📜

নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

থেরগাথা-অট্ঠকথা

(পঠমো ভাগো)

গন্থারম্ভকথা

মহাকারুণিকং নাথং, ঞেয্যসাগরপারগুং;

ৰন্দে নিপুণগম্ভীর-ৰিচিত্রনযদেসনং.

ৰিজ্জাচরণসম্পন্না, যেন নিয্যন্তি লোকতো;

ৰন্দে তমুত্তমং ধম্মং, সম্মাসম্বুদ্ধপূজিতং.

সীলাদিগুণসম্পন্নো, ঠিতো মগ্গফলেসু যো;

ৰন্দে অরিযসঙ্ঘং তং, পুঞ্ঞক্খেত্তং অনুত্তরং.

ৰন্দনাজনিতং পুঞ্ঞং, ইতি যং রতনত্তযে;

হতন্তরাযো সব্বত্থ, হুত্ৰাহং তস্স তেজসা.

যা তা সুভূতিআদীহি, কতকিচ্চেহি তাদিহি;

থেরেহি ভাসিতা গাথা, থেরীহি চ নিরামিসা.

উদাননাদৰিধিনা, গম্ভীরা নিপুণা সুভা;

সুঞ্ঞতাপটিসংযুত্তা, অরিযধম্মপ্পকাসিকা.

থেরগাথাতি নামেন, থেরীগাথাতি তাদিনো;

যা খুদ্দকনিকাযম্হি, সঙ্গাযিংসু মহেসযো.

তাসং গম্ভীরঞাণেহি, ওগাহেতব্বভাৰতো;

কিঞ্চাপি দুক্করা কাতুং, অত্থসংৰণ্ণনা মযা.

সহসংৰণ্ণনং যস্মা, ধরতে সত্থু সাসনং;

পুব্বাচরিযসীহানং, তিট্ঠতেৰ ৰিনিচ্ছযো.

তস্মা তং অৰলম্বিত্ৰা, ওগাহেত্ৰান পঞ্চপি;

নিকাযে উপনিস্সায, পোরাণট্ঠকথানযং.

সুৰিসুদ্ধং অসংকিণ্ণং, নিপুণত্থৰিনিচ্ছযং;

মহাৰিহারৰাসীনং, সমযং অৰিলোমযং.

যাসং অত্থো দুৰিঞ্ঞেয্যো, অনুপুব্বিকথং ৰিনা;

তাসং তঞ্চ ৰিভাৰেন্তো, দীপযন্তো ৰিনিচ্ছযং.

যথাবলং করিস্সামি, অত্থসংৰণ্ণনং সুভং;

সক্কচ্চং থেরগাথানং, থেরীগাথানমেৰ চ.

ইতি আকঙ্খমানস্স, সদ্ধম্মস্স চিরট্ঠিতিং;

তদত্থং ৰিভজন্তস্স, নিসামযথ সাধৰোতি.

কা পনেতা থেরগাথা থেরীগাথা চ, কথঞ্চ পৰত্তাতি, কামঞ্চাযমত্থো গাথাসু ৰুত্তোযেৰ পাকটকরণত্থং পন পুনপি ৰুচ্চতে – তত্থ থেরগাথা তাৰ সুভূতিত্থেরাদীহি ভাসিতা. যা হি তে অত্তনা যথাধিগতং মগ্গফলসুখং পচ্চৰেক্খিত্ৰা কাচি উদানৰসেন, কাচি অত্তনো সমাপত্তিৰিহারপচ্চৰেক্খণৰসেন, কাচি পুচ্ছাৰসেন, কাচি পরিনিব্বানসমযে সাসনস্স নিয্যানিকভাৰৰিভাৰনৰসেন অভাসিংসু, তা সব্বা সঙ্গীতিকালে একজ্ঝং কত্ৰা ‘‘থেরগাথা’’ইচ্চেৰ ধম্মসঙ্গাহকেহি সঙ্গীতা. থেরীগাথা পন থেরিযো উদ্দিস্স দেসিতা.

তা পন ৰিনযপিটকং, সুত্তন্তপিটকং অভিধম্মপিটকন্তি তীসু পিটকেসু সুত্তন্তপিটকপরিযাপন্না. দীঘনিকাযো, মজ্ঝিমনিকাযো, সংযুত্তনিকাযো, অঙ্গুত্তরনিকাযো, খুদ্দকনিকাযোতি পঞ্চসু নিকাযেসু খুদ্দকনিকাযপরিযাপন্না, সুত্তং, গেয্যং, ৰেয্যাকরণং, গাথা, উদানং, ইতিৰুত্তকং, জাতকং, অব্ভুতধম্মং, ৰেদল্লন্তি নৰসু সাসনঙ্গেসু গাথঙ্গসঙ্গহং গতা.

‘‘দ্ৰাসীতি বুদ্ধতো গণ্হিং, দ্ৰেসহস্সানি ভিক্খুতো;

চতুরাসীতিসহস্সানি, যে মে ধম্মা পৰত্তিনো’’তি.

এৰং ধম্মভণ্ডাগারিকেন পটিঞ্ঞাতেসু চতুরাসীতিযা ধম্মক্খন্ধসহস্সেসু কতিপযধম্মক্খন্ধসঙ্গহং গতা.

তত্থ থেরগাথা তাৰ নিপাততো একনিপাতো একুত্তরৰসেন যাৰ চুদ্দসনিপাতাতি চুদ্দসনিপাতো সোল়সনিপাতো ৰীসতিনিপাতো তিংসনিপাতো চত্তালীসনিপাতো পঞ্ঞাসনিপাতো সট্ঠিনিপাতো সত্ততিনিপাতোতি একৰীসতিনিপাতসঙ্গহা. নিপাতনং নিক্খিপনন্তি নিপাতো. একো একেকো গাথানং নিপাতো নিক্খেপো এত্থাতি একনিপাতো. ইমিনা নযেন সেসেসুপি অত্থো ৰেদিতব্বো.

তত্থ একনিপাতে দ্ৰাদস ৰগ্গা. একেকস্মিং ৰগ্গে দস দস কত্ৰা ৰীসুত্তরসতং থেরা, তত্তিকা এৰ গাথা. ৰুত্তঞ্হি –

‘‘ৰীসুত্তরসতং থেরা, কতকিচ্চা অনাসৰা;

এককম্হি নিপাতম্হি, সুসঙ্গীতা মহেসিভী’’তি.

দুকনিপাতে একূনপঞ্ঞাস থেরা, অট্ঠনৰুতি গাথা; তিকনিপাতে সোল়স থেরা, অট্ঠচত্তালীস গাথা; চতুক্কনিপাতে তেরস থেরা, দ্ৰেপঞ্ঞাস গাথা; পঞ্চকনিপাতে দ্ৰাদস থেরা, সট্ঠি গাথা; ছক্কনিপাতে চুদ্দস থেরা, চতুরাসীতি গাথা; সত্তকনিপাতে পঞ্চ থেরা, পঞ্চতিংস গাথা; অট্ঠকনিপাতে তযো থেরা, চতুৰীসতি গাথা; নৰকনিপাতে একো থেরো, নৰ গাথা; দসনিপাতে সত্ত থেরা, সত্ততি গাথা; একাদসনিপাতে একো থেরো, একাদস গাথা; দ্ৰাদসনিপাতে দ্ৰে থেরা, চতুৰীসতি গাথা; তেরসনিপাতে একো থেরো, তেরস গাথা; চুদ্দসনিপাতে দ্ৰে থেরা, অট্ঠৰীসতি গাথা; পন্নরসনিপাতো নত্থি, সোল়সনিপাতে দ্ৰে থেরা, দ্ৰত্তিংস গাথা; ৰীসতিনিপাতে দস থেরা, পঞ্চচত্তালীসাধিকানি দ্ৰে গাথাসতানি; তিংসনিপাতে তযো থেরা, সতং পঞ্চ চ গাথা; চত্তালীসনিপাতে একো থেরো, দ্ৰেচত্তালীস গাথা; পঞ্ঞাসনিপাতে একো থেরো, পঞ্চপঞ্ঞাস গাথা; সট্ঠিনিপাতে একো থেরো, অট্ঠসট্ঠি গাথা; সত্ততিনিপাতে একো থেরো, একসত্ততি গাথা. সম্পিণ্ডেত্ৰা পন দ্ৰেসতানি চতুসট্ঠি চ থেরা, সহস্সং তীণি সতানি সট্ঠি চ গাথাতি. ৰুত্তম্পি চেতং –

‘‘সহস্সং হোন্তি তা গাথা, তীণি সট্ঠি সতানি চ;

থেরা চ দ্ৰে সতা সট্ঠি, চত্তারো চ পকাসিতা’’তি.

থেরীগাথা পন একনিপাতো একুত্তরৰসেন যাৰ নৰনিপাতাতি নৰনিপাতো একাদসনিপাতো, দ্ৰাদসনিপাতো, সোল়সনিপাতো, ৰীসতিনিপাতো, তিংসনিপাতো, চত্তালীসনিপাতো, মহানিপাতোতি সোল়সনিপাতসঙ্গহা. তত্থ একনিপাতে অট্ঠারস থেরিযো, অট্ঠারসেৰ গাথা; দুকনিপাতে দস থেরিযো, ৰীসতি গাথা; তিকনিপাতে অট্ঠ থেরিযো, চতুৰীসতি গাথা; চতুক্কনিপাতে একা থেরী, চতস্সো গাথা; পঞ্চকনিপাতে দ্ৰাদস থেরিযো সট্ঠি গাথা; ছক্কনিপাতে অট্ঠ থেরিযো অট্ঠচত্তালীস গাথা; সত্তনিপাতে তিস্সো থেরিযো, একৰীসতি গাথা; অট্ঠ নিপাততো পট্ঠায যাৰ সোল়সনিপাতা একেকা থেরিযো তংতংনিপাতপরিমাণা গাথা; ৰীসতিনিপাতে পঞ্চ থেরিযো, অট্ঠারসসতগাথা; তিংসনিপাতে একা থেরী, চতুত্তিংস গাথা; চত্তালীসনিপাতে একা থেরী, অট্ঠচত্তালীস গাথা; মহানিপাতেপি একা থেরী, পঞ্চসত্ততি গাথা. এৰমেত্থ নিপাতানং গাথাৰগ্গানং গাথানঞ্চ পরিমাণং ৰেদিতব্বং.

নিদানগাথাৰণ্ণনা

এৰং পরিচ্ছিন্নপরিমাণাসু পনেতাসু থেরগাথা আদি. তত্থাপি –

‘‘সীহানংৰ নদন্তানং, দাঠীনং গিরিগব্ভরে;

সুণাথ ভাৰিতত্তানং, গাথা অত্থূপনাযিকা’’তি.

অযং পঠমমহাসঙ্গীতিকালে আযস্মতা আনন্দেন তেসং থেরানং থোমনত্থং ভাসিতা গাথা আদি. তত্থ সীহানন্তি সীহসদ্দো ‘‘সীহো, ভিক্খৰে, মিগরাজা’’তিআদীসু (অ. নি. ৪.৩৩) মিগরাজে আগতো. ‘‘অথ খো সীহো সেনাপতি যেন ভগৰা তেনুপসঙ্কমী’’তিআদীসু (অ. নি. ৫.৩৪) পঞ্ঞত্তিযং. ‘‘সীহোতি খো, ভিক্খৰে, তথাগতস্সেতং অধিৰচনং অরহতো সম্মাসম্বুদ্ধস্সা’’তিআদীসু (অ. নি. ৫.৯৯; ১০.২১) তথাগতে. তত্থ যথা তথাগতে সদিসকপ্পনায আগতো, এৰং ইধাপি সদিসকপ্পনাৰসেনেৰ ৰেদিতব্বো, তস্মা সীহানংৰাতি সীহানং ইৰ. সন্ধিৰসেন সরলোপো ‘‘এৰংস তে’’তিআদীসু (ম. নি. ১.২২) ৰিয. তত্থ ইৰাতি নিপাতপদং. সুণাথাতি আখ্যাতপদং. ইতরানি নামপদানি. সীহানংৰাতি চ সম্বন্ধে সামিৰচনং. কামঞ্চেত্থ সম্বন্ধী সরূপতো ন ৰুত্তো, অত্থতো পন ৰুত্তোৰ হোতি. যথা হি ‘‘ওট্ঠস্সেৰ মুখং এতস্সা’’তি ৰুত্তে ওট্ঠস্স মুখং ৰিয মুখং এতস্সাতি অযমত্থো ৰুত্তো এৰ হোতি, এৰমিধাপি ‘‘সীহানংৰা’’তি ৰুত্তে সীহানং নাদো ৰিযাতি অযমত্থো ৰুত্তো এৰ হোতি. তত্থ মুখসদ্দসন্নিধানং হোতীতি চে, ইধাপি ‘‘নদন্তান’’ন্তি পদসন্নিধানতো, তস্মা সীহানংৰাতি নিদস্সনৰচনং. নদন্তানন্তি তস্স নিদস্সিতব্বেন সম্বন্ধদস্সনং. দাঠীনন্তি তব্বিসেসনং. গিরিগব্ভরেতি তস্স পৰত্তিট্ঠানদস্সনং. সুণাথাতি সৰনে নিযোজনং. ভাৰিতত্তানন্তি সোতব্বস্স পভৰদস্সনং. গাথাতি সোতব্বৰত্থুদস্সনং. অত্থুপনাযিকাতি তব্বিসেসনং. কামঞ্চেত্থ ‘‘সীহানং নদন্তানং দাঠীন’’ন্তি পুল্লিঙ্গৰসেন আগতং, লিঙ্গং পন পরিৰত্তেত্ৰা ‘‘সীহীন’’ন্তিআদিনা ইত্থিলিঙ্গৰসেনাপি অত্থো ৰেদিতব্বো. একসেসৰসেন ৰা সীহা চ সীহিযো চ সীহা, তেসং সীহানন্তিআদিনা সাধারণা হেতা তিস্সো নিদানগাথা থেরগাথানং থেরীগাথানঞ্চাতি.

তত্থ সহনতো হননতো চ সীহো. যথা হি সীহস্স মিগরঞ্ঞো বলৰিসেসযোগতো সরভমিগমত্তৰরৰারণাদিতোপি পরিস্সযো নাম নত্থি, ৰাতাতপাদিপরিস্সযম্পি সো সহতিযেৰ, গোচরায পক্কমন্তোপি তেজুস্সদতায মত্তগন্ধহত্থিৰনমহিংসাদিকে সমাগন্ত্ৰা অভীরূ অছম্ভী অভিভৰতি, অভিভৰন্তো চ তে অঞ্ঞদত্থু হন্ত্ৰা তত্থ মুদুমংসানি ভক্খযিত্ৰা সুখেনেৰ ৰিহরতি, এৰমেতেপি মহাথেরা অরিযবলৰিসেসযোগেন সব্বেসম্পি পরিস্সযানং সহনতো, রাগাদিসংকিলেসবলস্স অভিভৰিত্ৰা হননতো পজহনতো তেজুস্সদভাৰেন কুতোচিপি অভীরূ অছম্ভী ঝানাদিসুখেন ৰিহরন্তীতি সহনতো হননতো চ সীহা ৰিযাতি সীহা. সদ্দত্থতো পন যথা কন্তনত্থেন আদিঅন্তৰিপল্লাসতো তক্কং ৰুচ্চতি, এৰং হিংসনট্ঠেন সীহো ৰেদিতব্বো. তথা সহনট্ঠেন. পিসোদরাদিপক্খেপেন নিরুত্তিনযেন পন ৰুচ্চমানে ৰত্তব্বমেৰ নত্থি.

অথ ৰা যথা মিগরাজা কেসরসীহো অত্তনো তেজুস্সদতায একচারী ৰিহরতি, ন কঞ্চি সহাযং পচ্চাসীসতি, এৰমেতেপি তেজুস্সদতায ৰিৰেকাভিরতিযা চ একচারিনোতি একচরিযট্ঠেনপি সীহা ৰিযাতি সীহা, তেনাহ – ভগৰা ‘‘সীহংৰেকচরং নাগ’’ন্তি (সং. নি. ১.৩০; সু. নি. ১৬৮).

অথ ৰা অসন্তাসনজৰপরক্কমাদিৰিসেসযোগতো সীহা ৰিযাতি সীহা, এতে মহাথেরা. ৰুত্তঞ্হেতং ভগৰতা –

‘‘দ্ৰেমে, ভিক্খৰে, অসনিযা ফলন্তিযা ন সন্তসন্তি, কতমেৰ দ্ৰে? ভিক্খু চ খীণাসৰো সীহো চ মিগরাজা’’তি (অ. নি. ২.৬০).

জৰোপি সীহস্স অঞ্ঞেহি অসাধারণো, তথা পরক্কমো. তথা হি সো উসভসতম্পি লঙ্ঘিত্ৰা ৰনমহিংসাদীসু নিপততি, পোতকোপি সমানো পভিন্নমদানম্পি মত্তৰরৰারণানং পটিমানং ভিন্দিত্ৰা দন্তকল়ীরংৰ খাদতি. এতেসং পন অরিযমগ্গজৰো ইদ্ধিজৰো চ অঞ্ঞেহি অসাধারণো, সম্মপ্পধানপরক্কমো চ নিরতিসযো. তস্মা সীহানংৰাতি সীহসদিসানং ৰিয. সীহস্স চেত্থ হীনূপমতা দট্ঠব্বা, অচ্চন্তৰিসিট্ঠস্স সহনাদিঅত্থস্স থেরেস্ৰেৰ লব্ভনতো.

নদন্তানন্তি গজ্জন্তানং. গোচরপরক্কমতুট্ঠিৰেলাদীসু হি যথা সীহা অত্তনো আসযতো নিক্খমিত্ৰা ৰিজম্ভিত্ৰা সীহনাদং অভীতনাদং নদন্তি, এৰং এতেপি ৰিসযজ্ঝত্তপচ্চৰেক্খণউদানাদিকালেসু ইমং অভীতনাদং নদিংসু. তেন ৰুত্তং – ‘‘সীহানংৰ নদন্তান’’ন্তি. দাঠীনন্তি দাঠাৰন্তানং. পসট্ঠদাঠীনং, অতিসযদাঠানন্তি ৰা অত্থো. যথা হি সীহা অতিৰিয দল়্হানং তিক্খানঞ্চ চতুন্নং দাঠানং বলেন পটিপক্খং অভিভৰিত্ৰা অত্তনো মনোরথং মত্থকং পূরেন্তি, এৰমেতেপি চতুন্নং অরিযমগ্গদাঠানং বলেন অনাদিমতি সংসারে অনভিভূতপুব্বপটিপক্খং অভিভৰিত্ৰা অত্তনো মনোরথং মত্থকং পাপেসুং. ইধাপি দাঠা ৰিযাতি দাঠাতি সদিসকপ্পনাৰসেনেৰ অত্থো ৰেদিতব্বো.

গিরিগব্ভরেতি পব্বতগুহাযং, সমীপত্থে ভুম্মৰচনং. ‘‘গিরিগৰ্হরে’’তি কেচি পঠন্তি. পব্বতেসু ৰনগহনে ৰনসণ্ডেতি অত্থো. ইদং পন নেসং ৰিরোচনট্ঠানদস্সনঞ্চেৰ সীহনাদস্স যোগ্যভূমিদস্সনঞ্চ. নদন্তানং গিরিগব্ভরেতি যোজনা. যথা হি সীহা যেভুয্যেন গিরিগব্ভরে অঞ্ঞেহি দুরাসদতায জনৰিৰিত্তে ৰসন্তা অত্তনো দস্সনেন উপ্পজ্জনকস্স খুদ্দকমিগসন্তাসস্স পরিহরণত্থং গোচরগমনে সীহনাদং নদন্তি, এৰমেতেপি অঞ্ঞেহি দুরাসদগিরিগব্ভরসদিসেৰ সুঞ্ঞাগারেৰসন্তা গুণেহি খুদ্দকানং পুথুজ্জনানং তণ্হাদিট্ঠিপরিত্তাসপরিৰজ্জনত্থং ৰক্খমানগাথাসঙ্খাতং অভীতনাদং নদিংসু. তেন ৰুত্তং ‘‘সীহানংৰ নদন্তানং, দাঠীনং গিরিগব্ভরে’’তি.

সুণাথাতি সৰনাণত্তিকৰচনং, তেন ৰক্খমানানং গাথানং সন্নিপতিতায পরিসায সোতুকামতং উপ্পাদেন্তো সৰনে আদরং জনেতি, উস্সাহং সমুট্ঠাপেন্তো গারৰং বহুমানঞ্চ উপট্ঠপেতি. অথ ৰা ‘‘সীহান’’ন্তিআদীনং পদানং সদিসকপ্পনায ৰিনা মুখ্যৰসেনেৰ অত্থো ৰেদিতব্বো. তস্মা দল়্হতিক্খভাৰেন পসট্ঠাতিসযদাঠতায দাঠীনং গিরিগব্ভরে নদন্তানং সীহগজ্জিতং গজ্জন্তানং সীহানং মিগরাজূনং ৰিয তেসং অভীতনাদসদিসা গাথা সুণাথাতি অত্থো. ইদং ৰুত্তং হোতি – ‘‘যথা সীহনাদং নদন্তানং সীহানং মিগরাজূনং কুতোচিপি ভযাভাৰতো সো অভীতনাদো তদঞ্ঞমিগসন্তাসকরো, এৰং ভাৰিতত্তানং অপ্পমত্তানং থেরানং সীহনাদসদিসিযো সব্বসো ভযহেতূনং সুপ্পহীনত্তা অভীতনাদভূতা, পমত্তজনসন্তাসকরা গাথা সুণাথা’’তি.

ভাৰিতত্তানন্তি ভাৰিতচিত্তানং. চিত্তঞ্হি ‘‘অত্তা হি কির দুদ্দমো (ধ. প. ১৫৯) যো ৰে ঠিতত্তো তসরংৰ উজ্জূ’’তি (সু. নি. ২১৭) চ ‘‘অত্তসম্মাপণিধী’’তি (খু. পা. ৫.৪; সু. নি. ২৬৩) চ এৰমাদীসু অত্তাতি ৰুচ্চতি, তস্মা অধিচিত্তানুযোগেন সমথৰিপস্সনাভিৰড্ঢিতচিত্তানং সমথৰিপস্সনাভাৰনামত্থকং পাপেত্ৰা ঠিতানন্তি অত্থো. অথ ৰা ভাৰিতত্তানন্তি ভাৰিতসভাৰানং, সভাৰভূতসীলাদিভাৰিতানন্তি অত্থো. গীযতীতি গাথা, অনুট্ঠুভাদিৰসেন ইসীহি পৰত্তিতং চতুপ্পদং ছপ্পদং ৰা ৰচনং. অঞ্ঞেসম্পি তংসদিসতায তথা ৰুচ্চন্তি. অত্তত্থাদিভেদে অত্থে উপনেন্তি তেসু ৰা উপনিয্যন্তীতি অত্থূপনাযিকা.

অথ ৰা ভাৰিতত্তানন্তি ভাৰিতত্তাভাৰানং, অত্তভাৰো হি আহিতো অহং মানো এত্থাতি ‘‘অত্তা’’তি ৰুচ্চতি, সো চ তেহি অপ্পমাদভাৰনায অনৰজ্জভাৰনায ভাৰিতো সম্মদেৰ গুণগন্ধং গাহাপিতো. তেন তেসং কাযভাৰনা সীলভাৰনা চিত্তভাৰনা পঞ্ঞাভাৰনাতি চতুন্নম্পি ভাৰনানং পরিপুণ্ণভাৰং দস্সেতি. ‘‘ভাৰনা’’তি চ সম্বোধিপটিপদা ইধাধিপ্পেতা. যাযং সচ্চসম্বোধি অত্থি, সা দুৰিধা অভিসমযতো তদত্থতো চ. সম্বোধি পন তিৰিধা সম্মাসম্বোধি পচ্চেকসম্বোধি সাৰকসম্বোধীতি. তত্থ সম্মা সামং সব্বধম্মানং বুজ্ঝনতো বোধনতো চ সম্মাসম্বোধি. সব্বঞ্ঞুতঞ্ঞাণপদট্ঠানং মগ্গঞাণং মগ্গঞাণপদট্ঠানঞ্চ সব্বঞ্ঞুতঞ্ঞাণং ‘‘সম্মাসম্বোধী’’তি ৰুচ্চতি. তেনাহ –

‘‘বুদ্ধোতি যো সো ভগৰা সযম্ভূ অনাচরিযকো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝি, তত্থ চ সব্বঞ্ঞুতং পত্তো বলেসু চ ৰসীভাৰ’’ন্তি (মহানি. ১৯২; চূল়নি. পারাযনত্থুতিগাথানিদ্দেস ৯৭; পটি. ম. ১.১৬১).

বোধনেয্যবোধনত্থো হি বলেসু ৰসীভাৰো. পচ্চেকং সযমেৰ বোধীতি পচ্চেকসম্বোধি, অননুবুদ্ধো সযম্ভূঞাণেন সচ্চাভিসমযোতি অত্থো. সম্মাসম্বুদ্ধানঞ্হি সযম্ভূঞাণতায সযমেৰ পৰত্তমানোপি সচ্চাভিসমযো সানুবুদ্ধো অপরিমাণানং সত্তানং সচ্চাভিসমযস্স হেতুভাৰতো. ইমেসং পন সো একস্সাপি সত্তস্স সচ্চাভিসমযহেতু ন হোতি. সত্থু ধম্মদেসনায সৰনন্তে জাতাতি সাৰকা. সাৰকানং সচ্চাভিসমযো সাৰকসম্বোধি. তিৰিধাপেসা তিণ্ণং বোধিসত্তানং যথাসকং আগমনীযপটিপদায মত্থকপ্পত্তিযা সতিপট্ঠানাদীনং সত্ততিংসায বোধিপক্খিযধম্মানং ভাৰনাপারিপূরীতি ৰেদিতব্বা ইতরাভিসমযানং তদৰিনাভাৰতো. ন হি সচ্ছিকিরিযাভিসমযেন ৰিনা ভাৰনাভিসমযো সম্ভৰতি, সতি চ ভাৰনাভিসমযে পহানাভিসমযো পরিঞ্ঞাভিসমযো চ সিদ্ধোযেৰ হোতীতি.

যদা হি মহাবোধিসত্তো পরিপূরিতবোধিসম্ভারো চরিমভৰে কতপুব্বকিচ্চো বোধিমণ্ডং আরুয্হ – ‘‘ন তাৰিমং পল্লঙ্কং ভিন্দিস্সামি, যাৰ ন মে অনুপাদায আসৰেহি চিত্তং ৰিমুচ্চিস্সতী’’তি পটিঞ্ঞং কত্ৰা অপরাজিতপল্লঙ্কে নিসিন্নো অসম্পত্তায এৰ সঞ্ঝাৰেলায মারবলং ৰিধমিত্ৰা পুরিমযামে পুব্বেনিৰাসানুস্সতিঞাণেন অনেকাকারৰোকারে পুব্বে নিৰুত্থক্খন্ধে অনুস্সরিত্ৰা মজ্ঝিমযামে দিব্বচক্খুৰিসোধনেন চুতূপপাতঞাণঅনাগতংসঞাণানি অধিগন্ত্ৰা পচ্ছিমযামে ‘‘কিচ্ছং ৰতাযং লোকো আপন্নো জাযতি চ জীযতি চ মীযতি চ চৰতি চ উপপজ্জতি চ, অথ চ পনিমস্স দুক্খস্স নিস্সরণং নপ্পজানাতি জরামরণস্সা’’তিআদিনা (দী. নি. ২.৫৭) জরামরণতো পট্ঠায পটিচ্চসমুপ্পাদমুখেন ৰিপস্সনং অভিনিৰিসিত্ৰা মহাগহনং ছিন্দিতুং নিসদসিলাযং ফরসুং নিসেন্তো ৰিয কিলেসগহনং ছিন্দিতুং লোকনাথো ঞাণফরসুং তেজেন্তো বুদ্ধভাৰায হেতুসম্পত্তিযা পরিপাকং গতত্তা সব্বঞ্ঞুতঞ্ঞাণাধিগমায ৰিপস্সনং গব্ভং গণ্হাপেন্তো অন্তরন্তরা নানাসমাপত্তিযো সমাপজ্জিত্ৰা যথাৰৰত্থাপিতে নামরূপে তিলক্খণং আরোপেত্ৰা অনুপদধম্মৰিপস্সনাৰসেন অনেকাকারৰোকারসঙ্খারে সম্মসন্তো ছত্তিংসকোটিসতসহস্সমুখেন সম্মসনৰারং ৰিত্থারেত্ৰা তত্থ মহাৰজিরঞাণসঙ্খাতে ৰিপস্সনাঞাণে তিক্খে সূরে পসন্নে ৰুট্ঠানগামিনিভাৰেন পৰত্তমানে যদা তং মগ্গেন ঘটেতি, তদা মগ্গপটিপাটিযা দিযড্ঢকিলেসসহস্সং খেপেন্তো অগ্গমগ্গক্খণে সম্মাসম্বোধিং অধিগচ্ছতি নাম, অগ্গফলক্খণতো পট্ঠায অধিগতো নাম. সম্মাসম্বুদ্ধভাৰতো দসবলচতুৰেসারজ্জাদযোপি তস্স তদা হত্থগতাযেৰ হোন্তীতি অযং তাৰ অভিসমযতো সম্মাসম্বোধিপটিপদা. তদত্থতো পন মহাভিনীহারতো পট্ঠায যাৰ তুসিতভৰনে নিব্বত্তি, এত্থন্তরে পৰত্তং বোধিসম্ভারসম্ভরণং. তত্থ যং ৰত্তব্বং, তং সব্বাকারসম্পন্নং চরিযাপিটকৰণ্ণনাযং ৰিত্থারতো ৰুত্তমেৰাতি তত্থ ৰুত্তনযেনেৰ গহেতব্বং.

পচ্চেকবোধিসত্তাপি পচ্চেকবোধিযা কতাভিনীহারা অনুপুব্বেন সম্ভতপচ্চেকসম্বোধিসম্ভারা তাদিসে কালে চরিমত্তভাৰে ঠিতা ঞাণস্স পরিপাকগতভাৰেন উপট্ঠিতং সংৰেগনিমিত্তং গহেত্ৰা সৰিসেসং ভৰাদীসু আদীনৰং দিস্ৰা সযম্ভূঞাণেন পৰত্তি পৰত্তিহেতুং নিৰত্তি নিৰত্তিহেতুঞ্চ পরিচ্ছিন্দিত্ৰা ‘‘সো ‘ইদং দুক্খ’ন্তি যোনিসো মনসি করোতী’’তিআদিনা আগতনযেন চতুসচ্চকম্মট্ঠানং পরিব্রূহেন্তা অত্তনো অভিনীহারানুরূপং সঙ্খারে পরিমদ্দন্তা অনুক্কমেন ৰিপস্সনং উস্সুক্কাপেত্ৰা মগ্গপটিপাটিযা অগ্গমগ্গং অধিগচ্ছন্তা পচ্চেকসম্বোধিং অভিসম্বুজ্ঝন্তি নাম, অগ্গফলক্খণতো পট্ঠায পচ্চেকসম্বুদ্ধা নাম হুত্ৰা সদেৰকস্স লোকস্স অগ্গদক্খিণেয্যা হোন্তি.

সাৰকা পন সত্থু সব্রহ্মচারিনো ৰা চতুসচ্চকম্মট্ঠানকথং সুত্ৰা তস্মিংযেৰ খণে কালন্তরে ৰা তজ্জং পটিপত্তিং অনুতিট্ঠন্তা ঘটেন্তা ৰাযমন্তা ৰিপস্সনং উস্সুক্কাপেত্ৰা, যদি ৰা পটিপদায ৰড্ঢন্তিযা, সচ্চানি পটিৰিজ্ঝন্তা অত্তনো অভিনীহারানুরূপসিদ্ধিঅগ্গসাৰকভূমিযা ৰা কেৰলং ৰা অগ্গমগ্গক্খণে সাৰকসম্বোধিং অধিগচ্ছন্তি নাম. ততো পরং সাৰকবুদ্ধা নাম হোন্তি সদেৰকে লোকে অগ্গদক্খিণেয্যা. এৰং তাৰ অভিসমযতো পচ্চেকসম্বোধি সাৰকসম্বোধি চ ৰেদিতব্বা.

তদত্থতো পন যথা মহাবোধিসত্তানং হেট্ঠিমপরিচ্ছেদেন চত্তারি অসঙ্খ্যেয্যানি কপ্পানং সতসহস্সঞ্চ বোধিসম্ভারসম্ভরণং ইচ্ছিতব্বং মজ্ঝিমপরিচ্ছেদেন অট্ঠ অসঙ্খ্যেয্যানি কপ্পানং সতসহস্সঞ্চ, উপরিমপরিচ্ছেদেন সোল়স অসঙ্খ্যেয্যানি কপ্পানং সতসহস্সঞ্চ এতে চ ভেদা পঞ্ঞাধিকসদ্ধাধিকৰীরিযাধিকৰসেন ৰেদিতব্বা. পঞ্ঞাধিকানঞ্হি সদ্ধা মন্দা হোতি পঞ্ঞা তিক্খা, ততো চ উপাযকোসল্লস্স ৰিসদনিপুণভাৰেন নচিরস্সেৰ পারমিযো পারিপূরিং গচ্ছন্তি. সদ্ধাধিকানং পঞ্ঞা মজ্ঝিমা হোতীতি তেসং নাতিসীঘং নাতিসণিকং পারমিযো পারিপূরিং গচ্ছন্তি. ৰীরিযাধিকানং পন পঞ্ঞা মন্দা হোতীতি তেসং চিরেনেৰ পারমিযো পারিপূরিং গচ্ছন্তি. ন এৰং পচ্চেকবোধিসত্তানং. তেসঞ্হি সতিপি পঞ্ঞাধিকভাৰে দ্ৰে অসঙ্খ্যেয্যানি কপ্পানং সতসহস্সঞ্চ বোধিসম্ভারসম্ভরণং ইচ্ছিতব্বং, ন ততো ওরং. সদ্ধাধিকৰীরিযাধিকাপি ৰুত্তপরিচ্ছেদতো পরং কতিপযে এৰ কপ্পে অতিক্কমিত্ৰা পচ্চেকসম্বোধিং অভিসম্বুজ্ঝন্তি, ন ততিযং অসঙ্খ্যেয্যন্তি. সাৰকবোধিসত্তানং পন যেসং অগ্গসাৰকভাৰায অভিনীহারো, তেসং একং অসঙ্খ্যেয্যং কপ্পানং সতসহস্সঞ্চ সম্ভারসম্ভরণং ইচ্ছিতব্বং. যেসং মহাসাৰকভাৰায, তেসং কপ্পানং সতসহস্সমেৰ, তথা বুদ্ধস্স মাতাপিতূনং উপট্ঠাকস্স পুত্তস্স চ. তত্থ যথা –

‘‘মনুস্সত্তং লিঙ্গসম্পত্তি, হেতু সত্থারদস্সনং;

পব্বজ্জা গুণসম্পত্তি, অধিকারো চ ছন্দতা;

অট্ঠধম্মসমোহানা, অভিনীহারো সমিজ্ঝতী’’তি. (বু. ৰং. ২.৫৯) –

এৰং ৰুত্তে অট্ঠ ধম্মে সমোধানেত্ৰা কতপণিধানানং মহাবোধিসত্তানং মহাভিনীহারতো পভুতি সৰিসেসং দানাদীসু যুত্তপ্পযুত্তানং দিৰসে দিৰসে ৰেস্সন্তরদানসদিসং মহাদানং দেন্তানং তদনুরূপসীলাদিকে সব্বপারমিধম্মে আচিনন্তানম্পি যথাৰুত্তকালপরিচ্ছেদং অসম্পত্ৰা অন্তরা এৰ বুদ্ধভাৰপ্পত্তি নাম নত্থি. কস্মা? ঞাণস্স অপরিপচ্চনতো. পরিচ্ছিন্নকালে নিপ্ফাদিতং ৰিয হি সস্সং বুদ্ধঞাণং যথাপরিচ্ছিন্নকালৰসেনেৰ ৰুদ্ধিং ৰিরুল়্হিং ৰেপুল্লং আপজ্জন্তং গব্ভং গণ্হন্তং পরিপাকং গচ্ছতীতি এৰং –

‘‘মনুস্সত্তং লিঙ্গসম্পত্তি, ৰিগতাসৰদস্সনং;

অধিকারো ছন্দতা এতে, অভিনীহারকারণা’’তি. (সু. নি. অট্ঠ. ১.খগ্গৰিসাণসুত্তৰণ্ণনা) –

ইমে পঞ্চ ধম্মে সমোধানেত্ৰা কতাভিনীহারানং পচ্চেকবোধিসত্তানং ‘‘অধিকারো ছন্দতা’’তি দ্ৰঙ্গসমন্নাগতায পত্থনায ৰসেন কতপণিধানানং সাৰকবোধিসত্তানঞ্চ তত্থ তত্থ ৰুত্তকালপরিচ্ছেদং অসম্পত্ৰা অন্তরা এৰ পচ্চেকসম্বোধিযা যথাৰুত্তসাৰকসম্বোধিযা চ অধিগমো নত্থি. কস্মা? ঞাণস্স অপরিপচ্চনতো. ইমেসম্পি হি যথা মহাবোধিসত্তানং দানাদিপারমীহি পরিব্রূহিতা পঞ্ঞাপারমী অনুক্কমেন গব্ভং গণ্হন্তী পরিপাকং গচ্ছন্তী বুদ্ধঞাণং পরিপূরেতি, এৰং দানাদীহি পরিব্রূহিতা অনুপুব্বেন যথারহং গব্ভং গণ্হন্তী পরিপাকং গচ্ছন্তী পচ্চেকবোধিঞাণং সাৰকবোধিঞাণঞ্চ পরিপূরেতি. দানপরিচযেন হেতে তত্থ তত্থ ভৰে অলোভজ্ঝাসযতায সব্বত্থ অসঙ্গমানসা অনপেক্খচিত্তা হুত্ৰা, সীলপরিচযেন সুসংৰুতকাযৰাচতায সুপরিসুদ্ধকাযৰচীকম্মন্তা পরিসুদ্ধাজীৰা ইন্দ্রিযেসু গুত্তদ্ৰারা ভোজনে মত্তঞ্ঞুনো হুত্ৰা জাগরিযানুযোগেন চিত্তং সমাদহন্তি, স্ৰাযং তেসং জাগরিযানুযোগো গতপচ্চাগতিকৰত্তৰসেন ৰেদিতব্বো.

এৰং পন পটিপজ্জন্তানং অধিকারসম্পত্তিযা অপ্পকসিরেনেৰ অট্ঠ সমাপত্তিযো পঞ্চাভিঞ্ঞা ছল়ভিঞ্ঞা অধিট্ঠানভূতা পুব্বভাগৰিপস্সনা চ হত্থগতাযেৰ হোন্তি. ৰীরিযাদযো পন তদন্তোগধা এৰ. যঞ্হি পচ্চেকবোধিযা সাৰকবোধিযা ৰা অত্থায দানাদিপুঞ্ঞসম্ভরণে অব্ভুস্সহনং, ইদং ৰীরিযং. যং তদনুপরোধস্স সহনং, অযং খন্তি. যং দানসীলাদিসমাদানাৰিসংৰাদনং, ইদং সচ্চং. সব্বত্থমেৰ অচলসমাধানাধিট্ঠানং, ইদং অধিট্ঠানং. যা দানসীলাদীনং পৰত্তিট্ঠানভূতেসু সত্তেসু হিতেসিতা, অযং মেত্তা. যং সত্তানং কতৰিপ্পকারেসু অজ্ঝুপেক্খনং, অযং উপেক্খাতি. এৰং দানসীলভাৰনাসু সীলসমাধিপঞ্ঞাসু চ সিজ্ঝমানাসু ৰীরিযাদযো সিদ্ধা এৰ হোন্তি. সাযেৰ পচ্চেকবোধিঅত্থায সাৰকবোধিঅত্থায চ দানাদিপটিপদা তেসং বোধিসত্তানং সন্তানস্স ভাৰনতো পরিভাৰনতো ভাৰনা নাম. ৰিসেসতো দানসীলাদীহি স্ৰাভিসঙ্খতে সন্তানে পৰত্তা সমথৰিপস্সনাপটিপদা, যতো তে বোধিসত্তা পুব্বযোগাৰচরসমুদাগমসম্পন্না হোন্তি. তেনাহ ভগৰা –

‘‘পঞ্চিমে, আনন্দ, আনিসংসা পুব্বযোগাৰচরে. কতমে পঞ্চ? ইধানন্দ, পুব্বযোগাৰচরো দিট্ঠেৰ ধম্মে পটিকচ্চ অঞ্ঞং আরাধেতি, নো চে দিট্ঠেৰ ধম্মে পটিকচ্চ অঞ্ঞং আরাধেতি, অথ মরণকালে অঞ্ঞং আরাধেতি, অথ দেৰপুত্তো সমানো অঞ্ঞং আরাধেতি, অথ বুদ্ধানং সম্মুখীভাৰে খিপ্পাভিঞ্ঞো হোতি, অথ পচ্ছিমে কালে পচ্চেকসম্বুদ্ধো হোতী’’তি (সু. নি. অট্ঠ. ১.খগ্গৰিসাণসুত্তৰণ্ণনা).

ইতি পুব্বভাগপটিপদাভূতায পারমিতাপরিভাৰিতায সমথৰিপস্সনাভাৰনায নিরোধগামিনিপটিপদাভূতায অভিসমযসঙ্খাতায মগ্গভাৰনায চ ভাৰিতত্তভাৰা বুদ্ধপচ্চেকবুদ্ধবুদ্ধসাৰকা ভাৰিতত্তা নাম. তেসু ইধ বুদ্ধসাৰকা অধিপ্পেতা.

এত্থ চ ‘‘সীহানংৰা’’তি ইমিনা থেরানং সীহসমানৰুত্তিতাদস্সনেন অত্তনো পটিপক্খেহি অনভিভৰনীযতং, তে চ অভিভুয্য পৰত্তিং দস্সেতি. ‘‘সীহানংৰ নদন্তানং…পে… গাথা’’তি ইমিনা থেরগাথানং সীহনাদসদিসতাদস্সনেন তাসং পরৰাদেহি অনভিভৰনীযতং, তে চ অভিভৰিত্ৰা পৰত্তিং দস্সেতি. ‘‘ভাৰিতত্তান’’ন্তি ইমিনা তদুভযস্স কারণং ৰিভাৰেতি. ভাৰিতত্তভাৰেন থেরা ইধ সীহসদিসা ৰুত্তা, তেসঞ্চ গাথা সীহনাদসদিসিযো. ‘‘অত্থূপনাযিকা’’তি ইমিনা অভিভৰনে পযোজনং দস্সেতি. তত্থ থেরানং পটিপক্খো নাম সংকিলেসধম্মো, তদভিভৰো তদঙ্গিৰিক্খম্ভনপ্পহানেহি সদ্ধিং সমুচ্ছেদপ্পহানং. তস্মিং সতি পটিপস্সদ্ধীপ্পহানং নিস্সরণপ্পহানঞ্চ সিদ্ধমেৰ হোতি, যতো তে ভাৰিতত্তাতি ৰুচ্চন্তি. মগ্গক্খণে হি অরিযা অপ্পমাদভাৰনং ভাৰেন্তি নাম, অগ্গফলক্খণতো পট্ঠায ভাৰিতত্তা নামাতি ৰুত্তোৰাযমত্থো.

তেসু তদঙ্গপ্পহানেন নেসং সীলসম্পদা দস্সিতা, ৰিক্খম্ভনপ্পহানেন সমাধিসম্পদা, সমুচ্ছেদপ্পহানেন পঞ্ঞাসম্পদা, ইতরেন তাসং ফলং দস্সিতং. সীলেন চ তেসং পটিপত্তিযা আদিকল্যাণতা দস্সিতা, ‘‘কো চাদি কুসলানং ধম্মানং? সীলঞ্চ সুৰিসুদ্ধং’’ (সং. নি. ৫.৩৬৯), ‘‘সীলে পতিট্ঠায’’ (সং. নি. ১.২৩; ৰিসুদ্ধি. ১.১), ‘‘সব্বপাপস্স অকরণ’’ন্তি (ধ. প. ১৮৩; দী. নি. ২.৯০) চ ৰচনতো সীলং পটিপত্তিযা আদিকল্যাণংৰ অৰিপ্পটিসারাদিগুণাৰহত্তা. সমাধিনা মজ্ঝেকল্যাণতা দস্সিতা, ‘‘চিত্তং ভাৰযং’’, ‘‘কুসলস্স উপসম্পদা’’তি চ ৰচনতো সমাধিপটিপত্তিযা মজ্ঝেকল্যাণোৰ, ইদ্ধিৰিধাদিগুণাৰহত্তা. পঞ্ঞায পরিযোসানকল্যাণতা দস্সিতা, ‘‘সচিত্তপরিযোদপনং’’ (ধ. প. ১৮৩; দী. নি. ২.৯০), ‘‘পঞ্ঞং ভাৰয’’ন্তি (সং. নি. ১.২৩; ৰিসুদ্ধি. ১.১) চ ৰচনতো পঞ্ঞা পটিপত্তিযা পরিযোসানংৰ, পঞ্ঞুত্তরতো কুসলানং ধম্মানং সাৰ কল্যাণা ইট্ঠানিট্ঠেসু তাদিভাৰাৰহত্তা.

‘‘সেলো যথা একঘনো, ৰাতেন ন সমীরতি; (মহাৰ. ২৪৪);

এৰং নিন্দাপসংসাসু, ন সমিঞ্জন্তি পণ্ডিতা’’তি. (ধ. প. ৮১) –

হি ৰুত্তং.

তথা সীলসম্পদায তেৰিজ্জভাৰো দস্সিতো. সীলসম্পত্তিঞ্হি নিস্সায তিস্সো ৰিজ্জা পাপুণন্তি. সমাধিসম্পদায ছল়ভিঞ্ঞাভাৰো. সমাধিসম্পত্তিঞ্হি নিস্সায ছল়ভিঞ্ঞা পাপুণন্তি. পঞ্ঞাসম্পদায পভিন্নপটিসম্ভিদাভাৰো. পঞ্ঞাসম্পদঞ্হি নিস্সায চতস্সো পটিসম্ভিদা পাপুণন্তি. ইমিনা তেসং থেরানং কেচি তেৰিজ্জা, কেচি ছল়ভিঞ্ঞা, কেচি পটিসম্ভিদাপত্তাতি অযমত্থো দস্সিতোতি ৰেদিতব্বং.

তথা সীলসম্পদায তেসং কামসুখানুযোগসঙ্খাতস্স অন্তস্স পরিৰজ্জনং দস্সেতি. সমাধিসম্পদায অত্তকিলমথানুযোগসঙ্খাতস্স, পঞ্ঞাসম্পদায মজ্ঝিমায পটিপদায সেৰনং দস্সেতি. তথা সীলসম্পদায তেসং ৰীতিক্কমপ্পহানং কিলেসানং দস্সেতি. সমাধিসম্পদায পরিযুট্ঠানপ্পহানং, পঞ্ঞাসম্পদায অনুসযপ্পহানং দস্সেতি. সীলসম্পদায ৰা দুচ্চরিতসংকিলেসৰিসোধনং, সমাধিসম্পদায তণ্হাসংকিলেসৰিসোধনং, পঞ্ঞাসম্পদায দিট্ঠিসংকিলেসৰিসোধনং দস্সেতি. তদঙ্গপ্পহানেন ৰা নেসং অপাযসমতিক্কমো দস্সিতো. ৰিক্খম্ভনপ্পহানেন কামধাতুসমতিক্কমো, সমুচ্ছেদপ্পহানেন সব্বভৰসমতিক্কমো দস্সিতোতি ৰেদিতব্বং.

‘‘ভাৰিতত্তান’’ন্তি ৰা এত্থ সীলভাৰনা, চিত্তভাৰনা পঞ্ঞাভাৰনাতি তিস্সো ভাৰনা ৰেদিতব্বা কাযভাৰনায তদন্তোগধত্তা. সীলভাৰনা চ পটিপত্তিযা আদীতি সব্বং পুরিমসদিসং. যথা পন সীহনাদং পরে মিগগণা ন সহন্তি, কুতো অভিভৰে, অঞ্ঞদত্থু সীহনাদোৰ তে অভিভৰতি এৰমেৰ অঞ্ঞতিত্থিযৰাদা থেরানং ৰাদে ন সহন্তি, কুতো অভিভৰে, অঞ্ঞদত্থু থেরৰাদাৰ তে অভিভৰন্তি. তং কিস্স হেতু? ‘‘সব্বে সঙ্খারা অনিচ্চা, সব্বে সঙ্খারা দুক্খা, সব্বে ধম্মা অনত্তা’’তি (ধ. প. ২৭৭-২৭৯) ‘‘নিব্বানধাতূ’’তি চ পৰত্তনতো. ন হি ধম্মতো সক্কা কেনচি অঞ্ঞথা কাতুং অপ্পটিৰত্তনীযতো. যং পনেত্থ ৰত্তব্বং, তং পরতো আৰিভৰিস্সতি. এৰমেত্থ সঙ্খেপেনেৰ পঠমগাথায অত্থৰিভাৰনা ৰেদিতব্বা.

দুতিযগাথাযং পন অযং সম্বন্ধদস্সনমুখেন অত্থৰিভাৰনা. তত্থ যেসং থেরানং গাথা সাৰেতুকামো, তে সাধারণৰসেন নামতো গোত্ততো গুণতো চ কিত্তেতুং ‘‘যথানামা’’তিআদি ৰুত্তং. অসাধারণতো পন তত্থ তত্থ গাথাস্ৰেৰ আৰিভৰিস্সতি. তত্থ যথানামাতি যংযংনামা, সুভূতি মহাকোট্ঠিকোতিআদিনা নযেন নামধেয্যেন পঞ্ঞাতাতি অত্থো. যথাগোত্তাতি যংযংগোত্তা, গোতমো কস্সপোতিআদিনা নযেন কুলপদেসেন যায যায জাতিযা পঞ্ঞাতাতি অত্থো. যথাধম্মৰিহারিনোতি যাদিসধম্মৰিহারিনো, পরিযত্তিপরমতাযং অট্ঠত্ৰা যথানুরূপং সমাপত্তিৰিহারিনো হুত্ৰা ৰিহরিংসূতি অত্থো. অথ ৰা যথাধম্মৰিহারিনোতি যথাধম্মা ৰিহারিনো চ, যাদিসসীলাদিধম্মা দিব্বৰিহারাদীসু অভিণ্হসো ৰিহরমানা যাদিসৰিহারা চাতি অত্থো. যথাধিমুত্তাতি যাদিসঅধিমুত্তিকা সদ্ধাধিমুত্তিপঞ্ঞাধিমুত্তীসু যংযংঅধিমুত্তিকা সুঞ্ঞতমুখাদীসু ৰা যথা যথা নিব্বানং অধিমুত্তাতি যথাধিমুত্তা. ‘‘নিব্বানং অধিমুত্তানং, অত্থং গচ্ছন্তি আসৰা’’তি (ধ. প. ২২৬) হি ৰুত্তং. উভযঞ্চেতং পুব্বভাগৰসেন ৰেদিতব্বং. অরহত্তপ্পত্তিতো পুব্বেযেৰ হি যথাৰুত্তমধিমুচ্চনং, ন পরতো. তেনাহ ভগৰা –

‘‘অস্সদ্ধো অকতঞ্ঞূ চ, সন্ধিচ্ছেদো চ যো নরো’’তিআদি. (ধ. প. ৯৭).

‘‘যথাৰিমুত্তা’’তি ৰা পাঠো, পঞ্ঞাৰিমুত্তিউভতোভাগৰিমুত্তীসু যংযংৰিমুত্তিকাতি অত্থো. সপ্পঞ্ঞাতি তিহেতুকপটিসন্ধিপঞ্ঞায পারিহারিকপঞ্ঞায ভাৰনাপঞ্ঞায চাতি তিৰিধাযপি পঞ্ঞায পঞ্ঞৰন্তো. ৰিহরিংসূতি তায এৰ সপ্পঞ্ঞতায যথালদ্ধেন ফাসুৰিহারেনেৰ ৰসিংসু. অতন্দিতাতি অনলসা, অত্তহিতপটিপত্তিযং যথাবলং পরহিতপটিপত্তিযঞ্চ উট্ঠানৰন্তোতি অত্থো.

এত্থ চ পন নামগোত্তগ্গহণেন তেসং থেরানং পকাসপঞ্ঞাতভাৰং দস্সেতি. ধম্মৰিহারগ্গহণেন সীলসম্পদং সমাধিসম্পদঞ্চ দস্সেতি. ‘‘যথাধিমুত্তা সপ্পঞ্ঞা’’তি ইমিনা পঞ্ঞাসম্পদং. ‘‘অতন্দিতা’’তি ইমিনা সীলসম্পদাদীনং কারণভূতং ৰীরিযসম্পদং দস্সেতি. ‘‘যথানামা’’তি ইমিনা তেসং পকাসননামতং দস্সেতি. ‘‘যথাগোত্তা’’তি ইমিনা সদ্ধানুসারীধম্মানুসারীগোত্তসম্পত্তিসমুদাগমং, ‘‘যথাধম্মৰিহারিনো’’তিআদিনা সীলসমাধিপঞ্ঞাৰিমুত্তিৰিমুত্তিঞাণদস্সনং সম্পত্তিসমুদাগমং, ‘‘অতন্দিতা’’তি ইমিনা এৰং অত্তহিতসম্পত্তিযং ঠিতানং পরহিতপটিপত্তিং দস্সেতি.

অথ ৰা ‘‘যথানামা’’তি ইদং তেসং থেরানং গরূহি গহিতনামধেয্যদস্সনং সমঞ্ঞামত্তকিত্তনতো. ‘‘যথাগোত্তা’’তি ইদং কুলপুত্তভাৰদস্সনং কুলাপদেস কিত্তনতো. তেন নেসং সদ্ধাপব্বজিতভাৰং দস্সেতি. ‘‘যথাধম্মৰিহারিনো’’তি ইদং চরণসম্পত্তিদস্সনং সীলসংৰরাদীহি সমঙ্গীভাৰদীপনতো. ‘‘যথাধিমুত্তা সপ্পঞ্ঞা’’তি ইদং নেসং ৰিজ্জাসম্পত্তিদস্সনং আসৰক্খযপরিযোসানায ঞাণসম্পত্তিযা অধিগমপরিদীপনতো. ‘‘অতন্দিতা’’তি ইদং ৰিজ্জাচরণসম্পত্তীনং অধিগমূপাযদস্সনং. ‘‘যথানামা’’তি ৰা ইমিনা তেসং পকাসননামতংযেৰ দস্সেতি. ‘‘যথাগোত্তা’’তি পন ইমিনা পচ্ছিমচক্কদ্ৰযসম্পত্তিং দস্সেতি. ন হি সম্মাঅপ্পণিহিতত্তনো পুব্বে চ অকতপুঞ্ঞস্স সদ্ধানুসারীধম্মানুসারিনো গোত্তসম্পত্তিসমুদাগমো সম্ভৰতি. ‘‘যথাধম্মৰিহারিনো’’তি ইমিনা তেসং পুরিমচক্কদ্ৰযসম্পত্তিং দস্সেতি. ন হি অপ্পতিরূপে দেসে ৰসতো সপ্পুরিসূপনিস্সযরহিতস্স চ তাদিসা গুণৰিসেসা সম্ভৰন্তি. ‘‘যথাধিমুত্তা’’তি ইমিনা সদ্ধম্মসৰনসম্পদাসমাযোগং দস্সেতি. ন হি পরতোঘোসেন ৰিনা সাৰকানং সচ্চসম্পটিৰেধো সম্ভৰতি. ‘‘সপ্পঞ্ঞা অতন্দিতা’’তি ইমিনা যথাৰুত্তস্স গুণৰিসেসস্স অব্যভিচারিহেতুং দস্সেতি ঞাযারম্ভদস্সনতো.

অপরো নযো – ‘‘যথাগোত্তা’’তি এত্থ গোত্তকিত্তনেন তেসং থেরানং যোনিসোমনসিকারসম্পদং দস্সেতি যথাৰুত্তগোত্তসম্পন্নস্স যোনিসোমনসিকারসম্ভৰতো. ‘‘যথাধম্মৰিহারিনো’’তি এত্থ ধম্মৰিহারগ্গহণেন সদ্ধম্মসৰনসম্পদং দস্সেতি সদ্ধম্মসৰনেন ৰিনা তদভাৰতো. ‘‘যথাধিমুত্তা’’তি ইমিনা মত্থকপ্পত্তং ধম্মানুধম্মপটিপদং দস্সেতি. ‘‘সপ্পঞ্ঞা’’তি ইমিনা সব্বত্থ সম্পজানকারিতং. ‘‘অতন্দিতা’’তি ইমিনা ৰুত্তনযেন অত্তহিতসম্পত্তিং পরিপূরেত্ৰা ঠিতানং পরেসং হিতসুখাৰহায পটিপত্তিযং অকিলাসুভাৰং দস্সেতি. তথা ‘‘যথাগোত্তা’’তি ইমিনা নেসং সরণগমনসম্পদা দস্সিতা সদ্ধানুসারীগোত্তকিত্তনতো. ‘‘যথাধম্মৰিহারিনো’’তি ইমিনা সীলক্খন্ধপুব্বঙ্গমো সমাধিক্খন্ধো দস্সিতো. ‘‘যথাধিমুত্তা সপ্পঞ্ঞা’’তি ইমিনা পঞ্ঞক্খন্ধাদযো. সরণগমনঞ্চ সাৰকগুণানং আদি, সমাধি মজ্ঝে, পঞ্ঞা পরিযোসানন্তি আদিমজ্ঝপরিযোসানদস্সনেন সব্বেপি সাৰকগুণা দস্সিতা হোন্তি.

ঈদিসী পন গুণৰিভূতি যায সম্মাপটিপত্তিযা তেহি অধিগতা, তং দস্সেতুং ‘‘তত্থ তত্থ ৰিপস্সিত্ৰা’’তিআদি ৰুত্তং. তত্থ তত্থাতি তেসু তেসু অরঞ্ঞরুক্খমূলপব্বতাদীসু ৰিৰিত্তসেনাসনেসু. তত্থ তত্থাতি ৰা তস্মিং তস্মিং উদানাদিকালে. ৰিপস্সিত্ৰাতি সম্পস্সিত্ৰা. নামরূপৰৰত্থাপনপচ্চযপরিগ্গহেহি দিট্ঠিৰিসুদ্ধিকঙ্খাৰিতরণৰিসুদ্ধিযো সম্পাদেত্ৰা কলাপসম্মসনাদিক্কমেন পঞ্চমং ৰিসুদ্ধিং অধিগন্ত্ৰা পটিপদাঞাণদস্সনৰিসুদ্ধিযা মত্থকং পাপনৰসেন ৰিপস্সনং উস্সুক্কাপেত্ৰা ফুসিত্ৰাতি পত্ৰা সচ্ছিকত্ৰা. অচ্চুতং পদন্তি নিব্বানং. তঞ্হি সযং অচৰনধম্মত্তা অধিগতানং অচ্চুতিহেতুভাৰতো চ নত্থি এত্থ চুতীতি ‘‘অচ্চুতং’’. সঙ্খতধম্মেহি অসম্মিস্সভাৰতায তদত্থিকেহি পটিপজ্জিতব্বতায চ ‘‘পদ’’ন্তি চ ৰুচ্চতি. কতন্তন্তি কতস্স অন্তং. যো হি তেহি অধিগতো অরিযমগ্গো, সো অত্তনো পচ্চযেহি উপ্পাদিতত্তা কতো নাম. তস্স পন পরিযোসানভূতং ফলং কতন্তোতি অধিপ্পেতং. তং কতন্তং অগ্গফলং. অথ ৰা পচ্চযেহি কতত্তা নিপ্ফাদিতত্তা কতা নাম সঙ্খতধম্মা, তন্নিস্সরণভাৰতো কতন্তো নিব্বানং. তং কতন্তং. পচ্চৰেক্খন্তাতি ‘‘অধিগতং ৰত মযা অরিযমগ্গাধিগমেন ইদং অরিযফলং, অধিগতা অসঙ্খতা ধাতূ’’তি অরিযফলনিব্বানানি ৰিমুত্তিঞাণদস্সনেন পটিপত্তিং অৰেক্খমানা. অথ ৰা সচ্চসম্পটিৰেধৰসেন যং অরিযেন করণীযং পরিঞ্ঞাদিসোল়সৰিধং কিচ্চং অগ্গফলে ঠিতেন নিপ্ফাদিতত্তা পরিযোসাপিতত্তা কতং নাম, এৰং কতং তং পচ্চৰেক্খন্তা. এতেন পহীনকিলেসপচ্চৰেক্খণং দস্সিতং. পুরিমনযেন পন ইতরপচ্চৰেক্খণানীতি একূনৰীসতি পচ্চৰেক্খণানি দস্সিতানি হোন্তি.

ইমমত্থন্তি এত্থ ইমন্তি সকলো থেরথেরীগাথানং অত্থো অত্তনো ইতরেসঞ্চ তত্থ সন্নিপতিতানং ধম্মসঙ্গাহকমহাথেরানং বুদ্ধিযং ৰিপরিৰত্তমানতায আসন্নো পচ্চক্খোতি চ কত্ৰা ৰুত্তং. অত্থন্তি ‘‘ছন্না মে কুটিকা’’তিআদীহি গাথাহি ৰুচ্চমানং অত্তূপনাযিকং পরূপনাযিকং লোকিযলোকুত্তরপটিসংযুত্তং অত্থং. অভাসিসুন্তি গাথাবন্ধৰসেন কথেসুং, তংদীপনিযো ইদানি মযা ৰুচ্চমানা তেসং ভাৰিতত্তানং গাথা অত্তূপনাযিকা সুণাথাতি যোজনা. তে চ মহাথেরা এৰং কথেন্তা অত্তনো সম্মাপটিপত্তিপকাসনীহি গাথাহি সাসনস্স একন্তনিয্যানিকৰিভাৰনেন পরেপি তত্থ সম্মাপটিপত্তিযং নিযোজেন্তীতি এতমত্থং দীপেতি আযস্মা ধম্মভণ্ডাগারিকো, তথা দীপেন্তো চ ইমাহি গাথাহি তেসং থোমনং তাসঞ্চ তেসং ৰচনস্স নিদানভাৰেন ঠপনং ঠানগতমেৰাতি দস্সেতীতি দট্ঠব্বং.

নিদানগাথাৰণ্ণনা নিট্ঠিতা.

১. এককনিপাতো

১. পঠমৰগ্গো

১. সুভূতিত্থেরগাথাৰণ্ণনা

ইদানি ছন্না মে কুটিকাতিআদিনযপ্পৰত্তানং থেরগাথানং অত্থৰণ্ণনা হোতি. সা পনাযং অত্থৰণ্ণনা যস্মা তাসং তাসং গাথানং অট্ঠুপ্পত্তিং পকাসেত্ৰা ৰুচ্চমানা পাকটা হোতি সুৰিঞ্ঞেয্যা চ. তস্মা তত্থ তত্থ অট্ঠুপ্পত্তিং পকাসেত্ৰা অত্থৰণ্ণনং করিস্সামাতি.

তত্থ ছন্না মে কুটিকাতিগাথায কা উপ্পত্তি? ৰুচ্চতে – ইতো কির কপ্পসতসহস্সমত্থকে অনুপ্পন্নেযেৰ পদুমুত্তরে ভগৰতি লোকনাথে হংসৰতীনামকে নগরে অঞ্ঞতরস্স ব্রাহ্মণমহাসালস্স একো পুত্তো উপ্পজ্জি. তস্স ‘‘নন্দমাণৰো’’তি নামং অকংসু. সো ৰযপ্পত্তো তযো ৰেদে উগ্গণ্হিত্ৰা তত্থ সারং অপস্সন্তো অত্তনো পরিৰারভূতেহি চতুচত্তালীসায মাণৰকসহস্সেহি সদ্ধিং পব্বতপাদে ইসিপব্বজ্জং পব্বজিত্ৰা অট্ঠ সমাপত্তিযো পঞ্চ চ অভিঞ্ঞাযো নিব্বত্তেসি. অন্তেৰাসিকানম্পি কম্মট্ঠানং আচিক্খি. তেপি ন চিরেনেৰ ঝানলাভিনো অহেসুং.

তেন চ সমযেন পদুমুত্তরো ভগৰা লোকে উপ্পজ্জিত্ৰা হংসৰতীনগরং উপনিস্সায ৰিহরন্তো একদিৰসং পচ্চূসসমযে লোকং ৰোলোকেন্তো নন্দতাপসস্স অন্তেৰাসিকজটিলানং অরহত্তূপনিস্সযং নন্দতাপসস্স চ দ্ৰীহঙ্গেহি সমন্নাগতস্স সাৰকট্ঠানন্তরস্স পত্থনং দিস্ৰা পাতোৰ সরীরপটিজগ্গনং কত্ৰা পুব্বণ্হসমযে পত্তচীৰরমাদায অঞ্ঞং কঞ্চি অনামন্তেত্ৰা সীহো ৰিয একচরো নন্দতাপসস্স অন্তেৰাসিকেসু ফলাফলত্থায গতেসু ‘‘বুদ্ধভাৰং মে জানাতূ’’তি পস্সন্তস্সেৰ নন্দতাপসস্স আকাসতো ওতরিত্ৰা পথৰিযং পতিট্ঠাসি. নন্দতাপসো বুদ্ধানুভাৰঞ্চেৰ লক্খণপারিপূরিঞ্চ দিস্ৰা লক্খণমন্তে সম্মসিত্ৰা ‘‘ইমেহি লক্খণেহি সমন্নাগতো নাম অগারং অজ্ঝাৰসন্তো রাজা হোতি চক্কৰত্তী, পব্বজন্তো লোকে ৰিৰটচ্ছদো সব্বঞ্ঞূ বুদ্ধো হোতি. অযং পুরিসাজানীযো নিস্সংসযং বুদ্ধোতি ঞত্ৰা পচ্চুগ্গমনং কত্ৰা, পঞ্চপতিট্ঠিতেন ৰন্দিত্ৰা, আসনং পঞ্ঞাপেত্ৰা, অদাসি. নিসীদি ভগৰা পঞ্ঞত্তে আসনে. নন্দতাপসোপি অত্তনো অনুচ্ছৰিকং আসনং গহেত্ৰা একমন্তং নিসীদি.

তস্মিং সমযে চতুচত্তালীসসহস্সজটিলা পণীতপণীতানি ওজৰন্তানি ফলাফলানি গহেত্ৰা আচরিযস্স সন্তিকং সম্পত্তা বুদ্ধানঞ্চেৰ আচরিযস্স চ নিসিন্নাসনং ওলোকেন্তা আহংসু – ‘‘আচরিয, মযং ‘ইমস্মিং লোকে তুম্হেহি মহন্ততরো নত্থী’তি ৰিচরাম, অযং পন পুরিসো তুম্হেহি মহন্ততরো মঞ্ঞে’’তি. নন্দতাপসো, ‘‘তাতা, কিং ৰদেথ, সাসপেন সদ্ধিং অট্ঠসট্ঠিসতসহস্সযোজনুব্বেধং সিনেরুং উপমেতুং ইচ্ছথ, সব্বঞ্ঞুবুদ্ধেন সদ্ধিং মা মং উপমিত্থা’’তি আহ. অথ তে তাপসা ‘‘সচে অযং ওরকো অভৰিস্স, ন অম্হাকং আচরিযো এৰং উপমং আহরেয্য, যাৰ মহা ৰতাযং পুরিসাজানীযো’’তি পাদেসু নিপতিত্ৰা সিরসা ৰন্দিংসু. অথ তে আচরিযো আহ – ‘‘তাতা, অম্হাকং বুদ্ধানং অনুচ্ছৰিকো দেয্যধম্মো নত্থি, ভগৰা চ ভিক্খাচারৰেলাযং ইধাগতো, তস্মা মযং যথাবলং দেয্যধম্মং দস্সাম, তুম্হে যং যং পণীতং ফলাফলং আনীতং, তং তং আহরথা’’তি ৰত্ৰা আহরাপেত্ৰা হত্থে ধোৰিত্ৰা সযং তথাগতস্স পত্তে পতিট্ঠাপেসি. সত্থারা ফলাফলে পটিগ্গহিতমত্তে দেৰতা দিব্বোজং পক্খিপিংসু. তাপসো উদকম্পি সযমেৰ পরিস্সাৰেত্ৰা অদাসি. ততো ভোজনকিচ্চং নিট্ঠাপেত্ৰা নিসিন্নে সত্থরি সব্বে অন্তেৰাসিকে পক্কোসিত্ৰা সত্থু সন্তিকে সারণীযং কথং কথেন্তো নিসীদি. সত্থা ‘‘ভিক্খুসঙ্ঘো আগচ্ছতূ’’তি চিন্তেসি. ভিক্খূ সত্থু চিত্তং ঞত্ৰা সতসহস্সমত্তা খীণাসৰা আগন্ত্ৰা সত্থারং ৰন্দিত্ৰা একমন্তং অট্ঠংসু.

নন্দতাপসো অন্তেৰাসিকে আমন্তেসি – ‘‘তাতা, বুদ্ধানং নিসিন্নাসনম্পি নীচং, সমণসতসহস্সস্সপি আসনং নত্থি, তুম্হেহি অজ্জ উল়ারং ভগৰতো ভিক্খুসঙ্ঘস্স চ সক্কারং কাতুং ৰট্টতি, পব্বতপাদতো ৰণ্ণগন্ধসম্পন্নানি পুপ্ফানি আহরথা’’তি. অচিন্তেয্যত্তা ইদ্ধিৰিসযস্স মুহুত্তেনেৰ ৰণ্ণগন্ধসম্পন্নানি পুপ্ফানি আহরিত্ৰা বুদ্ধানং যোজনপ্পমাণং পুপ্ফাসনং পঞ্ঞাপেসুং. অগ্গসাৰকানং তিগাৰুতং, সেসভিক্খূনং অড্ঢযোজনিকাদিভেদং, সঙ্ঘনৰকস্স উসভমত্তং অহোসি. এৰং পঞ্ঞত্তেসু আসনেসু নন্দতাপসো তথাগতস্স পুরতো অঞ্জলিং পগ্গয্হ ঠিতো, ‘‘ভন্তে, ময্হং দীঘরত্তং হিতায সুখায ইমং পুপ্ফাসনং অভিরুহথা’’তি আহ. নিসীদি ভগৰা পুপ্ফাসনে. এৰং নিসিন্নে সত্থরি সত্থু আকারং ঞত্ৰা ভিক্খূ অত্তনো অত্তনো পত্তাসনে নিসীদিংসু. নন্দতাপসো মহন্তং পুপ্ফছত্তং গহেত্ৰা তথাগতস্স মত্থকে ধারেন্তো অট্ঠাসি. সত্থা ‘‘তাপসানং অযং সক্কারো মহপ্ফলো হোতূ’’তি নিরোধসমাপত্তিং সমাপজ্জি. সত্থু সমাপন্নভাৰং ঞত্ৰা ভিক্খূপি সমাপজ্জিংসু. তথাগতে সত্তাহং নিরোধং সমাপজ্জিত্ৰা নিসিন্নে অন্তেৰাসিকা ভিক্খাচারকালে সম্পত্তে ৰনমূলফলাফলং পরিভুঞ্জিত্ৰা সেসকালে বুদ্ধানং অঞ্জলিং পগ্গয্হ তিট্ঠন্তি. নন্দতাপসো পন ভিক্খাচারম্পি অগন্ত্ৰা পুপ্ফছত্তং ধারেন্তো সত্তাহং পীতিসুখেনেৰ ৰীতিনামেতি.

সত্থা নিরোধতো ৰুট্ঠায অরণৰিহারিঅঙ্গেন দক্খিণেয্যঙ্গেন চাতি দ্ৰীহি অঙ্গেহি সমন্নাগতং একং সাৰকং ‘‘ইসিগণস্স পুপ্ফাসনানুমোদনং করোহী’’তি আণাপেসি. সো চক্কৰত্তিরঞ্ঞো সন্তিকা পটিলদ্ধমহালাভো মহাযোধো ৰিয তুট্ঠমানসো অত্তনো ৰিসযে ঠত্ৰা তেপিটকং বুদ্ধৰচনং সম্মসিত্ৰা অনুমোদনং অকাসি. তস্স দেসনাৰসানে সত্থা সযং ধম্মং দেসেসি. দেসনাপরিযোসানে সব্বে চতুচত্তালীসসহস্সতাপসা অরহত্তং পাপুণিংসু. সত্থা ‘‘এথ, ভিক্খৰো’’তি হত্থং পসারেসি. তেসং তাৰদেৰ কেসমস্সু অন্তরধাযি. অট্ঠ পরিক্খারা কাযে পটিমুক্কাৰ অহেসুং সট্ঠিৰস্সত্থেরা ৰিয সত্থারং পরিৰারযিংসু. নন্দতাপসো পন ৰিক্খিত্তচিত্ততায ৰিসেসং নাধিগচ্ছি. তস্স কির অরণৰিহারিত্থেরস্স সন্তিকে ধম্মং সোতুং আরদ্ধকালতো পট্ঠায ‘‘অহো ৰতাহম্পি অনাগতে উপ্পজ্জনকবুদ্ধস্স সাসনে ইমিনা সাৰকেন লদ্ধধুরং লভেয্য’’ন্তি চিত্তং উদপাদি. সো তেন পরিৰিতক্কেন মগ্গফলপটিৰেধং কাতুং নাসক্খি. তথাগতং পন ৰন্দিত্ৰা সম্মুখে ঠত্ৰা আহ – ‘‘ভন্তে, যেন ভিক্খুনা ইসিগণস্স পুপ্ফাসনানুমোদনা কতা, কো নামাযং তুম্হাকং সাসনে’’তি. ‘‘অরণৰিহারিঅঙ্গে দক্খিণেয্যঅঙ্গে চ এতদগ্গং পত্তো এসো ভিক্খূ’’তি. ‘‘ভন্তে, য্ৰাযং মযা সত্তাহং পুপ্ফছত্তং ধারেন্তেন সক্কারো কতো, তেন অধিকারেন ন অঞ্ঞং সম্পত্তিং পত্থেমি, অনাগতে পন একস্স বুদ্ধস্স সাসনে অযং থেরো ৰিয দ্ৰীহঙ্গেহি সমন্নাগতো সাৰকো ভৰেয্য’’ন্তি পত্থনমকাসি.

সত্থা ‘‘সমিজ্ঝিস্সতি নু, খো ইমস্স তাপসস্স পত্থনা’’তি অনাগতংসঞাণং পেসেত্ৰা ওলোকেন্তো কপ্পসতসহস্সং অতিক্কমিত্ৰা সমিজ্ঝনকভাৰং দিস্ৰা নন্দতাপসং আহ – ‘‘ন তে অযং পত্থনা মোঘা ভৰিস্সতি, অনাগতে কপ্পসতসহস্সং অতিক্কমিত্ৰা গোতমো নাম বুদ্ধো উপ্পজ্জিস্সতি, তস্স সন্তিকে সমিজ্ঝিস্সতী’’তি ৰত্ৰা ধম্মকথং কথেত্ৰা ভিক্খুসঙ্ঘপরিৰুতো আকাসং পক্খন্দি. নন্দতাপসো যাৰ চক্খুপথসমতিক্কমা সত্থারং ভিক্খুসঙ্ঘঞ্চ উদ্দিস্স অঞ্জলিং পগ্গয্হ অট্ঠাসি. সো অপরভাগে কালেন কালং সত্থারং উপসঙ্কমিত্ৰা ধম্মং সুণি. অপরিহীনজ্ঝানোৰ কালঙ্কত্ৰা ব্রহ্মলোকে নিব্বত্তো. ততো পন চুতো অপরানিপি পঞ্চ জাতিসতানি পব্বজিত্ৰা আরঞ্ঞকো অহোসি. কস্সপসম্মাসম্বুদ্ধকালেপি পব্বজিত্ৰা আরঞ্ঞকো হুত্ৰা গতপচ্চাগতৰত্তং পূরেসি. এতং কির ৰত্তং অপরিপূরেত্ৰা মহাসাৰকভাৰং পাপুণন্তা নাম নত্থি. গতপচ্চাগতৰত্তং পন আগমট্ঠকথাসু ৰুত্তনযেনেৰ ৰেদিতব্বং. সো ৰীসতিৰস্সসহস্সানি গতপচ্চাগতৰত্তং পূরেত্ৰা কালঙ্কত্ৰা কামাৰচরদেৰলোকে তাৰতিংসভৰনে নিব্বত্তি. ৰুত্তঞ্হেতং অপদানে (অপ. থের ১.৩.১৫১) –

‘‘হিমৰন্তস্সাৰিদূরে, নিসভো নাম পব্বতো;

অস্সমো সুকতো ময্হং, পণ্ণসালা সুমাপিতা.

‘‘কোসিযো নাম নামেন, জটিলো উগ্গতাপনো;

একাকিযো অদুতিযো, ৰসামি নিসভে তদা.

‘‘ফলং মূলঞ্চ পণ্ণঞ্চ, ন ভুঞ্জামি অহং তদা;

পৰত্তংৰ সুপাতাহং, উপজীৰামি তাৰদে.

‘‘নাহং কোপেমি আজীৰং, চজমানোপি জীৰিতং;

আরাধেমি সকং চিত্তং, ৰিৰজ্জেমি অনেসনং.

‘‘রাগূপসংহিতং চিত্তং, যদা উপ্পজ্জতে মম;

সযংৰ পচ্চৰেক্খামি, একগ্গো তং দমেমহং.

‘‘রজ্জসে রজ্জনীযে চ, দুস্সনীযে চ দুস্সসে;

মুয্হসে মোহনীযে চ, নিক্খমস্সু ৰনা তুৰং.

‘‘ৰিসুদ্ধানং অযং ৰাসো, নিম্মলানং তপস্সিনং;

মা খো ৰিসুদ্ধং দূসেসি, নিক্খমস্সু ৰনা তুৰং.

‘‘অগারিকো ভৰিত্ৰান, যদা পুত্তং লভিস্সসি;

উভোপি মা ৰিরাধেসি, নিক্খমস্সু ৰনা তুৰং.

‘‘ছৰালাতং যথা কট্ঠং, ন ক্ৰচি কিচ্চকারকং;

নেৰ গামে অরঞ্ঞে ৰা, ন হি তং কট্ঠসম্মতং.

‘‘ছৰালাতূপমো ত্ৰং সি, ন গিহী নাপি সঞ্ঞতো;

উভতো মুত্তকো অজ্জ, নিক্খমস্সু ৰনা তুৰং.

‘‘সিযা নু খো তৰ এতং, কো পজানাতি তে ইদং;

সদ্ধাধুরং ৰহিসি মে, কোসজ্জবহুলায চ.

‘‘জিগুচ্ছিস্সন্তি তং ৰিঞ্ঞূ, অসুচিং নাগরিকো যথা;

আকড্ঢিত্ৰান ইসযো, চোদযিস্সন্তি তং সদা.

‘‘তং ৰিঞ্ঞূ পৰদিস্সন্তি, সমতিক্কন্তসাসনং;

সংৰাসং অলভন্তো হি, কথং জীৰিহিসি তুৰং.

‘‘তিধাপভিন্নং মাতঙ্গং, কুঞ্জরং সট্ঠিহাযনং;

বলী নাগো উপগন্ত্ৰা, যূথা নীহরতে গজং.

‘‘যূথা ৰিনিস্সটো সন্তো, সুখং সাতং ন ৰিন্দতি;

দুক্খিতো ৰিমনো হোতি, পজ্ঝাযন্তো পৰেধতি.

‘‘তথেৰ জটিলা তম্পি, নীহরিস্সন্তি দুম্মতিং;

তেহি ত্ৰং নিস্সটো সন্তো, সুখং সাতং ন লচ্ছসি.

‘‘দিৰা ৰা যদি ৰা রত্তিং, সোকসল্লসমপ্পিতো;

দয্হতি পরিল়াহেন, গজো যূথাৰ নিস্সটো.

‘‘জাতরূপং যথা কূটং, নেৰ ঝাযতি কত্থচি;

তথা সীলৰীহিনো ত্ৰং, ন ঝাযিস্সসি কত্থচি.

‘‘অগারং ৰসমানোপি, কথং জীৰিহিসি তুৰং;

মত্তিকং পেত্তিকঞ্চাপি, নত্থি তে নিহিতং ধনং.

‘‘সযং কম্মং করিত্ৰান, গত্তে সেদং পমোচযং;

এৰং জীৰিহিসি গেহে, সাধু তে তং ন রুচ্চতি.

‘‘এৰাহং তত্থ ৰারেমি, সংকিলেসগতং মনং;

নানাধম্মকথং কত্ৰা, পাপা চিত্তং নিৰারযিং.

‘‘এৰং মে ৰিহরন্তস্স, অপ্পমাদৰিহারিনো;

তিংসৰস্সসহস্সানি, ৰিপিনে মে অতিক্কমুং.

‘‘অপ্পমাদরতং দিস্ৰা, উত্তমত্থং গৰেসকং;

পদুমুত্তরসম্বুদ্ধো, আগচ্ছি মম সন্তিকং.

‘‘তিম্বরূসকৰণ্ণাভো, অপ্পমেয্যো অনূপমো;

রূপেনাসদিসো বুদ্ধো, আকাসে চঙ্কমী তদা.

‘‘সুফুল্লো সালরাজাৰ, ৰিজ্জূৰব্ভঘনন্তরে;

ঞাণেনাসদিসো বুদ্ধো, আকাসে চঙ্কমী তদা.

‘‘সীহরাজাৰসম্ভীতো, গজরাজাৰ দপ্পিতো;

লাসীতো ব্যগ্ঘরাজাৰ, আকাসে চঙ্কমী তদা.

‘‘সিঙ্ঘীনিক্খসৰণ্ণাভো, খদিরঙ্গারসন্নিভো;

মণি যথা জোতিরসো, আকাসে চঙ্কমী তদা.

‘‘ৰিসুদ্ধকেলাসনিভো, পুণ্ণমাযেৰ চন্দিমা;

মজ্ঝন্হিকেৰ সূরিযো, আকাসে চঙ্কমী তদা.

‘‘দিস্ৰা নভে চঙ্কমন্তং, এৰং চিন্তেসহং তদা;

দেৰো নু খো অযং সত্তো, উদাহু মনুজো অযং.

‘‘ন মে সুতো ৰা দিট্ঠো ৰা, মহিযা এদিসো নরো;

অপি মন্তপদং অত্থি, অযং সত্থা ভৰিস্সতি.

‘‘এৰাহং চিন্তযিত্ৰান, সকং চিত্তং পসাদযিং;

নানাপুপ্ফঞ্চ গন্ধঞ্চ, সন্নিপাতেসহং তদা.

‘‘পুপ্ফাসনং পঞ্ঞাপেত্ৰা, সাধুচিত্তং মনোরমং;

নরসারথিনং অগ্গং, ইদং ৰচনমব্রৰিং.

‘‘ইদং মে আসনং ৰীর, পঞ্ঞত্তং তৰনুচ্ছৰং;

হাসযন্তো মমং চিত্তং, নিসীদ কুসুমাসনে.

‘‘নিসীদি তত্থ ভগৰা, অসম্ভীতোৰ কেসরী;

সত্তরত্তিন্দিৰং বুদ্ধো, পৰরে কুসুমাসনে.

‘‘নমস্সমানো অট্ঠাসিং, সত্তরত্তিন্দিৰং অহং;

ৰুট্ঠহিত্ৰা সমাধিম্হা, সত্থা লোকে অনুত্তরো;

মম কম্মং পকিত্তেন্তো, ইদং ৰচনমব্রৰি.

‘‘ভাৰেহি বুদ্ধানুস্সতিং, ভাৰনানমনুত্তরং;

ইমং সতিং ভাৰযিত্ৰা, পূরযিস্সসি মানসং.

‘‘তিংসকপ্পসহস্সানি, দেৰলোকে রমিস্সসি;

অসীতিক্খত্তুং দেৰিন্দো, দেৰরজ্জং করিস্সসি;

সহস্সক্খত্তুং চক্কৰত্তী, রাজা রট্ঠে ভৰিস্সসি.

‘‘পদেসরজ্জং ৰিপুলং, গণনাতো অসঙ্খিযং;

অনুভোস্সসি তং সব্বং, বুদ্ধানুস্সতিযা ফলং.

‘‘ভৰাভৰে সংসরন্তো, মহাভোগং লভিস্সসি;

ভোগে তে ঊনতা নত্থি, বুদ্ধানুস্সতিযা ফলং.

‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘অসীতিকোটিং ছড্ডেত্ৰা, দাসে কম্মকরে বহূ;

গোতমস্স ভগৰতো, সাসনে পব্বজিস্সসি.

‘‘আরাধযিত্ৰা সম্বুদ্ধং, গোতমং সক্যপুঙ্গৰং;

সুভূতি নাম নামেন, হেস্সসি সত্থু সাৰকো.

‘‘ভিক্খুসঙ্ঘে নিসীদিত্ৰা, দক্খিণেয্যগুণম্হি তং;

তথারণৰিহারে চ, দ্ৰীসু অগ্গে ঠপেস্সসি.

‘‘ইদং ৰত্ৰান সম্বুদ্ধো, জলজুত্তমনামকো;

নভং অব্ভুগ্গমী ৰীরো, হংসরাজাৰ অম্বরে.

‘‘সাসিতো লোকনাথেন, নমস্সিত্ৰা তথাগতং;

সদা ভাৰেমি মুদিতো, বুদ্ধানুস্সতিমুত্তমং.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসং অগচ্ছহং.

‘‘অসীতিক্খত্তুং দেৰিন্দো, দেৰরজ্জমকারযিং;

সহস্সক্খত্তুং রাজা চ, চক্কৰত্তী অহোসহং.

‘‘পদেসরজ্জং ৰিপুলং, গণনাতো অসঙ্খিযং;

অনুভোমি সুসম্পত্তিং, বুদ্ধানুস্সতিযা ফলং.

‘‘ভৰাভৰে সংসরন্তো, মহাভোগং লভামহং;

ভোগে মে ঊনতা নত্থি, বুদ্ধানুস্সতিযা ফলং.

‘‘সতসহস্সিতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধানুস্সতিযা ফলং.

‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি. –

ইত্থং সুদং আযস্মা সুভূতিত্থেরো ইমা গাথাযো অভাসিত্থাতি.

এৰং পন সো তাৰতিংসভৰনে অপরাপরং উপ্পজ্জনৰসেন দিব্বসম্পত্তিং অনুভৰিত্ৰা ততো চুতো মনুস্সলোকে অনেকসতক্খত্তুং চক্কৰত্তিরাজা চ পদেসরাজা চ হুত্ৰা উল়ারং মনুস্সসম্পত্তিং অনুভৰিত্ৰা অথ অম্হাকং ভগৰতো কালে সাৰত্থিযং সুমনসেট্ঠিস্স গেহে অনাথপিণ্ডিকস্স কনিট্ঠো হুত্ৰা নিব্বত্তি ‘‘সুভূতী’’তিস্স নামং অহোসি.

তেন চ সমযেন অম্হাকং ভগৰা লোকে উপ্পজ্জিত্ৰা পৰত্তৰরধম্মচক্কো অনুপুব্বেন রাজগহং গন্ত্ৰা তত্থ ৰেল়ুৰনপটিগ্গহণাদিনা লোকানুগ্গহং করোন্তো রাজগহং উপনিস্সায সীতৰনে ৰিহরতি. তদা অনাথপিণ্ডিকো সেট্ঠি সাৰত্থিযং উট্ঠানকভণ্ডং গহেত্ৰা অত্তনো সহাযস্স রাজগহসেট্ঠিনো ঘরং গতো বুদ্ধুপ্পাদং সুত্ৰা সত্থারং সীতৰনে ৰিহরন্তং উপসঙ্কমিত্ৰা পঠমদস্সনেনেৰ সোতাপত্তিফলে পতিট্ঠায সত্থারং সাৰত্থিং আগমনত্থায যাচিত্ৰা ততো পঞ্চচত্তালীসযোজনে মগ্গে যোজনে যোজনে সতসহস্সপরিচ্চাগেন ৰিহারে পতিট্ঠাপেত্ৰা সাৰত্থিযং রাজমানেন অট্ঠকরীসপ্পমাণং জেতস্স রাজকুমারস্স উয্যানভূমিং কোটিসন্থারেন কিণিত্ৰা তত্থ ভগৰতো ৰিহারং কারেত্ৰা অদাসি. ৰিহারপরিগ্গহণদিৰসে অযং সুভূতিকুটুম্বিকো অনাথপিণ্ডিকসেট্ঠিনা সদ্ধিং গন্ত্ৰা ধম্মং সুণন্তো সদ্ধং পটিলভিত্ৰা পব্বজি. সো উপসম্পজ্জিত্ৰা দ্ৰে মাতিকা পগুণা কত্ৰা কম্মট্ঠানং কথাপেত্ৰা অরঞ্ঞে সমণধম্মং করোন্তো মেত্তাঝানপাদকং ৰিপস্সনং ৰড্ঢেত্ৰা অরহত্তং পাপুণি. সো ধম্মং দেসেন্তো যস্মা সত্থারা দেসিতনিযামেন অনোদিস্সকং কত্ৰা ধম্মং দেসেতি. তস্মা অরণৰিহারীনং অগ্গো নাম জাতো. পিণ্ডায চরন্তো ঘরে ঘরে মেত্তাঝানং সমাপজ্জিত্ৰা ৰুট্ঠায ভিক্খং পটিগ্গণ্হাতি ‘‘এৰং দাযকানং মহপ্ফলং ভৰিস্সতী’’তি. তস্মা দক্খিণেয্যানং অগ্গো নাম জাতো. তেনাহ ভগৰা – ‘‘এতদগ্গং, ভিক্খৰে, মম সাৰকানং ভিক্খূনং অরণৰিহারীনং যদিদং সুভূতি, দক্খিণেয্যানং যদিদং সুভূতী’’তি (অ. নি. ১.১৯৮, ২০১). এৰমযং মহাথেরো অরহত্তে পতিট্ঠায অত্তনা পূরিতপারমীনং ফলস্স মত্থকং পত্ৰা লোকে অভিঞ্ঞাতো অভিলক্খিতো হুত্ৰা বহুজনহিতায জনপদচারিকং চরন্তো অনুপুব্বেন রাজগহং অগমাসি.

