📜

নমো তস্স ভগৰতো অরহতো সম্মাসম্বুদ্ধস্স

সংযুত্তনিকাযে

সল়াযতনৰগ্গটীকা

১. সল়াযতনসংযুত্তং

১. অনিচ্চৰগ্গো

১. অজ্ঝত্তানিচ্চসুত্তৰণ্ণনা

১. চক্খতীতি ¶ ¶ চক্খু, ঞাণং, যথাসভাৰতো আরম্মণস্স জাননেন সমৰিসমং আচিক্খন্তং ৰিয পৰত্ততীতি অত্থো. তথা মংসচক্খু. তম্পি হি রূপদস্সনে চক্খতীতি চক্খু. বুদ্ধানংযেৰ চক্খূতি বুদ্ধচক্খু, অসাধারণতো হি সত্তসন্তানেসু সস্সতুচ্ছেদদিট্ঠি অনুলোমিকঞাণযথাভূতঞাণানঞ্চেৰ কামরাগানুসযাদীনঞ্চ যাথাৰতো ৰিভাৰিতঞাণং আসযানুসযঞাণং ইন্দ্রিযপরোপরিযত্তঞাণঞ্চ. হেট্ঠিমা তযো মগ্গা চতুসচ্চধম্মেসু ৰুত্তাকারেন পৰত্তিযা ধম্মে চক্খূতি ধম্মচক্খু, তথা তেসং ফলানি তংতংপটিপক্খেসু পটিপ্পস্সদ্ধিপহানৰসেন ¶ পৰত্তনতো. সমন্ততো সব্বধম্মেসু চক্খুকিচ্চসাধনতো সমন্তচক্খু, সব্বঞ্ঞুতঞ্ঞাণং. দিব্বৰিহারসন্নিস্সযেন লদ্ধব্বতো দেৰানং দিব্বচক্খু ৰিযাতি তং দিব্বচক্খু, অভিঞ্ঞাৰিসেসো. আলোকং ৰড্ঢেত্ৰা রূপদস্সনতো ‘‘আলোকফরণেনা’’তি ৰুত্তং. ‘‘ইদং দুক্খং অরিযসচ্চন্তি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদী’’তিআদিনা (সং. নি. ৫.১০৮১; মহাৰ. ১৫) নযেন ¶ আগতত্তা চতুসচ্চপরিচ্ছেদকঞাণং ‘‘পঞ্ঞাচক্খূ’’তি ৰুত্তং. তদিদং ‘‘ৰিপস্সনাঞাণ’’ন্তি ৰদন্তি, ‘‘ৰিপস্সনামগ্গফলপচ্চৰেক্খণঞাণানী’’তি অপরে.

পচ্চযভূতেহি এতেহি অভিসম্ভরীযন্তীতি সম্ভারা, উপত্থম্ভভূতা চতুসমুট্ঠানিকরূপা. সহ সম্ভারেহীতি সসম্ভারং. মহাভূতানং উপাদায পসীদতীতি পসাদো. অক্খিকূপকে অক্খিপটলেহীতি উভোহি অক্খিদলেহি. সম্ভৰোতি আপোধাতুমেৰ সম্ভৰভূতমাহ. ইধ ‘‘তেরস সম্ভারা’’তি ৰুত্তং. অট্ঠসালিনিযং (ধ. স. অট্ঠ. ৫৯৬) পন সণ্ঠানেন সদ্ধিং ‘‘চুদ্দস সম্ভারা’’তি আগতং. তত্থ সণ্ঠানন্তি ৰণ্ণাযতনমেৰ পরিমণ্ডলাদিসণ্ঠানভূতং. ৰিসুং ৰচনং পন নেসং তথাভূতানং অতথাভূতানঞ্চ আপোধাতুৰণ্ণাযতনানং যথাৰুত্তে মংসপিণ্ডে ৰিজ্জমানত্তা. সম্ভৰস্স চতুধাতুনিস্সিতেহি সহ ৰুত্তস্স ধাতুত্তযনিস্সিততা যোজেতব্বা. দিট্ঠিমণ্ডলেতি অভিমুখং ঠিতানং পটিবিম্বপঞ্ঞাযনট্ঠানভূতে চক্খুসঞ্ঞিতায দিট্ঠিযা পৰত্তিট্ঠানভূতে মণ্ডলে. সন্নিৰিট্ঠন্তি এতেন চক্খুপসাদস্স অনেককলাপগতভাৰো দস্সিতো. তথা হি সো সত্ত অক্খিপটলানি অভিব্যাপেত্ৰা ৰত্ততি. যস্মা সো সত্ত অক্খিপটলানি ব্যাপেত্ৰা ঠিতেহি অত্তনো নিস্সযভূতেহি কতূপকারং তংনিস্সিতেহেৰ আযুৰণ্ণাদীহি অনুপালিতপরিৰারিতং তিসন্ততিরূপসমুট্ঠাপকেহি উতুচিত্তাহারেহি উপত্থম্ভিযমানং হুত্ৰা তিট্ঠতি. রূপদস্সনসমত্থন্তি অত্তানং নিস্সায পৰত্তৰিঞ্ঞাণস্স ৰসেন রূপাযতনদস্সনসমত্থং. ৰিত্থারকথাতি তস্স চক্খুনো সোতাদীনঞ্চ হেতুপচ্চযাদিৰসেন চেৰ লক্খণাদিৰসেন চ ৰিত্থারকথা.

সম্মসনচারচিত্তন্তি ৰিপস্সনায পৰত্তিট্ঠানভূতং ৰিপস্সিতব্বং চিত্তং. কেচি ‘‘ৰিপস্সনুপগতকিরিযমযচিত্ত’’ন্তি ৰদন্তি, তং তেসং মতিমত্তং. তীণি লক্খণানি দস্সেত্ৰা ৰিপস্সনং উস্সুক্কাপেত্ৰা অরহত্তস্স পাপনৰসেন দেসনায পৰত্তত্তা.

অজ্ঝত্তানিচ্চসুত্তৰণ্ণনা নিট্ঠিতা.

২-৩. অজ্ঝত্তদুক্খসুত্তাদিৰণ্ণনা

২-৩. দ্ৰে ¶ ¶ লক্খণানীতি দুক্খানত্তলক্খণানি. একং লক্খণন্তি অনত্তলক্খণং. সেসানীতি ৰুত্তাৰসেসানি লক্খণানি. তেহীতি যেহি দুতিযততিযানি সুত্তানি দেসিতানি, তেহি. সল্লক্খিতানীতি সম্মদেৰ উপধারিতানি. এত্তকেনাতি দ্ৰিন্নং একস্সেৰ ৰা লক্খণস্স কথনেন.

অজ্ঝত্তদুক্খসুত্তাদিৰণ্ণনা নিট্ঠিতা.

৪-৬. বাহিরানিচ্চসুত্তাদিৰণ্ণনা

৪-৬. ৰুত্তসদিসোৰাতি ‘‘দ্ৰে লক্খণানী’’তিআদিনা ৰুত্তসদিসো এৰ. নযোতি অতিদেসনযো.

বাহিরানিচ্চসুত্তাদিৰণ্ণনা নিট্ঠিতা.

৭-১২. অজ্ঝত্তানিচ্চাতীতানাগতসুত্তাদিৰণ্ণনা

৭-১২. সল্লক্খেত্ৰাতি অতীতানাগতানং অৰিজ্জমানত্তা গাহস্স দল়্হতায সল্লক্খেত্ৰা. পচ্চুপ্পন্নেসু ৰিজ্জমানত্তা বলৰতা তণ্হাদিগাহেন ৰিপস্সনাৰীথিং পটিপাদেতুং কিলমন্তানং ৰিনেয্যানং ৰসেন.

অজ্ঝত্তানিচ্চাতীতানাগতসুত্তাদিৰণ্ণনা নিট্ঠিতা.

অনিচ্চৰগ্গৰণ্ণনা নিট্ঠিতা.

২. যমকৰগ্গো

১-৪. পঠমপুব্বেসম্বোধসুত্তাদিৰণ্ণনা

১৩-১৬. দ্ৰীসুপি সুত্তেসু আযতনানং ৰসেন দেসনা একরসাৰাতি ‘‘পঠমদুতিযেসূ’’তি একজ্ঝং পদুদ্ধারো কতো. আহিতো অহংমানো এত্থাতি অত্তা, অত্তভাৰো. অত্তানমধি অজ্ঝত্তং, তপ্পরিযাপন্নত্তা তত্থ ভৰানি অজ্ঝত্তিকানি, তেসং অজ্ঝত্তিকানং. অজ্ঝত্তঞ্চ ¶ নাম অজ্ঝত্তজ্ঝত্তং ¶ , নিযকজ্ঝত্তং, গোচরজ্ঝত্তং, ৰিসযজ্ঝত্তন্তি চতুব্বিধং. তত্থ অজ্ঝত্তজ্ঝত্তং অজ্ঝত্তে ভৰন্তি অজ্ঝত্তিকন্তি আহ ‘‘অজ্ঝত্তজ্ঝত্তৰসেন অজ্ঝত্তিকান’’ন্তি. তেসং চক্খাদীনং অজ্ঝত্তেসুপি অজ্ঝত্তিকভাৰো অধিকসিনেহৰত্থুতাযাতি আহ ‘‘ছন্দরাগস্স অধিমত্তবলৰতাযা’’তি. ইদানি তত্থ তমত্থং পটিযোগিনা সদ্ধিং উদাহরণৰসেন দস্সেন্তো ‘‘মনুস্সানং হী’’তিআদিমাহ. তং উত্তানমেৰ. বাহিরানীতি অজ্ঝত্তিকতো বহি ভৰানি.

পঠমপুব্বেসম্বোধসুত্তাদিৰণ্ণনা নিট্ঠিতা.

৫-৬. পঠমনোচেঅস্সাদসুত্তাদিৰণ্ণনা

১৭-১৮. নিক্খন্তাতি লোকতো নিক্খন্তা. ৰিসংযুত্তা সংযোগহেতূনং কিলেসানং পহীনত্তা নো সংযুত্তা. নো অধিমুত্তাতি ন উস্সুক্কজাতা. ৰিমরিযাদী…পে… চেতসাতি ৰিগতকিলেসৰট্টমরিযাদতায নিম্মরিযাদীকতেন চিত্তেন. চতুসচ্চমেৰ কথিতং চক্খাদীনং অস্সাদাদিনো কথিতত্তা.

পঠমনোচেঅস্সাদসুত্তাদিৰণ্ণনা নিট্ঠিতা.

৭-১০. পঠমাভিনন্দসুত্তাদিৰণ্ণনা

১৯-২২. ৰট্টৰিৰট্টমেৰ কথিতং অভিনন্দনানং উপ্পাদনিরোধানঞ্চ ৰসেন দেসনায পৰত্তত্তা. অনুপুব্বকথাতি আদিতো পট্ঠায পদত্থৰণ্ণনা. নেসন্তি সুত্তানং.

পঠমাভিনন্দসুত্তাদিৰণ্ণনা নিট্ঠিতা.

যমকৰগ্গৰণ্ণনা নিট্ঠিতা.

৩. সব্বৰগ্গো

১. সব্বসুত্তৰণ্ণনা

২৩. সব্ব-সদ্দো ¶ পকরণৰসেন কত্থচি সপ্পদেসেপি পৰত্ততীতি ততো নিৰত্তনত্থং অনৰসেসৰিসযেন সব্ব-সদ্দেন ৰিসেসেত্ৰা ৰুত্তং ‘‘সব্বসব্ব’’ন্তি, সব্বমেৰ হুত্ৰা সব্বন্তি অত্থো. আযতনভাৰং সব্বং আযতনসব্বং, সেসদ্ৰযেপি এসেৰ নযো.

তস্স ¶ অৰিসযাভাৰতো ন অদ্দিট্ঠমিধত্থি কিঞ্চীতি. ইধাতি নিপাতমত্তং, ইধ ৰা সদেৰকে লোকে, দস্সনভূতেন ঞাণেন অদিট্ঠং নাম কিঞ্চি নত্থীতি অত্থো. যদি এৰং অনুমানৰিসযং নু খো কথন্তি আহ ‘‘অথো অৰিঞ্ঞাত’’ন্তি. অঞ্ঞেসং অপচ্চক্খম্পি অৰিঞ্ঞাতং তস্স কিঞ্চি নত্থীতি অদিট্ঠং অৰিঞ্ঞাতং নত্থি. পচ্চুপ্পন্নং অতীতমেৰ ঞেয্যং গহিতং, অনাগতং নু খো কথন্তি আহ – ‘‘অজানিতব্ব’’ন্তি, তস্স কিঞ্চি নত্থীতি আনেত্ৰা সম্বন্ধো. জানিতুং ঞাতুং অসক্কুণেয্যং নাম তস্স কিঞ্চি নত্থীতি দস্সেন্তো আহ ‘‘সব্বং অভিঞ্ঞাসী’’তিআদি.

সকলস্স সক্কাযধম্মস্স পরিগ্গহিতত্তা সক্কাযসব্বং. সব্বধম্মেসূতি পঞ্চন্নং দ্ৰারানং আরম্মণভূতেসু সব্বেসু ধম্মেসু. যস্মা ছসুপি আরম্মণেসু গহিতেসু পদেসসব্বং নাম ন হোতি, তস্মা ‘‘পঞ্চারম্মণমত্ত’’ন্তি ৰুত্তং. পদেসসব্বং সক্কাযসব্বং ন পাপুণাতি তস্স তেভূমকধম্মেসু একদেসস্স অসঙ্গণ্হনতো. সক্কাযসব্বং আযতনসব্বং ন পাপুণাতি লোকুত্তরধম্মানং অসঙ্গণ্হনতো. আযতনসব্বং সব্বসব্বং ন পাপুণাতি. যস্মা আযতনসব্বেন চতুভূমকধম্মাৰ পরিগ্গহিতা, ন লক্খণপঞ্ঞত্তিযো, যস্মা সব্বসব্বং দস্সেন্তেন বুদ্ধঞাণৰিসযো দস্সিতো, তস্মা ‘‘সব্বসব্বং ন পাপুণাতী’’তি এত্থাপি ‘‘কস্মা…পে… নত্থিতাযা’’তি সব্বং ঞাতারম্মণেনেৰ পুচ্ছাৰিস্সজ্জনং কতং. ‘‘আযতনসব্বেপি ইধ ৰিপস্সনুপগধম্মাৰ গহেতব্বা অভিঞ্ঞেয্যনিদ্দেসৰসেনপি সম্মসনচারস্সেৰ ইচ্ছিতত্তা’’তি ৰদন্তি.

পটিক্খিপিত্ৰাতি ‘‘ইদং সব্বং নাম ন হোতী’’তি এৰং পটিক্খিপিত্ৰা. তস্সাতি ‘‘অঞ্ঞং সব্বং পঞ্ঞাপেস্সামী’’তি ৰদন্তস্স. ৰাচায ৰত্তব্বৰত্থুমত্তকমেৰাতি ৰঞ্ঝাপুত্তগগনকুসুমাদিৰাচা ৰিয এতস্স ৰাচায কেৰলং ৰত্তব্বৰত্থুকমেৰ ভৰেয্য, ন অত্থো, ৰচনমত্তকমেৰাতি অত্থো ¶ . অতিক্কমিত্ৰাতি অনামসিত্ৰা অগ্গহেত্ৰা. তং কিস্স হেতূতি ৰিঘাতাপজ্জনং কেন হেতুনা. যথা তং অৰিসযস্মিন্তি যথা অঞ্ঞোপি কোচি অৰিসযে ৰাযমন্তো, এৰন্তি অত্থো. অট্ঠকথাযং পন যস্মা পাল়িযং ‘‘তং কিস্স হেতূ’’তি ৰুত্তকারণমেৰ উপনযনৰসেন দস্সেতুং ‘‘যথা ত’’ন্তিআদি ৰুত্তং. কারণোপনযনঞ্চ কারণমেৰাতি ‘‘যথাতি কারণৰচন’’ন্তি ৰুত্তন্তি দট্ঠব্বং. তেনেৰাহ ‘‘এৰং ইমস্মিম্পি অৰিসযে’’তিআদি.

সব্বসুত্তৰণ্ণনা নিট্ঠিতা.

২. পহানসুত্তৰণ্ণনা

২৪. সব্বস্সাতি দ্ৰারারম্মণেহি সদ্ধিং দ্ৰারপ্পৰত্তস্স. পহানাযাতি তপ্পটিবদ্ধছন্দরাগপহানৰসেন ¶ পজহনায. চক্খুসম্ফস্সন্তি চক্খুসন্নিস্সিতফস্সং. মূলপচ্চযন্তি মূলভূতং পচ্চযং কত্ৰা, সহজাতৰেদনায চক্খুসম্ফস্সপচ্চযভাৰে ৰত্তব্বমেৰ নত্থি. এসেৰ নযোতি অপদেসেন ‘‘সোতসম্ফস্সং মূলপচ্চযং কত্ৰা’’তিআদিনা ৰত্তব্বন্তি দস্সেতি. মনোতি ভৰঙ্গচিত্তং মনোদ্ৰারস্স অধিপ্পেতত্তা. আরম্মণন্তি ধম্মারম্মণং. সহাৰজ্জনকজৰনন্তি সহমনোদ্ৰারাৰজ্জনকং জৰনং. তংপুব্বকত্তা মনোৰিঞ্ঞাণফস্সৰেদনানং মূলপচ্চযভূতা সব্বেস্ৰেৰ চক্খুদ্ৰারাদীসু ৰুত্তিত্তা তদনুরূপতো ‘‘ভৰঙ্গসহজাতো সম্ফস্সো’’তি ৰুত্তং. সহাৰজ্জনৰেদনায জৰনৰেদনা ‘‘ৰেদযিত’’ন্তি অধিপ্পেতা, ভৰঙ্গসম্পযুত্তায পন ৰেদনায গহণে ৰত্তব্বমেৰ নত্থি. ভৰঙ্গতো অমোচেত্ৰা ভৰঙ্গচিত্তেন সদ্ধিংযেৰ আৰজ্জনং গহেত্ৰা মনোদ্ৰারাৰজ্জনং ভৰঙ্গং দট্ঠব্বং. যা পনেত্থ দেসনাতি যা এত্থ ‘‘পহানাযা’’তিআদিনা পৰত্তদেসনা সত্থু অনসিট্ঠি আণা. অযং পণ্ণত্তি নাম তস্স তস্স অত্থস্স পকারতো ঞাপনতো. এত্থ সব্বগ্গহণেন সব্বে সভাৰধম্মা গহিতা, পঞ্ঞত্তি পন কতমাতি ৰিচারণায তং দস্সেতুং ‘‘যা পনেত্থা’’তিআদি ৰুত্তন্তি দট্ঠব্বং.

পহানসুত্তৰণ্ণনা নিট্ঠিতা.

৩. অভিঞ্ঞাপরিঞ্ঞাপহানসুত্তৰণ্ণনা

২৫. অভিঞ্ঞাতি ¶ অভিঞ্ঞায. য-কারলোপৰসেনাযং নিদ্দেসো ‘‘সযং অভিঞ্ঞা’’তিআদীসু (দী. নি. ১.২৮, ৪০৫; ম. নি. ১.১৫৪) ৰিয, তথা ‘‘পরিঞ্ঞা’’তি এত্থাপি. সব্বন্তি আযতনসব্বং. তঞ্হি অভিঞ্ঞেয্যং. অভিজানিত্ৰাতি অভিঞ্ঞায জানিত্ৰা. পরিজানিত্ৰাতি তীরণপরিঞ্ঞায অনিচ্চাদিতো পরিজানিত্ৰা. পজহনত্থাযাতি পহানপরিঞ্ঞায অনৰসেসতো পজহনায.

অভিঞ্ঞাপরিঞ্ঞাপহানসুত্তৰণ্ণনা নিট্ঠিতা.

৪. পঠমঅপরিজাননসুত্তৰণ্ণনা

২৬. ‘‘অভিজান’’ন্তিআদিনা এত্থ ভগৰা পঠমং কণ্হপক্খং দস্সেত্ৰা সুক্কপক্খং দস্সেতি ৰেনেয্যজ্ঝাসযৰসেন. তেনেত্থ ৰট্টৰিৰট্টং কথিতং.

পঠমঅপরিজাননসুত্তৰণ্ণনা নিট্ঠিতা.

৫. দুতিযঅপরিজাননসুত্তৰণ্ণনা

২৭. চক্খুৰিঞ্ঞাণৰিঞ্ঞাতব্বধম্মো ¶ নাম রূপাযতনমেৰাতি আহ ‘‘হেট্ঠা গহিতরূপমেৰা’’তি. ইধ অনাপাথগতং ‘‘চক্খুৰিঞ্ঞাণৰিঞ্ঞাতব্বা ধম্মা’’তি ৰুত্তত্তা. হেট্ঠা আপাথগতম্পি অনাপাথগতম্পি গহিতমেৰ ‘‘যে চ রূপা’’তি অনৰসেসতো ৰুত্তত্তা. তে হি ৰেদনাসঞ্ঞাসঙ্খারক্খন্ধা সহ চক্খুৰিঞ্ঞাণেন ৰিঞ্ঞাতব্বত্তা. তথা হি চক্খুৰিঞ্ঞাণং তেহি একুপ্পাদং একৰত্থুকং একনিরোধং একারম্মণমেৰ. সেসপদেসূতি সেসেসু ‘‘যঞ্চ সোতং যে চ সদ্দা’’তিআদিনা আগতেসু কণ্হপক্খে পঞ্চসু, সুক্কপক্খে ছসুপি পদেসু. এসেৰ নযোতি য্ৰাযং ‘‘হেট্ঠা গহিতরূপমেৰ গণ্হিত্ৰা’’তি অত্থো ৰুত্তো. এসো এৰ তত্থপি অত্থৰণ্ণনানযো.

দুতিযঅপরিজাননসুত্তৰণ্ণনা নিট্ঠিতা.

৬. আদিত্তসুত্তৰণ্ণনা

২৮. গযানামিকায ¶ নদিযা অৰিদূরে পৰত্তো গামো গযা নাম, তস্সং গযাযং ৰিহরতীতি সমীপত্থে চেতং ভুম্মৰচনং. গযাগামস্স হি আসন্নে গযাসীসনামকে পিট্ঠিপাসাণে ভগৰা তদা ৰিহাসি. তেনাহ ‘‘ভগৰা তত্থ ৰিহরতী’’তি.

তত্রাতি ‘‘ভিক্খূ আমন্তেসী’’তি যে ভিক্খূ আমন্তেসি, যথা চাযং দেসনা তেসং সপ্পাযা জাতা, তত্র তস্মিং অত্থদ্ৰযে ৰিভাৰেতব্বে অযং অনুপুব্বিকথা সমুদাগমতো পট্ঠায অনুপটিপাটিকথা. ইতোতি ইমস্মা কপ্পতো. কিরাতি অনুস্সৰনত্থে নিপাতো. পারমিতাপরিভাৰনায পরিপাকগতে. ঞাণেতি বোধিঞাণে. কনিট্ঠপুত্তো ৰেমাতিকভাতা ভগৰতো. ৰেল়ুভিত্তিকুটিকাহি পরিক্খিপিত্ৰা বহিদ্ধা, অন্তো পন পটসাণীহি.

সব্বেসং সত্তানং. পুঞ্ঞচেতনং অন্তো অব্ভন্তরে পৰেসেতি. ভগৰাপি তস্স পুত্তোতি কত্ৰা ‘‘অঞ্ঞে তযো পুত্তা’’তি ৰুত্তং. অৰিপ্পকিরিত্ৰাতি পরাজযেন অৰিপ্পকিরিয অপলাযিত্ৰা. পিদহীতি দাতুং ন সক্কোমীতি তথা অকাসি. সচ্চৰাদিতায গণ্হিংসূতি রাজকুলস্স সচ্চৰাদিতায অত্তনো ৰরং গণ্হিংসু.

ৰিনিৰত্তিতুন্তি পটিঞ্ঞায নিৰত্তিতুং. অন্তরাতি তুম্হেহি পরিচ্ছিন্নকালস্স অন্তরা এৰ মতা. অট্ঠৰীসতিহত্থট্ঠানং উসভং নাম. উসভে অট্ঠৰীসতিহত্থপ্পমাণে ঠানে. দানগ্গে ব্যাৰটোতি পসুতো.

সোতি ¶ ভগৰা. তথারূপঞ্হি বুদ্ধানং দেসনাপাটিহারিযং, যথা দেসনায গহিতো অত্থো পচ্চক্খতো ৰিভূতো হুত্ৰা উপট্ঠাতি. তেনাহ ‘‘ইমেসং…পে… দেসেস্সামী’’তি. সন্নিট্ঠানন্তি চিরকালপরিচিতাদিত্তঅগ্গিকানং আদিত্তপরিযাযদেসনাৰ সপ্পাযাতি নিচ্ছযমকাসি. পদিত্তন্তি পদীপিতং একাদসহি অগ্গীহি একজালীভূতং. তেনাহ ‘‘সম্পজ্জলিত’’ন্তি. দুক্খলক্খণং কথিতং চক্খাদীনং একাদসহি অগ্গীহি আদিত্তভাৰেন দুক্খমতায দুক্খস্স কথিতত্তা.

আদিত্তসুত্তৰণ্ণনা নিট্ঠিতা.

৭. অদ্ধভূতসুত্তৰণ্ণনা

২৯. অধিসদ্দেন ¶ সমানত্থো অদ্ধসদ্দোতি আহ ‘‘অদ্ধভূতন্তি অধিভূত’’ন্তিআদি. সেসং ৰুত্তনযমেৰ.

অদ্ধভূতসুত্তৰণ্ণনা নিট্ঠিতা.

৮. সমুগ্ঘাতসারুপ্পসুত্তৰণ্ণনা

৩০. মঞ্ঞিতং নাম তণ্হামানদিট্ঠীহি গহেতব্বং মঞ্ঞিতং. সব্বস্মিং মঞ্ঞিতন্তি সব্বমঞ্ঞিতং, তস্স সমুগ্ঘাতো সেতুঘাতো, তদাৰহং সব্বমঞ্ঞিতসমুগ্ঘাতসারুপ্পং. অট্ঠকথাযং পন ‘‘মঞ্ঞিতং নাম চক্খাদীসু এৰ উপ্পজ্জতি, নাঞ্ঞস্মি’’ন্তি দুতিযনযো ৰুত্তো. অনুচ্ছৰিকন্তি অনুরূপং অৰিলোমং. ইধাতি ইধেৰ সাসনে অঞ্ঞত্থ তদভাৰতো. ‘‘তণ্হা-মানদিট্ঠিমঞ্ঞিতান’’ন্তি ৰুত্তং মঞ্ঞিতত্তযং সপরসন্তানেসু পটিপক্খৰসেন যোজেত্ৰা দস্সেতুং ‘‘চক্খুং অহন্তি ৰা’’তিআদি ৰুত্তং. তত্থ ‘‘চক্খুং অহ’’ন্তি ইমিনা অজ্ঝত্তৰিসযং দিট্ঠিমঞ্ঞিতঞ্চ দস্সেতি অত্তাভিনিৰেসাহংকারদীপনতো. ‘‘মম’’ন্তি ইমিনা তণ্হামঞ্ঞিতং মানমঞ্ঞিতম্পি ৰা, পরিগ্গহমুখেনপি সেয্যাদিতো মানুপ্পজ্জনতো. সেসপদদ্ৰযেপি ইমিনা নযেন মঞ্ঞিতৰিভাগো ৰেদিতব্বো. অহন্তি অত্তাৰ, সো চ চক্খুস্মিং তদধীনৰুত্তিত্তা ‘‘পরো’’তি ন মঞ্ঞতি. মম কিঞ্চনপলিবোধো চক্খুস্মিং সতি লব্ভনতো, অসতি ন মঞ্ঞতি তথামঞ্ঞিতস্স পচ্চযঘাততো. সেসপদদ্ৰযেপি এসেৰ নযো.

অহং চক্খুতো নিগ্গতোতি ‘‘অহ’’ন্তি ৰত্তব্বো অযং সত্তো চক্খুতো নিগ্গতো তত্থ সুখুমাকারেন উপলব্ভনতো. মম কিঞ্চনপলিবোধো চক্খুতো নিগ্গতো তস্মিং সতি এৰ উপলব্ভনতো ¶ . সেসদ্ৰযেপি এসেৰ নযো. তত্থ পরোতি পরো সত্তো. মম চক্খূতি ন মঞ্ঞতি যস্স তং চক্খু, তস্স ‘‘অহ’’ন্তি ৰত্তব্বস্সেৰ অভাৰতো. মমত্তভূতন্তি মম কারণং. সেসং উত্তানমেৰ. এৰমেতস্মিং সুত্তে চক্খুরূপ-চক্খুৰিঞ্ঞাণ-চক্খুসম্ফস্স-সুখদুক্খাদুক্খমসুখৰসেন সত্ত ৰারা চক্খুদ্ৰারে, তথা সোতদ্ৰারাদীসূতি ছ সত্তকা দ্ৰেচত্তালীস. পুন সক্কাযৰসেন ‘‘সব্বং ন মঞ্ঞতী’’তিআদিনা ৰুত্তং, তেন তেচত্তালীস. পুন তেভূমকৰট্টং ‘‘লোকো’’তি গহেত্ৰা ‘‘ন কিঞ্চি লোকে উপাদিযতী’’তি ¶ ৰুত্তং, তেন চতুচত্তালীস হোন্তি. এৰং সব্বথাপি চতুচত্তালীসায ঠানেসু অরহত্তং পাপেত্ৰা ৰিপস্সনা কথিতাতি ৰেদিতব্বা. ‘‘চতুচত্তালীসাধিকসতেসূ’’তি কেসুচি পোত্থকেসু লিখন্তি, সা চ পমাদলেখা.

সমুগ্ঘাতসারুপ্পসুত্তৰণ্ণনা নিট্ঠিতা.

৯. পঠমসমুগ্ঘাতসপ্পাযসুত্তৰণ্ণনা

৩১. উপকারভূতা তদাৰহত্তা. ততোতি মঞ্ঞিতাকারতো. তন্তি মঞ্ঞনাৰত্থুং. অঞ্ঞেনাকারেনাতি যথা মঞ্ঞতি অনিচ্চাদিআকারতো, অঞ্ঞেন অনিচ্চাদিনা আকারেন হোতি. অঞ্ঞথাভাৰং ৰিপরিণামন্তি উপ্পাদৰযতায অঞ্ঞথাভাৰং জরায মরণেন চ দ্ৰেধা ৰিপরিণামেতব্বং. তং উপগমনেন অঞ্ঞথাভাৰী, এৰংভূতো হুত্ৰাপি জীরণভিজ্জনসভাৰেসু. ভৰেসু সত্তো লোকো উপরিপি ভৰংযেৰ অভিনন্দতি. হেট্ঠা গহিতমেৰ সঙ্কড্ঢিত্ৰাতি ‘‘চক্খুং ন মঞ্ঞতী’’তিআদিনা হেট্ঠা গহিতমেৰ খন্ধধাতুআযতনাতি খন্ধাদিপরিযাযেন একতো গহেত্ৰা পুনপি মঞ্ঞনাৰত্থুং দস্সেতি. অৰসানে ‘‘ততো তং হোতী’’তি ৰুত্তপদেন সদ্ধিং সব্বৰারেসু অট্ঠ অট্ঠ হোন্তীতি ‘‘অট্ঠচত্তালীসায ঠানেসূ’’তি ৰুত্তং.

পঠমসমুগ্ঘাতসপ্পাযসুত্তৰণ্ণনা নিট্ঠিতা.

১০. দুতিযসমুগ্ঘাতসপ্পাযসুত্তৰণ্ণনা

৩২. দস্সেত্ৰাতি এত্থ লক্খণে অযং ত্ৰা-সদ্দো, হেতুম্হি ৰা. অনাদিসত্তসন্তানগতগাহত্তযলক্খিতা হি সত্থু, তিপরিৰট্টদেসনা তংনিমিত্তং যাৰদেৰ তপ্পহানায পৰত্তিতভাৰতো. অরহত্তং পাপেত্ৰা ৰিপস্সনা কথিতাতি অট্ঠকথাযং ৰুত্তং ‘‘সহ ৰিপস্সনায চত্তারোপি মগ্গা কথিতা’’তি.

দুতিযসমুগ্ঘাতসপ্পাযসুত্তৰণ্ণনা নিট্ঠিতা.

সব্বৰগ্গৰণ্ণনা নিট্ঠিতা.

৪. জাতিধম্মৰগ্গৰণ্ণনা

৩৩-৪২. নিব্বত্তনসভাৰন্তি ¶ ¶ হেতুপচ্চযেহি উপ্পজ্জনসভাৰং. উপ্পাদানন্তরং বুদ্ধিপ্পত্তিযা জীরণসভাৰং. যত্থ চক্খাদযো, তত্থেৰ ৰিসভাগসমুট্ঠানলক্খণেন ব্যাধিনো উপ্পত্তিপচ্চযভাৰেন ব্যাধিসভাৰং. মরণসভাৰন্তি ৰিনাসসভাৰং. সোকসভাৰন্তি ঞাতিব্যসনাদিনা ডয্হমানদুক্খসভাৰং. সংকিলেসিকসভাৰন্তি তণ্হাদিৰসেন সংকিলিস্সনসভাৰং.

জাতিধম্মৰগ্গৰণ্ণনা নিট্ঠিতা.

৫. সব্বঅনিচ্চৰগ্গৰণ্ণনা

৪৩-৫২. ঞাতপরিঞ্ঞা আগতা ৰিসযৰসেন তব্বিসযস্স ধম্মস্স জোতিতত্তা. ইতরা দ্ৰে তীরণপহানপরিঞ্ঞাপি আগতা এৰাতি ৰেদিতব্বা, তাসং অভিঞ্ঞেয্যধম্মৰিসযত্তা ঞাণস্স চ তীরণপহানপরিঞ্ঞাসম্ভৰতো. পরিঞ্ঞেয্যপদে তীরণপরিঞ্ঞাৰ আগতা, পহাতব্বপদে পহানপরিঞ্ঞাৰ আগতাতি যোজনা. ইতরাপি দ্ৰে গহিতাযেৰ তাহি ৰিনা অত্থসিদ্ধিযা অভাৰতো. পচ্চক্খং কাতব্বং আরম্মণতো অসম্মোহতো পটিৰিজ্ঝনেন. অৰুত্তাপি গহিতাযেৰ পরিজাননস্স যাৰদেৰ পহানত্থত্তা. একসভাৰেন ৰিনাভাৰো অনেকগ্গট্ঠো. উপসট্ঠরোগেন ৰিয অন্তো এৰ অভিহতসব্বতা উপহতট্ঠো.

সব্বঅনিচ্চৰগ্গৰণ্ণনা নিট্ঠিতা.

পঠমো পণ্ণাসকো.

৬. অৰিজ্জাৰগ্গৰণ্ণনা

৫৩-৬২. চতূসু সচ্চেসু অঞ্ঞাণং তপ্পটিচ্ছাদকসম্মোহো. অৰিন্দিযং ৰিন্দতি, ৰিন্দিযং ন ৰিন্দতীতি কত্ৰা ৰিজ্জায পটিপক্খোৰ অৰিজ্জা. ৰিজ্জায উপ্পন্নায অনৰসেসতো অৰিজ্জা পহীযতি, তং দস্সেন্তো ‘‘ৰিজ্জাতি অরহত্তমগ্গৰিজ্জা’’তি ¶ আহ. ন কেৰলং ¶ অনিচ্চানুপস্সনাৰসেনেৰ মগ্গৰুট্ঠানং, অথ খো ইতরানুপস্সনাৰসেনপীতি দস্সেন্তো ‘‘দুক্খা…পে… পহীযতিযেৰা’’তি আহ. সব্বত্থাতি উপরিসুত্তন্তে সন্ধাযাহ. ততো অপরেপি তংঅত্থলক্খণৰসেন কথিতসুত্তন্তেপি. তানিপি হি তথা বুজ্ঝনকপুগ্গলানমজ্ঝাসযেন ৰুত্তানীতি.

অৰিজ্জাৰগ্গৰণ্ণনা নিট্ঠিতা.

৭. মিগজালৰগ্গো

১. পঠমমিগজালসুত্তৰণ্ণনা

৬৩. চক্খুৰিঞ্ঞাণং দস্সনকিচ্চন্তি ৰুত্তচক্খুৰিঞ্ঞাণেন পস্সিতব্বন্তি আহ ‘‘ইট্ঠারম্মণভূতা’’তি. কমনীযাতি কামেতব্বা. মনং অপ্পাযন্তীতি মনাপাতি আহ ‘‘মনৰড্ঢনকা’’তি. পিযাযিতব্বসভাৰা পিযরূপা. কামূপসংহিতাতি কামপটিসংযুত্তা. আলম্বিতব্বতা এৰ চেত্থ উপসংহিততাতি ‘‘আরম্মণং কত্ৰা’’তিআদিমাহ. তণ্হাসঙ্খাতা নন্দী তণ্হানন্দী, ন তুট্ঠিনন্দীযেৰ ‘‘নন্দিং চরতী’’তিআদীসু ৰিয. গামন্তন্তি গামসমীপং. ‘‘অনুপচারট্ঠান’’ন্তি ৰত্ৰা তং দস্সেতি ‘‘যত্থা’’তিআদিনা.

এত্থাতি যথানীহতে পাঠে. ‘‘ইমং একং পরিযাযং ঠপেত্ৰা’’তি ৰুত্তং তস্স ‘‘পন্তানী’’তিপদেন সঙ্গহিতত্তা. অপ্পসদ্দানি অপ্পনিগ্ঘোসানীতি এত্থ অপ্প-সদ্দো অভাৰত্থো.

পঠমমিগজালসুত্তৰণ্ণনা নিট্ঠিতা.

৬. সমিদ্ধিলোকপঞ্হাসুত্তৰণ্ণনা

৬৮. আযাচনসুত্ততো পট্ঠাযাতি মিগজালৰগ্গে দুতিযসুত্ততো পট্ঠায. পঠমসুত্তে পন দুতিযকৰিহারাদিভাৰো ৰুত্তোতি.

সমিদ্ধিলোকপঞ্হাসুত্তৰণ্ণনা নিট্ঠিতা.

৭. উপসেনআসীৰিসসুত্তৰণ্ণনা

৬৯. গহেত্ৰাতি ¶ ¶ পারুপনস্স সিথিলকরণেন ৰীমংসতো মোচেত্ৰা. লেণচ্ছাযাযাতি পুরিমদিসায লেণচ্ছাযাযং. পতিত্ৰাতি লেণচ্ছদনতো ভস্সিত্ৰা. ফুট্ঠৰিসোতি চতূসু আসীৰিসেসু সো ফুট্ঠৰিসো. তেনাহ ‘‘তস্মা’’তিআদি. পরিযাদিযমানমেৰাতি খেপেন্তমেৰ, ৰিনাসেন্তমেৰাতি অত্থো. যথাপরিচ্ছেদেনাতি অত্তনো ৰিসপরিচ্ছেদানুরূপং. অঞ্ঞথাভাৰন্তি ৰড্ঢভাৰাদিপকতিজহনং. সভাৰৰিগমোতি ৰিনাসো.

উপসেনআসীৰিসসুত্তৰণ্ণনা নিট্ঠিতা.

৮. উপৰাণসন্দিট্ঠিকসুত্তৰণ্ণনা

৭০. রূপং পটিসংৰিদিতং করোতি ঞাতপরিঞ্ঞাৰসেন. রূপরাগন্তি নীলাদিভেদে রূপধম্মে রাগং. পটিসংৰিদিতং করোতি ‘‘অযং মে রাগো অপ্পহীনো’’তি. এতেন সেক্খানং পচ্চৰেক্খণা কথিতা. তেন ৰুত্তং ‘‘এৰম্পি খো, উপৰাণ, সন্দিট্ঠিকো ধম্মো হোতী’’তিআদি. রূপরাগং পটিসংৰিদিতং করোতি ‘‘নত্থি মে অজ্ঝত্তং রূপেসু রাগো’’তি পজানাতি. অসেক্খানং হাযং পচ্চৰেক্খণা.

উপৰাণসন্দিট্ঠিকসুত্তৰণ্ণনা নিট্ঠিতা.

৯. পঠমছফস্সাযতনসুত্তৰণ্ণনা

৭১. ফস্সাকরানন্তি ছন্নং ফস্সানং আকরানং উপ্পত্তিট্ঠানানং, চক্খাদীনন্তি অত্থো. নট্ঠো নাম অহন্তি ৰদতি, যো ছন্নং ফস্সাযতনানং সমুদযাদিং যথাভূতং পজানাতি, সো ৰুসিতৰা, ইতরো অৰুসিতৰা অহঞ্চ তাদিসোতি. অযমেৰাতি অযং চক্খুস্মিং ‘‘নেতং মমা’’তিআদিনা তিণ্ণং গাহানং অভাৰো এৰ.

পঠমছফস্সাযতনসুত্তৰণ্ণনা নিট্ঠিতা.

১০. দুতিযছফস্সাযতনসুত্তৰণ্ণনা

৭২. অপুনব্ভৰোতি ¶ পুনব্ভৰাভাৰো.

১১. ততিযছফস্সাযতনসুত্তৰণ্ণনা

৭৩. পনস্সসন্তি ¶ একংসেন নট্ঠোতি অযমেত্থ অত্থোতি আহ ‘‘অতিনট্ঠো’’তি, ধুরতো এৰ নট্ঠোতি অত্থো.

ততিযছফস্সাযতনসুত্তৰণ্ণনা নিট্ঠিতা.

মিগজালৰগ্গৰণ্ণনা নিট্ঠিতা.

৮. গিলানৰগ্গো

১-৫. পঠমগিলানসুত্তাদিৰণ্ণনা

৭৪-৭৮. অপ্পঞ্ঞাতোতি নামগোত্ততো চেৰ সীলাদিগুণেহি চ অপ্পঞ্ঞাতো অৰিস্সুতো. থেরমজ্ঝিমভাৰং অপ্পত্ততায নৰো.

পঠমগিলানসুত্তাদিৰণ্ণনা নিট্ঠিতা.

৭. দুতিযঅৰিজ্জাপহানসুত্তৰণ্ণনা

৮০. অনিচ্চাদিৰসেন অভিনিৰিসনং অভিনিৰেসো, সো এৰ ধম্মসভাৰং অতিক্কমিত্ৰা পরতো আমসনতো পরামাসো, সো এৰ গাহো. তেন অভিনিৰেসপরামাসগ্গাহেন গণ্হিতুং ন যুত্তা অনিচ্চাদিসভাৰত্তা. সঙ্খারা এৰ পৰত্তিযা কারণভাৰতো সঙ্খারনিমিত্তানি. যো সঙ্খারেসু অপরিঞ্ঞাতাভিনিৰেসেন পস্সিতব্বো অত্তাকারো, সো ন হোতীতি অঞ্ঞো অনত্তাকারো, ততো অঞ্ঞতো পস্সতি. পরিঞ্ঞাতাভিনিৰেসোতি তীরণপরিঞ্ঞায পরিচ্ছিজ্জ ঞাতমিচ্ছাভিনিৰেসো. পরিঞ্ঞাতাভিনিৰেসোতি ৰা পরিঞ্ঞাতৰিপস্সনাভিনিৰেসো. ৰিপস্সনাতি অরূপসত্তকৰসেন ৰিপস্সনায পরিজানিতব্বা.

দুতিযঅৰিজ্জাপহানসুত্তৰণ্ণনা নিট্ঠিতা.

৮. সম্বহুলভিক্খুসুত্তৰণ্ণনা

৮১. কেৰলন্তি ¶ ইতরলক্খণেহি অৰোমিস্সং.

১০. ফগ্গুনপঞ্হাসুত্তৰণ্ণনা

৮৩. তণ্হায ¶ পহীনায দিট্ঠিমানাপি পহীনা এৰাতি ‘‘তণ্হাপপঞ্চস্স ছিন্নত্তা ছিন্নপপঞ্চে’’তি ৰুত্তং. দুতিযপদেপি এসেৰ নযো. ইধ সত্তৰোহারো চক্খাদীসু ৰিজ্জমানেসু এৰ হোতি, তস্মা পরিনিব্বুতানঞ্চ ৰোহারো চক্খাদীসু সন্নিস্সযেনেৰ, নাঞ্ঞথাতি অতিক্কন্তবুদ্ধেহি পরিহরিতানি চক্খুসোতাদীনি পুচ্ছামীতি পুচ্ছতি ‘‘অত্থি নু খো ভন্তে’’তিআদিনা. চক্খুসোতাদিৰট্টং ৰট্টে পৰত্তেয্য.

ফগ্গুনপঞ্হাসুত্তৰণ্ণনা নিট্ঠিতা.

গিলানৰগ্গৰণ্ণনা নিট্ঠিতা.

