📜

নমো তস্স ভগৰতো অরহতো সম্মাসম্বুদ্ধস্স.

অঙ্গুত্তরনিকাযো

নৰকনিপাতপাল়ি

১. পঠমপণ্ণাসকং

১. সম্বোধিৰগ্গো

১. সম্বোধিসুত্তং

১. এৰং ¶ ¶ ¶ ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি –

‘‘সচে, ভিক্খৰে, অঞ্ঞতিত্থিযা পরিব্বাজকা এৰং পুচ্ছেয্যুং – ‘সম্বোধিপক্খিকানং [সম্বোধপক্খিকানং (সী. স্যা. পী.)], আৰুসো, ধম্মানং কা উপনিসা ভাৰনাযা’তি, এৰং পুট্ঠা তুম্হে, ভিক্খৰে, তেসং অঞ্ঞতিত্থিযানং ¶ পরিব্বাজকানং কিন্তি ব্যাকরেয্যাথা’’তি? ‘‘ভগৰংমূলকা নো, ভন্তে, ধম্মা…পে… ভগৰতো সুত্ৰা ভিক্খূ ধারেস্সন্তী’’তি.

‘‘তেন হি, ভিক্খৰে, সুণাথ, সাধুকং মনসি করোথ; ভাসিস্সামী’’তি. ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘সচে, ভিক্খৰে, অঞ্ঞতিত্থিযা পরিব্বাজকা এৰং পুচ্ছেয্যুং – ‘সম্বোধিপক্খিকানং, আৰুসো, ধম্মানং কা উপনিসা ভাৰনাযা’তি, এৰং পুট্ঠা ¶ তুম্হে, ভিক্খৰে, তেসং অঞ্ঞতিত্থিযানং পরিব্বাজকানং এৰং ব্যাকরেয্যাথ ¶ –

‘‘ইধাৰুসো, ভিক্খু কল্যাণমিত্তো হোতি কল্যাণসহাযো কল্যাণসম্পৰঙ্কো ¶ . সম্বোধিপক্খিকানং, আৰুসো, ধম্মানং অযং পঠমা উপনিসা ভাৰনায.

‘‘পুন চপরং, আৰুসো, ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু. সম্বোধিপক্খিকানং, আৰুসো, ধম্মানং অযং দুতিযা উপনিসা ভাৰনায.

‘‘পুন চপরং, আৰুসো, ভিক্খু যাযং কথা অভিসল্লেখিকা চেতোৰিৰরণসপ্পাযা, সেয্যথিদং – অপ্পিচ্ছকথা সন্তুট্ঠিকথা পৰিৰেককথা অসংসগ্গকথা ৰীরিযারম্ভকথা সীলকথা সমাধিকথা পঞ্ঞাকথা ৰিমুত্তিকথা ৰিমুত্তিঞাণদস্সনকথা, এৰরূপিযা কথায নিকামলাভী হোতি অকিচ্ছলাভী অকসিরলাভী. সম্বোধিপক্খিকানং, আৰুসো, ধম্মানং অযং ততিযা উপনিসা ভাৰনায.

‘‘পুন চপরং, আৰুসো, ভিক্খু আরদ্ধৰীরিযো ৰিহরতি অকুসলানং ধম্মানং পহানায, কুসলানং ধম্মানং উপসম্পদায, থামৰা দল়্হপরক্কমো অনিক্খিত্তধুরো কুসলেসু ধম্মেসু. সম্বোধিপক্খিকানং, আৰুসো, ধম্মানং অযং চতুত্থী উপনিসা ভাৰনায.

‘‘পুন চপরং, আৰুসো, ভিক্খু পঞ্ঞৰা হোতি উদযত্থগামিনিযা পঞ্ঞায সমন্নাগতো অরিযায ¶ নিব্বেধিকায সম্মা দুক্খক্খযগামিনিযা. সম্বোধিপক্খিকানং, আৰুসো, ধম্মানং অযং পঞ্চমী উপনিসা ভাৰনায’’.

‘‘কল্যাণমিত্তস্সেতং ¶ , ভিক্খৰে, ভিক্খুনো পাটিকঙ্খং কল্যাণসহাযস্স কল্যাণসম্পৰঙ্কস্স – সীলৰা ভৰিস্সতি, পাতিমোক্খসংৰরসংৰুতো ৰিহরিস্সতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খিস্সতি সিক্খাপদেসু.

‘‘কল্যাণমিত্তস্সেতং, ভিক্খৰে, ভিক্খুনো পাটিকঙ্খং কল্যাণসহাযস্স কল্যাণসম্পৰঙ্কস্স – যাযং কথা অভিসল্লেখিকা চেতোৰিৰরণসপ্পাযা, সেয্যথিদং – অপ্পিচ্ছকথা সন্তুট্ঠিকথা পৰিৰেককথা ¶ অসংসগ্গকথা ৰীরিযারম্ভকথা সীলকথা সমাধিকথা পঞ্ঞাকথা ৰিমুত্তিকথা ৰিমুত্তিঞাণদস্সনকথা, এৰরূপিযা কথায নিকামলাভী ভৰিস্সতি অকিচ্ছলাভী অকসিরলাভী.

‘‘কল্যাণমিত্তস্সেতং, ভিক্খৰে, ভিক্খুনো পাটিকঙ্খং কল্যাণসহাযস্স কল্যাণসম্পৰঙ্কস্স – আরদ্ধৰীরিযো ৰিহরিস্সতি ¶ অকুসলানং ধম্মানং পহানায, কুসলানং ধম্মানং উপসম্পদায, থামৰা দল়্হপরক্কমো অনিক্খিত্তধুরো কুসলেসু ধম্মেসু.

‘‘কল্যাণমিত্তস্সেতং, ভিক্খৰে, ভিক্খুনো পাটিকঙ্খং কল্যাণসহাযস্স কল্যাণসম্পৰঙ্কস্স – পঞ্ঞৰা ভৰিস্সতি উদযত্থগামিনিযা পঞ্ঞায সমন্নাগতো অরিযায নিব্বেধিকায সম্মা দুক্খক্খযগামিনিযা.

‘‘তেন চ পন, ভিক্খৰে, ভিক্খুনা ইমেসু পঞ্চসু ধম্মেসু পতিট্ঠায চত্তারো ধম্মা উত্তরি [উত্তরিং (সী. স্যা. পী.)] ভাৰেতব্বা – অসুভা ভাৰেতব্বা রাগস্স পহানায, মেত্তা ভাৰেতব্বা ব্যাপাদস্স পহানায, আনাপানস্সতি [আনাপানসতি (সী. পী.)] ভাৰেতব্বা ৰিতক্কুপচ্ছেদায, অনিচ্চসঞ্ঞা ভাৰেতব্বা অস্মিমানসমুগ্ঘাতায. অনিচ্চসঞ্ঞিনো, ভিক্খৰে, অনত্তসঞ্ঞা সণ্ঠাতি. অনত্তসঞ্ঞী অস্মিমানসমুগ্ঘাতং পাপুণাতি দিট্ঠেৰ ধম্মে নিব্বান’’ন্তি ¶ . পঠমং.

২. নিস্সযসুত্তং

২. অথ ¶ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং…পে… একমন্তং নিসিন্নো খো সো ভিক্খু ভগৰন্তং এতদৰোচ – ‘‘‘নিস্সযসম্পন্নো নিস্সযসম্পন্নো’তি, ভন্তে, ৰুচ্চতি. কিত্তাৰতা নু খো, ভন্তে, ভিক্খু নিস্সযসম্পন্নো হোতী’’তি? ‘‘সদ্ধং চে, ভিক্খু, ভিক্খু নিস্সায অকুসলং পজহতি কুসলং ভাৰেতি, পহীনমেৰস্স তং অকুসলং হোতি. হিরিং চে, ভিক্খু, ভিক্খু নিস্সায…পে… ওত্তপ্পং চে, ভিক্খু, ভিক্খু নিস্সায…পে… ৰীরিযং চে, ভিক্খু, ভিক্খু নিস্সায…পে… পঞ্ঞং চে, ভিক্খু, ভিক্খু নিস্সায অকুসলং পজহতি কুসলং ভাৰেতি, পহীনমেৰস্স তং অকুসলং হোতি ¶ . তং হিস্স ভিক্খুনো অকুসলং পহীনং হোতি সুপ্পহীনং, যংস অরিযায পঞ্ঞায দিস্ৰা পহীনং’’.

‘‘তেন ¶ চ পন, ভিক্খু, ভিক্খুনা ইমেসু পঞ্চসু ধম্মেসু পতিট্ঠায চত্তারো উপনিস্সায ৰিহাতব্বা. কতমে চত্তারো? ইধ, ভিক্খু, ভিক্খু সঙ্খাযেকং পটিসেৰতি, সঙ্খাযেকং অধিৰাসেতি, সঙ্খাযেকং পরিৰজ্জেতি, সঙ্খাযেকং ৰিনোদেতি. এৰং খো, ভিক্খু, ভিক্খু নিস্সযসম্পন্নো হোতী’’তি. দুতিযং.

৩. মেঘিযসুত্তং

৩. একং সমযং ভগৰা চালিকাযং ৰিহরতি চালিকাপব্বতে. তেন খো পন সমযেন আযস্মা মেঘিযো ভগৰতো উপট্ঠাকো হোতি. অথ খো আযস্মা মেঘিযো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতো খো আযস্মা মেঘিযো ভগৰন্তং এতদৰোচ – ‘‘ইচ্ছামহং, ভন্তে, জন্তুগামং [জতুগামং (সী. অট্ঠ., স্যা. অট্ঠ.), জত্তুগামং (ক. অট্ঠকথাযম্পি পাঠন্তরং)] পিণ্ডায ¶ পৰিসিতু’’ন্তি. ‘‘যস্স দানি ত্ৰং, মেঘিয, কালং মঞ্ঞসী’’তি.

অথ খো আযস্মা মেঘিযো পুব্বণ্হসমযং নিৰাসেত্ৰা পত্তচীৰরমাদায জন্তুগামং পিণ্ডায পাৰিসি. জন্তুগামে পিণ্ডায চরিত্ৰা পচ্ছাভত্তং পিণ্ডপাতপটিক্কন্তো যেন কিমিকাল়ায নদিযা তীরং তেনুপসঙ্কমি. অদ্দসা খো আযস্মা মেঘিযো কিমিকাল়ায নদিযা ¶ তীরে জঙ্ঘাৰিহারং [জঙ্ঘৰিহারং (স্যা. ক.)] অনুচঙ্কমমানো অনুৰিচরমানো অম্বৰনং ¶ পাসাদিকং রমণীযং. দিস্ৰানস্স এতদহোসি – ‘‘পাসাদিকং ৰতিদং অম্বৰনং রমণীযং, অলং ৰতিদং কুলপুত্তস্স পধানত্থিকস্স পধানায. সচে মং ভগৰা অনুজানেয্য, আগচ্ছেয্যাহং ইমং অম্বৰনং পধানাযা’’তি.

অথ খো আযস্মা মেঘিযো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা মেঘিযো ভগৰন্তং এতদৰোচ – ‘‘ইধাহং, ভন্তে, পুব্বণ্হসমযং নিৰাসেত্ৰা পত্তচীৰরমাদায জন্তুগামং পিণ্ডায পাৰিসিং. জন্তুগামে পিণ্ডায চরিত্ৰা পচ্ছাভত্তং পিণ্ডপাতপটিক্কন্তো যেন কিমিকাল়ায নদিযা তীরং তেনুপসঙ্কমিং. অদ্দসং খো অহং, ভন্তে, কিমিকাল়ায নদিযা তীরে জঙ্ঘাৰিহারং অনুচঙ্কমমানো অনুৰিচরমানো অম্বৰনং পাসাদিকং রমণীযং. দিস্ৰান মে এতদহোসি – ‘পাসাদিকং ৰতিদং অম্বৰনং রমণীযং. অলং ৰতিদং কুলপুত্তস্স পধানত্থিকস্স পধানায. সচে ¶ মং ভগৰা অনুজানেয্য, আগচ্ছেয্যাহং ইমং অম্বৰনং পধানাযা’তি. সচে মং ভগৰা অনুজানেয্য, গচ্ছেয্যাহং তং অম্বৰনং পধানাযা’’তি. ‘‘আগমেহি তাৰ, মেঘিয ¶ ! এককম্হি [এককম্হা (সী. পী.)] তাৰ [ৰত (ক.)] যাৰ অঞ্ঞোপি কোচি ভিক্খু আগচ্ছতী’’তি [দিস্সতূতি (সব্বত্থ, টীকাযম্পি পাঠন্তরং), আগচ্ছতূতি, দিস্সতীতি (টীকাযং পাঠন্তরানি)].

দুতিযম্পি খো আযস্মা মেঘিযো ভগৰন্তং এতদৰোচ – ‘‘ভগৰতো, ভন্তে, নত্থি কিঞ্চি উত্তরি করণীযং, নত্থি কতস্স পটিচযো. ময্হং খো পন, ভন্তে, অত্থি উত্তরি করণীযং, অত্থি কতস্স পটিচযো. সচে মং ভগৰা অনুজানেয্য, গচ্ছেয্যাহং তং অম্বৰনং পধানাযা’’তি. ‘‘আগমেহি তাৰ, মেঘিয, এককম্হি তাৰ যাৰ অঞ্ঞোপি কোচি ভিক্খু আগচ্ছতী’’তি.

ততিযম্পি ¶ খো আযস্মা মেঘিযো ভগৰন্তং এতদৰোচ – ‘‘ভগৰতো, ভন্তে, নত্থি কিঞ্চি উত্তরি করণীযং, নত্থি কতস্স পটিচযো. ময্হং খো পন, ভন্তে, অত্থি উত্তরি করণীযং, অত্থি কতস্স পটিচযো. সচে মং ভগৰা অনুজানেয্য, গচ্ছেয্যাহং তং অম্বৰনং পধানাযা’’তি. ‘‘পধানন্তি খো, মেঘিয, ৰদমানং কিন্তি ৰদেয্যাম! যস্স দানি ত্ৰং, মেঘিয, কালং মঞ্ঞসী’’তি.

অথ ¶ খো আযস্মা মেঘিযো উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা যেন তং অম্বৰনং তেনুপসঙ্কমি; উপসঙ্কমিত্ৰা তং অম্বৰনং অজ্ঝোগাহেত্ৰা অঞ্ঞতরস্মিং রুক্খমূলে দিৰাৰিহারং নিসীদি. অথ খো আযস্মতো মেঘিযস্স তস্মিং অম্বৰনে ৰিহরন্তস্স যেভুয্যেন তযো পাপকা অকুসলা ৰিতক্কা সমুদাচরন্তি, সেয্যথিদং – কামৰিতক্কো, ব্যাপাদৰিতক্কো, ৰিহিংসাৰিতক্কো. অথ খো আযস্মতো মেঘিযস্স এতদহোসি – ‘‘অচ্ছরিযং ৰত ভো, অব্ভুতং ৰত ভো! সদ্ধায চ ৰতম্হা অগারস্মা অনগারিযং পব্বজিতা; অথ চ পনিমেহি তীহি পাপকেহি অকুসলেহি ৰিতক্কেহি অন্ৰাসত্তা – কামৰিতক্কেন, ব্যাপাদৰিতক্কেন, ৰিহিংসাৰিতক্কেনা’’তি.

অথ ¶ খো আযস্মা মেঘিযো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা মেঘিযো ভগৰন্তং এতদৰোচ –

‘‘ইধ ¶ ময্হং, ভন্তে, তস্মিং অম্বৰনে ৰিহরন্তস্স যেভুয্যেন তযো পাপকা অকুসলা ৰিতক্কা সমুদাচরন্তি, সেয্যথিদং – কামৰিতক্কো, ব্যাপাদৰিতক্কো, ৰিহিংসাৰিতক্কো. তস্স ময্হং, ভন্তে, এতদহোসি – ‘অচ্ছরিযং ৰত ভো, অব্ভুতং ৰত ভো! সদ্ধায চ ৰতম্হা অগারস্মা অনগারিযং পব্বজিতা; অথ চ পনিমেহি ¶ তীহি পাপকেহি অকুসলেহি ৰিতক্কেহি অন্ৰাসত্তা – কামৰিতক্কেন, ব্যাপাদৰিতক্কেন, ৰিহিংসাৰিতক্কেনাতি’’’.

‘‘অপরিপক্কায, মেঘিয, চেতোৰিমুত্তিযা পঞ্চ ধম্মা পরিপক্কায সংৰত্তন্তি. কতমে পঞ্চ? ইধ, মেঘিয, ভিক্খু কল্যাণমিত্তো হোতি কল্যাণসহাযো কল্যাণসম্পৰঙ্কো. অপরিপক্কায, মেঘিয, চেতোৰিমুত্তিযা অযং পঠমো ধম্মো পরিপক্কায সংৰত্ততি.

‘‘পুন চপরং, মেঘিয, ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু. অপরিপক্কায, মেঘিয, চেতোৰিমুত্তিযা অযং দুতিযো ধম্মো পরিপক্কায সংৰত্ততি.

‘‘পুন চপরং, মেঘিয, যাযং কথা অভিসল্লেখিকা চেতোৰিৰরণসপ্পাযা, সেয্যথিদং – অপ্পিচ্ছকথা ¶ সন্তুট্ঠিকথা পৰিৰেককথা অসংসগ্গকথা ¶ ৰীরিযারম্ভকথা সীলকথা সমাধিকথা পঞ্ঞাকথা ৰিমুত্তিকথা ৰিমুত্তিঞাণদস্সনকথা, এৰরূপিযা কথায নিকামলাভী হোতি অকিচ্ছলাভী অকসিরলাভী. অপরিপক্কায, মেঘিয, চেতোৰিমুত্তিযা অযং ততিযো ধম্মো পরিপক্কায সংৰত্ততি.

‘‘পুন চপরং, মেঘিয, ভিক্খু আরদ্ধৰীরিযো ৰিহরতি অকুসলানং ধম্মানং পহানায, কুসলানং ধম্মানং উপসম্পদায, থামৰা দল়্হপরক্কমো অনিক্খিত্তধুরো কুসলেসু ধম্মেসু. অপরিপক্কায, মেঘিয, চেতোৰিমুত্তিযা অযং চতুত্থো ধম্মো পরিপক্কায সংৰত্ততি.

‘‘পুন চপরং, মেঘিয, ভিক্খু পঞ্ঞৰা হোতি উদযত্থগামিনিযা পঞ্ঞায সমন্নাগতো অরিযায নিব্বেধিকায সম্মা দুক্খক্খযগামিনিযা. অপরিপক্কায, মেঘিয, চেতোৰিমুত্তিযা অযং পঞ্চমো ধম্মো পরিপক্কায সংৰত্ততি.

‘‘কল্যাণমিত্তস্সেতং ¶ , মেঘিয, ভিক্খুনো পাটিকঙ্খং কল্যাণসহাযস্স কল্যাণসম্পৰঙ্কস্স – ‘সীলৰা ভৰিস্সতি…পে. ¶ … সমাদায সিক্খিস্সতি সিক্খাপদেসু’’’.

‘‘কল্যাণমিত্তস্সেতং, মেঘিয, ভিক্খুনো পাটিকঙ্খং কল্যাণসহাযস্স কল্যাণসম্পৰঙ্কস্স – ‘যাযং কথা অভিসল্লেখিকা চেতোৰিৰরণসপ্পাযা, সেয্যথিদং – অপ্পিচ্ছকথা…পে… ৰিমুত্তিঞাণদস্সনকথা, এৰরূপিযা কথায নিকামলাভী ভৰিস্সতি অকিচ্ছলাভী অকসিরলাভী’’’.

‘‘কল্যাণমিত্তস্সেতং, মেঘিয, ভিক্খুনো পাটিকঙ্খং কল্যাণসহাযস্স কল্যাণসম্পৰঙ্কস্স – ‘আরদ্ধৰীরিযো ৰিহরিস্সতি…পে… অনিক্খিত্তধুরো কুসলেসু ধম্মেসু’’’.

‘‘কল্যাণমিত্তস্সেতং ¶ , মেঘিয, ভিক্খুনো পাটিকঙ্খং কল্যাণসহাযস্স কল্যাণসম্পৰঙ্কস্স – ‘পঞ্ঞৰা ভৰিস্সতি…পে… সম্মাদুক্খক্খযগামিনিযা’’’.

‘‘তেন ¶ চ পন, মেঘিয, ভিক্খুনা ইমেসু পঞ্চসু ধম্মেসু পতিট্ঠায চত্তারো ধম্মা উত্তরি ভাৰেতব্বা – অসুভা ভাৰেতব্বা রাগস্স পহানায, মেত্তা ভাৰেতব্বা ব্যাপাদস্স পহানায, আনাপানস্সতি ভাৰেতব্বা ৰিতক্কুপচ্ছেদায, অনিচ্চসঞ্ঞা ভাৰেতব্বা অস্মিমানসমুগ্ঘাতায. অনিচ্চসঞ্ঞিনো, মেঘিয, অনত্তসঞ্ঞা সণ্ঠাতি. অনত্তসঞ্ঞী অস্মিমানসমুগ্ঘাতং পাপুণাতি দিট্ঠেৰ ধম্মে নিব্বান’’ন্তি. ততিযং.

৪. নন্দকসুত্তং

৪. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা নন্দকো উপট্ঠানসালাযং ভিক্খূ ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি. অথ খো ভগৰা সাযন্হসমযং পটিসল্লানা ৰুট্ঠিতো যেনুপট্ঠানসালা তেনুপসঙ্কমি; উপসঙ্কমিত্ৰা বহিদ্ৰারকোট্ঠকে অট্ঠাসি কথাপরিযোসানং আগমযমানো. অথ খো ভগৰা কথাপরিযোসানং ৰিদিত্ৰা উক্কাসেত্ৰা অগ্গল়ং ¶ আকোটেসি. ৰিৰরিংসু খো তে ভিক্খূ ভগৰতো দ্ৰারং.

অথ ¶ খো ভগৰা উপট্ঠানসালং পৰিসিত্ৰা পঞ্ঞত্তাসনে নিসীদি. নিসজ্জ খো ভগৰা আযস্মন্তং নন্দকং এতদৰোচ – ‘‘দীঘো খো ত্যাযং, নন্দক, ধম্মপরিযাযো ভিক্খূনং পটিভাসি. অপি মে পিট্ঠি আগিলাযতি বহিদ্ৰারকোট্ঠকে ¶ ঠিতস্স কথাপরিযোসানং আগমযমানস্সা’’তি.

এৰং ৰুত্তে আযস্মা নন্দকো সারজ্জমানরূপো ভগৰন্তং এতদৰোচ – ‘‘ন খো পন মযং, ভন্তে, জানাম ‘ভগৰা বহিদ্ৰারকোট্ঠকে ঠিতো’তি. সচে হি মযং, ভন্তে, জানেয্যাম ‘ভগৰা বহিদ্ৰারকোট্ঠকে ঠিতো’তি, এত্তকম্পি ( ) [(ধম্মং) কত্থচি] নো নপ্পটিভাসেয্যা’’তি.

অথ খো ভগৰা আযস্মন্তং নন্দকং সারজ্জমানরূপং ৰিদিত্ৰা আযস্মন্তং নন্দকং এতদৰোচ – ‘‘সাধু, সাধু, নন্দক! এতং খো, নন্দক, তুম্হাকং পতিরূপং কুলপুত্তানং সদ্ধায অগারস্মা অনগারিযং পব্বজিতানং, যং তুম্হে ধম্মিযা কথায সন্নিসীদেয্যাথ. সন্নিপতিতানং ৰো, নন্দক, দ্ৰযং করণীযং – ধম্মী ৰা কথা অরিযো ৰা তুণ্হীভাৰো. [অ. নি. ৮.৭১; ৯.১] সদ্ধো চ, নন্দক, ভিক্খু ¶ হোতি, নো চ সীলৰা. এৰং সো তেনঙ্গেন অপরিপূরো হোতি. তেন তং অঙ্গং পরিপূরেতব্বং – ‘কিন্তাহং সদ্ধো চ অস্সং ¶ সীলৰা চা’তি. যতো চ খো, নন্দক, ভিক্খু সদ্ধো চ হোতি সীলৰা চ, এৰং সো তেনঙ্গেন পরিপূরো হোতি.

‘‘সদ্ধো চ, নন্দক, ভিক্খু হোতি সীলৰা চ, নো চ লাভী অজ্ঝত্তং চেতোসমাধিস্স. এৰং সো তেনঙ্গেন অপরিপূরো হোতি. তেন তং অঙ্গং পরিপূরেতব্বং – ‘কিন্তাহং সদ্ধো চ অস্সং সীলৰা চ লাভী চ অজ্ঝত্তং চেতোসমাধিস্সা’তি. যতো চ খো, নন্দক, ভিক্খু সদ্ধো চ হোতি সীলৰা চ লাভী চ অজ্ঝত্তং চেতোসমাধিস্স, এৰং সো তেনঙ্গেন পরিপূরো হোতি.

‘‘সদ্ধো চ, নন্দক, ভিক্খু হোতি সীলৰা চ লাভী চ অজ্ঝত্তং চেতোসমাধিস্স, ন লাভী অধিপঞ্ঞাধম্মৰিপস্সনায. এৰং সো তেনঙ্গেন ¶ অপরিপূরো হোতি. সেয্যথাপি, নন্দক, পাণকো চতুপ্পাদকো অস্স. তস্স একো পাদো ওমকো লামকো. এৰং সো তেনঙ্গেন অপরিপূরো অস্স. এৰমেৰং খো, নন্দক, ভিক্খু সদ্ধো চ হোতি সীলৰা চ লাভী চ অজ্ঝত্তং চেতোসমাধিস্স, ন লাভী অধিপঞ্ঞাধম্মৰিপস্সনায. এৰং ¶ সো তেনঙ্গেন অপরিপূরো হোতি. তেন তং অঙ্গং পরিপূরেতব্বং – ‘কিন্তাহং সদ্ধো চ অস্সং সীলৰা চ লাভী চ অজ্ঝত্তং চেতোসমাধিস্স লাভী চ অধিপঞ্ঞাধম্মৰিপস্সনাযা’’’তি.

‘‘যতো চ খো, নন্দক, ভিক্খু সদ্ধো চ হোতি সীলৰা চ লাভী চ অজ্ঝত্তং চেতোসমাধিস্স লাভী চ অধিপঞ্ঞাধম্মৰিপস্সনায, এৰং সো তেনঙ্গেন পরিপূরো হোতী’’তি. ইদমৰোচ ভগৰা. ইদং ৰত্ৰান সুগতো উট্ঠাযাসনা ৰিহারং পাৰিসি.

অথ খো আযস্মা নন্দকো অচিরপক্কন্তস্স ভগৰতো ভিক্খূ আমন্তেসি – ‘‘ইদানি, আৰুসো, ভগৰা চতূহি পদেহি কেৰলপরিপুণ্ণং পরিসুদ্ধং ব্রহ্মচরিযং পকাসেত্ৰা ¶ উট্ঠাযাসনা ৰিহারং পৰিট্ঠো – ‘সদ্ধো চ, নন্দক, ভিক্খু হোতি, নো চ সীলৰা. এৰং সো তেনঙ্গেন অপরিপূরো হোতি. তেন তং অঙ্গং পরিপূরেতব্বং – কিন্তাহং সদ্ধো চ অস্সং সীলৰা চা’তি. যতো চ খো নন্দক ভিক্খু সদ্ধো চ হোতি সীলৰা চ, এৰং সো তেনঙ্গেন পরিপূরো হোতি. সদ্ধো চ নন্দক ভিক্খু হোতি সীলৰা চ, নো চ লাভী অজ্ঝত্তং চেতোসমাধিস্স…পে… লাভী ¶ চ অজ্ঝত্তং চেতোসমাধিস্স, ন লাভী অধিপঞ্ঞাধম্মৰিপস্সনায, এৰং সো তেনঙ্গেন অপরিপূরো ¶ হোতি. সেয্যথাপি নন্দক পাণকো চতুপ্পাদকো অস্স, তস্স একো পাদো ওমকো লামকো, এৰং সো তেনঙ্গেন অপরিপূরো অস্স. এৰমেৰং খো, নন্দক, ভিক্খু সদ্ধো চ হোতি সীলৰা চ, লাভী চ অজ্ঝত্তং চেতোসমাধিস্স, ন লাভী অধিপঞ্ঞাধম্মৰিপস্সনায, এৰং সো তেনঙ্গেন অপরিপূরো হোতি, তেন তং অঙ্গং পরিপূরেতব্বং ‘কিন্তাহং সদ্ধো চ অস্সং সীলৰা চ, লাভী চ অজ্ঝত্তং চেতোসমাধিস্স, লাভী চ অধিপঞ্ঞাধম্মৰিপস্সনাযা’তি. যতো চ খো, নন্দক, ভিক্খু সদ্ধো চ হোতি সীলৰা চ লাভী চ অজ্ঝত্তং চেতোসমাধিস্স লাভী চ অধিপঞ্ঞাধম্মৰিপস্সনায, এৰং সো তেনঙ্গেন পরিপূরো হোতী’’তি.

‘‘পঞ্চিমে, আৰুসো, আনিসংসা কালেন ধম্মস্সৰনে কালেন ধম্মসাকচ্ছায. কতমে পঞ্চ? ইধাৰুসো, ভিক্খু ভিক্খূনং ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি. যথা যথা, আৰুসো, ভিক্খু ভিক্খূনং ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি ¶ , তথা তথা সো সত্থু পিযো চ হোতি মনাপো চ গরু চ ভাৰনীযো চ. অযং, আৰুসো, পঠমো আনিসংসো কালেন ধম্মস্সৰনে কালেন ধম্মসাকচ্ছায.

‘‘পুন চপরং, আৰুসো, ভিক্খু ভিক্খূনং ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ¶ ব্রহ্মচরিযং পকাসেতি. যথা যথা, আৰুসো, ভিক্খু ভিক্খূনং ধম্মং দেসেতি আদিকল্যাণং…পে… ব্রহ্মচরিযং ¶ পকাসেতি, তথা তথা সো তস্মিং ধম্মে অত্থপ্পটিসংৰেদী চ হোতি ধম্মপ্পটিসংৰেদী চ. অযং, আৰুসো, দুতিযো আনিসংসো কালেন ধম্মস্সৰনে কালেন ধম্মসাকচ্ছায.

‘‘পুন চপরং, আৰুসো, ভিক্খু ভিক্খূনং ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি. যথা যথা, আৰুসো, ভিক্খু ভিক্খূনং ধম্মং দেসেতি আদিকল্যাণং…পে… ব্রহ্মচরিযং পকাসেতি, তথা তথা সো তস্মিং ধম্মে গম্ভীরং অত্থপদং পঞ্ঞায অতিৰিজ্ঝ পস্সতি. অযং, আৰুসো, ততিযো আনিসংসো কালেন ধম্মস্সৰনে কালেন ধম্মসাকচ্ছায.

‘‘পুন ¶ চপরং, আৰুসো, ভিক্খু ভিক্খূনং ধম্মং দেসেতি আদিকল্যাণং…পে… ব্রহ্মচরিযং পকাসেতি. যথা যথা, আৰুসো, ভিক্খু ভিক্খূনং ধম্মং দেসেতি আদিকল্যাণং…পে… ব্রহ্মচরিযং পকাসেতি, তথা তথা নং সব্রহ্মচারী উত্তরি সম্ভাৰেন্তি – ‘অদ্ধা অযমাযস্মা পত্তো ৰা পজ্জতি ৰা’. অযং, আৰুসো, চতুত্থো আনিসংসো কালেন ধম্মস্সৰনে কালেন ধম্মসাকচ্ছায.

‘‘পুন চপরং, আৰুসো, ভিক্খু ভিক্খূনং ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি. যথা যথা, আৰুসো, ভিক্খু ভিক্খূনং ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং ¶ , কেৰলপরিপুণ্ণং পরিসুদ্ধং ব্রহ্মচরিযং পকাসেতি, তত্থ যে খো ভিক্খূ সেখা অপ্পত্তমানসা অনুত্তরং যোগক্খেমং পত্থযমানা ৰিহরন্তি, তে তং ধম্মং সুত্ৰা ৰীরিযং আরভন্তি অপ্পত্তস্স পত্তিযা অনধিগতস্স ¶ অধিগমায অসচ্ছিকতস্স সচ্ছিকিরিযায. যে পন তত্থ ভিক্খূ অরহন্তো খীণাসৰা ৰুসিতৰন্তো কতকরণীযা ওহিতভারা অনুপ্পত্তসদত্থা পরিক্খীণভৰসংযোজনা সম্মদঞ্ঞাৰিমুত্তা, তে তং ধম্মং সুত্ৰা দিট্ঠধম্মসুখৰিহারংযেৰ ¶ অনুযুত্তা ৰিহরন্তি. অযং, আৰুসো, পঞ্চমো আনিসংসো কালেন ধম্মস্সৰনে কালেন ধম্মসাকচ্ছায. ইমে খো, আৰুসো, পঞ্চ আনিসংসা কালেন ধম্মস্সৰনে কালেন ধম্মসাকচ্ছাযা’’তি. চতুত্থং.

৫. বলসুত্তং

৫. ‘‘চত্তারিমানি, ভিক্খৰে, বলানি. কতমানি চত্তারি? পঞ্ঞাবলং, ৰীরিযবলং, অনৰজ্জবলং, সঙ্গাহবলং. কতমঞ্চ, ভিক্খৰে, পঞ্ঞাবলং? যে ধম্মা কুসলা কুসলসঙ্খাতা যে ধম্মা অকুসলা অকুসলসঙ্খাতা যে ধম্মা সাৰজ্জা সাৰজ্জসঙ্খাতা যে ধম্মা অনৰজ্জা অনৰজ্জসঙ্খাতা যে ধম্মা কণ্হা কণ্হসঙ্খাতা যে ধম্মা সুক্কা সুক্কসঙ্খাতা যে ধম্মা সেৰিতব্বা সেৰিতব্বসঙ্খাতা যে ধম্মা অসেৰিতব্বা অসেৰিতব্বসঙ্খাতা যে ধম্মা নালমরিযা নালমরিযসঙ্খাতা যে ধম্মা অলমরিযা অলমরিযসঙ্খাতা, ত্যাস্স ধম্মা পঞ্ঞায ৰোদিট্ঠা হোন্তি ৰোচরিতা. ইদং ৰুচ্চতি, ভিক্খৰে, পঞ্ঞাবলং.

‘‘কতমঞ্চ ¶ ¶ , ভিক্খৰে, ৰীরিযবলং? যে ধম্মা অকুসলা অকুসলসঙ্খাতা যে ধম্মা সাৰজ্জা সাৰজ্জসঙ্খাতা যে ধম্মা কণ্হা কণ্হসঙ্খাতা যে ধম্মা অসেৰিতব্বা অসেৰিতব্বসঙ্খাতা যে ধম্মা নালমরিযা নালমরিযসঙ্খাতা, তেসং ধম্মানং পহানায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. যে ধম্মা কুসলা কুসলসঙ্খাতা যে ধম্মা অনৰজ্জা অনৰজ্জসঙ্খাতা যে ধম্মা সুক্কা সুক্কসঙ্খাতা যে ধম্মা সেৰিতব্বা সেৰিতব্বসঙ্খাতা ¶ যে ধম্মা অলমরিযা অলমরিযসঙ্খাতা, তেসং ধম্মানং পটিলাভায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. ইদং ৰুচ্চতি, ভিক্খৰে, ৰীরিযবলং.

