মূল > সুত্তপিটক > খুদ্দকনিকায

১. এৰং ¶ মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং জেতৰনং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতা খো সা দেৰতা ভগৰন্তং গাথায অজ্ঝভাসি –

‘‘বহূ ¶ দেৰা মনুস্সা চ, মঙ্গলানি অচিন্তযুং;

আকঙ্খমানা সোত্থানং, ব্রূহি মঙ্গলমুত্তমং’’.

‘‘অসেৰনা চ বালানং, পণ্ডিতানঞ্চ সেৰনা;

পূজা চ পূজনেয্যানং [পূজনীযানং (সী. স্যা. কং. পী.)], এতং মঙ্গলমুত্তমং.

‘‘পতিরূপদেসৰাসো ¶ চ, পুব্বে চ কতপুঞ্ঞতা;

অত্তসম্মাপণিধি ¶ [অত্থসম্মাপণীধী (কত্থচি)] চ, এতং মঙ্গলমুত্তমং.

‘‘বাহুসচ্চঞ্চ সিপ্পঞ্চ, ৰিনযো চ সুসিক্খিতো;

সুভাসিতা চ যা ৰাচা, এতং মঙ্গলমুত্তমং.

‘‘মাতাপিতু উপট্ঠানং, পুত্তদারস্স সঙ্গহো;

অনাকুলা চ কম্মন্তা, এতং মঙ্গলমুত্তমং.

‘‘দানঞ্চ ধম্মচরিযা চ, ঞাতকানঞ্চ সঙ্গহো;

অনৰজ্জানি কম্মানি, এতং মঙ্গলমুত্তমং.

‘‘আরতী ৰিরতী পাপা, মজ্জপানা চ সংযমো;

অপ্পমাদো চ ধম্মেসু, এতং মঙ্গলমুত্তমং.

‘‘গারৰো ¶ চ নিৰাতো চ, সন্তুট্ঠি চ কতঞ্ঞুতা;

কালেন ধম্মস্সৰনং [ধম্মস্সাৰণং (ক. সী.), ধম্মসৰনং (ক. সী.)], এতং মঙ্গলমুত্তমং.

‘‘খন্তী চ সোৰচস্সতা, সমণানঞ্চ দস্সনং;

কালেন ধম্মসাকচ্ছা, এতং মঙ্গলমুত্তমং.

‘‘তপো চ ব্রহ্মচরিযঞ্চ, অরিযসচ্চান দস্সনং;

নিব্বানসচ্ছিকিরিযা চ, এতং মঙ্গলমুত্তমং.

‘‘ফুট্ঠস্স লোকধম্মেহি, চিত্তং যস্স ন কম্পতি;

অসোকং ৰিরজং খেমং, এতং মঙ্গলমুত্তমং.

‘‘এতাদিসানি কত্ৰান, সব্বত্থমপরাজিতা;

সব্বত্থ সোত্থিং গচ্ছন্তি, তং তেসং মঙ্গলমুত্তম’’ন্তি.

যানীধ ¶ ভূতানি সমাগতানি, ভুম্মানি [ভূমানি (ক.)] ৰা যানি ৰ অন্তলিক্খে;

সব্বেৰ ভূতা সুমনা ভৰন্তু, অথোপি সক্কচ্চ সুণন্তু ভাসিতং.

তস্মা ¶ হি ভূতা নিসামেথ সব্বে, মেত্তং করোথ মানুসিযা পজায;

দিৰা চ রত্তো চ হরন্তি যে বলিং, তস্মা হি নে রক্খথ অপ্পমত্তা.

যং কিঞ্চি ৰিত্তং ইধ ৰা হুরং ৰা, সগ্গেসু ¶ ৰা যং রতনং পণীতং;

ন নো সমং অত্থি তথাগতেন, ইদম্পি বুদ্ধে রতনং পণীতং;

খযং ¶ ৰিরাগং অমতং পণীতং, যদজ্ঝগা সক্যমুনী সমাহিতো;

ন তেন ধম্মেন সমত্থি কিঞ্চি, ইদম্পি ধম্মে রতনং পণীতং;

যং ¶ বুদ্ধসেট্ঠো পরিৰণ্ণযী সুচিং, সমাধিমানন্তরিকঞ্ঞমাহু;

সমাধিনা তেন সমো ন ৰিজ্জতি, ইদম্পি ধম্মে রতনং পণীতং;

যে পুগ্গলা অট্ঠ সতং পসত্থা, চত্তারি এতানি যুগানি হোন্তি;

তে দক্খিণেয্যা সুগতস্স সাৰকা, এতেসু দিন্নানি মহপ্ফলানি;

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

যে সুপ্পযুত্তা মনসা দল়্হেন, নিক্কামিনো গোতমসাসনম্হি;

তে পত্তিপত্তা অমতং ৰিগয্হ, লদ্ধা মুধা নিব্বুতিং [নিব্বুতি (ক.)] ভুঞ্জমানা;

ইদম্পি ¶ সঙ্ঘে রতনং পণীতং, এতেন সচ্চেন সুৰত্থি হোতু.

