধম্মরাগপ্পটিসংৰেদী. অসন্তঞ্চ অজ্ঝত্তং ধম্মেসু রাগং ‘নত্থি মে অজ্ঝত্তং ধম্মেসু রাগো’তি পজানাতি. এৰম্পি খো, উপৰাণ, সন্দিট্ঠিকো ধম্মো হোতি, অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’’তি. অট্ঠমং.

৯. পঠমছফস্সাযতনসুত্তং

৭১. ‘‘যো হি কোচি, ভিক্খৰে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানাতি. অৰুসিতং ¶ তেন ব্রহ্মচরিযং, আরকা সো ইমস্মা ধম্মৰিনযা’’তি.

এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘এত্থাহং, ভন্তে, অনস্সসং [অনস্সসিং (সী.), অনস্সাসং (স্যা. কং.), অনস্সাসিং (পী.)]. অহঞ্হি, ভন্তে, ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানামী’’তি.

‘‘তং কিং মঞ্ঞসি, ভিক্খু, চক্খুং ‘এতং মম, এসোহমস্মি ¶ , এসো মে অত্তা’তি সমনুপস্সসী’’তি?

‘‘নো হেতং, ভন্তে’’.

‘‘সাধু, ভিক্খু, এত্থ চ তে, ভিক্খু, চক্খু ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এসেৰন্তো দুক্খস্স…পে… জিৰ্হং ‘এতং মম, এসোহমস্মি, এসো মে অত্তা’তি সমনুপস্সসী’’তি?

‘‘নো হেতং, ভন্তে’’.

‘‘সাধু, ভিক্খু, এত্থ চ তে, ভিক্খু, জিৰ্হা ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এসেৰন্তো দুক্খস্স…পে… মনং ‘এতং মম, এসোহমস্মি, এসো মে অত্তা’তি সমনুপস্সসী’’তি?

‘‘নো হেতং, ভন্তে’’.

‘‘সাধু, ভিক্খু, এত্থ চ তে, ভিক্খু, মনো ‘নেতং মম, নেসোহমস্মি, ন মেসো অত্তা’তি ¶ এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এসেৰন্তো দুক্খস্সা’’তি. নৰমং.

১০. দুতিযছফস্সাযতনসুত্তং

৭২. ‘‘যো ¶ হি কোচি, ভিক্খৰে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানাতি. অৰুসিতং তেন ব্রহ্মচরিযং, আরকা সো ইমস্মা ধম্মৰিনযা’’তি.

এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘এত্থাহং, ভন্তে, অনস্সসং পনস্সসং. অহঞ্হি, ভন্তে, ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানামী’’তি.

‘‘তং কিং মঞ্ঞসি, ভিক্খু, চক্খুং ‘নেতং মম, নেসোহমস্মি ¶ , ন মেসো অত্তা’তি সমনুপস্সসী’’তি?

‘‘এৰং, ভন্তে’’.

‘‘সাধু, ভিক্খু, এত্থ চ তে, ভিক্খু, চক্খু ‘নেতং মম, নেসোহমস্মি ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এৰং তে এতং পঠমং ফস্সাযতনং পহীনং ভৰিস্সতি ¶ আযতিং অপুনব্ভৰায…পে….

‘‘জিৰ্হং ‘নেতং মম, নেসোহমস্মি, ন মেসো অত্তা’তি সমনুপস্সসী’’তি?

‘‘এৰং, ভন্তে’’.

‘‘সাধু ¶ , ভিক্খু, এত্থ চ তে, ভিক্খু, জিৰ্হা ‘নেতং মম, নেসোহমস্মি ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এৰং তে এতং চতুত্থং ফস্সাযতনং পহীনং ভৰিস্সতি আযতিং অপুনব্ভৰায…পে….

‘‘মনং ‘নেতং মম, নেসোহমস্মি, ন মেসো অত্তা’তি সমনুপস্সসী’’তি?

‘‘এৰং, ভন্তে’’.

‘‘সাধু, ভিক্খু, এত্থ চ তে, ভিক্খু, মনো ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায সুদিট্ঠং ভৰিস্সতি. এৰং তে এতং ছট্ঠং ফস্সাযতনং পহীনং ভৰিস্সতি আযতিং অপুনব্ভৰাযা’’তি. দসমং.

১১. ততিযছফস্সাযতনসুত্তং

৭৩. ‘‘যো হি কোচি, ভিক্খৰে, ভিক্খু ছন্নং ফস্সাযতনানং ¶ সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানাতি. অৰুসিতং তেন ব্রহ্মচরিযং, আরকা সো ইমস্মা ধম্মৰিনযা’’তি.

এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘এত্থাহং, ভন্তে, অনস্সসং পনস্সসং. অহঞ্হি, ভন্তে, ছন্নং ফস্সাযতনানং সমুদযঞ্চ ¶ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানামী’’তি.

‘‘তং কিং মঞ্ঞসি, ভিক্খু, চক্খু নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং ¶ পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘সোতং… ঘানং… জিৰ্হা… কাযো… মনো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘এৰং পস্সং, ভিক্খু, সুতৰা অরিযসাৰকো চক্খুস্মিম্পি নিব্বিন্দতি, সোতস্মিম্পি নিব্বিন্দতি, ঘানস্মিম্পি নিব্বিন্দতি, জিৰ্হাযপি নিব্বিন্দতি, কাযস্মিম্পি নিব্বিন্দতি, মনস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. একাদসমং.

মিগজালৰগ্গো সত্তমো.

তস্সুদ্দানং –

মিগজালেন ¶ দ্ৰে ৰুত্তা, চত্তারো চ সমিদ্ধিনা;

উপসেনো উপৰাণো, ছফস্সাযতনিকা তযোতি.

৮. গিলানৰগ্গো

১. পঠমগিলানসুত্তং

৭৪. সাৰত্থিনিদানং ¶ ¶ ¶ . অথ খো অঞ্ঞতরো ভিক্খু যেন ভগৰা তেনুপসঙ্কমি…পে… একমন্তং নিসিন্নো খো সো ভিক্খু ভগৰন্তং এতদৰোচ – ‘‘অমুকস্মিং, ভন্তে, ৰিহারে অঞ্ঞতরো ভিক্খু নৰো অপ্পঞ্ঞাতো আবাধিকো দুক্খিতো বাল়্হগিলানো. সাধু, ভন্তে, ভগৰা যেন সো ভিক্খু তেনুপসঙ্কমতু অনুকম্পং উপাদাযা’’তি.

অথ খো ভগৰা নৰৰাদঞ্চ সুত্ৰা গিলানৰাদঞ্চ, ‘‘অপ্পঞ্ঞাতো ভিক্খূ’’তি ইতি ৰিদিত্ৰা যেন সো ভিক্খু তেনুপসঙ্কমি. অদ্দসা খো সো ভিক্খু ভগৰন্তং দূরতোৰ আগচ্ছন্তং. দিস্ৰান মঞ্চকে সমধোসি [সমঞ্চোসি (সী.), সমতেসি (স্যা. কং.), সমঞ্চোপি (পী.)]. অথ খো ভগৰা তং ভিক্খুং এতদৰোচ – ‘‘অলং, ভিক্খু, মা ত্ৰং মঞ্চকে সমধোসি. সন্তিমানি আসনানি পঞ্ঞত্তানি, তত্থাহং নিসীদিস্সামী’’তি. নিসীদি ভগৰা পঞ্ঞত্তে আসনে. নিসজ্জ খো ভগৰা তং ভিক্খুং এতদৰোচ – ‘‘কচ্চি তে, ভিক্খু, খমনীযং, কচ্চি যাপনীযং, কচ্চি দুক্খা ৰেদনা পটিক্কমন্তি নো অভিক্কমন্তি, পটিক্কমোসানং পঞ্ঞাযতি নো অভিক্কমো’’তি?

‘‘ন মে, ভন্তে, খমনীযং, ন যাপনীযং, বাল়্হা মে দুক্খা ৰেদনা অভিক্কমন্তি নো পটিক্কমন্তি, অভিক্কমোসানং পঞ্ঞাযতি নো পটিক্কমো’’তি.

‘‘কচ্চি তে, ভিক্খু, ন কিঞ্চি কুক্কুচ্চং, ন কোচি ৰিপ্পটিসারো’’তি?

‘‘তগ্ঘ মে, ভন্তে, অনপ্পকং ¶ কুক্কুচ্চং, অনপ্পকো ৰিপ্পটিসারো’’তি.

‘‘কচ্চি ¶ পন তং [ত্ৰং (সী.), তে (স্যা. কং. ক.)], ভিক্খু, অত্তা সীলতো উপৰদতী’’তি?

‘‘ন খো মং, ভন্তে, অত্তা সীলতো উপৰদতী’’তি [নো হেতং ভন্তে (পী. ক.)].

‘‘নো চে কির তে, ভিক্খু, অত্তা সীলতো উপৰদতি, অথ কিঞ্চ [অথ কিস্মিঞ্চ (সী.), অথ ভিক্খু কিস্মিঞ্চ (স্যা. কং. পী. ক.)] তে কুক্কুচ্চং কো চ ৰিপ্পটিসারো’’তি?

‘‘ন খ্ৰাহং ¶ , ভন্তে, সীলৰিসুদ্ধত্থং ভগৰতা ধম্মং দেসিতং আজানামী’’তি ¶ .

‘‘নো চে কির ত্ৰং, ভিক্খু, সীলৰিসুদ্ধত্থং মযা ধম্মং দেসিতং আজানাসি, অথ কিমত্থং চরহি ত্ৰং, ভিক্খু, মযা ধম্মং দেসিতং আজানাসী’’তি?

‘‘রাগৰিরাগত্থং খ্ৰাহং, ভন্তে, ভগৰতা ধম্মং দেসিতং আজানামী’’তি.

‘‘সাধু সাধু, ভিক্খু! সাধু খো ত্ৰং, ভিক্খু, রাগৰিরাগত্থং মযা ধম্মং দেসিতং আজানাসি. রাগৰিরাগত্থো হি, ভিক্খু, মযা ধম্মো দেসিতো. তং কিং মঞ্ঞসি ভিক্খু, চক্খু নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং…পে… সোতং… ঘানং… জিৰ্হা… কাযো… মনো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘এৰং পস্সং, ভিক্খু, সুতৰা অরিযসাৰকো চক্খুস্মিম্পি নিব্বিন্দতি, সোতস্মিম্পি নিব্বিন্দতি…পে… মনস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং নাপরং ইত্থত্তাযা’তি পজানাতী’’তি.

ইদমৰোচ ¶ ভগৰা. অত্তমনো সো ভিক্খু ভগৰতো ভাসিতং অভিনন্দি. ইমস্মিঞ্চ পন ৰেয্যাকরণস্মিং ভঞ্ঞমানে তস্স ভিক্খুনো ৰিরজং ৰীতমলং ধম্মচক্খুং উদপাদি – ‘‘যং কিঞ্চি সমুদযধম্মং, সব্বং তং নিরোধধম্ম’’ন্তি. পঠমং.

২. দুতিযগিলানসুত্তং

৭৫. অথ ¶ খো অঞ্ঞতরো ভিক্খু…পে… ভগৰন্তং এতদৰোচ – ‘‘অমুকস্মিং, ভন্তে, ৰিহারে অঞ্ঞতরো ভিক্খু নৰো অপ্পঞ্ঞাতো আবাধিকো দুক্খিতো বাল়্হগিলানো. সাধু, ভন্তে, ভগৰা যেন সো ভিক্খু তেনুপসঙ্কমতু অনুকম্পং উপাদাযা’’তি.

অথ খো ভগৰা নৰৰাদঞ্চ সুত্ৰা গিলানৰাদঞ্চ, ‘‘অপ্পঞ্ঞাতো ভিক্খূ’’তি ইতি ৰিদিত্ৰা যেন সো ভিক্খু তেনুপসঙ্কমি. অদ্দসা খো সো ভিক্খু ভগৰন্তং দূরতোৰ আগচ্ছন্তং. দিস্ৰান মঞ্চকে সমধোসি. অথ খো ভগৰা তং ভিক্খুং এতদৰোচ – ‘‘অলং, ভিক্খু, মা ত্ৰং মঞ্চকে সমধোসি. সন্তিমানি আসনানি পঞ্ঞত্তানি, তত্থাহং নিসীদিস্সামী’’তি. নিসীদি ভগৰা পঞ্ঞত্তে আসনে. নিসজ্জ খো ভগৰা তং ভিক্খুং এতদৰোচ – ‘‘কচ্চি তে, ভিক্খু, খমনীযং, কচ্চি যাপনীযং, কচ্চি দুক্খা ৰেদনা পটিক্কমন্তি নো অভিক্কমন্তি, পটিক্কমোসানং ¶ পঞ্ঞাযতি নো অভিক্কমো’’তি?

‘‘ন মে, ভন্তে, খমনীযং, ন যাপনীযং…পে… ন খো মং [মে (সব্বত্থ)], ভন্তে, অত্তা সীলতো উপৰদতী’’তি.

‘‘নো চে কির তে, ভিক্খু, অত্তা সীলতো উপৰদতি, অথ কিঞ্চ তে কুক্কুচ্চং কো চ ৰিপ্পটিসারো’’তি?

‘‘ন খ্ৰাহং, ভন্তে, সীলৰিসুদ্ধত্থং ভগৰতা ধম্মং দেসিতং আজানামী’’তি.

‘‘নো ¶ চে কির ত্ৰং, ভিক্খু, সীলৰিসুদ্ধত্থং মযা ধম্মং দেসিতং আজানাসি, অথ ¶ কিমত্থং চরহি ত্ৰং, ভিক্খু, মযা ধম্মং দেসিতং আজানাসী’’তি?

‘‘অনুপাদাপরিনিব্বানত্থং খ্ৰাহং, ভন্তে, ভগৰতা ধম্মং দেসিতং আজানামী’’তি.

‘‘সাধু সাধু, ভিক্খু! সাধু খো ত্ৰং, ভিক্খু, অনুপাদাপরিনিব্বানত্থং মযা ধম্মং দেসিতং আজানাসি. অনুপাদাপরিনিব্বানত্থো হি, ভিক্খু, মযা ধম্মো দেসিতো.

‘‘তং কিং মঞ্ঞসি, ভিক্খু, চক্খু নিচ্চং ৰা অনিচ্চং ৰা’’তি?

‘‘অনিচ্চং ¶ , ভন্তে’’.

‘‘যং…পে… সোতং… ঘানং… জিৰ্হা… কাযো… মনো… মনোৰিঞ্ঞাণং… মনোসম্ফস্সো… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘এৰং পস্সং, ভিক্খু, সুতৰা অরিযসাৰকো চক্খুস্মিম্পি নিব্বিন্দতি…পে… মনস্মিম্পি… মনোৰিঞ্ঞাণেপি… মনোসম্ফস্সেপি নিব্বিন্দতি. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি.

ইদমৰোচ ভগৰা. অত্তমনো সো ভিক্খু ভগৰতো ভাসিতং অভিনন্দি. ইমস্মিঞ্চ পন ৰেয্যাকরণস্মিং ভঞ্ঞমানে তস্স ভিক্খুস্স অনুপাদায আসৰেহি চিত্তং ৰিমুচ্চীতি [ৰিমুচ্চতীতি (সব্বত্থ)]. দুতিযং.

৩. রাধঅনিচ্চসুত্তং

৭৬. অথ ¶ খো আযস্মা রাধো…পে… একমন্তং নিসিন্নো খো আযস্মা রাধো ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু ¶ , যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি. ‘‘যং খো, রাধ, অনিচ্চং তত্র তে ছন্দো পহাতব্বো. কিঞ্চ, রাধ, অনিচ্চং তত্র তে ছন্দো পহাতব্বো? চক্খু অনিচ্চং ¶ , রূপা অনিচ্চা, চক্খুৰিঞ্ঞাণং… চক্খুসম্ফস্সো… যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং. তত্র তে ছন্দো পহাতব্বো…পে… জিৰ্হা… কাযো… মনো অনিচ্চো. তত্র তে ছন্দো পহাতব্বো. ধম্মা… মনোৰিঞ্ঞাণং… মনোসম্ফস্সো… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং. তত্র তে ছন্দো পহাতব্বো. যং ¶ খো, রাধ, অনিচ্চং তত্র তে ছন্দো পহাতব্বো’’তি. ততিযং.

৪. রাধদুক্খসুত্তং

৭৭. ‘‘যং খো, রাধ, দুক্খং তত্র তে ছন্দো পহাতব্বো. কিঞ্চ, রাধ, দুক্খং? চক্খু খো, রাধ, দুক্খং. তত্র তে ছন্দো পহাতব্বো. রূপা… চক্খুৰিঞ্ঞাণং… চক্খুসম্ফস্সো… যম্পিদং চক্খুসম্ফস্স…পে… অদুক্খমসুখং ৰা তম্পি দুক্খং. তত্র তে ছন্দো পহাতব্বো…পে… মনো দুক্খো… ধম্মা… মনোৰিঞ্ঞাণং… মনোসম্ফস্সো… যম্পিদং মনোসম্ফস্সপচ্চযা উপ্পজ্জতি ৰেদযিতং ¶ সুখং ৰা দুক্খং ৰা অদুক্খমসুখং ৰা তম্পি দুক্খং. তত্র তে ছন্দো পহাতব্বো. যং খো, রাধ, দুক্খং তত্র তে ছন্দো পহাতব্বো’’তি. চতুত্থং.

৫. রাধঅনত্তসুত্তং

৭৮. ‘‘যো খো, রাধ, অনত্তা তত্র তে ছন্দো পহাতব্বো. কো চ, রাধ, অনত্তা? চক্খু খো, রাধ, অনত্তা. তত্র তে ছন্দো পহাতব্বো. রূপা… চক্খুৰিঞ্ঞাণং… চক্খুসম্ফস্সো… যম্পিদং চক্খুসম্ফস্সপচ্চযা…পে… মনো অনত্তা… ধম্মা… মনোৰিঞ্ঞাণং… মনোসম্ফস্সো… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনত্তা. তত্র তে ছন্দো পহাতব্বো. যো খো, রাধ, অনত্তা তত্র তে ছন্দো পহাতব্বো’’তি. পঞ্চমং.

৬. পঠমঅৰিজ্জাপহানসুত্তং

৭৯. অথ ¶ ¶ খো অঞ্ঞতরো ভিক্খু যেন ভগৰা তেনুপসঙ্কমি…পে… একমন্তং নিসিন্নো খো সো ভিক্খু ভগৰন্তং এতদৰোচ – ‘‘অত্থি নু খো, ভন্তে, একো ধম্মো যস্স পহানা ভিক্খুনো অৰিজ্জা পহীযতি, ৰিজ্জা উপ্পজ্জতী’’তি?

‘‘অত্থি খো, ভিক্খু, একো ধম্মো যস্স পহানা ভিক্খুনো অৰিজ্জা পহীযতি, ৰিজ্জা উপ্পজ্জতী’’তি.

‘‘কতমো পন, ভন্তে, একো ধম্মো যস্স পহানা ভিক্খুনো অৰিজ্জা পহীযতি, ৰিজ্জা উপ্পজ্জতী’’তি?

‘‘অৰিজ্জা ¶ খো, ভিক্খু, একো ধম্মো যস্স পহানা ভিক্খুনো অৰিজ্জা পহীযতি, ৰিজ্জা উপ্পজ্জতী’’তি.

‘‘কথং পন, ভন্তে, জানতো, কথং পস্সতো ভিক্খুনো অৰিজ্জা ¶ পহীযতি, ৰিজ্জা উপ্পজ্জতী’’তি?

‘‘চক্খুং খো, ভিক্খু, অনিচ্চতো জানতো পস্সতো ভিক্খুনো অৰিজ্জা পহীযতি, ৰিজ্জা উপ্পজ্জতি. রূপে… চক্খুৰিঞ্ঞাণং… চক্খুসম্ফস্সং… যম্পিদং, চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চতো জানতো পস্সতো ভিক্খুনো অৰিজ্জা পহীযতি, ৰিজ্জা উপ্পজ্জতি…পে… মনং অনিচ্চতো জানতো পস্সতো ভিক্খুনো অৰিজ্জা পহীযতি, ৰিজ্জা উপ্পজ্জতি. ধম্মে… মনোৰিঞ্ঞাণং… মনোসম্ফস্সং… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চতো জানতো পস্সতো ভিক্খুনো অৰিজ্জা পহীযতি, ৰিজ্জা উপ্পজ্জতি. এৰং খো, ভিক্খু, জানতো এৰং পস্সতো ভিক্খুনো অৰিজ্জা পহীযতি, ৰিজ্জা উপ্পজ্জতী’’তি. ছট্ঠং.

৭. দুতিযঅৰিজ্জাপহানসুত্তং

৮০. অথ ¶ খো অঞ্ঞতরো ভিক্খু…পে… এতদৰোচ – ‘‘অত্থি নু খো, ভন্তে, একো ধম্মো যস্স পহানা ভিক্খুনো অৰিজ্জা পহীযতি, ৰিজ্জা উপ্পজ্জতী’’তি?

‘‘অত্থি খো, ভিক্খু, একো ধম্মো যস্স পহানা ভিক্খুনো অৰিজ্জা পহীযতি, ৰিজ্জা উপ্পজ্জতী’’তি.

‘‘কতমো পন, ভন্তে, একো ধম্মো যস্স পহানা ভিক্খুনো অৰিজ্জা পহীযতি, ৰিজ্জা উপ্পজ্জতী’’তি?

‘‘অৰিজ্জা খো, ভিক্খু, একো ধম্মো যস্স পহানা ভিক্খুনো অৰিজ্জা পহীযতি, ৰিজ্জা উপ্পজ্জতী’’তি.

‘‘কথং পন, ভন্তে, জানতো, কথং পস্সতো অৰিজ্জা পহীযতি, ৰিজ্জা উপ্পজ্জতী’’তি?

‘‘ইধ, ভিক্খু, ভিক্খুনো সুতং হোতি – ‘সব্বে ধম্মা নালং অভিনিৰেসাযা’তি. এৰঞ্চেতং, ভিক্খু, ভিক্খুনো সুতং হোতি – ‘সব্বে ধম্মা ¶ নালং অভিনিৰেসাযা’তি. সো সব্বং ধম্মং অভিজানাতি, সব্বং ধম্মং অভিঞ্ঞায সব্বং ধম্মং পরিজানাতি, সব্বং ধম্মং পরিঞ্ঞায সব্বনিমিত্তানি অঞ্ঞতো পস্সতি, চক্খুং অঞ্ঞতো পস্সতি ¶ , রূপে… চক্খুৰিঞ্ঞাণং… চক্খুসম্ফস্সং… যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অঞ্ঞতো পস্সতি…পে… মনং অঞ্ঞতো পস্সতি, ধম্মে… মনোৰিঞ্ঞাণং… মনোসম্ফস্সং… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অঞ্ঞতো পস্সতি. এৰং খো, ভিক্খু, জানতো এৰং পস্সতো ভিক্খুনো অৰিজ্জা পহীযতি, ৰিজ্জা উপ্পজ্জতী’’তি. সত্তমং.

৮. সম্বহুলভিক্খুসুত্তং

৮১. অথ ¶ খো সম্বহুলা ভিক্খূ যেন ভগৰা তেনুপসঙ্কমিংসু…পে… একমন্তং নিসিন্না খো তে ভিক্খূ ভগৰন্তং এতদৰোচুং ¶ – ‘‘ইধ নো, ভন্তে, অঞ্ঞতিত্থিযা পরিব্বাজকা অম্হে এৰং পুচ্ছন্তি – ‘কিমত্থিযং, আৰুসো, সমণে গোতমে ব্রহ্মচরিযং ৰুস্সতী’তি? এৰং পুট্ঠা মযং, ভন্তে, তেসং অঞ্ঞতিত্থিযানং পরিব্বাজকানং এৰং ব্যাকরোম – ‘দুক্খস্স খো, আৰুসো, পরিঞ্ঞত্থং ভগৰতি ব্রহ্মচরিযং ৰুস্সতী’তি. কচ্চি মযং, ভন্তে, এৰং পুট্ঠা এৰং ব্যাকরমানা ৰুত্তৰাদিনো চেৰ ভগৰতো হোম, ন চ ভগৰন্তং অভূতেন অব্ভাচিক্খাম, ধম্মস্স চানুধম্মং ব্যাকরোম, ন চ কোচি সহধম্মিকো ৰাদানুৰাদো গারয্হং ঠানং আগচ্ছতী’’তি?

‘‘তগ্ঘ তুম্হে, ভিক্খৰে, এৰং পুট্ঠা এৰং ব্যাকরমানা ৰুত্তৰাদিনো চেৰ মে হোথ, ন চ মং অভূতেন অব্ভাচিক্খথ, ধম্মস্স চানুধম্মং ব্যাকরোথ, ন চ ¶ কোচি সহধম্মিকো ৰাদানুৰাদো গারয্হং ঠানং আগচ্ছতি. দুক্খস্স হি, ভিক্খৰে, পরিঞ্ঞত্থং মযি ব্রহ্মচরিযং ৰুস্সতি. সচে পন ৰো, ভিক্খৰে, অঞ্ঞতিত্থিযা পরিব্বাজকা এৰং পুচ্ছেয্যুং – ‘কতমং পন তং, আৰুসো, দুক্খং, যস্স পরিঞ্ঞায সমণে গোতমে ব্রহ্মচরিযং ৰুস্সতী’তি? এৰং পুট্ঠা তুম্হে, ভিক্খৰে, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ – ‘চক্খু খো, আৰুসো, দুক্খং, তস্স পরিঞ্ঞায ভগৰতি ব্রহ্মচরিযং ৰুস্সতি. রূপা…পে… যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি দুক্খং. তস্স পরিঞ্ঞায ভগৰতি ব্রহ্মচরিযং ৰুস্সতি…পে… মনো দুক্খো…পে… যম্পিদং ¶ মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি দুক্খং. তস্স পরিঞ্ঞায ভগৰতি ব্রহ্মচরিযং ৰুস্সতি. ইদং খো তং, আৰুসো, দুক্খং, তস্স পরিঞ্ঞায ভগৰতি ব্রহ্মচরিযং ৰুস্সতী’তি. এৰং ¶ পুট্ঠা তুম্হে, ভিক্খৰে, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথা’’তি. অট্ঠমং.

৯. লোকপঞ্হাসুত্তং

৮২. অথ ¶ খো অঞ্ঞতরো ভিক্খু যেন ভগৰা…পে… একমন্তং নিসিন্নো খো সো ভিক্খু ভগৰন্তং এতদৰোচ –

‘‘‘লোকো, লোকো’তি, ভন্তে, ৰুচ্চতি. কিত্তাৰতা নু খো, ভন্তে, লোকোতি ৰুচ্চতী’’তি? ‘‘‘লুজ্জতী’তি খো, ভিক্খু, তস্মা লোকোতি ৰুচ্চতি. কিঞ্চ লুজ্জতি? চক্খু খো, ভিক্খু, লুজ্জতি. রূপা লুজ্জন্তি, চক্খুৰিঞ্ঞাণং লুজ্জতি, চক্খুসম্ফস্সো লুজ্জতি ¶ , যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি লুজ্জতি…পে… জিৰ্হা লুজ্জতি…পে… মনো লুজ্জতি, ধম্মা লুজ্জন্তি, মনোৰিঞ্ঞাণং লুজ্জতি, মনোসম্ফস্সো লুজ্জতি, যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি লুজ্জতি. লুজ্জতীতি খো, ভিক্খু, তস্মা লোকোতি ৰুচ্চতী’’তি. নৰমং.

১০. ফগ্গুনপঞ্হাসুত্তং

৮৩. অথ খো আযস্মা ফগ্গুনো…পে… একমন্তং নিসিন্নো খো আযস্মা ফগ্গুনো ভগৰন্তং এতদৰোচ –

‘‘অত্থি নু খো, ভন্তে, তং চক্খু, যেন চক্খুনা অতীতে বুদ্ধে পরিনিব্বুতে ছিন্নপপঞ্চে ছিন্নৰটুমে পরিযাদিন্নৰট্টে সব্বদুক্খৰীতিৰট্টে পঞ্ঞাপযমানো পঞ্ঞাপেয্য…পে… অত্থি নু খো, ভন্তে, সা জিৰ্হা, যায জিৰ্হায অতীতে বুদ্ধে পরিনিব্বুতে ছিন্নপপঞ্চে ছিন্নৰটুমে পরিযাদিন্নৰট্টে সব্বদুক্খৰীতিৰট্টে পঞ্ঞাপযমানো পঞ্ঞাপেয্য…পে… অত্থি নু খো সো, ভন্তে, মনো, যেন মনেন অতীতে বুদ্ধে পরিনিব্বুতে ছিন্নপপঞ্চে ছিন্নৰটুমে পরিযাদিন্নৰট্টে সব্বদুক্খৰীতিৰট্টে পঞ্ঞাপযমানো পঞ্ঞাপেয্যা’’তি?

‘‘নত্থি খো তং, ফগ্গুন, চক্খু, যেন চক্খুনা অতীতে বুদ্ধে পরিনিব্বুতে ছিন্নপপঞ্চে ছিন্নৰটুমে পরিযাদিন্নৰট্টে সব্বদুক্খৰীতিৰট্টে পঞ্ঞাপযমানো পঞ্ঞাপেয্য ¶ …পে… নত্থি খো সা ¶ , ফগ্গুন, জিৰ্হা, যায জিৰ্হায অতীতে বুদ্ধে পরিনিব্বুতে ছিন্নপপঞ্চে ছিন্নৰটুমে পরিযাদিন্নৰট্টে সব্বদুক্খৰীতিৰট্টে পঞ্ঞাপযমানো ¶ পঞ্ঞাপেয্য…পে… নত্থি ¶ খো সো, ফগ্গুন, মনো, যেন মনেন অতীতে বুদ্ধে পরিনিব্বুতে ছিন্নপপঞ্চে ছিন্নৰটুমে পরিযাদিন্নৰট্টে সব্বদুক্খৰীতিৰট্টে পঞ্ঞাপযমানো পঞ্ঞাপেয্যা’’তি. দসমং.

গিলানৰগ্গো অট্ঠমো.

তস্সুদ্দানং –

গিলানেন দুৰে ৰুত্তা, রাধেন অপরে তযো;

অৰিজ্জায চ দ্ৰে ৰুত্তা, ভিক্খু লোকো চ ফগ্গুনোতি.

৯. ছন্নৰগ্গো

১. পলোকধম্মসুত্তং

৮৪. সাৰত্থিনিদানং. অথ ¶ খো আযস্মা আনন্দো যেন ভগৰা তেনুপসঙ্কমি…পে… একমন্তং নিসিন্নো খো আযস্মা আনন্দো ভগৰন্তং এতদৰোচ –

‘‘‘লোকো, লোকো’তি, ভন্তে, ৰুচ্চতি. কিত্তাৰতা নু খো, ভন্তে, লোকোতি ৰুচ্চতী’’তি? ‘‘যং খো, আনন্দ, পলোকধম্মং, অযং ৰুচ্চতি অরিযস্স ৰিনযে লোকো. কিঞ্চ, আনন্দ, পলোকধম্মং? চক্খু খো, আনন্দ, পলোকধম্মং, রূপা পলোকধম্মা, চক্খুৰিঞ্ঞাণং পলোকধম্মং, চক্খুসম্ফস্সো পলোকধম্মো, যম্পিদং চক্খুসম্ফস্সপচ্চযা…পে… তম্পি পলোকধম্মং…পে… জিৰ্হা পলোকধম্মা, রসা পলোকধম্মা, জিৰ্হাৰিঞ্ঞাণং পলোকধম্মং, জিৰ্হাসম্ফস্সো পলোকধম্মো, যম্পিদং জিৰ্হাসম্ফস্সপচ্চযা…পে… তম্পি পলোকধম্মং…পে… ¶ মনো পলোকধম্মো, ধম্মা পলোকধম্মা, মনোৰিঞ্ঞাণং পলোকধম্মং, মনোসম্ফস্সো পলোকধম্মো, যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি পলোকধম্মং. যং খো, আনন্দ, পলোকধম্মং, অযং ৰুচ্চতি অরিযস্স ৰিনযে লোকো’’তি. পঠমং.

২. সুঞ্ঞতলোকসুত্তং

৮৫. অথ ¶ ¶ খো আযস্মা আনন্দো…পে… ভগৰন্তং এতদৰোচ – ‘‘‘সুঞ্ঞো লোকো, সুঞ্ঞো লোকো’তি, ভন্তে, ৰুচ্চতি. কিত্তাৰতা নু খো, ভন্তে, সুঞ্ঞো লোকোতি ৰুচ্চতী’’তি? ‘‘যস্মা চ খো, আনন্দ, সুঞ্ঞং ¶ অত্তেন ৰা অত্তনিযেন ৰা তস্মা সুঞ্ঞো লোকোতি ৰুচ্চতি. কিঞ্চ, আনন্দ, সুঞ্ঞং অত্তেন ৰা অত্তনিযেন ৰা? চক্খু খো, আনন্দ, সুঞ্ঞং অত্তেন ৰা অত্তনিযেন ৰা. রূপা সুঞ্ঞা অত্তেন ৰা অত্তনিযেন ৰা, চক্খুৰিঞ্ঞাণং সুঞ্ঞং অত্তেন ৰা অত্তনিযেন ৰা, চক্খুসম্ফস্সো সুঞ্ঞো অত্তেন ৰা অত্তনিযেন ৰা…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি সুঞ্ঞং অত্তেন ৰা অত্তনিযেন ৰা. যস্মা চ খো, আনন্দ, সুঞ্ঞং অত্তেন ৰা অত্তনিযেন ৰা, তস্মা সুঞ্ঞো লোকোতি ৰুচ্চতী’’তি. দুতিযং.

৩. সংখিত্তধম্মসুত্তং

৮৬. একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি.

‘‘তং কিং মঞ্ঞসি, আনন্দ, চক্খু নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং ¶ , ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘রূপা নিচ্চা ৰা অনিচ্চা ৰা’’তি?

‘‘অনিচ্চা, ভন্তে’’…পে….

‘‘চক্খুৰিঞ্ঞাণং…পে… যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ¶ ৰা দুক্খং ৰা অদুক্খমসুখং ৰা তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ¶ ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো ¶ মে অত্তা’’’তি?

‘‘নো হেতং, ভন্তে’’…পে….

‘‘জিৰ্হা নিচ্চা ৰা অনিচ্চা ৰা’’তি?

‘‘অনিচ্চা, ভন্তে’’…পে….

‘‘জিৰ্হাৰিঞ্ঞাণং… জিৰ্হাসম্ফস্সো…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং ¶ পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’…পে….

‘‘এৰং পস্সং, আনন্দ, সুতৰা অরিযসাৰকো চক্খুস্মিম্পি নিব্বিন্দতি…পে… চক্খুসম্ফস্সেপি নিব্বিন্দতি…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. ততিযং.

৪. ছন্নসুত্তং

৮৭. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন আযস্মা চ সারিপুত্তো আযস্মা চ মহাচুন্দো আযস্মা চ ছন্নো গিজ্ঝকূটে পব্বতে ৰিহরন্তি. তেন খো পন সমযেন যেন আযস্মা ছন্নো আবাধিকো হোতি দুক্খিতো বাল়্হগিলানো ¶ . অথ খো আযস্মা সারিপুত্তো সাযন্হসমযং পটিসল্লানা ¶ ৰুট্ঠিতো যেনাযস্মা মহাচুন্দো তেনুপসঙ্কমি; উপসঙ্কমিত্ৰা আযস্মন্তং মহাচুন্দং এতদৰোচ – ‘‘আযামাৰুসো চুন্দ, যেনাযস্মা ছন্নো তেনুপসঙ্কমিস্সাম গিলানপুচ্ছকা’’তি. ‘‘এৰমাৰুসো’’তি খো আযস্মা মহাচুন্দো আযস্মতো সারিপুত্তস্স পচ্চস্সোসি.

অথ খো আযস্মা চ সারিপুত্তো আযস্মা চ মহাচুন্দো যেনাযস্মা ছন্নো তেনুপসঙ্কমিংসু; উপসঙ্কমিত্ৰা পঞ্ঞত্তে আসনে নিসীদিংসু. নিসজ্জ খো আযস্মা সারিপুত্তো আযস্মন্তং ছন্নং এতদৰোচ – ‘‘কচ্চি তে, আৰুসো ছন্ন, খমনীযং, কচ্চি যাপনীযং, কচ্চি দুক্খা ৰেদনা পটিক্কমন্তি নো অভিক্কমন্তি, পটিক্কমোসানং পঞ্ঞাযতি নো অভিক্কমো’’তি?

‘‘ন ¶ মে, আৰুসো সারিপুত্ত, খমনীযং ন যাপনীযং, বাল়্হা মে দুক্খা ৰেদনা অভিক্কমন্তি নো পটিক্কমন্তি, অভিক্কমোসানং পঞ্ঞাযতি নো পটিক্কমো. সেয্যথাপি, আৰুসো, বলৰা পুরিসো তিণ্হেন সিখরেন [খগ্গেন (ক.)] মুদ্ধনি [মুদ্ধানং (সী. স্যা. কং. পী.)] অভিমত্থেয্য [অভিমন্থেয্য (সী.)]; এৰমেৰ খো, আৰুসো, অধিমত্তা ৰাতা মুদ্ধনি [মুদ্ধানং (সী. স্যা. কং. পী.)] ঊহনন্তি [উপহনন্তি (সী. স্যা. কং. পী. ক.), উহনন্তি (ক.)]. ন মে, আৰুসো, খমনীযং, ন যাপনীযং…পে… নো পটিক্কমো. সেয্যথাপি ¶ , আৰুসো, বলৰা পুরিসো দল়্হেন ৰরত্তক্খণ্ডেন সীসে সীসৰেঠং দদেয্য; এৰমেৰ খো, আৰুসো, অধিমত্তা সীসে সীসৰেদনা. ন মে, আৰুসো, খমনীযং ¶ , ন যাপনীযং…পে… নো পটিক্কমো. সেয্যথাপি, আৰুসো, দক্খো গোঘাতকো ৰা গোঘাতকন্তেৰাসী ৰা তিণ্হেন গোৰিকন্তনেন কুচ্ছিং পরিকন্তেয্য; এৰমেৰ খো অধিমত্তা ৰাতা কুচ্ছিং পরিকন্তন্তি. ন মে, আৰুসো, খমনীযং, ন যাপনীযং…পে… নো পটিক্কমো. সেয্যথাপি, আৰুসো, দ্ৰে বলৰন্তো পুরিসা দুব্বলতরং পুরিসং নানাবাহাসু গহেত্ৰা অঙ্গারকাসুযা সন্তাপেয্যুং ¶ সম্পরিতাপেয্যুং; এৰমেৰ খো, আৰুসো, অধিমত্তো কাযস্মিং ডাহো. ন মে, আৰুসো, খমনীযং, ন যাপনীযং, বাল়্হা মে দুক্খা ৰেদনা অভিক্কমন্তি নো পটিক্কমন্তি, অভিক্কমোসানং পঞ্ঞাযতি নো পটিক্কমো. সত্থং, আৰুসো সারিপুত্ত, আহরিস্সামি, নাৰকঙ্খামি [নাপি কঙ্খামি (ক.)] জীৰিত’’ন্তি.

‘‘মা আযস্মা ছন্নো সত্থং আহরেসি. যাপেতাযস্মা ছন্নো, যাপেন্তং মযং আযস্মন্তং ছন্নং ইচ্ছাম. সচে আযস্মতো ছন্নস্স নত্থি সপ্পাযানি ভোজনানি, অহং আযস্মতো ছন্নস্স সপ্পাযানি ভোজনানি পরিযেসিস্সামি. সচে আযস্মতো ছন্নস্স নত্থি সপ্পাযানি ভেসজ্জানি, অহং আযস্মতো ছন্নস্স সপ্পাযানি ভেসজ্জানি পরিযেসিস্সামি. সচে আযস্মতো ছন্নস্স নত্থি পতিরূপা উপট্ঠাকা, অহং আযস্মন্তং ছন্নং উপট্ঠহিস্সামি. মা আযস্মা ছন্নো সত্থং আহরেসি. যাপেতাযস্মা ছন্নো, যাপেন্তং মযং আযস্মন্তং ছন্নং ইচ্ছামা’’তি.

‘‘ন মে, আৰুসো সারিপুত্ত, নত্থি সপ্পাযানি ভোজনানি; অত্থি মে সপ্পাযানি ¶ ভোজনানি. নপি মে নত্থি সপ্পাযানি ভেসজ্জানি; অত্থি মে সপ্পাযানি ভেসজ্জানি. নপি মে নত্থি পতিরূপা উপট্ঠাকা; অত্থি মে পতিরূপা উপট্ঠাকা. অপি চ মে, আৰুসো, সত্থা পরিচিণ্ণো দীঘরত্তং মনাপেনেৰ, নো অমনাপেন. এতঞ্হি, আৰুসো, সাৰকস্স পতিরূপং যং সত্থারং ¶ পরিচরেয্য মনাপেনেৰ, নো অমনাপেন. ‘অনুপৰজ্জং [তং অনুপৰজ্জং (বহূসু)] ছন্নো ভিক্খু সত্থং আহরিস্সতী’তি – এৰমেতং, আৰুসো সারিপুত্ত, ধারেহী’’তি.

‘‘পুচ্ছেয্যাম ¶ মযং আযস্মন্তং ছন্নং কঞ্চিদেৰ [কিঞ্চিদেৰ (স্যা. কং. পী. ক.)] দেসং, সচে আযস্মা ছন্নো ওকাসং করোতি পঞ্হস্স ৰেয্যাকরণাযা’’তি. ‘‘পুচ্ছাৰুসো ¶ সারিপুত্ত, সুত্ৰা ৰেদিস্সামা’’তি.

‘‘চক্খুং, আৰুসো ছন্ন, চক্খুৰিঞ্ঞাণং চক্খুৰিঞ্ঞাণৰিঞ্ঞাতব্বে ধম্মে ‘এতং মম, এসোহমস্মি, এসো মে অত্তা’তি সমনুপস্সসি…পে… জিৰ্হং, আৰুসো ছন্ন, জিৰ্হাৰিঞ্ঞাণং জিৰ্হাৰিঞ্ঞাণৰিঞ্ঞাতব্বে ধম্মে ‘এতং মম, এসোহমস্মি, এসো মে অত্তা’তি সমনুপস্সসি…পে… মনং, আৰুসো ছন্ন, মনোৰিঞ্ঞাণং মনোৰিঞ্ঞাণৰিঞ্ঞাতব্বে ধম্মে ‘এতং মম, এসোহমস্মি, এসো মে অত্তা’তি সমনুপস্সসী’’তি?

‘‘চক্খুং, আৰুসো সারিপুত্ত, চক্খুৰিঞ্ঞাণং চক্খুৰিঞ্ঞাণৰিঞ্ঞাতব্বে ধম্মে ‘নেতং মম, নেসোহমস্মি, ন মেসো অত্তা’তি সমনুপস্সামি…পে… জিৰ্হং, আৰুসো সারিপুত্ত, জিৰ্হাৰিঞ্ঞাণং জিৰ্হাৰিঞ্ঞাণৰিঞ্ঞাতব্বে ধম্মে ‘নেতং ¶ মম, নেসোহমস্মি, ন মেসো অত্তা’তি সমনুপস্সামি…পে… মনং, আৰুসো সারিপুত্ত, মনোৰিঞ্ঞাণং মনোৰিঞ্ঞাণৰিঞ্ঞাতব্বে ধম্মে ‘নেতং মম, নেসোহমস্মি, ন মেসো অত্তা’তি সমনুপস্সামী’’তি.

‘‘চক্খুস্মিং, আৰুসো ছন্ন, চক্খুৰিঞ্ঞাণে চক্খুৰিঞ্ঞাণৰিঞ্ঞাতব্বেসু ধম্মেসু কিং দিস্ৰা কিং অভিঞ্ঞায চক্খুং চক্খুৰিঞ্ঞাণং চক্খুৰিঞ্ঞাণৰিঞ্ঞাতব্বে ধম্মে ‘নেতং মম, নেসোহমস্মি, ন মেসো অত্তা’তি সমনুপস্সসি… জিৰ্হায, আৰুসো ছন্ন, জিৰ্হাৰিঞ্ঞাণে জিৰ্হাৰিঞ্ঞাণৰিঞ্ঞাতব্বেসু ধম্মেসু কিং দিস্ৰা কিং অভিঞ্ঞায জিৰ্হং জিৰ্হাৰিঞ্ঞাণং জিৰ্হাৰিঞ্ঞাণৰিঞ্ঞাতব্বে ধম্মে ‘নেতং মম, নেসোহমস্মি, ন মেসো অত্তা’তি সমনুপস্সসি… মনস্মিং, আৰুসো ছন্ন, মনোৰিঞ্ঞাণে মনোৰিঞ্ঞাণৰিঞ্ঞাতব্বেসু ধম্মেসু কিং দিস্ৰা কিং অভিঞ্ঞায মনং মনোৰিঞ্ঞাণং মনোৰিঞ্ঞাণৰিঞ্ঞাতব্বে ধম্মে ‘নেতং মম, নেসোহমস্মি, ন মেসো অত্তা’তি সমনুপস্সসী’’তি?

‘‘চক্খুস্মিং ¶ , আৰুসো সারিপুত্ত, চক্খুৰিঞ্ঞাণে চক্খুৰিঞ্ঞাণৰিঞ্ঞাতব্বেসু ধম্মেসু নিরোধং দিস্ৰা নিরোধং অভিঞ্ঞায চক্খুং চক্খুৰিঞ্ঞাণং চক্খুৰিঞ্ঞাণৰিঞ্ঞাতব্বে ধম্মে ‘নেতং মম, নেসোহমস্মি, ন মেসো অত্তা’তি ¶ সমনুপস্সামি…পে… জিৰ্হায, আৰুসো সারিপুত্ত, জিৰ্হাৰিঞ্ঞাণে জিৰ্হাৰিঞ্ঞাণৰিঞ্ঞাতব্বেসু ধম্মেসু নিরোধং দিস্ৰা নিরোধং অভিঞ্ঞায জিৰ্হং জিৰ্হাৰিঞ্ঞাণং জিৰ্হাৰিঞ্ঞাণৰিঞ্ঞাতব্বে ¶ ধম্মে ‘নেতং মম, নেসোহমস্মি, ন মেসো অত্তা’তি ¶ সমনুপস্সামি…পে… মনস্মিং, আৰুসো সারিপুত্ত, মনোৰিঞ্ঞাণে মনোৰিঞ্ঞাণৰিঞ্ঞাতব্বেসু ধম্মেসু নিরোধং দিস্ৰা নিরোধং অভিঞ্ঞায মনং মনোৰিঞ্ঞাণং মনোৰিঞ্ঞাণৰিঞ্ঞাতব্বে ধম্মে ‘নেতং মম, নেসোহমস্মি, ন মেসো অত্তা’তি সমনুপস্সামী’’তি.

এৰং ৰুত্তে, আযস্মা মহাচুন্দো আযস্মন্তং ছন্নং এতদৰোচ – ‘‘তস্মাতিহ, আৰুসো ছন্ন, ইদম্পি তস্স ভগৰতো সাসনং নিচ্চকপ্পং সাধুকং মনসি কাতব্বং – ‘নিস্সিতস্স চলিতং, অনিস্সিতস্স চলিতং নত্থি. চলিতে অসতি পস্সদ্ধি হোতি. পস্সদ্ধিযা সতি নতি ন হোতি. নতিযা অসতি আগতিগতি ন হোতি. আগতিগতিযা অসতি চুতূপপাতো ন হোতি. চুতূপপাতে অসতি নেৰিধ ন হুরং ন উভযমন্তরেন. এসেৰন্তো দুক্খস্সা’’’তি.

অথ খো আযস্মা চ সারিপুত্তো আযস্মা চ মহাচুন্দো আযস্মন্তং ছন্নং ইমিনা ওৰাদেন ওৰদিত্ৰা উট্ঠাযাসনা পক্কমিংসু. অথ খো আযস্মা ছন্নো অচিরপক্কন্তেসু তেসু আযস্মন্তেসু সত্থং আহরেসি.

অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা সারিপুত্তো ভগৰন্তং এতদৰোচ – ‘‘আযস্মতা, ভন্তে, ছন্নেন সত্থং আহরিতং. তস্স কা গতি কো অভিসম্পরাযো’’তি? ‘‘ননু তে, সারিপুত্ত, ছন্নেন ভিক্খুনা সম্মুখাযেৰ অনুপৰজ্জতা ব্যাকতা’’তি ¶ ? ‘‘অত্থি, ভন্তে, পুব্বৰিজ্জনং [পুব্বৰিচিরং (সী.), পুব্বৰিজ্ঝনং (পী.), পুব্বজিরং (ম. নি. ৩.৩৯৪] নাম ৰজ্জিগামো. তত্থাযস্মতো ছন্নস্স মিত্তকুলানি সুহজ্জকুলানি উপৰজ্জকুলানী’’তি. ‘‘হোন্তি হেতে, সারিপুত্ত, ছন্নস্স ভিক্খুনো মিত্তকুলানি সুহজ্জকুলানি উপৰজ্জকুলানি. ন খো পনাহং, সারিপুত্ত ¶ , এত্তাৰতা সউপৰজ্জোতি ৰদামি. যো খো, সারিপুত্ত, তঞ্চ কাযং নিক্খিপতি, অঞ্ঞঞ্চ কাযং ¶ উপাদিযতি, তমহং সউপৰজ্জোতি ৰদামি. তং ছন্নস্স ভিক্খুনো নত্থি. ‘অনুপৰজ্জং ছন্নেন ভিক্খুনা সত্থং আহরিত’ন্তি – এৰমেতং, সারিপুত্ত, ধারেহী’’তি. চতুত্থং.

৫. পুণ্ণসুত্তং

৮৮. অথ ¶ [সাৰত্থিনিদানং. অথ (?) ম. নি. ৩.৩৯৫ পস্সিতব্বং] খো আযস্মা পুণ্ণো যেন ভগৰা তেনুপসঙ্কমি; উপসঙ্কমিত্ৰা…পে… একমন্তং নিসিন্নো খো আযস্মা পুণ্ণো ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি.

‘‘সন্তি খো, পুণ্ণ, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী. ‘নন্দিসমুদযা দুক্খসমুদযো, পুণ্ণা’তি ৰদামি…পে… সন্তি খো, পুণ্ণ, জিৰ্হাৰিঞ্ঞেয্যা রসা…পে… সন্তি খো, পুণ্ণ, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ¶ ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী. ‘নন্দিসমুদযা দুক্খসমুদযো, পুণ্ণা’তি ৰদামি.

‘‘সন্তি খো, পুণ্ণ, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি, তস্স তং অনভিনন্দতো অনভিৰদতো অনজ্ঝোসায তিট্ঠতো নিরুজ্ঝতি নন্দী. ‘নন্দিনিরোধা দুক্খনিরোধো, পুণ্ণা’তি ৰদামি…পে… সন্তি খো, পুণ্ণ, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু ¶ নাভিনন্দতি নাভিৰদতি নাজ্ঝোসায তিট্ঠতি, তস্স তং অনভিনন্দতো অনভিৰদতো অনজ্ঝোসায তিট্ঠতো নিরুজ্ঝতি নন্দী. ‘নন্দিনিরোধা দুক্খনিরোধো, পুণ্ণা’তি ৰদামি.

‘‘ইমিনা ¶ ত্ৰং [ইমিনা চ ত্ৰং], পুণ্ণ, মযা সংখিত্তেন ওৰাদেন ওৰদিতো কতমস্মিং [কতরস্মিং (ম. নি. ৩.৩৯৫)] জনপদে ৰিহরিস্সসী’’তি? ‘‘অত্থি, ভন্তে, সুনাপরন্তো নাম জনপদো, তত্থাহং ৰিহরিস্সামী’’তি.

‘‘চণ্ডা ¶ খো, পুণ্ণ, সুনাপরন্তকা মনুস্সা; ফরুসা খো, পুণ্ণ, সুনাপরন্তকা মনুস্সা. সচে তং, পুণ্ণ, সুনাপরন্তকা মনুস্সা অক্কোসিস্সন্তি পরিভাসিস্সন্তি, তত্র তে, পুণ্ণ, কিন্তি ভৰিস্সতী’’তি?

‘‘সচে মং, ভন্তে, সুনাপরন্তকা ¶ মনুস্সা অক্কোসিস্সন্তি পরিভাসিস্সন্তি, তত্র মে এৰং ভৰিস্সতি – ‘ভদ্দকা ৰতিমে সুনাপরন্তকা মনুস্সা, সুভদ্দকা ৰতিমে সুনাপরন্তকা মনুস্সা, যং মে [মং (সব্বত্থ)] নযিমে পাণিনা পহারং দেন্তী’তি. এৰমেত্থ [এৰম্মেত্থ (?)], ভগৰা, ভৰিস্সতি; এৰমেত্থ, সুগত, ভৰিস্সতী’’তি.

‘‘সচে পন তে, পুণ্ণ, সুনাপরন্তকা মনুস্সা পাণিনা পহারং দস্সন্তি, তত্র পন তে, পুণ্ণ, কিন্তি ভৰিস্সতী’’তি?

‘‘সচে মে, ভন্তে, সুনাপরন্তকা মনুস্সা পাণিনা পহারং ¶ দস্সন্তি, তত্র মে এৰং ভৰিস্সতি – ‘ভদ্দকা ৰতিমে সুনাপরন্তকা মনুস্সা, সুভদ্দকা ৰতিমে সুনাপরন্তকা মনুস্সা, যং মে [এৰম্মেত্থ (?)] নযিমে লেড্ডুনা পহারং দেন্তী’তি. এৰমেত্থ, ভগৰা, ভৰিস্সতি; এৰমেত্থ, সুগত, ভৰিস্সতী’’তি.

‘‘সচে পন তে, পুণ্ণ, সুনাপরন্তকা মনুস্সা লেড্ডুনা পহারং দস্সন্তি, তত্র পন তে, পুণ্ণ, কিন্তি ভৰিস্সতী’’তি?

‘‘সচে মে, ভন্তে, সুনাপরন্তকা মনুস্সা লেড্ডুনা পহারং দস্সন্তি, তত্র মে এৰং ভৰিস্সতি – ‘ভদ্দকা ৰতিমে সুনাপরন্তকা মনুস্সা, সুভদ্দকা ৰতিমে সুনাপরন্তকা মনুস্সা, যং মে নযিমে দণ্ডেন পহারং দেন্তী’তি ¶ . এৰমেত্থ, ভগৰা, ভৰিস্সতি; এৰমেত্থ, সুগত, ভৰিস্সতী’’তি.

‘‘সচে ¶ পন পুণ্ণ, সুনাপরন্তকা মনুস্সা দণ্ডেন পহারং দস্সন্তি, তত্র পন তে, পুণ্ণ, কিন্তি ভৰিস্সতী’’তি?

‘‘সচে মে, ভন্তে, সুনাপরন্তকা মনুস্সা দণ্ডেন পহারং দস্সন্তি, তত্র মে এৰং ভৰিস্সতি – ‘ভদ্দকা ৰতিমে সুনাপরন্তকা মনুস্সা, সুভদ্দকা ৰতিমে সুনাপরন্তকা মনুস্সা, যং মে নযিমে সত্থেন পহারং দেন্তী’তি. এৰমেত্থ, ভগৰা, ভৰিস্সতি; এৰমেত্থ, সুগত, ভৰিস্সতী’’তি.

‘‘সচে পন তে, পুণ্ণ, সুনাপরন্তকা মনুস্সা সত্থেন পহারং দস্সন্তি, তত্র পন তে, পুণ্ণ, কিন্তি ভৰিস্সতী’’তি?

‘‘সচে মে, ভন্তে, সুনাপরন্তকা মনুস্সা সত্থেন পহারং দস্সন্তি, তত্র মে এৰং ভৰিস্সতি – ‘ভদ্দকা ৰতিমে সুনাপরন্তকা মনুস্সা, সুভদ্দকা ৰতিমে সুনাপরন্তকা মনুস্সা, যং মং নযিমে ¶ তিণ্হেন সত্থেন জীৰিতা ৰোরোপেন্তী’তি. এৰমেত্থ, ভগৰা, ভৰিস্সতি; এৰমেত্থ, সুগত, ভৰিস্সতী’’তি.

‘‘সচে ¶ পন তং, পুণ্ণ, সুনাপরন্তকা মনুস্সা তিণ্হেন সত্থেন জীৰিতা ৰোরোপেস্সন্তি, তত্র পন তে, পুণ্ণ, কিন্তি ভৰিস্সতী’’তি?

‘‘সচে মং, ভন্তে, সুনাপরন্তকা মনুস্সা তিণ্হেন সত্থেন জীৰিতা ৰোরোপেস্সন্তি, তত্র মে এৰং ভৰিস্সতি – ‘সন্তি খো তস্স ভগৰতো সাৰকা কাযেন চ জীৰিতেন চ অট্টীযমানা হরাযমানা জিগুচ্ছমানা সত্থহারকং পরিযেসন্তি, তং মে ইদং অপরিযিট্ঠঞ্ঞেৰ সত্থহারকং লদ্ধ’ন্তি. এৰমেত্থ, ভগৰা, ভৰিস্সতি; এৰমেত্থ, সুগত, ভৰিস্সতী’’তি.

‘‘সাধু সাধু, পুণ্ণ! সক্খিস্সসি খো ত্ৰং, পুণ্ণ, ইমিনা দমূপসমেন সমন্নাগতো সুনাপরন্তস্মিং জনপদে ৰত্থুং. যস্স দানি ত্ৰং, পুণ্ণ, কালং মঞ্ঞসী’’তি.

অথ খো আযস্মা পুণ্ণো ভগৰতো ৰচনং অভিনন্দিত্ৰা অনুমোদিত্ৰা উট্ঠাযাসনা ভগৰন্তং ¶ অভিৰাদেত্ৰা ¶ পদক্খিণং কত্ৰা সেনাসনং সংসামেত্ৰা পত্তচীৰরমাদায যেন সুনাপরন্তো জনপদো তেন চারিকং পক্কামি. অনুপুব্বেন চারিকং চরমানো যেন সুনাপরন্তো জনপদো তদৰসরি. তত্র সুদং আযস্মা পুণ্ণো সুনাপরন্তস্মিং জনপদে ৰিহরতি. অথ খো আযস্মা পুণ্ণো তেনেৰন্তরৰস্সেন পঞ্চমত্তানি উপাসকসতানি পটিৰেদেসি [পটিপাদেসি (সী. পী.), পটিদেসেসি (স্যা. কং.)]. তেনেৰন্তরৰস্সেন পঞ্চমত্তানি উপাসিকাসতানি পটিৰেদেসি. তেনেৰন্তরৰস্সেন তিস্সো ৰিজ্জা ¶ সচ্ছাকাসি. তেনেৰন্তরৰস্সেন পরিনিব্বাযি.

অথ খো সম্বহুলা ভিক্খূ যেন ভগৰা তেনুপসঙ্কমিংসু…পে… একমন্তং নিসিন্না খো তে ভিক্খূ ভগৰন্তং এতদৰোচুং – ‘‘যো সো, ভন্তে, পুণ্ণো নাম কুলপুত্তো ভগৰতা সংখিত্তেন ওৰাদেন ওৰদিতো, সো কালঙ্কতো. তস্স কা গতি কো অভিসম্পরাযো’’তি?

‘‘পণ্ডিতো, ভিক্খৰে, পুণ্ণো কুলপুত্তো [কুলপুত্তো অহোসি (সব্বত্থ)], পচ্চপাদি [সচ্চৰাদী (স্যা. কং. ক.)] ধম্মস্সানুধম্মং, ন চ মং ধম্মাধিকরণং ৰিহেসেসি [ৰিহেঠেসি (সী. স্যা. কং.)]. পরিনিব্বুতো, ভিক্খৰে, পুণ্ণো কুলপুত্তো’’তি. পঞ্চমং.

৬. বাহিযসুত্তং

৮৯. অথ ¶ খো আযস্মা বাহিযো যেন ভগৰা তেনুপসঙ্কমি…পে… একমন্তং নিসিন্নো খো আযস্মা বাহিযো ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি.

‘‘তং কিং মঞ্ঞসি, বাহিয, চক্খু নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো ¶ ¶ হেতং, ভন্তে’’.

‘‘রূপা নিচ্চা ৰা অনিচ্চা ৰা’’তি?

‘‘অনিচ্চা, ভন্তে’’…পে… চক্খুৰিঞ্ঞাণং…পে… চক্খুসম্ফস্সো…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু ¶ তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘এৰং পস্সং, বাহিয, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি.

অথ খো আযস্মা বাহিযো ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো আযস্মা বাহিযো একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি তদনুত্তরং – ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি. ‘‘খীণা জাতি, ৰুসিতং ব্রহ্মচরিযং, কতং করণীযং ¶ , নাপরং ইত্থত্তাযা’’তি অব্ভঞ্ঞাসি. অঞ্ঞতরো চ পনাযস্মা বাহিযো অরহতং অহোসীতি. ছট্ঠং.

৭. পঠমএজাসুত্তং

৯০. ‘‘এজা ¶ , ভিক্খৰে, রোগো, এজা গণ্ডো, এজা সল্লং. তস্মাতিহ, ভিক্খৰে, তথাগতো অনেজো ৰিহরতি ৰীতসল্লো. তস্মাতিহ ¶ , ভিক্খৰে, ভিক্খু চেপি আকঙ্খেয্য ‘অনেজো ৰিহরেয্যং [ৰিহরেয্য (সী. পী. ক.)] ৰীতসল্লো’তি, চক্খুং ন মঞ্ঞেয্য, চক্খুস্মিং ন মঞ্ঞেয্য, চক্খুতো ন মঞ্ঞেয্য, চক্খু ¶ মেতি ন মঞ্ঞেয্য; রূপে ন মঞ্ঞেয্য, রূপেসু ন মঞ্ঞেয্য, রূপতো ন মঞ্ঞেয্য, রূপা মেতি ন মঞ্ঞেয্য; চক্খুৰিঞ্ঞাণং ন মঞ্ঞেয্য, চক্খুৰিঞ্ঞাণস্মিং ন মঞ্ঞেয্য, চক্খুৰিঞ্ঞাণতো ন মঞ্ঞেয্য, চক্খুৰিঞ্ঞাণং মেতি ন মঞ্ঞেয্য; চক্খুসম্ফস্সং ন মঞ্ঞেয্য, চক্খুসম্ফস্সস্মিং ন মঞ্ঞেয্য, চক্খুসম্ফস্সতো ন মঞ্ঞেয্য, চক্খুসম্ফস্সো মেতি ন মঞ্ঞেয্য. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ন মঞ্ঞেয্য, তং মেতি ন মঞ্ঞেয্য.

‘‘সোতং ন মঞ্ঞেয্য…পে… ঘানং ন মঞ্ঞেয্য…পে… জিৰ্হং ন মঞ্ঞেয্য, জিৰ্হায ন মঞ্ঞেয্য, জিৰ্হাতো ন মঞ্ঞেয্য, জিৰ্হা মেতি ন মঞ্ঞেয্য; রসে ন মঞ্ঞেয্য…পে… জিৰ্হাৰিঞ্ঞাণং ন মঞ্ঞেয্য…পে… জিৰ্হাসম্ফস্সং ন মঞ্ঞেয্য…পে… যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ন মঞ্ঞেয্য, তং মেতি ন মঞ্ঞেয্য.

‘‘কাযং ন মঞ্ঞেয্য…পে… মনং ন মঞ্ঞেয্য, মনস্মিং ন মঞ্ঞেয্য, মনতো ন মঞ্ঞেয্য, মনো মেতি ন মঞ্ঞেয্য; ধম্মে ন মঞ্ঞেয্য…পে… মনো ৰিঞ্ঞাণং…পে… মনোসম্ফস্সং…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ন মঞ্ঞেয্য, তং মেতি ন মঞ্ঞেয্য; সব্বং ন মঞ্ঞেয্য, সব্বস্মিং ¶ ন মঞ্ঞেয্য, সব্বতো ন মঞ্ঞেয্য, সব্বং মেতি ন মঞ্ঞেয্য.

‘‘সো ¶ এৰং অমঞ্ঞমানো ন কিঞ্চিপি লোকে উপাদিযতি. অনুপাদিযং ন পরিতস্সতি. অপরিতস্সং পচ্চত্তঞ্ঞেৰ পরিনিব্বাযতি ¶ . ‘খীণা জাতি, ৰুসিতং ব্রহ্মচরিযং, কতং করণীযং নাপরং ইত্থত্তাযা’তি পজানাতী’’তি. সত্তমং.

৮. দুতিযএজাসুত্তং

৯১. ‘‘এজা ¶ , ভিক্খৰে, রোগো, এজা গণ্ডো, এজা সল্লং. তস্মাতিহ, ভিক্খৰে, তথাগতো অনেজো ৰিহরতি ৰীতসল্লো. তস্মাতিহ, ভিক্খৰে, ভিক্খু চেপি আকঙ্খেয্য ‘অনেজো ৰিহরেয্যং ৰীতসল্লো’তি, চক্খুং ন মঞ্ঞেয্য, চক্খুস্মিং ন মঞ্ঞেয্য, চক্খুতো ন মঞ্ঞেয্য, চক্খু মেতি ন মঞ্ঞেয্য; রূপে ন মঞ্ঞেয্য… চক্খুৰিঞ্ঞাণং… চক্খুসম্ফস্সং… যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ন মঞ্ঞেয্য, তং মেতি ন মঞ্ঞেয্য. যঞ্হি, ভিক্খৰে, মঞ্ঞতি, যস্মিং মঞ্ঞতি, যতো মঞ্ঞতি, যং মেতি মঞ্ঞতি, ততো তং হোতি অঞ্ঞথা. অঞ্ঞথাভাৰী ভৰসত্তো লোকো ভৰমেৰ অভিনন্দতি…পে….

‘‘জিৰ্হং ন মঞ্ঞেয্য, জিৰ্হায ন মঞ্ঞেয্য, জিৰ্হাতো ন মঞ্ঞেয্য, জিৰ্হা মেতি ন মঞ্ঞেয্য; রসে ন মঞ্ঞেয্য… জিৰ্হাৰিঞ্ঞাণং… জিৰ্হাসম্ফস্সং… যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ন মঞ্ঞেয্য, তং মেতি ন মঞ্ঞেয্য. যঞ্হি, ভিক্খৰে, মঞ্ঞতি, যস্মিং মঞ্ঞতি, যতো মঞ্ঞতি, যং মেতি মঞ্ঞতি, ততো তং হোতি অঞ্ঞথা. অঞ্ঞথাভাৰী ভৰসত্তো লোকো ভৰমেৰ অভিনন্দতি…পে….

‘‘মনং ন মঞ্ঞেয্য, মনস্মিং ন মঞ্ঞেয্য, মনতো ন মঞ্ঞেয্য, মনো মেতি ন মঞ্ঞেয্য… মনোৰিঞ্ঞাণং… মনোসম্ফস্সং… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ¶ ন মঞ্ঞেয্য, তং মেতি ন মঞ্ঞেয্য. যঞ্হি, ভিক্খৰে, মঞ্ঞতি, যস্মিং মঞ্ঞতি ¶ , যতো ¶ মঞ্ঞতি, যং মেতি মঞ্ঞতি, ততো তং হোতি অঞ্ঞথা. অঞ্ঞথাভাৰী ভৰসত্তো লোকো ভৰমেৰ অভিনন্দতি.

‘‘যাৰতা, ভিক্খৰে, খন্ধধাতুআযতনা তম্পি ন মঞ্ঞেয্য, তস্মিম্পি ন মঞ্ঞেয্য, ততোপি ন মঞ্ঞেয্য, তং মেতি ন মঞ্ঞেয্য. সো এৰং অমঞ্ঞমানো ন কিঞ্চি লোকে উপাদিযতি. অনুপাদিযং ন পরিতস্সতি. অপরিতস্সং পচ্চত্তঞ্ঞেৰ পরিনিব্বাযতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. অট্ঠমং.

