📜

নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

সুত্তনিপাত-অট্ঠকথা

(পঠমো ভাগো)

গন্থারম্ভকথা

উত্তমং ¶ ¶ ¶ ৰন্দনেয্যানং, ৰন্দিত্ৰা রতনত্তযং;

যো খুদ্দকনিকাযম্হি, খুদ্দাচারপ্পহাযিনা.

দেসিতো লোকনাথেন, লোকনিস্সরণেসিনা;

তস্স সুত্তনিপাতস্স, করিস্সামত্থৰণ্ণনং.

অযং ¶ সুত্তনিপাতো চ, খুদ্দকেস্ৰেৰ ওগধো;

যস্মা তস্মা ইমস্সাপি, করিস্সামত্থৰণ্ণনং.

গাথাসতসমাকিণ্ণো, গেয্যব্যাকরণঙ্কিতো;

কস্মা সুত্তনিপাতোতি, সঙ্খমেস গতোতি চে.

সুৰুত্ততো সৰনতো, অত্থানং সুট্ঠু তাণতো;

সূচনা সূদনা চেৰ, যস্মা সুত্তং পৰুচ্চতি.

তথারূপানি সুত্তানি, নিপাতেত্ৰা ততো ততো;

সমূহতো অযং তস্মা, সঙ্খমেৰমুপাগতো.

সব্বানি চাপি সুত্তানি, পমাণন্তেন তাদিনো;

ৰচনানি অযং তেসং, নিপাতো চ যতো ততো.

অঞ্ঞসঙ্খানিমিত্তানং, ৰিসেসানমভাৰতো;

সঙ্খং সুত্তনিপাতোতি, এৰমেৰ সমজ্ঝগাতি.

১. উরগৰগ্গো

১. উরগসুত্তৰণ্ণনা

এৰং ¶ ¶ সমধিগতসঙ্খো চ যস্মা এস ৰগ্গতো উরগৰগ্গো, চূল়ৰগ্গো, মহাৰগ্গো, অট্ঠকৰগ্গো, পারাযনৰগ্গোতি পঞ্চ ৰগ্গা হোন্তি; তেসু উরগৰগ্গো আদি. সুত্ততো উরগৰগ্গে দ্ৰাদস সুত্তানি, চূল়ৰগ্গে চুদ্দস, মহাৰগ্গে দ্ৰাদস, অট্ঠকৰগ্গে সোল়স, পারাযনৰগ্গে সোল়সাতি সত্ততি সুত্তানি. তেসং উরগসুত্তং আদি. পরিযত্তিপমাণতো অট্ঠ ¶ ভাণৰারা. এৰং ৰগ্গসুত্তপরিযত্তিপমাণৰতো পনস্স –

‘‘যো উপ্পতিতং ৰিনেতি কোধং, ৰিসটং সপ্পৰিসংৰ ওসধেহি;

সো ভিক্খু জহাতি ওরপারং, উরগো জিণ্ণমিৰ তচং পুরাণ’’ন্তি. –

অযং গাথা আদি. তস্মা অস্সা ইতো পভুতি অত্থৰণ্ণনং কাতুং ইদং ৰুচ্চতি –

‘‘যেন যত্থ যদা যস্মা, ৰুত্তা গাথা অযং ইমং;

ৰিধিং পকাসযিত্ৰাস্সা, করিস্সামত্থৰণ্ণন’’ন্তি.

কেন পনাযং গাথা ৰুত্তা, কত্থ, কদা, কস্মা চ ৰুত্তাতি? ৰুচ্চতে – যো সো ভগৰা চতুৰীসতিবুদ্ধসন্তিকে লদ্ধব্যাকরণো যাৰ ৰেস্সন্তরজাতকং, তাৰ পারমিযো পূরেত্ৰা তুসিতভৰনে উপ্পজ্জি, ততোপি চৰিত্ৰা সক্যরাজকুলে উপপত্তিং গহেত্ৰা, অনুপুব্বেন কতমহাভিনিক্খমনো বোধিরুক্খমূলে সম্মাসম্বোধিং অভিসম্বুজ্ঝিত্ৰা, ধম্মচক্কং পৰত্তেত্ৰা দেৰ-মনুস্সানং হিতায ধম্মং দেসেসি, তেন ভগৰতা সযম্ভুনা অনাচরিযকেন সম্মাসম্বুদ্ধেন ৰুত্তা. সা চ পন আল়ৰিযং. যদা চ ভূতগামসিক্খাপদং পঞ্ঞত্তং, তদা তত্থ উপগতানং ধম্মদেসনত্থং ৰুত্তাতি. অযমেত্থ সঙ্খেপৰিস্সজ্জনা. ৰিত্থারতো পন দূরেনিদানঅৰিদূরেনিদানসন্তিকেনিদানৰসেন ৰেদিতব্বা. তত্থ দূরেনিদানং নাম দীপঙ্করতো ¶ যাৰ পচ্চুপ্পন্নৰত্থুকথা ¶ , অৰিদূরেনিদানং নাম তুসিতভৰনতো যাৰ পচ্চুপ্পন্নৰত্থুকথা, সন্তিকেনিদানং নাম বোধিমণ্ডতো যাৰ পচ্চুপ্পন্নৰত্থুকথাতি.

তত্থ যস্মা অৰিদূরেনিদানং সন্তিকেনিদানঞ্চ দূরেনিদানেযেৰ সমোধানং গচ্ছন্তি, তস্মা দূরেনিদানৰসেনেৰেত্থ ৰিত্থারতো ৰিস্সজ্জনা ৰেদিতব্বা. সা পনেসা জাতকট্ঠকথাযং ৰুত্তাতি ইধ ন ৰিত্থারিতা. ততো তত্থ ৰিত্থারিতনযেনেৰ ৰেদিতব্বা. অযং পন ৰিসেসো – তত্থ পঠমগাথায সাৰত্থিযং ৰত্থু উপ্পন্নং, ইধ আল়ৰিযং. যথাহ –

‘‘তেন ¶ সমযেন বুদ্ধো ভগৰা আল়ৰিযং ৰিহরতি অগ্গাল়ৰে চেতিযে. তেন খো পন সমযেন আল়ৰকা ভিক্খূ নৰকম্মং করোন্তা রুক্খং ছিন্দন্তিপি ছেদাপেন্তিপি. অঞ্ঞতরোপি আল়ৰকো ভিক্খু রুক্খং ছিন্দতি. তস্মিং রুক্খে অধিৰত্থা দেৰতা তং ভিক্খুং এতদৰোচ – ‘মা, ভন্তে, অত্তনো ভৰনং কত্তুকামো ময্হং ভৰনং ছিন্দী’তি. সো ভিক্খু অনাদিযন্তো ছিন্দিযেৰ. তস্সা চ দেৰতায দারকস্স বাহুং আকোটেসি. অথ খো তস্সা দেৰতায এতদহোসি – ‘যংনূনাহং ইমং ভিক্খুং ইধেৰ জীৰিতা ৰোরোপেয্য’ন্তি. অথ খো তস্সা দেৰতায এতদহোসি – ‘ন খো মেতং পতিরূপং, যাহং ইমং ভিক্খুং ইধেৰ জীৰিতা ৰোরোপেয্যং, যংনূনাহং ভগৰতো এতমত্থং আরোচেয্য’ন্তি. অথ খো সা দেৰতা যেন ভগৰা তেনুপসঙ্কমি; উপসঙ্কমিত্ৰা ভগৰতো এতমত্থং আরোচেসি. ‘সাধু, সাধু দেৰতে, সাধু খো ত্ৰং, দেৰতে, তং ভিক্খুং জীৰিতা ন ৰোরোপেসি. সচজ্জ ত্ৰং, দেৰতে, তং ভিক্খুং জীৰিতা ৰোরোপেয্যাসি, বহুঞ্চ ত্ৰং, দেৰতে, অপুঞ্ঞং পসৰেয্যাসি. গচ্ছ ত্ৰং, দেৰতে, অমুকস্মিং ওকাসে রুক্খো ৰিৰিত্তো, তস্মিং উপগচ্ছা’’’তি (পাচি. ৮৯).

এৰঞ্চ পন ৰত্ৰা পুন ভগৰা তস্সা দেৰতায উপ্পন্নকোধৰিনযনত্থং –

‘‘যো ৰে উপ্পতিতং কোধং, রথং ভন্তংৰ ৰারযে’’তি. (ধ. প. ২২২) –

ইমং ¶ গাথং অভাসি. ততো ‘‘কথঞ্হি নাম সমণা সক্যপুত্তিযা রুক্খং ছিন্দিস্সন্তিপি, ছেদাপেস্সন্তিপি, একিন্দ্রিযং সমণা সক্যপুত্তিযা জীৰং ৰিহেঠেন্তী’’তি এৰং মনুস্সানং উজ্ঝাযিতং সুত্ৰা ভিক্খূহি আরোচিতো ভগৰা – ‘‘ভূতগামপাতব্যতায পাচিত্তিয’’ন্তি (পাচি. ৯০) ইমং সিক্খাপদং পঞ্ঞাপেত্ৰা তত্থ উপগতানং ধম্মদেসনত্থং –

‘‘যো ¶ উপ্পতিতং ৰিনেতি কোধং,

ৰিসটং সপ্পৰিসংৰ ওসধেহী’’তি. –

ইমং গাথং অভাসি. এৰমিদং একংযেৰ ¶ ৰত্থু তীসু ঠানেসু সঙ্গহং গতং – ৰিনযে, ধম্মপদে, সুত্তনিপাতেতি. এত্তাৰতা চ যা সা মাতিকা ঠপিতা –

‘‘যেন যত্থ যদা যস্মা, ৰুত্তা গাথা অযং ইমং;

ৰিধি পকাসযিত্ৰাস্সা, করিস্সামত্থৰণ্ণন’’ন্তি. –

সা সঙ্খেপতো ৰিত্থারতো চ পকাসিতা হোতি ঠপেত্ৰা অত্থৰণ্ণনং.

১. অযং পনেত্থ অত্থৰণ্ণনা. যোতি যো যাদিসো খত্তিযকুলা ৰা পব্বজিতো, ব্রাহ্মণকুলা ৰা পব্বজিতো, নৰো ৰা মজ্ঝিমো ৰা থেরো ৰা. উপ্পতিতন্তি উদ্ধমুদ্ধং পতিতং গতং, পৰত্তন্তি অত্থো, উপ্পন্নন্তি ৰুত্তং হোতি. উপ্পন্নঞ্চ নামেতং ৰত্তমানভুত্ৰাপগতোকাসকতভূমিলদ্ধৰসেন অনেকপ্পভেদং. তত্থ সব্বম্পি সঙ্খতং উপ্পাদাদিসমঙ্গি ৰত্তমানুপ্পন্নং নাম, যং সন্ধায ‘‘উপ্পন্না ধম্মা, অনুপ্পন্না ধম্মা, উপ্পাদিনো ধম্মা’’তি (ধ. স. তিকমাতিকা ১৭) ৰুত্তং. আরম্মণরসমনুভৰিত্ৰা নিরুদ্ধং অনুভুত্ৰাপগতসঙ্খাতং কুসলাকুসলং, উপ্পাদাদিত্তযমনুপ্পত্ৰা নিরুদ্ধং ভুত্ৰাপগতসঙ্খাতং সেসসঙ্খতঞ্চ ভুত্ৰাপগতুপ্পন্নং নাম. তদেতং ‘‘এৰরূপং পাপকং দিট্ঠিগতং উপ্পন্নং হোতী’’তি (ম. নি. ১.২৩৪; পাচি. ৪১৭) চ, ‘‘যথা চ উপ্পন্নস্স সতিসম্বোজ্ঝঙ্গস্স ভাৰনাপারিপূরী হোতী’’তি চ এৰমাদীসু সুত্তন্তেসু দট্ঠব্বং. ‘‘যানিস্স তানি পুব্বে কতানি কম্মানী’’তি এৰমাদিনা (ম. নি. ৩.২৪৮; নেত্তি. ১২০) নযেন ৰুত্তং কম্মং অতীতম্পি সমানং অঞ্ঞস্স ৰিপাকং পটিবাহিত্ৰা অত্তনো ৰিপাকস্সোকাসং কত্ৰা ঠিতত্তা, তথা কতোকাসঞ্চ ৰিপাকং অনুপ্পন্নম্পি এৰং কতে ওকাসে অৰস্সমুপ্পত্তিতো ওকাসকতুপ্পন্নং ¶ নাম. তাসু তাসু ভূমীসু অসমূহতমকুসলং ভূমিলদ্ধুপ্পন্নং নাম.

এত্থ চ ভূমিযা ভূমিলদ্ধস্স চ নানত্তং ৰেদিতব্বং. সেয্যথিদং – ভূমি নাম ৰিপস্সনায আরম্মণভূতা তেভূমকা পঞ্চক্খন্ধা. ভূমিলদ্ধং নাম তেসু উপ্পত্তারহং ¶ কিলেসজাতং. তেন হি সা ভূমিলদ্ধা নাম হোতীতি. তস্মা ‘‘ভূমিলদ্ধ’’ন্তি ৰুচ্চতি. তঞ্চ পন ন আরম্মণৰসেন. আরম্মণৰসেন হি সব্বেপি অতীতাদিভেদে পরিঞ্ঞাতেপি চ খীণাসৰানং ¶ খন্ধে আরব্ভ কিলেসা উপ্পজ্জন্তি মহাকচ্চাযনউপ্পলৰণ্ণাদীনং খন্ধে আরব্ভ সোরেয্যসেট্ঠিপুত্তনন্দমাণৰকাদীনং ৰিয. যদি চেতং ভূমিলদ্ধং নাম সিযা, তস্স অপ্পহেয্যতো ন কোচি ভৰমূলং জহেয্য. ৰত্থুৰসেন পন ভূমিলদ্ধং নাম ৰেদিতব্বং. যত্থ যত্থ হি ৰিপস্সনায অপরিঞ্ঞাতা খন্ধা উপ্পজ্জন্তি, তত্থ তত্থ উপ্পাদতো পভুতি তেসু ৰট্টমূলং কিলেসজাতং অনুসেতি. তং অপ্পহীনট্ঠেন ভূমিলদ্ধুপ্পন্নং নামাতি ৰেদিতব্বং. তত্থ চ যস্স খন্ধেসু অপ্পহীনানুসযিতা কিলেসা, তস্স তে এৰ খন্ধা তেসং কিলেসানং ৰত্থু, ন ইতরে খন্ধা. অতীতক্খন্ধেসু চস্স অপ্পহীনানুসযিতানং কিলেসানং অতীতক্খন্ধা এৰ ৰত্থু, ন ইতরে. এসেৰ নযো অনাগতাদীসু. তথা কামাৰচরক্খন্ধেসু অপ্পহীনানুসযিতানং কিলেসানং কামাৰচরক্খন্ধা এৰ ৰত্থু, ন ইতরে. এস নযো রূপারূপাৰচরেসু.

সোতাপন্নাদীনং পন যস্স যস্স অরিযপুগ্গলস্স খন্ধেসু তং তং ৰট্টমূলং কিলেসজাতং তেন তেন মগ্গেন পহীনং, তস্স তস্স তে তে খন্ধা পহীনানং তেসং তেসং ৰট্টমূলকিলেসানং অৰত্থুতো ভূমীতি সঙ্খং ন লভন্তি. পুথুজ্জনস্স পন সব্বসো ৰট্টমূলানং কিলেসানং অপ্পহীনত্তা যং কিঞ্চি করিযমানং কম্মং কুসলং ৰা অকুসলং ৰা হোতি, ইচ্চস্স কিলেসপ্পচ্চযা ৰট্টং ৰড্ঢতি. তস্সেতং ৰট্টমূলং রূপক্খন্ধে এৰ, ন ৰেদনাক্খন্ধাদীসু…পে… ৰিঞ্ঞাণক্খন্ধে এৰ ৰা, ন রূপক্খন্ধাদীসূতি ন ৰত্তব্বং. কস্মা? অৰিসেসেন পঞ্চসু খন্ধেসু অনুসযিতত্তা. কথং? পথৰীরসাদিমিৰ রুক্খে. যথা হি মহারুক্খে পথৰীতলং অধিট্ঠায পথৰীরসঞ্চ আপোরসঞ্চ ¶ নিস্সায তপ্পচ্চযা মূলখন্ধসাখপসাখপত্তপল্লৰপলাসপুপ্ফফলেহি ৰড্ঢিত্ৰা নভং পূরেত্ৰা যাৰকপ্পাৰসানং বীজপরম্পরায রুক্খপৰেণীসন্তানে ঠিতে ¶ ‘‘তং পথৰীরসাদি মূলে এৰ, ন খন্ধাদীসু, ফলে এৰ ৰা, ন মূলাদীসূ’’তি ন ৰত্তব্বং. কস্মা? অৰিসেসেন সব্বেস্ৰেৰ মূলাদীসু অনুগতত্তা, এৰং. যথা পন তস্সেৰ রুক্খস্স পুপ্ফফলাদীসু নিব্বিন্নো কোচি পুরিসো চতূসু দিসাসু মণ্ডূককণ্টকং নাম রুক্খে ৰিসং পযোজেয্য, অথ সো রুক্খো তেন ৰিসসম্ফস্সেন ফুট্ঠো পথৰীরসআপোরসপরিযাদিন্নেন অপ্পসৰনধম্মতং আগম্ম পুন সন্তানং নিব্বত্তেতুং সমত্থো ন ভৰেয্য, এৰমেৰং খন্ধপ্পৰত্তিযং নিব্বিন্নো কুলপুত্তো তস্স পুরিসস্স চতূসু দিসাসু রুক্খে ৰিসপ্পযোজনং ৰিয অত্তনো সন্তানে চতুমগ্গভাৰনং আরভতি. অথস্স সো খন্ধসন্তানো তেন চতুমগ্গৰিসসম্ফস্সেন সব্বসো ৰট্টমূলকিলেসানং পরিযাদিন্নত্তা কিরিযভাৰমত্তমুপগতকাযকম্মাদি সব্বকম্মপ্পভেদো আযতিং পুনব্ভৰাভিনিব্বত্তধম্মতমাগম্ম ভৰন্তরসন্তানং নিব্বত্তেতুং সমত্থো ন হোতি. কেৰলং পন চরিমৰিঞ্ঞাণনিরোধেন নিরিন্ধনো ৰিয জাতৰেদো অনুপাদানো পরিনিব্বাতি. এৰং ভূমিযা ভূমিলদ্ধস্স চ নানত্তং ৰেদিতব্বং.

অপিচ ¶ অপরম্পি সমুদাচারারম্মণাধিগ্গহিতাৰিক্খম্ভিতাসমূহতৰসেন চতুব্বিধমুপ্পন্নং. তত্থ ৰত্তমানুপ্পন্নমেৰ সমুদাচারুপ্পন্নং. চক্খাদীনং পন আপাথগতে আরম্মণে পুব্বভাগে অনুপ্পজ্জমানম্পি কিলেসজাতং আরম্মণস্স অধিগ্গহিতত্তা এৰ অপরভাগে অৰস্সমুপ্পত্তিতো আরম্মণাধিগ্গহিতুপ্পন্নন্তি ৰুচ্চতি. কল্যাণিগামে পিণ্ডায চরতো ¶ মহাতিস্সত্থেরস্স ৰিসভাগরূপদস্সনেন উপ্পন্নকিলেসজাতঞ্চেত্থ নিদস্সনং. তস্স ‘‘উপ্পন্নং কামৰিতক্ক’’ন্তিআদীসু (ম. নি. ১.২৬; অ. নি. ৬.৫৮) পযোগো দট্ঠব্বো. সমথৰিপস্সনানং অঞ্ঞতরৰসেন অৰিক্খম্ভিতকিলেসজাতং চিত্তসন্ততিমনারূল়্হং উপ্পত্তিনিৰারকস্স হেতুনো অভাৰা অৰিক্খম্ভিতুপ্পন্নং নাম. তং ‘‘অযম্পি খো, ভিক্খৰে, আনাপানস্সতিসমাধি ভাৰিতো বহুলীকতো সন্তো চেৰ পণীতো চ অসেচনকো চ সুখো চ ৰিহারো উপ্পন্নুপ্পন্নে পাপকে অকুসলে ধম্মে ঠানসো অন্তরধাপেতী’’তিআদীসু (পারা. ১৬৫) দট্ঠব্বং. সমথৰিপস্সনাৰসেন ৰিক্খম্ভিতম্পি কিলেসজাতং অরিযমগ্গেন অসমূহতত্তা উপ্পত্তিধম্মতং অনতীতন্তি কত্ৰা অসমূহতুপ্পন্নন্তি ৰুচ্চতি. আকাসেন গচ্ছন্তস্স অট্ঠসমাপত্তিলাভিনো থেরস্স কুসুমিতরুক্খে উপৰনে পুপ্ফানি ওচিনন্তস্স মধুরস্সরেন ¶ গাযতো মাতুগামস্স গীতস্সরং সুতৰতো উপ্পন্নকিলেসজাতঞ্চেত্থ নিদস্সনং. তস্স ‘‘অরিযং অট্ঠঙ্গিকং মগ্গং বহুলীকরোন্তো উপ্পন্নুপ্পন্নে পাপকে অকুসলে ধম্মে অন্তরাযেৰ অন্তরধাপেতী’’তিআদীসু (সং. নি. ৫.১৫৭) পযোগো দট্ঠব্বো. তিৰিধম্পি চেতং আরম্মণাধিগ্গহিতাৰিক্খম্ভিতাসমূহতুপ্পন্নং ভূমিলদ্ধেনেৰ সঙ্গহং গচ্ছতীতি ৰেদিতব্বং.

এৰমেতস্মিং যথাৰুত্তপ্পভেদে উপ্পন্নে ভূমিলদ্ধারম্মণাধিগ্গহিতাৰিক্খম্ভিতাসমূহতুপ্পন্নৰসেনাযং কোধো উপ্পন্নোতি ৰেদিতব্বো. কস্মা? এৰংৰিধস্স ৰিনেতব্বতো. এৰংৰিধমেৰ হি উপ্পন্নং যেন কেনচি ৰিনযেন ৰিনেতুং সক্কা হোতি. যং পনেতং ৰত্তমানভুত্ৰাপগতোকাসকতসমুদাচারসঙ্খাতং উপ্পন্নং, এত্থ অফলো চ অসক্যো চ ৰাযামো. অফলো হি ভুত্ৰাপগতে ৰাযামো ৰাযামন্তরেনাপি তস্স নিরুদ্ধত্তা. তথা ওকাসকতে. অসক্যো চ ৰত্তমানসমুদাচারুপ্পন্নে কিলেসৰোদানানং একজ্ঝমনুপ্পত্তিতোতি.

ৰিনেতীতি ¶ এত্থ পন –

‘‘দুৰিধো ৰিনযো নাম, একমেকেত্থ পঞ্চধা;

তেসু অট্ঠৰিধেনেস, ৰিনেতীতি পৰুচ্চতি’’.

অযঞ্হি ¶ সংৰরৰিনযো, পহানৰিনযোতি দুৰিধো ৰিনযো. এত্থ চ দুৰিধে ৰিনযে একমেকো ৰিনযো পঞ্চধা ভিজ্জতি. সংৰরৰিনযোপি হি সীলসংৰরো, সতিসংৰরো, ঞাণসংৰরো, খন্তিসংৰরো, ৰীরিযসংৰরোতি পঞ্চৰিধো. পহানৰিনযোপি তদঙ্গপ্পহানং, ৰিক্খম্ভনপ্পহানং, সমুচ্ছেদপ্পহানং, পটিপ্পস্সদ্ধিপ্পহানং, নিস্সরণপ্পহানন্তি পঞ্চৰিধো.

তত্থ ‘‘ইমিনা পাতিমোক্খসংৰরেন উপেতো হোতি সমুপেতো’’তিআদীসু (ৰিভ. ৫১১) সীলসংৰরো, ‘‘রক্খতি চক্খুন্দ্রিযং, চক্খুন্দ্রিযে সংৰরং আপজ্জতী’’তিআদীসু (দী. নি. ১.২১৩; ম. নি. ১.২৯৫; সং. নি. ৪.২৩৯; অ. নি. ৩.১৬) সতিসংৰরো.

‘‘যানি সোতানি লোকস্মিং, (অজিতাতি ভগৰা)

সতি তেসং নিৰারণং;

সোতানং সংৰরং ব্রূমি,

পঞ্ঞাযেতে পিধীযরে’’তি. (সু. নি. ১০৪১) –

আদীসু ¶ ঞাণসংৰরো, ‘‘খমো হোতি সীতস্স উণ্হস্সা’’তিআদীসু (ম. নি. ১.২৪; অ. নি. ৪.১১৪) খন্তিসংৰরো, ‘‘উপ্পন্নং কামৰিতক্কং নাধিৰাসেতি, পজহতি, ৰিনোদেতী’’তিআদীসু (ম. নি. ১.২৬; অ. নি. ৪.১১৪) ৰীরিযসংৰরো ৰেদিতব্বো. সব্বোপি চাযং সংৰরো যথাসকং সংৰরিতব্বানং ৰিনেতব্বানঞ্চ কাযৰচীদুচ্চরিতাদীনং সংৰরণতো সংৰরো, ৰিনযনতো ৰিনযোতি ৰুচ্চতি. এৰং তাৰ সংৰরৰিনযো পঞ্চধা ভিজ্জতীতি ৰেদিতব্বো.

তথা যং নামরূপপরিচ্ছেদাদীসু ৰিপস্সনঙ্গেসু যাৰ অত্তনো অপরিহানৰসেন পৰত্তি, তাৰ তেন তেন ঞাণেন তস্স তস্স অনত্থসন্তানস্স পহানং. সেয্যথিদং – নামরূপৰৰত্থানেন সক্কাযদিট্ঠিযা, পচ্চযপরিগ্গহেন ¶ অহেতুৰিসমহেতুদিট্ঠীনং, তস্সেৰ অপরভাগেন কঙ্খাৰিতরণেন কথংকথীভাৰস্স, কলাপসম্মসনেন ‘‘অহং মমা’’তি গাহস্স, মগ্গামগ্গৰৰত্থানেন অমগ্গে মগ্গসঞ্ঞায, উদযদস্সনেন উচ্ছেদদিট্ঠিযা, ৰযদস্সনেন সস্সতদিট্ঠিযা, ভযদস্সনেন সভযেসু অভযসঞ্ঞায, আদীনৰদস্সনেন অস্সাদসঞ্ঞায, নিব্বিদানুপস্সনেন অভিরতিসঞ্ঞায, মুচ্চিতুকম্যতাঞাণেন অমুচ্চিতুকম্যতায, উপেক্খাঞাণেন অনুপেক্খায, অনুলোমেন ধম্মট্ঠিতিযং নিব্বানে চ পটিলোমভাৰস্স, গোত্রভুনা সঙ্খারনিমিত্তগ্গাহস্স পহানং, এতং তদঙ্গপ্পহানং নাম. যং পন উপচারপ্পনাভেদস্স সমাধিনো যাৰ অত্তনো অপরিহানিপৰত্তি ¶ , তাৰ তেনাভিহতানং নীৰরণানং যথাসকং ৰিতক্কাদিপচ্চনীকধম্মানঞ্চ অনুপ্পত্তিসঙ্খাতং পহানং, এতং ৰিক্খম্ভনপ্পহানং নাম. যং পন চতুন্নং অরিযমগ্গানং ভাৰিতত্তা তংতংমগ্গৰতো অত্তনো সন্তানে যথাসকং ‘‘দিট্ঠিগতানং পহানাযা’’তিআদিনা (ধ. স. ২৭৭) নযেন ৰুত্তস্স সমুদযপক্খিকস্স কিলেসগহনস্স পুন অচ্চন্তঅপ্পৰত্তিভাৰেন সমুচ্ছেদসঙ্খাতং পহানং, ইদং সমুচ্ছেদপ্পহানং নাম. যং পন ফলক্খণে পটিপ্পস্সদ্ধত্তং কিলেসানং পহানং, ইদং পটিপ্পস্সদ্ধিপ্পহানং নাম. যং পন সব্বসঙ্খতনিস্সরণত্তা পহীনসব্বসঙ্খতং নিব্বানং, এতং নিস্সরণপ্পহানং নাম. সব্বম্পি চেতং পহানং যস্মা চাগট্ঠেন পহানং, ৰিনযনট্ঠেন ৰিনযো, তস্মা ‘‘পহানৰিনযো’’তি ৰুচ্চতি, তংতংপহানৰতো ৰা তস্স তস্স ৰিনযস্স সম্ভৰতোপেতং ‘‘পহানৰিনযো’’তি ¶ ৰুচ্চতি. এৰং পহানৰিনযোপি পঞ্চধা ভিজ্জতীতি ৰেদিতব্বো. এৰমেকেকস্স পঞ্চধা ভিন্নত্তা দসেতে ৰিনযা হোন্তি.

তেসু পটিপ্পস্সদ্ধিৰিনযং নিস্সরণৰিনযঞ্চ ঠপেত্ৰা ¶ অৰসেসেন অট্ঠৰিধেন ৰিনযেনেস তেন তেন পরিযাযেন ৰিনেতীতি পৰুচ্চতি. কথং? সীলসংৰরেন কাযৰচীদুচ্চরিতানি ৰিনেন্তোপি হি তংসম্পযুত্তং কোধং ৰিনেতি, সতিপঞ্ঞাসংৰরেহি অভিজ্ঝাদোমনস্সাদীনি ৰিনেন্তোপি দোমনস্সসম্পযুত্তং কোধং ৰিনেতি, খন্তিসংৰরেন সীতাদীনি খমন্তোপি তংতংআঘাতৰত্থুসম্ভৰং কোধং ৰিনেতি, ৰীরিযসংৰরেন ব্যাপাদৰিতক্কং ৰিনেন্তোপি তংসম্পযুত্তং কোধং ৰিনেতি. যেহি ধম্মেহি তদঙ্গৰিক্খম্ভনসমুচ্ছেদপ্পহানানি হোন্তি, তেসং ধম্মানং অত্তনি নিব্বত্তনেন তে তে ধম্মে পজহন্তোপি তদঙ্গপ্পহাতব্বং ৰিক্খম্ভেতব্বং সমুচ্ছিন্দিতব্বঞ্চ কোধং ৰিনেতি. কামঞ্চেত্থ পহানৰিনযেন ৰিনযো ন সম্ভৰতি. যেহি পন ধম্মেহি পহানং হোতি, তেহি ৰিনেন্তোপি পরিযাযতো ‘‘পহানৰিনযেন ৰিনেতী’’তি ৰুচ্চতি. পটিপ্পস্সদ্ধিপ্পহানকালে পন ৰিনেতব্বাভাৰতো নিস্সরণপ্পহানস্স চ অনুপ্পাদেতব্বতো ন তেহি কিঞ্চি ৰিনেতীতি ৰুচ্চতি. এৰং তেসু পটিপ্পস্সদ্ধিৰিনযং নিস্সরণৰিনযঞ্চ ঠপেত্ৰা অৰসেসেন অট্ঠৰিধেন ৰিনযেনেস তেন তেন পরিযাযেন ৰিনেতীতি পৰুচ্চতীতি. যে ৰা –

‘‘পঞ্চিমে, ভিক্খৰে, আঘাতপটিৰিনযা, যত্থ ভিক্খুনো উপ্পন্নো আঘাতো সব্বসো পটিৰিনেতব্বো. কতমে পঞ্চ? যস্মিং, ভিক্খৰে, পুগ্গলে আঘাতো জাযেথ, মেত্তা তস্মিং পুগ্গলে ভাৰেতব্বা…পে… করুণা… উপেক্খা… অসতি-অমনসিকারো তস্মিং পুগ্গলে আপজ্জিতব্বো, এৰং তস্মিং পুগ্গলে আঘাতো পটিৰিনেতব্বো. কম্মস্সকতা এৰ ৰা তস্মিং পুগ্গলে অধিট্ঠাতব্বা কম্মস্সকো অযমাযস্মা…পে… দাযাদো ভৰিস্সতী’’তি (অ. নি. ৫.১৬১) –

এৰং ¶ পঞ্চ আঘাতপটিৰিনযা ৰুত্তা. যে চ –

‘‘পঞ্চিমে, আৰুসো, আঘাতপটিৰিনযা, যত্থ ভিক্খুনো উপ্পন্নো আঘাতো সব্বসো পটিৰিনেতব্বো. কতমে পঞ্চ? ইধাৰুসো ¶ , একচ্চো পুগ্গলো অপরিসুদ্ধকাযসমাচারো হোতি, পরিসুদ্ধৰচীসমাচারো, এৰরূপেপি, আৰুসো, পুগ্গলে আঘাতো ¶ পটিৰিনেতব্বো’’তি (অ. নি. ৫.১৬২) –

এৰমাদিনাপি নযেন পঞ্চ আঘাতপটিৰিনযা ৰুত্তা. তেসু যেন কেনচি আঘাতপটিৰিনযেন ৰিনেন্তোপেস ৰিনেতীতি পৰুচ্চতি. অপিচ যস্মা –

‘‘উভতোদণ্ডকেন চেপি, ভিক্খৰে, ককচেন চোরা ওচরকা অঙ্গমঙ্গানি ওক্কন্তেয্যুং, তত্রাপি যো মনো পদোসেয্য, ন মে সো তেন সাসনকরো’’তি (ম. নি. ১.২৩২) –-

এৰং সত্থু ওৰাদং,

‘‘তস্সেৰ তেন পাপিযো, যো কুদ্ধং পটিকুজ্ঝতি;

কুদ্ধং অপ্পটিকুজ্ঝন্তো, সঙ্গামং জেতি দুজ্জযং.

‘‘উভিন্নমত্থং চরতি, অত্তনো চ পরস্স চ;

পরং সঙ্কুপিতং ঞত্ৰা, যো সতো উপসম্মতি’’. (সং. নি. ১.১৮৮);

‘‘সত্তিমে, ভিক্খৰে, ধম্মা সপত্তকন্তা সপত্তকরণা কোধনং আগচ্ছন্তি ইত্থিং ৰা পুরিসং ৰা. কতমে সত্ত? ইধ, ভিক্খৰে, সপত্তো সপত্তস্স এৰং ইচ্ছতি – ‘অহো, ৰতাযং দুব্বণ্ণো অস্সা’তি. তং কিস্স হেতু? ন, ভিক্খৰে, সপত্তো সপত্তস্স ৰণ্ণৰতায নন্দতি. কোধনাযং, ভিক্খৰে, পুরিসপুগ্গলো কোধাভিভূতো কোধপরেতো কিঞ্চাপি সো হোতি সুন্হাতো সুৰিলিত্তো কপ্পিতকেসমস্সু ওদাতৰত্থৰসনো, অথ খো সো দুব্বণ্ণোৰ হোতি কোধাভিভূতো. অযং, ভিক্খৰে, পঠমো ধম্মো সপত্তকন্তো সপত্তকরণো কোধনং আগচ্ছতি ইত্থিং ৰা পুরিসং ৰা (অ. নি. ৭.৬৪).

‘‘পুন ¶ চপরং, ভিক্খৰে, সপত্তো সপত্তস্স এৰং ইচ্ছতি – ‘অহো, ৰতাযং দুক্খং সযেয্যা’তি…পে… ‘ন পচুরত্থো অস্সা’তি…পে… ‘ন ভোগৰা অস্সা’তি…পে… ‘ন যসৰা অস্সা’তি…পে… ‘ন মিত্তৰা অস্সা’তি…পে… ‘কাযস্স ভেদা পরং মরণা অপাযং দুগ্গতিং ¶ ৰিনিপাতং নিরযং উপপজ্জেয্যা’তি. তং কিস্স হেতু? ন, ভিক্খৰে, সপত্তো সপত্তস্স সুগতিগমনেন নন্দতি. কোধনাযং, ভিক্খৰে, পুরিসপুগ্গলো কোধাভিভূতো কোধপরেতো কাযেন দুচ্চরিতং চরতি, ৰাচায… মনসা দুচ্চরিতং চরতি. সো কাযেন দুচ্চরিতং চরিত্ৰা…পে… ৰাচায…পে… মনসা দুচ্চরিতং চরিত্ৰা কাযস্স ¶ ভেদা পরং মরণা…পে… নিরযং উপপজ্জতি কোধাভিভূতো’’তি (অ. নি. ৭.৬৪).

‘‘কুদ্ধো অত্থং ন জানাতি, কুদ্ধো ধম্মং ন পস্সতি…পে…. (অ. নি. ৭.৬৪; মহানি. ৫);

‘‘যেন কোধেন কুদ্ধাসে, সত্তা গচ্ছন্তি দুগ্গতিং;

তং কোধং সম্মদঞ্ঞায, পজহন্তি ৰিপস্সিনো. (ইতিৰু. ৪);

‘‘কোধং জহে ৰিপ্পজহেয্য মানং, সংযোজনং সব্বমতিক্কমেয্য. (ধ. প. ২২১);

‘‘অনত্থজননো কোধো, কোধো চিত্তপ্পকোপনো. (অ. নি. ৭.৬৪; ইতিৰু. ৮৮);

‘‘একাপরাধং খম ভূরিপঞ্ঞ, ন পণ্ডিতা কোধবলা ভৰন্তী’’তি. (জা. ১.১৫.১৯) –

এৰমাদিনা নযেন কোধে আদীনৰঞ্চ পচ্চৰেক্খতোপি কোধো ৰিনযং উপেতি. তস্মা এৰং পচ্চৰেক্খিত্ৰা কোধং ৰিনেন্তোপি এস ৰিনেতীতি ৰুচ্চতি.

কোধন্তি ‘‘অনত্থং মে অচরীতি আঘাতো জাযতী’’তিআদিনা (দী. নি. ৩.৩৪০; অ. নি. ৯.২৯) নযেন সুত্তে ৰুত্তানং নৰন্নং, ‘‘অত্থং মে ন চরী’’তি আদীনঞ্চ তপ্পটিপক্খতো ¶ সিদ্ধানং নৰন্নমেৰাতি অট্ঠারসন্নং, খাণুকণ্টকাদিনা অট্ঠানেন সদ্ধিং একূনৰীসতিযা আঘাতৰত্থূনং অঞ্ঞতরাঘাতৰত্থুসম্ভৰং আঘাতং. ৰিসটন্তি ৰিত্থতং. সপ্পৰিসন্তি সপ্পস্স ৰিসং. ইৰাতি ওপম্মৰচনং, ই-কার লোপং কত্ৰা ৰ-ইচ্চেৰ ৰুত্তং. ওসধেহীতি অগদেহি. ইদং ৰুত্তং হোতি – যথা ৰিসতিকিচ্ছকো ৰেজ্জো সপ্পেন দট্ঠং সব্বং কাযং ফরিত্ৰা ঠিতং ৰিসটং সপ্পৰিসং মূলখন্ধতচপত্তপুপ্ফাদীনং অঞ্ঞতরেহি ¶ নানাভেসজ্জেহি পযোজেত্ৰা কতেহি ৰা ওসধেহি খিপ্পমেৰ ৰিনেয্য, এৰমেৰং যো যথাৰুত্তেনত্থেন উপ্পতিতং চিত্তসন্তানং ব্যাপেত্ৰা ঠিতং কোধং যথাৰুত্তেসু ৰিনযনূপাযেসু যেন কেনচি উপাযেন ৰিনেতি নাধিৰাসেতি পজহতি ৰিনোদেতি ব্যন্তীকরোতীতি.

সো ভিক্খু জহাতি ওরপারন্তি সো এৰং কোধং ৰিনেন্তো ভিক্খু যস্মা কোধো ততিযমগ্গেন সব্বসো ¶ পহীযতি, তস্মা ওরপারসঞ্ঞিতানি পঞ্চোরম্ভাগিযসংযোজনানি জহাতীতি ৰেদিতব্বো. অৰিসেসেন হি পারন্তি তীরস্স নামং, তস্মা ওরানি চ তানি সংসারসাগরস্স পারভূতানি চাতি কত্ৰা ‘‘ওরপার’’ন্তি ৰুচ্চতি. অথ ৰা ‘‘যো উপ্পতিতং ৰিনেতি কোধং ৰিসটং সপ্পৰিসংৰ ওসধেহি’’, সো ততিযমগ্গেন সব্বসো কোধং ৰিনেত্ৰা অনাগামিফলে ঠিতো ভিক্খু জহাতি ওরপারং. তত্থ ওরন্তি সকত্তভাৰো, পারন্তি পরত্তভাৰো. ওরং ৰা ছ অজ্ঝত্তিকানি আযতনানি, পারং ছ বাহিরাযতনানি. তথা ওরং মনুস্সলোকো, পারং দেৰলোকো. ওরং কামধাতু, পারং রূপারূপধাতু. ওরং কামরূপভৰো, পারং অরূপভৰো. ওরং অত্তভাৰো, পারং অত্তভাৰসুখূপকরণানি. এৰমেতস্মিং ওরপারে চতুত্থমগ্গেন ছন্দরাগং পজহন্তো ‘‘জহাতি ওরপার’’ন্তি ৰুচ্চতি. এত্থ চ কিঞ্চাপি অনাগামিনো কামরাগস্স পহীনত্তা ইধত্তভাৰাদীসু ছন্দরাগো এৰ নত্থি; অপিচ খো পনস্স ততিযমগ্গাদীনং ৰিয ৰণ্ণপ্পকাসনত্থং সব্বমেতং ওরপারভেদং সঙ্গহেত্ৰা তত্থ ছন্দরাগপ্পহানেন ‘‘জহাতি ওরপার’’ন্তি ৰুত্তং.

ইদানি তস্সত্থস্স ৰিভাৰনত্থায উপমং আহ ‘‘উরগো জিণ্ণমিৰ তচং পুরাণ’’ন্তি. তত্থ উরেন গচ্ছতীতি উরগো, সপ্পস্সেতং অধিৰচনং. সো দুৰিধো – কামরূপী চ অকামরূপী চ. কামরূপীপি দুৰিধো – জলজো থলজো চ. জলজো জলে এৰ কামরূপং লভতি, ন থলে, সঙ্খপালজাতকে সঙ্খপালনাগরাজা ৰিয. থলজো থলে এৰ, ন জলে. সো জজ্জরভাৰেন জিণ্ণং, চিরকালতায পুরাণঞ্চাতি সঙ্খং গতং. তচং জহন্তো চতুব্বিধেন জহাতি – সজাতিযং ঠিতো, জিগুচ্ছন্তো, নিস্সায, থামেনাতি. সজাতি নাম সপ্পজাতি দীঘত্তভাৰো. উরগা হি পঞ্চসু ঠানেসু সজাতিং নাতিৰত্তন্তি – উপপত্তিযং, চুতিযং, ৰিস্সট্ঠনিদ্দোক্কমনে, সমানজাতিযা ¶ ¶ মেথুনপটিসেৰনে, জিণ্ণতচাপনযনে চাতি. সপ্পো হি যদা তচং জহাতি, তদা সজাতিযংযেৰ ঠত্ৰা জহাতি. সজাতিযং ঠিতোপি চ জিগুচ্ছন্তো ¶ জহাতি. জিগুচ্ছন্তো নাম যদা উপড্ঢট্ঠানে মুত্তো হোতি, উপড্ঢট্ঠানে অমুত্তো ওলম্বতি, তদা নং অট্টীযন্তো জহাতি. এৰং জিগুচ্ছন্তোপি চ দণ্ডন্তরং ৰা মূলন্তরং ৰা পাসাণন্তরং ৰা নিস্সায জহাতি. নিস্সায জহন্তোপি চ থামং জনেত্ৰা, উস্সাহং কত্ৰা, ৰীরিযেন ৰঙ্কং নঙ্গুট্ঠং কত্ৰা, পস্সসন্তোৰ ফণং করিত্ৰা জহাতি. এৰং জহিত্ৰা যেনকামং পক্কমতি. এৰমেৰং অযম্পি ভিক্খু ওরপারং জহিতুকামো চতুব্বিধেন জহাতি – সজাতিযং ঠিতো, জিগুচ্ছন্তো, নিস্সায, থামেনাতি. সজাতি নাম ভিক্খুনো ‘‘অরিযায জাতিযা জাতো’’তি (ম. নি. ২.৩৫১) ৰচনতো সীলং. তেনেৰাহ ‘‘সীলে পতিট্ঠায নরো সপ্পঞ্ঞো’’তি (সং. নি. ১.২৩; পেটকো. ২২). এৰমেতিস্সং সজাতিযং ঠিতো ভিক্খু তং সকত্তভাৰাদিভেদং ওরপারং জিণ্ণপুরাণতচমিৰ দুক্খং জনেন্তং তত্থ তত্থ আদীনৰদস্সনেন জিগুচ্ছন্তো কল্যাণমিত্তে নিস্সায অধিমত্তৰাযামসঙ্খাতং থামং জনেত্ৰা ‘‘দিৰসং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতী’’তি (অ. নি. ৩.১৬; ৰিভ. ৫১৯) ৰুত্তনযেন রত্তিন্দিৰং ছধা ৰিভজিত্ৰা ঘটেন্তো ৰাযমন্তো উরগো ৰিয, ৰঙ্কং নঙ্গুট্ঠং পল্লঙ্কং আভুজিত্ৰা উরগো ৰিয পস্সসন্তো, অযম্পি অসিথিলপরক্কমতায ৰাযমন্তো উরগো ৰিয ফণং করিত্ৰা, অযম্পি ঞাণৰিপ্ফারং জনেত্ৰা উরগোৰ তচং ওরপারং জহাতি. জহিত্ৰা চ উরগো ৰিয ওহিততচো যেনকামং অযম্পি ওহিতভারো অনুপাদিসেসনিব্বানধাতুদিসং পক্কমতীতি. তেনাহ ভগৰা –

‘‘যো উপ্পতিতং ৰিনেতি কোধং, ৰিসটং সপ্পৰিসংৰ ওসধেহি;

সো ভিক্খু জহাতি ওরপারং, উরগো জিণ্ণমিৰ তচং পুরাণ’’ন্তি.

এৰমেসা ¶ ভগৰতা অরহত্তনিকূটেন পঠমগাথা দেসিতাতি.

২. ইদানি দুতিযগাথায অত্থৰণ্ণনাক্কমো অনুপ্পত্তো. তত্রাপি –

‘‘যেন ¶ যত্থ যদা যস্মা, ৰুত্তা গাথা অযং ইমং;

ৰিধিং পকাসযিত্ৰাস্সা, করিস্সামত্থৰণ্ণন’’ন্তি. –

অযমেৰ মাতিকা. ততো পরঞ্চ সব্বগাথাসু. অতিৰিত্থারভযেন পন ইতো পভুতি মাতিকং অনিক্খিপিত্ৰা ¶ উপ্পত্তিদস্সননযেনেৰ তস্সা তস্সা অত্থং দস্সেন্তো অত্থৰণ্ণনং করিস্সামি. সেয্যথিদং যো রাগমুদচ্ছিদা অসেসন্তি অযং দুতিযগাথা.

তস্সুপ্পত্তি – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মতো সারিপুত্তত্থেরস্স উপট্ঠাকো অঞ্ঞতরো সুৰণ্ণকারপুত্তো থেরস্স সন্তিকে পব্বজিতো. থেরো তস্স ‘‘দহরানং অসুভং সপ্পায’’ন্তি মন্ত্ৰা রাগৰিঘাতত্থং অসুভকম্মট্ঠানং অদাসি. তস্স তস্মিং আসেৰনমত্তম্পি চিত্তং ন লভতি. সো ‘‘অনুপকারং মমেত’’ন্তি থেরস্স আরোচেসি. থেরো ‘‘দহরানমেতং সপ্পায’’ন্তি মন্ত্ৰা পুনপি তদেৰাচিক্খি. এৰং চত্তারো মাসা অতীতা, সো কিঞ্চিমত্তম্পি ৰিসেসং ন লভতি. ততো নং থেরো ভগৰতো সন্তিকং নেসি. ভগৰা ‘‘অৰিসযো, সারিপুত্ত, তুয্হেতস্স সপ্পাযং জানিতুং, বুদ্ধৰেনেয্যো এসো’’তি ৰত্ৰা পভস্সরৰণ্ণং পদুমং ইদ্ধিযা নিম্মিনিত্ৰা তস্স হত্থে পাদাসি – ‘‘হন্দ, ভিক্খু, ইমং ৰিহারপচ্ছাযাযং ৰালিকাতলে নাল়েন ৰিজ্ঝিত্ৰা ঠপেহি, অভিমুখঞ্চস্স পল্লঙ্কেন নিসীদ ‘লোহিতং লোহিত’ন্তি আৰজ্জেন্তো’’তি. অযং কির পঞ্চ জাতিসতানি সুৰণ্ণকারোৰ অহোসি. তেনস্স ‘‘লোহিতকনিমিত্তং সপ্পায’’ন্তি ঞত্ৰা ভগৰা লোহিতককম্মট্ঠানং অদাসি. সো তথা কত্ৰা মুহুত্তেনেৰ যথাক্কমং ¶ তত্থ চত্তারিপি ঝানানি অধিগন্ত্ৰা অনুলোমপটিলোমাদিনা নযেন ঝানকীল়ং আরভি. অথ ভগৰা ‘তং পদুমং মিলাযতূ’তি অধিট্ঠাসি. সো ঝানা ৰুট্ঠিতো তং মিলাতং কাল়ৰণ্ণং দিস্ৰা ‘‘পভস্সররূপং জরায পরিমদ্দিত’’ন্তি অনিচ্চসঞ্ঞং পটিলভি. ততো নং অজ্ঝত্তম্পি উপসংহরি. ততো ‘‘যদনিচ্চং তং দুক্খং, যং দুক্খং তদনত্তা’’তি তযোপি ভৰে আদিত্তে ৰিয পস্সি. এৰং পস্সতো চস্সাৰিদূরে পদুমস্সরো অত্থি. তত্থ দারকা ওরোহিত্ৰা পদুমানি ভঞ্জিত্ৰা ভঞ্জিত্ৰা রাসিং করোন্তি. তস্স তানি উদকে পদুমানি নল়ৰনে অগ্গিজালা ৰিয খাযিংসু, পত্তানি পতন্তানি পপাতং পৰিসন্তানি ৰিয খাযিংসু, থলে নিক্খিত্তপদুমানং অগ্গানি মিলাতানি অগ্গিডড্ঢানি ৰিয ¶ খাযিংসু. অথস্স তদনুসারেন সব্বধম্মে উপনিজ্ঝাযতো ভিয্যোসোমত্তায তযো ভৰা আদিত্তমিৰ অগারং অপ্পটিসরণা হুত্ৰা উপট্ঠহিংসু. ততো ভগৰা গন্ধকুটিযং নিসিন্নোৰ তস্স ভিক্খুনো উপরি সরীরাভং মুঞ্চি. সা চস্স মুখংযেৰ অজ্ঝোত্থরি. ততো সো ‘‘কিমেত’’ন্তি আৰজ্জেন্তো ভগৰন্তং আগন্ত্ৰা সমীপে ঠিতমিৰ দিস্ৰা উট্ঠাযাসনা অঞ্জলিং পণামেসি. অথস্স ভগৰা সপ্পাযং ৰিদিত্ৰা ধম্মং দেসেন্তো ইমং ওভাসগাথং অভাসি ‘‘যো রাগমুদচ্ছিদা অসেস’’ন্তি.

তত্থ রঞ্জনৰসেন রাগো, পঞ্চকামগুণরাগস্সেতং অধিৰচনং. উদচ্ছিদাতি উচ্ছিন্দতি, ভঞ্জতি ¶ , ৰিনাসেতি. অতীতকালিকানম্পি হি ছন্দসি ৰত্তমানৰচনং অক্খরচিন্তকা ইচ্ছন্তি. অসেসন্তি সানুসযং. ভিসপুপ্ফংৰ সরোরুহন্তি সরে ৰিরূল়্হং পদুমপুপ্ফং ৰিয. ৰিগয্হাতি ওগয্হ, পৰিসিত্ৰাতি অত্থো. সেসং পুব্বসদিসমেৰ. কিং ৰুত্তং হোতি? যথা নাম এতে দারকা সরং ওরুয্হ ভিসপুপ্ফং সরোরুহং ছিন্দন্তি, এৰমেৰং যো ভিক্খু ইমং তেধাতুকলোকসন্নিৰাসং ওগয্হ –

‘‘নত্থি রাগসমো অগ্গি’’; (ধ. প. ২০২);

‘‘কামরাগেন ¶ দয্হামি, চিত্তং মে পরিদয্হতি’’; (সং. নি. ১.২১২);

‘‘যে রাগরত্তানুপতন্তি সোতং, সযং কতং মক্কটকোৰ জালং’’. (ধ. প. ৩৪৭);

‘‘রত্তো খো, আৰুসো, রাগেন অভিভূতো পরিযাদিন্নচিত্তো পাণম্পি হনতী’’তি (অ. নি. ৩.৫৬, ৭২) –

এৰমাদিনযমনুগন্ত্ৰা রাগাদীনৰপচ্চৰেক্খণেন যথাৰুত্তপ্পকারেহি সীলসংৰরাদীহি সংৰরেহি সৰিঞ্ঞাণকাৰিঞ্ঞাণকেসু ৰত্থূসু অসুভসঞ্ঞায চ থোকং থোকং রাগং সমুচ্ছিন্দন্তো অনাগামিমগ্গেন অৰসেসং অরহত্তমগ্গেন চ ততো অনৰসেসম্পি উচ্ছিন্দতি পুব্বে ৰুত্তপ্পকারেনেৰ সো ভিক্খু জহাতি ওরপারং উরগো জিণ্ণমিৰ তচং পুরাণন্তি. এৰমেসা ভগৰতা অরহত্তনিকূটেন গাথা দেসিতা. দেসনাপরিযোসানে চ সো ভিক্খু অরহত্তে পতিট্ঠিতোতি.

৩. যো ¶ তণ্হমুদচ্ছিদাতি কা উপ্পত্তি? ভগৰা সাৰত্থিযং ৰিহরতি. অঞ্ঞতরো ভিক্খু গগ্গরায পোক্খরণিযা তীরে ৰিহরন্তো তণ্হাৰসেন অকুসলৰিতক্কং ৰিতক্কেতি. ভগৰা তস্সজ্ঝাসযং ৰিদিত্ৰা ইমং ওভাসগাথমভাসি.

তত্থ তস্সতীতি তণ্হা. ৰিসযেহি তিত্তিং ন উপেতীতি অত্থো. কামভৰৰিভৰতণ্হানমেতং অধিৰচনং. সরিতন্তি গতং পৰত্তং, যাৰ ভৰগ্গা অজ্ঝোত্থরিত্ৰা ঠিতন্তি ৰুত্তং হোতি. সীঘসরন্তি সীঘগামিনিং, সন্দিট্ঠিকসম্পরাযিকং আদীনৰং অগণেত্ৰা মুহুত্তেনেৰ পরচক্কৰাল়ম্পি ¶ ভৰগ্গম্পি সম্পাপুণিতুং সমত্থন্তি ৰুত্তং হোতি. এৰমেতং সরিতং সীঘসরং সব্বপ্পকারম্পি তণ্হং –

‘‘উপরিৰিসালা দুপ্পূরা, ইচ্ছা ৰিসটগামিনী;

যে চ তং অনুগিজ্ঝন্তি, তে হোন্তি চক্কধারিনো’’তি.

‘‘তণ্হাদুতিযো পুরিসো, দীঘমদ্ধানসংসরং;

ইত্থভাৰঞ্ঞথাভাৰং, সংসারং নাতিৰত্ততী’’তি. (ইতিৰু. ১৫, ১০৫; মহানি. ১৯১; চূল়নি. পারাযনানুগীতিগাথানিদ্দেস ১০৭);

‘‘ঊনো ¶ লোকো অতিত্তো তণ্হাদাসোতি খো, মহারাজা’’তি (ম. নি. ২.৩০৫) চ –

এৰমাদীনৰপচ্চৰেক্খণেন ৰুত্তপ্পকারেহি সীলসংৰরাদীহি চ যো থোকং থোকং ৰিসোসযিত্ৰা অরহত্তমগ্গেন অসেসং উচ্ছিজ্জতি, সো ভিক্খু তস্মিংযেৰ খণে সব্বপ্পকারম্পি জহাতি ওরপারন্তি. দেসনাপরিযোসানে সো ভিক্খু অরহত্তে পতিট্ঠিতোতি.

৪. যো মানমুদব্বধীতি কা উপ্পত্তি? ভগৰা সাৰত্থিযং ৰিহরতি. অঞ্ঞতরো ভিক্খু গঙ্গায তীরে ৰিহরন্তো গিম্হকালে অপ্পোদকে সোতে কতং নল়সেতুং পচ্ছা আগতেন মহোঘেন ৰুয্হমানং দিস্ৰা ‘‘অনিচ্চা সঙ্খারা’’তি সংৰিগ্গো অট্ঠাসি. তস্সজ্ঝাসযং ৰিদিত্ৰা ভগৰা ইমং ওভাসগাথং অভাসি.

তত্থ ¶ মানোতি জাতিআদিৰত্থুকো চেতসো উণ্ণামো. সো ‘‘সেয্যোহমস্মী’’তি মানো, ‘‘সদিসোহমস্মী’’তি মানো, ‘‘হীনোহমস্মী’’তি মানোতি এৰং তিৰিধো হোতি. পুন ‘‘সেয্যস্স সেয্যোহমস্মীতি, সেয্যস্স সদিসো, সেয্যস্স হীনো, সদিসস্স সেয্যো, সদিসস্স সদিসো, সদিসস্স হীনো, হীনস্স সেয্যো, হীনস্স সদিসো, হীনস্স হীনোহমস্মী’’তি মানোতি এৰং নৰৰিধো হোতি. তং সব্বপ্পকারম্পি মানং –

‘‘যেন মানেন মত্তাসে, সত্তা গচ্ছন্তি দুগ্গতি’’ন্তি. (ইতিৰু. ৬) –

আদিনা ¶ নযেন তত্থ আদীনৰপচ্চৰেক্খণেন ৰুত্তপ্পকারেহি সীলসংৰরাদীহি চ যো থোকং থোকং ৰধেন্তো কিলেসানং অবলদুব্বলত্তা নল়সেতুসদিসং লোকুত্তরধম্মানং অতিবলত্তা মহোঘসদিসেন অরহত্তমগ্গেন অসেসং উদব্বধি, অনৰসেসপ্পহানৰসেন উচ্ছিন্দন্তো ৰধেতীতি ৰুত্তং হোতি. সো ভিক্খু তস্মিংযেৰ খণে সব্বপ্পকারম্পি জহাতি ওরপারন্তি. দেসনাপরিযোসানে সো ভিক্খু অরহত্তে পতিট্ঠিতোতি.

৫. তি কা উপ্পত্তি? ইমিস্সা গাথায ইতো পরানঞ্চ দ্ৰাদসন্নং একাযেৰ উপ্পত্তি. একং সমযং ভগৰা সাৰত্থিযং ৰিহরতি. তেন খো পন সমযেন অঞ্ঞতরো ¶ ব্রাহ্মণো অত্তনো ধীতুযা ৰারেয্যে পচ্চুপট্ঠিতে চিন্তেসি – ‘‘কেনচি ৰসলেন অপরিভুত্তপুব্বেহি পুপ্ফেহি দারিকং অলঙ্করিত্ৰা পতিকুলং পেসেস্সামী’’তি. সো সন্তরবাহিরং সাৰত্থিং ৰিচিনন্তো কিঞ্চি তিণপুপ্ফম্পি অপরিভুত্তপুব্বং নাদ্দস. অথ সম্বহুলে ধুত্তকজাতিকে ব্রাহ্মণদারকে সন্নিপতিতে দিস্ৰা ‘‘এতে পুচ্ছিস্সামি, অৰস্সং সম্বহুলেসু কোচি জানিস্সতী’’তি উপসঙ্কমিত্ৰা পুচ্ছি. তে তং ব্রাহ্মণং উপ্পণ্ডেন্তা আহংসু – ‘‘উদুম্বরপুপ্ফং নাম, ব্রাহ্মণ, লোকে ন কেনচি পরিভুত্তপুব্বং. তেন ধীতরং অলঙ্করিত্ৰা দেহী’’তি. সো দুতিযদিৰসে কালস্সেৰ ৰুট্ঠায ভত্তৰিস্সগ্গং কত্ৰা অচিরৰতিযা নদিযা তীরে উদুম্বরৰনং গন্ত্ৰা একমেকং রুক্খং ৰিচিনন্তো পুপ্ফস্স ৰণ্টমত্তম্পি নাদ্দস. অথ ৰীতিৰত্তে মজ্ঝন্হিকে দুতিযতীরং অগমাসি. তত্থ চ অঞ্ঞতরো ভিক্খু অঞ্ঞতরস্মিং মনুঞ্ঞে রুক্খমূলে দিৰাৰিহারং নিসিন্নো কম্মট্ঠানং ¶ মনসি করোতি. সো তত্থ উপসঙ্কমিত্ৰা অমনসিকরিত্ৰা, সকিং নিসীদিত্ৰা, সকিং উক্কুটিকো হুত্ৰা, সকিং ঠত্ৰা, তং রুক্খং সব্বসাখাৰিটপপত্তন্তরেসু ৰিচিনন্তো কিলমতি. ততো নং সো ভিক্খু আহ – ‘‘ব্রাহ্মণ, কিং মগ্গসী’’তি? ‘‘উদুম্বরপুপ্ফং, ভো’’তি. ‘‘উদুম্বরপুপ্ফং নাম, ব্রাহ্মণ, লোকে নত্থি, মুসা এতং ৰচনং, মা কিলমা’’তি. অথ ভগৰা তস্স ভিক্খুনো অজ্ঝাসযং ৰিদিত্ৰা ওভাসং মুঞ্চিত্ৰা সমুপ্পন্নসমন্নাহারবহুমানস্স ইমা ওভাসগাথাযো অভাসি ‘‘যো নাজ্ঝগমা ভৰেসু সার’’ন্তি সব্বা ৰত্তব্বা.

তত্থ পঠমগাথায তাৰ নাজ্ঝগমাতি নাধিগচ্ছি, নাধিগচ্ছতি ৰা. ভৰেসূতি কামরূপারূপসঞ্ঞীঅসঞ্ঞীনেৰসঞ্ঞীনাসঞ্ঞীএকৰোকারচতুৰোকারপঞ্চৰোকারভৰেসু. সারন্তি নিচ্চভাৰং অত্তভাৰং ৰা. ৰিচিনন্তি পঞ্ঞায গৰেসন্তো. পুপ্ফমিৰ উদুম্বরেসূতি যথা উদুম্বররুক্খেসু ¶ পুপ্ফং ৰিচিনন্তো এস ব্রাহ্মণো নাজ্ঝগমা, এৰং যো যোগাৰচরোপি পঞ্ঞায ৰিচিনন্তো সব্বভৰেসু কিঞ্চি সারং নাজ্ঝগমা. সো অসারকট্ঠেন তে ধম্মে অনিচ্চতো অনত্ততো চ ৰিপস্সন্তো অনুপুব্বেন লোকুত্তরধম্মে অধিগচ্ছন্তো জহাতি ওরপারং উরগো জিণ্ণমিৰ ¶ তচং পুরাণন্তি অযমত্থো যোজনা চ. অৰসেসগাথাসু পনস্স যোজনং অৰত্ৰা ৰিসেসত্থমত্তমেৰ ৰক্খাম.

৬.

‘‘যস্সন্তরতো ন সন্তি কোপা,

ইতিভৰাভৰতঞ্চ ৰীতিৰত্তো’’তি. (উদা. ২০) –

এত্থ তাৰ অযং ‘অন্তরসদ্দো’ –

‘‘নদীতীরেসু সণ্ঠানে, সভাসু রথিযাসু চ;

জনা সঙ্গম্ম মন্তেন্তি, মঞ্চ তঞ্চ কিমন্তর’’ন্তি. (সং. নি. ১.২২৮);

‘‘অপ্পমত্তকেন ৰিসেসাধিগমেন অন্তরা ৰোসানমাপাদি’’ (অ. নি. ১০.৮৪);

‘‘অনত্থজননো কোধো, কোধো চিত্তপ্পকোপনো;

ভযমন্তরতো জাতং, তং জনো নাৰবুজ্ঝতী’’তি. (অ. নি. ৭.৬৪; ইতিৰু. ৮৮) –

এৰং ¶ কারণৰেমজ্ঝচিত্তাদীসু সম্বহুলেসু অত্থেসু দিস্সতি. ইধ পন চিত্তে. ততো যস্সন্তরতো ন সন্তি কোপাতি ততিযমগ্গেন সমূহতত্তা যস্স চিত্তে ন সন্তি কোপাতি অত্থো. যস্মা পন ভৰোতি সম্পত্তি, ৰিভৰোতি ৰিপত্তি. তথা ভৰোতি ৰুদ্ধি, ৰিভৰোতি হানি. ভৰোতি সস্সতো, ৰিভৰোতি উচ্ছেদো. ভৰোতি পুঞ্ঞং, ৰিভৰোতি পাপং. ৰিভৰো অভৰোতি চ অত্থতো একমেৰ. তস্মা ইতিভৰাভৰতঞ্চ ৰীতিৰত্তোতি এত্থ যা এসা সম্পত্তিৰিপত্তিৰুড্ঢিহানিসস্সতুচ্ছেদপুঞ্ঞপাপৰসেন ইতি অনেকপ্পকারা ভৰাভৰতা ৰুচ্চতি. চতূহিপি মগ্গেহি যথাসম্ভৰং তেন তেন নযেন তং ইতিভৰাভৰতঞ্চ ৰীতিৰত্তোতি এৰমত্থো ঞাতব্বো.

৭. যস্স ¶ ৰিতক্কাতি এত্থ পন যস্স ভিক্খুনো তযো কামব্যাপাদৰিহিংসাৰিতক্কা, তযো ঞাতিজনপদামরৰিতক্কা, তযো পরানুদ্দযতাপটিসংযুত্তলাভসক্কারসিলোকঅনৰঞ্ঞত্তিপটিসংযুত্তৰিতক্কাতি এতে নৰ ৰিতক্কা সমন্তভদ্দকে ৰুত্তনযেন তত্থ তত্থ আদীনৰং পচ্চৰেক্খিত্ৰা ¶ পটিপক্খৰৰত্থানেন তস্স তস্স পহানসমত্থেহি তীহি হেট্ঠিমমগ্গেহি চ ৰিধূপিতা ভুসং ধূপিতা সন্তাপিতা দড্ঢাতি অত্থো. এৰং ৰিধূপেত্ৰা চ অজ্ঝত্তং সুৰিকপ্পিতা অসেসা, নিযকজ্ঝত্তভূতে অত্তনো খন্ধসন্তানে অজ্ঝত্তজ্ঝত্তভূতে চিত্তে চ যথা ন পুন সম্ভৰন্তি, এৰং অরহত্তমগ্গেন অসেসা ছিন্না. ছিন্নঞ্হি কপ্পিতন্তি ৰুচ্চতি. যথাহ ‘‘কপ্পিতকেসমস্সূ’’তি (সং. নি. ১.১২২; ৪.৩৬৫). এৰমেত্থ অত্থো দট্ঠব্বো.

৮. ইদানি যো নাচ্চসারীতি এত্থ যো নাচ্চসারীতি যো নাতিধাৰি. ন পচ্চসারীতি ন ওহীযি. কিং ৰুত্তং হোতি? অচ্চারদ্ধৰীরিযেন হি উদ্ধচ্চে পতন্তো অচ্চাসরতি, অতিসিথিলেন কোসজ্জে পতন্তো পচ্চাসরতি. তথা ভৰতণ্হায অত্তানং কিলমেন্তো অচ্চাসরতি, কামতণ্হায কামসুখমনুযুঞ্জন্তো পচ্চাসরতি. সস্সতদিট্ঠিযা অচ্চাসরতি, উচ্ছেদদিট্ঠিযা পচ্চাসরতি. অতীতং অনুসোচন্তো অচ্চাসরতি, অনাগত পটিকঙ্খন্তো পচ্চাসরতি. পুব্বন্তানুদিট্ঠিযা অচ্চাসরতি, অপরন্তানুদিট্ঠিযা পচ্চাসরতি. তস্মা যো এতে উভো অন্তে ৰজ্জেত্ৰা মজ্ঝিমং পটিপদং পটিপজ্জন্তো নাচ্চসারী ন পচ্চসারীতি এৰং ৰুত্তং হোতি. সব্বং ¶ অচ্চগমা ইমং পপঞ্চন্তি তায চ পন অরহত্তমগ্গৰোসানায মজ্ঝিমায পটিপদায সব্বং ইমং ৰেদনাসঞ্ঞাৰিতক্কপ্পভৰং তণ্হামানদিট্ঠিসঙ্খাতং তিৰিধং পপঞ্চং অচ্চগমা অতিক্কন্তো, সমতিক্কন্তোতি অত্থো.

৯. তদনন্তরগাথায পন সব্বং ৰিতথমিদন্তি ঞত্ৰা লোকেতি অযমেৰ ৰিসেসো. তস্সত্থো – সব্বন্তি অনৰসেসং, সকলমনূনন্তি ¶ ৰুত্তং হোতি. এৰং সন্তেপি পন ৰিপস্সনুপগং লোকিযখন্ধাযতনধাতুপ্পভেদং সঙ্খতমেৰ ইধাধিপ্পেতং. ৰিতথন্তি ৰিগততথভাৰং. নিচ্চন্তি ৰা সুখন্তি ৰা সুভন্তি ৰা অত্তাতি ৰা যথা যথা কিলেসৰসেন বালজনেহি গয্হতি, তথাতথাভাৰতো ৰিতথন্তি ৰুত্তং হোতি. ইদন্তি তমেৰ সব্বং পচ্চক্খভাৰেন দস্সেন্তো আহ. ঞত্ৰাতি মগ্গপঞ্ঞায জানিত্ৰা, তঞ্চ পন অসম্মোহতো, ন ৰিসযতো. লোকেতি ওকাসলোকে সব্বং খন্ধাদিভেদং ধম্মজাতং ‘‘ৰিতথমিদ’’ন্তি ঞত্ৰাতি সম্বন্ধো.

১০-১৩. ইদানি ইতো পরাসু চতূসু গাথাসু ৰীতলোভো ৰীতরাগো ৰীতদোসো ৰীতমোহোতি এতে ৰিসেসা. এত্থ লুব্ভনৰসেন লোভো. সব্বসঙ্গাহিকমেতং পঠমস্স অকুসলমূলস্স অধিৰচনং, ৰিসমলোভস্স ৰা. যো সো ‘‘অপ্পেকদা মাতুমত্তীসুপি লোভধম্মা উপ্পজ্জন্তি, ভগিনিমত্তীসুপি লোভধম্মা উপ্পজ্জন্তি, ধীতুমত্তীসুপি লোভধম্মা উপ্পজ্জন্তী’’তি (সং. নি. ৪.১২৭) এৰং ৰুত্তো. রজ্জনৰসেন রাগো, পঞ্চকামগুণরাগস্সেতং অধিৰচনং. দুস্সনৰসেন ¶ দোসো, পুব্বে ৰুত্তকোধস্সেতং অধিৰচনং. মুয্হনৰসেন মোহো, চতূসু অরিযসচ্চেসু অঞ্ঞাণস্সেতং অধিৰচনং. তত্থ যস্মা অযং ভিক্খু লোভং জিগুচ্ছন্তো ৰিপস্সনং আরভি ‘‘কুদাস্সু নামাহং লোভং ৰিনেত্ৰা ৰিগতলোভো ৰিহরেয্য’’ন্তি, তস্মা তস্স লোভপ্পহানূপাযং সব্বসঙ্খারানং ৰিতথভাৰদস্সনং লোভপ্পহানানিসংসঞ্চ ওরপারপ্পহানং দস্সেন্তো ইমং গাথমাহ. এস নযো ইতো পরাসুপি. কেচি পনাহু – ‘‘যথাৰুত্তেনেৰ নযেন এতে ধম্মে জিগুচ্ছিত্ৰা ৰিপস্সনমারদ্ধস্স তস্স ¶ তস্স ভিক্খুনো একমেকাৰ এত্থ গাথা ৰুত্তা’’তি. যং রুচ্চতি, তং গহেতব্বং. এস নযো ইতো পরাসু চতূসু গাথাসু.

১৪. অযং ¶ পনেত্থ অত্থৰণ্ণনা – অপ্পহীনট্ঠেন সন্তানে সযন্তীতি অনুসযা কামরাগপটিঘমানদিট্ঠিৰিচিকিচ্ছাভৰরাগাৰিজ্জানং এতং অধিৰচনং. সম্পযুত্তধম্মানং অত্তনো আকারানুৰিধানট্ঠেন মূলা; অখেমট্ঠেন অকুসলা; ধম্মানং পতিট্ঠাভূতাতিপি মূলা; সাৰজ্জদুক্খৰিপাকট্ঠেন অকুসলা; উভযম্পেতং লোভদোসমোহানং অধিৰচনং. তে হি ‘‘লোভো, ভিক্খৰে, অকুসলঞ্চ অকুসলমূলঞ্চা’’তিআদিনা নযেন এৰং নিদ্দিট্ঠা. এৰমেতে অনুসযা তেন তেন মগ্গেন পহীনত্তা যস্স কেচি ন সন্তি, এতে চ অকুসলমূলা তথেৰ সমূহতাসে, সমূহতা ইচ্চেৰ অত্থো. পচ্চত্তবহুৰচনস্স হি সে-কারাগমং ইচ্ছন্তি সদ্দলক্খণকোৰিদা. অট্ঠকথাচরিযা পন ‘‘সেতি নিপাতো’’তি ৰণ্ণযন্তি. যং রুচ্চতি, তং গহেতব্বং. এত্থ পন ‘‘কিঞ্চাপি সো এৰংৰিধো ভিক্খু খীণাসৰো হোতি, খীণাসৰো চ নেৰ আদিযতি, ন পজহতি, পজহিত্ৰা ঠিতো’’তি ৰুত্তো. তথাপি ৰত্তমানসমীপে ৰত্তমানৰচনলক্খণেন ‘‘জহাতি ওরপার’’ন্তি ৰুচ্চতি. অথ ৰা অনুপাদিসেসায চ নিব্বানধাতুযা পরিনিব্বাযন্তো অত্তনো অজ্ঝত্তিকবাহিরাযতনসঙ্খাতং জহাতি ওরপারন্তি ৰেদিতব্বো.

তত্থ কিলেসপটিপাটিযা মগ্গপটিপাটিযা চাতি দ্ৰিধা অনুসযানং অভাৰো ৰেদিতব্বো. কিলেসপটিপাটিযা হি কামরাগানুসযপটিঘানুসযানং ততিযমগ্গেন অভাৰো হোতি, মানানুসযস্স চতুত্থমগ্গেন, দিট্ঠানুসযৰিচিকিচ্ছানুসযানং পঠমমগ্গেন, ভৰরাগানুসযাৰিজ্জানুসযানং চতুত্থমগ্গেনেৰ. মগ্গপটিপাটিযা ¶ পন পঠমমগ্গেন দিট্ঠানুসযৰিচিকিচ্ছানুসযানং অভাৰো হোতি. দুতিযমগ্গেন কামরাগানুসযপটিঘানুসযানং তনুভাৰো, ততিযমগ্গেন সব্বসো অভাৰো, চতুত্থমগ্গেন মানানুসযভৰরাগানুসযাৰিজ্জানুসযানং অভাৰো হোতি. তত্থ যস্মা ন সব্বে অনুসযা অকুসলমূলা; কামরাগভৰরাগানুসযা এৰ হি লোভাকুসলমূলেন সঙ্গহং গচ্ছন্তি. পটিঘানুসযাৰিজ্জানুসযা চ ‘‘দোসো অকুসলমূলং, মোহো অকুসলমূলং’’ ইচ্চেৰ সঙ্খং গচ্ছন্তি, দিট্ঠিমানৰিচিকিচ্ছানুসযা ¶ পন ন কিঞ্চি অকুসলমূলং হোন্তি, যস্মা ৰা অনুসযাভাৰৰসেন চ অকুসলমূলসমুগ্ঘাতৰসেন চ কিলেসপ্পহানং পট্ঠপেসি, তস্মা –

‘‘যস্সানুসযা ¶ ন সন্তি কেচি, মূলা চ অকুসলা সমূহতাসে’’. –

ইতি ভগৰা আহ.

১৫. যস্স দরথজাতি এত্থ পন পঠমুপ্পন্না কিলেসা পরিল়াহট্ঠেন দরথা নাম, অপরাপরুপ্পন্না পন তেহি দরথেহি জাতত্তা দরথজা নাম. ওরন্তি সক্কাযো ৰুচ্চতি. যথাহ – ‘‘ওরিমং তীরন্তি খো, ভিক্খু, সক্কাযস্সেতং অধিৰচন’’ন্তি (সং. নি. ৪.২৩৮). আগমনাযাতি উপ্পত্তিযা. পচ্চযাসেতি পচ্চযা এৰ. কিং ৰুত্তং হোতি? যস্স পন উপাদানক্খন্ধগ্গহণায পচ্চযভূতা অরিযমগ্গেন পহীনত্তা, কেচি দরথজৰেৰচনা কিলেসা ন সন্তি, পুব্বে ৰুত্তনযেনেৰ সো ভিক্খু জহাতি ওরপারন্তি.

১৬. যস্স ৰনথজাতি এত্থপি দরথজা ৰিয ৰনথজা ৰেদিতব্বা. ৰচনত্থে পন অযং ৰিসেসো – ৰনুতে, ৰনোতীতি ৰা ৰনং যাচতি সেৰতি ভজতীতি অত্থো. তণ্হাযেতং অধিৰচনং. সা হি ৰিসযানং পত্থনতো সেৰনতো চ ‘‘ৰন’’ন্তি ৰুচ্চতি. তং পরিযুট্ঠানৰসেন ৰনং থরতি তনোতীতি ৰনথো, তণ্হানুসযস্সেতং অধিৰচনং. ৰনথা জাতাতি ৰনথজাতি. কেচি পনাহু ‘‘সব্বেপি কিলেসা গহনট্ঠেন ৰনথোতি ৰুচ্চন্তি, অপরাপরুপ্পন্না পন ৰনথজা’’তি. অযমেৰ ¶ চেত্থ উরগসুত্তে অত্থো অধিপ্পেতো, ইতরো পন ধম্মপদগাথাযং. ৰিনিবন্ধায ভৰাযাতি ভৰৰিনিবন্ধায. অথ ৰা চিত্তস্স ৰিসযেসু ৰিনিবন্ধায আযতিং উপ্পত্তিযা চাতি অত্থো. হেতুযেৰ হেতুকপ্পা.

১৭. যো নীৰরণেতি এত্থ নীৰরণাতি চিত্তং, হিতপটিপত্তিং ৰা নীৰরন্তীতি নীৰরণা, পটিচ্ছাদেন্তীতি অত্থো. পহাযাতি ছড্ডেত্ৰা. পঞ্চাতি তেসং সঙ্খ্যাপরিচ্ছেদো. ঈঘাভাৰতো অনীঘো. কথংকথায তিণ্ণত্তা তিণ্ণকথংকথো. ৰিগতসল্লত্তা ৰিসল্লো. কিং ৰুত্তং হোতি? যো ভিক্খু কামচ্ছন্দাদীনি পঞ্চ নীৰরণানি সমন্তভদ্দকে ৰুত্তনযেন সামঞ্ঞতো ৰিসেসতো চ নীৰরণেসু আদীনৰং দিস্ৰা তেন তেন মগ্গেন পহায তেসঞ্চ পহীনত্তা এৰ কিলেসদুক্খসঙ্খাতস্স ঈঘস্সাভাৰেন ¶ অনীঘো, ‘‘অহোসিং নু খো অহং অতীতমদ্ধান’’ন্তিআদিনা (ম. নি. ১.১৮; সং. নি. ২.২০) নযেন পৰত্তায কথংকথায তিণ্ণত্তা তিণ্ণকথংকথো ¶ , ‘‘তত্থ কতমে পঞ্চ সল্লা? রাগসল্লো, দোসসল্লো, মোহসল্লো, মানসল্লো, দিট্ঠিসল্লো’’তি ৰুত্তানং পঞ্চন্নং সল্লানং ৰিগতত্তা ৰিসল্লো. সো ভিক্খু পুব্বে ৰুত্তনযেনেৰ জহাতি ওরপারন্তি.

অত্রাপি চ কিলেসপটিপাটিযা মগ্গপটিপাটিযা চাতি দ্ৰিধা এৰ নীৰরণপ্পহানং ৰেদিতব্বং. কিলেসপটিপাটিযা হি কামচ্ছন্দনীৰরণস্স ব্যাপাদনীৰরণস্স চ ততিযমগ্গেন পহানং হোতি, থিনমিদ্ধনীৰরণস্স উদ্ধচ্চনীৰরণস্স চ চতুত্থমগ্গেন. ‘‘অকতং ৰত মে কুসল’’ন্তিআদিনা (ম. নি. ৩.২৪৮; নেত্তি. ১২০) নযেন পৰত্তস্স ৰিপ্পটিসারসঙ্খাতস্স কুক্কুচ্চনীৰরণস্স ৰিচিকিচ্ছানীৰরণস্স ¶ চ পঠমমগ্গেন. মগ্গপটিপাটিযা পন কুক্কুচ্চনীৰরণস্স ৰিচিকিচ্ছানীৰরণস্স চ পঠমমগ্গেন পহানং হোতি, কামচ্ছন্দনীৰরণস্স ব্যাপাদনীৰরণস্স চ দুতিযমগ্গেন তনুভাৰো হোতি, ততিযেন অনৰসেসপ্পহানং. থিনমিদ্ধনীৰরণস্স উদ্ধচ্চনীৰরণস্স চ চতুত্থমগ্গেন পহানং হোতীতি. এৰং –

‘‘যো নীৰরণে পহায পঞ্চ, অনীঘো তিণ্ণকথংকথো ৰিসল্লো;

সো ভিক্খু জহাতি ওরপারং, উরগো জিণ্ণমিৰত্তচং পুরাণ’’ন্তি. –

অরহত্তনিকূটেনেৰ ভগৰা দেসনং নিট্ঠাপেসি. দেসনাপরিযোসানে সো ভিক্খু অরহত্তে পতিট্ঠিতো. ‘‘একচ্চে যেন যেন তেসং ভিক্খূনং যা যা গাথা দেসিতা, তেন তেন তস্সা তস্সা গাথায পরিযোসানে সো সো ভিক্খু অরহত্তে পতিট্ঠিতো’’তি ৰদন্তি.

পরমত্থজোতিকায খুদ্দক-অট্ঠকথায

সুত্তনিপাত-অট্ঠকথায উরগসুত্তৰণ্ণনা নিট্ঠিতা.

২. ধনিযসুত্তৰণ্ণনা

১৮. পক্কোদনোতি ¶ ¶ ধনিযসুত্তং. কা উপ্পত্তি? ভগৰা সাৰত্থিযং ৰিহরতি. তেন সমযেন ধনিযো গোপো মহীতীরে পটিৰসতি. তস্সাযং পুব্বযোগো – কস্সপস্স ভগৰতো পাৰচনে দিব্বমানে ৰীসতি ৰস্সসহস্সানি দিৰসে দিৰসে সঙ্ঘস্স ৰীসতি সলাকভত্তানি অদাসি. সো ততো চুতো দেৰেসু উপ্পন্নো. এৰং দেৰলোকে একং বুদ্ধন্তরং খেপেত্ৰা অম্হাকং ভগৰতো কালে ৰিদেহরট্ঠমজ্ঝে পব্বতরট্ঠং নাম অত্থি তত্থ ধম্মকোরণ্ডং নাম নগরং, তস্মিং নগরে সেট্ঠিপুত্তো হুত্ৰা অভিনিব্বত্তো, গোযূথং নিস্সায জীৰতি. তস্স হি তিংসমত্তানি গোসহস্সানি হোন্তি, সত্তৰীসসহস্সা গাৰো খীরং দুয্হন্তি. গোপা নাম নিবদ্ধৰাসিনো ন হোন্তি. ৰস্সিকে চত্তারোমাসে থলে ৰসন্তি, অৰসেসে অট্ঠমাসে যত্থ তিণোদকং সুখং লব্ভতি, তত্থ ৰসন্তি. তঞ্চ নদীতীরং ৰা জাতস্সরতীরং ৰা হোতি. অথাযম্পি ৰস্সকালে অত্তনো ৰসিতগামতো নিক্খমিত্ৰা ¶ গুন্নং ফাসুৰিহারত্থায ওকাসং গৰেসন্তো মহামহী ভিজ্জিত্ৰা একতো কালমহী একতো মহামহিচ্চেৰ সঙ্খং গন্ত্ৰা সন্দমানা পুন সমুদ্দসমীপে সমাগন্ত্ৰা পৰত্তা. যং ওকাসং অন্তরদীপং অকাসি, তং পৰিসিত্ৰা ৰচ্ছানং সালং অত্তনো চ নিৰেসনং মাপেত্ৰা ৰাসং কপ্পেসি. তস্স সত্ত পুত্তা, সত্ত ধীতরো, সত্ত সুণিসা, অনেকে চ কম্মকারা হোন্তি. গোপা নাম ৰস্সনিমিত্তং জানন্তি. যদা সকুণিকা কুলাৰকানি রুক্খগ্গে করোন্তি, কক্কটকা উদকসমীপে দ্ৰারং পিদহিত্ৰা থলসমীপদ্ৰারেন ৰল়ঞ্জেন্তি, তদা সুৰুট্ঠিকা ভৰিস্সতীতি গণ্হন্তি. যদা পন সকুণিকা কুলাৰকানি নীচট্ঠানে উদকপিট্ঠে করোন্তি, কক্কটকা থলসমীপে দ্ৰারং পিদহিত্ৰা উদকসমীপদ্ৰারেন ৰল়ঞ্জেন্তি, তদা দুব্বুট্ঠিকা ভৰিস্সতীতি গণ্হন্তি.

অথ সো ধনিযো সুৰুট্ঠিকনিমিত্তানি উপসল্লক্খেত্ৰা উপকট্ঠে ৰস্সকালে অন্তরদীপা নিক্খমিত্ৰা মহামহিযা পরতীরে সত্তসত্তাহম্পি দেৰে ৰস্সন্তে উদকেন অনজ্ঝোত্থরণোকাসে অত্তনো ৰসনোকাসং কত্ৰা সমন্তা পরিক্খিপিত্ৰা, ৰচ্ছসালাযো মাপেত্ৰা, তত্থ নিৰাসং কপ্পেসি. অথস্স দারুতিণাদিসঙ্গহে কতে সব্বেসু পুত্তদারকম্মকরপোরিসেসু ¶ সমানিযেসু জাতেসু নানপ্পকারে খজ্জভোজ্জে পটিযত্তে সমন্তা চতুদ্দিসা মেঘমণ্ডলানি উট্ঠহিংসু. সো ধেনুযো দুহাপেত্ৰা ¶ , ৰচ্ছসালাসু ৰচ্ছে সণ্ঠাপেত্ৰা, গুন্নং চতুদ্দিসা ধূমং কারাপেত্ৰা, সব্বপরিজনং ভোজাপেত্ৰা, সব্বকিচ্চানি কারাপেত্ৰা তত্থ তত্থ দীপে উজ্জালাপেত্ৰা, সযং খীরেন ভত্তং ভুঞ্জিত্ৰা, মহাসযনে সযন্তো অত্তনো সিরিসম্পত্তিং দিস্ৰা, তুট্ঠচিত্তো হুত্ৰা, অপরদিসায মেঘত্থনিতসদ্দং সুত্ৰা নিপন্নো ইমং উদানং উদানেসি ‘‘পক্কোদনো দুদ্ধখীরোহমস্মী’’তি.

তত্রাযং অত্থৰণ্ণনা – পক্কোদনোতি সিদ্ধভত্তো. দুদ্ধখীরোতি গাৰো দুহিত্ৰা গহিতখীরো. অহন্তি অত্তানং নিদস্সেতি ¶ , অস্মীতি অত্তনো তথাভাৰং. পক্কোদনো দুদ্ধখীরো চ অহমস্মি ভৰামীতি অত্থো. ইতীতি এৰমাহাতি অত্থো. নিদ্দেসে পন ‘‘ইতীতি পদসন্ধি, পদসংসগ্গো, পদপারিপূরি, অক্খরসমৰাযো ব্যঞ্জনসিলিট্ঠতা পদানুপুব্বতামেত’’ন্তি (চূল়নি. অজিতমাণৰপুচ্ছানিদ্দেস ১) এৰমস্স অত্থো ৰণ্ণিতো. সোপি ইদমেৰ সন্ধাযাতি ৰেদিতব্বো. যং যং হি পদং পুব্বপদেন ৰুত্তং, তস্স তস্স এৰমাহাতি এতমত্থং পকাসেন্তোযেৰ ইতিসদ্দো পচ্ছিমেন পদেন মেত্তেয্যো ইতি ৰা ভগৰা ইতি ৰা এৰমাদিনা পদসন্ধি হোতি, নাঞ্ঞথা.

ধনিযো গোপোতি তস্স সেট্ঠিপুত্তস্স নামসমোধানং. সো হি যানিমানি থাৰরাদীনি পঞ্চ ধনানি, তেসু ঠপেত্ৰা দানসীলাদিঅনুগামিকধনং, খেত্তৰত্থু-আরামাদিতো থাৰরধনতোপি, গৰস্সাদিতো জঙ্গমধনতোপি হিরঞ্ঞসুৰণ্ণাদিতো সংহারিমধনতোপি, সিপ্পাযতনাদিতো অঙ্গসমধনতোপি যং তং লোকস্স পঞ্চগোরসানুপ্পদানেন বহূপকারং তং সন্ধায ‘‘নত্থি গোসমিতং ধন’’ন্তি (সং. নি. ১.১৩; নেত্তি. ১২৩) এৰং ৰিসেসিতং গোধনং, তেন সমন্নাগতত্তা ধনিযো, গুন্নং পালনতো গোপো. যো হি অত্তনো গাৰো পালেতি, সো ‘‘গোপো’’তি ৰুচ্চতি. যো পরেসং ৰেতনেন ভটো হুত্ৰা, সো গোপালকো. অযং পন অত্তনোযেৰ, তেন গোপোতি ৰুত্তো.

অনুতীরেতি ¶ তীরস্স সমীপে. মহিযাতি মহামহীনামিকায নদিযা. সমানেন অনুকূলৰত্তিনা পরিজনেন সদ্ধিং ৰাসো যস্স সো সমানৰাসো, অযঞ্চ তথাৰিধো. তেনাহ ‘‘সমানৰাসো’’তি. ছন্নাতি তিণপণ্ণচ্ছদনেহি অনোৰস্সকা কতা. কুটীতি ৰসনঘরস্সেতং অধিৰচনং. আহিতোতি আভতো, জালিতো ৰা. গিনীতি অগ্গি. তেসু তেসু ঠানেসু অগ্গি ‘‘গিনী’’তি ৰোহরীযতি. অথ চে পত্থযসীতি ইদানি যদি ইচ্ছসীতি ৰুত্তং হোতি. পৰস্সাতি সিঞ্চ, পগ্ঘর, উদকং মুঞ্চাতি অত্থো. দেৰাতি মেঘং আলপতি. অযং তাৰেত্থ পদৰণ্ণনা.

অযং ¶ পন অত্থৰণ্ণনা – এৰমযং ধনিযো গোপো অত্তনো সযনঘরে মহাসযনে নিপন্নো মেঘত্থনিতং ¶ সুত্ৰা ‘‘পক্কোদনোহমস্মী’’তি ভণন্তো কাযদুক্খৰূপসমূপাযং কাযসুখহেতুঞ্চ অত্তনো সন্নিহিতং দীপেতি. ‘‘দুদ্ধখীরোহমস্মী’’তি ভণন্তো চিত্তদুক্খৰূপসমূপাযং চিত্তসুখহেতুঞ্চ. ‘‘অনুতীরে মহিযা’’তি নিৰাসট্ঠানসম্পত্তিং, ‘‘সমানৰাসো’’তি তাদিসে কালে পিযৰিপ্পযোগপদট্ঠানস্স সোকস্সাভাৰং. ‘‘ছন্না কুটী’’তি কাযদুক্খাপগমপটিঘাতং. ‘‘আহিতো গিনী’’তি যস্মা গোপালকা পরিক্খেপধূমদারুঅগ্গিৰসেন তযো অগ্গী করোন্তি. তে চ তস্স গেহে সব্বে কতা, তস্মা সব্বদিসাসু পরিক্খেপগ্গিং সন্ধায ‘‘আহিতো গিনী’’তি ভণন্তো ৰাল়মিগাগমননিৰারণং দীপেতি, গুন্নং মজ্ঝে গোমযাদীহি ধূমগ্গিং সন্ধায ডংসমকসাদীহি গুন্নং অনাবাধং, গোপালকানং সযনট্ঠানে দারুঅগ্গিং সন্ধায গোপালকানং সীতাবাধপটিঘাতং. সো এৰং দীপেন্তো অত্তনো ৰা গুন্নং ৰা পরিজনস্স ৰা ৰুট্ঠিপচ্চযস্স কস্সচি আবাধস্স অভাৰতো পীতিসোমনস্সজাতো আহ – ‘‘অথ চে পত্থযসী পৰস্স দেৰা’’তি.

১৯. এৰং ধনিযস্স ইমং গাথং ভাসমানস্স অস্সোসি ভগৰা দিব্বায সোতধাতুযা ৰিসুদ্ধায অতিক্কন্তমানুসিকায জেতৰনমহাৰিহারে গন্ধকুটিযং ৰিহরন্তো. সুত্ৰা চ পন বুদ্ধচক্খুনা লোকং ৰোলোকেন্তো অদ্দস ধনিযঞ্চ পজাপতিঞ্চস্স ‘‘ইমে উভোপি হেতুসম্পন্না. সচে অহং গন্ত্ৰা ধম্মং দেসেস্সামি, উভোপি পব্বজিত্ৰা অরহত্তং পাপুণিস্সন্তি. নো চে গমিস্সামি, স্ৰে উদকোঘেন ৰিনস্সিস্সন্তী’’তি তং খণেযেৰ সাৰত্থিতো সত্ত যোজনসতানি ধনিযস্স নিৰাসট্ঠানং আকাসেন গন্ত্ৰা তস্স কুটিযা উপরি অট্ঠাসি. ধনিযো তং গাথং পুনপ্পুনং ভাসতিযেৰ ¶ , ন নিট্ঠাপেতি, ভগৰতি গতেপি ভাসতি. ভগৰা চ তং সুত্ৰা ‘‘ন এত্তকেন সন্তুট্ঠা ৰা ৰিস্সত্থা ৰা হোন্তি, এৰং পন হোন্তী’’তি দস্সেতুং –

‘‘অক্কোধনো ৰিগতখিলোহমস্মি, অনুতীরে মহিযেকরত্তিৰাসো;

ৰিৰটা কুটি নিব্বুতো গিনি, অথ চে পত্থযসী পৰস্স দেৰা’’তি. –

ইমং পটিগাথং অভাসি ব্যঞ্জনসভাগং ¶ নো অত্থসভাগং. ন হি ‘‘পক্কোদনো’’তি, ‘‘অক্কোধনো’’তি চ আদীনি পদানি অত্থতো সমেন্তি মহাসমুদ্দস্স ওরিমপারিমতীরানি ৰিয, ব্যঞ্জনং পনেত্থ কিঞ্চি কিঞ্চি সমেতীতি ব্যঞ্জনসভাগানি হোন্তি. তত্থ পুরিমগাথায সদিসপদানং ৰুত্তনযেনেৰ অত্থো ৰেদিতব্বো.

ৰিসেসপদানং পনাযং পদতো অত্থতো চ ৰণ্ণনা – অক্কোধনোতি অকুজ্ঝনসভাৰো. যো ¶ হি সো পুব্বে ৰুত্তপ্পকারআঘাতৰত্থুসম্ভৰো কোধো একচ্চস্স সুপরিত্তোপি উপ্পজ্জমানো হদযং সন্তাপেত্ৰা ৰূপসম্মতি, যেন চ ততো বলৰতরুপ্পন্নেন একচ্চো মুখৰিকুণনমত্তং করোতি, ততো বলৰতরেন একচ্চো ফরুসং ৰত্তুকামো হনুসঞ্চলনমত্তং করোতি, অপরো ততো বলৰতরেন ফরুসং ভণতি, অপরো ততো বলৰতরেন দণ্ডং ৰা সত্থং ৰা গৰেসন্তো দিসা ৰিলোকেতি, অপরো ততো বলৰতরেন দণ্ডং ৰা সত্থং ৰা আমসতি, অপরো ততো বলৰতরেন দণ্ডাদীনি গহেত্ৰা উপধাৰতি, অপরো ততো বলৰতরেন একং ৰা দ্ৰে ৰা পহারে দেতি, অপরো ততো বলৰতরেন অপি ঞাতিসালোহিতং জীৰিতা ৰোরোপেতি, একচ্চো ততো বলৰতরেন পচ্ছা ৰিপ্পটিসারী অত্তানম্পি জীৰিতা ৰোরোপেতি সীহল়দীপে কালগামৰাসী অমচ্চো ৰিয. এত্তাৰতা চ কোধো পরমৰেপুল্লপ্পত্তো হোতি. সো ভগৰতা বোধিমণ্ডেযেৰ সব্বসো পহীনো উচ্ছিন্নমূলো তালাৰত্থুকতো, তস্মা ভগৰা ‘‘অক্কোধনোহমস্মী’’তি আহ.

ৰিগতখিলোতি অপগতখিলো. যে হি তে চিত্তবন্ধভাৰেন পঞ্চ চেতোখিলা ৰুত্তা, যে হি চ খিলভূতে চিত্তে সেয্যথাপি নাম খিলে ভূমিভাগে ¶ চত্তারো মাসে ৰস্সন্তেপি দেৰে সস্সানি ন রুহন্তি, এৰমেৰং সদ্ধম্মস্সৰনাদিকুসলহেতুৰস্সে ৰস্সন্তেপি কুসলং ন রুহতি তে চ ভগৰতা বোধিমণ্ডেযেৰ সব্বসো পহীনা, তস্মা ভগৰা ‘‘ৰিগতখিলোহমস্মী’’তি আহ.

একরত্তিং ৰাসো অস্সাতি একরত্তিৰাসো ¶ . যথা হি ধনিযো তত্থ চত্তারো ৰস্সিকে মাসে নিবদ্ধৰাসং উপগতো, ন তথা ভগৰা. ভগৰা হি তংযেৰ রত্তিং তস্স অত্থকামতায তত্থ ৰাসং উপগতো. তস্মা ‘‘একরত্তিৰাসো’’তি আহ. ৰিৰটাতি অপনীতচ্ছদনা. কুটীতি অত্তভাৰো. অত্তভাৰো হি তং তং অত্থৰসং পটিচ্চ কাযোতিপি গুহাতিপি দেহোতিপি সন্দেহোতিপি নাৰাতিপি রথোতিপি ৰণোতিপি ধজোতিপি ৰম্মিকোতিপি কুটীতিপি কুটিকাতিপি ৰুচ্চতি. ইধ পন কট্ঠাদীনি পটিচ্চ গেহনামিকা কুটি ৰিয অট্ঠিআদীনি পটিচ্চ সঙ্খ্যং গতত্তা ‘‘কুটী’’তি ৰুত্তো. যথাহ –

‘‘সেয্যথাপি, আৰুসো, কট্ঠঞ্চ পটিচ্চ, ৰল্লিঞ্চ পটিচ্চ, মত্তিকঞ্চ পটিচ্চ, তিণঞ্চ পটিচ্চ, আকাসো পরিৰারিতো অগারংত্ৰেৰ সঙ্খং গচ্ছতি; এৰমেৰ খো, আৰুসো, অট্ঠিঞ্চ পটিচ্চ, ন্হারুঞ্চ পটিচ্চ, মংসঞ্চ পটিচ্চ, চম্মঞ্চ পটিচ্চ, আকাসো পরিৰারিতো রূপন্ত্ৰেৰ সঙ্খং গচ্ছতী’’তি (ম. নি. ১.৩০৬).

চিত্তমক্কটস্স নিৰাসতো ৰা কুটি. যথাহ –

‘‘অট্ঠিকঙ্কলকুটি ¶ চে সা, মক্কটাৰসথো ইতি;

মক্কটো পঞ্চদ্ৰারায, কুটিকায পসক্কিয;

দ্ৰারেন অনুপরিযাতি, ঘট্টযন্তো পুনপ্পুন’’ন্তি. (থেরগা. ১২৫);

সা কুটি যেন তণ্হামানদিট্ঠিছদনেন সত্তানং ছন্নত্তা পুনপ্পুনং রাগাদিকিলেসৰস্সং অতিৰস্সতি. যথাহ –

‘‘ছন্নমতিৰস্সতি, ৰিৰটং নাতিৰস্সতি;

তস্মা ছন্নং ৰিৰরেথ, এৰং তং নাতিৰস্সতী’’তি. (উদা. ৪৫; থেরগা. ৪৪৭; পরি. ৩৩৯);

অযং ¶ গাথা দ্ৰীসু ঠানেসু ৰুত্তা খন্ধকে থেরগাথাযঞ্চ. খন্ধকে হি ‘‘যো আপত্তিং পটিচ্ছাদেতি, তস্স কিলেসা চ পুনপ্পুনং আপত্তিযো চ অতিৰস্সন্তি, যো পন ন পটিচ্ছাদেতি, তস্স নাতিৰস্সন্তী’’তি ইমং অত্থং পটিচ্চ ৰুত্তা. থেরগাথাযং ‘‘যস্স রাগাদিচ্ছদনং অত্থি, তস্স পুন ইট্ঠারম্মণাদীসু রাগাদিসম্ভৰতো ছন্নমতিৰস্সতি ¶ . যো ৰা উপ্পন্নে কিলেসে অধিৰাসেতি, তস্সেৰ অধিৰাসিতকিলেসচ্ছদনচ্ছন্না অত্তভাৰকুটি পুনপ্পুনং কিলেসৰস্সং অতিৰস্সতি. যস্স পন অরহত্তমগ্গঞাণৰাতেন কিলেসচ্ছদনস্স ৰিদ্ধংসিতত্তা ৰিৰটা, তস্স নাতিৰস্সতী’’তি. অযমত্থো ইধ অধিপ্পেতো. ভগৰতা হি যথাৰুত্তং ছদনং যথাৰুত্তেনেৰ নযেন ৰিদ্ধংসিতং, তস্মা ‘‘ৰিৰটা কুটী’’তি আহ. নিব্বুতোতি উপসন্তো. গিনীতি অগ্গি. যেন হি একাদসৰিধেন অগ্গিনা সব্বমিদং আদিত্তং. যথাহ – ‘‘আদিত্তং রাগগ্গিনা’’তি ৰিত্থারো. সো অগ্গি ভগৰতো বোধিমূলেযেৰ অরিযমগ্গসলিলসেকেন নিব্বুতো, তস্মা ‘‘নিব্বুতো গিনী’’তি আহ.