৯. ছন্নৰগ্গো

১. পলোকধম্মসুত্তৰণ্ণনা

৮৪. অনিচ্চলক্খণমেৰ কথিতং, তঞ্চ পরিযাযেন, অনিচ্চলক্খণে কথিতে ইতরলক্খণানি কথিতানেৰ হোন্তি ব্যভিচারভাৰতো.

২. সুঞ্ঞতলোকসুত্তৰণ্ণনা

৮৫. অত্তনো ইদন্তি অত্তনিযন্তি আহ ‘‘অত্তনো সন্তকেনা’’তি.

৩. সংখিত্তধম্মসুত্তৰণ্ণনা

৮৬. ৰুত্তনযেনেৰ ৰেদিতব্বন্তি খন্ধিযৰগ্গে খন্ধৰসেন আগতং, ইধ আযতনৰসেনাতি অযমেৰ ৰিসেসো.

৪. ছন্নসুত্তৰণ্ণনা

৮৭. সব্বনিমিত্তেহি পটিসল্লীযতি এতেনাতি পটিসল্লানং, ফলসমাপত্তি. জীৰিতহারকসত্থং ¶ জীৰিতস্স হরণতো, সত্তানঞ্চ সসনতো হিংসনতো ¶ . পরিচরিতোতি পযিরুপাসিতো. তেন যথানুসিট্ঠং পটিপজ্জিন্তি দীপেতি.

অনুপৰজ্জন্তি পরেহি ন উপৰদিতব্বং. তং পনেত্থ আযতিং অপ্পটিসন্ধিভাৰতো হোতীতি আহ ‘‘অপ্পৰত্তিক’’ন্তি. ‘‘নেতং মমা’’তিআদীনি ৰদন্তো অরহত্তে পক্খিপিত্ৰা কথেসি. পুথুজ্জনভাৰমেৰ দীপেন্তো ৰদতি অকতকিচ্চভাৰদীপনেন. কিঞ্চাপি থেরো পুচ্ছিতং পঞ্হং অরহত্তে পক্খিপিত্ৰা কথেসি, ‘‘ন সমনুপস্সামী’’তি পন ৰদন্তো কিঞ্চি নিপ্ফত্তিং ন কথেসি, তস্মা ‘‘ইদম্পি মনসি কাতব্ব’’ন্তি ইদং আনেত্ৰা সম্বন্ধো.

কিলেসপস্সদ্ধীতি কিলেসপরিল়াহৰূপসমো. ভৰত্থায পুন ভৰত্থায. আলযনিকন্তি পরিযুট্ঠানেতি ভৰন্তরে অপেক্খাসঞ্ঞিতে আলযে নিকন্তিযা চ পরিযুট্ঠানপ্পত্তিযা. অসতি অৰিজ্জমানায. পটিসন্ধিৰসেন অঞ্ঞভৰতো ইধাগমনং আগতি নাম. চুতিৰসেন গমনন্তি চৰনৰসেন ইতো গতি. অনুরূপগমনং গতি নাম তদুভযং ন হোতি. চুতূপপাতো অপরাপরভৰনৰসেন চুতি, উপপজ্জনৰসেন উপপাতো, তদুভযম্পি ন হোতি. এৰং পন চুতূপপাতে অসতি নেৰিধ ন ইধ লোকে. ন হুরং ন পরলোকে হোতি. ততো এৰ ন উভযত্থ হোতি. অযমেৰ অন্তো অযং ইধলোকে পরলোকে চ অভাৰোযেৰ দুক্খস্স পরিযোসানং. অযমেৰাতি যথাৰুত্তো এৰ – এত্থ এতস্মিং পাঠে পরম্পরাগতো পমাণভূতো অত্থো.

যে পনাতি সম্মৰাদিনো সন্ধায ৰদতি. অন্তরাভৰং ইচ্ছন্তি ‘‘এৰং ভৰেন ভৰন্তরসম্বন্ধো যুজ্জেয্যা’’তি. নিরত্থকং অন্তরাভৰস্স নাম কস্সচি অভাৰতো. চুতিক্খন্ধানন্তরঞ্হি পটিসন্ধিক্খন্ধানংযেৰ পাতুভাৰো. তেনাহ ‘‘অন্তরাভৰস্স…পে… পটিক্খিত্তোযেৰা’’তি. তত্থ ভাৰোতি অত্থিতা. অভিধম্মে কথাৰত্থুপ্পকরণে (কথা. ৫০৫-৫০৭) পটিক্খিত্তোযেৰ. যদি এৰং ‘‘অন্তরেনা’’তি ইদং কথন্তি আহ ‘‘অন্তরেনা’’তিআদি. ৰিকপ্পতো অঞ্ঞং ৰিকপ্পন্তরং, তস্স দীপনং ‘‘অন্তরেনা’’তি ৰচনং. ন অন্তরাভৰদীপনং তাদিসস্স অনুপলব্ভনতো পযোজনাভাৰতো চ. যত্থ হি ৰিপাকৰিঞ্ঞাণস্স পচ্চযো, তত্থস্স নিস্সযভূতস্স ৰত্থুস্স সহভাৰীনঞ্চ ¶ খন্ধানং সম্ভৰোতি সদ্ধিং অত্তনো নিস্সযেন ৰিঞ্ঞাণং উপ্পজ্জতেৰাতি নাস্স উপ্পত্তিযা দেসদূরতা ৰেদিতব্বা. ‘‘নেৰ ইধ ন হুর’’ন্তি ৰুত্তদ্ৰযতো অপরং ৰিকপ্পেন ‘‘ন উভয’’ন্তি, তত্থপি ন হোতিযেৰাতি অধিপ্পাযো. ‘‘অন্তরেনা’’তি ৰা ‘‘ৰিনা’’তি ইমিনা সমানত্থো নিপাতো, তস্মা নেৰিধ, ন হুরং, উভযং ৰিনাপি নেৰাতি অত্থো.

আহরীতি ¶ ছিন্নৰসেন গণ্হি. তেনাহ ‘‘কণ্ঠনাল়ং ছিন্দী’’তি. পরিগ্গণ্হন্তোতি সম্মসন্তো. পরিনিব্বুতো দীঘরত্তং ৰিপস্সনাযং যুত্তপযুত্তভাৰতো. ‘‘অনুপৰজ্জং ছন্নেন ভিক্খুনা সত্থং আহরিত’’ন্তি, কথেসীতি অসেক্খকালে ব্যাকরণং ৰিয কত্ৰা কথেসি.

ইমিনাতি ‘‘উপৰজ্জকুলানী’’তি ইমিনা ৰচনেন. থেরোতি সারিপুত্তত্থেরো. এৰন্তি এৰং পুব্বকালেসু সংসট্ঠৰিহারী হুত্ৰা ঠিতো পচ্ছা অরহত্তং পাপুণিস্সতীতি আসঙ্কন্তো পুচ্ছতি. সেসং উত্তানমেৰ.

ছন্নসুত্তৰণ্ণনা নিট্ঠিতা.

৫-৬. পুণ্ণসুত্তাদিৰণ্ণনা

৮৮-৮৯. তন্তি চক্খুরূপদ্ৰযং. তেনাহ ‘‘চক্খুঞ্চেৰ রূপঞ্চা’’তি. নন্দিসমুদযাতি নন্দিযা সমুদযতণ্হায সেসকারণেহি নন্দিযা সমুদিতি সমোধানং নন্দিসমুদযো, তস্মা নন্দিসমুদযা. তেনাহ ‘‘তণ্হায সমোধানেনা’’তি. পঞ্চক্খন্ধসঙ্খাতস্স দুক্খস্স সমোধানেন সমুদিতি পৰত্তিযেৰাতি সহ সমুদযেন দুক্খস্স দস্সিতত্তা ‘‘ৰট্টং মত্থকং পাপেত্ৰা’’তি ৰুত্তং. নিরোধূপাযেন সদ্ধিং নিরোধস্স দস্সিতত্তা ‘‘ৰিৰট্টং মত্থকং পাপেত্ৰা’’তি. পুচ্ছানুসন্ধিআদীসু অঞ্ঞতরো ন হোতীতি আহ – ‘‘পাটিযেক্কো অনুসন্ধী’’তি.

চণ্ডাতি কোধনা. দুট্ঠাতি দোসৰন্তোতি অত্থো. কিব্বিসাতি পাপা. কক্খল়াতি দারুণা. ঘটিকমুগ্গরেনাতি একস্মিং পক্খে ঘটিকং দস্সেত্ৰা কতেন রস্সদণ্ডেন. সত্তানং সসনতো সত্থং, ততো এৰ জীৰিতস্স হরণতো হারকঞ্চাতি সত্থহারকং. ইন্দ্রিযসংৰরো ‘‘দমো’’তি ৰুত্তো মনচ্ছট্ঠানং ইন্দ্রিযানং দমনতো. পঞ্ঞা ‘‘দমো’’তি ৰুত্তা কিলেসৰিসেৰিতানং দমনতো ৰূপসমনতো. উপোসথকম্মং ‘‘দমো’’তি ¶ ৰুত্তং কাযদ্ৰারাদীহি উপ্পজ্জনকঅসমস্স দমনতো. খন্তি ‘‘দমো’’তি ৰেদিতব্বা অক্খন্তিযা দমনতো ৰূপসমনতো. তেনাহ ‘‘উপসমোতি তস্সেৰ ৰেৰচন’’ন্তি.

এত্থাতি সুনাপরন্তজনপদে. এতে দ্ৰেতি অযং পুণ্ণত্থেরো তস্স কনিট্ঠোতি এতে দ্ৰে ভাতরো. আহচ্চ অট্ঠাসি উল়ারং বুদ্ধারম্মণং পীতিং উপ্পাদেত্ৰা. সত্ত সীহনাদে নদিত্ৰাতি মম্মচ্ছেদকানম্পি অক্কোসপরিভাসানং খমনে সন্তোসাভাৰদীপনং, পাণিপ্পহারস্স, লেড্ডুপ্পহারস্স, দণ্ডপ্পহারস্স, সত্থপ্পহারস্স, জীৰিতৰোরোপনস্স, খমনে সন্তোসাভাৰদীপনঞ্চাতি ¶ এৰং সত্ত সীহনাদে নদিত্ৰা. চতূসু ঠানেসু ৰসিতত্তা পাল়িযং ৰসনট্ঠানং অনুদ্দেসিকং কত্ৰা ‘‘সুনাপরন্তস্মিং জনপদে ৰিহরতি’’ইচ্চেৰ ৰুত্তং.

চতূসু ঠানেসূতি অব্বুহত্থপব্বতে, সমুদ্দগিরিৰিহারে, মাতুলগিরিম্হি, মকুল়কারামৰিহারেতি ইমেসু চতূসু ঠানেসু. তন্তি চঙ্কমং আরুয্হ কোচি ভিক্খু চঙ্কমিতুং সমত্থো নত্থি মহতা সমুদ্দপরিস্সযেন ভাৰনামনসিকারস্স অনভিসম্ভুণনতো. উপ্পাতিকন্তি উপ্পাতকরং মহাসঙ্খোভং উট্ঠপেত্ৰা. সম্মুখেতি অনিলপদেসে. পটিৰেদেসুন্তি পৰেদেসুং.

আরদ্ধকালতো পট্ঠাযাতি মণ্ডলমাল়স্স কাতুং পথৰীমিতকালতো পভুতি. সচ্চবন্ধেন পঞ্চসতানি পরিপূরেতুং ‘‘একূনপঞ্চসতান’’ন্তি ৰুত্তং. গন্ধকুটিন্তি জেতৰনমহাৰিহারে মহাগন্ধকুটিং.

সচ্চবন্ধনামোতি সচ্চবন্ধে পব্বতে চিরনিৰাসিতায ‘‘সচ্চবন্ধো’’ত্ৰেৰ লদ্ধনামো. অরহত্তং পাপুণীতি পঞ্চাভিঞ্ঞাপরিৰারং অরহত্তং অধিগচ্ছি. তেনাহ ‘‘মগ্গেনেৰস্স অভিঞ্ঞা আগতা’’তি.

তস্মিং সন্নিপতিতা মহাজনা কেচি সোতাপন্না, কেচি সকদাগামিনো, কেচি অনাগামিনো, কেচি অরহন্তো অহেসুং. তত্থাপি কেচি তেৰিজ্জা, কেচি ছল়ভিঞ্ঞা, কেচি পটিসম্ভিদপ্পত্তা অহেসুং. তং সন্ধায ৰুত্তং ‘‘মহাজনস্স বন্ধনমোক্খো জাতো’’তি. যে পন তত্থ সরণগমনপঞ্চসীলদসসীলসমাদানেন লদ্ধানুগ্গহা, তেসং দেৰতানঞ্চ ৰসেন ‘‘মহন্তং বুদ্ধকোলাহলং অহোসী’’তি ৰুত্তং.

অরুণং ¶ পন মহাগন্ধকুটিযংযেৰ উট্ঠপেসি দেৰতানুগ্গহত্থঞ্চেৰ কুলানুদযায চ. অপাযমগ্গে ওতারিতো ‘‘কোচি লোকস্স সজিতা অত্থি, তস্স ৰসেন পৰত্তিসংহারা হোন্তি, তেনেৰাযং পজা সনাথা হোতি, তং যুঞ্জতি চ তস্মিং তস্মিং কম্মে’’তি মিচ্ছাগাহেহি. পরিচরিতব্বং যাচি ‘‘এত্থ মযা চিরং ৰসিতব্ব’’ন্তি.

ছট্ঠন্তি বাহিযসুত্তং. তং উত্তানমেৰ হেট্ঠা ৰুত্তনযত্তা.

পুণ্ণসুত্তাদিৰণ্ণনা নিট্ঠিতা.

৭-৮. পঠমএজাসুত্তাদিৰণ্ণনা

৯০-৯১. এজতি ¶ ছল়ারম্মণনিমিত্তং কম্পতীতি এজা. তেনাহ ‘‘চলনট্ঠেনা’’তি. আবাধনট্ঠেন পীল়নট্ঠেন. অন্তো দোসনট্ঠেনাতি অন্তোচিত্তে এৰ পদুস্সনট্ঠেন. নিকন্তনট্ঠেনাতি ছিন্দনট্ঠেন. হেট্ঠা গহিতমেৰাতি হেট্ঠা মঞ্ঞিতসমুগ্ঘাতসারুপ্পসুত্তে আগতমেৰ. ৰুত্তনযমেৰ মঞ্ঞিতসমুগ্ঘাতসুত্তে.

পঠমএজাসুত্তাদিৰণ্ণনা নিট্ঠিতা.

৯-১০. পঠমদ্ৰযসুত্তাদিৰণ্ণনা

৯২-৯৩. দ্ৰযন্তি দুকং. পাল়িযং আমেডিতলোপেন নিদ্দেসোতি আহ ‘‘দ্ৰে দ্ৰে কোট্ঠাসে’’তি. এৰমেতন্তি এৰং অনিচ্চাদিভাৰেন এতং চক্খুরূপঞ্চাতি দ্ৰযং. চলতীতি অনৰট্ঠানেন পচলতি. ব্যথতীতি জরায মরণেন চ পৰেধতি. হেতু চেৰ উপ্পত্তিনিমিত্তত্তা. সহগতীতি সহপ্পৰত্তি, তায গহেতব্বত্তা ‘‘সঙ্গতী’’তি ফস্সো ৰুত্তো. এস নযো সেসপদদ্ৰযেপি. যস্মা চ সংগচ্ছমানধম্মৰিমুত্তা সঙ্গতি নাম নত্থি, তথা সন্নিপাতসমৰাযা, তেসং ৰসেন নিব্বত্তো ফস্সো তথা ৰুচ্চতীতি. তেনাহ ‘‘ইমিনা’’তিআদি.

ৰত্থূতি ¶ চক্খু নিস্সযপচ্চযাদিভাৰেন. আরম্মণন্তি রূপং আরম্মণপচ্চযাদিভাৰেন. সহজাতা তযো খন্ধা ৰেদনাদযো, তে সহজাতাদিপচ্চযভাৰেন. অযং হেতূতি অযং তিৰিধো হেতূ. ফস্সেনাতিআদীসু অযং সঙ্খেপত্থো – যস্মা রূপারম্মণে ফস্সে অত্তনো ফুসনকিচ্চং করোন্তে এৰং ৰেদনা অনুভৰনকিচ্চং, সঞ্ঞা সঞ্জাননকিচ্চং করোতি, তস্মা ‘‘ফস্সেন ফুট্ঠমেৰা’’তিআদিৰুত্তমেৰ অত্থং ইদানি পুগ্গলাধিট্ঠানেন দস্সেতুং ‘‘ফুট্ঠো’’তিআদি ৰুত্তং. পঞ্চেৰ খন্ধা ভগৰতা সমতিংসায আকারেহি ৰুত্তা. কস্মাতি আহ ‘‘কথ’’ন্তিআদি. রুক্খসাখাসু রুক্খৰোহারো ৰিয একেকধম্মেপি খন্ধৰোহারো হোতিযেৰ. তেনাহ ভগৰা – ‘‘ৰিঞ্ঞাণং ৰিঞ্ঞাণক্খন্ধো’’তি (যম. খন্ধযমক ২).

পঠমদ্ৰযসুত্তাদিৰণ্ণনা নিট্ঠিতা.

ছন্নৰগ্গৰণ্ণনা নিট্ঠিতা.

১০. সল়ৰগ্গো

১. অদন্তঅগুত্তসুত্তৰণ্ণনা

৯৪. অদমিতাতি ¶ দমং নিব্বিসেৰনভাৰং অনীতা. অগোপিতাতি সতিসঙ্খাতায ৰতিযা ন রক্খিতা. অপিহিতাতি সতিকৰাটেন ন পিহিতা. চতূহিপি পদেহি ইন্দ্রিযানং অনাৰরণমেৰাহ. অধিকং ৰহন্তীতি অধিৰাহা, দুক্খস্স অধিৰাহা দুক্খাধিৰাহা. নিরযেসু উপ্পজ্জনকং নেরযিকং. আদি-সদ্দেন সেসপাল়িং সঙ্গণ্হাতি.

সল়েৰাতি ছ-কারস্স স-কারো, ল়-কারো পদসন্ধিকরো. যত্থাতি নিমিত্তত্থে ভুম্মং. অনৰস্সুতা অতিন্তাতি রাগেন অতেমিতা.

অস্সাদিতন্তি অস্সাদং ইতং উপগতং. তেনাহ ‘‘অস্সাদৰন্ত’’ন্তি. সুখদুক্খন্তি ইট্ঠানিট্ঠং. অন্ৰযতীতি অন্ৰযো, হেতু. ফস্সোতি অন্ৰযো এতস্সাতি ফস্সন্ৰযন্তি আহ – ‘‘ফস্সহেতুক’’ন্তি. ‘‘অৰিরুদ্ধ’’ইতি ৰিভত্তিলোপেন নিদ্দেসো.

পপঞ্চসঞ্ঞাতি ¶ তণ্হাদিসমধূপসংহতসঞ্ঞা. তেনাহ ‘‘কিলেসসঞ্ঞায পপঞ্চসঞ্ঞা নাম হুত্ৰা’’তি. পপঞ্চসঞ্ঞা এতেসং অত্থীতি পপঞ্চসঞ্ঞা, ইতরীতরা নরা. পপঞ্চযন্তাতি সংসারে পপঞ্চং চিরাযনং করোন্তা. সঞ্ঞিনোতি গেহস্সিতসঞ্ঞায সঞ্ঞাৰন্তো. মনোমযং ৰিতক্কন্তি কেৰলং মনসা সম্ভাৰিতং মিচ্ছাৰিতক্কং. ইরীযতীতি ইরিযং পটিপত্তিং ইরীযতি পটিপজ্জতি.

সুট্ঠু ভাৰিতোতি সুট্ঠুভাৰং সুভাৰনং ইতো ভাৰিতভাৰিতো. ফুট্ঠস্স চিত্তন্তি তেন যথাৰুত্তফস্সেন ফুট্ঠং অস্স চিত্তং. ন ৰিকম্পতে ক্ৰচীতি কিস্মিঞ্চি ইট্ঠানিট্ঠারম্মণে ন কম্পতি. পারগাতি পারগামিনো ভৰথ.

অদন্তঅগুত্তসুত্তৰণ্ণনা নিট্ঠিতা.

২. মালুক্যপুত্তসুত্তৰণ্ণনা

৯৫. অপসাদেতীতি ¶ তজ্জেতি. উস্সাদেতীতি উক্কংসেতি. অযং কির থেরো মালুক্যপুত্তো. পমজ্জিত্ৰাতি যোনিসোমনসিকারস্স অননুযুজ্জনেন পমজ্জিত্ৰা.

যত্রাতি পচ্চত্তং ৰচনালঙ্কারে. নামাতি অসম্ভাৰনে অপসাদনপক্খে, উস্সাদনপক্খে পন সম্ভাৰনে. কিং জাতন্তি কিং তেন মহল্লকভাৰেন জাতন্তি মহল্লকভাৰং তিণাযপি অমঞ্ঞমানো ৰদতি. তেনাহ ‘‘যদি…পে… অনুগ্গণ্হন্তো’’তি. অনুগ্গণ্হন্তোতি অচিন্তেন্তো. মাদিসানং ভগৰতো ওৰাদো উপকারাৰহোতি এতরহি ওৰাদঞ্চ পসংসন্তো.

‘‘অদিট্ঠা অদিট্ঠপুব্বা’’তিআদিনা পরিকপ্পৰসেন ৰুত্তনিদস্সনং ‘‘যথা এতেসু ছন্দাদযো ন হোন্তি, এৰমিতরেসুপি পরিঞ্ঞাতেসূ’’তি নযপটিপজ্জনত্থং, তেসম্পি ইমেহি সমানেতব্বত্তা. তেন ৰুত্তং ‘‘সুপিনকূপমা কামা’’তি (ম. নি. ১.২৩৪; ২.৪৬; পাচি. ৪১৭; চূল়ৰ. ৬৫).

চক্খুৰিঞ্ঞাণেন দিট্ঠে দিট্ঠমত্তন্তি চক্খুৰিঞ্ঞাণস্স রূপাযতনং যত্তকো গহণাকারো, তত্তকং. কিত্তকং পমাণন্তি অত্তসংৰেদিযং পরস্স ন ¶ দিসিতব্বং, কপ্পনামত্তং রূপং. তেনাহ ‘‘চক্খুৰিঞ্ঞাণং হী’’তিআদি. রূপেতি রূপাযতনে. রূপমত্তমেৰাতি নীলাদিভেদং রূপাযতনমত্তং, ন নীলাদি. ৰিসেসনিৰত্তনত্থো হি অযং মত্ত-সদ্দো. যদি এৰং, এৰ-কারো কিমত্থিযো? চক্খুৰিঞ্ঞাণঞ্হি রূপাযতনে লব্ভমানম্পি নীলাদিৰিসেসং ‘‘ইদং নীলং নাম, ইদং পীতং নামা’’তি ন গণ্হাতি. কুতো নিচ্চানিচ্চাদিসভাৰত্থন্তি সংহিতস্সপি নিৰত্তনত্থং এৰকারগ্গহণং. তেনাহ ‘‘ন নিচ্চাদিসভাৰ’’ন্তি. সেসৰিঞ্ঞাণেহিপীতি জৰনৰিঞ্ঞাণেহিপি.

দিট্ঠং নাম চক্খুৰিঞ্ঞাণং রূপাযতনস্স দস্সনন্তি কত্ৰা. তেনাহ ‘‘রূপে রূপৰিজানন’’ন্তি. চক্খুৰিঞ্ঞাণমত্তমেৰাতি যত্তকং চক্খুৰিঞ্ঞাণং রূপাযতনে গহণমত্তং, তংমত্তমেৰ মে সব্বং চিত্তং ভৰিস্সতীতি অত্থো. ‘‘রাগাদিরহেনা’’তি ৰা পাঠো. দিট্ঠং নাম পদত্থতো চক্খুৰিঞ্ঞাণেন দিট্ঠং রূপং. তত্থেৰাতি চক্খুৰিঞ্ঞাণেন দিট্ঠমত্তে রূপে. চিত্তত্তযং দিট্ঠমত্তং নাম চক্খুৰিঞ্ঞাণং ৰিয রাগাদিৰিরহেন পৰত্তনতো. তেনাহ ‘‘যথা ত’’ন্তি আদি.

মনোদ্ৰারাৰজ্জনেন ¶ ৰিঞ্ঞাতারম্মণং ৰিঞ্ঞাতন্তি অধিপ্পেতং রাগাদিৰিরহেন ৰিঞ্ঞেয্যতো. তেনাহ ‘‘যথা আৰজ্জনেনা’’তিআদি.

তদাতি তস্মিং কালে, ন ততো পট্ঠাযাতি অযমেত্থ অত্থোতি দস্সেতি. ‘‘দিট্ঠমত্ত’’ন্তিআদিনা যেসং রাগাদীনং নিৰত্তনং অধিপ্পেতং, তে ‘‘তেনা’’তি এত্থ ত-সদ্দেন পচ্চামসীযন্তীতি ‘‘তেন রাগেন ৰা রত্তো’’তিআদি ৰুত্তং. তত্থাতি ৰিসযে ভুম্মং, ৰিসযভাৰো চ ৰিসযিনা সম্বন্ধৰসেন ইচ্ছিতব্বোতি ৰুত্তং ‘‘পটিবদ্ধো’’তিআদি.

সতীতি রূপস্স যথাসভাৰসল্লক্খণা সতি মুট্ঠা পিযনিমিত্তমনসিকারেন অনুপ্পজ্জনতো ন দিস্সতি নপ্পৰত্ততি. অজ্ঝোসাতি অজ্ঝোসায. গিলিত্ৰা পরিনিট্ঠপেত্ৰা অত্তনিযকরণেন.

অভিজ্ঝা চ ৰিহেসা চাতি করণত্থে পচ্চত্তৰচনন্তি আহ – ‘‘অভিজ্ঝায চ ৰিহেসায চা’’তি. অত্থৰসেন ৰিভত্তিপরিণামোতি আহ – ‘‘অভিজ্ঝাৰিহেসাহী’’তি. আচিনন্তস্সাতি ৰড্ঢেন্তস্স. পটিস্সতোতি পতিস্সতো সব্বত্থ সতিযা যুত্তো. সেৰতো চাপীতি এত্থ চ-সদ্দো অপি-সদ্দো চ নিপাতমত্তন্তি ‘‘সেৰন্তস্স’’ইচ্চেৰ অত্থো ৰুত্তো.

মালুক্যপুত্তসুত্তৰণ্ণনা নিট্ঠিতা.

৩. পরিহানসুত্তৰণ্ণনা

৯৬. পরিহানসভাৰন্তি ¶ অনৰজ্জধম্মেহি পরিহাযনসভাৰং. অভিভৰিতানীতি অভিভূতানি নিব্বিসেৰনভাৰাকারেন. সরসঙ্কপ্পাতি তস্মিং তস্মিং ৰিসযে অনৰট্ঠিতভাৰেন সঙ্কপ্পা. সংযোজনিযাতি সংযোজেতব্বা. সংযোজনানঞ্হি পুনপ্পুনং উপ্পত্তিযা ওকাসং দেন্তো কিলেসজাতং অধিৰাসেতি নাম. কিলেসো এৰ কিলেসজাতং. আরম্মণং পন চিত্তে করোন্তো অধিৰাসেতি নাম. ছন্দরাগপ্পহানেন ন পজহতি আরম্মণং, কিলেসং পন অনুপ্পত্তিধম্মতাপাদনেন এৰ. অভিভৰিতং আযতনন্তি কথিতং অধিৰাসনাদিনা. ‘‘কথঞ্চ, ভিক্খৰে, পরিহানধম্মো হোতী’’তি ধম্মং পুচ্ছিত্ৰা তং ৰিভজন্তেন ভগৰতা ‘‘তঞ্চে ভিক্খু অধিৰাসেতী’’তিআদিনা পুগ্গলেন পুগ্গলাধিট্ঠানেন ধম্মো দস্সিতো.

পরিহানসুত্তৰণ্ণনা নিট্ঠিতা.

৪. পমাদৰিহারীসুত্তৰণ্ণনা

৯৭. ন ¶ পিদহিত্ৰা চক্খুন্দ্রিযং ন পিদহিত্ৰা সঞ্ছাদিত্ৰা ঠিতস্স. ব্যাসিঞ্চতীতি কিলেসেহি ৰিসেসেন আসিঞ্চতি. কিলেসতিন্তন্তি কিলেসেহি অৰস্সুতং. দুব্বলপীতি তরুণা ন বলপ্পত্তা. বলৰপীতি উব্বেগা ফরণপ্পত্তা চ পীতি. দরথপ্পস্সদ্ধীতি কাযচিত্তদরথৰূপসমলক্খণা পস্সদ্ধি. ন উপ্পজ্জন্তি পচ্চযপরম্পরায অসিদ্ধত্তা. ‘‘কথঞ্চ, ভিক্খৰে, পমাদৰিহারী হোতী’’তিআদিনা পুগ্গলং পুচ্ছিত্ৰা ‘‘পামোজ্জং ন হোতি, পামোজ্জং জাযতী’’তিআদিনা চ, ধম্মেন ‘‘পমাদৰিহারী অপ্পমাদৰিহারী’’তি চ পুগ্গলো দস্সিতো.

পমাদৰিহারীসুত্তৰণ্ণনা নিট্ঠিতা.

৫. সংৰরসুত্তৰণ্ণনা

৯৮. ইদন্তি ‘‘কথঞ্চ, ভিক্খৰে, অসংৰরো’’তি? ইদং ৰচনং. পহাতব্বধম্মক্খানৰসেনাতি পহাতব্বধম্মস্সেৰ কথনং ৰুত্তং. ‘‘কথঞ্চ, ভিক্খৰে, অসংৰরো ¶ হোতী’’তি ধম্মং পুচ্ছিত্ৰা ‘‘সন্তি, ভিক্খৰে, চক্খুৰিঞ্ঞেয্যা রূপা’’তিআদিনা ধম্মোৰ ৰিভত্তো.

সংৰরসুত্তৰণ্ণনা নিট্ঠিতা.

৬. সমাধিসুত্তৰণ্ণনা

৯৯. চিত্তেকগ্গতাযাতি সমথৰসেন চিত্তেকগ্গতায. পরিহাযমানেতি তস্স অলাভেন পরিহাযমানে. কম্মট্ঠানন্তি ৰিপস্সনাকম্মট্ঠানং, সমথমেৰ ৰা.

৭. পটিসল্লানসুত্তৰণ্ণনা

১০০. কম্মট্ঠানন্তি সমথৰিপস্সনাকম্মট্ঠানং.

৮-৯. পঠমনতুম্হাকংসুত্তাদিৰণ্ণনা

১০১-১০২. উপমং পরিৰারেত্ৰাতি উপমং পরিহরিত্ৰা. সুদ্ধিকৰসেনাতি উপমায ৰিনা কেৰলমেৰ.

১০. উদকসুত্তৰণ্ণনা

১০৩. উদকোতি ¶ তস্স নামং. ৰেদং ঞাণং. সব্বং জিতৰাতি সব্বজি. অৰখতন্তি নিখতং. উচ্ছাদনধম্মোতি উচ্ছাদেতব্বসভাৰো. পরিমদ্দনধম্মোতি পরিমদ্দিতব্বসভাৰো. পরিহতোতি পরিহরিতো. ওদনকুম্মাসূপচযুচ্ছাদনপরিমদ্দনপদেহীতি ৰত্তব্বং. উচ্ছাদনং ৰা পরিমদ্দনমত্তমেৰাতি কত্ৰা ন গহিতং.

উদকসুত্তৰণ্ণনা নিট্ঠিতা.

সল়ৰগ্গৰণ্ণনা নিট্ঠিতা.

দুতিযো পণ্ণাসকো.

১১. যোগক্খেমিৰগ্গো

১. যোগক্খেমিসুত্তৰণ্ণনা

১০৪. চতূহি ¶ যোগেহীতি কামযোগাদীহি চতূহি যোগেহি. খেমিনোতি খেমৰতো কুসলিনো. কারণভূতন্তি কত্তব্বউপাযস্স কারণভূতং. পরিযাযতি পৰত্তিং নিৰত্তিঞ্চ ঞাপেতীতি পরিযাযো, ধম্মো চ সো পরিযত্তিধম্মত্তা পরিযাযো চাতি ধম্মপরিযাযো, তং ধম্মপরিযাযং. যস্মা পন সো তস্সাধিগমস্স কারণং হোতি, তস্মা ৰুত্তং ‘‘ধম্মকারণ’’ন্তি. যুত্তিন্তি সমথৰিপস্সনাধম্মানীতি ৰা চতুসচ্চধম্মানীতি ৰা. ‘‘তস্মা’’তি পদং উদ্ধরিত্ৰা – ‘‘কস্মা’’তি কারণং পুচ্ছন্তো ‘‘কিং অক্খাতত্তা, উদাহু পহীনত্তা’’তি ৰিভজিত্ৰা পুচ্ছি. যস্মা পন ছন্দরাগপ্পহানং যোগক্খেমিভাৰস্স কারণং, ন কথনং, তস্মা ‘‘পহীনত্তা’’তিআদি ৰুত্তং.

যোগক্খেমিসুত্তৰণ্ণনা নিট্ঠিতা.

২-১০. উপাদাযসুত্তাদিৰণ্ণনা

১০৫-১১৩. ৰেদনাসুখদুক্খন্তি ৰেদনাসঙ্খাতং সুখঞ্চ দুক্খঞ্চ কথিতং. ‘‘অজ্ঝত্তং সুখং দুক্খ’’ন্তি ৰুত্তত্তা ৰিমুত্তিসুখস্স চ সল়াযতনদুক্খস্স চ কথিতত্তা ৰিৰট্টসুখং চেত্থ কথিতমেৰাতি ¶ সক্কা ৰিঞ্ঞাতুং. কামং খন্ধিযৰগ্গে খন্ধৰসেন দেসনা আগতা, ন আযতনৰসেন. এত্থ পন ৰত্তব্বং অত্থজাতং খন্ধিযৰগ্গে ৰুত্তনযমেৰাতি.

উপাদাযসুত্তাদিৰণ্ণনা নিট্ঠিতা.

যোগক্খেমিৰগ্গৰণ্ণনা নিট্ঠিতা.

১২. লোককামগুণৰগ্গো

১-২. পঠমমারপাসসুত্তাদিৰণ্ণনা

১১৪-১১৫. আৰসতি এত্থ কিলেসমারোতি আৰাসো. কামগুণঅজ্ঝত্তিকবাহিরানি আযতনানি. কিলেসমারস্স আৰাসং গতো ¶ ৰসং গতো. তিৰিধস্সাতি পপঞ্চসঞ্ঞাসঙ্খাতস্স তিৰিধস্সপি মারস্স. ততো এৰ দেৰপুত্তমারস্সপি ৰসং গতোতি সক্কা ৰিঞ্ঞাতুং.

পঠমমারপাসসুত্তাদিৰণ্ণনা নিট্ঠিতা.

৩. লোকন্তগমনসুত্তৰণ্ণনা

১১৬. লোকিযন্তি এত্থ সত্তকাযভূতগামাদীতি লোকো, চক্কৰাল়ো. সঙ্খারো পন লুজ্জনপলুজ্জনট্ঠেন লোকো. অন্তন্তি ওসানং. সব্বঞ্ঞুতঞ্ঞাণেন সংসন্দিত্ৰাতি সব্বঞ্ঞুতঞ্ঞাণগতিযা সমানেত্ৰা অৰিরোধেত্ৰা. থোমেস্সামীতি পসংসিস্সামি.

এৰংসম্পত্তিকন্তি এৰংসম্পজ্জনকং এৰংপস্সিতব্বং ইদং মম অজ্ঝেসনং. তেনাহ ‘‘ঈদিসন্তি অত্থো’’তি. জানং জানাতীতি সব্বঞ্ঞুতঞ্ঞাণেন জানিতব্বং জানাতি এৰ. ন হি পদেসঞ্ঞাণে ঠিতো জানিতব্বং সব্বং জানাতি. উক্কট্ঠনিদ্দেসেন হি অৰিসেসগ্গহণেন চ ‘‘জান’’ন্তি ইমিনা নিরৰসেসং ঞেয্যজাতং পরিগ্গয্হতীতি তব্বিসযায জাননকিরিযায সব্বঞ্ঞুতঞ্ঞাণমেৰ করণং ভৰিতুং যুত্তং. পকরণৰসেন ‘‘ভগৰা’’তি পদসন্নিধানেন চ অযমত্থো ৰিভাৰেতব্বো. পস্সিতব্বমেৰ পস্সতীতি দিব্বচক্খু-পঞ্ঞাচক্খু-ধম্মচক্খু-বুদ্ধচক্খু-সমন্তচক্খু-সঙ্খাতেহি ঞাণচক্খূহি পস্সিতব্বং পস্সতি এৰ. অথ ৰা জানং জানাতীতি যথা অঞ্ঞে ¶ সৰিপল্লাসা কামরূপপরিঞ্ঞাৰাদিনো জানন্তাপি ৰিপল্লাসৰসেন জানন্তি, ন এৰং ভগৰা. ভগৰা পন পহীনৰিপল্লাসত্তা জানন্তো জানাতি এৰ, দিট্ঠিদস্সনস্স অভাৰা পস্সন্তো পস্সতি এৰাতি অত্থো.

দস্সনপরিণাযকট্ঠেনাতি যথা চক্খু সত্তানং দস্সনত্থং পরিণেতি সাধেতি, এৰং লোকস্স যাথাৰদস্সনসাধনতোপি দস্সনকিচ্চপরিণাযকট্ঠেন চক্খুভূতো, পঞ্ঞাচক্খুমযত্তা ৰা সযম্ভূঞাণেন পঞ্ঞাচক্খুং ভূতো পত্তোতি ৰা চক্খুভূতো. ঞাণভূতোতি এতস্স চ এৰমেৰ অত্থো দট্ঠব্বো. ধম্মা ৰা বোধিপক্খিযা, তেহি উপ্পন্নত্তা লোকস্স চ তদুপ্পাদনতো অনঞ্ঞসাধারণং ৰা ধম্মং পত্তো অধিগতোতি ধম্মভূতো. ‘‘ব্রহ্মা’’ৰুচ্চতি সেট্ঠট্ঠেন মগ্গঞাণং, তেন উপ্পন্নত্তা লোকস্স ¶ চ তদুপ্পাদনতো তঞ্চ সযম্ভূঞাণেন পত্তোতি ব্রহ্মভূতো. চতুসচ্চধম্মং ৰদতীতি ৰত্তা. চিরং সচ্চপটিৰেধং পৰত্তেন্তো ৰদতীতি পৰত্তা. অত্থং নীহরিত্ৰাতি দুক্খাদিঅত্থং উদ্ধরিত্ৰা. পরমত্থং ৰা নিব্বানং পাপযিতা. অমতসচ্ছিকিরিযং সত্তেসু উপ্পাদেন্তো অমতং দদাতীতি অমতস্স দাতা. বোধিপক্খিযধম্মানং তদাযত্তভাৰতো ধম্মস্সামী. পুনপ্পুনং যাচাপেন্তো ভারিযং করোন্তো গরুং করোতি নাম, তথা দুৰিঞ্ঞেয্যং কত্ৰা কথেন্তোপি.

চক্খুনা ৰিজ্জমানেন লোকসঞ্ঞী হোতি, ন তস্মিং অসতি. ন হি অজ্ঝত্তিকাযতনৰিরহেন লোকসমঞ্ঞা অত্থি. তেনাহ ‘‘চক্খুঞ্হি লোকো’’তিআদি. অপ্পহীনদিট্ঠীতি অসমূহতসক্কাযদিট্ঠিকো ঘনৰিনিব্ভোগং কাতুং অসক্কোন্তো সমুদাযং ৰিয অৰযৰং ‘‘লোকো’’তি সঞ্জানাতি চেৰ মঞ্ঞতি চ. তথাতি ইমিনা ‘‘লোকোতি সঞ্জানাতি চেৰ মঞ্ঞতি চা’’তি পদত্তযং আকড্ঢতি. তস্সাতি পুথুজ্জনস্স, চক্কৰাল়লোকস্স ৰা. চক্খাদিমেৰ হি সহোকাসেন ‘‘চক্কৰাল়ো’’তি পুথুজ্জনো সঞ্জানাতি. গমনেনাতি পদসা গমনেন. ন সক্কা তেসং অনন্তত্তা. লুজ্জনট্ঠেনাতি অভিসঙ্খারলোকৰসেন লোকস্স অন্তং দস্সেতুং ৰুত্তং. তস্স অন্তো নাম নিব্বানং. তং পত্তুং সক্কা সম্মাপটিপত্তিযা পত্তব্বত্তা. চক্কৰাল়লোকস্স পন অন্তো নাম, নত্থি তস্স গমনেন অপ্পত্তব্বত্তা.

ইমেহি পদেহীতি ইমেহি ৰাক্যৰিভাগেহি পদেহি. তানি পন অক্খরসমুদাযলক্খণানীতি আহ ‘‘অক্খরসম্পিণ্ডনেহী’’তি. পাটিযেক্কঅক্খরেহীতি তস্মিং তস্মিং পদে পটিনিযতসন্নিৰেসেহি ৰিসুং ৰিসুং চিত্তেন গয্হমানেহি অক্খরেহীতি অত্থো.

গমনট্ঠেন ‘‘পণ্ডা’’ ৰুচ্চতি পঞ্ঞা, তায ইতো গতো পত্তোতি পণ্ডিতো, পঞ্ঞৰা. মহাপঞ্ঞতা ¶ নাম পটিসম্ভিদাৰসেন ৰেদিতব্বাতি আহ ‘‘মহন্তে অত্থে’’তিআদি. যথা তন্তি এত্থ তন্তি নিপাতমত্তং পঠমৰিকপ্পে, দুতিযৰিকপ্পে পন পচ্চামসনন্তি আহ ‘‘তং ব্যাকত’’ন্তি.

লোকন্তগমনসুত্তৰণ্ণনা নিট্ঠিতা.

৪. কামগুণসুত্তৰণ্ণনা

১১৭. চেতসোতি ¶ করণে সামিৰচনং. চিত্তেন সংফুসনং নাম অনুভৰোতি আহ ‘‘চিত্তেন অনুভূতপুব্বা’’তি. উতুত্তযানুরূপতাৰসেন পাসাদত্তযং, তং ৰসেন তিৰিধনাটকভেদো. মনোরম্মতামত্তেন কামগুণং কত্ৰা দস্সিতং, ন কামৰসেন. ন হি অভিনিক্খমনতো উদ্ধং বোধিসত্তস্স কামৰিতক্কা ভূতপুব্বা. তেনাহ মারো পাপিমা –

‘‘সত্ত ৰস্সানি ভগৰন্তং, অনুবন্ধিং পদাপদং;

ওতারং নাধিগচ্ছিস্সং, সম্বুদ্ধস্স সতীমতো’’তি. (সু. নি. ৪৪৮);

মেত্তেয্যো নামাতিআদি অনাগতারম্মণদস্সনমত্তং, ন বোধিসত্তস্স এৰং উপ্পজ্জতীতি. অত্তা পিযাযিতব্বরূপো এতস্সাতি অত্তরূপো, উত্তরপদে পুরিমপদলোপেনাতি ‘‘অত্তনো হিতকামজাতিকেনা’’তি অত্থো ৰুত্তো. অত্তরূপেনাতি ৰা পীতিসোমনস্সেহি গহিতসভাৰেন তুট্ঠপহট্ঠেন উদগ্গুদগ্গেন. অপ্পমাদোতি অপ্পমজ্জনং কুসলধম্মেসু অখণ্ডকারিতাতি আহ ‘‘সাতচ্চকিরিযা’’তি. অৰোস্সগ্গোতি চিত্তস্স কামগুণেসু অৰোস্সজ্জনং পক্খন্দিতুং অপ্পদানং. পুরিমো ৰিকপ্পো কুসলানং ধম্মানং করণৰসেন দস্সিতো, পচ্ছিমো অকুসলানং অকরণৰসেন. দ্ৰে ধম্মাতি অপ্পমাদো সতীতি দ্ৰে ধম্মা. অপ্পমাদো সতি চ তথা পৰত্তা চত্তারো কুসলধম্মক্খন্ধা ৰেদিতব্বা. কত্তব্বাতি পৰত্তেতব্বা.

তস্মিং আযতনেতি তস্মিং নিব্বানসঞ্ঞিতে কারণে পটিৰেধে. তং কারণন্তি ছন্নং আযতনানং কারণং. সল়াযতনং নিরুজ্ঝতি এত্থাতি সল়াযতননিরোধো ৰুচ্চতি নিব্বানং. তেনাহ ‘‘নিব্বানং. তং সন্ধাযা’’তিআদি. নিব্বানস্মিন্তি নিব্বানম্হি.