৯. পঠমদ্ৰযসুত্তং

৯২. ‘‘দ্ৰযং ¶ ৰো, ভিক্খৰে, দেসেস্সামি. তং সুণাথ. কিঞ্চ, ভিক্খৰে, দ্ৰযং? চক্খুঞ্চেৰ রূপা চ, সোতঞ্চেৰ সদ্দা চ, ঘানঞ্চেৰ গন্ধা চ, জিৰ্হা চেৰ রসা চ, কাযো চেৰ ফোট্ঠব্বা চ ¶ , মনো চেৰ ধম্মা চ – ইদং ৰুচ্চতি, ভিক্খৰে, দ্ৰযং.

‘‘যো, ভিক্খৰে, এৰং ৰদেয্য – ‘অহমেতং দ্ৰযং পচ্চক্খায অঞ্ঞং দ্ৰযং পঞ্ঞপেস্সামী’তি, তস্স ৰাচাৰত্থুকমেৰস্স. পুট্ঠো চ ন সম্পাযেয্য. উত্তরিঞ্চ ৰিঘাতং আপজ্জেয্য. তং কিস্স হেতু? যথা তং, ভিক্খৰে, অৰিসযস্মি’’ন্তি. নৰমং.

১০. দুতিযদ্ৰযসুত্তং

৯৩. ‘‘দ্ৰযং, ভিক্খৰে, পটিচ্চ ৰিঞ্ঞাণং সম্ভোতি. কথঞ্চ, ভিক্খৰে, দ্ৰযং পটিচ্চ ৰিঞ্ঞাণং সম্ভোতি? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. চক্খু অনিচ্চং ৰিপরিণামি অঞ্ঞথাভাৰি. রূপা ¶ অনিচ্চা ৰিপরিণামিনো অঞ্ঞথাভাৰিনো. ইত্থেতং দ্ৰযং চলঞ্চেৰ ব্যথঞ্চ অনিচ্চং ৰিপরিণামি অঞ্ঞথাভাৰি. চক্খুৰিঞ্ঞাণং অনিচ্চং ৰিপরিণামি অঞ্ঞথাভাৰি. যোপি হেতু যোপি পচ্চযো চক্খুৰিঞ্ঞাণস্স উপ্পাদায, সোপি হেতু সোপি পচ্চযো অনিচ্চো ৰিপরিণামী অঞ্ঞথাভাৰী. অনিচ্চং খো পন, ভিক্খৰে, পচ্চযং পটিচ্চ উপ্পন্নং চক্খুৰিঞ্ঞাণং কুতো নিচ্চং ভৰিস্সতি! যা খো, ভিক্খৰে, ইমেসং তিণ্ণং ধম্মানং সঙ্গতি সন্নিপাতো সমৰাযো, অযং ৰুচ্চতি চক্খুসম্ফস্সো. চক্খুসম্ফস্সোপি অনিচ্চো ¶ ৰিপরিণামী অঞ্ঞথাভাৰী. যোপি হেতু যোপি পচ্চযো চক্খুসম্ফস্সস্স উপ্পাদায, সোপি হেতু সোপি পচ্চযো অনিচ্চো ৰিপরিণামী অঞ্ঞথাভাৰী. অনিচ্চং খো পন, ভিক্খৰে, পচ্চযং পটিচ্চ উপ্পন্নো চক্খুসম্ফস্সো কুতো নিচ্চো ভৰিস্সতি! ফুট্ঠো ¶ , ভিক্খৰে, ৰেদেতি, ফুট্ঠো চেতেতি, ফুট্ঠো সঞ্জানাতি. ইত্থেতেপি ধম্মা চলা চেৰ ব্যথা চ অনিচ্চা ৰিপরিণামিনো অঞ্ঞথাভাৰিনো. সোতং…পে….

‘‘জিৰ্হঞ্চ পটিচ্চ রসে চ উপ্পজ্জতি জিৰ্হাৰিঞ্ঞাণং. জিৰ্হা অনিচ্চা ৰিপরিণামী অঞ্ঞথাভাৰী [ৰিপরিণামিনী অঞ্ঞথাভাৰিনী (?)]. রসা অনিচ্চা ৰিপরিণামিনো অঞ্ঞথাভাৰিনো. ইত্থেতং দ্ৰযং চলঞ্চেৰ ব্যথঞ্চ অনিচ্চং ৰিপরিণামি অঞ্ঞথাভাৰি. জিৰ্হাৰিঞ্ঞাণং অনিচ্চং ৰিপরিণামি অঞ্ঞথাভাৰি. যোপি হেতু যোপি পচ্চযো জিৰ্হাৰিঞ্ঞাণস্স উপ্পাদায ¶ , সোপি হেতু সোপি পচ্চযো অনিচ্চো ৰিপরিণামী অঞ্ঞথাভাৰী. অনিচ্চং খো পন, ভিক্খৰে, পচ্চযং পটিচ্চ উপ্পন্নং জিৰ্হাৰিঞ্ঞাণং, কুতো নিচ্চং ভৰিস্সতি! যা খো, ভিক্খৰে, ইমেসং তিণ্ণং ধম্মানং সঙ্গতি সন্নিপাতো সমৰাযো, অযং ৰুচ্চতি জিৰ্হাসম্ফস্সো. জিৰ্হাসম্ফস্সোপি অনিচ্চো ৰিপরিণামী অঞ্ঞথাভাৰী. যোপি হেতু যোপি পচ্চযো জিৰ্হাসম্ফস্সস্স উপ্পাদায, সোপি হেতু সোপি পচ্চযো অনিচ্চো ৰিপরিণামী অঞ্ঞথাভাৰী. অনিচ্চং ¶ খো পন, ভিক্খৰে, পচ্চযং পটিচ্চ উপ্পন্নো জিৰ্হাসম্ফস্সো, কুতো নিচ্চো ভৰিস্সতি! ফুট্ঠো, ভিক্খৰে, ৰেদেতি, ফুট্ঠো চেতেতি, ফুট্ঠো সঞ্জানাতি. ইত্থেতেপি ধম্মা চলা চেৰ ব্যথা চ অনিচ্চা ৰিপরিণামিনো অঞ্ঞথাভাৰিনো. কাযং…পে….

‘‘মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. মনো অনিচ্চো ৰিপরিণামী অঞ্ঞথাভাৰী. ধম্মা অনিচ্চা ৰিপরিণামিনো অঞ্ঞথাভাৰিনো. ইত্থেতং দ্ৰযং চলঞ্চেৰ ¶ ব্যথঞ্চ অনিচ্চং ৰিপরিণামি অঞ্ঞথাভাৰি. মনোৰিঞ্ঞাণং অনিচ্চং ৰিপরিণামি অঞ্ঞথাভাৰি. যোপি হেতু যোপি পচ্চযো মনোৰিঞ্ঞাণস্স উপ্পাদায, সোপি হেতু সোপি পচ্চযো অনিচ্চো ৰিপরিণামী অঞ্ঞথাভাৰী. অনিচ্চং খো পন, ভিক্খৰে, পচ্চযং পটিচ্চ উপ্পন্নং মনোৰিঞ্ঞাণং, কুতো নিচ্চং ভৰিস্সতি! যা খো, ভিক্খৰে, ইমেসং তিণ্ণং ধম্মানং সঙ্গতি সন্নিপাতো সমৰাযো, অযং ৰুচ্চতি মনোসম্ফস্সো. মনোসম্ফস্সোপি অনিচ্চো ৰিপরিণামী অঞ্ঞথাভাৰী. যোপি হেতু যোপি পচ্চযো মনোসম্ফস্সস্স উপ্পাদায, সোপি হেতু সোপি পচ্চযো অনিচ্চো ৰিপরিণামী অঞ্ঞথাভাৰী. অনিচ্চং খো পন, ভিক্খৰে, পচ্চযং পটিচ্চ ¶ উপ্পন্নো মনোসম্ফস্সো, কুতো নিচ্চো ভৰিস্সতি! ফুট্ঠো, ভিক্খৰে, ৰেদেতি, ফুট্ঠো চেতেতি, ফুট্ঠো সঞ্জানাতি. ইত্থেতেপি ধম্মা চলা চেৰ ব্যথা চ অনিচ্চা ৰিপরিণামিনো অঞ্ঞথাভাৰিনো. এৰং খো, ভিক্খৰে, দ্ৰযং পটিচ্চ ৰিঞ্ঞাণং সম্ভোতী’’তি. দসমং.

ছন্নৰগ্গো নৰমো.

তস্সুদ্দানং –

পলোকসুঞ্ঞা সংখিত্তং, ছন্নো পুণ্ণো চ বাহিযো;

এজেন চ দুৰে ৰুত্তা, দ্ৰযেহি অপরে দুৰেতি.

১০. সল়ৰগ্গো

১. অদন্তঅগুত্তসুত্তং

৯৪. সাৰত্থিনিদানং ¶ . ‘‘ছযিমে ¶ ¶ , ভিক্খৰে, ফস্সাযতনা অদন্তা অগুত্তা অরক্খিতা অসংৰুতা দুক্খাধিৰাহা হোন্তি. কতমে ছ? চক্খু, ভিক্খৰে, ফস্সাযতনং অদন্তং অগুত্তং অরক্খিতং অসংৰুতং দুক্খাধিৰাহং হোতি…পে… জিৰ্হা, ভিক্খৰে, ফস্সাযতনং অদন্তং অগুত্তং অরক্খিতং অসংৰুতং দুক্খাধিৰাহং হোতি…পে… মনো, ভিক্খৰে, ফস্সাযতনং অদন্তং অগুত্তং অরক্খিতং অসংৰুতং দুক্খাধিৰাহং হোতি. ইমে খো, ভিক্খৰে, ছ ফস্সাযতনা অদন্তা অগুত্তা অরক্খিতা অসংৰুতা দুক্খাধিৰাহা হোন্তি’’.

‘‘ছযিমে, ভিক্খৰে, ফস্সাযতনা সুদন্তা সুগুত্তা সুরক্খিতা সুসংৰুতা সুখাধিৰাহা হোন্তি. কতমে ছ? চক্খু, ভিক্খৰে, ফস্সাযতনং সুদন্তং সুগুত্তং সুরক্খিতং সুসংৰুতং সুখাধিৰাহং হোতি…পে… জিৰ্হা, ভিক্খৰে, ফস্সাযতনং সুদন্তং সুগুত্তং সুরক্খিতং সুসংৰুতং সুখাধিৰাহং হোতি…পে… মনো, ভিক্খৰে, ফস্সাযতনং সুদন্তং সুগুত্তং সুরক্খিতং ¶ সুসংৰুতং সুখাধিৰাহং হোতি. ইমে খো, ভিক্খৰে, ছ ফস্সাযতনা সুদন্তা সুগুত্তা সুরক্খিতা সুসংৰুতা সুখাধিৰাহা হোন্তী’’তি. ইদমৰোচ ভগৰা…পে… এতদৰোচ সত্থা –

‘‘সল়েৰ [ছল়েৰ (ক.)] ফস্সাযতনানি ভিক্খৰো,

অসংৰুতো যত্থ দুক্খং নিগচ্ছতি;

তেসঞ্চ যে সংৰরণং অৰেদিসুং,

সদ্ধাদুতিযা ৰিহরন্তানৰস্সুতা.

‘‘দিস্ৰান রূপানি মনোরমানি,

অথোপি দিস্ৰান অমনোরমানি;

মনোরমে ¶ রাগপথং ৰিনোদযে,

ন চাপ্পিযং মেতি মনং পদোসযে.

‘‘সদ্দঞ্চ ¶ সুত্ৰা দুভযং পিযাপ্পিযং,

পিযম্হি সদ্দে ন সমুচ্ছিতো সিযা;

অথোপ্পিযে দোসগতং ৰিনোদযে,

ন চাপ্পিযং মেতি মনং পদোসযে.

‘‘গন্ধঞ্চ ¶ ঘত্ৰা সুরভিং মনোরমং,

অথোপি ঘত্ৰা অসুচিং অকন্তিযং;

অকন্তিযস্মিং পটিঘং ৰিনোদযে,

ছন্দানুনীতো ন চ কন্তিযে সিযা.

‘‘রসঞ্চ ভোত্ৰান অসাদিতঞ্চ সাদুং,

অথোপি ভোত্ৰান অসাদুমেকদা;

সাদুং রসং নাজ্ঝোসায ভুঞ্জে,

ৰিরোধমাসাদুসু নোপদংসযে.

‘‘ফস্সেন ¶ ফুট্ঠো ন সুখেন মজ্জে [মজ্ঝে (স্যা. কং. পী.)],

দুক্খেন ফুট্ঠোপি ন সম্পৰেধে;

ফস্সদ্ৰযং সুখদুক্খে উপেক্খে,

অনানুরুদ্ধো অৰিরুদ্ধ কেনচি.

‘‘পপঞ্চসঞ্ঞা ইতরীতরা নরা,

পপঞ্চযন্তা উপযন্তি সঞ্ঞিনো;

মনোমযং গেহসিতঞ্চ সব্বং,

পনুজ্জ নেক্খম্মসিতং ইরীযতি.

‘‘এৰং মনো ছস্সু যদা সুভাৰিতো,

ফুট্ঠস্স চিত্তং ন ৰিকম্পতে ক্ৰচি;

তে রাগদোসে অভিভুয্য ভিক্খৰো,

ভৰত্থ [ভৰথ (সী. স্যা. কং.)] জাতিমরণস্স পারগা’’তি. পঠমং;

২. মালুক্যপুত্তসুত্তং

৯৫. অথ ¶ খো আযস্মা মালুক্যপুত্তো [মালুঙ্ক্যপুত্তো (সী.)] যেন ভগৰা তেনুপসঙ্কমি…পে… একমন্তং নিসিন্নো খো আযস্মা মালুক্যপুত্তো ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো ¶ আতাপী পহিতত্তো ৰিহরেয্য’’ন্তি.

‘‘এত্থ ¶ দানি, মালুক্যপুত্ত, কিং দহরে ভিক্খূ ৰক্খাম! যত্র হি নাম ত্ৰং, ভিক্খু, জিণ্ণো ৰুদ্ধো মহল্লকো অদ্ধগতো ৰযোঅনুপ্পত্তো সংখিত্তেন ওৰাদং যাচসী’’তি.

‘‘কিঞ্চাপাহং, ভন্তে, জিণ্ণো ৰুদ্ধো মহল্লকো অদ্ধগতো ৰযোঅনুপ্পত্তো. দেসেতু মে, ভন্তে ¶ , ভগৰা সংখিত্তেন ধম্মং, দেসেতু সুগতো সংখিত্তেন ধম্মং, অপ্পেৰ নামাহং ভগৰতো ভাসিতস্স অত্থং আজানেয্যং. অপ্পেৰ নামাহং ভগৰতো ভাসিতস্স দাযাদো অস্স’’ন্তি.

‘‘তং কিং মঞ্ঞসি, মালুক্যপুত্ত, যে তে চক্খুৰিঞ্ঞেয্যা রূপা অদিট্ঠা অদিট্ঠপুব্বা, ন চ পস্সসি, ন চ তে হোতি পস্সেয্যন্তি? অত্থি তে তত্থ ছন্দো ৰা রাগো ৰা পেমং ৰা’’তি? ‘‘নো হেতং, ভন্তে’’.

‘‘যে তে সোতৰিঞ্ঞেয্যা সদ্দা অস্সুতা অস্সুতপুব্বা, ন চ সুণাসি, ন চ তে হোতি সুণেয্যন্তি? অত্থি তে তত্থ ছন্দো ৰা রাগো ৰা পেমং ৰা’’তি? ‘‘নো হেতং, ভন্তে’’.

‘‘যে তে ঘানৰিঞ্ঞেয্যা গন্ধা অঘাযিতা অঘাযিতপুব্বা, ন চ ঘাযসি, ন চ তে হোতি ঘাযেয্যন্তি? অত্থি তে তত্থ ছন্দো ৰা রাগো ৰা পেমং ৰা’’তি? ‘‘নো হেতং, ভন্তে’’.

‘‘যে তে জিৰ্হাৰিঞ্ঞেয্যা রসা অসাযিতা অসাযিতপুব্বা, ন চ সাযসি, ন চ তে হোতি সাযেয্যন্তি? অত্থি তে তত্থ ছন্দো ৰা রাগো ৰা পেমং ৰা’’তি? ‘‘নো হেতং, ভন্তে’’.

‘‘যে তে কাযৰিঞ্ঞেয্যা ফোট্ঠব্বা অসম্ফুট্ঠা অসম্ফুট্ঠপুব্বা, ন চ ফুসসি, ন চ তে হোতি ফুসেয্যন্তি? অত্থি তে তত্থ ছন্দো ৰা রাগো ৰা পেমং ৰা’’তি? ‘‘নো হেতং, ভন্তে’’.

‘‘যে ¶ তে মনোৰিঞ্ঞেয্যা ধম্মা ¶ অৰিঞ্ঞাতা অৰিঞ্ঞাতপুব্বা, ন চ ৰিজানাসি, ন চ তে হোতি ৰিজানেয্যন্তি? অত্থি তে তত্থ ছন্দো ৰা রাগো ৰা পেমং ৰা’’তি? ‘‘নো হেতং, ভন্তে’’.

‘‘এত্থ চ তে, মালুক্যপুত্ত, দিট্ঠসুতমুতৰিঞ্ঞাতব্বেসু ধম্মেসু দিট্ঠে দিট্ঠমত্তং ভৰিস্সতি, সুতে সুতমত্তং ভৰিস্সতি, মুতে মুতমত্তং ভৰিস্সতি, ৰিঞ্ঞাতে ৰিঞ্ঞাতমত্তং ভৰিস্সতি. যতো খো তে, মালুক্যপুত্ত, দিট্ঠসুতমুতৰিঞ্ঞাতব্বেসু ধম্মেসু দিট্ঠে দিট্ঠমত্তং ভৰিস্সতি, সুতে সুতমত্তং ভৰিস্সতি ¶ , মুতে মুতমত্তং ভৰিস্সতি, ৰিঞ্ঞাতে ৰিঞ্ঞাতমত্তং ভৰিস্সতি; ততো ত্ৰং, মালুক্যপুত্ত, ন তেন. যতো ত্ৰং, মালুক্যপুত্ত, ন তেন; ততো ত্ৰং, মালুক্যপুত্ত ¶ , ন তত্থ. যতো ত্ৰং, মালুক্যপুত্ত, ন তত্থ; ততো ত্ৰং, মালুক্যপুত্ত, নেৰিধ, ন হুরং, ন উভযমন্তরেন. এসেৰন্তো দুক্খস্সা’’তি.

‘‘ইমস্স খ্ৰাহং, ভন্তে, ভগৰতা সংখিত্তেন ভাসিতস্স ৰিত্থারেন অত্থং আজানামি –

‘‘রূপং দিস্ৰা সতি মুট্ঠা, পিযং নিমিত্তং মনসি করোতো;

সারত্তচিত্তো ৰেদেতি, তঞ্চ অজ্ঝোস [অজ্ঝোসায (সী.)] তিট্ঠতি.

‘‘তস্স ৰড্ঢন্তি ৰেদনা, অনেকা রূপসম্ভৰা;

অভিজ্ঝা চ ৰিহেসা চ, চিত্তমস্সূপহঞ্ঞতি;

এৰং আচিনতো দুক্খং, আরা নিব্বানমুচ্চতি.

‘‘সদ্দং সুত্ৰা সতি মুট্ঠা, পিযং নিমিত্তং মনসি করোতো;

সারত্তচিত্তো ৰেদেতি, তঞ্চ অজ্ঝোস তিট্ঠতি.

‘‘তস্স ¶ ৰড্ঢন্তি ৰেদনা, অনেকা সদ্দসম্ভৰা;

অভিজ্ঝা চ ৰিহেসা চ, চিত্তমস্সূপহঞ্ঞতি;

এৰং আচিনতো দুক্খং, আরা নিব্বানমুচ্চতি.

‘‘গন্ধং ¶ ঘত্ৰা সতি মুট্ঠা, পিযং নিমিত্তং মনসি করোতো;

সারত্তচিত্তো ৰেদেতি, তঞ্চ অজ্ঝোস তিট্ঠতি.

‘‘তস্স ৰড্ঢন্তি ৰেদনা, অনেকা গন্ধসম্ভৰা;

অভিজ্ঝা চ ৰিহেসা চ, চিত্তমস্সূপহঞ্ঞতি;

এৰং আচিনতো দুক্খং, আরা নিব্বানমুচ্চতি.

‘‘রসং ¶ ভোত্ৰা সতি মুট্ঠা, পিযং নিমিত্তং মনসি করোতো;

সারত্তচিত্তো ৰেদেতি, তঞ্চ অজ্ঝোস তিট্ঠতি.

‘‘তস্স ৰড্ঢন্তি ৰেদনা, অনেকা রসসম্ভৰা;

অভিজ্ঝা চ ৰিহেসা চ, চিত্তমস্সূপহঞ্ঞতি;

এৰং আচিনতো দুক্খং, আরা নিব্বানমুচ্চতি.

‘‘ফস্সং ¶ ফুস্স সতি মুট্ঠা, পিযং নিমিত্তং মনসি করোতো;

সারত্তচিত্তো ৰেদেতি, তঞ্চ অজ্ঝোস তিট্ঠতি.

‘‘তস্স ৰড্ঢন্তি ৰেদনা, অনেকা ফস্সসম্ভৰা;

অভিজ্ঝা চ ৰিহেসা চ, চিত্তমস্সূপহঞ্ঞতি;

এৰং আচিনতো দুক্খং, আরা নিব্বানমুচ্চতি.

‘‘ধম্মং ঞত্ৰা সতি মুট্ঠা, পিযং নিমিত্তং মনসি করোতো;

সারত্তচিত্তো ৰেদেতি, তঞ্চ অজ্ঝোস তিট্ঠতি.

‘‘তস্স ৰড্ঢন্তি ৰেদনা, অনেকা ধম্মসম্ভৰা;

অভিজ্ঝা চ ৰিহেসা চ, চিত্তমস্সূপহঞ্ঞতি;

এৰং আচিনতো ¶ দুক্খং, আরা নিব্বানমুচ্চতি.

‘‘ন সো রজ্জতি রূপেসু, রূপং দিস্ৰা পটিস্সতো;

ৰিরত্তচিত্তো ৰেদেতি, তঞ্চ নাজ্ঝোস তিট্ঠতি.

‘‘যথাস্স পস্সতো রূপং, সেৰতো চাপি ৰেদনং;

খীযতি নোপচীযতি, এৰং সো চরতী সতো;

এৰং অপচিনতো দুক্খং, সন্তিকে নিব্বানমুচ্চতি.

‘‘ন সো রজ্জতি সদ্দেসু, সদ্দং সুত্ৰা পটিস্সতো;

ৰিরত্তচিত্তো ৰেদেতি, তঞ্চ নাজ্ঝোস তিট্ঠতি.

‘‘যথাস্স ¶ সুণতো সদ্দং, সেৰতো চাপি ৰেদনং;

খীযতি নোপচীযতি, এৰং সো চরতী সতো;

এৰং অপচিনতো দুক্খং, সন্তিকে নিব্বানমুচ্চতি.

‘‘ন ¶ সো রজ্জতি গন্ধেসু, গন্ধং ঘত্ৰা পটিস্সতো;

ৰিরত্তচিত্তো ৰেদেতি, তঞ্চ নাজ্ঝোস তিট্ঠতি.

‘‘যথাস্স ঘাযতো গন্ধং, সেৰতো চাপি ৰেদনং;

খীযতি নোপচীযতি, এৰং সো চরতী সতো;

এৰং অপচিনতো দুক্খং, সন্তিকে নিব্বানমুচ্চতি.

‘‘ন সো রজ্জতি রসেসু, রসং ভোত্ৰা পটিস্সতো;

ৰিরত্তচিত্তো ৰেদেতি, তঞ্চ নাজ্ঝোস তিট্ঠতি.

‘‘যথাস্স ¶ সাযতো রসং, সেৰতো চাপি ৰেদনং;

খীযতি নোপচীযতি, এৰং সো চরতী সতো;

এৰং অপচিনতো দুক্খং, সন্তিকে নিব্বানমুচ্চতি.

‘‘ন ¶ সো রজ্জতি ফস্সেসু, ফস্সং ফুস্স পটিস্সতো;

ৰিরত্তচিত্তো ৰেদেতি, তঞ্চ নাজ্ঝোস তিট্ঠতি.

‘‘যথাস্স ফুসতো ফস্সং, সেৰতো চাপি ৰেদনং;

খীযতি নোপচীযতি, এৰং সো চরতী সতো;

এৰং অপচিনতো দুক্খং, সন্তিকে নিব্বানমুচ্চতি.

‘‘ন ¶ সো রজ্জতি ধম্মেসু, ধম্মং ঞত্ৰা পটিস্সতো;

ৰিরত্তচিত্তো ৰেদেতি, তঞ্চ নাজ্ঝোস তিট্ঠতি.

‘‘যথাস্স ¶ জানতো ধম্মং, সেৰতো চাপি ৰেদনং;

খীযতি নোপচীযতি, এৰং সো চরতী সতো;

এৰং অপচিনতো দুক্খং, সন্তিকে নিব্বানমুচ্চতী’’তি.

‘‘ইমস্স খ্ৰাহং, ভন্তে, ভগৰতা সংখিত্তেন ভাসিতস্স এৰং ৰিত্থারেন অত্থং আজানামী’’তি. ‘‘সাধু সাধু, মালুক্যপুত্ত! সাধু খো ত্ৰং, মালুক্যপুত্ত, মযা সংখিত্তেন ভাসিতস্স ৰিত্থারেন অত্থং আজানাসি –

‘‘রূপং দিস্ৰা সতি মুট্ঠা, পিযং নিমিত্তং মনসি করোতো;

সারত্তচিত্তো ৰেদেতি, তঞ্চ অজ্ঝোস তিট্ঠতি.

‘‘তস্স ৰড্ঢন্তি ৰেদনা, অনেকা রূপসম্ভৰা;

অভিজ্ঝা চ ৰিহেসা চ, চিত্তমস্সূপহঞ্ঞতি;

এৰং আচিনতো দুক্খং, আরা নিব্বানমুচ্চতি.…পে….

‘‘ন সো রজ্জতি ধম্মেসু, ধম্মং ঞত্ৰা পটিস্সতো;

ৰিরত্তচিত্তো ৰেদেতি, তঞ্চ নাজ্ঝোস তিট্ঠতি.

‘‘যথাস্স ¶ ৰিজানতো ধম্মং, সেৰতো চাপি ৰেদনং;

খীযতি নোপচীযতি, এৰং সো চরতী সতো;

এৰং অপচিনতো দুক্খং, সন্তিকে নিব্বানমুচ্চতী’’তি.

‘‘ইমস্স খো, মালুক্যপুত্ত, মযা সংখিত্তেন ভাসিতস্স এৰং ৰিত্থারেন অত্থো দট্ঠব্বো’’তি.

অথ ¶ খো আযস্মা মালুক্যপুত্তো ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো আযস্মা মালুক্যপুত্তো একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি তদনুত্তরং ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি. ‘‘খীণা জাতি, ৰুসিতং ব্রহ্মচরিযং, কতং ¶ করণীযং, নাপরং ইত্থত্তাযা’’তি অব্ভঞ্ঞাসি. অঞ্ঞতরো চ পনাযস্মা মালুক্যপুত্তো অরহতং অহোসীতি. দুতিযং.

৩. পরিহানধম্মসুত্তং

৯৬. ‘‘পরিহানধম্মঞ্চ ৰো, ভিক্খৰে, দেসেস্সামি অপরিহানধম্মঞ্চ ছ চ অভিভাযতনানি. তং সুণাথ. কথঞ্চ, ভিক্খৰে, পরিহানধম্মো হোতি? ইধ, ভিক্খৰে, ভিক্খুনো চক্খুনা রূপং দিস্ৰা উপ্পজ্জন্তি পাপকা অকুসলা সরসঙ্কপ্পা [অকুসলা ধম্মা সরসঙ্কপ্পা (স্যা. কং. পী. ক.) উপরি আসীৰিসৰগ্গে সত্তমসুত্তে পন ‘‘আকুসলা সরসঙ্কপ্পা’’ ত্ৰেৰ সব্বত্থ দিস্সতি] সংযোজনিযা. তঞ্চে ভিক্খু অধিৰাসেতি নপ্পজহতি ন ৰিনোদেতি ন ব্যন্তীকরোতি [ব্যন্তিকরোতি (পী.) ব্যন্তিং করোতি (ক.)] ন অনভাৰং গমেতি, ৰেদিতব্বমেতং, ভিক্খৰে, ভিক্খুনা – ‘পরিহাযামি কুসলেহি ¶ ধম্মেহি’. পরিহানঞ্হেতং ৰুত্তং ভগৰতাতি…পে….

‘‘পুন চপরং, ভিক্খৰে, ভিক্খুনো জিৰ্হায রসং সাযিত্ৰা উপ্পজ্জন্তি…পে… পুন চপরং, ভিক্খৰে, ভিক্খুনো মনসা ধম্মং ¶ ৰিঞ্ঞায উপ্পজ্জন্তি পাপকা অকুসলা সরসঙ্কপ্পা সংযোজনিযা. তঞ্চে ভিক্খু অধিৰাসেতি নপ্পজহতি ন ৰিনোদেতি ন ব্যন্তীকরোতি ন অনভাৰং গমেতি, ৰেদিতব্বমেতং, ভিক্খৰে, ভিক্খুনা – ‘পরিহাযামি কুসলেহি ধম্মেহি’. পরিহানঞ্হেতং ৰুত্তং ভগৰতাতি. এৰং খো, ভিক্খৰে, পরিহানধম্মো হোতি.

‘‘কথঞ্চ, ভিক্খৰে, অপরিহানধম্মো হোতি? ইধ, ভিক্খৰে, ভিক্খুনো চক্খুনা রূপং দিস্ৰা উপ্পজ্জন্তি পাপকা অকুসলা সরসঙ্কপ্পা সংযোজনিযা. তঞ্চে ভিক্খু নাধিৰাসেতি পজহতি ৰিনোদেতি ব্যন্তীকরোতি অনভাৰং গমেতি, ৰেদিতব্বমেতং, ভিক্খৰে, ভিক্খুনা – ‘ন পরিহাযামি কুসলেহি ধম্মেহি’. অপরিহানঞ্হেতং ৰুত্তং ভগৰতাতি…পে….

‘‘পুন ¶ চপরং, ভিক্খৰে, ভিক্খুনো জিৰ্হায রসং সাযিত্ৰা উপ্পজ্জন্তি…পে… পুন চপরং, ভিক্খৰে, ভিক্খুনো মনসা ধম্মং ৰিঞ্ঞায উপ্পজ্জন্তি পাপকা অকুসলা সরসঙ্কপ্পা সংযোজনিযা. তঞ্চে ভিক্খু নাধিৰাসেতি পজহতি ৰিনোদেতি ব্যন্তীকরোতি অনভাৰং গমেতি, ৰেদিতব্বমেতং ¶ , ভিক্খৰে, ভিক্খুনা – ‘ন পরিহাযামি কুসলেহি ধম্মেহি’. অপরিহানঞ্হেতং ৰুত্তং ভগৰতাতি. এৰং খো, ভিক্খৰে, অপরিহানধম্মো হোতি.

‘‘কতমানি ¶ চ, ভিক্খৰে, ছ অভিভাযতনানি? ইধ, ভিক্খৰে, ভিক্খুনো চক্খুনা রূপং দিস্ৰা নুপ্পজ্জন্তি পাপকা অকুসলা সরসঙ্কপ্পা সংযোজনিযা. ৰেদিতব্বমেতং, ভিক্খৰে, ভিক্খুনা – ‘অভিভূতমেতং আযতনং’. অভিভাযতনঞ্হেতং ৰুত্তং ভগৰতাতি…পে… পুন চপরং, ভিক্খৰে, ভিক্খুনো মনসা ধম্মং ৰিঞ্ঞায নুপ্পজ্জন্তি পাপকা অকুসলা ধম্মা সরসঙ্কপ্পা সংযোজনিযা. ৰেদিতব্বমেতং, ভিক্খৰে, ভিক্খুনা – ‘অভিভূতমেতং আযতনং’. অভিভাযতনঞ্হেতং ৰুত্তং ভগৰতাতি. ইমানি ৰুচ্চন্তি, ভিক্খৰে, ছ অভিভাযতনানী’’তি. ততিযং.

৪. পমাদৰিহারীসুত্তং

৯৭. ‘‘পমাদৰিহারিঞ্চ ¶ ৰো, ভিক্খৰে, দেসেস্সামি অপ্পমাদৰিহারিঞ্চ. তং সুণাথ. কথঞ্চ, ভিক্খৰে, পমাদৰিহারী হোতি? চক্খুন্দ্রিযং অসংৰুতস্স, ভিক্খৰে, ৰিহরতো চিত্তং ব্যাসিঞ্চতি [ব্যাসিচ্চতি (সী. স্যা. কং.)]. চক্খুৰিঞ্ঞেয্যেসু রূপেসু তস্স ব্যাসিত্তচিত্তস্স পামোজ্জং ন হোতি. পামোজ্জে অসতি পীতি ন হোতি. পীতিযা অসতি পস্সদ্ধি ন হোতি. পস্সদ্ধিযা অসতি দুক্খং হোতি. দুক্খিনো চিত্তং ন সমাধিযতি. অসমাহিতে চিত্তে ধম্মা ন পাতুভৰন্তি. ধম্মানং অপাতুভাৰা পমাদৰিহারী ত্ৰেৰ সঙ্খং গচ্ছতি…পে… জিৰ্হিন্দ্রিযং অসংৰুতস্স, ভিক্খৰে, ৰিহরতো চিত্তং ব্যাসিঞ্চতি জিৰ্হাৰিঞ্ঞেয্যেসু রসেসু, তস্স ব্যাসিত্তচিত্তস্স…পে… পমাদৰিহারী ত্ৰেৰ সঙ্খং গচ্ছতি…পে… মনিন্দ্রিযং অসংৰুতস্স, ভিক্খৰে, ৰিহরতো চিত্তং ব্যাসিঞ্চতি মনোৰিঞ্ঞেয্যেসু ধম্মেসু, তস্স ব্যাসিত্তচিত্তস্স পামোজ্জং ন হোতি. পামোজ্জে অসতি পীতি ন হোতি ¶ . পীতিযা অসতি পস্সদ্ধি ন হোতি. পস্সদ্ধিযা অসতি দুক্খং হোতি. দুক্খিনো চিত্তং ন সমাধিযতি. অসমাহিতে চিত্তে ধম্মা ন পাতুভৰন্তি ¶ . ধম্মানং অপাতুভাৰা পমাদৰিহারী ত্ৰেৰ সঙ্খং গচ্ছতি. এৰং খো, ভিক্খৰে, পমাদৰিহারী হোতি.

‘‘কথঞ্চ, ভিক্খৰে, অপ্পমাদৰিহারী হোতি? চক্খুন্দ্রিযং সংৰুতস্স, ভিক্খৰে, ৰিহরতো ¶ চিত্তং ন ব্যাসিঞ্চতি চক্খুৰিঞ্ঞেয্যেসু রূপেসু, তস্স অব্যাসিত্তচিত্তস্স পামোজ্জং জাযতি. পমুদিতস্স পীতি জাযতি. পীতিমনস্স কাযো পস্সম্ভতি. পস্সদ্ধকাযো সুখং ৰিহরতি. সুখিনো চিত্তং সমাধিযতি. সমাহিতে চিত্তে ধম্মা ¶ পাতুভৰন্তি. ধম্মানং পাতুভাৰা অপ্পমাদৰিহারী ত্ৰেৰ সঙ্খং গচ্ছতি…পে… জিৰ্হিন্দ্রিযং সংৰুতস্স, ভিক্খৰে, ৰিহরতো চিত্তং ন ব্যাসিঞ্চতি…পে… অপ্পমাদৰিহারী ত্ৰেৰ সঙ্খং গচ্ছতি. মনিন্দ্রিযং সংৰুতস্স, ভিক্খৰে, ৰিহরতো চিত্তং ন ব্যাসিঞ্চতি, মনোৰিঞ্ঞেয্যেসু ধম্মেসু, তস্স অব্যাসিত্তচিত্তস্স পামোজ্জং জাযতি. পমুদিতস্স পীতি জাযতি. পীতিমনস্স কাযো পস্সম্ভতি. পস্সদ্ধকাযো সুখং ৰিহরতি. সুখিনো চিত্তং সমাধিযতি. সমাহিতে চিত্তে ধম্মা পাতুভৰন্তি. ধম্মানং পাতুভাৰা অপ্পমাদৰিহারী ত্ৰেৰ সঙ্খং গচ্ছতি. এৰং খো, ভিক্খৰে, অপ্পমাদৰিহারী হোতী’’তি. চতুত্থং.

৫. সংৰরসুত্তং

৯৮. ‘‘সংৰরঞ্চ ৰো, ভিক্খৰে, দেসেস্সামি, অসংৰরঞ্চ. তং সুণাথ. কথঞ্চ, ভিক্খৰে, অসংৰরো হোতি? সন্তি, ভিক্খৰে, চক্খুৰিঞ্ঞেয্যা ¶ রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি, ৰেদিতব্বমেতং, ভিক্খৰে, ভিক্খুনা – ‘পরিহাযামি কুসলেহি ধম্মেহি’. পরিহানঞ্হেতং ৰুত্তং ভগৰতাতি…পে… সন্তি, ভিক্খৰে, জিৰ্হাৰিঞ্ঞেয্যা রসা…পে… সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি, ৰেদিতব্বমেতং, ভিক্খৰে, ভিক্খুনা – ‘পরিহাযামি কুসলেহি ধম্মেহি’. পরিহানঞ্হেতং ৰুত্তং ভগৰতাতি. এৰং খো, ভিক্খৰে, অসংৰরো হোতি.

‘‘কথঞ্চ, ভিক্খৰে, সংৰরো হোতি? সন্তি, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি, ৰেদিতব্বমেতং, ভিক্খৰে, ভিক্খুনা – ‘ন পরিহাযামি কুসলেহি ¶ ধম্মেহি’. অপরিহানঞ্হেতং ৰুত্তং ভগৰতাতি ¶ …পে… সন্তি, ভিক্খৰে, জিৰ্হাৰিঞ্ঞেয্যা রসা…পে… সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা ¶ রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি, ৰেদিতব্বমেতং ভিক্খুনা – ‘ন পরিহাযামি কুসলেহি ধম্মেহি’. অপরিহানঞ্হেতং ৰুত্তং ভগৰতাতি. এৰং খো, ভিক্খৰে, সংৰরো হোতী’’তি. পঞ্চমং.

৬. সমাধিসুত্তং

৯৯. ‘‘সমাধিং, ভিক্খৰে, ভাৰেথ. সমাহিতো, ভিক্খৰে, ভিক্খু যথাভূতং পজানাতি. কিঞ্চ যথাভূতং পজানাতি? ‘চক্খু অনিচ্চ’ন্তি যথাভূতং ¶ পজানাতি; ‘রূপা অনিচ্চা’তি যথাভূতং পজানাতি; ‘চক্খুৰিঞ্ঞাণং অনিচ্চ’ন্তি যথাভূতং পজানাতি; ‘চক্খুসম্ফস্সো অনিচ্চো’তি যথাভূতং পজানাতি. ‘যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চ’ন্তি যথাভূতং পজানাতি…পে… ‘মনো অনিচ্চ’ন্তি যথাভূতং পজানাতি. ধম্মা… মনোৰিঞ্ঞাণং… মনোসম্ফস্সো… ‘যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চ’ন্তি যথাভূতং পজানাতি. সমাধিং, ভিক্খৰে, ভাৰেথ. সমাহিতো, ভিক্খৰে, ভিক্খু যথাভূতং পজানাতী’’তি. ছট্ঠং.

৭. পটিসল্লানসুত্তং

১০০. ‘‘পটিসল্লানে [পটিসল্লানং (সী. পী. ক.), পটিসল্লীনা (স্যা. কং.)], ভিক্খৰে, যোগমাপজ্জথ. পটিসল্লীনো, ভিক্খৰে, ভিক্খু যথাভূতং পজানাতি. কিঞ্চ যথাভূতং পজানাতি? ‘চক্খু অনিচ্চ’ন্তি যথাভূতং পজানাতি; ‘রূপা অনিচ্চা’তি ¶ যথাভূতং পজানাতি; ‘চক্খুৰিঞ্ঞাণং অনিচ্চ’ন্তি যথাভূতং পজানাতি; ‘চক্খুসম্ফস্সো অনিচ্চো’তি যথাভূতং পজানাতি. ‘যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চ’ন্তি যথাভূতং পজানাতি…পে… ‘যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চ’ন্তি যথাভূতং পজানাতি. পটিসল্লানে, ভিক্খৰে, যোগমাপজ্জথ. পটিসল্লীনো, ভিক্খৰে, ভিক্খু যথাভূতং পজানাতী’’তি. সত্তমং.

৮. পঠমনতুম্হাকংসুত্তং

১০১. ‘‘যং ¶ [যম্পি (পী. ক.)], ভিক্খৰে, ন তুম্হাকং, তং পজহথ. তং ৰো পহীনং হিতায সুখায ভৰিস্সতি. কিঞ্চ, ভিক্খৰে, ন তুম্হাকং? চক্খু, ভিক্খৰে, ন তুম্হাকং ¶ . তং পজহথ. তং ৰো পহীনং হিতায সুখায ভৰিস্সতি ¶ . রূপা ন তুম্হাকং. তে পজহথ. তে ৰো পহীনা হিতায সুখায ভৰিস্সন্তি. চক্খুৰিঞ্ঞাণং ন তুম্হাকং. তং পজহথ. তং ৰো পহীনং হিতায সুখায ভৰিস্সতি. চক্খুসম্ফস্সো ন তুম্হাকং. তং পজহথ. সো ৰো পহীনো হিতায সুখায ভৰিস্সতি. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন তুম্হাকং. তং পজহথ. তং ৰো পহীনং হিতায সুখায ভৰিস্সতি. সোতং ন তুম্হাকং. তং পজহথ. তং ৰো পহীনং হিতায সুখায ভৰিস্সতি. সদ্দা ন তুম্হাকং. তে পজহথ. তে ৰো পহীনা হিতায সুখায ভৰিস্সন্তি. সোতৰিঞ্ঞাণং ন তুম্হাকং. তং পজহথ. তং ৰো পহীনং হিতায সুখায ভৰিস্সতি. সোতসম্ফস্সো ন তুম্হাকং. তং পজহথ. সো ৰো পহীনা হিতায সুখায ভৰিস্সতি. যম্পিদং সোতসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন তুম্হাকং. তং পজহথ. তং ৰো পহীনং হিতায সুখায ভৰিস্সতি. ঘানং ন তুম্হাকং. তং পজহথ. তং ৰো পহীনং হিতায সুখায ভৰিস্সতি. গন্ধা ন তুম্হাকং. তে পজহথ. তে ৰো পহীনা হিতায সুখায ভৰিস্সন্তি. ঘানৰিঞ্ঞাণং ন তুম্হাকং. তং পজহথ. তং ৰো পহীনং হিতায সুখায ভৰিস্সতি. ঘানসম্ফস্সো ন তুম্হাকং. তং পজহথ. সো ৰো পহীনা হিতায সুখায ভৰিস্সতি. যম্পিদং ঘানসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন তুম্হাকং. তং পজহথ. তং ৰো পহীনং হিতায সুখায ভৰিস্সতি.

জিৰ্হা ন তুম্হাকং. তং পজহথ. সা ৰো পহীনা হিতায সুখায ভৰিস্সতি. রসা ন তুম্হাকং. তে পজহথ. তে ৰো পহীনা হিতায সুখায ভৰিস্সন্তি. জিৰ্হাৰিঞ্ঞাণং ন তুম্হাকং. তং পজহথ. তং ৰো পহীনং হিতায সুখায ভৰিস্সতি. জিৰ্হাসম্ফস্সো ন তুম্হাকং. তং পজহথ. সো ৰো পহীনা হিতায সুখায ভৰিস্সতি. যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং ¶ সুখং ৰা দুক্খং ৰা অদুক্খমসুখং ৰা তম্পি ন তুম্হাকং. তং পজহথ. তং ৰো পহীনং হিতায সুখায ভৰিস্সতি ¶ …পে….

মনো ন তুম্হাকং. তং পজহথ. সো ৰো পহীনো হিতায সুখায ভৰিস্সতি. ধম্মা ন তুম্হাকং. তে পজহথ. তে ৰো পহীনা হিতায সুখায ভৰিস্সন্তি. মনোৰিঞ্ঞাণং ন তুম্হাকং. তং পজহথ. তং ৰো পহীনং হিতায সুখায ভৰিস্সতি. মনোসম্ফস্সো ন তুম্হাকং. তং পজহথ. সো ৰো পহীনো হিতায সুখায ভৰিস্সতি. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন ¶ তুম্হাকং. তং পজহথ. তং ৰো পহীনং হিতায সুখায ভৰিস্সতি.

‘‘সেয্যথাপি, ভিক্খৰে, যং ইমস্মিং জেতৰনে তিণকট্ঠসাখাপলাসং তং জনো হরেয্য ৰা ডহেয্য ৰা যথাপচ্চযং ৰা করেয্য, অপি নু তুম্হাকং এৰমস্স – ‘অম্হে জনো হরতি ৰা ডহতি ৰা যথাপচ্চযং ৰা করোতী’’’তি?

‘‘নো হেতং, ভন্তে’’.

‘‘তং কিস্স হেতু’’?

‘‘ন হি নো এতং, ভন্তে, অত্তা ৰা অত্তনিযং ৰা’’তি.

‘‘এৰমেৰ খো, ভিক্খৰে, চক্খু ন তুম্হাকং. তং পজহথ. তং ৰো পহীনং হিতায সুখায ভৰিস্সতি. রূপা ন তুম্হাকং… চক্খুৰিঞ্ঞাণং… চক্খুসম্ফস্সো…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন তুম্হাকং. তং পজহথ. তং ৰো পহীনং হিতায সুখায ভৰিস্সতী’’তি. অট্ঠমং.

৯. দুতিযনতুম্হাকংসুত্তং

১০২. ‘‘যং ¶ ¶ , ভিক্খৰে, ন তুম্হাকং তং পজহথ. তং ৰো পহীনং হিতায সুখায ভৰিস্সতি. কিঞ্চ, ভিক্খৰে, ন তুম্হাকং? চক্খু, ভিক্খৰে, ন তুম্হাকং. তং পজহথ. তং ৰো পহীনং হিতায সুখায ভৰিস্সতি. রূপা ন তুম্হাকং. তে পজহথ. তে ৰো পহীনা হিতায সুখায ভৰিস্সন্তি. চক্খুৰিঞ্ঞাণং ন তুম্হাকং. তং পজহথ. তং ৰো পহীনং হিতায সুখায ভৰিস্সতি. চক্খুসম্ফস্সো ন তুম্হাকং. তং পজহথ. সো ৰো পহীনো হিতায সুখায ভৰিস্সতি…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ন তুম্হাকং. তং পজহথ. তং ৰো ¶ পহীনং হিতায সুখায ভৰিস্সতি. যম্পি, ভিক্খৰে, ন তুম্হাকং, তং পজহথ. তং ৰো পহীনং হিতায সুখায ভৰিস্সতী’’তি. নৰমং.

১০. উদকসুত্তং

১০৩. ‘‘উদকো ¶ [উদ্দকো (সী. পী.)] সুদং, ভিক্খৰে, রামপুত্তো এৰং ৰাচং ভাসতি – ‘ইদং জাতু ৰেদগূ, ইদং জাতু সব্বজী [সব্বজি (পী.)], ইদং জাতু অপলিখতং গণ্ডমূলং পলিখণি’ন্তি. তং খো পনেতং, ভিক্খৰে, উদকো রামপুত্তো অৰেদগূযেৰ সমানো ‘ৰেদগূস্মী’তি ভাসতি, অসব্বজীযেৰ সমানো ‘সব্বজীস্মী’তি ভাসতি, অপলিখতংযেৰ গণ্ডমূলং পলিখতং মে ‘গণ্ডমূল’ন্তি ভাসতি. ইধ খো তং, ভিক্খৰে, ভিক্খু সম্মা ৰদমানো ৰদেয্য – ‘ইদং জাতু ৰেদগূ, ইদং জাতু সব্বজী, ইদং জাতু অপলিখতং গণ্ডমূলং পলিখণি’’’ন্তি.

‘‘কথঞ্চ, ভিক্খৰে, ৰেদগূ হোতি? যতো খো, ভিক্খৰে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং পজানাতি; এৰং খো, ভিক্খৰে, ভিক্খু ৰেদগূ হোতি.

‘‘কথঞ্চ, ভিক্খৰে, ভিক্খু সব্বজী হোতি? যতো খো, ভিক্খৰে, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা অনুপাদাৰিমুত্তো হোতি; এৰং খো, ভিক্খৰে, ভিক্খু সব্বজী হোতি.

‘‘কথঞ্চ ¶ , ভিক্খৰে, ভিক্খুনো অপলিখতং গণ্ডমূলং পলিখতং হোতি? গণ্ডোতি খো, ভিক্খৰে, ইমস্সেতং চাতুমহাভূতিকস্স কাযস্স অধিৰচনং ¶ মাতাপেত্তিকসম্ভৰস্স ওদনকুম্মাসূপচযস্স অনিচ্চুচ্ছাদনপরিমদ্দনভেদনৰিদ্ধংসনধম্মস্স ¶ . গণ্ডমূলন্তি খো, ভিক্খৰে, তণ্হাযেতং অধিৰচনং. যতো খো, ভিক্খৰে, ভিক্খুনো তণ্হা পহীনা হোতি উচ্ছিন্নমূলা তালাৰত্থুকতা ¶ অনভাৰঙ্কতা আযতিং অনুপ্পাদধম্মা; এৰং খো, ভিক্খৰে, ভিক্খুনো অপলিখতং গণ্ডমূলং পলিখতং হোতি.

‘‘উদকো সুদং, ভিক্খৰে, রামপুত্তো এৰং ৰাচং ভাসতি – ‘ইদং জাতু ৰেদগূ, ইদং জাতু সব্বজী, ইদং জাতু অপলিখতং গণ্ডমূলং পলিখণি’ন্তি. তং খো পনেতং, ভিক্খৰে, উদকো রামপুত্তো অৰেদগূযেৰ সমানো ‘ৰেদগূস্মী’তি ভাসতি, অসব্বজীযেৰ সমানো ‘সব্বজীস্মী’তি ভাসতি; অপলিখতংযেৰ গণ্ডমূলং ‘পলিখতং মে গণ্ডমূল’ন্তি ভাসতি. ইধ খো তং, ভিক্খৰে, ভিক্খু সম্মা ৰদমানো ৰদেয্য – ‘ইদং জাতু ৰেদগূ, ইদং জাতু সব্বজী, ইদং জাতু অপলিখতং গণ্ডমূলং পলিখণি’’’ন্তি. দসমং.

সল়ৰগ্গো দসমো.

তস্সুদ্দানং –

দ্ৰে সংগয্হা পরিহানং, পমাদৰিহারী চ সংৰরো;

সমাধি পটিসল্লানং, দ্ৰে নতুম্হাকেন উদ্দকোতি.

সল়াযতনৰগ্গে দুতিযপণ্ণাসকো সমত্তো.

তস্স ৰগ্গুদ্দানং –

অৰিজ্জা মিগজালঞ্চ, গিলানং ছন্নং চতুত্থকং;

সল়ৰগ্গেন পঞ্ঞাসং, দুতিযো পণ্ণাসকো অযন্তি.

পঠমসতকং.

১১. যোগক্খেমিৰগ্গো

১. যোগক্খেমিসুত্তং

১০৪. সাৰত্থিনিদানং ¶ . ‘‘যোগক্খেমিপরিযাযং ¶ ¶ ৰো, ভিক্খৰে, ধম্মপরিযাযং দেসেস্সামি. তং সুণাথ. কতমো চ, ভিক্খৰে, যোগক্খেমিপরিযাযো ধম্মপরিযাযো? সন্তি, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা ¶ পিযরূপা কামূপসংহিতা রজনীযা. তে তথাগতস্স পহীনা উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা. তেসঞ্চ পহানায অক্খাসি যোগং, তস্মা তথাগতো ‘যোগক্খেমী’তি ৰুচ্চতি…পে… সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তে তথাগতস্স পহীনা উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা. তেসঞ্চ পহানায অক্খাসি যোগং, তস্মা তথাগতো ‘যোগক্খেমী’তি ৰুচ্চতি. অযং খো, ভিক্খৰে, যোগক্খেমিপরিযাযো ধম্মপরিযাযো’’তি. পঠমং.

২. উপাদাযসুত্তং

১০৫. ‘‘কিস্মিং নু খো, ভিক্খৰে, সতি কিং উপাদায উপ্পজ্জতি অজ্ঝত্তং সুখং দুক্খ’’ন্তি?

‘‘ভগৰংমূলকা নো, ভন্তে, ধম্মা…পে….

‘‘চক্খুস্মিং খো, ভিক্খৰে, সতি চক্খুং উপাদায উপ্পজ্জতি অজ্ঝত্তং সুখং দুক্খং…পে… মনস্মিং সতি মনং উপাদায উপ্পজ্জতি অজ্ঝত্তং সুখং দুক্খং. তং ¶ কিং মঞ্ঞথ, ভিক্খৰে, চক্খু নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, অপি নু তং অনুপাদায উপ্পজ্জেয্য অজ্ঝত্তং সুখং দুক্খ’’ন্তি?

‘‘নো হেতং ভন্তে’’…পে….

‘‘জিৰ্হা ¶ নিচ্চা ৰা অনিচ্চা ৰা’’তি?

‘‘অনিচ্চা, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং ¶ পনানিচ্চং দুক্খং ৰিপরিণামধম্মং, অপি নু তং অনুপাদায উপ্পজ্জেয্য অজ্ঝত্তং সুখং দুক্খ’’ন্তি?

‘‘নো হেতং, ভন্তে’’…পে….

‘‘মনো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, অপি নু তং অনুপাদায উপ্পজ্জেয্য অজ্ঝত্তং সুখং দুক্খ’’ন্তি?

‘‘নো হেতং, ভন্তে’’.

‘‘এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি…পে… মনস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. দুতিযং.

৩. দুক্খসমুদযসুত্তং

১০৬. ‘‘দুক্খস্স ¶ , ভিক্খৰে, সমুদযঞ্চ অত্থঙ্গমঞ্চ দেসেস্সামি. তং সুণাথ. কতমো চ, ভিক্খৰে, দুক্খস্স সমুদযো? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং ¶ . তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. অযং দুক্খস্স সমুদযো…পে… ¶ জিৰ্হঞ্চ পটিচ্চ রসে চ উপ্পজ্জতি জিৰ্হাৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. অযং দুক্খস্স সমুদযো…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. অযং খো, ভিক্খৰে, দুক্খস্স সমুদযো.

‘‘কতমো চ, ভিক্খৰে, দুক্খস্স অত্থঙ্গমো? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো; উপাদাননিরোধা ভৰনিরোধো; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতি. অযং দুক্খস্স অত্থঙ্গমো…পে… জিৰ্হঞ্চ পটিচ্চ রসে চ উপ্পজ্জতি জিৰ্হাৰিঞ্ঞাণং…পে… মনঞ্চ ¶ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো; উপাদাননিরোধা ভৰনিরোধো ¶ ; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতি. অযং খো, ভিক্খৰে, দুক্খস্স অত্থঙ্গমো’’তি. ততিযং.

৪. লোকসমুদযসুত্তং

১০৭. ‘‘লোকস্স, ভিক্খৰে, সমুদযঞ্চ অত্থঙ্গমঞ্চ দেসেস্সামি. তং সুণাথ. কতমো চ, ভিক্খৰে, লোকস্স সমুদযো? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা; তণ্হাপচ্চযা উপাদানং; উপাদানপচ্চযা ভৰো; ভৰপচ্চযা জাতি; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. অযং খো, ভিক্খৰে, লোকস্স সমুদযো ¶ …পে… জিৰ্হঞ্চ পটিচ্চ রসে চ উপ্পজ্জতি জিৰ্হাৰিঞ্ঞাণং…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা; তণ্হাপচ্চযা উপাদানং; উপাদানপচ্চযা ভৰো ¶ ; ভৰপচ্চযা জাতি; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. অযং খো, ভিক্খৰে, লোকস্স সমুদযো.

‘‘কতমো চ, ভিক্খৰে, লোকস্স অত্থঙ্গমো? চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো; উপাদাননিরোধা ভৰনিরোধো ¶ ; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতি. অযং খো, ভিক্খৰে, লোকস্স অত্থঙ্গমো…পে… জিৰ্হঞ্চ পটিচ্চ রসে চ উপ্পজ্জতি…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো; উপাদাননিরোধা…পে… এৰমেতস্স কেৰলস্স দুক্খক্খন্ধস্স নিরোধো হোতি. অযং খো, ভিক্খৰে, লোকস্স অত্থঙ্গমো’’তি. চতুত্থং.

৫. সেয্যোহমস্মিসুত্তং

১০৮. ‘‘কিস্মিং ¶ নু খো, ভিক্খৰে, সতি কিং উপাদায কিং অভিনিৰিস্স সেয্যোহমস্মীতি ৰা হোতি, সদিসোহমস্মীতি ৰা হোতি, হীনোহমস্মীতি ৰা হোতী’’তি?

‘‘ভগৰংমূলকা নো, ভন্তে, ধম্মা.

‘‘চক্খুস্মিং খো, ভিক্খৰে, সতি চক্খুং উপাদায চক্খুং অভিনিৰিস্স সেয্যোহমস্মীতি ৰা হোতি, সদিসোহমস্মীতি ৰা হোতি, হীনোহমস্মীতি ৰা হোতি…পে… জিৰ্হায সতি…পে… মনস্মিং সতি মনং উপাদায মনং অভিনিৰিস্স সেয্যোহমস্মীতি ৰা হোতি, সদিসোহমস্মীতি ৰা হোতি, হীনোহমস্মীতি ৰা হোতি. তং কিং মঞ্ঞথ, ভিক্খৰে, চক্খু নিচ্চং ৰা অনিচ্চং ৰা’’তি?

‘‘অনিচ্চং ¶ , ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, অপি নু তং অনুপাদায সেয্যোহমস্মীতি ৰা অস্স, সদিসোহমস্মীতি ৰা অস্স, হীনোহমস্মীতি ¶ ৰা অস্সা’’তি?

‘‘নো হেতং, ভন্তে’’…পে… জিৰ্হা… কাযো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’…পে….

‘‘মনো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’.

‘‘যং পনানিচ্চং দুক্খং ৰা ¶ তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, অপি নু তং অনুপাদায সেয্যোহমস্মীতি ৰা অস্স, সদিসোহমস্মীতি ৰা অস্স, হীনোহমস্মীতি ৰা অস্সা’’তি?

‘‘নো হেতং, ভন্তে’’.

‘‘এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি…পে… মনস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. পঞ্চমং.

৬. সংযোজনিযসুত্তং

১০৯. ‘‘সংযোজনিযে ¶ ¶ চ, ভিক্খৰে, ধম্মে দেসেস্সামি সংযোজনঞ্চ. তং সুণাথ. কতমে চ, ভিক্খৰে, সংযোজনিযা ধম্মা, কতমঞ্চ সংযোজনং? চক্খুং, ভিক্খৰে, সংযোজনিযো ধম্মো. যো তত্থ ছন্দরাগো, তং তত্থ সংযোজনং…পে… জিৰ্হা সংযোজনিযো ধম্মো…পে… মনো সংযোজনিযো ধম্মো. যো তত্থ ছন্দরাগো, তং তত্থ সংযোজনং. ইমে ৰুচ্চন্তি, ভিক্খৰে, সংযোজনিযা ধম্মা, ইদং সংযোজন’’ন্তি. ছট্ঠং.

৭. উপাদানিযসুত্তং

১১০. ‘‘উপাদানিযে চ, ভিক্খৰে, ধম্মে দেসেস্সামি উপাদানঞ্চ. তং সুণাথ. কতমে চ, ভিক্খৰে, উপাদানিযা ধম্মা, কতমঞ্চ উপাদানং ¶ ? চক্খুং, ভিক্খৰে, উপাদানিযো ধম্মো. যো তত্থ ছন্দরাগো, তং তত্থ উপাদানং…পে… জিৰ্হা উপাদানিযো ধম্মো…পে… মনো উপাদানিযো ধম্মো. যো তত্থ ছন্দরাগো, তং তত্থ উপাদানং. ইমে ৰুচ্চন্তি, ভিক্খৰে, উপাদানিযা ধম্মা, ইদং উপাদান’’ন্তি. সত্তমং.

৮. অজ্ঝত্তিকাযতনপরিজাননসুত্তং

১১১. ‘‘চক্খুং, ভিক্খৰে, অনভিজানং অপরিজানং অৰিরাজযং অপ্পজহং অভব্বো দুক্খক্খযায. সোতং… ঘানং… জিৰ্হং… কাযং… মনং অনভিজানং অপরিজানং অৰিরাজযং অপ্পজহং অভব্বো দুক্খক্খযায. চক্খুঞ্চ খো, ভিক্খৰে, অভিজানং পরিজানং ৰিরাজযং পজহং ভব্বো দুক্খক্খযায…পে… জিৰ্হং… কাযং… মনং অভিজানং পরিজানং ৰিরাজযং পজহং ভব্বো দুক্খক্খযাযা’’তি. অট্ঠমং.

৯. বাহিরাযতনপরিজাননসুত্তং

১১২. ‘‘রূপে ¶ ¶ , ভিক্খৰে, অনভিজানং অপরিজানং অৰিরাজযং অপ্পজহং অভব্বো দুক্খক্খযায. সদ্দে… গন্ধে… রসে… ফোট্ঠব্বে… ধম্মে অনভিজানং অপরিজানং ¶ অৰিরাজযং অপ্পজহং অভব্বো দুক্খক্খযায. রূপে চ খো, ভিক্খৰে, অভিজানং পরিজানং ৰিরাজযং পজহং ভব্বো দুক্খক্খযায. সদ্দে… গন্ধে… রসে… ফোট্ঠব্বে… ধম্মে অভিজানং পরিজানং ৰিরাজযং পজহং ভব্বো দুক্খক্খযাযা’’তি. নৰমং.

১০. উপস্সুতিসুত্তং

১১৩. একং সমযং ভগৰা নাতিকে [ঞাতিকে (সী. স্যা. কং.)] ৰিহরতি গিঞ্জকাৰসথে. অথ খো ভগৰা রহোগতো পটিসল্লীনো ইমং ধম্মপরিযাযং অভাসি – ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা; তণ্হাপচ্চযা ¶ উপাদানং; উপাদানপচ্চযা ভৰো; ভৰপচ্চযা জাতি; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি. জিৰ্হঞ্চ পটিচ্চ রসে চ উপ্পজ্জতি…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা; তণ্হাপচ্চযা উপাদানং; উপাদানপচ্চযা ভৰো; ভৰপচ্চযা জাতি; জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তি. এৰমেতস্স কেৰলস্স দুক্খক্খন্ধস্স সমুদযো হোতি’’.

‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো; উপাদাননিরোধা ভৰনিরোধো; ভৰনিরোধা জাতিনিরোধো; জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি. এৰমেতস্স কেৰলস্স দুক্খক্খন্ধস্স নিরোধো হোতি…পে… জিৰ্হঞ্চ পটিচ্চ রসে চ উপ্পজ্জতি…পে… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং. তিণ্ণং সঙ্গতি ফস্সো. ফস্সপচ্চযা ৰেদনা; ৰেদনাপচ্চযা তণ্হা. তস্সাযেৰ তণ্হায অসেসৰিরাগনিরোধা উপাদাননিরোধো ¶ ; উপাদাননিরোধা…পে… এৰমেতস্স কেৰলস্স দুক্খক্খন্ধস্স নিরোধো হোতী’’তি.

তেন ¶ ¶ খো পন সমযেন অঞ্ঞতরো ভিক্খু ভগৰতো উপস্সুতি [উপস্সুতিং (সী. ক.)] ঠিতো হোতি. অদ্দসা খো ¶ ভগৰা তং ভিক্খুং উপস্সুতি ঠিতং. দিস্ৰান তং ভিক্খুং এতদৰোচ – ‘‘অস্সোসি নো ত্ৰং, ভিক্খু, ইমং ধম্মপরিযায’’ন্তি? ‘‘এৰং, ভন্তে’’. ‘‘উগ্গণ্হাহি ত্ৰং, ভিক্খু, ইমং ধম্মপরিযাযং. পরিযাপুণাহি ত্ৰং, ভিক্খু, ইমং ধম্মপরিযাযং. ধারেহি ত্ৰং, ভিক্খু, ইমং ধম্মপরিযাযং. অত্থসংহিতোযং, ভিক্খু, ধম্মপরিযাযো আদিব্রহ্মচরিযকো’’তি. দসমং.

যোগক্খেমিৰগ্গো একাদসমো.

তস্সুদ্দানং –

যোগক্খেমি উপাদায, দুক্খং লোকো চ সেয্যো চ;

সংযোজনং উপাদানং, দ্ৰে পরিজানং উপস্সুতীতি.

১২. লোককামগুণৰগ্গো

১. পঠমমারপাসসুত্তং

১১৪. ‘‘সন্তি ¶ , ভিক্খৰে, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে, ভিক্খু, অভিনন্দতি অভিৰদতি অজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু আৰাসগতো মারস্স, মারস্স ৰসং গতো [ৰসগতো (সী. অট্ঠ. স্যা. অট্ঠ.)], পটিমুক্কস্স মারপাসো. বদ্ধো সো মারবন্ধনেন যথাকামকরণীযো পাপিমতো…পে….

‘‘সন্তি, ভিক্খৰে, জিৰ্হাৰিঞ্ঞেয্যা রসা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু আৰাসগতো মারস্স, মারস্স ৰসং গতো, পটিমুক্কস্স মারপাসো. বদ্ধো সো মারবন্ধনেন…পে….

‘‘সন্তি ¶ , ভিক্খৰে, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু আৰাসগতো মারস্স, মারস্স ৰসং গতো, পটিমুক্কস্স ¶ মারপাসো. বদ্ধো সো মারবন্ধনেন যথাকামকরণীযো পাপিমতো.

‘‘সন্তি চ খো, ভিক্খৰে, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি – অযং ৰুচ্চতি, ভিক্খৰে ¶ , ভিক্খু নাৰাসগতো মারস্স, ন মারস্স ৰসং গতো, উম্মুক্কস্স মারপাসো. মুত্তো সো মারবন্ধনেন ন যথাকামকরণীযো পাপিমতো…পে….

‘‘সন্তি, ভিক্খৰে, জিৰ্হাৰিঞ্ঞেয্যা রসা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু নাৰাসগতো ¶ মারস্স, ন মারস্স ৰসং গতো, উম্মুক্কস্স মারপাসো. মুত্তো সো মারবন্ধনেন ন যথাকামকরণীযো পাপিমতো…পে….

‘‘সন্তি, ভিক্খৰে, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু নাৰাসগতো মারস্স, ন মারস্স ৰসং গতো, উম্মুক্কস্স মারপাসো. মুত্তো সো মারবন্ধনেন ন যথাকামকরণীযো পাপিমতো’’তি. পঠমং.

২. দুতিযমারপাসসুত্তং

১১৫. ‘‘সন্তি, ভিক্খৰে, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু বদ্ধো চক্খুৰিঞ্ঞেয্যেসু রূপেসু, আৰাসগতো মারস্স, মারস্স ৰসং গতো, পটিমুক্কস্স মারপাসো. বদ্ধো সো মারবন্ধনেন যথাকামকরণীযো পাপিমতো…পে….