এৰং ৰদন্তো চ ধনিযং অতুট্ঠব্বেন তুস্সমানং অঞ্ঞাপদেসেনেৰ পরিভাসতি, ওৰদতি, অনুসাসতি. কথং? ‘‘অক্কোধনো’’তি হি ৰদমানো, ধনিয, ত্ৰং ‘‘পক্কোদনোহমস্মী’’তি তুট্ঠো, ওদনপাকো চ যাৰজীৰং ধনপরিক্খযেন কত্তব্বো, ধনপরিক্খযো চ আরক্খাদিদুক্খপদট্ঠানো, এৰং সন্তে দুক্খেনেৰ তুট্ঠো হোসি. অহং পন ‘‘অক্কোধনোহমস্মী’’তি তুস্সন্তো সন্দিট্ঠিকসম্পরাযিকদুক্খাভাৰেন তুট্ঠো হোমীতি দীপেতি. ‘‘ৰিগতখিলো’’তি ৰদমানো ত্ৰং ‘‘দুদ্ধখীরোহমস্মী’’তি তুস্সন্তো অকতকিচ্চোৰ ‘‘কতকিচ্চোহমস্মী’’তি মন্ত্ৰা তুট্ঠো, অহং পন ‘‘ৰিগতখিলোহমস্মী’’তি তুস্সন্তো কতকিচ্চোৰ তুট্ঠো হোমীতি দীপেতি. ‘‘অনুতীরে ¶ মহিযেকরত্তিৰাসো’’তি ৰদমানো ত্ৰং অনুতীরে মহিযা সমানৰাসোতি তুস্সন্তো চতুমাসনিবদ্ধৰাসেন তুট্ঠো. নিবদ্ধৰাসো চ আৰাসসঙ্গেন হোতি, সো চ দুক্খো, এৰং সন্তে দুক্খেনেৰ তুট্ঠো হোসি. অহং পন একরত্তিৰাসোতি তুস্সন্তো অনিবদ্ধৰাসেন তুট্ঠো, অনিবদ্ধৰাসো চ আৰাসসঙ্গাভাৰেন হোতি, আৰাসসঙ্গাভাৰো চ সুখোতি সুখেনেৰ তুট্ঠো হোমীতি ¶ দীপেতি.

‘‘ৰিৰটা ¶ কুটী’’তি ৰদমানো ত্ৰং ছন্না কুটীতি তুস্সন্তো ছন্নগেহতায তুট্ঠো, গেহে চ তে ছন্নেপি অত্তভাৰকুটিকং কিলেসৰস্সং অতিৰস্সতি, যেন সঞ্জনিতেহি চতূহি মহোঘেহি ৰুয্হমানো অনযব্যসনং পাপুণেয্যাসি, এৰং সন্তে অতুট্ঠব্বেনেৰ তুট্ঠো হোসি. অহং পন ‘‘ৰিৰটা কুটী’’তি তুস্সন্তো অত্তভাৰকুটিযা কিলেসচ্ছদনাভাৰেন তুট্ঠো. এৰঞ্চ মে ৰিৰটায কুটিযা ন তং কিলেসৰস্সং অতিৰস্সতি, যেন সঞ্জনিতেহি চতূহি মহোঘেহি ৰুয্হমানো অনযব্যসনং পাপুণেয্যং, এৰং সন্তে তুট্ঠব্বেনেৰ তুট্ঠো হোমীতি দীপেতি. ‘‘নিব্বুতো গিনী’’তি ৰদমানো ত্ৰং আহিতো গিনীতি তুস্সন্তো অকতূপদ্দৰনিৰারণোৰ কতূপদ্দৰনিৰারণোস্মীতি মন্ত্ৰা তুট্ঠো. অহং পন নিব্বুতো গিনীতি তুস্সন্তো একাদসগ্গিপরিল়াহাভাৰতো কতূপদ্দৰনিৰারণতাযেৰ তুট্ঠোতি দীপেতি. ‘‘অথ চে পত্থযসী পৰস্স দেৰা’’তি ৰদমানো এৰং ৰিগতদুক্খানং অনুপ্পত্তসুখানং কতসব্বকিচ্চানং অম্হাদিসানং এতং ৰচনং সোভতি, অথ চে পত্থযসি, পৰস্স দেৰ, ন নো তযি ৰস্সন্তে ৰা অৰস্সন্তে ৰা ৰুড্ঢি ৰা হানি ৰা অত্থি, ত্ৰং পন কস্মা এৰং ৰদসীতি দীপেতি. তস্মা যং ৰুত্তং ‘‘এৰং ৰদন্তো চ ধনিয অতুট্ঠব্বেনেৰ তুস্সমানং অঞ্ঞাপদেসেনেৰ পরিভাসতি ওৰদতি, অনুসাসতী’’তি, তং সম্মদেৰ ৰুত্তন্তি.

২০. এৰমিমং ভগৰতা ৰুত্তং গাথং সুত্ৰাপি ধনিযো গোপো ‘‘কো অযং গাথং ভাসতী’’তি অৰত্ৰা তেন সুভাসিতেন পরিতুট্ঠো পুনপি তথারূপং সোতুকামো অপরম্পি গাথমাহ ‘‘অন্ধকমকসা’’তি. তত্থ অন্ধকাতি কাল়মক্খিকানং অধিৰচনং, পিঙ্গলমক্খিকানন্তিপি একে. মকসাতি মকসাযেৰ. ন ৰিজ্জরেতি নত্থি. কচ্ছেতি দ্ৰে কচ্ছা – নদীকচ্ছো চ পব্বতকচ্ছো চ. ইধ নদীকচ্ছো. রুল়্হতিণেতি সঞ্জাততিণে. চরন্তীতি ভত্তকিচ্চং ¶ করোন্তি. ৰুট্ঠিম্পীতি ৰাতৰুট্ঠিআদিকা অনেকা ৰুট্ঠিযো, তা আল়ৰকসুত্তে পকাসযিস্সাম. ইধ পন ৰস্সৰুট্ঠিং সন্ধায ৰুত্তং. সহেয্যুন্তি খমেয্যুং. সেসং পাকটমেৰ. এত্থ ধনিযো যে অন্ধকমকসা সন্নিপতিত্ৰা রুধিরে পিৰন্তা মুহুত্তেনেৰ গাৰো অনযব্যসনং পাপেন্তি, তস্মা ৰুট্ঠিতমত্তেযেৰ তে গোপালকা পংসুনা চ সাখাহি চ ¶ মারেন্তি, তেসং অভাৰেন গুন্নং খেমতং, কচ্ছে ¶ রুল়্হতিণচরণেন অদ্ধানগমনপরিস্সমাভাৰং ৰত্ৰা খুদাকিলমথাভাৰঞ্চ দীপেন্তো ‘‘যথা অঞ্ঞেসং গাৰো অন্ধকমকসসম্ফস্সেহি দিস্সমানা অদ্ধানগমনেন কিলন্তা খুদায মিলাযমানা একৰুট্ঠিনিপাতম্পি ন সহেয্যুং, ন মে তথা গাৰো, ময্হং পন গাৰো ৰুত্তপ্পকারাভাৰা দ্ৰিক্খত্তুং ৰা তিক্খতুং ৰা ৰুট্ঠিম্পি সহেয্যু’’ন্তি দীপেতি.

২১. ততো ভগৰা যস্মা ধনিযো অন্তরদীপে ৰসন্তো ভযং দিস্ৰা, কুল্লং বন্ধিত্ৰা, মহামহিং তরিত্ৰা, তং কচ্ছং আগম্ম ‘‘অহং সুট্ঠু আগতো, নিব্ভযেৰ ঠানে ঠিতো’’তি মঞ্ঞমানো এৰমাহ, সভযে এৰ চ সো ঠানে ঠিতো, তস্মা তস্স আগমনট্ঠানা অত্তনো আগমনট্ঠানং উত্তরিতরঞ্চ পণীততরঞ্চ ৰণ্ণেন্তো ‘‘বদ্ধাসি ভিসী’’তি ইমং গাথমভাসি, অত্থসভাগং নো ব্যঞ্জনসভাগং.

তত্থ ভিসীতি পত্থরিত্ৰা পুথুলং কত্ৰা বদ্ধকুল্লো ৰুচ্চতি লোকে. অরিযস্স পন ধম্মৰিনযে অরিযমগ্গস্সেতং অধিৰচনং. অরিযমগ্গো হি –

‘‘মগ্গো পজ্জো পথো পন্থো, অঞ্জসং ৰটুমাযনং;

নাৰা উত্তরসেতু চ, কুল্লো চ ভিসি সঙ্কমো’’. (চূল়নি. পারাযনত্থুতিগাথানিদ্দেস ১০১);

‘‘অদ্ধানং পভৰো চেৰ, তত্থ তত্থ পকাসিতো’’.

ইমাযপি গাথায ভগৰা পুরিমনযেনেৰ তং ওৰদন্তো ইমং অত্থং আহাতি ৰেদিতব্বো – ধনিয, ত্ৰং কুল্লং বন্ধিত্ৰা, মহিং তরিত্ৰা, ইমং ঠানমাগতো, পুনপি চ তে কুল্লো ¶ বন্ধিতব্বো এৰ ভৰিস্সতি, নদী চ তরিতব্বা, ন চেতং ঠানং খেমং. মযা পন একচিত্তে মগ্গঙ্গানি সমোধানেত্ৰা ঞাণবন্ধনেন বদ্ধা অহোসি ভিসি. সা চ সত্ততিংসবোধিপক্খিযধম্মপরিপুণ্ণতায একরসভাৰূপগতত্তা অঞ্ঞমঞ্ঞং অনতিৰত্তনেন পুন বন্ধিতব্বপ্পযোজনাভাৰেন দেৰমনুস্সেসু কেনচি মোচেতুং অসক্কুণেয্যতায চ সুসঙ্খতা. তায চম্হি তিণ্ণো, পুব্বে পত্থিতং তীরপ্পদেসং গতো. গচ্ছন্তোপি চ ন সোতাপন্নাদযো ৰিয কঞ্চিদেৰ পদেসং গতো. অথ খো পারগতো সব্বাসৰক্খযং সব্বধম্মপারং পরমং খেমং নিব্বানং গতো, তিণ্ণোতি ৰা সব্বঞ্ঞুতং পত্তো, পারগতোতি অরহত্তং পত্তো ¶ . কিং ৰিনেয্য পারগতোতি চে? ৰিনেয্য ওঘং, কামোঘাদিচতুব্বিধং ওঘং তরিত্ৰা অতিক্কম্ম তং পারং গতোতি. ইদানি চ ¶ পন মে পুন তরিতব্বাভাৰতো অত্থো ভিসিযা ন ৰিজ্জতি, তস্মা মমেৰ যুত্তং ৰত্তুং ‘‘অথ চে পত্থযসী পৰস্স দেৰা’’তি.

২২. তম্পি সুত্ৰা ধনিযো পুরিমনযেনেৰ ‘‘গোপী মম অস্সৰা’’তি ইমং গাথং অভাসি. তত্থ গোপীতি ভরিযং নিদ্দিসতি. অস্সৰাতি ৰচনকরা কিংকারপটিসাৰিনী. অলোলাতি মাতুগামো হি পঞ্চহি লোলতাহি লোলো হোতি – আহারলোলতায, অলঙ্কারলোলতায, পরপুরিসলোলতায, ধনলোলতায, পাদলোলতায. তথা হি মাতুগামো ভত্তপূৰসুরাদিভেদে আহারে লোলতায অন্তমসো পারিৰাসিকভত্তম্পি ভুঞ্জতি, হত্থোতাপকম্পি খাদতি, দিগুণং ধনমনুপ্পদত্ৰাপি সুরং পিৰতি. অলঙ্কারলোলতায অঞ্ঞং অলঙ্কারং অলভমানো অন্তমসো উদকতেলকেনপি কেসে ওসণ্ডেত্ৰা মুখং পরিমজ্জতি. পরপুরিসলোলতায অন্তমসো পুত্তেনপি ¶ তাদিসে পদেসে পক্কোসিযমানো পঠমং অসদ্ধম্মৰসেন চিন্তেতি. ধনলোলতায ‘‘হংসরাজং গহেত্ৰান সুৰণ্ণা পরিহাযথ’’. পাদলোলতায আরামাদিগমনসীলো হুত্ৰা সব্বং ধনং ৰিনাসেতি. তত্থ ধনিযো ‘‘একাপি লোলতা ময্হং গোপিযা নত্থী’’তি দস্সেন্তো অলোলাতি আহ.

দীঘরত্তং সংৰাসিযাতি দীঘকালং সদ্ধিং ৰসমানা কোমারভাৰতো পভুতি একতো ৰড্ঢিতা. তেন পরপুরিসে ন জানাতীতি দস্সেতি. মনাপাতি এৰং পরপুরিসে অজানন্তী মমেৰ মনং অল্লীযতীতি দস্সেতি. তস্সা ন সুণামি কিঞ্চি পাপন্তি ‘‘ইত্থন্নামেন নাম সদ্ধিং ইমায হসিতং ৰা লপিতং ৰা’’তি এৰং তস্সা ন সুণামি, কঞ্চি অতিচারদোসন্তি দস্সেতি.

২৩. অথ ভগৰা এতেহি গুণেহি গোপিযা তুট্ঠং ধনিযং ওৰদন্তো পুরিমনযেনেৰ ‘‘চিত্তং মম অস্সৰ’’ন্তি ইমং গাথমভাসি, অত্থসভাগং, ব্যঞ্জনসভাগঞ্চ. তত্থ উত্তানত্থানেৰ পদানি. অযং পন অধিপ্পাযো – ধনিয, ত্ৰং ‘‘গোপী মম অস্সৰা’’তি তুট্ঠো, সা পন তে অস্সৰা ¶ ভৰেয্য ৰা ন ৰা; দুজ্জানং পরচিত্তং, ৰিসেসতো মাতুগামস্স. মাতুগামঞ্হি কুচ্ছিযা পরিহরন্তাপি রক্খিতুং ন সক্কোন্তি, এৰং দুরক্খচিত্তত্তা এৰ ন সক্কা তুম্হাদিসেহি ইত্থী অলোলাতি ৰা সংৰাসিযাতি ৰা মনাপাতি ৰা নিপ্পাপাতি ৰা জানিতুং. ময্হং পন চিত্তং অস্সৰং ওৰাদপটিকরং মম ৰসে ৰত্ততি, নাহং তস্স ৰসে ৰত্তামি. সো চস্স অস্সৰভাৰো যমকপাটিহারিযে ছন্নং ৰণ্ণানং অগ্গিধারাসু চ উদকধারাসু চ পৰত্তমানাসু সব্বজনস্স পাকটো অহোসি. অগ্গিনিম্মানে হি তেজোকসিণং সমাপজ্জিতব্বং উদকনিম্মানে আপোকসিণং, নীলাদিনিম্মানে নীলাদিকসিণানি. বুদ্ধানম্পি হি দ্ৰে চিত্তানি একতো ¶ নপ্পৰত্তন্তি, একমেৰ পন অস্সৰভাৰেন এৰং ৰসৰত্তি অহোসি. তঞ্চ খো পন সব্বকিলেসবন্ধনাপগমা ¶ ৰিমুত্তং, ৰিমুত্তত্তা তদেৰ অলোলং, ন তৰ গোপী. দীপঙ্করবুদ্ধকালতো চ পভুতি দানসীলাদীহি দীঘরত্তং পরিভাৰিতত্তা সংৰাসিযং, ন তৰ গোপী. তদেতং অনুত্তরেন দমথেন দমিতত্তা সুদন্তং, সুদন্তত্তা অত্তনো ৰসেন ছদ্ৰারৰিসেৰনং পহায মমেৰ অধিপ্পাযমনস্স ৰসেনানুৰত্তনতো মনাপং, ন তৰ গোপী.

পাপং পন মে ন ৰিজ্জতীতি ইমিনা পন ভগৰা তস্স অত্তনো চিত্তস্স পাপাভাৰং দস্সেতি, ধনিযো ৰিয গোপিযা. সো চস্স পাপাভাৰো ন কেৰলং সম্মাসম্বুদ্ধকালেযেৰ, একূনতিংস ৰস্সানি সরাগাদিকালে অগারমজ্ঝে ৰসন্তস্সাপি ৰেদিতব্বো. তদাপি হিস্স অগারিযভাৰানুরূপং ৰিঞ্ঞুপটিকুট্ঠং কাযদুচ্চরিতং ৰা ৰচীদুচ্চরিতং ৰা মনোদুচ্চরিতং ৰা ন উপ্পন্নপুব্বং. ততো পরং মারোপি ছব্বস্সানি অনভিসম্বুদ্ধং, একং ৰস্সং অভিসম্বুদ্ধন্তি সত্ত ৰস্সানি তথাগতং অনুবন্ধি ‘‘অপ্পেৰ নাম ৰালগ্গনিতুদনমত্তম্পিস্স পাপসমাচারং পস্সেয্য’’ন্তি. সো অদিস্ৰাৰ নিব্বিন্নো ইমং গাথং অভাসি –

‘‘সত্ত ৰস্সানি ভগৰন্তং, অনুবন্ধিং পদাপদং;

ওতারং নাধিগচ্ছিস্সং, সম্বুদ্ধস্স সতীমতো’’তি. (সু. নি. ৪৪৮);

বুদ্ধকালেপি নং উত্তরমাণৰো সত্ত মাসানি অনুবন্ধি আভিসমাচারিকং দট্ঠুকামো. সো কিঞ্চি ৰজ্জং অদিস্ৰাৰ পরিসুদ্ধসমাচারো ভগৰাতি গতো. চত্তারি হি তথাগতস্স অরক্খেয্যানি. যথাহ –

‘‘চত্তারিমানি ¶ , ভিক্খৰে, তথাগতস্স অরক্খেয্যানি. কতমানি চত্তারি? পরিসুদ্ধকাযসমাচারো, ভিক্খৰে, তথাগতো, নত্থি তথাগতস্স কাযদুচ্চরিতং, যং তথাগতো রক্খেয্য ‘মা মে ইদং পরো অঞ্ঞাসী’তি, পরিসুদ্ধৰচীসমাচারো…পে… পরিসুদ্ধমনোসমাচারো…পে… পরিসুদ্ধাজীৰো, ভিক্খৰে, তথাগতো, নত্থি তথাগতস্স মিচ্ছাজীৰো, যং তথাগতো রক্খেয্য ¶ ‘মা মে ইদং পরো অঞ্ঞাসী’’’তি (অ. নি. ৭.৫৮).

এৰং যস্মা তথাগতস্স চিত্তস্স ন কেৰলং সম্মাসম্বুদ্ধকালে, পুব্বেপি পাপং নত্থি এৰ, তস্মা আহ – ‘‘পাপং পন মে ন ৰিজ্জতী’’তি. তস্সাধিপ্পাযো – মমেৰ চিত্তস্স পাপং ন সক্কা ¶ সুণিতুং, ন তৰ গোপিযা. তস্মা যদি এতেহি গুণেহি তুট্ঠেন ‘‘অথ চে পত্থযসী পৰস্স দেৰা’’তি ৰত্তব্বং, মযাৰেতং ৰত্তব্বন্তি.

২৪. তম্পি সুত্ৰা ধনিযো ততুত্তরিপি সুভাসিতরসাযনং পিৰিতুকামো অত্তনো ভুজিস্সভাৰং দস্সেন্তো আহ ‘‘অত্তৰেতনভতোহমস্মী’’তি. তত্থ অত্তৰেতনভতোতি অত্তনিযেনেৰ ঘাসচ্ছাদনেন ভতো, অত্তনোযেৰ কম্মং কত্ৰা জীৰামি, ন পরস্স ৰেতনং গহেত্ৰা পরস্স কম্মং করোমীতি দস্সেতি. পুত্তাতি ধীতরো চ পুত্তা চ, তে সব্বে পুত্তাত্ৰেৰ একজ্ঝং ৰুচ্চন্তি. সমানিযাতি সন্নিহিতা অৰিপ্পৰুট্ঠা. অরোগাতি নিরাবাধা, সব্বেৰ ঊরুবাহুবলাতি দস্সেতি. তেসং ন সুণামি কিঞ্চি পাপন্তি তেসং চোরাতি ৰা পরদারিকাতি ৰা দুস্সীলাতি ৰা কিঞ্চি পাপং ন সুণামীতি.

২৫. এৰং ৰুত্তে ভগৰা পুরিমনযেনেৰ ধনিযং ওৰদন্তো ইমং গাথং অভাসি – ‘‘নাহং ভতকো’’তি. অত্রাপি উত্তানত্থানেৰ পদানি. অযং পন অধিপ্পাযো – ত্ৰং ‘‘ভুজিস্সোহমস্মী’’তি মন্ত্ৰা তুট্ঠো, পরমত্থতো চ অত্তনো কম্মং করিত্ৰা জীৰন্তোপি দাসো এৰাসি তণ্হাদাসত্তা, ভতকৰাদা চ ন পরিমুচ্চসি. ৰুত্তঞ্হেতং ‘‘ঊনো লোকো অতিত্তো তণ্হাদাসো’’তি (ম. নি. ২.৩০৫). পরমত্থতো পন নাহং ভতকোস্মি কস্সচি. অহঞ্হি কস্সচি পরস্স ৰা অত্তনো ৰা ভতকো ন হোমি. কিং কারণা? যস্মা ¶ নিব্বিট্ঠেন চরামি সব্বলোকে. অহঞ্হি দীপঙ্করপাদমূলতো যাৰ বোধি, তাৰ সব্বঞ্ঞুতঞ্ঞাণস্স ভতকো অহোসিং. সব্বঞ্ঞুতং পত্তো পন নিব্বিট্ঠো নিব্বিসো রাজভতো ৰিয. তেনেৰ নিব্বিট্ঠেন সব্বঞ্ঞুভাৰেন লোকুত্তরসমাধিসুখেন চ জীৰামি. তস্স মে ইদানি ¶ উত্তরিকরণীযস্স কতপরিচযস্স ৰা অভাৰতো অপ্পহীনপটিসন্ধিকানং তাদিসানং ৰিয পত্তব্বো কোচি অত্থো ভতিযা ন ৰিজ্জতি. ‘‘ভটিযা’’তিপি পাঠো. তস্মা যদি ভুজিস্সতায তুট্ঠেন ‘‘অথ চে পত্থযসী পৰস্স দেৰা’’তি ৰত্তব্বং, মযাৰেতং ৰত্তব্বন্তি.

২৬. তম্পি সুত্ৰা ধনিযো অতিত্তোৰ সুভাসিতামতেন অত্তনো পঞ্চপ্পকারগোমণ্ডলপরিপুণ্ণভাৰং দস্সেন্তো আহ ‘‘অত্থি ৰসা’’তি. তত্থ ৰসাতি অদমিতৰুড্ঢৰচ্ছকা. ধেনুপাতি ধেনুং পিৰন্তা তরুণৰচ্ছকা, খীরদাযিকা ৰা গাৰো. গোধরণিযোতি গব্ভিনিযো. পৰেণিযোতি ৰযপ্পত্তা বলীবদ্দেহি সদ্ধিং মেথুনপত্থনকগাৰো. উসভোপি গৰম্পতীতি যো গোপালকেহি পাতো এৰ ন্হাপেত্ৰা, ভোজেত্ৰা, পঞ্চঙ্গুলং দত্ৰা, মালং বন্ধিত্ৰা – ‘‘এহি, তাত, গাৰো গোচরং পাপেত্ৰা রক্খিত্ৰা আনেহী’’তি পেসীযতি, এৰং পেসিতো ¶ চ তা গাৰো অগোচরং পরিহরিত্ৰা, গোচরে চারেত্ৰা, সীহব্যগ্ঘাদিভযা পরিত্তাযিত্ৰা আনেতি, তথারূপো উসভোপি গৰম্পতি ইধ ময্হং গোমণ্ডলে অত্থীতি দস্সেসি.

২৭. এৰং ৰুত্তে ভগৰা তথেৰ ধনিযং ওৰদন্তো ইমং পচ্চনীকগাথং আহ ‘‘নত্থি ৰসা’’তি. এত্থ চেস অধিপ্পাযো – ইধ অম্হাকং সাসনে অদমিতট্ঠেন ৰুড্ঢট্ঠেন চ ৰসাসঙ্খাতা পরিযুট্ঠানা ৰা, তরুণৰচ্ছকে সন্ধায ৰসানং মূলট্ঠেন খীরদাযিনিযো সন্ধায পগ্ঘরণট্ঠেন ধেনুপাসঙ্খাতা অনুসযা ৰা, পটিসন্ধিগব্ভধারণট্ঠেন গোধরণিসঙ্খাতা পুঞ্ঞাপুঞ্ঞানেঞ্জাভিসঙ্খারচেতনা ৰা, সংযোগপত্থনট্ঠেন পৰেণিসঙ্খাতা পত্থনা তণ্হা ৰা, আধিপচ্চট্ঠেন পুব্বঙ্গমট্ঠেন সেট্ঠট্ঠেন চ গৰম্পতিউসভসঙ্খাতং অভিসঙ্খারৰিঞ্ঞাণং ৰা নত্থি, স্ৰাহং ইমায সব্বযোগক্খেমভূতায নত্থিতায তুট্ঠো. ত্ৰং পন সোকাদিৰত্থুভূতায অত্থিতায তুট্ঠো ¶ . তস্মা সব্বযোগক্খেমতায ¶ তুট্ঠস্স মমেৰেতং যুত্তং ৰত্তুং ‘‘অথ চে পত্থযসী পৰস্স দেৰা’’তি.

২৮. তম্পি সুত্ৰা ধনিযো ততুত্তরিপি সুভাসিতং অমতরসং অধিগন্তুকামো অত্তনো গোগণস্স খিলবন্ধনসম্পত্তিং দস্সেন্তো আহ ‘‘খিলা নিখাতা’’তি. তত্থ খিলাতি গুন্নং বন্ধনত্থম্ভা. নিখাতাতি আকোটেত্ৰা ভূমিযং পৰেসিতা খুদ্দকা মহন্তা খণিত্ৰা ঠপিতা. অসম্পৰেধীতি অকম্পকা. দামাতি ৰচ্ছকানং বন্ধনত্থায কতা গন্থিতপাসযুত্তা রজ্জুবন্ধনৰিসেসা. মুঞ্জমযাতি মুঞ্জতিণমযা. নৰাতি অচিরকতা. সুসণ্ঠানাতি সুট্ঠু সণ্ঠানা, সুৰট্টিতসণ্ঠানা ৰা. ন হি সক্খিন্তীতি নেৰ সক্খিস্সন্তি. ধেনুপাপি ছেত্তুন্তি তরুণৰচ্ছকাপি ছিন্দিতুং.

২৯. এৰং ৰুত্তে ভগৰা ধনিযস্স ইন্দ্রিয-পরিপাককালং ঞত্ৰা পুরিমনযেনেৰ তং ওৰদন্তো ইমং চতুসচ্চদীপিকং গাথং অভাসি ‘‘উসভোরিৰ ছেত্ৰা’’তি. তত্থ উসভোতি গোপিতা গোপরিণাযকো গোযূথপতি বলীবদ্দো. কেচি পন ভণন্তি ‘‘গৰসতজেট্ঠো উসভো, সহস্সজেট্ঠো ৰসভো, সতসহস্সজেট্ঠো নিসভো’’তি. অপরে ‘‘একগামখেত্তে জেট্ঠো উসভো, দ্ৰীসু জেট্ঠো ৰসভো, সব্বত্থ অপ্পটিহতো নিসভো’’তি. সব্বেপেতে পপঞ্চা, অপিচ খো পন উসভোতি ৰা ৰসভোতি ৰা নিসভোতি ৰা সব্বেপেতে অপ্পটিসমট্ঠেন ৰেদিতব্বা. যথাহ – ‘‘নিসভো ৰত ভো সমণো গোতমো’’তি (সং. নি. ১.৩৮). র-কারো পদসন্ধিকরো. বন্ধনানীতি রজ্জুবন্ধনানি কিলেসবন্ধনানি চ. নাগোতি হত্থী. পূতিলতন্তি গল়োচীলতং. যথা হি সুৰণ্ণৰণ্ণোপি কাযো পূতিকাযো, ৰস্সসতিকোপি সুনখো কুক্কুরো, তদহুজাতোপি সিঙ্গালো ¶ ‘‘জরসিঙ্গালো’’তি ৰুচ্চতি, এৰং অভিনৰাপি গল়োচীলতা অসারকত্তেন ‘‘পূতিলতা’’তি ৰুচ্চতি. দালযিত্ৰাতি ছিন্দিত্ৰা. গব্ভঞ্চ ¶ সেয্যঞ্চ গব্ভসেয্যং. তত্থ গব্ভগ্গহণেন জলাবুজযোনি, সেয্যগ্গহণেন অৰসেসা. গব্ভসেয্যমুখেন ৰা সব্বাপি তা ৰুত্তাতি ৰেদিতব্বা. সেসমেত্থ পদত্থতো উত্তানমেৰ.

অযং ¶ পনেত্থ অধিপ্পাযো – ধনিয, ত্ৰং বন্ধনেন তুট্ঠো, অহং পন বন্ধনেন অট্টীযন্তো থামৰীরিযূপেতো মহাউসভোরিৰ বন্ধনানি পঞ্চুদ্ধম্ভাগিযসংযোজনানি চতুত্থঅরিযমগ্গথামৰীরিযেন ছেত্ৰা, নাগো পূতিলতংৰ পঞ্চোরম্ভাগিযসংযোজনবন্ধনানি হেট্ঠামগ্গত্তযথামৰীরিযেন দালযিত্ৰা, অথ ৰা উসভোরিৰ বন্ধনানি অনুসযে নাগো পূতিলতংৰ পরিযুট্ঠানানি ছেত্ৰা দালযিত্ৰাৰ ঠিতো. তস্মা ন পুন গব্ভসেয্যং উপেস্সং. সোহং জাতিদুক্খৰত্থুকেহি সব্বদুক্খেহি পরিমুত্তো সোভামি – ‘‘অথ চে পত্থযসী পৰস্স দেৰা’’তি ৰদমানো. তস্মা সচে ত্ৰম্পি অহং ৰিয ৰত্তুমিচ্ছসি, ছিন্দ তানি বন্ধনানীতি. এত্থ চ বন্ধনানি সমুদযসচ্চং, গব্ভসেয্যা দুক্খসচ্চং, ‘‘ন উপেস্স’’ন্তি এত্থ অনুপগমো অনুপাদিসেসৰসেন, ‘‘ছেত্ৰা দালযিত্ৰা’’তি এত্থ ছেদো পদালনঞ্চ সউপাদিসেসৰসেন নিরোধসচ্চং, যেন ছিন্দতি পদালেতি চ, তং মগ্গসচ্চন্তি.

এৰমেতং চতুসচ্চদীপিকং গাথং সুত্ৰা গাথাপরিযোসানে ধনিযো চ পজাপতি চস্স দ্ৰে চ ধীতরোতি চত্তারো জনা সোতাপত্তিফলে পতিট্ঠহিংসু. অথ ধনিযো অৰেচ্চপ্পসাদযোগেন তথাগতে মূলজাতায পতিট্ঠিতায সদ্ধায পঞ্ঞাচক্খুনা ভগৰতো ধম্মকাযং দিস্ৰা ধম্মতায চোদিতহদযো চিন্তেসি – ‘‘বন্ধনানি ছিন্দিং, গব্ভসেয্যো চ মে নত্থী’’তি অৰীচিং পরিযন্তং কত্ৰা যাৰ ভৰগ্গা কো অঞ্ঞো এৰং সীহনাদং নদিস্সতি অঞ্ঞত্র ভগৰতা, আগতো নু খো মে সত্থাতি. ততো ভগৰা ছব্বণ্ণরস্মিজালৰিচিত্রং সুৰণ্ণরসসেকপিঞ্জরং ৰিয সরীরাভং ধনিযস্স নিৰেসনে মুঞ্চি ‘‘পস্স দানি যথাসুখ’’ন্তি.

৩০. অথ ধনিযো অন্তো পৰিট্ঠচন্দিমসূরিযং ৰিয ¶ সমন্তা পজ্জলিতপদীপসহস্সসমুজ্জলিতমিৰ চ নিৰেসনং দিস্ৰা ‘‘আগতো ভগৰা’’তি চিত্তং উপ্পাদেসি. তস্মিংযেৰ চ সমযে মেঘোপি পাৰস্সি. তেনাহু সঙ্গীতিকারা ‘‘নিন্নঞ্চ থলঞ্চ পূরযন্তো’’তি. তত্থ নিন্নন্তি পল্ললং. থলন্তি উক্কূলং. এৰমেতং উক্কূলৰিকূলং সব্বম্পি সমং কত্ৰা পূরযন্তো মহামেঘো পাৰস্সি, ৰস্সিতুং আরভীতি ৰুত্তং হোতি. তাৰদেৰাতি যং খণং ভগৰা সরীরাভং ¶ মুঞ্চি, ধনিযো চ ‘‘সত্থা মে আগতো’’তি সদ্ধামযং চিত্তাভং ¶ মুঞ্চি, তং খণং পাৰস্সীতি. কেচি পন ‘‘সূরিযুগ্গমনম্পি তস্মিংযেৰ খণে’’তি ৰণ্ণযন্তি.

৩১-৩২. এৰং তস্মিং ধনিযস্স সদ্ধুপ্পাদতথাগতোভাসফরণসূরিযুগ্গমনক্খণে ৰস্সতো দেৰস্স সদ্দং সুত্ৰা ধনিযো পীতিসোমনস্সজাতো ইমমত্থং অভাসথ ‘‘লাভা ৰত নো অনপ্পকা’’তি দ্ৰে গাথা ৰত্তব্বা.

তত্থ যস্মা ধনিযো সপুত্তদারো ভগৰতো অরিযমগ্গপটিৰেধেন ধম্মকাযং দিস্ৰা, লোকুত্তরচক্খুনা রূপকাযং দিস্ৰা, লোকিযচক্খুনা সদ্ধাপটিলাভং লভি. তস্মা আহ – ‘‘লাভা ৰত নো অনপ্পকা, যে মযং ভগৰন্তং অদ্দসামা’’তি. তত্থ ৰত ইতি ৰিম্হযত্থে নিপাতো. নো ইতি অম্হাকং. অনপ্পকাতি ৰিপুলা. সেসং উত্তানমেৰ. সরণং তং উপেমাতি এত্থ পন কিঞ্চাপি মগ্গপটিৰেধেনেৰস্স সিদ্ধং সরণগমনং, তত্থ পন নিচ্ছযগমনমেৰ গতো, ইদানি ৰাচায অত্তসন্নিয্যাতনং করোতি. মগ্গৰসেন ৰা সন্নিয্যাতনসরণতং অচলসরণতং পত্তো, তং পরেসং ৰাচায পাকটং করোন্তো পণিপাতসরণগমনং গচ্ছতি. চক্খুমাতি ভগৰা পকতিদিব্বপঞ্ঞাসমন্তবুদ্ধচক্খূহি পঞ্চহি চক্খূহি চক্খুমা. তং আলপন্তো আহ – ‘‘সরণং তং উপেম চক্খুমা’’তি. ‘‘সত্থা নো হোহি তুৰং মহামুনী’’তি ইদং পন ৰচনং সিস্সভাৰূপগমনেনাপি সরণগমনং পূরেতুং ভণতি, গোপী চ অহঞ্চ অস্সৰা, ব্রহ্মচরিযং ¶ সুগতে চরামসেতি ইদং সমাদানৰসেন.

তত্থ ব্রহ্মচরিযন্তি মেথুনৰিরতিমগ্গসমণধম্মসাসনসদারসন্তোসানমেতং অধিৰচনং. ‘‘ব্রহ্মচারী’’তি এৰমাদীসু (ম. নি. ১.৮৩) হি মেথুনৰিরতি ব্রহ্মচরিযন্তি ৰুচ্চতি. ‘‘ইদং খো পন মে পঞ্চসিখ, ব্রহ্মচরিযং একন্তনিব্বিদাযা’’তি এৰমাদীসু (দী. নি. ২.৩২৯) মগ্গো. ‘‘অভিজানামি খো পনাহং, সারিপুত্ত, চতুরঙ্গসমন্নাগতং ব্রহ্মচরিযং চরিতা’’তি এৰমাদীসু (ম. নি. ১.১৫৫) সমণধম্মো. ‘‘তযিদং ব্রহ্মচরিযং ইদ্ধঞ্চেৰ ফীতঞ্চা’’তি এৰমাদীসু (দী. নি. ৩.১৭৪) সাসনং.

‘‘মযঞ্চ ¶ ভরিযা নাতিক্কমাম, অম্হে চ ভরিযা নাতিক্কমন্তি;

অঞ্ঞত্র তাহি ব্রহ্মচরিযং চরাম, তস্মা হি অম্হং দহরা ন মীযরে’’তি. (জা. ১.১০.৯৭) –

এৰমাদীসু ¶ সদারসন্তোসো. ইধ পন সমণধম্মব্রহ্মচরিযপুব্বঙ্গমং উপরিমগ্গব্রহ্মচরিযমধিপ্পেতং. সুগতেতি সুগতস্স সন্তিকে. ভগৰা হি অন্তদ্ৰযমনুপগ্গম্ম সুট্ঠু গতত্তা, সোভণেন চ অরিযমগ্গগমনেন সমন্নাগতত্তা, সুন্দরঞ্চ নিব্বানসঙ্খাতং ঠানং গতত্তা সুগতোতি ৰুচ্চতি. সমীপত্থে চেত্থ ভুম্মৰচনং, তস্মা সুগতস্স সন্তিকেতি অত্থো. চরামসেতি চরাম. যঞ্হি তং সক্কতে চরামসীতি ৰুচ্চতি, তং ইধ চরামসেতি. অট্ঠকথাচরিযা পন ‘‘সেতি নিপাতো’’তি ভণন্তি. তেনেৰ চেত্থ আযাচনত্থং সন্ধায ‘‘চরেম সে’’তিপি পাঠং ৰিকপ্পেন্তি. যং রুচ্চতি, তং গহেতব্বং.

এৰং ধনিযো ব্রহ্মচরিযচরণাপদেসেন ভগৰন্তং পব্বজ্জং যাচিত্ৰা পব্বজ্জপযোজনং দীপেন্তো আহ ‘‘জাতীমরণস্স পারগূ, দুক্খস্সন্তকরা ভৰামসে’’তি. জাতিমরণস্স পারং নাম নিব্বানং, তং অরহত্তমগ্গেন ¶ গচ্ছাম. দুক্খস্সাতি ৰট্টদুক্খস্স. অন্তকরাতি অভাৰকরা. ভৰামসেতি ভৰাম, অথ ৰা অহো ৰত মযং ভৰেয্যামাতি. ‘‘চরামসে’’তি এত্থ ৰুত্তনযেনেৰ তং ৰেদিতব্বং. এৰং ৰত্ৰাপি চ পুন উভোপি কির ভগৰন্তং ৰন্দিত্ৰা ‘‘পব্বাজেথ নো ভগৰা’’তি এৰং পব্বজ্জং যাচিংসূতি.

৩৩. অথ মারো পাপিমা এৰং তে উভোপি ৰন্দিত্ৰা পব্বজ্জং যাচন্তে দিস্ৰা – ‘‘ইমে মম ৰিসযং অতিক্কমিতুকামা, হন্দ নেসং অন্তরাযং করোমী’’তি আগন্ত্ৰা ঘরাৰাসে গুণং দস্সেন্তো ইমং গাথমাহ ‘‘নন্দতি পুত্তেহি পুত্তিমা’’তি. তত্থ নন্দতীতি তুস্সতি মোদতি. পুত্তেহীতি পুত্তেহিপি ধীতরেহিপি, সহযোগত্থে, করণত্থে ৰা করণৰচনং, পুত্তেহি সহ নন্দতি, পুত্তেহি করণভূতেহি নন্দতীতি ৰুত্তং হোতি. পুত্তিমাতি পুত্তৰা পুগ্গলো. ইতীতি এৰমাহ. মারোতি ৰসৰত্তিভূমিযং অঞ্ঞতরো দামরিকদেৰপুত্তো. সো হি সট্ঠানাতিক্কমিতুকামং জনং ¶ যং সক্কোতি, তং মারেতি. যং ন সক্কোতি, তস্সপি মরণং ইচ্ছতি. তেন ‘‘মারো’’তি ৰুচ্চতি. পাপিমাতি লামকপুগ্গলো, পাপসমাচারো ৰা. সঙ্গীতিকারানমেতং ৰচনং, সব্বগাথাসু চ ঈদিসানি. যথা চ পুত্তেহি পুত্তিমা, গোপিযো গোহি তথেৰ নন্দতি. যস্স গাৰো অত্থি, সোপি গোপিযো, গোহি সহ, গোহি ৰা করণভূতেহি তথেৰ নন্দতীতি অত্থো.

এৰং ৰত্ৰা ইদানি তস্সত্থস্স সাধককারণং নিদ্দিসতি, ‘‘উপধী হি নরস্স নন্দনা’’তি. তত্থ উপধীতি চত্তারো উপধযো – কামূপধি, খন্ধূপধি, কিলেসূপধি, অভিসঙ্খারূপধীতি. কামা হি ‘‘যং পঞ্চকামগুণে পটিচ্চ উপ্পজ্জতি সুখং সোমনস্সং, অযং কামানং অস্সাদো’’তি (ম. নি. ১.১৬৬) এৰং ৰুত্তস্স সুখস্স অধিট্ঠানভাৰতো উপধীযতি ¶ এত্থ সুখন্তি ইমিনা ৰচনত্থেন উপধীতি ৰুচ্চন্তি. খন্ধাপি খন্ধমূলকদুক্খস্স অধিট্ঠানভাৰতো, কিলেসাপি অপাযদুক্খস্স অধিট্ঠানভাৰতো, অভিসঙ্খারাপি ভৰদুক্খস্স ¶ অধিট্ঠানভাৰতোতি. ইধ পন কামূপধি অধিপ্পেতো. সো সত্তসঙ্খারৰসেন দুৰিধো. তত্থ সত্তপটিবদ্ধো পধানো, তং দস্সেন্তো ‘‘পুত্তেহি গোহী’’তি ৰত্ৰা কারণমাহ – ‘‘উপধী হি নরস্স নন্দনা’’তি. তস্সত্থো – যস্মা ইমে কামূপধী নরস্স নন্দনা, নন্দযন্তি নরং পীতিসোমনস্সং উপসংহরন্তা, তস্মা ৰেদিতব্বমেতং ‘‘নন্দতি পুত্তেহি পুত্তিমা, গোপিযো গোহি তথেৰ নন্দতি, ত্ৰঞ্চ পুত্তিমা গোপিযো চ, তস্মা এতেহি, নন্দ, মা পব্বজ্জং পাটিকঙ্খি. পব্বজিতস্স হি এতে উপধযো ন সন্তি, এৰং সন্তে ত্ৰং দুক্খস্সন্তং পত্থেন্তোপি দুক্খিতোৰ ভৰিস্সসী’’তি.

ইদানি তস্সপি অত্থস্স সাধককারণং নিদ্দিসতি ‘‘ন হি সো নন্দতি, যো নিরূপধী’’তি. তস্সত্থো – যস্মা যস্সেতে উপধযো নত্থি, সো পিযেহি ঞাতীহি ৰিপ্পযুত্তো নিব্ভোগূপকরণো ন নন্দতি, তস্মা ত্ৰং ইমে উপধযো ৰজ্জেত্ৰা পব্বজিতো দুক্খিতোৰ ভৰিস্সসীতি.

৩৪. অথ ভগৰা ‘‘মারো অযং পাপিমা ইমেসং অন্তরাযায আগতো’’তি ৰিদিত্ৰা ফলেন ফলং পাতেন্তো ৰিয তাযেৰ মারেনাভতায উপমায মারৰাদং ভিন্দন্তো তমেৰ গাথং পরিৰত্তেত্ৰা ‘‘উপধি ¶ সোকৰত্থূ’’তি দস্সেন্তো আহ ‘‘সোচতি পুত্তেহি পুত্তিমা’’তি. তত্থ সব্বং পদত্থতো উত্তানমেৰ. অযং পন অধিপ্পাযো – মা, পাপিম, এৰং অৰচ ‘‘নন্দতি পুত্তেহি পুত্তিমা’’তি. সব্বেহেৰ হি পিযেহি, মনাপেহি নানাভাৰো ৰিনাভাৰো, অনতিক্কমনীযো অযং ৰিধি, তেসঞ্চ পিযমনাপানং পুত্তদারানং গৰাস্সৰল়ৰহিরঞ্ঞসুৰণ্ণাদীনং ৰিনাভাৰেন অধিমত্তসোকসল্লসমপ্পিতহদযা সত্তা উম্মত্তকাপি হোন্তি খিত্তচিত্তা, মরণম্পি নিগচ্ছন্তি মরণমত্তম্পি দুক্খং. তস্মা এৰং গণ্হ – সোচতি পুত্তেহি পুত্তিমা. যথা চ পুত্তেহি পুত্তিমা, গোপিযো গোহি তথেৰ সোচতীতি. কিং কারণা? উপধী হি নরস্স সোচনা. যস্মা চ উপধী হি নরস্স সোচনা, তস্মা এৰ ‘‘ন হি সো সোচতি, যো নিরূপধি’’. যো উপধীসু সঙ্গপ্পহানেন নিরুপধি হোতি, সো সন্তুট্ঠো হোতি কাযপরিহারিকেন চীৰরেন, কুচ্ছিপরিহারিকেন পিণ্ডপাতেন, যেন যেনেৰ পক্কমতি, সমাদাযেৰ পক্কমতি. সেয্যথাপি নাম পক্খী সকুণো ¶ …পে… নাপরং ইত্থত্তাযাতি পজানাতি. এৰং সব্বসোকসমুগ্ঘাতা ‘‘ন হি সো সোচতি, যো নিরুপধী’’তি. ইতি ভগৰা অরহত্তনিকূটেন দেসনং ৰোসাপেসি. অথ ৰা যো নিরুপধি, যো নিক্কিলেসো, সো ন সোচতি. যাৰদেৰ হি কিলেসা সন্তি, তাৰদেৰ সব্বে ¶ উপধযো সোকপ্ফলাৰ হোন্তি. কিলেসপ্পহানা পন নত্থি সোকোতি. এৰম্পি অরহত্তনিকূটেনেৰ দেসনং ৰোসাপেসি. দেসনাপরিযোসানে ধনিযো চ গোপী চ উভোপি পব্বজিংসু. ভগৰা আকাসেনেৰ জেতৰনং অগমাসি. তে পব্বজিত্ৰা অরহত্তং সচ্ছিকরিংসু. ৰসনট্ঠানে চ নেসং গোপালকা ৰিহারং কারেসুং. সো অজ্জাপি গোপালকৰিহারোত্ৰেৰ পঞ্ঞাযতীতি.

পরমত্থজোতিকায খুদ্দক-অট্ঠকথায

সুত্তনিপাত-অট্ঠকথায ধনিযসুত্তৰণ্ণনা নিট্ঠিতা.

৩. খগ্গৰিসাণসুত্তৰণ্ণনা

সব্বেসু ¶ ¶ ভূতেসূতি খগ্গৰিসাণসুত্তং. কা উপ্পত্তি? সব্বসুত্তানং চতুব্বিধা উপ্পত্তি – অত্তজ্ঝাসযতো, পরজ্ঝাসযতো, অট্ঠুপ্পত্তিতো, পুচ্ছাৰসিতো চাতি. দ্ৰযতানুপস্সনাদীনঞ্হি অত্তজ্ঝাসযতো উপ্পত্তি, মেত্তসুত্তাদীনং পরজ্ঝাসযতো, উরগসুত্তাদীনং অট্ঠুপ্পত্তিতো, ধম্মিকসুত্তাদীনং পুচ্ছাৰসিতো. তত্থ খগ্গৰিসাণসুত্তস্স অৰিসেসেন পুচ্ছাৰসিতো উপ্পত্তি. ৰিসেসেন পন যস্মা এত্থ কাচি গাথা তেন তেন পচ্চেকসম্বুদ্ধেন পুট্ঠেন ৰুত্তা, কাচি অপুট্ঠেন অত্তনা অধিগতমগ্গনযানুরূপং উদানংযেৰ উদানেন্তেন, তস্মা কাযচি গাথায পুচ্ছাৰসিতো, কাযচি অত্তজ্ঝাসযতো উপ্পত্তি.

তত্থ ¶ যা অযং অৰিসেসেন পুচ্ছাৰসিতো উপ্পত্তি, সা আদিতো পভুতি এৰং ৰেদিতব্বা – একং সমযং ভগৰা সাৰত্থিযং ৰিহরতি. অথ খো আযস্মতো আনন্দস্স রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘‘বুদ্ধানং পত্থনা চ অভিনীহারো চ দিস্সতি; তথা সাৰকানং, পচ্চেকবুদ্ধানং ন দিস্সতি; যংনূনাহং ভগৰন্তং উপসঙ্কমিত্ৰা পুচ্ছেয্য’’ন্তি. সো পটিসল্লানা ৰুট্ঠিতো ভগৰন্তং উপসঙ্কমিত্ৰা যথাক্কমেন এতমত্থং পুচ্ছি. অথস্স ভগৰা পুব্বযোগাৰচরসুত্তং অভাসি –

‘‘পঞ্চিমে, আনন্দ, আনিসংসা পুব্বযোগাৰচরে দিট্ঠেৰ ধম্মে পটিকচ্চেৰ অঞ্ঞং আরাধেতি. নো চে দিট্ঠেৰ ধম্মে পটিকচ্চেৰ অঞ্ঞং আরাধেতি, অথ মরণকালে অঞ্ঞং আরাধেতি. নো চে মরণকালে অঞ্ঞং আরাধেতি, অথ দেৰপুত্তো সমানো অঞ্ঞং আরাধেতি, অথ বুদ্ধানং সম্মুখীভাৰে খিপ্পাভিঞ্ঞো হোতি, অথ পচ্ছিমে কালে পচ্চেকসম্বুদ্ধো হোতী’’তি –

এৰং ৰত্ৰা পুন আহ –

‘‘পচ্চেকবুদ্ধা নাম, আনন্দ, অভিনীহারসম্পন্না পুব্বযোগাৰচরা হোন্তি. তস্মা বুদ্ধপচ্চেকবুদ্ধসাৰকানং সব্বেসং পত্থনা চ অভিনীহারো চ ইচ্ছিতব্বো’’তি.

সো ¶ ¶ আহ – ‘‘বুদ্ধানং, ভন্তে, পত্থনা কীৰ চিরং ৰট্টতী’’তি? বুদ্ধানং, আনন্দ, হেট্ঠিমপরিচ্ছেদেন চত্তারি অসঙ্খ্যেয্যানি কপ্পসতসহস্সঞ্চ, মজ্ঝিমপরিচ্ছেদেন অট্ঠ অসঙ্খ্যেয্যানি কপ্পসতসহস্সঞ্চ, উপরিমপরিচ্ছেদেন সোল়স অসঙ্খ্যেয্যানি কপ্পসতসহস্সঞ্চ. এতে চ ভেদা পঞ্ঞাধিকসদ্ধাধিকৰীরিযাধিকৰসেন ঞাতব্বা. পঞ্ঞাধিকানঞ্হি সদ্ধা মন্দা হোতি, পঞ্ঞা তিক্খা. সদ্ধাধিকানং পঞ্ঞা মজ্ঝিমা হোতি, সদ্ধা বলৰা. ৰীরিযাধিকানং সদ্ধাপঞ্ঞা মন্দা, ৰীরিযং বলৰন্তি. অপ্পত্ৰা পন চত্তারি অসঙ্খ্যেয্যানি কপ্পসতসহস্সঞ্চ দিৰসে দিৰসে ৰেস্সন্তরদানসদিসং ¶ দানং দেন্তোপি তদনুরূপসীলাদিসব্বপারমিধম্মে আচিনন্তোপি অন্তরা বুদ্ধো ভৰিস্সতীতি নেতং ঠানং ৰিজ্জতি. কস্মা? ঞাণং গব্ভং ন গণ্হাতি, ৰেপুল্লং নাপজ্জতি, পরিপাকং ন গচ্ছতীতি. যথা নাম তিমাসচতুমাসপঞ্চমাসচ্চযেন নিপ্ফজ্জনকং সস্সং তং তং কালং অপ্পত্ৰা দিৰসে দিৰসে সহস্সক্খত্তুং কেল়াযন্তোপি উদকেন সিঞ্চন্তোপি অন্তরা পক্খেন ৰা মাসেন ৰা নিপ্ফাদেস্সতীতি নেতং ঠানং ৰিজ্জতি. কস্মা? সস্সং গব্ভং ন গণ্হাতি, ৰেপুল্লং নাপজ্জতি, পরিপাকং ন গচ্ছতীতি. এৰমেৰং অপ্পত্ৰা চত্তারি অসঙ্খ্যেয্যানি…পে… নেতং ঠানং ৰিজ্জতীতি. তস্মা যথাৰুত্তমেৰ কালং পারমিপূরণং কাতব্বং ঞাণপরিপাকত্থায. এত্তকেনপি চ কালেন বুদ্ধত্তং পত্থযতো অভিনীহারকরণে অট্ঠ সম্পত্তিযো ইচ্ছিতব্বা. অযঞ্হি –

‘‘মনুস্সত্তং লিঙ্গসম্পত্তি, হেতু সত্থারদস্সনং;

পব্বজ্জা গুণসম্পত্তি, অধিকারো চ ছন্দতা;

অট্ঠধম্মসমোধানা, অভিনীহারো সমিজ্ঝতী’’তি. (বু. ৰং. ২.৫৯);

অভিনীহারোতি চ মূলপণিধানস্সেতং অধিৰচনং. তত্থ মনুস্সত্তন্তি মনুস্সজাতি. অঞ্ঞত্র হি মনুস্সজাতিযা অৰসেসজাতীসু দেৰজাতিযম্পি ঠিতস্স পণিধি ন ইজ্ঝতি. এত্থ ঠিতেন পন বুদ্ধত্তং পত্থেন্তেন দানাদীনি পুঞ্ঞকম্মানি কত্ৰা মনুস্সত্তংযেৰ পত্থেতব্বং. তত্থ ঠত্ৰা পণিধি কাতব্বো. এৰঞ্হি সমিজ্ঝতি. লিঙ্গসম্পত্তীতি পুরিসভাৰো. মাতুগামনপুংসকউভতোব্যঞ্জনকানঞ্হি মনুস্সজাতিযং ঠিতানম্পি পণিধি ন সমিজ্ঝতি. তত্থ ঠিতেন পন বুদ্ধত্তং পত্থেন্তেন দানাদীনি পুঞ্ঞকম্মানি কত্ৰা পুরিসভাৰোযেৰ পত্থেতব্বো. তত্থ ঠত্ৰা পণিধি কাতব্বো. এৰঞ্হি ¶ সমিজ্ঝতি. হেতূতি অরহত্তস্স উপনিস্সযসম্পত্তি. যো হি তস্মিং অত্তভাৰে ৰাযমন্তো ¶ অরহত্তং পাপুণিতুং সমত্থো, তস্স সমিজ্ঝতি, নো ইতরস্স, যথা সুমেধপণ্ডিতস্স. সো হি দীপঙ্করপাদমূলে পব্বজিত্ৰা তেনত্তভাৰেন অরহত্তং পাপুণিতুং সমত্থো অহোসি ¶ . সত্থারদস্সনন্তি বুদ্ধানং সম্মুখাদস্সনং. এৰঞ্হি ইজ্ঝতি, নো অঞ্ঞথা; যথা সুমেধপণ্ডিতস্স. সো হি দীপঙ্করং সম্মুখা দিস্ৰা পণিধেসি. পব্বজ্জাতি অনগারিযভাৰো. সো চ খো সাসনে ৰা কম্মৰাদিকিরিযৰাদিতাপসপরিব্বাজকনিকাযে ৰা ৰট্টতি যথা সুমেধপণ্ডিতস্স. সো হি সুমেধো নাম তাপসো হুত্ৰা পণিধেসি. গুণসম্পত্তীতি ঝানাদিগুণপটিলাভো. পব্বজিতস্সাপি হি গুণসম্পন্নস্সেৰ ইজ্ঝতি, নো ইতরস্স; যথা সুমেধপণ্ডিতস্স. সো হি পঞ্চাভিঞ্ঞো অট্ঠসমাপত্তিলাভী চ হুত্ৰা পণিধেসি. অধিকারোতি অধিককারো, পরিচ্চাগোতি অত্থো. জীৰিতাদিপরিচ্চাগঞ্হি কত্ৰা পণিদহতোযেৰ ইজ্ঝতি, নো ইতরস্স; যথা সুমেধপণ্ডিতস্স. সো হি –

‘‘অক্কমিত্ৰান মং বুদ্ধো, সহ সিস্সেহি গচ্ছতু;

মা নং কললে অক্কমিত্থ, হিতায মে ভৰিস্সতী’’তি. (বু. ৰং. ২.৫৩) –

এৰং জীৰিতপরিচ্চাগং কত্ৰা পণিধেসি. ছন্দতাতি কত্তুকম্যতা. সা যস্স বলৰতী হোতি, তস্স ইজ্ঝতি. সা চ, সচে কোচি ৰদেয্য ‘‘কো চত্তারি অসঙ্খ্যেয্যানি সতসহস্সঞ্চ কপ্পে নিরযে পচ্চিত্ৰা বুদ্ধত্তং ইচ্ছতী’’তি, তং সুত্ৰা যো ‘‘অহ’’ন্তি ৰত্তুং উস্সহতি, তস্স বলৰতীতি ৰেদিতব্বা. তথা যদি কোচি ৰদেয্য ‘‘কো সকলচক্কৰাল়ং ৰীতচ্চিকানং অঙ্গারানং পূরং অক্কমন্তো অতিক্কমিত্ৰা বুদ্ধত্তং ইচ্ছতি, কো সকলচক্কৰাল়ং সত্তিসূলেহি আকিণ্ণং অক্কমন্তো অতিক্কমিত্ৰা বুদ্ধত্তং ইচ্ছতি, কো সকলচক্কৰাল়ং সমতিত্তিকং উদকপুণ্ণং উত্তরিত্ৰা বুদ্ধত্তং ইচ্ছতি, কো সকলচক্কৰাল়ং নিরন্তরং ৰেল়ুগুম্বসঞ্ছন্নং মদ্দন্তো অতিক্কমিত্ৰা বুদ্ধত্তং ইচ্ছতী’’তি তং সুত্ৰা যো ‘‘অহ’’ন্তি ৰত্তুং উস্সহতি, তস্স বলৰতীতি ৰেদিতব্বা. এৰরূপেন চ কত্তুকম্যতাছন্দেন সমন্নাগতো সুমেধপণ্ডিতো পণিধেসীতি.

এৰং ¶ সমিদ্ধাভিনীহারো ¶ চ বোধিসত্তো ইমানি অট্ঠারস অভব্বট্ঠানানি ন উপেতি. সো হি ততো পভুতি ন জচ্চন্ধো হোতি, ন জচ্চবধিরো, ন উম্মত্তকো, ন এল়মূগো, ন পীঠসপ্পী, ন মিলক্খূসু উপ্পজ্জতি, ন দাসিকুচ্ছিযা নিব্বত্ততি, ন নিযতমিচ্ছাদিট্ঠিকো হোতি, নাস্স লিঙ্গং পরিৰত্ততি, ন পঞ্চানন্তরিযকম্মানি করোতি, ন কুট্ঠী হোতি, ন তিরচ্ছানযোনিযং ৰট্টকতো পচ্ছিমত্তভাৰো হোতি, ন খুপ্পিপাসিকনিজ্ঝামতণ্হিকপেতেসু উপ্পজ্জতি, ন কালকঞ্চিকাসুরেসু, ন অৰীচিনিরযে, ন লোকন্তরিকেসু, কামাৰচরেসু ন মারো ¶ হোতি, রূপাৰচরেসু ন অসঞ্ঞীভৰে, ন সুদ্ধাৰাসভৰেসু উপ্পজ্জতি, ন অরূপভৰেসু, ন অঞ্ঞং চক্কৰাল়ং সঙ্কমতি.

যা চিমা উস্সাহো উম্মঙ্গো অৰত্থানং হিতচরিযা চাতি চতস্সো বুদ্ধভূমিযো, তাহি সমন্নাগতো হোতি. তত্থ –

‘‘উস্সাহো ৰীরিযং ৰুত্তং, উম্মঙ্গো পঞ্ঞা পৰুচ্চতি;

অৰত্থানং অধিট্ঠানং, হিতচরিযা মেত্তাভাৰনা’’তি. –

ৰেদিতব্বা. যে চাপি ইমে নেক্খম্মজ্ঝাসযো, পৰিৰেকজ্ঝাসযো, অলোভজ্ঝাসযো, অদোসজ্ঝাসযো, অমোহজ্ঝাসযো, নিস্সরণজ্ঝাসযোতি ছ অজ্ঝাসযা বোধিপরিপাকায সংৰত্তন্তি, যেহি সমন্নাগতত্তা নেক্খম্মজ্ঝাসযা চ বোধিসত্তা কামে দোসদস্সাৰিনো, পৰিৰেকজ্ঝাসযা চ বোধিসত্তা সঙ্গণিকায দোসদস্সাৰিনো, অলোভজ্ঝাসযা চ বোধিসত্তা লোভে দোসদস্সাৰিনো, অদোসজ্ঝাসযা চ বোধিসত্তা দোসে দোসদস্সাৰিনো, অমোহজ্ঝাসযা চ বোধিসত্তা মোহে দোসদস্সাৰিনো, নিস্সরণজ্ঝাসযা চ বোধিসত্তা সব্বভৰেসু দোসদস্সাৰিনোতি ৰুচ্চন্তি, তেহি চ সমন্নাগতো হোতি.

পচ্চেকবুদ্ধানং পন কীৰ চিরং পত্থনা ৰট্টতীতি? পচ্চেকবুদ্ধানং দ্ৰে অসঙ্খ্যেয্যানি কপ্পসতসহস্সঞ্চ. ততো ওরং ন সক্কা. পুব্বে ৰুত্তনযেনেৰেত্থ কারণং ৰেদিতব্বং. এত্তকেনাপি ¶ চ কালেন পচ্চেকবুদ্ধত্তং পত্থযতো অভিনীহারকরণে পঞ্চ সম্পত্তিযো ইচ্ছিতব্বা. তেসঞ্হি –

মনুস্সত্তং ¶ লিঙ্গসম্পত্তি, ৰিগতাসৰদস্সনং;

অধিকারো ছন্দতা এতে, অভিনীহারকারণা.

তত্থ ৰিগতাসৰদস্সনন্তি বুদ্ধপচ্চেকবুদ্ধসাৰকানং যস্স কস্সচি দস্সনন্তি অত্থো. সেসং ৰুত্তনযমেৰ.

অথ সাৰকানং পত্থনা কিত্তকং ৰট্টতীতি? দ্ৰিন্নং অগ্গসাৰকানং একং অসঙ্খ্যেয্যং কপ্পসতসহস্সঞ্চ, অসীতিমহাসাৰকানং কপ্পসতসহস্সং, তথা বুদ্ধস্স মাতাপিতূনং উপট্ঠাকস্স ¶ পুত্তস্স চাতি. ততো ওরং ন সক্কা. ৰুত্তনযমেৰেত্থ কারণং. ইমেসং পন সব্বেসম্পি অধিকারো ছন্দতাতি দ্ৰঙ্গসম্পন্নোযেৰ অভিনীহারো হোতি.

এৰং ইমায পত্থনায ইমিনা চ অভিনীহারেন যথাৰুত্তপ্পভেদং কালং পারমিযো পূরেত্ৰা বুদ্ধা লোকে উপ্পজ্জন্তা খত্তিযকুলে ৰা ব্রাহ্মণকুলে ৰা উপ্পজ্জন্তি, পচ্চেকবুদ্ধা খত্তিযব্রাহ্মণগহপতিকুলানং অঞ্ঞতরস্মিং, অগ্গসাৰকা পন খত্তিযব্রাহ্মণকুলেস্ৰেৰ বুদ্ধা ইৰ সব্ববুদ্ধা সংৰট্টমানে কপ্পে ন উপ্পজ্জন্তি, ৰিৰট্টমানে কপ্পে উপ্পজ্জন্তি. পচ্চেকবুদ্ধা বুদ্ধে অপ্পত্ৰা বুদ্ধানং উপ্পজ্জনকালেযেৰ উপ্পজ্জন্তি. বুদ্ধা সযঞ্চ বুজ্ঝন্তি, পরে চ বোধেন্তি. পচ্চেকবুদ্ধা সযমেৰ বুজ্ঝন্তি, ন পরে বোধেন্তি. অত্থরসমেৰ পটিৰিজ্ঝন্তি, ন ধম্মরসং. ন হি তে লোকুত্তরধম্মং পঞ্ঞত্তিং আরোপেত্ৰা দেসেতুং সক্কোন্তি, মূগেন দিট্ঠসুপিনো ৰিয ৰনচরকেন নগরে সাযিতব্যঞ্জনরসো ৰিয চ নেসং ধম্মাভিসমযো হোতি. সব্বং ইদ্ধিসমাপত্তিপটিসম্ভিদাপভেদং পাপুণন্তি, গুণৰিসিট্ঠতায বুদ্ধানং হেট্ঠা সাৰকানং উপরি হোন্তি, অঞ্ঞে পব্বাজেত্ৰা আভিসমাচারিকং সিক্খাপেন্তি, ‘‘চিত্তসল্লেখো কাতব্বো, ৰোসানং নাপজ্জিতব্ব’’ন্তি ইমিনা উদ্দেসেন উপোসথং করোন্তি, ‘অজ্জুপোসথো’তি ¶ ৰচনমত্তেন ৰা. উপোসথং করোন্তা চ গন্ধমাদনে মঞ্জূসকরুক্খমূলে রতনমাল়ে সন্নিপতিত্ৰা করোন্তীতি. এৰং ভগৰা আযস্মতো আনন্দস্স পচ্চেকবুদ্ধানং সব্বাকারপরিপূরং পত্থনঞ্চ অভিনীহারঞ্চ কথেত্ৰা, ইদানি ইমায পত্থনায ইমিনা চ অভিনীহারেন সমুদাগতে তে তে পচ্চেকবুদ্ধে কথেতুং ‘‘সব্বেসু ভূতেসু নিধায দণ্ড’’ন্তিআদিনা ¶ নযেন ইমং খগ্গৰিসাণসুত্তং অভাসি. অযং তাৰ অৰিসেসেন পুচ্ছাৰসিতো খগ্গৰিসাণসুত্তস্স উপ্পত্তি.

৩৫. ইদানি ৰিসেসেন ৰত্তব্বা. তত্থ ইমিস্সা তাৰ গাথায এৰং উপ্পত্তি ৰেদিতব্বা – অযং কির পচ্চেকবুদ্ধো পচ্চেকবোধিসত্তভূমিং ওগাহন্তো দ্ৰে অসঙ্খ্যেয্যানি কপ্পসতসহস্সঞ্চ পারমিযো পূরেত্ৰা কস্সপস্স ভগৰতো সাসনে পব্বজিত্ৰা আরঞ্ঞিকো হুত্ৰা গতপচ্চাগতৰত্তং পূরেন্তো সমণধম্মং অকাসি. এতং কির ৰত্তং অপরিপূরেত্ৰা পচ্চেকবোধিং পাপুণন্তা নাম নত্থি. কিং পনেতং গতপচ্চাগতৰত্তং নাম? হরণপচ্চাহরণন্তি. তং যথা ৰিভূতং হোতি, তথা কথেস্সাম.

ইধেকচ্চো ভিক্খু হরতি, ন পচ্চাহরতি; একচ্চো পচ্চাহরতি, ন হরতি; একচ্চো পন নেৰ হরতি, ন পচ্চাহরতি; একচ্চো হরতি চ পচ্চাহরতি চ. তত্থ যো ভিক্খু পগেৰ ৰুট্ঠায চেতিযঙ্গণবোধিযঙ্গণৰত্তং কত্ৰা, বোধিরুক্খে উদকং আসিঞ্চিত্ৰা, পানীযঘটং পূরেত্ৰা ¶ পানীযমাল়ে ঠপেত্ৰা, আচরিযৰত্তং উপজ্ঝাযৰত্তং কত্ৰা, দ্ৰেঅসীতি খুদ্দকৰত্তানি চুদ্দস মহাৰত্তানি চ সমাদায ৰত্ততি, সো সরীরপরিকম্মং কত্ৰা, সেনাসনং পৰিসিত্ৰা, যাৰ ভিক্খাচারৰেলা তাৰ ৰিৰিত্তাসনে ৰীতিনামেত্ৰা, ৰেলং ঞত্ৰা, নিৰাসেত্ৰা, কাযবন্ধনং বন্ধিত্ৰা, উত্তরাসঙ্গং করিত্ৰা, সঙ্ঘাটিং খন্ধে করিত্ৰা, পত্তং অংসে আলগ্গেত্ৰা, কম্মট্ঠানং মনসি ¶ করোন্তো চেতিযঙ্গণং পত্ৰা, চেতিযঞ্চ বোধিঞ্চ ৰন্দিত্ৰা, গামসমীপে চীৰরং পারুপিত্ৰা, পত্তমাদায গামং পিণ্ডায পৰিসতি, এৰং পৰিট্ঠো চ লাভী ভিক্খু পুঞ্ঞৰা উপাসকেহি সক্কতগরুকতো উপট্ঠাককুলে ৰা পটিক্কমনসালাযং ৰা পটিক্কমিত্ৰা উপাসকেহি তং তং পঞ্হং পুচ্ছিযমানো তেসং পঞ্হৰিস্সজ্জনেন ধম্মদেসনাৰিক্খেপেন চ তং মনসিকারং ছড্ডেত্ৰা নিক্খমতি, ৰিহারং আগতোপি ভিক্খূনং পঞ্হং পুট্ঠো কথেতি, ধম্মং ভণতি, তং তং ব্যাপারমাপজ্জতি, পচ্ছাভত্তম্পি পুরিমযামম্পি মজ্ঝিমযামম্পি এৰং ভিক্খূহি সদ্ধিং পপঞ্চিত্ৰা কাযদুট্ঠুল্লাভিভূতো পচ্ছিমযামেপি সযতি, নেৰ কম্মট্ঠানং মনসি করোতি, অযং ৰুচ্চতি হরতি, ন পচ্চাহরতীতি.

যো ¶ পন ব্যাধিবহুলো হোতি, ভুত্তাহারো পচ্চূসসমযে ন সম্মা পরিণমতি, পগেৰ ৰুট্ঠায যথাৰুত্তং ৰত্তং কাতুং ন সক্কোতি কম্মট্ঠানং ৰা মনসি কাতুং, অঞ্ঞদত্থু যাগুং ৰা ভেসজ্জং ৰা পত্থযমানো কালস্সেৰ পত্তচীৰরমাদায গামং পৰিসতি. তত্থ যাগুং ৰা ভেসজ্জং ৰা ভত্তং ৰা লদ্ধা ভত্তকিচ্চং নিট্ঠাপেত্ৰা, পঞ্ঞত্তাসনে নিসিন্নো কম্মট্ঠানং মনসি কত্ৰা, ৰিসেসং পত্ৰা ৰা অপ্পত্ৰা ৰা, ৰিহারং আগন্ত্ৰা, তেনেৰ মনসিকারেন ৰিহরতি. অযং ৰুচ্চতি পচ্চাহরতি ন হরতীতি. এদিসা চ ভিক্খূ যাগুং পিৰিত্ৰা, ৰিপস্সনং আরভিত্ৰা, বুদ্ধসাসনে অরহত্তং পত্তা গণনপথং ৰীতিৰত্তা. সীহল়দীপেযেৰ তেসু তেসু গামেসু আসনসালায ন তং আসনং অত্থি, যত্থ যাগুং পিৰিত্ৰা অরহত্তং পত্তো ভিক্খু নত্থীতি.

যো পন পমাদৰিহারী হোতি নিক্খিত্তধুরো, সব্বৰত্তানি ভিন্দিত্ৰা পঞ্চৰিধচেতোখিলৰিনিবন্ধনবদ্ধচিত্তো ৰিহরন্তো কম্মট্ঠানমনসিকারমননুযুত্তো গামং পিণ্ডায পৰিসিত্ৰা গিহিপপঞ্চেন পপঞ্চিতো তুচ্ছকো নিক্খমতি, অযং ৰুচ্চতি নেৰ হরতি ন পচ্চাহরতীতি.

যো পন পগেৰ ¶ ৰুট্ঠায পুরিমনযেনেৰ সব্বৰত্তানি পরিপূরেত্ৰা যাৰ ভিক্খাচারৰেলা, তাৰ পল্লঙ্কং আভুজিত্ৰা কম্মট্ঠানং মনসি করোতি. কম্মট্ঠানং নাম দুৰিধং – সব্বত্থকং, পারিহারিযঞ্চ. সব্বত্থকং নাম মেত্তা চ মরণস্সতি চ. তং সব্বত্থ ইচ্ছিতব্বতো ‘‘সব্বত্থক’’ন্তি ৰুচ্চতি. মেত্তা নাম আৰাসাদীসু সব্বত্থ ইচ্ছিতব্বা. আৰাসেসু হি মেত্তাৰিহারী ¶ ভিক্খু সব্রহ্মচারীনং পিযো হোতি, তেন ফাসু অসঙ্ঘট্ঠো ৰিহরতি. দেৰতাসু মেত্তাৰিহারী দেৰতাহি রক্খিতগোপিতো সুখং ৰিহরতি. রাজরাজমহামত্তাদীসু মেত্তাৰিহারী, তেহি মমাযিতো সুখং ৰিহরতি. গামনিগমাদীসু মেত্তাৰিহারী সব্বত্থ ভিক্খাচরিযাদীসু মনুস্সেহি সক্কতগরুকতো সুখং ৰিহরতি. মরণস্সতিভাৰনায জীৰিতনিকন্তিং পহায অপ্পমত্তো ৰিহরতি.

যং পন সদা পরিহরিতব্বং চরিতানুকূলেন গহিতত্তা দসাসুভকসিণানুস্সতীসু অঞ্ঞতরং, চতুধাতুৰৰত্থানমেৰ ৰা, তং সদা পরিহরিতব্বতো, রক্খিতব্বতো, ভাৰেতব্বতো চ পারিহারিযন্তি ৰুচ্চতি, মূলকম্মট্ঠানন্তিপি ¶ তদেৰ. তত্থ যং পঠমং সব্বত্থককম্মট্ঠানং মনসি করিত্ৰা পচ্ছা পারিহারিযকম্মট্ঠানং মনসি করোতি, তং চতুধাতুৰৰত্থানমুখেন দস্সেস্সাম.

অযঞ্হি যথাঠিতং যথাপণিহিতং কাযং ধাতুসো পচ্চৰেক্খতি – যং ইমস্মিং সরীরে ৰীসতিকোট্ঠাসেসু কক্খল়ং খরগতং, সা পথৰীধাতু. যং দ্ৰাদসসু আবন্ধনকিচ্চকরং স্নেহগতং, সা আপোধাতু. যং চতূসু পরিপাচনকরং উসুমগতং, সা তেজোধাতু. যং পন ছসু ৰিত্থম্ভনকরং ৰাযোগতং, সা ৰাযোধাতু. যং পনেত্থ চতূহি মহাভূতেহি অসম্ফুট্ঠং ছিদ্দং ৰিৰরং, সা আকাসধাতু. তংৰিজাননকং চিত্তং ৰিঞ্ঞাণধাতু. ততো উত্তরি অঞ্ঞো সত্তো ৰা পুগ্গলো ৰা নত্থি. কেৰলং সুদ্ধসঙ্খারপুঞ্জোৰ ¶ অযন্তি.

এৰং আদিমজ্ঝপরিযোসানতো কম্মট্ঠানং মনসি করিত্ৰা, কালং ঞত্ৰা, উট্ঠাযাসনা নিৰাসেত্ৰা, পুব্বে ৰুত্তনযেনেৰ গামং পিণ্ডায গচ্ছতি. গচ্ছন্তো চ যথা অন্ধপুথুজ্জনা অভিক্কমাদীসু ‘‘অত্তা অভিক্কমতি, অত্তনা অভিক্কমো নিব্বত্তিতো’’তি ৰা, ‘‘অহং অভিক্কমামি, মযা অভিক্কমো নিব্বত্তিতো’’তি ৰা সম্মুয্হন্তি, তথা অসম্মুয্হন্তো ‘‘অভিক্কমামীতি চিত্তে উপ্পজ্জমানে তেনেৰ চিত্তেন সদ্ধিং চিত্তসমুট্ঠানা সন্ধারণৰাযোধাতু উপ্পজ্জতি. সা ইমং পথৰীধাত্ৰাদিসন্নিৰেসভূতং কাযসম্মতং অট্ঠিকসঙ্ঘাটং ৰিপ্ফরতি, ততো চিত্তকিরিযাৰাযোধাতুৰিপ্ফারৰসেন অযং কাযসম্মতো অট্ঠিকসঙ্ঘাটো অভিক্কমতি. তস্সেৰং অভিক্কমতো একেকপাদুদ্ধারণে চতূসু ধাতূসু ৰাযোধাতুঅনুগতা তেজোধাতু অধিকা উপ্পজ্জতি, মন্দা ইতরা. অতিহরণৰীতিহরণাপহরণেসু পন তেজোধাতুঅনুগতা ৰাযোধাতু অধিকা উপ্পজ্জতি, মন্দা ইতরা. ওরোহণে পন পথৰীধাতুঅনুগতা আপোধাতু অধিকা উপ্পজ্জতি, মন্দা ইতরা. সন্নিক্খেপনসমুপ্পীল়নেসু আপোধাতুঅনুগতা পথৰীধাতু অধিকা উপ্পজ্জতি, মন্দা ইতরা. ইচ্চেতা ধাতুযো তেন তেন অত্তনো উপ্পাদকচিত্তেন সদ্ধিং তত্থ তত্থেৰ ভিজ্জন্তি ¶ . তত্থ কো একো অভিক্কমতি, কস্স ৰা একস্স অভিক্কমন’’ন্তি এৰং একেকপাদুদ্ধারণাদিপ্পকারেসু একেকস্মিং পকারে উপ্পন্নধাতুযো, তদৰিনিব্ভুত্তা চ সেসা রূপধম্মা, তংসমুট্ঠাপকং চিত্তং, তংসম্পযুত্তা চ ¶ সেসা অরূপধম্মাতি এতে রূপারূপধম্মা. ততো পরং অতিহরণৰীতিহরণাদীসু অঞ্ঞং পকারং ন সম্পাপুণন্তি, তত্থ তত্থেৰ ভিজ্জন্তি. তস্মা অনিচ্চা. যঞ্চ অনিচ্চং, তং দুক্খং. যং দুক্খং, তদনত্তাতি এৰং সব্বাকারপরিপূরং কম্মট্ঠানং মনসিকরোন্তোৰ গচ্ছতি. অত্থকামা হি কুলপুত্তা সাসনে পব্বজিত্ৰা দসপি ৰীসম্পি তিংসম্পি চত্তালীসম্পি পঞ্ঞাসম্পি সট্ঠিপি সত্ততিপি সতম্পি একতো ৰসন্তা কতিকৰত্তং কত্ৰা ৰিহরন্তি – ‘‘আৰুসো, তুম্হে ন ইণট্ঠা, ন ভযট্ঠা, ন জীৰিকাপকতা পব্বজিতা; দুক্খা মুচ্চিতুকামা পনেত্থ পব্বজিতা. তস্মা গমনে উপ্পন্নকিলেসং গমনেযেৰ নিগ্গণ্হথ, ঠানে নিসজ্জায, সযনে উপ্পন্নকিলেসং গমনেযেৰ নিগ্গণ্হথা’’তি. তে এৰং কতিকৰত্তং কত্ৰা ভিক্খাচারং গচ্ছন্তা অড্ঢউসভউসভঅড্ঢগাৰুতগাৰুতন্তরেসু পাসাণা হোন্তি, তায সঞ্ঞায কম্মট্ঠানং মনসিকরোন্তাৰ গচ্ছন্তি. সচে কস্সচি গমনে কিলেসো উপ্পজ্জতি, তত্থেৰ নং নিগ্গণ্হাতি. তথা অসক্কোন্তো তিট্ঠতি. অথস্স পচ্ছতো আগচ্ছন্তোপি তিট্ঠতি. সো – ‘‘অযং ভিক্খু তুয্হং উপ্পন্নৰিতক্কং জানাতি, অননুচ্ছৰিকং তে এত’’ন্তি অত্তানং পটিচোদেত্ৰা ৰিপস্সনং ৰড্ঢেত্ৰা তত্থেৰ অরিযভূমিং ওক্কমতি. তথা অসক্কোন্তো নিসীদতি. অথস্স পচ্ছতো আগচ্ছন্তোপি নিসীদতীতি সোযেৰ নযো. অরিযভূমি ওক্কমিতুং অসক্কোন্তোপি তং কিলেসং ৰিক্খম্ভেত্ৰা কম্মট্ঠানং মনসিকরোন্তোৰ গচ্ছতি. ন কম্মট্ঠানৰিপ্পযুত্তেন চিত্তেন পাদং উদ্ধরতি. উদ্ধরতি চে, পটিনিৰত্তিত্ৰা পুরিমপ্পদেসংযেৰ এতি সীহল়দীপে আলিন্দকৰাসী মহাফুস্সদেৰত্থেরো ৰিয ¶ .

সো কির একূনৰীসতি ৰস্সানি গতপচ্চাগতৰত্তং পূরেন্তো এৰ ৰিহাসি. মনুস্সাপি সুদং অন্তরামগ্গে কসন্তা চ ৰপন্তা চ মদ্দন্তা চ কম্মানি করোন্তা থেরং তথা গচ্ছন্তং দিস্ৰা – ‘‘অযং থেরো পুনপ্পুনং নিৰত্তিত্ৰা গচ্ছতি, কিং নু খো মগ্গমূল়্হো, উদাহু কিঞ্চি পমুট্ঠো’’তি সমুল্লপন্তি. সো তং অনাদিযিত্ৰা কম্মট্ঠানযুত্তেনেৰ চিত্তেন সমণধম্মং করোন্তো ৰীসতিৰস্সব্ভন্তরে অরহত্তং পাপুণি. অরহত্তপ্পত্তদিৰসে চস্স চঙ্কমনকোটিযং অধিৰত্থা দেৰতা অঙ্গুলীহি দীপং উজ্জালেত্ৰা অট্ঠাসি. চত্তারোপি মহারাজানো সক্কো চ দেৰানমিন্দো, ব্রহ্মা চ সহম্পতি উপট্ঠানং আগমংসু. তঞ্চ ওভাসং দিস্ৰা ৰনৰাসী মহাতিস্সত্থেরো তং দুতিযদিৰসে পুচ্ছি ¶ ‘‘রত্তিভাগে আযস্মতো সন্তিকে ওভাসো অহোসি, কিং সো ওভাসো’’তি? থেরো ৰিক্খেপং করোন্তো ‘‘ওভাসো নাম দীপোভাসোপি হোতি, মণিওভাসোপী’’তি ¶ এৰমাদিং আহ. সো ‘‘পটিচ্ছাদেথ তুম্হে’’তি নিবদ্ধো ‘‘আমা’’তি পটিজানিত্ৰা আরোচেসি.

কাল়ৰল্লিমণ্ডপৰাসী মহানাগত্থেরো ৰিয চ. সোপি কির গতপচ্চাগতৰত্তং পূরেন্তো ‘‘পঠমং তাৰ ভগৰতো মহাপধানং পূজেমী’’তি সত্ত ৰস্সানি ঠানচঙ্কমমেৰ অধিট্ঠাসি. পুন সোল়স ৰস্সানি গতপচ্চাগতৰত্তং পূরেত্ৰা অরহত্তং পাপুণি. এৰং কম্মট্ঠানযুত্তেনেৰ চিত্তেন পাদং উদ্ধরন্তো ৰিপ্পযুত্তেন চিত্তেন উদ্ধটে পন পটিনিৰত্তন্তো গামসমীপং গন্ত্ৰা, ‘‘গাৰী নু পব্বজিতো নূ’’তি আসঙ্কনীযপ্পদেসে ঠত্ৰা, সঙ্ঘাটিং পারুপিত্ৰা পত্তং গহেত্ৰা, গামদ্ৰারং পত্ৰা, কচ্ছকন্তরতো উদকং গহেত্ৰা, গণ্ডূসং কত্ৰা গামং পৰিসতি ‘‘ভিক্খং দাতুং ৰা ৰন্দিতুং ৰা উপগতে মনুস্সে ‘দীঘাযুকা হোথা’তি ৰচনমত্তেনপি মা মে কম্মট্ঠানৰিক্খেপো অহোসী’’তি সচে পন ‘‘অজ্জ, ভন্তে, কিং সত্তমী, উদাহু অট্ঠমী’’তি দিৰসং পুচ্ছন্তি, উদকং গিলিত্ৰা আরোচেতি. সচে দিৰসপুচ্ছকা ন হোন্তি, নিক্খমনৰেলাযং ¶ গামদ্ৰারে নিট্ঠুভিত্ৰাৰ যাতি.

সীহল়দীপেযেৰ কলম্বতিত্থৰিহারে ৰস্সূপগতা পঞ্ঞাসভিক্খূ ৰিয চ. তে কির ৰস্সূপনাযিকউপোসথদিৰসে কতিকৰত্তং অকংসু – ‘‘অরহত্তং অপ্পত্ৰা অঞ্ঞমঞ্ঞং নালপিস্সামা’’তি. গামঞ্চ পিণ্ডায পৰিসন্তা গামদ্ৰারে উদকগণ্ডূসং কত্ৰা পৰিসিংসু, দিৰসে পুচ্ছিতে উদকং গিলিত্ৰা আরোচেসুং, অপুচ্ছিতে গামদ্ৰারে নিট্ঠুভিত্ৰা ৰিহারং আগমংসু. তত্থ মনুস্সা নিট্ঠুভনট্ঠানং দিস্ৰা জানিংসু ‘‘অজ্জ একো আগতো, অজ্জ দ্ৰে’’তি. এৰঞ্চ চিন্তেসুং ‘‘কিং নু খো এতে অম্হেহেৰ সদ্ধিং ন সল্লপন্তি, উদাহু অঞ্ঞমঞ্ঞম্পি? যদি অঞ্ঞমঞ্ঞম্পি ন সল্লপন্তি, অদ্ধা ৰিৰাদজাতা ভৰিস্সন্তি, হন্দ নেসং অঞ্ঞমঞ্ঞং খমাপেস্সামা’’তি সব্বে ৰিহারং অগমংসু. তত্থ পঞ্ঞাসভিক্খূসু ৰস্সং উপগতেসু দ্ৰে ভিক্খূ একোকাসে নাদ্দসংসু. ততো যো তেসু চক্খুমা পুরিসো, সো এৰমাহ – ‘‘ন, ভো, কলহকারকানং ৰসনোকাসো ঈদিসো হোতি, সুসম্মট্ঠং চেতিযঙ্গণং বোধিযঙ্গণং, সুনিক্খিত্তা সম্মজ্জনিযো, সূপট্ঠপিতং পানীযপরিভোজনীয’’ন্তি. তে ততোৰ ¶ নিৰত্তা. তে ভিক্খূ অন্তোতেমাসেযেৰ ৰিপস্সনং আরভিত্ৰা অরহত্তং পত্ৰা মহাপৰারণায ৰিসুদ্ধিপৰারণং পৰারেসুং.

এৰং কাল়ৰল্লিমণ্ডপৰাসী মহানাগত্থেরো ৰিয কলম্বতিত্থৰিহারে ৰস্সূপগতভিক্খূ ৰিয চ কম্মট্ঠানযুত্তেনেৰ চিত্তেন পাদং উদ্ধরন্তো গামসমীপং পত্ৰা, উদকগণ্ডূসং কত্ৰা, ৰীথিযো সল্লক্খেত্ৰা, যত্থ সুরাসোণ্ডধুত্তাদযো কলহকারকা চণ্ডহত্থিঅস্সাদযো ৰা নত্থি, তং ¶ ৰীথিং পটিপজ্জতি. তত্থ চ পিণ্ডায চরমানো ন তুরিততুরিতো ৰিয জৰেন গচ্ছতি, জৰনপিণ্ডপাতিকধুতঙ্গং নাম নত্থি. ৰিসমভূমিভাগপ্পত্তং ¶ পন উদকভরিতসকটমিৰ নিচ্চলোৰ হুত্ৰা গচ্ছতি. অনুঘরং পৰিট্ঠো চ দাতুকামং অদাতুকামং ৰা সল্লক্খেতুং তদনুরূপং কালং আগমেন্তো ভিক্খং গহেত্ৰা, পতিরূপে ওকাসে নিসীদিত্ৰা, কম্মট্ঠানং মনসি করোন্তো আহারে পটিকূলসঞ্ঞং উপট্ঠপেত্ৰা, অক্খব্ভঞ্জনৰণালেপনপুত্তমংসূপমাৰসেন পচ্চৰেক্খন্তো অট্ঠঙ্গসমন্নাগতং আহারং আহারেতি, নেৰ দৰায ন মদায…পে… ভুত্তাৰী চ উদককিচ্চং কত্ৰা, মুহুত্তং ভত্তকিলমথং পটিপ্পস্সম্ভেত্ৰা, যথা পুরে ভত্তং, এৰং পচ্ছা ভত্তং পুরিমযামং পচ্ছিমযামঞ্চ কম্মট্ঠানং মনসি করোতি. অযং ৰুচ্চতি হরতি চেৰ পচ্চাহরতি চাতি. এৰমেতং হরণপচ্চাহরণং গতপচ্চাগতৰত্তন্তি ৰুচ্চতি.

এতং পূরেন্তো যদি উপনিস্সযসম্পন্নো হোতি, পঠমৰযে এৰ অরহত্তং পাপুণাতি. নো চে পঠমৰযে পাপুণাতি, অথ মজ্ঝিমৰযে পাপুণাতি. নো চে মজ্ঝিমৰযে পাপুণাতি, অথ মরণসমযে পাপুণাতি. নো চে মরণসমযে পাপুণাতি, অথ দেৰপুত্তো হুত্ৰা পাপুণাতি. নো চে দেৰপুত্তো হুত্ৰা পাপুণাতি, অথ পচ্চেকসম্বুদ্ধো হুত্ৰা পরিনিব্বাতি. নো চে পচ্চেকসম্বুদ্ধো হুত্ৰা পরিনিব্বাতি, অথ বুদ্ধানং সন্তিকে খিপ্পাভিঞ্ঞো হোতি; সেয্যথাপি – থেরো বাহিযো, মহাপঞ্ঞো ৰা হোতি; সেয্যথাপি থেরো সারিপুত্তো.

অযং পন পচ্চেকবোধিসত্তো কস্সপস্স ভগৰতো সাসনে পব্বজিত্ৰা, আরঞ্ঞিকো হুত্ৰা, ৰীসতি ৰস্সসহস্সানি এতং গতপচ্চাগতৰত্তং পূরেত্ৰা, কালং কত্ৰা, কামাৰচরদেৰলোকে উপ্পজ্জি. ততো চৰিত্ৰা বারাণসিরঞ্ঞো অগ্গমহেসিযা কুচ্ছিম্হি পটিসন্ধিং অগ্গহেসি. কুসলা ইত্থিযো তদহেৰ গব্ভসণ্ঠানং জানন্তি, সা চ তাসমঞ্ঞতরা ¶ , তস্মা তং গব্ভপতিট্ঠানং রঞ্ঞো নিৰেদেসি. ধম্মতা এসা, যং পুঞ্ঞৰন্তে সত্তে গব্ভে উপ্পন্নে মাতুগামো ¶ গব্ভপরিহারং লভতি. তস্মা রাজা তস্সা গব্ভপরিহারং অদাসি. সা ততো পভুতি নাচ্চুণ্হং কিঞ্চি অজ্ঝোহরিতুং লভতি, নাতিসীতং, নাতিঅম্বিলং, নাতিলোণং, নাতিকটুকং, নাতিতিত্তকং. অচ্চুণ্হে হি মাতরা অজ্ঝোহটে গব্ভস্স লোহকুম্ভিৰাসো ৰিয হোতি, অতিসীতে লোকন্তরিকৰাসো ৰিয, অচ্চম্বিললোণকটুকতিত্তকেসু ভুত্তেসু সত্থেন ফালেত্ৰা অম্বিলাদীহি সিত্তানি ৰিয গব্ভসেয্যকস্স অঙ্গানি তিব্বৰেদনানি হোন্তি. অতিচঙ্কমনট্ঠাননিসজ্জাসযনতোপি নং নিৰারেন্তি – ‘‘কুচ্ছিগতস্স সঞ্চলনদুক্খং মা অহোসী’’তি. মুদুকত্থরণত্থতায ভূমিযং চঙ্কমনাদীনি মত্তায কাতুং লভতি, ৰণ্ণগন্ধাদিসম্পন্নং সাদুসপ্পাযং অন্নপানং লভতি. পরিগ্গহেত্ৰাৰ নং চঙ্কমাপেন্তি, নিসীদাপেন্তি, ৰুট্ঠাপেন্তি.

সা ¶ এৰং পরিহরিযমানা গব্ভপরিপাককালে সূতিঘরং পৰিসিত্ৰা পচ্চূসসমযে পুত্তং ৰিজাযি পক্কতেলমদ্দিতমনোসিলাপিণ্ডিসদিসং ধঞ্ঞপুঞ্ঞলক্খণূপেতং. ততো নং পঞ্চমদিৰসে অলঙ্কতপ্পটিযত্তং রঞ্ঞো দস্সেসুং, রাজা তুট্ঠো ছসট্ঠিযা ধাতীহি উপট্ঠাপেসি. সো সব্বসম্পত্তীহি ৰড্ঢমানো ন চিরস্সেৰ ৰিঞ্ঞুতং পাপুণি. তং সোল়সৰস্সুদ্দেসিকমেৰ সমানং রাজা রজ্জে অভিসিঞ্চি, ৰিৰিধনাটকানি চস্স উপট্ঠাপেসি. অভিসিত্তো রাজপুত্তো রজ্জং কারেসি নামেন ব্রহ্মদত্তো সকলজম্বুদীপে ৰীসতিযা নগরসহস্সেসু. জম্বুদীপে হি পুব্বে চতুরাসীতি নগরসহস্সানি অহেসুং. তানি পরিহাযন্তানি সট্ঠি অহেসুং, ততো পরিহাযন্তানি চত্তালীসং, সব্বপরিহাযনকালে পন ৰীসতি হোন্তি. অযঞ্চ ব্রহ্মদত্তো সব্বপরিহাযনকালে উপ্পজ্জি. তেনস্স ৰীসতি নগরসহস্সানি অহেসুং, ৰীসতি পাসাদসহস্সানি, ৰীসতি হত্থিসহস্সানি, ৰীসতি অস্সসহস্সানি, ৰীসতি রথসহস্সানি ¶ , ৰীসতি পত্তিসহস্সানি, ৰীসতি ইত্থিসহস্সানি – ওরোধা চ নাটকিত্থিযো চ, ৰীসতি অমচ্চসহস্সানি. সো মহারজ্জং কারযমানো এৰ কসিণপরিকম্মং কত্ৰা পঞ্চ অভিঞ্ঞাযো, অট্ঠ সমাপত্তিযো চ নিব্বত্তেসি. যস্মা পন অভিসিত্তরঞ্ঞা নাম অৰস্সং অট্টকরণে নিসীদিতব্বং, তস্মা একদিৰসং পগেৰ পাতরাসং ভুঞ্জিত্ৰা ৰিনিচ্ছযট্ঠানে নিসীদি. তত্থ উচ্চাসদ্দমহাসদ্দং অকংসু. সো ‘‘অযং সদ্দো সমাপত্তিযা উপক্কিলেসো’’তি পাসাদতলং ¶ অভিরুহিত্ৰা ‘‘সমাপত্তিং অপ্পেমী’’তি নিসিন্নো নাসক্খি অপ্পেতুং, রজ্জৰিক্খেপেন সমাপত্তি পরিহীনা. ততো চিন্তেসি ‘‘কিং রজ্জং ৰরং, উদাহু সমণধম্মো’’তি. ততো ‘‘রজ্জসুখং পরিত্তং অনেকাদীনৰং, সমণধম্মসুখং পন ৰিপুলমনেকানিসংসং উত্তমপুরিসসেৰিতঞ্চা’’তি ঞত্ৰা অঞ্ঞতরং অমচ্চং আণাপেসি – ‘‘ইমং রজ্জং ধম্মেন সমেন অনুসাস, মা খো অধম্মকারং অকাসী’’তি সব্বং নিয্যাতেত্ৰা পাসাদং অভিরুহিত্ৰা সমাপত্তিসুখেন ৰিহরতি, ন কোচি উপসঙ্কমিতুং লভতি অঞ্ঞত্র মুখধোৰনদন্তকট্ঠদাযকভত্তনীহারকাদীহি.

ততো অদ্ধমাসমত্তে ৰীতিক্কন্তে মহেসী পুচ্ছি ‘‘রাজা উয্যানগমনবলদস্সননাটকাদীসু কত্থচি ন দিস্সতি, কুহিং গতো’’তি? তস্সা তমত্থং আরোচেসুং. সা অমচ্চস্স পাহেসি ‘‘রজ্জে পটিচ্ছিতে অহম্পি পটিচ্ছিতা হোমি, এতু মযা সদ্ধিং সংৰাসং কপ্পেতূ’’তি. সো উভো কণ্ণে থকেত্ৰা ‘‘অসৰনীযমেত’’ন্তি পটিক্খিপি. সা পুনপি দ্ৰত্তিক্খত্তুং পেসেত্ৰা অনিচ্ছমানং তজ্জাপেসি – ‘‘যদি ন করোসি, ঠানাপি তে চাৰেমি, জীৰিতাপি ৰোরোপেমী’’তি. সো ভীতো ‘‘মাতুগামো নাম দল়্হনিচ্ছযো, কদাচি এৰম্পি কারাপেয্যা’’তি একদিৰসং রহো গন্ত্ৰা তায সদ্ধিং সিরিসযনে সংৰাসং কপ্পেসি. সা পুঞ্ঞৰতী ¶ সুখসম্ফস্সা. সো তস্সা সম্ফস্সরাগেন রত্তো তত্থ অভিক্খণং সঙ্কিতসঙ্কিতোৰ অগমাসি. অনুক্কমেন ¶ অত্তনো ঘরসামিকো ৰিয নিব্বিসঙ্কো পৰিসিতুমারদ্ধো.

ততো রাজমনুস্সা তং পৰত্তিং রঞ্ঞো আরোচেসুং. রাজা ন সদ্দহতি. দুতিযম্পি ততিযম্পি আরোচেসুং. ততো নিলীনো সযমেৰ দিস্ৰা সব্বামচ্চে সন্নিপাতাপেত্ৰা আরোচেসি. তে – ‘‘অযং রাজাপরাধিকো হত্থচ্ছেদং অরহতি, পাদচ্ছেদং অরহতী’’তি যাৰ সূলে উত্তাসনং, তাৰ সব্বকম্মকারণানি নিদ্দিসিংসু. রাজা – ‘‘এতস্স ৰধবন্ধনতাল়নে ময্হং ৰিহিংসা উপ্পজ্জেয্য, জীৰিতা ৰোরোপনে পাণাতিপাতো ভৰেয্য, ধনহরণে অদিন্নাদানং, অলং এৰরূপেহি কতেহি, ইমং মম রজ্জা নিক্কড্ঢথা’’তি আহ. অমচ্চা তং নিব্বিসযং অকংসু. সো অত্তনো ধনসারঞ্চ পুত্তদারঞ্চ গহেত্ৰা পরৰিসযং অগমাসি. তত্থ রাজা সুত্ৰা ‘‘কিং আগতোসী’’তি পুচ্ছি. ‘‘দেৰ, ইচ্ছামি তং উপট্ঠাতু’’ন্তি. সো তং সম্পটিচ্ছি. অমচ্চো কতিপাহচ্চযেন লদ্ধৰিস্সাসো তং রাজানং এতদৰোচ – ‘‘মহারাজ, অমক্খিকমধুং ¶ পস্সামি, তং খাদন্তো নত্থী’’তি. রাজা ‘‘কিং এতং উপ্পণ্ডেতুকামো ভণতী’’তি ন সুণাতি. সো অন্তরং লভিত্ৰা পুনপি সুট্ঠুতরং ৰণ্ণেত্ৰা আরোচেসি. রাজা ‘‘কিং এত’’ন্তি পুচ্ছি. ‘‘বারাণসিরজ্জং, দেৰা’’তি. রাজা ‘‘মং নেত্ৰা মারেতুকামোসী’’তি আহ. সো ‘‘মা, দেৰ, এৰং অৰচ, যদি ন সদ্দহসি, মনুস্সে পেসেহী’’তি. সো মনুস্সে পেসেসি. তে গন্ত্ৰা গোপুরং খণিত্ৰা রঞ্ঞো সযনঘরে উট্ঠহিংসু.

রাজা দিস্ৰা ‘‘কিস্স আগতাত্থা’’তি পুচ্ছি. ‘‘চোরা মযং, মহারাজা’’তি. রাজা তেসং ধনং দাপেত্ৰা ‘‘মা পুন এৰমকত্থা’’তি ওৰদিত্ৰা ৰিস্সজ্জেসি. তে আগন্ত্ৰা তস্স রঞ্ঞো আরোচেসুং. সো পুনপি দ্ৰত্তিক্খত্তুং তথেৰ ৰীমংসিত্ৰা ‘‘সীলৰা রাজা’’তি চতুরঙ্গিনিং সেনং সন্নয্হিত্ৰা সীমন্তরে একং নগরং উপগম্ম তত্থ অমচ্চস্স পাহেসি ‘‘নগরং ৰা মে দেহি যুদ্ধং ৰা’’তি. সো ব্রহ্মদত্তস্স তমত্থং আরোচাপেসি ‘‘আণাপেতু দেৰো কিং যুজ্ঝামি, উদাহু নগরং দেমী’’তি. রাজা ‘‘ন যুজ্ঝিতব্বং, নগরং দত্ৰা ইধাগচ্ছা’’তি পেসেসি. সো তথা অকাসি. পটিরাজাপি তং নগরং গহেত্ৰা অৰসেসনগরেসুপি ¶ তথেৰ দূতং পাহেসি. তেপি অমচ্চা তথেৰ ব্রহ্মদত্তস্স আরোচেত্ৰা তেন ‘‘ন যুজ্ঝিতব্বং, ইধাগন্তব্ব’’ন্তি ৰুত্তা বারাণসিং আগমংসু.

ততো অমচ্চা ব্রহ্মদত্তং আহংসু – ‘‘মহারাজ, তেন সহ যুজ্ঝামা’’তি. রাজা – ‘‘মম পাণাতিপাতো ভৰিস্সতী’’তি ৰারেসি. অমচ্চা – ‘‘মযং, মহারাজ, তং জীৰগ্গাহং গহেত্ৰা ¶ ইধেৰ আনেস্সামা’’তি নানাউপাযেহি রাজানং সঞ্ঞাপেত্ৰা ‘‘এহি মহারাজা’’তি গন্তুং আরদ্ধা. রাজা ‘‘সচে সত্তমারণপ্পহরণৰিলুম্পনকম্মং ন করোথ, গচ্ছামী’’তি ভণতি. অমচ্চা ‘‘ন, দেৰ, করোম, ভযং দস্সেত্ৰা পলাপেমা’’তি চতুরঙ্গিনিং সেনং সন্নয্হিত্ৰা ঘটেসু দীপে পক্খিপিত্ৰা রত্তিং গচ্ছিংসু. পটিরাজা তং দিৰসং বারাণসিসমীপে নগরং গহেত্ৰা ইদানি কিন্তি রত্তিং সন্নাহং মোচাপেত্ৰা পমত্তো নিদ্দং ওক্কমি সদ্ধিং বলকাযেন. ততো অমচ্চা বারাণসিরাজানং গহেত্ৰা পটিরঞ্ঞো খন্ধাৰারং গন্ত্ৰা সব্বঘটেহি দীপে নিহরাপেত্ৰা একপজ্জোতায সেনায সদ্দং অকংসু. পটিরঞ্ঞো অমচ্চো মহাবলং দিস্ৰা ভীতো অত্তনো রাজানং উপসঙ্কমিত্ৰা ‘‘উট্ঠেহি অমক্খিকমধুং খাদাহী’’তি মহাসদ্দং অকাসি. তথা দুতিযোপি, ততিযোপি. পটিরাজা তেন সদ্দেন পটিবুজ্ঝিত্ৰা ¶ ভযং সন্তাসং আপজ্জি. উক্কুট্ঠিসতানি পৰত্তিংসু. সো ‘‘পরৰচনং সদ্দহিত্ৰা অমিত্তহত্থং পত্তোম্হী’’তি সব্বরত্তিং তং তং ৰিপ্পলপিত্ৰা দুতিযদিৰসে ‘‘ধম্মিকো রাজা, উপরোধং ন করেয্য, গন্ত্ৰা খমাপেমী’’তি চিন্তেত্ৰা রাজানং উপসঙ্কমিত্ৰা জণ্ণুকেহি পতিট্ঠহিত্ৰা ‘‘খম, মহারাজ, ময্হং অপরাধ’’ন্তি আহ. রাজা তং ওৰদিত্ৰা ‘‘উট্ঠেহি, খমামি তে’’তি আহ. সো রঞ্ঞা এৰং ৰুত্তমত্তেযেৰ পরমস্সাসপ্পত্তো অহোসি, বারাণসিরঞ্ঞো সমীপেযেৰ জনপদে রজ্জং লভি. তে অঞ্ঞমঞ্ঞং সহাযকা অহেসুং.