কামগুণসুত্তৰণ্ণনা নিট্ঠিতা.

৫-৬. সক্কপঞ্হসুত্তাদিৰণ্ণনা

১১৮-১১৯. দিট্ঠেতি ¶ পচ্চক্খভূতে. ধম্মেতি উপাদানক্খন্ধধম্মে. তত্থ হি অত্তাতি ভৰতি সঞ্ঞা দিট্ঠি চাতি অত্তভাৰসঞ্ঞা. তেনাহ – ‘‘দিট্ঠেৰ ¶ ধম্মেতি ইমস্মিংযেৰ অত্তভাৰে’’তি. ‘‘তন্নিস্সিত’’ন্তি এত্থ তং-সদ্দেন হেট্ঠা অভিনন্দনাদিপরিযাযেন ৰুত্তা তণ্হা পচ্চামট্ঠাতি আহ – ‘‘তণ্হানিস্সিত’’ন্তি. তং উপাদানং এতস্সাতি তদুপাদানং. তেনাহ – ‘‘তংগহণ’’ন্তিআদি. তণ্হুপাদানসঙ্খাতং গহণং এতস্সাতি তংগহণং. ছট্ঠং উত্তানমেৰ পঞ্চমে ৰুত্তনযত্তা.

সক্কপঞ্হসুত্তাদিৰণ্ণনা নিট্ঠিতা.

৭. সারিপুত্তসদ্ধিৰিহারিকসুত্তৰণ্ণনা

১২০. ঘটেস্সতীতি পুব্বেনাপরং ঘটিতং সম্বন্ধং করিস্সতি. ৰিচ্ছেদন্তি ব্রহ্মচরিযস্স ৰিরোধিপচ্চযসমুপ্পত্তিযা উচ্ছেদং.

৮. রাহুলোৰাদসুত্তৰণ্ণনা

১২১. যে ধম্মা সম্মদেৰ ভাৰিতা বহুলীকতা ৰিমুত্তিযা অরহত্তস্স সচ্ছিকিরিযায সংৰত্তন্তি, তে সদ্ধাদযো সম্ভারা ৰিমুত্তিপরিপাচনিযাতি অধিপ্পেতা. পরিপাচেন্তীতি পরিপাকং পরিণামং গমেন্তি. ধম্মাতি কারণভূতা ধম্মা. ৰিসুদ্ধিকারণৰসেনাতি ৰিসুদ্ধিকারণতাৰসেন, সা পন সদ্ধিন্দ্রিযাদীনং কারণতো ৰিসুদ্ধি. যথা নাম জাতিসম্পন্নস্স খত্তিযকুমারস্স ৰিপক্খৰিগমেন পক্খসঙ্গহেন পৰত্তিট্ঠানসম্পত্তিযা চ পরিসুদ্ধি হোতি, এৰমেৰং দট্ঠব্বাতি দস্সেন্তো ‘‘ৰুত্তং হেত’’ন্তিআদিমাহ.

অস্সদ্ধাদযোপি পুগ্গলা সদ্ধাদীনং যাৰদেৰ পরিহানায হোন্তি, সদ্ধাদযো পারিপূরিযাৰ, তথা পসাদনিযসুত্তন্তাদিপচ্চৰেক্খণা, পসাদনিযসুত্তন্তা নাম সম্পসাদনীযসুত্তাদযো. সম্মপ্পধানেতি সম্মপ্পধানসুত্তন্তে. সতিপট্ঠানেতি চত্তারো সতিপট্ঠানে. ঝানৰিমোক্খেতি ঝানানি চেৰ ৰিমোক্খে চ উদ্দিস্স পৰত্তসুত্তন্তে. গম্ভীরঞাণচরিযেতি খন্ধাযতনধাতুপটিচ্চসমুপ্পাদপটিসংযুত্তসুত্তন্তে.

কল্যাণমিত্ততাদযোতি কল্যাণমিত্ততা সীলসংৰরো অভিসল্লেখকথা ৰীরিযারম্ভো নিব্বেধিকপঞ্ঞাতি ¶ ইমে কল্যাণমিত্তাদযো পঞ্চ ধম্মা, যে ‘‘ইধ, মেঘিয, ভিক্খু কল্যাণমিত্তো হোতী’’তিআদিনা উদানে ¶ (উদা. ৩১) কথিতা. লোকং ৰোলোকেন্তস্সাতি আযস্মতো রাহুলস্স তাসঞ্চ দেৰতানং ইন্দ্রিযপরিপাকং পস্সন্তস্স. ততো যেন অন্ধৰনং, তত্থ দিৰাৰিহারায মহাসমাগমো ভৰিস্সতীতি. তথা হি ৰক্খতি ‘‘এত্তকাতি গণনাৰসেন পরিচ্ছেদো নত্থী’’তি.

রুক্খপব্বতনিস্সিতা ভূমট্ঠকা, আকাসচারিৰিমানৰাসিনো অন্তলিক্খট্ঠকা. ধম্মচক্খুন্তি ৰেদিতব্বানি চতুসচ্চধম্মানং দস্সনট্ঠেন.

রাহুলোৰাদসুত্তৰণ্ণনা নিট্ঠিতা.

লোককামগুণৰগ্গৰণ্ণনা নিট্ঠিতা.

১৩. গহপতিৰগ্গো

১-৩. ৰেসালীসুত্তাদিৰণ্ণনা

১২৪-১২৬. দ্ৰীসূতি ইমস্মিং গহপতিৰগ্গে পঠমদুতিযেসু ততিযে চ ৰুত্তত্থমেৰ পাঠজাতং অপুব্বং নত্থীতি অত্থো.

৪-৫. ভারদ্ৰাজসুত্তাদিৰণ্ণনা

১২৭-১২৮. কামং অঞ্ঞেপি পব্বজিতা যুত্তকালে পিণ্ডং উলমানা চরন্তিযেৰ, অযং পন ওদরিতো, তেনেৰ কারণেন পব্বজিতোতি দস্সেন্তো ‘‘পিণ্ডং উলমানো’’তিআদিমাহ. ঘংসন্তোৰাতি ভূমিযং ঘংসন্তো এৰ পত্তং ঠপেতি. পরিক্খীণন্তি সমন্ততো পরিক্খীণং. নাল়িকো …পে… জাতং, অতিরেকপত্তট্ঠপনস্স পটিক্খিত্তত্তা অঞ্ঞং ন গণ্হাতি. ‘‘ইন্দ্রিযভাৰনন্তি চক্খাদিপঞ্চিন্দ্রিযভাৰন’’ন্তি কেচি ৰদন্তি, তথা ৰিপস্সনাভিনিৰেসং কত্ৰা উপরিৰিপস্সনং ৰড্ঢিত্ৰাতি অধিপ্পাযো. অপরে পন ‘‘সদ্ধাপঞ্চমানং ইন্দ্রিযানং ৰসেন ৰিপস্সনাভিনিৰেসং কত্ৰা তেন সুখেন অভিঞ্ঞাপহানানং সম্পাদনৰসেন ইন্দ্রিযং ভাৰেত্ৰা’’তি ৰদন্তি.

উপসঙ্কমতীতি ¶ ¶ এত্থ যথা সো রাজা উপসঙ্কমি, তং আগমনতো পট্ঠায দস্সেতুং ‘‘থেরো কিরা’’তিআদি আরদ্ধং. মহাপানং নাম অঞ্ঞং কম্মং অকত্ৰা পানপসুতো হুত্ৰা সত্তাহং তদনুরূপপরিজনস্স সুরাপিৰনং. তেনাহ ‘‘মহাপানং নাম পিৰিত্ৰা’’তি. সালিথুসেহীতি রত্তসালিথুসেহি. ডয্হমানং ৰিয কিপিল্লিকদংসনজাতাহি দুক্খৰেদনাহি. মুখসত্তীহি ৰিজ্ঝিংসু ৰল্লভতায. ইত্থিলোলো হি সো রাজা.

পৰেণিন্তি তেসং সমাদানপৰেণিং ব্রহ্মচরিযপবন্ধং. পটিপাদেন্তীতি সম্পাদেন্তি. গরুকারম্মণন্তি গরুকাতব্বআরম্মণং, অৰীতিক্কমিতব্বারম্মণন্তি অত্থো. অস্সাতি রঞ্ঞো. চিত্তং অনোতরন্তন্তি পসাদৰীথিং অনোতরন্তং অনুপগচ্ছন্তং. ৰিহেঠেতুন্তি ৰিবাধিতুং.

লোভস্স অপরাপরুপ্পত্তিযা বহুৰচনৰসেন ‘‘লোভধম্মা’’তি ৰুত্তং. উপ্পজ্জন্তীতিপি অত্থো যেৰ, যস্মা উপ্পজ্জমানো লোভধম্মো অত্তনো হেতুপচ্চযে পরিগ্গহাপেন্তো জানাপেন্তো ৰিয সহতি পৰত্ততীতি. ইমমেৰ কাযন্তি এত্থ সমূহত্থে এৰ কায-সদ্দো গব্ভাসযাদিট্ঠানেসু উপ্পজ্জনধম্মসমূহৰিসযত্তা, ইতরে পন কাযূপলক্খিততায ‘‘কাযো’’তি ৰেদিতব্বা. উত্তানমেৰ হেট্ঠা ৰুত্তনযত্তা.

ভারদ্ৰাজসুত্তাদিৰণ্ণনা নিট্ঠিতা.

৬. ঘোসিতসুত্তৰণ্ণনা

১২৯. রূপা চ মনাপাতি নীলাদিভেদা রূপধম্মা চ মনসা মনুঞ্ঞা পিযরূপা সংৰিজ্জন্তি, ইদঞ্চ সুখৰেদনীযস্স ফস্সস্স সভাৰদস্সনত্থং. এৰং ‘‘রূপা চ মনাপা উপেক্খাৰেদনিযা’’তি এত্থাপি যথারহং ৰত্তব্বং. চক্খুৰিঞ্ঞাণ…পে… ফস্সন্তি ৰুত্তং. উপনিস্সযকোটিযা হি চক্খুৰিঞ্ঞাণসম্পযুত্তফস্সো সুখৰেদনীযো, ন সহজাতকোটিযা. তেনাহ – ‘‘একং ফস্সং পটিচ্চ জৰনৰসেন সুখৰেদনা উপ্পজ্জতী’’তি. সেসপদেসূতি ‘‘সংৰিজ্জতি খো, গহপতি, সোতধাতূ’’তি আগতেসু পঞ্চসু কোট্ঠাসেসু.

তেৰীসতি ¶ ধাতুযো কথিতা ছন্নং দ্ৰারানং ৰসেন ৰিভজ্জগহণেন. ৰত্থুনিস্সিতন্তি হদযৰত্থুনিস্সিতং. পঞ্চদ্ৰারে ৰীসতি, মনোদ্ৰারে তিস্সো এৰং তেৰীসতি.

ঘোসিতসুত্তৰণ্ণনা নিট্ঠিতা.

৭-৮. হালিদ্দিকানিসুত্তাদিৰণ্ণনা

১৩০-১৩১. তং ¶ ইত্থেতন্তি চক্খুনা যং রূপং দিট্ঠং, তং ইত্থন্তি অত্থো. তং সুখৰেদনিযন্তি তং সুখৰেদনায উপনিস্সযকোটিযা পচ্চযভূতং চক্খুৰিঞ্ঞাণঞ্চেৰ, যো চ যথারহং উপনিস্সযকোটিযা ৰা, অনন্তরো চে অনন্তরকোটিযা ৰা, সহজাতো চে সম্পযুত্তকোটিযা ৰা, সুখৰেদনায পচ্চযো ফস্সো. তং সুখৰেদনিযঞ্চ ফস্সং পটিচ্চ উপ্পজ্জতি সুখৰেদনাতি যোজনা. এস নযো সব্বত্থ সব্বেসু সেসেসু সত্তসু ৰারেসু. মনোধাতুযেৰ ৰা সমানাতি অভিধম্মনযেন. সুত্তন্তনযেন পন সুঞ্ঞতট্ঠেন নিস্সত্তনিজ্জীৰট্ঠেন চ মনোধাতুসমঞ্ঞং লভতেৰ. অট্ঠমং উত্তানমেৰ হেট্ঠা ৰুত্তনযত্তা.

হালিদ্দিকানিসুত্তাদিৰণ্ণনা নিট্ঠিতা.

৯. লোহিচ্চসুত্তৰণ্ণনা

১৩২. তেপি মাণৰকাত্ৰেৰ ৰুত্তা, ন ব্রাহ্মণকুমারা এৰ. সেলেয্যকানীতি অঞ্ঞমঞ্ঞং সিলিস্সনলঙ্ঘনকীল়নানি.

উপট্ঠানৰসেন ইভং হরন্তীতি ইব্ভা, হত্থিগোপকা. তে পন নিহীনকুটুম্বস্স ভোগ্গং উপাদায গহপতিভাৰং উপাদায ‘‘গহপতিকা’’তিপি ৰুচ্চন্তীতি আহ ‘‘গহপতিকা’’তি. কণ্হাতি কণ্হাভিজাতিকা. রট্ঠং ভরন্তীতি যস্মিং রট্ঠে ৰসন্তি, তস্স রট্ঠস্স বলিং ভরণেন, অত্তনো ৰা কুটুম্বস্স ভরণেন ভরতা. পরিযাযন্তাতি পরিতো সংচরন্তা কীল়ন্তি.

সীলজেট্ঠকাতি সীলপ্পধানা. যে পুরাণং সরন্তি, তে সীলুত্তমা অহেসুং. দ্ৰারানি চক্খাদিদ্ৰারানি.

অপক্কমিত্ৰা ¶ অপেতা ৰিরহিতা হুত্ৰা. ৰিসমানীতি ৰিগতসমানি দুচ্চরিতসভাৰানি. নানাৰিধদণ্ডা নানাৰিধদণ্ডনিপাতা.

অনাহারকাতি কিঞ্চি অভুঞ্জনকা. পঙ্কো ৰিয পঙ্কো, মলং. দন্তপঙ্কো পুরিমপদলোপেন পঙ্কোতি ৰুত্তোতি ‘‘পঙ্কো নাম দন্তমল’’ন্তি ৰুত্তং. অজেহি কাতব্বকানং অকোপেত্ৰা করণং সমাদানৰসেন ৰতং. এস নযো সেসেসুপি. কোহঞ্ঞং নাম অত্তনি ৰিজ্জমানদোসং পটিচ্ছাদেত্ৰা ¶ অসন্তগুণপকাসনাতি আহ – ‘‘পটিচ্ছন্ন…পে… কোহঞ্ঞঞ্চেৰা’’তি. পরিক্খারভণ্ডকৰণ্ণাতি পরিক্খারভণ্ডা কপ্পকাতি. তে চ খো অত্তনো জীৰিকত্থায আমিসকিঞ্জক্খস্স অত্তনিবন্ধনত্থায অমোচনত্থায কতা.

অখিলন্তি চেতোখিলরহিতং ব্রহ্মৰিহারৰসেন. তেনাহ ‘‘মুদু অথদ্ধ’’ন্তি.

অধিমুত্তোতি অভিরতিৰসেন যুত্তপযুত্তো. পরিত্তচিত্তোতি পরিতো খণ্ডিতচিত্তো. অপ্পমাণচিত্তোতি এত্থ ‘‘কো অয’’ন্তি পটিক্খিতুং সক্কুণেয্যচিত্তো.

লোহিচ্চসুত্তৰণ্ণনা নিট্ঠিতা.

১০. ৰেরহচ্চানিসুত্তৰণ্ণনা

১৩৩. ব্রাহ্মণিং ধম্মসৰনায চোদেন্তো মাণৰকো ‘‘যগ্ঘে’’তি অৰোচ. তেনাহ ‘‘যগ্ঘেতি চোদনত্থে নিপাতো’’তি.

ৰেরহচ্চানিসুত্তৰণ্ণনা নিট্ঠিতা.

গহপতিৰগ্গৰণ্ণনা নিট্ঠিতা.

১৪. দেৰদহৰগ্গো

১. দেৰদহসুত্তৰণ্ণনা

১৩৪. মনং রমযন্তাতি আপাথগতা মনস্স রমণৰসেন পিযাযিতব্বতাৰসেন পৰত্তন্তা.

২. খণসুত্তৰণ্ণনা

১৩৫. ছফস্সাযতনিকাতি ¶ ছহি ফস্সাযতনেহি অনিট্ঠসংৰেদনিযা. ছদ্ৰারফস্সপটিৰিঞ্ঞত্তীতি ছহিপি দ্ৰারেহি আরম্মণস্স পটিসংৰেদনা হোতিযেৰ সব্বসো দুক্খানুভৰনত্থং. তাৰতিংসপুরন্তি ¶ সুদস্সনমহানগরং. অভাৰো নাম নত্থি সব্বথা সুখানুভৰনতো. নিরযেতি ইমিনা দুগ্গতি ভৰসামঞ্ঞেন ইতরাপাযাপি গহিতা এৰ. মগ্গব্রহ্মচরিযৰাসং ৰসিতুং ন সক্কাতি ইমিনা পন সব্বেসম্পি অচ্ছিন্দিকট্ঠানানং গহণং দট্ঠব্বং. ইমেৰাতি ইমস্মিং মনুস্সলোকে এৰ. অপাযোপি পঞ্ঞাযতি অপাযদুক্খসদিসস্স দুক্খস্স কদাচি পটিসংৰেদনতো. সগ্গোপি পঞ্ঞাযতি দেৰভোগসদিসসম্পত্তিযা কদাচি পটিলভিতব্বতো.

অযং কম্মভূমীতি অযং মনুস্সলোকো পুরিসথামকরণায কম্মভূমি নাম তাসং যোগ্যট্ঠানভাৰতো. তত্থ পধানকম্মং দস্সেন্তো ‘‘ইধ মগ্গভাৰনা’’তি আহ. ঠানানীতি কারণানি. সংৰেজনিযানীতি সংৰেগজননানি বহূনি জাতিআদীনি. তথা হি জাতি, জরা, ব্যাধি, মরণং, অপাযভৰং, তত্থপি নিরযূপপত্তিহেতুকং, তিরচ্ছানুপপত্তিহেতুকং, অসূরকাযূপপত্তিহেতুকং, অতীতে ৰট্টমূলকং, অনাগতে ৰট্টমূলকং, পচ্চুপ্পন্নে আহারপরিযেট্ঠিমূলকন্তি বহূনি সংৰেগৰত্থূনি পচ্চৰেক্খিত্ৰা সংৰেগজাতো সঞ্জাতসংৰেগো যোনিসো পধানমনুযুঞ্জস্সু. সংৰেগাতি সংৰেগমাপজ্জস্সু.

খণসুত্তৰণ্ণনা নিট্ঠিতা.

৩. পঠমরূপারামসুত্তৰণ্ণনা

১৩৬. সম্মুদিতা সম্মোদপ্পত্তা, পমোদিতা সঞ্জাতপমোদা. দুক্খাতি দুক্খৰন্তো সঞ্জাতদুক্খা. তেনাহ ‘‘দুক্খিতা’’তি. সুখং এতস্স অত্থীতি সুখো, সুখী. তেনাহ ‘‘সুখিতো’’তি. যত্তকা রূপাদযো ধম্মা লোকে অত্থীতি ৰুচ্চতি. পস্সন্তানন্তি সচ্চপটিৰেধেন সম্মদেৰ পস্সন্তানং. ‘‘পচ্চনীকং হোতী’’তি ৰত্ৰা তং পচ্চনীকভাৰং দস্সেতুং ‘‘লোকো হী’’তিআদি ¶ ৰুত্তং. অসুভাতি ‘‘আহূ’’তিপদং আনেত্ৰা সম্বন্ধো. সব্বমেতন্তি ‘‘সুখং দিট্ঠমরিযেভি…পে… তদরিযা সুখতো ৰিদূ’’তি চ ৰুত্তং. সব্বমেতং নিব্বানমেৰ সন্ধায ৰুত্তং. নিব্বানমেৰ হি একন্ততো সুখং নাম.

পঞ্চনৰুতিপাসণ্ডিনো তেসঞ্চ পাসণ্ডিভাৰো পপঞ্চসূদনিট্ঠকথাযং পকাসিতো এৰ. কিলেসনীৰরণেন নিৰুতানন্তি কিলেসখন্ধা কিলেসনীৰরণং, তেন নিৰারিতানং. নিব্বানদস্সনং নাম অরিযমগ্গো, তেন তস্স পটিৰিজ্ঝনঞ্চ কাল়মেঘঅৰচ্ছাদিতং ৰিয চন্দমণ্ডলং.

পরিচ্ছিন্দিত্ৰাতি ¶ অসুভভাৰপরিচ্ছিন্দনেন সম্মাৰিঞ্ঞাণদস্সনেন চ পরিচ্ছিন্দিত্ৰা. মগ্গধম্মস্সাতি অরিযমগ্গধম্মস্স.

অনুপন্নেহীতি অনু অনু অৰিহায পটিপন্নেহি. কো নু অঞ্ঞো জানিতুং অরহতি, অঞ্ঞো ন জানাতীতি দস্সেতি.

পঠমরূপারামসুত্তৰণ্ণনা নিট্ঠিতা.

৪-১২. দুতিযরূপারামসুত্তাদিৰণ্ণনা

১৩৭-১৪৫. সুদ্ধিকং কত্ৰা গাথাবন্ধনেন ৰিনা কেৰলং চুণ্ণিযপদৰসেনেৰ. তথা তথাতি অজ্ঝত্তিকানি বাহিরানি চ আযতনানি অনিচ্চলক্খণেন দুক্খানত্তলক্খণেহি চ যোজেত্ৰা দস্সনৰসেন.

দুতিযরূপারামসুত্তাদিৰণ্ণনা নিট্ঠিতা.

দেৰদহৰগ্গৰণ্ণনা নিট্ঠিতা.

১৫. নৰপুরাণৰগ্গো

১. কম্মনিরোধসুত্তৰণ্ণনা

১৪৬. সম্পতি ৰিজ্জমানস্স চক্খুস্স তংনিব্বত্তস্স কম্মস্স চ অধিপ্পেতত্তা ‘‘ন চক্খু পুরাণং, কম্মমেৰ পুরাণ’’ন্তি ৰত্ৰা যথা তস্স চক্খুস্স পুরাণপরিযাযো ¶ ৰুত্তো, তং দস্সেন্তো আহ – ‘‘কম্মতো পনা’’তিআদি. পচ্চযনামেনাতি পুরিমজাতিসংসিদ্ধত্তা ‘‘পুরাণ’’ন্তি ৰত্তব্বস্স পচ্চযভূতস্স কম্মস্স নামেন. এৰং ৰুত্তন্তি ‘‘পুরাণকম্ম’’ন্তি এৰং ৰুত্তং. পচ্চযেহি অভিসমাগন্ত্ৰা কতন্তি তণ্হাৰিজ্জাদিপচ্চযেহি অভিমুখভাৰেন সমাগন্ত্ৰা সমেচ্চ নিব্বত্তিতং. চেতনাযাতি কম্মচেতনায. পকপ্পিতন্তি অভিসমীহিতং. ৰেদনাযাতি অত্তানং নিস্সায আরম্মণং কত্ৰা পৰত্তায ৰেদনায. ৰত্থূতি নিব্বত্তিকারণং পৰত্তট্ঠানন্তি ৰিপস্সনাপঞ্ঞায পস্সিতব্বং. কম্মস্স নিরোধেনাতি কিলেসানং অনুপ্পাদনিরোধসিদ্ধেন কম্মস্স নিরোধেন. ৰিমুত্তিং ফুসতীতি অরহত্তফলৰিমুত্তিং পাপুণাতি. আরম্মণভূতো নিরোধো নিব্বানং ‘‘কম্মনিরোধো’’তি ¶ ৰুচ্চতি, ‘‘কম্মং নিরুজ্ঝতি এত্থা’’তি কত্ৰা. ‘‘ঝাযথ, ভিক্খৰে, মা পমাদত্থা’’তি ৰুত্তত্তা ‘‘পুব্বভাগৰিপস্সনা কথিতা’’তি ৰুত্তং.

কম্মনিরোধসুত্তৰণ্ণনা নিট্ঠিতা.

২-৫. অনিচ্চনিব্বানসপ্পাযসুত্তাদিৰণ্ণনা

১৪৭-১৫০. নিব্বানস্সাতি নিব্বানাধিগমস্স, কিলেসনিব্বানস্সেৰ ৰা. উপকারপটিপদন্তি উপকারাৰহং পটিপদং. চতূসূতি দুতিযাদীসু চতূসু. নিব্বানসপ্পাযা পটিপদা দেসিতাতি কত্ৰা ‘‘সহ ৰিপস্সনায চত্তারো মগ্গা কথিতা’’তি ৰুত্তং.

অনিচ্চনিব্বানসপ্পাযসুত্তাদিৰণ্ণনা নিট্ঠিতা.

৬-৭. অন্তেৰাসিকসুত্তাদিৰণ্ণনা

১৫১-১৫২. অন্ত-সদ্দো সমীপত্থে ৰত্ততি ‘‘উদকন্তং ৰনন্ত’’ন্তিআদীসু, কিলেসো পন অতিআসন্নে ৰসতি অব্ভন্তরৰুত্তিতাযাতি ‘‘অন্তেৰাসিক’’ন্তি ৰুত্তো ৰিভত্তিঅলোপেন যথা ‘‘ৰনেকুসলো, কূলেরুক্খা’’তি. তেনাহ – ‘‘অনন্তেৰাসিকন্তি অন্তোৰসনকিলেসৰিরহিত’’ন্তি. আচরণককিলেসৰিরহিতন্তি সমুদাচরণকিলেসরহিতং. অন্তো ¶ অস্স ৰসন্তীতি অস্স পুগ্গলস্স অন্তো অব্ভন্তরে চিত্তে ৰসন্তি পৰত্তন্তি. তে এতং অধিভৰন্তীতি তে কিলেসা এতং পুগ্গলং অভিভৰিত্ৰা অত্তনো ৰসে ৰত্তেন্তি. তেনাহ – ‘‘অজ্ঝোত্থরন্তি সিক্খাপেন্তি ৰা’’তি. তেহি আচরিযেহীতি তেহি কিলেসসঙ্খাতেহি সত্তে অত্তনো গতিযং ঠপেন্তেহি আচরিযেহি. সত্তমং হেট্ঠা কথিতনযমেৰাতি যস্মা হেট্ঠা খন্ধৰসেন দেসনা আগতা, ইধ আযতনৰসেনাতি অযমেৰ ৰিসেসো.

অন্তেৰাসিকসুত্তাদিৰণ্ণনা নিট্ঠিতা.

৮. অত্থিনুখোপরিযাযসুত্তৰণ্ণনা

১৫৩. পরিযাযতি পরিগচ্ছতি ফলং এতস্সাতি পরিযাযো হেতূতি আহ – ‘‘যং পরিযাযন্তি যং কারণ’’ন্তি. পচ্চক্খদিট্ঠে অৰিপরীতে অত্থে পৰত্তসদ্ধা পচ্চক্খসদ্ধা যথা ‘‘সম্মাসম্বুদ্ধো ভগৰা, স্ৰাখাতো ধম্মো’’তি (ম. নি. ১.২৮৮) চ. এৰং কিরাতি ইতি কিরায উপ্পন্নো সদ্দহনাকারো সদ্ধাপতিরূপকো. এতন্তি ‘‘অঞ্ঞত্রেৰ সদ্ধাযা’’তি এতং ৰচনং ¶ . রুচাপেত্ৰাতি কিঞ্চি অত্থং অত্তনো মতিযা রোচেত্ৰা. খমাপেত্ৰাতি তস্সেৰ ৰেৰচনং, চিত্তং তথা খমাপেত্ৰা. তেনাহ – ‘‘অত্থেতন্তি গহণাকারো’’তি. পরম্পরাগতস্স অত্থস্স এৰং কিরস্সাতি অনুস্সৰনং. কারণং চিন্তেন্তস্সাতি যুত্তিং চিন্তেন্তস্স. কারণং উপট্ঠাতীতি ‘‘সাধূ’’তি অত্তনো চিত্তস্স উপতিট্ঠতি. অত্থেতন্তি ‘‘এতং কারণং এৰমযমত্থো যুজ্জতী’’তি চিত্তেন গহণং. আকারপরিৰিতক্কোতি যুত্তিপরিকপ্পনা. লদ্ধীতি নিচ্ছযেন গহণং, সা চ খো দিট্ঠি অযাথাৰগ্গহণেন অঞ্ঞাণমেৰাতি দট্ঠব্বং. তন্তি লদ্ধিং. অত্থেসাতি এসা লদ্ধি মম উপ্পন্না অত্থি যুত্তরূপা হুত্ৰা উপলব্ভতি. এৰং গহণাকারো দিট্ঠিনিজ্ঝানক্খন্তি নাম, পঠমুপ্পন্নলদ্ধিসঙ্খাতায দিট্ঠিযা নিজ্ঝানং খমনাকারো দিট্ঠিনিজ্ঝানক্খন্তি নাম. পঞ্চ ঠানানীতি যথাৰুত্তানি সদ্ধাদীনি পঞ্চ কারণানি. মুঞ্চিত্ৰা অগ্গহেত্ৰা. হেট্ঠিমমগ্গৰজ্ঝানং রাগাদীনং অভাৰং সন্ধায ‘‘নত্থি মে অজ্ঝত্তং রাগদোসমোহো’’তি অযং সেক্খানং পচ্চৰেক্খণা, সব্বসো অভাৰং সন্ধায অসেক্খানন্তি আহ – ‘‘সেক্খাসেক্খানং পচ্চৰেক্খণা কথিতা’’তি. ‘‘সন্তং ¶ ৰা অজ্ঝত্ত’’ন্তিআদিনা সেক্খানং, ‘‘অসন্তং ৰা অজ্ঝত্ত’’ন্তিআদিনা অসেক্খানং পচ্চৰেক্খণা কথিতাতি দট্ঠব্বং.

অত্থিনুখোপরিযাযসুত্তৰণ্ণনা নিট্ঠিতা.

৯-১০. ইন্দ্রিযসম্পন্নসুত্তাদিৰণ্ণনা

১৫৪-১৫৫. ‘‘সম্পন্নসীলা, ভিক্খৰে, ৰিহরথা’’তিআদীসু (ম. নি. ১.৬৪) ৰিয পরিপুণ্ণত্থো ইধ সম্পন্ন-সদ্দোতি আহ ‘‘পরিপুণ্ণিন্দ্রিযো’’তি. ইন্দ্রিযেহি সমন্নাগতত্তা পরিপুণ্ণিন্দ্রিযো নাম হোতীতি সম্বন্ধো. এৰং সতি সমন্নাগমসম্পত্তি ৰুত্তা হোতীতি আসঙ্কন্তো ‘‘চক্খাদীনি ৰা’’তিআদিমাহ. তং সন্ধাযাতি দুতিযৰিকপ্পেন ৰুত্তমত্থং সন্ধায. হেট্ঠা খন্ধিযৰগ্গে খন্ধৰসেন দেসনা আগতা, ইধ আযতনৰসেনাতি আহ ‘‘ৰুত্তনযমেৰা’’তি.

ইন্দ্রিযসম্পন্নসুত্তাদিৰণ্ণনা নিট্ঠিতা.

নৰপুরাণৰগ্গৰণ্ণনা নিট্ঠিতা.

ততিযো পণ্ণাসকো.

১৬. নন্দিক্খযৰগ্গো

১-৪. অজ্ঝত্তনন্দিক্খযসুত্তাদিৰণ্ণনা

১৫৬-১৫৯. অত্থতোতি ¶ সভাৰতো. ঞাণেন অরিযতো ঞাতব্বতো অত্থো, সভাৰোতি. এৰঞ্হি অভিজ্জনসভাৰো নন্দনট্ঠেন নন্দী, রঞ্জনট্ঠেন রাগো. ৰিমুত্তিৰসেনাতি ৰিমুত্তিযা অধিগমৰসেন. এত্থাতি ইমস্মিং পঠমসুত্তে. দুতিযাদীসূতি দুতিযততিযচতুত্থেসু. উত্তানমেৰ হেট্ঠা ৰুত্তনযত্তা.

অজ্ঝত্তনন্দিক্খযসুত্তাদিৰণ্ণনা নিট্ঠিতা.

৫-৬. জীৰকম্বৰনসমাধিসুত্তাদিৰণ্ণনা

১৬০-১৬১. সমাধিৰিকলানং ¶ চিত্তেকগ্গতং লভন্তানং, পটিসল্লানৰিকলানং কাযৰিৰেকঞ্চ চিত্তেকগ্গতঞ্চ লভন্তানন্তি যোজনা. পাকটং হোতীতি ৰিভূতং হুত্ৰা উপট্ঠাতি. ওক্খাযতি পচ্চক্খাযতীতি চতুসচ্চধম্মানং ৰিভূতভাৰেন উপট্ঠানস্স কথিতত্তা ৰুত্তং – ‘‘দ্ৰীসুপি…পে… কথিতা’’তি.

জীৰকম্বৰনসমাধিসুত্তাদিৰণ্ণনা নিট্ঠিতা.

৭-৯. কোট্ঠিকঅনিচ্চসুত্তাদিৰণ্ণনা

১৬২-১৬৪. অনিচ্চানুপস্সনাদযো এৰ ৰিমুত্তিপরিপাচনিযা ধম্মা নাম. থেরস্স তদা সদ্ধাদীনি ইন্দ্রিযানি ন পরিপাকং উপগতানি, থেরো ইমাহি দেসনাহি ইন্দ্রিযপরিপাকমগমাসি.

কোট্ঠিকঅনিচ্চসুত্তাদিৰণ্ণনা নিট্ঠিতা.

১০-১২. মিচ্ছাদিট্ঠিপহানসুত্তাদিৰণ্ণনা

১৬৫-১৬৭. পাটিযেক্কন্তি ¶ ৰিসুং ৰিসুং. ৰুত্তনযেনেৰাতি হেট্ঠা ৰুত্তনযেনেৰ অপুব্বস্স ৰত্তব্বস্স অভাৰা.

মিচ্ছাদিট্ঠিপহানসুত্তাদিৰণ্ণনা নিট্ঠিতা.

নন্দিক্খযৰগ্গৰণ্ণনা নিট্ঠিতা.

১৭. সট্ঠিপেয্যালৰগ্গো

১-৬০. অজ্ঝত্তঅনিচ্চছন্দসুত্তাদিৰণ্ণনা

১৬৮-২২৭. ‘‘যং, ভিক্খৰে, অনিচ্চং, তত্র ৰো ছন্দো পহাতব্বো’’তিআদিনা তেসং তেসং পুগ্গলানং অজ্ঝাসযৰসেন সট্ঠি সুত্তানি কথিতানি ¶ , তানি চ পেয্যালনযেন দেসনং আরুল়্হানীতি ‘‘সট্ঠিপেয্যালো নাম হোতী’’তি ৰুত্তং. তেনাহ ‘‘যানি পনেত্থা’’তিআদি.

অজ্ঝত্তঅনিচ্চছন্দসুত্তাদিৰণ্ণনা নিট্ঠিতা.

সট্ঠিপেয্যালৰগ্গৰণ্ণনা নিট্ঠিতা.

১৮. সমুদ্দৰগ্গো

১. পঠমসমুদ্দসুত্তৰণ্ণনা

২২৮. যদি ‘‘দুপ্পূরণট্ঠেন সমুদ্দনট্ঠেনা’’তি ইমিনা অত্থদ্ৰযেন সাগরো ‘‘সমুদ্দো’’তি ৰুচ্চতি, চক্খুস্সেৰেতং নিপ্পরিযাযতো যুজ্জতীতি দস্সেতুং ‘‘যদী’’তিআদি ৰুত্তং. তত্থ দুপ্পূরণট্ঠেনাতি পূরেতুং অসক্কুণেয্যভাৰেন. সমুদ্দনট্ঠেনাতি সব্বসো উপরূপরিপক্খিত্তগমনেন. মহাগঙ্গাদিমহানদীনং মহতা উদকোঘেন অনুসংৰচ্ছরং অনুপক্খন্দমানোপি হি সমুদ্দো পারিপূরিং ন গচ্ছতি, যঞ্চ ভূমিপদেসং ওত্থরতি, তং সমুদ্দভাৰং নেতি, অভাৰং ৰা পাপুণাতি অপযাতে সমুদ্দোদকে, তং ৰা অনুদকভাৰপত্তিযা অতথমেৰ হোতি. কামঞ্চেস দুপ্পূরণট্ঠো সমুদ্দনট্ঠো ¶ সাগরে লব্ভতি, তথাপি তং দ্ৰযং চক্খুস্মিংযেৰ ৰিসেসতো লব্ভতীতি দস্সেন্তো ‘‘তস্স হী’’তিআদিমাহ. সমোসরন্তন্তি সব্বসো নীলাদিভাগেহি ওসরন্তং, আপাথং আগচ্ছন্তন্তি অত্থো. কাতুং ন সক্কোতি দুপ্পূরণীযত্তা. সদোসগমনেন গচ্ছতি সত্তসন্তানস্স দুস্সনতো. দুস্সনট্ঠতা চস্স চক্খুদ্ৰারিকতণ্হাৰসেন ৰেদিতব্বা. যথা সমুদ্দে অপরাপরং পরিৰত্তমানো ঊমিযা ৰেগো সমুদ্দস্সাতি ৰুচ্চতি, এৰং চক্খুসমুদ্দস্স পুরতো অপরাপরং পরিৰত্তমানং নীলাদিভেদং রূপারম্মণং চক্খুস্সাতি ৰত্তব্বতং অরহতি অনঞ্ঞসাধারণত্তাতি ৰুত্তং ‘‘রূপমযো ৰেগো’’তি. অসমপেক্খিতেতি সম্মাদস্সনে রূপে মনাপভাৰং অমনাপভাৰঞ্চ গহেত্ৰা, ‘‘ইদং নাম মযা দিট্ঠ’’ন্তি অনুপধারেন্তস্স কেৰলং সমূহঘনৰসেন গণ্হন্তস্স গহণং অসমপেক্খনং. সহতীতি অধিভৰতি, তংনিমিত্তং কঞ্চি ৰিকারং নাপজ্জতি.

ঊমীতি ¶ ৰীচিযো. আৰট্টো আৰট্টনৰসেন পৰত্তং উদকং. গাহরক্খসমকরাদযো গাহরক্খসো. যথা সমুদ্দে ঊমিযো উপরূপরি ৰত্তমানা অত্তনি পতিতপুগ্গলং অজ্ঝোত্থরিত্ৰা অনযব্যসনং আপাদেন্তি, তথা আৰট্টগাহরক্খসা. এৰমেতে রাগাদযো কিলেসা সযং উপ্পন্নকসত্তে অজ্ঝোত্থরিত্ৰা অনযব্যসনং আপাদেন্তি, কিলেসুপ্পত্তিনিমিত্ততায সত্তানং অনযব্যসনাপত্তিহেতুভূতস্স ঊমিভযস্স আরম্মণৰসেন চক্খুসমুদ্দো ‘‘সঊমিসাৰট্টো সগাহো সরক্খসো’’তি ৰুত্তো.

ঊমিভযন্তি এত্থ ভাযতি এতস্মাতি ভযং, ঊমীৰ ভযং ঊমিভযং. কুজ্ঝনট্ঠেন কোধো. স্ৰেৰ চিত্তস্স চ অভিমদ্দনৰসেনুপ্পাদনত্থেন দল়্হং আযাসনট্ঠেন উপাযাসো. এত্থ চ অনেকৰারং পৰত্তিত্ৰা সত্তে অজ্ঝোত্থরিত্ৰা সীসং উক্খিপিতুং অদত্ৰা অনযব্যসননিপ্ফাদনেন কোধূপাযাসস্স ঊমিসদিসতা দট্ঠব্বা. তথা কামগুণা কিলেসাভিভূতে সত্তে মানে ৰিয রূপাদিৰিসযসঙ্খাতে অত্তনি সংসারেত্ৰা যথা ততো বহিভূতে নেক্খম্মে চিত্তম্পি ন উপ্পজ্জতি, এৰং আৰট্টেত্ৰা ব্যসনাপাদনেন আৰট্টসদিসতা দট্ঠব্বা. যদা পন গাহরক্খসো আরক্খরহিতং অত্তনো গোচরভূমিগতং পুরিসং অভিভুয্য গহেত্ৰা অগোচরে ঠিতম্পি গোচরং নেত্ৰা ভেরৰরূপদস্সনাদিনা অত্তনো উপক্কমং কাতুং অসমত্থং কত্ৰা অন্ৰাৰিসিত্ৰা ৰণ্ণবলভোগআযুসুখেহি ৰিযোজেত্ৰা মহন্তং অনযব্যসনং আপাদেতি, এৰং মাতুগামোপি যোনিসোমনসিকাররহিতং অৰীরপুরিসং অত্তনো রূপাদীহি পলোভনৰসেন অভিভুয্য গহেত্ৰা ৰা ৰীরজাতিযম্পি ইত্থিকুত্তভূতেহি অত্তনো হাৰভাৰৰিলাসেহি ইত্থিমাযায অন্ৰাৰিসিত্ৰা ৰা অৰসং অত্তনো উপকারধম্মে সীলাদযো সম্পাদেতুং অসমত্থং করোন্তো গুণৰণ্ণাদীহি ৰিযোজেত্ৰা মহন্তং অনযব্যসনং আপাদেতি, এৰং মাতুগামস্স গাহরক্খসসদিসতা দট্ঠব্বা. ঊমিভযন্তি লক্খণৰচনং ¶ . যথা হি ঊমি ভাযিতব্বট্ঠেন ভযং, এৰং আৰট্টগাহরক্খসাপীতি ঊমিআদিভযেন সভযন্তি অত্থো ৰেদিতব্বো. অন্তং অৰসানং গতো, এৰং পারং নিব্বানং গতোতি ৰুচ্চতি.

পঠমসমুদ্দসুত্তৰণ্ণনা নিট্ঠিতা.

২-৩. দুতিযসমুদ্দসুত্তাদিৰণ্ণনা

২২৯-২৩০. কিলেসানং ¶ অল্লভাৰূপনযনন্তি আহ ‘‘তেমনট্ঠেনা’’তি. অরিযসাৰকেতি অনাগামিনো. তে হি কামভৰৰসেন অতিন্ততায ন সমুন্না. তযো মচ্চূতি কিলেসাভিসঙ্খারদেৰপুত্তমারে. তীহি উপধীহীতি কিলেসাভিসঙ্খারকামগুণানং ৰসেন তীহি উপধীহি. খন্ধুপধিনা পন সো ন নিরূপধি সউপাদিসেসস্সেৰ নিব্বানস্স অধিগতত্তা. গতোতি পটিপত্তিগমনেন গতো.

দুতিযসমুদ্দসুত্তাদিৰণ্ণনা নিট্ঠিতা.

৪-৬. খীররুক্খোপমসুত্তাদিৰণ্ণনা

২৩১-২৩৩. অপ্পহীনট্ঠেনাতি মগ্গেন অসমুগ্ঘাটিতভাৰেন. অত্থীতি ৰিজ্জতি. সতি পচ্চযে ৰিজ্জমানকিচ্চকরণতো পরিযুট্ঠানং অপ্পকং মূসিকাৰিসং ৰিয পরিত্তং নাম হোতি অপ্পানুভাৰত্তা. এৰরূপাপীতি অপ্পকাপি. অস্সাতি অপ্পহীনকিলেসস্স. অধিমত্তানন্তি ইট্ঠানং রজনীযানং, ৰত্থুৰসেন পরিত্তকম্পি ইট্ঠারম্মণং অধিমত্তমেৰ. তেনাহ ‘‘নখপিট্ঠিপ্পমাণম্পী’’তিআদি. দহরোতিআদীনি তীণিপি পদানি. আভিন্দেয্যাতি ভিন্দেয্য. তং উভযন্তি তং চক্খুরূপন্তি উভযম্পি আযতনং.

খীররুক্খোপমসুত্তাদিৰণ্ণনা নিট্ঠিতা.

৭. উদাযীসুত্তৰণ্ণনা

২৩৪. ইতিপীতি ইমিনাপি কারণেন. অনিচ্চেনাতি অনিচ্চভাৰেন অনত্তলক্খণং কথিতং. যস্মা হেতুপচ্চযা ৰিঞ্ঞাণস্স উপ্পত্তি সতি চ উপ্পাদে নিরোধেন ভৰিতব্বং, উপ্পাদৰযৰন্ততায অনিচ্চং ৰিঞ্ঞাণং, যদি চ অত্তা সিযা পচ্চযেহি ৰিনা সিজ্ঝেয্য, ন চ তথাস্স সিদ্ধি, তস্মা ‘‘ৰিঞ্ঞাণং অনত্তা’’তি অনিচ্চতায অনত্ততা কথিতা.

