📜

নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

থেরগাথা-অট্ঠকথা

(দুতিযো ভাগো)

৪. চতুক্কনিপাতো

১. নাগসমালত্থেরগাথাৰণ্ণনা

অলঙ্কতাতিআদিকা ¶ ¶ আযস্মতো নাগসমালত্থেরস্স গাথা. কা উপ্পত্তি? অযম্পি পদুমুত্তরস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো গিম্হসমযে সূরিযাতপসন্তত্তায ¶ ভূমিযা গচ্ছন্তং সত্থারং ¶ দিস্ৰা পসন্নমানসো ছত্তং অদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সক্যরাজকুলে নিব্বত্তিত্ৰা নাগসমালোতি লদ্ধনামো ৰযপ্পত্তো ঞাতিসমাগমে পটিলদ্ধসদ্ধো পব্বজিত্ৰা কিঞ্চি কালং ভগৰতো উপট্ঠাকো অহোসি. সো একদিৰসং নগরং পিণ্ডায পৰিট্ঠো অলঙ্কতপটিযত্তং অঞ্ঞতরং নচ্চকিং মহাপথে তূরিযেসু ৰজ্জন্তেসু নচ্চন্তিং দিস্ৰা, ‘‘অযং চিত্তকিরিযৰাযোধাতুৰিপ্ফারৰসেন করজকাযস্স তথা তথা পরিৰত্তি, অহো অনিচ্চা সঙ্খারা’’তি খযৰযং পট্ঠপেত্ৰা ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ২.৪৬.৩৭-৪৮) –

‘‘অঙ্গারজাতা পথৰী, কুক্কুল়ানুগতা মহী;

পদুমুত্তরো ভগৰা, অব্ভোকাসম্হি চঙ্কমি.

‘‘পণ্ডরং ¶ ছত্তমাদায, অদ্ধানং পটিপজ্জহং;

তত্থ দিস্ৰান সম্বুদ্ধং, ৰিত্তি মে উপপজ্জথ.

‘‘মরীচিযোত্থটা ভূমি, অঙ্গারাৰ মহী অযং;

উপহন্তি মহাৰাতা, সরীরস্সাসুখেপনা.

‘‘সীতং উণ্হং ৰিহনন্তং, ৰাতাতপনিৰারণং;

পটিগ্গণ্হ ইমং ছত্তং, ফস্সযিস্সামি নিব্বুতিং.

‘‘অনুকম্পকো কারুণিকো, পদুমুত্তরো মহাযসো;

মম সঙ্কপ্পমঞ্ঞায, পটিগ্গণ্হি তদা জিনো.

‘‘তিংসকপ্পানি দেৰিন্দো, দেৰরজ্জমকারযিং;

সতানং পঞ্চক্খত্তুঞ্চ, চক্কৰত্তী অহোসহং.

‘‘পদেসরজ্জং ৰিপুলং, গণনাতো অসঙ্খিযং;

অনুভোমি সকং কম্মং, পুব্বে সুকতমত্তনো.

‘‘অযং মে পচ্ছিমা জাতি, চরিমো ৰত্ততে ভৰো;

অজ্জাপি সেতচ্ছত্তং মে, সব্বকালং ধরীযতি.

‘‘সতসহস্সিতো কপ্পে, যং ছত্তমদদিং তদা;

দুগ্গতিং নাভিজানামি, ছত্তদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা –

২৬৭.

‘‘অলঙ্কতা ¶ সুৰসনা, মালিনী চন্দনুস্সদা;

মজ্ঝে মহাপথে নারী, তূরিযে নচ্চতি নট্টকী.

২৬৮.

‘‘পিণ্ডিকায পৰিট্ঠোহং, গচ্ছন্তো নং উদিক্খিসং;

অলঙ্কতং সুৰসনং, মচ্চুপাসংৰ ওড্ডিতং.

২৬৯.

‘‘ততো মে মনসীকারো, যোনিসো উদপজ্জথ;

আদীনৰো পাতুরহু, নিব্বিদা সমতিট্ঠথ.

২৭০.

‘‘ততো ¶ চিত্তং ৰিমুচ্চি মে, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. –

চতূহি গাথাহি অত্তনো পটিপত্তিকিত্তনমুখেন অঞ্ঞং ব্যাকাসি.

তত্থ অলঙ্কতাতি হত্থূপগাদিআভরণেহি অলঙ্কতগত্তা. সুৰসনাতি সুন্দরৰসনা সোভনৰত্থনিৰত্থা. মালিনীতি মালাধারিনী পিল়ন্ধিতপুপ্ফমালা. চন্দনুস্সদাতি চন্দনানুলেপলিত্তসরীরা. মজ্ঝে মহাপথে নারী, তূরিযে নচ্চতি নট্টকীতি যথাৰুত্তট্ঠানে একা নারী নট্টকী নাটকিত্থী নগরৰীথিযা মজ্ঝে পঞ্চঙ্গিকে তূরিযে ৰজ্জন্তে নচ্চতি, যথাপট্ঠপিতং নচ্চং করোতি.

পিণ্ডিকাযাতি ভিক্খায. পৰিট্ঠোহন্তি নগরং পৰিট্ঠো অহং. গচ্ছন্তো নং উদিক্খিসন্তি নগরৰীথিযং গচ্ছন্তো পরিস্সযপরিহরণত্থং ৰীথিং ওলোকেন্তো তং নট্টকিং ওলোকেসিং. কিং ৰিয? মচ্চুপাসংৰ ওড্ডিতন্তি যথা মচ্চুস্স মচ্চুরাজস্স পাসভূতো রূপাদিকো ওড্ডিতো লোকে অনুৰিচরিত্ৰা ঠিতো একংসেন সত্তানং অনত্থাৰহো, এৰং ¶ সাপি অপ্পটিসঙ্খানে ঠিতানং অন্ধপুথুজ্জনানং একংসতো অনত্থাৰহাতি মচ্চুপাসসদিসী ৰুত্তা.

ততোতি তস্মা মচ্চুপাসসদিসত্তা. মেতি ময্হং. মনসীকারো যোনিসো উদপজ্জথাতি ‘‘অযং অট্ঠিসঙ্ঘাতো ন্হারুসম্বন্ধো মংসেন অনুপলিত্তো ছৰিযা পটিচ্ছন্নো অসুচিদুগ্গন্ধজেগুচ্ছপটিক্কূলো অনিচ্চুচ্ছাদনপরিমদ্দনভেদনৰিদ্ধংসনধম্মো ঈদিসে ৰিকারে দস্সেতী’’তি এৰং যোনিসো মনসিকারো উপ্পজ্জি. আদীনৰো পাতুরহূতি এৰং কাযস্স সভাৰূপধারণমুখেন তস্স চ তংনিস্সিতানঞ্চ চিত্তচেতসিকানং উদযব্বযং সরসপভঙ্গুতঞ্চ মনসি করোতো তেসু চ যক্খরক্খসাদীসু ৰিয ভযতো উপট্ঠহন্তেসু তত্থ মে অনেকাকারআদীনৰো দোসো পাতুরহোসি. তপ্পটিপক্খতো চ নিব্বানে আনিসংসো. নিব্বিদা সমতিট্ঠথাতি নিব্বিন্দনং আদীনৰানুপস্সনানুভাৰসিদ্ধং নিব্বিদাঞাণং মম হদযে সণ্ঠাসি, মুহুত্তম্পি ¶ তেসং রূপারূপধম্মানং গহণে চিত্তং নাহোসি, অঞ্ঞদত্থু মুঞ্চিতুকামতাদিৰসেন তত্থ উদাসীনমেৰ জাতন্তি অত্থো.

ততোতি ¶ ৰিপস্সনাঞাণতো পরং. চিত্তং ৰিমুচ্চি মেতি লোকুত্তরভাৰনায ৰত্তমানায মগ্গপটিপাটিযা সব্বকিলেসেহি মম চিত্তং ৰিমুত্তং অহোসি. এতেন ফলুপ্পত্তিং দস্সেতি. মগ্গক্খণে হি কিলেসা ৰিমুচ্চন্তি নাম, ফলক্খণে ৰিমুত্তাতি. সেসং ৰুত্তনযমেৰ.

নাগসমালত্থেরগাথাৰণ্ণনা নিট্ঠিতা.

২. ভগুত্থেরগাথাৰণ্ণনা

অহং মিদ্ধেনাতিআদিকা আযস্মতো ভগুত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো সত্থরি পরিনিব্বুতে তস্স ধাতুযো পুপ্ফেহি পূজেসি. সো তেন পুঞ্ঞকম্মেন নিম্মানরতীসু নিব্বত্তিত্ৰা অপরাপরং দেৰমনুস্সেসু সংসরন্তো ইমস্মিং বুদ্ধুপ্পাদে সক্যরাজকুলে নিব্বত্তিত্ৰা ভগূতি লদ্ধনামো ৰযপ্পত্তো অনুরুদ্ধকিমিলেহি সদ্ধিং নিক্খমিত্ৰা পব্বজিত্ৰা বালকলোণকগামে ৰসন্তো একদিৰসং থিনমিদ্ধাভিভৰং ৰিনোদেতুং ৰিহারতো নিক্খম্ম চঙ্কমং অভিরুহন্তো পপতিত্ৰা ¶ তদেৰ অঙ্কুসং কত্ৰা থিনমিদ্ধং ৰিনোদেত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৪৬.৪৯-৫৭) –

‘‘পরিনিব্বুতে ভগৰতি, পদুমুত্তরে মহাযসে;

পুপ্ফৰটংসকে কত্ৰা, সরীরমভিরোপযিং.

‘‘তত্থ চিত্তং পসাদেত্ৰা, নিম্মানং অগমাসহং;

দেৰলোকগতো সন্তো, পুঞ্ঞকম্মং সরামহং.

‘‘অম্বরা পুপ্ফৰস্সো মে, সব্বকালং পৰস্সতি;

সংসরামি মনুস্সে চে, রাজা হোমি মহাযসো.

‘‘তহিং কুসুমৰস্সো মে, অভিৰস্সতি সব্বদা;

তস্সেৰ পুপ্ফপূজায, ৰাহসা সব্বদস্সিনো.

‘‘অযং ¶ পচ্ছিমকো ময্হং, চরিমো ৰত্ততে ভৰো;

অজ্জাপি পুপ্ফৰস্সো মে, অভিৰস্সতি সব্বদা.

‘‘সতসহস্সিতো ¶ কপ্পে, যং পুপ্ফমভিরোপযিং;

দুগ্গতিং নাভিজানামি, দেহপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ফলসুখেন নিব্বানসুখেন চ ৰীতিনামেন্তো সত্থারা একৰিহারং অনুমোদিতুং উপগতেন – ‘‘কচ্চি ত্ৰং, ভিক্খু, অপ্পমত্তো ৰিহরসী’’তি পুট্ঠো অত্তনো অপ্পমাদৰিহারং নিৰেদেন্তো –

২৭১.

‘‘অহং মিদ্ধেন পকতো, ৰিহারা উপনিক্খমিং;

চঙ্কমং অভিরুহন্তো, তত্থেৰ পপতিং ছমা.

২৭২.

‘‘গত্তানি পরিমজ্জিত্ৰা, পুনপারুয্হ চঙ্কমং;

চঙ্কমে চঙ্কমিং সোহং, অজ্ঝত্তং সুসমাহিতো.

২৭৩.

‘‘ততো মে মনসীকারো, যোনিসো উদপজ্জথ;

আদীনৰো পাতুরহু, নিব্বিদা সমতিট্ঠথ.

২৭৪.

‘‘ততো চিত্তং ৰিমুচ্চি মে, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. –

ইমা চতস্সো গাথা অভাসি.

তত্থ মিদ্ধেন পকতোতি কাযালসিযসঙ্খাতেন অসত্তিৰিঘাতসভাৰেন মিদ্ধেন অভিভূতো. ৰিহারাতি সেনাসনতো. উপনিক্খমিন্তি চঙ্কমিতুং নিক্খমিং. তত্থেৰ পপতিং ছমাতি তত্থেৰ চঙ্কমসোপানে নিদ্দাভিভূততায ভূমিযং নিপতিং. গত্তানি পরিমজ্জিত্ৰাতি ভূমিযং পতনেন পংসুকিতানি অত্তনো সরীরাৰযৰানি অনুমজ্জিত্ৰা. পুনপারুয্হ চঙ্কমন্তি ‘‘পতিতো দানাহ’’ন্তি সঙ্কোচং অনাপজ্জিত্ৰা পুনপি চঙ্কমট্ঠানং আরুহিত্ৰা. অজ্ঝত্তং সুসমাহিতোতি গোচরজ্ঝত্তে কম্মট্ঠানে নীৰরণৰিক্খম্ভনেন সুট্ঠু সমাহিতো একগ্গচিত্তো হুত্ৰা চঙ্কমিন্তি যোজনা. সেসং ৰুত্তনযমেৰ. ইদমেৰ চ থেরস্স অঞ্ঞাব্যাকরণং অহোসি.