অথ ব্রহ্মদত্তো দ্ৰেপি সেনা সম্মোদমানা একতো ঠিতা দিস্ৰা ‘‘মমেকস্স চিত্তানুরক্খণায অস্মিং জনকাযে খুদ্দকমক্খিকায পিৰনমত্তম্পি লোহিতবিন্দু ¶ ন উপ্পন্নং. অহো সাধু, অহো সুট্ঠু, সব্বে সত্তা সুখিতা হোন্তু, অৰেরা হোন্তু, অব্যাপজ্ঝা হোন্তূ’’তি মেত্তাঝানং উপ্পাদেত্ৰা, তদেৰ পাদকং কত্ৰা, সঙ্খারে সম্মসিত্ৰা, পচ্চেকবোধিঞাণং সচ্ছিকত্ৰা, সযম্ভুতং পাপুণি. তং মগ্গসুখেন ফলসুখেন সুখিতং হত্থিক্খন্ধে নিসিন্নং অমচ্চা পণিপাতং কত্ৰা আহংসু – ‘‘যানকালো, মহারাজ, ৰিজিতবলকাযস্স সক্কারো কাতব্বো, পরাজিতবলকাযস্স ভত্তপরিব্বযো দাতব্বো’’তি. সো আহ – ‘‘নাহং, ভণে, রাজা, পচ্চেকবুদ্ধো নামাহ’’ন্তি. কিং দেৰো ভণতি, ন এদিসা পচ্চেকবুদ্ধা হোন্তীতি? কীদিসা, ভণে, পচ্চেকবুদ্ধাতি? পচ্চেকবুদ্ধা নাম দ্ৰঙ্গুলকেসমস্সু অট্ঠপরিক্খারযুত্তা ভৰন্তীতি. সো দক্খিণহত্থেন সীসং পরামসি, তাৰদেৰ গিহিলিঙ্গং অন্তরধাযি, পব্বজিতৰেসো পাতুরহোসি, দ্ৰঙ্গুলকেসমস্সু অট্ঠপরিক্খারসমন্নাগতো ৰস্সসতিকত্থেরসদিসো অহোসি. সো চতুত্থজ্ঝানং সমাপজ্জিত্ৰা হত্থিক্খন্ধতো ৰেহাসং অব্ভুগ্গন্ত্ৰা পদুমপুপ্ফে নিসীদি. অমচ্চা ৰন্দিত্ৰা ‘‘কিং, ভন্তে, কম্মট্ঠানং, কথং অধিগতোসী’’তি পুচ্ছিংসু. সো যতো অস্স মেত্তাঝানকম্মট্ঠানং অহোসি ¶ , তঞ্চ ৰিপস্সনং ৰিপস্সিত্ৰা অধিগতো, তস্মা তমত্থং দস্সেন্তো উদানগাথঞ্চ ব্যাকরণগাথঞ্চ ইমঞ্ঞেৰ গাথং অভাসি ‘‘সব্বেসু ভূতেসু নিধায দণ্ড’’ন্তি.

তত্থ সব্বেসূতি অনৰসেসেসু. ভূতেসূতি সত্তেসু. অযমেত্থ সঙ্খেপো, ৰিত্থারং পন রতনসুত্তৰণ্ণনাযং ৰক্খাম. নিধাযাতি নিক্খিপিত্ৰা. দণ্ডন্তি ¶ কাযৰচীমনোদণ্ডং, কাযদুচ্চরিতাদীনমেতং অধিৰচনং. কাযদুচ্চরিতঞ্হি দণ্ডযতীতি দণ্ডো, বাধেতি অনযব্যসনং পাপেতীতি ৰুত্তং হোতি. এৰং ৰচীদুচ্চরিতং মনোদুচ্চরিতং চ. পহরণদণ্ডো এৰ ৰা দণ্ডো, তং নিধাযাতিপি ৰুত্তং হোতি. অৰিহেঠযন্তি অৰিহেঠযন্তো. অঞ্ঞতরম্পীতি যংকিঞ্চি একম্পি. তেসন্তি তেসং সব্বভূতানং. ন পুত্তমিচ্ছেয্যাতি অত্রজো, খেত্রজো, দিন্নকো, অন্তেৰাসিকোতি ইমেসু চতূসু ¶ পুত্তেসু যং কিঞ্চি পুত্তং ন ইচ্ছেয্য. কুতো সহাযন্তি সহাযং পন ইচ্ছেয্যাতি কুতো এৰ এতং.

একোতি পব্বজ্জাসঙ্খাতেন একো, অদুতিযট্ঠেন একো, তণ্হাপহানেন একো, একন্তৰিগতকিলেসোতি একো, একো পচ্চেকসম্বোধিং অভিসম্বুদ্ধোতি একো. সমণসহস্সস্সাপি হি মজ্ঝে ৰত্তমানো গিহিসঞ্ঞোজনস্স ছিন্নত্তা একো – এৰং পব্বজ্জাসঙ্খাতেন একো. একো তিট্ঠতি, একো গচ্ছতি, একো নিসীদতি, একো সেয্যং কপ্পেতি, একো ইরিযতি ৰত্ততীতি – এৰং অদুতিযট্ঠেন একো.

‘‘তণ্হাদুতিযো পুরিসো, দীঘমদ্ধানসংসরং;

ইত্থভাৰঞ্ঞথাভাৰং, সংসারং নাতিৰত্ততি.

‘‘এৰমাদীনৰং ঞত্ৰা, তণ্হং দুক্খস্স সম্ভৰং;

ৰীততণ্হো অনাদানো, সতো ভিক্খু পরিব্বজে’’তি. (ইতিৰু. ১৫, ১০৫; মহানি. ১৯১; চূল়নি. পারাযনানুগীতিগাথানিদ্দেস ১০৭) –

এৰং তণ্হাপহানট্ঠেন একো. সব্বকিলেসাস্স পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মাতি – এৰং একন্তৰিগতকিলেসোতি একো. অনাচরিযকো হুত্ৰা সযম্ভূ সামঞ্ঞেৰ পচ্চেকসম্বোধিং অভিসম্বুদ্ধোতি – এৰং একো পচ্চেকসম্বোধিং অভিসম্বুদ্ধোতি একো.

চরেতি যা ইমা অট্ঠ চরিযাযো; সেয্যথিদং – পণিধিসম্পন্নানং চতূসু ইরিযাপথেসু ইরিযাপথচরিযা ¶ , ইন্দ্রিযেসু গুত্তদ্ৰারানং অজ্ঝত্তিকাযতনেসু আযতনচরিযা, অপ্পমাদৰিহারীনং চতূসু সতিপট্ঠানেসু সতিচরিযা, অধিচিত্তমনুযুত্তানং চতূসু ঝানেসু সমাধিচরিযা, বুদ্ধিসম্পন্নানং চতূসু অরিযসচ্চেসু ঞাণচরিযা, সম্মা পটিপন্নানং চতূসু অরিযমগ্গেসু মগ্গচরিযা, অধিগতপ্ফলানং চতূসু সামঞ্ঞফলেসু ¶ পত্তিচরিযা, তিণ্ণং বুদ্ধানং সব্বসত্তেসু লোকত্থচরিযা, তত্থ পদেসতো পচ্চেকবুদ্ধসাৰকানন্তি. যথাহ – ‘‘চরিযাতি অট্ঠ চরিযাযো ইরিযাপথচরিযা’’তি ¶ (পটি. ম. ১.১৯৭; ৩.২৮) ৰিত্থারো. তাহি চরিযাহি সমন্নাগতো ভৰেয্যাতি অত্থো. অথ ৰা যা ইমা ‘‘অধিমুচ্চন্তো সদ্ধায চরতি, পগ্গণ্হন্তো ৰীরিযেন চরতি, উপট্ঠহন্তো সতিযা চরতি, অৰিক্খিত্তো সমাধিনা চরতি, পজানন্তো পঞ্ঞায চরতি, ৰিজানন্তো ৰিঞ্ঞাণেন চরতি, এৰং পটিপন্নস্স কুসলা ধম্মা আযতন্তীতি আযতনচরিযায চরতি, এৰং পটিপন্নো ৰিসেসমধিগচ্ছতীতি ৰিসেসচরিযায চরতী’’তি (পটি. ম. ১.১৯৭; ৩.২৯) এৰং অপরাপি অট্ঠ চরিযা ৰুত্তা. তাহিপি সমন্নাগতো ভৰেয্যাতি অত্থো. খগ্গৰিসাণকপ্পোতি এত্থ খগ্গৰিসাণং নাম খগ্গমিগসিঙ্গং. কপ্পসদ্দস্স অত্থং ৰিত্থারতো মঙ্গলসুত্তৰণ্ণনাযং পকাসযিস্সাম. ইধ পনাযং ‘‘সত্থুকপ্পেন ৰত, ভো, কির সাৰকেন সদ্ধিং মন্তযমানা’’তি (ম. নি. ১.২৬০) এৰমাদীসু ৰিয পটিভাগো ৰেদিতব্বো. খগ্গৰিসাণকপ্পোতি খগ্গৰিসাণসদিসোতি ৰুত্তং হোতি. অযং তাৰেত্থ পদতো অত্থৰণ্ণনা.

অধিপ্পাযানুসন্ধিতো পন এৰং ৰেদিতব্বা – য্ৰাযং ৰুত্তপ্পকারো দণ্ডো ভূতেসু পৰত্তিযমানো অহিতো হোতি, তং তেসু অপ্পৰত্তনেন তপ্পটিপক্খভূতায মেত্তায পরহিতূপসংহারেন চ সব্বেসু ভূতেসু নিধায দণ্ডং, নিহিতদণ্ডত্তা এৰ চ. যথা অনিহিতদণ্ডা সত্তা ভূতানি দণ্ডেন ৰা সত্থেন ৰা পাণিনা ৰা লেড্ডুনা ৰা ৰিহেঠযন্তি, তথা অৰিহেঠযং অঞ্ঞতরম্পি তেসং. ইমং মেত্তাকম্মট্ঠানমাগম্ম যদেৰ তত্থ ৰেদনাগতং সঞ্ঞাসঙ্খারৰিঞ্ঞাণগতং তঞ্চ তদনুসারেনেৰ তদঞ্ঞঞ্চ সঙ্খারগতং ৰিপস্সিত্ৰা ইমং পচ্চেকবোধিং অধিগতোম্হীতি অযং তাৰ অধিপ্পাযো.

অযং পন অনুসন্ধি – এৰং ৰুত্তে তে অমচ্চা আহংসু – ‘‘ইদানি, ভন্তে, কুহিং গচ্ছথা’’তি? ততো তেন ‘‘পুব্বপচ্চেকসম্বুদ্ধা কত্থ ৰসন্তী’’তি ¶ আৰজ্জেত্ৰা ঞত্ৰা ‘‘গন্ধমাদনপব্বতে’’তি ৰুত্তে পুনাহংসু – ‘‘অম্হে দানি, ভন্তে, পজহথ, ন ইচ্ছথা’’তি. অথ পচ্চেকবুদ্ধো আহ – ‘‘ন পুত্তমিচ্ছেয্যা’’তি সব্বং. তত্রাধিপ্পাযো – অহং ইদানি অত্রজাদীসু যং ¶ কিঞ্চি পুত্তম্পি ন ইচ্ছেয্যং, কুতো পন তুম্হাদিসং সহাযং? তস্মা তুম্হেসুপি যো মযা সদ্ধিং ¶ গন্তুং মাদিসো ৰা হোতুং ইচ্ছতি, সো একো চরে খগ্গৰিসাণকপ্পো. অথ ৰা তেহি ‘‘অম্হে দানি, ভন্তে, পজহথ ন ইচ্ছথা’’তি ৰুত্তে সো পচ্চেকবুদ্ধো ‘‘ন পুত্তমিচ্ছেয্য কুতো সহায’’ন্তি ৰত্ৰা অত্তনো যথাৰুত্তেনত্থেন একচরিযায গুণং দিস্ৰা পমুদিতো পীতিসোমনস্সজাতো ইমং উদানং উদানেসি – ‘‘একো চরে খগ্গৰিসাণকপ্পো’’তি. এৰং ৰত্ৰা পেক্খমানস্সেৰ মহাজনস্স আকাসে উপ্পতিত্ৰা গন্ধমাদনং অগমাসি.

গন্ধমাদনো নাম হিমৰতি চূল়কাল়পব্বতং, মহাকাল়পব্বতং, নাগপলিৰেঠনং, চন্দগব্ভং, সূরিযগব্ভং, সুৰণ্ণপস্সং, হিমৰন্তপব্বতন্তি সত্ত পব্বতে অতিক্কম্ম হোতি. তত্থ নন্দমূলকং নাম পব্ভারং পচ্চেকবুদ্ধানং ৰসনোকাসো. তিস্সো চ গুহাযো – সুৰণ্ণগুহা, মণিগুহা, রজতগুহাতি. তত্থ মণিগুহাদ্ৰারে মঞ্জূসকো নাম রুক্খো যোজনং উব্বেধেন, যোজনং ৰিত্থারেন. সো যত্তকানি উদকে ৰা থলে ৰা পুপ্ফানি, সব্বানি তানি পুপ্ফযতি ৰিসেসেন পচ্চেকবুদ্ধাগমনদিৰসে. তস্সূপরিতো সব্বরতনমাল়ো হোতি. তত্থ সম্মজ্জনকৰাতো কচৰরং ছড্ডেতি, সমকরণৰাতো সব্বরতনমযং ৰালিকং সমং করোতি, সিঞ্চনকৰাতো অনোতত্তদহতো আনেত্ৰা উদকং সিঞ্চতি, সুগন্ধকরণৰাতো হিমৰন্ততো সব্বেসং গন্ধরুক্খানং গন্ধে আনেতি, ওচিনকৰাতো পুপ্ফানি ওচিনিত্ৰা ¶ পাতেতি, সন্থরকৰাতো সব্বত্থ সন্থরতি. সদা পঞ্ঞত্তানেৰ চেত্থ আসনানি হোন্তি, যেসু পচ্চেকবুদ্ধুপ্পাদদিৰসে উপোসথদিৰসে চ সব্বপচ্চেকবুদ্ধা সন্নিপতিত্ৰা নিসীদন্তি. অযং তত্থ পকতি. অভিসম্বুদ্ধ-পচ্চেকবুদ্ধো তত্থ গন্ত্ৰা পঞ্ঞত্তাসনে নিসীদতি. ততো সচে তস্মিং কালে অঞ্ঞেপি পচ্চেকবুদ্ধা সংৰিজ্জন্তি, তেপি তঙ্খণং সন্নিপতিত্ৰা পঞ্ঞত্তাসনেসু নিসীদন্তি. নিসীদিত্ৰা চ কিঞ্চিদেৰ সমাপত্তিং সমাপজ্জিত্ৰা ৰুট্ঠহন্তি, ততো সঙ্ঘত্থেরো অধুনাগতপচ্চেকবুদ্ধং সব্বেসং অনুমোদনত্থায ‘‘কথমধিগত’’ন্তি কম্মট্ঠানং পুচ্ছতি. তদাপি সো তমেৰ অত্তনো উদানব্যাকরণগাথং ভাসতি. পুন ভগৰাপি আযস্মতা আনন্দেন পুট্ঠো তমেৰ গাথং ভাসতি, আনন্দো চ সঙ্গীতিযন্তি এৰমেকেকা গাথা পচ্চেকসম্বোধিঅভিসম্বুদ্ধট্ঠানে, মঞ্জূসকমাল়ে ¶ , আনন্দেন পুচ্ছিতকালে, সঙ্গীতিযন্তি চতুক্খত্তুং ভাসিতা হোতীতি.

পঠমগাথাৰণ্ণনা সমত্তা.

৩৬. সংসগ্গজাতস্সাতি কা উপ্পত্তি? অযম্পি পচ্চেকবোধিসত্তো কস্সপস্স ভগৰতো সাসনে ৰীসতি ৰস্সসহস্সানি পুরিমনযেনেৰ সমণধম্মং করোন্তো কসিণপরিকম্মং কত্ৰা, পঠমজ্ঝানং নিব্বত্তেত্ৰা, নামরূপং ৰৰত্থপেত্ৰা, লক্খণসম্মসনং কত্ৰা, অরিযমগ্গং অনধিগম্ম ব্রহ্মলোকে ¶ নিব্বত্তি. সো ততো চুতো বারাণসিরঞ্ঞো অগ্গমহেসিযা কুচ্ছিম্হি উপ্পজ্জিত্ৰা পুরিমনযেনেৰ ৰড্ঢমানো যতো পভুতি ‘‘অযং ইত্থী অযং পুরিসো’’তি ৰিসেসং অঞ্ঞাসি, ততুপাদায ইত্থীনং হত্থে ন রমতি, উচ্ছাদনন্হাপনমণ্ডনাদিমত্তম্পি ন সহতি. তং পুরিসা এৰ পোসেন্তি, থঞ্ঞপাযনকালে ধাতিযো কঞ্চুকং ¶ পটিমুঞ্চিত্ৰা পুরিসৰেসেন থঞ্ঞং পাযেন্তি. সো ইত্থীনং গন্ধং ঘাযিত্ৰা সদ্দং ৰা সুত্ৰা রোদতি, ৰিঞ্ঞুতং পত্তোপি ইত্থিযো পস্সিতুং ন ইচ্ছতি, তেন তং অনিত্থিগন্ধোত্ৰেৰ সঞ্জানিংসু.

তস্মিং সোল়সৰস্সুদ্দেসিকে জাতে রাজা ‘‘কুলৰংসং সণ্ঠপেস্সামী’’তি নানাকুলেহি তস্স অনুরূপা কঞ্ঞাযো আনেত্ৰা অঞ্ঞতরং অমচ্চং আণাপেসি ‘‘কুমারং রমাপেহী’’তি. অমচ্চো উপাযেন তং রমাপেতুকামো তস্স অৰিদূরে সাণিপাকারং পরিক্খিপাপেত্ৰা নাটকানি পযোজাপেসি. কুমারো গীতৰাদিতসদ্দং সুত্ৰা – ‘‘কস্সেসো সদ্দো’’তি আহ. অমচ্চো ‘‘তৰেসো, দেৰ, নাটকিত্থীনং সদ্দো, পুঞ্ঞৰন্তানং ঈদিসানি নাটকানি হোন্তি, অভিরম, দেৰ, মহাপুঞ্ঞোসি ত্ৰ’’ন্তি আহ. কুমারো অমচ্চং দণ্ডেন তাল়াপেত্ৰা নিক্কড্ঢাপেসি. সো রঞ্ঞো আরোচেসি. রাজা কুমারস্স মাতরা সহ গন্ত্ৰা, কুমারং খমাপেত্ৰা, পুন অমচ্চং অপ্পেসি. কুমারো তেহি অতিনিপ্পীল়িযমানো সেট্ঠসুৰণ্ণং দত্ৰা সুৰণ্ণকারে আণাপেসি – ‘‘সুন্দরং ইত্থিরূপং করোথা’’তি. তে ৰিস্সকম্মুনা নিম্মিতসদিসং সব্বালঙ্কারৰিভূসিতং ইত্থিরূপং কত্ৰা দস্সেসুং. কুমারো দিস্ৰা ৰিম্হযেন সীসং চালেত্ৰা মাতাপিতূনং পেসেসি ‘‘যদি ঈদিসিং ইত্থিং লভিস্সামি, গণ্হিস্সামী’’তি. মাতাপিতরো ¶ ‘‘অম্হাকং পুত্তো মহাপুঞ্ঞো, অৰস্সং তেন সহ কতপুঞ্ঞা কাচি দারিকা লোকে উপ্পন্না ভৰিস্সতী’’তি তং সুৰণ্ণরূপং রথং আরোপেত্ৰা অমচ্চানং অপ্পেসুং ‘‘গচ্ছথ, ঈদিসিং দারিকং গৰেসথা’’তি. তে গহেত্ৰা সোল়স মহাজনপদে ৰিচরন্তা তং তং গামং গন্ত্ৰা উদকতিত্থাদীসু যত্থ যত্থ জনসমূহং পস্সন্তি, তত্থ তত্থ দেৰতং ৰিয সুৰণ্ণরূপং ঠপেত্ৰা নানাপুপ্ফৰত্থালঙ্কারেহি পূজং কত্ৰা, ৰিতানং বন্ধিত্ৰা, একমন্তং তিট্ঠন্তি – ‘‘যদি কেনচি এৰরূপা দিট্ঠপুব্বা ভৰিস্সতি, সো কথং সমুট্ঠাপেস্সতী’’তি? এতেনুপাযেন অঞ্ঞত্র মদ্দরট্ঠা সব্বে ¶ জনপদে আহিণ্ডিত্ৰা তং ‘‘খুদ্দকরট্ঠ’’ন্তি অৰমঞ্ঞমানা তত্থ পঠমং অগন্ত্ৰা নিৰত্তিংসু.

ততো নেসং অহোসি ‘‘মদ্দরট্ঠম্পি তাৰ গচ্ছাম, মা নো বারাণসিং পৰিট্ঠেপি রাজা পুন পাহেসী’’তি মদ্দরট্ঠে সাগলনগরং অগমংসু. সাগলনগরে চ মদ্দৰো নাম রাজা. তস্স ধীতা সোল়সৰস্সুদ্দেসিকা অভিরূপা হোতি. তস্সা ৰণ্ণদাসিযো ন্হানোদকত্থায তিত্থং গতা. তত্থ অমচ্চেহি ঠপিতং তং সুৰণ্ণরূপং দূরতোৰ দিস্ৰা ‘‘অম্হে উদকত্থায পেসেত্ৰা রাজপুত্তী সযমেৰ ¶ আগতা’’তি ভণন্তিযো সমীপং গন্ত্ৰা ‘‘নাযং সামিনী, অম্হাকং সামিনী ইতো অভিরূপতরা’’তি আহংসু. অমচ্চা তং সুত্ৰা রাজানং উপসঙ্কমিত্ৰা অনুরূপেন নযেন দারিকং যাচিংসু, সোপি অদাসি. ততো বারাণসিরঞ্ঞো পাহেসুং ‘‘লদ্ধা দারিকা, সামং আগচ্ছিস্সতি, উদাহু অম্হেৰ আনেমা’’তি? সো চ ‘‘মযি আগচ্ছন্তে জনপদপীল়া ভৰিস্সতি, তুম্হেৰ আনেথা’’তি পেসেসি.

অমচ্চা দারিকং গহেত্ৰা নগরা নিক্খমিত্ৰা কুমারস্স পাহেসুং – ‘‘লদ্ধা সুৰণ্ণরূপসদিসী দারিকা’’তি. কুমারো সুত্ৰাৰ রাগেন অভিভূতো পঠমজ্ঝানা পরিহাযি. সো দূতপরম্পরং পেসেসি ‘‘সীঘং আনেথ, সীঘং আনেথা’’তি. তে সব্বত্থ একরত্তিৰাসেনেৰ বারাণসিং পত্ৰা বহিনগরে ঠিতা রঞ্ঞো পাহেসুং – ‘‘অজ্জ পৰিসিতব্বং, নো’’তি? রাজা ‘‘সেট্ঠকুলা আনীতা দারিকা, মঙ্গলকিরিযং কত্ৰা মহাসক্কারেন পৰেসেস্সাম, উয্যানং তাৰ নং নেথা’’তি আণাপেসি. তে তথা অকংসু. সা অচ্চন্তসুখুমালা যানুগ্ঘাতেন উব্বাল়্হা অদ্ধানপরিস্সমেন উপ্পন্নৰাতরোগা মিলাতমালা ৰিয ¶ হুত্ৰা রত্তিংযেৰ কালমকাসি. অমচ্চা ‘‘সক্কারা পরিভট্ঠম্হা’’তি পরিদেৰিংসু. রাজা চ নাগরা চ ‘‘কুলৰংসো ৰিনট্ঠো’’তি পরিদেৰিংসু. নগরে মহাকোলাহলং অহোসি. কুমারস্স সুতমত্তেযেৰ মহাসোকো উদপাদি. ততো কুমারো সোকস্স মূলং খণিতুমারদ্ধো. সো চিন্তেসি – ‘‘অযং সোকো নাম ন অজাতস্স হোতি, জাতস্স পন হোতি, তস্মা জাতিং পটিচ্চ সোকো’’তি. ‘‘জাতি পন কিং ¶ পটিচ্চা’’তি? ততো ‘‘ভৰং পটিচ্চ জাতী’’তি এৰং পুব্বভাৰনানুভাৰেন যোনিসো মনসিকরোন্তো অনুলোমপটিলোমপটিচ্চসমুপ্পাদং দিস্ৰা সঙ্খারে সম্মসন্তো তত্থেৰ নিসিন্নো পচ্চেকবোধিং সচ্ছাকাসি. তং মগ্গফলসুখেন সুখিতং সন্তিন্দ্রিযং সন্তমানসং নিসিন্নং দিস্ৰা, পণিপাতং কত্ৰা, অমচ্চা আহংসু – ‘‘মা সোচি, দেৰ, মহন্তো জম্বুদীপো, অঞ্ঞং ততো সুন্দরতরং আনেস্সামা’’তি. সো আহ – ‘‘নাহং সোচকো, নিস্সোকো পচ্চেকবুদ্ধো অহ’’ন্তি. ইতো পরং সব্বং পুরিমগাথাসদিসমেৰ ঠপেত্ৰা গাথাৰণ্ণনং.

গাথাৰণ্ণনাযং পন সংসগ্গজাতস্সাতি জাতসংসগ্গস্স. তত্থ দস্সন, সৰন, কায, সমুল্লপন, সম্ভোগসংসগ্গৰসেন পঞ্চৰিধো সংসগ্গো. তত্থ অঞ্ঞমঞ্ঞং দিস্ৰা চক্খুৰিঞ্ঞাণৰীথিৰসেন উপ্পন্নরাগো দস্সনসংসগ্গো নাম. তত্থ সীহল়দীপে কাল়দীঘৰাপীগামে পিণ্ডায চরন্তং কল্যাণৰিহারৰাসীদীঘভাণকদহরভিক্খুং দিস্ৰা পটিবদ্ধচিত্তা কেনচি উপাযেন তং অলভিত্ৰা, কালকতা কুটুম্বিযধীতা, তস্সা নিৰাসনচোল়খণ্ডং দিস্ৰা ‘‘এৰরূপৰত্থধারিনিযা ¶ নাম সদ্ধিং সংৰাসং নালত্থ’’ন্তি হদযং ফালেত্ৰা কালকতো. সো এৰ চ দহরো নিদস্সনং.

পরেহি পন কথিযমানং রূপাদিসম্পত্তিং অত্তনা ৰা হসিতলপিতগীতসদ্দং সুত্ৰা সোতৰিঞ্ঞাণৰীথিৰসেন উপ্পন্নো রাগো সৰনসংসগ্গো নাম. তত্রাপি গিরিগামৰাসীকম্মারধীতায পঞ্চহি কুমারীহি সদ্ধিং পদুমস্সরং গন্ত্ৰা, ন্হত্ৰা মালং আরোপেত্ৰা, উচ্চাসদ্দেন গাযন্তিযা আকাসেন গচ্ছন্তো সদ্দং সুত্ৰা কামরাগেন ৰিসেসা পরিহাযিত্ৰা অনযব্যসনং পত্তো পঞ্চগ্গল়লেণৰাসী তিস্সদহরো নিদস্সনং.

অঞ্ঞমঞ্ঞং অঙ্গপরামসনেন উপ্পন্নরাগো কাযসংসগ্গো নাম. ধম্মগাযনদহরভিক্খু ¶ চেত্থ নিদস্সনং. মহাৰিহারে কির দহরভিক্খু ধম্মং ভাসতি ¶ . তত্থ মহাজনে আগতে রাজাপি অগমাসি সদ্ধিং অন্তেপুরেন. ততো রাজধীতায তস্স রূপঞ্চ সদ্দঞ্চ আগম্ম বলৰরাগো উপ্পন্নো, তস্স চ দহরস্সাপি. তং দিস্ৰা রাজা সল্লক্খেত্ৰা সাণিপাকারেন পরিক্খিপাপেসি. তে অঞ্ঞমঞ্ঞং পরামসিত্ৰা আলিঙ্গিংসু. পুন সাণিপাকারং অপনেত্ৰা পস্সন্তা দ্ৰেপি কালকতেযেৰ অদ্দসংসূতি.

অঞ্ঞমঞ্ঞং আলপনসমুল্লপনে উপ্পন্নো রাগো পন সমুল্লপনসংসগ্গো নাম. ভিক্খুভিক্খুনীহি সদ্ধিং পরিভোগকরণে উপ্পন্নরাগো সম্ভোগসংসগ্গো নাম. দ্ৰীসুপি চেতেসু পারাজিকপ্পত্তো ভিক্খু চ ভিক্খুনী চ নিদস্সনং. মরিচিৰট্টিনামমহাৰিহারমহে কির দুট্ঠগামণি অভযমহারাজা মহাদানং পটিযাদেত্ৰা উভতোসঙ্ঘং পরিৰিসতি. তত্থ উণ্হযাগুযা দিন্নায সঙ্ঘনৰকসামণেরী অনাধারকস্স সঙ্ঘনৰকসামণেরস্স দন্তৰলযং দত্ৰা সমুল্লাপং অকাসি. তে উভোপি উপসম্পজ্জিত্ৰা সট্ঠিৰস্সা হুত্ৰা পরতীরং গতা অঞ্ঞমঞ্ঞং সমুল্লাপেন পুব্বসঞ্ঞং পটিলভিত্ৰা তাৰদেৰ জাতসিনেহা সিক্খাপদং ৰীতিক্কমিত্ৰা পারাজিকা অহেসুন্তি.

এৰং পঞ্চৰিধে সংসগ্গে যেন কেনচি সংসগ্গেন জাতসংসগ্গস্স ভৰতি স্নেহো, পুরিমরাগপচ্চযা বলৰরাগো উপ্পজ্জতি. ততো স্নেহন্ৰযং দুক্খমিদং পহোতি তমেৰ স্নেহং অনুগচ্ছন্তং সন্দিট্ঠিকসম্পরাযিকসোকপরিদেৰাদিনানপ্পকারকং দুক্খমিদং পহোতি, নিব্বত্ততি, ভৰতি, জাযতি. অপরে পন ‘‘আরম্মণে চিত্তস্স ৰোস্সগ্গো সংসগ্গো’’তি ভণন্তি. ততো স্নেহো, স্নেহা দুক্খমিদন্তি.

এৰমত্থপ্পভেদং ¶ ¶ ইমং অড্ঢগাথং ৰত্ৰা সো পচ্চেকবুদ্ধো আহ – ‘‘স্ৰাহং যমিদং স্নেহন্ৰযং সোকাদিদুক্খং পহোতি, তস্স দুক্খস্স মূলং খনন্তো পচ্চেকসম্বোধিমধিগতো’’তি. এৰং ৰুত্তে তে অমচ্চা আহংসু – ‘‘অম্হেহি দানি, ভন্তে, কিং কাতব্ব’’ন্তি? ততো সো আহ – ‘‘তুম্হে ৰা অঞ্ঞে ৰা যো ইমম্হা দুক্খা মুচ্চিতুকামো, সো সব্বোপি আদীনৰং স্নেহজং পেক্খমানো, একো চরে খগ্গৰিসাণকপ্পো’’তি. এত্থ চ যং ‘‘স্নেহন্ৰযং দুক্খমিদং পহোতী’’তি ৰুত্তং ‘‘তদেৰ সন্ধায আদীনৰং স্নেহজং পেক্খমানো’’তি ইদং ৰুত্তন্তি ৰেদিতব্বং. অথ ৰা যথাৰুত্তেন সংসগ্গেন সংসগ্গজাতস্স ভৰতি স্নেহো, স্নেহন্ৰযং দুক্খমিদং পহোতি, এতং যথাভূতং আদীনৰং স্নেহজং পেক্খমানো অহং অধিগতোতি. এৰং অভিসম্বন্ধিত্ৰা চতুত্থপাদো পুব্বে ৰুত্তনযেনেৰ ¶ উদানৰসেন ৰুত্তোপি ৰেদিতব্বো. ততো পরং সব্বং পুরিমগাথায ৰুত্তসদিসমেৰাতি.

সংসগ্গগাথাৰণ্ণনা সমত্তা.

৩৭. মিত্তে সুহজ্জেতি কা উপ্পত্তি? অযং পচ্চেকবোধিসত্তো পুরিমগাথায ৰুত্তনযেনেৰ উপ্পজ্জিত্ৰা বারাণসিযং রজ্জং কারেন্তো পঠমং ঝানং নিব্বত্তেত্ৰা ‘‘কিং সমণধম্মো ৰরো, রজ্জং ৰর’’ন্তি ৰীমংসিত্ৰা চতুন্নং অমচ্চানং হত্থে রজ্জং নিয্যাতেত্ৰা সমণধম্মং করোতি. অমচ্চা ‘‘ধম্মেন সমেন করোথা’’তি ৰুত্তাপি লঞ্জং গহেত্ৰা অধম্মেন করোন্তি. তে লঞ্জং গহেত্ৰা সামিকে পরাজেন্তা একদা অঞ্ঞতরং রাজৰল্লভং পরাজেসুং. সো রঞ্ঞো ভত্তহারকেন সদ্ধিং পৰিসিত্ৰা সব্বং আরোচেসি. রাজা দুতিযদিৰসে সযং ৰিনিচ্ছযট্ঠানং অগমাসি. ততো মহাজনকাযা – ‘‘অমচ্চা সামিকে অসামিকে করোন্তী’’তি মহাসদ্দং করোন্তা মহাযুদ্ধং ৰিয অকংসু. অথ রাজা ৰিনিচ্ছযট্ঠানা ৰুট্ঠায পাসাদং অভিরুহিত্ৰা সমাপত্তিং অপ্পেতুং নিসিন্নো তেন সদ্দেন ৰিক্খিত্তচিত্তো ¶ ন সক্কোতি অপ্পেতুং. সো ‘‘কিং মে রজ্জেন, সমণধম্মো ৰরো’’তি রজ্জসুখং পহায পুন সমাপত্তিং নিব্বত্তেত্ৰা পুব্বে ৰুত্তনযেনেৰ ৰিপস্সন্তো পচ্চেকসম্বোধিং সচ্ছাকাসি. কম্মট্ঠানঞ্চ পুচ্ছিতো ইমং গাথং অভাসি –

‘‘মিত্তে সুহজ্জে অনুকম্পমানো, হাপেতি অত্থং পটিবদ্ধচিত্তো;

এতং ভযং সন্থৰে পেক্খমানো, একো চরে খগ্গৰিসাণকপ্পো’’তি.

তত্থ মেত্তাযনৰসেন মিত্তা. সুহদযভাৰেন সুহজ্জা. কেচি হি একন্তহিতকামতায মিত্তাৰ হোন্তি, ন সুহজ্জা. কেচি গমনাগমনট্ঠাননিসজ্জাসমুল্লাপাদীসু হদযসুখজননেন সুহজ্জাৰ হোন্তি, ন মিত্তা. কেচি তদুভযৰসেন সুহজ্জা চেৰ মিত্তা চ. তে দুৰিধা হোন্তি ¶ – অগারিযা অনগারিযা চ. তত্থ অগারিযা তিৰিধা হোন্তি – উপকারো, সমানসুখদুক্খো, অনুকম্পকোতি. অনগারিযা ৰিসেসেন অত্থক্খাযিনো এৰ. তে চতূহি অঙ্গেহি সমন্নাগতা হোন্তি. যথাহ –

‘‘চতূহি ¶ খো, গহপতিপুত্ত, ঠানেহি উপকারো মিত্তো সুহদো ৰেদিতব্বো – পমত্তং রক্খতি, পমত্তস্স সাপতেয্যং রক্খতি, ভীতস্স সরণং হোতি, উপ্পন্নেসু কিচ্চকরণীযেসু তদ্দিগুণং ভোগং অনুপ্পদেতি’’ (দী. নি. ৩.২৬১).

তথা –

‘‘চতূহি খো, গহপতিপুত্ত, ঠানেহি সমানসুখদুক্খো মিত্তো সুহদো ৰেদিতব্বো – গুয্হমস্স আচিক্খতি, গুয্হমস্স পরিগূহতি, আপদাসু ন ৰিজহতি, জীৰিতম্পিস্স অত্থায পরিচ্চত্তং হোতি’’ (দী. নি. ৩.২৬২).

তথা –

‘‘চতূহি খো, গহপতিপুত্ত, ঠানেহি অনুকম্পকো মিত্তো সুহদো ৰেদিতব্বো – অভৰেনস্স ন নন্দতি, ভৰেনস্স নন্দতি, অৰণ্ণং ভণমানং নিৰারেতি, ৰণ্ণং ভণমানং পসংসতি’’ (দী. নি. ৩.২৬৪).

তথা –

‘‘চতূহি খো, গহপতিপুত্ত, ঠানেহি অত্থক্খাযী মিত্তো সুহদো ৰেদিতব্বো – পাপা নিৰারেতি, কল্যাণে নিৰেসেতি, অস্সুতং সাৰেতি, সগ্গস্স মগ্গং আচিক্খতী’’তি (দী. নি. ৩.২৬৩).

তেস্ৰিধ অগারিযা অধিপ্পেতা. অত্থতো পন সব্বেপি যুজ্জন্তি. তে মিত্তে সুহজ্জে. অনুকম্পমানোতি অনুদযমানো. তেসং সুখং উপসংহরিতুকামো দুক্খং ¶ অপহরিতুকামো চ.

হাপেতি অত্থন্তি দিট্ঠধম্মিকসম্পরাযিকপরমত্থৰসেন তিৰিধং, তথা অত্তত্থপরত্থউভযত্থৰসেনাপি ¶ তিৰিধং. অত্থং লদ্ধৰিনাসনেন অলদ্ধানুপ্পাদনেনাতি দ্ৰিধাপি হাপেতি ৰিনাসেতি. পটিবদ্ধচিত্তোতি ‘‘অহং ইমং ৰিনা ন জীৰামি, এস মে গতি, এস মে পরাযণ’’ন্তি এৰং অত্তানং নীচে ঠানে ঠপেন্তোপি পটিবদ্ধচিত্তো হোতি. ‘‘ইমে মং ৰিনা ন জীৰন্তি, অহং তেসং গতি, তেসং পরাযণ’’ন্তি এৰং অত্তানং উচ্চে ঠানে ঠপেন্তোপি পটিবদ্ধচিত্তো হোতি. ইধ পন এৰং পটিবদ্ধচিত্তো অধিপ্পেতো. এতং ভযন্তি এতং অত্থহাপনভযং, অত্তনো সমাপত্তিহানিং সন্ধায ৰুত্তং. সন্থৰেতি ¶ তিৰিধো সন্থৰো – তণ্হাদিট্ঠিমিত্তসন্থৰৰসেন. তত্থ অট্ঠসতপ্পভেদাপি তণ্হা তণ্হাসন্থৰো, দ্ৰাসট্ঠিভেদাপি দিট্ঠি দিট্ঠিসন্থৰো, পটিবদ্ধচিত্ততায মিত্তানুকম্পনা মিত্তসন্থৰো. সো ইধাধিপ্পেতো. তেন হিস্স সমাপত্তি পরিহীনা. তেনাহ – ‘‘এতং ভযং সন্থৰে পেক্খমানো অহমধিগতো’’তি. সেসং ৰুত্তসদিসমেৰাতি ৰেদিতব্বন্তি.

মিত্তসুহজ্জগাথাৰণ্ণনা সমত্তা.

৩৮. ৰংসো ৰিসালোতি কা উপ্পত্তি? পুব্বে কির কস্সপস্স ভগৰতো সাসনে তযো পচ্চেকবোধিসত্তা পব্বজিত্ৰা ৰীসতি ৰস্সসহস্সানি গতপচ্চাগতৰত্তং পূরেত্ৰা দেৰলোকে উপ্পন্না. ততো চৰিত্ৰা তেসং জেট্ঠকো বারাণসিরাজকুলে নিব্বত্তো, ইতরে পচ্চন্তরাজকুলেসু. তে উভোপি কম্মট্ঠানং উগ্গণ্হিত্ৰা, রজ্জং পহায পব্বজিত্ৰা, অনুক্কমেন পচ্চেকবুদ্ধা হুত্ৰা, নন্দমূলকপব্ভারে ৰসন্তা একদিৰসং সমাপত্তিতো ৰুট্ঠায ‘‘মযং কিং কম্মং কত্ৰা ইমং লোকুত্তরসুখং অনুপ্পত্তা’’তি আৰজ্জেত্ৰা পচ্চৰেক্খমানা কস্সপবুদ্ধকালে অত্তনো চরিযং অদ্দসংসু. ততো ‘‘ততিযো কুহি’’ন্তি আৰজ্জেন্তা বারাণসিযং রজ্জং ¶ কারেন্তং দিস্ৰা তস্স গুণে সরিত্ৰা ‘‘সো পকতিযাৰ অপ্পিচ্ছতাদিগুণসমন্নাগতো অহোসি, অম্হাকঞ্ঞেৰ ওৰাদকো ৰত্তা ৰচনক্খমো পাপগরহী, হন্দ, নং আরম্মণং দস্সেত্ৰা মোচেস্সামা’’তি ওকাসং গৰেসন্তা তং একদিৰসং সব্বালঙ্কারৰিভূসিতং উয্যানং গচ্ছন্তং দিস্ৰা আকাসেনাগন্ত্ৰা উয্যানদ্ৰারে ৰেল়ুগুম্বমূলে অট্ঠংসু. মহাজনো অতিত্তো রাজদস্সনেন রাজানং ওলোকেতি. ততো রাজা ‘‘অত্থি নু খো কোচি মম দস্সনে অব্যাৰটো’’তি ওলোকেন্তো পচ্চেকবুদ্ধে অদ্দক্খি. সহ দস্সনেনেৰ চস্স তেসু সিনেহো উপ্পজ্জি.

সো হত্থিক্খন্ধা ওরুয্হ সন্তেন উপচারেন তে উপসঙ্কমিত্ৰা ‘‘ভন্তে, কিং নামা তুম্হে’’তি পুচ্ছি. তে আহংসু ‘‘মযং, মহারাজ, অসজ্জমানা নামা’’তি. ‘‘ভন্তে, ‘অসজ্জমানা’তি এতস্স কো অত্থো’’তি? ‘‘অলগ্গনত্থো, মহারাজা’’তি. ততো তং ৰেল়ুগুম্বং দস্সেন্তা আহংসু – ‘‘সেয্যথাপি, মহারাজ, ইমং ৰেল়ুগুম্বং সব্বসো মূলখন্ধসাখানুসাখাহি সংসিব্বিত্ৰা ¶ ঠিতং অসিহত্থো পুরিসো মূলে ছেত্ৰা আৰিঞ্ছন্তো ন সক্কুণেয্য উদ্ধরিতুং ¶ , এৰমেৰ ত্ৰং অন্তো চ বহি চ জটায জটিতো আসত্তৰিসত্তো তত্থ লগ্গো. সেয্যথাপি ৰা পনস্স ৰেমজ্ঝগতোপি অযং ৰংসকল়ীরো অসঞ্জাতসাখত্তা কেনচি অলগ্গো ঠিতো, সক্কা চ পন অগ্গে ৰা মূলে ৰা ছেত্ৰা উদ্ধরিতুং, এৰমেৰ মযং কত্থচি অসজ্জমানা সব্বদিসা গচ্ছামা’’তি তাৰদেৰ চতুত্থজ্ঝানং সমাপজ্জিত্ৰা পস্সতো এৰ রঞ্ঞো আকাসেন নন্দমূলকপব্ভারং অগমংসু. ততো রাজা চিন্তেসি – ‘‘কদা নু খো অহম্পি এৰং অসজ্জমানো ভৰেয্য’’ন্তি তত্থেৰ নিসীদিত্ৰা ৰিপস্সন্তো পচ্চেকবোধিং সচ্ছাকাসি. পুরিমনযেনেৰ কম্মট্ঠানং পুচ্ছিতো ইমং গাথং অভাসি –

‘‘ৰংসো ৰিসালোৰ যথা ৰিসত্তো, পুত্তেসু দারেসু চ যা অপেক্খা;

ৰংসক্কল়ীরোৰ অসজ্জমানো, একো চরে খগ্গৰিসাণকপ্পো’’তি.

তত্থ ¶ ৰংসোতি ৰেল়ু. ৰিসালোতি ৰিত্থিণ্ণো. চকারো অৰধারণত্থো, এৰকারো ৰা অযং, সন্ধিৰসেনেত্থ একারো নট্ঠো. তস্স পরপদেন সম্বন্ধো, তং পচ্ছা যোজেস্সাম. যথাতি পটিভাগে. ৰিসত্তোতি লগ্গো, জটিতো সংসিব্বিতো. পুত্তেসু দারেসু চাতি পুত্তধীতুভরিযাসু. যা অপেক্খাতি যা তণ্হা যো স্নেহো. ৰংসক্কল়ীরোৰ অসজ্জমানোতি ৰংসকল়ীরো ৰিয অলগ্গমানো. কিং ৰুত্তং হোতি? যথা ৰংসো ৰিসালো ৰিসত্তো এৰ হোতি, পুত্তেসু দারেসু চ যা অপেক্খা, সাপি এৰং তানি ৰত্থূনি সংসিব্বিত্ৰা ঠিতত্তা ৰিসত্তা এৰ. স্ৰাহং তায অপেক্খায অপেক্খৰা ৰিসালো ৰংসো ৰিয ৰিসত্তোতি এৰং অপেক্খায আদীনৰং দিস্ৰা তং অপেক্খং মগ্গঞাণেন ছিন্দন্তো অযং ৰংসকল়ীরোৰ রূপাদীসু ৰা লোভাদীসু ৰা কামভৰাদীসু ৰা দিট্ঠাদীসু ৰা তণ্হামানদিট্ঠিৰসেন অসজ্জমানো পচ্চেকবোধিং অধিগতোতি. সেসং পুরিমনযেনেৰ ৰেদিতব্বন্তি.

ৰংসকল়ীরগাথাৰণ্ণনা সমত্তা.

৩৯. মিগো ¶ অরঞ্ঞম্হীতি কা উপ্পত্তি? একো কির ভিক্খু কস্সপস্স ভগৰতো সাসনে যোগাৰচরো কালং কত্ৰা, বারাণসিযং সেট্ঠিকুলে উপ্পন্নো অড্ঢে মহদ্ধনে মহাভোগে, সো সুভগো অহোসি. ততো পরদারিকো হুত্ৰা তত্থ কালকতো নিরযে নিব্বত্তো তত্থ পচ্চিত্ৰা ৰিপাকাৰসেসেন সেট্ঠিভরিযায কুচ্ছিম্হি ইত্থিপটিসন্ধিং অগ্গহেসি. নিরযতো আগতানং গত্তানি উণ্হানি হোন্তি. তেন সেট্ঠিভরিযা ডয্হমানেন উদরেন কিচ্ছেন কসিরেন তং গব্ভং ধারেত্ৰা ¶ কালেন দারিকং ৰিজাযি. সা জাতদিৰসতো পভুতি মাতাপিতূনং সেসবন্ধুপরিজনানঞ্চ দেস্সা অহোসি. ৰযপ্পত্তা চ যম্হি কুলে দিন্না, তত্থাপি সামিকসস্সুসসুরানং দেস্সাৰ অহোসি অপ্পিযা অমনাপা. অথ নক্খত্তে ঘোসিতে সেট্ঠিপুত্তো তায সদ্ধিং কীল়িতুং অনিচ্ছন্তো ৰেসিং আনেত্ৰা কীল়তি. সা তং দাসীনং সন্তিকা সুত্ৰা সেট্ঠিপুত্তং উপসঙ্কমিত্ৰা নানপ্পকারেহি অনুনযিত্ৰা আহ – ‘‘অয্যপুত্ত, ইত্থী নাম সচেপি দসন্নং রাজূনং কনিট্ঠা হোতি, চক্কৰত্তিনো ৰা ধীতা, তথাপি সামিকস্স পেসনকরা হোতি. সামিকে অনালপন্তে সূলে আরোপিতা ৰিয দুক্খং পটিসংৰেদেতি. সচে ¶ অহং অনুগ্গহারহা, অনুগ্গহেতব্বা. নো চে, ৰিস্সজ্জেতব্বা, অত্তনো ঞাতিকুলং গমিস্সামী’’তি. সেট্ঠিপুত্তো – ‘‘হোতু, ভদ্দে, মা সোচি, কীল়নসজ্জা হোহি, নক্খত্তং কীল়িস্সামা’’তি আহ. সেট্ঠিধীতা তাৰতকেনপি সল্লাপমত্তেন উস্সাহজাতা ‘‘স্ৰে নক্খত্তং কীল়িস্সামী’’তি বহুং খজ্জভোজ্জং পটিযাদেতি. সেট্ঠিপুত্তো দুতিযদিৰসে অনারোচেত্ৰাৰ কীল়নট্ঠানং গতো. সা ‘‘ইদানি পেসেস্সতি, ইদানি পেসেস্সতী’’তি মগ্গং ওলোকেন্তী নিসিন্না উস্সূরং দিস্ৰা মনুস্সে পেসেসি. তে পচ্চাগন্ত্ৰা ‘‘সেট্ঠিপুত্তো গতো’’তি আরোচেসুং. সা সব্বং তং পটিযাদিতং আদায যানং অভিরুহিত্ৰা উয্যানং গন্তুং আরদ্ধা.

অথ নন্দমূলকপব্ভারে পচ্চেকসম্বুদ্ধো সত্তমে দিৰসে নিরোধা ৰুট্ঠায অনোতত্তে মুখং ধোৰিত্ৰা নাগলতাদন্তপোণং খাদিত্ৰা ‘‘কত্থ অজ্জ ভিক্খং চরিস্সামী’’তি আৰজ্জেন্তো তং সেট্ঠিধীতরং দিস্ৰা ‘‘ইমিস্সা মযি সক্কারং করিত্ৰা তং কম্মং পরিক্খযং গমিস্সতী’’তি ঞত্ৰা পব্ভারসমীপে ¶ সট্ঠিযোজনং মনোসিলাতলং, তত্থ ঠত্ৰা নিৰাসেত্ৰা পত্তচীৰরমাদায অভিঞ্ঞাপাদকজ্ঝানং সমাপজ্জিত্ৰা আকাসেনাগন্ত্ৰা তস্সা পটিপথে ওরুয্হ বারাণসীভিমুখো অগমাসি. তং দিস্ৰা দাসিযো সেট্ঠিধীতায আরোচেসুং. সা যানা ওরুয্হ সক্কচ্চং ৰন্দিত্ৰা, পত্তং গহেত্ৰা, সব্বরসসম্পন্নেন খাদনীযভোজনীযেন পূরেত্ৰা, পদুমপুপ্ফেন পটিচ্ছাদেত্ৰা হেট্ঠাপি পদুমপুপ্ফং কত্ৰা, পুপ্ফকলাপং হত্থেন গহেত্ৰা, পচ্চেকবুদ্ধং উপসঙ্কমিত্ৰা, তস্স হত্থে পত্তং দত্ৰা, ৰন্দিত্ৰা, পুপ্ফকলাপহত্থা পত্থেসি ‘‘ভন্তে, যথা ইদং পুপ্ফং, এৰাহং যত্থ যত্থ উপ্পজ্জামি, তত্থ তত্থ মহাজনস্স পিযা ভৰেয্যং মনাপা’’তি. এৰং পত্থেত্ৰা দুতিযং পত্থেসি ‘‘ভন্তে, দুক্খো গব্ভৰাসো, তং অনুপগম্ম পদুমপুপ্ফে এৰং পটিসন্ধি ভৰেয্যা’’তি. ততিযম্পি পত্থেসি ‘‘ভন্তে, জিগুচ্ছনীযো মাতুগামো, চক্কৰত্তিধীতাপি পরৰসং গচ্ছতি, তস্মা অহং ইত্থিভাৰং অনুপগম্ম পুরিসো ভৰেয্য’’ন্তি. চতুত্থম্পি ¶ পত্থেসি ‘‘ভন্তে, ইমং সংসারদুক্খং অতিক্কম্ম পরিযোসানে তুম্হেহি পত্তং অমতং পাপুণেয্য’’ন্তি.

এৰং ¶ চতুরো পণিধযো কত্ৰা, তং পদুমপুপ্ফকলাপং পূজেত্ৰা, পচ্চেকবুদ্ধস্স পঞ্চপতিট্ঠিতেন ৰন্দিত্ৰা ‘‘পুপ্ফসদিসো এৰ মে গন্ধো চেৰ ৰণ্ণো চ হোতূ’’তি ইমং পঞ্চমং পণিধিং অকাসি. ততো পচ্চেকবুদ্ধো পত্তং পুপ্ফকলাপঞ্চ গহেত্ৰা আকাসে ঠত্ৰা –

‘‘ইচ্ছিতং পত্থিতং তুয্হং, খিপ্পমেৰ সমিজ্ঝতু;

সব্বে পূরেন্তু সঙ্কপ্পা, চন্দো পন্নরসো যথা’’তি. –

ইমায গাথায সেট্ঠিধীতায অনুমোদনং কত্ৰা ‘‘সেট্ঠিধীতা মং গচ্ছন্তং পস্সতূ’’তি অধিট্ঠহিত্ৰা নন্দমূলকপব্ভারং অগমাসি. সেট্ঠিধীতায তং দিস্ৰা মহতী পীতি উপ্পন্না. ভৰন্তরে কতং অকুসলকম্মং অনোকাসতায পরিক্খীণং, চিঞ্চম্বিলধোততম্বভাজনমিৰ সুদ্ধা জাতা. তাৰদেৰ চস্সা পতিকুলে ঞাতিকুলে চ সব্বো জনো তুট্ঠো ‘‘কিং করোমা’’তি পিযৰচনানি পণ্ণাকারানি চ পেসেসি. সেট্ঠিপুত্তো মনুস্সে পেসেসি ‘‘সীঘং সীঘং আনেথ সেট্ঠিধীতরং, অহং ৰিস্সরিত্ৰা উয্যানং আগতো’’তি. ততো পভুতি চ নং উরে ৰিলিত্তচন্দনং ৰিয আমুত্তমুত্তাহারং ৰিয পুপ্ফমালং ৰিয চ পিযাযন্তো পরিহরি.

সা ¶ তত্থ যাৰতাযুকং ইস্সরিযভোগসুখং অনুভৰিত্ৰা কালং কত্ৰা পুরিসভাৰেন দেৰলোকে পদুমপুপ্ফে উপ্পজ্জি. সো দেৰপুত্তো গচ্ছন্তোপি পদুমপুপ্ফগব্ভেযেৰ গচ্ছতি, তিট্ঠন্তোপি, নিসীদন্তোপি, সযন্তোপি পদুমগব্ভেযেৰ সযতি. মহাপদুমদেৰপুত্তোতি চস্স নামং অকংসু. এৰং সো তেন ইদ্ধানুভাৰেন অনুলোমপটিলোমং ছদেৰলোকে এৰ সংসরতি.

তেন ¶ চ সমযেন বারাণসিরঞ্ঞো ৰীসতি ইত্থিসহস্সানি হোন্তি. রাজা একিস্সাপি কুচ্ছিযং পুত্তং ন লভতি. অমচ্চা রাজানং ৰিঞ্ঞাপেসুং ‘‘দেৰ, কুলৰংসানুপালকো পুত্তো ইচ্ছিতব্বো, অত্রজে অৰিজ্জমানে খেত্রজোপি কুলৰংসধরো হোতী’’তি. রাজা ‘‘ঠপেত্ৰা মহেসিং অৰসেসা নাটকিত্থিযো সত্তাহং ধম্মনাটকং করোথা’’তি যথাকামং বহি চরাপেসি, তথাপি পুত্তং নালত্থ. পুন অমচ্চা আহংসু – ‘‘মহারাজ, মহেসী নাম পুঞ্ঞেন চ পঞ্ঞায চ সব্বিত্থীনং অগ্গা, অপ্পেৰ নাম দেৰো মহেসিযাপি কুচ্ছিস্মিং পুত্তং লভেয্যা’’তি. রাজা মহেসিযা এতমত্থং আরোচেসি. সা আহ – ‘‘মহারাজ, যা ইত্থী সচ্চৰাদিনী সীলৰতী, সা পুত্তং লভেয্য, হিরোত্তপ্পরহিতায কুতো পুত্তো’’তি পাসাদং অভিরুহিত্ৰা পঞ্চ সীলানি সমাদিযিত্ৰা পুনপ্পুনং অনুমজ্জতি. সীলৰতিযা রাজধীতায পঞ্চ সীলানি অনুমজ্জন্তিযা পুত্তপত্থনাচিত্তে উপ্পন্নমত্তে সক্কস্স আসনং সন্তপ্পি.

অথ ¶ সক্কো আসনতাপকারণং আৰজ্জেন্তো এতমত্থং ৰিদিত্ৰা ‘‘সীলৰতিযা রাজধীতায পুত্তৰরং দেমী’’তি আকাসেনাগন্ত্ৰা দেৰিযা সম্মুখে ঠত্ৰা ‘‘কিং পত্থেসি দেৰী’’তি পুচ্ছি. ‘‘পুত্তং, মহারাজা’’তি. ‘‘দম্মি তে, দেৰি, পুত্তং, মা চিন্তযী’’তি ৰত্ৰা দেৰলোকং গন্ত্ৰা ‘‘অত্থি নু খো এত্থ খীণাযুকো’’তি আৰজ্জেন্তো ‘‘অযং মহাপদুমো উপরিদেৰলোকে উপ্পজ্জিতুং ইতো চৰতী’’তি ঞত্ৰা তস্স ৰিমানং গন্ত্ৰা ‘‘তাত মহাপদুম, মনুস্সলোকং গচ্ছাহী’’তি যাচি. সো আহ – ‘‘মহারাজ, মা এৰং ভণি, জেগুচ্ছো মনুস্সলোকো’’তি. ‘‘তাত, ত্ৰং মনুস্সলোকে পুঞ্ঞং কত্ৰা ইধূপপন্নো, তত্থেৰ ঠত্ৰা পারমিযো পূরেতব্বা, গচ্ছ, তাতা’’তি. ‘‘দুক্খো, মহারাজ, গব্ভৰাসো, ন সক্কোমি তত্থ ৰসিতু’’ন্তি. ‘‘কিং তে, তাত, গব্ভৰাসেন, তথা হি ত্ৰং কম্মমকাসি, যথা ¶ পদুমগব্ভেযেৰ নিব্বত্তিস্সসি, গচ্ছ, তাতা’’তি পুনপ্পুনং ৰুচ্চমানো অধিৰাসেসি.

ততো মহাপদুমো দেৰলোকা চৰিত্ৰা বারাণসিরঞ্ঞো ¶ উয্যানে সিলাপট্টপোক্খরণিযং পদুমগব্ভে নিব্বত্তো. তঞ্চ রত্তিং মহেসী পচ্চূসসমযে সুপিনন্তেন ৰীসতিইত্থিসহস্সপরিৰুতা উয্যানং গন্ত্ৰা সিলাপট্টপোক্খরণিযং পদুমস্সরে পুত্তং লদ্ধা ৰিয অহোসি. সা পভাতায রত্তিযা সীলানি রক্খমানা তথেৰ তত্থ গন্ত্ৰা একং পদুমপুপ্ফং অদ্দস. তং নেৰ তীরে হোতি ন গম্ভীরে. সহ দস্সনেনেৰ চস্সা তত্থ পুত্তসিনেহো উপ্পজ্জি. সা সামংযেৰ পৰিসিত্ৰা তং পুপ্ফং অগ্গহেসি. পুপ্ফে গহিতমত্তেযেৰ পত্তানি ৰিকসিংসু. তত্থ তট্টকে আসিত্তসুৰণ্ণপটিমং ৰিয দারকং অদ্দস. দিস্ৰাৰ ‘‘পুত্তো মে লদ্ধো’’তি সদ্দং নিচ্ছারেসি. মহাজনো সাধুকারসহস্সানি মুঞ্চি, রঞ্ঞো চ পেসেসি. রাজা সুত্ৰা ‘‘কত্থ লদ্ধো’’তি পুচ্ছিত্ৰা লদ্ধোকাসঞ্চ সুত্ৰা ‘‘উয্যানঞ্চ পোক্খরণিযং পদুমঞ্চ অম্হাকঞ্ঞেৰ খেত্তং, তস্মা অম্হাকং খেত্তে জাতত্তা খেত্রজো নামাযং পুত্তো’’তি ৰত্ৰা নগরং পৰেসেত্ৰা ৰীসতিসহস্সইত্থিযো ধাতিকিচ্চং কারাপেসি. যা যা কুমারস্স রুচিং ঞত্ৰা পত্থিতপত্থিতং খাদনীযং খাদাপেতি, সা সা সহস্সং লভতি. সকলবারাণসী চলিতা, সব্বো জনো কুমারস্স পণ্ণাকারসহস্সানি পেসেসি. কুমারো তং তং অতিনেত্ৰা ‘‘ইমং খাদ, ইমং ভুঞ্জা’’তি ৰুচ্চমানো ভোজনেন উব্বাল়্হো উক্কণ্ঠিতো হুত্ৰা, গোপুরদ্ৰারং গন্ত্ৰা, লাখাগুল়কেন কীল়তি.

তদা অঞ্ঞতরো পচ্চেকবুদ্ধো বারাণসিং নিস্সায ইসিপতনে ৰসতি. সো কালস্সেৰ ৰুট্ঠায সেনাসনৰত্তসরীরপরিকম্মমনসিকারাদীনি সব্বকিচ্চানি কত্ৰা, পটিসল্লানা ৰুট্ঠিতো ‘‘অজ্জ কত্থ ভিক্খং গহেস্সামী’’তি আৰজ্জেন্তো কুমারস্স সম্পত্তিং দিস্ৰা ‘‘এস পুব্বে কিং কম্মং করী’’তি ৰীমংসন্তো ‘‘মাদিসস্স পিণ্ডপাতং দত্ৰা, চতস্সো পত্থনা পত্থেসি তত্থ তিস্সো ¶ সিদ্ধা, একা তাৰ ন সিজ্ঝতি, তস্স উপাযেন আরম্মণং দস্সেমী’’তি ভিক্খাচরিযৰসেন ¶ কুমারস্স সন্তিকং অগমাসি. কুমারো তং দিস্ৰা ‘‘সমণ, মা ইধ আগচ্ছি, ইমে হি তম্পি ‘ইদং খাদ, ইদং ভুঞ্জা’তি ৰদেয্যু’’ন্তি আহ. সো একৰচনেনেৰ ততো নিৰত্তিত্ৰা ¶ অত্তনো সেনাসনং পাৰিসি. কুমারো পরিজনং আহ – ‘‘অযং সমণো মযা ৰুত্তমত্তোৰ নিৰত্তো, কুদ্ধো, নু, খো মমা’’তি. ততো তেহি ‘‘পব্বজিতা নাম, দেৰ, ন কোধপরাযণা হোন্তি, পরেন পসন্নমনেন যং দিন্নং হোতি, তেন যাপেন্তী’’তি ৰুচ্চমানোপি ‘‘কুদ্ধো এৰ মমাযং সমণো, খমাপেস্সামি ন’’ন্তি মাতাপিতূনং আরোচেত্ৰা হত্থিং অভিরুহিত্ৰা, মহতা রাজানুভাৰেন ইসিপতনং গন্ত্ৰা, মিগযূথং দিস্ৰা, পুচ্ছি ‘‘কিং নাম এতে’’তি? ‘‘এতে, সামি, মিগা নামা’’তি. এতেসং ‘‘ইমং খাদথ, ইমং ভুঞ্জথ, ইমং সাযথা’’তি ৰত্ৰা পটিজগ্গন্তা অত্থীতি. নত্থি সামি, যত্থ তিণোদকং সুলভং, তত্থ ৰসন্তীতি.

কুমারো ‘‘যথা ইমে অরক্খিযমানাৰ যত্থ ইচ্ছন্তি, তত্থ ৰসন্তি, কদা নু, খো, অহম্পি এৰং ৰসেয্য’’ন্তি এতমারম্মণং অগ্গহেসি. পচ্চেকবুদ্ধোপি তস্স আগমনং ঞত্ৰা সেনাসনমগ্গঞ্চ চঙ্কমঞ্চ সম্মজ্জিত্ৰা, মট্ঠং কত্ৰা, একদ্ৰিক্খত্তুং চঙ্কমিত্ৰা, পদনিক্খেপং দস্সেত্ৰা, দিৰাৰিহারোকাসঞ্চ পণ্ণসালঞ্চ সম্মজ্জিত্ৰা, মট্ঠং কত্ৰা, পৰিসনপদনিক্খেপং দস্সেত্ৰা, নিক্খমনপদনিক্খেপং অদস্সেত্ৰা, অঞ্ঞত্র অগমাসি. কুমারো তত্থ গন্ত্ৰা তং পদেসং সম্মজ্জিত্ৰা মট্ঠং কতং দিস্ৰা ‘‘ৰসতি মঞ্ঞে এত্থ সো পচ্চেকবুদ্ধো’’তি পরিজনেন ভাসিতং সুত্ৰা আহ – ‘‘পাতোপি সো সমণো কুদ্ধো, ইদানি হত্থিঅস্সাদীহি অত্তনো ওকাসং অক্কন্তং দিস্ৰা, সুট্ঠুতরং কুজ্ঝেয্য, ইধেৰ তুম্হে তিট্ঠথা’’তি হত্থিক্খন্ধা ওরুয্হ এককোৰ সেনাসনং পৰিট্ঠো ৰত্তসীসেন সুসম্মট্ঠোকাসে ¶ পদনিক্খেপং দিস্ৰা, ‘‘অযং সমণো এত্থ চঙ্কমন্তো ন ৰণিজ্জাদিকম্মং চিন্তেসি, অদ্ধা অত্তনো হিতমেৰ চিন্তেসি মঞ্ঞে’’তি পসন্নমানসো চঙ্কমং আরুহিত্ৰা, দূরীকতপুথুৰিতক্কো গন্ত্ৰা, পাসাণফলকে নিসীদিত্ৰা, সঞ্জাতএকগ্গো হুত্ৰা, পণ্ণসালং পৰিসিত্ৰা, ৰিপস্সন্তো পচ্চেকবোধিঞাণং অধিগন্ত্ৰা, পুরিমনযেনেৰ পুরোহিতেন কম্মট্ঠানে পুচ্ছিতে গগনতলে নিসিন্নো ইমং গাথমাহ –

‘‘মিগো ¶ অরঞ্ঞম্হি যথা অবদ্ধো, যেনিচ্ছকং গচ্ছতি গোচরায;

ৰিঞ্ঞূ নরো সেরিতং পেক্খমানো, একো চরে খগ্গৰিসাণকপ্পো’’তি.

তত্থ মিগোতি দ্ৰে মিগা এণীমিগো, পসদমিগো চাতি. অপিচ সব্বেসং আরঞ্ঞিকানং চতুপ্পদানমেতং ¶ অধিৰচনং. ইধ পন পসদমিগো অধিপ্পেতো. অরঞ্ঞম্হীতি গামঞ্চ ¶ গামূপচারঞ্চ ঠপেত্ৰা অৰসেসং অরঞ্ঞং, ইধং পন উয্যানমধিপ্পেতং, তস্মা উয্যানম্হীতি ৰুত্তং হোতি. যথাতি পটিভাগে. অবদ্ধোতি রজ্জুবন্ধনাদীহি অবদ্ধো, এতেন ৰিস্সত্থচরিযং দীপেতি. যেনিচ্ছকং গচ্ছতি গোচরাযতি যেন যেন দিসাভাগেন গন্তুমিচ্ছতি, তেন তেন দিসাভাগেন গোচরায গচ্ছতি. ৰুত্তম্পি চেতং ভগৰতা –

‘‘সেয্যথাপি, ভিক্খৰে, আরঞ্ঞকো মিগো অরঞ্ঞে পৰনে চরমানো ৰিস্সত্থো গচ্ছতি, ৰিস্সত্থো তিট্ঠতি, ৰিস্সত্থো নিসীদতি, ৰিস্সত্থো সেয্যং কপ্পেতি. তং কিস্স হেতু? অনাপাথগতো, ভিক্খৰে, লুদ্দস্স; এৰমেৰ খো, ভিক্খৰে, ভিক্খু ৰিৰিচ্চেৰ কামেহি…পে… পঠমং ঝানং উপসম্পজ্জ ৰিহরতি. অযং ৰুচ্চতি, ভিক্খৰে, ভিক্খু অন্ধমকাসি মারং অপদং, ৰধিত্ৰা মারচক্খুং অদস্সনং গতো পাপিমতো’’তি (ম. নি. ১.২৮৭; চূল়নি. খগ্গৰিসাণসুত্তনিদ্দেস ১২৫) ৰিত্থারো.

ৰিঞ্ঞূ ¶ নরোতি পণ্ডিতপুরিসো. সেরিতন্তি সচ্ছন্দৰুত্তিতং অপরাযত্ততং. পেক্খমানোতি পঞ্ঞাচক্খুনা ওলোকযমানো. অথ ৰা ধম্মসেরিতং পুগ্গলসেরিতঞ্চ. লোকুত্তরধম্মা হি কিলেসৰসং অগমনতো সেরিনো তেহি সমন্নাগতা পুগ্গলা চ, তেসং ভাৰনিদ্দেসো সেরিতা. তং পেক্খমানোতি. কিং ৰুত্তং হোতি? ‘‘যথা মিগো অরঞ্ঞম্হি অবদ্ধো যেনিচ্ছকং গচ্ছতি গোচরায, কদা নু খো অহম্পি এৰং গচ্ছেয্য’’ন্তি ইতি মে তুম্হেহি ইতো চিতো চ পরিৰারেত্ৰা ঠিতেহি বদ্ধস্স যেনিচ্ছকং গন্তুং অলভন্তস্স ¶ তস্মিং যেনিচ্ছকগমনাভাৰেন যেনিচ্ছকগমনে চানিসংসং দিস্ৰা অনুক্কমেন সমথৰিপস্সনা পারিপূরিং অগমংসু. ততো পচ্চেকবোধিং অধিগতোম্হি. তস্মা অঞ্ঞোপি ৰিঞ্ঞূ পণ্ডিতো নরো সেরিতং পেক্খমানো একো চরে খগ্গৰিসাণকপ্পোতি. সেসং ৰুত্তনযেনেৰ ৰেদিতব্বন্তি.

মিগঅরঞ্ঞগাথাৰণ্ণনা সমত্তা.

৪০. আমন্তনা হোতীতি কা উপ্পত্তি? অতীতে কির একৰজ্জিকব্রহ্মদত্তো নাম রাজা অহোসি মুদুকজাতিকো. যদা অমচ্চা তেন সহ যুত্তং ৰা অযুত্তং ৰা মন্তেতুকামা হোন্তি, তদা নং পাটিযেক্কং পাটিযেক্কং একমন্তং নেন্তি. তং একদিৰসং দিৰাসেয্যং উপগতং অঞ্ঞতরো অমচ্চো ‘‘দেৰ, মম সোতব্বং অত্থী’’তি একমন্তং গমনং যাচি. সো উট্ঠায অগমাসি. পুন একো মহাউপট্ঠানে নিসিন্নং ৰরং যাচি, একো হত্থিক্খন্ধে, একো অস্সপিট্ঠিযং ¶ , একো সুৰণ্ণরথে, একো সিৰিকায নিসীদিত্ৰা উয্যানং গচ্ছন্তং যাচি. রাজা ততো ওরোহিত্ৰা একমন্তং অগমাসি. অপরো জনপদচারিকং গচ্ছন্তং যাচি, তস্সাপি ৰচনং সুত্ৰা হত্থিতো ওরুয্হ একমন্তং অগমাসি. এৰং সো তেহি নিব্বিন্নো হুত্ৰা পব্বজি. অমচ্চা ইস্সরিযেন ৰড্ঢন্তি. তেসু একো গন্ত্ৰা রাজানং আহ – ‘‘অমুকং, মহারাজ, জনপদং ময্হং দেহী’’তি. রাজা ‘‘তং ইত্থন্নামো ভুঞ্জতী’’তি ভণতি. সো রঞ্ঞো ৰচনং অনাদিযিত্ৰা ‘‘গচ্ছামহং তং জনপদং গহেত্ৰা ভুঞ্জামী’’তি তত্থ গন্ত্ৰা, কলহং কত্ৰা, পুন উভোপি রঞ্ঞো সন্তিকং আগন্ত্ৰা, অঞ্ঞমঞ্ঞস্স দোসং আরোচেন্তি. রাজা ‘‘ন সক্কা ইমে তোসেতু’’ন্তি তেসং ¶ লোভে আদীনৰং দিস্ৰা ৰিপস্সন্তো পচ্চেকসম্বোধিং সচ্ছাকাসি. সো পুরিমনযেনেৰ ইমং উদানগাথং অভাসি –

‘‘আমন্তনা হোতি সহাযমজ্ঝে, ৰাসে ঠানে গমনে চারিকায;

অনভিজ্ঝিতং সেরিতং পেক্খমানো, একো চরে খগ্গৰিসাণকপ্পো’’তি.

তস্সত্থো ¶ – সহাযমজ্ঝে ঠিতস্স দিৰাসেয্যসঙ্খাতে ৰাসে চ, মহাউপট্ঠানসঙ্খাতে ঠানে চ, উয্যানগমনসঙ্খাতে গমনে চ, জনপদচারিকসঙ্খাতায চারিকায চ ‘‘ইদং মে সুণ, ইদং মে দেহী’’তিআদিনা নযেন তথা তথা আমন্তনা হোতি, তস্মা অহং তত্থ নিব্বিজ্জিত্ৰা যাযং অরিযজনসেৰিতা অনেকানিসংসা একন্তসুখা, এৰং সন্তেপি লোভাভিভূতেহি সব্বকাপুরিসেহি অনভিজ্ঝিতা অনভিপত্থিতা পব্বজ্জা, তং অনভিজ্ঝিতং পরেসং অৰসৰত্তনেন ধম্মপুগ্গলৰসেন চ সেরিতং পেক্খমানো ৰিপস্সনং আরভিত্ৰা অনুক্কমেন পচ্চেকসম্বোধিং অধিগতোম্হীতি. সেসং ৰুত্তনযমেৰাতি.

আমন্তনাগাথাৰণ্ণনা সমত্তা.

৪১. খিড্ডা রতীতি কা উপ্পত্তি? বারাণসিযং একপুত্তকব্রহ্মদত্তো নাম রাজা অহোসি. সো চস্স একপুত্তকো পিযো অহোসি মনাপো পাণসমো. সো সব্বিরিযাপথেসু পুত্তং গহেত্ৰাৰ ৰত্ততি. সো একদিৰসং উয্যানং গচ্ছন্তো তং ঠপেত্ৰা গতো. কুমারোপি তং দিৰসংযেৰ উপ্পন্নেন ব্যাধিনা মতো. অমচ্চা ‘‘পুত্তসিনেহেন রঞ্ঞো হদযম্পি ফলেয্যা’’তি অনারোচেত্ৰাৰ নং ঝাপেসুং. রাজা উয্যানে সুরামদেন মত্তো পুত্তং নেৰ সরি, তথা দুতিযদিৰসেপি ন্হানভোজনৰেলাসু. অথ ভুত্তাৰী নিসিন্নো সরিত্ৰা ‘‘পুত্তং মে আনেথা’’তি আহ. তস্স অনুরূপেন ৰিধানেন তং পৰত্তিং আরোচেসুং. ততো সোকাভিভূতো নিসিন্নো এৰং যোনিসো মনসাকাসি ‘‘ইমস্মিং সতি ইদং হোতি, ইমস্সুপ্পাদা ইদং উপ্পজ্জতী’’তি. সো এৰং অনুক্কমেন ¶ অনুলোমপটিলোমং ¶ পটিচ্চসমুপ্পাদং সম্মসন্তো পচ্চেকবোধিং সচ্ছাকাসি. সেসং সংসগ্গগাথায ৰুত্তসদিসমেৰ ঠপেত্ৰা গাথাযত্থৰণ্ণনং.

অত্থৰণ্ণনাযং ¶ পন খিড্ডাতি কীল়না. সা দুৰিধা হোতি – কাযিকা, ৰাচসিকা চ. তত্থ কাযিকা নাম হত্থীহিপি কীল়ন্তি, অস্সেহিপি, রথেহিপি, ধনূহিপি, থরূহিপীতি এৰমাদি. ৰাচসিকা নাম গীতং, সিলোকভণনং, মুখভেরীতি এৰমাদি. রতীতি পঞ্চকামগুণরতি. ৰিপুলন্তি যাৰ অট্ঠিমিঞ্জং আহচ্চ ঠানেন সকলত্তভাৰব্যাপকং. সেসং পাকটমেৰ. অনুসন্ধিযোজনাপি চেত্থ সংসগ্গগাথায ৰুত্তনযেনেৰ ৰেদিতব্বা, ততো পরঞ্চ সব্বন্তি.

খিড্ডারতিগাথাৰণ্ণনা সমত্তা.

৪২. চাতুদ্দিসোতি কা উপ্পত্তি? পুব্বে কির কস্সপস্স ভগৰতো সাসনে পঞ্চ পচ্চেকবোধিসত্তা পব্বজিত্ৰা ৰীসতি ৰস্সসহস্সানি গতপচ্চাগতৰত্তং পূরেত্ৰা দেৰলোকে উপ্পন্না. ততো চৰিত্ৰা তেসং জেট্ঠকো বারাণসিযং রাজা অহোসি, সেসা পাকতিকরাজানো. তে চত্তারোপি কম্মট্ঠানং উগ্গণ্হিত্ৰা, রজ্জং পহায পব্বজিত্ৰা, অনুক্কমেন পচ্চেকবুদ্ধা হুত্ৰা নন্দমূলকপব্ভারে ৰসন্তা একদিৰসং সমাপত্তিতো ৰুট্ঠায ৰংসকল়ীরগাথাযং ৰুত্তনযেনেৰ অত্তনো কম্মঞ্চ সহাযঞ্চ আৰজ্জেত্ৰা ঞত্ৰা বারাণসিরঞ্ঞো উপাযেন আরম্মণং দস্সেতুং ওকাসং গৰেসন্তি. সো চ রাজা তিক্খত্তুং রত্তিযা উব্বিজ্জতি, ভীতো ৰিস্সরং করোতি, মহাতলে ধাৰতি. পুরোহিতেন কালস্সেৰ ৰুট্ঠায সুখসেয্যং পুচ্ছিতোপি ‘‘কুতো মে, আচরিয, সুখ’’ন্তি সব্বং তং পৰত্তিং আরোচেসি. পুরোহিতোপি ‘‘অযং রোগো ন সক্কা যেন কেনচি উদ্ধংৰিরেচনাদিনা ভেসজ্জকম্মেন ৰিনেতুং ¶ , ময্হং পন খাদনূপাযো উপ্পন্নো’’তি চিন্তেত্ৰা ‘‘রজ্জহানিজীৰিতন্তরাযাদীনং পুব্বনিমিত্তং এতং মহারাজা’’তি রাজানং সুট্ঠুতরং উব্বেজেত্ৰা তস্স ৰূপসমনত্থং ‘‘এত্তকে চ এত্তকে চ হত্থিঅস্সরথাদযো হিরঞ্ঞসুৰণ্ণঞ্চ দক্খিণং দত্ৰা যঞ্ঞো যজিতব্বো’’তি তং যঞ্ঞযজনে সমাদপেসি.

ততো পচ্চেকবুদ্ধা অনেকানি পাণসহস্সানি যঞ্ঞত্থায সম্পিণ্ডিযমানানি দিস্ৰা ‘‘এতস্মিং কম্মে কতে দুব্বোধনেয্যো ভৰিস্সতি, হন্দ নং পটিকচ্চেৰ গন্ত্ৰা পেক্খামা’’তি ৰংসকল়ীরগাথাযং ৰুত্তনযেনেৰ আগন্ত্ৰা পিণ্ডায চরমানা রাজঙ্গণে পটিপাটিযা অগমংসু. রাজা সীহপঞ্জরে ঠিতো রাজঙ্গণং ওলোকযমানো তে অদ্দক্খি ¶ , সহ দস্সনেনেৰ চস্স সিনেহো উপ্পজ্জি. ততো তে পক্কোসাপেত্ৰা আকাসতলে পঞ্ঞত্তাসনে নিসীদাপেত্ৰা সক্কচ্চং ভোজেত্ৰা ¶ কতভত্তকিচ্চে ‘‘কে তুম্হে’’তি পুচ্ছি. ‘‘মযং, মহারাজ, চাতুদ্দিসা নামা’’তি. ‘‘ভন্তে, চাতুদ্দিসাতি ইমস্স কো অত্থো’’তি? ‘‘চতূসু দিসাসু কত্থচি কুতোচি ভযং ৰা চিত্তুত্রাসো ৰা অম্হাকং নত্থি, মহারাজা’’তি. ‘‘ভন্তে, তুম্হাকং তং ভযং কিং কারণা ন হোতী’’তি? ‘‘মযঞ্হি, মহারাজ, মেত্তং ভাৰেম, করুণং ভাৰেম, মুদিতং ভাৰেম, উপেক্খং ভাৰেম, তেন নো তং ভযং ন হোতী’’তি ৰত্ৰা উট্ঠাযাসনা অত্তনো ৰসতিং অগমংসু.

ততো রাজা চিন্তেসি ‘‘ইমে সমণা মেত্তাদিভাৰনায ভযং ন হোতীতি ভণন্তি, ব্রাহ্মণা পন অনেকসহস্সপাণৰধং ৰণ্ণযন্তি, কেসং নু খো ৰচনং সচ্চ’’ন্তি. অথস্স এতদহোসি – ‘‘সমণা সুদ্ধেন অসুদ্ধং ধোৰন্তি, ব্রাহ্মণা পন অসুদ্ধেন অসুদ্ধং. ন চ সক্কা অসুদ্ধেন অসুদ্ধং ধোৰিতুং, পব্বজিতানং এৰ ৰচনং সচ্চ’’ন্তি. সো ‘‘সব্বে সত্তা সুখিতা হোন্তূ’’তিআদিনা নযেন মেত্তাদযো চত্তারোপি ব্রহ্মৰিহারে ভাৰেত্ৰা হিতফরণচিত্তেন অমচ্চে ¶ আণাপেসি ‘‘সব্বে পাণে মুঞ্চথ, সীতানি পানীযানি পিৰন্তু, হরিতানি তিণানি খাদন্তু, সীতো চ নেসং ৰাতো উপৰাযতূ’’তি. তে তথা অকংসু.

ততো রাজা ‘‘কল্যাণমিত্তানং ৰচনেনেৰ পাপকম্মতো মুত্তোম্হী’’তি তত্থেৰ নিসিন্নো ৰিপস্সিত্ৰা পচ্চেকসম্বোধিং সচ্ছাকাসি. অমচ্চেহি চ ভোজনৰেলাযং ‘‘ভুঞ্জ, মহারাজ, কালো’’তি ৰুত্তে ‘‘নাহং রাজা’’তি পুরিমনযেনেৰ সব্বং ৰত্ৰা ইমং উদানব্যাকরণগাথং অভাসি –

‘‘চাতুদ্দিসো অপ্পটিঘো চ হোতি, সন্তুস্সমানো ইতরীতরেন;

পরিস্সযানং সহিতা অছম্ভী, একো চরে খগ্গৰিসাণকপ্পো’’তি.

তত্থ চাতুদ্দিসোতি চতূসু দিসাসু যথাসুখৰিহারী, ‘‘একং দিসং ফরিত্ৰা ৰিহরতী’’তিআদিনা (দী. নি. ৩.৩০৮; অ. নি. ৪.১২৫; চূল়নি. খগ্গৰিসাণসুত্তনিদ্দেস ১২৮) ৰা নযেন ব্রহ্মৰিহারভাৰনাফরিতা চতস্সো দিসা অস্স সন্তীতিপি চাতুদ্দিসো. তাসু দিসাসু কত্থচি সত্তে ¶ ৰা সঙ্খারে ৰা ভযেন ন পটিহঞ্ঞতীতি অপ্পটিঘো. সন্তুস্সমানোতি দ্ৰাদসৰিধস্স সন্তোসস্সৰসেন সন্তুস্সকো, ইতরীতরেনাতি উচ্চাৰচেন পচ্চযেন. পরিস্সযানং সহিতা অছম্ভীতি এত্থ পরিস্সযন্তি কাযচিত্তানি, পরিহাপেন্তি ৰা তেসং সম্পত্তিং, তানি ৰা পটিচ্চ সযন্তীতি পরিস্সযা, বাহিরানং সীহব্যগ্ঘাদীনং অব্ভন্তরানঞ্চ কামচ্ছন্দাদীনং কাযচিত্তুপদ্দৰানং এতং অধিৰচনং. তে পরিস্সযে অধিৰাসনখন্তিযা ¶ চ ৰীরিযাদীহি ধম্মেহি চ সহতীতি পরিস্সযানং সহিতা. থদ্ধভাৰকরভযাভাৰেন অছম্ভী. কিং ৰুত্তং হোতি? যথা তে চত্তারো সমণা, এৰং ইতরীতরেন পচ্চযেন সন্তুস্সমানো এত্থ পটিপত্তিপদট্ঠানে সন্তোসে ঠিতো চতূসু দিসাসু মেত্তাদিভাৰনায চাতুদ্দিসো, সত্তসঙ্খারেসু পটিহননভযাভাৰেন অপ্পটিঘো চ হোতি. সো চাতুদ্দিসত্তা ৰুত্তপ্পকারানং পরিস্সযানং সহিতা, অপ্পটিঘত্তা অছম্ভী চ হোতীতি এৰং পটিপত্তিগুণং দিস্ৰা যোনিসো পটিপজ্জিত্ৰা পচ্চেকবোধিং অধিগতোম্হীতি. অথ ৰা তে সমণা ৰিয সন্তুস্সমানো ¶ ইতরীতরেন ৰুত্তনযেনেৰ চাতুদ্দিসো হোতীতি ঞত্ৰা এৰং চাতুদ্দিসভাৰং পত্থযন্তো যোনিসো পটিপজ্জিত্ৰা অধিগতোম্হি. তস্মা অঞ্ঞোপি ঈদিসং ঠানং পত্থযমানো চাতুদ্দিসতায পরিস্সযানং সহিতা অপ্পটিঘতায চ অছম্ভী হুত্ৰা একো চরে খগ্গৰিসাণকপ্পোতি. সেসং ৰুত্তনযমেৰাতি.

চাতুদ্দিসগাথাৰণ্ণনা সমত্তা.

৪৩. দুস্সঙ্গহাতি কা উপ্পত্তি? বারাণসিরঞ্ঞো কির অগ্গমহেসী কালমকাসি. ততো ৰীতিৰত্তেসু সোকদিৰসেসু একং দিৰসং অমচ্চা ‘‘রাজূনং নাম তেসু তেসু কিচ্চেসু অগ্গমহেসী অৰস্সং ইচ্ছিতব্বা, সাধু, দেৰো, অঞ্ঞং দেৰিং আনেতূ’’তি যাচিংসু. রাজা‘‘তেন হি, ভণে, জানাথা’’তি আহ. তে পরিযেসন্তা সামন্তরজ্জে রাজা মতো. তস্স দেৰী রজ্জং অনুসাসতি. সা চ গব্ভিনী হোতি. অমচ্চা ‘‘অযং রঞ্ঞো অনুরূপা’’তি ঞত্ৰা তং যাচিংসু. সা ‘‘গব্ভিনী নাম মনুস্সানং অমনাপা হোতি, সচে আগমেথ, যাৰ ৰিজাযামি, এৰং হোতু, নো চে, অঞ্ঞং পরিযেসথা’’তি আহ. তে রঞ্ঞোপি এতমত্থং আরোচেসুং. রাজা ‘‘গব্ভিনীপি হোতু আনেথা’’তি. তে আনেসুং. রাজা তং অভিসিঞ্চিত্ৰা সব্বং মহেসীভোগং অদাসি. তস্সা পরিজনঞ্চ নানাৰিধেহি ¶ পণ্ণাকারেহি সঙ্গণ্হাতি. সা কালেন পুত্তং ৰিজাযি. তম্পি রাজা অত্তনো জাতপুত্তমিৰ সব্বিরিযাপথেসু অঙ্কে চ উরে চ কত্ৰা ৰিহরতি. ততো দেৰিযা পরিজনো চিন্তেসি ‘‘রাজা অতিৰিয সঙ্গণ্হাতি কুমারং, অতিৰিস্সাসনিযানি রাজহদযানি, হন্দ নং পরিভেদেমা’’তি.

ততো কুমারং – ‘‘ত্ৰং, তাত, অম্হাকং রঞ্ঞো পুত্তো, ন ইমস্স রঞ্ঞো, মা এত্থ ৰিস্সাসং আপজ্জী’’তি আহংসু. অথ কুমারো ‘‘এহি পুত্তা’’তি রঞ্ঞা ৰুচ্চমানোপি হত্থে গহেত্ৰা আকড্ঢিযমানোপি পুব্বে ৰিয রাজানং ন অল্লীযতি. রাজা ‘‘কিং এত’’ন্তি ৰীমংসন্তো তং পৰত্তিং ঞত্ৰা ‘‘অরে, এতে মযা এৰং সঙ্গহিতাপি ¶ পটিকূলৰুত্তিনো এৰা’’তি নিব্বিজ্জিত্ৰা রজ্জং পহায পব্বজিতো. ‘‘রাজা পব্বজিতো’’তি অমচ্চপরিজনাপি বহূ পব্বজিতা ¶ , ‘‘সপরিজনো রাজা পব্বজিতো’’তি মনুস্সা পণীতে পচ্চযে উপনেন্তি. রাজা পণীতে পচ্চযে যথাৰুড্ঢং দাপেতি. তত্থ যে সুন্দরং লভন্তি, তে তুস্সন্তি. ইতরে উজ্ঝাযন্তি ‘‘মযং পরিৰেণসম্মজ্জনাদীনি সব্বকিচ্চানি করোন্তা লূখভত্তং জিণ্ণৰত্থঞ্চ লভামা’’তি. সো তম্পি ঞত্ৰা ‘‘অরে, যথাৰুড্ঢং দিয্যমানেপি নাম উজ্ঝাযন্তি, অহো, অযং পরিসা দুস্সঙ্গহা’’তি পত্তচীৰরং আদায একো অরঞ্ঞং পৰিসিত্ৰা ৰিপস্সনং আরভিত্ৰা পচ্চেকবোধিং সচ্ছাকাসি. তত্থ আগতেহি চ কম্মট্ঠানং পুচ্ছিতো ইমং গাথং অভাসি –

‘‘দুস্সঙ্গহা পব্বজিতাপি একে, অথো গহট্ঠা ঘরমাৰসন্তা;

অপ্পোস্সুক্কো পরপুত্তেসু হুত্ৰা, একো চরে খগ্গৰিসাণকপ্পো’’তি.

সা অত্থতো পাকটা এৰ. অযং পন যোজনা – দুস্সঙ্গহা পব্বজিতাপি একে, যে অসন্তোসাভিভূতা, তথাৰিধা এৰ চ অথো গহট্ঠা ঘরমাৰসন্তা. এতমহং দুস্সঙ্গহভাৰং জিগুচ্ছন্তো ৰিপস্সনং আরভিত্ৰা পচ্চেকবোধিং অধিগতোম্হীতি. সেসং পুরিমনযেনেৰ ৰেদিতব্বন্তি.

দুস্সঙ্গহগাথাৰণ্ণনা সমত্তা.

৪৪. ওরোপযিত্ৰাতি ¶ কা উপ্পত্তি? বারাণসিযং কির চাতুমাসিকব্রহ্মদত্তো নাম রাজা গিম্হানং পঠমে মাসে উয্যানং গতো. তত্থ রমণীযে ভূমিভাগে নীলঘনপত্তসঞ্ছন্নং কোৰিল়াররুক্খং দিস্ৰা ‘‘কোৰিল়ারমূলে মম সযনং পঞ্ঞাপেথা’’তি ৰত্ৰা উয্যানে কীল়িত্ৰা সাযন্হসমযং তত্থ সেয্যং কপ্পেসি. পুন গিম্হানং মজ্ঝিমে মাসে উয্যানং গতো. তদা কোৰিল়ারো পুপ্ফিতো হোতি, তদাপি তথেৰ অকাসি. পুন গিম্হানং পচ্ছিমে মাসে গতো. তদা কোৰিল়ারো সঞ্ছিন্নপত্তো সুক্খরুক্খো ৰিয হোতি. তদাপি সো অদিস্ৰাৰ তং রুক্খং পুব্বপরিচযেন তত্থেৰ সেয্যং আণাপেসি. অমচ্চা জানন্তাপি ‘‘রঞ্ঞা আণত্ত’’ন্তি ভযেন তত্থ সযনং পঞ্ঞাপেসুং. সো উয্যানে কীল়িত্ৰা সাযন্হসমযং ¶ তত্থ সেয্যং কপ্পেন্তো তং রুক্খং দিস্ৰা ‘‘অরে, অযং পুব্বে সঞ্ছন্নপত্তো মণিমযো ৰিয অভিরূপদস্সনো অহোসি. ততো মণিৰণ্ণসাখন্তরে ঠপিতপৰাল়ঙ্কুরসদিসেহি পুপ্ফেহি সস্সিরিকচারুদস্সনো অহোসি. মুত্তাদলসদিসৰালিকাকিণ্ণো চস্স হেট্ঠা ভূমিভাগো বন্ধনা পমুত্তপুপ্ফসঞ্ছন্নো রত্তকম্বলসন্থতো ৰিয অহোসি. সো নামজ্জ সুক্খরুক্খো ৰিয সাখামত্তাৰসেসো ঠিতো. ‘অহো, জরায উপহতো কোৰিল়ারো’’’তি চিন্তেত্ৰা ‘‘অনুপাদিন্নম্পি তাৰ জরা হঞ্ঞতি, কিমঙ্গ পন উপাদিন্ন’’ন্তি অনিচ্চসঞ্ঞং পটিলভি. তদনুসারেনেৰ সব্বসঙ্খারে দুক্খতো অনত্ততো চ ৰিপস্সন্তো ‘‘অহো ৰতাহম্পি ¶ সঞ্ছিন্নপত্তো কোৰিল়ারো ৰিয অপেতগিহিব্যঞ্জনো ভৰেয্য’’ন্তি পত্থযমানো অনুপুব্বেন তস্মিং সযনতলে দক্খিণেন পস্সেন নিপন্নোযেৰ পচ্চেকবোধিং সচ্ছাকাসি. ততো গমনকালে অমচ্চেহি ‘‘কালো গন্তুং, মহারাজা’’তি ৰুত্তে ‘‘নাহং রাজা’’তিআদীনি ৰত্ৰা পুরিমনযেনেৰ ইমং গাথং অভাসি –

‘‘ওরোপযিত্ৰা গিহিব্যঞ্জনানি, সঞ্ছিন্নপত্তো যথা কোৰিল়ারো;

ছেত্ৰান ৰীরো গিহিবন্ধনানি, একো চরে খগ্গৰিসাণকপ্পো’’তি.

তত্থ ওরোপযিত্ৰাতি অপনেত্ৰা. গিহিব্যঞ্জনানীতি কেসমস্সুওদাতৰত্থালঙ্কারমালাগন্ধৰিলেপনইত্থিপুত্তদাসিদাসাদীনি. এতানি হি গিহিভাৰং ¶ ব্যঞ্জযন্তি, তস্মা ‘‘গিহিব্যঞ্জনানী’’তি ৰুচ্চন্তি. সঞ্ছিন্নপত্তোতি পতিতপত্তো. ছেত্ৰানাতি মগ্গঞাণেন ছিন্দিত্ৰা. ৰীরোতি মগ্গৰীরিযসমন্নাগতো. গিহিবন্ধনানীতি কামবন্ধনানি. কামা হি গিহীনং বন্ধনানি. অযং তাৰ পদত্থো.

অযং পন অধিপ্পাযো – ‘‘অহো ৰতাহম্পি ওরোপযিত্ৰা গিহিব্যঞ্জনানি সঞ্ছিন্নপত্তো যথা কোৰিল়ারো ভৰেয্য’’ন্তি এৰঞ্হি চিন্তযমানো ৰিপস্সনং আরভিত্ৰা পচ্চেকবোধিং অধিগতোম্হীতি. সেসং পুরিমনযেনেৰ ৰেদিতব্বন্তি.

কোৰিল়ারগাথাৰণ্ণনা সমত্তা. পঠমো ৰগ্গো নিট্ঠিতো.

৪৫-৪৬. সচে ¶ লভেথাতি কা উপ্পত্তি? পুব্বে কির কস্সপস্স ভগৰতো সাসনে দ্ৰে পচ্চেকবোধিসত্তা পব্বজিত্ৰা ৰীসতি ৰস্সসহস্সানি গতপচ্চাগতৰত্তং পূরেত্ৰা দেৰলোকে উপ্পন্না. ততো চৰিত্ৰা তেসং জেট্ঠকো বারাণসিরঞ্ঞো পুত্তো অহোসি, কনিট্ঠো পুরোহিতস্স পুত্তো অহোসি. তে একদিৰসংযেৰ পটিসন্ধিং গহেত্ৰা একদিৰসমেৰ মাতুকুচ্ছিতো নিক্খমিত্ৰা সহপংসুকীল়িতসহাযকা অহেসুং. পুরোহিতপুত্তো পঞ্ঞৰা অহোসি. সো রাজপুত্তং আহ – ‘‘সম্ম, ত্ৰং পিতুনো অচ্চযেন রজ্জং লভিস্সসি, অহং পুরোহিতট্ঠানং, সুসিক্খিতেন চ সুখং রজ্জং অনুসাসিতুং সক্কা, এহি সিপ্পং উগ্গহেস্সামা’’তি. ততো উভোপি পুব্বোপচিতকম্মা হুত্ৰা ¶ গামনিগমাদীসু ভিক্খং চরমানা পচ্চন্তজনপদগামং গতা. তঞ্চ গামং পচ্চেকবুদ্ধা ভিক্খাচারৰেলায পৰিসন্তি. অথ মনুস্সা পচ্চেকবুদ্ধে দিস্ৰা উস্সাহজাতা আসনানি পঞ্ঞাপেন্তি, পণীতং খাদনীযং ভোজনীযং উপনামেন্তি, মানেন্তি, পূজেন্তি. তেসং এতদহোসি – ‘‘অম্হেহি সদিসা উচ্চাকুলিকা নাম নত্থি, অথ চ পনিমে মনুস্সা যদি ইচ্ছন্তি, অম্হাকং ভিক্খং দেন্তি, যদি চ নিচ্ছন্তি, ন দেন্তি, ইমেসং পন পব্বজিতানং এৰরূপং সক্কারং করোন্তি, অদ্ধা এতে কিঞ্চি সিপ্পং জানন্তি, হন্দ নেসং সন্তিকে সিপ্পং উগ্গণ্হামা’’তি.

তে ¶ মনুস্সেসু পটিক্কন্তেসু ওকাসং লভিত্ৰা ‘‘যং, ভন্তে, তুম্হে সিপ্পং জানাথ, তং অম্হেপি সিক্খাপেথা’’তি যাচিংসু. পচ্চেকবুদ্ধা ‘‘ন সক্কা অপব্বজিতেন সিক্খিতু’’ন্তি আহংসু. তে পব্বজ্জং যাচিত্ৰা পব্বজিংসু. ততো নেসং পচ্চেকবুদ্ধা ‘‘এৰং ৰো নিৰাসেতব্বং, এৰং পারুপিতব্ব’’ন্তিআদিনা নযেন আভিসমাচারিকং আচিক্খিত্ৰা ‘‘ইমস্স সিপ্পস্স একীভাৰাভিরতি নিপ্ফত্তি, তস্মা একেনেৰ নিসীদিতব্বং, একেন চঙ্কমিতব্বং, ঠাতব্বং, সযিতব্ব’’ন্তি পাটিযেক্কং পণ্ণসালমদংসু. ততো তে অত্তনো অত্তনো পণ্ণসালং পৰিসিত্ৰা নিসীদিংসু. পুরোহিতপুত্তো নিসিন্নকালতো ¶ পভুতি চিত্তসমাধানং লদ্ধা ঝানং লভি. রাজপুত্তো মুহুত্তেনেৰ উক্কণ্ঠিতো তস্স সন্তিকং আগতো. সো তং দিস্ৰা ‘‘কিং, সম্মা’’তি পুচ্ছি. ‘‘উক্কণ্ঠিতোম্হী’’তি আহ. ‘‘তেন হি ইধ নিসীদা’’তি. সো তত্থ মুহুত্তং নিসীদিত্ৰা আহ – ‘‘ইমস্স কির, সম্ম, সিপ্পস্স একীভাৰাভিরতি নিপ্ফত্তী’’তি পুরোহিতপুত্তো ‘‘এৰং, সম্ম, তেন হি ত্ৰং অত্তনো নিসিন্নোকাসং এৰ গচ্ছ, উগ্গহেস্সামি ইমস্স সিপ্পস্স নিপ্ফত্তি’’ন্তি আহ. সো গন্ত্ৰা পুনপি মুহুত্তেনেৰ উক্কণ্ঠিতো পুরিমনযেনেৰ তিক্খত্তুং আগতো.

ততো নং পুরোহিতপুত্তো তথেৰ উয্যোজেত্ৰা তস্মিং গতে চিন্তেসি ‘‘অযং অত্তনো চ কম্মং হাপেতি, মম চ ইধাভিক্খণং আগচ্ছন্তো’’তি. সো পণ্ণসালতো নিক্খম্ম অরঞ্ঞং পৰিট্ঠো. ইতরো অত্তনো পণ্ণসালাযেৰ নিসিন্নো পুনপি মুহুত্তেনেৰ উক্কণ্ঠিতো হুত্ৰা তস্স পণ্ণসালং আগন্ত্ৰা ইতো চিতো চ মগ্গন্তোপি তং অদিস্ৰা চিন্তেসি – ‘‘যো গহট্ঠকালে পণ্ণাকারম্পি আদায আগতো মং দট্ঠুং ন লভতি, সো নাম মযি আগতে দস্সনম্পি অদাতুকামো পক্কামি, অহো, রে চিত্ত, ন লজ্জসি, যং মং চতুক্খত্তুং ইধানেসি, সোদানি তে ৰসে ন ৰত্তিস্সামি, অঞ্ঞদত্থু তংযেৰ মম ৰসে ৰত্তাপেস্সামী’’তি অত্তনো সেনাসনং পৰিসিত্ৰা ৰিপস্সনং আরভিত্ৰা পচ্চেকবোধিং সচ্ছিকত্ৰা আকাসেন নন্দমূলকপব্ভারং অগমাসি. ইতরোপি অরঞ্ঞং পৰিসিত্ৰা ৰিপস্সনং ¶ আরভিত্ৰা পচ্চেকবোধিং সচ্ছিকত্ৰা তত্থেৰ অগমাসি. তে উভোপি মনোসিলাতলে নিসীদিত্ৰা পাটিযেক্কং পাটিযেক্কং ইমা উদানগাথাযো অভাসিংসু –

‘‘সচে ¶ লভেথ নিপকং সহাযং, সদ্ধিং চরং সাধুৰিহারি ধীরং;

অভিভুয্য সব্বানি পরিস্সযানি, চরেয্য তেনত্তমনো সতীমা.