উদাযীসুত্তৰণ্ণনা নিট্ঠিতা.

৮. আদিত্তপরিযাযসুত্তৰণ্ণনা

২৩৫. কিলেসানং ¶ ¶ অনু অনু ব্যঞ্জনতো পরিব্যত্তিযা উপ্পত্তিপচ্চযভাৰতো অনুব্যঞ্জনং, হত্থপাদাদিঅৰযৰাতি আহ – ‘‘হত্থা সোভনা’’তিআদি. নিমিত্তগ্গাহোতি কিলেসুপ্পত্তিযা নিমিত্তভূতো গাহো. সংসন্দেত্ৰা গহণন্তি অৰযৰে সমোধানেত্ৰা ‘‘ইত্থিপুরিসো’’তিআদিনা একজ্ঝং গহণং. ৰিভত্তিগহণন্তি ৰিভাগেন অনৰসেসগ্গহণং. কুম্ভীলসদিসোতি কুম্ভীলগাহসদিসো. তেনাহ – ‘‘সব্বমেৰ গণ্হাতী’’তি হত্থপাদাদীসু তং তং কোট্ঠাসং ৰিভজিত্ৰা গহণং রত্তপাসদিসো জলূকগাহসদিসো. একজৰনৰারেপি লব্ভন্তীতি ইদং চক্খুদ্ৰারানুসারেন উপ্পন্নমনোদ্ৰারিকজৰনং সন্ধায ৰুত্তং.

নিমিত্তস্সাদেন গন্থিতন্তি যথাৰুত্তে নিমিত্তে অস্সাদগাহেন গন্থিতং সম্বদ্ধং. ভৰঙ্গেনেৰাতি মূলভৰঙ্গেনেৰ. কিলেসভযং দস্সেন্তোতি তথা কিলেসুপ্পত্তিযা সতি অকুসলচিত্তেন অন্তরিতং চে মরণচিত্তং ভৰেয্য, একন্ততো নিরযে ৰা তিরচ্ছানযোনিযা ৰা উপ্পত্তি সিযাতি কিলেসানং ভাযিতব্বং দস্সেন্তো. ‘‘সমযৰসেন ৰা এৰং ৰুত্ত’’ন্তি ৰত্ৰা তমত্থং ৰিৰরন্তো ‘‘চক্খুদ্ৰারস্মিঞ্হী’’তিআদিমাহ. রত্তচিত্তং ৰাতি রাগৰসেন রত্তচিত্তং ৰা. দুট্ঠচিত্তেন কথং আরম্মণরসানুভৰনন্তি? দোমনস্সৰেদনুপ্পত্তি এৰ তস্স আরম্মণরসানুভৰনং দট্ঠব্বং. ইমস্স সমযস্সাতি মরণসমযস্স.

উভিন্নং নাসচ্ছিদ্দানং মজ্ঝে ঠিত-অট্ঠিতুদনং সহ খুরট্ঠেন ছিন্দনং. দণ্ডকৰাসীতি দীঘদণ্ডকা মহাৰাসি. নিপজ্জিত্ৰা নিদ্দোক্কমনন্তি ইমিনা পচলাযিকনিদ্দং পটিক্খিপতি. তত্থ হি কদাচি অন্তরা মিচ্ছাৰিতক্কানং সল্লকানং অৰসরো সিযা, নত্থেৰ নিপজ্জিত্ৰা মহানিদ্দং ওক্কন্তকালে. ৰিতক্কানন্তি মিচ্ছাৰিতক্কানং.

আদিত্তপরিযাযসুত্তৰণ্ণনা নিট্ঠিতা.

৯-১০. পঠমহত্থপাদোপমসুত্তাদিৰণ্ণনা

২৩৬-২৩৭. নৰমং ¶ ‘‘পঞ্ঞাযতী’’তি ৰুচ্চমানে বুজ্ঝনকানং অজ্ঝাসযৰসেন ৰুত্তন্তি আহ – ‘‘দসমে ন হোতীতি ৰুচ্চমানে’’তিআদি. এত্তকমেৰ হি দ্ৰিন্নং সুত্তানং ৰিসেসোতি.

পঠমহত্থপাদোপমসুত্তাদিৰণ্ণনা নিট্ঠিতা.

সমুদ্দৰগ্গৰণ্ণনা নিট্ঠিতা.

১৯. আসীৰিসৰগ্গো

১. আসীৰিসোপমসুত্তৰণ্ণনা

২৩৮. যে ¶ ভিক্খূ তদা ভগৰন্তং পরিৰারেত্ৰা নিসিন্না, তেসু কেচি একৰিহারিনো, কেচি অত্তদুতিযা, কেচি অত্তততিযা, কেচি অত্তচতুত্থা, কেচি অত্তপঞ্চমা হুত্ৰা অরঞ্ঞাযতনেসু ৰিহরন্তীতি ৰুত্তং – ‘‘একচারিক…পে… পঞ্চচারিকে’’তি. সমানজ্ঝাসযতা সভাগৰুত্তিনো. কম্মট্ঠানানুযুঞ্জনস্স কারকে. ততো এৰ তত্থ যুত্তপযুত্তে. পুগ্গলজ্ঝাসযেন কারণভূতেন. পচ্চযভূতন্তি অপস্সযভূতং. ‘‘সেয্যথাপি, ভিক্খৰে’’তি আরভিত্ৰা যাৰ ‘‘তিণ্ণো পারঙ্গতো থলে তিট্ঠতি ব্রাহ্মণো’’তি অযং মাতিকানিক্খেপো. তেসং মাতিকায ৰিত্থারভাজনং. ৰাসনা ভৰিস্সতীতি ৰাসনাৰহং ভৰিস্সতি. সিনেরুং উক্খিপন্তো ৰিযাতিআদি ইমিস্সা দেসনায অনঞ্ঞসাধারণতায সুদুক্করভাৰদস্সনং.

মঞ্চট্ঠেসু মঞ্চসমঞ্ঞা ৰিয মুখট্ঠং ৰিসং ‘‘মুখ’’ন্তি অধিপ্পেতং. সুক্খকট্ঠসদিসভাৰাপাদনতো ‘‘কট্ঠ’’ন্তি ৰুচ্চতীতি কট্ঠং মুখং এতস্সাতি কট্ঠমুখো, দংসনাদিনা কট্ঠসদিসভাৰকরো সপ্পো. অথ ৰা কট্ঠসদিসভাৰাপাদনতো কট্ঠং ৰিসং ৰা মুখে এতস্সাতি কট্ঠমুখো. ইমিনা নযেন সেসপদেসুপি অত্থো ৰেদিতব্বো. ইমে চত্তারোতি ইমে ৰিসকিচ্চভেদেন চত্তারো. ইদানি তং নেসং ৰিসকিচ্চভেদং দস্সেতুং ‘‘তেসূ’’তিআদি ৰুত্তং. অযসূলসমপ্পিতং ৰিযাতি অব্ভন্তরে অযসূলং অনুপ্পৰেসিতং ৰিয. পক্কপূতিপনসং ৰিযাতি পচ্চিত্ৰা কালাতিক্কমে কুথিতপনসফলং ¶ ৰিয. চঙ্গৰারেতি রজকানং খারপরিস্সাৰনে সুরাপরিস্সাৰনে ৰা. অনৰসেসং ছিজ্জনেন অসনিপাতট্ঠানং ৰিয. মহানিখাদনেনাতি মহন্তেন নিখাদনেন.

ৰিসৰেগৰিকারেনাতি ৰিসৰেগগতেন ৰিকারেন. ৰাতেনাতি তস্স সপ্পস্স সরীরং ফুসিত্ৰা উগ্গতৰাতেন. নাসৰাতে পন ৰত্তব্বমেৰ নত্থি. পুগ্গলপণ্ণত্তিৰসেনাতি তেসংযেৰ সোল়সন্নং সপ্পানং আগতৰিসোতিআদিপুগ্গলনামস্স ৰসেন চতুসট্ঠি হোন্তি পচ্চেকং চতুব্বিধভাৰতো. আগতৰিসোতি আগচ্ছৰিসো, সীঘতরং অভিরুহনৰিসোতি অত্থো. ঘোরৰিসোতি কক্খল়ৰিসো, দুত্তিকিচ্ছৰিসো. অযং সীতউদকং ৰিয হোতি গাল়্হদুব্বিনিম্মোচযভাৰেন. উদকসপ্পো হি ঘোরৰিসো হোতি যেৰাতি ৰুত্তং – ‘‘উদকসপ্পাদীনং ৰিসং ৰিযা’’তি. পঞ্ঞাযতীতি গণ্ডপিল়কাদিৰসেন পঞ্ঞাযতি. অনেল়কসপ্পো নাম মহাআসীৰিসো. নীলসপ্পো নাম সাখৰণ্ণো ¶ রুক্খগ্গাদীসু ৰিচরণকসপ্পো. ইমিনা উপাযেনাতি যোযং কট্ঠমুখেসু দট্ঠৰিসানংযেৰ ‘‘আগতৰিসো নো ঘোরৰিসো’’তিআদিনা চতুব্বিধভাৰো ৰুত্তো, ইমিনা উপাযেন. কট্ঠমুখে দট্ঠৰিসাদযোতি কট্ঠমুখেসু দট্ঠৰিসো, ফুট্ঠৰিসো, ৰাতৰিভোতি তযো, পূতিমুখাদীসু চ দট্ঠৰিসাদযো চত্তারো চত্তারো ৰেদিতব্বো.

একেকন্তি চতুসট্ঠিযো একেকং. চতুধাতি অণ্ডজাদিৰিভাগেন চতুধা ৰিভজিত্ৰা. ছপণ্ণাসানীতি ছপণ্ণাসাধিকানি. গতমগ্গস্সাতি যথাৰুত্তসঙ্খ্যাগতমগ্গস্স পটিলোমতো সংখিপ্পমানা অনুক্কমেন চত্তারোৰ হোন্তি. কুলৰসেনাতি কট্ঠমুখাদিজাতিৰসেন.

সকলকাযে আসিঞ্চিত্ৰা ৰিয ঠপিতৰিসাতি হি তেসং ফুট্ঠৰিসতা, ৰাতৰিসতা ৰুচ্চতি. এৰন্তি ‘‘আসিত্তৰিসা’’তিআদিনা. এত্থাতি আসীৰিসসদ্দে ৰচনত্থো নিরুত্তিনযেন ৰেদিতব্বো. উগ্গততেজাতি উদগ্গতেজা, অত্তনো ৰিসতেজেন নেসং কুরূরদব্বতা ৰা. দুন্নিম্মদ্দনৰিসাতি মন্তাগদেহি অনিম্মদ্দনীযৰিসা. চত্তারো আসীৰিসাতি এত্থ ইতি-সদ্দো আদিঅত্থো. তেনেত্থ অৰসেসপাল়িং সঙ্গণ্হাতি.

আসীৰিসেসূতি ¶ ইমে আসীৰিসা দট্ঠৰিসা এৰাতি ৰেদিতব্বা. সরীরট্ঠকেসুযেৰাতি তেন পুরিসেন তেসং কস্সচি অনিট্ঠস্স অকতত্তা আযুসেসস্স চ ৰিজ্জমানত্তা নং ন দংসিংসূতি দট্ঠব্বং. পুচ্ছি যথাভূতং পৰেদেতুকামো. দুরুপট্ঠাহাতি দুরুপট্ঠানা. সোত্থিমগ্গোতি সোত্থিভাৰস্স উপাযো.

অন্তরচরোতি অন্তরং চরো সুখসত্তু ৰিস্সাসঘাতী. তেনাহ ‘‘ৰধকো’’তি. ইদানি তাসং পেসনে কারণং দস্সেতুং ‘‘পঠম’’ন্তিআদি ৰুত্তং. অভিমুখগতং ৰিয অভিমুখগতং. ঈদিসীপি হি ৰচোযুত্তি লোকে নিরূপীযতি সন্তিযং পুরিসং ঠপেতীতি ৰিয. তস্মা অভিমুখগতন্তি অভিমুখং তেন সম্পত্তন্তি অত্থো. ৰঙ্কসণ্ঠানং ফলকং রুক্খমূলে আগতাগতানং নিসীদনত্থায অত্থতং.

অরিত্তহত্থো পুরিসো সন্তারেতি এতাযাতি সন্তারণী. ওরিমতীরতো উত্তরণায সেতু উত্তরসেতু. একেন দ্ৰীহি ৰা গন্তব্বো রুক্খমযো সেতু রুক্খসেতু. জঙ্ঘসত্থেন গমনযোগ্গো সেতু জঙ্ঘসেতু. সকটেন গন্তুং সক্কুণেয্যো সকটসেতু. ন খো এস ব্রাহ্মণো পরমত্থতো. তদত্থো পন একদেসেন সম্ভৰতীতি তথা ৰুত্তন্তি দস্সেন্তো ‘‘এত্তকানং পচ্চত্থিকানং বাহিতত্তা’’তি আহ. দেসনন্তি ¶ উদ্দেসদেসনং. ৰিনিৰত্তেন্তোতি পটিসংহরন্তো. ন লদ্ধো ৰতাসীতি ন লদ্ধো ৰত আসি.

রাজা ৰিয কম্মং সত্তেসু ইস্সরিযস্স ৰত্তাপনতো. রাজা…পে… পুথুজ্জনো ৰট্টদুক্খসঙ্খাতাপরাধতায. ঞাণপলাযনেনাতি মহাভূতেহি নিব্বিন্দিত্ৰা ৰিরজ্জিত্ৰা ৰিমুচ্চিতুকামতাৰসেন উপ্পন্নঞাণপলাযনে মগ্গাধিগমসিদ্ধেনেৰ ঞাণপলাযনেন. এৰঞ্হেত্থ উপমাসংসন্দনং মত্থকং পাপিতমেৰ হোতি.

যথেৰ হীতিআদিনা একদেসনাসমুদাযস্স নিদস্সনং আরদ্ধং. যথাৰুত্তৰচনং অট্ঠকথাচরিযানং ৰচনেন সমত্থেতি ‘‘পত্থদ্ধো ভৰতী’’তিআদিনা. তত্থ কট্ঠমুখেন ৰাতি ৰা-সদ্দো উপমত্থো. যথা কট্ঠমুখেন সপ্পেন দট্ঠো পত্থদ্ধো হোতি, এৰং পথৰীধাতুপ্পকোপেন সো ¶ কাযো কট্ঠমুখেৰ হোতি, কট্ঠমুখগতো ৰিয পত্থদ্ধো হোতীতি অত্থো. অথ ৰা ৰা-সদ্দো অৰধারণত্থো. সো ‘‘পথৰীধাতুপকোপেন ৰা’’তি এৰং আনেত্ৰা সম্বন্ধিতব্বো. অযঞ্হেত্থ অত্থো – কট্ঠমুখেন দট্ঠোপি কাযো পথৰীধাতুপ্পকোপেনেৰ পত্থদ্ধো হোতি, তস্মা পথৰীধাতুযা অৰিযুত্তো সো কাযো সব্বদা কট্ঠমুখগতো ৰিয হোতীতি. ৰা-সদ্দো ৰা অনিযমত্থো. তত্রাযমত্থো – কট্ঠমুখেন দট্ঠো কাযো পত্থদ্ধো হোতি ৰা, ন ৰা মন্তাগদৰসেন. পথৰীধাতুপ্পকোপেন পন মন্তাগদরহিতো সো কাযো কট্ঠমুখগতো ৰিয হোতি একন্তপত্থদ্ধোতি. তত্থ কাযোতি পকতিকাযো. পূতিকোতি কুথিতো. সন্তত্তোতি সব্বসো তত্তো মহাদাহপ্পত্তো. সঞ্ছিন্নোতি সব্বসো ছিন্নো চুণ্ণৰিচুণ্ণভূতো. যদা কাযো পত্থদ্ধাদিভাৰপ্পত্তো হোতি, তদা পুরিসো কট্ঠমুখাদিসপ্পস্স মুখে ৰত্তমানো ৰিয হোতীতি অত্থো.

ৰিসেসতোতি কট্ঠমুখাদিৰিসেসতো চ পথৰীআদিৰিসেসতো চ. অনত্থগ্গহণতোতিআদি অচেতনেসুপি ভূতেসু সচেতনেসু ৰিয অনত্থাদীনং পচ্চক্খতায নিব্বেদজননত্থং আরদ্ধং. তত্থ আসযতোতি পৰত্তিট্ঠানতো. এতেসন্তি মহাভূতানং. সদিসতাতি ৰম্মিকাসযসুসিরগহনসঙ্কারট্ঠানাসযতায চ সদিসতা.

পচ্চত্তলক্খণৰসেনাতি ৰিসুং ৰিসুং লক্খণৰসেন. পথৰীআদীনং কক্খল়ভাৰাদি, তংসমঙ্গিনো পুগ্গলস্স কক্খল়ভাৰাপাদনাদিনা ৰিকারুপ্পাদনতো ৰিসৰেগৰিকারতো সদিসতা ৰেদিতব্বা.

অনত্থাতি ¶ ব্যসনা. ব্যাধিন্তি কুট্ঠাদিব্যাধিং. ভৰে জাতাভিনন্দিনোতি ভৰেসু জাতিযা অভিনন্দনসীলা. পঞ্চৰোকারে হি জাতিযা অভিনন্দনা নাম মহাভূতাভিনন্দনা এৰ.

দুরুপট্ঠানতরানীতি দুপ্পটিকারতরানি. দুরাসদাতি দুরুপসঙ্কমনা. ‘‘উপট্ঠামী’’তি উপসঙ্কমিতুং ন সক্কোন্তি. পরিজানাম কম্মনামানি, উপকারা নাম নত্থি. অনন্তদোসূপদ্দৰতোতি অপরিমাণদোসূপদ্দৰহেতুতো. একপক্খলন্তি একদুক্খং.

রূপক্খন্ধো ¶ ভিজ্জমানো চত্তারো অরূপক্খন্ধে গহেত্ৰাৰ ভিজ্জতি অরূপক্খন্ধানং একনিরোধত্তা. ৰত্থুরূপম্পি গহেত্ৰাৰ ভিজ্জন্তি পঞ্চৰোকারে অরূপক্খন্ধেসু ভিন্নেসু রূপক্খন্ধস্স অৰট্ঠানাভাৰতো. এত্তাৰতাতি লোভুপ্পাদনমত্তেন. পঞ্ঞা নাম অত্তভাৰে উত্তমঙ্গং পঞ্ঞুত্তরত্তা কুসলধম্মানং, সতি চ কিলেসুপ্পত্তিযং পঞ্ঞায অনুপ্পজ্জনতো ৰুত্তং – ‘‘এত্তাৰতা পঞ্ঞাসীসং পতিতং নাম হোতী’’তি. যোনিযো উপনেতি তদুপগস্স কম্মপচ্চযস্স ভাৰে. ‘‘জাতিভযং, জরাভযং, মরণভযং, চোরভয’’ন্তিআদিনা আগতানি পঞ্চৰীসতি মহাভযানি, ‘‘হত্থম্পি ছিন্দতী’’তিআদিনা আগতানি দ্ৰত্তিংস কম্মকারণানি আগতানেৰ হোন্তি কারণস্স সমৰট্ঠিতত্তা. নন্দীরাগো সঙ্খারক্খন্ধোতি সঙ্খারক্খন্ধপরিযাপন্নত্তা ৰুত্তং.

পাল়িযংযেৰ আগতা ‘‘চক্খুতো চেপি নং, ভিক্খৰে’’তিআদিনা. কিঞ্চি অলভিত্ৰাতি তস্মিং সুঞ্ঞগামে চোরানং গয্হূপগস্স অলাভৰচনেনেৰ তস্স পুরিসস্স অত্তনো পটিসরণস্স অলাভো ৰুত্তো এৰ হোতীতি ন উদ্ধটো, পুরিসট্ঠানিযো ভিক্খু, চোরা পন বাহিরাযতনট্ঠানিযা. অভিনিৰিসিত্ৰাতি ৰিপস্সনাভিনিৰেসং কত্ৰা. অজ্ঝত্তিকাযতনৰসেন দেসনায আগতত্তা ৰুত্তং ‘‘উপাদারূপকম্মট্ঠানৰসেনা’’তি.

বাহিরানন্তি বাহিরাযতনানং. পঞ্চ কিচ্চানীতি চোরেহি তদা কাতব্বানি পঞ্চ কিচ্চানি. হত্থসারন্তি অত্তনো সন্তকে হত্থেহি গহেতব্বসারভণ্ডং. পাতনাদিৰসেন হত্থপরামাসং করোন্তি. পহারঠানেতি পহটট্ঠানে. ঠানসো তস্মিং এৰ খণেতি ৰদন্তি. অত্তনো সুখাৰহং কুসলধম্মং পহায দুক্খাৰহেন অকুসলেন সমঙ্গিতা সুখাৰহং ভণ্ডং পহায বহি নিক্খমনং ৰিযাতি ৰুত্তং সুখনিস্সযত্তা তস্স. হত্থপরা…পে… আপজ্জনকালো গুণসরীরস্স তদা পমাদেন বাধিতত্তা. পহার…পে… কালো ততো দল়্হতরং গুণসরীরস্স বাধিতত্তা. পহারং…পে… অস্সমণকালো গুণসরীরস্স মরণপ্পত্তিসদিসত্তা. অৰসেসজনস্স দাসপরিভোগেন পরিভুঞ্জিতব্বতা অঞ্ঞথত্তপ্পত্তিগিহিভাৰাপত্তিযা নিদস্সনভাৰেন ৰুত্তা. যং ‘‘ছসু দ্ৰারেসু আরম্মণে ¶ আপাথগতে’’তি ৰুত্তং, তমেৰ আরম্মণং নিস্সায সম্পরাযিকো দুক্খক্খন্ধো ৰেদিতব্বোতি যোজনা.

রূপাদীনীতি ¶ রূপসদ্দগন্ধরসানি. তেসন্তি যথাৰুত্তভূতুপাদারূপানং. লহুতাদিৰসেনাতি তেসং লহুতাদিৰসেন. দুরুত্তরণট্ঠোতি উত্তরিতুং অসক্কুণেয্যভাৰো ওঘট্ঠো. ৰুত্তনযেনাতি ‘‘সম্পযুত্তা ৰেদনা ৰেদনাক্খন্ধো’’তিআদিনা ৰুত্তনযেন. চতুমহাভূতাদীহীতি আদিসদ্দেন উপাদানক্খন্ধাদীনং গহণং. চিত্তকিরিযদস্সনত্থন্তি চিত্তপযোগদস্সনত্থং. ৰুত্তৰাযামমেৰাতি ‘‘সম্মাৰাযামো’’তি যো অরিযমগ্গে ৰুত্তো. ভদ্দেকরত্তাদীনীতি ‘‘অজ্জেৰ কিচ্চং আতপ্প’’ন্তিআদিনা (ম. নি. ৩.২৭২, ২৭৫, ২৭৬) ৰুত্তানি ভদ্দেকরত্তসুত্তাদীনি.

কুণ্ঠপাদোতি ছিন্নপাদোৰ হুত্ৰা গতিৰিকলো. মানসং বন্ধতীতি তস্মিং চিত্তে কিচ্চং নিবন্ধতি. ‘‘অযং অরিযমগ্গো ময্হং ওঘুত্তরনুপাযো’’তি তত্থ চিত্তস্স সন্নিট্ঠানং পুন তত্থ পৰত্তনং ৰীরিযারম্ভো চিত্তবন্ধনং.

তস্স নামরূপস্স ইমে নন্দীরাগাদযো তণ্হাৰিজ্জাদযোতি কত্ৰা পচ্চযো ধম্মাযতনেকদেসো. অরিযমগ্গনিব্বানতণ্হাৰজ্জো ইধ ধম্মাযতনেকদেসোতি চ. সোল়সহাকারেহীতি পীল়নাদীহি সোল়সহি আকারেহি. সতিপট্ঠানৰিভঙ্গে আগতনযেন সট্ঠিনযসহস্সেহি. দেসনাপরিযোসানে…পে… পতিট্ঠহিংসূতি ৰিপঞ্চিতঞ্ঞূ এৰেত্থ গহণৰসেন অধিগতৰিসেসা পরিচ্ছিন্দিতা. তে হি তদা ধম্মপটিগ্গাহকভাৰেন সত্থু সন্তিকে সন্নিসিন্না. উগ্ঘটিতঞ্ঞূনং পন নেয্যানঞ্চ ৰিসেসাধিগমো অট্ঠকথাযং ন রুল়্হোতি ইধ ন গহিতোতি.

আসীৰিসোপমসুত্তৰণ্ণনা নিট্ঠিতা.

২. রথোপমসুত্তৰণ্ণনা

২৩৯. সুসংৰুতিন্দ্রিযস্স ভোজনে মত্তঞ্ঞুনো সতস্স সম্পজানস্স ৰিহরতো কিলেসনিমিত্তং দুক্খং অনৰসরন্তি সুখসোমনস্সবহুলতা ৰুত্তা. যৰতি তেন ফলং মিস্সিতং ৰিয হোতীতি যোনি, একন্তিকং কারণং. অস্সাতি ভিক্খুনো. পরিপুণ্ণন্তি অৰিকলং. অনৰসেসং আসৰে খেপেতীতি আসৰক্খযো, অগ্গমগ্গো. যং যন্তি দন্ধং মজ্ঝং জৰোতি জৰাদীসু যং যং গমনং. রক্খণত্থাযাতি কিলেসচোরেহি রক্খণত্থায ¶ . ৰেগনিগ্গহণত্থাযাতি কিলেসহেতুকস্স ¶ ইন্দ্রিযৰেগস্স নিগ্গণ্হনত্থায. নিব্বিসেৰনত্থাযাতি ৰিসেৰনস্স ৰিপ্ফন্দিতস্স নিরোধনায. কিলেসূপসমত্থাযাতি কিলেসানং উপরূপরি সমনত্থায ৰূপসমনত্থায.

সমণরতি নাম সমথৰিপস্সনামগ্গফলসুখানি. দন্তানম্পি সিন্ধৰানং সারথিনো পযোগেন সিযা কাচি ৰিসেৰনমত্তাতি তদভাৰং দস্সেন্তো ‘‘নিব্বিসেৰনে কত্ৰা পেসেন্তো’’তি ৰুত্তং. ঞাণং গচ্ছতীতি অসঙ্গমনং পৰত্ততি পগেৰ ইন্দ্রিযভাৰনায কতত্তা, কিলেসনিগ্গহস্স সুখেনেৰ সিদ্ধত্তা. দাযকস্স অজ্ঝাসযো ৰসো উল়ারো লামকো. দেয্যধম্মস্স পমাণং ৰসো অপ্পকং বহুকঞ্চ.

মহামণ্ডপট্ঠানং নাম লোহপাসাদস্স পুরতো এৰ মহাভিক্খুসঙ্ঘস্স সন্নিপাতকালে তেসং পহোনকৰসেন মহামণ্ডপস্স কত্তব্বট্ঠানং. গহণমানন্তি পরিৰিসগহণভাজনং.

পকতিযা ভত্তকারকিচ্চে অধিগতো উপট্ঠাকুপাসকো. মুদুসমখরসঞ্ঞিতেহি, দহনপচনভজ্জনসঞ্ঞিতেহি ৰা তীহি পাকেহি.

পরিসোধেত্ৰাতি রঞ্ঞো অনুচ্ছৰিকভাৰং পরিসোধেত্ৰা. ভূমিযং ছড্ডেসি ‘‘ভিক্খূনং অদত্ৰা মযা মুখে পক্খিত্ত’’ন্তি. মুখেন গণ্হি তস্স নিদ্দোসভাৰং দস্সেতুং. মত্তং জানাপেতুং পমজ্জি. ‘‘ত্ৰং কুতো আগতো’’তি পুচ্ছনে পমাদং আপজ্জি. অনুভাগোতি অৰসিট্ঠভাগো. ইদমত্থিযন্তি ইদং পযোজনং. ইতরন্তি পাল়িযং অনাগতম্পি আহারে পমাণজাননং.

সযনং সেয্যা, কামভোগীনং সেয্যা কামভোগিসেয্যা. দক্খিণপস্সেন সযানো নাম নত্থি দক্খিণহত্থেন কাতব্বকিচ্চকরণতো. তেজুস্সদত্তাতি ইদং অনুত্রাসস্সেৰ সীহস্স সযনন্তি দস্সেতুং ৰুত্তং. দ্ৰে পুরিমপাদে একস্মিং, পচ্ছিমপাদে একস্মিং ঠানে ঠপেত্ৰাতি হি ইদং পাদানং অৰিক্খিত্তভাৰকরণদস্সনং.

চতুত্থজ্ঝানসেয্যাতি চতুত্থজ্ঝানিকং ফলসমাপত্তিং ৰদতি. যেভুয্যেন হি তথাগতা ফলসমাপত্তিং সমাপজ্জিত্ৰাৰ সযন্তি. সা চ নেসং চতুত্থজ্ঝানতো ৰুট্ঠায, কিলেসপরিনিব্বানস্স চ কতত্তাতি ৰদন্তি ¶ . ইধ সীহসেয্যা আগতা পাদং অচ্চাধায পুব্বেনাপরং অজহিতসংলক্খণা সেয্যাতি কত্ৰা. তেনাহ ‘‘অযং হী’’তিআদি. এৰন্তি ‘‘দক্খিণেন পস্সেনা’’তিআদিনা ৰুত্তাকারেন সেয্যং কপ্পেতি.

কথং ¶ নিদ্দাযন্তো সতো সম্পজানো হোতি? ভৰঙ্গচিত্তেন হি নিদ্দূপগমনন্তি অধিপ্পাযো. অপ্পহানেনাতি তদধিমুত্ততায তদপ্পহানং দট্ঠব্বং. তথা তেসু নিদ্দোক্কমনস্স আদিপরিযোসানেসু অজহিতসতিসম্পজঞ্ঞং হোতি. তেনাহ – ‘‘নিদ্দং ওক্কমন্তোপি সতো সম্পজানো হোতী’’তি. এতং পনাতি ‘‘নিদ্দং ওক্কমন্তোপি সতো সম্পজানো হোতী’’তি ৰুত্তনযং ৰদতি. ঞাণধাতুকন্তি ন রোচযিংসূতি নিদ্দোক্কমনেপি জাগরণে পৰত্তঞাণসভাৰমেৰাতি ন রোচযিংসু পোরাণা. নিরন্তরং ভৰঙ্গচিত্তেসু ৰত্তমানেসু সতিসম্পজঞ্ঞাসম্ভৰোতি অধিপ্পাযো. পুরিমস্মিঞ্হি নযে সতিসম্পজঞ্ঞস্স অসংৰরো, ন ভৰঙ্গস্স. ইন্দ্রিযসংৰরো, ভোজনে মত্তঞ্ঞুতা, জাগরিযানুযোগোতি ইমেহি তিৰঙ্গিকা, নিমিত্তানুব্যঞ্জনপরিৰজ্জনাদি সব্বং ৰিপস্সনাপক্খিকমেৰাতি অধিপ্পাযো.

তানেৰাতি ৰিপস্সনাক্খণে পৰত্তানি ইন্দ্রিযাদীনি. যাৰ অরহত্তা দেসনা ৰিত্থারতো কথেতব্বা. পাল়িযং পন ‘‘যোনি চস্স আরদ্ধা হোতি আসৰানং খযাযা’’তি সঙ্খেপেন কথিতা.

রথোপমসুত্তৰণ্ণনা নিট্ঠিতা.

৩. কুম্মোপমসুত্তৰণ্ণনা

২৪০. অট্ঠিকুম্মোতি পিট্ঠিযং তিখিণট্ঠিকো কুম্মো. তন্তিবন্ধোতি ব্যাৰটো. সমুগ্গে ৰিয অত্তনো কপালে পক্খিপিত্ৰা. সমোদহন্তো সম্মা ওদহন্তো অজ্ঝত্তমেৰ দহন্তো. আরম্মণকপালেতি আরম্মণকটাহে. সমোদহন্তোতি দিট্ঠমত্তস্সেৰ চ গহণতো মনোৰিতক্কে তত্থেৰ সম্মদেৰ ওদহন্তো. তঞ্হি ৰিসযৰসেন পৰত্তিতুং অদেন্তো. পঞ্চ ধম্মেতি ‘‘কালেন ৰক্খামী’’তিআদিনা (পরি. ৩৬২) ৰুচ্চমানে.

কুম্মোপমসুত্তৰণ্ণনা নিট্ঠিতা.

৪. পঠমদারুক্খন্ধোপমসুত্তৰণ্ণনা

২৪১. ৰিলাসমানো ¶ ৰিয সাগরং পত্ৰা. অন্তোসাখোতি গঙ্গায তীরস্স অন্তো ওনতসাখো. তেমেতীতি তিন্তো হোতি. তিরিযং পতিতো দণ্ডসেতু ৰিয ঠিতত্তা মহাজনস্স পচ্চযো জাতো, তথা মহন্তভাৰেন গঙ্গাসোতং ওতরণাদি নত্থি.

অযং ¶ হীতি অনন্তরং ৰুত্তপুগ্গলো. অরিযমগ্গং ওরুয্হাতি চতুব্বিধং অরিযমগ্গৰীথিং ওতরিত্ৰা. ‘‘চিত্তং নামেত’’ন্তিআদিনা চিন্তেত্ৰা গিহিবন্ধনং ন ৰিস্সজ্জেতীতি সম্বন্ধো. অত্তনো ভজমানকেতি অত্তনো ভজন্তে. জীৰিকত্থায পযুজ্জিতব্বতো পযোগো, খেত্তৰত্থাদি. ততো পযোগতো উট্ঠিতং আযং. কিঞ্চাপি ভিক্খূনং কাযসামগ্গিং দেতি ভিক্খত্থায.

মুণ্ডঘটন্তি ভিন্নোট্ঠং ঘটং. খন্ধেতি অংসে. সঙ্ঘভোগন্তি সঙ্ঘসন্তকং ভোগগামং গন্ত্ৰা. অত্থতো এৰং ৰদন্তীতি তথা অত্থস্স সম্ভৰতো এৰং ৰদন্তা ৰিয হোন্তি. যাগুমত্তকে যাগুন্তি যাগুং পিৰিত্ৰা তায অপরিপক্কায এৰ অঞ্ঞং যাগুং অজ্ঝোহরিত্ৰাতি সম্বন্ধো.

কিলেসানুরঞ্জিতোৰাতি যোনিসোমনসিকারস্স অভাৰেন কিলেসানুগতচিত্তো এৰ. অক্খীনি নীহরিত্ৰাতি কোধৰসেন অক্খিকে করোন্তো অক্খীনি নীহরিত্ৰা ৰিচরিস্সতি. উদ্ধতো হোতি অৰূপসন্তো.

দিট্ঠিগতিকোতি সাসনিকো এৰং অযোনিসো উম্মুজ্জিত্ৰা সাসনং উদ্ধম্মং উব্বিনযং কত্ৰা দীপেন্তো অরিট্ঠসদিসো. তেনাহ ‘‘সো হী’’তিআদি. অরূপভৰে রূপং অত্থি, অঞ্ঞথা ততো চুতস্স কুতো রূপক্খন্ধস্স সম্ভৰো. অসঞ্ঞীভৰে চিত্তং অত্থীতি এত্থাপি এসেৰ নযো. বহুচিত্তক্খণিকো লোকুত্তরমগ্গো ‘‘যো ইমে চত্তারো সতিপট্ঠানে ভাৰেয্য সত্তৰস্সানী’’তিআদিৰচনতো (দী. নি. ২.৪০৪; ম. নি. ১.১৩৭). অনুসযো চিত্তৰিপ্পযুত্তো, অঞ্ঞথা সাৰজ্জানৰজ্জধম্মানং একজ্ঝং উপ্পত্তি সিযা. তে চ সত্তা সন্ধাৰন্তি সংসরন্তি, অঞ্ঞথা কম্মফলানং সম্বন্ধো ন সিযাতি. ইতি ৰদন্তো এৰং মিচ্ছাৰাদং পগ্গয্হ ৰদন্তো.

তেমনরুক্খো ৰিয…পে… দুল্লভধম্মস্সৰনো চ পুগ্গলো সদ্ধাসিনেহেন অতেমনতো. কতৰিনযো সিক্খিতৰিনযো যথা ‘‘কতৰিজ্জো’’তি. ধম্মকথিকানং ¶ ৰিচারেথাতি ইদং দেয্যধম্মং ধম্মকথিকানং অয্যানং তস্স তস্স যুত্তৰসেন ৰিচারেথাতি নিয্যাতনৰসেন ৰত্ৰা. দিৰাকথিকো সরভাণকো সাযন্হে কথেতি, পুরিমযামং কথেন্তো রত্তিকথিকো ভাণকপুগ্গলো.

নন্দনৰনাভিরামেতি নন্দনৰনং ৰিয মনোরমে. অস্স ভারহারভিক্খূতি অস্স কিচ্চৰাহকভিক্খূ উপজ্ঝাযাদযো. সুখনিসিন্নকথন্তি পটিসন্থারকথাপুব্বকং উপনিসিন্নকথং সুত্ৰা.

ঠিতসণ্ঠানেনেৰ ¶ ঠিতাকারেনেৰ ঠিতং, নপ্পযুত্তন্তি অত্থো. চিত্তকম্মমূলাদীনি ঠিতসণ্ঠানেনেৰ ঠিতাতি যোজনা. মুদুতাযাতি মুদুহদযতায সাপেক্খতায.

পটিপদন্তি সমথৰিপস্সনাপটিপত্তিং. দীপেত্ৰা পকাসেত্ৰা পাকটং কত্ৰা. তত্রুপ্পাদোতি তত্র উপ্পজ্জনকআযুপ্পাদো. খেত্তং সন্ধায ৰদতি. তেল…পে… হত্থাতি তেলঘট-মধুঘটফাণিতঘটাদিহত্থা. অপক্কমিংসু দুব্বিচারিতত্তা. পূরেসীতি হেট্ঠা চ তত্থ তত্থ অতীতানি কালৰচনানি পোরাণট্ঠকথায আগতত্তা কির ৰুত্তানি.

উপগমনানুপগমনাদীনি ওরিমস্স পারিমস্স চ উপগমনানুপগমনানি চেৰ মজ্ঝে সংসীদনানি চ. পটিৰিজ্ঝিতুন্তি জানিতুং. এতন্তি যথাৰুত্তং চক্খুসভাৰং. দোমনস্সন্তি তস্সেৰ মন্দভাৰপচ্চযং দোমনস্সং. আপজ্জন্তোপি উপগচ্ছতি নাম তন্নিমিত্তসংকিলেসস্স উপ্পাদিতত্তা. তিণ্ণং লক্খণানন্তি হুত্ৰা অভাৰতো আদিঅন্তৰন্ততো তাৰকালিকতো নিচ্চপটিক্খেপতোতিআদীনং তিণ্ণং লক্খণানং সল্লক্খণৰসেন.

ৰামতোতি মিচ্ছা. দক্খিণতোতি সম্মা. যথা তস্স তস্স সত্তস্স ওরভাৰত্তা অজ্ঝত্তিকানি আযতনানি ওরিমং তীরং কত্ৰা ৰুত্তানি, এৰং নেসং পরভাৰত্তা বাহিরানি আযতনানি পারিমং ৰুত্তানি. অপাযমজ্ঝে সংসরণহেতুতায নন্দীরাগোৰ ‘‘মজ্ঝে সংসাদো’’তি ৰুত্তো.

উন্নতোতি ‘‘সেয্যোহমস্মী’’তিআদিনা উন্নতিং উপগতো. অত্তুক্কংসনে পংসুকূলিকভাৰেন অত্তানং দহনতো অঞ্ঞাকারতাগহেতব্বো. পাসাণো নু খো এস খাণুকোতি গহেতব্বদারুক্খন্ধসদিসো ৰুত্তো.

চুণ্ণৰিচুণ্ণং ¶ হোতি আৰট্টৰেগস্স বলৰভাৰতো. চতূসু অপাযেসূতি পঞ্চকামগুণাৰট্টে পতিতপুগ্গলো মনুস্সলোকেপি গুণসরীরভেদনেন দীঘরত্তং চুণ্ণৰিচুণ্ণং আপজ্জতিযেৰ, তস্স তথা আপন্নত্তা. এৰঞ্হি সো অপাযেসু তাদিসেসু জাযতি.

সীলস্স দুট্ঠং নাম নত্থি, তস্মা অভাৰত্থো ইধ দু-সদ্দোতি আহ ‘‘নিস্সীলো’’তি. ‘‘পাপং পাপেন সুকর’’ন্তিআদীসু (উদা. ৪৮) ৰিয পাপ-সদ্দো নিহীনপরিযাযোতি আহ ‘‘লামকধম্মো’’তি. ন সুচীতি কাযৰাচাচিত্তেহি ন সুচি. সঙ্কায ৰাতি অত্তনো ৰা সঙ্কায ¶ পরেসং সমাচারকিরিযং সরতি আসঙ্কতি. তেনাহ ‘‘তস্স হী’’তিআদি. তানি কম্মানি পৰিসতীতি তানি কম্মানি করোন্তানং অন্তরে পৰিসতি. গুণানং পূতিভাৰেনাতি গুণভাৰেন গহিতানং সীলধম্মানং সংকিলিট্ঠভাৰপ্পত্তিযা. কচৰরজাতোতি অব্ভন্তরং সঞ্জাতকচৰরো, কচৰরভূতো ৰা.

অণণা পব্বজ্জাতি অণণস্সেৰ পব্বজ্জা. ওরিমতীরাদীনং উপগমনানুপগমনাদীনং জোতিতত্তা ৰট্টৰিৰট্টং কথিতং.

পঠমদারুক্খন্ধোপমসুত্তৰণ্ণনা নিট্ঠিতা.

৫. দুতিযদারুক্খন্ধোপমসুত্তৰণ্ণনা

২৪২. যা আপত্তি ৰুট্ঠানগামিনী দেসনাগামিনী, তং পটিচ্ছাদিতকালতো পট্ঠায সংকিলিট্ঠা নাম অন্তরাযিকভাৰতো. আৰীকতা পন অনাপত্তিট্ঠানে তিট্ঠতীতি অসংকিলিট্ঠা নাম. তেনাহ – ‘‘আৰীকতা হিস্স ফাসু হোতী’’তি. এৰরূপং সংকিলিট্ঠন্তি পটিচ্ছাদিততায ৰা দুট্ঠুল্লভাৰেন ৰা সংকিলিট্ঠং.

দুতিযদারুক্খন্ধোপমসুত্তৰণ্ণনা নিট্ঠিতা.

৬. অৰস্সুতপরিযাযসুত্তৰণ্ণনা

২৪৩. সন্থাগারন্তি সঞ্ঞাপনাগারং. তেনাহ ‘‘উয্যোগকালাদীসূ’’তিআদি. আদি-সদ্দেন মঙ্গলমহাদীনং সঙ্গহো দট্ঠব্বো. সন্থরন্তীতি ৰিস্সমন্তি ¶ , পরিস্সমং ৰিনোদেন্তীতি অত্থো. সহাতি সন্নিপাতৰসেন একজ্ঝং. সহ অত্থানুসাসনং অগারন্তি তস্মিং অত্থে ত্থ-কারস্স ন্থ-কারং কত্ৰা ‘‘সন্থাগার’’ন্তি ৰুচ্চতীতি দট্ঠব্বং, পঠমং তত্থ সম্মন্তনৰসেন সন্থরন্তি ৰিচারেন্তীতি অত্থো.

তেপিটকং বুদ্ধৰচনং আগতমেৰ ভৰিস্সতীতি বুদ্ধৰচনস্স আগমনসীসেন অরিযফলধম্মানম্পি আগমনং ৰুত্তমেৰ. তিযামরত্তিং তত্থ ৰসন্তানং ফলসমাপত্তিৰল়ঞ্জনং হোতীতি. তস্মিঞ্চ ভিক্খুসঙ্ঘে কল্যাণধম্মা কল্যাণপুথুজ্জনা ৰিপস্সনং উস্সুক্কাপেন্তা হোন্তীতি অরিযমগ্গধম্মানম্পি তত্থ আগমনং হোতিযেৰ.