‘‘কতমঞ্চ, ভিক্খৰে, অনৰজ্জবলং? ইধ, ভিক্খৰে, অরিযসাৰকো অনৰজ্জেন কাযকম্মেন সমন্নাগতো হোতি, অনৰজ্জেন ৰচীকম্মেন সমন্নাগতো হোতি, অনৰজ্জেন মনোকম্মেন সমন্নাগতো হোতি. ইদং ৰুচ্চতি, ভিক্খৰে, অনৰজ্জবলং.

‘‘কতমঞ্চ ¶ , ভিক্খৰে, সঙ্গাহবলং? চত্তারিমানি, ভিক্খৰে, সঙ্গহৰত্থূনি – দানং, পেয্যৰজ্জং, অত্থচরিযা, সমানত্ততা. এতদগ্গং, ভিক্খৰে, দানানং যদিদং ধম্মদানং. এতদগ্গং, ভিক্খৰে, পেয্যৰজ্জানং যদিদং অত্থিকস্স ওহিতসোতস্স পুনপ্পুনং ধম্মং দেসেতি. এতদগ্গং, ভিক্খৰে, অত্থচরিযানং যদিদং অস্সদ্ধং সদ্ধাসম্পদায সমাদপেতি নিৰেসেতি পতিট্ঠাপেতি, দুস্সীলং সীলসম্পদায… পে… মচ্ছরিং চাগসম্পদায…পে… দুপ্পঞ্ঞং পঞ্ঞাসম্পদায সমাদপেতি নিৰেসেতি পতিট্ঠাপেতি. এতদগ্গং, ভিক্খৰে, সমানত্ততানং যদিদং ¶ সোতাপন্নো সোতাপন্নস্স সমানত্তো, সকদাগামী সকদাগামিস্স সমানত্তো, অনাগামী অনাগামিস্স সমানত্তো, অরহা অরহতো সমানত্তো. ইদং ৰুচ্চতি, ভিক্খৰে, সঙ্গাহবলং. ইমানি খো, ভিক্খৰে, চত্তারি বলানি.

‘‘ইমেহি খো, ভিক্খৰে, চতূহি বলেহি সমন্নাগতো অরিযসাৰকো পঞ্চ ভযানি সমতিক্কন্তো হোতি. কতমানি পঞ্চ? আজীৰিকভযং, অসিলোকভযং, পরিসসারজ্জভযং, মরণভযং ¶ , দুগ্গতিভযং. স খো সো, ভিক্খৰে, অরিযসাৰকো ইতি পটিসঞ্চিক্খতি – ‘নাহং আজীৰিকভযস্স ভাযামি. কিস্সাহং আজীৰিকভযস্স ভাযিস্সামি? অত্থি মে চত্তারি বলানি – পঞ্ঞাবলং, ৰীরিযবলং, অনৰজ্জবলং, সঙ্গাহবলং. দুপ্পঞ্ঞো খো আজীৰিকভযস্স ¶ ভাযেয্য. কুসীতো আজীৰিকভযস্স ভাযেয্য. সাৰজ্জকাযকম্মন্তৰচীকম্মন্তমনোকম্মন্তো আজীৰিকভযস্স ভাযেয্য. অসঙ্গাহকো আজীৰিকভযস্স ভাযেয্য. নাহং অসিলোকভযস্স ভাযামি…পে… নাহং পরিসসারজ্জভযস্স ভাযামি…পে… নাহং মরণভযস্স ভাযামি…পে… নাহং দুগ্গতিভযস্স ভাযামি. কিস্সাহং দুগ্গতিভযস্স ভাযিস্সামি? অত্থি মে চত্তারি বলানি – পঞ্ঞাবলং, ৰীরিযবলং, অনৰজ্জবলং, সঙ্গাহবলং. দুপ্পঞ্ঞো খো দুগ্গতিভযস্স ভাযেয্য. কুসীতো দুগ্গতিভযস্স ভাযেয্য. সাৰজ্জকাযকম্মন্তৰচীকম্মন্তমনোকম্মন্তো দুগ্গতিভযস্স ভাযেয্য. অসঙ্গাহকো দুগ্গতিভযস্স ভাযেয্য. ইমেহি খো, ভিক্খৰে, চতূহি বলেহি সমন্নাগতো অরিযসাৰকো ইমানি পঞ্চ ভযানি সমতিক্কন্তো হোতী’’তি. পঞ্চমং.

৬. সেৰনাসুত্তং

৬. তত্র ¶ খো আযস্মা সারিপুত্তো ভিক্খূ আমন্তেসি…পে… আযস্মা সারিপুত্তো এতদৰোচ –

‘‘পুগ্গলোপি ¶ , আৰুসো, দুৰিধেন ৰেদিতব্বো – সেৰিতব্বোপি অসেৰিতব্বোপি. চীৰরম্পি, আৰুসো, দুৰিধেন ৰেদিতব্বং – সেৰিতব্বম্পি অসেৰিতব্বম্পি. পিণ্ডপাতোপি, আৰুসো, দুৰিধেন ৰেদিতব্বো – সেৰিতব্বোপি অসেৰিতব্বোপি. সেনাসনম্পি, আৰুসো, দুৰিধেন ৰেদিতব্বং – সেৰিতব্বম্পি অসেৰিতব্বম্পি. গামনিগমোপি, আৰুসো, দুৰিধেন ৰেদিতব্বো – সেৰিতব্বোপি ¶ অসেৰিতব্বোপি. জনপদপদেসোপি আৰুসো, দুৰিধেন ৰেদিতব্বো – সেৰিতব্বোপি অসেৰিতব্বোপি.

‘‘‘পুগ্গলোপি, আৰুসো, দুৰিধেন ৰেদিতব্বো – সেৰিতব্বোপি অসেৰিতব্বোপী’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? তত্থ যং জঞ্ঞা পুগ্গলং – ‘ইমং খো মে পুগ্গলং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি; যে চ খো মে পব্বজিতেন জীৰিতপরিক্খারা সমুদানেতব্বা চীৰরপিণ্ডপাতসেনাসনগিলানপচ্চযভেসজ্জপরিক্খারা তে চ কসিরেন সমুদাগচ্ছন্তি; যস্স চম্হি অত্থায অগারস্মা অনগারিযং পব্বজিতো সো চ মে সামঞ্ঞত্থো ¶ ন ভাৰনাপারিপূরিং গচ্ছতী’তি, তেনাৰুসো, পুগ্গলেন সো পুগ্গলো রত্তিভাগং ৰা দিৰসভাগং ৰা সঙ্খাপি অনাপুচ্ছা পক্কমিতব্বং নানুবন্ধিতব্বো.

‘‘তত্থ যং জঞ্ঞা পুগ্গলং – ‘ইমং খো মে পুগ্গলং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি; যে চ খো মে পব্বজিতেন জীৰিতপরিক্খারা সমুদানেতব্বা চীৰরপিণ্ডপাতসেনাসনগিলানপচ্চযভেসজ্জপরিক্খারা তে ¶ চ অপ্পকসিরেন সমুদাগচ্ছন্তি; যস্স চম্হি অত্থায অগারস্মা অনগারিযং পব্বজিতো সো চ মে সামঞ্ঞত্থো ন ভাৰনাপারিপূরিং গচ্ছতী’তি, তেনাৰুসো, পুগ্গলেন সো পুগ্গলো সঙ্খাপি অনাপুচ্ছা পক্কমিতব্বং নানুবন্ধিতব্বো.

‘‘তত্থ যং জঞ্ঞা পুগ্গলং – ‘ইমং খো মে পুগ্গলং সেৰতো অকুসলা ¶ ধম্মা পরিহাযন্তি, কুসলা ধম্মা অভিৰড্ঢন্তি; যে চ খো মে পব্বজিতেন জীৰিতপরিক্খারা সমুদানেতব্বা চীৰরপিণ্ডপাতসেনাসনগিলানপচ্চযভেসজ্জপরিক্খারা তে চ কসিরেন সমুদাগচ্ছন্তি; যস্স চম্হি অত্থায অগারস্মা অনগারিযং পব্বজিতো সো চ মে সামঞ্ঞত্থো ভাৰনাপারিপূরিং গচ্ছতী’তি, তেনাৰুসো, পুগ্গলেন সো পুগ্গলো সঙ্খাপি অনুবন্ধিতব্বো ন পক্কমিতব্বং.

‘‘তত্থ ¶ যং জঞ্ঞা পুগ্গলং – ‘ইমং খো মে পুগ্গলং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি; যে চ খো মে পব্বজিতেন জীৰিতপরিক্খারা সমুদানেতব্বা চীৰরপিণ্ডপাতসেনাসনগিলানপচ্চযভেসজ্জপরিক্খারা তে চ অপ্পকসিরেন সমুদাগচ্ছন্তি; যস্স চম্হি অত্থায অগারস্মা অনগারিযং পব্বজিতো সো চ মে সামঞ্ঞত্থো ভাৰনাপারিপূরিং গচ্ছতী’তি, তেনাৰুসো, পুগ্গলেন সো পুগ্গলো যাৰজীৰং অনুবন্ধিতব্বো ন পক্কমিতব্বং অপি পনুজ্জমানেন [পণুজ্জমানেন (?)]. ‘পুগ্গলোপি, আৰুসো, দুৰিধেন ৰেদিতব্বো – সেৰিতব্বোপি অসেৰিতব্বোপী’তি, ইতি যং তং ৰুত্তং, ইদমেতং পটিচ্চ ৰুত্তং.

‘‘‘চীৰরম্পি, আৰুসো, দুৰিধেন ৰেদিতব্বং – সেৰিতব্বম্পি অসেৰিতব্বম্পী’তি, ইতি ¶ খো পনেতং ৰুত্তং. কিঞ্চেতং পটিচ্চ ৰুত্তং? তত্থ যং জঞ্ঞা চীৰরং – ‘ইদং খো মে চীৰরং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তী’তি, এৰরূপং চীৰরং ন সেৰিতব্বং ¶ . তত্থ যং জঞ্ঞা চীৰরং – ‘ইদং খো মে চীৰরং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তী’তি, এৰরূপং চীৰরং সেৰিতব্বং. ‘চীৰরম্পি ¶ , আৰুসো, দুৰিধেন ৰেদিতব্বং – সেৰিতব্বম্পি অসেৰিতব্বম্পী’তি, ইতি যং তং ৰুত্তং, ইদমেতং পটিচ্চ ৰুত্তং.

‘‘‘পিণ্ডপাতোপি, আৰুসো, দুৰিধেন ৰেদিতব্বো – সেৰিতব্বোপি অসেৰিতব্বোপী’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? তত্থ যং জঞ্ঞা পিণ্ডপাতং – ‘ইমং খো মে পিণ্ডপাতং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তী’তি, এৰরূপো পিণ্ডপাতো ন সেৰিতব্বো. তত্থ যং জঞ্ঞা পিণ্ডপাতং – ‘ইমং খো মে পিণ্ডপাতং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তী’তি, এৰরূপো পিণ্ডপাতো সেৰিতব্বো. ‘পিণ্ডপাতোপি, আৰুসো, দুৰিধেন ৰেদিতব্বো – সেৰিতব্বোপি অসেৰিতব্বোপী’তি, ইতি যং তং ৰুত্তং, ইদমেতং পটিচ্চ ৰুত্তং.

‘‘‘সেনাসনম্পি, আৰুসো, দুৰিধেন ৰেদিতব্বং – সেৰিতব্বম্পি অসেৰিতব্বম্পী’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? তত্থ যং জঞ্ঞা সেনাসনং – ‘‘ইদং খো মে সেনাসনং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তী’তি, এৰরূপং সেনাসনং ন ¶ সেৰিতব্বং. তত্থ যং জঞ্ঞা সেনাসনং – ‘ইদং খো মে সেনাসনং সেৰতো অকুসলা ধম্মা পরিহাযন্তি ¶ , কুসলা ধম্মা অভিৰড্ঢন্তী’তি, এৰরূপং সেনাসনং সেৰিতব্বং. ‘সেনাসনম্পি, আৰুসো, দুৰিধেন ৰেদিতব্বং – সেৰিতব্বম্পি অসেৰিতব্বম্পী’তি, ইতি যং তং ৰুত্তং, ইদমেতং পটিচ্চ ৰুত্তং.

‘‘‘গামনিগমোপি, আৰুসো, দুৰিধেন ৰেদিতব্বো – সেৰিতব্বোপি অসেৰিতব্বোপী’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? তত্থ যং জঞ্ঞা গামনিগমং – ‘ইমং খো মে গামনিগমং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তী’তি, এৰরূপো গামনিগমো ন সেৰিতব্বো. তত্থ যং জঞ্ঞা গামনিগমং – ‘ইমং খো, মে গামনিগমং ¶ সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তী’তি, এৰরূপো গামনিগমো সেৰিতব্বো. ‘গামনিগমোপি, আৰুসো, দুৰিধেন ৰেদিতব্বো – সেৰিতব্বোপি অসেৰিতব্বোপী’তি, ইতি যং তং ৰুত্তং, ইদমেতং পটিচ্চ ৰুত্তং.

‘‘‘জনপদপদেসোপি ¶ , আৰুসো, দুৰিধেন ৰেদিতব্বো – সেৰিতব্বোপি অসেৰিতব্বোপী’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? তত্থ যং জঞ্ঞা জনপদপদেসং – ‘ইমং খো মে জনপদপদেসং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তী’তি, এৰরূপো জনপদপদেসো ন সেৰিতব্বো. তত্থ যং জঞ্ঞা জনপদপদেসং – ‘ইমং খো মে জনপদপদেসং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তী’তি, এৰরূপো জনপদপদেসো সেৰিতব্বো. ‘জনপদপদেসোপি, আৰুসো, দুৰিধেন ¶ ৰেদিতব্বো – সেৰিতব্বোপি অসেৰিতব্বোপী’তি, ইতি যং তং ৰুত্তং, ইদমেতং পটিচ্চ ৰুত্ত’’ন্তি. ছট্ঠং.

৭. সুতৰাসুত্তং

৭. একং সমযং ভগৰা রাজগহে ৰিহরতি গিজ্ঝকূটে পব্বতে. অথ খো সুতৰা পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো সুতৰা পরিব্বাজকো ভগৰন্তং এতদৰোচ –

‘‘একমিদাহং, ভন্তে, সমযং ভগৰা ইধেৰ রাজগহে ৰিহরামি গিরিব্বজে. তত্র মে, ভন্তে, ভগৰতো সম্মুখা সুতং সম্মুখা পটিগ্গহিতং – ‘যো সো, সুতৰা ¶ [সুতৰ (স্যা.)], ভিক্খু অরহং খীণাসৰো ৰুসিতৰা কতকরণীযো ওহিতভারো ¶ অনুপ্পত্তসদত্থো পরিক্খীণভৰসংযোজনো সম্মদঞ্ঞাৰিমুত্তো, অভব্বো সো পঞ্চ ঠানানি অজ্ঝাচরিতুং – অভব্বো খীণাসৰো ভিক্খু সঞ্চিচ্চ পাণং জীৰিতা ৰোরোপেতুং, অভব্বো খীণাসৰো ভিক্খু অদিন্নং থেয্যসঙ্খাতং আদাতুং, অভব্বো খীণাসৰো ভিক্খু মেথুনং ধম্মং পটিসেৰিতুং, অভব্বো খীণাসৰো ভিক্খু সম্পজানমুসা [সম্পজানং মুসা (ক. সী.)] ভাসিতুং, অভব্বো খীণাসৰো ভিক্খু সন্নিধিকারকং কামে পরিভুঞ্জিতুং সেয্যথাপি পুব্বে অগারিযভূতো’তি. কচ্চি মেতং, ভন্তে, ভগৰতো সুস্সুতং সুগ্গহিতং সুমনসিকতং সূপধারিত’’ন্তি?

‘‘তগ্ঘ তে এতং, সুতৰা, সুস্সুতং সুগ্গহিতং সুমনসিকতং সূপধারিতং. পুব্বে চাহং, সুতৰা, এতরহি চ এৰং ৰদামি – ‘যো সো ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞাৰিমুত্তো, অভব্বো ¶ সো নৰ ঠানানি অজ্ঝাচরিতুং ¶ – অভব্বো খীণাসৰো ভিক্খু সঞ্চিচ্চ পাণং জীৰিতা ৰোরোপেতুং, অভব্বো খীণাসৰো ভিক্খু অদিন্নং থেয্যসঙ্খাতং আদাতুং, অভব্বো খীণাসৰো ভিক্খু মেথুনং ধম্মং পটিসেৰিতুং, অভব্বো খীণাসৰো ভিক্খু সম্পজানমুসা ভাসিতুং, অভব্বো খীণাসৰো ভিক্খু সন্নিধিকারকং কামে পরিভুঞ্জিতুং সেয্যথাপি পুব্বে অগারিযভূতো, অভব্বো খীণাসৰো ভিক্খু ছন্দাগতিং গন্তুং, অভব্বো খীণাসৰো ভিক্খু দোসাগতিং গন্তুং, অভব্বো খীণাসৰো ভিক্খু মোহাগতিং গন্তুং, অভব্বো খীণাসৰো ভিক্খু ভযাগতিং ¶ গন্তুং’. পুব্বে চাহং, সুতৰা, এতরহি চ এৰং ৰদামি – ‘যো সো ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞাৰিমুত্তো, অভব্বো সো ইমানি নৰ ঠানানি অজ্ঝাচরিতু’’’ন্তি. সত্তমং.

৮. সজ্ঝসুত্তং

৮. একং সমযং ভগৰা রাজগহে ৰিহরতি গিজ্ঝকূটে পব্বতে. অথ খো সজ্ঝো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং ¶ নিসীদি. একমন্তং নিসিন্নো খো সজ্ঝো পরিব্বাজকো ভগৰন্তং এতদৰোচ –

‘‘একমিদাহং, ভন্তে, সমযং ভগৰা ইধেৰ রাজগহে ৰিহরামি গিরিব্বজে. তত্র মে, ভন্তে, ভগৰতো সম্মুখা সুতং সম্মুখা পটিগ্গহিতং – ‘যো সো, সজ্ঝ, ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞাৰিমুত্তো, অভব্বো সো পঞ্চ ঠানানি অজ্ঝাচরিতুং – অভব্বো খীণাসৰো ভিক্খু সঞ্চিচ্চ ¶ পাণং জীৰিতা ৰোরোপেতুং, অভব্বো খীণাসৰো ভিক্খু অদিন্নং থেয্যসঙ্খাতং আদাতুং, অভব্বো খীণাসৰো ভিক্খু মেথুনং ধম্মং পটিসেৰিতুং, অভব্বো খীণাসৰো ভিক্খু সম্পজানমুসা ভাসিতুং, অভব্বো খীণাসৰো ভিক্খু সন্নিধিকারকং কামে পরিভুঞ্জিতুং সেয্যথাপি পুব্বে অগারিযভূতো’তি. কচ্চি মেতং, ভন্তে, ভগৰতো সুস্সুতং সুগ্গহিতং সুমনসিকতং সূপধারিত’’ন্তি?

‘‘তগ্ঘ ¶ তে এতং, সজ্ঝ, সুস্সুতং সুগ্গহিতং সুমনসিকতং সূপধারিতং. পুব্বে চাহং, সজ্ঝ ¶ , এতরহি চ এৰং ৰদামি – ‘যো সো ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞাৰিমুত্তো, অভব্বো সো নৰ ঠানানি অজ্ঝাচরিতুং – অভব্বো খীণাসৰো ভিক্খু সঞ্চিচ্চ পাণং জীৰিতা ৰোরোপেতুং…পে… অভব্বো খীণাসৰো ভিক্খু সন্নিধিকারকং কামে পরিভুঞ্জিতুং সেয্যথাপি পুব্বে অগারিযভূতো, অভব্বো খীণাসৰো ভিক্খু বুদ্ধং পচ্চক্খাতুং, অভব্বো খীণাসৰো ভিক্খু ধম্মং পচ্চক্খাতুং, অভব্বো খীণাসৰো ভিক্খু সঙ্ঘং পচ্চক্খাতুং, অভব্বো খীণাসৰো ভিক্খু সিক্খং পচ্চক্খাতুং’. পুব্বে চাহং, সজ্ঝ, এতরহি চ এৰং ৰদামি – ‘যো সো ভিক্খু অরহং খীণাসৰো ৰুসিতৰা কতকরণীযো ওহিতভারো অনুপ্পত্তসদত্থো পরিক্খীণভৰসংযোজনো সম্মদঞ্ঞাৰিমুত্তো, অভব্বো সো ইমানি নৰ ঠানানি অজ্ঝাচরিতু’’’ন্তি. অট্ঠমং.

৯. পুগ্গলসুত্তং

৯. ‘‘নৰযিমে, ভিক্খৰে, পুগ্গলা সন্তো সংৰিজ্জমানা লোকস্মিং. কতমে ¶ নৰ? অরহা, অরহত্তায পটিপন্নো, অনাগামী, অনাগামিফলসচ্ছিকিরিযায পটিপন্নো, সকদাগামী, সকদাগামিফলসচ্ছিকিরিযায পটিপন্নো ¶ , সোতাপন্নো, সোতাপত্তিফলসচ্ছিকিরিযায পটিপন্নো, পুথুজ্জনো – ইমে খো, ভিক্খৰে, নৰ পুগ্গলা সন্তো সংৰিজ্জমানা লোকস্মি’’ন্তি. নৰমং.

১০. আহুনেয্যসুত্তং

১০. ‘‘নৰযিমে ¶ , ভিক্খৰে, পুগ্গলা আহুনেয্যা পাহুনেয্যা দক্খিণেয্যা অঞ্জলিকরণীযা অনুত্তরং পুঞ্ঞক্খেত্তং লোকস্স. কতমে নৰ? অরহা, অরহত্তায পটিপন্নো, অনাগামী, অনাগামিফলসচ্ছিকিরিযায পটিপন্নো, সকদাগামী, সকদাগামিফলসচ্ছিকিরিযায পটিপন্নো, সোতাপন্নো, সোতাপত্তিফলসচ্ছিকিরিযায পটিপন্নো, গোত্রভূ – ইমে খো, ভিক্খৰে, নৰ পুগ্গলা আহুনেয্যা…পে… অনুত্তরং পুঞ্ঞক্খেত্তং লোকস্সা’’তি. দসমং.

সম্বোধিৰগ্গো পঠমো.

তস্সুদ্দানং ¶ –

সম্বোধি নিস্সযো চেৰ, মেঘিয নন্দকং বলং;

সেৰনা সুতৰা সজ্ঝো, পুগ্গলো আহুনেয্যেন চাতি.

২. সীহনাদৰগ্গো

১. সীহনাদসুত্তং

১১. একং ¶ সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা সারিপুত্তো ভগৰন্তং এতদৰোচ – ‘‘ৰুত্থো ¶ মে, ভন্তে, সাৰত্থিযং ৰস্সাৰাসো. ইচ্ছামহং, ভন্তে, জনপদচারিকং পক্কমিতু’’ন্তি. ‘‘যস্সদানি ত্ৰং, সারিপুত্ত, কালং মঞ্ঞসী’’তি. অথ খো আযস্মা সারিপুত্তো উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ ¶ খো অঞ্ঞতরো ভিক্খু অচিরপক্কন্তে আযস্মন্তে সারিপুত্তে ভগৰন্তং এতদৰোচ – ‘‘আযস্মা মং, ভন্তে, সারিপুত্তো আসজ্জ অপ্পটিনিস্সজ্জ চারিকং পক্কন্তো’’তি. অথ খো ভগৰা অঞ্ঞতরং ভিক্খুং আমন্তেসি – ‘‘এহি ¶ ত্ৰং, ভিক্খু, মম ৰচনেন সারিপুত্তং আমন্তেহি – ‘সত্থা তং, আৰুসো সারিপুত্ত, আমন্তেতী’’’তি. ‘‘এৰং, ভন্তে’’তি খো সো ভিক্খু ভগৰতো পটিস্সুত্ৰা যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মন্তং সারিপুত্তং এতদৰোচ – ‘‘সত্থা তং, আৰুসো সারিপুত্ত, আমন্তেতী’’তি. ‘‘এৰমাৰুসো’’তি খো আযস্মা সারিপুত্তো তস্স ভিক্খুনো পচ্চস্সোসি.

তেন খো পন সমযেন আযস্মা চ মহামোগ্গল্লানো [মহামোগ্গলানো (ক.)] আযস্মা চ আনন্দো অৰাপুরণং [অপাপুরণং (স্যা. ক.)] আদায ৰিহারে আহিণ্ডন্তি [ৰিহারেন ৰিহারং অন্ৰাহিণ্ডন্তি (সী. পী.), ৰিহারং আহিণ্ডন্তি (স্যা.)] – ‘‘অভিক্কমথাযস্মন্তো, অভিক্কমথাযস্মন্তো! ইদানাযস্মা সারিপুত্তো ভগৰতো সম্মুখা সীহনাদং নদিস্সতী’’তি. অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং সারিপুত্তং ভগৰা এতদৰোচ – ‘‘ইধ তে, সারিপুত্ত, অঞ্ঞতরো সব্রহ্মচারী খীযনধম্মং আপন্নো – ‘আযস্মা মং, ভন্তে, সারিপুত্তো আসজ্জ ¶ অপ্পটিনিস্সজ্জচারিকং পক্কন্তো’’’তি.

‘‘যস্স ¶ নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, পথৰিযং সুচিম্পি নিক্খিপন্তি অসুচিম্পি নিক্খিপন্তি গূথগতম্পি নিক্খিপন্তি মুত্তগতম্পি নিক্খিপন্তি খেল়গতম্পি নিক্খিপন্তি পুব্বগতম্পি নিক্খিপন্তি লোহিতগতম্পি নিক্খিপন্তি, ন চ তেন পথৰী অট্টীযতি ৰা হরাযতি ৰা জিগুচ্ছতি ৰা; এৰমেৰং ¶ খো অহং, ভন্তে, পথৰীসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, আপস্মিং সুচিম্পি ধোৰন্তি অসুচিম্পি ধোৰন্তি গূথগতম্পি… মুত্তগতম্পি… খেল়গতম্পি… পুব্বগতম্পি… লোহিতগতম্পি ধোৰন্তি, ন চ তেন আপো অট্টীযতি ৰা হরাযতি ৰা জিগুচ্ছতি ৰা; এৰমেৰং খো অহং, ভন্তে, আপোসমেন চেতসা ৰিহরামি ৰিপুলেন মহগ্গতেন অপ্পমাণেন ¶ অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, তেজো সুচিম্পি ডহতি অসুচিম্পি ডহতি গূথগতম্পি… মুত্তগতম্পি… খেল়গতম্পি… পুব্বগতম্পি… লোহিতগতম্পি ডহতি, ন চ তেন তেজো অট্টীযতি ৰা হরাযতি ৰা জিগুচ্ছতি ৰা; এৰমেৰং খো অহং ¶ , ভন্তে, তেজোসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, ৰাযো সুচিম্পি উপৰাযতি অসুচিম্পি উপৰাযতি গূথগতম্পি… মুত্তগতম্পি… খেল়গতম্পি… পুব্বগতম্পি… লোহিতগতম্পি উপৰাযতি, ন চ তেন ৰাযো অট্টীযতি ৰা হরাযতি ৰা জিগুচ্ছতি ৰা; এৰমেৰং খো অহং, ভন্তে, ৰাযোসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি ¶ অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি ¶ , ভন্তে, রজোহরণং সুচিম্পি পুঞ্ছতি অসুচিম্পি পুঞ্ছতি গূথগতম্পি… মুত্তগতম্পি… খেল়গতম্পি… পুব্বগতম্পি… লোহিতগতম্পি পুঞ্ছতি, ন চ তেন রজোহরণং অট্টীযতি ৰা হরাযতি ৰা জিগুচ্ছতি ৰা; এৰমেৰং খো অহং, ভন্তে, রজোহরণসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, চণ্ডালকুমারকো ৰা চণ্ডালকুমারিকা ৰা কল়োপিহত্থো নন্তকৰাসী গামং ৰা নিগমং ৰা পৰিসন্তো নীচচিত্তংযেৰ উপট্ঠপেত্ৰা ¶ পৰিসতি; এৰমেৰং খো অহং, ভন্তে, চণ্ডালকুমারকচণ্ডালকুমারিকাসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি ¶ অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, উসভো ছিন্নৰিসাণো সূরতো সুদন্তো সুৰিনীতো রথিযায রথিযং সিঙ্ঘাটকেন সিঙ্ঘাটকং অন্ৰাহিণ্ডন্তো ন কিঞ্চি হিংসতি পাদেন ৰা ৰিসাণেন ৰা; এৰমেৰং খো অহং, ভন্তে, উসভছিন্নৰিসাণসমেন চেতসা ৰিহরামি ৰিপুলেন মহগ্গতেন অপ্পমাণেন অৰেরেন অব্যাপজ্জেন. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি, ভন্তে, ইত্থী ৰা পুরিসো ৰা দহরো যুৰা মণ্ডনকজাতিকো সীসংন্হাতো অহিকুণপেন ৰা কুক্কুরকুণপেন ¶ ৰা মনুস্সকুণপেন ৰা কণ্ঠে আসত্তেন অট্টীযেয্য হরাযেয্য জিগুচ্ছেয্য; এৰমেৰং খো অহং, ভন্তে, ইমিনা পূতিকাযেন অট্টীযামি হরাযামি জিগুচ্ছামি. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্য.

‘‘সেয্যথাপি ¶ , ভন্তে, পুরিসো মেদকথালিকং পরিহরেয্য ছিদ্দাৰছিদ্দং উগ্ঘরন্তং পগ্ঘরন্তং; এৰমেৰং খো অহং, ভন্তে, ইমং কাযং পরিহরামি ছিদ্দাৰছিদ্দং ¶ উগ্ঘরন্তং পগ্ঘরন্তং. যস্স নূন, ভন্তে, কাযে কাযগতাসতি অনুপট্ঠিতা অস্স, সো ইধ অঞ্ঞতরং সব্রহ্মচারিং আসজ্জ অপ্পটিনিস্সজ্জ চারিকং পক্কমেয্যা’’তি.

অথ খো সো ভিক্খু উট্ঠাযাসনা একংসং উত্তরাসঙ্গং করিত্ৰা ভগৰতো পাদেসু সিরসা নিপতিত্ৰা ভগৰন্তং এতদৰোচ – ‘‘অচ্চযো মং, ভন্তে, অচ্চগমা যথাবালং যথামূল়্হং যথাঅকুসলং, যো অহং আযস্মন্তং সারিপুত্তং অসতা তুচ্ছা মুসা অভূতেন অব্ভাচিক্খিং. তস্স মে, ভন্তে, ভগৰা অচ্চযং অচ্চযতো পটিগ্গণ্হতু আযতিং সংৰরাযা’’তি. ‘‘তগ্ঘ তং [ত্ৰং (সী. পী.)], ভিক্খু, অচ্চযো অচ্চগমা যথাবালং যথামূল়্হং যথাঅকুসলং, যো ত্ৰং সারিপুত্তং অসতা তুচ্ছা মুসা অভূতেন অব্ভাচিক্খি. যতো চ খো ত্ৰং, ভিক্খু, অচ্চযং অচ্চযতো দিস্ৰা যথাধম্মং ¶ পটিকরোসি, তং তে মযং পটিগ্গণ্হাম. ৰুড্ঢিহেসা, ভিক্খু, অরিযস্স ৰিনযে যো অচ্চযং অচ্চযতো দিস্ৰা যথাধম্মং পটিকরোতি আযতিং সংৰরং আপজ্জতী’’তি.

অথ ¶ খো ভগৰা আযস্মন্তং সারিপুত্তং আমন্তেসি – ‘‘খম, সারিপুত্ত, ইমস্স মোঘপুরিসস্স, পুরা তস্স তত্থেৰ সত্তধা মুদ্ধা ফলতী’’তি [ফলিস্সতীতি (ক. সী. স্যা. পী. ক.) অট্ঠকথাসু পন ‘‘ফলতীতি’’ ইত্ৰেৰ দিস্সতি]. ‘‘খমামহং, ভন্তে, তস্স আযস্মতো সচে মং সো আযস্মা এৰমাহ – ‘খমতু চ মে সো আযস্মা’’’তি. পঠমং.

২. সউপাদিসেসসুত্তং

১২. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো আযস্মা সারিপুত্তো পুব্বণ্হসমযং নিৰাসেত্ৰা পত্তচীৰরমাদায ¶ সাৰত্থিং পিণ্ডায পাৰিসি. অথ খো আযস্মতো সারিপুত্তস্স এতদহোসি – ‘‘অতিপ্পগো খো তাৰ সাৰত্থিযং পিণ্ডায চরিতুং, যংনূনাহং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্য’’ন্তি. অথ খো আযস্মা সারিপুত্তো যেন অঞ্ঞতিত্থিযানং পরিব্বাজকানং আরামো তেনুপসঙ্কমি; উপসঙ্কমিত্ৰা তেহি অঞ্ঞতিত্থিযেহি পরিব্বাজকেহি সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি.

তেন ¶ খো পন সমযেন তেসং অঞ্ঞতিত্থিযানং পরিব্বাজকানং সন্নিসিন্নানং সন্নিপতিতানং অযমন্তরাকথা উদপাদি – ‘‘যো হি কোচি, আৰুসো, সউপাদিসেসো কালং করোতি, সব্বো সো অপরিমুত্তো নিরযা অপরিমুত্তো তিরচ্ছানযোনিযা অপরিমুত্তো পেত্তিৰিসযা অপরিমুত্তো অপাযদুগ্গতিৰিনিপাতা’’তি. অথ খো আযস্মা সারিপুত্তো তেসং অঞ্ঞতিত্থিযানং পরিব্বাজকানং ভাসিতং নেৰ অভিনন্দি নপ্পটিক্কোসি. অনভিনন্দিত্ৰা অপ্পটিক্কোসিত্ৰা উট্ঠাযাসনা পক্কামি – ‘‘ভগৰতো সন্তিকে এতস্স ভাসিতস্স অত্থং আজানিস্সামী’’তি. অথ খো আযস্মা সারিপুত্তো সাৰত্থিযং পিণ্ডায চরিত্ৰা পচ্ছাভত্তং ¶ পিণ্ডপাতপটিক্কন্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা ¶ একমন্তং নিসীদি. একমন্তং নিসিন্নো খো আযস্মা সারিপুত্তো ভগৰন্তং এতদৰোচ –

‘‘ইধাহং, ভন্তে, পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পাৰিসিং. তস্স ময্হং, ভন্তে, এতদহোসি – ‘অতিপ্পগো খো তাৰ সাৰত্থিযং ¶ পিণ্ডায চরিতুং; যংনূনাহং যেন অঞ্ঞতিত্থিযানং পরিব্বাজকানং আরামো তেনুপসঙ্কমেয্য’ন্তি. অথ খো অহং, ভন্তে, যেন অঞ্ঞতিত্থিযানং পরিব্বাজকানং আরামো তেনুপসঙ্কমিং; উপসঙ্কমিত্ৰা তেহি অঞ্ঞতিত্থিযেহি পরিব্বাজকেহি সদ্ধিং সম্মোদিং. সম্মোদনীযং কথং সারণীযং ৰীতিসারেত্ৰা একমন্তং নিসীদিং. তেন খো পন সমযেন তেসং অঞ্ঞতিত্থিযানং পরিব্বাজকানং সন্নিসিন্নানং সন্নিপতিতানং অযমন্তরাকথা উদপাদি – ‘যো হি কোচি, আৰুসো, সউপাদিসেসো কালং করোতি, সব্বো সো অপরিমুত্তো নিরযা অপরিমুত্তো তিরচ্ছানযোনিযা অপরিমুত্তো পেত্তিৰিসযা অপরিমুত্তো অপাযদুগ্গতিৰিনিপাতা’তি. অথ খো অহং, ভন্তে, তেসং অঞ্ঞতিত্থিযানং পরিব্বাজকানং ভাসিতং নেৰ অভিনন্দিং নপ্পটিক্কোসিং. অনভিনন্দিত্ৰা অপ্পটিক্কোসিত্ৰা উট্ঠাযাসনা পক্কমিং – ‘ভগৰতো সন্তিকে এতস্স ভাসিতস্স অত্থং আজানিস্সামী’’’তি.