‘‘নো চে লভেথ নিপকং সহাযং, সদ্ধিং চরং সাধুৰিহারি ধীরং;

রাজাৰ রট্ঠং ৰিজিতং পহায, একো চরে মাতঙ্গরঞ্ঞেৰ নাগো’’তি.

তত্থ নিপকন্তি পকতিনিপুণং পণ্ডিতং কসিণপরিকম্মাদীসু কুসলং. সাধুৰিহারিন্তি অপ্পনাৰিহারেন ৰা উপচারেন ৰা সমন্নাগতং. ধীরন্তি ধিতিসম্পন্নং. তত্থ নিপকত্তেন ধিতিসম্পদা ৰুত্তা. ইধ পন ধিতিসম্পন্নমেৰাতি অত্থো. ধিতি নাম অসিথিলপরক্কমতা, ‘‘কামং তচো ¶ চ ন্হারু চা’’তি (ম. নি. ২.১৮৪; অ. নি. ২.৫; মহানি. ১৯৬) এৰং পৰত্তৰীরিযস্সেতং অধিৰচনং. অপিচ ধিকতপাপোতিপি ধীরো. রাজাৰ রট্ঠং ৰিজিতং পহাযাতি যথা পটিরাজা ‘‘ৰিজিতং রট্ঠং অনত্থাৰহ’’ন্তি ঞত্ৰা রজ্জং পহায একো চরতি, এৰং বালসহাযং পহায একো চরে. অথ ৰা রাজাৰ রট্ঠন্তি যথা সুতসোমো রাজা ৰিজিতং রট্ঠং পহায একো চরি, যথা চ মহাজনকো, এৰং একো চরেতি অযম্পি তস্সত্থো. সেসং ৰুত্তানুসারেন সক্কা জানিতুন্তি ন ৰিত্থারিতন্তি.

সহাযগাথাৰণ্ণনা সমত্তা.

৪৭. অদ্ধা পসংসামাতি ইমিস্সা গাথায যাৰ আকাসতলে পঞ্ঞত্তাসনে পচ্চেকবুদ্ধানং নিসজ্জা, তাৰ চাতুদ্দিসগাথায উপ্পত্তিসদিসা এৰ উপ্পত্তি. অযং পন ৰিসেসো – যথা সো রাজা রত্তিযা তিক্খত্তুং উব্বিজ্জি, ন তথা অযং, নেৰস্স যঞ্ঞো পচ্চুপট্ঠিতো অহোসি. সো আকাসতলে পঞ্ঞত্তেসু আসনেসু পচ্চেকবুদ্ধে নিসীদাপেত্ৰা ‘‘কে তুম্হে’’তি পুচ্ছি. ‘‘মযং, মহারাজ, অনৰজ্জভোজিনো নামা’’তি. ‘‘ভন্তে, ‘অনৰজ্জভোজিনো’তি ইমস্স কো অত্থো’’তি? ‘‘সুন্দরং ৰা অসুন্দরং ৰা লদ্ধা নিব্বিকারা ভুঞ্জাম, মহারাজা’’তি. তং সুত্ৰা রঞ্ঞো এতদহোসি ‘‘যংনূনাহং ইমে উপপরিক্খেয্যং এদিসা ৰা নো ৰা’’তি. তং দিৰসং কণাজকেন ¶ বিলঙ্গদুতিযেন পরিৰিসি. পচ্চেকবুদ্ধা অমতং ভুঞ্জন্তা ৰিয নিব্বিকারা ভুঞ্জিংসু. রাজা ‘‘হোন্তি নাম একদিৰসং পটিঞ্ঞাতত্তা নিব্বিকারা, স্ৰে জানিস্সামী’’তি স্ৰাতনাযপি ¶ নিমন্তেসি. ততো দুতিযদিৰসেপি তথেৰাকাসি. তেপি তথেৰ পরিভুঞ্জিংসু. অথ রাজা ‘‘ইদানি সুন্দরং দত্ৰা ৰীমংসিস্সামী’’তি পুনপি নিমন্তেত্ৰা, দ্ৰে দিৰসে মহাসক্কারং কত্ৰা, পণীতেন অতিৰিচিত্রেন খাদনীযেন ভোজনীযেন পরিৰিসি. তেপি তথেৰ নিব্বিকারা ভুঞ্জিত্ৰা রঞ্ঞো মঙ্গলং ৰত্ৰা পক্কমিংসু. রাজা অচিরপক্কন্তেসু তেসু ‘‘অনৰজ্জভোজিনোৰ এতে সমণা, অহো ৰতাহম্পি অনৰজ্জভোজী ¶ ভৰেয্য’’ন্তি চিন্তেত্ৰা মহারজ্জং পহায পব্বজ্জং সমাদায ৰিপস্সনং আরভিত্ৰা, পচ্চেকবুদ্ধো হুত্ৰা, মঞ্জূসকরুক্খমূলে পচ্চেকবুদ্ধানং মজ্ঝে অত্তনো আরম্মণং ৰিভাৰেন্তো ইমং গাথং অভাসি –

‘‘অদ্ধা পসংসাম সহাযসম্পদং, সেট্ঠা সমা সেৰিতব্বা সহাযা;

এতে অলদ্ধা অনৰজ্জভোজী, একো চরে খগ্গৰিসাণকপ্পো’’তি.

সা পদত্থতো উত্তানা এৰ. কেৰলং পন সহাযসম্পদন্তি এত্থ অসেখেহি সীলাদিক্খন্ধেহি সম্পন্না সহাযা এৰ সহাযসম্পদাতি ৰেদিতব্বা. অযং পনেত্থ যোজনা – যাযং ৰুত্তা সহাযসম্পদা, তং সহাযসম্পদং অদ্ধা পসংসাম, একংসেনেৰ থোমেমাতি ৰুত্তং হোতি. কথং? সেট্ঠা সমা সেৰিতব্বা সহাযাতি. কস্মা? অত্তনো হি সীলাদীহি সেট্ঠে সেৰমানস্স সীলাদযো ধম্মা অনুপ্পন্না উপ্পজ্জন্তি, উপ্পন্না ৰুদ্ধিং ৰিরূল়্হিং ৰেপুল্লং পাপুণন্তি. সমে সেৰমানস্স অঞ্ঞমঞ্ঞং সমধারণেন কুক্কুচ্চস্স ৰিনোদনেন চ লদ্ধা ন পরিহাযন্তি. এতে পন সহাযকে সেট্ঠে চ সমে চ অলদ্ধা কুহনাদিমিচ্ছাজীৰং ৰজ্জেত্ৰা ধম্মেন সমেন উপ্পন্নং ভোজনং ভুঞ্জন্তো তত্থ চ পটিঘানুনযং অনুপ্পাদেন্তো অনৰজ্জভোজী হুত্ৰা অত্থকামো কুলপুত্তো একো চরে খগ্গৰিসাণকপ্পো. অহম্পি হি এৰং চরন্তো ইমং সম্পত্তিং অধিগতোম্হীতি.

অনৰজ্জভোজিগাথাৰণ্ণনা সমত্তা.

৪৮. দিস্ৰা ¶ সুৰণ্ণস্সাতি কা উপ্পত্তি? অঞ্ঞতরো বারাণসিরাজা গিম্হসমযে দিৰাসেয্যং উপগতো. সন্তিকে চস্স ৰণ্ণদাসী গোসীতচন্দনং পিসতি. তস্সা একবাহাযং একং সুৰণ্ণৰলযং, একবাহাযং দ্ৰে, তানি সঙ্ঘট্টন্তি ইতরং ন সঙ্ঘট্টতি. রাজা তং দিস্ৰা ‘‘এৰমেৰ গণৰাসে সঙ্ঘট্টনা, একৰাসে অসঙ্ঘট্টনা’’তি পুনপ্পুনং তং দাসিং ওলোকযমানো চিন্তেসি. তেন চ সমযেন সব্বালঙ্কারভূসিতা দেৰী তং বীজযন্তী ঠিতা হোতি. সা ‘‘ৰণ্ণদাসিযা পটিবদ্ধচিত্তো মঞ্ঞে রাজা’’তি চিন্তেত্ৰা তং দাসিং উট্ঠাপেত্ৰা সযমেৰ পিসিতুমারদ্ধা ¶ . তস্সা উভোসু বাহাসু অনেকে সুৰণ্ণৰলযা, তে সঙ্ঘট্টন্তা মহাসদ্দং জনযিংসু. রাজা সুট্ঠুতরং নিব্বিন্নো দক্খিণেন পস্সেন নিপন্নোযেৰ ৰিপস্সনং ¶ আরভিত্ৰা পচ্চেকবোধিং সচ্ছাকাসি. তং অনুত্তরেন সুখেন সুখিতং নিপন্নং চন্দনহত্থা দেৰী উপসঙ্কমিত্ৰা ‘‘আলিম্পামি, মহারাজা’’তি আহ. রাজা – ‘‘অপেহি, মা আলিম্পাহী’’তি আহ. সা ‘‘কিস্স, মহারাজা’’তি আহ. সো ‘‘নাহং রাজা’’তি. এৰমেতেসং তং কথাসল্লাপং সুত্ৰা অমচ্চা উপসঙ্কমিংসু. তেহিপি মহারাজৰাদেন আলপিতো ‘‘নাহং, ভণে, রাজা’’তি আহ. সেসং পঠমগাথায ৰুত্তসদিসমেৰ.

অযং পন গাথাৰণ্ণনা – দিস্ৰাতি ওলোকেত্ৰা. সুৰণ্ণস্সাতি কঞ্চনস্স ‘‘ৰলযানী’’তি পাঠসেসো. সাৰসেসপাঠো হি অযং অত্থো. পভস্সরানীতি পভাসনসীলানি, জুতিমন্তানীতি ৰুত্তং হোতি. সেসং উত্তানত্থমেৰ. অযং পন যোজনা – দিস্ৰা ভুজস্মিং সুৰণ্ণস্স ৰলযানি ‘‘গণৰাসে সতি সঙ্ঘট্টনা, একৰাসে অসঙ্ঘট্টনা’’তি এৰং চিন্তেন্তো ৰিপস্সনং আরভিত্ৰা পচ্চেকবোধিং অধিগতোম্হীতি. সেসং ৰুত্তনযমেৰাতি.

সুৰণ্ণৰলযগাথাৰণ্ণনা সমত্তা.

৪৯. এৰং দুতিযেনাতি কা উপ্পত্তি? অঞ্ঞতরো বারাণসিরাজা দহরোৰ পব্বজিতুকামো অমচ্চে আণাপেসি ‘‘দেৰিং গহেত্ৰা রজ্জং পরিহরথ, অহং পব্বজিস্সামী’’তি. অমচ্চা ‘‘ন, মহারাজ, অরাজকং রজ্জং অম্হেহি সক্কা রক্খিতুং, সামন্তরাজানো আগম্ম ৰিলুম্পিস্সন্তি, যাৰ একপুত্তোপি উপ্পজ্জতি, তাৰ আগমেহী’’তি সঞ্ঞাপেসুং. মুদুচিত্তো রাজা ¶ অধিৰাসেসি. অথ দেৰী গব্ভং গণ্হি. রাজা পুনপি তে আণাপেসি – ‘‘দেৰী গব্ভিনী, পুত্তং জাতং রজ্জে অভিসিঞ্চিত্ৰা রজ্জং পরিহরথ, অহং পব্বজিস্সামী’’তি. অমচ্চা ‘‘দুজ্জানং, মহারাজ, এতং দেৰী পুত্তং ৰা ৰিজাযিস্সতি ধীতরং ৰা, ৰিজাযনকালং তাৰ আগমেহী’’তি পুনপি সঞ্ঞাপেসুং. অথ সা পুত্তং ৰিজাযি. তদাপি রাজা তথেৰ অমচ্চে আণাপেসি. অমচ্চা পুনপি রাজানং ‘‘আগমেহি, মহারাজ, যাৰ, পটিবলো হোতী’’তি বহূহি কারণেহি সঞ্ঞাপেসুং. ততো কুমারে পটিবলে ¶ জাতে অমচ্চে সন্নিপাতাপেত্ৰা ‘‘পটিবলো অযং, তং রজ্জে অভিসিঞ্চিত্ৰা পটিপজ্জথা’’তি অমচ্চানং ওকাসং অদত্ৰা অন্তরাপণা কাসাযৰত্থাদযো সব্বপরিক্খারে আহরাপেত্ৰা অন্তেপুরে এৰ পব্বজিত্ৰা মহাজনকো ৰিয নিক্খমি. সব্বপরিজনো নানপ্পকারকং পরিদেৰমানো রাজানং অনুবন্ধি.

রাজা ¶ যাৰ অত্তনো রজ্জসীমা, তাৰ গন্ত্ৰা কত্তরদণ্ডেন লেখং কত্ৰা ‘‘অযং লেখা নাতিক্কমিতব্বা’’তি আহ. মহাজনো লেখায সীসং কত্ৰা, ভূমিযং নিপন্নো পরিদেৰমানো ‘‘তুয্হং দানি, তাত, রঞ্ঞো আণা, কিং করিস্সতী’’তি কুমারং লেখং অতিক্কমাপেসি. কুমারো ‘‘তাত, তাতা’’তি ধাৰিত্ৰা রাজানং সম্পাপুণি. রাজা কুমারং দিস্ৰা ‘‘এতং মহাজনং পরিহরন্তো রজ্জং কারেসিং, কিং দানি একং দারকং পরিহরিতুং ন সক্খিস্স’’ন্তি কুমারং গহেত্ৰা অরঞ্ঞং পৰিট্ঠো, তত্থ পুব্বপচ্চেকবুদ্ধেহি ৰসিতপণ্ণসালং দিস্ৰা ৰাসং কপ্পেসি সদ্ধিং পুত্তেন. ততো কুমারো ৰরসযনাদীসু কতপরিচযো তিণসন্থারকে ৰা রজ্জুমঞ্চকে ৰা সযমানো রোদতি. সীতৰাতাদীহি ফুট্ঠো সমানো ‘‘সীতং, তাত, উণ্হং, তাত, মক্খিকা, তাত, খাদন্তি, ছাতোম্হি, তাত, পিপাসিতোম্হি, তাতা’’তি ৰদতি. রাজা তং সঞ্ঞাপেন্তোযেৰ রত্তিং ৰীতিনামেতি. দিৰাপিস্স পিণ্ডায চরিত্ৰা ভত্তং উপনামেতি, তং হোতি মিস্সকভত্তং কঙ্গুৰরকমুগ্গাদিবহুলং. কুমারো অচ্ছাদেন্তম্পি তং জিঘচ্ছাৰসেন ভুঞ্জমানো কতিপাহেনেৰ উণ্হে ঠপিতপদুমং ৰিয মিলাযি. পচ্চেকবোধিসত্তো পন পটিসঙ্খানবলেন নিব্বিকারোযেৰ ভুঞ্জতি.

ততো সো কুমারং সঞ্ঞাপেন্তো আহ – ‘‘নগরস্মিং, তাত, পণীতাহারো লব্ভতি, তত্থ গচ্ছামা’’তি. কুমারো ‘‘আম, তাতা’’তি আহ. ততো নং পুরক্খত্ৰা আগতমগ্গেনেৰ নিৰত্তি. কুমারমাতাপি দেৰী ¶ ‘‘ন দানি রাজা কুমারং গহেত্ৰা অরঞ্ঞে চিরং ৰসিস্সতি, কতিপাহেনেৰ নিৰত্তিস্সতী’’তি ¶ চিন্তেত্ৰা রঞ্ঞা কত্তরদণ্ডেন লিখিতট্ঠানেযেৰ ৰতিং কারাপেত্ৰা ৰাসং কপ্পেসি. ততো রাজা তস্সা ৰতিযা অৰিদূরে ঠত্ৰা ‘‘এত্থ তে, তাত, মাতা নিসিন্না, গচ্ছাহী’’তি পেসেসি. যাৰ চ সো তং ঠানং পাপুণাতি, তাৰ উদিক্খন্তো অট্ঠাসি ‘‘মা হেৰ নং কোচি ৰিহেঠেয্যা’’তি. কুমারো মাতু সন্তিকং ধাৰন্তো অগমাসি. আরক্খকপুরিসা চ নং দিস্ৰা দেৰিযা আরোচেসুং. দেৰী ৰীসতিনাটকিত্থিসহস্সপরিৰুতা গন্ত্ৰা পটিগ্গহেসি, রঞ্ঞো চ পৰত্তিং পুচ্ছি. অথ ‘‘পচ্ছতো আগচ্ছতী’’তি সুত্ৰা মনুস্সে পেসেসি. রাজাপি তাৰদেৰ সকৰসতিং অগমাসি. মনুস্সা রাজানং অদিস্ৰা নিৰত্তিংসু. ততো দেৰী নিরাসাৰ হুত্ৰা, পুত্তং গহেত্ৰা, নগরং গন্ত্ৰা, তং রজ্জে অভিসিঞ্চি. রাজাপি অত্তনো ৰসতিং পত্ৰা, তত্থ নিসিন্নো ৰিপস্সিত্ৰা, পচ্চেকবোধিং সচ্ছিকত্ৰা, মঞ্জূসকরুক্খমূলে পচ্চেকবুদ্ধানং মজ্ঝে ইমং উদানগাথং অভাসি –

‘‘এৰং দুতিযেন সহ মমস্স, ৰাচাভিলাপো অভিসজ্জনা ৰা;

এতং ভযং আযতিং পেক্খমানো, একো চরে খগ্গৰিসাণকপ্পো’’তি.

সা ¶ পদত্থতো উত্তানা এৰ. অযং পনেত্থ অধিপ্পাযো – য্ৰাযং এতেন দুতিযেন কুমারেন সীতুণ্হাদীনি নিৰেদেন্তেন সহৰাসেন তং সঞ্ঞাপেন্তস্স মম ৰাচাভিলাপো, তস্মিং সিনেহৰসেন অভিসজ্জনা চ জাতা, সচে অহং ইমং ন পরিচ্চজামি, ততো আযতিম্পি হেস্সতি যথেৰ ইদানি; এৰং দুতিযেন সহ মমস্স ৰাচাভিলাপো অভিসজ্জনা ৰা. উভযম্পি চেতং অন্তরাযকরং ৰিসেসাধিগমস্সাতি এতং ভযং আযতিং পেক্খমানো তং ছড্ডেত্ৰা যোনিসো পটিপজ্জিত্ৰা পচ্চেকবোধিং অধিগতোম্হীতি. সেসং ৰুত্তনযমেৰাতি.

আযতিভযগাথাৰণ্ণনা সমত্তা.

৫০. কামা হি চিত্রাতি কা উপ্পত্তি? বারাণসিযং কির সেট্ঠিপুত্তো দহরোৰ সেট্ঠিট্ঠানং লভি. তস্স তিণ্ণং উতূনং তযো পাসাদা হোন্তি ¶ . সো তত্থ সব্বসম্পত্তীহি দেৰকুমারো ৰিয পরিচারেতি. সো দহরোৰ সমানো ‘‘পব্বজিস্সামী’’তি মাতাপিতরো যাচি. তে নং ৰারেন্তি. সো তথেৰ নিবন্ধতি. পুনপি নং মাতাপিতরো ‘‘ত্ৰং, তাত, সুখুমালো, দুক্করা পব্বজ্জা, খুরধারায উপরি চঙ্কমনসদিসা’’তি নানপ্পকারেহি ৰারেন্তি. সো তথেৰ নিবন্ধতি. তে চিন্তেসুং ‘‘সচাযং ¶ পব্বজতি, অম্হাকং দোমনস্সং হোতি. সচে নং নিৰারেম, এতস্স দোমনস্সং হোতি. অপিচ অম্হাকং দোমনস্সং হোতু, মা চ এতস্সা’’তি অনুজানিংসু. ততো সো সব্বপরিজনং পরিদেৰমানং অনাদিযিত্ৰা ইসিপতনং গন্ত্ৰা পচ্চেকবুদ্ধানং সন্তিকে পব্বজি. তস্স উল়ারসেনাসনং ন পাপুণাতি, মঞ্চকে তট্টিকং পত্থরিত্ৰা সযি. সো ৰরসযনে কতপরিচযো সব্বরত্তিং অতিদুক্খিতো অহোসি. পভাতেপি সরীরপরিকম্মং কত্ৰা, পত্তচীৰরমাদায পচ্চেকবুদ্ধেহি সদ্ধিং পিণ্ডায পাৰিসি. তত্থ ৰুড্ঢা অগ্গাসনঞ্চ অগ্গপিণ্ডঞ্চ লভন্তি, নৰকা যংকিঞ্চিদেৰ আসনং লূখভোজনঞ্চ. সো তেন লূখভোজনেনাপি অতিদুক্খিতো অহোসি. সো কতিপাহংযেৰ কিসো দুব্বণ্ণো হুত্ৰা নিব্বিজ্জি যথা তং অপরিপাকগতে সমণধম্মে. ততো মাতাপিতূনং দূতং পেসেত্ৰা উপ্পব্বজি. সো কতিপাহংযেৰ বলং গহেত্ৰা পুনপি পব্বজিতুকামো অহোসি. ততো তেনেৰ কমেন পব্বজিত্ৰা পুনপি উপ্পব্বজিত্ৰা ততিযৰারে পব্বজিত্ৰা সম্মা পটিপন্নো পচ্চেকসম্বোধিং সচ্ছিকত্ৰা ইমং উদানগাথং ৰত্ৰা পুন পচ্চেকবুদ্ধানং মজ্ঝে ইমমেৰ ব্যাকরণগাথং অভাসি –

‘‘কামা হি চিত্রা মধুরা মনোরমা, ৰিরূপরূপেন মথেন্তি চিত্তং;

আদীনৰং কামগুণেসু দিস্ৰা, একো চরে খগ্গৰিসাণকপ্পো’’তি.

তত্থ ¶ কামাতি দ্ৰে কামা ৰত্থুকামা চ কিলেসকামা চ. তত্থ ৰত্থুকামা মনাপিযরূপাদযো ধম্মা, কিলেসকামা ছন্দাদযো সব্বেপি রাগপ্পভেদা. ইধ পন ৰত্থুকামা অধিপ্পেতা. রূপাদিঅনেকপ্পকারৰসেন চিত্রা. লোকস্সাদৰসেন মধুরা. বালপুথুজ্জনানং মনং রমেন্তীতি মনোরমা. ৰিরূপরূপেনাতি ৰিরূপেন রূপেন, অনেকৰিধেন সভাৰেনাতি ৰুত্তং হোতি. তে হি রূপাদিৰসেন চিত্রা, রূপাদীসুপি নীলাদিৰসেন ৰিৰিধরূপা. এৰং তেন ৰিরূপরূপেন তথা তথা অস্সাদং দস্সেত্ৰা ¶ মথেন্তি চিত্তং পব্বজ্জায অভিরমিতুং ন দেন্তীতি. সেসমেত্থ পাকটমেৰ. নিগমনম্পি দ্ৰীহি তীহি ৰা পদেহি যোজেত্ৰা পুরিমগাথাসু ৰুত্তনযেনেৰ ৰেদিতব্বন্তি.

কামগাথাৰণ্ণনা সমত্তা.

৫১. ঈতী ¶ চাতি কা উপ্পত্তি? বারাণসিযং কির রঞ্ঞো গণ্ডো উদপাদি. বাল়্হা ৰেদনা ৰত্তন্তি. ৰেজ্জা ‘‘সত্থকম্মেন ৰিনা ফাসু ন হোতী’’তি ভণন্তি. রাজা তেসং অভযং দত্ৰা সত্থকম্মং কারাপেসি. তে ফালেত্ৰা, পুব্বলোহিতং নীহরিত্ৰা, নিব্বেদনং কত্ৰা, ৰণং পট্টেন বন্ধিংসু, আহারাচারেসু চ নং সম্মা ওৰদিংসু. রাজা লূখভোজনেন কিসসরীরো অহোসি, গণ্ডো চস্স মিলাযি. সো ফাসুকসঞ্ঞী হুত্ৰা সিনিদ্ধাহারং ভুঞ্জি. তেন চ সঞ্জাতবলো ৰিসযে পটিসেৰি. তস্স গণ্ডো পুন পুরিমসভাৰমেৰ সম্পাপুণি. এৰং যাৰ তিক্খত্তুং সত্থকম্মং কারাপেত্ৰা, ৰেজ্জেহি পরিৰজ্জিতো নিব্বিজ্জিত্ৰা, রজ্জং পহায পব্বজিত্ৰা, অরঞ্ঞং পৰিসিত্ৰা, ৰিপস্সনং আরভিত্ৰা, সত্তহি ৰস্সেহি পচ্চেকবোধিং সচ্ছিকত্ৰা, ইমং উদানগাথং ভাসিত্ৰা নন্দমূলকপব্ভারং অগমাসি.

‘‘ঈতী চ গণ্ডো চ উপদ্দৰো চ, রোগো চ সল্লঞ্চ ভযঞ্চ মেতং;

এতং ভযং কামগুণেসু দিস্ৰা, একো চরে খগ্গৰিসাণকপ্পো’’তি.

তত্থ এতীতি ঈতি, আগন্তুকানং অকুসলভাগিযানং ব্যসনহেতূনং এতং অধিৰচনং. তস্মা কামগুণাপি এতে অনেকব্যসনাৰহট্ঠেন দল়্হসন্নিপাতট্ঠেন চ ঈতি. গণ্ডোপি অসুচিং পগ্ঘরতি, উদ্ধুমাতপরিপক্কপরিভিন্নো হোতি. তস্মা এতে কিলেসাসুচিপগ্ঘরণতো উপ্পাদজরাভঙ্গেহি উদ্ধুমাতপরিপক্কপরিভিন্নভাৰতো চ গণ্ডো. উপদ্দৰতীতি উপদ্দৰো; অনত্থং জনেন্তো অভিভৰতি; অজ্ঝোত্থরতীতি অত্থো, রাজদণ্ডাদীনমেতং অধিৰচনং. তস্মা কামগুণাপেতে অৰিদিতনিব্বানত্থাৰহহেতুতায সব্বুপদ্দৰৰত্থুতায চ উপদ্দৰো. যস্মা পনেতে কিলেসাতুরভাৰং জনেন্তা সীলসঙ্খাতমারোগ্যং, লোলুপ্পং ৰা ¶ উপ্পাদেন্তা পাকতিকমেৰ আরোগ্যং ৰিলুম্পন্তি, তস্মা ইমিনা ¶ আরোগ্যৰিলুম্পনট্ঠেনেৰ রোগো. অব্ভন্তরমনুপ্পৰিট্ঠট্ঠেন পন অন্তোতুদকট্ঠেন দুন্নিহরণীযট্ঠেন চ সল্লং. দিট্ঠধম্মিকসম্পরাযিকভযাৰহনতো ¶ ভযং. মে এতন্তি মেতং. সেসমেত্থ পাকটমেৰ. নিগমনং ৰুত্তনযেনেৰ ৰেদিতব্বন্তি.

ঈতিগাথাৰণ্ণনা সমত্তা.

৫২. সীতঞ্চাতি কা উপ্পত্তি? বারাণসিযং কির সীতালুকব্রহ্মদত্তো নাম রাজা অহোসি. সো পব্বজিত্ৰা অরঞ্ঞকুটিকায ৰিহরতি. তস্মিঞ্চ পদেসে সীতে সীতং, উণ্হে উণ্হমেৰ চ হোতি অব্ভোকাসত্তা পদেসস্স. গোচরগামে ভিক্খা যাৰদত্থায ন লব্ভতি. পিৰনকপানীযম্পি দুল্লভং, ৰাতাতপডংসসরীসপাপি বাধেন্তি. তস্স এতদহোসি – ‘‘ইতো অড্ঢযোজনমত্তে সম্পন্নো পদেসো, তত্থ সব্বেপি এতে পরিস্সযা নত্থি. যংনূনাহং তত্থ গচ্ছেয্যং; ফাসুকং ৰিহরন্তেন সক্কা ৰিসেসং অধিগন্তু’’ন্তি. তস্স পুন অহোসি – ‘‘পব্বজিতা নাম ন পচ্চযৰসিকা হোন্তি, এৰরূপঞ্চ চিত্তং ৰসে ৰত্তেন্তি, ন চিত্তস্স ৰসে ৰত্তেন্তি, নাহং গমিস্সামী’’তি পচ্চৰেক্খিত্ৰা ন অগমাসি. এৰং যাৰততিযকং উপ্পন্নচিত্তং পচ্চৰেক্খিত্ৰা নিৰত্তেসি. ততো তত্থেৰ সত্ত ৰস্সানি ৰসিত্ৰা, সম্মা পটিপজ্জমানো পচ্চেকসম্বোধিং সচ্ছিকত্ৰা, ইমং উদানগাথং ভাসিত্ৰা নন্দমূলকপব্ভারং অগমাসি.

‘‘সীতঞ্চ উণ্হঞ্চ খুদং পিপাসং, ৰাতাতপে ডংসসরীসপে চ;

সব্বানিপেতানি অভিসম্ভৰিত্ৰা, একো চরে খগ্গৰিসাণকপ্পো’’তি.

তত্থ সীতঞ্চাতি সীতং নাম দুৰিধং অব্ভন্তরধাতুক্খোভপচ্চযঞ্চ, বাহিরধাতুক্খোভপচ্চযঞ্চ; তথা উণ্হং. ডংসাতি পিঙ্গলমক্খিকা. সরীসপাতি যে কেচি দীঘজাতিকা সরিত্ৰা গচ্ছন্তি. সেসং পাকটমেৰ. নিগমনম্পি ৰুত্তনযেনেৰ ৰেদিতব্বন্তি.

সীতালুকগাথাৰণ্ণনা সমত্তা.

৫৩. নাগোৰাতি ¶ কা উপ্পত্তি? বারাণসিযং কির অঞ্ঞতরো রাজা ৰীসতি ৰস্সানি রজ্জং কারেত্ৰা কালকতো নিরযে ৰীসতি এৰ ৰস্সানি পচ্চিত্ৰা হিমৰন্তপ্পদেসে হত্থিযোনিযং উপ্পজ্জিত্ৰা ¶ সঞ্জাতক্খন্ধো পদুমৰণ্ণসকলসরীরো উল়ারো যূথপতি মহানাগো অহোসি. তস্স ওভগ্গোভগ্গং সাখাভঙ্গং হত্থিছাপাৰ খাদন্তি. ওগাহেপি নং হত্থিনিযো কদ্দমেন লিম্পন্তি ¶ , সব্বং পালিলেয্যকনাগস্সেৰ অহোসি. সো যূথা নিব্বিজ্জিত্ৰা পক্কমি. ততো নং পদানুসারেন যূথং অনুবন্ধি. এৰং যাৰততিযং পক্কন্তো অনুবদ্ধোৰ. ততো চিন্তেসি – ‘‘ইদানি ময্হং নত্তকো বারাণসিযং রজ্জং কারেতি, যংনূনাহং অত্তনো পুরিমজাতিযা উয্যানং গচ্ছেয্যং, তত্র মং সো রক্খিস্সতী’’তি. ততো রত্তিং নিদ্দাৰসং গতে যূথে যূথং পহায তমেৰ উয্যানং পাৰিসি. উয্যানপালো দিস্ৰা রঞ্ঞো আরোচেসি. রাজা ‘‘হত্থিং গহেস্সামী’’তি সেনায পরিৰারেসি. হত্থী রাজানং এৰ অভিমুখো গচ্ছতি. রাজা ‘‘মং অভিমুখো এতী’’তি খুরপ্পং সন্নয্হিত্ৰা অট্ঠাসি. ততো হত্থী ‘‘ৰিজ্ঝেয্যাপি মং এসো’’তি মানুসিকায ৰাচায ‘‘ব্রহ্মদত্ত, মা মং ৰিজ্ঝ, অহং তে অয্যকো’’তি আহ. রাজা ‘‘কিং ভণসী’’তি সব্বং পুচ্ছি. হত্থীপি রজ্জে চ নরকে চ হত্থিযোনিযঞ্চ পৰত্তিং সব্বং আরোচেসি. রাজা ‘‘সুন্দরং, মা ভাযি, মা চ কঞ্চি ভিংসাপেহী’’তি হত্থিনো ৰট্টঞ্চ আরক্খকে চ হত্থিভণ্ডে চ উপট্ঠাপেসি.

অথেকদিৰসং রাজা হত্থিক্খন্ধগতো ‘‘অযং ৰীসতি ৰস্সানি রজ্জং কত্ৰা নিরযে পক্কো, ৰিপাকাৰসেসেন চ তিরচ্ছানযোনিযং উপ্পন্নো, তত্থপি গণৰাসসঙ্ঘট্টনং অসহন্তো ইধাগতো. অহো দুক্খো গণৰাসো, একীভাৰো এৰ চ পন সুখো’’তি চিন্তেত্ৰা তত্থেৰ ৰিপস্সনং আরভিত্ৰা পচ্চেকবোধিং সচ্ছাকাসি. তং লোকুত্তরসুখেন সুখিতং অমচ্চা উপসঙ্কমিত্ৰা, পণিপাতং কত্ৰা ‘‘যানকালো মহারাজা’’তি আহংসু. ততো ‘‘নাহং রাজা’’তি ৰত্ৰা পুরিমনযেনেৰ ইমং গাথং অভাসি –

‘‘নাগোৰ যূথানি ৰিৰজ্জযিত্ৰা, সঞ্জাতখন্ধো পদুমী উল়ারো;

যথাভিরন্তং ৰিহরং অরঞ্ঞে, একো চরে খগ্গৰিসাণকপ্পো’’তি.

সা ¶ ¶ পদত্থতো পাকটা এৰ. অযং পনেত্থ অধিপ্পাযযোজনা. সা চ খো যুত্তিৰসেনেৰ, ন অনুস্সৰৰসেন. যথা অযং হত্থী মনুস্সকন্তেসু সীলেসু দন্তত্তা অদন্তভূমিং নাগচ্ছতীতি ৰা, সরীরমহন্ততায ৰা নাগো, এৰং কুদাস্সু নামাহম্পি অরিযকন্তেসু সীলেসু দন্তত্তা অদন্তভূমিং নাগমনেন আগুং অকরণেন পুন ইত্থত্তং অনাগমনেন চ গুণসরীরমহন্ততায ৰা নাগো ভৰেয্যং. যথা চেস যূথানি ৰিৰজ্জেত্ৰা একচরিযসুখেন যথাভিরন্তং ৰিহরং অরঞ্ঞে একো চরে খগ্গৰিসাণকপ্পো, কুদাস্সু নামাহম্পি এৰং গণং ৰিৰজ্জেত্ৰা একৰিহারসুখেন ঝানসুখেন যথাভিরন্তং ৰিহরং অরঞ্ঞে অত্তনো যথা যথা সুখং, তথা তথা যত্তকং ৰা ইচ্ছামি, তত্তকং অরঞ্ঞে নিৰাসং একো চরে খগ্গৰিসাণকপ্পো চরেয্যন্তি অত্থো. যথা চেস সুসণ্ঠিতক্খন্ধতায ¶ সঞ্জাতক্খন্ধো, কুদাস্সু নামাহম্পি এৰং অসেখসীলক্খন্ধমহন্ততায সঞ্জাতক্খন্ধো ভৰেয্যং. যথা চেস পদুমসদিসগত্ততায ৰা পদুমকুলে উপ্পন্নতায ৰা পদুমী, কুদাস্সু নামাহম্পি এৰং পদুমসদিসউজুগত্ততায ৰা অরিযজাতিপদুমে উপ্পন্নতায ৰা পদুমী ভৰেয্যং. যথা চেস থামবলজৰাদীহি উল়ারো, কুদাস্সু নামাহম্পি এৰং পরিসুদ্ধকাযসমাচারতাদীহি সীলসমাধিনিব্বেধিকপঞ্ঞাদীহি ৰা উল়ারো ভৰেয্যন্তি এৰং চিন্তেন্তো ৰিপস্সনং আরভিত্ৰা পচ্চেকবোধিং অধিগতোম্হীতি.

নাগগাথাৰণ্ণনা সমত্তা.

৫৪. অট্ঠান তন্তি কা উপ্পত্তি? বারাণসিরঞ্ঞো কির পুত্তো দহরো এৰ সমানো পব্বজিতুকামো মাতাপিতরো যাচি. মাতাপিতরো নং ৰারেন্তি. সো ৰারিযমানোপি নিবন্ধতিযেৰ ‘‘পব্বজিস্সামী’’তি. ততো নং পুব্বে ৰুত্তসেট্ঠিপুত্তং ¶ ৰিয সব্বং ৰত্ৰা অনুজানিংসু. পব্বজিত্ৰা চ উয্যানেযেৰ ৰসিতব্বন্তি পটিজানাপেসুং, সো তথা অকাসি. তস্স মাতা পাতোৰ ৰীসতিসহস্সনাটকিত্থিপরিৰুতা উয্যানং গন্ত্ৰা, পুত্তং যাগুং পাযেত্ৰা, অন্তরা খজ্জকাদীনি চ খাদাপেত্ৰা, যাৰ মজ্ঝন্হিকসমযং তেন সদ্ধিং সমুল্লপিত্ৰা, নগরং পৰিসতি. পিতা চ মজ্ঝন্হিকে আগন্ত্ৰা, তং ভোজেত্ৰা অত্তনাপি ভুঞ্জিত্ৰা, দিৰসং তেন সদ্ধিং সমুল্লপিত্ৰা, সাযন্হসমযে ¶ জগ্গনপুরিসে ঠপেত্ৰা নগরং পৰিসতি. সো এৰং রত্তিন্দিৰং অৰিৰিত্তো ৰিহরতি. তেন খো পন সমযেন আদিচ্চবন্ধু নাম পচ্চেকবুদ্ধো নন্দমূলকপব্ভারে ৰিহরতি. সো আৰজ্জেন্তো তং অদ্দস – ‘‘অযং কুমারো পব্বজিতুং অসক্খি, জটং ছিন্দিতুং ন সক্কোতী’’তি. ততো পরং আৰজ্জি ‘‘অত্তনো ধম্মতায নিব্বিজ্জিস্সতি, নো’’তি. অথ ‘‘ধম্মতায নিব্বিন্দন্তো অতিচিরং ভৰিস্সতী’’তি ঞত্ৰা ‘‘তস্স আরম্মণং দস্সেস্সামী’’তি পুব্বে ৰুত্তনযেনেৰ মনোসিলাতলতো আগন্ত্ৰা উয্যানে অট্ঠাসি. রাজপুরিসো দিস্ৰা ‘‘পচ্চেকবুদ্ধো আগতো, মহারাজা’’তি রঞ্ঞো আরোচেসি. রাজা ‘‘ইদানি মে পুত্তো পচ্চেকবুদ্ধেন সদ্ধিং অনুক্কণ্ঠিতো ৰসিস্সতী’’তি পমুদিতমনো হুত্ৰা পচ্চেকবুদ্ধং সক্কচ্চং উপট্ঠহিত্ৰা তত্থেৰ ৰাসং যাচিত্ৰা পণ্ণসালাদিৰাৰিহারট্ঠানচঙ্কমাদিসব্বং কারেত্ৰা ৰাসেসি.

সো তত্থ ৰসন্তো একদিৰসং ওকাসং লভিত্ৰা কুমারং পুচ্ছি ‘‘কোসি ত্ৰ’’ন্তি? সো আহ ‘‘অহং পব্বজিতো’’তি. ‘‘পব্বজিতা নাম ন এদিসা হোন্তী’’তি. ‘‘অথ ভন্তে, কীদিসা হোন্তি, কিং ময্হং অননুচ্ছৰিক’’ন্তি ৰুত্তে ‘‘ত্ৰং অত্তনো অননুচ্ছৰিকং ন পেক্খসি ¶ , ননু তে মাতা ৰীসতিসহস্সইত্থীহি সদ্ধিং পুব্বণ্হসমযে আগচ্ছন্তী উয্যানং অৰিৰিত্তং করোতি, পিতা মহতা বলকাযেন সাযন্হসমযে, জগ্গনপুরিসা সকলরত্তিং; পব্বজিতা নাম তৰ সদিসা ন হোন্তি, ‘এদিসা পন হোন্তী’’’তি তত্র ঠিতস্সেৰ ইদ্ধিযা হিমৰন্তে অঞ্ঞতরং ৰিহারং দস্সেসি. সো তত্থ পচ্চেকবুদ্ধে আলম্বনবাহং ¶ নিস্সায ঠিতে চ চঙ্কমন্তে চ রজনকম্মসূচিকম্মাদীনি করোন্তে চ দিস্ৰা আহ – ‘‘তুম্হে ইধ, নাগচ্ছথ, পব্বজ্জা নাম তুম্হেহি অনুঞ্ঞাতা’’তি. ‘‘আম, পব্বজ্জা অনুঞ্ঞাতা, পব্বজিতকালতো পট্ঠায সমণা নাম অত্তনো নিস্সরণং কাতুং ইচ্ছিতপত্থিতঞ্চ পদেসং গন্তুং লভন্তি, এত্তকংৰ ৰট্টতী’’তি ৰত্ৰা আকাসে ঠত্ৰা –

‘‘অট্ঠান তং সঙ্গণিকারতস্স, যং ফস্সযে সামযিকং ৰিমুত্তি’’ন্তি. –

ইমং ¶ উপড্ঢগাথং ৰত্ৰা, দিস্সমানেনেৰ কাযেন নন্দমূলকপব্ভারং অগমাসি. এৰং গতে পচ্চেকবুদ্ধে সো অত্তনো পণ্ণসালং পৰিসিত্ৰা নিপজ্জি. আরক্খকপুরিসোপি ‘‘সযিতো কুমারো, ইদানি কুহিং গমিস্সতী’’তি পমত্তো নিদ্দং ওক্কমি. সো তস্স পমত্তভাৰং ঞত্ৰা পত্তচীৰরং গহেত্ৰা অরঞ্ঞং পাৰিসি. তত্র চ ৰিৰিত্তো ৰিপস্সনং আরভিত্ৰা, পচ্চেকবোধিং সচ্ছিকত্ৰা, পচ্চেকবুদ্ধট্ঠানং গতো. তত্র চ ‘‘কথমধিগত’’ন্তি পুচ্ছিতো আদিচ্চবন্ধুনা ৰুত্তং উপড্ঢগাথং পরিপুণ্ণং কত্ৰা অভাসি.

তস্সত্থো – অট্ঠান তন্তি. অট্ঠানং তং, অকারণং তন্তি ৰুত্তং হোতি, অনুনাসিকলোপো কতো ‘‘অরিযসচ্চান দস্সন’’ন্তিআদীসু (খু. পা. ৫.১১; সু. নি. ২৭০) ৰিয. সঙ্গণিকারতস্সাতি গণাভিরতস্স. যন্তি করণৰচনমেতং ‘‘যং হিরীযতি হিরীযিতব্বেনা’’তিআদীসু (ধ. স. ৩০) ৰিয. ফস্সযেতি অধিগচ্ছে. সামযিকং ৰিমুত্তিন্তি লোকিযসমাপত্তিং. সা হি অপ্পিতপ্পিতসমযে এৰ পচ্চনীকেহি ৰিমুচ্চনতো ‘‘সামযিকা ৰিমুত্তী’’তি ৰুচ্চতি. তং সামযিকং ৰিমুত্তিং. অট্ঠানং তং, ন তং কারণং ৰিজ্জতি সঙ্গণিকারতস্স, যেন কারণেন ফস্সযেতি এতং আদিচ্চবন্ধুস্স পচ্চেকবুদ্ধস্স ৰচো নিসম্ম সঙ্গণিকারতিং পহায যোনিসো পটিপজ্জন্তো অধিগতোম্হীতি আহ. সেসং ৰুত্তনযমেৰাতি.

অট্ঠানগাথাৰণ্ণনা সমত্তা.

দুতিযো ৰগ্গো নিট্ঠিতো.

৫৫. দিট্ঠীৰিসূকানীতি ¶ ¶ কা উপ্পত্তি? বারাণসিযং কির অঞ্ঞতরো রাজা রহোগতো চিন্তেসি – ‘‘যথা সীতাদীনং পটিঘাতকানি উণ্হাদীনি অত্থি, অত্থি নু খো এৰং ৰট্টপটিঘাতকং ৰিনট্টং, নো’’তি. সো অমচ্চে পুচ্ছি – ‘‘ৰিৰট্টং জানাথা’’তি? তে ‘‘জানাম, মহারাজা’’তি আহংসু. রাজা – ‘‘কিং ত’’ন্তি? ততো ‘‘অন্তৰা লোকো’’তিআদিনা নযেন সস্সতুচ্ছেদং কথেসুং. অথ রাজা ‘‘ইমে ন জানন্তি, সব্বেপিমে দিট্ঠিগতিকা’’তি সযমেৰ তেসং ৰিলোমতঞ্চ অযুত্ততঞ্চ দিস্ৰা ‘‘ৰট্টপটিঘাতকং ৰিৰট্টং অত্থি, তং গৰেসিতব্ব’’ন্তি চিন্তেত্ৰা রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছাকাসি. ইমঞ্চ উদানগাথং অভাসি পচ্চেকবুদ্ধমজ্ঝে ব্যাকরণগাথঞ্চ –

‘‘দিট্ঠীৰিসূকানি ¶ উপাতিৰত্তো, পত্তো নিযামং পটিলদ্ধমগ্গো;

উপ্পন্নঞাণোম্হি অনঞ্ঞনেয্যো, একো চরে খগ্গৰিসাণকপ্পো’’তি.

তস্সত্থো – দিট্ঠীৰিসূকানীতি দ্ৰাসট্ঠিদিট্ঠিগতানি. তানি হি মগ্গসম্মাদিট্ঠিযা ৰিসূকট্ঠেন ৰিজ্ঝনট্ঠেন ৰিলোমট্ঠেন চ ৰিসূকানি. এৰং দিট্ঠিযা ৰিসূকানি, দিট্ঠি এৰ ৰা ৰিসূকানি দিট্ঠিৰিসূকানি. উপাতিৰত্তোতি দস্সনমগ্গেন অতিক্কন্তো. পত্তো নিযামন্তি অৰিনিপাতধম্মতায সম্বোধিপরাযণতায চ নিযতভাৰং অধিগতো, সম্মত্তনিযামসঙ্খাতং ৰা পঠমমগ্গন্তি. এত্তাৰতা পঠমমগ্গকিচ্চনিপ্ফত্তি চ তস্স পটিলাভো চ ৰুত্তো. ইদানি পটিলদ্ধমগ্গোতি ইমিনা সেসমগ্গপটিলাভং দস্সেতি. উপ্পন্নঞাণোম্হীতি উপ্পন্নপচ্চেকবোধিঞাণো অম্হি. এতেন ফলং দস্সেতি. অনঞ্ঞনেয্যোতি অঞ্ঞেহি ‘‘ইদং সচ্চং, ইদং সচ্চ’’ন্তি ন নেতব্বো. এতেন সযম্ভুতং দীপেতি, পত্তে ৰা পচ্চেকবোধিঞাণে অনেয্যতায অভাৰা সযংৰসিতং. সমথৰিপস্সনায ৰা দিট্ঠিৰিসূকানি উপাতিৰত্তো, আদিমগ্গেন পত্তো নিযামং, সেসেহি ¶ পটিলদ্ধমগ্গো, ফলঞাণেন উপ্পন্নঞাণো, তং সব্বং অত্তনাৰ অধিগতোতি অনঞ্ঞনেয্যো. সেসং ৰুত্তনযেনেৰ ৰেদিতব্বন্তি.

দিট্ঠিৰিসূকগাথাৰণ্ণনা সমত্তা.

৫৬. নিল্লোলুপোতি কা উপ্পত্তি? বারাণসিরঞ্ঞো কির সূদো অন্তরভত্তং পচিত্ৰা উপনামেসি মনুঞ্ঞদস্সনং সাদুরসং ‘‘অপ্পেৰ নাম মে রাজা ধনমনুপ্পদেয্যা’’তি. তং রঞ্ঞো গন্ধেনেৰ ভোত্তুকামতং জনেসি মুখে খেল়ং উপ্পাদেন্তং. পঠমকবল়ে পন মুখে পক্খিত্তমত্তে সত্তরসহরণিসহস্সানি অমতেনেৰ ফুট্ঠানি অহেসুং. সূদো ‘‘ইদানি মে দস্সতি, ইদানি মে দস্সতী’’তি ¶ চিন্তেসি. রাজাপি ‘‘সক্কারারহো সূদো’’তি চিন্তেসি – ‘‘রসং সাযিত্ৰা পন সক্করোন্তং মং পাপকো কিত্তিসদ্দো অব্ভুগ্গচ্ছেয্য – ‘লোলো অযং রাজা রসগরুকো’’’তি ন কিঞ্চি অভণি. এৰং যাৰ ভোজনপরিযোসানং, তাৰ সূদোপি ‘‘ইদানি দস্সতি, ইদানি দস্সতী’’তি চিন্তেসি. রাজাপি অৰণ্ণভযেন ন কিঞ্চি অভণি. ততো ¶ সূদো ‘‘নত্থি ইমস্স রঞ্ঞো জিৰ্হাৰিঞ্ঞাণ’’ন্তি দুতিযদিৰসে অরসভত্তং উপনামেসি. রাজা ভুঞ্জন্তো ‘‘নিগ্গহারহো অজ্জ সূদো’’তি জানন্তোপি পুব্বে ৰিয পচ্চৰেক্খিত্ৰা অৰণ্ণভযেন ন কিঞ্চি অভণি. ততো সূদো ‘‘রাজা নেৰ সুন্দরং নাসুন্দরং জানাতী’’তি চিন্তেত্ৰা সব্বং পরিব্বযং অত্তনা গহেত্ৰা যংকিঞ্চিদেৰ পচিত্ৰা রঞ্ঞো দেতি. রাজা ‘‘অহো ৰত লোভো, অহং নাম ৰীসতি নগরসহস্সানি ভুঞ্জন্তো ইমস্স লোভেন ভত্তমত্তম্পি ন লভামী’’তি নিব্বিজ্জিত্ৰা, রজ্জং পহায পব্বজিত্ৰা, ৰিপস্সন্তো পচ্চেকবোধিং সচ্ছাকাসি, পুরিমনযেনেৰ চ ইমং গাথং অভাসি –

‘‘নিল্লোলুপো নিক্কুহো নিপ্পিপাসো, নিম্মক্খো নিদ্ধন্তকসাৰমোহো;

নিরাসযো সব্বলোকে ভৰিত্ৰা, একো চরে খগ্গৰিসাণকপ্পো’’তি.

তত্থ নিল্লোলুপোতি অলোলুপো. যো হি রসতণ্হাভিভূতো হোতি, সো ভুসং লুপ্পতি পুনপ্পুনঞ্চ লুপ্পতি, তেন লোলুপোতি ৰুচ্চতি. তস্মা এস তং পটিক্খিপন্তো আহ ‘‘নিল্লোলুপো’’তি. নিক্কুহোতি এত্থ কিঞ্চাপি যস্স তিৰিধং কুহনৰত্থু নত্থি, সো নিক্কুহোতি ৰুচ্চতি. ইমিস্সা পন গাথায মনুঞ্ঞভোজনাদীসু ৰিম্হযমনাপজ্জনতো নিক্কুহোতি অযমধিপ্পাযো ¶ . নিপ্পিপাসোতি এত্থ পাতুমিচ্ছা পিপাসা, তস্সা অভাৰেন নিপ্পিপাসো, সাদুরসলোভেন ভোত্তুকম্যতাৰিরহিতোতি অত্থো. নিম্মক্খোতি এত্থ পরগুণৰিনাসনলক্খণো মক্খো, তস্স অভাৰেন নিম্মক্খো. অত্তনো গহট্ঠকালে সূদস্স গুণমক্খনাভাৰং সন্ধাযাহ. নিদ্ধন্তকসাৰমোহোতি এত্থ রাগাদযো তযো, কাযদুচ্চরিতাদীনি চ তীণীতি ছ ধম্মা যথাসম্ভৰং অপ্পসন্নট্ঠেন সকভাৰং ৰিজহাপেত্ৰা পরভাৰং গণ্হাপনট্ঠেন কসটট্ঠেন চ কসাৰাতি ৰেদিতব্বা. যথাহ –

‘‘তত্থ, কতমে তযো কসাৰা? রাগকসাৰো, দোসকসাৰো, মোহকসাৰো, ইমে তযো কসাৰা. তত্থ, কতমে অপরেপি তযো কসাৰা? কাযকসাৰো, ৰচীকসাৰো, মনোকসাৰো’’তি (ৰিভ. ৯২৪).

তেসু ¶ ¶ মোহং ঠপেত্ৰা পঞ্চন্নং কসাৰানং তেসঞ্চ সব্বেসং মূলভূতস্স মোহস্স নিদ্ধন্তত্তা নিদ্ধন্তকসাৰমোহো, তিণ্ণং এৰ ৰা কাযৰচীমনোকসাৰানং মোহস্স চ নিদ্ধন্তত্তা নিদ্ধন্তকসাৰমোহো. ইতরেসু নিল্লোলুপতাদীহি রাগকসাৰস্স, নিম্মক্খতায দোসকসাৰস্স নিদ্ধন্তভাৰো সিদ্ধো এৰ. নিরাসযোতি নিত্তণ্হো. সব্বলোকেতি সকললোকে, তীসু ভৰেসু দ্ৰাদসসু ৰা আযতনেসু ভৰৰিভৰতণ্হাৰিরহিতো হুত্ৰাতি অত্থো. সেসং ৰুত্তনযেনেৰ ৰেদিতব্বং. অথ ৰা তযোপি পাদে ৰত্ৰা একো চরেতি একো চরিতুং সক্কুণেয্যাতি এৰম্পি এত্থ সম্বন্ধো কাতব্বোতি.

নিল্লোলুপগাথাৰণ্ণনা সমত্তা.

৫৭. পাপং সহাযন্তি কা উপ্পত্তি? বারাণসিযং কির অঞ্ঞতরো রাজা মহচ্চরাজানুভাৰেন নগরং পদক্খিণং করোন্তো মনুস্সে কোট্ঠাগারতো পুরাণধঞ্ঞানি বহিদ্ধা নীহরন্তে দিস্ৰা ‘‘কিং, ভণে, ইদ’’ন্তি অমচ্চে পুচ্ছি. ‘‘ইদানি, মহারাজ, নৰধঞ্ঞানি উপ্পজ্জিস্সন্তি, তেসং ওকাসং কাতুং ইমে মনুস্সা পুরাণধঞ্ঞাদীনি ছড্ডেন্তী’’তি. রাজা – ‘‘কিং, ভণে, ইত্থাগারবলকাযাদীনং ৰট্টং পরিপুণ্ণ’’ন্তি ¶ ? ‘‘আম, মহারাজ, পরিপুণ্ণন্তি’’. ‘‘তেন হি, ভণে, দানসালং কারাপেথ, দানং দস্সামি, মা ইমানি ধঞ্ঞানি অনুপকারানি ৰিনস্সিংসূ’’তি. ততো নং অঞ্ঞতরো দিট্ঠিগতিকো অমচ্চো ‘‘মহারাজ, নত্থি দিন্ন’’ন্তি আরব্ভ যাৰ ‘‘বালা চ পণ্ডিতা চ সন্ধাৰিত্ৰা সংসরিত্ৰা দুক্খস্সন্তং করিস্সন্তী’’তি ৰত্ৰা নিৰারেসি. সো দুতিযম্পি ততিযম্পি কোট্ঠাগারে ৰিলুম্পন্তে দিস্ৰা তথেৰ আণাপেসি. ততিযম্পি নং ‘‘মহারাজ, দত্তুপঞ্ঞত্তং যদিদং দান’’ন্তিআদীনি ৰত্ৰা নিৰারেসি. সো ‘‘অরে, অহং অত্তনো সন্তকম্পি ন লভামি দাতুং, কিং মে ইমেহি পাপসহাযেহী’’তি নিব্বিন্নো রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছাকাসি. তঞ্চ পাপং সহাযং গরহন্তো ইমং উদানগাথং অভাসি –

‘‘পাপং সহাযং পরিৰজ্জযেথ, অনত্থদস্সিং ৰিসমে নিৰিট্ঠং;

সযং ন সেৰে পসুতং পমত্তং, একো চরে খগ্গৰিসাণকপ্পো’’তি.

তস্সাযং ¶ সঙ্খেপত্থো – য্ৰাযং দসৰত্থুকায পাপদিট্ঠিযা সমন্নাগতত্তা পাপো, পরেসম্পি অনত্থং পস্সতীতি অনত্থদস্সী, কাযদুচ্চরিতাদিম্হি চ ৰিসমে নিৰিট্ঠো, তং অত্থকামো কুলপুত্তো পাপং সহাযং পরিৰজ্জযেথ অনত্থদস্সিং ৰিসমে নিৰিট্ঠং. সযং ন সেৰেতি অত্তনো ৰসেন ন সেৰে. যদি পন পরৰসো হোতি, কিং সক্কা কাতুন্তি ৰুত্তং হোতি. পসুতন্তি পসটং ¶ , দিট্ঠিৰসেন তত্থ তত্থ লগ্গন্তি অত্থো. পমত্তন্তি কামগুণেসু ৰোস্সট্ঠচিত্তং, কুসলভাৰনারহিতং ৰা. তং এৰরূপং ন সেৰে, ন ভজে, ন পযিরুপাসে, অঞ্ঞদত্থু একো চরে খগ্গৰিসাণকপ্পোতি.

পাপসহাযগাথাৰণ্ণনা সমত্তা.

৫৮. বহুস্সুতন্তি কা উপ্পত্তি? পুব্বে কির কস্সপস্স ভগৰতো সাসনে অট্ঠ পচ্চেকবোধিসত্তা পব্বজিত্ৰা গতপচ্চাগতৰত্তং পূরেত্ৰা দেৰলোকে উপ্পন্নাতি সব্বং অনৰজ্জভোজীগাথায ৰুত্তসদিসমেৰ. অযং পন ৰিসেসো – পচ্চেকবুদ্ধে নিসীদাপেত্ৰা রাজা আহ ‘‘কে তুম্হে’’তি? তে আহংসু – ‘‘মযং, মহারাজ, বহুস্সুতা নামা’’তি. রাজা ¶ – ‘‘অহং সুতব্রহ্মদত্তো নাম, সুতেন তিত্তিং ন গচ্ছামি, হন্দ, নেসং সন্তিকে ৰিচিত্রনযং সদ্ধম্মদেসনং সোস্সামী’’তি অত্তমনো দক্খিণোদকং দত্ৰা, পরিৰিসিত্ৰা, ভত্তকিচ্চপরিযোসানে সঙ্ঘত্থেরস্স পত্তং গহেত্ৰা, ৰন্দিত্ৰা, পুরতো নিসীদি ‘‘ধম্মকথং, ভন্তে, করোথা’’তি. সো ‘‘সুখিতো হোতু, মহারাজ, রাগক্খযো হোতূ’’তি ৰত্ৰা উট্ঠিতো. রাজা ‘‘অযং ন বহুস্সুতো, দুতিযো বহুস্সুতো ভৰিস্সতি, স্ৰে দানি ৰিচিত্রধম্মদেসনং সোস্সামী’’তি স্ৰাতনায নিমন্তেসি. এৰং যাৰ সব্বেসং পটিপাটি গচ্ছতি, তাৰ নিমন্তেসি. তে সব্বেপি ‘‘দোসক্খযো হোতু, মোহক্খযো, গতিক্খযো, ৰট্টক্খযো, উপধিক্খযো, তণ্হক্খযো হোতূ’’তি এৰং একেকং পদং ৰিসেসেত্ৰা সেসং পঠমসদিসমেৰ ৰত্ৰা উট্ঠহিংসু.

ততো রাজা ‘‘ইমে ‘বহুস্সুতা ময’ন্তি ভণন্তি, ন চ তেসং ৰিচিত্রকথা, কিমেতেহি ৰুত্ত’’ন্তি তেসং ৰচনত্থং উপপরিক্খিতুমারদ্ধো. অথ ‘‘রাগক্খযো হোতূ’’তি উপপরিক্খন্তো ‘‘রাগে খীণে দোসোপি মোহোপি ¶ অঞ্ঞতরঞ্ঞতরেপি কিলেসা খীণা হোন্তী’’তি ঞত্ৰা অত্তমনো অহোসি – ‘‘নিপ্পরিযাযবহুস্সুতা ইমে সমণা. যথা হি পুরিসেন মহাপথৰিং ৰা আকাসং ৰা অঙ্গুলিযা নিদ্দিসন্তেন ন অঙ্গুলিমত্তোৰ পদেসো নিদ্দিট্ঠো হোতি, অপিচ, খো, পন পথৰীআকাসা এৰ নিদ্দিট্ঠা হোন্তি, এৰং ইমেহি একমেকং অত্থং নিদ্দিসন্তেহি অপরিমাণা অত্থা নিদ্দিট্ঠা হোন্তী’’তি. ততো সো ‘‘কুদাস্সু নামাহম্পি এৰং বহুস্সুতো ভৰিস্সামী’’তি তথারূপং বহুস্সুতভাৰং পত্থেন্তো রজ্জং পহায পব্বজিত্ৰা, ৰিপস্সন্তো পচ্চেকবোধিং সচ্ছিকত্ৰা, ইমং উদানগাথং অভাসি –

‘‘বহুস্সুতং ধম্মধরং ভজেথ, মিত্তং উল়ারং পটিভানৰন্তং;

অঞ্ঞায অত্থানি ৰিনেয্য কঙ্খং, একো চরে খগ্গৰিসাণকপ্পো’’তি.

তত্থাযং ¶ সঙ্খেপত্থো – বহুস্সুতন্তি দুৰিধো বহুস্সুতো তীসু পিটকেসু অত্থতো নিখিলো পরিযত্তিবহুস্সুতো চ, মগ্গফলৰিজ্জাভিঞ্ঞানং পটিৰিদ্ধত্তা পটিৰেধবহুস্সুতো চ. আগতাগমো ধম্মধরো. উল়ারেহি পন কাযৰচীমনোকম্মেহি সমন্নাগতো উল়ারো. যুত্তপটিভানো চ মুত্তপটিভানো ¶ চ যুত্তমুত্তপটিভানো চ পটিভানৰা. পরিযত্তিপরিপুচ্ছাধিগমৰসেন ৰা তিধা পটিভানৰা ৰেদিতব্বো. যস্স হি পরিযত্তি পটিভাতি, সো পরিযত্তিপটিভানৰা. যস্স অত্থঞ্চ ঞাণঞ্চ লক্খণঞ্চ ঠানাট্ঠানঞ্চ পরিপুচ্ছন্তস্স পরিপুচ্ছা পটিভাতি, সো পরিপুচ্ছাপটিভানৰা. যেন মগ্গাদযো পটিৰিদ্ধা হোন্তি, সো অধিগমপটিভানৰা. তং এৰরূপং বহুস্সুতং ধম্মধরং ভজেথ মিত্তং উল়ারং পটিভানৰন্তং. ততো তস্সানুভাৰেন অত্তত্থপরত্থউভযত্থভেদতো ৰা দিট্ঠধম্মিকসম্পরাযিকপরমত্থভেদতো ৰা অনেকপ্পকারানি অঞ্ঞায অত্থানি. ততো – ‘‘অহোসিং নু খো অহং অতীতমদ্ধান’’ন্তিআদীসু (ম. নি. ১.১৮; সং. নি. ২.২০) কঙ্খট্ঠানেসু ৰিনেয্য কঙ্খং, ৰিচিকিচ্ছং ৰিনেত্ৰা ৰিনাসেত্ৰা এৰং কতসব্বকিচ্চো একো চরে খগ্গৰিসাণকপ্পোতি.

বহুস্সুতগাথাৰণ্ণনা সমত্তা.

৫৯. খিড্ডং ¶ রতিন্তি কা উপ্পত্তি? বারাণসিযং ৰিভূসকব্রহ্মদত্তো নাম রাজা পাতোৰ যাগুং ৰা ভত্তং ৰা ভুঞ্জিত্ৰা নানাৰিধৰিভূসনেহি অত্তানং ৰিভূসাপেত্ৰা মহাআদাসে সকলসরীরং দিস্ৰা যং ন ইচ্ছতি তং অপনেত্ৰা অঞ্ঞেন ৰিভূসনেন ৰিভূসাপেতি. তস্স একদিৰসং এৰং করোতো ভত্তৰেলা মজ্ঝন্হিকসমযো পত্তো. অথ অৰিভূসিতোৰ দুস্সপট্টেন সীসং ৰেঠেত্ৰা, ভুঞ্জিত্ৰা, দিৰাসেয্যং উপগচ্ছি. পুনপি উট্ঠহিত্ৰা তথেৰ করোতো সূরিযো অত্থঙ্গতো. এৰং দুতিযদিৰসেপি ততিযদিৰসেপি. অথস্স এৰং মণ্ডনপ্পসুতস্স পিট্ঠিরোগো উদপাদি. তস্সেতদহোসি – ‘‘অহো রে, অহং সব্বথামেন ৰিভূসন্তোপি ইমস্মিং কপ্পকে ৰিভূসনে অসন্তুট্ঠো লোভং উপ্পাদেসিং. লোভো চ নামেস অপাযগমনীযো ধম্মো, হন্দাহং, লোভং নিগ্গণ্হামী’’তি রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছিকত্ৰা ইমং উদানগাথং অভাসি –

‘‘খিড্ডং রতিং কামসুখঞ্চ লোকে, অনলঙ্করিত্ৰা অনপেক্খমানো;

ৰিভূসনট্ঠানা ৰিরতো সচ্চৰাদী, একো চরে খগ্গৰিসাণকপ্পো’’তি.

তত্থ ¶ খিড্ডা চ রতি চ পুব্বে ৰুত্তাৰ. কামসুখন্তি ৰত্থুকামসুখং. ৰত্থুকামাপি হি সুখস্স ৰিসযাদিভাৰেন সুখন্তি ৰুচ্চন্তি. যথাহ – ‘‘অত্থি রূপং সুখং সুখানুপতিত’’ন্তি (সং. নি. ৩.৬০). এৰমেতং ¶ খিড্ডং রতিং কামসুখঞ্চ ইমস্মিং ওকাসলোকে অনলঙ্করিত্ৰা অলন্তি অকত্ৰা, এতং তপ্পকন্তি ৰা সারভূতন্তি ৰা এৰং অগ্গহেত্ৰা. অনপেক্খমানোতি তেন অলঙ্করণেন অনপেক্খণসীলো, অপিহালুকো, নিত্তণ্হো, ৰিভূসনট্ঠানা ৰিরতো সচ্চৰাদী একো চরেতি. তত্থ ৰিভূসা দুৰিধা – অগারিকৰিভূসা, অনগারিকৰিভূসা চ. তত্থ অগারিকৰিভূসা সাটকৰেঠনমালাগন্ধাদি, অনগারিকৰিভূসা পত্তমণ্ডনাদি. ৰিভূসা এৰ ৰিভূসনট্ঠানং. তস্মা ৰিভূসনট্ঠানা তিৰিধায ৰিরতিযা ৰিরতো. অৰিতথৰচনতো সচ্চৰাদীতি এৰমত্থো দট্ঠব্বো.

ৰিভূসনট্ঠানগাথাৰণ্ণনা সমত্তা.

৬০. পুত্তঞ্চ ¶ দারন্তি কা উপ্পত্তি? বারাণসিরঞ্ঞো কির পুত্তো দহরকালে এৰ অভিসিত্তো রজ্জং কারেসি. সো পঠমগাথায ৰুত্তপচ্চেকবোধিসত্তো ৰিয রজ্জসিরিমনুভৰন্তো একদিৰসং চিন্তেসি – ‘‘অহং রজ্জং কারেন্তো বহূনং দুক্খং করোমি. কিং মে একভত্তত্থায ইমিনা পাপেন, হন্দ সুখমুপ্পাদেমী’’তি রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছিকত্ৰা ইমং উদানগাথং অভাসি –

‘‘পুত্তঞ্চ দারং পিতরঞ্চ মাতরং, ধনানি ধঞ্ঞানি চ বন্ধৰানি;

হিত্ৰান কামানি যথোধিকানি, একো চরে খগ্গৰিসাণকপ্পো’’তি.

তত্থ ধনানীতি মুত্তামণিৰেল়ুরিযসঙ্খসিলাপৰাল়রজতজাতরূপাদীনি রতনানি. ধঞ্ঞানীতি সালিৰীহিযৰগোধুমকঙ্কুৰরককুদ্রূসকপভেদানি সত্ত সেসাপরণ্ণানি চ. বন্ধৰানীতি ঞাতিবন্ধুগোত্তবন্ধুমিত্তবন্ধুসিপ্পবন্ধুৰসেন ¶ চতুব্বিধে বন্ধৰে. যথোধিকানীতি সকসকওধিৰসেন ঠিতানেৰ. সেসং ৰুত্তনযমেৰাতি.

পুত্তদারগাথাৰণ্ণনা সমত্তা.

৬১. সঙ্গো এসোতি কা উপ্পত্তি? বারাণসিযং কির পাদলোলব্রহ্মদত্তো নাম রাজা অহোসি. সো পাতোৰ যাগুং ৰা ভত্তং ৰা ভুঞ্জিত্ৰা তীসু পাসাদেসু তিৰিধনাটকানি পস্সতি. তিৰিধনাটকানীতি কির পুব্বরাজতো আগতং, অনন্তররাজতো আগতং, অত্তনো কালে উট্ঠিতন্তি. সো একদিৰসং পাতোৰ দহরনাটকপাসাদং গতো. তা নাটকিত্থিযো ‘‘রাজানং ¶ রমাপেস্সামা’’তি সক্কস্স দেৰানমিন্দস্স অচ্ছরাযো ৰিয অতিমনোহরং নচ্চগীতৰাদিতং পযোজেসুং. রাজা – ‘‘অনচ্ছরিযমেতং দহরান’’ন্তি অসন্তুট্ঠো হুত্ৰা মজ্ঝিমনাটকপাসাদং গতো. তাপি নাটকিত্থিযো তথেৰ অকংসু. সো তত্থাপি তথেৰ অসন্তুট্ঠো হুত্ৰা মহানাটকপাসাদং গতো. তাপি নাটকিত্থিযো তথেৰ অকংসু. রাজা দ্ৰে তযো রাজপরিৰট্টে অতীতানং তাসং মহল্লকভাৰেন অট্ঠিকীল়নসদিসং নচ্চং দিস্ৰা গীতঞ্চ অমধুরং সুত্ৰা পুনদেৰ দহরনাটকপাসাদং, পুন মজ্ঝিমনাটকপাসাদন্তি এৰং ৰিচরিত্ৰা কত্থচি অসন্তুট্ঠো চিন্তেসি – ‘‘ইমা নাটকিত্থিযো সক্কং ¶ দেৰানমিন্দং অচ্ছরাযো ৰিয মং রমাপেতুকামা সব্বথামেন নচ্চগীতৰাদিতং পযোজেসুং, স্ৰাহং কত্থচি অসন্তুট্ঠো লোভমেৰ ৰড্ঢেমি, লোভো চ নামেস অপাযগমনীযো ধম্মো, হন্দাহং লোভং নিগ্গণ্হামী’’তি রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছিকত্ৰা ইমং উদানগাথং অভাসি –

‘‘সঙ্গো এসো পরিত্তমেত্থ সোখ্যং, অপ্পস্সাদো দুক্খমেত্থ ভিয্যো;

গল়ো এসো ইতি ঞত্ৰা মতিমা, একো চরে খগ্গৰিসাণকপ্পো’’তি.

তস্সত্থো – সঙ্গো এসোতি অত্তনো উপভোগং নিদ্দিসতি. সো হি সজ্জন্তি তত্থ পাণিনো কদ্দমে পৰিট্ঠো হত্থী ৰিযাতি সঙ্গো. পরিত্তমেত্থ সোখ্যন্তি এত্থ পঞ্চকামগুণূপভোগকালে ৰিপরীতসঞ্ঞায উপ্পাদেতব্বতো কামাৰচরধম্মপরিযাপন্নতো ৰা লামকট্ঠেন সোখ্যং পরিত্তং, ৰিজ্জুপ্পভায ওভাসিতনচ্চদস্সনসুখং ৰিয ইত্তরং ¶ , তাৰকালিকন্তি ৰুত্তং হোতি. অপ্পস্সাদো দুক্খমেত্থ ভিয্যোতি এত্থ চ য্ৰাযং ‘‘যং খো, ভিক্খৰে, ইমে পঞ্চ কামগুণে পটিচ্চ উপ্পজ্জতি সুখং সোমনস্সং, অযং কামানং অস্সাদো’’তি (ম. নি. ১.১৬৬) ৰুত্তো. সো যদিদং ‘‘কো চ, ভিক্খৰে, কামানং আদীনৰো? ইধ, ভিক্খৰে, কুলপুত্তো যেন সিপ্পট্ঠানেন জীৰিকং কপ্পেতি, যদি মুদ্দায, যদি গণনাযা’’তি এৰমাদিনা (ম. নি. ১.১৬৭) নযেনেত্থ দুক্খং ৰুত্তং. তং উপনিধায অপ্পো উদকবিন্দুমত্তো হোতি. অথ খো দুক্খমেৰ ভিয্যো বহু, চতূসু সমুদ্দেসু উদকসদিসং হোতি. তেন ৰুত্তং ‘‘অপ্পস্সাদো দুক্খমেত্থ ভিয্যো’’তি. গল়ো এসোতি অস্সাদং দস্সেত্ৰা আকড্ঢনৰসেন বল়িসো ৰিয এসো যদিদং পঞ্চ কামগুণা. ইতি ঞত্ৰা মতিমাতি এৰং ঞত্ৰা বুদ্ধিমা পণ্ডিতো পুরিসো সব্বম্পেতং পহায একো চরে খগ্গৰিসাণকপ্পোতি.

সঙ্গগাথাৰণ্ণনা সমত্তা.

৬২. সন্দালযিত্ৰানাতি কা উপ্পত্তি? বারাণসিযং কির অনিৰত্তব্রহ্মদত্তো নাম রাজা অহোসি ¶ . সো সঙ্গামং ওতিণ্ণো অজিনিত্ৰা অঞ্ঞং ৰা কিচ্চং আরদ্ধো অনিট্ঠপেত্ৰা ন নিৰত্ততি, তস্মা নং এৰং সঞ্জানিংসু. সো ¶ একদিৰসং উয্যানং গচ্ছতি. তেন চ সমযেন ৰনদাহো উট্ঠাসি. সো অগ্গি সুক্খানি চ হরিতানি চ তিণাদীনি দহন্তো অনিৰত্তমানো এৰ গচ্ছতি. রাজা তং দিস্ৰা তপ্পটিভাগনিমিত্তং উপ্পাদেসি. ‘‘যথাযং ৰনদাহো, এৰমেৰ একাদসৰিধো অগ্গি সব্বসত্তে দহন্তো অনিৰত্তমানোৰ গচ্ছতি মহাদুক্খং উপ্পাদেন্তো, কুদাস্সু নামাহম্পি ইমস্স দুক্খস্স নিৰত্তনত্থং অযং অগ্গি ৰিয অরিযমগ্গঞাণগ্গিনা কিলেসে দহন্তো অনিৰত্তমানো গচ্ছেয্য’’ন্তি? ততো মুহুত্তং গন্ত্ৰা কেৰট্টে অদ্দস নদিযং মচ্ছে গণ্হন্তে ¶ . তেসং জালন্তরং পৰিট্ঠো একো মহামচ্ছো জালং ভেত্ৰা পলাযি. তে ‘‘মচ্ছো জালং ভেত্ৰা গতো’’তি সদ্দমকংসু. রাজা তম্পি ৰচনং সুত্ৰা তপ্পটিভাগনিমিত্তং উপ্পাদেসি – ‘‘কুদাস্সু নামাহম্পি অরিযমগ্গঞাণেন তণ্হাদিট্ঠিজালং ভেত্ৰা অসজ্জমানো গচ্ছেয্য’’ন্তি. সো রজ্জং পহায পব্বজিত্ৰা ৰিপস্সনং আরভিত্ৰা পচ্চেকবোধিং সচ্ছাকাসি, ইমঞ্চ উদানগাথং অভাসি –

‘‘সন্দালযিত্ৰান সংযোজনানি, জালংৰ ভেত্ৰা সলিলম্বুচারী;

অগ্গীৰ দড্ঢং অনিৰত্তমানো, একো চরে খগ্গৰিসাণকপ্পো’’তি.

তস্সা দুতিযপাদে জালন্তি সুত্তমযং ৰুচ্চতি. অম্বূতি উদকং, তত্থ চরতীতি অম্বুচারী, মচ্ছস্সেতং অধিৰচনং. সলিলে অম্বুচারী সলিলম্বুচারী, তস্মিং নদীসলিলে জালং ভেত্ৰা অম্বুচারীৰাতি ৰুত্তং হোতি. ততিযপাদে দড্ঢন্তি দড্ঢট্ঠানং ৰুচ্চতি. যথা অগ্গি দড্ঢট্ঠানং পুন ন নিৰত্ততি, ন তত্থ ভিয্যো আগচ্ছতি, এৰং মগ্গঞাণগ্গিনা দড্ঢং কামগুণট্ঠানং অনিৰত্তমানো তত্থ ভিয্যো অনাগচ্ছন্তোতি ৰুত্তং হোতি. সেসং ৰুত্তনযমেৰাতি.

সন্দালনগাথাৰণ্ণনা সমত্তা.

৬৩. ওক্খিত্তচক্খূতি কা উপ্পত্তি? বারাণসিযং কির চক্খুলোলব্রহ্মদত্তো নাম রাজা পাদলোলব্রহ্মদত্তো ৰিয নাটকদস্সনমনুযুত্তো হোতি. অযং পন ৰিসেসো – সো অসন্তুট্ঠো তত্থ তত্থ গচ্ছতি, অযং তং তং নাটকং দিস্ৰা অতিৰিয অভিনন্দিত্ৰা নাটকপরিৰত্তদস্সনেন তণ্হং ৰড্ঢেন্তো ৰিচরতি. সো কির নাটকদস্সনায আগতং অঞ্ঞতরং ¶ কুটুম্বিযভরিযং দিস্ৰা রাগং উপ্পাদেসি. ততো সংৰেগমাপজ্জিত্ৰা পুন ‘‘অহং ইমং তণ্হং ৰড্ঢেন্তো অপাযপরিপূরকো ভৰিস্সামি, হন্দ নং নিগ্গণ্হামী’’তি পব্বজিত্ৰা ৰিপস্সন্তো পচ্চেকবোধিং ¶ সচ্ছিকত্ৰা অত্তনো পুরিমপটিপত্তিং গরহন্তো তপ্পটিপক্খগুণদীপিকং ইমং উদানগাথং অভাসি –

‘‘ওক্খিত্তচক্খূ ন চ পাদলোলো, গুত্তিন্দ্রিযো রক্খিতমানসানো;

অনৰস্সুতো অপরিডয্হমানো, একো চরে খগ্গৰিসাণকপ্পো’’তি.

তত্থ ¶ ওক্খিত্তচক্খূতি হেট্ঠাখিত্তচক্খু, সত্ত গীৰট্ঠীনি পটিপাটিযা ঠপেত্ৰা পরিৰজ্জগহেতব্বদস্সনত্থং যুগমত্তং পেক্খমানোতি ৰুত্তং হোতি. ন তু হনুকট্ঠিনা হদযট্ঠিং সঙ্ঘট্টেন্তো. এৰঞ্হি ওক্খিত্তচক্খুতা ন সমণসারুপ্পা হোতী. ন চ পাদলোলোতি একস্স দুতিযো, দ্ৰিন্নং ততিযোতি এৰং গণমজ্ঝং পৰিসিতুকামতায কণ্ডূযমানপাদো ৰিয অভৰন্তো, দীঘচারিকঅনৰট্ঠিতচারিকৰিরতো ৰা. গুত্তিন্দ্রিযোতি ছসু ইন্দ্রিযেসু ইধ ৰিসুংৰুত্তাৰসেসৰসেন গোপিতিন্দ্রিযো. রক্খিতমানসানোতি মানসং যেৰ মানসানং, তং রক্খিতমস্সাতি রক্খিতমানসানো. যথা কিলেসেহি ন ৰিলুপ্পতি, এৰং রক্খিতচিত্তোতি ৰুত্তং হোতি. অনৰস্সুতোতি ইমায পটিপত্তিযা তেসু তেসু আরম্মণেসু কিলেসঅন্ৰাস্সৰৰিরহিতো. অপরিডয্হমানোতি এৰং অন্ৰাস্সৰৰিরহাৰ কিলেসগ্গীহি অপরিডয্হমানো. বহিদ্ধা ৰা অনৰস্সুতো, অজ্ঝত্তং অপরিডয্হমানো. সেসং ৰুত্তনযমেৰাতি.

ওক্খিত্তচক্খুগাথাৰণ্ণনা সমত্তা.

৬৪. ওহারযিত্ৰাতি কা উপ্পত্তি? বারাণসিযং কির অযং অঞ্ঞোপি চাতুমাসিকব্রহ্মদত্তো নাম রাজা চতুমাসে চতুমাসে উয্যানকীল়ং গচ্ছতি. সো একদিৰসং গিম্হানং মজ্ঝিমে মাসে উয্যানং পৰিসন্তো উয্যানদ্ৰারে ¶ পত্তসঞ্ছন্নং পুপ্ফালঙ্কতৰিটপং পারিচ্ছত্তককোৰিল়ারং দিস্ৰা একং পুপ্ফং গহেত্ৰা উয্যানং পাৰিসি. ততো ‘‘রঞ্ঞা অগ্গপুপ্ফং গহিত’’ন্তি অঞ্ঞতরোপি অমচ্চো হত্থিক্খন্ধে ঠিতো এৰ একং পুপ্ফং অগ্গহেসি. এতেনেৰ উপাযেন সব্বো বলকাযো অগ্গহেসি. পুপ্ফং অনস্সাদেন্তা ¶ পত্তম্পি গণ্হিংসু. সো রুক্খো নিপ্পত্তপুপ্ফো খন্ধমত্তোৰ অহোসি. তং রাজা সাযন্হসমযে উয্যানা নিক্খমন্তো দিস্ৰা ‘‘কিং কতো অযং রুক্খো, মম আগমনৰেলাযং মণিৰণ্ণসাখন্তরেসু পৰাল়সদিসপুপ্ফালঙ্কতো অহোসি, ইদানি নিপ্পত্তপুপ্ফো জাতো’’তি চিন্তেন্তো তস্সেৰাৰিদূরে অপুপ্ফিতং রুক্খং সঞ্ছন্নপলাসং অদ্দস. দিস্ৰা চস্স এতদহোসি – ‘‘অযং রুক্খো পুপ্ফভরিতসাখত্তা বহুজনস্স লোভনীযো অহোসি, তেন মুহুত্তেনেৰ ব্যসনং পত্তো, অযং পনঞ্ঞো অলোভনীযত্তা তথেৰ ঠিতো. ইদম্পি রজ্জং পুপ্ফিতরুক্খো ¶ ৰিয লোভনীযং, ভিক্খুভাৰো পন অপুপ্ফিতরুক্খো ৰিয অলোভনীযো. তস্মা যাৰ ইদম্পি অযং রুক্খো ৰিয ন ৰিলুপ্পতি, তাৰ অযমঞ্ঞো সঞ্ছন্নপত্তো যথা পারিচ্ছত্তকো, এৰং কাসাৰেন পরিসঞ্ছন্নেন হুত্ৰা পব্বজিতব্ব’’ন্তি. সো রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছিকত্ৰা ইমং উদানগাথং অভাসি –

‘‘ওহারযিত্ৰা গিহিব্যঞ্জনানি, সঞ্ছন্নপত্তো যথা পারিছত্তো;

কাসাযৰত্থো অভিনিক্খমিত্ৰা, একো চরে খগ্গৰিসাণকপ্পো’’তি.

তত্থ কাসাযৰত্থো অভিনিক্খমিত্ৰাতি ইমস্স পাদস্স গেহা অভিনিক্খমিত্ৰা কাসাযৰত্থো হুত্ৰাতি এৰমত্থো ৰেদিতব্বো. সেসং ৰুত্তনযেনেৰ সক্কা জানিতুন্তি ন ৰিত্থারিতন্তি.

পারিচ্ছত্তকগাথাৰণ্ণনা সমত্তা.

ততিযো ৰগ্গো নিট্ঠিতো.

৬৫. রসেসূতি কা উপ্পত্তি? অঞ্ঞতরো কির বারাণসিরাজা উয্যানে অমচ্চপুত্তেহি পরিৰুতো সিলাপট্টপোক্খরণিযং কীল়তি. তস্স সূদো ¶ সব্বমংসানং রসং গহেত্ৰা অতীৰ সুসঙ্খতং অমতকপ্পং অন্তরভত্তং পচিত্ৰা উপনামেসি. সো তত্থ গেধমাপন্নো কস্সচি কিঞ্চি অদত্ৰা অত্তনাৰ ভুঞ্জি. উদককীল়তো চ অতিৰিকালে নিক্খন্তো সীঘং সীঘং ভুঞ্জি. যেহি সদ্ধিং পুব্বে ভুঞ্জতি, ন তেসং কঞ্চি সরি. অথ পচ্ছা পটিসঙ্খানং উপ্পাদেত্ৰা ‘‘অহো, মযা পাপং কতং, য্ৰাহং রসতণ্হায অভিভূতো সব্বজনং ৰিসরিত্ৰা ¶ এককোৰ ভুঞ্জিং. হন্দ রসতণ্হং নিগ্গণ্হামী’’তি রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছিকত্ৰা অত্তনো পুরিমপটিপত্তিং গরহন্তো তপ্পটিপক্খগুণদীপিকং ইমং উদানগাথং অভাসি –

‘‘রসেসু গেধং অকরং অলোলো, অনঞ্ঞপোসী সপদানচারী;

কুলে কুলে অপ্পটিবদ্ধচিত্তো, একো চরে খগ্গৰিসাণকপ্পো’’তি.

তত্থ রসেসূতি অম্বিলমধুরতিত্তককটুকলোণিকখারিককসাৰাদিভেদেসু সাযনীযেসু. গেধং অকরন্তি গিদ্ধিং অকরোন্তো, তণ্হং অনুপ্পাদেন্তোতি ৰুত্তং হোতি. অলোলোতি ‘‘ইদং সাযিস্সামি, ইদং সাযিস্সামী’’তি এৰং রসৰিসেসেসু অনাকুলো. অনঞ্ঞপোসীতি পোসেতব্বকসদ্ধিৰিহারিকাদিৰিরহিতো ¶ , কাযসন্ধারণমত্তেন সন্তুট্ঠোতি ৰুত্তং হোতি. যথা ৰা পুব্বে উয্যানে রসেসু গেধকরণলোলো হুত্ৰা অঞ্ঞপোসী আসিং, এৰং অহুত্ৰা যায তণ্হায লোলো হুত্ৰা রসেসু গেধং করোতি. তং তণ্হং হিত্ৰা আযতিং তণ্হামূলকস্স অঞ্ঞস্স অত্তভাৰস্স অনিব্বত্তনেন অনঞ্ঞপোসীতি দস্সেতি. অথ ৰা অত্থভঞ্জনকট্ঠেন অঞ্ঞেতি কিলেসা ৰুচ্চন্তি. তেসং অপোসনেন অনঞ্ঞপোসীতি অযম্পেত্থ অত্থো. সপদানচারীতি অৰোক্কম্মচারী অনুপুব্বচারী, ঘরপটিপাটিং অছড্ডেত্ৰা অড্ঢকুলঞ্চ দলিদ্দকুলঞ্চ নিরন্তরং পিণ্ডায পৰিসমানোতি অত্থো. কুলে কুলে অপ্পটিবদ্ধচিত্তোতি খত্তিযকুলাদীসু যত্থ কত্থচি কিলেসৰসেন অলগ্গচিত্তো, চন্দূপমো নিচ্চনৰকো হুত্ৰাতি অত্থো. সেসং ৰুত্তনযমেৰাতি.

রসগেধগাথাৰণ্ণনা সমত্তা.

৬৬. পহায ¶ পঞ্চাৰরণানীতি কা উপ্পত্তি? বারাণসিযং কির অঞ্ঞতরো রাজা পঠমজ্ঝানলাভী অহোসি. সো ঝানানুরক্খণত্থং রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছিকত্ৰা অত্তনো পটিপত্তিসম্পদং দীপেন্তো ইমং উদানগাথং অভাসি –

‘‘পহায পঞ্চাৰরণানি চেতসো, উপক্কিলেসে ব্যপনুজ্জ সব্বে;

অনিস্সিতো ছেত্ৰ সিনেহদোসং, একো চরে খগ্গৰিসাণকপ্পো’’তি.

তত্থ আৰরণানীতি নীৰরণানেৰ. তানি অত্থতো উরগসুত্তে ¶ ৰুত্তানি. তানি পন যস্মা অব্ভাদযো ৰিয চন্দসূরিযে চেতো আৰরন্তি, তস্মা ‘‘আৰরণানি চেতসো’’তি ৰুত্তানি. তানি উপচারেন ৰা অপ্পনায ৰা পহায. উপক্কিলেসেতি উপগম্ম চিত্তং ৰিবাধেন্তে অকুসলে ধম্মে, ৰত্থোপমাদীসু ৰুত্তে অভিজ্ঝাদযো ৰা. ব্যপনুজ্জাতি পনুদিত্ৰা ৰিনাসেত্ৰা, ৰিপস্সনামগ্গেন পজহিত্ৰাতি অত্থো. সব্বেতি অনৰসেসে. এৰং সমথৰিপস্সনাসম্পন্নো পঠমমগ্গেন দিট্ঠিনিস্সযস্স পহীনত্তা অনিস্সিতো. সেসমগ্গেহি ছেত্ৰা তেধাতুকং সিনেহদোসং, তণ্হারাগন্তি ৰুত্তং হোতি. সিনেহো এৰ হি গুণপটিপক্খতো সিনেহদোসোতি ৰুত্তো. সেসং ৰুত্তনযমেৰাতি.

আৰরণগাথাৰণ্ণনা সমত্তা.

৬৭. ৰিপিট্ঠিকত্ৰানাতি কা উপ্পত্তি? বারাণসিযং কির অঞ্ঞতরো রাজা চতুত্থজ্ঝানলাভী ¶ অহোসি. সো ঝানানুরক্খণত্থং রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছিকত্ৰা অত্তনো পটিপত্তিসম্পদং দীপেন্তো ইমং উদানগাথং অভাসি –

‘‘ৰিপিট্ঠিকত্ৰান সুখং দুখঞ্চ, পুব্বেৰ চ সোমনস্সদোমনস্সং;

লদ্ধানুপেক্খং সমথং ৰিসুদ্ধং, একো চরে খগ্গৰিসাণকপ্পো’’তি.

তত্থ ¶ ৰিপিট্ঠিকত্ৰানাতি পিট্ঠিতো কত্ৰা, ছড্ডেত্ৰা জহিত্ৰাতি অত্থো. সুখং দুখঞ্চাতি কাযিকং সাতাসাতং. সোমনস্সদোমনস্সন্তি চেতসিকং সাতাসাতং. উপেক্খন্তি চতুত্থজ্ঝানুপেক্খং. সমথন্তি চতুত্থজ্ঝানসমথমেৰ. ৰিসুদ্ধন্তি পঞ্চনীৰরণৰিতক্কৰিচারপীতিসুখসঙ্খাতেহি নৰহি পচ্চনীকধম্মেহি ৰিমুত্তত্তা ৰিসুদ্ধং, নিদ্ধন্তসুৰণ্ণমিৰ ৰিগতূপক্কিলেসন্তি অত্থো.

অযং পন যোজনা – ৰিপিট্ঠিকত্ৰান সুখং দুক্খঞ্চ পুব্বেৰ পঠমজ্ঝানুপচারভূমিযংযেৰ দুক্খং, ততিযজ্ঝানুপচারভূমিযং সুখন্তি অধিপ্পাযো. পুন আদিতো ৰুত্তং চকারং পরতো নেত্ৰা ‘‘সোমনস্সং দোমনস্সঞ্চ ¶ ৰিপিট্ঠিকত্ৰান পুব্বেৰা’’তি অধিকারো. তেন সোমনস্সং চতুত্থজ্ঝানুপচারে, দোমনস্সঞ্চ দুতিযজ্ঝানুপচারেযেৰাতি দীপেতি. এতানি হি এতেসং পরিযাযতো পহানট্ঠানানি. নিপ্পরিযাযতো পন দুক্খস্স পঠমজ্ঝানং, দোমনস্সস্স দুতিযজ্ঝানং, সুখস্স ততিযজ্ঝানং, সোমনস্সস্স চতুত্থজ্ঝানং পহানট্ঠানং. যথাহ – ‘‘পঠমজ্ঝানং উপসম্পজ্জ ৰিহরতি এত্থুপ্পন্নং দুক্খিন্দ্রিযং অপরিসেসং নিরুজ্ঝতী’’তিআদি (সং. নি. ৫.৫১০). তং সব্বং অট্ঠসালিনিযা ধম্মসঙ্গহট্ঠকথাযং (ধ. স. অট্ঠ. ১৬৫) ৰুত্তং. যতো পুব্বেৰ তীসু পঠমজ্ঝানাদীসু দুক্খদোমনস্সসুখানি ৰিপিট্ঠিকত্ৰা এত্থেৰ চতুত্থজ্ঝানে সোমনস্সং ৰিপিট্ঠিকত্ৰা ইমায পটিপদায লদ্ধানুপেক্খং সমথং ৰিসুদ্ধং একো চরেতি. সেসং সব্বত্থ পাকটমেৰাতি.

ৰিপিট্ঠিকত্ৰাগাথাৰণ্ণনা সমত্তা.

৬৮. আরদ্ধৰীরিযোতি কা উপ্পত্তি? অঞ্ঞতরো কির পচ্চন্তরাজা সহস্সযোধপরিমাণবলকাযো রজ্জেন খুদ্দকো, পঞ্ঞায মহন্তো অহোসি. সো একদিৰসং ‘‘কিঞ্চাপি অহং খুদ্দকো, পঞ্ঞৰতা চ পন সক্কা সকলজম্বুদীপং গহেতু’’ন্তি চিন্তেত্ৰা সামন্তরঞ্ঞো দূতং পাহেসি – ‘‘সত্তদিৰসব্ভন্তরে মে রজ্জং ৰা দেতু যুদ্ধং ৰা’’তি. ততো সো অত্তনো ¶ অমচ্চে সমোধানেত্ৰা আহ – ‘‘মযা তুম্হে অনাপুচ্ছাযেৰ সাহসং কতং, অমুকস্স রঞ্ঞো এৰং পহিতং, কিং কাতব্ব’’ন্তি? তে আহংসু – ‘‘সক্কা, মহারাজ, সো দূতো নিৰত্তেতু’’ন্তি? ‘‘ন সক্কা, গতো ভৰিস্সতী’’তি. ‘‘যদি এৰং ৰিনাসিতম্হা তযা, তেন হি দুক্খং ¶ অঞ্ঞস্স সত্থেন মরিতুং. হন্দ, মযং অঞ্ঞমঞ্ঞং পহরিত্ৰা মরাম, অত্তানং পহরিত্ৰা মরাম, উব্বন্ধাম, ৰিসং খাদামা’’তি. এৰং তেসু একমেকো মরণমেৰ সংৰণ্ণেতি. ততো রাজা – ‘‘কিং মে, ইমেহি, অত্থি, ভণে, ময্হং যোধা’’তি আহ. অথ ‘‘অহং, মহারাজ, যোধো, অহং, মহারাজ, যোধো’’তি তং যোধসহস্সং উট্ঠহি.

রাজা ‘‘এতে উপপরিক্খিস্সামী’’তি মন্ত্ৰা ¶ চিতকং সজ্জেত্ৰা আহ – ‘‘মযা, ভণে, ইদং নাম সাহসং কতং, তং মে অমচ্চা পটিক্কোসন্তি, সোহং চিতকং পৰিসিস্সামি, কো মযা সদ্ধিং পৰিসিস্সতি, কেন ময্হং জীৰিতং পরিচ্চত্ত’’ন্তি? এৰং ৰুত্তে পঞ্চসতা যোধা উট্ঠহিংসু – ‘‘মযং, মহারাজ, পৰিসামা’’তি. ততো রাজা অপরে পঞ্চসতে যোধে আহ – ‘‘তুম্হে ইদানি, তাতা, কিং করিস্সথা’’তি? তে আহংসু – ‘‘নাযং, মহারাজ, পুরিসকারো, ইত্থিকিরিযা এসা, অপিচ মহারাজেন পটিরঞ্ঞো দূতো পেসিতো, তেন মযং রঞ্ঞা সদ্ধিং যুজ্ঝিত্ৰা মরিস্সামা’’তি. ততো রাজা ‘‘পরিচ্চত্তং তুম্হেহি মম জীৰিত’’ন্তি চতুরঙ্গিনিং সেনং সন্নয্হিত্ৰা তেন যোধসহস্সেন পরিৰুতো গন্ত্ৰা রজ্জসীমায নিসীদি.

সোপি পটিরাজা তং পৰত্তিং সুত্ৰা ‘‘অরে, সো খুদ্দকরাজা মম দাসস্সাপি নপ্পহোতী’’তি কুজ্ঝিত্ৰা সব্বং বলকাযং আদায যুজ্ঝিতুং নিক্খমি. খুদ্দকরাজা তং অব্ভুয্যাতং দিস্ৰা বলকাযং আহ – ‘‘তাতা, তুম্হে ন বহুকা; সব্বে সম্পিণ্ডিত্ৰা, অসিচম্মং গহেত্ৰা, সীঘং ইমস্স রঞ্ঞো পুরতো উজুকং এৰ গচ্ছথা’’তি. তে তথা অকংসু. অথ সা সেনা দ্ৰিধা ভিজ্জিত্ৰা অন্তরমদাসি. তে তং রাজানং জীৰগ্গাহং গণ্হিংসু, অঞ্ঞে যোধা পলাযিংসু. খুদ্দকরাজা ‘‘তং মারেমী’’তি পুরতো ধাৰতি, পটিরাজা তং অভযং যাচি. ততো তস্স অভযং দত্ৰা, সপথং কারাপেত্ৰা, তং অত্তনো মনুস্সং কত্ৰা, তেন সহ অঞ্ঞং রাজানং অব্ভুগ্গন্ত্ৰা, তস্স রজ্জসীমায ঠত্ৰা পেসেসি – ‘‘রজ্জং ৰা মে দেতু যুদ্ধং ৰা’’তি. সো ‘‘অহং একযুদ্ধম্পি ন সহামী’’তি রজ্জং নিয্যাতেসি. এতেনেৰ উপাযেন সব্বরাজানো গহেত্ৰা অন্তে বারাণসিরাজানম্পি অগ্গহেসি.

সো ¶ একসতরাজপরিৰুতো সকলজম্বুদীপে রজ্জং অনুসাসন্তো চিন্তেসি – ‘‘অহং পুব্বে খুদ্দকো অহোসিং, সোম্হি অত্তনো ঞাণসম্পত্তিযা সকলজম্বুদীপস্স ইস্সরো জাতো. তং ¶ খো পন ¶ মে ঞাণং লোকিযৰীরিযসম্পযুত্তং, নেৰ নিব্বিদায ন ৰিরাগায সংৰত্ততি, সাধু ৰতস্স স্ৰাহং ইমিনা ঞাণেন লোকুত্তরধম্মং গৰেসেয্য’’ন্তি. ততো বারাণসিরঞ্ঞো রজ্জং দত্ৰা, পুত্তদারঞ্চ সকজনপদমেৰ পেসেত্ৰা, পব্বজ্জং সমাদায ৰিপস্সনং আরভিত্ৰা, পচ্চেকবোধিং সচ্ছিকত্ৰা অত্তনো ৰীরিযসম্পত্তিং দীপেন্তো ইমং উদানগাথং অভাসি –

‘‘আরদ্ধৰিরিযো পরমত্থপত্তিযা, অলীনচিত্তো অকুসীতৰুত্তি;

দল়্হনিক্কমো থামবলূপপন্নো, একো চরে খগ্গৰিসাণকপ্পো’’তি.

তত্থ আরদ্ধং ৰীরিযমস্সাতি আরদ্ধৰিরিযো. এতেন অত্তনো ৰীরিযারম্ভং আদিৰীরিযং দস্সেতি. পরমত্থো ৰুচ্চতি নিব্বানং, তস্স পত্তিযা পরমত্থপত্তিযা. এতেন ৰীরিযারম্ভেন পত্তব্বফলং দস্সেতি. অলীনচিত্তোতি এতেন বলৰীরিযূপত্থম্ভানং চিত্তচেতসিকানং অলীনতং দস্সেতি. অকুসীতৰুত্তীতি এতেন ঠানআসনচঙ্কমনাদীসু কাযস্স অনৰসীদনং. দল়্হনিক্কমোতি এতেন ‘‘কামং তচো চ ন্হারু চা’’তি (ম. নি. ২.১৮৪; অ. নি. ২.৫; মহানি. ১৯৬) এৰং পৰত্তং পদহনৰীরিযং দস্সেতি, যং তং অনুপুব্বসিক্খাদীসু পদহন্তো ‘‘কাযেন চেৰ পরমসচ্চং সচ্ছিকরোতি, পঞ্ঞায চ নং অতিৰিজ্ঝ পস্সতী’’তি ৰুচ্চতি. অথ ৰা এতেন মগ্গসম্পযুত্তৰীরিযং দস্সেতি. তঞ্হি দল়্হঞ্চ ভাৰনাপারিপূরিং গতত্তা, নিক্কমো চ সব্বসো পটিপক্খা নিক্খন্তত্তা, তস্মা তংসমঙ্গীপুগ্গলোপি দল়্হো নিক্কমো অস্সাতি ‘‘দল়্হনিক্কমো’’তি ৰুচ্চতি. থামবলূপপন্নোতি মগ্গক্খণে কাযথামেন ঞাণবলেন চ উপপন্নো, অথ ৰা থামভূতেন বলেন উপপন্নোতি থামবলূপপন্নো, থিরঞাণবলূপপন্নোতি ৰুত্তং হোতি. এতেন তস্স ৰীরিযস্স ৰিপস্সনাঞাণসম্পযোগং দীপেন্তো যোনিসো পদহনভাৰং সাধেতি. পুব্বভাগমজ্ঝিমউক্কট্ঠৰীরিযৰসেন ৰা তযোপি পাদা যোজেতব্বা. সেসং ৰুত্তনযমেৰাতি.

আরদ্ধৰীরিযগাথাৰণ্ণনা সমত্তা.