‘‘সন্তি, ভিক্খৰে, জিৰ্হাৰিঞ্ঞেয্যা রসা…পে… সন্তি, ভিক্খৰে, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি ¶ অভিৰদতি ¶ অজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু বদ্ধো মনোৰিঞ্ঞেয্যেসু ধম্মেসু, আৰাসগতো মারস্স, মারস্স ৰসং গতো, পটিমুক্কস্স মারপাসো. বদ্ধো সো মারবন্ধনেন যথাকামকরণীযো পাপিমতো…পে….

‘‘সন্তি চ খো, ভিক্খৰে, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি – অযং ৰুচ্চতি, ভিক্খৰে ¶ , ভিক্খু মুত্তো চক্খুৰিঞ্ঞেয্যেহি রূপেহি, নাৰাসগতো মারস্স, ন মারস্স ৰসং গতো, উম্মুক্কস্স মারপাসো. মুত্তো সো মারবন্ধনেন ন যথাকামকরণীযো পাপিমতো…পে….

‘‘সন্তি, ভিক্খৰে, জিৰ্হাৰিঞ্ঞেয্যা রসা…পে… সন্তি, ভিক্খৰে, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ¶ ভিক্খু নাভিনন্দতি নাভিৰদতি নাজ্ঝোসায তিট্ঠতি – অযং ৰুচ্চতি, ভিক্খৰে, ভিক্খু মুত্তো মনোৰিঞ্ঞেয্যেহি ধম্মেহি, নাৰাসগতো মারস্স, ন মারস্স ৰসং গতো, উম্মুক্কস্স মারপাসো. মুত্তো সো মারবন্ধনেন ন যথাকামকরণীযো পাপিমতো’’তি. দুতিযং.

৩. লোকন্তগমনসুত্তং

১১৬. ‘‘নাহং, ভিক্খৰে, গমনেন লোকস্স অন্তং ঞাতেয্যং, দট্ঠেয্যং [দিট্ঠেয্যং (স্যা. কং. ক.)], পত্তেয্যন্তি ৰদামি. ন চ পনাহং, ভিক্খৰে, অপ্পত্ৰা লোকস্স অন্তং দুক্খস্স অন্তকিরিযং ৰদামী’’তি. ইদং ৰত্ৰা ভগৰা উট্ঠাযাসনা ৰিহারং পাৰিসি. অথ খো তেসং ভিক্খূনং অচিরপক্কন্তস্স ভগৰতো এতদহোসি – ‘‘ইদং খো নো, আৰুসো, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – ‘নাহং, ভিক্খৰে, গমনেন লোকস্স অন্তং ঞাতেয্যং, দট্ঠেয্যং, পত্তেয্যন্তি ৰদামি. ন চ পনাহং, ভিক্খৰে, অপ্পত্ৰা লোকস্স অন্তং দুক্খস্স অন্তকিরিযং ৰদামী’তি. কো নু খো ইমস্স ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজেয্যা’’তি?

অথ ¶ খো তেসং ভিক্খূনং এতদহোসি – ‘‘অযং খো আযস্মা আনন্দো সত্থু চেৰ সংৰণ্ণিতো ¶ , সম্ভাৰিতো চ ¶ ৰিঞ্ঞূনং সব্রহ্মচারীনং. পহোতি চাযস্মা আনন্দো ইমস্স ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজিতুং. যংনূন মযং যেনাযস্মা আনন্দো তেনুপসঙ্কমেয্যাম; উপসঙ্কমিত্ৰা আযস্মন্তং আনন্দং এতমত্থং পটিপুচ্ছেয্যামা’’তি.

অথ খো তে ভিক্খূ যেনাযস্মা আনন্দো তেনুপসঙ্কমিংসু; উপসঙ্কমিত্ৰা আযস্মতা আনন্দেন সদ্ধিং সম্মোদিংসু. সম্মোদনীযং কথং সারণীযং ৰীতিসারেত্ৰা একমন্তং নিসীদিংসু. একমন্তং নিসিন্না খো তে ভিক্খূ আযস্মন্তং আনন্দং ¶ এতদৰোচুং –

‘‘ইদং খো নো, আৰুসো আনন্দ, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – ‘নাহং, ভিক্খৰে, গমনেন লোকস্স অন্তং ঞাতেয্যং, দট্ঠেয্যং, পত্তেয্যন্তি ৰদামি. ন চ পনাহং, ভিক্খৰে, অপ্পত্ৰা লোকস্স অন্তং দুক্খস্স অন্তকিরিযং ৰদামী’তি. তেসং নো, আৰুসো, অম্হাকং অচিরপক্কন্তস্স ভগৰতো এতদহোসি – ‘ইদং খো নো, আৰুসো, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – নাহং, ভিক্খৰে, গমনেন লোকস্স অন্তং ঞাতেয্যং, দট্ঠেয্যং, পত্তেয্যন্তি ৰদামি. ন চ পনাহং, ভিক্খৰে, অপ্পত্ৰা লোকস্স অন্তং দুক্খস্স অন্তকিরিযং ৰদামীতি. কো নু খো ইমস্স ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজেয্যা’তি ¶ ? তেসং নো, আৰুসো, অম্হাকং এতদহোসি – ‘অযং খো, আৰুসো, আযস্মা আনন্দো সত্থু চেৰ সংৰণ্ণিতো, সম্ভাৰিতো চ ৰিঞ্ঞূনং সব্রহ্মচারীনং. পহোতি চাযস্মা আনন্দো ইমস্স ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজিতুং. যংনূন মযং যেনাযস্মা আনন্দো তেনুপসঙ্কমেয্যাম; উপসঙ্কমিত্ৰা আযস্মন্তং আনন্দং এতমত্থং পটিপুচ্ছেয্যামা’তি. ৰিভজতাযস্মা আনন্দো’’তি.

‘‘সেয্যথাপি, আৰুসো, পুরিসো সারত্থিকো সারগৰেসী সারপরিযেসনং চরমানো মহতো রুক্খস্স তিট্ঠতো সারৰতো অতিক্কম্মেৰ, মূলং অতিক্কম্মেৰ, খন্ধং সাখাপলাসে সারং পরিযেসিতব্বং মঞ্ঞেয্য; এৰং সম্পদমিদং আযস্মন্তানং সত্থরি সম্মুখীভূতে তং ভগৰন্তং অতিসিত্ৰা ¶ অম্হে এতমত্থং পটিপুচ্ছিতব্বং মঞ্ঞথ [মঞ্ঞেথ (পী. ক.)]. সো হাৰুসো, ভগৰা জানং জানাতি, পস্সং ¶ পস্সতি – চক্খুভূতো, ঞাণভূতো, ধম্মভূতো, ব্রহ্মভূতো, ৰত্তা, পৰত্তা, অত্থস্স নিন্নেতা, অমতস্স দাতা, ধম্মস্সামী, তথাগতো. সো চেৰ পনেতস্স কালো অহোসি যং ভগৰন্তংযেৰ এতমত্থং পটিপুচ্ছেয্যাথ ¶ . যথা ৰো ভগৰা ব্যাকরেয্য তথা ৰো ধারেয্যাথা’’তি.

‘‘অদ্ধাৰুসো আনন্দ, ভগৰা জানং জানাতি, পস্সং পস্সতি – চক্খুভূতো, ঞাণভূতো, ধম্মভূতো, ব্রহ্মভূতো, ৰত্তা, পৰত্তা, অত্থস্স নিন্নেতা, অমতস্স দাতা, ধম্মস্সামী, তথাগতো. সো চেৰ পনেতস্স কালো অহোসি যং ভগৰন্তংযেৰ এতমত্থং পটিপুচ্ছেয্যাম ¶ . যথা নো ভগৰা ব্যাকরেয্য তথা নং ধারেয্যাম. অপি চাযস্মা আনন্দো সত্থু চেৰ সংৰণ্ণিতো, সম্ভাৰিতো চ ৰিঞ্ঞূনং সব্রহ্মচারীনং. পহোতি চাযস্মা আনন্দো ইমস্স ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজিতুং. ৰিভজতাযস্মা আনন্দো অগরুং করিত্ৰা’’তি.

‘‘তেনহাৰুসো, সুণাথ, সাধুকং মনসি করোথ; ভাসিস্সামী’’তি. ‘‘এৰমাৰুসো’’তি খো তে ভিক্খূ আযস্মতো আনন্দস্স পচ্চস্সোসুং. আযস্মা আনন্দো এতদৰোচ –

‘‘যং খো ৰো, আৰুসো, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – ‘নাহং, ভিক্খৰে, গমনেন লোকস্স অন্তং ঞাতেয্যং, দট্ঠেয্যং, পত্তেয্যন্তি ৰদামি. ন চ পনাহং, ভিক্খৰে, অপ্পত্ৰা লোকস্স অন্তং দুক্খস্স অন্তকিরিযং ৰদামী’তি, ইমস্স খ্ৰাহং, আৰুসো, ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং আজানামি. যেন খো, আৰুসো, লোকস্মিং লোকসঞ্ঞী হোতি লোকমানী – অযং ৰুচ্চতি অরিযস্স ৰিনযে লোকো. কেন চাৰুসো, লোকস্মিং লোকসঞ্ঞী হোতি লোকমানী? চক্খুনা খো, আৰুসো, লোকস্মিং লোকসঞ্ঞী হোতি লোকমানী. সোতেন খো, আৰুসো… ঘানেন খো, আৰুসো… জিৰ্হায খো, আৰুসো, লোকস্মিং লোকসঞ্ঞী হোতি লোকমানী ¶ . কাযেন খো, আৰুসো… মনেন খো, আৰুসো, লোকস্মিং লোকসঞ্ঞী হোতি লোকমানী. যেন খো, আৰুসো, লোকস্মিং লোকসঞ্ঞী ¶ হোতি লোকমানী – অযং ৰুচ্চতি অরিযস্স ৰিনযে লোকো. যং ¶ খো ৰো, আৰুসো, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – ‘নাহং, ভিক্খৰে, গমনেন লোকস্স অন্তং ঞাতেয্যং ¶ , দট্ঠেয্যং, পত্তেয্যন্তি ৰদামি. ন চ পনাহং, ভিক্খৰে, অপ্পত্ৰা লোকস্স অন্তং দুক্খস্স অন্তকিরিযং ৰদামী’তি, ইমস্স খ্ৰাহং, আৰুসো, ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স এৰং ৰিত্থারেন অত্থং আজানামি. আকঙ্খমানা চ পন তুম্হে আযস্মন্তো ভগৰন্তংযেৰ উপসঙ্কমিত্ৰা এতমত্থং পটিপুচ্ছেয্যাথ. যথা ৰো ভগৰা ব্যাকরোতি তথা নং ধারেয্যাথা’’তি.

‘‘এৰমাৰুসো’’তি খো তে ভিক্খূ আযস্মতো আনন্দস্স পটিস্সুত্ৰা উট্ঠাযাসনা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং –

‘‘যং খো নো, ভন্তে, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – ‘নাহং, ভিক্খৰে, গমনেন লোকস্স অন্তং ঞাতেয্যং, দট্ঠেয্যং, পত্তেয্যন্তি ৰদামি. ন চ পনাহং, ভিক্খৰে, অপ্পত্ৰা লোকস্স অন্তং দুক্খস্স অন্তকিরিযং ৰদামী’তি. তেসং নো, ভন্তে, অম্হাকং অচিরপক্কন্তস্স ভগৰতো এতদহোসি – ‘ইদং খো নো, আৰুসো, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ¶ ৰিহারং পৰিট্ঠো – নাহং, ভিক্খৰে, গমনেন লোকস্স অন্তং ঞাতেয্যং, দট্ঠেয্যং, পত্তেয্যন্তি ৰদামি. ন চ পনাহং, ভিক্খৰে, অপ্পত্ৰা লোকস্স অন্তং দুক্খস্স অন্তকিরিযং ৰদামী’তি. কো নু খো ইমস্স ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজেয্যাতি? তেসং নো, ভন্তে, অম্হাকং এতদহোসি – ‘অযং খো ¶ আযস্মা আনন্দো সত্থু চেৰ সংৰণ্ণিতো, সম্ভাৰিতো চ ৰিঞ্ঞূনং সব্রহ্মচারীনং. পহোতি চাযস্মা আনন্দো ইমস্স ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজিতুং. যংনূন মযং যেনাযস্মা আনন্দো তেনুপসঙ্কমেয্যাম; উপসঙ্কমিত্ৰা আযস্মন্তং আনন্দং এতমত্থং পটিপুচ্ছেয্যামা’তি. অথ খো মযং ¶ , ভন্তে, যেনাযস্মা আনন্দো তেনুপসঙ্কমিম্হ; উপসঙ্কমিত্ৰা আযস্মন্তং আনন্দং এতমত্থং পটিপুচ্ছিম্হ. তেসং নো, ভন্তে, আযস্মতা আনন্দেন ইমেহি আকারেহি ইমেহি পদেহি ইমেহি ব্যঞ্জনেহি অত্থো ৰিভত্তো’’তি.

‘‘পণ্ডিতো ¶ , ভিক্খৰে, আনন্দো; মহাপঞ্ঞো, ভিক্খৰে, আনন্দো! মং চেপি তুম্হে, ভিক্খৰে, এতমত্থং পটিপুচ্ছেয্যাথ, অহম্পি তং এৰমেৰং ব্যাকরেয্যং যথা তং আনন্দেন ব্যাকতং. এসো চেৰেতস্স অত্থো, এৰঞ্চ নং ধারেয্যাথা’’তি. ততিযং.

৪. কামগুণসুত্তং

১১৭. ‘‘পুব্বেৰ মে, ভিক্খৰে, সম্বোধা অনভিসম্বুদ্ধস্স বোধিসত্তস্সেৰ ¶ সতো এতদহোসি – ‘যেমে পঞ্চ কামগুণা চেতসো সম্ফুট্ঠপুব্বা অতীতা নিরুদ্ধা ৰিপরিণতা, তত্র মে চিত্তং বহুলং গচ্ছমানং গচ্ছেয্য পচ্চুপ্পন্নেসু ৰা অপ্পং ৰা অনাগতেসু’. তস্স ময্হং, ভিক্খৰে, এতদহোসি – ‘যেমে পঞ্চ কামগুণা চেতসো সম্ফুট্ঠপুব্বা অতীতা নিরুদ্ধা ৰিপরিণতা, তত্র মে অত্তরূপেন অপ্পমাদো সতি চেতসো আরক্খো করণীযো’. তস্মাতিহ, ভিক্খৰে, তুম্হাকম্পি যে তে পঞ্চ কামগুণা চেতসো সম্ফুট্ঠপুব্বা অতীতা নিরুদ্ধা ৰিপরিণতা, তত্র ৰো চিত্তং বহুলং গচ্ছমানং গচ্ছেয্য পচ্চুপ্পন্নেসু ৰা অপ্পং ৰা অনাগতেসু. তস্মাতিহ, ভিক্খৰে, তুম্হাকম্পি যে তে পঞ্চ কামগুণা চেতসো সম্ফুট্ঠপুব্বা ¶ অতীতা নিরুদ্ধা ৰিপরিণতা, তত্র ৰো অত্তরূপেহি অপ্পমাদো সতি চেতসো আরক্খো করণীযো. তস্মাতিহ, ভিক্খৰে, সে আযতনে ৰেদিতব্বে যত্থ চক্খু চ নিরুজ্ঝতি, রূপসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ জিৰ্হা চ নিরুজ্ঝতি, রসসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ মনো চ নিরুজ্ঝতি, ধম্মসঞ্ঞা চ নিরুজ্ঝতি, সে আযতনে ৰেদিতব্বে’’তি. ইদং ৰত্ৰা ভগৰা উট্ঠাযাসনা ৰিহারং পাৰিসি.

অথ খো তেসং ভিক্খূনং অচিরপক্কন্তস্স ভগৰতো এতদহোসি – ‘‘ইদং খো নো, আৰুসো, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – ‘তস্মাতিহ, ভিক্খৰে, সে আযতনে ৰেদিতব্বে ¶ যত্থ চক্খু চ নিরুজ্ঝতি, রূপসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ জিৰ্হা চ নিরুজ্ঝতি, রসসঞ্ঞা চ নিরুজ্ঝতি, সে ¶ আযতনে ৰেদিতব্বে…পে… যত্থ মনো চ নিরুজ্ঝতি, ধম্মসঞ্ঞা চ নিরুজ্ঝতি, সে আযতনে ৰেদিতব্বে’তি. কো নু খো ইমস্স ভগৰতা ¶ সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজেয্যা’’তি?

অথ খো তেসং ভিক্খূনং এতদহোসি – ‘‘অযং খো আযস্মা আনন্দো সত্থু চেৰ সংৰণ্ণিতো, সম্ভাৰিতো চ ৰিঞ্ঞূনং সব্রহ্মচারীনং. পহোতি চাযস্মা আনন্দো ইমস্স ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজিতুং. যংনূন মযং যেনাযস্মা আনন্দো তেনুপসঙ্কমেয্যাম; উপসঙ্কমিত্ৰা আযস্মন্তং আনন্দং এতমত্থং পটিপুচ্ছেয্যামা’’তি.

অথ খো তে ভিক্খূ যেনাযস্মা আনন্দো তেনুপসঙ্কমিংসু; উপসঙ্কমিত্ৰা আযস্মতা আনন্দেন সদ্ধিং সম্মোদিংসু ¶ . সম্মোদনীযং কথং সারণীযং ৰীতিসারেত্ৰা একমন্তং নিসীদিংসু. একমন্তং নিসিন্না খো তে ভিক্খূ আযস্মন্তং আনন্দং এতদৰোচুং –

‘‘ইদং খো নো, আৰুসো আনন্দ, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – ‘তস্মাতিহ, ভিক্খৰে, সে আযতনে ৰেদিতব্বে যত্থ চক্খু চ নিরুজ্ঝতি, রূপসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ জিৰ্হা চ নিরুজ্ঝতি ¶ , রসসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ মনো চ নিরুজ্ঝতি, ধম্মসঞ্ঞা চ নিরুজ্ঝতি, সে আযতনে ৰেদিতব্বে’তি. তেসং নো, আৰুসো, অম্হাকং অচিরপক্কন্তস্স ভগৰতো এতদহোসি – ‘ইদং খো নো, আৰুসো, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – তস্মাতিহ, ভিক্খৰে, সে আযতনে ৰেদিতব্বে যত্থ চক্খু চ নিরুজ্ঝতি, রূপসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ জিৰ্হা চ নিরুজ্ঝতি, রসসঞ্ঞা চ নিরুজ্ঝতি সে আযতনে ৰেদিতব্বে…পে… যত্থ মনো চ নিরুজ্ঝতি, ধম্মসঞ্ঞা চ নিরুজ্ঝতি, সে আযতনে ৰেদিতব্বে’তি. কো নু খো ইমস্স ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজেয্যাতি? তেসং নো, আৰুসো, অম্হাকং এতদহোসি – ‘অযং খো আযস্মা আনন্দো সত্থু চেৰ সংৰণ্ণিতো, সম্ভাৰিতো চ ৰিঞ্ঞূনং সব্রহ্মচারীনং. পহোতি চাযস্মা আনন্দো ইমস্স ভগৰতা সংখিত্তেন ¶ উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজিতুং. যংনূন মযং যেনাযস্মা আনন্দো ¶ তেনুপসঙ্কমেয্যাম; উপসঙ্কমিত্ৰা আযস্মন্তং আনন্দং এতমত্থং পটিপুচ্ছেয্যামা’তি. ৰিভজতাযস্মা আনন্দো’’তি.

‘‘সেয্যথাপি, আৰুসো, পুরিসো সারত্থিকো সারগৰেসী সারপরিযেসনং চরমানো মহতো রুক্খস্স…পে… ৰিভজতাযস্মা আনন্দো অগরুং করিত্ৰাতি.

‘‘তেনহাৰুসো ¶ , সুণাথ, সাধুকং মনসি করোথ; ভাসিস্সামী’’তি. ‘‘এৰমাৰুসো’’তি ¶ খো তে ভিক্খূ আযস্মতো আনন্দস্স পচ্চস্সোসুং. আযস্মা আনন্দো এতদৰোচ –

‘‘যং খো ৰো, আৰুসো, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – ‘তস্মাতিহ, ভিক্খৰে, সে আযতনে ৰেদিতব্বে যত্থ চক্খু চ নিরুজ্ঝতি, রূপসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ মনো চ নিরুজ্ঝতি, ধম্মসঞ্ঞা চ নিরুজ্ঝতি, সে আযতনে ৰেদিতব্বে’তি. ইমস্স খ্ৰাহং, আৰুসো, ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং আজানামি. সল়াযতননিরোধং নো এতং, আৰুসো, ভগৰতা সন্ধায ভাসিতং – ‘তস্মাতিহ, ভিক্খৰে, সে আযতনে ৰেদিতব্বে, যত্থ চক্খু চ নিরুজ্ঝতি, রূপসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ মনো চ নিরুজ্ঝতি, ধম্মসঞ্ঞা চ নিরুজ্ঝতি, সে আযতনে ৰেদিতব্বে’তি. অযং খো, আৰুসো, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – ‘তস্মাতিহ, ভিক্খৰে, সে আযতনে ৰেদিতব্বে যত্থ চক্খু চ নিরুজ্ঝতি, রূপসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ মনো চ নিরুজ্ঝতি, ধম্মসঞ্ঞা চ নিরুজ্ঝতি, সে আযতনে ৰেদিতব্বে’তি. ইমস্স খ্ৰাহং, আৰুসো, ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ¶ এৰং ৰিত্থারেন অত্থং আজানামি. আকঙ্খমানা চ পন তুম্হে আযস্মন্তো ভগৰন্তংযেৰ উপসঙ্কমথ; উপসঙ্কমিত্ৰা এতমত্থং পুচ্ছেয্যাথ. যথা ৰো ভগৰা ব্যাকরোতি তথা নং ধারেয্যাথা’’তি.

‘‘এৰমাৰুসো’’তি ¶ খো তে ভিক্খূ আযস্মতো আনন্দস্স পটিস্সুত্ৰা উট্ঠাযাসনা যেন ভগৰা ¶ তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং –

‘‘যং খো নো, ভন্তে, ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – ‘তস্মাতিহ, ভিক্খৰে, সে আযতনে ৰেদিতব্বে যত্থ চক্খু চ নিরুজ্ঝতি, রূপসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ জিৰ্হা চ নিরুজ্ঝতি, রসসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ মনো চ নিরুজ্ঝতি, ধম্মসঞ্ঞা চ নিরুজ্ঝতি, সে আযতনে ৰেদিতব্বে’তি, তেসং নো, ভন্তে, অম্হাকং অচিরপক্কন্তস্স ভগৰতো এতদহোসি – ‘ইদং খো নো, আৰুসো ¶ , ভগৰা সংখিত্তেন উদ্দেসং উদ্দিসিত্ৰা ৰিত্থারেন অত্থং অৰিভজিত্ৰা উট্ঠাযাসনা ৰিহারং পৰিট্ঠো – তস্মাতিহ, ভিক্খৰে, সে আযতনে ৰেদিতব্বে যত্থ চক্খু চ নিরুজ্ঝতি, রূপসঞ্ঞা চ নিরুজ্ঝতি, সে আযতনে ৰেদিতব্বে…পে… যত্থ মনো চ নিরুজ্ঝতি, ধম্মসঞ্ঞা চ নিরুজ্ঝতি, সে আযতনে ৰেদিতব্বে’তি. ‘কো নু খো ইমস্স ভগৰতা সংখিত্তেন ¶ উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজেয্যা’তি? তেসং নো, ভন্তে, অম্হাকং এতদহোসি – ‘অযং খো আযস্মা আনন্দো সত্থু চেৰ সংৰণ্ণিতো, সম্ভাৰিতো চ ৰিঞ্ঞূনং সব্রহ্মচারীনং. পহোতি চাযস্মা আনন্দো ইমস্স ভগৰতা সংখিত্তেন উদ্দেসস্স উদ্দিট্ঠস্স ৰিত্থারেন অত্থং অৰিভত্তস্স ৰিত্থারেন অত্থং ৰিভজিতুং. যংনূন মযং যেনাযস্মা আনন্দো তেনুপসঙ্কমেয্যাম; উপসঙ্কমিত্ৰা আযস্মন্তং আনন্দং এতমত্থং পটিপুচ্ছেয্যামা’তি. অথ খো মযং, ভন্তে, যেনাযস্মা আনন্দো তেনুপসঙ্কমিম্হ; উপসঙ্কমিত্ৰা আযস্মন্তং আনন্দং এতমত্থং পটিপুচ্ছিম্হ. তেসং নো, ভন্তে, আযস্মতা আনন্দেন ইমেহি আকারেহি, ইমেহি পদেহি, ইমেহি ব্যঞ্জনেহি অত্থো ৰিভত্তো’’তি.

‘‘পণ্ডিতো, ভিক্খৰে, আনন্দো; মহাপঞ্ঞো, ভিক্খৰে, আনন্দো! মং চেপি তুম্হে, ভিক্খৰে, এতমত্থং পটিপুচ্ছেয্যাথ, অহম্পি তং এৰমেৰং ব্যাকরেয্যং যথা তং আনন্দেন ব্যাকতং. এসো চেৰেতস্স অত্থো. এৰঞ্চ নং ধারেয্যাথা’’তি. চতুত্থং.

৫. সক্কপঞ্হসুত্তং

১১৮. একং ¶ ¶ সমযং ভগৰা রাজগহে ৰিহরতি গিজ্ঝকূটে পব্বতে. অথ খো সক্কো দেৰানমিন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতো খো সক্কো দেৰানমিন্দো ভগৰন্তং এতদৰোচ – ‘‘কো নু খো, ভন্তে ¶ , হেতু, কো পচ্চযো যেন ¶ মিধেকচ্চে সত্তা দিট্ঠেৰ ধম্মে নো পরিনিব্বাযন্তি? কো পন, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি?

‘‘সন্তি খো, দেৰানমিন্দ, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং. সউপাদানো, দেৰানমিন্দ, ভিক্খু নো পরিনিব্বাযতি…পে….

‘‘সন্তি খো, দেৰানমিন্দ, জিৰ্হাৰিঞ্ঞেয্যা রসা…পে… সন্তি খো, দেৰানমিন্দ, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং. সউপাদানো, দেৰানমিন্দ, ভিক্খু নো পরিনিব্বাযতি. অযং খো, দেৰানমিন্দ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি.

‘‘সন্তি চ খো, দেৰানমিন্দ, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো ন তন্নিস্সিতং ৰিঞ্ঞাণং হোতি, ন তদুপাদানং. অনুপাদানো, দেৰানমিন্দ, ভিক্খু পরিনিব্বাযতি…পে… ¶ .

‘‘সন্তি খো, দেৰানমিন্দ, জিৰ্হাৰিঞ্ঞেয্যা রসা…পে… সন্তি খো, দেৰানমিন্দ, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো ¶ ন তন্নিস্সিতং ৰিঞ্ঞাণং হোতি ন তদুপাদানং. অনুপাদানো, দেৰানমিন্দ, ভিক্খু ¶ পরিনিব্বাযতি. অযং খো, দেৰানমিন্দ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি. পঞ্চমং.

৬. পঞ্চসিখসুত্তং

১১৯. একং ¶ সমযং ভগৰা রাজগহে ৰিহরতি গিজ্ঝকূটে পব্বতে. অথ খো পঞ্চসিখো গন্ধব্বদেৰপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতো খো পঞ্চসিখো গন্ধব্বদেৰপুত্তো ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি? কো পন, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি? ‘‘সন্তি খো, পঞ্চসিখ, চক্খুৰিঞ্ঞেয্যা রূপা…পে… সন্তি খো, পঞ্চসিখ, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং. সউপাদানো, পঞ্চসিখ ¶ , ভিক্খু নো পরিনিব্বাযতি. অযং খো, পঞ্চসিখ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি’’.

‘‘সন্তি চ খো, পঞ্চসিখ, চক্খুৰিঞ্ঞেয্যা রূপা ইট্ঠা কন্তা মনাপা…পে… সন্তি খো, পঞ্চসিখ, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি, তস্স তং অনভিনন্দতো অনভিৰদতো অনজ্ঝোসায তিট্ঠতো ন তন্নিস্সিতং ৰিঞ্ঞাণং হোতি, ন তদুপাদানং. অনুপাদানো, পঞ্চসিখ, ভিক্খু পরিনিব্বাযতি. অযং খো, পঞ্চসিখ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি. ছট্ঠং.

৭. সারিপুত্তসদ্ধিৰিহারিকসুত্তং

১২০. একং সমযং আযস্মা সারিপুত্তো সাৰত্থিযং ৰিহরতি জেতৰনে অনাথপিণ্ডিকস্স আরামে ¶ . অথ খো অঞ্ঞতরো ভিক্খু যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো সো ভিক্খু আযস্মন্তং সারিপুত্তং এতদৰোচ – ‘‘সদ্ধিৰিহারিকো ¶ , আৰুসো সারিপুত্ত, ভিক্খু সিক্খং পচ্চক্খায হীনাযাৰত্তো’’তি.

‘‘এৰমেতং, আৰুসো, হোতি ইন্দ্রিযেসু অগুত্তদ্ৰারস্স, ভোজনে অমত্তঞ্ঞুনো, জাগরিযং অননুযুত্তস্স. ‘সো ৰতাৰুসো, ভিক্খু ইন্দ্রিযেসু অগুত্তদ্ৰারো ভোজনে অমত্তঞ্ঞূ জাগরিযং ¶ অননুযুত্তো যাৰজীৰং পরিপুণ্ণং পরিসুদ্ধং ব্রহ্মচরিযং সন্তানেস্সতী’তি ¶ নেতং ঠানং ৰিজ্জতি. ‘সো ৰতাৰুসো, ভিক্খু ইন্দ্রিযেসু গুত্তদ্ৰারো, ভোজনে মত্তঞ্ঞূ, জাগরিযং অনুযুত্তো যাৰজীৰং পরিপুণ্ণং পরিসুদ্ধং ব্রহ্মচরিযং সন্তানেস্সতী’তি ঠানমেতং ৰিজ্জতি.

‘‘কথঞ্চাৰুসো, ইন্দ্রিযেসু গুত্তদ্ৰারো হোতি? ইধাৰুসো, ভিক্খু চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং তস্স সংৰরায পটিপজ্জতি, রক্খতি চক্খুন্দ্রিযং, চক্খুন্দ্রিযে সংৰরং আপজ্জতি. সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি, রক্খতি মনিন্দ্রিযং, মনিন্দ্রিযে সংৰরং আপজ্জতি. এৰং খো, আৰুসো, ইন্দ্রিযেসু গুত্তদ্ৰারো হোতি.

‘‘কথঞ্চাৰুসো, ভোজনে মত্তঞ্ঞূ হোতি? ইধাৰুসো, ভিক্খু পটিসঙ্খা যোনিসো আহারং আহারেতি – ‘নেৰ দৰায, ন মদায, ন মণ্ডনায, ন ৰিভূসনায, যাৰদেৰ ইমস্স কাযস্স ঠিতিযা যাপনায, ৰিহিংসূপরতিযা, ব্রহ্মচরিযানুগ্গহায. ইতি পুরাণঞ্চ ৰেদনং পটিহঙ্খামি, নৰঞ্চ ৰেদনং ন উপ্পাদেস্সামি, যাত্রা চ মে ভৰিস্সতি ¶ , অনৰজ্জতা চ ফাসুৰিহারো চা’তি. এৰং খো, আৰুসো, ভোজনে মত্তঞ্ঞূ হোতি.

‘‘কথঞ্চাৰুসো, জাগরিযং অনুযুত্তো হোতি? ইধাৰুসো, ভিক্খু দিৰসং চঙ্কমেন নিসজ্জায ¶ আৰরণীযেহি ধম্মেহি চিত্তং পরিসোধেতি. রত্তিযা পঠমং যামং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি ¶ . রত্তিযা মজ্ঝিমং যামং দক্খিণেন পস্সেন সীহসেয্যং কপ্পেতি পাদে পাদং অচ্চাধায সতো সম্পজানো, উট্ঠানসঞ্ঞং মনসি করিত্ৰা. রত্তিযা পচ্ছিমং যামং পচ্চুট্ঠায চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি. এৰং খো, আৰুসো, জাগরিযং ¶ অনুযুত্তো হোতি. তস্মাতিহাৰুসো, এৰং সিক্খিতব্বং – ‘ইন্দ্রিযেসু গুত্তদ্ৰারা ভৰিস্সাম, ভোজনে মত্তঞ্ঞুনো, জাগরিযং অনুযুত্তা’তি. এৰঞ্হি ৰো, আৰুসো, সিক্খিতব্ব’’ন্তি. সত্তমং.

৮. রাহুলোৰাদসুত্তং

১২১. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো ভগৰতো রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘‘পরিপক্কা খো রাহুলস্স ৰিমুত্তিপরিপাচনিযা ধম্মা; যংনূনাহং রাহুলং উত্তরিং আসৰানং খযে ৰিনেয্য’’ন্তি. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তো আযস্মন্তং রাহুলং আমন্তেসি – ‘‘গণ্হাহি, রাহুল, নিসীদনং. যেন অন্ধৰনং তেনুপসঙ্কমিস্সাম দিৰাৰিহারাযা’’তি ¶ . ‘‘এৰং, ভন্তে’’তি খো আযস্মা রাহুলো ভগৰতো পটিস্সুত্ৰা নিসীদনং আদায ভগৰন্তং পিট্ঠিতো পিট্ঠিতো অনুবন্ধি.

তেন খো পন সমযেন অনেকানি দেৰতাসহস্সানি ভগৰন্তং অনুবন্ধানি হোন্তি – ‘‘অজ্জ ভগৰা আযস্মন্তং রাহুলং উত্তরিং আসৰানং খযে ৰিনেস্সতী’’তি. অথ খো ভগৰা অন্ধৰনং অজ্ঝোগাহেত্ৰা অঞ্ঞতরস্মিং রুক্খমূলে পঞ্ঞত্তে আসনে নিসীদি. আযস্মাপি খো রাহুলো ভগৰন্তং অভিৰাদেত্ৰা একমন্তং নিসীদি. একমন্তং ¶ নিসিন্নং খো আযস্মন্তং রাহুলং ভগৰা এতদৰোচ –

‘‘তং কিং মঞ্ঞসি, রাহুল, চক্খু নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং ¶ পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’. ( ) [(তং কিং মঞ্ঞসি) এৰমিতরেসুপি (ম. নি. ৩.৪১৬-৪১৭)]

‘‘রূপা নিচ্চা ৰা অনিচ্চা ৰা’’তি?

‘‘অনিচ্চা, ভন্তে’’…পে….

‘‘চক্খুৰিঞ্ঞাণং নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’…পে….

‘‘চক্খুসম্ফস্সো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’…পে….

‘‘যম্পিদং চক্খুসম্ফস্সপচ্চযা উপ্পজ্জতি ৰেদনাগতং, সঞ্ঞাগতং, সঙ্খারগতং, ৰিঞ্ঞাণগতং, তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি ¶ , এসো ¶ মে অত্তা’’’তি?

‘‘নো হেতং, ভন্তে’’…পে….

‘‘জিৰ্হা নিচ্চা ৰা অনিচ্চা ৰা’’তি?

‘‘অনিচ্চা, ভন্তে’’…পে….

‘‘জিৰ্হাৰিঞ্ঞাণং ¶ নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’…পে….

‘‘জিৰ্হাসম্ফস্সো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’…পে….

‘‘যম্পিদং জিৰ্হাসম্ফস্সপচ্চযা উপ্পজ্জতি ৰেদনাগতং, সঞ্ঞাগতং, সঙ্খারগতং, ৰিঞ্ঞাণগতং, তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’…পে….

‘‘মনো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’.

‘‘যং পনানিচ্চং দুক্খং ৰা তং সুখং ৰাতি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘ধম্মা নিচ্চা ৰা অনিচ্চা ৰা’’তি?

‘‘অনিচ্চা, ভন্তে’’…পে….

‘‘মনোৰিঞ্ঞাণং নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’…পে….

‘‘মনোসম্ফস্সো নিচ্চো ৰা অনিচ্চো ৰা’’তি?

‘‘অনিচ্চো, ভন্তে’’…পে….

‘‘যম্পিদং ¶ মনোসম্ফস্সপচ্চযা উপ্পজ্জতি ৰেদনাগতং, সঞ্ঞাগতং, সঙ্খারগতং, ৰিঞ্ঞাণগতং, তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং ¶ মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘এৰং পস্সং, রাহুল, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি, যম্পিদং চক্খুসম্ফস্সপচ্চযা উপ্পজ্জতি ৰেদনাগতং সঞ্ঞাগতং সঙ্খারগতং ৰিঞ্ঞাণগতং তস্মিম্পি নিব্বিন্দতি…পে… জিৰ্হাযপি নিব্বিন্দতি, রসেসুপি নিব্বিন্দতি, জিৰ্হাৰিঞ্ঞাণেপি নিব্বিন্দতি, জিৰ্হাসম্ফস্সেপি নিব্বিন্দতি, যম্পিদং জিৰ্হাসম্ফস্সপচ্চযা উপ্পজ্জতি ৰেদনাগতং সঞ্ঞাগতং সঙ্খারগতং ৰিঞ্ঞাণগতং তস্মিম্পি নিব্বিন্দতি…পে….

‘‘মনস্মিম্পি নিব্বিন্দতি, ধম্মেসুপি নিব্বিন্দতি, মনোৰিঞ্ঞাণেপি নিব্বিন্দতি, মনোসম্ফস্সেপি নিব্বিন্দতি, যম্পিদং মনোসম্ফস্সপচ্চযা উপ্পজ্জতি ৰেদনাগতং সঞ্ঞাগতং সঙ্খারগতং ৰিঞ্ঞাণগতং তস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি.

ইদমৰোচ ¶ ভগৰা. অত্তমনো আযস্মা রাহুলো ভগৰতো ভাসিতং অভিনন্দি. ইমস্মিঞ্চ পন ৰেয্যাকরণস্মিং ভঞ্ঞমানে আযস্মতো রাহুলস্স অনুপাদায আসৰেহি চিত্তং ৰিমুচ্চি. অনেকানঞ্চ ¶ দেৰতাসহস্সানং ৰিরজং ৰীতমলং ধম্মচক্খুং উদপাদি – ‘‘যং কিঞ্চি সমুদযধম্মং, সব্বং তং নিরোধধম্ম’’ন্তি. অট্ঠমং.

৯. সংযোজনিযধম্মসুত্তং

১২২. ‘‘সংযোজনিযে চ, ভিক্খৰে, ধম্মে দেসেস্সামি সংযোজনঞ্চ. তং সুণাথ. কতমে ¶ চ, ভিক্খৰে, সংযোজনিযা ধম্মা, কতমঞ্চ সংযোজনং? সন্তি, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা ¶ পিযরূপা কামূপসংহিতা রজনীযা. ইমে ৰুচ্চন্তি, ভিক্খৰে, সংযোজনিযা ধম্মা. যো তত্থ ছন্দরাগো, তং তত্থ সংযোজনং…পে… সন্তি, ভিক্খৰে, জিৰ্হাৰিঞ্ঞেয্যা রসা…পে… সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. ইমে ৰুচ্চন্তি, ভিক্খৰে, সংযোজনিযা ধম্মা. যো তত্থ ছন্দরাগো তং তত্থ সংযোজন’’ন্তি. নৰমং.

১০. উপাদানিযধম্মসুত্তং

১২৩. ‘‘উপাদানিযে চ, ভিক্খৰে, ধম্মে দেসেস্সামি উপাদানঞ্চ. তং সুণাথ. কতমে চ, ভিক্খৰে, উপাদানিযা ধম্মা, কতমঞ্চ উপাদানং? সন্তি, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. ইমে ৰুচ্চন্তি, ভিক্খৰে, উপাদানিযা ধম্মা. যো তত্থ ছন্দরাগো, তং তত্থ উপাদানং…পে… সন্তি, ভিক্খৰে, জিৰ্হাৰিঞ্ঞেয্যা রসা…পে… সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. ইমে ৰুচ্চন্তি, ভিক্খৰে, উপাদানিযা ধম্মা. যো তত্থ ছন্দরাগো তং তত্থ উপাদান’’ন্তি. দসমং.

লোককামগুণৰগ্গো দ্ৰাদসমো.

তস্সুদ্দানং ¶ –

মারপাসেন দ্ৰে ৰুত্তা, লোককামগুণেন চ;

সক্কো পঞ্চসিখো চেৰ, সারিপুত্তো চ রাহুলো;

সংযোজনং উপাদানং, ৰগ্গো তেন পৰুচ্চতীতি.

১৩. গহপতিৰগ্গো

১. ৰেসালীসুত্তং

১২৪. একং ¶ ¶ ¶ সমযং ভগৰা ৰেসালিযং ৰিহরতি মহাৰনে কূটাগারসালাযং. অথ খো উগ্গো গহপতি ৰেসালিকো যেন ভগৰা তেনুপসঙ্কমি; উপসঙ্কমিত্ৰা একমন্তং নিসীদি. একমন্তং নিসিন্নো খো উগ্গো গহপতি ৰেসালিকো ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি? কো পন, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি?

‘‘সন্তি খো, গহপতি, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং. সউপাদানো, গহপতি, ভিক্খু নো পরিনিব্বাযতি…পে… সন্তি খো, গহপতি, জিৰ্হাৰিঞ্ঞেয্যা রসা…পে… সন্তি খো, গহপতি, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং. সউপাদানো, গহপতি, ভিক্খু নো পরিনিব্বাযতি. অযং খো, গহপতি, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি.

‘‘সন্তি ¶ চ খো, গহপতি, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা ¶ রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো ন তন্নিস্সিতং ৰিঞ্ঞাণং হোতি, ন তদুপাদানং. অনুপাদানো, গহপতি, ভিক্খু পরিনিব্বাযতি…পে… সন্তি খো, গহপতি, জিৰ্হাৰিঞ্ঞেয্যা রসা…পে… সন্তি খো, গহপতি, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি, তস্স তং অনভিনন্দতো অনভিৰদতো অনজ্ঝোসায তিট্ঠতো. ন তন্নিস্সিতং ৰিঞ্ঞাণং হোতি, ন তদুপাদানং. অনুপাদানো ¶ , গহপতি, ভিক্খু পরিনিব্বাযতি. অযং খো, গহপতি, হেতু অযং পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি. পঠমং.

২. ৰজ্জীসুত্তং

১২৫. একং সমযং ভগৰা ৰজ্জীসু ৰিহরতি হত্থিগামে. অথ খো উগ্গো গহপতি হত্থিগামকো যেন ভগৰা তেনুপসঙ্কমি; উপসঙ্কমিত্ৰা একমন্তং নিসীদি. একমন্তং নিসিন্নো খো উগ্গো গহপতি হত্থিগামকো ভগৰন্তং এতদৰোচ – ‘‘কো নু খো, ভন্তে, হেতু কো পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি? কো পন, ভন্তে হেতু কো পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি? (যথা পুরিমসুত্তন্তং, এৰং ৰিত্থারেতব্বং). অযং ¶ খো, গহপতি, হেতু অযং পচ্চযো যেন মিধেকচ্চে সত্তা দিট্ঠেৰ ¶ ধম্মে পরিনিব্বাযন্তীতি. দুতিযং.

৩. নাল়ন্দসুত্তং

১২৬. একং সমযং ভগৰা নাল়ন্দাযং ৰিহরতি পাৰারিকম্বৰনে. অথ খো, উপালি গহপতি, যেন ভগৰা তেনুপসঙ্কমি…পে… একমন্তং নিসিন্নো খো, উপালি গহপতি, ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি? কো পন, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি? (যথা পুরিমসুত্তন্তং, এৰং ৰিত্থারেতব্বং). অযং খো, গহপতি, হেতু অযং পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তীতি. ততিযং.

৪. ভারদ্ৰাজসুত্তং

১২৭. একং ¶ সমযং আযস্মা পিণ্ডোলভারদ্ৰাজো কোসম্বিযং ৰিহরতি ঘোসিতারামে. অথ খো রাজা উদেনো যেনাযস্মা পিণ্ডোলভারদ্ৰাজো তেনুপসঙ্কমি; উপসঙ্কমিত্ৰা আযস্মতা পিণ্ডোলভারদ্ৰাজেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো রাজা উদেনো আযস্মন্তং পিণ্ডোলভারদ্ৰাজং এতদৰোচ – ‘‘কো নু খো, ভো ভারদ্ৰাজ, হেতু ¶ কো পচ্চযো যেনিমে দহরা ভিক্খূ সুসূ [সুসু (সী. ক.)] কাল়কেসা ভদ্রেন যোব্বনেন সমন্নাগতা পঠমেন ৰযসা অনিকীল়িতাৰিনো কামেসু যাৰজীৰং পরিপুণ্ণং পরিসুদ্ধং ব্রহ্মচরিযং চরন্তি, অদ্ধানঞ্চ আপাদেন্তী’’তি? ‘‘ৰুত্তং খো এতং, মহারাজ, তেন ¶ ভগৰতা জানতা পস্সতা অরহতা সম্মাসম্বুদ্ধেন – ‘এথ তুম্হে, ভিক্খৰে, মাতুমত্তীসু মাতুচিত্তং উপট্ঠপেথ, ভগিনিমত্তীসু ¶ ভগিনিচিত্তং উপট্ঠপেথ, ধীতুমত্তীসু ধীতুচিত্তং উপট্ঠপেথা’তি. অযং খো, মহারাজ, হেতু, অযং পচ্চযো যেনিমে দহরা ভিক্খূ সুসূ কাল়কেসা ভদ্রেন যোব্বনেন সমন্নাগতা পঠমেন ৰযসা অনিকীল়িতাৰিনো কামেসু যাৰজীৰং পরিপুণ্ণং পরিসুদ্ধং ব্রহ্মচরিযং চরন্তি, অদ্ধানঞ্চ আপাদেন্তী’’তি.

‘‘লোলং [লোল়ং (স্যা. কং.)] খো, ভো ভারদ্ৰাজ, চিত্তং. অপ্পেকদা মাতুমত্তীসুপি লোভধম্মা উপ্পজ্জন্তি, ভগিনিমত্তীসুপি লোভধম্মা উপ্পজ্জন্তি, ধীতুমত্তীসুপি লোভধম্মা উপ্পজ্জন্তি. অত্থি নু খো, ভো ভারদ্ৰাজ, অঞ্ঞো চ হেতু, অঞ্ঞো চ পচ্চযো যেনিমে দহরা ভিক্খূ সুসূ কাল়কেসা…পে… অদ্ধানঞ্চ আপাদেন্তী’’তি?

‘‘ৰুত্তং খো এতং, মহারাজ, তেন ভগৰতা জানতা পস্সতা অরহতা সম্মাসম্বুদ্ধেন – ‘এথ তুম্হে, ভিক্খৰে, ইমমেৰ কাযং উদ্ধং পাদতলা অধো কেসমত্থকা তচপরিযন্তং পূরং নানপ্পকারস্স অসুচিনো পচ্চৰেক্খথ – অত্থি ইমস্মিং কাযে কেসা লোমা নখা দন্তা তচো মংসং ন্হারু [নহারু (সী. স্যা. কং. পী.)] অট্ঠি অট্ঠিমিঞ্জং [অট্ঠিমিঞ্জা (সী.)] ৰক্কং হদযং যকনং কিলোমকং পিহকং পপ্ফাসং অন্তং অন্তগুণং উদরিযং করীসং পিত্তং সেম্হং পুব্বো লোহিতং সেদো মেদো অস্সু ৰসা খেল়ো সিঙ্ঘাণিকা লসিকা মুত্ত’ন্তি. অযম্পি খো, মহারাজ, হেতু, অযং পচ্চযো যেনিমে দহরা ভিক্খূ সুসূ কাল়কেসা…পে… ¶ অদ্ধানঞ্চ আপাদেন্তী’’তি. ‘‘যে তে, ভো ভারদ্ৰাজ, ভিক্খূ ভাৰিতকাযা ভাৰিতসীলা ভাৰিতচিত্তা ভাৰিতপঞ্ঞা, তেসং তং সুকরং হোতি. যে চ খো তে ¶ , ভো ভারদ্ৰাজ, ভিক্খূ অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা, তেসং তং দুক্করং হোতি. অপ্পেকদা, ভো ভারদ্ৰাজ, অসুভতো মনসি ¶ করিস্সামীতি [মনসি করিস্সামাতি (সী. স্যা. কং. পী.)] সুভতোৰ [সুভতো ৰা (সী.), সুভতো চ (স্যা. কং.)] আগচ্ছতি. অত্থি নু খো, ভো ভারদ্ৰাজ ¶ , অঞ্ঞো চ খো হেতু অঞ্ঞো চ পচ্চযো যেনিমে দহরা ভিক্খূ সুসূ কাল়কেসা…পে… অদ্ধানঞ্চ আপাদেন্তী’’তি?

‘‘ৰুত্তং খো এতং, মহারাজ, তেন ভগৰতা জানতা পস্সতা অরহতা সম্মাসম্বুদ্ধেন – ‘এথ তুম্হে, ভিক্খৰে, ইন্দ্রিযেসু গুত্তদ্ৰারা ৰিহরথ. চক্খুনা রূপং দিস্ৰা মা নিমিত্তগ্গাহিনো অহুৰত্থ, মানুব্যঞ্জনগ্গাহিনো. যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জথ. রক্খথ চক্খুন্দ্রিযং; চক্খুন্দ্রিযে সংৰরং আপজ্জথ. সোতেন সদ্দং সুত্ৰা…পে… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায মা নিমিত্তগ্গাহিনো অহুৰত্থ, মানুব্যঞ্জনগ্গাহিনো. যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জথ ¶ . রক্খথ মনিন্দ্রিযং; মনিন্দ্রিযে সংৰরং আপজ্জথা’তি. অযম্পি খো, মহারাজ, হেতু অযং পচ্চযো যেনিমে দহরা ভিক্খূ সুসূ কাল়কেসা ভদ্রেন যোব্বনেন সমন্নাগতা পঠমেন ৰযসা অনিকীল়িতাৰিনো কামেসু যাৰজীৰং পরিপুণ্ণং পরিসুদ্ধং ব্রহ্মচরিযং চরন্তি, অদ্ধানঞ্চ আপাদেন্তী’’তি.

‘‘অচ্ছরিযং, ভো ভারদ্ৰাজ; অব্ভুতং, ভো ভারদ্ৰাজ! যাৰ সুভাসিতং চিদং [যাৰ সুভাসিতমিদং (সী.)], ভো ভারদ্ৰাজ, তেন ভগৰতা জানতা পস্সতা অরহতা সম্মাসম্বুদ্ধেন. এসোৰ খো, ভো ভারদ্ৰাজ, হেতু, এস পচ্চযো যেনিমে দহরা ভিক্খূ সুসূ কাল়কেসা ভদ্রেন যোব্বনেন সমন্নাগতা পঠমেন ৰযসা অনিকীল়িতাৰিনো কামেসু যাৰজীৰং পরিপুণ্ণং পরিসুদ্ধং ব্রহ্মচরিযং চরন্তি, অদ্ধানঞ্চ আপাদেন্তীতি. অহম্পি খো, ভো [অহম্পি ভো (সী. পী.)] ভারদ্ৰাজ, যস্মিং সমযে অরক্খিতেনেৰ কাযেন, অরক্খিতায ৰাচায, অরক্খিতেন চিত্তেন, অনুপট্ঠিতায সতিযা, অসংৰুতেহি ইন্দ্রিযেহি অন্তেপুরং পৰিসামি, অতিৰিয মং তস্মিং সমযে লোভধম্মা পরিসহন্তি. যস্মিঞ্চ খ্ৰাহং, ভো ভারদ্ৰাজ, সমযে রক্খিতেনেৰ কাযেন, রক্খিতায ৰাচায, রক্খিতেন চিত্তেন, উপট্ঠিতায সতিযা ¶ , সংৰুতেহি ইন্দ্রিযেহি অন্তেপুরং পৰিসামি, ন মং তথা ¶ তস্মিং সমযে লোভধম্মা পরিসহন্তি. অভিক্কন্তং, ভো ভারদ্ৰাজ; অভিক্কন্তং, ভো ভারদ্ৰাজ! সেয্যথাপি ¶ , ভো ভারদ্ৰাজ, নিক্কুজ্জিতং [নিকুজ্জিতং (পী.)] ৰা উক্কুজ্জেয্য ¶ , পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য, চক্খুমন্তো রূপানি দক্খন্তীতি; এৰমেৰং ভোতা ভারদ্ৰাজেন অনেকপরিযাযেন ধম্মো পকাসিতো. এসাহং, ভো ভারদ্ৰাজ, তং ভগৰন্তং সরণং গচ্ছামি, ধম্মঞ্চ, ভিক্খুসঙ্ঘঞ্চ. উপাসকং মং ভৰং ভারদ্ৰাজো ধারেতু অজ্জতগ্গে পাণুপেতং সরণং গত’’ন্তি. চতুত্থং.

৫. সোণসুত্তং

১২৮. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. অথ খো সোণো গহপতিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সোণো গহপতিপুত্তো ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি? কো পন, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি? (যথা পুরিমসুত্তন্তং, এৰং ৰিত্থারেতব্বং). অযং খো, সোণ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তীতি. পঞ্চমং.

৬. ঘোসিতসুত্তং

১২৯. একং সমযং আযস্মা আনন্দো কোসম্বিযং ৰিহরতি ঘোসিতারামে. অথ খো ঘোসিতো গহপতি যেনাযস্মা আনন্দো তেনুপসঙ্কমি…পে… একমন্তং নিসিন্নো খো ঘোসিতো গহপতি আযস্মন্তং আনন্দং এতদৰোচ – ‘‘‘ধাতুনানত্তং, ধাতুনানত্ত’ন্তি ¶ , ভন্তে আনন্দ, ৰুচ্চতি. কিত্তাৰতা নু খো, ভন্তে, ধাতুনানত্তং ৰুত্তং ভগৰতা’’তি? ‘‘সংৰিজ্জতি খো, গহপতি, চক্খুধাতু, রূপা চ মনাপা, চক্খুৰিঞ্ঞাণঞ্চ ¶ সুখৰেদনিযং. ফস্সং পটিচ্চ উপ্পজ্জতি সুখা ৰেদনা. সংৰিজ্জতি খো, গহপতি, চক্খুধাতু, রূপা চ অমনাপা, চক্খুৰিঞ্ঞাণঞ্চ দুক্খৰেদনিযং. ফস্সং পটিচ্চ উপ্পজ্জতি দুক্খা ৰেদনা. সংৰিজ্জতি খো, গহপতি, চক্খুধাতু, রূপা চ মনাপা উপেক্খাৰেদনিযা, চক্খুৰিঞ্ঞাণঞ্চ অদুক্খমসুখৰেদনিযং. ফস্সং পটিচ্চ উপ্পজ্জতি অদুক্খমসুখা ¶ ৰেদনা…পে… সংৰিজ্জতি খো, গহপতি, জিৰ্হাধাতু, রসা চ মনাপা, জিৰ্হাৰিঞ্ঞাণঞ্চ সুখৰেদনিযং. ফস্সং পটিচ্চ উপ্পজ্জতি ¶ সুখা ৰেদনা. সংৰিজ্জতি খো, গহপতি, জিৰ্হাধাতু, রসা চ অমনাপা, জিৰ্হাৰিঞ্ঞাণঞ্চ দুক্খৰেদনিযং. ফস্সং পটিচ্চ উপ্পজ্জতি দুক্খা ৰেদনা. সংৰিজ্জতি খো, গহপতি, জিৰ্হাধাতু, রসা চ উপেক্খাৰেদনিযা, জিৰ্হাৰিঞ্ঞাণঞ্চ অদুক্খমসুখৰেদনিযং. ফস্সং পটিচ্চ উপ্পজ্জতি অদুক্খমসুখা ৰেদনা…পে… সংৰিজ্জতি খো, গহপতি, মনোধাতু, ধম্মা চ মনাপা, মনোৰিঞ্ঞাণঞ্চ সুখৰেদনিযং. ফস্সং পটিচ্চ উপ্পজ্জতি সুখা ৰেদনা. সংৰিজ্জতি খো, গহপতি, মনোধাতু, ধম্মা চ অমনাপা, মনোৰিঞ্ঞাণঞ্চ দুক্খৰেদনিযং. ফস্সং পটিচ্চ উপ্পজ্জতি দুক্খা ৰেদনা. সংৰিজ্জতি খো, গহপতি, মনোধাতু, ধম্মা চ উপেক্খাৰেদনিযা, মনোৰিঞ্ঞাণঞ্চ অদুক্খমসুখৰেদনিযং. ফস্সং পটিচ্চ উপ্পজ্জতি অদুক্খমসুখা ৰেদনা. এত্তাৰতা খো, গহপতি, ধাতুনানত্তং ৰুত্তং ভগৰতা’’তি. ছট্ঠং.

৭. হালিদ্দিকানিসুত্তং

১৩০. একং ¶ ¶ সমযং আযস্মা মহাকচ্চানো অৰন্তীসু ৰিহরতি কুররঘরে [কুলঘরে (স্যা. ক.)] পপাতে [পৰত্তে (সী. পী.), সম্পৰত্তে (স্যা. কং. ক.) এত্থেৰ অট্ঠমপিট্ঠেপি] পব্বতে. অথ খো হালিদ্দিকানি [হালিদ্দকানি (সী. স্যা. কং.)] গহপতি যেনাযস্মা মহাকচ্চানো তেনুপসঙ্কমি…পে… একমন্তং নিসিন্নো খো হালিদ্দিকানি গহপতি আযস্মন্তং মহাকচ্চানং এতদৰোচ – ‘‘ৰুত্তমিদং, ভন্তে, ভগৰতা – ‘ধাতুনানত্তং পটিচ্চ উপ্পজ্জতি ফস্সনানত্তং; ফস্সনানত্তং পটিচ্চ উপ্পজ্জতি ৰেদনানানত্ত’ন্তি. কথং নু খো, ভন্তে, ধাতুনানত্তং পটিচ্চ উপ্পজ্জতি ফস্সনানত্তং; ফস্সনানত্তং পটিচ্চ উপ্পজ্জতি ৰেদনানানত্ত’’ন্তি? ‘‘ইধ, গহপতি, ভিক্খু চক্খুনা রূপং দিস্ৰা ‘মনাপং ইত্থেত’ন্তি পজানাতি চক্খুৰিঞ্ঞাণং সুখৰেদনিযঞ্চ [সুখৰেদনিযং, সুখৰেদনিযং (সী. পী.), সুখৰেদনিযঞ্চ, সুখৰেদনিযং (স্যা. কং. ক.) এৰং ‘‘দুক্খৰেদনিযঞ্চ অদুক্খমসুখৰেদনিযঞ্চা’’তি পদেসুপি. অট্ঠকথাটীকা ওলোকেতব্বা]. ফস্সং পটিচ্চ উপ্পজ্জতি সুখা ৰেদনা. চক্খুনা খো পনেৰ [পনেৰং (স্যা. কং. ক.)] রূপং দিস্ৰা ‘অমনাপং ইত্থেত’ন্তি পজানাতি চক্খুৰিঞ্ঞাণং দুক্খৰেদনিযঞ্চ. ফস্সং পটিচ্চ উপ্পজ্জতি দুক্খা ৰেদনা. চক্খুনা খো পনেৰ রূপং দিস্ৰা ‘উপেক্খাট্ঠানিযং ¶ [উপেক্খাৰেদনিযং (ক.)] ইত্থেত’ন্তি পজানাতি চক্খুৰিঞ্ঞাণং অদুক্খমসুখৰেদনিযঞ্চ. ফস্সং পটিচ্চ উপ্পজ্জতি অদুক্খমসুখা ৰেদনা.

‘‘পুন চপরং, গহপতি, ভিক্খু সোতেন সদ্দং সুত্ৰা…পে… ঘানেন গন্ধং ঘাযিত্ৰা…পে… জিৰ্হায রসং সাযিত্ৰা…পে… কাযেন ফোট্ঠব্বং ফুসিত্ৰা…পে… মনসা ধম্মং ৰিঞ্ঞায ‘মনাপং ইত্থেত’ন্তি পজানাতি মনোৰিঞ্ঞাণং সুখৰেদনিযঞ্চ ¶ . ফস্সং পটিচ্চ উপ্পজ্জতি সুখা ৰেদনা. মনসা খো পনেৰ ধম্মং ৰিঞ্ঞায ¶ ‘অমনাপং ইত্থেত’ন্তি পজানাতি মনোৰিঞ্ঞাণং ¶ দুক্খৰেদনিযঞ্চ. ফস্সং পটিচ্চ উপ্পজ্জতি দুক্খা ৰেদনা. মনসা খো পনেৰ ধম্মং ৰিঞ্ঞায ‘উপেক্খাট্ঠানিযং ইত্থেত’ন্তি পজানাতি মনোৰিঞ্ঞাণং অদুক্খমসুখৰেদনিযঞ্চ. ফস্সং পটিচ্চ উপ্পজ্জতি অদুক্খমসুখা ৰেদনা. এৰং খো, গহপতি, ধাতুনানত্তং পটিচ্চ উপ্পজ্জতি ফস্সনানত্তং; ফস্সনানত্তং পটিচ্চ উপ্পজ্জতি ৰেদনানানত্ত’’ন্তি. সত্তমং.

৮. নকুলপিতুসুত্তং

১৩১. একং সমযং ভগৰা ভগ্গেসু ৰিহরতি সুসুমারগিরে ভেসকল়াৰনে মিগদাযে. অথ খো নকুলপিতা গহপতি যেন ভগৰা তেনুপসঙ্কমি…পে… একমন্তং নিসিন্নো খো নকুলপিতা গহপতি ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি? কো পন, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি? ‘‘সন্তি খো, গহপতি, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং. সউপাদানো, গহপতি, ভিক্খু নো পরিনিব্বাযতি…পে… সন্তি খো, গহপতি, জিৰ্হাৰিঞ্ঞেয্যা রসা…পে… সন্তি খো, গহপতি, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা ¶ . তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং. সউপাদানো, গহপতি, ভিক্খু নো পরিনিব্বাযতি ¶ . অযং খো, গহপতি, হেতু অযং পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি’’.

‘‘সন্তি চ খো, গহপতি, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খুনাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো ন তন্নিস্সিতং ৰিঞ্ঞাণং হোতি, ন তদুপাদানং. অনুপাদানো, গহপতি, ভিক্খু পরিনিব্বাযতি…পে… সন্তি খো, গহপতি, জিৰ্হাৰিঞ্ঞেয্যা রসা…পে… সন্তি খো, গহপতি, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং নাভিনন্দতো নাভিৰদতো অনজ্ঝোসায তিট্ঠতো ন তন্নিস্সিতং ৰিঞ্ঞাণং হোতি ন ¶ তদুপাদানং. অনুপাদানো, গহপতি, ভিক্খু পরিনিব্বাযতি. অযং খো, গহপতি, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি. অট্ঠমং.

৯. লোহিচ্চসুত্তং

১৩২. একং সমযং আযস্মা মহাকচ্চানো অৰন্তীসু ৰিহরতি মক্করকতে [মক্করকটে (সী. স্যা. কং. পী.)] অরঞ্ঞকুটিকাযং. অথ ¶ খো লোহিচ্চস্স ব্রাহ্মণস্স সম্বহুলা ¶ অন্তেৰাসিকা কট্ঠহারকা মাণৰকা যেনাযস্মতো মহাকচ্চানস্স অরঞ্ঞকুটিকা তেনুপসঙ্কমিংসু; উপসঙ্কমিত্ৰা পরিতো পরিতো কুটিকায অনুচঙ্কমন্তি অনুৰিচরন্তি উচ্চাসদ্দা মহাসদ্দা কানিচি কানিচি সেলেয্যকানি করোন্তি [সেলিস্সকানি করোন্তা (সী.)] – ‘‘ইমে পন মুণ্ডকা সমণকা ইব্ভা কণ্হা [কিণ্হা (সী. পী.)] বন্ধুপাদাপচ্চা, ইমেসং ভরতকানং সক্কতা গরুকতা মানিতা পূজিতা অপচিতা’’তি. অথ খো আযস্মা মহাকচ্চানো ৰিহারা নিক্খমিত্ৰা তে মাণৰকে এতদৰোচ – ‘‘মা মাণৰকা সদ্দমকত্থ; ধম্মং ৰো ভাসিস্সামী’’তি. এৰং ৰুত্তে, তে মাণৰকা তুণ্হী অহেসুং. অথ খো আযস্মা মহাকচ্চানো তে মাণৰকে গাথাহি অজ্ঝভাসি –

‘‘সীলুত্তমা পুব্বতরা অহেসুং,

তে ব্রাহ্মণা যে পুরাণং সরন্তি;

গুত্তানি দ্ৰারানি সুরক্খিতানি,

অহেসুং তেসং অভিভুয্য কোধং.

‘‘ধম্মে ¶ চ ঝানে চ রতা অহেসুং,

তে ব্রাহ্মণা যে পুরাণং সরন্তি;

ইমে চ ৰোক্কম্ম জপামসেতি,

গোত্তেন মত্তা ৰিসমং চরন্তি.

‘‘কোধাভিভূতা পুথুঅত্তদণ্ডা [কোধাভিভূতাসুপুথুত্তদণ্ডা (স্যা. কং. ক.)],

ৰিরজ্জমানা সতণ্হাতণ্হেসু;

অগুত্তদ্ৰারস্স ¶ ভৰন্তি মোঘা,

সুপিনেৰ লদ্ধং পুরিসস্স ৰিত্তং.

‘‘অনাসকা ¶ থণ্ডিলসাযিকা চ;

পাতো সিনানঞ্চ তযো চ ৰেদা.

‘‘খরাজিনং জটাপঙ্কো, মন্তা সীলব্বতং তপো;

কুহনা ৰঙ্কদণ্ডা চ, উদকাচমনানি চ.

‘‘ৰণ্ণা ¶ এতে ব্রাহ্মণানং, কতা কিঞ্চিক্খভাৰনা;

চিত্তঞ্চ সুসমাহিতং, ৰিপ্পসন্নমনাৰিলং;

অখিলং সব্বভূতেসু, সো মগ্গো ব্রহ্মপত্তিযা’’তি.

অথ খো তে মাণৰকা কুপিতা অনত্তমনা যেন লোহিচ্চো ব্রাহ্মণো তেনুপসঙ্কমিংসু; উপসঙ্কমিত্ৰা লোহিচ্চং ব্রাহ্মণং এতদৰোচুং – ‘‘যগ্ঘে! ভৰং জানেয্য, সমণো মহাকচ্চানো ব্রাহ্মণানং মন্তে [মন্তং (ক.)] একংসেন অপৰদতি, পটিক্কোসতী’’তি? এৰং ৰুত্তে, লোহিচ্চো ব্রাহ্মণো কুপিতো অহোসি অনত্তমনো. অথ খো লোহিচ্চস্স ব্রাহ্মণস্স এতদহোসি – ‘‘ন খো পন মেতং পতিরূপং যোহং অঞ্ঞদত্থু মাণৰকানংযেৰ সুত্ৰা সমণং মহাকচ্চানং অক্কোসেয্যং [অক্কোসেয্যং ৰিরুজ্ঝেয্যং (স্যা. কং. ক.)] পরিভাসেয্যং. যংনূনাহং উপসঙ্কমিত্ৰা পুচ্ছেয্য’’ন্তি.