‘‘কে চ [কেচি (স্যা. পী.), তে চ (ক.)], সারিপুত্ত, অঞ্ঞতিত্থিযা পরিব্বাজকা বালা অব্যত্তা, কে চ [কেচি (স্যা. পী. ক.) অ. নি. ৬.৪৪ পাল়িযা সংসন্দেতব্বং] সউপাদিসেসং ৰা ‘সউপাদিসেসো’তি জানিস্সন্তি, অনুপাদিসেসং ৰা ‘অনুপাদিসেসো’তি জানিস্সন্তি’’!

‘‘নৰযিমে, সারিপুত্ত, পুগ্গলা সউপাদিসেসা কালং কুরুমানা পরিমুত্তা নিরযা পরিমুত্তা তিরচ্ছানযোনিযা পরিমুত্তা পেত্তিৰিসযা পরিমুত্তা অপাযদুগ্গতিৰিনিপাতা. কতমে নৰ? ইধ ¶ , সারিপুত্ত, একচ্চো পুগ্গলো সীলেসু পরিপূরকারী হোতি, সমাধিস্মিং পরিপূরকারী ¶ , পঞ্ঞায মত্তসো কারী. সো পঞ্চন্নং ওরম্ভাগিযানং সংযোজনানং পরিক্খযা অন্তরাপরিনিব্বাযী হোতি. অযং, সারিপুত্ত ¶ , পঠমো পুগ্গলো সউপাদিসেসো কালং কুরুমানো পরিমুত্তো নিরযা পরিমুত্তো তিরচ্ছানযোনিযা ¶ পরিমুত্তো পেত্তিৰিসযা পরিমুত্তো অপাযদুগ্গতিৰিনিপাতা.

‘‘পুন চপরং, সারিপুত্ত, ইধেকচ্চো পুগ্গলো সীলেসু পরিপূরকারী হোতি, সমাধিস্মিং পরিপূরকারী, পঞ্ঞায মত্তসো কারী. সো পঞ্চন্নং ওরম্ভাগিযানং সংযোজনানং পরিক্খযা উপহচ্চপরিনিব্বাযী হোতি…পে… অসঙ্খারপরিনিব্বাযী হোতি…পে… সসঙ্খারপরিনিব্বাযী হোতি…পে… উদ্ধংসোতো হোতি অকনিট্ঠগামী. অযং, সারিপুত্ত, পঞ্চমো পুগ্গলো সউপাদিসেসো কালং কুরুমানো পরিমুত্তো নিরযা পরিমুত্তো তিরচ্ছানযোনিযা পরিমুত্তো পেত্তিৰিসযা পরিমুত্তো অপাযদুগ্গতিৰিনিপাতা.

‘‘পুন চপরং, সারিপুত্ত, ইধেকচ্চো পুগ্গলো সীলেসু পরিপূরকারী হোতি, সমাধিস্মিং মত্তসো কারী, পঞ্ঞায মত্তসো কারী. সো তিণ্ণং সংযোজনানং পরিক্খযা রাগদোসমোহানং তনুত্তা সকদাগামী হোতি, সকিদেৰ ইমং লোকং আগন্ত্ৰা দুক্খস্সন্তং করোতি. অযং, সারিপুত্ত, ছট্ঠো পুগ্গলো সউপাদিসেসো কালং কুরুমানো পরিমুত্তো নিরযা…পে… পরিমুত্তো অপাযদুগ্গতিৰিনিপাতা.

‘‘পুন চপরং, সারিপুত্ত, ইধেকচ্চো পুগ্গলো সীলেসু পরিপূরকারী হোতি, সমাধিস্মিং মত্তসো কারী, পঞ্ঞায মত্তসো কারী. সো তিণ্ণং সংযোজনানং পরিক্খযা একবীজী হোতি, একংযেৰ মানুসকং ভৰং নিব্বত্তেত্ৰা দুক্খস্সন্তং ¶ করোতি. অযং, সারিপুত্ত, সত্তমো পুগ্গলো সউপাদিসেসো ¶ কালং কুরুমানো পরিমুত্তো নিরযা…পে… পরিমুত্তো অপাযদুগ্গতিৰিনিপাতা.

‘‘পুন চপরং, সারিপুত্ত, ইধেকচ্চো পুগ্গলো সীলেসু পরিপূরকারী হোতি, সমাধিস্মিং মত্তসো কারী, পঞ্ঞায মত্তসো কারী. সো তিণ্ণং সংযোজনানং পরিক্খযা কোলংকোলো হোতি, দ্ৰে ৰা তীণি ৰা কুলানি সন্ধাৰিত্ৰা সংসরিত্ৰা দুক্খস্সন্তং করোতি. অযং, সারিপুত্ত, অট্ঠমো পুগ্গলো সউপাদিসেসো কালং কুরুমানো পরিমুত্তো নিরযা…পে… পরিমুত্তো অপাযদুগ্গতিৰিনিপাতা.

‘‘পুন ¶ চপরং, সারিপুত্ত, ইধেকচ্চো পুগ্গলো সীলেসু পরিপূরকারী হোতি, সমাধিস্মিং মত্তসো কারী, পঞ্ঞায মত্তসো কারী. সো তিণ্ণং ¶ সংযোজনানং পরিক্খযা সত্তক্খত্তুপরমো হোতি, সত্তক্খত্তুপরমং দেৰে চ মনুস্সে চ সন্ধাৰিত্ৰা সংসরিত্ৰা দুক্খস্সন্তং করোতি. অযং, সারিপুত্ত, নৰমো পুগ্গলো সউপাদিসেসো কালং কুরুমানো পরিমুত্তো নিরযা পরিমুত্তো তিরচ্ছানযোনিযা পরিমুত্তো পেত্তিৰিসযা পরিমুত্তো অপাযদুগ্গতিৰিনিপাতা.

‘‘কে চ, সারিপুত্ত, অঞ্ঞতিত্থিযা পরিব্বাজকা বালা অব্যত্তা, কে চ সউপাদিসেসং ৰা ‘সউপাদিসেসো’তি জানিস্সন্তি, অনুপাদিসেসং ৰা ‘অনুপাদিসেসো’তি জানিস্সন্তি! ইমে খো, সারিপুত্ত, নৰ পুগ্গলা সউপাদিসেসা কালং কুরুমানা পরিমুত্তা নিরযা পরিমুত্তা তিরচ্ছানযোনিযা পরিমুত্তা পেত্তিৰিসযা পরিমুত্তা অপাযদুগ্গতিৰিনিপাতা. ন তাৰাযং, সারিপুত্ত, ধম্মপরিযাযো পটিভাসি ভিক্খূনং ভিক্খুনীনং উপাসকানং উপাসিকানং. তং কিস্স ¶ হেতু? মাযিমং ধম্মপরিযাযং সুত্ৰা পমাদং আহরিংসূতি [আহরিংসু (সী. পী.)]. অপি ¶ চ মযা [অপি চাযং (?)], সারিপুত্ত, ধম্মপরিযাযো পঞ্হাধিপ্পাযেন ভাসিতো’’তি. দুতিযং.

৩. কোট্ঠিকসুত্তং

১৩. অথ খো আযস্মা মহাকোট্ঠিকো [মহাকোট্ঠিতো (সী. স্যা. পী.)] যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো আযস্মা মহাকোট্ঠিকো আযস্মন্তং সারিপুত্তং এতদৰোচ – ‘‘কিং নু খো, আৰুসো সারিপুত্ত, ‘যং কম্মং দিট্ঠধম্মৰেদনীযং, তং মে কম্মং সম্পরাযৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং নু খো, আৰুসো সারিপুত্ত, ‘যং কম্মং সুখৰেদনীযং [সুখৰেদনিযং (ক.) ম. নি. ৩.৮ পস্সিতব্বং], তং মে কম্মং দুক্খৰেদনীযং [দুক্খৰেদনিযং (ক.)] হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং নু খো, আৰুসো সারিপুত্ত, ‘যং কম্মং সুখৰেদনীযং [সুখৰেদনিযং (ক.) ম. নি. ৩.৮ পস্সিতব্বং], তং মে কম্মং দুক্খৰেদনীযং [দুক্খৰেদনিযং (ক.)] হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং ¶ ¶ পনাৰুসো, সারিপুত্ত, ‘যং কম্মং দুক্খৰেদনীযং, তং মে কম্মং সুখৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং নু খো, আৰুসো সারিপুত্ত, ‘যং কম্মং পরিপক্কৰেদনীযং, তং মে কম্মং অপরিপক্কৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো ¶ হিদং, আৰুসো’’.

‘‘কিং পনাৰুসো সারিপুত্ত, ‘যং কম্মং অপরিপক্কৰেদনীযং, তং মে কম্মং পরিপক্কৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং নু খো, আৰুসো সারিপুত্ত, ‘যং কম্মং বহুৰেদনীযং, তং মে কম্মং অপ্পৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং পনাৰুসো সারিপুত্ত ¶ , ‘যং কম্মং অপ্পৰেদনীযং, তং মে কম্মং বহুৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং নু খো, আৰুসো সারিপুত্ত, ‘যং কম্মং ৰেদনীযং, তং মে কম্মং অৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘কিং পনাৰুসো সারিপুত্ত, ‘যং কম্মং অৰেদনীযং, তং মে কম্মং ৰেদনীযং হোতূ’তি, এতস্স অত্থায ভগৰতি ব্রহ্মচরিযং ৰুস্সতী’’তি? ‘‘নো হিদং, আৰুসো’’.

‘‘‘কিং নু খো, আৰুসো সারিপুত্ত, যং কম্মং দিট্ঠধম্মৰেদনীযং তং মে কম্মং সম্পরাযৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং পনাৰুসো সারিপুত্ত, যং কম্মং সম্পরাযৰেদনীযং তং মে কম্মং দিট্ঠধম্মৰেদনীযং হোতূতি ¶ , এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং ¶ নু খো, আৰুসো সারিপুত্ত, যং কম্মং সুখৰেদনীযং তং মে কম্মং দুক্খৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং পনাৰুসো সারিপুত্ত, যং কম্মং দুক্খৰেদনীযং তং মে কম্মং সুখৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি ¶ পুট্ঠো সমানো ‘নো হিদং, আৰুসো’তি ৰদেসি.

‘‘‘কিং নু খো, আৰুসো সারিপুত্ত, যং কম্মং পরিপক্কৰেদনীযং তং মে কম্মং অপরিপক্কৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং পনাৰুসো সারিপুত্ত, যং কম্মং অপরিপক্কৰেদনীযং তং মে কম্মং পরিপক্কৰেদনীযং হোতূতি, এতস্স অত্থায ভগৰতি ব্রহ্মচরিযং ¶ ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং নু খো, আৰুসো সারিপুত্ত, যং কম্মং বহুৰেদনীযং তং মে কম্মং অপ্পৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং পনাৰুসো সারিপুত্ত, যং কম্মং অপ্পৰেদনীযং তং মে কম্মং বহুৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং নু খো, আৰুসো সারিপুত্ত, যং কম্মং ৰেদনীযং তং মে কম্মং অৰেদনীযং হোতূতি ¶ , এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি.

‘‘‘কিং পনাৰুসো সারিপুত্ত, যং কম্মং অৰেদনীযং তং মে কম্মং ৰেদনীযং হোতূতি, এতস্স অত্থায ভগৰতি ব্রহ্মচরিযং ৰুস্সতী’তি, ইতি পুট্ঠো সমানো ‘নো হিদং, আৰুসো’তি ৰদেসি. অথ কিমত্থং চরহাৰুসো, ভগৰতি ব্রহ্মচরিযং ৰুস্সতী’’তি?

‘‘যং খ্ৰস্স [যং খো (ক.)], আৰুসো, অঞ্ঞাতং অদিট্ঠং অপ্পত্তং অসচ্ছিকতং অনভিসমেতং, তস্স ঞাণায দস্সনায পত্তিযা সচ্ছিকিরিযায অভিসমযায ভগৰতি ¶ ব্রহ্মচরিযং ৰুস্সতী’’তি [ৰুস্সতি (স্যা.)]. (‘‘কিং পনস্সাৰুসো, অঞ্ঞাতং ¶ অদিট্ঠং অপ্পত্তং অসচ্ছিকতং অনভিসমেতং, যস্স ঞাণায দস্সনায পত্তিযা সচ্ছিকিরিযায অভিসমযায ভগৰতি ব্রহ্মচরিযং ৰুস্সতী’’তি?) [( ) স্যা. ক. পোত্থকেসু নত্থি] ‘‘‘ইদং দুক্খ’ন্তি খ্ৰস্স [খো যং (ক.)], আৰুসো, অঞ্ঞাতং অদিট্ঠং অপ্পত্তং অসচ্ছিকতং অনভিসমেতং. তস্স ঞাণায দস্সনায পত্তিযা সচ্ছিকিরিযায অভিসমযায ভগৰতি ব্রহ্মচরিযং ৰুস্সতি. অযং ¶ ‘দুক্খসমুদযো’তি খ্ৰস্স, আৰুসো…পে… ‘অযং দুক্খনিরোধো’তি খ্ৰস্স, আৰুসো…পে… ‘অযং দুক্খনিরোধগামিনী পটিপদা’তি খ্ৰস্স, আৰুসো, অঞ্ঞাতং অদিট্ঠং অপ্পত্তং অসচ্ছিকতং অনভিসমেতং. তস্স ঞাণায দস্সনায পত্তিযা সচ্ছিকিরিযায অভিসমযায ভগৰতি ব্রহ্মচরিযং ৰুস্সতি. ইদং খ্ৰস্স [ইতি খো যং (ক.)], আৰুসো, অঞ্ঞাতং অদিট্ঠং অপ্পত্তং অসচ্ছিকতং অনভিসমেতং. তস্স [যস্স (?)] ঞাণায দস্সনায পত্তিযা সচ্ছিকিরিযায অভিসমযায ভগৰতি ব্রহ্মচরিযং ৰুস্সতী’’তি. ততিযং.

৪. সমিদ্ধিসুত্তং

১৪. অথ খো আযস্মা সমিদ্ধি যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মন্তং সারিপুত্তং অভিৰাদেত্ৰা একমন্তং নিসীদি. একমন্তং নিসিন্নং খো আযস্মন্তং সমিদ্ধিং আযস্মা সারিপুত্তো এতদৰোচ – ‘‘কিমারম্মণা, সমিদ্ধি, পুরিসস্স সঙ্কপ্পৰিতক্কা উপ্পজ্জন্তী’’তি? ‘‘নামরূপারম্মণা, ভন্তে’’তি. ‘‘তে পন, সমিদ্ধি, ক্ৰ নানত্তং গচ্ছন্তী’’তি? ‘‘ধাতূসু, ভন্তে’’তি. ‘‘তে পন, সমিদ্ধি, কিংসমুদযা’’তি? ‘‘ফস্সসমুদযা, ভন্তে’’তি. ‘‘তে পন, সমিদ্ধি, কিংসমোসরণা’’তি? ‘‘ৰেদনাসমোসরণা, ভন্তে’’তি. ‘‘তে পন ¶ , সমিদ্ধি, কিংপমুখা’’তি? ‘‘সমাধিপ্পমুখা, ভন্তে’’তি. ‘‘তে পন, সমিদ্ধি, কিংঅধিপতেয্যা’’তি? ‘‘সতাধিপতেয্যা, ভন্তে’’তি. ‘‘তে পন, সমিদ্ধি, কিংউত্তরা’’তি? ‘‘পঞ্ঞুত্তরা, ভন্তে’’তি. ‘‘তে পন, সমিদ্ধি, কিংসারা’’তি? ‘‘ৰিমুত্তিসারা, ভন্তে’’তি. ‘‘তে পন, সমিদ্ধি, কিংওগধা’’তি? ‘‘অমতোগধা, ভন্তে’’তি.

‘‘‘কিমারম্মণা, সমিদ্ধি, পুরিসস্স সঙ্কপ্পৰিতক্কা উপ্পজ্জন্তী’তি, ইতি পুট্ঠো সমানো ‘নামরূপারম্মণা, ভন্তে’তি ৰদেসি. ‘তে পন, সমিদ্ধি, ক্ৰ ¶ নানত্তং গচ্ছন্তী’তি, ইতি ¶ পুট্ঠো সমানো ‘ধাতূসু, ভন্তে’তি ৰদেসি. ‘তে পন, সমিদ্ধি, কিংসমুদযা’তি, ইতি পুট্ঠো সমানো ‘ফস্সসমুদযা, ভন্তে’তি ¶ ৰদেসি. ‘তে পন, সমিদ্ধি, কিংসমোসরণা’তি, ইতি পুট্ঠো সমানো ‘ৰেদনাসমোসরণা, ভন্তে’তি ৰদেসি. ‘তে পন, সমিদ্ধি, কিংপমুখা’তি, ইতি পুট্ঠো সমানো ‘সমাধিপ্পমুখা, ভন্তে’তি ৰদেসি. ‘তে পন, সমিদ্ধি, কিংঅধিপতেয্যা’তি, ইতি পুট্ঠো সমানো ‘সতাধিপতেয্যা, ভন্তে’তি ৰদেসি. ‘তে পন, সমিদ্ধি, কিংউত্তরা’তি, ইতি পুট্ঠো সমানো ‘পঞ্ঞুত্তরা, ভন্তে’তি ৰদেসি. ‘তে পন, সমিদ্ধি, কিংসারা’তি, ইতি পুট্ঠো সমানো ‘ৰিমুত্তিসারা, ভন্তে’তি ৰদেসি. ‘তে পন, সমিদ্ধি, কিংওগধা’তি, ইতি পুট্ঠো সমানো ‘অমতোগধা, ভন্তে’তি ৰদেসি. সাধু সাধু, সমিদ্ধি! সাধু খো ত্ৰং, সমিদ্ধি, পুট্ঠো [পঞ্হং (সী. স্যা. পী.)] পুট্ঠো ৰিস্সজ্জেসি, তেন চ মা মঞ্ঞী’’তি. চতুত্থং.

৫. গণ্ডসুত্তং

১৫. ‘‘সেয্যথাপি, ভিক্খৰে, গণ্ডো অনেকৰস্সগণিকো. তস্সস্সু গণ্ডস্স নৰ ৰণমুখানি নৰ অভেদনমুখানি. ততো যং কিঞ্চি পগ্ঘরেয্য – অসুচিযেৰ পগ্ঘরেয্য, দুগ্গন্ধংযেৰ পগ্ঘরেয্য, জেগুচ্ছিযংযেৰ [জেগুচ্ছিযেৰ (ক.)] পগ্ঘরেয্য; যং কিঞ্চি পসৰেয্য – অসুচিযেৰ পসৰেয্য, দুগ্গন্ধংযেৰ পসৰেয্য, জেগুচ্ছিযংযেৰ পসৰেয্য.

‘‘গণ্ডোতি খো, ভিক্খৰে, ইমস্সেতং চাতুমহাভূতিকস্স [চাতুম্মহাভূতিকস্স (সী. স্যা. পী.)] কাযস্স অধিৰচনং মাতাপেত্তিকসম্ভৰস্স ওদনকুম্মাসূপচযস্স অনিচ্চুচ্ছাদনপরিমদ্দনভেদনৰিদ্ধংসনধম্মস্স. তস্সস্সু গণ্ডস্স নৰ ৰণমুখানি নৰ অভেদনমুখানি. ততো যং কিঞ্চি পগ্ঘরতি – অসুচিযেৰ পগ্ঘরতি, দুগ্গন্ধংযেৰ পগ্ঘরতি, জেগুচ্ছিযংযেৰ ¶ পগ্ঘরতি; যং কিঞ্চি পসৰতি ¶ – অসুচিযেৰ ¶ পসৰতি, দুগ্গন্ধংযেৰ পসৰতি, জেগুচ্ছিযংযেৰ পসৰতি. তস্মাতিহ, ভিক্খৰে, ইমস্মিং কাযে নিব্বিন্দথা’’তি. পঞ্চমং.

৬. সঞ্ঞাসুত্তং

১৬. ‘‘নৰযিমা, ভিক্খৰে, সঞ্ঞা ভাৰিতা বহুলীকতা মহপ্ফলা হোন্তি মহানিসংসা অমতোগধা অমতপরিযোসানা. কতমা নৰ ¶ ? অসুভসঞ্ঞা, মরণসঞ্ঞা, আহারে পটিকূলসঞ্ঞা [পটিক্কূলসঞ্ঞা (সী. স্যা. পী.)], সব্বলোকে অনভিরতসঞ্ঞা [অনভিরতিসঞ্ঞা (ক.) অ. নি. ৫.১২১-১২২], অনিচ্চসঞ্ঞা, অনিচ্চে দুক্খসঞ্ঞা, দুক্খে অনত্তসঞ্ঞা, পহানসঞ্ঞা, ৰিরাগসঞ্ঞা – ইমা খো, ভিক্খৰে, নৰ সঞ্ঞা, ভাৰিতা বহুলীকতা মহপ্ফলা হোন্তি মহানিসংসা অমতোগধা অমতপরিযোসানা’’তি. ছট্ঠং.

৭. কুলসুত্তং

১৭. ‘‘নৰহি, ভিক্খৰে, অঙ্গেহি সমন্নাগতং কুলং অনুপগন্ত্ৰা ৰা নালং উপগন্তুং, উপগন্ত্ৰা ৰা নালং নিসীদিতুং. কতমেহি নৰহি? ন মনাপেন পচ্চুট্ঠেন্তি, ন মনাপেন অভিৰাদেন্তি, ন মনাপেন আসনং দেন্তি, সন্তমস্স পরিগুহন্তি, বহুকম্পি থোকং দেন্তি, পণীতম্পি লূখং দেন্তি, অসক্কচ্চং দেন্তি নো সক্কচ্চং, ন উপনিসীদন্তি ধম্মস্সৰনায, ভাসিতমস্স ন সুস্সূসন্তি. ইমেহি খো, ভিক্খৰে, নৰহঙ্গেহি সমন্নাগতং কুলং অনুপগন্ত্ৰা ৰা নালং উপগন্তুং উপগন্ত্ৰা ৰা নালং নিসীদিতুং.

‘‘নৰহি, ভিক্খৰে, অঙ্গেহি সমন্নাগতং কুলং অনুপগন্ত্ৰা ৰা অলং উপগন্তুং, উপগন্ত্ৰা ৰা অলং নিসীদিতুং. কতমেহি নৰহি? মনাপেন পচ্চুট্ঠেন্তি, মনাপেন অভিৰাদেন্তি, মনাপেন আসনং দেন্তি, সন্তমস্স ¶ ন পরিগুহন্তি, বহুকম্পি ¶ বহুকং দেন্তি, পণীতম্পি পণীতং দেন্তি, সক্কচ্চং দেন্তি নো অসক্কচ্চং, উপনিসীদন্তি ধম্মস্সৰনায, ভাসিতমস্স সুস্সূসন্তি. ইমেহি খো, ভিক্খৰে, নৰহঙ্গেহি সমন্নাগতং কুলং অনুপগন্ত্ৰা ৰা অলং উপগন্তুং, উপগন্ত্ৰা ৰা অলং নিসীদিতু’’ন্তি. সত্তমং.

৮. নৰঙ্গুপোসথসুত্তং

১৮. ‘‘নৰহি ¶ , ভিক্খৰে, অঙ্গেহি সমন্নাগতো উপোসথো উপৰুত্থো মহপ্ফলো হোতি মহানিসংসো মহাজুতিকো মহাৰিপ্ফারো. কথং উপৰুত্থো চ, ভিক্খৰে, নৰহঙ্গেহি সমন্নাগতো উপোসথো মহপ্ফলো হোতি মহানিসংসো মহাজুতিকো মহাৰিপ্ফারো? ইধ, ভিক্খৰে, অরিযসাৰকো ইতি পটিসঞ্চিক্খতি – ‘যাৰজীৰং অরহন্তো পাণাতিপাতং পহায পাণাতিপাতা পটিৰিরতা নিহিতদণ্ডা নিহিতসত্থা লজ্জী ¶ দযাপন্না সব্বপাণভূতহিতানুকম্পিনো ৰিহরন্তি; অহম্পজ্জ ইমঞ্চ রত্তিং ইমঞ্চ দিৰসং পাণাতিপাতং পহায পাণাতিপাতা পটিৰিরতো নিহিতদণ্ডো নিহিতসত্থো লজ্জী দযাপন্নো সব্বপাণভূতহিতানুকম্পী ৰিহরামি. ইমিনাপঙ্গেন [ইমিনাপি অঙ্গেন (ক. সী.)] অরহতং অনুকরোমি; উপোসথো চ মে উপৰুত্থো ভৰিস্সতী’তি. ইমিনা পঠমেন অঙ্গেন সমন্নাগতো হোতি…পে. ¶ ….

‘‘‘যাৰজীৰং অরহন্তো উচ্চাসযনমহাসযনং পহায উচ্চাসযনমহাসযনা পটিৰিরতা নীচসেয্যং কপ্পেন্তি ¶ – মঞ্চকে ৰা তিণসন্থারকে ৰা; অহম্পজ্জ ইমঞ্চ রত্তিং ইমঞ্চ দিৰসং উচ্চাসযনমহাসযনং পহায উচ্চাসযনমহাসযনা পটিৰিরতো নীচসেয্যং কপ্পেমি – মঞ্চকে ৰা তিণসন্থারকে ৰা. ইমিনাপঙ্গেন অরহতং ¶ অনুকরোমি; উপোসথো চ মে উপৰুত্থো ভৰিস্সতী’তি. ইমিনা অট্ঠমেন অঙ্গেন সমন্নাগতো হোতি.

‘‘মেত্তাসহগতেন চেতসা একং দিসং ফরিত্ৰা ৰিহরতি, তথা দুতিযং তথা ততিযং তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন [অব্যাপজ্ঝেন (ক.), অব্যাবজ্ঝেন (?)] ফরিত্ৰা ৰিহরতি. ইমিনা নৰমেন অঙ্গেন সমন্নাগতো হোতি. এৰং উপৰুত্থো খো, ভিক্খৰে, নৰহঙ্গেহি সমন্নাগতো উপোসথো মহপ্ফলো হোতি মহানিসংসো মহাজুতিকো মহাৰিপ্ফারো’’তি. অট্ঠমং.

৯. দেৰতাসুত্তং

১৯. ‘‘ইমঞ্চ, ভিক্খৰে, রত্তিং সম্বহুলা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং জেতৰনং ওভাসেত্ৰা যেনাহং তেনুপসঙ্কমিংসু; উপসঙ্কমিত্ৰা মং অভিৰাদেত্ৰা ¶ একমন্তং অট্ঠংসু. একমন্তং ঠিতা খো, ভিক্খৰে, তা দেৰতা মং এতদৰোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগারানি. তে মযং, ভন্তে, পচ্চুট্ঠিম্হ, নো চ খো অভিৰাদিম্হ. তা মযং, ভন্তে, অপরিপুণ্ণকম্মন্তা ৰিপ্পটিসারিনিযো পচ্চানুতাপিনিযো হীনং কাযং উপপন্না’’’তি.

‘‘অপরাপি ¶ ¶ মং, ভিক্খৰে, সম্বহুলা দেৰতা উপসঙ্কমিত্ৰা এতদৰোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগারানি. তে মযং, ভন্তে, পচ্চুট্ঠিম্হ অভিৰাদিম্হ [পচ্চুট্ঠিম্হ চ অভিৰাদিম্হ চ (স্যা.)], নো চ তেসং আসনং অদম্হ. তা মযং, ভন্তে, অপরিপুণ্ণকম্মন্তা ৰিপ্পটিসারিনিযো পচ্চানুতাপিনিযো হীনং কাযং উপপন্না’’’তি.

‘‘অপরাপি মং, ভিক্খৰে, সম্বহুলা দেৰতা উপসঙ্কমিত্ৰা ¶ এতদৰোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগারানি. তে মযং, ভন্তে, পচ্চুট্ঠিম্হ অভিৰাদিম্হ [পচ্চুট্ঠিম্হ চ অভিৰাদিম্হ চ (স্যা.)] আসনং [আসনঞ্চ (সী. স্যা.)] অদম্হ, নো চ খো যথাসত্তি যথাবলং সংৰিভজিম্হ…পে… যথাসত্তি যথাবলং [যথাবলং চ (?)] সংৰিভজিম্হ, নো চ খো উপনিসীদিম্হ ধম্মস্সৰনায…পে… উপনিসীদিম্হ [উপনিসীদিম্হ চ (স্যা.)] ধম্মস্সৰনায, নো চ খো ওহিতসোতা ধম্মং সুণিম্হ…পে… ওহিতসোতা চ ধম্মং সুণিম্হ, নো চ খো সুত্ৰা ধম্মং ধারযিম্হ…পে… সুত্ৰা চ ধম্মং ধারযিম্হ, নো চ খো ধাতানং ধম্মানং অত্থং উপপরিক্খিম্হ…পে… ধাতানঞ্চ ধম্মানং অত্থং উপপরিক্খিম্হ, নো চ খো অত্থমঞ্ঞায ধম্মমঞ্ঞায ধম্মানুধম্মং পটিপজ্জিম্হ. তা মযং, ভন্তে, অপরিপুণ্ণকম্মন্তা ৰিপ্পটিসারিনিযো পচ্চানুতাপিনিযো হীনং কাযং উপপন্না’’’তি.

‘‘অপরাপি মং, ভিক্খৰে, সম্বহুলা দেৰতা উপসঙ্কমিত্ৰা এতদৰোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগারানি. তে মযং, ভন্তে, পচ্চুট্ঠিম্হ অভিৰাদিম্হ [পচ্চুট্ঠিম্হ চ অভিৰাদিম্হ চ (স্যা.)], আসনং [আসনঞ্চ (সী. স্যা.)] অদম্হ, যথাসত্তি ¶ যথাবলং [যথাবলং চ (?)] সংৰিভজিম্হ, উপনিসীদিম্হ [উপনিসীদিম্হ চ (স্যা.)] ধম্মস্সৰনায, ওহিতসোতা চ ধম্মং সুণিম্হ, সুত্ৰা চ ধম্মং ধারযিম্হ, ধাতানঞ্চ ধম্মানং অত্থং উপপরিক্খিম্হ, অত্থমঞ্ঞায ধম্মমঞ্ঞায ধম্মানুধম্মং [ধম্মানুধম্মঞ্চ (?)] পটিপজ্জিম্হ. তা মযং, ভন্তে, পরিপুণ্ণকম্মন্তা অৰিপ্পটিসারিনিযো অপচ্চানুতাপিনিযো পণীতং কাযং উপপন্না’তি. এতানি, ভিক্খৰে, রুক্খমূলানি এতানি সুঞ্ঞাগারানি. ঝাযথ, ভিক্খৰে, মা পমাদত্থ, মা পচ্ছা ৰিপ্পটিসারিনো অহুৰত্থ সেয্যথাপি তা পুরিমিকা দেৰতা’’তি. নৰমং.

১০. ৰেলামসুত্তং

২০. একং ¶ ¶ ¶ সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো অনাথপিণ্ডিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৰা এতদৰোচ –

‘‘অপি নু তে, গহপতি, কুলে দানং দীযতী’’তি? ‘‘দীযতি মে, ভন্তে, কুলে দানং; তঞ্চ খো লূখং কণাজকং বিল়ঙ্গদুতিয’’ন্তি. ‘‘লূখঞ্চেপি [লূখং ৰাপি (স্যা.), লূখঞ্চাপি (ক.)], গহপতি, দানং দেতি পণীতং ৰা; তঞ্চ অসক্কচ্চং দেতি, অচিত্তীকত্ৰা [অচিত্তিং কত্ৰা (ক.), অপচিত্তিং কত্ৰা (স্যা.), অচিত্তিকত্ৰা (পী.)] দেতি, অসহত্থা দেতি, অপৰিদ্ধং [অপৰিট্ঠং (স্যা.)] দেতি, অনাগমনদিট্ঠিকো দেতি. যত্থ যত্থ তস্স তস্স দানস্স ৰিপাকো নিব্বত্ততি, ন উল়ারায ভত্তভোগায চিত্তং নমতি, ন উল়ারায ৰত্থভোগায চিত্তং নমতি, ন উল়ারায যানভোগায চিত্তং নমতি, ন উল়ারেসু পঞ্চসু কামগুণেসু ভোগায চিত্তং নমতি. যেপিস্স তে হোন্তি ¶ পুত্তাতি ৰা দারাতি ৰা দাসাতি ৰা পেস্সাতি ৰা কম্মকরাতি ৰা, তেপি ন সুস্সূসন্তি ন সোতং ওদহন্তি ন অঞ্ঞা চিত্তং উপট্ঠপেন্তি. তং কিস্স হেতু? এৰঞ্হেতং [এৰঞ্চেতং (স্যা. ক.)], গহপতি, হোতি অসক্কচ্চং কতানং কম্মানং ৰিপাকো’’.

‘‘লূখঞ্চেপি, গহপতি, দানং দেতি পণীতং ৰা; তঞ্চ সক্কচ্চং দেতি, চিত্তীকত্ৰা দেতি, সহত্থা দেতি, অনপৰিদ্ধং দেতি, আগমনদিট্ঠিকো দেতি. যত্থ যত্থ তস্স তস্স দানস্স ৰিপাকো নিব্বত্ততি, উল়ারায ভত্তভোগায চিত্তং নমতি, উল়ারায ৰত্থভোগায চিত্তং নমতি, উল়ারায যানভোগায চিত্তং নমতি, উল়ারেসু পঞ্চসু কামগুণেসু ভোগায চিত্তং নমতি. যেপিস্স তে হোন্তি পুত্তাতি ¶ ৰা দারাতি ৰা দাসাতি ৰা পেস্সাতি ৰা কম্মকরাতি ৰা, তেপি সুস্সূসন্তি সোতং ওদহন্তি অঞ্ঞা চিত্তং উপট্ঠপেন্তি. তং কিস্স হেতু? এৰঞ্হেতং, গহপতি, হোতি সক্কচ্চং কতানং কম্মানং ৰিপাকো.