অল্লগোমযেনাতি ¶ অচ্ছেন অল্লগোমযরসেন. ওপুঞ্জাপেত্ৰাতি ৰিলিম্পেত্ৰা. চতুজ্জাতিযগন্ধেহীতি কুঙ্কুমতুরুক্খযৰনপুপ্ফতমালপত্তগন্ধেহি. নানাৰণ্ণেতি নীলাদিৰসেন নানাৰণ্ণে, ভিত্তিৰিসেসৰসেন নানাসণ্ঠানরূপে. ‘‘মহাপিট্ঠিককোজৰেতি হত্থিপিট্ঠিআদীসু অত্থরিতব্বতায ‘মহাপিট্ঠিকা’তি লদ্ধসমঞ্ঞে কোজৰে’’তি ৰদন্তি. কুত্তকে পন সন্ধাযেতং ৰুত্তং, ‘‘চতুরঙ্গুলাধিকপুপ্ফা মহাপিট্ঠিককোজৰা’’তিপি ৰদন্তি. হত্থত্থরঅস্সত্থরা হত্থিঅস্সপিট্ঠীসু অত্থরিতব্বা হত্থিঅস্সরূপৰিচিত্তা চ অত্থরকা. সীহত্থরকাদযো পন সীহরূপাদিৰিচিত্তা এৰ অত্থরকা. চিত্তত্থরকং নানাৰিধরূপেহি চেৰ নানাৰিধমালাকম্মাদীহি চ ৰিচিত্তং অত্থরকং.

উপধানন্তি অপস্সযনং. উপদহিত্ৰাতি অপস্সযযোগ্গভাৰেন ঠপেত্ৰা. গন্ধেহি কতমালা গন্ধদামং. তমালপত্তাদীহি কতমালা পত্তদামং. আদি-সদ্দেন হিঙ্গুলতক্কোলজাতিফলজাতিপুপ্ফাদীহি কতদামং সঙ্গণ্হাতি. পল্লঙ্কাকারেন কতপীঠং পল্লঙ্কপীঠং. তীসু পস্সেসু একপস্সে এৰ ৰা সউপস্সযং অপস্সযপীঠং. অনপস্সযং মুণ্ডপীঠং. যোজনাৰট্টেতি যোজনপরিক্খেপোকাসে.

সংৰিধাযাতি অন্তরৰাসকস্স কোণপদেসং ইতরপদেসঞ্চ সমং কত্ৰা ৰিধায. তেনাহ – ‘‘কত্তরিযা পদুমং কন্তেন্তো ৰিযা’’তি, ‘‘তিমণ্ডলং পটিচ্ছাদেন্তো’’তি চ. যস্মা বুদ্ধানং রূপসম্পদা ৰিয আকপ্পসম্পদাপি পরমুক্কংসতং গতা, তস্মা তদা ভগৰা এৰং সোভেয্যাতি দস্সেন্তো ‘‘সুৰণ্ণপামঙ্গেনা’’তিআদিমাহ. তত্থ ‘‘অসমেন বুদ্ধৰেসেনা’’তিআদিনা ¶ তদা ভগৰা বুদ্ধানুভাৰস্স নিগুহনে কারণাভাৰতো তত্থ সন্নিপতিতদেৰমনুস্সনাগযক্খগন্ধব্বাদীনং পসাদজননত্থং অত্তনো সভাৰপকতিযাৰ কপিলৰত্থুং পাৰিসীতি দস্সেতি. বুদ্ধানং কাযপভা নাম পকতিযা অসীতিহত্থমত্তপদেসং ৰিসরতীতি আহ ‘‘অসীতিহত্থট্ঠানং অগ্গহেসী’’তি. নীলপীতলোহিতোদাতমঞ্জিট্ঠপভস্সরানং ৰসেন ছব্বণ্ণা বুদ্ধরস্মিযো.

সব্বপালিফুল্লোতি মূলতো পট্ঠায যাৰ সাখগ্গা সমন্ততো ফুল্লো ৰিকসিতো. পটিপাটিযা ঠপিতানন্তিআদি পরিকপ্পূপমা, যথা তং…পে… অলঙ্কতং অঞ্ঞং ৰিরোচতি, এৰং ৰিরোচিত্থ, সমতিংসায পারমিতাহি অভিসঙ্খতত্তা এৰং ৰিরোচিত্থাতি ৰুত্তং হোতি. ‘‘পঞ্চৰীসতিযা গঙ্গানন্তি সতমুখা হুত্ৰা সমুদ্দং পৰিট্ঠায মহাগঙ্গায মহন্তমহন্তানং গঙ্গানং পঞ্চৰীসতী’’তি ৰদন্তি. পপঞ্চসূদনিযং (ম. নি. অট্ঠ. ২.২২) ‘‘পঞ্চৰীসতিযা নদীন’’ন্তি ৰুত্তং, গঙ্গাদীনং চন্দভাগাপরিযোসানানং পঞ্চৰীসতিযা মহানদীনন্তি অত্থো. পরিকপ্পৰচনঞ্হেতং. সম্ভিজ্জাতি সম্ভেদং মিস্সীভাৰং পত্ৰা মুখদ্ৰারেতি সমুদ্দং পৰিট্ঠট্ঠানে.

নাগসুপণ্ণগন্ধব্বযক্খাদীনন্তিআদি ¶ পরিকপ্পৰসেন ৰুত্তং. সহস্সেনাতি পদসহস্সেন, ভাণৰারপ্পমাণেন গন্থেনাতি অত্থো.

কম্পযন্তো ৰসুন্ধরন্তি অত্তনো গুণৰিসেসেহি পথৰীকম্মং উন্নাদেন্তো, এৰংভূতোপি অহেঠযন্তো পাণানি. সব্বপদক্খিণত্তা বুদ্ধানং দক্খিণং পঠমং পাদং উদ্ধরন্তো. সমং সম্ফুসতে ভূমিং সুপ্পতিট্ঠিতপাদতায. যদিপি ভূমিং সমং ফুসতি, রজসা নুপলিপ্পতি সুখুমত্তা ছৰিযা. নিন্নট্ঠানং উন্নমতীতিআদি বুদ্ধানং সুপ্পতিট্ঠিতপাদতাসঙ্খাতমহাপুরিসলক্খণপটিলাভস্স নিস্সন্দফলং. নাতিদূরে উদ্ধরতীতি অতিদূরে ঠপেতুং ন উদ্ধরতি. নচ্চাসন্নে চ নিক্খিপন্তি অচ্চাসন্নে চ ঠানে অনিক্খিপন্তো নিয্যাতি. হাসযন্তো সদেৰকে লোকে তোসেন্তো. চতূহি পাদেহি চরতীতি চতুচারী.

বুদ্ধানুভাৰস্স পকাসনৰসেন গতত্তা ৰণ্ণকালো নাম এস. সরীরৰণ্ণে ৰা গুণৰণ্ণে ৰা কথিযমানে দুক্কথিতন্তি ন ৰত্তব্বং. কস্মা? অপ্পমাণৰণ্ণা হি বুদ্ধা ভগৰন্তো, বুদ্ধগুণসংৰণ্ণনা জানন্তস্স যথারদ্ধসংৰণ্ণনংযেৰ ¶ অনুপৰিসতি. দুকূলচুম্বটকেনাতি গন্থিত্ৰা গহিতদুকূলৰত্থেন.

নাগৰিক্কন্তচারণোতি হত্থিনাগসদিসপদনিক্খেপো. সতপুঞ্ঞলক্খণোতি অনেকসতপুঞ্ঞাভিনিব্বত্তমহাপুরিসলক্খণো. মণিৰেরোচনো যথাতি চতুরাসীতিসহস্সমণিপরিৰারিতো অতিৰিয ৰিরোচমানো ৰিজ্জোতমানো মণি ৰিয. ‘‘ৰেরোচনো নাম একো মণী’’তি কেচি. মহাসালোৰাতি মহন্তো সালরুক্খো ৰিয, সুদ্ধট্ঠিতো কোৰিল়ারাদি মহারুক্খো ৰিয ৰা. পদুমো কোকনদো যথাতি কোকনদসঙ্খাতং মহাপদুমং ৰিয, ৰিকসমানপদুমং ৰিয ৰা.

আকাসগঙ্গং ওতারেন্তো ৰিযাতিআদি তস্সা পকিণ্ণককথায অঞ্ঞেসং সুদুক্করভাৰদস্সনঞ্চেৰ সুণন্তানং অচ্চন্তসুখাৰহভাৰদস্সনঞ্চ. পথৰোজং আকড্ঢন্তো ৰিযাতি নাল়িযন্তং যোজেত্ৰা মহাপথৰিযা হেট্ঠিমতলে পপ্পটকোজং উদ্ধং মুখং কত্ৰা আকড্ঢন্তো ৰিয. যোজনিকন্তি যোজনপমাণং. মধুভণ্ডন্তি মধুপটলং.

মহন্তন্তি ৰিপুলং উল়ারপুঞ্ঞং. সব্বদানং দিন্নমেৰ হোতীতি সব্বমেৰ পচ্চযজাতং আৰাসদাযকেন দিন্নমেৰ হোতি. তথা হি দ্ৰে তযো গামে পিণ্ডায চরিত্ৰা কিঞ্চি অলদ্ধা আগতস্সপি ¶ ছাযূদকসম্পন্নং আরামং পৰিসিত্ৰা ন্হাযিত্ৰা পটিস্সযে মুহুত্তং নিপজ্জিত্ৰা উট্ঠায নিসিন্নস্স কাযে বলং আহরিত্ৰা পক্খিত্তং ৰিয হোতি. বহি ৰিচরন্তস্স চ কাযে ৰণ্ণধাতু ৰাতাতপেহি কিলমতি, পটিস্সযং পৰিসিত্ৰা দ্ৰারং পিধায মুহুত্তং নিসিন্নস্স ৰিসভাগসন্ততি ৰূপসম্মতি, সভাগসন্ততি পতিট্ঠাতি, ৰণ্ণধাতু আহরিত্ৰা পক্খিত্তা ৰিয হোতি, বহি ৰিচরন্তস্স চ পাদে কণ্টকা ৰিজ্ঝন্তি, খাণু পহরতি, সরীসপাদিপরিস্সযা চেৰ চোরভযঞ্চ উপ্পজ্জতি, পটিস্সযং পৰিসিত্ৰা দ্ৰারং পিধায নিসিন্নস্স পন সব্বেপেতে পরিস্সযা ন হোন্তি. সজ্ঝাযন্তস্স ধম্মপীতিসুখং, কম্মট্ঠানং মনসিকরোন্তস্স উপসমসুখং উপ্পজ্জতি বহিদ্ধা ৰিক্খেপাভাৰতো. বহি ৰিচরন্তস্স চ কাযে সেদা মুচ্চন্তি, অক্খীনি ফন্দন্তি, সেনাসনং পৰিসনক্খণে মঞ্চপীঠাদীনি ন পঞ্ঞাযন্তি, মুহুত্তং নিসিন্নস্স পন অক্খিপসাদো আহরিত্ৰা পক্খিত্তো ৰিয হোতি, দ্ৰারৰাতপানমঞ্চপীঠাদীনি পঞ্ঞাযন্তি. এতস্মিঞ্চ আৰাসে ৰসন্তং দিস্ৰা মনুস্সা চতূহি পচ্চযেহি সক্কচ্চং উপট্ঠহন্তি. তেন ৰুত্তং – ‘‘আৰাসদানস্মিঞ্হি দিন্নে সব্বদানং দিন্নমেৰ হোতী’’তি. ভূমট্ঠক…পে… ন ¶ সক্কাতি অযমত্থো মহাসুদস্সনৰত্থুনা (দী. নি. ২.২৪১ আদযো) দীপেতব্বো. মাতুকুচ্ছি অসম্বাধোৰ হোতীতি অযমত্থো অন্তিমভৰিকানং মহাবোধিসত্তানং পটিসন্ধিৰসেন দীপেতব্বো.

সীতন্তি অজ্ঝত্তং ধাতুক্খোভৰসেন ৰা বহিদ্ধা উতুৰিপরিণামৰসেন ৰা উপ্পজ্জনকসীতং. উণ্হন্তি অগ্গিসন্তাপং, তস্স চ দৰদাহাদীসু সম্ভৰো দট্ঠব্বো. পটিহন্তীতি পটিহনতি. যথা তদুভযৰসেন কাযচিত্তানং আবাধো ন হনতি, এৰং করোতি. সীতুণ্হব্ভাহতে হি সরীরে ৰিক্খিত্তচিত্তো ভিক্খু যোনিসো পদহিতুং ন সক্কোতি. ৰাল়মিগানীতি সীহব্যগ্ঘাদিৰাল়মিগে. গুত্তসেনাসনঞ্হি পৰিসিত্ৰা দ্ৰারং পিধায নিসিন্নস্স তে পরিস্সযা ন হোন্তি. সরীসপেতি যে কেচি সরন্তা গচ্ছন্তে দীঘজাতিকে সপ্পাদিকে অঞ্ঞে চ তথারূপে. মকসেতি নিদস্সনমত্তমেতং, ডংসাদীনং এতেনেৰ সঙ্গহো দট্ঠব্বো. সিসিরেতি সীতকালৰসেন সত্তাহৰদ্দলিকাদিৰসেন চ উপ্পন্নে সিসিরসম্ফস্সে. ৰুট্ঠিযোতি যদা তদা উপ্পন্না ৰস্সৰুট্ঠিযো পটিহনতীতি যোজনা.

ৰাতাতপো ঘোরোতি রুক্খগচ্ছাদীনং উব্বহনভঞ্জনাদিৰসেন পৰত্তিযা ঘোরো সরজঅরজাদিভেদো ৰাতো চেৰ গিম্হপরিল়াহসমযেসু উপ্পত্তিযা ঘোরো সূরিযাতপো চ. পটিহঞ্ঞতীতি পটিবাহীযতি. লেণত্থন্তি নানারম্মণতো চিত্তং নিৰত্তিত্ৰা পটিসল্লাণারামত্থং. সুখত্থন্তি ৰুত্তপরিস্সযাভাৰেন ফাসুৰিহারত্থং. ঝাযিতুন্তি অট্ঠতিংসায আরম্মণেসু যত্থ কত্থচি ¶ চিত্তং উপনিবন্ধিত্ৰা সমাদহনৰসেন ঝাযিতুং. ৰিপস্সিতুন্তি অনিচ্চাদিৰসেন সঙ্খারে সম্মসিতুং.

ৰিহারেতি পটিস্সযে. কারযেতি কারাপেয্য. রম্মেতি মনোরমে. ৰাসযেত্থ বহুস্সুতেতি কারেত্ৰা পন এত্থ ৰিহারেসু বহুস্সুতে সীলৰন্তে কল্যাণধম্মে নিৰাসেয্য. তে নিৰাসেন্তো পন তেসং বহুস্সুতানং যথা পচ্চযেহি কিলমথো ন হোতি. এৰং অন্নঞ্চ পানঞ্চ ৰত্থসেনাসনানি চ দদেয্য উজুভূতেসু অজ্ঝাসযসম্পন্নেসু কম্মফলানং রতনত্তযগুণানঞ্চ সদ্দহনেন ৰিপ্পসন্নেন চেতসা. ইদানি গহট্ঠপব্বজিতানং অঞ্ঞমঞ্ঞূপকারতং দস্সেতুং ‘‘তে তস্সা’’তি গাথমাহ. তত্থ তেতি বহুস্সুতা. তস্সাতি উপাসকস্স. ধম্মং দেসেন্তীতি সকলৰট্টদুক্খপনূদনং ¶ নিয্যানিকং ধম্মং কথেন্তি. যং সো ধম্মং ইধঞ্ঞাযাতি সো পুগ্গলো যং সদ্ধম্মং ইমস্মিং সাসনে সম্মাপটিপজ্জনেন জানিত্ৰা অগ্গমগ্গাধিগমেন অনাসৰো হুত্ৰা পরিনিব্বাযতি.

আৰাসেতি আৰাসদানে. আনিসংসোতি উদ্রযো. পূজাসক্কারৰসেন পঠমযামো খেপিতো, সত্থু ধম্মদেসনায অপ্পাৰসেসো মজ্ঝিমযামো গতোতি পাল়িযং ‘‘বহুদেৰ রত্তি’’ন্তি ৰুত্তন্তি আহ ‘‘অতিরেকতরং দিযড্ঢযাম’’ন্তি. সঙ্গহং নারোহতি ৰিপুলৰিত্থারভাৰতো. বুদ্ধানঞ্হি ভত্তানুমোদনাপি থোকং ৰড্ঢেত্ৰা ৰুচ্চমানা দীঘমজ্ঝিমপমাণাপি হোতি. তথা হি সুফুসিতং দন্তাৰরণং, জিৰ্হা তনুকা, ভৰঙ্গপরিৰাসো পরিত্তো, নত্থি ৰেগাযিতং, নত্থি ৰিত্থাযিতং, নত্থি অব্যাৰটমনো, সব্বঞ্ঞুতঞ্ঞাণং সমুপব্যূল়্হং, অপরিক্খযা পটিসম্ভিদা.

সন্দস্সেত্ৰাতিআদীসু সন্দস্সেত্ৰা আৰাসদানপটিসংযুত্তং ধম্মিং কথং কত্ৰা. ততো পরং, মহারাজ, ইতিপি সীলং, ইতিপি সমাধি, ইতিপি পঞ্ঞাতি সীলাদিগুণে তেসং সম্মা দস্সেত্ৰা হত্থেন গহেত্ৰা ৰিয পচ্চক্খতো পকাসেত্ৰা. সমাদপেত্ৰাতি এৰং সীলং সমাদাতব্বং, সীলে পতিট্ঠিতেন এৰং সমাধিপঞ্ঞা ভাৰেতব্বাতি যথা তে সীলাদিগুণে সম্মা আদিযন্তি, তথা গণ্হাপেত্ৰা. সমুত্তেজেত্ৰাতি যথাসমাদিন্নং সীলং সুৰিসুদ্ধং হোতি, সমথৰিপস্সনা চ ভাৰিযমানা যথা সুট্ঠু ৰিসোধিতা উপরূপরি ৰিসেসাৰহা হোন্তি, এৰং সমুত্তেজেত্ৰা নিসামনৰসেন ৰোদাপেত্ৰা. সম্পহংসেত্ৰাতি যথানুসিট্ঠং ঠিতসীলাদিগুণেহি সম্পতি পটিলদ্ধগুণানিসংসেহি চেৰ উপরিলদ্ধব্বফলৰিসেসেহি চ চিত্তং সম্পহংসেত্ৰা লদ্ধস্সাসৰসেন সুট্ঠু তোসেত্ৰা. এৰমেতেসং পদানং অত্থো ৰেদিতব্বো. সক্যরাজানো যেভুয্যেন ভগৰতো ধম্মদেসনায সাসনে লদ্ধস্সাদা লদ্ধপ্পতিট্ঠা চ.

উপসগ্গসদ্দানং ¶ অনেকত্থত্তা অভি-সদ্দো অতি-সদ্দেন সমানত্থোপি হোতীতি ৰুত্তং ‘‘অভিক্কন্তাতি অতিক্কন্তা’’তি.

তত্র কিরাতিআদি কেচিৰাদোতি বদ্ধোপি ন হোতি. তেনাহ ‘‘অকারণমেত’’ন্তিআদি. কাযচিত্তলহুতাদযো উপ্পজ্জন্তীতি ইদং কাযিকচেতসিকঅঞ্ঞথাভাৰস্স কারণৰচনং, লহুতাদিউপ্পন্নে সৰনানুত্তরিযপটিলাভেন লদ্ধব্বধম্মত্থৰেদসমধিগমতো. ৰুত্তঞ্হেতং –

‘‘যথা ¶ , যথাৰুসো, ভিক্খুনো সত্থা ৰা ধম্মং দেসেতি অঞ্ঞতরো ৰা গরুট্ঠানিকো সব্রহ্মচারী, তথা তথা সো তস্মিং ধম্মে লভতি অত্থৰেদং, লভতি ধম্মৰেদং, লভতি ধম্মূপসংহিতং পামোজ্জ’’ন্তিআদি (দী. নি. ৩.৩২২, ৩৫৫; অ. নি. ৫.২৬).

পিট্ঠিৰাতো উপ্পজ্জি উপাদিন্নসরীরস্স তথারূপত্তা সঙ্খারানঞ্চ অনিচ্চতায দুক্খানুবন্ধত্তা. অকারণং ৰা এতন্তি যেনাধিপ্পাযেন ৰুত্তং, তমেৰ অধিপ্পাযং ৰিৰরিতুং ‘‘পহোতী’’তিআদি ৰুত্তং. একপল্লঙ্কেন নিসীদিতুং পহোতি যথা তং ৰেলুৰগামকে. এত্তকে ঠানেতি এত্তকে ঠানে ঠানং নিপ্ফন্নন্তি যোজনা. তঞ্চ খোতি ৰুট্ঠানসঞ্ঞং চিত্তে ঠপনং. ধম্মকথং সুণমানো ধম্মগারৰেন.

অৰস্সুতস্সাতি অৰস্সুতভাৰস্স রাগাদিৰসেন. অৰস্সুতস্স কারণন্তি তিন্তভাৰকারণং. কিলেসাধিমুচ্চনেনাতি কিলেসৰসেন পরিপ্ফন্দিতৰসেন. নিব্বাপনং ৰিযাতি ৰূপসমো ৰিয. নিব্বিসেৰনানন্তি পরিপ্ফন্দনরহিতানং.

অৰস্সুতপরিযাযসুত্তৰণ্ণনা নিট্ঠিতা.

৭. দুক্খধম্মসুত্তৰণ্ণনা

২৪৪. দুক্খধম্মানন্তি দুক্খকারণানং. তেনাহ ‘‘দুক্খসম্ভৰধম্মান’’ন্তিআদি. তত্থ কিং দুক্খং, কা দুক্খধম্মাতি তদুভযং দস্সেতুং ‘‘পঞ্চসু হী’’তি ৰুত্তং. তেতি পঞ্চক্খন্ধা. দুক্খসম্ভৰধম্মত্তাতি দুক্খুপ্পত্তিকারণত্তা. অস্সাতি তেন. করণে হেতং সামিৰচনং. কামেতি ৰত্থুকামে কিলেসকামে চ. পুন অস্সাতি সামিঅত্থে এৰ সামিৰচনং. চারন্তি চিত্তাচারং. ৰিহারন্তি পঞ্চদ্ৰারপ্পৰত্তিচারৰিহারং. ‘‘একট্ঠা’’তি চ ৰদন্তি. তেনেৰ হি ‘‘অনুবন্ধিত্ৰা চরন্তং’’ইচ্চেৰ ৰুত্তং. অনুবন্ধিত্ৰাতি চ ৰীথিচিত্তপ্পৰত্তিতো পট্ঠায যাৰ ততিযজৰনৰারা অনু ¶ অনু বন্ধিত্ৰা. পক্খন্দনাদীতি আদি-সদ্দেন কসিগোরক্খাদিৰসেনপি কামানং পরিযেসনদুক্খং সঙ্গণ্হাতি.

দাযতীতি ¶ দাযো, ৰনং. তেনাহ ‘‘অটৰি’’ন্তি. কণ্টকগব্ভন্তি ওৰরকসদিসং ৰনং. নামপদং নাম কিরিযাপদাপেক্খন্তি ‘‘ৰিজ্ঝী’’তি ৰচনসেসেন কিরিযাপদং গণ্হাতি.

দন্ধাযিতত্তং উপ্পন্নকিলেসানং অৰট্ঠানং. তেনাহ ‘‘উপ্পন্নমত্তাযা’’তিআদি. তাযাতি সতিযা. কাচি কিলেসাতি চুদ্দসৰিধে চিত্তস্স কিচ্চে জৰনকিচ্চে এৰ চিত্তকিলেসানং উপ্পত্তিং কত্ৰা তথা ৰুত্তং. নিগ্গহিতাৰ হোন্তি পৰত্তিতুং অপ্পদানৰসেন. তেনাহ ‘‘ন সণ্ঠাতুং সক্কোন্তী’’তি. চক্খুদ্ৰারস্মিন্তি পাল়িযং তস্স পঠমং গহিততায ৰুত্তং, তেন নযেন সেসদ্ৰারানিপি গহিতানেৰ হোন্তি. রাগাদীসু উপ্পন্নেসু পঠমজৰনৰারে. সতিসম্মোসেন ‘‘কিলেসা মে উপ্পন্না’’তি ঞত্ৰা তথা পচ্চামাসসতিযা লব্ভনতো. তেনাহ – ‘‘অনচ্ছরিযং চেত’’ন্তি. আৰট্টেত্ৰাতি অযোনিসো আৰট্টেত্ৰা. আৰজ্জনাদীসূতি ততো এৰ অযোনিসো আৰজ্জনাদীসু উপ্পন্নেসু ইট্ঠারম্মণস্স লদ্ধত্তা পচ্চযসিদ্ধিযা সম্পত্তং পৰত্তনারহং. নিৰত্তেত্ৰাতি দুতিযজৰনৰারেপি কিলেসুপ্পত্তিং নিৰত্তেত্ৰা. কথং পনস্স এৰং লদ্ধুং সক্কাতি আহ ‘‘আরদ্ধৰিপস্সকানং হী’’তিআদি. ভাৰনাপটিসঙ্খানেতি ভাৰনাযং পটিসঙ্খানে চ যোগিনো পতিট্ঠিতভাৰো. তস্স অযমানিসংসো – যং পচ্চযলাভেন উপ্পজ্জিতুং লদ্ধোকাসাপি কিলেসা পুব্বে পৰত্তভাৰনানুভাৰেন ৰিক্খম্ভিতা তথা তথা নিগ্গহিতা এৰ হুত্ৰা নিৰত্তন্তি, কুসলা ধম্মাৰ লদ্ধোকাসা উপরূপরি ৰড্ঢন্তি.

অভিহট্ঠুন্তি অভিহরিত্ৰা. অনুদহন্তীতি অনুদহন্তা ৰিয হোন্তি. অনুসেন্তীতি এত্থাপি এসেৰ নযো. অনাৰট্টন্তেতি অনিৰত্তন্তে সামঞ্ঞতোতি অধিপ্পাযো. ৰিপস্সনাবলমেৰ দীপিতং মগ্গফলাধিগমস্স অজোতিতত্তা.

দুক্খধম্মসুত্তৰণ্ণনা নিট্ঠিতা.

৮. কিংসুকোপমসুত্তৰণ্ণনা

২৪৫. চতুন্নং অরিযসচ্চানং পরিঞ্ঞাভিসমযাদিৰসেন ৰিৰিধদস্সনন্তি কিচ্চৰসেন নানাদস্সনং হোতীতি ৰুত্তং, ‘‘দস্সনন্তি পঠমমগ্গস্সেতং অধিৰচন’’ন্তি ¶ . তযিদং উপরিমগ্গেসু ভাৰনাপরিযাযস্স নিরুল়্হত্তা পঠমমগ্গস্স পঠমং নিব্বানদস্সনতো. তেনাহ ‘‘পঠমমগ্গো হী’’তিআদি ¶ . কোচি যথাৰুত্তং অৰিপরীতং অত্থং অজানন্তো ঞাণদস্সনং নাম আরম্মণকরণস্স ৰসেন অতিপ্পসঙ্গং আসঙ্কেয্যাতি তং নিৰত্তেতুং ‘‘গোত্রভূ পনা’’তিআদি ৰুত্তং. ন দস্সনন্তি ৰুচ্চতীতি এত্থ রাজদস্সনং উদাহরন্তি. চত্তারোপি মগ্গা দস্সনমেৰ যথাৰুত্তেনত্থেন, ভাৰনাপরিযাযো পন উপরি তিণ্ণং মগ্গানং পঠমমগ্গউপাযস্স ভাৰনাকারেন পৰত্তনতো. দস্সনং ৰিসুদ্ধি এত্থাতি দস্সনৰিসুদ্ধিকং, নিব্বানং. ফস্সাযতনং কম্মট্ঠানং অস্স অত্থীতি ফস্সাযতনকম্মট্ঠানিকো. এস নযো সেসেসুপি পদেসু.

পদেসসঙ্খারেসূতি সঙ্খারেকদেসেসু. হেট্ঠিমপরিচ্ছেদেন পথৰিআদিকে ধম্মমত্তে দিট্ঠে রূপপরিগ্গহো, চক্খুৰিঞ্ঞাণাদিকে তংসহগতধম্মমত্তে দিট্ঠে অরূপপরিগ্গহো চ সিজ্ঝতীতি ৰদন্তি.

অধিগতমগ্গমেৰ কথেসীতি যেন মুখেন ৰিপস্সনাভিনিৰেসং অকাসি, তমেৰস্স মুখং কথেসি. অযং পনাতি কম্মট্ঠানং পুচ্ছন্তো ভিক্খু. ইমেসন্তি ফস্সাযতনকম্মট্ঠানিকপঞ্চক্খন্ধকম্মট্ঠানিকানং ৰচনং. ‘‘অঞ্ঞমঞ্ঞং ন সমেতী’’তি ৰত্ৰা তমেৰত্থং পাকটং করোতি ‘‘পঠমেনা’’তিআদিনা. পঞ্চক্খন্ধৰিমুত্তস্স সঙ্খারস্স অভাৰা ‘‘নিপ্পদেসেসূ’’তি ৰুত্তং. তথেৰাতি যথেৰ ফস্সাযতনকম্মট্ঠানিকং, তথেৰ তং পঞ্চক্খন্ধকম্মট্ঠানিকং পুচ্ছিত্ৰা.

সমপ্পৰত্তা ধাতুযোতি রসাদযো সরীরধাতুযো সমপ্পৰত্তা, ন ৰিসমাকারসণ্ঠিতা অহেসুং. তেনাহ ‘‘কল্লসরীরং বলপ্পত্ত’’ন্তি. ‘‘অতীতা সঙ্খারা’’তিআদি ৰিপস্সনাভিনিৰেসৰসেন ৰুত্তং. সম্মসনং সব্বত্থকমেৰ ইচ্ছিতব্বং. চারিভূমিন্তি গোচরট্ঠানং.

কারকভাৰন্তি ভাৰনানুযুঞ্জনভাৰং. পণ্ডুরোগপুরিসোতি পণ্ডুরোগী পুরিসো. অরিট্ঠন্তি সুত্তং. ভেসজ্জং কত্ৰাতি ভেসজ্জপযোগং কত্ৰা. করিস্সামীতি ভেসজ্জং করিস্সামি. ঝামথুণো ৰিযাতি দড্ঢথুণো ৰিয খারকজালনদ্ধত্তা তরুণমকুলসন্তানসঞ্ছন্নত্তা.

দক্খিণদ্ৰারগামেতি দক্খিণদ্ৰারসমীপে গামে. লোহিতকোতি লোহিতৰণ্ণো. ওচিরকজাতোতি জাতওলম্বমানচিরকো ৰিয. আদিন্নসিপাটিকোতি ¶ গহিতফলপোতকো. সন্দচ্ছাযোতি বহলচ্ছাযো. যস্মা তস্স রুক্খস্স সাখা অৰিরল়া ঘনপ্পত্তা অঞ্ঞমঞ্ঞং সংসন্দিত্ৰা ঠিতা, তস্মা ছাযাপিস্স তাদিসীতি ৰুত্তং ‘‘সন্দচ্ছাযো নাম সংসন্দিত্ৰা ঠিতচ্ছাযো’’তি, ঘনচ্ছাযোতি অত্থো. তত্থাতিআদি উপমাসংসন্দনং.

যেন ¶ যেনাকারেন অধিমুত্তানন্তি ছফস্সাযতনাদিমুখেন যেন যেন ৰিপস্সনাভিনিৰেসেন ৰিপস্সন্তানং নিব্বানঞ্চ অধিমুত্তানং. সুট্ঠু ৰিসুদ্ধং পরিঞ্ঞাতিসমযাদিসিদ্ধিযা. তেন তেনেৰাকারেনাতি অত্তনাধিমুত্তাকারেন. ইদানি তং তং আকারং উপমায সদ্ধিং যোজেত্ৰা দস্সেতুং ‘‘যথা হী’’তিআদি আরদ্ধং. তং সুৰিঞ্ঞেয্যমেৰ.

ইদন্তি নগরোপমং. তং সল্লক্খিতন্তি কিংসুকোপমদীপিতং অত্থজাতং সচে সল্লক্খিতং. অস্স ভিক্খুনো. ধম্মদেসনত্থন্তি যথাসল্লক্খিতস্স অত্থস্স ৰসেন লদ্ধৰিসেসস্স উপব্রূহনায. তস্সেৰত্থস্সাতি তস্স দস্সনৰিসুদ্ধিসঙ্খাতস্স অত্থস্স. চোরাসঙ্কা ন হোন্তি মজ্ঝিমদেসরজ্জস্স পসন্নভাৰতো. তিপুরিসুব্বেধানীতি উব্বেধেন তিপুরিসপ্পমাণানি নানাভিত্তিৰিচিত্তানি থম্ভানং উপরি ৰিৰিধমালাকম্মাদিৰিচিত্তধনুরাকারলক্খিতানি মনোরমানি. তেনাহ ‘‘নগরস্স অলঙ্কারত্থ’’ন্তি. নগরদ্ৰারস্স থিরভাৰাপাদনৰসেন ঠপেতব্বত্তা ৰুত্তং ‘‘চোরনিৰারণত্থানিপি হোন্তিযেৰা’’তি. পিট্ঠসঙ্ঘাতস্সাতি দ্ৰারবাহস্স. ‘‘ইমে আৰাসিকা, ইমে আগন্তুকা, তত্থাপি চ ইমেহি নগরস্স নগরসামিকস্স চ অত্থো. ইমেসং ৰসেন অনত্থো সিযা’’তি জাননঞাণসঙ্খাতেন পণ্ডিচ্চেন সমন্নাগতো. অঞ্ঞাতনিৰারণে পটুভাৰসঙ্খাতেন ৰেয্যত্তিযেন সমন্নাগতো. ঠানুপ্পত্তিকপঞ্ঞাসঙ্খাতাযাতি তস্মিং তস্মিং অত্থকিচ্চে তঙ্খণুপ্পজ্জনকপটিভানসঙ্খাতায.

রঞ্ঞা আযুত্তো নিযোজিতো রাজাযুত্তো, তত্থ তত্থ রঞ্ঞো কাতব্বকিচ্চে ঠপিতপুরিসো. কতিপাহেযেৰাতি কতিপযদিৰসেযেৰ অকিচ্চকরণেন তস্স ঠানং ৰিব্ভমো জাতোতি কত্ৰা ৰুত্তং – ‘‘সব্বানি ৰিনিচ্ছযট্ঠানাদীনি হারেত্ৰা’’তি.

সীসমস্স ছিন্দাহীতি সীসভূতং উত্তমঙ্গট্ঠানিযং তত্থ তস্স রাজকিচ্চং ছিন্দাতি অত্থো. অঞ্ঞথা তস্স পাকতিকে অত্থে গয্হমানে পাণাতিপাতো ¶ আণত্তো নাম সিযা. ন হি চক্কৰত্তিরাজা তাদিসং আণাপেতি, অঞ্ঞেসম্পি ততো নিৰারকত্তা. অথ ৰা ছিন্দাহীতি মম আণায অস্স সীসং ছিন্দন্তো ৰিয অত্তানং দস্সেহি, এৰং সো তত্থোৰাদপটিকরত্তপত্তো ওদমেয্যাতি, তথা চেৰ উপরি পটিপত্তি আগতা. তত্থাতি এতস্মিং পচ্চন্তিমনগরে.

উপ্পন্নেনাতি সমথকম্মট্ঠানে উপ্পন্নেন.

তস্সেৰাতি সক্কাযসঙ্খাতস্স নগরস্স ‘‘দ্ৰারানী’’তি ৰুত্তানীতি আনেত্ৰা সম্বন্ধো. ‘‘সীঘং ¶ দূতযুগ’’ন্তি ৰুত্তাতি যোজনা. হদযৰত্থুরূপস্স মজ্ঝে সিঙ্ঘাটকভাৰেন গহিতত্তা ‘‘হদযৰত্থুস্স নিস্সযভূতানং মহাভূতান’’ন্তি ৰুত্তং. যদি এৰং ৰত্থুরূপমেৰ গহেতব্বং, তদেৰেত্থ অগ্গহেত্ৰা কস্মা মহাভূতগ্গহণন্তি আহ ‘‘ৰত্থুরূপস্স হী’’তিআদি. যাদিসোতি সম্মাদিট্ঠিআদীনং ৰসেন যাদিসো এৰ পুব্বে আগতৰিপস্সনামগ্গো. ‘‘অযম্পি অট্ঠঙ্গসমন্নাগতত্তা তাদিসো এৰা’’তি ৰত্ৰা অরিযমগ্গো ‘‘যথাগতমগ্গো’’তি ৰুত্তো. ইদং তাৰেত্থাতি এত্থ এতস্মিং সুত্তে ধম্মদেসনত্থং আভতায যথাৰুত্তউপমায ইদং সংসন্দনং.

ইদং সংসন্দনন্তি ইদানি ৰক্খমানং উপমায সংসন্দনং. নগরসামিউপমা পঞ্চক্খন্ধৰসেন দস্সনৰিসুদ্ধিপত্তং খীণাসৰং দস্সেতুং আভতা. সিঙ্ঘাটকূপমা চতুমহাভূতৰসেন দস্সনৰিসুদ্ধিপত্তং খীণাসৰং দস্সেতুং আভতাতি যোজনা. ‘‘চতুসচ্চমেৰ কথিত’’ন্তি ৰত্ৰা তানি সচ্চানি নিদ্ধারেত্ৰা দস্সেতুং ‘‘সকলেনপি হী’’তিআদি ৰুত্তং. ইধ নগরসম্ভারো ছদ্ৰারাদযো. তেন হি ছফস্সাযতনাদযো উপমিতা. তে পন দুক্খসচ্চপরিযাপন্নাতি ৰুত্তং ‘‘নগরসম্ভারেন দুক্খসচ্চমেৰ কথিত’’ন্তি.

কিংসুকোপমসুত্তৰণ্ণনা নিট্ঠিতা.

৯. ৰীণোপমসুত্তৰণ্ণনা

২৪৬. ভিক্খুস্স ৰা ভিক্খুনিযা ৰাতি কামং পাল়িযং পরিসাদ্ৰযমেৰ গহিতং, সেসপরিসানং পন তদঞ্ঞেসম্পি দেৰমনুস্সানন্তি সব্বসাধারণোৰাযং ধম্মসঙ্গহোতি ইমমত্থং উপমাপুব্বকং কত্ৰা দস্সেতুং ‘‘যথা নামা’’তিআদি ¶ আরদ্ধং. যজন্তোতি দদন্তো. ৰিন্দিতব্বোতি লদ্ধব্বো, অধিগন্তব্বোতি অত্থো.

ছন্দোতি তণ্হাছন্দো. তেনাহ – ‘‘দুব্বলতণ্হা সো রঞ্জেতুং ন সক্কোতী’’তি. পুব্বুপ্পত্তিকা একস্মিং আরম্মণে পঠমং উপ্পন্না. সা হি অনাসেৰনত্তা মন্দা. সোতি ছন্দো. রঞ্জেতুং ন সক্কোতি লদ্ধাসেৰনত্তা. দোসো নাম চিত্তদূসনত্তা. তানীতি দণ্ডাদানাদীনি. তম্মূলকাতি লোভমূলকা তাৰ মাযাসাঠেয্যমানাতিমানদিট্ঠিচাপলাদযো, দোসমূলকা উপনাহমক্খপলাসইস্সামচ্ছরিযথম্ভসারম্ভাদযো, মোহমূলকা অহিরিক-অনোত্তপ্প-থিনমিদ্ধৰিচিকিচ্ছুদ্ধচ্চ-ৰিপরীতমনসিকারাদযো, সংকিলেসধম্মা গহিতাৰ হোন্তি তংমূলকত্তা. যস্মা পন সব্বেপি সংকিলেসধম্মা দ্ৰাদসাকুসলচিত্তুপ্পাদপরিযাপন্না এৰ, তস্মা তেসম্পেত্থ গহিতভাৰং দস্সেতুং ‘‘ছন্দো রাগোতি ৰা’’তি ৰুত্তং.

ভাযিতব্বট্ঠেন ¶ সভযো. ভেরৰট্ঠেন সপ্পটিভযো. কুসলপক্খস্স ৰিক্খম্ভনট্ঠেন সকণ্টকো. কুসলঅনৰজ্জধম্মেহি দুরৰগাহট্ঠেন সগহনো. ভৰসম্পত্তিভৰনিব্বানানং অপ্পদানভাৰতো উম্মগ্গো. দুগ্গতিগামিমগ্গত্তা কুম্মগ্গো. ইরিযনাতি ৰত্তনা পটিপজ্জনা. দুগ্গতিগামিতায কিলেসো এৰ কিলেসমগ্গো. ন সক্কা সম্পত্তিভৰং গন্তুং কুতো নিব্বানগমনন্তি অধিপ্পাযো.

অসুভাৰজ্জনাদীহীতি আদি-সদ্দেন অনিচ্চমনসিকারাদীনম্পি সঙ্গহো দট্ঠব্বো. চিত্তং নিৰত্ততি সরাগচিত্তং ন উপ্পজ্জতি পটিপক্খমনসিকারেন ৰিনোদিতত্তা. মজ্ঝত্তারম্মণেতি অঞ্ঞাণুপেক্খট্ঠানিযে আরম্মণে. উদ্দেস…পে… আৰজ্জন্তস্সাতি উদ্দিসাপনৰসেন উদ্দেসং, পরিপুচ্ছাপনৰসেন পরিপুচ্ছং, গরূনং সন্তিকে ৰসনৰসেন গরুৰাসং আৰজ্জন্তস্স. চিত্তন্তি গম্ভীরঞাণচরিয-পচ্চৰেক্খণ-পঞ্ঞৰন্ত-পুগ্গলসেৰনৰসেন তদধিমুত্তিসিদ্ধিযা অঞ্ঞাণচিত্তং নিৰত্ততি.

যথা ‘‘পুজ্জভৰফলং পুঞ্ঞ’’ন্তি ৰুত্তং ‘‘এৰমিদং পুঞ্ঞং পৰড্ঢতী’’তি (দী. নি. ৩.৮০), এৰং কিট্ঠসম্ভৰত্তা ‘‘কিট্ঠ’’ন্তি ৰুত্তন্তি আহ ‘‘কিট্ঠন্তি কিট্ঠট্ঠানে উপ্পন্নসস্স’’ন্তি.

ঘটাতি ¶ সিঙ্গযুগং ইধাধিপ্পেতন্তি আহ ‘‘দ্ৰিন্নং সিঙ্গানং অন্তরে’’তি. ঘটাতি গোণাদীনং সিঙ্গন্তরট্ঠস্স সমঞ্ঞাতি ৰদন্তি. নাসারজ্জুকেতি নাসারজ্জুপাতট্ঠানে.

দমেতি পুথুত্তারম্মণতো নিৰারেতি. নন্তি চিত্তং. যং সুত্তং সুভাসিতং মযা. তদস্সাতি তদা অস্স ভিক্খুনো. আরম্মণেতি কম্মট্ঠানারম্মণে.

সুদুজিতন্তি নিব্বিসেৰনভাৰকরণেন জিতং. সুতজ্জিতন্তি সুট্ঠু দূরকরণেন জিতং, তথাভূতঞ্চ তজ্জিতং নাম হোতীতি তথা ৰুত্তং. গোচরজ্ঝত্তন্তি অজ্ঝত্তভূতো গোচরো. কম্মট্ঠানারম্মণঞ্হি বহিদ্ধারূপাদিআরম্মণৰিধুরতায অজ্ঝত্তন্তি ৰুচ্চতি. সমথো অনুরক্খণং এতস্সাতি সমথানুরক্খণং. যথা ইন্দ্রিযসংৰরসীলং সমথানুরক্খণং হোতি, তথা কথিতন্তি অত্থো. যথা হি ইন্দ্রিযসংৰরসীলং সমথস্স পচ্চযো, এৰং সমথোপি তস্স পচ্চযোতি.

ৰাদিযমানায ৰীণায. চিত্তং রঞ্জেতীতি রজ্জনেন. অৰিস্সজ্জনীযতায চিত্তং বন্ধতীতি ¶ বন্ধনীযো. ৰেট্ঠকেতি তন্তীনং আসজ্জনৰেট্ঠকে. কোণন্তি কৰণতো ৰীণায সদ্দকরণতো কোণন্তি লদ্ধনামং দারুদণ্ডং সিঙ্গাদীসু যেন কেনচি কতং ঘটিকং. তেনাহ ‘‘চতুরস্সং সারদণ্ডক’’ন্তি.

যস্মা সো রাজা রাজমহামত্তো ৰা সদ্দং যথাসভাৰতো ন অঞ্ঞাসি, তস্মিং তস্স অজাননাকারমেৰ দস্সেতুং ‘‘সদ্দং পস্সিস্সামী’’তিআদি ৰুত্তং.