রাজা বিম্বিসারো থেরস্স আগমনং সুত্ৰা উপসঙ্কমিত্ৰা ৰন্দিত্ৰা ‘‘ইধেৰ, ভন্তে, ৰসথা’’তি ৰত্ৰা ‘‘নিৰাসনট্ঠানং করিস্সামী’’তি পক্কন্তো ৰিস্সরি. থেরো সেনাসনং অলভন্তো অব্ভোকাসে ৰীতিনামেসি. থেরস্স আনুভাৰেন দেৰো ন ৰস্সতি. মনুস্সা অৰুট্ঠিতায উপদ্দুতা রঞ্ঞো নিৰেসনদ্ৰারে উক্কুট্ঠিমকংসু. রাজা ‘‘কেন নু খো কারণেন দেৰো ন ৰস্সতী’’তি ৰীমংসন্তো ‘‘থেরস্স অব্ভোকাসৰাসেন মঞ্ঞে ন ৰস্সতী’’তি চিন্তেত্ৰা তস্স পণ্ণকুটিং কারাপেত্ৰা ‘‘ইমিস্সা, ভন্তে, পণ্ণকুটিযা ৰসথা’’তি ৰত্ৰা ৰন্দিত্ৰা পক্কামি. থেরো কুটিকং পৰিসিত্ৰা তিণসন্থারকে পল্লঙ্কেন নিসীদি. তদা পন দেৰো থোকং থোকং ফুসাযতি, ন সম্মা ধারং অনুপ্পৰেচ্ছতি. অথ থেরো লোকস্স অৰুট্ঠিকভযং ৰিসমিতুকামো অত্তনো অজ্ঝত্তিকবাহিরৰত্থুকস্স পরিস্সযস্স অভাৰং পৰেদেন্তো –

১.

‘‘ছন্না মে কুটিকা সুখা নিৰাতা, ৰস্স দেৰ যথাসুখং;

চিত্তং মে সুসমাহিতং ৰিমুত্তং, আতাপী ৰিহরামি ৰস্স দেৰা’’তি. –

গাথমাহ.

তত্থ ছন্ন-সদ্দো তাৰ ‘‘ছন্না সা কুমারিকা ইমস্স কুমারকস্স’’ (পারা. ২৯৬) ‘‘নচ্ছন্নং নপ্পতিরূপ’’ন্তিআদীসু (পারা. ৩৮৩) পতিরূপে আগতো. ‘‘ছন্নং ত্ৰেৰ, ফগ্গুণ, ফস্সাযতনান’’ন্তিআদীসু ৰচনৰিসিট্ঠে সঙ্খ্যাৰিসেসে. ‘‘ছন্নমতিৰস্সতি, ৰিৰটং নাতিৰস্সতী’’তিআদীসু (উদা. ৪৫; চূল়ৰ. ৩৮৫) গহণে. ‘‘ক্যাহং তে নচ্ছন্নোপি করিস্সামী’’তিআদীসু নিৰাসনপারুপনে ‘‘আযস্মা ছন্নো অনাচারং আচরতী’’তিআদীসু (পারা. ৪২৪) পঞ্ঞত্তিযং. ‘‘সব্বচ্ছন্নং সব্বপরিচ্ছন্নং (পাচি. ৫২, ৫৪), ছন্না কুটি আহিতো গিনী’’তি (সু. নি. ১৮) চ আদীসু তিণাদীহি ছাদনে. ইধাপি তিণাদীহি ছাদনেযেৰ দট্ঠব্বো, তস্মা তিণেন ৰা পণ্ণেন ৰা ছন্না যথা ন ৰস্সতি ৰস্সোদকপতনং ন হোতি ন ওৰস্সতি, এৰং সম্মদেৰ ছাদিতাতি অত্থো.

মে-সদ্দো ‘‘কিচ্ছেন মে অধিগতং, হলং দানি পকাসিতু’’ন্তিআদীসু (মহাৰ. ৮; দী. নি. ২.৬৫; ম. নি. ১.২৮১; ২.৩৩৭; সং. নি. ১.১৭২) করণে আগতো, মযাতি অত্থো. ‘‘তস্স মে, ভন্তে, ভগৰা সংখিত্তেন ধম্মং দেসেতূ’’তিআদীসু (সং. নি. ৩.১৮২; অ. নি. ৪.২৫৭) সম্পদানে, ময্হন্তি অত্থো. ‘‘পুব্বেৰ মে, ভিক্খৰে, সম্বোধা অনভিসম্বুদ্ধস্স বোধিসত্তস্সেৰ সতো’’আদীসু (ম. নি. ১.২০৬; সং. নি. ৪.১৪) সামিঅত্থে আগতো. ইধাপি সামিঅত্থে এৰ দট্ঠব্বো, মমাতি অত্থো. কিঞ্চাপি খীণাসৰানং মমাযিতব্বং নাম কিঞ্চি নত্থি লোকধম্মেহি অনুপলিত্তভাৰতো, লোকসমঞ্ঞাৰসেন পন তেসম্পি ‘‘অহং মমা’’তি ৰোহারমত্তং হোতি. তেনাহ ভগৰা – ‘‘কিন্তি মে সাৰকা ধম্মদাযাদা ভৰেয্যুং, নো আমিসদাযাদা’’তি (ম. নি. ১.২৯).

কুটিকাতি পন মাতুকুচ্ছিপি করজকাযোপি তিণাদিচ্ছদনো পতিস্সযোপি ৰুচ্চতি. তথা হি –

‘‘মাতরং কুটিকং ব্রূসি, ভরিযং ব্রূসি কুলাৰকং;

পুত্তে সন্তানকে ব্রূসি, তণ্হা মে ব্রূসি বন্ধন’’ন্তি. (সং. নি. ১.১৯) –

আদীসু মাতুকুচ্ছি ‘‘কুটিকা’’তি ৰুত্তা.

‘‘অট্ঠিকঙ্কলকুটিকে, মংসন্হারুপসিব্বিতে;

ধিরত্থু পূরে দুগ্গন্ধে, পরগত্তে মমাযসী’’তি. (থেরগা. ১১৫৩) –

আদীসু কেসাদিসমূহভূতো করজকাযো. ‘‘কস্সপস্স ভগৰতো ভগিনি কুটি ওৰস্সতি’’ (ম. নি. ২.২৯১) ‘‘কুটি নাম উল্লিত্তা ৰা হোতি অৰলিত্তা ৰা’’তিআদীসু (পারা. ৩৪৯) তিণছদনপতিস্সযো. ইধাপি সো এৰ ৰেদিতব্বো পণ্ণসালায অধিপ্পেতত্তা. কুটি এৰ হি কুটিকা, অপাকটকুটি ‘‘কুটিকা’’তি ৰুত্তা.

সুখ-সদ্দো পন ‘‘ৰিপিট্ঠিকত্ৰান সুখং দুখঞ্চ, পুব্বেৰ চ সোমনস্সদোমনস্স’’ন্তিআদীসু (সু. নি. ৬৭) সুখৰেদনাযং আগতো. ‘‘সুখো বুদ্ধানমুপ্পাদো, সুখা সদ্ধম্মদেসনা’’তিআদীসু (ধ. প. ১৯৪) সুখমূলে. ‘‘সুখস্সেতং, ভিক্খৰে, অধিৰচনং যদিদং পুঞ্ঞানী’’তিআদীসু (অ. নি. ৭.৬২; ইতিৰু. ২২) সুখহেতুম্হি. ‘‘যস্মা চ, খো, মহালি, রূপং সুখং সুখানুপতিতং সুখাৰক্কন্ত’’ন্তিআদীসু (সং. নি. ৩.৬০) সুখারম্মণে, ‘‘দিট্ঠধম্মসুখৰিহারা এতে, চুন্দ, অরিযস্স ৰিনযে’’তিআদীসু (ম. নি. ১.৮২) অব্যাপজ্জে. ‘‘নিব্বানং পরমং সুখ’’ন্তিআদীসু (ম. নি. ২.২১৫; ধ. প. ২০৩-২০৪) নিব্বানে. ‘‘যাৰঞ্চিদং, ভিক্খৰে, ন সুকরং অক্খানেন পাপুণিতুং যাৰ সুখা সগ্গা’’তিআদীসু (ম. নি. ৩.২২৫) সুখপ্পচ্চযট্ঠানে. ‘‘সোৰগ্গিকং সুখৰিপাকং সগ্গসংৰত্তনিক’’ন্তিআদীসু (দী. নি. ১.১৬৩; সং. নি. ১.১৩০) ইট্ঠে, পিযমনাপেতি অত্থো. ইধাপি ইট্ঠে সুখপ্পচ্চযে ৰা দট্ঠব্বো. সা হি কুটি অন্তো বহি চ মনাপভাৰেন সম্পাদিতা নিৰাসনফাসুতায ‘‘সুখা’’তি ৰুত্তা. তথা নাতিসীতনাতিউণ্হতায উতুসুখসম্পত্তিযোগেন কাযিকচেতসিকসুখস্স পচ্চযভাৰতো.

নিৰাতাতি অৰাতা, ফুসিতগ্গল়পিহিতৰাতপানত্তা ৰাতপরিস্সযরহিতাতি অত্থো. ইদং তস্সা কুটিকা সুখভাৰৰিভাৰনং. সৰাতে হি সেনাসনে উতুসপ্পাযো ন লব্ভতি, নিৰাতে সো লব্ভতীতি. ৰস্সাতি পৰস্স সম্মা ধারং অনুপ্পৰেচ্ছ. দেৰাতি অযং দেৰ-সদ্দো ‘‘ইমানি তে, দেৰ, চতুরাসীতি নগরসহস্সানি কুসৰতীরাজধানিপ্পমুখানি, এত্থ, দেৰ, ছন্দং জনেহি জীৰিতে অপেক্খ’’ন্তিআদীসু (দী. নি. ২.২৬৬) সম্মুতিদেৰে খত্তিযে আগতো. ‘‘চাতুমহারাজিকা দেৰা ৰণ্ণৰন্তো সুখবহুলা’’তিআদীসু (দী. নি. ৩.৩৩৭) উপপত্তিদেৰেসু. ‘‘তস্স দেৰাতিদেৰস্স, সাসনং সব্বদস্সিনো’’তিআদীসু ৰিসুদ্ধিদেৰেসু. ৰিসুদ্ধিদেৰানঞ্হি ভগৰতো অতিদেৰভাৰে ৰুত্তে ইতরেসং ৰুত্তো এৰ হোতি. ‘‘ৰিদ্ধে ৰিগতৰলাহকে দেৰে’’তিআদীসু (ম. নি. ১.৪৮৬; সং. নি. ১.১১০; ইতিৰু. ২৭) আকাসে. ‘‘দেৰো চ কালেন কালং ন সম্মা ধারং অনুপ্পৰেচ্ছতী’’তিআদীসু (অ. নি. ৪.৭০) মেঘে পজ্জুন্নে ৰা. ইধাপি মেঘে পজ্জুন্নে ৰা দট্ঠব্বো. ৰস্সাতি হি তে আণাপেন্তো থেরো আলপতি. যথাসুখন্তি যথারুচিং. তৰ ৰস্সনেন ময্হং বাহিরো পরিস্সযো নত্থি, তস্মা যথাকামং ৰস্সাতি ৰস্সূপজীৰিসত্তে অনুগ্গণ্হন্তো ৰদতি.

ইদানি অব্ভন্তরে পরিস্সযাভাৰং দস্সেন্তো ‘‘চিত্ত’’ন্তিআদিমাহ. তত্থ চিত্তং মে সুসমাহিতন্তি মম চিত্তং সুট্ঠু অতিৰিয সম্মা সম্মদেৰ একগ্গভাৰেন আরম্মণে ঠপিতং. তঞ্চ খো ন নীৰরণাদিৰিক্খম্ভনমত্তেন; অপি চ খো ৰিমুত্তং ওরম্ভাগিযউদ্ধংভাগিযসঙ্গহেহি সব্বসংযোজনেহি সব্বকিলেসধম্মতো চ ৰিসেসেন ৰিমুত্তং, সমুচ্ছেদপ্পহানৰসেন পটিপস্সদ্ধিপ্পহানৰসেন তে পজহিত্ৰা ঠিতন্তি অত্থো. আতাপীতি ৰীরিযৰা. ফলসমাপত্তিঅত্থং ৰিপস্সনারম্ভৰসেন দিট্ঠধম্মসুখৰিহারত্থঞ্চ আরদ্ধৰীরিযো হুত্ৰা ৰিহরামি, দিব্বৰিহারাদীহি অত্তভাৰং পৰত্তেমি, ন পন কিলেসপ্পহানত্থং, পহাতব্বস্সেৰ অভাৰতোতি অধিপ্পাযো. ‘‘যথা পন বাহিরপরিস্সযাভাৰেন, দেৰ, মযা ত্ৰং ৰস্সনে নিযোজিতো, এৰং অব্ভন্তরপরিস্সযাভাৰেনপী’’তি দস্সেন্তো পুনপি ‘‘ৰস্স, দেৰা’’তি আহ.

অপরো নযো ছন্নাতি ছাদিতা পিহিতা. কুটিকাতি অত্তভাৰো. সো হি ‘‘অনেকাৰযৰস্স সমুদাযস্স অৰিজ্জানীৰরণস্স, ভিক্খৰে, পুগ্গলস্স তণ্হাসংযুত্তস্স অযঞ্চেৰ কাযো সমুদাগতো, বহিদ্ধা চ নামরূপ’’ন্তিআদীসু (সং. নি. ২.১৯) কাযোতি আগতো. ‘‘সিঞ্চ, ভিক্খু, ইমং নাৰং, সিত্তা তে লহুমেস্সতী’’তিআদীসু (ধ. প. ৬৬) নাৰাতি আগতো. ‘‘গহকারক দিট্ঠোসি, গহকূটং ৰিসঙ্খত’’ন্তি (ধ. প. ১৫৪) চ আদীসু গহন্তি আগতো. ‘‘সত্তো গুহাযং বহুনাভিছন্নো, তিট্ঠং নরো মোহনস্মিং পগাল়্হো’’তিআদীসু (সু. নি. ৭৭৮) গুহাতি আগতো. ‘‘নেলঙ্গো সেতপচ্ছাদো, একারো ৰত্ততী রথো’’তিআদীসু (উদা. ৬৫) রথোতি আগতো. ‘‘পুন গেহং ন কাহসী’’তিআদীসু (ধ. প. ১৫৪) গেহন্তি আগতো. ‘‘ৰিৰটা কুটি নিব্বুতো গিনী’’তিআদীসু (সু. নি. ১৯) কুটীতি আগতো. তস্মা ইধাপি সো ‘‘কুটিকা’’তি ৰুত্তো. অত্তভাৰো হি কট্ঠাদীনি পটিচ্চ লব্ভমানা গেহনামিকা কুটিকা ৰিয অট্ঠিআদিসঞ্ঞিতে পথৰীধাতুআদিকে ফস্সাদিকে চ পটিচ্চ লব্ভমানো ‘‘কুটিকা’’তি ৰুত্তো, চিত্তমক্কটস্স নিৰাসভাৰতো চ. যথাহ –

‘‘অট্ঠিকঙ্কলকুটিৰেসা, মক্কটাৰসথো ইতি;

মক্কটো পঞ্চদ্ৰারায, কুটিকায পসক্কিয;

দ্ৰারেনানুপরিযাতি, ঘট্টযন্তো পুনপ্পুন’’ন্তি চ.

সা পনেসা অত্তভাৰকুটিকা থেরস্স তিণ্ণং ছন্নং অট্ঠন্নঞ্চ অসংৰরদ্ৰারানং ৰসেন সমতি ৰিজ্ঝনকস্স রাগাদিঅৰস্সুতস্স পঞ্ঞায সংৰুতত্তা সম্মদেৰ পিহিতত্তা ‘‘ছন্না’’তি ৰুত্তা. তেনাহ ভগৰা – ‘‘সোতানং সংৰরং ব্রূমি, পঞ্ঞাযেতে পিধীযরে’’তি (সু. নি. ১০৪১). ৰুত্তনযেন ছন্নত্তা এৰ কিলেসদুক্খাভাৰতো নিরামিসসুখসমঙ্গিতায চ সুখা সুখপ্পত্তা, ততো এৰ চ নিৰাতা নিহতমানমদথম্ভসারম্ভতায নিৰাতৰুত্তিকা. অযঞ্চ নযো ‘‘ময্হং ন সংকিলেসধম্মানং সংৰরণমত্তেন সিদ্ধো, অথ খো অগ্গমগ্গসমাধিনা সুট্ঠু সমাহিতচিত্ততায চেৰ অগ্গমগ্গপঞ্ঞায সব্বসংযোজনেহি ৰিপ্পমুত্তচিত্ততায চা’’তি দস্সেন্তো আহ ‘‘চিত্তং মে সুসমাহিতং ৰিমুত্ত’’ন্তি. এৰংভূতো চ ‘‘ইদানাহং কতকরণীযো’’তি ন অপ্পোস্সুক্কো হোমি, অথ খো আতাপী ৰিহরামি, সদেৰকস্স লোকস্স হিতসুখূপসংহারে উস্সাহজাতো ভিক্খাচারকালেপি অনুঘরং ব্রহ্মৰিহারেনেৰ ৰিহরামি. তস্মা ত্ৰম্পি, দেৰ, পজ্জুন্ন ময্হং পিযং কাতুকামতাযপি ৰস্সূপজীৰীনং সত্তানং অনুকম্পাযপি ৰস্স সম্মা ধারং অনুপ্পৰেচ্ছাতি এৰমেত্থ অত্থো দট্ঠব্বো.

এত্থ চ থেরো ‘‘ছন্না মে কুটিকা সুখা নিৰাতা’’তি ইমিনা লোকিযলোকুত্তরভেদং অত্তনো অধিসীলসিক্খং দস্সেতি. ‘‘চিত্তং মে সুসমাহিত’’ন্তি ইমিনা অধিচিত্তসিক্খং. ‘‘ৰিমুত্ত’’ন্তি ইমিনা অধিপঞ্ঞাসিক্খং. ‘‘আতাপী ৰিহরামী’’তি ইমিনা দিট্ঠধম্মসুখৰিহারং. অথ ৰা ‘‘ছন্না মে কুটিকা সুখা নিৰাতা’’তি ইমিনা অনিমিত্তৰিহারং দস্সেতি কিলেসৰস্সপিধানমুখেন নিচ্চাদিনিমিত্তুগ্ঘাটনদীপনতো. ‘‘চিত্তং মে সুসমাহিত’’ন্তি ইমিনা অপ্পণিহিতৰিহারং. ‘‘ৰিমুত্ত’’ন্তি ইমিনা সুঞ্ঞতৰিহারং. ‘‘আতাপী ৰিহরামী’’তি ইমিনা তেসং তিণ্ণং ৰিহারানং অধিগমূপাযং. পঠমেন ৰা দোসপ্পহানং, দুতিযেন রাগপ্পহানং, ততিযেন মোহপ্পহানং. তথা দুতিযেন পঠমদুতিযেহি ৰা ধম্মৰিহারসম্পত্তিযো দস্সেতি. ততিযেন ৰিমুত্তিসম্পত্তিযো. ‘‘আতাপী ৰিহরামী’’তি ইমিনা পরহিতপটিপত্তিযং অতন্দিতভাৰং দস্সেতীতি দট্ঠব্বং.

এৰং ‘‘যথানামা’’তি গাথায ৰুত্তানং ধম্মৰিহারাদীনং ইমায গাথায দস্সিতত্তা তত্থ অদস্সিতেসু নামগোত্তেসু নামং দস্সেতুং ‘‘ইত্থং সুদ’’ন্তিআদি ৰুত্তং. যে হি থেরা নামমত্তেন পাকটা, তে নামেন, যে গোত্তমত্তেন পাকটা, তে গোত্তেন, যে উভযথা পাকটা, তে উভযেনপি দস্সিস্স’’ন্তি. অযং পন থেরো নামেন অভিলক্খিতো, ন তথা গোত্তেনাতি ‘‘ইত্থং সুদং আযস্মা সুভূতী’’তি ৰুত্তং. তত্থ ইত্থন্তি ইদং পকারং, ইমিনা আকারেনাতি অত্থো. সুদন্তি সু ইদং, সন্ধিৰসেন ইকারলোপো. সূতি চ নিপাতমত্তং, ইদং গাথন্তি যোজনা. আযস্মাতি পিযৰচনমেতং গরুগারৰসপ্পতিস্সৰচনমেতং. সুভূতীতি নামকিত্তনং. সো হি সরীরসম্পত্তিযাপি দস্সনীযো পাসাদিকো, গুণসম্পত্তিযাপি. ইতি সুন্দরায সরীরাৰযৰৰিভূতিযা সীলসম্পত্তিযাদিৰিভূতিযা চ সমন্নাগতত্তা সুভূতীতি পঞ্ঞাযিত্থ সীলসারাদিথিরগুণযোগতো থেরো. অভাসিত্থাতি কথেসি. কস্মা পনেতে মহাথেরা অত্তনো গুণে পকাসেন্তীতি? ইমিনা দীঘেন অদ্ধুনা অনধিগতপুব্বং পরমগম্ভীরং অতিৰিয সন্তং পণীতং অত্তনা অধিগতং লোকুত্তরধম্মং পচ্চৰেক্খিত্ৰা পীতিৰেগসমুস্সাহিতউদানৰসেন সাসনস্স নিয্যানিকভাৰৰিভাৰনৰসেন চ পরমপ্পিচ্ছা অরিযা অত্তনো গুণে পকাসেন্তি, যথা তং লোকনাথো বোধনেয্যঅজ্ঝাসযৰসেন ‘‘দসবলসমন্নাগতো, ভিক্খৰে, তথাগতো চতুৰেসারজ্জৰিসারদো’’তিআদিনা অত্তনো গুণে পকাসেতি, এৰমযং থেরস্স অঞ্ঞাব্যাকরণগাথা হোতীতি.

পরমত্থদীপনিযা থেরগাথাসংৰণ্ণনায

সুভূতিত্থেরগাথাৰণ্ণনা নিট্ঠিতা.

২. মহাকোট্ঠিকত্থেরগাথাৰণ্ণনা

উপসন্তোতি আযস্মতো মহাকোট্ঠিকত্থেরস্স গাথা. তস্স কা উপ্পত্তি? অযম্পি থেরো পদুমুত্তরস্স ভগৰতো কালে হংসৰতীনগরে মহাভোগকুলে নিব্বত্তিত্ৰা ৰিঞ্ঞুতং পত্তো মাতাপিতূনং অচ্চযেন কুটুম্বং সণ্ঠপেত্ৰা ঘরাৰাসং ৰসন্তো একদিৰসং পদুমুত্তরস্স ভগৰতো ধম্মদেসনাকালে হংসৰতীনগরৰাসিকে গন্ধমালাদিহত্থে যেন বুদ্ধো যেন ধম্মো যেন সঙ্ঘো, তন্নিন্নে তপ্পোণে তপ্পব্ভারে গচ্ছন্তে দিস্ৰা মহাজনেন সদ্ধিং উপগতো সত্থারং একং ভিক্খুং পটিসম্ভিদাপত্তানং অগ্গট্ঠানে ঠপেন্তং দিস্ৰা ‘‘অযং কির ইমস্মিং সাসনে পটিসম্ভিদাপত্তানং অগ্গো, অহো ৰতাহম্পি একস্স বুদ্ধস্স সাসনে অযং ৰিয পটিসম্ভিদাপত্তানং অগ্গো ভৰেয্য’’ন্তি চিন্তেত্ৰা সত্থু দেসনাপরিযোসানে ৰুট্ঠিতায পরিসায ভগৰন্তং উপসঙ্কমিত্ৰা, ‘‘ভন্তে, স্ৰে ময্হং ভিক্খং গণ্হথা’’তি নিমন্তেসি. সত্থা অধিৰাসেসি. সো ভগৰন্তং অভিৰাদেত্ৰা পদক্খিণং কত্ৰা সকনিৰেসনং গন্ত্ৰা সব্বরত্তিং বুদ্ধস্স ভিক্খুসঙ্ঘস্স চ নিসজ্জট্ঠানং গন্ধদামমালাদামাদীহি অলঙ্করিত্ৰা পণীতং খাদনীযং ভোজনীযং পটিযাদাপেত্ৰা তস্সা রত্তিযা অচ্চযেন সকে নিৰেসনে ভিক্খুসতসহস্সপরিৰারং ভগৰন্তং ৰিৰিধযাগুখজ্জকপরিৰারং নানারসসূপব্যঞ্জনং গন্ধসালিভোজনং ভোজেত্ৰা ভত্তকিচ্চপরিযোসানে চিন্তেসি – ‘‘মহন্তং, খো, অহং ঠানন্তরং পত্থেমি ন খো পন ময্হং যুত্তং একদিৰসমেৰ দানং দত্ৰা তং ঠানন্তরং পত্থেতুং, অনুপটিপাটিযা সত্ত দিৰসে দানং দত্ৰা পত্থেস্সামী’’তি. সো তেনেৰ নিযামেন সত্ত দিৰসে মহাদানানি দত্ৰা ভত্তকিচ্চপরিযোসানে দুস্সকোট্ঠাগারং ৰিৰরাপেত্ৰা উত্তমং তিচীৰরপ্পহোনকং সুখুমৰত্থং বুদ্ধস্স পাদমূলে ঠপেত্ৰা ভিক্খুসতসহস্সস্স চ তিচীৰরং দত্ৰা তথাগতং উপসঙ্কমিত্ৰা, ‘‘ভন্তে, যো সো ভিক্খু তুম্হেহি ইতো সত্তমদিৰসমত্থকে এতদগ্গে ঠপিতো, অহম্পি সো ভিক্খু ৰিয অনাগতে উপ্পজ্জনকবুদ্ধস্স সাসনে পব্বজিত্ৰা পটিসম্ভিদাপত্তানং অগ্গো ভৰেয্য’’ন্তি ৰত্ৰা সত্থু পাদমূলে নিপজ্জিত্ৰা পত্থনং অকাসি. সত্থা তস্স পত্থনায সমিজ্ঝনভাৰং দিস্ৰা ‘‘অনাগতে ইতো কপ্পসতসহস্সমত্থকে গোতমো নাম বুদ্ধো লোকে উপ্পজ্জিস্সতি, তস্স সাসনে তৰ পত্থনা সমিজ্ঝিস্সতী’’তি ব্যাকাসি. ৰুত্তম্পি চেতং অপদানে (অপ. থের ২.৫৪.২২১-২৫০) –

‘‘পদুমুত্তরো নাম জিনো, সব্বলোকৰিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

‘‘ওৰাদকো ৰিঞ্ঞাপকো, তারকো সব্বপাণিনং;

দেসনাকুসলো বুদ্ধো, তারেসি জনতং বহুং.

‘‘অনুকম্পকো কারুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

‘‘এৰং নিরাকুলং আসি, সুঞ্ঞতং তিত্থিযেহি চ;

ৰিচিত্তং অরহন্তেহি, ৰসীভূতেহি তাদিভি.

‘‘রতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৰরলক্খণো.

‘‘ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

‘‘তদাহং হংসৰতিযং, ব্রাহ্মণো ৰেদপারগূ;

উপেচ্চ সব্বলোকগ্গং, অস্সোসিং ধম্মদেসনং.

‘‘তদা সো সাৰকং ৰীরো, পভিন্নমতিগোচরং;

অত্থে ধম্মে নিরুত্তে চ, পটিভানে চ কোৰিদং.

‘‘ঠপেসি এতদগ্গম্হি, তং সুত্ৰা মুদিতো অহং;

সসাৰকং জিনৰরং, সত্তাহং ভোজযিং তদা.

‘‘দুস্সেহচ্ছাদযিত্ৰান, সসিস্সং বুদ্ধিসাগরং;

নিপচ্চ পাদমূলম্হি, তং ঠানং পত্থযিং অহং.

‘‘ততো অৰোচ লোকগ্গো, পস্সথেতং দিজুত্তমং;

ৰিনতং পাদমূলে মে, কমলোদরসপ্পভং.

‘‘বুদ্ধসেট্ঠস্স ভিক্খুস্স, ঠানং পত্থযতে অযং;

তায সদ্ধায চাগেন, সদ্ধম্মস্সৰনেন চ.

‘‘সব্বত্থ সুখিতো হুত্ৰা, সংসরিত্ৰা ভৰাভৰে;

অনাগতম্হি অদ্ধানে, লচ্ছসেতং মনোরথং.

‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ধম্মেসু দাযাদো, ওরসো ধম্মনিম্মিতো;

কোট্ঠিকো নাম নামেন, হেস্সতি সত্থু সাৰকো.

‘‘তং সুত্ৰা মুদিতো হুত্ৰা, যাৰজীৰং তদা জিনং;

মেত্তচিত্তো পরিচরিং, সতো পঞ্ঞা সমাহিতো.

‘‘তেন কম্মৰিপাকেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘সতানং তীণিক্খত্তুঞ্চ, দেৰরজ্জমকারযিং;

সতানং পঞ্চক্খত্তুঞ্চ, চক্কৰত্তী অহোসহং.

‘‘পদেসরজ্জং ৰিপুলং, গণনাতো অসঙ্খিযং;

সব্বত্থ সুখিতো আসিং, তস্স কম্মস্স ৰাহসা.

‘‘দুৰে ভৰে সংসরামি, দেৰত্তে অথ মানুসে;

অঞ্ঞং গতিং ন গচ্ছামি, সুচিণ্ণস্স ইদং ফলং.

‘‘দুৰে কুলে পজাযামি, খত্তিযে অথ ব্রাহ্মণে;

নীচে কুলে ন জাযামি, সুচিণ্ণস্স ইদং ফলং.

‘‘পচ্ছিমে ভৰে সম্পত্তে, ব্রহ্মবন্ধু অহোসহং;

সাৰত্থিযং ৰিপ্পকুলে, পচ্চাজাতো মহদ্ধনে.

‘‘মাতা চন্দৰতী নাম, পিতা মে অস্সলাযনো;

যদা মে পিতরং বুদ্ধো, ৰিনযী সব্বসুদ্ধিযা.

‘‘তদা পসন্নো সুগতে, পব্বজিং অনগারিযং;

মোগ্গল্লানো আচরিযো, উপজ্ঝা সারিসম্ভৰো.

‘‘কেসেসু ছিজ্জমানেসু, দিট্ঠি ছিন্না সমূলিকা;

নিৰাসেন্তো চ কাসাৰং, অরহত্তমপাপুণিং.

‘‘অত্থধম্মনিরুত্তীসু, পটিভানে চ মে মতি;

পভিন্না তেন লোকগ্গো, এতদগ্গে ঠপেসি মং.

‘‘অসন্দিট্ঠং ৰিযাকাসিং, উপতিস্সেন পুচ্ছিতো;

পটিসম্ভিদাসু তেনাহং, অগ্গো সম্বুদ্ধসাসনে.

‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

‘‘স্ৰাগতং ৰত মে আসি, মম বুদ্ধস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি.

এৰং সো তত্থ তত্থ ভৰে পুঞ্ঞঞাণসম্ভারং সম্ভরন্তো অপরাপরং দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং ব্রাহ্মণমহাসালকুলে নিব্বত্তি. কোট্ঠিকোতিস্স নামং অকংসু. সো ৰযপ্পত্তো তযো ৰেদে উগ্গহেত্ৰা ব্রাহ্মণসিপ্পে নিপ্ফত্তিং গতো একদিৰসং সত্থু সন্তিকং গন্ত্ৰা ধম্মং সুত্ৰা পটিলদ্ধসদ্ধো পব্বজিত্ৰা উপসম্পন্নকালতো পট্ঠায ৰিপস্সনায কম্মং করোন্তো সহ পটিসম্ভিদাহি অরহত্তং পত্ৰা পটিসম্ভিদাসু চিণ্ণৰসী হুত্ৰা অভিঞ্ঞাতে অভিঞ্ঞাতে মহাথেরে উপসঙ্কমিত্ৰা পঞ্হং পুচ্ছন্তোপি দসবলং উপসঙ্কমিত্ৰা পঞ্হং পুচ্ছন্তোপি পটিসম্ভিদাসুযেৰ পঞ্হং পুচ্ছি. এৰমযং থেরো তত্থ কতাধিকারতায চিণ্ণৰসীভাৰেন চ পটিসম্ভিদাপত্তানং অগ্গো জাতো. অথ নং সত্থা মহাৰেদল্লসুত্তং (ম. নি. ১.৪৪৯ আদযো) অট্ঠুপ্পত্তিং কত্ৰা পটিসম্ভিদাপত্তানং অগ্গট্ঠানে ঠপেসি – ‘‘এতদগ্গং, ভিক্খৰে, মম সাৰকানং ভিক্খূনং পটিসম্ভিদাপত্তানং যদিদং মহাকোট্ঠিকো’’তি (অ. নি. ১.২০৯, ২১৮). সো অপরেন সমযেন ৰিমুত্তিসুখং পটিসংৰেদেন্তো উদানৰসেন –

২.

‘‘উপসন্তো উপরতো, মন্তভাণী অনুদ্ধতো;

ধুনাতি পাপকে ধম্মে, দুমপত্তংৰ মালুতো’’তি. –

ইত্থং সুদং আযস্মা মহাকোট্ঠিকত্থেরো গাথং অভাসি.

তত্থ উপসন্তোতি মনচ্ছট্ঠানং ইন্দ্রিযানং উপসমনেন নিব্বিসেৰনভাৰকরণেন উপসন্তো. উপরতোতি সব্বস্মা পাপকরণতো ওরতো ৰিরতো. মন্তভাণীতি মন্তা ৰুচ্চতি পঞ্ঞা, তায পন উপপরিক্খিত্ৰা ভণতীতি মন্তভাণী, কালৰাদীআদিভাৰং অৰিস্সজ্জেন্তোযেৰ ভণতীতি অত্থো. মন্তভণনৰসেন ৰা ভণতীতি মন্তভাণী, দুব্ভাসিততো ৰিনা অত্তনো ভাসনৰসেন চতুরঙ্গসমন্নাগতং সুভাসিতংযেৰ ভণতীতি অত্থো. জাতিআদিৰসেন অত্তনো অনুক্কংসনতো ন উদ্ধতোতি অনুদ্ধতো অথ ৰা তিণ্ণং কাযদুচ্চরিতানং ৰূপসমনেন ততো পটিৰিরতিযা উপসন্তো, তিণ্ণং মনোদুচ্চরিতানং উপরমণেন পজহনেন উপরতো, চতুন্নং ৰচীদুচ্চরিতানং অপ্পৰত্তিযা পরিমিতভাণিতায মন্তভাণী, তিৰিধদুচ্চরিতনিমিত্তউপ্পজ্জনকস্স উদ্ধচ্চস্স অভাৰতো অনুদ্ধতো. এৰং পন তিৰিধদুচ্চরিতপ্পহানেন সুদ্ধে সীলে পতিট্ঠিতো, উদ্ধচ্চপ্পহানেন সমাহিতো, তমেৰ সমাধিং পদট্ঠানং কত্ৰা ৰিপস্সনং ৰড্ঢেত্ৰা মগ্গপটিপাটিযা ধুনাতি পাপকে ধম্মে লামকট্ঠেন পাপকে সব্বেপি সংকিলেসধম্মে নিদ্ধুনাতি, সমুচ্ছেদৰসেন পজহতি. যথা কিং? দুমপত্তংৰ মালুতো, যথা নাম দুমস্স রুক্খস্স পত্তং পণ্ডুপলাসং মালুতো ৰাতো ধুনাতি, বন্ধনতো ৰিযোজেন্তো নীহরতি, এৰং যথাৰুত্তপটিপত্তিযং ঠিতো পাপধম্মে অত্তনো সন্তানতো নীহরতি, এৰমযং থেরস্স অঞ্ঞাপদেসেন অঞ্ঞাব্যাকরণগাথাপি হোতীতি ৰেদিতব্বা.

এত্থ চ কাযৰচীদুচ্চরিতপ্পহানৰচনেন পযোগসুদ্ধিং দস্সেতি, মনোদুচ্চরিতপ্পহানৰচনেন আসযসুদ্ধিং. এৰং পযোগাসযসুদ্ধস্স ‘‘অনুদ্ধতো’’তি ইমিনা উদ্ধচ্চাভাৰৰচনেন তদেকট্ঠতায নীৰরণপ্পহানং দস্সেতি. তেসু পযোগসুদ্ধিযা সীলসম্পত্তি ৰিভাৰিতা, আসযসুদ্ধিযা সমথভাৰনায উপকারকধম্মপরিগ্গহো, নীৰরণপ্পহানেন সমাধিভাৰনা, ‘‘ধুনাতি পাপকে ধম্মে’’তি ইমিনা পঞ্ঞাভাৰনা ৰিভাৰিতা হোতি. এৰং অধিসীলসিক্খাদযো তিস্সো সিক্খা, তিৰিধকল্যাণং সাসনং, তদঙ্গপ্পহানাদীনি তীণি পহানানি, অন্তদ্ৰযপরিৰজ্জনেন সদ্ধিং মজ্ঝিমায পটিপত্তিযা পটিপজ্জনং, অপাযভৰাদীনং সমতিক্কমনূপাযো চ যথারহং নিদ্ধারেত্ৰা যোজেতব্বা. ইমিনা নযেন সেসগাথাসুপি যথারহং অত্থযোজনা ৰেদিতব্বা. অত্থমত্তমেৰ পন তত্থ তত্থ অপুব্বং ৰণ্ণযিস্সাম. ‘‘ইত্থং সুদং আযস্মা মহাকোট্ঠিকো’’তি ইদং পূজাৰচনং, যথা তং মহামোগ্গল্লানোতি.

মহাকোট্ঠিকত্থেরগাথাৰণ্ণনা নিট্ঠিতা.

৩. কঙ্খারেৰতত্থেরগাথাৰণ্ণনা

পঞ্ঞং ইমং পস্সাতি আযস্মতো কঙ্খারেৰতস্স গাথা. কা উপ্পত্তি? অযম্পি থেরো পদুমুত্তরভগৰতো কালে হংসৰতীনগরে ব্রাহ্মণমহাসালকুলে নিব্বত্তো. একদিৰসং বুদ্ধানং ধম্মদেসনাকালে হেট্ঠা ৰুত্তনযেন মহাজনেন সদ্ধিং ৰিহারং গন্ত্ৰা পরিসপরিযন্তে ঠিতো ধম্মং সুণন্তো সত্থারং একং ভিক্খুং ঝানাভিরতানং অগ্গট্ঠানে ঠপেন্তং দিস্ৰা ‘‘মযাপি অনাগতে এৰরূপেন ভৰিতুং ৰট্টতী’’তি চিন্তেত্ৰা দেসনাৰসানে সত্থারং নিমন্তেত্ৰা হেট্ঠা ৰুত্তনযেন মহাসক্কারং কত্ৰা ভগৰন্তং আহ – ‘‘ভন্তে, অহং ইমিনা অধিকারকম্মেন অঞ্ঞং সম্পত্তিং ন পত্থেমি, যথা পন সো ভিক্খু তুম্হেহি ইতো সত্তমদিৰসমত্থকে ঝাযীনং অগ্গট্ঠানে ঠপিতো, এৰং অহম্পি অনাগতে একস্স বুদ্ধস্স সাসনে ঝাযীনং অগ্গো ভৰেয্য’’ন্তি পত্থনমকাসি. সত্থা অনাগতং ওলোকেত্ৰা নিপ্ফজ্জনভাৰং দিস্ৰা ‘‘অনাগতে কপ্পসতসহস্সাৰসানে গোতমো নাম বুদ্ধো উপ্পজ্জিস্সতি, তস্স সাসনে ত্ৰং ঝাযীনং অগ্গো ভৰিস্সসী’’তি ব্যাকরিত্ৰা পক্কামি.

সো যাৰজীৰং কল্যাণকম্মং কত্ৰা কপ্পসতসহস্সং দেৰমনুস্সেসু সংসরিত্ৰা অম্হাকং ভগৰতো কালে সাৰত্থিনগরে মহাভোগকুলে নিব্বত্তো পচ্ছাভত্তং ধম্মস্সৰনত্থং গচ্ছন্তেন মহাজনেন সদ্ধিং ৰিহারং গন্ত্ৰা পরিসপরিযন্তে ঠিতো দসবলস্স ধম্মকথং সুত্ৰা পটিলদ্ধসদ্ধো পব্বজিত্ৰা উপসম্পদং লভিত্ৰা কম্মট্ঠানং কথাপেত্ৰা ঝানপরিকম্মং করোন্তো ঝানলাভী হুত্ৰা ঝানং পাদকং কত্ৰা অরহত্তং পাপুণি. সো যেভুয্যেন দসবলেন সমাপজ্জিতব্বসমাপত্তিং সমাপজ্জন্তো অহোরত্তং ঝানেসু চিণ্ণৰসী অহোসি. অথ নং সত্থা ‘‘এতদগ্গং, ভিক্খৰে, মম সাৰকানং ভিক্খূনং ঝাযীনং যদিদং কঙ্খারেৰতো’’তি (অ. নি. ১.১৯৮, ২০৪) ঝাযীনং অগ্গট্ঠানে ঠপেসি. ৰুত্তম্পি চেতং অপদানে (অপ. থের ২.৫৫.৩৪-৫৩) –

‘‘পদুমুত্তরো নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

‘‘সীহহনু ব্রহ্মগিরো, হংসদুন্দুভিনিস্সনো;

নাগৰিক্কন্তগমনো, চন্দসূরাধিকপ্পভো.

‘‘মহামতি মহাৰীরো, মহাঝাযী মহাবলো;

মহাকারুণিকো নাথো, মহাতমপনূদনো.

‘‘স কদাচি তিলোকগ্গো, ৰেনেয্যং ৰিনযং বহুং;

ধম্মং দেসেসি সম্বুদ্ধো, সত্তাসযৰিদূ মুনি.

‘‘ঝাযিং ঝানরতং ৰীরং, উপসন্তং অনাৰিলং;

ৰণ্ণযন্তো পরিসতিং, তোসেসি জনতং জিনো.

‘‘তদাহং হংসৰতিযং, ব্রাহ্মণো ৰেদপারগূ;

ধম্মং সুত্ৰান মুদিতো, তং ঠানমভিপত্থযিং.

‘‘তদা জিনো ৰিযাকাসি, সঙ্ঘমজ্ঝে ৰিনাযকো;

মুদিতো হোহি ত্ৰং ব্রহ্মে, লচ্ছসে তং মনোরথং.

‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ধম্মেসু দাযাদো, ওরসো ধম্মনিম্মিতো;

রেৰতো নাম নামেন, হেস্সতি সত্থু সাৰকো.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘পচ্ছিমে চ ভৰে দানি, জাতোহং কোলিযে পুরে;

খত্তিযে কুলসম্পন্নে, ইদ্ধে ফীতে মহদ্ধনে.

‘‘যদা কপিলৰত্থুস্মিং, বুদ্ধো ধম্মমদেসযি;

তদা পসন্নো সুগতে, পব্বজিং অনগারিযং.

‘‘কঙ্খা মে বহুলা আসি, কপ্পাকপ্পে তহিং তহিং;

সব্বং তং ৰিনযী বুদ্ধো, দেসেত্ৰা ধম্মমুত্তমং.

‘‘ততোহং তিণ্ণসংসারো, তদা ঝানসুখে রতো;

ৰিহরামি তদা বুদ্ধো, মং দিস্ৰা এতদব্রৰি.

‘‘যা কাচি কঙ্খা ইধ ৰা হুরং ৰা, সৰেদিযা ৰা পরৰেদিযা ৰা;

যে ঝাযিনো তা পজহন্তি সব্বা, আতাপিনো ব্রহ্মচরিযং চরন্তা.

‘‘সতসহস্সে কতং কম্মং, ফলং দস্সেসি মে ইধ;

সুমুত্তো সরৰেগোৰ, কিলেসে ঝাপযিং মম.

‘‘ততো ঝানরত্তং দিস্ৰা, বুদ্ধো লোকন্তগূ মুনি;

ঝাযীনং ভিক্খূনং অগ্গো, পঞ্ঞাপেসি মহামতি.

‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

‘‘স্ৰাগতং ৰত মে আসি, মম বুদ্ধস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি.

তথা কতকিচ্চো পনাযং মহাথেরো পুব্বে দীঘরত্তং অত্তনো কঙ্খাপকতচিত্ততং ইদানি সব্বসো ৰিগতকঙ্খতঞ্চ পচ্চৰেক্খিত্ৰা ‘‘অহো নূন ময্হং সত্থুনো দেসনানুভাৰো, তেনেতরহি এৰং ৰিগতকঙ্খো অজ্ঝত্তং ৰূপসন্তচিত্তো জাতো’’তি সঞ্জাতবহুমানো ভগৰতো পঞ্ঞং পসংসন্তো ‘‘পঞ্ঞং ইমং পস্সা’’তি ইমং গাথমাহ.

৩. তত্থ পঞ্ঞন্তি পকারে জানাতি, পকারেহি ঞাপেতীতি চ পঞ্ঞা. ৰেনেয্যানং আসযানুসযচরিযাধিমুত্তিআদিপ্পকারে ধম্মানং কুসলাদিকে খন্ধাদিকে চ দেসেতব্বপ্পকারে জানাতি, যথাসভাৰতো পটিৰিজ্ঝতি, তেহি চ পকারেহি ঞাপেতীতি অত্থো. সত্থু দেসনাঞাণঞ্হি ইধাধিপ্পেতং, তেনাহ ‘‘ইম’’ন্তি. তঞ্হি অত্তনি সিদ্ধেন দেসনাবলেন নযগ্গাহতো পচ্চক্খং ৰিয উপট্ঠিতং গহেত্ৰা ‘‘ইম’’ন্তি ৰুত্তং. যদগ্গেন ৰা সত্থু দেসনাঞাণং সাৰকেহি নযতো গয্হতি, তদগ্গেন অত্তনো ৰিসযে পটিৰেধঞাণম্পি নযতো গয্হতেৰ. তেনাহ আযস্মা ধম্মসেনাপতি – ‘‘অপিচ মে, ভন্তে, ধম্মন্ৰযো ৰিদিতো’’তি (দী. নি. ২.১৪৬; ৩.১৪৩). পস্সাতি ৰিম্হযপ্পত্তো অনিযমতো আলপতি অত্তনোযেৰ ৰা চিত্তং, যথাহ ভগৰা উদানেন্তো – ‘‘লোকমিমং পস্স; পুথূ অৰিজ্জায পরেতং ভূতং ভূতরতং ভৰা অপরিমুত্ত’’ন্তি (উদা. ৩০). তথাগতানন্তি তথা আগমনাদিঅত্থেন তথাগতানং. তথা আগতোতি হি তথাগতো, তথা গতোতি তথাগতো, তথলক্খণং আগতোতি তথাগতো, তথধম্মে যাথাৰতো অভিসম্বুদ্ধোতি তথাগতো, তথদস্সিতায তথাগতো, তথৰাদিতায তথাগতো, তথাকারিতায তথাগতো, অভিভৰনট্ঠেন তথাগতোতি এৰং অট্ঠহি কারণেহি ভগৰা তথাগতো. তথায আগতোতি তথাগতো, তথায গতোতি তথাগতো, তথলক্খণং গতোতি তথাগতো, তথানি আগতোতি তথাগতো, তথাৰিধোতি তথাগতো, তথা পৰত্তিতোতি তথাগতো, তথেহি আগতোতি তথাগতো, তথা গতভাৰেন তথাগতোতি এৰম্পি অট্ঠহি কারণেহি ভগৰা তথাগতোতি অযমেত্থ সঙ্খেপো. ৰিত্থারো পন পরমত্থদীপনিযা উদানট্ঠকথায (উদা. অট্ঠ. ১৮) ইতিৰুত্তকট্ঠকথায (ইতিৰু. অট্ঠ. ৩৮) চ ৰুত্তনযেনেৰ ৰেদিতব্বো.

ইদানি তস্সা পঞ্ঞায অসাধারণৰিসেসং দস্সেতুং ‘‘অগ্গি যথা’’তিআদি ৰুত্তং. যথা অগ্গীতি উপমাৰচনং. যথাতি তস্স উপমাভাৰদস্সনং. পজ্জলিতোতি উপমেয্যেন সম্বন্ধদস্সনং. নিসীথেতি কিচ্চকরণকালদস্সনং. অযঞ্হেত্থ অত্থো – যথা নাম নিসীথে রত্তিযং চতুরঙ্গসমন্নাগতে অন্ধকারে ৰত্তমানে উন্নতে ঠানে পজ্জলিতো অগ্গি তস্মিং পদেসে তযগতং ৰিধমন্তং তিট্ঠতি, এৰমেৰ তথাগতানং ইমং দেসনাঞাণসঙ্খাতং সব্বসো ৰেনেয্যানং সংসযতমং ৰিধমন্তং পঞ্ঞং পস্সাতি. যতো দেসনাৰিলাসেন সত্তানং ঞাণমযং আলোকং দেন্তীতি আলোকদা. পঞ্ঞামযমেৰ চক্খুং দদন্তীতি চক্খুদদা. তদুভযম্পি কঙ্খাৰিনযপদট্ঠানমেৰ কত্ৰা দস্সেন্তো ‘‘যে আগতানং ৰিনযন্তি কঙ্খ’’ন্তি আহ, যে তথাগতা অত্তনো সন্তিকং আগতানং উপগতানং ৰেনেয্যানং ‘‘অহোসিং নু খো অহমতীতমদ্ধান’’ন্তিআদিনযপ্পৰত্তং (ম. নি. ১.১৮; সং. নি. ২.২০) সোল়সৰত্থুকং, ‘‘বুদ্ধে কঙ্খতি ধম্মে কঙ্খতী’’তিআদিনযপ্পৰত্তং (ধ. স. ১০০৮) অট্ঠৰত্থুকঞ্চ কঙ্খং ৰিচিকিচ্ছং ৰিনযন্তি দেসনানুভাৰেন অনৰসেসতো ৰিধমন্তি ৰিদ্ধংসেন্তি. ৰিনযকুক্কুচ্চসঙ্খাতা পন কঙ্খা তব্বিনযেনেৰ ৰিনীতা হোন্তীতি.

অপরো নযো – যথা অগ্গি নিসীথে রত্তিভাগে পজ্জলিতো পটুতরজালো সমুজ্জলং উচ্চাসনে ঠিতানং ওভাসদানমত্তেন অন্ধকারং ৰিধমিত্ৰা সমৰিসমং ৰিভাৰেন্তো আলোকদদো হোতি. অচ্চাসন্নে পন ঠিতানং তং সুপাকটং করোন্তো চক্খুকিচ্চকরণতো চক্খুদদো নাম হোতি, এৰমেৰ তথাগতো অত্তনো ধম্মকাযস্স দূরে ঠিতানং অকতাধিকারানং পঞ্ঞাপজ্জোতেন মোহন্ধকারং ৰিধমিত্ৰা কাযৰিসমাদিসমৰিসমং ৰিভাৰেন্তো আলোকদা ভৰন্তি, আসন্নে ঠিতানং পন কতাধিকারানং ধম্মচক্খুং উপ্পাদেন্তো চক্খুদদা ভৰন্তি. যে এৰংভূতা অত্তনো ৰচীগোচরং আগতানং মাদিসানম্পি কঙ্খাবহুলানং কঙ্খং ৰিনযন্তি অরিযমগ্গসমুপ্পাদনেন ৰিধমন্তি, তেসং তথাগতানং পঞ্ঞং ঞাণাতিসযং পস্সাতি যোজনা. এৰমযং থেরস্স অত্তনো কঙ্খাৰিতরণপ্পকাসনেন অঞ্ঞাব্যাকরণগাথাপি হোতি. অযঞ্হি থেরো পুথুজ্জনকালে কপ্পিযেপি কুক্কুচ্চকো হুত্ৰা কঙ্খাবহুলতায ‘‘কঙ্খারেৰতো’’তি পঞ্ঞাতো, পচ্ছা খীণাসৰকালেপি তথেৰ ৰোহরযিত্থ. তেনাহ – ‘‘ইত্থং সুদং আযস্মা কঙ্খারেৰতো গাথং অভাসিত্থা’’তি. তং ৰুত্তত্থমেৰ.

কঙ্খারেৰতত্থেরগাথাৰণ্ণনা নিট্ঠিতা.

৪. পুণ্ণত্থেরগাথাৰণ্ণনা

সব্ভিরেৰ সমাসেথাতি আযস্মতো পুণ্ণত্থেরস্স গাথা. কা উপ্পত্তি? অযং কির পদুমুত্তরস্স দসবলস্স উপ্পত্তিতো পুরেতরমেৰ হংসৰতীনগরে ব্রাহ্মণমহাসালকুলে নিব্বত্তো অনুক্কমেন ৰিঞ্ঞুতং পত্তো সত্থরি লোকে উপ্পজ্জন্তে একদিৰসং বুদ্ধানং ধম্মদেসনাকালে হেট্ঠা ৰুত্তনযেন মহাজনেন সদ্ধিং ৰিহারং গন্ত্ৰা পরিসপরিযন্তে নিসীদিত্ৰা ধম্মং সুণন্তো সত্থারং একং ভিক্খুং ধম্মকথিকানং অগ্গট্ঠানে ঠপেন্তং দিস্ৰা ‘‘মযাপি অনাগতে এৰরূপেন ভৰিতুং ৰট্টতী’’তি চিন্তেত্ৰা দেসনাৰসানে ৰুট্ঠিতায পরিসায সত্থারং উপসঙ্কমিত্ৰা নিমন্তেত্ৰা হেট্ঠা ৰুত্তনযেনেৰ মহাসক্কারং কত্ৰা ভগৰন্তং এৰমাহ – ‘‘ভন্তে, অহং ইমিনা অধিকারকম্মেন নাঞ্ঞং সম্পত্তিং পত্থেমি. যথা পন সো ভিক্খু ইতো সত্তমদিৰসমত্থকে ধম্মকথিকানং অগ্গট্ঠানে ঠপিতো, এৰং অহম্পি অনাগতে একস্স বুদ্ধস্স সাসনে ধম্মকথিকানং ভিক্খূনং অগ্গো ভৰেয্য’’ন্তি পত্থনং অকাসি. সত্থা অনাগতং ওলোকেত্ৰা তস্স পত্থনায সমিজ্ঝনভাৰং দিস্ৰা ‘‘অনাগতে কপ্পসতসহস্সমত্থকে গোতমো নাম বুদ্ধো উপ্পজ্জিস্সতি, তস্স সাসনে ত্ৰং পব্বজিত্ৰা ধম্মকথিকানং অগ্গো ভৰিস্সসী’’তি ব্যাকাসি.

সো তত্থ যাৰজীৰং কল্যাণধম্মং কত্ৰা ততো চুতো কপ্পসতসহস্সং পুঞ্ঞঞাণসম্ভারং সম্ভরন্তো দেৰমনুস্সেসু সংসরিত্ৰা অম্হাকং ভগৰতো কালে কপিলৰত্থুনগরস্স অৰিদূরে দোণৰত্থুনামকে ব্রাহ্মণগামে ব্রাহ্মণমহাসালকুলে অঞ্ঞাসিকোণ্ডঞ্ঞত্থেরস্স ভাগিনেয্যো হুত্ৰা নিব্বত্তি. তস্স নামগ্গহণদিৰসে ‘‘পুণ্ণো’’তি নামং অকংসু. সো সত্থরি অভিসম্বোধিং পত্ৰা পৰত্তৰরধম্মচক্কে অনুপুব্বেন রাজগহং গন্ত্ৰা তং উপনিস্সায ৰিহরন্তে অঞ্ঞাসিকোণ্ডঞ্ঞত্থেরস্স সন্তিকে পব্বজিত্ৰা লদ্ধূপসম্পদো সব্বং পুব্বকিচ্চং কত্ৰা পধানমনুযুঞ্জন্তো পব্বজিতকিচ্চং মত্থকং পাপেত্ৰাৰ ‘‘দসবলস্স সন্তিকং গমিস্সামী’’তি মাতুলত্থেরেন সদ্ধিং সত্থু সন্তিকং অগন্ত্ৰা কপিলৰত্থুসামন্তাযেৰ ওহীযিত্ৰা যোনিসোমনসিকারে কম্মং করোন্তো নচিরস্সেৰ ৰিপস্সনং উস্সুক্কাপেত্ৰা অরহত্তং পাপুণি. ৰুত্তম্পি চেতং অপদানে (অপ. থের ১.১.৪৩৪-৪৪০) –

‘‘অজ্ঝাযকো মন্তধরো, তিণ্ণং ৰেদান পারগূ;

পুরক্খতোম্হি সিস্সেহি, উপগচ্ছিং নরুত্তমং.

‘‘পদুমুত্তরো লোকৰিদূ, আহুতীনং পটিগ্গহো;

মম কম্মং পকিত্তেসি, সংখিত্তেন মহামুনি.

‘‘তাহং ধম্মং সুণিত্ৰান, অভিৰাদেত্ৰান সত্থুনো;

অঞ্জলিং পগ্গহেত্ৰান, পক্কমিং দক্খিণামুখো.

‘‘সংখিত্তেন সুণিত্ৰান, ৰিত্থারেন অভাসযিং;

সব্বে সিস্সা অত্তমনা, সুত্ৰান মম ভাসতো.

‘‘সকং দিট্ঠিং ৰিনোদেত্ৰা, বুদ্ধে চিত্তং পসাদযুং;

সংখিত্তেনপি দেসেমি, ৰিত্থারেন তথেৰহং.

‘‘অভিধম্মনযঞ্ঞূহং, কথাৰত্থুৰিসুদ্ধিযা;

সব্বেসং ৰিঞ্ঞাপেত্ৰান, ৰিহরামি অনাসৰো.

‘‘ইতো পঞ্চসতে কপ্পে, চতুরো সুপ্পকাসকা;

সত্তরতনসম্পন্না, চতুদীপম্হি ইস্সরা.

‘‘পটিসম্ভিদা চতস্সো…পে… কতং বুদ্ধস্স সাসন’’ন্তি.

তস্স পন পুণ্ণত্থেরস্স সন্তিকে পব্বজিতা কুলপুত্তা পঞ্চসতা অহেসুং. থেরো সযং দসকথাৰত্থুলাভিতায তেপি দসহি কথাৰত্থূহি ওৰদি. তে তস্স ওৰাদে ঠত্ৰা সব্বেৰ অরহত্তং পত্তা. তে অত্তনো পব্বজিতকিচ্চং মত্থকপ্পত্তং ঞত্ৰা উপজ্ঝাযং উপসঙ্কমিত্ৰা আহংসু – ‘‘ভন্তে, অম্হাকং কিচ্চং মত্থকপ্পত্তং, দসন্নঞ্চম্হ কথাৰত্থূনং লাভিনো, সমযো, দানি নো দসবলং পস্সিতু’’ন্তি. থেরো তেসং ৰচনং সুত্ৰা চিন্তেসি – ‘‘মম দসকথাৰত্থুলাভিতং সত্থা জানাতি অহং ধম্মং দেসেন্তো দস কথাৰত্থূনি অমুঞ্চিত্ৰাৰ দেসেমি, মযি গচ্ছন্তে সব্বেপিমে ভিক্খূ মং পরিৰারেত্ৰা গচ্ছিস্সন্তি, এৰং গণসঙ্গণিকায গন্ত্ৰা পন অযুত্তং ময্হং দসবলং পস্সিতুং, ইমে তাৰ গন্ত্ৰা পস্সন্তূ’’তি তে ভিক্খূ আহ – ‘‘আৰুসো, তুম্হে পুরতো গন্ত্ৰা তথাগতং পস্সথ, মম ৰচনেন চস্স পাদে ৰন্দথ, অহম্পি তুম্হাকং গতমগ্গেনাগমিস্সামী’’তি. তে থেরা সব্বেপি দসবলস্স জাতিভূমিরট্ঠৰাসিনো সব্বে খীণাসৰা সব্বে দসকথাৰত্থুলাভিনো অত্তনো উপজ্ঝাযস্স ওৰাদং সম্পটিচ্ছিত্ৰা থেরং ৰন্দিত্ৰা অনুপুব্বেন চারিকং চরন্তা সট্ঠিযোজনমগ্গং অতিক্কম্ম রাজগহে ৰেল়ুৰনমহাৰিহারং গন্ত্ৰা দসবলস্স পাদে ৰন্দিত্ৰা একমন্তং নিসীদিংসু.

আচিণ্ণং খো পনেতং বুদ্ধানং ভগৰন্তানং আগন্তুকেহি ভিক্খূহি সদ্ধিং পটিসম্মোদিতুন্তি ভগৰা তেহি সদ্ধিং – ‘‘কচ্চি, ভিক্খৰে, খমনীয’’ন্তিআদিনা নযেন মধুরপটিসন্থারং কত্ৰা ‘‘কুতো চ তুম্হে, ভিক্খৰে, আগচ্ছথা’’তি পুচ্ছি. অথ তেহি ‘‘জাতিভূমিতো’’তি ৰুত্তে ‘‘কো নু খো, ভিক্খৰে, জাতিভূমিযং জাতিভূমকানং ভিক্খূনং সব্রহ্মচারীনং এৰং সম্ভাৰিতো ‘অত্তনা চ অপ্পিচ্ছো অপ্পিচ্ছকথঞ্চ ভিক্খূনং কত্তা’’’তি (ম. নি. ১.২৫২) দসকথাৰত্থুলাভিং ভিক্খুং পুচ্ছি. তেপি ‘‘পুণ্ণো নাম, ভন্তে, আযস্মা মন্তাণিপুত্তো’’তি আরোচযিংসু. তং কথং সুত্ৰা আযস্মা সারিপুত্তো থেরস্স দস্সনকামো অহোসি. অথ সত্থা রাজগহতো সাৰত্থিং অগমাসি. পুণ্ণত্থেরোপি দসবলস্স তত্থ আগতভাৰং সুত্ৰা – ‘‘সত্থারং পস্সিস্সামী’’তি গন্ত্ৰা অন্তোগন্ধকুটিযংযেৰ তথাগতং সম্পাপুণি. সত্থা তস্স ধম্মং দেসেসি. থেরো ধম্মং সুত্ৰা দসবলং ৰন্দিত্ৰা পটিসল্লানত্থায অন্ধৰনং গন্ত্ৰা অঞ্ঞতরম্হি রুক্খমূলে দিৰাৰিহারং নিসীদি.

সারিপুত্তত্থেরোপি তস্সাগমনং সুত্ৰা সীসানুলোকিকো গন্ত্ৰা ওকাসং সল্লক্খেত্ৰা তং রুক্খমূলে নিসিন্নং উপসঙ্কমিত্ৰা থেরেন সদ্ধিং সম্মোদিত্ৰা, তং সত্তৰিসুদ্ধিক্কমং পুচ্ছি. থেরোপিস্স পুচ্ছিতপুচ্ছিতং ব্যাকরোন্তো রথৰিনীতূপমায চিত্তং আরাধেসি, তে অঞ্ঞমঞ্ঞস্স সুভাসিতং সমনুমোদিংসু. অথ সত্থা অপরভাগে ভিক্খুসঙ্ঘমজ্ঝে নিসিন্নো থেরং ‘‘এতদগ্গং, ভিক্খৰে, মম সাৰকানং ভিক্খূনং ধম্মকথিকানং যদিদং পুণ্ণো’’তি (অ. নি. ১.১৮৮, ১৯৬) ধম্মকথিকানং অগ্গট্ঠানে ঠপেসি. সো একদিৰসং অত্তনো ৰিমুত্তিসম্পত্তিং পচ্চৰেক্খিত্ৰা ‘‘সত্থারং নিস্সায অহঞ্চেৰ অঞ্ঞে চ বহূ সত্তা সংসারদুক্খতো ৰিপ্পমুত্তা, বহূপকারা ৰত সপ্পুরিসসংসেৰা’’তি পীতিসোমনস্সজাতো উদানৰসেন পীতিৰেগৰিস্সট্ঠং ‘‘সব্ভিরেৰ সমাসেথা’’তি গাথং অভাসি.

৪. তত্থ সব্ভিরেৰাতি সপ্পুরিসেহি এৰ. সন্তোতি পনেত্থ বুদ্ধাদযো অরিযা অধিপ্পেতা. তে হি অনৰসেসতো অসতং ধম্মং পহায সদ্ধম্মে উক্কংসগতত্তা সাতিসযং পসংসিযত্তা চ ৰিসেসতো ‘‘সন্তো সপ্পুরিসা’’তি চ ৰুচ্চন্তি. সমাসেথাতি সমং আসেথ সহ ৰসেয্য. তে পযিরুপাসন্তো তেসং সুস্সূসন্তো দিট্ঠানুগতিঞ্চ আপজ্জন্তো সমানৰাসো ভৰেয্যাতি অত্থো. পণ্ডিতেহত্থদস্সিভীতি তেসং থোমনা. পণ্ডা ৰুচ্চতি পঞ্ঞা, সা ইমেসং সঞ্জাতাতি পণ্ডিতা. ততো এৰ অত্তত্থাদিভেদং অত্থং অৰিপরীততো পস্সন্তীতি অত্থদস্সিনো. তেহি পণ্ডিতেহি অত্থদস্সীভি সমাসেথ. কস্মাতি চে? যস্মা তে সন্তো পণ্ডিতা, তে ৰা সম্মা সেৰন্তা একন্তহিতভাৰতো মগ্গঞাণাদীহেৰ অরণীযতো অত্থং, মহাগুণতায সন্ততায চ মহন্তং, অগাধভাৰতো গম্ভীরঞাণগোচরতো চ গম্ভীরং, হীনচ্ছন্দাদীহি দট্ঠুং অসক্কুণেয্যত্তা ইতরেহি চ কিচ্ছেন দট্ঠব্বত্তা দুদ্দসং, দুদ্দসত্তা সণ্হনিপুণসভাৰত্তা নিপুণঞাণগোচরতো চ নিপুণং, নিপুণত্তা এৰং সুখুমসভাৰতায অণুং নিব্বানং, অৰিপরীতট্ঠেন ৰা পরমত্থসভাৰত্তা অত্থং, অরিযভাৰকরত্তা মহত্তনিমিত্ততায মহন্তং, অনুত্তানসভাৰতায গম্ভীরং, দুক্খেন দট্ঠব্বং ন সুখেন দট্ঠুং সক্কাতি দুদ্দসং, গম্ভীরত্তা দুদ্দসং, দুদ্দসত্তা গম্ভীরন্তি চতুসচ্চং, ৰিসেসতো নিপুণং অণুং, নিরোধসচ্চন্তি এৰমেতং চতুসচ্চং ধীরা সমধিগচ্ছন্তি ধিতিসম্পন্নতায ধীরা চতুসচ্চকম্মট্ঠানভাৰনং উস্সুক্কাপেত্ৰা সম্মদেৰ অধিগচ্ছন্তি. অপ্পমত্তাতি সব্বত্থ সতিঅৰিপ্পৰাসেন অপ্পমাদপটিপত্তিং পূরেন্তা. ৰিচক্খণাতি ৰিপস্সনাভাৰনায ছেকা কুসলা. তস্মা সব্ভিরেৰ সমাসেথাতি যোজনা. পণ্ডিতেহত্থদস্সিভীতি ৰা এতং নিস্সক্কৰচনং. যস্মা পণ্ডিতেহি অত্থদস্সীভি সমুদাযভূতেহি ধীরা অপ্পমত্তা ৰিচক্খণা মহন্তাদিৰিসেসৰন্তং অত্থং সমধিগচ্ছন্তি, তস্মা তাদিসেহি সব্ভিরেৰ সমাসেথাতি সম্বন্ধো. এৰমেসা থেরস্স পটিৰেধদীপনেন অঞ্ঞাব্যাকরণগাথাপি অহোসীতি.

পুণ্ণত্থেরগাথাৰণ্ণনা নিট্ঠিতা.

৫. দব্বত্থেরগাথাৰণ্ণনা

যো দুদ্দমিযোতি আযস্মতো দব্বত্থেরস্স গাথা. কা উপ্পত্তি? অযম্পি পদুমুত্তরবুদ্ধকালে হংসৰতীনগরে কুলগেহে নিব্বত্তিত্ৰা ৰযপ্পত্তো হেট্ঠা ৰুত্তনযেনেৰ ধম্মদেসনং সুণন্তো সত্থারং একং ভিক্খুং সেনাসনপঞ্ঞাপকানং অগ্গট্ঠানে ঠপেন্তং দিস্ৰা অধিকারকম্মং কত্ৰা তং ঠানন্তরং পত্থেত্ৰা সত্থারা ব্যাকতো যাৰজীৰং কুসলং কত্ৰা দেৰমনুস্সেসু সংসরিত্ৰা কস্সপদসবলস্স সাসনোসক্কনকালে পব্বজি. তদা তেন সদ্ধিং অপরে ছ জনাতি সত্ত ভিক্খূ একচিত্তা হুত্ৰা অঞ্ঞে সাসনে অগারৰং করোন্তে দিস্ৰা – ‘‘ইধ কিং করোম একমন্তে সমণধম্মং কত্ৰা দুক্খস্সন্তং করিস্সামা’’তি নিস্সেণিং বন্ধিত্ৰা উচ্চং পব্বতসিখরং আরুহিত্ৰা, ‘‘অত্তনো চিত্তবলং জানন্তা নিস্সেণিং নিপাতেন্তু, জীৰিতে সালযা ওতরন্তু, মা পচ্ছানুতপ্পিনো অহুৰত্থা’’তি ৰত্ৰা সব্বে একচিত্তা হুত্ৰা নিস্সেণিং পাতেত্ৰা – ‘‘অপ্পমত্তা হোথ, আৰুসো’’তি অঞ্ঞমঞ্ঞং ওৰদিত্ৰা চিত্তরুচিকেসু ঠানেসু নিসীদিত্ৰা সমণধম্মং কাতুং আরভিংসু.

তত্রেকো থেরো পঞ্চমে দিৰসে অরহত্তং পত্ৰা, ‘‘মম কিচ্চং নিপ্ফন্নং, অহং ইমস্মিং ঠানে কিং করিস্সামি’’তি ইদ্ধিযা উত্তরকুরুতো পিণ্ডপাতং আহরিত্ৰা, ‘‘আৰুসো, ইমং পিণ্ডপাতং পরিভুঞ্জথ, ভিক্খাচারকিচ্চং মমাযত্তং হোতু, তুম্হে অত্তনো কম্মং করোথা’’তি আহ. ‘‘কিং নু খো মযং, আৰুসো, নিস্সেণিং পাতেন্তা এৰং অৰোচুম্হ – ‘যো পঠমং ধম্মং সচ্ছিকরোতি, সো ভিক্খং আহরতু, তেনাভতং সেসা পরিভুঞ্জিত্ৰা সমণধম্মং করিস্সন্তী’’’তি. ‘‘নত্থি, আৰুসো’’তি. তুম্হে অত্তনো পুব্বহেতুনা লভিত্থ, মযম্পি সক্কোন্তা ৰট্টস্সন্তং করিস্সাম, গচ্ছথ তুম্হেতি. থেরো তে সঞ্ঞাপেতুং অসক্কোন্তো ফাসুকট্ঠানে পিণ্ডপাতং পরিভুঞ্জিত্ৰা গতো. অপরো থেরো সত্তমে দিৰসে অনাগামিফলং পত্ৰা ততো চুতো সুদ্ধাৰাসব্রহ্মলোকে নিব্বত্তো. ইতরে থেরা ততো চুতা একং বুদ্ধন্তরং দেৰমনুস্সেসু সংসরিত্ৰা তেসু তেসু কুলেসু নিব্বত্তা. একো গন্ধাররট্ঠে তক্কসিলানগরে রাজগেহে নিব্বত্তো, একো মজ্ঝন্তিকরট্ঠে পরিব্বাজিকায কুচ্ছিম্হি নিব্বত্তো, একো বাহিযরট্ঠে কুটুম্বিযগেহে নিব্বত্তো, একো ভিক্খুনুপস্সযে জাতো.

অযং পন দব্বত্থেরো মল্লরট্ঠে অনুপিযনগরে একস্স মল্লরঞ্ঞো গেহে পটিসন্ধিং গণ্হি. তস্স মাতা উপৰিজঞ্ঞা কালমকাসি, মতসরীরং সুসানং নেত্ৰা দারুচিতকং আরোপেত্ৰা অগ্গিং অদংসু. তস্সা অগ্গিৰেগসন্তত্তং উদরপটলং দ্ৰেধা অহোসি. দারকো অত্তনো পুঞ্ঞবলেন উপ্পতিত্ৰা একস্মিং দব্বত্থম্ভে নিপতি. তং দারকং গহেত্ৰা অয্যিকায অদংসু. সা তস্স নামং গণ্হন্তী দব্বত্থম্ভে পতিত্ৰা লদ্ধজীৰিতত্তা ‘‘দব্বো’’তিস্স নামং অকাসি. তস্স চ সত্তৰস্সিককালে সত্থা ভিক্খুসঙ্ঘপরিৰারো মল্লরট্ঠে চারিকং চরমানো অনুপিযম্বৰনে ৰিহরতি. দব্বকুমারো সত্থারং দিস্ৰা দস্সনেনেৰ পসীদিত্ৰা পব্বজিতুকামো হুত্ৰা ‘‘অহং দসবলস্স সন্তিকে পব্বজিস্সামী’’তি অয্যিকং আপুচ্ছি. সা ‘‘সাধু, তাতা’’তি দব্বকুমারং আদায সত্থু সন্তিকং গন্ত্ৰা, ‘‘ভন্তে, ইমং কুমারং পব্বাজেথা’’তি আহ. সত্থা অঞ্ঞতরস্স ভিক্খুনো সঞ্ঞং অদাসি – ‘‘ভিক্খু ইমং দারকং পব্বাজেহী’’তি. সো থেরো সত্থু ৰচনং সুত্ৰা দব্বকুমারং পব্বাজেন্তো তচপঞ্চককম্মট্ঠানং আচিক্খি. পুব্বহেতুসম্পন্নো কতাভিনীহারো সত্তো পঠমকেসৰট্টিযা ৰোরোপনক্খণে সোতাপত্তিফলে পতিট্ঠহি, দুতিযায কেসৰট্টিযা ওরোপিযমানায সকদাগামিফলে, ততিযায অনাগামিফলে, সব্বকেসানং পন ওরোপনঞ্চ অরহত্তফলসচ্ছিকিরিযা চ অপচ্ছা অপুরে অহোসি. সত্থা মল্লরট্ঠে যথাভিরন্তং ৰিহরিত্ৰা রাজগহং গন্ত্ৰা ৰেল়ুৰনে ৰাসং কপ্পেসি.

তত্রাযস্মা দব্বো মল্লপুত্তো রহোগতো অত্তনো কিচ্চনিপ্ফত্তিং ওলোকেত্ৰা সঙ্ঘস্স ৰেয্যাৰচ্চকরণে কাযং যোজেতুকামো চিন্তেসি – ‘‘যংনূনাহং সঙ্ঘস্স সেনাসনঞ্চ পঞ্ঞাপেয্যং ভত্তানি চ উদ্দিসেয্য’’ন্তি. সো সত্থু সন্তিকং গন্ত্ৰা অত্তনো পরিৰিতক্কং আরোচেসি. সত্থা তস্স সাধুকারং দত্ৰা সেনাসনপঞ্ঞাপকত্তঞ্চ ভত্তুদ্দেসকত্তঞ্চ সম্পটিচ্ছি. অথ নং ‘‘অযং দব্বো দহরোৰ সমানো মহন্তে ঠানে ঠিতো’’তি সত্তৰস্সিককালেযেৰ উপসম্পাদেসি. থেরো উপসম্পন্নকালতো পট্ঠায রাজগহং উপনিস্সায ৰিহরন্তানং সব্বভিক্খূনং সেনাসনানি চ পঞ্ঞাপেতি, ভিক্খঞ্চ উদ্দিসতি. তস্স সেনাসনপঞ্ঞাপকভাৰো সব্বদিসাসু পাকটো অহোসি – ‘‘দব্বো কির মল্লপুত্তো সভাগসভাগানং ভিক্খূনং একট্ঠানে সেনাসনানি পঞ্ঞাপেতি, আসন্নেপি দূরেপি সেনাসনং পঞ্ঞাপেতি, গন্তুং অসক্কোন্তে ইদ্ধিযা নেতী’’তি.

অথ নং ভিক্খূ কালেপি ৰিকালেপি – ‘‘অম্হাকং, আৰুসো, জীৰকম্বৰনে সেনাসনং পঞ্ঞাপেহি, অম্হাকং মদ্দকুচ্ছিস্মিং মিগদাযে’’তি এৰং সেনাসনং উদ্দিসাপেত্ৰা তস্স ইদ্ধিং পস্সন্তা গচ্ছন্তি. সোপি ইদ্ধিযা মনোমযে কাযে অভিসঙ্খরিত্ৰা একেকস্স থেরস্স একেকং অত্তনা সদিসং ভিক্খুং দত্ৰা অঙ্গুলিযা জলমানায পুরতো গন্ত্ৰা ‘‘অযং মঞ্চো ইদং পীঠ’’ন্তিআদীনি ৰত্ৰা সেনাসনং পঞ্ঞাপেত্ৰা পুন অত্তনো ৰসনট্ঠানমেৰ আগচ্ছতি. অযমেত্থ সঙ্খেপো, ৰিত্থারতো পনিদং ৰত্থু পাল়িযং আগতমেৰ. সত্থা ইদমেৰ কারণং অট্ঠুপ্পত্তিং কত্ৰা অপরভাগে অরিযগণমজ্ঝে নিসিন্নো থেরং সেনাসনপঞ্ঞাপকানং অগ্গট্ঠানে ঠপেসি – ‘‘এতদগ্গং, ভিক্খৰে, মম সাৰকানং ভিক্খূনং সেনাসনপঞ্ঞাপকানং যদিদং দব্বো মল্লপুত্তো’’তি (অ. নি. ১.২০৯; ২১৪). ৰুত্তম্পি চেতং অপদানে (অপ. থের ২.৫৪, ১০৮-১৪৯) –

‘‘পদুমুত্তরো নাম জিনো, সব্বলোকৰিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

‘‘ওৰাদকো ৰিঞ্ঞাপকো, তারকো সব্বপাণিনং;

দেসনাকুসলো বুদ্ধো, তারেসি জনতং বহুং.

‘‘অনুকম্পকো কারুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

‘‘এৰং নিরাকুলং আসি, সুঞ্ঞতং তিত্থিযেহি চ;

ৰিচিত্তং অরহন্তেহি, ৰসীভূতেহি তাদিভি.

‘‘রতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৰরলক্খণো.

‘‘ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

‘‘তদাহং হংসৰতিযং, সেট্ঠিপুত্তো মহাযসো;

উপেত্ৰা লোকপজ্জোতং, অস্সোসিং ধম্মদেসনং.

‘‘সেনাসনানি ভিক্খূনং, পঞ্ঞাপেন্তং সসাৰকং;

কিত্তযন্তস্স ৰচনং, সুণিত্ৰা মুদিতো অহং.

‘‘অধিকারং সসঙ্ঘস্স, কত্ৰা তস্স মহেসিনো;

নিপচ্চ সিরসা পাদে, তং ঠানমভিপত্থযিং.

‘‘তদাহ স মহাৰীরো, মম কম্মং পকিত্তযং;

যো সসঙ্ঘমভোজেসি, সত্তাহং লোকনাযকং.

‘‘সোযং কমলপত্তক্খো, সীহংসো কনকত্তচো;

মম পাদমূলে নিপতি, পত্থযং ঠানমুত্তমং.

‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘সাৰকো তস্স বুদ্ধস্স, দব্বো নামেন ৰিস্সুতো;

সেনাসনপঞ্ঞাপকো, অগ্গো হেস্সতিযং তদা.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘সতানং তীণিক্খত্তুঞ্চ, দেৰরজ্জমকারযিং;

সতানং পঞ্চক্খত্তুঞ্চ, চক্কৰত্তী অহোসহং.

‘‘পদেসরজ্জং ৰিপুলং, গণনাতো অসঙ্খিযং;

সব্বত্থ সুখিতো আসিং, তস্স কম্মস্স ৰাহসা.

‘‘একনৰুতিতো কপ্পে, ৰিপস্সী নাম নাযকো;

উপ্পজ্জি চারুদস্সনো, সব্বধম্মৰিপস্সকো.

‘‘দুট্ঠচিত্তো উপৰদিং, সাৰকং তস্স তাদিনো;

সব্বাসৰপরিক্খীণং, সুদ্ধোতি চ ৰিজানিয.

‘‘তস্সেৰ নরৰীরস্স, সাৰকানং মহেসিনং;

সলাকঞ্চ গহেত্ৰান, খীরোদনমদাসহং.

‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

‘‘সাসনং জোতযিত্ৰান, অভিভুয্য কুতিত্থিযে;

ৰিনেয্যে ৰিনযিত্ৰাৰ, নিব্বুতো সো সসাৰকো.

‘‘সসিস্সে নিব্বুতে নাথে, অত্থমেন্তম্হি সাসনে;

দেৰা কন্দিংসু সংৰিগ্গা, মুত্তকেসা রুদম্মুখা.

‘‘নিব্বাযিস্সতি ধম্মক্খো, ন পস্সিসাম সুব্বতে;

ন সুণিস্সাম সদ্ধম্মং, অহো নো অপ্পপুঞ্ঞতা.

‘‘তদাযং পথৰী সব্বা, অচলা সা চলাচলা;

সাগরো চ সসোকোৰ, ৰিনদী করুণং গিরং.

‘‘চতুদ্দিসা দুন্দুভিযো, নাদযিংসু অমানুসা;

সমন্ততো অসনিযো, ফলিংসু চ ভযাৰহা.

‘‘উক্কা পতিংসু নভসা, ধূমকেতু চ দিস্সতি;

সধূমা জালৰট্টা চ, রৰিংসু করুণং মিগা.

‘‘উপ্পাদে দারুণে দিস্ৰা, সাসনত্থঙ্গসূচকে;

সংৰিগ্গা ভিক্খৰো সত্ত, চিন্তযিম্হ মযং তদা.

‘‘সাসনেন ৰিনাম্হাকং, জীৰিতেন অলং মযং;

পৰিসিত্ৰা মহারঞ্ঞং, যুঞ্জাম জিনসাসনে.

‘‘অদ্দসম্হ তদারঞ্ঞে, উব্বিদ্ধং সেলমুত্তমং;

নিস্সেণিযা তমারুয্হ, নিস্সেণিং পাতযিম্হসে.

‘‘তদা ওৰদি নো থেরো, বুদ্ধুপ্পাদো সুদুল্লভো;

সদ্ধাতিদুল্লভা লদ্ধা, থোকং সেসঞ্চ সাসনং.

‘‘নিপতন্তি খণাতীতা, অনন্তে দুক্খসাগরে;

তস্মা পযোগো কত্তব্বো, যাৰ ঠাতি মুনে মতং.

‘‘অরহা আসি সো থেরো, অনাগামী তদানুগো;

সুসীলা ইতরে যুত্তা, দেৰলোকং অগম্হসে.

‘‘নিব্বুতো তিণ্ণসংসারো, সুদ্ধাৰাসে চ এককো;

অহঞ্চ পক্কুসাতি চ, সভিযো বাহিযো তথা.

‘‘কুমারকস্সপো, চেৰ, তত্থ তত্থূপগা মযং;

সংসারবন্ধনা মুত্তা, গোতমেনানুকম্পিতা.

‘‘মল্লেসু কুসিনারাযং, গব্ভে জাতস্স মে সতো;

মাতা মতা চিতারুল়্হা, ততো নিপ্পতিতো অহং.

‘‘পতিতো দব্বপুঞ্জম্হি, ততো দব্বোতি ৰিস্সুতো;

ব্রহ্মচারীবলেনাহং, ৰিমুত্তো সত্তৰস্সিকো.

‘‘খীরোদনবলেনাহং, পঞ্চহঙ্গেহুপাগতো;

খীণাসৰোপৰাদেন, পাপেহি বহু চোদিতো.

‘‘উভো পুঞ্ঞঞ্চ পাপঞ্চ, ৰীতিৰত্তোম্হি দানিহং;

পত্ৰান পরমং সন্তিং, ৰিহরামি অনাসৰো.

‘‘সেনাসনং পঞ্ঞাপযিং, হাসযিত্ৰান সুব্বতে;

জিনো তস্মিং গুণে তুট্ঠো, এতদগ্গে ঠপেসি মং.

‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

‘‘স্ৰাগতং ৰত মে আসি, বুদ্ধসেট্ঠস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

‘‘পটিসম্ভিদা চতস্সো…পে…কতং বুদ্ধস্স সাসন’’ন্তি.

এৰংভূতং পন তং যেন পুব্বে একস্স খীণাসৰত্থেরস্স অনুদ্ধংসনৰসেন কতেন পাপকম্মেন বহূনি ৰস্সসতসহস্সানি নিরযে পচ্চি, তায এৰ কম্মপিলোতিকায চোদিযমানা মেত্তিযভূমজকা ভিক্খূ ‘‘ইমিনা মযং কল্যাণভত্তিকস্স গহপতিনো অন্তরে পরিভেদিতা’’তি দুগ্গহিতগাহিনো অমূলকেন পারাজিকেন ধম্মেন অনুদ্ধংসেসুং. তস্মিঞ্চ অধিকরণে সঙ্ঘেন সতিৰিনযেন ৰূপসমিতে অযং থেরো লোকানুকম্পায অত্তনো গুণে ৰিভাৰেন্তো ‘‘যো দুদ্দমিযো’’তি ইমং গাথং অভাসি.

৫. তত্থ যোতি অনিযমিতনিদ্দেসো, তস্স ‘‘সো’’তি ইমিনা নিযমত্তং দট্ঠব্বং. উভযেনপি অঞ্ঞং ৰিয কত্ৰা অত্তানমেৰ ৰদতি. দুদ্দমিযোতি দুদ্দমো, দমেতুং অসক্কুণেয্যো. ইদঞ্চ অত্তনো পুথুজ্জনকালে দিট্ঠিগতানং ৰিসূকাযিকানং কিলেসানং মদালেপচিত্তস্স ৰিপ্ফন্দিতং ইন্দ্রিযানং অৰূপসমনঞ্চ চিন্তেত্ৰা ৰদতি. দমেনাতি উত্তমেন অগ্গমগ্গদমেন, তেন হি দন্তো পুন দমেতব্বতাভাৰতো ‘‘দন্তো’’তি ৰত্তব্বতং অরহতি, ন অঞ্ঞেন. অথ ৰা দমেনাতি দমকেন পুরিসদম্মসারথিনা দমিতো. দব্বোতি দ্রব্যো, ভব্বোতি অত্থো. তেনাহ ভগৰা ইমমেৰ থেরং সন্ধায – ‘‘ন খো, দব্ব, দব্বা এৰং নিব্বেঠেন্তী’’তি (পারা. ৩৮৪; চূল়ৰ. ১৯৩). সন্তুসিতোতি যথালদ্ধপচ্চযসন্তোসেন ঝানসমাপত্তিসন্তোসেন মগ্গফলসন্তোসেন চ সন্তুট্ঠো. ৰিতিণ্ণকঙ্খোতি সোল়সৰত্থুকায অট্ঠৰত্থুকায চ কঙ্খায পঠমমগ্গেনেৰ সমুগ্ঘাটিতত্তা ৰিগতকঙ্খো. ৰিজিতাৰীতি পুরিসাজানীযেন ৰিজেতব্বস্স সব্বস্সপি সংকিলেসপক্খস্স ৰিজিতত্তা ৰিধমিতত্তা ৰিজিতাৰী. অপেতভেরৰোতি পঞ্চৰীসতিযা ভযানং সব্বসো অপেতত্তা অপগতভেরৰো অভযূপরতো. পুন দব্বোতি নামকিত্তনং. পরিনিব্বুতোতি দ্ৰে পরিনিব্বানানি কিলেসপরিনিব্বানঞ্চ, যা সউপাদিসেসনিব্বানধাতু, খন্ধপরিনিব্বানঞ্চ, যা অনুপাদিসেসনিব্বানধাতু. তেসু ইধ কিলেসপরিনিব্বানং অধিপ্পেতং, তস্মা পহাতব্বধম্মানং মগ্গেন সব্বসো পহীনত্তা কিলেসপরিনিব্বানেন পরিনিব্বুতোতি অত্থো. ঠিতত্তোতি ঠিতসভাৰো অচলো ইট্ঠাদীসু তাদিভাৰপ্পত্তিযা লোকধম্মেহি অকম্পনীযো. হীতি চ হেতুঅত্থে নিপাতো, তেন যো পুব্বে দুদ্দমো হুত্ৰা ঠিতো যস্মা দব্বত্তা সত্থারা উত্তমেন দমেন দমিতো সন্তুসিতো ৰিতিণ্ণকঙ্খো ৰিজিতাৰী অপেতভেরৰো, তস্মা সো দব্বো পরিনিব্বুতো ততোযেৰ চ ঠিতত্তো, এৰংভূতে চ তস্মিং চিত্তপসাদোৰ কাতব্বো, ন পসাদঞ্ঞথত্তন্তি পরনেয্যবুদ্ধিকে সত্তে অনুকম্পন্তো থেরো অঞ্ঞং ব্যাকাসি.

দব্বত্থেরগাথাৰণ্ণনা নিট্ঠিতা.

৬. সীতৰনিযত্থেরগাথাৰণ্ণনা

যো সীতৰনন্তি আযস্মতো সম্ভূতত্থেরস্স গাথা. কা উপ্পত্তি? ইতো কির অট্ঠারসাধিকস্স কপ্পসতস্স মত্থকে অত্থদস্সী নাম সম্বুদ্ধো লোকে উপ্পজ্জিত্ৰা সদেৰকং লোকং সংসারমহোঘতো তারেন্তো একদিৰসং মহতা ভিক্খুসঙ্ঘেন সদ্ধিং গঙ্গাতীরং উপগচ্ছি. তস্মিং কালে অযং গহপতিকুলে নিব্বত্তো তত্থ ভগৰন্তং পস্সিত্ৰা পসন্নমানসো উপসঙ্কমিত্ৰা ৰন্দিত্ৰা ‘‘কিং, ভন্তে, পারং গন্তুকামত্থা’’তি পুচ্ছি. ভগৰা ‘‘গমিস্সামা’’তি অৰোচ. সো তাৰদেৰ নাৰাসঙ্ঘাটং যোজেত্ৰা উপনেসি. সত্থা তং অনুকম্পন্তো সহ ভিক্খুসঙ্ঘেন নাৰং অভিরুহি. সো সযম্পি অভিরুয্হ সুখেনেৰ পরতীরং সম্পাপেত্ৰা ভগৰন্তং ভিক্খুসঙ্ঘঞ্চ দুতিযদিৰসে মহাদানং পৰত্তেত্ৰা অনুগন্ত্ৰা পসন্নচিত্তো ৰন্দিত্ৰা নিৰত্তি. সো তেন পুঞ্ঞকম্মেন দেৰমনুস্সেসু সংসরিত্ৰা ইতো তেরসাধিককপ্পসতস্স মত্থকে খত্তিযকুলে নিব্বত্তিত্ৰা রাজা অহোসি চক্কৰত্তী ধম্মিকো ধম্মরাজা. সো সত্তে সুগতিমগ্গে পতিট্ঠাপেত্ৰা ততো চুতো একনৰুতিকপ্পে ৰিপস্সিস্স ভগৰতো সাসনে পব্বজিত্ৰা ধুতধম্মে সমাদায সুসানে ৰসন্তো সমণধম্মং অকাসি. পুন কস্সপস্স ভগৰতো কালেপি তস্স সাসনে তীহি সহাযেহি সদ্ধিং পব্বজিত্ৰা ৰীসতিৰস্সসহস্সানি সমণধম্মং কত্ৰা একং বুদ্ধন্তরং দেৰমনুস্সেসু সংসরিত্ৰা ইমস্মিং বুদ্ধুপ্পাদে রাজগহে ব্রাহ্মণমহাসালস্স পুত্তো হুত্ৰা নিব্বত্তি. তস্স ‘‘সম্ভূতো’’তি নামং অকংসু. সো ৰযপ্পত্তো ব্রাহ্মণসিপ্পেসু নিপ্ফত্তিং গতো. ভূমিজো জেয্যসেনো অভিরাধনোতি তীহি সহাযেহি সদ্ধিং ভগৰতো সন্তিকং গতো ধম্মদেসনং সুত্ৰা পটিলদ্ধসদ্ধো পব্বজি. যে সন্ধায ৰুত্তং –

‘‘ভূমিজো জেয্যসেনো চ, সম্ভূতো অভিরাধনো;

এতে ধম্মং অভিঞ্ঞাসুং, সাসনে ৰরতাদিনো’’তি.