‘‘ভূতপুব্বং, গহপতি, ৰেলামো নাম ব্রাহ্মণো অহোসি. সো এৰরূপং দানং অদাসি মহাদানং. চতুরাসীতি সুৰণ্ণপাতিসহস্সানি অদাসি রূপিযপূরানি ¶ , চতুরাসীতি রূপিযপাতিসহস্সানি অদাসি সুৰণ্ণপূরানি, চতুরাসীতি কংসপাতিসহস্সানি অদাসি হিরঞ্ঞপূরানি ¶ , চতুরাসীতি হত্থিসহস্সানি অদাসি সোৰণ্ণালঙ্কারানি সোৰণ্ণধজানি হেমজালপ্পটিচ্ছন্নানি [হেমজালসঞ্ছন্নানি (সী. পী.)], চতুরাসীতি রথসহস্সানি অদাসি সীহচম্মপরিৰারানি ব্যগ্ঘচম্মপরিৰারানি দীপিচম্মপরিৰারানি পণ্ডুকম্বলপরিৰারানি সোৰণ্ণালঙ্কারানি সোৰণ্ণধজানি হেমজালপ্পটিচ্ছন্নানি, চতুরাসীতি ধেনুসহস্সানি অদাসি দুকূলসন্ধনানি [দুকূলসন্দস্সনানি (সী.), দুকূলসণ্ঠনানি (স্যা.), দুকূলসন্থনানি (পী.), দুহসন্দনানি (দী. নি. ২.২৬৩), দুকূলসন্দনানি (তত্থ পাঠন্তরং)] কংসূপধারণানি, চতুরাসীতি কঞ্ঞাসহস্সানি অদাসি আমুত্তমণিকুণ্ডলাযো [আমুক্কমণিকুণ্ডলাযো (?)], চতুরাসীতি পল্লঙ্কসহস্সানি অদাসি গোনকত্থতানি ¶ পটিকত্থতানি পটলিকত্থতানি কদলিমিগপৰরপচ্চত্থরণানি সউত্তরচ্ছদানি উভতোলোহিতকূপধানানি, চতুরাসীতি ৰত্থকোটিসহস্সানি অদাসি খোমসুখুমানং কোসেয্যসুখুমানং কম্বলসুখুমানং কপ্পাসিকসুখুমানং, কো পন ৰাদো অন্নস্স পানস্স খজ্জস্স ভোজ্জস্স লেয্যস্স পেয্যস্স, নজ্জো মঞ্ঞে ৰিস্সন্দন্তি [ৰিস্সন্দতি (সী. পী.)].

‘‘সিযা খো পন তে, গহপতি, এৰমস্স – ‘অঞ্ঞো নূন তেন সমযেন ৰেলামো ব্রাহ্মণো অহোসি, সো [যো (?)] তং দানং অদাসি মহাদান’ন্তি. ন খো পনেতং, গহপতি, এৰং দট্ঠব্বং. অহং তেন সমযেন ৰেলামো ব্রাহ্মণো ¶ অহোসিং. অহং তং দানং অদাসিং মহাদানং. তস্মিং খো পন, গহপতি, দানে ন কোচি দক্খিণেয্যো অহোসি, ন তং কোচি দক্খিণং ৰিসোধেতি.

‘‘যং, গহপতি, ৰেলামো ব্রাহ্মণো দানং অদাসি মহাদানং, যো চেকং দিট্ঠিসম্পন্নং ভোজেয্য, ইদং ততো মহপ্ফলতরং.

( ) [(যঞ্চ গহপতি ৰেলামো ব্রাহ্মণো দানং অদাসি মহাদানং) (সী. পী.)] ‘‘যো চ সতং দিট্ঠিসম্পন্নানং ভোজেয্য, যো চেকং সকদাগামিং ভোজেয্য, ইদং ততো মহপ্ফলতরং.

( ) [(যঞ্চ গহপতি ৰেলামো ব্রাহ্মণো দানং অদাসি মহাদানং) (সী. পী.)] ‘‘যো চ সতং সকদাগামীনং ভোজেয্য, যো চেকং অনাগামিং ভোজেয্য…পে… যো চ সতং অনাগামীনং ভোজেয্য, যো চেকং ¶ অরহন্তং ভোজেয্য… যো চ সতং অরহন্তানং ভোজেয্য, যো চেকং পচ্চেকবুদ্ধং ভোজেয্য ¶ … যো চ সতং পচ্চেকবুদ্ধানং ভোজেয্য, যো চ তথাগতং অরহন্তং সম্মাসম্বুদ্ধং ভোজেয্য… যো চ বুদ্ধপ্পমুখং ভিক্খুসঙ্ঘং ভোজেয্য… যো চ চাতুদ্দিসং সঙ্ঘং উদ্দিস্স ৰিহারং কারাপেয্য… যো চ পসন্নচিত্তো বুদ্ধঞ্চ ধম্মঞ্চ সঙ্ঘঞ্চ সরণং গচ্ছেয্য… যো চ পসন্নচিত্তো সিক্খাপদানি সমাদিযেয্য – পাণাতিপাতা ৰেরমণিং, অদিন্নাদানা ¶ ৰেরমণিং, কামেসুমিচ্ছাচারা ৰেরমণিং, মুসাৰাদা ৰেরমণিং, সুরামেরযমজ্জপমাদট্ঠানা ৰেরমণিং, যো চ অন্তমসো গন্ধোহনমত্তম্পি [গন্ধূহনমত্তম্পি (সী.), গদ্দূহনমত্তম্পি (স্যা. পী.) ম. নি. ৩.২১১] মেত্তচিত্তং ভাৰেয্য, ( ) [(যো চ অচ্ছরাসঙ্ঘাতমত্তম্পি অনিচ্চসঞ্ঞং ভাৰেয্য) (ক.)] ইদং ততো মহপ্ফলতরং.

‘‘যঞ্চ, গহপতি, ৰেলামো ব্রাহ্মণো দানং অদাসি মহাদানং, যো চেকং দিট্ঠিসম্পন্নং ভোজেয্য… যো চ সতং দিট্ঠিসম্পন্নানং ভোজেয্য, যো চেকং সকদাগামিং ভোজেয্য… যো চ সতং সকদাগামীনং ভোজেয্য, যো ¶ চেকং অনাগামিং ভোজেয্য… যো চ সতং অনাগামীনং ভোজেয্য, যো চেকং অরহন্তং ভোজেয্য… যো চ সতং অরহন্তানং ভোজেয্য, যো চেকং পচ্চেকবুদ্ধং ভোজেয্য… যো চ সতং পচ্চেকবুদ্ধানং ভোজেয্য, যো চ তথাগতং অরহন্তং সম্মাসম্বুদ্ধং ভোজেয্য… যো চ বুদ্ধপ্পমুখং ভিক্খুসঙ্ঘং ভোজেয্য, যো চ চাতুদ্দিসং সঙ্ঘং উদ্দিস্স ৰিহারং কারাপেয্য… যো চ পসন্নচিত্তো বুদ্ধঞ্চ ধম্মঞ্চ সঙ্ঘঞ্চ সরণং গচ্ছেয্য, যো চ পসন্নচিত্তো সিক্খাপদানি সমাদিযেয্য – পাণাতিপাতা ৰেরমণিং… সুরামেরযমজ্জপমাদট্ঠানা ৰেরমণিং, যো চ অন্তমসো গন্ধোহনমত্তম্পি মেত্তচিত্তং ভাৰেয্য ¶ , যো চ অচ্ছরাসঙ্ঘাতমত্তম্পি অনিচ্চসঞ্ঞং ভাৰেয্য, ইদং ততো মহপ্ফলতর’’ন্তি. দসমং.

সীহনাদৰগ্গো দুতিযো.

তস্সুদ্দানং –

নাদো সউপাদিসেসো চ, কোট্ঠিকেন সমিদ্ধিনা;

গণ্ডসঞ্ঞা কুলং মেত্তা, দেৰতা ৰেলামেন চাতি.

৩. সত্তাৰাসৰগ্গো

১. তিঠানসুত্তং

২১. ‘‘তীহি ¶ ¶ , ভিক্খৰে, ঠানেহি উত্তরকুরুকা মনুস্সা দেৰে চ তাৰতিংসে অধিগ্গণ্হন্তি জম্বুদীপকে চ মনুস্সে. কতমেহি তীহি? অমমা, অপরিগ্গহা, নিযতাযুকা, ৰিসেসগুণা [ৰিসেসভুনো (সী. স্যা. পী.)] – ইমেহি খো, ভিক্খৰে, তীহি ঠানেহি উত্তরকুরুকা ¶ মনুস্সা দেৰে চ তাৰতিংসে অধিগ্গণ্হন্তি জম্বুদীপকে চ মনুস্সে.

‘‘তীহি, ভিক্খৰে, ঠানেহি দেৰা তাৰতিংসা উত্তরকুরুকে চ মনুস্সে অধিগ্গণ্হন্তি জম্বুদীপকে চ মনুস্সে. কতমেহি তীহি? দিব্বেন আযুনা, দিব্বেন ৰণ্ণেন, দিব্বেন সুখেন – ইমেহি খো, ভিক্খৰে, তীহি ঠানেহি দেৰা তাৰতিংসা উত্তরকুরুকে চ মনুস্সে অধিগ্গণ্হন্তি জম্বুদীপকে চ মনুস্সে.

[কথা. ২৭১] ‘‘তীহি, ভিক্খৰে, ঠানেহি জম্বুদীপকা মনুস্সা উত্তরকুরুকে চ মনুস্সে অধিগ্গণ্হন্তি দেৰে চ তাৰতিংসে. কতমেহি তীহি? সূরা, সতিমন্তো, ইধ ব্রহ্মচরিযৰাসো – ইমেহি খো, ভিক্খৰে, তীহি ঠানেহি জম্বুদীপকা মনুস্সা উত্তরকুরুকে চ মনুস্সে অধিগ্গণ্হন্তি দেৰে চ তাৰতিংসে’’তি. পঠমং.

২. অস্সখল়ুঙ্কসুত্তং

২২. [অ. নি. ৩.১৪১] ‘‘তযো ¶ চ, ভিক্খৰে, অস্সখল়ুঙ্কে দেসেস্সামি তযো চ পুরিসখল়ুঙ্কে তযো চ অস্সপরস্সে [অস্সসদস্সে (সী. স্যা. পী.) অ. নি. ৩.১৪২] তযো চ পুরিসপরস্সে [পুরিসসদস্সে (সী. স্যা. পী.)] তযো চ ভদ্দে অস্সাজানীযে তযো চ ভদ্দে পুরিসাজানীযে. তং সুণাথ.

‘‘কতমে চ, ভিক্খৰে, তযো অস্সখল়ুঙ্কা? ইধ, ভিক্খৰে, একচ্চো অস্সখল়ুঙ্কো জৰসম্পন্নো ¶ হোতি, ন ৰণ্ণসম্পন্নো, ন আরোহপরিণাহসম্পন্নো. ইধ পন, ভিক্খৰে, একচ্চো অস্সখল়ুঙ্কো জৰসম্পন্নো চ হোতি ৰণ্ণসম্পন্নো চ, ন আরোহপরিণাহসম্পন্নো. ইধ পন, ভিক্খৰে, একচ্চো অস্সখল়ুঙ্কো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ. ইমে খো, ভিক্খৰে, তযো অস্সখল়ুঙ্কা.

‘‘কতমে ¶ ¶ চ, ভিক্খৰে, তযো পুরিসখল়ুঙ্কা? ইধ, ভিক্খৰে, একচ্চো পুরিসখল়ুঙ্কো জৰসম্পন্নো হোতি, ন ৰণ্ণসম্পন্নো, ন আরোহপরিণাহসম্পন্নো. ইধ পন, ভিক্খৰে, একচ্চো পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ, ন আরোহপরিণাহসম্পন্নো. ইধ পন, ভিক্খৰে, একচ্চো পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ.

‘‘কথঞ্চ, ভিক্খৰে, পুরিসখল়ুঙ্কো জৰসম্পন্নো হোতি, ন ৰণ্ণসম্পন্নো ন আরোহপরিণাহসম্পন্নো? ইধ, ভিক্খৰে, ভিক্খু ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি. ইদমস্স ¶ জৰস্মিং ৰদামি. অভিধম্মে খো পন অভিৰিনযে পঞ্হং পুট্ঠো সংসাদেতি [সংসারেতি (ক.) অ. নি. ১.৩.১৪১], নো ৰিস্সজ্জেতি. ইদমস্স ন ৰণ্ণস্মিং ৰদামি. ন খো পন লাভী হোতি চীৰরপিণ্ডপাতসেনাসনগিলানপচ্চযভেসজ্জপরিক্খারানং. ইদমস্স ন আরোহপরিণাহস্মিং ৰদামি. এৰং খো, ভিক্খৰে, পুরিসখল়ুঙ্কো জৰসম্পন্নো হোতি, ন ৰণ্ণসম্পন্নো ন আরোহপরিণাহসম্পন্নো.

‘‘কথঞ্চ, ভিক্খৰে, পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ, ন আরোহপরিণাহসম্পন্নো? ইধ, ভিক্খৰে, ভিক্খু ‘ইদং দুক্খ’ন্তি যথাভূতং পজানাতি…পে… ‘অযং দুক্খনিরোধগামিনী পটিপদা’তি যথাভূতং পজানাতি. ইদমস্স জৰস্মিং ৰদামি. অভিধম্মে খো পন অভিৰিনযে পঞ্হং ¶ পুট্ঠো ৰিস্সজ্জেতি, নো সংসাদেতি. ইদমস্স ৰণ্ণস্মিং ৰদামি. ন খো পন লাভী হোতি চীৰরপিণ্ডপাতসেনাসনগিলানপচ্চযভেসজ্জপরিক্খারানং. ইদমস্স ন আরোহপরিণাহস্মিং ৰদামি. এৰং খো, ভিক্খৰে, পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ, ন আরোহপরিণাহসম্পন্নো.

‘‘কথঞ্চ ¶ , ভিক্খৰে, পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ? ইধ, ভিক্খৰে, ভিক্খু ‘ইদং দুক্খ’ন্তি যথাভূতং পজানাতি…পে… ‘অযং দুক্খনিরোধগামিনী পটিপদা’তি যথাভূতং পজানাতি. ইদমস্স জৰস্মিং ৰদামি. অভিধম্মে খো পন অভিৰিনযে পঞ্হং পুট্ঠো ৰিস্সজ্জেতি, নো সংসাদেতি. ইদমস্স ৰণ্ণস্মিং ৰদামি. লাভী ¶ খো পন ¶ হোতি চীৰরপিণ্ডপাতসেনাসনগিলানপচ্চযভেসজ্জপরিক্খারানং. ইদমস্স আরোহপরিণাহস্মিং ৰদামি. এৰং খো, ভিক্খৰে, পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ. ইমে খো, ভিক্খৰে, তযো পুরিসখল়ুঙ্কা.

‘‘কতমে চ, ভিক্খৰে, তযো অস্সপরস্সা? ইধ, ভিক্খৰে, একচ্চো অস্সপরস্সো…পে… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ. ইমে খো, ভিক্খৰে, তযো অস্সপরস্সা.

‘‘কতমে চ, ভিক্খৰে, তযো পুরিসপরস্সা? ইধ, ভিক্খৰে, একচ্চো পুরিসপরস্সো…পে… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ.

‘‘কথঞ্চ ¶ , ভিক্খৰে, পুরিসপরস্সো…পে… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ? ইধ, ভিক্খৰে, ভিক্খু পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি, তত্থ পরিনিব্বাযী অনাৰত্তিধম্মো তস্মা লোকা. ইদমস্স জৰস্মিং ৰদামি. অভিধম্মে খো পন অভিৰিনযে পঞ্হং পুট্ঠো ৰিস্সজ্জেতি, নো সংসাদেতি. ইদমস্স ৰণ্ণস্মিং ৰদামি. লাভী খো পন হোতি চীৰরপিণ্ডপাতসেনাসনগিলানপচ্চযভেসজ্জপরিক্খারানং. ইদমস্স আরোহপরিণাহস্মিং ৰদামি. এৰং খো, ভিক্খৰে, পুরিসপরস্সো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ. ইমে খো, ভিক্খৰে, তযো পুরিসপরস্সা.

‘‘কতমে চ, ভিক্খৰে, তযো ভদ্দা অস্সাজানীযা? ইধ, ভিক্খৰে, একচ্চো ভদ্দো অস্সাজানীযো…পে… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ. ইমে ¶ খো, ভিক্খৰে, তযো ভদ্দা অস্সাজানীযা.

‘‘কতমে ¶ চ, ভিক্খৰে, তযো ভদ্দা পুরিসাজানীযা? ইধ, ভিক্খৰে, একচ্চো ভদ্দো পুরিসাজানীযো…পে… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ.

‘‘কথঞ্চ, ভিক্খৰে, ভদ্দো পুরিসাজানীযো…পে… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ? ইধ, ভিক্খৰে, ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ¶ ধম্মে সযং অভিঞ্ঞা ¶ সচ্ছিকত্ৰা উপসম্পজ্জ ৰিহরতি. ইদমস্স জৰস্মিং ৰদামি. অভিধম্মে খো পন অভিৰিনযে পঞ্হং পুট্ঠো ৰিস্সজ্জেতি, নো সংসাদেতি. ইদমস্স ৰণ্ণস্মিং ৰদামি. লাভী খো পন হোতি চীৰরপিণ্ডপাতসেনাসনগিলানপচ্চযভেসজ্জপরিক্খারানং. ইদমস্স আরোহপরিণাহস্মিং ৰদামি. এৰং খো, ভিক্খৰে, ভদ্দো পুরিসাজানীযো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ. ইমে খো, ভিক্খৰে, তযো ভদ্দা পুরিসাজানীযা’’তি. দুতিযং.

৩. তণ্হামূলকসুত্তং

২৩. [দী. নি. ২.১০৩] ‘‘নৰ, ভিক্খৰে, তণ্হামূলকে ধম্মে দেসেস্সামি, তং সুণাথ. কতমে চ, ভিক্খৰে, নৰ তণ্হামূলকা ধম্মা? তণ্হং পটিচ্চ পরিযেসনা, পরিযেসনং পটিচ্চ লাভো, লাভং পটিচ্চ ৰিনিচ্ছযো, ৰিনিচ্ছযং পটিচ্চ ছন্দরাগো, ছন্দরাগং পটিচ্চ অজ্ঝোসানং, অজ্ঝোসানং পটিচ্চ পরিগ্গহো, পরিগ্গহং পটিচ্চ মচ্ছরিযং, মচ্ছরিযং পটিচ্চ আরক্খো, আরক্খাধিকরণং দণ্ডাদানং সত্থাদানং ¶ কলহৰিগ্গহৰিৰাদতুৰংতুৰংপেসুঞ্ঞমুসাৰাদা অনেকে পাপকা অকুসলা ধম্মা সম্ভৰন্তি. ইমে খো, ভিক্খৰে, নৰ তণ্হামূলকা ধম্মা’’তি. ততিযং.

৪. সত্তাৰাসসুত্তং

২৪. [দী. নি. ৩.৩৪১] ‘‘নৰযিমে, ভিক্খৰে, সত্তাৰাসা. কতমে নৰ? সন্তি, ভিক্খৰে, সত্তা নানত্তকাযা নানত্তসঞ্ঞিনো, সেয্যথাপি মনুস্সা, একচ্চে চ দেৰা, একচ্চে চ ৰিনিপাতিকা. অযং পঠমো সত্তাৰাসো.

‘‘সন্তি ¶ , ভিক্খৰে, সত্তা নানত্তকাযা একত্তসঞ্ঞিনো, সেয্যথাপি দেৰা ব্রহ্মকাযিকা পঠমাভিনিব্বত্তা. অযং দুতিযো সত্তাৰাসো.

‘‘সন্তি ¶ , ভিক্খৰে, সত্তা একত্তকাযা নানত্তসঞ্ঞিনো, সেয্যথাপি দেৰা আভস্সরা. অযং ততিযো সত্তাৰাসো.

‘‘সন্তি, ভিক্খৰে, সত্তা একত্তকাযা একত্তসঞ্ঞিনো, সেয্যথাপি দেৰা সুভকিণ্হা. অযং চতুত্থো সত্তাৰাসো.

‘‘সন্তি, ভিক্খৰে, সত্তা অসঞ্ঞিনো অপ্পটিসংৰেদিনো, সেয্যথাপি দেৰা অসঞ্ঞসত্তা. অযং পঞ্চমো সত্তাৰাসো.

‘‘সন্তি ¶ , ভিক্খৰে, সত্তা সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনূপগা. অযং ছট্ঠো সত্তাৰাসো.

‘‘সন্তি, ভিক্খৰে, সত্তা সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনূপগা. অযং সত্তমো সত্তাৰাসো.

‘‘সন্তি, ভিক্খৰে, সত্তা সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনূপগা. অযং অট্ঠমো সত্তাৰাসো.

‘‘সন্তি, ভিক্খৰে, সত্তা সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনূপগা. অযং নৰমো সত্তাৰাসো. ইমে খো, ভিক্খৰে, নৰ সত্তাৰাসা’’তি. চতুত্থং.

৫. পঞ্ঞাসুত্তং

২৫. ‘‘যতো ¶ ¶ খো, ভিক্খৰে, ভিক্খুনো পঞ্ঞায চিত্তং সুপরিচিতং হোতি, তস্সেতং, ভিক্খৰে, ভিক্খুনো কল্লং ৰচনায – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’’’তি.

‘‘কথঞ্চ ¶ , ভিক্খৰে, ভিক্খুনো পঞ্ঞায চিত্তং সুপরিচিতং হোতি? ‘ৰীতরাগং মে চিত্ত’ন্তি পঞ্ঞায চিত্তং সুপরিচিতং হোতি; ‘ৰীতদোসং মে চিত্ত’ন্তি পঞ্ঞায চিত্তং সুপরিচিতং হোতি; ‘ৰীতমোহং মে চিত্ত’ন্তি পঞ্ঞায চিত্তং সুপরিচিতং হোতি; ‘অসরাগধম্মং মে চিত্ত’ন্তি পঞ্ঞায চিত্তং সুপরিচিতং হোতি; ‘অসদোসধম্মং মে চিত্ত’ন্তি পঞ্ঞায চিত্তং সুপরিচিতং হোতি; ‘অসমোহধম্মং মে চিত্ত’ন্তি পঞ্ঞায চিত্তং সুপরিচিতং হোতি; ‘অনাৰত্তিধম্মং মে চিত্তং কামভৰাযা’তি পঞ্ঞায চিত্তং সুপরিচিতং হোতি; ‘অনাৰত্তিধম্মং মে চিত্তং রূপভৰাযা’তি পঞ্ঞায চিত্তং সুপরিচিতং হোতি; ‘অনাৰত্তিধম্মং মে চিত্তং অরূপভৰাযা’তি পঞ্ঞায চিত্তং সুপরিচিতং হোতি. যতো খো, ভিক্খৰে, ভিক্খুনো পঞ্ঞায চিত্তং সুপরিচিতং হোতি, তস্সেতং, ভিক্খৰে, ভিক্খুনো কল্লং ৰচনায – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’’’তি. পঞ্চমং.

৬. সিলাযূপসুত্তং

২৬. একং ¶ সমযং আযস্মা চ সারিপুত্তো আযস্মা চ চন্দিকাপুত্তো রাজগহে ৰিহরন্তি ৰেল়ুৰনে কলন্দকনিৰাপে. তত্র খো আযস্মা চন্দিকাপুত্তো ভিক্খূ আমন্তেসি ( ) [(আৰুসো…পে… এতদৰোচ) (সী.)] – ‘‘দেৰদত্তো, আৰুসো, ভিক্খূনং এৰং ধম্মং দেসেতি – ‘যতো খো, আৰুসো, ভিক্খুনো চেতসা চিতং হোতি, তস্সেতং ভিক্খুনো কল্লং ৰেয্যাকরণায ¶ – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’’’তি.

এৰং ৰুত্তে আযস্মা সারিপুত্তো আযস্মন্তং চন্দিকাপুত্তং এতদৰোচ – ‘‘ন খো, আৰুসো চন্দিকাপুত্ত, দেৰদত্তো ভিক্খূনং এৰং ধম্মং দেসেতি ¶ – ‘যতো খো, আৰুসো, ভিক্খুনো চেতসা চিতং হোতি, তস্সেতং ভিক্খুনো কল্লং ৰেয্যাকরণায – খীণা জাতি, ৰুসিতং ¶ ব্রহ্মচরিযং, কতং করণীযং, নাপরং ইত্থত্তাযাতি পজানামী’তি. এৰঞ্চ খো, আৰুসো, চন্দিকাপুত্ত, দেৰদত্তো ভিক্খূনং ধম্মং দেসেতি – ‘যতো খো, আৰুসো, ভিক্খুনো চেতসা চিত্তং সুপরিচিতং হোতি, তস্সেতং ভিক্খুনো কল্লং ৰেয্যাকরণায – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’’’তি.

দুতিযম্পি খো আযস্মা চন্দিকাপুত্তো ভিক্খূ আমন্তেসি – ‘‘দেৰদত্তো, আৰুসো, ভিক্খূনং এৰং ধম্মং দেসেতি – ‘যতো খো, আৰুসো, ভিক্খুনো চেতসা চিতং হোতি, তস্সেতং ভিক্খুনো কল্লং ৰেয্যাকরণায – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’’’তি. দুতিযম্পি খো আযস্মা সারিপুত্তো আযস্মন্তং চন্দিকাপুত্তং এতদৰোচ – ‘‘ন খো, আৰুসো চন্দিকাপুত্ত, দেৰদত্তো ভিক্খূনং এৰং ধম্মং দেসেতি – ‘যতো খো, আৰুসো, ভিক্খুনো চেতসা চিতং হোতি, তস্সেতং ভিক্খুনো কল্লং ৰেয্যাকরণায – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি. এৰঞ্চ খো, আৰুসো চন্দিকাপুত্ত, দেৰদত্তো ভিক্খূনং ধম্মং দেসেতি – ‘যতো খো, আৰুসো, ভিক্খুনো চেতসা চিত্তং সুপরিচিতং হোতি, তস্সেতং ভিক্খুনো কল্লং ৰেয্যাকরণায – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’’’তি.

ততিযম্পি ¶ ¶ খো আযস্মা চন্দিকাপুত্তো ভিক্খূ আমন্তেসি – ‘‘দেৰদত্তো, আৰুসো, ভিক্খূনং এৰং ধম্মং দেসেতি – ‘যতো খো, আৰুসো, ভিক্খুনো চেতসা চিতং হোতি, তস্সেতং ভিক্খুনো কল্লং ৰেয্যাকরণায – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’’’তি. ততিযম্পি খো আযস্মা সারিপুত্তো আযস্মন্তং চন্দিকাপুত্তং এতদৰোচ – ‘‘ন খো, আৰুসো চন্দিকাপুত্ত, দেৰদত্তো ভিক্খূনং এৰং ধম্মং দেসেতি – ‘যতো খো, আৰুসো, ভিক্খুনো চেতসা চিতং হোতি, তস্সেতং ভিক্খুনো কল্লং ৰেয্যাকরণায – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’তি. এৰঞ্চ খো, আৰুসো চন্দিকাপুত্ত, দেৰদত্তো ভিক্খূনং ধম্মং দেসেতি – ‘যতো খো, আৰুসো, ভিক্খুনো চেতসা চিত্তং সুপরিচিতং হোতি, তস্সেতং ভিক্খুনো কল্লং ৰেয্যাকরণায – খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’’’তি.

‘‘কথঞ্চ, আৰুসো, ভিক্খুনো চেতসা চিত্তং সুপরিচিতং হোতি? ‘ৰীতরাগং ¶ মে চিত্ত’ন্তি ¶ চেতসা চিত্তং সুপরিচিতং হোতি; ‘ৰীতদোসং মে চিত্ত’ন্তি চেতসা চিত্তং সুপরিচিতং হোতি; ‘ৰীতমোহং মে চিত্ত’ন্তি চেতসা চিত্তং সুপরিচিতং হোতি; ‘অসরাগধম্মং মে চিত্ত’ন্তি চেতসা চিত্তং সুপরিচিতং হোতি; ‘অসদোসধম্মং মে চিত্ত’ন্তি চেতসা চিত্তং সুপরিচিতং হোতি; ‘অসমোহধম্মং মে চিত্ত’ন্তি চেতসা চিত্তং সুপরিচিতং হোতি; ‘অনাৰত্তিধম্মং মে ¶ চিত্তং কামভৰাযা’তি চেতসা চিত্তং সুপরিচিতং হোতি; ‘অনাৰত্তিধম্মং মে চিত্তং রূপভৰাযা’তি চেতসা চিত্তং সুপরিচিতং হোতি; ‘অনাৰত্তিধম্মং মে চিত্তং অরূপভৰাযা’তি চেতসা চিত্তং সুপরিচিতং হোতি. এৰং সম্মা ৰিমুত্তচিত্তস্স খো, আৰুসো, ভিক্খুনো ভুসা চেপি চক্খুৰিঞ্ঞেয্যা রূপা চক্খুস্স আপাথং আগচ্ছন্তি, নেৰস্স চিত্তং পরিযাদিযন্তি; অমিস্সীকতমেৰস্স চিত্তং হোতি ঠিতং আনেঞ্জপ্পত্তং, ৰযং চস্সানুপস্সতি.

‘‘সেয্যথাপি, আৰুসো, সিলাযূপো সোল়সকুক্কুকো. তস্সস্সু অট্ঠ কুক্কূ হেট্ঠা নেমঙ্গমা, অট্ঠ কুক্কূ উপরি নেমস্স. অথ পুরত্থিমায চেপি দিসায আগচ্ছেয্য ভুসা ৰাতৰুট্ঠি, নেৰ নং সঙ্কম্পেয্য ¶ ন সম্পৰেধেয্য; অথ পচ্ছিমায… অথ উত্তরায… অথ দক্খিণায চেপি দিসায ¶ আগচ্ছেয্য ভুসা ৰাতৰুট্ঠি, নেৰ নং সঙ্কম্পেয্য ন সম্পৰেধেয্য. তং কিস্স হেতু? গম্ভীরত্তা, আৰুসো, নেমস্স, সুনিখাতত্তা সিলাযূপস্স. এৰমেৰং খো, আৰুসো, সম্মা ৰিমুত্তচিত্তস্স ভিক্খুনো ভুসা চেপি চক্খুৰিঞ্ঞেয্যা রূপা চক্খুস্স আপাথং আগচ্ছন্তি, নেৰস্স চিত্তং পরিযাদিযন্তি; অমিস্সীকতমেৰস্স চিত্তং হোতি ঠিতং আনেঞ্জপ্পত্তং, ৰযং চস্সানুপস্সতি.

‘‘ভুসা চেপি সোতৰিঞ্ঞেয্যা সদ্দা… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ¶ ফোট্ঠব্বা… মনোৰিঞ্ঞেয্যা ধম্মা মনস্স আপাথং আগচ্ছন্তি, নেৰস্স চিত্তং পরিযাদিযন্তি; অমিস্সীকতমেৰস্স চিত্তং হোতি ঠিতং আনেঞ্জপ্পত্তং, ৰযং চস্সানুপস্সতী’’তি. ছট্ঠং.

৭. পঠমৰেরসুত্তং

২৭. [অ. নি. ৯.৯২; সং. নি. ৫.১০২৪] অথ খো অনাথপিণ্ডিকো গহপতি যেন ভগৰা তেনুপসঙ্কমি; উপসঙ্কমিত্ৰা ভগৰন্তং ¶ অভিৰাদেত্ৰা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৰা এতদৰোচ –

‘‘যতো খো, গহপতি, অরিযসাৰকস্স পঞ্চ ভযানি ৰেরানি ৰূপসন্তানি হোন্তি, চতূহি চ সোতাপত্তিযঙ্গেহি সমন্নাগতো হোতি, সো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযণো’’’তি.

‘‘কতমানি ¶ পঞ্চ ভযানি ৰেরানি ৰূপসন্তানি হোন্তি? যং, গহপতি, পাণাতিপাতী পাণাতিপাতপচ্চযা দিট্ঠধম্মিকম্পি ভযং ৰেরং পসৰতি, সম্পরাযিকম্পি ভযং ৰেরং পসৰতি, চেতসিকম্পি দুক্খং দোমনস্সং পটিসংৰেদেতি, পাণাতিপাতা পটিৰিরতো নেৰ দিট্ঠধম্মিকম্পি ভযং ৰেরং পসৰতি, ন সম্পরাযিকম্পি ভযং ৰেরং পসৰতি, ন চেতসিকম্পি দুক্খং দোমনস্সং পটিসংৰেদেতি. পাণাতিপাতা পটিৰিরতস্স এৰং তং ভযং ৰেরং ৰূপসন্তং হোতি.

‘‘যং, গহপতি, অদিন্নাদাযী…পে… কামেসুমিচ্ছাচারী… মুসাৰাদী… সুরামেরযমজ্জপমাদট্ঠাযী সুরামেরযমজ্জপমাদট্ঠানপচ্চযা দিট্ঠধম্মিকম্পি ভযং ৰেরং পসৰতি, সম্পরাযিকম্পি ভযং ৰেরং পসৰতি, চেতসিকম্পি ¶ দুক্খং দোমনস্সং ¶ পটিসংৰেদেতি, সুরামেরযমজ্জপমাদট্ঠানা পটিৰিরতো নেৰ দিট্ঠধম্মিকম্পি ভযং ৰেরং পসৰতি, ন সম্পরাযিকম্পি ভযং ৰেরং পসৰতি, ন চেতসিকম্পি দুক্খং দোমনস্সং পটিসংৰেদেতি. সুরামেরযমজ্জপমাদট্ঠানা পটিৰিরতস্স এৰং তং ভযং ৰেরং ৰূপসন্তং হোতি. ইমানি পঞ্চ ভযানি ৰেরানি ৰূপসন্তানি হোন্তি.

‘‘কতমেহি চতূহি সোতাপত্তিযঙ্গেহি সমন্নাগতো হোতি? ইধ, গহপতি, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’’’তি.

ধম্মে ¶ অৰেচ্চপ্পসাদেন সমন্নাগতো হোতি – ‘স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’তি.

সঙ্ঘে অৰেচ্চপ্পসাদেন সমন্নাগতো হোতি – ‘সুপ্পটিপন্নো ভগৰতো সাৰকসঙ্ঘো উজুপ্পটিপন্নো ভগৰতো সাৰকসঙ্ঘো ঞাযপ্পটিপন্নো ¶ ভগৰতো সাৰকসঙ্ঘো সামীচিপ্পটিপন্নো ভগৰতো সাৰকসঙ্ঘো; যদিদং চত্তারি পুরিসযুগানি অট্ঠ পুরিসপুগ্গলা এস ভগৰতো সাৰকসঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সা’তি.

অরিযকন্তেহি সীলেহি সমন্নাগতো হোতি অখণ্ডেহি অচ্ছিদ্দেহি অসবলেহি অকম্মাসেহি ভুজিস্সেহি ৰিঞ্ঞুপ্পসত্থেহি অপরামট্ঠেহি সমাধিসংৰত্তনিকেহি. ইমেহি চতূহি সোতাপত্তিযঙ্গেহি সমন্নাগতো হোতি.

‘‘যতো ¶ খো, গহপতি, অরিযসাৰকস্স ইমানি পঞ্চ ভযানি ৰেরানি ৰূপসন্তানি হোন্তি, ইমেহি চ চতূহি সোতাপত্তিযঙ্গেহি সমন্নাগতো হোতি, সো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো; সোতাপন্নোহমস্মি অৰিনিপাতধম্মো নিযতো সম্বোধিপরাযণো’’’তি. সত্তমং.

৮. দুতিযৰেরসুত্তং

২৮. [সং. নি. ৫.১০২৫] ‘‘যতো ¶ খো, ভিক্খৰে, অরিযসাৰকস্স পঞ্চ ভযানি ৰেরানি ৰূপসন্তানি হোন্তি, চতূহি চ সোতাপত্তিযঙ্গেহি সমন্নাগতো হোতি, সো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো; সোতাপন্নোহমস্মি অৰিনিপাতধম্মো নিযতো সম্বোধিপরাযণো’’’তি.