ভগুত্থেরগাথাৰণ্ণনা নিট্ঠিতা.

৩. সভিযত্থেরগাথাৰণ্ণনা

পরে ¶ ¶ চাতিআদিকা আযস্মতো সভিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ককুসন্ধস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং দিৰাৰিহারায গচ্ছন্তং দিস্ৰা পসন্নমানসো উপাহনং ¶ অদাসি. সো তেন পুঞ্ঞকম্মেন দেৰমনুস্সেসু সংসরন্তো কস্সপে ভগৰতি পরিনিব্বুতে পতিট্ঠিতে সুৰণ্ণচেতিযে ছহি কুলপুত্তেহি সদ্ধিং অত্তসত্তমো সাসনে পব্বজিত্ৰা কম্মট্ঠানং গহেত্ৰা অরঞ্ঞে ৰিহরন্তো ৰিসেসং নিব্বত্তেতুং অসক্কোন্তো ইতরে আহ – ‘‘মযং পিণ্ডপাতায গচ্ছন্তো জীৰিতে সাপেক্খা হোম, জীৰিতে সাপেক্খেন চ ন সক্কা লোকুত্তরধম্মং অধিগন্তুং, পুথুজ্জনকালঙ্কিরিযা চ দুক্খা. হন্দ, মযং নিস্সেণিং বন্ধিত্ৰা পব্বতং অভিরুয্হ কাযে চ জীৰিতে চ অনপেক্খা সমণধম্মং করোমা’’তি. তে তথা অকংসু.

অথ নেসং মহাথেরো উপনিস্সযসম্পন্নত্তা তদহেৰ ছল়ভিঞ্ঞো হুত্ৰা উত্তরকুরুতো পিণ্ডপাতং উপনেসি. ইতরে – ‘‘তুম্হে, ভন্তে, কতকিচ্চা তুম্হেহি সদ্ধিং সল্লাপমত্তম্পি পপঞ্চো, সমণধম্মমেৰ মযং করিস্সাম, তুম্হে অত্তনা দিট্ঠধম্মসুখৰিহারমনুযুঞ্জথা’’তি ৰত্ৰা পিণ্ডপাতং পটিক্খিপিংসু. থেরো নে সম্পটিচ্ছাপেতুং অসক্কোন্তো অগমাসি.

ততো নেসং একো দ্ৰীহতীহচ্চযেন অভিঞ্ঞাপরিৰারং অনাগামিফলং সচ্ছিকত্ৰা তথেৰ ৰত্ৰা তেহি পটিক্খিত্তো অগমাসি. তেসু খীণাসৰত্থেরো পরিনিব্বাযি, অনাগামী সুদ্ধাৰাসেসু উপ্পজ্জি. ইতরে পুথুজ্জনকালঙ্কিরিযমেৰ কত্ৰা ছসু কামসগ্গেসু অনুলোমপটিলোমতো দিব্বসম্পত্তিং অনুভৰিত্ৰা অম্হাকং ভগৰতো কালে দেৰলোকা চৰিত্ৰা একো মল্লরাজকুলে পটিসন্ধিং গণ্হি, একো গন্ধাররাজকুলে, একো বাহিররট্ঠে, একো রাজগহে একিস্সা কুলদারিকায কুচ্ছিম্হি পটিসন্ধিং গণ্হি. ইতরো অঞ্ঞতরিস্সা পরিব্বাজিকায কুচ্ছিম্হি পটিসন্ধিং অগ্গহেসি. সা কির অঞ্ঞতরস্স খত্তিযস্স ধীতা, নং মাতাপিতরো – ‘‘অম্হাকং ধীতা সমযন্তরং জানাতূ’’তি একস্স পরিব্বাজকস্স নিয্যাদযিংসু. অথেকো পরিব্বাজকো তায সদ্ধিং ৰিপ্পটিপজ্জি. সা তেন গব্ভং গণ্হি. তং গব্ভিনিং দিস্ৰা পরিব্বাজকা নিক্কড্ঢিংসু. সা অঞ্ঞত্থ ¶ গচ্ছন্তী অন্তরামগ্গে সভাযং ৰিজাযি. তেনস্স সভিযোত্ৰেৰ নামং অকাসি. সো ৰড্ঢিত্ৰা পরিব্বাজকপব্বজ্জং পব্বজিত্ৰা নানাসত্থানি উগ্গহেত্ৰা ¶ মহাৰাদী হুত্ৰা ৰাদপ্পসুতো ৰিচরন্তো অত্তনা সদিসং অদিস্ৰা নগরদ্ৰারে অস্সমং কারেত্ৰা খত্তিযকুমারাদযো সিপ্পং সিক্খাপেন্তো ৰিহরন্তো অত্তনো মাতুযা ইত্থিভাৰং জিগুচ্ছিত্ৰা ঝানং উপ্পাদেত্ৰা ব্রহ্মলোকে উপ্পন্নায অভিসঙ্খরিত্ৰা দিন্নে ৰীসতিপঞ্হে গহেত্ৰা তে তে সমণব্রাহ্মণে পুচ্ছি. তে চস্স তেসং পঞ্হানং অত্থং ব্যাকাতুং নাসক্খিংসু. সভিযসুত্তৰণ্ণনাযং (সু. নি. অট্ঠ. ২. সভিযসুত্তৰণ্ণনা) পন ¶ ‘‘সুদ্ধাৰাসব্রহ্মা তে পঞ্হে অভিসঙ্খরিত্ৰা অদাসী’’তি আগতং.

যদা পন ভগৰা পৰত্তৰরধম্মচক্কো অনুপুব্বেন রাজগহং আগন্ত্ৰা ৰেল়ুৰনে ৰিহাসি, তদা সভিযো তত্থ গন্ত্ৰা সত্থারং উপসঙ্কমিত্ৰা তে পঞ্হে পুচ্ছি. সত্থা তস্স তে পঞ্হে ব্যাকাসীতি সব্বং সভিযসুত্তে (সু. নি. সভিযসুত্তং) আগতনযেন ৰেদিতব্বং. সভিযো পন ভগৰতা তেসু পঞ্হেসু ব্যাকতেসু পটিলদ্ধসদ্ধো পব্বজিত্ৰা ৰিপস্সনং পট্ঠপেত্ৰা অরহত্তং পাপুণি. তেন ৰুত্তং অপদানে (অপ. থের ২.৪৬.২৭-৩১) –

‘‘ককুসন্ধস্স মুনিনো, ব্রাহ্মণস্স ৰুসীমতো;

দিৰাৰিহারং ৰজতো, অক্কমনমদাসহং.

‘‘ইমস্মিংযেৰ কপ্পম্হি, যং দানমদদিং তদা;

দুগ্গতিং নাভিজানামি, অক্কমনস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহা পন হুত্ৰা দেৰদত্তে সঙ্ঘভেদায পরক্কমন্তে দেৰদত্তপক্খিকানং ভিক্খূনং ওৰাদং দেন্তো –

২৭৫.

‘‘পরে চ ন ৰিজানন্তি, মযমেত্থ যমামসে;

যে চ তত্থ ৰিজানন্তি, ততো সম্মন্তি মেধগা.

২৭৬.

‘‘যদা চ অৰিজানন্তা, ইরিযন্ত্যমরা ৰিয;

ৰিজানন্তি চ যে ধম্মং, আতুরেসু অনাতুরা.

২৭৭.

‘‘যং ¶ কিঞ্চি সিথিলং কম্মং, সংকিলিট্ঠঞ্চ যং ৰতং;

সঙ্কস্সরং ব্রহ্মচরিযং, ন তং হোতি মহপ্ফলং.

২৭৮.

‘‘যস্স সব্রহ্মচারীসু, গারৰো নূপলব্ভতি;

আরকা হোতি সদ্ধম্মা, নভং পুথৰিযা যথা’’তি. –

চতূহি গাথাহি ধম্মং দেসেসি.

তত্থ ¶ পরেতি পণ্ডিতে ঠপেত্ৰা ততো অঞ্ঞে – ‘‘অধম্মং ধম্মো’’তি ‘‘ধম্মং অধম্মো’’তিআদিভেদকরৰত্থুদীপনৰসেন ৰিৰাদপ্পসুতা পরে নাম. তে তত্থ ৰিৰাদং করোন্তা ‘‘মযং যমামসে উপরমাম নস্সাম সততং সমিতং মচ্চুসন্তিকং গচ্ছামা’’তি ন জানন্তি. যে চ তত্থ ৰিজানন্তীতি যে তত্থ পণ্ডিতা – ‘‘মযং মচ্চুসমীপং গচ্ছামা’’তি ৰিজানন্তি. ততো সম্মন্তি মেধগাতি এৰঞ্হি তে জানন্তা যোনিসোমনসিকারং উপ্পাদেত্ৰা মেধগানং কলহানং ৰূপসমায পটিপজ্জন্তি. অথ নেসং তায পটিপত্তিযা তে মেধগা সম্মন্তি. অথ ৰা পরে চাতি যে সত্থু ওৰাদানুসাসনিযা অগ্গহণেন সাসনতো বাহিরতায পরে, তে যাৰ ‘‘মযং মিচ্ছাগাহং গহেত্ৰা এত্থ ইধ লোকে ¶ সাসনস্স পটিনিগ্গাহেন যমামসে ৰাযমামা’’তি ন ৰিজানন্তি, তাৰ ৰিৰাদা ন ৰূপসম্মন্তি, যদা পন তস্স গাহস্স ৰিস্সজ্জনৰসেন যে চ তত্থ তেসু ৰিৰাদপ্পসুতেসু অধম্মধম্মাদিকে অধম্মধম্মাদিতো যথাভূতং ৰিজানন্তি, ততো তেসং সন্তিকা তে পণ্ডিতপুরিসে নিস্সায ৰিৰাদসঙ্খাতা মেধগা সম্মন্তীতি এৰম্পেত্থ অত্থো ৰেদিতব্বো.

যদাতি যস্মিং কালে. অৰিজানন্তাতি ৰিৰাদস্স ৰূপসমূপাযং, ধম্মাধম্মে ৰা যাথাৰতো অজানন্তা. ইরিযন্ত্যমরা ৰিযাতি অমরা ৰিয জরামরণং অতিক্কন্তা ৰিয উদ্ধতা উন্নল়া চপলা মুখরা ৰিপ্পকিণ্ণৰাচা হুত্ৰা ৰত্তন্তি চরন্তি ৰিচরন্তি তদা ৰিৰাদো ন ৰূপসম্মতেৰ. ৰিজানন্তি চ যে ধম্মং, আতুরেসু অনাতুরাতি যে পন সত্থু সাসনধম্মং যথাভূতং জানন্তি, তে কিলেসরোগেন আতুরেসু সত্তেসু অনাতুরা নিক্কিলেসা অনীঘা ৰিহরন্তি, তেসং ৰসেন ৰিৰাদো অচ্চন্তমেৰ ৰূপসম্মতীতি অধিপ্পাযো.

যং ¶ কিঞ্চি সিথিলং কম্মন্তি ওলিযিত্ৰা করণেন সিথিলগাহং কত্ৰা সাথলিভাৰেন কতং যং কিঞ্চি কুসলকম্মং. সংকিলিট্ঠন্তি ৰেসীআদিকে অগোচরে চরণেন, কুহনাদিমিচ্ছাজীৰেন ৰা সংকিলিট্ঠং ৰতসমাদানং. সঙ্কস্সরন্তি সঙ্কাহি সরিতব্বং, ৰিহারে কিঞ্চি অসারুপ্পং সুত্ৰা – ‘‘নূন অসুকেন কত’’ন্তি পরেহি অসঙ্কিতব্বং, উপোসথকিচ্চাদীসু অঞ্ঞতরকিচ্চৰসেন সন্নিপতিতম্পি সঙ্ঘং দিস্ৰা, ‘‘অদ্ধা ইমে মম চরিযং ঞত্ৰা মং উক্খিপিতুকামা সন্নিপতিতা’’তি এৰং অত্তনো ৰা আসঙ্কাহি সরিতং উসঙ্কিতং পরিসঙ্কিতং. ন তং হোতীতি তং এৰরূপং ব্রহ্মচরিযং সমণধম্মকরণং তস্স পুগ্গলস্স মহপ্ফলং ন হোতি. তস্স অমহপ্ফলভাৰেনেৰ পচ্চযদাযকানম্পিস্স ন মহপ্ফলং হোতি. তস্মা সল্লেখৰুত্তিনা ভৰিতব্বং. সল্লেখৰুত্তিনো চ ৰিৰাদস্স অৰসরো এৰ নত্থীতি অধিপ্পাযো.