অথ সম্ভূতো ভগৰতো সন্তিকে কাযগতাসতিকম্মট্ঠানং গহেত্ৰা নিবদ্ধং সীতৰনে ৰসতি. তেনেৰাযস্মা ‘‘সীতৰনিযো’’তি পঞ্ঞাযিত্থ. তেন চ সমযেন ৰেস্সৰণো মহারাজা কেনচিদেৰ করণীযেন জম্বুদীপে দক্খিণদিসাভাগং উদ্দিস্স আকাসেন গচ্ছন্তো থেরং অব্ভোকাসে নিসীদিত্ৰা কম্মট্ঠানং মনসিকরোন্তং দিস্ৰা ৰিমানতো ওরুয্হ থেরং ৰন্দিত্ৰা, ‘‘যদা থেরো সমাধিতো ৰুট্ঠহিস্সতি, তদা মম আগমনং আরোচেথ, আরক্খঞ্চস্স করোথা’’তি দ্ৰে যক্খে আণাপেত্ৰা পক্কামি. তে থেরস্স সমীপে ঠত্ৰা মনসিকারং পটিসংহরিত্ৰা নিসিন্নকালে আরোচেসুং. তং সুত্ৰা থেরো ‘‘তুম্হে মম ৰচনেন ৰেস্সৰণমহারাজস্স কথেথ, ভগৰতা অত্তনো সাসনে ঠিতানং সতিআরক্খা নাম ঠপিতা অত্থি, সাযেৰ মাদিসে রক্খতি, ত্ৰং তত্থ অপ্পোস্সুক্কো হোহি, ভগৰতো ওৰাদে ঠিতানং এদিসায আরক্খায করণীযং নত্থী’’তি তে ৰিস্সজ্জেত্ৰা তাৰদেৰ ৰিপস্সনং ৰড্ঢেত্ৰা ৰিজ্জাত্তযং সচ্ছাকাসি. ততো ৰেস্সৰণো নিৰত্তমানো থেরস্স সমীপং পত্ৰা মুখাকারসল্লক্খণেনেৰস্স কতকিচ্চভাৰং ঞত্ৰা সাৰত্থিং গন্ত্ৰা ভগৰতো আরোচেত্ৰা সত্থু সম্মুখা থেরং অভিত্থৰন্তো –

‘‘সতিআরক্খসম্পন্নো, ধিতিমা ৰীরিযসমাহিতো;

অনুজাতো সত্থু সম্ভূতো, তেৰিজ্জো মচ্চুপারগূ’’তি. –

ইমায গাথায থেরস্স গুণে ৰণ্ণেসি. তেন ৰুত্তং অপদানে (অপ. থের ১.২১.১৫-২০) –

‘‘অত্থদস্সী তু ভগৰা, দ্ৰিপদিন্দো নরাসভো;

পুরক্খতো সাৰকেহি, গঙ্গাতীরমুপাগমি.

‘‘সমতিত্তি কাকপেয্যা, গঙ্গা আসি দুরুত্তরা;

উত্তারযিং ভিক্খুসঙ্ঘং, বুদ্ধঞ্চ দ্ৰিপদুত্তমং.

‘‘অট্ঠারসে কপ্পসতে, যং কম্মমকরিং তদা;

দুগ্গতিং নাভিজানামি, তরণায ইদং ফলং.

‘‘তেরসেতো কপ্পসতে, পঞ্চ সব্বোভৰা অহুং;

সত্তরতনসম্পন্না, চক্কৰত্তী মহব্বলা.

‘‘পচ্ছিমে চ ভৰে অস্মিং, জাতোহং ব্রাহ্মণে কুলে;

সদ্ধিং তীহি সহাযেহি, পব্বজিং সত্থু সাসনে.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অথাযস্মা সম্ভূতো ভগৰন্তং দস্সনায গচ্ছন্তে ভিক্খূ দিস্ৰা ‘‘আৰুসো, মম ৰচনেন ভগৰতো পাদে সিরসা ৰন্দথ, এৰঞ্চ ৰদেথা’’তি ৰত্ৰা ধম্মাধিকরণং অত্তনো সত্থু অৰিহেঠিতভাৰং পকাসেন্তো ‘‘যো সীতৰন’’ন্তি গাথমাহ. তে ভিক্খূ ভগৰন্তং উপসঙ্কমিত্ৰা ৰন্দিত্ৰা সম্ভূতত্থেরস্স সাসনং সম্পৰেদেন্তা, ‘‘আযস্মা, ভন্তে, সম্ভূতো ভগৰতো পাদে সিরসা ৰন্দতি, এৰঞ্চ ৰদতী’’তি ৰত্ৰা তং গাথং আরোচেসুং, তং সুত্ৰা ভগৰা ‘‘পণ্ডিতো, ভিক্খৰে, সম্ভূতো ভিক্খু পচ্চপাদি ধম্মস্সানুধম্মং, ন চ মং ধম্মাধিকরণং ৰিহেঠেতি. ৰেস্সৰণেন তস্সত্থো ময্হং আরোচিতা’’তি আহ.

৬. যং পন তে ভিক্খূ সম্ভূতত্থেরেন ৰুত্তং ‘‘যো সীতৰন’’ন্তি গাথং সত্থু নিৰেদেসুং. তত্থ সীতৰনন্তি এৰংনামকং রাজগহসমীপে মহন্তং ভেরৰসুসানৰনং. উপগাতি নিৰাসনৰসেন উপগচ্ছি. এতেন ভগৰতা অনুঞ্ঞাতং পব্বজিতানুরূপং নিৰাসনট্ঠানং দস্সেতি. ভিক্খূতি সংসারভযস্স ইক্খনতো ভিন্নকিলেসতায চ ভিক্খু. একোতি অদুতিযো, এতেন কাযৰিৰেকং দস্সেতি. সন্তুসিতোতি সন্তুট্ঠো. এতেন চতুপচ্চযসন্তোসলক্খণং অরিযৰংসং দস্সেতি. সমাহিতত্তোতি উপচারপ্পনাভেদেন সমাধিনা সমাহিতচিত্তো, এতেন চিত্তৰিৰেকভাৰনামুখেন ভাৰনারামং অরিযৰংসং দস্সেতি. ৰিজিতাৰীতি সাসনে সম্মাপটিপজ্জন্তেন ৰিজেতব্বং কিলেসগণং ৰিজিত্ৰা ঠিতো, এতেন উপধিৰিৰেকং দস্সেতি. ভযহেতূনং কিলেসানং অপগতত্তা অপেতলোমহংসো, এতেন সম্মাপটিপত্তিযা ফলং দস্সেতি. রক্খন্তি রক্খন্তো. কাযগতাসতিন্তি কাযারম্মণং সতিং, কাযগতাসতিকম্মট্ঠানং পরিব্রূহনৰসেন অৰিস্সজ্জেন্তো. ধিতিমাতি ধীরো, সমাহিতত্তং ৰিজিতাৰিভাৰতং ৰা উপাদায পটিপত্তিদস্সনমেতং. অযঞ্হেত্থ সঙ্খেপত্থো – সো ভিক্খু ৰিৰেকসুখানুপেক্খায একো সীতৰনং উপাগমি, উপাগতো চ লোলভাৰাভাৰতো সন্তুট্ঠো ধিতিমা কাযগতাসতিকম্মট্ঠানং ভাৰেন্তো তথাধিগতং ঝানং পাদকং কত্ৰা আরদ্ধৰিপস্সনং উস্সুক্কাপেত্ৰা অধিগতেন অগ্গমগ্গেন সমাহিতো ৰিজিতাৰী চ হুত্ৰা কতকিচ্চতায ভযহেতূনং সব্বসো অপগতত্তা অপেতলোমহংসো জাতোতি.

সীতৰনিযত্থেরগাথাৰণ্ণনা নিট্ঠিতা.

৭. ভল্লিযত্থেরগাথাৰণ্ণনা

যোপানুদীতি আযস্মতো ভল্লিযত্থেরস্স গাথা. কা উপ্পত্তি? অযং কির ইতো একতিংসে কপ্পে অনুপ্পন্নে বুদ্ধে সুমনস্স নাম পচ্চেকবুদ্ধস্স পসন্নচিত্তো ফলাফলং দত্ৰা সুগতীসু এৰ সংসরন্তো সিখিস্স সম্মাসম্বুদ্ধস্স কালে অরুণৰতীনগরে ব্রাহ্মণকুলে নিব্বত্তো ‘‘সিখিস্স ভগৰতো পঠমাভিসম্বুদ্ধস্স উজিত, ওজিতা নাম দ্ৰে সত্থৰাহপুত্তা পঠমাহারং অদংসূ’’তি সুত্ৰা অত্তনো সহাযকেন সদ্ধিং ভগৰন্তং উপসঙ্কমিত্ৰা ৰন্দিত্ৰা স্ৰাতনায নিমন্তেত্ৰা মহাদানং পৰত্তেত্ৰা পত্থনং অকংসু – ‘‘উভোপি মযং, ভন্তে, অনাগতে তুম্হাদিসস্স বুদ্ধস্স পঠমাহারদাযকা ভৰেয্যামা’’তি. তে তত্থ তত্থ ভৰে পুঞ্ঞকম্মং কত্ৰা দেৰমনুস্সেসু সংসরন্তা কস্সপস্স ভগৰতো কালে গোপালকসেট্ঠিস্স পুত্তা ভাতরো হুত্ৰা নিব্বত্তা. বহূনি ৰস্সানি ভিক্খুসঙ্ঘং খীরভোজনেন উপট্ঠহিংসু. অম্হাকং পন ভগৰতো কালে পোক্খরৰতীনগরে সত্থৰাহস্স পুত্তা ভাতরো হুত্ৰা নিব্বত্তা. তেসু জেট্ঠো তফুস্সো নাম, কনিট্ঠো ভল্লিযো নাম, তে পঞ্চমত্তানি সকটসতানি ভণ্ডস্স পূরেত্ৰা ৰাণিজ্জায গচ্ছন্তা ভগৰতি পঠমাভিসম্বুদ্ধে সত্তসত্তাহং ৰিমুত্তিসুখধম্মপচ্চৰেক্খণাহি ৰীতিনামেত্ৰা অট্ঠমে সত্তাহে রাজাযতনমূলে ৰিহরন্তে রাজাযতনস্স অৰিদূরে মহামগ্গেন অতিক্কমন্তি, তেসং তস্মিং সমযে সমেপি ভূমিভাগে অকদ্দমোদকে সকটানি নপ্পৰত্তিংসু, ‘‘কিং নু, খো, কারণ’’ন্তি চ চিন্তেন্তানং পোরাণসালোহিতা দেৰতা রুক্খৰিটপন্তরে অত্তানং দস্সেন্তী আহ – ‘‘মাদিসা, অযং ভগৰা অচিরাভিসম্বুদ্ধো সত্তসত্তাহং অনাহারো ৰিমুত্তিসুখাপটিসংৰেদী ইদানি রাজাযতনমূলে নিসিন্নো, তং আহারেন পটিমানেথ, যদস্স তুম্হাকং দীঘরত্তং হিতায সুখাযা’’তি. তং সুত্ৰা তে উল়ারং পীতিসোমনস্সং পটিসংৰেদেন্তা, ‘‘আহারসম্পাদনং পপঞ্চ’’ন্তি মঞ্ঞমানা মন্থঞ্চ মধুপিণ্ডিকঞ্চ ভগৰতো দত্ৰা দ্ৰেৰাচিকসরণং গন্ত্ৰা কেসধাতুযো লভিত্ৰা অগমংসু. তে হি পঠমং উপাসকা অহেসুং. অথ ভগৰতি বারাণসিং গন্ত্ৰা ধম্মচক্কং পৰত্তেত্ৰা অনুপুব্বেন রাজগহে ৰিহরন্তে তফুস্সভল্লিযা রাজগহং উপগতা ভগৰন্তং উপসঙ্কমিত্ৰা ৰন্দিত্ৰা একমন্তং নিসীদিংসু. তেসং ভগৰা ধম্মং দেসেসি. তেসু তফুস্সো সোতাপত্তিফলে পতিট্ঠায উপাসকোৰ অহোসি. ভল্লিযো পন পব্বজিত্ৰা ছল়ভিঞ্ঞো অহোসি. তেন ৰুত্তং অপদানে (অপ. থের ২.৪৮.৬৬-৭০) –

‘‘সুমনো নাম সম্বুদ্ধো, তক্করাযং ৰসী তদা;

ৰল্লিকারফলং গয্হ, সযম্ভুস্স অদাসহং.

‘‘একতিংসে ইতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অথেকদিৰসং মারো ভল্লিযত্থেরস্স ভিংসাপনত্থং ভযানকং রূপং দস্সেসি. সো অত্তনো সব্বভযাতিক্কমং পকাসেন্তো ‘‘যোপানুদী’’তি গাথমভাসি.

৭. তত্থ যোপানুদীতি যো অপানুদি খিপি পজহি ৰিদ্ধংসেসি. মচ্চুরাজস্সাতি মচ্চু নাম মরণং খন্ধানং ভেদো, সো এৰ চ সত্তানং অত্তনো ৰসে অনুৰত্তাপনতো ইস্সরট্ঠেন রাজাতি মচ্চুরাজা, তস্স. সেনন্তি জরারোগাদিং, সা হিস্স ৰসৰত্তনে অঙ্গভাৰতো সেনা নাম, তেন হেস মহতা নানাৰিধেন ৰিপুলেন ‘‘মহাসেনো’’তি ৰুচ্চতি. যথাহ – ‘‘ন হি নো সঙ্গরং তেন, মহাসেনেন মচ্চুনা’’তি (ম. নি. ১.২৭২; জা. ২.২২.১২১; নেত্তি. ১০৩). অথ ৰা গুণমারণট্ঠেন ‘‘মচ্চূ’’তি ইধ দেৰপুত্তমারো অধিপ্পেতো, তস্স চ সহাযভাৰূপগমনতো কামাদযো সেনা. তথা চাহ –

‘‘কামা তে পঠমা সেনা, দুতিযা অরতি ৰুচ্চতি;

ততিযা খুপ্পিপাসা তে, চতুত্থী তণ্হা পৰুচ্চতি.

‘‘পঞ্চমী থিনমিদ্ধং তে, ছট্ঠা ভীরূ পৰুচ্চতি;

সত্তমী ৰিচিকিচ্ছা তে, মানো মক্খো চ অট্ঠমী’’তি. (সু. নি. ৪৩৮-৪৩৯; মহানি. ২৮;চূল়নি. নন্দমাণৰপুচ্ছানিদ্দেস ৪৭);

নল়সেতুংৰ সুদুব্বলং মহোঘোতি সারৰিরহিততো নল়সেতুসদিসং অতিৰিয অবলভাৰতো সুট্ঠু দুব্বলং সংকিলেসসেনং নৰলোকুত্তরধম্মানং মহাবলৰভাৰতো মহোঘসদিসেন অগ্গমগ্গেন যো অপানুদি ৰিজিতাৰী অপেতভেরৰো দন্তো, সো পরিনিব্বুতো ঠিতত্তোতি যোজনা. তং সুত্ৰা মারো ‘‘জানাতি মং সমণো’’তি তত্থেৰন্তরধাযীতি.

ভল্লিযত্থেরগাথাৰণ্ণনা নিট্ঠিতা.

৮. ৰীরত্থেরগাথাৰণ্ণনা

যো দুদ্দমিযোতি আযস্মতো ৰীরত্থেরস্স গাথা. কা উপ্পত্তি? অযং কির ইতো একনৰুতে কপ্পে ৰিপস্সিস্স ভগৰতো ৰসনআৰাসং পটিজগ্গি. একদিৰসঞ্চ সিন্ধুৰারপুপ্ফসদিসানি নিগ্গুণ্ঠিপুপ্ফানি গহেত্ৰা ভগৰন্তং পূজেসি. সো তেন পুঞ্ঞকম্মেন দেৰমনুস্সেসু সংসরন্তো ইতো পঞ্চতিংসে কপ্পে খত্তিযকুলে নিব্বত্তিত্ৰা মহাপতাপো নাম রাজা অহোসি চক্কৰত্তী. সো ধম্মেন সমেন রজ্জং কারেন্তো সত্তে সগ্গমগ্গে পতিট্ঠাপেসি. পুন ইমস্মিং কপ্পে কস্সপস্স ভগৰতো কালে মহাৰিভৰো সেট্ঠি হুত্ৰা কপণদ্ধিকাদীনং দানং দেন্তো সঙ্ঘস্স খীরভত্তং অদাসি. এৰং তত্থ তত্থ দানমযং পুঞ্ঞসম্ভারং করোন্তো ইতরঞ্চ নিব্বানত্থং সম্ভরন্তো দেৰমনুস্সেসু সংসরিত্ৰা ইমস্মিং বুদ্ধুপ্পাদে সাৰত্থিনগরে রঞ্ঞো পসেনদিস্স অমচ্চকুলে নিব্বত্তি, ‘‘ৰীরো’’তিস্স নামং অকংসু. সো ৰযপ্পত্তো নামানুগতেহি পত্তবলজৰাদিগুণেহি সমন্নাগতো সঙ্গামসূরো হুত্ৰা মাতাপিতূহি নিবন্ধৰসেন কারিতে দারপরিগ্গহে একংযেৰ পুত্তং লভিত্ৰা পুব্বহেতুনা চোদিযমানো কামেসু সংসারে চ আদীনৰং দিস্ৰা সংৰেগজাতো পব্বজিত্ৰা ঘটেন্তো ৰাযমন্তো নচিরস্সেৰ ছল়ভিঞ্ঞো অহোসি. তেন ৰুত্তং অপদানে (অপ. থের ১.২১.২১-২৪) –

‘‘ৰিপস্সিস্স ভগৰতো, আসিমারামিকো অহং;

নিগ্গুণ্ঠিপুপ্ফং পগ্গয্হ, বুদ্ধস্স অভিরোপযিং.

‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘পঞ্চৰীসে ইতো কপ্পে, একো আসিং জনাধিপো;

মহাপতাপনামেন, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

এৰং পন অরহত্তং পত্ৰা ফলসমাপত্তিসুখেন ৰীতিনামেন্তং থেরং পুরাণদুতিযিকা উপ্পব্বাজেতুকামা অন্তরন্তরা নানানযেহি পলোভেতুং পরক্কমন্তী একদিৰসং দিৰাৰিহারট্ঠানং গন্ত্ৰা ইত্থিকুত্তাদীনি দস্সেতুং আরভি. অথাযস্মা ৰীরো ‘‘মং পলোভেতুকামা সিনেরুং মকসপক্খৰাতেন চালেতুকামা ৰিয যাৰ বালা ৰতাযং ইত্থী’’তি তস্সা কিরিযায নিরত্থকভাৰং দীপেন্তো ‘‘যো দুদ্দমিযো’’তি গাথং অভাসি.

৮. তত্থ যো দুদ্দমিযোতিআদীনং পদানং অত্থো হেট্ঠা ৰুত্তোযেৰ. ইদং পনেত্থ যোজনামত্তং যো পুব্বে অদন্ত কিলেসতায পচ্চত্থিকেহি ৰা সঙ্গমসীসে দমেতুং জেতুং অসক্কুণেয্যতাযদুদ্দমিযো, ইদানি পন উত্তমেন দমেন দন্তো চতুব্বিধসম্মপ্পমধানৰীরিযসম্পত্তিযা ৰীরো, ৰুত্তনযেনেৰ সন্তুসিতো ৰিতিণ্ণকঙ্খো ৰিজিতাৰী অপেতলোমহংসো ৰীরো ৰীরনামকো অনৰসেসতো কিলেসপরিনিব্বানেন পরিনিব্বুতো, ততো এৰ ঠিতসভাৰো, ন তাদিসানং সতেনপি সহস্সেনপি চালনীযোতি. তং সুত্ৰা সা ইত্থী – ‘‘ময্হং সামিকে এৰং পটিপন্নে কো ময্হং ঘরাৰাসেন অত্থো’’তি সংৰেগজাতা ভিক্খুনীসু পব্বজিত্ৰা নচিরস্সেৰ তেৰিজ্জা অহোসীতি.

ৰীরত্থেরগাথাৰণ্ণনা নিট্ঠিতা.

৯. পিলিন্দৰচ্ছত্থেরগাথাৰণ্ণনা

স্ৰাগতন্তি আযস্মতো পিলিন্দৰচ্ছত্থেরস্স গাথা. কা উপ্পত্তি? অযং কির পদুমুত্তরবুদ্ধকালে হংসৰতীনগরে মহাভোগকুলে নিব্বত্তো হেট্ঠা ৰুত্তনযেনেৰ সত্থু সন্তিকে ধম্মং সুণন্তো সত্থারং একং ভিক্খুং দেৰতানং পিযমনাপভাৰেন অগ্গট্ঠানে ঠপেন্তং দিস্ৰা তং ঠানন্তরং পত্থেত্ৰা যাৰজীৰং কুসলং কত্ৰা ততো চুতো দেৰমনুস্সেসু সংসরন্তো সুমেধস্স ভগৰতো কালে মনুস্সলোকে নিব্বত্তিত্ৰা ভগৰতি পরিনিব্বুতে সত্থু থূপস্স পূজং কত্ৰা সঙ্ঘে চ মহাদানং পৰত্তেত্ৰা ততো চুতো দেৰমনুস্সেসু এৰ সংসরন্তো অনুপ্পন্নে বুদ্ধে চক্কৰত্তী রাজা হুত্ৰা মহাজনং পঞ্চসু সীলেসু পতিট্ঠাপেত্ৰা সগ্গপরাযণং অকাসি. সো অনুপ্পন্নেযেৰ অম্হাকং ভগৰতি সাৰত্থিযং ব্রাহ্মণগেহে নিব্বত্তি. ‘‘পিলিন্দো’’তিস্স নামং অকংসু. ৰচ্ছোতি পন গোত্তং. তেন সো অপরভাগে ‘‘পিলিন্দৰচ্ছো’’তি পঞ্ঞাযিত্থ. সংসারে পন সংৰেগবহুলতায পরিব্বাজকপব্বজ্জং পব্বজিত্ৰা চূল়গন্ধারং নাম ৰিজ্জং সাধেত্ৰা তায ৰিজ্জায আকাসচারী পরচিত্তৰিদূ চ হুত্ৰা রাজগহে লাভগ্গযসগ্গপ্পত্তো পটিৰসতি.

অথ যদা অম্হাকং ভগৰা অভিসম্বুদ্ধো হুত্ৰা অনুক্কমেন রাজগহং উপগতো, ততো পট্ঠায বুদ্ধানুভাৰেন তস্স সা ৰিজ্জা ন সম্পজ্জতি, অত্তনো কিচ্চং ন সাধেতি. সো চিন্তেসি – ‘‘সুতং খো পন মেতং আচরিযপাচরিযানং ভাসমানানং ‘যত্থ মহাগন্ধারৰিজ্জা ধরতি, তত্থ চূল়গন্ধারৰিজ্জা ন সম্পজ্জতী’তি, সমণস্স পন গোতমস্স আগতকালতো পট্ঠায নাযং মম ৰিজ্জা সম্পজ্জতি, নিস্সংসযং সমণো গোতমো মহাগন্ধারৰিজ্জং জানাতি, যংনূনাহং তং পযিরুপাসিত্ৰা তস্স সন্তিকে তং ৰিজ্জং পরিযাপুণেয্য’’ন্তি. সো ভগৰন্তং উপসঙ্কমিত্ৰা এতদৰোচ – ‘‘অহং, মহাসমণ, তৰ সন্তিকে একং ৰিজ্জং পরিযাপুণিতুকামো, ওকাসং মে করোহী’’তি. ভগৰা ‘‘তেন হি পব্বজা’’তি আহ. সো ‘‘ৰিজ্জায পরিকম্মং পব্বজ্জা’’তি মঞ্ঞমানো পব্বজি. তস্স ভগৰা ধম্মং কথেত্ৰা চরিতানুকূলং কম্মট্ঠানং অদাসি. সো উপনিস্সযসম্পন্নতায নচিরস্সেৰ ৰিপস্সনং ৰড্ঢেত্ৰা অরহত্তং পাপুণি. যা পন পুরিমজাতিযং তস্সোৰাদে ঠত্ৰা সগ্গে নিব্বত্তা দেৰতা, তং কতঞ্ঞুতং নিস্সায সঞ্জাতবহুমানা সাযং পাতং থেরং পযিরুপাসিত্ৰা গচ্ছন্তি. তস্মা থেরো দেৰতানং পিযমনাপতায অগ্গতং পত্তো. তেন ৰুত্তং অপদানে (অপ. থের ১.২.৫৫-৬৭) –

‘‘নিব্বুতে লোকনাথম্হি, সুমেধে অগ্গপুগ্গলে;

পসন্নচিত্তো সুমনো, থূপপূজং অকাসহং.

‘‘যে চ খীণাসৰা তত্থ, ছল়ভিঞ্ঞা মহিদ্ধিকা;

তেহং তত্থ সমানেত্ৰা, সঙ্ঘভত্তং অকাসহং.

‘‘সুমেধস্স ভগৰতো, উপট্ঠাকো তদা অহু;

সুমেধো নাম নামেন, অনুমোদিত্থ সো তদা.

‘‘তেন চিত্তপ্পসাদেন, ৰিমানং উপপজ্জহং;

ছল়াসীতিসহস্সানি, অচ্ছরাযো রমিংসু মে.

‘‘মমেৰ অনুৰত্তন্তি, সব্বকামেহি তা সদা;

অঞ্ঞে দেৰে অভিভোমি, পুঞ্ঞকম্মস্সিদং ফলং.

‘‘পঞ্চৰীসম্হি কপ্পম্হি, ৰরুণো নাম খত্তিযো;

ৰিসুদ্ধভোজনো আসিং, চক্কৰত্তী অহং তদা.

‘‘ন তে বীজং পৰপ্পন্তি, নপি নীযন্তি নঙ্গলা;

অকট্ঠপাকিমং সালিং, পরিভুঞ্জন্তি মানুসা.

‘‘তত্থ রজ্জং করিত্ৰান, দেৰত্তং পুন গচ্ছহং;

তদাপি এদিসা ময্হং, নিব্বত্তা ভোগসম্পদা.

‘‘ন মং মিত্তা অমিত্তা ৰা, হিংসন্তি সব্বপাণিনো;

সব্বেসম্পি পিযো হোমি, পুঞ্ঞকম্মস্সিদং ফলং.

‘‘তিংসকপ্পসহস্সম্হি, যং দানমদদিং তদা;

দুগ্গতিং নাভিজানামি, গন্ধালেপস্সিদং ফলং.

‘‘ইমস্মিং ভদ্দকে কপ্পে, একো আসিং জনাধিপো;

মহানুভাৰো রাজাহং, চক্কৰত্তী মহব্বলো.

‘‘সোহং পঞ্চসু সীলেসু, ঠপেত্ৰা জনতং বহুং;

পাপেত্ৰা সুগতিংযেৰ, দেৰতানং পিযো অহুং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

তথা দেৰতাহি অতিৰিয পিযাযিতব্বভাৰতো ইমং থেরং ভগৰা দেৰতানং পিযমনাপভাৰেন অগ্গট্ঠানে ঠপেসি – ‘‘এতদগ্গং, ভিক্খৰে, মম সাৰকানং ভিক্খূনং দেৰতানং পিযমনাপানং যদিদং পিলিন্দৰচ্ছো’’তি (অ. নি. ১.২০৯, ২১৫) সো একদিৰসং ভিক্খুসঙ্ঘমজ্ঝে নিসিন্নো অত্তনো গুণে পচ্চৰেক্খিত্ৰা তেসং কারণভূতং ৰিজ্জানিমিত্তং ভগৰতো সন্তিকে আগমনং পসংসন্তো ‘‘স্ৰাগতং নাপগত’’ন্তি গাথং অভাসি.

৯. তত্থ স্ৰাগতন্তি সুন্দরং আগমনং, ইদং মমাতি সম্বন্ধো. অথ ৰা স্ৰাগতন্তি সুট্ঠু আগতং, মযাতি ৰিভত্তি ৰিপরিণামেতব্বা. নাপগতন্তি ন অপগতং হিতাভিৰুদ্ধিতো ন অপেতং. নযিদং দুমন্তিতং মমাতি ইদং মম দুট্ঠু কথিতং, দুট্ঠু ৰা ৰীমংসিতং ন হোতি. ইদং ৰুত্তং হোতি – যং ভগৰতো সন্তিকে মমাগমনং, যং ৰা মযা তত্থ আগতং, তং স্ৰাগতং, স্ৰাগতত্তাযেৰ ন দুরাগতং. যং ‘‘ভগৰতো সন্তিকে ধম্মং সুত্ৰা পব্বজিস্সামী’’তি মম মন্তিতং গদিতং কথিতং, চিত্তেন ৰা ৰীমংসিতং ইদম্পি ন দুম্মন্তিন্তি. ইদানি তত্থ কারণং দস্সেন্তো ‘‘সংৰিভত্তেসূ’’তিআদিমাহ. সংৰিভত্তেসূতি পকারতো ৰিভত্তেসু. ধম্মেসূতি ঞেয্যধম্মেসু সমথধম্মেসু ৰা, নানাতিত্থিযেহি পকতিআদিৰসেন, সম্মাসম্বুদ্ধেহি দুক্খাদিৰসেন সংৰিভজিত্ৰা ৰুত্তধম্মেসু. যং সেট্ঠং তদুপাগমিন্তি যং তত্থ সেট্ঠং, তং চতুসচ্চধম্মং, তস্স ৰা বোধকং সাসনধম্মং উপাগমিং, ‘‘অযং ধম্মো অযং ৰিনযো’’তি উপগচ্ছিং. সম্মাসম্বুদ্ধেহি এৰ ৰা কুসলাদিৰসেন খন্ধাদিৰসেন যথাসভাৰতো সংৰিভত্তেসু সভাৰধম্মেসু যং তত্থ সেট্ঠং উত্তমং পৰরং, তং মগ্গফলনিব্বানধম্মং উপাগমিং, অত্তপচ্চক্খতো উপগচ্ছিং সচ্ছাকাসিং, তস্মা স্ৰাগতং মম ন অপগতং সুমন্তিতং ন দুম্মন্তিতন্তি যোজনা.

পিলিন্দৰচ্ছত্থেরগাথাৰণ্ণনা নিট্ঠিতা.

১০. পুণ্ণমাসত্থেরগাথাৰণ্ণনা

ৰিহরি অপেক্খন্তি আযস্মতো পুণ্ণমাসত্থেরস্স গাথা. কা উপ্পত্তি? সো কির ৰিপস্সিস্স ভগৰতো কালে চক্কৰাকযোনিযং নিব্বত্তো ভগৰন্তং গচ্ছন্তং দিস্ৰা পসন্নমানসো অত্তনো মুখতুণ্ডকেন সালপুপ্ফং গহেত্ৰা পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইতো সত্তরসে কপ্পে অট্ঠক্খত্তুং চক্কৰত্তী রাজা অহোসি. ইমস্মিং পন কপ্পে কস্সপস্স ভগৰতো সাসনে ওসক্কমানে কুটুম্বিযকুলে নিব্বত্তিত্ৰা পব্বজিত্ৰা সমণধম্মং কত্ৰা ততো চুতো দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিনগরে সমিদ্ধিস্স নাম ব্রাহ্মণস্স পুত্তো হুত্ৰা নিব্বত্তি. তস্স জাতদিৰসে তস্মিং গেহে সব্বা রিত্তকুম্ভিযো সুৰণ্ণমাসানং পুণ্ণা অহেসুং. তেনস্স পুণ্ণমাসোতি নামং অকংসু. সো ৰযপ্পত্তো ব্রাহ্মণৰিজ্জাসু নিপ্ফত্তিং পত্ৰা ৰিৰাহকম্মং কত্ৰা একং পুত্তং লভিত্ৰা উপনিস্সযসম্পন্নতায ঘরাৰাসং জিগুচ্ছন্তো ভগৰন্তং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা লদ্ধূপসম্পদো পুব্বকিচ্চসম্পন্নো চতুসচ্চকম্মট্ঠানে যুত্তপ্পযুত্তো ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ১.৭.১৩-১৯) –

‘‘সিন্ধুযা নদিযা তীরে, চক্কৰাকো অহং তদা;

সুদ্ধসেৰালভক্খোহং, পাপেসু চ সুসঞ্ঞতো.

‘‘অদ্দসং ৰিরজং বুদ্ধং, গচ্ছন্তং অনিলঞ্জসে;

তুণ্ডেন সালং পগ্গয্হ, ৰিপস্সিস্সাভিরোপযিং.

‘‘যস্স সদ্ধা তথাগতে, অচলা সুপ্পতিট্ঠিতা;

তেন চিত্তপ্পসাদেন, দুগ্গতিং সো ন গচ্ছতি.

‘‘স্ৰাগতং ৰত মে আসি, বুদ্ধসেট্ঠস্স সন্তিকে;

ৰিহঙ্গমেন সন্তেন, সুবীজং রোপিতং মযা.

‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘সুচারুদস্সনা নাম, অট্ঠেতে একনামকা;

কপ্পে সত্তরসে আসুং, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অথস্স পুরাণদুতিযিকা তং পলোভেতুকামা অলঙ্কতপটিযত্তা পুত্তেন সদ্ধিং উপগন্ত্ৰা পিযালাপভাৰাদিকেহি ভাৰৰিৰরণকম্মং নাম কাতুং আরভি. থেরো তস্সা কারণং দিস্ৰা অত্তনো কত্থচিপি অলগ্গভাৰং পকাসেন্তো ‘‘ৰিহরি অপেক্খ’’ন্তি গাথং অভাসি.

১০. তত্থ ৰিহরীতি ৰিসেসতো হরি অপহরি অপনেসি. অপেক্খন্তি তণ্হং. ইধাতি ইমস্মিং লোকে অত্তভাৰে ৰা. হুরন্তি অপরস্মিং অনাগতে অত্তভাৰে ৰা. ইধাতি ৰা অজ্ঝত্তিকেসু আযতনেসু. হুরন্তি বাহিরেসু. ৰা-সদ্দো সমুচ্চযত্থো ‘‘অপদা ৰা দ্ৰিপদা ৰা’’তিআদীসু (ইতিৰু. ৯০; অ. নি. ৪.৩৪; ৫.৩২) ৰিয. যোতি অত্তানমেৰ পরং ৰিয দস্সেতি. ৰেদগূতি ৰেদেন গতো মগ্গঞাণেন নিব্বানং গতো অধিগতো, চত্তারি ৰা সচ্চানি পরিঞ্ঞাপহানসচ্ছিকিরিযাভাৰনাভিসমযৰসেন অভিসমেচ্চ ঠিতো. যতত্তোতি মগ্গসংৰরেন সংযতসভাৰো, সম্মাৰাযামেন ৰা সংযতসভাৰো. সব্বেসু ধম্মেসু অনূপলিত্তোতি সব্বেসু আরম্মণেসু ধম্মেসু তণ্হাদিট্ঠিলেপৰসেন ন উপলিত্তো, তেন লাভাদিলোকধম্মে সমতিক্কমং দস্সেতি. লোকস্সাতি উপাদানক্খন্ধপঞ্চকস্স. তঞ্হি লুজ্জনপলুজ্জনট্ঠেন লোকো. জঞ্ঞাতি জানিত্ৰা. উদযব্বযঞ্চাতি উপ্পাদঞ্চেৰ ৰযঞ্চ, এতেন যথাৰুত্তগুণানং পুব্বভাগপটিপদং দস্সেতি. অযং পনেত্থ অত্থো – যো সকলস্স খন্ধাদিলোকস্স সমপঞ্ঞাসায আকারেহি উদযব্বযং জানিত্ৰা ৰেদগূ যতত্তো কত্থচি অনুপলিত্তো, সো সব্বত্থ অপেক্খং ৰিনেয্য সন্তুসিতো তাদিসানং ৰিপ্পকারানং ন কিঞ্চি মঞ্ঞতি, তস্মা ত্ৰং অন্ধবালে যথাগতমগ্গেনেৰ গচ্ছাতি. অথ সা ইত্থী ‘‘অযং সমণো মযি পুত্তে চ নিরপেক্খো, ন সক্কা ইমং পলোভেতু’’ন্তি পক্কামি.

পুণ্ণমাসত্থেরগাথাৰণ্ণনা নিট্ঠিতা.

পরমত্থদীপনিযা থেরগাথাসংৰণ্ণনায

পঠমৰগ্গৰণ্ণনা নিট্ঠিতা.

২. দুতিযৰগ্গো

১. চূল়ৰচ্ছত্থেরগাথাৰণ্ণনা

পামোজ্জবহুলোতি আযস্মতো চূল়ৰচ্ছত্থেরস্স গাথা. কা উপ্পত্তি? সো কির পদুমুত্তরস্স ভগৰতো কালে দলিদ্দকুলে নিব্বত্তিত্ৰা পরেসং ভতিযা জীৰিকং কপ্পেন্তো ভগৰতো সাৰকং সুজাতং নাম থেরং পংসুকূলং পরিযেসন্তং দিস্ৰা পসন্নমানসো উপসঙ্কমিত্ৰা ৰত্থং দত্ৰা পঞ্চপতিট্ঠিতেন ৰন্দি. সো তেন পুঞ্ঞকম্মেন তেত্তিংসক্খত্তুং দেৰরজ্জং কারেসি. সত্তসত্ততিক্খত্তুং চক্কৰত্তী রাজা অহোসি. অনেকৰারং পদেসরাজা. এৰং দেৰমনুস্সেসু সংসরন্তো কস্সপস্স ভগৰতো সাসনে ওসক্কমানে পব্বজিত্ৰা সমণধম্মং কত্ৰা একং বুদ্ধন্তরং দেৰমনুস্সগতীসু অপরাপরং পরিৰত্তন্তো অম্হাকং ভগৰতো কালে কোসম্বিযং ব্রাহ্মণকুলে নিব্বত্তি. চূল়ৰচ্ছোতিস্স নামং অহোসি. সো ৰযপ্পত্তো ব্রাহ্মণসিপ্পেসু নিপ্ফত্তিং গতো বুদ্ধগুণে সুত্ৰা পসন্নমানসো ভগৰন্তং উপসঙ্কমি, তস্স ভগৰা ধম্মং কথেসি. সো পটিলদ্ধসদ্ধো পব্বজিত্ৰা লদ্ধূপসম্পদো কতপুব্বকিচ্চো চরিতানুকূলং কম্মট্ঠানং গহেত্ৰা ভাৰেন্তো ৰিহরি. তেন চ সমযেন কোসম্বিকা ভিক্খূ ভণ্ডনজাতা অহেসুং. তদা চূল়ৰচ্ছত্থেরো উভযেসং ভিক্খূনং লদ্ধিং অনাদায ভগৰতা দিন্নোৰাদে ঠত্ৰা ৰিপস্সনং ব্রূহেত্ৰা অরহত্তং পাপুণি. তেন ৰুত্তং অপদানে (অপ. থের ২.৫০.৩১-৪০) –

‘‘পদুমুত্তরভগৰতো, সুজাতো নাম সাৰকো;

পংসুকূলং গৰেসন্তো, সঙ্কারে চরতী তদা.

‘‘নগরে হংসৰতিযা, পরেসং ভতকো অহং;

উপড্ঢুদুস্সং দত্ৰান, সিরসা অভিৰাদযিং.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘তেত্তিংসক্খত্তুং দেৰিন্দো, দেৰরজ্জমকারযিং;

সত্তসত্ততিক্খত্তুঞ্চ, চক্কৰত্তী অহোসহং.

‘‘পদেসরজ্জং ৰিপুলং, গণনাতো অসঙ্খিযং;

উপড্ঢদুস্সদানেন, মোদামি অকুতোভযো.

‘‘ইচ্ছমানো চহং অজ্জ, সকাননং সপব্বতং;

খোমদুস্সেহি ছাদেয্যং, অড্ঢুদুস্সস্সিদং ফলং.

‘‘সতসহস্সিতো কপ্পে, যং দানমদদিং তদা;

দুগ্গতিং নাভিজানামি, অড্ঢুদুস্সস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অথ চূল়ৰচ্ছত্থেরো অরহত্তং পত্ৰা তেসং ভিক্খূনং কলহাভিরতিযা সকত্থৰিনাসং দিস্ৰা ধম্মসংৰেগপ্পত্তো, অত্তনো চ পত্তৰিসেসং পচ্চৰেক্খিত্ৰা পীতিসোমনস্সৰসেন ‘‘পামোজ্জবহুলো’’তি গাথং অভাসি.

১১. তত্থ পামোজ্জবহুলোতি সুপরিসুদ্ধসীলতায ৰিপ্পটিসারাভাৰতো অধিকুসলেসু ধম্মেসু অভিরতিৰসেন পমোদবহুলো. তেনেৰাহ ‘‘ধম্মে বুদ্ধপ্পৰেদিতে’’তি. তত্থ ধম্মেতি. সত্ততিংসায বোধিপক্খিযধম্মে নৰৰিধে ৰা লোকুত্তরধম্মে. সো হি সব্বঞ্ঞুবুদ্ধেন সামুক্কংসিকায দেসনায পকাসিতত্তা সাতিসযং বুদ্ধপ্পৰেদিতো নাম. তস্স পন অধিগমূপাযভাৰতো দেসনাধম্মোপি ইধ লব্ভতেৰ. পদং সন্তন্তি নিব্বানং সন্ধায ৰদতি. এৰরূপো হি ভিক্খু সন্তং পদং সন্তং কোট্ঠাসং সব্বসঙ্খারানং উপসমভাৰতো সঙ্খারূপসমং পরমসুখতায সুখং নিব্বানং অধিগচ্ছতি ৰিন্দতিযেৰ. পরিসুদ্ধসীলো হি ভিক্খু ৰিপ্পটিসারাভাৰেন পামোজ্জবহুলো সদ্ধম্মে যুত্তপ্পযুত্তো ৰিমুত্তিপরিযোসানা সব্বসম্পত্তিযো পাপুণাতি. যথাহ – ‘‘অৰিপ্পটিসারত্থানি খো, আনন্দ, কুসলানি সীলানি, অৰিপ্পটিসারো পামোজ্জত্থাযা’’তিআদি (অ. নি. ১০.১). অথ ৰা পামোজ্জবহুলোতি সম্মাসম্বুদ্ধো ভগৰা, স্ৰাক্খাতো ধম্মো, সুপ্পটিপন্নো সঙ্ঘোতি রতনত্তযং সন্ধায পমোদবহুলো. তত্থ পন সো পমোদবহুলো কিং ৰা করোতীতি আহ ‘‘ধম্মে বুদ্ধপ্পৰেদিতে’’তিআদি. সদ্ধাসম্পন্নস্স হি সপ্পুরিসসংসেৰনসদ্ধম্মস্সৰনযোনিসোমনসিকারধম্মানুধম্মপটিপত্তীনং সুখেনেৰ সম্ভৰতো সম্পত্তিযো হত্থগতা এৰ হোন্তি, যথাহ – ‘‘সদ্ধাজাতো উপসঙ্কমতি, উপসঙ্কমন্তো পযিরুপাসতী’’তিআদি (ম. নি. ২.১৮৩).

চূল়ৰচ্ছত্থেরগাথাৰণ্ণনা নিট্ঠিতা.

২. মহাৰচ্ছত্থেরগাথাৰণ্ণনা

পঞ্ঞাবলীতি আযস্মতো মহাৰচ্ছত্থেরস্স গাথা. কা উপ্পত্তি? অযং কির পদুমুত্তরস্স ভগৰতো ভিক্খুসঙ্ঘস্স চ পানীযদানমদাসি. পুন সিখিস্স ভগৰতো কালে উপাসকো হুত্ৰা ৰিৰট্টূপনিস্সযং বহুং পুঞ্ঞকম্মং অকাসি, সো তেহি পুঞ্ঞকম্মেহি তত্থ তত্থ সুগতীসুযেৰ সংসরন্তো ইমস্মিং বুদ্ধুপ্পাদে মগধরট্ঠে নাল়কগামে সমিদ্ধিস্স নাম ব্রাহ্মণস্স পুত্তো হুত্ৰা নিব্বত্তি. তস্স মহাৰচ্ছোতি নামং অহোসি. সো ৰযপ্পত্তো আযস্মতো সারিপুত্তস্স ভগৰতো সাৰকভাৰং সুত্ৰা ‘‘সোপি নাম মহাপঞ্ঞো. যস্স সাৰকত্তং উপাগতো, সো এৰ মঞ্ঞে ইমস্মিং লোকে অগ্গপুগ্গলো’’তি ভগৰতি সদ্ধং উপ্পাদেত্ৰা সত্থু সন্তিকে পব্বজিত্ৰা কম্মট্ঠানং অনুযুঞ্জন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৫০.৫১-৫৬) –

‘‘পদুমুত্তরবুদ্ধস্স, ভিক্খুসঙ্ঘে অনুত্তরে;

পসন্নচিত্তো সুমনো, পানীযঘটমপূরযিং.

‘‘পব্বতগ্গে দুমগ্গে ৰা, আকাসে ৰাথ ভূমিযং;

যদা পানীযমিচ্ছামি, খিপ্পং নিব্বত্ততে মম.

‘‘সতসহস্সিতো কপ্পে, যং দানমদদিং তদা;

দুগ্গতিং নাভিজানামি, দকদানস্সিদং ফলং.

‘‘কিলেসা ঝাপিতা ময্হং…পে… ভৰা সব্বে সমূহতা;

ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি.

এৰং পন অরহত্তং পত্ৰা ৰিমুত্তিসুখং অনুভৰন্তো সাসনস্স নিয্যানিকভাৰৰিভাৰনেন সব্রহ্মচারীনং উস্সাহজননত্থং ‘‘পঞ্ঞাবলী’’তি গাথং অভাসি.

১২. তত্থ পঞ্ঞাবলীতি পারিহারিযপঞ্ঞায ৰিপস্সনাপঞ্ঞায চ ৰসেন অভিণ্হসো সাতিসযেন পঞ্ঞাবলেন সমন্নাগতো. সীলৰতূপপন্নোতি উক্কংসগতেন চতুপারিসুদ্ধিসীলেন, ধুতধম্মসঙ্খাতেহি ৰতেহি চ উপপন্নো সমন্নাগতো. সমাহিতোতি উপচারপ্পনাভেদেন সমাধিনা সমাহিতো. ঝানরতোতি ততো এৰ আরম্মণূপনিজ্ঝানে লক্খণূপনিজ্ঝানে চ রতো সততাভিযুত্তো. সব্বকালং সতিযা অৰিপ্পৰাসৰসেন সতিমা. যদত্থিযন্তি অত্থতো অনপেতং অত্থিযং, যেন অত্থিযং যদত্থিযং. যথা পচ্চযে পরিভুঞ্জন্তস্স পরিভুঞ্জনং অত্থিযং হোতি, তথা ভোজনং ভুঞ্জমানো. সামিপরিভোগেন হি তং অত্থিযং হোতি দাযজ্জপরিভোগেন ৰা, ন অঞ্ঞথা ভোজনন্তি চ নিদস্সনমত্তং দট্ঠব্বং. ভুঞ্জিযতি পরিভুঞ্জিযতীতি ৰা ভোজনং, চত্তারো পচ্চযা. ‘‘যদত্থিক’’ন্তি ৰা পাঠো. যদত্থং যস্সত্থায সত্থারা পচ্চযা অনুঞ্ঞাতা, তদত্থং কাযস্স ঠিতিআদিঅত্থং, তঞ্চ অনুপাদিসেসনিব্বানত্থং. তস্মা অনুপাদাপরিনিব্বানত্থং ভোজনপচ্চযে ভুঞ্জমানো ততো এৰ কঙ্খেথ কালং অত্তনো অনুপাদাপরিনিব্বানকালং আগমেয্য. ইধ ইমস্মিং সাসনে ৰীতরাগো. বাহিরকস্স পন কামেসু ৰীতরাগস্স ইদং নত্থীতি অধিপ্পাযো.

মহাৰচ্ছত্থেরগাথাৰণ্ণনা নিট্ঠিতা.

৩. ৰনৰচ্ছত্থেরগাথাৰণ্ণনা

নীলব্ভৰণ্ণাতি আযস্মতো ৰনৰচ্ছত্থেরস্স গাথা. কা উপ্পত্তি? সো কির অত্থদস্সিনো ভগৰতো কালে কচ্ছপযোনিযং নিব্বত্তো ৰিনতায নাম নদিযা ৰসতি. তস্স খুদ্দকনাৰপ্পমাণো অত্তভাৰো অহোসি. সো কির একদিৰসং ভগৰন্তং নদিযা তীরে ঠিতং দিস্ৰা, ‘‘পারং গন্তুকামো মঞ্ঞে ভগৰা’’তি অত্তনো পিট্ঠিযং আরোপেত্ৰা নেতুকামো পাদমূলে নিপজ্জি. ভগৰা তস্স অজ্ঝাসযং ঞত্ৰা তং অনুকম্পন্তো আরুহি. সো পীতিসোমনস্সজাতো সোতং ছিন্দন্তো জিযায ৰেগেন খিত্তসরো ৰিয তাৰদেৰ পরতীরং পাপেসি. ভগৰা তস্স পুঞ্ঞস্স ফলং এতরহি নিব্বত্তনকসম্পত্তিঞ্চ ব্যাকরিত্ৰা পক্কামি. সো তেন পুঞ্ঞকম্মেন দেৰমনুস্সেসু সংসরন্তো অনেকসতক্খত্তুং তাপসপব্বজ্জং পব্বজিত্ৰা অরঞ্ঞৰাসীযেৰ অহোসি. পুন কস্সপবুদ্ধকালে কপোতযোনিযং নিব্বত্তিত্ৰা অরঞ্ঞে ৰিহরন্তং মেত্তাৰিহারিং একং ভিক্খুং দিস্ৰা চিত্তং পসাদেসি.

ততো পন চুতো বারাণসিযং কুলগেহে নিব্বত্তিত্ৰা ৰযপ্পত্তো সংৰেগজাতো পব্বজিত্ৰা ৰিৰট্টূপনিস্সযং বহুং পুঞ্ঞকম্মং উপচিনি. এৰং তত্থ তত্থ দেৰমনুস্সেসু সংসরিত্ৰা ইমস্মিং বুদ্ধুপ্পাদে কপিলৰত্থুনগরে ৰচ্ছগোত্তস্স নাম ব্রাহ্মণস্স গেহে পটিসন্ধিং গণ্হি. তস্স মাতা পরিপক্কগব্ভা অরঞ্ঞং দস্সনত্থায সঞ্জাতদোহল়া অরঞ্ঞং পৰিসিত্ৰা ৰিচরতি, তাৰদেৰস্সা কম্মজৰাতা চলিংসু, তিরোকরণিং পরিক্খিপিত্ৰা অদংসু. সা ধঞ্ঞপুঞ্ঞলক্খণং পুত্তং ৰিজাযি. সো বোধিসত্তেন সহ পংসুকীল়িকসহাযো অহোসি. ‘‘ৰচ্ছো’’তিস্স নামঞ্চ অহোসি. ৰনাভিরতিযা ৰসেন ৰনৰচ্ছোতি পঞ্ঞাযিত্থ. অপরভাগে মহাসত্তে মহাভিনিক্খমনং নিক্খমিত্ৰা মহাপধানং পদহন্তে, ‘‘অহম্পি সিদ্ধত্থকুমারেন সহ অরঞ্ঞে ৰিহরিস্সামী’’তি নিক্খমিত্ৰা তাপসপব্বজ্জং পব্বজিত্ৰা হিমৰন্তে ৰসন্তো অভিসম্বুদ্ধভাৰং সুত্ৰা ভগৰতো সন্তিকং উপগন্ত্ৰা পব্বজিত্ৰা কম্মট্ঠানং গহেত্ৰা অরঞ্ঞে ৰসমানো নচিরস্সেৰ ৰিপস্সনং উস্সুক্কাপেত্ৰা অরহত্তং সচ্ছাকাসি. তেন ৰুত্তং অপদানে (অপ. থের ২.৪৯-১৪৮-১৬৩) –

‘‘অত্থদস্সী তু ভগৰা, সযম্ভূ লোকনাযকো;

ৰিনতানদিযা তীরং, উপগচ্ছি তথাগতো.

‘‘উদকা অভিনিক্খম্ম, কচ্ছপো ৰারিগোচরো;

বুদ্ধং তারেতুকামোহং, উপেসিং লোকনাযকং.

‘‘অভিরূহতু মং বুদ্ধো, অত্থদস্সী মহামুনি;

অহং তং তারযিস্সামি, দুক্খস্সন্তকরো তুৰং.

‘‘মম সঙ্কপ্পমঞ্ঞায, অত্থদস্সী মহাযসো;

অভিরূহিত্ৰা মে পিট্ঠিং, অট্ঠাসি লোকনাযকো.

‘‘যতো সরামি অত্তানং, যতো পত্তোস্মি ৰিঞ্ঞুতং;

সুখং মে তাদিসং নত্থি, ফুট্ঠে পাদতলে যথা.

‘‘উত্তরিত্ৰান সম্বুদ্ধো, অত্থদস্সী মহাযসো;

নদিতীরম্হি ঠত্ৰান, ইমা গাথা অভাসথ.

‘‘যাৰতা ৰত্ততে চিত্তং, গঙ্গাসোতং তরামহং;

অযঞ্চ কচ্ছপো রাজা, তারেসি মম পঞ্ঞৰা.

‘‘ইমিনা বুদ্ধতরণেন, মেত্তচিত্তৰতায চ;

অট্ঠারসে কপ্পসতে, দেৰলোকে রমিস্সতি.

‘‘দেৰলোকা ইধাগন্ত্ৰা, সুক্কমূলেন চোদিতো;

একাসনে নিসীদিত্ৰা, কঙ্খাসোতং তরিস্সতি.

‘‘যথাপি ভদ্দকে খেত্তে, বীজং অপ্পম্পি রোপিতং;

সম্মাধারে পৰেচ্ছন্তে, ফলং তোসেতি কস্সকং.

‘‘তথেৰিদং বুদ্ধখেত্তং, সম্মাসম্বুদ্ধদেসিতং;

সম্মাধারে পৰেচ্ছন্তে, ফলং মং তোসযিস্সতি.

‘‘পধানপহিতত্তোম্হি, উপসন্তো নিরূপধি;

সব্বাসৰে পরিঞ্ঞায, ৰিহরামি অনাসৰো.

‘‘অট্ঠারসে কপ্পসতে, যং কম্মমকরিং তদা;

দুগ্গতিং নাভিজানামি, তরণায ইদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

এৰং পন অরহত্তং পত্ৰা ভগৰতি কপিলৰত্থুস্মিং ৰিহরন্তে তত্থ গন্ত্ৰা সত্থারং ৰন্দিত্ৰা ভিক্খূহি সমাগতো পটিসন্থারৰসেন ‘‘কিং, আৰুসো, অরঞ্ঞে ফাসুৰিহারো লদ্ধো’’তি পুট্ঠো ‘‘রমণীযা, আৰুসো, অরঞ্ঞে পব্বতা’’তি অত্তনা ৰুট্ঠপব্বতে ৰণ্ণেন্তো ‘‘নীলব্ভৰণ্ণা’’তি গাথং অভাসি.

১৩. তত্থ নীলব্ভৰণ্ণাতি নীলৰলাহকনিভা নীলৰলাহকসণ্ঠানা চ. রুচিরাতি রুচিযা সকিরণা পভস্সরা চ. সীতৰারীতি সীতলসলিলা. সুচিন্ধরাতি সুচিসুদ্ধভূমিভাগতায সুদ্ধচিত্তানং ৰা অরিযানং নিৰাসনট্ঠানতায সুচিন্ধরা. গাথাসুখত্থঞ্হি সানুনাসিকং কত্ৰা নিদ্দেসো. ‘‘সীতৰারিসুচিন্ধরা’’তিপি পাঠো, সীতসুচিৰারিধরা সীতলৰিমলসলিলাসযৰন্তোতি অত্থো. ইন্দগোপকসঞ্ছন্নাতি ইন্দগোপকনামকেহি পৰাল়ৰণ্ণেহি রত্তকিমীহি সঞ্ছাদিতা পাৰুস্সকালৰসেন এৰমাহ. কেচি পন ‘‘ইন্দগোপকনামানি রত্ততিণানী’’তি ৰদন্তি. অপরে ‘‘কণিকাররুক্খা’’তি. সেলাতি সিলামযা পব্বতা, ন পংসুপব্বতাতি অত্থো. তেনাহ – ‘‘যথাপি পব্বতো সেলো’’তি (উদা. ২৪). রমযন্তি মন্তি মং রমাপেন্তি, ময্হং ৰিৰেকাভিরত্তিং পরিব্রূহেন্তি. এৰং থেরো অত্তনো চিরকালপরিভাৰিতং অরঞ্ঞাভিরতিং পৰেদেন্তো তিৰিধং ৰিৰেকাভিরতিমেৰ দীপেতি. তত্থ উপধিৰিৰেকেন অঞ্ঞাব্যাকরণং দীপিতমেৰ হোতীতি.

ৰনৰচ্ছত্থেরগাথাৰণ্ণনা নিট্ঠিতা.

৪. সিৰকসামণেরগাথাৰণ্ণনা

উপজ্ঝাযোতি সিৰকস্স সামণেরস্স গাথা. কা উপ্পত্তি? সো কির ইতো একতিংসে কপ্পে ৰেস্সভুস্স ভগৰতো কালে কুলগেহে নিব্বত্তো একদিৰসং কেনচিদেৰ করণীযেন অরঞ্ঞং পৰিট্ঠো তত্থ পব্বতন্তরে নিসিন্নং ৰেস্সভুং ভগৰন্তং দিস্ৰা পসন্নচিত্তো উপসঙ্কমিত্ৰা ৰন্দিত্ৰা অঞ্জলিং পগ্গয্হ অট্ঠাসি. পুন তত্থ মনোহরানি কাসুমারিকফলানি দিস্ৰা তানি গহেত্ৰা ভগৰতো উপনেসি, পটিগ্গহেসি ভগৰা অনুকম্পং উপাদায. সো তেন পুঞ্ঞকম্মেন দেৰমনুস্সেসু সংসরন্তো কস্সপস্স ভগৰতো সাসনে মাতুলে পব্বজন্তে তেন সদ্ধিং পব্বজিত্ৰা বহুং ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে ৰনৰচ্ছত্থেরস্স ভাগিনেয্যো হুত্ৰা নিব্বত্তো, সিৰকোতিস্স নামং অহোসি. তস্স মাতা অত্তনো জেট্ঠভাতিকে ৰনৰচ্ছে সাসনে পব্বজিত্ৰা পব্বজিতকিচ্চং মত্থকং পাপেত্ৰা অরঞ্ঞে ৰিহরন্তে তং পৰত্তিং সুত্ৰা পুত্তং আহ – ‘‘তাত সিৰক, থেরস্স সন্তিকে পব্বজিত্ৰা থেরং উপট্ঠহ, মহল্লকো দানি থেরো’’তি. সো মাতু একৰচনেনেৰ চ পুব্বে কতাধিকারতায চ মাতুলত্থেরস্স সন্তিকং গন্ত্ৰা পব্বজিত্ৰা তং উপট্ঠহন্তো অরঞ্ঞে ৰসতি.

তস্স একদিৰসং কেনচিদেৰ করণীযেন গামন্তং গতস্স খরো আবাধো উপ্পজ্জি. মনুস্সেসু ভেসজ্জং করোন্তেসুপি ন পটিপ্পস্সম্ভি. তস্মিং চিরাযন্তে থেরো ‘‘সামণেরো চিরাযতি, কিং নু খো কারণ’’ন্তি তত্থ গন্ত্ৰা তং গিলানং দিস্ৰা তস্স তং তং কত্তব্বযুত্তকং করোন্তো দিৰসভাগং ৰীতিনামেত্ৰা রত্তিভাগে বলৰপচ্চূসৰেলাযং আহ – ‘‘সিৰক, ন মযা পব্বজিতকালতো পট্ঠায গামে ৰসিতপুব্বং, ইতো অরঞ্ঞমেৰ গচ্ছামা’’তি. তং সুত্ৰা সিৰকো ‘‘যদিপি মে, ভন্তে, ইদানি কাযো গামন্তে ঠিতো, চিত্তং পন অরঞ্ঞে, তস্মা সযানোপি অরঞ্ঞমেৰ গমিস্সামী’’তি, তং সুত্ৰা থেরো তং বাহাযং গহেত্ৰা অরঞ্ঞমেৰ নেত্ৰা ওৰাদং অদাসি. সো থেরস্স ওৰাদে ঠত্ৰা ৰিপস্সিত্ৰা অরহত্তং পাপুণি. তেন ৰুত্তং অপদানে (অপ. থের ১.৩৮.৫৩-৫৮) –

‘‘কণিকারংৰ জোতন্তং, নিসিন্নং পব্বতন্তরে;

অদ্দসং ৰিরজং বুদ্ধং, লোকজেট্ঠং নরাসভং.

‘‘পসন্নচিত্তো সুমনো, কিরে কত্ৰান অঞ্জলিং;

কাসুমারিকমাদায, বুদ্ধসেট্ঠস্সদাসহং.

‘‘একতিংসে ইতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

সো অরহত্তং পত্ৰা উপজ্ঝাযেন অত্তনা চ ৰুত্তমত্থং সংসন্দিত্ৰা অত্তনো ৰিৰেকাভিরতিকতং কতকিচ্চতঞ্চ পৰেদেন্তো ‘‘উপজ্ঝাযো মং অৰচা’’তি গাথং অভাসি.

১৪. তত্থ উপজ্ঝাযোতি ৰজ্জাৰজ্জং উপনিজ্ঝাযতি হিতেসিতং পচ্চুপট্ঠপেত্ৰা ঞাণচক্খুনা পেক্খতীতি উপজ্ঝাযো. মন্তি অত্তানং ৰদতি. অৰচাতি অভাসি. ইতো গচ্ছাম সীৰকাতি ৰুত্তাকারদস্সনং, সিৰক, ইতো গামন্ততো অরঞ্ঞট্ঠানমেৰ এহি গচ্ছাম, তদেৰ অম্হাকং ৰসনযোগ্গন্তি অধিপ্পাযো. এৰং পন উপজ্ঝাযেন ৰুত্তো সিৰকো ভদ্রো অস্সাজানীযো ৰিয কসাভিহতো সঞ্জাতসংৰেগো হুত্ৰা অরঞ্ঞমেৰ গন্তুকামতং পৰেদেন্তো –

‘‘গামে মে ৰসতি কাযো, অরঞ্ঞং মে গতং মনো;

সেমানকোপি গচ্ছামি, নত্থি সঙ্গো ৰিজানত’’ন্তি. –আহ;

তস্সত্থো – যস্মা ইদানি যদিপি মে ইদং সরীরং গামন্তে ঠিতং, অজ্ঝাসযো পন অরঞ্ঞমেৰ গতো, তস্মা সেমানকোপি গচ্ছামি গেলঞ্ঞেন ঠাননিসজ্জাগমনেসু অসমত্থতায সযানোপি ইমিনা সযিতাকারেন সরীসপো ৰিয সরীসপন্তো, এথ, ভন্তে, অরঞ্ঞমেৰ গচ্ছাম, কস্মা? নত্থি সঙ্গো ৰিজানতন্তি, যস্মা ধম্মসভাৰা কামেসু সংসারে চ আদীনৰং, নেক্খম্মে নিব্বানে চ আনিসংসং যাথাৰতো জানন্তস্স ন কত্থচি সঙ্গো, তস্মা একপদেনেৰ উপজ্ঝাযস্স আণা অনুঠিতাতি, তদপদেসেন অঞ্ঞং ব্যাকাসি.

সিৰকসামণেরগাথাৰণ্ণনা নিট্ঠিতা.

৫. কুণ্ডধানত্থেরগাথাৰণ্ণনা

পঞ্চ ছিন্দে পঞ্চ জহেতি আযস্মতো কুণ্ডধানত্থেরস্স গাথা. কা উপ্পত্তি? সো কির পদুমুত্তরস্স ভগৰতো কালে হংসৰতীনগরে কুলগেহে উপ্পন্নো ৰযপ্পত্তো হেট্ঠা ৰুত্তনযেনেৰ ভগৰন্তং উপসঙ্কমিত্ৰা ধম্মং সুণন্তো সত্থারা একং ভিক্খুং পঠমং সলাকং গণ্হন্তানং অগ্গট্ঠানে ঠপিযমানং দিস্ৰা তং ঠানন্তরং পত্থেত্ৰা তদনুরূপং পুঞ্ঞং করোন্তো ৰিচরি. সো একদিৰসং পদুমুত্তরস্স ভগৰতো নিরোধসমাপত্তিতো ৰুট্ঠায নিসিন্নস্স মনোসিলাচুণ্ণপিঞ্জরং মহন্তং কদলিফলকণ্ণিকং উপনেসি, তং ভগৰা পটিগ্গহেত্ৰা পরিভুঞ্জি. সো তেন পুঞ্ঞকম্মেন একাদসক্খত্তুং দেৰেসু দেৰরজ্জং কারেসি. চতুৰীসতিৰারে রাজা অহোসি চক্কৰত্তী. এৰং সো পুনপ্পুনং পুঞ্ঞানি কত্ৰা অপরাপরং দেৰমনুস্সেসু সংসরন্তো কস্সপবুদ্ধকালে ভুম্মদেৰতা হুত্ৰা নিব্বত্তি. দীঘাযুকবুদ্ধানঞ্চ নাম ন অন্ৰদ্ধমাসিকো উপোসথো হোতি. তথা হি ৰিপস্সিস্স ভগৰতো ছব্বস্সন্তরে ছব্বস্সন্তরে উপোসথো অহোসি. কস্সপদসবলো পন ছট্ঠে ছট্ঠে মাসে পাতিমোক্খং ওসারেসি. তস্স পাতিমোক্খস্স ওসারণকালে দিসাৰাসিকা দ্ৰে সহাযকা ভিক্খূ ‘‘উপোসথং করিস্সামা’’তি গচ্ছন্তি.

অযং ভুম্মদেৰতা চিন্তেসি – ‘‘ইমেসং দ্ৰিন্নং ভিক্খূনং মেত্তি অতিৰিয দল়্হা, কিং নু খো, ভেদকে সতি ভিজ্জেয্য, ন ভিজ্জেয্যা’’তি, সা তেসং ওকাসং ওলোকযমানা তেসং অৰিদূরেনেৰ গচ্ছতি. অথেকো থেরো একস্স হত্থে পত্তচীৰরং দত্ৰা সরীরৰল়ঞ্জনত্থং উদকফাসুকট্ঠানং গন্ত্ৰা ধোতহত্থপাদো হুত্ৰা গুম্বসমীপতো নিক্খমতি ভুম্মদেৰতা তস্স থেরস্স পচ্ছতো উত্তমরূপা ইত্থী হুত্ৰা কেসে ৰিধুনিত্ৰা সংৰিধায সম্বন্ধন্তী ৰিয পিট্ঠিযং পংসুং পুঞ্ছমানা ৰিয সাটকং সংৰিধায নিৰাসযমানা ৰিয চ হুত্ৰা থেরস্স পদানুপদিকা হুত্ৰা গুম্বতো নিক্খন্তা. একমন্তে ঠিতো সহাযকত্থেরো তং কারণং দিস্ৰাৰ দোমনস্সজাতো ‘‘নট্ঠো দানি মে ইমিনা ভিক্খুনা সদ্ধিং দীঘরত্তানুগতো সিনেহো, সচাহং এৰংৰিধভাৰং জানেয্যং, এত্তকং অদ্ধানং ইমিনা সদ্ধিং ৰিস্সাসং ন করেয্য’’ন্তি চিন্তেত্ৰা আগচ্ছন্তস্সেৰস্স, ‘‘হন্দাৰুসো, তুয্হং পত্তচীৰরং, তাদিসেন পাপেন সদ্ধিং একমগ্গং নাগচ্ছামী’’তি আহ. তং কথং সুত্ৰা তস্স লজ্জিভিক্খুনো হদযং তিখিণসত্তিং গহেত্ৰা ৰিদ্ধং ৰিয অহোসি. ততো নং আহ – ‘‘আৰুসো, কিং নামেতং ৰদসি, অহং এত্তকং কালং দুক্কটমত্তম্পি আপত্তিং ন জানামি. ত্ৰং পন মং অজ্জ ‘পাপো’তি ৰদসি, কিং তে দিট্ঠ’’ন্তি. ‘‘কিং অঞ্ঞেন দিট্ঠেন, কিং ত্ৰং এৰংৰিধেন অলঙ্কতপটিযত্তেন মাতুগামেন সদ্ধিং একট্ঠানে হুত্ৰা নিক্খন্তো’’তি. ‘‘নত্থেতং, আৰুসো, ময্হং, নাহং এৰরূপং মাতুগামং পস্সামী’’তি. তস্স যাৰততিযং কথেন্তস্সাপি ইতরো থেরো কথং অসদ্দহিত্ৰা অত্তনা দিট্ঠকারণংযেৰ ভূতত্তং কত্ৰা গণ্হন্তো তেন সদ্ধিং একমগ্গেন অগন্ত্ৰা অঞ্ঞেন মগ্গেন সত্থু সন্তিকং গতো. ইতরোপি ভিক্খু অঞ্ঞেন মগ্গেন সত্থু সন্তিকংযেৰ গতো.

ততো ভিক্খুসঙ্ঘস্স উপোসথাগারং পৰিসনৰেলায সো ভিক্খু তং ভিক্খুং উপোসথগ্গে সঞ্জানিত্ৰা, ‘‘ইমস্মিং উপোসথগ্গে এৰরূপো নাম পাপভিক্খু অত্থি, নাহং তেন সদ্ধিং উপোসথং করিস্সামী’’তি নিক্খমিত্ৰা বহি অট্ঠাসি. অথ ভুম্মদেৰতা ‘‘ভারিযং মযা কম্মং কত’’ন্তি মহল্লকউপাসকৰণ্ণেন তস্স সন্তিকং গন্ত্ৰা ‘‘কস্মা, ভন্তে, অয্যো ইমস্মিং ঠানে ঠিতো’’তি আহ. ‘‘উপাসক, ইমং উপোসথগ্গং একো পাপভিক্খু পৰিট্ঠো, ‘নাহং তেন সদ্ধিং উপোসথং করোমী’তি বহি ঠিতোম্হী’’তি. ‘‘ভন্তে, মা এৰং গণ্হথ, পরিসুদ্ধসীলো এস ভিক্খু. তুম্হেহি দিট্ঠমাতুগামো নাম অহং, মযা তুম্হাকং ৰীমংসনত্থায ‘দল়্হা নু খো ইমেসং থেরানং মেত্তি, নো দল়্হা’তি ভিজ্জনাভিজ্জনভাৰং ওলোকেন্তেন তং কম্মং কত’’ন্তি. ‘‘কো পন, ত্ৰং সপ্পুরিসা’’তি? ‘‘অহং একা ভুম্মদেৰতা, ভন্তে’’তি দেৰপুত্তো কথেন্তো দিব্বানুভাৰেন ঠত্ৰা থেরস্স পাদেসু নিপতিত্ৰা ‘‘ময্হং, ভন্তে, খমথ, এতং দোসং থেরো ন জানাতি, উপোসথং করোথা’’তি থেরং যাচিত্ৰা উপোসথগ্গং পৰেসেসি. সো থেরো উপোসথং তাৰ একট্ঠানে অকাসি, মিত্তসন্থৰৰসেন পন পুন তেন সদ্ধিং ন একট্ঠানে অহোসীতি. ইমস্স থেরস্স কম্মং ন কথীযতি, চুদিতকত্থেরো পন অপরাপরং ৰিপস্সনায কম্মং করোন্তো অরহত্তং পাপুণি.

ভুম্মদেৰতা তস্স কম্মস্স নিস্সন্দেন একং বুদ্ধন্তরং অপাযভযতো ন মুচ্চিত্থ. সচে পন কিস্মিঞ্চি কালে মনুস্সত্তং আগচ্ছতি, অঞ্ঞেন যেন কেনচি কতো দোসো তস্সেৰ উপরি পততি. সো অম্হাকং ভগৰতো কালে সাৰত্থিযং ব্রাহ্মণকুলে নিব্বত্তি. ‘‘ধানমাণৰো’’তিস্স নামং অকংসু. সো ৰযপ্পত্তো তযো ৰেদে উগ্গণ্হিত্ৰা মহল্লককালে সত্থু ধম্মদেসনং সুত্ৰা পটিলদ্ধসদ্ধো পব্বজি, তস্স উপসম্পন্নদিৰসতো পট্ঠায একা অলঙ্কতপটিযত্তা ইত্থী তস্মিং গামং পৰিসন্তে সদ্ধিংযেৰ গামং পৰিসতি, নিক্খমন্তে নিক্খমতি. ৰিহারং পৰিসন্তেপি সদ্ধিং পৰিসতি, তিট্ঠন্তেপি তিট্ঠতীতি এৰং নিচ্চানুবন্ধা পঞ্ঞাযতি. থেরো তং ন পস্সতি. তস্স পুন পুরিমকম্মনিস্সন্দেন সা অঞ্ঞেসং উপট্ঠাতি. গামে যাগুং ভিক্খঞ্চ দদমানা ইত্থিযো ‘‘ভন্তে, অযং একো যাগুউল়ুঙ্কো তুম্হাকং, একো ইমিস্সা অম্হাকং সহাযিকাযা’’তি পরিহাসং করোন্তি. থেরস্স মহতী ৰিহেসা হোতি. ৰিহারগতম্পি নং সামণেরা চেৰ দহরা ভিক্খূ চ পরিৰারেত্ৰা ‘‘ধানো কোণ্ডো জাতো’’তি পরিহাসং করোন্তি. অথস্স তেনেৰ কারণেন কুণ্ডধানত্থেরোতি নামং জাতং. সো উট্ঠায সমুট্ঠায তেহি করিযমানং কেল়িং সহিতুং অসক্কোন্তো উম্মাদং গহেত্ৰা ‘‘তুম্হে কোণ্ডা, তুম্হাকং উপজ্ঝাযো কোণ্ডো, আচরিযো কোণ্ডো’’তি ৰদতি. অথ নং সত্থু আরোচেসুং ‘‘কুণ্ডধানো, ভন্তে, দহরসামণেরেহি সদ্ধিং এৰং ফরুসৰাচং ৰদতী’’তি. সত্থা তং পক্কোসাপেত্ৰা ‘‘সচ্চং কির ত্ৰং, ধান, সামণেরেহি সদ্ধিং ফরুসৰাচং ৰদসী’’তি ৰত্ৰা তেন ‘‘সচ্চং ভগৰা’’তি ৰুত্তে ‘‘কস্মা এৰং ৰদেসী’’তি আহ. ‘‘ভন্তে, নিবদ্ধং ৰিহেসং অসহন্তো এৰং কথেমী’’তি. ‘‘ত্ৰং পুব্বে কতকম্মং যাৰজ্জদিৰসা জীরাপেতুং ন সক্কোসি, পুন এৰরূপং ফরুসং মাৰদী ভিক্খূ’’তি ৰত্ৰা আহ –

‘‘মাৰোচ ফরুসং কঞ্চি, ৰুত্তা পটিৰদেয্যু তং;

দুক্খা হি সারম্ভকথা, পটিদণ্ডা ফুসেয্যু তং.

‘‘সচে নেরেসি অত্তানং, কংসো উপহতো যথা;

এস পত্তোসি নিব্বানং, সারম্ভো তে ন ৰিজ্জতী’’তি. (ধ. প. ১৩৩-১৩৪);

ইমঞ্চ পন তস্স থেরস্স মাতুগামেন সদ্ধিং ৰিচরণভাৰং কোসলরঞ্ঞোপি কথযিংসু. রাজা ‘‘গচ্ছথ, ভণে, ৰীমংসথা’’তি পেসেত্ৰা সযম্পি মন্দেনেৰ পরিৰারেন থেরস্স ৰসনট্ঠানং গন্ত্ৰা একমন্তে ওলোকেন্তো অট্ঠাসি. তস্মিং খণে থেরো সূচিকম্মং করোন্তো নিসিন্নো হোতি, সাপি ইত্থী অৰিদূরে ঠানে ঠিতা ৰিয পঞ্ঞাযতি. রাজা দিস্ৰা ‘‘অত্থিদং কারণ’’ন্তি তস্সা ঠিতট্ঠানং অগমাসি. সা তস্মিং আগচ্ছন্তে থেরস্স ৰসনপণ্ণসালং পৰিট্ঠা ৰিয অহোসি. রাজাপি তায সদ্ধিং তমেৰ পণ্ণসালং পৰিসিত্ৰা সব্বত্থ ওলোকেন্তো অদিস্ৰা ‘‘নাযং মাতুগামো, থেরস্স একো কম্মৰিপাকো’’তি সঞ্ঞং কত্ৰা পঠমং থেরস্স সমীপেন গচ্ছন্তোপি থেরং অৰন্দিত্ৰা তস্স কারণস্স অভূতভাৰং ঞত্ৰা আগম্ম থেরং ৰন্দিত্ৰা একমন্তং নিসিন্নো ‘‘কচ্চি, ভন্তে, পিণ্ডকেন ন কিলমথা’’তি পুচ্ছি. থেরো ‘‘ৰট্টতি, মহারাজা’’তি আহ. ‘‘জানামহং, ভন্তে, অয্যস্স কথং, এৰরূপেন পরিক্কিলেসেন সদ্ধিং চরন্তানং তুম্হাকং কে নাম পসীদিস্সন্তি, ইতো পট্ঠায ৰো কত্থচি গমনকিচ্চং নত্থি, অহং চতূহি পচ্চযেহি তুম্হে উপট্ঠহিস্সামি, তুম্হে যোনিসো মনসিকারে মা পমজ্জিত্থা’’তি নিবদ্ধভিক্খং পট্ঠপেসি. থেরো রাজানং উপত্থম্ভকং লভিত্ৰা ভোজনসপ্পাযেন একগ্গচিত্তো হুত্ৰা ৰিপস্সনং ৰড্ঢেত্ৰা অরহত্তং পাপুণি. ততো পট্ঠায সা ইত্থী অন্তরধাযি.

তদা মহাসুভদ্দা উগ্গনগরে মিচ্ছাদিট্ঠিককুলে ৰসমানা ‘‘সত্থা মং অনুকম্পতূ’’তি উপোসথং অধিট্ঠায নিরামগন্ধা হুত্ৰা উপরিপাসাদতলে ঠিতা ‘‘ইমানি পুপ্ফানি অন্তরে অট্ঠত্ৰা দসবলস্স মত্থকে ৰিতানং হুত্ৰা তিট্ঠন্তু, দসবলো ইমায সঞ্ঞায স্ৰে পঞ্চহি ভিক্খুসতেহি সদ্ধিং ময্হং ভিক্খং গণ্হতূ’’তি সচ্চকিরিযং কত্ৰা অট্ঠ সুমনপুপ্ফমুট্ঠিযো ৰিস্সজ্জেসি. পুপ্ফানি গন্ত্ৰা ধম্মদেসনাৰেলায সত্থু মত্থকে ৰিতানং হুত্ৰা অট্ঠংসু. সত্থা তং সুমনপুপ্ফৰিতানং দিস্ৰা চিত্তেনেৰ সুভদ্দায ভিক্খং অধিৰাসেত্ৰা পুনদিৰসে অরুণে উট্ঠিতে আনন্দত্থেরং আহ – ‘‘আনন্দ, মযং অজ্জ দূরং ভিক্খাচারং গমিস্সাম, পুথুজ্জনানং অদত্ৰা অরিযানংযেৰ সলাকং দেহী’’তি. থেরো ভিক্খূনং আরোচেসি – ‘‘আৰুসো, সত্থা অজ্জ দূরং ভিক্খাচারং গমিস্সতি, পুথুজ্জনা মা গণ্হন্তু, অরিযাৰ সলাকং গণ্হন্তূ’’তি. কুণ্ডধানত্থেরো ‘‘আহর, আৰুসো সলাক’’ন্তি পঠমংযেৰ হত্থং পসারেসি. আনন্দো ‘‘সত্থা তাদিসানং ভিক্খূনং সলাকং ন দাপেতি, অরিযানংযেৰ দাপেতী’’তি ৰিতক্কং উপ্পাদেত্ৰা গন্ত্ৰা সত্থু আরোচেসি. সত্থা ‘‘আহরাপেন্তস্স সলাকং দেহী’’তি আহ. থেরো চিন্তেসি – ‘‘সচে কুণ্ডধানস্স সলাকা দাতুং ন যুত্তা, অথ সত্থা পটিবাহেয্য, ভৰিস্সতি এত্থ কারণ’’ন্তি ‘‘কুণ্ডধানস্স সলাকং দস্সামী’’তি গমনং অভিনীহরি. কুণ্ডধানো তস্স পুরে আগমনা এৰ অভিঞ্ঞাপাদকং চতুত্থজ্ঝানং সমাপজ্জিত্ৰা ইদ্ধিযা আকাসে ঠত্ৰা ‘‘আহরাৰুসো, আনন্দ, সত্থা মং জানাতি, মাদিসং ভিক্খুং পঠমং সলাকং গণ্হন্তং ন সত্থা নিৰারেতী’’তি হত্থং পসারেত্ৰা সলাকং গণ্হি. সত্থা তং অট্ঠুপ্পত্তিং কত্ৰা থেরং ইমস্মিং সাসনে পঠমং সলাকং গণ্হন্তানং অগ্গট্ঠানে ঠপেসি. যস্মা অযং থেরো রাজানং উপত্থম্ভকং লভিত্ৰা সপ্পাযাহারলাভেন সমাহিতচিত্তো ৰিপস্সনায কম্মং করোন্তো উপনিস্সযসম্পন্নতায ছল়ভিঞ্ঞো অহোসি. তেন ৰুত্তং অপদানে (অপ. থের ১.৪.১-১৬) –

‘‘সত্তাহং পটিসল্লীনং, সযম্ভুং অগ্গপুগ্গলং;

পসন্নচিত্তো সুমনো, বুদ্ধসেট্ঠং উপট্ঠহিং.

‘‘ৰুট্ঠিতং কালমঞ্ঞায, পদুমুত্তরং মহামুনিং;

মহন্তিং কদলীকণ্ণিং, গহেত্ৰা উপগচ্ছহং.

‘‘পটিগ্গহেত্ৰা ভগৰা, সব্বঞ্ঞূ লোকনাযকো;

মম চিত্তং পসাদেন্তো, পরিভুঞ্জি মহামুনি.

‘‘পরিভুঞ্জিত্ৰা সম্বুদ্ধো, সত্থৰাহো অনুত্তরো;

সকাসনে নিসীদিত্ৰা, ইমা গাথা অভাসথ.

‘‘যে চ সন্তি সমিতারো, যক্খা ইমম্হি পব্বতে;

অরঞ্ঞে ভূতভব্যানি, সুণন্তু ৰচনং মম.

‘‘যো সো বুদ্ধং উপট্ঠাসি, মিগরাজংৰ কেসরিং;

তমহং কিত্তযিস্সামি, সুণাথ মম ভাসতো.

‘‘একাদসঞ্চক্খত্তুং সো, দেৰরাজা ভৰিস্সতি;

চতুৰীসতিক্খত্তুঞ্চ, চক্কৰত্তী ভৰিস্সতি.

‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘অক্কোসিত্ৰান সমণে, সীলৰন্তে অনাসৰে;

পাপকম্মৰিপাকেন, নামধেয্যং লভিস্সতি.

‘‘তস্স ধম্মে সুদাযাদো, ওরসো ধম্মনিম্মিতো;

কুণ্ডধানোতি নামেন, সাৰকো সো ভৰিস্সতি.

‘‘পৰিৰেকমনুযুত্তো, ঝাযী ঝানরতো অহং;

তোসযিত্ৰান সত্থারং, ৰিহরামি অনাসৰো.

‘‘সাৰকেহি পরিৰুতো, ভিক্খুসঙ্ঘপুরক্খতো;

ভিক্খুসঙ্ঘে নিসীদিত্ৰা, সলাকং গাহযী জিনো.

‘‘একংসং চীৰরং কত্ৰা, ৰন্দিত্ৰা লোকনাযকং;

ৰদতং ৰরস্স পুরতো, পঠমং অগ্গহেসহং.

‘‘তেন কম্মেন ভগৰা, দসসহস্সিকম্পকো;

ভিক্খুসঙ্ঘে নিসীদিত্ৰা, অগ্গট্ঠানে ঠপেসি মং.

‘‘ৰীরিযং মে ধুরধোরয্হং, যোগক্খেমাধিৰাহনং;

ধারেমি অন্তিমং দেহং, সম্মাসম্বুদ্ধসাসনে.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

এৰংভূতস্সপি ইমস্স থেরস্স গুণে অজানন্তা যে পুথুজ্জনা ভিক্খূ তদা পঠমং সলাকগ্গহণে ‘‘কিং নু খো এত’’ন্তি সমচিন্তেসুং. তেসং ৰিমতিৰিধমনত্থং থেরো আকাসং অব্ভুগ্গন্ত্ৰা ইদ্ধিপাটিহারিযং দস্সেত্ৰা অঞ্ঞাপদেসেন অঞ্ঞং ব্যাকরোন্তো ‘‘পঞ্চ ছিন্দে’’তি গাথং অভাসি.

১৫. তত্থ পঞ্চ ছিন্দেতি অপাযূপপত্তিনিব্বত্তনকানি পঞ্চোরম্ভাগিযানি সংযোজনানি পাদে বন্ধনরজ্জুকং ৰিয পুরিসো সত্থেন হেট্ঠিমমগ্গত্তযেন ছিন্দেয্য পজহেয্য. পঞ্চ জহেতি উপরিদেৰলোকূপপত্তিহেতুভূতানি পঞ্চুদ্ধম্ভাগিযসংযোজনানি পুরিসো গীৰায বন্ধনরজ্জুকং ৰিয অরহত্তমগ্গেন জহেয্য, ছিন্দেয্য ৰাতি অত্থো. পঞ্চ চুত্তরি ভাৰযেতি তেসংযেৰ উদ্ধম্ভাগিযসংযোজনানং পহানায সদ্ধাদীনি পঞ্চিন্দ্রিযানি উত্তরি অনাগামিমগ্গাধিগমতো উপরি ভাৰেয্য অগ্গমগ্গাধিগমৰসেন ৰড্ঢেয্য. পঞ্চসঙ্গাতিগোতি এৰংভূতো পন পঞ্চন্নং রাগদোসমোহমানদিট্ঠিসঙ্গানং অতিক্কমনেন পহানেন পঞ্চসঙ্গাতিগো হুত্ৰা. ভিক্খু ওঘতিণ্ণোতি ৰুচ্চতীতি সব্বথা ভিন্নকিলেসতায ভিক্খূতি, কামভৰদিট্ঠিঅৰিজ্জোঘে তরিত্ৰা তেসং পারভূতে নিব্বানে ঠিতোতি চ ৰুচ্চতীতি অত্থো.

কুণ্ডধানত্থেরগাথাৰণ্ণনা নিট্ঠিতা.

৬. বেলট্ঠসীসত্থেরগাথাৰণ্ণনা

যথাপি ভদ্দো আজঞ্ঞোতি আযস্মতো বেলট্ঠসীসত্থেরস্স গাথা. কা উপ্পত্তি? সো কির পদুমুত্তরস্স ভগৰতো কালে কুলগেহে নিব্বত্তো ভগৰন্তং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা সমণধম্মং করোন্তো উপনিস্সযসম্পত্তিযা অভাৰেন ৰিসেসং নিব্বত্তেতুং নাসক্খি. ৰিৰট্টূপনিস্সযং পন বহুং কুসলং উপচিনিত্ৰা দেৰমনুস্সেসু সংসরন্তো ইতো একতিংসে কপ্পে ৰেস্সভুং ভগৰন্তং পস্সিত্ৰা পসন্নচিত্তো মাতুলুঙ্গফলং অদাসি. সো তেন পুঞ্ঞকম্মেন দেৰেসু নিব্বত্তিত্ৰা অপরাপরং পুঞ্ঞানি কত্ৰা সুগতিতো সুগতিং উপগচ্ছন্তো ইমস্মিং বুদ্ধুপ্পাদে সাৰত্থিযং ব্রাহ্মণকুলে নিব্বত্তো ভগৰতো অভিসম্বোধিযা পুরেতরমেৰ উরুৰেলকস্সপস্স সন্তিকে তাপসপব্বজ্জং পব্বজিত্ৰা অগ্গিং পরিচরন্তো উরুৰেলকস্সপদমনে আদিত্তপরিযাযদেসনায (মহাৰ. ৫৪; সং. নি. ৪.২৮) পুরাণজটিলসহস্সেন সদ্ধিং অরহত্তং পাপুণি. তেন ৰুত্তং অপদানে (অপ. থের ২.৫১.৬৮-৭৩) –

‘‘কণিকারংৰ জোতন্তং, পুণ্ণমাযেৰ চন্দিমং;

জলন্তং দীপরুক্খংৰ, অদ্দসং লোকনাযকং.

‘‘মাতুলুঙ্গফলং গয্হ, অদাসিং সত্থুনো অহং;

দক্খিণেয্যস্স ৰীরস্স, পসন্নো সেহি পাণিভি.

‘‘একতিংসে ইতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

এৰং অধিগতারহত্তো আযস্মতো ধম্মভণ্ডাগারিকস্স উপজ্ঝাযো অযং থেরো একদিৰসং ফলসমাপত্তিতো উট্ঠায তং সন্তং পণীতং নিরামিসং সুখং অত্তনো পুব্বযোগঞ্চ পচ্চৰেক্খিত্ৰা পীতিৰেগৰসেন ‘‘যথাপি ভদ্দো আজঞ্ঞো’’তি গাথং অভাসি.