অসতী কিরাযন্তি পাল়িযং লিঙ্গৰিপল্লাসেন ৰুত্তন্তি যথালিঙ্গমেৰ ৰদন্তো ‘‘অসা’’তি আহ. ‘‘অসতীতি লামকাধিৰচন’’ন্তি ৰত্ৰা তত্থ পযোগং দস্সেতুং ‘‘অসা লোকিত্থিযো নামা’’তি ৰুত্তং, লোকে ইত্থিযো নাম অসতিযোতি অত্থো, তত্থ কারণমাহ ‘‘ৰেলা তাসং ন ৰিজ্জতী’’তি. পকতিযা লোকে জেট্ঠভাতা কনিট্ঠভাতা মাতুলোতিআদিকা ৰেলা মরিযাদা তাসং ন ৰিজ্জতি. কস্মা? সারত্তা চ পগব্বা চ সব্বেসম্পি সম্ভোগৰসেন ৰিনিযোগং গচ্ছন্তি. কথং? সিখী সব্বঘসো যথা. তেনেৰাহ –

‘‘সব্বা ¶ নদী ৰঙ্কগতী, সব্বে কট্ঠমযা ৰনা;

সব্বিত্থিযো করে পাপং, লভমানে নিৰাতকে’’তি. (জা. ২.২১.৩০৮);

অঞ্ঞম্পি তন্তিবদ্ধং চতুরস্সঅম্বণৰাদিতাদীনি. ৰীণা ৰিয পঞ্চক্খন্ধা অনেকধম্মসমূহভাৰতো. রাজা ৰিয যোগাৰচরো তপ্পটিবদ্ধধম্মগৰেসকত্তা. অস্সাতি যোগাৰচরস্স.

নিরযাদিতো অঞ্ঞস্মিম্পি গতি-সদ্দো ৰত্ততি. ততো ৰিসেসনত্থং ‘‘গতিগতী’’তি ৰুত্তং ‘‘দুক্খদুক্খং, রূপরূপ’’ন্তি চ যথা, গতিসঞ্ঞিতং পৰত্তিট্ঠানন্তি অত্থো. তেনাহ – ‘‘এত্থন্তরে সংসরতি ৰত্ততী’’তি. সঞ্জাযনপদেসো এৰ গতীতি সঞ্জাতিগতি.

তং পন গতিং সত্তানং সংৰেগৰত্থুভূতস্স পচ্চক্খস্স গব্ভাসযস্স ৰসেন দস্সেতুং ‘‘অযমস্স কাযো’’তিআদি ৰুত্তং. রূপধম্মস্স সলক্খণং গতি নিট্ঠা, ততো পরং অঞ্ঞং কিঞ্চি নত্থীতি সলক্খণগতি. অভাৰো অচ্চন্তাভাৰো. সন্তানৰিচ্ছেদো ৰিভৰগতি তংনিট্ঠানভাৰা. ভেদোতি খণনিরোধো, ইধাপি তংনিট্ঠানতাযেৰ পরিযাযো. যাৰ ভৰগ্গাতি যাৰ সব্বভৰগ্গা. সলক্খণৰিভৰগতিভেদগতিযো ‘‘এসেৰ নযো’’তি ইমিনাৰ পকাসিতাতি ন গহিতা. তস্স খীণাসৰস্স ন হোতি অগ্গমগ্গেন সমুচ্ছিন্নত্তা.

সীলং ¶ কথিতং রূপাদীসু ছন্দাদিনিৰারণস্স কথিতত্তা. মজ্ঝে সমাধিভাৰনা কথিতা ‘‘অজ্ঝত্তমেৰ সন্তিট্ঠতি…পে… সমাধিযতী’’তি জোতিতত্তা. পরিযোসানে চ নিব্বানং কথিতং ‘‘যম্পিস্স…পে… ন হোতী’’তি ৰচনতো.

ৰীণোপমসুত্তৰণ্ণনা নিট্ঠিতা.

১০. ছপ্পাণকোপমসুত্তৰণ্ণনা

২৪৭. ৰণসরীরোতি ৰণিতসরীরো. পক্কত্তাতি কুথিতত্তা. সরদণ্ডেসু সরসমঞ্ঞাতি কণ্ড-সদ্দো সরপরিযাযোতি আহ – ‘‘সরৰনন্তি কণ্ডৰন’’ন্তি. অরুগত্তো…পে… ৰেদিতব্বো গুণসরীরস্স খণ্ডছিদ্দসীলাদীহি হেট্ঠা মজ্ঝে উপরিভাগে চ ভেদৰিসমচ্ছিন্নৰিকারদোসত্তা. এত্থ ¶ কুসা ‘‘কণ্টকা’’তি অধিপ্পেতা কণ্টকসদিসত্তা, কুসতিণানং এৰ ৰা ৰুত্তাকারপদেসো ‘‘কুসকণ্টকো’’তি ৰুত্তো.

গামৰাসীনং ৰিজ্ঝনট্ঠেনাতি নারহোৰ হুত্ৰা তেসং কারানং পটিগ্গহণৰসেন পীল়নট্ঠেন.

পক্খিন্তি হত্থিলিঙ্গসকুণং. তস্স কির হত্থিসোণ্ডসদিসং মুখং, তস্মা ‘‘হত্থিসোণ্ডসকুণ’’ন্তি ৰুত্তং. ৰিস্সজ্জেয্যাতি রজ্জুযা যথাবদ্ধং এৰ ৰিস্সজ্জেয্য.

ভোগেহীতি অত্তনো সরীরভোগেহি. মণ্ডলং বন্ধিত্ৰাতি যথা সরীরং মণ্ডলাকারেন তিট্ঠতি, এৰং কত্ৰা. সুপিস্সামীতি নিদ্দং ওক্কমিস্সামি. ডেতুকামোতি উপ্পতিতুকামো. দিসা দিসন্তি দিসতো দিসং.

ছ পাণকা ৰিয ছ আযতনানি নানজ্ঝাসযত্তা, নানজ্ঝাসযতা চ নেসং নানাৰিসযনিন্নতায দট্ঠব্বা. দল়্হরজ্জু ৰিয তণ্হা তেসং বন্ধনতো. মজ্ঝে গণ্ঠি ৰিয অৰিজ্জা বন্ধনস্স দুব্বিনিম্মোচনহেতুতো. আরম্মণং বলৰং হোতি মনুঞ্ঞভাৰেন চেৰ তত্থ তণ্হাভিনিৰেসস্স দল়্হভাৰেন চ.

সরিক্খকেন ৰা উপমায আহরণপক্খে. অপ্পনাতি সংসন্দনা. পাল়িযংযেৰ অপ্পিতা উপমা ‘‘এৰমেৰ খো’’তিআদিনা. রূপচিত্তাদিৰিসমনিন্নত্তা চক্খুস্স ৰিসমজ্ঝাসযতা. এস নযো সেসেসুপি.

কণ্ণচ্ছিদ্দকূপকেতি ¶ কণ্ণচ্ছিদ্দসঞ্ঞিতে আৰাটে. তস্সাতি সোতস্স. পচ্চযো হোতীতি উপনিস্সযো হোতি তেন ৰিনা সদ্দগ্গহণস্স অভাৰতো. ‘‘অজটাকাসোপি ৰট্টতি এৰা’’তি ৰত্ৰা তস্স পচ্চযভাৰং দস্সেতুং ‘‘অন্তোলেণস্মি’’ন্তিআদি ৰুত্তং. ধাতুপরম্পরা ঘট্টেন্তোতি ভূতপরম্পরাসঙ্ঘট্টেন্তো.

এৰং সন্তেতি এৰং ভূতপরম্পরাৰসেন সদ্দে সোতপথমাগচ্ছন্তে. সম্পত্তগোচরতা হোতি সোতস্স. ঘানাদীনং ৰিয ‘‘দূরে সদ্দো’’তি জাননং ন সম্ভৰেয্য সম্পত্তগাহিভাৰতো. তথা তথা জাননাকারো হোতি মনোৰিঞ্ঞাণস্স গহণাকারৰিসেসতো. সোতৰিঞ্ঞাণপ্পৰত্তি পন উভযত্থ সমানাৰ. দূরে ঠিতোপি সদ্দো তাদিসে ঠানে ¶ পটিঘোসাদীনং পচ্চযো হোতি অযোকন্তো ৰিয অযোচলনস্সাতি দট্ঠব্বং. ধম্মতাতি ধম্মসভাৰো, সদ্দস্স সো সভাৰোতি অত্থো. ততো ততো সৰনং হোতি আকাসসঞ্ঞিতস্স উপনিস্সযস্স লব্ভনতো. যদি পন সোতং সম্পত্তগাহী সিযা, চিত্তসমুট্ঠানসদ্দো সোতৰিঞ্ঞাণস্স আরম্মণপচ্চযো ন সিযা. পট্ঠানে চ অৰিসেসেন ‘‘সদ্দাযতনং সোতৰিঞ্ঞাণস্স আরম্মণপচ্চযেন পচ্চযো’’তি ৰুত্তো, বহিদ্ধা চ চিত্তজস্স সদ্দস্স সম্ভৰো নত্থি. অথ ৰা চিত্তজো সদ্দো ধাতুপরম্পরায সোতপসাদং ঘট্টেতি, ন সো চিত্তজো সদ্দো, যো পরম্পরায পৰত্তো. উতুজো হি সো, তস্মা যথুপ্পন্নো সদ্দো, তত্থ ঠিতোৰ সোতপসাদস্স আপাথং আগচ্ছতীতি নিট্ঠমেত্থ গন্তব্বং. তেন ৰুত্তং ‘‘অসম্পত্তগোচরমেৰেত’’ন্তি.

তদা একগ্গচিত্ততং আপজ্জতি পরিস্সযানং অভাৰতো. নাসচ্ছিদ্দসঙ্খাতআকাসসন্নিস্সযে ৰত্তনতো ঘানং আকাসজ্ঝাসযং ৰুত্তং. ৰাতেন ৰিনা গন্ধগহণস্স অসম্ভৰতো ৰাতূপনিস্সযগন্ধগোচরং. তেনাহ ‘‘তথা হী’’তিআদি.

গামতো লদ্ধব্বং আহারং গামং, তন্নিন্নতায গামজ্ঝাসযতা ৰুত্তা. তথা হি জীৰিতনিমিত্তং রসো জীৰিতং, তস্মিং নিন্নতায তং অৰ্হাযতীতি জিৰ্হা. ন সক্কা খেল়েন অতেমিতস্স রসং জানিতুং, তস্মা আপোসন্নিস্সিতরসারম্মণা জিৰ্হাতি.

আমকসুসানতো বহি. উপাদিণ্ণকজ্ঝাসযোতি উপাদিণ্ণকনিন্নো. কাযপসাদসন্নিস্সযভূতায পথৰিযা ফোট্ঠব্বারম্মণে ঘটিতে এৰ তত্থ ৰিঞ্ঞাণুপ্পত্তি, ন অঞ্ঞথাতি ৰুত্তং ‘‘পথৰীসন্নিস্সিতফোট্ঠব্বারম্মণো’’তি. তথা হীতিআদি কাযস্স উপাদিণ্ণকজ্ঝাসযতায সাধকং ¶ . অজ্ঝত্তিকবাহিরাতি অজ্ঝত্তিকা বাহিরা ৰা. অস্সাতি কাযস্স. সুসন্থতস্সাতিআদি তস্স পথৰিযা পচ্চযভাৰদস্সনং.

নানজ্ঝাসযোতি নানারম্মণনিন্নো. তেন মনস্স মক্কটস্স ৰিয অনৰট্ঠিততং দস্সেতি. তেনাহ ‘‘দিট্ঠপুব্বেপী’’তিআদি. মূলভৰঙ্গগ্গহণেন পিট্ঠিভৰঙ্গং নিৰত্তেতি. অস্সাতি মনস্স. এৰং কিরিযমযং ৰিঞ্ঞাণং দট্ঠব্বং. নানত্তন্তি ভেদো.

যথারুচিপ্পৰত্তিযা ¶ নিৰারণৰসেন বদ্ধানং. নিব্বিসেৰনভাৰন্তি লোলতাসঙ্খাতপরিপ্ফন্দস্স অভাৰং. নাকড্ঢতীতি সৰিসযে রূপারম্মণে চিত্তসন্তানং, তংসমঙ্গিনং ৰা পুগ্গলং নাকড্ঢতি. পুব্বভাগৰিপস্সনাৰ কথিতা আযতনমুখেন ‘‘এৰঞ্হি ৰো, ভিক্খৰে, সিক্খিতব্ব’’ন্তি ৰুত্তত্তা.

ছপ্পাণকোপমসুত্তৰণ্ণনা নিট্ঠিতা.

১১. যৰকলাপিসুত্তৰণ্ণনা

২৪৮. যৰপুঞ্জো সুপরিপক্কযৰসমুদাযো. কাজহত্থাতি দণ্ডহত্থা. পোথেয্যুন্তি যথা যৰসঙ্খাতং ধঞ্ঞং ৰণ্টতো মুচ্চতি, এৰং পোথেয্যুং. যৰে সাৰেত্ৰাতি যৰসীসতো যৰে পোথনেন মোচেত্ৰা ৰিৰেচেত্ৰা.

চতুমহাপথো ৰিয ছ আযতনানি আরম্মণদণ্ডকেহি হননট্ঠানত্তা. যৰকলাপী ৰিয সত্তো তেহি হঞ্ঞমানত্তা. ছ ব্যাভঙ্গিযো ৰিয সভাৰতো ছধাপি পচ্চেকং ইট্ঠানিট্ঠমজ্ঝত্তৰসেন অট্ঠারস আরম্মণানি যৰকলাপট্ঠানিযস্স সত্তস্স হননতো. ভৰপত্থনায অপরাপরুপ্পত্তিং সন্ধায ‘‘ভৰপত্থনা কিলেসা’’তি বহুৰচননিদ্দেসো. ভৰপত্থনা চ তস্স পচ্চযভূতা কিলেসা চাতি ভৰপত্থনাকিলেসাতি এৰং ৰা এত্থ অত্থো দট্ঠব্বো. যস্মা সত্তানং ৰট্টদুক্খং নাম সব্বম্পি তং ভৰপত্থনামূলকং, তস্মা ৰুত্তং ‘‘এৰং সত্তা’’তিআদি. ভৰপত্থনকিলেসাতি চ ভৰপত্থনামূলকং কিলেসং.

ভুম্মন্তি সমীপত্থে ভুম্মং. তেনাহ ‘‘সুধম্মায দ্ৰারে’’তি. ন কতন্তি দুক্খুপ্পাদনং ন কতং. নৰগূথসূকরং ৰিযাতি নৰগূথভক্খসূকরং ৰিয. চিত্তেনেৰাতি যো বজ্ঝতি, তস্স চিত্তেনেৰ ¶ . তস্মাতি যস্মা ৰেপচিত্তিবন্ধনস্স বন্ধনমুচ্চনং ৰিয, তস্মা ‘‘ৰেপচিত্তিবন্ধন’’ন্তি ৰুত্তং. ঞাণমোক্খং বন্ধনন্তি ঞাণেন মুচ্চনং বন্ধনং.

মঞ্ঞমানোতি পরিকপ্পিততণ্হাৰসেন ‘‘এতং মমা’’তি, দিট্ঠিৰসেন ‘‘এসো মে অত্তা’’তি, মানৰসেন ‘‘এসোহমস্মী’’তি মঞ্ঞন্তো. খন্ধৰিনিমুত্তস্স মঞ্ঞমানৰত্থুনো অভাৰা ‘‘খন্ধে মঞ্ঞন্তো’’তি ৰুত্তং. এতন্তি ‘‘মারস্সা’’তি ¶ এতং সামিৰচনং. কিলেসমারেন বদ্ধোতি কিলেসমারেন তেনেৰ কিলেসবন্ধনেন বদ্ধো. মুত্তোতি এত্থাপি এসেৰ নযো.

তণ্হামঞ্ঞনায সতি দিট্ঠিমানমঞ্ঞনানং পসঙ্গো এৰ নত্থীতি যথা ‘‘অস্মী’’তি পদেন দিট্ঠিমানমঞ্ঞনা ৰুত্তা হোন্তি, এৰং তণ্হামঞ্ঞিতাপীতি ৰুত্তং ‘‘অস্মীতি পদেন তণ্হামঞ্ঞিতং ৰুত্ত’’ন্তি. অযমহমস্মীতি পদেন দিট্ঠিমঞ্ঞিতন্তি এতরহি লব্ভমানদিট্ঠিৰত্থুৰসেনেৰ. ভৰিস্সন্তি অনাগতদিট্ঠিৰত্থুপরিকপ্পনৰসেনেৰ দিট্ঠিমঞ্ঞিতং. যেভুয্যেন হি অনাগতালিঙ্গনা সস্সতদিট্ঠি. উচ্ছেদৰসেন দিট্ঠিমঞ্ঞিতমেৰাতি আনেত্ৰা সম্বন্ধো. রূপীতিআদীনি পদানি. সস্সতস্সেৰাতি সস্সতগাহস্সেৰ পভেদদীপনানি. যস্মা মঞ্ঞিতং আবাধৰসেন রোগো, অন্তোদোসৰসেন গণ্ডো, অঙ্গনিকন্তৰসেন সল্লং, তস্মা ইমেহি তণ্হাদীহি কিলেসেহি পাকটচলনৰসেন ইঞ্জন্তি চেৰ, অপাকটসঞ্চলনৰসেন ফন্দন্তি চ. পপঞ্চিতং সংসারে চিরাযনং দট্ঠব্বং, খন্ধসন্তানস্স ৰা ৰিত্থারণং. পমত্তাকারপ্পত্তা মুচ্ছনাকারপ্পত্তা. তেসন্তি তণ্হাদিট্ঠিকিলেসানং. আকারদস্সনত্থন্তি পৰত্তিআকারদস্সনত্থং.

মানো নাম ‘‘সেয্যোহমস্মী’’তিআদিনা মজ্জনাকারপ্পৰত্তি. তণ্হায সম্পযুত্তমানৰসেনাতি কস্মা ৰুত্তং? ননু সব্বো মানো তণ্হাসম্পযুত্তো? সতি হি ব্যভিচারে ৰিসেসনং ইচ্ছিতব্বন্তি. সচ্চমেতং, তণ্হা পন অত্থি মানস্স পচ্চযভূতা, অত্থি মানস্স অপ্পচ্চযভূতা, যতো মানো অনিযতো ৰুচ্চতি. তথা হি পট্ঠানে ‘‘সংযোজনং ধম্মং পটিচ্চ সংযোজনো ধম্মো উপ্পজ্জতি হেতুপচ্চযা’’তি এত্থ সংযোজনানি সংযোজনেহি যথালাভং যোজেত্ৰা দস্সিতযোজনায ‘‘কামরাগসংযোজনং পটিচ্চ মানসংযোজনং অৰিজ্জাসংযোজন’’ন্তি ৰত্ৰা ‘‘কামরাগসংযোজনং পটিচ্চ অৰিজ্জাসংযোজন’’ন্তি, ‘‘মানসংযোজনং পটিচ্চ ভৰরাগসংযোজনং অৰিজ্জাসংযোজন’’ন্তি চ ৰত্ৰা ‘‘ভৰরাগসংযোজনং পটিচ্চ অৰিজ্জাসংযোজন’’ন্তি ৰুত্তং. এত্থ চ কামরাগভৰরাগসংযোজনেহি মানস্স অনিযতভাৰো পকাসিতো. তত্থ যা তণ্হা বলৰতী, তং সন্ধায ইদং ৰুত্তং ‘‘তণ্হায সম্পযুত্তমানৰসেনা’’তি. বলৰতণ্হাসম্পযুত্তো হি মানো সযম্পি বলৰা হুত্ৰা অস্মীতি সৰিসেসং মজ্জনৰসেন পৰত্ততীতি.

দিট্ঠিৰসেনাতি ¶ ¶ মানমূলকদিট্ঠিৰসেন. ‘‘সেয্যোহমস্মী’’তিআদিনা হি বহুলমানুপেতস্স পুগ্গলস্স রূপাদীসু একং উদ্দিস্স অযমহমস্মীতি দিট্ঠিযা উপ্পন্নায মানস্স অপ্পহীনত্তা মানোপি তত্থ তত্থেৰ উপ্পজ্জতি. ইতি মানমূলকং দিট্ঠিং সন্ধাযাহ ‘‘অযমহমস্মীতি দিট্ঠিৰসেন ৰুত্ত’’ন্তি. চোদকো পন ইমমত্থং অজানন্তো অনুপলব্ভমানমেৰ সম্পযোগত্থং গহেত্ৰা ‘‘ননু চা’’তিআদিনা চোদেতি. ইতরো ‘‘আম নত্থী’’তি তমত্থং সম্পটিচ্ছিত্ৰা ‘‘মানস্স পনা’’তিআদিনা পরিহারমাহ. তস্সত্থো ৰুত্তো এৰ.

যৰকলাপিসুত্তৰণ্ণনা নিট্ঠিতা.

আসীৰিসৰগ্গৰণ্ণনা নিট্ঠিতা.

চতুত্থো পণ্ণাসকো.

সল়াযতনসংযুত্তৰণ্ণনা নিট্ঠিতা.

২. ৰেদনাসংযুত্তং

১. সগাথাৰগ্গো

১. সমাধিসুত্তৰণ্ণনা

২৪৯. ৰেদনা ¶ ¶ চ পজানাতীতি সচ্চাভিসম্বোধৰসেন ৰুচ্চমানৰেদনানং পজাননং সাতিসযসমাধানপুব্বকন্তি ভগৰতা ‘‘সমাহিতো’’তি ৰুত্তন্তি আহ ‘‘উপচারেন ৰা অপ্পনায ৰা সমাহিতো’’তি. ৰেদনাতি তিস্সোপি ৰেদনা. দুক্খসচ্চৰসেনাতি দুক্খসচ্চভাৰেন, পরিজাননৰসেনাতি অত্থো. সম্ভৰন্তি সমুদযং তণ্হাৰিজ্জাকম্মফস্সাদিপ্পভেদং উপ্পত্তিকারণং. তেনাহ ‘‘সমুদযসচ্চৰসেন পজানাতী’’তি. যত্থাতি যংনিমিত্তং, যং আগম্ম কামতণ্হাৰিজ্জাদিনিরোধা ৰেদনানিরোধো, তেসং অযং নিরোধো. নিব্বানং আরব্ভ অরিযমগ্গপ্পৰত্তিযা হি নিব্বানং ৰেদনানিরোধোতি ৰুত্তো. খযং গমেতীতি খযগামী, তং খযগামিনং. ছাতং ৰুচ্চতি তণ্হা কামানং পাতুকামতাৰসেন পৰত্তনতো, অচ্চন্তমেৰ সমুচ্ছিন্নত্তা নত্থি এতস্মিং ছাতন্তি নিচ্ছাতো. তেনাহ ‘‘নিত্তণ্হো’’তি. সম্মসনচারৰেদনাতি সম্মসনূপচারৰেদনা. দ্ৰীহি পদেহীতি ‘‘সমাহিতো সম্পজানো’’তি ইমেহি দ্ৰীহি. ‘‘সতো’’তি পন ইদং সম্পজানপদস্সেৰ উপব্রূহনন্তি অধিপ্পাযো. সেসেহি চতূহি চতুসচ্চং কথিতং, ইতরেহি পন দ্ৰীহি চতুসচ্চবুজ্ঝনমেৰ কথিতং. সব্বসঙ্গাহিকোতি সব্বসভাৰধম্মানং সঙ্গণ্হনকো. তেনাহ ‘‘চতুভূমকধম্মপরিচ্ছেদো ৰুত্তো’’তি.

সমাধিসুত্তৰণ্ণনা নিট্ঠিতা.

২. সুখসুত্তৰণ্ণনা

২৫০. দুক্খং ন হোতীতি অদুক্খং, সুখং ন হোতীতি অসুখং, ম-কারো পদসন্ধিকরো. অদুক্খমসুখন্তি ৰেদযিতসদ্দাপেক্খায নপুংসকনিদ্দেসো. সপরসন্তানগতে সন্ধায অজ্ঝত্তবহিদ্ধাগহণন্তি আহ ‘‘অত্তনো চ পরস্স চা’’তি. তেন সব্বম্পি ৰেদযিতং গহিতন্তি দট্ঠব্বং ¶ . নস্সনসভাৰন্তি ইত্তরখণতায ¶ ভঙ্গতো উদ্ধং অপস্সিতব্বসভাৰং. পলোকো ভেদো এতস্স অত্থীতি পলোকিনং. তেনাহ ‘‘ভিজ্জনসভাৰ’’ন্তি. ঞাণেন ফুসিত্ৰা ফুসিত্ৰাতি পুব্বভাগে ৰিপস্সনাঞাণেন অনিচ্চা পভঙ্গুনোতি আরম্মণতো, উত্তরকালং অসম্মোহতো মগ্গপরম্পরায ফুসিত্ৰা ফুসিত্ৰা ৰযং পস্সন্তো. ৰিরজ্জতীতি মগ্গৰিরাগেন ৰিরজ্জতি. সম্মসনচারৰেদনা কথিতা আরদ্ধৰিপস্সকানং ৰসেন দেসনাতি. লোকিযলোকুত্তরেহি ঞাণেহি যাথাৰতো পরিজাননং পটিৰিজ্ঝনং ঞাণফুসনং.

সুখসুত্তৰণ্ণনা নিট্ঠিতা.

৩. পহানসুত্তৰণ্ণনা

২৫১. সব্বম্পি অট্ঠসতপভেদং তণ্হং ছিন্দি সমুচ্ছেদপহানৰসেন পজহি. তেনাহ ‘‘সমুচ্ছিন্দী’’তি. যদগ্গেন তণ্হা সব্বসো সমুচ্ছিন্না, তদগ্গেন সব্বানিপি সঞ্ঞোজনানীতি আহ ‘‘দসৰিধম্পী’’তিআদি. সম্মাতি সুট্ঠু. পহানঞ্চ নাম উপাযেন ঞাযেন পহানন্তি আহ ‘‘হেতুনা কারণেনা’’তি. দস্সনাভিসমযাতি অসম্মোহপটিৰেধা. অরহত্তমগ্গো হি উপ্পজ্জমানোৰ সভাৰপটিচ্ছাদকং মোহং ৰিদ্ধংসেন্তো এৰ পৰত্ততি, তেন মানো যাথাৰতো দিট্ঠো নাম হোতি, অযমস্স দস্সনাভিসমযো. যথা হি সূরিযে উট্ঠিতে অন্ধকারো ৰিদ্ধংসিযমানো ৰিহতো, এৰং অরহত্তমগ্গে উপ্পজ্জমানে সো সব্বসো পহীনো এৰ হোতি, ন তস্মিং সন্তানে পতিট্ঠং লভতি, অযমস্স পহানাভিসমযো. তেন ৰুত্তং ‘‘অরহত্তমগ্গো হী’’তিআদি. কিচ্চৰসেনাতি অসম্মোহপটিৰেধসঙ্খাতস্স দস্সনকিচ্চস্স অনিপ্ফাদনৰসেন.

যে ইমে চত্তারো অন্তাতি সম্বন্ধো. মরিযাদন্তোতি মরিযাদসঙ্খাতো অন্তো. এস নযো সেসত্তযেপি. তেসূতি চতূসু অন্তেসু. অদুং চতুত্থকোটিসঙ্খাতং সব্বস্সেৰ ৰট্টদুক্খস্স অন্তং পরিচ্ছেদং অরহত্তমগ্গেন মানস্স দিট্ঠত্তা পহীনত্তা চ অকাসীতি যোজনা. সমুস্সযো অত্তভাৰো.

ন রিঞ্চতীতি ন ৰিৰেচেতি ন ৰিস্সজ্জেতি. তেনাহ ‘‘সম্পজঞ্ঞং ন জহতী’’তি, সম্পজঞ্ঞং ন পরিচ্চজতীতি অত্থো. সঙ্খ্যং নোপেতীতি ইমস্স ‘‘দিট্ঠধম্মে অনাসৰো’’তি ¶ ইমস্স ৰসেন অত্থং ৰদন্তো ‘‘রত্তো দুট্ঠো’’তি অৰোচ সউপাদিসেসনিব্বানৰসেন. সঙ্খ্যং নোপেতীতি ৰা দিট্ঠে-ধম্মে অনাসৰো ধম্মট্ঠো ৰেদগূ কাযস্স ভেদা মনুস্সো দেৰোতি ৰা পঞ্ঞত্তিং ন উপেতীতি অনুপাদিসেসনিব্বানৰসেনপি অত্থো ৰত্তব্বো. এত্থ চ সুখাদীসু ৰেদনাসু যথাক্কমং ¶ রাগানুসযাদযো কথিতাতি আহ – ‘‘ইমস্মিং সুত্তে আরম্মণানুসযো কথিতো’’তি. যো হি রাগাদি পচ্চযসমৰাযে অতিইট্ঠাদীসু উপ্পজ্জনারহো মগ্গেন অপ্পহীনো, সো ‘‘রাগানুসযো’’তিআদিনা ৰুত্তো, অপ্পহীনত্থো সো মগ্গেন পহাতব্বো, ন পরিযুট্ঠানাভিভৰত্থোতি.

পহানসুত্তৰণ্ণনা নিট্ঠিতা.

৪. পাতালসুত্তৰণ্ণনা

২৫২. যত্থ পতিট্ঠা নত্থি একন্তিকাতি একন্তিকস্স মহতো পাতস্স অলন্তি অযমেত্থ অত্থো অধিপ্পেতোতি আহ ‘‘নত্থি এত্থ পতিট্ঠা’’তি. অসম্ভূতত্থন্তি ন সম্ভূতত্থং, মুসাতি অত্থো. সোতি অস্সুতৰা পুথুজ্জনো. যং তং উদকং পততীতি যোজনা. যস্মা সমুদ্দপিট্ঠে অন্তরন্তরা ৰেরম্ভৰাতসদিসো মহাৰাতো উট্ঠহিত্ৰা মহাসমুদ্দে উদকং উগ্গচ্ছাপেতি, তং কদাচি চক্কৰাল়াভিমুখং, কদাচি সিনেরুপাদাভিমুখং গন্ত্ৰা তং পতিহনতি, তস্মা ৰুত্তং ‘‘বলৰামুখং মহাসমুদ্দস্সা’’তিআদি. ৰেগেন পক্খন্দিত্ৰাতি মহতা ৰাতৰেগেন সমুদ্ধতং তেনেৰ ৰেগেন পক্খন্দন্তঞ্চ হুত্ৰা. মহানরকপপাতো ৰিযাতি যোজনাযামৰিত্থারগম্ভীরসোব্ভপপাতো ৰিয হোতি. তথারূপানন্তি তত্থ ৰসিতুং সমত্থানং. অসন্তন্তি অভূতং. অত্থৰসেন হি ৰাচা অভূতং নাম.

ন পতিট্ঠাসীতি পতিট্ঠং ন লভি. অনিবদ্ধন্তি অনিবন্ধনত্থং যংকিঞ্চি. দুব্বলঞাণোতি ঞাণবলরহিতো. ‘‘অস্সুতৰা পুথুজ্জনো’’তি ৰত্ৰা ‘‘সুতৰা অরিযসাৰকো’’তি ৰুত্তত্তা ‘‘সোতাপন্নো ধুর’’ন্তি ৰুত্তং. ইতরেসু অরিযসাৰকেসু ৰত্তব্বমেৰ নত্থি. তেসঞ্হি ৰেদনা সুপরিঞ্ঞাতা. বলৰৰিপস্সকো…পে… যোগাৰচরোপি ৰট্টতি মত্তসো ৰেদনানং পরিঞ্ঞাতত্তা.

পাতালসুত্তৰণ্ণনা নিট্ঠিতা.

৫. দট্ঠব্বসুত্তৰণ্ণনা

২৫৩. ৰিপরিণামনৰসেন ¶ দুক্খতো দট্ঠব্বাতি কিঞ্চাপি সুখা, পরিণামদুক্খতা পন সুখৰেদনায একন্তিকাতি. ৰিনিৰিজ্ঝনট্ঠেনাতি পীল়নৰসেন অত্তভাৰস্স ৰিজ্ঝনট্ঠেন. হুত্ৰাতি পচ্চযসমাগমেন উপ্পজ্জিত্ৰা. তেন পাকভাৰপুব্বকো অত্তলাভো ৰুত্তো. অভাৰাকারেনাতি ভঙ্গুপগমনাকারেন. তেন ৰিদ্ধংসভাৰো ৰুত্তো. উভযেন উদযব্বযপরিচ্ছিন্নতায সিখপ্পত্তং অনিচ্চতং ¶ দস্সেতি. স্ৰাযং হুত্ৰা অভাৰাকারো ইতরাসুপি ৰেদনাসু লব্ভতেৰ, অধিকো চ পন দ্ৰিন্নং দুক্খসভাৰো. দুক্খতাৰসেন পুরিমানং ৰেদনানং দট্ঠব্বতায দস্সিতত্তা পচ্ছিমায ৰেদনায এৰং দট্ঠব্বতা দস্সিতা. অদ্দাতি ঞাণগতিযা সচ্ছিকত্ৰা অদক্খি. ঞাণগমনঞ্হেতং, যদিদং দুক্খতো দস্সনং. সন্তসভাৰং সুখদুক্খতো উপসন্তরূপত্তা.

দট্ঠব্বসুত্তৰণ্ণনা নিট্ঠিতা.

৬. সল্লসুত্তৰণ্ণনা

২৫৪. দ্ৰীসু জনেসূতি সুতৰন্তঅস্সুতৰন্তেসু দ্ৰীসু জনেসু. অনুগতৰেধন্তি পুব্বে পৰত্তৰেধস্স অনুগতৰেধং. বলৰতরা দিগুণা ৰিয হুত্ৰা দল়্হতরপৰত্তিযা. এৰমেৰাতি যথা ৰিদ্ধস্স পুরিসস্স অনুৰেধনা বলৰতরা, এৰমেৰ. সমাধিমগ্গফলানি নিস্সরণং ৰিক্খম্ভনসমুচ্ছেদপটিপ্পস্সদ্ধিৰসেন. সমাধিসীসেন হেত্থ ঝানঞ্চ গহিতং. সো ন জানাতি অনধিগতত্তা. নিস্সরণন্তি জানাতি অনিস্সরণমেৰ. তাসং সমধিগতানং সুখদুক্খৰেদনানং. ন ৰিপ্পযুত্তো অপ্পহীনকিলেসত্তা. সঙ্খাতধম্মস্সাতি সঙ্খায পঞ্ঞায পরিঞ্ঞাতচতুক্খন্ধস্স. তেনাহ ‘‘তুলিতধম্মস্সা’’তি. ইমস্মিম্পি সুত্তে পুরিমসুত্তে ৰিয আরম্মণানুসযোৰ কথিতো, সো পন তত্থ ৰুত্তনযেনেৰ ৰেদিতব্বো. অনুরোধৰিরোধপহানস্স ৰুত্তত্তা খীণাসৰো ধুরং. অনাগামীপি ৰট্টতি, তস্স ৰিরোধপ্পহানং লব্ভতি.

সল্লসুত্তৰণ্ণনা নিট্ঠিতা.

৭. পঠমগেলঞ্ঞসুত্তৰণ্ণনা

২৫৫. সদ্দহিত্ৰা ¶ গিলানে উপট্ঠাতব্বে মঞ্ঞিস্সন্তীতি যোজনা. তত্থাতি তস্মিং ঠানে. কম্মট্ঠানানুযোগো সপ্পাযো যেসং তে কম্মট্ঠানসপ্পাযা, সতিপট্ঠানরতাতি অত্থো. অনিচ্চতং অনুপস্সন্তোতি কাযং পটিচ্চ উপ্পন্নায ৰেদনায চ অনিচ্চতং অনুপস্সন্তো. ৰযং অনুপস্সন্তোতিআদীসুপি এসেৰ নযো. ৰযন্তি পন তায এৰ খযসঙ্খাতং. ৰিরাগন্তি ৰিরজ্জনং. পটিনিস্সগ্গন্তি পরিচ্চাগপটিনিস্সগ্গং, পক্খন্দনপটিনিস্সগ্গম্পি ৰা.

আগমনীযপটিপদাতি অরিযমগ্গস্স আগমনট্ঠানিযা পুব্বভাগপটিপদা. পুব্বভাগাযেৰ ন লোকুত্তরা. সম্পজঞ্ঞং পুব্বভাগিযমেৰ. তিস্সো অনুপস্সনা পুব্বভাগাযেৰ ৰিপস্সনাপরিযাপন্নত্তা ¶ . মিস্সকাতি লোকিযলোকুত্তরমিস্সকা. ভাৰনাকালো দস্সিতো ‘‘নিরোধানুপস্সিনো ৰিহরতো, পটিনিস্সগ্গানুপস্সিনো ৰিহরতো রাগানুসযো পহীযতী’’তি ৰুত্তত্তা.

পঠমগেলঞ্ঞসুত্তৰণ্ণনা নিট্ঠিতা.

৮-৯. দুতিযগেলঞ্ঞসুত্তাদিৰণ্ণনা

২৫৬-২৫৭. ফস্সং পটিচ্চাতি এত্থ ফস্সসীসেন ফস্সাযতনানং গহণং. ন হি ফস্সাযতনেহি ৰিনা ফস্সস্স সম্ভৰো. তেনাহ ‘‘কাযোৰ হি এত্থ ফস্সোতি ৰুত্তো’’তি, ফস্সসীসেন ৰুত্তোতি অধিপ্পাযো. নৰমং উত্তানমেৰ হেট্ঠা ৰুত্তনযত্তা.

দুতিযগেলঞ্ঞসুত্তাদিৰণ্ণনা নিট্ঠিতা.

১০. ফস্সমূলকসুত্তৰণ্ণনা

২৫৮. সুখৰেদনায হিতং সুখৰেদনিযং. সো পনেস হিতভাৰো পচ্চযভাৰেনাতি আহ ‘‘সুখৰেদনায পচ্চযভূত’’ন্তি. ইমস্মিম্পি সুত্তদ্ৰযেতি ¶ ইমস্মিং নৰমে দসমে চ সুত্তেপি. সম্মসনচারৰেদনাতি সম্মসনীযৰেদনা এৰ কথিতা, ন লোকুত্তরাতি অধিপ্পাযো.

ফস্সমূলকসুত্তৰণ্ণনা নিট্ঠিতা.

সগাথাৰগ্গৰণ্ণনা নিট্ঠিতা.

২. রহোগতৰগ্গো

১. রহোগতসুত্তৰণ্ণনা

২৫৯. যংকিঞ্চি ৰেদযিতন্তি ‘‘সুখং দুক্খং অদুক্খমসুখ’’ন্তি ৰুত্তং ৰেদযিতং দুক্খস্মিং অন্তোগধং, দুক্খন্তি ৰত্তব্বতং লভতি পরিযাযেনাতি অত্থো. তেনাহ ‘‘তং সব্বং দুক্খন্তি অত্থো’’তি. যা এসাতিআদীসু যো সঙ্খারানং অনিচ্চতাসঙ্খাতো হুত্ৰা অভাৰাকারো, যা খযসভাৰতা ৰিনস্সনসভাৰতা জরায মরণেন চাতি দ্ৰিধা ৰিপরিণামনসভাৰতা, এতং সন্ধায উদ্দিস্স সব্বং ৰেদযিতং দুক্খন্তি মযা ৰুত্তন্তি অযং সঙ্খেপত্থো. সাতি সঙ্খারানং অনিচ্চতা ¶ . ৰেদনানম্পি অনিচ্চতা এৰ সঙ্খারসভাৰত্তা. তাসং অনিচ্চতা চ নাম মরণং ভঙ্গোতি কত্ৰা ততো উত্তরি দুক্খং নাম নত্থীতি সব্বা ৰেদনা ‘‘দুক্খা’’তি ৰুত্তা, যথা ‘‘যদনিচ্চং তং দুক্খ’’ন্তি চ, ‘‘পঞ্চুপাদানক্খন্ধা দুক্খা’’তি চ ৰুত্তং. ইদং সুত্তপদং. চত্তারো আরুপ্পাতি চতস্সো অরূপসমাপত্তিযো. এত্থাতি চ এতস্মিং পটিপ্পস্সদ্ধিৰারে.

রহোগতসুত্তৰণ্ণনা নিট্ঠিতা.

৪. অগারসুত্তৰণ্ণনা

২৬২. পুরত্থিমাতি ৰিভত্তিলোপেন নিদ্দেসো, নিস্সক্কে ৰা এতং পচ্চত্তৰচনং. পঠমজ্ঝানাদিৰসেনাতি পঠমদুতিযজ্ঝানৰসেন. অনুস্সতিৰসেনাতি নিদস্সনমত্তং অঞ্ঞস্সপি উপচারজ্ঝানগ্গহিতস্স সৰিতক্কচারস্স নিরামিসস্স সুখস্স লব্ভনতো. তস্সপি ৰা পঠমজ্ঝানাদীতি এত্থ আদি-সদ্দেন সঙ্গহো দট্ঠব্বো. কামহেতু দুক্খপ্পত্তানং দুক্খৰেদনা কামামিসেন ¶ সামিসা ৰেদনা. অনুত্তরৰিমোক্খা নাম অরহত্তফলং. ‘‘কুদাস্সু নামাহং তদাযতনং উপসম্পজ্জ ৰিহরিস্সামী’’তি এৰং পিহং উপট্ঠাপযতো তস্মিং অনিজ্ঝমানে পিহপ্পচ্চযা উপ্পন্নদোমনস্সৰেদনা. নেক্খম্মনিস্সিতা উপেক্খাৰেদনা নিরামিসা অদুক্খমসুখা নাম. সৰিসেসং পন দস্সেতুং ‘‘চতুত্থজ্ঝানৰসেন উপ্পন্না অদুক্খমসুখৰেদনা’’তি ৰুত্তং.

অগারসুত্তৰণ্ণনা নিট্ঠিতা.

৫-৮. পঠমআনন্দসুত্তাদিৰণ্ণনা

২৬৩-২৬৬. হেট্ঠা কথিতনযানেৰ, ৰেনেয্যজ্ঝাসযতো পন তেসং দেসনাতি দট্ঠব্বং. এত্থাতি এতেসু চতূসু সুত্তেসু. পুরিমানি দ্ৰে ‘‘পঠমং ঝানং সমাপন্নস্স ৰাচা পটিপ্পস্সদ্ধা হোতী’’তিআদিনা নযেন যাৰ খীণাসৰস্স কিলেসপটিপ্পস্সদ্ধি, তাৰ দেসনায পৰত্তত্তা ‘‘পরিপুণ্ণপস্সদ্ধিকানী’’তি ৰুত্তানি. তাৰ পরিপূরং কত্ৰা অদেসিতত্তা ‘‘পচ্ছিমানি উপড্ঢপস্সদ্ধিকানি, দেসনাযা’’তিআদি ৰুত্তং.

পঠমআনন্দসুত্তাদিৰণ্ণনা নিট্ঠিতা.

৯-১০. পঞ্চকঙ্গসুত্তাদিৰণ্ণনা

২৬৭-২৬৮. দণ্ডমুগ্গরং অগ্গসোণ্ডমুগ্গরং. কাল়সুত্তপক্খিপনং কাল়সুত্তনাল়ি. ৰাসিআদীনি ¶ পঞ্চ অঙ্গানি অস্সাতি পঞ্চকঙ্গো. ৰত্থুৰিজ্জায ৰুত্তৰিধিনা কত্তব্বনিস্সযানি ঠপেতীতি থপতি. পণ্ডিতউদাযিত্থেরো, ন লাল়ুদাযিত্থেরো. দ্ৰেপানন্দাতি অট্ঠকথায পদুদ্ধারো কতো – ‘‘দ্ৰেপি মযা আনন্দা’’তি পন পাল়িযং. পসাদকাযসন্নিস্সিতা কাযিকা, চেতোসন্নিস্সিতা চেতসিকা. আধিপচ্চট্ঠেন সুখমেৰ ইন্দ্রিযন্তি সুখিন্দ্রিযং. উপৰিচারৰসেনাতি রূপাদীনি উপেচ্চ ৰিচরণৰসেন. অতীতে আরম্মণে. পচ্চুপ্পন্নেতি অদ্ধাপচ্চুপ্পন্নে. এৰং অট্ঠাধিকং সতং অট্ঠসতং.

পাটিযেক্কো অনুসন্ধীতি পুচ্ছানুসন্ধিআদীহি ৰিসুং তেহি অসম্মিস্সো একো অনুসন্ধি. একাপি ৰেদনা কথিতা ‘‘তত্র, ভিক্খৰে, সুতৰা অরিযসাৰকো’’তি আহরিত্ৰা ‘‘ফস্সপচ্চযা ৰেদনা’’তি. যস্মা ভগৰা ¶ চতুত্থজ্ঝানুপেক্খাৰেদনং ৰত্ৰা – ‘‘অত্থানন্দ, এতস্মা সুখা অঞ্ঞং সুখ’’ন্তিআদিং ৰদন্তো থপতিনো ৰাদং উপত্থম্ভেতি নাম. তেন হি উপেক্খাৰেদনা ‘‘সুখ’’ন্তেৰ ৰুত্তা সন্তসভাৰত্তা. অভিক্কন্ততরন্তি অতিৰিয কন্ততরং মনোরমতরং. তেনাহ ‘‘সুন্দরতর’’ন্তি. পণীততরন্তি পধানভাৰং নীততায উল়ারতরং. তেনাহ ‘‘অতপ্পকতর’’ন্তি. সুখন্তি ৰুত্তা পটিপক্খস্স সুট্ঠু খাদনেন, সুকরং ওকাসদানমস্সাতি ৰা. নিরোধো সুখং নাম সব্বসো উদযব্বযাভাৰতো. তেনাহ ‘‘নিদ্দুক্খভাৰসঙ্খাতেন সুখট্ঠেনা’’তি.