যথিন্দখীলো পথৰিস্সিতো [পঠৰিস্সিতো (ক. সী.), পথৰিংসিতো (ক. সি. স্যা. কং. পী.)] সিযা, চতুব্ভি ৰাতেহি অসম্পকম্পিযো;

তথূপমং সপ্পুরিসং ৰদামি, যো ¶ অরিযসচ্চানি অৰেচ্চ পস্সতি;

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

যে অরিযসচ্চানি ৰিভাৰযন্তি, গম্ভীরপঞ্ঞেন সুদেসিতানি;

কিঞ্চাপি তে হোন্তি ভুসং পমত্তা, ন তে ভৰং অট্ঠমমাদিযন্তি;

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

সহাৰস্স ¶ দস্সনসম্পদায [সহাৰসদ্দস্সনসম্পদায (ক.)], তযস্সু ধম্মা জহিতা ভৰন্তি;

সক্কাযদিট্ঠী ৰিচিকিচ্ছিতঞ্চ, সীলব্বতং ৰাপি যদত্থি কিঞ্চি.

চতূহপাযেহি চ ৰিপ্পমুত্তো, ছচ্চাভিঠানানি [ছ চাভিঠানানি (সী. স্যা.)] অভব্ব কাতুং [অভব্বো কাতুং (সী.)];

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

কিঞ্চাপি ¶ সো কম্ম [কম্মং (সী. স্যা. কং. পী.)] করোতি পাপকং, কাযেন ৰাচা উদ চেতসা ৰা;

অভব্ব [অভব্বো (বহূসু)] সো তস্স পটিচ্ছদায [পটিচ্ছাদায (সী.)], অভব্বতা ¶ দিট্ঠপদস্স ৰুত্তা;

ইদম্পি ¶ সঙ্ঘে রতনং পণীতং, এতেন সচ্চেন সুৰত্থি হোতু.

ৰনপ্পগুম্বে যথ [যথা (সী. স্যা.)] ফুস্সিতগ্গে, গিম্হানমাসে পঠমস্মিং [পঠমস্মি (?)] গিম্হে;

তথূপমং ধম্মৰরং অদেসযি [অদেসযী (সী.)], নিব্বানগামিং পরমং হিতায;

ইদম্পি বুদ্ধে রতনং পণীতং, এতেন সচ্চেন সুৰত্থি হোতু.

ৰরো ৰরঞ্ঞূ ৰরদো ৰরাহরো, অনুত্তরো ধম্মৰরং অদেসযি;

ইদম্পি বুদ্ধে রতনং পণীতং, এতেন সচ্চেন সুৰত্থি হোতু.

খীণং পুরাণং নৰ নত্থি সম্ভৰং, ৰিরত্তচিত্তাযতিকে ভৰস্মিং;

তে খীণবীজা অৰিরূল়্হিছন্দা, নিব্বন্তি ধীরা যথাযং [যথযং (ক.)] পদীপো;

ইদম্পি সঙ্ঘে রতনং পণীতং, এতেন সচ্চেন সুৰত্থি হোতু.

যানীধ ভূতানি সমাগতানি, ভুম্মানি ¶ ৰা যানি ৰ অন্তলিক্খে;

তথাগতং দেৰমনুস্সপূজিতং, বুদ্ধং নমস্সাম সুৰত্থি হোতু.

যানীধ ভূতানি সমাগতানি, ভুম্মানি ৰা যানি ৰ অন্তলিক্খে;

তথাগতং দেৰমনুস্সপূজিতং, ধম্মং ¶ নমস্সাম সুৰত্থি হোতু.

যানীধ ¶ ভূতানি সমাগতানি, ভুম্মানি ৰা যানি ৰ অন্তলিক্খে;

তথাগতং দেৰমনুস্সপূজিতং, সঙ্ঘং নমস্সাম সুৰত্থি হোতূতি.

তিরোকুট্টেসু ¶ তিট্ঠন্তি, সন্ধিসিঙ্ঘাটকেসু চ;

দ্ৰারবাহাসু তিট্ঠন্তি, আগন্ত্ৰান সকং ঘরং.