১৬. তত্থ যথাপীতি ওপম্মপটিপাদনত্থে নিপাতো. ভদ্দোতি সুন্দরো থামবলসমত্থজৰপরক্কমাদিসম্পন্নো. আজঞ্ঞোতি আজানীযো জাতিমা কারণাকারণানং আজাননকো. সো তিৰিধো উসভাজঞ্ঞো অস্সাজঞ্ঞো হত্থাজঞ্ঞোতি. তেসু উসভাজঞ্ঞো ইধাধিপ্পেতো. সো চ খো ছেককসনকিচ্চে নিযুত্তো, তেনাহ ‘‘নঙ্গলাৰত্তনী’’তি. নঙ্গলস্স ফালস্স আৰত্তনকো, নঙ্গলং ইতো চিতো চ আৰত্তেত্ৰা খেত্তে কসনকোতি অত্থো. নঙ্গলং ৰা আৰত্তযতি এত্থাতি নঙ্গলাৰত্তং, খেত্তে নঙ্গলপথো, তস্মিং নঙ্গলাৰত্তনি. গাথাসুখত্থঞ্হেত্থ ‘‘ৰত্তনী’’তি দীঘং কত্ৰা ৰুত্তং. সিখীতি মত্থকে অৰট্ঠানতো সিখাসদিসতায সিখা, সিঙ্গং. তদস্স অত্থীতি সিখী. অপরে পন ‘‘ককুধং ইধ ‘সিখা’তি অধিপ্পেত’’ন্তি ৰদন্তি, উভযথাপি পধানঙ্গকিত্তনমেতং ‘‘সিখী’’তি. অপ্পকসিরেনাতি অপ্পকিলমথেন. রত্তিন্দিৰাতি রত্তিযো দিৰা চ, এৰং মমং অপ্পকসিরেন গচ্ছন্তীতি যোজনা. ইদং ৰুত্তং হোতি – যথা ‘‘ভদ্দো উসভাজানীযো কসনে নিযুত্তো ঘনতিণমূলাদিকেপি নঙ্গলপথে তং অগণেন্তো অপ্পকসিরেন ইতো চিতো চ পরিৰত্তেন্তো গচ্ছতি, যাৰ কসনতিণানং পরিস্সমং দস্সেতি, এৰং মমং রত্তিন্দিৰাপি অপ্পকসিরেনেৰ গচ্ছন্তি অতিক্কমন্তী’’তি. তত্থ কারণমাহ ‘‘সুখে লদ্ধে নিরামিসে’’তি. যস্মা কামামিসলোকামিসৰট্টামিসেহি অসম্মিস্সং সন্তং পণীতং ফলসমাপত্তিসুখং লদ্ধং, তস্মাতি অত্থো. পচ্চত্তে চেতং ভুম্মৰচনং যথা ‘‘ৰনপ্পগুম্বে’’ (খু. পা. ৬.১৩; সু. নি. ২৩৬) ‘‘তেন ৰত রে ৰত্তব্বে’’তি (কথা. ১) চ. অথ ৰা ততো পভুতি রত্তিন্দিৰা অপ্পকসিরেন গচ্ছন্তীতি ৰিচারণায আহ – ‘‘সুখে লদ্ধে নিরামিসে’’তি, নিরামিসে সুখে লদ্ধে সতি তস্স লদ্ধকালতো পট্ঠাযাতি অত্থো.

বেলট্ঠসীসত্থেরগাথাৰণ্ণনা নিট্ঠিতা.

৭. দাসকত্থেরগাথাৰণ্ণনা

মিদ্ধী যদাতি আযস্মতো দাসকত্থেরস্স গাথা. কা উপ্পত্তি? সো কির ইতো একনৰুতে কপ্পে অনুপ্পন্নে তথাগতে অজিতস্স নাম পচ্চেকবুদ্ধস্স গন্ধমাদনতো মনুস্সপথং ওতরিত্ৰা অঞ্ঞতরস্মিং গামে পিণ্ডায চরন্তস্স মনোরমানি অম্বফলানি অদাসি. সো তেন পুঞ্ঞকম্মেন দেৰমনুস্সেসু সংসরন্তো কস্সপস্স ভগৰতো কালে সাসনে পব্বজিত্ৰা ৰিৰট্টূপনিস্সযং বহুং পুঞ্ঞং অকাসি. এৰং কুসলকম্মপ্পসুতো হুত্ৰা সুগতিতো সুগতিং উপগচ্ছন্তো ইমস্মিং বুদ্ধুপ্পাদে সাৰত্থিযং কুলগেহে নিব্বত্তি. দাসকোতিস্স নামং অহোসি. সো অনাথপিণ্ডিকেন গহপতিনা ৰিহারপটিজগ্গনকম্মে ঠপিতো সক্কচ্চং ৰিহারং পটিজগ্গন্তো অভিণ্হং বুদ্ধদস্সনেন ধম্মস্সৰনেন চ পটিলদ্ধসদ্ধো পব্বজি. কেচি পন ভণন্তি – ‘‘অযং কস্সপস্স ভগৰতো কালে কুলগেহে নিব্বত্তিত্ৰা ৰযপ্পত্তো অঞ্ঞতরং খীণাসৰত্থেরং উপট্ঠহন্তো কিঞ্চি কম্মং কারাপেতুকামো থেরং আণাপেসি. সো তেন কম্মেন অম্হাকং ভগৰতো কালে সাৰত্থিযং অনাথপিণ্ডিকস্স দাসিযা কুচ্ছিম্হি নিব্বত্তো ৰযপ্পত্তো সেট্ঠিনা ৰিহারপটিজগ্গনে ঠপিতো ৰুত্তনযেনেৰ পটিলদ্ধসদ্ধো অহোসি. মহাসেট্ঠি তস্স সীলাচারং অজ্ঝাসযঞ্চ ঞত্ৰা ভুজিস্সং কত্ৰা ‘যথাসুখং পব্বজা’তি আহ. তং ভিক্খূ পব্বাজেসু’’ন্তি. সো পব্বজিতকালতো পট্ঠায কুসীতো হীনৰীরিযো হুত্ৰা ন কিঞ্চি ৰত্তপটিৰত্তং করোতি, কুতো সমণধম্মং, কেৰলং যাৰদত্থং ভুঞ্জিত্ৰা নিদ্দাবহুলো ৰিহরতি. ধম্মস্সৰনকালেপি একং কোণং পৰিসিত্ৰা পরিসপরিযন্তে নিসিন্নো ঘুরুঘুরুপস্সাসী নিদ্দাযতেৰ. অথস্স ভগৰা পুব্বূপনিস্সযং ওলোকেত্ৰা সংৰেগজননত্থং ‘‘মিদ্ধী যদা হোতি মহগ্ঘসো চা’’তি গাথং অভাসি.

১৭. তত্থ মিদ্ধীতি থিনমিদ্ধাভিভূতো, যঞ্হি মিদ্ধং অভিভৰতি, তং থিনম্পি অভিভৰতেৰ. যদাতি যস্মিং কালে. মহগ্ঘসোতি মহাভোজনো, আহরহত্থকঅলংসাটকতত্থৰট্টককাকমাসকভুত্তৰমিতকানং অঞ্ঞতরো ৰিয. নিদ্দাযিতাতি সুপনসীলো. সম্পরিৰত্তসাযীতি সম্পরিৰত্তকং সম্পরিৰত্তকং নিপজ্জিত্ৰা উভযেনপি সেয্যসুখং পস্সসুখং মিদ্ধসুখং অনুযুত্তোতি দস্সেতি. নিৰাপপুট্ঠোতি কুণ্ডকাদিনা সূকরভত্তেন পুট্ঠো ভরিতো. ঘরসূকরো হি বালকালতো পট্ঠায পোসিযমানো থূলসরীরকালে গেহা বহি নিক্খমিতুং অলভন্তো হেট্ঠামঞ্চাদীসু সম্পরিৰত্তেত্ৰা সম্পরিৰত্তেত্ৰা সযতেৰ. ইদং ৰুত্তং হোতি – যদা পুরিসো মিদ্ধী চ হোতি মহগ্ঘসো চ নিৰাপপুট্ঠো মহাৰরাহো ৰিয অঞ্ঞেন ইরিযাপথেন যাপেতুং অসক্কোন্তো নিদ্দাযনসীলো সম্পরিৰত্তসাযী, তদা সো ‘‘অনিচ্চং দুক্খং অনত্তা’’তি তীণি লক্খণানি মনসিকাতুং ন সক্কোতি. তেসং অমনসিকারা মন্দপঞ্ঞো পুনপ্পুনং গব্ভং উপেতি, গব্ভাৰাসতো ন পরিমুচ্চতেৰাতি. তং সুত্ৰা দাসকত্থেরো সংৰেগজাতো ৰিপস্সনং পট্ঠপেত্ৰা নচিরস্সেৰ অরহত্তং সচ্ছাকাসি. তেন ৰুত্তং অপদানে (অপ. থের ২.৫১.৭৪, ৮০-৮৪) –

‘‘অজিতো নাম সম্বুদ্ধো, হিমৰন্তে ৰসী তদা;

চরণেন চ সম্পন্নো, সমাধিকুসলো মুনি.

‘‘সুৰণ্ণৰণ্ণে সম্বুদ্ধে, আহুতীনং পটিগ্গহে;

রথিযং পটিপজ্জন্তে, অম্বফলমদাসহং.

‘‘একনৰুতে ইতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরো ইমায গাথায মং ভগৰা ওৰদি, ‘‘অযং গাথা ময্হং অঙ্কুসভূতা’’তি তমেৰ গাথং পচ্চুদাহাসি. তযিদং থেরস্স পরিৰত্তাহারনযেন অঞ্ঞাব্যাকরণং জাতং.

দাসকত্থেরগাথাৰণ্ণনা নিট্ঠিতা.

৮. সিঙ্গালপিতুত্থেরগাথাৰণ্ণনা

অহু বুদ্ধস্স দাযাদোতি সিঙ্গালকপিতুত্থেরস্স গাথা. কা উপ্পত্তি? সো কির ইতো চতুনৰুতে কপ্পে সতরংসিং নাম পচ্চেকসম্বুদ্ধং পিণ্ডায চরন্তং দিস্ৰা পসন্নমানসো ৰন্দিত্ৰা অত্তনো হত্থগতং তালফলং অদাসি. তেন পুঞ্ঞকম্মেন দেৰলোকে নিব্বত্তো অপরাপরং পুঞ্ঞানি কত্ৰা সুগতীসুযেৰ সংসরন্তো কস্সপস্স ভগৰতো কালে মনুস্সযোনিযং নিব্বত্তো সাসনে পটিলদ্ধসদ্ধো হুত্ৰা পব্বজিত্ৰা অট্ঠিকসঞ্ঞং ভাৰেসি. পুন ইমস্মিং বুদ্ধুপ্পাদে সাৰত্থিযং কুলগেহে নিব্বত্তিত্ৰা ৰযপ্পত্তো দারপরিগ্গহং কত্ৰা একং পুত্তং লভিত্ৰা তস্স ‘‘সিঙ্গালকো’’তি নামং অকাসি. তেন নং সিঙ্গালকপিতাতি ৰোহরন্তি. সো অপরভাগে ঘরবন্ধনং পহায সাসনে পব্বজি. তস্স ভগৰা অজ্ঝাসযং ওলোকেন্তো অট্ঠিকসঞ্ঞাকম্মট্ঠানং অদাসি. সো তং গহেত্ৰা ভগ্গেসু ৰিহরতি সুসুমারগিরে ভেসকল়াৰনে, অথস্স তস্মিং ৰনে অধিৰত্থা দেৰতা উস্সাহজননত্থং ‘‘ভাৰনাফলং নচিরস্সেৰ হত্থগতং করিস্সতী’’তি ইমমত্থং অঞ্ঞাপদেসেন ৰিভাৰেন্তী ‘‘অহু বুদ্ধস্স দাযাদো’’তি গাথং অভাসি.

১৮. তত্থ অহূতি হোতি, ৰত্তমানত্থে হি ইদং অতীতকালৰচনং. বুদ্ধস্সাতি সব্বঞ্ঞুবুদ্ধস্স. দাযাদোতি ধম্মদাযাদো নৰৰিধস্স লোকুত্তরধম্মদাযস্স অত্তনো সম্মাপটিপত্তিযা আদাযকো গণ্হনকো. অথ ৰা অহূতি অহোসি. এৰংনামস্স বুদ্ধস্স দাযাদভাৰে কোচি ৰিবন্ধো ইদানেৰ ভৰিস্সতীতি অধিপ্পাযো. তেনাহ ‘‘মঞ্ঞেহং কামরাগং সো, খিপ্পমেৰ ৰহিস্সতী’’তি. ভেসকল়াৰনেতি ভেসকেন নাম যক্খেন লভিতত্তা পরিগ্গহিতত্তা, ভেসকল়ানং ৰা কট্ঠাদীনং বহুলতায ‘‘ভেসকল়াৰন’’ন্তি লদ্ধনামে অরঞ্ঞে. তস্স ভিক্খুনো বুদ্ধস্স দাযাদভাৰে কারণং ৰদন্তো ‘‘কেৰলং অট্ঠিসঞ্ঞায, অফরী পথৰিং ইম’’ন্তি আহ. তত্থ কেৰলন্তি সকলং অনৰসেসং. অট্ঠিসঞ্ঞাযাতি অট্ঠিকভাৰনায. অফরীতি ‘‘অট্ঠী’’তি অধিমুচ্চনৰসেন পত্থরি. পথৰিন্তি অত্তভাৰপথৰিং. অত্তভাৰো হি ইধ ‘‘পথৰী’’তি ৰুত্তো ‘‘কো ইমং পথৰিং ৰিচ্চেস্সতী’’তিআদীসু ৰিয. মঞ্ঞেহন্তি মঞ্ঞে অহং. ‘‘মঞ্ঞাহ’’ন্তিপি পাঠো. সোতি সো ভিক্খু. খিপ্পমেৰ নচিরস্সেৰ কামরাগং পহিস্সতি পজহিস্সতীতি মঞ্ঞে. কস্মা? অট্ঠিকসঞ্ঞায কামরাগস্স উজুপটিপক্খভাৰতো. ইদং ৰুত্তং হোতি – যো একস্মিং পদেসে লদ্ধায অত্থিকসঞ্ঞায সকলং অত্তনো সব্বেসং ৰা অত্তভাৰং ‘‘অট্ঠী’’ত্ৰেৰ ফরিত্ৰা ঠিতো, সো ভিক্খু তং অট্ঠিকঝানং পাদকং কত্ৰা ৰিপস্সন্তো নচিরেনেৰ অনাগামিমগ্গেন কামরাগং, সব্বং ৰা কামনট্ঠেন ‘‘কামো’’, রঞ্জনট্ঠেন ‘‘রাগো’’তি চ লদ্ধনামং তণ্হং অগ্গমগ্গেন পজহিস্সতীতি. ইমং গাথং সুত্ৰা সো থেরো ‘‘অযং দেৰতা ময্হং উস্সাহজননত্থং এৰমাহা’’তি অপ্পটিৰানৰীরিযং অধিট্ঠায ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৫১.৮৫-৯০) –

‘‘সতরংসী নাম ভগৰা, সযম্ভূ অপরাজিতো;

ৰিৰেকা উট্ঠহিত্ৰান, গোচরাযাভিনিক্খমি.

‘‘ফলহত্থো অহং দিস্ৰা, উপগচ্ছিং নরাসভং;

পসন্নচিত্তো সুমনো, তালফলমদাসহং.

‘‘চতুন্নৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা তায দেৰতায ৰুত্তৰচনং পতিমানেন্তো তমেৰ গাথং উদানৰসেন অভাসি. তদেৰস্স থেরস্স অঞ্ঞাব্যাকরণং অহোসীতি.

সিঙ্গালপিতুত্থেরগাথাৰণ্ণনা নিট্ঠিতা.

৯. কুলত্থেরগাথাৰণ্ণনা

উদকঞ্হি নযন্তীতি আযস্মতো কুলত্থেরস্স গাথা. কা উপ্পত্তি? অযং কির থেরো পুব্বেপি ৰিৰট্টূপনিস্সযং বহুং কুসলং উপচিনিত্ৰা অধিকারসম্পন্নো ৰিপস্সিং ভগৰন্তং আকাসে গচ্ছন্তং দিস্ৰা পসন্নমানসো নাল়িকেরফলং দাতুকামো অট্ঠাসি. সত্থা তস্স চিত্তং ঞত্ৰা ওতরিত্ৰা পটিগ্গণ্হি. সো অতিৰিয পসন্নচিত্তো হুত্ৰা তেনেৰ সদ্ধাপটিলাভেন সত্থারং উপসঙ্কমিত্ৰা পব্বজ্জং যাচি, সত্থা অঞ্ঞতরং ভিক্খুং আণাপেসি – ‘‘ইমং পুরিসং পব্বাজেহী’’তি. সো পব্বজিত্ৰা লদ্ধূপসম্পদো সমণধম্মং কত্ৰা ততো চুতো ছপি বুদ্ধন্তরানি দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং ব্রাহ্মণকুলে নিব্বত্তি. কুলোতিস্স নামং অহোসি. সো ৰযপ্পত্তো সাসনে লদ্ধপ্পসাদো ভগৰতো সন্তিকে পব্বজিত্ৰা ৰিক্খেপবহুলতায ৰিসেসং নিব্বত্তেতুং নাসক্খি. অথেকদিৰসং গামং পিণ্ডায পৰিসন্তো অন্তরামগ্গে ভূমিং খণিত্ৰা উদকৰাহকং কত্ৰা ইচ্ছিতিচ্ছিতট্ঠানে উদকং নেন্তে পুরিসে দিস্ৰা তং সল্লক্খেত্ৰা গামং পৰিট্ঠো অঞ্ঞতরং উসুকারং উসুদণ্ডকং উসুযন্তে পক্খিপিত্ৰা অক্খিকোটিযা ওলোকেত্ৰা উজুং করোন্তং দিস্ৰা তম্পি সল্লক্খেত্ৰা গচ্ছন্তো পুরতো গন্ত্ৰা অরনেমিনাভিআদিকে রথচক্কাৰযৰে তচ্ছন্তে তচ্ছকে দিস্ৰা তম্পি সল্লক্খেত্ৰা ৰিহারং পৰিসিত্ৰা কতভত্তকিচ্চো পত্তচীৰরং পটিসামেত্ৰা দিৰাৰিহারে নিসিন্নো অত্তনা দিট্ঠনিমিত্তানি উপমাভাৰেন গহেত্ৰা অত্তনো চিত্তদমনে উপনেন্তো ‘‘অচেতনং উদকম্পি মনুস্সা ইচ্ছিকিচ্ছিতট্ঠানং নযন্তি তথা অচেতনং ৰঙ্কম্পি সরদণ্ডং উপাযেন নমেন্তো উজুং করোন্তি, তথা অচেতনং কট্ঠকল়িঙ্গরাদিং তচ্ছকা নেমিআদিৰসেন ৰঙ্কং উজুঞ্চ করোন্তি. অথ কস্মা অহং সকচিত্তং উজুং ন করিস্সামী’’তি চিন্তেত্ৰা ৰিপস্সনং পট্ঠপেত্ৰা ঘটেন্তো ৰাযমন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৫১.৯১-৯৯) –

‘‘নগরে বন্ধুমতিযা, আরামিকো অহং তদা;

অদ্দসং ৰিরজং বুদ্ধং, গচ্ছন্তং অনিলঞ্জসে.

‘‘নাল়িকেরফলং গয্হ, বুদ্ধসেট্ঠস্সদাসহং;

আকাসে ঠিতকো সন্তো, পটিগ্গণ্হি মহাযসো.

‘‘ৰিত্তিসঞ্জননো ময্হং, দিট্ঠধম্মসুখাৰহো;

ফলং বুদ্ধস্স দত্ৰান, ৰিপ্পসন্নেন চেতসা.

‘‘অধিগচ্ছিং তদা পীতিং, ৰিপুলঞ্চ সুখুত্তমং;

উপ্পজ্জতেৰ রতনং, নিব্বত্তস্স তহিং তহিং.

‘‘একনৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘দিব্বচক্খু ৰিসুদ্ধং মে, সমাধিকুসলো অহং;

অভিঞ্ঞাপারমিপ্পত্তো, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

এৰং যানি নিমিত্তানি অঙ্কুসে কত্ৰা ৰিপস্সনং ৰড্ঢেত্ৰা অরহত্তং পাপুণি, তেহি সদ্ধিং অত্তনো চিত্তদমনং সংসন্দিত্ৰা অঞ্ঞং ব্যাকরোন্তো ‘‘উদকঞ্হি নযন্তি নেত্তিকা’’তি গাথং অভাসি.

১৯. তত্থ উদকং হীতি হি-সদ্দো নিপাতমত্তং. নযন্তীতি পথৰিযা তং তং থলট্ঠানং খণিত্ৰা নিন্নট্ঠানং পূরেত্ৰা মাতিকং ৰা কত্ৰা রুক্খদোণিং ৰা ঠপেত্ৰা অত্তনো ইচ্ছিতিচ্ছিতট্ঠানং নেন্তি. তথা তে নেন্তীতি নেত্তিকা. তেজনন্তি কণ্ডং. ইদং ৰুত্তং হোতি – নেত্তিকা অত্তনো রুচিযা ইচ্ছিতিচ্ছিতট্ঠানং উদকং নযন্তি, উসুকারাপি তাপেত্ৰা তেজনং নমযন্তি উজুং করোন্তি. নমনৰসেন তচ্ছকা নেমিআদীনং অত্থায তচ্ছন্তা দারুং নমযন্তি অত্তনো রুচিযা উজুং ৰা ৰঙ্কং ৰা করোন্তি. এৰং এত্তকং আরম্মণং কত্ৰা সুব্বতা যথাসমাদিন্নেন সীলাদিনা সুন্দরৰতা ধীরা সোতাপত্তিমগ্গাদীনং উপ্পাদেন্তা অত্তানং দমেন্তি, অরহত্তং পন পত্তেসু একন্তদন্তা নাম হোন্তীতি.

কুলত্থেরগাথাৰণ্ণনা নিট্ঠিতা.

১০. অজিতত্থেরগাথাৰণ্ণনা

মরণে মে ভযং নত্থীতি আযস্মতো অজিতত্থেরস্স গাথা. কা উপ্পত্তি? সো কির একনৰুতে কপ্পে ৰিপস্সিং ভগৰন্তং পস্সিত্ৰা পসন্নচিত্তো কপিত্থফলং অদাসি. ততো পরম্পি তং তং পুঞ্ঞং কত্ৰা দেৰমনুস্সেসু সংসরন্তো ইমস্মিং কপ্পে অনুপ্পন্নে এৰ অম্হাকং সত্থরি সাৰত্থিযং মহাকোসলরঞ্ঞো অগ্গাসনিযস্স ব্রাহ্মণস্স পুত্তো হুত্ৰা নিব্বত্তি. তস্স অজিতোতি নামং অহোসি. তস্মিঞ্চ সমযে সাৰত্থিৰাসী বাৰরী নাম ব্রাহ্মণো তীহি মহাপুরিসলক্খণেহি সমন্নাগতো তিণ্ণং ৰেদানং পারগূ সাৰত্থিতো নিক্খমিত্ৰা তাপসপব্বজ্জং পব্বজিত্ৰা গোধাৰরীতীরে কপিত্থারামে ৰসতি. অথ অজিতো তস্স সন্তিকে পব্বজিতো অত্থকামায দেৰতায চোদিতেন বাৰরিনা সত্থু সন্তিকং পেসিতো তিস্সমেত্তেয্যাদীহি সদ্ধিং ভগৰন্তং উপসঙ্কমিত্ৰা মনসাৰ পঞ্হে পুচ্ছিত্ৰা তেসু ৰিস্সজ্জিতেসু পসন্নচিত্তো সত্থু সন্তিকে পব্বজিত্ৰা কম্মট্ঠানং গহেত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৫২.৭-১১) –

‘‘সুৰণ্ণৰণ্ণং সম্বুদ্ধং, আহুতীনং পটিগ্গহং;

রথিযং পটিপজ্জন্তং, কপিত্থং অদদিং ফলং.

‘‘একনৰুতিতো কপ্পে, যং ফলং অদদিং দদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্তো সীহনাদং নদন্তো ‘‘মরণে মে ভযং নত্থী’’তি গাথং অভাসি.

২০. তত্থ মরণেতি মরণনিমিত্তং মরণহেতু. মেতি ময্হং, ভযং নত্থি উচ্ছিন্নভৰমূলতায পরিক্খীণজাতিকত্তা. অনুচ্ছিন্নভৰমূলানঞ্হি ‘‘কীদিসী নু খো ময্হং আযতিং উপ্পত্তী’’তি মরণতো ভযং ভৰেয্য. নিকন্তীতি অপেক্খা তণ্হা, সা নত্থি জীৰিতে সুপরিমদ্দিতসঙ্খারতায উপাদানক্খন্ধানং দুক্খাসারকাদিভাৰেন সুট্ঠু উপট্ঠহনতো. এৰংভূতো চাহং সন্দেহং সরীরং, সকং ৰা দেহং দেহসঙ্খাতং দুক্খভারং নিক্খিপিস্সামি ছড্ডেস্সামি, নিক্খিপন্তো চ ‘‘‘ইমিনা সরীরকেন সাধেতব্বং সাধিতং, ইদানি তং একংসেন ছড্ডনীযমেৰা’তি পঞ্ঞাৰেপুল্লপ্পত্তিযা সম্পজানো সতিৰেপুল্লপ্পত্তিযা পটিস্সতো নিক্খিপিস্সামী’’তি. ইমং পন গাথং ৰত্ৰা থেরো ঝানং সমাপজ্জিত্ৰা তদনন্তরং পরিনিব্বাযীতি.

অজিতত্থেরগাথাৰণ্ণনা নিট্ঠিতা.

দুতিযৰগ্গৰণ্ণনা নিট্ঠিতা.

৩. ততিযৰগ্গো

১. নিগ্রোধত্থেরগাথাৰণ্ণনা

নাহং ভযস্স ভাযামীতি আযস্মতো নিগ্রোধত্থেরস্স গাথা. কা উপ্পত্তি? অযং কির ইতো অট্ঠারসে কপ্পসতে ব্রাহ্মণমহাসালকুলে নিব্বত্তিত্ৰা ৰযপ্পত্তো কামেসু আদীনৰং নেক্খম্মে চ আনিসংসং দিস্ৰা ঘরবন্ধনং পহায অরঞ্ঞাযতনং পৰিসিত্ৰা অঞ্ঞতরস্মিং সালৰনে পণ্ণসালং কত্ৰা তাপসপব্বজং পব্বজিত্ৰা ৰনমূলফলাহারো ৰসতি. তেন সমযেন পিযদস্সী নাম সম্মাসম্বুদ্ধো লোকে উপ্পজ্জিত্ৰা সদেৰকস্স লোকস্স ধম্মামতৰস্সেন কিলেসসন্তাপং নিব্বাপেন্তো একদিৰসং তাপসে অনুকম্পায তং সালৰনং পৰিসিত্ৰা নিরোধসমাপত্তিং সমাপন্নো. তাপসো ৰনমূলফলত্থায গচ্ছন্তো ভগৰন্তং দিস্ৰা পসন্নমানসো পুপ্ফিতসালদণ্ডসাখাযো গহেত্ৰা সালমণ্ডপং কত্ৰা তং সব্বত্থকমেৰ সালপুপ্ফেহি সঞ্ছাদেত্ৰা ভগৰন্তং ৰন্দিত্ৰা পীতিসোমনস্সৰসেনেৰ আহারত্থাযপি অগন্ত্ৰা নমস্সমানো অট্ঠাসি. সত্থা নিরোধতো ৰুট্ঠায তস্স অনুকম্পায ‘‘ভিক্খুসঙ্ঘো আগচ্ছতূ’’তি চিন্তেসি, ‘‘ভিক্খুসঙ্ঘেপি চিত্তং পসাদেস্সতী’’তি. তাৰদেৰ ভিক্খুসঙ্ঘো আগতো. সো ভিক্খুসঙ্ঘম্পি দিস্ৰা পসন্নমানসো ৰন্দিত্ৰা অঞ্জলিং পগ্গয্হ অট্ঠাসি. সত্থা সিতস্স পাতুকরণাপদেসেন তস্স ভাৰিনিং সম্পত্তিং পকাসেন্তো ধম্মং কথেত্ৰা পক্কামি সদ্ধিং ভিক্খুসঙ্ঘেন. সো তেন পুঞ্ঞকম্মেন দেৰমনুস্সেসুযেৰ সংসরন্তো ৰিৰট্টূপনিস্সযং বহুং কুসলং উপচিনিত্ৰা ইমস্মিং বুদ্ধুপ্পাদে সাৰত্থিযং ব্রাহ্মণমহাসালকুলে নিব্বত্তি, নিগ্রোধোতিস্স নামং অহোসি. সো জেতৰনপটিগ্গহণদিৰসে বুদ্ধানুভাৰদস্সনেন সঞ্জাতপ্পসাদো পব্বজিত্ৰা ৰিপস্সনং আরভিত্ৰা নচিরস্সেৰ ছল়ভিঞ্ঞো অহোসি. তেন ৰুত্তং অপদানে (অপ. থের ২.৪৯.১৯০-২২০) –

‘‘অজ্ঝোগাহেত্ৰা সালৰনং, সুকতো অস্সমো মম;

সালপুপ্ফেহি সঞ্ছন্নো, ৰসামি ৰিপিনে তদা.

‘‘পিযদস্সী চ ভগৰা, সযম্ভূ অগ্গপুগ্গলো;

ৰিৰেককামো সম্বুদ্ধো, সালৰনমুপাগমি.

‘‘অস্সমা অভিনিক্খম্ম, পৰনং অগমাসহং;

মূলফলং গৰেসন্তো, আহিন্দামি ৰনে তদা.

‘‘তত্থদ্দসাসিং সম্বুদ্ধং, পিযদস্সিং মহাযসং;

সুনিসিন্নং সমাপন্নং, ৰিরোচন্তং মহাৰনে.

‘‘চতুদণ্ডে ঠপেত্ৰান, বুদ্ধস্স উপরী অহং;

মণ্ডপং সুকতং কত্ৰা, সালপুপ্ফেহি ছাদযিং.

‘‘সত্তাহং ধারযিত্ৰান, মণ্ডপং সালছাদিতং;

তত্থ চিত্তং পসাদেত্ৰা, বুদ্ধসেট্ঠমৰন্দহং.

‘‘ভগৰা তম্হি সমযে, ৰুট্ঠহিত্ৰা সমাধিতো;

যুগমত্তং পেক্খমানো, নিসীদি পুরিসুত্তমো.

‘‘সাৰকো ৰরুণো নাম, পিযদস্সিস্স সত্থুনো;

ৰসীসতসহস্সেহি, উপগচ্ছি ৰিনাযকং.

‘‘পিযদস্সী চ ভগৰা, লোকজেট্ঠো নরাসভো;

ভিক্খুসঙ্ঘে নিসীদিত্ৰা, সিতং পাতুকরী জিনো.

‘‘অনুরুদ্ধো উপট্ঠাকো, পিযদস্সিস্স সত্থুনো;

একংসং চীৰরং কত্ৰা, অপুচ্ছিত্থ মহামুনিং.

‘‘কো নু খো ভগৰা হেতু, সিতকম্মস্স সত্থুনো;

কারণে ৰিজ্জমানম্হি, সত্থা পাতুকরে সিতং.

‘‘সত্তাহং সালচ্ছদনং, যো মে ধারেসি মাণৰো;

তস্স কম্মং সরিত্ৰান, সিতং পাতুকরিং অহং.

‘‘অনোকাসং ন পস্সামি, যত্থ পুঞ্ঞং ৰিপচ্চতি;

দেৰলোকে মনুস্সে ৰা, ওকাসোৰ ন সম্মতি.

‘‘দেৰলোকে ৰসন্তস্স, পুঞ্ঞকম্মসমঙ্গিনো;

যাৰতা পরিসা তস্স, সালচ্ছন্না ভৰিস্সতি.

‘‘তত্থ দিব্বেহি নচ্চেহি, গীতেহি ৰাদিতেহি চ;

রমিস্সতি সদা সন্তো, পুঞ্ঞকম্মসমাহিতো.

‘‘যাৰতা পরিসা তস্স, গন্ধগন্ধী ভৰিস্সতি;

সালস্স পুপ্ফৰস্সো চ, পৰস্সিস্সতি তাৰদে.

‘‘ততো চুতোযং মনুজো, মানুসং আগমিস্সতি;

ইধাপি সালচ্ছদনং, সব্বকালং ধরিস্সতি.

‘‘ইধ নচ্চঞ্চ গীতঞ্চ, সম্মতাল়সমাহিতং;

পরিৰারেস্সন্তি মং নিচ্চং, বুদ্ধপূজাযিদং ফলং.

‘‘উগ্গচ্ছন্তে চ সূরিযে, সালৰস্সং পৰস্সতে;

পুঞ্ঞকম্মেন সংযুত্তং, ৰস্সতে সব্বকালিকং.

‘‘অট্ঠারসে কপ্পসতে, ওক্কাককুলসম্ভৰো;

গোতমো নাম নামেন, সত্থা লোকে ভৰিস্সতি.

‘‘তস্স ধম্মে সুদাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো.

‘‘ধম্মং অভিসমেন্তস্স, সালচ্ছন্নং ভৰিস্সতি;

চিতকে ঝাযমানস্স, ছদনং তত্থ হেস্সতি.

‘‘ৰিপাকং কিত্তযিত্ৰান, পিযদস্সী মহামুনি;

পরিসায ধম্মং দেসেসি, তপ্পেন্তো ধম্মৰুট্ঠিযা.

‘‘তিংসকপ্পানি দেৰেসু, দেৰরজ্জমকারযিং;

সট্ঠি চ সত্তক্খত্তুঞ্চ, চক্কৰত্তী অহোসহং.

‘‘দেৰলোকা ইধাগন্ত্ৰা, লভামি ৰিপুলং সুখং;

ইধাপি সালচ্ছদনং, মণ্ডপস্স ইদং ফলং.

‘‘অযং পচ্ছিমকো ময্হং, চরিমো ৰত্ততে ভৰো;

ইধাপি সালচ্ছদনং, হেস্সতি সব্বকালিকং.

‘‘মহামুনিং তোসযিত্ৰা, গোতমং সক্যপুঙ্গৰং;

পত্তোম্হি অচলং ঠানং, হিত্ৰা জযপরাজযং.

‘‘অট্ঠারসে কপ্পসতে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং, ভৰা সব্বে সমূহতা;

নাগোৰ বন্ধনং ছেত্ৰা, ৰিহরামি অনাসৰো.

‘‘স্ৰাগতং ৰত মে আসি, বুদ্ধসেট্ঠস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি.

এৰং পন ছল়ভিঞ্ঞো হুত্ৰা ফলসুখেন ৰীতিনামেন্তো সাসনস্স নিয্যানিকভাৰৰিভাৰনত্থং অঞ্ঞাব্যাকরণৰসেন ‘‘নাহং ভযস্স ভাযামী’’তি গাথং অভাসি.

২১. তত্থ ভাযন্তি এতস্মাতি ভযং, জাতিজরাদি. ভযস্সাতি নিস্সক্কে সামিৰচনং, ভযতো ভাযিতব্বনিমিত্তং জাতিজরামরণাদিনা হেতুনা নাহং ভাযামীতি অত্থো. তত্থ কারণমাহ ‘‘সত্থা নো অমতস্স কোৰিদো’’তি. অম্হাকং সত্থা অমতে কুসলো ৰেনেয্যানং অমতদানে ছেকো. যত্থ ভযং নাৰতিট্ঠতীতি যস্মিং নিব্বানে যথাৰুত্তং ভযং ন তিট্ঠতি ওকাসং ন লভতি. তেনাতি ততো নিব্বানতো. ৰজন্তীতি অভযট্ঠানমেৰ গচ্ছন্তি. নিব্বানঞ্হি অভযট্ঠানং নাম. কেন পন ৰজন্তীতি আহ ‘‘মগ্গেন ৰজন্তি ভিক্খৰো’’তি, অট্ঠঙ্গিকেন অরিযমগ্গেন সত্থু ওৰাদকরণা ভিক্খূ সংসারে ভযস্স ইক্খনকাতি অত্থো. যত্থাতি ৰা যং নিমিত্তং যস্স অরিযমগ্গস্স অধিগমহেতু অত্তানুৰাদাদিকং পঞ্চৰীসতিৰিধম্পি ভযং নাৰতিট্ঠতি পতিট্ঠং ন লভতি, তেন অরিযেন মগ্গেন ৰজন্তি অভযট্ঠানং সত্থু সাসনে ভিক্খূ, তেন মগ্গেন অহম্পি গতো, তস্মা নাহং ভযস্স ভাযামীতি থেরো অঞ্ঞং ব্যাকাসি.

নিগ্রোধত্থেরগাথাৰণ্ণনা নিট্ঠিতা.

২. চিত্তকত্থেরগাথাৰণ্ণনা

নীলাসুগীৰাতি আযস্মতো চিত্তকত্থেরস্স গাথা. কা উপ্পত্তি? সো কির পদুমুত্তরবুদ্ধকালতো পট্ঠায ৰিৰট্টূপনিস্সযং কুসলং আচিনন্তো ইতো একনৰুতে কপ্পে মনুস্সযোনিযং নিব্বত্তিত্ৰা ৰিঞ্ঞুত্তং পত্তো ৰিপস্সিং ভগৰন্তং পস্সিত্ৰা পসন্নমানসো পুপ্ফেহি পূজং কত্ৰা ৰন্দিত্ৰা ‘‘সন্তধম্মেন নাম এত্থ ভৰিতব্ব’’ন্তি সত্থরি নিব্বানে চ অধিমুচ্চি. সো তেন পুঞ্ঞকম্মেন ততো চুতো তাৰতিংসভৰনে নিব্বত্তো অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে রাজগহে ৰিভৰসম্পন্নস্স ব্রাহ্মণস্স পুত্তো হুত্ৰা নিব্বত্তি চিত্তকো নাম নামেন. সো ভগৰতি রাজগহং গন্ত্ৰা ৰেল়ুৰনে ৰিহরন্তে সত্থারং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা চরিযানুকূলং কম্মট্ঠানং গহেত্ৰা অরঞ্ঞাযতনং পৰিসিত্ৰা ভাৰনানুযুত্তো ঝানং নিব্বত্তেত্ৰা ঝানপাদকং ৰিপস্সনং ৰড্ঢেত্ৰা নচিরেনেৰ অরহত্তং পাপুণি. তেন ৰুত্তং অপদানে (অপ. থের ২.৫০.১-৭) –

‘‘কণিকারংৰ জোতন্তং, নিসিন্নং পব্বতন্তরে;

অদ্দসং ৰিরজং বুদ্ধং, ৰিপস্সিং লোকনাযকং.

‘‘তীণি কিঙ্কণিপুপ্ফানি, পগ্গয্হ অভিরোপযিং;

সম্বুদ্ধং অভিপূজেত্ৰা, গচ্ছামি দক্খিণামুখো.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসং অগচ্ছহং.

‘‘একনৰুতে ইতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা সত্থারং ৰন্দিতুং রাজগহং উপগতো তত্থ ভিক্খূহি ‘‘কিং, আৰুসো, অরঞ্ঞে অপ্পমত্তো ৰিহাসী’’তি পুট্ঠো অত্তনো অপ্পমাদৰিহারনিৰেদনেন অঞ্ঞং ব্যাকরোন্তো ‘‘নীলাসুগীৰা’’তি গাথং অভাসি.

২২. তত্থ নীলাসুগীৰাতি নীলসুগীৰা, গাথাসুখত্থঞ্হেত্থ দীঘো কতো, রাজিৰন্ততায সুন্দরায গীৰায সমন্নাগতোতি অত্থো. তে যেভুয্যেন চ নীলৰণ্ণতায নীলা. সোভনকণ্ঠতায সুগীৰা. সিখিনোতি মত্থকে জাতায সিখায সস্সিরিকভাৰেন সিখিনো. মোরাতি মযূরা. কারম্ভিযন্তি কারম্বরুক্খে. কারম্ভিযন্তি ৰা তস্স ৰনস্স নামং. তস্মা কারম্ভিযন্তি কারম্ভনামকে ৰনেতি অত্থো. অভিনদন্তীতি পাৰুস্সকালে মেঘগজ্জিতং সুত্ৰা কেকাসদ্দং করোন্তা উতুসম্পদাসিদ্ধেন সরেন হংসাদিকে অভিভৰন্তা ৰিয নদন্তি. তেতি তে মোরা. সীতৰাতকীল়িতাতি সীতেন মেঘৰাতেন সঞ্জাতকীল়িতা মধুরৰস্সিতং ৰস্সন্তা. সুত্তন্তি ভত্তসম্মদৰিনোদনত্থং সযিতং, কাযকিলমথপটিপস্সম্ভনায ৰা অনুঞ্ঞাতৰেলাযং সুপন্তং. ঝাযন্তি সমথৰিপস্সনাঝানেহি ঝাযনসীলং ভাৰনানুযুত্তং. নিবোধেন্তীতি পবোধেন্তি. ‘‘ইমেপি নাম নিদ্দং অনুপগন্ত্ৰা জাগরন্তা অত্তনা কত্তব্বং করোন্তি, কিমঙ্গং পনাহ’’ন্তি এৰং সম্পজঞ্ঞুপ্পাদনেন সযনতো ৰুট্ঠাপেন্তীতি অধিপ্পাযো.

চিত্তকত্থেরগাথাৰণ্ণনা নিট্ঠিতা.

৩. গোসালত্থেরগাথাৰণ্ণনা

অহং খো ৰেল়ুগুম্বস্মিন্তি আযস্মতো গোসালত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ৰিৰট্টূপনিস্সযং কুসলং আচিনন্তো ইতো একনৰুতে কপ্পে অঞ্ঞতরস্মিং পব্বতে রুক্খসাখাযং ওলম্বমানং পচ্চেকবুদ্ধস্স পংসুকূলচীৰরং দিস্ৰা ‘‘অরহদ্ধজো ৰতায’’ন্তি পসন্নচিত্তো পুপ্ফেহি পূজেহি. সো তেন পুঞ্ঞকম্মেন তাৰতিংসভৰনে নিব্বত্তো. ততো পট্ঠায দেৰমনুস্সেসুযেৰ সংসরন্তো ইমস্মিং বুদ্ধুপ্পাদে মগধরট্ঠে ইব্ভকুলে নিব্বত্তো গোসালো নাম নামেন. সোণেন পন কোটিকণ্ণেন কতপরিচযত্তা তস্স পব্বজিতভাৰং সুত্ৰা ‘‘সোপি নাম মহাৰিভৰো পব্বজিস্সতি, কিমঙ্গং পনাহ’’ন্তি সঞ্জাতসংৰেগো ভগৰতো সন্তিকে পব্বজিত্ৰা চরিযানুকূলং কম্মট্ঠানং গহেত্ৰা সপ্পাযং ৰসনট্ঠানং গৰেসন্তো অত্তনো জাতগামস্স অৰিদূরে একস্মিং সানুপব্বতে ৰিহাসি. তস্স মাতা দিৰসে দিৰসে ভিক্খং দেতি. অথেকদিৰসং গামং পিণ্ডায পৰিট্ঠস্স মাতা মধুসক্খরাভিসঙ্খতং পাযাসং অদাসি. সো তং গহেত্ৰা তস্স পব্বতস্স ছাযাযং অঞ্ঞতরস্স ৰেল়ুগুম্বস্স মূলে নিসীদিত্ৰা পরিভুঞ্জিত্ৰা ধোৰিতপত্তপাণী ৰিপস্সনং আরভি. ভোজনসপ্পাযলাভেন কাযচিত্তানং কল্লতায সমাহিতো উদযব্বযঞাণাদিকে তিক্খে সূরে ৰহন্তে অপ্পকসিরেনেৰ ৰিপস্সনং উস্সুক্কাপেত্ৰা মগ্গপটিপাটিযা ভাৰনং মত্থকং পাপেন্তো সহ পটিসম্ভিদাহি অরহত্তং সচ্ছাকাসি. তেন ৰুত্তং অপদানে (অপ. থের ২.৫০.৮-১৪) –

‘‘হিমৰন্তস্স অৰিদূরে, উদঙ্গণো নাম পব্বতো;

তত্থদ্দসং পংসুকূলং, দুমগ্গম্হি ৰিলম্বিতং.

‘‘তীণি কিঙ্কণিপুপ্ফানি, ওচিনিত্ৰানহং তদা;

হেট্ঠা পহট্ঠেন চিত্তেন, পংসুকূলং অপূজযিং.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসং অগচ্ছহং.

‘‘একনৰুতে ইতো কপ্পে, যং কম্মমকরিং তদা;

দুগ্গতিং নাভিজানামি, পূজিত্ৰা অরহদ্ধজং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন অধিগন্ত্ৰা দিট্ঠধম্মসুখৰিহারত্থং পব্বতসানুমেৰ গন্তুকামো অত্তনো পটিপত্তিং পৰেদেন্তো ‘‘অহং খো ৰেল়ুগুম্বস্মি’’ন্তি গাথং অভাসি.

২৩. তত্থ ৰেল়ুগুম্বস্মিন্তি ৰেল়ুগচ্ছস্স সমীপে, তস্স ছাযাযং. ভুত্ৰান মধুপাযসন্তি মধুপসিত্তপাযাসং ভুঞ্জিত্ৰা. পদক্খিণন্তি পদক্খিণগ্গাহেন, সত্থু ওৰাদস্স সম্মা সম্পটিচ্ছনেনাতি অত্থো. সম্মসন্তো খন্ধানং উদযব্বযন্তি পঞ্চন্নং উপাদানক্খন্ধানং উদযব্বযঞ্চ ৰিপস্সন্তো, যদিপি ইদানি কতকিচ্চো, ফলসমাপত্তিং পন সমাপজ্জিতুং ৰিপস্সনং পট্ঠপেন্তোতি অধিপ্পাযো. সানুং পটিগমিস্সামীতি পুব্বে মযা ৰুত্থপব্বতসানুমেৰ উদ্দিস্স গচ্ছিস্সামি. ৰিৰেকমনুব্রূহযন্তি পটিপস্সদ্ধিৰিৰেকং ফলসমাপত্তিকাযৰিৰেকঞ্চ পরিব্রূহযন্তো, তস্স ৰা পরিব্রূহনহেতু গমিস্সামীতি. এৰং পন ৰত্ৰা থেরো তত্থেৰ গতো, অযমেৰ চ ইমস্স থেরস্স অঞ্ঞাব্যাকরণগাথা অহোসি.

গোসালত্থেরগাথাৰণ্ণনা নিট্ঠিতা.

৪. সুগন্ধত্থেরগাথাৰণ্ণনা

অনুৰস্সিকো পব্বজিতোতি আযস্মতো সুগন্ধত্থেরস্স গাথা. কা উপ্পত্তি? সো কির ইতো দ্ৰানৰুতে কপ্পে তিস্সস্স নাম সম্মাসম্বুদ্ধস্স কালে মনুস্সযোনিযং নিব্বত্তিত্ৰা ৰিঞ্ঞুতং পত্তো মিগব্যধনেন অরঞ্ঞে ৰিচরতি. সত্থা তস্স অনুকম্পায পদৰল়ঞ্জং দস্সেত্ৰা গতো. সো সত্থু পদচেতিযানি দিস্ৰা পুরিমবুদ্ধেসু কতাধিকারতায ‘‘সদেৰকে লোকে অগ্গপুগ্গলস্স ইমানি পদানী’’তি পীতিসোমনস্সজাতো কোরণ্ডকপুপ্ফানি গহেত্ৰা পূজং কত্ৰা চিত্তং পসাদেসি. সো তেন পুঞ্ঞকম্মেন দেৰলোকে নিব্বত্তিত্ৰা ততো চুতো অপরাপরং পুঞ্ঞানি কত্ৰা দেৰমনুস্সেসু সংসরন্তো কস্সপস্স ভগৰতো কালে কুটুম্বিকো হুত্ৰা সত্থু ভিক্খুসঙ্ঘস্স চ মহাদানং পৰত্তেত্ৰা গন্ধকুটিং মহগ্ঘগোসিতচন্দনং পিসিত্ৰা তেন পরিভণ্ডং কত্ৰা পত্থনং পট্ঠপেসি – ‘‘নিব্বত্তনিব্বত্তট্ঠানে ময্হং সরীরং এৰংসুগন্ধং হোতূ’’তি. এৰং অঞ্ঞানিপি তত্থ তত্থ ভৰে বহূনি পুঞ্ঞকম্মানি কত্ৰা সুগতীসু এৰ পরিৰত্তমানো ইমস্মিং বুদ্ধুপ্পাদে সাৰত্থিযং ৰিভৰসম্পন্নস্স ব্রাহ্মণস্স গেহে নিব্বত্তি. নিব্বত্তস্স চ তস্স মাতুকুচ্ছিগতকালতো পট্ঠায মাতু সরীরং সকলম্পি গেহং সুরভিগন্ধং ৰাযতি. জাতদিৰসে পন ৰিসেসতো পরমসুগন্ধং সামন্তগেহেসুপি ৰাযতেৰ. তস্স মাতাপিতরো ‘‘অম্হাকং পুত্তো অত্তনাৰ অত্তনো নামং গহেত্ৰা আগতো’’তি সুগন্ধোত্ৰেৰ নামং অকংসু. সো অনুপুব্বেন ৰযপ্পত্তো মহাসেলত্থেরং দিস্ৰা তস্স সন্তিকে ধম্মং সুত্ৰা পব্বজিত্ৰা ৰিপস্সনায কম্মং করোন্তো সত্তাহব্ভন্তরে এৰ অরহত্তং পাপুণি. তেন ৰুত্তং অপদানে (অপ. থের ২.৫০.১৫-২৪) –

‘‘ৰনকম্মিকো পুরে আসিং, পিতুমাতুমতেনহং;

পসুমারেন জীৰামি, কুসলং মে ন ৰিজ্জতি.

‘‘মম আসযসামন্তা, তিস্সো লোকগ্গনাযকো;

পদানি তীণি দস্সেসি, অনুকম্পায চক্খুমা.

‘‘অক্কন্তে চ পদে দিস্ৰা, তিস্সনামস্স সত্থুনো;

হট্ঠো হট্ঠেন চিত্তেন, পদে চিত্তং পসাদযিং.

‘‘কোরণ্ডং পুপ্ফিতং দিস্ৰা, পাদপং ধরণীরুহং;

সকোসকং গহেত্ৰান, পদসেট্ঠং অপূজযিং.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘যং যং যোনুপপজ্জামি, দেৰত্তং অথ মানুসং;

কোরণ্ডকছৰী হোমি, সুপ্পভাসো ভৰামহং.

‘‘দ্ৰেনৰুতে ইতো কপ্পে, যং কম্মমকরিং তদা;

দুগ্গতিং নাভিজানামি, পদপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অঞ্ঞং ব্যাকরোন্তো ‘‘অনুৰস্সিকো পব্বজিতো’’তি ইমং গাথং অভাসি.

২৪. তত্থ অনুৰস্সিকোতি অনুগতো উপগতো ৰস্সং অনুৰস্সো, অনুৰস্সোৰ অনুৰস্সিকো. পব্বজিতোতি পব্বজ্জং উপগতো, পব্বজিতো হুত্ৰা উপগতৰস্সমত্তো একৰস্সিকোতি অত্থো. অথ ৰা অনুগতং পচ্ছাগতং অপগতং ৰস্সং অনুৰস্সং, তং অস্স অত্থীতি অনুৰস্সিকো. যস্স পব্বজিতস্স ৰস্সং অপরিপুণ্ণতায ন গণনূপগতং, সো এৰং ৰুত্তো, তস্মা অৰস্সিকোতি ৰুত্তং হোতি. পস্স ধম্মসুধম্মতন্তি তৰ সত্থু ধম্মস্স সুধম্মভাৰং স্ৰাক্খাততং একন্তনিয্যানিকতং পস্স, যত্থ অনুৰস্সিকো তুৰং পব্বজিতো. পুব্বেনিৰাসঞাণং দিব্বচক্খুঞাণং আসৰক্খযঞাণন্তি তিস্সো ৰিজ্জা তযা অনুপ্পত্তা সচ্ছিকতা, ততো এৰ কতং বুদ্ধস্স সাসনং সম্মাসম্বুদ্ধস্স সাসনং অনুসিট্ঠি ওৰাদো অনুসিক্খিতোতি কতকিচ্চতং নিস্সায পীতিসোমনস্সজাতো থেরো অত্তানং পরং ৰিয কত্ৰা ৰদতীতি.

সুগন্ধত্থেরগাথাৰণ্ণনা নিট্ঠিতা.

৫. নন্দিযত্থেরগাথাৰণ্ণনা

ওভাসজাতন্তি আযস্মতো নন্দিযত্থেরস্স গাথা. কা উপ্পত্তি? সো কির পদুমুত্তরস্স ভগৰতো কালে সত্থরি পরিনিব্বুতে চেতিযে চন্দনসারেন ৰেদিকং কারেত্ৰা উল়ারং পূজাসক্কারং পৰত্তেসি. ততো পট্ঠায অজ্ঝাসযসম্পন্নো হুত্ৰা তত্থ তত্থ ৰিৰট্টূপনিস্সযং বহুং পুঞ্ঞকম্মং আচিনিত্ৰা দেৰেসু চ মনুস্সেসু চ সংসরন্তো ইমস্মিং বুদ্ধুপ্পাদে কপিলৰত্থুস্মিং সক্যরাজকুলে নিব্বত্তি. তস্স মাতাপিতরো নন্দিং জনেন্তো জাতোতি নন্দিযোতি নামং অকংসু. সো ৰযপ্পত্তো অনুরুদ্ধাদীসু সত্থু সন্তিকে পব্বজন্তেসু সযম্পি পব্বজিত্ৰা ৰিপস্সনায কম্মং করোন্তো কতাধিকারতায নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.১৫.১৫-২০) –

‘‘পদুমুত্তরো নাম জিনো, লোকজেট্ঠো নরাসভো;

জলিত্ৰা অগ্গিখন্ধোৰ, সম্বুদ্ধো পরিনিব্বুতো.

‘‘নিব্বুতে চ মহাৰীরে, থূপো ৰিত্থারিকো অহু;

দূরতোৰ উপট্ঠেন্তি, ধাতুগেহৰরুত্তমে.

‘‘পসন্নচিত্তো সুমনো, অকং চন্দনৰেদিকং;

দিস্সতি থূপখন্ধো চ, থূপানুচ্ছৰিকো তদা.

‘‘ভৰে নিব্বত্তমানম্হি, দেৰত্তে অথ মানুসে.

ওমত্তং মে ন পস্সামি, পুব্বকম্মস্সিদং ফলং.

‘‘পঞ্চদসকপ্পসতে, ইতো অট্ঠ জনা অহুং;

সব্বে সমত্তনামা তে চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অনুরুদ্ধত্থেরাদীহি সদ্ধিং পাচীনৰংসমিগদাযে ৰিহরন্তে ইমস্মিং থেরে একদিৰসং মারো পাপিমা ভিংসাপেতুকামো তস্স ভেরৰরূপং দস্সেতি. থেরো তং ‘‘মারো অয’’ন্তি ঞত্ৰা ‘‘পাপিম, যে মারধেয্যং ৰীতিৰত্তা, তেসং তৰ কিরিযা কিং করিস্সতি, ততোনিদানং পন ত্ৰং এৰ ৰিঘাতং অনত্থং পাপুণিস্সসী’’তি দস্সেন্তো ‘‘ওভাসজাতং ফলগ’’ন্তি গাথং অভাসি.

২৫. তত্থ ওভাসজাতন্তি ঞাণোভাসেন জাতোভাসং অগ্গমগ্গঞাণস্স অধিগতত্তা. তেন অনৰসেসতো কিলেসন্ধকারস্স ৰিহতৰিদ্ধংসিতভাৰতো অতিৰিয পভস্সরন্তি অত্থো. ফলগন্তি ফলং গতং উপগতং, অগ্গফলঞাণসহিতন্তি অধিপ্পাযো. চিত্তন্তি খীণাসৰস্স চিত্তং সামঞ্ঞেন ৰদতি. তেনাহ ‘‘অভিণ্হসো’’তি. তঞ্হি নিরোধনিন্নতায খীণাসৰানং নিচ্চকপ্পং অরহত্তফলসমাপত্তিসমাপজ্জনতো ‘‘ফলেন সহিত’’ন্তি ৰত্তব্বতং অরহতি. তাদিসন্তি তথারূপং, অরহন্তন্তি অত্থো. আসজ্জাতি ৰিসোধেত্ৰা পরিভুয্য. কণ্হাতি মারং আলপতি, সো হি কণ্হকম্মত্তা কণ্হাভিজাতিতায চ ‘‘কণ্হো’’তি ৰুচ্চতি. দুক্খং নিগচ্ছসীতি ইধ কুচ্ছিঅনুপ্পৰেসাদিনা নিরত্থকং কাযপরিস্সমং দুক্খং, সম্পরাযে চ অপ্পতিকারং অপাযদুক্খং উপগমিস্সসি পাপুণিস্সসি. তং সুত্ৰা মারো ‘‘জানাতি মং সমণো’’তি তত্থেৰন্তরধাযীতি.

নন্দিযত্থেরগাথাৰণ্ণনা নিট্ঠিতা.

৬. অভযত্থেরগাথাৰণ্ণনা

সুত্ৰা সুভাসিতং ৰাচন্তি আযস্মতো অভযত্থেরস্স গাথা. কা উপ্পত্তি? সো কির পদুমুত্তরস্স ভগৰতো সাসনে পব্বজিত্ৰা ধম্মকথিকো হুত্ৰা ধম্মকথনকালে পঠমং চতূহি গাথাহি ভগৰন্তং অভিত্থৰিত্ৰা পচ্ছা ধম্মং কথেসি. তেনস্স পুঞ্ঞকম্মবলেন কপ্পানং সতসহস্সং অপাযপটিসন্ধি নাম নাহোসি. তথা হি ৰুত্তং –

‘‘অভিত্থৰিত্ৰা পদুমুত্তরং জিনং, পসন্নচিত্তো অভযো সযম্ভুং;

ন গচ্ছি কপ্পানি অপাযভূমিং, সতসহস্সানি উল়ারসদ্ধো’’তি. (অপ. থের ২.৫৫.২২১)

খেত্তসম্পত্তিযাদীহি তস্স চ পুব্বপচ্ছিমসন্নিট্ঠানচেতনানং অতিৰিয উল়ারভাৰেন সো অপরিমেয্যো পুঞ্ঞাভিসন্দো কুসলাভিসন্দো তাদিসো অহোসি. ‘‘অচিন্তিযে পসন্নানং, ৰিপাকো হোতি অচিন্তিযো’’তি (অপ. থের ১.১.৮২) হি ৰুত্তং. তত্থ তত্থ হি ভৰে উপচিতং পুঞ্ঞং তস্স উপত্থম্ভকমহোসি. তথা হি সো ৰিপস্সিস্স ভগৰতো কেতকপুপ্ফেহি পূজমকাসি. এৰং উল়ারেহি পুঞ্ঞৰিসেসেহি সুগতীসু এৰ সংসরন্তো ইমস্মিং বুদ্ধুপ্পাদে রঞ্ঞো বিম্বিসারস্স পুত্তো হুত্ৰা নিব্বত্তি. অভযোতিস্স নামং অহোসি. তস্স উপ্পত্তি পরতো আৰি ভৰিস্সতি. সো নিগণ্ঠেন নাটপুত্তেন উভতোকোটিকং পঞ্হং সিক্খাপেত্ৰা ‘‘ইমং পঞ্হং পুচ্ছিত্ৰা সমণস্স গোতমস্স ৰাদং আরোপেহী’’তি ৰিস্সজ্জিতো ভগৰন্তং উপসঙ্কমিত্ৰা তং পঞ্হং পুচ্ছিত্ৰা তস্স পঞ্হস্স অনেকংসব্যাকরণভাৰে ভগৰতা কথিতে নিগণ্ঠানং পরাজযং, সত্থু চ সম্মাসম্বুদ্ধভাৰং ৰিদিত্ৰা উপাসকত্তং পটিৰেদেসি. ততো রঞ্ঞে বিম্বিসারে কালঙ্কতে সঞ্জাতসংৰেগো সাসনে পব্বজিত্ৰা তালচ্ছিগ্গল়ূপমসুত্তদেসনায সোতাপন্নো হুত্ৰা পুন ৰিপস্সনং আরভিত্ৰা অরহত্তং সচ্ছাকাসি. তেন ৰুত্তং অপদানে (অপ. থের ২.৫২.১৭-২২) –

‘‘ৰিনতানদিযা তীরে, ৰিহাসি পুরিসুত্তমো;

অদ্দসং ৰিরজং বুদ্ধং, একগ্গং সুসমাহিতং.

‘‘মধুগন্ধস্স পুপ্ফেন, কেতকস্স অহং তদা;

পসন্নচিত্তো সুমনো, বুদ্ধসেট্ঠমপূজযিং.

‘‘একনৰুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিকিত্তনেন অঞ্ঞং ব্যাকরোন্তো ‘‘সুত্ৰা সুভাসিতং ৰাচ’’ন্তি গাথং অভাসি.

২৬. তত্থ সুত্ৰাতি সোতং ওদহিত্ৰা, সোতদ্ৰারানুসারেন উপধারেত্ৰা. সুভাসিতন্তি সুট্ঠু ভাসিতং, সম্মদেৰ ভাসিতং, সম্মাসম্বুদ্ধভাৰতো মহাকারুণিকতায চ কিঞ্চি অৰিসংৰাদেত্ৰা যথাধিপ্পেতস্স অত্থস্স একন্ততো সাধনৰসেন ভাসিতং চতুসচ্চৰিভাৰনীযধম্মকথং. ন হি সচ্চৰিনিমুত্তা ভগৰতো ধম্মদেসনা অত্থি. বুদ্ধস্সাতি সব্বঞ্ঞুবুদ্ধস্স. আদিচ্চবন্ধুনোতি আদিচ্চৰংসে সম্ভূতত্তা আদিচ্চো বন্ধু এতস্সাতি আদিচ্চবন্ধু, ভগৰা. তস্স আদিচ্চবন্ধুনো. আদিচ্চস্স ৰা বন্ধূতি আদিচ্চবন্ধু, ভগৰা. তস্স ভগৰতো ওরসপুত্তভাৰতো. তেনাহ ভগৰা –

‘‘যো অন্ধকারে তমসী পভঙ্করো, ৰেরোচনো মণ্ডলী উগ্গতেজো;

মা রাহু গিলী চরমন্তলিক্খে, পজং মমং রাহু পমুঞ্চ সূরিয’’ন্তি. (সং. নি. ১.৯১);

পচ্চব্যধিন্তি পটিৰিজ্ঝিং. হী-তি নিপাতমত্তং. নিপুণন্তি সণ্হং পরমসুখুমং, নিরোধসচ্চং, চতুসচ্চমেৰ ৰা. হী-তি ৰা হেতুঅত্থে নিপাতো. যস্মা পচ্চব্যধিং নিপুণং চতুসচ্চং, তস্মা ন দানি কিঞ্চি পটিৰিজ্ঝিতব্বং অত্থীতি অত্থো. যথা কিং পটিৰিজ্ঝীতি আহ ‘‘ৰালগ্গং উসুনা যথা’’তি. যথা সত্তধা ভিন্নস্স ৰালস্স কোটিং সুসিক্খিতো কুসলো ইস্সাসো উসুনা কণ্ডেন অৰিরজ্ঝন্তো ৰিজ্ঝেয্য, এৰং পচ্চব্যধিং নিপুণং অরিযসচ্চন্তি যোজনা.

অভযত্থেরগাথাৰণ্ণনা নিট্ঠিতা.

৭. লোমসকঙ্গিযত্থেরগাথাৰণ্ণনা

দব্বং কুসন্তি আযস্মতো লোমসকঙ্গিযত্থেরস্স গাথা. কা উপ্পত্তি? সো কির ইতো একনৰুতে কপ্পে ৰিপস্সিং ভগৰন্তং পস্সিত্ৰা পসন্নমানসো নানাপুপ্ফেহি পূজেত্ৰা তেন পুঞ্ঞকম্মেন দেৰলোকে নিব্বত্তো পুন অপরাপরং পুঞ্ঞানি কত্ৰা সুগতীসুযেৰ সংসরন্তো কস্সপস্স ভগৰতো সাসনে পব্বজিত্ৰা সমণধম্মং করোতি. তেন চ সমযেন সত্থারা ভদ্দেকরত্তপটিপদায কথিতায অঞ্ঞতরো ভিক্খু ভদ্দেকরত্তসুত্তৰসেন তেন সাকচ্ছং করোতি. সো তং ন সম্পাযাসি. অসম্পাযন্তো ‘‘অহং অনাগতে তুয্হং ভদ্দেকরত্তং কথেতুং সমত্থো ভৰেয্য’’ন্তি পণিধানং অকাসি, ইতরো ‘‘পুচ্ছেয্য’’ন্তি. এতেসু পঠমো একং বুদ্ধন্তরং দেৰমনুস্সেসু সংসরিত্ৰা অম্হাকং ভগৰতো কালে কপিলৰত্থুস্মিং সাকিযরাজকুলে নিব্বত্তি. তস্স সুখুমালভাৰেন সোণস্স ৰিয পাদতলেসু লোমানি জাতানি, তেনস্স লোমসকঙ্গিযোতি নামং অহোসি. ইতরো দেৰলোকে নিব্বত্তিত্ৰা চন্দনোতি পঞ্ঞাযিত্থ. লোমসকঙ্গিযো অনুরুদ্ধাদীসু সক্যকুমারেসু পব্বজন্তেসু পব্বজিতুং ন ইচ্ছি. অথ নং সংৰেজেতুং চন্দনো দেৰপুত্তো উপসঙ্কমিত্ৰা ভদ্দেকরত্তং পুচ্ছি. ইতরো ‘‘ন জানামী’’তি. পুন দেৰপুত্তো ‘‘অথ কস্মা তযা ‘ভদ্দেকরত্তং কথেয্য’ন্তি সঙ্গরো কতো, ইদানি পন নামমত্তম্পি ন জানাসী’’তি চোদেসি. ইতরো তেন সদ্ধিং ভগৰন্তং উপসঙ্কমিত্ৰা, ‘‘মযা কির, ভন্তে, পুব্বে ‘ইমস্স ভদ্দেকরত্তং কথেস্সামী’তি সঙ্গরো কতো’’তি পুচ্ছি. ভগৰা ‘‘আম, কুলপুত্ত, কস্সপস্স ভগৰতো কালে তযা এৰং কত’’ন্তি আহ. স্ৰাযমত্থো উপরিপণ্ণাসকে আগতনযেন ৰিত্থারতো ৰেদিতব্বো. অথ লোমসকঙ্গিযো ‘‘তেন হি, ভন্তে, পব্বাজেথ ম’’ন্তি আহ. ভগৰা ‘‘ন, খো, তথাগতা মাতাপিতূহি অননুঞ্ঞাতং পুত্তং পব্বাজেন্তী’’তি পটিক্খিপি. সো মাতু সন্তিকং গন্ত্ৰা ‘‘অনুজানাহি মং, অম্ম, পব্বজিতুং, পব্বজিস্সামহ’’ন্তি ৰত্ৰা, মাতরা ‘‘তাত, সুখুমালো ত্ৰং কথং পব্বজিস্সসী’’তি ৰুত্তে, ‘‘অত্তনো পরিস্সযসহনভাৰং পকাসেন্তো ‘‘দব্বং কুসং পোটকিল’’ন্তি গাথং অভাসি.

২৭. তত্থ দব্বন্তি দব্বতিণমাহ, যং ‘‘সদ্দুলো’’তিপি ৰুচ্চতি. কুসন্তি কুসতিণং, যো ‘‘কাসো’’তি ৰুচ্চতি. পোটকিলন্তি সকণ্টকং অকণ্টকঞ্চ গচ্ছং. ইধ পন সকণ্টকমেৰ অধিপ্পেতং. উসীরাদীনি সুৰিঞ্ঞেয্যানি. দব্বাদীনি তিণানি বীরণতিণানি পাদেহি অক্কন্তস্সাপি দুক্খজনকানি গমনন্তরাযকরানি চ, তানি চ পনাহং উরসা পনুদিস্সামি উরসাপি অপনেস্সামি. এৰং অপনেন্তো তং নিমিত্তং দুক্খং সহন্তো অরঞ্ঞাযতনে গুম্বন্তরং পৰিসিত্ৰা সমণধম্মং কাতুং সক্খিস্সামি. কো পন ৰাদো পাদেহি অক্কমনেতি দস্সেতি. ৰিৰেকমনুব্রূহযন্তি কাযৰিৰেকং চিত্তৰিৰেকং উপধিৰিৰেকঞ্চ অনুব্রূহযন্তো. গণসঙ্গণিকঞ্হি পহায কাযৰিৰেকং অনুব্রূহযন্তস্সেৰ অট্ঠতিংসায আরম্মণেসু যত্থ কত্থচি চিত্তং সমাদহন্তস্স চিত্তৰিৰেকো, ন সঙ্গণিকারতস্স. সমাহিতস্সেৰ ৰিপস্সনায কম্মং করোন্তস্স সমথৰিপস্সনঞ্চ যুগনদ্ধং করোন্তস্স কিলেসানং খেপনেন উপধিৰিৰেকাধিগমো, ন অসমাহিতস্স. তেন ৰুত্তং ‘‘ৰিৰেকমনুব্রূহযন্তি কাযৰিৰেকং চিত্তৰিৰেকং উপধিৰিৰেকঞ্চ অনুব্রূহযন্তো’’তি. এৰং পন পুত্তেন ৰুত্তে মাতা ‘‘তেন হি, তাত, পব্বজা’’তি অনুজানি. সো ভগৰন্তং উপসঙ্কমিত্ৰা পব্বজ্জং যাচি. তং সত্থা পব্বাজেসি. তং পব্বজিত্ৰা কতপুব্বকিচ্চং কম্মট্ঠানং গহেত্ৰা অরঞ্ঞং পৰিসন্তং ভিক্খূ আহংসু – ‘‘আৰুসো, ত্ৰং সুখুমালো কিং সক্খিস্সসি অরঞ্ঞে ৰসিতু’’ন্তি. সো তেসম্পি তমেৰ গাথং ৰত্ৰা অরঞ্ঞং পৰিসিত্ৰা ভাৰনং অনুযুঞ্জন্তো নচিরস্সেৰ ছল়ভিঞ্ঞো অহোসি. তেন ৰুত্তং অপদানে (অপ. থের ২.৫২.২৩-২৭) –

‘‘সুৰণ্ণৰণ্ণং সম্বুদ্ধং, আহুতীনং পটিগ্গহং;

রথিযং পটিপজ্জন্তং, নানাপুপ্ফেহি পূজযিং.

‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরো অঞ্ঞং ব্যাকরোন্তো তংযেৰ গাথং অভাসীতি.

লোমসকঙ্গিযত্থেরগাথাৰণ্ণনা নিট্ঠিতা.

৮. জম্বুগামিযপুত্তত্থেরগাথাৰণ্ণনা

কচ্চি নো ৰত্থপসুতোতি আযস্মতো জম্বুগামিযপুত্তত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো হুত্ৰা তত্থ তত্থ ৰিৰট্টূপনিস্সযং কুসলং আচিনন্তো ইতো একতিংসে কপ্পে ৰেস্সভুস্স ভগৰতো কালে একদিৰসং কিংসুকানি পুপ্ফানি দিস্ৰা তানি পুপ্ফানি গহেত্ৰা বুদ্ধগুণে অনুস্সরন্তো ভগৰন্তং উদ্দিস্স আকাসে খিপন্তো পূজেসি. সো তেন পুঞ্ঞকম্মেন তাৰতিংসেসু নিব্বত্তো. ততো পরং পুঞ্ঞানি কত্ৰা অপরাপরং দেৰমনুস্সেসু সংসরন্তো ইমস্মিং বুদ্ধুপ্পাদে চম্পাযং জম্বুগামিযস্স নাম উপাসকস্স পুত্তো হুত্ৰা নিব্বত্তি. তেন পুঞ্ঞকম্মেন তাৰতিংসেসু নিব্বত্তো. ততো পরং পুঞ্ঞানি কত্ৰা অপরাপরং দেৰমনুস্সেসু সংসরন্তো ইমস্মিং বুদ্ধুপ্পাদে চম্পাযং জম্বুগামিযস্স নাম উপাসকস্স পুত্ৰা নিব্বত্তি. তেনস্স জম্বুগামিযপুত্তোত্ৰেৰ সমঞ্ঞা অহোসি. সো ৰযপ্পত্তো ভগৰতো সন্তিকে ধম্মং সুত্ৰা পটিলদ্ধসংৰেগো পব্বজিত্ৰা কতপুব্বকিচ্চো কম্মট্ঠানং গহেত্ৰা সাকেতে অঞ্জনৰনে ৰসতি. অথস্স পিতা ‘‘কিং নু খো মম পুত্তো সাসনে অভিরতো ৰিহরতি, উদাহু নো’’তি ৰীমংসনত্থং ‘‘কচ্চি নো ৰত্থপসুতো’’তি গাথং লিখিত্ৰা পেসেসি. সো তং ৰাচেত্ৰা, ‘‘পিতা মে পমাদৰিহারং আসঙ্কতি, অহঞ্চ অজ্জাপি পুথুজ্জনভূমিং নাতিৰত্তো’’তি সংৰেগজাতো ঘটেন্তো ৰাযমন্তো নচিরস্সেৰ ছল়ভিঞ্ঞো অহোসি. তেন ৰুত্তং অপদানে (অপ. থের ২.৫০.২৫-৩০) –

‘‘কিংসুকং পুপ্ফিতং দিস্ৰা, পগ্গহেত্ৰান অঞ্জলিং;

বুদ্ধসেট্ঠং সরিত্ৰান, আকাসে অভিপূজযিং.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘একতিংসে ইতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ঞাতীনং ৰসননগরং গন্ত্ৰা সাসনস্স নিয্যানিকভাৰং পকাসেন্তো ইদ্ধিপাটিহারিযং দস্সেসি. তং দিস্ৰা ঞাতকা পসন্নমানসা বহূ সঙ্ঘারামে কারেসুং. থেরোপি সকপিতরা পেসিতং গাথং অঙ্কুসং কত্ৰা ঘটেন্তো ৰাযমন্তো অরহত্তং সচ্ছাকাসি. অঞ্ঞং ব্যাকরোন্তোপি পিতুপূজনত্থং ‘‘কচ্চি নো ৰত্থপসুতো’’তি তমেৰ গাথং অভাসি.

২৮. তত্থ কচ্চীতি পুচ্ছাযং নিপাতো. নোতি পটিসেধে. ৰত্থপসুতোতি ৰত্থে পসুতো ৰত্থপসুতো, চীৰরমণ্ডনাভিরতো. নিদস্সনমত্তঞ্চেতং পত্তমণ্ডনাদিচাপল্লপটিক্খেপস্সাপি অধিপ্পেতত্তা. ‘‘কচ্চি ন ৰত্থপসুতো’’তিপি পাঠো, সো এৰত্থো. ভূসনারতোতি অত্তভাৰৰিভূসনায রতো অভিরতো, যথেকচ্চে পব্বজিত্ৰাপি চপলা কাযদল়্হিবহুলা চীৰরাদিপরিক্খারস্স অত্তনো সরীরস্স চ মণ্ডনৰিভূসনট্ঠানায যুত্তা হোন্তি. কিমেৰ পরিক্খারপসুতো ভূসনারতো চ নাহোসীতি অযমেত্থ পদদ্ৰযস্সাপি অত্থো. সীলমযং গন্ধন্তি অখণ্ডাদিভাৰাপাদনেন সুপরিসুদ্ধস্স চতুব্বিধস্সপি সীলস্স ৰসেন য্ৰাযং ‘‘যো চ সীলৰতং পজাতি ন ইতরা দুস্সীলপজা, দুস্সীলত্তাযেৰ দুস্সিল্যমযং দুগ্গন্ধং ৰাযতি, এৰং ত্ৰং দুগ্গন্ধং অৰাযিত্ৰা কচ্চি সীলমযং গন্ধং ৰাযসীতি অত্থো. অথ ৰা নেতরা পজাতি ন ইতরা দুস্সীলপজা, তং কচ্চি ন হোতি, যতো সীলমযং গন্ধং ৰাযসীতি ব্যতিরেকেন সীলগন্ধৰাযনমেৰ ৰিভাৰেতি.

জম্বুগামিযপুত্তত্থেরগাথাৰণ্ণনা নিট্ঠিতা.

৯. হারিতত্থেরগাথাৰণ্ণনা

সমুন্নমযমত্তানন্তি আযস্মতো হারিতত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো হুত্ৰা তত্থ তত্থ ৰিৰট্টূপনিস্সযং পুঞ্ঞসম্ভারং উপচিনন্তো ইতো একতিংসে কপ্পে সুদস্সনং নাম পচ্চেকসম্বুদ্ধং দিস্ৰা পসন্নমানসো কুটজপুপ্ফেহি পূজং কত্ৰা তেন পুঞ্ঞকম্মেন সুগতীসুযেৰ পরিৰত্তেন্তো ইমস্মিং বুদ্ধুপ্পাদে সাৰত্থিনগরে ব্রাহ্মণমহাসালকুলে নিব্বত্তি. হারিতোতিস্স নামং অহোসি. তস্স ৰযপ্পত্তস্স মাতাপিতরো কুলরূপাদীহি অনুচ্ছৰিকং কুমারিকং ব্রাহ্মণধীতরং আনেসুং. সো তায সদ্ধিং ভোগসুখং অনুভৰন্তো একদিৰসং অত্তনো তস্সা চ রূপসম্পত্তিং ওলোকেত্ৰা ধম্মতায চোদিযমানো ‘‘ঈদিসং নাম রূপং নচিরস্সেৰ জরায মচ্চুনা চ অভিপ্পমদ্দীযতী’’তি সংৰেগং পটিলভি. কতিপযদিৰসাতিক্কমেনেৰ চস্স ভরিযং কণ্হসপ্পো ডংসিত্ৰা মারেসি. সো তেন ভিয্যোসোমত্তায সঞ্জাতসংৰেগো সত্থু সন্তিকং গন্ত্ৰা ধম্মং সুত্ৰা ঘরবন্ধনে ছিন্দিত্ৰা পব্বজি. তস্স চ চরিযানুকূলং কম্মট্ঠানং গহেত্ৰা ৰিহরন্তস্স কম্মট্ঠানং ন সম্পজ্জতি, চিত্তং উজুগতং ন হোতি. সো গামং পিণ্ডায পৰিট্ঠো অঞ্ঞতরং উসুকারং উসুদণ্ডং যন্তে পক্খিপিত্ৰা উজুং করোন্তং দিস্ৰা ‘‘ইমে অচেতনম্পি নাম উজুং করোন্তি, কস্মা অহং চিত্তং উজুং ন করিস্সামী’’তি চিন্তেত্ৰা ততোৰ পটিনিৰত্তিত্ৰা দিৰাট্ঠানে নিসিন্নো ৰিপস্সনং আরভি. অথস্স ভগৰা উপরি আকাসে নিসীদিত্ৰা ওৰাদং দেন্তো ‘‘সমুন্নমযমত্তান’’ন্তি গাথং অভাসি. অযমেৰ থেরো অত্তানং পরং ৰিয ওৰদন্তো অভাসীতি চ ৰদন্তি.

২৯. তত্থ সমুন্নমযন্তি সম্মা উন্নমেন্তো, সমাপত্তিৰসেন কোসজ্জপক্খে পতিতুং অদত্ৰা ততো উদ্ধরন্তো ৰীরিযসমতং যোজেন্তোতি অত্থো. অত্তানন্তি চিত্তং, অথ ৰা সমুন্নমযাতি কোসজ্জপক্খতো সমুন্নমেহি. ম-কারো পদসন্ধিকরো. হীনৰীরিযতায তৰ চিত্তং কম্মট্ঠানৰীথিং নপ্পটিপজ্জতি চে, তং ৰীরিযারম্ভৰসেন সম্মা উন্নমেহি, অনোনতং অনপনতং করোহীতি অধিপ্পাযো. এৰং পন করোন্তো উসুকারোৰ তেজনং. চিত্তং উজুং করিত্ৰান, অৰিজ্জং ভিন্দ হারিতাতি. যথা নাম উসুকারো কণ্ডং ঈসকম্পি ওনতং অপনতঞ্চ ৰিজ্ঝন্তো লক্খং ভিন্দনত্থং উজুং করোতি, এৰং কোসজ্জপাততো অরক্খণেন ওনতং উদ্ধচ্চপাততো অরক্খণেন অপনতং ৰিজ্ঝন্তো অপ্পনাপত্তিযা চিত্তং উজুং করিত্ৰান সমাহিতচিত্তো ৰিপস্সনং উস্সুক্কাপেত্ৰা সীঘং অগ্গমগ্গঞাণেন অৰিজ্জং ভিন্দ পদালেহীতি. তং সুত্ৰা থেরো ৰিপস্সনং ৰড্ঢেত্ৰা নচিরেনেৰ অরহা অহোসি. তেন ৰুত্তং অপদানে (অপ. থের ১.৩৫.৩৯-৪৩) –

‘‘হিমৰন্তস্সাৰিদূরে, ৰসলো নাম পব্বতো;

বুদ্ধো সুদস্সনো নাম, ৰসতে পব্বতন্তরে.

‘‘পুপ্ফং হেমৰন্তং গয্হ, ৰেহাসং অগমাসহং;

তত্থদ্দসাসিং সম্বুদ্ধং, ওঘতিণ্ণমনাসৰং.

‘‘পুপ্ফং কুটজমাদায, সীসে কত্ৰানহং তদা;

বুদ্ধস্স অভিরোপেসিং, সযম্ভুস্স মহেসিনো.

‘‘একতিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, পুপ্ফপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অঞ্ঞং ব্যাকরোন্তোপি তমেৰ গাথং অভাসি.

হারিতত্থেরগাথাৰণ্ণনা নিট্ঠিতা.

১০. উত্তিযত্থেরগাথাৰণ্ণনা

আবাধে মে সমুপ্পন্নেতি আযস্মতো উত্তিযত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো তত্থ তত্থ ৰিৰট্টূপনিস্সযং পুঞ্ঞং উপচিনন্তো ইতো চতুনৰুতে কপ্পে সিদ্ধত্থস্স ভগৰতো কালে চন্দভাগায নদিযা মহারূপো সুসুমারো হুত্ৰা নিব্বত্তো. সো পারং গন্তুং নদিযা তীরং উপগতং ভগৰন্তং দিস্ৰা পসন্নচিত্তো পারং নেতুকামো তীরসমীপে নিপজ্জি. ভগৰা তস্স অনুকম্পায পিট্ঠিযং পাদে ঠপেসি. সো হট্ঠো উদগ্গো পীতিৰেগেন দিগুণুস্সাহো হুত্ৰা সোতং ছিন্দন্তো সীঘেন জৰেন ভগৰন্তং পরতীরং নেসি. ভগৰা তস্স চিত্তপ্পসাদং ওলোকেত্ৰা ‘‘অযং ইতো চুতো দেৰলোকে নিব্বত্তিত্ৰা ততো পট্ঠায সুগতীসুযেৰ সংসরন্তো ইতো চতুনৰুতে কপ্পে অমতং পাপুণিস্সতী’’তি ব্যাকরিত্ৰা পক্কামি.

সো তথা সুগতীসুযেৰ পরিব্ভমন্তো ইমস্মিং বুদ্ধুপ্পাদে সাৰত্থিযং অঞ্ঞতরস্স ব্রাহ্মণস্স পুত্তো হুত্ৰা নিব্বত্তি উত্তিযো নাম নামেন. সো ৰযপ্পত্তো ‘‘অমতং পরিযেসিস্সামী’’তি পরিব্বাজকো হুত্ৰা ৰিচরন্তো একদিৰসং ভগৰন্তং উপসঙ্কমিত্ৰা ধম্মং সুত্ৰা সাসনে পব্বজিত্ৰাপি সীলাদীনং অৰিসোধিতত্তা ৰিসেসং নিব্বত্তেতুং অসক্কোন্তো অঞ্ঞে ভিক্খূ ৰিসেসং নিব্বত্তেত্ৰা অঞ্ঞং ব্যাকরোন্তে দিস্ৰা সত্থারং উপসঙ্কমিত্ৰা সঙ্খেপেনেৰ ওৰাদং যাচি. সত্থাপি তস্স ‘‘তস্মাতিহ ত্ৰং, উত্তিয, আদিমেৰ ৰিসোধেহী’’তিআদিনা (সং. নি. ৫.৩৬৯) সঙ্খেপেনেৰ ওৰাদং অদাসি. সো তস্স ওৰাদে ঠত্ৰা ৰিপস্সনং আরভি. তস্স আরদ্ধৰিপস্সনস্স আবাধো উপ্পজ্জি. উপ্পন্নে পন আবাধে সঞ্জাতসংৰেগো ৰীরিযারম্ভৰত্থুং কত্ৰা ৰিপস্সনায কম্মং করোন্তো ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ১.৩.১৬৯-১৭৯) –

‘‘চন্দভাগানদীতীরে, সুসুমারো অহং তদা;

সগোচরপসুতোহং, নদিতিত্থং অগচ্ছহং.

‘‘সিদ্ধত্থো তম্হি সমযে, সযম্ভূ অগ্গপুগ্গলো;

নদিং তরিতুকামো সো, নদিতিত্থং উপাগমি.

‘‘উপগতে চ সম্বুদ্ধে, অহম্পি তত্থুপাগমিং;

উপগন্ত্ৰান সম্বুদ্ধং, ইমং ৰাচং উদীরযিং.

‘‘অভিরূহ মহাৰীর, তারেস্সামি অহং তুৰং;

পেত্তিকং ৰিসযং ময্হং, অনুকম্প মহামুনি.

‘‘মম উগ্গজ্জনং সুত্ৰা, অভিরূহি মহামুনি;

হট্ঠো হট্ঠেন চিত্তেন, তারেসিং লোকনাযকং.

‘‘নদিযা পারিমে তীরে, সিদ্ধত্থো লোকনাযকো;

অস্সাসেসি মমং তত্থ, অমতং পাপুণিস্সতি.

‘‘তম্হা কাযা চৰিত্ৰান, দেৰলোকং অগচ্ছহং;

দিব্বসুখং অনুভৰিং, অচ্ছরাহি পুরক্খতো.

‘‘সত্তক্খত্তুঞ্চ দেৰিন্দো, দেৰরজ্জমকাসহং;

তীণিক্খত্তুং চক্কৰত্তী, মহিযা ইস্সরো অহুং.

‘‘ৰিৰেকমনুযুত্তোহং, নিপকো চ সুসংৰুতো;

ধারেমি অন্তিমং দেহং, সম্মাসম্বুদ্ধসাসনে.

‘‘চতুন্নৰুতিতো কপ্পে, তারেসিং যং নরাসভং;

দুগ্গতিং নাভিজানামি, তরণায ইদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো সম্মা পটিপত্তিযা পরিপুণ্ণাকারৰিভাৰনমুখেন অঞ্ঞং ব্যাকরোন্তো ‘‘আবাধে মে সমুপ্পন্নে’’তি গাথং অভাসি.

৩০. তত্থ আবাধে মে সমুপ্পন্নেতি সরীরস্স আবাধনতো ‘‘আবাধো’’তি লদ্ধনামে ৰিসভাগধাতুক্খোভহেতুকে রোগে ময্হং সঞ্জাতে. সতি মে উদপজ্জথাতি ‘‘উপ্পন্নো খো মে আবাধো, ঠানং খো পনেতং ৰিজ্জতি, যদিদং আবাধো ৰড্ঢেয্য. যাৰ পনাযং আবাধো ন ৰড্ঢতি, হন্দাহং ৰীরিযং আরভামি ‘অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযাযা’’’তি ৰীরিযারম্ভৰত্থুভূতা সতি তস্সেৰ আবাধস্স ৰসেন দুক্খায ৰেদনায পীল়িযমানস্স ময্হং উদপাদি. তেনাহ ‘‘আবোধো মে সমুপ্পন্নো, কালো মে নপ্পমজ্জিতু’’ন্তি. এৰং উপ্পন্নঞ্হি সতিং অঙ্কুসং কত্ৰা অযং থেরো অরহত্তং পত্তোতি.

উত্তিযত্থেরগাথাৰণ্ণনা নিট্ঠিতা.

ততিযৰগ্গৰণ্ণনা নিট্ঠিতা.

৪. চতুত্থৰগ্গো

১. গহ্ৰরতীরিযত্থেরগাথাৰণ্ণনা

ফুট্ঠো ডংসেহীতি আযস্মতো গহ্ৰরতীরিযত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো ইতো একতিংসে কপ্পে সিখিস্স ভগৰতো কালে মিগলুদ্দো হুত্ৰা অরঞ্ঞে ৰিচরন্তো অদ্দস সিখিং ভগৰন্তং অঞ্ঞতরস্মিং রুক্খমূলে দেৰনাগযক্খানং ধম্মং দেসেন্তং, দিস্ৰা পন পসন্নমানসো ‘‘ধম্মো এস ৰুচ্চতী’’তি সরে নিমিত্তং অগ্গহেসি. সো তেন চিত্তপ্পসাদেন দেৰলোকে উপ্পন্নো পুন অপরাপরং সুগতীসুযেৰ সংসরন্তো ইমস্মিং বুদ্ধুপ্পাদে সাৰত্থিযং ব্রাহ্মণকুলে নিব্বত্তিত্ৰা ‘‘অগ্গিদত্তো’’তি লদ্ধনামো ৰযপ্পত্তো ভগৰতো যমকপাটিহারিযং দিস্ৰা সঞ্জাতপ্পসাদো সাসনে পব্বজিত্ৰা কম্মট্ঠানং গহেত্ৰা গহ্ৰরতীরে নাম অরঞ্ঞট্ঠানে ৰসতি. তেনস্স গহ্ৰরতীরযোতি সমঞ্ঞা অহোসি. সো ৰিপস্সনং ৰড্ঢেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৫২.৪৪-৫০) –

‘‘মিগলুদ্দো পুরে আসি, অরঞ্ঞে ৰিপিনে অহং;

অদ্দসং ৰিরজং বুদ্ধং, দেৰসঙ্ঘপুরক্খতং.

‘‘চতুসচ্চং পকাসেন্তং, দেসেন্তং, অমতং পদং;

অস্সোসিং মধুরং ধম্মং, সিখিনো লোকবন্ধুনো.

‘‘ঘোসে চিত্তং পসাদেসিং, অসমপ্পটিপুগ্গলে;

তত্থ চিত্তং পসাদেত্ৰা, উত্তরিং দুত্তরং ভৰং.