গারৰো ¶ নূপলব্ভতীতি অনুসাসনিযা অপদক্খিণগ্গাহিভাৰেন গরুকাতব্বেসু সব্রহ্মচারীসু যস্স পুগ্গলস্স গারৰো গরুকরণং ন ৰিজ্জতি. আরকা হোতি সদ্ধম্মাতি সো এৰরূপো পুগ্গলো পটিপত্তিসদ্ধম্মতোপি পটিৰেধসদ্ধম্মতোপি দূরে হোতি, ন হি তং গরূ সিক্খাপেন্তি, অসিক্খিযমানো অনাদিযন্তো ন পটিপজ্জতি, অপ্পটিপজ্জন্তো কুতো সচ্চানি পটিৰিজ্ঝিস্সতীতি. তেনাহ – ‘‘আরকা হোতি সদ্ধম্মা’’তি. যথা কিং? ‘‘নভং পুথৰিযা যথা’’তি যথা নভং আকাসং পুথৰিযা পথৰীধাতুযা সভাৰতো দূরে. ন কদাচি সম্মিস্সভাৰো. তেনেৰাহ –

‘‘নভঞ্চ ¶ দূরে পথৰী চ দূরে, পারং সমুদ্দস্স তদাহু দূরে;

ততো হৰে দূরতরং ৰদন্তি, সতঞ্চ ধম্মো অসতঞ্চ রাজা’’তি.(জা. ২.২১.৪১৪);

সভিযত্থেরগাথাৰণ্ণনা নিট্ঠিতা.

৪. নন্দকত্থেরগাথাৰণ্ণনা

ধিরত্থূতিআদিকা ¶ আযস্মতো নন্দকত্থেরস্স গাথা. কা উপ্পত্তি? অযম্পি কির পদুমুত্তরস্স ভগৰতো কালে হংসৰতীনগরে মহাৰিভৰো সেট্ঠি হুত্ৰা সত্থু সন্তিকে ধম্মং সুণন্তো সত্থারং একং ভিক্খুং ভিক্খুনোৰাদকানং অগ্গট্ঠানে ঠপেন্তং দিস্ৰা তং ঠানন্তরং পত্থেত্ৰা সতসহস্সগ্ঘনিকেন ৰত্থেন ভগৰন্তং পূজেত্ৰা পণিধানমকাসি, সত্থু বোধিরুক্খে পদীপপূজঞ্চ পৰত্তেতি. সো ততো পট্ঠায দেৰমনুস্সেসু সংসরন্তো ককুসন্ধস্স ভগৰতো কালে করৰিকসকুণো হুত্ৰা মধুরকূজিতং কূজন্তো সত্থারং পদক্খিণং অকাসি. অপরভাগে মযূরো হুত্ৰা অঞ্ঞতরস্স পচ্চেকবুদ্ধস্স ৰসনগুহায দ্ৰারে পসন্নমানসো দিৰসে দিৰসে তিক্খত্তুং মধুরৰস্সিতং ৰস্সি, এৰং তত্থ তত্থ পুঞ্ঞানি কত্ৰা অম্হাকং ভগৰতো কালে সাৰত্থিযং কুলগেহে নিব্বত্তিত্ৰা নন্দকোতি লদ্ধনামো ৰযপ্পত্তো সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৪৬.২২-২৬) –

‘‘পদুমুত্তরবুদ্ধস্স ¶ বোধিযা পাদপুত্তমে;

পসন্নচিত্তো সুমনো, তযো উক্কে অধারযিং.

‘‘সতসহস্সিতো কপ্পে, সোহং উক্কমধারযিং;

দুগ্গতিং নাভিজানামি, উক্কদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহা পন হুত্ৰা ৰিমুত্তিসুখেন ৰীতিনামেন্তো সত্থারা ভিক্খুনীনং ওৰাদে আণত্তো একস্মিং উপোসথদিৰসে পঞ্চ ভিক্খুনিসতানি একোৰাদেনেৰ অরহত্তং পাপেসি. তেন নং ভগৰা ভিক্খুনোৰাদকানং অগ্গট্ঠানে ঠপেসি. অথেকদিৰসং থেরং সাৰত্থিযং পিণ্ডায চরন্তং অঞ্ঞতরা পুরাণদুতিযিকা ইত্থী কিলেসৰসেন ওলোকেত্ৰা হসি. থেরো তস্সা তং কিরিযং দিস্ৰা সরীরস্স পটিক্কূলৰিভাৰনমুখেন ধম্মং কথেন্তো –

২৭৯.

‘‘ধিরত্থু পূরে দুগ্গন্ধে, মারপক্খে অৰস্সুতে;

নৰসোতানি তে কাযে, যানি সন্দন্তি সব্বদা.

২৮০.

‘‘মা ¶ ¶ পুরাণং অমঞ্ঞিত্থো, মাসাদেসি তথাগতে;

সগ্গেপি তে ন রজ্জন্তি, কিমঙ্গং পন মানুসে.

২৮১.

‘‘যে চ খো বালা দুম্মেধা, দুম্মন্তী মোহপারুতা;

তাদিসা তত্থ রজ্জন্তি, মারখিত্তম্হি বন্ধনে.

২৮২.

‘‘যেসং রাগো চ দোসো চ, অৰিজ্জা চ ৰিরাজিতা;

তাদী তত্থ ন রজ্জন্তি, ছিন্নসুত্তা অবন্ধনা’’তি. – গাথা অভাসি;

তত্থ ধীতি জিগুচ্ছনত্থে নিপাতো, রত্থূতি র-কারো পদসন্ধিকরো, ধী অত্থু তং জিগুচ্ছামি তৰ ধিক্কারো হোতূতি অত্থো. পূরেতিআদীনি তস্সা ধিক্কাতব্বভাৰদীপনানি আমন্তনৰচনানি. পূরেতি অতিৰিয জেগুচ্ছেহি নানাকুণপেহি নানাৰিধঅসুচীহি সম্পুণ্ণে. দুগ্গন্ধেতি কুণপপূরিতত্তা এৰ সভাৰদুগ্গন্ধে. মারপক্খেতি যস্মা ৰিসভাগৰত্থু অন্ধপুথুজ্জনানং অযোনিসোমনসিকারনিমিত্ততায কিলেসমারং ৰড্ঢেতি, দেৰপুত্তমারস্স চ ওতারং পৰিট্ঠং দেতি. তস্মা মারস্স পক্খো হোতি. তেন ৰুত্তং ‘‘মারপক্খে’’তি. অৰস্সুতেতি সব্বকালং কিলেসাৰস্সৰনেন তহিং তহিং অসুচিনিস্সন্দনেন চ অৰস্সুতে. ইদানিস্সা নৰসোতানি তে কাযে, যানি সন্দন্তি সব্বদাতি ‘‘অক্খিম্হা অক্খিগূথকো’’তিআদিনা (সু. নি. ১৯৯) ৰুত্তং অসুচিনো অৰস্সৰনট্ঠানং দস্সেতি.

এৰং ¶ পন নৰছিদ্দং ধুৰস্সৰং অসুচিভরিতং কাযং যথাভূতং জানন্তী মা পুরাণং অমঞ্ঞিত্থোতি পুরাণং অজাননকালে পৰত্তং হসিতলপিতং কীল়িতং মা মঞ্ঞি, ‘‘ইদানিপি এৰং পটিপজ্জিস্সতী’’তি মা চিন্তেহি. মাসাদেসি তথাগতেতি যথা উপনিস্সযসম্পত্তিযা পুরিমকা বুদ্ধসাৰকা আগতা, যথা ৰা তে সম্মাপটিপত্তিযা গতা পটিপন্না, যথা চ রূপারূপধম্মানং তথলক্খণং তথধম্মে চ অরিযসচ্চানি আগতা অধিগতা অৰবুদ্ধা, তথা ইমেপীতি এৰং তথা আগমনাদিঅত্থেন তথাগতে অরিযসাৰকে পকতিসত্তে ৰিয অৰঞ্ঞায কিলেসৰসেন চ ¶ উপসঙ্কমমানা মাসাদেসি. অনাসাদেতব্বতায কারণমাহ. সগ্গেপি তে ন রজ্জন্তি, কিমঙ্গং পন মানুসেতি সব্বঞ্ঞুবুদ্ধেনাপি অক্খানেন পরিযোসাপেতুং অসক্কুণেয্যসুখে সগ্গেপি তে সাৰকবুদ্ধা ন রজ্জন্তি, সঙ্খারেসু আদীনৰস্স সুপরিদিট্ঠত্তা রাগং ন জনেন্তি, কিমঙ্গং পন মীল়্হরাসিসদিসে মানুসে কামগুণে, তত্থ ন রজ্জন্তীতি ৰত্তব্বমেৰ নত্থি.

যে চ খোতি যে পন বাল্যপ্পযোগতো বালা, ধম্মোজপঞ্ঞায অভাৰতো দুম্মেধা, অসুভে সুভানুপস্সনেন দুচিন্তিতচিন্তিতায দুম্মন্তী, মোহেন অঞ্ঞাণেন সব্বসো পটিচ্ছাদিতচিত্ততায মোহপারুতা ¶ তাদিসা তথারূপা অন্ধপুথুজ্জনা, তত্থ তস্মিং ইত্থিসঞ্ঞিতে, মারখিত্তম্হি বন্ধনে মারেন ওড্ডিতে মারপাসে, রজ্জন্তি রত্তা গিদ্ধা গধিতা মুচ্ছিতা অজ্ঝোপন্না তিট্ঠন্তি.

ৰিরাজিতাতি যেসং পন খীণাসৰানং তেলঞ্জনরাগো ৰিয দুম্মোচনীযসভাৰো রাগো সপত্তো ৰিয লদ্ধোকাসো দুস্সনসভাৰো দোসো অঞ্ঞাণসভাৰা অৰিজ্জা চ অরিযমগ্গৰিরাগেন সব্বসো ৰিরাজিতা পহীনা সমুচ্ছিন্না, তাদিসা অগ্গমগ্গসত্থেন ছিন্নভৰনেত্তিসুত্তা ততো এৰ কত্থচিপি বন্ধনাভাৰতো অবন্ধনা তত্থ তস্মিং যথাৰুত্তে মারপাসে ন রজ্জন্তি. এৰং থেরো তস্সা ইত্থিযা ধম্মং কথেত্ৰা গতো.

নন্দকত্থেরগাথাৰণ্ণনা নিট্ঠিতা.

৫. জম্বুকত্থেরগাথাৰণ্ণনা

পঞ্চপঞ্ঞাসাতিআদিকা আযস্মতো জম্বুকত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো তিস্সস্স ভগৰতো কালে কুলগেহে ¶ নিব্বত্তিত্ৰা ৰিঞ্ঞুতং পত্তো সত্থু সম্মাসম্বোধিং সদ্দহন্তো বোধিরুক্খং ৰন্দিত্ৰা বীজনেন পূজেসি. সো তেন পুঞ্ঞকম্মেন দেৰমনুস্সেসু সংসরন্তো কস্সপস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো সাসনে পব্বজিত্ৰা অঞ্ঞতরেন উপাসকেন কারিতে আরামে আৰাসিকো হুত্ৰা ৰিহরতি তেন ¶ উপট্ঠীযমানো. অথেকদিৰসং একো খীণাসৰত্থেরো লূখচীৰরধরো কেসোহরণত্থং অরঞ্ঞতো গামাভিমুখো আগচ্ছতি, তং দিস্ৰা সো উপাসকো ইরিযাপথে পসীদিত্ৰা কপ্পকেন কেসমস্সূনি ওহারাপেত্ৰা পণীতভোজনং ভোজেত্ৰা সুন্দরানি চীৰরানি দত্ৰা ‘‘ইধেৰ, ভন্তে, ৰসথা’’তি ৰসাপেতি. তং দিস্ৰা আৰাসিকো ইস্সামচ্ছেরপকতো খীণাসৰত্থেরং আহ – ‘‘ৰরং তে, ভিক্খু, ইমিনা পাপুপাসকেন উপট্ঠীযমানস্স এৰং ইধ ৰসনতো অঙ্গুলীহি কেসে লুঞ্চিত্ৰা অচেলস্স সতো গূথমুত্তাহারজীৰন’’ন্তি. এৰঞ্চ পন ৰত্ৰা তাৰদেৰ ৰচ্চকুটিং পৰিসিত্ৰা পাযাসং ৰড্ঢেন্তো ৰিয হত্থেন গূথং ৰড্ঢেত্ৰা ৰড্ঢেত্ৰা যাৰদত্থং খাদি, মুত্তঞ্চ পিৰি. ইমিনা নিযামেন যাৰতাযুকং ঠত্ৰা কালঙ্কত্ৰা নিরযে পচ্চিত্ৰা পুন গূথমুত্তাহারো ৰসিত্ৰা তস্সেৰ কম্মস্স ৰিপাকাৰসেসেন মনুস্সেসু উপ্পন্নোপি পঞ্চ জাতিসতানি নিগণ্ঠো হুত্ৰা গূথভক্খো অহোসি.