৬৯. পটিসল্লানন্তি ¶ কা উপ্পত্তি? ইমিস্সা গাথায আৰরণগাথায উপ্পত্তিসদিসা এৰ উপ্পত্তি, নত্থি কোচি ৰিসেসো. অত্থৰণ্ণনাযং পনস্সা পটিসল্লানন্তি তেহি তেহি সত্তসঙ্খারেহি ¶ পটিনিৰত্তিত্ৰা সল্লীনং একত্তসেৰিতা একীভাৰো, কাযৰিৰেকোতি অত্থো. ঝানন্তি পচ্চনীকঝাপনতো আরম্মণলক্খণূপনিজ্ঝানতো চ চিত্তৰিৰেকো ৰুচ্চতি. তত্থ অট্ঠসমাপত্তিযো নীৰরণাদিপচ্চনীকঝাপনতো আরম্মণূপনিজ্ঝানতো চ ঝানন্তি ৰুচ্চতি, ৰিপস্সনামগ্গফলানি সত্তসঞ্ঞাদিপচ্চনীকঝাপনতো, লক্খণূপনিজ্ঝানতোযেৰ চেত্থ ফলানি. ইধ ¶ পন আরম্মণূপনিজ্ঝানমেৰ অধিপ্পেতং. এৰমেতং পটিসল্লানঞ্চ ঝানঞ্চ অরিঞ্চমানো, অজহমানো, অনিস্সজ্জমানো. ধম্মেসূতি ৰিপস্সনূপগেসু পঞ্চক্খন্ধাদিধম্মেসু. নিচ্চন্তি সততং, সমিতং, অব্ভোকিণ্ণং. অনুধম্মচারীতি তে ধম্মে আরব্ভ পৰত্তমানেন অনুগতং ৰিপস্সনাধম্মং চরমানো. অথ ৰা ধম্মাতি নৰ লোকুত্তরধম্মা, তেসং ধম্মানং অনুলোমো ধম্মোতি অনুধম্মো, ৰিপস্সনাযেতং অধিৰচনং. তত্থ ‘‘ধম্মানং নিচ্চং অনুধম্মচারী’’তি ৰত্তব্বে গাথাবন্ধসুখত্থং ৰিভত্তিব্যত্তযেন ‘‘ধম্মেসূ’’তি ৰুত্তং সিযা. আদীনৰং সম্মসিতা ভৰেসূতি তায অনুধম্মচরিতাসঙ্খাতায ৰিপস্সনায অনিচ্চাকারাদিদোসং তীসু ভৰেসু সমনুপস্সন্তো এৰং ইমং কাযৰিৰেকচিত্তৰিৰেকং অরিঞ্চমানো সিখাপ্পত্তৰিপস্সনাসঙ্খাতায পটিপদায অধিগতোতি ৰত্তব্বো একো চরেতি এৰং যোজনা ৰেদিতব্বা.

পটিসল্লানগাথাৰণ্ণনা সমত্তা.

৭০. তণ্হক্খযন্তি কা উপ্পত্তি? অঞ্ঞতরো কির বারাণসিরাজা মহচ্চরাজানুভাৰেন নগরং পদক্খিণং করোতি. তস্স সরীরসোভায আৰট্টিতহদযা সত্তা পুরতো গচ্ছন্তাপি নিৰত্তিত্ৰা তমেৰ উল্লোকেন্তি, পচ্ছতো গচ্ছন্তাপি, উভোহি পস্সেহি গচ্ছন্তাপি. পকতিযা এৰ হি বুদ্ধদস্সনে পুণ্ণচন্দসমুদ্দরাজদস্সনে চ অতিত্তো লোকো. অথ অঞ্ঞতরা কুটুম্বিযভরিযাপি উপরিপাসাদগতা সীহপঞ্জরং ৰিৰরিত্ৰা ওলোকযমানা অট্ঠাসি. রাজা তং দিস্ৰাৰ পটিবদ্ধচিত্তো হুত্ৰা অমচ্চং আণাপেসি – ‘‘জানাহি তাৰ, ভণে, অযং ইত্থী সসামিকা ৰা ¶ অসামিকা ৰা’’তি. সো গন্ত্ৰা ¶ ‘‘সসামিকা’’তি আরোচেসি. অথ রাজা চিন্তেসি – ‘‘ইমা ৰীসতিসহস্সনাটকিত্থিযো দেৰচ্ছরাযো ৰিয মংযেৰ একং অভিরমেন্তি, সো দানাহং এতাপি অতুসিত্ৰা পরস্স ইত্থিযা তণ্হং উপ্পাদেসিং, সা উপ্পন্না অপাযমেৰ আকড্ঢতী’’তি তণ্হায আদীনৰং দিস্ৰা ‘‘হন্দ নং নিগ্গণ্হামী’’তি রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছিকত্ৰা ইমং উদানগাথং অভাসি –

‘‘তণ্হক্খযং পত্থযমপ্পমত্তো, অনেল়মূগো সুতৰা সতীমা;

সঙ্খাতধম্মো নিযতো পধানৰা, একো চরে খগ্গৰিসাণকপ্পো’’তি.

তত্থ তণ্হক্খযন্তি নিব্বানং, এৰং দিট্ঠাদীনৰায তণ্হায এৰ অপ্পৰত্তিং. অপ্পমত্তোতি সাতচ্চকারী সক্কচ্চকারী. অনেল়মূগোতি অলালামুখো. অথ ৰা অনেল়ো চ অমূগো চ, পণ্ডিতো ব্যত্তোতি ৰুত্তং হোতি. হিতসুখসম্পাপকং সুতমস্স অত্থীতি সুতৰা আগমসম্পন্নোতি ৰুত্তং ¶ হোতি. সতীমাতি চিরকতাদীনং অনুস্সরিতা. সঙ্খাতধম্মোতি ধম্মুপপরিক্খায পরিঞ্ঞাতধম্মো. নিযতোতি অরিযমগ্গেন নিযামং পত্তো. পধানৰাতি সম্মপ্পধানৰীরিযসম্পন্নো. উপ্পটিপাটিযা এস পাঠো যোজেতব্বো. এৰমেতেহি অপ্পমাদাদীহি সমন্নাগতো নিযামসম্পাপকেন পধানেন পধানৰা, তেন পধানেন পত্তনিযামত্তা নিযতো, ততো অরহত্তপ্পত্তিযা সঙ্খাতধম্মো. অরহা হি পুন সঙ্খাতব্বাভাৰতো ‘‘সঙ্খাতধম্মো’’তি ৰুচ্চতি. যথাহ ‘‘যে চ সঙ্খাতধম্মাসে, যে চ সেখা পুথূ ইধা’’তি (সু. নি. ১০৪৪; চূল়নি. অজিতমাণৰপুচ্ছানিদ্দেস ৭). সেসং ৰুত্তনযমেৰাতি.

তণ্হক্খযগাথাৰণ্ণনা সমত্তা.

৭১. সীহো ৰাতি কা উপ্পত্তি? অঞ্ঞতরস্স কির বারাণসিরঞ্ঞো দূরে উয্যানং হোতি. সো পগেৰ ৰুট্ঠায উয্যানং গচ্ছন্তো অন্তরামগ্গে যানা ওরুয্হ উদকট্ঠানং উপগতো ‘‘মুখং ¶ ধোৰিস্সামী’’তি. তস্মিঞ্চ পদেসে সীহী পোতকং জনেত্ৰা গোচরায গতা. রাজপুরিসো তং দিস্ৰা ‘‘সীহপোতকো দেৰা’’তি আরোচেসি. রাজা ‘‘সীহো কির ¶ ন কস্সচি ভাযতী’’তি তং উপপরিক্খিতুং ভেরিআদীনি আকোটাপেসি. সীহপোতকো তং সদ্দং সুত্ৰাপি তথেৰ সযি. রাজা যাৰততিযকং আকোটাপেসি, সো ততিযৰারে সীসং উক্খিপিত্ৰা সব্বং পরিসং ওলোকেত্ৰা তথেৰ সযি. অথ রাজা ‘‘যাৰস্স মাতা নাগচ্ছতি, তাৰ গচ্ছামা’’তি ৰত্ৰা গচ্ছন্তো চিন্তেসি – ‘‘তং দিৰসং জাতোপি সীহপোতকো ন সন্তসতি ন ভাযতি, কুদাস্সু নামাহম্পি তণ্হাদিট্ঠিপরিতাসং ছেত্ৰা ন সন্তসেয্যং ন ভাযেয্য’’ন্তি. সো তং আরম্মণং গহেত্ৰা, গচ্ছন্তো পুন কেৰট্টেহি মচ্ছে গহেত্ৰা সাখাসু বন্ধিত্ৰা পসারিতে জালে ৰাতং অলগ্গংযেৰ গচ্ছমানং দিস্ৰা, তম্পি নিমিত্তং অগ্গহেসি – ‘‘কুদাস্সু নামাহম্পি তণ্হাদিট্ঠিজালং মোহজালং ৰা ফালেত্ৰা এৰং অসজ্জমানো গচ্ছেয্য’’ন্তি.

অথ উয্যানং গন্ত্ৰা সিলাপট্টপোক্খরণিতীরে নিসিন্নো ৰাতব্ভাহতানি পদুমানি ওনমিত্ৰা উদকং ফুসিত্ৰা ৰাতৰিগমে পুন যথাঠানে ঠিতানি উদকেন অনুপলিত্তানি দিস্ৰা তম্পি নিমিত্তং অগ্গহেসি – ‘‘কুদাস্সু নামাহম্পি যথা এতানি উদকে জাতানি উদকেন অনুপলিত্তানি তিট্ঠন্তি, এৰমেৰং লোকে জাতো লোকেন অনুপলিত্তো তিট্ঠেয্য’’ন্তি. সো পুনপ্পুনং ‘‘যথা সীহৰাতপদুমানি, এৰং অসন্তসন্তেন অসজ্জমানেন অনুপলিত্তেন ভৰিতব্ব’’ন্তি চিন্তেত্ৰা, রজ্জং পহায পব্বজিত্ৰা, ৰিপস্সন্তো পচ্চেকবোধিং সচ্ছিকত্ৰা ইমং উদানগাথং অভাসি –

‘‘সীহোৰ ¶ সদ্দেসু অসন্তসন্তো, ৰাতোৰ জালম্হি অসজ্জমানো;

পদুমংৰ তোযেন অলিপ্পমানো, একো চরে খগ্গৰিসাণকপ্পো’’তি.

তত্থ সীহোতি চত্তারো সীহা – তিণসীহো, পণ্ডুসীহো, কাল়সীহো, কেসরসীহোতি. কেসরসীহো তেসং অগ্গমক্খাযতি. সোৰ ইধ অধিপ্পেতো. ৰাতো পুরত্থিমাদিৰসেন অনেকৰিধো, পদুমং রত্তসেতাদিৰসেন. তেসু যো কোচি ৰাতো যংকিঞ্চি পদুমঞ্চ ৰট্টতিযেৰ. তত্থ যস্মা সন্তাসো অত্তসিনেহেন হোতি, অত্তসিনেহো চ তণ্হালেপো, সোপি দিট্ঠিসম্পযুত্তেন ৰা দিট্ঠিৰিপ্পযুত্তেন ৰা লোভেন ¶ হোতি, সো চ তণ্হাযেৰ. সজ্জনং পন তত্থ উপপরিক্খাৰিরহিতস্স মোহেন হোতি, মোহো ¶ চ অৰিজ্জা. তত্থ সমথেন তণ্হায পহানং হোতি, ৰিপস্সনায, অৰিজ্জায. তস্মা সমথেন অত্তসিনেহং পহায সীহোৰ সদ্দেসু অনিচ্চাদীসু অসন্তসন্তো, ৰিপস্সনায মোহং পহায ৰাতোৰ জালম্হি খন্ধাযতনাদীসু অসজ্জমানো, সমথেনেৰ লোভং লোভসম্পযুত্তং এৰ দিট্ঠিঞ্চ পহায, পদুমংৰ তোযেন সব্বভৰভোগলোভেন অলিপ্পমানো. এত্থ চ সমথস্স সীলং পদট্ঠানং, সমথো সমাধি, ৰিপস্সনা পঞ্ঞাতি. এৰং তেসু দ্ৰীসু ধম্মেসু সিদ্ধেসু তযোপি খন্ধা সিদ্ধা হোন্তি. তত্থ সীলক্খন্ধেন সুরতো হোতি. সো সীহোৰ সদ্দেসু আঘাতৰত্থূসু কুজ্ঝিতুকামতায ন সন্তসতি. পঞ্ঞাক্খন্ধেন পটিৰিদ্ধসভাৰো ৰাতোৰ জালম্হি খন্ধাদিধম্মভেদে ন সজ্জতি, সমাধিক্খন্ধেন ৰীতরাগো পদুমংৰ তোযেন রাগেন ন লিপ্পতি. এৰং সমথৰিপস্সনাহি সীলসমাধিপঞ্ঞাক্খন্ধেহি চ যথাসম্ভৰং অৰিজ্জাতণ্হানং তিণ্ণঞ্চ অকুসলমূলানং পহানৰসেন অসন্তসন্তো অসজ্জমানো অলিপ্পমানো চ ৰেদিতব্বো. সেসং ৰুত্তনযমেৰাতি.

অসন্তসন্তগাথাৰণ্ণনা সমত্তা.

৭২. সীহো যথাতি কা উপ্পত্তি? অঞ্ঞতরো কির বারাণসিরাজা পচ্চন্তং কুপ্পিতং ৰূপসমেতুং গামানুগামিমগ্গং ছড্ডেত্ৰা, উজুং অটৰিমগ্গং গহেত্ৰা, মহতিযা সেনায গচ্ছতি. তেন চ সমযেন অঞ্ঞতরস্মিং পব্বতপাদে সীহো বালসূরিযাতপং তপ্পমানো নিপন্নো হোতি. তং দিস্ৰা রাজপুরিসো রঞ্ঞো আরোচেসি. রাজা ‘‘সীহো কির সদ্দেন ন সন্তসতী’’তি ভেরিসঙ্খপণৰাদীহি সদ্দং কারাপেসি. সীহো তথেৰ নিপজ্জি. দুতিযম্পি কারাপেসি. সীহো তথেৰ নিপজ্জি. ততিযম্পি কারাপেসি. সীহো ‘‘মম পটিসত্তু অত্থী’’তি চতূহি পাদেহি সুপ্পতিট্ঠিতং পতিট্ঠহিত্ৰা সীহনাদং নদি. তং সুত্ৰাৰ হত্থারোহাদযো হত্থিআদীহি ওরোহিত্ৰা ¶ তিণগহনানি পৰিট্ঠা, হত্থিঅস্সগণা দিসাৰিদিসা পলাতা. রঞ্ঞো হত্থীপি রাজানং গহেত্ৰা ৰনগহনানি ¶ পোথযমানো পলাযি. সো তং সন্ধারেতুং অসক্কোন্তো রুক্খসাখায ওলম্বিত্ৰা ¶ , পথৰিং পতিত্ৰা, একপদিকমগ্গেন গচ্ছন্তো পচ্চেকবুদ্ধানং ৰসনট্ঠানং পাপুণিত্ৰা তত্থ পচ্চেকবুদ্ধে পুচ্ছি – ‘‘অপি, ভন্তে, সদ্দমস্সুত্থা’’তি? ‘‘আম, মহারাজা’’তি. ‘‘কস্স সদ্দং, ভন্তে’’তি? ‘‘পঠমং ভেরিসঙ্খাদীনং, পচ্ছা সীহস্সা’’তি. ‘‘ন ভাযিত্থ, ভন্তে’’তি? ‘‘ন মযং, মহারাজ, কস্সচি সদ্দস্স ভাযামা’’তি. ‘‘সক্কা পন, ভন্তে, ময্হম্পি এদিসং কাতু’’ন্তি? ‘‘সক্কা, মহারাজ, সচে পব্বজসী’’তি. ‘‘পব্বজামি, ভন্তে’’তি. ততো নং পব্বাজেত্ৰা পুব্বে ৰুত্তনযেনেৰ আভিসমাচারিকং সিক্খাপেসুং. সোপি পুব্বে ৰুত্তনযেনেৰ ৰিপস্সন্তো পচ্চেকবোধিং সচ্ছিকত্ৰা ইমং উদানগাথং অভাসি –

‘‘সীহো যথা দাঠবলী পসয্হ, রাজা মিগানং অভিভুয্য চারী;

সেৰেথ পন্তানি সেনাসনানি, একো চরে খগ্গৰিসাণকপ্পো’’তি.

তত্থ সহনা চ হননা চ সীঘজৰত্তা চ সীহো. কেসরসীহোৰ ইধ অধিপ্পেতো. দাঠা বলমস্স অত্থীতি দাঠবলী. পসয্হ অভিভুয্যাতি, উভযং চারীসদ্দেন সহ যোজেতব্বং পসয্হচারী অভিভুয্যচারীতি তত্থ পসয্হ নিগ্গহেত্ৰা চরণেন পসয্হচারী, অভিভৰিত্ৰা, সন্তাসেত্ৰা, ৰসীকত্ৰা, চরণেন অভিভুয্যচারী. স্ৰাযং কাযবলেন পসয্হচারী, তেজসা অভিভুয্যচারী. তত্থ সচে কোচি ৰদেয্য – ‘‘কিং পসয্হ অভিভুয্য চারী’’তি, ততো মিগানন্তি সামিৰচনং উপযোগৰচনং কত্ৰা ‘‘মিগে পসয্হ অভিভুয্য চারী’’তি পটিৰত্তব্বং. পন্তানীতি দূরানি. সেনাসনানীতি ৰসনট্ঠানানি. সেসং পুব্বে ৰুত্তনযেনেৰ সক্কা জানিতুন্তি ন ৰিত্থারিতন্তি.

দাঠবলীগাথাৰণ্ণনা সমত্তা.

৭৩. মেত্তং উপেক্খন্তি কা উপ্পত্তি? অঞ্ঞতরো কির রাজা মেত্তাদিঝানলাভী অহোসি. সো ‘‘ঝানসুখন্তরাযকরং রজ্জ’’ন্তি ঝানানুরক্খণত্থং ¶ রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছিকত্ৰা, ইমং উদানগাথং অভাসি –

মেত্তং ¶ উপেক্খং করুণং ৰিমুত্তিং, আসেৰমানো মুদিতঞ্চ কালে;

সব্বেন লোকেন অৰিরুজ্ঝমানো, একো চরে খগ্গৰিসাণকপ্পো’’তি.

তত্থ ‘‘সব্বে সত্তা সুখিতা হোন্তূ’’তিআদিনা নযেন হিতসুখুপনযনকামতা মেত্তা. ‘‘অহো ¶ ৰত ইমম্হা দুক্খা ৰিমুচ্চেয্যু’’ন্তিআদিনা নযেন অহিতদুক্খাপনযনকামতা করুণা. ‘‘মোদন্তি ৰত ভোন্তো সত্তা মোদন্তি সাধু সুট্ঠূ’’তিআদিনা নযেন হিতসুখাৰিপ্পযোগকামতা মুদিতা. ‘‘পঞ্ঞাযিস্সন্তি সকেন কম্মেনা’’তি সুখদুক্খেসু অজ্ঝুপেক্খনতা উপেক্খা. গাথাবন্ধসুখত্থং পন উপ্পটিপাটিযা মেত্তং ৰত্ৰা উপেক্খা ৰুত্তা, মুদিতা পচ্ছা. ৰিমুত্তিন্তি চতস্সোপি হি এতা অত্তনো পচ্চনীকধম্মেহি ৰিমুত্তত্তা ৰিমুত্তিযো. তেন ৰুত্তং ‘‘মেত্তং উপেক্খং করুণং, ৰিমুত্তিং, আসেৰমানো মুদিতঞ্চ কালে’’তি.

তত্থ আসেৰমানোতি তিস্সো তিকচতুক্কজ্ঝানৰসেন, উপেক্খং চতুত্থজ্ঝানৰসেন ভাৰযমানো. কালেতি মেত্তং আসেৰিত্ৰা ততো ৰুট্ঠায করুণং, ততো ৰুট্ঠায মুদিতং, ততো ইতরতো ৰা নিপ্পীতিকঝানতো ৰুট্ঠায উপেক্খং আসেৰমানো ‘‘কালে আসেৰমানো’’তি ৰুচ্চতি, আসেৰিতুং ফাসুকালে ৰা. সব্বেন লোকেন অৰিরুজ্ঝমানোতি দসসু দিসাসু সব্বেন সত্তলোকেন অৰিরুজ্ঝমানো. মেত্তাদীনঞ্হি ভাৰিতত্তা সত্তা অপ্পটিকূলা হোন্তি. সত্তেসু চ ৰিরোধভূতো পটিঘো ৰূপসম্মতি. তেন ৰুত্তং – ‘‘সব্বেন লোকেন অৰিরুজ্ঝমানো’’তি. অযমেত্থ সঙ্খেপো, ৰিত্থারেন পন মেত্তাদিকথা অট্ঠসালিনিযা ধম্মসঙ্গহট্ঠকথাযং (ধ. স. অট্ঠ. ২৫১) ৰুত্তা. সেসং পুব্বৰুত্তসদিসমেৰাতি.

অপ্পমঞ্ঞাগাথাৰণ্ণনা সমত্তা.

৭৪. রাগঞ্চ দোসঞ্চাতি কা উপ্পত্তি? রাজগহং কির উপনিস্সায মাতঙ্গো নাম পচ্চেকবুদ্ধো ৰিহরতি সব্বপচ্ছিমো ¶ পচ্চেকবুদ্ধানং. অথ অম্হাকং বোধিসত্তে উপ্পন্নে দেৰতাযো বোধিসত্তস্স পূজনত্থায আগচ্ছন্তিযো তং দিস্ৰা ‘‘মারিসা, মারিসা, বুদ্ধো লোকে উপ্পন্নো’’তি ভণিংসু ¶ . সো নিরোধা ৰুট্ঠহন্তো তং সদ্দং সুত্ৰা, অত্তনো চ জীৰিতক্খযং দিস্ৰা, হিমৰন্তে মহাপপাতো নাম পব্বতো পচ্চেকবুদ্ধানং পরিনিব্বানট্ঠানং, তত্থ আকাসেন গন্ত্ৰা পুব্বে পরিনিব্বুতপচ্চেকবুদ্ধস্স অট্ঠিসঙ্ঘাতং পপাতে পক্খিপিত্ৰা, সিলাতলে নিসীদিত্ৰা ইমং উদানগাথং অভাসি –

‘‘রাগঞ্চ দোসঞ্চ পহায মোহং, সন্দালযিত্ৰান সংযোজনানি;

অসন্তসং জীৰিতসঙ্খযম্হি, একো চরে খগ্গৰিসাণকপ্পো’’তি.

তত্থ রাগদোসমোহা উরগসুত্তে ৰুত্তা. সংযোজনানীতি দস সংযোজনানি. তানি চ তেন তেন ¶ মগ্গেন সন্দালযিত্ৰা. অসন্তসং জীৰিতসঙ্খযম্হীতি জীৰিতসঙ্খযো ৰুচ্চতি চুতিচিত্তস্স পরিভেদো, তস্মিঞ্চ জীৰিতসঙ্খযে জীৰিতনিকন্তিযা পহীনত্তা অসন্তসন্তি. এত্তাৰতা সোপাদিসেসং নিব্বানধাতুং অত্তনো দস্সেত্ৰা গাথাপরিযোসানে অনুপাদিসেসায নিব্বানধাতুযা পরিনিব্বাযীতি.

জীৰিতসঙ্খযগাথাৰণ্ণনা সমত্তা.

৭৫. ভজন্তীতি কা উপ্পত্তি? বারাণসিযং কির অঞ্ঞতরো রাজা আদিগাথায ৰুত্তপ্পকারমেৰ ফীতং রজ্জং সমনুসাসতি. তস্স খরো আবাধো উপ্পজ্জি, দুক্খা ৰেদনা ৰত্তন্তি. ৰীসতিসহস্সিত্থিযো পরিৰারেত্ৰা হত্থপাদসম্বাহনাদীনি করোন্তি. অমচ্চা ‘‘ন দানাযং রাজা জীৰিস্সতি, হন্দ মযং অত্তনো সরণং গৰেসামা’’তি চিন্তেত্ৰা অঞ্ঞস্স রঞ্ঞো সন্তিকং গন্ত্ৰা উপট্ঠানং যাচিংসু. তে তত্থ উপট্ঠহন্তিযেৰ, ন কিঞ্চি লভন্তি. রাজাপি আবাধা ৰুট্ঠহিত্ৰা পুচ্ছি ‘‘ইত্থন্নামো চ ইত্থন্নামো চ কুহি’’ন্তি? ততো তং পৰত্তিং সুত্ৰা সীসং চালেত্ৰা তুণ্হী অহোসি. তেপি অমচ্চা ‘‘রাজা ৰুট্ঠিতো’’তি সুত্ৰা তত্থ কিঞ্চি অলভমানা পরমেন পারিজুঞ্ঞেন সমন্নাগতা পুনদেৰ আগন্ত্ৰা রাজানং ৰন্দিত্ৰা একমন্তং অট্ঠংসু. তেন চ রঞ্ঞা ¶ ‘‘কুহিং, তাতা, তুম্হে গতা’’তি ৰুত্তা আহংসু – ‘‘দেৰং দুব্বলং দিস্ৰা আজীৰিকভযেনম্হা অসুকং নাম জনপদং গতা’’তি. রাজা ¶ সীসং চালেত্ৰা চিন্তেসি – ‘‘যংনূনাহং ইমে ৰীমংসেয্যং, কিং পুনপি এৰং করেয্যুং নো’’তি? সো পুব্বে আবাধিকরোগেন ফুট্ঠো ৰিয বাল়্হৰেদনং অত্তানং দস্সেন্তো গিলানালযং অকাসি. ইত্থিযো সম্পরিৰারেত্ৰা পুব্বসদিসমেৰ সব্বং অকংসু. তেপি অমচ্চা তথেৰ পুন বহুতরং জনং গহেত্ৰা পক্কমিংসু. এৰং রাজা যাৰততিযং সব্বং পুব্বসদিসং অকাসি. তেপি তথেৰ পক্কমিংসু. ততো চতুত্থম্পি তে আগতে দিস্ৰা ‘‘অহো ইমে দুক্করং অকংসু, যে মং ব্যাধিতং পহায অনপেক্খা পক্কমিংসূ’’তি নিব্বিন্নো রজ্জং পহায পব্বজিত্ৰা ৰিপস্সন্তো পচ্চেকবোধিং সচ্ছিকত্ৰা ইমং উদানগাথং অভাসি –

‘‘ভজন্তি সেৰন্তি চ কারণত্থা, নিক্কারণা দুল্লভা অজ্জ মিত্তা;

অত্তট্ঠপঞ্ঞা অসুচী মনুস্সা, একো চরে খগ্গৰিসাণকপ্পো’’তি.

তত্থ ভজন্তীতি সরীরেন অল্লীযিত্ৰা পযিরুপাসন্তি. সেৰন্তীতি অঞ্জলিকম্মাদীহি কিং কারপটিস্সাৰিতায চ পরিচরন্তি. কারণং অত্থো এতেসন্তি কারণত্থা, ভজনায সেৰনায চ নাঞ্ঞং কারণমত্থি, অত্থো এৰ নেসং কারণং, অত্থহেতু সেৰন্তীতি ৰুত্তং হোতি. নিক্কারণা ¶ দুল্লভা অজ্জ মিত্তাতি ‘‘ইতো কিঞ্চি লচ্ছামা’’তি এৰং অত্তপটিলাভকারণেন নিক্কারণা, কেৰলং –

‘‘উপকারো চ যো মিত্তো,

সুখে দুক্খে চ যো সখা;

অত্থক্খাযী চ যো মিত্তো,

যো চ মিত্তানুকম্পকো’’তি. (দী. নি. ৩.২৬৫) –

এৰং ৰুত্তেন অরিযেন মিত্তভাৰেন সমন্নাগতা দুল্লভা অজ্জ মিত্তা. অত্তনি ঠিতা এতেসং পঞ্ঞা, অত্তানংযেৰ ওলোকেন্তি, ন অঞ্ঞন্তি অত্তট্ঠপঞ্ঞা. দিট্ঠত্থপঞ্ঞাতি অযম্পি ¶ কির পোরাণপাঠো, সম্পতি দিট্ঠিযেৰ অত্থে এতেসং পঞ্ঞা, আযতিং ন পেক্খন্তীতি ৰুত্তং হোতি. অসুচীতি ¶ অসুচিনা অনরিযেন কাযৰচীমনোকম্মেন সমন্নাগতা. সেসং পুব্বে ৰুত্তনযেনেৰ ৰেদিতব্বন্তি.

কারণত্থগাথাৰণ্ণনা সমত্তা.

চতুত্থো ৰগ্গো নিট্ঠিতো একাদসহি গাথাহি.

এৰমেতং একচত্তালীসগাথাপরিমাণং খগ্গৰিসাণসুত্তং কত্থচিদেৰ ৰুত্তেন যোজনানযেন সব্বত্থ যথানুরূপং যোজেত্ৰা অনুসন্ধিতো অত্থতো চ ৰেদিতব্বং. অতিৰিত্থারভযেন পন অম্হেহি ন সব্বত্থ যোজিতন্তি.

পরমত্থজোতিকায খুদ্দক-অট্ঠকথায

সুত্তনিপাত-অট্ঠকথায খগ্গৰিসাণসুত্তৰণ্ণনা নিট্ঠিতা.

৪. কসিভারদ্ৰাজসুত্তৰণ্ণনা

এৰং ¶ মে সুতন্তি কসিভারদ্ৰাজসুত্তং. কা উপ্পত্তি? ভগৰা মগধেসু ৰিহরন্তো দক্খিণাগিরিস্মিং একনালাযং ব্রাহ্মণগামে পুরেভত্তকিচ্চং পচ্ছাভত্তকিচ্চন্তি ইমেসু দ্ৰীসু বুদ্ধকিচ্চেসু পুরেভত্তকিচ্চং নিট্ঠাপেত্ৰা পচ্ছাভত্তকিচ্চাৰসানে বুদ্ধচক্খুনা লোকং ৰোলোকেন্তো কসিভারদ্ৰাজং ব্রাহ্মণং অরহত্তস্স উপনিস্সযসম্পন্নং দিস্ৰা ‘‘তত্থ মযি গতে যথা পৰত্তিস্সতি, ততো কথাৰসানে ধম্মদেসনং সুত্ৰা এস ব্রাহ্মণো পব্বজিত্ৰা অরহত্তং পাপুণিস্সতী’’তি চ ঞত্ৰা, তত্থ গন্ত্ৰা, কথং সমুট্ঠাপেত্ৰা, ইমং সুত্তং অভাসি.

তত্থ সিযা ‘‘কতমং বুদ্ধানং পুরেভত্তকিচ্চং, কতমং পচ্ছাভত্তকিচ্চ’’ন্তি? ৰুচ্চতে – বুদ্ধো ভগৰা পাতো এৰ উট্ঠায উপট্ঠাকানুগ্গহত্থং সরীরফাসুকত্থঞ্চ মুখধোৰনাদিসরীরপরিকম্মং কত্ৰা যাৰ ভিক্খাচারৰেলা, তাৰ ৰিৰিত্তাসনে ৰীতিনামেত্ৰা, ভিক্খাচারৰেলায ¶ নিৰাসেত্ৰা, কাযবন্ধনং বন্ধিত্ৰা, চীৰরং পারুপিত্ৰা, পত্তমাদায কদাচি এককোৰ কদাচি ভিক্খুসঙ্ঘপরিৰুতো গামং ৰা নিগমং ৰা পিণ্ডায পৰিসতি, কদাচি পকতিযা, কদাচি অনেকেহি ¶ পাটিহারিযেহি ৰত্তমানেহি. সেয্যথিদং – পিণ্ডায পৰিসতো লোকনাথস্স পুরতো পুরতো গন্ত্ৰা মুদুগতিযো ৰাতা পথৰিং সোধেন্তি; ৰলাহকা উদকফুসিতানি মুঞ্চন্তা মগ্গে রেণুং ৰূপসমেত্ৰা উপরি ৰিতানং হুত্ৰা তিট্ঠন্তি. অপরে ৰাতা পুপ্ফানি উপসংহরিত্ৰা মগ্গে ওকিরন্তি, উন্নতা ভূমিপ্পদেসা ওনমন্তি, ওনতা উন্নমন্তি, পাদনিক্খেপসমযে সমাৰ ভূমি হোতি, সুখসম্ফস্সানি রথচক্কমত্তানি পদুমপুপ্ফানি ৰা পাদে সম্পটিচ্ছন্তি, ইন্দখীলস্স অন্তো ঠপিতমত্তে দক্খিণপাদে সরীরা ছব্বণ্ণরস্মিযো নিচ্ছরিত্ৰা সুৰণ্ণরসপিঞ্জরানি ৰিয চিত্রপটপরিক্খিত্তানি ৰিয চ পাসাদকূটাগারাদীনি করোন্তিযো ইতো চিতো চ ৰিধাৰন্তি, হত্থিঅস্সৰিহঙ্গাদযো সকসকট্ঠানেসু ঠিতাযেৰ মধুরেনাকারেন সদ্দং করোন্তি, তথা ভেরিৰীণাদীনি তূরিযানি মনুস্সানং কাযূপগানি চ আভরণানি, তেন সঞ্ঞাণেন মনুস্সা জানন্তি ‘‘অজ্জ ভগৰা ইধ পিণ্ডায পৰিট্ঠো’’তি. তে সুনিৰত্থা সুপারুতা গন্ধপুপ্ফাদীনি আদায ঘরা নিক্খমিত্ৰা অন্তরৰীথিং পটিপজ্জিত্ৰা ভগৰন্তং গন্ধপুপ্ফাদীহি সক্কচ্চং পূজেত্ৰা ৰন্দিত্ৰা – ‘‘অম্হাকং ¶ , ভন্তে, দস ভিক্খূ, অম্হাকং ৰীসতি, অম্হাকং ভিক্খুসতং দেথা’’তি যাচিত্ৰা ভগৰতোপি পত্তং গহেত্ৰা, আসনং পঞ্ঞাপেত্ৰা সক্কচ্চং পিণ্ডপাতেন পটিমানেন্তি.

ভগৰা কতভত্তকিচ্চো তেসং সন্তানানি ওলোকেত্ৰা তথা ধম্মং দেসেতি, যথা কেচি সরণগমনে পতিট্ঠহন্তি, কেচি পঞ্চসু সীলেসু, কেচি সোতাপত্তিসকদাগামিঅনাগামিফলানং অঞ্ঞতরস্মিং, কেচি পব্বজিত্ৰা অগ্গফলে অরহত্তেতি. এৰং তথা তথা জনং অনুগ্গহেত্ৰা উট্ঠাযাসনা ৰিহারং গচ্ছতি. তত্থ মণ্ডলমাল়ে পঞ্ঞত্তৰরবুদ্ধাসনে নিসীদতি ভিক্খূনং ভত্তকিচ্চপরিযোসানং আগমযমানো. ততো ভিক্খূনং ভত্তকিচ্চপরিযোসানে উপট্ঠাকো ¶ ভগৰতো নিৰেদেতি. অথ ভগৰা গন্ধকুটিং পৰিসতি. ইদং তাৰ পুরেভত্তকিচ্চং. যঞ্চেত্থ ন ৰুত্তং, তং ব্রহ্মাযুসুত্তে ৰুত্তনযেনেৰ গহেতব্বং.

অথ ভগৰা এৰং কতপুরেভত্তকিচ্চো গন্ধকুটিযা উপট্ঠানে নিসীদিত্ৰা, পাদে পক্খালেত্ৰা, পাদপীঠে ঠত্ৰা, ভিক্খুসঙ্ঘং ওৰদতি – ‘‘ভিক্খৰে, অপ্পমাদেন সম্পাদেথ, বুদ্ধুপ্পাদো দুল্লভো লোকস্মিং, মনুস্সপটিলাভো দুল্লভো, সদ্ধাসম্পত্তি দুল্লভা, পব্বজ্জা দুল্লভা, সদ্ধম্মস্সৰনং দুল্লভং ¶ লোকস্মি’’ন্তি. ততো ভিক্খূ ভগৰন্তং ৰন্দিত্ৰা কম্মট্ঠানং পুচ্ছন্তি. অথ ভগৰা ভিক্খূনং চরিযৰসেন কম্মট্ঠানং দেতি. তে কম্মট্ঠানং উগ্গহেত্ৰা, ভগৰন্তং অভিৰাদেত্ৰা, অত্তনো অত্তনো ৰসনট্ঠানং গচ্ছন্তি; কেচি অরঞ্ঞং, কেচি রুক্খমূলং, কেচি পব্বতাদীনং অঞ্ঞতরং, কেচি চাতুমহারাজিকভৰনং…পে… কেচি ৰসৰত্তিভৰনন্তি. ততো ভগৰা গন্ধকুটিং পৰিসিত্ৰা সচে আকঙ্খতি, দক্খিণেন পস্সেন সতো সম্পজানো মুহুত্তং সীহসেয্যং কপ্পেতি. অথ সমস্সাসিতকাযো উট্ঠহিত্ৰা দুতিযভাগে লোকং ৰোলোকেতি. ততিযভাগে যং গামং ৰা নিগমং ৰা উপনিস্সায ৰিহরতি, তত্থ জনো পুরেভত্তং দানং দত্ৰা পচ্ছাভত্তং সুনিৰত্থো সুপারুতো গন্ধপুপ্ফাদীনি আদায ৰিহারে সন্নিপততি. ততো ভগৰা সম্পত্তপরিসায অনুরূপেন পাটিহারিযেন গন্ত্ৰা ধম্মসভাযং পঞ্ঞত্তৰরবুদ্ধাসনে নিসজ্জ ধম্মং দেসেতি কালযুত্তং পমাণযুত্তং. অথ কালং ৰিদিত্ৰা পরিসং উয্যোজেতি.

ততো সচে গত্তানি ওসিঞ্চিতুকামো হোতি. অথ বুদ্ধাসনা উট্ঠায উপট্ঠাকেন উদকপটিযাদিতোকাসং গন্ত্ৰা, উপট্ঠাকহত্থতো উদকসাটিকং গহেত্ৰা, ন্হানকোট্ঠকং পৰিসতি. উপট্ঠাকোপি বুদ্ধাসনং আনেত্ৰা গন্ধকুটিপরিৰেণে পঞ্ঞাপেতি. ভগৰা গত্তানি ওসিঞ্চিত্ৰা, সুরত্তদুপট্টং নিৰাসেত্ৰা ¶ , কাযবন্ধনং বন্ধিত্ৰা, উত্তরাসঙ্গং কত্ৰা, তত্থ আগন্ত্ৰা, নিসীদতি এককোৰ মুহুত্তং পটিসল্লীনো. অথ ভিক্খূ ততো ততো আগম্ম ভগৰতো উপট্ঠানং গচ্ছন্তি. তত্থ ¶ একচ্চে পঞ্হং পুচ্ছন্তি, একচ্চে কম্মট্ঠানং, একচ্চে ধম্মস্সৰনং যাচন্তি. ভগৰা তেসং অধিপ্পাযং সম্পাদেন্তো পঠমং যামং ৰীতিনামেতি.

মজ্ঝিমযামে সকলদসসহস্সিলোকধাতুদেৰতাযো ওকাসং লভমানা ভগৰন্তং উপসঙ্কমিত্ৰা পঞ্হং পুচ্ছন্তি যথাভিসঙ্খতং অন্তমসো চতুরক্খরম্পি. ভগৰা তাসং দেৰতানং পঞ্হং ৰিস্সজ্জেন্তো মজ্ঝিমযামং ৰীতিনামেতি. ততো পচ্ছিমযামং চত্তারো ভাগে কত্ৰা একং ভাগং চঙ্কমং অধিট্ঠাতি, দুতিযভাগং গন্ধকুটিং পৰিসিত্ৰা দক্খিণেন পস্সেন সতো সম্পজানো সীহসেয্যং কপ্পেতি, ততিযভাগং ফলসমাপত্তিযা ৰীতিনামেতি, চতুত্থভাগং মহাকরুণাসমাপত্তিং পৰিসিত্ৰা বুদ্ধচক্খুনা লোকং ৰোলোকেতি অপ্পরজক্খমহারজক্খাদিসত্তদস্সনত্থং. ইদং পচ্ছাভত্তকিচ্চং.

এৰমিমস্স ¶ পচ্ছাভত্তকিচ্চস্স লোকৰোলোকনসঙ্খাতে চতুত্থভাগাৰসানে বুদ্ধধম্মসঙ্ঘেসু দানসীলউপোসথকম্মাদীসু চ অকতাধিকারে কতাধিকারে চ অনুপনিস্সযসম্পন্নে উপনিস্সযসম্পন্নে চ সত্তে পস্সিতুং বুদ্ধচক্খুনা লোকং ৰোলোকেন্তো কসিভারদ্ৰাজং ব্রাহ্মণং অরহত্তস্স উপনিস্সযসম্পন্নং দিস্ৰা ‘‘তত্থ মযি গতে কথা পৰত্তিস্সতি, ততো কথাৰসানে ধম্মদেসনং সুত্ৰা এস ব্রাহ্মণো পব্বজিত্ৰা অরহত্তং পাপুণিস্সতী’’তি চ ঞত্ৰা, তত্থ গন্ত্ৰা, কথং সমুট্ঠাপেত্ৰা ইমং সুত্তমভাসি.

তত্থ এৰং মে সুতন্তিআদি আযস্মতা আনন্দেন পঠমমহাসঙ্গীতিকালে ধম্মসঙ্গীতিং করোন্তেন আযস্মতা মহাকস্সপত্থেরেন পুট্ঠেন পঞ্চন্নং অরহন্তসতানং ৰুত্তং, ‘‘অহং, খো, সমণ কসামি চ ৰপামি চা’’তি কসিভারদ্ৰাজেন ৰুত্তং, ‘‘অহম্পি খো ব্রাহ্মণ কসামি ¶ চ ৰপামি চা’’তিআদি ভগৰতা ৰুত্তং. তদেতং সব্বম্পি সমোধানেত্ৰা ‘‘কসিভারদ্ৰাজসুত্ত’’ন্তি ৰুচ্চতি.

তত্থ এৰন্তি অযং আকারনিদস্সনাৰধারণত্থো এৰং-সদ্দো. আকারত্থেন হি এতেন এতমত্থং দীপেতি – নানানযনিপুণমনেকজ্ঝাসযসমুট্ঠানং অত্থব্যঞ্জনসম্পন্নং ৰিৰিধপাটিহারিযং ধম্মত্থদেসনাপটিৰেধগম্ভীরং সব্বসত্তেহি সকসকভাসানুরূপমুপলক্খণিযসভাৰং তস্স ভগৰতো ৰচনং, তং সব্বাকারেন কো সমত্থো ৰিঞ্ঞাতুং; অথ, খো, ‘‘এৰং মে সুতং, মযাপি একেনাকারেন সুত’’ন্তি. নিদস্সনত্থেন ‘‘নাহং সযম্ভূ, ন মযা ইদং সচ্ছিকত’’ন্তি অত্তানং পরিমোচেন্তো ‘‘এৰং মে সুতং, মযা এৰং সুত’’ন্তি ইদানি ৰত্তব্বং সকলসুত্তং নিদস্সেতি. অৰধারণত্থেন ¶ ‘‘এতদগ্গং, ভিক্খৰে, মম সাৰকানং ভিক্খূনং বহুস্সুতানং যদিদং আনন্দো, গতিমন্তানং, সতিমন্তানং, ধিতিমন্তানং, উপট্ঠাকানং যদিদং আনন্দো’’তি (অ. নি. ১.২১৯-২২৩) এৰং ভগৰতা পসত্থভাৰানুরূপং অত্তনো ধারণবলং দস্সেন্তো সত্তানং সোতুকম্যতং জনেতি ‘‘এৰং মে সুতং তঞ্চ অত্থতো ৰা ব্যঞ্জনতো ৰা অনূনমনধিকং, এৰমেৰ, ন অঞ্ঞথা দট্ঠব্ব’’ন্তি. মে সুতন্তি এত্থ মযাসদ্দত্থো মে-সদ্দো, সোতদ্ৰারৰিঞ্ঞাণত্থো সুতসদ্দো. তস্মা এৰং মে সুতন্তি এৰং মযা সোতৰিঞ্ঞাণপুব্বঙ্গমায ৰিঞ্ঞাণৰীথিযা উপধারিতন্তি ৰুত্তং হোতি.

একং ¶ সমযন্তি একং কালং. ভগৰাতি ভাগ্যৰা, ভগ্গৰা, ভত্তৰাতি ৰুত্তং হোতি. মগধেসু ৰিহরতীতি মগধা নাম জনপদিনো রাজকুমারা, তেসং নিৰাসো একোপি জনপদো রুল়্হীসদ্দেন ‘‘মগধা’’তি ৰুচ্চতি. তস্মিং মগধেসু জনপদে. কেচি পন ‘‘যস্মা চেতিযরাজা মুসাৰাদং ভণিত্ৰা ভূমিং পৰিসন্তো ‘মা গধং পৰিসা’তি ৰুত্তো, যস্মা ৰা তং রাজানং মগ্গন্তা ভূমিং খনন্তা পুরিসা ‘মা গধং করোথা’তি ৰুত্তা, তস্মা মগধা’’তি এৰমাদীহি নযেহি বহুধা ¶ পপঞ্চেন্তি. যং রুচ্চতি, তং গহেতব্বন্তি. ৰিহরতীতি একং ইরিযাপথবাধনং অপরেন ইরিযাপথেন ৰিচ্ছিন্দিত্ৰা অপরিপতন্তং অত্তভাৰং হরতি, পৰত্তেতীতি ৰুত্তং হোতি. দিব্বব্রহ্মঅরিযৰিহারেহি ৰা সত্তানং ৰিৰিধং হিতং হরতীতি ৰিহরতি. হরতীতি উপসংহরতি, উপনেতি, জনেতি, উপ্পাদেতীতি ৰুত্তং হোতি. তথা হি যদা সত্তা কামেসু ৰিপ্পটিপজ্জন্তি, তদা কির ভগৰা দিব্বেন ৰিহারেন ৰিহরতি তেসং অলোভকুসলমূলুপ্পাদনত্থং – ‘‘অপ্পেৰ নাম ইমং পটিপত্তিং দিস্ৰা এত্থ রুচিং উপ্পাদেত্ৰা কামেসু ৰিরজ্জেয্যু’’ন্তি. যদা পন ইস্সরিযত্থং সত্তেসু ৰিপ্পটিপজ্জন্তি, তদা ব্রহ্মৰিহারেন ৰিহরতি তেসং অদোসকুসলমূলুপ্পাদনত্থং – ‘‘অপ্পেৰ নাম ইমং পটিপত্তিং দিস্ৰা এত্থ রুচিং উপ্পাদেত্ৰা অদোসেন দোসং ৰূপসমেয্যু’’ন্তি. যদা পন পব্বজিতা ধম্মাধিকরণং ৰিৰদন্তি, তদা অরিযৰিহারেন ৰিহরতি তেসং অমোহকুসলমূলুপ্পাদনত্থং – ‘‘অপ্পেৰ নাম ইমং পটিপত্তিং দিস্ৰা এত্থ রুচিং উপ্পাদেত্ৰা অমোহেন মোহং ৰূপসমেয্যু’’ন্তি. ইরিযাপথৰিহারেন পন ন কদাচি ন ৰিহরতি তং ৰিনা অত্তভাৰপরিহরণাভাৰতোতি. অযমেত্থ সঙ্খেপো, ৰিত্থারং পন মঙ্গলসুত্তৰণ্ণনাযং ৰক্খাম.

দক্খিণাগিরিস্মিন্তি যো সো রাজগহং পরিৰারেত্ৰা ঠিতো গিরি, তস্স দক্খিণপস্সে জনপদো ‘‘দক্খিণাগিরী’’তি ৰুচ্চতি, তস্মিং জনপদেতি ৰুত্তং হোতি. তত্থ ৰিহারস্সাপি তদেৰ নামং. একনাল়াযং ব্রাহ্মণগামেতি একনাল়াতি তস্স গামস্স নামং. ব্রাহ্মণা চেত্থ সম্বহুলা পটিৰসন্তি, ব্রাহ্মণভোগো ৰা সো, তস্মা ‘‘ব্রাহ্মণগামো’’তি ৰুচ্চতি.

তেন ¶ খো পন সমযেনাতি যং সমযং ভগৰা অপরাজিতপল্লঙ্কং আভুজিত্ৰা অনুত্তরং সম্মাসম্বোধিং অভিসম্বুজ্ঝিত্ৰা পৰত্তিতৰরধম্মচক্কো মগধরট্ঠে ¶ একনাল়ং ব্রাহ্মণগামং উপনিস্সায দক্খিণাগিরিমহাৰিহারে ¶ ব্রাহ্মণস্স ইন্দ্রিযপরিপাকং আগমযমানো ৰিহরতি, তেন সমযেন করণভূতেনাতি ৰুত্তং হোতি. খো পনাতি ইদং পনেত্থ নিপাতদ্ৰযং পদপূরণমত্তং, অধিকারন্তরদস্সনত্থং ৰাতি দট্ঠব্বং. কসিভারদ্ৰাজস্স ব্রাহ্মণস্সাতি সো ব্রাহ্মণো কসিযা জীৰতি, ভারদ্ৰাজোতি চস্স গোত্তং, তস্মা এৰং ৰুচ্চতি. পঞ্চমত্তানীতি যথা – ‘‘ভোজনে মত্তঞ্ঞূ’’তি এত্থ মত্তসদ্দো পমাণে ৰত্ততি, এৰমিধাপি, তস্মা পঞ্চপমাণানি অনূনানি অনধিকানি, পঞ্চনঙ্গলসতানীতি ৰুত্তং হোতি. পযুত্তানীতি পযোজিতানি, বলিবদ্দানং খন্ধেসু ঠপেত্ৰা যুগে যোত্তেহি যোজিতানি হোন্তীতি অত্থো.

ৰপ্পকালেতি ৰপনকালে, বীজনিক্খিপকালেতি ৰুত্তং হোতি. তত্থ দ্ৰে ৰপ্পানি কললৰপ্পঞ্চ, পংসুৰপ্পঞ্চ. পংসুৰপ্পং ইধ অধিপ্পেতং. তঞ্চ খো পঠমদিৰসে মঙ্গলৰপ্পং. তত্থাযং উপকরণসম্পদা – তীণি বলিবদ্দসহস্সানি উপট্ঠাপিতানি হোন্তি, সব্বেসং সুৰণ্ণমযানি সিঙ্গানি পটিমুক্কানি, রজতমযা খুরা, সব্বে সেতমালাহি সব্বগন্ধসুগন্ধেহি পঞ্চঙ্গুলিকেহি চ অলঙ্কতা পরিপুণ্ণঙ্গপচ্চঙ্গা সব্বলক্খণসম্পন্না, একচ্চে কাল়া অঞ্জনৰণ্ণাযেৰ, একচ্চে সেতা ফলিকৰণ্ণা, একচ্চে রত্তা পৰাল়ৰণ্ণা, একচ্চে কম্মাসা মসারগল্লৰণ্ণা. পঞ্চসতা কস্সকপুরিসা সব্বে অহতসেতৰত্থনিৰত্থা মালালঙ্কতা দক্খিণঅংসকূটেসু ঠপিতপুপ্ফচুম্বটকা হরিতালমনোসিলালঞ্ছনুজ্জলিতগত্তভাগা দস দস নঙ্গলা একেকগুম্বা হুত্ৰা গচ্ছন্তি. নঙ্গলানং সীসঞ্চ যুগঞ্চ পতোদা চ সুৰণ্ণৰিনদ্ধা. পঠমনঙ্গলে অট্ঠ বলিবদ্দা যুত্তা, সেসেসু চত্তারো চত্তারো, অৰসেসা কিলন্তপরিৰত্তনত্থং আনীতা. একেকগুম্বে একমেকং বীজসকটং একেকো কসতি, একেকো ৰপতি.

ব্রাহ্মণো পন পগেৰ মস্সুকম্মং কারাপেত্ৰা ন্হত্ৰা সুগন্ধগন্ধেহি ৰিলিত্তো পঞ্চসতগ্ঘনকং ¶ ৰত্থং নিৰাসেত্ৰা সহস্সগ্ঘনকং একংসং করিত্ৰা একমেকিস্সা অঙ্গুলিযা দ্ৰে দ্ৰে কত্ৰা ৰীসতি অঙ্গুলিমুদ্দিকাযো, কণ্ণেসু সীহকুণ্ডলানি, সীসে চ ব্রহ্মৰেঠনং পটিমুঞ্চিত্ৰা সুৰণ্ণমালং কণ্ঠে ¶ কত্ৰা ব্রাহ্মণগণপরিৰুতো কম্মন্তং ৰোসাসতি. অথস্স ব্রাহ্মণী অনেকসতভাজনেসু পাযাসং পচাপেত্ৰা মহাসকটেসু আরোপেত্ৰা গন্ধোদকেন ন্হাযিত্ৰা সব্বালঙ্কারৰিভূসিতা ব্রাহ্মণীগণপরিৰুতা কম্মন্তং অগমাসি. গেহম্পিস্স সব্বত্থ গন্ধেহি সুৰিলিত্তং পুপ্ফেহি সুকতবলিকম্মং, খেত্তঞ্চ তেসু তেসু ঠানেসু সমুস্সিতপটাকং অহোসি. পরিজনকম্মকারেহি ¶ সহ কম্মন্তং ওসটপরিসা অড্ঢতেয্যসহস্সা অহোসি. সব্বে অহতৰত্থনিৰত্থা, সব্বেসঞ্চ পাযাসভোজনং পটিযত্তং অহোসি.

অথ ব্রাহ্মণো যত্থ সামং ভুঞ্জতি, তং সুৰণ্ণপাতিং ধোৰাপেত্ৰা পাযাসস্স পূরেত্ৰা সপ্পিমধুফাণিতাদীনি অভিসঙ্খরিত্ৰা নঙ্গলবলিকম্মং কারাপেসি. ব্রাহ্মণী পঞ্চ কস্সকসতানি সুৰণ্ণরজতকংসতম্বমযানি ভাজনানি গহেত্ৰা নিসিন্নানি সুৰণ্ণকটচ্ছুং গহেত্ৰা পাযাসেন পরিৰিসন্তী গচ্ছতি. ব্রাহ্মণো পন বলিকম্মং কারাপেত্ৰা রত্তসুৰণ্ণবন্ধূপাহনাযো আরোহিত্ৰা রত্তসুৰণ্ণদণ্ডং গহেত্ৰা ‘‘ইধ পাযাসং দেথ, ইধ সপ্পিং, ইধ সক্খরং দেথা’’তি ৰোসাসমানো ৰিচরতি. অথ ভগৰা গন্ধকুটিযং নিসিন্নোৰ ব্রাহ্মণস্স পরিৰেসনং ৰত্তমানং ঞত্ৰা ‘‘অযং কালো ব্রাহ্মণং দমেতু’’ন্তি নিৰাসেত্ৰা, কাযবন্ধনং বন্ধিত্ৰা, সঙ্ঘাটিং পারুপিত্ৰা, পত্তং গহেত্ৰা, গন্ধকুটিতো নিক্খমি যথা তং অনুত্তরো পুরিসদম্মসারথি. তেনাহ আযস্মা আনন্দো ‘‘অথ খো ভগৰা পুব্বণ্হসমযং নিৰাসেত্ৰা’’তি.

তত্থ অথ ইতি নিপাতো অঞ্ঞাধিকারৰচনারম্ভে খোতি ¶ পদপূরণে. ভগৰাতি ৰুত্তনযমেৰ. পুব্বণ্হসমযন্তি দিৰসস্স পুব্বভাগসমযং, পুব্বণ্হসমযেতি অত্থো, পুব্বণ্হে ৰা সমযং পুব্বণ্হসমযং, পুব্বণ্হে একং খণন্তি ৰুত্তং হোতি. এৰং অচ্চন্তসংযোগে উপযোগৰচনং লব্ভতি. নিৰাসেত্ৰাতি পরিদহিত্ৰা, ৰিহারনিৰাসনপরিৰত্তনৰসেনেতং ৰেদিতব্বং. ন হি ভগৰা ততো পুব্বে অনিৰত্থো আসি. পত্তচীৰরমাদাযাতি পত্তং হত্থেহি, চীৰরং কাযেন আদিযিত্ৰা, সম্পটিচ্ছিত্ৰা ধারেত্ৰাতি অত্থো. ভগৰতো কির পিণ্ডায পৰিসিতুকামস্স ভমরো ৰিয ৰিকসিতপদুমদ্ৰযমজ্ঝং, ইন্দনীলমণিৰণ্ণং ¶ সেলমযং পত্তং হত্থদ্ৰযমজ্ঝং আগচ্ছতি. তস্মা এৰমাগতং পত্তং হত্থেহি সম্পটিচ্ছিত্ৰা চীৰরঞ্চ পরিমণ্ডলং পারুতং কাযেন ধারেত্ৰাতি এৰমস্স অত্থো ৰেদিতব্বো. যেন ৰা তেন ৰা হি পকারেন গণ্হন্তো আদায ইচ্চেৰ ৰুচ্চতি যথা ‘‘সমাদাযেৰ পক্কমতী’’তি.

যেনাতি যেন মগ্গেন. কম্মন্তোতি কম্মকরণোকাসো. তেনাতি তেন মগ্গেন. উপসঙ্কমীতি গতো, যেন মগ্গেন কসিভারদ্ৰাজস্স ব্রাহ্মণস্স কম্মন্তো গম্মতি, তেন মগ্গেন গতোতি ৰুত্তং হোতি. অথ কস্মা, ভিক্খূ, ভগৰন্তং নানুবন্ধিংসূতি? ৰুচ্চতে – যদা ভগৰা এককোৰ কত্থচি উপসঙ্কমিতুকামো হোতি, ভিক্খাচারৰেলাযং দ্ৰারং পিদহিত্ৰা অন্তোগন্ধকুটিং পৰিসতি. ততো ভিক্খূ তায সঞ্ঞায জানন্তি – ‘‘অজ্জ ভগৰা এককোৰ গামং পৰিসিতুকামো, অদ্ধা কঞ্চি এৰ ৰিনেতব্বপুগ্গলং অদ্দসা’’তি. তে অত্তনো পত্তচীৰরং গহেত্ৰা, গন্ধকুটিং পদক্খিণং ¶ কত্ৰা, ভিক্খাচারং গচ্ছন্তি. তদা চ ভগৰা এৰমকাসি. তস্মা ভিক্খূ ভগৰন্তং নানুবন্ধিংসূতি.

তেন ¶ খো পন সমযেনাতি যেন সমযেন ভগৰা কম্মন্তং উপসঙ্কমি, তেন সমযেন তস্স ব্রাহ্মণস্স পরিৰেসনা ৰত্ততি, ভত্তৰিস্সগ্গো ৰত্ততীতি অত্থো. যং পুব্বে অৰোচুম্হ – ‘‘ব্রাহ্মণী পঞ্চ কস্সকসতানি সুৰণ্ণরজতকংসতম্বমযানি ভাজনানি গহেত্ৰা নিসিন্নানি সুৰণ্ণকটচ্ছুং গহেত্ৰা পাযাসেন পরিৰিসন্তী গচ্ছতী’’তি. অথ খো ভগৰা যেন পরিৰেসনা তেনুপসঙ্কমি. কিং কারণাতি? ব্রাহ্মণস্স অনুগ্গহকরণত্থং. ন হি ভগৰা কপণপুরিসো ৰিয ভোত্তুকামতায পরিৰেসনং উপসঙ্কমতি. ভগৰতো হি দ্ৰে অসীতিসহস্সসঙ্খ্যা সক্যকোলিযরাজানো ঞাতযো, তে অত্তনো সম্পত্তিযা নিবদ্ধভত্তং দাতুং উস্সহন্তি. ন পন ভগৰা ভত্তত্থায পব্বজিতো, অপিচ খো পন ‘‘অনেকানি অসঙ্খ্যেয্যানি পঞ্চ মহাপরিচ্চাগে পরিচ্চজন্তো পারমিযো পূরেত্ৰা মুত্তো মোচেস্সামি, দন্তো দমেস্সামি; সন্তো সমেস্সামি, পরিনিব্বুতো পরিনিব্বাপেস্সামী’’তি পব্বজিতো. তস্মা অত্তনো মুত্তত্তা…পে… পরিনিব্বুতত্তা চ পরং মোচেন্তো…পে… পরিনিব্বাপেন্তো চ লোকে ৰিচরন্তো ব্রাহ্মণস্স অনুগ্গহকরণত্থং যেন পরিৰেসনা তেনুপসঙ্কমীতি ৰেদিতব্বং.

উপসঙ্কমিত্ৰা ¶ একমন্তং অট্ঠাসীতি এৰং উপসঙ্কমিত্ৰা চ একমন্তং অট্ঠাসি. একমন্তন্তি ভাৰনপুংসকনিদ্দেসো, একোকাসং একপস্সন্তি ৰুত্তং হোতি. ভুম্মত্থে ৰা উপযোগৰচনং, তস্স দস্সনূপচারে কথাসৰনট্ঠানে, যত্থ ঠিতং ব্রাহ্মণো পস্সতি, তত্থ উচ্চট্ঠানে অট্ঠাসি. ঠত্ৰা চ সুৰণ্ণরসপিঞ্জরং সহস্সচন্দসূরিযোভাসাতিভাসযমানং সরীরাভং মুঞ্চি সমন্ততো অসীতিহত্থপরিমাণং, যায অজ্ঝোত্থরিতত্তা ব্রাহ্মণস্স কম্মন্তসালাভিত্তিরুক্খকসিতমত্তিকাপিণ্ডাদযো সুৰণ্ণমযা ৰিয অহেসুং. অথ মনুস্সা পাযাসং ভুত্তা অসীতিঅনুব্যঞ্জনপরিৰারদ্ৰত্তিংসৰরলক্খণপটিমণ্ডিতসরীরং ব্যামপ্পভাপরিক্খেপৰিভূসিতবাহুযুগল়ং কেতুমালাসমুজ্জলিতসস্সিরিকদস্সনং ¶ জঙ্গমমিৰ পদুমস্সরং, রংসিজালুজ্জলিততারাগণমিৰ গগনতলং, আদিত্তমিৰ চ কনকগিরিসিখরং সিরিযা জলমানং সম্মাসম্বুদ্ধং একমন্তং ঠিতং দিস্ৰা হত্থপাদে ধোৰিত্ৰা অঞ্জলিং পগ্গয্হ সম্পরিৰারেত্ৰা অট্ঠংসু. এৰং তেহি সম্পরিৰারিতং অদ্দস খো কসিভারদ্ৰাজো ব্রাহ্মণো ভগৰন্তং পিণ্ডায ঠিতং. দিস্ৰান ভগৰন্তং এতদৰোচ ‘‘অহং খো, সমণ, কসামি চ ৰপামি চা’’তি.

কস্মা পনাযং এৰমাহ? কিং সমন্তপাসাদিকে পসাদনীযে উত্তমদমথসমথমনুপ্পত্তেপি ভগৰতি ¶ অপ্পসাদেন, উদাহু অড্ঢতেয্যানং জনসহস্সানং পাযাসং পটিযাদেত্ৰাপি কটচ্ছুভিক্খায মচ্ছেরেনাতি? উভযথাপি নো, অপিচ খ্ৰাস্স ভগৰতো দস্সনেন অতিত্তং নিক্খিত্তকম্মন্তং জনং দিস্ৰা ‘‘কম্মভঙ্গং মে কাতুং আগতো’’তি অনত্তমনতা অহোসি. তস্মা এৰমাহ. ভগৰতো চ লক্খণসম্পত্তিং দিস্ৰা ‘‘সচাযং কম্মন্তে পযোজযিস্স, সকলজম্বুদীপে মনুস্সানং সীসে চূল়ামণি ৰিয অভৰিস্স, কো নামস্স অত্থো ন সম্পজ্জিস্স, এৰমেৰং অলসতায কম্মন্তে অপ্পযোজেত্ৰা ৰপ্পমঙ্গলাদীসু পিণ্ডায চরিত্ৰা ভুঞ্জন্তো কাযদল়্হীবহুলো ৰিচরতী’’তিপিস্স অহোসি. তেনাহ – ‘‘অহং খো, সমণ, কসামি চ ৰপামি চ, কসিত্ৰা চ ৰপিত্ৰা চ ভুঞ্জামী’’তি. ন মে কম্মন্তা ব্যাপজ্জন্তি, ন চম্হি যথা ত্ৰং এৰং লক্খণসম্পন্নোতি অধিপ্পাযো. ত্ৰম্পি সমণ…পে… ভুঞ্জস্সু, কো তে অত্থো ন সম্পজ্জেয্য এৰং লক্খণসম্পন্নস্সাতি অধিপ্পাযো.

অপিচাযং ¶ অস্সোসি – ‘‘সক্যরাজকুলে কির কুমারো উপ্পন্নো, সো চক্কৰত্তিরজ্জং পহায পব্বজিতো’’তি. তস্মা ‘‘ইদানি অযং সো’’তি ঞত্ৰা ‘‘চক্কৰত্তিরজ্জং কির পহায কিলন্তোসী’’তি উপারম্ভং করোন্তো আহ ‘‘অহং খো সমণা’’তি. অপিচাযং তিক্খপঞ্ঞো ব্রাহ্মণো, ন ভগৰন্তং অৰক্খিপন্তো ¶ ভণতি, ভগৰতো পন রূপসম্পত্তিং দিস্ৰা পঞ্ঞাসম্পত্তিং সম্ভাৰযমানো কথাপৰত্তনত্থম্পি এৰমাহ – ‘‘অহং খো সমণা’’তি. ততো ভগৰা ৰেনেয্যৰসেন সদেৰকে লোকে অগ্গকস্সকৰপ্পকভাৰং অত্তনো দস্সেন্তো আহ ‘‘অহম্পি খো ব্রাহ্মণা’’তি.

অথ ব্রাহ্মণস্স চিন্তা উদপাদি – ‘‘অযং সমণো ‘কসামি চ ৰপামি চা’তি আহ. ন চস্স ওল়ারিকানি যুগনঙ্গলাদীনি কসিভণ্ডানি পস্সামি, সো মুসা নু খো ভণতি, নো’’তি ভগৰন্তং পাদতলা পট্ঠায যাৰ উপরি কেসন্তা সম্মালোকযমানো অঙ্গৰিজ্জায কতাধিকারত্তা দ্ৰত্তিংসৰরলক্খণসম্পত্তিমস্স ঞত্ৰা ‘‘অট্ঠানমেতং অনৰকাসো, যং এৰরূপো মুসা ভণেয্যা’’তি তাৰদেৰ সঞ্জাতবহুমানো ভগৰতি সমণৰাদং পহায গোত্তেন ভগৰন্তং সমুদাচরমানো আহ ‘‘ন খো পন মযং পস্সাম ভোতো গোতমস্সা’’তি.

এৰঞ্চ পন ৰত্ৰা তিক্খপঞ্ঞো ব্রাহ্মণো ‘‘গম্ভীরত্থং সন্ধায ইমিনা এতং ৰুত্ত’’ন্তি ঞত্ৰা পুচ্ছিত্ৰা তমত্থং ঞাতুকামো ভগৰন্তং গাথায অজ্ঝভাসি. তেনাহ আযস্মা আনন্দো ‘‘অথ খো কসিভারদ্ৰাজো ব্রাহ্মণো ভগৰন্তং গাথায অজ্ঝভাসী’’তি. তত্থ গাথাযাতি অক্খরপদনিযমিতেন ৰচনেন. অজ্ঝভাসীতি অভাসি.

৭৬-৭৭. তত্থ ¶ ব্রাহ্মণো ‘‘কসি’’ন্তি যুগনঙ্গলাদিকসিসম্ভারসমাযোগং ৰদতি. ভগৰা পন যস্মা পুব্বধম্মসভাগেন রোপেত্ৰা কথনং নাম বুদ্ধানং আনুভাৰো, তস্মা বুদ্ধানুভাৰং দীপেন্তো পুব্বধম্মসভাগেন রোপেন্তো আহ – ‘‘সদ্ধা বীজ’’ন্তি. কো পনেত্থ পুব্বধম্মসভাগো, ননু ব্রাহ্মণেন ভগৰা যুগনঙ্গলাদিকসিসম্ভারসমাযোগং পুচ্ছিতো অথ চ পন অপুচ্ছিতস্স বীজস্স সভাগেন রোপেন্তো আহ – ‘‘সদ্ধা বীজ’’ন্তি, এৰঞ্চ সতি অননুসন্ধিকাৰ অযং কথা হোতীতি? ৰুচ্চতে – ন বুদ্ধানং ¶ অননুসন্ধিকা নাম কথা অত্থি, নাপি বুদ্ধা পুব্বধম্মসভাগং অনারোপেত্ৰা কথেন্তি. এৰঞ্চেত্থ ¶ অনুসন্ধি ৰেদিতব্বা – অনেন হি ব্রাহ্মণেন ভগৰা যুগনঙ্গলাদিকসিসম্ভারৰসেন কসিং পুচ্ছিতো. সো তস্স অনুকম্পায ‘‘ইদং অপুচ্ছিত’’ন্তি অপরিহাপেত্ৰা সমূলং সউপকারং সসম্ভারং সফলং কসিং ঞাপেতুং মূলতো পট্ঠায কসিং দস্সেন্তো আহ – ‘‘সদ্ধা বীজ’’ন্তি. বীজঞ্হি কসিযা মূলং তস্মিং সতি কত্তব্বতো, অসতি অকত্তব্বতো, তপ্পমাণেন চ কত্তব্বতো. বীজে হি সতি কসিং করোন্তি, অসতি ন করোন্তি. বীজপ্পমাণেন চ কুসলা কস্সকা খেত্তং কসন্তি, ন ঊনং ‘‘মা নো সস্সং পরিহাযী’’তি, ন অধিকং ‘‘মা নো মোঘো ৰাযামো অহোসী’’তি. যস্মা চ বীজমেৰ মূলং, তস্মা ভগৰা মূলতো পট্ঠায কসিং দস্সেন্তো তস্স ব্রাহ্মণস্স কসিযা পুব্বধম্মস্স বীজস্স সভাগেন অত্তনো কসিযা পুব্বধম্মং রোপেন্তো আহ – ‘‘সদ্ধা বীজ’’ন্তি. এৰমেত্থ পুব্বধম্মসভাগো ৰেদিতব্বো.

পুচ্ছিতংযেৰ ৰত্ৰা অপুচ্ছিতং পচ্ছা কিং ন ৰুত্তন্তি চে? তস্স উপকারভাৰতো ধম্মসম্বন্ধসমত্থভাৰতো চ. অযঞ্হি ব্রাহ্মণো পঞ্ঞৰা, মিচ্ছাদিট্ঠিকুলে পন জাতত্তা সদ্ধাৰিরহিতো. সদ্ধাৰিরহিতো চ পঞ্ঞৰা পরেসং সদ্ধায অত্তনো ৰিসযে অপটিপজ্জমানো ৰিসেসং নাধিগচ্ছতি, কিলেসকালুস্সিযভাৰাপগমপ্পসাদমত্তলক্খণাপি চস্স দুব্বলা সদ্ধা বলৰতিযা পঞ্ঞায সহ ৰত্তমানা অত্থসিদ্ধিং ন করোতি, হত্থিনা সহ একধুরে যুত্তগোণো ৰিয. তস্মা তস্স সদ্ধা উপকারিকা. এৰং তস্স ব্রাহ্মণস্স সউপকারভাৰতো তং ব্রাহ্মণং সদ্ধায পতিট্ঠাপেন্তেন পচ্ছাপি ৰত্তব্বো অযমত্থো পুব্বে ৰুত্তো দেসনাকুসলতায যথা অঞ্ঞত্রাপি ‘‘সদ্ধা বন্ধতি পাথেয্য’’ন্তি (সং. নি. ১.৭৯) চ, ‘‘সদ্ধা দুতিযা পুরিসস্স হোতী’’তি (সং. নি. ১.৫৯) চ, ‘‘সদ্ধীধ ৰিত্তং পুরিসস্স সেট্ঠ’’ন্তি (সং. নি. ১.৭৩, ২৪৬; সু. নি. ১৮৪) চ, ‘‘সদ্ধায তরতি ওঘ’’ন্তি (সং. নি. ১.২৪৬) চ, ‘‘সদ্ধাহত্থো মহানাগো’’তি (অ. নি. ৬.৪৩; থেরগা. ৬৯৪) চ, ‘‘সদ্ধেসিকো খো, ভিক্খৰে, অরিযসাৰকোতি চা’’তি (অ. নি. ৭.৬৭). বীজস্স চ উপকারিকা ¶ ৰুট্ঠি, সা তদনন্তরঞ্ঞেৰ ৰুচ্চমানা সমত্থা হোতি ¶ . এৰং ধম্মসম্বন্ধসমত্থভাৰতো ¶ পচ্ছাপি ৰত্তব্বো অযমত্থো পুব্বে ৰুত্তো, অঞ্ঞো চ এৰংৰিধো ঈসাযোত্তাদি.

তত্থ সম্পসাদনলক্খণা সদ্ধা, ওকপ্পনলক্খণা ৰা, পক্খন্দনরসা, অধিমুত্তিপচ্চুপট্ঠানা, অকালুস্সিযপচ্চুপট্ঠানা ৰা, সোতাপত্তিযঙ্গপদট্ঠানা, সদ্দহিতব্বধম্মপদট্ঠানা ৰা, আদাসজলতলাদীনং পসাদো ৰিয চেতসো পসাদভূতা, উদকপ্পসাদকমণি ৰিয উদকস্স, সম্পযুত্তধম্মানং পসাদিকা. বীজন্তি পঞ্চৰিধং – মূলবীজং, খন্ধবীজং, ফলুবীজং, অগ্গবীজং, বীজবীজমেৰ পঞ্চমন্তি. তং সব্বম্পি ৰিরুহনট্ঠেন বীজংত্ৰেৰ সঙ্খং গচ্ছতি. যথাহ – ‘‘বীজঞ্চেতং ৰিরুহনট্ঠেনা’’তি.

তত্থ যথা ব্রাহ্মণস্স কসিযা মূলভূতং বীজং দ্ৰে কিচ্চানি করোতি, হেট্ঠা মূলেন পতিট্ঠাতি, উপরি অঙ্কুরং উট্ঠাপেতি; এৰং ভগৰতো কসিযা মূলভূতা সদ্ধা হেট্ঠা সীলমূলেন পতিট্ঠাতি, উপরি সমথৰিপস্সনঙ্কুরং উট্ঠাপেতি. যথা চ তং মূলেন পথৰিরসং আপোরসং গহেত্ৰা নাল়েন ধঞ্ঞপরিপাকগহণত্থং ৰড্ঢতি; এৰমযং সীলমূলেন সমথৰিপস্সনারসং গহেত্ৰা অরিযমগ্গনাল়েন অরিযফলধঞ্ঞপরিপাকগহণত্থং ৰড্ঢতি. যথা চ তং সুভূমিযং পতিট্ঠহিত্ৰা মূলঙ্কুরপণ্ণনাল়কণ্ডপ্পসৰেহি ৰুড্ঢিং ৰিরূল়্হিং ৰেপুল্লং পত্ৰা, খীরং জনেত্ৰা, অনেকসালিফলভরিতং সালিসীসং নিপ্ফাদেতি; এৰমযং চিত্তসন্তানে পতিট্ঠহিত্ৰা সীলচিত্তদিট্ঠিকঙ্খাৰিতরণমগ্গামগ্গঞাণদস্সনপটিপদাঞাণদস্সনৰিসুদ্ধীহি ৰুড্ঢিং ৰিরূল়্হিং ৰেপুল্লং পত্ৰা ঞাণদস্সনৰিসুদ্ধিখীরং জনেত্ৰা অনেকপটিসম্ভিদাভিঞ্ঞাভরিতং অরহত্তফলং নিপ্ফাদেতি. তেনাহ ভগৰা – ‘‘সদ্ধা বীজ’’ন্তি.

তত্থ সিযা ‘‘পরোপঞ্ঞাসকুসলধম্মেসু একতো উপ্পজ্জমানেসু কস্মা সদ্ধাৰ বীজন্তি ৰুত্তা’’তি? ৰুচ্চতে – বীজকিচ্চকরণতো. যথা হি তেসু ৰিঞ্ঞাণংযেৰ ৰিজাননকিচ্চং করোতি, এৰং সদ্ধা বীজকিচ্চং, সা চ সব্বকুসলানং মূলভূতা. যথাহ –

‘‘সদ্ধাজাতো উপসঙ্কমতি, উপসঙ্কমন্তো পযিরুপাসতি, পযিরুপাসন্তো সোতং ওদহতি ¶ , ওহিতসোতো ধম্মং সুণাতি, সুত্ৰা ধম্মং ধারেতি, ধতানং ধম্মানং অত্থং উপপরিক্খতি ¶ , অত্থং উপপরিক্খতো ধম্মা নিজ্ঝানং খমন্তি, ধম্মনিজ্ঝানক্খন্তিযা সতি ছন্দো জাযতি, ছন্দজাতো উস্সহতি, উস্সাহেত্ৰা তুলযতি, তুলযিত্ৰা পদহতি, পহিতত্তো ¶ সমানো কাযেন চেৰ পরমসচ্চং সচ্ছিকরোতি, পঞ্ঞায চ নং অতিৰিজ্ঝপস্সতী’’তি (ম. নি. ২.১৮৩, ৪৩২).

তপতি অকুসলে ধম্মে কাযঞ্চাতি তপো; ইন্দ্রিযসংৰরৰীরিযধুতঙ্গদুক্করকারিকানং এতং অধিৰচনং. ইধ পন ইন্দ্রিযসংৰরো অধিপ্পেতো. ৰুট্ঠীতি ৰস্সৰুট্ঠিৰাতৰুট্ঠীতিআদিনা অনেকৰিধা. ইধ ৰস্সৰুট্ঠি অধিপ্পেতা. যথা হি ব্রাহ্মণস্স ৰস্সৰুট্ঠিসমনুগ্গহিতং বীজং বীজমূলকঞ্চ সস্সং ৰিরুহতি ন মিলাযতি নিপ্ফত্তিং গচ্ছতি, এৰং ভগৰতো ইন্দ্রিযসংৰরসমনুগ্গহিতা সদ্ধা সদ্ধামূলা চ সীলাদযো ধম্মা ৰিরুহন্তি ন মিলাযন্তি নিপ্ফত্তিং গচ্ছন্তি. তেনাহ – ‘‘তপো ৰুট্ঠী’’তি. ‘‘পঞ্ঞা মে’’তি এত্থ চ ৰুত্তো মে-সদ্দো ইমেসুপি পদেসু যোজেতব্বো ‘‘সদ্ধা মে বীজং, তপো মে ৰুট্ঠী’’তি. তেন কিং দীপেতি? যথা, ব্রাহ্মণ, তযা ৰপিতে বীজে সচে ৰুট্ঠি অত্থি, সাধু, নো চে অত্থি, উদকম্পি দাতব্বং হোতি, তথা মযা হিরি-ঈসে পঞ্ঞাযুগনঙ্গলে মনোযোত্তেন একাবদ্ধে কতে ৰীরিযবলিবদ্দে যোজেত্ৰা সতিপাচনেন ৰিজ্ঝিত্ৰা অত্তনো চিত্তসন্তানখেত্তে সদ্ধাবীজে ৰপিতে ৰুট্ঠি-অভাৰো নাম নত্থি. অযং পন মে সততং সমিতং তপো ৰুট্ঠীতি.

পজানাতি এতায পুগ্গলো, সযং ৰা পজানাতীতি পঞ্ঞা, সা কামাৰচরাদিভেদতো অনেকৰিধা. ইধ পন সহ ৰিপস্সনায মগ্গপঞ্ঞা অধিপ্পেতা. যুগনঙ্গলন্তি যুগঞ্চ নঙ্গলঞ্চ. যথা হি ব্রাহ্মণস্স যুগনঙ্গলং, এৰং ¶ ভগৰতো দুৰিধাপি পঞ্ঞা. তত্থ যথা যুগং ঈসায উপনিস্সযং হোতি, পুরতো হোতি, ঈসাবদ্ধং হোতি, যোত্তানং নিস্সযং হোতি, বলিবদ্দানং একতো গমনং ধারেতি, এৰং পঞ্ঞা হিরিপমুখানং ধম্মানং উপনিস্সযা হোতি. যথাহ – ‘‘পঞ্ঞুত্তরা সব্বে কুসলা ধম্মা’’তি (অ. নি. ৮.৮৩) চ, ‘‘পঞ্ঞা হি সেট্ঠা কুসলা ৰদন্তি, নক্খত্তরাজারিৰ তারকান’’ন্তি (জা. ২.১৭.৮১) চ. কুসলানং ধম্মানং পুব্বঙ্গমট্ঠেন পুরতো চ হোতি. যথাহ – ‘‘সীলং হিরী চাপি সতঞ্চ ধম্মো, অন্ৰাযিকা পঞ্ঞৰতো ভৰন্তী’’তি. হিরিৰিপ্পযোগেন ¶ অনুপ্পত্তিতো ঈসাবদ্ধা হোতি, মনোসঙ্খাতস্স সমাধিযোত্তস্স নিস্সযপচ্চযতো যোত্তানং নিস্সযো হোতি, অচ্চারদ্ধাতিলীনভাৰপটিসেধনতো ৰীরিযবলিবদ্দানং একতো গমনং ধারেতি. যথা চ নঙ্গলং ফালযুত্তং কসনকালে পথৰিঘনং ভিন্দতি, মূলসন্তানকানি পদালেতি, এৰং সতিযুত্তা পঞ্ঞা ৰিপস্সনাকালে ধম্মানং সন্ততিসমূহকিচ্চারম্মণঘনং ভিন্দতি, সব্বকিলেসমূলসন্তানকানি পদালেতি. সা চ খো লোকুত্তরাৰ ইতরা পন লোকিযাপি সিযা. তেনাহ – ‘‘পঞ্ঞা মে যুগনঙ্গল’’ন্তি.

হিরীযতি ¶ এতায পুগ্গলো, সযং ৰা হিরীযতি অকুসলপ্পৰত্তিং জিগুচ্ছতীতি হিরী. তগ্গহণেন সহচরণভাৰতো ওত্তপ্পং গহিতংযেৰ হোতি. ঈসাতি যুগনঙ্গলসন্ধারিকা দারুযট্ঠি. যথা হি ব্রাহ্মণস্স ঈসা যুগনঙ্গলং সন্ধারেতি, এৰং ভগৰতোপি হিরী লোকিযলোকুত্তরপঞ্ঞাসঙ্খাতং যুগনঙ্গলং সন্ধারেতি হিরিযা অসতি পঞ্ঞায অভাৰতো. যথা চ ঈসাপটিবদ্ধং যুগনঙ্গলং কিচ্চকরং হোতি অচলং অসিথিলং, এৰং হিরিপটিবদ্ধা চ পঞ্ঞা কিচ্চকারী হোতি অচলা অসিথিলা অব্বোকিণ্ণা অহিরিকেন. তেনাহ ‘‘হিরী ঈসা’’তি.

মুনাতীতি মনো, চিত্তস্সেতং অধিৰচনং. ইধ পন মনোসীসেন ¶ তংসম্পযুত্তো সমাধি অধিপ্পেতো. যোত্তন্তি রজ্জুবন্ধনং. তং তিৰিধং ঈসায সহ যুগস্স বন্ধনং, যুগেন সহ বলিবদ্দানং বন্ধনং, সারথিনা সহ বলিবদ্দানং বন্ধনন্তি. তত্থ যথা ব্রাহ্মণস্স যোত্তং ঈসাযুগবলিবদ্দে একাবদ্ধে কত্ৰা সককিচ্চে পটিপাদেতি, এৰং ভগৰতো সমাধি সব্বেৰ তে হিরিপঞ্ঞাৰীরিযধম্মে একারম্মণে অৰিক্খেপভাৰেন বন্ধিত্ৰা সককিচ্চে পটিপাদেতি. তেনাহ – ‘‘মনো যোত্ত’’ন্তি.

সরতি এতায চিরকতাদিমত্থং পুগ্গলো, সযং ৰা সরতীতি সতি, সা অসম্মুস্সনলক্খণা. ফালেতীতি ফালো. পাজেতি এতেনাতি পাজনং. তং ইধ ‘‘পাচন’’ন্তি ৰুচ্চতি, পতোদস্সেতং অধিৰচনং. ফালো চ পাচনঞ্চ ফালপাচনং. যথা হি ব্রাহ্মণস্স ফালপাচনং, এৰং ভগৰতো ৰিপস্সনাযুত্তা মগ্গযুত্তা চ সতি. তত্থ যথা ফালো নঙ্গলমনুরক্খতি, পুরতো চস্স গচ্ছতি, এৰং সতি কুসলানং ধম্মানং গতিযো সমন্ৰেসমানা আরম্মণে ৰা উপট্ঠাপযমানা পঞ্ঞানঙ্গলং রক্খতি, তথা হি ‘‘সতারক্খেন ¶ চেতসা ৰিহরতী’’তিআদীসু (অ. নি. ১০.২০) ‘‘আরক্খা’’তি ৰুত্তা. অসম্মুস্সনৰসেন চস্স পুরতো হোতি. সতিপরিচিতে হি ধম্মে পঞ্ঞা পজানাতি, নো সম্মুট্ঠে. যথা চ পাচনং বলিবদ্দানং ৰিজ্ঝনভযং দস্সেন্তং সংসীদনং ন দেতি, উপ্পথগমনঞ্চ ৰারেতি, এৰং সতি ৰীরিযবলিবদ্দানং অপাযভযং দস্সেন্তী কোসজ্জসংসীদনং ন দেতি, কামগুণসঙ্খাতে অগোচরে চারং নিৰারেত্ৰা কম্মট্ঠানে নিযোজেন্তী উপ্পথগমনঞ্চ ৰারেতি. তেনাহ – ‘‘সতি মে ফালপাচন’’ন্তি.

৭৮. কাযগুত্তোতি তিৰিধেন কাযসুচরিতেন গুত্তো. ৰচীগুত্তোতি চতুব্বিধেন ৰচীসুচরিতেন গুত্তো. এত্তাৰতা পাতিমোক্খসংৰরসীলং ৰুত্তং. আহারে উদরে যতোতি এত্থ আহারমুখেন সব্বপচ্চযানং সঙ্গহিতত্তা চতুব্বিধেপি পচ্চযে ¶ যতো সংযতো নিরুপক্কিলেসোতি অত্থো. ইমিনা আজীৰপারিসুদ্ধিসীলং ৰুত্তং. উদরে যতোতি উদরে যতো সংযতো মিতভোজী, আহারে ¶ মত্তঞ্ঞূতি ৰুত্তং হোতি. ইমিনা ভোজনে মত্তঞ্ঞুতামুখেন পচ্চযপটিসেৰনসীলং ৰুত্তং. তেন কিং দীপেতি? যথা ত্ৰং, ব্রাহ্মণ, বীজং ৰপিত্ৰা সস্সপরিপালনত্থং কণ্টকৰতিং ৰা রুক্খৰতিং ৰা পাকারপরিক্খেপং ৰা করোসি, তেন তে গোমহিংসমিগগণা পৰেসং অলভন্তা সস্সং ন ৰিলুম্পন্তি, এৰমহম্পি সদ্ধাবীজং ৰপিত্ৰা নানপ্পকারকুসলসস্সপরিপালনত্থং কাযৰচীআহারগুত্তিমযং তিৰিধপরিক্খেপং করোমি. তেন মে রাগাদিঅকুসলধম্মগোমহিংসমিগগণা পৰেসং অলভন্তা নানপ্পকারকুসলসস্সং ন ৰিলুম্পন্তীতি.

সচ্চং করোমি নিদ্দানন্তি এত্থ দ্ৰীহি দ্ৰারেহি অৰিসংৰাদনং সচ্চং. নিদ্দানন্তি ছেদনং লুননং উপ্পাটনং, করণত্থে চেতং উপযোগৰচনং ৰেদিতব্বং. অযঞ্হি এত্থ অত্থো ‘‘সচ্চেন করোমি নিদ্দান’’ন্তি. কিং ৰুত্তং হোতি? যথা ত্ৰং বাহিরং কসিং কসিত্ৰা সস্সদূসকানং তিণানং হত্থেন ৰা অসিতেন ৰা নিদ্দানং করোসি; এৰমহম্পি অজ্ঝত্তিকং কসিং কসিত্ৰা কুসলসস্সদূসকানং ৰিসংৰাদনতিণানং সচ্চেন নিদ্দানং করোমি. ঞাণসচ্চং ৰা এত্থ সচ্চন্তি ৰেদিতব্বং, যং তং যথাভূতঞাণন্তি ৰুচ্চতি. তেন অত্তসঞ্ঞাদীনং তিণানং নিদ্দানং করোমীতি এৰং যোজেতব্বং. অথ ৰা নিদ্দানন্তি ছেদকং লাৰকং, উপ্পাটকন্তি অত্থো. এৰং সন্তে যথা ত্ৰং দাসং ৰা কম্মকরং ¶ ৰা নিদ্দানং করোসি, ‘‘নিদ্দেহি তিণানী’’তি তিণানং ছেদকং লাৰকং উপ্পাটকং করোসি; এৰমহং সচ্চং করোমীতি উপযোগৰচনেনেৰ ৰত্তুং যুজ্জতি. অথ ৰা সচ্চন্তি দিট্ঠিসচ্চং. তমহং নিদ্দানং করোমি, ছিন্দিতব্বং লুনিতব্বং উপ্পাটেতব্বং করোমীতি এৰম্পি উপযোগৰচনেনেৰ ৰত্তুং যুজ্জতি.

সোরচ্চং মে পমোচনন্তি এত্থ যং তং ‘‘কাযিকো অৰীতিক্কমো, ৰাচসিকো অৰীতিক্কমো’’তি, এৰং ¶ সীলমেৰ ‘‘সোরচ্চ’’ন্তি ৰুত্তং, ন তং ইধ অধিপ্পেতং, ৰুত্তমেৰ এতং ‘‘কাযগুত্তো’’তিআদিনা নযেন, অরহত্তফলং পন অধিপ্পেতং. তম্পি হি সুন্দরে নিব্বানে রতভাৰতো ‘‘সোরচ্চ’’ন্তি ৰুচ্চতি. পমোচনন্তি যোগ্গৰিস্সজ্জনং. কিং ৰুত্তং হোতি? যথা তৰ পমোচনং পুনপি সাযন্হে ৰা দুতিযদিৰসে ৰা অনাগতসংৰচ্ছরে ৰা যোজেতব্বতো অপ্পমোচনমেৰ হোতি, ন মম এৰং. ন হি মম অন্তরা মোচনং নাম অত্থি. অহঞ্হি দীপঙ্করদসবলকালতো পভুতি পঞ্ঞানঙ্গলে ৰীরিযবলিবদ্দে যোজেত্ৰা চত্তারি অসঙ্খ্যেয্যানি কপ্পসতসহস্সঞ্চ মহাকসিং কসন্তো তাৰ ন মুঞ্চিং, যাৰ ন সম্মাসম্বোধিং অভিসম্বুজ্ঝি. যদা চ মে সব্বং তং কালং খেপেত্ৰা বোধিরুক্খমূলে অপরাজিতপল্লঙ্কে নিসিন্নস্স সব্বগুণপরিৰারং অরহত্তফলং উদপাদি, তদা মযা তং সব্বুস্সুক্কপটিপ্পস্সদ্ধিপ্পত্তিযা ¶ পমুত্তং, ন দানি পুন যোজেতব্বং ভৰিস্সতীতি. এতমত্থং সন্ধাযাহ ভগৰা – ‘‘সোরচ্চং মে পমোচন’’ন্তি.

৭৯. ৰীরিযং মে ধুরধোরয্হন্তি এত্থ ৰীরিযন্তি ‘‘কাযিকো ৰা, চেতসিকো ৰা ৰীরিযারম্ভো’’তিআদিনা নযেন ৰুত্তপধানং. ধুরাযং ধোরয্হং ধুরধোরয্হং, ধুরং ৰহতীতি অত্থো. যথা হি ব্রাহ্মণস্স ধুরাযং ধোরয্হাকড্ঢিতং নঙ্গলং ভূমিঘনং ভিন্দতি, মূলসন্তানকানি চ পদালেতি, এৰং ভগৰতো ৰীরিযাকড্ঢিতং পঞ্ঞানঙ্গলং যথাৰুত্তং ঘনং ভিন্দতি, কিলেসসন্তানকানি চ পদালেতি. তেনাহ – ‘‘ৰীরিযং মে ধুরধোরয্হ’’ন্তি. অথ ৰা পুরিমধুরং ৰহন্তা ধুরা, মূলধুরং ৰহন্তা ধোরয্হা; ধুরা চ ধোরয্হা চ ধুরধোরয্হা. তত্থ যথা ব্রাহ্মণস্স একমেকস্মিং নঙ্গলে চতুবলিবদ্দপ্পভেদং ধুরধোরয্হং ৰহন্তং উপ্পন্নানুপ্পন্নতিণমূলঘাতং সস্সসম্পত্তিঞ্চ সাধেতি, এৰং ভগৰতো চতুসম্মপ্পধানৰীরিযপ্পভেদং ধুরধোরয্হং ৰহন্তং উপ্পন্নানুপ্পন্নাকুসলমূলঘাতং কুসলসম্পত্তিঞ্চ ¶ সাধেতি. তেনাহ – ‘‘ৰীরিযং মে ধুরধোরয্হ’’ন্তি.

যোগক্খেমাধিৰাহনন্তি ¶ এত্থ যোগেহি খেমত্তা ‘‘যোগক্খেম’’ন্তি নিব্বানং ৰুচ্চতি, তং অধিকত্ৰা ৰাহীযতি, অভিমুখং ৰা ৰাহীযতীতি অধিৰাহনং. যোগক্খেমস্স অধিৰাহনং যোগক্খেমাধিৰাহনং. তেন কিং দীপেতি? যথা তৰ ধুরধোরয্হং পুরত্থিমং দিসং পচ্ছিমাদীসু ৰা অঞ্ঞতরং অভিমুখং ৰাহীযতি, তথা মম ধুরধোরয্হং নিব্বানাভিমুখং ৰাহীযতি.

এৰং ৰাহিযমানঞ্চ গচ্ছতি অনিৰত্তন্তং. যথা তৰ নঙ্গলং ৰহন্তং ধুরধোরয্হং খেত্তকোটিং পত্ৰা পুন নিৰত্ততি, এৰং অনিৰত্তন্তং দীপঙ্করকালতো পভুতি গচ্ছতেৰ. যস্মা ৰা তেন তেন মগ্গেন পহীনা কিলেসা পুনপ্পুনং পহাতব্বা ন হোন্তি, যথা তৰ নঙ্গলেন ছিন্নানি তিণানি পুনপি অপরস্মিং সমযে ছিন্দিতব্বানি হোন্তি, তস্মাপি এতং পঠমমগ্গৰসেন দিট্ঠেকট্ঠে কিলেসে, দুতিযৰসেন ওল়ারিকে, ততিযৰসেন অনুসহগতে কিলেসে, চতুত্থৰসেন সব্বকিলেসে পজহন্তং গচ্ছতি অনিৰত্তন্তং. অথ ৰা গচ্ছতি অনিৰত্তন্তি নিৰত্তনরহিতং হুত্ৰা গচ্ছতীতি অত্থো. ন্তি তং ধুরধোরয্হং. এৰম্পেত্থ পদচ্ছেদো ৰেদিতব্বো. এৰং গচ্ছন্তঞ্চ যথা তৰ ধুরধোরয্হং ন তং ঠানং গচ্ছতি, যত্থ গন্ত্ৰা কস্সকো অসোকো নিস্সোকো ৰিরজো হুত্ৰা ন সোচতি, এতং পন তং ঠানং গচ্ছতি, যত্থ গন্ত্ৰা ন সোচতি. যত্থ সতিপাচনেন এতং ৰীরিযধুরধোরয্হং চোদেন্তো গন্ত্ৰা মাদিসো কস্সকো অসোকো নিস্সোকো ৰিরজো হুত্ৰা ন সোচতি, তং সব্বসোকসল্লসমুগ্ঘাতভূতং নিব্বানামতসঙ্খাতং ঠানং গচ্ছতীতি.

৮০. ইদানি ¶ নিগমনং করোন্তো ভগৰা ইমং গাথমাহ –

‘‘এৰমেসা কসী কট্ঠা, সা হোতি অমতপ্ফলা;

এতং কসিং কসিত্ৰান, সব্বদুক্খা পমুচ্চতী’’তি.

তস্সাযং সঙ্খেপত্থো – মযা ব্রাহ্মণ এসা সদ্ধাবীজা তপোৰুট্ঠিযা অনুগ্গহিতা কসি, পঞ্ঞামযং যুগনঙ্গলং, হিরিমযঞ্চ ঈসং, মনোমযেন যোত্তেন, একাবদ্ধং ¶ কত্ৰা, পঞ্ঞানঙ্গলে সতিফালং আকোটেত্ৰা, সতিপাচনং গহেত্ৰা, কাযৰচীআহারগুত্তিযা গোপেত্ৰা, সচ্চং নিদ্দানং কত্ৰা, সোরচ্চং পমোচনং ৰীরিযং ধুরধোরয্হং যোগক্খেমাভিমুখং অনিৰত্তন্তং ৰাহেন্তেন কট্ঠা, কসিকম্মপরিযোসানং চতুব্বিধং সামঞ্ঞফলং পাপিতা, সা ¶ হোতি অমতপ্ফলা, সা এসা কসি অমতপ্ফলা হোতি. অমতং ৰুচ্চতি নিব্বানং, নিব্বানানিসংসা হোতীতি অত্থো. সা খো পনেসা কসি ন মমেৰেকস্স অমতপ্ফলা হোতি, অপিচ, খো, পন যো কোচি খত্তিযো ৰা ব্রাহ্মণো ৰা ৰেস্সো ৰা সুদ্দো ৰা গহট্ঠো ৰা পব্বজিতো ৰা এতং কসিং কসতি, সো সব্বোপি এতং কসিং কসিত্ৰান, সব্বদুক্খা পমুচ্চতি, সব্বস্মা ৰট্টদুক্খদুক্খদুক্খসঙ্খারদুক্খৰিপরিণামদুক্খা পমুচ্চতীতি. এৰং ভগৰা ব্রাহ্মণস্স অরহত্তনিকূটেন নিব্বানপরিযোসানং কত্ৰা দেসনং নিট্ঠাপেসি.

ততো ব্রাহ্মণো গম্ভীরত্থং দেসনং সুত্ৰা ‘‘মম কসিফলং ভুঞ্জিত্ৰা অপরজ্জু এৰ ছাতো হোতি, ইমস্স পন কসি অমতপ্ফলা, তস্সা ফলং ভুঞ্জিত্ৰা সব্বদুক্খা পমুচ্চতী’’তি চ ৰিদিত্ৰা পসন্নো পসন্নাকারং কাতুং পাযাসং দাতুমারদ্ধো. তেনাহ ‘‘অথ খো কসিভারদ্ৰাজো’’তি. তত্থ মহতিযাতি মহতিযন্তি অত্থো. কংসপাতিযাতি সুৰণ্ণপাতিযং, সতসহস্সগ্ঘনকে অত্তনো সুৰণ্ণথালে. ৰড্ঢেত্ৰাতি ছুপিত্ৰা, আকিরিত্ৰাতি ৰুত্তং হোতি. ভগৰতো উপনামেসীতি সপ্পিমধুফাণিতাদীহি ৰিচিত্রং কত্ৰা, দুকূলৰিতানেন পটিচ্ছাদেত্ৰা, উক্খিপিত্ৰা, সক্কচ্চং তথাগতস্স অভিহরি. কিন্তি? ‘‘ভুঞ্জতু ভৰং গোতমো পাযাসং, কস্সকো ভৰ’’ন্তি. ততো কস্সকভাৰসাধকং কারণমাহ ‘‘যঞ্হি…পে… কসতী’’তি, যস্মা ভৰং…পে… কসতীতি ৰুত্তং হোতি. অথ ভগৰা ‘‘গাথাভিগীতং মে’’তি আহ.

৮১. তত্থ গাথাভিগীতন্তি গাথাহি অভিগীতং, গাথাযো ভাসিত্ৰা লদ্ধন্তি ৰুত্তং হোতি. মেতি মযা. অভোজনেয্যন্তি ভুঞ্জনারহং ন হোতি. সম্পস্সতন্তি সম্মা আজীৰসুদ্ধিং পস্সতং ¶ , সমন্তা ৰা পস্সতং সম্পস্সতং, বুদ্ধানন্তি ৰুত্তং হোতি. নেস ধম্মোতি ‘‘গাথাভিগীতং ভুঞ্জিতব্ব’’ন্তি ¶ এস ধম্মো এতং চারিত্তং ন হোতি, তস্মা গাথাভিগীতং পনুদন্তি বুদ্ধা পটিক্খিপন্তি ন ভুঞ্জন্তীতি. কিং পন ভগৰতা পাযাসত্থং গাথা অভিগীতা, যেন এৰমাহাতি? ন এতদত্থং অভিগীতা, অপিচ, খো, পন পাতো পট্ঠায খেত্তসমীপে ঠত্ৰা কটচ্ছুভিক্খম্পি অলভিত্ৰা পুন সকলবুদ্ধগুণে পকাসেত্ৰা লদ্ধং তদেতং নটনচ্চকাদীহি নচ্চিত্ৰা গাযিত্ৰা চ লদ্ধসদিসং হোতি, তেন ‘‘গাথাভিগীত’’ন্তি ৰুত্তং. তাদিসঞ্চ যস্মা ¶ বুদ্ধানং ন কপ্পতি, তস্মা ‘‘অভোজনেয্য’’ন্তি ৰুত্তং. অপ্পিচ্ছতানুরূপঞ্চেতং ন হোতি, তস্মাপি পচ্ছিমং জনতং অনুকম্পমানেন চ এৰং ৰুত্তং. যত্র চ নাম পরপ্পকাসিতেনাপি অত্তনো গুণেন উপ্পন্নং লাভং পটিক্খিপন্তি সেয্যথাপি অপ্পিচ্ছো ঘটিকারো কুম্ভকারো, তত্র কথং কোটিপ্পত্তায অপ্পিচ্ছতায সমন্নাগতো ভগৰা অত্তনাৰ অত্তনো গুণপ্পকাসনেন উপ্পন্নং লাভং সাদিযিস্সতি, যতো যুত্তমেৰ এতং ভগৰতো ৰত্তুন্তি.

এত্তাৰতা ‘‘অপ্পসন্নং অদাতুকামং ব্রাহ্মণং গাথাগাযনেন দাতুকামং কত্ৰা, সমণো গোতমো ভোজনং পটিগ্গহেসি, আমিসকারণা ইমস্স দেসনা’’তি ইমম্হা লোকাপৰাদা অত্তানং মোচেন্তো দেসনাপারিসুদ্ধিং দীপেত্ৰা, ইদানি আজীৰপারিসুদ্ধিং দীপেন্তো আহ ‘‘ধম্মে সতী ব্রাহ্মণ ৰুত্তিরেসা’’তি তস্সত্থো – আজীৰপারিসুদ্ধিধম্মে ৰা দসৰিধসুচরিতধম্মে ৰা বুদ্ধানং চারিত্তধম্মে ৰা সতি সংৰিজ্জমানে অনুপহতে ৰত্তমানে ৰুত্তিরেসা একন্তৰোদাতা আকাসে পাণিপ্পসারণকপ্পা এসনা পরিযেসনা জীৰিতৰুত্তি বুদ্ধানং ব্রাহ্মণাতি.