অথ খো লোহিচ্চো ব্রাহ্মণো তেহি মাণৰকেহি সদ্ধিং যেনাযস্মা মহাকচ্চানো তেনুপসঙ্কমি; উপসঙ্কমিত্ৰা ¶ আযস্মতা মহাকচ্চানেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো লোহিচ্চো ব্রাহ্মণো ¶ আযস্মন্তং মহাকচ্চানং এতদৰোচ – ‘‘আগমংসু নু খ্ৰিধ, ভো কচ্চান, অম্হাকং সম্বহুলা অন্তেৰাসিকা কট্ঠহারকা মাণৰকা’’তি? ‘‘আগমংসু খ্ৰিধ তে, ব্রাহ্মণ, সম্বহুলা অন্তেৰাসিকা কট্ঠহারকা মাণৰকা’’তি. ‘‘অহু পন ভোতো কচ্চানস্স তেহি মাণৰকেহি সদ্ধিং কোচিদেৰ কথাসল্লাপো’’তি? ‘‘অহু খো মে, ব্রাহ্মণ, তেহি মাণৰকেহি সদ্ধিং কোচিদেৰ কথাসল্লাপো’’তি ¶ . ‘‘যথা কথং পন ভোতো কচ্চানস্স তেহি মাণৰকেহি সদ্ধিং অহোসি ¶ কথাসল্লাপো’’তি? ‘‘এৰং খো মে, ব্রাহ্মণ, তেহি মাণৰকেহি সদ্ধিং অহোসি কথাসল্লাপো –

‘‘সীলুত্তমা পুব্বতরা অহেসুং,

তে ব্রাহ্মণা যে পুরাণং সরন্তি;…পে…;

অখিলং সব্বভূতেসু,

সো মগ্গো ব্রহ্মপত্তিযা’’তি.

‘‘এৰং খো মে, ব্রাহ্মণ, তেহি মাণৰকেহি সদ্ধিং অহোসি কথাসল্লাপো’’তি.

‘‘‘অগুত্তদ্ৰারো’তি [অগুত্তদ্ৰারো অগুত্তদ্ৰারোতি (ক.)] ভৰং কচ্চানো আহ. কিত্তাৰতা নু খো, ভো কচ্চান, অগুত্তদ্ৰারো হোতী’’তি? ‘‘ইধ, ব্রাহ্মণ, একচ্চো চক্খুনা রূপং দিস্ৰা পিযরূপে রূপে অধিমুচ্চতি, অপ্পিযরূপে রূপে ব্যাপজ্জতি, অনুপট্ঠিতকাযস্সতি [অনুপট্ঠিতায সতিযা (স্যা. কং. পী. ক.) উপরি আসীৰিসৰগ্গে অৰস্সুতসুত্তে পন ‘‘অনুপট্ঠিতকাযস্সতী’’ত্ৰেৰ সব্বত্থ দিস্সতি] চ ৰিহরতি, পরিত্তচেতসো তঞ্চ চেতোৰিমুত্তিং পঞ্ঞাৰিমুত্তিং ¶ যথাভূতং নপ্পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি. সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায পিযরূপে ধম্মে অধিমুচ্চতি, অপ্পিযরূপে চ ধম্মে ব্যাপজ্জতি, অনুপট্ঠিতকাযস্সতি চ ৰিহরতি, পরিত্তচেতসো তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি. এৰং খো, ব্রাহ্মণ, অগুত্তদ্ৰারো হোতী’’তি. ‘‘অচ্ছরিযং, ভো কচ্চান; অব্ভুতং, ভো কচ্চান! যাৰঞ্চিদং ভোতা ¶ কচ্চানেন অগুত্তদ্ৰারোৰ সমানো অগুত্তদ্ৰারোতি অক্খাতো.

‘‘‘গুত্তদ্ৰারো’তি ¶ ভৰং কচ্চানো আহ. কিত্তাৰতা নু খো, ভো কচ্চান, গুত্তদ্ৰারো হোতী’’তি? ‘‘ইধ, ব্রাহ্মণ, ভিক্খু চক্খুনা রূপং দিস্ৰা পিযরূপে রূপে নাধিমুচ্চতি, অপ্পিযরূপে রূপে ন ব্যাপজ্জতি, উপট্ঠিতকাযস্সতি চ ৰিহরতি, অপ্পমাণচেতসো তঞ্চ চেতোৰিমুত্তিং পঞ্ঞাৰিমুত্তিং যথাভূতং পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি. সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায পিযরূপে ধম্মে ¶ নাধিমুচ্চতি, অপ্পিযরূপে ধম্মে ন ব্যাপজ্জতি, উপট্ঠিতকাযস্সতি চ ৰিহরতি, অপ্পমাণচেতসো তঞ্চ চেতোৰিমুত্তিং পঞ্ঞাৰিমুত্তিং যথাভূতং পজানাতি, যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি. এৰং খো, ব্রাহ্মণ, গুত্তদ্ৰারো হোতী’’তি.

‘‘অচ্ছরিযং, ভো কচ্চান; অব্ভুতং, ভো কচ্চান! যাৰঞ্চিদং ¶ ভোতা কচ্চানেন গুত্তদ্ৰারোৰ সমানো গুত্তদ্ৰারোতি অক্খাতো. অভিক্কন্তং, ভো কচ্চান; অভিক্কন্তং, ভো কচ্চান! সেয্যথাপি, ভো কচ্চান, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য, চক্খুমন্তো রূপানি দক্খন্তীতি; এৰমেৰং ভোতা কচ্চানেন অনেকপরিযাযেন ধম্মো পকাসিতো. এসাহং, ভো কচ্চান, তং ভগৰন্তং ¶ সরণং গচ্ছামি, ধম্মঞ্চ, ভিক্খুসঙ্ঘঞ্চ. উপাসকং মং ভৰং কচ্চানো ধারেতু অজ্জতগ্গে পাণুপেতং সরণং গতং. যথা চ ভৰং কচ্চানো মক্করকতে উপাসককুলানি উপসঙ্কমতি; এৰমেৰ লোহিচ্চকুলং উপসঙ্কমতু. তত্থ যে মাণৰকা ৰা মাণৰিকা ৰা ভৰন্তং কচ্চানং অভিৰাদেস্সন্তি পচ্চুট্ঠিস্সন্তি আসনং ৰা উদকং ৰা দস্সন্তি, তেসং তং ভৰিস্সতি দীঘরত্তং হিতায সুখাযা’’তি. নৰমং.

১০. ৰেরহচ্চানিসুত্তং

১৩৩. একং সমযং আযস্মা উদাযী কামণ্ডাযং ৰিহরতি তোদেয্যস্স ব্রাহ্মণস্স অম্বৰনে. অথ খো ৰেরহচ্চানিগোত্তায ব্রাহ্মণিযা অন্তেৰাসী মাণৰকো যেনাযস্মা উদাযী তেনুপসঙ্কমি; উপসঙ্কমিত্ৰা আযস্মতা উদাযিনা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো তং মাণৰকং ¶ আযস্মা উদাযী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো সো মাণৰকো আযস্মতা উদাযিনা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো উট্ঠাযাসনা যেন ৰেরহচ্চানিগোত্তা ব্রাহ্মণী তেনুপসঙ্কমি; উপসঙ্কমিত্ৰা ৰেরহচ্চানিগোত্তং ব্রাহ্মণিং এতদৰোচ – ‘‘যগ্ঘে, ভোতি, জানেয্যাসি [ভোতি জানেয্য (সী. পী. ক.), ভোতী জানেয্য (স্যা. কং.)]! সমণো উদাযী ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং ¶ , সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেতী’’তি.

‘‘তেন হি ত্ৰং, মাণৰক, মম ৰচনেন সমণং উদাযিং নিমন্তেহি স্ৰাতনায ভত্তেনা’’তি ¶ . ‘‘এৰং ভোতী’’তি খো ¶ সো মাণৰকো ৰেরহচ্চানিগোত্তায ব্রাহ্মণিযা পটিস্সুত্ৰা যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘অধিৰাসেতু কির, ভৰং, উদাযি, অম্হাকং আচরিযভরিযায ৰেরহচ্চানিগোত্তায ব্রাহ্মণিযা স্ৰাতনায ভত্ত’’ন্তি. অধিৰাসেসি খো আযস্মা উদাযী তুণ্হীভাৰেন. অথ খো আযস্মা উদাযী তস্সা রত্তিযা অচ্চযেন পুব্বণ্হসমযং নিৰাসেত্ৰা পত্তচীৰরমাদায যেন ৰেরহচ্চানিগোত্তায ব্রাহ্মণিযা নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো ৰেরহচ্চানিগোত্তা ব্রাহ্মণী আযস্মন্তং উদাযিং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি. অথ খো ৰেরহচ্চানিগোত্তা ব্রাহ্মণী আযস্মন্তং উদাযিং ভুত্তাৰিং ওনীতপত্তপাণিং পাদুকা আরোহিত্ৰা উচ্চে আসনে নিসীদিত্ৰা সীসং ওগুণ্ঠিত্ৰা আযস্মন্তং উদাযিং এতদৰোচ – ‘‘ভণ, সমণ, ধম্ম’’ন্তি. ‘‘ভৰিস্সতি, ভগিনি, সমযো’’তি ৰত্ৰা উট্ঠাযাসনা পক্কমি [পক্কামি (স্যা. কং. পী.)].

দুতিযম্পি খো সো মাণৰকো যেনাযস্মা উদাযী তেনুপসঙ্কমি; উপসঙ্কমিত্ৰা আযস্মতা উদাযিনা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো তং মাণৰকং আযস্মা উদাযী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. দুতিযম্পি খো সো মাণৰকো আযস্মতা উদাযিনা ধম্মিযা কথায সন্দস্সিতো সমাদপিতো সমুত্তেজিতো ¶ সম্পহংসিতো উট্ঠাযাসনা যেন ৰেরহচ্চানিগোত্তা ব্রাহ্মণী তেনুপসঙ্কমি; উপসঙ্কমিত্ৰা ¶ ৰেরহচ্চানিগোত্তং ব্রাহ্মণিং এতদৰোচ – ‘‘যগ্ঘে, ভোতি, জানেয্যাসি! সমণো উদাযী ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং ¶ , সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেতী’’তি.

‘‘এৰমেৰং পন ত্ৰং, মাণৰক, সমণস্স উদাযিস্স ৰণ্ণং ভাসসি. সমণো পনুদাযী ‘ভণ, সমণ, ধম্ম’ন্তি ৰুত্তো সমানো ‘ভৰিস্সতি, ভগিনি, সমযো’তি ৰত্ৰা উট্ঠাযাসনা পক্কন্তো’’তি. ‘‘তথা হি পন ত্ৰং, ভোতি, পাদুকা আরোহিত্ৰা উচ্চে আসনে নিসীদিত্ৰা সীসং ওগুণ্ঠিত্ৰা এতদৰোচ – ‘ভণ, সমণ, ধম্ম’ন্তি. ধম্মগরুনো হি তে ভৰন্তো ধম্মগারৰা’’তি. ‘‘তেন হি ত্ৰং, মাণৰক, মম ৰচনেন সমণং উদাযিং নিমন্তেহি স্ৰাতনায ভত্তেনা’’তি. ‘‘এৰং, ভোতী’’তি খো সো মাণৰকো ৰেরহচ্চানিগোত্তায ব্রাহ্মণিযা পটিস্সুত্ৰা যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘অধিৰাসেতু কির ¶ ভৰং উদাযী অম্হাকং আচরিযভরিযায ৰেরহচ্চানিগোত্তায ব্রাহ্মণিযা স্ৰাতনায ভত্ত’’ন্তি. অধিৰাসেসি খো আযস্মা উদাযী তুণ্হীভাৰেন.

অথ খো আযস্মা উদাযী তস্সা রত্তিযা অচ্চযেন পুব্বণ্হসমযং নিৰাসেত্ৰা পত্তচীৰরমাদায যেন ৰেরহচ্চানিগোত্তায ব্রাহ্মণিযা নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো ৰেরহচ্চানিগোত্তা ব্রাহ্মণী আযস্মন্তং ¶ উদাযিং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি. অথ খো ৰেরহচ্চানিগোত্তা ব্রাহ্মণী আযস্মন্তং উদাযিং ভুত্তাৰিং ওনীতপত্তপাণিং পাদুকা ওরোহিত্ৰা নীচে আসনে নিসীদিত্ৰা সীসং ৰিৰরিত্ৰা আযস্মন্তং উদাযিং এতদৰোচ – ‘‘কিস্মিং নু খো, ভন্তে, সতি অরহন্তো সুখদুক্খং পঞ্ঞপেন্তি, কিস্মিং অসতি অরহন্তো সুখদুক্খং ন পঞ্ঞপেন্তী’’তি?

‘‘চক্খুস্মিং খো, ভগিনি, সতি অরহন্তো সুখদুক্খং পঞ্ঞপেন্তি, চক্খুস্মিং অসতি অরহন্তো সুখদুক্খং ¶ ন পঞ্ঞপেন্তি…পে… জিৰ্হায সতি অরহন্তো সুখদুক্খং পঞ্ঞপেন্তি, জিৰ্হায অসতি অরহন্তো সুখদুক্খং ন পঞ্ঞপেন্তি…পে…. মনস্মিং সতি অরহন্তো সুখদুক্খং পঞ্ঞপেন্তি, মনস্মিং অসতি অরহন্তো সুখদুক্খং ন পঞ্ঞপেন্তী’’তি.

এৰং ৰুত্তে, ৰেরহচ্চানিগোত্তা ব্রাহ্মণী আযস্মন্তং উদাযিং এতদৰোচ – ‘‘অভিক্কন্তং, ভন্তে; অভিক্কন্তং, ভন্তে! সেয্যথাপি, ভন্তে, নিক্কুজ্জিতং ৰা উক্কুজ্জেয্য ¶ , পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য, চক্খুমন্তো রূপানি দক্খন্তীতি; এৰমেৰং অয্যেন উদাযিনা অনেকপরিযাযেন ধম্মো পকাসিতো. এসাহং, অয্য উদাযি, তং ভগৰন্তং সরণং গচ্ছামি, ধম্মঞ্চ, ভিক্খুসঙ্ঘঞ্চ. উপাসিকং মং অয্যো উদাযী ধারেতু অজ্জতগ্গে পাণুপেতং সরণং গত’’ন্তি. দসমং.

গহপতিৰগ্গো তেরসমো.

তস্সুদ্দানং –

ৰেসালী ¶ ৰজ্জি নাল়ন্দা, ভারদ্ৰাজ সোণো চ ঘোসিতো;

হালিদ্দিকো নকুলপিতা, লোহিচ্চো ৰেরহচ্চানীতি.

১৪. দেৰদহৰগ্গো

১. দেৰদহসুত্তং

১৩৪. একং ¶ ¶ সমযং ভগৰা সক্কেসু ৰিহরতি দেৰদহং নাম সক্যানং নিগমো. তত্র খো ভগৰা ভিক্খূ আমন্তেসি – ‘‘নাহং, ভিক্খৰে, সব্বেসংযেৰ ভিক্খূনং ছসু ফস্সাযতনেসু অপ্পমাদেন করণীযন্তি ৰদামি, ন চ পনাহং, ভিক্খৰে, সব্বেসংযেৰ ভিক্খূনং ছসু ফস্সাযতনেসু ¶ নাপ্পমাদেন করণীযন্তি ৰদামি. যে তে, ভিক্খৰে, ভিক্খূ অরহন্তো খীণাসৰা ৰুসিতৰন্তো কতকরণীযা ওহিতভারা অনুপ্পত্তসদত্থা পরিক্খীণভৰসংযোজনা সম্মদঞ্ঞা ৰিমুত্তা, তেসাহং, ভিক্খৰে, ভিক্খূনং ছসু ফস্সাযতনেসু নাপ্পমাদেন করণীযন্তি ৰদামি. তং কিস্স হেতু? কতং তেসং অপ্পমাদেন, অভব্বা তে পমজ্জিতুং. যে চ খো তে, ভিক্খৰে, ভিক্খূ সেক্খা [সেখা (সী. স্যা. কং. পী. ক.)] অপ্পত্তমানসা অনুত্তরং যোগক্খেমং পত্থযমানা ৰিহরন্তি, তেসাহং, ভিক্খৰে, ভিক্খূনং ছসু ফস্সাযতনেসু অপ্পমাদেন করণীযন্তি ৰদামি. তং কিস্স হেতু? সন্তি, ভিক্খৰে, চক্খুৰিঞ্ঞেয্যা রূপা মনোরমাপি, অমনোরমাপি. ত্যাস্স ফুস্স ফুস্স চিত্তং ন পরিযাদায তিট্ঠন্তি. চেতসো অপরিযাদানা আরদ্ধং হোতি ৰীরিযং অসল্লীনং, উপট্ঠিতা সতি অসম্মুট্ঠা [অপম্মুট্ঠা (সী.), অপ্পমুট্ঠা (স্যা. কং.)], পস্সদ্ধো কাযো অসারদ্ধো, সমাহিতং চিত্তং একগ্গং. ইমং খ্ৰাহং, ভিক্খৰে, অপ্পমাদফলং ¶ সম্পস্সমানো তেসং ভিক্খূনং ছসু ¶ ফস্সাযতনেসু অপ্পমাদেন করণীযন্তি ৰদামি…পে… সন্তি, ভিক্খৰে, মনোৰিঞ্ঞেয্যা ধম্মা মনোরমাপি অমনোরমাপি. ত্যাস্স ফুস্স ফুস্স চিত্তং ন পরিযাদায তিট্ঠন্তি. চেতসো অপরিযাদানা আরদ্ধং হোতি ৰীরিযং অসল্লীনং, উপট্ঠিতা সতি অসম্মুট্ঠা, পস্সদ্ধো কাযো অসারদ্ধো, সমাহিতং চিত্তং একগ্গং. ইমং খ্ৰাহং, ভিক্খৰে, অপ্পমাদফলং সম্পস্সমানো তেসং ভিক্খূনং ছসু [ছস্সু (সী.)] ফস্সাযতনেসু অপ্পমাদেন করণীযন্তি ৰদামী’’তি. পঠমং.

২. খণসুত্তং

১৩৫. ‘‘লাভা ¶ ৰো, ভিক্খৰে, সুলদ্ধং ৰো, ভিক্খৰে, খণো ৰো পটিলদ্ধো ব্রহ্মচরিযৰাসায. দিট্ঠা মযা, ভিক্খৰে, ছফস্সাযতনিকা নাম নিরযা. তত্থ যং কিঞ্চি চক্খুনা ¶ রূপং পস্সতি অনিট্ঠরূপংযেৰ পস্সতি, নো ইট্ঠরূপং; অকন্তরূপংযেৰ পস্সতি, নো কন্তরূপং; অমনাপরূপংযেৰ পস্সতি, নো মনাপরূপং. যং কিঞ্চি সোতেন সদ্দং সুণাতি…পে… যং কিঞ্চি ঘানেন গন্ধং ঘাযতি…পে… যং কিঞ্চি জিৰ্হায রসং সাযতি…পে… যং কিঞ্চি কাযেন ফোট্ঠব্বং ফুসতি…পে… যং ¶ কিঞ্চি মনসা ধম্মং ৰিজানাতি অনিট্ঠরূপংযেৰ ৰিজানাতি, নো ইট্ঠরূপং; অকন্তরূপংযেৰ ৰিজানাতি, নো কন্তরূপং; অমনাপরূপংযেৰ ৰিজানাতি, নো মনাপরূপং. লাভা ৰো, ভিক্খৰে, সুলদ্ধং ৰো, ভিক্খৰে, খণো ৰো পটিলদ্ধো ব্রহ্মচরিযৰাসায. দিট্ঠা মযা, ভিক্খৰে, ছফস্সাযতনিকা নাম সগ্গা. তত্থ যং কিঞ্চি চক্খুনা রূপং পস্সতি ইট্ঠরূপংযেৰ পস্সতি, নো অনিট্ঠরূপং; কন্তরূপংযেৰ পস্সতি, নো অকন্তরূপং; মনাপরূপংযেৰ পস্সতি, নো অমনাপরূপং…পে… যং কিঞ্চি জিৰ্হায রসং সাযতি…পে… যং কিঞ্চি মনসা ধম্মং ৰিজানাতি ইট্ঠরূপংযেৰ ৰিজানাতি, নো অনিট্ঠরূপং; কন্তরূপংযেৰ ৰিজানাতি, নো অকন্তরূপং; মনাপরূপংযেৰ ৰিজানাতি, নো অমনাপরূপং. লাভা ৰো, ভিক্খৰে, সুলদ্ধং ৰো, ভিক্খৰে, খণো ৰো পটিলদ্ধো ব্রহ্মচরিযৰাসাযা’’তি. দুতিযং.

৩. পঠমরূপারামসুত্তং

১৩৬. ‘‘রূপারামা, ভিক্খৰে, দেৰমনুস্সা রূপরতা রূপসম্মুদিতা. রূপৰিপরিণামৰিরাগনিরোধা দুক্খা, ভিক্খৰে, দেৰমনুস্সা ৰিহরন্তি. সদ্দারামা, ভিক্খৰে ¶ , দেৰমনুস্সা সদ্দরতা সদ্দসম্মুদিতা. সদ্দৰিপরিণামৰিরাগনিরোধা দুক্খা, ভিক্খৰে, দেৰমনুস্সা ৰিহরন্তি. গন্ধারামা… রসারামা… ফোট্ঠব্বারামা… ধম্মারামা, ভিক্খৰে, দেৰমনুস্সা ¶ ধম্মরতা ধম্মসম্মুদিতা. ধম্মৰিপরিণামৰিরাগনিরোধা দুক্খা, ভিক্খৰে, দেৰমনুস্সা ৰিহরন্তি. তথাগতো চ খো, ভিক্খৰে, অরহং সম্মাসম্বুদ্ধো ¶ রূপানং সমুদযঞ্চ অত্থঙ্গমঞ্চ অস্সাদঞ্চ আদীনৰং চ নিস্সরণঞ্চ যথাভূতং ৰিদিত্ৰা ন রূপারামো ন রূপরতো ন রূপসম্মুদিতো. রূপৰিপরিণামৰিরাগনিরোধা সুখো, ভিক্খৰে, তথাগতো ৰিহরতি. সদ্দানং… গন্ধানং… রসানং… ফোট্ঠব্বানং… ধম্মানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা ন ধম্মারামো, ন ধম্মরতো, ন ধম্মসম্মুদিতো. ধম্মৰিপরিণামৰিরাগনিরোধা সুখো, ভিক্খৰে, তথাগতো ৰিহরতি’’. ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘রূপা ¶ সদ্দা রসা গন্ধা, ফস্সা ধম্মা চ কেৰলা;

ইট্ঠা কন্তা মনাপা চ, যাৰতত্থীতি ৰুচ্চতি.

‘‘সদেৰকস্স লোকস্স, এতে ৰো সুখসম্মতা;

যত্থ চেতে নিরুজ্ঝন্তি, তং তেসং দুক্খসম্মতং.

‘‘সুখং [সুখন্তি (সী.)] দিট্ঠমরিযেভি, সক্কাযস্স নিরোধনং;

পচ্চনীকমিদং হোতি, সব্বলোকেন পস্সতং.

‘‘যং পরে সুখতো আহু, তদরিযা আহু দুক্খতো;

যং পরে দুক্খতো আহু, তদরিযা সুখতো ৰিদূ.

‘‘পস্স ধম্মং দুরাজানং, সম্মূল়্হেত্থ অৰিদ্দসু;

নিৰুতানং তমো হোতি, অন্ধকারো অপস্সতং.

‘‘সতঞ্চ ¶ ৰিৰটং হোতি, আলোকো পস্সতামি;

সন্তিকে ন ৰিজানন্তি, মগ্গা [মগা (সী.)] ধম্মস্স অকোৰিদা.

‘‘ভৰরাগপরেতেভি ¶ , ভৰরাগানুসারীভি [ভৰসোতানুসারিভি (স্যা. কং. পী.), ভৰসোতানুসারিহি (সী.)];

মারধেয্যানুপন্নেহি, নাযং ধম্মো সুসম্বুধো.

‘‘কো ¶ নু অঞ্ঞত্র মরিযেভি, পদং সম্বুদ্ধুমরহতি;

যং পদং সম্মদঞ্ঞায, পরিনিব্বন্তি অনাসৰা’’তি. ততিযং;

৪. দুতিযরূপারামসুত্তং

১৩৭. ‘‘রূপারামা, ভিক্খৰে, দেৰমনুস্সা রূপরতা রূপসম্মুদিতা. রূপৰিপরিণামৰিরাগনিরোধা দুক্খা, ভিক্খৰে, দেৰমনুস্সা ৰিহরন্তি. সদ্দারামা… গন্ধারামা… রসারামা ¶ … ফোট্ঠব্বারামা… ধম্মারামা, ভিক্খৰে, দেৰমনুস্সা ধম্মরতা ধম্মসম্মুদিতা. ধম্মৰিপরিণামৰিরাগনিরোধা দুক্খা, ভিক্খৰে, দেৰমনুস্সা ৰিহরন্তি. তথাগতো চ, ভিক্খৰে, অরহং সম্মাসম্বুদ্ধো রূপানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা ন রূপারামো ন রূপরতো ন রূপসম্মুদিতো. রূপৰিপরিণামৰিরাগনিরোধা সুখো, ভিক্খৰে, তথাগতো ৰিহরতি. সদ্দানং… গন্ধানং… রসানং… ফোট্ঠব্বানং… ধম্মানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং ৰিদিত্ৰা ন ধম্মারামো ন ধম্মরতো ন ধম্মসম্মুদিতো. ধম্মৰিপরিণামৰিরাগনিরোধা সুখো, ভিক্খৰে, তথাগতো ৰিহরতী’’তি. চতুত্থং.

৫. পঠমনতুম্হাকংসুত্তং

১৩৮. ‘‘যং, ভিক্খৰে, ন তুম্হাকং তং পজহথ. তং ৰো পহীনং হিতায সুখায ভৰিস্সতি. কিঞ্চ, ভিক্খৰে, ন তুম্হাকং? চক্খু, ভিক্খৰে, ন তুম্হাকং; তং পজহথ. তং ৰো পহীনং হিতায সুখায ভৰিস্সতি…পে… ¶ জিৰ্হা ন তুম্হাকং ¶ ; তং পজহথ. সা ৰো পহীনা হিতায সুখায ভৰিস্সতি…পে… মনো ন তুম্হাকং; তং পজহথ. সো ৰো পহীনো হিতায সুখায ভৰিস্সতি. সেয্যথাপি, ভিক্খৰে, যং ইমস্মিং জেতৰনে তিণকট্ঠসাখাপলাসং তং জনো হরেয্য ৰা ডহেয্য ৰা যথাপচ্চযং ৰা করেয্য, অপি নু তুম্হাকং এৰমস্স – ‘অম্হে জনো হরতি ৰা ডহতি ৰা যথাপচ্চযং ৰা করোতী’’’তি? ‘‘নো হেতং, ভন্তে’’. ‘‘তং কিস্স হেতু’’? ‘‘ন হি নো এতং, ভন্তে, অত্তা ৰা অত্তনিযং ৰা’’তি. ‘‘এৰমেৰ খো, ভিক্খৰে, চক্খু ন তুম্হাকং; তং পজহথ. তং ৰো পহীনং হিতায সুখায ভৰিস্সতি…পে… জিৰ্হা ন তুম্হাকং; তং পজহথ. সা ৰো পহীনা হিতায সুখায ভৰিস্সতি…পে… মনো ন তুম্হাকং ¶ ; তং পজহথ. সো ৰো পহীনো হিতায সুখায ভৰিস্সতী’’তি. পঞ্চমং.

৬. দুতিযনতুম্হাকংসুত্তং

১৩৯. ‘‘যং, ভিক্খৰে, ন তুম্হাকং, তং পজহথ. তং ৰো পহীনং হিতায সুখায ভৰিস্সতি ¶ . কিঞ্চ, ভিক্খৰে, ন তুম্হাকং? রূপা, ভিক্খৰে, ন তুম্হাকং; তে পজহথ. তে ৰো পহীনা হিতায সুখায ভৰিস্সন্তি. সদ্দা… গন্ধা… রসা… ফোট্ঠব্বা… ধম্মা ¶ ন তুম্হাকং; তে পজহথ. তে ৰো পহীনা হিতায সুখায ভৰিস্সন্তি. সেয্যথাপি, ভিক্খৰে, যং ইমস্মিং জেতৰনে…পে… এৰমেৰ খো, ভিক্খৰে, রূপা ন তুম্হাকং; তে পজহথ. তে ৰো পহীনা হিতায সুখায ভৰিস্সন্তী’’তি. ছট্ঠং.

৭. অজ্ঝত্তানিচ্চহেতুসুত্তং

১৪০. ‘‘চক্খুং, ভিক্খৰে, অনিচ্চং. যোপি হেতু, যোপি পচ্চযো চক্খুস্স উপ্পাদায, সোপি অনিচ্চো. অনিচ্চসম্ভূতং, ভিক্খৰে, চক্খু কুতো নিচ্চং ভৰিস্সতি…পে… ¶ জিৰ্হা অনিচ্চা. যোপি হেতু, যোপি পচ্চযো জিৰ্হায উপ্পাদায সোপি অনিচ্চো. অনিচ্চসম্ভূতা, ভিক্খৰে, জিৰ্হা কুতো নিচ্চা ভৰিস্সতি…পে… মনো অনিচ্চো. যোপি, ভিক্খৰে, হেতু যোপি পচ্চযো মনস্স উপ্পাদায, সোপি অনিচ্চো. অনিচ্চসম্ভূতো, ভিক্খৰে, মনো কুতো নিচ্চো ভৰিস্সতি! এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি…পে… জিৰ্হাযপি নিব্বিন্দতি…পে… নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. সত্তমং.

৮. অজ্ঝত্তদুক্খহেতুসুত্তং

১৪১. ‘‘চক্খুং, ভিক্খৰে, দুক্খং. যোপি হেতু যোপি পচ্চযো চক্খুস্স উপ্পাদায, সোপি দুক্খো. দুক্খসম্ভূতং, ভিক্খৰে, চক্খু কুতো সুখং ভৰিস্সতি…পে… জিৰ্হা দুক্খা. যোপি হেতু, যোপি পচ্চযো জিৰ্হায উপ্পাদায, সোপি দুক্খো. দুক্খসম্ভূতা, ভিক্খৰে, জিৰ্হা কুতো সুখা ভৰিস্সতি…পে… মনো দুক্খো. যোপি হেতু যোপি পচ্চযো মনস্স উপ্পাদায, সোপি দুক্খো. দুক্খসম্ভূতো, ভিক্খৰে, মনো কুতো সুখো ভৰিস্সতি! এৰং পস্সং…পে… ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. অট্ঠমং.

৯. অজ্ঝত্তানত্তহেতুসুত্তং

১৪২. ‘‘চক্খুং ¶ ¶ ¶ , ভিক্খৰে, অনত্তা. যোপি হেতু, যোপি পচ্চযো চক্খুস্স উপ্পাদায, সোপি অনত্তা. অনত্তসম্ভূতং, ভিক্খৰে, চক্খু কুতো অত্তা ভৰিস্সতি…পে… জিৰ্হা অনত্তা. যোপি হেতু যোপি পচ্চযো জিৰ্হায উপ্পাদায, সোপি অনত্তা. অনত্তসম্ভূতা, ভিক্খৰে, জিৰ্হা কুতো অত্তা ভৰিস্সতি…পে… মনো অনত্তা. যোপি হেতু যোপি পচ্চযো মনস্স উপ্পাদায ¶ , সোপি অনত্তা. অনত্তসম্ভূতো, ভিক্খৰে, মনো কুতো অত্তা ভৰিস্সতি! এৰং পস্সং…পে… ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. নৰমং.

১০. বাহিরানিচ্চহেতুসুত্তং

১৪৩. ‘‘রূপা, ভিক্খৰে, অনিচ্চা. যোপি হেতু, যোপি পচ্চযো রূপানং উপ্পাদায, সোপি অনিচ্চো. অনিচ্চসম্ভূতা, ভিক্খৰে, রূপা কুতো নিচ্চা ভৰিস্সন্তি! সদ্দা… গন্ধা… রসা… ফোট্ঠব্বা… ধম্মা অনিচ্চা. যোপি হেতু, যোপি পচ্চযো ধম্মানং উপ্পাদায, সোপি অনিচ্চো. অনিচ্চসম্ভূতা, ভিক্খৰে, ধম্মা কুতো নিচ্চা ভৰিস্সন্তি! এৰং পস্সং…পে… ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. দসমং.

১১. বাহিরদুক্খহেতুসুত্তং

১৪৪. ‘‘রূপা, ভিক্খৰে, দুক্খা. যোপি হেতু, যোপি পচ্চযো রূপানং উপ্পাদায, সোপি দুক্খো. দুক্খসম্ভূতা, ভিক্খৰে, রূপা কুতো সুখা ভৰিস্সন্তি! সদ্দা… গন্ধা… রসা… ফোট্ঠব্বা… ধম্মা দুক্খা. যোপি হেতু, যোপি পচ্চযো ধম্মানং উপ্পাদায, সোপি দুক্খো. দুক্খসম্ভূতা, ভিক্খৰে, ধম্মা কুতো সুখা ভৰিস্সন্তি! এৰং পস্সং…পে… ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. একাদসমং.

১২. বাহিরানত্তহেতুসুত্তং

১৪৫. ‘‘রূপা ¶ ¶ , ভিক্খৰে, অনত্তা. যোপি হেতু, যোপি পচ্চযো রূপানং উপ্পাদায, সোপি অনত্তা. অনত্তসম্ভূতা, ভিক্খৰে, রূপা কুতো অত্তা ভৰিস্সন্তি! সদ্দা… গন্ধা… রসা… ফোট্ঠব্বা… ধম্মা অনত্তা. যোপি হেতু, যোপি পচ্চযো ধম্মানং উপ্পাদায, সোপি অনত্তা. অনত্তসম্ভূতা, ভিক্খৰে, ধম্মা ¶ কুতো অত্তা ভৰিস্সন্তি! এৰং পস্সং ¶ , ভিক্খৰে, সুতৰা অরিযসাৰকো রূপেসুপি নিব্বিন্দতি, সদ্দেসুপি… গন্ধেসুপি… রসেসুপি… ফোট্ঠব্বেসুপি… ধম্মেসুপি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. দ্ৰাদসমং.

দেৰদহৰগ্গো চুদ্দসমো.

তস্সুদ্দানং –

দেৰদহো খণো রূপা, দ্ৰে নতুম্হাকমেৰ চ;

হেতুনাপি তযো ৰুত্তা, দুৰে অজ্ঝত্তবাহিরাতি.

১৫. নৰপুরাণৰগ্গো

১. কম্মনিরোধসুত্তং

১৪৬. ‘‘নৰপুরাণানি ¶ , ভিক্খৰে, কম্মানি দেসেস্সামি কম্মনিরোধং কম্মনিরোধগামিনিঞ্চ পটিপদং. তং সুণাথ, সাধুকং মনসি করোথ; ভাসিস্সামীতি. কতমঞ্চ, ভিক্খৰে, পুরাণকম্মং? চক্খু, ভিক্খৰে, পুরাণকম্মং অভিসঙ্খতং অভিসঞ্চেতযিতং ৰেদনিযং দট্ঠব্বং…পে… জিৰ্হা পুরাণকম্মা অভিসঙ্খতা অভিসঞ্চেতযিতা ৰেদনিযা দট্ঠব্বা…পে… মনো পুরাণকম্মো অভিসঙ্খতো অভিসঞ্চেতযিতো ৰেদনিযো দট্ঠব্বো. ইদং ৰুচ্চতি, ভিক্খৰে, পুরাণকম্মং. কতমঞ্চ, ভিক্খৰে, নৰকম্মং? যং খো, ভিক্খৰে, এতরহি ¶ কম্মং করোতি কাযেন ৰাচায মনসা, ইদং ৰুচ্চতি, ভিক্খৰে, নৰকম্মং. কতমো চ, ভিক্খৰে, কম্মনিরোধো? যো খো, ভিক্খৰে, কাযকম্মৰচীকম্মমনোকম্মস্স নিরোধা ৰিমুত্তিং ¶ ফুসতি, অযং ৰুচ্চতি, ভিক্খৰে, কম্মনিরোধো. কতমা চ, ভিক্খৰে, কম্মনিরোধগামিনী পটিপদা? অযমেৰ অরিযো অট্ঠঙ্গিকো মগ্গো, সেয্যথিদং – সম্মাদিট্ঠি, সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি – অযং ৰুচ্চতি, ভিক্খৰে, কম্মনিরোধগামিনী পটিপদা. ইতি খো, ভিক্খৰে, দেসিতং মযা পুরাণকম্মং, দেসিতং ¶ নৰকম্মং, দেসিতো কম্মনিরোধো, দেসিতা কম্মনিরোধগামিনী পটিপদা. যং ¶ খো, ভিক্খৰে, সত্থারা করণীযং সাৰকানং হিতেসিনা অনুকম্পকেন অনুকম্পং উপাদায, কতং ৰো তং মযা. এতানি, ভিক্খৰে, রুক্খমূলানি, এতানি সুঞ্ঞাগারানি. ঝাযথ, ভিক্খৰে, মা পমাদত্থ; মা পচ্ছাৰিপ্পটিসারিনো অহুৰত্থ. অযং ৰো অম্হাকং অনুসাসনী’’তি. পঠমং.

২. অনিচ্চনিব্বানসপ্পাযসুত্তং

১৪৭. ‘‘নিব্বানসপ্পাযং ৰো, ভিক্খৰে, পটিপদং দেসেস্সামি. তং সুণাথ…পে… কতমা চ সা, ভিক্খৰে, নিব্বানসপ্পাযা পটিপদা? ইধ, ভিক্খৰে, ভিক্খু চক্খুং অনিচ্চন্তি পস্সতি, রূপা অনিচ্চাতি পস্সতি, চক্খুৰিঞ্ঞাণং অনিচ্চন্তি পস্সতি, চক্খুসম্ফস্সো অনিচ্চোতি পস্সতি. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চন্তি পস্সতি…পে… জিৰ্হা অনিচ্চাতি পস্সতি, রসা অনিচ্চাতি পস্সতি, জিৰ্হাৰিঞ্ঞাণং অনিচ্চন্তি পস্সতি, জিৰ্হাসম্ফস্সো অনিচ্চোতি পস্সতি ¶ , যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চন্তি পস্সতি…পে… মনো অনিচ্চোতি পস্সতি, ধম্মা অনিচ্চাতি পস্সতি, মনোৰিঞ্ঞাণং অনিচ্চন্তি পস্সতি, মনোসম্ফস্সো অনিচ্চোতি পস্সতি, যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চন্তি পস্সতি. অযং খো সা, ভিক্খৰে, নিব্বানসপ্পাযা পটিপদা’’তি. দুতিযং.

৩. দুক্খনিব্বানসপ্পাযসুত্তং

১৪৮. ‘‘নিব্বানসপ্পাযং ¶ ¶ ৰো, ভিক্খৰে, পটিপদং দেসেস্সামি. তং সুণাথ…পে… কতমা চ সা, ভিক্খৰে, নিব্বানসপ্পাযা পটিপদা? ইধ, ভিক্খৰে, চক্খুং দুক্খন্তি পস্সতি, রূপা দুক্খাতি পস্সতি, চক্খুৰিঞ্ঞাণং দুক্খন্তি পস্সতি, চক্খুসম্ফস্সো দুক্খোতি পস্সতি, যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি দুক্খন্তি পস্সতি…পে… জিৰ্হা দুক্খাতি পস্সতি…পে… মনো দুক্খোতি পস্সতি, ধম্মা দুক্খাতি পস্সতি, মনোৰিঞ্ঞাণং দুক্খন্তি পস্সতি, মনোসম্ফস্সো দুক্খোতি পস্সতি, যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি ¶ দুক্খন্তি পস্সতি. অযং খো সা, ভিক্খৰে, নিব্বানসপ্পাযা পটিপদা’’তি. ততিযং.

৪. অনত্তনিব্বানসপ্পাযসুত্তং

১৪৯. ‘‘নিব্বানসপ্পাযং ৰো, ভিক্খৰে, পটিপদং দেসেস্সামি. তং সুণাথ…পে… কতমা চ সা, ভিক্খৰে, নিব্বানসপ্পাযা পটিপদা? ইধ, ভিক্খৰে, ভিক্খু চক্খুং অনত্তাতি পস্সতি, রূপা অনত্তাতি পস্সতি, চক্খুৰিঞ্ঞাণং অনত্তাতি পস্সতি, চক্খুসম্ফস্সো অনত্তাতি পস্সতি, যম্পিদং চক্খুসম্ফস্সপচ্চযা ¶ উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনত্তাতি পস্সতি…পে… মনো অনত্তাতি পস্সতি, ধম্মা অনত্তাতি পস্সতি, মনোৰিঞ্ঞাণং অনত্তাতি পস্সতি, মনোসম্ফস্সো অনত্তাতি পস্সতি, যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ¶ ৰা দুক্খং ৰা অদুক্খমসুখং ৰা তম্পি অনত্তাতি পস্সতি. অযং খো সা, ভিক্খৰে, নিব্বানসপ্পাযা পটিপদা’’তি. চতুত্থং.

৫. নিব্বানসপ্পাযপটিপদাসুত্তং

১৫০. ‘‘নিব্বানসপ্পাযং ৰো, ভিক্খৰে, পটিপদং দেসেস্সামি. তং সুণাথ…পে… কতমা চ সা, ভিক্খৰে, নিব্বানসপ্পাযা পটিপদা? তং কিং মঞ্ঞথ, ভিক্খৰে, চক্খু নিচ্চং ৰা অনিচ্চং ৰা’’তি?

‘‘অনিচ্চং ¶ , ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘রূপা নিচ্চা ৰা অনিচ্চা ৰা’’তি?

‘‘অনিচ্চা, ভন্তে’’…পে….

‘‘চক্খুৰিঞ্ঞাণং… চক্খুসম্ফস্সো…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি নিচ্চং ৰা অনিচ্চং ৰা’’তি?

‘‘অনিচ্চং, ভন্তে’’.

‘‘যং পনানিচ্চং দুক্খং ৰা তং সুখং ৰা’’তি?

‘‘দুক্খং, ভন্তে’’.

‘‘যং পনানিচ্চং দুক্খং ৰিপরিণামধম্মং, কল্লং নু তং সমনুপস্সিতুং – ‘এতং মম, এসোহমস্মি, এসো মে অত্তা’’’তি?

‘‘নো হেতং, ভন্তে’’.

‘‘এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি ¶ . নিব্বিন্দং ৰিরজ্জতি; ৰিরাগা ৰিমুচ্চতি ¶ …পে… নাপরং ইত্থত্তাযাতি পজানাতি. অযং খো সা, ভিক্খৰে, নিব্বানসপ্পাযা পটিপদা’’তি ¶ . পঞ্চমং.

৬. অন্তেৰাসিকসুত্তং

১৫১. ‘‘অনন্তেৰাসিকমিদং ¶ , ভিক্খৰে, ব্রহ্মচরিযং ৰুস্সতি অনাচরিযকং. সন্তেৰাসিকো, ভিক্খৰে, ভিক্খু সাচরিযকো দুক্খং ন ফাসু [ফাসুং (সী. পী.)] ৰিহরতি. অনন্তেৰাসিকো, ভিক্খৰে, ভিক্খু অনাচরিযকো সুখং ফাসু ৰিহরতি. কথঞ্চ, ভিক্খু, সন্তেৰাসিকো সাচরিযকো দুক্খং ন ফাসু ৰিহরতি? ইধ, ভিক্খৰে, ভিক্খুনো চক্খুনা রূপং দিস্ৰা উপ্পজ্জন্তি পাপকা অকুসলা ধম্মা সরসঙ্কপ্পা সংযোজনিযা. ত্যাস্স অন্তো ৰসন্তি, অন্তস্স ৰসন্তি পাপকা অকুসলা ধম্মাতি. তস্মা সন্তেৰাসিকোতি ৰুচ্চতি. তে নং সমুদাচরন্তি, সমুদাচরন্তি নং পাপকা অকুসলা ধম্মাতি. তস্মা সাচরিযকোতি ৰুচ্চতি…পে….

‘‘পুন চপরং, ভিক্খৰে, ভিক্খুনো জিৰ্হায রসং সাযিত্ৰা উপ্পজ্জন্তি পাপকা অকুসলা ধম্মা সরসঙ্কপ্পা সংযোজনিযা. ত্যাস্স অন্তো ৰসন্তি, অন্তস্স ৰসন্তি পাপকা অকুসলা ধম্মাতি. তস্মা সন্তেৰাসিকোতি ৰুচ্চতি. তে নং সমুদাচরন্তি, সমুদাচরন্তি নং পাপকা অকুসলা ধম্মাতি. তস্মা সাচরিযকোতি ৰুচ্চতি…পে….

‘‘পুন চপরং, ভিক্খৰে, ভিক্খুনো মনসা ধম্মং ৰিঞ্ঞায উপ্পজ্জন্তি পাপকা অকুসলা ধম্মা সরসঙ্কপ্পা সংযোজনিযা. ত্যাস্স অন্তো ৰসন্তি, অন্তস্স ৰসন্তি ¶ পাপকা অকুসলা ধম্মাতি. তস্মা সন্তেৰাসিকোতি ৰুচ্চতি. তে নং সমুদাচরন্তি, সমুদাচরন্তি নং পাপকা অকুসলা ধম্মাতি. তস্মা সাচরিযকোতি ৰুচ্চতি. এৰং খো ¶ , ভিক্খৰে, ভিক্খু সন্তেৰাসিকো সাচরিযকো দুক্খং, ন ফাসু ৰিহরতি.

‘‘কথঞ্চ, ভিক্খৰে, ভিক্খু অনন্তেৰাসিকো অনাচরিযকো সুখং ফাসু ৰিহরতি? ইধ, ভিক্খৰে, ভিক্খুনো চক্খুনা রূপং দিস্ৰা ন উপ্পজ্জন্তি পাপকা অকুসলা ধম্মা সরসঙ্কপ্পা সংযোজনিযা. ত্যাস্স ন অন্তো ৰসন্তি, নাস্স অন্তো ৰসন্তি পাপকা অকুসলা ধম্মাতি ¶ . তস্মা অনন্তেৰাসিকোতি ৰুচ্চতি. তে নং ন সমুদাচরন্তি, ন সমুদাচরন্তি নং পাপকা অকুসলা ধম্মাতি. তস্মা অনাচরিযকোতি ৰুচ্চতি…পে….

‘‘পুন চপরং, ভিক্খৰে, ভিক্খুনো জিৰ্হায রসং সাযিত্ৰা ন উপ্পজ্জন্তি পাপকা অকুসলা ধম্মা সরসঙ্কপ্পা সংযোজনিযা. ত্যাস্স ন অন্তো ৰসন্তি, নাস্স ¶ অন্তো ৰসন্তি পাপকা অকুসলা ধম্মাতি. তস্মা অনন্তেৰাসিকোতি ৰুচ্চতি. তে নং ন সমুদাচরন্তি, ন সমুদাচরন্তি নং পাপকা অকুসলা ধম্মাতি. তস্মা অনাচরিযকোতি ৰুচ্চতি…পে….

‘‘পুন চপরং, ভিক্খৰে, ভিক্খুনো মনসা ধম্মং ৰিঞ্ঞায ন উপ্পজ্জন্তি পাপকা অকুসলা ধম্মা সরসঙ্কপ্পা সংযোজনিযা. ত্যাস্স ন অন্তো ৰসন্তি, নাস্স অন্তো ৰসন্তি পাপকা অকুসলা ধম্মাতি. তস্মা অনন্তেৰাসিকোতি ৰুচ্চতি. তে নং ন সমুদাচরন্তি, ন সমুদাচরন্তি নং পাপকা অকুসলা ধম্মাতি. তস্মা অনাচরিযকোতি ৰুচ্চতি. এৰং খো, ভিক্খৰে, ভিক্খু অনন্তেৰাসিকো অনাচরিযকো সুখং ফাসু ৰিহরতি. অনন্তেৰাসিকমিদং, ভিক্খৰে, ব্রহ্মচরিযং ৰুস্সতি ¶ . অনাচরিযকং সন্তেৰাসিকো ¶ , ভিক্খৰে, ভিক্খু সাচরিযকো দুক্খং, ন ফাসু ৰিহরতি. অনন্তেৰাসিকো, ভিক্খৰে, ভিক্খু অনাচরিযকো সুখং ফাসু ৰিহরতী’’তি. ছট্ঠং.

৭. কিমত্থিযব্রহ্মচরিযসুত্তং

১৫২. ‘‘সচে ৰো, ভিক্খৰে, অঞ্ঞতিত্থিযা পরিব্বাজকা এৰং পুচ্ছেয্যুং – ‘কিমত্থিযং, আৰুসো, সমণে গোতমে ব্রহ্মচরিযং ৰুস্সতী’তি? এৰং পুট্ঠা তুম্হে, ভিক্খৰে, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ – ‘দুক্খস্স খো, আৰুসো, পরিঞ্ঞায ভগৰতি ব্রহ্মচরিযং ৰুস্সতী’তি. সচে পন ৰো, ভিক্খৰে, অঞ্ঞতিত্থিযা পরিব্বাজকা এৰং পুচ্ছেয্যুং – ‘কতমং পনাৰুসো, দুক্খং, যস্স পরিঞ্ঞায সমণে গোতমে ব্রহ্মচরিযং ৰুস্সতী’তি? এৰং পুট্ঠা তুম্হে, ভিক্খৰে, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ –

‘‘চক্খু খো, আৰুসো, দুক্খং; তস্স পরিঞ্ঞায ভগৰতি ব্রহ্মচরিযং ৰুস্সতি. রূপা দুক্খা ¶ ; তেসং পরিঞ্ঞায ভগৰতি ব্রহ্মচরিযং ৰুস্সতি. চক্খুৰিঞ্ঞাণং দুক্খং; তস্স পরিঞ্ঞায ভগৰতি ব্রহ্মচরিযং ৰুস্সতি. চক্খুসম্ফস্সো দুক্খো; তস্স পরিঞ্ঞায ভগৰতি ব্রহ্মচরিযং ৰুস্সতি. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি দুক্খং; তস্স পরিঞ্ঞায ভগৰতি ব্রহ্মচরিযং ৰুস্সতি…পে… জিৰ্হা দুক্খা… মনো দুক্খো; তস্স পরিঞ্ঞায ভগৰতি ব্রহ্মচরিযং ৰুস্সতি…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ¶ ৰা তম্পি দুক্খং; তস্স পরিঞ্ঞায ভগৰতি ব্রহ্মচরিযং ৰুস্সতি. ইদং খো, আৰুসো ¶ , দুক্খং; যস্স পরিঞ্ঞায ভগৰতি ব্রহ্মচরিযং ৰুস্সতী’তি. এৰং পুট্ঠা তুম্হে, ভিক্খৰে, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথা’’তি. সত্তমং.

৮. অত্থিনুখোপরিযাযসুত্তং

১৫৩. ‘‘অত্থি নু খো, ভিক্খৰে, পরিযাযো যং পরিযাযং আগম্ম ভিক্খু অঞ্ঞত্রেৰ সদ্ধায, অঞ্ঞত্র রুচিযা, অঞ্ঞত্র অনুস্সৰা, অঞ্ঞত্র আকারপরিৰিতক্কা, অঞ্ঞত্র দিট্ঠিনিজ্ঝানক্খন্তিযা ¶ অঞ্ঞং ব্যাকরেয্য – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি [পজানাতীতি (স্যা. কং. পী. ক.)]? ‘‘ভগৰংমূলকা নো, ভন্তে, ধম্মা, ভগৰংনেত্তিকা ভগৰংপটিসরণা. সাধু ৰত, ভন্তে, ভগৰন্তংযেৰ পটিভাতু এতস্স ভাসিতস্স অত্থো. ভগৰতো সুত্ৰা ভিক্খূ ধারেস্সন্তী’’তি. ‘‘তেন হি, ভিক্খৰে, সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ – ‘‘অত্থি, ভিক্খৰে, পরিযাযো যং পরিযাযং আগম্ম ভিক্খু অঞ্ঞত্রেৰ সদ্ধায, অঞ্ঞত্র রুচিযা, অঞ্ঞত্র অনুস্সৰা, অঞ্ঞত্র আকারপরিৰিতক্কা, অঞ্ঞত্র দিট্ঠিনিজ্ঝানক্খন্তিযা অঞ্ঞং ব্যাকরেয্য – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি.

‘‘কতমো চ, ভিক্খৰে, পরিযাযো, যং পরিযাযং আগম্ম ভিক্খু অঞ্ঞত্রেৰ সদ্ধায…পে… অঞ্ঞত্র দিট্ঠিনিজ্ঝানক্খন্তিযা অঞ্ঞং ¶ ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি? ইধ, ভিক্খৰে, ভিক্খু চক্খুনা রূপং দিস্ৰা সন্তং ৰা অজ্ঝত্তং রাগদোসমোহং, অত্থি মে অজ্ঝত্তং রাগদোসমোহোতি পজানাতি ¶ ; অসন্তং ৰা অজ্ঝত্তং রাগদোসমোহং, নত্থি মে অজ্ঝত্তং রাগদোসমোহোতি পজানাতি. যং তং, ভিক্খৰে, ভিক্খু চক্খুনা রূপং দিস্ৰা সন্তং ৰা অজ্ঝত্তং রাগদোসমোহং, অত্থি মে অজ্ঝত্তং রাগদোসমোহোতি পজানাতি; অসন্তং ৰা অজ্ঝত্তং রাগদোসমোহং, নত্থি মে অজ্ঝত্তং রাগদোসমোহোতি পজানাতি. অপি নুমে, ভিক্খৰে, ধম্মা সদ্ধায ৰা ৰেদিতব্বা, রুচিযা ৰা ৰেদিতব্বা, অনুস্সৰেন ৰা ৰেদিতব্বা, আকারপরিৰিতক্কেন ৰা ৰেদিতব্বা, দিট্ঠিনিজ্ঝানক্খন্তিযা ৰা ৰেদিতব্বা’’তি? ‘‘নো হেতং ¶ , ভন্তে’’. ‘‘ননুমে, ভিক্খৰে, ধম্মা পঞ্ঞায দিস্ৰা ৰেদিতব্বা’’তি? ‘‘এৰং, ভন্তে’’. ‘‘অযং খো, ভিক্খৰে, পরিযাযো যং পরিযাযং আগম্ম ভিক্খু অঞ্ঞত্রেৰ সদ্ধায, অঞ্ঞত্র রুচিযা, অঞ্ঞত্র অনুস্সৰা, অঞ্ঞত্র আকারপরিৰিতক্কা, অঞ্ঞত্র দিট্ঠিনিজ্ঝানক্খন্তিযা অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি…পে….

‘‘পুন চপরং, ভিক্খৰে, ভিক্খু জিৰ্হায রসং সাযিত্ৰা সন্তং ৰা অজ্ঝত্তং…পে… রাগদোসমোহোতি পজানাতি; অসন্তং ৰা অজ্ঝত্তং রাগদোসমোহং, নত্থি মে অজ্ঝত্তং রাগদোসমোহোতি পজানাতি ¶ . যং তং, ভিক্খৰে, জিৰ্হায রসং সাযিত্ৰা সন্তং ৰা অজ্ঝত্তং রাগদোসমোহং, অত্থি মে অজ্ঝত্তং রাগদোসমোহোতি পজানাতি; অসন্তং ৰা অজ্ঝত্তং রাগদোসমোহং, নত্থি মে অজ্ঝত্তং রাগদোসমোহোতি পজানাতি; অপি নুমে, ভিক্খৰে, ধম্মা সদ্ধায ৰা ৰেদিতব্বা, রুচিযা ৰা ৰেদিতব্বা, অনুস্সৰেন ৰা ৰেদিতব্বা, আকারপরিৰিতক্কেন ৰা ৰেদিতব্বা, দিট্ঠিনিজ্ঝানক্খন্তিযা ৰা ৰেদিতব্বা’’তি? ‘‘নো হেতং, ভন্তে’’. ‘‘ননুমে, ভিক্খৰে, ধম্মা পঞ্ঞায দিস্ৰা ৰেদিতব্বা’’তি? ‘‘এৰং, ভন্তে’’. ‘‘অযম্পি খো, ভিক্খৰে, পরিযাযো যং পরিযাযং আগম্ম ভিক্খু অঞ্ঞত্রেৰ সদ্ধায, অঞ্ঞত্র রুচিযা, অঞ্ঞত্র অনুস্সৰা, অঞ্ঞত্র আকারপরিৰিতক্কা, অঞ্ঞত্র দিট্ঠিনিজ্ঝানক্খন্তিযা অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি [পজানাতীতি (স্যা. কং. পী. ক.)] …পে….

‘‘পুন ¶ চপরং, ভিক্খৰে, ভিক্খু মনসা ধম্মং ৰিঞ্ঞায সন্তং ৰা অজ্ঝত্তং রাগদোসমোহং, অত্থি মে অজ্ঝত্তং রাগদোসমোহোতি পজানাতি; অসন্তং ৰা অজ্ঝত্তং রাগদোসমোহং, নত্থি মে অজ্ঝত্তং রাগদোসমোহোতি পজানাতি. যং তং, ভিক্খৰে, ভিক্খু মনসা ¶ ধম্মং ৰিঞ্ঞায সন্তং ৰা অজ্ঝত্তং রাগদোসমোহং, অত্থি মে অজ্ঝত্তং রাগদোসমোহোতি পজানাতি; অসন্তং ৰা অজ্ঝত্তং রাগদোসমোহং, নত্থি মে অজ্ঝত্তং রাগদোসমোহোতি পজানাতি; অপি নুমে, ভিক্খৰে, ধম্মা সদ্ধায ৰা ৰেদিতব্বা, রুচিযা ৰা ৰেদিতব্বা, অনুস্সৰেন ¶ ৰা ৰেদিতব্বা, আকারপরিৰিতক্কেন ৰা ৰেদিতব্বা, দিট্ঠিনিজ্ঝানক্খন্তিযা ৰা ৰেদিতব্বা’’তি? ‘‘নো হেতং, ভন্তে’’. ‘‘ননুমে, ভিক্খৰে, ধম্মা পঞ্ঞায দিস্ৰা ৰেদিতব্বা’’তি? ‘‘এৰং, ভন্তে’’. ‘‘অযম্পি খো, ভিক্খৰে, পরিযাযো যং পরিযাযং আগম্ম ভিক্খু ¶ অঞ্ঞত্রেৰ সদ্ধায, অঞ্ঞত্র রুচিযা, অঞ্ঞত্র অনুস্সৰা, অঞ্ঞত্র আকারপরিৰিতক্কা, অঞ্ঞত্র দিট্ঠিনিজ্ঝানক্খন্তিযা অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি. অট্ঠমং.

৯. ইন্দ্রিযসম্পন্নসুত্তং

১৫৪. অথ খো অঞ্ঞতরো ভিক্খু যেন ভগৰা তেনুপসঙ্কমি…পে… একমন্তং নিসিন্নো খো সো ভিক্খু ভগৰন্তং এতদৰোচ – ‘‘‘ইন্দ্রিযসম্পন্নো, ইন্দ্রিযসম্পন্নো’তি, ভন্তে, ৰুচ্চতি. কিত্তাৰতা নু খো, ভন্তে, ইন্দ্রিযসম্পন্নো হোতী’’তি?

‘‘চক্খুন্দ্রিযে চে, ভিক্খু, উদযব্বযানুপস্সী ৰিহরন্তো চক্খুন্দ্রিযে নিব্বিন্দতি…পে… জিৰ্হিন্দ্রিযে চে, ভিক্খু, উদযব্বযানুপস্সী ৰিহরন্তো জিৰ্হিন্দ্রিযে নিব্বিন্দতি…পে… মনিন্দ্রিযে চে, ভিক্খু, উদযব্বযানুপস্সী ৰিহরন্তো মনিন্দ্রিযে নিব্বিন্দতি. নিব্বিন্দং ৰিরজ্জতি…পে… ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি. এত্তাৰতা খো, ভিক্খু, ইন্দ্রিযসম্পন্নো হোতী’’তি. নৰমং.

১০. ধম্মকথিকপুচ্ছসুত্তং

১৫৫. অথ ¶ খো অঞ্ঞতরো ভিক্খু যেন ভগৰা তেনুপসঙ্কমি…পে… একমন্তং নিসিন্নো খো সো ভিক্খু ভগৰন্তং এতদৰোচ – ‘‘‘ধম্মকথিকো ¶ , ধম্মকথিকো’তি, ভন্তে, ৰুচ্চতি. কিত্তাৰতা নু খো, ভন্তে, ধম্মকথিকো হোতী’’তি?

‘‘চক্খুস্স ¶ চে, ভিক্খু নিব্বিদায ৰিরাগায নিরোধায ধম্মং দেসেতি, ‘ধম্মকথিকো ভিক্খূ’তি অলংৰচনায. চক্খুস্স চে, ভিক্খু, নিব্বিদায ৰিরাগায নিরোধায পটিপন্নো হোতি, ‘ধম্মানুধম্মপ্পটিপন্নো ভিক্খূ’তি অলংৰচনায. চক্খুস্স চে, ভিক্খু, নিব্বিদা ৰিরাগা নিরোধা অনুপাদাৰিমুত্তো হোতি, ‘দিট্ঠধম্মনিব্বানপ্পত্তো ভিক্খূ’তি অলংৰচনায…পে… জিৰ্হায চে, ভিক্খু, নিব্বিদায ৰিরাগায নিরোধায ধম্মং দেসেতি, ‘ধম্মকথিকো ভিক্খূ’তি অলংৰচনায…পে… মনস্স চে, ভিক্খু, নিব্বিদায ৰিরাগায নিরোধায ধম্মং দেসেতি, ‘ধম্মকথিকো ভিক্খূ’তি অলংৰচনায. মনস্স চে, ভিক্খু, নিব্বিদায ৰিরাগায নিরোধায পটিপন্নো হোতি, ‘ধম্মানুধম্মপ্পটিপন্নো ভিক্খূ’তি অলংৰচনায. মনস্স ¶ চে, ভিক্খু, নিব্বিদা ৰিরাগা নিরোধা অনুপাদাৰিমুত্তো হোতি, ‘দিট্ঠধম্মনিব্বানপ্পত্তো ভিক্খূ’তি অলংৰচনাযা’’তি. দসমং.

নৰপুরাণৰগ্গো পঞ্চদসমো.

তস্সুদ্দানং –

কম্মং চত্তারি সপ্পাযা, অনন্তেৰাসি কিমত্থিযা;

অত্থি নু খো পরিযাযো, ইন্দ্রিযকথিকেন চাতি.

সল়াযতনৰগ্গে ততিযপণ্ণাসকো সমত্তো.

তস্স ৰগ্গুদ্দানং –

যোগক্খেমি ¶ চ লোকো চ, গহপতি দেৰদহেন চ;

নৰপুরাণেন পণ্ণাসো, ততিযো তেন ৰুচ্চতীতি.

১৬. নন্দিক্খযৰগ্গো

১. অজ্ঝত্তনন্দিক্খযসুত্তং

১৫৬. ‘‘অনিচ্চংযেৰ ¶ ¶ , ভিক্খৰে, ভিক্খু চক্খুং অনিচ্চন্তি পস্সতি, সাস্স [সাযং (পী. ক.)] হোতি সম্মাদিট্ঠি ¶ . সম্মা পস্সং নিব্বিন্দতি. নন্দিক্খযা রাগক্খযো; রাগক্খযা নন্দিক্খযো. নন্দিরাগক্খযা চিত্তং সুৰিমুত্তন্তি ৰুচ্চতি…পে… অনিচ্চংযেৰ, ভিক্খৰে, ভিক্খু জিৰ্হং অনিচ্চন্তি পস্সতি, সাস্স হোতি সম্মাদিট্ঠি. সম্মা পস্সং নিব্বিন্দতি. নন্দিক্খযা রাগক্খযো; রাগক্খযা…পে… চিত্তং সুৰিমুত্তন্তি ৰুচ্চতি…পে… অনিচ্চংযেৰ, ভিক্খৰে, ভিক্খু মনং অনিচ্চন্তি পস্সতি, সাস্স হোতি সম্মাদিট্ঠি. সম্মা পস্সং নিব্বিন্দতি. নন্দিক্খযা রাগক্খযো; রাগক্খযা নন্দিক্খযো. নন্দিরাগক্খযা চিত্তং সুৰিমুত্তন্তি ৰুচ্চতী’’তি. পঠমং.

২. বাহিরনন্দিক্খযসুত্তং

১৫৭. ‘‘অনিচ্চেযেৰ, ভিক্খৰে, ভিক্খু রূপে অনিচ্চাতি পস্সতি, সাস্স হোতি সম্মাদিট্ঠি. সম্মা পস্সং নিব্বিন্দতি. নন্দিক্খযা রাগক্খযো; রাগক্খযা নন্দিক্খযো ¶ . নন্দিরাগক্খযা চিত্তং সুৰিমুত্তন্তি ৰুচ্চতি. অনিচ্চেযেৰ, ভিক্খৰে, ভিক্খু সদ্দে… গন্ধে… রসে… ফোট্ঠব্বে… ধম্মে অনিচ্চাতি পস্সতি, সাস্স হোতি সম্মাদিট্ঠি. সম্মা পস্সং নিব্বিন্দতি. নন্দিক্খযা রাগক্খযো; রাগক্খযা নন্দিক্খযো. নন্দিরাগক্খযা চিত্তং সুৰিমুত্তন্তি ৰুচ্চতী’’তি. দুতিযং.

৩. অজ্ঝত্তঅনিচ্চনন্দিক্খযসুত্তং

১৫৮. ‘‘চক্খুং, ভিক্খৰে, যোনিসো মনসি করোথ; চক্খানিচ্চতঞ্চ যথাভূতং ¶ সমনুপস্সথ. চক্খুং, ভিক্খৰে, ভিক্খু যোনিসো মনসিকরোন্তো, চক্খানিচ্চতঞ্চ যথাভূতং সমনুপস্সন্তো চক্খুস্মিম্পি নিব্বিন্দতি. নন্দিক্খযা রাগক্খযো; রাগক্খযা নন্দিক্খযো. নন্দিরাগক্খযা চিত্তং সুৰিমুত্তন্তি ৰুচ্চতি. সোতং ¶ , ভিক্খৰে, যোনিসো মনসি করোথ… ঘানং… জিৰ্হং, ভিক্খৰে, যোনিসো মনসি করোথ; জিৰ্হানিচ্চতঞ্চ যথাভূতং সমনুপস্সথ. জিৰ্হং, ভিক্খৰে, ভিক্খু যোনিসো মনসিকরোন্তো, জিৰ্হানিচ্চতঞ্চ যথাভূতং সমনুপস্সন্তো জিৰ্হাযপি নিব্বিন্দতি. নন্দিক্খযা রাগক্খযো; রাগক্খযা নন্দিক্খযো. নন্দিরাগক্খযা চিত্তং সুৰিমুত্তন্তি ৰুচ্চতি. কাযং… মনং, ভিক্খৰে, যোনিসো মনসি করোথ; মনানিচ্চতঞ্চ যথাভূতং সমনুপস্সথ. মনং, ভিক্খৰে, ভিক্খু যোনিসো মনসিকরোন্তো ¶ , মনানিচ্চতঞ্চ যথাভূতং সমনুপস্সন্তো মনস্মিম্পি নিব্বিন্দতি. নন্দিক্খযা রাগক্খযো; রাগক্খযা নন্দিক্খযো. নন্দিরাগক্খযা চিত্তং সুৰিমুত্তন্তি ৰুচ্চতী’’তি. ততিযং.

৪. বাহিরঅনিচ্চনন্দিক্খযসুত্তং

১৫৯. ‘‘রূপে, ভিক্খৰে, যোনিসো মনসি করোথ; রূপানিচ্চতঞ্চ যথাভূতং সমনুপস্সথ. রূপে, ভিক্খৰে, ভিক্খু যোনিসো মনসিকরোন্তো, রূপানিচ্চতঞ্চ যথাভূতং সমনুপস্সন্তো রূপেসুপি নিব্বিন্দতি. নন্দিক্খযা রাগক্খযো; রাগক্খযা নন্দিক্খযো. নন্দিরাগক্খযা চিত্তং সুৰিমুত্তন্তি ৰুচ্চতি. সদ্দে… গন্ধে… রসে… ফোট্ঠব্বে… ধম্মে, ভিক্খৰে, যোনিসো মনসি করোথ; ধম্মানিচ্চতঞ্চ যথাভূতং সমনুপস্সথ. ধম্মে, ভিক্খৰে, ভিক্খু যোনিসো মনসিকরোন্তো, ধম্মানিচ্চতঞ্চ যথাভূতং সমনুপস্সন্তো ধম্মেসুপি নিব্বিন্দতি. নন্দিক্খযা রাগক্খযো; রাগক্খযা নন্দিক্খযো ¶ . নন্দিরাগক্খযা চিত্তং সুৰিমুত্তন্তি ৰুচ্চতী’’তি. চতুত্থং.