‘‘একতিংসে ইতো কপ্পে, যং সঞ্ঞমলভিং তদা;

দুগ্গতিং নাভিজানামি, ঘোসসঞ্ঞাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ভগৰন্তং ৰন্দিত্ৰা সাৰত্থিযং অগমাসি. তস্স আগতভাৰং সুত্ৰা ঞাতকা উপগন্ত্ৰা মহাদানং পৰত্তেসুং. সো কতিপযদিৰসে ৰসিত্ৰা অরঞ্ঞমেৰ গন্তুকামো অহোসি. তং ঞাতকা, ‘‘ভন্তে, অরঞ্ঞং নাম ডংসমকসাদিৰসেন বহুপরিস্সযং, ইধেৰ ৰসথা’’তি আহংসু. তং সুত্ৰা থেরো ‘‘অরঞ্ঞৰাসোযেৰ ময্হং রুচ্চতী’’তি ৰিৰেকাভিরতিকিত্তনমুখেন অঞ্ঞং ব্যাকরোন্তো ‘‘ফুট্ঠো ডংসেহী’’তি গাথং অভাসি.

৩১. তত্থ ফুট্ঠো ডংসেহি মকসেহীতি ডংসনসীলতায ‘‘ডংসা’’তি লদ্ধনামাহি অন্ধকমক্খিকাহি, মকসনঞ্ঞিতেহি চ সূচিমুখপাণেহি ফুস্সিতো দট্ঠোতি অত্থো. অরঞ্ঞস্মিন্তি ‘‘পঞ্চধনুসতিকং পচ্ছিম’’ন্তি (পারা. ৬৫৪) ৰুত্তঅরঞ্ঞলক্খণযোগতো অরঞ্ঞে. ব্রহাৰনেতি মহারুক্খগচ্ছগহনতায মহাৰনে অরঞ্ঞানিযং. নাগো সঙ্গামসীসেৰাতি সঙ্গামাৰচরো হত্থিনাগো ৰিয সঙ্গামমুদ্ধনি পরসেনাসম্পহারং. ‘‘অরঞ্ঞৰাসো নাম বুদ্ধাদীহি ৰণ্ণিতো থোমিতো’’তি উস্সাহজাতো সতো সতিমা হুত্ৰা তত্র তস্মিং অরঞ্ঞে, তস্মিং ৰা ডংসাদিসম্ফস্সে উপট্ঠিতে অধিৰাসযে অধিৰাসেয্য সহেয্য, ‘‘ডংসাদযো মং আবাধেন্তী’’তি অরঞ্ঞৰাসং ন জহেয্যাতি অত্থো.

গহ্ৰরতীরিযত্থেরগাথাৰণ্ণনা নিট্ঠিতা.

২. সুপ্পিযত্থেরগাথাৰণ্ণনা

অজরং জীরমানেনাতি আযস্মতো সুপ্পিযত্থেরস্স গাথা. কা উপ্পত্তি? সো কির পদুমুত্তরস্স ভগৰতো কালে কুলগেহে নিব্বত্তিত্ৰা তাপসপব্বজ্জং পব্বজিত্ৰা অরঞ্ঞাযতনে ৰসন্তো তত্থ ভগৰন্তং দিস্ৰা পসন্নমানসো ফলাফলং অদাসি, তথা ভিক্খুসঙ্ঘস্স. সো তেন পুঞ্ঞকম্মেন দেৰমনুস্সেসু সংসরন্তো কস্সপস্স সম্মাসম্বুদ্ধস্স কালে খত্তিযকুলে নিব্বত্তিত্ৰা অনুক্কমেন ৰিঞ্ঞুতং পত্তো কল্যাণমিত্তসন্নিস্সযেন লদ্ধসংৰেগো সাসনে পব্বজিত্ৰা বহুস্সুতো অহোসি. জাতিমদেন সুতমদেন চ অত্তানং উক্কংসেন্তো পরে চ ৰম্ভেন্তো ৰিহাসি. সো ইমস্মিং বুদ্ধুপ্পাদে তস্স কম্মস্স নিস্সন্দেন সাৰত্থিযং পরিভূতরূপে সুসানগোপককুলে নিব্বত্তি. সুপ্পিযোতিস্স নামং অহোসি. অথ ৰিঞ্ঞুতং পত্তো অত্তনো সহাযভূতং সোপাকত্থেরং উপসঙ্কমিত্ৰা তস্স সন্তিকে ধম্মং সুত্ৰা পটিলদ্ধসংৰেগো পব্বজিত্ৰা সম্মাপটিপত্তিং পূরেত্ৰা ‘‘অজরং জীরমানেনা’’তি গাথং অভাসি.

৩২. তত্থ অজরন্তি জরারহিতং, নিব্বানং সন্ধাযাহ. তঞ্হি অজাতত্তা নত্থি এত্থ জরা, এতস্মিং ৰা অধিগতে পুগ্গলস্স সা নত্থীতি জরাভাৰহেতুতোপি অজরং নাম. জীরমানেনাতি জীরন্তেন, খণে খণে জরং পাপুণন্তেন. তপ্পমানেনাতি সন্তপ্পমানেন, রাগাদীহি একাদসহি অগ্গীহি দয্হমানেন. নিব্বুতিন্তি যথাৰুত্তসন্তাপাভাৰতো নিব্বুতসভাৰং নিব্বানং. নিমিযন্তি পরিৰত্তেয্যং চেতাপেয্যং. পরমং সন্তিন্তি অনৰসেসকিলেসাভিসঙ্খারপরিল়াহৰূপসমধম্মতায উত্তমং সন্তিং. চতূহি যোগেহি অননুবন্ধত্তা যোগক্খেমং. অত্তনো উত্তরিতরস্স কস্সচি অভাৰতো অনুত্তরং. অযঞ্হেত্থ সঙ্খেপত্থো – খণে খণে জরায অভিভুয্যমানত্তা জীরমানেন, তথা রাগগ্গিআদীহি সন্তপ্পমানেন গতো এৰং অনিচ্চেন দুক্খেন অসারেন সব্বথাপি অনুপসন্তসভাৰেন সউপদ্দৰেন, তপ্পটিপক্খভাৰতো অজরং পরমুপসমভূতং কেনচি অনুপদ্দুতং অনুত্তরং নিব্বানং নিমিযং পরিৰত্তেয্যং ‘‘মহা ৰত মে লাভো মহা উদযো হত্থগতো’’তি. যথা হি মনুস্সা যং কিঞ্চি ভণ্ডং পরিৰত্তেন্তা নিরপেক্খা গয্হমানেন সম্বহুমানা হোন্তি, এৰমযং থেরো পহিতত্তো ৰিহরন্তো অত্তনো কাযে চ জীৰিতে চ নিরপেক্খতং, নিব্বানং পটিপেসিতত্তঞ্চ পকাসেন্তো ‘‘নিমিযং পরমং সন্তিং, যোগক্খেমং অনুত্তর’’ন্তি ৰত্ৰা তমেৰ পটিপত্তিং পরিব্রূহযন্তো ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ২.৫২.৫১-৭৭) –

‘‘ৰরুণো নাম নামেন, ব্রাহ্মণো মন্তপারগূ;

ছড্ডেত্ৰা দস পুত্তানি, ৰনমজ্ঝোগহিং তদা.

‘‘অস্সমং সুকতং কত্ৰা, সুৰিভত্তং মনোরমং;

পণ্ণসালং করিত্ৰান, ৰসামি ৰিপিনে অহং.

‘‘পদুমুত্তরো লোকৰিদূ, আহুতীনং পটিগ্গহো;

মমুদ্ধরিতুকামো সো, আগচ্ছি মম অস্সমং.

‘‘যাৰতা ৰনসণ্ডম্হি, ওভাসো ৰিপুলো অহু;

বুদ্ধস্স আনুভাৰেন, পজ্জলী ৰিপিনং তদা.

‘‘দিস্ৰান তং পাটিহীরং, বুদ্ধসেট্ঠস্স তাদিনো;

পত্তপুটং গহেত্ৰান, ফলেন পূজযিং অহং.

‘‘উপগন্ত্ৰান সম্বুদ্ধং, সহখারিমদাসহং;

অনুকম্পায মে বুদ্ধো, ইদং ৰচনমব্রৰি.

‘‘খারিভারং গহেত্ৰান, পচ্ছতো এহি মে তুৰং;

পরিভুত্তে চ সঙ্ঘম্হি, পুঞ্ঞং তৰ ভৰিস্সতি.

‘‘পুটকং তং গহেত্ৰান, ভিক্খুসঙ্ঘস্সদাসহং;

তত্থ চিত্তং পসাদেত্ৰা, তুসিতং উপপজ্জহং.

‘‘তত্থ দিব্বেহি নচ্চেহি, গীতেহি ৰাদিতেহি চ;

পুঞ্ঞকম্মেন সংযুত্তং, অনুভোমি সদা সুখং.

‘‘যং যং যোনুপপজ্জামি, দেৰত্তং অথ মানুসং;

ভোগে মে ঊনতা নত্থি, ফলদানস্সিদং ফলং.

‘‘যাৰতা চতুরো দীপা, সসমুদ্দা সপব্বতা;

ফলং বুদ্ধস্স দত্ৰান, ইস্সরং কারযামহং.

‘‘যাৰতা যে পক্খিগণা, আকাসে উপ্পতন্তি চে;

তেপি মে ৰসমন্ৰেন্তি, ফলদানস্সিদং ফলং.

‘‘যাৰতা ৰনসণ্ডম্হি, যক্খা ভূতা চ রক্খসা;

কুম্ভণ্ডা গরুল়া চাপি, পারিচরিযং উপেন্তি মে.

‘‘কুম্মা সোণা মধুকারা, ডংসা চ মকসা উভো;

তেপি মং ৰসমন্ৰেন্তি, ফলদানস্সিদং ফলং.

‘‘সুপণ্ণা নাম সকুণা, পক্খিজাতা মহব্বলা;

তেপি মং সরণং যন্তি, ফলদানস্সিদং ফলং.

‘‘যেপি দীঘাযুকা নাগা, ইদ্ধিমন্তো মহাযসা;

তেপি মং ৰসমন্ৰেন্তি, ফলদানস্সিদং ফলং.

‘‘সীহা ব্যগ্ঘা চ দীপী চ, অচ্ছকোকতরচ্ছকা;

তেপি মং ৰসমন্ৰেন্তি, ফলদানস্সিদং ফলং.

‘‘ওসধী তিণৰাসী চ, যে চ আকাসৰাসিনো;

সব্বে মং সরণং যন্তি, ফলদানস্সিদং ফলং.

‘‘সুদুদ্দসং সুনিপুণং, গম্ভীরং সুপ্পকাসিতং;

ফস্সযিত্ৰা ৰিহরামি, ফলদানস্সিদং ফলং.

‘‘ৰিমোক্খে অট্ঠ ফুসিত্ৰা, ৰিহরামি অনাসৰো;

আতাপী নিপকো চাহং, ফলদানস্সিদং ফলং.

‘‘যে ফলট্ঠা বুদ্ধপুত্তা, খীণদোসা মহাযসা;

অহমঞ্ঞতরো তেসং, ফলদানস্সিদং ফলং.

‘‘অভিঞ্ঞাপারমিং গন্ত্ৰা, সুক্কমূলেন চোদিতো;

সব্বাসৰে পরিঞ্ঞায, ৰিহরামি অনাসৰো.

‘‘তেৰিজ্জা ইদ্ধিপত্তা চ, বুদ্ধপুত্তা মহাযসা;

দিব্বসোতং সমাপন্না, তেসং অঞ্ঞতরো অহং.

‘‘সতসহস্সিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰাপি তমেৰ গাথং অঞ্ঞাব্যাকরণৰসেন অভাসি.

সুপ্পিযত্থেরগাথাৰণ্ণনা নিট্ঠিতা.

৩. সোপাকত্থেরগাথাৰণ্ণনা

যথাপি একপুত্তস্মিন্তি আযস্মতো সোপাকত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো হুত্ৰা তত্থ তত্থ ৰিৰট্টূপনিস্সযং কুসলং উপচিনন্তো ককুসন্ধস্স ভগৰতো কালে অঞ্ঞতরস্স কুটুম্বিকস্স পুত্তো হুত্ৰা নিব্বত্তো একদিৰসং সত্থারং দিস্ৰা পসন্নচিত্তো বীজপূরফলানি সত্থু উপনেসি. পটিগ্গহেসি ভগৰা অনুকম্পং উপাদায. সো ভিক্খুসঙ্ঘে চ অভিপ্পসন্নো সলাকভত্তং পট্ঠপেত্ৰা সঙ্ঘুদ্দেসৰসেন তিণ্ণং ভিক্খূনং যাৰতাযুকং খীরভত্তং অদাসি. সো তেহি পুঞ্ঞকম্মেহি অপরাপরং দেৰমনুস্সেসু সম্পত্তিং অনুভৰন্তো একদা মনুস্সযোনিযং নিব্বত্তো একস্স পচ্চেকবুদ্ধস্স খীরভত্তং অদাসি. এৰং তত্থ তত্থ পুঞ্ঞানি কত্ৰা সুগতীসু এৰ পরিব্ভমন্তো ইমস্মিং বুদ্ধুপ্পাদে পুরিমকম্মনিস্সন্দেন সাৰত্থিযং অঞ্ঞতরায দুগ্গতিত্থিযা কুচ্ছিম্হি পটিসন্ধিং গণ্হি. তস্স মাতা দস মাসে কুচ্ছিনা পরিহরিত্ৰা পরিপক্কে গব্ভে ৰিজাযনকালে ৰিজাযিতুং অসক্কোন্তী মুচ্ছং আপজ্জিত্ৰা বহুৰেলং মতা ৰিয নিপজ্জি. তং ঞাতকা ‘‘মতা’’তি সঞ্ঞায সুসানং নেত্ৰা চিতকং আরোপেত্ৰা দেৰতানুভাৰেন ৰাতৰুট্ঠিযা উট্ঠিতায অগ্গিং অদত্ৰা পক্কমিংসু. দারকো পচ্ছিমভাৰিকত্তা দেৰতানুভাৰেন মাতুকুচ্ছিতো অরোগো নিক্খমি. মাতা পন কালমকাসি. দেৰতা তং গহেত্ৰা মনুস্সরূপেন সুসানগোপকস্স গেহে ঠপেত্ৰা কতিপযকালং পতিরূপেন আহারেন পোসেসি. ততো পরং সুসানগোপকো চ নং অত্তনো পুত্তং কত্ৰা ৰড্ঢেতি. সো তথা ৰড্ঢেন্তো তস্স পুত্তেন সুপিযেন নাম দারকেন সদ্ধিং কীল়ন্তো ৰিচরতি. তস্স সুসানে জাতসংৰড্ঢভাৰতো সোপাকোতি সমঞ্ঞা অহোসি.

অথেকদিৰসং সত্তৰস্সিকং তং ভগৰা পচ্চূসৰেলায ঞাণজালং পত্থরিত্ৰা ৰেনেয্যবন্ধৰে ওলোকেত্ৰা ঞাণজলন্তোগধং দিস্ৰা সুসানট্ঠানং অগমাসি. দারকো পুব্বহেতুনা চোদিযমানো পসন্নমানসো সত্থারং উপসঙ্কমিত্ৰা ৰন্দিত্ৰা অট্ঠাসি. সত্থা তস্স ধম্মং কথেসি. সো ধম্মং সুত্ৰা পব্বজ্জং যাচিত্ৰা ‘‘পিতরা অনুঞ্ঞাতোসী’’তি ৰুত্তো পিতরং সত্থু সন্তিকং নেসি. তস্স পিতা সত্থারং উপসঙ্কমিত্ৰা ৰন্দিত্ৰা ‘‘ভন্তে, ইমং দারকং পব্বাজেথা’’তি অনুজানি. সত্থা তং পব্বাজেত্ৰা মেত্তাভাৰনায নিযোজেসি. সো মেত্তাকম্মট্ঠানং গহেত্ৰা সুসানে ৰিহরন্তো চ চিরস্সেৰ মেত্তাঝানং নিব্বত্তেত্ৰা ঝানং পাদকং কত্ৰা ৰিপস্সনং ৰড্ঢেত্ৰা অরহত্তং সচ্ছাকাসি. তেন ৰুত্তং অপদানে (অপ. থের ২.৪৫.১-৭) –

‘‘ককুসন্ধো মহাৰীরো, সব্বধম্মান পারগূ;

গণম্হা ৰূপকট্ঠো সো, অগমাসি ৰনন্তরং.

‘‘বীজমিঞ্জং গহেত্ৰান, লতায আৰুণিং অহং;

ভগৰা তম্হি সমযে, ঝাযতে পব্বতন্তরে.

‘‘দিস্ৰানহং দেৰদেৰং, ৰিপ্পসন্নেন চেতসা;

দক্খিণেয্যস্স ৰীরস্স, বীজমিঞ্জমদাসহং.

‘‘ইমস্মিংযেৰ কপ্পম্হি, যং মিঞ্জমদদিং তদা;

দুগ্গতিং নাভিজানামি, বীজমিঞ্জস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহা হুত্ৰা পন অঞ্ঞেসং সোসানিকভিক্খূনং মেত্তাভাৰনাৰিধিং দস্সেন্তো ‘‘যথাপি একপুত্তস্মি’’ন্তি গাথং অভাসি.

৩৩. তত্থ যথাতি ওপম্মত্থে নিপাতো. একপুত্তস্মিন্তি পুনাতি চ কুলৰংসং তাযতি চাতি পুত্তো, অত্রজাদিভেদো পুত্তো. একো পুত্তো একপুত্তো, তস্মিং একপুত্তস্মিং. ৰিসযে চেতং ভুম্মৰচনং. পিযস্মিন্তি পিযাযিতব্বতায চেৰ একপুত্ততায চ রূপসীলাচারাদীহি চ পেমকরণট্ঠানভূতে. কুসলীতি কুসলং ৰুচ্চতি খেমং সোত্থিভাৰো, তং লভিতব্বং এতস্স অত্থীতি কুসলী, সত্তানং হিতেসী মেত্তজ্ঝাসযো. সব্বেসু পাণেসূতি সব্বেসু সত্তেসু. সব্বত্থাতি সব্বাসু দিসাসু সব্বেসু ৰা ভৰাদীসু, সব্বাসু ৰা অৰত্থাসু. ইদং ৰুত্তং হোতি – যথা একপুত্তকে পিযে মনাপে মাতাপিতা কুসলী একন্তহিতেসী ভৰেয্য, এৰং পুরত্থিমাদিভেদাসু সব্বাসু দিসাসু, কামভৰাদিভেদেসু সব্বেসু ভৰেসু দহরাদিভেদাসু সব্বাসু অৰত্থাসু চ ঠিতেসু সব্বেসু সত্তেসু একন্তহিতেসিতায কুসলী ভৰেয্য, ‘‘মিত্তো উদাসীনো পঞ্চত্থিকো’’তি সীমং অকত্ৰা সীমাসম্ভেদৰসেন সব্বত্থ একরসং মেত্তং ভাৰেয্যাতি. ইমং পন গাথং ৰত্ৰা ‘‘সচে তুম্হে আযস্মন্তো এৰং মেত্তাভাৰনং অনুযুঞ্জেয্যাথ, যে তে ভগৰতা ‘সুখং সুপতী’তিআদিনা (অ. নি. ১১.১৫) একাদস মেত্তানিসংসা ৰুত্তা, একংসেন তেসং ভাগিনো ভৰথা’’তি ওৰাদমদাসি.

সোপাকত্থেরগাথাৰণ্ণনা নিট্ঠিতা.

৪. পোসিযত্থেরগাথাৰণ্ণনা

অনাসন্নৰরাতি আযস্মতো পোসিযত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো তত্থ তত্থ ৰিৰট্টূপনিস্সযং বহুং কুসলং উপচিনিত্ৰা সুগতীসু এৰ সংসরন্তো ইতো দ্ৰেনৰুতে কপ্পে তিস্সস্স ভগৰতো কালে মিগলুদ্দো হুত্ৰা অরঞ্ঞে ৰিচরতি. অথ ভগৰা তস্স অনুগ্গহং কাতুং অরঞ্ঞং গন্ত্ৰা তস্স চক্খুপথে অত্তানং দস্সেসি. সো ভগৰন্তং দিস্ৰা পসন্নচিত্তো আৰুধং নিক্খিপিত্ৰা উপসঙ্কমিত্ৰা অঞ্জলিং পগ্গয্হ অট্ঠাসি. ভগৰা নিসীদিতুকামতং দস্সেসি. সো তাৰদেৰ তিণমুট্ঠিযো গহেত্ৰা সমে ভূমিভাগে সক্কচ্চং সন্থরিত্ৰা অদাসি. নিসীদি তত্থ ভগৰা অনুকম্পং উপাদায. নিসিন্নে পন ভগৰতি অনপ্পকং পীতিসোমনস্সং পটিসংৰেদেন্তো ভগৰন্তং ৰন্দিত্ৰা সযম্পি একমন্তং নিসীদি. অথ ভগৰা ‘‘এত্তকং ৰট্টতি ইমস্স কুসলবীজ’’ন্তি উট্ঠাযাসনা পক্কামি. অচিরপক্কন্তে ভগৰতি তং সীহো মিগরাজা ঘাতেসি. সো কালঙ্কতো দেৰলোকে নিব্বত্তি. ‘‘সো কির ভগৰতি অনুপগচ্ছন্তে সীহেন ঘাতিতো নিরযে নিব্বত্তিস্সতী’’তি তং দিস্ৰা ভগৰা সুগতিযং নিব্বত্তনত্থং কুসলবীজরোপনত্থঞ্চ উপসঙ্কমি.

সো তত্থ যাৰতাযুকং ঠত্ৰা ততো দেৰলোকতো চৰিত্ৰা সুগতীসুযেৰ পরিৰত্তেন্তো ইমস্মিং বুদ্ধুপ্পাদে সাৰত্থিযং অঞ্ঞতরস্স মহাৰিভৰস্স সেট্ঠিনো পুত্তো সঙ্গামজিতত্থেরস্স কনিট্ঠভাতা হুত্ৰা নিব্বত্তি. পোসিযোতিস্স নামং অহোসি. সো ৰযপ্পত্তো দারপরিগ্গহং কত্ৰা একং পুত্তং লভিত্ৰা অন্তিমভৰিকতায ধম্মতায চোদিযমানো জাতিআদিং পটিচ্চ উপ্পন্নসংৰেগো পব্বজিত্ৰা অরঞ্ঞং পৰিসিত্ৰা ৰূপকট্ঠো হুত্ৰা চতুসচ্চকম্মট্ঠানভাৰনং অনুযুঞ্জন্তো নচিরস্সেৰ ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ২.৫৩.১-১২) –

‘‘হিমৰন্তস্সাৰিদূরে, লম্বকো নাম পব্বতো;

তত্থেৰ তিস্সো সম্বুদ্ধো, অব্ভোকাসম্হি চঙ্কমি.

‘‘মিগলুদ্দো তদা আসিং, অরঞ্ঞে কাননে অহং;

দিস্ৰান তং দেৰদেৰং, তিণমুট্ঠিমদাসহং.

‘‘নিসীদনত্থং বুদ্ধস্স, দত্ৰা চিত্তং পসাদযিং;

সম্বুদ্ধং অভিৰাদেত্ৰা, পক্কামিং উত্তরামুখো.

‘‘অচিরং গতমত্তস্স, মিগরাজা অপোথযি;

সোহেন পোথিতো, সন্তো তত্থ কালঙ্কতো অহং.

‘‘আসন্নে মে কতং কম্মং, বুদ্ধসেট্ঠে অনাসৰে;

সুমুত্তো সরৰেগোৰ, দেৰলোকমগচ্ছহং.

‘‘যূপো তত্থ সুভো আসি, পুঞ্ঞকম্মাভিনিম্মিতো;

সহস্সকণ্ডো সতভেণ্ডু, ধজালু হরিতামযো.

‘‘পভা নিদ্ধাৰতে তস্স, সতরংসীৰ উগ্গতো;

আকিণ্ণো দেৰকঞ্ঞাহি, আমোদিং কামকামিহং.

‘‘দেৰলোকা চৰিত্ৰান, সুক্কমূলেন চোদিতো;

আগন্ত্ৰান মনুস্সত্তং, পত্তোম্হি আসৰক্খযং.

‘‘চতুন্নৰুতিতো কপ্পে, নিসীদনমদাসহং;

দুগ্গতিং নাভিজানামি, তিণমুট্ঠে ইদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ভগৰন্তং ৰন্দিতুং সাৰত্থিং আগতো ঞাতিং অনুকম্পায ঞাতিগেহং অগমাসি. তত্থ নং পুরাণদুতিযিকা ৰন্দিত্ৰা আসনদানাদিনা পঠমং উপাসিকা ৰিয ৰত্তং দস্সেত্ৰা থেরস্স অজ্ঝাসযং অজানন্তী পচ্ছা ইত্থিকুত্তাদীহি পলোভেতুকামা অহোসি. থেরো ‘‘অহো অন্ধবালা মাদিসেপি নাম এৰং পটিপজ্জতী’’তি চিন্তেত্ৰা কিঞ্চি অৰত্ৰা উট্ঠাযাসনা অরঞ্ঞমেৰ গতো. তং আরঞ্ঞকা ভিক্খূ ‘‘কিং, আৰুসো, অতিলহুং, নিৰত্তোসি, ঞাতকেহি ন দিট্ঠোসী’’তি পুচ্ছিংসু. থেরো তত্থ পৰত্তিং আচিক্খন্তো ‘‘অনাসন্নৰরা এতা’’তি গাথং অভাসি.

৩৪. তত্থ অনাসন্নৰরাতি এতা ইত্থিযো ন আসন্না অনুপগতা, দূরে এৰ ৰা ঠিতা হুত্ৰা ৰরা পুরিসস্স সেট্ঠা হিতাৰহা, তঞ্চ খো নিচ্চমেৰ সব্বকালমেৰ, ন রত্তিমেৰ, ন দিৰাপি, ন রহোৰেলাযপি. ৰিজানতাতি ৰিজানন্তেন. ‘‘অনাসন্নপরা’’তিপি পাল়ি, সো এৰত্থো. অযঞ্হেত্থ অধিপ্পাযো – চণ্ডহত্থিঅস্সমহিংসসীহব্যগ্ঘযক্খরক্খসপিসাচাপি মনুস্সানং অনুপসঙ্কমন্তো ৰরা সেট্ঠা, ন অনত্থাৰহা, তে পন উপসঙ্কমন্তা দিট্ঠধম্মিকংযেৰ অনত্থং করেয্যুং. ইত্থিযো পন উপসঙ্কমিত্ৰা দিট্ঠধম্মিকং সম্পরাযিকং ৰিমোক্খনিস্সিতম্পি অত্থং ৰিনাসেত্ৰা মহন্তং অনত্থং আপাদেন্তি, তস্মা অনাসন্নৰরা এতা নিচ্চমেৰ ৰিজানতাতি. ইদানি তমত্থং অত্তূপনাযিকং কত্ৰা দস্সেন্তো ‘‘গামা’’তিআদিমাহ. তত্থ গামাতি গামং. উপযোগত্থে হি এতং নিস্সক্কৰচনং. অরঞ্ঞমাগম্মাতি অরঞ্ঞতো আগন্ত্ৰা. ম-কারো পদসন্ধিকরো, নিস্সক্কে চেতং উপযোগৰচনং. ততোতি মঞ্চকতো. অনামন্তেত্ৰাতি অনালপিত্ৰা পুরাণদুতিযিকং ‘‘অপ্পমত্তা হোহী’’তি এত্তকম্পি অৰত্ৰা. পোসিযোতি অত্তানমেৰ পরং ৰিয ৰদতি. যে পন ‘‘পক্কামি’’ন্তি পঠন্তি, তেসং অহং পোসিযো পক্কামিন্তি যোজনা. যে পন ‘‘সা ইত্থী থেরং ঘরং উপগতং ভোজেত্ৰা পলোভেতুকামা জাতা, তং দিস্ৰা থেরো তাৰদেৰ গেহতো নিক্খমিত্ৰা ৰিহারং গন্ত্ৰা অত্তনো ৰসনট্ঠানে মঞ্চকে নিসীদি. সাপি খো ইত্থী পচ্ছাভত্তং অলঙ্কতপটিযত্তা ৰিহারে থেরস্স ৰসনট্ঠানং উপসঙ্কমি. তং দিস্ৰা থেরো কিঞ্চি অৰত্ৰা উট্ঠায দিৰাট্ঠানমেৰ গতো’’তি ৰদন্তি, তেসং ‘‘গামা অরঞ্ঞমাগম্মা’’তি গাথাপদস্স অত্থো যথারুতৰসেনেৰ নিয্যতি. ৰিহারো হি ইধ ‘‘অরঞ্ঞ’’ন্তি অধিপ্পেতো.

পোসিযত্থেরগাথাৰণ্ণনা নিট্ঠিতা.

৫. সামঞ্ঞকানিত্থেরগাথাৰণ্ণনা

সুখং সুখত্থোতি আযস্মতো সামঞ্ঞকানিত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো হুত্ৰা তত্থ তত্থ ভৰে কুসলং উপচিনন্তো ইতো একনৰুতে কপ্পে ৰিপস্সিস্স ভগৰতো কালে মনুস্সযোনিযং নিব্বত্তো ৰিপস্সিং ভগৰন্তং দিস্ৰা পসন্নমানসো একং মঞ্চং অদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে অঞ্ঞতরস্স পরিব্বাজকস্স পুত্তো হুত্ৰা নিব্বত্তি. সামঞ্ঞকানীতিস্স নামং অহোসি. সো ৰিঞ্ঞুতং পত্তো সত্থু যমকপাটিহারিযং দিস্ৰা পসন্নমানসো সাসনে পব্বজিত্ৰা চরিযানুকূলং কম্মট্ঠানং গহেত্ৰা ঝানং নিব্বত্তেত্ৰা ঝানং পাদকং কত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.৩৬.৩০-৩৩) –

‘‘ৰিপস্সিনো ভগৰতো, লোকজেট্ঠস্স তাদিনো;

একং মঞ্চং মযা দিন্নং, পসন্নেন সপাণিনা.

‘‘হত্থিযানং অস্সযানং, দিব্বযানং সমজ্ঝগং;

তেন মঞ্চক দানেন, পত্তোম্হি আসৰক্খযং.

‘‘একনৰুতিতো কপ্পে, যং মঞ্চমদদিং তদা;

দুগ্গতিং নাভিজানামি, মঞ্চদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

থেরস্স পন গিহিসহাযকো কাতিযানো নাম পরিব্বাজকো বুদ্ধুপ্পাদতো পট্ঠায তিত্থিযানং হতলাভসক্কারতায ঘাসচ্ছাদনমত্তম্পি অলভন্তো আজীৰকাপকতো থেরং উপসঙ্কমিত্ৰা ‘‘তুম্হে সাকিযপুত্তিযা নাম মহালাভগ্গযসগ্গপ্পত্তা সুখেন জীৰথ, মযং পন দুক্খিতা কিচ্ছজীৰিকা, কথং নু খো পটিপজ্জমানস্স দিট্ঠধম্মিকঞ্চেৰ সম্পরাযিকঞ্চ সুখং সম্পজ্জতী’’তি পুচ্ছি. অথস্স থেরো ‘‘নিপ্পরিযাযতো সুখং নাম লোকুত্তরসুখমেৰ, তঞ্চ তদনুরূপং পটিপত্তিং পটিপজ্জন্তস্সেৰা’’তি অত্তনা তস্স অধিগতভাৰং পরিযাযেন ৰিভাৰেন্তো ‘‘সুখং সুখত্থো লভতে তদাচর’’ন্তি গাথং অভাসি.

৩৫. তত্থ সুখন্তি নিরামিসং সুখং ইধাধিপ্পেতং. তঞ্চ ফলসমাপত্তি চেৰ নিব্বানঞ্চ. তথা হি ‘‘অযং সমাধি পচ্চুপ্পন্নসুখো চেৰ আযতিঞ্চ সুখৰিপাকো’’ (দী. নি. ৩.৩৫৫; অ. নি. ৫.২৭; ৰিভ. ৮০৪) ‘‘নিব্বানং পরমং সুখ’’ন্তি (ধ. প. ২০৩-২০৪) চ ৰুত্তং. সুখত্থোতি সুখপ্পযোজনো, যথাৰুত্তেন সুখেন অত্থিকো. লভতেতি পাপুণাতি, অত্থিকস্সেৰেদং সুখং, ন ইতরস্স. কো পন অত্থিকোতি আহ ‘‘তদাচর’’ন্তি তদত্থং আচরন্তো, যায পটিপত্তিযা তং পটিপত্তিং পটিপজ্জন্তোতি অত্থো. ন কেৰলং তদাচরং সুখমেৰ লভতে, অথ খো কিত্তিঞ্চ পপ্পোতি ‘‘ইতিপি সীলৰা সুপরিসুদ্ধকাযৰচীকম্মন্তো সুপরিসুদ্ধাজীৰো ঝাযী ঝানযুত্তো’’তিআদিনা কিত্তিং পরম্মুখা পত্থটযসতং পাপুণাতি. যসস্স ৰড্ঢতীতি সম্মুখে গুণাভিত্থৰসঙ্খাতো পরিৰারসম্পদাসঙ্খাতো চ যসো অস্স পরিব্রূহতি. ইদানি ‘‘তদাচর’’ন্তি সামঞ্ঞতো ৰুত্তমত্থং সরূপতো দস্সেন্তো – ‘‘যো অরিযমট্ঠঙ্গিকমঞ্জসং উজুং, ভাৰেতি মগ্গং অমতস্স পত্তিযা’’তি আহ. তস্সত্থো যো পুগ্গলো কিলেসেহি আরকত্তা পরিসুদ্ধট্ঠেন পটিপজ্জন্তানং অরিযভাৰকরণট্ঠেন অরিযং, সম্মাদিট্ঠিআদিঅট্ঠঙ্গসমুদাযতায অট্ঠঙ্গিকং, অন্তদ্ৰযরহিতমজ্ঝিমপটিপত্তিভাৰতো অকুটিলট্ঠেন অঞ্জসং, কাযৰঙ্কাদিপ্পহানতো উজুং, নিব্বানত্থিকেহি মগ্গনিযট্ঠেন কিলেসে মারেন্তো গমনট্ঠেন চ ‘‘মগ্গ’’ন্তি লদ্ধনামং দুক্খনিরোধগামিনিপটিপদং অমতস্স অসঙ্খতায ধাতুযা পত্তিযা অধিগমায ভাৰেতি অত্তনো সন্তানে উপ্পাদেতি ৰড্ঢেতি চ, সো নিপ্পরিযাযেন ‘‘সুখত্থো তদাচর’’ন্তি ৰুচ্চতি, তস্মা যথাৰুত্তং সুখং লভতি. তং সুত্ৰা পরিব্বাজকো পসন্নমানসো পব্বজিত্ৰা সম্মা পটিপজ্জন্তো নচিরস্সেৰ ৰিপস্সনং ৰড্ঢেত্ৰা অরহত্তং পাপুণি. ইদমেৰ থেরস্স অঞ্ঞাব্যাকরণং অহোসি.

সামঞ্ঞকানিত্থেরগাথাৰণ্ণনা নিট্ঠিতা.

৬. কুমাপুত্তত্থেরগাথাৰণ্ণনা

সাধু সুতন্তি আযস্মতো কুমাপুত্তত্থেরস্স গাথা. কা উপ্পতি? সো কির পুরিমবুদ্ধেসু কতাধিকারো ইতো একনৰুতে কপ্পে অজিনচম্মৰসনো তাপসো হুত্ৰা বন্ধুমতীনগরে রাজুয্যানে ৰসন্তো ৰিপস্সিং ভগৰন্তং পস্সিত্ৰা পসন্নমানসো পাদব্ভঞ্জনতেলং অদাসি. সো তেন পুঞ্ঞকম্মেন দেৰলোকে নিব্বত্তো. ততো পট্ঠায সুগতীসুযেৰ সংসরন্তো ইমস্মিং বুদ্ধুপ্পাদে অৰন্তিরট্ঠে ৰেল়ুকণ্টকনগরে গহপতিকুলে নিব্বত্তো. ‘‘নন্দো’’তিস্স নামং অকংসু. মাতা পনস্স কুমা নাম, তেন কুমাপুত্তোতি পঞ্ঞাযিত্থ. সো আযস্মতো সারিপুত্তস্স সন্তিকে ধম্মং সুত্ৰা লদ্ধপ্পসাদো পব্বজিত্ৰা কতপুব্বকিচ্চো পরিযন্তপব্বতপস্সে সমণধম্মং করোন্তো ৰিসেসং নিব্বত্তেতুং অসক্কোন্তো ভগৰন্তং উপসঙ্কমিত্ৰা ধম্মং সুত্ৰা কম্মট্ঠানং সোধেত্ৰা সপ্পাযট্ঠানে ৰসন্তো ৰিপস্সনং ৰড্ঢেত্ৰা অরহত্তং সচ্ছাকাসি. তেন ৰুত্তং অপদানে (অপ. থের ২.৫৩.২৪-৩০) –

‘‘নগরে বন্ধুমতিযা, রাজুয্যানে ৰসামহং;

চম্মৰাসী তদা আসিং, কমণ্ডলুধরো অহং.

‘‘অদ্দসং ৰিমলং বুদ্ধং, সযম্ভুং অপরাজিতং;

পধানং পহিতত্তং তং, ঝাযিং ঝানরতং ৰসিং.

‘‘সব্বকামসমিদ্ধঞ্চ, ওঘতিণ্ণমনাসৰং;

দিস্ৰা পসন্নসুমনো, অব্ভঞ্জনমদাসহং.

‘‘একনৰুতিতো কপ্পে, অব্ভঞ্জনমদাসহং;

দুগ্গতিং নাভিজানামি, অব্ভঞ্জনস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অরঞ্ঞে কাযদল়্হিবহুলে ভিক্খূ, দিস্ৰা তে ওৰদন্তো সাসনস্স নিয্যানিকভাৰং পকাসেন্তো ‘‘সাধু সুতং সাধু চরিতক’’ন্তি গাথং অভাসি.

৩৬. তত্থ সাধূতি সুন্দরং. সুতন্তি সৰনং. তঞ্চ খো ৰিৰট্টূপনিস্সিতং ৰিসেসতো অপ্পিচ্ছতাদিপটিসংযুত্তং দসকথাৰত্থুসৰনং ইধাধিপ্পেতং. সাধু চরিতকন্তি তদেৰ অপ্পিচ্ছতাদিচরিতং চিণ্ণং, সাধুচরিতমেৰ হি ‘‘চরিতক’’ন্তি ৰুত্তং. পদদ্ৰযেনাপি বাহুসচ্চং তদনুরূপং পটিপত্তিঞ্চ ‘‘সুন্দর’’ন্তি দস্সেতি. সদাতি সব্বকালে নৰকমজ্ঝিমথেরকালে, সব্বেসু ৰা ইরিযাপথক্খণেসু. অনিকেতৰিহারোতি কিলেসানং নিৰাসনট্ঠানট্ঠেন পঞ্চকামগুণা নিকেতা নাম, লোকিযা ৰা ছল়ারম্মণধম্মা. যথাহ – ‘‘রূপনিমিত্তনিকেতৰিসারৰিনিবন্ধা খো, গহপতি, ‘নিকেতসারী’তি ৰুচ্চতী’’তিআদি (সং. নি. ৩.৩). তেসং নিকেতানং পহানত্থায পটিপদা অনিকেতৰিহারো. অত্থপুচ্ছনন্তি তং আজানিতুকামস্স কল্যাণমিত্তং উপসঙ্কমিত্ৰা দিট্ঠধম্মিকসম্পরাযিকপরমত্থপভেদস্স পুচ্ছনং, কুসলাদিভেদস্স ৰা অত্থস্স সভাৰধম্মস্স ‘‘কিং, ভন্তে, কুসলং, কিং অকুসলং, কিং সাৰজ্জং, কিং অনৰজ্জ’’ন্তিআদিনা (ম. নি. ৩.২৯৬) পুচ্ছনং অত্থপুচ্ছনং. পদক্খিণকম্মন্তি তং পন পুচ্ছিত্ৰা পদক্খিণগ্গাহিভাৰেন তস্স ওৰাদে অধিট্ঠানং সম্মাপটিপত্তি. ইধাপি ‘‘সাধূ’’তি পদং আনেত্ৰা যোজেতব্বং. এতং সামঞ্ঞন্তি ‘‘সাধু সুত’’ন্তিআদিনা ৰুত্তং যং সুতং, যঞ্চ চরিতং, যো চ অনিকেতৰিহারো, যঞ্চ অত্থপুচ্ছনং, যঞ্চ পদক্খিণকম্মং, এতং সামঞ্ঞং এসো সমণভাৰো. যস্মা ইমায এৰ পটিপদায সমণভাৰো, ন অঞ্ঞথা, তস্মা ‘‘সামঞ্ঞ’’ন্তি নিপ্পরিযাযতো মগ্গফলস্স অধিৰচনং. তস্স ৰা পন অযং অপণ্ণকপটিপদা, তং পনেতং সামঞ্ঞং যাদিসস্স সম্ভৰাতি, তং দস্সেতুং ‘‘অকিঞ্চনস্সা’’তি ৰুত্তং. অপরিগ্গাহকস্স, খেত্তৰত্থুহিরঞ্ঞসুৰণ্ণদাসিদাসাদিপরিগ্গহপটিগ্গহণরহিতস্সাতি অত্থো.

কুমাপুত্তত্থেরগাথাৰণ্ণনা নিট্ঠিতা.

৭. কুমাপুত্তসহাযত্থেরগাথাৰণ্ণনা

নানাজনপদং যন্তীতি আযস্মতো কুমাপুত্তসহাযত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো তত্থ তত্থ ৰিৰট্টূপনিস্সযং কুসলং উপচিনন্তো ইতো চতুনৰুতে কপ্পে সিদ্ধত্থস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো অরঞ্ঞং পৰিসিত্ৰা বহুং রুক্খদণ্ডং ছিন্দিত্ৰা কত্তরযট্ঠিং কত্ৰা সঙ্ঘস্স অদাসি. অঞ্ঞঞ্চ যথাৰিভৰং পুঞ্ঞং কত্ৰা দেৰেসু নিব্বত্তিত্ৰা ততো পট্ঠায সুগতীসুযেৰ পরিৰত্তেন্তো ইমস্মিং বুদ্ধুপ্পাদে ৰেল়ুকণ্টকনগরে ইদ্ধে কুলে নিব্বত্তি. সুদন্তোতিস্স নামং অহোসি. ‘‘ৰাসুলো’’তি কেচি ৰদন্তি. সো কুমাপুত্তস্স পিযসহাযো হুত্ৰা ৰিচরন্তো ‘‘কুমাপুত্তো পব্বজিতো’’তি সুত্ৰা ‘‘ন হি নূন সো ওরকো ধম্মৰিনযো, যত্থ কুমাপুত্তো পব্বজিতো’’তি তদনুবন্ধেন সযম্পি পব্বজিতুকামো হুত্ৰা সত্থু সন্তিকং উপসঙ্কমি. তস্স সত্থা ধম্মং দেসেসি. সো ভিয্যোসোমত্তায পব্বজ্জায সঞ্জাতছন্দো পব্বজিত্ৰা কুমাপুত্তেনেৰ সদ্ধিং পরিযন্তপব্বতে ভাৰনানুযুত্তো ৰিহরতি. তেন চ সমযেন সম্বহুলা ভিক্খূ নানাজনপদেসু জনপদচারিকং চরন্তাপি গচ্ছন্তাপি আগচ্ছন্তাপি তং ঠানং উপগচ্ছন্তি. তেন তত্থ কোলাহলং হোতি. তং দিস্ৰা সুদন্তত্থেরো ‘‘ইমে ভিক্খূ নিয্যানিকসাসনে পব্বজিত্ৰা জনপদৰিতক্কং অনুৰত্তেন্তা চিত্তসমাধিং ৰিরাধেন্তী’’তি সংৰেগজাতো তমেৰ সংৰেগং অত্তনো চিত্তদমনস্স অঙ্কুসং করোন্তো ‘‘নানাজনপদং যন্তী’’তি গাথং অভাসি.

৩৭. তত্থ নানাজনপদন্তি ৰিসুং ৰিসুং নানাৰিধং জনপদং, কাসিকোসলাদিঅনেকরট্ঠন্তি অত্থো. যন্তীতি গচ্ছন্তি. ৰিচরন্তাতি ‘‘অসুকো জনপদো সুভিক্খো সুলভপিণ্ডো, অসুকো খেমো অরোগো’’তিআদিৰিতক্কৰসেন জনপদচারিকং চরন্তা. অসঞ্ঞতাতি তস্সেৰ জনপদৰিতক্কস্স অপ্পহীনতায চিত্তেন অসংযতা. সমাধিঞ্চ ৰিরাধেন্তীতি সব্বস্সপি উত্তরিমনুস্সধম্মস্স মূলভূতং উপচারপ্পনাভেদং সমাধিঞ্চ নাম ৰিরাধেন্তি. চ-সদ্দো সম্ভাৰনে. দেসন্তরচরণেন ঝাযিতুং ওকাসাভাৰেন অনধিগতং সমাধিং নাধিগচ্ছন্তা, অধিগতঞ্চ ৰসীভাৰানাপাদনেন জীরন্তা ৰীরাধেন্তি নাম. কিংসু রট্ঠচরিযা করিস্সতীতি সূতি নিপাতমত্তং. ‘‘এৰংভূতানং রট্ঠচরিযা জনপদচারিকা কিং করিস্সতি, কিং নাম অত্থং সাধেস্সতি, নিরত্থকাৰা’’তি গরহন্তো ৰদতি. তস্মাতি যস্মা ঈদিসী দেসন্তরচরিযা ভিক্খুস্স ন অত্থাৰহা, অপি চ খো অনত্থাৰহা সম্পত্তীনং ৰিরাধনতো, তস্মা. ৰিনেয্য সারম্ভন্তি ৰসনপদেসে অরতিৰসেন উপ্পন্নং সারম্ভং চিত্তসংকিলেসং তদনুরূপেন পটিসঙ্খানেন ৰিনেত্ৰা ৰূপসমেত্ৰা. ঝাযেয্যাতি আরম্মণূপনিজ্ঝানেন লক্খণূপনিজ্ঝানেন চাতি দুৰিধেনপি ঝানেন ঝাযেয্য. অপুরক্খতোতি মিচ্ছাৰিতক্কেহি তণ্হাদীহি ৰা ন পুরক্খতোতি তেসং ৰসং অনুপগচ্ছন্তো কম্মট্ঠানমেৰ মনসি করেয্যাতি অত্থো. এৰং পন ৰত্ৰা থেরো তমেৰ সংৰেগং অঙ্কুসং কত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৫৩.৩৬-৪১) –

‘‘কাননং ৰনমোগ্গয্হ, ৰেল়ুং ছেত্ৰানহং তদা;

আলম্বনং করিত্ৰান, সঙ্ঘস্স অদদিং বহুং.

‘‘তেন চিত্তপ্পসাদেন, সুব্বতে অভিৰাদিয;

আলম্বদণ্ডং দত্ৰান, পক্কামিং উত্তরামুখো.

‘‘চতুন্নৰুতিতো কপ্পে, যং দণ্ডমদদিং তদা;

দুগ্গতিং নাভিজানামি, দণ্ডদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

যং পনত্থং অঙ্কুসং কত্ৰা অযং থেরো অরহত্তং পত্তো, তমেৰত্থং হদযে ঠপেত্ৰা অরহত্তং পত্তোপি ‘‘নানাজনপদং যন্তি’’তি ইদমেৰ গাথং অভাসি. তস্মা তদেৰস্স অঞ্ঞাব্যাকরণং অহোসীতি.

কুমাপুত্তসহাযত্থেরগাথাৰণ্ণনা নিট্ঠিতা.

৮. গৰম্পতিত্থেরগাথাৰণ্ণনা

যো ইদ্ধিযা সরভুন্তি আযস্মতো গৰম্পতিত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো ইতো একতিংসে কপ্পে সিখিং ভগৰন্তং পস্সিত্ৰা পসন্নমানসো পুপ্ফেহি পূজং অকাসি. সো তেন পুঞ্ঞকম্মেন দেৰলোকে উপ্পন্নো অপরাপরং পুঞ্ঞানি করোন্তো কোণাগমনস্স ভগৰতো চেতিযে ছত্তঞ্চ ৰেদিকঞ্চ কারেসি. কস্সপস্স পন ভগৰতো কালে অঞ্ঞতরস্মিং কুলগেহে নিব্বত্তো. তস্মিঞ্চ কুলে বহুং গোমণ্ডলং অহোসি. তং গোপালকা রক্খন্তি. অযং তত্থ অন্তরন্তরা যুত্তপ্পযুত্তং ৰিচারেন্তো ৰিচরতি. সো একং খীণাসৰত্থেরং গামে পিণ্ডায চরিত্ৰা বহিগামে দেৰসিকং একস্মিং পদেসে ভত্তকিচ্চং করোন্তং দিস্ৰা ‘‘অয্যো সূরিযাতপেন কিলমিস্সতী’’তি চিন্তেত্ৰা চত্তারো সিরীসদণ্ডে উস্সাপেত্ৰা তেসং উপরি সিরীসসাখাযো ঠপেত্ৰা সাখামণ্ডপং কত্ৰা অদাসি. ‘‘মণ্ডপস্স সমীপে সিরীসরুক্খং রোপেসী’’তি চ ৰদন্তি. তস্স অনুকম্পায দেৰসিকং থেরো তত্থ নিসীদি. সো তেন পুঞ্ঞকম্মেন ততো চৰিত্ৰা চাতুমহারাজিকেসু নিব্বত্তি. তস্স পুরিমকম্মসংসূচকং ৰিমানদ্ৰারে মহন্তং সিরীসৰনং নিব্বত্তি ৰণ্ণগন্ধসম্পন্নেহি অঞ্ঞেহি পুপ্ফেহি সব্বকালে উপসোভযমানং, তেন তং ৰিমানং ‘‘সেরীসক’’ন্তি পঞ্ঞাযিত্থ. সো দেৰপুত্তো একং বুদ্ধন্তরং দেৰেসু চ মনুস্সেসু চ সংসরিত্ৰা ইমস্মিং বুদ্ধুপ্পাদে যসত্থেরস্স চতূসু গিহিসহাযেসু গৰম্পতি নাম হুত্ৰা আযস্মতো যসস্স পব্বজিতভাৰং সুত্ৰা অত্তনো সহাযেহি সদ্ধিং ভগৰতো সন্তিকং অগমাসি. সত্থা তস্স ধম্মং দেসেসি. সো দেসনাৰসানে সহাযেহি সদ্ধিং অরহত্তে পতিট্ঠাসি. তেন ৰুত্তং অপদানে (অপ. থের ২.৫৩.৪২-৪৭) –

‘‘মিগলুদ্দো পুরে আসিং, ৰিপিনে ৰিচরং অহং;

অদ্দসং ৰিরজং বুদ্ধং, সব্বধম্মান পারগুং.

‘‘তস্মিং মহাকারুণিকে, সব্বসত্তহিতে রতে;

পসন্নচিত্তো সুমনো, নেলপুপ্ফং অপূজযিং.

‘‘একতিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরো ৰিমুত্তিসুখং পটিসংৰেদেন্তো সাকেতে ৰিহরতি অঞ্জনৰনে. তেন চ সমযেন ভগৰা মহতা ভিক্খুসঙ্ঘেন সদ্ধিং সাকেতং গন্ত্ৰা অঞ্জনৰনে ৰিহাসি. সেনাসনং নপ্পহোসি. সম্বহুলা ভিক্খূ ৰিহারসামন্তা সরভুযা নদিযা ৰালিকাপুল়িনে সযিংসু. অথ অড্ঢরত্তসমযে নদিযা উদকোঘে আগচ্ছন্তে সামণেরাদযো উচ্চাসদ্দমহাসদ্দা অহেসুং. ভগৰা তং ঞত্ৰা আযস্মন্তং গৰম্পতিং আণাপেসি – ‘‘গচ্ছ, গৰম্পতি, জলোঘং ৰিক্খম্ভেত্ৰা ভিক্খূনং ফাসুৰিহারং করোহী’’তি. থেরো ‘‘সাধু, ভন্তে’’তি ইদ্ধিবলেন নদীসোতং ৰিক্খম্ভি, তং দূরতোৰ পব্বতকূটং ৰিয অট্ঠাসি. ততো পট্ঠায থেরস্স আনুভাৰো লোকে পাকটো অহোসি. অথেকদিৰসং সত্থা মহতিযা দেৰপরিসায মজ্ঝে নিসীদিত্ৰা ধম্মং দেসেন্তং থেরং দিস্ৰা লোকানুকম্পায তস্স গুণানং ৰিভাৰনত্থং তং পসংসন্তো ‘‘যো ইদ্ধিযা সরভু’’ন্তি গাথং অভাসি.

৩৮. তত্থ ইদ্ধিযাতি অধিট্ঠানিদ্ধিযা. সরভুন্তি এৰংনামিকং নদিং, যং লোকে ‘‘সরভু’’ন্তি ৰদন্তি. অট্ঠপেসীতি সন্দিতুং অদেন্তো সোতং নিৰত্তেত্ৰা পব্বতকূটং ৰিয মহন্তং জলরাসিং কত্ৰা ঠপেসি. অসিতোতি নসিতো, তণ্হাদিট্ঠিনিস্সযরহিতো, বন্ধনসঙ্খাতানং ৰা সব্বসংযোজনানং সমুচ্ছিন্নত্তা কেনচিপি বন্ধনেন অবদ্ধো, ততো এৰ এজানং কিলেসানং অভাৰতো অনেজো সো, গৰম্পতি, তং সব্বসঙ্গাতিগতং তাদিসং সব্বেপি রাগদোসমোহমানদিট্ঠিসঙ্গে অতিক্কমিত্ৰা ঠিতত্তা সব্বসঙ্গাতিগতং, অসেক্খমুনিভাৰতো মহামুনিং, ততো এৰ কামকম্মভৰাদিভেদস্স সকলস্সপি ভৰস্স পারং নিব্বানং গতত্তা ভৰস্স পারগুং. দেৰা নমস্সন্তীতি দেৰাপি ইমস্সন্তি, পগেৰ ইতরা পজাতি.

গাথাপরিযোসানে মহতো জনকাযস্স ধম্মাভিসমযো অহোসি. থেরো অঞ্ঞং ব্যাকরোন্তো ‘‘সত্থারং পূজেস্সামী’’তি ইমমেৰ গাথং অভাসীতি.

গৰম্পতিত্থেরগাথাৰণ্ণনা নিট্ঠিতা.

৯. তিস্সত্থেরগাথাৰণ্ণনা

সত্তিযা ৰিয ওমট্ঠোতি আযস্মতো তিস্সত্থেরস্স গাথা. কা উপ্পতি? অযম্পি কির পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো তিস্সস্স ভগৰতো বোধিযা মূলে পুরাণপণ্ণানি নীহরিত্ৰা সোধেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কপিলৰত্থুনগরে ভগৰতো পিতুচ্ছাপুত্তো হুত্ৰা নিব্বত্তি তিস্সো নাম নামেন. সো ভগৰন্তং অনুপব্বজিত্ৰা উপসম্পন্নো হুত্ৰা অরঞ্ঞাযতনে ৰিহরন্তো জাতিং পটিচ্চ মানং করোন্তো কোধূপাযাসবহুলো চ উজ্ঝানবহুলো চ হুত্ৰা ৰিচরতি, সমণধম্মে উস্সুক্কং ন করোতি. অথ নং সত্থা একদিৰসং দিৰাট্ঠানে ৰিৰটমুখং নিদ্দাযন্তং দিব্বচক্খুনা ওলোকেন্তো সাৰত্থিতো আকাসেন গন্ত্ৰা তস্স উপরি আকাসেযেৰ ঠত্ৰা ওভাসং ফরিত্ৰা তেনোভাসেন পটিবুদ্ধস্স সতিং উপ্পাদেত্ৰা ওৰাদং দেন্তো ‘‘সত্তিযা ৰিয ওমট্ঠো’’তি গাথং অভাসি.

৩৯. তত্থ সত্তিযাতি দেসনাসীসমেতং, একতোধারাদিনা সত্থেনাতি অত্থো. ওমট্ঠোতি পহতো. চত্তারো হি পহারা ওমট্ঠো উম্মট্ঠো মট্ঠো ৰিমট্ঠোতি. তত্থ উপরি ঠত্ৰা অধোমুখং দিন্নপহারো ওমট্ঠো নাম, হেট্ঠা ঠত্ৰা উদ্ধম্মুখং দিন্নপহারো উম্মট্ঠো নাম, অগ্গল়সূচি ৰিয ৰিনিৰিজ্ঝিত্ৰা গতো মট্ঠো নাম, সেসো সব্বোপি ৰিমট্ঠো নাম. ইমস্মিং পন ঠানে ওমট্ঠো গহিতো. সো হি সব্বদারুণো দুরুদ্ধরণসল্লো দুত্তিকিচ্ছো অন্তোদোসো অন্তোপুব্বলোহিতোৰ হোতি, পুব্বলোহিতং অনিক্খমিত্ৰা ৰণমুখং পরিযোনন্ধিত্ৰা তিট্ঠতি. পুব্বলোহিতং নীহরিতুকামেহি মঞ্চেন সদ্ধিং বন্ধিত্ৰা অধোসিরো কাতব্বো হোতি, মরণং ৰা মরণমত্তং ৰা দুক্খং পাপুণন্তি. ডয্হমানেতি অগ্গিনা ঝাযমানে. মত্থকেতি সীসে. ইদং ৰুত্তং হোতি – যথা সত্তিযা ওমট্ঠো পুরিসো সল্লুব্বাহনৰণতিকিচ্ছনানং অত্থায ৰীরিযং আরভতি তাদিসং পযোগং করোতি পরক্কমতি, যথা চ ডয্হমানে মত্থকে আদিত্তসীসো পুরিসো তস্স নিব্বাপনত্থং ৰীরিযং আরভতি তাদিসং পযোগং করোতি, এৰমেৰং, ভিক্খু, কামরাগপ্পহানায সতো অপ্পমত্তো অতিৰিয উস্সাহজাতো হুত্ৰা ৰিহরেয্যাতি.

এৰং ভগৰা তস্স থেরস্স কোধূপাযাসৰূপসমায ওৰাদং দেন্তো তদেকট্ঠতায কামরাগপ্পহানসীসেন দেসনং নিট্ঠাপেসি. থেরো ইমং গাথং সুত্ৰা সংৰিগ্গহদযো ৰিপস্সনায যুত্তপ্পযুত্তো ৰিহাসি. তস্স অজ্ঝাসযং ঞত্ৰা সত্থা সংযুত্তকে তিস্সত্থেরসুত্তং (সং. নি. ৩.৮৪) দেসেসি. সো দেসনাপরিযোসানে অরহত্তে পতিট্ঠাসি. তেন ৰুত্তং অপদানে (অপ. থের ২.৫৩.৬৬-৭৩) –

‘‘দেৰলোকে মনুস্সে চে, অনুভোত্ৰা উভো যসে;

অৰসানে চ নিব্বানং, সিৰং পত্তো অনুত্তরং.

‘‘সম্বুদ্ধং উদ্দিসিত্ৰান, বোধিং ৰা তস্স সত্থুনো;

যো পুঞ্ঞং পসৰী পোসো, তস্স কিং নাম দুল্লভং.

‘‘মগ্গে ফলে আগমে চ, ঝানাভিঞ্ঞাগুণেসু চ;

অঞ্ঞেসং অধিকো হুত্ৰা, নিব্বাযামি অনাসৰো.

‘‘পুরেহং বোধিযা পত্তং, ছড্ডেত্ৰা হট্ঠমানসো;

ইমেহি ৰীসতঙ্গেহি, সমঙ্গী হোমি সব্বথা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরো অঞ্ঞং ব্যাকরোন্তো সত্থারং পূজেতুং তমেৰ গাথং অভাসি.

তিস্সত্থেরগাথাৰণ্ণনা নিট্ঠিতা.

১০. ৰড্ঢমানত্থেরগাথাৰণ্ণনা

সত্তিযা ৰিয ওমট্ঠোতি আযস্মতো ৰড্ঢমানত্থেরস্স গাথা. কা উপ্পত্তি? অযম্পি কির পুরিমবুদ্ধেসু কতাধিকারো ইতো দ্ৰেনৰুতে কপ্পে তিস্সস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো তিস্সং ভগৰন্তং পিণ্ডায চরন্তং দিস্ৰা পসন্নমানসো সুপরিপক্কানি ৰণ্টতো মুত্তানি অম্বফলানি অদাসি. সো তেন পুঞ্ঞকম্মেন দেৰলোকে নিব্বত্তো অপরাপরং পুঞ্ঞকম্মানি উপচিনন্তো ইমস্মিং বুদ্ধুপ্পাদে ৰেসালিযং লিচ্ছৰিরাজকুলে নিব্বত্তি, ৰড্ঢমানোতিস্স নামং অহোসি. সো ৰযপ্পত্তো সদ্ধো পসন্নো দাযকো দানরতো কারকো সঙ্ঘুপট্ঠাকো হুত্ৰা তথারূপে অপরাধে সত্থারা পত্তনিক্কুজ্জনকম্মে কারাপিতে অগ্গিং অক্কন্তো ৰিয সঙ্ঘং খমাপেত্ৰা কম্মং পটিপ্পস্সম্ভেত্ৰা সঞ্জাতসংৰেগো পব্বজি, পব্বজিত্ৰা পন থিনমিদ্ধাভিভূতো ৰিহাসি. তং সত্থা সংৰেজেন্তো ‘‘সত্তিযা ৰিয ওমট্ঠো’’তি গাথং অভাসি.

৪০. তত্থ ভৰরাগপ্পহানাযাতি ভৰরাগস্স রূপরাগস্স অরূপরাগস্স চ পজহনত্থায. যদিপি অজ্ঝত্তসংযোজনানি অপ্পহায বহিদ্ধসংযোজনানং পহানং নাম নত্থি, নানন্তরিকভাৰতো পন উদ্ধম্ভাগিযসংযোজনপ্পহানৰচনেন ওরম্ভাগিযসংযোজনপ্পহানম্পি ৰুত্তমেৰ হোতি. যস্মা ৰা সমুচ্ছিন্নোরম্ভাগিযসংযোজনানম্পি কেসঞ্চি অরিযানং উদ্ধম্ভাগিযসংযোজনানি দুপ্পহেয্যানি হোন্তি, তস্মা সুপ্পহেয্যতো দুপ্পহেয্যমেৰ দস্সেন্তো ভগৰা ভৰরাগপ্পহানসীসেন সব্বস্সাপি উদ্ধম্ভাগিযসংযোজনস্স পহানমাহ. থেরস্স এৰ ৰা অজ্ঝাসযৰসেনেৰং ৰুত্তং. সেসং ৰুত্তনযমেৰ.

ৰড্ঢমানত্থেরগাথাৰণ্ণনা নিট্ঠিতা.

চতুত্থৰগ্গৰণ্ণনা নিট্ঠিতা.

৫. পঞ্চমৰগ্গো

১. সিরিৰড্ঢত্থেরগাথাৰণ্ণনা

ৰিৰরমনুপতন্তি ৰিজ্জুতাতি আযস্মতো সিরিৰড্ঢত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ৰিৰট্টূপনিস্সযং কুসলং উপচিনন্তো ইতো একনৰুতে কপ্পে ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো ৰিপস্সিং ভগৰন্তং পস্সিত্ৰা কিঙ্কণিপুপ্ফেহি পূজং কত্ৰা তেন পুঞ্ঞকম্মেন দেৰলোকে নিব্বত্তো অপরাপরং পুঞ্ঞানি কত্ৰা সুগতীসুযেৰ সংসরন্তো ইমস্মিং বুদ্ধুপ্পাদে রাজগহে ৰিভৰসম্পন্নস্স ব্রাহ্মণস্স গেহে নিব্বত্তি, সিরিৰড্ঢোতিস্স নামং অহোসি. সো ৰযপ্পত্তো বিম্বিসারসমাগমে সত্থরি সদ্ধম্মে চ উপ্পন্নপ্পসাদো হেতুসম্পন্নতায পব্বজি. পব্বজিত্ৰা চ কতপুব্বকিচ্চো ৰেভারপণ্ডৰপব্বতানং অৰিদূরে অঞ্ঞতরস্মিং অরঞ্ঞাযতনে পব্বতগুহাযং কম্মট্ঠানমনুযুত্তো ৰিহরতি. তস্মিঞ্চ সমযে মহা অকালমেঘো উট্ঠহি. ৰিজ্জুল্লতা পব্বতৰিৰরং পৰিসন্তিযো ৰিয ৰিচরন্তি. থেরস্স ঘম্মপরিল়াহাভিভূতস্স সারগব্ভেহি মেঘৰাতেহি ঘম্মপরিল়াহো ৰূপসমি. উতুসপ্পাযলাভেন চিত্তং একগ্গং অহোসি. সমাহিতচিত্তো ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ১.২১.১০-১৪) –

‘‘কঞ্চনগ্ঘিযসঙ্কাসো, সব্বঞ্ঞূ লোকনাযকো;

ওদকং দহমোগ্গয্হ, সিনাযি অগ্গপুগ্গলো.

‘‘পগ্গয্হ কিঙ্কণিং পুপ্ফং, ৰিপস্সিস্সাভিরোপযিং;

উদগ্গচিত্তো সুমনো, দ্ৰিপদিন্দস্স তাদিনো.

‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘সত্তৰীসতিকপ্পম্হি, রাজা ভীমরথো অহু;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অঞ্ঞাপদেসেন অত্তসন্নিস্সযং উদানং উদানেন্তো ‘‘ৰিৰরমনুপতন্তি ৰিজ্জুতা’’তি গাথং অভাসি.

৪১. তত্থ ৰিৰরন্তি অন্তরা ৰেমজ্ঝং. অনুপতন্তীতি অনুলক্খণে পতন্তি পৰত্তন্তি, ৰিজ্জোতন্তীতি অত্থো. ৰিজ্জোতনমেৰ হি ৰিজ্জুল্লতানং পৰত্তি নাম. অনু-সদ্দযোগেন চেত্থ উপযোগৰচনং, যথা ‘‘রুক্খমনুৰিজ্জোতন্তী’’তি. ৰিজ্জুতাতি সতেরতা. ৰেভারস্স চ পণ্ডৰস্স চাতি ৰেভারপব্বতস্স চ পণ্ডৰপব্বতস্স চ ৰিৰরমনুপতন্তীতি যোজনা. নগৰিৰরগতোতি নগৰিৰরং পব্বতগুহং উপগতো. ঝাযতীতি আরম্মণূপনিজ্ঝানেন লক্খণূপনিজ্ঝানেন চ ঝাযতি, সমথৰিপস্সনং উস্সুক্কাপেন্তো ভাৰেতি. পুত্তো অপ্পটিমস্স তাদিনোতি সীলক্খন্ধাদিধম্মকাযসম্পত্তিযা রূপকাযসম্পত্তিযা চ অনুপমস্স উপমারহিতস্স ইট্ঠানিট্ঠাদীসু তাদিলক্খণসম্পত্তিযা তাদিনো বুদ্ধস্স ভগৰতো ওরসপুত্তো. পুত্তৰচনেনেৰ চেত্থ থেরেন সত্থু অনুজাতভাৰদীপনেন অঞ্ঞা ব্যাকতাতি ৰেদিতব্বং.

সিরিৰড্ঢত্থেরগাথাৰণ্ণনা নিট্ঠিতা.

২. খদিরৰনিযত্থেরগাথাৰণ্ণনা

চালে উপচালেতি আযস্মতো খদিরৰনিযরেৰতত্থেরস্স গাথা. কা উপ্পতি? অযং কির পদুমুত্তরস্স ভগৰতো কালে হংসৰতীনগরে তিত্থনাৰিককুলে নিব্বত্তিত্ৰা মহাগঙ্গায পযাগতিত্থে তিত্থনাৰাকম্মং করোন্তো একদিৰসং সসাৰকসঙ্ঘং ভগৰন্তং গঙ্গাতীরং উপগতং দিস্ৰা পসন্নমানসো নাৰাসঙ্ঘাটং যোজেত্ৰা মহন্তেন পূজাসক্কারেন পরতীরং পাপেত্ৰা অঞ্ঞতরং ভিক্খুং সত্থারা আরঞ্ঞকানং অগ্গট্ঠানে ঠপিযমানং দিস্ৰা তদত্থং পত্থনং পট্ঠপেত্ৰা ভগৰতো ভিক্খুসঙ্ঘস্স চ মহাদানং পৰত্তেসি. ভগৰা চ তস্স পত্থনায অৰজ্ঝভাৰং ব্যাকাসি. সো ততো পট্ঠায তত্থ তত্থ ৰিৰট্টূপনিস্সযং কুসলং কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে মগধরট্ঠে নালকগামে রূপসারিযা ব্রাহ্মণিযা কুচ্ছিস্মিং নিব্বত্তি. তং ৰযপ্পত্তং মাতাপিতরো ঘরবন্ধনেন বন্ধিতুকামা জাতা. সো সারিপুত্তত্থেরস্স পব্বজিতভাৰং সুত্ৰা ‘‘ময্হং জেট্ঠভাতা অয্যো উপতিস্সো ইমং ৰিভৰং ছড্ডেত্ৰা পব্বজিতো, তেন ৰন্তং খেল়পিণ্ডং কথাহং পচ্ছা গিলিস্সামী’’তি জাতসংৰেগো পাসং অনুপগচ্ছনকমিগো ৰিয ঞাতকে ৰঞ্চেত্ৰা হেতুসম্পত্তিযা চোদিযমানো ভিক্খূনং সন্তিকং গন্ত্ৰা ধম্মসেনাপতিনো কনিট্ঠভাৰং নিৰেদেত্ৰা অত্তনো পব্বজ্জায ছন্দং আরোচেসি. ভিক্খূ তং পব্বাজেত্ৰা পরিপুণ্ণৰীসতিৰস্সং উপসম্পাদেত্ৰা কম্মট্ঠানে নিযোজেসুং. সো কম্মট্ঠানং গহেত্ৰা খদিরৰনং পৰিসিত্ৰা, ‘‘অরহত্তং পত্ৰা ভগৰন্তং ধম্মসেনাপতিঞ্চ পস্সিস্সামী’’তি ঘটেন্তো ৰাযমন্তো ঞাণস্স পরিপাকগতত্তা নচিরস্সেৰ ছল়ভিঞ্ঞো অহোসি. তেন ৰুত্তং অপদানে (অপ. থের ১.১.৬২৮-৬৪৩) –

‘‘গঙ্গা ভাগীরথী নাম, হিমৰন্তা পভাৰিতা;

কুতিত্থে নাৰিকো আসিং, ওরিমে চ তরিং অহং.

‘‘পদুমুত্তরো নাযকো, সম্বুদ্ধো দ্ৰিপদুত্তমো;

ৰসীসতসহস্সেহি, গঙ্গাতীরমুপাগতো.

‘‘বহূ নাৰা সমানেত্ৰা, ৰড্ঢকীহি সুসঙ্খতং;

নাৰায ছদনং কত্ৰা, পটিমানিং নরাসভং.

‘‘আগন্ত্ৰান চ সম্বুদ্ধো, আরূহি তঞ্চ নাৰকং;

ৰারিমজ্ঝে ঠিতো সত্থা, ইমা গাথা অভাসথ.

‘‘যো সো তারেসি সম্বুদ্ধং, সঙ্ঘঞ্চাপি অনাসৰং;

তেন চিত্তপ্পসাদেন, দেৰলোকে রমিস্সতি.

‘‘নিব্বত্তিস্সতি তে ব্যম্হং, সুকতং নাৰসণ্ঠিতং;

আকাসে পুপ্ফছদনং, ধারযিস্সতি সব্বদা.

‘‘অট্ঠপঞ্ঞাসকপ্পম্হি, তারকো নাম খত্তিযো;

চাতুরন্তো ৰিজিতাৰী, চক্কৰত্তী ভৰিস্সতি.

‘‘সত্তপঞ্ঞাসকপ্পম্হি, চম্মকো নাম খত্তিযো;

উগ্গচ্ছন্তোৰ সূরিযো, জোতিস্সতি মহব্বলো.

‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তিদসা সো চৰিত্ৰান, মনুস্সত্তং গমিস্সতি;

রেৰতো নাম নামেন, ব্রহ্মবন্ধু ভৰিস্সতি.

‘‘অগারা নিক্খমিত্ৰান, সুক্কমূলেন চোদিতো;

গোতমস্স ভগৰতো, সাসনে পব্বজিস্সতি.

‘‘সো পচ্ছা পব্বজিত্ৰান, যুত্তযোগো ৰিপস্সকো;

সব্বাসৰে পরিঞ্ঞায, নিব্বাযিস্সতিনাসৰো.

‘‘ৰীরিযং মে ধুরধোরয্হং, যোগক্খেমাধিৰাহনং;

ধারেমি অন্তিমং দেহং, সম্মাসম্বুদ্ধসাসনে.

‘‘সতসহস্সে কতং কম্মং, ফলং দস্সেসি মে ইধ;

সুমুত্তো সরৰেগোৰ, কিলেসে ঝাপযী মম.

‘‘ততো মং ৰননিরতং, দিস্ৰা লোকন্তগূ মুনি;

ৰনৰাসিভিক্খূনগ্গং, পঞ্ঞপেসি মহামতি.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা থেরো সত্থারং ধম্মসেনাপতিঞ্চ ৰন্দিতুং সেনাসনং সংসামেত্ৰা পত্তচীৰরমাদায অনুপুব্বেন সাৰত্থিং পত্ৰা জেতৰনং পৰিসিত্ৰা সত্থারং ধম্মসেনাপতিঞ্চ ৰন্দিত্ৰা কতিপাহং জেতৰনে ৰিহাসি. অথ নং সত্থা অরিযগণমজ্ঝে নিসিন্নো আরঞ্ঞকানং ভিক্খূনং অগ্গট্ঠানে ঠপেসি – ‘‘এতদগ্গং, ভিক্খৰে, মম সাৰকানং ভিক্খূনং আরঞ্ঞকানং যদিদং রেৰতো খদিরৰনিযো’’তি (অ. নি. ১.১৯৮, ২০৩). সো অপরভাগে অত্তনো জাতগামং গন্ত্ৰা ‘‘চালা, উপচালা, সীসূপচালা’’তি তিস্সন্নং ভগিনীনং পুত্তে ‘‘চালা, উপচালা, সীসূপচালা’’তি তযো ভাগিনেয্যে আনেত্ৰা পব্বাজেত্ৰা কম্মট্ঠানে নিযোজেসি. তে কম্মট্ঠানং অনুযুত্তা ৰিহরন্তি. তস্মিঞ্চ সমযে থেরস্স কোচিদেৰ আবাধো উপ্পন্নো. তং সুত্ৰা সারিপুত্তত্থেরো রেৰতং ‘‘গিলানপুচ্ছনং অধিগমপুচ্ছনঞ্চ করিস্সামী’’তি উপগচ্ছি. রেৰতত্থেরো ধম্মসেনাপতিং দূরতোৰ আগচ্ছন্তং দিস্ৰা তেসং সামণেরানং সতুপ্পাদনৰসেন ওৰদন্তো ‘‘চালে উপচালে’’তি গাথং অভাসি.

৪২. তত্থ চালে উপচালে সীসূপচালেতি তেসং আলপনং. ‘‘চালা, উপচালা, সীসূপচালা’’তি হি ইত্থিলিঙ্গৰসেন লদ্ধনামা তে তযো দারকা পব্বজিতাপি তথা ৰোহরীযন্তি. ‘‘‘চালী, উপচালী, সীসূপচালী’তি তেসং নাম’’ন্তি চ ৰদন্তি. যদত্থং ‘‘চালা’’তিআদিনা আমন্তনং কতং, তং দস্সেন্তো ‘‘পতিস্সতা নু খো ৰিহরথা’’তি ৰত্ৰা তত্থ কারণমাহ ‘‘আগতো ৰো ৰালং ৰিয ৰেধী’’তি. পতিস্সতাতি পতিস্সতিকা. খোতি অৰধারণে. আগতোতি আগচ্ছি. ৰোতি তুম্হাকং. ৰালং ৰিয ৰেধীতি ৰালৰেধী ৰিয, অযঞ্হেত্থ সঙ্খেপত্থো – তিক্খজৰননিব্বেধিকপঞ্ঞতায ৰালৰেধিরূপো সত্থুকপ্পো তুম্হাকং মাতুলত্থেরো আগতো, তস্মা সমণসঞ্ঞং উপট্ঠপেত্ৰা সতিসম্পজঞ্ঞযুত্তা এৰ হুত্ৰা ৰিহরথ, ‘‘যথাধিগতে ৰিহারে অপ্পমত্তা ভৰথা’’তি.

তং সুত্ৰা তে সামণেরা ধম্মসেনাপতিস্স পচ্চুগ্গমনাদিৰত্তং কত্ৰা উভিন্নং মাতুলত্থেরানং পটিসন্থারৰেলাযং নাতিদূরে সমাধিং সমাপজ্জিত্ৰা নিসীদিংসু. ধম্মসেনাপতি রেৰতত্থেরেন সদ্ধিং পটিসন্থারং কত্ৰা উট্ঠাযাসনা তে সামণেরে উপসঙ্কমি, তে তথাকালপরিচ্ছেদস্স কতত্তা থেরে উপসঙ্কমন্তে এৰ উট্ঠহিত্ৰা ৰন্দিত্ৰা অট্ঠংসু. থেরো ‘‘কতরকতরৰিহারেন ৰিহরথা’’তি পুচ্ছিত্ৰা তেহি ‘‘ইমায ইমাযা’’তি ৰুত্তে ‘‘দারকেপি নাম এৰং ৰিনেন্তো ময্হং ভাতিকো পচ্চপাদি ৰত ধম্মস্স অনুধম্ম’’ন্তি থেরং পসংসন্তো পক্কামি.

খদিরৰনিযত্থেরগাথাৰণ্ণনা নিট্ঠিতা.

৩. সুমঙ্গলত্থেরগাথাৰণ্ণনা

সুমুত্তিকোতি আযস্মতো সুমঙ্গলত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো সিদ্ধত্থস্স ভগৰতো কালে রুক্খদেৰতা হুত্ৰা নিব্বত্তি. সো একদিৰসং সত্থারং ন্হাযিত্ৰা একচীৰরং ঠিতং দিস্ৰা সোমনস্সপ্পত্তো হুত্ৰা অপ্ফোটেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযা অৰিদূরে অঞ্ঞতরস্মিং গামকে তাদিসেন কম্মনিস্সন্দেন দলিদ্দকুলে নিব্বত্তি. তস্স সুমঙ্গলোতি নামং অহোসি. সো ৰযপ্পত্তো খুজ্জকাসিতনঙ্গলকুদ্দালপরিক্খারো হুত্ৰা কসিযা জীৰতি. সো একদিৰসং রঞ্ঞা পসেনদিকোসলেন ভগৰতো ভিক্খুসঙ্ঘস্স চ মহাদানে পৰত্তিযমানে দানোপকরণানি গহেত্ৰা আগচ্ছন্তেহি মনুস্সেহি সদ্ধিং দধিঘটং গহেত্ৰা আগতো ভিক্খূনং সক্কারসম্মানং দিস্ৰা ‘‘ইমে সমণা সক্যপুত্তিযা সুখুমৰত্থসুনিৰত্থা সুভোজনানি ভুঞ্জিত্ৰা নিৰাতেসু সেনাসনেসু ৰিহরন্তি, যংনূনাহম্পি পব্বজেয্য’’ন্তি চিন্তেত্ৰা, অঞ্ঞতরং মহাথেরং উপসঙ্কমিত্ৰা অত্তনো পব্বজ্জাধিপ্পাযং নিৰেদেসি. সো তং করুণাযন্তো পব্বাজেত্ৰা কম্মট্ঠানং আচিক্খি. সো অরঞ্ঞে ৰিহরন্তো একৰিহারে নিব্বিন্নো উক্কণ্ঠিতো হুত্ৰা, ৰিব্ভমিতুকামো ঞাতিগামং গচ্ছন্তো অন্তরামগ্গে কচ্ছং বন্ধিত্ৰা খেত্তং কসন্তে কিলিট্ঠৰত্থনিৰত্থে সমন্ততো রজোকিণ্ণসরীরে ৰাতাতপেন ফুস্সন্তে কস্সকে দিস্ৰা, ‘‘মহন্তং ৰতিমে সত্তা জীৰিকনিমিত্তং দুক্খং পচ্চনুভোন্তী’’তি সংৰেগং পটিলভি. ঞাণস্স পরিপাকং গতত্তা যথাগহিতং কম্মট্ঠানং উপট্ঠাসি. সো অঞ্ঞতরং রুক্খমূলং উপগন্ত্ৰা ৰিৰেকং লভিত্ৰা যোনিসো মনসিকরোন্তো ৰিপস্সনং ৰড্ঢেত্ৰা মগ্গপটিপাটিযা অরহত্তং পাপুণি. তেন ৰুত্তং অপদানে (অপ. থের ১.১২.১১-১৯) –

‘‘অত্থদস্সী জিনৰরো, লোকজেট্ঠো নরাসভো;

ৰিহারা অভিনিক্খম্ম, তল়াকং উপসঙ্কমি.

‘‘ন্হাত্ৰা পিত্ৰা চ সম্বুদ্ধো, উত্তরিত্ৰেকচীৰরো;

অট্ঠাসি ভগৰা তত্থ, ৰিলোকেন্তো দিসোদিসং.

‘‘ভৰনে উপৰিট্ঠোহং, অদ্দসং লোকনাযকং;

হট্ঠো হট্ঠেন চিত্তেন, অপ্ফোটেসিং অহং তদা.

‘‘সতরংসিংৰ জোতন্তং, পভাসন্তংৰ কঞ্চনং;

নচ্চগীতে পযুত্তোহং, পঞ্চঙ্গতূরিযম্হি চ.

‘‘যং যং যোনুপপজ্জামি, দেৰত্তং অথ মানুসং;

সব্বে সত্তে অভিভোমি, ৰিপুলো হোতি মে যসো.

‘‘নমো তে পুরিসাজঞ্ঞ, নমো তে পুরিসুত্তম;

অত্তানং তোসযিত্ৰান, পরে তোসেসি ত্ৰং মুনি.

‘‘পরিগ্গহে নিসীদিত্ৰা, হাসং কত্ৰান সুব্বতে;

উপট্ঠহিত্ৰা সম্বুদ্ধং, তুসিতং উপপজ্জহং.

‘‘সোল়সেতো কপ্পসতে, দ্ৰিনৰএকচিন্তিতা;

সত্তরতনসম্পন্না, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা সম্পত্তিং অত্তনো দুক্খৰিমুত্তিঞ্চ কিত্তনৰসেন উদানং উদানেন্তো ‘‘সুমুত্তিকো’’তিআদিমাহ.

৪৩. তত্থ সুমুত্তিকোতি সুন্দরা অচ্চন্তিকতায অপুনব্ভৰিকা মুত্তি এতস্সাতি সুমুত্তিকো. তস্স পন ৰিমুত্তিযা পাসংসিযতায অচ্ছরিযতায চ অপ্ফোটেন্তো আহ ‘‘সুমুত্তিকো’’তি. পুন তত্থ ৰিমুত্তিযং অত্তনো পসাদস্স দল়্হভাৰং দস্সেন্তো ‘‘সাহু সুমুত্তিকোম্হী’’তি আহ. ‘‘সাধু সুট্ঠু মুত্তিকো ৰতম্হী’’তি অত্থো. ‘‘কুতো পনাযং সুমুত্তিকতা’’তি? কামঞ্চাযং থেরো সব্বস্মাপি ৰট্টদুক্খতো সুৰিমুত্তো, অত্তনো পন তাৰ উপট্ঠিতং অতিৰিয অনিট্ঠভূতং দুক্খং দস্সেন্তো ‘‘তীহি খুজ্জকেহী’’তিআদিমাহ. তত্থ খুজ্জকেহীতি খুজ্জসভাৰেহি, খুজ্জাকারেহি ৰা. নিস্সক্কৰচনঞ্চেতং মুত্তসদ্দাপেক্খায. কস্সকো হি অখুজ্জোপি সমানো তীসু ঠানেসু অত্তানং খুজ্জং কত্ৰা দস্সেতি লাযনে কসনে কুদ্দালকম্মে চ. যো হি পন কস্সকো লাযনাদীনি করোতি, তানিপি অসিতাদীনি কুটিলাকারতো খুজ্জকানীতি ৰুত্তং ‘‘তীহি খুজ্জকেহী’’তি.

ইদানি তানি সরূপতো দস্সেন্তো ‘‘অসিতাসু মযা, নঙ্গলাসু মযা, খুদ্দকুদ্দালাসু মযা’’তি আহ. তত্থ অসিতাসু মযাতি লৰিত্তেহি মযা মুত্তন্তি অত্থো. নিস্সক্কে চেতং ভুম্মৰচনং. সেসেসুপি এসেৰ নযো. অপরে পন ‘‘অসিতাসু মযাতি লৰিত্তেহি করণভূতেহি মযা খুজ্জিত’’ন্তি ৰদন্তি. তেসং মতেন করণত্থে হেতুম্হি ৰা ভুম্মৰচনং. ‘‘নঙ্গলাসূ’’তি লিঙ্গৰিপল্লাসং কত্ৰা ৰুত্তং, নঙ্গলেহি কসিরেহীতি অত্থো. অত্তনা ৰল়ঞ্জিতকুদ্দালস্স সভাৰতো ৰল়ঞ্জনেন ৰা অপ্পকতায ৰুত্তং ‘‘খুদ্দকুদ্দালাসূ’’তি ‘‘কুণ্ঠকুদ্দালাসূ’’তিপি পাল়ি. ৰল়ঞ্জনেনেৰ অতিখিণখণিত্তেসূতি অত্থো. ইধমেৰাতি ম-কারো পদসন্ধিকরো. অথ ৰাপীতি ৰা-সদ্দো নিপাতমত্তং. গামকে ঠিতত্তা তানি অসিতাদীনি কিঞ্চাপি ইধেৰ মম সমীপেযেৰ, তথাপি অলমেৰ হোতীতি অত্থো. তুরিতৰসেন চেতং আমেডিতৰচনং. ঝাযাতি ফলসমাপত্তিজ্ঝানৰসেন দিট্ঠধম্মসুখৰিহারত্থং দিব্বৰিহারাদিৰসেন চ ঝায. সুমঙ্গলাতি অত্তানং আলপতি. ঝানে পন আদরদস্সনত্থং আমেডিতং কতং. অপ্পমত্তো ৰিহরাতি সতিপঞ্ঞাৰেপুল্লপ্পত্তিযা সব্বত্থকমেৰ অপ্পমত্তোসি ত্ৰং, তস্মা ইদানি সুখং ৰিহর, সুমঙ্গল. কেচি পন ‘‘অরহত্তং অপ্পত্ৰা এৰ ৰিপস্সনায ৰীথিপটিপন্নায সাসনে সঞ্জাতাভিরতিযা যথানুভূতং ঘরাৰাসদুক্খং জিগুচ্ছন্তো থেরো ইমং গাথং ৰত্ৰা পচ্ছা ৰিপস্সনং ৰড্ঢেত্ৰা অরহত্তং পাপুণী’’তি ৰদন্তি. তেসং মতেন ‘‘ঝায অপ্পমত্তো ৰিহরা’’তি পদানং অত্থো ৰিপস্সনামগ্গৰসেনপি যুজ্জতি এৰ.

সুমঙ্গলত্থেরগাথাৰণ্ণনা নিট্ঠিতা.

৪. সানুত্থেরগাথাৰণ্ণনা

মতং ৰা অম্ম রোদন্তীতি আযস্মতো সানুত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো ইতো চতুনৰুতে কপ্পে সিদ্ধত্থস্স ভগৰতো হত্থপাদধোৰনমুখৰিক্খালনানং অত্থায উদকং উপনেসি. সত্থা হি ভোজনকালে হত্থপাদে ধোৰিতুকামো অহোসি. সো সত্থু আকারং সল্লক্খেত্ৰা উদকং উপনেসি. ভগৰা হত্থপাদে ধোৰিত্ৰা ভুঞ্জিত্ৰা মুখং ৰিক্খালেতুকামো অহোসি. সো তম্পি ঞত্ৰা মুখোদকং উপনেসি. সত্থা মুখং ৰিক্খালেত্ৰা মুখধোৰনকিচ্চং নিট্ঠাপেসি. এৰং ভগৰা অনুকম্পং উপাদায তেন করীযমানং ৰেয্যাৰচ্চং সাদিযি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং অঞ্ঞতরস্স উপাসকস্স গেহে পটিসন্ধিং গণ্হি. তস্মিং গব্ভগতেযেৰ পিতা পৰাসং গতো, উপাসিকা দসমাসচ্চযেন পুত্তং ৰিজাযিত্ৰা সানূতিস্স নামং অকাসি. তস্মিং অনুক্কমেন ৰড্ঢন্তে সত্তৰস্সিকংযেৰ নং ভিক্খূনং সন্তিকে পব্বাজেসি, ‘‘এৰমযং অনন্তরাযো ৰড্ঢিত্ৰা অচ্চন্তসুখভাগী ভৰিস্সতী’’তি. ‘‘সো সানুসামণেরো’’তি পঞ্ঞাতো পঞ্ঞৰা ৰত্তসম্পন্নো বহুস্সুতো ধম্মকথিকো সত্তেসু মেত্তজ্ঝাসযো হুত্ৰা দেৰমনুস্সানং পিযো অহোসি মনাপোতি সব্বং সানুসুত্তে আগতনযেন ৰেদিতব্বং.

তস্স অতীতজাতিযং মাতা যক্খযোনিযং নিব্বত্তি. তং যক্খা ‘‘সানুত্থেরস্স অযং মাতা’’তি গরুচিত্তিকারবহুলা হুত্ৰা মানেন্তি. এৰং গচ্ছন্তে কালে পুথুজ্জনভাৰস্স আদীনৰং ৰিভাৰেন্তং ৰিয একদিৰসং সানুস্স যোনিসো মনসিকারাভাৰা অযোনিসো উম্মুজ্জন্তস্স ৰিব্ভমিতুকামতাচিত্তং উপ্পজ্জি. তং তস্স যক্খিনিমাতা ঞত্ৰা মনুস্সমাতুযা আরোচেসি – ‘‘তৰ পুত্তো, সানু, ‘ৰিব্ভমিস্সামী’তি চিত্তং উপ্পাদেসি, তস্মা ত্ৰং –

‘‘সানুং পবুদ্ধং ৰজ্জাসি, যক্খানং ৰচনং ইদং;

মাকাসি পাপকং কম্মং, আৰি ৰা যদি ৰা রহো.