৮২. এৰং ৰুত্তে ব্রাহ্মণো ‘‘পাযাসং মে পটিক্খিপতি, অকপ্পিযং কিরেতং ভোজনং, অধঞ্ঞো ৰতস্মিং, দানং দাতুং ¶ ন লভামী’’তি দোমনস্সং উপ্পাদেত্ৰা ‘‘অপ্পেৰ নাম অঞ্ঞং পটিগ্গণ্হেয্যা’’তি চ চিন্তেসি. তং ঞত্ৰা ভগৰা ‘‘অহং ভিক্খাচারৰেলং পরিচ্ছিন্দিত্ৰা আগতো – ‘এত্তকেন কালেন ইমং ব্রাহ্মণং পসাদেস্সামী’তি, ব্রাহ্মণো চ দোমনস্সং অকাসি. ইদানি তেন দোমনস্সেন মযি চিত্তং পকোপেত্ৰা অমতৰরধম্মং পটিৰিজ্ঝিতুং ন সক্খিস্সতী’’তি ব্রাহ্মণস্স পসাদজননত্থং তেন পত্থিতমনোরথং পূরেন্তো আহ ‘‘অঞ্ঞেন চ কেৰলিন’’ন্তি. তত্থ কেৰলিনন্তি সব্বগুণপরিপুণ্ণং, সব্বযোগৰিসংযুত্তং ৰাতি অত্থো. মহন্তানং সীলক্খন্ধাদীনং গুণানং এসনতো মহেসিং. পরিক্খীণসব্বাসৰত্তা খীণাসৰং. হত্থপাদকুক্কুচ্চমাদিং কত্ৰা ৰূপসন্তসব্বকুক্কুচ্চত্তা কুক্কুচ্চৰূপসন্তং. উপট্ঠহস্সূতি পরিৰিসস্সু পটিমানযস্সু. এৰং ব্রাহ্মণেন চিত্তে উপ্পাদিতেপি পরিযাযমেৰ ভণতি, ন তু ভণতি ‘‘দেহি, আহরাহী’’তি. সেসমেত্থ উত্তানমেৰ.

অথ ¶ ¶ ব্রাহ্মণো ‘‘অযং পাযাসো ভগৰতো আনীতো নাহং অরহামি তং অত্তনো ছন্দেন কস্সচি দাতু’’ন্তি চিন্তেত্ৰা আহ ‘‘অথ কস্স চাহ’’ন্তি. ততো ভগৰা ‘‘তং পাযাসং ঠপেত্ৰা তথাগতং তথাগতসাৰকঞ্চ অঞ্ঞস্স অজীরণধম্মো’’তি ঞত্ৰা আহ – ‘‘ন খ্ৰাহং ত’’ন্তি. তত্থ সদেৰকৰচনেন পঞ্চকামাৰচরদেৰগ্গহণং, সমারকৰচনেন ছট্ঠকামাৰচরদেৰগ্গহণং, সব্রহ্মকৰচনেন রূপাৰচরব্রহ্মগ্গহণং অরূপাৰচরা পন ভুঞ্জেয্যুন্তি অসম্ভাৰনেয্যা. সস্সমণব্রাহ্মণিৰচনেন সাসনপচ্চত্থিকপচ্চামিত্তসমণব্রাহ্মণগ্গহণং সমিতপাপবাহিতপাপসমণব্রাহ্মণগ্গহণঞ্চ. পজাৰচনেন সত্তলোকগ্গহণং, সদেৰমনুস্সৰচনেন সম্মুতিদেৰঅৰসেসমনুস্সগ্গহণং. এৰমেত্থ তীহি ৰচনেহি ওকাসলোকো, দ্ৰীহি পজাৰসেন সত্তলোকো গহিতোতি ৰেদিতব্বো. এস সঙ্খেপো, ৰিত্থারং পন আল়ৰকসুত্তে ¶ ৰণ্ণযিস্সাম.

কস্মা পন সদেৰকাদীসু কস্সচি ন সম্মা পরিণামং গচ্ছেয্যাতি? ওল়ারিকে সুখুমোজাপক্খিপনতো. ইমস্মিঞ্হি পাযাসে ভগৰন্তং উদ্দিস্স গহিতমত্তেযেৰ দেৰতাহি ওজা পক্খিত্তা যথা সুজাতায পাযাসে, চুন্দস্স চ সূকরমদ্দৰে পচ্চমানে, ৰেরঞ্জাযঞ্চ ভগৰতা গহিতগহিতালোপে, ভেসজ্জক্খন্ধকে চ কচ্চানস্স গুল়্হকুম্ভস্মিং অৰসিট্ঠগুল়্হে. সো ওল়ারিকে সুখুমোজাপক্খিপনতো দেৰানং ন পরিণমতি. দেৰা হি সুখুমসরীরা, তেসং ওল়ারিকো মনুস্সাহারো ন সম্মা পরিণমতি. মনুস্সানম্পি ন পরিণমতি. মনুস্সা হি ওল়ারিকসরীরা, তেসং সুখুমা দিব্বোজা ন সম্মা পরিণমতি. তথাগতস্স পন পকতিঅগ্গিনাৰ পরিণমতি, সম্মা জীরতি. কাযবলঞাণবলপ্পভাৰেনাতি একে তথাগতসাৰকস্স খীণাসৰস্সেতং সমাধিবলেন মত্তঞ্ঞুতায চ পরিণমতি, ইতরেসং ইদ্ধিমন্তানম্পি ন পরিণমতি. অচিন্তনীযং ৰা এত্থ কারণং, বুদ্ধৰিসযো এসোতি.

তেন হি ত্ৰন্তি যস্মা অঞ্ঞং ন পস্সামি, মম ন কপ্পতি, মম অকপ্পন্তং সাৰকস্সাপি মে ন কপ্পতি, তস্মা ত্ৰং ব্রাহ্মণাতি ৰুত্তং হোতি. অপ্পহরিতেতি পরিত্তহরিততিণে, অপ্পরুল়্হরিততিণে ৰা পাসাণপিট্ঠিসদিসে. অপ্পাণকেতি নিপ্পাণকে, পাযাসজ্ঝোত্থরণকারণেন মরিতব্বপাণরহিতে ৰা মহাউদকক্খন্ধে. সহ তিণনিস্সিতেহি পাণেহি তিণানং পাণকানঞ্চ অনুরক্খণত্থায এতং ৰুত্তং. চিচ্চিটাযতি চিটিচিটাযতীতি ¶ এৰং সদ্দং করোতি. সংধূপাযতীতি সমন্তা ধূপাযতি. সম্পধূপাযতীতি তথেৰ অধিমত্তং ধূপাযতি. কস্মা এৰং অহোসীতি? ভগৰতো আনুভাৰেন, ন উদকস্স, ন পাযাসস্স, ন ব্রাহ্মণস্স, ন অঞ্ঞেসং দেৰযক্খাদীনং. ভগৰা হি ব্রাহ্মণস্স ধম্মসংৰেগত্থং তথা অধিট্ঠাসি. সেয্যথাপি নামাতি ওপম্মনিদস্সনমত্তমেতং, যথা ফালোতি এত্তকমেৰ ¶ ৰুত্তং হোতি. সংৰিগ্গো চিত্তেন, লোমহট্ঠজাতো ¶ সরীরেন. সরীরে কিরস্স নৰনৰুতিলোমকূপসহস্সানি সুৰণ্ণভিত্তিযা আহতমণিনাগদন্তা ৰিয উদ্ধগ্গা অহেসুং. সেসং পাকটমেৰ.

পাদেসু পন নিপতিত্ৰা ভগৰতো ধম্মদেসনং অব্ভনুমোদমানো ভগৰন্তং এতদৰোচ ‘‘অভিক্কন্তং, ভো গোতম, অভিক্কন্তং, ভো গোতমা’’তি. অব্ভনুমোদনে হি অযমিধ অভিক্কন্ত সদ্দো. ৰিত্থারতো পনস্স মঙ্গলসুত্তৰণ্ণনাযং অত্থৰণ্ণনা আৰি ভৰিস্সতি. যস্মা চ অব্ভনুমোদনত্থে, তস্মা সাধু সাধু ভো গোতমাতি ৰুত্তং হোতীতি ৰেদিতব্বং.

‘‘ভযে কোধে পসংসাযং, তুরিতে কোতূহলচ্ছরে;

হাসে সোকে পসাদে চ, করে আমেডিতং বুধো’’তি. –

ইমিনা চ লক্খণেন ইধ পসাদৰসেন পসংসাৰসেন চাযং দ্ৰিক্খত্তুং ৰুত্তোতি ৰেদিতব্বো. অথ ৰা অভিক্কন্তন্তি অভিকন্তং অতিইট্ঠং, অতিমনাপং, অতিসুন্দরন্তি ৰুত্তং হোতি.

তত্থ একেন অভিক্কন্তসদ্দেন দেসনং থোমেতি, একেন অত্তনো পসাদং. অযঞ্হি এত্থ অধিপ্পাযো – অভিক্কন্তং, ভো গোতম, যদিদং ভোতো গোতমস্স ধম্মদেসনা, অভিক্কন্তং যদিদং ভোতো গোতমস্স ধম্মদেসনং আগম্ম মম পসাদোতি. ভগৰতো এৰ ৰা ৰচনং দ্ৰে দ্ৰে অত্থে সন্ধায থোমেতি – ভোতো গোতমস্স ৰচনং অভিক্কন্তং দোসনাসনতো, অভিক্কন্তং গুণাধিগমনতো, তথা সদ্ধাজননতো, পঞ্ঞাজননতো, সাত্থতো, সব্যঞ্জনতো, উত্তানপদতো, গম্ভীরত্থতো, কণ্ণসুখতো, হদযঙ্গমতো, অনত্তুক্কংসনতো, অপরৰম্ভনতো, করুণাসীতলতো, পঞ্ঞাৰদাততো, আপাথরমণীযতো, ৰিমদ্দক্খমতো, সুয্যমানসুখতো, ৰীমংসিযমানহিততোতি এৰমাদীহি যোজেতব্বং.

ততো ¶ পরম্পি চতূহি উপমাহি দেসনংযেৰ থোমেতি. তত্থ নিক্কুজ্জিতন্তি অধোমুখট্ঠপিতং, হেট্ঠা মুখজাতং ৰা. উক্কুজ্জেয্যাতি উপরিমুখং করেয্য. পটিচ্ছন্নন্তি তিণপণ্ণাদিচ্ছাদিতং. ৰিৰরেয্যাতি উগ্ঘাটেয্য. মূল়্হস্সাতি দিসামূল়্হস্স. মগ্গং আচিক্খেয্যাতি হত্থে গহেত্ৰা ¶ ‘‘এস মগ্গো’’তি ৰদেয্য. অন্ধকারেতি কাল়পক্খচাতুদ্দসীঅড্ঢরত্তঘনৰনসণ্ডমেঘপটলেহি চতুরঙ্গে তমসি. অযং তাৰ পদত্থো.

অযং পন অধিপ্পাযযোজনা – যথা কোচি নিক্কুজ্জিতং উক্কুজ্জেয্য, এৰং সদ্ধম্মৰিমুখং ¶ অসদ্ধম্মপতিতং মং অসদ্ধম্মা ৰুট্ঠাপেন্তেন, যথা পটিচ্ছন্নং ৰিৰরেয্য; এৰং কস্সপস্স ভগৰতো সাসনন্তরধানা পভুতি মিচ্ছাদিট্ঠিগহনপটিচ্ছন্নং সাসনং ৰিৰরন্তেন, যথা মূল়্হস্স মগ্গং আচিক্খেয্য, এৰং কুম্মগ্গমিচ্ছামগ্গপটিপন্নস্স মে সগ্গমোক্খমগ্গং আচিক্খন্তেন, যথা অন্ধকারে তেলপজ্জোতং ধারেয্য, এৰং মোহন্ধকারনিমুগ্গস্স মে বুদ্ধাদিরতনরূপানি অপস্সতো তপ্পটিচ্ছাদকমোহন্ধকারৰিদ্ধংসকদেসনাপজ্জোতধারণেন ময্হং ভোতা গোতমেন এতেহি পরিযাযেহি দেসিতত্তা অনেকপরিযাযেন ধম্মো পকাসিতো.

অথ ৰা একচ্চিযেন মত্তেন যস্মা অযং ধম্মো দুক্খদস্সনেন অসুভে ‘‘সুভ’’ন্তি ৰিপল্লাসপ্পহানেন চ নিক্কুজ্জিতুক্কুজ্জিতসদিসো, সমুদযদস্সনেন দুক্খে ‘‘সুখ’’ন্তি ৰিপল্লাসপ্পহানেন চ পটিচ্ছন্নৰিৰরণসদিসো, নিরোধদস্সনেন অনিচ্চে ‘‘নিচ্চ’’ন্তি ৰিপল্লাসপ্পহানেন চ মূল়্হস্স মগ্গাচিক্খণসদিসো, মগ্গদস্সনেন অনত্তনি ‘‘অত্তা’’তি ৰিপল্লাসপ্পহানেন চ অন্ধকারে পজ্জোতসদিসো, তস্মা সেয্যথাপি নাম নিক্কুজ্জিতং ৰা উক্কুজ্জেয্য…পে… পজ্জোতং ধারেয্য ‘‘চক্খুমন্তো রূপানি দক্খন্তী’’তি, এৰং পকাসিতো হোতি.

যস্মা পনেত্থ সদ্ধাতপকাযগুত্ততাদীহি সীলক্খন্ধো পকাসিতো হোতি, পঞ্ঞায পঞ্ঞাক্খন্ধো, হিরিমনাদীহি সমাধিক্খন্ধো, যোগক্খেমেন নিরোধোতি এৰং তিক্খন্ধো অরিযমগ্গো নিরোধো চাতি সরূপেনেৰ দ্ৰে অরিযসচ্চানি পকাসিতানি. তত্থ মগ্গো পটিপক্খো সমুদযস্স, নিরোধো দুক্খস্সাতি পটিপক্খেন দ্ৰে. ইতি ইমিনা পরিযাযেন চত্তারি সচ্চানি পকাসিতানি. তস্মা অনেকপরিযাযেন পকাসিতো হোতীতি ৰেদিতব্বো ¶ .

এসাহন্তিআদীসু ¶ এসো অহন্তি এসাহং. সরণং গচ্ছামীতি পাদেসু নিপতিত্ৰা পণিপাতেন সরণগমনেন গতোপি ইদানি ৰাচায সমাদিযন্তো আহ. অথ ৰা পণিপাতেন বুদ্ধংযেৰ সরণং গতোতি ইদানি তং আদিং কত্ৰা সেসে ধম্মসঙ্ঘেপি গন্তুং আহ. অজ্জতগ্গেতি অজ্জতং আদিং কত্ৰা, অজ্জদগ্গেতি ৰা পাঠো, দ-কারো পদসন্ধিকরো, অজ্জ অগ্গং কত্ৰাতি ৰুত্তং হোতি. পাণেহি উপেতং পাণুপেতং, যাৰ মে জীৰিতং পৰত্ততি, তাৰ উপেতং, অনঞ্ঞসত্থুকং তীহি সরণগমনেহি সরণং গতং মং ভৰং গোতমো ধারেতু জানাতূতি ৰুত্তং হোতি. এত্তাৰতা অনেন সুতানুরূপা পটিপত্তি দস্সিতা হোতি. নিক্কুজ্জিতাদীহি ৰা সত্থুসম্পত্তিং দস্সেত্ৰা ইমিনা ‘‘এসাহ’’ন্তিআদিনা সিস্সসম্পত্তি দস্সিতা. তেন ৰা পঞ্ঞাপটিলাভং দস্সেত্ৰা ইমিনা সদ্ধাপটিলাভো দস্সিতো. ইদানি এৰং পটিলদ্ধসদ্ধেন পঞ্ঞৰতা যং ¶ কত্তব্বং, তং কত্তুকামো ভগৰন্তং যাচতি ‘‘লভেয্যাহ’’ন্তি. তত্থ ভগৰতো ইদ্ধিযাদীহি অভিপ্পসাদিতচিত্তো ‘‘ভগৰাপি চক্কৰত্তিরজ্জং পহায পব্বজিতো, কিমঙ্গং পনাহ’’ন্তি সদ্ধায পব্বজ্জং যাচতি, তত্থ পরিপূরকারিতং পত্থেন্তো পঞ্ঞায উপসম্পদং. সেসং পাকটমেৰ.

একো ৰূপকট্ঠোতিআদীসু পন একো কাযৰিৰেকেন, ৰূপকট্ঠো চিত্তৰিৰেকেন, অপ্পমত্তো কম্মট্ঠানে সতিঅৰিজহনেন, আতাপী কাযিকচেতসিকৰীরিযসঙ্খাতেন আতাপেন, পহিতত্তো কাযে চ জীৰিতে চ অনপেক্খতায ৰিহরন্তো অঞ্ঞতরইরিযাপথৰিহারেন. ন চিরস্সেৰাতি পব্বজ্জং উপাদায ৰুচ্চতি. কুলপুত্তাতি দুৰিধা কুলপুত্তা, জাতিকুলপুত্তা, আচারকুলপুত্তা চ. অযং পন উভযথাপি কুলপুত্তো. অগারস্মাতি ঘরা. অগারানং হিতং অগারিযং কসিগোরক্খাদিকুটুম্বপোসনকম্মং ৰুচ্চতি. নত্থি এত্থ অগারিযন্তি অনগারিযং, পব্বজ্জাযেতং অধিৰচনং পব্বজন্তীতি উপগচ্ছন্তি উপসঙ্কমন্তি. তদনুত্তরন্তি তং অনুত্তরং. ব্রহ্মচরিযপরিযোসানন্তি মগ্গব্রহ্মচরিযস্স পরিযোসানং, অরহত্তফলন্তি ¶ ৰুত্তং হোতি. তস্স হি অত্থায কুলপুত্তা পব্বজন্তি. দিট্ঠেৰ ধম্মেতি তস্মিংযেৰ অত্তভাৰে. সযং অভিঞ্ঞা সচ্ছিকত্ৰাতি অত্তনাযেৰ পঞ্ঞায পচ্চক্খং কত্ৰা, অপরপ্পচ্চযং ঞত্ৰাতি অত্থো. উপসম্পজ্জ ৰিহাসীতি পাপুণিত্ৰা সম্পাদেত্ৰা ৰা ৰিহাসি. এৰং ৰিহরন্তো চ খীণা জাতি…পে… অব্ভঞ্ঞাসি. এতেনস্স পচ্চৰেক্খণভূমিং দস্সেতি.

কতমা ¶ পনস্স জাতি খীণা, কথঞ্চ নং অব্ভঞ্ঞাসীতি? ৰুচ্চতে – ন তাৰস্স অতীতা জাতি খীণা পুব্বেৰ খীণত্তা, ন অনাগতা অনাগতে ৰাযামাভাৰতো, ন পচ্চুপ্পন্না ৰিজ্জমানত্তা. যা পন মগ্গস্স অভাৰিতত্তা উপ্পজ্জেয্য একচতুপঞ্চৰোকারভৰেসু একচতুপঞ্চক্খন্ধপ্পভেদা জাতি, সা মগ্গস্স ভাৰিতত্তা অনুপ্পাদধম্মতং আপজ্জনেন খীণা. তং সো মগ্গভাৰনায পহীনকিলেসে পচ্চৰেক্খিত্ৰা কিলেসাভাৰে ৰিজ্জমানম্পি কম্মং আযতিং অপটিসন্ধিকং হোতীতি জানন্তো জানাতি.

ৰুসিতন্তি ৰুত্থং পরিৰুত্থং, কতং চরিতং নিট্ঠাপিতন্তি অত্থো. ব্রহ্মচরিযন্তি মগ্গব্রহ্মচরিযং. কতং করণীযন্তি চতূসু সচ্চেসু চতূহি মগ্গেহি পরিঞ্ঞাপহানসচ্ছিকিরিযভাৰনাৰসেন সোল়সৰিধম্পি কিচ্চং নিট্ঠাপিতন্তি অত্থো. নাপরং ইত্থত্তাযাতি ইদানি পুন ইত্থভাৰায এৰং সোল়সকিচ্চভাৰায কিলেসক্খযায ৰা মগ্গভাৰনা নত্থীতি. অথ ৰা ইত্থত্তাযাতি ইত্থভাৰতো, ইমস্মা এৰংপকারা ইদানি ৰত্তমানক্খন্ধসন্তানা অপরং খন্ধসন্তানং নত্থি. ইমে পন পঞ্চক্খন্ধা পরিঞ্ঞাতা তিট্ঠন্তি ছিন্নমূলকো রুক্খো ৰিযাতি অব্ভঞ্ঞাসি. অঞ্ঞতরোতি ¶ একো. অরহতন্তি অরহন্তানং. মহাসাৰকানং অব্ভন্তরো আযস্মা ভারদ্ৰাজো অহোসীতি অযং কিরেত্থ অধিপ্পাযোতি.

পরমত্থজোতিকায খুদ্দক-অট্ঠকথায

সুত্তনিপাত-অট্ঠকথায কসিভারদ্ৰাজসুত্তৰণ্ণনা নিট্ঠিতা.

৫. চুন্দসুত্তৰণ্ণনা

৮৩. পুচ্ছামি ¶ ¶ মুনিং পহূতপঞ্ঞন্তি চুন্দসুত্তং. কা উপ্পত্তি? সঙ্খেপতো তাৰ অত্তজ্ঝাসযপরজ্ঝাসযঅট্ঠুপ্পত্তিপুচ্ছাৰসিকভেদতো চতূসু উপ্পত্তীসু ইমস্স সুত্তস্স পুচ্ছাৰসিকা উপ্পত্তি. ৰিত্থারতো পন একং সমযং ভগৰা মল্লেসু চারিকং চরমানো মহতা ভিক্খুসঙ্ঘেন সদ্ধিং যেন পাৰা তদৰসরি. তত্র সুদং ভগৰা পাৰাযং ৰিহরতি চুন্দস্স কম্মারপুত্তস্স অম্বৰনে. ইতো পভুতি যাৰ ‘‘অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায সদ্ধিং ভিক্খুসঙ্ঘেন যেন চুন্দস্স ¶ কম্মারপুত্তস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদী’’তি (দী. নি. ২.১৮৯), তাৰ সুত্তে আগতনযেনেৰ ৰিত্থারেতব্বং.

এৰং ভিক্খুসঙ্ঘেন সদ্ধিং নিসিন্নে ভগৰতি চুন্দো কম্মারপুত্তো বুদ্ধপ্পমুখং ভিক্খুসঙ্ঘং পরিৰিসন্তো ব্যঞ্জনসূপাদিগহণত্থং ভিক্খূনং সুৰণ্ণভাজনানি উপনামেসি. অপঞ্ঞত্তে সিক্খাপদে কেচি ভিক্খূ সুৰণ্ণভাজনানি পটিচ্ছিংসু কেচি ন পটিচ্ছিংসু. ভগৰতো পন একমেৰ ভাজনং অত্তনো সেলমযং পত্তং, দুতিযভাজনং বুদ্ধা ন গণ্হন্তি. তত্থ অঞ্ঞতরো পাপভিক্খু সহস্সগ্ঘনকং সুৰণ্ণভাজনং অত্তনো ভোজনত্থায সম্পত্তং থেয্যচিত্তেন কুঞ্চিকত্থৰিকায পক্খিপি. চুন্দো পরিৰিসিত্ৰা হত্থপাদং ধোৰিত্ৰা ভগৰন্তং নমস্সমানো ভিক্খুসঙ্ঘং ওলোকেন্তো তং ভিক্খুং অদ্দস, দিস্ৰা চ পন অপস্সমানো ৰিয হুত্ৰা ন নং কিঞ্চি অভণি ভগৰতি থেরেসু চ গারৰেন, অপিচ ‘‘মিচ্ছাদিট্ঠিকানং ৰচনপথো মা অহোসী’’তি. সো ‘‘কিং নু খো সংৰরযুত্তাযেৰ সমণা, উদাহু ভিন্নসংৰরা ঈদিসাপি সমণা’’তি ঞাতুকামো সাযন্হসমযে ভগৰন্তং উপসঙ্কমিত্ৰা আহ ‘‘পুচ্ছামি মুনি’’ন্তি.

তত্থ পুচ্ছামীতি ইদং ‘‘তিস্সো পুচ্ছা অদিট্ঠজোতনা পুচ্ছা’’তিআদিনা ¶ (চূল়নি. পুণ্ণকমাণৰপুচ্ছানিদ্দেস ১২) নযেন নিদ্দেসে ৰুত্তনযমেৰ. মুনিন্তি এতম্পি ‘‘মোনং ৰুচ্চতি ঞাণং. যা পঞ্ঞা পজাননা…পে… সম্মাদিট্ঠি, তেন ঞাণেন সমন্নাগতো মুনি, মোনপ্পত্তোতি, তীণি মোনেয্যানি কাযমোনেয্য’’ন্তিআদিনা (মহানি. ১৪) নযেন তত্থেৰ ৰুত্তনযমেৰ ¶ . অযম্পনেত্থ সঙ্খেপো. পুচ্ছামীতি ওকাসং কারেন্তো মুনিন্তি মুনিমুনিং ভগৰন্তং আলপতি. পহূতপঞ্ঞন্তিআদীনি থুতিৰচনানি, তেহি তং মুনিং থুনাতি. তত্থ পহূতপঞ্ঞন্তি ৰিপুলপঞ্ঞং. ঞেয্যপরিযন্তিকত্তা চস্স ৰিপুলতা ৰেদিতব্বা. ইতি চুন্দো কম্মারপুত্তোতি ইদং দ্ৰযং ধনিযসুত্তে ৰুত্তনযমেৰ. ইতো পরং পন এত্তকম্পি অৰত্ৰা সব্বং ৰুত্তনযং ছড্ডেত্ৰা অৰুত্তনযমেৰ ৰণ্ণযিস্সাম.

বুদ্ধন্তি তীসু বুদ্ধেসু ততিযবুদ্ধং. ধম্মস্সামিন্তি মগ্গধম্মস্স জনকত্তা পুত্তস্সেৰ পিতরং অত্তনা উপ্পাদিতসিপ্পাযতনাদীনং ৰিয চ আচরিযং ধম্মস্স সামিং, ধম্মিস্সরং ধম্মরাজং ধম্মৰসৰত্তিন্তি অত্থো. ৰুত্তম্পি চেতং –

‘‘সো ¶ হি, ব্রাহ্মণ, ভগৰা অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জনেতা, অনক্খাতস্স মগ্গস্স অক্খাতা, মগ্গঞ্ঞূ, মগ্গৰিদূ, মগ্গকোৰিদো. মগ্গানুগা চ পন এতরহি সাৰকা ৰিহরন্তি পচ্ছা সমন্নাগতা’’তি (ম. নি. ৩.৭৯).

ৰীততণ্হন্তি ৰিগতকামভৰৰিভৰতণ্হং. দ্ৰিপদুত্তমন্তি দ্ৰিপদানং উত্তমং. তত্থ কিঞ্চাপি ভগৰা ন কেৰলং দ্ৰিপদুত্তমো এৰ, অথ খো যাৰতা সত্তা অপদা ৰা দ্ৰিপদা ৰা…পে… নেৰসঞ্ঞীনাসঞ্ঞিনো ৰা, তেসং সব্বেসং উত্তমো. অথ খো উক্কট্ঠপরিচ্ছেদৰসেন দ্ৰিপদুত্তমোত্ৰেৰ ৰুচ্চতি. দ্ৰিপদা হি সব্বসত্তানং উক্কট্ঠা চক্কৰত্তিমহাসাৰকপচ্চেকবুদ্ধানং তত্থ উপ্পত্তিতো, তেসঞ্চ উত্তমোতি ৰুত্তে সব্বসত্তুত্তমোতি ¶ ৰুত্তোযেৰ হোতি. সারথীনং পৰরন্তি সারেতীতি সারথি, হত্থিদমকাদীনমেতং অধিৰচনং. তেসঞ্চ ভগৰা পৰরো অনুত্তরেন দমনেন পুরিসদম্মে দমেতুং সমত্থভাৰতো. যথাহ –

‘‘হত্থিদমকেন, ভিক্খৰে, হত্থিদম্মো সারিতো একং এৰ দিসং ধাৰতি পুরত্থিমং ৰা পচ্ছিমং ৰা উত্তরং ৰা দক্খিণং ৰা. অস্সদমকেন, ভিক্খৰে, অস্সদম্মো…পে… গোদমকেন, ভিক্খৰে, গোদম্মো…পে… দক্খিণং ৰা. তথাগতেন হি, ভিক্খৰে, অরহতা সম্মাসম্বুদ্ধেন পুরিসদম্মো সারিতো অট্ঠ দিসা ৰিধাৰতি, রূপী রূপানি পস্সতি, অযমেকা দিসা…পে… সঞ্ঞাৰেদযিতনিরোধং উপসম্পজ্জ ৰিহরতি, অযং অট্ঠমী দিসা’’তি (ম. নি. ৩.৩১২).

কতীতি ¶ অত্থপ্পভেদপুচ্ছা. লোকেতি সত্তলোকে. সমণাতি পুচ্ছিতব্বঅত্থনিদস্সনং. ইঙ্ঘাতি যাচনত্থে নিপাতো. তদিঙ্ঘাতি তে ইঙ্ঘ. ব্রূহীতি আচিক্খ কথযস্সূতি.

৮৪. এৰং ৰুত্তে ভগৰা চুন্দং কম্মারপুত্তং ‘‘কিং, ভন্তে, কুসলং, কিং অকুসল’’ন্তিআদিনা (ম. নি. ৩.২৯৬) নযেন গিহিপঞ্হং অপুচ্ছিত্ৰা সমণপঞ্হং পুচ্ছন্তং দিস্ৰা আৰজ্জেন্তো ‘‘তং পাপভিক্খুং সন্ধায অযং পুচ্ছতী’’তি ঞত্ৰা তস্স অঞ্ঞত্র ৰোহারমত্তা অস্সমণভাৰং দীপেন্তো আহ ‘‘চতুরো সমণা’’তি. তত্থ চতুরোতি সঙ্খ্যাপরিচ্ছেদো. সমণাতি কদাচি ¶ ভগৰা তিত্থিযে সমণৰাদেন ৰদতি; যথাহ – ‘‘যানি তানি পুথুসমণব্রাহ্মণানং ৰতকোতূহলমঙ্গলানী’’তি (ম. নি. ১.৪০৭). কদাচি পুথুজ্জনে; যথাহ – ‘‘সমণা সমণাতি খো, ভিক্খৰে, জনো সঞ্জানাতী’’তি (ম. নি. ১.৪৩৫). কদাচি সেক্খে; যথাহ – ‘‘ইধেৰ, ভিক্খৰে, সমণো, ইধ দুতিযো সমণো’’তি (ম. নি. ১.১৩৯; দী. নি. ২.২১৪; অ. নি. ৪.২৪১). কদাচি খীণাসৰে; যথাহ – ‘‘আসৰানং খযা সমণো হোতী’’তি (ম. নি. ১.৪৩৮). কদাচি অত্তানংযেৰ; যথাহ – ‘‘সমণোতি খো, ভিক্খৰে, তথাগতস্সেতং অধিৰচন’’ন্তি (অ. নি. ৮.৮৫). ইধ পন তীহি পদেহি সব্বেপি অরিযে সীলৰন্তং পুথুজ্জনঞ্চ ¶ , চতুত্থেন ইতরং অস্সমণম্পি ভণ্ডুং কাসাৰকণ্ঠং কেৰলং ৰোহারমত্তকেন সমণোতি সঙ্গণ্হিত্ৰা ‘‘চতুরো সমণা’’তি আহ. ন পঞ্চমত্থীতি ইমস্মিং ধম্মৰিনযে ৰোহারমত্তকেন পটিঞ্ঞামত্তকেনাপি পঞ্চমো সমণো নাম নত্থি.

তে তে আৰিকরোমীতি তে চতুরো সমণে তৰ পাকটে করোমি. সক্খিপুট্ঠোতি সম্মুখা পুচ্ছিতো. মগ্গজিনোতি মগ্গেন সব্বকিলেসে ৰিজিতাৰীতি অত্থো. মগ্গদেসকোতি পরেসং মগ্গং দেসেতা. মগ্গে জীৰতীতি সত্তসু সেক্খেসু যো কোচি সেক্খো অপরিযোসিতমগ্গৰাসত্তা লোকুত্তরে, সীলৰন্তপুথুজ্জনো চ লোকিযে মগ্গে জীৰতি নাম, সীলৰন্তপুথুজ্জনো ৰা লোকুত্তরমগ্গনিমিত্তং জীৰনতোপি মগ্গে জীৰতীতি ৰেদিতব্বো. যো চ মগ্গদূসীতি যো চ দুস্সীলো মিচ্ছাদিট্ঠি মগ্গপটিলোমায পটিপত্তিযা মগ্গদূসকোতি অত্থো.

৮৫. ‘‘ইমে তে চতুরো সমণা’’তি এৰং ভগৰতা সঙ্খেপেন উদ্দিট্ঠে চতুরো সমণে ‘‘অযং নামেত্থ মগ্গজিনো, অযং মগ্গদেসকো, অযং মগ্গে জীৰতি, অযং মগ্গদূসী’’তি এৰং পটিৰিজ্ঝিতুং অসক্কোন্তো পুন পুচ্ছিতুং চুন্দো আহ ‘‘কং মগ্গজিন’’ন্তি. তত্থ মগ্গে জীৰতি মেতি যো সো মগ্গে জীৰতি, তং মে ব্রূহি পুট্ঠোতি. সেসং পাকটমেৰ.

৮৬. ইদানিস্স ভগৰা ¶ চতুরোপি সমণে চতূহি গাথাহি নিদ্দিসন্তো আহ ‘‘যো তিণ্ণকথংকথো ৰিসল্লো’’তি. তত্থ তিণ্ণকথংকথো ৰিসল্লোতি এতং উরগসুত্তে ৰুত্তনযমেৰ. অযং পন ৰিসেসো. যস্মা ইমায গাথায মগ্গজিনোতি বুদ্ধসমণো অধিপ্পেতো, তস্মা সব্বঞ্ঞুতঞ্ঞাণেন ¶ কথংকথাপতিরূপকস্স সব্বধম্মেসু অঞ্ঞাণস্স তিণ্ণত্তাপি ‘‘তিণ্ণকথংকথো’’তি ৰেদিতব্বো. পুব্বে ৰুত্তনযেন হি তিণ্ণকথংকথাপি সোতাপন্নাদযো পচ্চেকবুদ্ধপরিযোসানা সকদাগামিৰিসযাদীসু বুদ্ধৰিসযপরিযোসানেসু পটিহতঞাণপ্পভাৰত্তা পরিযাযেন অতিণ্ণকথংকথাৰ ¶ হোন্তি. ভগৰা পন সব্বপ্পকারেন তিণ্ণকথংকথোতি. নিব্বানাভিরতোতি নিব্বানে অভিরতো, ফলসমাপত্তিৰসেন সদা নিব্বাননিন্নচিত্তোতি অত্থো. তাদিসো চ ভগৰা. যথাহ –

‘‘সো খো অহং, অগ্গিৰেস্সন, তস্সা এৰ কথায পরিযোসানে, তস্মিংযেৰ পুরিমস্মিং সমাধিনিমিত্তে অজ্ঝত্তমেৰ চিত্তং সণ্ঠপেমি, সন্নিসাদেমি, একোদিং করোমি, সমাদহামী’’তি (ম. নি. ১.৩৮৭).

অনানুগিদ্ধোতি কঞ্চি ধম্মং তণ্হাগেধেন অননুগিজ্ঝন্তো. লোকস্স সদেৰকস্স নেতাতি আসযানুসযানুলোমেন ধম্মং দেসেত্ৰা পারাযনমহাসমযাদীসু অনেকেসু সুত্তন্তেসু অপরিমাণানং দেৰমনুস্সানং সচ্চপটিৰেধসম্পাদনেন সদেৰকস্স লোকস্স নেতা, গমযিতা, তারেতা, পারং সম্পাপেতাতি অত্থো. তাদিন্তি তাদিসং যথাৰুত্তপ্পকারলোকধম্মেহি নিব্বিকারন্তি অত্থো. সেসমেত্থ পাকটমেৰ.

৮৭. এৰং ভগৰা ইমায গাথায ‘‘মগ্গজিন’’ন্তি বুদ্ধসমণং নিদ্দিসিত্ৰা ইদানি খীণাসৰসমণং নিদ্দিসন্তো আহ ‘‘পরমং পরমন্তী’’তি. তত্থ পরমং নাম নিব্বানং, সব্বধম্মানং অগ্গং উত্তমন্তি অত্থো. পরমন্তি যোধ ঞত্ৰাতি তং পরমং পরমমিচ্চেৰ যো ইধ সাসনে ঞত্ৰা পচ্চৰেক্খণঞাণেন. অক্খাতি ৰিভজতে ইধেৰ ধম্মন্তি নিব্বানধম্মং অক্খাতি, অত্তনা পটিৰিদ্ধত্তা পরেসং পাকটং করোতি ‘‘ইদং নিব্বান’’ন্তি, মগ্গধম্মং ৰিভজতি ‘‘ইমে চত্তারো সতিপট্ঠানা…পে… অরিযো অট্ঠঙ্গিকো মগ্গো’’তি. উভযম্পি ৰা উগ্ঘটিতঞ্ঞূনং সঙ্খেপদেসনায আচিক্খতি, ৰিপঞ্চিতঞ্ঞূনং ৰিত্থারদেসনায ৰিভজতি. এৰং আচিক্খন্তো ৰিভজন্তো চ ‘‘ইধেৰ সাসনে অযং ধম্মো, ন ইতো বহিদ্ধা’’তি সীহনাদং নদন্তো অক্খাতি চ ৰিভজতি চ. তেন ৰুত্তং ‘‘অক্খাতি ৰিভজতে ইধেৰ ধম্ম’’ন্তি. তং কঙ্খছিদং মুনিং অনেজন্তি তং এৰরূপং চতুসচ্চপটিৰেধেন ¶ অত্তনো, দেসনায চ পরেসং কঙ্খচ্ছেদনেন কঙ্খচ্ছিদং ¶ , মোনেয্যসমন্নাগমেন মুনিং, এজাসঙ্খাতায তণ্হায অভাৰতো অনেজং দুতিযং ভিক্খুনমাহু মগ্গদেসিন্তি.

৮৮. এৰং ¶ ইমায গাথায সযং অনুত্তরং মগ্গং উপ্পাদেত্ৰা দেসনায অনুত্তরো মগ্গদেসী সমানোপি দূতমিৰ লেখৰাচকমিৰ চ রঞ্ঞো অত্তনো সাসনহরং সাসনজোতকঞ্চ ‘‘মগ্গদেসি’’ন্তি খীণাসৰসমণং নিদ্দিসিত্ৰা ইদানি সেক্খসমণঞ্চ সীলৰন্তপুথুজ্জনসমণঞ্চ নিদ্দিসন্তো আহ ‘‘যো ধম্মপদে’’তি. তত্থ পদৰণ্ণনা পাকটাযেৰ. অযং পনেত্থ অত্থৰণ্ণনা – যো নিব্বানধম্মস্স পদত্তা ধম্মপদে, উভো অন্তে অনুপগম্ম দেসিতত্তা আসযানুরূপতো ৰা সতিপট্ঠানাদিনানপ্পকারেহি দেসিতত্তা সুদেসিতে, মগ্গসমঙ্গীপি অনৰসিতমগ্গকিচ্চত্তা মগ্গে জীৰতি, সীলসংযমেন সঞ্ঞতো, কাযাদীসু সূপট্ঠিতায চিরকতাদিসরণায ৰা সতিযা সতিমা, অণুমত্তস্সাপি ৰজ্জস্স অভাৰতো অনৰজ্জত্তা, কোট্ঠাসভাৰেন চ পদত্তা সত্ততিংসবোধিপক্খিযধম্মসঙ্খাতানি অনৰজ্জপদানি ভঙ্গঞাণতো পভুতি ভাৰনাসেৰনায সেৰমানো, তং ভিক্খুনং ততিযং মগ্গজীৰিন্তি আহূতি.

৮৯. এৰং ভগৰা ইমায গাথায ‘‘মগ্গজীৰি’’ন্তি সেক্খসমণং সীলৰন্তপুথুজ্জনসমণঞ্চ নিদ্দিসিত্ৰা ইদানি তং ভণ্ডুং কাসাৰকণ্ঠং কেৰলং ৰোহারমত্তসমণং নিদ্দিসন্তো আহ ‘‘ছদনং কত্ৰানা’’তি. তত্থ ছদনং কত্ৰানাতি পতিরূপং করিত্ৰা, ৰেসং গহেত্ৰা, লিঙ্গং ধারেত্ৰাতি অত্থো. সুব্বতানন্তি বুদ্ধপচ্চেকবুদ্ধসাৰকানং. তেসঞ্হি সুন্দরানি ৰতানি, তস্মা তে সুব্বতাতি ৰুচ্চন্তি. পক্খন্দীতি পক্খন্দকো, অন্তো পৰিসকোতি অত্থো. দুস্সীলো হি গূথপটিচ্ছাদনত্থং তিণপণ্ণাদিচ্ছদনং ৰিয অত্তনো দুস্সীলভাৰং পটিচ্ছাদনত্থং সুব্বতানং ছদনং ¶ কত্ৰা ‘‘অহম্পি ভিক্খূ’’তি ভিক্খুমজ্ঝে পক্খন্দতি, ‘‘এত্তকৰস্সেন ভিক্খুনা গহেতব্বং এত’’ন্তি লাভে দীযমানে ‘‘অহং এত্তকৰস্সো’’তি গণ্হিতুং পক্খন্দতি, তেন ৰুচ্চতি ‘‘ছদনং কত্ৰান সুব্বতানং পক্খন্দী’’তি. চতুন্নম্পি খত্তিযাদিকুলানং উপ্পন্নং পসাদং অননুরূপপটিপত্তিযা দূসেতীতি কুলদূসকো. পগব্ভোতি অট্ঠট্ঠানেন কাযপাগব্ভিযেন, চতুট্ঠানেন ৰচীপাগব্ভিযেন, অনেকট্ঠানেন মনোপাগব্ভিযেন চ সমন্নাগতোতি অত্থো. অযমেত্থ সঙ্খেপো, ৰিত্থারং পন মেত্তসুত্তৰণ্ণনাযং ৰক্খাম.

কতপটিচ্ছাদনলক্খণায ¶ মাযায সমন্নাগতত্তা মাযাৰী. সীলসংযমাভাৰেন অসঞ্ঞতো. পলাপসদিসত্তা পলাপো. যথা হি পলাপো অন্তো তণ্ডুলরহিতোপি বহি থুসেন ৰীহি ৰিয দিস্সতি, এৰমিধেকচ্চো অন্তো সীলাদিগুণসারৰিরহিতোপি বহি সুব্বতচ্ছদনেন সমণৰেসেন সমণো ৰিয দিস্সতি. সো এৰং পলাপসদিসত্তা ‘‘পলাপো’’তি ৰুচ্চতি. আনাপানস্সতিসুত্তে পন ‘‘অপলাপাযং, ভিক্খৰে, পরিসা, নিপ্পলাপাযং, ভিক্খৰে, পরিসা, সুদ্ধা সারে পতিট্ঠিতা’’তি (ম. নি. ৩.১৪৬) এৰং পুথুজ্জনকল্যাণোপি ‘‘পলাপো’’তি ৰুত্তো ¶ . ইধ পন কপিলসুত্তে চ ‘‘ততো পলাপে ৰাহেথ, অস্সমণে সমণমানিনে’’তি (সু. নি. ২৮৪) এৰং পরাজিতকো ‘‘পলাপো’’তি ৰুত্তো. পতিরূপেন চরং সমগ্গদূসীতি তং সুব্বতানং ছদনং কত্ৰা যথা চরন্তং ‘‘আরঞ্ঞিকো অযং রুক্খমূলিকো, পংসুকূলিকো, পিণ্ডপাতিকো, অপ্পিচ্ছো, সন্তুট্ঠো’’তি জনো জানাতি, এৰং পতিরূপেন যুত্তরূপেন বাহিরমট্ঠেন আচারেন চরন্তো পুগ্গলো অত্তনো লোকুত্তরমগ্গস্স, পরেসং সুগতিমগ্গস্স চ দূসনতো ‘‘মগ্গদূসী’’তি ৰেদিতব্বো.

৯০. এৰং ইমায গাথায ‘‘মগ্গদূসী’’তি দুস্সীলং ৰোহারমত্তকসমণং নিদ্দিসিত্ৰা ইদানি তেসং অঞ্ঞমঞ্ঞং অব্যামিস্সীভাৰং দীপেন্তো আহ ‘‘এতে চ পটিৰিজ্ঝী’’তি. তস্সত্থো – এতে চতুরো সমণে যথাৰুত্তেন ¶ লক্খণেন পটিৰিজ্ঝি অঞ্ঞাসি সচ্ছাকাসি যো গহট্ঠো খত্তিযো ৰা ব্রাহ্মণো ৰা অঞ্ঞো ৰা কোচি, ইমেসং চতুন্নং সমণানং লক্খণস্সৰনমত্তেন সুতৰা, তস্সেৰ লক্খণস্স অরিযানং সন্তিকে সুতত্তা অরিযসাৰকো, তেযেৰ সমণে ‘‘অযঞ্চ অযঞ্চ এৰংলক্খণো’’তি পজাননমত্তেন সপ্পঞ্ঞো, যাদিসো অযং পচ্ছা ৰুত্তো মগ্গদূসী, ইতরেপি সব্বে নেতাদিসাতি ঞত্ৰা ইতি দিস্ৰা এৰং পাপং করোন্তম্পি এতং পাপভিক্খুং দিস্ৰা. তত্থাযং যোজনা – এতে চ পটিৰিজ্ঝি যো গহট্ঠো সুতৰা অরিযসাৰকো সপ্পঞ্ঞো, তস্স তায পঞ্ঞায সব্বে ‘‘নেতাদিসা’’তি ঞত্ৰা ৰিহরতো ইতি দিস্ৰা ন হাপেতি সদ্ধা, এৰং পাপকম্মং করোন্তং পাপভিক্খুং দিস্ৰাপি ন হাপেতি, ন হাযতি, ন নস্সতি সদ্ধাতি.

এৰং ¶ ইমায গাথায তেসং অব্যামিস্সীভাৰং দীপেত্ৰা ইদানি ইতি দিস্ৰাপি ‘‘সব্বে নেতাদিসা’’তি জানন্তং অরিযসাৰকং পসংসন্তো আহ ‘‘কথঞ্হি দুট্ঠেনা’’তি. তস্স সম্বন্ধো – এতদেৰ চ যুত্তং সুতৰতো অরিযসাৰকস্স, যদিদং একচ্চং পাপং করোন্তং ইতি দিস্ৰাপি সব্বে ‘‘নেতাদিসা’’তি জাননং. কিং কারণা? কথঞ্হি দুট্ঠেন অসম্পদুট্ঠং, সুদ্ধং অসুদ্ধেন সমং করেয্যাতি? তস্সত্থো – কথঞ্হি সুতৰা অরিযসাৰকো সপ্পঞ্ঞো, সীলৰিপত্তিযা দুট্ঠেন মগ্গদূসিনা অদুট্ঠং ইতরং সমণত্তযং, সুদ্ধং সমণত্তযমেৰং অপরিসুদ্ধকাযসমাচারতাদীহি অসুদ্ধেন পচ্ছিমেন ৰোহারমত্তকসমণেন সমং করেয্য সদিসন্তি জানেয্যাতি. সুত্তপরিযোসানে উপাসকস্স মগ্গো ৰা ফলং ৰা ন কথিতং. কঙ্খামত্তমেৰ হি তস্স পহীনন্তি.

পরমত্থজোতিকায খুদ্দক-অট্ঠকথায

সুত্তনিপাত-অট্ঠকথায চুন্দসুত্তৰণ্ণনা নিট্ঠিতা.

৬. পরাভৰসুত্তৰণ্ণনা

এৰং ¶ মে সুতন্তি পরাভৰসুত্তং. কা উপ্পত্তি? মঙ্গলসুত্তং কির সুত্ৰা দেৰানং এতদহোসি – ‘‘ভগৰতা মঙ্গলসুত্তে সত্তানং ৰুড্ঢিঞ্চ সোত্থিঞ্চ কথযমানেন একংসেন ভৰো এৰ কথিতো, নো পরাভৰো. হন্দ দানি যেন সত্তা পরিহাযন্তি ৰিনস্সন্তি, তং নেসং পরাভৰম্পি ¶ পুচ্ছামা’’তি. অথ মঙ্গলসুত্তং কথিতদিৰসতো দুতিযদিৰসে দসসহস্সচক্কৰাল়েসু দেৰতাযো পরাভৰসুত্তং সোতুকামা ইমস্মিং একচক্কৰাল়ে সন্নিপতিত্ৰা একৰালগ্গকোটিওকাসমত্তে দসপি ৰীসম্পি তিংসম্পি চত্তালীসম্পি পঞ্ঞাসম্পি সট্ঠিপি সত্ততিপি অসীতিপি সুখুমত্তভাৰে নিম্মিনিত্ৰা সব্বদেৰমারব্রহ্মানো সিরিযা চ তেজেন চ অধিগয্হ ৰিরোচমানং পঞ্ঞত্তৰরবুদ্ধাসনে নিসিন্নং ভগৰন্তং পরিৰারেত্ৰা অট্ঠংসু. ততো সক্কেন দেৰানমিন্দেন আণত্তো অঞ্ঞতরো দেৰপুত্তো ভগৰন্তং পরাভৰপঞ্হং পুচ্ছি. অথ ভগৰা পুচ্ছাৰসেন ইমং সুত্তমভাসি.

তত্থ ¶ ‘‘এৰং মে সুত’’ন্তিআদি আযস্মতা আনন্দেন ৰুত্তং. ‘‘পরাভৰন্তং পুরিস’’ন্তিআদিনা নযেন একন্তরিকা গাথা দেৰপুত্তেন ৰুত্তা, ‘‘সুৰিজানো ভৰং হোতী’’তিআদিনা নযেন একন্তরিকা এৰ অৰসানগাথা চ ভগৰতা ৰুত্তা, তদেতং সব্বম্পি সমোধানেত্ৰা ‘‘পরাভৰসুত্ত’’ন্তি ৰুচ্চতি. তত্থ ‘‘এৰং মে সুত’’ন্তিআদীসু যং ৰত্তব্বং, তং সব্বং মঙ্গলসুত্তৰণ্ণনাযং ৰক্খাম.

৯১. পরাভৰন্তং পুরিসন্তিআদীসু পন পরাভৰন্তন্তি পরিহাযন্তং ৰিনস্সন্তং. পুরিসন্তি যংকিঞ্চি সত্তং জন্তুং. মযং পুচ্ছাম গোতমাতি সেসদেৰেহি সদ্ধিং অত্তানং নিদস্সেত্ৰা ওকাসং কারেন্তো সো দেৰপুত্তো গোত্তেন ভগৰন্তং আলপতি. ভৰন্তং পুট্ঠুমাগম্মাতি মযঞ্হি ভৰন্তং পুচ্ছিস্সামাতি ততো ততো চক্কৰাল়া আগতাতি অত্থো. এতেন আদরং দস্সেতি. কিং পরাভৰতো মুখন্তি এৰং আগতানং অম্হাকং ব্রূহি পরাভৰতো পুরিসস্স কিং মুখং, কিং দ্ৰারং, কা যোনি, কিং কারণং, যেন মযং পরাভৰন্তং পুরিসং জানেয্যামাতি অত্থো. এতেন ‘‘পরাভৰন্তং পুরিস’’ন্তি এত্থ ৰুত্তস্স পরাভৰতো পুরিসস্স পরাভৰকারণং পুচ্ছতি. পরাভৰকারণে হি ঞাতে তেন কারণসামঞ্ঞেন সক্কা যো কোচি পরাভৰপুরিসো জানিতুন্তি ¶ .

৯২. অথস্স ¶ ভগৰা সুট্ঠু পাকটীকরণত্থং পটিপক্খং দস্সেত্ৰা পুগ্গলাধিট্ঠানায দেসনায পরাভৰমুখং দীপেন্তো আহ ‘‘সুৰিজানো ভৰ’’ন্তি. তস্সত্থো – য্ৰাযং ভৰং ৰড্ঢন্তো অপরিহাযন্তো পুরিসো, সো সুৰিজানো হোতি, সুখেন অকসিরেন অকিচ্ছেন সক্কা ৰিজানিতুং. যোপাযং পরাভৰতীতি পরাভৰো, পরিহাযতি ৰিনস্সতি, যস্স তুম্হে পরাভৰতো পুরিসস্স মুখং মং পুচ্ছথ, সোপি সুৰিজানো. কথং? অযঞ্হি ধম্মকামো ভৰং হোতি দসকুসলকম্মপথধম্মং কামেতি, পিহেতি, পত্থেতি, সুণাতি, পটিপজ্জতি, সো তং পটিপত্তিং দিস্ৰা সুত্ৰা চ জানিতব্বতো সুৰিজানো হোতি. ইতরোপি ধম্মদেস্সী পরাভৰো, তমেৰ ধম্মং দেস্সতি, ন কামেতি, ন পিহেতি, ন পত্থেতি, ন সুণাতি, ন পটিপজ্জতি, সো তং ৰিপ্পটিপত্তিং দিস্ৰা সুত্ৰা চ জানিতব্বতো সুৰিজানো হোতীতি. এৰমেত্থ ভগৰা পটিপক্খং দস্সেন্তো অত্থতো ধম্মকামতং ভৰতো মুখং দস্সেত্ৰা ধম্মদেস্সিতং পরাভৰতো মুখং দস্সেতীতি ৰেদিতব্বং.

৯৩. অথ ¶ সা দেৰতা ভগৰতো ভাসিতং অভিনন্দমানা আহ ‘‘ইতি হেত’’ন্তি. তস্সত্থো – ইতি হি যথা ৰুত্তো ভগৰতা, তথেৰ এতং ৰিজানাম, গণ্হাম, ধারেম, পঠমো সো পরাভৰো সো ধম্মদেস্সিতালক্খণো পঠমো পরাভৰো. যানি মযং পরাভৰমুখানি ৰিজানিতুং আগতম্হা, তেসু ইদং তাৰ একং পরাভৰমুখন্তি ৰুত্তং হোতি. তত্থ ৰিগ্গহো, পরাভৰন্তি এতেনাতি পরাভৰো. কেন চ পরাভৰন্তি? যং পরাভৰতো মুখং, কারণং, তেন. ব্যঞ্জনমত্তেন এৰ হি এত্থ নানাকরণং, অত্থতো পন পরাভৰোতি ৰা পরাভৰতো মুখন্তি ৰা নানাকরণং নত্থি. এৰমেকং পরাভৰতো মুখং ৰিজানামাতি অভিনন্দিত্ৰা ততো পরং ঞাতুকামতাযাহ ‘‘দুতিযং ভগৰা ব্রূহি, কিং পরাভৰতো মুখ’’ন্তি. ইতো পরঞ্চ ততিযং চতুত্থন্তিআদীসুপি ইমিনাৰ নযেনত্থো ৰেদিতব্বো.

৯৪. ব্যাকরণপক্খেপি চ যস্মা ¶ তে তে সত্তা তেহি তেহি পরাভৰমুখেহি সমন্নাগতা, ন একোযেৰ সব্বেহি, ন চ সব্বে একেনেৰ, তস্মা তেসং তেসং তানি তানি পরাভৰমুখানি দস্সেতুং ‘‘অসন্তস্স পিযা হোন্তী’’তিআদিনা নযেন পুগ্গলাধিট্ঠানায এৰ দেসনায নানাৰিধানি পরাভৰমুখানি ব্যাকাসীতি ৰেদিতব্বা.

তত্রাযং সঙ্খেপতো অত্থৰণ্ণনা – অসন্তো নাম ছ সত্থারো, যে ৰা পনঞ্ঞেপি অৰূপসন্তেন কাযৰচীমনোকম্মেন সমন্নাগতা, তে অসন্তো অস্সপিযা হোন্তি সুনক্খত্তাদীনং অচেলককোরখত্তিযাদযো ৰিয. সন্তো নাম বুদ্ধপচ্চেকবুদ্ধসাৰকা. যে ৰা পনঞ্ঞেপি ৰূপসন্তেন ¶ কাযৰচীমনোকম্মেন সমন্নাগতা, তে সন্তে ন কুরুতে পিযং, অত্তনো পিযে ইট্ঠে কন্তে মনাপে ন কুরুতেতি অত্থো. ৰেনেয্যৰসেন হেত্থ ৰচনভেদো কতোতি ৰেদিতব্বো. অথ ৰা সন্তে ন কুরুতেতি সন্তে ন সেৰতীতি অত্থো, যথা ‘‘রাজানং সেৰতী’’তি এতস্মিঞ্হি অত্থে রাজানং পিযং কুরুতেতি সদ্দৰিদূ মন্তেন্তি. পিযন্তি পিযমানো, তুস্সমানো, মোদমানোতি অত্থো. অসতং ¶ ধম্মো নাম দ্ৰাসট্ঠি দিট্ঠিগতানি, দসাকুসলকম্মপথা ৰা. তং অসতং ধম্মং রোচেতি, পিহেতি, পত্থেতি, সেৰতি. এৰমেতায গাথায অসন্তপিযতা, সন্তঅপ্পিযতা, অসদ্ধম্মরোচনঞ্চাতি তিৰিধং পরাভৰতো মুখং ৰুত্তং. এতেন হি সমন্নাগতো পুরিসো পরাভৰতি পরিহাযতি, নেৰ ইধ ন হুরং ৰুড্ঢিং পাপুণাতি, তস্মা ‘‘পরাভৰতো মুখ’’ন্তি ৰুচ্চতি. ৰিত্থারং পনেত্থ ‘‘অসেৰনা চ বালানং, পণ্ডিতানঞ্চ সেৰনা’’তি গাথাৰণ্ণনাযং ৰক্খাম.

৯৬. নিদ্দাসীলী নাম যো গচ্ছন্তোপি, নিসীদন্তোপি, তিট্ঠন্তোপি, সযানোপি নিদ্দাযতিযেৰ. সভাসীলী নাম সঙ্গণিকারামতং, ভস্সারামতমনুযুত্তো. অনুট্ঠাতাতি ৰীরিযতেজৰিরহিতো উট্ঠানসীলো ন হোতি, অঞ্ঞেহি চোদিযমানো গহট্ঠো ৰা সমানো গহট্ঠকম্মং ¶ , পব্বজিতো ৰা পব্বজিতকম্মং আরভতি. অলসোতি জাতিঅলসো, অচ্চন্তাভিভূতো থিনেন ঠিতট্ঠানে ঠিতো এৰ হোতি, নিসিন্নট্ঠানে নিসিন্নো এৰ হোতি, অত্তনো উস্সাহেন অঞ্ঞং ইরিযাপথং ন কপ্পেতি. অতীতে অরঞ্ঞে অগ্গিম্হি উট্ঠিতে অপলাযনঅলসা চেত্থ নিদস্সনং. অযমেত্থ উক্কট্ঠপরিচ্ছেদো, ততো লামকপরিচ্ছেদেনাপি পন অলসো অলসোত্ৰেৰ ৰেদিতব্বো. ধজোৰ রথস্স, ধূমোৰ অগ্গিনো, কোধো পঞ্ঞাণমস্সাতি কোধপঞ্ঞাণো. দোসচরিতো খিপ্পকোপী অরুকূপমচিত্তো পুগ্গলো এৰরূপো হোতি. ইমায গাথায নিদ্দাসীলতা, সভাসীলতা, অনুট্ঠানতা, অলসতা, কোধপঞ্ঞাণতাতি পঞ্চৰিধং পরাভৰমুখং ৰুত্তং. এতেন হি সমন্নাগতো নেৰ গহট্ঠো গহট্ঠৰুড্ঢিং, ন পব্বজিতো পব্বজিতৰুড্ঢিং পাপুণাতি, অঞ্ঞদত্থু পরিহাযতিযেৰ পরাভৰতিযেৰ, তস্মা ‘‘পরাভৰতো মুখ’’ন্তি ৰুচ্চতি.

৯৮. মাতাতি জনিকা ৰেদিতব্বা. পিতাতি জনকোযেৰ. জিণ্ণকং সরীরসিথিলতায. গতযোব্বনং যোব্বনাতিক্কমেন আসীতিকং ৰা নাৰুতিকং ৰা সযং কম্মানি কাতুমসমত্থং. পহু সন্তোতি সমত্থো সমানো সুখং জীৰমানো. ন ভরতীতি ন পোসেতি. ইমায গাথায মাতাপিতূনং অভরণং, অপোসনং, অনুপট্ঠানং একংযেৰ পরাভৰমুখং ৰুত্তং. এতেন হি সমন্নাগতো যং তং –

‘‘তায ¶ ¶ নং পারিচরিযায, মাতাপিতূসু পণ্ডিতা;

ইধেৰ নং পসংসন্তি, পেচ্চ সগ্গে পমোদতী’’তি. (ইতিৰু. ১০৬; অ. নি. ৪.৬৩) –

মাতাপিতুভরণে আনিসংসং ৰুত্তং. তং ন পাপুণাতি, অঞ্ঞদত্থু ‘‘মাতাপিতরোপি ন ভরতি, কং অঞ্ঞং ভরিস্সতী’’তি নিন্দঞ্চ ৰজ্জনীযতঞ্চ দুগ্গতিঞ্চ পাপুণন্তো পরাভৰতিযেৰ, তস্মা ‘‘পরাভৰতো মুখ’’ন্তি ৰুচ্চতি.

১০০. পাপানং বাহিতত্তা ব্রাহ্মণং, সমিতত্তা সমণং. ব্রাহ্মণকুলপ্পভৰম্পি ৰা ব্রাহ্মণং, পব্বজ্জুপগতং ¶ সমণং, ততো অঞ্ঞং ৰাপি যংকিঞ্চি যাচনকং. মুসাৰাদেন ৰঞ্চেতীতি ‘‘ৰদ, ভন্তে, পচ্চযেনা’’তি পৰারেত্ৰা যাচিতো ৰা পটিজানিত্ৰা পচ্ছা অপ্পদানেন তস্স তং আসং ৰিসংৰাদেতি. ইমায গাথায ব্রাহ্মণাদীনং মুসাৰাদেন ৰঞ্চনং একংযেৰ পরাভৰমুখং ৰুত্তং. এতেন হি সমন্নাগতো ইধ নিন্দং, সম্পরাযে দুগ্গতিং সুগতিযম্পি অধিপ্পাযৰিপত্তিঞ্চ পাপুণাতি. ৰুত্তঞ্হেতং –

‘‘দুস্সীলস্স সীলৰিপন্নস্স পাপকো কিত্তিসদ্দো অব্ভুগ্গচ্ছতী’’তি (দী. নি. ২.১৪৯; অ. নি. ৫.২১৩; মহাৰ. ২৮৫).

তথা –

‘‘চতূহি, ভিক্খৰে, ধম্মেহি সমন্নাগতো যথাভতং নিক্খিত্তো এৰং নিরযে. কতমেহি চতূহি? মুসাৰাদী হোতী’’তিআদি (অ. নি. ৪.৮২).

তথা –

‘‘ইধ, সারিপুত্ত, একচ্চো সমণং ৰা ব্রাহ্মণং ৰা উপসঙ্কমিত্ৰা পৰারেতি, ‘ৰদ, ভন্তে, পচ্চযেনা’তি, সো যেন পৰারেতি, তং ন দেতি. সো চে ততো চুতো ইত্থত্তং আগচ্ছতি. সো যং যদেৰ ৰণিজ্জং পযোজেতি, সাস্স হোতি ছেদগামিনী. ইধ পন সারিপুত্ত…পে… সো যেন পৰারেতি, ন তং যথাধিপ্পাযং দেতি. সো চে ততো চুতো ¶ ইত্থত্তং আগচ্ছতি. সো যং যদেৰ ৰণিজ্জং পযোজেতি, সাস্স ন হোতি যথাধিপ্পাযা’’তি (অ. নি. ৪.৭৯).

এৰমিমানি ¶ নিন্দাদীনি পাপুণন্তো পরাভৰতিযেৰ, তস্মা ‘‘পরাভৰতো মুখ’’ন্তি ৰুত্তং.

১০২. পহূতৰিত্তোতি পহূতজাতরূপরজতমণিরতনো. সহিরঞ্ঞোতি সকহাপণো. সভোজনোতি অনেকসূপব্যঞ্জনভোজনসম্পন্নো. একো ভুঞ্জতি সাদূনীতি সাদূনি ভোজনানি অত্তনো পুত্তানম্পি অদত্ৰা পটিচ্ছন্নোকাসে ভুঞ্জতীতি একো ভুঞ্জতি সাদূনি. ইমায গাথায ভোজনগিদ্ধতায ভোজনমচ্ছরিযং একংযেৰ পরাভৰমুখং ৰুত্তং. এতেন হি সমন্নাগতো নিন্দং ৰজ্জনীযং দুগ্গতিন্তি এৰমাদীনি পাপুণন্তো পরাভৰতিযেৰ, তস্মা ‘‘পরাভৰতো মুখ’’ন্তি ৰুত্তং. ৰুত্তনযেনেৰ সব্বং সুত্তানুসারেন যোজেতব্বং, অতিৰিত্থারভযেন পন ইদানি যোজনানযং অদস্সেত্ৰা অত্থমত্তমেৰ ভণাম.

১০৪. জাতিত্থদ্ধো নাম যো ‘‘অহং জাতিসম্পন্নো’’তি মানং জনেত্ৰা তেন থদ্ধো ৰাতপূরিতভস্তা ৰিয উদ্ধুমাতো হুত্ৰা ন কস্সচি ¶ ওনমতি. এস নযো ধনগোত্তত্থদ্ধেসু. সঞ্ঞাতিং অতিমঞ্ঞেতীতি অত্তনো ঞাতিম্পি জাতিযা অতিমঞ্ঞতি সক্যা ৰিয ৰিটটূভং. ধনেনাপি চ ‘‘কপণো অযং দলিদ্দো’’তি অতিমঞ্ঞতি, সামীচিমত্তম্পি ন করোতি, তস্স তে ঞাতযো পরাভৰমেৰ ইচ্ছন্তি. ইমায গাথায ৰত্থুতো চতুব্বিধং, লক্খণতো একংযেৰ পরাভৰমুখং ৰুত্তং.

১০৬. ইত্থিধুত্তোতি ইত্থীসু সারত্তো, যংকিঞ্চি অত্থি, তং সব্বম্পি দত্ৰা অপরাপরং ইত্থিং সঙ্গণ্হাতি. তথা সব্বম্পি অত্তনো সন্তকং নিক্খিপিত্ৰা সুরাপানপযুত্তো সুরাধুত্তো. নিৰত্থসাটকম্পি নিক্খিপিত্ৰা জূতকীল়নমনুযুত্তো অক্খধুত্তো. এতেহি তীহি ঠানেহি যংকিঞ্চিপি লদ্ধং হোতি, তস্স ৰিনাসনতো লদ্ধং লদ্ধং ৰিনাসেতীতি ৰেদিতব্বো. এৰংৰিধো পরাভৰতিযেৰ, তেনস্সেতং ইমায গাথায তিৰিধং পরাভৰমুখং ৰুত্তং.

১০৮. সেহি দারেহীতি অত্তনো দারেহি. যো অত্তনো দারেহি অসন্তুট্ঠো হুত্ৰা ৰেসিযাসু পদুস্সতি, তথা পরদারেসু, সো ¶ যস্মা ৰেসীনং ধনপ্পদানেন পরদারসেৰনেন চ রাজদণ্ডাদীহি পরাভৰতিযেৰ, তেনস্সেতং ইমায গাথায দুৰিধং পরাভৰমুখং ৰুত্তং.

১১০. অতীতযোব্বনোতি ¶ যোব্বনমতিচ্চ আসীতিকো ৰা নাৰুতিকো ৰা হুত্ৰা আনেতি পরিগ্গণ্হাতি. তিম্বরুত্থনিন্তি তিম্বরুফলসদিসত্থনিং তরুণদারিকং. তস্সা ইস্সা ন সুপতীতি ‘‘দহরায মহল্লকেন সদ্ধিং রতি চ সংৰাসো চ অমনাপো, মা হেৰ খো তরুণং পত্থেয্যা’’তি ইস্সায তং রক্খন্তো ন সুপতি. সো যস্মা কামরাগেন চ ইস্সায চ ডয্হন্তো বহিদ্ধা কম্মন্তে চ অপ্পযোজেন্তো পরাভৰতিযেৰ, তেনস্সেতং ইমায গাথায ইমং ইস্সায অসুপনং একংযেৰ পরাভৰমুখং ৰুত্তং.

১১২. সোণ্ডিন্তি মচ্ছমংসাদীসু লোলং গেধজাতিকং. ৰিকিরণিন্তি তেসং অত্থায ধনং পংসুকং ৰিয ৰিকিরিত্ৰা নাসনসীলং. পুরিসং ৰাপি তাদিসন্তি পুরিসো ৰাপি যো এৰরূপো হোতি, তং যো ইস্সরিযস্মিং ঠপেতি, লঞ্ছনমুদ্দিকাদীনি দত্ৰা ঘরাৰাসে কম্মন্তে ¶ ৰা ৰণিজ্জাদিৰোহারেসু ৰা তদেৰ ৰাৰটং কারেতি. সো যস্মা তস্স দোসেন ধনক্খযং পাপুণন্তো পরাভৰতিযেৰ, তেনস্সেতং ইমায গাথায তথাৰিধস্স ইস্সরিযস্মিং ঠপনং একংযেৰ পরাভৰমুখং ৰুত্তং.

১১৪. অপ্পভোগো নাম সন্নিচিতানঞ্চ ভোগানং আযমুখস্স চ অভাৰতো. মহাতণ্হোতি মহতিযা ভোগতণ্হায সমন্নাগতো, যং লদ্ধং, তেন অসন্তুট্ঠো. খত্তিযে জাযতে কুলেতি খত্তিযানং কুলে জাযতি. সো চ রজ্জং পত্থযতীতি সো এতায মহাতণ্হতায অনুপাযেন উপ্পটিপাটিযা অত্তনো দাযজ্জভূতং অলব্ভনেয্যং ৰা পরসন্তকং রজ্জং পত্থেতি, সো এৰং পত্থেন্তো যস্মা তম্পি অপ্পকং ভোগং যোধাজীৰাদীনং দত্ৰা রজ্জং অপাপুণন্তো পরাভৰতিযেৰ, তেনস্সেতং ইমায গাথায রজ্জপত্থনং একংযেৰ পরাভৰমুখং ৰুত্তং.

১১৫. ইতো ¶ পরং যদি সা দেৰতা ‘‘তেরসমং ভগৰা ব্রূহি…পে… সতসহস্সিমং ভগৰা ব্রূহী’’তি পুচ্ছেয্য, তম্পি ভগৰা কথেয্য. যস্মা পন সা দেৰতা ‘‘কিং ইমেহি পুচ্ছিতেহি, একমেত্থ ৰুড্ঢিকরং নত্থী’’তি তানি পরাভৰমুখানি অসুয্যমানা এত্তকম্পি পুচ্ছিত্ৰা ৰিপ্পটিসারী হুত্ৰা তুণ্হী অহোসি, তস্মা ভগৰা তস্সাসযং ৰিদিত্ৰা দেসনং নিট্ঠাপেন্তো ইমং গাথং অভাসি ‘‘এতে পরাভৰে লোকে’’তি.

তত্থ পণ্ডিতোতি পরিৰীমংসায সমন্নাগতো. সমৰেক্খিযাতি পঞ্ঞাচক্খুনা উপপরিক্খিত্ৰা. অরিযোতি ন মগ্গেন, ন ফলেন, অপিচ খো, পন এতস্মিং পরাভৰসঙ্খাতে অনযে ন ইরিযতীতি অরিযো. যেন দস্সনেন যায পঞ্ঞায পরাভৰে দিস্ৰা ৰিৰজ্জেতি, তেন ¶ সম্পন্নত্তা দস্সনসম্পন্নো. স লোকং ভজতে সিৰন্তি সো এৰরূপো সিৰং খেমমুত্তমমনুপদ্দৰং দেৰলোকং ভজতি, অল্লীযতি, উপগচ্ছতীতি ৰুত্তং হোতি. দেসনাপরিযোসানে পরাভৰমুখানি সুত্ৰা উপ্পন্নসংৰেগানুরূপং যোনিসো পদহিত্ৰা সোতাপত্তিসকদাগামিঅনাগামিফলানি পত্তা দেৰতা গণনং ৰীতিৰত্তা. যথাহ –

‘‘মহাসমযসুত্তে ¶ চ, অথো মঙ্গলসুত্তকে;

সমচিত্তে রাহুলোৰাদে, ধম্মচক্কে পরাভৰে.

‘‘দেৰতাসমিতী তত্থ, অপ্পমেয্যা অসঙ্খিযা;

ধম্মাভিসমযো চেত্থ, গণনাতো অসঙ্খিযো’’তি.

পরমত্থজোতিকায খুদ্দক-অট্ঠকথায

সুত্তনিপাত-অট্ঠকথায পরাভৰসুত্তৰণ্ণনা নিট্ঠিতা.

৭. অগ্গিকভারদ্ৰাজসুত্তৰণ্ণনা

এৰং ¶ মে সুতন্তি অগ্গিকভারদ্ৰাজসুত্তং, ‘‘ৰসলসুত্ত’’ন্তিপি ৰুচ্চতি. কা উপ্পত্তি? ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. কসিভারদ্ৰাজসুত্তে ৰুত্তনযেন পচ্ছাভত্তকিচ্চাৰসানে বুদ্ধচক্খুনা লোকং ¶ ৰোলোকেন্তো অগ্গিকভারদ্ৰাজং ব্রাহ্মণং সরণসিক্খাপদানং উপনিস্সযসম্পন্নং দিস্ৰা ‘‘তত্থ মযি গতে কথা পৰত্তিস্সতি, ততো কথাৰসানে ধম্মদেসনং সুত্ৰা এস ব্রাহ্মণো সরণং গন্ত্ৰা সিক্খাপদানি সমাদিযিস্সতী’’তি ঞত্ৰা, তত্থ গন্ত্ৰা, পৰত্তায কথায ব্রাহ্মণেন ধম্মদেসনং যাচিতো ইমং সুত্তং অভাসি. তত্থ ‘‘এৰং মে সুত’’ন্তিআদিং মঙ্গলসুত্তৰণ্ণনাযং ৰণ্ণযিস্সাম, ‘‘অথ খো ভগৰা পুব্বণ্হসময’’ন্তিআদি কসিভারদ্ৰাজসুত্তে ৰুত্তনযেনেৰ ৰেদিতব্বং.

তেন খো পন সমযেন অগ্গিকভারদ্ৰাজস্সাতি যং যং অৰুত্তপুব্বং, তং তদেৰ ৰণ্ণযিস্সাম. সেয্যথিদং – সো হি ব্রাহ্মণো অগ্গিং জুহতি পরিচরতীতি কত্ৰা অগ্গিকোতি নামেন পাকটো অহোসি, ভারদ্ৰাজোতি গোত্তেন. তস্মা ৰুত্তং ‘‘অগ্গিকভারদ্ৰাজস্সা’’তি. নিৰেসনেতি ঘরে. তস্স কির ব্রাহ্মণস্স নিৰেসনদ্ৰারে অন্তরৰীথিযং অগ্গিহুতসালা অহোসি. ততো ‘‘নিৰেসনদ্ৰারে’’তি ৰত্তব্বে তস্সপি পদেসস্স নিৰেসনেযেৰ পরিযাপন্নত্তা ‘‘নিৰেসনে’’তি ৰুত্তং. সমীপত্থে ৰা ভুম্মৰচনং, নিৰেসনসমীপেতি অত্থো. অগ্গি পজ্জলিতো হোতীতি অগ্গিযাধানে ঠিতো অগ্গি কতব্ভুদ্ধরণো সমিধাপক্খেপং বীজনৰাতঞ্চ লভিত্ৰা ¶ জলিতো উদ্ধং সমুগ্গতচ্চিসমাকুলো হোতি. আহুতি পগ্গহিতাতি সসীসং ন্হাযিত্ৰা মহতা সক্কারেন পাযাসসপ্পিমধুফাণিতাদীনি অভিসঙ্খতানি হোন্তীতি অত্থো. যঞ্হি কিঞ্চি অগ্গিম্হি জুহিতব্বং, তং সব্বং ‘‘আহুতী’’তি ৰুচ্চতি. সপদানন্তি অনুঘরং. ভগৰা হি সব্বজনানুগ্গহত্থায আহারসন্তুট্ঠিযা চ উচ্চনীচকুলং অৰোক্কম্ম পিণ্ডায চরতি. তেন ৰুত্তং ‘‘সপদানং পিণ্ডায চরমানো’’তি.

অথ কিমত্থং সব্বাকারসম্পন্নং সমন্তপাসাদিকং ভগৰন্তং দিস্ৰা ব্রাহ্মণস্স চিত্তং নপ্পসীদতি? কস্মা চ এৰং ফরুসেন ৰচনেন ভগৰন্তং সমুদাচরতীতি? ৰুচ্চতে – অযং কির ¶ ব্রাহ্মণো ‘‘মঙ্গলকিচ্চেসু সমণদস্সনং অৰমঙ্গল’’ন্তি এৰংদিট্ঠিকো, ততো ‘‘মহাব্রহ্মুনো ভুঞ্জনৰেলায কাল়কণ্ণী মুণ্ডকসমণকো মম নিৰেসনং উপসঙ্কমতী’’তি মন্ত্ৰা চিত্তং নপ্পসাদেসি, অঞ্ঞদত্থু দোসৰসংযেৰ অগমাসি. অথ কুদ্ধো অনত্তমনো অনত্তমনৰাচং নিচ্ছারেসি ‘‘তত্রেৰ মুণ্ডকা’’তিআদি. তত্রাপি ¶ চ যস্মা ‘‘মুণ্ডো অসুদ্ধো হোতী’’তি ব্রাহ্মণানং দিট্ঠি, তস্মা ‘‘অযং অসুদ্ধো, তেন দেৰব্রাহ্মণপূজকো ন হোতী’’তি জিগুচ্ছন্তো ‘‘মুণ্ডকা’’তি আহ. মুণ্ডকত্তা ৰা উচ্ছিট্ঠো এস, ন ইমং পদেসং অরহতি আগচ্ছিতুন্তি সমণো হুত্ৰাপি ঈদিসং কাযকিলেসং ন ৰণ্ণেতীতি চ সমণভাৰং জিগুচ্ছন্তো ‘‘সমণকা’’তি আহ. ন কেৰলং দোসৰসেনেৰ, ৰসলে ৰা পব্বাজেত্ৰা তেহি সদ্ধিং একতো সম্ভোগপরিভোগকরণেন পতিতো অযং ৰসলতোপি পাপতরোতি জিগুচ্ছন্তো ‘‘ৰসলকা’’তি আহ – ‘‘ৰসলজাতিকানং ৰা আহুতিদস্সনমত্তসৰনেন পাপং হোতী’’তি মঞ্ঞমানোপি এৰমাহ.

ভগৰা তথা ৰুত্তোপি ৰিপ্পসন্নেনেৰ মুখৰণ্ণেন মধুরেন সরেন ব্রাহ্মণস্স উপরি অনুকম্পাসীতলেন চিত্তেন অত্তনো সব্বসত্তেহি অসাধারণতাদিভাৰং পকাসেন্তো আহ ‘‘জানাসি পন, ত্ৰং ব্রাহ্মণা’’তি. অথ ব্রাহ্মণো ভগৰতো ¶ মুখপ্পসাদসূচিতং তাদিভাৰং ঞত্ৰা অনুকম্পাসীতলেন চিত্তেন নিচ্ছারিতং মধুরস্সরং সুত্ৰা অমতেনেৰ অভিসিত্তহদযো অত্তমনো ৰিপ্পসন্নিন্দ্রিযো নিহতমানো হুত্ৰা তং জাতিসভাৰং ৰিসউগ্গিরসদিসং সমুদাচারৰচনং পহায ‘‘নূন যমহং হীনজচ্চং ৰসলন্তি পচ্চেমি, ন সো পরমত্থতো ৰসলো, ন চ হীনজচ্চতা এৰ ৰসলকরণো ধম্মো’’তি মঞ্ঞমানো ‘‘ন খ্ৰাহং, ভো গোতমা’’তি আহ. ধম্মতা হেসা, যং হেতুসম্পন্নো পচ্চযালাভেন ফরুসোপি সমানো লদ্ধমত্তে পচ্চযে মুদুকো হোতীতি.

তত্থ সাধূতি অযং সদ্দো আযাচনসম্পটিচ্ছনসম্পহংসনসুন্দরদল়্হীকম্মাদীসু দিস্সতি. ‘‘সাধু মে, ভন্তে, ভগৰা সংখিত্তেন ধম্মং দেসেতূ’’তিআদীসু (সং. নি. ৪.৯৫; অ. নি. ৭.৮৩) হি আযাচনে. ‘‘সাধু, ভন্তেতি খো সো ভিক্খু ভগৰতো ভাসিতং অভিনন্দিত্ৰা অনুমোদিত্ৰা’’তিআদীসু (ম. নি. ৩.৮৬) সম্পটিচ্ছনে. ‘‘সাধু, সাধু, সারিপুত্তা’’তিআদীসু (দী. নি. ৩.৩৪৯) সম্পহংসনে.

‘‘সাধু ধম্মরুচী রাজা, সাধু পঞ্ঞাণৰা নরো;

সাধু মিত্তানমদ্দুব্ভো, পাপস্সাকরণং সুখ’’ন্তি. (জা. ২.১৮.১০১) –

আদীসু ¶ ¶ সুন্দরে. ‘‘তং সুণাথ, সাধুকং মনসি করোথা’’তিআদীসু (ম. নি. ১.১) দল়্হীকম্মে. ইধ পন আযাচনে.

তেন হীতি তস্সাধিপ্পাযনিদস্সনং, সচে ঞাতুকামোসীতি ৰুত্তং হোতি. কারণৰচনং ৰা, তস্স যস্মা ঞাতুকামোসি, তস্মা, ব্রাহ্মণ, সুণাহি, সাধুকং মনসি করোহি, তথা তে ভাসিস্সামি, যথা ত্ৰং জানিস্সসীতি এৰং পরপদেহি সদ্ধিং সম্বন্ধো ৰেদিতব্বো. তত্র চ সুণাহীতি সোতিন্দ্রিযৰিক্খেপৰারণং, সাধুকং মনসি করোহীতি মনসিকারে দল়্হীকম্মনিযোজনেন মনিন্দ্রিযৰিক্খেপৰারণং. পুরিমঞ্চেত্থ ব্যঞ্জনৰিপল্লাসগ্গাহৰারণং, পচ্ছিমং অত্থৰিপল্লাসগ্গাহৰারণং ¶ . পুরিমেন চ ধম্মস্সৰনে নিযোজেতি, পচ্ছিমেন সুতানং ধম্মানং ধারণত্থূপপরিক্খাদীসু. পুরিমেন চ ‘‘সব্যঞ্জনো অযং ধম্মো, তস্মা সৰনীযো’’তি দীপেতি, পচ্ছিমেন ‘‘সাত্থো, তস্মা মনসি কাতব্বো’’তি. সাধুকপদং ৰা উভযপদেহি যোজেত্ৰা ‘‘যস্মা অযং ধম্মো ধম্মগম্ভীরো চ দেসনাগম্ভীরো চ, তস্মা সুণাহি সাধুকং. যস্মা অত্থগম্ভীরো পটিৰেধগম্ভীরো চ, তস্মা সাধুকং মনসি করোহী’’তি এতমত্থং দীপেন্তো আহ – ‘‘সুণাহি সাধুকং মনসি করোহী’’তি.

ততো ‘‘এৰং গম্ভীরে কথমহং পতিট্ঠং লভিস্সামী’’তি ৰিসীদন্তমিৰ তং ব্রাহ্মণং সমুস্সাহেন্তো আহ – ‘‘ভাসিস্সামী’’তি. তত্থ ‘‘যথা ত্ৰং ঞস্সসি, তথা পরিমণ্ডলেহি পদব্যঞ্জনেহি উত্তানেন নযেন ভাসিস্সামী’’তি এৰমধিপ্পাযো ৰেদিতব্বো. ততো উস্সাহজাতো হুত্ৰা ‘‘এৰং ভো’’তি খো অগ্গিকভারদ্ৰাজো ব্রাহ্মণো ভগৰতো পচ্চস্সোসি, সম্পটিচ্ছি পটিগ্গহেসীতি ৰুত্তং হোতি, যথানুসিট্ঠং ৰা পটিপজ্জনেন অভিমুখো অস্সোসীতি. অথস্স ‘‘ভগৰা এতদৰোচা’’তি ইদানি ৰত্তব্বং সন্ধায ৰুত্তং ‘‘কোধনো উপনাহী’’তি এৰমাদিকং.

১১৬. তত্থ কোধনোতি কুজ্ঝনসীলো. উপনাহীতি তস্সেৰ কোধস্স দল়্হীকম্মেন উপনাহেন সমন্নাগতো. পরেসং গুণে মক্খেতি পুঞ্ছতীতি মক্খী, পাপো চ সো মক্খী চাতি পাপমক্খী. ৰিপন্নদিট্ঠীতি ৰিনট্ঠসম্মাদিট্ঠি, ৰিপন্নায ৰা ৰিরূপং গতায দসৰত্থুকায মিচ্ছাদিট্ঠিযা সমন্নাগতো. মাযাৰীতি অত্তনি ৰিজ্জমানদোসপটিচ্ছাদনলক্খণায মাযায ¶ সমন্নাগতো. তং জঞ্ঞা ৰসলো ইতীতি তং এৰরূপং পুগ্গলং এতেসং হীনধম্মানং ৰস্সনতো সিঞ্চনতো অন্ৰাস্সৰনতো ‘‘ৰসলো’’তি জানেয্যাতি, এতেহি সব্বেহি ব্রাহ্মণমত্থকে জাতো. অযঞ্হি পরমত্থতো ৰসলো এৰ, অত্তনো ¶ হদযতুট্ঠিমত্তং, ন পরন্তি. এৰমেত্থ ভগৰা আদিপদেনেৰ তস্স ব্রাহ্মণস্স কোধনিগ্গহং কত্ৰা ‘‘কোধাদিধম্মো হীনপুগ্গলো’’তি পুগ্গলাধিট্ঠানায ¶ চ দেসনায কোধাদিধম্মে দেসেন্তো একেন তাৰ পরিযাযেন ৰসলঞ্চ ৰসলকরণে চ ধম্মে দেসেসি. এৰং দেসেন্তো চ ‘‘ত্ৰং অহ’’ন্তি পরৰম্ভনং অত্তুক্কংসনঞ্চ অকত্ৰা ধম্মেনেৰ সমেন ঞাযেন তং ব্রাহ্মণং ৰসলভাৰে, অত্তানঞ্চ ব্রাহ্মণভাৰে ঠপেসি.

১১৭. ইদানি যাযং ব্রাহ্মণানং দিট্ঠি ‘‘কদাচি পাণাতিপাতঅদিন্নাদানাদীনি করোন্তোপি ব্রাহ্মণো এৰা’’তি. তং দিট্ঠিং পটিসেধেন্তো, যে চ সত্তৰিহিংসাদীসু অকুসলধম্মেসু তেহি তেহি সমন্নাগতা আদীনৰং অপস্সন্তা তে ধম্মে উপ্পাদেন্তি, তেসং ‘‘হীনা এতে ধম্মা ৰসলকরণা’’তি তত্থ আদীনৰঞ্চ দস্সেন্তো অপরেহিপি পরিযাযেহি ৰসলঞ্চ ৰসলকরণে চ ধম্মে দেসেতুং ‘‘একজং ৰা দ্ৰিজং ৰা’’তি এৰমাদিগাথাযো অভাসি.

তত্থ একজোতি ঠপেত্ৰা অণ্ডজং অৰসেসযোনিজো. সো হি একদা এৰ জাযতি. দ্ৰিজোতি অণ্ডজো. সো হি মাতুকুচ্ছিতো অণ্ডকোসতো চাতি দ্ৰিক্খত্তুং জাযতি. তং একজং ৰা দ্ৰিজং ৰাপি. যোধ পাণন্তি যো ইধ সত্তং. ৰিহিংসতীতি কাযদ্ৰারিকচেতনাসমুট্ঠিতেন ৰা ৰচীদ্ৰারিকচেতনাসমুট্ঠিতেন ৰা পযোগেন জীৰিতা ৰোরোপেতি. ‘‘পাণানি হিংসতী’’তিপি পাঠো. তত্থ একজং ৰা দ্ৰিজং ৰাতি এৰংপভেদানি যোধ পাণানি হিংসতীতি এৰং সম্বন্ধো ৰেদিতব্বো. যস্স পাণে দযা নত্থীতি এতেন মনসা অনুকম্পায অভাৰং আহ. সেসমেত্থ ৰুত্তনযমেৰ. ইতো পরাসু চ গাথাসু, যতো এত্তকম্পি অৰত্ৰা ইতো পরং উত্তানত্থানি পদানি পরিহরন্তা অৰণ্ণিতপদৰণ্ণনামত্তমেৰ করিস্সাম.

১১৮. হন্তীতি ¶ হনতি ৰিনাসেতি. পরিরুন্ধতীতি সেনায পরিৰারেত্ৰা তিট্ঠতি. গামানি নিগমানি চাতি এত্থ চ-সদ্দেন নগরানীতিপি ৰত্তব্বং. নিগ্গাহকো সমঞ্ঞাতোতি ইমিনা হননপরিরুন্ধনেন গামনিগমনগরঘাতকোতি লোকে ৰিদিতো.

১১৯. গামে ৰা যদি ৰারঞ্ঞেতি ¶ গামোপি নিগমোপি নগরম্পি সব্বোৰ ইধ গামো সদ্ধিং উপচারেন, তং ঠপেত্ৰা সেসং অরঞ্ঞং. তস্মিং গামে ৰা যদি ৰারঞ্ঞে যং পরেসং মমাযিতং, যং পরসত্তানং পরিগ্গহিতমপরিচ্চত্তং সত্তো ৰা সঙ্খারো ৰা. থেয্যা অদিন্নমাদেতীতি তেহি অদিন্নং অননুঞ্ঞাতং থেয্যচিত্তেন আদিযতি, যেন কেনচি পযোগেন যেন কেনচি অৰহারেন অত্তনো গহণং সাধেতি.

১২০. ইণমাদাযাতি অত্তনো সন্তকং কিঞ্চি নিক্খিপিত্ৰা নিক্খেপগ্গহণেন ৰা, কিঞ্চি ¶ অনিক্খিপিত্ৰা ‘‘এত্তকেন কালেন এত্তকং ৰড্ঢিং দস্সামী’’তি ৰড্ঢিগ্গহণেন ৰা, ‘‘যং ইতো উদযং ভৰিস্সতি, তং ময্হং মূলং তৰেৰ ভৰিস্সতী’’তি ৰা ‘‘উদযং উভিন্নম্পি সাধারণ’’ন্তি ৰা এৰং তংতংআযোগগ্গহণেন ৰা ইণং গহেত্ৰা. চুজ্জমানো পলাযতি ন হি তে ইণমত্থীতি তেন ইণাযিকেন ‘‘দেহি মে ইণ’’ন্তি চোদিযমানো ‘‘ন হি তে ইণমত্থি, মযা গহিতন্তি কো সক্খী’’তি এৰং ভণনেন ঘরে ৰসন্তোপি পলাযতি.

১২১. কিঞ্চিক্খকম্যতাতি অপ্পমত্তকেপি কিস্মিঞ্চিদেৰ ইচ্ছায. পন্থস্মিং ৰজন্তং জনন্তি মগ্গে গচ্ছন্তং যংকিঞ্চি ইত্থিং ৰা পুরিসং ৰা. হন্ত্ৰা কিঞ্চিক্খমাদেতীতি মারেত্ৰা কোট্টেত্ৰা তং ভণ্ডকং গণ্হাতি.

১২২. অত্তহেতূতি অত্তনো জীৰিতকারণা, তথা পরহেতু. ধনহেতূতি সকধনস্স ৰা পরধনস্স ৰা কারণা. চ-কারো সব্বত্থ ৰিকপ্পনত্থো. সক্খিপুট্ঠোতি যং জানাসি, তং ৰদেহীতি পুচ্ছিতো. মুসা ব্রূতীতি জানন্তো ৰা ‘‘ন জানামী’’তি অজানন্তো ৰা ‘‘জানামী’’তি ভণতি, সামিকে অসামিকে, অসামিকে চ সামিকে করোতি.

১২৩. ঞাতীনন্তি ¶ সম্বন্ধীনং. সখীনন্তি ৰযস্সানং দারেসূতি পরপরিগ্গহিতেসু. পটিদিস্সতীতি পটিকূলেন দিস্সতি, অতিচরন্তো দিস্সতীতি অত্থো. সাহসাতি বলক্কারেন অনিচ্ছং. সম্পিযেনাতি তেহি তেসং দারেহি পত্থিযমানো সযঞ্চ পত্থযমানো, উভযসিনেহৰসেনাপীতি ৰুত্তং হোতি.

১২৪. মাতরং পিতরং ৰাতি এৰং মেত্তায পদট্ঠানভূতম্পি, জিণ্ণকং গতযোব্বনন্তি এৰং করুণায পদট্ঠানভূতম্পি ¶ . পহু সন্তো ন ভরতীতি অত্থসম্পন্নো উপকরণসম্পন্নো হুত্ৰাপি ন পোসেতি.

১২৫. সসুন্তি সস্সুং. হন্তীতি পাণিনা ৰা লেড্ডুনা ৰা অঞ্ঞেন ৰা কেনচি পহরতি. রোসেতীতি কোধমস্স সঞ্জনেতি ৰাচায ফরুসৰচনেন.

১২৬. অত্থন্তি সন্দিট্ঠিকসম্পরাযিকপরমত্থেসু যংকিঞ্চি. পুচ্ছিতো সন্তোতি পুট্ঠো সমানো. অনত্থমনুসাসতীতি তস্স অহিতমেৰ আচিক্খতি. পটিচ্ছন্নেন মন্তেতীতি অত্থং আচিক্খন্তোপি ¶ যথা সো ন জানাতি, তথা অপাকটেহি পদব্যঞ্জনেহি পটিচ্ছন্নেন ৰচনেন মন্তেতি, আচরিযমুট্ঠিং ৰা কত্ৰা দীঘরত্তং ৰসাপেত্ৰা সাৰসেসমেৰ মন্তেতি.

১২৭. যো কত্ৰাতি এত্থ মযা পুব্বভাগে পাপিচ্ছতা ৰুত্তা. যা সা ‘‘ইধেকচ্চো কাযেন দুচ্চরিতং চরিত্ৰা, ৰাচায দুচ্চরিতং চরিত্ৰা, মনসা দুচ্চরিতং চরিত্ৰা, তস্স পটিচ্ছাদনহেতু পাপিকং ইচ্ছং পণিদহতি, মা মং জঞ্ঞাতি ইচ্ছতী’’তি এৰং আগতা. যথা অঞ্ঞে ন জানন্তি, তথা করণেন কতানঞ্চ অৰিৰরণেন পটিচ্ছন্না অস্স কম্মন্তাতি পটিচ্ছন্নকম্মন্তো.

১২৮. পরকুলন্তি ঞাতিকুলং ৰা মিত্তকুলং ৰা. আগতন্তি যস্স তেন কুলে ভুত্তং, তং অত্তনো গেহমাগতং পানভোজনাদীহি নপ্পটিপূজেতি, ন ৰা দেতি, অৰভুত্তং ৰা দেতীতি অধিপ্পাযো.

১২৯. যো ব্রাহ্মণং ৰাতি পরাভৰসুত্তে ৰুত্তনযমেৰ.

১৩০. ভত্তকালে ¶ উপট্ঠিতেতি ভোজনকালে জাতে. উপট্ঠিতন্তিপি পাঠো, ভত্তকালে আগতন্তি অত্থো. রোসেতি ৰাচা ন চ দেতীতি ‘‘অত্থকামো মে অযং বলক্কারেন মং পুঞ্ঞং কারাপেতুং আগতো’’তি অচিন্তেত্ৰা অপ্পতিরূপেন ফরুসৰচনেন রোসেতি, অন্তমসো সম্মুখভাৰমত্তম্পি চস্স ন দেতি, পগেৰ ভোজনন্তি অধিপ্পাযো.

১৩১. অসতং যোধ পব্রূতীতি যো ইধ যথা নিমিত্তানি দিস্সন্তি ‘‘অসুকদিৰসে ইদঞ্চিদঞ্চ তে ভৰিস্সতী’’তি এৰং অসজ্জনানং ৰচনং পব্রূতি. ‘‘অসন্ত’’ন্তিপি পাঠো, অভূতন্তি অত্থো. পব্রূতীতি ভণতি ‘‘অমুকস্মিং নাম গামে ময্হং ঈদিসো ঘরৰিভৰো, এহি তত্থ গচ্ছাম, ঘরণী ¶ মে ভৰিস্সসি, ইদঞ্চিদঞ্চ তে দস্সামী’’তি পরভরিযং পরদাসিং ৰা ৰঞ্চেন্তো ধুত্তো ৰিয. নিজিগীসানোতি নিজিগীসমানো মগ্গমানো, তং ৰঞ্চেত্ৰা যংকিঞ্চি গহেত্ৰা পলাযিতুকামোতি অধিপ্পাযো.

১৩২. যো চত্তানন্তি যো চ অত্তানং. সমুক্কংসেতি জাতিআদীহি সমুক্কংসতি উচ্চট্ঠানে ঠপেতি. পরে চ মৰজানাতীতি তেহিযেৰ পরে অৰজানাতি, নীচং করোতি. ম-কারো পদসন্ধিকরো ¶ . নিহীনোতি গুণৰুড্ঢিতো পরিহীনো, অধমভাৰং ৰা গতো. সেন মানেনাতি তেন উক্কংসনাৰজাননসঙ্খাতেন অত্তনো মানেন.

১৩৩. রোসকোতি কাযৰাচাহি পরেসং রোসজনকো. কদরিযোতি থদ্ধমচ্ছরী, যো পরে পরেসং দেন্তে অঞ্ঞং ৰা পুঞ্ঞং করোন্তে ৰারেতি, তস্সেতং অধিৰচনং. পাপিচ্ছোতি অসন্তগুণসম্ভাৰনিচ্ছায সমন্নাগতো. মচ্ছরীতি আৰাসাদিমচ্ছরিযযুত্তো. সঠোতি অসন্তগুণপ্পকাসনলক্খণেন সাঠেয্যেন সমন্নাগতো, অসম্মাভাসী ৰা অকাতুকামোপি ‘‘করোমী’’তিআদিৰচনেন. নাস্স পাপজিগুচ্ছনলক্খণা হিরী, নাস্স উত্তাসনতো উব্বেগলক্খণং ওত্তপ্পন্তি অহিরিকো অনোত্তপ্পী.

১৩৪. বুদ্ধন্তি সম্মাসম্বুদ্ধং. পরিভাসতীতি ‘‘অসব্বঞ্ঞূ’’তিআদীহি অপৰদতি, সাৰকঞ্চ ‘‘দুপ্পটিপন্নো’’তিআদীহি. পরিব্বাজং গহট্ঠং ৰাতি সাৰকৰিসেসনমেৰেতং ¶ পব্বজিতং ৰা তস্স সাৰকং, গহট্ঠং ৰা পচ্চযদাযকন্তি অত্থো. বাহিরকং ৰা পরিব্বাজকং যংকিঞ্চি গহট্ঠং ৰা অভূতেন দোসেন পরিভাসতীতি এৰম্পেত্থ অত্থং ইচ্ছন্তি পোরাণা.

১৩৫. অনরহং সন্তোতি অখীণাসৰো সমানো. অরহং পটিজানাতীতি ‘‘অহং অরহা’’তি পটিজানাতি, যথা নং ‘‘অরহা অয’’ন্তি জানন্তি, তথা ৰাচং নিচ্ছারেতি, কাযেন পরক্কমতি, চিত্তেন ইচ্ছতি অধিৰাসেতি. চোরোতি থেনো. সব্রহ্মকে লোকেতি উক্কট্ঠৰসেন আহ – সব্বলোকেতি ৰুত্তং হোতি ¶ . লোকে হি সন্ধিচ্ছেদননিল্লোপহরণএকাগারিককরণপরিপন্থতিট্ঠনাদীহি পরেসং ধনং ৰিলুম্পন্তা চোরাতি ৰুচ্চন্তি. সাসনে পন পরিসসম্পত্তিআদীহি পচ্চযাদীনি ৰিলুম্পন্তা. যথাহ –

‘‘পঞ্চিমে, ভিক্খৰে, মহাচোরা সন্তো সংৰিজ্জমানা লোকস্মিং. কতমে পঞ্চ? ইধ, ভিক্খৰে, একচ্চস্স মহাচোরস্স এৰং হোতি ‘কুদাস্সু নামাহং সতেন ৰা সহস্সেন ৰা পরিৰুতো গামনিগমরাজধানীসু আহিণ্ডিস্সামি হনন্তো, ঘাতেন্তো, ছিন্দন্তো, ছেদাপেন্তো, পচন্তো পাচেন্তোতি, সো অপরেন সমযেন সতেন ৰা সহস্সেন ৰা পরিৰুতো গামনিগমরাজধানীসু আহিণ্ডতি হনন্তো…পে… পাচেন্তো. এৰমেৰ খো, ভিক্খৰে, ইধেকচ্চস্স পাপভিক্খুনো এৰং হোতি ‘কুদাস্সু নামাহং সতেন ৰা…পে… রাজধানীসু চারিকং চরিস্সামি সক্কতো, গরুকতো, মানিতো, পূজিতো, অপচিতো, গহট্ঠানঞ্চেৰ পব্বজিতানঞ্চ লাভী চীৰর…পে… পরিক্খারান’ন্তি. সো অপরেন ¶ সমযেন সতেন ৰা সহস্সেন ৰা পরিৰুতো গামনিগমরাজধানীসু চারিকং চরতি সক্কতো…পে… পরিক্খারানং. অযং, ভিক্খৰে, পঠমো মহাচোরো সন্তো সংৰিজ্জমানো লোকস্মিং.

‘‘পুন চপরং, ভিক্খৰে, ইধেকচ্চো পাপভিক্খু তথাগতপ্পৰেদিতং ধম্মৰিনযং পরিযাপুণিত্ৰা অত্তনো দহতি, অযং, ভিক্খৰে, দুতিযো…পে… লোকস্মিং.

‘‘পুন ¶ চপরং, ভিক্খৰে, ইধেকচ্চো পাপভিক্খু সুদ্ধং ব্রহ্মচারিং পরিসুদ্ধং ব্রহ্মচরিযং চরন্তং অমূলকেন অব্রহ্মচরিযেন অনুদ্ধংসেতি. অযং, ভিক্খৰে, ততিযো…পে… লোকস্মিং.

‘‘পুন চপরং, ভিক্খৰে, ইধেকচ্চো, পাপভিক্খু যানি তানি সঙ্ঘস্স গরুভণ্ডানি গরুপরিক্খারানি, সেয্যথিদং – আরামো, আরামৰত্থু, ৰিহারো, ৰিহারৰত্থু, মঞ্চো, পীঠং, ভিসি, বিম্বোহনং, লোহকুম্ভী, লোহভাণকং, লোহৰারকো, লোহকটাহং, ৰাসি, ফরসু, কুঠারী, কুদালো, নিখাদনং, ৰল্লি, ৰেল়ু, মুঞ্জং, পব্বজং, তিণং, মত্তিকা, দারুভণ্ডং, মত্তিকাভণ্ডং, তেহি গিহিং সঙ্গণ্হাতি উপলাপেতি. অযং, ভিক্খৰে, চতুত্থো…পে… লোকস্মিং.

‘‘সদেৰকে, ভিক্খৰে, লোকে…পে… সদেৰমনুস্সায অযং অগ্গো মহাচোরো, যো অসন্তং অভূতং উত্তরিমনুস্সধম্মং উল্লপতী’’তি (পারা. ১৯৫).