৫. জীৰকম্বৰনসমাধিসুত্তং

১৬০. একং ¶ সমযং ভগৰা রাজগহে ৰিহরতি জীৰকম্বৰনে. তত্র খো ভগৰা ভিক্খূ আমন্তেসি – ‘‘ভিক্খৰো’’তি…পে… ‘‘সমাধিং, ভিক্খৰে, ভাৰেথ. সমাহিতস্স, ভিক্খৰে ¶ , ভিক্খুনো যথাভূতং ওক্খাযতি. কিঞ্চ যথাভূতং ওক্খাযতি? চক্খুং অনিচ্চন্তি যথাভূতং ওক্খাযতি, রূপা অনিচ্চাতি যথাভূতং ওক্খাযতি, চক্খুৰিঞ্ঞাণং অনিচ্চন্তি যথাভূতং ওক্খাযতি, চক্খুসম্ফস্সো অনিচ্চোতি যথাভূতং ওক্খাযতি, যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চন্তি যথাভূতং ওক্খাযতি…পে… জিৰ্হা অনিচ্চাতি যথাভূতং ওক্খাযতি…পে… মনো অনিচ্চোতি যথাভূতং ওক্খাযতি, ধম্মা অনিচ্চাতি যথাভূতং ওক্খাযতি…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চন্তি যথাভূতং ওক্খাযতি. সমাধিং, ভিক্খৰে, ভাৰেথ. সমাহিতস্স, ভিক্খৰে, ভিক্খুনো যথাভূতং ওক্খাযতী’’তি. পঞ্চমং.

৬. জীৰকম্বৰনপটিসল্লানসুত্তং

১৬১. একং ¶ সমযং ভগৰা রাজগহে ৰিহরতি জীৰকম্বৰনে. তত্র খো ভগৰা ভিক্খূ আমন্তেসি…পে… ‘‘পটিসল্লানে, ভিক্খৰে, যোগমাপজ্জথ. পটিসল্লীনস্স, ভিক্খৰে, ভিক্খুনো যথাভূতং ওক্খাযতি. কিঞ্চ যথাভূতং ওক্খাযতি? চক্খুং অনিচ্চন্তি যথাভূতং ওক্খাযতি, রূপা অনিচ্চাতি যথাভূতং ওক্খাযতি, চক্খুৰিঞ্ঞাণং অনিচ্চন্তি ¶ যথাভূতং ওক্খাযতি, চক্খুসম্ফস্সো অনিচ্চোতি যথাভূতং ওক্খাযতি, যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চন্তি যথাভূতং ওক্খাযতি…পে… মনো অনিচ্চোতি যথাভূতং ওক্খাযতি, ধম্মা… মনোৰিঞ্ঞাণং… মনোসম্ফস্সো… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা ¶ অদুক্খমসুখং ৰা তম্পি অনিচ্চন্তি যথাভূতং ওক্খাযতি. পটিসল্লানে ভিক্খৰে, যোগমাপজ্জথ. পটিসল্লীনস্স, ভিক্খৰে, ভিক্খুনো যথাভূতং ওক্খাযতী’’তি. ছট্ঠং.

৭. কোট্ঠিকঅনিচ্চসুত্তং

১৬২. অথ খো আযস্মা মহাকোট্ঠিকো যেন ভগৰা তেনুপসঙ্কমি…পে… একমন্তং নিসিন্নো খো আযস্মা কোট্ঠিকো ভগৰন্তং এতদৰোচ ¶ – ‘‘সাধু মে, ভন্তে, ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি.

‘‘যং খো, কোট্ঠিক, অনিচ্চং তত্র তে ছন্দো পহাতব্বো. কিঞ্চ, কোট্ঠিক, অনিচ্চং? চক্খু খো, কোট্ঠিক, অনিচ্চং; তত্র তে ছন্দো পহাতব্বো. রূপা অনিচ্চা; তত্র তে ছন্দো পহাতব্বো. চক্খুৰিঞ্ঞাণং অনিচ্চং; তত্র তে ছন্দো পহাতব্বো. চক্খুসম্ফস্সো অনিচ্চো; তত্র তে ছন্দো পহাতব্বো. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং; তত্র তে ছন্দো পহাতব্বো…পে… জিৰ্হা অনিচ্চা; তত্র তে ছন্দো পহাতব্বো. রসা ¶ অনিচ্চা; তত্র তে ছন্দো পহাতব্বো. জিৰ্হাৰিঞ্ঞাণং অনিচ্চং; তত্র তে ছন্দো পহাতব্বো. জিৰ্হাসম্ফস্সো অনিচ্চো; তত্র তে ছন্দো পহাতব্বো. যম্পিদং ¶ জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং; তত্র তে ছন্দো পহাতব্বো…পে… মনো অনিচ্চো; তত্র তে ছন্দো পহাতব্বো. ধম্মা অনিচ্চা; তত্র তে ছন্দো পহাতব্বো. মনোৰিঞ্ঞাণং অনিচ্চং; তত্র তে ছন্দো পহাতব্বো. মনোসম্ফস্সো অনিচ্চো; তত্র তে ছন্দো পহাতব্বো. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং; তত্র তে ছন্দো পহাতব্বো. যং খো, কোট্ঠিক, অনিচ্চং তত্র তে ছন্দো পহাতব্বো’’তি. সত্তমং.

৮. কোট্ঠিকদুক্খসুত্তং

১৬৩. অথ ¶ খো আযস্মা মহাকোট্ঠিকো…পে… ভগৰন্তং এতদৰোচ – ‘‘সাধু মে, ভন্তে…পে… ৰিহরেয্য’’ন্তি. ‘‘যং খো, কোট্ঠিক, দুক্খং তত্র তে ছন্দো পহাতব্বো. কিঞ্চ, কোট্ঠিক, দুক্খং? চক্খু খো, কোট্ঠিক, দুক্খং; তত্র তে ছন্দো পহাতব্বো. রূপা দুক্খা; তত্র তে ছন্দো পহাতব্বো. চক্খুৰিঞ্ঞাণং দুক্খং; তত্র তে ছন্দো পহাতব্বো. চক্খুসম্ফস্সো দুক্খো; তত্র তে ছন্দো পহাতব্বো. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি দুক্খং; তত্র তে ছন্দো পহাতব্বো…পে… জিৰ্হা দুক্খা; তত্র তে ছন্দো পহাতব্বো…পে… মনো দুক্খো; তত্র তে ছন্দো পহাতব্বো. ধম্মা দুক্খা; তত্র তে ছন্দো পহাতব্বো ¶ . মনোৰিঞ্ঞাণং দুক্খং ¶ ; তত্র তে ছন্দো পহাতব্বো. মনোসম্ফস্সো দুক্খো; তত্র তে ছন্দো পহাতব্বো. যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি দুক্খং; তত্র তে ছন্দো পহাতব্বো. যং খো, কোট্ঠিক, দুক্খং তত্র তে ছন্দো পহাতব্বো’’তি. অট্ঠমং.

৯. কোট্ঠিকঅনত্তসুত্তং

১৬৪. একমন্তং…পে… ৰিহরেয্যন্তি. ‘‘যো খো, কোট্ঠিক, অনত্তা তত্র তে ছন্দো পহাতব্বো. কো চ, কোট্ঠিক, অনত্তা? চক্খু খো, কোট্ঠিক, অনত্তা; তত্র তে ছন্দো পহাতব্বো. রূপা অনত্তা; তত্র তে ছন্দো পহাতব্বো. চক্খুৰিঞ্ঞাণং অনত্তা; তত্র তে ছন্দো পহাতব্বো. চক্খুসম্ফস্সো অনত্তা; তত্র তে ছন্দো পহাতব্বো. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনত্তা; তত্র তে ছন্দো পহাতব্বো ¶ …পে… জিৰ্হা অনত্তা; তত্র তে ছন্দো পহাতব্বো…পে… মনো অনত্তা; তত্র তে ছন্দো পহাতব্বো. ধম্মা অনত্তা; তত্র তে ছন্দো পহাতব্বো. মনোৰিঞ্ঞাণং… মনোসম্ফস্সো… যম্পিদং মনোসম্ফস্সপচ্চযা ¶ উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনত্তা; তত্র তে ছন্দো পহাতব্বো. যো খো, কোট্ঠিক, অনত্তা, তত্র তে ছন্দো পহাতব্বো’’তি. নৰমং.

১০. মিচ্ছাদিট্ঠিপহানসুত্তং

১৬৫. অথ খো অঞ্ঞতরো ভিক্খু যেন ভগৰা তেনুপসঙ্কমি…পে… একমন্তং ¶ নিসিন্নো সো ভিক্খু ভগৰন্তং এতদৰোচ – ‘‘কথং নু খো, ভন্তে, জানতো কথং পস্সতো মিচ্ছাদিট্ঠি পহীযতী’’তি?

‘‘চক্খুং খো, ভিক্খু, অনিচ্চতো জানতো পস্সতো মিচ্ছাদিট্ঠি পহীযতি. রূপে অনিচ্চতো জানতো পস্সতো মিচ্ছাদিট্ঠি পহীযতি. চক্খুৰিঞ্ঞাণং অনিচ্চতো জানতো পস্সতো মিচ্ছাদিট্ঠি পহীযতি. চক্খুসম্ফস্সং অনিচ্চতো জানতো পস্সতো মিচ্ছাদিট্ঠি পহীযতি…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চতো জানতো পস্সতো মিচ্ছাদিট্ঠি পহীযতি. এৰং খো, ভিক্খু, জানতো এৰং পস্সতো মিচ্ছাদিট্ঠি পহীযতী’’তি. দসমং.

১১. সক্কাযদিট্ঠিপহানসুত্তং

১৬৬. অথ ¶ ¶ খো অঞ্ঞতরো ভিক্খু…পে… এতদৰোচ – ‘‘কথং নু খো, ভন্তে, জানতো কথং পস্সতো সক্কাযদিট্ঠি পহীযতী’’তি? ‘‘চক্খুং খো, ভিক্খু, দুক্খতো জানতো পস্সতো সক্কাযদিট্ঠি পহীযতি. রূপে দুক্খতো জানতো পস্সতো সক্কাযদিট্ঠি পহীযতি. চক্খুৰিঞ্ঞাণং দুক্খতো জানতো পস্সতো সক্কাযদিট্ঠি পহীযতি. চক্খুসম্ফস্সং দুক্খতো জানতো পস্সতো সক্কাযদিট্ঠি পহীযতি…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি দুক্খতো জানতো পস্সতো সক্কাযদিট্ঠি পহীযতি. এৰং খো, ভিক্খু, জানতো এৰং পস্সতো সক্কাযদিট্ঠি পহীযতী’’তি. একাদসমং.

১২. অত্তানুদিট্ঠিপহানসুত্তং

১৬৭. অথ খো অঞ্ঞতরো ভিক্খু…পে… এতদৰোচ ¶ – ‘‘কথং নু খো ¶ , ভন্তে, জানতো কথং পস্সতো অত্তানুদিট্ঠি পহীযতী’’তি? ‘‘চক্খুং খো, ভিক্খু, অনত্ততো জানতো পস্সতো অত্তানুদিট্ঠি পহীযতি. রূপে অনত্ততো জানতো পস্সতো অত্তানুদিট্ঠি পহীযতি. চক্খুৰিঞ্ঞাণং অনত্ততো জানতো পস্সতো অত্তানুদিট্ঠি পহীযতি. চক্খুসম্ফস্সং অনত্ততো জানতো পস্সতো অত্তানুদিট্ঠি পহীযতি. যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনত্ততো জানতো পস্সতো অত্তানুদিট্ঠি পহীযতি…পে… জিৰ্হং অনত্ততো জানতো পস্সতো অত্তানুদিট্ঠি পহীযতি…পে… মনং অনত্ততো ¶ জানতো পস্সতো অত্তানুদিট্ঠি পহীযতি. ধম্মে… মনোৰিঞ্ঞাণং… মনোসম্ফস্সং… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনত্ততো জানতো পস্সতো অত্তানুদিট্ঠি পহীযতী’’তি. দ্ৰাদসমং.

নন্দিক্খযৰগ্গো সোল়সমো.

তস্সুদ্দানং –

নন্দিক্খযেন চত্তারো, জীৰকম্বৰনে দুৰে;

কোট্ঠিকেন তযো ৰুত্তা, মিচ্ছা সক্কায অত্তনোতি.

১৭. সট্ঠিপেয্যালৰগ্গো

১. অজ্ঝত্তঅনিচ্চছন্দসুত্তং

১৬৮. ‘‘যং ¶ ¶ , ভিক্খৰে, অনিচ্চং, তত্র ৰো ছন্দো পহাতব্বো. কিঞ্চ, ভিক্খৰে, অনিচ্চং? চক্খু ¶ , ভিক্খৰে, অনিচ্চং; তত্র ৰো ছন্দো পহাতব্বো…পে… জিৰ্হা অনিচ্চা; তত্র ৰো ছন্দো পহাতব্বো…পে… মনো অনিচ্চো; তত্র ৰো ছন্দো পহাতব্বো. যং, ভিক্খৰে, অনিচ্চং, তত্র ৰো ছন্দো পহাতব্বো’’তি.

২. অজ্ঝত্তঅনিচ্চরাগসুত্তং

১৬৯. ‘‘যং ¶ , ভিক্খৰে, অনিচ্চং, তত্র ৰো রাগো পহাতব্বো. কিঞ্চ, ভিক্খৰে, অনিচ্চং? চক্খু, ভিক্খৰে, অনিচ্চং; তত্র ৰো রাগো পহাতব্বো…পে… জিৰ্হা অনিচ্চা; তত্র ৰো রাগো পহাতব্বো…পে… মনো অনিচ্চো; তত্র ৰো রাগো পহাতব্বো. যং, ভিক্খৰে, অনিচ্চং, তত্র ৰো রাগো পহাতব্বো’’তি.

৩. অজ্ঝত্তঅনিচ্চছন্দরাগসুত্তং

১৭০. ‘‘যং, ভিক্খৰে, অনিচ্চং, তত্র ৰো ছন্দরাগো পহাতব্বো. কিঞ্চ, ভিক্খৰে, অনিচ্চং? চক্খু, ভিক্খৰে, অনিচ্চং; তত্র ৰো ছন্দরাগো পহাতব্বো…পে… জিৰ্হা অনিচ্চা; তত্র ৰো ছন্দরাগো পহাতব্বো…পে… মনো অনিচ্চো; তত্র ৰো ছন্দরাগো পহাতব্বো. যং, ভিক্খৰে, অনিচ্চং, তত্র ৰো ছন্দরাগো পহাতব্বো’’তি.

৪-৬. দুক্খছন্দাদিসুত্তং

১৭১-১৭৩. ‘‘যং, ভিক্খৰে, দুক্খং, তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. কিঞ্চ, ভিক্খৰে, দুক্খং? চক্খু, ভিক্খৰে, দুক্খং; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো…পে… জিৰ্হা দুক্খা…পে… ¶ মনো দুক্খো; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. যং ¶ , ভিক্খৰে, দুক্খং তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো’’তি.

৭-৯. অনত্তছন্দাদিসুত্তং

১৭৪-১৭৬. ‘‘যো ¶ , ভিক্খৰে, অনত্তা, তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. কো চ, ভিক্খৰে, অনত্তা? চক্খু, ভিক্খৰে, অনত্তা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো…পে… জিৰ্হা অনত্তা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো…পে… মনো অনত্তা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. যো, ভিক্খৰে, অনত্তা তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো’’তি.

১০-১২. বাহিরানিচ্চছন্দাদিসুত্তং

১৭৭-১৭৯. ‘‘যং, ভিক্খৰে, অনিচ্চং, তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. কিঞ্চ, ভিক্খৰে, অনিচ্চং? রূপা, ভিক্খৰে, অনিচ্চা; তত্র ৰো ছন্দো ¶ পহাতব্বো, রাগো পহাতব্বো, ছন্দরাগো পহাতব্বো. সদ্দা অনিচ্চা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. গন্ধা অনিচ্চা; তত্র ৰো ছন্দো পহাতব্বো, রাগো ¶ পহাতব্বো, ছন্দরাগো পহাতব্বো. রসা অনিচ্চা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. ফোট্ঠব্বা অনিচ্চা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. ধম্মা অনিচ্চা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. যং, ভিক্খৰে, অনিচ্চং তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো’’তি.

১৩-১৫. বাহিরদুক্খছন্দাদিসুত্তং

১৮০-১৮২. ‘‘যং, ভিক্খৰে, দুক্খং, তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. কিঞ্চ, ভিক্খৰে, দুক্খং? রূপা, ভিক্খৰে, দুক্খা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. সদ্দা… গন্ধা… রসা… ফোট্ঠব্বা… ধম্মা দুক্খা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. যং, ভিক্খৰে, দুক্খং, তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো’’তি.

১৬-১৮. বাহিরানত্তছন্দাদিসুত্তং

১৮৩-১৮৫. ‘‘যো ¶ ¶ , ভিক্খৰে, অনত্তা, তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. কো চ, ভিক্খৰে, অনত্তা? রূপা, ভিক্খৰে, অনত্তা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. সদ্দা… গন্ধা… রসা… ফোট্ঠব্বা… ধম্মা অনত্তা; তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো. যো, ভিক্খৰে, অনত্তা ¶ তত্র ৰো ছন্দো পহাতব্বো, রাগো পহাতব্বো, ছন্দরাগো পহাতব্বো’’তি.

১৯. অজ্ঝত্তাতীতানিচ্চসুত্তং

১৮৬. ‘‘চক্খু ¶ , ভিক্খৰে, অনিচ্চং অতীতং…পে… জিৰ্হা অনিচ্চা অতীতা…পে… মনো অনিচ্চো অতীতো. এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি…পে… জিৰ্হাযপি নিব্বিন্দতি…পে… মনস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি.

২০. অজ্ঝত্তানাগতানিচ্চসুত্তং

১৮৭. ‘‘চক্খু, ভিক্খৰে, অনিচ্চং অনাগতং…পে… জিৰ্হা অনিচ্চা অনাগতা…পে… মনো অনিচ্চো অনাগতো. এৰং পস্সং…পে… নাপরং ইত্থত্তাযাতি পজানাতী’’তি.

২১. অজ্ঝত্তপচ্চুপ্পন্নানিচ্চসুত্তং

১৮৮. ‘‘চক্খু, ভিক্খৰে, অনিচ্চং পচ্চুপ্পন্নং…পে… জিৰ্হা অনিচ্চা পচ্চুপ্পন্না…পে… মনো অনিচ্চো পচ্চুপ্পন্নো. এৰং পস্সং…পে… নাপরং ইত্থত্তাযাতি পজানাতী’’তি.

২২-২৪. অজ্ঝত্তাতীতাদিদুক্খসুত্তং

১৮৯-১৯১. ‘‘চক্খু ¶ , ভিক্খৰে, দুক্খং অতীতং অনাগতং পচ্চুপ্পন্নং…পে… জিৰ্হা দুক্খা অতীতা অনাগতা পচ্চুপ্পন্না…পে… মনো দুক্খো অতীতো অনাগতো পচ্চুপ্পন্নো. এৰং পস্সং ¶ , ভিক্খৰে…পে… নাপরং ইত্থত্তাযাতি পজানাতী’’তি.

২৫-২৭. অজ্ঝত্তাতীতাদিঅনত্তসুত্তং

১৯২-১৯৪. ‘‘চক্খু ¶ , ভিক্খৰে, অনত্তা অতীতং অনাগতং পচ্চুপ্পন্নং…পে… জিৰ্হা অনত্তা…পে… মনো অনত্তা অতীতো অনাগতো পচ্চুপ্পন্নো ¶ . এৰং পস্সং…পে… নাপরং ইত্থত্তাযাতি পজানাতী’’তি.

২৮-৩০. বাহিরাতীতাদিঅনিচ্চসুত্তং

১৯৫-১৯৭. ‘‘রূপা, ভিক্খৰে, অনিচ্চা অতীতা অনাগতা পচ্চুপ্পন্না. সদ্দা… গন্ধা… রসা… ফোট্ঠব্বা… ধম্মা অনিচ্চা অতীতা অনাগতা পচ্চুপ্পন্না. এৰং পস্সং…পে… নাপরং ইত্থত্তাযাতি পজানাতী’’তি.

৩১-৩৩. বাহিরাতীতাদিদুক্খসুত্তং

১৯৮-২০০. ‘‘রূপা, ভিক্খৰে, দুক্খা অতীতা অনাগতা পচ্চুপ্পন্না. সদ্দা… গন্ধা… রসা… ফোট্ঠব্বা… ধম্মা দুক্খা অতীতা অনাগতা পচ্চুপ্পন্না. এৰং পস্সং…পে… নাপরং ইত্থত্তাযাতি পজানাতী’’তি.

৩৪-৩৬. বাহিরাতীতাদিঅনত্তসুত্তং

২০১-২০৩. ‘‘রূপা ¶ , ভিক্খৰে, অনত্তা অতীতা অনাগতা পচ্চুপ্পন্না. সদ্দা… গন্ধা… রসা… ফোট্ঠব্বা… ধম্মা অনত্তা অতীতা অনাগতা পচ্চুপ্পন্না. এৰং পস্সং…পে… নাপরং ইত্থত্তাযাতি পজানাতী’’তি.

৩৭. অজ্ঝত্তাতীতযদনিচ্চসুত্তং

২০৪. ‘‘চক্খু, ভিক্খৰে, অনিচ্চং অতীতং. যদনিচ্চং, তং ¶ দুক্খং. যং দুক্খং, তদনত্তা. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং…পে… জিৰ্হা অনিচ্চা অতীতা. যদনিচ্চং, তং দুক্খং. যং দুক্খং, তদনত্তা. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং…পে… মনো অনিচ্চো অতীতো. যদনিচ্চং, তং দুক্খং. যং দুক্খং, তদনত্তা. যদনত্তা, তং ‘নেতং মম, নেসোহমস্মি ¶ , ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… নাপরং ইত্থত্তাযাতি পজানাতী’’তি.

৩৮. অজ্ঝত্তানাগতযদনিচ্চসুত্তং

২০৫. ‘‘চক্খু ¶ , ভিক্খৰে, অনিচ্চং অনাগতং. যদনিচ্চং, তং দুক্খং. যং দুক্খং, তদনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং…পে… জিৰ্হা অনিচ্চা অনাগতা. যদনিচ্চং, তং দুক্খং. যং দুক্খং, তদনত্তা. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং…পে… মনো অনিচ্চো অনাগতো. যদনিচ্চং, তং দুক্খং. যং দুক্খং, তদনত্তা ¶ . যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং, ভিক্খৰে…পে… নাপরং ইত্থত্তাযাতি পজানাতী’’তি.

৩৯. অজ্ঝত্তপচ্চুপ্পন্নযদনিচ্চসুত্তং

২০৬. ‘‘চক্খু, ভিক্খৰে, অনিচ্চং পচ্চুপ্পন্নং. যদনিচ্চং, তং দুক্খং. যং দুক্খং, তদনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং…পে… জিৰ্হা অনিচ্চা পচ্চুপ্পন্না. যদনিচ্চং, তং দুক্খং. যং দুক্খং, তদনত্তা. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং…পে… মনো অনিচ্চো পচ্চুপ্পন্নো. যদনিচ্চং তং দুক্খং. যং দুক্খং তদনত্তা. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… নাপরং ইত্থত্তাযাতি পজানাতী’’তি.

৪০-৪২. অজ্ঝত্তাতীতাদিযংদুক্খসুত্তং

২০৭-২০৯. ‘‘চক্খু ¶ , ভিক্খৰে, দুক্খং অতীতং অনাগতং পচ্চুপ্পন্নং. যং ¶ দুক্খং, তদনত্তা. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং…পে… জিৰ্হা দুক্খা…পে… মনো দুক্খো অতীতো অনাগতো পচ্চুপ্পন্নো. যং দুক্খং, তদনত্তা. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… ¶ নাপরং ইত্থত্তাযাতি পজানাতী’’তি.

৪৩-৪৫. অজ্ঝত্তাতীতাদিযদনত্তসুত্তং

২১০-২১২. ‘‘চক্খু, ভিক্খৰে, অনত্তা অতীতং অনাগতং পচ্চুপ্পন্নং. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং ¶ যথাভূতং সম্মপ্পঞ্ঞায দট্ঠব্বং…পে… জিৰ্হা অনত্তা…পে… মনো অনত্তা অতীতো অনাগতো পচ্চুপ্পন্নো. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… নাপরং ইত্থত্তাযাতি পজানাতী’’তি.

৪৬-৪৮. বাহিরাতীতাদিযদনিচ্চসুত্তং

২১৩-২১৫. ‘‘রূপা, ভিক্খৰে, অনিচ্চা অতীতা অনাগতা পচ্চুপ্পন্না. যদনিচ্চং, তং দুক্খং. যং দুক্খং, তদনত্তা. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. সদ্দা… গন্ধা… রসা… ফোট্ঠব্বা… ধম্মা অনিচ্চা অতীতা অনাগতা পচ্চুপ্পন্না. যদনিচ্চং তং দুক্খং. যং দুক্খং তদনত্তা. যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… নাপরং ¶ ইত্থত্তাযাতি পজানাতী’’তি.

৪৯-৫১. বাহিরাতীতাদিযংদুক্খসুত্তং

২১৬-২১৮. ‘‘রূপা ¶ , ভিক্খৰে, দুক্খা অতীতা অনাগতা পচ্চুপ্পন্না. যং দুক্খং, তদনত্তা ¶ . যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. সদ্দা… গন্ধা… রসা… ফোট্ঠব্বা… ধম্মা দুক্খা অতীতা অনাগতা পচ্চুপ্পন্না. যং দুক্খং, তদনত্তা. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… নাপরং ইত্থত্তাযাতি পজানাতী’’তি.

৫২-৫৪. বাহিরাতীতাদিযদনত্তসুত্তং

২১৯-২২১. ‘‘রূপা, ভিক্খৰে, অনত্তা অতীতা অনাগতা পচ্চুপ্পন্না. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. সদ্দা… গন্ধা… রসা… ফোট্ঠব্বা… ধম্মা অনত্তা অতীতা অনাগতা পচ্চুপ্পন্না. যদনত্তা, তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং. এৰং পস্সং…পে… নাপরং ইত্থত্তাযাতি পজানাতী’’তি.

৫৫. অজ্ঝত্তাযতনঅনিচ্চসুত্তং

২২২. ‘‘চক্খু ¶ , ভিক্খৰে, অনিচ্চং…পে… জিৰ্হা অনিচ্চা…পে… মনো অনিচ্চো. এৰং পস্সং…পে… নাপরং ইত্থত্তাযাতি পজানাতী’’তি.

৫৬. অজ্ঝত্তাযতনদুক্খসুত্তং

২২৩. ‘‘চক্খু, ভিক্খৰে, দুক্খং…পে… জিৰ্হা দুক্খা…পে… মনো দুক্খো. এৰং পস্সং…পে… ¶ নাপরং ইত্থত্তাযাতি পজানাতী’’তি.

৫৭. অজ্ঝত্তাযতনঅনত্তসুত্তং

২২৪. ‘‘চক্খু ¶ ¶ , ভিক্খৰে, অনত্তা…পে… জিৰ্হা অনত্তা…পে… মনো অনত্তা. এৰং পস্সং…পে… নাপরং ইত্থত্তাযাতি পজানাতী’’তি.

৫৮. বাহিরাযতনঅনিচ্চসুত্তং

২২৫. ‘‘রূপা, ভিক্খৰে, অনিচ্চা. সদ্দা… গন্ধা… রসা… ফোট্ঠব্বা… ধম্মা অনিচ্চা. এৰং পস্সং…পে… নাপরং ইত্থত্তাযাতি পজানাতী’’তি.

৫৯. বাহিরাযতনদুক্খসুত্তং

২২৬. ‘‘রূপা, ভিক্খৰে, দুক্খা. সদ্দা… গন্ধা… রসা… ফোট্ঠব্বা… ধম্মা দুক্খা. এৰং পস্সং…পে… নাপরং ইত্থত্তাযাতি পজানাতী’’তি.

৬০. বাহিরাযতনঅনত্তসুত্তং

২২৭. ‘‘রূপা ¶ , ভিক্খৰে, অনত্তা. সদ্দা… গন্ধা… রসা… ফোট্ঠব্বা… ধম্মা অনত্তা. এৰং পস্সং…পে… নাপরং ইত্থত্তাযাতি পজানাতী’’তি.

সট্ঠিপেয্যালৰগ্গো সত্তরসমো.

তস্সুদ্দানং –

ছন্দেনট্ঠারস হোন্তি, অতীতেন চ দ্ৰে নৰ;

যদনিচ্চাট্ঠারস ৰুত্তা, তযো অজ্ঝত্তবাহিরা;

পেয্যালো সট্ঠিকো ৰুত্তো, বুদ্ধেনাদিচ্চবন্ধুনাতি.

সুত্তন্তানি সট্ঠি.

১৮. সমুদ্দৰগ্গো

১. পঠমসমুদ্দসুত্তং

২২৮. ‘‘‘সমুদ্দো ¶ ¶ ¶ , সমুদ্দো’তি, ভিক্খৰে, অস্সুতৰা পুথুজ্জনো ভাসতি. নেসো, ভিক্খৰে, অরিযস্স ৰিনযে সমুদ্দো. মহা এসো, ভিক্খৰে, উদকরাসি মহাউদকণ্ণৰো. চক্খু, ভিক্খৰে, পুরিসস্স সমুদ্দো; তস্স রূপমযো ৰেগো. যো তং রূপমযং ৰেগং সহতি, অযং ৰুচ্চতি, ভিক্খৰে, অতরি চক্খুসমুদ্দং সঊমিং সাৰট্টং সগাহং সরক্খসং; তিণ্ণো পারঙ্গতো ¶ থলে তিট্ঠতি ব্রাহ্মণো…পে… জিৰ্হা, ভিক্খৰে, পুরিসস্স সমুদ্দো; তস্স রসমযো ৰেগো. যো তং রসমযং ৰেগং সহতি, অযং ৰুচ্চতি, ভিক্খৰে, অতরি জিৰ্হাসমুদ্দং সঊমিং সাৰট্টং সগাহং সরক্খসং; তিণ্ণো পারঙ্গতো থলে তিট্ঠতি ব্রাহ্মণো…পে… মনো, ভিক্খৰে, পুরিসস্স সমুদ্দো; তস্স ধম্মমযো ৰেগো. যো তং ধম্মমযং ৰেগং সহতি, অযং ৰুচ্চতি, ভিক্খৰে, অতরি মনোসমুদ্দং সঊমিং সাৰট্টং সগাহং সরক্খসং; তিণ্ণো পারঙ্গতো থলে তিট্ঠতি ব্রাহ্মণো’’তি. ইদমৰোচ…পে… সত্থা –

‘‘যো ইমং সমুদ্দং সগাহং সরক্খসং,

সঊমিং সাৰট্টং সভযং দুত্তরং অচ্চতরি;

স ৰেদগূ ৰুসিতব্রহ্মচরিযো,

লোকন্তগূ পারগতোতি ৰুচ্চতী’’তি. পঠমং;

২. দুতিযসমুদ্দসুত্তং

২২৯. ‘‘সমুদ্দো, সমুদ্দো’তি, ভিক্খৰে, অস্সুতৰা পুথুজ্জনো ভাসতি ¶ . নেসো, ভিক্খৰে, অরিযস্স ৰিনযে সমুদ্দো. মহা এসো, ভিক্খৰে, উদকরাসি মহাউদকণ্ণৰো. সন্তি, ভিক্খৰে, চক্খুৰিঞ্ঞেয্যা রূপা ¶ ইট্ঠা কন্তা মনাপা পিযরূপা কামূপসংহিতা রজনীযা. অযং ৰুচ্চতি, ভিক্খৰে, অরিযস্স ৰিনযে সমুদ্দো. এত্থাযং সদেৰকো লোকো সমারকো সব্রহ্মকো সস্সমণব্রাহ্মণী পজা সদেৰমনুস্সা যেভুয্যেন সমুন্না তন্তাকুলকজাতা কুলগণ্ঠিকজাতা [গুল়াগুণ্ঠিকজাতা (সী.), কুলগুণ্ডিকজাতা (স্যা. কং.), গুণগুণিকজাতা (পী.), কুলাগুণ্ডিকজাতা (ক.)] মুঞ্জপব্বজভূতা, অপাযং দুগ্গতিং ৰিনিপাতং সংসারং নাতিৰত্ততি…পে….

‘‘সন্তি ¶ , ভিক্খৰে, জিৰ্হাৰিঞ্ঞেয্যা রসা…পে… সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. অযং ৰুচ্চতি, ভিক্খৰে, অরিযস্স ৰিনযে সমুদ্দো. এত্থাযং সদেৰকো লোকো সমারকো সব্রহ্মকো সস্সমণব্রাহ্মণী পজা সদেৰমনুস্সা যেভুয্যেন সমুন্না তন্তাকুলকজাতা কুলগণ্ঠিকজাতা মুঞ্জপব্বজভূতা অপাযং দুগ্গতিং ৰিনিপাতং সংসারং নাতিৰত্ততী’’তি.

‘‘যস্স ¶ রাগো চ দোসো চ, অৰিজ্জা চ ৰিরাজিতা;

সো ইমং সমুদ্দং সগাহং সরক্খসং, সঊমিভযং দুত্তরং অচ্চতরি.

‘‘সঙ্গাতিগো মচ্চুজহো নিরুপধি, পহাসি দুক্খং অপুনব্ভৰায;

অত্থঙ্গতো সো ন পুনেতি [ন পমাণমেতি (সী. স্যা. কং. পী.)], অমোহযী, মচ্চুরাজন্তি ব্রূমী’’তি. দুতিযং;

৩. বাল়িসিকোপমসুত্তং

২৩০. ‘‘সেয্যথাপি, ভিক্খৰে, বাল়িসিকো আমিসগতবল়িসং গম্ভীরে উদকরহদে পক্খিপেয্য. তমেনং অঞ্ঞতরো ¶ আমিসচক্খু মচ্ছো গিলেয্য. এৰঞ্হি সো, ভিক্খৰে, মচ্ছো গিলিতবল়িসো বাল়িসিকস্স অনযং ¶ আপন্নো ব্যসনং আপন্নো যথাকামকরণীযো বাল়িসিকস্স.

এৰমেৰ খো, ভিক্খৰে, ছযিমে বল়িসা লোকস্মিং অনযায সত্তানং ৰধায [ব্যাবাধায (সী. পী.)] পাণিনং. কতমে ছ? সন্তি, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে, ভিক্খু, অভিনন্দতি অভিৰদতি অজ্ঝোসায তিট্ঠতি. অযং ৰুচ্চতি, ভিক্খৰে, ভিক্খু গিলিতবল়িসো, মারস্স অনযং আপন্নো ব্যসনং আপন্নো যথাকামকরণীযো পাপিমতো…পে… সন্তি, ভিক্খৰে, জিৰ্হাৰিঞ্ঞেয্যা রসা…পে….

সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে, ভিক্খু, অভিনন্দতি অভিৰদতি অজ্ঝোসায তিট্ঠতি. অযং ৰুচ্চতি, ভিক্খৰে, ভিক্খু গিলিতবল়িসো মারস্স অনযং আপন্নো ব্যসনং আপন্নো যথাকামকরণীযো পাপিমতো.

‘‘সন্তি ¶ চ, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. অযং ৰুচ্চতি, ভিক্খৰে, ভিক্খু ন গিলিতবল়িসো মারস্স অভেদি বল়িসং পরিভেদি বল়িসং ন অনযং আপন্নো ন ব্যসনং আপন্নো ন যথাকামকরণীযো পাপিমতো…পে….

‘‘সন্তি ¶ , ভিক্খৰে, জিৰ্হাৰিঞ্ঞেয্যা রসা…পে…. সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায ¶ তিট্ঠতি, অযং ৰুচ্চতি, ভিক্খৰে, ভিক্খু ন গিলিতবল়িসো মারস্স অভেদি বল়িসং পরিভেদি বল়িসং ন অনযং আপন্নো ন ব্যসনং আপন্নো ন যথাকামকরণীযো পাপিমতো’’তি. ততিযং.

৪. খীররুক্খোপমসুত্তং

২৩১. ‘‘যস্স কস্সচি, ভিক্খৰে, ভিক্খুস্স ৰা ভিক্খুনিযা ৰা ¶ চক্খুৰিঞ্ঞেয্যেসু রূপেসু যো রাগো সো অত্থি, যো দোসো সো অত্থি, যো মোহো সো অত্থি, যো রাগো সো অপ্পহীনো, যো দোসো সো অপ্পহীনো, যো মোহো সো অপ্পহীনো তস্স পরিত্তা চেপি চক্খুৰিঞ্ঞেয্যা রূপা চক্খুস্স আপাথং আগচ্ছন্তি পরিযাদিযন্তেৰস্স চিত্তং; কো পন ৰাদো অধিমত্তানং! তং কিস্স হেতু? যো, ভিক্খৰে, রাগো, সো অত্থি, যো দোসো সো অত্থি, যো মোহো সো অত্থি, যো রাগো সো অপ্পহীনো, যো দোসো সো অপ্পহীনো, যো মোহো সো অপ্পহীনো…পে….

‘‘যস্স কস্সচি, ভিক্খৰে, ভিক্খুস্স ৰা ভিক্খুনিযা ৰা জিৰ্হাৰিঞ্ঞেয্যেসু রসেসু যো রাগো সো অত্থি…পে….

‘‘যস্স কস্সচি, ভিক্খৰে, ভিক্খুস্স ৰা ভিক্খুনিযা ৰা মনোৰিঞ্ঞেয্যেসু ধম্মেসু যো রাগো সো অত্থি, যো দোসো সো অত্থি, যো মোহো সো অত্থি, যো রাগো সো অপ্পহীনো, যো দোসো সো অপ্পহীনো, যো মোহো সো অপ্পহীনো, তস্স পরিত্তা চেপি মনোৰিঞ্ঞেয্যা ধম্মা মনস্স আপাথং আগচ্ছন্তি পরিযাদিযন্তেৰস্স চিত্তং; কো পন ৰাদো অধিমত্তানং! তং কিস্স হেতু? যো, ভিক্খৰে, রাগো, সো অত্থি, যো দোসো সো অত্থি, যো মোহো সো ¶ অত্থি, যো রাগো সো অপ্পহীনো, যো দোসো সো অপ্পহীনো, যো মোহো সো অপ্পহীনো.

‘‘সেয্যথাপি ¶ , ভিক্খৰে, খীররুক্খো অস্সত্থো ৰা নিগ্রোধো ৰা পিলক্খো ৰা উদুম্বরো ৰা দহরো তরুণো কোমারকো. তমেনং পুরিসো তিণ্হায কুঠারিযা যতো যতো আভিন্দেয্য [ভিন্দেয্য (স্যা. কং. সী. অট্ঠ.), অভিন্দেয্য (কত্থচি)] আগচ্ছেয্য ¶ খীর’’ন্তি? ‘‘এৰং, ভন্তে’’. ‘‘তং কিস্স হেতু’’? ‘‘যঞ্হি, ভন্তে, খীরং তং অত্থী’’তি.

‘‘এৰমেৰ খো, ভিক্খৰে, যস্স কস্সচি ভিক্খুস্স ৰা ভিক্খুনিযা ৰা চক্খুৰিঞ্ঞেয্যেসু রূপেসু যো রাগো সো অত্থি, যো দোসো সো অত্থি, যো মোহো সো অত্থি, যো রাগো সো অপ্পহীনো, যো দোসো সো অপ্পহীনো, যো মোহো সো অপ্পহীনো, তস্স পরিত্তা চেপি চক্খুৰিঞ্ঞেয্যা রূপা চক্খুস্স আপাথং আগচ্ছন্তি পরিযাদিযন্তেৰস্স চিত্তং; কো পন ৰাদো অধিমত্তানং! তং কিস্স হেতু? যো, ভিক্খৰে, রাগো সো অত্থি, যো দোসো সো অত্থি ¶ , যো মোহো সো অত্থি, যো রাগো সো অপ্পহীনো, যো দোসো সো অপ্পহীনো, যো মোহো সো অপ্পহীনো…পে….

‘‘যস্স কস্সচি, ভিক্খৰে, ভিক্খুস্স ৰা ভিক্খুনিযা ৰা জিৰ্হাৰিঞ্ঞেয্যেসু রসেসু যো রাগো সো অত্থি…পে….

‘‘যস্স কস্সচি, ভিক্খৰে, ভিক্খুস্স ৰা ভিক্খুনিযা ৰা মনোৰিঞ্ঞেয্যেসু ধম্মেসু যো রাগো সো অত্থি, যো দোসো সো অত্থি, যো মোহো সো অত্থি, যো রাগো সো অপ্পহীনো, যো দোসো সো অপ্পহীনো, যো মোহো সো অপ্পহীনো, তস্স পরিত্তা চেপি মনোৰিঞ্ঞেয্যা ধম্মা মনস্স আপাথং আগচ্ছন্তি পরিযাদিযন্তেৰস্স চিত্তং; কো পন ৰাদো অধিমত্তানং! তং কিস্স হেতু? যো, ভিক্খৰে, রাগো সো অত্থি, যো ¶ দোসো সো অত্থি, যো মোহো সো অত্থি, যো রাগো সো অপ্পহীনো, যো দোসো সো অপ্পহীনো, যো মোহো সো অপ্পহীনো.

‘‘যস্স কস্সচি, ভিক্খৰে, ভিক্খুস্স ৰা ভিক্খুনিযা ৰা চক্খুৰিঞ্ঞেয্যেসু রূপেসু যো রাগো সো নত্থি, যো দোসো সো নত্থি, যো মোহো সো নত্থি, যো রাগো সো পহীনো, যো দোসো সো পহীনো, যো মোহো সো ¶ পহীনো, তস্স অধিমত্তা চেপি চক্খুৰিঞ্ঞেয্যা রূপা চক্খুস্স আপাথং আগচ্ছন্তি নেৰস্স চিত্তং পরিযাদিযন্তি; কো পন ৰাদো পরিত্তানং! তং কিস্স হেতু? যো, ভিক্খৰে, রাগো সো নত্থি, যো দোসো সো নত্থি, যো মোহো সো নত্থি, যো রাগো সো পহীনো, যো দোসো সো পহীনো, যো মোহো সো পহীনো…পে….

‘‘যস্স ¶ কস্সচি, ভিক্খৰে, ভিক্খুস্স ৰা ভিক্খুনিযা ৰা জিৰ্হাৰিঞ্ঞেয্যেসু রসেসু…পে… মনোৰিঞ্ঞেয্যেসু ধম্মেসু যো রাগো সো নত্থি, যো দোসো সো নত্থি, যো মোহো সো নত্থি, যো রাগো সো পহীনো, যো দোসো সো পহীনো, যো মোহো সো পহীনো, তস্স অধিমত্তা চেপি মনোৰিঞ্ঞেয্যা ধম্মা মনস্স আপাথং আগচ্ছন্তি নেৰস্স চিত্তং পরিযাদিযন্তি; কো পন ৰাদো পরিত্তানং! তং কিস্স হেতু? যো, ভিক্খৰে, রাগো সো নত্থি, যো দোসো সো নত্থি, যো মোহো সো নত্থি, যো রাগো সো পহীনো, যো দোসো সো পহীনো, যো মোহো সো পহীনো. সেয্যথাপি ¶ , ভিক্খৰে, খীররুক্খো অস্সত্থো ৰা নিগ্রোধো ৰা পিলক্খো ৰা উদুম্বরো ৰা সুক্খো কোলাপো তেরোৰস্সিকো. তমেনং পুরিসো তিণ্হায কুঠারিযা যতো যতো আভিন্দেয্য আগচ্ছেয্য খীর’’ন্তি? ‘‘নো ¶ হেতং, ভন্তে’’. ‘‘তং কিস্স হেতু’’? ‘‘যঞ্হি, ভন্তে, খীরং তং নত্থী’’তি.

‘‘এৰমেৰ খো, ভিক্খৰে, যস্স কস্সচি ভিক্খুস্স ৰা ভিক্খুনিযা ৰা চক্খুৰিঞ্ঞেয্যেসু রূপেসু যো রাগো সো নত্থি, যো দোসো সো নত্থি, যো মোহো সো নত্থি, যো রাগো সো পহীনো, যো দোসো সো পহীনো, যো মোহো সো পহীনো, তস্স অধিমত্তা চেপি চক্খুৰিঞ্ঞেয্যা রূপা চক্খুস্স আপাথং আগচ্ছন্তি নেৰস্স চিত্তং পরিযাদিযন্তি; কো পন ৰাদো পরিত্তানং! তং কিস্স হেতু? যো, ভিক্খৰে, রাগো সো নত্থি, যো দোসো সো নত্থি, যো মোহো সো নত্থি, যো রাগো সো পহীনো, যো দোসো সো পহীনো, যো মোহো সো পহীনো…পে….

‘‘যস্স কস্সচি, ভিক্খৰে, ভিক্খুস্স ৰা ভিক্খুনিযা ৰা জিৰ্হাৰিঞ্ঞেয্যেসু রসেসু…পে….

‘‘যস্স ¶ কস্সচি, ভিক্খৰে, ভিক্খুস্স ৰা ভিক্খুনিযা ৰা মনোৰিঞ্ঞেয্যেসু ধম্মেসু যো রাগো সো নত্থি, যো দোসো সো নত্থি, যো মোহো সো নত্থি, যো রাগো সো পহীনো, যো দোসো সো পহীনো, যো মোহো সো পহীনো, তস্স অধিমত্তা চেপি মনোৰিঞ্ঞেয্যা ধম্মা মনস্স আপাথং আগচ্ছন্তি, নেৰস্স চিত্তং পরিযাদিযন্তি; কো পন ৰাদো পরিত্তানং! তং কিস্স হেতু? যো, ভিক্খৰে, রাগো সো নত্থি ¶ , যো দোসো সো নত্থি, যো মোহো সো নত্থি, যো রাগো সো পহীনো, যো দোসো সো পহীনো, যো মোহো সো পহীনো’’তি. চতুত্থং.

৫. কোট্ঠিকসুত্তং

২৩২. একং ¶ সমযং আযস্মা চ সারিপুত্তো আযস্মা চ মহাকোট্ঠিকো বারাণসিযং ৰিহরন্তি ইসিপতনে মিগদাযে. অথ খো আযস্মা মহাকোট্ঠিকো সাযন্হসমযং পটিসল্লানা ৰুট্ঠিতো যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা মহাকোট্ঠিকো আযস্মন্তং সারিপুত্তং এতদৰোচ –

‘‘কিং নু খো, আৰুসো সারিপুত্ত, চক্খু রূপানং সংযোজনং, রূপা চক্খুস্স সংযোজনং…পে… জিৰ্হা রসানং সংযোজনং, রসা জিৰ্হায সংযোজনং ¶ …পে… মনো ধম্মানং সংযোজনং, ধম্মা মনস্স সংযোজন’’ন্তি?

‘‘ন খো, আৰুসো কোট্ঠিক, চক্খু রূপানং সংযোজনং, ন রূপা চক্খুস্স সংযোজনং. যঞ্চ তত্থ তদুভযং পটিচ্চ উপ্পজ্জতি ছন্দরাগো তং তত্থ সংযোজনং…পে… ন জিৰ্হা রসানং সংযোজনং, ন রসা জিৰ্হায সংযোজনং. যঞ্চ তত্থ তদুভযং পটিচ্চ উপ্পজ্জতি ছন্দরাগো তং তত্থ সংযোজনং…পে… ন মনো ধম্মানং সংযোজনং, ন ধম্মা মনস্স সংযোজনং. যঞ্চ তত্থ তদুভযং পটিচ্চ উপ্পজ্জতি ছন্দরাগো তং তত্থ সংযোজনং.

‘‘সেয্যথাপি ¶ , আৰুসো, কাল়ো চ বলীবদ্দো [বলিৰদ্দো (সী. পী.), বলিবদ্দো (স্যা. কং. ক.)] ওদাতো চ বলীবদ্দো একেন দামেন ৰা যোত্তেন ৰা সংযুত্তা অস্সু. যো নু খো এৰং ¶ ৰদেয্য – ‘কাল়ো বলীবদ্দো ওদাতস্স বলীবদ্দস্স সংযোজনং, ওদাতো বলীবদ্দো কাল়স্স বলীবদ্দস্স সংযোজন’ন্তি, সম্মা নু খো সো ৰদমানো ৰদেয্যা’’তি? ‘‘নো হেতং, আৰুসো’’. ‘‘ন খো, আৰুসো, কাল়ো বলীবদ্দো ওদাতস্স বলীবদ্দস্স সংযোজনং, ন ওদাতো বলীবদ্দো কাল়স্স বলীবদ্দস্স সংযোজনং. যেন চ খো তে একেন দামেন ৰা যোত্তেন ৰা সংযুত্তা তং তত্থ সংযোজনং.

‘‘এৰমেৰ খো, আৰুসো, ন চক্খু রূপানং সংযোজনং, ন রূপা চক্খুস্স সংযোজনং. যঞ্চ তত্থ তদুভযং পটিচ্চ উপ্পজ্জতি ছন্দরাগো তং তত্থ সংযোজনং…পে… ন জিৰ্হা রসানং ¶ সংযোজনং…পে… ন মনো ধম্মানং সংযোজনং, ন ধম্মা মনস্স সংযোজনং. যঞ্চ তত্থ তদুভযং পটিচ্চ উপ্পজ্জতি ছন্দরাগো, তং তত্থ সংযোজনং.

‘‘চক্খু ৰা, আৰুসো, রূপানং সংযোজনং অভৰিস্স, রূপা ৰা চক্খুস্স সংযোজনং, নযিদং ব্রহ্মচরিযৰাসো পঞ্ঞাযেথ [পঞ্ঞাযতি (ক.)] সম্মা দুক্খক্খযায. যস্মা চ খো, আৰুসো, ন চক্খু রূপানং সংযোজনং, ন রূপা চক্খুস্স সংযোজনং ¶ ; যঞ্চ তত্থ তদুভযং পটিচ্চ উপ্পজ্জতি ছন্দরাগো, তং তত্থ সংযোজনং, তস্মা ব্রহ্মচরিযৰাসো পঞ্ঞাযতি সম্মা ¶ দুক্খক্খযায…পে….

‘‘জিৰ্হা, আৰুসো, রসানং সংযোজনং অভৰিস্স, রসা ৰা জিৰ্হায সংযোজনং, নযিদং ব্রহ্মচরিযৰাসো পঞ্ঞাযেথ সম্মা দুক্খক্খযায. যস্মা চ খো, আৰুসো, ন জিৰ্হা রসানং সংযোজনং, ন রসা জিৰ্হায সংযোজনং; যঞ্চ তত্থ তদুভযং পটিচ্চ উপ্পজ্জতি ছন্দরাগো, তং তত্থ সংযোজনং, তস্মা ব্রহ্মচরিযৰাসো পঞ্ঞাযতি সম্মা দুক্খক্খযায…পে….

‘‘মনো ৰা, আৰুসো, ধম্মানং সংযোজনং অভৰিস্স, ধম্মা ৰা মনস্স সংযোজনং, নযিদং ব্রহ্মচরিযৰাসো পঞ্ঞাযেথ সম্মা দুক্খক্খযায. যস্মা চ খো, আৰুসো, ন মনো ধম্মানং সংযোজনং, ন ধম্মা মনস্স সংযোজনং; যঞ্চ তত্থ তদুভযং পটিচ্চ উপ্পজ্জতি ছন্দরাগো, তং তত্থ সংযোজনং, তস্মা ব্রহ্মচরিযৰাসো পঞ্ঞাযতি সম্মা দুক্খক্খযায.

‘‘ইমিনাপেতং ¶ , আৰুসো, পরিযাযেন ৰেদিতব্বং যথা ন চক্খু রূপানং সংযোজনং, ন রূপা চক্খুস্স সংযোজনং. যঞ্চ তত্থ তদুভযং পটিচ্চ উপ্পজ্জতি ছন্দরাগো, তং তত্থ সংযোজনং…পে… ন জিৰ্হা রসানং সংযোজনং…পে… ন মনো ধম্মানং সংযোজনং, ন ধম্মা মনস্স সংযোজনং. যঞ্চ তত্থ তদুভযং পটিচ্চ উপ্পজ্জতি ছন্দরাগো, তং তত্থ সংযোজনং.

‘‘সংৰিজ্জতি খো, আৰুসো, ভগৰতো চক্খু. পস্সতি ভগৰা চক্খুনা রূপং. ছন্দরাগো ভগৰতো নত্থি. সুৰিমুত্তচিত্তো ভগৰা. সংৰিজ্জতি খো, আৰুসো, ভগৰতো সোতং. সুণাতি ভগৰা সোতেন সদ্দং. ছন্দরাগো ¶ ভগৰতো নত্থি. সুৰিমুত্তচিত্তো ভগৰা. সংৰিজ্জতি খো, আৰুসো, ভগৰতো ঘানং. ঘাযতি ভগৰা ঘানেন গন্ধং. ছন্দরাগো ভগৰতো নত্থি. সুৰিমুত্তচিত্তো ¶ ভগৰা. সংৰিজ্জতি খো, আৰুসো, ভগৰতো জিৰ্হা. সাযতি ভগৰা জিৰ্হায রসং. ছন্দরাগো ভগৰতো নত্থি. সুৰিমুত্তচিত্তো ভগৰা. সংৰিজ্জতি খো, আৰুসো, ভগৰতো কাযো. ফুসতি ভগৰা কাযেন ফোট্ঠব্বং. ছন্দরাগো ভগৰতো নত্থি. সুৰিমুত্তচিত্তো ভগৰা. সংৰিজ্জতি খো, আৰুসো, ভগৰতো মনো. ৰিজানাতি ভগৰা মনসা ¶ ধম্মং. ছন্দরাগো ভগৰতো নত্থি. সুৰিমুত্তচিত্তো ভগৰা.

‘‘ইমিনা খো এতং, আৰুসো, পরিযাযেন ৰেদিতব্বং যথা ন চক্খু রূপানং সংযোজনং, ন রূপা চক্খুস্স সংযোজনং; যঞ্চ তত্থ তদুভযং পটিচ্চ উপ্পজ্জতি ছন্দরাগো, তং তত্থ সংযোজনং. ন সোতং… ন ঘানং… ন জিৰ্হা রসানং সংযোজনং, ন রসা জিৰ্হায সংযোজনং; যঞ্চ তত্থ তদুভযং পটিচ্চ উপ্পজ্জতি ছন্দরাগো তং তত্থ সংযোজনং. ন কাযো… ন মনো ধম্মানং সংযোজনং, ন ধম্মা মনস্স সংযোজনং; যঞ্চ তত্থ তদুভযং পটিচ্চ উপ্পজ্জতি ছন্দরাগো, তং তত্থ সংযোজন’’ন্তি. পঞ্চমং.

৬. কামভূসুত্তং

২৩৩. একং সমযং আযস্মা চ আনন্দো আযস্মা চ কামভূ কোসম্বিযং ৰিহরন্তি ঘোসিতারামে. অথ খো আযস্মা কামভূ সাযন্হসমযং পটিসল্লানা ৰুট্ঠিতো যেনাযস্মা আনন্দো তেনুপসঙ্কমি; উপসঙ্কমিত্ৰা ¶ আযস্মতা আনন্দেন সদ্ধিং সম্মোদি. সম্মোদনীযং ¶ কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা কামভূ আযস্মন্তং আনন্দং এতদৰোচ –

‘‘কিং নু খো, আৰুসো আনন্দ, চক্খু রূপানং সংযোজনং, রূপা চক্খুস্স সংযোজনং…পে… জিৰ্হা রসানং সংযোজনং, রসা জিৰ্হায সংযোজনং…পে… মনো ধম্মানং সংযোজনং, ধম্মা মনস্স সংযোজন’’ন্তি?

‘‘ন খো, আৰুসো কামভূ [কামভু (সী.) মোগ্গল্লানে ৬৫-গে ৰাতি সুত্তং পস্সিতব্বং], চক্খু রূপানং সংযোজনং, ন রূপা চক্খুস্স সংযোজনং. যঞ্চ তত্থ তদুভযং পটিচ্চ উপ্পজ্জতি ছন্দরাগো, তং তত্থ সংযোজনং…পে… ন জিৰ্হা রসানং ¶ সংযোজনং, ন রসা জিৰ্হায সংযোজনং…পে… ন মনো ধম্মানং সংযোজনং, ন ধম্মা মনস্স সংযোজনং. যঞ্চ তত্থ তদুভযং পটিচ্চ উপ্পজ্জতি ছন্দরাগো তং তত্থ সংযোজনং.

‘‘সেয্যথাপি ¶ , আৰুসো, কাল়ো চ বলীবদ্দো ওদাতো চ বলীবদ্দো একেন দামেন ৰা যোত্তেন ৰা সংযুত্তা অস্সু. যো নু খো এৰং ৰদেয্য – ‘কাল়ো বলীবদ্দো ওদাতস্স বলীবদ্দস্স সংযোজনং, ওদাতো বলীবদ্দো কাল়স্স বলীবদ্দস্স সংযোজন’ন্তি, সম্মা নু খো সো ৰদমানো ৰদেয্যা’’তি? ‘‘নো হেতং, আৰুসো’’. ‘‘ন খো, আৰুসো, কাল়ো বলীবদ্দো ওদাতস্স বলীবদ্দস্স সংযোজনং, নপি ওদাতো বলীবদ্দো কাল়স্স বলীবদ্দস্স সংযোজনং. যেন চ খো তে একেন দামেন ৰা যোত্তেন ৰা সংযুত্তা, তং তত্থ সংযোজনং. এৰমেৰ খো ¶ , আৰুসো, ন চক্খু রূপানং সংযোজনং, ন রূপা চক্খুস্স সংযোজনং…পে… ন জিৰ্হা…পে… ন মনো…পে… যঞ্চ তত্থ তদুভযং পটিচ্চ উপ্পজ্জতি ছন্দরাগো, তং তত্থ সংযোজন’’ন্তি. ছট্ঠং.

৭. উদাযীসুত্তং

২৩৪. একং সমযং আযস্মা চ আনন্দো আযস্মা চ উদাযী কোসম্বিযং ৰিহরন্তি ঘোসিতারামে. অথ খো আযস্মা উদাযী সাযন্হসমযং পটিসল্লানা ৰুট্ঠিতো যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা উদাযী আযস্মন্তং আনন্দং এতদৰোচ –

‘‘যথেৰ ¶ নু খো, আৰুসো আনন্দ, অযং কাযো ভগৰতা অনেকপরিযাযেন অক্খাতো ৰিৰটো পকাসিতো – ‘ইতিপাযং কাযো অনত্তা’তি, সক্কা এৰমেৰ ৰিঞ্ঞাণং পিদং আচিক্খিতুং দেসেতুং পঞ্ঞপেতুং পট্ঠপেতুং ৰিৰরিতুং ৰিভজিতুং উত্তানীকাতুং – ‘ইতিপিদং ৰিঞ্ঞাণং অনত্তা’’’তি?

‘‘যথেৰ খো, আৰুসো উদাযী, অযং কাযো ভগৰতা অনেকপরিযাযেন অক্খাতো ৰিৰটো পকাসিতো – ‘ইতিপাযং কাযো অনত্তা’তি, সক্কা এৰমেৰ ৰিঞ্ঞাণং পিদং আচিক্খিতুং ¶ দেসেতুং পঞ্ঞপেতুং পট্ঠপেতুং ৰিৰরিতুং ৰিভজিতুং উত্তানীকাতুং – ‘ইতিপিদং ৰিঞ্ঞাণং অনত্তা’’’তি.

‘‘চক্খুঞ্চ, আৰুসো, পটিচ্চ রূপে চ উপ্পজ্জতি চক্খুৰিঞ্ঞাণ’’ন্তি? ‘‘এৰমাৰুসো’’তি ¶ . ‘‘যো চাৰুসো, হেতু, যো চ পচ্চযো চক্খুৰিঞ্ঞাণস্স উপ্পাদায, সো চ হেতু, সো চ পচ্চযো সব্বেন সব্বং ¶ সব্বথা সব্বং অপরিসেসং নিরুজ্ঝেয্য. অপি নু খো চক্খুৰিঞ্ঞাণং পঞ্ঞাযেথা’’তি? ‘‘নো হেতং, আৰুসো’’. ‘‘ইমিনাপি খো এতং, আৰুসো, পরিযাযেন ভগৰতা অক্খাতং ৰিৰটং পকাসিতং – ‘ইতিপিদং ৰিঞ্ঞাণং অনত্তা’’’তি…পে….

‘‘জিৰ্হঞ্চাৰুসো, পটিচ্চ রসে চ উপ্পজ্জতি জিৰ্হাৰিঞ্ঞাণ’’ন্তি? ‘‘এৰমাৰুসো’’তি. ‘‘যো চাৰুসো, হেতু যো চ পচ্চযো জিৰ্হাৰিঞ্ঞাণস্স উপ্পাদায, সো চ হেতু, সো চ পচ্চযো সব্বেন সব্বং সব্বথা সব্বং অপরিসেসং নিরুজ্ঝেয্য, অপি নু খো জিৰ্হাৰিঞ্ঞাণং পঞ্ঞাযেথা’’তি? ‘‘নো হেতং, আৰুসো’’. ‘‘ইমিনাপি খো এতং, আৰুসো, পরিযাযেন ভগৰতা অক্খাতং ৰিৰটং পকাসিতং – ‘ইতিপিদং ৰিঞ্ঞাণং অনত্তা’’’তি…পে….

‘‘মনঞ্চাৰুসো, পটিচ্চ ধম্মে চ উপ্পজ্জতি মনোৰিঞ্ঞাণ’’ন্তি? ‘‘এৰমাৰুসো’’তি. ‘‘যো চাৰুসো, হেতু, যো চ পচ্চযো মনোৰিঞ্ঞাণস্স উপ্পাদায, সো চ হেতু, সো চ পচ্চযো সব্বেন সব্বং সব্বথা সব্বং অপরিসেসং নিরুজ্ঝেয্য, অপি নু খো মনোৰিঞ্ঞাণং পঞ্ঞাযেথা’’তি? ‘‘নো হেতং, আৰুসো’’. ‘‘ইমিনাপি খো এতং, আৰুসো, পরিযাযেন ভগৰতা অক্খাতং ৰিৰটং পকাসিতং – ‘ইতিপিদং ৰিঞ্ঞাণং অনত্তা’’’তি.

‘‘সেয্যথাপি, আৰুসো, পুরিসো সারত্থিকো সারগৰেসী সারপরিযেসনং চরমানো তিণ্হং কুঠারিং আদায ৰনং পৰিসেয্য. সো তত্থ ¶ পস্সেয্য মহন্তং কদলিক্খন্ধং উজুং নৰং অকুক্কুকজাতং [অকুক্কুটকজাতং (স্যা. কং.), অকুক্কজটজাতং (ক.)]. তমেনং মূলে ছিন্দেয্য ¶ ¶ ; মূলে ছেত্ৰা অগ্গে ছিন্দেয্য; অগ্গে ছেত্ৰা পত্তৰট্টিং ৰিনিব্ভুজেয্য [ৰিনিব্ভুজ্জেয্য (পী.), ৰিনিব্ভজ্জেয্য (স্যা. কং.)]. সো তত্থ ফেগ্গুম্পি নাধিগচ্ছেয্য, কুতো সারং! এৰমেৰ খো, আৰুসো, ভিক্খু ছসু ফস্সাযতনেসু নেৰত্তানং ন অত্তনিযং সমনুপস্সতি. সো এৰং অসমনুপস্সন্তো [এৰং সমনুপস্সন্তো (স্যা. কং. ক.)] ন কিঞ্চি লোকে ¶ উপাদিযতি. অনুপাদিযং ন পরিতস্সতি. অপরিতস্সং পচ্চত্তঞ্ঞেৰ পরিনিব্বাযতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি. সত্তমং.

৮. আদিত্তপরিযাযসুত্তং

২৩৫. ‘‘আদিত্তপরিযাযং ৰো, ভিক্খৰে, ধম্মপরিযাযং দেসেস্সামি. তং সুণাথ. কতমো চ, ভিক্খৰে, আদিত্তপরিযাযো, ধম্মপরিযাযো? ৰরং, ভিক্খৰে, তত্তায অযোসলাকায আদিত্তায সম্পজ্জলিতায সজোতিভূতায [সঞ্জোতিভূতায (স্যা. কং.)] চক্খুন্দ্রিযং সম্পলিমট্ঠং, ন ত্ৰেৰ চক্খুৰিঞ্ঞেয্যেসু রূপেসু অনুব্যঞ্জনসো নিমিত্তগ্গাহো. নিমিত্তস্সাদগথিতং [নিমিত্তস্সাদগধিতং (স্যা. কং. ক.) ম. নি. ৩.৩১৬-৩১৭] ৰা, ভিক্খৰে, ৰিঞ্ঞাণং তিট্ঠমানং তিট্ঠেয্য, অনুব্যঞ্জনস্সাদগথিতং ৰা তস্মিঞ্চে সমযে কালং করেয্য, ঠানমেতং ৰিজ্জতি, যং দ্ৰিন্নং গতীনং অঞ্ঞতরং গতিং গচ্ছেয্য – নিরযং ৰা, তিরচ্ছানযোনিং ৰা. ইমং খ্ৰাহং, ভিক্খৰে, আদীনৰং দিস্ৰা এৰং ৰদামি.

‘‘ৰরং, ভিক্খৰে, তিণ্হেন অযোসঙ্কুনা আদিত্তেন সম্পজ্জলিতেন সজোতিভূতেন সোতিন্দ্রিযং সম্পলিমট্ঠং, ন ত্ৰেৰ সোতৰিঞ্ঞেয্যেসু সদ্দেসু অনুব্যঞ্জনসো নিমিত্তগ্গাহো. নিমিত্তস্সাদগথিতং ৰা, ভিক্খৰে, ৰিঞ্ঞাণং তিট্ঠমানং তিট্ঠেয্য ¶ , অনুব্যঞ্জনস্সাদগথিতং ৰা তস্মিঞ্চে সমযে কালঙ্করেয্য, ঠানমেতং ৰিজ্জতি, যং দ্ৰিন্নং গতীনং অঞ্ঞতরং গতিং গচ্ছেয্য – নিরযং ৰা তিরচ্ছানযোনিং ৰা. ইমং খ্ৰাহং, ভিক্খৰে, আদীনৰং দিস্ৰা এৰং ৰদামি ¶ .

‘‘ৰরং ¶ , ভিক্খৰে, তিণ্হেন নখচ্ছেদনেন আদিত্তেন সম্পজ্জলিতেন সজোতিভূতেন ঘানিন্দ্রিযং সম্পলিমট্ঠং, ন ত্ৰেৰ ঘানৰিঞ্ঞেয্যেসু গন্ধেসু অনুব্যঞ্জনসো নিমিত্তগ্গাহো. নিমিত্তস্সাদগথিতং ৰা, ভিক্খৰে, ৰিঞ্ঞাণং তিট্ঠমানং তিট্ঠেয্য, অনুব্যঞ্জনস্সাদগথিতং ৰা তস্মিঞ্চে সমযে কালং করেয্য. ঠানমেতং ৰিজ্জতি, যং দ্ৰিন্নং গতীনং অঞ্ঞতরং গতিং গচ্ছেয্য – নিরযং ৰা তিরচ্ছানযোনিং ৰা. ইমং খ্ৰাহং, ভিক্খৰে, আদীনৰং দিস্ৰা এৰং ৰদামি.