পুন ¶ ইমস্মিং বুদ্ধুপ্পাদে মনুস্সযোনিযং নিব্বত্তমানোপি অরিযূপৰাদবলেন দুগ্গতকূলে নিব্বত্তিত্ৰা থঞ্ঞং ৰা খীরং ৰা সপ্পিং ৰা পাযমানো, তং ছড্ডেত্ৰা মুত্তমেৰ পিৰতি, ওদনং ভোজিযমানো, তং ছড্ডেত্ৰা গূথমেৰ খাদতি, এৰং গূথমুত্তপরিভোগেন ৰড্ঢন্তো ৰযপ্পত্তোপি তদেৰ পরিভুঞ্জতি. মনুস্সা ততো ৰারেতুং অসক্কোন্তা পরিচ্চজিংসু. সো ঞাতকেহি পরিচ্চত্তো নগ্গপব্বজ্জং পব্বজিত্ৰা ন ন্হাযতি, রজোজল্লধরো কেসমস্সূনি লুঞ্চিত্ৰা অঞ্ঞে ইরিযাপথে পটিক্খিপিত্ৰা একপাদেন তিট্ঠতি, নিমন্তনং ন সাদিযতি, মাসোপৰাসং অধিট্ঠায পুঞ্ঞত্থিকেহি দিন্নং ভোজনং মাসে মাসে একৰারং কুসগ্গেন গহেত্ৰা দিৰা জিৰ্হগ্গেন লেহতি, রত্তিযং পন ‘‘অল্লগূথং সপ্পাণক’’ন্তি অখাদিত্ৰা সুক্খগূথমেৰ খাদতি, এৰং করোন্তস্স পঞ্চপঞ্ঞাসৰস্সানি ৰীতিৰত্তানি মহাজনো ‘‘মহাতপো পরমপ্পিচ্ছো’’তি মঞ্ঞমানো তন্নিন্নো তপ্পোণো অহোসি.

অথ ভগৰা তস্স হদযব্ভন্তরে ঘটে পদীপং ৰিয অরহত্তূপনিস্সযং পজ্জলন্তং দিস্ৰা সযমেৰ তত্থ গন্ত্ৰা ধম্মং দেসেত্ৰা সোতাপত্তিফলে পতিট্ঠাপেত্ৰা, এহিভিক্খূপসম্পদায লদ্ধূপসম্পদং ৰিপস্সনং উস্সুক্কাপেত্ৰা অরহত্তে পতিট্ঠাপেসি. অযমেত্থ সঙ্খেপো. ৰিত্থারো পন ধম্মপদে ¶ ‘‘মাসে মাসে কুসগ্গেনা’’তি গাথাৰণ্ণনায (ধ. প. অট্ঠ. ১.জম্বুকত্থেরৰত্থু) ৰুত্তনযেন ¶ ৰেদিতব্বো. অরহত্তে পন পতিট্ঠিতো পরিনিব্বানকালে ‘‘আদিতো মিচ্ছা পটিপজ্জিত্ৰাপি সম্মাসম্বুদ্ধং নিস্সায সাৰকেন অধিগন্তব্বং মযা অধিগত’’ন্তি দস্সেন্তো –

২৮৩.

‘‘পঞ্চপঞ্ঞাসৰস্সানি, রজোজল্লমধারযিং;

ভুঞ্জন্তো মাসিকং ভত্তং, কেসমস্সুং অলোচযিং.

২৮৪.

‘‘একপাদেন অট্ঠাসিং, আসনং পরিৰজ্জযিং;

সুক্খগূথানি চ খাদিং, উদ্দেসঞ্চ ন সাদিযিং.

২৮৫.

‘‘এতাদিসং করিত্ৰান, বহুং দুগ্গতিগামিনং;

ৰুয্হমানো মহোঘেন, বুদ্ধং সরণমাগমং.

২৮৬.

‘‘সরণগমনং পস্স, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. –

ইমা চতস্সো গাথা অভাসি.

তত্থ পঞ্চপঞ্ঞাসৰস্সানি, রজোজল্লমধারযিন্তি নগ্গপব্বজ্জূপগমনেন ন্হানপটিক্খেপতো পঞ্চাধিকানি পঞ্ঞাসৰস্সানি সরীরে লগ্গং আগন্তুকরেণুসঙ্খাতং রজো, সরীরমলসঙ্খাতং জল্লঞ্চ কাযেন ধারেসিং. ভুঞ্জন্তো মাসিকং ভত্তন্তি রত্তিযং গূথং খাদন্তো লোকৰঞ্চনত্থং মাসোপৰাসিকো নাম হুত্ৰা পুঞ্ঞত্থিকেহি দিন্নং ভোজনং মাসে মাসে একৰারং জিৰ্হগ্গে পঠনৰসেন ভুঞ্জন্তো অলোচযিন্তি তাদিসচ্ছারিকাপক্খেপেন সিথিলমূলং কেসমস্সুং অঙ্গুলীহি লুঞ্চাপেসিং.

একপাদেন ¶ অট্ঠাসিং, আসনং পরিৰজ্জযিন্তি সব্বেন সব্বং আসনং নিসজ্জং পরিৰজ্জেসিং, তিট্ঠন্তো চ উভো হত্থে উক্খিপিত্ৰা একেনেৰ পাদেন অট্ঠাসিং. উদ্দেসন্তি নিমন্তনং. উদিস্সকতন্তি কেচি. ন সাদিযিন্তি ন সম্পটিচ্ছিং পটিক্খিপিন্তি অত্থো.

এতাদিসং করিত্ৰান, বহুং দুগ্গতিগামিনন্তি এতাদিসং এৰরূপং ৰিপাকনিব্বত্তনকং দুগ্গতিগামিনং বহুং পাপকম্মং পুরিমজাতীসু ইধ চ কত্ৰা উপ্পাদেত্ৰা. ৰুয্হমানো ¶ মহোঘেনাতি কামোঘাদিনা মহতা ওঘেন ৰিসেসতো দিট্ঠোঘেন অপাযসমুদ্দং পতিআকড্ঢিযমানো, বুদ্ধং সরণমাগমন্তি তাদিসেন পুঞ্ঞকম্মচ্ছিদ্দেন কিচ্ছেন মনুস্সত্তভাৰং লভিত্ৰা ইদানি পুঞ্ঞবলেন বুদ্ধং ‘‘সরণ’’ন্তি আগমাসিং, ‘‘সম্মাসম্বুদ্ধো ভগৰা’’তি অৰেচ্চপসাদেন সত্থরি পসীদিং. সরণগমনং পস্স, পস্স ধম্মসুধম্মতন্তি আযতনগতং মম সরণগমনং পস্স, পস্স সাসনধম্মস্স ¶ চ সুধম্মতং যোহং তথামিচ্ছাপটিপন্নোপি একোৰাদেনেৰ সত্থারা এদিসং সম্পত্তিং সম্পাপিতো. ‘‘তিস্সো ৰিজ্জা’’তিআদিনা তং সম্পত্তিং দস্সেতি তেনাহ (অপ. থের ২.৪৬.১৭-২১) –

‘‘তিস্সস্সাহং ভগৰতো, বোধিরুক্খমৰন্দিযং;

পগ্গয্হ বীজনিং তত্থ, সীহাসনমবীজহং.

‘‘দ্ৰেনৰুতে ইতো কপ্পে, সীহাসনমবীজহং;

দুগ্গতিং নাভিজানামি, বীজনায ইদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

জম্বুকত্থেরগাথাৰণ্ণনা নিট্ঠিতা.

৬. সেনকত্থেরগাথাৰণ্ণনা

স্ৰাগতং ৰতাতিআদিকা আযস্মতো সেনকত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সিখিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং দিস্ৰা পসন্নমানসো মোরহত্থেন ভগৰন্তং পূজেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে ব্রাহ্মণকুলে নিব্বত্তিত্ৰা উরুৰেলকস্সপত্থেরস্স ভগিনিযা কুচ্ছিম্হি নিব্বত্তি, সেনকোতিস্স নামং অহোসি. সো ৰযপ্পত্তো ব্রাহ্মণানং ৰিজ্জাসিপ্পেসু নিপ্ফত্তিং গতো ঘরাৰাসং ৰসতি. তেন চ সমযেন মহাজনো সংৰচ্ছরে সংৰচ্ছরে ফগ্গুনমাসে উত্তরফগ্গুননক্খত্তে উস্সৰং অনুভৰন্তো গযাযং তিত্থাভিসেকং করোতি. তেন তং উস্সৰং ¶ ‘‘গযাফগ্গূ’’তি ৰদন্তি. অথ ভগৰা তাদিসে উস্সৰদিৰসে ৰেনেয্যানুকম্পায গযাতিত্থসমীপে ৰিহরতি, মহাজনোপি তিত্থাভিসেকাধিপ্পাযেন ততো ¶ ততো তং ঠানং উপগচ্ছতি. তস্মিং খণে সেনকোপি তিত্থাভিসেকত্থং তং ঠানং উপগতো সত্থারং ধম্মং দেসেন্তং দিস্ৰা উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৪৬.৯-১৬) –

‘‘মোরহত্থং ¶ গহেত্ৰান, উপেসিং লোকনাযকং;

পসন্নচিত্তো সুমনো, মোরহত্থমদাসহং.

‘‘ইমিনা মোরহত্থেন, চেতনাপণিধীহি চ;

নিব্বাযিংসু তযো অগ্গী, লভামি ৰিপুলং সুখং.

‘‘অহো বুদ্ধো অহো ধম্মো, অহো নো সত্থুসম্পদা;

দত্ৰানহং মোরহত্থং, লভামি ৰিপুলং সুখং.

‘‘তিযগ্গী নিব্বুতা ময্হং, ভৰা সব্বে সমূহতা;

সব্বাসৰা পরিক্খীণা, নত্থি দানি পুনব্ভৰো.

‘‘একতিংসে ইতো কপ্পে, যং দানমদদিং তদা;

দুগ্গতিং নাভিজানামি, মোরহত্থস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা সঞ্জাতসোমনস্সো উদানৰসেন –

২৮৭.

‘‘স্ৰাগতং ৰত মে আসি, গযাযং গযফগ্গুযা;

যং অদ্দসাসিং সম্বুদ্ধং, দেসেন্তং ধম্মমুত্তমং.

২৮৮.

‘‘মহপ্পভং গণাচরিযং, অগ্গপত্তং ৰিনাযকং;

সদেৰকস্স লোকস্স, জিনং অতুলদস্সনং.

২৮৯.

‘‘মহানাগং মহাৰীরং, মহাজুতিমনাসৰং;

সব্বাসৰপরিক্খীণং, সত্থারমকুতোভযং.

২৯০.

‘‘চিরসঙ্কিলিট্ঠং ¶ ৰত মং, দিট্ঠিসন্দানবন্ধিতং;

ৰিমোচযি সো ভগৰা, সব্বগন্থেহি সেনক’’ন্তি. –

চতস্সো গাথা অভাসি.