সুখস্মিংযেৰাতি সুখমিচ্চেৰ পঞ্ঞপেতি. নিরোধসমাপত্তিং সীসং কত্ৰাতি নিরোধসমাপত্তিদেসনায সীসং উত্তমং কত্ৰা. দেসনায উদ্দেসাধিমুত্তে উট্ঠাপেত্ৰা ৰিত্থারিতত্তা ‘‘নেয্যপুগ্গলস্স ৰসেনা’’তি ৰুত্তং. দসমং অনন্তরসুত্তে ৰুত্তনযত্তা উত্তানত্থমেৰ.

পঞ্চকঙ্গসুত্তাদিৰণ্ণনা নিট্ঠিতা.

রহোগতৰগ্গৰণ্ণনা নিট্ঠিতা.

৩. অট্ঠসতপরিযাযৰগ্গো

১. সীৰকসুত্তৰণ্ণনা

২৬৯. চূল়া পন অস্স মহতী অত্থি সৰিসেসা, তস্মা ‘‘মোল়িযসীৰকো’’তি ৰুচ্চতি. ছন্নপরিব্বাজকোতি কম্বলাদিনা কোপীনপটিচ্ছাদকপরিব্বাজকো. পিত্তপচ্চযানীতি পিত্তহেতুকানি ¶ . ‘‘তিস্সো ৰেদনা’’তি ৰত্ৰা তাসং সম্ভৰং দস্সেতুং ‘‘কথ’’ন্তিআদি ৰুত্তং. কুসলৰেদনা উপ্পজ্জতি পিত্তপচ্চযা. পিত্তভেসজ্জং করিস্সামীতি ভেসজ্জসম্ভরণত্থঞ্চেৰ তদত্থং আমিসকিঞ্জক্খসম্ভরণত্থঞ্চ পাণং হনতীতি যোজনা. মজ্ঝত্তো ভেসজ্জকরণে উদাসীনো.

তস্মাতি যস্মা পিত্তাদিপচ্চযহেতুকন্তি অত্তনো চ লোকস্স চ পচ্চক্খং অতিধাৰন্তি যে সমণা ৰা ব্রাহ্মণা ৰা, তস্মা তেসং মিচ্ছা. পিত্তাদীনং তিণ্ণম্পি সমোধানসন্নিপাতে জাতানি সন্নিপাতিকানি. পুরিমউতুনো ৰিসদিসো উতুৰিপরিণামোতি আহ ‘‘ৰিসভাগউতুতো জাতানী’’তি ¶ . অনুদকো থদ্ধলূখভূমিৰিভাগো জঙ্গলদেসো, ৰুত্তৰিপরিযাযেন অনুপদেসো ৰেদিতব্বো. মলযং হিমসীতবহুলো, ইতরো উণ্হবহুলো.

অত্তনো পকতিচরিযানং ৰিসমং কাযস্স পরিহরণৰসেন, জাতানি পন অসয্হসহনঅদেসঅকালচরণাদিনা ৰেদিতব্বানীতি আহ ‘‘মহাভারৰহনা’’তিআদি. পরস্স উপক্কমতো নিব্বত্তানি ওপক্কমিকানীতি আহ – ‘‘অযং চোরো ৰা’’তিআদি. কেৰলন্তি বাহিরপচ্চযং অনপেক্খিত্ৰা কেৰলং তেনেৰ. তেনাহ ‘‘কম্মৰিপাকতোৰ জাতানী’’তি. সক্কা পটিবাহিতুং পতীকারেন. লোকৰোহারো নাম কথিতো পিত্তসমুট্ঠানাদিসমঞ্ঞায লোকসিদ্ধত্তা. কামং সরীরসন্নিস্সিতা ৰেদনা কম্মনিব্বত্তাৰ, তস্সা পন পচ্চুপ্পন্নপচ্চযৰসেন এৰমযং লোকৰোহারোতি ৰুত্তঞ্চেৰ গহেত্ৰা পরৰাদপটিসেধো কতোতি দট্ঠব্বং.

সীৰকসুত্তৰণ্ণনা নিট্ঠিতা.

২-১০. অট্ঠসতসুত্তাদিৰণ্ণনা

২৭০-২৭৮. ৰেদনানং অট্ঠাধিকং সতং, তস্স অট্ঠসতস্স তব্ভাৰস্স পরিযাযো কারণং এত্থ অত্থীতি অট্ঠসতপরিযাযো, সুত্তং. তেনাহ ‘‘অট্ঠসতস্স কারণভূত’’ন্তি. ধম্মকারণন্তি পরিযত্তিধম্মভূতং কারণং. কাযিকাতি পঞ্চদ্ৰারকাযিকা. তেনাহ ‘‘কামাৰচরেযেৰ লব্ভন্তী’’তি, কামভূমিকাতি অত্থো. অরূপাৰচরে নত্থি, তিভূমিকাতি অত্থো. তেনাহ – ‘‘অরূপে তিকচতুক্কজ্ঝানং উপ্পজ্জতি, তঞ্চ খো লোকুত্তরং, ন লোকিয’’ন্তি. ইতরা উপেক্খাৰেদনা. উপৰিচরন্তি উপেচ্চ পজ্জন্তীতি অত্থো. তংসম্পযুত্তানন্তি ৰিচারসম্পযুত্তানং.

পটিলাভতোতি পটিলদ্ধভাৰতো. সমনুপস্সতোতি পচ্চৰেক্খতো পস্সতো. অতীতং খণত্তযাতিক্কমেন অতিক্কন্তং, নিরুদ্ধপ্পত্তিযা নিরুদ্ধং, পকতিৰিজহনেন ৰিপরিণতং. সমনুস্সরতোতি ¶ চিন্তযতো. গেহস্সিতন্তি কামগুণনিস্সিতং. কামগুণা হি ইধ গেহনিস্সিতধম্মেন গেহপরিযাযেন ৰুত্তা.

ৰিপরিণামৰিরাগনিরোধন্তি ¶ ৰিপরিণামনং ৰিরজ্জনলক্খণং নিরুজ্ঝনঞ্চ ৰিদিত্ৰা. পুব্বেতি অতীতে. এতরহীতি ইদানি ৰত্তমানা. সম্মপ্পঞ্ঞায পস্সতোতি ৰিপস্সনাপঞ্ঞায চেৰ মগ্গপঞ্ঞায চ যাথাৰতো পস্সতো. উস্সুক্কাপেতুন্তি ৰিপস্সনং পট্ঠপেত্ৰা মগ্গপটিৰেধং পাপেতুং. নিব্বানং উদ্দিস্স পৰত্তিতত্তা নেক্খম্মস্সিতসোমনস্সানি নাম. লোকামিসপটিসংযুত্তানন্তি কামগুণনিস্সিতানং. তদাযতনন্তি তং আযতনং তং কারণং অরহত্তং. অনুত্তরেসু ৰিমোক্খেসূতি অরিযফলধম্মেসু. পিহন্তি অধিগমিচ্ছং.

উপেক্খাতি সোমনস্সরহিতঅঞ্ঞাণুপেক্খা. বাল্যযোগতো বালস্স, ততো এৰ মূল়্হস্স পুথুজ্জনস্স. কিলেসোধীনং মগ্গোধীহি অজিতত্তা অনোধিজিনস্স. সত্তমভৰাদিতো উদ্ধং পৰত্তনৰিপাকস্স অজিতত্তা অৰিপাকজিনস্স. অনেকাদীনৰে ৰট্টে আদীনৰস্স অজাননেন অনাদীনৰদস্সাৰিনো. পটিপত্তিপটিৰেধবাহুসচ্চাভাৰেন অস্সুতৰতো পুথুজ্জনস্স. রূপং সা নাতিৰত্ততি ন অতিক্কমতি ঞাণসম্পযুত্তাভাৰতো. সব্বসঙ্গাহকোতি সব্বধম্মে সঙ্গণ্হনকো. ততিযাদীনি যাৰ দসমা হেট্ঠা ৰুত্তনযত্তা উত্তানত্থানেৰ.

অট্ঠসতসুত্তাদিৰণ্ণনা নিট্ঠিতা.

১১. নিরামিসসুত্তৰণ্ণনা

২৭৯. আরম্মণতো সম্পযোগতো চ কিলেসামিসেন সামিসা. নিরামিসাযাতি নিস্সক্কৰচনং. নিরামিসতরাৰাতি একংসৰচনং তস্সা তথা নিস্সমেতব্বতায. সা হি পীতি সব্বসো সন্তকিলেসামিসে সন্তানে পৰত্তিযা অচ্চন্তসভাৰধম্মারম্মণৰিসযতায সযম্পি সাতিসযং সন্তসভাৰাকারেন পৰত্তিযা নিরামিসাযপি নিরামিসতরা ৰুত্তা. তেনাহ ‘‘ননু চা’’তিআদি. ইদানি তমত্থং উপমায সাধেতুং ‘‘যথা হী’’তিআদিমাহ. অপ্পটিহারিকন্তি পটিহরণরহিতং অপ্পটিহারং, কেনচি অনাৰটন্তি অত্থো. সেসৰারেসূতি সুখৰারউপেক্খাৰারেসু.

ৰিমোক্খৰারো পন ন অতিদিট্ঠো ইতরেহি ৰিসদিসত্তা. তেনাহ ‘‘ৰিমোক্খৰারে পনা’’তিআদি. রূপপটিসংযুত্তোতি ভাৰিতরূপপটিসংযুত্তো. সামিসো নাম যস্মা সামিসরূপপটিবদ্ধৰুত্তি ¶ চেৰ সামিসরূপপটিভাগঞ্চ ¶ , তস্মা ‘‘রূপামিস’’ন্তি ৰুচ্চতি, তেন রূপামিসেন সামিসো নাম. অরূপামিসস্স অভাৰতো অরূপপটিসংযুত্তো ৰিমোক্খো নিরামিসো নাম.

নিরামিসসুত্তৰণ্ণনা নিট্ঠিতা.

অট্ঠসতপরিযাযৰগ্গৰণ্ণনা নিট্ঠিতা.

ৰেদনাসংযুত্তৰণ্ণনা নিট্ঠিতা.

৩. মাতুগামসংযুত্তং

১. পঠমপেয্যালৰগ্গো

১-২. মাতুগামসুত্তাদিৰণ্ণনা

২৮০-২৮১. অগুণঙ্গেহীতি ¶ ¶ অগুণকোট্ঠাসেহি. রূপযতীতি রূপং, সরীররূপং. সরীররূপং পাসংসং এতস্স অত্থীতি রূপৰা, তপ্পটিক্খেপেন ন চ রূপৰা, সম্পন্নরূপো ন হোতীতি অত্থো. ঞাতিকুলতো অঞ্ঞতো ৰা আগতায ভোগসম্পদায অভাৰেন ন ভোগসম্পন্নো. দুস্সীলোতি নিস্সীলো. নিস্সীলতায এৰ চস্সা পুব্বুট্ঠাযিতাদিআচারাভাৰো ৰুত্তো. আলসিযোতি আলসিযতায যুত্তো. পজঞ্চস্স ন লভতীতি পজাভাৰসীসেন তস্সা পরিৰারহানি ৰুত্তা. পরিৰত্তেতব্বন্তি পুরিসৰসেন পরিৰত্তেতব্বং.

মাতুগামসুত্তাদিৰণ্ণনা নিট্ঠিতা.

৩. আৰেণিকদুক্খসুত্তৰণ্ণনা

২৮২. আৰেণিতব্বতো মরিযাদায ৰিসুং অসাধারণতো পস্সিতব্বতো আৰেণিকানি. পটিপচ্চেকে পুগ্গলে নিযুত্তানীতি পাটিপুগ্গলিকানি. পরিচারিকভাৰন্তি উপট্ঠাযিকভাৰং.

আৰেণিকদুক্খসুত্তৰণ্ণনা নিট্ঠিতা.

৪. তীহিধম্মেহিসুত্তাদিৰণ্ণনা

২৮৩-৩০৩. মচ্ছেরমলপরিযুট্ঠিতেনাতি মচ্ছরিযমলেন অভিভূতেন. তেনাতি কস্সচি কিঞ্চি অদানেন চ. এতং ‘‘মচ্ছেরমলপরিযুট্ঠিতেনা’’তিআদি ৰুত্তং. ৰিলোকেন্তো ৰিচরতি ইস্সাপকতচিত্ততায. পঞ্চমাদীনি যাৰ একাদসমা উত্তানত্থানেৰ.

তীহিধম্মেহিসুত্তাদিৰণ্ণনা নিট্ঠিতা.

৩. বলৰগ্গো

১. ৰিসারদসুত্তৰণ্ণনা

৩০৪. রূপসম্পত্তি ¶ ¶ রূপবলং তংসমঙ্গিনো উপত্থম্ভকভাৰতো. এস নযো সেসেসুপি. বলানি হি সত্তানং ৰুড্ঢিযা উপত্থম্ভকপচ্চযো হোতি, যথা তং আহারো. তেনাহ – ‘‘ইমানী’’তিআদি.

ৰিসারদসুত্তৰণ্ণনা নিট্ঠিতা.

২-১০. পসয্হসুত্তাদিৰণ্ণনা

৩০৫-৩১৩. অভিভৰিত্ৰা সব্বং অন্তোজনং সামিকঞ্চ. নাসেন্তীতি নাসনং অদস্সনং নেন্তি নীহরন্তীতি অত্থো.

পসয্হসুত্তাদিৰণ্ণনা নিট্ঠিতা.

মাতুগামসংযুত্তৰণ্ণনা নিট্ঠিতা.

৪. জম্বুখাদকসংযুত্তং

১. নিব্বানপঞ্হসুত্তৰণ্ণনা

৩১৪. নিব্বানং ¶ ¶ আগম্মাতি এত্থ আগম্মাতি সব্বসঙ্খারেহি নিব্বিন্নস্স ৰিসঙ্খারনিন্নস্স গোত্রভুনা ৰিৰট্টিতমানসস্স মগ্গেন সচ্ছিকরণেনাতি অত্থো. সচ্ছিকিরিযমানঞ্হি তং অধিগন্ত্ৰা আরম্মণপচ্চযভূতঞ্চ পটিচ্চ অধিপতিপচ্চযভূতে চ তস্মিং পরমস্সাসভাৰেন ৰিমুত্তসঙ্খারস্স পরমগতিভাৰেন চ পতিট্ঠানভূতে পতিট্ঠায খযসঙ্খাতো মগ্গো রাগাদিকে খেপেতীতি তংসচ্ছিকরণাভাৰে রাগাদীনং অনুপ্পত্তিনিরোধগমনাভাৰতো ‘‘নিব্বানং আগম্ম রাগো খীযতী’’তি ৰুত্তং.

ইমিনাৰ সুত্তেনাতি ইমিনাৰ জম্বুখাদকসুত্তেন. কিলেসক্খযমত্তং নিব্বানন্তি ৰদেয্য ‘‘রাগক্খযো’’তিআদিনা সুত্তে আগতত্তা. ‘‘কিলেসক্খযমত্ত’’ন্তি অৰিসেসেন ৰুত্তত্তা আহ ‘‘কস্সা’’তিআদি. অদ্ধা অত্তনোতি ৰক্খতি ‘‘পরস্স কিলেসক্খযেন পরস্স নিব্বানসম্পত্তি ন যুত্তা’’তি. নিব্বানারম্মণকরণেন গোত্রভুক্খণে কিলেসক্খযপ্পত্তিতা চ আপন্নাতি আহ – ‘‘কিং পন তেসু অখীণেসুযেৰা’’তিআদি. ননু আরম্মণকরণমত্তেন কিলেসক্খযো অনুপ্পত্তোতি ন সক্কা ৰত্তুং. চিত্তঞ্হি অতীতানাগতাদিসব্বং আলম্বনং করোতি, ন নিপ্ফন্নমেৰাতি. গোত্রভূপি মগ্গেন যা কিলেসানং অনুপ্পত্তিধম্মতা কাতব্বা, তং আরব্ভ পৰত্তিস্সতীতি? ন, অপ্পত্তনিব্বানস্স নিব্বানারম্মণঞাণাভাৰতো. ন হি অঞ্ঞে ধম্মা ৰিয নিব্বানং, তং পন অতিগম্ভীরত্তা অপ্পত্তেন আলম্বিতুং ন সক্কা, তস্মা তেন গোত্রভুনা পত্তব্বেন তিকালিকসভাৰাতিক্কন্তগম্ভীরভাৰেন ভৰিতব্বং, কিলেসক্খযমত্ততং ৰা ইচ্ছতো গোত্রভুতো পুরেতরং নিপ্ফন্নেন কিলেসক্খযেন ভৰিতব্বং. অপ্পত্তকিলেসক্খযারম্মণকরণে হি সতি গোত্রভুতো পুরেতরচিত্তানিপি আলম্বেয্যুন্তি.

তস্মাতিআদি ৰুত্তস্সেৰ অত্থস্স নিগমনং. তং পনেতং নিব্বানং. রূপিনো ধম্মা অরূপিনো ধম্মাতিআদীসূতি আদিসদ্দেন লোকুত্তরঅনাসৰাদীনং সঙ্গহো দট্ঠব্বো. অরূপধম্মাদিভাৰগ্গহণেন চস্স ¶ পরিনিপ্ফন্নতা দীপিতা. তেনাহ ‘‘ন কিলেসক্খযমত্তমেৰা’’তি. কিলেসক্খযমত্ততায ¶ হি সতি নিব্বানস্স বহুতা আপজ্জতি ‘‘যত্তকা কিলেসা খীযন্তি, তত্তকানি নিব্বানানী’’তি. অভাৰস্সভাৰতো গম্ভীরাদিভাৰো অসঙ্খতাদিভাৰো চ ন সিযা, ৰুত্তো চ সো নিব্বানস্স, তস্মাস্স পচ্চেতব্বো পরিনিপ্ফন্নভাৰো. যস্মা চ সম্মুতিসচ্চারম্মণং সঙ্খতধম্মারম্মণং ৰা সমুচ্ছেদৰসেন কিলেসে পজহিতুং ন সক্কোতি, যতো মহগ্গতঞাণং ৰিপস্সনাঞাণং ৰা কিলেসৰিক্খম্ভনৰসেন তদঙ্গৰসেন ৰা পজহতি, তস্মা অরিযমগ্গঞাণস্স সম্মুতিসচ্চসঙ্খতধম্মারম্মণেহি ৰিপরীতসভাৰেন আরম্মণেন ভৰিতব্বং. তথা হি তং সমুচ্ছেদৰসেন কিলেসে পজহীতি এৰং পরিনিপ্ফন্নাসঙ্খতসভাৰং নিব্বানন্তি নিট্ঠমেত্থ গন্তব্বন্তি.

নিব্বানপঞ্হসুত্তৰণ্ণনা নিট্ঠিতা.

৩-১৫. ধম্মৰাদীপঞ্হসুত্তাদিৰণ্ণনা

৩১৬-৩২৮. পহায গতত্তাতি অরিযমগ্গেন জহিত্ৰা ঞাণগমনেন গতত্তা. সুট্ঠু গতাতি সম্মা গতা পটিপন্নাতি সুগতা. পরিজাননত্থন্তি তীহি পরিঞ্ঞাহি পরিজাননত্থং. দুক্খসঙ্খাতোতি ‘‘দুক্খ’’ন্তি সঙ্খাতব্বো ৰিদিতব্বো চ দুক্খসভাৰো ধম্মো দুক্খদুক্খতা. যস্মা দুক্খৰেদনাৰিনিমুত্তসঙ্খতধম্মে সুখৰেদনায চ যথা ইধ সঙ্খারদুক্খতা ৰিপরিণামদুক্খতাতি দুক্খপরিযাযো নিরুপ্পতেৰ, তস্মা দুক্খসভাৰো ধম্মো একেন দুক্খসদ্দেন ৰিসেসেত্ৰা ৰুত্তো ‘‘দুক্খদুক্খতা’’তি. সেসপদদ্ৰযেতি সঙ্খারদুক্খতা ৰিপরিণামদুক্খতাতি এতস্মিং পদদ্ৰযে. সঙ্খারভাৰেন দুক্খসভাৰো সঙ্খারদুক্খতা. সুখস্স ৰিপরিণামনেন দুক্খসভাৰো ৰিপরিণামদুক্খতা.

ধম্মৰাদীপঞ্হসুত্তাদিৰণ্ণনা নিট্ঠিতা.

১৬. দুক্করপঞ্হসুত্তৰণ্ণনা

৩২৯. পব্বজ্জাযাতি ¶ পব্বজিতপটিপত্তিযং. ধম্মানুধম্মপ্পটিপন্নো ভিক্খূতি ধম্মানুধম্মং পটিপজ্জমানো ভিক্খু. পাতন্তি পাতো. নচিরস্সন্তি খিপ্পমেৰ. তেনাহ ‘‘লহুযেৰা’’তি.

দুক্করপঞ্হসুত্তৰণ্ণনা নিট্ঠিতা.

জম্বুখাদকসংযুত্তৰণ্ণনা নিট্ঠিতা.

৫. সামণ্ডকসংযুত্তৰণ্ণনা

৩৩০-৩৩১. ইমিনাৰ ¶ নযেনাতি যো জম্বুখাদকসংযুত্তে অত্থনযো, ইমিনাৰ নযেন. ইমিনা হি দ্ৰে সংযুত্তানি পাল়িতো অত্থতো চ অঞ্ঞমঞ্ঞং সদিসানেৰাতি দস্সেতি.

সামণ্ডকসংযুত্তৰণ্ণনা নিট্ঠিতা.

৬. মোগ্গল্লানসংযুত্তং

১-৮. পঠমজ্ঝানপঞ্হসুত্তাদিৰণ্ণনা

৩৩২-৩৩৯. কামসহগতেসু ¶ ¶ সঞ্ঞামনসিকারেসু উপট্ঠহন্তেসু ব্যাপাদাদিসহগতাপি সঞ্ঞামনসিকারা যথাপচ্চযং উপট্ঠহন্তিযেৰাতি ৰুত্তং ‘‘কামসহগতাতি পঞ্চনীৰরণসহগতা’’তি. নীৰরণানঞ্হেত্থ নিদস্সনমত্তমেতং, যদিদং কামগ্গহণং. পহীনাৰসেসা চেত্থ নীৰরণা ৰেদিতব্বা, তস্মা পঞ্চগ্গহণং ন কত্তব্বং. তস্সাতি মহামোগ্গল্লানত্থেরস্স সন্ততো উপট্ঠহিংসু অচিণ্ণৰসিতায. তেনাহ ‘‘হানভাগিযং নাম অহোসী’’তি. আরম্মণ…পে… সহগতন্তি ৰুত্তং ইতরেসং অভাৰতো.

পঠমজ্ঝানপঞ্হসুত্তাদিৰণ্ণনা নিট্ঠিতা.

৯. অনিমিত্তপঞ্হসুত্তৰণ্ণনা

৩৪০. ৰিপস্সনাসমাধিংযেৰ, ন ফলসমাধিং. ছেজ্জকিচ্চং ন নিপ্ফজ্জতি অৰিচ্ছেদৰসেন অপ্পৰত্তনতো. নিকন্তীতি ৰিপস্সনং অস্সাদেন্তী পৰত্ততণ্হা. সাধেতুং নাসক্খি উপক্কিলিট্ঠত্তা. নিমিত্তানুসারীতি নিচ্চসুখঅত্তনিমিত্তানং অপূরণতো রাগদোসমোহনিমিত্তানিপেত্থ নিমিত্তানেৰ. ৰুট্ঠান…পে… সমাধিন্তি এতেন যাৰ মগ্গো নাধিগতো, তাৰ ৰুট্ঠানগামিনিৰিপস্সনমনুযুঞ্জন্তোপি যথারহং অনিমিত্তং অপ্পণিহিতং সুঞ্ঞতং চেতোসমাধিং অনুযুত্তো ৰিহরতীতি ৰত্তব্বতং অরহতীতি দস্সেতি. ৰিপস্সনাসম্পযুত্তন্তি ৰিপস্সনাসঙ্খাতঞাণসম্পযুত্তং. চেতোসমাধিন্তি চিত্তসীসেন ৰিপস্সনাসমাধিমাহ. উপরিমগ্গফলসমাধিন্তি পঠমমগ্গসমাধিস্স পগেৰ অধিগতত্তা.

অনিমিত্তপঞ্হসুত্তৰণ্ণনা নিট্ঠিতা.

১০-১১. সক্কসুত্তাদিৰণ্ণনা

৩৪১-৩৪২. অৰেচ্চপ্পসাদেনাতি ¶ ¶ ৰত্থুত্তযং যাথাৰতো ঞত্ৰা উপ্পন্নপসাদেন, মগ্গেনাগতপসাদেনাতি অত্থো. সো পন কেনচি অসংহারিযো অসম্পৰেধীতি আহ ‘‘অচলপ্পসাদেনা’’তি. অভিভৰন্তি অত্তনো পুঞ্ঞানুভাৰেন.

সক্কসুত্তাদিৰণ্ণনা নিট্ঠিতা.

মোগ্গল্লানসংযুত্তৰণ্ণনা নিট্ঠিতা.

৭. চিত্তসংযুত্তং

১. সংযোজনসুত্তৰণ্ণনা

৩৪৩. ভোগগামন্তি ¶ ¶ ভোগুপ্পত্তিগামং. পৰত্ততীতি অপ্পটিহতং হুত্ৰা পৰত্ততি পটিসম্ভিদপ্পত্তিযা.

সংযোজনসুত্তৰণ্ণনা নিট্ঠিতা.

২. পঠমইসিদত্তসুত্তৰণ্ণনা

৩৪৪. অৰিসারদত্তাতি পঞ্হং ব্যাকাতুং ৰেয্যত্তিযাভাৰেন অসমত্থত্তা. উপাসকো থেরেসু ব্যাকাতুং অসক্কোন্তেসু সযং ব্যাকাতুকামো পুচ্ছতি, ন ৰিহেসাধিপ্পাযো. পঠমৰচনেন অব্যাকরোন্তে দিস্ৰাৰ পুনপ্পুনং পুচ্ছিতং ৰিহেসো ৰিয হোতীতি কত্ৰা ৰুত্তং ‘‘ৰিহেসেতী’’তি.

পঠমইসিদত্তসুত্তৰণ্ণনা নিট্ঠিতা.

৩. দুতিযইসিদত্তসুত্তৰণ্ণনা

৩৪৫. অৰন্তিযাতি অৰন্তিরট্ঠে, তং পন মজ্ঝিমপদেসতো দক্খিণদিসাযং. তেনাহ ‘‘দক্খিণাপথে’’তি. অধিপ্পাযেনাতি তস্স ৰচনস্স অনুমোদনাধিপ্পাযেন ৰদতি, ন পন ততো কিঞ্চি গহেতুকামতাধিপ্পাযেন.

দুতিযইসিদত্তসুত্তৰণ্ণনা নিট্ঠিতা.

৪. মহকপাটিহারিযসুত্তৰণ্ণনা

৩৪৬. তেসং অনুজানন্তোতি তেসং দাসকম্মকরানং সেসকে যথারুচি ৰিচারণং অনুজানন্তো. কুধিতন্তি বলৰতা সূরিযসন্তাপেন সঙ্কুথিতং ¶ . তেনাহ ‘‘হেট্ঠা’’তিআদি. অতিতিখিণন্তি অতিৰিয তিক্খধাতুকং. অসম্ভিন্নপদন্তি ¶ অঞ্ঞত্থ অনাগতত্তা তিপিটকে অৰোমিস্সকপদং, ইধেৰ আগতপদন্তি অত্থো. পটিলীযমানেনাতি পটিকংসেন ৰিসেসনেন ৰিলীযমানেন কাযেন.

এত্থ চাতি এতস্মিং অধিট্ঠানিদ্ধিকরণে. অব্ভমণ্ডপং কত্ৰাতি সমন্ততো ছাদনৰসেন মণ্ডপং ৰিয মেঘপটলং উপ্পাদেত্ৰা. দেৰোতি মেঘো. একমেকং ফুসিতকং ফুসাযতু জালৰিনদ্ধং ৰিয ৰস্সতু. এৰং ৰুত্তপ্পকারেন নানাপরিকম্মং নানাধিট্ঠানং একতো পরিকম্মং একতো অধিট্ঠানন্তি চতুক্কমেত্থ সম্ভৰতীতি দস্সেতি ‘‘এত্থ চা’’তিআদিনা. যথা তথাতি যথাৰুত্তেসু চতূসু পকারেসু যেন ৰা তেন ৰা পকারেন করোন্তস্স. কতপরিকম্মস্সাতি ‘‘এৰং ৰা এৰং ৰা হোতূ’’তি পৰত্তিতপরিকম্মচিত্তস্স. ‘‘পরিকম্মানন্তরেনাতি অধিট্ঠানচিত্তুপ্পাদনত্থং সমাপন্নপাদকজ্ঝানতো ৰুট্ঠায অধিট্ঠানচিত্তস্স একাৰজ্জনৰীথিযং পৰত্তপরিকম্মং সন্ধায ৰুত্ত’’ন্তি ৰদন্তি.

মহকপাটিহারিযসুত্তৰণ্ণনা নিট্ঠিতা.

৫. পঠমকামভূসুত্তৰণ্ণনা

৩৪৭. এলং ৰুচ্চতি দোসো, তং এতস্স নত্থীতি নেলং, তং অঙ্গং এতস্সাতি নেলঙ্গো, সুৰিসুদ্ধসীলগুণো. তেনাহ ‘‘নেলঙ্গন্তি খো, ভন্তে, সীলানমেতং অধিৰচন’’ন্তি. অট্ঠকথাযং পন দোসাভাৰমেৰ দস্সেতুং ‘‘নেলঙ্গোতি নিদ্দোসো’’তি ৰুত্তং. এতং ভিক্খুং আগচ্ছন্তন্তি মহাকপ্পিনত্থেরং সন্ধায ৰুত্তং. অত্তনো দিট্ঠেন কথেসীতি অত্তনো সব্বঞ্ঞুতঞ্ঞাণেন পচ্চক্খতো উপলক্খিতেন অত্থেন কথেসি. অযং পন নযগ্গাহেনাতি অযং পন গহপতি অসুত্ৰা কেৰলং নযগ্গাহেন আহ.

পঠমকামভূসুত্তৰণ্ণনা নিট্ঠিতা.

৬. দুতিযকামভূসুত্তৰণ্ণনা

৩৪৮. নিরোধং ¶ ৰলঞ্জেতি অনাগামিভাৰতো. ইমে সঙ্খারাতি ইমে ‘‘কাযসঙ্খারো, ৰচীসঙ্খারো, চিত্তসঙ্খারো’’তি ৰুচ্চমানা তযো সঙ্খারা. সদ্দতোপি, অত্থতোপি অঞ্ঞমঞ্ঞং মিস্সা, ততো এৰ আলুল়িতা আকুলা, অৰিভূতা দুব্বিভাৰনা, দুদ্দীপনা অসঙ্করতো দীপেতুং দুক্করা. তথা হি কুসলচেতনা এৰ ‘‘কাযসঙ্খারো’’তিপি ¶ ৰুচ্চতি, ‘‘ৰচীসঙ্খারো’’তিপি, ‘‘চিত্তসঙ্খারো’’তিপি. অস্সাসপস্সাসাপি কত্থচি ‘‘কাযসঙ্খারো’’তি, ৰিতক্কৰিচারাপি ‘‘ৰচীসঙ্খারো’’তি ৰুচ্চন্তি, সঞ্ঞাৰেদনাপি ‘‘চিত্তসঙ্খারো’’তি ৰুচ্চন্তি. তেন ৰুত্তং ‘‘তথা হী’’তিআদি. তত্থ আকড্ঢিত্ৰা গহণং আদানং, সম্পত্তস্স হত্থে করণং গহণং, গহিতস্স ৰিস্সজ্জনং মুঞ্চনং, ফন্দনং চোপনং পাপেত্ৰা নিপ্ফাদেত্ৰা. হনুসঞ্চোপনন্তি কাযৰিঞ্ঞত্তিৰসেন পুব্বভাগে হনুসঞ্চোপনং কত্ৰা. এৰঞ্হি ৰচীভেদকরণং. এৰং ইমেতিআদি যথাৰুত্তস্স অত্থস্স নিগমনং.

পদত্থং পুচ্ছতি ইতরসঙ্খারেহি পদত্থতো ৰিসেসং কথাপেস্সামীতি. কাযনিস্সিতাতি এত্থ কাযনিস্সিততা চ নেসং তব্ভাৰভাৰিতায ৰেদিতব্বা, ন কাযস্স নিস্সযপচ্চযতাৰসেনাতি দস্সেন্তো ‘‘কাযে সতি হোন্তি, অসতি ন হোন্তী’’তি আহ. কাযোতি চেত্থ করজকাযো দট্ঠব্বো. চিত্তনিস্সিতাতি চিত্তং নিস্সায তং নিস্সযপচ্চযভূতং লভিত্ৰা উপ্পন্না.

‘‘সমাপজ্জামী’’তি পদস্স সমীপে ৰুচ্চমানং ‘‘সমাপজ্জিস্স’’ন্তি পদং আসন্নানাগতকালৰাচী এৰ ভৰিতুং যুত্তং, ন ইতরন্তি আহ – ‘‘পদদ্ৰযেন নেৰসঞ্ঞানাসঞ্ঞাযতনসমাপত্তিকালো কথিতো’’তি. তযিদং তস্স তথা ৰত্তব্বতায ৰুত্তং, ন পন তস্স তথা চিত্তপৰত্তিসম্ভৰতো. সমাপন্নেপি এসেৰ নযো. পুরিমেহীতি ‘‘সমাপজ্জিস্সং সমাপজ্জামী’’তি দ্ৰীহি পদেহি. পচ্ছিমেনাতি ‘‘সমাপন্নো’’তি পদেন.

ভাৰিতং হোতি উপ্পাদিতং হোতি নিরোধসমাপন্নত্থায. অনুপুব্বসমাপত্তিসমাপজ্জনসঙ্খাতায নিরোধভাৰনায তং চিত্তং ভাৰিতং হোতি. তেনাহ ‘‘যং ত’’ন্তিআদি. দুতিযজ্ঝানেযেৰাতি দুতিযজ্ঝানক্খণে নিরুজ্ঝতি. তত্থ অনুপ্পজ্জনতো অনুপ্পাদনতো হেট্ঠা নিরোধোতি অধিপ্পেতো. চতুন্নং অরূপক্খন্ধানং তজ্জা পরিকম্মসিদ্ধা যা অপ্পৰত্তি ¶ , তত্থ ‘‘নিরোধসমাপত্তিসঞ্ঞা’’তি, যা নেসং তথা অপ্পৰত্তি. সা ‘‘অন্তোনিরোধে নিরুজ্ঝতী’’তি ৰুত্তা.

‘‘চিত্তসঙ্খারো নিরুদ্ধো’’তি ৰচনতো তদঞ্ঞেসং অনিরোধং ইচ্ছন্তানং ৰাদং দস্সেন্তো ‘‘চিত্তসঙ্খারো নিরুদ্ধোতি ৰচনতো’’তিআদিং ৰত্ৰা তত্থ অতিপ্পসঙ্গদস্সনমুখেন তং ৰাদং নিসেধেতুং ‘‘তে ৰত্তব্বা’’তিআদিমাহ. অভিনিৰেসং অকত্ৰাতি যথাগতে ব্যঞ্জনমত্তে অভিনিৰেসং অকত্ৰা. আচরিযানং নযেতি আচরিযানং পরম্পরাগতে ধম্মনযে ধম্মনেত্তিযং ঠত্ৰা.

কিরিযমযপৰত্তস্মিন্তি ¶ পরিত্তভূমককুসলাকুসলধম্মপবন্ধে ৰত্তমানে. তস্মিঞ্হি ৰত্তমানে কাযিক-ৰাচসিক-কিরিযসম্পৰত্তি হোতি, দস্সন-সৰনাদিৰসেন আরম্মণগ্গহণে পৰত্তমানেতি অত্থো. তেনাহ – ‘‘বহিদ্ধারম্মণেসু পসাদে ঘট্টেন্তেসূ’’তি. মক্খিতানি ৰিযাতি পুঞ্ছিতানি ৰিয হোন্তি ঘট্টনায ৰিবাধিতত্তা. এতেনাযং ঘট্টনা পঞ্চদ্ৰারিকৰিঞ্ঞাণানং ৰেগসা উপ্পজ্জনায ন আরম্মণন্তি দস্সেতি. তেনেৰাহ – ‘‘অন্তোনিরোধে পঞ্চ পসাদা অতিৰিয ৰিরোচন্তী’’তি.

ততো পরং সচিত্তকো ভৰিস্সামীতি ইদং অত্থতো আপন্নং গহেত্ৰা ৰুত্তং – ‘‘এত্তকং কালং অচিত্তকো ভৰিস্সামী’’তি এতেনেৰ তস্স অত্থস্স সিদ্ধত্তা. যং এৰং ভাৰিতন্তি এত্থ ৰিসুং চিত্তস্স ভাৰনা নাম নত্থি, অদ্ধানপরিচ্ছেদং পন কত্ৰা নিরোধসমাপত্তত্থায কাতব্বপরিকম্মভাৰনায এৰ তস্স সিজ্ঝনতো.

সা পনেসা নিরোধকথা. দ্ৰীহি বলেহীতি সমথৰিপস্সনাবলেহি. তযো চ সঙ্খারানন্তি তিণ্ণং কাযৰচীচিত্তসঙ্খারানং পটিপ্পস্সদ্ধিযা. সোল়সহি ঞাণচরিযাহীতি অনিচ্চানুপস্সনাদীনং অট্ঠন্নং অনুপস্সনাঞাণানং, অট্ঠন্নঞ্চ মগ্গফলঞাণানং ৰসেন ইমাহি সোল়সহি ঞাণপ্পৰত্তীহি. নৰহি সমাধিচরিযাহীতি অট্ঠ সমাপত্তিযো অট্ঠ সমাধিচরিযা, তাসং উপচারসমাধি সমাধিভাৰসামঞ্ঞেন একা সমাধিচরিযাতি এৰং নৰহি সমাধিচরিযাহি. ৰসীভাৰতাপঞ্ঞাতি ৰসীভাৰতাসঙ্খাতা পঞ্ঞা. সব্বাকারেন ৰিসুদ্ধিমগ্গে কথিতা, তে তাৰ আকারা ¶ তিট্ঠন্তু, সরূপমত্তস্স পনস্স ৰত্তব্বন্তি আহ – ‘‘কো পনাযং নিরোধো নামা’’তি. যদি খন্ধানং অপ্পৰত্তি, অথ কিমত্থমেতং ঝানসুখাদিং ৰিয সমাপজ্জন্তীতি আহ ‘‘সঙ্খারান’’ন্তিআদি.

ফলসমাপত্তিচিত্তন্তি অরহত্তং অনাগামিফলচিত্তং. ‘‘ততো পরং ভৰঙ্গসমযে’’তি ৰুত্তত্তা আহ ‘‘কিং পন…পে… ন সমুট্ঠাপেতী’’তি. সমুট্ঠাপেতি রূপসমুপ্পাদকত্তা. ইমস্সাতি নিরোধং সমাপন্নভিক্খুনো. সা ন সমুট্ঠাপেতীতি সা চতুত্থজ্ঝানিকা ফলসমাপত্তি ন সমুট্ঠাপেতি অস্সাসপস্সাসে. ফলসমাপত্তিযা চতুত্থজ্ঝানিকভাৰো কথং নিচ্ছিতোতি আহ – ‘‘কিং ৰা এতেনা’’তিআদি. ৰক্খমানাকারেনপি পরিহারো হোতীতি. সন্তসমাপত্তিতোতি নিরোধসমাপত্তিমেৰ সন্ধায ৰদতি. অব্বোহারিকা হোন্তি অতিসুখুমসভাৰত্তা, সঞ্জীৰত্থেরস্স পুব্বে সমাপত্তিক্খণে অস্সাসপস্সাসা অব্বোহারিকভাৰং গচ্ছন্তি. তেন ৰুত্তং ‘‘ভৰঙ্গসমযেনেৰেতং কথিত’’ন্তি.

কিরিযময ¶ …পে… উপ্পজ্জতীতি কস্মা ৰুত্তং? ননু ভৰঙ্গুপ্পত্তিকালম্পি ৰিতক্কৰিচারা উপ্পজ্জন্তেৰাতি? কিঞ্চাপি উপ্পজ্জন্তি, ৰচীসঙ্খারলক্খণপ্পত্তা পন ন হোন্তীতি ইমমত্থং দস্সেতুং ‘‘কিং ভৰঙ্গ’’ন্তিআদি ৰুত্তং.

সুঞ্ঞতো ফস্সোতিআদযো সগুণেনপি আরম্মণেনাতি আরম্মণভূতমেতং. সুঞ্ঞতা নাম ফলসমাপত্তি নিচ্চসুখঅত্তসভাৰতো সুঞ্ঞত্তা. ‘‘সুঞ্ঞতো ফস্সো’’তি ৰুত্তং ৰুত্তনযেন সুঞ্ঞসভাৰত্তা. অনিমিত্তা নাম ফলসমাপত্তি রাগনিমিত্তাদীনং অভাৰতো. অপ্পণিহিতা নাম ফলসমাপত্তি রাগপণিধিআদীনমভাৰতো. সেসং ৰুত্তনযমেৰ. তেনাহ ‘‘অনিমিত্তপ্পণিহিতেসুপি এসেৰ নযো’’তি. রাগনিমিত্তাদীনন্তি এত্থ আদি-সদ্দেন সঙ্খারনিমিত্তস্সপি সঙ্গহো দট্ঠব্বো. যদগ্গেন ফলসমাপত্তিসম্ফস্সো সুঞ্ঞতো নাম, তদগ্গেন ফলসমাপত্তিপি সুঞ্ঞতা নাম, ফস্সসীসেন পন দেসনা আগতাতি তথা ৰুত্তং. অনিমিত্তপ্পণিহিতেসুপি এসেৰ নযো.

আগমনং এত্থ, এতাযাতি ৰা আগমনিকা, সা এৰ আগমনিযা ক-কারস্স য-কারং কত্ৰা. ৰুট্ঠাতি নিমিত্ততো মগ্গস্স উপ্পাদনেন. অনিমিত্তা নাম নিচ্চনিমিত্তস্স উগ্ঘাটনতো. এত্থ চ ৰুট্ঠানমেৰ পমাণং, ন ¶ পরিগ্গহদস্সনানি. অপ্পণিহিতা নাম সুখপণিধিযা পটিপক্খতো. সুঞ্ঞতা নাম অত্তদিট্ঠিযা উজুপটিপক্খত্তা সত্তসুঞ্ঞতায সুদিট্ঠত্তা. মগ্গো অনিমিত্তো নাম ৰিপস্সনাগমনতো. ফলং অনিমিত্তং নাম মগ্গাগমনতো. ৰিকপ্পো আপজ্জেয্য আগমনস্স ৰৰত্থানস্স অভাৰেন, ৰিপস্সনায অনিমিত্তাদিনামলাভো অৰৰত্থিতোতি অধিপ্পাযো. তেন ৰুত্তং ‘‘তস্মা’’তিআদি. যস্মা পন সা মগ্গৰুট্ঠানকালে এৰরূপাপি হোতীতি তস্স ৰসেন মগ্গফলানং ৰিয ফস্সস্সপি পৰত্তিরূপত্তা যথাৰুত্তো ৰিকপ্পো অনৰসরোতি দট্ঠব্বং. তযো ফস্সা ফুসন্তীতি পুগ্গলভেদৰসেন ৰুত্তং. ন হি একংযেৰ পুগ্গলং এতস্মিং খণে তযো ফস্সা ফুসন্তি. ‘‘তিৰিধো ফস্সো ফুসতী’’তি ৰা ভৰিতব্বং. যস্মা পন ‘‘নিরোধফলসমাপত্তিযা ৰুট্ঠিতস্সা’’তিআদি যস্স যথাৰুত্তা তযো এৰ ফস্সা সম্ভৰন্তি, তস্স অনৰসেসগ্গহণৰসেনেৰ ৰুত্তং ‘‘তযো ফস্সা ফুসন্তী’’তি.