‘‘ৰরং, ভিক্খৰে, তিণ্হেন খুরেন আদিত্তেন সম্পজ্জলিতেন সজোতিভূতেন জিৰ্হিন্দ্রিযং সম্পলিমট্ঠং, ন ত্ৰেৰ জিৰ্হাৰিঞ্ঞেয্যেসু রসেসু অনুব্যঞ্জনসো নিমিত্তগ্গাহো. নিমিত্তস্সাদগথিতং ¶ ৰা, ভিক্খৰে, ৰিঞ্ঞাণং তিট্ঠমানং তিট্ঠেয্য, অনুব্যঞ্জনস্সাদগথিতং ৰা তস্মিঞ্চে সমযে কালং করেয্য. ঠানমেতং ৰিজ্জতি, যং দ্ৰিন্নং গতীনং অঞ্ঞতরং গতিং গচ্ছেয্য – নিরযং ৰা তিরচ্ছানযোনিং ৰা. ইমং খ্ৰাহং, ভিক্খৰে, আদীনৰং দিস্ৰা এৰং ৰদামি.

‘‘ৰরং, ভিক্খৰে, তিণ্হায সত্তিযা আদিত্তায সম্পজ্জলিতায সজোতিভূতায কাযিন্দ্রিযং সম্পলিমট্ঠং, ন ত্ৰেৰ কাযৰিঞ্ঞেয্যেসু ফোট্ঠব্বেসু অনুব্যঞ্জনসো নিমিত্তগ্গাহো. নিমিত্তস্সাদগথিতং ৰা, ভিক্খৰে, ৰিঞ্ঞাণং তিট্ঠমানং তিট্ঠেয্য, অনুব্যঞ্জনস্সাদগথিতং ৰা তস্মিঞ্চে ¶ সমযে কালং করেয্য. ঠানমেতং ৰিজ্জতি, যং দ্ৰিন্নং গতীনং অঞ্ঞতরং গতিং গচ্ছেয্য – নিরযং ৰা তিরচ্ছানযোনিং ৰা. ইমং খ্ৰাহং, ভিক্খৰে, আদীনৰং দিস্ৰা এৰং ৰদামি.

‘‘ৰরং, ভিক্খৰে, সোত্তং. সোত্তং খো পনাহং, ভিক্খৰে, ৰঞ্ঝং জীৰিতানং ৰদামি, অফলং জীৰিতানং ৰদামি, মোমূহং জীৰিতানং ৰদামি, ন ত্ৰেৰ তথারূপে ৰিতক্কে ৰিতক্কেয্য যথারূপানং ৰিতক্কানং ৰসং গতো সঙ্ঘং ভিন্দেয্য. ইমং খ্ৰাহং, ভিক্খৰে ¶ , ৰঞ্ঝং জীৰিতানং আদীনৰং দিস্ৰা এৰং ৰদামি.

‘‘তত্থ, ভিক্খৰে, সুতৰা অরিযসাৰকো ইতি পটিসঞ্চিক্খতি – ‘তিট্ঠতু তাৰ তত্তায অযোসলাকায আদিত্তায সম্পজ্জলিতায সজোতিভূতায চক্খুন্দ্রিযং সম্পলিমট্ঠং. হন্দাহং ইদমেৰ মনসি করোমি – ইতি চক্খু অনিচ্চং, রূপা অনিচ্চা, চক্খুৰিঞ্ঞাণং অনিচ্চং, চক্খুসম্ফস্সো অনিচ্চো, যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং’’’ [অনিচ্চ’’ন্তি (?)].

‘‘তিট্ঠতু ¶ তাৰ তিণ্হেন অযোসঙ্কুনা আদিত্তেন সম্পজ্জলিতেন সজোতিভূতেন সোতিন্দ্রিযং সম্পলিমট্ঠং. হন্দাহং ইদমেৰ মনসি করোমি – ইতি সোতং অনিচ্চং, সদ্দা অনিচ্চা, সোতৰিঞ্ঞাণং অনিচ্চং, সোতসম্ফস্সো অনিচ্চো, যম্পিদং সোতসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং.

‘‘তিট্ঠতু ¶ তাৰ তিণ্হেন নখচ্ছেদনেন আদিত্তেন সম্পজ্জলিতেন সজোতিভূতেন ঘানিন্দ্রিযং সম্পলিমট্ঠং. হন্দাহং ইদমেৰ মনসি করোমি – ইতি ¶ ঘানং অনিচ্চং, গন্ধা অনিচ্চা, ঘানৰিঞ্ঞাণং অনিচ্চং, ঘানসম্ফস্সো অনিচ্চো, যম্পিদং ঘানসম্ফস্সপচ্চযা উপ্পজ্জতি ৰেদযিতং…পে… তম্পি অনিচ্চং.

‘‘তিট্ঠতু তাৰ তিণ্হেন খুরেন আদিত্তেন সম্পজ্জলিতেন সজোতিভূতেন জিৰ্হিন্দ্রিযং সম্পলিমট্ঠং. হন্দাহং ইদমেৰ মনসি করোমি – ইতি জিৰ্হা অনিচ্চা, রসা অনিচ্চা, জিৰ্হাৰিঞ্ঞাণং অনিচ্চং, জিৰ্হাসম্ফস্সো অনিচ্চো, যম্পিদং জিৰ্হাসম্ফস্সপচ্চযা উপ্পজ্জতি…পে… তম্পি অনিচ্চং.

‘‘তিট্ঠতু তাৰ তিণ্হায সত্তিযা আদিত্তায সম্পজ্জলিতায সজোতিভূতায কাযিন্দ্রিযং সম্পলিমট্ঠং. হন্দাহং ইদমেৰ মনসি করোমি – ইতি কাযো অনিচ্চো, ফোট্ঠব্বা অনিচ্চা ¶ , কাযৰিঞ্ঞাণং অনিচ্চং, কাযসম্ফস্সো অনিচ্চো, যম্পিদং কাযসম্ফস্সপচ্চযা উপ্পজ্জতি ৰেদযিতং…পে… তম্পি অনিচ্চং.

‘‘তিট্ঠতু তাৰ সোত্তং. হন্দাহং ইদমেৰ মনসি করোমি – ইতি মনো অনিচ্চো, ধম্মা অনিচ্চা, মনোৰিঞ্ঞাণং অনিচ্চং, মনোসম্ফস্সো অনিচ্চো, যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং’’.

‘‘এৰং পস্সং, ভিক্খৰে, সুতৰা অরিযসাৰকো চক্খুস্মিম্পি নিব্বিন্দতি, রূপেসুপি নিব্বিন্দতি, চক্খুৰিঞ্ঞাণেপি নিব্বিন্দতি, চক্খুসম্ফস্সেপি নিব্বিন্দতি…পে… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তস্মিম্পি নিব্বিন্দতি. নিব্বিন্দং ৰিরজ্জতি; ৰিরাগা ৰিমুচ্চতি; ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং ¶ করণীযং, নাপরং ইত্থত্তাযা’তি পজানাতি. অযং খো, ভিক্খৰে, আদিত্তপরিযাযো, ধম্মপরিযাযো’’তি. অট্ঠমং.

৯. পঠমহত্থপাদোপমসুত্তং

২৩৬. ‘‘হত্থেসু ¶ ¶ , ভিক্খৰে, সতি আদাননিক্খেপনং পঞ্ঞাযতি; পাদেসু সতি অভিক্কমপটিক্কমো পঞ্ঞাযতি; পব্বেসু সতি সমিঞ্জনপসারণং পঞ্ঞাযতি; কুচ্ছিস্মিং সতি জিঘচ্ছা পিপাসা পঞ্ঞাযতি. এৰমেৰ খো, ভিক্খৰে, চক্খুস্মিং সতি চক্খুসম্ফস্সপচ্চযা উপ্পজ্জতি অজ্ঝত্তং সুখং দুক্খং…পে… জিৰ্হায সতি জিৰ্হাসম্ফস্সপচ্চযা উপ্পজ্জতি অজ্ঝত্তং সুখং দুক্খং…পে… মনস্মিং সতি মনোসম্ফস্সপচ্চযা উপ্পজ্জতি অজ্ঝত্তং সুখং দুক্খং…পে….

‘‘হত্থেসু, ভিক্খৰে, অসতি আদাননিক্খেপনং ন পঞ্ঞাযতি; পাদেসু অসতি অভিক্কমপটিক্কমো ন পঞ্ঞাযতি; পব্বেসু অসতি সমিঞ্জনপসারণং ন পঞ্ঞাযতি; কুচ্ছিস্মিং অসতি জিঘচ্ছা পিপাসা ন পঞ্ঞাযতি. এৰমেৰ খো, ভিক্খৰে, চক্খুস্মিং অসতি চক্খুসম্ফস্সপচ্চযা ¶ নুপ্পজ্জতি অজ্ঝত্তং সুখং দুক্খং…পে… জিৰ্হায অসতি জিৰ্হাসম্ফস্সপচ্চযা নুপ্পজ্জতি…পে… মনস্মিং অসতি মনোসম্ফস্সপচ্চযা নুপ্পজ্জতি অজ্ঝত্তং সুখং দুক্খ’’ন্তি. নৰমং.

১০. দুতিযহত্থপাদোপমসুত্তং

২৩৭. ‘‘হত্থেসু, ভিক্খৰে, সতি আদাননিক্খেপনং হোতি; পাদেসু সতি অভিক্কমপটিক্কমো হোতি; পব্বেসু সতি সমিঞ্জনপসারণং হোতি; কুচ্ছিস্মিং সতি জিঘচ্ছা পিপাসা হোতি. এৰমেৰ খো, ভিক্খৰে, চক্খুস্মিং সতি চক্খুসম্ফস্সপচ্চযা উপ্পজ্জতি অজ্ঝত্তং সুখং দুক্খং…পে… ¶ জিৰ্হায সতি…পে… মনস্মিং সতি মনোসম্ফস্সপচ্চযা উপ্পজ্জতি অজ্ঝত্তং সুখং দুক্খং…পে….

‘‘হত্থেসু, ভিক্খৰে, অসতি আদাননিক্খেপনং ন হোতি; পাদেসু অসতি অভিক্কমপটিক্কমো ন হোতি; পব্বেসু অসতি সমিঞ্জনপসারণং ন হোতি; কুচ্ছিস্মিং অসতি জিঘচ্ছা পিপাসা ন হোতি. এৰমেৰ খো, ভিক্খৰে, চক্খুস্মিং অসতি চক্খুসম্ফস্সপচ্চযা নুপ্পজ্জতি অজ্ঝত্তং সুখং দুক্খং…পে… জিৰ্হায অসতি জিৰ্হাসম্ফস্সপচ্চযা ¶ নুপ্পজ্জতি…পে… মনস্মিং অসতি মনোসম্ফস্সপচ্চযা নুপ্পজ্জতি অজ্ঝত্তং সুখং দুক্খ’’ন্তি. দসমং.

সমুদ্দৰগ্গো অট্ঠরসমো.

তস্সুদ্দানং –

দ্ৰে ¶ সমুদ্দা বাল়িসিকো, খীররুক্খেন কোট্ঠিকো;

কামভূ উদাযী চেৰ, আদিত্তেন চ অট্ঠমং;

হত্থপাদূপমা দ্ৰেতি, ৰগ্গো তেন পৰুচ্চতীতি.

১৯. আসীৰিসৰগ্গো

১. আসীৰিসোপমসুত্তং

২৩৮. ‘‘সেয্যথাপি ¶ , ভিক্খৰে, চত্তারো আসীৰিসা উগ্গতেজা ঘোরৰিসা. অথ পুরিসো আগচ্ছেয্য জীৰিতুকামো অমরিতুকামো সুখকামো দুক্খপ্পটিকূলো. তমেনং এৰং ৰদেয্যুং – ‘ইমে তে, অম্ভো পুরিস, চত্তারো আসীৰিসা উগ্গতেজা ঘোরৰিসা কালেন ¶ কালং ৰুট্ঠাপেতব্বা, কালেন কালং ন্হাপেতব্বা, কালেন কালং ভোজেতব্বা, কালেন কালং সংৰেসেতব্বা [পৰেসেতব্বা (স্যা. কং. পী. ক.)]. যদা চ খো তে, অম্ভো পুরিস, ইমেসং চতুন্নং আসীৰিসানং উগ্গতেজানং ঘোরৰিসানং অঞ্ঞতরো ৰা অঞ্ঞতরো ৰা কুপ্পিস্সতি, ততো ত্ৰং, অম্ভো পুরিস, মরণং ৰা নিগচ্ছসি, মরণমত্তং ৰা দুক্খং. যং তে, অম্ভো পুরিস, করণীযং তং করোহী’’’তি.

‘‘অথ খো সো, ভিক্খৰে, পুরিসো ভীতো চতুন্নং আসীৰিসানং উগ্গতেজানং ঘোরৰিসানং যেন ৰা তেন ৰা পলাযেথ. তমেনং এৰং ৰদেয্যুং – ‘ইমে খো, অম্ভো পুরিস, পঞ্চ ৰধকা পচ্চত্থিকা পিট্ঠিতো পিট্ঠিতো অনুবন্ধা, যত্থেৰ নং পস্সিস্সাম তত্থেৰ জীৰিতা ৰোরোপেস্সামাতি. যং তে, অম্ভো পুরিস, করণীযং তং করোহী’’’তি.

‘‘অথ ¶ খো সো, ভিক্খৰে, পুরিসো ভীতো চতুন্নং আসীৰিসানং উগ্গতেজানং ঘোরৰিসানং, ভীতো পঞ্চন্নং ৰধকানং পচ্চত্থিকানং যেন ৰা ¶ তেন ৰা পলাযেথ. তমেনং এৰং ৰদেয্যুং – ‘অযং তে, অম্ভো পুরিস, ছট্ঠো অন্তরচরো ৰধকো উক্খিত্তাসিকো পিট্ঠিতো পিট্ঠিতো অনুবন্ধো যত্থেৰ নং পস্সিস্সামি তত্থেৰ সিরো পাতেস্সামীতি. যং তে, অম্ভো পুরিস, করণীযং তং করোহী’’’তি.

‘‘অথ ¶ খো সো, ভিক্খৰে, পুরিসো ভীতো চতুন্নং আসীৰিসানং উগ্গতেজানং ঘোরৰিসানং, ভীতো পঞ্চন্নং ৰধকানং পচ্চত্থিকানং, ভীতো ছট্ঠস্স অন্তরচরস্স ৰধকস্স উক্খিত্তাসিকস্স যেন ৰা তেন ৰা পলাযেথ. সো পস্সেয্য সুঞ্ঞং গামং. যঞ্ঞদেৰ ঘরং পৰিসেয্য রিত্তকঞ্ঞেৰ পৰিসেয্য তুচ্ছকঞ্ঞেৰ পৰিসেয্য সুঞ্ঞকঞ্ঞেৰ পৰিসেয্য. যঞ্ঞদেৰ ভাজনং পরিমসেয্য রিত্তকঞ্ঞেৰ পরিমসেয্য তুচ্ছকঞ্ঞেৰ পরিমসেয্য সুঞ্ঞকঞ্ঞেৰ পরিমসেয্য. তমেনং এৰং ৰদেয্যুং – ‘ইদানি, অম্ভো পুরিস, ইমং সুঞ্ঞং গামং চোরা গামঘাতকা পৰিসন্তি [ৰধিস্সন্তি (সী. পী.)]. যং তে, অম্ভো পুরিস, করণীযং তং করোহী’’’তি.

‘‘অথ ¶ খো সো, ভিক্খৰে, পুরিসো ভীতো চতুন্নং আসীৰিসানং উগ্গতেজানং ঘোরৰিসানং, ভীতো পঞ্চন্নং ৰধকানং পচ্চত্থিকানং, ভীতো ছট্ঠস্স অন্তরচরস্স ৰধকস্স উক্খিত্তাসিকস্স, ভীতো চোরানং গামঘাতকানং যেন ৰা তেন ৰা পলাযেথ. সো পস্সেয্য মহন্তং উদকণ্ণৰং ওরিমং তীরং সাসঙ্কং সপ্পটিভযং, পারিমং তীরং খেমং অপ্পটিভযং. ন চস্স নাৰা সন্তারণী উত্তরসেতু ৰা অপারা পারং গমনায. অথ ¶ খো, ভিক্খৰে, তস্স পুরিসস্স এৰমস্স – ‘অযং খো মহাউদকণ্ণৰো ওরিমং তীরং সাসঙ্কং সপ্পটিভযং, পারিমং তীরং খেমং অপ্পটিভযং, নত্থি চ [ন চস্স (সী. ক.), নত্থস্স (স্যা. কং.)] নাৰা সন্তারণী উত্তরসেতু ৰা অপারা পারং গমনায. যংনূনাহং তিণকট্ঠসাখাপলাসং সংকড্ঢিত্ৰা কুল্লং বন্ধিত্ৰা তং কুল্লং নিস্সায হত্থেহি চ পাদেহি চ ৰাযমমানো সোত্থিনা পারং গচ্ছেয্য’’’ন্তি.

‘‘অথ খো সো, ভিক্খৰে, পুরিসো তিণকট্ঠসাখাপলাসং সংকড্ঢিত্ৰা কুল্লং বন্ধিত্ৰা তং কুল্লং নিস্সায হত্থেহি চ পাদেহি চ ৰাযমমানো সোত্থিনা পারং গচ্ছেয্য, তিণ্ণো পারঙ্গতো [পারগতো (সী. স্যা. কং.)] থলে তিট্ঠতি ব্রাহ্মণো.

‘‘উপমা ¶ খো ম্যাযং, ভিক্খৰে, কতা অত্থস্স ৰিঞ্ঞাপনায. অযঞ্চেত্থ [অযং চেৰেত্থ (সী.)] অত্থো – চত্তারো আসীৰিসা উগ্গতেজা ঘোরৰিসাতি খো, ভিক্খৰে, চতুন্নেতং মহাভূতানং অধিৰচনং – পথৰীধাতুযা, আপোধাতুযা, তেজোধাতুযা, ৰাযোধাতুযা.

‘‘পঞ্চ ¶ ৰধকা পচ্চত্থিকাতি খো, ভিক্খৰে, পঞ্চন্নেতং উপাদানক্খন্ধানং অধিৰচনং, সেয্যথিদং – রূপুপাদানক্খন্ধস্স, ৰেদনুপাদানক্খন্ধস্স, সঞ্ঞুপাদানক্খন্ধস্স, সঙ্খারুপাদানক্খন্ধস্স, ৰিঞ্ঞাণুপাদানক্খন্ধস্স.

‘‘ছট্ঠো অন্তরচরো ৰধকো উক্খিত্তাসিকোতি খো, ভিক্খৰে, নন্দীরাগস্সেতং অধিৰচনং.

‘‘সুঞ্ঞো গামোতি খো, ভিক্খৰে, ছন্নেতং অজ্ঝত্তিকানং আযতনানং অধিৰচনং. চক্খুতো চেপি নং, ভিক্খৰে, পণ্ডিতো ব্যত্তো মেধাৰী উপপরিক্খতি রিত্তকঞ্ঞেৰ খাযতি, তুচ্ছকঞ্ঞেৰ ¶ খাযতি, সুঞ্ঞকঞ্ঞেৰ ¶ খাযতি…পে… জিৰ্হাতো চেপি নং, ভিক্খৰে…পে… মনতো চেপি নং, ভিক্খৰে, পণ্ডিতো ব্যত্তো মেধাৰী উপপরিক্খতি রিত্তকঞ্ঞেৰ খাযতি, তুচ্ছকঞ্ঞেৰ খাযতি, সুঞ্ঞকঞ্ঞেৰ খাযতি.

‘‘চোরা গামঘাতকাতি খো, ভিক্খৰে, ছন্নেতং বাহিরানং আযতনানং অধিৰচনং. চক্খু, ভিক্খৰে, হঞ্ঞতি মনাপামনাপেসু রূপেসু; সোতং, ভিক্খৰে…পে… ঘানং, ভিক্খৰে…পে… জিৰ্হা, ভিক্খৰে, হঞ্ঞতি মনাপামনাপেসু রসেসু; কাযো, ভিক্খৰে…পে… মনো, ভিক্খৰে, হঞ্ঞতি মনাপামনাপেসু ধম্মেসু.

‘‘মহা উদকণ্ণৰোতি খো, ভিক্খৰে, চতুন্নেতং ওঘানং অধিৰচনং – কামোঘস্স, ভৰোঘস্স, দিট্ঠোঘস্স, অৰিজ্জোঘস্স.

‘‘ওরিমং তীরং সাসঙ্কং সপ্পটিভযন্তি খো, ভিক্খৰে, সক্কাযস্সেতং অধিৰচনং.

‘‘পারিমং তীরং খেমং অপ্পটিভযন্তি খো, ভিক্খৰে, নিব্বানস্সেতং অধিৰচনং.

‘‘কুল্লন্তি ¶ খো, ভিক্খৰে, অরিযস্সেতং অট্ঠঙ্গিকস্স মগ্গস্স অধিৰচনং, সেয্যথিদং – সম্মাদিট্ঠি…পে… সম্মাসমাধি.

‘‘তস্স হত্থেহি চ পাদেহি চ ৰাযামোতি খো, ভিক্খৰে, ৰীরিযারম্ভস্সেতং অধিৰচনং.

‘‘তিণ্ণো পারঙ্গতো থলে তিট্ঠতি ব্রাহ্মণোতি খো, ভিক্খৰে, অরহতো এতং অধিৰচন’’ন্তি. পঠমং.

২. রথোপমসুত্তং

২৩৯. ‘‘তীহি ¶ ¶ , ভিক্খৰে, ধম্মেহি সমন্নাগতো ভিক্খু দিট্ঠেৰ ধম্মে সুখসোমনস্সবহুলো ৰিহরতি, যোনি চস্স আরদ্ধা হোতি আসৰানং খযায. কতমেহি তীহি? ইন্দ্রিযেসু গুত্তদ্ৰারো হোতি, ভোজনে মত্তঞ্ঞূ, জাগরিযং অনুযুত্তো.

‘‘কথঞ্চ ¶ , ভিক্খৰে, ভিক্খু ইন্দ্রিযেসু গুত্তদ্ৰারো হোতি? ইধ, ভিক্খৰে, ভিক্খু চক্খুনা রূপং দিস্ৰা ন নিমিত্তগ্গাহী হোতি, নানুব্যঞ্জনগ্গাহী; যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং. তস্স সংৰরায পটিপজ্জতি; রক্খতি চক্খুন্দ্রিযং; চক্খুন্দ্রিযে সংৰরং আপজ্জতি. সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায ন নিমিত্তগ্গাহী হোতি নানুব্যঞ্জনগ্গাহী; যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি; রক্খতি মনিন্দ্রিযং; মনিন্দ্রিযে সংৰরং আপজ্জতি. সেয্যথাপি, ভিক্খৰে, সুভূমিযং চাতুমহাপথে আজঞ্ঞরথো যুত্তো অস্স ঠিতো ওধস্তপতোদো [ওধতপতোদো (স্যা. কং.), ওধসতপতোদো (পী.)]. তমেনং দক্খো যোগ্গাচরিযো অস্সদম্মসারথি অভিরুহিত্ৰা ৰামেন হত্থেন রস্মিযো গহেত্ৰা, দক্খিণেন হত্থেন পতোদং গহেত্ৰা, যেনিচ্ছকং যদিচ্ছকং সারেয্যপি পচ্চাসারেয্যপি. এৰমেৰ খো, ভিক্খৰে, ভিক্খু ইমেসং ছন্নং ইন্দ্রিযানং আরক্খায ¶ সিক্খতি ¶ , সংযমায সিক্খতি, দমায সিক্খতি, উপসমায সিক্খতি. এৰং খো, ভিক্খৰে, ভিক্খু ইন্দ্রিযেসু গুত্তদ্ৰারো হোতি.

‘‘কথঞ্চ, ভিক্খৰে, ভিক্খু ভোজনে মত্তঞ্ঞূ হোতি? ইধ, ভিক্খৰে, ভিক্খু পটিসঙ্খা যোনিসো আহারং আহারেতি – ‘নেৰ দৰায, ন মদায, ন মণ্ডনায, ন ৰিভূসনায, যাৰদেৰ ইমস্স কাযস্স ঠিতিযা, যাপনায, ৰিহিংসূপরতিযা, ব্রহ্মচরিযানুগ্গহায, ইতি পুরাণঞ্চ ৰেদনং পটিহঙ্খামি, নৰঞ্চ ৰেদনং ন উপ্পাদেস্সামি, যাত্রা চ মে ভৰিস্সতি, অনৰজ্জতা চ ফাসুৰিহারো চা’তি. সেয্যথাপি ¶ , ভিক্খৰে, পুরিসো ৰণং আলিম্পেয্য ¶ যাৰদেৰ রোহনত্থায [রোপনত্থায (সী. পী.), সেৰনত্থায (স্যা. কং.), গোপনত্থায (ক.)], সেয্যথা ৰা পন অক্খং অব্ভঞ্জেয্য যাৰদেৰ ভারস্স নিত্থরণত্থায; এৰং খো, ভিক্খৰে, ভিক্খু পটিসঙ্খা যোনিসো আহারং আহারেতি – ‘নেৰ দৰায, ন মদায, ন মণ্ডনায, ন ৰিভূসনায, যাৰদেৰ ইমস্স কাযস্স ঠিতিযা, যাপনায, ৰিহিংসূপরতিযা, ব্রহ্মচরিযানুগ্গহায, ইতি পুরাণঞ্চ ৰেদনং পটিহঙ্খামি, নৰঞ্চ ৰেদনং ন উপ্পাদেস্সামি, যাত্রা চ মে ভৰিস্সতি, অনৰজ্জতা চ ফাসুৰিহারো চা’তি. এৰং খো, ভিক্খৰে, ভিক্খু ভোজনে মত্তঞ্ঞূ হোতি.

‘‘কথঞ্চ, ভিক্খৰে, ভিক্খু জাগরিযং অনুযুত্তো হোতি? ইধ, ভিক্খৰে, ভিক্খু দিৰসং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি. রত্তিযা পঠমং যামং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি. রত্তিযা মজ্ঝিমং যামং দক্খিণেন পস্সেন সীহসেয্যং ¶ কপ্পেতি পাদে পাদং অচ্চাধায সতো সম্পজানো উট্ঠানসঞ্ঞং মনসি করিত্ৰা. রত্তিযা পচ্ছিমং যামং পচ্চুট্ঠায চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি. এৰং খো, ভিক্খৰে, ভিক্খু জাগরিযং অনুযুত্তো হোতি. ইমেহি খো, ভিক্খৰে, তীহি ধম্মেহি সমন্নাগতো ভিক্খু দিট্ঠেৰ ধম্মে সুখসোমনস্সবহুলো ৰিহরতি, যোনি চস্স আরদ্ধা হোতি আসৰানং খযাযা’’তি. দুতিযং.

৩. কুম্মোপমসুত্তং

২৪০. ‘‘ভূতপুব্বং, ভিক্খৰে, কুম্মো কচ্ছপো সাযন্হসমযং অনুনদীতীরে গোচরপসুতো অহোসি. সিঙ্গালোপি [সিগালোপি (সী. স্যা. কং. পী.)] খো, ভিক্খৰে, সাযন্হসমযং অনুনদীতীরে গোচরপসুতো অহোসি. অদ্দসা ¶ খো, ভিক্খৰে, কুম্মো কচ্ছপো সিঙ্গালং দূরতোৰ গোচরপসুতং. দিস্ৰান সোণ্ডিপঞ্চমানি অঙ্গানি ¶ সকে কপালে সমোদহিত্ৰা অপ্পোস্সুক্কো তুণ্হীভূতো সঙ্কসাযতি. সিঙ্গালোপি খো, ভিক্খৰে, অদ্দস কুম্মং কচ্ছপং দূরতোৰ গোচরপসুতং. দিস্ৰান যেন কুম্মো কচ্ছপো তেনুপসঙ্কমি; উপসঙ্কমিত্ৰা কুম্মং কচ্ছপং পচ্চুপট্ঠিতো অহোসি – ‘যদাযং কুম্মো কচ্ছপো সোণ্ডিপঞ্চমানং অঙ্গানং অঞ্ঞতরং ৰা অঞ্ঞতরং ৰা অঙ্গং অভিনিন্নামেস্সতি, তত্থেৰ নং গহেত্ৰা উদ্দালিত্ৰা খাদিস্সামী’তি. যদা খো, ভিক্খৰে, কুম্মো কচ্ছপো ¶ সোণ্ডিপঞ্চমানং অঙ্গানং অঞ্ঞতরং ৰা অঞ্ঞতরং ৰা অঙ্গং ন অভিনিন্নামি, অথ সিঙ্গালো কুম্মম্হা নিব্বিজ্জ পক্কামি, ওতারং অলভমানো.

‘‘এৰমেৰ খো, ভিক্খৰে, তুম্হেপি মারো পাপিমা সততং সমিতং পচ্চুপট্ঠিতো – ‘অপ্পেৰ নামাহং ইমেসং চক্খুতো ¶ ৰা ওতারং লভেয্যং…পে… জিৰ্হাতো ৰা ওতারং লভেয্যং…পে… মনতো ৰা ওতারং লভেয্য’ন্তি. তস্মাতিহ, ভিক্খৰে, ইন্দ্রিযেসু গুত্তদ্ৰারা ৰিহরথ. চক্খুনা রূপং দিস্ৰা মা নিমিত্তগ্গাহিনো অহুৰত্থ, মা অনুব্যঞ্জনগ্গাহিনো. যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জথ, রক্খথ চক্খুন্দ্রিযং, চক্খুন্দ্রিযে সংৰরং আপজ্জথ. সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায মা নিমিত্তগ্গাহিনো অহুৰত্থ, মা অনুব্যঞ্জনগ্গাহিনো. যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জথ, রক্খথ মনিন্দ্রিযং, মনিন্দ্রিযে সংৰরং আপজ্জথ. যতো তুম্হে, ভিক্খৰে, ইন্দ্রিযেসু গুত্তদ্ৰারা ৰিহরিস্সথ, অথ তুম্হেহিপি মারো পাপিমা নিব্বিজ্জ পক্কমিস্সতি, ওতারং অলভমানো – কুম্মম্হাৰ সিঙ্গালো’’তি.

‘‘কুম্মো ¶ অঙ্গানি সকে কপালে,

সমোদহং ভিক্খু মনোৰিতক্কে;

অনিস্সিতো অঞ্ঞমহেঠযানো,

পরিনিব্বুতো নূপৰদেয্য কঞ্চী’’তি. ততিযং;

৪. পঠমদারুক্খন্ধোপমসুত্তং

২৪১. একং ¶ সমযং ভগৰা কোসম্বিযং ৰিহরতি গঙ্গায নদিযা তীরে. অদ্দসা খো ভগৰা মহন্তং দারুক্খন্ধং গঙ্গায নদিযা সোতেন ৰুয্হমানং. দিস্ৰান ভিক্খূ আমন্তেসি – ‘‘পস্সথ নো তুম্হে, ভিক্খৰে, অমুং ¶ মহন্তং দারুক্খন্ধং গঙ্গায নদিযা সোতেন ৰুয্হমান’’ন্তি? ‘‘এৰং, ভন্তে’’. ‘‘সচে সো, ভিক্খৰে, দারুক্খন্ধো ন ওরিমং তীরং উপগচ্ছতি, ন পারিমং তীরং উপগচ্ছতি, ন মজ্ঝে সংসীদিস্সতি, ন থলে উস্সীদিস্সতি, ন মনুস্সগ্গাহো গহেস্সতি, ন ¶ অমনুস্সগ্গাহো গহেস্সতি, ন আৰট্টগ্গাহো গহেস্সতি, ন অন্তোপূতি ভৰিস্সতি; এৰঞ্হি সো, ভিক্খৰে, দারুক্খন্ধো সমুদ্দনিন্নো ভৰিস্সতি সমুদ্দপোণো সমুদ্দপব্ভারো. তং কিস্স হেতু? সমুদ্দনিন্নো, ভিক্খৰে, গঙ্গায নদিযা সোতো সমুদ্দপোণো সমুদ্দপব্ভারো.

‘‘এৰমেৰ খো, ভিক্খৰে, সচে তুম্হেপি ন ওরিমং তীরং উপগচ্ছথ, ন পারিমং তীরং উপগচ্ছথ; ন মজ্ঝে সংসীদিস্সথ, ন থলে উস্সীদিস্সথ, ন মনুস্সগ্গাহো গহেস্সতি, ন অমনুস্সগ্গাহো গহেস্সতি, ন আৰট্টগ্গাহো গহেস্সতি, ন অন্তোপূতী ভৰিস্সথ; এৰং তুম্হে ¶ , ভিক্খৰে, নিব্বাননিন্না ভৰিস্সথ নিব্বানপোণা নিব্বানপব্ভারা. তং কিস্স হেতু? নিব্বাননিন্না, ভিক্খৰে, সম্মাদিট্ঠি নিব্বানপোণা নিব্বানপব্ভারা’’তি. এৰং ৰুত্তে, অঞ্ঞতরো ভিক্খু ভগৰন্তং এতদৰোচ – ‘‘কিং নু খো, ভন্তে, ওরিমং তীরং, কিং পারিমং তীরং, কো মজ্ঝে সংসাদো [সংসীদো (ক.), সংসীদিতো (স্যা. কং.)], কো থলে উস্সাদো, কো মনুস্সগ্গাহো, কো অমনুস্সগ্গাহো, কো আৰট্টগ্গাহো, কো অন্তোপূতিভাৰো’’তি?

‘‘‘ওরিমং তীর’ন্তি খো, ভিক্খু, ছন্নেতং অজ্ঝত্তিকানং আযতনানং অধিৰচনং. ‘পারিমং তীর’ন্তি খো ¶ , ভিক্খু, ছন্নেতং বাহিরানং আযতনানং অধিৰচনং. ‘মজ্ঝে সংসাদো’তি খো, ভিক্খু, নন্দীরাগস্সেতং অধিৰচনং. ‘থলে উস্সাদো’তি খো, ভিক্খু, অস্মিমানস্সেতং অধিৰচনং.

‘‘কতমো চ, ভিক্খু, মনুস্সগ্গাহো? ইধ, ভিক্খু, গিহীহি সংসট্ঠো [গিহিসংসট্ঠো (ক.)] ৰিহরতি, সহনন্দী ¶ সহসোকী, সুখিতেসু সুখিতো, দুক্খিতেসু দুক্খিতো, উপ্পন্নেসু কিচ্চকরণীযেসু অত্তনা তেসু যোগং আপজ্জতি. অযং ৰুচ্চতি, ভিক্খু, মনুস্সগ্গাহো.

‘‘কতমো চ, ভিক্খু, অমনুস্সগ্গাহো? ইধ, ভিক্খু, একচ্চো অঞ্ঞতরং দেৰনিকাযং পণিধায ব্রহ্মচরিযং চরতি – ‘ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা দেৰো ৰা ভৰিস্সামি দেৰঞ্ঞতরো ৰা’তি. অযং ৰুচ্চতি, ভিক্খু, অমনুস্সগ্গাহো. ‘আৰট্টগ্গাহো’তি খো, ভিক্খু, পঞ্চন্নেতং কামগুণানং অধিৰচনং.

‘‘কতমো চ, ভিক্খু, অন্তোপূতিভাৰো? ইধ, ভিক্খু, একচ্চো দুস্সীলো হোতি পাপধম্মো অসুচিসঙ্কস্সরসমাচারো পটিচ্ছন্নকম্মন্তো অস্সমণো ¶ সমণপটিঞ্ঞো অব্রহ্মচারী ¶ ব্রহ্মচারিপটিঞ্ঞো অন্তোপূতি অৰস্সুতো কসম্বুজাতো. অযং ৰুচ্চতি, ভিক্খু, ‘অন্তোপূতিভাৰো’’’তি.

তেন খো পন সমযেন নন্দো গোপালকো ভগৰতো অৰিদূরে ঠিতো হোতি. অথ খো নন্দো গোপালকো ভগৰন্তং এতদৰোচ – ‘‘অহং খো, ভন্তে, ন ওরিমং তীরং উপগচ্ছামি, ন পারিমং তীরং উপগচ্ছামি, ন মজ্ঝে সংসীদিস্সামি, ন ¶ থলে উস্সীদিস্সামি, ন মং মনুস্সগ্গাহো গহেস্সতি, ন অমনুস্সগ্গাহো গহেস্সতি, ন আৰট্টগ্গাহো গহেস্সতি, ন অন্তোপূতি ভৰিস্সামি. লভেয্যাহং, ভন্তে, ভগৰতো সন্তিকে পব্বজ্জং, লভেয্যং উপসম্পদ’’ন্তি. ‘‘তেন হি ত্ৰং, নন্দ, সামিকানং গাৰো নিয্যাতেহী’’তি [নীয্যাদেহীতি (সী.), নিয্যাদেহীতি (স্যা. কং. পী.)]. ‘‘গমিস্সন্তি, ভন্তে, গাৰো ৰচ্ছগিদ্ধিনিযো’’তি. ‘‘নিয্যাতেহেৰ ত্ৰং, নন্দ, সামিকানং গাৰো’’তি. অথ খো নন্দো গোপালকো সামিকানং গাৰো নিয্যাতেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘নিয্যাতিতা [নিয্যাতা (স্যা. কং. ক. সী. অট্ঠ.)], ভন্তে, সামিকানং গাৰো. লভেয্যাহং, ভন্তে, ভগৰতো সন্তিকে পব্বজ্জং, লভেয্যং উপসম্পদ’’ন্তি. অলত্থ খো নন্দো গোপালকো ভগৰতো সন্তিকে পব্বজ্জং, অলত্থ উপসম্পদং. অচিরূপসম্পন্নো চ পনাযস্মা নন্দো একো ৰূপকট্ঠো…পে… অঞ্ঞতরো চ পনাযস্মা নন্দো অরহতং অহোসীতি. চতুত্থং.

৫. দুতিযদারুক্খন্ধোপমসুত্তং

২৪২. একং ¶ সমযং ভগৰা কিমিলাযং [কিম্বিলাযং (সী. পী.), কিম্মিলাযং (স্যা. কং.)] ৰিহরতি গঙ্গায নদিযা তীরে. অদ্দসা খো ভগৰা মহন্তং দারুক্খন্ধং গঙ্গায নদিযা সোতেন ৰুয্হমানং. দিস্ৰান ভিক্খূ আমন্তেসি – ‘‘পস্সথ নো তুম্হে, ভিক্খৰে, অমুং মহন্তং ¶ দারুক্খন্ধং গঙ্গায নদিযা সোতেন ৰুয্হমান’’ন্তি? ‘‘এৰং ভন্তে’’…পে… এৰং ৰুত্তে, আযস্মা কিমিলো ভগৰন্তং এতদৰোচ – কিং নু খো, ভন্তে, ওরিমং তীরং…পে… কতমো চ, কিমিল, অন্তোপূতিভাৰো. ইধ, কিমিল, ভিক্খু অঞ্ঞতরং সংকিলিট্ঠং আপত্তিং ¶ আপন্নো হোতি যথারূপায আপত্তিযা ন ৰুট্ঠানং পঞ্ঞাযতি. অযং ৰুচ্চতি, কিমিল, অন্তোপূতিভাৰোতি. পঞ্চমং.

৬. অৰস্সুতপরিযাযসুত্তং

২৪৩. একং ¶ সমযং ভগৰা সক্কেসু ৰিহরতি কপিলৰত্থুস্মিং নিগ্রোধারামে. তেন খো পন সমযেন কাপিলৰত্থৰানং সক্যানং নৰং সন্থাগারং [সন্ধাগারং (ক.)] অচিরকারিতং হোতি অনজ্ঝাৰুট্ঠং [অনজ্ঝাৰুত্থং (সী. স্যা. কং. পী.)] সমণেন ৰা ব্রাহ্মণেন ৰা কেনচি ৰা মনুস্সভূতেন. অথ খো কাপিলৰত্থৰা সক্যা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো কাপিলৰত্থৰা সক্যা ভগৰন্তং এতদৰোচুং – ‘‘ইধ, ভন্তে, কাপিলৰত্থৰানং সক্যানং নৰং সন্থাগারং অচিরকারিতং [অচিরকারিতং হোতি (ক.)] অনজ্ঝাৰুট্ঠং সমণেন ৰা ব্রাহ্মণেন ৰা কেনচি ৰা মনুস্সভূতেন ¶ . তং, ভন্তে, ভগৰা পঠমং পরিভুঞ্জতু. ভগৰতা পঠমং পরিভুত্তং পচ্ছা কাপিলৰত্থৰা সক্যা পরিভুঞ্জিস্সন্তি. তদস্স কাপিলৰত্থৰানং সক্যানং দীঘরত্তং হিতায সুখাযা’’তি. অধিৰাসেসি ভগৰা তুণ্হীভাৰেন.

অথ খো কাপিলৰত্থৰা সক্যা ভগৰতো অধিৰাসনং ৰিদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা যেন নৰং সন্থাগারং তেনুপসঙ্কমিংসু; উপসঙ্কমিত্ৰা সব্বসন্থরিং [সব্বসন্থরিং সন্থতং (ক.)] সন্থাগারং সন্থরিত্ৰা আসনানি পঞ্ঞাপেত্ৰা উদকমণিকং পতিট্ঠাপেত্ৰা তেলপ্পদীপং আরোপেত্ৰা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং এতদৰোচুং – ‘‘সব্বসন্থরিসন্থতং [সব্বসন্থরিং সন্থতং (সী. পী. ক.)], ভন্তে, সন্থাগারং, আসনানি পঞ্ঞত্তানি, উদকমণিকো পতিট্ঠাপিতো, তেলপ্পদীপো ¶ আরোপিতো. যস্স দানি ¶ , ভন্তে, ভগৰা কালং মঞ্ঞতী’’তি. অথ খো ভগৰা নিৰাসেত্ৰা পত্তচীৰরমাদায সদ্ধিং ভিক্খুসঙ্ঘেন যেন নৰং সন্থাগারং তেনুপসঙ্কমি; উপসঙ্কমিত্ৰা পাদে পক্খালেত্ৰা সন্থাগারং পৰিসিত্ৰা মজ্ঝিমং থম্ভং নিস্সায পুরত্থাভিমুখো নিসীদি. ভিক্খুসঙ্ঘোপি খো পাদে পক্খালেত্ৰা সন্থাগারং পৰিসিত্ৰা পচ্ছিমং ভিত্তিং নিস্সায পুরত্থাভিমুখো নিসীদি ভগৰন্তংযেৰ পুরক্খত্ৰা. কাপিলৰত্থৰা সক্যা পাদে পক্খালেত্ৰা সন্থাগারং পৰিসিত্ৰা পুরত্থিমং ভিত্তিং নিস্সায পচ্ছিমাভিমুখা নিসীদিংসু ভগৰন্তংযেৰ পুরক্খত্ৰা. অথ খো ভগৰা কাপিলৰত্থৰে সক্যে বহুদেৰ রত্তিং ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা উয্যোজেসি – ‘‘অভিক্কন্তা খো, গোতমা, রত্তি. যস্স দানি কালং মঞ্ঞথা’’তি ¶ . ‘‘এৰং ¶ , ভন্তে’’তি খো কাপিলৰত্থৰা সক্যা ভগৰতো পটিস্সুত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কমিংসু.

অথ খো ভগৰা অচিরপক্কন্তেসু কাপিলৰত্থৰেসু সক্যেসু আযস্মন্তং মহামোগ্গল্লানং আমন্তেসি – ‘‘ৰিগতথিনমিদ্ধো খো, মোগ্গল্লান, ভিক্খুসঙ্ঘো. পটিভাতু তং, মোগ্গল্লান, ভিক্খূনং ধম্মী কথা. পিট্ঠি মে আগিলাযতি; তমহং আযমিস্সামী’’তি. ‘‘এৰং, ভন্তে’’তি খো আযস্মা মহামোগ্গল্লানো ভগৰতো পচ্চস্সোসি. অথ খো ভগৰা চতুগ্গুণং সঙ্ঘাটিং পঞ্ঞপেত্ৰা দক্খিণেন পস্সেন সীহসেয্যং কপ্পেসি ¶ , পাদে পাদং অচ্চাধায, সতো সম্পজানো উট্ঠানসঞ্ঞং মনসি করিত্ৰা. তত্র খো আযস্মা মহামোগ্গল্লানো ভিক্খূ আমন্তেসি – ‘‘আৰুসো ভিক্খৰে’’তি. ‘‘আৰুসো’’তি খো তে ভিক্খূ আযস্মতো মহামোগ্গল্লানস্স পচ্চস্সোসুং. আযস্মা মহামোগ্গল্লানো এতদৰোচ – ‘‘অৰস্সুতপরিযাযঞ্চ ৰো, আৰুসো, দেসেস্সামি, অনৰস্সুতপরিযাযঞ্চ. তং সুণাথ, সাধুকং মনসি করোথ; ভাসিস্সামী’’তি. ‘‘এৰমাৰুসো’’তি খো তে ভিক্খূ আযস্মতো মহামোগ্গল্লানস্স পচ্চস্সোসুং. আযস্মা মহামোগ্গল্লানো এতদৰোচ –

‘‘কথং, আৰুসো, অৰস্সুতো হোতি? ইধাৰুসো, ভিক্খু চক্খুনা রূপং দিস্ৰা পিযরূপে রূপে অধিমুচ্চতি, অপ্পিযরূপে রূপে ব্যাপজ্জতি, অনুপট্ঠিতকাযস্সতি ৰিহরতি পরিত্তচেতসো, তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি ¶ …পে… জিৰ্হায রসং সাযিত্ৰা…পে… মনসা ধম্মং ৰিঞ্ঞায পিযরূপে ধম্মে অধিমুচ্চতি, অপ্পিযরূপে ধম্মে ব্যাপজ্জতি, অনুপট্ঠিতকাযস্সতি চ ৰিহরতি ¶ পরিত্তচেতসো, তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি. অযং ৰুচ্চতি, আৰুসো, ভিক্খু অৰস্সুতো চক্খুৰিঞ্ঞেয্যেসু রূপেসু…পে… অৰস্সুতো জিৰ্হাৰিঞ্ঞেয্যেসু রসেসু…পে… অৰস্সুতো মনোৰিঞ্ঞেয্যেসু ধম্মেসু. এৰংৰিহারিঞ্চাৰুসো, ভিক্খুং চক্খুতো চেপি নং মারো উপসঙ্কমতি ¶ লভতেৰ মারো ওতারং, লভতি মারো আরম্মণং…পে… জিৰ্হাতো চেপি নং মারো উপসঙ্কমতি, লভতেৰ [লভেথ (ক.)] মারো ওতারং ¶ , লভতি [লভেথ (ক.)] মারো আরম্মণং…পে… মনতো চেপি নং মারো উপসঙ্কমতি, লভতেৰ মারো ওতারং, লভতি মারো আরম্মণং.

‘‘সেয্যথাপি, আৰুসো, নল়াগারং ৰা তিণাগারং ৰা সুক্খং কোলাপং তেরোৰস্সিকং. পুরত্থিমায চেপি নং দিসায পুরিসো আদিত্তায তিণুক্কায উপসঙ্কমেয্য, লভেথেৰ [লভেথ (ক.)] অগ্গি ওতারং, লভেথ অগ্গি আরম্মণং; পচ্ছিমায চেপি নং দিসায পুরিসো আদিত্তায তিণুক্কায উপসঙ্কমেয্য…পে… উত্তরায চেপি নং দিসায…পে… দক্খিণায চেপি নং দিসায…পে… হেট্ঠিমতো চেপি নং…পে… উপরিমতো চেপি নং… যতো কুতোচি চেপি নং পুরিসো আদিত্তায তিণুক্কায উপসঙ্কমেয্য, লভেথেৰ অগ্গি ওতারং লভেথ অগ্গি আরম্মণং. এৰমেৰ খো, আৰুসো, এৰংৰিহারিং ভিক্খুং চক্খুতো চেপি নং মারো উপসঙ্কমতি, লভতেৰ মারো ওতারং, লভতি মারো আরম্মণং…পে… জিৰ্হাতো চেপি নং মারো উপসঙ্কমতি…পে… মনতো চেপি নং মারো উপসঙ্কমতি, লভতেৰ মারো ওতারং, লভতি মারো আরম্মণং. এৰংৰিহারিঞ্চাৰুসো, ভিক্খুং রূপা অধিভংসু, ন ভিক্খু রূপে অধিভোসি; সদ্দা ভিক্খুং অধিভংসু, ন ভিক্খু ¶ সদ্দে অধিভোসি; গন্ধা ভিক্খুং অধিভংসু, ন ভিক্খু গন্ধে অধিভোসি; রসা ভিক্খুং অধিভংসু, ন ভিক্খু রসে অধিভোসি; ফোট্ঠব্বা ভিক্খুং অধিভংসু, ন ভিক্খু ফোট্ঠব্বে অধিভোসি ¶ ; ধম্মা ভিক্খুং অধিভংসু, ন ভিক্খু ধম্মে অধিভোসি. অযং ৰুচ্চতাৰুসো, ভিক্খু রূপাধিভূতো, সদ্দাধিভূতো, গন্ধাধিভূতো, রসাধিভূতো, ফোট্ঠব্বাধিভূতো, ধম্মাধিভূতো, অধিভূতো, অনধিভূ, [অনধিভূতো (সী. স্যা. কং. ক.)] অধিভংসু নং পাপকা অকুসলা ধম্মা সংকিলেসিকা পোনোব্ভৰিকা সদরা দুক্খৰিপাকা আযতিং জাতিজরামরণিযা. এৰং খো, আৰুসো, অৰস্সুতো হোতি.

‘‘কথঞ্চাৰুসো, অনৰস্সুতো হোতি? ইধাৰুসো, ভিক্খু চক্খুনা রূপং দিস্ৰা পিযরূপে রূপে নাধিমুচ্চতি, অপ্পিযরূপে রূপে ন ব্যাপজ্জতি, উপট্ঠিতকাযস্সতি চ ৰিহরতি অপ্পমাণচেতসো ¶ , তঞ্চ চেতোৰিমুত্তিং পঞ্ঞাৰিমুত্তিং যথাভূতং পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি…পে… জিৰ্হায রসং সাযিত্ৰা…পে… মনসা ¶ ধম্মং ৰিঞ্ঞায পিযরূপে ধম্মে নাধিমুচ্চতি, অপ্পিযরূপে ধম্মে ন ব্যাপজ্জতি, উপট্ঠিতকাযস্সতি চ ৰিহরতি অপ্পমাণচেতসো, তঞ্চ চেতোৰিমুত্তিং পঞ্ঞাৰিমুত্তিং যথাভূতং পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি. অযং ৰুচ্চতাৰুসো, ভিক্খু অনৰস্সুতো চক্খুৰিঞ্ঞেয্যেসু রূপেসু…পে… অনৰস্সুতো মনোৰিঞ্ঞেয্যেসু ধম্মেসু. এৰংৰিহারিঞ্চাৰুসো, ভিক্খুং চক্খুতো চেপি নং মারো উপসঙ্কমতি, নেৰ লভতি মারো ওতারং, ন লভতি মারো আরম্মণং…পে… জিৰ্হাতো চেপি নং মারো উপসঙ্কমতি…পে… মনতো চেপি ¶ নং মারো উপসঙ্কমতি, নেৰ লভতি মারো ওতারং, ন লভতি মারো আরম্মণং.

‘‘সেয্যথাপি, আৰুসো, কূটাগারং ৰা সালা ৰা বহলমত্তিকা ¶ অদ্দাৰলেপনা. পুরত্থিমায চেপি নং দিসায পুরিসো আদিত্তায তিণুক্কায উপসঙ্কমেয্য, নেৰ লভেথ অগ্গি ওতারং, ন লভেথ অগ্গি আরম্মণং…পে… পচ্ছিমায চেপি নং… উত্তরায চেপি নং… দক্খিণায চেপি নং… হেট্ঠিমতো চেপি নং… উপরিমতো চেপি নং… যতো কুতোচি চেপি নং পুরিসো আদিত্তায তিণুক্কায উপসঙ্কমেয্য, নেৰ লভেথ অগ্গি ওতারং, ন লভেথ অগ্গি আরম্মণং. এৰমেৰ খো, আৰুসো, এৰংৰিহারিং ভিক্খুং চক্খুতো চেপি নং মারো উপসঙ্কমতি, নেৰ লভতি মারো ওতারং, ন লভতি মারো আরম্মণং…পে… মনতো চেপি নং মারো উপসঙ্কমতি, নেৰ লভতি মারো ওতারং, ন লভতি মারো আরম্মণং. এৰংৰিহারী চাৰুসো, ভিক্খু রূপে অধিভোসি, ন রূপা ভিক্খুং অধিভংসু; সদ্দে ভিক্খু অধিভোসি, ন সদ্দা ভিক্খুং অধিভংসু; গন্ধে ভিক্খু অধিভোসি, ন গন্ধা ভিক্খুং অধিভংসু; রসে ভিক্খু অধিভোসি, ন রসা ভিক্খুং অধিভংসু; ফোট্ঠব্বে ভিক্খু অধিভোসি, ন ফোট্ঠব্বা ভিক্খুং অধিভংসু; ধম্মে ভিক্খু অধিভোসি, ন ধম্মা ভিক্খুং অধিভংসু. অযং ৰুচ্চতাৰুসো, ভিক্খু রূপাধিভূ, সদ্দাধিভূ, গন্ধাধিভূ, রসাধিভূ, ফোট্ঠব্বাধিভূ, ধম্মাধিভূ, অধিভূ, অনধিভূতো [অনধিভূতো কেহিচি কিলেসেহি (ক.)], অধিভোসি তে পাপকে অকুসলে ধম্মে সংকিলেসিকে পোনোব্ভৰিকে সদরে ¶ দুক্খৰিপাকে আযতিং জাতিজরামরণিযে. এৰং খো, আৰুসো, অনৰস্সুতো হোতী’’তি.

অথ ¶ ¶ খো ভগৰা ৰুট্ঠহিত্ৰা আযস্মন্তং মহামোগ্গল্লানং আমন্তেসি – ‘‘সাধু সাধু, মোগ্গল্লান! সাধু খো ত্ৰং, মোগ্গল্লান, ভিক্খূনং অৰস্সুতপরিযাযঞ্চ অনৰস্সুতপরিযাযঞ্চ অভাসী’’তি.

ইদমৰোচ আযস্মা মহামোগ্গল্লানো. সমনুঞ্ঞো সত্থা ¶ অহোসি. অত্তমনা তে ভিক্খূ আযস্মতো মহামোগ্গল্লানস্স ভাসিতং অভিনন্দুন্তি. ছট্ঠং.

৭. দুক্খধম্মসুত্তং

২৪৪. যতো খো, ভিক্খৰে, ভিক্খু সব্বেসংযেৰ দুক্খধম্মানং সমুদযঞ্চ অত্থঙ্গমঞ্চ যথাভূতং পজানাতি. তথা খো পনস্স কামা দিট্ঠা হোন্তি, যথাস্স কামে পস্সতো, যো কামেসু কামচ্ছন্দো কামস্নেহো কামমুচ্ছা কামপরিল়াহো, সো নানুসেতি. তথা খো পনস্স চারো চ ৰিহারো চ অনুবুদ্ধো হোতি, যথা চরন্তং ৰিহরন্তং অভিজ্ঝাদোমনস্সা পাপকা অকুসলা ধম্মা নানুসেন্তি.

‘‘কথঞ্চ, ভিক্খৰে, ভিক্খু সব্বেসংযেৰ দুক্খধম্মানং সমুদযঞ্চ অত্থঙ্গমঞ্চ যথাভূতং পজানাতি? ‘ইতি রূপং, ইতি রূপস্স সমুদযো, ইতি রূপস্স অত্থঙ্গমো; ইতি ৰেদনা… ইতি সঞ্ঞা… ইতি সঙ্খারা… ইতি ৰিঞ্ঞাণং, ইতি ৰিঞ্ঞাণস্স সমুদযো, ইতি ৰিঞ্ঞাণস্স অত্থঙ্গমো’তি – এৰং খো, ভিক্খৰে, ভিক্খু সব্বেসংযেৰ দুক্খধম্মানং সমুদযঞ্চ অত্থঙ্গমঞ্চ যথাভূতং পজানাতি.

‘‘কথঞ্চ, ভিক্খৰে, ভিক্খুনো কামা দিট্ঠা হোন্তি? যথাস্স কামে ¶ পস্সতো, যো কামেসু কামচ্ছন্দো কামস্নেহো কামমুচ্ছা কামপরিল়াহো, সো নানুসেতি. সেয্যথাপি, ভিক্খৰে, অঙ্গারকাসু সাধিকপোরিসা পুণ্ণা অঙ্গারানং ৰীতচ্চিকানং ৰীতধূমানং. অথ পুরিসো আগচ্ছেয্য জীৰিতুকামো অমরিতুকামো সুখকামো দুক্খপটিকূলো. তমেনং দ্ৰে বলৰন্তো পুরিসা নানাবাহাসু গহেত্ৰা, তং অঙ্গারকাসুং উপকড্ঢেয্যুং. সো ইতিচীতিচেৰ কাযং সন্নামেয্য. তং কিস্স হেতু? ঞাত [ঞাণং (ক.)] ঞ্হি, ভিক্খৰে, তস্স ¶ পুরিসস্স [পুরিসস্স হোতি (সী. স্যা. কং. পী.), পুরিসস্স হেতু হোতি (ক.) ম. নি. ২.৪৫] ইমং চাহং অঙ্গারকাসুং পপতিস্সামি, ততোনিদানং মরণং ৰা নিগচ্ছিস্সামি মরণমত্তং ৰা দুক্খন্তি. এৰমেৰ খো ¶ , ভিক্খৰে ¶ , ভিক্খুনো অঙ্গারকাসূপমা কামা দিট্ঠা হোন্তি, যথাস্স কামে পস্সতো, যো কামেসু কামচ্ছন্দো কামস্নেহো কামমুচ্ছা কামপরিল়াহো, সো নানুসেতি.

‘‘কথঞ্চ, ভিক্খৰে, ভিক্খুনো চারো চ ৰিহারো চ অনুবুদ্ধো হোতি, যথা চরন্তং ৰিহরন্তং অভিজ্ঝাদোমনস্সা পাপকা অকুসলা ধম্মা নানুস্সৰন্তি [নানুসেন্তি (ক.)]? সেয্যথাপি, ভিক্খৰে, পুরিসো বহুকণ্টকং দাযং পৰিসেয্য. তস্স পুরতোপি কণ্টকো, পচ্ছতোপি কণ্টকো, উত্তরতোপি কণ্টকো, দক্খিণতোপি কণ্টকো, হেট্ঠতোপি কণ্টকো, উপরিতোপি কণ্টকো. সো সতোৰ অভিক্কমেয্য, সতোৰ পটিক্কমেয্য – ‘মা মং কণ্টকো’তি. এৰমেৰ খো, ভিক্খৰে, যং লোকে পিযরূপং সাতরূপং, অযং ৰুচ্চতি অরিযস্স ৰিনযে কণ্টকো’’তি. ইতি ৰিদিত্ৰা [কণ্ডকো. তং কণ্ডকোতি ইতি ৰিদিত্ৰা (সী.)] সংৰরো চ অসংৰরো চ ¶ ৰেদিতব্বো.

‘‘কথঞ্চ, ভিক্খৰে, অসংৰরো হোতি? ইধ, ভিক্খৰে, ভিক্খু চক্খুনা রূপং দিস্ৰা পিযরূপে রূপে অধিমুচ্চতি, অপ্পিযরূপে রূপে ব্যাপজ্জতি, অনুপট্ঠিতকাযস্সতি চ ৰিহরতি পরিত্তচেতসো, তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি, যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি…পে… জিৰ্হায রসং সাযিত্ৰা…পে… মনসা ধম্মং ৰিঞ্ঞায পিযরূপে ধম্মে অধিমুচ্চতি, অপ্পিযরূপে ধম্মে ব্যাপজ্জতি, অনুপট্ঠিতকাযস্সতি চ ৰিহরতি পরিত্তচেতসো, তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি. এৰং খো, ভিক্খৰে, অসংৰরো হোতি.

‘‘কথঞ্চ, ভিক্খৰে, সংৰরো হোতি? ইধ, ভিক্খৰে, ভিক্খু চক্খুনা রূপং দিস্ৰা পিযরূপে রূপে নাধিমুচ্চতি, অপ্পিযরূপে রূপে ন ব্যাপজ্জতি, উপট্ঠিতকাযস্সতি চ ৰিহরতি অপ্পমাণচেতসো, তঞ্চ চেতোৰিমুত্তিং পঞ্ঞাৰিমুত্তিং যথাভূতং পজানাতি, যত্থস্স তে উপ্পন্না পাপকা ¶ অকুসলা ধম্মা অপরিসেসা নিরুজ্ঝন্তি…পে… জিৰ্হা রসং সাযিত্ৰা…পে… মনসা ধম্মং ৰিঞ্ঞায পিযরূপে ধম্মে নাধিমুচ্চতি, অপ্পিযরূপে ধম্মে ন ব্যাপজ্জতি, উপট্ঠিতকাযস্সতি চ ৰিহরতি অপ্পমাণচেতসো, তঞ্চ চেতোৰিমুত্তিং পঞ্ঞাৰিমুত্তিং যথাভূতং পজানাতি, যত্থস্স তে উপ্পন্না পাপকা ¶ অকুসলা ধম্মা ¶ অপরিসেসা নিরুজ্ঝন্তি. এৰং খো, ভিক্খৰে, সংৰরো হোতি.

‘‘তস্স ¶ চে, ভিক্খৰে, ভিক্খুনো এৰং চরতো এৰং ৰিহরতো কদাচি করহচি সতিসম্মোসা উপ্পজ্জন্তি, পাপকা অকুসলা সরসঙ্কপ্পা সংযোজনিযা, দন্ধো, ভিক্খৰে, সতুপ্পাদো. অথ খো নং খিপ্পমেৰ পজহতি ৰিনোদেতি ব্যন্তীকরোতি অনভাৰং গমেতি.

‘‘সেয্যথাপি, ভিক্খৰে, পুরিসো দিৰসংসন্তত্তে [দিৰসসন্তত্তে (সী.)] অযোকটাহে দ্ৰে ৰা তীণি ৰা উদকফুসিতানি নিপাতেয্য. দন্ধো, ভিক্খৰে, উদকফুসিতানং নিপাতো, অথ খো নং খিপ্পমেৰ পরিক্খযং পরিযাদানং গচ্ছেয্য. এৰমেৰ খো, ভিক্খৰে, তস্স চে ভিক্খুনো এৰং চরতো, এৰং ৰিহরতো কদাচি করহচি সতিসম্মোসা উপ্পজ্জন্তি পাপকা অকুসলা সরসঙ্কপ্পা সংযোজনিযা, দন্ধো, ভিক্খৰে, সতুপ্পাদো. অথ খো নং খিপ্পমেৰ পজহতি ৰিনোদেতি ব্যন্তীকরোতি অনভাৰং গমেতি. এৰং খো, ভিক্খৰে, ভিক্খুনো চারো চ ৰিহারো চ অনুবুদ্ধো হোতি; যথা চরন্তং ৰিহরন্তং অভিজ্ঝাদোমনস্সা পাপকা অকুসলা ধম্মা নানুস্সৰন্তি. তঞ্চে, ভিক্খৰে, ভিক্খুং এৰং চরন্তং এৰং ৰিহরন্তং রাজানো ৰা রাজমহামত্তা ৰা মিত্তা ৰা অমচ্চা ৰা ঞাতী ৰা সালোহিতা ৰা, ভোগেহি অভিহট্ঠুং পৰারেয্যুং – ‘এহি [এৰং (সী.)], ভো পুরিস, কিং তে ইমে কাসাৰা অনুদহন্তি, কিং মুণ্ডো কপালমনুচরসি, এহি হীনাযাৰত্তিত্ৰা ভোগে চ ভুঞ্জস্সু, পুঞ্ঞানি চ করোহী’তি. সো ৰত, ভিক্খৰে, ভিক্খু ¶ এৰং চরন্তো এৰং ৰিহরন্তো সিক্খং পচ্চক্খায হীনাযাৰত্তিস্সতীতি নেতং ঠানং ৰিজ্জতি.

‘‘সেয্যথাপি ¶ , ভিক্খৰে, গঙ্গা নদী পাচীননিন্না পাচীনপোণা পাচীনপব্ভারা. অথ মহাজনকাযো আগচ্ছেয্য কুদ্দাল-পিটকং আদায – ‘মযং ইমং গঙ্গং নদিং পচ্ছানিন্নং করিস্সাম পচ্ছাপোণং পচ্ছাপব্ভার’ন্তি. তং কিং মঞ্ঞথ, ভিক্খৰে, অপি নু খো সো মহাজনকাযো গঙ্গং নদিং পচ্ছানিন্নং করেয্য পচ্ছাপোণং পচ্ছাপব্ভার’’ন্তি? ‘‘নো হেতং, ভন্তে’’. ‘‘তং কিস্স হেতু’’? ‘‘গঙ্গা, ভন্তে, নদী পাচীননিন্না পাচীনপোণা পাচীনপব্ভারা; সা ন সুকরা পচ্ছানিন্না কাতুং পচ্ছাপোণা পচ্ছাপব্ভারা. যাৰদেৰ চ পন সো মহাজনকাযো কিলমথস্স ৰিঘাতস্স ভাগী অস্সা’’তি. ‘‘এৰমেৰ খো, ভিক্খৰে, তঞ্চে ভিক্খুং এৰং চরন্তং এৰং ৰিহরন্তং রাজানো ৰা রাজমহামত্তা ¶ ৰা মিত্তা ৰা অমচ্চা ৰা ঞাতী ৰা সালোহিতা ৰা ভোগেহি অভিহট্ঠুং পৰারেয্যুং – ‘এহি, ভো পুরিস, কিং তে ইমে কাসাৰা অনুদহন্তি, কিং মুণ্ডো কপালমনুচরসি, এহি হীনাযাৰত্তিত্ৰা ভোগে চ ভুঞ্জস্সু, পুঞ্ঞানি ¶ চ করোহী’তি. সো ৰত, ভিক্খৰে, ভিক্খু এৰং চরন্তো এৰং ৰিহরন্তো সিক্খং পচ্চক্খায হীনাযাৰত্তিস্সতীতি নেতং ঠানং ৰিজ্জতি. তং কিস্স হেতু? যঞ্হি তং, ভিক্খৰে, চিত্তং দীঘরত্তং ৰিৰেকনিন্নং ৰিৰেকপোণং ৰিৰেকপব্ভারং, তথা [কঞ্চ (স্যা. কং. ক.)] হীনাযাৰত্তিস্সতীতি নেতং ঠানং ৰিজ্জতী’’তি. সত্তমং.

৮. কিংসুকোপমসুত্তং

২৪৫. অথ ¶ খো অঞ্ঞতরো ভিক্খু যেনঞ্ঞতরো ভিক্খু তেনুপসঙ্কমি; উপসঙ্কমিত্ৰা তং ভিক্খুং এতদৰোচ – ‘‘কিত্তাৰতা নু খো, আৰুসো, ভিক্খুনো দস্সনং সুৰিসুদ্ধং হোতী’’তি? ‘‘যতো খো, আৰুসো, ভিক্খু ছন্নং ফস্সাযতনানং সমুদযঞ্চ ¶ অত্থঙ্গমঞ্চ যথাভূতং পজানাতি, এত্তাৰতা খো, আৰুসো, ভিক্খুনো দস্সনং সুৰিসুদ্ধং হোতী’’তি.

অথ খো সো ভিক্খু অসন্তুট্ঠো তস্স ভিক্খুস্স পঞ্হৰেয্যাকরণেন [পঞ্হাৰেয্যাকরণেন (স্যা. কং. ক.)], যেনঞ্ঞতরো ভিক্খু তেনুপসঙ্কমি; উপসঙ্কমিত্ৰা তং ভিক্খুং এতদৰোচ – ‘‘কিত্তাৰতা নু খো, আৰুসো, ভিক্খুনো দস্সনং সুৰিসুদ্ধং হোতী’’তি? ‘‘যতো খো, আৰুসো, ভিক্খু পঞ্চন্নং উপাদানক্খন্ধানং সমুদযঞ্চ অত্থঙ্গমঞ্চ যথাভূতং পজানাতি, এত্তাৰতা খো, আৰুসো, ভিক্খুনো দস্সনং সুৰিসুদ্ধং হোতী’’তি.