তত্থ স্ৰাগতং ৰত মে আসীতি মযা সুট্ঠু আগতং ৰত আসি. মম ৰা সুন্দরং ৰত আগমনং আসি. গযাযন্তি গযাতিত্থসমীপে. গযফগ্গুযাতি ‘‘গযাফগ্গূ’’তি লদ্ধৰোহারে ফগ্গুনমাসস্স উত্তরফগ্গুনীনক্খত্তে. ‘‘য’’ন্তিআদি স্ৰাগতভাৰস্স কারণদস্সনং. তত্থ যন্তি যস্মা. অদ্দসাসিন্তি অদ্দক্খিং. সম্বুদ্ধন্তি সম্মা সামং সব্বধম্মানং বুদ্ধত্তা সম্বুদ্ধং. দেসেন্তং ধম্মমুত্তমন্তি উত্তমং অগ্গং সব্বসেট্ঠং একন্তনিয্যানিকং ধম্মং ৰেনেয্যজ্ঝাসযানুরূপং ভাসন্তং.

মহপ্পভন্তি মহতিযা সরীরপ্পভায ঞাণপ্পভায চ সমন্নাগতং. গণাচরিযন্তি ভিক্খুপরিসাদীনং গণানং উত্তমেন দমথেন আচারসিক্খাপনেন গণাচরিযং. অগ্গভূতানং সীলাদীনং ¶ গুণানং অধিগমেন অগ্গপ্পত্তং. দেৰমনুস্সাদীনং পরমেন ৰিনযেন ৰিনযনতো, সযং নাযকরহিতত্তা চ ৰিনাযকং. কেনচি অনভিভূতো হুত্ৰা সকলং লোকং অভিভৰিত্ৰা ঠিতত্তা, পঞ্চন্নম্পি মারানং জিতত্তা চ সদেৰকস্স লোকস্স জিনং সদেৰকে লোকে অগ্গজিনং, বাত্তিংসৰরমহাপুরিসলক্খণঅসীতিঅনুব্যঞ্জনাদিপটিমণ্ডিতরূপকাযতায দসবলচতুৰেসারজ্জাদিগুণপটিমণ্ডিতধম্মকাযতায চ ¶ সদেৰকেন লোকেন অপরিমেয্যদস্সনতায অসদিসদস্সনতায চ অতুলদস্সনং.

গতিবলপরক্কমাদিসম্পত্তিযা মহানাগসদিসত্তা, নাগেসুপি খীণাসৰেসু মহানুভাৰতায চ মহানাগং. মারসেনাৰিমথনতো মহাৰিক্কন্ততায চ মহাৰীরং. মহাজুতিন্তি মহাপতাপং মহাতেজন্তি অত্থো. নত্থি এতস্স চত্তারোপি আসৰাতি অনাসৰং. সব্বে আসৰা সৰাসনা পরিক্খীণা এতস্সাতি সব্বাসৰপরিক্খীণং. কামং সাৰকবুদ্ধা পচ্চেকবুদ্ধা চ খীণাসৰাৰ, সব্বঞ্ঞুবুদ্ধা এৰ পন সৰাসনে আসৰে খেপেন্তীতি দস্সনত্থং ‘‘অনাসৰ’’ন্তি ৰত্ৰা পুন ‘‘সব্বাসৰপরিক্খীণ’’ন্তি ৰুত্তং. তেন ৰুত্তং – ‘‘সব্বে আসৰা সৰাসনা পরিক্খীণা এতস্সাতি সব্বাসৰপরিক্খীণ’’ন্তি. দিট্ঠধম্মিকসম্পরাযিকপরমত্থেহি যথারহং ৰেনেয্যানং অনুসাসনতো সত্থারং, চতুৰেসারজ্জৰিসারদতায কুতোচিপি ¶ ভযাভাৰতো অকুতোভযং, এৰরূপং সম্মাসম্বুদ্ধং যং যস্মা অদ্দসাসিং, তস্মা স্ৰাগতং ৰত মে আসীতি যোজনা.

ইদানি সত্থু দস্সনেন অত্তনা লদ্ধগুণং দস্সেন্তো চতুত্থং গাথমাহ. তস্সত্থো – কঞ্জিযপুণ্ণলাবু ৰিয তক্কভরিতচাটি ৰিয ৰসাপীতপিলোতিকা ৰিয চ সংকিলেসৰত্থূহি অনমতগ্গে সংসারে চিরকালং সংকিলিট্ঠং. গদ্দুলবন্ধিতং ৰিয থম্ভে সারমেযং সক্কাযথম্ভে দিট্ঠিসন্দানেন, দিট্ঠিবন্ধনেন বন্ধিতং বদ্ধং, ততো ৰিমোচেন্তো চ অভিজ্ঝাদীহি সব্বগন্থে হি মং সেনকং অরিযমগ্গহত্থেন, ৰিমোচযি ৰত সো ভগৰা ময্হং সত্থাতি ভগৰতি অভিপ্পসাদং পৰেদেতি.

সেনকত্থেরগাথাৰণ্ণনা নিট্ঠিতা.

৭. সম্ভূতত্থেরগাথাৰণ্ণনা

যো দন্ধকালেতিআদিকা আযস্মতো সম্ভূতত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি করোন্তো বুদ্ধসুঞ্ঞে লোকে চন্দভাগায নদিযা ¶ তীরে কিন্নরযোনিযং নিব্বত্তো. একদিৰসং অঞ্ঞতরং পচ্চেকবুদ্ধং দিস্ৰা পসন্নমানসো ৰন্দিত্ৰা কতঞ্জলী অজ্জুনপুপ্ফেহি পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কুলগেহে নিব্বত্তিত্ৰা সম্ভূতোতি লদ্ধনামো ৰযপ্পত্তো ভগৰতো পরিনিব্বানস্স পচ্ছা ধম্মভণ্ডাগারিকস্স সন্তিকে ধম্মং সুত্ৰা পটিলদ্ধসদ্ধো পব্বজিত্ৰা সমণধম্মং করোন্তো ¶ ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৫২.২৮-৩৬) –

‘‘চন্দভাগানদীতীরে, অহোসিং কিন্নরো তদা;

অদ্দসং ৰিরজং বুদ্ধং, সযম্ভুং অপরাজিতং.

‘‘পসন্নচিত্তো সুমনো, ৰেদজাতো কতঞ্জলী;

গহেত্ৰা অজ্জুনং পুপ্ফং, সযম্ভুং অভিপূজযিং.

‘‘তেন কম্মেন সুকতেন, চেতনাপণিধীহি চ;

জহিত্ৰা কিন্নরং দেহং, তাৰতিংসমগচ্ছহং.

‘‘ছত্তিসক্খত্তুং ¶ দেৰিন্দো, দেৰরজ্জমকারযিং;

দসক্খত্তুং চক্কৰত্তী, মহারজ্জমকারযিং.

‘‘পদেসরজ্জং ৰিপুলং, গণনাতো অসঙ্খিযং;

সুখেত্তে ৰপ্পিতং বীজং, সযম্ভুম্হি অহো মম.

‘‘কুসলং ৰিজ্জতে ময্হং, পব্বজিং অনগারিযং;

পূজারহো অহং অজ্জ, সক্যপুত্তস্স সাসনে.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ৰিমুত্তিসুখেন ৰিহরন্তো ৰস্সসতপরিনিব্বুতে ভগৰতি ৰেসালিকেসু ৰজ্জিপুত্তকেসু দস ৰত্থূনি পগ্গয্হ ঠিতেসু কাকণ্ডকপুত্তেন যসত্থেরেন উস্সাহিতেহি সত্তসতেহি খীণাসৰেহি তং দিট্ঠিং ভিন্দিত্ৰা সদ্ধম্মং পগ্গণ্হন্তেহি ধম্মৰিনযসঙ্গহে কতে তেসং ৰজ্জিপুত্তকানং উদ্ধম্মউব্বিনযদীপনে ধম্মসংৰেগেন থেরো –

২৯১.

‘‘যো দন্ধকালে তরতি, তরণীযে চ দন্ধযে;

অযোনিসংৰিধানেন, বালো দুক্খং নিগচ্ছতি.

২৯২.

‘‘তস্সত্থা পরিহাযন্তি, কাল়পক্খেৰ চন্দিমা;

আযসক্যঞ্চ পপ্পোতি, মিত্তেহি চ ৰিরুজ্ঝতি.

২৯৩.

‘‘যো ¶ দন্ধকালে দন্ধেতি, তরণীযে চ তারযে;

যোনিসো সংৰিধানেন, সুখং পপ্পোতি পণ্ডিতো.

২৯৪.

‘‘তস্সত্থা পরিপূরেন্তি, সুক্কপক্খেৰ চন্দিমা;

যসো কিত্তিঞ্চ পপ্পোতি, মিত্তেহি ন ৰিরুজ্ঝতী’’তি. –

ইমা গাথা ভণন্তো অঞ্ঞং ব্যাকাসি.

তত্থ যো দন্ধকালে তরতীতি কিস্মিঞ্চি কত্তব্বৰত্থুস্মিং – ‘‘কপ্পতি নু খো, ন নু খো কপ্পতী’’তি ৰিনযকুক্কুচ্চে উপ্পন্নে যাৰ ৰিযত্তং ৰিনযধরং পুচ্ছিত্ৰা তং কুক্কুচ্চং ন ৰিনোদেতি, তাৰ দন্ধকালে তস্স কিচ্চস্স দন্ধাযিতব্বসমযে তরতি মদ্দিত্ৰা ৰীতিক্কমং করোতি. তরণীযে চ দন্ধযেতি গহট্ঠস্স তাৰ সরণগমনসীলসমাদানাদিকে, পব্বজিতস্স ৰত্তপটিৰত্তকরণাদিকে ¶ সমথৰিপস্সনানুযোগে চ তরিতব্বে সম্পত্তে সীঘং তং কিচ্চং অননুযুঞ্জিত্ৰা – ‘‘আগমনমাসে পক্খে ৰা করিস্সামী’’তি দন্ধাযেয্য, তং কিচ্চং অকরোন্তোৰ কালং ৰীতিনামেয্য. অযোনিসংৰিধানেনাতি এৰং দন্ধাযিতব্বে তরন্তো তরিতব্বে চ দন্ধাযন্তো অনুপাযসংৰিধানেন উপাযসংৰিধানাভাৰেন বালো, মন্দবুদ্ধিকো পুগ্গলো, সম্পতি আযতিঞ্চ দুক্খং অনত্থং পাপুণাতি.

তস্সত্থা পরিহাযন্তীতি তস্স তথারূপস্স পুগ্গলস্স দিট্ঠধম্মিকাদিভেদা অত্থা কাল়পক্খে চন্দিমা ৰিয, পরিহাযন্তি দিৰসে ¶ দিৰসে পরিক্খযং পরিযাদানং গচ্ছন্তি. ‘‘অসুকো পুগ্গলো অস্সদ্ধো অপ্পসন্নো কুসীতো হীনৰীরিযো’’তিআদিনা. আযসক্যং ৰিঞ্ঞূহি গরহিতব্বতং পপ্পোতি পাপুণাতি. মিত্তেহি চ ৰিরুজ্ঝতীতি ‘‘এৰং পটিপজ্জ, মা এৰং পটিপজ্জা’’তি ওৰাদদাযকেহি কল্যাণমিত্তেহি ‘‘অৰচনীযা ময’’ন্তি ওৰাদস্স অনাদানেনেৰ ৰিরুদ্ধো নাম হোতি.

সেসগাথাদ্ৰযস্স ৰুত্তৰিপরিযাযেন অত্থো ৰেদিতব্বো. কেচি পনেত্থ – ‘‘তরতি দন্ধযে’’তিপদানং অত্থভাৰেন ভাৰনাচিত্তস্স পগ্গহনিগ্গহে উদ্ধরন্তি. তং পচ্ছিমগাথাসু যুজ্জতি. পুরিমা হি দ্ৰে গাথা পব্বজিতকালতো পট্ঠায চরিতব্বং সমণধম্মং অকত্ৰা কুক্কুচ্চপকততায দস ৰত্থূনি দীপেত্ৰা সঙ্ঘেন নিক্কড্ঢিতে ৰজ্জিপুত্তকে সন্ধায থেরেন ৰুত্তা. পচ্ছিমা পন অত্তসদিসে সম্মা পটিপন্নে সকত্থং নিপ্ফাদেত্ৰা ঠিতেতি.

সম্ভূতত্থেরগাথাৰণ্ণনা নিট্ঠিতা.