‘‘সচে ত্ৰং পাপকং কম্মং, করিস্সসি করোসি ৰা;

ন তে দুক্খা পমুত্যত্থি, উপ্পচ্চাপি পলাযতো’’তি. (সং. নি. ১.২৩৯; ধ. প. অট্ঠ. ২.৩২৫ সানুসামণেরৰত্থু) –

এৰং ভণাহী’’তি. এৰঞ্চ পন ৰত্ৰা যক্খিনিমাতা তত্থেৰন্তরধাযি. মনুস্সমাতা পন তং সুত্ৰা পরিদেৰসোকসমাপন্না চেতোদুক্খসমপ্পিতা অহোসি. অথ সানুসামণেরো পুব্বণ্হসমযং নিৰাসেত্ৰা পত্তচীৰরমাদায মাতু সন্তিকং উপগতো মাতরং রোদমানং দিস্ৰা ‘‘অম্ম, কিং নিস্সায রোদসী’’তি ৰত্ৰা ‘‘তং নিস্সাযা’’তি চ ৰুত্তো মাতু ‘‘মতং ৰা, অম্ম, রোদন্তি, যো ৰা জীৰং ন দিস্সতী’’তি গাথং অভাসি.

৪৪. তস্সত্থো – ‘‘অম্ম, রোদন্তা নাম ঞাতকা মিত্তা ৰা অত্তনো ঞাতকং মিত্তং ৰা মতং উদ্দিস্স রোদন্তি পরলোকং গতত্তা, যো ৰা ঞাতকো মিত্তো ৰা জীৰং জীৰন্তো দেসন্তরং পক্কন্ততায চ ন দিস্সতি, তং ৰা উদ্দিস্স রোদন্তি, উভযম্পেতং মযি ন ৰিজ্জতি, এৰং সন্তে জীৰন্তং ধরমানং মং পুরতো ঠিতং পস্সন্তী; কস্মা, অম্ম, রোদসি?মং উদ্দিস্স তৰ রোদনস্স কারণমেৰ নত্থী’’তি.

তং সুত্ৰা তস্স মাতা ‘‘মরণঞ্হেতং, ভিক্খৰে, যো সিক্খং পচ্চক্খায হীনাযাৰত্ততী’’তি (ম. নি. ৩.৬৩) সুত্তপদানুসারেন উপ্পব্বজনং অরিযস্স ৰিনযে মরণন্তি দস্সেন্তী –

‘‘মতং ৰা পুত্ত রোদন্তি, যো ৰা জীৰং ন দিস্সতি;

যো চ কামে চজিত্ৰান, পুনরাগচ্ছতে ইধ.

‘‘তং ৰাপি পুত্ত রোদন্তি, পুন জীৰং মতো হি সো;

কুক্কুল়া উব্ভতো তাত, কুক্কুল়ং পতিতুমিচ্ছসী’’তি. (সং. নি. ১.২৩৯; ধ. প. অট্ঠ. ২.সানুসামণেরৰত্থু) –

গাথাদ্ৰযং অভাসি.

তত্থ কামে চজিত্ৰানাতি নেক্খম্মজ্ঝাসযেন ৰত্থুকামে পহায, তঞ্চ কিলেসকামস্স তদঙ্গপ্পহানৰসেন ৰেদিতব্বং. পব্বজ্জা হেত্থ কামপরিচ্চাগো অধিপ্পেতো. পুনরাগচ্ছতে ইধাতি ইধ গেহে পুনদেৰ আগচ্ছতি, হীনাযাৰত্তনং সন্ধায ৰদতি. তং ৰাপীতি যো পব্বজিত্ৰা ৰিব্ভমতি, তং ৰাপি পুগ্গলং মতং ৰিযমাদিসিযো রোদন্তি. কস্মাতি চে? পুন জীৰং মতো হি সোতি ৰিব্ভমনতো পচ্ছা যো জীৰন্তো, সো গুণমরণেন অত্থতো মতোযেৰ. ইদানিস্স সৰিসেসসংৰেগং জনেতুং ‘‘কুক্কুল়া’’তিআদি ৰুত্তং. তস্সত্থো – ‘‘অহোরত্তং আদিত্তং ৰিয হুত্ৰা ডহনট্ঠেন কুক্কুল়নিরযসদিসত্তা কুক্কুল়া গিহিভাৰা অনুকম্পন্তিযা মযা উব্ভতো উদ্ধতো, তাত সানু, কুক্কুল়ং পতিতুং ইচ্ছসি পতিতুকামোসী’’তি.

তং সুত্ৰা সানুসামণেরো সংৰেগজাতো হুত্ৰা ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.২১.২৫-২৯) –

‘‘ভুঞ্জন্তং সমণং দিস্ৰা, ৰিপ্পসন্নমনাৰিলং;

ঘটেনোদকমাদায, সিদ্ধত্থস্স অদাসহং.

‘‘নিম্মলো হোমহং অজ্জ, ৰিমলো খীণসংসযো;

ভৰে নিব্বত্তমানস্স, ফলং নিব্বত্ততে সুভং.

‘‘চতুন্নৰুতিতো কপ্পে, উদকং যমদাসহং;

দুগ্গতিং নাভিজানামি, দকদানস্সিদং ফলং.

‘‘একসট্ঠিম্হিতো কপ্পে, একোৰ ৰিমলো অহু;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরো ইমিস্সা গাথায ৰসেন ‘‘ময্হং ৰিপস্সনারম্ভো অরহত্তপ্পত্তি চ জাতা’’তি উদানৰসেন তমেৰ গাথং পচ্চুদাহাসি.

সানুত্থেরগাথাৰণ্ণনা নিট্ঠিতা.

৫. রমণীযৰিহারিত্থেরগাথাৰণ্ণনা

যথাপি ভদ্দো আজঞ্ঞোতি আযস্মতো রমণীযৰিহারিত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ পুঞ্ঞানি উপচিনন্তো ইতো একনৰুতে কপ্পে ৰিপস্সিং ভগৰন্তং দিস্ৰা পসন্নমানসো পঞ্চপতিট্ঠিতেন ৰন্দিত্ৰা কোরণ্ডপুপ্ফেহি পূজং অকাসি. সো তেন পুঞ্ঞকম্মেন দেৰেসু নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে রাজগহে অঞ্ঞতরস্স সেট্ঠিস্স পুত্তো হুত্ৰা নিব্বত্তো যোব্বনমদেন কামেসু মুচ্ছং আপন্নো ৰিহরতি. সো একদিৰসং অঞ্ঞতরং পারদারিকং রাজপুরিসেহি ৰিৰিধা কম্মকারণা করীযমানং দিস্ৰা সংৰেগজাতো সত্থু সন্তিকে ধম্মং সুত্ৰা পব্বজি. পব্বজিতো চ রাগচরিততায নিচ্চকালং সুসম্মট্ঠং পরিৰেণং সূপট্ঠিতং পানীযপরিভোজনীযং সুপঞ্ঞতং মঞ্চপীঠং কত্ৰা ৰিহরতি. তেন সো রমণীযৰিহারীত্ৰেৰ পঞ্ঞাযিত্থ.

সো রাগুস্সন্নতায অযোনিসো মনসি করিত্ৰা সঞ্চেতনিকং সুক্কৰিস্সট্ঠিআপত্তিং আপজ্জিত্ৰা, ‘‘ধিরত্থু, মং এৰংভূতো সদ্ধাদেয্যং ভুঞ্জেয্য’’ন্তি ৰিপ্পটিসারী হুত্ৰা ‘‘ৰিব্ভমিস্সামী’’তি গচ্ছন্তো অন্তরামগ্গে রুক্খমূলে নিসীদি, তেন চ মগ্গেন সকটেসু গচ্ছন্তেসু একো সকটযুত্তো গোণো পরিস্সমন্তো ৰিসমট্ঠানে খলিত্ৰা পতি, তং সাকটিকা যুগতো মুঞ্চিত্ৰা তিণোদকং দত্ৰা পরিস্সমং ৰিনোদেত্ৰা পুনপি ধুরে যোজেত্ৰা অগমংসু. থেরো তং দিস্ৰা – ‘‘যথাযং গোণো সকিং খলিত্ৰাপি উট্ঠায সকিং ধুরং ৰহতি, এৰং মযাপি কিলেসৰসেন সকিং খলিতেনাপি ৰুট্ঠায সমণধম্মং কাতুং ৰট্টতী’’তি যোনিসো উম্মুজ্জন্তো নিৰত্তিত্ৰা উপালিত্থেরস্স অত্তনো পৰত্তিং আচিক্খিত্ৰা তেন ৰুত্তৰিধিনা আপত্তিতো ৰুট্ঠহিত্ৰা সীলং পাকতিকং কত্ৰা ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.২১.৩৫-৩৯) –

‘‘অক্কন্তঞ্চ পদং দিস্ৰা, চক্কালঙ্কারভূসিতং;

পদেনানুপদং যন্তো, ৰিপস্সিস্স মহেসিনো.

‘‘কোরণ্ডং পুপ্ফিতং দিস্ৰা, সমূলং পূজিতং মযা;

হট্ঠো হট্ঠেন চিত্তেন, অৰন্দিং পদমুত্তমং.

‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘সত্তপঞ্ঞাসকপ্পম্হি, একো ৰীতমলো অহুং;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ৰিমুত্তিসুখং অনুভৰন্তো অত্তনো পুব্বভাগপটিপত্তিযা সদ্ধিং অরিযধম্মাধিগমনদীপনিং ‘‘যথাপি ভদ্দো আজঞ্ঞো, খলিত্ৰা পতিতিট্ঠতী’’তি গাথং অভাসি.

৪৫. তত্থ খলিত্ৰাতি পক্খলিত্ৰা. পতিতিট্ঠতীতি পতিট্ঠহতি, পুনদেৰ যথাঠানে তিট্ঠতি. এৰন্তি যথা ভদ্দো উসভাজানীযো ভারং ৰহন্তো পরিস্সমপ্পত্তো ৰিসমট্ঠানং আগম্ম একৰারং পক্খলিত্ৰা পতিতো ন তত্তকেন ধুরং ছড্ডেতি, থামজৰপরক্কমসম্পন্নতায পন খলিত্ৰাপি পতিতিট্ঠতি, অত্তনো সভাৰেনেৰ ঠত্ৰা ভারং ৰহতি, এৰং কিলেসপরিস্সমপ্পত্তো কিরিযাপরাধেন খলিত্ৰা তং খলিতং থামৰীরিযসম্পত্তিতায পটিপাকতিকং কত্ৰা মগ্গসম্মাদিট্ঠিযা দস্সনসম্পন্নং, ততো এৰ সম্মাসম্বুদ্ধস্স সৰনন্তে অরিযায জাতিযা জাততায সাৰকং, তস্স উরে ৰাযামজনিতাভিজাতিতায ওরসং পুত্তং ভদ্দাজানীযসদিসকিচ্চতায আজানীযন্তি চ মং ধারেথ উপধারেথাতি অত্থো.

রমণীযৰিহারিত্থেরগাথাৰণ্ণনা নিট্ঠিতা.

৬. সমিদ্ধিত্থেরগাথাৰণ্ণনা

সদ্ধাযাহং পব্বজিতোতি আযস্মতো সমিদ্ধিত্থেরস্স গাথা. কা উপ্পত্তি? অযম্পি পুরিমবুদ্ধেসু কত্তাধিকারো তত্থ তত্থ পুঞ্ঞানি উপচিনন্তো ইতো চতুনৰুতে কপ্পে সিদ্ধত্থং ভগৰন্তং পস্সিত্ৰা পসন্নমানসো সৰণ্টানি পুপ্ফানি কণ্ণিকবদ্ধানি গহেত্ৰা পূজেসি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা সুগতীসুযেৰ পরিৰত্তেন্তো ইমস্মিং বুদ্ধুপ্পাদে রাজগহে কুলগেহে নিব্বত্তি. তস্স জাতকালতো পট্ঠায তং কুলং ধনধঞ্ঞাদীহি ৰড্ঢি, অত্তভাৰো চস্স অভিরূপো দস্সনীযো গুণৰা ইতি ৰিভৰসমিদ্ধিযা চ গুণসমিদ্ধিযা চ সমিদ্ধীত্ৰেৰ পঞ্ঞাযিত্থ. সো বিম্বিসারসমাগমে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা ভাৰনায যুত্তপ্পযুত্তো ৰিহরন্তো ভগৰতি তপোদারামে ৰিহরন্তে একদিৰসং এৰং চিন্তেসি – ‘‘লাভা ৰত মে সত্থা অরহং সম্মাসম্বুদ্ধো, স্ৰাক্খাতে চাহং ধম্মৰিনযে পব্বজিতো, সব্রহ্মচারী চ মে সীলৰন্তো কল্যাণধম্মা’’তি. তস্সেৰং চিন্তেন্তস্স উল়ারং পীতিসোমনস্সং উদপাদি. তং অসহন্তো মারো পাপিমা থেরস্স অৰিদূরে মহন্তং ভেরৰসদ্দমকাসি, পথৰিযা উন্দ্রিযনকালো ৰিয অহোসি. থেরো ভগৰতো তমত্থং আরোচেসি. ভগৰা ‘‘মারো তুয্হং ৰিচক্খুকম্মায চেতেতি, গচ্ছ, ভিক্খু তত্থ অচিন্তেত্ৰা ৰিহরাহী’’তি আহ. থেরো তত্থ গন্ত্ৰা ৰিহরন্তো নচিরস্সেৰ ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ১.২১.৩০-৩৪) –

‘‘কণিকারংৰ জোতন্তং, নিসিন্নং পব্বতন্তরে;

ওভাসেন্তং দিসা সব্বা, সিদ্ধত্থং নরসারথিং.

‘‘ধনুং অদ্ৰেজ্ঝং কত্ৰান, উসুং সন্নয্হহং তদা;

পুপ্ফং সৰণ্টং ছেত্ৰান, বুদ্ধস্স অভিরোপযিং.

‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘একপঞ্ঞাসিতো কপ্পে, একো আসিং জুতিন্ধরো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা তত্থেৰ ৰিহরন্তস্স থেরস্স খীণাসৰভাৰং অজানন্তো পুরিমনযেনেৰ মারো মহন্তং ভেরৰসদ্দং অকাসি. তং সুত্ৰা থেরো অভীতো অচ্ছম্ভী ‘‘তাদিসানং মারানং সতম্পি সহস্সম্পি ময্হং লোমম্পি ন কম্পেতী’’তি অঞ্ঞং ব্যাকরোন্তো ‘‘সদ্ধাযাহং পব্বজিতো’’তি গাথং অভাসি.

৪৬. তত্থ সদ্ধাযাতি ধম্মচ্ছন্দসমুট্ঠানায কম্মফলসদ্ধায চেৰ রতনত্তযসদ্ধায চ. অহন্তি অত্তানং নিদ্দিসতি. পব্বজিতোতি উপগতো. অগারস্মাতি গেহতো ঘরাৰাসতো ৰা. অনগারিযন্তি পব্বজ্জং, সা হি যংকিঞ্চি কসিৰাণিজ্জাদিকম্মং ‘অগারস্স হিত’ন্তি অগারিযং নাম, তদভাৰতো ‘‘অনগারিযা’’তি ৰুচ্চতি. সতি পঞ্ঞা চ মে ৰুড্ঢাতি সরণলক্খণা সতি, পজাননলক্খণা পঞ্ঞাতি ইমে ধম্মা ৰিপস্সনাক্খণতো পট্ঠায মগ্গপটিপাটিযা যাৰ অরহত্তা মে ৰুড্ঢা ৰড্ঢিতা, ন দানি ৰড্ঢেতব্বা অত্থি সতিপঞ্ঞা ৰেপুল্লপ্পত্তাতি দস্সেতি. চিত্তঞ্চ সুসমাহিতন্তি অট্ঠসমাপত্তিৰসেন চেৰ লোকুত্তরসমাধিৰসেন চ চিত্তং মে সুট্ঠু সমাহিতং, ন দানি তস্স সমাধাতব্বং অত্থি, সমাধি ৰেপুল্লপ্পত্তোতি দস্সেতি. তস্মা কামং করস্সু রূপানীতি পাপিম মং উদ্দিস্স যানি কানিচি ৰিপ্পকারানি যথারুচিং করোহি, তেহি পন নেৰ মং ব্যাধযিস্সসি মম সরীরকম্পনমত্তম্পি কাতুং ন সক্খিস্সসি, কুতো চিত্তঞ্ঞথত্তং? তস্মা তৰ কিরিযা অপ্পটিচ্ছিতপহেনকং ৰিয ন কিঞ্চি অত্থং সোধেতি, কেৰলং তৰ চিত্তৰিঘাতমত্তফলাতি থেরো মারং তজ্জেসি. তং সুত্ৰা মারো ‘‘জানাতি মং সমণো’’তি তত্থেৰন্তরধাযি.

সমিদ্ধিত্থেরগাথাৰণ্ণনা নিট্ঠিতা.

৭. উজ্জযত্থেরগাথাৰণ্ণনা

নমো তে বুদ্ধ ৰীরত্থূতি আযস্মতো উজ্জযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি করোন্তো ইতো দ্ৰানৰুতে কপ্পে তিস্সং ভগৰন্তং পস্সিত্ৰা পসন্নমানসো কণিকারপুপ্ফেহি পূজং অকাসি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে রাজগহে অঞ্ঞতরস্স সোত্তিযব্রাহ্মণস্স পুত্তো হুত্ৰা নিব্বত্তি, উজ্জযোতিস্স নামং অহোসি. সো ৰযপ্পত্তো তিণ্ণং ৰেদানং পারগূ হুত্ৰা তত্থ সারং অপস্সন্তো উপনিস্সযসম্পত্তিযা চোদিযমানো ৰেল়ুৰনং গন্ত্ৰা সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা চরিযানুকূলং কম্মট্ঠানং গহেত্ৰা অরঞ্ঞে ৰিহরন্তো ৰিপস্সনং ৰড্ঢেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.২১.১-৪) –

‘‘কণিকারং পুপ্ফিতং দিস্ৰা, ওচিনিত্ৰানহং তদা;

তিস্সস্স অভিরোপেসিং, ওঘতিণ্ণস্স তাদিনো.

‘‘দ্ৰেনৰুতে ইতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘পঞ্চতিংসে ইতো কপ্পে, অরুণপাণীতি ৰিস্সুতো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা সত্থু সন্তিকং গন্ত্ৰা ৰন্দিত্ৰা একমন্তং নিসীদিত্ৰা ভগৰতো থোমনাকারেন অঞ্ঞং ব্যাকরোন্তো ‘‘নমো তে বুদ্ধ ৰীরত্থূ’’তি গাথং অভাসি.

৪৭. তত্থ নমোতি পণামকিত্তনং. তেতি পণামকিরিযায সম্পদানকিত্তনং, তুয্হন্তি অত্থো. বুদ্ধ ৰীরাতি চ ভগৰতো আলপনং. ভগৰা হি যথা অভিঞ্ঞেয্যাদিভেদস্স অত্থস্স অভিঞ্ঞেয্যাদিভেদেন সযম্ভূঞাণেন অনৰসেসতো বুদ্ধত্তা ‘‘বুদ্ধো’’তি ৰুচ্চতি. এৰং পঞ্চন্নম্পি মারানং অভিপ্পমদ্দনৰসেন পদহন্তেন মহতা ৰীরিযেন সমন্নাগতত্তা ‘‘ৰীরো’’তি ৰুচ্চতি. অত্থূতি হোতু, তস্স ‘‘নমো’’তি ইমিনা সম্বন্ধো. ৰিপ্পমুত্তোসি সব্বধীতি সব্বেহি কিলেসেহি সব্বস্মিঞ্চ সঙ্খারগতে ৰিপ্পমুত্তো ৰিসংযুত্তো অসি ভৰসি, ন তযা কিঞ্চি অৰিপ্পমুত্তং নাম অত্থি, যতোহং তুয্হাপদানে ৰিহরং, ৰিহরামি অনাসৰোতি তুয্হং তৰ অপদানে ওৰাদে গতমগ্গে পটিপত্তিচরিযায ৰিহরং যথাসত্তি যথাবলং পটিপজ্জন্তো কামাসৰাদীনং চতুন্নম্পি আসৰানং সুপ্পহীনত্তা অনাসৰো ৰিহরামি, তাদিসস্স নমো তে বুদ্ধ-ৰীরত্থূতি.

উজ্জযত্থেরগাথাৰণ্ণনা নিট্ঠিতা.

৮. সঞ্জযত্থেরগাথাৰণ্ণনা

যতো অহন্তি আযস্মতো সঞ্জযত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ৰিৰট্টূপনিস্সযং পুঞ্ঞং উপচিনন্তো ৰিপস্সিস্স ভগৰতো কালে মহতি পূগে সংকিত্তিৰসেন ৰত্থুং সঙ্ঘরিত্ৰা রতনত্তযং উদ্দিস্স পুঞ্ঞং করোন্তো সযং দলিদ্দো হুত্ৰা নেসং গণাদীনং পুঞ্ঞকিরিযায ব্যাৰটো অহোসি. কালেন কালং ভগৰন্তং উপসঙ্কমিত্ৰা ৰন্দিত্ৰা পসন্নমানসো ভিক্খূনঞ্চ তং তং ৰেয্যাৰচ্চং অকাসি. সো তেন পুঞ্ঞকম্মেন দেৰলোকে নিব্বত্তো অপরাপরং পুঞ্ঞানি কত্ৰা সুগতীসুযেৰ সংসরন্তো ইমস্মিং বুদ্ধুপ্পাদে রাজগহে ৰিভৰসম্পন্নস্স ব্রাহ্মণস্স পুত্তো হুত্ৰা নিব্বত্তি সঞ্জযো নাম নামেন, সো ৰযপ্পত্তো ব্রহ্মাযুপোক্খরসাতিআদিকে অভিঞ্ঞাতে ব্রাহ্মণে সাসনে অভিপ্পসন্নে দিস্ৰা সঞ্জাতপ্পসাদো সত্থারং উপসঙ্কমি. তস্স সত্থা ধম্মং দেসেসি. সো ধম্মং সুত্ৰা সোতাপন্নো অহোসি. অপরভাগে পব্বজি. পব্বজন্তো চ খুরগ্গেযেৰ ছল়ভিঞ্ঞো অহোসী. তেন ৰুত্তং অপদানে (অপ. থের ১.১০.৫১-৫৫) –

‘‘ৰিপস্সিস্স ভগৰতো, মহাপূগগণো অহু;

ৰেয্যাৰচ্চকরো আসিং, সব্বকিচ্চেসু ৰাৰটো.

‘‘দেয্যধম্মো চ মে নত্থি, সুগতস্স মহেসিনো;

অৰন্দিং সত্থুনো পাদে, ৰিপ্পসন্নেন চেতসা.

‘‘একনৰুতিতো কপ্পে, ৰেয্যাৰচ্চং অকাসহং;

দুগ্গতিং নাভিজানামি, ৰেয্যাৰচ্চস্সিদং ফলং.

‘‘ইতো চ অট্ঠমে কপ্পে, রাজা আসিং সুচিন্তিতো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা অঞ্ঞং ব্যাকরোন্তো ‘‘যতো অহং পব্বজিতো’’তি গাথং অভাসি.

৪৮. তত্থ যতো অহং পব্বজিতোতি যতো পভুতি যতো পট্ঠায অহং পব্বজিতো. পব্বজিতকালতো পট্ঠায নাভিজানামি সঙ্কপ্পং, অনরিযং দোসসংহিতন্তি রাগাদিদোসসংহিতং ততো এৰ অনরিযং নিহীনং, অরিযেহি ৰা অনরণীযতায অনরিযেহি অরণীযতায চ অনরিযং পাপকং আরম্মণে অভূতগুণাদিসঙ্কপ্পনতো ‘‘সঙ্কপ্পো’’তি লদ্ধনামং কামৰিতক্কাদিমিচ্ছাৰিতক্কং উপ্পাদিতং নাভিজানামীতি, ‘‘খুরগ্গেযেৰ মযা অরহত্তং পত্ত’’ন্তি অঞ্ঞং ব্যাকাসি.

সঞ্জযত্থেরগাথাৰণ্ণনা নিট্ঠিতা.

৯. রামণেয্যকত্থেরগাথাৰণ্ণনা

চিহচিহাভিনদিতেতি আযস্মতো রামণেয্যকত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সিখিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো ভগৰন্তং দিস্ৰা পসন্নমানসো পুপ্ফেহি পূজং অকাসি. সো তেন পুঞ্ঞকম্মেন দেৰলোকে নিব্বত্তো অপরাপরং পুঞ্ঞানি কত্ৰা সুগতীসু এৰ পরিৰত্তেন্তো ইমস্মিং বুদ্ধুপ্পাদে সাৰত্থিযং ইব্ভকুলে নিব্বত্তিত্ৰা ৰযপ্পত্তো জেতৰনপটিগ্গহণে সঞ্জাতপ্পসাদো পব্বজিত্ৰা চরিযানুকূলং কম্মট্ঠানং গহেত্ৰা অরঞ্ঞে ৰিহরতি. তস্স অত্তনো সম্পত্তিযা পব্বজিতসারুপ্পায চ পটিপত্তিযা পাসাদিকভাৰতো রামণেয্যকোত্ৰেৰ সমঞ্ঞা অহোসি. অথেকদিৰসং মারো থেরং ভিংসাপেতুকামো ভেরৰসদ্দং অকাসি. তং সুত্ৰা থেরো থিরপকতিতায তেন অসন্তসন্তো ‘‘মারো অয’’ন্তি ঞত্ৰা তত্থ অনাদরং দস্সেন্তো ‘‘চিহচিহাভিনদিতে’’তি গাথং অভাসি.

৪৯. তত্থ চিহচিহাভিনদিতেতি চিহচিহাতি অভিণ্হং পৰত্তসদ্দতায ‘‘চিহচিহা’’তি লদ্ধনামানং ৰট্টকানং অভিনাদনিমিত্তং, ৰিরৰহেতূতি অত্থো. সিপ্পিকাভিরুতেহি চাতি সিপ্পিকা ৰুচ্চন্তি দেৰকা পরনামকা গেলঞ্ঞেন ছাতকিসদারকাকারা সাখামিগা. ‘‘মহাকলন্দকা’’তি কেচি, সিপ্পিকানং অভিরুতেহি মহাৰিরৰেহি, হেতুম্হি চেতং করণৰচনং, তং হেতূতি অত্থো. ন মে তং ফন্দতি চিত্তন্তি মম চিত্তং ন ফন্দতি ন চৰতি. ইদং ৰুত্তং হোতি – ইমস্মিং অরঞ্ঞে ৰিরৰহেতু সিপ্পিকাভিরুতহেতু ৰিয, পাপিম, তৰ ৰিস্সরকরণহেতু মম চিত্তং কম্মট্ঠানতো ন পরিপততীতি. তত্থ কারণমাহ ‘‘একত্তনিরতঞ্হি মে’’তি. হি-সদ্দো হেতু অত্থো, যস্মা মম চিত্তং গণসঙ্গণিকং পহায একত্তে একীভাৰে, বহিদ্ধা ৰা ৰিক্খেপং পহায একত্তে একগ্গতায, একত্তে একসভাৰে ৰা নিব্বানে নিরতং অভিরতং, তস্মা কম্মট্ঠানতো ন ফন্দতি ন চৰতীতি, ইমং কির গাথং ৰদন্তো এৰ থেরো ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.২১.৫-৯) –

‘‘সুৰণ্ণৰণ্ণো ভগৰা, সতরংসী পতাপৰা;

চঙ্কমনং সমারূল়্হো, মেত্তচিত্তো সিখীসভো.

‘‘পসন্নচিত্তো সুমনো, ৰন্দিত্ৰা ঞাণমুত্তমং;

মিনেলপুপ্ফং পগ্গয্হ, বুদ্ধস্স অভিরোপযিং.

‘‘একতিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘একূনতিংসকপ্পম্হি, সুমেঘঘননামকো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অযমেৰ চ থেরস্স অঞ্ঞাব্যাকরণগাথা অহোসি.

রামণেয্যকত্থেরগাথাৰণ্ণনা নিট্ঠিতা.

১০. ৰিমলত্থেরগাথাৰণ্ণনা

ধরণী চ সিঞ্চতি ৰাতি আযস্মতো ৰিমলত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো ৰিপস্সিস্স ভগৰতো কালে সঙ্খধমনকুলে নিব্বত্তিত্ৰা ৰিঞ্ঞুতং পত্তো তস্মিং সিপ্পে নিপ্ফত্তিং গতো একদিৰসং ৰিপস্সিং ভগৰন্তং পস্সিত্ৰা পসন্নমানসো সঙ্খধমনেন পূজং কত্ৰা ততো পট্ঠায কালেন কালং সত্থু উপট্ঠানং অকাসি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো কস্সপস্স ভগৰতো কালে ‘‘অনাগতে মে ৰিমলো ৰিসুদ্ধো কাযো হোতূ’’তি বোধিরুক্খং গন্ধোদকেহি ন্হাপেসি, চেতিযঙ্গণবোধিযঙ্গণেসু আসনানি ধোৰাপেসি, ভিক্খূনম্পি কিলিট্ঠে সমণপরিক্খারে ধোৰাপেসি.

সো ততো চৰিত্ৰা দেৰেসু চ মনুস্সেসু চ পরিৰত্তেন্তো ইমস্মিং বুদ্ধুপ্পাদে রাজগহে ইব্ভকুলে নিব্বত্তি. তস্স মাতুকুচ্ছিযং ৰসন্তস্স নিক্খমন্তস্স চ কাযো পিত্তসেম্হাদীহি অসংকিলিট্ঠো পদুমপলাসে উদকবিন্দু ৰিয অলগ্গো পচ্ছিমভৰিকবোধিসত্তস্স ৰিয সুৰিসুদ্ধো অহোসি, তেনস্স ৰিমলোত্ৰেৰ নামং অকংসু. সো ৰযপ্পত্তো রাজগহপ্পৰেসনে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা কম্মট্ঠানং গহেত্ৰা কোসলরট্ঠে পব্বতগুহাযং ৰিহরতি. অথেকদিৰসং চাতুদ্দীপিকমহামেঘো সকলং চক্কৰাল়গব্ভং পত্থরিত্ৰা পাৰস্সি. ৰিৰট্টট্ঠাযিম্হি বুদ্ধানং চক্কৰত্তীনঞ্চ ধরমানকালে এৰ কির এৰং ৰস্সতি. ঘম্মপরিল়াহৰূপসমতো উতুসপ্পাযলাভেন থেরস্স চিত্তং সমাহিতং অহোসি একগ্গং. সো সমাহিতচিত্তো তাৰদেৰ ৰিপস্সনং উস্সুক্কাপেত্ৰা মগ্গপটিপাটিযা অরহত্তং পাপুণি. তেন ৰুত্তং অপদানে (অপ. থের ১.১০.৫৬-৬০) –

‘‘ৰিপস্সিস্স ভগৰতো, অহোসিং সঙ্খধম্মকো;

নিচ্চুপট্ঠানযুত্তোম্হি, সুগতস্স মহেসিনো.

‘‘উপট্ঠানফলং পস্স, লোকনাথস্স তাদিনো;

সট্ঠি তূরিযসহস্সানি, পরিৰারেন্তি মং সদা.

‘‘একনৰুতিতো কপ্পে, উপট্ঠহিং মহাইসিং;

দুগ্গতিং নাভিজানামি, উপট্ঠানস্সিদং ফলং.

‘‘চতুৰীসে ইতো কপ্পে, মহানিগ্ঘোসনামকা;

সোল়সাসিংসু রাজানো, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা কতকিচ্চতায তুট্ঠমানসো উদানং উদানেন্তো ‘‘ধরণী চ সিঞ্চতি ৰাতি মালুতো’’তি গাথং অভাসি.

৫০. তত্থ ধরণীতি পথৰী, সা হি সকলং ধরাধরং ধারেতীতি ‘‘ধরণী’’তি ৰুচ্চতি. সিঞ্চতীতি সমন্ততো নভং পূরেত্ৰা অভিপ্পৰস্সতো মহামেঘস্স ৰুট্ঠিধারাহি সিঞ্চতি. ৰাতি মালুতোতি উদকফুসিতসম্মিস্সতায সীতলো ৰাতো ৰাযতি. ৰিজ্জুতা চরতি নভেতি তত্থ তত্থ গজ্জতা গল়গল়াযতা মহামেঘতো নিচ্ছরন্তিযো সতেরতা আকাসে ইতো চিতো চ ৰিচরন্তি. উপসমন্তি ৰিতক্কাতি উতুসপ্পাযসিদ্ধেন সমথৰিপস্সনাধিগমেন পুব্বভাগে তদঙ্গাদিৰসেন ৰূপসন্তা হুত্ৰা কামৰিতক্কাদযো সব্বেপি নৰ মহাৰিতক্কা অরিযমগ্গাধিগমেন উপসমন্তি. অনৰসেসতো সমুচ্ছিজ্জন্তীতি. ৰত্তমানসমীপতায অরিযমগ্গক্খণং ৰত্তমানং কত্ৰা ৰদতি. অতীতত্থে ৰা এতং পচ্চুপ্পন্নৰচনং. চিত্তং সুসমাহিতং মমাতি ততো এৰ লোকুত্তরসমাধিনা মম চিত্তং সুট্ঠু সমাহিতং, ন দানি তস্স সমাধানে কিঞ্চি কাতব্বং অত্থীতি থেরো অঞ্ঞং ব্যাকাসি.

ৰিমলত্থেরগাথাৰণ্ণনা নিট্ঠিতা.

পঞ্চমৰগ্গৰণ্ণনা নিট্ঠিতা.

৬. ছট্ঠৰগ্গো

১. গোধিকাদিচতুত্থেরগাথাৰণ্ণনা

ৰস্সতি দেৰোতিআদিকা চতস্সো – গোধিকো, সুবাহু, ৰল্লিযো, উত্তিযোতি ইমেসং চতুন্নং থেরানং গাথা. কা উপ্পত্তি? ইমেপি পুরিমবুদ্ধেসু কতাধিকারা তত্থ তত্থ ভৰে পুঞ্ঞানি উপচিনন্তা ইতো চতুনৰুতে কপ্পে সিদ্ধত্থস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্ৰা অঞ্ঞমঞ্ঞং সহাযা হুত্ৰা ৰিচরিংসু. তেসু একো সিদ্ধত্থং ভগৰন্তং পিণ্ডায চরন্তং দিস্ৰা কটচ্ছুভিক্খং অদাসি. দুতিযো পসন্নচিত্তো হুত্ৰা পঞ্চপতিট্ঠিতেন ৰন্দিত্ৰা অঞ্জলিং পগ্গণ্হি. ততিযো পসন্নচিত্তো একেন পুপ্ফহত্থেন ভগৰন্তং পূজেসি. চতুত্থো সুমনপুপ্ফেহি পূজমকাসি. এৰং তে সত্থরি চিত্তং পসাদেত্ৰা পসুতেন তেন পুঞ্ঞকম্মেন দেৰলোকে নিব্বত্তিত্ৰা পুন অপরাপরং পুঞ্ঞানি কত্ৰা দেৰমনুস্সেসু সংসরন্তো কস্সপস্স ভগৰতো কালে কুলগেহে নিব্বত্তিত্ৰা সহাযকা হুত্ৰা সাসনে পব্বজিত্ৰা সমণধম্মং কত্ৰা অম্হাকং ভগৰতো কালে পাৰাযং চতুন্নং মল্লরাজানং পুত্তা হুত্ৰা নিব্বত্তিংসু. তেসং গোধিকো, সুবাহু, ৰল্লিযো, উত্তিযোতি নামানি অকংসু. অঞ্ঞমঞ্ঞং পিযসহাযা অহেসুং. তে কেনচিদেৰ করণীযেন কপিলৰত্থুং অগমংসু. তস্মিঞ্চ সমযে সত্থা কপিলৰত্থুং গন্ত্ৰা নিগ্রোধারামে ৰসন্তো যমকপাটিহারিযং দস্সেত্ৰা সুদ্ধোদনপ্পমুখে সক্যরাজানো দমেসি. তদা তেপি চত্তারো মল্লরাজপুত্তা পাটিহারিযং দিস্ৰা লদ্ধপ্পসাদা পব্বজিত্ৰা ৰিপস্সনাকম্মং করোন্তা নচিরস্সেৰ সহ পটিসম্ভিদাহি অরহত্তং পাপুণিংসু. তেন ৰুত্তং অপদানে (অপ. থের ১.১১.১-২৩) –

‘‘সুৰণ্ণৰণ্ণং সম্বুদ্ধং, আহুতীনং পটিগ্গহং;

পৰরা অভিনিক্খন্তং, ৰনা নিব্বনমাগতং.

‘‘কটচ্ছুভিক্খং পাদাসিং, সিদ্ধত্থস্স মহেসিনো;

পঞ্ঞায উপসন্তস্স, মহাৰীরস্স তাদিনো.

‘‘পদেনানুপদাযন্তং, নিব্বাপেন্তে মহাজনং;

উল়ারা ৰিত্তি মে জাতা, বুদ্ধে আদিচ্চবন্ধুনে.

‘‘চতুন্নৰুতিতো কপ্পে, যং দানমদদিং তদা;

দুগ্গতিং নাভিজানামি, ভিক্খাদানস্সিদং ফলং.

‘‘সত্তাসীতিম্হিতো কপ্পে, মহারেণুসনামকা;

সত্তরতনসম্পন্না, সত্তেতে চক্কৰত্তিনো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

গোধিকো থেরো.

‘‘সুৰণ্ণৰণ্ণং সম্বুদ্ধং, নিসভাজানিযং যথা;

তিধাপভিন্নং মাতঙ্গং, কুঞ্জরংৰ মহেসিনং.

‘‘ওভাসেন্তং দিসা সব্বা, উল়ুরাজংৰ পূরিতং;

রথিযং পটিপজ্জন্তং, লোকজেট্ঠং অপস্সহং.

‘‘ঞাণে চিত্তং পসাদেত্ৰা, পগ্গহেত্ৰান অঞ্জলিং;

পসন্নচিত্তো সুমনো, সিদ্ধত্থমভিৰাদযিং.

‘‘চতুন্নৰুতিতো কপ্পে, যং কম্মমকরিং তদা;

দুগ্গতিং নাভিজানামি, ঞাণসঞ্ঞাযিদং ফলং.

‘‘তেসত্ততিম্হিতো কপ্পে, সোল়সাসুং নরুত্তমা;

সত্তরতনসম্পন্না, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

সুবাহুত্থেরো.

‘‘তিৰরাযং নিৰাসীহং, অহোসিং মালিকো তদা;

অদ্দসং ৰিরজং বুদ্ধং, সিদ্ধত্থং লোকপূজিতং.

‘‘পসন্নচিত্তো সুমনো, পুপ্ফহত্থমদাসহং;

যত্থ যত্থুপপজ্জামি, তস্স কম্মস্স ৰাহসা.

‘‘অনুভোমি ফলং ইট্ঠং, পুব্বে সুকতমত্তনো;

পরিক্খিত্তো সুমল্লেহি, পুপ্ফদানস্সিদং ফলং.

‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, পুপ্ফপূজাযিদং ফলং.

‘‘চতুন্নৰুতুপাদায, ঠপেত্ৰা ৰত্তমানকং;

পঞ্চরাজসতা তত্থ, নজ্জসমসনামকা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ৰল্লিযো থেরো.

‘‘সিদ্ধত্থস্স ভগৰতো, জাতিপুপ্ফমদাসহং;

পাদেসু সত্ত পুপ্ফানি, হাসেনোকিরিতানি মে.

‘‘তেন কম্মেনহং অজ্জ, অভিভোমি নরামরে;

ধারেমি অন্তিমং দেহং, সম্মাসম্বুদ্ধসাসনে.

‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, পুপ্ফপূজাযিদং ফলং.

‘‘সমন্তগন্ধনামাসুং, তেরস চক্কৰত্তিনো;

ইতো পঞ্চমকে কপ্পে, চাতুরন্তা জনাধিপা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি. (অপ. থের ১.১১.১-২৩);

উত্তিযো থেরো.

অরহত্তং পন পত্ৰা ইমে চত্তারোপি থেরা লোকে পাকটা পঞ্ঞাতা রাজরাজমহামত্তেহি সক্কতা গরুকতা হুত্ৰা অরঞ্ঞে সহেৰ ৰিহরন্তি. অথেকদা রাজা বিম্বিসারো তে চত্তারো থেরে রাজগহং উপগতে উপসঙ্কমিত্ৰা ৰন্দিত্ৰা তেমাসং ৰস্সাৰাসত্থায নিমন্তেত্ৰা তেসং পাটিযেক্কং কুটিকাযো কারেত্ৰা সতিসম্মোসেন ন ছাদেসি. থেরা অচ্ছন্নাসু কুটিকাসু ৰিহরন্তি. ৰস্সকালে দেৰো ন ৰস্সতি. রাজা ‘‘কিং নু খো কারণং দেৰো ন ৰস্সতী’’তি চিন্তেন্তো, তং কারণং ঞত্ৰা, তা কুটিকাযো ছাদাপেত্ৰা, মত্তিকাকম্মং চিত্তকম্মঞ্চ কারাপেত্ৰা, কুটিকামহং করোন্তো মহতো ভিক্খুসঙ্ঘস্স দানং অদাসি. থেরা রঞ্ঞো অনুকম্পায কুটিকাযো পৰিসিত্ৰা মেত্তাসমাপত্তিযো সমাপজ্জিংসু. অথুত্তরপাচীনদিসতো মহামেঘো উট্ঠহিত্ৰা থেরানং সমাপত্তিতো ৰুট্ঠানক্খণেযেৰ ৰস্সিতুং আরভি. তেসু গোধিকত্থেরো সমাপত্তিতো ৰুট্ঠায সহ মেঘগজ্জিতেন –

৫১.

‘‘ৰস্সতি দেৰো যথা সুগীতং, ছন্না মে কুটিকা সুখা নিৰাতা;

চিত্তং সুসমাহিতঞ্চ ময্হং, অথ চে পত্থযসি পৰস্স দেৰা’’তি. –

ইমং গাথং অভাসি.

তত্থ ৰস্সতীতি সিঞ্চতি ৰুট্ঠিধারং পৰেচ্ছতি. দেৰোতি মেঘো. যথা সুগীতন্তি সুন্দরগীতং ৰিয গজ্জন্তোতি অধিপ্পাযো. মেঘো হি ৰস্সনকালে সতপটলসহস্সপটলো উট্ঠহিত্ৰা থনযন্তো ৰিজ্জুতা নিচ্ছারেন্তোৰ সোভতি, ন কেৰলো. তস্মা সিনিদ্ধমধুরগম্ভীরনিগ্ঘোসো ৰস্সতি দেৰোতি দস্সেতি. তেন সদ্দতো অনুপপীল়িতং আহ ‘‘ছন্না মে কুটিকা সুখা নিৰাতা’’তি. যথা ন দেৰো ৰস্সতি, এৰং তিণাদীহি ছাদিতা অযং মে কুটিকা, তেন ৰুট্ঠিৰস্সেন অনুপপীল়িতং আহ. পরিভোগসুখস্স উতুসপ্পাযউতুসুখস্স চ সব্ভাৰতো সুখা. ফুসিতগ্গল়পিহিতৰাতপানতাহি ৰাতপরিস্সযরহিতা. উভযেনপি আৰাসসপ্পাযৰসেন অনুপপীল়িতং আহ. চিত্তং সুসমাহিতঞ্চ ময্হন্তি চিত্তঞ্চ মম সুট্ঠু সমাহিতং অনুত্তরসমাধিনা নিব্বানারম্মণে সুট্ঠু অপ্পিতং, এতেন অব্ভন্তরপরিস্সযাভাৰতো অপ্পোস্সুক্কতং দস্সেতি. অথ চে পত্থযসীতি অথ ইদানি পত্থযসি চে, যদি ইচ্ছসি. পৰস্সাতি সিঞ্চ উদকং পগ্ঘর ৰুট্ঠিধারং পৰেচ্ছ. দেৰাতি মেঘং আলপতি.

গোধিকত্থেরগাথাৰণ্ণনা নিট্ঠিতা.

২. সুবাহুত্থেরগাথাৰণ্ণনা

৫২. ইতরেহি ৰুত্তগাথাসু ততিযপদে এৰ ৰিসেসো. তত্থ সুবাহুনা ৰুত্তগাথাযং চিত্তং সুসমাহিতঞ্চ কাযেতি মম চিত্তং করজকাযে কাযগতাসতিভাৰনাৰসেন সুট্ঠু সমাহিতং সম্মদেৰ অপ্পিতং. অযঞ্হি থেরো কাযগতাসতিভাৰনাৰসেন পটিলদ্ধঝানং পাদকং কত্ৰা ৰিপস্সনং ৰড্ঢেত্ৰা অরহত্তং পাপুণি. তং সন্ধাযাহ ‘‘চিত্তং সুসমাহিতঞ্চ কাযে’’তি.

সুবাহুত্থেরগাথাৰণ্ণনা নিট্ঠিতা.

৩. ৰল্লিযত্থেরগাথাৰণ্ণনা

৫৩. ৰল্লিযত্থেরগাথাযং তস্সং ৰিহরামি অপ্পমত্তোতি তস্সং কুটিকাযং অপ্পমাদপটিপত্তিযা মত্থকং পাপিতত্তা অপ্পমত্তো অরিযৰিহারূপসংহিতেন দিব্বৰিহারাদিসংহিতেন চ ইরিযাপথৰিহারেন ৰিহরামি, অত্তভাৰং পৰত্তেমীতি ৰুত্তং হোতি.

ৰল্লিযত্থেরগাথাৰণ্ণনা নিট্ঠিতা

৪. উত্তিযত্থেরগাথাৰণ্ণনা

৫৪. উত্তিযত্থেরেন ৰুত্তগাথাযং অদুতিযোতি অসহাযো, কিলেসসঙ্গণিকায গণসঙ্গণিকায চ ৰিরহিতোতি অত্থো.

উত্তিযত্থেরগাথাৰণ্ণনা নিট্ঠিতা.

চতুন্নং থেরানং গাথাৰণ্ণনা নিট্ঠিতা.

৫. অঞ্জনৰনিযত্থেরগাথাৰণ্ণনা

আসন্দিং কুটিকং কত্ৰাতি আযস্মতো অঞ্জনৰনিযত্থেরস্স গাথা. কা উপ্পত্তি? সো কির পদুমুত্তরস্স ভগৰতো কালে সুদস্সনো নাম মালাকারো হুত্ৰা সুমনপুপ্ফেহি ভগৰন্তং পূজেত্ৰা অঞ্ঞম্পি তত্থ তত্থ বহুং পুঞ্ঞং কত্ৰা দেৰমনুস্সেসু সংসরন্তো কস্সপস্স ভগৰতো সাসনে পব্বজিত্ৰা সমণধম্মং অকাসি. অথ ইমস্মিং বুদ্ধুপ্পাদে ৰেসালিযং ৰজ্জিরাজকুলে নিব্বত্তিত্ৰা তস্স ৰযপ্পত্তকালে ৰজ্জিরট্ঠে অৰুট্ঠিভযং ব্যাধিভযং অমনুস্সভযন্তি তীণি ভযানি উপ্পজ্জিংসু. তং সব্বং রতনসুত্তৰণ্ণনাযং (খু. পা. অট্ঠ. রতনসুত্তৰণ্ণনা; সু. নি. অট্ঠ. ১.রতনসুত্তৰণ্ণনা) ৰুত্তনযেন ৰেদিতব্বং. ভগৰতি পন ৰেসালিং পৰিট্ঠে ভযেসু চ ৰূপসন্তেসু সত্থু ধম্মদেসনায সম্বহুলানং দেৰমনুস্সানং ধম্মাভিসমযে চ জাতে অযং রাজকুমারো বুদ্ধানুভাৰং দিস্ৰা পটিলদ্ধসদ্ধো পব্বজি. যথা চাযং এৰং অনন্তরং ৰুচ্চমানা চত্তারোপি জনা. তেপি হি ইমস্স সহাযভূতা লিচ্ছৰিরাজকুমারা এৰং ইমিনাৰ নীহারেন পব্বজিংসু. কস্সপসম্বুদ্ধকালেপি সহাযা হুত্ৰা ইমিনা সহেৰ পব্বজিত্ৰা সমণধম্মং অকংসু, পদুমুত্তরস্সপি ভগৰতো পাদমূলে কুসলবীজরোপনাদিং অকংসূতি. তত্থাযং কতপুব্বকিচ্চো সাকেতে অঞ্জনৰনে সুসানট্ঠানে ৰসন্তো উপকট্ঠায ৰস্সূপনাযিকায মনুস্সেহি ছড্ডিতং জিণ্ণকং আসন্দিং লভিত্ৰা তং চতূসু পাসাণেসু ঠপেত্ৰা উপরি তিরিযঞ্চ তিণাদীহি ছাদেত্ৰা দ্ৰারং যোজেত্ৰা ৰস্সং উপগতো. পঠমমাসেযেৰ ঘটেন্তো ৰাযমন্তো অরহত্তং পাপুণি. তেন ৰুত্তং অপদানে (অপ. থের ১.১১.২৪-২৮) –

‘‘সুদস্সনোতি নামেন, মালাকারো অহং তদা;

অদ্দসং ৰিরজং বুদ্ধং, লোকজেট্ঠং নরাসভং.

‘‘জাতিপুপ্ফং গহেত্ৰান, পূজযিং পদুমুত্তরং;

ৰিসুদ্ধচক্খু সুমনো, দিব্বচক্খুং সমজ্ঝগং.

‘‘এতিস্সা পুপ্ফপূজায, চিত্তস্স পণিধীহি চ;

কপ্পানং সতসহস্সং, দুগ্গতিং নুপপজ্জহং.

‘‘সোল়সাসিংসু রাজানো, দেৰুত্তরসনামকা;

ছত্তিংসম্হি ইতো কপ্পে, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ৰিমুত্তিসুখং পটিসংৰেদেন্তো সমাপত্তিতো ৰুট্ঠায যথালদ্ধং সম্পত্তিং পচ্চৰেক্খিত্ৰা পীতিৰেগেন উদানেন্তো ‘‘আসন্দিং কুটিকং কত্ৰা’’তি গাথং অভাসি.

৫৫. তত্থ আসন্দিং কুটিকং কত্ৰাতি আসন্দী নাম দীঘপাদকং চতুরস্সপীঠং, আযতং চতুরস্সম্পি অত্থিযেৰ, যত্থ নিসীদিতুমেৰ সক্কা, ন নিপজ্জিতুং তং আসন্দিং কুটিকং কত্ৰা ৰাসত্থায হেট্ঠা ৰুত্তনযেন কুটিকং কত্ৰা যথা তত্থ নিসিন্নস্স উতুপরিস্সযাভাৰেন সুখেন সমণধম্মং কাতুং সক্কা, এৰং কুটিকং কত্ৰা. এতেন পরমুক্কংসগতং সেনাসনে অত্তনো অপ্পিচ্ছতং সন্তুট্ঠিঞ্চ দস্সেতি. ৰুত্তম্পি চেতং ধম্মসেনাপতিনা –

‘‘পল্লঙ্কেন নিসিন্নস্স, জণ্ণুকেনাভিৰস্সতি;

অলং ফাসুৰিহারায, পহিতত্তস্স ভিক্খুনো’’তি. (থেরগা. ৯৮৫; মি. প. ৬.১.১);

অপরে ‘‘আসন্দিকুটিক’’ন্তি পাঠং ৰত্ৰা ‘‘আসন্দিপ্পমাণং কুটিকং কত্ৰা’’তি অত্থং ৰদন্তি. অঞ্ঞে পন ‘‘আসননিসজ্জাদিগতে মনুস্সে উদ্দিস্স মঞ্চকস্স উপরি কতকুটিকা আসন্দী নাম, তং আসন্দিং কুটিকং কত্ৰা’’তি অত্থং ৰদন্তি. ওগ্গয্হাতি ওগাহেত্ৰা অনুপৰিসিত্ৰা. অঞ্জনং ৰনন্তি এৰংনামকং ৰনং, অঞ্জনৰণ্ণপুপ্ফভাৰতো হি অঞ্জনা ৰুচ্চন্তি ৰল্লিযো, তব্বহুলতায তং ৰনং ‘‘অঞ্জনৰন’’ন্তি নামং লভি. অপরে পন ‘‘অঞ্জনা নাম মহাগচ্ছা’’তি ৰদন্তি, তং অঞ্জনৰনং ওগ্গয্হ আসন্দিকং কুটিকং কত্ৰা তিস্সো ৰিজ্জা অনুপ্পত্তা, কতং বুদ্ধস্স সাসনন্তি ৰিহরতা মযাতি ৰচনসেসেনেৰ যোজনা. ইদমেৰ চ থেরস্স অঞ্ঞাব্যাকরণং অহোসীতি.

অঞ্জনৰনিযত্থেরগাথাৰণ্ণনা নিট্ঠিতা.

৬. কুটিৰিহারিত্থেরগাথাৰণ্ণনা

কো কুটিকাযন্তি আযস্মতো কুটিৰিহারিত্থেরস্স গাথা. কা উপ্পত্তি? সো কির পদুমুত্তরস্স ভগৰতো আকাসেন গচ্ছন্তস্স ‘‘উদকদানং দস্সামী’’তি সীতলং উদকং গহেত্ৰা পীতিসোমনস্সজাতো উদ্ধম্মুখো হুত্ৰা উক্খিপি. সত্থা তস্স অজ্ঝাসযং ঞত্ৰা পসাদসংৰড্ঢনত্থং আকাসে ঠিতোৰ সম্পটিচ্ছি. সো তেন অনপ্পকং পীতিসোমনস্সং পটিসংৰেদেসি. সেসং অঞ্জনৰনিযত্থেরস্স ৰত্থুম্হি ৰুত্তসদিসমেৰ. অযং পন ৰিসেসো – অযং কির ৰুত্তনযেন পব্বজিত্ৰা কতপুব্বকিচ্চো ৰিপস্সনং অনুযুঞ্জন্তো সাযং খেত্তসমীপেন গচ্ছন্তো দেৰে ফুসাযন্তে খেত্তপালকস্স পুঞ্ঞং তিণকুটিং দিস্ৰা পৰিসিত্ৰা তত্থ তিণসন্থারকে নিসীদি. নিসিন্নমত্তোৰ উতুসপ্পাযং লভিত্ৰা ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ১.১১.২৯-৩৫) –

‘‘সুৰণ্ণৰণ্ণং সম্বুদ্ধং, গচ্ছন্তং অনিলঞ্জসে;

ঘতাসনংৰ জলিতং, আদিত্তংৰ হুতাসনং.

‘‘পাণিনা উদকং গয্হ, আকাসে উক্খিপিং অহং;

সম্পটিচ্ছি মহাৰীরো, বুদ্ধো কারুণিকো ইসি.

‘‘অন্তলিক্খে ঠিতো সত্থা, পদুমুত্তরনামকো;

মম সঙ্কপ্পমঞ্ঞায, ইমা গাথা অভাসথ.

‘‘ইমিনা দকদানেন, পীতিউপ্পাদনেন চ;

কপ্পসতসহস্সম্পি, দুগ্গতিং নুপপজ্জতি.

‘‘তেন কম্মেন দ্ৰিপদিন্দ, লোকজেট্ঠ নরাসভ;

পত্তোম্হি অচলং ঠানং, হিত্ৰা জযপরাজযং.

‘‘সহস্সরাজনামেন, তযো তে চক্কৰত্তিনো;

পঞ্চসট্ঠিকপ্পসতে, চাতুরন্তা জনাধিপা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরে তত্থ নিসিন্নে খেত্তপালকো আগন্ত্ৰা ‘‘কো কুটিকায’’ন্তি আহ. তং সুত্ৰা থেরো ‘‘ভিক্খু কুটিকায’’ন্তিআদিমাহ. তযিদং খেত্তপালস্স থেরস্স চ ৰচনং একজ্ঝং কত্ৰা –

৫৬.

‘‘কো কুটিকাযং ভিক্খু কুটিকাযং, ৰীতরাগো সুসমাহিতচিত্তো;

এৰং জানাহি আৰুসো, অমোঘা তে কুটিকা কতা’’তি. –

তথারূপেন সঙ্গীতিং আরোপিতং.

তত্থ কো কুটিকাযন্তি, ‘‘ইমিস্সং কুটিকাযং কো নিসিন্নো’’তি খেত্তপালস্স পুচ্ছাৰচনং. তস্স ভিক্খু কুটিকাযন্তি থেরস্স পটিৰচনদানং. অথ নং অত্তনো অনুত্তরদক্খিণেয্যভাৰতো তং কুটিপরিভোগং অনুমোদাপেত্ৰা উল়ারং তমেৰ পুঞ্ঞং পতিট্ঠাপেতুং ‘‘ৰীতরাগো’’তিআদি ৰুত্তং. তস্সত্থো – একো ভিন্নকিলেসো ভিক্খু তে কুটিকাযং নিসিন্নো, ততো এৰ সো অগ্গমগ্গেন সব্বসো সমুচ্ছিন্নরাগতায ৰীতরাগো অনুত্তরসমাধিনা নিব্বানং আরম্মণং কত্ৰা সুট্ঠু সমাহিতচিত্ততায সুসমাহিতচিত্তো, ইমঞ্চ অত্থং, আৰুসো খেত্তপাল, যথাহং ৰদামি, এৰং জানাহি সদ্দহ অধিমুচ্চস্সু. অমোঘা তে কুটিকা কতা তযা কতা কুটিকা অমোঘা অৰঞ্ঝা সফলা সউদ্রযা, যস্মা অরহতা খীণাসৰেন পরিভুত্তা. সচে ত্ৰং অনুমোদসি, তং তে ভৰিস্সতি দীঘরত্তং হিতায সুখাযাতি.

তং সুত্ৰা খেত্তপালো ‘‘লাভা ৰত মে, সুলদ্ধং ৰত মে, যস্স মে কুটিকাযং এদিসো অয্যো পৰিসিত্ৰা নিসীদতী’’তি পসন্নচিত্তো অনুমোদন্তো অট্ঠাসি. ইমং পন তেসং কথাসল্লাপং ভগৰা দিব্বায সোতধাতুযা সুত্ৰা অনুমোদনঞ্চস্স ঞত্ৰা তম্ভাৰিনিং সম্পত্তিং ৰিভাৰেন্তো খেত্তপালং ইমাহি গাথাহি অজ্ঝভাসি –

‘‘ৰিহাসি কুটিযং ভিক্খু, সন্তচিত্তো অনাসৰো;

তেন কম্মৰিপাকেন, দেৰিন্দো ত্ৰং ভৰিস্সসি.

‘‘ছত্তিংসক্খত্তুং দেৰিন্দো, দেৰরজ্জং করিস্সসি;

চতুত্তিংসক্খত্তুং চক্কৰত্তী, রাজা রট্ঠে ভৰিস্সসি;

রতনকুটি নাম পচ্চেকবুদ্ধো, ৰীতরাগো ভৰিস্সসী’’তি.

কুটিকাযং লদ্ধৰিসেসত্তা পন থেরস্স ততো পভুতি কুটিৰিহারীত্ৰেৰ সমঞ্ঞা উদপাদি. অযমেৰ চ থেরস্স অঞ্ঞাব্যাকরণগাথাপি অহোসীতি.

কুটিৰিহারিত্থেরগাথাৰণ্ণনা নিট্ঠিতা.

৭. দুতিযকুটিৰিহারিত্থেরগাথাৰণ্ণনা

অযমাহু পুরাণিযাতি আযস্মতো কুটিৰিহারিত্থেরস্স গাথা. কা উপ্পত্তি? সো কির পদুমুত্তরস্স ভগৰতো পসন্নমানসো পরিল়াহকালে নল়ৰিলীৰেহি ৰিরচিতং বীজনিং অদাসি. তং সত্থা অনুমোদনগাথায সম্পহংসেসি. সেসং যদেত্থ ৰত্তব্বং, তং অঞ্জনৰনিযত্থেরৰত্থুম্হি ৰুত্তসদিসমেৰ. অযং পন ৰিসেসো – অযং কির ৰুত্তনযেন পব্বজিত্ৰা অঞ্ঞতরায পুরাণকুটিকায ৰিহরন্তো সমণধম্মং অচিন্তেত্ৰা, ‘‘অযং কুটিকা জিণ্ণা, অঞ্ঞং কুটিকং কাতুং ৰট্টতী’’তি নৰকম্মৰসেন চিত্তং উপ্পাদেসি. তস্স অত্থকামা দেৰতা সংৰেগজননত্থং ইমং উত্তানোভাসং গম্ভীরত্থং ‘‘অযমাহু’’তি গাথমাহ.

৫৭. তত্থ অযন্তি আসন্নপচ্চক্খৰচনং. আহূতি অহোসীতি অত্থো. গাথাসুখত্থঞ্হি দীঘং কত্ৰা ৰুত্তং. পুরাণিযাতি পুরাতনী অদ্ধগতা. অঞ্ঞং পত্থযসে নৰং কুটিন্তি ইমিস্সা কুটিযা পুরাণভাৰেন জিণ্ণতায ইতো অঞ্ঞং ইদানি নিব্বত্তনীযতায নৰং কুটিং পত্থযসে পত্থেসি আসীসসি. সব্বেন সব্বং পন আসং কুটিযা ৰিরাজয পুরাণিযং ৰিয নৰাযম্পি কুটিযং আসং তণ্হং অপেক্খং ৰিরাজেহি, সব্বসো তত্থ ৰিরত্তচিত্তো হোহি. কস্মা? যস্মা দুক্খা ভিক্খু পুন নৰা নাম কুটি ভিক্খু পুন ইদানি নিব্বত্তিযমানা দুক্খাৰহত্তা দুক্খা, তস্মা অঞ্ঞং নৰং দুক্খং অনুপ্পাদেন্তো যথানিব্বত্তাযং পুরাণিযংযেৰ কুটিযং ঠত্ৰা অত্তনা কতব্বং করোহীতি. অযঞ্হেত্থ অধিপ্পাযো – ত্ৰং, ভিক্খু, ‘‘অযং পুরাণী তিণকুটিকা জিণ্ণা’’তি অঞ্ঞং নৰং তিণকুটিকং কাতুং ইচ্ছসি, ন সমণধম্মং, এৰং ইচ্ছন্তো পন ভাৰনায অননুযুঞ্জনেন পুনব্ভৰাভিনিব্বত্তিযা অনতিৰত্তনতো আযতিং অত্তভাৰকুটিম্পি পত্থেন্তো কাতুং ইচ্ছন্তোযেৰ নাম হোতি. সা পন নৰা তিণকুটি ৰিয করণদুক্খেন ততো ভিয্যোপি জরামরণসোকপরিদেৰাদিদুক্খসংসট্ঠতায দুক্খা, তস্মা তিণকুটিযং ৰিয অত্তভাৰকুটিযং আসং অপেক্খং ৰিরাজয সব্বসো তত্থ ৰিরত্তচিত্তো হোহি, এৰং তে ৰট্টদুক্খং ন ভৰিস্সতীতি. দেৰতায চ ৰচনং সুত্ৰা থেরো সংৰেগজাতো ৰিপস্সনং পট্ঠপেত্ৰা ঘটেন্তো ৰাযমন্তো নচিরস্সেৰ অরহত্তে পতিট্ঠাসি. তেন ৰুত্তং অপদানে (অপ. থের ১.১১.৩৬-৪৬) –

‘‘পদুমুত্তরবুদ্ধস্স, লোকজেট্ঠস্স তাদিনো;

তিণত্থরে নিসিন্নস্স, উপসন্তস্স তাদিনো.

‘‘নল়মালং গহেত্ৰান, বন্ধিত্ৰা বীজনিং অহং;

বুদ্ধস্স উপনামেসিং, দ্ৰিপদিন্দস্স তাদিনো.

‘‘পটিগ্গহেত্ৰা সব্বঞ্ঞূ, বীজনিং লোকনাযকো;

মম সঙ্কপ্পমঞ্ঞায, ইমং গাথং অভাসথ.

‘‘যথা মে কাযো নিব্বাতি, পরিল়াহো ন ৰিজ্জতি;

তথেৰ তিৰিধগ্গীহি, চিত্তং তৰ ৰিমুচ্চতু.

‘‘সব্বে দেৰা সমাগচ্ছুং, যে কেচি ৰননিস্সিতা;

সোস্সাম বুদ্ধৰচনং, হাসযন্তঞ্চ দাযকং.

‘‘নিসিন্নো ভগৰা তত্থ, দেৰসঙ্ঘপুরক্খতো;

দাযকং সম্পহংসেন্তো, ইমা গাথা অভাসথ.

‘‘ইমিনা বীজনিদানেন, চিত্তস্স পণিধীহি চ;

সুব্বতো নাম নামেন, চক্কৰত্তী ভৰিস্সতি.

‘‘তেন কম্মাৰসেসেন, সুক্কমূলেন চোদিতো;

মালুতো নাম নামেন, চক্কৰত্তী ভৰিস্সতি.

‘‘ইমিনা বীজনিদানেন, সম্মানৰিপুলেন চ;

কপ্পসতসহস্সম্পি, দুগ্গতিং নুপপজ্জতি.

‘‘তিংসকপ্পসহস্সম্হি, সুব্বতা অট্ঠতিংস তে;

একূনতিংসসহস্সে, অট্ঠ মালুতনামকা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তে পন পতিট্ঠিতো ‘‘অযং মে অরহত্তপ্পত্তিযা অঙ্কুসভূতা’’তি তমেৰ গাথং পচ্চুদাহাসি. সাযেৰ চ থেরস্স অঞ্ঞাব্যাকরণগাথা অহোসি. কুটিওৰাদেন লদ্ধৰিসেসত্তা চস্স কুটিৰিহারীত্ৰেৰ সমঞ্ঞা অহোসীতি.

দুতিযকুটিৰিহারিত্থেরগাথাৰণ্ণনা নিট্ঠিতা.

৮. রমণীযকুটিকত্থেরগাথাৰণ্ণনা

রমণীযা মে কুটিকাতি আযস্মতো রমণীযকুটিকত্থেরস্স গাথা. কা উপ্পত্তি? সোপি কির পদুমুত্তরস্স ভগৰতো কালে কুসলবীজরোপনং কত্ৰা দেৰমনুস্সেসু সংসরন্তো ইতো অট্ঠারসকপ্পসতমত্থকে অত্থদস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো বুদ্ধারহং আসনং ভগৰতো অদাসি. পুপ্ফেহি চ ভগৰন্তং পূজেত্ৰা পঞ্চপতিট্ঠিতেন ৰন্দিত্ৰা পদক্খিণং কত্ৰা পক্কামি. সেসং অঞ্জনৰনিযত্থেরস্স ৰত্থুম্হি ৰুত্তসদিসমেৰ. অযং পন ৰিসেসো – অযং কির ৰুত্তনযেন পব্বজিত্ৰা কতপুব্বকিচ্চো ৰজ্জিরট্ঠে অঞ্ঞতরস্মিং গামকাৰাসে কুটিকাযং ৰিহরতি, সা হোতি কুটিকা অভিরূপা দস্সনীযা পাসাদিকা সুপরিকম্মকতভিত্তিভূমিকা আরামপোক্খরণিরামণেয্যাদিসম্পন্না মুত্তাজালসদিসৰালিকাকিণ্ণভূমিভাগা থেরস্স চ ৰত্তসম্পন্নতায সুসম্মট্ঠঙ্গণতাদিনা ভিয্যোসোমত্তায রমণীযতরা হুত্ৰা তিট্ঠতি. সো তত্থ ৰিহরন্তো ৰিপস্সনং পট্ঠপেত্ৰা নচিরস্সেৰ অরহত্তে পতিট্ঠাসি. তেন ৰুত্তং অপদানে (অপ. থের ১.১১.৪৭-৫২) –

‘‘কাননং ৰনমোগ্গয্হ, অপ্পসদ্দং নিরাকুলং;

সীহাসনং মযা দিন্নং, অত্থদস্সিস্স তাদিনো.

‘‘মালাহত্থং গহেত্ৰান, কত্ৰা চ নং পদক্খিণং;

সত্থারং পযিরুপাসিত্ৰা, পক্কামিং উত্তরামুখো.

‘‘তেন কম্মেন দ্ৰিপদিন্দ, লোকজেট্ঠ নরাসভ;

সন্নিব্বাপেমি অত্তানং, ভৰা সব্বে সমূহতা.

‘‘অট্ঠারসকপ্পসতে, যং দানমদদিং তদা;

দুগ্গতিং নাভিজানামি, সীহাসনস্সিদং ফলং.

‘‘ইতো সত্তকপ্পসতে, সন্নিব্বাপকখত্তিযো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরে তত্থ ৰিহরন্তে কুটিকায রমণীযভাৰতো ৰিহারপেক্খকা মনুস্সা ততো ততো আগন্ত্ৰা কুটিং পস্সন্তি. অথেকদিৰসং কতিপযা ধুত্তজাতিকা ইত্থিযো তত্থ গতা কুটিকায রমণীযভাৰং দিস্ৰা, ‘‘এত্থ ৰসন্তো অযং সমণো সিযা অম্হেহি আকড্ঢনীযহদযো’’তি অধিপ্পাযেন – ‘‘রমণীযং ৰো, ভন্তে, ৰসনট্ঠানং. মযম্পি রমণীযরূপা পঠমযোব্বনে ঠিতা’’তি ৰত্ৰা ইত্থিকুত্তাদীনি দস্সেতুং আরভিংসু. থেরো অত্তনো ৰীতরাগভাৰং পকাসেন্তো ‘‘রমণীযা মে কুটিকা, সদ্ধাদেয্যা মনোরমা’’তি গাথং অভাসি.

৫৮. তত্থ রমণীযা মে কুটিকাতি ‘‘রমণীযা তে, ভন্তে, কুটিকা’’তি যং তুম্হেহি ৰুত্তং, তং সচ্চং. অযং মম ৰসনকুটিকা রমণীযা মনুঞ্ঞরূপা, সা চ খো সদ্ধাদেয্যা, ‘‘এৰরূপায মনাপং কত্ৰা পব্বজিতানং দিন্নায ইদং নাম ফলং হোতী’’তি কম্মফলানি সদ্দহিত্ৰা সদ্ধায ধম্মচ্ছন্দেন দাতব্বত্তা সদ্ধাদেয্যা, ন ধনেন নিব্বত্তিতা. সযঞ্চ তথাদিন্নানি সদ্ধাদেয্যানি পস্সন্তানং পরিভুঞ্জন্তানঞ্চ মনো রমেতীতি মনোরমা. সদ্ধাদেয্যত্তা এৰ হি মনোরমা, সদ্ধাদীহি দেয্যধম্মং সক্কচ্চং অভিসঙ্খরিত্ৰা দেন্তি, সদ্ধাদেয্যঞ্চ পরিভুঞ্জন্তা সপ্পুরিসা দাযকস্স অৰিসংৰাদনত্থম্পি পযোগাসযসম্পন্না হোন্তি, ন তুম্হেহি চিন্তিতাকারেন পযোগাসযৰিপন্নাতি অধিপ্পাযো. ন মে অত্থো কুমারীহীতি যস্মা সব্বসো কামেহি ৰিনিৰত্তিতমানসো অহং, তস্মা ন মে অত্থো কুমারীহি. কপ্পিযকারককম্মৰসেনপি হি মাদিসানং ইত্থীহি পযোজনং নাম নত্থি, পগেৰ রাগৰসেন, তস্মা ন মে অত্থো কুমারীহীতি. কুমারিগ্গহণঞ্চেত্থ উপলক্খণং দট্ঠব্বং. মাদিসস্স নাম সন্তিকে এৰং পটিপজ্জাহীতি অযুত্তকারিনীহি যাৰ অপরদ্ধঞ্চ তুম্হেহি সমানজ্ঝাসযানং পুরতো অযং কিরিযা সোভেয্যাতি দস্সেন্তো আহ ‘‘যেসং অত্থো তহিং গচ্ছথ নারিযো’’তি. তত্থ যেসন্তি কামেসু অৰীতরাগানং. অত্থোতি পযোজনং. তহিন্তি তত্থ তেসং সন্তিকং. নারিযোতি আলপনং. তং সুত্ৰা ইত্থিযো মঙ্কুভূতা পত্তক্খন্ধা আগতমগ্গেনেৰ গতা. এত্থ চ ‘‘ন মে অত্থো কুমারীহী’’তি কামেহি অনত্থিকভাৰৰচনেনেৰ থেরেন অরহত্তং ব্যাকতন্তি দট্ঠব্বং.

রমণীযকুটিকত্থেরগাথাৰণ্ণনা নিট্ঠিতা.

৯. কোসলৰিহারিত্থেরগাথাৰণ্ণনা

সদ্ধাযাহং পব্বজিতোতি আযস্মতো কোসলৰিহারিত্থেরস্স গাথা. কা উপ্পত্তি? অযম্পি কির পদুমুত্তরস্স ভগৰতো কালে কুসলবীজং রোপেত্ৰা তং তং পুঞ্ঞং অকাসি. সেসং অঞ্জনৰনিযত্থেরৰত্থুসদিসমেৰ. অযং পন ৰিসেসো – অযং কির ৰুত্তনযেন পব্বজিত্ৰা কতপুব্বকিচ্চো কোসলরট্ঠে অঞ্ঞতরস্মিং গামে একং উপাসককুলং নিস্সায অরঞ্ঞে ৰিহরতি, তং সো উপাসকো রুক্খমূলে ৰসন্তং দিস্ৰা কুটিকং কারেত্ৰা অদাসি. থেরো কুটিকাযং ৰিহরন্তো আৰাসসপ্পাযেন সমাধানং লভিত্ৰা ৰিপস্সনং উস্সুক্কাপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.১১.৫৩-৬১) –

‘‘হিমৰন্তস্সাৰিদূরে, ৰসামি পণ্ণসন্থরে;

ঘাসেসু গেধমাপন্নো, সেয্যসীলো চহং তদা.

‘‘খণন্তালুকলম্বানি, বিল়ালিতক্কলানি চ;

কোলং ভল্লাতকং বিল্লং, আহত্ৰা পটিযাদিতং.

‘‘পদুমুত্তরো লোকৰিদূ, আহুতীনং পটিগ্গহো;

মম সঙ্কপ্পমঞ্ঞায, আগচ্ছি মম সন্তিকং.

‘‘উপাগতং মহানাগং, দেৰদেৰং নরাসভং;

বিল়ালিং পগ্গহেত্ৰান, পত্তম্হি ওকিরিং অহং.

‘‘পরিভুঞ্জি মহাৰীরো, তোসযন্তো মমং তদা;

পরিভুঞ্জিত্ৰান সব্বঞ্ঞূ, ইমং গাথং অভাসথ.

‘‘সকং চিত্তং পসাদেত্ৰা, বিল়ালিং মে অদা তুৰং;

কপ্পানং সতসহস্সং, দুগ্গতিং নুপপজ্জসি.

‘‘চরিমং ৰত্ততে ময্হং, ভৰা সব্বে সমূহতা;

ধারেমি অন্তিমং দেহং, সম্মাসম্বুদ্ধসাসনে.

‘‘চতুপঞ্ঞাসিতো কপ্পে, সুমেখলিয সৰ্হযো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ৰিমুত্তিসুখপ্পটিসংৰেদনেন উপ্পন্নপীতিৰেগেন উদানেন্তো ‘‘সদ্ধাযাহং পব্বজিতো’’তি গাথং অভাসি.

৫৯. তত্থ সদ্ধাযাতি ভগৰতো ৰেসালিং উপগমনে আনুভাৰং দিস্ৰা, ‘‘একন্তনিয্যানিকং ইদং সাসনং, তস্মা অদ্ধা ইমায পটিপত্তিযা জরামরণতো মুচ্চিস্সামী’’তি উপ্পন্নসদ্ধাৰসেন পব্বজিতো পব্বজ্জং উপগতো. অরঞ্ঞে মে কুটিকা কতাতি তস্সা পব্বজ্জায অনুরূপৰসেন অরঞ্ঞে ৰসতো মে কুটিকা কতা, পব্বজ্জানুরূপং আরঞ্ঞকো হুত্ৰা ৰূপকট্ঠো ৰিহরামীতি দস্সেতি. তেনাহ ‘‘অপ্পমত্তো চ আতাপী, সম্পজানো পতিস্সতো’’তি. অরঞ্ঞৰাসলদ্ধেন কাযৰিৰেকেন জাগরিযং অনুযুঞ্জন্তো তত্থ সতিযা অৰিপ্পৰাসেন অপ্পমত্তো, আরদ্ধৰীরিযতায আতাপী, পুব্বভাগিযসতিসম্পজঞ্ঞপারিপূরিযা ৰিপস্সনং ৰড্ঢেত্ৰা অরহত্তাধিগমেন পঞ্ঞাসতিৰেপুল্লপ্পত্তিযা অচ্চন্তমেৰ সম্পজানো পতিস্সতো ৰিহরামীতি অত্থো. অপ্পমত্তভাৰাদিকিত্তনে চস্স ইদমেৰ অঞ্ঞাব্যাকরণং অহোসি কোসলরট্ঠে চিরনিৰাসিভাৰেন পন কোসলৰিহারীতি সমঞ্ঞা জাতাতি.

কোসলৰিহারিত্থেরগাথাৰণ্ণনা নিট্ঠিতা.

১০. সীৰলিত্থেরগাথাৰণ্ণনা

তে মে ইজ্ঝিংসু সঙ্কপ্পাতি আযস্মতো সীৰলিত্থেরস্স গাথা. কা উপ্পত্তি? অযম্পি পদুমুত্তরস্স ভগৰতো কালে হেট্ঠা ৰুত্তনযেন ৰিহারং গন্ত্ৰা পরিসপরিযন্তে ঠিতো ধম্মং সুণন্তো সত্থারং একং ভিক্খুং লাভীনং অগ্গট্ঠানে ঠপেন্তং দিস্ৰা ‘‘মযাপি অনাগতে এৰরূপেন ভৰিতুং ৰট্টতী’’তি দসবলং নিমন্তেত্ৰা সত্তাহং সত্থু ভিক্খুসঙ্ঘস্স চ মহাদানং দত্ৰা ‘‘ভগৰা অহং ইমিনা অধিকারকম্মেন অঞ্ঞং সম্পত্তিং ন পত্থেমি, অনাগতে পন একবুদ্ধস্স সাসনে অহম্পি তুম্হেহি সো এতদগ্গে ঠপিতভিক্খু ৰিয লাভীনং অগ্গো ভৰেয্য’’ন্তি পত্থনং অকাসি. সত্থা অনন্তরাযং দিস্ৰা – ‘‘অযং তে পত্থনা অনাগতে গোতমবুদ্ধস্স সন্তিকে সমিজ্ঝিস্সতী’’তি ব্যাকরিত্ৰা পক্কামি. সোপি কুলপুত্তো যাৰজীৰং কুসলং কত্ৰা দেৰমনুস্সেসু সংসরন্তো ৰিপস্সীবুদ্ধকালে বন্ধুমতীনগরতো অৰিদূরে একস্মিং গামকে পটিসন্ধিং গণ্হি. তস্মিং সমযে বন্ধুমতীনগরৰাসিনো রঞ্ঞা সদ্ধিং সাকচ্ছিত্ৰা দসবলস্স দানং দেন্তি. তে একদিৰসং সব্বেৰ একতো হুত্ৰা দানং দেন্তা ‘‘কিং নু খো অম্হাকং দানমুখে নত্থী’’তি (অ. নি. অট্ঠ. ১.১.২০৭) মধুঞ্চ গুল়দধিঞ্চ ন অদ্দসংসু. তে ‘‘যতো কুতোচি আহরিস্সামা’’তি জনপদতো নগরপৰিসনমগ্গে পুরিসং ঠপেসুং. তদা এস কুলপুত্তো অত্তনো গামতো গুল়দধিৰারকং গহেত্ৰা, ‘‘কিঞ্চিদেৰ আহরিস্সামী’’তি নগরং গচ্ছন্তো, ‘‘মুখং ধোৰিত্ৰা ধোতহত্থপাদো পৰিসিস্সামী’’তি ফাসুকট্ঠানং ওলোকেন্তো নঙ্গলসীসমত্তং নিম্মক্খিকং দণ্ডকমধুং দিস্ৰা ‘‘পুঞ্ঞেন মে ইদং উপ্পন্ন’’ন্তি গহেত্ৰা নগরং পাৰিসি. নাগরেহি ঠপিতপুরিসো তং দিস্ৰা, ‘‘ভো পুরিস, কস্সিমং আহরসী’’তি পুচ্ছি. ‘‘ন কস্সচি, সামি, ৰিক্কিণিতুং পন মে ইদং আভত’’ন্তি. ‘‘তেন হি, ভো, ইদং কহাপণং গহেত্ৰা এতং মধুঞ্চ গুল়দধিঞ্চ দেহী’’তি. সো চিন্তেসি – ‘‘ইদং ন বহুমূলং, অযঞ্চ একপ্পহারেনেৰ বহুং দেতি, ৰীমংসিতুং ৰট্টতী’’তি. ততো নং ‘‘নাহং একেন কহাপণেন দেমী’’তি আহ. ‘‘যদি এৰং দ্ৰে গহেত্ৰা দেহী’’তি. ‘‘দ্ৰীহিপি ন দেমী’’তি. এতেনুপাযেন ৰড্ঢেত্ৰা সহস্সং পাপুণি.

সো চিন্তেসি – ‘‘অতিৰড্ঢিতুং ন ৰট্টতি, হোতু তাৰ ইমিনা কত্তব্বকিচ্চং পুচ্ছিস্সামী’’তি. অথ নং আহ – ‘‘ইদং ন বহুং অগ্ঘনকং, ত্ৰঞ্চ বহুং দেসি, কেন কম্মেন ইদং গণ্হাসী’’তি. ‘‘ইধ, ভো, নগরৰাসিনো রঞ্ঞা সদ্ধিং পটিৰিরুজ্ঝিত্ৰা ৰিপস্সীদসবলস্স দানং দেন্তা ইদং দ্ৰযং দানমুখে অপস্সন্তা পরিযেসন্তি, সচে ইদং দ্ৰযং ন লভিস্সন্তি, নাগরানং পরাজযো ভৰিস্সতি, তস্মা সহস্সং কত্ৰা গণ্হামী’’তি. ‘‘কিং পনেতং নাগরানমেৰ ৰট্টতি, অঞ্ঞেসং দাতুং ন ৰট্টতী’’তি. ‘‘যস্স কস্সচি দাতুং অৰারিতমেত’’ন্তি. ‘‘অত্থি পন কোচি নাগরানং দানে একদিৰসং সহস্সং দাতা’’তি? ‘‘নত্থি, সম্মা’’তি. ‘‘ইমেসং পন দ্ৰিন্নং সহস্সগ্ঘনকভাৰং জানাসী’’তি? ‘‘আম, জানামী’’তি. ‘‘তেন হি গচ্ছ, নাগরানং আচিক্খ ‘একো পুরিসো ইমানি দ্ৰে মূলেন ন দেতি সহত্থেনেৰ দাতুকামো, তুম্হে ইমেসং দ্ৰিন্নং কারণা নিব্বিতক্কা হোথা’তি, ত্ৰং পন মে ইমস্মিং দানমুখে জেট্ঠকভাৰস্স কাযসক্খী হোহী’’তি. সো পরিব্বযত্থং গহিতমাসকেন পঞ্চকটুকং গহেত্ৰা চুণ্ণং কত্ৰা দধিতো কঞ্জিযং গহেত্ৰা তত্থ মধুপটলং পীল়েত্ৰা পঞ্চকটুকচুণ্ণেন যোজেত্ৰা একস্মিং পদুমিনিপত্তে পক্খিপিত্ৰা তং সংৰিদহিত্ৰা আদায দসবলস্স অৰিদূরট্ঠানে নিসীদি মহাজনেন আহরিযমানস্স সক্কারস্স অৰিদূরে অত্তনো পত্তৰারং ওলোকযমানো, সো ওকাসং ঞত্ৰা সত্থু সন্তিকং গন্ত্ৰা ভগৰা অযং উপ্পন্নদুগ্গতপণ্ণাকারো, ইমং মে অনুকম্পং পটিচ্চ পটিগ্গণ্হথাতি. সত্থা তস্স অনুকম্পং পটিচ্চ চতুমহারাজদত্তিযেন সেলমযপত্তেন তং পটিগ্গহেত্ৰা যথা অট্ঠসট্ঠিযা ভিক্খুসতসহস্সস্স দিয্যমানং ন খীযতি, এৰং অধিট্ঠাসি. সো কুলপুত্তো নিট্ঠিতভত্তকিচ্চং ভগৰন্তং অভিৰাদেত্ৰা একমন্তং ঠিতো আহ – ‘‘দিট্ঠো মে, ভগৰা, অজ্জ বন্ধুমতীনগরৰাসিকেহি তুম্হাকং সক্কারো আহরিযমানো, অহম্পি ইমস্স কম্মস্স নিস্সন্দেন নিব্বত্তনিব্বত্তভৰে লাভগ্গযসগ্গপ্পত্তো ভৰেয্য’’ন্তি (অ. নি. অট্ঠ. ১.১.২০৭). সত্থা, ‘‘এৰং হোতু, কুলপুত্তা’’তি ৰত্ৰা তস্স চ নগরৰাসীনঞ্চ ভত্তানুমোদনং কত্ৰা পক্কামি.

সোপি কুলপুত্তো যাৰজীৰং কুসলং কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে সুপ্পৰাসায রাজধীতায কুচ্ছিম্হি পটিসন্ধিং গণ্হি. পটিসন্ধিগ্গহণতো পট্ঠায সাযং পাতঞ্চ পণ্ণাকারসতানি সকটেনাদায সুপ্পৰাসায উপনীযন্তি. অথ নং পুঞ্ঞৰীমংসনত্থং হত্থেন বীজপচ্ছিং ফুসাপেন্তি. একেকবীজতো সলাকসতম্পি সলাকসহস্সম্পি নিগ্গচ্ছতি. একেককরীসখেত্তে পণ্ণাসম্পি সট্ঠিপি সকটপ্পমাণানি উপ্পজ্জন্তি. কোট্ঠে পূরণকালেপি কোট্ঠদ্ৰারং হত্থেন ফুসাপেন্তি. রাজধীতায পুঞ্ঞেন গণ্হন্তানং গহিতগহিতট্ঠানং পুন পূরতি. পরিপুণ্ণভত্তভাজনতোপি ‘‘রাজধীতায পুঞ্ঞ’’ন্তি ৰত্ৰা যস্স কস্সচি দেন্তানং যাৰ ন উক্কড্ঢন্তি, ন তাৰ ভত্তং খীযতি, দারকে কুচ্ছিগতেযেৰ সত্তৰস্সানি অতিক্কমিংসু.

গব্ভে পন পরিপক্কে সত্তাহং মহাদুক্খং অনুভোসি. সা সামিকং আমন্তেত্ৰা, ‘‘পুরে মরণা জীৰমানাৰ দানং দস্সামী’’তি সত্থু সন্তিকং পেসেসি – ‘‘গচ্ছ, ইমং পৰত্তিং সত্থু আরোচেত্ৰা সত্থারং নিমন্তেহি, যঞ্চ সত্থা ৰদেতি, তং সাধুকং উপলক্খেত্ৰা আগন্ত্ৰা ময্হং কথেহী’’তি. সো গন্ত্ৰা তস্সা সাসনং ভগৰতো আরোচেসি. সত্থা, ‘‘সুখিনী হোতু সুপ্পৰাসা কোলিযধীতা অরোগা, অরোগং পুত্তং ৰিজাযতূ’’তি (উদা. ১৮) আহ. রাজা তং সুত্ৰা ভগৰন্তং অভিৰাদেত্ৰা অত্তনো গামাভিমুখো পাযাসি. তস্স পুরে আগমনাযেৰ সুপ্পৰাসায কুচ্ছিতো ধমকরণা উদকং ৰিয গব্ভো নিক্খমি, পরিৰারেত্ৰা নিসিন্নজনো অস্সুমুখোৰ হসিতুং আরদ্ধো তুট্ঠপহট্ঠো মহাজনো রঞ্ঞো সাসনং আরোচেতুং অগমাসি.

রাজা তেসং আগমনং দিস্ৰাৰ, ‘‘দসবলেন কথিতকথা নিপ্ফন্না ভৰিস্সতি মঞ্ঞে’’তি চিন্তেসি. সো আগন্ত্ৰা সত্থু সাসনং রাজধীতায আরোচেসি. রাজধীতা তযা নিমন্তিতং জীৰিতভত্তমেৰ মঙ্গলভত্তং ভৰিস্সতি, গচ্ছ সত্তাহং দসবলং নিমন্তেহীতি. রাজা তথা অকাসি. সত্তাহং বুদ্ধপ্পমুখস্স সঙ্ঘস্স মহাদানং পৰত্তযিংসু. দারকো সব্বেসং ঞাতীনং সন্তত্তং চিত্তং নিব্বাপেন্তো জাতোতি সীৰলিদারকোত্ৰেৰস্স নামং অকংসু. সো সত্তৰস্সানি গব্ভে ৰসিতত্তা জাতকালতো পট্ঠায সব্বকম্মক্খমো অহোসি. ধম্মসেনাপতি সারিপুত্তো সত্তমে দিৰসে তেন সদ্ধিং কথাসল্লাপং অকাসি. সত্থাপি ধম্মপদে গাথং অভাসি –

‘‘যোমং পলিপথং দুগ্গং, সংসারং মোহমচ্চগা;

তিণ্ণো পারঙ্গতো ঝাযী, অনেজো অকথংকথী;

অনুপাদায নিব্বুতো, তমহং ব্রূমি ব্রাহ্মণ’’ন্তি. (ধ. প. ৪১৪);

অথ নং থেরো এৰমাহ – ‘‘কিং পন তযা এৰরূপং দুক্খরাসিং অনুভৰিত্ৰা পব্বজিতুং ন ৰট্টতী’’তি? ‘‘লভমানো পব্বজেয্যং, ভন্তে’’তি. সুপ্পৰাসা নং দারকং থেরেন সদ্ধিং কথেন্তং দিস্ৰা ‘‘কিং নু খো মে পুত্তো ধম্মসেনাপতিনা সদ্ধিং কথেতী’’তি থেরং উপসঙ্কমিত্ৰা পুচ্ছি – ‘‘ময্হং পুত্তো তুম্হেহি সদ্ধিং কিং কথেতি, ভন্তে’’তি? ‘‘অত্তনা অনুভূতং গব্ভৰাসদুক্খং কথেত্ৰা, ‘তুম্হেহি অনুঞ্ঞাতো পব্বজিস্সামী’তি ৰদতী’’তি. ‘‘সাধু, ভন্তে, পব্বাজেথ ন’’ন্তি. থেরো তং ৰিহারং নেত্ৰা তচপঞ্চককম্মট্ঠানং দত্ৰা পব্বাজেন্তো ‘‘সীৰলি, ন তুয্হং অঞ্ঞেন ওৰাদেন কম্মং অত্থি, তযা সত্ত ৰস্সানি অনুভূতদুক্খমেৰ পচ্চৰেক্খাহী’’তি. ‘‘ভন্তে, পব্বাজনমেৰ তুম্হাকং ভারো, যং পন মযা কাতুং সক্কা, তমহং জানিস্সামী’’তি. সো পন পঠমকেসৰট্টিযা ওহারণক্খণেযেৰ সোতাপত্তিফলে পতিট্ঠাসি, দুতিযায ওহারণক্খণে সকদাগামিফলে, ততিযায অনাগামিফলে সব্বেসংযেৰ পন কেসানং ওরোপনঞ্চ অরহত্তসচ্ছিকিরিযা চ অপচ্ছা অপুরিমা অহোসি. তস্স পব্বজিতদিৰসতো পট্ঠায ভিক্খুসঙ্ঘস্স চত্তারো পচ্চযা যাৰতিচ্ছকং উপ্পজ্জন্তি. এৰং এত্থ ৰত্থু সমুট্ঠিতং.