অথ খো সো ভিক্খু অসন্তুট্ঠো তস্স ভিক্খুস্স পঞ্হৰেয্যাকরণেন, যেনঞ্ঞতরো ভিক্খু তেনুপসঙ্কমি; উপসঙ্কমিত্ৰা তং ভিক্খুং এতদৰোচ – ‘‘কিত্তাৰতা নু খো, আৰুসো, ভিক্খুনো দস্সনং সুৰিসুদ্ধং হোতী’’তি? ‘‘যতো খো, আৰুসো, ভিক্খু চতুন্নং মহাভূতানং সমুদযঞ্চ অত্থঙ্গমঞ্চ যথাভূতং পজানাতি, এত্তাৰতা খো, আৰুসো, ভিক্খুনো দস্সনং সুৰিসুদ্ধং হোতী’’তি.

অথ খো সো ভিক্খু অসন্তুট্ঠো তস্স ভিক্খুস্স পঞ্হৰেয্যাকরণেন, যেনঞ্ঞতরো ভিক্খু তেনুপসঙ্কমি; উপসঙ্কমিত্ৰা তং ভিক্খুং এতদৰোচ – ‘‘কিত্তাৰতা ¶ নু খো, আৰুসো, ভিক্খুনো দস্সনং সুৰিসুদ্ধং হোতী’’তি? ‘‘যতো খো, আৰুসো, ভিক্খু যং কিঞ্চি সমুদযধম্মং ¶ , সব্বং তং ¶ নিরোধধম্মন্তি যথাভূতং পজানাতি, এত্তাৰতা, খো, আৰুসো, ভিক্খুনো দস্সনং সুৰিসুদ্ধং হোতী’’তি.

অথ খো সো ভিক্খু অসন্তুট্ঠো তস্স ভিক্খুস্স পঞ্হৰেয্যাকরণেন, যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘ইধাহং, ভন্তে, যেনঞ্ঞতরো ভিক্খু তেনুপসঙ্কমিং; উপসঙ্কমিত্ৰা তং ভিক্খুং এতদৰোচং – কিত্তাৰতা নু খো, আৰুসো, ভিক্খুনো দস্সনং সুৰিসুদ্ধং হোতী’তি? এৰং ৰুত্তে, ভন্তে, সো ভিক্খু মং এতদৰোচ – ‘যতো খো, আৰুসো, ভিক্খু ছন্নং ফস্সাযতনানং সমুদযঞ্চ অত্থঙ্গমঞ্চ যথাভূতং পজানাতি, এত্তাৰতা খো, আৰুসো, ভিক্খুনো দস্সনং সুৰিসুদ্ধং হোতী’তি. অথ খ্ৰাহং, ভন্তে, অসন্তুট্ঠো তস্স ভিক্খুস্স পঞ্হৰেয্যাকরণেন ¶ , যেনঞ্ঞতরো ভিক্খু তেনুপসঙ্কমিং; উপসঙ্কমিত্ৰা তং ভিক্খুং এতদৰোচং – ‘কিত্তাৰতা নু খো, আৰুসো, ভিক্খুনো দস্সনং সুৰিসুদ্ধং হোতী’তি? এৰং ৰুত্তে, ভন্তে, সো ভিক্খু মং এতদৰোচ – ‘যতো খো, আৰুসো, ভিক্খু পঞ্চন্নং উপাদানক্খন্ধানং…পে… চতুন্নং মহাভূতানং সমুদযঞ্চ অত্থঙ্গমঞ্চ যথাভূতং পজানাতি…পে… যং কিঞ্চি সমুদযধম্মং, সব্বং তং নিরোধধম্মন্তি যথাভূতং পজানাতি, এত্তাৰতা খো, আৰুসো, ভিক্খুনো দস্সনং সুৰিসুদ্ধং হোতী’তি. অথ খ্ৰাহং, ভন্তে, অসন্তুট্ঠো তস্স ভিক্খুস্স পঞ্হৰেয্যাকরণেন যেন ভগৰা তেনুপসঙ্কমিং ( ) [(উপসঙ্কমিত্ৰা ভগৰন্তং এতদৰোচং) (ক.)]. কিত্তাৰতা ¶ নু খো, ভন্তে, ভিক্খুনো দস্সনং সুৰিসুদ্ধং হোতী’’তি?

‘‘সেয্যথাপি, ভিক্খু, পুরিসস্স কিংসুকো অদিট্ঠপুব্বো অস্স. সো যেনঞ্ঞতরো পুরিসো কিংসুকস্স দস্সাৰী তেনুপসঙ্কমেয্য. উপসঙ্কমিত্ৰা তং পুরিসং এৰং ৰদেয্য – ‘কীদিসো, ভো পুরিস, কিংসুকো’তি? সো এৰং ৰদেয্য – ‘কাল়কো খো, অম্ভো পুরিস, কিংসুকো – সেয্যথাপি ঝামখাণূ’তি. তেন খো পন, ভিক্খু, সমযেন তাদিসোৰস্স কিংসুকো যথাপি [যথা (সী. স্যা. কং.) দুতিযৰারাদীসু পন ‘‘যথাপি’’ত্ৰেৰ দিস্সতি] তস্স পুরিসস্স দস্সনং. অথ খো, সো ভিক্খু, পুরিসো অসন্তুট্ঠো তস্স পুরিসস্স পঞ্হৰেয্যাকরণেন, যেনঞ্ঞতরো পুরিসো কিংসুকস্স দস্সাৰী তেনুপসঙ্কমেয্য; উপসঙ্কমিত্ৰা তং পুরিসং এৰং ৰদেয্য – ‘কীদিসো ¶ , ভো পুরিস, কিংসুকো’তি? সো এৰং ৰদেয্য – ‘লোহিতকো খো, অম্ভো পুরিস, কিংসুকো – সেয্যথাপি মংসপেসী’তি. তেন খো পন, ভিক্খু, সমযেন তাদিসোৰস্স কিংসুকো যথাপি তস্স পুরিসস্স দস্সনং. অথ খো সো ভিক্খু পুরিসো অসন্তুট্ঠো তস্স পুরিসস্স পঞ্হৰেয্যাকরণেন, যেনঞ্ঞতরো পুরিসো কিংসুকস্স দস্সাৰী তেনুপসঙ্কমেয্য ¶ ; উপসঙ্কমিত্ৰা তং পুরিসং এৰং ৰদেয্য – ‘কীদিসো, ভো পুরিস, কিংসুকো’তি? সো এৰং ৰদেয্য – ‘ওচীরকজাতো [ওজীরকজাতো (সী.), ওদীরকজাতো (পী.)] খো, অম্ভো পুরিস, কিংসুকো আদিন্নসিপাটিকো – সেয্যথাপি সিরীসো’তি. তেন খো পন, ভিক্খু, সমযেন তাদিসোৰস্স কিংসুকো, যথাপি তস্স পুরিসস্স দস্সনং. অথ খো সো ভিক্খু পুরিসো অসন্তুট্ঠো তস্স পুরিসস্স পঞ্হৰেয্যাকরণেন ¶ , যেনঞ্ঞতরো পুরিসো কিংসুকস্স দস্সাৰী তেনুপসঙ্কমেয্য; উপসঙ্কমিত্ৰা তং ¶ পুরিসং এৰং ৰদেয্য – ‘কীদিসো, ভো পুরিস, কিংসুকো’তি? সো এৰং ৰদেয্য – ‘বহলপত্তপলাসো সন্দচ্ছাযো [সণ্ডচ্ছাযো (স্যা. কং.)] খো, অম্ভো পুরিস, কিংসুকো – সেয্যথাপি নিগ্রোধো’তি. তেন খো পন, ভিক্খু, সমযেন তাদিসোৰস্স কিংসুকো, যথাপি তস্স পুরিসস্স দস্সনং. এৰমেৰ খো, ভিক্খু, যথা যথা অধিমুত্তানং তেসং সপ্পুরিসানং দস্সনং সুৰিসুদ্ধং হোতি, তথা তথা খো তেহি সপ্পুরিসেহি ব্যাকতং.

‘‘সেয্যথাপি, ভিক্খু, রঞ্ঞো পচ্চন্তিমং নগরং দল়্হুদ্ধাপং [দল়্হুদ্দাপং (সী. পী.)] দল়্হপাকারতোরণং ছদ্ৰারং. তত্রস্স দোৰারিকো পণ্ডিতো ব্যত্তো মেধাৰী, অঞ্ঞাতানং নিৰারেতা, ঞাতানং পৰেসেতা. পুরত্থিমায দিসায আগন্ত্ৰা সীঘং দূতযুগং তং দোৰারিকং এৰং ৰদেয্য – ‘কহং, ভো পুরিস, ইমস্স নগরস্স নগরস্সামী’তি? সো এৰং ৰদেয্য – ‘এসো, ভন্তে, মজ্ঝে সিঙ্ঘাটকে নিসিন্নো’তি. অথ খো তং সীঘং দূতযুগং নগরস্সামিকস্স যথাভূতং ৰচনং নিয্যাতেত্ৰা যথাগতমগ্গং পটিপজ্জেয্য. পচ্ছিমায দিসায আগন্ত্ৰা সীঘং দূতযুগং…পে… উত্তরায দিসায… দক্খিণায দিসায আগন্ত্ৰা সীঘং দূতযুগং তং দোৰারিকং এৰং ৰদেয্য – ‘কহং, ভো পুরিস, ইমস্স নগরস্সামী’তি? সো এৰং ৰদেয্য – ‘এসো, ভন্তে, মজ্ঝে সিঙ্ঘাটকে নিসিন্নো’তি. অথ খো তং সীঘং দূতযুগং নগরস্সামিকস্স যথাভূতং ৰচনং নিয্যাতেত্ৰা যথাগতমগ্গং পটিপজ্জেয্য.

‘‘উপমা ¶ খো ম্যাযং, ভিক্খু, কতা অত্থস্স ৰিঞ্ঞাপনায. অযঞ্চেত্থ অত্থো ¶ – ‘নগর’ন্তি খো, ভিক্খু, ইমস্সেতং চাতুমহাভূতিকস্স কাযস্স অধিৰচনং মাতাপেত্তিকসম্ভৰস্স ওদনকুম্মাসূপচযস্স অনিচ্চুচ্ছাদনপরিমদ্দনভেদনৰিদ্ধংসনধম্মস্স. ‘ছ দ্ৰারা’তি খো, ভিক্খু, ছন্নেতং অজ্ঝত্তিকানং আযতনানং অধিৰচনং. ‘দোৰারিকো’তি খো, ভিক্খু, সতিযা এতং অধিৰচনং. ‘সীঘং ¶ দূতযুগ’ন্তি খো, ভিক্খু, সমথৰিপস্সনানেতং অধিৰচনং. ‘নগরস্সামী’তি খো, ভিক্খু, ৰিঞ্ঞাণস্সেতং অধিৰচনং. ‘মজ্ঝে সিঙ্ঘাটকো’তি খো ¶ , ভিক্খু, চতুন্নেতং মহাভূতানং অধিৰচনং – পথৰীধাতুযা, আপোধাতুযা, তেজোধাতুযা, ৰাযোধাতুযা. ‘যথাভূতং ৰচন’ন্তি খো, ভিক্খু, নিব্বানস্সেতং অধিৰচনং. ‘যথাগতমগ্গো’তি খো, ভিক্খু, অরিযস্সেতং অট্ঠঙ্গিকস্স মগ্গস্স অধিৰচনং, সেয্যথিদং – সম্মাদিট্ঠিযা…পে… সম্মাসমাধিস্সা’’তি. অট্ঠমং.

৯. ৰীণোপমসুত্তং

২৪৬. ‘‘যস্স কস্সচি, ভিক্খৰে, ভিক্খুস্স ৰা ভিক্খুনিযা ৰা চক্খুৰিঞ্ঞেয্যেসু রূপেসু উপ্পজ্জেয্য ছন্দো ৰা রাগো ৰা দোসো ৰা মোহো ৰা পটিঘং ৰাপি [পটিঘং ৰা (সী.)] চেতসো, ততো চিত্তং নিৰারেয্য. সভযো চেসো মগ্গো সপ্পটিভযো চ সকণ্টকো চ সগহনো চ উম্মগ্গো চ কুম্মগ্গো চ দুহিতিকো চ. অসপ্পুরিসসেৰিতো চেসো মগ্গো, ন চেসো মগ্গো সপ্পুরিসেহি সেৰিতো. ন ত্ৰং এতং অরহসীতি. ততো চিত্তং নিৰারযে চক্খুৰিঞ্ঞেয্যেহি রূপেহি…পে… যস্স কস্সচি, ভিক্খৰে, ভিক্খুস্স ৰা ভিক্খুনিযা ৰা জিৰ্হাৰিঞ্ঞেয্যেসু রসেসু…পে… মনোৰিঞ্ঞেয্যেসু ধম্মেসু উপ্পজ্জেয্য ছন্দো ৰা রাগো ৰা দোসো ৰা ¶ মোহো ৰা পটিঘং ৰাপি চেতসো ততো চিত্তং নিৰারেয্য. সভযো চেসো মগ্গো সপ্পটিভযো চ সকণ্টকো চ সগহনো চ উম্মগ্গো চ কুম্মগ্গো চ দুহিতিকো চ. অসপ্পুরিসসেৰিতো চেসো মগ্গো, ন চেসো মগ্গো সপ্পুরিসেহি সেৰিতো. ন ত্ৰং এতং অরহসীতি. ততো চিত্তং নিৰারযে মনোৰিঞ্ঞেয্যেহি ধম্মেহি.

‘‘সেয্যথাপি, ভিক্খৰে, কিট্ঠং সম্পন্নং. কিট্ঠারক্খো [কিট্ঠারক্খকো (সী.)] চ পমত্তো, গোণো চ কিট্ঠাদো অদুং কিট্ঠং ওতরিত্ৰা ¶ যাৰদত্থং মদং আপজ্জেয্য পমাদং আপজ্জেয্য ¶ ; এৰমেৰ খো, ভিক্খৰে, অস্সুতৰা পুথুজ্জনো ছসু ফস্সাযতনেসু অসংৰুতকারী পঞ্চসু কামগুণেসু যাৰদত্থং মদং আপজ্জতি পমাদং আপজ্জতি.

‘‘সেয্যথাপি, ভিক্খৰে, কিট্ঠং সম্পন্নং কিট্ঠারক্খো চ অপ্পমত্তো গোণো চ কিট্ঠাদো অদুং কিট্ঠং ওতরেয্য. তমেনং কিট্ঠারক্খো নাসাযং সুগ্গহিতং গণ্হেয্য. নাসাযং সুগ্গহিতং গহেত্ৰা উপরিঘটাযং সুনিগ্গহিতং নিগ্গণ্হেয্য. উপরিঘটাযং সুনিগ্গহিতং নিগ্গহেত্ৰা দণ্ডেন সুতাল়িতং তাল়েয্য. দণ্ডেন সুতাল়িতং তাল়েত্ৰা ওসজ্জেয্য. দুতিযম্পি খো, ভিক্খৰে ¶ …পে… ততিযম্পি খো, ভিক্খৰে, গোণো কিট্ঠাদো অদুং কিট্ঠং ওতরেয্য. তমেনং কিট্ঠারক্খো নাসাযং সুগ্গহিতং গণ্হেয্য. নাসাযং সুগ্গহিতং গহেত্ৰা উপরিঘটাযং সুনিগ্গহিতং নিগ্গণ্হেয্য. উপরিঘটাযং সুনিগ্গহিতং নিগ্গহেত্ৰা দণ্ডেন সুতাল়িতং তাল়েয্য. দণ্ডেন সুতাল়িতং তাল়েত্ৰা ওসজ্জেয্য. এৰঞ্হি ¶ সো, ভিক্খৰে, গোণো কিট্ঠাদো গামগতো ৰা অরঞ্ঞগতো ৰা, ঠানবহুলো ৰা অস্স নিসজ্জবহুলো ৰা ন তং কিট্ঠং পুন ওতরেয্য – তমেৰ পুরিমং দণ্ডসম্ফস্সং সমনুস্সরন্তো. এৰমেৰ খো, ভিক্খৰে, যতো খো ভিক্খুনো ছসু ফস্সাযতনেসু চিত্তং উদুজিতং হোতি সুদুজিতং, অজ্ঝত্তমেৰ সন্তিট্ঠতি, সন্নিসীদতি, একোদি হোতি, সমাধিযতি.

‘‘সেয্যথাপি, ভিক্খৰে, রঞ্ঞো ৰা রাজমহামত্তস্স ৰা ৰীণায সদ্দো অস্সুতপুব্বো অস্স. সো ৰীণাসদ্দং সুণেয্য. সো এৰং ৰদেয্য – ‘অম্ভো, কস্স [কিস্স (সী. পী.)] নু খো এসো সদ্দো এৰংরজনীযো এৰংকমনীযো এৰংমদনীযো ¶ এৰংমুচ্ছনীযো এৰংবন্ধনীযো’তি? তমেনং এৰং ৰদেয্যুং – ‘এসা, খো, ভন্তে, ৰীণা নাম, যস্সা এসো সদ্দো এৰংরজনীযো এৰংকমনীযো এৰংমদনীযো এৰংমুচ্ছনীযো এৰংবন্ধনীযো’তি. সো এৰং ৰদেয্য – ‘গচ্ছথ মে, ভো, তং ৰীণং আহরথা’তি. তস্স তং ৰীণং আহরেয্যুং. তমেনং এৰং ৰদেয্যুং – ‘অযং খো সা, ভন্তে, ৰীণা যস্সা এসো সদ্দো এৰংরজনীযো এৰংকমনীযো এৰংমদনীযো এৰংমুচ্ছনীযো এৰংবন্ধনীযো’তি. সো এৰং ৰদেয্য – ‘অলং মে, ভো, তায ৰীণায, তমেৰ মে সদ্দং আহরথা’তি. তমেনং এৰং ৰদেয্যুং – ‘অযং খো, ভন্তে, ৰীণা নাম অনেকসম্ভারা মহাসম্ভারা. অনেকেহি সম্ভারেহি সমারদ্ধা ৰদতি ¶ , সেয্যথিদং – দোণিঞ্চ পটিচ্চ চম্মঞ্চ পটিচ্চ দণ্ডঞ্চ পটিচ্চ উপধারণে চ ¶ পটিচ্চ তন্তিযো চ পটিচ্চ কোণঞ্চ পটিচ্চ পুরিসস্স চ তজ্জং ৰাযামং পটিচ্চ এৰাযং, ভন্তে, ৰীণা নাম অনেকসম্ভারা মহাসম্ভারা. অনেকেহি সম্ভারেহি সমারদ্ধা ৰদতী’তি. সো তং ৰীণং দসধা ৰা সতধা ৰা ফালেয্য, দসধা ৰা সতধা ৰা তং ফালেত্ৰা সকলিকং সকলিকং করেয্য. সকলিকং সকলিকং করিত্ৰা অগ্গিনা ডহেয্য, অগ্গিনা ডহিত্ৰা মসিং করেয্য. মসিং করিত্ৰা মহাৰাতে ৰা ওফুনেয্য [ওপুনেয্য (সী. পী.), ওফুণেয্য (?)], নদিযা ৰা সীঘসোতায পৰাহেয্য. সো এৰং ৰদেয্য – ‘অসতী কিরাযং, ভো, ৰীণা নাম, যথেৰং যং [যথেৰাযং (সী.), যথেৰযং (পী.)] কিঞ্চি ৰীণা নাম এত্থ চ পনাযং জনো [এত্থ পনাযং জনো (স্যা. কং.), এত্থ চ মহাজনো (পী. ক.)] অতিৰেলং পমত্তো পলল়িতো’তি. এৰমেৰ খো, ভিক্খৰে, ভিক্খু রূপং সমন্ৰেসতি [সমন্নেসতি (সী. স্যা. কং.), সমনেসতি (পী.)] যাৰতা রূপস্স গতি, ৰেদনং সমন্ৰেসতি যাৰতা ৰেদনায গতি, সঞ্ঞং সমন্ৰেসতি যাৰতা সঞ্ঞায গতি, সঙ্খারে সমন্ৰেসতি যাৰতা সঙ্খারানং গতি, ৰিঞ্ঞাণং সমন্ৰেসতি ¶ যাৰতা ৰিঞ্ঞাণস্স গতি. তস্স রূপং সমন্ৰেসতো যাৰতা রূপস্স গতি, ৰেদনং সমন্ৰেসতো…পে… সঞ্ঞং… সঙ্খারে… ৰিঞ্ঞাণং সমন্ৰেসতো যাৰতা ৰিঞ্ঞাণস্স গতি. যম্পিস্স তং হোতি ¶ অহন্তি ৰা মমন্তি ৰা অস্মীতি ৰা তম্পি তস্স ন হোতী’’তি. নৰমং.

১০. ছপ্পাণকোপমসুত্তং

২৪৭. ‘‘সেয্যথাপি, ভিক্খৰে, পুরিসো অরুগত্তো পক্কগত্তো সরৰনং পৰিসেয্য. তস্স কুসকণ্টকা চেৰ পাদে ৰিজ্ঝেয্যুং, সরপত্তানি চ গত্তানি ¶ [সরপত্তানি পক্কগত্তানি (স্যা. কং.), অরুপক্কানি গত্তানি (পী. ক.)] ৰিলেখেয্যুং. এৰঞ্হি সো, ভিক্খৰে, পুরিসো ভিয্যোসোমত্তায ততোনিদানং দুক্খং দোমনস্সং পটিসংৰেদিযেথ. এৰমেৰ খো, ভিক্খৰে, ইধেকচ্চো ভিক্খু গামগতো ৰা অরঞ্ঞগতো ৰা লভতি ৰত্তারং – ‘অযঞ্চ সো [অযঞ্চ খো (পী. ক.), অযং সো (?)] আযস্মা এৰংকারী এৰংসমাচারো অসুচিগামকণ্টকো’তি. তং কণ্টকোতি [তং ‘‘অসুচিগামকণ্ডতো’’তি (ক.)] ইতি ৰিদিত্ৰা সংৰরো চ অসংৰরো চ ৰেদিতব্বো.

‘‘কথঞ্চ ¶ , ভিক্খৰে, অসংৰরো হোতি? ইধ, ভিক্খৰে, ভিক্খু চক্খুনা রূপং দিস্ৰা পিযরূপে রূপে অধিমুচ্চতি, অপ্পিযরূপে রূপে ব্যাপজ্জতি, অনুপট্ঠিতকাযস্সতি চ ৰিহরতি পরিত্তচেতসো. তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি, যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি. সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায পিযরূপে ধম্মে অধিমুচ্চতি, অপ্পিযরূপে ধম্মে ব্যাপজ্জতি, অনুপট্ঠিতকাযস্সতি চ ৰিহরতি পরিত্তচেতসো, তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি, যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি.

‘‘সেয্যথাপি, ভিক্খৰে, পুরিসো ছপ্পাণকে গহেত্ৰা নানাৰিসযে নানাগোচরে দল়্হায রজ্জুযা বন্ধেয্য. অহিং গহেত্ৰা দল়্হায ¶ রজ্জুযা বন্ধেয্য. সুসুমারং [সুংসুমারং (সী. স্যা. কং. পী.)] গহেত্ৰা দল়্হায রজ্জুযা বন্ধেয্য. পক্খিং গহেত্ৰা দল়্হায রজ্জুযা বন্ধেয্য. কুক্কুরং গহেত্ৰা দল়্হায রজ্জুযা বন্ধেয্য ¶ . সিঙ্গালং গহেত্ৰা দল়্হায রজ্জুযা বন্ধেয্য. মক্কটং গহেত্ৰা দল়্হায রজ্জুযা বন্ধেয্য. দল়্হায রজ্জুযা বন্ধিত্ৰা মজ্ঝে গণ্ঠিং করিত্ৰা ওস্সজ্জেয্য. অথ খো, তে, ভিক্খৰে ¶ , ছপ্পাণকা নানাৰিসযা নানাগোচরা সকং সকং গোচরৰিসযং আৰিঞ্ছেয্যুং [আৰিঞ্জেয্যুং (সী.)] – অহি আৰিঞ্ছেয্য ‘ৰম্মিকং পৰেক্খামী’তি, সুসুমারো আৰিঞ্ছেয্য ‘উদকং পৰেক্খামী’তি, পক্খী আৰিঞ্ছেয্য ‘আকাসং ডেস্সামী’তি, কুক্কুরো আৰিঞ্ছেয্য ‘গামং পৰেক্খামী’তি, সিঙ্গালো আৰিঞ্ছেয্য ‘সীৰথিকং [সিৰথিকং (ক.)] পৰেক্খামী’তি, মক্কটো আৰিঞ্ছেয্য ‘ৰনং পৰেক্খামী’তি. যদা খো তে, ভিক্খৰে, ছপ্পাণকা ঝত্তা অস্সু কিলন্তা, অথ খো যো নেসং পাণকানং বলৰতরো অস্স তস্স তে অনুৰত্তেয্যুং, অনুৰিধাযেয্যুং ৰসং গচ্ছেয্যুং. এৰমেৰ খো, ভিক্খৰে, যস্স কস্সচি ভিক্খুনো কাযগতাসতি অভাৰিতা অবহুলীকতা, তং চক্খু আৰিঞ্ছতি মনাপিযেসু রূপেসু, অমনাপিযা রূপা পটিকূলা হোন্তি…পে… মনো আৰিঞ্ছতি মনাপিযেসু ধম্মেসু, অমনাপিযা ধম্মা পটিকূলা হোন্তি. এৰং খো, ভিক্খৰে, অসংৰরো হোতি.

‘‘কথঞ্চ, ভিক্খৰে, সংৰরো হোতি? ইধ, ভিক্খৰে, ভিক্খু চক্খুনা ¶ রূপং দিস্ৰা পিযরূপে রূপে নাধিমুচ্চতি, অপ্পিযরূপে রূপে ন ব্যাপজ্জতি, উপট্ঠিতকাযস্সতি চ ¶ ৰিহরতি অপ্পমাণচেতসো, তঞ্চ চেতোৰিমুত্তিং পঞ্ঞাৰিমুত্তিং যথাভূতং পজানাতি, যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি…পে… জিৰ্হা রসং সাযিত্ৰা…পে… মনসা ধম্মং ৰিঞ্ঞায পিযরূপে ধম্মে নাধিমুচ্চতি, অপ্পিযরূপে ধম্মে ¶ ন ব্যাপজ্জতি, উপট্ঠিতকাযস্সতি চ ৰিহরতি অপ্পমাণচেতসো, তঞ্চ চেতোৰিমুত্তিং পঞ্ঞাৰিমুত্তিং যথাভূতং পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি.

‘‘সেয্যথাপি, ভিক্খৰে, পুরিসো ছপ্পাণকে গহেত্ৰা নানাৰিসযে নানাগোচরে দল়্হায রজ্জুযা বন্ধেয্য. অহিং গহেত্ৰা দল়্হায রজ্জুযা বন্ধেয্য. সুসুমারং গহেত্ৰা দল়্হায রজ্জুযা বন্ধেয্য. পক্খিং গহেত্ৰা…পে… কুক্কুরং গহেত্ৰা… সিঙ্গালং গহেত্ৰা… মক্কটং গহেত্ৰা দল়্হায রজ্জুযা বন্ধেয্য. দল়্হায রজ্জুযা বন্ধিত্ৰা দল়্হে খীলে ৰা থম্ভে ৰা উপনিবন্ধেয্য. অথ খো তে, ভিক্খৰে, ছপ্পাণকা নানাৰিসযা নানাগোচরা সকং সকং গোচরৰিসযং আৰিঞ্ছেয্যুং – অহি আৰিঞ্ছেয্য ‘ৰম্মিকং পৰেক্খামী’তি, সুসুমারো আৰিঞ্ছেয্য ‘উদকং পৰেক্খামী’তি, পক্খী আৰিঞ্ছেয্য ‘আকাসং ডেস্সামী’তি, কুক্কুরো আৰিঞ্ছেয্য ‘গামং পৰেক্খামী’তি, সিঙ্গালো আৰিঞ্ছেয্য ‘সীৰথিকং পৰেক্খামী’তি, মক্কটো আৰিঞ্ছেয্য ‘ৰনং পৰেক্খামী’তি ¶ . যদা খো তে, ভিক্খৰে, ছপ্পাণকা ঝত্তা অস্সু কিলন্তা ¶ , অথ তমেৰ খীলং ৰা থম্ভং ৰা উপতিট্ঠেয্যুং, উপনিসীদেয্যুং, উপনিপজ্জেয্যুং. এৰমেৰ খো, ভিক্খৰে, যস্স কস্সচি ভিক্খুনো কাযগতাসতি ভাৰিতা বহুলীকতা, তং চক্খু নাৰিঞ্ছতি মনাপিযেসু রূপেসু, অমনাপিযা রূপা নপ্পটিকূলা হোন্তি…পে… জিৰ্হা নাৰিঞ্ছতি মনাপিযেসু রসেসু…পে… মনো নাৰিঞ্ছতি মনাপিযেসু ধম্মেসু, অমনাপিযা ধম্মা নপ্পটিকূলা হোন্তি. এৰং খো, ভিক্খৰে, সংৰরো হোতি.

‘‘‘দল়্হে খীলে ৰা থম্ভে ৰা’তি খো, ভিক্খৰে, কাযগতায সতিযা এতং অধিৰচনং. তস্মাতিহ ৰো, ভিক্খৰে, এৰং সিক্খিতব্বং – ‘কাযগতা নো সতি ভাৰিতা ভৰিস্সতি বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা’তি. এৰঞ্হি খো, ভিক্খৰে, সিক্খিতব্ব’’ন্তি. দসমং.

১১. যৰকলাপিসুত্তং

২৪৮. ‘‘সেয্যথাপি ¶ ¶ , ভিক্খৰে, যৰকলাপী চাতুমহাপথে নিক্খিত্তা অস্স. অথ ছ পুরিসা আগচ্ছেয্যুং ব্যাভঙ্গিহত্থা. তে যৰকলাপিং ছহি ব্যাভঙ্গীহি হনেয্যুং. এৰঞ্হি সা, ভিক্খৰে, যৰকলাপী সুহতা অস্স ছহি ব্যাভঙ্গীহি হঞ্ঞমানা. অথ সত্তমো পুরিসো আগচ্ছেয্য ব্যাভঙ্গিহত্থো. সো তং যৰকলাপিং সত্তমায ব্যাভঙ্গিযা হনেয্য. এৰঞ্হি সা ভিক্খৰে, যৰকলাপী সুহততরা অস্স, সত্তমায ব্যাভঙ্গিযা হঞ্ঞমানা. এৰমেৰ খো, ভিক্খৰে, অস্সুতৰা পুথুজ্জনো চক্খুস্মিং হঞ্ঞতি মনাপামনাপেহি রূপেহি…পে… জিৰ্হায হঞ্ঞতি মনাপামনাপেহি রসেহি…পে… মনস্মিং হঞ্ঞতি ¶ মনাপামনাপেহি ধম্মেহি. সচে সো, ভিক্খৰে, অস্সুতৰা পুথুজ্জনো আযতিং পুনব্ভৰায চেতেতি, এৰঞ্হি সো, ভিক্খৰে, মোঘপুরিসো সুহততরো হোতি, সেয্যথাপি সা যৰকলাপী সত্তমায ব্যাভঙ্গিযা হঞ্ঞমানা.

‘‘ভূতপুব্বং, ভিক্খৰে, দেৰাসুরসঙ্গামো সমুপব্যূল়্হো [সমুপব্বূল়্হো (সী. পী.)] অহোসি. অথ খো, ভিক্খৰে, ৰেপচিত্তি অসুরিন্দো অসুরে আমন্তেসি – ‘সচে, মারিসা, দেৰাসুরসঙ্গামে সমুপব্যূল়্হে অসুরা জিনেয্যুং দেৰা পরাজিনেয্যুং, যেন নং সক্কং দেৰানমিন্দং কণ্ঠপঞ্চমেহি বন্ধনেহি বন্ধিত্ৰা মম সন্তিকে আনেয্যাথ অসুরপুর’ন্তি. সক্কোপি খো, ভিক্খৰে, দেৰানমিন্দো দেৰে তাৰতিংসে আমন্তেসি – ‘সচে, মারিসা, দেৰাসুরসঙ্গামে সমুপব্যূল়্হে দেৰা জিনেয্যুং অসুরা পরাজিনেয্যুং, যেন ¶ নং ৰেপচিত্তিং অসুরিন্দং কণ্ঠপঞ্চমেহি বন্ধনেহি বন্ধিত্ৰা মম সন্তিকে আনেয্যাথ সুধম্মং দেৰসভ’ন্তি. তস্মিং খো পন, ভিক্খৰে, সঙ্গামে দেৰা জিনিংসু, অসুরা পরাজিনিংসু ¶ . অথ খো, ভিক্খৰে, দেৰা তাৰতিংসা ৰেপচিত্তিং অসুরিন্দং কণ্ঠপঞ্চমেহি বন্ধনেহি বন্ধিত্ৰা সক্কস্স দেৰানমিন্দস্স সন্তিকে আনেসুং সুধম্মং দেৰসভং. তত্র সুদং, ভিক্খৰে, ৰেপচিত্তি অসুরিন্দো কণ্ঠপঞ্চমেহি বন্ধনেহি বদ্ধো [বন্ধো (সী. স্যা. কং. ক.)] হোতি. যদা খো, ভিক্খৰে, ৰেপচিত্তিস্স অসুরিন্দস্স এৰং হোতি – ‘ধম্মিকা খো দেৰা, অধম্মিকা অসুরা ¶ , ইধেৰ দানাহং ¶ দেৰপুরং গচ্ছামী’তি. অথ কণ্ঠপঞ্চমেহি বন্ধনেহি মুত্তং অত্তানং সমনুপস্সতি, দিব্বেহি চ পঞ্চহি কামগুণেহি সমপ্পিতো সমঙ্গীভূতো পরিচারেতি. যদা চ খো, ভিক্খৰে, ৰেপচিত্তিস্স অসুরিন্দস্স এৰং হোতি – ‘ধম্মিকা খো অসুরা, অধম্মিকা দেৰা, তত্থেৰ দানাহং অসুরপুরং গমিস্সামী’তি, অথ কণ্ঠপঞ্চমেহি বন্ধনেহি বদ্ধং অত্তানং সমনুপস্সতি. দিব্বেহি চ পঞ্চহি কামগুণেহি পরিহাযতি. এৰং সুখুমং খো, ভিক্খৰে, ৰেপচিত্তিবন্ধনং. ততো সুখুমতরং মারবন্ধনং. মঞ্ঞমানো খো, ভিক্খৰে, বদ্ধো মারস্স, অমঞ্ঞমানো মুত্তো পাপিমতো.

‘‘‘অস্মী’তি, ভিক্খৰে, মঞ্ঞিতমেতং, ‘অযমহমস্মী’তি মঞ্ঞিতমেতং, ‘ভৰিস্স’ন্তি মঞ্ঞিতমেতং, ‘ন ভৰিস্স’ন্তি মঞ্ঞিতমেতং, ‘রূপী ভৰিস্স’ন্তি মঞ্ঞিতমেতং, ‘অরূপী ভৰিস্স’ন্তি মঞ্ঞিতমেতং, ‘সঞ্ঞী ভৰিস্স’ন্তি মঞ্ঞিতমেতং, ‘অসঞ্ঞী ভৰিস্স’ন্তি মঞ্ঞিতমেতং, ‘নেৰসঞ্ঞীনাসঞ্ঞী ভৰিস্স’ন্তি মঞ্ঞিতমেতং. মঞ্ঞিতং, ভিক্খৰে, রোগো, মঞ্ঞিতং গণ্ডো, মঞ্ঞিতং সল্লং. তস্মাতিহ, ভিক্খৰে, ‘অমঞ্ঞমানেন [অমঞ্ঞিতমানেন (পী. ক.)] চেতসা ৰিহরিস্সামা’তি – এৰঞ্হি ৰো, ভিক্খৰে, সিক্খিতব্বং.

‘‘‘অস্মী’তি, ভিক্খৰে, ইঞ্জিতমেতং, ‘অযমহমস্মী’তি ইঞ্জিতমেতং, ‘ভৰিস্স’ন্তি ইঞ্জিতমেতং, ‘ন ভৰিস্স’ন্তি ইঞ্জিতমেতং, ‘রূপী ভৰিস্স’ন্তি ইঞ্জিতমেতং, ‘অরূপী ভৰিস্স’ন্তি ইঞ্জিতমেতং, ‘সঞ্ঞী ভৰিস্স’ন্তি ইঞ্জিতমেতং, ‘অসঞ্ঞী ভৰিস্স’ন্তি ইঞ্জিতমেতং, ‘নেৰসঞ্ঞীনাসঞ্ঞী ভৰিস্স’ন্তি ¶ ইঞ্জিতমেতং. ইঞ্জিতং, ভিক্খৰে ¶ , রোগো, ইঞ্জিতং গণ্ডো, ইঞ্জিতং সল্লং. তস্মাতিহ, ভিক্খৰে, ‘অনিঞ্জমানেন [অনিঞ্জিযমানেন (স্যা. কং. ক.)] চেতসা ৰিহরিস্সামা’তি – এৰঞ্হি ৰো, ভিক্খৰে, সিক্খিতব্বং.

‘‘‘অস্মী’তি ¶ , ভিক্খৰে, ফন্দিতমেতং, ‘অযমহমস্মী’তি ফন্দিতমেতং, ‘ভৰিস্স’ন্তি…পে… ‘ন ভৰিস্স’ন্তি… ‘রূপী ভৰিস্স’ন্তি… ‘অরূপী ভৰিস্স’ন্তি… ‘সঞ্ঞী ভৰিস্স’ন্তি… ‘অসঞ্ঞী ভৰিস্স’ন্তি… ‘নেৰসঞ্ঞীনাসঞ্ঞী ভৰিস্স’ন্তি ফন্দিতমেতং. ফন্দিতং, ভিক্খৰে, রোগো, ফন্দিতং গণ্ডো, ফন্দিতং সল্লং. তস্মাতিহ, ভিক্খৰে, ‘অফন্দমানেন [অফন্দিযমানেন (স্যা. কং. ক.)] চেতসা ৰিহরিস্সামা’তি – এৰঞ্হি ৰো, ভিক্খৰে, সিক্খিতব্বং.

‘‘‘অস্মী’তি, ভিক্খৰে, পপঞ্চিতমেতং, ‘অযমহমস্মী’তি পপঞ্চিতমেতং, ‘ভৰিস্স’ন্তি…পে… ‘ন ভৰিস্স’ন্তি… ‘রূপী ভৰিস্স’ন্তি… ‘অরূপী ভৰিস্স’ন্তি… ‘সঞ্ঞী ভৰিস্স’ন্তি… ‘অসঞ্ঞী ভৰিস্স’ন্তি… ‘নেৰসঞ্ঞীনাসঞ্ঞী ভৰিস্স’ন্তি পপঞ্চিতমেতং ¶ . পপঞ্চিতং, ভিক্খৰে, রোগো, পপঞ্চিতং গণ্ডো, পপঞ্চিতং সল্লং. তস্মাতিহ, ভিক্খৰে, ‘নিপ্পপঞ্চেন চেতসা ৰিহরিস্সামা’তি – এৰঞ্হি ৰো, ভিক্খৰে, সিক্খিতব্বং.

‘‘‘অস্মী’তি, ভিক্খৰে, মানগতমেতং, ‘অযমহমস্মী’তি মানগতমেতং, ‘ভৰিস্স’ন্তি মানগতমেতং, ‘ন ভৰিস্স’ন্তি মানগতমেতং, ‘রূপী ভৰিস্স’ন্তি মানগতমেতং, ‘অরূপী ভৰিস্স’ন্তি মানগতমেতং, ‘সঞ্ঞী ভৰিস্স’ন্তি মানগতমেতং, ‘অসঞ্ঞী ভৰিস্স’ন্তি মানগতমেতং, ‘নেৰসঞ্ঞীনাসঞ্ঞী ভৰিস্স’ন্তি ¶ মানগতমেতং. মানগতং, ভিক্খৰে, রোগো, মানগতং গণ্ডো, মানগতং সল্লং. তস্মাতিহ, ভিক্খৰে, ‘নিহতমানেন চেতসা ৰিহরিস্সামা’তি – এৰঞ্হি ৰো, ভিক্খৰে, সিক্খিতব্ব’’ন্তি. একাদসমং.

আসীৰিসৰগ্গো একূনৰীসতিমো.

তস্সুদ্দানং –

আসীৰিসো ¶ রথো কুম্মো, দ্ৰে দারুক্খন্ধা অৰস্সুতো;

দুক্খধম্মা কিংসুকা ৰীণা, ছপ্পাণা যৰকলাপীতি.

সল়াযতনৰগ্গে চতুত্থপণ্ণাসকো সমত্তো.

তস্স ¶ ৰগ্গুদ্দানং –

নন্দিক্খযো সট্ঠিনযো, সমুদ্দো উরগেন চ;

চতুপণ্ণাসকা এতে, নিপাতেসু পকাসিতাতি.

সল়াযতনসংযুত্তং সমত্তং.

২. ৰেদনাসংযুত্তং

১. সগাথাৰগ্গো

১. সমাধিসুত্তং

২৪৯. ‘‘তিস্সো ¶ ¶ ¶ ইমা, ভিক্খৰে, ৰেদনা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা – ইমা খো, ভিক্খৰে, তিস্সো ৰেদনাতি.

‘‘সমাহিতো সম্পজানো, সতো বুদ্ধস্স সাৰকো;

ৰেদনা চ পজানাতি, ৰেদনানঞ্চ সম্ভৰং.

‘‘যত্থ চেতা নিরুজ্ঝন্তি, মগ্গঞ্চ খযগামিনং;

ৰেদনানং খযা ভিক্খু, নিচ্ছাতো পরিনিব্বুতো’’তি. পঠমং;

২. সুখসুত্তং

২৫০. ‘‘তিস্সো ইমা, ভিক্খৰে, ৰেদনা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা – ইমা খো, ভিক্খৰে, তিস্সো ৰেদনাতি.

‘‘সুখং ¶ ৰা যদি ৰা দুক্খং, অদুক্খমসুখং সহ;

অজ্ঝত্তঞ্চ বহিদ্ধা চ, যং কিঞ্চি অত্থি ৰেদিতং.

‘‘এতং ¶ দুক্খন্তি ঞত্ৰান, মোসধম্মং পলোকিনং;

ফুস্স ফুস্স ৰযং পস্সং, এৰং তত্থ ৰিরজ্জতী’’তি. দুতিযং;

৩. পহানসুত্তং

২৫১. ‘‘তিস্সো ইমা, ভিক্খৰে, ৰেদনা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা. সুখায, ভিক্খৰে, ৰেদনায রাগানুসযো পহাতব্বো, দুক্খায ৰেদনায পটিঘানুসযো পহাতব্বো, অদুক্খমসুখায ৰেদনায অৰিজ্জানুসযো পহাতব্বো. যতো ¶ খো, ভিক্খৰে, ভিক্খুনো সুখায ৰেদনায রাগানুসযো পহীনো হোতি, দুক্খায ৰেদনায পটিঘানুসযো পহীনো হোতি, অদুক্খমসুখায ¶ ৰেদনায অৰিজ্জানুসযো পহীনো হোতি, অযং ৰুচ্চতি, ভিক্খৰে, ‘ভিক্খু নিরনুসযো সম্মদ্দসো অচ্ছেচ্ছি [অচ্ছেজ্জি (বহূসু)] তণ্হং, ৰিৰত্তযি [ৰাৰত্তযি (সী.)] সংযোজনং, সম্মা মানাভিসমযা অন্তমকাসি দুক্খস্সা’’’তি.

‘‘সুখং ৰেদযমানস্স [ৰেদিযমানস্স (সী. পী.)], ৰেদনং অপ্পজানতো;

সো রাগানুসযো হোতি, অনিস্সরণদস্সিনো.

‘‘দুক্খং ৰেদযমানস্স, ৰেদনং অপ্পজানতো;

পটিঘানুসযো হোতি, অনিস্সরণদস্সিনো.

‘‘অদুক্খমসুখং সন্তং, ভূরিপঞ্ঞেন দেসিতং;

তঞ্চাপি অভিনন্দতি, নেৰ দুক্খা পমুচ্চতি.

‘‘যতো ¶ চ ভিক্খু আতাপী, সম্পজঞ্ঞং ন রিঞ্চতি;

ততো সো ৰেদনা সব্বা, পরিজানাতি পণ্ডিতো.

‘‘সো ৰেদনা পরিঞ্ঞায, দিট্ঠে ধম্মে অনাসৰো;

কাযস্স ভেদা ধম্মট্ঠো, সঙ্খ্যং নোপেতি ৰেদগূ’’তি. ততিযং;

৪. পাতালসুত্তং

২৫২. ‘‘অস্সুতৰা ¶ , ভিক্খৰে, পুথুজ্জনো যং ৰাচং ভাসতি – ‘অত্থি মহাসমুদ্দে পাতালো’তি. তং খো পনেতং, ভিক্খৰে, অস্সুতৰা পুথুজ্জনো অসন্তং অৰিজ্জমানং এৰং ৰাচং ভাসতি – ‘অত্থি মহাসমুদ্দে পাতালো’তি. সারীরিকানং খো এতং, ভিক্খৰে, দুক্খানং ৰেদনানং অধিৰচনং যদিদং ‘পাতালো’তি. অস্সুতৰা, ভিক্খৰে, পুথুজ্জনো সারীরিকায দুক্খায ৰেদনায ¶ ফুট্ঠো সমানো সোচতি কিলমতি পরিদেৰতি উরত্তাল়িং কন্দতি সম্মোহং আপজ্জতি. অযং ৰুচ্চতি, ভিক্খৰে, ‘অস্সুতৰা পুথুজ্জনো পাতালে ন পচ্চুট্ঠাসি, গাধঞ্চ নাজ্ঝগা’. সুতৰা চ খো, ভিক্খৰে, অরিযসাৰকো সারীরিকায দুক্খায ৰেদনায ফুট্ঠো সমানো নেৰ সোচতি, ন কিলমতি, ন পরিদেৰতি, ন উরত্তাল়িং কন্দতি, ন সম্মোহং আপজ্জতি. অযং ৰুচ্চতি, ভিক্খৰে, ‘সুতৰা অরিযসাৰকো পাতালে পচ্চুট্ঠাসি, গাধঞ্চ অজ্ঝগা’’’তি.

‘‘যো ¶ এতা নাধিৰাসেতি, উপ্পন্না ৰেদনা দুখা;

সারীরিকা পাণহরা, যাহি ফুট্ঠো পৰেধতি.

‘‘অক্কন্দতি পরোদতি, দুব্বলো অপ্পথামকো;

ন সো পাতালে পচ্চুট্ঠাসি, অথো গাধম্পি নাজ্ঝগা.

‘‘যো ¶ চেতা অধিৰাসেতি, উপ্পন্না ৰেদনা দুখা;

সারীরিকা পাণহরা, যাহি ফুট্ঠো ন ৰেধতি;

স ৰে পাতালে পচ্চুট্ঠাসি, অথো গাধম্পি অজ্ঝগা’’তি. চতুত্থং;

৫. দট্ঠব্বসুত্তং

২৫৩. ‘‘তিস্সো ইমা, ভিক্খৰে, ৰেদনা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা. সুখা, ভিক্খৰে, ৰেদনা দুক্খতো দট্ঠব্বা, দুক্খা ৰেদনা সল্লতো দট্ঠব্বা, অদুক্খমসুখা ৰেদনা অনিচ্চতো দট্ঠব্বা. যতো খো, ভিক্খৰে, ভিক্খুনো সুখা ৰেদনা দুক্খতো দিট্ঠা হোতি, দুক্খা ৰেদনা সল্লতো দিট্ঠা হোতি, অদুক্খমসুখা ৰেদনা অনিচ্চতো ¶ দিট্ঠা হোতি ¶ – অযং ৰুচ্চতি, ভিক্খৰে, ‘ভিক্খু সম্মদ্দসো অচ্ছেচ্ছি তণ্হং, ৰিৰত্তযি সংযোজনং, সম্মা মানাভিসমযা অন্তমকাসি দুক্খস্সা’’’তি.

‘‘যো সুখং দুক্খতো অদ্দ, দুক্খমদ্দক্খি সল্লতো;

অদুক্খমসুখং সন্তং, অদ্দক্খি নং অনিচ্চতো.

‘‘স ৰে সম্মদ্দসো ভিক্খু, পরিজানাতি ৰেদনা;

সো ৰেদনা পরিঞ্ঞায, দিট্ঠে ধম্মে অনাসৰো;

কাযস্স ভেদা ধম্মট্ঠো, সঙ্খ্যং নোপেতি ৰেদগূ’’তি. পঞ্চমং;

৬. সল্লসুত্তং

২৫৪. ‘‘অস্সুতৰা, ভিক্খৰে, পুথুজ্জনো সুখম্পি ৰেদনং ৰেদযতি [ৰেদিযতি (সী. পী.)], দুক্খম্পি ৰেদনং ৰেদযতি, অদুক্খমসুখম্পি ৰেদনং ৰেদযতি. সুতৰা, ভিক্খৰে, অরিযসাৰকো সুখম্পি ৰেদনং ৰেদযতি ¶ , দুক্খম্পি ৰেদনং ৰেদযতি, অদুক্খমসুখম্পি ¶ ৰেদনং ৰেদযতি. তত্র, ভিক্খৰে, কো ৰিসেসো কো অধিপ্পযাসো [অধিপ্পাযো (সী. ক.), অধিপ্পাযসো (স্যা. কং.), অধিপ্পাযোসো (পী.)] কিং নানাকরণং সুতৰতো অরিযসাৰকস্স অস্সুতৰতা পুথুজ্জনেনা’’তি? ভগৰংমূলকা নো, ভন্তে, ধম্মা…পে… অস্সুতৰা. ভিক্খৰে, পুথুজ্জনো দুক্খায ৰেদনায ফুট্ঠো সমানো সোচতি কিলমতি ¶ পরিদেৰতি উরত্তাল়িং কন্দতি সম্মোহং আপজ্জতি. সো দ্ৰে ৰেদনা ৰেদযতি – কাযিকঞ্চ, চেতসিকঞ্চ. সেয্যথাপি, ভিক্খৰে, পুরিসং সল্লেন ৰিজ্ঝেয্য [সল্লেন অনুৰিজ্ঝেয্যুং (সী. স্যা. কং. পী.)]. তমেনং দুতিযেন সল্লেন অনুৰেধং ৰিজ্ঝেয্য [সল্লেন অনুৰিজ্ঝেয্যুং (সী.), সল্লেন অনুৰেধং ৰিজ্ঝেয্যুং (স্যা. কং.), সল্লেন ৰিজ্ঝেয্যুং (পী.)]. এৰঞ্হি সো, ভিক্খৰে, পুরিসো দ্ৰিসল্লেন ৰেদনং ৰেদযতি. এৰমেৰ খো, ভিক্খৰে, অস্সুতৰা পুথুজ্জনো দুক্খায ৰেদনায ফুট্ঠো সমানো সোচতি কিলমতি পরিদেৰতি উরত্তাল়িং কন্দতি সম্মোহং আপজ্জতি. সো দ্ৰে ৰেদনা ৰেদযতি – কাযিকঞ্চ, চেতসিকঞ্চ. তস্সাযেৰ খো পন দুক্খায ৰেদনায ফুট্ঠো সমানো পটিঘৰা হোতি. তমেনং দুক্খায ৰেদনায পটিঘৰন্তং, যো দুক্খায ৰেদনায পটিঘানুসযো, সো অনুসেতি. সো দুক্খায ৰেদনায ফুট্ঠো সমানো কামসুখং অভিনন্দতি. তং কিস্স হেতু? ন হি সো, ভিক্খৰে, পজানাতি অস্সুতৰা পুথুজ্জনো অঞ্ঞত্র কামসুখা দুক্খায ৰেদনায নিস্সরণং, তস্স কামসুখঞ্চ অভিনন্দতো, যো সুখায ৰেদনায রাগানুসযো, সো অনুসেতি. সো তাসং ৰেদনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ ¶ নিস্সরণঞ্চ যথাভূতং নপ্পজানাতি. তস্স তাসং ৰেদনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং অপ্পজানতো, যো অদুক্খমসুখায ৰেদনায অৰিজ্জানুসযো, সো অনুসেতি. সো সুখঞ্চে ৰেদনং ৰেদযতি, সঞ্ঞুত্তো নং ৰেদযতি. দুক্খঞ্চে ৰেদনং ৰেদযতি, সঞ্ঞুত্তো নং ৰেদযতি. অদুক্খমসুখঞ্চে ¶ ৰেদনং ৰেদযতি, সঞ্ঞুত্তো নং ৰেদযতি. অযং ৰুচ্চতি, ভিক্খৰে, ‘অস্সুতৰা পুথুজ্জনো সঞ্ঞুত্তো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, সঞ্ঞুত্তো দুক্খস্মা’তি ৰদামি.

‘‘সুতৰা চ খো, ভিক্খৰে, অরিযসাৰকো দুক্খায ৰেদনায ফুট্ঠো সমানো ন সোচতি, ন কিলমতি, ন পরিদেৰতি, ন উরত্তাল়িং কন্দতি, ন ¶ সম্মোহং আপজ্জতি. সো একং ৰেদনং ৰেদযতি – কাযিকং, ন চেতসিকং.

‘‘সেয্যথাপি ¶ , ভিক্খৰে, পুরিসং সল্লেন ৰিজ্ঝেয্য. তমেনং দুতিযেন সল্লেন অনুৰেধং ন ৰিজ্ঝেয্য. এৰঞ্হি সো, ভিক্খৰে, পুরিসো একসল্লেন ৰেদনং ৰেদযতি. এৰমেৰ খো, ভিক্খৰে, সুতৰা অরিযসাৰকো দুক্খায ৰেদনায ফুট্ঠো সমানো ন সোচতি, ন কিলমতি, ন পরিদেৰতি, ন উরত্তাল়িং কন্দতি, ন সম্মোহং আপজ্জতি. সো একং ৰেদনং ৰেদযতি – কাযিকং, ন চেতসিকং. তস্সাযেৰ খো পন দুক্খায ৰেদনায ফুট্ঠো সমানো পটিঘৰা ন হোতি. তমেনং দুক্খায ৰেদনায অপ্পটিঘৰন্তং, যো দুক্খায ৰেদনায পটিঘানুসযো, সো নানুসেতি. সো দুক্খায ৰেদনায ফুট্ঠো সমানো কামসুখং নাভিনন্দতি. তং কিস্স হেতু? পজানাতি হি সো, ভিক্খৰে, সুতৰা অরিযসাৰকো অঞ্ঞত্র কামসুখা দুক্খায ৰেদনায নিস্সরণং. তস্স কামসুখং নাভিনন্দতো যো সুখায ৰেদনায রাগানুসযো, সো নানুসেতি. সো তাসং ৰেদনানং সমুদযঞ্চ অত্থঙ্গমঞ্চ অস্সাদঞ্চ আদীনৰং চ নিস্সরণঞ্চ যথাভূতং পজানাতি. তস্স তাসং ৰেদনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং পজানতো, যো অদুক্খমসুখায ৰেদনায অৰিজ্জানুসযো, সো নানুসেতি. সো সুখঞ্চে ৰেদনং ৰেদযতি, ৰিসঞ্ঞুত্তো নং ৰেদযতি. দুক্খঞ্চে ৰেদনং ৰেদযতি ¶ , ৰিসঞ্ঞুত্তো নং ৰেদযতি. অদুক্খমসুখঞ্চে ৰেদনং ৰেদযতি, ৰিসঞ্ঞুত্তো নং ৰেদযতি. অযং ৰুচ্চতি, ভিক্খৰে, ‘সুতৰা অরিযসাৰকো ৰিসঞ্ঞুত্তো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি ¶ ¶ , ৰিসঞ্ঞুত্তো দুক্খস্মা’তি ৰদামি. অযং খো, ভিক্খৰে, ৰিসেসো, অযং অধিপ্পযাসো, ইদং নানাকরণং সুতৰতো অরিযসাৰকস্স অস্সুতৰতা পুথুজ্জনেনা’’তি.

‘‘ন ৰেদনং ৰেদযতি সপঞ্ঞো,

সুখম্পি দুক্খম্পি বহুস্সুতোপি;

অযঞ্চ ধীরস্স পুথুজ্জনেন,

মহা [অযং (স্যা. কং. ক.)] ৰিসেসো কুসলস্স হোতি.

‘‘সঙ্খাতধম্মস্স ¶ বহুস্সুতস্স,

ৰিপস্সতো [সম্পস্সতো (সী. পী.)] লোকমিমং পরঞ্চ;

ইট্ঠস্স ধম্মা ন মথেন্তি চিত্তং,

অনিট্ঠতো নো পটিঘাতমেতি.

‘‘তস্সানুরোধা অথৰা ৰিরোধা,

ৰিধূপিতা অত্থগতা ন সন্তি;

পদঞ্চ ঞত্ৰা ৰিরজং অসোকং,

সম্মা পজানাতি ভৰস্স পারগূ’’তি. ছট্ঠং;

৭. পঠমগেলঞ্ঞসুত্তং

২৫৫. একং সমযং ভগৰা ৰেসালিযং ৰিহরতি মহাৰনে কূটাগারসালাযং. অথ খো ভগৰা সাযন্হসমযং পটিসল্লানা ৰুট্ঠিতো যেন গিলানসালা তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. নিসজ্জ খো ভগৰা ভিক্খূ আমন্তেসি ¶ –

‘‘সতো, ভিক্খৰে, ভিক্খু সম্পজানো কালং আগমেয্য. অযং ৰো অম্হাকং অনুসাসনী.

‘‘কথঞ্চ, ভিক্খৰে, ভিক্খু সতো হোতি? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং; ৰেদনাসু ৰেদনানুপস্সী ¶ ৰিহরতি…পে… চিত্তে চিত্তানুপস্সী ৰিহরতি…পে… ধম্মেসু ধম্মানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং ¶ . এৰং খো, ভিক্খৰে, ভিক্খু সতো হোতি.

‘‘কথঞ্চ, ভিক্খৰে, ভিক্খু সম্পজানো হোতি? ইধ, ভিক্খৰে, ভিক্খু অভিক্কন্তে পটিক্কন্তে সম্পজানকারী হোতি, আলোকিতে ৰিলোকিতে সম্পজানকারী হোতি, সমিঞ্জিতে পসারিতে সম্পজানকারী হোতি, সঙ্ঘাটিপত্তচীৰরধারণে সম্পজানকারী হোতি, অসিতে পীতে খাযিতে সাযিতে সম্পজানকারী হোতি, উচ্চারপস্সাৰকম্মে সম্পজানকারী হোতি, গতে ঠিতে নিসিন্নে সুত্তে জাগরিতে ভাসিতে তুণ্হীভাৰে ¶ সম্পজানকারী হোতি. এৰং খো, ভিক্খৰে, ভিক্খু সম্পজানকারী হোতি. সতো, ভিক্খৰে, ভিক্খু সম্পজানো কালং আগমেয্য. অযং ৰো অম্হাকং অনুসাসনী.

‘‘তস্স চে, ভিক্খৰে, ভিক্খুনো এৰং সতস্স সম্পজানস্স অপ্পমত্তস্স আতাপিনো পহিতত্তস্স ৰিহরতো উপ্পজ্জতি সুখা ৰেদনা, সো এৰং পজানাতি – ‘উপ্পন্না খো ম্যাযং সুখা ৰেদনা. সা চ খো পটিচ্চ, নো অপ্পটিচ্চ. কিং পটিচ্চ? ইমমেৰ কাযং পটিচ্চ. অযং খো পন কাযো অনিচ্চো সঙ্খতো পটিচ্চসমুপ্পন্নো. অনিচ্চং খো পন সঙ্খতং পটিচ্চসমুপ্পন্নং কাযং পটিচ্চ উপ্পন্না সুখা ৰেদনা কুতো নিচ্চা ভৰিস্সতী’তি! সো কাযে চ সুখায চ ৰেদনায অনিচ্চানুপস্সী ৰিহরতি, ৰযানুপস্সী ৰিহরতি, ৰিরাগানুপস্সী ৰিহরতি, নিরোধানুপস্সী ৰিহরতি, পটিনিস্সগ্গানুপস্সী ৰিহরতি. তস্স কাযে চ সুখায চ ৰেদনায অনিচ্চানুপস্সিনো ৰিহরতো, ৰযানুপস্সিনো ৰিহরতো, ৰিরাগানুপস্সিনো ৰিহরতো, নিরোধানুপস্সিনো ৰিহরতো, পটিনিস্সগ্গানুপস্সিনো ¶ ¶ ৰিহরতো, যো কাযে চ সুখায চ ৰেদনায রাগানুসযো, সো পহীযতি.

‘‘তস্স চে, ভিক্খৰে, ভিক্খুনো এৰং সতস্স সম্পজানস্স অপ্পমত্তস্স আতাপিনো পহিতত্তস্স ৰিহরতো উপ্পজ্জতি দুক্খা ৰেদনা. সো এৰং পজানাতি – ‘উপ্পন্না খো ম্যাযং দুক্খা ৰেদনা. সা চ খো পটিচ্চ, নো অপ্পটিচ্চ. কিং পটিচ্চ? ইমমেৰ কাযং পটিচ্চ. অযং খো পন কাযো অনিচ্চো সঙ্খতো পটিচ্চসমুপ্পন্নো. অনিচ্চং খো পন সঙ্খতং পটিচ্চসমুপ্পন্নং কাযং পটিচ্চ উপ্পন্না দুক্খা ৰেদনা কুতো নিচ্চা ভৰিস্সতী’তি! সো কাযে চ দুক্খায ৰেদনায ¶ অনিচ্চানুপস্সী ৰিহরতি, ৰযানুপস্সী ৰিহরতি, ৰিরাগানুপস্সী ৰিহরতি, নিরোধানুপস্সী ৰিহরতি, পটিনিস্সগ্গানুপস্সী ৰিহরতি. তস্স কাযে চ দুক্খায চ ৰেদনায অনিচ্চানুপস্সিনো ৰিহরতো…পে… পটিনিস্সগ্গানুপস্সিনো ৰিহরতো, যো কাযে চ দুক্খায চ ৰেদনায পটিঘানুসযো, সো পহীযতি.

‘‘তস্স চে, ভিক্খৰে, ভিক্খুনো এৰং সতস্স সম্পজানস্স অপ্পমত্তস্স আতাপিনো পহিতত্তস্স ৰিহরতো উপ্পজ্জতি অদুক্খমসুখা ৰেদনা, সো এৰং পজানাতি – ‘উপ্পন্না খো ম্যাযং অদুক্খমসুখা ৰেদনা. সা চ খো পটিচ্চ, নো অপ্পটিচ্চ. কিং পটিচ্চ? ইমমেৰ কাযং পটিচ্চ. অযং খো পন কাযো অনিচ্চো সঙ্খতো পটিচ্চসমুপ্পন্নো. অনিচ্চং খো পন সঙ্খতং পটিচ্চসমুপ্পন্নং কাযং ¶ পটিচ্চ উপ্পন্না ¶ অদুক্খমসুখা ৰেদনা কুতো নিচ্চা ভৰিস্সতী’তি! সো কাযে চ অদুক্খমসুখায চ ৰেদনায অনিচ্চানুপস্সী ৰিহরতি, ৰযানুপস্সী ৰিহরতি, ৰিরাগানুপস্সী ৰিহরতি, নিরোধানুপস্সী ৰিহরতি, পটিনিস্সগ্গানুপস্সী ৰিহরতি. তস্স কাযে চ অদুক্খমসুখায চ ৰেদনায অনিচ্চানুপস্সিনো ৰিহরতো…পে… পটিনিস্সগ্গানুপস্সিনো ৰিহরতো, যো কাযে চ অদুক্খমসুখায চ ৰেদনায অৰিজ্জানুসযো, সো পহীযতি.

‘‘সো ¶ সুখঞ্চে ৰেদনং ৰেদযতি, সা অনিচ্চাতি পজানাতি, অনজ্ঝোসিতাতি পজানাতি, অনভিনন্দিতাতি পজানাতি; দুক্খঞ্চে ৰেদনং ৰেদযতি, সা অনিচ্চাতি পজানাতি, অনজ্ঝোসিতাতি পজানাতি, অনভিনন্দিতাতি পজানাতি; অদুক্খমসুখঞ্চে ৰেদনং ৰেদযতি, সা অনিচ্চাতি পজানাতি, অনজ্ঝোসিতাতি পজানাতি, অনভিনন্দিতাতি পজানাতি. সো সুখঞ্চে ৰেদনং ৰেদযতি, ৰিসঞ্ঞুত্তো নং ৰেদযতি; দুক্খঞ্চে ৰেদনং ৰেদযতি, ৰিসঞ্ঞুত্তো নং ৰেদযতি; অদুক্খমসুখঞ্চে ৰেদনং ৰেদযতি, ৰিসঞ্ঞুত্তো নং ৰেদযতি. সো কাযপরিযন্তিকং ৰেদনং ৰেদযমানো ‘কাযপরিযন্তিকং ৰেদনং ৰেদযামী’তি পজানাতি, জীৰিতপরিযন্তিকং ৰেদনং ৰেদযমানো ‘জীৰিতপরিযন্তিকং ৰেদনং ৰেদযামী’তি পজানাতি. ‘কাযস্স ভেদা উদ্ধং জীৰিতপরিযাদানা ইধেৰ সব্বৰেদযিতানি অনভিনন্দিতানি সীতীভৰিস্সন্তী’তি [সীতিভৰিস্সন্তীতি (সী. পী. ক.)] পজানাতি.

‘‘সেয্যথাপি, ভিক্খৰে, তেলঞ্চ পটিচ্চ ৰট্টিঞ্চ পটিচ্চ তেলপ্পদীপো ঝাযেয্য, তস্সেৰ তেলস্স চ ৰট্টিযা চ পরিযাদানা অনাহারো নিব্বাযেয্য; এৰমেৰ খো, ভিক্খৰে, ভিক্খু কাযপরিযন্তিকং ¶ ৰেদনং ৰেদযমানো ¶ ‘কাযপরিযন্তিকং ৰেদনং ৰেদযামী’তি পজানাতি. জীৰিতপরিযন্তিকং ৰেদনং ৰেদযমানো ‘জীৰিতপরিযন্তিকং ৰেদনং ৰেদযামী’তি পজানাতি. ‘কাযস্স ভেদা উদ্ধং জীৰিতপরিযাদানা ইধেৰ সব্বৰেদযিতানি অনভিনন্দিতানি সীতীভৰিস্সন্তী’তি পজানাতী’’তি. সত্তমং.

৮. দুতিযগেলঞ্ঞসুত্তং

২৫৬. একং সমযং ভগৰা ৰেসালিযং ৰিহরতি মহাৰনে কূটাগারসালাযং. অথ খো ভগৰা সাযন্হসমযং পটিসল্লানা ৰুট্ঠিতো যেন গিলানসালা তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. নিসজ্জ খো ভগৰা ভিক্খূ আমন্তেসি –

‘‘সতো ¶ , ভিক্খৰে, ভিক্খু সম্পজানো কালং আগমেয্য. অযং ৰো অম্হাকং অনুসাসনী.

‘‘কথঞ্চ, ভিক্খৰে, ভিক্খু সতো হোতি? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং; ৰেদনাসু ৰেদনানুপস্সী ৰিহরতি… চিত্তে চিত্তানুপস্সী ৰিহরতি… ধম্মেসু ধম্মানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং. এৰং খো, ভিক্খৰে, ভিক্খু সতো হোতি.