‘‘কতমানি পঞ্চ ভযানি ৰেরানি ৰূপসন্তানি হোন্তি? যং, ভিক্খৰে, পাণাতিপাতী পাণাতিপাতপচ্চযা দিট্ঠধম্মিকম্পি ভযং ৰেরং পসৰতি, সম্পরাযিকম্পি ভযং ৰেরং পসৰতি, চেতসিকম্পি ¶ দুক্খং দোমনস্সং পটিসংৰেদেতি, পাণাতিপাতা পটিৰিরতো…পে… এৰং তং ভযং ৰেরং ৰূপসন্তং হোতি.

‘‘যং, ভিক্খৰে, অদিন্নাদাযী…পে… সুরামেরযমজ্জপমাদট্ঠাযী সুরামেরযমজ্জপমাদট্ঠানপচ্চযা দিট্ঠধম্মিকম্পি ভযং ৰেরং পসৰতি, সম্পরাযিকম্পি ভযং ৰেরং পসৰতি, চেতসিকম্পি দুক্খং দোমনস্সং পটিসংৰেদেতি, সুরামেরযমজ্জপমাদট্ঠানা পটিৰিরতো নেৰ দিট্ঠধম্মিকম্পি ভযং ৰেরং পসৰতি, ন সম্পরাযিকম্পি ভযং ৰেরং পসৰতি, ন চেতসিকম্পি দুক্খং দোমনস্সং পটিসংৰেদেতি. সুরামেরযমজ্জপমাদট্ঠানা ¶ পটিৰিরতস্স এৰং তং ভযং ৰেরং ৰূপসন্তং হোতি. ইমানি পঞ্চ ভযানি ৰেরানি ৰূপসন্তানি হোন্তি.

‘‘কতমেহি চতূহি সোতাপত্তিযঙ্গেহি সমন্নাগতো হোতি? ইধ, ভিক্খৰে, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ‘ইতিপি সো ভগৰা…পে… সত্থা দেৰমনুস্সানং বুদ্ধো ভগৰা’তি. ধম্মে…পে… সঙ্ঘে… অরিযকন্তেহি সীলেহি সমন্নাগতো হোতি অখণ্ডেহি অচ্ছিদ্দেহি অসবলেহি অকম্মাসেহি ভুজিস্সেহি ৰিঞ্ঞুপ্পসত্থেহি অপরামট্ঠেহি সমাধিসংৰত্তনিকেহি. ইমেহি চতূহি সোতাপত্তিযঙ্গেহি সমন্নাগতো হোতি.

‘‘যতো ¶ খো, ভিক্খৰে, অরিযসাৰকস্স ইমানি পঞ্চ ভযানি ৰেরানি ৰূপসন্তানি হোন্তি, ইমেহি চ চতূহি সোতাপত্তিযঙ্গেহি সমন্নাগতো হোতি, সো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো ¶ ; সোতাপন্নোহমস্মি অৰিনিপাতধম্মো নিযতো সম্বোধিপরাযণো’’’তি. অট্ঠমং.

৯. আঘাতৰত্থুসুত্তং

২৯. [ৰিভ. ৯৬০; দী. নি. ৩.৩৪০; অ. নি. ১০.৭৯] ‘‘নৰযিমানি, ভিক্খৰে, আঘাতৰত্থূনি. কতমানি নৰ? ‘অনত্থং মে অচরী’তি আঘাতং বন্ধতি; ‘অনত্থং মে চরতী’তি আঘাতং বন্ধতি; ‘অনত্থং মে চরিস্সতী’তি আঘাতং বন্ধতি; ‘পিযস্স মে মনাপস্স অনত্থং অচরী’তি…পে… ‘অনত্থং চরতী’তি…পে… ‘অনত্থং চরিস্সতী’তি আঘাতং বন্ধতি; ‘অপ্পিযস্স মে ¶ অমনাপস্স অত্থং অচরী’তি ¶ …পে… ‘অত্থং চরতী’তি…পে… ‘অত্থং চরিস্সতী’তি আঘাতং বন্ধতি. ইমানি খো, ভিক্খৰে, নৰ আঘাতৰত্থূনী’’তি. নৰমং.

১০. আঘাতপটিৰিনযসুত্তং

৩০. [দী. নি. ৩.৩৪০, ৩৫৯] ‘‘নৰযিমে, ভিক্খৰে, আঘাতপটিৰিনযা. কতমে নৰ? ‘অনত্থং মে অচরি [অচরীতি (স্যা.), এৰং ‘‘চরতি, চরিস্সতি’’ পদেসুপি], তং কুতেত্থ লব্ভা’তি আঘাতং পটিৰিনেতি; ‘অনত্থং মে চরতি, তং কুতেত্থ লব্ভা’তি আঘাতং পটিৰিনেতি; ‘অনত্থং মে চরিস্সতি, তং কুতেত্থ লব্ভা’তি আঘাতং পটিৰিনেতি; পিযস্স মে মনাপস্স অনত্থং অচরি…পে… অনত্থং চরতি…পে… ‘অনত্থং ¶ চরিস্সতি, তং কুতেত্থ লব্ভা’তি আঘাতং পটিৰিনেতি; অপ্পিযস্স মে অমনাপস্স অত্থং অচরি…পে… অত্থং চরতি…পে… ‘অত্থং চরিস্সতি, তং কুতেত্থ লব্ভা’তি আঘাতং পটিৰিনেতি. ইমে খো, ভিক্খৰে, নৰ আঘাতপটিৰিনযা’’তি. দসমং.

১১. অনুপুব্বনিরোধসুত্তং

৩১. ‘‘নৰযিমে, ভিক্খৰে, অনুপুব্বনিরোধা. কতমে নৰ? পঠমং ঝানং সমাপন্নস্স কামসঞ্ঞা [আমিস্সসঞ্ঞা (স্যা.)] নিরুদ্ধা হোতি; দুতিযং ঝানং সমাপন্নস্স ৰিতক্কৰিচারা নিরুদ্ধা হোন্তি; ততিযং ঝানং সমাপন্নস্স পীতি নিরুদ্ধা হোতি; চতুত্থং ঝানং সমাপন্নস্স অস্সাসপস্সাসা নিরুদ্ধা হোন্তি; আকাসানঞ্চাযতনং সমাপন্নস্স রূপসঞ্ঞা নিরুদ্ধা হোতি; ৰিঞ্ঞাণঞ্চাযতনং সমাপন্নস্স আকাসানঞ্চাযতনসঞ্ঞা নিরুদ্ধা হোতি; আকিঞ্চঞ্ঞাযতনং সমাপন্নস্স ¶ ৰিঞ্ঞাণঞ্চাযতনসঞ্ঞা নিরুদ্ধা হোতি ¶ ; নেৰসঞ্ঞানাসঞ্ঞাযতনং সমাপন্নস্স আকিঞ্চঞ্ঞাযতনসঞ্ঞা নিরুদ্ধা হোতি; সঞ্ঞাৰেদযিতনিরোধং সমাপন্নস্স সঞ্ঞা চ ৰেদনা চ নিরুদ্ধা হোন্তি. ইমে খো, ভিক্খৰে, নৰ অনুপুব্বনিরোধা’’তি [দী. নি. ৩.৩৪৪, ৩৪৯]. একাদসমং.

সত্তাৰাসৰগ্গো ততিযো.

তস্সুদ্দানং –

তিঠানং খল়ুঙ্কো তণ্হা, সত্তপঞ্ঞা সিলাযুপো;

দ্ৰে ৰেরা দ্ৰে আঘাতানি, অনুপুব্বনিরোধেন চাতি.

৪. মহাৰগ্গো

১. অনুপুব্বৰিহারসুত্তং

৩২. [দী. নি. ৩.৩৪৪, ৩৫৯] ‘‘নৰযিমে ¶ ¶ , ভিক্খৰে, অনুপুব্বৰিহারা. কতমে নৰ? [এত্থ সী. পী. পোত্থকেসু ‘‘ইধ ভিক্খৰে ভিক্খু ৰিৰিচ্চেৰ কামেহী’’ তিআদিনা ৰিত্থরেন পাঠো দিস্সতি] পঠমং ঝানং, দুতিযং ঝানং, ততিযং ঝানং, চতুত্থং ঝানং, আকাসানঞ্চাযতনং, ৰিঞ্ঞাণঞ্চাযতনং, আকিঞ্চঞ্ঞাযতনং, নেৰসঞ্ঞানাসঞ্ঞাযতনং, সঞ্ঞাৰেদযিতনিরোধো – ইমে খো, ভিক্খৰে, নৰ অনুপুব্বৰিহারা’’তি. পঠমং.

২. অনুপুব্বৰিহারসমাপত্তিসুত্তং

৩৩. ‘‘নৰযিমা, ভিক্খৰে [নৰ ভিক্খৰে (?)], অনুপুব্বৰিহারসমাপত্তিযো দেসেস্সামি, তং সুণাথ…পে… কতমা চ, ভিক্খৰে, নৰ অনুপুব্বৰিহারসমাপত্তিযো? যত্থ কামা নিরুজ্ঝন্তি, যে চ কামে নিরোধেত্ৰা নিরোধেত্ৰা ৰিহরন্তি, ‘অদ্ধা তে আযস্মন্তো নিচ্ছাতা নিব্বুতা তিণ্ণা ¶ পারঙ্গতা তদঙ্গেনা’তি ৰদামি. ‘কত্থ কামা নিরুজ্ঝন্তি, কে চ কামে নিরোধেত্ৰা নিরোধেত্ৰা ৰিহরন্তি – অহমেতং ন জানামি অহমেতং ন পস্সামী’তি, ইতি যো এৰং ৰদেয্য, সো এৰমস্স ৰচনীযো – ‘ইধাৰুসো ¶ , ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ¶ ৰিহরতি. এত্থ কামা নিরুজ্ঝন্তি, তে চ কামে নিরোধেত্ৰা নিরোধেত্ৰা ৰিহরন্তী’তি. অদ্ধা, ভিক্খৰে, অসঠো অমাযাৰী ‘সাধূ’তি ভাসিতং অভিনন্দেয্য অনুমোদেয্য; ‘সাধূ’তি ভাসিতং অভিনন্দিত্ৰা অনুমোদিত্ৰা নমস্সমানো পঞ্জলিকো পযিরুপাসেয্য.

‘‘যত্থ ৰিতক্কৰিচারা নিরুজ্ঝন্তি, যে চ ৰিতক্কৰিচারে নিরোধেত্ৰা নিরোধেত্ৰা ৰিহরন্তি, ‘অদ্ধা তে আযস্মন্তো নিচ্ছাতা নিব্বুতা তিণ্ণা পারঙ্গতা তদঙ্গেনা’তি ৰদামি. ‘কত্থ ৰিতক্কৰিচারা নিরুজ্ঝন্তি, কে চ ৰিতক্কৰিচারে নিরোধেত্ৰা নিরোধেত্ৰা ৰিহরন্তি – অহমেতং ন জানামি অহমেতং ন পস্সামী’তি, ইতি যো এৰং ৰদেয্য, সো এৰমস্স ৰচনীযো ¶ – ‘ইধাৰুসো, ভিক্খু ৰিতক্কৰিচারানং ৰূপসমা…পে… দুতিযং ঝানং উপসম্পজ্জ ৰিহরতি; এত্থ ৰিতক্কৰিচারা নিরুজ্ঝন্তি, তে চ ৰিতক্কৰিচারে নিরোধেত্ৰা নিরোধেত্ৰা ৰিহরন্তী’তি. অদ্ধা, ভিক্খৰে, অসঠো অমাযাৰী ‘সাধূ’তি ভাসিতং অভিনন্দেয্য অনুমোদেয্য; ‘সাধূ’তি ভাসিতং অভিনন্দিত্ৰা অনুমোদিত্ৰা নমস্সমানো পঞ্জলিকো পযিরুপাসেয্য.

‘‘যত্থ পীতি নিরুজ্ঝতি, যে চ পীতিং নিরোধেত্ৰা নিরোধেত্ৰা ৰিহরন্তি, ‘অদ্ধা তে আযস্মন্তো নিচ্ছাতা নিব্বুতা তিণ্ণা পারঙ্গতা তদঙ্গেনা’তি ৰদামি. ‘কত্থ পীতি নিরুজ্ঝতি, কে চ পীতিং নিরোধেত্ৰা নিরোধেত্ৰা ৰিহরন্তি – অহমেতং ন জানামি অহমেতং ন পস্সামী’তি, ইতি যো এৰং ৰদেয্য, সো এৰমস্স ৰচনীযো – ‘ইধাৰুসো, ভিক্খু পীতিযা চ ৰিরাগা…পে… ¶ ততিযং ঝানং উপসম্পজ্জ ৰিহরতি; এত্থ পীতি নিরুজ্ঝতি, তে চ পীতিং নিরোধেত্ৰা নিরোধেত্ৰা ¶ ৰিহরন্তী’তি. অদ্ধা, ভিক্খৰে, অসঠো অমাযাৰী ‘সাধূ’তি ভাসিতং অভিনন্দেয্য অনুমোদেয্য; ‘সাধূ’তি ভাসিতং অভিনন্দিত্ৰা অনুমোদিত্ৰা নমস্সমানো পঞ্জলিকো পযিরুপাসেয্য.

‘‘যত্থ উপেক্খাসুখং নিরুজ্ঝতি, যে চ উপেক্খাসুখং নিরোধেত্ৰা নিরোধেত্ৰা ৰিহরন্তি, ‘অদ্ধা তে আযস্মন্তো নিচ্ছাতা নিব্বুতা তিণ্ণা পারঙ্গতা তদঙ্গেনা’তি ৰদামি. ‘কত্থ উপেক্খাসুখং নিরুজ্ঝতি, কে চ উপেক্খাসুখং নিরোধেত্ৰা নিরোধেত্ৰা ৰিহরন্তি – অহমেতং ন জানামি অহমেতং ন পস্সামী’তি, ইতি যো এৰং ৰদেয্য, সো এৰমস্স ৰচনীযো – ‘ইধাৰুসো, ভিক্খু সুখস্স চ পহানা…পে… চতুত্থং ঝানং উপসম্পজ্জ ৰিহরতি; এত্থ উপেক্খাসুখং নিরুজ্ঝতি, তে চ উপেক্খাসুখং নিরোধেত্ৰা নিরোধেত্ৰা ৰিহরন্তী’তি. অদ্ধা, ভিক্খৰে, অসঠো অমাযাৰী ‘সাধূ’তি ভাসিতং অভিনন্দেয্য ¶ অনুমোদেয্য; ‘সাধূ’তি ভাসিতং অভিনন্দিত্ৰা অনুমোদিত্ৰা নমস্সমানো পঞ্জলিকো পযিরুপাসেয্য.

‘‘যত্থ রূপসঞ্ঞা নিরুজ্ঝতি, যে চ রূপসঞ্ঞং [যত্থ রূপসঞ্ঞা নিরুজ্ঝন্তি, যে চ রূপসঞ্ঞা (সী. স্যা. পী.)] নিরোধেত্ৰা নিরোধেত্ৰা ৰিহরন্তি, ‘অদ্ধা তে আযস্মন্তো নিচ্ছাতা নিব্বুতা তিণ্ণা পারঙ্গতা তদঙ্গেনা’তি ৰদামি. ‘কত্থ রূপসঞ্ঞা নিরুজ্ঝতি ¶ , কে চ রূপসঞ্ঞং নিরোধেত্ৰা নিরোধেত্ৰা ৰিহরন্তি – অহমেতং ন জানামি অহমেতং ন পস্সামী’তি, ইতি যো এৰং ৰদেয্য, সো এৰমস্স ৰচনীযো – ‘ইধাৰুসো, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা অনন্তো আকাসোতি আকাসানঞ্চাযতনং ¶ উপসম্পজ্জ ৰিহরতি. এত্থ রূপসঞ্ঞা নিরুজ্ঝতি, তে চ রূপসঞ্ঞং নিরোধেত্ৰা নিরোধেত্ৰা ৰিহরন্তী’তি. অদ্ধা, ভিক্খৰে, অসঠো অমাযাৰী ‘সাধূ’তি ভাসিতং অভিনন্দেয্য অনুমোদেয্য; ‘সাধূ’তি ভাসিতং অভিনন্দিত্ৰা অনুমোদিত্ৰা নমস্সমানো পঞ্জলিকো পযিরুপাসেয্য.

‘‘যত্থ ¶ আকাসানঞ্চাযতনসঞ্ঞা নিরুজ্ঝতি, যে চ আকাসানঞ্চাযতনসঞ্ঞং নিরোধেত্ৰা নিরোধেত্ৰা ৰিহরন্তি, ‘অদ্ধা তে আযস্মন্তো নিচ্ছাতা নিব্বুতা তিণ্ণা পারঙ্গতা তদঙ্গেনা’তি ৰদামি. ‘কত্থ আকাসানঞ্চাযতনসঞ্ঞা নিরুজ্ঝতি, কে চ আকাসানঞ্চাযতনসঞ্ঞং নিরোধেত্ৰা নিরোধেত্ৰা ৰিহরন্তি – অহমেতং ন জানামি অহমেতং ন পস্সামী’তি, ইতি যো এৰং ৰদেয্য, সো এৰমস্স ৰচনীযো – ‘ইধাৰুসো, ভিক্খু সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরতি. এত্থ আকাসানঞ্চাযতনসঞ্ঞা নিরুজ্ঝতি, তে চ আকাসানঞ্চাযতনসঞ্ঞং নিরোধেত্ৰা নিরোধেত্ৰা ৰিহরন্তী’তি. অদ্ধা, ভিক্খৰে, অসঠো অমাযাৰী ‘সাধূ’তি ভাসিতং অভিনন্দেয্য অনুমোদেয্য; ‘সাধূ’তি ভাসিতং অভিনন্দিত্ৰা অনুমোদিত্ৰা নমস্সমানো পঞ্জলিকো পযিরুপাসেয্য.

‘‘যত্থ ৰিঞ্ঞাণঞ্চাযতনসঞ্ঞা নিরুজ্ঝতি, যে চ ৰিঞ্ঞাণঞ্চাযতনসঞ্ঞং নিরোধেত্ৰা নিরোধেত্ৰা ৰিহরন্তি, ‘অদ্ধা তে আযস্মন্তো নিচ্ছাতা নিব্বুতা ¶ তিণ্ণা পারঙ্গতা তদঙ্গেনা’তি ৰদামি. ‘কত্থ ৰিঞ্ঞাণঞ্চাযতনসঞ্ঞা নিরুজ্ঝতি, কে চ ৰিঞ্ঞাণঞ্চাযতনসঞ্ঞং নিরোধেত্ৰা নিরোধেত্ৰা ৰিহরন্তি – অহমেতং ¶ ন জানামি অহমেতং ন পস্সামী’তি, ইতি যো এৰং ৰদেয্য, সো এৰমস্স ৰচনীযো – ‘ইধাৰুসো, ভিক্খু সব্বসো ৰিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহরতি. এত্থ ৰিঞ্ঞাণঞ্চাযতনসঞ্ঞা নিরুজ্ঝতি, তে চ ৰিঞ্ঞাণঞ্চাযতনসঞ্ঞং নিরোধেত্ৰা নিরোধেত্ৰা ৰিহরন্তী’তি. অদ্ধা, ভিক্খৰে, অসঠো অমাযাৰী ‘সাধূ’তি ভাসিতং অভিনন্দেয্য অনুমোদেয্য ¶ ; ‘সাধূ’তি ভাসিতং অভিনন্দিত্ৰা অনুমোদিত্ৰা নমস্সমানো পঞ্জলিকো পযিরুপাসেয্য.

‘‘যত্থ আকিঞ্চঞ্ঞাযতনসঞ্ঞা নিরুজ্ঝতি, যে চ আকিঞ্চঞ্ঞাযতনসঞ্ঞং নিরোধেত্ৰা নিরোধেত্ৰা ৰিহরন্তি, ‘অদ্ধা তে আযস্মন্তো নিচ্ছাতা নিব্বুতা তিণ্ণা পারঙ্গতা তদঙ্গেনা’তি ৰদামি. ‘কত্থ আকিঞ্চঞ্ঞাযতনসঞ্ঞা নিরুজ্ঝতি, কে চ আকিঞ্চঞ্ঞাযতনসঞ্ঞং নিরোধেত্ৰা নিরোধেত্ৰা ৰিহরন্তি – অহমেতং ¶ ন জানামি অহমেতং ন পস্সামী’তি, ইতি যো এৰং ৰদেয্য, সো এৰমস্স ৰচনীযো – ‘ইধাৰুসো, ভিক্খু সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি. এত্থ আকিঞ্চঞ্ঞাযতনসঞ্ঞা নিরুজ্ঝতি, তে চ আকিঞ্চঞ্ঞাযতনসঞ্ঞং নিরোধেত্ৰা নিরোধেত্ৰা ৰিহরন্তী’তি. অদ্ধা, ভিক্খৰে, অসঠো অমাযাৰী ‘সাধূ’তি ভাসিতং অভিনন্দেয্য অনুমোদেয্য; ‘সাধূ’তি ভাসিতং অভিনন্দিত্ৰা অনুমোদিত্ৰা নমস্সমানো পঞ্জলিকো পযিরুপাসেয্য.

‘‘যত্থ নেৰসঞ্ঞানাসঞ্ঞাযতনসঞ্ঞা নিরুজ্ঝতি, যে চ নেৰসঞ্ঞানাসঞ্ঞাযতনসঞ্ঞং নিরোধেত্ৰা নিরোধেত্ৰা ৰিহরন্তি, ‘অদ্ধা তে ¶ আযস্মন্তো নিচ্ছাতা নিব্বুতা তিণ্ণা পারঙ্গতা তদঙ্গেনা’তি ৰদামি. ‘কত্থ নেৰসঞ্ঞানাসঞ্ঞাযতনসঞ্ঞা নিরুজ্ঝতি, কে চ নেৰসঞ্ঞানাসঞ্ঞাযতনসঞ্ঞং নিরোধেত্ৰা নিরোধেত্ৰা ৰিহরন্তি – অহমেতং ন জানামি অহমেতং ন পস্সামী’তি, ইতি যো এৰং ৰদেয্য, সো এৰমস্স ৰচনীযো – ‘ইধাৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি. এত্থ নেৰসঞ্ঞানাসঞ্ঞাযতনসঞ্ঞা নিরুজ্ঝতি, তে চ নেৰসঞ্ঞানাসঞ্ঞাযতনসঞ্ঞং নিরোধেত্ৰা ¶ নিরোধেত্ৰা ৰিহরন্তী’তি. অদ্ধা, ভিক্খৰে, অসঠো অমাযাৰী ‘সাধূ’তি ভাসিতং অভিনন্দেয্য অনুমোদেয্য; ‘সাধূ’তি ভাসিতং অভিনন্দিত্ৰা অনুমোদিত্ৰা নমস্সমানো পঞ্জলিকো পযিরুপাসেয্য. ইমা খো, ভিক্খৰে, নৰ অনুপুব্বৰিহারসমাপত্তিযো’’তি. দুতিযং.

৩. নিব্বানসুখসুত্তং

৩৪. একং সমযং আযস্মা সারিপুত্তো রাজগহে ৰিহরতি ৰেল়ুৰনে কলন্দকনিৰাপে. তত্র খো আযস্মা সারিপুত্তো ভিক্খূ আমন্তেসি – ‘‘সুখমিদং, আৰুসো, নিব্বানং. সুখমিদং ¶ , আৰুসো, নিব্বান’’ন্তি. এৰং ৰুত্তে আযস্মা উদাযী আযস্মন্তং সারিপুত্তং এতদৰোচ – ‘‘কিং ¶ পনেত্থ, আৰুসো সারিপুত্ত, সুখং যদেত্থ নত্থি ৰেদযিত’’ন্তি? ‘‘এতদেৰ খ্ৰেত্থ, আৰুসো, সুখং যদেত্থ নত্থি ৰেদযিতং. পঞ্চিমে, আৰুসো, কামগুণা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, সোতৰিঞ্ঞেয্যা সদ্দা…পে… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ¶ ইট্ঠা কন্তা মনাপা পিযরূপা কামূপসংহিতা রজনীযা – ইমে খো, আৰুসো, পঞ্চ কামগুণা. যং খো, আৰুসো, ইমে পঞ্চ কামগুণে পটিচ্চ উপ্পজ্জতি সুখং সোমনস্সং, ইদং ৰুচ্চতাৰুসো, কামসুখং.

‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো কামসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে কামসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু ৰিতক্কৰিচারানং ৰূপসমা…পে… দুতিযং ঝানং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো ৰিতক্কসহগতা সঞ্ঞামনসিকারা ¶ সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে ৰিতক্কসহগতা সঞ্ঞামনসিকারা সমুদাচরন্তি ¶ . স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু পীতিযা চ ৰিরাগা…পে… ততিযং ঝানং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো ¶ পীতিসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি ¶ , আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে পীতিসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু সুখস্স চ পহানা…পে… চতুত্থং ঝানং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো উপেক্খাসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে উপেক্খাসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা অনন্তো আকাসোতি আকাসানঞ্চাযতনং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো রূপসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে ¶ রূপসহগতা সঞ্ঞামনসিকারা সমুদাচরন্তি ¶ . স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরতি. তস্স চে ¶ , আৰুসো, ভিক্খুনো ইমিনা ৰিহারেন ৰিহরতো আকাসানঞ্চাযতনসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে আকাসানঞ্চাযতনসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন ¶ চপরং, আৰুসো, ভিক্খু সব্বসো ৰিঞ্ঞাণঞ্চাযতনং সমতিক্কম্ম, নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো ৰিঞ্ঞাণঞ্চাযতনসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে ৰিঞ্ঞাণঞ্চাযতনসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন চপরং, আৰুসো, ভিক্খু সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং ¶ উপসম্পজ্জ ৰিহরতি. তস্স চে, আৰুসো, ভিক্খুনো ইমিনা ৰিহারেন ৰিহরতো আকিঞ্চঞ্ঞাযতনসহগতা সঞ্ঞামনসিকারা সমুদাচরন্তি, স্ৰস্স হোতি আবাধো. সেয্যথাপি, আৰুসো, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স তে আকিঞ্চঞ্ঞাযতনসহগতা সঞ্ঞামনসিকারা সমুদাচরন্তি. স্ৰস্স হোতি আবাধো. যো খো পনাৰুসো, আবাধো দুক্খমেতং ৰুত্তং ভগৰতা. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বানং.

‘‘পুন ¶ চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. ইমিনাপি খো এতং, আৰুসো, পরিযাযেন ৰেদিতব্বং যথা সুখং নিব্বান’’ন্তি. ততিযং.

৪. গাৰীউপমাসুত্তং

৩৫. ‘‘সেয্যথাপি ¶ , ভিক্খৰে, গাৰী পব্বতেয্যা বালা অব্যত্তা অখেত্তঞ্ঞূ অকুসলা ৰিসমে পব্বতে চরিতুং. তস্সা এৰমস্স – ‘যংনূনাহং অগতপুব্বঞ্চেৰ দিসং গচ্ছেয্যং, অখাদিতপুব্বানি চ তিণানি খাদেয্যং, অপীতপুব্বানি চ পানীযানি পিৰেয্য’ন্তি. সা পুরিমং পাদং ন সুপ্পতিট্ঠিতং পতিট্ঠাপেত্ৰা পচ্ছিমং পাদং উদ্ধরেয্য. সা ন চেৰ অগতপুব্বং দিসং গচ্ছেয্য, ন চ অখাদিতপুব্বানি তিণানি খাদেয্য, ন চ অপীতপুব্বানি পানীযানি পিৰেয্য; যস্মিং চস্সা পদেসে ঠিতায এৰমস্স – ‘যংনূনাহং অগতপুব্বঞ্চেৰ দিসং গচ্ছেয্যং, অখাদিতপুব্বানি ¶ চ তিণানি খাদেয্যং, অপীতপুব্বানি ¶ চ পানীযানি পিৰেয্য’ন্তি তঞ্চ পদেসং ন সোত্থিনা পচ্চাগচ্ছেয্য. তং কিস্স হেতু? তথা হি সা, ভিক্খৰে, গাৰী পব্বতেয্যা বালা অব্যত্তা অখেত্তঞ্ঞূ অকুসলা ৰিসমে পব্বতে চরিতুং. এৰমেৰং খো, ভিক্খৰে, ইধেকচ্চো ভিক্খু বালো অব্যত্তো অখেত্তঞ্ঞূ অকুসলো ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি; সো তং নিমিত্তং ন আসেৰতি ন ভাৰেতি ন বহুলীকরোতি ন স্ৰাধিট্ঠিতং অধিট্ঠাতি.

‘‘তস্স এৰং হোতি – ‘যংনূনাহং ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ¶ ৰিহরেয্য’ন্তি. সো ন সক্কোতি ৰিতক্কৰিচারানং ৰূপসমা…পে… দুতিযং ঝানং উপসম্পজ্জ ৰিহরিতুং. তস্স এৰং হোতি – ‘যংনূনাহং ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরেয্য’ন্তি. সো ন সক্কোতি ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরিতুং. অযং ৰুচ্চতি, ভিক্খৰে, ‘ভিক্খু উভতো ভট্ঠো উভতো পরিহীনো, সেয্যথাপি সা গাৰী পব্বতেয্যা বালা অব্যত্তা অখেত্তঞ্ঞূ অকুসলা ৰিসমে পব্বতে চরিতুং’’’.

‘‘সেয্যথাপি, ভিক্খৰে, গাৰী পব্বতেয্যা পণ্ডিতা ব্যত্তা খেত্তঞ্ঞূ কুসলা ৰিসমে পব্বতে চরিতুং. তস্সা এৰমস্স – ‘যংনূনাহং অগতপুব্বঞ্চেৰ দিসং গচ্ছেয্যং, অখাদিতপুব্বানি চ তিণানি খাদেয্যং, অপীতপুব্বানি ¶ চ পানীযানি পিৰেয্য’ন্তি. সা পুরিমং পাদং সুপ্পতিট্ঠিতং পতিট্ঠাপেত্ৰা পচ্ছিমং পাদং উদ্ধরেয্য. সা অগতপুব্বঞ্চেৰ দিসং গচ্ছেয্য, অখাদিতপুব্বানি চ তিণানি ¶ খাদেয্য, অপীতপুব্বানি চ পানীযানি পিৰেয্য. যস্মিং চস্সা পদেসে ঠিতায এৰমস্স – ‘যংনূনাহং অগতপুব্বঞ্চেৰ দিসং গচ্ছেয্যং, অখাদিতপুব্বানি চ তিণানি খাদেয্যং, অপীতপুব্বানি চ পানীযানি পিৰেয্য’ন্তি তঞ্চ পদেসং সোত্থিনা পচ্চাগচ্ছেয্য. তং কিস্স হেতু? তথা হি সা, ভিক্খৰে, গাৰী পব্বতেয্যা পণ্ডিতা ব্যত্তা খেত্তঞ্ঞূ কুসলা ৰিসমে পব্বতে চরিতুং. এৰমেৰং খো, ভিক্খৰে, ইধেকচ্চো ভিক্খু পণ্ডিতো ব্যত্তো খেত্তঞ্ঞূ কুসলো ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং ¶ সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. সো তং নিমিত্তং আসেৰতি ভাৰেতি বহুলীকরোতি স্ৰাধিট্ঠিতং অধিট্ঠাতি.

‘‘তস্স এৰং হোতি – ‘যংনূনাহং ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরেয্য’ন্তি. সো দুতিযং ঝানং অনভিহিংসমানো ৰিতক্কৰিচারানং ৰূপসমা… দুতিযং ঝানং উপসম্পজ্জ ৰিহরতি. সো তং নিমিত্তং আসেৰতি ভাৰেতি বহুলীকরোতি স্ৰাধিট্ঠিতং অধিট্ঠাতি.

‘‘তস্স এৰং হোতি – ‘যংনূনাহং পীতিযা চ ৰিরাগা উপেক্খকো চ ৰিহরেয্যং সতো চ সম্পজানো, সুখঞ্চ কাযেন পটিসংৰেদেয্যং যং তং অরিযা আচিক্খন্তি – উপেক্খকো সতিমা সুখৰিহারীতি ততিযং ¶ ঝানং উপসম্পজ্জ ৰিহরেয্য’ন্তি. সো ততিযং ঝানং অনভিহিংসমানো পীতিযা চ ৰিরাগা…পে… ¶ ততিযং ঝানং উপসম্পজ্জ ৰিহরতি. সো তং নিমিত্তং আসেৰতি ভাৰেতি বহুলীকরোতি স্ৰাধিট্ঠিতং অধিট্ঠাতি.

‘‘তস্স এৰং হোতি – ‘যংনূনাহং সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরেয্য’ন্তি. সো চতুত্থং ঝানং অনভিহিংসমানো সুখস্স চ পহানা…পে… চতুত্থং ঝানং উপসম্পজ্জ ৰিহরতি. সো তং নিমিত্তং আসেৰতি ভাৰেতি বহুলীকরোতি স্ৰাধিট্ঠিতং অধিট্ঠাতি.

‘‘তস্স এৰং হোতি – ‘যংনূনাহং সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা অনন্তো আকাসোতি আকাসানঞ্চাযতনং উপসম্পজ্জ ৰিহরেয্য’ন্তি. সো আকাসানঞ্চাযতনং ¶ অনভিহিংসমানো সব্বসো রূপসঞ্ঞানং সমতিক্কমা ¶ …পে… আকাসানঞ্চাযতনং উপসম্পজ্জ ৰিহরতি. সো তং নিমিত্তং আসেৰতি ভাৰেতি বহুলীকরোতি স্ৰাধিট্ঠিতং অধিট্ঠাতি.

‘‘তস্স এৰং হোতি – ‘যংনূনাহং সব্বসো আকাসানঞ্চাযতনং সমতিক্কম্ম অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জ ৰিহরেয্য’ন্তি. সো ৰিঞ্ঞাণঞ্চাযতনং অনভিহিংসমানো সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং উপসম্পজ্জ ৰিহরতি. সো তং নিমিত্তং আসেৰতি ভাৰেতি বহুলীকরোতি স্ৰাধিট্ঠিতং অধিট্ঠাতি.

‘‘তস্স এৰং হোতি – ‘যংনূনাহং সব্বসো ৰিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহরেয্য’ন্তি. সো আকিঞ্চঞ্ঞাযতনং অনভিহিংসমানো সব্বসো ¶ ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি. সো তং নিমিত্তং আসেৰতি ভাৰেতি বহুলীকরোতি স্ৰাধিট্ঠিতং অধিট্ঠাতি.

‘‘তস্স এৰং হোতি – ‘যংনূনাহং সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরেয্য’ন্তি. সো নেৰসঞ্ঞানাসঞ্ঞাযতনং অনভিহিংসমানো সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি. সো তং নিমিত্তং আসেৰতি ভাৰেতি বহুলীকরোতি ¶ স্ৰাধিট্ঠিতং অধিট্ঠাতি.

‘‘তস্স এৰং হোতি – ‘যংনূনাহং সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরেয্য’ন্তি. সো সঞ্ঞাৰেদযিতনিরোধং অনভিহিংসমানো সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি.