৮. রাহুলত্থেরগাথাৰণ্ণনা

উভযেনাতিআদিকা ¶ আযস্মতো রাহুলত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো পদুমুত্তরস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো সত্থারং একং ভিক্খুং সিক্খাকামানং অগ্গট্ঠানে ঠপেন্তং দিস্ৰা ¶ সযম্পি তং ঠানন্তরং পত্থেত্ৰা সেনাসনৰিসোধনৰিজ্জোতনাদিকং উল়ারং পুঞ্ঞং কত্ৰা পণিধানমকাসি. সো ততো চৰিত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে অম্হাকং বোধিসত্তং পটিচ্চ যসোধরায দেৰিযা কুচ্ছিম্হি নিব্বত্তিত্ৰা রাহুলোতি লদ্ধনামো মহতা খত্তিযপরিৰারেন ৰড্ঢি, তস্স পব্বজ্জাৰিধানং খন্ধকে (মহাৰ. ১০৫) আগতমেৰ. সো পব্বজিত্ৰা সত্থু সন্তিকে অনেকেহি সুত্তপদেহি সুলদ্ধোৰাদো পরিপক্কঞাণো ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ১.২.৬৮-৮৫) –

‘‘পদুমুত্তরস্স ভগৰতো, লোকজেট্ঠস্স তাদিনো;

সত্তভূমম্হি পাসাদে, আদাসং সন্থরিং অহং.

‘‘খীণাসৰসহস্সেহি, পরিকিণ্ণো মহামুনি;

উপাগমি গন্ধকুটিং, দ্ৰিপদিন্দো নরাসভো.

‘‘ৰিরোচেন্তো গন্ধকুটিং, দেৰদেৰো নরাসভো;

ভিক্খুসঙ্ঘে ঠিতো সত্থা, ইমা গাথা অভাসথ.

‘‘যেনাযং জোতিতা সেয্যা, আদাসোৰ সুসন্থতো;

তমহং কিত্তযিস্সামি, সুণাথ মম ভাসতো.

‘‘সোণ্ণমযা রূপিমযা, অথো ৰেল়ুরিযামযা;

নিব্বত্তিস্সন্তি পাসাদা, যে কেচি মনসো পিযা.

‘‘চতুসট্ঠিক্খত্তুং দেৰিন্দো, দেৰরজ্জং করিস্সতি;

সহস্সক্খত্তুং চক্কৰত্তী, ভৰিস্সতি অনন্তরা.

‘‘একৰীসতিকপ্পম্হি, ৰিমলো নাম খত্তিযো;

চাতুরন্তো ৰিজিতাৰী, চক্কৰত্তী ভৰিস্সতি.

‘‘নগরং রেণুৰতী নাম, ইট্ঠকাহি সুমাপিতং;

আযামতো তীণি সতং, চতুরস্সসমাযুতং.

‘‘সুদস্সনো নাম পাসাদো, ৰিস্সকম্মেন মাপিতো;

কূটাগারৰরূপেতো, সত্তরতনভূসিতো.

‘‘দসসদ্দাৰিৰিত্তং ¶ তং, ৰিজ্জাধরসমাকুলং;

সুদস্সনংৰ নগরং, দেৰতানং ভৰিস্সতি.

‘‘পভা ¶ নিগ্গচ্ছতে তস্স, উগ্গচ্ছন্তেৰ সূরিযে;

ৰিরোচেস্সতি তং নিচ্চং, সমন্তা অট্ঠযোজনং.

‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তুসিতা সো চৰিত্ৰান, সুক্কমূলেন চোদিতো;

গোতমস্স ভগৰতো, অত্রজো সো ভৰিস্সতি.

‘‘সচেৰসেয্য অগারং, চক্কৰত্তী ভৰেয্য সো;

অট্ঠানমেতং যং তাদী, অগারে রতিমজ্ঝগা.

‘‘নিক্খমিত্ৰা অগারম্হা, পব্বজিস্সতি সুব্বতো;

রাহুলো নাম নামেন, অরহা সো ভৰিস্সতি.

‘‘কিকীৰ অণ্ডং রক্খেয্য, চামরী ৰিয ৰালধিং;

নিপকো সীলসম্পন্নো, মমং রক্খি মহামুনি.

‘‘তস্সাহং ধম্মমঞ্ঞায, ৰিহাসিং সাসনে রতো;

সব্বাসৰে পরিঞ্ঞায, ৰিহরামি অনাসৰো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা অঞ্ঞং ব্যাকরোন্তো –

২৯৫.

‘‘উভযেনেৰ ¶ সম্পন্নো, রাহুলভদ্দোতি মং ৰিদূ;

যঞ্চম্হি পুত্তো বুদ্ধস্স, যঞ্চ ধম্মেসু চক্খুমা.

২৯৬.

‘‘যঞ্চ মে আসৰা খীণা, যঞ্চ নত্থি পুনব্ভৰো;

অরহা দক্খিণেয্যোম্হি, তেৰিজ্জো অমতদ্দসো.

২৯৭.

‘‘কামন্ধা জালপচ্ছন্না, তণ্হাছদনছাদিতা;

পমত্তবন্ধুনা বদ্ধা, মচ্ছাৰ কুমিনামুখে.

২৯৮.

‘‘তং ¶ কামং অহমুজ্ঝিত্ৰা, ছেত্ৰা মারস্স বন্ধনং;

সমূলং তণ্হমব্বুয্হ, সীতিভূতোস্মি নিব্বুতো’’তি. –

চতস্সো গাথা অভাসি.

তত্থ উভযেনেৰ সম্পন্নোতি জাতিসম্পদা, পটিপত্তিসম্পদাতি উভযসম্পত্তিযাপি সম্পন্নো সমন্নাগতো. রাহুলভদ্দোতি মং ৰিদূতি ‘‘রাহুলভদ্দো’’তি মং সব্রহ্মচারিনো সঞ্জানন্তি. তস্স হি ¶ জাতসাসনং সুত্ৰা বোধিসত্তেন ‘‘রাহু জাতো, বন্ধনং জাত’’ন্তি ৰুত্তৰচনং উপাদায সুদ্ধোদনমহারাজা ‘‘রাহুলো’’তি নামং গণ্হি. তত্থ আদিতো পিতরা ৰুত্তপরিযাযমেৰ গহেত্ৰা আহ – ‘‘রাহুলভদ্দোতি মং ৰিদূ’’তি. ভদ্দোতি চ পসংসাৰচনমেতং.

ইদানি তং উভযসম্পত্তিং দস্সেতুং ‘‘যঞ্চম্হী’’তিআদি ৰুত্তং. তত্থ যন্তি যস্মা. চ-সদ্দো সমুচ্চযত্থো. অম্হি পুত্তো বুদ্ধস্সাতি সম্মাসম্বুদ্ধস্স ওরসপুত্তো অম্হি. ধম্মেসূতি লোকিযেসু লোকুত্তরেসু চ ধম্মেসু, চতুসচ্চধম্মেসূতি অত্থো. চক্খুমাতি মগ্গপঞ্ঞাচক্খুনা চক্খুমা চ অম্হীতি যোজেতব্বং.

পুন অপরাপরেহিপি পরিযাযেহি অত্তনি উভযসম্পত্তিং দস্সেতুং – ‘‘যঞ্চ মে আসৰা খীণা’’তি গাথমাহ. তত্থ দক্খিণেয্যোতি দক্খিণারহো. অমতদ্দসোতি নিব্বানস্স দস্সাৰী. সেসং সুৰিঞ্ঞেয্যমেৰ.

ইদানি যায ৰিজ্জাসম্পত্তিযা চ ৰিমুত্তিসম্পত্তিযা চ অভাৰেন সত্তকাযো কুমিনে বন্ধমচ্ছা ৰিয সংসারে পরিৰত্ততি, তং উভযসম্পত্তিং অত্তনি দস্সেতুং ‘‘কামন্ধা’’তি গাথাদ্ৰযমাহ. তত্থ কামেহি কামেসু ৰা অন্ধাতি কামন্ধা. ‘‘ছন্দো রাগো’’তিআদিৰিভাগেহি (চূল়নি. অজিতমাণৰপুচ্ছানিদ্দেস ৮) কিলেসকামেহি রূপাদীসু ৰত্থুকামেসু অনাদীনৰদস্সিতায অন্ধীকতা. জালপচ্ছন্নাতি সকলং ভৰত্তযং অজ্ঝোত্থরিত্ৰা ঠিতেন ৰিসত্তিকাজালেন পকারতো ছন্না পলিগুণ্ঠিতা. তণ্হাছদনছাদিতাতি ততো এৰ তণ্হাসঙ্খাতেন ছদনেন ছাদিতা নিৰুতা সব্বসো পটিকুজ্জিতা. পমত্তবন্ধুনা বদ্ধা, মচ্ছাৰ কুমিনামুখেতি কুমিনামুখে মচ্ছবন্ধানং মচ্ছপসিব্বকমুখে বদ্ধা মচ্ছা ৰিয পমত্তবন্ধুনা মারেন ¶ যেন ¶ কামবন্ধনেন বদ্ধা ইমে সত্তা ততো ন নিগচ্ছন্তি অন্তোবন্ধনগতাৰ হোন্তি.

তং তথারূপং কামং বন্ধনভূতং উজ্ঝিত্ৰা পুব্বভাগপটিপত্তিযা পহায কিলেসমারস্স বন্ধনং ছেত্ৰা, পুন অরিযমগ্গসত্থেন অনৰসেসতো সমুচ্ছিন্দিত্ৰা ততো এৰ অৰিজ্জাসঙ্খাতেন মূলেন সমূলং, কামতণ্হাদিকং তণ্হং অব্বুয্হ উদ্ধরিত্ৰা সব্বকিলেসদরথপরিল়াহাভাৰতো, সীতিভূতো সউপাদিসেসায নিব্বানধাতুযা নিব্বুতো, অহং অস্মি হোমীতি অত্থো.

রাহুলত্থেরগাথাৰণ্ণনা নিট্ঠিতা.

৯. চন্দনত্থেরগাথাৰণ্ণনা

জাতরূপেনাতিআদিকা ¶ আযস্মতো চন্দনত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইতো একতিংসে কপ্পে বুদ্ধসুঞ্ঞে লোকে রুক্খদেৰতা হুত্ৰা নিব্বত্তো সুদস্সনং নাম পচ্চেকবুদ্ধং পব্বতন্তরে ৰসন্তং দিস্ৰা পসন্নমানসো কুটজপুপ্ফেহি পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং ৰিভৰসম্পন্নে কুলে নিব্বত্তিত্ৰা চন্দনোতি লদ্ধনামো ৰযপ্পত্তো ঘরাৰাসং ৰসন্তো সত্থু সন্তিকে ধম্মং সুত্ৰা সোতাপন্নো অহোসি. সো একং পুত্তং লভিত্ৰা ঘরাৰাসং পহায পব্বজিত্ৰা ৰিপস্সনায কম্মট্ঠানং গহেত্ৰা অরঞ্ঞে ৰিহরন্তো সত্থারং ৰন্দিতুং সাৰত্থিং আগতো সুসানে ৰসতি. তস্স আগতভাৰং সুত্ৰা পুরাণদুতিযিকা অলঙ্কতপটিযত্তা দারকং আদায মহতা পরিৰারেন থেরস্স সন্তিকং গচ্ছতি – ‘‘ইত্থিকুত্তাদীহি নং পলোভেত্ৰা উপ্পব্বাজেস্সামী’’তি. থেরো তং আগচ্ছন্তিং দূরতোৰ দিস্ৰা ‘‘ইদানিস্সা অৰিসযো ভৰিস্সামী’’তি যথারদ্ধং ৰিপস্সনং উস্সুক্কাপেত্ৰা ছল়ভিঞ্ঞো অহোসি. তেন ৰুত্তং অপদানে (অপ. থের ২.৫২.৩৭-৪৩) –

‘‘হিমৰন্তস্সাৰিদূরে ¶ , ৰসলো নাম পব্বতো;

বুদ্ধো সুদস্সনো নাম, ৰসতে পব্বতন্তরে.

‘‘পুপ্ফং হেমৰন্তং ময্হ, ৰেহাসং অগমাসহং;

তত্থদ্দসাসিং সম্বুদ্ধং, ওঘতিণ্ণমনাসৰং.

‘‘পুপ্ফং কুটজমাদায, সিরে কত্ৰান অঞ্জলিং;

বুদ্ধস্স অভিরোপেসিং, সযম্ভুস্স মহেসিনো.

‘‘একতিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা আকাসে ঠত্ৰা তস্সা ধম্মং দেসেত্ৰা সরণেসু চ সীলেসু চ পতিট্ঠাপেত্ৰা সযং অত্তনা পুব্বে ৰসিতট্ঠানমেৰ গতো. সহাযভিক্খূহি – ‘‘ৰিপ্পসন্নানি খো তে, আৰুসো, ইন্দ্রিযানি, কচ্চি তযা সচ্চানি পটিৰিদ্ধানী’’তি পুট্ঠো –

২৯৯.