‘‘কথঞ্চ ¶ , ভিক্খৰে, ভিক্খু সম্পজানো হোতি? ইধ, ভিক্খৰে, ভিক্খু অভিক্কন্তে পটিক্কন্তে সম্পজানকারী হোতি…পে… ভাসিতে তুণ্হীভাৰে সম্পজানকারী হোতি. এৰং খো, ভিক্খৰে, ভিক্খু সম্পজানো হোতি. সতো, ভিক্খৰে, ভিক্খু সম্পজানো কালং আগমেয্য. অযং ৰো অম্হাকং অনুসাসনী.

‘‘তস্স চে, ভিক্খৰে, ভিক্খুনো এৰং সতস্স সম্পজানস্স অপ্পমত্তস্স ¶ আতাপিনো পহিতত্তস্স ৰিহরতো উপ্পজ্জতি সুখা ৰেদনা. সো এৰং পজানাতি – ‘উপ্পন্না খো ম্যাযং সুখা ৰেদনা; সা চ খো পটিচ্চ, নো অপ্পটিচ্চ. কিং পটিচ্চ? ইমমেৰ ফস্সং পটিচ্চ. অযং খো ¶ পন ফস্সো অনিচ্চো সঙ্খতো পটিচ্চসমুপ্পন্নো. অনিচ্চং খো পন সঙ্খতং পটিচ্চসমুপ্পন্নং ফস্সং পটিচ্চ উপ্পন্না সুখা ৰেদনা কুতো নিচ্চা ভৰিস্সতী’তি! সো ফস্সে চ সুখায চ ৰেদনায অনিচ্চানুপস্সী ৰিহরতি, ৰযানুপস্সী ৰিহরতি, ৰিরাগানুপস্সী ৰিহরতি, নিরোধানুপস্সী ৰিহরতি, পটিনিস্সগ্গানুপস্সী ৰিহরতি. তস্স ফস্সে চ সুখায চ ৰেদনায অনিচ্চানুপস্সিনো ৰিহরতো, ৰযানুপস্সিনো ৰিহরতো, ৰিরাগানুপস্সিনো ৰিহরতো, নিরোধানুপস্সিনো ৰিহরতো, পটিনিস্সগ্গানুপস্সিনো ৰিহরতো যো ফস্সে চ সুখায চ ৰেদনায রাগানুসযো, সো পহীযতি.

‘‘তস্স চে, ভিক্খৰে, ভিক্খুনো এৰং সতস্স…পে… ৰিহরতো উপ্পজ্জতি দুক্খা ৰেদনা…পে… উপ্পজ্জতি অদুক্খমসুখা ৰেদনা. সো এৰং পজানাতি – ‘উপ্পন্না খো ম্যাযং অদুক্খমসুখা ৰেদনা; সা চ খো পটিচ্চ, নো অপ্পটিচ্চ. কিং পটিচ্চ? ইমমেৰ ফস্সং পটিচ্চ…পে… কাযস্স ¶ ভেদা উদ্ধং জীৰিতপরিযাদানা ইধেৰ সব্বৰেদযিতানি অনভিনন্দিতানি সীতীভৰিস্সন্তী’তি পজানাতি’’.

‘‘সেয্যথাপি, ভিক্খৰে, তেলঞ্চ পটিচ্চ ৰট্টিঞ্চ পটিচ্চ তেলপ্পদীপো ঝাযেয্য ¶ , তস্সেৰ তেলস্স চ ৰট্টিযা চ পরিযাদানা অনাহারো নিব্বাযেয্য; এৰমেৰ খো, ভিক্খৰে, ভিক্খু কাযপরিযন্তিকং ৰেদনং ৰেদযমানো ‘কাযপরিযন্তিকং ৰেদনং ৰেদযামী’তি পজানাতি. জীৰিতপরিযন্তিকং ৰেদনং ৰেদযমানো ‘জীৰিতপরিযন্তিকং ৰেদনং ৰেদযামী’তি পজানাতি. ‘কাযস্স ভেদা উদ্ধং জীৰিতপরিযাদানা ইধেৰ সব্বৰেদযিতানি অনভিনন্দিতানি সীতীভৰিস্সন্তী’তি পজানাতী’’তি. অট্ঠমং.

৯. অনিচ্চসুত্তং

২৫৭. ‘‘তিস্সো ইমা, ভিক্খৰে, ৰেদনা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা – ইমা খো, ভিক্খৰে, তিস্সো ৰেদনা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মা’’তি. নৰমং.

১০. ফস্সমূলকসুত্তং

২৫৮. ‘‘তিস্সো ¶ ¶ ইমা, ভিক্খৰে, ৰেদনা ফস্সজা ফস্সমূলকা ফস্সনিদানা ফস্সপচ্চযা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা. সুখৰেদনিযং, ভিক্খৰে, ফস্সং পটিচ্চ উপ্পজ্জতি সুখা ৰেদনা. তস্সেৰ সুখৰেদনিযস্স ফস্সস্স নিরোধা, যং তজ্জং ৰেদযিতং সুখৰেদনিযং ফস্সং পটিচ্চ উপ্পন্না সুখা ৰেদনা, সা নিরুজ্ঝতি, সা ৰূপসম্মতি. দুক্খৰেদনিযং, ভিক্খৰে, ফস্সং পটিচ্চ উপ্পজ্জতি দুক্খা ৰেদনা. তস্সেৰ দুক্খৰেদনিযস্স ফস্সস্স নিরোধা, যং তজ্জং ৰেদযিতং দুক্খৰেদনিযং ফস্সং পটিচ্চ উপ্পন্না দুক্খা ৰেদনা, সা নিরুজ্ঝতি, সা ৰূপসম্মতি. অদুক্খমসুখৰেদনিযং, ভিক্খৰে, ফস্সং পটিচ্চ ¶ উপ্পজ্জতি অদুক্খমসুখা ৰেদনা. তস্সেৰ অদুক্খমসুখৰেদনিযস্স ফস্সস্স নিরোধা, যং তজ্জং ৰেদযিতং অদুক্খমসুখৰেদনিযং ফস্সং পটিচ্চ উপ্পন্না অদুক্খমসুখা ৰেদনা, সা নিরুজ্ঝতি, সা ৰূপসম্মতি. সেয্যথাপি ¶ , ভিক্খৰে, দ্ৰিন্নং কট্ঠানং সঙ্ঘট্টনসমোধানা [সঙ্খত্তা তস্স সমোধানা (স্যা. কং.) সঙ্ঘত্তা তস্স সমোধানা (ক.) সং. নি. ২.৬২ পস্সিতব্বং] উস্মা জাযতি, তেজো অভিনিব্বত্ততি. তেসংযেৰ কট্ঠানং নানাভাৰা ৰিনিক্খেপা, যা তজ্জা উস্মা, সা নিরুজ্ঝতি, সা ৰূপসম্মতি. এৰমেৰ খো, ভিক্খৰে, ইমা তিস্সো ৰেদনা ফস্সজা ফস্সমূলকা ফস্সনিদানা ফস্সপচ্চযা. তজ্জং ফস্সং পটিচ্চ তজ্জা ৰেদনা উপ্পজ্জন্তি. তজ্জস্স ফস্সস্স নিরোধা তজ্জা ৰেদনা নিরুজ্ঝন্তী’’তি. দসমং.

সগাথাৰগ্গো পঠমো ¶ .

তস্সুদ্দানং –

সমাধি সুখং পহানেন, পাতালং দট্ঠব্বেন চ;

সল্লেন চেৰ গেলঞ্ঞা, অনিচ্চ ফস্সমূলকাতি.

২. রহোগতৰগ্গো

১. রহোগতসুত্তং

২৫৯. অথ ¶ ¶ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু ভগৰন্তং এতদৰোচ – ‘‘ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘তিস্সো ৰেদনা ৰুত্তা ভগৰতা. সুখা ৰেদনা, দুক্খা ৰেদনা, অদুক্খমসুখা ৰেদনা – ইমা তিস্সো ৰেদনা ৰুত্তা ভগৰতা. ৰুত্তং খো পনেতং ভগৰতা – ‘যং কিঞ্চি ৰেদযিতং তং দুক্খস্মি’ন্তি. কিং নু খো এতং ভগৰতা সন্ধায ভাসিতং – ‘যং কিঞ্চি ৰেদযিতং তং দুক্খস্মি’’’ন্তি?

‘‘সাধু সাধু, ভিক্খু! তিস্সো ইমা, ভিক্খু, ৰেদনা ৰুত্তা মযা. সুখা ৰেদনা, দুক্খা ৰেদনা, অদুক্খমসুখা ৰেদনা – ইমা তিস্সো ৰেদনা ৰুত্তা মযা. ৰুত্তং খো পনেতং, ভিক্খু, মযা – ‘যং কিঞ্চি ৰেদযিতং, তং দুক্খস্মি’ন্তি. তং খো পনেতং, ভিক্খু, মযা সঙ্খারানংযেৰ অনিচ্চতং সন্ধায ভাসিতং – ‘যং কিঞ্চি ৰেদযিতং তং দুক্খস্মি’ন্তি ¶ . তং খো পনেতং, ভিক্খু, মযা সঙ্খারানংযেৰ খযধম্মতং…পে… ৰযধম্মতং…পে… ৰিরাগধম্মতং ¶ …পে… নিরোধধম্মতং…পে… ৰিপরিণামধম্মতং সন্ধায ভাসিতং – ‘যং কিঞ্চি ৰেদযিতং তং দুক্খস্মি’ন্তি. অথ খো পন, ভিক্খু, মযা অনুপুব্বসঙ্খারানং নিরোধো অক্খাতো. পঠমং ঝানং সমাপন্নস্স ৰাচা নিরুদ্ধা হোতি. দুতিযং ঝানং ¶ সমাপন্নস্স ৰিতক্কৰিচারা নিরুদ্ধা হোন্তি. ততিযং ঝানং সমাপন্নস্স পীতি নিরুদ্ধা হোতি. চতুত্থং ঝানং সমাপন্নস্স অস্সাসপস্সাসা নিরুদ্ধা হোন্তি. আকাসানঞ্চাযতনং সমাপন্নস্স রূপসঞ্ঞা নিরুদ্ধা হোতি. ৰিঞ্ঞাণঞ্চাযতনং সমাপন্নস্স আকাসানঞ্চাযতনসঞ্ঞা নিরুদ্ধা হোতি. আকিঞ্চঞ্ঞাযতনং সমাপন্নস্স ৰিঞ্ঞাণঞ্চাযতনসঞ্ঞা নিরুদ্ধা হোতি. নেৰসঞ্ঞানাসঞ্ঞাযতনং সমাপন্নস্স আকিঞ্চঞ্ঞাযতনসঞ্ঞা নিরুদ্ধা হোতি. সঞ্ঞাৰেদযিতনিরোধং সমাপন্নস্স সঞ্ঞা চ ৰেদনা চ নিরুদ্ধা হোন্তি. খীণাসৰস্স ভিক্খুনো রাগো নিরুদ্ধো হোতি, দোসো নিরুদ্ধো হোতি, মোহো নিরুদ্ধো হোতি. অথ খো, ভিক্খু, মযা অনুপুব্বসঙ্খারানং ৰূপসমো অক্খাতো. পঠমং ঝানং সমাপন্নস্স ¶ ৰাচা ৰূপসন্তা হোতি. দুতিযং ঝানং সমাপন্নস্স ৰিতক্কৰিচারা ৰূপসন্তা হোন্তি…পে… সঞ্ঞাৰেদযিতনিরোধং সমাপন্নস্স সঞ্ঞা চ ৰেদনা চ ৰূপসন্তা হোন্তি. খীণাসৰস্স ভিক্খুনো রাগো ৰূপসন্তো হোতি, দোসো ৰূপসন্তো হোতি, মোহো ৰূপসন্তো হোতি. ছযিমা, ভিক্খু, পস্সদ্ধিযো. পঠমং ঝানং সমাপন্নস্স ৰাচা পটিপ্পস্সদ্ধা হোতি. দুতিযং ঝানং সমাপন্নস্স ৰিতক্কৰিচারা পটিপ্পস্সদ্ধা হোন্তি. ততিযং ঝানং সমাপন্নস্স পীতি পটিপ্পস্সদ্ধা হোতি. চতুত্থং ঝানং সমাপন্নস্স অস্সাসপস্সাসা পটিপ্পস্সদ্ধা ¶ হোন্তি ¶ . সঞ্ঞাৰেদযিতনিরোধং সমাপন্নস্স সঞ্ঞা চ ৰেদনা চ পটিপ্পস্সদ্ধা হোন্তি. খীণাসৰস্স ভিক্খুনো রাগো পটিপ্পস্সদ্ধো হোতি, দোসো পটিপ্পস্সদ্ধো হোতি, মোহো পটিপ্পস্সদ্ধো হোতী’’তি. পঠমং.

২. পঠমআকাসসুত্তং

২৬০. ‘‘সেয্যথাপি, ভিক্খৰে, আকাসে ৰিৰিধা ৰাতা ৰাযন্তি. পুরত্থিমাপি ৰাতা ৰাযন্তি, পচ্ছিমাপি ৰাতা ৰাযন্তি, উত্তরাপি ৰাতা ৰাযন্তি, দক্খিণাপি ৰাতা ৰাযন্তি, সরজাপি ৰাতা ৰাযন্তি, অরজাপি ৰাতা ৰাযন্তি, সীতাপি ৰাতা ৰাযন্তি, উণ্হাপি ৰাতা ৰাযন্তি, পরিত্তাপি ৰাতা ৰাযন্তি, অধিমত্তাপি ৰাতা ¶ ৰাযন্তি. এৰমেৰ খো, ভিক্খৰে, ইমস্মিং কাযস্মিং ৰিৰিধা ৰেদনা উপ্পজ্জন্তি, সুখাপি ৰেদনা উপ্পজ্জতি, দুক্খাপি ৰেদনা উপ্পজ্জতি, অদুক্খমসুখাপি ৰেদনা উপ্পজ্জতী’’তি.

‘‘যথাপি ৰাতা আকাসে, ৰাযন্তি ৰিৰিধা পুথূ;

পুরত্থিমা পচ্ছিমা চাপি, উত্তরা অথ দক্খিণা.

‘‘সরজা অরজা চপি, সীতা উণ্হা চ একদা;

অধিমত্তা পরিত্তা চ, পুথূ ৰাযন্তি মালুতা.

‘‘তথেৰিমস্মিং কাযস্মিং, সমুপ্পজ্জন্তি ৰেদনা;

সুখদুক্খসমুপ্পত্তি, অদুক্খমসুখা চ যা.

‘‘যতো ¶ চ ভিক্খু আতাপী, সম্পজঞ্ঞং ন রিঞ্চতি [সম্পজানো নিরূপধি (ক.)];

ততো সো ৰেদনা সব্বা, পরিজানাতি পণ্ডিতো.

‘‘সো ¶ ৰেদনা পরিঞ্ঞায, দিট্ঠে ধম্মে অনাসৰো;

কাযস্স ভেদা ধম্মট্ঠো, সঙ্খ্যং নোপেতি ৰেদগূ’’তি. দুতিযং;

৩. দুতিযআকাসসুত্তং

২৬১. ‘‘সেয্যথাপি ¶ , ভিক্খৰে, আকাসে ৰিৰিধা ৰাতা ৰাযন্তি. পুরত্থিমাপি ৰাতা ৰাযন্তি…পে… অধিমত্তাপি ৰাতা ৰাযন্তি. এৰমেৰ খো, ভিক্খৰে, ইমস্মিং কাযস্মিং ৰিৰিধা ৰেদনা উপ্পজ্জন্তি, সুখাপি ৰেদনা উপ্পজ্জতি, দুক্খাপি ৰেদনা উপ্পজ্জতি, অদুক্খমসুখাপি ৰেদনা উপ্পজ্জতী’’তি. ততিযং.

৪. অগারসুত্তং

২৬২. ‘‘সেয্যথাপি, ভিক্খৰে, আগন্তুকাগারং. তত্থ পুরত্থিমাযপি দিসায আগন্ত্ৰা ৰাসং কপ্পেন্তি, পচ্ছিমাযপি দিসায আগন্ত্ৰা ৰাসং কপ্পেন্তি, উত্তরাযপি দিসায আগন্ত্ৰা ৰাসং কপ্পেন্তি, দক্খিণাযপি দিসায আগন্ত্ৰা ৰাসং কপ্পেন্তি. খত্তিযাপি আগন্ত্ৰা ৰাসং কপ্পেন্তি, ব্রাহ্মণাপি আগন্ত্ৰা ৰাসং কপ্পেন্তি, ৰেস্সাপি আগন্ত্ৰা ৰাসং কপ্পেন্তি, সুদ্দাপি আগন্ত্ৰা ৰাসং কপ্পেন্তি. এৰমেৰ খো, ভিক্খৰে, ইমস্মিং কাযস্মিং ৰিৰিধা ৰেদনা ¶ উপ্পজ্জন্তি. সুখাপি ৰেদনা উপ্পজ্জতি, দুক্খাপি ৰেদনা উপ্পজ্জতি, অদুক্খমসুখাপি ৰেদনা উপ্পজ্জতি. সামিসাপি সুখা ৰেদনা উপ্পজ্জতি, সামিসাপি দুক্খা ৰেদনা উপ্পজ্জতি, সামিসাপি অদুক্খমসুখা ৰেদনা উপ্পজ্জতি. নিরামিসাপি সুখা ৰেদনা উপ্পজ্জতি, নিরামিসাপি দুক্খা ৰেদনা উপ্পজ্জতি, নিরামিসাপি অদুক্খমসুখা ৰেদনা উপ্পজ্জতী’’তি. চতুত্থং.

৫. পঠমআনন্দসুত্তং

২৬৩. অথ ¶ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা একমন্তং নিসীদি ¶ , একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘কতমা নু খো, ভন্তে, ৰেদনা, কতমো ৰেদনাসমুদযো, কতমো ৰেদনানিরোধো, কতমা ৰেদনানিরোধগামিনী ¶ পটিপদা? কো ৰেদনায অস্সাদো, কো আদীনৰো, কিং নিস্সরণন্তি? তিস্সো ইমা, আনন্দ, ৰেদনা – সুখা ৰেদনা, দুক্খা ৰেদনা, অদুক্খমসুখা ৰেদনা – ইমা ৰুচ্চন্তি, আনন্দ, ৰেদনা. ফস্সসমুদযা ৰেদনাসমুদযো; ফস্সনিরোধা ৰেদনানিরোধো. অযমেৰ অরিযো অট্ঠঙ্গিকো মগ্গো ৰেদনানিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি. যং ৰেদনং পটিচ্চ উপ্পজ্জতি সুখং সোমনস্সং, অযং ৰেদনায অস্সাদো. যা ৰেদনা অনিচ্চা দুক্খা ৰিপরিণামধম্মা, অযং ৰেদনায আদীনৰো. যো ৰেদনায ছন্দরাগৰিনযো ছন্দরাগপ্পহানং, ইদং ৰেদনায নিস্সরণং. অথ খো পনানন্দ, মযা অনুপুব্বসঙ্খারানং নিরোধো অক্খাতো. পঠমং ঝানং সমাপন্নস্স ৰাচা নিরুদ্ধা হোতি…পে… সঞ্ঞাৰেদযিতনিরোধং ¶ সমাপন্নস্স সঞ্ঞা চ ৰেদনা চ নিরুদ্ধা হোন্তি. খীণাসৰস্স ভিক্খুনো রাগো নিরুদ্ধো হোতি, দোসো নিরুদ্ধো হোতি, মোহো নিরুদ্ধো হোতি. অথ খো পনানন্দ, মযা অনুপুব্বসঙ্খারানং ৰূপসমো অক্খাতো. পঠমং ঝানং সমাপন্নস্স ৰাচা ৰূপসন্তা হোতি…পে… সঞ্ঞাৰেদযিতনিরোধং সমাপন্নস্স সঞ্ঞা চ ৰেদনা চ ৰূপসন্তা হোন্তি. খীণাসৰস্স ভিক্খুনো রাগো ৰূপসন্তো হোতি, দোসো ৰূপসন্তো হোতি, মোহো ৰূপসন্তো হোতি. অথ খো পনানন্দ, মযা অনুপুব্বসঙ্খারানং পটিপ্পস্সদ্ধি অক্খাতা. পঠমং ঝানং সমাপন্নস্স ৰাচা পটিপ্পস্সদ্ধা হোতি…পে… আকাসানঞ্চাযতনং সমাপন্নস্স রূপসঞ্ঞা পটিপ্পস্সদ্ধা হোতি. ৰিঞ্ঞাণঞ্চাযতনং সমাপন্নস্স আকাসানঞ্চাযতনসঞ্ঞা পটিপ্পস্সদ্ধা হোতি. আকিঞ্চঞ্ঞাযতনং সমাপন্নস্স ¶ ৰিঞ্ঞাণঞ্চাযতনসঞ্ঞা পটিপ্পস্সদ্ধা হোতি. নেৰসঞ্ঞানাসঞ্ঞাযতনং সমাপন্নস্স আকিঞ্চঞ্ঞাযতনসঞ্ঞা পটিপ্পস্সদ্ধা হোতি. সঞ্ঞাৰেদযিতনিরোধং সমাপন্নস্স সঞ্ঞা চ ৰেদনা চ পটিপ্পস্সদ্ধা হোন্তি. খীণাসৰস্স ¶ ভিক্খুনো রাগো পটিপ্পস্সদ্ধো হোতি, দোসো পটিপ্পস্সদ্ধো হোতি, মোহো পটিপ্পস্সদ্ধো হোতী’’তি. পঞ্চমং.

৬. দুতিযআনন্দসুত্তং

২৬৪. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং আনন্দং ভগৰা এতদৰোচ – ‘‘কতমা নু খো, আনন্দ, ৰেদনা, কতমো ৰেদনাসমুদযো, কতমো ৰেদনানিরোধো ¶ , কতমা ৰেদনানিরোধগামিনী পটিপদা? কো ৰেদনায অস্সাদো, কো আদীনৰো, কিং নিস্সরণ’’ন্তি? ‘‘ভগৰংমূলকা নো, ভন্তে, ধম্মা ভগৰন্নেত্তিকা ভগৰম্পটিসরণা. সাধু, ভন্তে, ভগৰন্তঞ্ঞেৰ পটিভাতু এতস্স ¶ ভাসিতস্স অত্থো. ভগৰতো সুত্ৰা ভিক্খূ ধারেস্সন্তী’’তি. ‘‘তেন হি, আনন্দ, সুণোহি, সাধুকং মনসি করোহি; ভাসিস্সামী’’তি. ‘‘এৰং, ভন্তে’’তি খো আযস্মা আনন্দো ভগৰতো পচ্চস্সোসি. ভগৰা এতদৰোচ – ‘‘তিস্সো ইমা, আনন্দ, ৰেদনা – সুখা ৰেদনা, দুক্খা ৰেদনা, অদুক্খমসুখা ৰেদনা – ইমা ৰুচ্চন্তি, আনন্দ, ৰেদনা…পে… ফস্সসমুদযা…পে… খীণাসৰস্স ভিক্খুনো রাগো পটিপ্পস্সদ্ধো হোতি, দোসো পটিপ্পস্সদ্ধো হোতি, মোহো পটিপ্পস্সদ্ধো হোতী’’তি. ছট্ঠং.

৭. পঠমসম্বহুলসুত্তং

২৬৫. অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং – ‘‘কতমা নু খো, ভন্তে, ৰেদনা, কতমো ৰেদনাসমুদযো, কতমো ৰেদনানিরোধো, কতমা ৰেদনানিরোধগামিনী পটিপদা? কো ৰেদনায অস্সাদো, কো আদীনৰো, কিং নিস্সরণ’’ন্তি? ‘‘তিস্সো ¶ ইমা, ভিক্খৰে, ৰেদনা – সুখা ৰেদনা, দুক্খা ৰেদনা, অদুক্খমসুখা ৰেদনা – ইমা ৰুচ্চন্তি, ভিক্খৰে, ৰেদনা. ফস্সসমুদযা ¶ ৰেদনাসমুদযো; ফস্সনিরোধা ৰেদনানিরোধো. অযমেৰ ¶ অরিযো অট্ঠঙ্গিকো মগ্গো ৰেদনানিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি. যং ৰেদনং পটিচ্চ উপ্পজ্জতি সুখং সোমনস্সং, অযং ৰেদনায অস্সাদো. যা ৰেদনা অনিচ্চা দুক্খা ৰিপরিণামধম্মা, অযং ৰেদনায আদীনৰো. যো ৰেদনায ¶ ছন্দরাগৰিনযো ছন্দরাগপ্পহানং, ইদং ৰেদনায নিস্সরণং.

‘‘অথ খো পন, ভিক্খৰে, মযা অনুপুব্বসঙ্খারানং নিরোধো অক্খাতো. পঠমং ঝানং সমাপন্নস্স ৰাচা নিরুদ্ধা হোতি…পে… খীণাসৰস্স ভিক্খুনো রাগো নিরুদ্ধো হোতি, দোসো নিরুদ্ধো হোতি, মোহো নিরুদ্ধো হোতি. অথ খো পন, ভিক্খৰে, মযা অনুপুব্বসঙ্খারানং ৰূপসমো অক্খাতো. পঠমং ঝানং সমাপন্নস্স ৰাচা ৰূপসন্তা হোতি…পে… খীণাসৰস্স ভিক্খুনো রাগো ৰূপসন্তো হোতি, দোসো ৰূপসন্তো হোতি, মোহো ৰূপসন্তো হোতি. ছযিমা, ভিক্খৰে, পস্সদ্ধিযো. পঠমং ঝানং সমাপন্নস্স ৰাচা পটিপ্পস্সদ্ধা হোতি. দুতিযং ঝানং সমাপন্নস্স ৰিতক্কৰিচারা পটিপ্পস্সদ্ধা হোন্তি. ততিযং ঝানং সমাপন্নস্স পীতি পটিপ্পস্সদ্ধা হোতি. চতুত্থং ঝানং সমাপন্নস্স অস্সাসপস্সাসা পটিপ্পস্সদ্ধা হোন্তি. সঞ্ঞাৰেদযিতনিরোধং সমাপন্নস্স সঞ্ঞা চ ৰেদনা চ পটিপ্পস্সদ্ধা হোন্তি. খীণাসৰস্স ভিক্খুনো রাগো পটিপ্পস্সদ্ধো হোতি, দোসো পটিপ্পস্সদ্ধো হোতি, মোহো পটিপ্পস্সদ্ধো হোতী’’তি. সত্তমং.

৮. দুতিযসম্বহুলসুত্তং

২৬৬. অথ খো সম্বহুলা ভিক্খূ যেন ভগৰা তেনুপসঙ্কমিংসু…পে… একমন্তং ¶ নিসিন্না খো তে ভিক্খূ ভগৰা এতদৰোচ – ‘‘কতমা নু খো, ভিক্খৰে, ৰেদনা, কতমো ৰেদনাসমুদযো, কতমো ¶ ৰেদনানিরোধো, কতমা ৰেদনানিরোধগামিনী পটিপদা? কো ৰেদনায অস্সাদো, কো আদীনৰো, কিং নিস্সরণ’’ন্তি? ‘‘ভগৰংমূলকা নো, ভন্তে, ধম্মা…পে…’’ ‘‘তিস্সো ইমা, ভিক্খৰে, ৰেদনা – সুখা ৰেদনা, দুক্খা ৰেদনা, অদুক্খমসুখা ৰেদনা – ইমা ৰুচ্চন্তি, ভিক্খৰে, ৰেদনা…পে… ফস্সসমুদযা…পে…. (যথা পুরিমসুত্তন্তে, তথা ৰিত্থারেতব্বো.) ¶ অট্ঠমং.

৯. পঞ্চকঙ্গসুত্তং

২৬৭. অথ ¶ খো পঞ্চকঙ্গো থপতি যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং অভিৰাদেত্ৰা একমন্তং নিসীদি. একমন্তং নিসিন্নো খো পঞ্চকঙ্গো থপতি আযস্মন্তং উদাযিং এতদৰোচ – ‘‘কতি নু খো, ভন্তে উদাযি, ৰেদনা ৰুত্তা ভগৰতা’’তি? ‘‘তিস্সো খো, থপতি, ৰেদনা ৰুত্তা ভগৰতা. সুখা ৰেদনা, দুক্খা ৰেদনা, অদুক্খমসুখা ৰেদনা – ইমা খো, থপতি, তিস্সো ৰেদনা ৰুত্তা ভগৰতা’’তি. এৰং ৰুত্তে, পঞ্চকঙ্গো থপতি আযস্মন্তং উদাযিং এতদৰোচ – ‘‘ন খো, ভন্তে উদাযি, তিস্সো ৰেদনা ৰুত্তা ভগৰতা. দ্ৰে ৰেদনা ৰুত্তা ভগৰতা – সুখা ৰেদনা, দুক্খা ৰেদনা. যাযং, ভন্তে, অদুক্খমসুখা ৰেদনা, সন্তস্মিং এসা পণীতে সুখে ৰুত্তা ভগৰতা’’তি. দুতিযম্পি খো আযস্মা উদাযী পঞ্চকঙ্গং থপতিং এতদৰোচ – ‘‘ন খো, থপতি, দ্ৰে ৰেদনা ৰুত্তা ভগৰতা. তিস্সো ৰেদনা ৰুত্তা ভগৰতা. সুখা ৰেদনা, দুক্খা ৰেদনা, অদুক্খমসুখা ৰেদনা – ইমা তিস্সো ৰেদনা ¶ ৰুত্তা ভগৰতা’’তি. দুতিযম্পি খো পঞ্চকঙ্গো থপতি আযস্মন্তং উদাযিং ¶ এতদৰোচ – ‘‘ন খো, ভন্তে উদাযি, তিস্সো ৰেদনা ৰুত্তা ভগৰতা. দ্ৰে ৰেদনা ৰুত্তা ভগৰতা – সুখা ৰেদনা, দুক্খা ৰেদনা. যাযং, ভন্তে, অদুক্খমসুখা ৰেদনা, সন্তস্মিং এসা পণীতে সুখে ৰুত্তা ভগৰতা’’তি. ততিযম্পি খো ¶ আযস্মা উদাযী পঞ্চকঙ্গং থপতিং এতদৰোচ – ‘‘ন খো, থপতি, দ্ৰে ৰেদনা ৰুত্তা ভগৰতা. তিস্সো ৰেদনা ৰুত্তা ভগৰতা. সুখা ৰেদনা, দুক্খা ৰেদনা, অদুক্খমসুখা ৰেদনা – ইমা তিস্সো ৰেদনা ৰুত্তা ভগৰতা’’তি. ততিযম্পি খো পঞ্চকঙ্গো থপতি আযস্মন্তং উদাযিং এতদৰোচ – ‘‘ন খো, ভন্তে উদাযি, তিস্সো ৰেদনা ৰুত্তা ভগৰতা. দ্ৰে ৰেদনা ৰুত্তা ভগৰতা – সুখা ৰেদনা, দুক্খা ৰেদনা. যাযং, ভন্তে, অদুক্খমসুখা ৰেদনা, সন্তস্মিং এসা পণীতে সুখে ৰুত্তা ভগৰতা’’তি. নেৰ সক্খি আযস্মা উদাযী পঞ্চকঙ্গং থপতিং সঞ্ঞাপেতুং, ন পনাসক্খি পঞ্চকঙ্গো থপতি আযস্মন্তং উদাযিং সঞ্ঞাপেতুং. অস্সোসি খো আযস্মা আনন্দো আযস্মতো উদাযিস্স পঞ্চকঙ্গেন থপতিনা সদ্ধিং ইমং কথাসল্লাপং.

অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা একমন্তং নিসীদি. একমন্তং নিসিন্নো খো আযস্মা আনন্দো যাৰতকো ¶ আযস্মতো উদাযিস্স পঞ্চকঙ্গেন থপতিনা সদ্ধিং অহোসি কথাসল্লাপো তং সব্বং ভগৰতো আরোচেসি.

‘‘সন্তমেৰ, আনন্দ, পরিযাযং পঞ্চকঙ্গো ¶ থপতি উদাযিস্স ভিক্খুনো নাব্ভনুমোদি; সন্তঞ্চ পনানন্দ, পরিযাযং উদাযী ভিক্খু পঞ্চকঙ্গস্স থপতিনো নাব্ভনুমোদি. দ্ৰেপি মযা, আনন্দ, ৰেদনা ৰুত্তা পরিযাযেন. তিস্সোপি মযা ৰেদনা ৰুত্তা পরিযাযেন. পঞ্চপি মযা ৰেদনা ৰুত্তা পরিযাযেন. ছপি মযা ৰেদনা ৰুত্তা পরিযাযেন. অট্ঠারসাপি মযা ৰেদনা ৰুত্তা পরিযাযেন. ছত্তিংসাপি মযা ৰেদনা ৰুত্তা পরিযাযেন. অট্ঠসতম্পি ¶ মযা ৰেদনা ৰুত্তা পরিযাযেন. এৰং পরিযাযদেসিতো খো, আনন্দ, মযা ধম্মো. এৰং পরিযাযদেসিতে খো, আনন্দ, মযা ধম্মে যে অঞ্ঞমঞ্ঞস্স সুভাসিতং সুলপিতং, ন সমনুমঞ্ঞিস্সন্তি, ন সমনুজানিস্সন্তি, ন সমনুমোদিস্সন্তি, তেসং এতং পাটিকঙ্খং – ভণ্ডনজাতা কলহজাতা ৰিৰাদাপন্না অঞ্ঞমঞ্ঞং মুখসত্তীহি ৰিতুদন্তা ৰিহরিস্সন্তীতি [ৰিহরিস্সন্তি (সী. পী. ক.)]. এৰং পরিযাযদেসিতো খো, আনন্দ, মযা ধম্মো. এৰং পরিযাযদেসিতে খো, আনন্দ, মযা ধম্মে যে অঞ্ঞমঞ্ঞস্স সুভাসিতং সুলপিতং সমনুমঞ্ঞিস্সন্তি সমনুজানিস্সন্তি সমনুমোদিস্সন্তি, তেসং এতং পাটিকঙ্খং – সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরিস্সন্তী’’তি.

‘‘পঞ্চিমে, আনন্দ, কামগুণা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা…পে… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা. ইমে খো, আনন্দ, পঞ্চ কামগুণা ¶ . যং খো, আনন্দ ¶ , ইমে পঞ্চ কামগুণে পটিচ্চ উপ্পজ্জতি সুখং সোমনস্সং – ইদং ৰুচ্চতি কামসুখং. যে খো, আনন্দ, এৰং ৰদেয্যুং – ‘এতংপরমং সন্তং সুখং সোমনস্সং পটিসংৰেদেন্তী’তি – ইদং নেসাহং নানুজানামি. তং কিস্স হেতু? অত্থানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ.

‘‘কতমঞ্চানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ? ইধানন্দ, ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. ইদং খো, আনন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ. যে ¶ খো, আনন্দ, এৰং ¶ ৰদেয্যুং – ‘এতংপরমং সন্তং সুখং সোমনস্সং পটিসংৰেদেন্তী’তি – ইদং নেসাহং নানুজানামি. তং কিস্স হেতু? অত্থানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ.

‘‘কতমঞ্চানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ? ইধানন্দ, ভিক্খু, ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি. ইদং খো, আনন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ. যে খো, আনন্দ, এৰং ৰদেয্যুং – ‘এতংপরমং সন্তং সুখং সোমনস্সং পটিসংৰেদেন্তী’তি – ইদং ¶ নেসাহং নানুজানামি. তং কিস্স হেতু? অত্থানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ.

‘‘কতমঞ্চানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ? ইধানন্দ, ভিক্খু পীতিযা চ ৰিরাগা উপেক্খকো চ ৰিহরতি সতো চ সম্পজানো, সুখঞ্চ কাযেন পটিসংৰেদেতি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরতি. ইদং খো, আনন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ. যে খো, আনন্দ, এৰং ৰদেয্যুং – ‘এতংপরমং সন্তং সুখং সোমনস্সং পটিসংৰেদেন্তী’তি – ইদং নেসাহং নানুজানামি. তং কিস্স হেতু? অত্থানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ.

‘‘কতমঞ্চানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ? ইধানন্দ ¶ , ভিক্খু সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি. ইদং খো, আনন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ. যে খো, আনন্দ, এৰং ৰদেয্যুং – ‘এতংপরমং সন্তং সুখং সোমনস্সং পটিসংৰেদেন্তী’তি – ইদং নেসাহং নানুজানামি ¶ . তং কিস্স হেতু? অত্থানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ.

‘‘কতমঞ্চানন্দ ¶ , এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ? ইধানন্দ, ভিক্খু সব্বসো রূপসঞ্ঞানং সমতিক্কমা, পটিঘসঞ্ঞানং অত্থঙ্গমা, নানত্তসঞ্ঞানং অমনসিকারা, ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. ইদং খো, আনন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ. যে খো, আনন্দ, এৰং ৰদেয্যুং – ‘এতংপরমং সন্তং ¶ সুখং সোমনস্সং পটিসংৰেদেন্তী’তি – ইদং নেসাহং নানুজানামি. তং কিস্স হেতু? অত্থানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ.

‘‘কতমঞ্চানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ? ইধানন্দ, ভিক্খু সব্বসো আকাসানঞ্চাযতনং সমতিক্কম্ম, ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং উপসম্পজ্জ ৰিহরতি. ইদং খো, আনন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ. যে খো, আনন্দ, এৰং ৰদেয্যুং – ‘এতংপরমং সন্তং সুখং সোমনস্সং পটিসংৰেদেন্তী’তি – ইদং নেসাহং নানুজানামি. তং কিস্স হেতু? অত্থানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ.

‘‘কতমঞ্চানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ? ইধানন্দ, ভিক্খু সব্বসো ৰিঞ্ঞাণঞ্চাযতনং সমতিক্কম্ম, ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি. ইদং খো, আনন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ ¶ . যে খো, আনন্দ, এৰং ৰদেয্যুং – ‘এতংপরমং সন্তং সুখং সোমনস্সং পটিসংৰেদেন্তী’তি – ইদং নেসাহং নানুজানামি. তং কিস্স হেতু? অত্থানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ.

‘‘কতমঞ্চানন্দ ¶ , এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ? ইধানন্দ, ভিক্খু সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি. ইদং খো, আনন্দ ¶ , এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ. যে খো, আনন্দ, এৰং ৰদেয্যুং – ‘এতংপরমং সন্তং সুখং সোমনস্সং পটিসংৰেদেন্তী’তি – ইদং নেসাহং নানুজানামি. তং কিস্স হেতু? অত্থানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ.

‘‘কতমঞ্চানন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ? ইধানন্দ, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি. ইদং খো, আনন্দ, এতম্হা সুখা অঞ্ঞং সুখং অভিক্কন্ততরঞ্চ পণীততরঞ্চ.

‘‘ঠানং খো পনেতং, আনন্দ, ৰিজ্জতি যং অঞ্ঞতিত্থিযা পরিব্বাজকা এৰং ৰদেয্যুং – ‘সঞ্ঞাৰেদযিতনিরোধং সমণো গোতমো আহ, তঞ্চ সুখস্মিং ¶ পঞ্ঞপেতি. তযিদং কিংসু, তযিদং কথংসূ’তি? এৰংৰাদিনো, আনন্দ, অঞ্ঞতিত্থিযা পরিব্বাজকা এৰমস্সু ৰচনীযা – ‘ন খো, আৰুসো ¶ , ভগৰা সুখঞ্ঞেৰ ৰেদনং সন্ধায সুখস্মিং পঞ্ঞপেতি. যত্থ যত্থ, আৰুসো, সুখং উপলব্ভতি, যহিং যহিং [যং হিযং হি সুখং (সী. পী.), যহিং যহিং সুখং (স্যা. কং. ক.) ম. নি. ২.৯১], তং তং তথাগতো সুখস্মিং পঞ্ঞপেতী’’’তি. নৰমং.

১০. ভিক্খুসুত্তং

২৬৮. ‘‘দ্ৰেপি মযা, ভিক্খৰে, ৰেদনা ৰুত্তা পরিযাযেন, তিস্সোপি মযা ৰেদনা ৰুত্তা পরিযাযেন, পঞ্চপি মযা ৰেদনা ৰুত্তা পরিযাযেন, ছপি মযা ৰেদনা ৰুত্তা পরিযাযেন, অট্ঠারসাপি মযা ৰেদনা ৰুত্তা পরিযাযেন, ছত্তিংসাপি মযা ৰেদনা ৰুত্তা পরিযাযেন, অট্ঠসতম্পি মযা ৰেদনা ৰুত্তা পরিযাযেন. এৰং পরিযাযদেসিতো, ভিক্খৰে, মযা ধম্মো. এৰং পরিযাযদেসিতে খো, ভিক্খৰে, মযা ধম্মে যে অঞ্ঞমঞ্ঞস্স সুভাসিতং সুলপিতং ন সমনুমঞ্ঞিস্সন্তি, ন সমনুজানিস্সন্তি, ন সমনুমোদিস্সন্তি, তেসং এতং পাটিকঙ্খং ¶ – ভণ্ডনজাতা কলহজাতা ৰিৰাদাপন্না অঞ্ঞমঞ্ঞং মুখসত্তীহি ৰিতুদন্তা ৰিহরিস্সন্তীতি. এৰং পরিযাযদেসিতো, ভিক্খৰে, মযা ধম্মো. এৰং পরিযাযদেসিতে খো, ভিক্খৰে, মযা ধম্মে যে অঞ্ঞমঞ্ঞস্স সুভাসিতং সুলপিতং সমনুমঞ্ঞিস্সন্তি সমনুজানিস্সন্তি সমনুমোদিস্সন্তি, তেসং ¶ এতং পাটিকঙ্খং – সমগ্গা সম্মোদমানা অৰিৰদমানা খীরোদকীভূতা অঞ্ঞমঞ্ঞং পিযচক্খূহি সম্পস্সন্তা ৰিহরিস্সন্তীতি.

‘‘পঞ্চিমে, ভিক্খৰে, কামগুণা…পে… ঠানং খো পনেতং, ভিক্খৰে, ৰিজ্জতি যং অঞ্ঞতিত্থিযা পরিব্বাজকা এৰং ৰদেয্যুং – ‘সঞ্ঞাৰেদযিতনিরোধং ¶ সমণো গোতমো আহ, তঞ্চ সুখস্মিং পঞ্ঞপেতি. তযিদং কিংসু, তযিদং কথংসূ’তি? এৰংৰাদিনো, ভিক্খৰে, অঞ্ঞতিত্থিযা পরিব্বাজকা এৰমস্সু ৰচনীযা – ‘ন খো, আৰুসো, ভগৰা সুখঞ্ঞেৰ ৰেদনং সন্ধায সুখস্মিং পঞ্ঞপেতি. যত্থ যত্থ, আৰুসো, সুখং উপলব্ভতি যহিং যহিং [যং হি যং হি (সী. পী.)], তং তং তথাগতো সুখস্মিং পঞ্ঞপেতী’’তি. দসমং.

রহোগতৰগ্গো দুতিযো.

তস্সুদ্দানং –

রহোগতং ¶ দ্ৰে আকাসং, অগারং দ্ৰে চ আনন্দা;

সম্বহুলা দুৰে ৰুত্তা, পঞ্চকঙ্গো চ ভিক্খুনাতি.

৩. অট্ঠসতপরিযাযৰগ্গো

১. সীৰকসুত্তং

২৬৯. একং ¶ ¶ সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. অথ খো মোল়িযসীৰকো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো মোল়িযসীৰকো পরিব্বাজকো ভগৰন্তং এতদৰোচ – ‘‘সন্তি, ভো গোতম, একে সমণব্রাহ্মণা এৰংৰাদিনো এৰংদিট্ঠিনো – ‘যং কিঞ্চাযং পুরিসপুগ্গলো পটিসংৰেদেতি সুখং ৰা দুক্খং ৰা অদুক্খমসুখং ৰা সব্বং তং পুব্বেকতহেতূ’তি. ইধ [ইধ পন (স্যা. কং. পী. ক.)] ভৰং গোতমো কিমাহা’’তি?

‘‘পিত্তসমুট্ঠানানিপি ¶ খো, সীৰক, ইধেকচ্চানি ৰেদযিতানি উপ্পজ্জন্তি. সামম্পি খো এতং, সীৰক, ৰেদিতব্বং [এৰং ৰেদিতব্বং (স্যা. কং. ক.)] যথা পিত্তসমুট্ঠানানিপি ইধেকচ্চানি ৰেদযিতানি উপ্পজ্জন্তি; লোকস্সপি খো এতং, সীৰক, সচ্চসম্মতং যথা পিত্তসমুট্ঠানানিপি ইধেকচ্চানি ৰেদযিতানি উপ্পজ্জন্তি. তত্র, সীৰক, যে তে সমণব্রাহ্মণা এৰংৰাদিনো এৰংদিট্ঠিনো – ‘যং কিঞ্চাযং পুরিসপুগ্গলো পটিসংৰেদেতি সুখং ৰা দুক্খং ৰা অদুক্খমসুখং ৰা সব্বং তং পুব্বেকতহেতূ’তি. যঞ্চ সামং ঞাতং তঞ্চ অতিধাৰন্তি, যঞ্চ লোকে সচ্চসম্মতং তঞ্চ অতিধাৰন্তি. তস্মা তেসং সমণব্রাহ্মণানং মিচ্ছাতি ৰদামি.

‘‘সেম্হসমুট্ঠানানিপি খো, সীৰক…পে… ৰাতসমুট্ঠানানিপি খো, সীৰক…পে… ¶ সন্নিপাতিকানিপি খো, সীৰক…পে… উতুপরিণামজানিপি খো, সীৰক…পে… ৰিসমপরিহারজানিপি খো, সীৰক…পে… ওপক্কমিকানিপি খো, সীৰক…পে… কম্মৰিপাকজানিপি ¶ খো, সীৰক, ইধেকচ্চানি ৰেদযিতানি উপ্পজ্জন্তি. সামম্পি খো এতং, সীৰক, ৰেদিতব্বং. যথা কম্মৰিপাকজানিপি ইধেকচ্চানি ¶ ৰেদযিতানি উপ্পজ্জন্তি; লোকস্সপি খো এতং, সীৰক, সচ্চসম্মতং. যথা কম্মৰিপাকজানিপি ইধেকচ্চানি ৰেদযিতানি উপ্পজ্জন্তি; তত্র, সীৰক, যে তে সমণব্রাহ্মণা এৰংৰাদিনো এৰংদিট্ঠিনো – ‘যং কিঞ্চাযং পুরিসপুগ্গলো পটিসংৰেদেতি সুখং ৰা দুক্খং ৰা অদুক্খমসুখং ৰা সব্বং তং পুব্বেকতহেতূ’তি. যঞ্চ সামং ঞাতং তঞ্চ অতিধাৰন্তি যঞ্চ লোকে সচ্চসম্মতং তঞ্চ অতিধাৰন্তি. তস্মা তেসং সমণব্রাহ্মণানং মিচ্ছাতি ৰদামীতি. এৰং ৰুত্তে, মোল়িযসীৰকো পরিব্বাজকো ভগৰন্তং এতদৰোচ – ‘অভিক্কন্তং, ভো গোতম, অভিক্কন্তং, ভো গোতম …পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’’ন্তি.

‘‘পিত্তং সেম্হঞ্চ ৰাতো চ, সন্নিপাতা উতূনি চ;

ৰিসমং ওপক্কমিকং, কম্মৰিপাকেন অট্ঠমী’’তি. পঠমং;

২. অট্ঠসতসুত্তং

২৭০. ‘‘অট্ঠসতপরিযাযং ৰো, ভিক্খৰে, ধম্মপরিযাযং দেসেস্সামি. তং সুণাথ. কতমো ¶ চ, ভিক্খৰে, অট্ঠসতপরিযাযো, ধম্মপরিযাযো? দ্ৰেপি মযা, ভিক্খৰে, ৰেদনা ৰুত্তা পরিযাযেন; তিস্সোপি মযা ৰেদনা ৰুত্তা পরিযাযেন; পঞ্চপি মযা ৰেদনা ৰুত্তা পরিযাযেন; ছপি ¶ মযা ৰেদনা ৰুত্তা পরিযাযেন; অট্ঠারসাপি মযা ৰেদনা ৰুত্তা পরিযাযেন; ছত্তিংসাপি মযা ৰেদনা ৰুত্তা পরিযাযেন; অট্ঠসতম্পি মযা ৰেদনা ৰুত্তা পরিযাযেন. ‘‘কতমা চ, ভিক্খৰে, দ্ৰে ৰেদনা? কাযিকা চ চেতসিকা চ – ইমা ৰুচ্চন্তি, ভিক্খৰে, দ্ৰে ৰেদনা. কতমা ¶ চ, ভিক্খৰে, তিস্সো ৰেদনা? সুখা ৰেদনা, দুক্খা ৰেদনা, অদুক্খমসুখা ৰেদনা – ইমা ৰুচ্চন্তি, ভিক্খৰে, তিস্সো ৰেদনা. কতমা চ, ভিক্খৰে, পঞ্চ ৰেদনা? সুখিন্দ্রিযং, দুক্খিন্দ্রিযং, সোমনস্সিন্দ্রিযং, দোমনস্সিন্দ্রিযং, উপেক্খিন্দ্রিযং – ইমা ৰুচ্চন্তি, ভিক্খৰে, পঞ্চ ৰেদনা. কতমা চ, ভিক্খৰে, ছ ৰেদনা? চক্খুসম্ফস্সজা ৰেদনা…পে… মনোসম্ফস্সজা ৰেদনা – ইমা ৰুচ্চন্তি, ভিক্খৰে, ছ ৰেদনা. কতমা চ, ভিক্খৰে, অট্ঠারস ৰেদনা? ছ সোমনস্সূপৰিচারা, ছ দোমনস্সূপৰিচারা, ছ উপেক্খূপৰিচারা – ইমা ৰুচ্চন্তি, ভিক্খৰে, অট্ঠারস ৰেদনা. কতমা চ, ভিক্খৰে, ছত্তিংস ৰেদনা? ছ গেহসিতানি [গেহস্সিতানি (অট্ঠ.)] সোমনস্সানি, ছ নেক্খম্মসিতানি [নেক্খম্মস্সিতানি (অট্ঠ.)] সোমনস্সানি, ছ গেহসিতানি দোমনস্সানি, ছ নেক্খম্মসিতানি ¶ দোমনস্সানি, ছ গেহসিতা উপেক্খা ¶ , ছ নেক্খম্মসিতা উপেক্খা – ইমা ৰুচ্চন্তি, ভিক্খৰে, ছত্তিংস ৰেদনা. কতমঞ্চ, ভিক্খৰে, অট্ঠসতং ৰেদনা? অতীতা ছত্তিংস ৰেদনা, অনাগতা ছত্তিংস ৰেদনা, পচ্চুপ্পন্না ছত্তিংস ৰেদনা – ইমা ৰুচ্চন্তি, ভিক্খৰে, অট্ঠসতং ৰেদনা. অযং, ভিক্খৰে, অট্ঠসতপরিযাযো ধম্মপরিযাযো’’তি. দুতিযং.

৩. অঞ্ঞতরভিক্খুসুত্তং

২৭১. অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু ভগৰন্তং এতদৰোচ – ‘‘কতমা নু খো, ভন্তে, ৰেদনা, কতমো ৰেদনাসমুদযো, কতমা ৰেদনাসমুদযগামিনী পটিপদা? কতমো ৰেদনানিরোধো, কতমা ৰেদনানিরোধগামিনী পটিপদা? কো ৰেদনায অস্সাদো, কো আদীনৰো, কিং নিস্সরণ’’ন্তি?

‘‘তিস্সো ¶ ইমা, ভিক্খু, ৰেদনা – সুখা ৰেদনা, দুক্খা ৰেদনা, অদুক্খমসুখা ৰেদনা. ইমা ৰুচ্চন্তি, ভিক্খু, ৰেদনা. ফস্সসমুদযা ৰেদনাসমুদযো. তণ্হা ৰেদনাসমুদযগামিনী ¶ পটিপদা. ফস্সনিরোধা ৰেদনানিরোধো. অযমেৰ অরিযো অট্ঠঙ্গিকো মগ্গো ৰেদনানিরোধগামিনী পটিপদা, সেয্যথিদং – সম্মাদিট্ঠি…পে… সম্মাসমাধি. যং ৰেদনং পটিচ্চ উপ্পজ্জতি সুখং সোমনস্সং, অযং ৰেদনায অস্সাদো; যা ৰেদনা অনিচ্চা দুক্খা ৰিপরিণামধম্মা, অযং ৰেদনায আদীনৰো; যো ৰেদনায ছন্দরাগৰিনযো ছন্দরাগপ্পহানং, ইদং ৰেদনায নিস্সরণ’’ন্তি. ততিযং.

৪. পুব্বসুত্তং

২৭২. ‘‘পুব্বেৰ ¶ মে, ভিক্খৰে, সম্বোধা অনভিসম্বুদ্ধস্স বোধিসত্তস্সেৰ সতো এতদহোসি – ‘কতমা নু খো ৰেদনা, কতমো ৰেদনাসমুদযো, কতমা ৰেদনাসমুদযগামিনী পটিপদা, কতমো ৰেদনানিরোধো, কতমা ৰেদনানিরোধগামিনী পটিপদা? কো ৰেদনায অস্সাদো, কো আদীনৰো, কিং নিস্সরণ’ন্তি? তস্স ময্হং, ভিক্খৰে, এতদহোসি – ‘তিস্সো ইমা ৰেদনা – সুখা ৰেদনা, দুক্খা ৰেদনা, অদুক্খমসুখা ৰেদনা. ইমা ৰুচ্চন্তি ৰেদনা. ফস্সসমুদযা ৰেদনাসমুদযো. তণ্হা ৰেদনাসমুদযগামিনী পটিপদা…পে… যো ৰেদনায ছন্দরাগৰিনযো ছন্দরাগপ্পহানং. ইদং ৰেদনায নিস্সরণ’’’ন্তি. চতুত্থং.

৫. ঞাণসুত্তং

২৭৩. ‘‘‘ইমা ¶ ৰেদনা’তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদি. ‘অযং ৰেদনাসমুদযো’তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি. ‘অযং ৰেদনাসমুদযগামিনী পটিপদা’তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে… ‘অযং ৰেদনানিরোধো’তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি ¶ …পে… ‘অযং ¶ ৰেদনানিরোধগামিনী পটিপদা’তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে… ‘অযং ৰেদনায অস্সাদো’তি মে, ভিক্খৰে, পুব্বে অননুস্সুতেসু ধম্মেসু…পে… ¶ ‘অযং ৰেদনায আদীনৰো’তি মে, ভিক্খৰে, পুব্বে অননুস্সুতেসু ধম্মেসু…পে… ‘ইদং খো নিস্সরণ’ন্তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদী’’তি. পঞ্চমং.

৬. সম্বহুলভিক্খুসুত্তং

২৭৪. অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা…পে… একমন্তং নিসিন্না খো তে ভিক্খূ ভগৰন্তং এতদৰোচুং – ‘‘কতমা নু খো, ভন্তে, ৰেদনা, কতমো ৰেদনাসমুদযো, কতমা ৰেদনাসমুদযগামিনী পটিপদা? কতমো ৰেদনানিরোধো, কতমা ৰেদনানিরোধগামিনী পটিপদা? কো ৰেদনায অস্সাদো, কো আদীনৰো, কিং নিস্সরণ’’ন্তি? ‘‘তিস্সো ইমা, ভিক্খৰে, ৰেদনা – সুখা ৰেদনা, দুক্খা ৰেদনা, অদুক্খমসুখা ৰেদনা. ইমা ৰুচ্চন্তি, ভিক্খৰে, ৰেদনা. ফস্সসমুদযা ৰেদনাসমুদযো. তণ্হা ৰেদনাসমুদযগামিনী পটিপদা. ফস্সনিরোধা…পে… যো ৰেদনায ছন্দরাগৰিনযো ছন্দরাগপ্পহানং. ইদং ৰেদনায নিস্সরণ’’ন্তি. ছট্ঠং.

৭. পঠমসমণব্রাহ্মণসুত্তং

২৭৫. ‘‘তিস্সো ইমা, ভিক্খৰে, ৰেদনা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা. যে হি কেচি, ভিক্খৰে, সমণা ¶ ৰা ব্রাহ্মণা ৰা ইমাসং তিস্সন্নং ৰেদনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানন্তি. ন মে তে, ভিক্খৰে, সমণা ৰা ব্রাহ্মণা ৰা সমণেসু ৰা সমণসম্মতা ব্রাহ্মণেসু ¶ ৰা ব্রাহ্মণসম্মতা, ন চ পন তে আযস্মন্তো সামঞ্ঞত্থং ৰা ব্রহ্মঞ্ঞত্থং ৰা দিট্ঠেৰ ¶ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তি. যে চ খো কেচি, ভিক্খৰে, সমণা ৰা ব্রাহ্মণা ৰা ইমাসং তিস্সন্নং ৰেদনানং সমুদযঞ্চ অত্থঙ্গমঞ্চ অস্সাদঞ্চ আদীনৰং চ নিস্সরণঞ্চ যথাভূতং পজানন্তি. তে খো মে, ভিক্খৰে, সমণা ৰা ব্রাহ্মণা ৰা সমণেসু চেৰ সমণসম্মতা ব্রাহ্মণেসু চ ব্রাহ্মণসম্মতা. তে চ পনাযস্মন্তো সামঞ্ঞত্থঞ্চ ব্রহ্মঞ্ঞত্থঞ্চ, দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. সত্তমং.

৮. দুতিযসমণব্রাহ্মণসুত্তং

২৭৬. ‘‘তিস্সো ¶ ইমা, ভিক্খৰে, ৰেদনা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা. যে হি কেচি, ভিক্খৰে, সমণা ৰা ব্রাহ্মণা ৰা ইমাসং তিস্সন্নং ৰেদনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানন্তি…পে… পজানন্তি…পে… সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. অট্ঠমং.

৯. ততিযসমণব্রাহ্মণসুত্তং

২৭৭. ‘‘যে হি কেচি, ভিক্খৰে, সমণা ৰা ব্রাহ্মণা ৰা ৰেদনং নপ্পজানন্তি, ৰেদনাসমুদযং নপ্পজানন্তি, ৰেদনানিরোধং নপ্পজানন্তি, ৰেদনানিরোধগামিনিং পটিপদং নপ্পজানন্তি…পে… পজানন্তি…পে… সযং অভিঞ্ঞা সচ্ছিকত্ৰা উপসম্পজ্জ ৰিহরন্তী’’তি. নৰমং.

১০. সুদ্ধিকসুত্তং

২৭৮. ‘‘তিস্সো ¶ ইমা, ভিক্খৰে, ৰেদনা. কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা – ইমা খো, ভিক্খৰে, তিস্সো ¶ ৰেদনা’’তি. দসমং.

১১. নিরামিসসুত্তং

২৭৯. ‘‘অত্থি ¶ , ভিক্খৰে, সামিসা পীতি, অত্থি নিরামিসা পীতি, অত্থি নিরামিসা নিরামিসতরা পীতি; অত্থি সামিসং সুখং, অত্থি নিরামিসং সুখং, অত্থি নিরামিসা নিরামিসতরং সুখং; অত্থি সামিসা উপেক্খা, অত্থি নিরামিসা উপেক্খা, অত্থি নিরামিসা নিরামিসতরা উপেক্খা; অত্থি সামিসো ৰিমোক্খো, অত্থি নিরামিসো ৰিমোক্খো, অত্থি নিরামিসা নিরামিসতরো ৰিমোক্খো. কতমা চ, ভিক্খৰে, সামিসা পীতি? পঞ্চিমে, ভিক্খৰে, কামগুণা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা…পে… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা. ইমে খো, ভিক্খৰে, পঞ্চ কামগুণা. যা খো, ভিক্খৰে, ইমে পঞ্চ কামগুণে পটিচ্চ উপ্পজ্জতি পীতি, অযং ৰুচ্চতি, ভিক্খৰে, সামিসা পীতি.

‘‘কতমা ¶ চ, ভিক্খৰে, নিরামিসা পীতি? ইধ, ভিক্খৰে, ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি. অযং ৰুচ্চতি, ভিক্খৰে, নিরামিসা পীতি.

‘‘কতমা ¶ চ, ভিক্খৰে, নিরামিসা নিরামিসতরা পীতি? যা খো, ভিক্খৰে, খীণাসৰস্স ভিক্খুনো রাগা চিত্তং ৰিমুত্তং পচ্চৰেক্খতো, দোসা চিত্তং ৰিমুত্তং পচ্চৰেক্খতো, মোহা চিত্তং ৰিমুত্তং পচ্চৰেক্খতো উপ্পজ্জতি পীতি, অযং ৰুচ্চতি, ভিক্খৰে, নিরামিসা নিরামিসতরা পীতি.

‘‘কতমঞ্চ ¶ , ভিক্খৰে, সামিসং সুখং? পঞ্চিমে, ভিক্খৰে, কামগুণা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা…পে… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা. ইমে খো, ভিক্খৰে, পঞ্চ কামগুণা. যং খো, ভিক্খৰে, ইমে পঞ্চ কামগুণে পটিচ্চ উপ্পজ্জতি সুখং সোমনস্সং, ইদং ৰুচ্চতি, ভিক্খৰে, সামিসং সুখং.

‘‘কতমঞ্চ ¶ , ভিক্খৰে, নিরামিসং সুখং? ইধ, ভিক্খৰে, ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি. পীতিযা চ ৰিরাগা উপেক্খকো চ ৰিহরতি সতো চ সম্পজানো সুখঞ্চ কাযেন পটিসংৰেদেতি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরতি. ইদং ৰুচ্চতি, ভিক্খৰে, নিরামিসং সুখং.

‘‘কতমঞ্চ, ভিক্খৰে, নিরামিসা নিরামিসতরং সুখং? যং খো, ভিক্খৰে, খীণাসৰস্স ভিক্খুনো রাগা চিত্তং ৰিমুত্তং পচ্চৰেক্খতো, দোসা চিত্তং ৰিমুত্তং পচ্চৰেক্খতো ¶ , মোহা চিত্তং ৰিমুত্তং পচ্চৰেক্খতো উপ্পজ্জতি ¶ সুখং সোমনস্সং, ইদং ৰুচ্চতি, ভিক্খৰে, নিরামিসা নিরামিসতরং সুখং.

‘‘কতমা চ, ভিক্খৰে, সামিসা উপেক্খা? পঞ্চিমে, ভিক্খৰে, কামগুণা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা…পে… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা. ইমে খো, ভিক্খৰে, পঞ্চ কামগুণা. যা খো, ভিক্খৰে, ইমে পঞ্চ কামগুণে পটিচ্চ উপ্পজ্জতি উপেক্খা, অযং ৰুচ্চতি, ভিক্খৰে, সামিসা উপেক্খা.

‘‘কতমা চ, ভিক্খৰে, নিরামিসা উপেক্খা? ইধ, ভিক্খৰে, ভিক্খু সুখস্স চ পহানা, দুক্খস্স চ পহানা, পুব্বেৰ সোমনস্সদোমনস্সানং অত্থঙ্গমা, অদুক্খমসুখং উপেক্খাসতিপারিসুদ্ধিং ¶ চতুত্থং ঝানং উপসম্পজ্জ ৰিহরতি. অযং ৰুচ্চতি, ভিক্খৰে, নিরামিসা উপেক্খা.

‘‘কতমা চ, ভিক্খৰে, নিরামিসা নিরামিসতরা উপেক্খা? যা খো, ভিক্খৰে, খীণাসৰস্স ভিক্খুনো রাগা চিত্তং ৰিমুত্তং পচ্চৰেক্খতো, দোসা চিত্তং ৰিমুত্তং পচ্চৰেক্খতো, মোহা চিত্তং ৰিমুত্তং পচ্চৰেক্খতো উপ্পজ্জতি উপেক্খা, অযং ৰুচ্চতি, ভিক্খৰে, নিরামিসা নিরামিসতরা উপেক্খা.

‘‘কতমো চ, ভিক্খৰে, সামিসো ৰিমোক্খো? রূপপ্পটিসংযুত্তো ৰিমোক্খো সামিসো ৰিমোক্খো.

‘‘কতমো ¶ চ, ভিক্খৰে, নিরামিসো ৰিমোক্খো? অরূপপ্পটিসংযুত্তো ৰিমোক্খো নিরামিসো ৰিমোক্খো.

‘‘কতমো ¶ চ, ভিক্খৰে, নিরামিসা নিরামিসতরো ৰিমোক্খো? যো খো, ভিক্খৰে, খীণাসৰস্স ভিক্খুনো রাগা চিত্তং ৰিমুত্তং পচ্চৰেক্খতো, দোসা চিত্তং ৰিমুত্তং পচ্চৰেক্খতো, মোহা চিত্তং ৰিমুত্তং পচ্চৰেক্খতো উপ্পজ্জতি ৰিমোক্খো, অযং ৰুচ্চতি, ভিক্খৰে, নিরামিসা নিরামিসতরো ৰিমোক্খো’’তি. একাদসমং.

অট্ঠসতপরিযাযৰগ্গো ততিযো.

তস্সুদ্দানং –

সীৰকঅট্ঠসতং ¶ ভিক্খু, পুব্বে ঞাণঞ্চ ভিক্খুনা;

সমণব্রাহ্মণা তীণি, সুদ্ধিকঞ্চ নিরামিসন্তি.

ৰেদনাসংযুত্তং সমত্তং.

৩. মাতুগামসংযুত্তং

১. পঠমপেয্যালৰগ্গো

১. মাতুগামসুত্তং

২৮০. ‘‘পঞ্চহি ¶ ¶ ¶ , ভিক্খৰে, অঙ্গেহি সমন্নাগতো মাতুগামো একন্তঅমনাপো হোতি পুরিসস্স. কতমেহি পঞ্চহি? ন চ রূপৰা হোতি, ন চ ভোগৰা হোতি, ন চ সীলৰা হোতি, অলসো চ হোতি, পজঞ্চস্স ন লভতি – ইমেহি খো, ভিক্খৰে, পঞ্চহি অঙ্গেহি সমন্নাগতো মাতুগামো একন্তঅমনাপো হোতি পুরিসস্স. পঞ্চহি, ভিক্খৰে, অঙ্গেহি সমন্নাগতো মাতুগামো একন্তমনাপো হোতি পুরিসস্স. কতমেহি পঞ্চহি? রূপৰা চ হোতি, ভোগৰা চ হোতি, সীলৰা চ হোতি, দক্খো চ হোতি অনলসো, পজঞ্চস্স লভতি – ইমেহি খো, ভিক্খৰে, পঞ্চহি অঙ্গেহি সমন্নাগতো মাতুগামো একন্তমনাপো হোতি পুরিসস্সা’’তি. পঠমং.

২. পুরিসসুত্তং

২৮১. ‘‘পঞ্চহি, ভিক্খৰে, অঙ্গেহি সমন্নাগতো পুরিসো একন্তঅমনাপো হোতি মাতুগামস্স. কতমেহি পঞ্চহি? ন চ রূপৰা হোতি, ন চ ভোগৰা হোতি, ন চ সীলৰা হোতি, অলসো চ হোতি, পজঞ্চস্স ন লভতি – ইমেহি খো, ভিক্খৰে, পঞ্চহি ¶ অঙ্গেহি সমন্নাগতো পুরিসো একন্তঅমনাপো হোতি মাতুগামস্স. পঞ্চহি, ভিক্খৰে, অঙ্গেহি সমন্নাগতো পুরিসো একন্তমনাপো হোতি মাতুগামস্স. কতমেহি পঞ্চহি? রূপৰা চ হোতি, ভোগৰা চ হোতি, সীলৰা চ হোতি, দক্খো চ হোতি অনলসো, পজঞ্চস্স লভতি – ইমেহি ¶ খো, ভিক্খৰে, পঞ্চহি অঙ্গেহি সমন্নাগতো পুরিসো ¶ একন্তমনাপো হোতি মাতুগামস্সা’’তি. দুতিযং.

৩. আৰেণিকদুক্খসুত্তং

২৮২. ‘‘পঞ্চিমানি, ভিক্খৰে, মাতুগামস্স আৰেণিকানি দুক্খানি, যানি মাতুগামো পচ