‘‘যতো খো, ভিক্খৰে, ভিক্খু তং তদেৰ সমাপত্তিং সমাপজ্জতিপি ৰুট্ঠাতিপি, তস্স মুদু চিত্তং হোতি কম্মঞ্ঞং. মুদুনা কম্মঞ্ঞেন চিত্তেন অপ্পমাণো সমাধি হোতি সুভাৰিতো. সো অপ্পমাণেন সমাধিনা সুভাৰিতেন যস্স যস্স অভিঞ্ঞাসচ্ছিকরণীযস্স ধম্মস্স চিত্তং ¶ অভিনিন্নামেতি ¶ অভিঞ্ঞাসচ্ছিকিরিযায তত্র তত্রেৰ সক্খিভব্বতং পাপুণাতি সতি সতি আযতনে.

‘‘সো সচে আকঙ্খতি – ‘অনেকৰিহিতং ইদ্ধিৰিধং পচ্চনুভৰেয্যং, একোপি হুত্ৰা বহুধা অস্সং, বহুধাপি হুত্ৰা একো অস্সং…পে… যাৰ ব্রহ্মলোকাপি কাযেন ৰসং ৰত্তেয্য’ন্তি, তত্র তত্রেৰ সক্খিভব্বতং পাপুণাতি সতি সতি আযতনে.

‘‘সো সচে আকঙ্খতি – দিব্বায ¶ সোতধাতুযা…পে… সতি সতি আযতনে.

‘‘সো সচে আকঙ্খতি – ‘পরসত্তানং পরপুগ্গলানং চেতসা চেতো পরিচ্চ পজানেয্যং, সরাগং ৰা চিত্তং সরাগং চিত্তন্তি পজানেয্যং, ৰীতরাগং ৰা চিত্তং ৰীতরাগং চিত্তন্তি পজানেয্যং, সদোসং ৰা চিত্তং সদোসং চিত্তন্তি পজানেয্যং, ৰীতদোসং ৰা চিত্তং ৰীতদোসং চিত্তন্তি পজানেয্যং, সমোহং ৰা চিত্তং সমোহং চিত্তন্তি পজানেয্যং, ৰীতমোহং ৰা চিত্তং… সংখিত্তং ৰা চিত্তং… ৰিক্খিত্তং ৰা চিত্তং… মহগ্গতং ৰা চিত্তং… অমহগ্গতং ৰা চিত্তং… সউত্তরং ৰা চিত্তং… অনুত্তরং ৰা চিত্তং… সমাহিতং ৰা চিত্তং… অসমাহিতং ৰা চিত্তং… ৰিমুত্তং ৰা চিত্তং… অৰিমুত্তং ৰা চিত্তং অৰিমুত্তং চিত্তন্তি পজানেয্য’ন্তি, তত্র তত্রেৰ সক্খিভব্বতং পাপুণাতি সতি সতি আযতনে.

‘‘সো সচে আকঙ্খতি – ‘অনেকৰিহিতং পুব্বেনিৰাসং অনুস্সরেয্যং, সেয্যথিদং – একম্পি জাতিং দ্ৰেপি জাতিযো…পে… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরেয্য’ন্তি, তত্র তত্রেৰ সক্খিভব্বতং পাপুণাতি সতি সতি আযতনে.

‘‘সো ¶ সচে আকঙ্খতি – ‘দিব্বেন চক্খুনা ৰিসুদ্ধেন অতিক্কন্তমানুসকেন…পে… যথাকম্মূপগে সত্তে পজানেয্য’ন্তি, তত্র তত্রেৰ সক্খিভব্বতং পাপুণাতি সতি সতি আযতনে.

‘‘সো সচে আকঙ্খতি – ‘আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরেয্য’ন্তি, তত্র তত্রেৰ সক্খিভব্বতং পাপুণাতি সতি সতি আযতনে’’তি. চতুত্থং.

৫. ঝানসুত্তং

৩৬. ‘‘পঠমম্পাহং ¶ ¶ , ভিক্খৰে, ঝানং নিস্সায আসৰানং খযং ৰদামি ¶ ; দুতিযম্পাহং, ভিক্খৰে, ঝানং নিস্সায আসৰানং খযং ৰদামি; ততিযম্পাহং, ভিক্খৰে, ঝানং নিস্সায আসৰানং খযং ৰদামি; চতুত্থম্পাহং, ভিক্খৰে, ঝানং নিস্সায আসৰানং খযং ৰদামি; আকাসানঞ্চাযতনম্পাহং, ভিক্খৰে, নিস্সায আসৰানং খযং ৰদামি; ৰিঞ্ঞাণঞ্চাযতনম্পাহং, ভিক্খৰে, নিস্সায আসৰানং খযং ৰদামি; আকিঞ্চঞ্ঞাযতনম্পাহং, ভিক্খৰে, নিস্সায আসৰানং খযং ৰদামি; নেৰসঞ্ঞানাসঞ্ঞাযতনম্পাহং, ভিক্খৰে, নিস্সায আসৰানং খযং ৰদামি; সঞ্ঞাৰেদযিতনিরোধম্পাহং, ভিক্খৰে, নিস্সায আসৰানং খযং ৰদামি.

‘‘‘পঠমম্পাহং, ভিক্খৰে, ঝানং নিস্সায আসৰানং খযং ৰদামী’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? ইধ, ভিক্খৰে, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. সো যদেৰ তত্থ হোতি রূপগতং ৰেদনাগতং সঞ্ঞাগতং সঙ্খারগতং ৰিঞ্ঞাণগতং, তে ধম্মে অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো ¶ অনত্ততো সমনুপস্সতি. সো তেহি ধম্মেহি চিত্তং পটিৰাপেতি [পতিট্ঠাপেতি (স্যা.), পটিপাদেতি (ক.) ম. নি. ২.১৩৩ পস্সিতব্বং]. সো তেহি ধম্মেহি চিত্তং পটিৰাপেত্ৰা [পতিট্ঠাপেত্ৰা (স্যা.), পটিপাদেত্ৰা (ক.)] অমতায ধাতুযা চিত্তং উপসংহরতি – ‘এতং সন্তং এতং পণীতং যদিদং সব্বসঙ্খারসমথো সব্বূপধিপটিনিস্সগ্গো তণ্হাক্খযো ৰিরাগো নিরোধো নিব্বান’ন্তি. সো তত্থ ঠিতো আসৰানং খযং পাপুণাতি. নো চে আসৰানং খযং পাপুণাতি, তেনেৰ ধম্মরাগেন তায ধম্মনন্দিযা পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা.

‘‘সেয্যথাপি, ভিক্খৰে, ইস্সাসো ৰা ইস্সাসন্তেৰাসী ৰা তিণপুরিসরূপকে ৰা মত্তিকাপুঞ্জে ৰা যোগ্গং করিত্ৰা, সো অপরেন সমযেন দূরেপাতী চ হোতি অক্খণৰেধী চ মহতো চ কাযস্স পদালেতা [পদালিতা (ক.) অ. নি. ৩.১৩৪; ৪.১৮১]; এৰমেৰং খো ¶ , ভিক্খৰে, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ¶ ৰিহরতি. সো যদেৰ তত্থ হোতি রূপগতং ৰেদনাগতং সঞ্ঞাগতং সঙ্খারগতং ৰিঞ্ঞাণগতং, তে ধম্মে অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো অনত্ততো সমনুপস্সতি. সো তেহি ধম্মেহি চিত্তং পটিৰাপেতি ¶ . সো তেহি ধম্মেহি চিত্তং পটিৰাপেত্ৰা অমতায ধাতুযা চিত্তং উপসংহরতি – ‘এতং সন্তং এতং পণীতং যদিদং সব্বসঙ্খারসমথো সব্বূপধিপটিনিস্সগ্গো তণ্হাক্খযো ৰিরাগো নিরোধো নিব্বান’ন্তি. সো তত্থ ঠিতো আসৰানং খযং পাপুণাতি. নো চে আসৰানং খযং পাপুণাতি, তেনেৰ ধম্মরাগেন তায ধম্মনন্দিযা পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা. ‘পঠমম্পাহং ¶ , ভিক্খৰে, ঝানং নিস্সায আসৰানং খযং ৰদামী’তি, ইতি যং তং ৰুত্তং, ইদমেতং পটিচ্চ ৰুত্তং.

‘‘দুতিযম্পাহং, ভিক্খৰে, ঝানং নিস্সায…পে… ততিযম্পাহং, ভিক্খৰে, ঝানং নিস্সায… ‘চতুত্থম্পাহং, ভিক্খৰে, ঝানং নিস্সায আসৰানং খযং ৰদামী’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? ইধ, ভিক্খৰে, ভিক্খু সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি. সো যদেৰ তত্থ হোতি রূপগতং ৰেদনাগতং সঞ্ঞাগতং সঙ্খারগতং ৰিঞ্ঞাণগতং, তে ধম্মে অনিচ্চতো দুক্খতো ¶ রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো অনত্ততো সমনুপস্সতি. সো তেহি ধম্মেহি চিত্তং পটিৰাপেতি. সো তেহি ধম্মেহি চিত্তং পটিৰাপেত্ৰা অমতায ধাতুযা চিত্তং উপসংহরতি – ‘এতং সন্তং এতং পণীতং যদিদং সব্বসঙ্খারসমথো সব্বূপধিপটিনিস্সগ্গো তণ্হাক্খযো ৰিরাগো নিরোধো নিব্বান’ন্তি. সো তত্থ ঠিতো আসৰানং খযং পাপুণাতি. নো চে আসৰানং খযং পাপুণাতি, তেনেৰ ধম্মরাগেন তায ধম্মনন্দিযা পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা.

‘‘সেয্যথাপি ¶ , ভিক্খৰে, ইস্সাসো ৰা ইস্সাসন্তেৰাসী ৰা তিণপুরিসরূপকে ৰা মত্তিকাপুঞ্জে ৰা যোগ্গং করিত্ৰা, সো অপরেন সমযেন দূরেপাতী চ হোতি অক্খণৰেধী চ মহতো চ কাযস্স পদালেতা ¶ ; এৰমেৰং খো, ভিক্খৰে, ভিক্খু সুখস্স চ পহানা, দুক্খস্স চ পহানা, পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি. সো যদেৰ তত্থ হোতি রূপগতং ৰেদনাগতং…পে… অনাৰত্তিধম্মো তস্মা লোকা. ‘চতুত্থম্পাহং ¶ , ভিক্খৰে, ঝানং নিস্সায আসৰানং খযং ৰদামী’তি, ইতি যং তং ৰুত্তং, ইদমেতং পটিচ্চ ৰুত্তং.

‘‘‘আকাসানঞ্চাযতনম্পাহং, ভিক্খৰে, ঝানং নিস্সায আসৰানং খযং ৰদামী’তি, ইতি খো পনেতং ৰুত্তং. কিঞ্চেতং পটিচ্চ ৰুত্তং? ইধ, ভিক্খৰে, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. সো যদেৰ তত্থ হোতি ৰেদনাগতং সঞ্ঞাগতং সঙ্খারগতং ¶ ৰিঞ্ঞাণগতং, তে ধম্মে অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো অনত্ততো সমনুপস্সতি. সো তেহি ধম্মেহি চিত্তং পটিৰাপেতি. সো তেহি ধম্মেহি চিত্তং পটিৰাপেত্ৰা অমতায ধাতুযা চিত্তং উপসংহরতি – ‘এতং সন্তং এতং পণীতং যদিদং সব্বসঙ্খারসমথো সব্বূপধিপটিনিস্সগ্গো তণ্হাক্খযো ৰিরাগো নিরোধো নিব্বান’ন্তি. সো তত্থ ঠিতো আসৰানং খযং পাপুণাতি. নো চে আসৰানং খযং পাপুণাতি, তেনেৰ ধম্মরাগেন তায ধম্মনন্দিযা পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা.

‘‘সেয্যথাপি, ভিক্খৰে, ইস্সাসো ৰা ইস্সাসন্তেৰাসী ৰা তিণপুরিসরূপকে ৰা মত্তিকাপুঞ্জে ৰা যোগ্গং করিত্ৰা, সো অপরেন সমযেন দূরেপাতী চ হোতি অক্খণৰেধী চ মহতো চ কাযস্স পদালেতা; এৰমেৰং খো, ভিক্খৰে, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. সো যদেৰ তত্থ হোতি ৰেদনাগতং সঞ্ঞাগতং…পে… অনাৰত্তিধম্মো তস্মা লোকা. ‘আকাসানঞ্চাযতনম্পাহং, ভিক্খৰে, নিস্সায আসৰানং খযং ৰদামী’তি, ইতি যং তং ৰুত্তং, ইদমেতং পটিচ্চ ৰুত্তং.

‘‘‘ৰিঞ্ঞাণঞ্চাযতনম্পাহং ¶ , ভিক্খৰে, নিস্সায…পে… আকিঞ্চঞ্ঞাযতনম্পাহং, ভিক্খৰে, নিস্সায আসৰানং খযং ৰদামী’তি, ইতি খো পনেতং ৰুত্তং ¶ . কিঞ্চেতং পটিচ্চ ৰুত্তং? ইধ ¶ , ভিক্খৰে, ভিক্খু সব্বসো ৰিঞ্ঞাণঞ্চাযতনং সমতিক্কম্ম ¶ ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি. সো যদেৰ তত্থ হোতি ৰেদনাগতং সঞ্ঞাগতং সঙ্খারগতং ৰিঞ্ঞাণগতং, তে ধম্মে অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো অনত্ততো সমনুপস্সতি. সো তেহি ধম্মেহি চিত্তং পটিৰাপেতি. সো তেহি ধম্মেহি চিত্তং পটিৰাপেত্ৰা অমতায ধাতুযা চিত্তং উপসংহরতি – ‘এতং সন্তং এতং পণীতং যদিদং সব্বসঙ্খারসমথো সব্বূপধিপটিনিস্সগ্গো তণ্হাক্খযো ৰিরাগো নিরোধো নিব্বান’ন্তি. সো তত্থ ঠিতো আসৰানং খযং পাপুণাতি. নো চে আসৰানং খযং পাপুণাতি, তেনেৰ ধম্মরাগেন তায ধম্মনন্দিযা পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা.

‘‘সেয্যথাপি, ভিক্খৰে, ইস্সাসো ৰা ইস্সাসন্তেৰাসী ৰা তিণপুরিসরূপকে ৰা মত্তিকাপুঞ্জে ৰা যোগ্গং করিত্ৰা, সো অপরেন সমযেন দূরেপাতী চ হোতি অক্খণৰেধী চ মহতো চ কাযস্স পদালেতা; এৰমেৰং খো, ভিক্খৰে, ভিক্খু সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি. সো যদেৰ তত্থ হোতি ৰেদনাগতং সঞ্ঞাগতং সঙ্খারগতং ৰিঞ্ঞাণগতং, তে ধম্মে অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো অনত্ততো সমনুপস্সতি. সো তেহি ধম্মেহি ¶ চিত্তং পটিৰাপেতি. সো তেহি ধম্মেহি চিত্তং পটিৰাপেত্ৰা অমতায ধাতুযা চিত্তং উপসংহরতি – ‘এতং সন্তং এতং পণীতং যদিদং সব্বসঙ্খারসমথো সব্বূপধিপটিনিস্সগ্গো তণ্হাক্খযো ৰিরাগো নিরোধো নিব্বান’ন্তি. সো তত্থ ঠিতো আসৰানং খযং পাপুণাতি. নো চে আসৰানং খযং পাপুণাতি, তেনেৰ ধম্মরাগেন তায ধম্মনন্দিযা পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা. ‘আকিঞ্চঞ্ঞাযতনম্পাহং, নিস্সায আসৰানং খযং ৰদামী’তি, ইতি যং তং ৰুত্তং, ইদমেতং পটিচ্চ ৰুত্তং.

‘‘ইতি খো, ভিক্খৰে, যাৰতা সঞ্ঞাসমাপত্তি তাৰতা অঞ্ঞাপটিৰেধো. যানি চ খো ইমানি, ভিক্খৰে, নিস্সায দ্ৰে আযতনানি – নেৰসঞ্ঞানাসঞ্ঞাযতনসমাপত্তি চ সঞ্ঞাৰেদযিতনিরোধো ¶ চ, ঝাযীহেতে ¶ , ভিক্খৰে, সমাপত্তিকুসলেহি সমাপত্তিৰুট্ঠানকুসলেহি সমাপজ্জিত্ৰা ৰুট্ঠহিত্ৰা সম্মা অক্খাতব্বানীতি ৰদামী’’তি. পঞ্চমং.

৬. আনন্দসুত্তং

৩৭. একং সমযং আযস্মা আনন্দো কোসম্বিযং ৰিহরতি ঘোসিতারামে. তত্র খো আযস্মা আনন্দো ভিক্খূ আমন্তেসি – ‘‘আৰুসো ভিক্খৰে’’তি. ‘‘আৰুসো’’তি খো তে ভিক্খূ আযস্মতো আনন্দস্স পচ্চস্সোসুং. আযস্মা আনন্দো এতদৰোচ –

‘‘অচ্ছরিযং, আৰুসো, অব্ভুতং, আৰুসো! যাৰঞ্চিদং তেন ভগৰতা জানতা পস্সতা অরহতা সম্মাসম্বুদ্ধেন সম্বাধে ওকাসাধিগমো ¶ অনুবুদ্ধো সত্তানং ৰিসুদ্ধিযা সোকপরিদেৰানং সমতিক্কমায দুক্খদোমনস্সানং অত্থঙ্গমায ঞাযস্স অধিগমায নিব্বানস্স সচ্ছিকিরিযায. তদেৰ নাম চক্খুং ভৰিস্সতি তে রূপা তঞ্চাযতনং ¶ নো পটিসংৰেদিস্সতি [পটিসংৰেদযতি (ক.)]. তদেৰ নাম সোতং ভৰিস্সতি তে সদ্দা তঞ্চাযতনং নো পটিসংৰেদিস্সতি. তদেৰ নাম ঘানং ভৰিস্সতি তে গন্ধা তঞ্চাযতনং নো পটিসংৰেদিস্সতি. সাৰ নাম জিৰ্হা ভৰিস্সতি তে রসা তঞ্চাযতনং নো পটিসংৰেদিস্সতি. সোৰ নাম কাযো ভৰিস্সতি তে ফোট্ঠব্বা তঞ্চাযতনং নো পটিসংৰেদিস্সতী’’তি.

এৰং ৰুত্তে আযস্মা উদাযী আযস্মন্তং আনন্দং এতদৰোচ – ‘‘সঞ্ঞীমেৰ নু খো, আৰুসো আনন্দ, তদাযতনং নো পটিসংৰেদেতি উদাহু অসঞ্ঞী’’তি? ‘‘সঞ্ঞীমেৰ খো, আৰুসো, তদাযতনং নো পটিসংৰেদেতি, নো অসঞ্ঞী’’তি.

‘‘কিংসঞ্ঞী পনাৰুসো, তদাযতনং নো পটিসংৰেদেতী’’তি? ‘‘ইধাৰুসো, ভিক্খু, সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. এৰংসঞ্ঞীপি খো, আৰুসো, তদাযতনং নো পটিসংৰেদেতি.

‘‘পুন ¶ চপরং, আৰুসো, ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ¶ ৰিঞ্ঞাণঞ্চাযতনং উপসম্পজ্জ ৰিহরতি. এৰংসঞ্ঞীপি খো, আৰুসো, তদাযতনং নো পটিসংৰেদেতি.

‘‘পুন চপরং, আৰুসো, ভিক্খু সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি. এৰংসঞ্ঞীপি খো ¶ , আৰুসো, তদাযতনং নো পটিসংৰেদেতী’’তি.

‘‘একমিদাহং, আৰুসো, সমযং সাকেতে ৰিহরামি অঞ্জনৰনে মিগদাযে. অথ খো, আৰুসো, জটিলৰাসিকা [জটিলগাহিযা (সী. পী.), জডিলভাগিকা (স্যা.)] ভিক্খুনী ¶ যেনাহং তেনুপসঙ্কমি; উপসঙ্কমিত্ৰা মং অভিৰাদেত্ৰা একমন্তং অট্ঠাসি. একমন্তং ঠিতা খো, আৰুসো, জটিলৰাসিকা ভিক্খুনী মং এতদৰোচ – ‘যাযং, ভন্তে আনন্দ, সমাধি ন চাভিনতো ন চাপনতো ন চ সসঙ্খারনিগ্গয্হৰারিতগতো [সসঙ্খারনিগ্গয্হৰারিতৰতো (সী. স্যা. কং. পী.), সসঙ্খারনিগ্গয্হৰারিৰাৰটো (ক.) অ. নি. ৩.১০২; ৫.২৭; দী. নি. ৩.৩৫৫], ৰিমুত্তত্তা ঠিতো, ঠিতত্তা সন্তুসিতো, সন্তুসিতত্তা নো পরিতস্সতি. অযং, ভন্তে আনন্দ, সমাধি কিংফলো ৰুত্তো ভগৰতা’’’তি?

‘‘এৰং ৰুত্তে, সোহং, আৰুসো, জটিলৰাসিকং ভিক্খুনিং এতদৰোচং – ‘যাযং, ভগিনি, সমাধি ন চাভিনতো ন চাপনতো ন চ সসঙ্খারনিগ্গয্হৰারিতগতো, ৰিমুত্তত্তা ঠিতো, ঠিতত্তা সন্তুসিতো, সন্তুসিতত্তা নো পরিতস্সতি. অযং, ভগিনি, সমাধি অঞ্ঞাফলো ৰুত্তো ভগৰতা’তি. এৰংসঞ্ঞীপি খো, আৰুসো, তদাযতনং নো পটিসংৰেদেতী’’তি. ছট্ঠং.

৭. লোকাযতিকসুত্তং

৩৮. অথ খো দ্ৰে লোকাযতিকা ব্রাহ্মণা যেন ভগৰা তেনুপসঙ্কমিংসু; উপসঙ্কমিত্ৰা ভগৰতা সদ্ধিং সম্মোদিংসু. সম্মোদনীযং কথং সারণীযং ৰীতিসারেত্ৰা একমন্তং নিসীদিংসু. একমন্তং নিসিন্না খো তে ব্রাহ্মণা ভগৰন্তং এতদৰোচুং –

‘‘পূরণো, ভো গোতম, কস্সপো সব্বঞ্ঞূ সব্বদস্সাৰী অপরিসেসং ঞাণদস্সনং পটিজানাতি – ‘চরতো চ মে তিট্ঠতো চ সুত্তস্স চ জাগরস্স ¶ চ সততং সমিতং ঞাণদস্সনং ¶ পচ্চুপট্ঠিত’ন্তি. সো এৰমাহ – ‘অহং অনন্তেন ঞাণেন অনন্তং লোকং জানং পস্সং ¶ ৰিহরামী’তি. অযম্পি ¶ [অযম্পি হি (স্যা. ক.)], ভো গোতম, নিগণ্ঠো নাটপুত্তো সব্বঞ্ঞূ সব্বদস্সাৰী অপরিসেসং ঞাণদস্সনং পটিজানাতি – ‘চরতো চ মে তিট্ঠতো চ সুত্তস্স চ জাগরস্স চ সততং সমিতং ঞাণদস্সনং পচ্চুপট্ঠিত’ন্তি. সো [সোপি (?)] এৰমাহ – ‘অহং অনন্তেন ঞাণেন অনন্তং লোকং জানং পস্সং ৰিহরামী’তি. ইমেসং, ভো গোতম, উভিন্নং ঞাণৰাদানং উভিন্নং অঞ্ঞমঞ্ঞং ৰিপচ্চনীকৰাদানং কো সচ্চং আহ কো মুসা’’তি?

‘‘অলং, ব্রাহ্মণা! তিট্ঠতেতং – ‘ইমেসং উভিন্নং ঞাণৰাদানং উভিন্নং অঞ্ঞমঞ্ঞং ৰিপচ্চনীকৰাদানং কো সচ্চং আহ কো মুসা’তি. ধম্মং ৰো, ব্রাহ্মণা, দেসেস্সামি, তং সুণাথ, সাধুকং মনসি করোথ; ভাসিস্সামী’’তি. ‘‘এৰং, ভো’’তি খো তে ব্রাহ্মণা ভগৰতো পচ্চস্সোসুং. ভগৰা এতদৰোচ –

‘‘সেয্যথাপি, ব্রাহ্মণা, চত্তারো পুরিসা চতুদ্দিসা ঠিতা পরমেন জৰেন চ সমন্নাগতা পরমেন চ পদৰীতিহারেন. তে এৰরূপেন জৰেন সমন্নাগতা অস্সু, সেয্যথাপি নাম দল়্হধম্মা [দল়্হধম্মো (সব্বত্থ) অ. নি. ৪.৪৫; ম. নি. ১.১১৬ চ, তংসংৰণ্ণনাটীকাযো চ মোগ্গল্লানব্যাকরণঞ্চ ওলোকেতব্বা] ধনুগ্গহো সিক্খিতো কতহত্থো কতূপাসনো লহুকেন অসনেন অপ্পকসিরেন তিরিযং তালচ্ছাযং [তালচ্ছাতিং (সী. স্যা. পী.), তালচ্ছাদিং (ক.) অ. নি. ৪.৪৫; ম. নি. ১.১৬১ পস্সিতব্বং] অতিপাতেয্য; এৰরূপেন চ পদৰীতিহারেন, সেয্যথাপি নাম পুরত্থিমা সমুদ্দা পচ্ছিমো সমুদ্দো অথ পুরত্থিমায দিসায ঠিতো পুরিসো এৰং ৰদেয্য – ‘অহং গমনেন লোকস্স অন্তং পাপুণিস্সামী’তি. সো অঞ্ঞত্রেৰ অসিতপীতখাযিতসাযিতা অঞ্ঞত্র উচ্চারপস্সাৰকম্মা অঞ্ঞত্র নিদ্দাকিলমথপটিৰিনোদনা ¶ ৰস্সসতাযুকো ৰস্সসতজীৰী ৰস্সসতং গন্ত্ৰা অপ্পত্ৰাৰ লোকস্স অন্তং অন্তরা কালং ¶ করেয্য. অথ পচ্ছিমায দিসায…পে… অথ উত্তরায দিসায… অথ দক্খিণায দিসায ঠিতো পুরিসো এৰং ৰদেয্য – ‘অহং গমনেন লোকস্স অন্তং পাপুণিস্সামী’তি. সো অঞ্ঞত্রেৰ অসিতপীতখাযিতসাযিতা অঞ্ঞত্র উচ্চারপস্সাৰকম্মা অঞ্ঞত্র ¶ নিদ্দাকিলমথপটিৰিনোদনা ৰস্সসতাযুকো ৰস্সসতজীৰী ৰস্সসতং গন্ত্ৰা অপ্পত্ৰাৰ লোকস্স অন্তং অন্তরা কালং করেয্য. তং কিস্স হেতু? নাহং, ব্রাহ্মণা, এৰরূপায সন্ধাৰনিকায লোকস্স অন্তং ঞাতেয্যং দট্ঠেয্যং পত্তেয্যন্তি ৰদামি. ন চাহং, ব্রাহ্মণা, অপ্পত্ৰাৰ লোকস্স অন্তং দুক্খস্স অন্তকিরিযং ৰদামি.

‘‘পঞ্চিমে, ব্রাহ্মণা, কামগুণা অরিযস্স ৰিনযে লোকোতি ৰুচ্চতি. কতমে পঞ্চ? চক্খুৰিঞ্ঞেয্যা ¶ রূপা ইট্ঠা কন্তা মনাপা পিযরূপা কামূপসংহিতা রজনীযা; সোতৰিঞ্ঞেয্যা সদ্দা…পে… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা; ইমে খো, ব্রাহ্মণা, পঞ্চ কামগুণা অরিযস্স ৰিনযে লোকোতি ৰুচ্চতি.

‘‘ইধ, ব্রাহ্মণা, ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. অযং ৰুচ্চতি, ব্রাহ্মণা, ‘ভিক্খু লোকস্স অন্তমাগম্ম, লোকস্স অন্তে ৰিহরতি’. তমঞ্ঞে এৰমাহংসু – ‘অযম্পি ¶ লোকপরিযাপন্নো, অযম্পি অনিস্সটো লোকম্হা’তি. অহম্পি হি [অহম্পি (সী. পী.)], ব্রাহ্মণা, এৰং ৰদামি – ‘অযম্পি লোকপরিযাপন্নো, অযম্পি অনিস্সটো লোকম্হা’’’তি.

‘‘পুন ¶ চপরং, ব্রাহ্মণা, ভিক্খু ৰিতক্কৰিচারানং ৰূপসমা…পে… দুতিযং ঝানং… ততিযং ঝানং… চতুত্থং ঝানং উপসম্পজ্জ ৰিহরতি. অযং ৰুচ্চতি, ব্রাহ্মণা, ‘ভিক্খু লোকস্স অন্তমাগম্ম লোকস্স অন্তে ৰিহরতি’. তমঞ্ঞে এৰমাহংসু – ‘অযম্পি লোকপরিযাপন্নো, অযম্পি অনিস্সটো লোকম্হা’তি. অহম্পি হি, ব্রাহ্মণা, এৰং ৰদামি – ‘অযম্পি লোকপরিযাপন্নো, অযম্পি অনিস্সটো লোকম্হা’’’তি.

‘‘পুন চপরং, ব্রাহ্মণা, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. অযং ৰুচ্চতি, ব্রাহ্মণা, ‘ভিক্খু লোকস্স অন্তমাগম্ম লোকস্স অন্তে ৰিহরতি’. তমঞ্ঞে এৰমাহংসু – ‘অযম্পি লোকপরিযাপন্নো, অযম্পি অনিস্সটো লোকম্হা’তি ¶ . অহম্পি হি, ব্রাহ্মণা, এৰং ৰদামি – ‘অযম্পি লোকপরিযাপন্নো, অযম্পি অনিস্সটো লোকম্হা’’’তি.

‘‘পুন চপরং, ব্রাহ্মণা, ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ¶ ৰিঞ্ঞাণঞ্চাযতনং উপসম্পজ্জ ৰিহরতি…পে… সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি…পে… সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি. অযং ৰুচ্চতি, ব্রাহ্মণা ¶ , ‘ভিক্খু লোকস্স অন্তমাগম্ম লোকস্স অন্তে ৰিহরতি’. তমঞ্ঞে এৰমাহংসু – ‘অযম্পি লোকপরিযাপন্নো, অযম্পি অনিস্সটো লোকম্হা’তি. অহম্পি হি, ব্রাহ্মণা, এৰং ৰদামি – ‘অযম্পি লোকপরিযাপন্নো, অযম্পি অনিস্সটো লোকম্হা’’’তি.

‘‘পুন চপরং, ব্রাহ্মণা, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. অযং ৰুচ্চতি, ব্রাহ্মণা, ‘ভিক্খু লোকস্স ¶ অন্তমাগম্ম লোকস্স অন্তে ৰিহরতি তিণ্ণো লোকে ৰিসত্তিক’’’ন্তি. সত্তমং.

৮. দেৰাসুরসঙ্গামসুত্তং

৩৯. ‘‘ভূতপুব্বং, ভিক্খৰে, দেৰাসুরসঙ্গামো সমুপব্যূল়্হো [সমুপব্বূল়্হো (সী. পী.)] অহোসি. তস্মিং খো পন, ভিক্খৰে, সঙ্গামে অসুরা জিনিংসু, দেৰা পরাজযিংসু [পরাজিযিংসু (সী. স্যা. ক.)]. পরাজিতা চ, ভিক্খৰে, দেৰা [দেৰা ভীতা (পী.)] অপযিংসুযেৰ [অপযংস্ৰেৰ (সী.)] উত্তরেনাভিমুখা, অভিযিংসু [অভিযংসু (সী.)] অসুরা. অথ খো, ভিক্খৰে, দেৰানং এতদহোসি – ‘অভিযন্তেৰ খো অসুরা. যংনূন মযং দুতিযম্পি অসুরেহি সঙ্গামেয্যামা’তি. দুতিযম্পি খো, ভিক্খৰে, দেৰা অসুরেহি সঙ্গামেসুং. দুতিযম্পি খো, ভিক্খৰে, অসুরাৰ জিনিংসু, দেৰা পরাজযিংসু. পরাজিতা চ, ভিক্খৰে, দেৰা অপযিংসুযেৰ উত্তরেনাভিমুখা, অভিযিংসু অসুরা’’.

অথ খো, ভিক্খৰে, দেৰানং এতদহোসি – ‘অভিযন্তেৰ খো অসুরা. যংনূন মযং ততিযম্পি অসুরেহি সঙ্গামেয্যামা’তি. ততিযম্পি খো, ভিক্খৰে, ¶ দেৰা অসুরেহি সঙ্গামেসুং. ততিযম্পি খো ¶ , ভিক্খৰে, অসুরাৰ জিনিংসু, দেৰা পরাজযিংসু. পরাজিতা চ, ভিক্খৰে, দেৰা ভীতা দেৰপুরংযেৰ পৰিসিংসু. দেৰপুরগতানঞ্চ পন [পুন (ক.)], ভিক্খৰে, দেৰানং এতদহোসি – ‘ভীরুত্তানগতেন খো দানি মযং এতরহি ¶ অত্তনা ৰিহরাম অকরণীযা অসুরেহী’তি. অসুরানম্পি, ভিক্খৰে, এতদহোসি – ‘ভীরুত্তানগতেন খো দানি দেৰা এতরহি অত্তনা ৰিহরন্তি অকরণীযা অম্হেহী’তি.

‘‘ভূতপুব্বং ¶ , ভিক্খৰে, দেৰাসুরসঙ্গামো সমুপব্যূল়্হো অহোসি. তস্মিং খো পন, ভিক্খৰে, সঙ্গামে দেৰা জিনিংসু, অসুরা পরাজযিংসু. পরাজিতা চ, ভিক্খৰে, অসুরা অপযিংসুযেৰ দক্খিণেনাভিমুখা, অভিযিংসু দেৰা. অথ খো, ভিক্খৰে, অসুরানং এতদহোসি – ‘অভিযন্তেৰ খো দেৰা. যংনূন মযং দুতিযম্পি দেৰেহি সঙ্গামেয্যামা’তি. দুতিযম্পি খো, ভিক্খৰে, অসুরা দেৰেহি সঙ্গামেসুং. দুতিযম্পি খো, ভিক্খৰে, দেৰা জিনিংসু, অসুরা পরাজযিংসু. পরাজিতা চ, ভিক্খৰে, অসুরা অপযিংসুযেৰ দক্খিণেনাভিমুখা, অভিযিংসু দেৰা’’.

অথ খো, ভিক্খৰে, অসুরানং এতদহোসি – ‘অভিযন্তেৰ খো দেৰা. যংনূন মযং ততিযম্পি দেৰেহি সঙ্গামেয্যামা’তি. ততিযম্পি খো, ভিক্খৰে, অসুরা দেৰেহি সঙ্গামেসুং. ততিযম্পি খো, ভিক্খৰে, দেৰা জিনিংসু, অসুরা পরাজযিংসু. পরাজিতা চ, ভিক্খৰে, অসুরা ভীতা অসুরপুরংযেৰ পৰিসিংসু. অসুরপুরগতানঞ্চ পন, ভিক্খৰে, অসুরানং এতদহোসি – ‘ভীরুত্তানগতেন খো দানি মযং এতরহি অত্তনা ৰিহরাম অকরণীযা ¶ দেৰেহী’তি. দেৰানম্পি, ভিক্খৰে, এতদহোসি – ‘ভীরুত্তানগতেন খো দানি অসুরা এতরহি অত্তনা ৰিহরন্তি অকরণীযা অম্হেহী’তি.