তত্থ লোকিযচোরা লোকিযমেৰ ধনধঞ্ঞাদিং থেনেন্তি. সাসনে ৰুত্তচোরেসু পঠমো তথারূপমেৰ চীৰরাদিপচ্চযমত্তং, দুতিযো পরিযত্তিধম্মং, ততিযো পরস্স ব্রহ্মচরিযং, চতুত্থো সঙ্ঘিকগরুভণ্ডং, পঞ্চমো ঝানসমাধিসমাপত্তিমগ্গফলপ্পভেদং লোকিযলোকুত্তরগুণধনং, লোকিযঞ্চ চীৰরাদিপচ্চযজাতং. যথাহ – ‘‘থেয্যায ৰো, ভিক্খৰে, রট্ঠপিণ্ডো ভুত্তো’’তি. তত্থ য্ৰাযং পঞ্চমো মহাচোরো, তং সন্ধাযাহ ভগৰা ‘‘চোরো সব্রহ্মকে লোকে’’তি. সো হি ‘‘সদেৰকে, ভিক্খৰে, লোকে…পে… সদেৰমনুস্সায অযং অগ্গো মহাচোরো, যো অসন্তং অভূতং উত্তরিমনুস্সধম্মং উল্লপতী’’তি (পারা. ১৯৫) এৰং লোকিযলোকুত্তরধনথেননতো অগ্গো মহাচোরোতি ৰুত্তো, তস্মা তং ইধাপি ‘‘সব্রহ্মকে লোকে’’তি ইমিনা উক্কট্ঠপরিচ্ছেদেন পকাসেসি.

এসো খো ৰসলাধমোতি. এত্থ খোতি অৰধারণত্থো, তেন এসো এৰ ৰসলাধমো. ৰসলানং ¶ হীনো সব্বপচ্ছিমকোতি অৰধারেতি. কস্মা? ৰিসিট্ঠৰত্থুম্হি থেয্যধম্মৰস্সনতো, যাৰ তং পটিঞ্ঞং ন ৰিস্সজ্জেতি, তাৰ অৰিগতৰসলকরণধম্মতো চাতি.

এতে ¶ খো ৰসলাতি. ইদানি যে তে পঠমগাথায আসযৰিপত্তিৰসেন ¶ কোধনাদযো পঞ্চ, পাপমক্খিং ৰা দ্ৰিধা কত্ৰা ছ, দুতিযগাথায পযোগৰিপত্তিৰসেন পাণহিংসকো একো, ততিযায পযোগৰিপত্তিৰসেনেৰ গামনিগমনিগ্গাহকো একো, চতুত্থায থেয্যাৰহারৰসেন একো, পঞ্চমায ইণৰঞ্চনৰসেন একো, ছট্ঠায পসয্হাৰহারৰসেন পন্থদূসকো একো, সত্তমায কূটসক্খিৰসেন একো, অট্ঠমায মিত্তদুব্ভিৰসেন একো, নৰমায অকতঞ্ঞুৰসেন একো, দসমায কতনাসনৰিহেসনৰসেন একো, একাদসমায হদযৰঞ্চনৰসেন একো, দ্ৰাদসমায পটিচ্ছন্নকম্মন্তৰসেন দ্ৰে, তেরসমায অকতঞ্ঞুৰসেন একো, চুদ্দসমায ৰঞ্চনৰসেন একো, পন্নরসমায ৰিহেসনৰসেন একো, সোল়সমায ৰঞ্চনৰসেন একো, সত্তরসমায অত্তুক্কংসনপরৰম্ভনৰসেন দ্ৰে, অট্ঠারসমায পযোগাসযৰিপত্তিৰসেন রোসকাদযো সত্ত, একূনৰীসতিমায পরিভাসনৰসেন দ্ৰে, ৰীসতিমায অগ্গমহাচোরৰসেন একোতি এৰং তেত্তিংস চতুত্তিংস ৰা ৰসলা ৰুত্তা. তে নিদ্দিসন্তো আহ ‘‘এতে খো ৰসলা ৰুত্তা, মযা যে তে পকাসিতা’’তি. তস্সত্থো – যে তে মযা পুব্বে ‘‘জানাসি পন ত্ৰং, ব্রাহ্মণ, ৰসল’’ন্তি এৰং সঙ্খেপতো ৰসলা ৰুত্তা, তে ৰিত্থারতো এতে খো পকাসিতাতি. অথ ৰা যে তে মযা পুগ্গলৰসেন ৰুত্তা, তে ধম্মৰসেনাপি এতে খো পকাসিতা. অথ ৰা এতে খো ৰসলা ৰুত্তা অরিযেহি কম্মৰসেন, ন জাতিৰসেন, মযা যে তে পকাসিতা ‘‘কোধনো উপনাহী’’তিআদিনা নযেন.

১৩৬. এৰং ভগৰা ৰসলং দস্সেত্ৰা ইদানি যস্মা ব্রাহ্মণো সকায দিট্ঠিযা অতীৰ অভিনিৰিট্ঠো হোতি, তস্মা তং দিট্ঠিং পটিসেধেন্তো আহ ‘‘ন জচ্চা ৰসলো হোতী’’তি. তস্সত্থো – পরমত্থতো হি ন জচ্চা ৰসলো হোতি, ন জচ্চা হোতি ব্রাহ্মণো, অপিচ খো কম্মুনা ৰসলো হোতি, কম্মুনা হোতি ব্রাহ্মণো, অপরিসুদ্ধকম্মৰস্সনতো ৰসলো হোতি, পরিসুদ্ধেন কম্মুনা অপরিসুদ্ধৰাহনতো ব্রাহ্মণো হোতি. যস্মা ৰা তুম্হে হীনং ৰসলং উক্কট্ঠং ¶ ব্রাহ্মণং ¶ মঞ্ঞিত্থ, তস্মা হীনেন কম্মুনা ৰসলো হোতি, উক্কট্ঠেন কম্মুনা ব্রাহ্মণো হোতীতি এৰম্পি অত্থং ঞাপেন্তো এৰমাহ.

১৩৭-১৩৯. ইদানি তমেৰত্থং নিদস্সনেন সাধেতুং ‘‘তদমিনাপি জানাথা’’তিআদিকা তিস্সো গাথাযো আহ. তাসু দ্ৰে চতুপ্পাদা, একা ছপ্পাদা, তাসং অত্থো – যং মযা ৰুত্তং ‘‘ন জচ্চা ৰসলো হোতী’’তিআদি, তদমিনাপি জানাথ, যথা মেদং নিদস্সনং, তং ইমিনাপি পকারেন ¶ জানাথ, যেন মে পকারেন যেন সামঞ্ঞেন ইদং নিদস্সনন্তি ৰুত্তং হোতি. কতমং নিদস্সনন্তি চে? চণ্ডালপুত্তো সোপাকো…পে… ব্রহ্মলোকূপপত্তিযাতি.

চণ্ডালস্স পুত্তো চণ্ডালপুত্তো. অত্তনো খাদনত্থায মতে সুনখে লভিত্ৰা পচতীতি সোপাকো. মাতঙ্গোতি এৰংনামো ৰিস্সুতোতি এৰং হীনায জাতিযা চ জীৰিকায চ নামেন চ পাকটো.

সোতি পুরিমপদেন সম্বন্ধিত্ৰা সো মাতঙ্গো যসং পরমং পত্তো, অব্ভুতং উত্তমং অতিৰিসিট্ঠং যসং কিত্তিং পসংসং পত্তো. যং সুদুল্লভন্তি যং উল়ারকুলূপপন্নেনাপি দুল্লভং, হীনকুলূপপন্নেন সুদুল্লভং. এৰং যসপ্পত্তস্স চ আগচ্ছুং তস্সুপট্ঠানং, খত্তিযা ব্রাহ্মণা বহূ, তস্স মাতঙ্গস্স পারিচরিযত্থং খত্তিযা চ ব্রাহ্মণা চ অঞ্ঞে চ বহূ ৰেস্সসুদ্দাদযো জম্বুদীপমনুস্সা যেভুয্যেন উপট্ঠানং আগমিংসূতি অত্থো.

এৰং উপট্ঠানসম্পন্নো সো মাতঙ্গো ৰিগতকিলেসরজত্তা ৰিরজং, মহন্তেহি বুদ্ধাদীহি পটিপন্নত্তা মহাপথং, ব্রহ্মলোকসঙ্খাতং দেৰলোকং যাপেতুং সমত্থত্তা দেৰলোকযানসঞ্ঞিতং অট্ঠসমাপত্তিযানং অভিরুয্হ, তায পটিপত্তিযা কামরাগং ৰিরাজেত্ৰা, কাযস্স ভেদা ব্রহ্মলোকূপগো অহু, সা তথা হীনাপি ন নং জাতি নিৰারেসি ব্রহ্মলোকূপপত্তিযা, ব্রহ্মলোকূপপত্তিতোতি ৰুত্তং হোতি.

অযং পনত্থো এৰং ৰেদিতব্বো – অতীতে কির মহাপুরিসো তেন তেনুপাযেন সত্তহিতং করোন্তো সোপাকজীৰিকে চণ্ডালকুলে উপ্পজ্জি. সো নামেন মাতঙ্গো ¶ , রূপেন দুদ্দসিকো হুত্ৰা বহিনগরে চম্মকুটিকায ৰসতি, অন্তোনগরে ভিক্খং চরিত্ৰা জীৰিকং কপ্পেতি. অথেকদিৰসং ¶ তস্মিং নগরে সুরানক্খত্তে ঘোসিতে ধুত্তা যথাসকেন পরিৰারেন কীল়ন্তি. অঞ্ঞতরাপি ব্রাহ্মণমহাসালধীতা পন্নরসসোল়সৰস্সুদ্দেসিকা দেৰকঞ্ঞা ৰিয রূপেন দস্সনীযা পাসাদিকা ‘‘অত্তনো কুলৰংসানুরূপং কীল়িস্সামী’’তি পহূতং খজ্জভোজ্জাদিকীল়নসম্ভারং সকটেসু আরোপেত্ৰা সব্বসেতৰল়ৰযুত্তং যানমারুয্হ মহাপরিৰারেন উয্যানভূমিং গচ্ছতি দিট্ঠমঙ্গলিকাতি নামেন. সা কির ‘‘দুস্সণ্ঠিতং রূপং অৰমঙ্গল’’ন্তি দট্ঠুং ন ইচ্ছতি, তেনস্সা দিট্ঠমঙ্গলিকাত্ৰেৰ সঙ্খা উদপাদি.

তদা সো মাতঙ্গো কালস্সেৰ ৰুট্ঠায পটপিলোতিকং নিৰাসেত্ৰা, কংসতাল়ং হত্থে বন্ধিত্ৰা, ভাজনহত্থো ¶ নগরং পৰিসতি, মনুস্সে দিস্ৰা দূরতো এৰ কংসতাল়ং আকোটেন্তো. অথ দিট্ঠমঙ্গলিকা ‘‘উস্সরথ, উস্সরথা’’তি পুরতো পুরতো হীনজনং অপনেন্তেহি পুরিসেহি নীযমানা নগরদ্ৰারমজ্ঝে মাতঙ্গং দিস্ৰা ‘‘কো এসো’’তি আহ. অহং মাতঙ্গচণ্ডালোতি. সা ‘‘ঈদিসং দিস্ৰা গতানং কুতো ৰুড্ঢী’’তি যানং নিৰত্তাপেসি. মনুস্সা ‘‘যং মযং উয্যানং গন্ত্ৰা খজ্জভোজ্জাদিং লভেয্যাম, তস্স নো মাতঙ্গেন অন্তরাযো কতো’’তি কুপিতা ‘‘গণ্হথ চণ্ডাল’’ন্তি লেড্ডূহি পহরিত্ৰা ‘‘মতো’’তি পাদে গহেত্ৰা একমন্তে ছড্ডেত্ৰা কচৰরেন পটিচ্ছাদেত্ৰা অগমংসু. সো সতিং পটিলভিত্ৰা উট্ঠায মনুস্সে পুচ্ছি – ‘‘কিং, অয্যা, দ্ৰারং নাম সব্বসাধারণং, উদাহু ব্রাহ্মণানংযেৰ কত’’ন্তি? মনুস্সা আহংসু – ‘‘সব্বেসং সাধারণ’’ন্তি. ‘‘এৰং সব্বসাধারণদ্ৰারেন পৰিসিত্ৰা ভিক্খাহারেন যাপেন্তং মং দিট্ঠমঙ্গলিকায মনুস্সা ইমং অনযব্যসনং পাপেসু’’ন্তি রথিকায রথিকং আহিণ্ডন্তো মনুস্সানং আরোচেত্ৰা ব্রাহ্মণস্স ঘরদ্ৰারে নিপজ্জি – ‘‘দিট্ঠমঙ্গলিকং অলদ্ধা ন ৰুট্ঠহিস্সামী’’তি.

ব্রাহ্মণো ‘‘ঘরদ্ৰারে মাতঙ্গো নিপন্নো’’তি সুত্ৰা ‘‘তস্স কাকণিকং দেথ, তেলেন অঙ্গং মক্খেত্ৰা গচ্ছতূ’’তি আহ. সো তং ন ইচ্ছতি, ‘‘দিট্ঠমঙ্গলিকং ¶ অলদ্ধা ন ৰুট্ঠহিস্সামি’’চ্চেৰ আহ. ততো ব্রাহ্মণো ‘‘দ্ৰে কাকণিকাযো দেথ, কাকণিকায পূৰং খাদতু, কাকণিকায ¶ তেলেন অঙ্গং মক্খেত্ৰা গচ্ছতূ’’তি আহ. সো তং ন ইচ্ছতি, তথেৰ ৰদতি. ব্রাহ্মণো সুত্ৰা ‘‘মাসকং দেথ, পাদং, উপড্ঢকহাপণং, কহাপণং দ্ৰে তীণী’’তি যাৰ সতং আণাপেসি. সো ন ইচ্ছতি, তথেৰ ৰদতি. এৰং যাচন্তানংযেৰ সূরিযো অত্থঙ্গতো. অথ ব্রাহ্মণী পাসাদা ওরুয্হ সাণিপাকারং পরিক্খিপাপেত্ৰা তং উপসঙ্কমিত্ৰা যাচি – ‘‘তাত মাতঙ্গ, দিট্ঠমঙ্গলিকায অপরাধং খম, সহস্সং গণ্হাহি, দ্ৰে তীণী’’তি যাৰ ‘‘সতসহস্সং গণ্হাহী’’তি আহ. সো তুণ্হীভূতো নিপজ্জিযেৰ.

এৰং চতূহপঞ্চাহে ৰীতিৰত্তে বহুম্পি পণ্ণাকারং দত্ৰা দিট্ঠমঙ্গলিকং অলভন্তা খত্তিযকুমারাদযো মাতঙ্গস্স উপকণ্ণকে আরোচাপেসুং – ‘‘পুরিসা নাম অনেকানিপি সংৰচ্ছরানি ৰীরিযং কত্ৰা ইচ্ছিতত্থং পাপুণন্তি, মা খো ত্ৰং নিব্বিজ্জি, অদ্ধা দ্ৰীহতীহচ্চযেন দিট্ঠমঙ্গলিকং লচ্ছসী’’তি. সো তুণ্হীভূতো নিপজ্জিযেৰ. অথ সত্তমে দিৰসে সমন্তা পটিৰিস্সকা উট্ঠহিত্ৰা ‘‘তুম্হে মাতঙ্গং ৰা উট্ঠাপেথ, দারিকং ৰা দেথ, মা অম্হে সব্বে নাসযিত্থা’’তি আহংসু. তেসং কির অযং দিট্ঠি ‘‘যস্স ঘরদ্ৰারে এৰং নিপন্নো চণ্ডালো মরতি, তস্স ঘরেন সহ সমন্তা সত্তসত্তঘরৰাসিনো চণ্ডালা হোন্তী’’তি. ততো দিট্ঠমঙ্গলিকং নীলপটপিলোতিকং নিৰাসাপেত্ৰা উল়ুঙ্ককল়োপিকাদীনি দত্ৰা পরিদেৰমানং তস্স সন্তিকং ¶ নেত্ৰা ‘‘গণ্হ দারিকং, উট্ঠায গচ্ছাহী’’তি অদংসু. সা পস্সে ঠত্ৰা ‘‘উট্ঠাহী’’তি আহ, সো ‘‘হত্থেন মং গহেত্ৰা উট্ঠাপেহী’’তি আহ. সা নং উট্ঠাপেসি. সো নিসীদিত্ৰা আহ – ‘‘মযং অন্তোনগরে ৰসিতুং ন লভাম, এহি মং বহিনগরে চম্মকুটিং নেহী’’তি. সা নং হত্থে গহেত্ৰা তত্থ নেসি. ‘‘পিট্ঠিযং আরোপেত্ৰা’’তি জাতকভাণকা. নেত্ৰা ¶ চস্স সরীরং তেলেন মক্খেত্ৰা, উণ্হোদকেন ন্হাপেত্ৰা, যাগুং পচিত্ৰা অদাসি. সো ‘‘ব্রাহ্মণকঞ্ঞা অযং মা ৰিনস্সী’’তি জাতিসম্ভেদং অকত্ৰাৰ অড্ঢমাসমত্তং বলং গহেত্ৰা ‘‘অহং ৰনং গচ্ছামি, ‘অতিচিরাযতী’তি মা ত্ৰং উক্কণ্ঠী’’তি ৰত্ৰা ঘরমানুসকানি চ ‘‘ইমং মা পমজ্জিত্থা’’তি আণাপেত্ৰা ঘরা নিক্খম্ম তাপসপব্বজ্জং পব্বজিত্ৰা, কসিণপরিকম্মং কত্ৰা, কতিপাহেনেৰ অট্ঠ সমাপত্তিযো পঞ্চ চ অভিঞ্ঞাযো নিব্বত্তেত্ৰা ‘‘ইদানাহং দিট্ঠমঙ্গলিকায ¶ মনাপো ভৰিস্সামী’’তি আকাসেনাগন্ত্ৰা নগরদ্ৰারে ওরোহিত্ৰা দিট্ঠমঙ্গলিকায সন্তিকং পেসেসি.

সা সুত্ৰা ‘‘কোচি মঞ্ঞে মম ঞাতকো পব্বজিতো মং দুক্খিতং ঞত্ৰা দট্ঠুং আগতো ভৰিস্সতী’’তি চিন্তযমানা গন্ত্ৰা, তং ঞত্ৰা, পাদেসু নিপতিত্ৰা ‘‘কিস্স মং অনাথং তুম্হে অকত্থা’’তি আহ. মহাপুরিসো ‘‘মা ত্ৰং দিট্ঠমঙ্গলিকে দুক্খিনী অহোসি, সকলজম্বুদীপৰাসীহি তে সক্কারং কারেস্সামী’’তি ৰত্ৰা এতদৰোচ – ‘‘গচ্ছ ত্ৰং ঘোসনং করোহি – ‘মহাব্রহ্মা মম সামিকো ন মাতঙ্গো, সো চন্দৰিমানং ভিন্দিত্ৰা সত্তমে দিৰসে মম সন্তিকং আগমিস্সতী’’’তি. সা আহ – ‘‘অহং, ভন্তে, ব্রাহ্মণমহাসালধীতা হুত্ৰা অত্তনো পাপকম্মেন ইমং চণ্ডালভাৰং পত্তা, ন সক্কোমি এৰং ৰত্তু’’ন্তি. মহাপুরিসো ‘‘ন ত্ৰং মাতঙ্গস্স আনুভাৰং জানাসী’’তি ৰত্ৰা যথা সা সদ্দহতি, তথা অনেকানি পাটিহারিযানি দস্সেত্ৰা তথেৰ তং আণাপেত্ৰা অত্তনো ৰসতিং অগমাসি. সা তথা অকাসি.

মনুস্সা উজ্ঝাযন্তি হসন্তি – ‘‘কথঞ্হি নামাযং অত্তনো পাপকম্মেন চণ্ডালভাৰং পত্ৰা পুন তং মহাব্রহ্মানং করিস্সতী’’তি. সা অধিমানা এৰ হুত্ৰা দিৰসে দিৰসে ঘোসন্তী নগরং আহিণ্ডতি ‘‘ইতো ছট্ঠে দিৰসে, পঞ্চমে, চতুত্থে, ততিযে, সুৰে, অজ্জ আগমিস্সতী’’তি. মনুস্সা ¶ তস্সা ৰিস্সত্থৰাচং সুত্ৰা ‘‘কদাচি এৰম্পি সিযা’’তি অত্তনো অত্তনো ঘরদ্ৰারেসু মণ্ডপং কারাপেত্ৰা, সাণিপাকারং সজ্জেত্ৰা, ৰযপ্পত্তা দারিকাযো অলঙ্করিত্ৰা ‘‘মহাব্রহ্মনি আগতে কঞ্ঞাদানং দস্সামা’’তি আকাসং উল্লোকেন্তা নিসীদিংসু. অথ মহাপুরিসো পুণ্ণমদিৰসে গগনতলং উপারূল়্হে চন্দে চন্দৰিমানং ফালেত্ৰা পস্সতো মহাজনস্স মহাব্রহ্মরূপেন নিগ্গচ্ছি. মহাজনো ‘‘দ্ৰে চন্দা জাতা’’তি অতিমঞ্ঞি. ততো অনুক্কমেন আগতং দিস্ৰা ‘‘সচ্চং দিট্ঠমঙ্গলিকা আহ, মহাব্রহ্মাৰ অযং দিট্ঠমঙ্গলিকং দমেতুং ¶ পুব্বে মাতঙ্গৰেসেনাগচ্ছী’’তি নিট্ঠং অগমাসি. এৰং সো মহাজনেন দিস্সমানো দিট্ঠমঙ্গলিকায ৰসনট্ঠানে এৰ ওতরি. সা চ তদা উতুনী অহোসি. সো তস্সা নাভিং অঙ্গুট্ঠকেন পরামসি. তেন ফস্সেন গব্ভো পতিট্ঠাসি. ততো নং ‘‘গব্ভো তে সণ্ঠিতো ¶ , পুত্তম্হি জাতে তং নিস্সায জীৰাহী’’তি ৰত্ৰা পস্সতো মহাজনস্স পুন চন্দৰিমানং পাৰিসি.

ব্রাহ্মণা ‘‘দিট্ঠমঙ্গলিকা মহাব্রহ্মুনো পজাপতি অম্হাকং মাতা জাতা’’তি ৰত্ৰা ততো ততো আগচ্ছন্তি. তং সক্কারং কাতুকামানং মনুস্সানং সম্পীল়নেন নগরদ্ৰারানি অনোকাসানি অহেসুং. তে দিট্ঠমঙ্গলিকং হিরঞ্ঞরাসিম্হি ঠপেত্ৰা, ন্হাপেত্ৰা, মণ্ডেত্ৰা, রথং আরোপেত্ৰা, মহাসক্কারেন নগরং পদক্খিণং কারাপেত্ৰা, নগরমজ্ঝে মণ্ডপং কারাপেত্ৰা, তত্র নং ‘‘মহাব্রহ্মুনো পজাপতী’’তি দিট্ঠট্ঠানে ঠপেত্ৰা ৰসাপেন্তি ‘‘যাৰস্সা পতিরূপং ৰসনোকাসং করোম, তাৰ ইধেৰ ৰসতূ’’তি. সা মণ্ডপে এৰ পুত্তং ৰিজাযি. তং ৰিসুদ্ধদিৰসে সদ্ধিং পুত্তেন সসীসং ন্হাপেত্ৰা মণ্ডপে জাতোতি দারকস্স ‘‘মণ্ডব্যকুমারো’’তি নামং অকংসু. ততো পভুতি চ নং ব্রাহ্মণা ‘‘মহাব্রহ্মুনো পুত্তো’’তি পরিৰারেত্ৰা চরন্তি. ততো অনেকসতসহস্সপ্পকারা পণ্ণাকারা আগচ্ছন্তি, তে ব্রাহ্মণা কুমারস্সারক্খং ¶ ঠপেসুং, আগতা লহুং কুমারং দট্ঠুং ন লভন্তি.

কুমারো অনুপুব্বেন ৰুড্ঢিমন্ৰায দানং দাতুং আরদ্ধো. সো সালায সম্পত্তানং কপণদ্ধিকানং অদত্ৰা ব্রাহ্মণানংযেৰ দেতি. মহাপুরিসো ‘‘কিং মম পুত্তো দানং দেতী’’তি আৰজ্জেত্ৰা ব্রাহ্মণানংযেৰ দানং দেন্তং দিস্ৰা ‘‘যথা সব্বেসং দস্সতি, তথা করিস্সামী’’তি চীৰরং পারুপিত্ৰা পত্তং গহেত্ৰা আকাসেন আগম্ম পুত্তস্স ঘরদ্ৰারে অট্ঠাসি. কুমারো তং দিস্ৰা ‘‘কুতো অযং এৰং ৰিরূপৰেসো ৰসলো আগতো’’তি কুদ্ধো ইমং গাথমাহ –

‘‘কুতো নু আগচ্ছসি দুম্মৰাসী, ওতল্লকো পংসুপিসাচকোৰ;

সঙ্কারচোল়ং পটিমুঞ্চ কণ্ঠে, কো রে তুৰং হোসি অদক্খিণেয্যো’’তি.

ব্রাহ্মণা ‘‘গণ্হথ গণ্হথা’’তি তং গহেত্ৰা আকোটেত্ৰা অনযব্যসনং পাপেসুং. সো আকাসেন গন্ত্ৰা বহিনগরে পচ্চট্ঠাসি ¶ . দেৰতা কুপিতা কুমারং গলে গহেত্ৰা উদ্ধংপাদং অধোসিরং ঠপেসুং. সো অক্খীহি নিগ্গতেহি মুখেন খেল়ং পগ্ঘরন্তেন ঘরুঘরুপস্সাসী দুক্খং ৰেদযতি. দিট্ঠমঙ্গলিকা সুত্ৰা ‘‘কোচি আগতো অত্থী’’তি পুচ্ছি. ‘‘আম, পব্বজিতো আগচ্ছী’’তি. ‘‘কুহিং গতো’’তি? ‘‘এৰং গতো’’তি. সা তত্থ গন্ত্ৰা ‘‘খমথ, ভন্তে, অত্তনো ¶ দাসস্সা’’তি যাচন্তী তস্স পাদমূলে ভূমিযা নিপজ্জি. তেন চ সমযেন মহাপুরিসো পিণ্ডায চরিত্ৰা, যাগুং লভিত্ৰা, তং পিৰন্তো তত্থ নিসিন্নো হোতি, সো অৰসিট্ঠং থোকং যাগুং দিট্ঠমঙ্গলিকায অদাসি. ‘‘গচ্ছ ইমং যাগুং উদককুম্ভিযা আলোলেত্ৰা যেসং ভূতৰিকারো অত্থি, তেসং অক্খিমুখকণ্ণনাসাবিলেসু আসিঞ্চ, সরীরঞ্চ পরিপ্ফোসেহি, এৰং নিব্বিকারা ভৰিস্সন্তী’’তি. সা তথা অকাসি. ততো ¶ কুমারে পকতিসরীরে জাতে ‘‘এহি, তাত মণ্ডব্য, তং খমাপেস্সামা’’তি পুত্তঞ্চ সব্বে ব্রাহ্মণে চ তস্স পাদমূলে নিক্কুজ্জিত্ৰা নিপজ্জাপেত্ৰা খমাপেসি.

সো ‘‘সব্বজনস্স দানং দাতব্ব’’ন্তি ওৰদিত্ৰা, ধম্মকথং কত্ৰা, অত্তনো ৰসনট্ঠানংযেৰ গন্ত্ৰা, চিন্তেসি ‘‘ইত্থীসু পাকটা দিট্ঠমঙ্গলিকা দমিতা, পুরিসেসু পাকটো মণ্ডব্যকুমারো, ইদানি কো দমেতব্বো’’তি. ততো জাতিমন্ততাপসং অদ্দস বন্ধুমতীনগরং নিস্সায কুম্ভৰতীনদীতীরে ৰিহরন্তং. সো ‘‘অহং জাতিযা ৰিসিট্ঠো, অঞ্ঞেহি পরিভুত্তোদকং ন পরিভুঞ্জামী’’তি উপরিনদিযা ৰসতি. মহাপুরিসো তস্স উপরিভাগে ৰাসং কপ্পেত্ৰা তস্স উদকপরিভোগৰেলাযং দন্তকট্ঠং খাদিত্ৰা উদকে পক্খিপি. তাপসো তং উদকেন ৰুয্হমানং দিস্ৰা ‘‘কেনিদং খিত্ত’’ন্তি পটিসোতং গন্ত্ৰা মহাপুরিসং দিস্ৰা ‘‘কো এত্থা’’তি আহ. ‘‘মাতঙ্গচণ্ডালো, আচরিযা’’তি. ‘‘অপেহি, চণ্ডাল, মা উপরিনদিযা ৰসী’’তি. মহাপুরিসো ‘‘সাধু, আচরিযা’’তি হেট্ঠানদিযা ৰসতি, পটিসোতম্পি দন্তকট্ঠং তাপসস্স সন্তিকং আগচ্ছতি. তাপসো পুন গন্ত্ৰা ‘‘অপেহি, চণ্ডাল, মা হেট্ঠানদিযং ৰস, উপরিনদিযাযেৰ ৰসা’’তি আহ. মহাপুরিসো ‘‘সাধু, আচরিযা’’তি তথা অকাসি, পুনপি তথেৰ অহোসি. তাপসো পুনপি ‘‘তথা করোতী’’তি দুট্ঠো মহাপুরিসং সপি ‘‘সূরিযস্স তে উগ্গমনৰেলায সত্তধা মুদ্ধা ফলতূ’’তি. মহাপুরিসোপি ‘‘সাধু, আচরিয, অহং পন সূরিযুট্ঠানং ন দেমী’’তি ৰত্ৰা সূরিযুট্ঠানং নিৰারেসি ¶ . ততো রত্তি ন ৰিভাযতি, অন্ধকারো জাতো, ভীতা বন্ধুমতীৰাসিনো তাপসস্স সন্তিকং গন্ত্ৰা ‘‘অত্থি নু খো, আচরিয, অম্হাকং সোত্থিভাৰো’’তি পুচ্ছিংসু. তে হি তং ‘‘অরহা’’তি মঞ্ঞন্তি. সো তেসং সব্বমাচিক্খি. তে মহাপুরিসং উপসঙ্কমিত্ৰা ¶ ‘‘সূরিযং, ভন্তে, মুঞ্চথা’’তি যাচিংসু. মহাপুরিসো ‘‘যদি তুম্হাকং অরহা আগন্ত্ৰা মং খমাপেতি, মুঞ্চামী’’তি আহ.

মনুস্সা গন্ত্ৰা তাপসং আহংসু – ‘‘এহি, ভন্তে, মাতঙ্গপণ্ডিতং খমাপেহি, মা তুম্হাকং কলহকারণা মযং নস্সিম্হা’’তি. সো ‘‘নাহং চণ্ডালং খমাপেমী’’তি আহ. মনুস্সা ‘‘অম্হে ত্ৰং নাসেসী’’তি তং হত্থপাদেসু গহেত্ৰা মহাপুরিসস্স সন্তিকং নেসুং. মহাপুরিসো ‘‘মম পাদমূলে ¶ কুচ্ছিযা নিপজ্জিত্ৰা খমাপেন্তে খমামী’’তি আহ. মনুস্সা ‘‘এৰং করোহী’’তি আহংসু. তাপসো ‘‘নাহং চণ্ডালং ৰন্দামী’’তি. মনুস্সা ‘‘তৰ ছন্দেন ন ৰন্দিস্সসী’’তি হত্থপাদমস্সুগীৰাদীসু গহেত্ৰা মহাপুরিসস্স পাদমূলে সযাপেসুং. সো ‘‘খমামহং ইমস্স, অপিচাহং তস্সেৰানুকম্পায সূরিযং ন মুঞ্চামি, সূরিযে হি উগ্গতমত্তে মুদ্ধা অস্স সত্তধা ফলিস্সতী’’তি আহ. মনুস্সা ‘‘ইদানি, ভন্তে, কিং কাতব্ব’’ন্তি আহংসু. মহাপুরিসো ‘‘তেন হি ইমং গলপ্পমাণে উদকে ঠপেত্ৰা মত্তিকাপিণ্ডেনস্স সীসং পটিচ্ছাদেথ, সূরিযরস্মীহি ফুট্ঠো মত্তিকাপিণ্ডো সত্তধা ফলিস্সতি. তস্মিং ফলিতে এস অঞ্ঞত্র গচ্ছতূ’’তি আহ. তে তাপসং হত্থপাদাদীসু গহেত্ৰা তথা অকংসু. সূরিযে মুঞ্চিতমত্তে মত্তিকাপিণ্ডো সত্তধা ফলিত্ৰা পতি, তাপসো ভীতো পলাযি. মনুস্সা দিস্ৰা ‘‘পস্সথ, ভো, সমণস্স আনুভাৰ’’ন্তি দন্তকট্ঠপক্খিপনমাদিং কত্ৰা সব্বং ৰিত্থারেত্ৰা ‘‘নত্থি ঈদিসো সমণো’’তি তস্মিং পসীদিংসু. ততো পভুতি সকলজম্বুদীপে খত্তিযব্রাহ্মণাদযো গহট্ঠপব্বজিতা মাতঙ্গপণ্ডিতস্স উপট্ঠানং অগমংসু. সো যাৰতাযুকং ঠত্ৰা কাযস্স ভেদা ব্রহ্মলোকে উপ্পজ্জি. তেনাহ ভগৰা ‘‘তদমিনাপি জানাথ…পে… ব্রহ্মলোকূপপত্তিযা’’তি.

১৪০-১৪১. এৰং ‘‘ন জচ্চা ৰসলো হোতি, কম্মুনা ৰসলো হোতী’’তি সাধেত্ৰা ¶ ইদানি ‘‘ন জচ্চা হোতি ব্রাহ্মণো, কম্মুনা হোতি ব্রাহ্মণো’’তি এতং সাধেতুং আহ ‘‘অজ্ঝাযককুলে জাতা ¶ …পে… দুগ্গত্যা গরহায ৰা’’তি. তত্থ অজ্ঝাযককুলে জাতাতি মন্তজ্ঝাযকে ব্রাহ্মণকুলে জাতা. ‘‘অজ্ঝাযকাকুল়ে জাতা’’তিপি পাঠো. মন্তানং অজ্ঝাযকে অনুপকুট্ঠে চ ব্রাহ্মণকুলে জাতাতি অত্থো. মন্তা বন্ধৰা এতেসন্তি মন্তবন্ধৰা. ৰেদবন্ধূ ৰেদপটিস্সরণাতি ৰুত্তং হোতি. তে চ পাপেসু কম্মেসু অভিণ্হমুপদিস্সরেতি তে এৰং কুলে জাতা মন্তবন্ধৰা চ সমানাপি যদি পাণাতিপাতাদীসু পাপকম্মেসু পুনপ্পুনং উপদিস্সন্তি, অথ দিট্ঠেৰ ধম্মে গারয্হা সম্পরাযে চ দুগ্গতি তে এৰমুপদিস্সমানা ইমস্মিংযেৰ অত্তভাৰে মাতাপিতূহিপি ‘‘নযিমে অম্হাকং পুত্তা, দুজ্জাতা এতে কুলস্স অঙ্গারভূতা, নিক্কড্ঢথ নে’’তি, ব্রাহ্মণেহিপি ‘‘গহপতিকা এতে, ন এতে ব্রাহ্মণা, মা নেসং সদ্ধযঞ্ঞথালিপাকাদীসু পৰেসং দেথ, মা নেহি সদ্ধিং সল্লপথা’’তি, অঞ্ঞেহিপি মনুস্সেহি ‘‘পাপকম্মন্তা এতে, ন এতে ব্রাহ্মণা’’তি এৰং গারয্হা হোন্তি. সম্পরাযে চ নেসং দুগ্গতি নিরযাদিভেদা, দুগ্গতি এতেসং পরলোকে হোতীতি অত্থো. সম্পরাযে ৰাতিপি পাঠো. পরলোকে এতেসং দুক্খস্স গতি দুগ্গতি, দুক্খপ্পত্তিযেৰ হোতীতি অত্থো. ন নে জাতি নিৰারেতি, দুগ্গত্যা গরহায ৰাতি সা তথা উক্কট্ঠাপি যং ত্ৰং সারতো পচ্চেসি, জাতি এতে পাপকম্মেসু পদিস্সন্তে ব্রাহ্মণে ‘‘সম্পরাযে ¶ চ দুগ্গতী’’তি এত্থ ৰুত্তপ্পকারায দুগ্গতিযা ৰা, ‘‘দিট্ঠেৰ ধম্মে গারয্হা’’তি এত্থ ৰুত্তপ্পকারায গরহায ৰা ন নিৰারেতি.

১৪২. এৰং ভগৰা অজ্ঝাযককুলে জাতানম্পি ব্রাহ্মণানং গারয্হাদিকম্মৰসেন দিট্ঠেৰ ধম্মে পতিতভাৰং দীপেন্তো দুগ্গতিগমনেন চ সম্পরাযে ব্রাহ্মণজাতিযা অভাৰং দীপেন্তো ‘‘ন জচ্চা হোতি ব্রাহ্মণো, কম্মুনা হোতি ব্রাহ্মণো’’তি এতম্পি অত্থং সাধেত্ৰা ইদানি দুৰিধম্পি অত্থং নিগমেন্তো আহ, এৰং ব্রাহ্মণ –

‘‘ন জচ্চা ৰসলো হোতি, ন জচ্চা হোতি ব্রাহ্মণো;

কম্মুনা ৰসলো হোতি, কম্মুনা হোতি ব্রাহ্মণো’’তি.

সেসং ¶ কসিভারদ্ৰাজসুত্তে ৰুত্তনযমেৰ. ৰিসেসতো ৰা এত্থ নিক্কুজ্জিতং ৰাতিআদীনং এৰং যোজনা ৰেদিতব্বা – যথা কোচি নিক্কুজ্জিতং ৰা ¶ উক্কুজ্জেয্য, এৰং মং কম্মৰিমুখং জাতিৰাদে পতিতং ‘‘জাতিযা ব্রাহ্মণৰসলভাৰো হোতী’’তি দিট্ঠিতো ৰুট্ঠাপেন্তেন, যথা পটিচ্ছন্নং ৰিৰরেয্য, এৰং জাতিৰাদপটিচ্ছন্নং কম্মৰাদং ৰিৰরন্তেন, যথা মূল়্হস্স মগ্গং আচিক্খেয্য, এৰং ব্রাহ্মণৰসলভাৰস্স অসম্ভিন্নউজুমগ্গং আচিক্খন্তেন, যথা অন্ধকারে ৰা তেলপজ্জোতং ধারেয্য, এৰং মাতঙ্গাদিনিদস্সনপজ্জোতধারণেন ময্হং ভোতা গোতমেন এতেহি পরিযাযেহি পকাসিতত্তা অনেকপরিযাযেন ধম্মো পকাসিতোতি.

পরমত্থজোতিকায খুদ্দক-অট্ঠকথায

সুত্তনিপাত-অট্ঠকথায অগ্গিকভারদ্ৰাজসুত্তৰণ্ণনা নিট্ঠিতা.

৮. মেত্তসুত্তৰণ্ণনা

করণীযমত্থকুসলেনাতি ¶ মেত্তসুত্তং. কা উপ্পত্তি? হিমৰন্তপস্সতো কির দেৰতাহি উব্বাল়্হা ভিক্খূ ভগৰতো সন্তিকং সাৰত্থিং আগচ্ছিংসু. তেসং ভগৰা পরিত্তত্থায কম্মট্ঠানত্থায চ ইমং সুত্তং অভাসি. অযং তাৰ সঙ্খেপো.

অযং পন ৰিত্থারো – একং সমযং ভগৰা সাৰত্থিযং ৰিহরতি উপকট্ঠায ৰস্সূপনাযিকায. তেন খো পন সমযেন সম্বহুলা নানাৰেরজ্জকা ভিক্খূ ভগৰতো সন্তিকে কম্মট্ঠানং গহেত্ৰা তত্থ তত্থ ৰস্সং উপগন্তুকামা ভগৰন্তং উপসঙ্কমন্তি. তত্র সুদং ভগৰা রাগচরিতানং সৰিঞ্ঞাণকাৰিঞ্ঞাণকৰসেন একাদসৰিধং অসুভকম্মট্ঠানং, দোসচরিতানং চতুব্বিধং মেত্তাদিকম্মট্ঠানং, মোহচরিতানং মরণস্সতিকম্মট্ঠানাদীনি, ৰিতক্কচরিতানং আনাপানস্সতিপথৰীকসিণাদীনি, সদ্ধাচরিতানং বুদ্ধানুস্সতিকম্মট্ঠানাদীনি, বুদ্ধিচরিতানং চতুধাতুৰৰত্থনাদীনীতি ইমিনা নযেন চতুরাসীতিসহস্সপ্পভেদচরিতানুকূলানি কম্মট্ঠানানি কথেতি.

অথ খো পঞ্চমত্তানি ভিক্খুসতানি ভগৰতো সন্তিকে কম্মট্ঠানং উগ্গহেত্ৰা সপ্পাযসেনাসনঞ্চ গোচরগামঞ্চ পরিযেসমানানি অনুপুব্বেন গন্ত্ৰা ¶ পচ্চন্তে হিমৰন্তেন সদ্ধিং একাবদ্ধং নীলকাচমণিসন্নিভসিলাতলং সীতলঘনচ্ছাযনীলৰনসণ্ডমণ্ডিতং মুত্তাতলরজতপট্টসদিসৰালুকাকিণ্ণভূমিভাগং সুচিসাতসীতলজলাসযপরিৰারিতং পব্বতমদ্দসংসু. অথ খো তে ভিক্খূ তত্থেকরত্তিং ৰসিত্ৰা পভাতায রত্তিযা সরীরপরিকম্মং কত্ৰা তস্স অৰিদূরে অঞ্ঞতরং গামং পিণ্ডায পৰিসিংসু. গামো ঘননিৰেসসন্নিৰিট্ঠকুলসহস্সযুত্তো, মনুস্সা চেত্থ সদ্ধা পসন্না, তে পচ্চন্তে পব্বজিতদস্সনস্স দুল্লভতায ভিক্খূ দিস্ৰা এৰ পীতিসোমনস্সজাতা হুত্ৰা তে ভিক্খূ ভোজেত্ৰা ‘‘ইধেৰ, ভন্তে, তেমাসং ৰসথা’’তি যাচিত্ৰা পঞ্চপধানকুটিসতানি কারাপেত্ৰা তত্থ মঞ্চপীঠপানীযপরিভোজনীযঘটাদীনি সব্বূপকরণানি পটিযাদেসুং.

ভিক্খূ দুতিযদিৰসে অঞ্ঞং গামং পিণ্ডায পৰিসিংসু. তত্থাপি মনুস্সা তথেৰ উপট্ঠহিত্ৰা ৰস্সাৰাসং যাচিংসু. ভিক্খূ ‘‘অসতি অন্তরাযে’’তি অধিৰাসেত্ৰা তং ৰনসণ্ডং পৰিসিত্ৰা সব্বরত্তিন্দিৰং আরদ্ধৰীরিযা হুত্ৰা যামগণ্ডিকং কোট্টেত্ৰা যোনিসোমনসিকারবহুলা ৰিহরন্তা রুক্খমূলানি উপগন্ত্ৰা নিসীদিংসু. সীলৰন্তানং ভিক্খূনং তেজেন ৰিহততেজা রুক্খদেৰতা ¶ অত্তনো অত্তনো ৰিমানা ওরুয্হ দারকে গহেত্ৰা ইতো চিতো চ ৰিচরন্তি. সেয্যথাপি নাম রাজূহি ৰা রাজমহামত্তেহি ৰা গামকাৰাসং গতেহি গামৰাসীনং ঘরেসু ওকাসে গহিতে ঘরমানুসকা ঘরা নিক্খমিত্ৰা অঞ্ঞত্র ৰসন্তা ‘‘কদা নু খো গমিস্সন্তী’’তি দূরতো ওলোকেন্তি; এৰমেৰ দেৰতা অত্তনো অত্তনো ৰিমানানি ছড্ডেত্ৰা ইতো চিতো চ ৰিচরন্তিযো দূরতোৰ ওলোকেন্তি – ‘‘কদা নু খো ভদন্তা গমিস্সন্তী’’তি. ততো এৰং সমচিন্তেসুং ‘‘পঠমৰস্সূপগতা ভিক্খূ অৰস্সং তেমাসং ৰসিস্সন্তি. মযং পন তাৰ চিরং দারকে গহেত্ৰা ওক্কম্ম ৰসিতুং ন সক্খিস্সাম. হন্দ মযং ভিক্খূনং ভযানকং আরম্মণং দস্সেমা’’তি. তা রত্তিং ভিক্খূনং সমণধম্মকরণৰেলায ভিংসনকানি যক্খরূপানি নিম্মিনিত্ৰা পুরতো পুরতো তিট্ঠন্তি, ভেরৰসদ্দঞ্চ করোন্তি. ভিক্খূনং তানি রূপানি পস্সন্তানং তঞ্চ সদ্দং সুণন্তানং হদযং ফন্দি, দুব্বণ্ণা চ অহেসুং উপ্পণ্ডুপণ্ডুকজাতা. তেন তে চিত্তং একগ্গং কাতুং নাসক্খিংসু. তেসং অনেকগ্গচিত্তানং ভযেন চ পুনপ্পুনং সংৰিগ্গানং সতি সম্মুস্সি. ততো নেসং মুট্ঠস্সতীনং দুগ্গন্ধানি আরম্মণানি পযোজেসুং. তেসং তেন ¶ দুগ্গন্ধেন নিম্মথিযমানমিৰ মত্থলুঙ্গং অহোসি, বাল়্হা সীসৰেদনা উপ্পজ্জিংসু, ন চ তং পৰত্তিং অঞ্ঞমঞ্ঞস্স আরোচেসুং.

অথেকদিৰসং সঙ্ঘত্থেরস্স উপট্ঠানকালে সব্বেসু সন্নিপতিতেসু সঙ্ঘত্থেরো পুচ্ছি – ‘‘তুম্হাকং, আৰুসো, ইমং ৰনসণ্ডং পৰিট্ঠানং কতিপাহং অতিৰিয পরিসুদ্ধো ছৰিৰণ্ণো অহোসি পরিযোদাতো, ৰিপ্পসন্নানি চ ইন্দ্রিযানি এতরহি পনত্থ কিসা দুব্বণ্ণা উপ্পণ্ডুপণ্ডুকজাতা, কিং ৰো ইধ অসপ্পায’’ন্তি? ততো একো ভিক্খু আহ – ‘‘অহং, ভন্তে, রত্তিং ঈদিসঞ্চ ঈদিসঞ্চ ভেরৰারম্মণং পস্সামি চ সুণামি চ, ঈদিসঞ্চ গন্ধং ঘাযামি, তেন মে চিত্তং ন সমাধিযতী’’তি. এতেনেৰ উপাযেন সব্বে তং পৰত্তিং আরোচেসুং. সঙ্ঘত্থেরো আহ – ‘‘ভগৰতা আৰুসো দ্ৰে ৰস্সূপনাযিকা পঞ্ঞত্তা, অম্হাকঞ্চ ইদং সেনাসনং অসপ্পাযং, আযামাৰুসো ভগৰতো সন্তিকং, গন্ত্ৰা অঞ্ঞং সপ্পাযং সেনাসনং পুচ্ছামা’’তি. ‘‘সাধু ভন্তে’’তি তে ভিক্খূ থেরস্স পটিস্সুণিত্ৰা সব্বে সেনাসনং সংসামেত্ৰা পত্তচীৰরমাদায অনুপলিত্তত্তা কুলেসু কঞ্চি অনামন্তেত্ৰা এৰ যেন সাৰত্থি তেন চারিকং পক্কমিংসু. অনুপুব্বেন সাৰত্থিং গন্ত্ৰা ভগৰতো সন্তিকং অগমিংসু.

ভগৰা তে ভিক্খূ দিস্ৰা এতদৰোচ – ‘‘ন, ভিক্খৰে, অন্তোৰস্সং চারিকা চরিতব্বাতি মযা সিক্খাপদং পঞ্ঞত্তং, কিস্স তুম্হে চারিকং চরথা’’তি. তে ভগৰতো সব্বং আরোচেসুং. ভগৰা আৰজ্জেন্তো সকলজম্বুদীপে অন্তমসো চতুপ্পাদপীঠকট্ঠানমত্তম্পি তেসং সপ্পাযং সেনাসনং নাদ্দস. অথ তে ভিক্খূ আহ – ‘‘ন, ভিক্খৰে, তুম্হাকং অঞ্ঞং সপ্পাযং সেনাসনং অত্থি, তত্থেৰ তুম্হে ৰিহরন্তা আসৰক্খযং পাপুণেয্যাথ. গচ্ছথ, ভিক্খৰে, তমেৰ সেনাসনং ¶ উপনিস্সায ৰিহরথ. সচে পন দেৰতাহি অভযং ইচ্ছথ, ইমং পরিত্তং উগ্গণ্হথ, এতঞ্হি ৰো পরিত্তঞ্চ কম্মট্ঠানঞ্চ ভৰিস্সতী’’তি ইমং সুত্তমভাসি.

অপরে পনাহু – ‘‘গচ্ছথ, ভিক্খৰে, তমেৰ সেনাসনং উপনিস্সায ৰিহরথা’’তি ইদঞ্চ ৰত্ৰা ভগৰা আহ – ‘‘অপিচ খো আরঞ্ঞকেন পরিহরণং ঞাতব্বং. সেয্যথিদং – সাযংপাতং করণৰসেন দ্ৰে মেত্তা, দ্ৰে পরিত্তা, দ্ৰে অসুভা, দ্ৰে মরণস্সতী অট্ঠ মহাসংৰেগৰত্থুসমাৰজ্জনঞ্চ. অট্ঠ মহাসংৰেগৰত্থূনি নাম জাতি জরা ব্যাধি মরণং চত্তারি অপাযদুক্খানীতি ¶ . অথ ৰা জাতিজরাব্যাধিমরণানি চত্তারি, অপাযদুক্খং পঞ্চমং, অতীতে ৰট্টমূলকং দুক্খং, অনাগতে ৰট্টমূলকং দুক্খং, পচ্চুপ্পন্নে আহারপরিযেট্ঠিমূলকং দুক্খ’’ন্তি. এৰং ভগৰা পরিহরণং আচিক্খিত্ৰা তেসং ভিক্খূনং মেত্তত্থঞ্চ পরিত্তত্থঞ্চ ৰিপস্সনাপাদকঝানত্থঞ্চ ইমং সুত্তং অভাসীতি.

১৪৩. তত্থ করণীযমত্থকুসলেনাতি ইমিস্সা পঠমগাথায তাৰ অযং পদৰণ্ণনা – করণীযন্তি কাতব্বং, করণারহন্তি অত্থো. অত্থোতি পটিপদা, যং ৰা কিঞ্চি অত্তনো হিতং, তং সব্বং অরণীযতো অত্থোতি ৰুচ্চতি, অরণীযতো নাম উপগন্তব্বতো. অত্থে কুসলেন অত্থকুসলেন, অত্থছেকেনাতি ৰুত্তং হোতি. যন্তি অনিযমিতপচ্চত্তং. ন্তি নিযমিতউপযোগং. উভযম্পি ৰা যং তন্তি পচ্চত্তৰচনং. সন্তং পদন্তি উপযোগৰচনং. তত্থ লক্খণতো সন্তং, পত্তব্বতো পদং, নিব্বানস্সেতং অধিৰচনং. অভিসমেচ্চাতি অভিসমাগন্ত্ৰা. সক্কোতীতি সক্কো, সমত্থো পটিবলোতি ৰুত্তং হোতি. উজূতি অজ্জৰযুত্তো. সুট্ঠু উজূতি সুহুজু. সুখং ৰচো অস্মিন্তি সুৰচো. অস্সাতি ভৰেয্য. মুদূতি মদ্দৰযুত্তো. ন অতিমানীতি অনতিমানী.

অযং পনেত্থ অত্থৰণ্ণনা – করণীযমত্থকুসলেন যন্ত সন্তং পদং অভিসমেচ্চাতি. এত্থ তাৰ অত্থি করণীযং, অত্থি অকরণীযং. তত্থ সঙ্খেপতো সিক্খত্তযং করণীযং, সীলৰিপত্তি, দিট্ঠিৰিপত্তি, আচারৰিপত্তি, আজীৰৰিপত্তীতি এৰমাদি অকরণীযং. তথা অত্থি অত্থকুসলো, অত্থি অনত্থকুসলো.

তত্থ যো ইমস্মিং সাসনে পব্বজিত্ৰা ন অত্তানং সম্মা পযোজেতি, খণ্ডসীলো হোতি, একৰীসতিৰিধং অনেসনং নিস্সায জীৰিকং কপ্পেতি. সেয্যথিদং – ৰেল়ুদানং, পত্তদানং, পুপ্ফদানং, ফলদানং, দন্তকট্ঠদানং, মুখোদকদানং, সিনানদানং, চুণ্ণদানং, মত্তিকাদানং, চাটুকম্যতং, মুগ্গসূপ্যতং, পারিভটুতং, জঙ্ঘপেসনিযং, ৰেজ্জকম্মং, দূতকম্মং, পহিণগমনং, পিণ্ডপটিপিণ্ডদানানুপ্পদানং, ৰত্থুৰিজ্জং, নক্খত্তৰিজ্জং, অঙ্গৰিজ্জন্তি. ছব্বিধে চ অগোচরে চরতি ¶ . সেয্যথিদং – ৰেসিযগোচরে ৰিধৰাথুল্লকুমারিকপণ্ডকভিক্খুনিপানাগারগোচরেতি. সংসট্ঠো চ ¶ ৰিহরতি রাজূহি রাজমহামত্তেহি তিত্থিযেহি তিত্থিযসাৰকেহি অননুলোমিকেন গিহিসংসগ্গেন. যানি ৰা পন তানি কুলানি অসদ্ধানি অপ্পসন্নানি অনোপানভূতানি অক্কোসকপরিভাসকানি অনত্থকামানি অহিতঅফাসুকঅযোগক্খেমকামানি ভিক্খূনং…পে… উপাসিকানং, তথারূপানি কুলানি সেৰতি ভজতি পযিরুপাসতি. অযং অনত্থকুসলো.

যো পন ইমস্মিং সাসনে পব্বজিত্ৰা অত্তানং সম্মা পযোজেতি, অনেসনং পহায চতুপারিসুদ্ধিসীলে পতিট্ঠাতুকামো সদ্ধাসীসেন পাতিমোক্খসংৰরং, সতিসীসেন ইন্দ্রিযসংৰরং, ৰীরিযসীসেন আজীৰপারিসুদ্ধিং, পঞ্ঞাসীসেন পচ্চযপটিসেৰনং পূরেতি অযং অত্থকুসলো.

যো ৰা সত্তাপত্তিক্খন্ধসোধনৰসেন পাতিমোক্খসংৰরং, ছদ্ৰারে ঘট্টিতারম্মণেসু অভিজ্ঝাদীনং অনুপ্পত্তিৰসেন ইন্দ্রিযসংৰরং, অনেসনপরিৰজ্জনৰসেন ৰিঞ্ঞুপসত্থবুদ্ধবুদ্ধসাৰকৰণ্ণিতপচ্চযপটিসেৰনেন চ আজীৰপারিসুদ্ধিং, যথাৰুত্তপচ্চৰেক্খণৰসেন পচ্চযপটিসেৰনং, চতুইরিযাপথপরিৰত্তনে সাত্থকাদীনং পচ্চৰেক্খণৰসেন সম্পজঞ্ঞঞ্চ সোধেতি, অযম্পি অত্থকুসলো.

যো ৰা যথা ঊসোদকং পটিচ্চ সংকিলিট্ঠং ৰত্থং পরিযোদাযতি, ছারিকং পটিচ্চ আদাসো, উক্কামুখং পটিচ্চ জাতরূপং, তথা ঞাণং পটিচ্চ সীলং ৰোদাযতীতি ঞত্ৰা ঞাণোদকেন ধোৰন্তো সীলং পরিযোদাপেতি. যথা চ কিকী সকুণিকা অণ্ডং, চমরীমিগো ৰালধিং, একপুত্তিকা নারী পিযং একপুত্তকং, একনযনো পুরিসো তং একনযনং রক্খতি, তথা অতিৰিয অপ্পমত্তো অত্তনো সীলক্খন্ধং রক্খতি, সাযংপাতং পচ্চৰেক্খমানো অণুমত্তম্পি ৰজ্জং ন পস্সতি, অযম্পি অত্থকুসলো.

যো ৰা পন অৰিপ্পটিসারকরসীলে পতিট্ঠায কিলেসৰিক্খম্ভনপটিপদং পগ্গণ্হাতি, তং পগ্গহেত্ৰা কসিণপরিকম্মং করোতি, কসিণপরিকম্মং কত্ৰা সমাপত্তিযো নিব্বত্তেতি, অযম্পি অত্থকুসলো. যো ৰা পন সমাপত্তিতো ¶ ৰুট্ঠায সঙ্খারে সম্মসিত্ৰা অরহত্তং পাপুণাতি, অযং অত্থকুসলানং অগ্গো.

তত্থ যে ইমে যাৰ অৰিপ্পটিসারকরসীলে পতিট্ঠানেন, যাৰ ৰা কিলেসৰিক্খম্ভনপটিপদায পগ্গহণেন মগ্গফলেন ৰণ্ণিতা অত্থকুসলা, তে ইমস্মিং অত্থে অত্থকুসলাতি অধিপ্পেতা. তথাৰিধা চ তে ভিক্খূ. তেন ভগৰা তে ভিক্খূ সন্ধায একপুগ্গলাধিট্ঠানায দেসনায ‘‘করণীযমত্থকুসলেনা’’তি আহ.

ততো ¶ ‘‘কিং করণীয’’ন্তি তেসং সঞ্জাতকঙ্খানং আহ ‘‘যন্ত সন্তং পদং অভিসমেচ্চা’’তি. অযমেত্থ অধিপ্পাযো – তং বুদ্ধানুবুদ্ধেহি ৰণ্ণিতং সন্তং নিব্বানপদং পটিৰেধৰসেন অভিসমেচ্চ ৰিহরিতুকামেন যং করণীযন্তি. এত্থ চ যন্তি ইমস্স গাথাপাদস্স আদিতো ৰুত্তমেৰ করণীযন্তি. অধিকারতো অনুৰত্ততি তং সন্তং পদং অভিসমেচ্চাতি. অযং পন যস্মা সাৰসেসপাঠো অত্থো, তস্মা ‘‘ৰিহরিতুকামেনা’’তি ৰুত্তন্তি ৰেদিতব্বং.

অথ ৰা সন্তং পদং অভিসমেচ্চাতি অনুস্সৰাদিৰসেন লোকিযপঞ্ঞায নিব্বানপদং সন্তন্তি ঞত্ৰা তং অধিগন্তুকামেন যন্তং করণীযন্তি অধিকারতো অনুৰত্ততি, তং করণীযমত্থকুসলেনাতি এৰম্পেত্থ অধিপ্পাযো ৰেদিতব্বো. অথ ৰা ‘‘করণীযমত্থকুসলেনা’’তি ৰুত্তে ‘‘কি’’ন্তি চিন্তেন্তানং আহ ‘‘যন্ত সন্তং পদং অভিসমেচ্চা’’তি. তস্সেৰং অধিপ্পাযো ৰেদিতব্বো – লোকিযপঞ্ঞায সন্তং পদং অভিসমেচ্চ যং করণীযং, তন্তি. যং কাতব্বং, তং করণীযং, করণারহমেৰ তন্তি ৰুত্তং হোতি.

কিং পন তন্তি? কিমঞ্ঞং সিযা অঞ্ঞত্র তদধিগমূপাযতো. কামঞ্চেতং করণারহত্থেন সিক্খত্তযদীপকেন আদিপদেনেৰ ৰুত্তং. তথা হি তস্স অত্থৰণ্ণনাযং অৰোচুম্হা ‘‘অত্থি করণীযং অত্থি অকরণীযং. তত্থ সঙ্খেপতো সিক্খত্তযং করণীয’’ন্তি. অতিসঙ্খেপদেসিতত্তা পন তেসং ভিক্খূনং কেহিচি ৰিঞ্ঞাতং, কেহিচি ন ৰিঞ্ঞাতং. ততো যেহি ন ৰিঞ্ঞাতং, তেসং ৰিঞ্ঞাপনত্থং যং ৰিসেসতো আরঞ্ঞকেন ভিক্খুনা কাতব্বং, তং ৰিত্থারেন্তো ¶ ‘‘সক্কো উজূ চ সুহুজূ চ, সুৰচো চস্স মুদু অনতিমানী’’তি ইমং তাৰ উপড্ঢগাথং আহ.

কিং ৰুত্তং হোতি? সন্তং পদং অভিসমেচ্চ ৰিহরিতুকামো লোকিযপঞ্ঞায ৰা তং অভিসমেচ্চ তদধিগমায পটিপজ্জমানো আরঞ্ঞকো ভিক্খু দুতিযচতুত্থপধানিযঙ্গসমন্নাগমেন কাযে চ জীৰিতে চ অনপেক্খো হুত্ৰা সচ্চপটিৰেধায পটিপজ্জিতুং সক্কো অস্স, তথা কসিণপরিকম্মৰত্তসমাদানাদীসু, অত্তনো পত্তচীৰরপটিসঙ্খরণাদীসু চ যানি তানি সব্রহ্মচারীনং উচ্চাৰচানি কিং করণীযানি, তেসু অঞ্ঞেসু চ এৰরূপেসু সক্কো অস্স দক্খো অনলসো সমত্থো. সক্কো হোন্তোপি চ ততিযপধানিযঙ্গসমন্নাগমেন উজু অস্স. উজু হোন্তোপি চ সকিং উজুভাৰেন সন্তোসং অনাপজ্জিত্ৰা যাৰজীৰং পুনপ্পুনং অসিথিলকরণেন সুট্ঠুতরং উজু অস্স. অসঠতায ৰা উজু, অমাযাৰিতায সুহুজু. কাযৰচীৰঙ্কপ্পহানেন ৰা উজু, মনোৰঙ্কপ্পহানেন সুহুজু. অসন্তগুণস্স ৰা অনাৰিকরণেন উজু, অসন্তগুণেন উপ্পন্নস্স লাভস্স অনধিৰাসনেন সুহুজু. এৰং আরম্মণলক্খণূপনিজ্ঝানেহি পুরিমদ্ৰযততিযসিক্খাহি পযোগাসযসুদ্ধীহি চ উজু চ সুহুজু চ অস্স.

ন ¶ কেৰলঞ্চ উজু চ সুহুজু চ, অপিচ পন সুব্বচো চ অস্স. যো হি পুগ্গলো ‘‘ইদং ন কাতব্ব’’ন্তি ৰুত্তো ‘‘কিং তে দিট্ঠং, কিং তে সুতং, কো মে হুত্ৰা ৰদসি, কিং উপজ্ঝাযো আচরিযো সন্দিট্ঠো সম্ভত্তো ৰা’’তি ৰদতি, তুণ্হীভাৰেন ৰা তং ৰিহেঠেতি, সম্পটিচ্ছিত্ৰা ৰা ন তথা করোতি, সো ৰিসেসাধিগমস্স দূরে হোতি. যো পন ওৰদিযমানো ‘‘সাধু, ভন্তে, সুট্ঠু ৰুত্তং, অত্তনো ৰজ্জং নাম দুদ্দসং হোতি, পুনপি মং এৰরূপং দিস্ৰা ৰদেয্যাথ অনুকম্পং উপাদায, চিরস্সং মে তুম্হাকং সন্তিকা ওৰাদো লদ্ধো’’তি ৰদতি, যথানুসিট্ঠঞ্চ পটিপজ্জতি, সো ৰিসেসাধিগমস্স অৰিদূরে হোতি. তস্মা এৰং পরস্স ৰচনং সম্পটিচ্ছিত্ৰা করোন্তো সুব্বচো চ অস্স.

যথা চ সুৰচো, এৰং মুদু অস্স. মুদূতি গহট্ঠেহি দূতগমনপ্পহিণগমনাদীসু নিযুঞ্জিযমানো তত্থ মুদুভাৰং অকত্ৰা থদ্ধো হুত্ৰা ৰত্তপটিপত্তিযং সকলব্রহ্মচরিযে চ মুদু অস্স সুপরিকম্মকতসুৰণ্ণং ৰিয তত্থ তত্থ ৰিনিযোগক্খমো. অথ ৰা মুদূতি অভাকুটিকো উত্তানমুখো সুখসম্ভাসো ¶ পটিসন্থারৰুত্তি সুতিত্থং ৰিয সুখাৰগাহো অস্স. ন কেৰলঞ্চ মুদু, অপিচ পন অনতিমানী অস্স, জাতিগোত্তাদীহি অতিমানৰত্থূহি পরে নাতিমঞ্ঞেয্য, সারিপুত্তত্থেরো ৰিয চণ্ডালকুমারকসমেন চেতসা ৰিহরেয্যাতি.

১৪৪. এৰং ভগৰা সন্তং পদং অভিসমেচ্চ ৰিহরিতুকামস্স তদধিগমায ৰা পটিপজ্জমানস্স ৰিসেসতো আরঞ্ঞকস্স ভিক্খুনো একচ্চং করণীযং ৰত্ৰা পুন ততুত্তরিপি ৰত্তুকামো ‘‘সন্তুস্সকো চা’’তি দুতিযং গাথমাহ.

তত্থ ‘‘সন্তুট্ঠী চ কতঞ্ঞুতা’’তি এত্থ ৰুত্তপ্পভেদেন দ্ৰাদসৰিধেন সন্তোসেন সন্তুস্সতীতি সন্তুস্সকো. অথ ৰা তুস্সতীতি তুস্সকো, সকেন তুস্সকো, সন্তেন তুস্সকো, সমেন তুস্সকোতি সন্তুস্সকো. তত্থ সকং নাম ‘‘পিণ্ডিযালোপভোজনং নিস্সাযা’’তি (মহাৰ. ৭৩) এৰং উপসম্পদমাল়কে উদ্দিট্ঠং অত্তনা চ সম্পটিচ্ছিতং চতুপচ্চযজাতং. তেন সুন্দরেন ৰা অসুন্দরেন ৰা সক্কচ্চং ৰা অসক্কচ্চং ৰা দিন্নেন পটিগ্গহণকালে পরিভোগকালে চ ৰিকারমদস্সেত্ৰা যাপেন্তো ‘‘সকেন তুস্সকো’’তি ৰুচ্চতি. সন্তং নাম যং লদ্ধং হোতি অত্তনো ৰিজ্জমানং, তেন সন্তেনেৰ তুস্সন্তো ততো পরং ন পত্থেন্তো অত্রিচ্ছতং পজহন্তো ‘‘সন্তেন তুস্সকো’’তি ৰুচ্চতি. সমং নাম ইট্ঠানিট্ঠেসু অনুনযপটিঘপ্পহানং. তেন সমেন সব্বারম্মণেসু তুস্সন্তো ‘‘সমেন তুস্সকো’’তি ৰুচ্চতি.

সুখেন ভরীযতীতি সুভরো, সুপোসোতি ৰুত্তং হোতি. যো হি ভিক্খু সালিমংসোদনাদীনং পত্তে পূরেত্ৰা দিন্নেপি দুম্মুখভাৰং অনত্তমনভাৰমেৰ চ দস্সেতি, তেসং ৰা সম্মুখাৰ তং পিণ্ডপাতং ¶ ‘‘কিং তুম্হেহি দিন্ন’’ন্তি অপসাদেন্তো সামণেরগহট্ঠাদীনং দেতি, এস দুব্ভরো. এতং দিস্ৰা মনুস্সা দূরতোৰ পরিৰজ্জেন্তি ‘‘দুব্ভরো ভিক্খু ন সক্কা পোসিতু’’ন্তি. যো পন যংকিঞ্চি লূখং ৰা পণীতং ৰা অপ্পং ৰা বহুং ৰা লভিত্ৰা অত্তমনো ৰিপ্পসন্নমুখো হুত্ৰা যাপেতি, এস সুভরো. এতং দিস্ৰা মনুস্সা অতিৰিয ৰিস্সত্থা হোন্তি – ‘‘অম্হাকং ভদন্তো সুভরো থোকথোকেনপি ¶ তুস্সতি, মযমেৰ নং পোসেস্সামা’’তি পটিঞ্ঞং কত্ৰা পোসেন্তি. এৰরূপো ইধ সুভরোতি অধিপ্পেতো.

অপ্পং কিচ্চমস্সাতি অপ্পকিচ্চো, ন কম্মারামতাভস্সারামতাসঙ্গণিকারামতাদিঅনেককিচ্চব্যাৰটো. অথ ৰা সকলৰিহারে নৰকম্মসঙ্ঘভোগসামণেরআরামিকৰোসাসনাদিকিচ্চৰিরহিতো, অত্তনো কেসনখচ্ছেদনপত্তচীৰরপরিকম্মাদিং কত্ৰা সমণধম্মকিচ্চপরো হোতীতি ৰুত্তং হোতি.

সল্লহুকা ৰুত্তি অস্সাতি সল্লহুকৰুত্তি. যথা একচ্চো বহুভণ্ডো ভিক্খু দিসাপক্কমনকালে বহুং পত্তচীৰরপচ্চত্থরণতেলগুল়াদিং মহাজনেন সীসভারকটিভারাদীহি উচ্চারাপেত্ৰা পক্কমতি, এৰং অহুত্ৰা যো অপ্পপরিক্খারো হোতি, পত্তচীৰরাদিঅট্ঠসমণপরিক্খারমত্তমেৰ পরিহরতি, দিসাপক্কমনকালে পক্খী সকুণো ৰিয সমাদাযেৰ পক্কমতি, এৰরূপো ইধ সল্লহুকৰুত্তীতি অধিপ্পেতো. সন্তানি ইন্দ্রিযানি অস্সাতি সন্তিন্দ্রিযো, ইট্ঠারম্মণাদীসু রাগাদিৰসেন অনুদ্ধতিন্দ্রিযোতি ৰুত্তং হোতি. নিপকোতি ৰিঞ্ঞূ ৰিভাৰী পঞ্ঞৰা, সীলানুরক্খণপঞ্ঞায চীৰরাদিৰিচারণপঞ্ঞায আৰাসাদিসত্তসপ্পাযপরিজাননপঞ্ঞায চ সমন্নাগতোতি অধিপ্পাযো.

ন পগব্ভোতি অপ্পগব্ভো, অট্ঠট্ঠানেন কাযপাগব্ভিযেন, চতুট্ঠানেন ৰচীপাগব্ভিযেন, অনেকট্ঠানেন মনোপাগব্ভিযেন চ ৰিরহিতোতি অত্থো.

অট্ঠট্ঠানং কাযপাগব্ভিযং (মহানি. ৮৭) নাম সঙ্ঘগণপুগ্গলভোজনসালাজন্তাঘরন্হানতিত্থভিক্খাচারমগ্গঅন্তরঘরপৰেসনেসু কাযেন অপ্পতিরূপকরণং. সেয্যথিদং – ইধেকচ্চো সঙ্ঘমজ্ঝে পল্লত্থিকায ৰা নিসীদতি, পাদে পাদমোদহিত্ৰা ৰাতি এৰমাদি, তথা গণমজ্ঝে, গণমজ্ঝেতি চতুপরিসসন্নিপাতে, তথা ৰুড্ঢতরে পুগ্গলে. ভোজনসালাযং পন ৰুড্ঢানং আসনং ন দেতি, নৰানং আসনং পটিবাহতি, তথা জন্তাঘরে. ৰুড্ঢে চেত্থ অনাপুচ্ছা অগ্গিজালনাদীনি করোতি. ন্হানতিত্থে চ যদিদং ‘‘দহরো ৰুড্ঢোতি পমাণং অকত্ৰা আগতপটিপাটিযা ন্হাযিতব্ব’’ন্তি ৰুত্তং ¶ , তম্পি অনাদিযন্তো পচ্ছা আগন্ত্ৰা উদকং ওতরিত্ৰা ৰুড্ঢে চ নৰে চ বাধেতি. ভিক্খাচারমগ্গে পন অগ্গাসনঅগ্গোদকঅগ্গপিণ্ডত্থং ৰুড্ঢানং পুরতো পুরতো যাতি বাহায ¶ বাহং পহরন্তো, অন্তরঘরপ্পৰেসনে ৰুড্ঢানং পঠমতরং পৰিসতি, দহরেহি কাযকীল়নং করোতীতি এৰমাদি.

চতুট্ঠানং ৰচীপাগব্ভিযং নাম সঙ্ঘগণপুগ্গলঅন্তরঘরেসু অপ্পতিরূপৰাচানিচ্ছারণং. সেয্যথিদং – ইধেকচ্চো সঙ্ঘমজ্ঝে অনাপুচ্ছা ধম্মং ভাসতি, তথা পুব্বে ৰুত্তপ্পকারে গণে ৰুড্ঢতরে পুগ্গলে চ. তত্থ মনুস্সেহি পঞ্হং পুট্ঠো ৰুড্ঢতরং অনাপুচ্ছা ৰিস্সজ্জেতি. অন্তরঘরে পন ‘‘ইত্থন্নামে কিং অত্থি, কিং যাগু উদাহু খাদনীযং ভোজনীযং, কিং মে দস্সসি, কিমজ্জ খাদিস্সামি, কিং ভুঞ্জিস্সামি, কিং পিৰিস্সামী’’তি এদমাদিং ভাসতি.

অনেকট্ঠানং মনোপাগব্ভিযং নাম তেসু তেসু ঠানেসু কাযৰাচাহি অজ্ঝাচারং অনাপজ্জিত্ৰাপি মনসা এৰ কামৰিতক্কাদিনানপ্পকারঅপ্পতিরূপৰিতক্কনং.

কুলেস্ৰননুগিদ্ধোতি যানি কুলানি উপসঙ্কমতি, তেসু পচ্চযতণ্হায ৰা অননুলোমিযগিহিসংসগ্গৰসেন ৰা অননুগিদ্ধো, ন সহসোকী, ন সহনন্দী, ন সুখিতেসু সুখিতো, ন দুক্খিতেসু দুক্খিতো, ন উপ্পন্নেসু কিচ্চকরণীযেসু অত্তনা ৰা যোগমাপজ্জিতাতি ৰুত্তং হোতি. ইমিস্সা চ গাথায যং ‘‘সুৰচো চস্সা’’তি এত্থ ৰুত্তং ‘‘অস্সা’’তি ৰচনং, তং সব্বপদেহি সদ্ধিং ‘‘সন্তুস্সকো চ অস্স, সুভরো চ অস্সা’’তি এৰং যোজেতব্বং.

১৪৫. এৰং ভগৰা সন্তং পদং অভিসমেচ্চ ৰিহরিতুকামস্স তদধিগমায ৰা পটিপজ্জিতুকামস্স ৰিসেসতো আরঞ্ঞকস্স ভিক্খুনো ততুত্তরিপি করণীযং আচিক্খিত্ৰা ইদানি অকরণীযম্পি আচিক্খিতুকামো ‘‘ন চ খুদ্দমাচরে কিঞ্চি, যেন ৰিঞ্ঞূ পরে উপৰদেয্যু’’ন্তি ইমং উপড্ঢগাথমাহ. তস্সত্থো – এৰমিমং করণীযং করোন্তো যং তং কাযৰচীমনোদুচ্চরিতং খুদ্দং লামকন্তি ৰুচ্চতি, তং ন চ খুদ্দং সমাচরে. অসমাচরন্তো চ ন কেৰলং ওল়ারিকং, কিং পন কিঞ্চি ন সমাচরে, অপ্পমত্তকং অণুমত্তম্পি ন সমাচরেতি ৰুত্তং হোতি.

ততো ¶ তস্স সমাচারে সন্দিট্ঠিকমেৰাদীনৰং দস্সেতি ‘‘যেন ৰিঞ্ঞূ পরে উপৰদেয্যু’’ন্তি. এত্থ চ যস্মা অৰিঞ্ঞূ পরে অপ্পমাণং. তে হি অনৰজ্জং ৰা সাৰজ্জং করোন্তি, অপ্পসাৰজ্জং ৰা মহাসাৰজ্জং. ৰিঞ্ঞূ এৰ পন পমাণং. তে হি অনুৰিচ্চ পরিযোগাহেত্ৰা অৰণ্ণারহস্স অৰণ্ণং ভাসন্তি, ৰণ্ণারহস্স চ ৰণ্ণং ভাসন্তি, তস্মা ‘‘ৰিঞ্ঞূ পরে’’তি ৰুত্তং.

এৰং ভগৰা ইমাহি অড্ঢতেয্যাহি গাথাহি সন্তং পদং অভিসমেচ্চ ৰিহরিতুকামস্স, তদধিগমায ¶ ৰা পটিপজ্জিতুকামস্স ৰিসেসতো আরঞ্ঞকস্স আরঞ্ঞকসীসেন চ সব্বেসম্পি কম্মট্ঠানং গহেত্ৰা ৰিহরিতুকামানং করণীযাকরণীযভেদং কম্মট্ঠানূপচারং ৰত্ৰা ইদানি তেসং ভিক্খূনং তস্স দেৰতাভযস্স পটিঘাতায পরিত্তত্থং ৰিপস্সনাপাদকজ্ঝানৰসেন কম্মট্ঠানত্থঞ্চ ‘‘সুখিনো ৰ খেমিনো হোন্তূ’’তিআদিনা নযেন মেত্তকথং কথেতুমারদ্ধো.

তত্থ সুখিনোতি সুখসমঙ্গিনো. খেমিনোতি খেমৰন্তো, অভযা নিরুপদ্দৰাতি ৰুত্তং হোতি. সব্বেতি অনৰসেসা. সত্তাতি পাণিনো. সুখিতত্তাতি সুখিতচিত্তা. এত্থ চ কাযিকেন সুখেন সুখিনো, মানসেন সুখিতত্তা, তদুভযেনাপি সব্বভযূপদ্দৰৰিগমেন ৰা খেমিনোতি ৰেদিতব্বা. কস্মা পন এৰং ৰুত্তং? মেত্তাভাৰনাকারদস্সনত্থং. এৰঞ্হি মেত্তা ভাৰেতব্বা ‘‘সব্বে সত্তা সুখিনো হোন্তূ’’তি ৰা, ‘‘খেমিনো হোন্তূ’’তি ৰা, ‘‘সুখিতত্তা হোন্তূ’’তি ৰা.

১৪৬. এৰং যাৰ উপচারতো অপ্পনাকোটি, তাৰ সঙ্খেপেন মেত্তাভাৰনং দস্সেত্ৰা ইদানি ৰিত্থারতোপি তং দস্সেতুং ‘‘যে কেচী’’তি গাথাদ্ৰযমাহ. অথ ৰা যস্মা পুথুত্তারম্মণে পরিচিতং চিত্তং ন আদিকেনেৰ একত্তে সণ্ঠাতি, আরম্মণপ্পভেদং পন অনুগন্ত্ৰা কমেন সণ্ঠাতি, তস্মা তস্স তসথাৰরাদিদুকতিকপ্পভেদে আরম্মণে অনুগন্ত্ৰা অনুগন্ত্ৰা সণ্ঠানত্থম্পি ‘‘যে কেচী’’তি গাথাদ্ৰযমাহ. অথ ৰা যস্মা যস্স যং আরম্মণং ৰিভূতং হোতি, তস্স তত্থ চিত্তং সুখং তিট্ঠতি. তস্মা তেসং ভিক্খূনং যস্স যং ৰিভূতং আরম্মণং, তস্স তত্থ চিত্তং সণ্ঠাপেতুকামো তসথাৰরাদিদুকত্তিকআরম্মণপ্পভেদদীপকং ‘‘যে কেচী’’তি ইমং গাথাদ্ৰযমাহ.

এত্থ ¶ হি তসথাৰরদুকং দিট্ঠাদিট্ঠদুকং দূরসন্তিকদুকং ভূতসম্ভৰেসিদুকন্তি চত্তারি দুকানি, দীঘাদীহি চ ছহি পদেহি মজ্ঝিমপদস্স তীসু, অণুকপদস্স চ দ্ৰীসু তিকেসু অত্থসম্ভৰতো দীঘরস্সমজ্ঝিমত্তিকং মহন্তাণুকমজ্ঝিমত্তিকং থূলাণুকমজ্ঝিমত্তিকন্তি তযো তিকে দীপেতি. তত্থ যে কেচীতি অনৰসেসৰচনং. পাণা এৰ ভূতা পাণভূতা. অথ ৰা পাণন্তীতি পাণা. এতেন অস্সাসপস্সাসপটিবদ্ধে পঞ্চৰোকারসত্তে গণ্হাতি. ভৰন্তীতি ভূতা. এতেন একৰোকারচতুৰোকারসত্তে গণ্হাতি. অত্থীতি সন্তি, সংৰিজ্জন্তি.

এৰং ‘‘যে কেচি পাণভূতত্থী’’তি ইমিনা ৰচনেন দুকত্তিকেহি সঙ্গহেতব্বে সব্বে সত্তে একজ্ঝং দস্সেত্ৰা ইদানি সব্বেপি তে তসা ৰা থাৰরা ৰা অনৰসেসাতি ইমিনা দুকেন সঙ্গহেত্ৰা দস্সেতি.

তত্থ তসন্তীতি তসা, সতণ্হানং সভযানঞ্চেতং অধিৰচনং. তিট্ঠন্তীতি থাৰরা, পহীনতণ্হাভযানং অরহতং এতং অধিৰচনং. নত্থি তেসং অৰসেসন্তি অনৰসেসা, সব্বেপীতি ৰুত্তং ¶ হোতি. যঞ্চ দুতিযগাথায অন্তে ৰুত্তং, তং সব্বদুকতিকেহি সম্বন্ধিতব্বং – যে কেচি পাণভূতত্থি তসা ৰা থাৰরা ৰা অনৰসেসা, ইমেপি সব্বে সত্তা ভৰন্তু সুখিতত্তা. এৰং যাৰ ভূতা ৰা সম্ভৰেসী ৰা ইমেপি সব্বে সত্তা ভৰন্তু সুখিতত্তাতি.

ইদানি দীঘরস্সমজ্ঝিমাদিতিকত্তযদীপকেসু দীঘা ৰাতিআদীসু ছসু পদেসু দীঘাতি দীঘত্তভাৰা নাগমচ্ছগোধাদযো. অনেকব্যামসতপ্পমাণাপি হি মহাসমুদ্দে নাগানং অত্তভাৰা অনেকযোজনপ্পমাণাপি মচ্ছগোধাদীনং অত্তভাৰা হোন্তি. মহন্তাতি মহন্তত্তভাৰা জলে মচ্ছকচ্ছপাদযো, থলে হত্থিনাগাদযো, অমনুস্সেসু দানৰাদযো. আহ চ – ‘‘রাহুগ্গং অত্তভাৰীন’’ন্তি (অ. নি. ৪.১৫). তস্স হি অত্তভাৰো উব্বেধেন চত্তারি যোজনসহস্সানি অট্ঠ চ যোজনসতানি, বাহূ দ্ৰাদসযোজনসতপরিমাণা, পঞ্ঞাসযোজনং ভমুকন্তরং, তথা অঙ্গুলন্তরিকা, হত্থতলানি দ্ৰে যোজনসতানীতি. মজ্ঝিমাতি অস্সগোণমহিংসসূকরাদীনং অত্তভাৰা. রস্সকাতি তাসু তাসু জাতীসু ৰামনাদযো দীঘমজ্ঝিমেহি ওমকপ্পমাণা সত্তা. অণুকাতি মংসচক্খুস্স ¶ অগোচরা, দিব্বচক্খুৰিসযা উদকাদীসু নিব্বত্তা সুখুমত্তভাৰা সত্তা, ঊকাদযো ৰা. অপিচ যে তাসু তাসু জাতীসু মহন্তমজ্ঝিমেহি থূলমজ্ঝিমেহি চ ওমকপ্পমাণা সত্তা, তে অণুকাতি ৰেদিতব্বা. থূলাতি পরিমণ্ডলত্তভাৰা মচ্ছকুম্মসিপ্পিকসম্বুকাদযো সত্তা.

১৪৭. এৰং তীহি তিকেহি অনৰসেসতো সত্তে দস্সেত্ৰা ইদানি ‘‘দিট্ঠা ৰা যেৰ অদিট্ঠা’’তিআদীহি তীহি দুকেহিপি তে সঙ্গহেত্ৰা দস্সেতি.

তত্থ দিট্ঠাতি যে অত্তনো চক্খুস্স আপাথমাগতৰসেন দিট্ঠপুব্বা. অদিট্ঠাতি যে পরসমুদ্দপরসেলপরচক্কৰাল়াদীসু ঠিতা. ‘‘যেৰ দূরে ৰসন্তি অৰিদূরে’’তি ইমিনা পন দুকেন অত্তনো অত্তভাৰস্স দূরে চ অৰিদূরে চ ৰসন্তে সত্তে দস্সেতি. তে উপাদাযুপাদাৰসেন ৰেদিতব্বা. অত্তনো হি কাযে ৰসন্তা সত্তা অৰিদূরে, বহিকাযে ৰসন্তা দূরে. তথা অন্তোউপচারে ৰসন্তা অৰিদূরে, বহিউপচারে ৰসন্তা দূরে. অত্তনো ৰিহারে গামে জনপদে দীপে চক্কৰাল়ে ৰসন্তা অৰিদূরে, পরচক্কৰাল়ে ৰসন্তা দূরে ৰসন্তীতি ৰুচ্চন্তি.

ভূতাতি জাতা, অভিনিব্বত্তা. যে ভূতা এৰ, ন পুন ভৰিস্সন্তীতি সঙ্খ্যং গচ্ছন্তি, তেসং খীণাসৰানমেতং অধিৰচনং. সম্ভৰমেসন্তীতি সম্ভৰেসী. অপ্পহীনভৰসংযোজনত্তা আযতিম্পি সম্ভৰং এসন্তানং সেক্খপুথুজ্জনানমেতং অধিৰচনং. অথ ৰা চতূসু যোনীসু অণ্ডজজলাবুজা সত্তা যাৰ অণ্ডকোসং ৰত্থিকোসঞ্চ ন ভিন্দন্তি, তাৰ সম্ভৰেসী নাম. অণ্ডকোসং ৰত্থিকোসঞ্চ ভিন্দিত্ৰা বহি নিক্খন্তা ভূতা নাম. সংসেদজা ওপপাতিকা চ পঠমচিত্তক্খণে ¶ সম্ভৰেসী নাম. দুতিযচিত্তক্খণতো পভুতি ভূতা নাম. যেন ৰা ইরিযাপথেন জাযন্তি, যাৰ ততো অঞ্ঞং ন পাপুণন্তি, তাৰ সম্ভৰেসী নাম. ততো পরং ভূতাতি.

১৪৮. এৰং ভগৰা ‘‘সুখিনো ৰা’’তিআদীহি অড্ঢতেয্যাহি গাথাহি নানপ্পকারতো তেসং ভিক্খূনং হিতসুখাগমপত্থনাৰসেন সত্তেসু মেত্তাভাৰনং ¶ দস্সেত্ৰা ইদানি অহিতদুক্খানাগমপত্থনাৰসেনাপি তং দস্সেন্তো আহ ‘‘ন পরো পরং নিকুব্বেথা’’তি. এস পোরাণপাঠো, ইদানি পন ‘‘পরং হী’’তিপি পঠন্তি, অযং ন সোভনো.

তত্থ পরোতি পরজনো. পরন্তি পরজনং. ন নিকুব্বেথাতি ন ৰঞ্চেয্য. নাতিমঞ্ঞেথাতি ন অতিক্কমিত্ৰা মঞ্ঞেয্য. কত্থচীতি কত্থচি ওকাসে, গামে ৰা নিগমে ৰা খেত্তে ৰা ঞাতিমজ্ঝে ৰা পূগমজ্ঝে ৰাতিআদি. নন্তি এতং. কঞ্চীতি যং কঞ্চি খত্তিযং ৰা ব্রাহ্মণং ৰা গহট্ঠং ৰা পব্বজিতং ৰা সুগতং ৰা দুগ্গতং ৰাতিআদি. ব্যারোসনা পটিঘসঞ্ঞাতি কাযৰচীৰিকারেহি ব্যারোসনায চ, মনোৰিকারেন পটিঘসঞ্ঞায চ. ‘‘ব্যারোসনায পটিঘসঞ্ঞাযা’’তি হি ৰত্তব্বে ‘‘ব্যারোসনা পটিঘসঞ্ঞা’’তি ৰুচ্চতি যথা ‘‘সম্ম দঞ্ঞায ৰিমুত্তা’’তি ৰত্তব্বে ‘‘সম্ম দঞ্ঞা ৰিমুত্তা’’তি, যথা চ ‘‘অনুপুব্বসিক্খায অনুপুব্বকিরিযায অনুপুব্বপটিপদাযা’’তি ৰত্তব্বে ‘‘অনুপুব্বসিক্খা অনুপুব্বকিরিযা অনুপুব্বপটিপদা’’তি (অ. নি. ৮.১৯; উদা. ৪৫; চূল়ৰ. ৩৮৫). নাঞ্ঞমঞ্ঞস্স দুক্খমিচ্ছেয্যাতি অঞ্ঞমঞ্ঞস্স দুক্খং ন ইচ্ছেয্য. কিং ৰুত্তং হোতি? ন কেৰলং ‘‘সুখিনো ৰা খেমিনো ৰা হোন্তূ’’তিআদি মনসিকারৰসেনেৰ মেত্তং ভাৰেয্য. কিং পন ‘‘অহো ৰত যো কোচি পরপুগ্গলো যং কঞ্চি পরপুগ্গলং ৰঞ্চনাদীহি নিকতীহি ন নিকুব্বেথ, জাতিআদীহি চ নৰহি মানৰত্থূহি কত্থচি পদেসে যং কঞ্চি পরপুগ্গলং নাতিমঞ্ঞেয্য, অঞ্ঞমঞ্ঞস্স চ ব্যারোসনায ৰা পটিঘসঞ্ঞায ৰা দুক্খং ন ইচ্ছেয্যা’’তি এৰম্পি মনসি করোন্তো ভাৰেয্যাতি.

১৪৯. এৰং অহিতদুক্খানাগমপত্থনাৰসেন অত্থতো মেত্তাভাৰনং দস্সেত্ৰা ইদানি তমেৰ উপমায দস্সেন্তো আহ ‘‘মাতা যথা নিযং পুত্ত’’ন্তি.

তস্সত্থো – যথা মাতা নিযং পুত্তং অত্তনি জাতং ওরসং পুত্তং, তঞ্চ একপুত্তমেৰ আযুসা অনুরক্খে, তস্স দুক্খাগমপটিবাহনত্থং অত্তনো আযুম্পি চজিত্ৰা তং অনুরক্খে, এৰম্পি সব্বভূতেসু ইদং মেত্তমানসং ভাৰযে, পুনপ্পুনং জনযে ৰড্ঢযে, তঞ্চ অপরিমাণসত্তারম্মণৰসেন একস্মিং ৰা সত্তে অনৰসেসফরণৰসেন অপরিমাণং ভাৰযেতি.

১৫০. এৰং ¶ ¶ সব্বাকারেন মেত্তাভাৰনং দস্সেত্ৰা ইদানি তস্সেৰ ৰড্ঢনং দস্সেন্তো আহ ‘‘মেত্তঞ্চ সব্বলোকস্মী’’তি.

তত্থ মিজ্জতি তাযতি চাতি মিত্তো, হিতজ্ঝাসযতায সিনিয্হতি, অহিতাগমতো রক্খতি চাতি অত্থো. মিত্তস্স ভাৰো মেত্তং. সব্বস্মিন্তি অনৰসেসে. লোকস্মিন্তি সত্তলোকে. মনসি ভৰন্তি মানসং. তঞ্হি চিত্তসম্পযুত্তত্তা এৰং ৰুত্তং. ভাৰযেতি ৰড্ঢযে. নাস্স পরিমাণন্তি অপরিমাণং, অপ্পমাণসত্তারম্মণতায এৰং ৰুত্তং. উদ্ধন্তি উপরি. তেন অরূপভৰং গণ্হাতি. অধোতি হেট্ঠা. তেন কামভৰং গণ্হাতি. তিরিযন্তি ৰেমজ্ঝং. তেন রূপভৰং গণ্হাতি. অসম্বাধন্তি সম্বাধৰিরহিতং, ভিন্নসীমন্তি ৰুত্তং হোতি. সীমা নাম পচ্চত্থিকো ৰুচ্চতি, তস্মিম্পি পৰত্তন্তি অত্থো. অৰেরন্তি ৰেরৰিরহিতং, অন্তরন্তরাপি ৰেরচেতনাপাতুভাৰৰিরহিতন্তি ৰুত্তং হোতি. অসপত্তন্তি ৰিগতপচ্চত্থিকং. মেত্তাৰিহারী হি পুগ্গলো মনুস্সানং পিযো হোতি, অমনুস্সানং পিযো হোতি, নাস্স কোচি পচ্চত্থিকো হোতি, তেনস্স তং মানসং ৰিগতপচ্চত্থিকত্তা ‘‘অসপত্ত’’ন্তি ৰুচ্চতি. পরিযাযৰচনঞ্হি এতং, যদিদং পচ্চত্থিকো সপত্তোতি. অযং অনুপদতো অত্থৰণ্ণনা.

অযং পনেত্থ অধিপ্পেতত্থৰণ্ণনা – যদেতং ‘‘এৰম্পি সব্বভূতেসু মানসং ভাৰযে অপরিমাণ’’ন্তি ৰুত্তং. তঞ্চেতং অপরিমাণং মেত্তং মানসং সব্বলোকস্মিং ভাৰযে ৰড্ঢযে, ৰুড্ঢিং, ৰিরূল়্হিং, ৰেপুল্লং গমযে. কথং? উদ্ধং অধো চ তিরিযঞ্চ, উদ্ধং যাৰ ভৰগ্গা, অধো যাৰ অৰীচিতো, তিরিযং যাৰ অৰসেসদিসা. উদ্ধং ৰা আরুপ্পং, অধো কামধাতুং, তিরিযং রূপধাতুং অনৰসেসং ফরন্তো. এৰং ভাৰেন্তোপি চ তং যথা অসম্বাধং, অৰেরং, অসপত্তঞ্চ, হোতি তথা সম্বাধৰেরসপত্তাভাৰং করোন্তো ভাৰযে. যং ৰা তং ভাৰনাসম্পদং পত্তং সব্বত্থ ওকাসলাভৰসেন অসম্বাধং. অত্তনো পরেসু আঘাতপটিৰিনযেন অৰেরং, অত্তনি চ পরেসং আঘাতপটিৰিনযেন অসপত্তং হোতি, তং অসম্বাধং অৰেরং অসপত্তং অপরিমাণং মেত্তং মানসং উদ্ধং অধো তিরিযঞ্চাতি তিৰিধপরিচ্ছেদে সব্বলোকস্মিং ভাৰযে ৰড্ঢযেতি.

১৫১. এৰং ¶ মেত্তাভাৰনায ৰড্ঢনং দস্সেত্ৰা ইদানি তং ভাৰনমনুযুত্তস্স ৰিহরতো ইরিযাপথনিযমাভাৰং দস্সেন্তো আহ ‘‘তিট্ঠং চরং…পে… অধিট্ঠেয্যা’’তি.

তস্সত্থো – এৰমেতং মেত্তং মানসং ভাৰেন্তো সো ‘‘নিসীদতি পল্লঙ্কং আভুজিত্ৰা, উজুং কাযং পণিধাযা’’তিআদীসু (দী. নি. ২.৩৭৪; ম. নি. ১.১০৭; ৰিভ. ৫০৮) ৰিয ইরিযাপথনিযমং অকত্ৰা যথাসুখং অঞ্ঞতরঞ্ঞতরইরিযাপথবাধনৰিনোদনং করোন্তো তিট্ঠং ৰা চরং ৰা নিসিন্নো ৰা সযানো ৰা যাৰতা ৰিগতমিদ্ধো অস্স, অথ এতং মেত্তাঝানস্সতিং অধিট্ঠেয্য.

অথ ¶ ৰা এৰং মেত্তাভাৰনায ৰড্ঢনং দস্সেত্ৰা ইদানি ৰসীভাৰং দস্সেন্তো আহ ‘‘তিট্ঠং চর’’ন্তি. ৰসিপ্পত্তো হি তিট্ঠং ৰা চরং ৰা নিসিন্নো ৰা সযানো ৰা যাৰতা ইরিযাপথেন এতং মেত্তাঝানস্সতিং অধিট্ঠাতুকামো হোতি. অথ ৰা তিট্ঠং ৰা চরং ৰাতি ন তস্স ঠানাদীনি অন্তরাযকরানি হোন্তি, অপিচ খো সো যাৰতা এতং মেত্তাঝানস্সতিং অধিট্ঠাতুকামো হোতি, তাৰতা ৰিতমিদ্ধো হুত্ৰা অধিট্ঠাতি, নত্থি তস্স তত্থ দন্ধাযিতত্তং. তেনাহ ‘‘তিট্ঠং চরং নিসিন্নো ৰ সযানো, যাৰতাস্স ৰিতমিদ্ধো. এতং সতিং অধিট্ঠেয্যা’’তি.

তস্সাযমধিপ্পাযো – যং তং ‘‘মেত্তঞ্চ সব্বলোকস্মি, মানসং ভাৰযে’’তি ৰুত্তং, তং তথা ভাৰযে, যথা ঠানাদীসু যাৰতা ইরিযাপথেন, ঠানাদীনি ৰা অনাদিযিত্ৰা যাৰতা এতং মেত্তাঝানস্সতিং অধিট্ঠাতুকামো অস্স, তাৰতা ৰিতমিদ্ধো হুত্ৰা এতং সতিং অধিট্ঠেয্যাতি.

এৰং মেত্তাভাৰনায ৰসীভাৰং দস্সেন্তো ‘‘এতং সতিং অধিট্ঠেয্যা’’তি তস্মিং মেত্তাৰিহারে নিযোজেত্ৰা ইদানি তং ৰিহারং থুনন্তো আহ ‘‘ব্রহ্মমেতং ৰিহারমিধমাহূ’’তি.

তস্সত্থো – য্ৰাযং ‘‘সুখিনোৰ খেমিনো হোন্তূ’’তিআদিং কত্ৰা যাৰ ‘‘এতং সতিং অধিট্ঠেয্যা’’তি সংৰণ্ণিতো মেত্তাৰিহারো, এতং চতূসু দিব্বব্রহ্মঅরিযইরিযাপথৰিহারেসু নিদ্দোসত্তা অত্তনোপি পরেসম্পি অত্থকরত্তা চ ইধ অরিযস্স ধম্মৰিনযে ব্রহ্মৰিহারমাহু, সেট্ঠৰিহারমাহূতি. যতো সততং সমিতং অব্বোকিণ্ণং তিট্ঠং চরং নিসিন্নো ¶ ৰা সযানো ৰা যাৰতাস্স ৰিতমিদ্ধো, এতং সতিং অধিট্ঠেয্যাতি.

১৫২. এৰং ভগৰা তেসং ভিক্খূনং নানপ্পকারতো মেত্তাভাৰনং দস্সেত্ৰা ইদানি যস্মা মেত্তা সত্তারম্মণত্তা অত্তদিট্ঠিযা আসন্না হোতি তস্মা দিট্ঠিগহণনিসেধনমুখেন তেসং ভিক্খূনং তদেৰ মেত্তাঝানং পাদকং কত্ৰা অরিযভূমিপ্পত্তিং দস্সেন্তো আহ ‘‘দিট্ঠিঞ্চ অনুপগ্গম্মা’’তি. ইমায গাথায দেসনং সমাপেসি.

তস্সত্থো – য্ৰাযং ‘‘ব্রহ্মমেতং ৰিহারমিধমাহূ’’তি সংৰণ্ণিতো মেত্তাঝানৰিহারো, ততো ৰুট্ঠায যে তত্থ ৰিতক্কৰিচারাদযো ধম্মা, তে, তেসঞ্চ ৰত্থাদিঅনুসারেন রূপধম্মে পরিগ্গহেত্ৰা ইমিনা নামরূপপরিচ্ছেদেন ‘‘সুদ্ধসঙ্খারপুঞ্জোযং, ন ইধ সত্তূপলব্ভতী’’তি (সং. নি. ১.১৭১) এৰং দিট্ঠিঞ্চ অনুপগ্গম্ম অনুপুব্বেন লোকুত্তরসীলেন সীলৰা হুত্ৰা লোকুত্তরসীলসম্পযুত্তেনেৰ সোতাপত্তিমগ্গসম্মাদিট্ঠিসঙ্খাতেন দস্সনেন সম্পন্নো. ততো পরং যোপাযং ৰত্থুকামেসু গেধো কিলেসকামো অপ্পহীনো হোতি, তম্পি সকদাগামিঅনাগামিমগ্গেহি তনুভাৰেন অনৰসেসপ্পহানেন চ কামেসু গেধং ৰিনেয্য ৰিনযিত্ৰা ৰূপসমেত্ৰা ন হি জাতু গব্ভসেয্য পুন রেতি ¶ একংসেনেৰ পুন গব্ভসেয্যং ন এতি, সুদ্ধাৰাসেসু নিব্বত্তিত্ৰা তত্থেৰ অরহত্তং পাপুণিত্ৰা পরিনিব্বাতীতি.

এৰং ভগৰা দেসনং সমাপেত্ৰা তে ভিক্খূ আহ – ‘‘গচ্ছথ, ভিক্খৰে, তস্মিংযেৰ ৰনসণ্ডে ৰিহরথ. ইমঞ্চ সুত্তং মাসস্স অট্ঠসু ধম্মস্সৰনদিৰসেসু গণ্ডিং আকোটেত্ৰা উস্সারেথ, ধম্মকথং করোথ, সাকচ্ছথ, অনুমোদথ, ইদমেৰ কম্মট্ঠানং আসেৰথ, ভাৰেথ, বহুলীকরোথ. তেপি ৰো অমনুস্সা তং ভেরৰারম্মণং ন দস্সেস্সন্তি, অঞ্ঞদত্থু অত্থকামা হিতকামা ভৰিস্সন্তী’’তি. তে ‘‘সাধূ’’তি ভগৰতো পটিস্সুণিত্ৰা উট্ঠাযাসনা ভগৰন্তং অভিৰাদেত্ৰা, পদক্খিণং কত্ৰা, তত্থ গন্ত্ৰা, তথা অকংসু. দেৰতাযো চ ‘‘ভদন্তা অম্হাকং অত্থকামা হিতকামা’’তি পীতিসোমনস্সজাতা হুত্ৰা সযমেৰ সেনাসনং সম্মজ্জন্তি, উণ্হোদকং পটিযাদেন্তি, পিট্ঠিপরিকম্মপাদপরিকম্মং করোন্তি, আরক্খং সংৰিদহন্তি. তে ভিক্খূ তথেৰ মেত্তং ভাৰেত্ৰা তমেৰ ¶ চ পাদকং কত্ৰা ৰিপস্সনং আরভিত্ৰা সব্বেৰ তস্মিংযেৰ অন্তোতেমাসে অগ্গফলং অরহত্তং পাপুণিত্ৰা মহাপৰারণায ৰিসুদ্ধিপৰারণং পৰারেসুন্তি.

এৰঞ্হি অত্থকুসলেন তথাগতেন,

ধম্মিস্সরেন কথিতং করণীযমত্থং;

কত্ৰানুভুয্য পরমং হদযস্স সন্তিং,

সন্তং পদং অভিসমেন্তি সমত্তপঞ্ঞা.

তস্মা হি তং অমতমব্ভুতমরিযকন্তং,

সন্তং পদং অভিসমেচ্চ ৰিহরিতুকামো;

ৰিঞ্ঞূ জনো ৰিমলসীলসমাধিপঞ্ঞা,

ভেদং করেয্য সততং করণীযমত্থন্তি.