পহূতে অন্নপানম্হি, খজ্জভোজ্জে উপট্ঠিতে;

ন ¶ তেসং কোচি সরতি, সত্তানং কম্মপচ্চযা.

এৰং দদন্তি ঞাতীনং, যে হোন্তি অনুকম্পকা;

সুচিং পণীতং কালেন, কপ্পিযং পানভোজনং;

ইদং ৰো ঞাতীনং হোতু, সুখিতা হোন্তু ঞাতযো.

তে চ তত্থ সমাগন্ত্ৰা, ঞাতিপেতা সমাগতা;

পহূতে অন্নপানম্হি, সক্কচ্চং অনুমোদরে.

চিরং জীৰন্তু নো ঞাতী, যেসং হেতু লভামসে;

অম্হাকঞ্চ কতা পূজা, দাযকা চ অনিপ্ফলা.

ন হি তত্থ কসি [কসী (সী.)] অত্থি, গোরক্খেত্থ ন ৰিজ্জতি;

ৰণিজ্জা তাদিসী নত্থি, হিরঞ্ঞেন কযোকযং [কযাক্কযং (সী.), কযা কযং (স্যা.)];

ইতো দিন্নেন যাপেন্তি, পেতা কালঙ্কতা [কালকতা (সী. স্যা. কং.)] তহিং.

উন্নমে উদকং ৰুট্ঠং, যথা নিন্নং পৰত্ততি;

এৰমেৰ ইতো দিন্নং, পেতানং উপকপ্পতি.

যথা ৰারিৰহা পূরা, পরিপূরেন্তি সাগরং;

এৰমেৰ ইতো দিন্নং, পেতানং উপকপ্পতি.

অদাসি ¶ ¶ মে অকাসি মে, ঞাতিমিত্তা [ঞাতি মিত্তো (?)] সখা চ মে;

পেতানং দক্খিণং দজ্জা, পুব্বে কতমনুস্সরং.

ন হি রুণ্ণং ৰা সোকো ৰা, যা চঞ্ঞা পরিদেৰনা;

ন তং পেতানমত্থায, এৰং তিট্ঠন্তি ঞাতযো.

অযঞ্চ খো দক্খিণা দিন্না, সঙ্ঘম্হি সুপ্পতিট্ঠিতা;

দীঘরত্তং ¶ হিতাযস্স, ঠানসো উপকপ্পতি.

সো ঞাতিধম্মো চ অযং নিদস্সিতো, পেতান পূজা চ কতা উল়ারা;

বলঞ্চ ভিক্খূনমনুপ্পদিন্নং [… মনুপ্পদিন্নৰা (ক.)], তুম্হেহি পুঞ্ঞং পসুতং অনপ্পকন্তি.

নিধিং ¶ নিধেতি পুরিসো, গম্ভীরে ওদকন্তিকে;

অত্থে কিচ্চে সমুপ্পন্নে, অত্থায মে ভৰিস্সতি.

রাজতো ৰা দুরুত্তস্স, চোরতো পীল়িতস্স ৰা;

ইণস্স ৰা পমোক্খায, দুব্ভিক্খে আপদাসু ৰা;

এতদত্থায লোকস্মিং, নিধি নাম নিধীযতি.

তাৰস্সুনিহিতো [তাৰ সুনিহিতো (সী.)] সন্তো, গম্ভীরে ওদকন্তিকে;

ন সব্বো সব্বদা এৰ, তস্স তং উপকপ্পতি.

নিধি ৰা ঠানা চৰতি, সঞ্ঞা ৰাস্স ৰিমুয্হতি;

নাগা ৰা অপনামেন্তি, যক্খা ৰাপি হরন্তি নং.

অপ্পিযা ¶ ৰাপি দাযাদা, উদ্ধরন্তি অপস্সতো;

যদা পুঞ্ঞক্খযো হোতি, সব্বমেতং ৰিনস্সতি.

যস্স ¶ দানেন সীলেন, সংযমেন দমেন চ;

নিধী সুনিহিতো হোতি, ইত্থিযা পুরিসস্স ৰা.

চেতিযম্হি ¶ চ সঙ্ঘে ৰা, পুগ্গলে অতিথীসু ৰা;

মাতরি পিতরি চাপি [ৰাপি (স্যা. কং.)], অথো জেট্ঠম্হি ভাতরি.

এসো নিধি সুনিহিতো, অজেয্যো অনুগামিকো;

পহায গমনীযেসু, এতং আদায গচ্ছতি.

অসাধারণমঞ্ঞেসং, অচোরাহরণো নিধি;

কযিরাথ ধীরো পুঞ্ঞানি, যো নিধি অনুগামিকো.