‘‘এৰমেৰং খো, ভিক্খৰে, যস্মিং সমযে ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি, তস্মিং, ভিক্খৰে, সমযে ভিক্খুস্স এৰং হোতি – ‘ভীরুত্তানগতেন খো দানাহং এতরহি অত্তনা ৰিহরামি ¶ অকরণীযো মারস্সা’তি ¶ . মারস্সাপি, ভিক্খৰে, পাপিমতো এৰং হোতি – ‘ভীরুত্তানগতেন খো দানি ভিক্খু এতরহি অত্তনা ৰিহরতি অকরণীযো ময্হ’’’ন্তি.

‘‘যস্মিং, ভিক্খৰে, সমযে ভিক্খু ৰিতক্কৰিচারানং ৰূপসমা…পে… দুতিযং ঝানং… ততিযং ঝানং… চতুত্থং ঝানং উপসম্পজ্জ ৰিহরতি, তস্মিং, ভিক্খৰে, সমযে ¶ ভিক্খুস্স এৰং হোতি – ‘ভীরুত্তানগতেন খো দানাহং এতরহি অত্তনা ৰিহরামি অকরণীযো মারস্সা’তি. মারস্সাপি, ভিক্খৰে, পাপিমতো এৰং হোতি – ‘ভীরুত্তানগতেন খো দানি ভিক্খু এতরহি অত্তনা ৰিহরতি, অকরণীযো ময্হ’’’ন্তি.

‘‘যস্মিং, ভিক্খৰে, সমযে ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. অযং ৰুচ্চতি, ভিক্খৰে, ‘ভিক্খু অন্তমকাসি মারং, অপদং ৰধিত্ৰা মারচক্খুং অদস্সনং গতো পাপিমতো তিণ্ণো লোকে ৰিসত্তিক’’’ন্তি.

‘‘যস্মিং, ভিক্খৰে, সমযে ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং উপসম্পজ্জ ৰিহরতি… সব্বসো ৰিঞ্ঞাণঞ্চাযতনং সমতিক্কম্ম ‘নত্থি ¶ কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি… সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি… সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. অযং ৰুচ্চতি, ভিক্খৰে, ‘ভিক্খু অন্তমকাসি মারং, অপদং ৰধিত্ৰা মারচক্খুং অদস্সনং গতো পাপিমতো তিণ্ণো লোকে ৰিসত্তিক’’’ন্তি. অট্ঠমং.

৯. নাগসুত্তং

৪০. ‘‘যস্মিং ¶ , ভিক্খৰে, সমযে আরঞ্ঞিকস্স নাগস্স গোচরপসুতস্স হত্থীপি হত্থিনিযোপি হত্থিকলভাপি হত্থিচ্ছাপাপি পুরতো পুরতো গন্ত্ৰা তিণগ্গানি ছিন্দন্তি, তেন, ভিক্খৰে, আরঞ্ঞিকো নাগো অট্টীযতি হরাযতি জিগুচ্ছতি. যস্মিং, ভিক্খৰে, সমযে আরঞ্ঞিকস্স নাগস্স গোচরপসুতস্স হত্থীপি হত্থিনিযোপি হত্থিকলভাপি হত্থিচ্ছাপাপি ওভগ্গোভগ্গং সাখাভঙ্গং খাদন্তি, তেন, ভিক্খৰে, আরঞ্ঞিকো নাগো অট্টীযতি হরাযতি জিগুচ্ছতি. যস্মিং ¶ , ভিক্খৰে, সমযে আরঞ্ঞিকস্স নাগস্স ওগাহং ওতিণ্ণস্স হত্থীপি হত্থিনিযোপি হত্থিকলভাপি হত্থিচ্ছাপাপি পুরতো পুরতো গন্ত্ৰা সোণ্ডায উদকং আলোল়েন্তি, তেন, ভিক্খৰে, আরঞ্ঞিকো নাগো অট্টীযতি হরাযতি জিগুচ্ছতি. যস্মিং, ভিক্খৰে, সমযে আরঞ্ঞিকস্স ¶ নাগস্স ওগাহা উত্তিণ্ণস্স হত্থিনিযো কাযং উপনিঘংসন্তিযো গচ্ছন্তি, তেন, ভিক্খৰে, আরঞ্ঞিকো নাগো অট্টীযতি হরাযতি জিগুচ্ছতি.

‘‘তস্মিং, ভিক্খৰে, সমযে আরঞ্ঞিকস্স নাগস্স এৰং হোতি – ‘অহং খো এতরহি আকিণ্ণো ৰিহরামি হত্থীহি হত্থিনীহি হত্থিকলভেহি হত্থিচ্ছাপেহি ¶ . ছিন্নগ্গানি চেৰ তিণানি খাদামি, ওভগ্গোভগ্গঞ্চ মে সাখাভঙ্গং খাদন্তি [খাদিতং (স্যা. ক.) মহাৰ. ৪৬৭ পস্সিতব্বং], আৰিলানি চ পানীযানি পিৰামি, ওগাহা চ [ওগাহাপি চ (স্যা. ক.) মহাৰ. ৪৬৭ পস্সিতব্বং] মে উত্তিণ্ণস্স হত্থিনিযো কাযং উপনিঘংসন্তিযো গচ্ছন্তি. যংনূনাহং একো গণস্মা ৰূপকট্ঠো ৰিহরেয্য’ন্তি. সো অপরেন সমযেন একো গণস্মা ৰূপকট্ঠো ৰিহরতি, অচ্ছিন্নগ্গানি চেৰ তিণানি খাদতি, ওভগ্গোভগ্গঞ্চস্স সাখাভঙ্গং ¶ ন খাদন্তি [ন ওভগ্গোভগ্গঞ্চ সাখাভঙ্গ খাদতি (স্যা. ক.)], অনাৰিলানি চ পানীযানি পিৰতি, ওগাহা চস্স উত্তিণ্ণস্স ন হত্থিনিযো কাযং উপনিঘংসন্তিযো গচ্ছন্তি.

‘‘তস্মিং, ভিক্খৰে, সমযে আরঞ্ঞিকস্স নাগস্স এৰং হোতি – ‘অহং খো পুব্বে আকিণ্ণো ৰিহাসিং হত্থীহি হত্থিনীহি হত্থিকলভেহি হত্থিচ্ছাপেহি, ছিন্নগ্গানি চেৰ তিণানি খাদিং, ওভগ্গোভগ্গঞ্চ মে সাখাভঙ্গং খাদিংসু, আৰিলানি চ পানীযানি অপাযিং, ওগাহা [এত্থ পিসদ্দো সব্বত্থপি নত্থি] চ মে উত্তিণ্ণস্স হত্থিনিযো কাযং উপনিঘংসন্তিযো অগমংসু. সোহং এতরহি একো গণস্মা ৰূপকট্ঠো ৰিহরামি, অচ্ছিন্নগ্গানি চেৰ তিণানি খাদামি, ওভগ্গোভগ্গঞ্চ মে সাখাভঙ্গং ন খাদন্তি, অনাৰিলানি চ পানীযানি পিৰামি, ওগাহা চ মে উত্তিণ্ণস্স ন হত্থিনিযো কাযং উপনিঘংসন্তিযো গচ্ছন্তী’তি. সো সোণ্ডায সাখাভঙ্গং ভঞ্জিত্ৰা সাখাভঙ্গেন কাযং পরিমজ্জিত্ৰা অত্তমনো সোণ্ডং সংহরতি [কণ্ডুং সংহন্তি (সী. পী.) কণ্ডুং সংহনতি (স্যা.), এত্থ কণ্ডুৰনদুক্খং ৰিনেতীতি অত্থো],.

‘‘এৰমেৰং খো, ভিক্খৰে, যস্মিং সমযে ভিক্খু আকিণ্ণো ৰিহরতি ভিক্খূহি ভিক্খুনীহি উপাসকেহি উপাসিকাহি রঞ্ঞা রাজমহামত্তেহি তিত্থিযেহি ¶ তিত্থিযসাৰকেহি, তস্মিং, ভিক্খৰে, সমযে ভিক্খুস্স এৰং হোতি – ‘অহং খো এতরহি আকিণ্ণো ৰিহরামি ভিক্খূহি ভিক্খুনীহি উপাসকেহি ¶ উপাসিকাহি রঞ্ঞা রাজমহামত্তেহি তিত্থিযেহি তিত্থিযসাৰকেহি. যংনূনাহং একো গণস্মা ৰূপকট্ঠো ৰিহরেয্য’ন্তি. সো ৰিৰিত্তং সেনাসনং ভজতি অরঞ্ঞং রুক্খমূলং ¶ পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং ¶ . সো অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা নিসীদতি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা.

‘‘সো অভিজ্ঝং লোকে পহায ৰিগতাভিজ্ঝেন চেতসা ৰিহরতি, অভিজ্ঝায চিত্তং পরিসোধেতি; ব্যাপাদপদোসং পহায অব্যাপন্নচিত্তো ৰিহরতি সব্বপাণভূতহিতানুকম্পী, ব্যাপাদপদোসা চিত্তং পরিসোধেতি; থিনমিদ্ধং পহায ৰিগতথিনমিদ্ধো ৰিহরতি আলোকসঞ্ঞী সতো সম্পজানো, থিনমিদ্ধা চিত্তং পরিসোধেতি; উদ্ধচ্চকুক্কুচ্চং পহায অনুদ্ধতো ৰিহরতি অজ্ঝত্তং ৰূপসন্তচিত্তো, উদ্ধচ্চকুক্কুচ্চা চিত্তং পরিসোধেতি; ৰিচিকিচ্ছং পহায তিণ্ণৰিচিকিচ্ছো ৰিহরতি অকথংকথী কুসলেসু ধম্মেসু, ৰিচিকিচ্ছায চিত্তং পরিসোধেতি. সো ইমে পঞ্চ নীৰরণে পহায চেতসো উপক্কিলেসে পঞ্ঞায দুব্বলীকরণে ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. সো অত্তমনো সোণ্ডং সংহরতি [কণ্ডুং সংহন্তি (সী. পী.), কণ্ডুং সংহনতি (স্যা.), এত্থ কণ্ডুৰনসদিসং ঝানপটিপক্খং কিলেসদুক্খং ৰিনেতীতি অত্থো]. ৰিতক্কৰিচারানং ৰূপসমা…পে… দুতিযং ঝানং… ততিযং ঝানং… চতুত্থং ঝানং উপসম্পজ্জ ৰিহরতি. সো অত্তমনো সোণ্ডং সংহরতি.

‘‘সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. সো অত্তমনো সোণ্ডং ¶ সংহরতি. সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং উপসম্পজ্জ ৰিহরতি… সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি… সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি… সব্বসো নেৰসঞ্ঞানাসঞ্ঞাযতনং ¶ ¶ সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. সো অত্তমনো সোণ্ডং সংহরতী’’তি. নৰমং.

১০. তপুস্সসুত্তং

৪১. একং ¶ সমযং ভগৰা মল্লেসু ৰিহরতি উরুৰেলকপ্পং নাম মল্লানং নিগমো. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায উরুৰেলকপ্পং পিণ্ডায পাৰিসি. উরুৰেলকপ্পে পিণ্ডায চরিত্ৰা পচ্ছাভত্তং পিণ্ডপাতপটিক্কন্তো আযস্মন্তং আনন্দং আমন্তেসি – ‘‘ইধেৰ তাৰ ত্ৰং, আনন্দ, হোহি, যাৰাহং মহাৰনং অজ্ঝোগাহামি দিৰাৰিহারাযা’’তি. ‘‘এৰং, ভন্তে’’তি খো আযস্মা আনন্দো ভগৰতো পচ্চস্সোসি. অথ খো ভগৰা মহাৰনং অজ্ঝোগাহেত্ৰা অঞ্ঞতরস্মিং রুক্খমূলে দিৰাৰিহারং নিসীদি.

অথ খো তপুস্সো গহপতি যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মন্তং আনন্দং অভিৰাদেত্ৰা একমন্তং নিসীদি. একমন্তং নিসিন্নো খো তপুস্সো গহপতি আযস্মন্তং আনন্দং এতদৰোচ –

‘‘মযং, ভন্তে আনন্দ, গিহী কামভোগিনো কামারামা কামরতা কামসম্মুদিতা. তেসং নো, ভন্তে, অম্হাকং গিহীনং কামভোগীনং কামারামানং কামরতানং কামসম্মুদিতানং ¶ পপাতো ৰিয খাযতি, যদিদং নেক্খম্মং. সুতং মেতং, ভন্তে, ‘ইমস্মিং ধম্মৰিনযে দহরানং দহরানং ভিক্খূনং নেক্খম্মে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি পস্সতো’ [পস্সতং (?)]. তযিদং, ভন্তে, ইমস্মিং ধম্মৰিনযে ভিক্খূনং বহুনা জনেন ৰিসভাগো, যদিদং নেক্খম্ম’’ন্তি.

‘‘অত্থি ¶ খো এতং, গহপতি, কথাপাভতং ভগৰন্তং দস্সনায. আযাম, গহপতি, যেন ভগৰা তেনুপসঙ্কমিস্সাম; উপসঙ্কমিত্ৰা ভগৰতো এতমত্থং আরোচেস্সাম. যথা নো ভগৰা ব্যাকরিস্সতি তথা নং ধারেস্সামা’’তি.

‘‘এৰং, ভন্তে’’তি খো তপুস্সো গহপতি আযস্মতো আনন্দস্স পচ্চস্সোসি. অথ খো আযস্মা আনন্দো তপুস্সেন গহপতিনা সদ্ধিং ¶ যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ –

‘‘অযং ¶ , ভন্তে, তপুস্সো গহপতি এৰমাহ – ‘মযং, ভন্তে আনন্দ, গিহী কামভোগিনো কামারামা কামরতা কামসম্মুদিতা, তেসং নো ভন্তে, অম্হাকং গিহীনং কামভোগীনং কামারামানং কামরতানং কামসম্মুদিতানং পপাতো ৰিয খাযতি, যদিদং নেক্খম্মং’. সুতং মেতং, ভন্তে, ‘ইমস্মিং ধম্মৰিনযে দহরানং দহরানং ভিক্খূনং নেক্খম্মে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি পস্সতো. তযিদং, ভন্তে, ইমস্মিং ধম্মৰিনযে ভিক্খূনং বহুনা জনেন ৰিসভাগো যদিদং নেক্খম্ম’’’ন্তি.

‘‘এৰমেতং, আনন্দ, এৰমেতং, আনন্দ! ময্হম্পি খো, আনন্দ, পুব্বেৰ সম্বোধা অনভিসম্বুদ্ধস্স বোধিসত্তস্সেৰ সতো এতদহোসি – ‘সাধু নেক্খম্মং ¶ , সাধু পৰিৰেকো’তি. তস্স ময্হং, আনন্দ, নেক্খম্মে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে নেক্খম্মে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘কামেসু খো মে আদীনৰো অদিট্ঠো, সো চ মে অবহুলীকতো, নেক্খম্মে চ আনিসংসো অনধিগতো, সো চ মে অনাসেৰিতো ¶ . তস্মা মে নেক্খম্মে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং কামেসু আদীনৰং দিস্ৰা তং বহুলং করেয্যং [বহুলীকরেয্যং (সী. স্যা. পী.)], নেক্খম্মে আনিসংসং অধিগম্ম তমাসেৰেয্যং, ঠানং খো পনেতং ৰিজ্জতি যং মে নেক্খম্মে চিত্তং পক্খন্দেয্য পসীদেয্য সন্তিট্ঠেয্য ৰিমুচ্চেয্য এতং সন্তন্তি পস্সতো’. সো খো অহং, আনন্দ, অপরেন সমযেন কামেসু আদীনৰং দিস্ৰা তং বহুলমকাসিং, নেক্খম্মে আনিসংসং অধিগম্ম তমাসেৰিং. তস্স ময্হং, আনন্দ, নেক্খম্মে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি পস্সতো. সো খো অহং, আনন্দ, ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরামি. তস্স ময্হং, আনন্দ, ইমিনা ৰিহারেন ৰিহরতো কামসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো ¶ . সেয্যথাপি, আনন্দ, সুখিনো দুক্খং উপ্পজ্জেয্য ¶ যাৰদেৰ আবাধায; এৰমেৰস্স মে কামসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং ৰিতক্কৰিচারানং ৰূপসমা…পে… দুতিযং ¶ ঝানং উপসম্পজ্জ ৰিহরেয্য’ন্তি. তস্স ময্হং, আনন্দ, অৰিতক্কে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে অৰিতক্কে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘ৰিতক্কেসু খো মে আদীনৰো অদিট্ঠো, সো চ মে অবহুলীকতো, অৰিতক্কে চ আনিসংসো অনধিগতো, সো চ ¶ মে অনাসেৰিতো. তস্মা মে অৰিতক্কে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং ৰিতক্কেসু আদীনৰং দিস্ৰা তং বহুলং করেয্যং, অৰিতক্কে আনিসংসং অধিগম্ম তমাসেৰেয্যং, ঠানং খো পনেতং ৰিজ্জতি যং মে অৰিতক্কে চিত্তং পক্খন্দেয্য পসীদেয্য সন্তিট্ঠেয্য ৰিমুচ্চেয্য এতং সন্তন্তি পস্সতো’. সো খো অহং, আনন্দ, অপরেন সমযেন ৰিতক্কেসু আদীনৰং দিস্ৰা তং বহুলমকাসিং, অৰিতক্কে আনিসংসং অধিগম্ম তমাসেৰিং. তস্স ময্হং, আনন্দ, অৰিতক্কে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি পস্সতো. সো খো অহং, আনন্দ, ৰিতক্কৰিচারানং ৰূপসমা…পে… দুতিযং ঝানং উপসম্পজ্জ ¶ ৰিহরামি. তস্স ময্হং, আনন্দ, ইমিনা ৰিহারেন ৰিহরতো ৰিতক্কসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স মে ৰিতক্কসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং পীতিযা চ ৰিরাগা উপেক্খকো চ ৰিহরেয্যং সতো চ সম্পজানো সুখঞ্চ কাযেন পটিসংৰেদেয্যং যং তং অরিযা আচিক্খন্তি – উপেক্খকো সতিমা সুখৰিহারীতি ততিযং ঝানং উপসম্পজ্জ ৰিহরেয্য’ন্তি. তস্স ময্হং, আনন্দ, নিপ্পীতিকে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো ¶ , যেন মে নিপ্পীতিকে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘পীতিযা খো মে আদীনৰো অদিট্ঠো, সো চ মে অবহুলীকতো, নিপ্পীতিকে চ আনিসংসো অনধিগতো, সো চ মে অনাসেৰিতো. তস্মা মে নিপ্পীতিকে চিত্তং ন পক্খন্দতি নপ্পসীদতি ন সন্তিট্ঠতি ¶ ন ৰিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং পীতিযা আদীনৰং দিস্ৰা তং ¶ বহুলং করেয্যং, নিপ্পীতিকে আনিসংসং অধিগম্ম তমাসেৰেয্যং, ঠানং খো পনেতং ৰিজ্জতি যং মে নিপ্পীতিকে চিত্তং পক্খন্দেয্য পসীদেয্য সন্তিট্ঠেয্য ৰিমুচ্চেয্য এতং সন্তন্তি পস্সতো’. সো খো অহং, আনন্দ, অপরেন সমযেন পীতিযা আদীনৰং দিস্ৰা তং বহুলমকাসিং, নিপ্পীতিকে আনিসংসং অধিগম্ম তমাসেৰিং. তস্স ময্হং, আনন্দ, নিপ্পীতিকে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি পস্সতো. সো ¶ খো অহং, আনন্দ, পীতিযা চ ৰিরাগা…পে… ততিযং ঝানং উপসম্পজ্জ ৰিহরামি. তস্স ময্হং, আনন্দ, ইমিনা ৰিহারেন ৰিহরতো পীতিসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স মে পীতিসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরেয্য’ন্তি. তস্স ময্হং, আনন্দ, অদুক্খমসুখে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে অদুক্খমসুখে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘উপেক্খাসুখে খো মে আদীনৰো অদিট্ঠো, সো চ মে অবহুলীকতো, অদুক্খমসুখে চ আনিসংসো অনধিগতো, সো চ মে অনাসেৰিতো. তস্মা মে অদুক্খমসুখে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং ¶ সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং উপেক্খাসুখে আদীনৰং দিস্ৰা তং ¶ বহুলং করেয্যং, অদুক্খমসুখে আনিসংসং অধিগম্ম তমাসেৰেয্যং, ঠানং ¶ খো পনেতং ৰিজ্জতি যং মে অদুক্খমসুখে চিত্তং পক্খন্দেয্য পসীদেয্য সন্তিট্ঠেয্য ৰিমুচ্চেয্য এতং সন্তন্তি পস্সতো’. সো খো অহং, আনন্দ, অপরেন সমযেন উপেক্খাসুখে আদীনৰং দিস্ৰা তং বহুলমকাসিং অদুক্খমসুখে আনিসংসং অধিগম্ম তমাসেৰিং. তস্স ময্হং, আনন্দ, অদুক্খমসুখে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি পস্সতো. সো খো অহং, আনন্দ, সুখস্স চ পহানা…পে… ¶ চতুত্থং ঝানং উপসম্পজ্জ ৰিহরামি. তস্স ময্হং, আনন্দ, ইমিনা ৰিহারেন ৰিহরতো উপেক্খাসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স মে উপেক্খাসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘‘অনন্তো আকাসো’’তি আকাসানঞ্চাযতনং উপসম্পজ্জ ৰিহরেয্য’ন্তি. তস্স ময্হং, আনন্দ, আকাসানঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন ¶ মে আকাসানঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘রূপেসু খো মে আদীনৰো অদিট্ঠো, সো চ অবহুলীকতো, আকাসানঞ্চাযতনে চ আনিসংসো অনধিগতো, সো চ মে অনাসেৰিতো. তস্মা মে আকাসানঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি ¶ পস্সতো’. তস্স ময্হং, আনন্দ, এতদহোসি – ‘সচে খো অহং রূপেসু আদীনৰং দিস্ৰা তং বহুলং করেয্যং, আকাসানঞ্চাযতনে আনিসংসং অধিগম্ম তমাসেৰেয্যং, ঠানং খো পনেতং ৰিজ্জতি যং মে আকাসানঞ্চাযতনে চিত্তং পক্খন্দেয্য পসীদেয্য সন্তিট্ঠেয্য ৰিমুচ্চেয্য এতং সন্তন্তি পস্সতো’. সো খো অহং, আনন্দ, অপরেন সমযেন রূপেসু আদীনৰং দিস্ৰা তং বহুলমকাসিং, আকাসানঞ্চাযতনে আনিসংসং অধিগম্ম তমাসেৰিং. তস্স ময্হং, আনন্দ, আকাসানঞ্চাযতনে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি পস্সতো. সো খো অহং, আনন্দ, সব্বসো রূপসঞ্ঞানং সমতিক্কমা ¶ পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরামি. তস্স ময্হং, আনন্দ, ইমিনা ৰিহারেন ৰিহরতো রূপসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স মে রূপসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো.

‘‘তস্স ¶ ময্হং, আনন্দ, এতদহোসি – ‘যংনূনাহং সব্বসো আকাসানঞ্চাযতনং সমতিক্কম্ম ¶ ‘‘অনন্তং ৰিঞ্ঞাণ’’ন্তি ৰিঞ্ঞাণঞ্চাযতনং উপসম্পজ্জ ৰিহরেয্য’ন্তি. তস্স ময্হং, আনন্দ, ৰিঞ্ঞাণঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে ৰিঞ্ঞাণঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘আকাসানঞ্চাযতনে খো মে আদীনৰো অদিট্ঠো, সো চ অবহুলীকতো, ৰিঞ্ঞাণঞ্চাযতনে চ আনিসংসো অনধিগতো, সো চ মে অনাসেৰিতো. তস্মা মে ৰিঞ্ঞাণঞ্চাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং আকাসানঞ্চাযতনে আদীনৰং দিস্ৰা তং বহুলং ¶ করেয্যং, ৰিঞ্ঞাণঞ্চাযতনে আনিসংসং অধিগম্ম তমাসেৰেয্যং, ঠানং খো পনেতং ৰিজ্জতি যং মে ৰিঞ্ঞাণঞ্চাযতনে চিত্তং পক্খন্দেয্য পসীদেয্য সন্তিট্ঠেয্য ৰিমুচ্চেয্য এতং সন্তন্তি পস্সতো’. সো খো অহং, আনন্দ, অপরেন সমযেন আকাসানঞ্চাযতনে আদীনৰং দিস্ৰা তং বহুলমকাসিং, ৰিঞ্ঞাণঞ্চাযতনে আনিসংসং অধিগম্ম তমাসেৰিং. তস্স ময্হং, আনন্দ, ৰিঞ্ঞাণঞ্চাযতনে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি পস্সতো. সো খো অহং, আনন্দ, সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং ¶ উপসম্পজ্জ ৰিহরামি. তস্স ময্হং, আনন্দ, ইমিনা ৰিহারেন ৰিহরতো আকাসানঞ্চাযতনসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৰদেৰ আবাধায ¶ ; এৰমেৰস্স মে আকাসানঞ্চাযতনসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং সব্বসো ৰিঞ্ঞাণঞ্চাযতনং সমতিক্কম্ম নত্থি কিঞ্চীতি আকিঞ্চঞ্ঞাযতনং উপসম্পজ্জ ৰিহরেয্য’ন্তি. তস্স ময্হং, আনন্দ, আকিঞ্চঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু কো পচ্চযো, যেন মে আকিঞ্চঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘ৰিঞ্ঞাণঞ্চাযতনে খো মে আদীনৰো অদিট্ঠো, সো চ মে অবহুলীকতো, আকিঞ্চঞ্ঞাযতনে চ আনিসংসো অনধিগতো, সো চ মে অনাসেৰিতো. তস্মা মে আকিঞ্চঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ¶ ন ৰিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং ৰিঞ্ঞাণঞ্চাযতনে আদীনৰং দিস্ৰা তং বহুলং করেয্যং, আকিঞ্চঞ্ঞাযতনে আনিসংসং অধিগম্ম তমাসেৰেয্যং, ঠানং খো ¶ পনেতং ৰিজ্জতি যং মে আকিঞ্চঞ্ঞাযতনে ¶ চিত্তং পক্খন্দেয্য পসীদেয্য সন্তিট্ঠেয্য ৰিমুচ্চেয্য এতং সন্তন্তি পস্সতো’. সো খো অহং, আনন্দ, অপরেন সমযেন ৰিঞ্ঞাণঞ্চাযতনে আদীনৰং দিস্ৰা তং বহুলমকাসিং, আকিঞ্চঞ্ঞাযতনে আনিসংসং অধিগম্ম তমাসেৰিং. তস্স ময্হং, আনন্দ, আকিঞ্চঞ্ঞাযতনে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি পস্সতো. সো খো অহং, আনন্দ, সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরামি. তস্স ময্হং, আনন্দ, ইমিনা ৰিহারেন ৰিহরতো ৰিঞ্ঞাণঞ্চাযতনসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স মে ৰিঞ্ঞাণঞ্চাযতনসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরেয্য’ন্তি. তস্স ময্হং, আনন্দ, নেৰসঞ্ঞানাসঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি ¶ – ‘কো নু খো হেতু কো পচ্চযো, যেন মে নেৰসঞ্ঞানাসঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘আকিঞ্চঞ্ঞাযতনে খো মে আদীনৰো অদিট্ঠো, সো চ মে অবহুলীকতো, নেৰসঞ্ঞানাসঞ্ঞাযতনে ¶ চ আনিসংসো অনধিগতো, সো চ মে অনাসেৰিতো. তস্মা মে নেৰসঞ্ঞানাসঞ্ঞাযতনে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং আকিঞ্চঞ্ঞাযতনে আদীনৰং দিস্ৰা তং বহুলং করেয্যং, নেৰসঞ্ঞানাসঞ্ঞাযতনে আনিসংসং অধিগম্ম তমাসেৰেয্যং, ঠানং খো পনেতং ৰিজ্জতি যং মে নেৰসঞ্ঞানাসঞ্ঞাযতনে চিত্তং পক্খন্দেয্য পসীদেয্য সন্তিট্ঠেয্য ৰিমুচ্চেয্য এতং সন্তন্তি পস্সতো’. সো ¶ খো অহং, আনন্দ, অপরেন সমযেন আকিঞ্চঞ্ঞাযতনে আদীনৰং দিস্ৰা তং বহুলমকাসিং, নেৰসঞ্ঞানাসঞ্ঞাযতনে আনিসংসং অধিগম্ম তমাসেৰিং. তস্স ময্হং, আনন্দ, নেৰসঞ্ঞানাসঞ্ঞাযতনে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি ¶ পস্সতো. সো খো অহং, আনন্দ, সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরামি. তস্স ময্হং, আনন্দ, ইমিনা ৰিহারেন ৰিহরতো আকিঞ্চঞ্ঞাযতনসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো. সেয্যথাপি, আনন্দ, সুখিনো দুক্খং উপ্পজ্জেয্য যাৰদেৰ আবাধায; এৰমেৰস্স মে আকিঞ্চঞ্ঞাযতনসহগতা সঞ্ঞামনসিকারা সমুদাচরন্তি. স্ৰস্স মে হোতি আবাধো.

‘‘তস্স ময্হং, আনন্দ, এতদহোসি – ‘যংনূনাহং নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরেয্য’ন্তি. তস্স ¶ ময্হং, আনন্দ, সঞ্ঞাৰেদযিতনিরোধে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো. তস্স ময্হং, আনন্দ, এতদহোসি – ‘কো নু খো হেতু, কো পচ্চযো, যেন মে সঞ্ঞাৰেদযিতনিরোধে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’? তস্স ময্হং, আনন্দ, এতদহোসি – ‘নেৰসঞ্ঞানাসঞ্ঞাযতনে খো মে আদীনৰো অদিট্ঠো, সো চ মে অবহুলীকতো, সঞ্ঞাৰেদযিতনিরোধে চ আনিসংসো অনধিগতো, সো ¶ চ মে অনাসেৰিতো. তস্মা মে সঞ্ঞাৰেদযিতনিরোধে চিত্তং ন পক্খন্দতি নপ্পসীদতি ন সন্তিট্ঠতি ন ৰিমুচ্চতি এতং সন্তন্তি পস্সতো’. তস্স ময্হং, আনন্দ, এতদহোসি – ‘সচে খো অহং নেৰসঞ্ঞানাসঞ্ঞাযতনে আদীনৰং দিস্ৰা তং বহুলং করেয্যং, সঞ্ঞাৰেদযিতনিরোধে আনিসংসং অধিগম্ম তমাসেৰেয্যং, ঠানং খো পনেতং ৰিজ্জতি যং মে সঞ্ঞাৰেদযিতনিরোধে চিত্তং পক্খন্দেয্য পসীদেয্য সন্তিট্ঠেয্য ৰিমুচ্চেয্য এতং সন্তন্তি পস্সতো’. সো খো অহং, আনন্দ, অপরেন সমযেন নেৰসঞ্ঞানাসঞ্ঞাযতনে আদীনৰং দিস্ৰা তং বহুলমকাসিং ¶ , সঞ্ঞাৰেদযিতনিরোধে আনিসংসং অধিগম্ম তমাসেৰিং. তস্স ময্হং, আনন্দ, সঞ্ঞাৰেদযিতনিরোধে চিত্তং পক্খন্দতি পসীদতি সন্তিট্ঠতি ৰিমুচ্চতি এতং সন্তন্তি পস্সতো. সো খো অহং, আনন্দ, সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরামি, পঞ্ঞায চ মে দিস্ৰা আসৰা পরিক্খযং অগমংসু.

‘‘যাৰকীৰঞ্চাহং ¶ , আনন্দ, ইমা নৰ অনুপুব্বৰিহারসমাপত্তিযো ন এৰং অনুলোমপটিলোমং সমাপজ্জিম্পি ৰুট্ঠহিম্পি, নেৰ তাৰাহং, আনন্দ, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায ‘অনুত্তরং সম্মাসম্বোধিং অভিসম্বুদ্ধো’তি পচ্চঞ্ঞাসিং. যতো চ খো অহং, আনন্দ, ইমা নৰ অনুপুব্বৰিহারসমাপত্তিযো এৰং অনুলোমপটিলোমং ¶ সমাপজ্জিম্পি ৰুট্ঠহিম্পি, অথাহং, আনন্দ, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায ‘অনুত্তরং সম্মাসম্বোধিং অভিসম্বুদ্ধো’তি পচ্চঞ্ঞাসিং. ঞাণঞ্চ পন মে দস্সনং উদপাদি – ‘অকুপ্পা মে চেতোৰিমুত্তি [ৰিমুত্তি (ক. সী. ক.)], অযমন্তিমা জাতি, নত্থি দানি পুনব্ভৰো’’’তি. দসমং.

মহাৰগ্গো চতুত্থো.

তস্সুদ্দানং –

দ্ৰে ৰিহারা চ নিব্বানং, গাৰী ঝানেন পঞ্চমং;

আনন্দো ব্রাহ্মণা দেৰো, নাগেন তপুস্সেন চাতি.

৫. সামঞ্ঞৰগ্গো

১. সম্বাধসুত্তং

৪২. একং ¶ ¶ ¶ সমযং আযস্মা আনন্দো কোসম্বিযং ৰিহরতি ঘোসিতারামে. অথ খো আযস্মা উদাযী যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো ¶ খো আযস্মা উদাযী আযস্মন্তং আনন্দং এতদৰোচ – ‘‘ৰুত্তমিদং, আৰুসো, পঞ্চালচণ্ডেন দেৰপুত্তেন –

‘‘সম্বাধে গতং [সম্বাধে ৰত (সী.)] ওকাসং, অৰিদ্ৰা ভূরিমেধসো;

যো ঝানমবুজ্ঝি বুদ্ধো, পটিলীননিসভো মুনী’’তি.

‘‘কতমো, আৰুসো, সম্বাধো, কতমো সম্বাধে ওকাসাধিগমো ৰুত্তো ভগৰতা’’তি? ‘‘পঞ্চিমে, আৰুসো, কামগুণা সম্বাধো ৰুত্তো ভগৰতা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, সোতৰিঞ্ঞেয্যা সদ্দা…পে… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা. ইমে খো, আৰুসো, পঞ্চ কামগুণা সম্বাধো ৰুত্তো ভগৰতা.

‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন. তত্রাপত্থি সম্বাধো. কিঞ্চ তত্থ সম্বাধো? যদেৰ ¶ তত্থ ৰিতক্কৰিচারা অনিরুদ্ধা হোন্তি, অযমেত্থ সম্বাধো.

‘‘পুন চপরং, আৰুসো, ভিক্খু ৰিতক্কৰিচারানং ৰূপসমা…পে… দুতিযং ঝানং উপসম্পজ্জ ৰিহরতি. এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন ¶ . তত্রাপত্থি সম্বাধো. কিঞ্চ তত্থ সম্বাধো? যদেৰ তত্থ পীতি অনিরুদ্ধা হোতি ¶ , অযমেত্থ সম্বাধো.