অপরভাগে সত্থা সাৰত্থিং অগমাসি. থেরো সত্থারং অভিৰাদেত্ৰা, ‘‘ভন্তে, ময্হং পুঞ্ঞং ৰীমংসিস্সামি, পঞ্চ মে ভিক্খুসতানি দেথা’’তি আহ. ‘‘গণ্হ সীৰলী’’তি. সো পঞ্চসতে ভিক্খূ গহেত্ৰা হিমৰন্তাভিমুখং গচ্ছন্তো অটৰিমগ্গং গচ্ছতি, তস্স পঠমং দিট্ঠনিগ্রোধে অধিৰত্থা দেৰতা সত্তদিৰসানি দানং অদাসি. ইতি সো –

‘‘নিগ্রোধং পঠমং পস্সি, দুতিযং পণ্ডৰপব্বতং;

ততিযং অচিরৰতিযং, চতুত্থং ৰরসাগরং.

‘‘পঞ্চমং হিমৰন্তং সো, ছট্ঠং ছদ্দন্তুপাগমি;

সত্তমং গন্ধমাদনং, অট্ঠমং অথ রেৰত’’ন্তি.

সব্বট্ঠানেসু সত্ত সত্ত দিৰসানেৰ দানং অদংসু. গন্ধমাদনপব্বতে পন নাগদত্তদেৰরাজা নাম সত্তসু দিৰসেসু একদিৰসে খীরপিণ্ডপাতং অদাসি, একদিৰসে সপ্পিপিণ্ডপাতং. ভিক্খুসঙ্ঘো আহ – ‘‘ইমস্স দেৰরঞ্ঞো নেৰ ধেনুযো দুয্হমানা পঞ্ঞাযন্তি, ন দধিনিম্মথনং, কুতো তে দেৰরাজ ইদং উপ্পজ্জতী’’তি. ‘‘ভন্তে কস্সপদসবলস্স কালে খীরসলাকভত্তদানস্সেতং ফল’’ন্তি দেৰরাজা আহ. অপরভাগে সত্থা খদিরৰনিযরেৰতস্স পচ্চুগ্গমনং অট্ঠুপ্পত্তিং কত্ৰা থেরং অত্তনো সাসনে লাভগ্গযসগ্গপ্পত্তানং অগ্গট্ঠানে ঠপেসি.

এৰং লাভগ্গযসগ্গপ্পত্তস্স পন ইমস্স থেরস্স অরহত্তপ্পত্তিং একচ্চে আচরিযা এৰং ৰদন্তি – ‘‘হেট্ঠা ৰুত্তনযেন ধম্মসেনাপতিনা ওৰাদে দিন্নে যং মযা কাতুং সক্কা, তমহং জানিস্সামীতি পব্বজিত্ৰা ৰিপস্সনাকম্মট্ঠানং গহেত্ৰা তং দিৰসংযেৰ অঞ্ঞতরং ৰিৰিত্তং কুটিকং দিস্ৰা তং পৰিসিত্ৰা মাতুকুচ্ছিস্মিং সত্ত ৰস্সানি অত্তনা অনুভূতং দুক্খং অনুস্সরিত্ৰা তদনুসারেন অতীতানাগতে তস্স অৰেক্খন্তস্স আদিত্তা ৰিয তযো ভৰা উপট্ঠহিংসু. ঞাণস্স পরিপাকং গতত্তা ৰিপস্সনাৰীথিং ওতরি, তাৰদেৰ মগ্গপ্পটিপাটিযা সব্বেপি আসৰে খেপেন্তো অরহত্তং পাপুণী’’তি. উভযথাপি থেরস্স অরহত্তপ্পত্তিযেৰ পকাসিতা. থেরো পন পভিন্নপটিসম্ভিদো ছল়ভিঞ্ঞো অহোসি. তেন ৰুত্তং অপদানে (অপ. থের ১.১২.৩১-৩৯) –

‘‘ৰরুণো নাম নামেন, দেৰরাজা অহং তদা;

উপট্ঠহেসিং সম্বুদ্ধং, সযোগ্গবলৰাহনো.

‘‘নিব্বুতে লোকনাথম্হি, অত্থদস্সীনরুত্তমে;

তূরিযং সব্বমাদায, অগমং বোধিমুত্তমং.

‘‘ৰাদিতেন চ নচ্চেন, সম্মতাল়সমাহিতো;

সম্মুখা ৰিয সম্বুদ্ধং, উপট্ঠিং বোধিমুত্তমং.

‘‘উপট্ঠহিত্ৰা তং বোধিং, ধরণীরুহপাদপং;

পল্লঙ্কং আভুজিত্ৰান, তত্থ কালঙ্কতো অহং.

‘‘সককম্মাভিরদ্ধোহং, পসন্নো বোধিমুত্তমে;

তেন চিত্তপ্পসাদেন, নিম্মানং উপপজ্জহং.

‘‘সট্ঠিতূরিযসহস্সানি, পরিৰারেন্তি মং সদা;

মনুস্সেসু চ দেৰেসু, ৰত্তমানং ভৰাভৰে.

‘‘তিৰিধগ্গী নিব্বুতা ময্হং, ভৰা সব্বে সমূহতা;

ধারেমি অন্তিমং দেহং, সম্মাসম্বুদ্ধসাসনে.

‘‘সুবাহূ নাম নামেন, চতুত্তিংসাসু খত্তিযা;

সত্তরতনসম্পন্না, পঞ্চকপ্পসতে ইতো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ৰিমুত্তিসুখপটিসংৰেদনেন পীতিৰেগেন উদানেন্তো ‘‘তে মে ইজ্ঝিংসু সঙ্কপ্পা’’তি গাথং অভাসি.

৬০. তত্থ তে মে ইজ্ঝিংসু সঙ্কপ্পা, যদত্থো পাৰিসিং কুটিং, ৰিজ্জাৰিমুত্তিং পচ্চেসন্তি যে পুব্বে মযা কামসঙ্কপ্পাদীনং সমুচ্ছেদকরা নেক্খম্মসঙ্কপ্পাদযো অভিপত্থিতাযেৰ ‘‘কদা নু খ্ৰাহং তদাযতনং উপসম্পজ্জ ৰিহরিস্সামি, যদরিযা এতরহি উপসম্পজ্জ ৰিহরন্তী’’তি, ৰিমুত্তাধিপ্পাযসঞ্ঞিতা ৰিমুত্তিং উদ্দিস্স সঙ্কপ্পা মনোরথা অভিণ্হসো অপ্পমত্তা যদত্থো যংপযোজনো যেসং নিপ্ফাদনত্থং কুটিং সুঞ্ঞাগারং ৰিপস্সিতুং পাৰিসিং তিস্সো ৰিজ্জা ফলৰিমুত্তিঞ্চ পচ্চেসন্তো, গৰেসন্তো তে মে ইজ্ঝিংসু তে সব্বেৰ ইদানি ময্হং ইজ্ঝিংসু সমিজ্ঝিংসু, নিপ্ফন্নকুসলসঙ্কপ্পো পরিপুণ্ণমনোরথো জাতোতি অত্থো. তেসং সমিদ্ধভাৰং দস্সেতুং ‘‘মানানুসযমুজ্জহ’’ন্তি ৰুত্তং. যস্মা মানানুসযমুজ্জহং পজহিং সমুচ্ছিন্দিং, তস্মা তে মে সঙ্কপ্পা ইজ্ঝিংসূতি যোজনা. মানানুসযে হি পহীনে অপ্পহীনো নাম অনুসযো নত্থি, অরহত্তঞ্চ অধিগতমেৰ হোতীতি মানানুসযপ্পহানং যথাৰুত্তসঙ্কপ্পসমিদ্ধিযা কারণং কত্ৰা ৰুত্তং.

সীৰলিত্থেরগাথাৰণ্ণনা নিট্ঠিতা.

ছট্ঠৰগ্গৰণ্ণনা নিট্ঠিতা.

৭. সত্তমৰগ্গো

১. ৰপ্পত্থেরগাথাৰণ্ণনা

পস্সতি পস্সোতি আযস্মতো ৰপ্পত্থেরস্স গাথা. কা উপ্পত্তি? সো কির পদুমুত্তরস্স ভগৰতো কালে হংসৰতীনগরে কুলগেহে নিব্বত্তিত্ৰা ৰিঞ্ঞুতং পত্তো ‘‘অসুকো চ অসুকো চ থেরো সত্থু পঠমং ধম্মপটিগ্গাহকা অহেসু’’ন্তি থোমনং সুত্ৰা ভগৰন্তং উপসঙ্কমিত্ৰা পত্থনং পট্ঠপেসি – ‘‘অহম্পি ভগৰা অনাগতে তাদিসস্স সম্মাসম্বুদ্ধস্স পঠমং ধম্মপটিগ্গাহকানং অঞ্ঞতরো ভৰেয্য’’ন্তি, সত্থু সন্তিকে সরণগমনঞ্চ পৰেদেসি. সো যাৰজীৰং পুঞ্ঞানি কত্ৰা ততো চুতো দেৰমনুস্সেসুযেৰ সংসরন্তো ইমস্মিং বুদ্ধুপ্পাদে কপিলৰত্থুস্মিং ৰাসেট্ঠস্স নাম ব্রাহ্মণস্স পুত্তো হুত্ৰা নিব্বত্তি, ৰপ্পোতিস্স নামং অহোসি. সো অসিতেন ইসিনা ‘‘সিদ্ধত্থকুমারো সব্বঞ্ঞূ ভৰিস্সতী’’তি ব্যাকতো কোণ্ডঞ্ঞপ্পমুখেহি ব্রাহ্মণপুত্তেহি সদ্ধিং ঘরাৰাসং পহায তাপসপব্বজ্জং পব্বজিত্ৰা ‘‘তস্মিং সব্বঞ্ঞুতং পত্তে তস্স সন্তিকে ধম্মং সুত্ৰা অমতং পাপুণিস্সামী’’তি উরুৰেলাযং ৰিহরন্তং মহাসত্তং ছব্বস্সানি পধানং পদহন্তং উপট্ঠহিত্ৰা ওল়ারিকাহারপরিভোগেন নিব্বিজ্জিত্ৰা ইসিপতনং গতো. অভিসম্বুজ্ঝিত্ৰা সত্থারা সত্তসত্তাহানি ৰীতিনামেত্ৰা ইসিপতনং গন্ত্ৰা ধম্মচক্কে পৰত্তিতে পাটিপদদিৰসে সোতাপত্তিফলে পতিট্ঠিতো পঞ্চমিযং পক্খস্স অঞ্ঞাসিকোণ্ডঞ্ঞাদীহি সদ্ধিং অরহত্তং পাপুণি. তেন ৰুত্তং অপদানে (অপ. থের ১.১২.২০-৩০) –

‘‘উভিন্নং দেৰরাজূনং, সঙ্গামো সমুপট্ঠিতো;

অহোসি সমুপব্যূল়্হো, মহাঘোসো অৰত্তথ.

‘‘পদুমুত্তরো লোকৰিদূ, আহুতীনং পটিগ্গহো;

অন্তলিক্খে ঠিতো সত্থা, সংৰেজেসি মহাজনং.

‘‘সব্বে দেৰা অত্তমনা, নিক্খিত্তকৰচাৰুধা;

সম্বুদ্ধং অভিৰাদেত্ৰা, একগ্গাসিংসু তাৰদে.

‘‘ময্হং সঙ্কপ্পমঞ্ঞায, ৰাচাসভিমুদীরযি;

অনুকম্পকো লোকৰিদূ, নিব্বাপেসি মহাজনং.

‘‘পদুট্ঠচিত্তো মনুজো, একপাণং ৰিহেঠযং;

তেন চিত্তপ্পদোসেন, অপাযং উপপজ্জতি.

‘‘সঙ্গামসীসে নাগোৰ, বহূ পাণে ৰিহেঠযং;

নিব্বাপেথ সকং চিত্তং, মা হঞ্ঞিত্থো পুনপ্পুনং.

‘‘দ্ৰিন্নম্পি যক্খরাজূনং, সেনা সা ৰিম্হিতা অহু;

সরণঞ্চ উপাগচ্ছুং, লোকজেট্ঠং সুতাদিনং.

‘‘সঞ্ঞাপেত্ৰান জনতং, পদমুদ্ধরি চক্খুমা;

পেক্খমানোৰ দেৰেহি, পক্কামি উত্তরামুখো.

‘‘পঠমং সরণং গচ্ছিং, দ্ৰিপদিন্দস্স তাদিনো;

কপ্পানং সতসহস্সং, দুগ্গতিং নুপপজ্জহং.

‘‘মহাদুন্দুভিনামা চ, সোল়সাসুং রথেসভা;

তিংসকপ্পসহস্সম্হি, রাজানো চক্কৰত্তিনো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনা পটিলদ্ধসম্পত্তিং পচ্চৰেক্খণমুখেন সত্থু গুণমহন্ততং পচ্চৰেক্খিত্ৰা ‘‘ঈদিসং নাম সত্থারং বাহুলিকাদিৰাদেন সমুদাচরিম্হ. অহো পুথুজ্জনভাৰো নাম অন্ধকরণো অচক্খুকরণো অরিযভাৰোযেৰ চক্খুকরণো’’তি দস্সেন্তো ‘‘পস্সতি পস্সো’’তি গাথং অভাসি.

৬১. তত্থ পস্সতি পস্সোতি পস্সতি সম্মাদিট্ঠিযা ধম্মে অৰিপরীতং জানাতি বুজ্ঝতীতি পস্সো, দস্সনসম্পন্নো অরিযো, সো পস্সন্তং অৰিপরীতদস্সাৰিং ‘‘অযং অৰিপরীতদস্সাৰী’’তি পস্সতি পঞ্ঞাচক্খুনা ধম্মাধম্মং যথাসভাৰতো জানাতি. ন কেৰলং পস্সন্তমেৰ, অথ খো অপস্সন্তঞ্চ পস্সতি, যো পঞ্ঞাচক্খুৰিরহিতো ধম্মে যথাসভাৰতো ন পস্সতি, তম্পি অপস্সন্তং পুথুজ্জনং ‘‘অন্ধো ৰতাযং ভৰং অচক্খুকো’’তি অত্তনো পঞ্ঞাচক্খুনা পস্সতি. অপস্সন্তো অপস্সন্তং, পস্সন্তঞ্চ ন পস্সতীতি অপস্সন্তো পঞ্ঞাচক্খুরহিতো অন্ধবালো তাদিসং অন্ধবালং অযং ধম্মাধম্মং যথাসভাৰতো ন পস্সতীতি যথা অপস্সন্তং ন পস্সতি ন জানাতি, এৰং অত্তনো পঞ্ঞাচক্খুনা ধম্মাধম্মং যথাসভাৰতো পস্সন্তঞ্চ পণ্ডিতং ‘‘অযং এৰংৰিধো’’তি ন পস্সতি ন জানাতি, তস্মা অহম্পি পুব্বে দস্সনরহিতো সকলং ঞেয্যং হত্থামলকং ৰিয পস্সন্তং ভগৰন্তং অপস্সন্তম্পি পূরণাদিং যথাসভাৰতো ন পস্সিং, ইদানি পন বুদ্ধানুভাৰেন সম্পন্নো উভযেপি যথাসভাৰতো পস্সামীতি সেৰিতব্বাসেৰিতব্বেসু অত্তনো অৰিপরীতপটিপত্তিং দস্সেতি.

ৰপ্পত্থেরগাথাৰণ্ণনা নিট্ঠিতা.

২. ৰজ্জিপুত্তত্থেরগাথাৰণ্ণনা

এককা মযং অরঞ্ঞেতি আযস্মতো ৰজ্জিপুত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো ইতো একনৰুতে কপ্পে ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং ৰিপস্সিং ভগৰন্তং দিস্ৰা পসন্নমানসো নাগপুপ্ফকেসরেহি পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে অমচ্চকুলে নিব্বত্তি, ৰজ্জিপুত্তোতিস্স নামং অহোসি. সো ভগৰতো ৰেসালিগমনে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা কতপুব্বকিচ্চো কম্মট্ঠানং গহেত্ৰা ৰেসালিযা অৰিদূরে অঞ্ঞতরস্মিং ৰনসণ্ডে ৰিহরতি. তেন চ সমযেন ৰেসালিযং উস্সৰো অহোসি. তত্থ তত্থ নচ্চগীতৰাদিতং পৰত্ততি, মহাজনো হট্ঠতুট্ঠো উস্সৰসম্পত্তিং পচ্চনুভোতি, তং সুত্ৰা সো ভিক্খু অযোনিসো উম্মুজ্জন্তো ৰিৰেকং ৰজ্জমানো কম্মট্ঠানং ৰিস্সজ্জেত্ৰা অত্তনো অনভিরতিং পকাসেন্তো –

‘‘এককা মযং অরঞ্ঞে ৰিহরাম, অপৰিদ্ধংৰ ৰনস্মিং দারুকং;

এতাদিসিকায রত্তিযা, কো সু নাম অম্হেহি পাপিযো’’তি. – গাথমাহ;

তং সুত্ৰা ৰনসণ্ডে অধিৰত্থা দেৰতা তং ভিক্খুং অনুকম্পমানা ‘‘যদিপি, ত্ৰং ভিক্খু, অরঞ্ঞৰাসং হীল়েন্তো ৰদসি, ৰিৰেককামা পন ৰিদ্দসুনো তং বহু মঞ্ঞন্তিযেৰা’’তি ইমমত্থং দস্সেন্তী –

‘‘এককো ত্ৰং অরঞ্ঞে ৰিহরসি, অপৰিদ্ধংৰ ৰনস্মিং দারুকং;

তস্স তে বহুকা পিহযন্তি, নেরযিকা ৰিয সগ্গগামিন’’ন্তি. –

গাথং ৰত্ৰা, ‘‘কথঞ্হি নাম ত্ৰং, ভিক্খু, নিয্যানিকে সম্মাসম্বুদ্ধস্স সাসনে পব্বজিত্ৰা অনিয্যানিকং ৰিতক্কং ৰিতক্কেস্সসী’’তি সন্তজ্জেন্তী সংৰেজেসি. এৰং সো ভিক্খু তায দেৰতায সংৰেজিতো কসাভিহতো ৰিয ভদ্রো অস্সাজানীযো ৰিপস্সনাৰীথিং ওতরিত্ৰা নচিরস্সেৰ ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ১.১১.৬২-৬৬) –

‘‘সুৰণ্ণৰণ্ণং সম্বুদ্ধং, সতরংসিংৰ ভাণুমং;

ওভাসেন্তং দিসা সব্বা, উল়ুরাজংৰ পূরিতং.

‘‘পুরক্খতং সাৰকেহি, সাগরেহেৰ মেদনিং;

নাগং পগ্গয্হ রেণূহি, ৰিপস্সিস্সাভিরোপযিং.

‘‘একনৰুতিতো কপ্পে, যং রেণুমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘পণ্ণতালীসিতো কপ্পে, রেণু নামাসি খত্তিযো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ‘‘অযং মে অরহত্তপ্পত্তিযা অঙ্কুসো জাতো’’তি অত্তনো দেৰতায চ ৰুত্তনযং সংকড্ঢিত্ৰা –

৬২.

‘‘এককা মযং অরঞ্ঞে ৰিহরাম, অপৰিদ্ধংৰ ৰনস্মিং দারুকং;

তস্স মে বহুকা পিহযন্তি, নেরযিকা ৰিয সগ্গগামিন’’ন্তি. –

গাথং অভাসি.

তস্সত্থো – অনপেক্খভাৰেন ৰনে ছড্ডিতদারুক্খণ্ডং ৰিয যদিপি মযং এককা একাকিনো অসহাযা ইমস্মিং অরঞ্ঞে ৰিহরাম, এৰং ৰিহরতো পন তস্স মে বহুকা পিহযন্তি মং বহূ অত্থকামরূপা কুলপুত্তা অভিপত্থেন্তি, ‘‘অহো ৰতস্স মযম্পি ৰজ্জিপুত্তত্থেরো ৰিয ঘরবন্ধনং পহায অরঞ্ঞে ৰিহরেয্যামা’’তি. যথা কিং? নেরযিকা ৰিয সগ্গগামিনং, যথা নাম নেরযিকা অত্তনো পাপকম্মেন নিরযে নিব্বত্তসত্তা সগ্গগামীনং সগ্গূপগামীনং পিহযন্তি – ‘‘অহো ৰত মযম্পি নিরযদুক্খং পহায সগ্গসুখং পচ্চনুভৰেয্যামা’’তি এৰংসম্পদমিদন্তি অত্থো. এত্থ চ অত্তনি গরুবহুৰচনপ্পযোগস্স ইচ্ছিতব্বত্তা ‘‘এককা মযং ৰিহরামা’’তি পুন তস্স অত্থস্স একত্তং সন্ধায ‘‘তস্স মে’’তি একৰচনপ্পযোগো কতো. ‘‘তস্স মে’’, ‘‘সগ্গগামিন’’ন্তি চ উভযম্পি ‘পিহযন্তী’তি পদং অপেক্খিত্ৰা উপযোগত্থে সম্পদাননিদ্দেসো দট্ঠব্বো. তং অভিপত্থেন্তীতি চ তাদিসে অরঞ্ঞৰাসাদিগুণে অভিপত্থেন্তা নাম হোন্তীতি কত্ৰা ৰুত্তং. তস্স মেতি ৰা তস্স মম সন্তিকে গুণেতি অধিপ্পাযো.

ৰজ্জিপুত্তত্থেরগাথাৰণ্ণনা নিট্ঠিতা.

৩. পক্খত্থেরগাথাৰণ্ণনা

চুতা পতন্তীতি আযস্মতো পক্খত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি করোন্তো ইতো একনৰুতে কপ্পে যক্খসেনাপতি হুত্ৰা ৰিপস্সিং ভগৰন্তং দিস্ৰা পসন্নমানসো দিব্বৰত্থেন পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সক্কেসু দেৰদহনিগমে সাকিযরাজকুলে নিব্বত্তি, ‘‘সম্মোদকুমারো’’তিস্স নামং অহোসি. অথস্স দহরকালে ৰাতরোগেন পাদা ন ৰহিংসু. সো কতিপযং কালং পীঠসপ্পী ৰিয ৰিচরি. তেনস্স পক্খোতি সমঞ্ঞা জাতা. পচ্ছা অরোগকালেপি তথেৰ নং সঞ্জানন্তি, সো ভগৰতো ঞাতিসমাগমে পাটিহারিযং দিস্ৰা পটিলদ্ধসদ্ধো পব্বজিত্ৰা কতপুব্বকিচ্চো কম্মট্ঠানং গহেত্ৰা অরঞ্ঞে ৰিহরতি. অথেকদিৰসং গামং পিণ্ডায পৰিসিতুং গচ্ছন্তো অন্তরামগ্গে অঞ্ঞতরস্মিং রুক্খমূলে নিসীদি. তস্মিঞ্চ সমযে অঞ্ঞতরো কুললো মংসপেসিং আদায আকাসেন গচ্ছতি, তং বহূ কুললা অনুপতিত্ৰা পাতেসুং. পাতিতং মংসপেসিং একো কুললো অগ্গহেসি. তং অঞ্ঞো অচ্ছিন্দিত্ৰা গণ্হি, তং দিস্ৰা থেরো ‘‘যথাযং মংসপেসি, এৰং কামা নাম বহুসাধারণা বহুদুক্খা বহুপাযাসা’’তি – কামেসু আদীনৰং নেক্খম্মে চ আনিসংসং পচ্চৰেক্খিত্ৰা ৰিপস্সনং পট্ঠপেত্ৰা ‘‘অনিচ্চ’’ন্তিআদিনা মনসিকরোন্তো পিণ্ডায চরিত্ৰা কতভত্তকিচ্চো দিৰাট্ঠানে নিসীদিত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.১২.১-১০) –

‘‘ৰিপস্সী নাম ভগৰা, লোকজেট্ঠো নরাসভো;

অট্ঠসট্ঠিসহস্সেহি, পাৰিসি বন্ধুমং তদা.

‘‘নগরা অভিনিক্খম্ম, অগমং দীপচেতিযং;

অদ্দসং ৰিরজং বুদ্ধং, আহুতীনং পটিগ্গহং.

‘‘চুল্লাসীতিসহস্সানি, যক্খা ময্হং উপন্তিকে;

উপট্ঠহন্তি সক্কচ্চং, ইন্দংৰ তিদসা গণা.

‘‘ভৰনা অভিনিক্খম্ম, দুস্সং পগ্গয্হহং তদা;

সিরসা অভিৰাদেসিং, তঞ্চাদাসিং মহেসিনো.

‘‘অহো বুদ্ধো অহো ধম্মো, অহো নো সত্থু সম্পদা;

বুদ্ধস্স আনুভাৰেন, ৰসুধাযং পকম্পথ.

‘‘তঞ্চ অচ্ছরিযং দিস্ৰা, অব্ভুতং লোমহংসনং;

বুদ্ধে চিত্তং পসাদেমি, দ্ৰিপদিন্দম্হি তাদিনে.

‘‘সোহং চিত্তং পসাদেত্ৰা, দুস্সং দত্ৰান সত্থুনো;

সরণঞ্চ উপাগচ্ছিং, সামচ্চো সপরিজ্জনো.

‘‘একনৰুতিতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

‘‘ইতো পন্নরসে কপ্পে, সোল়সাসুং সুৰাহনা;

সত্তরতনসম্পন্নো, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা যদেৰ সংৰেগৰত্থুং অঙ্কুসং কত্ৰা ৰিপস্সনং ৰড্ঢেত্ৰা অঞ্ঞা অধিগতা, তস্স সংকিত্তনমুখেন অঞ্ঞং ব্যাকরোন্তো ‘‘চুতা পতন্তী’’তি গাথং অভাসি.

৬৩. তত্থ চুতাতি ভট্ঠা. পতন্তীতি অনুপতন্তি. পতিতাতি চৰনৰসেন ভূমিযং পতিতা, আকাসে ৰা সম্পতনৰসেন পতিতা. গিদ্ধাতি গেধং আপন্না. পুনরাগতাতি পুনদেৰ উপগতা. চ-সদ্দো সব্বত্থ যোজেতব্বো. ইদং ৰুত্তং হোতি – পতন্তি অনুপতন্তি চ ইধ কুললা, ইতরস্স মুখতো চুতা চ মংসপেসি, চুতা পন সা ভূমিযং পতিতা চ, গিদ্ধা গেধং আপন্না সব্বেৰ কুললা পুনরাগতা. যথা চিমে কুললা, এৰং সংসারে পরিব্ভমন্তা সত্তা যে কুসলধম্মতো চুতা, তে পতন্তি নিরযাদীসু, এৰং পতিতা চ, সম্পত্তিভৰে ঠিতা তত্থ কামসুখানুযোগৰসেন কামভৰে রূপারূপভৰেসু চ ভৰনিকন্তিৰসেন গিদ্ধা চ পুনরাগতা ভৰতো অপরিমুত্তত্তা তেন তেন ভৰগামিনা কম্মেন তং তং ভৰসঞ্ঞিতং দুক্খং আগতা এৰ, এৰংভূতা ইমে সত্তা. মযা পন কতং কিচ্চং পরিঞ্ঞাদিভেদং সোল়সৰিধম্পি কিচ্চং কতং, ন দানি তং কাতব্বং অত্থি. রতং রম্মং রমিতব্বং অরিযেহি সব্বসঙ্খতৰিনিস্সটং নিব্বানং রতং অভিরতং রম্মং. তেন চ সুখেনন্ৰাগতং সুখং ফলসমাপত্তিসুখেন অনুআগতং উপগতং অচ্চন্তসুখং নিব্বানং, সুখেন ৰা সুখাপটিপদাভূতেন ৰিপস্সনাসুখেন মগ্গসুখেন চ অন্ৰাগতং ফলসুখং নিব্বানসুখঞ্চাতি অত্থো ৰেদিতব্বো.

পক্খত্থেরগাথাৰণ্ণনা নিট্ঠিতা.

৪. ৰিমলকোণ্ডঞ্ঞত্থেরগাথাৰণ্ণনা

দুমৰ্হযায উপ্পন্নোতি ৰিমলকোণ্ডঞ্ঞত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো ইতো একনৰুতে কপ্পে ৰিপস্সিস্স ভগৰতো কালে ৰিভৰসম্পন্নে কুলে নিব্বত্তিত্ৰা ৰিঞ্ঞুতং পত্তো একদিৰসং ৰিপস্সিং ভগৰন্তং মহতিযা পরিসায পরিৰুতং ধম্মং দেসেন্তং দিস্ৰা পসন্নমানসো চতূহি সুৰণ্ণপুপ্ফেহি পূজেসি. ভগৰা তস্স পসাদসংৰড্ঢনত্থং তথারূপং ইদ্ধাভিসঙ্খারং অভিসঙ্খারেসি, যথা সুৰণ্ণাভা সকলং তং পদেসং ওত্থরতি. তং দিস্ৰা ভিয্যোসোমত্তায পসন্নমানসো হুত্ৰা ভগৰন্তং ৰন্দিত্ৰা তং নিমিত্তং গহেত্ৰা অত্তনো গেহং গন্ত্ৰা বুদ্ধারম্মণং পীতিং অৰিজহন্তো কেনচি রোগেন কালং কত্ৰা তুসিতেসু উপপন্নো অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে রাজানং বিম্বিসারং পটিচ্চ অম্বপালিযা কুচ্ছিম্হি পটিসন্ধিং গণ্হি. রাজা হি বিম্বিসারো তরুণকালে অম্বপালিযা রূপসম্পত্তিং সুত্ৰা সঞ্জাতাভিলাসো কতিপযমনুস্সপরিৰারো অঞ্ঞাতকৰেসেন ৰেসালিং গন্ত্ৰা একরত্তিং তায সংৰাসং কপ্পেসি. তদা অযং তস্সা কুচ্ছিম্হি পটিসন্ধিং অগ্গহেসি. সা চ গব্ভস্স পতিট্ঠিতভাৰং তস্স আরোচেসি. রাজাপি অত্তানং জানাপেত্ৰা দাতব্বযুত্তকং দত্ৰা পক্কামি. সা গব্ভস্স পরিপাকমন্ৰায পুত্তং ৰিজাযি, ‘‘ৰিমলো’’তিস্স নামং অহোসি, পচ্ছা ৰিমলকোণ্ডঞ্ঞোতি পঞ্ঞাযিত্থ. সো ৰযপ্পত্তো ভগৰতো ৰেসালিগমনে বুদ্ধানুভাৰং দিস্ৰা পসন্নমানসো পব্বজিত্ৰা কতপুব্বকিচ্চো ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.১২.৪০-৪৮) –

‘‘ৰিপস্সী নাম ভগৰা, লোকজেট্ঠো নরাসভো;

নিসিন্নো জনকাযস্স, দেসেসি অমতং পদং.

‘‘তস্সাহং ধম্মং সুত্ৰান, দ্ৰিপদিন্নস্স তাদিনো;

সোণ্ণপুপ্ফানি চত্তারি, বুদ্ধস্স অভিরোপযিং.

‘‘সুৰণ্ণচ্ছদনং আসি, যাৰতা পরিসা তদা;

বুদ্ধাভা চ সুৰণ্ণাভা, আলোকো ৰিপুলো অহু.

‘‘উদগ্গচিত্তো সুমনো, ৰেদজাতো কতঞ্জলী;

ৰিত্তিসঞ্জননো তেসং, দিট্ঠধম্মসুখাৰহো.

‘‘আযাচিত্ৰান সম্বুদ্ধং, ৰন্দিত্ৰান চ সুব্বতং;

পামোজ্জং জনযিত্ৰান, সকং ভৰনুপাগমিং.

‘‘ভৰনে উপৰিট্ঠোহং, বুদ্ধসেট্ঠং অনুস্সরিং;

তেন চিত্তপ্পসাদেন, তুসিতং উপপজ্জহং.

‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘সোল়সাসিংসু রাজানো, নেমিসম্মতনামকা;

তেতালীসে ইতো কপ্পে, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অঞ্ঞাপদেসেন অঞ্ঞং ব্যাকরোন্তো ‘‘দুমৰ্হযাযা’’তি গাথং অভাসি.

৬৪. তত্থ দুমৰ্হযাযাতি দুমেন অম্বেন অৰ্হাতব্বায, অম্বপালিযাতি অত্থো. আধারে চেতং ভুম্মৰচনং. উপ্পন্নোতি তস্সা কুচ্ছিযং উপ্পন্নো উপ্পজ্জমানো চ. জাতো পণ্ডরকেতুনাতি ধৰলৰত্থধজত্তা ‘‘পণ্ডরকেতূ’’তি পঞ্ঞাতেন বিম্বিসাররঞ্ঞা হেতুভূতেন জাতো, তং পটিচ্চ নিব্বত্তোতি অত্থো. উপ্পন্নোতি ৰা পঠমাভিনিব্বত্তিদস্সনং. ততো হি জাতোতি অভিজাতিদস্সনং. ৰিজাযনকালতো পট্ঠায হি লোকে জাতৰোহারো. এত্থ চ ‘‘দুমৰ্হযায উপ্পন্নো’’তি ইমিনা অত্তুক্কংসনভাৰং অপনেতি, অনেকপতিপুত্তানম্পি ৰিসেসাধিগমসম্ভৰঞ্চ দীপেতি. ‘‘জাতো পণ্ডরকেতুনা’’তি ইমিনা ৰিঞ্ঞাতপিতিকদস্সনেন পরৰম্ভনং অপনেতি. কেতুহাতি মানপ্পহাযী. মানো হি উণ্ণতিলক্খণত্তা কেতু ৰিযাতি কেতু. তথা হি সো ‘‘কেতুকম্যতাপচ্চুপট্ঠানো’’তি ৰুচ্চতি. কেতুনাযেৰাতি পঞ্ঞায এৰ. পঞ্ঞা হি অনৰজ্জধম্মেসু অচ্চুগ্গতট্ঠেন মারসেনপ্পমদ্দনেন পুব্বঙ্গমট্ঠেন চ অরিযানং ধজা নাম. তেনাহ ‘‘ধম্মো হি ইসিনং ধজো’’তি (সং. নি. ২.২৪১; অ. নি. ৪.৪৮; জা. ২.২১.৪৯৪). মহাকেতুং পধংসযীতি মহাৰিসযতায মহন্তা, সেয্যমানজাতিমানাদিভেদতো বহৰো চ মানপ্পকারা, ইতরে চ কিলেসধম্মা সমুস্সিতট্ঠেন কেতু এতস্সাতি মহাকেতু মারো পাপিমা. তং বলৰিধমনৰিসযাতিক্কমনৰসেন অভিভৰি নিব্বিসেৰনং অকাসীতি. ‘‘মহাকেতুং পধংসযী’’তি অত্তানং পরং ৰিয দস্সেন্তো অঞ্ঞাপদেসেন অরহত্তং ব্যাকাসি.

ৰিমলকোণ্ডঞ্ঞত্থেরগাথাৰণ্ণনা নিট্ঠিতা.

৫. উক্খেপকতৰচ্ছত্থেরগাথাৰণ্ণনা

উক্খেপকতৰচ্ছস্সাতি আযস্মতো উক্খেপকতৰচ্ছত্থেরস্স গাথা. কা উপ্পত্তি? সোপি কির পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো ইতো চতুনৰুতে কপ্পে সিদ্ধত্থস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো সত্থারং উদ্দিস্স মাল়ং করোন্তস্স পূগস্স একত্থম্ভং অলভন্তস্স থম্ভং দত্ৰা সহাযকিচ্চং অকাসি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং অঞ্ঞতরস্স ব্রাহ্মণস্স পুত্তো হুত্ৰা নিব্বত্তি, ৰচ্ছোতিস্স গোত্ততো আগতনামং. সো সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা কোসলরট্ঠে গামকাৰাসে ৰসন্তো আগতাগতানং ভিক্খূনং সন্তিকে ধম্মং পরিযাপুণাতি. ‘‘অযং ৰিনযো ইদং সুত্তন্তং অযং অভিধম্মো’’তি পন পরিচ্ছেদং ন জানাতি. অথেকদিৰসং আযস্মন্তং ধম্মসেনাপতিং পুচ্ছিত্ৰা যথাপরিচ্ছেদং সব্বং সল্লক্খেসি. ধম্মসঙ্গীতিযা পুব্বেপি পিটকাদিসমঞ্ঞা পরিযত্তিসদ্ধম্মে ৰৰত্থিতা এৰ, যতো ভিক্খূনং ৰিনযধরাদিৰোহারো. সো তেপিটকং বুদ্ধৰচনং উগ্গণ্হন্তো পরিপুচ্ছন্তো তত্থ ৰুত্তে রূপারূপধম্মে সল্লক্খেত্ৰা ৰিপস্সনং পট্ঠপেত্ৰা সম্মসন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.২.১৩-২৬) –

‘‘সিদ্ধত্থস্স ভগৰতো, মহাপূগগণো অহু;

সরণং গতা চ তে বুদ্ধং, সদ্দহন্তি তথাগতং.

‘‘সব্বে সঙ্গম্ম মন্তেত্ৰা, মাল়ং কুব্বন্তি সত্থুনো;

একত্থম্ভং অলভন্তা, ৰিচিনন্তি ব্রহাৰনে.

‘‘তেহং অরঞ্ঞে দিস্ৰান, উপগম্ম গণং তদা;

অঞ্জলিং পগ্গহেত্ৰান, পটিপুচ্ছিং গণং অহং.

‘‘তে মে পুট্ঠা ৰিযাকংসু, সীলৰন্তো উপাসকা;

মাল়ং মযং কত্তুকামা, একত্থম্ভো ন লব্ভতি.

‘‘একত্থম্ভং মমং দেথ, অহং দস্সামি সত্থুনো;

আহরিস্সামহং থম্ভং, অপ্পোস্সুক্কা ভৰন্তু তে.

‘‘তে মে থম্ভং পৰেচ্ছিংসু, পসন্না তুট্ঠমানসা;

ততো পটিনিৰত্তিত্ৰা, অগমংসু সকং ঘরং.

‘‘অচিরং গতে পূগগণে, থম্ভং অহাসহং তদা;

হট্ঠো হট্ঠেন চিত্তেন, পঠমং উস্সপেসহং.

‘‘তেন চিত্তপ্পসাদেন, ৰিমানং উপপজ্জহং;

উব্বিদ্ধং ভৰনং ময্হং, সত্তভূমং সমুগ্গতং.

‘‘ৰজ্জমানাসু ভেরীসু, পরিচারেমহং সদা;

পঞ্চপঞ্ঞাসকপ্পম্হি, রাজা আসিং যসোধরো.

‘‘তত্থাপি ভৰনং ময্হং, সত্তভূমং সমুগ্গতং;

কূটাগারৰরূপেতং, একত্থম্ভং মনোরমং.

‘‘একৰীসতিকপ্পম্হি, উদেনো নাম খত্তিযো;

তত্রাপি ভৰনং ময্হং, সত্তভূমং সমুগ্গতং.

‘‘যং যং যোনুপপজ্জামি, দেৰত্তং অথ মানুসং;

অনুভোমি সুখং সব্বং, একত্থম্ভস্সিদং ফলং.

‘‘চতুন্নৰুতিতো কপ্পে, যং থম্ভমদদং তদা;

দুগ্গতিং নাভিজানামি, একত্থম্ভস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা কতকিচ্চত্তা অকিলাসুভাৰে ঠিতো অত্তনো সন্তিকং উপগতানং গহট্ঠপব্বজিতানং অনুকম্পং উপাদায তেপিটকং বুদ্ধৰচনং ৰীমংসিত্ৰা ধম্মং দেসেসি. দেসেন্তো চ একদিৰসং অত্তানং পরং ৰিয কত্ৰা দস্সেন্তো –

৬৫.

‘‘উক্খেপকতৰচ্ছস্স, সঙ্কলিতং বহূহি ৰস্সেহি;

তং ভাসতি গহট্ঠানং, সুনিসিন্নো উল়ারপামোজ্জো’’তি. – গাথং অভাসি;

তত্থ উক্খেপকতৰচ্ছস্সাতি কতউক্খেপৰচ্ছস্স, ভিক্খুনো সন্তিকে ৰিসুং ৰিসুং উগ্গহিতং ৰিনযপদেসং সুত্তপদেসং অভিধম্মপদেসঞ্চ যথাপরিচ্ছেদং ৰিনযসুত্তাভিধম্মানংযেৰ উপরি খিপিত্ৰা সজ্ঝাযনৰসেন তত্থ তত্থেৰ পক্খিপিত্ৰা ঠিতৰচ্ছেনাতি অত্থো করণত্থে হি ইদং সামিৰচনং. সঙ্কলিতং বহূহি ৰস্সেহীতি বহুকেহি সংৰচ্ছরেহি সম্পিণ্ডনৰসেন হদযে ঠপিতং. ‘‘সঙ্খলিত’’ন্তিপি পাঠো, সঙ্খলিতং ৰিয কতং একাবদ্ধৰসেন ৰাচুগ্গতং কতং. যং বুদ্ধৰচনন্তি ৰচনসেসো. তন্তি তং পরিযত্তিধম্মং ভাসতি কথেতি. গহট্ঠানন্তি তেসং যেভুয্যতায ৰুত্তং. সুনিসিন্নোতি তস্মিং ধম্মে সম্মা নিচ্চলো নিসিন্নো, লাভসক্কারাদিং অপচ্চাসীসন্তো কেৰলং ৰিমুত্তাযতনসীসেযেৰ ঠত্ৰা কথেতীতি অত্থো. তেনাহ ‘‘উল়ারপামোজ্জো’’তি ফলসমাপত্তিসুখৰসেন ধম্মদেসনাৰসেনেৰ চ উপ্পন্নউল়ারপামোজ্জোতি. ৰুত্তঞ্হেতং –

‘‘যথা যথাৰুসো ভিক্খু, যথাসুতং যথাপরিযত্তং ধম্মং ৰিত্থারেন পরেসং দেসেতি তথা তথা সো তস্মিং ধম্মে লভতি অত্থৰেদং, লভতি ধম্মৰেদং, লভতি ধম্মূপসংহিতং পামোজ্জ’’ন্তিআদি (দী. নি. ৩.৩৫৫).

উক্খেপকতৰচ্ছত্থেরগাথাৰণ্ণনা নিট্ঠিতা.

৬. মেঘিযত্থেরগাথাৰণ্ণনা

অনুসাসি মহাৰীরোতি আযস্মতো মেঘিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে কুসলবীজানি রোপেন্তো ইতো একনৰুতে কপ্পে ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পাপুণি. তস্মিঞ্চ সমযে ৰিপস্সী ভগৰা বুদ্ধকিচ্চস্স পরিযোসানমাগম্ম আযুসঙ্খারং ওস্সজ্জি. তেন পথৰীকম্পাদীসু উপ্পন্নেসু মহাজনো ভীততসিতো অহোসি. অথ নং ৰেস্সৰণো মহারাজা তমত্থং ৰিভাৰেত্ৰা সমস্সাসেসি. তং সুত্ৰা মহাজনো সংৰেগপ্পত্তো অহোসি. তত্থাযং কুলপুত্তো বুদ্ধানুভাৰং সুত্ৰা সত্থরি সঞ্জাতগারৰবহুমানো উল়ারং পীতিসোমনস্সং পটিসংৰেদেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কপিলৰত্থুস্মিং সাকিযরাজকুলে নিব্বত্তি, তস্স মেঘিযোতি নামং অহোসি. সো ৰযপ্পত্তো সত্থু সন্তিকে পব্বজিত্ৰা ভগৰন্তং উপট্ঠহন্তো ভগৰতি জালিকাযং ৰিহরন্তে কিমিকালায নদিযা তীরে রমণীযং অম্বৰনং দিস্ৰা তত্থ ৰিহরিতুকামো দ্ৰে ৰারে ভগৰতা ৰারেত্ৰা ততিযৰারং ৰিস্সজ্জিতো তত্থ গন্ত্ৰা মিচ্ছাৰিতক্কমক্খিকাহি খজ্জমানো চিত্তসমাধিং অলভিত্ৰা সত্থু সন্তিকং গন্ত্ৰা তমত্থং আরোচেসি. অথস্স ভগৰা ‘‘অপরিপক্কায, মেঘিয, চেতোৰিমুত্তিযা পঞ্চ ধম্মা পরিপাকায সংৰত্তন্তী’’তিআদিনা (উদা. ৩১) ওৰাদং অদাসি. সো তস্মিং ওৰাদে ঠত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.১২.৫৭-৬৫) –

‘‘যদা ৰিপস্সী লোকগ্গো, আযুসঙ্খারমোস্সজি;

পথৰী সম্পকম্পিত্থ, মেদনী জলমেখলা.

‘‘ওততং ৰিততং ময্হং, সুৰিচিত্তৰটংসকং;

ভৰনম্পি পকম্পিত্থ, বুদ্ধস্স আযুসঙ্খযে.

‘‘তাসো ময্হং সমুপ্পন্নো, ভৰনে সম্পকম্পিতে;

উপ্পাদো নু কিমত্থায, আলোকো ৰিপুলো অহু.

‘‘ৰেস্সৰণো ইধাগম্ম, নিব্বাপেসি মহাজনং;

পাণভূতে ভযং নত্থি, একগ্গা হোথ সংৰুতা.

‘‘অহো বুদ্ধো অহো ধম্মো, অহো নো সত্থু সম্পদা;

যস্মিং উপ্পজ্জমানম্হি, পথৰী সম্পকম্পতি.

‘‘বুদ্ধানুভাৰং কিত্তেত্ৰা, কপ্পং সগ্গম্হি মোদহং;

অৰসেসেসু কপ্পেসু, কুসলং চরিতং মযা.

‘‘একনৰুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

‘‘ইতো চুদ্দসকপ্পম্হি, রাজা আসিং পতাপৰা;

সমিতো নাম নামেন, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা সত্থু সম্মুখা ওৰাদং লভিত্ৰা ‘‘মযা অরহত্তং অধিগত’’ন্তি অঞ্ঞং ব্যাকরোন্তো –

৬৬.

‘‘অনুসাসি মহাৰীরো, সব্বধম্মান পারগূ;

তস্সাহং ধম্মং সুত্ৰান, ৰিহাসিং সন্তিকে সতো;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. – গাথং অভাসি;

তত্থ অনুসাসীতি ‘‘অপরিপক্কায, মেঘিয, চেতোৰিমুত্তিযা পঞ্চ ধম্মা পরিপাকায সংৰত্তন্তী’’তিআদিনা ওৰদি অনুসিট্ঠিং অদাসি. মহাৰীরোতি মহাৰিক্কন্তো, ৰীরিযপারমিপারিপূরিযা চতুরঙ্গসমন্নাগতৰীরিযাধিট্ঠানেন অনঞ্ঞসাধারণচতুব্বিধসম্মপ্পধানসম্পত্তিযা চ মহাৰীরিযোতি অত্থো. সব্বধম্মান পারগূতি সব্বেসঞ্চ ঞেয্যধম্মানং পারং পরিযন্তং ঞাণগমনেন গতো অধিগতোতি সব্বধম্মান পারগূ, সব্বঞ্ঞূতি অত্থো. সব্বেসং ৰা সঙ্খতধম্মানং পারভূতং নিব্বানং সযম্ভূঞাণেন গতো অধিগতোতি সব্বধম্মান পারগূ. তস্সাহং ধম্মং সুত্ৰানাতি তস্স বুদ্ধস্স ভগৰতো সামুক্কংসিকং তং চতুসচ্চধম্মং সুণিত্ৰা. ৰিহাসিং সন্তিকেতি অম্বৰনে মিচ্ছাৰিতক্কেহি উপদ্দুতো চালিকা ৰিহারং গন্ত্ৰা সত্থু সমীপেযেৰ ৰিহাসিং. সতোতি সতিমা, সমথৰিপস্সনাভাৰনায অপ্পমত্তোতি অত্থো. অহন্তি ইদং যথা ‘‘অনুসাসী’’তি এত্থ ‘‘ম’’ন্তি এৰং ‘‘ৰিজ্জা অনুপ্পত্তা, কতং বুদ্ধস্স সাসন’’ন্তি এত্থ ‘‘মযা’’তি পরিণামেতব্বং. ‘‘কতং বুদ্ধস্স সাসন’’ন্তি চ ইমিনা যথাৰুত্তং ৰিজ্জাত্তযানুপ্পত্তিমেৰ সত্থু ওৰাদপটিকরণভাৰদস্সনেন পরিযাযন্তরেন পকাসেতি. সীলক্খন্ধাদিপরিপূরণমেৰ হি সত্থু সাসনকারিতা.

মেঘিযত্থেরগাথাৰণ্ণনা নিট্ঠিতা.

৭. একধম্মসৰনীযত্থেরগাথাৰণ্ণনা

কিলেসা ঝাপিতা ময্হন্তি আযস্মতো একধম্মসৰনীযত্থেরস্স গাথা. কা উপ্পত্তি? সো কির পদুমুত্তরস্স ভগৰতো কালে রুক্খদেৰতা হুত্ৰা নিব্বত্তো কতিপযে ভিক্খূ মগ্গমূল়্হে মহারঞ্ঞে ৰিচরন্তে দিস্ৰা অনুকম্পমানো অত্তনো ভৰনতো ওতরিত্ৰা তে সমস্সাসেত্ৰা ভোজেত্ৰা যথাধিপ্পেতট্ঠানং পাপেসি. সো তেন পুঞ্ঞকম্মেন দেৰমনুস্সেসু সংসরন্তো কস্সপে ভগৰতি লোকে উপ্পজ্জিত্ৰা কতবুদ্ধকিচ্চে পরিনিব্বুতে তস্মিং কালে বারাণসিরাজা কিকী নাম অহোসি. তস্মিং কালঙ্কতে তস্স পুথুৰিন্দরাজা নাম পুত্তো আসি. তস্স পুত্তো সুসামো নাম. তস্স পুত্তো কিকীব্রহ্মদত্তো নাম হুত্ৰা রজ্জং কারেন্তো সাসনে অন্তরহিতে ধম্মস্সৰনং অলভন্তো, ‘‘যো ধম্মং দেসেতি, তস্স সহস্সং দম্মী’’তি ঘোসাপেত্ৰা একম্পি ধম্মকথিকং অলভন্তো, ‘‘ময্হং পিতুপিতামহাদীনং কালে ধম্মো সংৰত্ততি, ধম্মকথিকা সুলভা অহেসুং. ইদানি পন চতুপ্পদিকগাথামত্তম্পি কথেন্তো দুল্লভো. যাৰ ধম্মসঞ্ঞা ন ৰিনস্সতি, তাৰদেৰ পব্বজিস্সামী’’তি রজ্জং পহায হিমৰন্তং উদ্দিস্স গচ্ছন্তং সক্কো দেৰরাজা আগন্ত্ৰা, ‘‘অনিচ্চা ৰত সঙ্খারা’’তি গাথায ধম্মং কথেত্ৰা নিৰত্তেসি. সো নিৰত্তিত্ৰা বহুং পুঞ্ঞং কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে সেতব্যনগরে সেট্ঠিকুলে নিব্বত্তিত্ৰা ৰযপ্পত্তো ভগৰতি সেতব্যনগরে সিংসপাৰনে ৰিহরন্তে সত্থারং উপসঙ্কমিত্ৰা ৰন্দিত্ৰা একমন্তং নিসীদি. তস্স সত্থা অজ্ঝাসযং ওলোকেত্ৰা, ‘‘অনিচ্চা ৰত সঙ্খারা’’তি ইমায গাথায ধম্মং দেসেসি. তস্স তত্থ কতাধিকারতায সো অনিচ্চসঞ্ঞায পাকটতরং হুত্ৰা উপট্ঠিতায পটিলদ্ধসংৰেগো পব্বজিত্ৰা ধম্মসম্মসনং পট্ঠপেত্ৰা দুক্খসঞ্ঞং অনত্তসঞ্ঞঞ্চ মনসিকরোন্তো ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ১.১২.৬৬-৭১) –

‘‘পদুমুত্তরবুদ্ধস্স, সাৰকা ৰনচারিনো;

ৰিপ্পনট্ঠা ব্রহারঞ্ঞে, অন্ধাৰ অনুসুয্যরে.

‘‘অনুস্সরিত্ৰা সম্বুদ্ধং, পদুমুত্তরনাযকং;

তস্স তে মুনিনো পুত্তা, ৰিপ্পনট্ঠা মহাৰনে.

‘‘ভৰনা ওরুহিত্ৰান, অগমিং ভিক্খুসন্তিকং;

তেসং মগ্গঞ্চ আচিক্খিং, ভোজনঞ্চ অদাসহং.

‘‘তেন কম্মেন দ্ৰিপদিন্দ, লোকজেট্ঠ নরাসভ;

জাতিযা সত্তৰস্সোহং, অরহত্তমপাপুণিং.

‘‘সচক্খূ নাম নামেন, দ্ৰাদস চক্কৰত্তিনো;

সত্তরতনসম্পন্না, পঞ্চকপ্পসতে ইতো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

তস্স একেনেৰ ধম্মস্সৰনেন নিপ্ফন্নকিচ্চত্তা একধম্মসৰনীযোত্ৰেৰ সমঞ্ঞা অহোসি. সো অরহা হুত্ৰা অঞ্ঞং ব্যাকরোন্তো –

৬৭.

‘‘কিলেসা ঝাপিতা ময্হং, ভৰা সব্বে সমূহতা;

ৰিক্খীণো জাতিসংসারো, নত্থি দানি পুনব্ভৰো’’তি. – গাথং অভাসি;

তত্থ কিলেসাতি যস্মিং সন্তানে উপ্পন্না, তং কিলেসেন্তি ৰিবাধেন্তি উপতাপেন্তি ৰাতি কিলেসা, রাগাদযো. ঝাপিতাতি ইন্দগ্গিনা ৰিয রুক্খগচ্ছাদযো অরিযমগ্গঞাণগ্গিনা সমূলং দড্ঢা. ময্হন্তি মযা, মম সন্তানে ৰা. ভৰা সব্বে সমূহতাতি কামকম্মভৰাদযো সব্বে ভৰা সমুগ্ঘাটিতা কিলেসানং ঝাপিতত্তা. সতি হি কিলেসৰট্টে কম্মৰট্টেন ভৰিতব্বং. কম্মভৰানং সমূহতত্তা এৰ চ উপপত্তিভৰাপি সমূহতা এৰ অনুপ্পত্তিধম্মতায আপাদিতত্তা. ৰিক্খীণো জাতিসংসারোতি জাতিআদিকো –

‘‘খন্ধানঞ্চ পটিপাটি, ধাতুআযতনান চ;

অব্বোচ্ছিন্নং ৰত্তমানা, সংসারোতি পৰুচ্চতী’’তি. –

ৰুত্তলক্খণো সংসারো ৰিসেসতো খীণো, তস্মা নত্থি দানি পুনব্ভৰো. যস্মা আযতিং পুনব্ভৰো নত্থি, তস্মা ৰিক্খীণো জাতিসংসারো. তস্মা চ পুনব্ভৰো নত্থি, যস্মা ভৰা সব্বে সমূহতাতি আৰত্তেত্ৰা ৰত্তব্বং. অথ ৰা ৰিক্খীণো জাতিসংসারো, ততো এৰ নত্থি দানি পুনব্ভৰোতি যোজেতব্বং.

একধম্মসৰনীযত্থেরগাথাৰণ্ণনা নিট্ঠিতা.

৮. একুদানিযত্থেরগাথাৰণ্ণনা

অধিচেতসো অপ্পমজ্জতোতি আযস্মতো একুদানিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো অত্থদস্সিস্স ভগৰতো কালে যক্খসেনাপতি হুত্ৰা নিব্বত্তো সত্থরি পরিনিব্বুতে, ‘‘অলাভা ৰত মে, দুল্লদ্ধং ৰত মে, যোহং সত্থুধরমানকালে দানাদিপুঞ্ঞং কাতুং নালত্থ’’ন্তি পরিদেৰসোকমাপন্নো অহোসি. অথ নং সাগরো নাম সত্থু সাৰকো সোকং ৰিনোদেত্ৰা সত্থু থূপপূজাযং নিযোজেসি. সো পঞ্চ ৰস্সানি থূপং পূজেত্ৰা ততো চুতো তেন পুঞ্ঞেন দেৰমনুস্সেসু এৰ সংসরন্তো কস্সপস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো কালেন কালং সত্থু সন্তিকং উপসঙ্কমি. তস্মিঞ্চ সমযে সত্থা ‘‘অধিচেতসো’’তি গাথায সাৰকে অভিণ্হং ওৰদি. সো তং সুত্ৰা সদ্ধাজাতো পব্বজি. পব্বজিত্ৰা চ পন তমেৰ গাথং পুনপ্পুনং পরিৰত্তেতি. সো তত্থ ৰীসতিৰস্সসহস্সানি সমণধম্মং করোন্তো ঞাণস্স অপরিপক্কত্তা ৰিসেসং নিব্বত্তেতু নাসক্খি. ততো পন চুতো দেৰলোকে নিব্বত্তিত্ৰা অপরাপরং সুগতীসুযেৰ সংসরন্তো ইমস্মিং বুদ্ধুপ্পাদে সাৰত্থিযং ৰিভৰসম্পন্নস্স ব্রাহ্মণস্স পুত্তো হুত্ৰা নিব্বত্তো ৰিঞ্ঞুতং পত্ৰা জেতৰনপটিগ্গহণসমযে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা কতপুব্বকিচ্চো অরঞ্ঞে ৰিহরন্তো সত্থু সন্তিকং অগমাসি. তস্মিঞ্চ সমযে সত্থা আযস্মন্তং সারিপুত্তং অত্তনো অৰিদূরে অধিচিত্তমনুযুত্তং দিস্ৰা ‘‘অধিচেতসো’’তি ইমং উদানং উদানেসি. তং সুত্ৰা অযং চিরকালং ভাৰনায অরঞ্ঞে ৰিহরন্তোপি কালেন কালং তমেৰ গাথং উদানেতি, তেনস্স একুদানিযোতি সমঞ্ঞা উদপাদি. সো অথেকদিৰসং চিত্তেকগ্গতং লভিত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.১২.৭২-৮১) –

‘‘অত্থদস্সিম্হি সুগতে, নিব্বুতে সমনন্তরা;

যক্খযোনিং উপপজ্জিং, যসং পত্তো চহং তদা.

‘‘দুল্লদ্ধং ৰত মে আসি, দুপ্পভাতং দুরুট্ঠিতং;

যং মে ভোগে ৰিজ্জমানে, পরিনিব্বাযি চক্খুমা.

‘‘মম সঙ্কপ্পমঞ্ঞায, সাগরো নাম সাৰকো;

মমুদ্ধরিতুকামো সো, আগচ্ছি মম সন্তিকং.

‘‘কিং নু সোচসি মা ভাযি, চর ধম্মং সুমেধস;

অনুপ্পদিন্না বুদ্ধেন, সব্বেসং বীজসম্পদা.

‘‘যো চে পূরেয্য সম্বুদ্ধং, তিট্ঠন্তং লোকনাযকং;

ধাতুং সাসপমত্তম্পি, নিব্বুতস্সাপি পূজযে.

‘‘সমে চিত্তপ্পসাদম্হি, সমং পুঞ্ঞং মহগ্গতং;

তস্মা থূপং করিত্ৰান, পূজেহি জিনধাতুযো.

‘‘সাগরস্স ৰচো সুত্ৰা, বুদ্ধথূপং অকাসহং;

পঞ্চৰস্সে পরিচরিং, মুনিনো থূপমুত্তমং.

‘‘তেন কম্মেন দ্ৰিপদিন্দ, লোকজেট্ঠ নরাসভ;

সম্পত্তিং অনুভোত্ৰান, অরহত্তমপাপুণিং.

‘‘ভূরিপঞ্ঞা চ চত্তারো, সত্তকপ্পসতে ইতো;

সত্তরতনসম্পন্না, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ৰিমুত্তিসুখেন ৰিহরন্তো একদিৰসং আযস্মতা ধম্মভণ্ডাগারিকেন পটিভানং ৰীমংসিতুং, ‘‘আৰুসো, ময্হং ধম্মং ভণাহী’’তি অজ্ঝিট্ঠো চিরকালপরিচিতত্তা –

৬৮.

‘‘অধিচেতসো অপ্পমজ্জতো, মুনিনো মোনপথেসু সিক্খতো;

সোকা ন ভৰন্তি তাদিনো, উপসন্তস্স সদা সতীমতো’’তি. (উদা. ৩৭) –

ইমমেৰ গাথং অভাসি.

তত্থ অধিচেতসোতি অধিচিত্তৰতো, সব্বচিত্তানং অধিকেন অরহত্তফলচিত্তেন সমন্নাগতস্সাতি অত্থো. অপ্পমজ্জতোতি নপ্পমজ্জতো, অপ্পমাদেন অনৰজ্জধম্মেসু সাতচ্চকিরিযায সমন্নাগতস্সাতি ৰুত্তং হোতি. মুনিনোতি ‘‘যো মুনাতি উভো লোকে, মুনি তেন পৰুচ্চতী’’তি (ধ. প. ২৬৯; মহানি. ১৪৯; চূল়নি. মেত্তগূমাণৰপুচ্ছানিদ্দেস ২১) এৰং উভযলোকমুননেন ৰা, মোনং ৰুচ্চতি ঞাণং, তেন অরহত্তফলপঞ্ঞাসঙ্খাতেন মোনেন সমন্নাগততায ৰা খীণাসৰো মুনি নাম, তস্স মুনিনো. মোনপথেসু সিক্খতোতি অরহত্তঞাণসঙ্খাতস্স মোনস্স পথেসু উপাযমগ্গেসু সত্ততিংসবোধিপক্খিযধম্মেসু, তীসু ৰা সিক্খাসু সিক্খতো. ইদঞ্চ পুব্বভাগপটিপদং গহেত্ৰা ৰুত্তং. পরিনিট্ঠিতসিক্খো হি অরহা, তস্মা এৰং সিক্খতো, ইমায সিক্খায মুনিভাৰং পত্তস্স মুনিনোতি এৰমেত্থ অত্থো দট্ঠব্বো. যস্মা চেতদেৰং তস্মা হেট্ঠিমমগ্গফলচিত্তানং ৰসেন অধিচেতসো, চতুসচ্চসম্বোধিপটিপত্তিযং অপ্পমাদৰসেন অপ্পমজ্জতো, অগ্গমগ্গঞাণসমন্নাগমেন মুনিনোতি এৰমেতেসং পদানং অত্থো যুজ্জতিযেৰ. অথ ৰা ‘‘অপ্পমজ্জতো সিক্খতো’’ পধানহেতূ অক্খাতাতি দট্ঠব্বা. তস্মা অপ্পমজ্জনহেতু সিক্খনহেতু চ অধিচেতসোতি অত্থো.

সোকা ন ভৰন্তি তাদিনোতি তাদিসস্স খীণাসৰমুনিনো অব্ভন্তরে ইট্ঠৰিযোগাদিৰত্থুকা সোকা চিত্তসন্তাপা ন হোন্তি. অথ ৰা তাদিলক্খণপ্পত্তস্স অসেক্খমুনিনো সোকা ন ভৰন্তীতি. উপসন্তস্সাতি রাগাদীনং অচ্চন্তূপসমেন উপসন্তস্স. সদা সতীমতোতি সতিৰেপুল্লপ্পত্তিযা নিচ্চকালং সতিযা অৰিরহিতস্স.

এত্থ চ ‘‘অধিচেতসো’’তি ইমিনা অধিচিত্তসিক্খা, ‘‘অপ্পমজ্জতো’’তি ইমিনা অধিসীলসিক্খা, ‘‘মুনিনো মোনপথেসু সিক্খতো’’তি এতেহি অধিপঞ্ঞাসিক্খা. ‘‘মুনিনো’’তি ৰা এতেন অধিপঞ্ঞাসিক্খা, ‘‘মোনপথেসু সিক্খতো’’তি এতেন তাসং লোকুত্তরসিক্খানং পুব্বভাগপটিপদা, ‘‘সোকা ন ভৰন্তী’’তিআদীহি সিক্খাপারিপূরিযা আনিসংসা পকাসিতাতি ৰেদিতব্বং অযমেৰ চ থেরস্স অঞ্ঞাব্যাকরণগাথা অহোসি.

একুদানিযত্থেরগাথাৰণ্ণনা নিট্ঠিতা.

৯. ছন্নত্থেরগাথাৰণ্ণনা

সুত্ৰান ধম্মং মহতো মহারসন্তি আযস্মতো ছন্নত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো সিদ্ধত্থস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সিদ্ধত্থং ভগৰন্তং অঞ্ঞতরং রুক্খমূলং উপগচ্ছন্তং দিস্ৰা পসন্নচিত্তো মুদুসম্ফস্সং পণ্ণসন্থরং সন্থরিত্ৰা অদাসি. পুপ্ফেহি চ সমন্ততো ওকিরিত্ৰা পূজং অকাসি. সো তেন পুঞ্ঞকম্মেন দেৰলোকে নিব্বত্তিত্ৰা পুনপি অপরাপরং পুঞ্ঞানি কত্ৰা সুগতীসুযেৰ সংসরন্তো অম্হাকং ভগৰতো কালে সুদ্ধোদনমহারাজস্স গেহে দাসিযা কুচ্ছিম্হি নিব্বত্তি, ছন্নোতিস্স নামং অহোসি, বোধিসত্তেন সহজাতো. সো সত্থু ঞাতিসমাগমে পটিলদ্ধসদ্ধো পব্বজিত্ৰা ভগৰতি পেমেন, ‘‘অম্হাকং বুদ্ধো, অম্হাকং ধম্মো’’তি মমত্তং উপ্পাদেত্ৰা সিনেহং ছিন্দিতুং অসক্কোন্তো সমণধম্মং অকত্ৰা সত্থরি পরিনিব্বুতে সত্থারা আণত্তৰিধিনা কতেন ব্রহ্মদণ্ডেন সন্তজ্জিতো সংৰেগপ্পত্তো হুত্ৰা সিনেহং ছিন্দিত্ৰা ৰিপস্সন্তো নচিরেনেৰ অরহত্তং পাপুণি. তেন ৰুত্তং অপদানে (অপ. থের ১.১০.৪৫-৫০) –

‘‘সিদ্ধত্থস্স ভগৰতো, অদাসিং পণ্ণসন্থরং;

সমন্তা উপহারঞ্চ, কুসুমং ওকিরিং অহং.

‘‘পাসাদেৰং গুণং রম্মং, অনুভোমি মহারহং;

মহগ্ঘানি চ পুপ্ফানি, সযনেভিসৰন্তি মে.

‘‘সযনেহং তুৰট্টামি, ৰিচিত্তে পুপ্ফসন্থতে;

পুপ্ফৰুট্ঠি চ সযনে, অভিৰস্সতি তাৰদে.

‘‘চতুন্নৰুতিতো কপ্পে, অদাসিং পণ্ণসন্থরং;

দুগ্গতিং নাভিজানামি, সন্থরস্স ইদং ফলং.

‘‘তিণসন্থরকা নাম, সত্তেতে চক্কৰত্তিনো;

ইতো তে পঞ্চমে কপ্পে, উপ্পজ্জিংসু জনাধিপা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ৰিমুত্তিসুখসন্তপ্পিতো পীতিৰেগৰিস্সট্ঠং উদানং উদানেন্তো –

৬৯.

‘‘সুত্ৰান ধম্মং মহতো মহারসং,

সব্বঞ্ঞুতঞ্ঞাণৰরেন দেসিতং;

মগ্গং পপজ্জিং অমতস্স পত্তিযা,

সো যোগক্খেমস্স পথস্স কোৰিদো’’তি. – গাথং অভাসি;

তত্থ সুত্ৰানাতি সুণিত্ৰা, সোতেন গহেত্ৰা ওহিতসোতো সোতদ্ৰারানুসারেন উপধারেত্ৰা. ধম্মন্তি চতুসচ্চধম্মং. মহতোতি ভগৰতো. ভগৰা হি মহন্তেহি উল়ারতমেহি সীলাদিগুণেহি সমন্নাগতত্তা, সদেৰকেন লোকেন ৰিসেসতো মহনীযতায চ ‘‘মহা’’তি ৰুচ্চতি, যা তস্স মহাসমণোতি সমঞ্ঞা জাতা. নিস্সক্কৰচনঞ্চেতং ‘‘মহতো ধম্মং সুত্ৰানা’’তি. মহারসন্তি ৰিমুত্তিরসস্স দাযকত্তা উল়াররসং. সব্বঞ্ঞুতঞ্ঞাণৰরেন দেসিতন্তি সব্বং জানাতীতি সব্বঞ্ঞূ, তস্স ভাৰো সব্বঞ্ঞুতা. ঞাণমেৰ ৰরং, ঞাণেসু ৰা ৰরন্তি ঞাণৰরং, সব্বঞ্ঞুতা ঞাণৰরং এতস্সাতি সব্বঞ্ঞুতঞ্ঞাণৰরো, ভগৰা. তেন সব্বঞ্ঞুতঞ্ঞাণসঙ্খাতঅগ্গঞাণেন ৰা করণভূতেন দেসিতং কথিতং ধম্মং সুত্ৰানাতি যোজনা. যং পনেত্থ ৰত্তব্বং, তং পরমত্থদীপনিযং ইতিৰুত্তকৰণ্ণনাযং ৰুত্তনযেন ৰেদিতব্বং. মগ্গন্তি অট্ঠঙ্গিকং অরিযমগ্গং. পপজ্জিন্তি পটিপজ্জিং. অমতস্স পত্তিযাতি নিব্বানস্স অধিগমায উপাযভূতং পটিপজ্জিন্তি যোজনা. সোতি সো ভগৰা. যোগক্খেমস্স পথস্স কোৰিদোতি চতূহি যোগেহি অনুপদ্দুতস্স নিব্বানস্স যো পথো, তস্স কোৰিদো তত্থ সুকুসলো. অযঞ্হেত্থ অত্থো – ভগৰতো চতুসচ্চদেসনং সুত্ৰা অমতাধিগমূপাযমগ্গং অহং পটিপজ্জিং পটিপজ্জনমগ্গং মযা কতং, সো এৰ পন ভগৰা সব্বথা যোগক্খেমস্স পথস্স কোৰিদো, পরসন্তানে ৰা পরমনেসু কুসলো, যস্স সংৰিধানমাগম্ম অহম্পি মগ্গং পটিপজ্জিন্তি. অযমেৰ চ থেরস্স অঞ্ঞাব্যাকরণগাথা অহোসীতি.

ছন্নত্থেরগাথাৰণ্ণনা নিট্ঠিতা.

১০. পুণ্ণত্থেরগাথাৰণ্ণনা

সীলমেৰাতি আযস্মতো পুণ্ণত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো ইতো একনৰুতে কপ্পে বুদ্ধসুঞ্ঞে লোকে ব্রাহ্মণকুলে নিব্বত্তিত্ৰা ৰযপ্পত্তো ব্রাহ্মণসিপ্পেসু নিপ্ফত্তিং গন্ত্ৰা কামেসু আদীনৰং দিস্ৰা ঘরাৰাসং পহায তাপসপব্বজ্জং পব্বজিত্ৰা হিমৰন্তপ্পদেসে পণ্ণকুটিং কত্ৰা ৰাসং কপ্পেসি. তস্স ৰসনট্ঠানস্স অৰিদূরে একস্মিং পব্ভারে পচ্চেকবুদ্ধো আবাধিকো হুত্ৰা পরিনিব্বাযি, তস্স পরিনিব্বানসমযে মহা আলোকো অহোসি. তং দিস্ৰা সো, ‘‘কথং নু খো অযং আলোকো উপ্পন্নো’’তি ৰীমংসনৰসেন ইতো চিতো চ আহিণ্ডন্তো পব্ভারে পচ্চেকসম্বুদ্ধং পরিনিব্বুতং দিস্ৰা গন্ধদারূনি সংকড্ঢিত্ৰা সরীরং ঝাপেত্ৰা গন্ধোদকেন উপসিঞ্চি. তত্থেকো দেৰপুত্তো অন্তলিক্খে ঠত্ৰা এৰমাহ – ‘‘সাধু, সাধু, সপ্পুরিস, বহুং তযা পুঞ্ঞং পসৰন্তেন পূরিতং সুগতিসংৰত্তনিযং কম্মং তেন ত্ৰং সুগতীসুযেৰ উপ্পজ্জিস্সসি, ‘পুণ্ণো’তি চ তে নামং ভৰিস্সতী’’তি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সুনাপরন্তজনপদে সুপ্পারকপট্টনে গহপতিকুলে নিব্বত্তি, পুণ্ণোতিস্স নামং অহোসি. সো ৰযপ্পত্তো ৰাণিজ্জৰসেন মহতা সত্থেন সদ্ধিং সাৰত্থিং গতো. তেন চ সমযেন ভগৰা সাৰত্থিযং ৰিহরতি. অথ সো সাৰত্থিৰাসীহি উপাসকেহি সদ্ধিং ৰিহারং গতো সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা ৰত্তপটিৰত্তেহি আচরিযুপজ্ঝাযে আরাধেন্তো ৰিহাসি. সো একদিৰসং সত্থারং উপসঙ্কমিত্ৰা, ‘‘সাধু মং, ভন্তে ভগৰা, সংখিত্তেন ওৰাদেন ওৰদতু, যমহং সুত্ৰা সুনাপরন্তজনপদে ৰিহরেয্য’’ন্তি আহ. তস্স ভগৰা, ‘‘সন্তি খো, পুণ্ণ, চক্খুৰিঞ্ঞেয্যা রূপা’’তিআদিনা (ম. নি. ৩.৩৯৫; সং. নি. ৪.৮৮) ওৰাদং দত্ৰা সীহনাদং নদাপেত্ৰা ৰিস্সজ্জেসি. সো ভগৰন্তং ৰন্দিত্ৰা সুনাপরন্তজনপদং গন্ত্ৰা সুপ্পারকপট্টনে ৰিহরন্তো সমথৰিপস্সনং উস্সুক্কাপেত্ৰা তিস্সো ৰিজ্জা সচ্ছাকাসি. তেন ৰুত্তং অপদানে (অপ. থের ১.৪১.২৯-৪৪) –

‘‘পব্ভারকূটং নিস্সায, সযম্ভূ অপরাজিতো;

আবাধিকো চ সো বুদ্ধো, ৰসতি পব্বতন্তরে.

‘‘মম অস্সমসামন্তা, পনাদো আসি তাৰদে;

বুদ্ধে নিব্বাযমানম্হি, আলোকো উদপজ্জথ.

‘‘যাৰতা ৰনসণ্ডস্মিং, অচ্ছকোকতরচ্ছকা;

ৰাল়া চ কেসরী সব্বে, অভিগজ্জিংসু তাৰদে.

‘‘উপ্পাতং তমহং দিস্ৰা, পব্ভারং অগমাসহং;

তত্থদ্দসাসিং সম্বুদ্ধং, নিব্বুতং অপরাজিতং.

‘‘সুফুল্লং সালরাজংৰ, সতরংসিংৰ উগ্গতং;

ৰীতচ্চিকংৰ অঙ্গারং, নিব্বুতং অপরাজিতং.

‘‘তিণং কট্ঠঞ্চ পূরেত্ৰা, চিতকং তত্থকাসহং;

চিতকং সুকতং কত্ৰা, সরীরং ঝাপযিং অহং.

‘‘সরীরং ঝাপযিত্ৰান, গন্ধতোযং সমোকিরিং;

অন্তলিক্খে ঠিতো যক্খো, নামমগ্গহি তাৰদে.

‘‘যং পূরিতং তযা কিচ্চং, সযম্ভুস্স মহেসিনো;

পুণ্ণকো নাম নামেন, সদা হোহি তুৰং মুনে.

‘‘তম্হা কাযা চৰিত্ৰান, দেৰলোকং অগচ্ছহং;

তত্থ দিব্বমযো গন্ধো, অন্তলিক্খা পৰস্সতি.

‘‘তত্রাপি নামধেয্যং মে, পুণ্ণকোতি অহূ তদা;

দেৰভূতো মনুস্সো ৰা, সঙ্কপ্পং পূরযামহং.

‘‘ইদং পচ্ছিমকং ময্হং, চরিমো ৰত্ততে ভৰো;

ইধাপি পুণ্ণকো নাম, নামধেয্যং পকাসতি.

‘‘তোসযিত্ৰান সম্বুদ্ধং, গোতমং সক্যপুঙ্গৰং;

সব্বাসৰে পরিঞ্ঞায, ৰিহরামি অনাসৰো.

‘‘একনৰুতিতো কপ্পে, যং কম্মমকরিং তদা;

দুগ্গতিং নাভিজানামি, তনুকিচ্চস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরো বহূ মনুস্সে সাসনে অভিপ্পসাদেসি. যতো পঞ্চসতমত্তা পুরিসা উপাসকত্তং পঞ্চসতমত্তা চ ইত্থিযো উপাসিকাভাৰং পটিৰেদেসুং. সো তত্থ রত্তচন্দনেন চন্দনমাল়ং নাম গন্ধকুটিং কারাপেত্ৰা, ‘‘সত্থা পঞ্চহি ভিক্খুসতেহি সদ্ধিং মাল়ং পটিচ্ছতূ’’তি ভগৰন্তং পুপ্ফদূতেন নিমন্তেসি. ভগৰা চ ইদ্ধানুভাৰেন তত্তকেহি ভিক্খূহি সদ্ধিং তত্থ গন্ত্ৰা চন্দনমাল়ং পটিগ্গহেত্ৰা অরুণে অনুট্ঠিতেযেৰ পচ্চাগমাসি. থেরো অপরভাগে পরিনিব্বানসমযে অঞ্ঞং ব্যাকরোন্তো –

৭০.

‘‘সীলমেৰ ইধ অগ্গং, পঞ্ঞৰা পন উত্তমো;

মনুস্সেসু চ দেৰেসু, সীলপঞ্ঞাণতো জয’’ন্তি. – গাথং অভাসি;

তত্থ সীলন্তি সীলনট্ঠেন সীলং, পতিট্ঠানট্ঠেন সমাধানট্ঠেন চাতি অত্থো. সীলঞ্হি সব্বগুণানং পতিট্ঠা, তেনাহ – ‘‘সীলে পতিট্ঠায নরো সপঞ্ঞো’’তি (সং. নি. ১.২৩; পেটকো. ২২; ৰিসুদ্ধি. ১.১). সমাদহতি চ তং কাযৰাচাঅৰিপ্পকিণ্ণং করোতীতি অত্থো. তযিদং সীলমেৰ অগ্গং সব্বগুণানং মূলভাৰতো পমুখভাৰতো চ. যথাহ – ‘‘তস্মাতিহ, ত্ৰং ভিক্খু, আদিমেৰ ৰিসোধেহি কুসলেসু ধম্মেসু. কো চাদি কুসলানং ধম্মানং সীলঞ্চ সুৰিসুদ্ধ’’ন্তি (সং. নি. ৫.৩৬৯), ‘‘পাতিমোক্খন্তি মুখমেতং পমুখমেত’’ন্তি (মহাৰ. ১৩৫) চ আদি. ইধাতি নিপাতমত্তং. পঞ্ঞৰাতি ঞাণসম্পন্নো. সো উত্তমো সেট্ঠো পৰরোতি পুগ্গলাধিট্ঠানায গাথায পঞ্ঞাযযেৰ সেট্ঠভাৰং দস্সেতি. পঞ্ঞুত্তরা হি কুসলা ধম্মা. ইদানি তং সীলপঞ্ঞানং অগ্গসেট্ঠভাৰং কারণতো দস্সেতি ‘‘মনুস্সেসু চ দেৰেসু, সীলপঞ্ঞাণতো জয’’ন্তি চ. সীলপঞ্ঞাণহেতু পটিপক্খজযো কামকিলেসজযো হোতীতি অত্থো.

পুণ্ণত্থেরগাথাৰণ্ণনা নিট্ঠিতা.

সত্তমৰগ্গৰণ্ণনা নিট্ঠিতা.

৮. অট্ঠমৰগ্গো

১. ৰচ্ছপালত্থেরগাথাৰণ্ণনা

সুসুখুমনিপুণত্থদস্সিনাতি আযস্মতো ৰচ্ছপালত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি আচিনন্তো দেৰমনুস্সেসু সংসরন্তো ইতো একনৰুতে কপ্পে ব্রাহ্মণকুলে নিব্বত্তিত্ৰা ব্রাহ্মণসিপ্পেসু নিপ্ফত্তিং গন্ত্ৰা অগ্গিং পরিচরন্তো একদিৰসং মহতিযা কংসপাতিযা পাযাসং আদায দক্খিণেয্যং পরিযেসন্তো ৰিপস্সিং ভগৰন্তং আকাসে চঙ্কমন্তং দিস্ৰা অচ্ছরিযব্ভুতচিত্তজাতো ভগৰন্তং অভিৰাদেত্ৰা দাতুকামতং দস্সেসি. পটিগ্গহেসি ভগৰা অনুকম্পং উপাদায. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে রাজগহে ৰিভৰসম্পন্নস্স ব্রাহ্মণস্স পুত্তো হুত্ৰা নিব্বত্তি, ৰচ্ছপালোতিস্স নামং অহোসি. সো বিম্বিসারসমাগমে উরুৰেলকস্সপত্থেরেন ইদ্ধিপাটিহারিযং দস্সেত্ৰা সত্থু পরমনিপচ্চকারে কতে তং দিস্ৰা পটিলদ্ধসদ্ধো পব্বজিত্ৰা সত্তাহপব্বজিতো এৰ ৰিপস্সনং ৰড্ঢেত্ৰা ছল়ভিঞ্ঞো অহোসি. তেন ৰুত্তং অপদানে (অপ. থের ১.১৩.২৬-৩৪) –

‘‘সুৰণ্ণৰণ্ণো সম্বুদ্ধো, বাত্তিংসৰরলক্খণো;

পৰনা অভিনিক্খন্তো, ভিক্খুসঙ্ঘপুরক্খতো.

‘‘মহচ্চা কংসপাতিযা, ৰড্ঢেত্ৰা পাযসং অহং;

আহুতিং যিট্ঠুকামো সো, উপনেসিং বলিং অহং.

‘‘ভগৰা তম্হি সমযে, লোকজেট্ঠো নরাসভো;

চঙ্কমং সুসমারূল়্হো, অম্বরে অনিলাযনে.

‘‘তঞ্চ অচ্ছরিযং দিস্ৰা, অব্ভুতং লোমহংসনং;

ঠপযিত্ৰা কংসপাতিং, ৰিপস্সিং অভিৰাদযিং.

‘‘তুৰং দেৰোসি সব্বঞ্ঞূ, সদেৰে সহমানুসে;

অনুকম্পং উপাদায, পটিগ্গণ্হ মহামুনি.

‘‘পটিগ্গহেসি ভগৰা, সব্বঞ্ঞূ লোকনাযকো;

মম সঙ্কপ্পমঞ্ঞায, সত্থা লোকে মহামুনি.

‘‘একনৰুতিতো কপ্পে, যং দানমদদিং তদা;

দুগ্গতিং নাভিজানামি, পাযাসস্স ইদং ফলং.

‘‘একতালীসিতো কপ্পে, বুদ্ধো নামাসি খত্তিযো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা সুখেনেৰ অত্তনা নিব্বানস্স অধিগতভাৰং ৰিভাৰেন্তো –

৭১.

‘‘সুসুখুমনিপুণত্থদস্সিনা, মতিকুসলেন নিৰাতৰুত্তিনা;

সংসেৰিতৰুদ্ধসীলিনা, নিব্বানং ন হি তেন দুল্লভ’’ন্তি. –

ইমং গাথং অভাসি.

তত্থ সুসুখুমনিপুণত্থদস্সিনাতি অতিৰিয দুদ্দসট্ঠেন সুখুমে, সণ্হট্ঠেন নিপুণে সচ্চপটিচ্চসমুপ্পাদাদিঅত্থে অনিচ্চতাদিং ওরোপেত্ৰা পস্সতীতি সুসুখুমনিপুণত্থদস্সী, তেন. মতিকুসলেনাতি মতিযা পঞ্ঞায কুসলেন ছেকেন, ‘‘এৰং পৰত্তমানস্স পঞ্ঞা ৰড্ঢতি, এৰং ন ৰড্ঢতী’’তি ধম্মৰিচযসম্বোজ্ঝঙ্গপঞ্ঞায উপ্পাদনে কুসলেন. নিৰাতৰুত্তিনাতি সব্রহ্মচারীসু নিৰাতনীচৰত্তনসীলেন, ৰুড্ঢেসু নৰেসু চ যথানুরূপপটিপত্তিনা. সংসেৰিতৰুদ্ধসীলিনাতি সংসেৰিতং আচিণ্ণং ৰুদ্ধসীলং সংসেৰিতৰুদ্ধসীলং, তং যস্স অত্থি, তেন সংসেৰিতৰুদ্ধসীলিনা. অথ ৰা সংসেৰিতা উপাসিতা ৰুদ্ধসীলিনো এতেনাতি সংসেৰিতৰুদ্ধসীলী, তেন. হীতিসদ্দো হেতুঅত্থো. যস্মা যো নিৰাতৰুত্তি সংসেৰিতৰুদ্ধসীলী মতিকুসলো সুসুখুমনিপুণত্থদস্সী চ, তস্মা নিব্বানং ন তস্স দুল্লভন্তি অত্থো. নিৰাতৰুত্তিতায হি সংসেৰিতৰুদ্ধসীলিতায চ পণ্ডিতা তং ওৰদিতব্বং অনুসাসিতব্বং মঞ্ঞন্তি, তেসঞ্চ ওৰাদে ঠিতো সযং মতিকুসলতায সুসুখুমনিপুণত্থদস্সিতায চ ৰিপস্সনায কম্মং করোন্তো নচিরস্সেৰ নিব্বানং অধিগচ্ছতীতি, অযমেৰ চ থেরস্স অঞ্ঞাব্যাকরণগাথা অহোসীতি.

ৰচ্ছপালত্থেরগাথাৰণ্ণনা নিট্ঠিতা.

২. আতুমত্থেরগাথাৰণ্ণনা

যথা কল়ীরো সুসু ৰড্ঢিতগ্গোতি আযস্মতো আতুমত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং আচিনন্তো ইতো একনৰুতে কপ্পে কুলগেহে নিব্বত্তিত্ৰা ৰিঞ্ঞুতং পত্তো ৰিপস্সিং ভগৰন্তং অন্তরৰীথিযং গচ্ছন্তং দিস্ৰা পসন্নমানসো গন্ধোদকেন গন্ধচুণ্ণেন চ পূজং অকাসি. সো তেন পুঞ্ঞকম্মেন দেৰলোকে নিব্বত্তো অপরাপরং সুগতীসুযেৰ সংসরন্তো কস্সপস্স ভগৰতো সাসনে পব্বজিত্ৰা সমণধম্মং অকাসি, ঞাণস্স পন অপরিপক্কত্তা ৰিসেসং নিব্বত্তেতুং নাসক্খি. অথ ইমস্মিং বুদ্ধুপ্পাদে সাৰত্থিযং সেট্ঠিপুত্তো হুত্ৰা নিব্বত্তি, আতুমোতিস্স নামং অহোসি. তস্স ৰযপ্পত্তস্স মাতা ‘‘পুত্তস্স মে ভরিযং আনেস্সামা’’তি ঞাতকেহি সম্মন্তেসি. সো তং উপধারেত্ৰা হেতুসম্পত্তিযা চোদিযমানো ‘‘কিং ময্হং ঘরাৰাসেন, ইদানেৰ পব্বজিস্সামী’’তি ভিক্খূনং সন্তিকং গন্ত্ৰা পব্বজি. পব্বজিতম্পি নং মাতা উপ্পব্বাজেতুকামা নানানযেহি পলোভেতি. সো তস্সা অৰসরং অদত্ৰা অত্তনো অজ্ঝাসযং পকাসেন্তো –

৭২.

‘‘যথা কল়ীরো সুসু ৰড্ঢিতগ্গো, দুন্নিক্খমো হোতি পসাখজাতো;

এৰং অহং ভরিযাযানীতায, অনুমঞ্ঞ মং পব্বজিতোম্হি দানী’’তি. –

গাথং অভাসি.

তত্থ কল়ীরোতি অঙ্কুরো, ইধ পন ৰংসঙ্কুরো অধিপ্পেতো. সুসূতি তরুণো. ৰড্ঢিতগ্গোতি পৰড্ঢিতসাখো. সুসুৰড্ঢিতগ্গোতি ৰা সুট্ঠু ৰড্ঢিতসাখো সঞ্জাতপত্তসাখো. দুন্নিক্খমোতি ৰেল়ুগুম্বতো নিক্খামেতুং নীহরিতুং অসক্কুণেয্যো. পসাখজাতোতি জাতপসাখো, সাখানম্পি পব্বে পব্বে উপ্পন্নঅনুসাখো. এৰং অহং ভরিযাযানীতাযাতি যথা ৰংসো ৰড্ঢিতগ্গো ৰংসন্তরেসু সংসট্ঠ সাখাপসাখো ৰেল়ুগুম্বতো দুন্নীহরণীযো হোতি, এৰং অহম্পি ভরিযায ময্হং আনীতায পুত্তধীতাদিৰসেন ৰড্ঢিতগ্গো আসত্তিৰসেন ঘরাৰাসতো দুন্নীহরণীযো ভৰেয্যং. যথা পন ৰংসকল়ীরো অসঞ্জাতসাখবন্ধো ৰেল়ুগুম্বতো সুনীহরণীযোৰ হোতি, এৰং অহম্পি অসঞ্জাতপুত্তদারাদিবন্ধো সুনীহরণীযো হোমি, তস্মা অনানীতায এৰ ভরিযায অনুমঞ্ঞ মং অত্তনাৰ মং অনুজানাপেত্ৰা. পব্বজিতোম্হি দানীতি, ‘‘ইদানি পন পব্বজিতো অম্হি, সাধু সুট্ঠূ’’তি অত্তনো নেক্খম্মাভিরতিং পকাসেসি, অথ ৰা ‘‘অনুমঞ্ঞ মং পব্বজিতোম্হি দানী’’তি মাতু কথেতি. অযঞ্হেত্থ অত্থো – যদিপি তায পুব্বে নানুমতং, ইদানি পন পব্বজিতো অম্হি, তস্মা অনুমঞ্ঞ অনুজানাহি মং সমণভাৰেযেৰ ঠাতুং, নাহং তযা নিৰত্তনীযোতি. এৰং পন কথেন্তো যথাঠিতোৰ ৰিপস্সনং ৰড্ঢেত্ৰা মগ্গপটিপাটিযা কিলেসে খেপেত্ৰা ছল়ভিঞ্ঞো অহোসি. তেন ৰুত্তং অপদানে (অপ. থের ১.১৩.৩৫-৪০) –

‘‘নিসজ্জ পাসাদৰরে, ৰিপস্সিং অদ্দসং জিনং;

ককুধং ৰিলসন্তংৰ, সব্বঞ্ঞুং তমনাসকং.