‘‘জাতরূপেন সঞ্ছন্না, দাসীগণপুরক্খতা;

অঙ্কেন পুত্তমাদায, ভরিযা মং উপাগমি.

৩০০.

‘‘তঞ্চ ¶ ¶ দিস্ৰান আযন্তিং, সকপুত্তস্স মাতরং;

অলঙ্কতং সুৰসনং, মচ্চুপাসংৰ ওড্ডিতং.

৩০১.

‘‘ততো মে মনসীকারো, যোনিসো উদপজ্জথ;

আদীনৰো পাতুরহু, নিব্বিদা সমতিট্ঠথ.

৩০২.

‘‘ততো চিত্তং ৰিমুচ্চি মে, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. –

ইমাহি গাথাহি অত্তনো পটিপত্তিং কথেন্তো অঞ্ঞং ব্যাকাসি.

তত্থ জাতরূপেন সঞ্ছন্নাতি জাতরূপমযেন সীসূপগাদিঅলঙ্কারেন অলঙ্করণৰসেন পটিচ্ছাদিতসরীরা, সব্বাভরণভূসিতাতি অত্থো. দাসীগণপুরক্খতাতি যথারহং অলঙ্কতপটিযত্তেন অত্তনো দাসিগণেন ¶ পুরতো কতা পরিৰারিতাতি অত্থো. অঙ্কেন পুত্তমাদাযাতি ‘‘অপি নাম পুত্তম্পি দিস্ৰা গেহস্সিতসাতো ভৰেয্যা’’তি পুত্তং অত্তনো অঙ্কেন গহেত্ৰা.

আযন্তিন্তি আগচ্ছন্তিং. সকপুত্তস্স মাতরন্তি মম ওরসপুত্তস্স জননিং, ময্হং পুরাণদুতিযিকন্তি অত্থো. সব্বমিদং থেরো অত্তনো কামরাগসমুচ্ছেদং বহুমঞ্ঞন্তো ৰদতি. যোনিসো উদপজ্জথাতি ‘‘এৰরূপাপি নাম সম্পত্তি জরাব্যাধিমরণেহি অভিভুয্যতি, অহো সঙ্খারা অনিচ্চা অধুৰা অনস্সাসিকা’’তি এৰং যোনিসোমনসিকারো উপ্পজ্জি. সেসং হেট্ঠা ৰুত্তনযমেৰ.

চন্দনত্থেরগাথাৰণ্ণনা নিট্ঠিতা.

১০. ধম্মিকত্থেরগাথাৰণ্ণনা

ধম্মো হৰেতিআদিকা আযস্মতো ধম্মিকত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সিখিস্স ভগৰতো কালে মিগলুদ্দকো হুত্ৰা একদিৰসং অরঞ্ঞাযতনে দেৰপরিসায সত্থু ধম্মং দেসেন্তস্স ‘‘ধম্মো এসো ৰুচ্চতী’’তি দেসনায নিমিত্তং গণ্হি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কোসলরট্ঠে ব্রাহ্মণকুলে নিব্বত্তিত্ৰা ধম্মিকোতি লদ্ধনামো ৰযপ্পত্তো জেতৰনপটিগ্গহণে লদ্ধপ্পসাদো পব্বজিত্ৰা অঞ্ঞতরস্মিং গামকাৰাসে আৰাসিকো হুত্ৰা ৰিহরন্তো ¶ আগন্তুকানং ভিক্খূনং ৰত্তাৰত্তেসু উজ্ঝানবহুলো অক্খমো অহোসি. তেন ভিক্খূ তং ৰিহারং ছড্ডেত্ৰা পক্কমিংসু. সো এককোৰ অহোসি. ৰিহারসামিকো উপাসকো তং কারণং সুত্ৰা ভগৰতো তং পৰত্তিং আরোচেসি. সত্থা তং ভিক্খুং পক্কোসেত্ৰা তমত্থং পুচ্ছিত্ৰা তেন ‘‘এৰং, ভন্তে’’তি ৰুত্তে – ‘‘নাযং ইদানেৰ অক্খমো, পুব্বেপি অক্খমো অহোসী’’তি ৰত্ৰা ভিক্খূহি যাচিতো রুক্খধম্মং (জা. ১.১.৭৪) কথেত্ৰা উপরি তস্স ওৰাদং দেন্তো –

৩০৩.

‘‘ধম্মো ¶ ¶ হৰে রক্খতি ধম্মচারিং, ধম্মো সুচিণ্ণো সুখমাৰহাতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী.

৩০৪.

‘‘ন হি ধম্মো অধম্মো চ, উভো সমৰিপাকিনো;

অধম্মো নিরযং নেতি, ধম্মো পাপেতি সুগ্গতিং.

৩০৫.

‘‘তস্মা হি ধম্মেসু করেয্য ছন্দং, ইতি মোদমানো সুগতেন তাদিনা;

ধম্মে ঠিতা সুগতৰরস্স সাৰকা, নীযন্তি ধীরা সরণৰরগ্গগামিনো.

৩০৬.

‘‘ৰিপ্ফোটিতো গণ্ডমূলো, তণ্হাজালো সমূহতো;

সো খীণসংসারো ন চত্থি কিঞ্চনং,

চন্দো যথা দোসিনা পুণ্ণমাসিয’’ন্তি. – চতস্সো গাথা অভাসি;

তত্থ ধম্মোতি লোকিযলোকুত্তরো সুচরিতধম্মো. রক্খতীতি অপাযদুক্খতো রক্খতি, সংসারদুক্খতো চ ৰিৰট্টূপনিস্সযভূতো রক্খতিযেৰ. ধম্মচারিন্তি তং ধম্মং চরন্তং পটিপজ্জন্তং. সুচিণ্ণোতি সুট্ঠু চিণ্ণো কম্মফলানি সদ্দহিত্ৰা সক্কচ্চং চিত্তীকত্ৰা উপচিতো. সুখন্তি লোকিযলোকুত্তরসুখং. তত্থ লোকিযং তাৰ কামাৰচরাদিভেদো ধম্মো যথাসকং সুখং দিট্ঠে ৰা ধম্মে উপপজ্জে ৰা অপরে ৰা পরিযাযে আৰহতি নিপ্ফাদেতি, ইতরং পন ৰিৰট্টূপনিস্সযে ঠত্ৰা চিণ্ণো পরম্পরায আৰহতীতি ৰত্তুং ৰট্টতি অনুপনিস্সযস্স তদভাৰতো. এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারীতি ধম্মচারী পুগ্গলো ধম্মে সুচিণ্ণে তংনিমিত্তং দুগ্গতিং ন গচ্ছতীতি এসো ধম্মে সুচিণ্ণে আনিসংসো উদ্রযোতি অত্থো.

যস্মা ¶ ধম্মেনেৰ সুগতিগমনং, অধম্মেনেৰ চ দুগ্গতিগমনং, তস্মা ‘‘ধম্মো অধম্মো’’তি ইমে অঞ্ঞমঞ্ঞং অসংকিণ্ণফলাতি দস্সেতুং ‘‘ন হি ধম্মো’’তিআদিনা দুতিযং গাথমাহ. তত্থ অধম্মোতি ধম্মপটিপক্খো দুচ্চরিতং. সমৰিপাকিনোতি সদিসৰিপাকা সমানফলা.

তস্মাতি ¶ যস্মা ধম্মাধম্মানং অযং যথাৰুত্তো ৰিপাকভেদো, তস্মা. ছন্দন্তি কত্তুকম্যতাছন্দং. ইতি মোদমানো সুগতেন তাদিনাতি ইতি এৰং ৰুত্তপ্পকারেন ওৰাদদানেন সুগতেন সম্মগ্গতেন সম্মাপটিপন্নেন ইট্ঠাদীসু তাদিভাৰপ্পত্তিযা তাদিনামৰতা হেতুভূতেন মোদমানো ¶ তুট্ঠিং আপজ্জমানো ধম্মেসু ছন্দং করেয্যাতি যোজনা. এত্তাৰতা ৰট্টং দস্সেত্ৰা ইদানি ৰিৰট্টং দস্সেন্তো ‘‘ধম্মে ঠিতা’’তিআদিমাহ. তস্সত্থো – যস্মা সুগতস্স ৰরস্স সুগতেসু চ ৰরস্স সম্মাসম্বুদ্ধস্স সাৰকা তস্স ধম্মে ঠিতা ধীরা অতিৰিয অগ্গভূতসরণগামিনো তেনেৰ সরণগমনসঙ্খাতে ধম্মে ঠিতভাৰেন সকলৰট্টদুক্খতোপি নীযন্তি নিস্সরন্তি, তস্মা হি ধম্মেসু করেয্য ছন্দন্তি.

এৰং সত্থারা তীহি গাথাহি ধম্মে দেসিতে দেসনানুসারেন যথানিসিন্নোৰ ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৫২.৪৪-৫০) –

‘‘মিগলুদ্দো পুরে আসিং, অরঞ্ঞে ৰিপিনে অহং;

অদ্দসং ৰিরজং বুদ্ধং, দেৰসঙ্ঘপুরক্খতং.

‘‘চতুসচ্চং পকাসেন্তং, দেসেন্তং অমতং পদং;

অস্সোসিং মধুরং ধম্মং, সিখিনো লোকবন্ধুনো.

‘‘ঘোসে চিত্তং পসাদেসিং, অসমপ্পটিপুগ্গলে;

তত্থ চিত্তং পসাদেত্ৰা, উত্তরিং দুত্তরং ভৰং.

‘‘একতিংসে ইতো কপ্পে, যং সঞ্ঞমলভিং তদা;

দুগ্গতিং নাভিজানামি, ঘোসসঞ্ঞাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

তথা অরহত্তে পতিট্ঠিতো. অরহত্তং পন পত্ৰা অত্তনা অধিগতং ৰিসেসং সত্থু নিৰেদেন্তো চরিমগাথায অঞ্ঞং ব্যাকাসি.

তত্থ ¶ ৰিপ্ফোটিতোতি ৰিধুতো, মগ্গঞাণেন পটিনিস্সট্ঠোতি অত্থো. গণ্ডমূলোতি অৰিজ্জা. সা হি গণ্ডতি সৰতি. ‘‘গণ্ডোতি খো, ভিক্খু, পঞ্চন্নেতং উপাদানক্খন্ধানং অধিৰচন’’ন্তি (সং. নি. ৪.১০৩; অ. নি. ৬.২৩; ৮.৫৬; ৯.১৫; চূল়নি. খগ্গৰিসাণসুত্তনিদ্দেস ১৩৭) এৰং সত্থারা ৰুত্তস্স দুক্খমূলযোগতো, কিলেসাসুচিপগ্ঘরণতো, উপ্পাদজরাভঙ্গেহি উদ্ধুমাতপক্কপভিজ্জনতো চ, গণ্ডাভিধানস্স উপাদানক্খন্ধপঞ্চকস্স ¶ মূলং কারণং তণ্হাজালো সমূহতোতি তণ্হাসঙ্খাতো জালো মগ্গেন সমুগ্ঘাটিতো. সো খীণসংসারো ন চত্থি কিঞ্চনন্তি সো অহং এৰং পহীনতণ্হাৰিজ্জতায পরিক্খীণসংসারো পহীনভৰমূলত্তা এৰ ন চত্থি, ন চ উপলব্ভতি রাগাদিকিঞ্চনং. চন্দো যথা দোসিনা পুণ্ণমাসিযন্তি যথা নাম চন্দো অব্ভমহিকাদিদোসরহিতো পুণ্ণমাসিযং পরিপুণ্ণকালে এৰং অহম্পি অরহত্তাধিগমেন অপেতরাগাদিকিঞ্চনো পরিপুণ্ণধম্মকোট্ঠাসো অহোসিন্তি.

ধম্মিকত্থেরগাথাৰণ্ণনা নিট্ঠিতা.