‘‘পুন ¶ চপরং, আৰুসো, ভিক্খু পীতিযা চ ৰিরাগা…পে… ততিযং ঝানং উপসম্পজ্জ ৰিহরতি. এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন. তত্রাপত্থি সম্বাধো. কিঞ্চ তত্থ সম্বাধো? যদেৰ তত্থ উপেক্খাসুখং অনিরুদ্ধং হোতি, অযমেত্থ সম্বাধো.

‘‘পুন চপরং, আৰুসো, ভিক্খু সুখস্স চ পহানা…পে… চতুত্থং ঝানং উপসম্পজ্জ ৰিহরতি. এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন. তত্রাপত্থি সম্বাধো. কিঞ্চ তত্থ সম্বাধো? যদেৰ তত্থ রূপসঞ্ঞা অনিরুদ্ধা হোতি, অযমেত্থ সম্বাধো.

‘‘পুন চপরং, আৰুসো, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন. তত্রাপত্থি সম্বাধো. কিঞ্চ তত্থ সম্বাধো? যদেৰ তত্থ আকাসানঞ্চাযতনসঞ্ঞা অনিরুদ্ধা হোতি, অযমেত্থ সম্বাধো.

‘‘পুন চপরং, আৰুসো, ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৰিঞ্ঞাণ’ন্তি ৰিঞ্ঞাণঞ্চাযতনং ¶ উপসম্পজ্জ ৰিহরতি. এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন ¶ . তত্রাপত্থি সম্বাধো. কিঞ্চ তত্থ সম্বাধো? যদেৰ তত্থ ৰিঞ্ঞাণঞ্চাযতনসঞ্ঞা অনিরুদ্ধা হোতি, অযমেত্থ সম্বাধো.

‘‘পুন চপরং, আৰুসো, ভিক্খু সব্বসো ৰিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৰিহরতি. এত্তাৰতাপি খো, আৰুসো, সম্বাধে ওকাসাধিগমো ¶ ৰুত্তো ভগৰতা পরিযাযেন. তত্রাপত্থি সম্বাধো. কিঞ্চ তত্থ সম্বাধো? যদেৰ তত্থ আকিঞ্চঞ্ঞাযতনসঞ্ঞা অনিরুদ্ধা হোতি, অযমেত্থ সম্বাধো.

‘‘পুন চপরং, আৰুসো, ভিক্খু সব্বসো আকিঞ্চঞ্ঞাযতনং সমতিক্কম্ম নেৰসঞ্ঞানাসঞ্ঞাযতনং উপসম্পজ্জ ৰিহরতি. এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা পরিযাযেন. তত্রাপত্থি ¶ সম্বাধো. কিঞ্চ তত্থ সম্বাধো? যদেৰ তত্থ নেৰসঞ্ঞানাসঞ্ঞাযতনসঞ্ঞা অনিরুদ্ধা হোতি, অযমেত্থ সম্বাধো.

‘‘পুন চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. এত্তাৰতাপি খো, আৰুসো, সম্বাধে ওকাসাধিগমো ৰুত্তো ভগৰতা নিপ্পরিযাযেনা’’তি. পঠমং.

২. কাযসক্খীসুত্তং

৪৩. ‘‘‘কাযসক্খী কাযসক্খী’তি, আৰুসো, ৰুচ্চতি. কিত্তাৰতা নু খো, আৰুসো, কাযসক্খী ৰুত্তো ভগৰতা’’তি? ‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. যথা যথা চ তদাযতনং তথা তথা নং কাযেন ফুসিত্ৰা ৰিহরতি. এত্তাৰতাপি ¶ খো, আৰুসো, কাযসক্খী ৰুত্তো ভগৰতা পরিযাযেন.

‘‘পুন ¶ চপরং, আৰুসো, ভিক্খু ৰিতক্কৰিচারানং ৰূপসমা…পে… দুতিযং ঝানং… ততিযং ঝানং… চতুত্থং ঝানং উপসম্পজ্জ ৰিহরতি. যথা যথা চ তদাযতনং তথা তথা নং কাযেন ফুসিত্ৰা ৰিহরতি. এত্তাৰতাপি খো, আৰুসো, কাযসক্খী ৰুত্তো ভগৰতা পরিযাযেন.

‘‘পুন চপরং, আৰুসো, ভিক্খু সব্বসো রূপসঞ্ঞানং সমতিক্কমা পটিঘসঞ্ঞানং অত্থঙ্গমা ¶ নানত্তসঞ্ঞানং অমনসিকারা ‘অনন্তো আকাসো’তি আকাসানঞ্চাযতনং উপসম্পজ্জ ৰিহরতি. যথা যথা চ তদাযতনং তথা তথা নং কাযেন ফুসিত্ৰা ৰিহরতি. এত্তাৰতাপি খো, আৰুসো, কাযসক্খী ৰুত্তো ভগৰতা পরিযাযেন…পে….

‘‘পুন চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. যথা যথা চ তদাযতনং তথা তথা নং কাযেন ফুসিত্ৰা ৰিহরতি. এত্তাৰতাপি খো, আৰুসো, কাযসক্খী ৰুত্তো ভগৰতা নিপ্পরিযাযেনা’’তি. দুতিযং.

৩. পঞ্ঞাৰিমুত্তসুত্তং

৪৪. ‘‘‘পঞ্ঞাৰিমুত্তো ¶ পঞ্ঞাৰিমুত্তো’তি, আৰুসো, ৰুচ্চতি. কিত্তাৰতা নু খো, আৰুসো, পঞ্ঞাৰিমুত্তো ৰুত্তো ভগৰতা’’তি?

‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি, পঞ্ঞায চ নং পজানাতি. এত্তাৰতাপি খো, আৰুসো, পঞ্ঞাৰিমুত্তো ৰুত্তো ভগৰতা পরিযাযেন…পে….

‘‘পুন ¶ ¶ চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি, পঞ্ঞায চ নং পজানাতি. এত্তাৰতাপি খো, আৰুসো, পঞ্ঞাৰিমুত্তো ৰুত্তো ভগৰতা নিপ্পরিযাযেনা’’তি. ততিযং.

৪. উভতোভাগৰিমুত্তসুত্তং

৪৫. ‘‘‘উভতোভাগৰিমুত্তো ¶ উভতোভাগৰিমুত্তো’তি, আৰুসো, ৰুচ্চতি. কিত্তাৰতা নু খো, আৰুসো, উভতোভাগৰিমুত্তো ৰুত্তো ভগৰতা’’তি?

‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. যথা যথা চ তদাযতনং তথা তথা নং কাযেন ফুসিত্ৰা ৰিহরতি, পঞ্ঞায চ নং পজানাতি. এত্তাৰতাপি খো, আৰুসো, উভতোভাগৰিমুত্তো ৰুত্তো ভগৰতা পরিযাযেন…পে….

‘‘পুন ¶ চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. যথা যথা চ তদাযতনং তথা তথা নং কাযেন ফুসিত্ৰা ৰিহরতি, পঞ্ঞায চ নং পজানাতি. এত্তাৰতাপি খো, আৰুসো, উভতোভাগৰিমুত্তো ৰুত্তো ভগৰতা নিপ্পরিযাযেনা’’তি. চতুত্থং.

৫. সন্দিট্ঠিকধম্মসুত্তং

৪৬. ‘‘‘সন্দিট্ঠিকো ধম্মো সন্দিট্ঠিকো ধম্মো’তি, আৰুসো, ৰুচ্চতি. কিত্তাৰতা নু খো, আৰুসো, সন্দিট্ঠিকো ধম্মো ৰুত্তো ভগৰতা’’তি?

‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. এত্তাৰতাপি ¶ খো, আৰুসো, সন্দিট্ঠিকো ধম্মো ৰুত্তো ভগৰতা পরিযাযেন…পে….

‘‘পুন চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. এত্তাৰতাপি খো, আৰুসো, সন্দিট্ঠিকো ধম্মো ৰুত্তো ভগৰতা নিপ্পরিযাযেনা’’তি. পঞ্চমং.

৬. সন্দিট্ঠিকনিব্বানসুত্তং

৪৭. ‘‘‘সন্দিট্ঠিকং ¶ নিব্বানং সন্দিট্ঠিকং নিব্বান’ন্তি, আৰুসো, ৰুচ্চতি. কিত্তাৰতা নু খো, আৰুসো, সন্দিট্ঠিকং নিব্বানং ৰুত্তং ভগৰতা’’তি?

‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. এত্তাৰতাপি খো, আৰুসো, সন্দিট্ঠিকং নিব্বানং ৰুত্তং ভগৰতা পরিযাযেন…পে….

‘‘পুন চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. এত্তাৰতাপি খো, আৰুসো, সন্দিট্ঠিকং নিব্বানং ৰুত্তং ভগৰতা নিপ্পরিযাযেনা’’তি. ছট্ঠং.

৭. নিব্বানসুত্তং

৪৮. ‘‘‘নিব্বানং ¶ নিব্বান’ন্তি, আৰুসো, ৰুচ্চতি…পে…. সত্তমং.

৮. পরিনিব্বানসুত্তং

৪৯. ‘‘‘পরিনিব্বানং পরিনিব্বান’ন্তি…পে…. অট্ঠমং.

৯. তদঙ্গনিব্বানসুত্তং

৫০. ‘‘‘তদঙ্গনিব্বানং ¶ তদঙ্গনিব্বান’ন্তি, আৰুসো, ৰুচ্চতি…পে…. নৰমং.

১০. দিট্ঠধম্মনিব্বানসুত্তং

৫১. ‘‘‘দিট্ঠধম্মনিব্বানং দিট্ঠধম্মনিব্বান’ন্তি, আৰুসো, ৰুচ্চতি. কিত্তাৰতা নু খো, আৰুসো দিট্ঠধম্মনিব্বানং ৰুত্তং ভগৰতা’’তি?

‘‘ইধাৰুসো, ভিক্খু ৰিৰিচ্চেৰ কামেহি ¶ …পে… পঠমং ঝানং উপসম্পজ্জ ৰিহরতি. এত্তাৰতাপি খো, আৰুসো, দিট্ঠধম্মনিব্বানং ৰুত্তং ভগৰতা পরিযাযেন ¶ …পে….

‘‘পুন চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. এত্তাৰতাপি খো, আৰুসো, দিট্ঠধম্মনিব্বানং ৰুত্তং ভগৰতা নিপ্পরিযাযেনা’’তি. দসমং.

সামঞ্ঞৰগ্গো পঞ্চমো.

তস্সুদ্দানং –

সম্বাধো ¶ কাযসক্খী পঞ্ঞা,

উভতোভাগো সন্দিট্ঠিকা দ্ৰে;

নিব্বানং পরিনিব্বানং,

তদঙ্গদিট্ঠধম্মিকেন চাতি.

পঠমপণ্ণাসকং সমত্তং.

২. দুতিযপণ্ণাসকং

(৬) ১. খেমৰগ্গো

১. খেমসুত্তং

৫২. ‘‘‘খেমং ¶ খেম’ন্তি ¶ ¶ , আৰুসো, ৰুচ্চতি. কিত্তাৰতা নু খো, আৰুসো, খেমং ৰুত্তং ভগৰতা’’তি?

‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. এত্তাৰতাপি খো, আৰুসো, খেমং ৰুত্তং ভগৰতা পরিযাযেন…পে….

‘‘পুন চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. এত্তাৰতাপি খো, আৰুসো, খেমং ৰুত্তং ভগৰতা নিপ্পরিযাযেনা’’তি. পঠমং.

২. খেমপ্পত্তসুত্তং

৫৩. খেমপ্পত্তো খেমপ্পত্তোতি, আৰুসো, ৰুচ্চতি…পে…. দুতিযং.

৩. অমতসুত্তং

৫৪. অমতং অমতন্তি, আৰুসো, ৰুচ্চতি…পে…. ততিযং.

৪. অমতপ্পত্তসুত্তং

৫৫. অমতপ্পত্তো অমতপ্পত্তোতি, আৰুসো, ৰুচ্চতি…পে…. চতুত্থং.

৫. অভযসুত্তং

৫৬. অভযং ¶ অভযন্তি, আৰুসো, ৰুচ্চতি…পে…. পঞ্চমং.

৬. অভযপ্পত্তসুত্তং

৫৭. অভযপ্পত্তো অভযপ্পত্তোতি, আৰুসো, ৰুচ্চতি…পে…. ছট্ঠং.

৭. পস্সদ্ধিসুত্তং

৫৮. পস্সদ্ধি পস্সদ্ধীতি, আৰুসো, ৰুচ্চতি…পে…. সত্তমং.

৮. অনুপুব্বপস্সদ্ধিসুত্তং

৫৯. অনুপুব্বপস্সদ্ধি ¶ ¶ অনুপুব্বপস্সদ্ধীতি, আৰুসো, ৰুচ্চতি…পে…. অট্ঠমং.

৯. নিরোধসুত্তং

৬০. নিরোধো নিরোধোতি, আৰুসো, ৰুচ্চতি…পে…. নৰমং.

১০. অনুপুব্বনিরোধসুত্তং

৬১. ‘‘‘অনুপুব্বনিরোধো অনুপুব্বনিরোধো’তি, আৰুসো, ৰুচ্চতি. কিত্তাৰতা ¶ নু খো, আৰুসো, অনুপুব্বনিরোধো ৰুত্তো ভগৰতা’’তি?

‘‘ইধাৰুসো, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. এত্তাৰতাপি খো, আৰুসো, অনুপুব্বনিরোধো ৰুত্তো ভগৰতা পরিযাযেন…পে… ¶ .

‘‘পুন চপরং, আৰুসো, ভিক্খু সব্বসো নেৰসঞ্ঞানাসঞ্ঞাযতনং সমতিক্কম্ম সঞ্ঞাৰেদযিতনিরোধং উপসম্পজ্জ ৰিহরতি, পঞ্ঞায চস্স দিস্ৰা আসৰা পরিক্খীণা হোন্তি. এত্তাৰতাপি খো, আৰুসো, অনুপুব্বনিরোধো ৰুত্তো ভগৰতা নিপ্পরিযাযেনা’’তি. দসমং.

১১. অভব্বসুত্তং

৬২. ‘‘নৰ, ভিক্খৰে, ধম্মে অপ্পহায অভব্বো অরহত্তং সচ্ছিকাতুং. কতমে নৰ? রাগং, দোসং, মোহং, কোধং, উপনাহং, মক্খং, পল়াসং, ইস্সং, মচ্ছরিযং – ইমে খো, ভিক্খৰে, নৰ ধম্মে অপ্পহায অভব্বো অরহত্তং সচ্ছিকাতুং.

‘‘নৰ, ভিক্খৰে, ধম্মে পহায ভব্বো অরহত্তং সচ্ছিকাতুং. কতমে নৰ? রাগং, দোসং, মোহং, কোধং, উপনাহং, মক্খং, পল়াসং, ইস্সং, মচ্ছরিযং – ইমে খো, ভিক্খৰে, নৰ ধম্মে পহায ভব্বো অরহত্তং সচ্ছিকাতু’’ন্তি. একাদসমং.

খেমৰগ্গো পঠমো.

তস্সুদ্দানং –

খেমো ¶ চ অমতঞ্চেৰ, অভযং পস্সদ্ধিযেন চ;

নিরোধো অনুপুব্বো চ, ধম্মং পহায ভব্বেন চাতি.

(৭) ২. সতিপট্ঠানৰগ্গো

১. সিক্খাদুব্বল্যসুত্তং

৬৩. ‘‘পঞ্চিমানি ¶ ¶ ¶ , ভিক্খৰে, সিক্খাদুব্বল্যানি. কতমানি পঞ্চ? পাণাতিপাতো, অদিন্নাদানং, কামেসুমিচ্ছাচারো, মুসাৰাদো, সুরামেরযমজ্জপমাদট্ঠানং – ইমানি খো, ভিক্খৰে, পঞ্চ সিক্খাদুব্বল্যানি.

‘‘ইমেসং খো, ভিক্খৰে, পঞ্চন্নং সিক্খাদুব্বল্যানং পহানায চত্তারো সতিপট্ঠানা ভাৰেতব্বা. কতমে চত্তারো? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং; ৰেদনাসু…পে… চিত্তে…পে… ধম্মেসু ধম্মানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং. ইমেসং খো, ভিক্খৰে, পঞ্চন্নং সিক্খাদুব্বল্যানং পহানায ইমে চত্তারো সতিপট্ঠানা ভাৰেতব্বা’’তি. পঠমং.

২. নীৰরণসুত্তং

৬৪. ‘‘পঞ্চিমানি, ভিক্খৰে, নীৰরণানি. কতমানি পঞ্চ? কামচ্ছন্দনীৰরণং, ব্যাপাদনীৰরণং, থিনমিদ্ধনীৰরণং ¶ , উদ্ধচ্চকুক্কুচ্চনীৰরণং, ৰিচিকিচ্ছানীৰরণং – ইমানি খো, ভিক্খৰে, পঞ্চ নীৰরণানি.

‘‘ইমেসং খো, ভিক্খৰে, পঞ্চন্নং নীৰরণানং পহানায চত্তারো সতিপট্ঠানা ভাৰেতব্বা. কতমে চত্তারো? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং; ৰেদনাসু…পে… চিত্তে…পে… ¶ ধম্মেসু ধম্মানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং. ইমেসং ¶ খো, ভিক্খৰে, পঞ্চন্নং নীৰরণানং পহানায ইমে চত্তারো সতিপট্ঠানা ভাৰেতব্বা’’তি. দুতিযং.

৩. কামগুণসুত্তং

৬৫. ‘‘পঞ্চিমে, ভিক্খৰে, কামগুণা. কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, সোতৰিঞ্ঞেয্যা সদ্দা…পে… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ¶ ইট্ঠা কন্তা মনাপা পিযরূপা কামূপসংহিতা রজনীযা. ইমে খো, ভিক্খৰে, পঞ্চ কামগুণা.

‘‘ইমেসং খো, ভিক্খৰে, পঞ্চন্নং কামগুণানং পহানায…পে… ইমে চত্তারো সতিপট্ঠানা ভাৰেতব্বা’’তি. ততিযং.

৪. উপাদানক্খন্ধসুত্তং

৬৬. ‘‘পঞ্চিমে, ভিক্খৰে, উপাদানক্খন্ধা. কতমে পঞ্চ? রূপুপাদানক্খন্ধো, ৰেদনুপাদানক্খন্ধো, সঞ্ঞুপাদানক্খন্ধো, সঙ্খারুপাদানক্খন্ধো, ৰিঞ্ঞাণুপাদানক্খন্ধো – ইমে ¶ খো, ভিক্খৰে, পঞ্চুপাদানক্খন্ধা.

‘‘ইমেসং খো, ভিক্খৰে, পঞ্চন্নং উপাদানক্খন্ধানং পহানায…পে… ইমে চত্তারো সতিপট্ঠানা ভাৰেতব্বা’’তি. চতুত্থং.

৫. ওরম্ভাগিযসুত্তং

৬৭. ‘‘পঞ্চিমানি, ভিক্খৰে, ওরম্ভাগিযানি সংযোজনানি. কতমানি পঞ্চ? সক্কাযদিট্ঠি, ৰিচিকিচ্ছা, সীলব্বতপরামাসো, কামচ্ছন্দো, ব্যাপাদো – ইমানি খো, ভিক্খৰে, পঞ্চোরম্ভাগিযানি সংযোজনানি.

‘‘ইমেসং ¶ খো, ভিক্খৰে, পঞ্চন্নং ওরম্ভাগিযানং সংযোজনানং পহানায…পে… ইমে চত্তারো সতিপট্ঠানা ভাৰেতব্বা’’তি. পঞ্চমং.

৬. গতিসুত্তং

৬৮. ‘‘পঞ্চিমা, ভিক্খৰে, গতিযো. কতমা পঞ্চ? নিরযো, তিরচ্ছানযোনি ¶ , পেত্তিৰিসযো, মনুস্সা, দেৰা – ইমা খো, ভিক্খৰে, পঞ্চ গতিযো.

‘‘ইমাসং খো, ভিক্খৰে, পঞ্চন্নং গতীনং পহানায…পে… ইমে চত্তারো সতিপট্ঠানা ভাৰেতব্বা’’তি. ছট্ঠং.

৭. মচ্ছরিযসুত্তং

৬৯. ‘‘পঞ্চিমানি, ভিক্খৰে, মচ্ছরিযানি. কতমানি পঞ্চ? আৰাসমচ্ছরিযং, কুলমচ্ছরিযং, লাভমচ্ছরিযং, ৰণ্ণমচ্ছরিযং, ধম্মমচ্ছরিযং – ইমানি খো, ভিক্খৰে, পঞ্চ মচ্ছরিযানি.

‘‘ইমেসং ¶ খো, ভিক্খৰে, পঞ্চন্নং মচ্ছরিযানং পহানায…পে… ইমে চত্তারো সতিপট্ঠানা ভাৰেতব্বা’’তি. সত্তমং.

৮. উদ্ধম্ভাগিযসুত্তং

৭০. ‘‘পঞ্চিমানি ¶ , ভিক্খৰে, উদ্ধম্ভাগিযানি সংযোজনানি. কতমানি পঞ্চ? রূপরাগো, অরূপরাগো, মানো, উদ্ধচ্চং, অৰিজ্জা – ইমানি খো, ভিক্খৰে, পঞ্চুদ্ধম্ভাগিযানি সংযোজনানি.

‘‘ইমেসং খো, ভিক্খৰে, পঞ্চন্নং উদ্ধম্ভাগিযানং সংযোজনানং পহানায…পে… ইমে চত্তারো সতিপট্ঠানা ভাৰেতব্বা’’তি. অট্ঠমং.

৯. চেতোখিলসুত্তং

৭১. [অ. নি. ৫.২০৫; দী. নি. ৩.৩১৯; ম. নি. ১.১৮৫] ‘‘পঞ্চিমে ¶ , ভিক্খৰে, চেতোখিলা [চেতোখীলা (ক.)]. কতমে পঞ্চ? ইধ ভিক্খৰে, ভিক্খু সত্থরি কঙ্খতি ৰিচিকিচ্ছতি নাধিমুচ্চতি ন সম্পসীদতি. যো সো, ভিক্খৰে, ভিক্খু সত্থরি কঙ্খতি ৰিচিকিচ্ছতি নাধিমুচ্চতি ন সম্পসীদতি, তস্স চিত্তং ন নমতি আতপ্পায অনুযোগায সাতচ্চায পধানায. যস্স চিত্তং ন নমতি আতপ্পায অনুযোগায সাতচ্চায পধানায ¶ , অযং পঠমো চেতোখিলো.

‘‘পুন চপরং, ভিক্খৰে, ভিক্খু ধম্মে কঙ্খতি…পে… সঙ্ঘে কঙ্খতি… সিক্খায কঙ্খতি… সব্রহ্মচারীসু কুপিতো হোতি অনত্তমনো আহতচিত্তো খিলজাতো. যো সো, ভিক্খৰে, ভিক্খু সব্রহ্মচারীসু কুপিতো হোতি অনত্তমনো আহতচিত্তো খিলজাতো, তস্স চিত্তং ন নমতি আতপ্পায অনুযোগায সাতচ্চায পধানায. যস্স চিত্তং ন নমতি আতপ্পায অনুযোগায সাতচ্চায পধানায, অযং পঞ্চমো চেতোখিলো.

‘‘ইমেসং, খো, ভিক্খৰে, পঞ্চন্নং চেতোখিলানং পহানায…পে… ইমে চত্তারো সতিপট্ঠানা ভাৰেতব্বা’’তি. নৰমং.

১০. চেতসোৰিনিবন্ধসুত্তং

৭২. ‘‘পঞ্চিমে ¶ , ভিক্খৰে, চেতসোৰিনিবন্ধা [চেতোৰিনিবদ্ধা (সারত্থদীপনীটীকা) অ. নি. ৫.২০৬; দী. নি. ৩.৩২০]. কতমে পঞ্চ? ইধ, ভিক্খৰে, ভিক্খু কামেসু অৰীতরাগো হোতি অৰিগতচ্ছন্দো অৰিগতপেমো অৰিগতপিপাসো ¶ অৰিগতপরিল়াহো অৰিগততণ্হো. যো সো, ভিক্খৰে, ভিক্খু কামেসু অৰীতরাগো হোতি অৰিগতচ্ছন্দো অৰিগতপেমো অৰিগতপিপাসো অৰিগতপরিল়াহো অৰিগততণ্হো, তস্স চিত্তং ন নমতি আতপ্পায অনুযোগায সাতচ্চায পধানায. যস্স চিত্তং ন নমতি আতপ্পায অনুযোগায সাতচ্চায পধানায, অযং পঠমো চেতসোৰিনিবন্ধো.

‘‘পুন চপরং, ভিক্খৰে, ভিক্খু কাযে অৰীতরাগো হোতি…পে… রূপে অৰীতরাগো হোতি… যাৰদত্থং উদরাৰদেহকং ভুঞ্জিত্ৰা সেয্যসুখং পস্সসুখং মিদ্ধসুখং অনুযুত্তো ৰিহরতি ¶ … অঞ্ঞতরং দেৰনিকাযং পণিধায ব্রহ্মচরিযং চরতি – ‘ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা দেৰো ৰা ভৰিস্সামি দেৰঞ্ঞতরো ¶ ৰা’তি. যো সো, ভিক্খৰে, ভিক্খু অঞ্ঞতরং দেৰনিকাযং পণিধায ব্রহ্মচরিযং চরতি – ‘ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা দেৰো ৰা ভৰিস্সামি দেৰঞ্ঞতরো ৰা’তি, তস্স চিত্তং ন নমতি আতপ্পায অনুযোগায সাতচ্চায পধানায. যস্স চিত্তং ন নমতি আতপ্পায অনুযোগায সাতচ্চায পধানায, অযং পঞ্চমো চেতসোৰিনিবন্ধো. ইমে খো, ভিক্খৰে, পঞ্চ চেতসোৰিনিবন্ধা.

‘‘ইমেসং খো, ভিক্খৰে, পঞ্চন্নং চেতসোৰিনিবন্ধানং পহানায চত্তারো সতিপট্ঠানা ভাৰেতব্বা. কতমে চত্তারো? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং; ৰেদনাসু…পে… চিত্তে…পে… ধম্মেসু ধম্মানুপস্সী ৰিহরতি আতাপী সম্পজানো সতিমা ৰিনেয্য লোকে অভিজ্ঝাদোমনস্সং. ইমেসং খো, ভিক্খৰে, পঞ্চন্নং চেতসোৰিনিবন্ধানং পহানায ইমে চত্তারো সতিপট্ঠানা ভাৰেতব্বা’’তি. দসমং.

সতিপট্ঠানৰগ্গো দুতিযো.

তস্সুদ্দানং –

সিক্খা ¶ নীৰরণাকামা, খন্ধা চ ওরম্ভাগিযা গতি;

মচ্ছেরং উদ্ধম্ভাগিযা অট্ঠমং, চেতোখিলা ৰিনিবন্ধাতি.

(৮) ৩. সম্মপ্পধানৰগ্গো

১. সিক্খসুত্তং

৭৩. ‘‘পঞ্চিমানি ¶ ¶ , ভিক্খৰে, সিক্খাদুব্বল্যানি. কতমানি পঞ্চ? পাণাতিপাতো ¶ …পে… সুরামেরযমজ্জপমাদট্ঠানং – ইমানি খো, ভিক্খৰে, পঞ্চ সিক্খাদুব্বল্যানি.

‘‘ইমেসং খো, ভিক্খৰে, পঞ্চন্নং সিক্খাদুব্বল্যানং পহানায চত্তারো সম্মপ্পধানা ভাৰেতব্বা. কতমে চত্তারো? ইধ, ভিক্খৰে, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি; উপ্পন্নানং পাপকানং অকুসলানং ধম্মানং পহানায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি; অনুপ্পন্নানং কুসলানং ধম্মানং উপ্পাদায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি; উপ্পন্নানং কুসলানং ধম্মানং ঠিতিযা অসম্মোসায ভিয্যোভাৰায ৰেপুল্লায ভাৰনায পারিপূরিযা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি. ইমেসং খো, ভিক্খৰে, পঞ্চন্নং সিক্খাদুব্বল্যানং পহানায ইমে চত্তারো সম্মপ্পধানা ভাৰেতব্বা’’তি. পঠমং.

৭৪-৮১. (যথা সতিপট্ঠানৰগ্গে তথা সম্মপ্পধানৰসেন ৰিত্থারেতব্বা.)

১০. চেতসোৰিনিবন্ধসুত্তং

৮২. ‘‘পঞ্চিমে ¶ , ভিক্খৰে, চেতসোৰিনিবন্ধা. কতমে পঞ্চ? ইধ, ভিক্খৰে, ভিক্খু কামেসু অৰীতরাগো হোতি…পে… ইমে খো, ভিক্খৰে, পঞ্চ চেতসোৰিনিবন্ধা.

‘‘ইমেসং খো, ভিক্খৰে, পঞ্চন্নং চেতসোৰিনিবন্ধানং পহানায চত্তারো সম্মপ্পধানা ভাৰেতব্বা ¶ . কতমে চত্তারো? ইধ, ভিক্খৰে, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৰাযমতি ¶ ৰীরিযং আরভতি চিত্তং পগ্গণ্হাতি পদহতি; উপ্পন্নানং পাপকানং অকুসলানং ধম্মানং পহানায… অনুপ্পন্নানং কুসলানং ধম্মানং উপ্পাদায… উপ্পন্নানং কুসলানং ধম্মানং ঠিতিযা অসম্মোসায ভিয্যোভাৰায ৰেপুল্লায ভাৰনায পারিপূরিযা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি ¶ . ইমেসং খো, ভিক্খৰে, পঞ্চন্নং চেতসোৰিনিবন্ধানং পহানায ইমে চত্তারো সম্মপ্পধানা ভাৰেতব্বা’’তি. দসমং.

সম্মপ্পধানৰগ্গো ততিযো.

(৯) ৪. ইদ্ধিপাদৰগ্গো

১. সিক্খসুত্তং

৮৩. ‘‘পঞ্চিমানি ¶ , ভিক্খৰে, সিক্খাদুব্বল্যানি. কতমানি পঞ্চ? পাণাতিপাতো…পে… সুরামেরযমজ্জপমাদট্ঠানং – ইমানি খো, ভিক্খৰে, পঞ্চ সিক্খাদুব্বল্যানি.

‘‘ইমেসং খো, ভিক্খৰে, পঞ্চন্নং সিক্খাদুব্বল্যানং পহানায চত্তারো ইদ্ধিপাদা ভাৰেতব্বা. কতমে চত্তারো? ইধ ¶ , ভিক্খৰে, ভিক্খু ছন্দসমাধিপধানসঙ্খারসমন্নাগতং ইদ্ধিপাদং ভাৰেতি, ৰীরিযসমাধি… চিত্তসমাধি… ৰীমংসাসমাধিপধানসঙ্খারসমন্নাগতং ইদ্ধিপাদং ভাৰেতি. ইমেসং খো, ভিক্খৰে, পঞ্চন্নং সিক্খাদুব্বল্যানং পহানায ইমে চত্তারো ইদ্ধিপাদা ভাৰেতব্বা’’তি. পঠমং.

৮৪-৯১. (যথা সতিপট্ঠানৰগ্গে তথা ইদ্ধিপাদৰসেন ৰিত্থারেতব্বা.)

১০. চেতসোৰিনিবন্ধসুত্তং

৯২. ‘‘পঞ্চিমে ¶ , ভিক্খৰে, চেতসোৰিনিবন্ধা. কতমে পঞ্চ? ইধ, ভিক্খৰে, ভিক্খু কামেসু অৰীতরাগো হোতি…পে… ইমে খো, ভিক্খৰে, পঞ্চ চেতসোৰিনিবন্ধা.

‘‘ইমেসং খো, ভিক্খৰে, পঞ্চন্নং চেতসোৰিনিবন্ধানং পহানায ইমে চত্তারো ইদ্ধিপাদা ভাৰেতব্বা. কতমে চত্তারো? ইধ, ভিক্খৰে, ভিক্খু ছন্দসমাধিপধানসঙ্খারসমন্নাগতং ইদ্ধিপাদং ভাৰেতি, ৰীরিযসমাধি… চিত্তসমাধি… ৰীমংসাসমাধিপধানসঙ্খারসমন্নাগতং ইদ্ধিপাদং ¶ ভাৰেতি. ইমেসং খো, ভিক্খৰে, পঞ্চন্নং চেতসোৰিনিবন্ধানং পহানায ইমে চত্তারো ইদ্ধিপাদা ভাৰেতব্বা’’তি. দসমং.

ইদ্ধিপাদৰগ্গো চতুত্থো.

যথেৰ ¶ সতিপট্ঠানা, পধানা চতুরোপি চ;

চত্তারো ইদ্ধিপাদা চ, তথেৰ সম্পযোজযেতি.

(১০) ৫. রাগপেয্যালং

৯৩. ‘‘রাগস্স ¶ ¶ , ভিক্খৰে, অভিঞ্ঞায নৰ ধম্মা ভাৰেতব্বা. কতমে নৰ? অসুভসঞ্ঞা, মরণসঞ্ঞা, আহারে পটিকূলসঞ্ঞা, সব্বলোকে অনভিরতসঞ্ঞা, অনিচ্চসঞ্ঞা, অনিচ্চে দুক্খসঞ্ঞা, দুক্খে অনত্তসঞ্ঞা, পহানসঞ্ঞা, ৰিরাগসঞ্ঞা – রাগস্স, ভিক্খৰে অভিঞ্ঞায ইমে নৰ ধম্মা ভাৰেতব্বা’’তি.

৯৪. ‘‘রাগস্স, ভিক্খৰে, অভিঞ্ঞায নৰ ধম্মা ভাৰেতব্বা. কতমে ¶ নৰ? পঠমং ঝানং, দুতিযং ঝানং, ততিযং ঝানং, চতুত্থং ঝানং, আকাসানঞ্চাযতনং, ৰিঞ্ঞাণঞ্চাযতনং, আকিঞ্চঞ্ঞাযতনং, নেৰসঞ্ঞানাসঞ্ঞাযতনং, সঞ্ঞাৰেদযিতনিরোধো – রাগস্স, ভিক্খৰে, অভিঞ্ঞায ইমে নৰ ধম্মা ভাৰেতব্বা’’তি.

৯৫-১১২. ‘‘রাগস্স, ভিক্খৰে, পরিঞ্ঞায…পে… পরিক্খযায…পে… পহানায…পে… খযায…পে… ৰযায…পে… ৰিরাগায…পে… নিরোধায…পে… চাগায…পে… পটিনিস্সগ্গায…পে… ইমে নৰ ধম্মা ভাৰেতব্বা’’.

১১৩-৪৩২. ‘‘দোসস্স…পে… মোহস্স… কোধস্স… উপনাহস্স… মক্খস্স… পল়াসস্স… ইস্সায… মচ্ছরিযস্স… মাযায… সাঠেয্যস্স… থম্ভস্স… সারম্ভস্স… মানস্স… অতিমানস্স… মদস্স… পমাদস্স অভিঞ্ঞায…পে… পরিঞ্ঞায… পরিক্খযায… পহানায… খযায… ৰযায… ৰিরাগায… নিরোধায ¶ … চাগায… পটিনিস্সগ্গায…পে… ইমে নৰ ধম্মা ভাৰেতব্বা’’তি.

রাগপেয্যালং নিট্ঠিতং.

নৰকনিপাতপাল়ি নিট্ঠিতা.