‘‘পাসাদস্সাৰিদূরে চ, গচ্ছতি লোকনাযকো;

পভা নিদ্ধাৰতে তস্স, যথা চ সতরংসিনো.

‘‘গন্ধোদকঞ্চ পগ্গয্হ, বুদ্ধসেট্ঠং সমোকিরিং;

তেন চিত্তপ্পসাদেন, তত্থ কালঙ্কতো অহং.

‘‘একনৰুতিতো কপ্পে, যং গন্ধোদকমাকিরিং;

দুগ্গতিং নাভিজানামি, বুদ্ধপূজাযিদং ফলং.

‘‘একতিংসে ইতো কপ্পে, সুগন্ধো নাম খত্তিযো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা মাতরং আপুচ্ছিত্ৰা তস্সা পেক্খন্তিযাযেৰ আকাসেন পক্কামি. সো অরহত্তপ্পত্তিযা উত্তরিকালম্পি অন্তরন্তরা তমেৰ গাথং পচ্চুদাহাসি.

তত্থ ‘‘পব্বজিতোম্হী’’তি ইমিনাপদেসেন অযম্পি থেরস্স অঞ্ঞাব্যাকরণগাথা অহোসি অত্তনো সন্তানে রাগাদিমলস্স পব্বাজিতভাৰদীপনতো. তেনাহ ভগৰা – ‘‘পব্বাজযমত্তনো মলং, তস্মা ‘পব্বজিতো’তি ৰুচ্চতী’’তি (ধ. প. ৩৮৮).

আতুমত্থেরগাথাৰণ্ণনা নিট্ঠিতা.

৩. মাণৰত্থেরগাথাৰণ্ণনা

জিণ্ণঞ্চ দিস্ৰা দুখিতঞ্চ ব্যাধিতন্তি আযস্মতো মাণৰত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো ইতো একনৰুতে কপ্পে ব্রাহ্মণকুলে নিব্বত্তিত্ৰা লক্খণধরো হুত্ৰা ৰিপস্সিস্স ভগৰতো অভিজাতিযা লক্খণানি পরিগ্গহেত্ৰা পুব্বনিমিত্তানি সাৰেত্ৰা, ‘‘একংসেন অযং বুদ্ধো ভৰিস্সতী’’তি ব্যাকরিত্ৰা নানানযেহি থোমেত্ৰা অভিৰাদেত্ৰা পদক্খিণং কত্ৰা পক্কামি. সো তেন পুঞ্ঞকম্মেন সুগতীসুযেৰ সংসরন্তো ইমস্মিং বুদ্ধুপ্পাদে সাৰত্থিযং ব্রাহ্মণমহাসালস্স গেহে নিব্বত্তিত্ৰা যাৰ সত্তৰস্সানি, তাৰ অন্তোঘরেযেৰ ৰড্ঢিত্ৰা সত্তমে সংৰচ্ছরে উপনযনত্থং উয্যানং নীতো অন্তরামগ্গে জিণ্ণাতুরমতে দিস্ৰা তেসং অদিট্ঠপুব্বত্তা তে পরিজনে পুচ্ছিত্ৰা জরারোগমরণসভাৰং সুত্ৰা সঞ্জাতসংৰেগো ততো অনিৰত্তন্তো ৰিহারং গন্ত্ৰা সত্থু সন্তিকে ধম্মং সুত্ৰা মাতাপিতরো অনুজানাপেত্ৰা পব্বজিত্ৰা ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.১৩.৪১-৬৪) –

‘‘জাযমানে ৰিপস্সিম্হি, নিমিত্তং ব্যাকরিং অহং;

নিব্বাপযিঞ্চ জনতং, বুদ্ধো লোকে ভৰিস্সতি.

‘‘যস্মিঞ্চ জাযমানস্মিং, দসসহস্সি কম্পতি;

সো দানি ভগৰা সত্থা, ধম্মং দেসেতি চক্খুমা.

‘‘যস্মিঞ্চ জাযমানস্মিং, আলোকো ৰিপুলো অহু;

সো দানি ভগৰা সত্থা, ধম্মং দেসেতি চক্খুমা.

‘‘যস্মিঞ্চ জাযমানস্মিং, সরিতাযো ন সন্দযুং;

সো দানি ভগৰা সত্থা, ধম্মং দেসেতি চক্খুমা.

‘‘যস্মিঞ্চ জাযমানস্মিং, অৰীচগ্গি ন পজ্জলি;

সো দানি ভগৰা সত্থা, ধম্মং দেসেতি চক্খুমা.

‘‘যস্মিঞ্চ জাযমানস্মিং, পক্খিসঙ্ঘো ন সঞ্চরি;

সো দানি ভগৰা সত্থা, ধম্মং দেসেতি চক্খুমা.

‘‘যস্মিঞ্চ জাযমানস্মিং, ৰাতক্খন্ধো ন ৰাযতি;

সো দানি ভগৰা সত্থা, ধম্মং দেসেতি চক্খুমা.

‘‘যস্মিঞ্চ জাযমানস্মিং, সব্বরতনানি জোতযুং;

সো দানি ভগৰা সত্থা, ধম্মং দেসেতি চক্খুমা.

‘‘যস্মিঞ্চ জাযমানস্মিং, সত্তাসুং পদৰিক্কমা;

সো দানি ভগৰা সত্থা, ধম্মং দেসেতি চক্খুমা.

‘‘জাতমত্তো চ সম্বুদ্ধো, দিসা সব্বা ৰিলোকযি;

ৰাচাসভিমুদীরেসি, এসা বুদ্ধান ধম্মতা.

‘‘সংৰেজযিত্ৰা জনতং, থৰিত্ৰা লোকনাযকং;

সম্বুদ্ধং অভিৰাদেত্ৰা, পক্কামিং পাচিনামুখো.

‘‘একনৰুতিতো কপ্পে, যং বুদ্ধমভিথোমযিং;

দুগ্গতিং নাভিজানামি, থোমনায ইদং ফলং.

‘‘ইতো নৰুতিকপ্পম্হি, সম্মুখাথৰিকৰ্হযো;

সত্তরতনসম্পন্নো, চক্কৰত্তী মহব্বলো.

‘‘পথৰীদুন্দুভি নাম, একূননৰুতিম্হিতো;

সত্তরতনসম্পন্নো, চক্কৰত্তী মহব্বলো.

‘‘অট্ঠাসীতিম্হিতো কপ্পে, ওভাসো নাম খত্তিযো;

সত্তরতনসম্পন্নো, চক্কৰত্তী মহব্বলো.

‘‘সত্তাসীতিম্হিতো কপ্পে, সরিতচ্ছেদনৰ্হযো;

সত্তরতনসম্পন্নো, চক্কৰত্তী মহব্বলো.

‘‘অগ্গিনিব্বাপনো নাম, কপ্পানং ছল়সীতিযা;

সত্তরতনসম্পন্নো, চক্কৰত্তী মহব্বলো.

‘‘গতিপচ্ছেদনো নাম, কপ্পানং পঞ্চসীতিযা;

সত্তরতনসম্পন্নো, চক্কৰত্তী মহব্বলো.

‘‘রাজা ৰাতসমো নাম, কপ্পানং চুল্লসীতিযা;

সত্তরতনসম্পন্নো, চক্কৰত্তী মহব্বলো.

‘‘রতনপজ্জলো নাম, কপ্পানং তেঅসীতিযা;

সত্তরতনসম্পন্নো, চক্কৰত্তী মহব্বলো.

‘‘পদৰিক্কমনো নাম, কপ্পানং দ্ৰেঅসীতিযা;

সত্তরতনসম্পন্নো, চক্কৰত্তী মহব্বলো.

‘‘রাজা ৰিলোকনো নাম, কপ্পানং একসীতিযা;

সত্তরতনসম্পন্নো, চক্কৰত্তী মহব্বলো.

‘‘গিরসারোতি নামেন, কপ্পেসীতিম্হি খত্তিযো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অধিগতারহত্তো পন ভিক্খূহি, ‘‘কেন, ত্ৰং আৰুসো, সংৰেগেন অতিদহরোৰ সমানো পব্বজিতো’’তি পুচ্ছিতো অত্তনো পব্বজ্জানিমিত্তকিত্তনাপদেসেন অঞ্ঞং ব্যাকরোন্তো –

৭৩.

‘‘জিণ্ণঞ্চ দিস্ৰা দুখিতঞ্চ ব্যাধিতং, মতঞ্চ দিস্ৰা গতমাযুসঙ্খযং;

ততো অহং নিক্খমিতূন পব্বজিং, পহায কামানি মনোরমানী’’তি. –

গাথং অভাসি.

তত্থ জিণ্ণন্তি জরায অভিভূতং, খণ্ডিচ্চপালিচ্চৰলিত্তচতাদীহি সমঙ্গীভূতং. দুখিতন্তি দুক্খপ্পত্তং. ব্যাধিতন্তি গিলানং. এত্থ চ ‘‘ব্যাধিত’’ন্তি ৰুত্তেপি দুক্খপ্পত্তভাৰো সিদ্ধো, ‘‘দুখিত’’ন্তি ৰচনং তস্স বাল়্হগিলানভাৰপরিদীপনত্থং. মতন্তি কালঙ্কতং, যস্মা কালঙ্কতো আযুনো খযং ৰযং ভেদং গতো নাম হোতি, তস্মা ৰুত্তং ‘‘গতমাযুসঙ্খয’’ন্তি. তস্মা জিণ্ণব্যাধিমতানং দিট্ঠত্তা, ‘‘ইমে জরাদযো নাম ন ইমেসংযেৰ, অথ খো সব্বসাধারণা, তস্মা অহম্পি জরাদিকে অনতিৰত্তো’’তি সংৰিগ্গত্তা. নিক্খমিতূনাতি নিক্খমিত্ৰা, অযমেৰ ৰা পাঠো. পব্বজ্জাধিপ্পাযেন ঘরতো নিগ্গন্ত্ৰা. পব্বজিন্তি সত্থু সাসনে পব্বজং উপগতো. পহায কামানি মনোরমানীতি ইট্ঠকন্তাদিভাৰতো অৰীতরাগানং মনো রমেন্তীতি মনোরমে ৰত্থুকামে পজহিত্ৰা, তপ্পটিবদ্ধস্স ছন্দরাগস্স অরিযমগ্গেন সমুচ্ছিন্দনেন নিরপেক্খভাৰেন ছড্ডেত্ৰাতি অত্থো. কামানং পহানকিত্তনমুখেন চেতং থেরস্স অঞ্ঞাব্যাকরণং অহোসি. মাণৰকালে পব্বজিতত্তা ইমস্স থেরস্স মাণৰোত্ৰেৰ সমঞ্ঞা জাতাতি.

মাণৰত্থেরগাথাৰণ্ণনা নিট্ঠিতা.

৪. সুযামনত্থেরগাথাৰণ্ণনা

কামচ্ছন্দো চ ব্যাপাদোতি আযস্মতো সুযামনত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইতো একনৰুতে কপ্পে ৰিপস্সিস্স ভগৰতো কালে ধঞ্ঞৰতীনগরে ব্রাহ্মণকুলে নিব্বত্তিত্ৰা ৰযপ্পত্তো ব্রাহ্মণসিপ্পেসু নিপ্ফত্তিং পত্ৰা ব্রাহ্মণমন্তে ৰাচেতি. তেন চ সমযেন ৰিপস্সী ভগৰা মহতা ভিক্খুসঙ্ঘেন সদ্ধিং ধঞ্ঞৰতীনগরং পিণ্ডায পৰিট্ঠো হোতি. তং দিস্ৰা ব্রাহ্মণো পসন্নচিত্তো অত্তনো গেহং নেত্ৰা আসনং পঞ্ঞাপেত্ৰা তস্সূপরি পুপ্ফসন্থারং সন্থরিত্ৰা অদাসি, সত্থরি তত্থ নিসিন্নে পণীতেন আহারেন সন্তপ্পেসি, ভুত্তাৰিঞ্চ পুপ্ফগন্ধেন পূজেসি. সত্থা অনুমোদনং ৰত্ৰা পক্কামি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে ৰেসালিযং অঞ্ঞতরস্স ব্রাহ্মণস্স পুত্তো হুত্ৰা নিব্বত্তি, সুযামনোতিস্স নামং অহোসি. সো ৰযপ্পত্তো তিণ্ণং ৰেদানং পারগূ পরমনিস্সমযুত্তো হুত্ৰা গেহৰাসীনং কামূপভোগং জিগুচ্ছিত্ৰা ঝাননিন্নো ভগৰতো ৰেসালিগমনে পটিলদ্ধসদ্ধো পব্বজিত্ৰা খুরগ্গেযেৰ অরহত্তং পাপুণি. তেন ৰুত্তং অপদানে (অপ. থের ১.১৩.৬৫-৭৪) –

‘‘নগরে ধঞ্ঞৰতিযা, অহোসিং ব্রাহ্মণো তদা;

লক্খণে ইতিহাসে চ, সনিঘণ্ডুসকেটুভে.

‘‘পদকো ৰেয্যাকরণো, নিমিত্তকোৰিদো অহং;

মন্তে চ সিস্সে ৰাচেসিং, তিণ্ণং ৰেদান পারগূ.

‘‘পঞ্চ উপ্পলহত্থানি, পিট্ঠিযং ঠপিতানি মে;

আহুতিং যিট্ঠুকামোহং, পিতুমাতুসমাগমে.

‘‘তদা ৰিপস্সী ভগৰা, ভিক্খুসঙ্ঘপুরক্খতো;

ওভাসেন্তো দিসা সব্বা, আগচ্ছতি নরাসভো.

‘‘আসনং পঞ্ঞপেত্ৰান, নিমন্তেত্ৰা মহামুনিং;

সন্থরিত্ৰান তং পুপ্ফং, অভিনেসিং সকং ঘরং.

‘‘যং মে অত্থি সকে গেহে, আমিসং পচ্চুপট্ঠিতং;

তাহং বুদ্ধস্স পাদাসিং, পসন্নো সেহি পাণিভি.

‘‘ভুত্তাৰিং কালমঞ্ঞায পুপ্ফহত্থমদাসহং;

অনুমোদিত্ৰান সব্বঞ্ঞূ, পক্কামি উত্তরামুখো.

‘‘একনৰুতিতো কপ্পে, যং পুপ্ফমদদিং তদা;

দুগ্গতিং নাভিজানামি, পুপ্ফদানস্সিদং ফলং.

‘‘অনন্তরং ইতো কপ্পে, রাজাহুং ৰরদস্সনো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা নীৰরণপ্পহানকিত্তনমুখেন অঞ্ঞং ব্যাকরোন্তো –

৭৪.

‘‘কামচ্ছন্দো চ ব্যাপাদো, থিনমিদ্ধঞ্চ ভিক্খুনো;

উদ্ধচ্চং ৰিচিকিচ্ছা চ, সব্বসোৰ ন ৰিজ্জতী’’তি. – গাথং অভাসি;

তত্থ কামচ্ছন্দোতি কামেসু ছন্দো, কামো চ সো ছন্দো চাতিপি কামচ্ছন্দো, কামরাগো. ইধ পন সব্বোপি রাগো কামচ্ছন্দো অগ্গমগ্গৰজ্ঝস্সাপি অধিপ্পেতত্তা, তেনাহ ‘‘সব্বসোৰ ন ৰিজ্জতী’’তি. সব্বেপি হি তেভূমকধম্মা কামনীযট্ঠেন কামা, তত্থ পৰত্তো রাগো কামচ্ছন্দো, তেনাহ ভগৰা – ‘‘আরুপ্পে কামচ্ছন্দনীৰরণং পটিচ্চ থিনমিদ্ধনীৰরণং উদ্ধচ্চনীৰরণং অৰিজ্জানীৰরণং উপ্পজ্জতী’’তি (পট্ঠা. ৩.৮.৮) ব্যাপজ্জতি চিত্তং পূতিভাৰং গচ্ছতি এতেনাতি ব্যাপাদো, ‘‘অনত্থং মে অচরী’’তিআদিনযপ্পৰত্তো (ধ. স. ১০৬৬; ৰিভ. ৯০৯) আঘাতো. থিনং চিত্তস্স অকল্যতা অনুস্সাহসংহননং, মিদ্ধং কাযস্স অকল্যতা অসত্তিৰিঘাতো, তদুভযম্পি থিনঞ্চ মিদ্ধঞ্চ থিনমিদ্ধং, কিচ্চাহারপটিপক্খানং একতায একং কত্ৰা ৰুত্তং. উদ্ধতভাৰো উদ্ধচ্চং, যেন ধম্মেন চিত্তং উদ্ধতং হোতি অৰূপসন্তং, সো চেতসো ৰিক্খেপো উদ্ধচ্চং. উদ্ধচ্চগ্গহণেনেৰ চেত্থ কিচ্চাহারপটিপক্খানং সমানতায কুক্কুচ্চম্পি গহিতমেৰাতি দট্ঠব্বং. তং পচ্ছানুতাপলক্খণং. যো হি কতাকতকুসলাকুসলূপনিস্সযো ৰিপ্পটিসারো, তং কুক্কুচ্চং. ৰিচিকিচ্ছাতি, ‘‘এৰং নু খো ন নু খো’’তি সংসযং আপজ্জতি, ধম্মসভাৰং ৰা ৰিচিনন্তো কিচ্ছতি কিলমতি এতাযাতি ৰিচিকিচ্ছা, বুদ্ধাদিৰত্থুকো সংসযো. সব্বসোতি অনৰসেসতো. ন ৰিজ্জতীতি নত্থি, মগ্গেন সমুচ্ছিন্নত্তা ন উপলব্ভতি. ইদঞ্চ পদদ্ৰযং পচ্চেকং যোজেতব্বং অযঞ্হেত্থ যোজনা – যস্স ভিক্খুনো তেন তেন অরিযমগ্গেন সমুচ্ছিন্নত্তা কামচ্ছন্দো চ ব্যাপাদো চ থিনমিদ্ধঞ্চ উদ্ধচ্চকুক্কুচ্চঞ্চ ৰিচিকিচ্ছা চ সব্বসোৰ ন ৰিজ্জতি, তস্স ন কিঞ্চি করণীযং, কতস্স ৰা পতিচযোতি অঞ্ঞাপদেসেন অঞ্ঞং ব্যাকরোতি. পঞ্চসু হি নীৰরণেসু মগ্গেন সমুচ্ছিন্নেসু তদেকট্ঠতায সব্বেপি কিলেসা সমুচ্ছিন্নাযেৰ হোন্তি. তেনাহ – ‘‘সব্বেতে ভগৰন্তো পঞ্চ নীৰরণে পহায চেতসো উপক্কিলেসে’’তি (দী. নি. ২.১৪৬).

সুযামনত্থেরগাথাৰণ্ণনা নিট্ঠিতা.

৫. সুসারদত্থেরগাথাৰণ্ণনা

সাধু সুৰিহিতান দস্সনন্তি আযস্মতো সুসারদত্থেরস্স গাথা. কা উপ্পত্তি? সো কির পদুমুত্তরস্স ভগৰতো কালে ব্রাহ্মণকুলে নিব্বত্তিত্ৰা ৰিজ্জাপদেসু নিপ্ফত্তিং গন্ত্ৰা কামেসু আদীনৰং দিস্ৰা ঘরাৰাসং পহায তাপসপব্বজ্জং পব্বজিত্ৰা হিমৰন্তপ্পদেসে অরঞ্ঞাযতনে অস্সমং কারেত্ৰা ৰিহাসি. অথ নং অনুগ্গণ্হন্তো পদুমুত্তরো ভগৰা ভিক্খাচারৰেলাযং উপসঙ্কমি. সো দূরতোৰ দিস্ৰা পসন্নমানসো পচ্চুগ্গন্ত্ৰা পত্তং গহেত্ৰা মধুরানি ফলানি পক্খিপিত্ৰা অদাসি. ভগৰা তং পটিগ্গহেত্ৰা অনুমোদনং কত্ৰা পক্কামি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে ধম্মসেনাপতিনো ঞাতিব্রাহ্মণকুলে নিব্বত্তিত্ৰা মন্দপঞ্ঞত্তা সুসারদোতি গহিতনামো অপরভাগে ধম্মসেনাপতিস্স সন্তিকে ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.১৩.৭৫-৮৩) –

‘‘অজ্ঝাযকো মন্তধরো, তিণ্ণং ৰেদান পারগূ;

হিমৰন্তস্সাৰিদূরে, ৰসামি অস্সমে অহং.

‘‘অগ্গিহুত্তঞ্চ মে অত্থি, পুণ্ডরীকফলানি চ;

পুটকে নিক্খিপিত্ৰান, দুমগ্গে লগ্গিতং মযা.

‘‘পদুমুত্তরো লোকৰিদূ, আহুতীনং পটিগ্গহো;

মমুদ্ধরিতুকামো সো, ভিক্খন্তো মমুপাগমি.

‘‘পসন্নচিত্তো সুমনো, ফলং বুদ্ধস্সদাসহং;

ৰিত্তিসঞ্জননো ময্হং, দিট্ঠধম্মসুখাৰহো.

‘‘সুৰণ্ণৰণ্ণো সম্বুদ্ধো, আহুতীনং পটিগ্গহো;

অন্তলিক্খে ঠিতো সত্থা, ইমং গাথং অভাসথ.

‘‘ইমিনা ফলদানেন, চেতনাপণিধীহি চ;

কপ্পানং সতসহস্সং, দুগ্গতিং নুপপজ্জসি.

‘‘তেনেৰ সুক্কমূলেন, অনুভোত্ৰান সম্পদা;

পত্তোম্হি অচলং ঠানং, হিত্ৰা জযপরাজযং.

‘‘ইতো সত্তসতে কপ্পে, রাজা আসিং সুমঙ্গলো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা সপ্পুরিসূপনিস্সযানিসংসকিত্তনাপদেসেন অঞ্ঞং ব্যাকরোন্তো –

৭৫.

‘‘সাধু সুৰিহিতান দস্সনং, কঙ্খা ছিজ্জতি বুদ্ধি ৰড্ঢতি;

বালম্পি করোন্তি পণ্ডিতং, তস্মা সাধু সতং সমাগমো’’তি. –

গাথং অভাসি.

তত্থ সাধূতি সুন্দরং, ভদ্দকন্তি অত্থো. সুৰিহিতান দস্সনন্তি সুৰিহিতানং দস্সনং. গাথাসুখত্থং অনুস্ৰারলোপো কতো. সীলাদিগুণেহি সুসংৰিহিতত্তভাৰানং পরানুদ্দযায সুট্ঠু ৰিহিতধম্মদেসনানং অরিযানং দস্সনং সাধূতি যোজনা. ‘‘দস্সন’’ন্তি নিদস্সনমত্তং দট্ঠব্বং সৰনাদীনম্পি বহুকারত্তা. ৰুত্তঞ্হেতং ভগৰতা –

‘‘যে তে ভিক্খূ সীলসম্পন্না সমাধিসম্পন্না পঞ্ঞাসম্পন্না ৰিমুত্তিসম্পন্না ৰিমুত্তিঞাণদস্সনসম্পন্না ওৰাদকা ৰিঞ্ঞাপকা সন্দস্সকা সমাদপকা সমুত্তেজকা সম্পহংসকা অলংসমক্খাতারো সদ্ধম্মস্স, দস্সনম্পাহং, ভিক্খৰে, তেসং ভিক্খূনং বহূপকারং ৰদামি, সৰনং…পে… উপসঙ্কমনং…পে… পযিরুপাসনং…পে… অনুস্সরণং…পে… অনুপব্বজ্জম্পাহং, ভিক্খৰে, তেসং ভিক্খূনং বহূপকারং ৰদামী’’তি (ইতিৰু. ১০৪).

দস্সনমূলকত্তা ৰা ইতরেসং দস্সনমেৰেত্থ ৰুত্তং, কঙ্খা ছিজ্জতীতিআদি তত্থ কারণৰচনং. তাদিসানঞ্হি কল্যাণমিত্তানং দস্সনে সতি ৰিঞ্ঞুজাতিকো অত্থকামো কুলপুত্তো তে উপসঙ্কমতি পযিরুপাসতি ‘‘কিং, ভন্তে, কুসলং, কিং অকুসল’’ন্তিআদিনা (ম. নি. ৩.২৯৬) পঞ্হং পুচ্ছতি. তে চস্স অনেকৰিহিতেসু কঙ্খাট্ঠানীযেসু কঙ্খং পটিৰিনোদেন্তি, তেন ৰুত্তং ‘‘কঙ্খা ছিজ্জতী’’তি. যস্মা চ তে ধম্মদেসনায তেসং কঙ্খং পটিৰিনোদেত্ৰা পুব্বভাগে কম্মপথসম্মাদিট্ঠিং ৰিপস্সনাসম্মাদিট্ঠিঞ্চ উপ্পাদেন্তি, তস্মা তেসং বুদ্ধি ৰড্ঢতি. যদা পন তে ৰিপস্সনং ৰড্ঢেত্ৰা সচ্চানি পটিৰিজ্ঝন্তি, তদা সোল়সৰত্থুকা অট্ঠৰত্থুকা চ ৰিচিকিচ্ছা ছিজ্জতি সমুচ্ছিজ্জতি, নিপ্পরিযাযেন পঞ্ঞা বুদ্ধি ৰড্ঢতি. বাল্যসমতিক্কমনতো তে পণ্ডিতা হোন্তি. সো তেহি বুদ্ধিং ৰড্ঢেতি, বালম্পি করোন্তি পণ্ডিতন্তি. তস্মাতিআদি নিগমনং, যস্মা সাধূনং দস্সনং ৰুত্তনযেন কঙ্খা ছিজ্জতি বুদ্ধি ৰড্ঢতি, তে বালং পণ্ডিতং করোন্তি, তস্মা তেন কারণেন সাধু সুন্দরং সতং সপ্পুরিসানং অরিযানং সমাগমো, তেহি সমোধানং সম্মা ৰড্ঢনন্তি অত্থো.

সুসারদত্থেরগাথাৰণ্ণনা নিট্ঠিতা.

৬. পিযঞ্জহত্থেরগাথাৰণ্ণনা

উপ্পতন্তেসু নিপতেতি আযস্মতো পিযঞ্জহত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো ইতো একনৰুতে কপ্পে ৰিপস্সিস্স ভগৰতো কালে হিমৰন্তে রুক্খদেৰতা হুত্ৰা পব্বতন্তরে ৰসন্তো দেৰতাসমাগমেসু অপ্পানুভাৰতায পরিসপরিযন্তে ঠত্ৰা ধম্মং সুত্ৰা সত্থরি পটিলদ্ধসদ্ধো একদিৰসং সুৰিসুদ্ধং রমণীযং গঙ্গাযং পুলিনপ্পদেসং দিস্ৰা সত্থু গুণে অনুস্সরি – ‘‘ইতোপি সুৰিসুদ্ধা সত্থু গুণা অনন্তা অপরিমেয্যা চা’’তি, এৰং সো সত্থু গুণে আরব্ভ চিত্তং পসাদেত্ৰা তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে ৰেসালিযং লিচ্ছৰিরাজকুলে নিব্বত্তিত্ৰা ৰযপ্পত্তো যুদ্ধসোণ্ডো অপরাজিতসঙ্গামো অমিত্তানং পিযহানিকরণেন পিযঞ্জহোতি পঞ্ঞাযিত্থ. সো সত্থু ৰেসালিগমনে পটিলদ্ধসদ্ধো পব্বজিত্ৰা অরঞ্ঞে ৰসমানো ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.১৩.৮৪-৯০) –

‘‘পব্বতে হিমৰন্তম্হি, ৰসামি পব্বতন্তরে;

পুলিনং সোভনং দিস্ৰা, বুদ্ধসেট্ঠং অনুস্সরিং.

‘‘ঞাণে উপনিধা নত্থি, সঙ্খারং নত্থি সত্থুনো;

সব্বধম্মং অভিঞ্ঞায, ঞাণেন অধিমুচ্চতি.

‘‘নমো তে পুরিসাজঞ্ঞ, নমো তে পুরিসুত্তম;

ঞাণেন তে সমো নত্থি, যাৰতা ঞাণমুত্তমং.

‘‘ঞাণে চিত্তং পসাদেত্ৰা, কপ্পং সগ্গম্হি মোদহং;

অৰসেসেসু কপ্পেসু, কুসলং চরিতং মযা.

‘‘একনৰুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, ঞাণসঞ্ঞাযিদং ফলং.

‘‘ইতো সত্ততিকপ্পম্হি, একো পুলিনপুপ্ফিযো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ‘‘অন্ধপুথুজ্জনানং পটিপত্তিতো ৰিধুরা অরিযানং পটিপত্তী’’তি ইমস্স অত্থস্স দস্সনৰসেন অঞ্ঞং ব্যাকরোন্তো –

৭৬.

‘‘উপ্পতন্তেসু নিপতে, নিপতন্তেসু উপ্পতে;

ৰসে অৰসমানেসু, রমমানেসু নো রমে’’তি. – গাথং অভাসি;

তত্থ উপ্পতন্তেসূতি উণ্ণমন্তেসু, সত্তেসু মানুদ্ধচ্চথম্ভসারম্ভাদীহি অত্তুক্কংসনেন অনুপসন্তেসু. নিপতেতি নমেয্য, তেসঞ্ঞেৰ পাপধম্মানং পরিৰজ্জনেন নিৰাতৰুত্তি ভৰেয্য. নিপতন্তেসূতি ওণমন্তেসু, হীনাধিমুত্তিকতায কোসজ্জেন চ গুণতো নিহীযমানেসু. উপ্পতেতি উণ্ণমেয্য, পণীতাধিমুত্তিকতায ৰীরিযারম্ভেন চ গুণতো উস্সুক্কেয্য. অথ ৰা উপ্পতন্তেসূতি উট্ঠহন্তেসু, কিলেসেসু পরিযুট্ঠানৰসেন সীসং উক্খিপন্তেসু. নিপতেতি পটিসঙ্খানবলেন যথা তে ন উপ্পজ্জন্তি, তথা অনুরূপপচ্চৰেক্খণায নিপতেয্য, ৰিক্খম্ভেয্য চেৰ সমুচ্ছিন্দেয্য চ. নিপতন্তেসূতি পরিপতন্তেসু, অযোনিসোমনসিকারেসু ৰীরিযপযোগমন্দতায ৰা যথারদ্ধেসু সমথৰিপস্সনাধম্মেসু হায মানেসু. উপ্পতেতি যোনিসোমনসিকারেন ৰীরিযারম্ভসম্পদায চ তে উপট্ঠাপেয্য উপ্পাদেয্য ৰড্ঢেয্য চ. ৰসে অৰসমানেসূতি সত্তেসু মগ্গব্রহ্মচরিযৰাসং অরিযৰাসঞ্চ অৰসন্তেসু সযং তং ৰাসং ৰসেয্যাতি, অরিযেসু ৰা কিলেসৰাসং দুতিযকৰাসং অৰসন্তেসু যেন ৰাসেন তে অৰসমানা নাম হোন্তি, সযং তথা ৰসে. রমমানেসু নো রমেতি সত্তেসু কামগুণরতিযা কিলেসরতিযা রমন্তেসু সযং তথা নো রমে নং রমেয্য, অরিযেসু ৰা নিরামিসায ঝানাদিরতিযা রমমানেসু সযম্পি তথা রমে, ততো অঞ্ঞথা পন কদাচিপি নো রমে নাভিরমেয্য ৰাতি অত্থো.

পিযঞ্জহত্থেরগাথাৰণ্ণনা নিট্ঠিতা.

৭. হত্থারোহপুত্তত্থেরগাথাৰণ্ণনা

ইদং পুরে চিত্তমচারি চারিকন্তি আযস্মতো হত্থারোহপুত্তত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং ভিক্খুসঙ্ঘপরিৰুতং ৰিহারতো নিক্খন্তং দিস্ৰা পসন্নচিত্তো পুপ্ফেহি পূজং কত্ৰা পঞ্চপতিট্ঠিতেন ৰন্দিত্ৰা পদক্খিণং কত্ৰা পক্কামি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং হত্থারোহকুলে নিব্বত্তিত্ৰা ৰিঞ্ঞুতং পত্তো হত্থিসিপ্পে নিপ্ফত্তিং অগমাসি. সো একদিৰসং হত্থিং সিক্খাপেন্তো নদীতীরং গন্ত্ৰা হেতুসম্পত্তিযা চোদিযমানো ‘‘কিং ময্হং ইমিনা হত্থিদমনেন, অত্তানং দমনমেৰ ৰর’’ন্তি চিন্তেত্ৰা ভগৰন্তং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰাৰ চরিযানুকূলং কম্মট্ঠানং গহেত্ৰা ৰিপস্সনায কম্মং করোন্তো চিরপরিচযেন কম্মট্ঠানতো বহিদ্ধা ৰিধাৰন্তং চিত্তং ছেকো হত্থাচরিযো ৰিয অঙ্কুসেন চণ্ডমত্তৰরৰারণং পটিসঙ্খানঅঙ্কুসেন নিগ্গণ্হন্তো ‘‘ইদং পুরে চিত্তমচারি চারিক’’ন্তি গাথং অভাসি.

৭৭. তত্থ ইদন্তি ৰুচ্চমানস্স চিত্তস্স অত্তপচ্চক্খতায ৰুত্তং. পুরেতি নিগ্গহকালতো পুব্বে. অচারীতি ৰিচরি, অনৰট্ঠিততায নানারম্মণেসু পরিব্ভমি. চারিকন্তি যথাকামচরিযং. তেনাহ ‘‘যেনিচ্ছকং যত্থকামং যথাসুখ’’ন্তি. তন্তি তং চিত্তং. অজ্জাতি এতরহি. নিগ্গহেস্সামীতি নিগ্গণ্হিস্সামি, নিব্বিসেৰনং করিস্সামি. যোনিসোতি উপাযেন. যথা কিং? হত্থিপ্পভিন্নং ৰিয অঙ্কুসগ্গহো. ইদং ৰুত্তং হোতি – ইদং মম চিত্তং নাম ইতো পুব্বে রূপাদীসু আরম্মণেসু যেন যেন রমিতুং ইচ্ছতি, তস্স তস্স ৰসেন যেনিচ্ছকং, যত্থ যত্থ চস্স কামো, তস্স তস্স ৰসেন যত্থকামং, যথা যথা ৰিচরন্তস্স সুখং হোতি, তথেৰ চরণতো যথাসুখং দীঘরত্তং চারিকং অচরি, তং অজ্জপাহং ভিন্নমদমত্তহত্থিং হত্থাচরিযসঙ্খাতো ছেকো অঙ্কুসগ্গহো অঙ্কুসেন ৰিয যোনিসোমনসিকারেন নিগ্গহেস্সামি, নাস্স ৰীতিক্কমিতুং দস্সামীতি. এৰং ৰদন্তো এৰ চ থেরো ৰিপস্সনং ৰড্ঢেত্ৰা অরহত্তং সচ্ছাকাসি. তেন ৰুত্তং অপদানে (অপ. থের ১.১৩.৯১-৯৬) –

‘‘সুৰণ্ণৰণ্ণো সম্বুদ্ধো, ৰিপস্সী দক্খিণারহো;

পুরক্খতো সাৰকেহি, আরামা অভিনিক্খমি.

‘‘দিস্ৰানহং বুদ্ধসেট্ঠং, সব্বঞ্ঞুং তমনাসকং;

পসন্নচিত্তো সুমনো, গণ্ঠিপুপ্ফং অপূজযিং.

‘‘তেন চিত্তপ্পসাদেন, দ্ৰিপদিন্দস্স তাদিনো;

হট্ঠো হট্ঠেন চিত্তেন, পুন ৰন্দিং তথাগতং.

‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘একতালীসিতো কপ্পে, চরণো নাম খত্তিযো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অযমেৰ চ থেরস্স অঞ্ঞাব্যাকরণগাথা অহোসীতি.

হত্থারোহপুত্তত্থেরগাথাৰণ্ণনা নিট্ঠিতা.

৮. মেণ্ডসিরত্থেরগাথাৰণ্ণনা

অনেকজাতিসংসারন্তি আযস্মতো মেণ্ডসিরত্থেরস্স গাথা. কা উপ্পত্তি? সোপি কির পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি করোন্তো ইতো একনৰুতে কপ্পে ব্রাহ্মণকুলে নিব্বত্তিত্ৰা ৰযপ্পত্তো কামে পহায ইসিপব্বজ্জং পব্বজিত্ৰা মহতা ইসিগণেন সদ্ধিং হিমৰন্তে ৰসন্তো সত্থারং দিস্ৰা পসন্নমানসো ইসিগণেন পদুমানি আহরাপেত্ৰা সত্থু পুপ্ফপূজং কত্ৰা সাৰকে অপ্পমাদপটিপত্তিযং ওৰদিত্ৰা কালং কত্ৰা দেৰলোকে নিব্বত্তো অপরাপরং সংসরন্তো ইমস্মিং বুদ্ধুপ্পাদে সাকেতে গহপতিকুলে নিব্বত্তি, তস্স মেণ্ডসরিক্খসীসতায মেণ্ডসিরোত্ৰেৰ সমঞ্ঞা অহোসি. সো ভগৰতি সাকেতে অঞ্জনৰনে ৰিহরন্তে সত্থারং উপসঙ্কমিত্ৰা পটিলদ্ধসদ্ধো পব্বজিত্ৰা সমথৰিপস্সনাসু কম্মং করোন্তো ছল়ভিঞ্ঞো অহোসি. তেৰ ৰুত্তং অপদানে (অপ. থের ১.১৩.৯৭-১০৫) –

‘‘হিমৰন্তস্সাৰিদূরে, গোতমো নাম পব্বতো;

নানারুক্খেহি সঞ্ছন্নো, মহাভূতগণালযো.

‘‘ৰেমজ্ঝম্হি চ তস্সাসি, অস্সমো অভিনিম্মিতো;

পুরক্খতো সসিস্সেহি, ৰসামি অস্সমে অহং.

‘‘আযন্তু মে সিস্সগণা, পদুমং আহরন্তু মে;

বুদ্ধপূজং করিস্সামি, দ্ৰিপদিন্দস্স তাদিনো.

‘‘এৰন্তি তে পটিস্সুত্ৰা, পদুমং আহরিংসু মে;

তথা নিমিত্তং কত্ৰাহং, বুদ্ধস্স অভিরোপযিং.

‘‘সিস্সে তদা সমানেত্ৰা, সাধুকং অনুসাসহং;

মা খো তুম্হে পমজ্জিত্থ, অপ্পমাদো সুখাৰহো.

‘‘এৰং সমনুসাসিত্ৰা, তে সিস্সে ৰচনক্খমে;

অপ্পমাদগুণে যুত্তো, তদা কালঙ্কতো অহং.

‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘একপঞ্ঞাসকপ্পম্হি, রাজা আসিং জলুত্তমো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

সো অত্তনো পুব্বেনিৰাসং অনুস্সরন্তো –

৭৮.

‘‘অনেকজাতিসংসারং, সন্ধাৰিস্সং অনিব্বিসং;

তস্স মে দুক্খজাতস্স, দুক্খক্খন্ধো অপরদ্ধো’’তি. – গাথং অভাসি;

তত্থ অনেকজাতিসংসারন্তি অনেকজাতিসতসহস্সসঙ্খ্যং ইদং সংসারৰট্টং, অদ্ধুনো অধিপ্পেতত্তা অচ্চন্তসংযোগেকৰচনং. সন্ধাৰিস্সন্তি সংসরিং, অপরাপরং চৰনুপ্পজ্জনৰসেন পরিব্ভমিং. অনিব্বিসন্তি তস্স নিৰত্তকঞাণং অৰিন্দন্তো অলভন্তো. তস্স মেতি এৰং সংসরন্তস্স মে. দুক্খজাতস্সাতি জাতিআদিৰসেন উপ্পন্নদুক্খস্স, তিস্সন্নং ৰা দুক্খতানং ৰসেন দুক্খসভাৰস্স. দুক্খক্খন্ধোতি কম্মকিলেসৰিপাকৰট্টপ্পকারো দুক্খরাসি. অপরদ্ধোতি অরহত্তমগ্গপ্পত্তিতো পট্ঠায পরিব্ভট্ঠো চুতো ন অভিনিব্বত্তিস্সতি. ‘‘অপরট্ঠো’’তি ৰা পাঠো, অপগতসমিদ্ধিতো সমুচ্ছিন্নকারণত্তা অপগতোতি অত্থো. ইদমেৰ চ থেরস্স অঞ্ঞাব্যাকরণং অহোসি.

মেণ্ডসিরত্থেরগাথাৰণ্ণনা নিট্ঠিতা.

৯. রক্খিতত্থেরগাথাৰণ্ণনা

সব্বো রাগো পহীনো মেতি আযস্মতো রক্খিতত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থু ধম্মদেসনং সুত্ৰা পসন্নমানসো দেসনাঞাণং আরব্ভ থোমনং অকাসি. সত্থা তস্স চিত্তপ্পসাদং ওলোকেত্ৰা ‘‘অযং ইতো সতসহস্সকপ্পমত্থকে গোতমস্স নাম সম্মাসম্বুদ্ধস্স রক্খিতো নাম সাৰকো ভৰিস্সতী’’তি ব্যাকাসি. সো তং সুত্ৰা ভিয্যোসোমত্তায পসন্নমানসো অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে দেৰদহনিগমে সাকিযরাজকুলে নিব্বত্তি, রক্খিতোতিস্স নামং অহোসি. সো যে সাকিযকোলিযরাজূহি ভগৰতো পরিৰারত্থায দিন্না পঞ্চসতরাজকুমারা পব্বজিতা, তেসং অঞ্ঞতরো. তে পন রাজকুমারা ন সংৰেগেন পব্বজিতত্তা উক্কণ্ঠাভিভূতা যদা সত্থারা কুণালদহতীরং নেত্ৰা কুণালজাতকদেসনায (জা. ২.২১.কুণালজাতক) ইত্থীনং দোসৰিভাৰনেন কামেসু আদীনৰং পকাসেত্ৰা কম্মট্ঠানে নিযোজিতা, তদা অযম্পি কম্মট্ঠানং অনুযুঞ্জন্তো ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.১৪.১-৯) –

‘‘পদুমুত্তরো নাম জিনো, লোকজেট্ঠো নরাসভো;

মহতো জনকাযস্স, দেসেতি অমতং পদং.

‘‘তস্সাহং ৰচনং সুত্ৰা, ৰাচাসভিমুদীরিতং;

অঞ্জলিং পগ্গহেত্ৰান, একগ্গো আসহং তদা.

‘‘যথা সমুদ্দো উদধীনমগ্গো, নেরূ নগানং পৰরো সিলুচ্চযো;

তথেৰ যে চিত্তৰসেন ৰত্তরে, ন বুদ্ধঞাণস্স কলং উপেন্তি তে.

‘‘ধম্মৰিধিং ঠপেত্ৰান, বুদ্ধো কারুণিকো ইসি;

ভিক্খুসঙ্ঘে নিসীদিত্ৰা, ইমা গাথা অভাসথ.

‘‘যো সো ঞাণং পকিত্তেসি, বুদ্ধম্হি লোকনাযকে;

কপ্পানং সতসহস্সং, দুগ্গতিং ন গমিস্সতি.

‘‘কিলেসে ঝাপযিত্ৰান, একগ্গো সুসমাহিতো;

সোভিতো নাম নামেন, হেস্সতি সত্থু সাৰকো.

‘‘পঞ্ঞাসে কপ্পসহস্সে, সত্তেৰাসুং যসুগ্গতা;

সত্তরতনসম্পন্না, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পহীনকিলেসে পচ্চৰেক্খন্তো ‘‘সব্বো রাগো’’তি গাথং অভাসি.

৭৯. তত্থ ‘‘সব্বো রাগো’’তি কামরাগাদিপ্পভেদো সব্বোপি রাগো. পহীনোতি অরিযমগ্গভাৰনায সমুচ্ছেদপ্পহানৰসেন পহীনো. সব্বো দোসোতি আঘাতৰত্থুকাদিভাৰেন অনেকভেদভিন্নো সব্বোপি ব্যাপাদো. সমূহতোতি মগ্গেন সমুগ্ঘাটিতো. সব্বো মে ৰিগতো মোহোতি ‘‘দুক্খে অঞ্ঞাণ’’ন্তিআদিনা (ধ. স. ১০৬৭; ৰিভ. ৯০৯) ৰত্থুভেদেন অট্ঠভেদো, সংকিলেসৰত্থুৰিভাগেন অনেকৰিভাগো সব্বোপি মোহো মগ্গেন ৰিদ্ধংসিতত্তা ময্হং ৰিগতো. সীতিভূতোস্মি নিব্বুতোতি এৰং মূলকিলেসপ্পহানেন তদেকট্ঠতায সংকিলেসানং সম্মদেৰ পটিপ্পস্সদ্ধত্তা অনৰসেসকিলেসদরথপরিল়াহাভাৰতো সীতিভাৰং পত্তো, ততো এৰ সব্বসো কিলেসপরিনিব্বানেন পরিনিব্বুতো অহং অস্মি ভৰামীতি অঞ্ঞং ব্যাকাসি.

রক্খিতত্থেরগাথাৰণ্ণনা নিট্ঠিতা.

১০. উগ্গত্থেরগাথাৰণ্ণনা

যং মযা পকতং কম্মন্তি আযস্মতো উগ্গত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি করোন্তো ইতো একতিংসে কপ্পে সিখিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সিখিং ভগৰন্তং পস্সিত্ৰা পসন্নমানসো কেতকপুপ্ফেহি পূজং অকাসি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং সুগতীসুযেৰ সংসরন্তো ইমস্মিং বুদ্ধুপ্পাদে কোসলরট্ঠে উগ্গনিগমে সেট্ঠিপুত্তো হুত্ৰা নিব্বত্তি, উগ্গোত্ৰেৰস্স নামং অহোসি. সো ৰিঞ্ঞুতং পত্তো ভগৰতি তস্মিং নিগমে ভদ্দারামে ৰিহরন্তে ৰিহারং গন্ত্ৰা সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.১৪.১০-১৬) –

‘‘ৰিনতানদিযা তীরে, পিলক্খু ফলিতো অহু;

তাহং রুক্খং গৰেসন্তো, অদ্দসং লোকনাযকং.

‘‘কেতকং পুপ্ফিতং দিস্ৰা, ৰণ্টে ছেত্ৰানহং তদা;

বুদ্ধস্স অভিরোপেসিং, সিখিনো লোকবন্ধুনো.

‘‘যেন ঞাণেন পত্তোসি, অচ্চুতং অমতং পদং;

তং ঞাণং অভিপূজেমি, বুদ্ধসেট্ঠ মহামুনি.

‘‘ঞাণম্হি পূজং কত্ৰান, পিলক্খুমদ্দসং অহং;

পটিলদ্ধোম্হি তং পঞ্ঞং, ঞাণপূজাযিদং ফলং.

‘‘একতিংসে ইতো কপ্পে, যং পুপ্ফমভিরোপযিং;

দুগ্গতিং নাভিজানামি, ঞাণপূজাযিদং ফলং.

‘‘ইতো তেরসকপ্পম্হি, দ্ৰাদসাসুং ফলুগ্গতা;

সত্তরতনসম্পন্না, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো ৰট্টূপচ্ছেদদীপনেন অঞ্ঞং ব্যাকরোন্তো –

৮০.

‘‘যং মযা পকতং কম্মং, অপ্পং ৰা যদি ৰা বহুং;

সব্বমেতং পরিক্খীণং, নত্থি দানি পুনব্ভৰো’’তি. – গাথং অভাসি;

তত্থ যং মযা পকতং কম্মন্তি যং কম্মং তীহি কম্মদ্ৰারেহি, ছহি উপ্পত্তিদ্ৰারেহি, অট্ঠহি অসংৰরদ্ৰারেহি, অট্ঠহি চ সংৰরদ্ৰারেহি পাপাদিৰসেন দানাদিৰসেন চাতি অনেকেহি পকারেহি অনাদিমতি সংসারে যং মযা কতং উপচিতং অভিনিব্বত্তিতং ৰিপাককম্মং. অপ্পং ৰা যদি ৰা বহুন্তি তঞ্চ ৰত্থুচেতনাপযোগকিলেসাদীনং দুব্বলভাৰেন অপ্পং ৰা, তেসং বলৰভাৰেন অভিণ্হপৰত্তিযা চ বহুং ৰা. সব্বমেতং পরিক্খীণন্তি সব্বমেৰ চেতং কম্মং কম্মক্খযকরস্স অগ্গমগ্গস্স অধিগতত্তা পরিক্খযং গতং, কিলেসৰট্টপ্পহানেন হি কম্মৰট্টং পহীনমেৰ হোতি ৰিপাকৰট্টস্স অনুপ্পাদনতো. তেনাহ ‘‘নত্থি দানি পুনব্ভৰো’’তি. আযতিং পুনব্ভৰাভিনিব্বত্তি ময্হং নত্থীতি অত্থো. ‘‘সব্বম্পেত’’ন্তিপি পাঠো, সব্বম্পি এতন্তি পদৰিভাগো.

উগ্গত্থেরগাথাৰণ্ণনা নিট্ঠিতা.

অট্ঠমৰগ্গৰণ্ণনা নিট্ঠিতা.

৯. নৰমৰগ্গো

১. সমিতিগুত্তত্থেরগাথাৰণ্ণনা

যং মযা পকতং পাপন্তি আযস্মতো সমিতিগুত্তত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো ভগৰন্তং পস্সিত্ৰা পসন্নচিত্তো জাতিসুমনপুপ্ফেহি পূজং অকাসি. সো তেন পুঞ্ঞকম্মেন যত্থ যত্থ ভৰে নিব্বত্তি, তত্থ তত্থ কুলরূপপরিৰারসম্পদায অঞ্ঞে সত্তে অভিভৰিত্ৰা অট্ঠাসি. একস্মিং পন অত্তভাৰে অঞ্ঞতরং পচ্চেকবুদ্ধং পিণ্ডায চরন্তং দিস্ৰা ‘‘অযং মুণ্ডকো কুট্ঠী মঞ্ঞে, তেনাযং পটিচ্ছাদেত্ৰা ৰিচরতী’’তি নিট্ঠুভিত্ৰা পক্কামি. সো তেন কম্মেন বহুং কালং নিরযে পচ্চিত্ৰা কস্সপস্স ভগৰতো কালে মনুস্সলোকে নিব্বত্তো পরিব্বাজকপব্বজ্জং উপগতো একং সীলাচারসম্পন্নং উপাসকং দিস্ৰা দোসন্তরো হুত্ৰা, ‘‘কুট্ঠরোগী ভৰেয্যাসী’’তি অক্কোসি, ন্হানতিত্থে চ মনুস্সেহি ঠপিতানি ন্হানচুণ্ণানি দূসেসি. সো তেন কম্মেন পুন নিরযে নিব্বত্তিত্ৰা বহূনি ৰস্সানি দুক্খং অনুভৰিত্ৰা ইমস্মিং বুদ্ধুপ্পাদে সাৰত্থিযং অঞ্ঞতরস্স ব্রাহ্মণস্স পুত্তো হুত্ৰা নিব্বত্তি, সমিতিগুত্তোতিস্স নামং অহোসি. সো ৰযপ্পত্তো সত্থু ধম্মদেসনং সুত্ৰা পটিলদ্ধসদ্ধো পব্বজিত্ৰা সুৰিসুদ্ধসীলো হুত্ৰা ৰিহরতি. তস্স পুরিমকম্মনিস্সন্দেন কুট্ঠরোগো উপ্পজ্জি, তেন তস্স সরীরাৰযৰা যেভুয্যেন ছিন্নভিন্না হুত্ৰা পগ্ঘরন্তি. সো গিলানসালাযং ৰসতি. অথেকদিৰসং ধম্মসেনাপতি গিলানপুচ্ছং গন্ত্ৰা তত্থ তত্থ গিলানে ভিক্খূ পুচ্ছন্তো তং ভিক্খুং দিস্ৰা ‘‘আৰুসো, যাৰতা খন্ধপ্পৰত্তি নাম, সব্বং দুক্খমেৰ ৰেদনা. খন্ধেসু পন অসন্তেসুযেৰ নত্থি দুক্খ’’ন্তি ৰেদনানুপস্সনাকম্মট্ঠানং কথেত্ৰা অগমাসি. সো থেরস্স ওৰাদে ঠত্ৰা ৰিপস্সনং ৰড্ঢেত্ৰা ছল়ভিঞ্ঞা সচ্ছাকাসি. তেন ৰুত্তং অপদানে (অপ. থের ১.১২.৮২-৯০) –

‘‘জাযন্তস্স ৰিপস্সিস্স, আলোকো ৰিপুলো অহু;

পথৰী চ পকম্পিত্থ, সসাগরা সপব্বতা.

‘‘নেমিত্তা চ ৰিযাকংসু, বুদ্ধো লোকে ভৰিস্সতি;

অগ্গো চ সব্বসত্তানং, জনতং উদ্ধরিস্সতি.

‘‘নেমিত্তানং সুণিত্ৰান, জাতিপূজমকাসহং;

এদিসা পূজনা নত্থি, যাদিসা জাতিপূজনা.

‘‘সঙ্খরিত্ৰান কুসলং, সকং চিত্তং পসাদযিং;

জাতিপূজং করিত্ৰান, তত্থ কালঙ্কতো অহং.

‘‘যং যং যোনুপপজ্জামি, দেৰত্তং অথ মানুসং;

সব্বে সত্তে অভিভোমি, জাতিপূজাযিদং ফলং.

‘‘ধাতিযো মং উপট্ঠেন্তি, মম চিত্তৰসানুগা;

ন তা সক্কোন্তি কোপেতুং, জাতিপূজাযিদং ফলং.

‘‘একনৰুতিতো কপ্পে, যং পূজমকরিং তদা;

দুগ্গতিং নাভিজানামি, জাতিপূজাযিদং ফলং.

‘‘সুপারিচরিযা নাম, চতুত্তিংস জনাধিপা;

ইতো ততিযকপ্পম্হি, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা পহীনকিলেসপচ্চৰেক্খণেন এতরহি অনুভুয্যমানরোগৰসেন পুরিমজাতীসু অত্তনা কতং পাপকম্মং অনুস্সরিত্ৰা তস্স ইদানি সব্বসো পহীনভাৰং ৰিভাৰেন্তো –

৮১.

‘‘যং মযা পকতং পাপং, পুব্বে অঞ্ঞাসু জাতিসু;

ইধেৰ তং ৰেদনীযং, ৰত্থু অঞ্ঞং ন ৰিজ্জতী’’তি. – গাথং অভাসি;

তত্থ পাপন্তি অকুসলং কম্মং. তঞ্হি লামকট্ঠেন পাপন্তি ৰুচ্চতি. পুব্বেতি পুরা. অঞ্ঞাসু জাতিসূতি ইতো অঞ্ঞাসু জাতীসু, অঞ্ঞেসু অত্তভাৰেসু. অযঞ্হেত্থ অত্থো – যদিপি মযা ইমস্মিং অত্তভাৰে ন তাদিসং পাপং কতং অত্থি, ইদানি পন তস্স সম্ভৰোযেৰ নত্থি. যং পন ইতো অঞ্ঞাসু জাতীসু কতং অত্থি, ইধেৰ তং ৰেদনীযং, তঞ্হি ইধেৰ ইমস্মিংযেৰ অত্তভাৰে ৰেদযিতব্বং অনুভৰিতব্বং ফলং, কস্মা? ৰত্থু অঞ্ঞং ন ৰিজ্জতীতি তস্স কম্মস্স ৰিপচ্চনোকাসো অঞ্ঞো খন্ধপ্পবন্ধো নত্থি, ইমে পন খন্ধা সব্বসো উপাদানানং পহীনত্তা অনুপাদানো ৰিয জাতৰেদো চরিমকচিত্তনিরোধেন অপ্পটিসন্ধিকা নিরুজ্ঝন্তীতি অঞ্ঞং ব্যাকাসি.

সমিতিগুত্তত্থেরগাথাৰণ্ণনা নিট্ঠিতা.

২. কস্সপত্থেরগাথাৰণ্ণনা

যেন যেন সুভিক্খানীতি আযস্মতো কস্সপত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে ব্রাহ্মণকুলে নিব্বত্তিত্ৰা তীসু ৰেদেসু অঞ্ঞেসু চ ব্রাহ্মণসিপ্পেসু নিপ্ফত্তিং গতো, সো একদিৰসং ভগৰন্তং দিস্ৰা পসন্নমানসো সুমনপুপ্ফেহি পূজং অকাসি. করোন্তো চ সত্থু সমন্ততো উপরি চ পুপ্ফমুট্ঠিযো খিপি. বুদ্ধানুভাৰেন পুপ্ফানি পুপ্ফাসনাকারেন সত্তাহং অট্ঠংসু. সো তং অচ্ছরিযং দিস্ৰা ভিয্যোসোমত্তায পসন্নমানসো অহোসি. অপরাপরং পুঞ্ঞানি করোন্তো কপ্পসতসহস্সং সুগতীসুযেৰ সংসরন্তো ইমস্মিং বুদ্ধুপ্পাদে সাৰত্থিযং অঞ্ঞতরস্স উদিচ্চব্রাহ্মণস্স পুত্তো হুত্ৰা নিব্বত্তি, কস্সপোতিস্স নামং অহোসি. তস্স দহরকালেযেৰ পিতা কালমকাসি. মাতা তং পটিজগ্গতি. সো একদিৰসং জেতৰনং গতো ভগৰতো ধম্মদেসনং সুত্ৰা হেতুসম্পন্নতায তস্মিংযেৰ আসনে সোতাপন্নো হুত্ৰা মাতু সন্তিকং গন্ত্ৰা অনুজানাপেত্ৰা পব্বজিতো সত্থরি ৰুট্ঠৰস্সে পৰারেত্ৰা জনপদচারিকং পক্কন্তে সযম্পি সত্থারা সদ্ধিং গন্তুকামো আপুচ্ছিতুং মাতু সন্তিকং অগমাসি. মাতা ৰিস্সজ্জেন্তী ওৰাদৰসেন –

৮২.

‘‘যেন যেন সুভিক্খানি, সিৰানি অভযানি চ;

তেন পুত্তক গচ্ছস্সু, মা সোকাপহতো ভৰা’’তি. – গাথং অভাসি;

তত্থ যেন যেনাতি যত্থ যত্থ. ভুম্মত্থে হি এতং করণৰচনং, যস্মিং যস্মিং দিসাভাগেতি অত্থো. সুভিক্খানীতি সুলভপিণ্ডানি, রট্ঠানীতি অধিপ্পাযো. সিৰানীতি খেমানি অরোগানি. অভযানীতি চোরভযাদীহি নিব্ভযানি, রোগদুব্ভিক্খভযানি পন ‘‘সুভিক্খানি, সিৰানী’’তি পদদ্ৰযেনেৰ গহিতানি. তেনাতি তত্থ, তস্মিং তস্মিং দিসাভাগেতি অত্থো. পুত্তকাতি অনুকম্পন্তী তং আলপতি. মাতি পটিসেধত্থে নিপাতো সোকাপহতোতি ৰুত্তগুণরহিতানি রট্ঠানি গন্ত্ৰা দুব্ভিক্খভযাদিজনিতেন সোকেন উপহতো মা ভৰ মাহোসীতি অত্থো. তং সুত্ৰা থেরো, ‘‘মম মাতা ময্হং সোকরহিতট্ঠানগমনং আসীসতি, হন্দ মযং সব্বসো অচ্চন্তমেৰ সোকরহিতং ঠানং পত্তুং যুত্ত’’ন্তি উস্সাহজাতো ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.১৩.১-৯) –

‘‘অজ্ঝাযকো মন্তধরো, তিণ্ণং ৰেদান পারগূ;

অব্ভোকাসে ঠিতো সন্তো, অদ্দসং লোকনাযকং.

‘‘সীহং যথা ৰনচরং, ব্যগ্ঘরাজংৰ নিত্তসং;

তিধাপভিন্নমাতঙ্গং, কুঞ্জরংৰ মহেসিনং.

‘‘সেরেযকং গহেত্ৰান, আকাসে উক্খিপিং অহং;

বুদ্ধস্স আনুভাৰেন, পরিৰারেন্তি সব্বসো.

‘‘অধিট্ঠহি মহাৰীরো, সব্বঞ্ঞূ লোকনাযকো;

সমন্তা পুপ্ফচ্ছদনা, ওকিরিংসু নরাসভং.

‘‘ততো সা পুপ্ফকঞ্চুকা, অন্তোৰণ্টা বহিমুখা;

সত্তাহং ছদনং কত্ৰা, ততো অন্তরধাযথ.

‘‘তঞ্চ অচ্ছরিযং দিস্ৰা, অব্ভুতং লোমহংসনং;

বুদ্ধে চিত্তং পসাদেসিং, সুগতে লোকনাযকে.

‘‘তেন চিত্তপ্পসাদেন, সুক্কমূলেন চোদিতো;

কপ্পানং সতসহস্সং, দুগ্গতিং নুপপজ্জহং.

‘‘পন্নরসসহস্সম্হি, কপ্পানং পঞ্চৰীসতি;

ৰীতমলাসনামা চ, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ‘‘ইদমেৰ মাতু ৰচনং অরহত্তপ্পত্তিযা অঙ্কুসং জাত’’ন্তি তমেৰ গাথং পচ্চুদাহাসি.

কস্সপত্থেরগাথাৰণ্ণনা নিট্ঠিতা.

৩. সীহত্থেরগাথাৰণ্ণনা

সীহপ্পমত্তো ৰিহরাতি আযস্মতো সীহত্থেরস্স গাথা. কা উপ্পত্তি? সো কির পুরিমবুদ্ধেসু কতাধিকারো ইতো অট্ঠারসকপ্পসতমত্থকে অত্থদস্সিস্স ভগৰতো কালে চন্দভাগায নদিযা তীরে কিন্নরযোনিযং নিব্বত্তিত্ৰা পুপ্ফভক্খো পুপ্ফনিৰসনো হুত্ৰা ৰিহরন্তো আকাসেন গচ্ছন্তং অত্থদস্সিং ভগৰন্তং দিস্ৰা পসন্নচিত্তো পূজেতুকামো অঞ্জলিং পগ্গয্হ অট্ঠাসি. ভগৰা তস্স অজ্ঝাসযং ঞত্ৰা আকাসতো ওরুয্হ অঞ্ঞতরস্মিং রুক্খমূলে পল্লঙ্কেন নিসীদি. কিন্নরো চন্দনসারং ঘংসিত্ৰা চন্দনগন্ধেন পুপ্ফেহি চ পূজং কত্ৰা ৰন্দিত্ৰা পদক্খিণং কত্ৰা পক্কামি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে মল্লরাজকুলে নিব্বত্তি, তস্স সীহোতি নামং অহোসি. সো ভগৰন্তং দিস্ৰা পসন্নমানসো ৰন্দিত্ৰা একমন্তং নিসীদি. সত্থা তস্স অজ্ঝাসযং ওলোকেত্ৰা ধম্মং কথেসি. সো ধম্মং সুত্ৰা পটিলদ্ধসদ্ধো পব্বজিত্ৰা কম্মট্ঠানং গহেত্ৰা অরঞ্ঞে ৰিহরতি. তস্স চিত্তং নানারম্মণে ৰিধাৰতি, একগ্গং ন হোতি, সকত্থং নিপ্ফাদেতুং ন সক্কোতি. সত্থা তং দিস্ৰা আকাসে ঠত্ৰা –

৮৩.

‘‘সীহপ্পমত্তো ৰিহর, রত্তিন্দিৰমতন্দিতো;

ভাৰেহি কুসলং ধম্মং, জহ সীঘং সমুস্সয’’ন্তি. –

গাথায ওৰদি. সো গাথাৰসানে ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.১৪.১৭-২৫) –

‘‘চন্দভাগানদীতীরে, অহোসিং কিন্নরো তদা;

পুপ্ফভক্খো চহং আসিং, পুপ্ফনিৰসনো তথা.

‘‘অত্থদস্সী তু ভগৰা, লোকজেট্ঠো নরাসভো;

ৰিপিনগ্গেন নিয্যাসি, হংসরাজাৰ অম্বরে.

‘‘নমো তে পুরিসাজঞ্ঞ, চিত্তং তে সুৰিসোধিতং;

পসন্নমুখৰণ্ণোসি, ৰিপ্পসন্নমুখিন্দ্রিযো.

‘‘ওরোহিত্ৰান আকাসা, ভূরিপঞ্ঞো সুমেধসো;

সঙ্ঘাটিং পত্থরিত্ৰান, পল্লঙ্কেন উপাৰিসি.

‘‘ৰিলীনং চন্দনাদায, অগমাসিং জিনন্তিকং;

পসন্নচিত্তো সুমনো, বুদ্ধস্স অভিরোপযিং.

‘‘অভিৰাদেত্ৰান সম্বুদ্ধং, লোকজেট্ঠং নরাসভং;

পামোজ্জং জনযিত্ৰান, পক্কামিং উত্তরামুখো.

‘‘অট্ঠারসে কপ্পসতে, চন্দনং যং অপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘চতুদ্দসে কপ্পসতে, ইতো আসিংসু তে তযো;

রোহণী নাম নামেন, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

যা পন ভগৰতা ওৰাদৰসেন ৰুত্তা ‘‘সীহপ্পমত্তো’’তি গাথা, তত্থ সীহাতি তস্স থেরস্স আলপনং. অপ্পমত্তো ৰিহরাতি সতিযা অৰিপ্পৰাসেন পমাদৰিরহিতো সব্বিরিযাপথেসু সতিসম্পজঞ্ঞযুত্তো হুত্ৰা ৰিহরাহি. ইদানি তং অপ্পমাদৰিহারং সহ ফলেন সঙ্খেপতো দস্সেতুং ‘‘রত্তিন্দিৰ’’ন্তিআদি ৰুত্তং. তস্সত্থো – রত্তিভাগং দিৰসভাগঞ্চ ‘‘চঙ্কমেন নিসজ্জায আৰরণীযেহি ধম্মেহি চিত্তং পরিসোধেতী’’তি (সং. নি. ৪.২৩৯; অ. নি. ৩.১৬; ৰিভ. ৫১৯) ৰুত্তনযেন চতুসম্মপ্পধানৰসেন অতন্দিতো অকুসীতো আরদ্ধৰীরিযো কুসলং সমথৰিপস্সনাধম্মঞ্চ লোকুত্তরধম্মঞ্চ ভাৰেহি উপ্পাদেহি ৰড্ঢেহি চ, এৰং ভাৰেত্ৰা চ জহ সীঘং সমুস্সযন্তি তৰ সমুস্সযং অত্তভাৰং পঠমং তাৰ তপ্পটিবদ্ধছন্দরাগপ্পহানেন সীঘং নচিরস্সেৰ পজহ, এৰংভূতো চ পচ্ছা চরিমকচিত্তনিরোধেন অনৰসেসতো চ পজহিস্সতীতি. অরহত্তং পন পত্ৰা থেরো অঞ্ঞং ব্যাকরোন্তো তমেৰ গাথং পচ্চুদাহাসীতি.

সীহত্থেরগাথাৰণ্ণনা নিট্ঠিতা.

৪. নীতত্থেরগাথাৰণ্ণনা

সব্বরত্তিং সুপিত্ৰানাতি আযস্মতো নীতত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে সুনন্দো নাম ব্রাহ্মণো হুত্ৰা অনেকসতে ব্রাহ্মণে মন্তে ৰাচেন্তো ৰাজপেয্যং নাম যঞ্ঞং যজি, ভগৰা তং ব্রাহ্মণং অনুকম্পন্তো যঞ্ঞট্ঠানং গন্ত্ৰা আকাসে চঙ্কমি. ব্রাহ্মণো সত্থারং দিস্ৰা পসন্নমানসো সিস্সেহি পুপ্ফানি আহরাপেত্ৰা আকাসে খিপিত্ৰা পূজং অকাসি. বুদ্ধানুভাৰেন তং ঠানং সকলঞ্চ নগরং পুপ্ফপটৰিতানিকং ৰিয ছাদিতং অহোসি. মহাজনো সত্থরি উল়ারং পীতিসোমনস্সং পটিসংৰেদেসি. সুনন্দব্রাহ্মণো তেন কুসলমূলেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং অঞ্ঞতরস্স ব্রাহ্মণস্স পুত্তো হুত্ৰা নিব্বত্তি, নীতোতিস্স নামং অহোসি. সো ৰিঞ্ঞুতং পত্তো ‘‘ইমে সমণা সক্যপুত্তিযা সুখসীলা সুখসমাচারা সুভোজনানি ভুঞ্জিত্ৰা নিৰাতেসু সেনাসনেসু ৰিহরন্তি, ইমেসু পব্বজিত্ৰা সুখেন ৰিহরিতুং সক্কা’’তি সুখাভিলাসায পব্বজিত্ৰাৰ সত্থু সন্তিকে কম্মট্ঠানং গহেত্ৰা কতিপাহমেৰ মনসিকরিত্ৰা তং ছড্ডেত্ৰা যাৰদত্থং উদরাৰদেহকং ভুঞ্জিত্ৰা দিৰসভাগং সঙ্গণিকারামো তিরচ্ছানকথায ৰীতিনামেতি, রত্তিভাগেপি থিনমিদ্ধাভিভূতো সব্বরত্তিং সুপতি. সত্থা তস্স হেতুপরিপাকং ওলোকেত্ৰা ওৰাদং দেন্তো –

৮৪.

‘‘সব্বরত্তিং সুপিত্ৰান, দিৰা সঙ্গণিকে রতো;

কুদাস্সু নাম দুম্মেধো, দুক্খস্সন্তং করিস্সতী’’তি. – গাথং অভাসি;

তত্থ সব্বরত্তিন্তি সকলং রত্তিং. সুপিত্ৰানাতি নিদ্দাযিত্ৰা, ‘‘রত্তিযা পঠমং যামং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতী’’তিআদিনা ৰুত্তং জাগরিযং অননুযুঞ্জিত্ৰা কেৰলং রত্তিযা তীসুপি যামেসু নিদ্দং ওক্কমিত্ৰাতি অত্থো. দিৰাতি দিৰসং, সকলং দিৰসভাগন্তি অত্থো. সঙ্গণিকেতি তিরচ্ছানকথিকেহি কাযদল়্হিবহুলপুগ্গলেহি সন্নিসজ্জা সঙ্গণিকো, তস্মিং রতো অভিরতো তত্থ অৰিগতচ্ছন্দো ‘‘সঙ্গণিকে রতো’’তি ৰুত্তো ‘‘সঙ্গণিকারতো’’তিপি পাল়ি. কুদাস্সু নামাতি কুদা নাম. অস্সূতি নিপাতমত্তং, কস্মিং নাম কালেতি অত্থো. দুম্মেধোতি নিপ্পঞ্ঞো. দুক্খস্সাতি ৰট্টদুক্খস্স. অন্তন্তি পরিযোসানং. অচ্চন্তমেৰ অনুপ্পাদং কদা নাম করিস্সতি, এদিসস্স দুক্খস্সন্তকরণং নত্থীতি অত্থো. ‘‘দুম্মেধ দুক্খস্সন্তং করিস্সসী’’তিপি পাল়ি.

এৰং পন সত্থারা গাথায কথিতায থেরো সংৰেগজাতো ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.১৪.২৬-৩৩) –

‘‘সুনন্দো নাম নামেন, ব্রাহ্মণো মন্তপারগূ;

অজ্ঝাযকো যাচযোগো, ৰাজপেয্যং অযাজযি.

‘‘পদুমুত্তরো লোকৰিদূ, অগ্গো কারুণিকো ইসি;

জনতং অনুকম্পন্তো, অম্বরে চঙ্কমী তদা.

‘‘চঙ্কমিত্ৰান সম্বুদ্ধো, সব্বঞ্ঞূ লোকনাযকো;

মেত্তায অফরি সত্তে, অপ্পমাণে নিরূপধি.

‘‘ৰণ্টে ছেত্ৰান পুপ্ফানি, ব্রাহ্মণো মন্তপারগূ;

সব্বে সিস্সে সমানেত্ৰা, আকাসে উক্খিপাপযি.

‘‘যাৰতা নগরং আসি, পুপ্ফানং ছদনং তদা;

বুদ্ধস্স আনুভাৰেন, সত্তাহং ন ৰিগচ্ছথ.

‘‘তেনেৰ সুক্কমূলেন, অনুভোত্ৰান সম্পদা;

সব্বাসৰে পরিঞ্ঞায, তিণ্ণো লোকে ৰিসত্তিকং.

‘‘একারসে কপ্পসতে, পঞ্চতিংসাসু খত্তিযা;

অম্বরংসসনামা তে, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরো অঞ্ঞং ব্যাকরোন্তো তমেৰ গাথং পচ্চুদাহাসি.

নীতত্থেরগাথাৰণ্ণনা নিট্ঠিতা.

৫. সুনাগত্থেরগাথাৰণ্ণনা

চিত্তনিমিত্তস্স কোৰিদোতি আযস্মতো সুনাগত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো ইতো একত্তিংসে কপ্পে সিখিস্স ভগৰতো কালে ব্রাহ্মণকুলে নিব্বত্তিত্ৰা ৰযপ্পত্তো তিণ্ণং ৰেদানং পারগূ হুত্ৰা অরঞ্ঞাযতনে অস্সমে ৰসন্তো তীণি ব্রাহ্মণসহস্সানি মন্তে ৰাচেসি. অথেকদিৰসং তস্স সত্থারং দিস্ৰা লক্খণানি উপধারেত্ৰা লক্খণমন্তে পরিৰত্তেন্তস্স, ‘‘ঈদিসেহি লক্খণেহি সমন্নাগতো অনন্তজিনো অনন্তঞাণো বুদ্ধো ভৰিস্সতী’’তি বুদ্ধঞাণং আরব্ভ উল়ারো পসাদো উপ্পজ্জি. সো তেন চিত্তপ্পসাদেন দেৰলোকে নিব্বত্তো অপরাপরং দেৰমনুস্সেসু সংসরন্তো ইমস্মিং বুদ্ধুপ্পাদে নালকগামে অঞ্ঞতরস্স ব্রাহ্মণস্স পুত্তো হুত্ৰা নিব্বত্তি, সুনাগোতিস্স নামং অহোসি. সো ধম্মসেনাপতিস্স গিহিসহাযো থেরস্স সন্তিকং গন্ত্ৰা ধম্মং সুত্ৰা দস্সনভূমিযং পতিট্ঠিতো পব্বজিত্ৰা ৰিপস্সনং পট্ঠপেত্ৰা অরহত্তং পাপুণি. তেন ৰুত্তং অপদানে (অপ. থের ১.১৪.৩৪-৪০) –

‘‘হিমৰন্তস্সাৰিদূরে, ৰসভো নাম পব্বতো;

তস্মিং পব্বতপাদম্হি, অস্সমো আসি মাপিতো.

‘‘তীণি সিস্সসহস্সানি, ৰাচেসিং ব্রাহ্মণো তদা;

সংহরিত্ৰান তে সিস্সে, একমন্তং উপাৰিসিং.

‘‘একমন্তং নিসীদিত্ৰা, ব্রাহ্মণো মন্তপারগূ;

বুদ্ধৰেদং গৰেসন্তো, ঞাণে চিত্তং পসাদযিং.

‘‘তত্থ চিত্তং পসাদেত্ৰা, নিসীদিং পণ্ণসন্থরে;

পল্লঙ্কং আভুজিত্ৰান, তত্থ কালঙ্কতো অহং.

‘‘একতিংসে ইতো কপ্পে, যং সঞ্ঞমলভিং তদা;

দুগ্গতিং নাভিজানামি, ঞাণসঞ্ঞাযিদং ফলং.

‘‘সত্তৰীসতি কপ্পম্হি, রাজা সিরিধরো অহু;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ভিক্খূনং ধম্মদেসনাপদেসেন অঞ্ঞং ব্যাকরোন্তো –

৮৫.

‘‘চিত্তনিমিত্তস্স কোৰিদো, পৰিৰেকরসং ৰিজানিয;

ঝাযং নিপকো পতিস্সতো, অধিগচ্ছেয্য সুখং নিরামিস’’ন্তি. –

গাথং অভাসি.

তত্থ চিত্তনিমিত্তস্স কোৰিদোতি ভাৰনাচিত্তস্স নিমিত্তগ্গহণে কুসলো, ‘‘ইমস্মিং সমযে চিত্তং পগ্গহেতব্বং, ইমস্মিং সম্পহংসিতব্বং, ইমস্মিং অজ্ঝুপেক্খিতব্ব’’ন্তি এৰং পগ্গহণাদিযোগ্যস্স চিত্তনিমিত্তস্স গহণে ছেকো. পৰিৰেকরসং ৰিজানিযাতি কাযৰিৰেকসংৰড্ঢিতস্স চিত্তৰিৰেকস্স রসং সঞ্জানিত্ৰা, ৰিৰেকসুখং অনুভৰিত্ৰাতি অত্থো. ‘‘পৰিৰেকরসং পিত্ৰা’’তি (ধ. প. ২০৫) হি ৰুত্তং. ঝাযন্তি পঠমং আরম্মণূপনিজ্ঝানেন পচ্ছা লক্খণূপনিজ্ঝানেন চ ঝাযন্তো. নিপকোতি কম্মট্ঠানপরিহরণে কুসলো. পতিস্সতোতি উপট্ঠিতস্সতি. অধিগচ্ছেয্য সুখং নিরামিসন্তি এৰং সমথনিমিত্তাদিকোসল্লেন লব্ভে চিত্তৰিৰেকসুখে পতিট্ঠায সতো সম্পজানো হুত্ৰা ৰিপস্সনাঝানেনেৰ ঝাযন্তো কামামিসৰট্টামিসেহি অসম্মিস্সতায নিরামিসং নিব্বানসুখং ফলসুখঞ্চ অধিগচ্ছেয্য সমুপগচ্ছেয্যাতি অত্থো.

সুনাগত্থেরগাথাৰণ্ণনা নিট্ঠিতা.

৬. নাগিতত্থেরগাথাৰণ্ণনা

ইতো বহিদ্ধা পুথুঅঞ্ঞৰাদিনন্তি আযস্মতো নাগিতত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে নারদো নাম ব্রাহ্মণো হুত্ৰা একদিৰসং মাল়কে নিসিন্নো ভগৰন্তং ভিক্খুসঙ্ঘেন পুরক্খতং গচ্ছন্তং দিস্ৰা পসন্নমানসো তীহি গাথাহি অভিত্থৰি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে কপিলৰত্থুনগরে সক্যরাজকুলে নিব্বত্তি, নাগিতোতিস্স নামং অহোসি. সো ভগৰতি কপিলৰত্থুস্মিং ৰিহরন্তে মধুপিণ্ডিকসুত্তং (ম. নি. ১.১৯৯ আদযো) সুত্ৰা পটিলদ্ধসদ্ধো পব্বজিত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.১৪.৪৭-৫৪) –

‘‘ৰিসালমাল়ে আসীনো, অদ্দসং লোকনাযকং;

খীণাসৰং বলপ্পত্তং, ভিক্খুসঙ্ঘপুরক্খতং.

‘‘সতসহস্সা তেৰিজ্জা, ছল়ভিঞ্ঞা মহিদ্ধিকা;

পরিৰারেন্তি সম্বুদ্ধং, কো দিস্ৰা নপ্পসীদতি.

‘‘ঞাণে উপনিধা যস্স, ন ৰিজ্জতি সদেৰকে;

অনন্তঞাণং সম্বুদ্ধং, কো দিস্ৰা নপ্পসীদতি.

‘‘ধম্মকাযঞ্চ দীপেন্তং, কেৰলং রতনাকরং;

ৰিকপ্পেতুং ন সক্কোন্তি, কো দিস্ৰা নপ্পসীদতি.

‘‘ইমাহি তীহি গাথাহি, নারদোৰ্হযৰচ্ছলো;

পদুমুত্তরং থৰিত্ৰান, সম্বুদ্ধং অপরাজিতং.

‘‘তেন চিত্তপ্পসাদেন, বুদ্ধসন্থৰনেন চ;

কপ্পানং সতসহস্সং, দুগ্গতিং নুপপজ্জহং.

‘‘ইতো তিংসকপ্পসতে, সুমিত্তো নাম খত্তিযো;

সত্তরতনসম্পন্নো, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা সত্থু অৰিতথদেসনতং ধম্মস্স চ নিয্যানিকতং নিস্সায সঞ্জাতপীতিসোমনস্সো পীতিৰেগপ্পৰিস্সট্ঠং উদানং উদানেন্তো –

৮৬.

‘‘ইতো বহিদ্ধা পুথুঅঞ্ঞৰাদিনং, মগ্গো ন নিব্বানগমো যথা অযং;

ইতিস্সু সঙ্ঘং ভগৰানুসাসতি, সত্থা সযং পাণিতলেৰ দস্সয’’ন্তি. –

গাথং অভাসি.

তত্থ ইতো বহিদ্ধাতি ইমস্মা বুদ্ধসাসনা বাহিরকে সমযে, তেনাহ ‘‘পুথুঅঞ্ঞৰাদিন’’ন্তি, নানাতিত্থিযানন্তি অত্থো. মগ্গো ন নিব্বানগমো যথা অযন্তি যথা অযং অরিযো অট্ঠঙ্গিকো মগ্গো একংসেন নিব্বানং গচ্ছতীতি নিব্বানগমো, নিব্বানগামী, এৰং নিব্বানগমো মগ্গো তিত্থিযসমযে নত্থি অসম্মাসম্বুদ্ধপ্পৰেদিতত্তা অঞ্ঞতিত্থিযৰাদস্স. তেনাহ ভগৰা –

‘‘ইধেৰ, ভিক্খৰে, সমণো, ইধ দুতিযো সমণো, ইধ ততিযো সমণো, ইধ চতুত্থো সমণো, সুঞ্ঞা পরপ্পৰাদা সমণেভি অঞ্ঞেহী’’তি (দী. নি. ২.২১৪; ম. নি. ১.১৩৯; অ. নি. ৪.২৪১).

ইতীতি এৰং. অস্সূতি নিপাতমত্তং. সঙ্ঘন্তি ভিক্খুসঙ্ঘং, উক্কট্ঠনিদ্দেসোযং যথা ‘‘সত্থা দেৰমনুস্সান’’ন্তি. সঙ্ঘন্তি ৰা সমূহং, ৰেনেয্যজনন্তি অধিপ্পাযো. ভগৰাতি ভাগ্যৰন্ততাদীহি কারণেহি ভগৰা, অযমেত্থ সঙ্খেপো. ৰিত্থারো পন পরমত্থদীপনিযং ইতিৰুত্তকৰণ্ণনাযং ৰুত্তনযেন ৰেদিতব্বো. সত্থাতি দিট্ঠধম্মিকসম্পরাযিকপরমত্থেহি যথারহং অনুসাসতীতি সত্থা. সযন্তি সযমেৰ. অযঞ্হেত্থ অত্থো – ‘‘সীলাদিক্খন্ধত্তযসঙ্গহো সম্মাদিট্ঠিআদীনং অট্ঠন্নং অঙ্গানং ৰসেন অট্ঠঙ্গিকো নিব্বানগামী অরিযমগ্গো যথা মম সাসনে অত্থি, এৰং বাহিরকসমযে মগ্গো নাম নত্থী’’তি সীহনাদং নদন্তো অম্হাকং সত্থা ভগৰা সযমেৰ সযম্ভূঞাণেন ঞাতং, সযমেৰ ৰা মহাকরুণাসঞ্চোদিতো হুত্ৰা অত্তনো দেসনাৰিলাসসম্পত্তিযা হত্থতলে আমলকং ৰিয দস্সেন্তো ভিক্খুসঙ্ঘং ৰেনেয্যজনতং অনুসাসতি ওৰদতীতি.

নাগিতত্থেরগাথাৰণ্ণনা নিট্ঠিতা.

৭. পৰিট্ঠত্থেরগাথাৰণ্ণনা

খন্ধা দিট্ঠা যথাভূতন্তি আযস্মতো পৰিট্ঠত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং করোন্তো অত্থদস্সিস্স ভগৰতো কালে কেসৰো নাম তাপসো হুত্ৰা একদিৰসং সত্থারং উপসঙ্কমিত্ৰা ধম্মং সুত্ৰা পসন্নমানসো অভিৰাদেত্ৰা অঞ্জলিং পগ্গয্হ পদক্খিণং কত্ৰা পক্কামি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে মগধরট্ঠে ব্রাহ্মণকুলে উপ্পজ্জিত্ৰা অনুক্কমেন ৰিঞ্ঞুতং পত্তো নেক্খম্মনিন্নজ্ঝাসযতায পরিব্বাজকপব্বজ্জং পব্বজিত্ৰা তত্থ সিক্খিতব্বং সিক্খিত্ৰা ৰিচরন্তো উপতিস্সকোলিতানং বুদ্ধসাসনে পব্বজিতভাৰং সুত্ৰা ‘‘তেপি নাম মহাপঞ্ঞা তত্থ পব্বজিতা, তদেৰ মঞ্ঞে সেয্যো’’তি সত্থু সন্তিকং গন্ত্ৰা ধম্মং সুত্ৰা পটিলদ্ধসদ্ধো পব্বজি. তস্স সত্থা ৰিপস্সনং আচিক্খি. সো ৰিপস্সনং আরভিত্ৰা নচিরস্সেৰ অরহত্তং সচ্ছাকাসি. তেন ৰুত্তং অপদানে (অপ. থের ১.১৪.৫৫-৫৯) –

‘‘নারদো ইতি মে নামং, কেসৰো ইতি মং ৰিদূ;

কুসলাকুসলং এসং, অগমং বুদ্ধসন্তিকং.

‘‘মেত্তচিত্তো কারুণিকো, অত্থদস্সী মহামুনি;

অস্সাসযন্তো সত্তে সো, ধম্মং দেসেতি চক্খুমা.

‘‘সকং চিত্তং পসাদেত্ৰা, সিরে কত্ৰান অঞ্জলিং;

সত্থারং অভিৰাদেত্ৰা, পক্কামিং পাচিনামুখো.

‘‘সত্তরসে কপ্পসতে, রাজা আসি মহীপতি;

অমিত্ততাপনো নাম, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অঞ্ঞং ব্যাকরোন্তো –

৮৭.

‘‘খন্ধা দিট্ঠা যথাভূতং, ভৰা সব্বে পদালিতা;

ৰিক্খীণো জাতিসংসারো, নত্থি দানি পুনব্ভৰো’’তি. – গাথং অভাসি;

তত্থ খন্ধাতি পঞ্চুপাদানক্খন্ধা, তে হি ৰিপস্সনুপলক্খণতো সামঞ্ঞলক্খণতো চ ঞাতপরিঞ্ঞাদীহি পরিজাননৰসেন ৰিপস্সিতব্বা. দিট্ঠা যথাভূতন্তি ৰিপস্সনাপঞ্ঞাসহিতায মগ্গপঞ্ঞায ‘‘ইদং দুক্খ’’ন্তিআদিনা অৰিপরীততো দিট্ঠা. ভৰা সব্বে পদালিতাতি কামভৰাদযো সব্বে কম্মভৰা উপপত্তিভৰা চ মগ্গঞাণসত্থেন ভিন্না ৰিদ্ধংসিতা. কিলেসপদালনেনেৰ হি কম্মোপপত্তিভৰা পদালিতা নাম হোন্তি. তেনাহ ‘‘ৰিক্খীণো জাতিসংসারো, নত্থি দানি পুনব্ভৰো’’তি. তস্সত্থো হেট্ঠা ৰুত্তোযেৰ.

পৰিট্ঠত্থেরগাথাৰণ্ণনা নিট্ঠিতা.

৮. অজ্জুনত্থেরগাথাৰণ্ণনা

অসক্খিং ৰত অত্তানন্তি আযস্মতো অজ্জুনত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো ৰিপস্সিস্স ভগৰতো কালে সীহযোনিযং নিব্বত্তো একদিৰসং অরঞ্ঞে অঞ্ঞতরস্মিং রুক্খমূলে নিসিন্নং সত্থারং দিস্ৰা ‘‘অযং খো ইমস্মিং কালে সব্বসেট্ঠো পুরিসসীহো’’তি পসন্নমানসো সুপুপ্ফিতসালসাখং ভঞ্জিত্ৰা সত্থারং পূজেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং সেট্ঠিকুলে নিব্বত্তি. অজ্জুনোতিস্স নামং অহোসি. সো ৰিঞ্ঞুতং পত্তো নিগণ্ঠেহি কতপরিচযো হুত্ৰা ‘‘এৰাহং অমতং অধিগমিস্সামী’’তি ৰিৰট্টজ্ঝাসযতায দহরকালেযেৰ নিগণ্ঠেসু পব্বজিত্ৰা তত্থ সারং অলভন্তো সত্থু যমকপাটিহারিযং দিস্ৰা পটিলদ্ধসদ্ধো সাসনে পব্বজিত্ৰা ৰিপস্সনং আরভিত্ৰা নচিরস্সেৰ অরহা অহোসি. তেন ৰুত্তং অপদানে (অপ. থের ১.১৪.৬০-৬৫) –

‘‘মিগরাজা তদা আসিং, অভিজাতো সুকেসরী;

গিরিদুগ্গং গৰেসন্তো, অদ্দসং লোকনাযকং.

‘‘অযং নু খো মহাৰীরো, নিব্বাপেতি মহাজনং;

যংনূনাহং উপাসেয্যং, দেৰদেৰং নরাসভং.

‘‘সাখং সালস্স ভঞ্জিত্ৰা, সকোসং পুপ্ফমাহরিং;

উপগন্ত্ৰান সম্বুদ্ধং, অদাসিং পুপ্ফমুত্তমং.

‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, পুপ্ফদানস্সিদং ফলং.

‘‘ইতো চ নৰমে কপ্পে, ৰিরোচনসনামকা;

তযো আসিংসু রাজানো, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অনুত্তরসুখাধিগমসম্ভূতেন পীতিৰেগেন উদানং উদানেন্তো –

৮৮.

‘‘অসক্খিং ৰত অত্তানং, উদ্ধাতুং উদকা থলং;

ৰুয্হমানো মহোঘেৰ, সচ্চানি পটিৰিজ্ঝহ’’ন্তি. – গাথং অভাসি;

তত্থ অসক্খিন্তি সক্কোসিং. ৰতাতি ৰিম্হযে নিপাতো. অতিৰিম্হযনীযঞ্হেতং যদিদং সচ্চপটিৰেধো. তেনাহ –

‘‘তং কিংমঞ্ঞথ, ভিক্খৰে, কতমং নু খো দুক্করতরং ৰা দুরভিসম্ভৰতরং ৰা, যং সত্তধ