এস দেৰমনুস্সানং, সব্বকামদদো নিধি;

যং যদেৰাভিপত্থেন্তি, সব্বমেতেন লব্ভতি.

সুৰণ্ণতা সুসরতা, সুসণ্ঠানা সুরূপতা [সুসণ্ঠানসুরূপতা (সী.), সুসণ্ঠানং সুরূপতা (স্যা. কং.)];

আধিপচ্চপরিৰারো, সব্বমেতেন লব্ভতি.

পদেসরজ্জং ইস্সরিযং, চক্কৰত্তিসুখং পিযং;

দেৰরজ্জম্পি দিব্বেসু, সব্বমেতেন লব্ভতি.

মানুস্সিকা চ সম্পত্তি, দেৰলোকে চ যা রতি;

যা চ নিব্বানসম্পত্তি, সব্বমেতেন লব্ভতি.

মিত্তসম্পদমাগম্ম, যোনিসোৰ [যোনিসো ৰে (সী.), যোনিসো চে (স্যা.), যোনিসো চ (?)] পযুঞ্জতো;

ৰিজ্জা ৰিমুত্তি ৰসীভাৰো, সব্বমেতেন লব্ভতি.

পটিসম্ভিদা ¶ ৰিমোক্খা চ, যা চ সাৰকপারমী;

পচ্চেকবোধি বুদ্ধভূমি, সব্বমেতেন লব্ভতি.

এৰং ¶ মহত্থিকা এসা, যদিদং পুঞ্ঞসম্পদা;

তস্মা ধীরা পসংসন্তি, পণ্ডিতা কতপুঞ্ঞতন্তি.

করণীযমত্থকুসলেন ¶ , যন্তসন্তং পদং অভিসমেচ্চ;

সক্কো উজূ চ সুহুজূ [সূজূ (সী.)] চ, সুৰচো চস্স মুদু অনতিমানী.

সন্তুস্সকো ¶ চ সুভরো চ, অপ্পকিচ্চো চ সল্লহুকৰুত্তি;

সন্তিন্দ্রিযো চ নিপকো চ, অপ্পগব্ভো কুলেস্ৰননুগিদ্ধো.

ন চ খুদ্দমাচরে কিঞ্চি, যেন ৰিঞ্ঞূ পরে উপৰদেয্যুং;

সুখিনোৰ খেমিনো হোন্তু, সব্বসত্তা [সব্বে সত্তা (সী. স্যা.)] ভৰন্তু সুখিতত্তা.

যে কেচি পাণভূতত্থি, তসা ৰা থাৰরা ৰনৰসেসা;

দীঘা ৰা যেৰ মহন্তা [মহন্ত (?)], মজ্ঝিমা রস্সকা অণুকথূলা.

দিট্ঠা ৰা যেৰ অদিট্ঠা [অদিট্ঠ (?)], যে ৰ [যে চ (সী. স্যা. কং. পী.)] দূরে ৰসন্তি অৰিদূরে;

ভূতা ৰ [ৰা (স্যা. কং. পী. ক.)] সম্ভৰেসী ৰ [ৰা (সী. স্যা. কং. পী.)], সব্বসত্তা ভৰন্তু সুখিতত্তা.

ন পরো পরং নিকুব্বেথ, নাতিমঞ্ঞেথ কত্থচি ন কঞ্চি [নং কঞ্চি (সী. পী.), নং কিঞ্চি (স্যা.), ন কিঞ্চি (ক.)];

ব্যারোসনা পটিঘসঞ্ঞা, নাঞ্ঞমঞ্ঞস্স দুক্খমিচ্ছেয্য.

মাতা ¶ যথা নিযং পুত্তমাযুসা একপুত্তমনুরক্খে;

এৰম্পি সব্বভূতেসু, মানসং ভাৰযে অপরিমাণং.

মেত্তঞ্চ ¶ সব্বলোকস্মি, মানসং ভাৰযে অপরিমাণং;

উদ্ধং অধো চ তিরিযঞ্চ, অসম্বাধং অৰেরমসপত্তং.

তিট্ঠং চরং নিসিন্নো ৰ [ৰা (সী. স্যা. কং. পী.)], সযানো যাৰতাস্স ৰিতমিদ্ধো [ৰিগতমিদ্ধো (বহূসু)];

এতং সতিং অধিট্ঠেয্য, ব্রহ্মমেতং ৰিহারমিধমাহু.

দিট্ঠিঞ্চ ¶ অনুপগ্গম্ম, সীলৰা দস্সনেন সম্পন্নো;

কামেসু ৰিনয [ৰিনেয্য (সী.)] গেধং, ন হি জাতুগ্গব্ভসেয্য পুন রেতীতি.