নিব্বানং ৰিৰেকো নাম সব্বসঙ্খারৰিৰিত্তভাৰতো. তস্মিং ৰিৰেকে একন্তেনেৰ নিন্নপোণত্তা এৰ হি তে পটিপ্পস্সদ্ধসব্বুস্সুক্কা উত্তমপুরিসা চতুন্নং খন্ধানং অপ্পৰত্তিং অনৰসেসগ্গহণলক্খণং নিরোধসমাপত্তিং সমাপজ্জন্তীতি.

দুতিযকামভূসুত্তৰণ্ণনা নিট্ঠিতা.

৭. গোদত্তসুত্তৰণ্ণনা

৩৪৯. নেসন্তি ¶ অপ্পমাণচেতোৰিমুত্তি-আকিঞ্চঞ্ঞচেতোৰিমুত্তিসঞ্ঞিতানং ঝানানং. অত্থোপি নানাতি আনেত্ৰা যোজনা. ফরণঅপ্পমাণতায ‘‘অপ্পমাণা চেতোৰিমুত্তী’’তি লদ্ধনামং ব্রহ্মৰিহারজ্ঝানন্তি আহ ‘‘ভূমন্তরতো’’তিআদি. আকিঞ্চঞ্ঞা চেতোৰিমুত্তীতি আকিঞ্চঞ্ঞাযতনজ্ঝানন্তি আহ ‘‘ভূমন্তরতো’’তিআদি. ৰিপস্সনাতি অনিচ্চানুপস্সনা, সব্বাপি ৰা. পমাণকরণো নাম যস্স সযং উপ্পজ্জতি, তস্স গুণাভাৰদস্সনৰসেন পমাণকরণতো.

ফরণঅপ্পমাণতাযাতি ¶ ফরণৰসেন অপ্পমাণগোচরতায. নিব্বানম্পি অপ্পমাণমেৰ পমাণগোচরানং কিলেসানং আরম্মণভাৰস্সপি অনাগমনতো. খলন্তি খলে পসারিতসালিসীসাদিভণ্ডং. কিঞ্চেহীতি মদ্দস্সু. তেনাহ ‘‘মদ্দনট্ঠো’’তি. আরম্মণভূতং, পলিবুদ্ধকং ৰা নত্থি এতস্স কিঞ্চনন্তি অকিঞ্চনং, অকিঞ্চনমেৰ আকিঞ্চঞ্ঞং.

রূপনিমিত্তস্সাতি কসিণরূপনিমিত্তস্স. ন গহিতাতি সরূপতো ন গহিতা, অত্থতো পন গহিতা এৰ. তেনাহ – ‘‘সা সুঞ্ঞা রাগেনাতিআদিৰচনতো সব্বত্থ অনুপৰিত্থাৰা’’তি.

নানাতি সদ্দৰসেন. একত্থাতি আরম্মণৰসেন আরম্মণভাৰেন একসভাৰা. তেনাহ ‘‘অপ্পমাণং…পে… একত্থা’’তি. আরম্মণৰসেনাতি আরম্মণস্স ৰসেন. চত্তারো হি মগ্গা, চত্তারি ফলানি আরম্মণৰসেন নিব্বানপৰিট্ঠতায একত্থা একারম্মণা. অঞ্ঞস্মিং পন ঠানেতি ইদং ৰিসুং ৰিসুং গহেত্ৰা ৰুত্তং অপ্পমাণাদি পরিযাযৰুত্তং, নিব্বানং আরব্ভ পৰত্তনতো. তস্মা ‘‘অঞ্ঞস্মি’’ন্তি ইদং তেন তেন পরিযাযেন তত্থ তত্থ আগতভাৰং সন্ধায ৰুত্তং.

গোদত্তসুত্তৰণ্ণনা নিট্ঠিতা.

৮. নিগণ্ঠনাটপুত্তসুত্তৰণ্ণনা

৩৫০. আগতাগমোতি ৰাচুগ্গতপরিযত্তিধম্মো. ৰিঞ্ঞাতসাসনোতি পটিৰিদ্ধসত্থুসাসনো. তেনাহ ‘‘অনাগামী’’তিআদি. নগ্গভোগ্গন্তি অৰসনভাৰেন নগ্গং, কুটিলজ্ঝাসযতায ভোগ্গং, ততো এৰ নিস্সিরিকং. নগ্গতায হি সো রূপেন নিস্সিরিকো, ভোগ্গতায চিত্তেন. ভগৰতো সদ্ধাযাতি ভগৰতি সদ্ধায. তস্মিং সদ্দহনা ওকপ্পনা তস্স সদ্ধাতিপি ৰত্তব্বতং লভতি. গচ্ছামীতি আগচ্ছামি, বুজ্ঝামীতি অত্থো. এতং নিগণ্ঠেন পুচ্ছিতমত্থমাহ.

কাযং ¶ উন্নামেত্ৰাতি কাযং অব্ভুন্নামেত্ৰা. কুচ্ছিং নীহরিত্ৰাতি পিট্ঠিযা নিন্নমনেন কুচ্ছিং পুরতো নীহরিত্ৰা. গীৰং পসারণৰসেন পগ্গয্হ পগ্গহেত্ৰা ¶ সব্বং দিসং পেক্খমানো. সব্বমিদং নিগণ্ঠস্স পহট্ঠাকারদস্সনত্থং ‘‘ইদানি সমণস্স গোতমস্স উপরি ৰাদং আরোপেতুং লব্ভতী’’তি. তেনাহ ‘‘ৰাতং ৰা সো’’তিআদি. সকারণাতি যুত্তিসহিতা. পঞ্হমগ্গোতি পঞ্হসঙ্খাতো ৰীমংসা, এৰং ভৰিতব্বন্তি চিত্তেনেৰ পরিৰীমংসা পঞ্হা. একো উদ্দেসোতি একং উদ্দিসনং অত্থস্স সংখিত্তৰচনং. ৰেয্যাকরণন্তি নিদ্দিসনং অত্থস্স ৰিচারেত্ৰা কথনং. এৰন্তি ইমিনা নযেন. সব্বত্থাতি সব্বেসু পঞ্হুদ্দেসৰেয্যাকরণেসু অত্থো ৰিত্থারতো ৰেদিতব্বো.

নিগণ্ঠনাটপুত্তসুত্তৰণ্ণনা নিট্ঠিতা.

৯. অচেলকস্সপসুত্তৰণ্ণনা

৩৫১. অলং সমত্থো অরিযভাৰাযাতি অলমরিযো. ঞেয্যজাননট্ঠেন ঞাণমেৰ পচ্চক্খতো দস্সনট্ঠেন ঞাণদস্সনং, সোযেৰ অতিসযট্ঠেন ঞাণদস্সনৰিসেসো. পাৰল়া ৰুচ্চতি আনিসদপদেসো, তং পাৰল়ং রজোহরণত্থং নিপ্ফোটীযতি এতাযাতি পাৰল়নিপ্ফোটনা, মোরপিঞ্ছৰত্তি.

অচেলকস্সপসুত্তৰণ্ণনা নিট্ঠিতা.

১০. গিলানদস্সনসুত্তৰণ্ণনা

৩৫২. মত্তরাজা নাম একো ভুম্মদেৰো ভূতাধিপতি সুরাপোতলরুক্খনিৰাসী. তেন ৰুত্তং ‘‘মত্তরাজকালে’’তি. ‘‘ওসধিতিণৰনপ্পতীসূ’’তি ৰত্ৰা তে যথাক্কমং দস্সেন্তো ‘‘হরীতকা…পে… রুক্খেসু চা’’তি আহ. পত্থনাৰসেন চিত্তং ঠপেহি. সমিজ্ঝিস্সতীতি যথাধিপ্পাযং সমিজ্ঝিস্সতি. তেন হীতি যস্মা তং দেৰাপি আসন্নমরণং মঞ্ঞন্তি, তস্মা সা ৰরমেৰ ভৰিস্সতি, তং তুম্হাকং দীঘরত্তং হিতায সুখায ভৰিস্সতীতি অধিপ্পাযো.

গিলানদস্সনসুত্তৰণ্ণনা নিট্ঠিতা.

চিত্তসংযুত্তৰণ্ণনা নিট্ঠিতা.

৮. গামণিসংযুত্তং

১. চণ্ডসুত্তৰণ্ণনা

৩৫৩. ‘‘যেন ¶ ¶ মিধেকচ্চো চণ্ডো চণ্ডোত্ৰেৰ সঙ্খং গচ্ছতী’’তি এৰং পঞ্হপুচ্ছনেন ধম্মসঙ্গাহকত্থেরেহি চণ্ডোতি গহিতনামো. পাকটং করোতীতি দস্সেতি অত্তনো চণ্ডভাৰং.

চণ্ডসুত্তৰণ্ণনা নিট্ঠিতা.

২. তালপুটসুত্তৰণ্ণনা

৩৫৪. ৰালোতি ৰুচ্চতি তালো, তস্স তালপুটং নাম. যথা আমলকীফলসমানকং, সো পন তালসদিসমুখৰণ্ণত্তা তালপুটোতি এৰংনামকো. তেনাহ ‘‘তস্স কিরা’’তিআদি. অভিনীহারসম্পন্নো অনেকেসু কপ্পেসু সম্ভতসাৰকবোধিসম্ভারো. তথা হেস অসীতিযা মহাসাৰকেসু অব্ভন্তরো জাতো. সহস্সং দেন্তি নচ্চং পস্সিতুকামা. সমজ্জৰেসন্তি নেপচ্চৰেসং. কীল়ং কত্ৰাতি নচ্চকীল়িতং কীল়িত্ৰা, নচ্চিত্ৰাতি অত্থো.

পুব্বে তথাপৰত্তৰুত্তন্তদস্সনে সচ্চেন, তব্বিপরিযাযে অলিকেন. রাগপচ্চযাতি রাগুপ্পত্তিযা কারণভূতা. মুখতো…পে… দস্সনাদযোতি আদি-সদ্দেন মুখতো অগ্গিজালনিক্খমদস্সনাদিকে সঙ্গণ্হাতি. অঞ্ঞে চ…পে… অভিনযাতি কামস্সাদসংযুত্তানং সিঙ্গারহস্সঅব্ভুতরসানঞ্চেৰ ‘‘অঞ্ঞে চা’’তি ৰুত্তসন্তবীভচ্ছরসানঞ্চ দস্সনকা অভিনযা. দোসপচ্চযাতি দোসুপ্পত্তিযা কারণভূতা. হত্থপাদচ্ছেদাদীতি আদি-সদ্দেন সঙ্গহিতানং রুদ্দৰীরভযানকরসানং দস্সনকা অভিনযা. মোহপচ্চযাতি মোহুপ্পত্তিযা কারণভূতা. এৰমাদযোতি আদি-সদ্দেন সঙ্গহিতানং করুণাসন্তভযানকরসানং দস্সনকা অভিনযা. তে হি রসে সন্ধায পাল়িযং ‘‘যে ধম্মা রজনীযা, যে ধম্মা দোসনীযা, যে ধম্মা মোহনীযা’’তি চ ৰুত্তং.

নটৰেসং ¶ গহেত্ৰাৰ পচ্চন্তি কম্মসরিক্খৰিপাকৰসেন. তং সন্ধাযাতি তং যথাৰুত্তং নিরযে পচ্চনং সন্ধায. এতং ‘‘পহাসো নাম নিরযো, তত্থ উপপজ্জতী’’তি ৰুত্তং. যথা লোকে অত্থৰিসেসৰসেন সকম্মকানিপি পদানি অকম্মকানি ভৰন্তি ‘‘ৰিমুচ্চতি পুরিসো’’তি, এৰং ইধ অত্থৰিসেসৰসেন অকম্মকং সকম্মকং কত্ৰা ৰুত্তং – ‘‘নাহং, ভন্তে, এতং রোদামী’’তি. কো ¶ পন সো অত্থৰিসেসো? অসহনং অক্খমনং, তস্মা ন রোদামি ন সহামি, ন অক্খমামীতি অত্থো. রোদনকারণঞ্হি অসহন্তো তেন অভিভূতো রোদতি. তমেৰস্স সকম্মকভাৰস্স কারণভূতং অত্থৰিসেসং ‘‘ন অস্সুৰিমোচনমত্তেনা’’তি ৰুত্তং. মতং ৰা, অম্ম, রোদন্তীতি এত্থাপি মতং রোদন্তি, তস্স মরণং ন সহন্তি, নক্খমন্তীতি পাকটোযমত্থোতি.

তালপুটসুত্তৰণ্ণনা নিট্ঠিতা.

৩-৫. যোধাজীৰসুত্তাদিৰণ্ণনা

৩৫৫-৩৫৭. যুজ্ঝনং যোধো, সো আজীৰো এতস্সাতি যোধাজীৰো. তেনাহ – ‘‘যুদ্ধেন জীৰিকং কপ্পনকো’’তি, উস্সাহং ৰাযামং করোতীতি যুজ্ঝনৰসেন উস্সাহং ৰাযামং করোতি. পরিযাপাদেন্তীতি মরণপরিযন্তিকং আপদং পাপেন্তি. তেনাহ ‘‘মরণং পটিপজ্জাপেন্তী’’তি. দুট্ঠু ঠপিতন্তি দুট্ঠাকারেন অত্তনো পরেসঞ্চ অত্থাৰহভাৰং ন গতং পটিপন্নং. পরেহি সঙ্গামে জিতা হতা এত্থ জাযন্তীতি পরজিতো নাম নিরযো. অসিধনুগদাযসঙ্কুচক্কানি পঞ্চাৰুধানি. তং সন্ধাযাতি তং যোধাজীৰং পুগ্গলং সন্ধায. এতং ‘‘যো সো’’তিআদি ৰুত্তং. চতুত্থপঞ্চমেসূতি হত্থারোহঅস্সারোহসুত্তেসু. এসেৰ নযোতি এসো ততিযে ৰুত্তো এৰ অত্থতো ৰিসেসাভাৰতো.

যোধাজীৰসুত্তাদিৰণ্ণনা নিট্ঠিতা.

৬. অসিবন্ধকপুত্তসুত্তৰণ্ণনা

৩৫৮. পচ্ছাভূমিৰাসিনোতি ¶ অপরদেসৰাসিনো. উদকসুদ্ধিকভাৰজাননত্থাযাতি অত্তনো উদকসুদ্ধিকভাৰং জাননত্থঞ্চেৰ লোকস্স চ উদকেন সুদ্ধি হোতীতি ইমস্স অত্থস্স জাননত্থঞ্চ. উপরি যাপেন্তীতি উপরি ব্রহ্মলোকং যাপেন্তি. সম্মা ঞাপেন্তীতি সম্মা উজুকংযেৰ সগ্গং লোকং গমেন্তি. তেনাহ – ‘‘সগ্গং নাম ওক্কামেন্তী’’তি, অৰক্কামেন্তি ওগাহাপেন্তীতি অত্থো. অনুপরিগচ্ছেয্যাতি অনুপরিতো গচ্ছেয্য.

অসিবন্ধকপুত্তসুত্তৰণ্ণনা নিট্ঠিতা.

৭. খেত্তূপমসুত্তৰণ্ণনা

৩৫৯. থদ্ধন্তি কথিনং লূখং. ঊসরন্তি ঊসজাতং. চতূহিপি ওঘেহি অনভিভৰনীযতায ¶ অহং দীপো. সব্বপরিস্সযেহি অনভিভৰনীযতায অহং লেণো. সব্বদুক্খপরিত্তাসনতো তাযনট্ঠেন অহং তাণং. সব্বভযহিংসনতো অহং সরণন্তি যোজেতব্বং.

উদকমণিকোতি মহন্তং উদকভাজনং. বহি ৰিস্সন্দনৰসেন উদকং ন হরতীতি অহারী, পরিতো ন পগ্ঘরতীতি অপরিহারী. সক্কচ্চমেৰ দেসেন্তি সদ্ধম্মগারৰস্স সব্বসত্তেসু মহাকরুণায চ বুদ্ধানং সমানরসত্তা. চতস্সো পন পরিসা সত্থুগারৰেন অত্তনো চ সদ্ধাসম্পন্নতায সদ্দহিত্ৰা ওকপ্পেত্ৰা সুণন্তি, তস্মা তা দেসনাফলেন যুজ্জন্তি. কিচ্চসিদ্ধিযা সত্থু দেসনা তত্থ সক্কচ্চদেসনা নাম জাতা.

খেত্তূপমসুত্তৰণ্ণনা নিট্ঠিতা.

৮. সঙ্খধমসুত্তৰণ্ণনা

৩৬০. ‘‘যো কোচি পুরিসো পাণাতিপাতী মুসাৰাদী, সব্বো সো আপাযিকো’’তি ৰত্ৰা পুন ‘‘যংবহুলং যংবহুলং করোতি, তেন ¶ দুগ্গতিং গচ্ছতী’’তি ৰদন্তো অত্তনাৰ অত্তনো ৰাদং ভিন্দতি. এৰং সন্তেতি যদি বহুসো কতেন পাপকম্মেন আপাযিকো, ‘‘যো কোচি পাণমতিপাতেতী’’তিআদিৰচনং মিচ্ছাতি. চত্তারি পদানীতি ‘‘যো কোচি পাণমতিপাতেতী’’তিআদিনা নযেন ৰুত্তা চত্তারো অত্থকোট্ঠাসা. দিট্ঠিযা পচ্চযা হোন্তি ‘‘অত্থি খো পন মযা’’তিআদিনা অযোনিসো উম্মুজ্জন্তস্স. বলসম্পন্নোতি সমত্থো. সঙ্খধমকোতি সঙ্খস্স ধমনকিচ্চে ছেকো. অদুক্খেনাতি সুখেন. উপচারোপি অপ্পনাপি ৰট্টতি উভিন্নং সামঞ্ঞৰচনভাৰতো. অপ্পমাণকতভাৰো লব্ভতেৰ. তথা হি তং কিলেসানং ৰিক্খম্ভনসমত্থতায দীঘসন্তানতায ৰিপুলফলতায চ ‘‘মহগ্গত’’ন্তি ৰুচ্চতি.

ন ওহীযতীতি যস্মিং সন্তানে কামাৰচরকম্মং, মহগ্গতকম্মঞ্চ কতূপচিতং ৰিপাকদানে লদ্ধাৰসরং হুত্ৰা ঠিতং, তেসু কামাৰচরকম্মং ইতরং নীহরিত্ৰা সযং তত্থ ওহীযিত্ৰা অত্তনো ৰিপাকং দাতুং ন সক্কোতি, মহগ্গতকম্মমেৰ পন ইতরং পটিবাহিত্ৰা অত্তনো ৰিপাকং দাতুং সক্কোতি গরুভাৰতো. তেনাহ ‘‘তং কামাৰচরকম্ম’’ন্তিআদি. কিলেসৰসেনাতি পাপকম্মস্স মূলভূতকিলেসৰসেন. পাণাতিপাতাদযো হি দোসমোহলোভাদিমূলকিলেসসমুট্ঠানা. কিলেসৰসেনাতি ৰা কম্মকিলেসৰসেন. ৰুত্তঞ্হেতং – ‘‘পাণাতিপাতো খো, গহপতিপুত্ত, কম্মকিলেসো’’তিআদি (দী. নি. ৩.২৪৫). যথানুসন্ধিনাৰ গতন্তি যথানুসন্ধিসঙ্খাতঅনুসন্ধিনা ¶ ওসানং গতং সংকিলেসসম্মুখেন উট্ঠিতায ৰোদানধম্মৰসেন নিট্ঠাপিতত্তা.

সঙ্খধমসুত্তৰণ্ণনা নিট্ঠিতা.

৯. কুলসুত্তৰণ্ণনা

৩৬১. এৰং পৰত্তঈহিতিকাতি এৰং দ্ৰিধা পৰত্তঈহিতিকা. দ্ৰীহিতিকা দুক্করজীৰিকপযোগা. সলাকমত্তং ৰুত্তং এত্থাতি সলাকা ৰুত্তা, পুরিমপদে উত্তরপদলোপো. উভতোকোটিকন্তি যদি ‘‘কুলানুদযং ন ৰণ্ণেমী’’তি ৰদতি, ‘‘ভূতা নিক্করুণা সমণ তুম্হে’’তি ৰাদং আরোপেহি. অথ ¶ সব্বদাপি ‘‘কুলানুদযং ৰণ্ণেমী’’তি ৰদতি. এৰং সন্তে ‘‘কস্মা এৰং দুব্ভিক্খে কালে মহতিযা পরিসায পরিৰুতো জনপদচারিকং চরন্তা কুলূপচ্ছেদায পটিপজ্জথা’’তি এৰং উভতোকোটিকং ৰাদং আরোপেহীতি গামণিং উয্যোজেসি.

দ্ৰে অন্তেতি উভো কোটিযো. বহি নীহরিতুন্তি ন ৰণ্ণেমি ৰণ্ণেমীতি দ্ৰে অন্তে মোচেন্তো তং পুচ্ছিতমত্থং বহি নীহরতি নাম. তত্থ দোসং দত্ৰা চোদেন্তো তং অপুচ্ছং করোন্তো গিলিত্ৰা ৰিয অন্তো পৰেসেতি নাম.

ইতো সো গামণীতিআদি অত্তনো ভিক্খূনং অঞ্ঞেসঞ্চ অত্থকামানং ভিক্খপ্পদানেন অনিট্ঠপ্পত্তিঅভাৰদস্সনত্থং আরদ্ধং. দানেন সম্ভূতানীতি দানমযেন পুঞ্ঞকিরিযৰত্থুনা সম্মদেৰ ভূতিং ৰড্ঢিং পত্তানি. সচ্চেন অরিযৰোহারেন সম্মদেৰ ভূতানি উপ্পন্নানি সচ্চসম্ভূতানীতি আহ ‘‘সচ্চং নাম সচ্চৰাদিতা’’তি. সেসসীলন্তি অট্ঠৰিধঅরিযৰোহারতো অঞ্ঞসীলং. নিহিতন্তি তস্মিং কুলে পুব্বপুরিসেহি নিধানভাৰেন নিহিতং. দুপ্পযুত্তাতি কসিৰাণিজ্জাদিৰসেন দুট্ঠু পযুত্তা কম্মন্তা. ৰিপজ্জন্তীতি নস্সন্তি. কুলঙ্গারোতি কুলস্স অঙ্গারসদিসো ৰিনাসকপুগ্গলো. অনিচ্চতাতি মরণং. তস্মিং কুলে পধানপুরিসানং ভোগানং ৰা সব্বসো ৰিনাসো. তেনাহ ‘‘হুত্ৰা অভাৰো’’তিআদি.

কুলসুত্তৰণ্ণনা নিট্ঠিতা.

১০. মণিচূল়কসুত্তৰণ্ণনা

৩৬২. তং ¶ পরিসন্তি তং রাজন্তেপুরে নিসিন্নং রাজপরিসং. নযগ্গাহেতি কুতোচিপি অসুত্ৰা কেৰলং অত্তনো এৰ মতিযা নযগ্গহণে ঠত্ৰা.

কারেতুং ৰট্টতি সতি সম্ভৰে পটিসঙ্খারস্স, সেনাসনৰিনাসো ন অজ্ঝুপেক্খিতব্বোতি অধিপ্পাযো. অত্তনো এত্থ কিচ্চাৰসানে যং গিহীনংযেৰ সন্তকং তাৰকালিকং, তং গিহিৰিকতন্তি আহ ‘‘গিহিৰিকতং কত্ৰা’’তি. ন ৰদামি পব্বজ্জিতাসারুপ্পতো.

মণিচূল়কসুত্তৰণ্ণনা নিট্ঠিতা.

১১. ভদ্রকসুত্তৰণ্ণনা

৩৬৩. এৰংনামকেতি ¶ মল্লা নাম জানপদিনো রাজকুমারা, নেসং নিৰাসতায ‘‘মল্লা’’ইচ্চেৰ বহুৰচনৰসেন লদ্ধনামত্তা এৰংনামকে জনপদে. নত্থি এতস্স পত্তিযা কালন্তরসঞ্ঞিতো কালোতি অকালো, সো এৰ অকালিকো. তেনাহ – ‘‘কালং অনতিক্কমিত্ৰা পত্তেনা’’তি. সো পন ‘‘যংকিঞ্চি দুক্খং উপ্পজ্জমানং উপ্পজ্জতি, সব্বং তং ছন্দমূলক’’ন্তি এৰং ৰুত্তো দুক্খস্স ছন্দমূলভাৰো, এৰং ছন্দমূলকস্স দুক্খস্স কথিতত্তা ‘‘ইমস্মিং সুত্তে ৰট্টদুক্খং কথিত’’ন্তি ৰুত্তং.

ভদ্রকসুত্তৰণ্ণনা নিট্ঠিতা.

১২. রাসিযসুত্তৰণ্ণনা

৩৬৪. রাসিং কত্ৰা মারপাসৰসেন, তত্রাপি অন্তরভেদেন ৰিভজিত্ৰা পুচ্ছিতব্বপঞ্হে একতো রাসিং কত্ৰা. তপনং অত্তপরিতাপনং তপো, সো এতস্স অত্থীতি তপস্সী, তং তপস্সিং. সো পন তং তপং নিস্সায ঠিতো নাম হোতীতি ৰুত্তং ‘‘তপনিস্সিতক’’ন্তি. সো পন অনেকাকারভেদেন লূখং ফরুসং জীৰনসীলত্তা লূখজীৰী নাম. তেনাহ ‘‘লূখজীৰিক’’ন্তি. মজ্ঝিমায পটিপত্তিযা উপ্পথভাৰেন অৰনিযা গন্ধব্বাতি অন্তা, ততো এৰ লামকত্তা অন্তা. লামকম্পি ‘‘অন্তো’’তি ৰুচ্চতি ‘‘অন্তমিদং, ভিক্খৰে, জীৰিকানং (ইতিৰু. ৯১; সং. নি. ৩.৮০), একো অন্তো’’তি এৰমাদীসু (সং. নি. ২.১৫; ৩.৯০). অট্ঠকথাযং পন অঞ্ঞমঞ্ঞআধারভাৰং উরীকত্ৰা ‘‘কোট্ঠাসা’’তি ৰুত্তং. হীনো গামোতি পাল়ি. গাম-সদ্দো ¶ হীনপরিযাযোতি অধিপ্পাযেনাহ ‘‘গাম্মো’’তি. গামে ভৰোতি গাম্মো. গাম-সদ্দো চেত্থ গামৰাসিৰিসযো ‘‘গামো আগতো’’তিআদীসু ৰিয. অট্ঠকথাযং পন ‘‘গামৰাসীনং ধম্মো’’তি ৰুত্তং, তেসং চারিত্তন্তি অত্থো. অত্ত-সদ্দো ইধ সরীরপরিযাযো ‘‘অত্তন্তপো’’তিআদীসু ৰিযাতি আহ ‘‘সরীরদুক্খকরণন্তি অত্থো’’তি.

এত্থাতি ¶ এতস্মিং তপনিস্সিতগরহিতব্বপদে কস্মা অন্তদ্ৰযমজ্ঝিমপটিপদাগহণং? অত্তকিলমথানুযোগো তাৰ গয্হতু ইদমত্থিতাযাতি অধিপ্পাযো. কামভোগীতপনিস্সিতকনিজ্জরৰত্থূনং দস্সনে যথাধিপ্পেতস্স অত্থস্স ৰিভজিত্ৰা কথনং সম্ভৰতীতি তে দস্সেত্ৰা অধিপ্পেতত্থো কথিতো.

তমত্থন্তি যো ‘‘কামভোগীতপনিস্সিতকেসু গরহিতব্বেযেৰ গরহতি, পসংসিতব্বেযেৰ চ পসংসতী’’তি ৰুত্তো অত্থো, তমত্থং পকাসেন্তো. সাহসিককম্মেনাতি অযুত্তেন কম্মেন. ধম্মেন চ অধম্মেন চাতি ধম্মিকেন অধম্মিকেন চ. অযোনিসো পৰত্তং বাহিরকং সন্ধায চোদকো ‘‘কথ’’ন্তিআদিমাহ. ইতরো নযিদং তাদিসং অত্তপরিতাপনং অধিপ্পেতং, অথ খো যোনিসো পৰত্তং সাসনিকমেৰাতি দস্সেন্তো ‘‘চতুরঙ্গৰীরিযৰসেন চা’’তি আহ. তত্থ ‘‘কামং তচো চ ন্হারু চ অট্ঠি চ অৰসিস্সতূ’’তিআদিনা (ম. নি. ২.১৮৪; সং. নি. ২.২২.২৩৭; অ. নি. ২.৫) নযেন ৰুত্তা সরীরেনিরপেক্খৰিপস্সনায উস্সুক্কাপনৰসেন পৰত্তা ৰীরিযভাৰনা ‘‘চতুরঙ্গৰীরিযৰসেনা’’তি ৰুত্তা. তথা অব্ভোকাসিকনেসজ্জিকতপাদিনিস্সিতাৰ কিলেসনিম্মথনযোগ্যা ৰীরিযভাৰনা ‘‘ধুতঙ্গৰসেন চা’’তি ৰুত্তাতি. অরিযমগ্গেন নিস্সেসকিলেসানং পজহনা নিজ্জরা. সা চ অত্তপচ্চক্খতায সন্দিট্ঠিকা তিণ্ণং মূলকিলেসানং পজহনেন ‘‘তিস্সো’’তি চ ৰুত্তা. তেনাহ ‘‘একোপী’’তিআদি.

রাসিযসুত্তৰণ্ণনা নিট্ঠিতা.

১৩. পাটলিযসুত্তৰণ্ণনা

৩৬৫. ‘‘মাযঞ্চাহং পজানামী’’তি ৰচনং কামং তেসং মাযাৰীভাৰদস্সনপরং, ভগৰতো পন মাযাসাঠেয্যাদিকস্স সব্বস্স পাপধম্মস্স বোধিমূলে এৰ সেতুঘাতো, তস্মা সব্বসো পহীনমাযো, সব্বঞ্ঞুতায মাযং অঞ্ঞে চ ঞেয্যে সব্বসো জানাতি. তেন ৰুত্তং ‘‘মাযঞ্চাহং, গামণি, পজানামী’’তিআদি. মাযঞ্চ পজানামীতি ন কেৰলমহং মাযং এৰ জানামি, অথ খো অঞ্ঞম্পি ইদঞ্চিদঞ্চ জানামীতি.

ইত্থিকামেহীতি ¶ ¶ ইত্থীহি চেৰ তদঞ্ঞকামেহি চ. একস্মিং ঠানেতি একস্মিং পদেসে. একেকস্সেৰ আগন্তুকস্স গহট্ঠস্স ৰা পব্বজিতস্স ৰা. সত্তিঅনুরূপেনাতি ৰিভৰসত্তিঅনুরূপেন. বলানুরূপেনাতি পরিৰারবলানুরূপেন. সত্তিঅনুরূপেনাতি ৰা সদ্ধাসত্তিঅনুরূপেন. বলানুরূপেনাতি ৰিভৰবলানুরূপেন. ধম্মেসু সমাধি দসকুসলধম্মেসু সমাধানং. অগ্গহিতচিত্ততা পরিযুট্ঠকারিতা. তেন লোকিযসীলৰিসুদ্ধি দিট্ঠিৰিসুদ্ধি চ ৰুত্তা. তথা চাহ – ‘‘কো চাদি কুসলানং ধম্মানং, সীলঞ্চ সুৰিসুদ্ধং দিট্ঠি চ উজুকা’’তি (সং. নি. ৫.৩৬৯). তত্থ পতিট্ঠিতস্স উপরি কত্তব্বং দস্সেতুং ‘‘ধম্মসমাধিস্মিং ঠিতো’’তিআদি ৰুত্তং. অযং পটিপদাতি তস্স কম্মফলৰাদিনো সত্থু ৰচনং সব্বেসঞ্চ অযং ময্হং সীলসংৰরব্রহ্মৰিহারভাৰনাসঙ্খাতাপটিপদা অনপরাধকতায এৰ সংৰত্ততি. জযগ্গাহোতি উভযথাপি ময্হং কাচি জানি নত্থি.

পঞ্চ ধম্মা ধম্মসমাধি নাম, ৰিপস্সনামগ্গফলধম্মমত্তং ৰা. ততিযৰিকপ্পে সীলাদিৰিসুদ্ধিযা সদ্ধিং ব্রহ্মৰিহারা যথাৰুত্ততিৰিধধম্মাৰহত্তা এৰ ধম্মসমাধি নাম. পূরেন্তস্স উপ্পন্না চিত্তেকগ্গতাতি ৰুত্তখণিকচিত্তেকগ্গতা. সাপি চিত্তস্স সমাধানতো ‘‘চিত্তসমাধী’’তি ৰুত্তা, তস্স পটিপক্খং ৰিক্খম্ভন্তী সমুচ্ছিন্দন্তী চ হুত্ৰা পৰত্তা যথাৰুত্তসমাধি এৰ ৰিসেসেন চিত্তসমাধি নাম.

পাটলিযসুত্তৰণ্ণনা নিট্ঠিতা.

গামণিসংযুত্তৰণ্ণনা নিট্ঠিতা.

৯. অসঙ্খতসংযুত্তং

১. পঠমৰগ্গো

১-১১. কাযগতাসতিসুত্তাদিৰণ্ণনা

৩৬৬-৩৭৬. অসঙ্খতন্তি ¶ ¶ ন সঙ্খতং হেতুপচ্চযেতি. তেনাহ ‘‘অকত’’ন্তি. হিতং এসন্তেনাতি মেত্তাযন্তেন. অনুকম্পমানেনাতি করুণাযন্তেন. উপাদাযাতি আদিযিত্ৰাতি অযমত্থোতিআহ ‘‘চিত্তেন পরিগ্গহেত্ৰা’’তি. অৰিপরীতধম্মদেসনাতি অৰিপরীতধম্মস্স দেসনা, পটিপত্তিম্পি সাৰকা ৰিয গরুকো ভগৰা. দাযজ্জং অত্তনো অধিট্ঠিতং নিয্যাতেতি.

ভিক্খাসম্পত্তিকালাদীনং সত্তন্নং সপ্পাযানং সম্পত্তিযা লব্ভনকালে. ৰিপত্তিকালে পন এত্থ ৰুত্তৰিপরিযাযেন অত্থো ৰেদিতব্বো. ভারিযন্তি দুক্খবহুলতায দারুণং. অম্হাকং সন্তিকা লদ্ধব্বা. তুম্হাকং অনুসাসনীতি তুম্হাকং দাতব্বা অনুসাসনী.

কাযগতাসতিসুত্তাদিৰণ্ণনা নিট্ঠিতা.

২. দুতিযৰগ্গো

২৩-৩৩. অসঙ্খতসুত্তাদিৰণ্ণনা

৩৭৭-৪০৯. তত্থ চ নত্থি এত্থ তণ্হাসঙ্খাতং নতং, নত্থি এতস্মিং ৰা অধিগতে পুগ্গলভাৰোতি অনতং. অনাসৰন্তি এত্থাপি এসেৰ নযো. সচ্চধম্মতায সচ্চং. ৰট্টদুক্খতো পারমেতীতি পারং. সণ্হট্ঠেনাতি সুখুমট্ঠেন নিপুণং. ততো এৰ দুদ্দসতায. অজজ্জরং নিচ্চসভাৰত্তা. নত্থি এতস্স নিদস্সনন্তি ৰা অনিদস্সনং. এতস্মিং অধিগতে নত্থি সংসারে. পপঞ্চন্তি ৰা নিপ্পপঞ্চং.

এতস্মিং ¶ ¶ অধিগতে পুগ্গলস্স মরণং নত্থীতি ৰা অমতং. অতপ্পকট্ঠেন ৰা পণীতং. সুখহেতুতায ৰা সিৰং. তণ্হা খীযন্তি এত্থাতি তণ্হক্খযং.

অঞ্ঞস্স তাদিসস্স অভাৰতো ৰিম্হাপনীযতায অভূতমেৰাতি. কুতোচি পচ্চযতো অনিব্বত্তমেৰ হুত্ৰা ভূতং ৰিজ্জমানং. তেনাহ ‘‘অজাতং হুত্ৰা অত্থী’’তি. নত্থি এত্থ দুক্খন্তি নিদ্দুক্খং, তস্স ভাৰো নিদ্দুক্খত্তং. তস্মা অনীতিকং ঈতিরহিতং. ৰানং ৰুচ্চতি তণ্হা, তদভাৰেন নিব্বানং. ব্যাবজ্ঝং ৰুচ্চতি দুক্খং, তদভাৰেন অব্যাবজ্ঝং. পরমত্থতো সচ্চতো সুদ্ধিভাৰেন. কামা এৰ পুথুজ্জনেহি অল্লীযিতব্বতো আলযা. এস নযো সেসেসুপি. পতিট্ঠট্ঠেনাতি পতিট্ঠাভাৰেন ৰট্টদুক্খতো মুচ্চিতুকামানং দীপসদিসং ওঘেহি অনজ্ঝোত্থরণীযত্তা. অল্লীযিতব্বযুত্তট্ঠেনাতি অল্লীযিতুং অরহভাৰতো. তাযনট্ঠেনাতি সপরতাযনট্ঠেন. ভযসরণট্ঠেনাতি ভযস্স হিংসনট্ঠেন. সেট্ঠং উত্তমং. গতীতি গন্ধব্বট্ঠানং.

অসঙ্খতসুত্তাদিৰণ্ণনা নিট্ঠিতা.

অসঙ্খতসংযুত্তৰণ্ণনা নিট্ঠিতা.

১০. অব্যাকতসংযুত্তং

১. খেমাসুত্তৰণ্ণনা

৪১০. বিম্বিসারস্স ¶ ¶ উপাসিকাতি বিম্বিসারস্স ওরোধভূতা উপাসিকা. পণ্ডিচ্চং সিক্খিতভাৰেন. ৰেয্যত্তিযং ৰিসারদভাৰেন. ৰিসারদা নাম তিহেতুকপটিসন্ধিসিদ্ধসাভাৰিকপঞ্ঞা, তায সমন্নাগতা.

অচ্ছিদ্দকগণনায কুসলোতি নৰন্তগণনায কুসলো. অঙ্গুলিমুদ্দায গণনায কুসলোতি অঙ্গুলিকায এৰ গণনায কুসলো সেয্যথাপি পাদসিকা. পিণ্ডগণনাযাতি সঙ্কলনপটুপ্পন্নকারিনো পিণ্ডৰসেন গণনা. তথাগতোতি খীণাসৰো, তথাগতং সন্ধায পুচ্ছতীতি খীণাসৰোতি চস্স অরহত্তফলৰসিভাৰিতখন্ধে উপাদায অযং পঞ্ঞত্তি হোতি. তেসু খন্ধেসু সতি খীণাসৰা সত্তসঙ্খাতা হোন্তীতি ৰোহারেন পঞ্ঞপেতুং সক্কা ভৰেয্য, অসন্তেসু ন সক্কা, তস্মা পরং মরণাতি ৰুত্তত্তা তেসং অভাৰা ‘‘অব্যাকতমেত’’ন্তি ৰুত্তং. যদি এৰং তেসং অভাৰতো ‘‘ন হোতি তথাগতো পরং মরণা’’তি পুট্ঠায ‘‘আমা’’তি পটিজানিতব্বা সিযা, তং পন সত্তসঙ্খাতস্স পুচ্ছিতত্তা ন পটিঞ্ঞাতন্তি দট্ঠব্বং. যেন রূপেনাতি সত্ততথাগতে ৰুত্তরূপং সব্বঞ্ঞুতথাগতে পটিক্খিপিতুং ‘‘তং রূপ’’ন্তিআদি ৰুত্তং. যং উপাদাযাতি যং খন্ধপঞ্চকং উপাদায. তদভাৰেনাতি তস্স খন্ধপঞ্চকস্স অভাৰেন. তস্সা পঞ্ঞত্তিযাতি সত্তপঞ্ঞত্তিযা অভাৰং. নিরুদ্ধং ন নিদস্সেতি.

খেমায থেরিযা ৰুত্তং পঠমং সুত্তং ভগৰতো সেট্ঠত্থদীপনতো অগ্গপদাৰচরংৰ হোতীতি ৰুত্তং ‘‘অগ্গপদস্মি’’ন্তি.

খেমাসুত্তৰণ্ণনা নিট্ঠিতা.

২. অনুরাধসুত্তৰণ্ণনা

৪১১. ইধ সল়াযতনৰগ্গে সঙ্গাযনৰসেন সঙ্গীতিকারেহি ৰুত্তং.

৩-৮. পঠমসারিপুত্তকোট্ঠিকসুত্তাদিৰণ্ণনা

৪১২-৪১৭. রূপমত্তন্তি ¶ ¶ এত্থ মত্ত-সদ্দো ৰিসেসনিৰত্তিঅত্থো. কো পন সো ৰিসেসোতি? যো বাহিরপরিকপ্পিতো ইধ তথাগতোতি ৰুচ্চমানো অত্তা. অনুপলব্ভিযসভাৰোতি অনুপলব্ভিযত্তা.

পঠমসারিপুত্তকোট্ঠিকসুত্তাদিৰণ্ণনা নিট্ঠিতা.

৯. কুতূহলসালাসুত্তৰণ্ণনা

৪১৮. নানাৰিধন্তি তংতংদিট্ঠিৰাদপটিসংযুত্তং অঞ্ঞম্পি ৰা নানাৰিধং তিরচ্ছানকথং. বহূনং কুতূহলুপ্পত্তিট্ঠানতোতি যোজনা. যাৰ আভস্সরব্রহ্মলোকা গচ্ছতীতি অগ্গিনা কপ্পৰুট্ঠানকালে গচ্ছতি, তং সন্ধায ৰুত্তং. ইমঞ্চ কাযন্তি ইমং রূপকাযং. চুতিচিত্তেন নিক্খিপতীতি চুতিচিত্তেন ভিজ্জমানেন নিক্খিপতি. চুতিচিত্তস্স হি ওরং সত্তরসমস্স চিত্তস্স উপ্পাদক্খণে উপ্পন্নং কম্মজরূপং চুতিচিত্তেন সদ্ধিং নিরুজ্ঝতি, ততো পরং কম্মজরূপং ন উপ্পজ্জতি. যদি উপ্পজ্জেয্য, মরণং ন সিযা, চুতিচিত্তং রূপং ন সমুট্ঠাপেতি, আহারজস্স চ অসম্ভৰো এৰ, উতুজং পন ৰত্ততেৰ. যস্মা পটিসন্ধিক্খণে সত্তো অঞ্ঞতরণায উপপজ্জতি নাম, চুতিক্খণে পটিসন্ধিচিত্তং অলদ্ধং অঞ্ঞতরণায, তস্মা ৰুত্তং ‘‘চুতিক্খণে…পে… হোতী’’তি.

কুতূহলসালাসুত্তৰণ্ণনা নিট্ঠিতা.

১০. আনন্দসুত্তৰণ্ণনা

৪১৯. তেসং লদ্ধিযাতি তেসং সস্সতৰাদানং লদ্ধিযা সদ্ধিং এতং ‘‘অত্থত্তা’’তি ৰচনং একং অভৰিস্স. ততো এৰ অনুলোমং তং নাভৰিস্স ঞাণস্সাতি অসারং এতন্তি অধিপ্পাযো. অপি নু মেতস্সাতি মে এতস্স অনত্তাতি ৰিপস্সনাঞাণস্স অনুলোমং অপি নু অভৰিস্স, ৰিলোমকমেৰ তস্স সিযাতি অত্থো.

আনন্দসুত্তৰণ্ণনা নিট্ঠিতা.

১১. সভিযকচ্চানসুত্তৰণ্ণনা

৪২০. যস্সপ’স্সাতি ¶ ¶ পাঠস্স অযং পিণ্ডত্থো ‘‘আৰুসো’’তিআদি. তত্থাযং সম্বন্ধো – আৰুসো, যস্সপি পুগ্গলস্স তীণি ৰস্সানি ৰুট্ঠো, এত্তকেন কালেন ‘‘হেতুম্হি সতি রূপীতিআদিপঞ্ঞাপনা হোতি, অসতি ন হোতী’’তি এত্তকং ব্যাকরণং ভৰেয্য, তস্স পুগ্গলস্স এত্তকমেৰ বহু, কো পন ৰাদো অতিক্কন্তে! ইতো অতিক্কন্তে ধম্মদেসনানযে ৰাদোযেৰ ৰত্তব্বমেৰ নত্থীতি থেরস্স পঞ্হব্যাকরণং সুত্ৰা পরিব্বাজকো পীতিসোমনস্সং পৰেদেসি.

সভিযকচ্চানসুত্তৰণ্ণনা নিট্ঠিতা.

অব্যাকতসংযুত্তৰণ্ণনা নিট্ঠিতা.

সারত্থপ্পকাসিনিযা সংযুত্তনিকায-অট্ঠকথায

সল়াযতনৰগ্গৰণ্ণনায লীনত্থপ্পকাসনা সমত্তা.