পরমত্থজোতিকায খুদ্দক-অট্ঠকথায

সুত্তনিপাত-অট্ঠকথায মেত্তসুত্তৰণ্ণনা নিট্ঠিতা.

৯. হেমৰতসুত্তৰণ্ণনা

অজ্জ ¶ পন্নরসোতি হেমৰতসুত্তং. কা উপ্পত্তি? পুচ্ছাৰসিকা উপ্পত্তি. হেমৰতেন হি পুট্ঠো ভগৰা ‘‘ছসু লোকো সমুপ্পন্নো’’তিআদীনি অভাসি. তত্থ ‘‘অজ্জ পন্নরসো’’তিআদি সাতাগিরেন ৰুত্তং, ‘‘ইতি সাতাগিরো’’তিআদি সঙ্গীতিকারেহি, ‘‘কচ্চিমনো’’তিআদি হেমৰতেন, ‘‘ছসু লোকো’’তিআদি ভগৰতা, তং সব্বম্পি সমোধানেত্ৰা ¶ ‘‘হেমৰতসুত্ত’’ন্তি ৰুচ্চতি. ‘‘সাতাগিরিসুত্ত’’ন্তি একচ্চেহি.

তত্থ যাযং ‘‘অজ্জ পন্নরসো’’তিআদি গাথা. তস্সা উপ্পত্তি – ইমস্মিংযেৰ ভদ্দকপ্পে ৰীসতিৰস্সসহস্সাযুকেসু পুরিসেসু উপ্পজ্জিত্ৰা সোল়সৰস্সসহস্সাযুকানি ঠত্ৰা পরিনিব্বুতস্স ভগৰতো কস্সপসম্মাসম্বুদ্ধস্স মহতিযা পূজায সরীরকিচ্চং অকংসু. তস্স ধাতুযো অৰিকিরিত্ৰা ¶ সুৰণ্ণক্খন্ধো ৰিয একগ্ঘনা হুত্ৰা অট্ঠংসু. দীঘাযুকবুদ্ধানঞ্হি এসা ধম্মতা. অপ্পাযুকবুদ্ধা পন যস্মা বহুতরেন জনেন অদিট্ঠা এৰ পরিনিব্বাযন্তি, তস্মা ধাতুপূজম্পি কত্ৰা ‘‘তত্থ তত্থ জনা পুঞ্ঞং পসৰিস্সন্তী’’তি অনুকম্পায ‘‘ধাতুযো ৰিকিরন্তূ’’তি অধিট্ঠহন্তি. তেন তেসং সুৰণ্ণচুণ্ণানি ৰিয ধাতুযো ৰিকিরন্তি, সেয্যথাপি অম্হাকং ভগৰতো.

মনুস্সা তস্স ভগৰতো একংযেৰ ধাতুঘরং কত্ৰা চেতিযং পতিট্ঠাপেসুং যোজনং উব্বেধেন পরিক্খেপেন চ. তস্স একেকগাৰুতন্তরানি চত্তারি দ্ৰারানি অহেসুং. একং দ্ৰারং কিকী রাজা অগ্গহেসি; একং তস্সেৰ পুত্তো পথৰিন্ধরো নাম; একং সেনাপতিপমুখা অমচ্চা; একং সেট্ঠিপমুখা জানপদা রত্তসুৰণ্ণমযা একগ্ঘনা সুৰণ্ণরসপটিভাগা চ নানারতনমযা ইট্ঠকা অহেসুং একেকা সতসহস্সগ্ঘনিকা. তে হরিতালমনোসিলাহি মত্তিকাকিচ্চং সুরভিতেলেন উদককিচ্চঞ্চ কত্ৰা তং চেতিযং পতিট্ঠাপেসুং.

এৰং পতিট্ঠিতে চেতিযে দ্ৰে কুলপুত্তা সহাযকা নিক্খমিত্ৰা সম্মুখসাৰকানং থেরানং সন্তিকে পব্বজিংসু. দীঘাযুকবুদ্ধানঞ্হি সম্মুখসাৰকাযেৰ পব্বাজেন্তি, উপসম্পাদেন্তি, নিস্সযং ¶ দেন্তি, ইতরে ন লভন্তি. ততো তে কুলপুত্তা ‘‘সাসনে, ভন্তে, কতি ধুরানী’’তি পুচ্ছিংসু. থেরা ‘‘দ্ৰে ধুরানী’’তি কথেসুং – ‘‘ৰাসধুরং, পরিযত্তিধুরঞ্চা’’তি. তত্থ পব্বজিতেন কুলপুত্তেন আচরিযুপজ্ঝাযানং সন্তিকে পঞ্চ ৰস্সানি ৰসিত্ৰা, ৰত্তপটিৰত্তং পূরেত্ৰা, পাতিমোক্খং দ্ৰে তীণি ভাণৰারসুত্তন্তানি চ পগুণং ¶ কত্ৰা, কম্মট্ঠানং উগ্গহেত্ৰা, কুলে ৰা গণে ৰা নিরালযেন অরঞ্ঞং পৰিসিত্ৰা, অরহত্তসচ্ছিকিরিযায ঘটিতব্বং ৰাযমিতব্বং, এতং ৰাসধুরং. অত্তনো থামেন পন একং ৰা নিকাযং পরিযাপুণিত্ৰা দ্ৰে ৰা পঞ্চ ৰা নিকাযে পরিযত্তিতো চ অত্থতো চ সুৰিসদং সাসনং অনুযুঞ্জিতব্বং, এতং পরিযত্তিধুরন্তি. অথ তে কুলপুত্তা ‘‘দ্ৰিন্নং ধুরানং ৰাসধুরমেৰ সেট্ঠ’’ন্তি ৰত্ৰা ‘‘মযং পনম্হা দহরা, ৰুড্ঢকালে ৰাসধুরং পরিপূরেস্সাম, পরিযত্তিধুরং তাৰ পূরেমা’’তি পরিযত্তিং আরভিংসু. তে পকতিযাৰ পঞ্ঞৰন্তো নচিরস্সেৰ সকলে বুদ্ধৰচনে পকতঞ্ঞনো ৰিনযে চ অতিৰিয ৰিনিচ্ছযকুসলা অহেসুং. তেসং পরিযত্তিং নিস্সায পরিৰারো উপ্পজ্জি, পরিৰারং নিস্সায ¶ লাভো, একমেকস্স পঞ্চসতপঞ্চসতা ভিক্খূ পরিৰারা অহেসুং. তে সত্থুসাসনং দীপেন্তা ৰিহরিংসু, পুন বুদ্ধকালো ৰিয অহোসি.

তদা দ্ৰে ভিক্খূ গামকাৰাসে ৰিহরন্তি ধম্মৰাদী চ অধম্মৰাদী চ. অধম্মৰাদী চণ্ডো হোতি ফরুসো, মুখরো, তস্স অজ্ঝাচারো ইতরস্স পাকটো হোতি. ততো নং ‘‘ইদং তে, আৰুসো, কম্মং সাসনস্স অপ্পতিরূপ’’ন্তি চোদেসি. সো ‘‘কিং তে দিট্ঠং, কিং সুত’’ন্তি ৰিক্খিপতি. ইতরো ‘‘ৰিনযধরা জানিস্সন্তী’’তি আহ. ততো অধম্মৰাদী ‘‘সচে ইমং ৰত্থুং ৰিনযধরা ৰিনিচ্ছিনিস্সন্তি, অদ্ধা মে সাসনে পতিট্ঠা ন ভৰিস্সতী’’তি ঞত্ৰা অত্তনো পক্খং কাতুকামো তাৰদেৰ পরিক্খারে আদায তে দ্ৰে থেরে উপসঙ্কমিত্ৰা সমণপরিক্খারে দত্ৰা তেসং নিস্সযেন ৰিহরিতুমারদ্ধো. সব্বঞ্চ নেসং উপট্ঠানং করোন্তো সক্কচ্চং ৰত্তপটিৰত্তং পূরেতুকামো ৰিয অকাসি. ততো একদিৰসং উপট্ঠানং গন্ত্ৰা ৰন্দিত্ৰা তেহি ৰিস্সজ্জিযমানোপি অট্ঠাসিযেৰ. থেরা ‘‘কিঞ্চি ৰত্তব্বমত্থী’’তি তং পুচ্ছিংসু. সো ‘‘আম, ভন্তে, একেন মে ভিক্খুনা সহ অজ্ঝাচারং পটিচ্চ ৰিৰাদো অত্থি. সো যদি তং ৰত্থুং ইধাগন্ত্ৰা আরোচেতি, যথাৰিনিচ্ছযং ন ৰিনিচ্ছিনিতব্ব’’ন্তি. থেরা ‘‘ওসটং ¶ ৰত্থুং যথাৰিনিচ্ছযং ন ৰিনিচ্ছিনিতুং ন ৰট্টতী’’তি আহংসু. সো ‘‘এৰং করিযমানে, ভন্তে, মম সাসনে পতিট্ঠা নত্থি, ময্হেতং পাপং হোতু, মা তুম্হে ৰিনিচ্ছিনথা’’তি. তে তেন নিপ্পীল়িযমানা সম্পটিচ্ছিংসু. সো তেসং পটিঞ্ঞং গহেত্ৰা পুন তং আৰাসং গন্ত্ৰা ‘‘সব্বং ৰিনযধরানং সন্তিকে নিট্ঠিত’’ন্তি তং ধম্মৰাদিং সুট্ঠুতরং অৰমঞ্ঞন্তো ফরুসেন সমুদাচরতি. ধম্মৰাদী ‘‘নিস্সঙ্কো অযং জাতো’’তি তাৰদেৰ নিক্খমিত্ৰা থেরানং পরিৰারং ভিক্খুসহস্সং উপসঙ্কমিত্ৰা আহ ¶ – ‘‘ননু, আৰুসো, ওসটং ৰত্থু যথাধম্মং ৰিনিচ্ছিনিতব্বং, অনোসরাপেত্ৰা এৰ ৰা অঞ্ঞমঞ্ঞং অচ্চযং দেসাপেত্ৰা সামগ্গী কাতব্বা. ইমে পন থেরা নেৰ ৰত্থুং ৰিনিচ্ছিনিংসু, ন সামগ্গিং অকংসু. কিং নামেত’’ন্তি? তেপি সুত্ৰা তুণ্হী অহেসুং – ‘‘নূন কিঞ্চি আচরিযেহি ঞাত’’ন্তি. ততো অধম্মৰাদী ওকাসং লভিত্ৰা ‘‘ত্ৰং পুব্বে ‘ৰিনযধরা জানিস্সন্তী’তি ভণসি. ইদানি তেসং ৰিনযধরানং আরোচেহি তং ¶ ৰত্থু’’ন্তি ধম্মৰাদিং পীল়েত্ৰা ‘‘অজ্জতগ্গে পরাজিতো ত্ৰং, মা তং আৰাসং আগচ্ছী’’তি ৰত্ৰা পক্কামি. ততো ধম্মৰাদী থেরে উপসঙ্কমিত্ৰা ‘‘তুম্হে সাসনং অনপেক্খিত্ৰা ‘অম্হে উপট্ঠেসি পরিতোসেসী’তি পুগ্গলমেৰ অপেক্খিত্থ, সাসনং অরক্খিত্ৰা পুগ্গলং রক্খিত্থ, অজ্জতগ্গে দানি তুম্হাকং ৰিনিচ্ছযং ৰিনিচ্ছিনিতুং ন ৰট্টতি, অজ্জ পরিনিব্বুতো কস্সপো ভগৰা’’তি মহাসদ্দেন কন্দিত্ৰা ‘‘নট্ঠং সত্থু সাসন’’ন্তি পরিদেৰমানো পক্কামি.

অথ খো তে ভিক্খূ সংৰিগ্গমানসা ‘‘মযং পুগ্গলমনুরক্খন্তা সাসনরতনং সোব্ভে পক্খিপিম্হা’’তি কুক্কুচ্চং উপ্পাদেসুং ¶ . তে তেনেৰ কুক্কুচ্চেন উপহতাসযত্তা কালং কত্ৰা সগ্গে নিব্বত্তিতুমসক্কোন্তা একাচরিযো হিমৰতি হেমৰতে পব্বতে নিব্বত্তি হেমৰতো যক্খোতি নামেন. দুতিযাচরিযো মজ্ঝিমদেসে সাতপব্বতে সাতাগিরোতি নামেন. তেপি নেসং পরিৰারা ভিক্খূ তেসংযেৰ অনুৰত্তিত্ৰা সগ্গে নিব্বত্তিতুমসক্কোন্তা তেসং পরিৰারা যক্খাৰ হুত্ৰা নিব্বত্তিংসু. তেসং পন পচ্চযদাযকা গহট্ঠা দেৰলোকে নিব্বতিংসু. হেমৰতসাতাগিরা অট্ঠৰীসতিযক্খসেনাপতীনমব্ভন্তরা মহানুভাৰা যক্খরাজানো অহেসুং.

যক্খসেনাপতীনঞ্চ অযং ধম্মতা – মাসে মাসে অট্ঠ দিৰসানি ধম্মৰিনিচ্ছযত্থং হিমৰতি মনোসিলাতলে নাগৰতিমণ্ডপে দেৰতানং সন্নিপাতো হোতি, তত্থ সন্নিপতিতব্বন্তি. অথ সাতাগিরহেমৰতা তস্মিং সমাগমে অঞ্ঞমঞ্ঞং দিস্ৰা সঞ্জানিংসু – ‘‘ত্ৰং, সম্ম, কুহিং উপ্পন্নো, ত্ৰং কুহি’’ন্তি অত্তনো অত্তনো উপ্পত্তিট্ঠানঞ্চ পুচ্ছিত্ৰা ৰিপ্পটিসারিনো অহেসুং. ‘‘নট্ঠা মযং, সম্ম, পুব্বে ৰীসতি ৰস্সসহস্সানি সমণধম্মং কত্ৰা একং পাপসহাযং নিস্সায যক্খযোনিযং উপ্পন্না, অম্হাকং পন পচ্চযদাযকা কামাৰচরদেৰেসু নিব্বত্তা’’তি. অথ সাতাগিরো আহ – ‘‘মারিস, হিমৰা নাম অচ্ছরিযব্ভুতসম্মতো, কিঞ্চি অচ্ছরিযং দিস্ৰা ৰা সুত্ৰা ৰা মমাপি আরোচেয্যাসী’’তি. হেমৰতোপি আহ – ‘‘মারিস, মজ্ঝিমদেসো নাম অচ্ছরিযব্ভুতসম্মতো, কিঞ্চি অচ্ছরিযং দিস্ৰা ৰা সুত্ৰা ৰা মমাপি আরোচেয্যাসী’’তি. এৰং তেসু দ্ৰীসু সহাযেসু অঞ্ঞমঞ্ঞং কতিকং কত্ৰা, তমেৰ উপ্পত্তিং অৰিৰজ্জেত্ৰা ৰসমানেসু একং বুদ্ধন্তরং ৰীতিৰত্তং, মহাপথৰী একযোজনতিগাৰুতমত্তং উস্সদা.

অথম্হাকং ¶ ¶ ¶ বোধিসত্তো দীপঙ্করপাদমূলে কতপণিধানো যাৰ ৰেস্সন্তরজাতকং, তাৰ পারমিযো পূরেত্ৰা, তুসিতভৰনে উপ্পজ্জিত্ৰা, তত্থ যাৰতাযুকং ঠত্ৰা, ধম্মপদনিদানে ৰুত্তনযেন দেৰতাহি আযাচিতো পঞ্চ মহাৰিলোকনানি ৰিলোকেত্ৰা, দেৰতানং আরোচেত্ৰা, দ্ৰত্তিংসায পুব্বনিমিত্তেসু ৰত্তমানেসু ইধ পটিসন্ধিং অগ্গহেসি দসসহস্সিলোকধাতুং কম্পেত্ৰা. তানি দিস্ৰাপি ইমে রাজযক্খা ‘‘ইমিনা কারণেন নিব্বত্তানী’’তি ন জানিংসু. ‘‘খিড্ডাপসুতত্তা নেৰাদ্দসংসূ’’তি একে. এস নযো জাতিযং অভিনিক্খমনে বোধিযঞ্চ. ধম্মচক্কপ্পৰত্তনে পন পঞ্চৰগ্গিযে আমন্তেত্ৰা ভগৰতি তিপরিৰট্টং দ্ৰাদসাকারং ৰরধম্মচক্কং পৰত্তেন্তে মহাভূমিচালং পুব্বনিমিত্তং পাটিহারিযানি চ এতেসং একো সাতাগিরোযেৰ পঠমং অদ্দস. নিব্বত্তিকারণঞ্চ তেসং ঞত্ৰা সপরিসো ভগৰন্তং উপসঙ্কম্ম ধম্মদেসনং অস্সোসি, ন চ কিঞ্চি ৰিসেসং অধিগচ্ছি. কস্মা? সো হি ধম্মং সুণন্তো হেমৰতং অনুস্সরিত্ৰা ‘‘আগতো নু খো মে সহাযকো, নো’’তি পরিসং ওলোকেত্ৰা তং অপস্সন্তো ‘‘ৰঞ্চিতো মে সহাযো, যো এৰং ৰিচিত্রপটিভানং ভগৰতো ধম্মদেসনং ন সুণাতী’’তি ৰিক্খিত্তচিত্তো অহোসি. ভগৰা চ অত্থঙ্গতেপি চ সূরিযে দেসনং ন নিট্ঠাপেসি.

অথ সাতাগিরো ‘‘সহাযং গহেত্ৰা তেন সহাগম্ম ধম্মদেসনং সোস্সামী’’তি হত্থিযানঅস্সযানগরুল়যানাদীনি মাপেত্ৰা পঞ্চহি যক্খসতেহি পরিৰুতো হিমৰন্তাভিমুখো পাযাসি, তদা হেমৰতোপি. যস্মা পটিসন্ধিজাতি-অভিনিক্খমন-বোধিপরিনিব্বানেস্ৰেৰ দ্ৰত্তিংস পুব্বনিমিত্তানি হুত্ৰাৰ পতিৰিগচ্ছন্তি, ন চিরট্ঠিতিকানি হোন্তি, ধম্মচক্কপৰত্তনে পন তানি সৰিসেসানি হুত্ৰা, চিরতরং ঠত্ৰা নিরুজ্ঝন্তি, তস্মা হিমৰতি তং অচ্ছরিযপাতুভাৰং দিস্ৰা ‘‘যতো অহং জাতো, ন কদাচি অযং পব্বতো এৰং অভিরামো ভূতপুব্বো, হন্দ দানি মম সহাযং গহেত্ৰা আগম্ম তেন সহ ইমং পুপ্ফসিরিং অনুভৰিস্সামী’’তি তথেৰ মজ্ঝিমদেসাভিমুখো আগচ্ছতি. তে উভোপি রাজগহস্স ¶ উপরি সমাগন্ত্ৰা অঞ্ঞমঞ্ঞস্স আগমনকারণং পুচ্ছিংসু. হেমৰতো আহ – ‘‘যতো অহং, মারিস, জাতো, নাযং পব্বতো এৰং অকালকুসুমিতেহি রুক্খেহি অভিরামো ভূতপুব্বো, তস্মা এতং পুপ্ফসিরিং তযা সদ্ধিং অনুভৰিস্সামীতি আগতোম্হী’’তি ¶ . সাতাগিরো আহ – ‘‘জানাসি, পন, ত্ৰং মারিস, যেন কারণেন ইমং অকালপুপ্ফপাটিহারিযং জাত’’ন্তি? ‘‘ন জানামি, মারিসা’’তি. ‘‘ইমং, মারিস, পাটিহারিযং ন কেৰল হিমৰন্তেযেৰ, অপিচ খো পন দসসহস্সিলোকধাতূসু নিব্বত্তং, সম্মাসম্বুদ্ধো লোকে উপ্পন্নো, অজ্জ ধম্মচক্কং পৰত্তেসি, তেন কারণেনা’’তি. এৰং সাতাগিরো হেমৰতস্স বুদ্ধুপ্পাদং কথেত্ৰা, তং ভগৰতো সন্তিকং আনেতুকামো ইমং গাথমাহ. কেচি পন গোতমকে চেতিযে ৰিহরন্তে ভগৰতি অযমেৰমাহাতি ভণন্তি ‘‘অজ্জ পন্নরসো’’তি.

১৫৩. তত্থ ¶ অজ্জাতি অযং রত্তিন্দিৰো পক্খগণনতো পন্নরসো, উপৰসিতব্বতো উপোসথো. তীসু ৰা উপোসথেসু অজ্জ পন্নরসো উপোসথো, ন চাতুদ্দসী উপোসথো, ন সামগ্গীউপোসথো. যস্মা ৰা পাতিমোক্খুদ্দেসঅট্ঠঙ্গউপৰাসপঞ্ঞত্তিদিৰসাদীসু সম্বহুলেসু অত্থেসু উপোসথসদ্দো ৰত্ততি. ‘‘আযামাৰুসো, কপ্পিন, উপোসথং গমিস্সামা’’তিআদীসু হি পাতিমোক্খুদ্দেসে উপোসথসদ্দো. ‘‘এৰং অট্ঠঙ্গসমন্নাগতো খো ৰিসাখে উপোসথো উপৰুত্থো’’তিআদীসু (অ. নি. ৮.৪৩) পাণাতিপাতা ৰেরমণিআদিকেসু অট্ঠঙ্গেসু. ‘‘সুদ্ধস্স ৰে সদা ফগ্গু, সুদ্ধস্সুপোসথো সদা’’তিআদীসু (ম. নি. ১.৭৯) উপৰাসে. ‘‘উপোসথো নাম নাগরাজা’’তিআদীসু (দী. নি. ২.২৪৬; ম. নি. ৩.২৫৮) পঞ্ঞত্তিযং. ‘‘তদহুপোসথে পন্নরসে সীসংন্হাতস্সা’’তিআদীসু (দী. নি. ৩.৮৫; ম. নি. ৩.২৫৬) দিৰসে. তস্মা অৰসেসত্থং পটিক্খিপিত্ৰা আসাল়্হীপুণ্ণমদিৰসংযেৰ নিযামেন্তো আহ – ‘‘অজ্জ পন্নরসো উপোসথো’’তি. পাটিপদো দুতিযোতি এৰং গণিযমানে অজ্জ পন্নরসো দিৰসোতি অত্থো.

দিৰি ভৰানি দিব্বানি, দিব্বানি এত্থ অত্থীতি দিব্বা. কানি তানি? রূপানি. তঞ্হি ¶ রত্তিং দেৰানং দসসহস্সিলোকধাতুতো সন্নিপতিতানং সরীরৰত্থাভরণৰিমানপ্পভাহি অব্ভাদিউপক্কিলেসৰিরহিতায চন্দপ্পভায চ সকলজম্বুদীপো অলঙ্কতো অহোসি. ৰিসেসালঙ্কতো চ পরমৰিসুদ্ধিদেৰস্স ভগৰতো সরীরপ্পভায. তেনাহ ‘‘দিব্বা রত্তি উপট্ঠিতা’’তি.

এৰং ¶ রত্তিগুণৰণ্ণনাপদেসেনাপি সহাযস্স চিত্তপ্পসাদং জনেন্তো বুদ্ধুপ্পাদং কথেত্ৰা আহ ‘‘অনোমনামং সত্থারং, হন্দ পস্সাম গোতম’’ন্তি. তত্থ অনোমেহি অলামকেহি সব্বাকারপরিপূরেহি গুণেহি নামং অস্সাতি অনোমনামো. তথা হিস্স ‘‘বুজ্ঝিতা সচ্চানীতি বুদ্ধো, বোধেতা পজাযাতি বুদ্ধো’’তিআদিনা (মহানি. ১৯২; চূল়নি. পারাযনত্থুতিগাথানিদ্দেস ৯৭; পটি. ম. ১.১৬২) নযেন বুদ্ধোতি অনোমেহি গুণেহি নামং, ‘‘ভগ্গরাগোতি ভগৰা, ভগ্গদোসোতি ভগৰা’’তিআদিনা (মহানি. ৮৪) নযেন চ অনোমেহি গুণেহি নামং. এস নযো ‘‘অরহং সম্মাসম্বুদ্ধো ৰিজ্জাচরণসম্পন্নো’’তিআদীসু. দিট্ঠধম্মিকাদীসু অত্থেসু দেৰমনুস্সে অনুসাসতি ‘‘ইমং পজহথ, ইমং সমাদায ৰত্তথা’’তি সত্থা. অপিচ ‘‘সত্থা ভগৰা সত্থৰাহো, যথা সত্থৰাহো সত্তে কন্তারং তারেতী’’তিআদিনা (মহানি. ১৯০) নিদ্দেসে ৰুত্তনযেনাপি সত্থা. তং অনোমনামং সত্থারং. হন্দাতি ব্যৰসানত্থে নিপাতো. পস্সামাতি তেন অত্তানং সহ সঙ্গহেত্ৰা পচ্চুপ্পন্নৰচনং. গোতমন্তি গোতমগোত্তং. কিং ৰুত্তং হোতি ¶ ? ‘‘সত্থা, ন সত্থা’’তি মা ৰিমতিং অকাসি, একন্তব্যৰসিতো হুত্ৰাৰ এহি পস্সাম গোতমন্তি.

১৫৪. এৰং ৰুত্তে হেমৰতো ‘‘অযং সাতাগিরো ‘অনোমনামং সত্থার’ন্তি ভণন্তো তস্স সব্বঞ্ঞুতং পকাসেতি, সব্বঞ্ঞুনো চ দুল্লভা লোকে, সব্বঞ্ঞুপটিঞ্ঞেহি পূরণাদিসদিসেহেৰ লোকো উপদ্দুতো. সো পন যদি সব্বঞ্ঞূ, অদ্ধা তাদিলক্খণপ্পত্তো ভৰিস্সতি, তেন তং এৰং পরিগ্গণ্হিস্সামী’’তি চিন্তেত্ৰা তাদিলক্খণং পুচ্ছন্তো আহ – ‘‘কচ্চি মনো’’তি.

তত্থ কচ্চীতি পুচ্ছা. মনোতি চিত্তং. সুপণিহিতোতি সুট্ঠু ঠপিতো, অচলো অসম্পৰেধী. সব্বেসু ভূতেসু সব্বভূতেসু. তাদিনোতি তাদিলক্খণপ্পত্তস্সেৰ ¶ সতো. পুচ্ছা এৰ ৰা অযং ‘‘সো তে সত্থা সব্বভূতেসু তাদী, উদাহু নো’’তি. ইট্ঠে অনিট্ঠে চাতি এৰরূপে আরম্মণে. সঙ্কপ্পাতি ৰিতক্কা. ৰসীকতাতি ৰসং গমিতা. কিং ৰুত্তং হোতি? যং ত্ৰং সত্থারং ৰদসি, তস্স তে সত্থুনো কচ্চি তাদিলক্খণপ্পত্তস্স সতো সব্বভূতেসু মনো সুপণিহিতো, উদাহু যাৰ চলনপচ্চযং ন লভতি, তাৰ সুপণিহিতো ৰিয খাযতি. সো ৰা তে সত্থা কচ্চি সব্বভূতেসু সমচিত্তেন তাদী, উদাহু নো, যে চ খো ইট্ঠানিট্ঠেসু ¶ আরম্মণেসু রাগদোসৰসেন সঙ্কপ্পা উপ্পজ্জেয্যুং, ত্যাস্স কচ্চি ৰসীকতা, উদাহু কদাচি তেসম্পি ৰসেন ৰত্ততীতি.

১৫৫. ততো সাতাগিরো ভগৰতো সব্বঞ্ঞুভাৰে ব্যৰসিতত্তা সব্বে সব্বঞ্ঞুগুণে অনুজানন্তো আহ ‘‘মনো চস্স সুপণিহিতো’’তিআদি. তত্থ সুপণিহিতোতি সুট্ঠু ঠপিতো, পথৰীসমো অৰিরুজ্ঝনট্ঠেন, সিনেরুসমো সুপ্পতিট্ঠিতাচলনট্ঠেন, ইন্দখীলসমো চতুব্বিধমারপরৰাদিগণেহি অকম্পিযট্ঠেন. অনচ্ছরিযঞ্চেতং, ভগৰতো ইদানি সব্বাকারসম্পন্নত্তা সব্বঞ্ঞুভাৰে ঠিতস্স মনো সুপণিহিতো অচলো ভৰেয্য. যস্স তিরচ্ছানভূতস্সাপি সরাগাদিকালে ছদ্দন্তনাগকুলে উপ্পন্নস্স সৰিসেন সল্লেন ৰিদ্ধস্স অচলো অহোসি, ৰধকেপি তস্মিং নপ্পদুস্সি, অঞ্ঞদত্থু তস্সেৰ অত্তনো দন্তে ছেত্ৰা অদাসি; তথা মহাকপিভূতস্স মহতিযা সিলায সীসে পহটস্সাপি তস্সেৰ চ মগ্গং দস্সেসি; তথা ৰিধুরপণ্ডিতভূতস্স পাদেসু গহেত্ৰা সট্ঠিযোজনে কাল়পব্বতপপাতে পক্খিত্তস্সাপি অঞ্ঞদত্থু তস্সেৰ যক্খস্সত্থায ধম্মং দেসেসি. তস্মা সম্মদেৰ আহ সাতাগিরো – ‘‘মনো চস্স সুপণিহিতো’’তি.

সব্বভূতেসু ¶ তাদিনোতি সব্বসত্তেসু তাদিলক্খণপ্পত্তস্সেৰ সতো মনো সুপণিহিতো, ন যাৰ পচ্চযং ন লভতীতি অত্থো ¶ . তত্থ ভগৰতো তাদিলক্খণং পঞ্চধা ৰেদিতব্বং. যথাহ –

‘‘ভগৰা পঞ্চহাকারেহি তাদী, ইট্ঠানিট্ঠে তাদী, চত্তাৰীতি তাদী, মুত্তাৰীতি তাদী, তিণ্ণাৰীতি তাদী, তন্নিদ্দেসাতি তাদী. কথং ভগৰা ইট্ঠানিট্ঠে তাদী? ভগৰা লাভেপি তাদী’’তি (মহানি. ৩৮).

এৰমাদি সব্বং নিদ্দেসে ৰুত্তনযেনেৰ গহেতব্বং. লাভাদযো চ তস্স মহাঅট্ঠকথাযং ৰিত্থারিতনযেন ৰেদিতব্বা. ‘‘পুচ্ছা এৰ ৰা অযং. সো তে সত্থা সব্বভূতেসু তাদী, উদাহু নো’’তি ইমস্মিম্পি ৰিকপ্পে সব্বভূতেসু সমচিত্ততায তাদী অম্হাকং সত্থাতি অত্থো. অযঞ্হি ভগৰা সুখূপসংহারকামতায দুক্খাপনযনকামতায চ সব্বসত্তেসু সমচিত্তো, যাদিসো অত্তনি, তাদিসো পরেসু, যাদিসো ¶ মাতরি মহামাযায, তাদিসো চিঞ্চমাণৰিকায, যাদিসো পিতরি সুদ্ধোদনে, তাদিসো সুপ্পবুদ্ধে, যাদিসো পুত্তে রাহুলে, তাদিসো ৰধকেসু দেৰদত্তধনপালকঅঙ্গুলিমালাদীসু. সদেৰকে লোকেপি তাদী. তস্মা সম্মদেৰাহ সাতাগিরো – ‘‘সব্বভূতেসু তাদিনো’’তি.

অথো ইট্ঠে অনিট্ঠে চাতি. এত্থ পন এৰং অত্থো দট্ঠব্বো – যং কিঞ্চি ইট্ঠং ৰা অনিট্ঠং ৰা আরম্মণং, সব্বপ্পকারেহি তত্থ যে রাগদোসৰসেন সঙ্কপ্পা উপ্পজ্জেয্যুং, ত্যাস্স অনুত্তরেন মগ্গেন রাগাদীনং পহীনত্তা ৰসীকতা, ন কদাচি তেসং ৰসে ৰত্ততি. সো হি ভগৰা অনাৰিলসঙ্কপ্পো সুৰিমুত্তচিত্তো সুৰিমুত্তপঞ্ঞোতি. এত্থ চ সুপণিহিতমনতায অযোনিসোমনসিকারাভাৰো ৰুত্তো. সব্বভূতেসু ইট্ঠানিট্ঠেহি সো যত্থ ভৰেয্য, তং সত্তসঙ্খারভেদতো দুৰিধমারম্মণং ৰুত্তং. সঙ্কপ্পৰসীভাৰেন তস্মিং আরম্মণে তস্স মনসিকারাভাৰতো কিলেসপ্পহানং ৰুত্তং. সুপণিহিতমনতায চ মনোসমাচারসুদ্ধি, সব্বভূতেসু তাদিতায কাযসমাচারসুদ্ধি, সঙ্কপ্পৰসীভাৰেন ৰিতক্কমূলকত্তা ৰাচায ৰচীসমাচারসুদ্ধি. তথা সুপণিহিতমনতায লোভাদিসব্বদোসাভাৰো ¶ , সব্বভূতেসু তাদিতায মেত্তাদিগুণসব্ভাৰো, সঙ্কপ্পৰসীভাৰেন পটিকূলে অপ্পটিকূলসঞ্ঞিতাদিভেদা অরিযিদ্ধি, তায চস্স সব্বঞ্ঞুভাৰো ৰুত্তো হোতীতি ৰেদিতব্বো.

১৫৬. এৰং হেমৰতো পুব্বে মনোদ্ৰারৰসেনেৰ তাদিভাৰং পুচ্ছিত্ৰা তঞ্চ পটিজানন্তমিমং সুত্ৰা দল়্হীকম্মত্থং ইদানি দ্ৰারত্তযৰসেনাপি, পুব্বে ৰা সঙ্খেপেন কাযৰচীমনোদ্ৰারসুদ্ধিং পুচ্ছিত্ৰা তঞ্চ পটিজানন্তমিমং সুত্ৰা দল়্হীকম্মত্থমেৰ ৰিত্থারেনাপি পুচ্ছন্তো ¶ আহ ‘‘কচ্চি অদিন্ন’’ন্তি. তত্থ গাথাবন্ধসুখত্থায পঠমং অদিন্নাদানৰিরতিং পুচ্ছতি. আরা পমাদম্হাতি পঞ্চসু কামগুণেসু চিত্তৰোস্সগ্গতো দূরীভাৰেন অব্রহ্মচরিযৰিরতিং পুচ্ছতি. ‘‘আরা পমদম্হা’’তিপি পঠন্তি, আরা মাতুগামাতি ৰুত্তং হোতি. ঝানং ন রিঞ্চতীতি ইমিনা পন তস্সাযেৰ তিৰিধায কাযদুচ্চরিতৰিরতিযা বলৰভাৰং পুচ্ছতি. ঝানযুত্তস্স হি ৰিরতি বলৰতী হোতীতি.

১৫৭. অথ ¶ সাতাগিরো যস্মা ভগৰা ন কেৰলং এতরহি, অতীতেপি অদ্ধানে দীঘরত্তং অদিন্নাদানাদীহি পটিৰিরতো, তস্সা তস্সাযেৰ চ ৰিরতিযা আনুভাৰেন তং তং মহাপুরিসলক্খণং পটিলভি, সদেৰকো চস্স লোকো ‘‘অদিন্নাদানা পটিৰিরতো সমণো গোতমো’’তিআদিনা নযেন ৰণ্ণং ভাসতি. তস্মা ৰিস্সট্ঠায ৰাচায সীহনাদং নদন্তো আহ ‘‘ন সো অদিন্নং আদিযতী’’তি. তং অত্থতো পাকটমেৰ. ইমিস্সাপি গাথায ততিযপাদে ‘‘পমাদম্হা পমদম্হা’’তি দ্ৰিধা পাঠো. চতুত্থপাদে চ ঝানং ন রিঞ্চতীতি ঝানং রিত্তকং সুঞ্ঞকং ন করোতি, ন পরিচ্চজতীতি অত্থো ৰেদিতব্বো.

১৫৮. এৰং কাযদ্ৰারে সুদ্ধিং সুত্ৰা ইদানি ৰচীদ্ৰারে সুদ্ধিং পুচ্ছন্তো ¶ আহ – ‘‘কচ্চি মুসা ন ভণতী’’তি. এত্থ খীণাতীতি খীণো, ৰিহিংসতি বধতীতি অত্থো. ৰাচায পথো ব্যপ্পথো, খীণো ব্যপ্পথো অস্সাতি খীণব্যপ্পথো. তং ন-কারেন পটিসেধেত্ৰা পুচ্ছতি ‘‘ন খীণব্যপ্পথো’’তি, ন ফরুসৰাচোতি ৰুত্তং হোতি. ‘‘নাখীণব্যপ্পথো’’তিপি পাঠো, ন অখীণৰচনোতি অত্থো. ফরুসৰচনঞ্হি পরেসং হদযে অখীযমানং তিট্ঠতি. তাদিসৰচনো কচ্চি ন সোতি ৰুত্তং হোতি. ৰিভূতীতি ৰিনাসো, ৰিভূতিং কাসতি করোতি ৰাতি ৰিভূতিকং, ৰিভূতিকমেৰ ৰেভূতিকং, ৰেভূতিযন্তিপি ৰুচ্চতি, পেসুঞ্ঞস্সেতং অধিৰচনং. তঞ্হি সত্তানং অঞ্ঞমঞ্ঞতো ভেদনেন ৰিনাসং করোতি. সেসং উত্তানত্থমেৰ.

১৫৯. অথ সাতাগিরো যস্মা ভগৰা ন কেৰলং এতরহি, অতীতেপি অদ্ধানে দীঘরত্তং মুসাৰাদাদীহি পটিৰিরতো, তস্সা তস্সাযেৰ চ ৰিরতিযা আনুভাৰেন তং তং মহাপুরিসলক্খণং পটিলভি, সদেৰকো চস্স লোকো ‘‘মুসাৰাদা পটিৰিরতো সমণো গোতমো’’তি ৰণ্ণং ভাসতি. তস্মা ৰিস্সট্ঠায ৰাচায সীহনাদং নদন্তো আহ, ‘‘মুসা চ সো ন ভণতী’’তি. তত্থ মুসাতি ৰিনিধায দিট্ঠাদীনি পরৰিসংৰাদনৰচনং. তং সো ন ভণতি. দুতিযপাদে পন পঠমত্থৰসেন ন খীণব্যপ্পথোতি, দুতিযত্থৰসেন নাখীণব্যপ্পথোতি পাঠো. চতুত্থপাদে মন্তাতি পঞ্ঞা ৰুচ্চতি. ভগৰা যস্মা তায মন্তায পরিচ্ছিন্দিত্ৰা অত্থমেৰ ¶ ভাসতি অত্থতো অনপেতৰচনং, ন সম্ফং ¶ . অঞ্ঞাণপুরেক্খারঞ্হি নিরত্থকৰচনং বুদ্ধানং নত্থি. তস্মা আহ – ‘‘মন্তা অত্থং সো ভাসতী’’তি. সেসমেত্থ পাকটমেৰ.

১৬০. এৰং ৰচীদ্ৰারসুদ্ধিম্পি সুত্ৰা ইদানি মনোদ্ৰারসুদ্ধিং ¶ পুচ্ছন্তো আহ ‘‘কচ্চি ন রজ্জতি কামেসূ’’তি. তত্থ কামাতি ৰত্থুকামা. তেসু কিলেসকামেন ন রজ্জতীতি পুচ্ছন্তো অনভিজ্ঝালুতং পুচ্ছতি. অনাৰিলন্তি পুচ্ছন্তো ব্যাপাদেন আৰিলভাৰং সন্ধায অব্যাপাদতং পুচ্ছতি. মোহং অতিক্কন্তোতি পুচ্ছন্তো যেন মোহেন মূল়্হো মিচ্ছাদিট্ঠিং গণ্হাতি, তস্সাতিক্কমেন সম্মাদিট্ঠিতং পুচ্ছতি. ধম্মেসু চক্খুমাতি পুচ্ছন্তো সব্বধম্মেসু অপ্পটিহতস্স ঞাণচক্খুনো, পঞ্চচক্খুৰিসযেসু ৰা ধম্মেসু পঞ্চন্নম্পি চক্খূনং ৰসেন সব্বঞ্ঞুতং পুচ্ছতি ‘‘দ্ৰারত্তযপারিসুদ্ধিযাপি সব্বঞ্ঞূ ন হোতী’’তি চিন্তেত্ৰা.

১৬১. অথ সাতাগিরো যস্মা ভগৰা অপ্পত্ৰাৰ অরহত্তং অনাগামিমগ্গেন কামরাগব্যাপাদানং পহীনত্তা নেৰ কামেসু রজ্জতি, ন ব্যাপাদেন আৰিলচিত্তো, সোতাপত্তিমগ্গেনেৰ চ মিচ্ছাদিট্ঠিপচ্চযস্স সচ্চপটিচ্ছাদকমোহস্স পহীনত্তা মোহং অতিক্কন্তো, সামঞ্চ সচ্চানি অভিসম্বুজ্ঝিত্ৰা বুদ্ধোতি ৰিমোক্খন্তিকং নামং যথাৰুত্তানি চ চক্খূনি পটিলভি, তস্মা তস্স মনোদ্ৰারসুদ্ধিং সব্বঞ্ঞুতঞ্চ উগ্ঘোসেন্তো আহ ‘‘ন সো রজ্জতি কামেসূ’’তি.

১৬২. এৰং হেমৰতো ভগৰতো দ্ৰারত্তযপারিসুদ্ধিং সব্বঞ্ঞুতঞ্চ সুত্ৰা হট্ঠো উদগ্গো অতীতজাতিযং বাহুসচ্চৰিসদায পঞ্ঞায অসজ্জমানৰচনপ্পথো হুত্ৰা অচ্ছরিযব্ভুতরূপে সব্বঞ্ঞুগুণে সোতুকামো আহ ‘‘কচ্চি ৰিজ্জায সম্পন্নো’’তি. তত্থ ৰিজ্জায সম্পন্নোতি ইমিনা দস্সনসম্পত্তিং পুচ্ছতি, সংসুদ্ধচারণোতি ইমিনা গমনসম্পত্তিং. ছন্দৰসেন চেত্থ দীঘং কত্ৰা চাকারমাহ, সংসুদ্ধচরণোতি অত্থো. আসৰা খীণাতি ইমিনা এতায দস্সনগমনসম্পত্তিযা পত্তব্বায আসৰক্খযসঞ্ঞিতায পঠমনিব্বানধাতুযা পত্তিং পুচ্ছতি, নত্থি পুনব্ভৰোতি ইমিনা দুতিযনিব্বানধাতুপত্তিসমত্থতং, পচ্চৰেক্খণঞাণেন ৰা পরমস্সাসপ্পত্তিং ঞত্ৰা ঠিতভাৰং.

১৬৩. ততো ¶ যা এসা ‘‘সো অনেকৰিহিতং ¶ পুব্বেনিৰাস’’ন্তিআদিনা (ম. নি. ১.৫২) নযেন ভযভেরৰাদীসু তিৰিধা, ‘‘সো এৰং সমাহিতে চিত্তে…পে… আনেঞ্জপ্পত্তে ঞাণদস্সনায চিত্তং অভিনীহরতী’’তিআদিনা (দী. নি. ১.২৭৯) নযেন অম্বট্ঠাদীসু অট্ঠৰিধা ৰিজ্জা ৰুত্তা, তায যস্মা সব্বাযপি সব্বাকারসম্পন্নায ভগৰা উপেতো. যঞ্চেতং ‘‘ইধ, মহানাম, অরিযসাৰকো সীলসম্পন্নো হোতি, ইন্দ্রিযেসু গুত্তদ্ৰারো হোতি, ভোজনে মত্তঞ্ঞূ হোতি ¶ , জাগরিযং অনুযুত্তো হোতি, সত্তহি সদ্ধম্মেহি সমন্নাগতো হোতি, চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতী’’তি এৰং উদ্দিসিত্ৰা ‘‘কথঞ্চ, মহানাম, অরিযসাৰকো সীলসম্পন্নো হোতী’’তিআদিনা (ম. নি. ২.২৪) নযেন সেখসুত্তে নিদ্দিট্ঠং পন্নরসপ্পভেদং চরণং. তঞ্চ যস্মা সব্বূপক্কিলেসপ্পহানেন ভগৰতো অতিৰিয সংসুদ্ধং. যেপিমে কামাসৰাদযো চত্তারো আসৰা, তেপি যস্মা সব্বে সপরিৰারা সৰাসনা ভগৰতো খীণা. যস্মা চ ইমায ৰিজ্জাচরণসম্পদায খীণাসৰো হুত্ৰা তদা ভগৰা ‘‘নত্থি দানি পুনব্ভৰো’’তি পচ্চৰেক্খিত্ৰা ঠিতো, তস্মা সাতাগিরো ভগৰতো সব্বঞ্ঞুভাৰে ব্যৰসাযেন সমুস্সাহিতহদযো সব্বেপি গুণে অনুজানন্তো আহ ‘‘ৰিজ্জায চেৰ সম্পন্নো’’তি.

১৬৪. ততো হেমৰতো ‘‘সম্মাসম্বুদ্ধো ভগৰা’’তি ভগৰতি নিক্কঙ্খো হুত্ৰা আকাসে ঠিতোযেৰ ভগৰন্তং পসংসন্তো সাতাগিরঞ্চ আরাধেন্তো আহ ‘‘সম্পন্নং মুনিনো চিত্ত’’ন্তি. তস্সত্থো – সম্পন্নং মুনিনো চিত্তং, ‘‘মনো চস্স সুপণিহিতো’’তি এত্থ ৰুত্ততাদিভাৰেন পুণ্ণং সম্পুণ্ণং, ‘‘ন সো অদিন্নং আদিযতী’’তি এত্থ ৰুত্তকাযকম্মুনা, ‘‘ন সো রজ্জতি কামেসূ’’তি এত্থ ৰুত্তমনোকম্মুনা চ পুণ্ণং সম্পুণ্ণং, ‘‘মুসা চ সো ন ভণতী’’তি এত্থ ৰুত্তব্যপ্পথেন চ ৰচীকম্মুনাতি ¶ ৰুত্তং হোতি. এৰং সম্পন্নচিত্তঞ্চ অনুত্তরায ৰিজ্জাচরণসম্পদায সম্পন্নত্তা ৰিজ্জাচরণসম্পন্নঞ্চ ইমেহি গুণেহি ‘‘মনো চস্স সুপণিহিতো’’তিআদিনা নযেন ধম্মতো নং পসংসসি, সভাৰতো তচ্ছতো ভূততো এৰ নং পসংসসি, ন কেৰলং সদ্ধামত্তকেনাতি দস্সেতি.

১৬৫-১৬৬. ততো ¶ সাতাগিরোপি ‘‘এৰমেতং, মারিস, সুট্ঠু তযা ঞাতঞ্চ অনুমোদিতঞ্চা’’তি অধিপ্পাযেন তমেৰ সংরাধেন্তো আহ – ‘‘সম্পন্নং মুনিনো…পে… ধম্মতো অনুমোদসী’’তি. এৰঞ্চ পন ৰত্ৰা পুন ভগৰতো দস্সনে তং অভিত্থৰযমানো আহ ‘‘সম্পন্নং…পে… হন্দ পস্সাম গোতম’’ন্তি.

১৬৭. অথ হেমৰতো অত্তনো অভিরুচিতগুণেহি পুরিমজাতিবাহুসচ্চবলেন ভগৰন্তং অভিত্থুনন্তো সাতাগিরং আহ – ‘‘এণিজঙ্ঘং…পে… এহি পস্সাম গোতম’’ন্তি. তস্সত্থো – এণিমিগস্সেৰ জঙ্ঘা অস্সাতি এণিজঙ্ঘো. বুদ্ধানঞ্হি এণিমিগস্সেৰ অনুপুব্বৰট্টা জঙ্ঘা হোন্তি, ন পুরতো নিম্মংসা পচ্ছতো সুসুমারকুচ্ছি ৰিয উদ্ধুমাতা. কিসা চ বুদ্ধা হোন্তি দীঘরস্সসমৰট্টিতযুত্তট্ঠানেসু তথারূপায অঙ্গপচ্চঙ্গসম্পত্তিযা, ন ৰঠরপুরিসা ৰিয থূলা. পঞ্ঞায ৰিলিখিতকিলেসত্তা ৰা কিসা. অজ্ঝত্তিকবাহিরসপত্তৰিদ্ধংসনতো ৰীরা. একাসনভোজিতায পরিমিতভোজিতায চ অপ্পাহারা, ন দ্ৰত্তিমত্তালোপভোজিতায. যথাহ –

‘‘অহং ¶ খো পন, উদাযি, অপ্পেকদা ইমিনা পত্তেন সমতিত্তিকম্পি ভুঞ্জামি, ভিয্যোপি ভুঞ্জামি. ‘অপ্পাহারো সমণো গোতমো অপ্পাহারতায চ ৰণ্ণৰাদী’তি ইতি চে মং, উদাযি, সাৰকা সক্করেয্যুং, গরুং করেয্যুং, মানেয্যুং, পূজেয্যুং, সক্কত্ৰা, গরুং কত্ৰা, উপনিস্সায ৰিহরেয্যুং. যে তে, উদাযি, মম সাৰকা কোসকাহারাপি অড্ঢকোসকাহারাপি বেলুৰাহারাপি অড্ঢবেলুৰাহারাপি, ন মং তে ইমিনা ধম্মেন সক্করেয্যুং…পে… উপনিস্সায ৰিহরেয্যু’’ন্তি (ম. নি. ২.২৪২).

আহারে ছন্দরাগাভাৰেন ¶ অলোলুপা অট্ঠঙ্গসমন্নাগতং আহারং আহারেন্তি মোনেয্যসম্পত্তিযা মুনিনো. অনগারিকতায ৰিৰেকনিন্নমানসতায চ ৰনে ঝাযন্তি. তেনাহ হেমৰতো যক্খো ‘‘এণিজঙ্ঘং…পে… এহি পস্সাম গোতম’’ন্তি.

১৬৮. এৰঞ্চ ৰত্ৰা পুন তস্স ভগৰতো সন্তিকে ধম্মং সোতুকামতায ‘‘সীহংৰেকচর’’ন্তি ইমং গাথমাহ. তস্সত্থো – সীহংৰাতি দুরাসদট্ঠেন ¶ খমনট্ঠেন নিব্ভযট্ঠেন চ কেসরসীহসদিসং. যায তণ্হায ‘‘তণ্হাদুতিযো পুরিসো’’তি ৰুচ্চতি, তস্সা অভাৰেন একচরং, একিস্সা লোকধাতুযা দ্ৰিন্নং বুদ্ধানং অনুপ্পত্তিতোপি একচরং. খগ্গৰিসাণসুত্তে ৰুত্তনযেনাপি চেত্থ তং তং অত্থো দট্ঠব্বো. নাগন্তি পুনব্ভৰং নেৰ গন্তারং নাগন্তারং. অথ ৰা আগুং ন করোতীতিপি নাগো. বলৰাতিপি নাগো. তং নাগং. কামেসু অনপেক্খিনন্তি দ্ৰীসুপি কামেসু ছন্দরাগাভাৰেন অনপেক্খিনং. উপসঙ্কম্ম পুচ্ছাম, মচ্চুপাসপ্পমোচনন্তি তং এৰরূপং মহেসিং উপসঙ্কমিত্ৰা তেভূমকৰট্টস্স মচ্চুপাসস্স পমোচনং ৰিৰট্টং নিব্বানং পুচ্ছাম. যেন ৰা উপাযেন দুক্খসমুদযসঙ্খাতা মচ্চুপাসা পমুচ্চতি, তং মচ্চুপাসপ্পমোচনং পুচ্ছামাতি. ইমং গাথং হেমৰতো সাতাগিরঞ্চ সাতাগিরপরিসঞ্চ অত্তনো পরিসঞ্চ সন্ধায আহ.

তেন খো পন সমযেন আসাল়্হীনক্খত্তং ঘোসিতং অহোসি. অথ সমন্ততো অলঙ্কতপটিযত্তে দেৰনগরে সিরিং পচ্চনুভোন্তী ৰিয রাজগহে কাল়ী নাম কুররঘরিকা উপাসিকা পাসাদমারুয্হ সীহপঞ্জরং ৰিৰরিত্ৰা ¶ গব্ভপরিস্সমং ৰিনোদেন্তী সৰাতপ্পদেসে উতুগ্গহণত্থং ঠিতা তেসং যক্খসেনাপতীনং তং বুদ্ধগুণপটিসংযুত্তং কথং আদিমজ্ঝপরিযোসানতো অস্সোসি. সুত্ৰা চ ‘‘এৰং ৰিৰিধগুণসমন্নাগতা বুদ্ধা’’তি বুদ্ধারম্মণং পীতিং উপ্পাদেত্ৰা তায নীৰরণানি ৰিক্খম্ভেত্ৰা তত্থেৰ ঠিতা সোতাপত্তিফলে পতিট্ঠাসি. ততো এৰ ভগৰতা ‘‘এতদগ্গং, ভিক্খৰে, মম সাৰিকানং উপাসিকানং অনুস্সৰপ্পসন্নানং, যদিদং কাল়ী উপাসিকা কুররঘরিকা’’তি (অ. নি. ১.২৬৭) এতদগ্গে ঠপিতা.

১৬৯. তেপি ¶ যক্খসেনাপতযো সহস্সযক্খপরিৰারা মজ্ঝিমযামসমযে ইসিপতনং পত্ৰা, ধম্মচক্কপ্পৰত্তিতপল্লঙ্কেনেৰ নিসিন্নং ভগৰন্তং উপসঙ্কম্ম ৰন্দিত্ৰা, ইমায গাথায ভগৰন্তং অভিত্থৰিত্ৰা ওকাসমকারযিংসু ‘‘অক্খাতারং পৰত্তার’’ন্তি. তস্সত্থো – ঠপেত্ৰা তণ্হং তেভূমকে ধম্মে ‘‘ইদং খো পন, ভিক্খৰে, দুক্খং অরিযসচ্চ’’ন্তিআদিনা (সং. নি. ৫.১০৮১; মহাৰ. ১৪) নযেন সচ্চানং ৰৰত্থানকথায অক্খাতারং, ‘‘‘তং খো পনিদং দুক্খং অরিযসচ্চং পরিঞ্ঞেয্য’ন্তি মে ভিক্খৰে’’তিআদিনা নযেন তেসু কিচ্চঞাণকতঞাণপ্পৰত্তনেন পৰত্তারং. যে ৰা ধম্মা যথা ৰোহরিতব্বা, তেসু তথা ¶ ৰোহারকথনেন অক্খাতারং, তেসংযেৰ ধম্মানং সত্তানুরূপতো পৰত্তারং. উগ্ঘটিতঞ্ঞুৰিপঞ্চিতঞ্ঞূনং ৰা দেসনায অক্খাতারং, নেয্যানং পটিপাদনেন পৰত্তারং. উদ্দেসেন ৰা অক্খাতারং, ৰিভঙ্গেন তেহি তেহি পকারেহি ৰচনতো পৰত্তারং. বোধিপক্খিযানং ৰা সলক্খণকথনেন অক্খাতারং, সত্তানং চিত্তসন্তানে পৰত্তনেন পৰত্তারং. সঙ্খেপতো ৰা তীহি পরিৰট্টেহি ¶ সচ্চানং কথনেন অক্খাতারং, ৰিত্থারতো পৰত্তারং. ‘‘সদ্ধিন্দ্রিযং ধম্মো, তং ধম্মং পৰত্তেতীতি ধম্মচক্ক’’ন্তি (পটি. ম. ২.৪০) এৰমাদিনা পটিসম্ভিদানযেন ৰিত্থারিতস্স ধম্মচক্কস্স পৰত্তনতো পৰত্তারং.

সব্বধম্মানন্তি চতুভূমকধম্মানং. পারগুন্তি ছহাকারেহি পারং গতং অভিঞ্ঞায, পরিঞ্ঞায, পহানেন, ভাৰনায, সচ্ছিকিরিযায, সমাপত্তিযা. সো হি ভগৰা সব্বধম্মে অভিজানন্তো গতোতি অভিঞ্ঞাপারগূ, পঞ্চুপাদানক্খন্ধে পরিজানন্তো গতোতি পরিঞ্ঞাপারগূ, সব্বকিলেসে পজহন্তো গতোতি পহানপারগূ, চত্তারো মগ্গে ভাৰেন্তো গতোতি ভাৰনাপারগূ, নিরোধং সচ্ছিকরোন্তো গতোতি সচ্ছিকিরিযাপারগূ, সব্বা সমাপত্তিযো সমাপজ্জন্তো গতোতি সমাপত্তিপারগূ. এৰং সব্বধম্মানং পারগুং. বুদ্ধং ৰেরভযাতীতন্তি অঞ্ঞাণসযনতো পটিবুদ্ধত্তা বুদ্ধং, সব্বেন ৰা সরণৰণ্ণনাযং ৰুত্তেনত্থেন বুদ্ধং, পঞ্চৰেরভযানং অতীতত্তা ৰেরভযাতীতং. এৰং ভগৰন্তং অতিত্থৰন্তা ‘‘মযং পুচ্ছাম গোতম’’ন্তি ওকাসমকারযিংসু.

১৭০. অথ নেসং যক্খানং তেজেন চ পঞ্ঞায চ অগ্গো হেমৰতো যথাধিপ্পেতং পুচ্ছিতব্বং পুচ্ছন্তো ‘‘কিস্মিং লোকো’’তি ইমং গাথমাহ. তস্সাদিপাদে কিস্মিন্তি ভাৰেনভাৰলক্খণে ভুম্মৰচনং, কিস্মিং উপ্পন্নে লোকো সমুপ্পন্নো হোতীতি অযঞ্হেত্থ অধিপ্পাযো. সত্তলোকসঙ্খারলোকে সন্ধায পুচ্ছতি. কিস্মিং কুব্বতি সন্থৰন্তি অহন্তি ৰা মমন্তি ৰা তণ্হাদিট্ঠিসন্থৰং কিস্মিং কুব্বতি, অধিকরণত্থে ভুম্মৰচনং. কিস্স লোকোতি উপযোগত্থে সামিৰচনং, কিং উপাদায লোকোতি সঙ্খ্যং গচ্ছতীতি অযঞ্হেত্থ অধিপ্পাযো. কিস্মিং লোকোতি ভাৰেনভাৰলক্খণকারণত্থেসু ¶ ভুম্মৰচনং. কিস্মিং ¶ সতি কেন কারণেন লোকো ৰিহঞ্ঞতি পীল়ীযতি বাধীযতীতি অযঞ্হেত্থ অধিপ্পাযো.

১৭১. অথ ¶ ভগৰা যস্মা ছসু অজ্ঝত্তিকবাহিরেসু আযতনেসু উপ্পন্নেসু সত্তলোকো চ ধনধঞ্ঞাদিৰসেন সঙ্খারলোকো চ উপ্পন্নো হোতি, যস্মা চেত্থ সত্তলোকো তেস্ৰেৰ ছসু দুৰিধম্পি সন্থৰং করোতি. চক্খাযতনং ৰা হি ‘‘অহং মম’’ন্তি গণ্হাতি অৰসেসেসু ৰা অঞ্ঞতরং. যথাহ – ‘‘চক্খু অত্তাতি যো ৰদেয্য, তং ন উপপজ্জতী’’তিআদি (ম. নি. ৩.৪২২). যস্মা চ এতানিযেৰ ছ উপাদায দুৰিধোপি লোকোতি সঙ্খ্যং গচ্ছতি, যস্মা চ তেস্ৰেৰ ছসু সতি সত্তলোকো দুক্খপাতুভাৰেন ৰিহঞ্ঞতি. যথাহ –

‘‘হত্থেসু, ভিক্খৰে, সতি আদাননিক্খেপনং হোতি, পাদেসু সতি অভিক্কমপটিক্কমো হোতি, পব্বেসু সতি সমিঞ্জনপসারণং হোতি, কুচ্ছিস্মিং সতি জিঘচ্ছাপিপাসা হোতি; এৰমেৰ খো, ভিক্খৰে, চক্খুস্মিং সতি চক্খুসম্ফস্সপচ্চযা উপ্পজ্জতি অজ্ঝত্তং সুখং দুক্খ’’ন্তিআদি (সং. নি. ৪.২৩৭).

তথা তেসু আধারভূতেসু পটিহতো সঙ্খারলোকো ৰিহঞ্ঞতি. যথাহ –

‘‘চক্খুস্মিং অনিদস্সনে সপ্পটিঘে পটিহঞ্ঞি ৰা’’ইতি (ধ. স. ৫৯৭-৮) চ.

‘‘চক্খু, ভিক্খৰে, পটিহঞ্ঞতি মনাপামনাপেসু রূপেসূ’’তি (সং. নি. ৪.২৩৮) এৰমাদি.

তথা তেহিযেৰ কারণভূতেহি দুৰিধোপি লোকো ৰিহঞ্ঞতি. যথাহ –

‘‘চক্খু ৰিহঞ্ঞতি মনাপামনাপেসু রূপেসূ’’তি (সং. নি. ৪.২৩৮) চ.

‘‘চক্খু, ভিক্খৰে, আদিত্তং, রূপা আদিত্তা. কেন আদিত্তং? রাগগ্গিনা’’তি (সং. নি. ৪.২৮; মহাৰ. ৫৪) এৰমাদি.

তস্মা ¶ ছঅজ্ঝত্তিকবাহিরাযতনৰসেন তং পুচ্ছং ৰিস্সজ্জেন্তো আহ ‘‘ছসু লোকো সমুপ্পন্নো’’তি.

১৭২. অথ সো যক্খো অত্তনা ৰট্টৰসেন পুট্ঠপঞ্হং ভগৰতা দ্ৰাদসাযতনৰসেন সঙ্খিপিত্ৰা ৰিস্সজ্জিতং ন ¶ সুট্ঠু উপলক্খেত্ৰা তঞ্চ অত্থং ¶ তপ্পটিপক্খঞ্চ ঞাতুকামো সঙ্খেপেনেৰ ৰট্টৰিৰট্টং পুচ্ছন্তো আহ ‘‘কতমং ত’’ন্তি. তত্থ উপাদাতব্বট্ঠেন উপাদানং, দুক্খসচ্চস্সেতং অধিৰচনং. যত্থ লোকো ৰিহঞ্ঞতীতি ‘‘ছসু লোকো ৰিহঞ্ঞতী’’তি এৰং ভগৰতা যত্থ ছব্বিধে উপাদানে লোকো ৰিহঞ্ঞতীতি ৰুত্তো, তং কতমং উপাদানন্তি? এৰং উপড্ঢগাথায সরূপেনেৰ দুক্খসচ্চং পুচ্ছি. সমুদযসচ্চং পন তস্স কারণভাৰেন গহিতমেৰ হোতি. নিয্যানং পুচ্ছিতোতি ইমায পন উপড্ঢগাথায মগ্গসচ্চং পুচ্ছি. মগ্গসচ্চেন হি অরিযসাৰকো দুক্খং পরিজানন্তো, সমুদযং পজহন্তো, নিরোধং সচ্ছিকরোন্তো, মগ্গং ভাৰেন্তো লোকম্হা নিয্যাতি, তস্মা নিয্যানন্তি ৰুচ্চতি. কথন্তি কেন পকারেন. দুক্খা পমুচ্চতীতি ‘‘উপাদান’’ন্তি ৰুত্তা ৰট্টদুক্খা পমোক্খং পাপুণাতি. এৰমেত্থ সরূপেনেৰ মগ্গসচ্চং পুচ্ছি, নিরোধসচ্চং পন তস্স ৰিসযভাৰেন গহিতমেৰ হোতি.

১৭৩. এৰং যক্খেন সরূপেন দস্সেত্ৰা চ অদস্সেত্ৰা চ চতুসচ্চৰসেন পঞ্হং পুট্ঠো ভগৰা তেনেৰ নযেন ৰিস্সজ্জেন্তো আহ ‘‘পঞ্চ কামগুণা’’তি. তত্থ পঞ্চকামগুণসঙ্খাতগোচরগ্গহণেন তগ্গোচরানি পঞ্চাযতনানি গহিতানেৰ হোন্তি. মনো ছট্ঠো এতেসন্তি মনোছট্ঠা. পৰেদিতাতি পকাসিতা. এত্থ অজ্ঝত্তিকেসু ছট্ঠস্স মনাযতনস্স গহণেন তস্স ৰিসযভূতং ধম্মাযতনং গহিতমেৰ হোতি. এৰং ‘‘কতমং তং উপাদান’’ন্তি ইমং পঞ্হং ৰিস্সজ্জেন্তো পুনপি দ্ৰাদসাযতনানং ৰসেনেৰ দুক্খসচ্চং পকাসেসি. মনোগহণেন ৰা সত্তন্নং ৰিঞ্ঞাণধাতূনং গহিতত্তা তাসু পুরিমপঞ্চৰিঞ্ঞাণধাতুগ্গহণেন তাসং ৰত্থূনি পঞ্চ চক্খাদীনি আযতনানি, মনোধাতুমনোৰিঞ্ঞাণধাতুগ্গহণেন তাসং ৰত্থুগোচরভেদং ধম্মাযতনং গহিতমেৰাতি এৰম্পি দ্ৰাদসাযতনৰসেন দুক্খসচ্চং পকাসেসি. লোকুত্তরমনাযতনধম্মাযতনেকদেসো ¶ পনেত্থ যত্থ লোকো ৰিহঞ্ঞতি, তং সন্ধায নিদ্দিট্ঠত্তা ন সঙ্গয্হতি.

এত্থ ছন্দং ৰিরাজেত্ৰাতি এত্থ দ্ৰাদসাযতনভেদে দুক্খসচ্চে তানেৰাযতনানি খন্ধতো ধাতুতো নামরূপতোতি তথা তথা ৰৰত্থপেত্ৰা, তিলক্খণং আরোপেত্ৰা, ৰিপস্সন্তো অরহত্তমগ্গপরিযোসানায ৰিপস্সনায তণ্হাসঙ্খাতং ছন্দং সব্বসো ৰিরাজেত্ৰা ৰিনেত্ৰা ৰিদ্ধংসেত্ৰাতি অত্থো. এৰং দুক্খা পমুচ্চতীতি ইমিনা পকারেন এতস্মা ¶ ৰট্টদুক্খা পমুচ্চতীতি ¶ . এৰমিমায উপড্ঢগাথায ‘‘নিয্যানং পুচ্ছিতো ব্রূহি, কথং দুক্খা পমুচ্চতী’’তি অযং পঞ্হো ৰিস্সজ্জিতো হোতি, মগ্গসচ্চঞ্চ পকাসিতং সমুদযনিরোধসচ্চানি পনেত্থ পুরিমনযেনেৰ সঙ্গহিতত্তা পকাসিতানেৰ হোন্তীতি ৰেদিতব্বানি. উপড্ঢগাথায ৰা দুক্খসচ্চং, ছন্দেন সমুদযসচ্চং, ‘‘ৰিরাজেত্ৰা’’তি এত্থ ৰিরাগেন নিরোধসচ্চং, ‘‘ৰিরাগাৰিমুচ্চতী’’তি ৰচনতো ৰা মগ্গসচ্চং. ‘‘এৰ’’ন্তি উপাযনিদস্সনেন মগ্গসচ্চং, দুক্খনিরোধন্তি ৰচনতো ৰা. ‘‘দুক্খা পমুচ্চতী’’তি দুক্খপমোক্খেন নিরোধসচ্চন্তি এৰমেত্থ চত্তারি সচ্চানি পকাসিতানি হোন্তীতি ৰেদিতব্বানি.

১৭৪. এৰং চতুসচ্চগব্ভায গাথায লক্খণতো নিয্যানং পকাসেত্ৰা পুন তদেৰ সকেন নিরুত্তাভিলাপেন নিগমেন্তো আহ ‘‘এতং লোকস্স নিয্যান’’ন্তি. এত্থ এতন্তি পুব্বে ৰুত্তস্স নিদ্দেসো, লোকস্সাতি তেধাতুকলোকস্স. যথাতথন্তি অৰিপরীতং. এতং ৰো অহমক্খামীতি সচেপি মং সহস্সক্খত্তুং পুচ্ছেয্যাথ, এতং ৰো অহমক্খামি, ন অঞ্ঞং. কস্মা? যস্মা এৰং দুক্খা পমুচ্চতি, ন অঞ্ঞথাতি অধিপ্পাযো. অথ ৰা এতেন নিয্যানেন একদ্ৰত্তিক্খতুং নিগ্গতানম্পি এতং ৰো অহমক্খামি, উপরিৰিসেসাধিগমাযপি এতদেৰ অহমক্খামীতি অত্থো. কস্মা? যস্মা এৰং দুক্খা পমুচ্চতি অসেসনিস্সেসাতি অরহত্তনিকূটেন দেসনং নিট্ঠাপেসি. দেসনাপরিযোসানে দ্ৰেপি যক্খসেনাপতযো সোতাপত্তিফলে পতিট্ঠহিংসু সদ্ধিং যক্খসহস্সেন.

১৭৫. অথ হেমৰতো পকতিযাপি ধম্মগরু ইদানি অরিযভূমিযং ¶ পতিট্ঠায সুট্ঠুতরং অতিত্তো ভগৰতো ৰিচিত্রপটিভানায দেসনায ভগৰন্তং সেক্খাসেক্খভূমিং পুচ্ছন্তো ‘‘কো সূধ তরতী’’তি গাথমভাসি. তত্থ কো সূধ তরতি ওঘন্তি ইমিনা চতুরোঘং কো তরতীতি সেক্খভূমিং পুচ্ছতি অৰিসেসেন. যস্মা অণ্ণৰন্তি ন ৰিত্থতমত্তং নাপি গম্ভীরমত্তং অপিচ পন যং ৰিত্থততরঞ্চ গম্ভীরতরঞ্চ, তং ৰুচ্চতি. তাদিসো চ সংসারণ্ণৰো. অযঞ্হি সমন্ততো পরিযন্তাভাৰেন ৰিত্থতো, হেট্ঠা পতিট্ঠাভাৰেন উপরি আলম্বনাভাৰেন চ গম্ভীরো, তস্মা ‘‘কো ইধ তরতি অণ্ণৰং, তস্মিঞ্চ অপ্পতিট্ঠে অনালম্বে গম্ভীরে অণ্ণৰে কো ন সীদতী’’তি অসেক্খভূমিং পুচ্ছতি.

১৭৬. অথ ¶ ভগৰা যো ভিক্খু জীৰিতহেতুপি ৰীতিক্কমং অকরোন্তো সব্বদা সীলসম্পন্নো লোকিযলোকুত্তরায চ পঞ্ঞায পঞ্ঞৰা, উপচারপ্পনাসমাধিনা ইরিযাপথহেট্ঠিমমগ্গফলেহি চ সুসমাহিতো, তিলক্খণং আরোপেত্ৰা ৰিপস্সনায নিযকজ্ঝত্তচিন্তনসীলো, সাতচ্চকিরিযাৰহায ¶ অপ্পমাদসতিযা চ সমন্নাগতো. যস্মা সো চতুত্থেন মগ্গেন ইমং সুদুত্তরং ওঘং অনৰসেসং তরতি, তস্মা সেক্খভূমিং ৰিস্সজ্জেন্তো ‘‘সব্বদা সীলসম্পন্নো’’তি ইমং তিসিক্খাগব্ভং গাথমাহ. এত্থ হি সীলসম্পদায অধিসীলসিক্খা, সতিসমাধীহি অধিচিত্তসিক্খা, অজ্ঝত্তচিন্তিতাপঞ্ঞাহি অধিপঞ্ঞাসিক্খাতি তিস্সো সিক্খা সউপকারা সানিসংসা চ ৰুত্তা. উপকারো হি সিক্খানং লোকিযপঞ্ঞা সতি চ, অনিসংসো সামঞ্ঞফলানীতি.

১৭৭. এৰং পঠমগাথায সেক্খভূমিং দস্সেত্ৰা ইদানি অসেক্খভূমিং দস্সেন্তো দুতিযগাথমাহ. তস্সত্থো ৰিরতো কামসঞ্ঞাযাতি যা কাচি কামসঞ্ঞা, ততো সব্বতো চতুত্থমগ্গসম্পযুত্তায সমুচ্ছেদৰিরতিযা ৰিরতো. ‘‘ৰিরত্তো’’তিপি পাঠো. তদা ‘‘কামসঞ্ঞাযা’’তি ভুম্মৰচনং হোতি, সগাথাৰগ্গে পন ‘‘কামসঞ্ঞাসূ’’তিপি (সং. নি. ১.৯৬) পাঠো. চতূহিপি মগ্গেহি দসন্নং সংযোজনানং অতীতত্তা সব্বসংযোজনাতিগো, চতুত্থেনেৰ ৰা উদ্ধম্ভাগিযসব্বসংযোজনাতিগো ¶ , তত্রতত্রাভিনন্দিনীতণ্হাসঙ্খাতায নন্দিযা তিণ্ণঞ্চ ভৰানং পরিক্খীণত্তা নন্দীভৰপরিক্খীণো সো তাদিসো খীণাসৰো ভিক্খু গম্ভীরে সংসারণ্ণৰে ন সীদতি নন্দীপরিক্খযেন সউপাদিসেসং, ভৰপরিক্খযেন চ অনুপাদিসেসং নিব্বানথলং সমাপজ্জ পরমস্সাসপ্পত্তিযাতি.

১৭৮. অথ হেমৰতো সহাযঞ্চ যক্খপরিসঞ্চ ওলোকেত্ৰা পীতিসোমনস্সজাতো ‘‘গম্ভীরপঞ্ঞ’’ন্তি এৰমাদীহি গাথাহি ভগৰন্তং অভিত্থৰিত্ৰা সব্বাৰতিযা পরিসায সহাযেন চ সদ্ধিং অভিৰাদেত্ৰা, পদক্খিণং কত্ৰা, অত্তনো ৰসনট্ঠানং অগমাসি.

তাসং পন গাথানং অযং অত্থৰণ্ণনা – গম্ভীরপঞ্ঞন্তি গম্ভীরায পঞ্ঞায সমন্নাগতং. তত্থ পটিসম্ভিদাযং ৰুত্তনযেন গম্ভীরপঞ্ঞা ৰেদিতব্বা. ৰুত্তঞ্হি তত্থ ¶ ‘‘গম্ভীরেসু খন্ধেসু ঞাণং পৰত্ততীতি গম্ভীরপঞ্ঞা’’তিআদি (পটি. ম. ৩.৪). নিপুণত্থদস্সিন্তি নিপুণেহি খত্তিযপণ্ডিতাদীহি অভিসঙ্খতানং পঞ্হানং অত্থদস্সিং অত্থানং ৰা যানি নিপুণানি কারণানি দুপ্পটিৰিজ্ঝানি অঞ্ঞেহি তেসং দস্সনেন নিপুণত্থদস্সিং. রাগাদিকিঞ্চনাভাৰেন অকিঞ্চনং. দুৰিধে কামে তিৰিধে চে ভৰে অলগ্গনেন কামভৰে অসত্তং. খন্ধাদিভেদেসু সব্বারম্মণেসু ছন্দরাগবন্ধনাভাৰেন সব্বধি ৰিপ্পমুত্তং. দিব্বে পথে কমমানন্তি অট্ঠসমাপত্তিভেদে দিব্বে পথে সমাপজ্জনৰসেন চঙ্কমন্তং. তত্থ কিঞ্চাপি ন তায ৰেলায ভগৰা দিব্বে পথে কমতি, অপিচ খো পুব্বে কমনং উপাদায কমনসত্তিসব্ভাৰেন তত্থ লদ্ধৰসীভাৰতায এৰং ৰুচ্চতি. অথ ৰা যে তে ৰিসুদ্ধিদেৰা অরহন্তো, তেসং পথে সন্তৰিহারে কমনেনাপেতং ৰুত্তং. মহন্তানং গুণানং এসনেন মহেসিং.

১৭৯. দুতিযগাথায ¶ অপরেন পরিযাযেন থুতি আরদ্ধাতি কত্ৰা পুন নিপুণত্থদস্সিগ্গহণং নিদস্সেতি. অথ ৰা নিপুণত্থে দস্সেতারন্তি অত্থো. পঞ্ঞাদদন্তি পঞ্ঞাপটিলাভসংৰত্তনিকায ¶ পটিপত্তিযা কথনেন পঞ্ঞাদাযকং. কামালযে অসত্তন্তি য্ৰাযং কামেসু তণ্হাদিট্ঠিৰসেন দুৰিধো আলযো, তত্থ অসত্তং. সব্বৰিদুন্তি সব্বধম্মৰিদুং, সব্বঞ্ঞুন্তি ৰুত্তং হোতি. সুমেধন্তি তস্স সব্বঞ্ঞুভাৰস্স মগ্গভূতায পারমীপঞ্ঞাসঙ্খাতায মেধায সমন্নাগতং. অরিযে পথেতি অট্ঠঙ্গিকে মগ্গে, ফলসমাপত্তিযং ৰা. কমমানন্তি পঞ্ঞায অজ্ঝোগাহমানং মগ্গলক্খণং ঞত্ৰা দেসনতো, পৰিসমানং ৰা খণে খণে ফলসমাপত্তিসমাপজ্জনতো, চতুব্বিধমগ্গভাৰনাসঙ্খাতায কমনসত্তিযা কমিতপুব্বং ৰা.

১৮০. সুদিট্ঠং ৰত নো অজ্জাতি. অজ্জ অম্হেহি সুন্দরং দিট্ঠং, অজ্জ ৰা অম্হাকং সুন্দরং দিট্ঠং, দস্সনন্তি অত্থো. সুপ্পভাতং সুহুট্ঠিতন্তি অজ্জ অম্হাকং সুট্ঠু পভাতং সোভনং ৰা পভাতং অহোসি. অজ্জ চ নো সুন্দরং উট্ঠিতং অহোসি, অনুপরোধেন সযনতো উট্ঠিতং. কিং কারণং? যং অদ্দসাম সম্বুদ্ধং, যস্মা সম্বুদ্ধং অদ্দসামাতি অত্তনো লাভসম্পত্তিং আরব্ভ পামোজ্জং পৰেদেতি.

১৮১. ইদ্ধিমন্তোতি ¶ কম্মৰিপাকজিদ্ধিযা সমন্নাগতা. যসস্সিনোতি লাভগ্গপরিৰারগ্গসম্পন্না. সরণং যন্তীতি কিঞ্চাপি মগ্গেনেৰ গতা, তথাপি সোতাপন্নভাৰপরিদীপনত্থং পসাদদস্সনত্থঞ্চ ৰাচং ভিন্দতি.

১৮২. গামা গামন্তি দেৰগামা দেৰগামং. নগা নগন্তি দেৰপব্বতা দেৰপব্বতং. নমস্সমানা সম্বুদ্ধং, ধম্মস্স চ সুধম্মতন্তি ‘‘সম্মাসম্বুদ্ধো ৰত ভগৰা, স্ৰাক্খাতো ৰত ভগৰতো ধম্মো’’তিআদিনা নযেন বুদ্ধসুবোধিতঞ্চ ধম্মসুধম্মতঞ্চ. ‘‘সুপ্পটিপন্নো ৰত ভগৰতো সাৰকসঙ্ঘো’’তিআদিনা সঙ্ঘ-সুপ্পটিপত্তিঞ্চ অভিত্থৰিত্ৰা অভিত্থৰিত্ৰা নমস্সমানা ধম্মঘোসকা হুত্ৰা ৰিচরিস্সামাতি ৰুত্তং হোতি. সেসমেত্থ উত্তানত্থমেৰাতি.

পরমত্থজোতিকায খুদ্দক-অট্ঠকথায

সুত্তনিপাত-অট্ঠকথায হেমৰতসুত্তৰণ্ণনা নিট্ঠিতা.

১০. আল়ৰকসুত্তৰণ্ণনা

এৰং ¶ ¶ মে সুতন্তি আল়ৰকসুত্তং. কা উপ্পত্তি? অত্থৰণ্ণনানযেনেৰস্স উপ্পত্তি আৰিভৰিস্সতি. অত্থৰণ্ণনায চ ‘‘এৰং মে সুতং, একং সমযং ভগৰা’’তি এতং ৰুত্তত্থমেৰ. আল়ৰিযং ৰিহরতি আল়ৰকস্স যক্খস্স ভৰনেতি এত্থ পন কা আল়ৰী, কস্মা চ ভগৰা তস্স যক্খস্স ভৰনে ৰিহরতীতি? ৰুচ্চতে – আল়ৰীতি রট্ঠম্পি নগরম্পি ৰুচ্চতি, তদুভযম্পি ইধ ৰট্টতি. আল়ৰীনগরস্স হি সমীপে ৰিহরন্তোপি ‘‘আল়ৰিযং ৰিহরতী’’তি ৰুচ্চতি. তস্স চ নগরস্স সমীপে অৰিদূরে গাৰুতমত্তে তং ভৰনং, আল়ৰীরট্ঠে ৰিহরন্তোপি ‘‘আল়ৰিযং ৰিহরতী’’তি ৰুচ্চতি, আল়ৰীরট্ঠে চেতং ভৰনং.

যস্মা পন আল়ৰকো রাজা ৰিৰিধনাটকূপভোগং ছড্ডেত্ৰা চোরপটিবাহনত্থং পটিরাজনিসেধনত্থং ব্যাযামকরণত্থঞ্চ সত্তমে সত্তমে দিৰসে মিগৰং গচ্ছন্তো একদিৰসং বলকাযেন সদ্ধিং কতিকং অকাসি – ‘‘যস্স পস্সেন ¶ মিগো পলাযতি, তস্সেৰ সো ভারো’’তি. অথ তস্সেৰ পস্সেন মিগো পলাযি, জৰসম্পন্নো রাজা ধনুং গহেত্ৰা পত্তিকোৰ তিযোজনং তং মিগং অনুবন্ধি. এণিমিগা চ তিযোজনৰেগা এৰ হোন্তি. অথ পরিক্খীণজৰং তং মিগং উদকং পৰিসিত্ৰা, ঠিতং ৰধিত্ৰা, দ্ৰিধা ছেত্ৰা, অনত্থিকোপি মংসেন ‘‘নাসক্খি মিগং গহেতু’’ন্তি অপৰাদমোচনত্থং কাজেনাদায আগচ্ছন্তো নগরস্সাৰিদূরে বহলপত্তপলাসং মহানিগ্রোধং দিস্ৰা পরিস্সমৰিনোদনত্থং তস্স মূলমুপগতো. তস্মিঞ্চ নিগ্রোধে আল়ৰকো যক্খো মহারাজসন্তিকা ৰরং লভিত্ৰা মজ্ঝন্হিকসমযে তস্স রুক্খস্স ছাযায ফুট্ঠোকাসং পৰিট্ঠে পাণিনো খাদন্তো পটিৰসতি. সো তং দিস্ৰা ¶ খাদিতুং উপগতো. অথ রাজা তেন সদ্ধিং কতিকং অকাসি – ‘‘মুঞ্চ মং, অহং তে দিৰসে দিৰসে মনুস্সঞ্চ থালিপাকঞ্চ পেসেস্সামী’’তি. যক্খো ‘‘ত্ৰং রাজূপভোগেন পমত্তো সম্মুস্সসি, অহং পন ভৰনং অনুপগতঞ্চ অননুঞ্ঞাতঞ্চ খাদিতুং ন লভামি, স্ৰাহং ভৰন্তম্পি জীযেয্য’’ন্তি ন মুঞ্চি. রাজা ‘‘যং দিৰসং ন পেসেমি, তং দিৰসং মং গহেত্ৰা খাদাহী’’তি অত্তানং অনুজানিত্ৰা তেন মুত্তো নগরাভিমুখো অগমাসি.

বলকাযো ¶ মগ্গে খন্ধাৰারং বন্ধিত্ৰা ঠিতো রাজানং দিস্ৰা – ‘‘কিং, মহারাজ, অযসমত্তভযা এৰং কিলন্তোসী’’তি ৰদন্তো পচ্চুগ্গন্ত্ৰা পটিগ্গহেসি. রাজা তং পৰত্তিং অনারোচেত্ৰা নগরং গন্ত্ৰা, কতপাতরাসো নগরগুত্তিকং আমন্তেত্ৰা এতমত্থং আরোচেসি. নগরগুত্তিকো – ‘‘কিং, দেৰ, কালপরিচ্ছেদো কতো’’তি আহ. রাজা ‘‘ন কতো, ভণে’’তি আহ. ‘‘দুট্ঠু কতং, দেৰ, অমনুস্সা হি পরিচ্ছিন্নমত্তমেৰ লভন্তি, অপরিচ্ছিন্নে পন জনপদস্স আবাধো ভৰিস্সতি. হোতু, দেৰ, কিঞ্চাপি এৰমকাসি, অপ্পোস্সুক্কো ত্ৰং রজ্জসুখং অনুভোহি, অহমেত্থ কাতব্বং করিস্সামী’’তি. সো কালস্সেৰ ৰুট্ঠায বন্ধনাগারং গন্ত্ৰা যে যে ৰজ্ঝা হোন্তি, তে তে সন্ধায – ‘‘যো জীৰিতত্থিকো হোতি, সো ¶ নিক্খমতূ’’তি ভণতি. যো পঠমং নিক্খমতি তং গেহং নেত্ৰা, ন্হাপেত্ৰা, ভোজেত্ৰা চ, ‘‘ইমং থালিপাকং যক্খস্স দেহী’’তি পেসেতি. তং রুক্খমূলং পৰিট্ঠমত্তংযেৰ যক্খো ভেরৰং অত্তভাৰং নিম্মিনিত্ৰা মূলকন্দং ৰিয খাদতি ¶ . যক্খানুভাৰেন কির মনুস্সানং কেসাদীনি উপাদায সকলসরীরং নৰনীতপিণ্ডো ৰিয হোতি. যক্খস্স ভত্তং গাহাপেত্তুং গতপুরিসা তং দিস্ৰা ভীতা যথামিত্তং আরোচেসুং. ততো পভুতি ‘‘রাজা চোরে গহেত্ৰা যক্খস্স দেতী’’তি মনুস্সা চোরকম্মতো পটিৰিরতা. ততো অপরেন সমযেন নৰচোরানং অভাৰেন পুরাণচোরানঞ্চ পরিক্খযেন বন্ধনাগারানি সুঞ্ঞানি অহেসুং.

অথ নগরগুত্তিকো রঞ্ঞো আরোচেসি. রাজা অত্তনো ধনং নগররচ্ছাসু ছড্ডাপেসি – ‘‘অপ্পেৰ নাম কোচি লোভেন গণ্হেয্যা’’তি. তং পাদেনপি ন কোচি ছুপি. সো চোরে অলভন্তো অমচ্চানং আরোচেসি. অমচ্চা ‘‘কুলপটিপাটিযা একমেকং জিণ্ণকং পেসেম, সো পকতিযাপি মচ্চুমুখে ৰত্ততী’’তি আহংসু. রাজা ‘‘‘অম্হাকং পিতরং, অম্হাকং পিতামহং পেসেতী’তি মনুস্সা খোভং করিস্সন্তি, মা ৰো এতং রুচ্চী’’তি নিৰারেসি. ‘‘তেন হি, দেৰ, দারকং পেসেম উত্তানসেয্যকং, তথাৰিধস্স হি ‘মাতা মে পিতা মে’তি সিনেহো নত্থী’’তি আহংসু. রাজা অনুজানি. তে তথা অকংসু. নগরে দারকমাতরো চ দারকে গহেত্ৰা গব্ভিনিযো চ পলাযিত্ৰা পরজনপদে দারকে সংৰড্ঢেত্ৰা আনেন্তি. এৰং সব্বানিপি দ্ৰাদস ৰস্সানি গতানি.

ততো একদিৰসং সকলনগরং ৰিচিনিত্ৰা একম্পি দারকং অলভিত্ৰা রঞ্ঞো আরোচেসুং – ‘‘নত্থি, দেৰ, নগরে দারকো ঠপেত্ৰা অন্তেপুরে তৰ পুত্তং আল়ৰককুমার’’ন্তি. রাজা ‘‘যথা মম পুত্তো পিযো, এৰং সব্বলোকস্স, অত্তনা পন পিযতরং নত্থি, গচ্ছথ, তম্পি দত্ৰা মম জীৰিতং রক্খথা’’তি আহ. তেন চ সমযেন আল়ৰককুমারস্স মাতা পুত্তং ¶ ন্হাপেত্ৰা, মণ্ডেত্ৰা, দুকূলচুম্বটকে কত্ৰা, অঙ্কে সযাপেত্ৰা, নিসিন্না হোতি. রাজপুরিসা রঞ্ঞো আণায তত্থ গন্ত্ৰা ৰিপ্পলপন্তিযা তস্সা সোল়সন্নঞ্চ ইত্থিসহস্সানং সদ্ধিং ধাতিযা তং আদায পক্কমিংসু ‘‘স্ৰে যক্খভক্খো ভৰিস্সতী’’তি. তং দিৰসঞ্চ ভগৰা পচ্চূসসমযে ¶ পচ্চুট্ঠায জেতৰনমহাৰিহারে ¶ গন্ধকুটিযং মহাকরুণাসমাপত্তিং সমাপজ্জিত্ৰা পুন বুদ্ধচক্খুনা লোকং ৰোলোকেন্তো অদ্দস আল়ৰকস্স কুমারস্স অনাগামিফলুপ্পত্তিযা উপনিস্সযং, যক্খস্স চ সোতাপত্তিফলুপ্পত্তিযা উপনিস্সযং দেসনাপরিযোসানে চ চতুরাসীতিযা পাণসহস্সানং ধম্মচক্খুপটিলাভস্সাতি. তস্মা ৰিভাতায রত্তিযা পুরেভত্তকিচ্চং কত্ৰা অনিট্ঠিতপচ্ছাভত্তকিচ্চোৰ কাল়পক্খউপোসথদিৰসে ৰত্তমানে ওগ্গতে সূরিযে এককোৰ অদুতিযো পত্তচীৰরমাদায পাদগমনেনেৰ সাৰত্থিতো তিংস যোজনানি গন্ত্ৰা তস্স যক্খস্স ভৰনং পাৰিসি. তেন ৰুত্তং ‘‘আল়ৰকস্স যক্খস্স ভৰনে’’তি.

কিং পন ভগৰা যস্মিং নিগ্রোধে আল়ৰকস্স ভৰনং, তস্স মূলে ৰিহাসি, উদাহু ভৰনেযেৰাতি? ৰুচ্চতে – ভৰনেযেৰ. যথেৰ হি যক্খা অত্তনো ভৰনং পস্সন্তি, তথা ভগৰাপি. সো তত্থ গন্ত্ৰা ভৰনদ্ৰারে অট্ঠাসি. তদা আল়ৰকো হিমৰন্তে যক্খসমাগমং গতো হোতি. ততো আল়ৰকস্স দ্ৰারপালো গদ্রভো নাম যক্খো ভগৰন্তং উপসঙ্কমিত্ৰা, ৰন্দিত্ৰা – ‘‘কিং, ভন্তে, ভগৰা ৰিকালে আগতো’’তি আহ. ‘‘আম, গদ্রভ, আগতোম্হি. সচে তে অগরু, ৰিহরেয্যামেকরত্তিং আল়ৰকস্স ভৰনে’’তি. ‘‘ন মে, ভন্তে, গরু, অপিচ খো সো যক্খো কক্খল়ো ফরুসো, মাতাপিতূনম্পি অভিৰাদনাদীনি ন করোতি, মা রুচ্চি ভগৰতো ইধ ৰাসো’’তি. ‘‘জানামি, গদ্রভ, তস্স কক্খল়ত্তং, ন কোচি মমন্তরাযো ভৰিস্সতি, সচে তে অগরু, ৰিহরেয্যামেকরত্তি’’ন্তি ¶ .

দুতিযম্পি গদ্রভো যক্খো ভগৰন্তং এতদৰোচ – ‘‘অগ্গিতত্তকপালসদিসো, ভন্তে, আল়ৰকো, ‘মাতাপিতরো’তি ৰা ‘সমণব্রাহ্মণা’তি ৰা ‘ধম্মো’তি ৰা ন জানাতি, ইধাগতানং চিত্তক্খেপম্পি করোতি, হদযম্পি ফালেতি, পাদেপি গহেত্ৰা পরসমুদ্দে ৰা পরচক্কৰাল়ে ৰা খিপতী’’তি. দুতিযম্পি ভগৰা আহ – ‘‘জানামি, গদ্রভ, সচে তে অগরু, ৰিহরেয্যামেকরত্তি’’ন্তি. ততিযম্পি গদ্রভো যক্খো ভগৰন্তং এতদৰোচ – ‘‘অগ্গিতত্তকপালসদিসো, ভন্তে, আল়ৰকো, ‘মাতাপিতরো’তি ৰা ‘সমণব্রাহ্মণা’তি ৰা ‘ধম্মো’তি ৰা ন জানাতি, ইধাগতানং চিত্তক্খেপম্পি করোতি, হদযম্পি ফালেতি, পাদেপি গহেত্ৰা পরসমুদ্দে ¶ ৰা পরচক্কৰাল়ে ৰা খিপতী’’তি. ততিযম্পি ভগৰা আহ – ‘‘জানামি, গদ্রভ, সচে তে অগরু, ৰিহরেয্যামেকরত্তি’’ন্তি. ‘‘ন মে, ভন্তে, গরু, অপিচ খো সো যক্খো অত্তনো অনারোচেত্ৰা ¶ অনুজানন্তং মং জীৰিতা ৰোরোপেয্য, আরোচেমি, ভন্তে, তস্সা’’তি. ‘‘যথাসুখং, গদ্রভ, আরোচেহী’’তি. ‘‘তেন হি, ভন্তে, ত্ৰমেৰ জানাহী’’তি ভগৰন্তং অভিৰাদেত্ৰা হিমৰন্তাভিমুখো পক্কামি. ভৰনদ্ৰারম্পি সযমেৰ ভগৰতো ৰিৰরমদাসি. ভগৰা অন্তোভৰনং পৰিসিত্ৰা যত্থ অভিলক্খিতেসু মঙ্গলদিৰসাদীসু নিসীদিত্ৰা আল়ৰকো সিরিং অনুভোতি, তস্মিংযেৰ দিব্বরতনপল্লঙ্কে নিসীদিত্ৰা সুৰণ্ণাভং মুঞ্চি. তং দিস্ৰা যক্খস্স ইত্থিযো আগন্ত্ৰা, ভগৰন্তং ৰন্দিত্ৰা, সম্পরিৰারেত্ৰা নিসীদিংসু. ভগৰা ‘‘পুব্বে তুম্হে দানং দত্ৰা, সীলং সমাদিযিত্ৰা, পূজনেয্যং পূজেত্ৰা, ইমং সম্পত্তিং পত্তা, ইদানিপি তথেৰ করোথ, মা অঞ্ঞমঞ্ঞং ইস্সামচ্ছরিযাভিভূতা ৰিহরথা’’তিআদিনা নযেন তাসং পকিণ্ণকধম্মকথং কথেসি. তা চ ভগৰতো মধুরনিগ্ঘোসং সুত্ৰা, সাধুকারসহস্সানি দত্ৰা, ভগৰন্তং পরিৰারেত্ৰা নিসীদিংসুযেৰ. গদ্রভোপি হিমৰন্তং গন্ত্ৰা আল়ৰকস্স আরোচেসি – ‘‘যগ্ঘে, মারিস, জানেয্যাসি, ৰিমানে তে ভগৰা নিসিন্নো’’তি. সো গদ্রভস্স সঞ্ঞমকাসি ‘‘তুণ্হী হোহি, গন্ত্ৰা কত্তব্বং করিস্সামী’’তি. পুরিসমানেন কির লজ্জিতো অহোসি, তস্মা ‘‘মা কোচি পরিসমজ্ঝে সুণেয্যা’’তি ৰারেসি.

তদা সাতাগিরহেমৰতা ভগৰন্তং জেতৰনেযেৰ ৰন্দিত্ৰা ‘‘যক্খসমাগমং গমিস্সামা’’তি সপরিৰারা নানাযানেহি আকাসেন গচ্ছন্তি. আকাসে চ যক্খানং ন সব্বত্থ ¶ মগ্গো অত্থি, আকাসট্ঠানি ৰিমানানি পরিহরিত্ৰা মগ্গট্ঠানেনেৰ মগ্গো হোতি. আল়ৰকস্স পন ৰিমানং ভূমট্ঠং সুগুত্তং পাকারপরিক্খিত্তং সুসংৰিহিতদ্ৰারট্টালকগোপুরং, উপরি কংসজালসঞ্ছন্নং মঞ্জূসসদিসং তিযোজনং উব্বেধেন. তস্স উপরি মগ্গো হোতি. তে তং পদেসমাগম্ম গন্তুং অসমত্থা অহেসুং. বুদ্ধানঞ্হি নিসিন্নোকাসস্স উপরিভাগেন যাৰ ভৰগ্গা, তাৰ কোচি গন্তুং অসমত্থো. তে ‘‘কিমিদ’’ন্তি আৰজ্জেত্ৰা ভগৰন্তং দিস্ৰা আকাসে খিত্তলেড্ডু ৰিয ওরুয্হ ৰন্দিত্ৰা, ধম্মং সুত্ৰা, পদক্খিণং কত্ৰা ‘‘যক্খসমাগমং গচ্ছাম ভগৰা’’তি তীণি ৰত্থূনি পসংসন্তা যক্খসমাগমং অগমংসু. আল়ৰকো তে দিস্ৰা ‘‘ইধ নিসীদথা’’তি পটিক্কম্ম ওকাসমদাসি. তে ¶ আল়ৰকস্স নিৰেদেসুং ‘‘লাভা তে, আল়ৰক, যস্স তে ভৰনে ভগৰা ৰিহরতি, গচ্ছাৰুসো ভগৰন্তং পযিরুপাসস্সূ’’তি. এৰং ভগৰা ভৰনেযেৰ ৰিহাসি, ন যস্মিং নিগ্রোধে আল়ৰকস্স ভৰনং, তস্স মূলেতি. তেন ৰুত্তং ‘‘একং সমযং ভগৰা আল়ৰিযং ৰিহরতি আল়ৰকস্স যক্খস্স ভৰনে’’তি.

অথ খো আল়ৰকো…পে… ভগৰন্তং এতদৰোচ ‘‘নিক্খম সমণা’’তি. ‘‘কস্মা পনাযং এতদৰোচা’’তি? ৰুচ্চতে – রোসেতুকামতায. তত্রেৰং আদিতো পভুতি সম্বন্ধো ৰেদিতব্বো ¶ – অযঞ্হি যস্মা অস্সদ্ধস্স সদ্ধাকথা দুক্কথা হোতি দুস্সীলাদীনং সীলাদিকথা ৰিয, তস্মা তেসং যক্খানং সন্তিকা ভগৰতো পসংসং সুত্ৰা এৰ অগ্গিম্হি পক্খিত্তলোণসক্খরা ৰিয অব্ভন্তরকোপেন তটতটাযমানহদযো হুত্ৰা ‘‘কো সো ভগৰা নাম, যো মম ভৰনং পৰিট্ঠো’’তি আহ. তে আহংসু – ‘‘ন ত্ৰং, আৰুসো, জানাসি ভগৰন্তং অম্হাকং সত্থারং, যো তুসিতভৰনে ঠিতো পঞ্চ মহাৰিলোকনানি ৰিলোকেত্ৰা’’তিআদিনা নযেন যাৰ ধম্মচক্কপ্পৰত্তনং কথেন্তা পটিসন্ধিআদিনা দ্ৰত্তিংস পুব্বনিমিত্তানি ৰত্ৰা ‘‘ইমানিপি ত্ৰং, আৰুসো ¶ , অচ্ছরিযানি নাদ্দসা’’তি চোদেসুং. সো দিস্ৰাপি কোধৰসেন ‘‘নাদ্দস’’ন্তি আহ. আৰুসো আল়ৰক পস্সেয্যাসি ৰা ত্ৰং, ন ৰা, কো তযা অত্থো পস্সতা ৰা অপস্সতা ৰা, কিং ত্ৰং করিস্সসি অম্হাকং সত্থুনো, যো ত্ৰং তং উপনিধায চলক্ককুধমহাউসভসমীপে তদহুজাতৰচ্ছকো ৰিয, তিধাপভিন্নমত্তৰারণসমীপে ভিঙ্কপোতকো ৰিয, ভাসুরৰিলম্বকেসরউপসোভিতক্খন্ধস্স মিগরঞ্ঞো সমীপে জরসিঙ্গালো ৰিয, দিযড্ঢযোজনসতপ্পৰড্ঢকাযসুপণ্ণরাজসমীপে ছিন্নপক্খকাকপোতকো ৰিয খাযসি, গচ্ছ যং তে করণীযং, তং করোহীতি. এৰং ৰুত্তে কুদ্ধো আল়ৰকো উট্ঠহিত্ৰা মনোসিলাতলে ৰামপাদেন ঠত্ৰা ‘‘পস্সথ দানি তুম্হাকং ৰা সত্থা মহানুভাৰো, অহং ৰা’’তি দক্খিণপাদেন সট্ঠিযোজনমত্তং কেলাসপব্বতকূটং অক্কমি, তং অযোকূটপহটো নিদ্ধন্তঅযোপিণ্ডো ৰিয পপটিকাযো মুঞ্চি. সো তত্র ঠত্ৰা ‘‘অহং আল়ৰকো’’তি ঘোসেসি, সকলজম্বুদীপং সদ্দো ফরি.

চত্তারো ¶ কির সদ্দা সকলজম্বুদীপে সুয্যিংসু – যঞ্চ পুণ্ণকো যক্খসেনাপতি ধনঞ্চযকোরব্যরাজানং জূতে জিনিত্ৰা অপ্ফোটেত্ৰা ‘‘অহং জিনি’’ন্তি উগ্ঘোসেসি, যঞ্চ সক্কো দেৰানমিন্দো কস্সপস্স ভগৰতো সাসনে পরিহাযমানে ৰিস্সকম্মং দেৰপুত্তং সুনখং কারেত্ৰা ‘‘অহং পাপভিক্খূ চ পাপভিক্খুনিযো চ উপাসকে চ উপাসিকাযো চ সব্বেৰ অধম্মৰাদিনো খাদামী’’তি উগ্ঘোসাপেসি, যঞ্চ কুসজাতকে পভাৰতিহেতু সত্তহি রাজূহি নগরে উপরুদ্ধে পভাৰতিং অত্তনা সহ হত্থিক্খন্ধং আরোপেত্ৰা নগরা নিক্খম্ম ‘‘অহং সীহস্সরকুসমহারাজা’’তি মহাপুরিসো উগ্ঘোসেসি, যঞ্চ আল়ৰকো কেলাসমুদ্ধনি ঠত্ৰা ‘‘অহং আল়ৰকো’’তি. তদা হি সকলজম্বুদীপে দ্ৰারে দ্ৰারে ঠত্ৰা উগ্ঘোসিতসদিসং অহোসি, তিযোজনসহস্সৰিত্থতো ¶ চ হিমৰাপি সঙ্কম্পি যক্খস্স আনুভাৰেন.

সো ৰাতমণ্ডলং সমুট্ঠাপেসি – ‘‘এতেনেৰ সমণং পলাপেস্সামী’’তি. তে পুরত্থিমাদিভেদা ৰাতা সমুট্ঠহিত্ৰা অড্ঢযোজনযোজনদ্ৰিযোজনতিযোজনপ্পমাণানি পব্বতকূটানি পদালেত্ৰা ৰনগচ্ছরুক্খাদীনি উম্মূলেত্ৰা আল়ৰীনগরং পক্খন্তা জিণ্ণহত্থিসালাদীনি চুণ্ণেন্তা ছদনিট্ঠকা ¶ আকাসে ভমেন্তা. ভগৰা ‘‘মা কস্সচি উপরোধো হোতূ’’তি