১১. সপ্পকত্থেরগাথাৰণ্ণনা

যদা ¶ বলাকাতিআদিকা আযস্মতো সপ্পকত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইতো একতিংসে কপ্পে মহানুভাৰো নাগরাজা হুত্ৰা নিব্বত্তো সম্ভৰস্স নাম পচ্চেকবুদ্ধস্স অব্ভোকাসে সমাপত্তিযা নিসিন্নস্স মহন্তং পদুমং গহেত্ৰা উপরিমুদ্ধনি ধারেন্তো পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং ব্রাহ্মণকুলে নিব্বত্তিত্ৰা সপ্পকোতি লদ্ধনামো ৰিঞ্ঞুতং পত্তো ভগৰতো সন্তিকে ধম্মং সুত্ৰা পটিলদ্ধসদ্ধো পব্বজিত্ৰা কম্মট্ঠানং গহেত্ৰা অজকরণিযা ¶ নাম নদিযা তীরে লেণগিরিৰিহারে ৰসন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৫২.৭৮-৮৩) –

‘‘হিমৰন্তস্সাৰিদূরে, রোমসো নাম পব্বতো;

বুদ্ধোপি সম্ভৰো নাম, অব্ভোকাসে ৰসী তদা.

‘‘ভৰনা নিক্খমিত্ৰান, পদুমং ধারযিং অহং;

একাহং ধারযিত্ৰান, ভৰনং পুনরাগমিং.

‘‘একতিংসে ইতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

সো অরহত্তং পত্ৰা সত্থারং ৰন্দিতুং সাৰত্থিং আগতো ঞাতীহি উপট্ঠীযমানো তত্থ কতিপাহং ¶ ৰসিত্ৰা ধম্মং দেসেত্ৰা ঞাতকে সরণেসু চ সীলেসু চ পতিট্ঠাপেত্ৰা যথাৰুত্তট্ঠানমেৰ গন্তুকামো অহোসি. তং ঞাতকা ‘‘ইধেৰ, ভন্তে, ৰসথ, মযং পটিজগ্গিস্সামা’’তি যাচিংসু. সো গমনাকারং দস্সেত্ৰা ঠিতো অত্তনা ৰসিতট্ঠানকিত্তনাপদেসেন ৰিৰেকাভিরতিং পকাসেন্তো –

৩০৭.

‘‘যদা বলাকা সুচিপণ্ডরচ্ছদা, কাল়স্স মেঘস্স ভযেন তজ্জিতা;

পলেহিতি আলযমালযেসিনী, তদা নদী অজকরণী রমেতি মং.

৩০৮.

‘‘যদা বলাকা সুৰিসুদ্ধপণ্ডরা, কাল়স্স মেঘস্স ভযেন তজ্জিতা;

পরিযেসতি লেণমলেণদস্সিনী, তদা নদী অজকরণী রমেতি মং.

৩০৯.

‘‘কং নু তত্থ ন রমেন্তি, জম্বুযো উভতো তহিং;

সোভেন্তী আপগাকূলং, মম লেণস্স পচ্ছতো.

৩১০.

‘‘তামতমদসঙ্ঘসুপ্পহীনা ¶ ¶ , ভেকা মন্দৰতী পনাদযন্তি;

নাজ্জ গিরিনদীহি ৰিপ্পৰাসসমযো,

খেমা অজকরণী সিৰা সুরম্মা’’তি. – চতস্সো গাথা অভাসি;

তত্থ যদাতি যস্মিং কালে. বলাকাতি বলাকাসকুণিকা. সুচিপণ্ডরচ্ছদাতি সুচিসুদ্ধধৰলপক্খা. কাল়স্স মেঘস্স ভযেন তজ্জিতাতি জলভারভরিততায কাল়স্স অঞ্জনগিরিসন্নিকাসস্স পাৰুস্সকমেঘস্স গজ্জতো ৰুট্ঠিভযেন নিব্বিজ্জিতা ভিংসাপিতা. পলেহিতীতি গোচরভূমিতো উপ্পতিত্ৰা গমিস্সতি. আলযন্তি নিলযং অত্তনো কুলাৰকং. আলযেসিনীতি তত্থ আলযনং নিলীযনমেৰ ইচ্ছন্তী. তদা নদী অজকরণী রমেতি মন্তি তস্মিং পাৰুস্সককালে অজকরণীনামিকা নদী নৰোদকস্স পূরা হারহারিনী কুলঙ্কসা মং রমেতি মম চিত্তং আরাধেতীতি উতুপদেসৰিসেসকিত্তনাপদেসেন ৰিৰেকাভিরতিং পকাসেসি.

সুৰিসুদ্ধপণ্ডরাতি সুট্ঠু ৰিসুদ্ধপণ্ডরৰণ্ণা, অসম্মিস্সৰণ্ণা সব্বসেতাতি অত্থো. পরিযেসতীতি মগ্গতি. লেণন্তি ৰসনট্ঠানং. অলেণদস্সিনীতি ৰসনট্ঠানং অপস্সন্তী. পুব্বে নিবদ্ধৰসনট্ঠানস্স অভাৰেন অলেণদস্সিনী, ইদানি পাৰুস্সককালে মেঘগজ্জিতেন আহিতগব্ভা পরিযেসতি লেণন্তি নিবদ্ধৰসনট্ঠানং কুলাৰকং করোতীতি অত্থো.

কং নু তত্থ…পে… পচ্ছতোতি মম ৰসনকমহালেণস্স পচ্ছতো পচ্ছাভাগে আপগাকূলং অজকরণীনদিযা উভতোতীরং তহিং তহিং ইতো চিতো চ সোভেন্তিযো নিচ্চকালং ফলভারনমিতসাখা ¶ সিনিদ্ধপণ্ণচ্ছাযা জম্বুযো তত্থ তস্মিং ঠানে কং নাম সত্তং ন রমেন্তি নু, সব্বং রমেন্তিযেৰ.

তামতমদসঙ্ঘসুপ্পহীনাতি ¶ অমতং ৰুচ্চতি অগদং, তেন মজ্জন্তীতি অমতমদা, সপ্পা, তেসং সঙ্ঘো অমতমদসঙ্ঘো, ততো সুট্ঠু পহীনা অপগতা. ভেকা মণ্ডূকিযো, মন্দৰতী সরৰতিযো, পনাদযন্তি তং ঠানং মধুরেন ৰস্সিতেন নিন্নাদযন্তি. নাজ্জ ¶ গিরিনদীহি ৰিপ্পৰাসসমযোতি অজ্জ এতরহি অঞ্ঞাহিপি পব্বতেয্যাহি নদীহি ৰিপ্পৰাসসমযো ন হোতি, ৰিসেসতো পন ৰাল়মচ্ছসুসুমারাদিৰিরহিততো খেমা অজকরণী নদী. সুন্দরতলতিত্থপুলিনসম্পত্তিযা সিৰা. সুট্ঠু রম্মা রমণীযা, তস্মা তত্থেৰ মে মনো রমতীতি অধিপ্পাযো.

এৰং পন ৰত্ৰা ঞাতকে ৰিস্সজ্জেত্ৰা অত্তনো ৰসনট্ঠানমেৰ গতো. সুঞ্ঞাগারাভিরতিদীপনেন ইদমেৰ চ থেরস্স অঞ্ঞাব্যাকরণং অহোসীতি.

সপ্পকত্থেরগাথাৰণ্ণনা নিট্ঠিতা.

১২. মুদিতত্থেরগাথাৰণ্ণনা

পব্বজিন্তিআদিকা আযস্মতো মুদিতত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং দিস্ৰা পসন্নমানসো একং মঞ্চমদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কোসলরট্ঠে গহপতিকুলে নিব্বত্তিত্ৰা মুদিতোতি লদ্ধনামো ৰিঞ্ঞুতং পাপুণি. তেন চ সমযেন তং কুলং রঞ্ঞা কেনচিদেৰ করণীযেন পলিবুদ্ধং অহোসি. মুদিতো রাজভযাভীতো পলাযিত্ৰা অরঞ্ঞং পৰিট্ঠো অঞ্ঞতরস্স খীণাসৰত্থেরস্স ৰসনট্ঠানং উপগচ্ছি. থেরো তস্স ভীতভাৰং ঞত্ৰা ‘‘মা ভাযী’’তি সমস্সাসেসি. সো ‘‘কিত্তকেন নু খো, ভন্তে, কালেন ইদং মে ভযং ৰূপসমেস্সতী’’তি পুচ্ছিত্ৰা ‘‘সত্তট্ঠমাসে অতিক্কমিত্ৰা’’তি ৰুত্তে – ‘‘এত্তকং কালং অধিৰাসেতুং ন সক্কোমি, পব্বজিস্সামহং, ভন্তে, পব্বাজেথ ম’’ন্তি জীৰিতরক্খণত্থং পব্বজ্জং যাচি. থেরো তং পব্বাজেসি. সো পব্বজিত্ৰা সাসনে পটিলদ্ধসদ্ধো ভযে ৰূপসন্তেপি সমণধম্মংযেৰ ¶ ¶ রোচেন্তো কম্মট্ঠানং গহেত্ৰা ৰিপস্সনায কম্মং করোন্তো – ‘‘অরহত্তং অপ্পত্ৰা ইমস্মা ৰসনগব্ভা বহি ন নিক্খমিস্সামী’’তিআদিনা পটিঞ্ঞং কত্ৰা ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ১.৩৬.৩০-৩৩) –

‘‘ৰিপস্সিনো ভগৰতো, লোকজেট্ঠস্স তাদিনো;

একং মঞ্চং মযা দিন্নং, পসন্নেন সপাণিনা.

‘‘হত্থিযানং অস্সযানং, দিব্বযানং সমজ্ঝগং;

তেন মঞ্চকদানেন, পত্তোম্হি আসৰক্খযং.

‘‘একনৰুতিতো কপ্পে, যং মঞ্চমদদিং তদা;

দুগ্গতিং নাভিজানামি, মঞ্চদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ৰিমুত্তিসুখং পটিসংৰেদেন্তো সহাযভিক্খূহি অধিগতং পুচ্ছিতো অত্তনো পটিপন্নাকারং কথেন্তো –

৩১১.

‘‘পব্বজিং ¶ জীৰিকত্থোহং, লদ্ধান উপসম্পদং;

ততো সদ্ধং পটিলভিং, দল়্হৰীরিযো পরক্কমিং.

৩১২.

‘‘কামং ভিজ্জতুযং কাযো, মংসপেসী ৰিসীযরুং;

উভো জণ্ণুকসন্ধীহি, জঙ্ঘাযো পপতন্তু মে.

৩১৩.

‘‘নাসিস্সং ন পিৰিস্সামি, ৰিহারা চ ন নিক্খমে;

নপি পস্সং নিপাতেস্সং, তণ্হাসল্লে অনূহতে.

৩১৪.

‘‘তস্স মেৰং ৰিহরতো, পস্স ৰীরিযপরক্কমং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. –

চতস্সো গাথা অভাসি.

তত্থ জীৰিকত্থোতি জীৰিকায অত্থিকো জীৰিকপ্পযোজনো. ‘‘এত্থ পব্বজিত্ৰা নিব্ভযো সুখেন অকিলমন্তো জীৰিস্সামী’’তি এৰং জীৰিকত্থায পব্বজিন্তি অত্থো. লদ্ধান উপসম্পদন্তি পঠমং সামণেরপব্বজ্জাযং ঠিতো ¶ ঞত্তিচতুত্থেন কম্মেন উপসম্পদং লভিত্ৰা. ততো সদ্ধং পটিলভিন্তি ততো উপসম্পন্নকালতো পট্ঠায কল্যাণমিত্তে সেৰন্তো দ্ৰে মাতিকা, তিস্সো অনুমোদনা, একচ্চং সুত্তং, সমথকম্মট্ঠানং, ৰিপস্সনাৰিধিঞ্চ উগ্গণ্হন্তো বুদ্ধাদীনং মহানুভাৰতং ¶ দিস্ৰা – ‘‘সম্মাসম্বুদ্ধো ভগৰা, স্ৰাক্খাতো ধম্মো, সুপ্পটিপন্নো সঙ্ঘো’’তি রতনত্তযে সদ্ধং পটিলভিং. দল়্হৰীরিযো পরক্কমিন্তি এৰং পটিলদ্ধসদ্ধো হুত্ৰা ৰিপস্সনায কম্মং করোন্তো নচিরস্সেৰ সচ্চপটিৰেধায দল়্হৰীরিযো থিরৰীরিযো হুত্ৰা পরক্কমিং, অকুসলানং ধম্মানং পহানায কুসলানং ধম্মানং উপসম্পদায সম্মদেৰ পদহিং.

যথা পন পরক্কমিং, তং দস্সেতুং ‘‘কাম’’ন্তিআদি ৰুত্তং. তত্থ কামন্তি যথাকামং একংসতো ৰা ভিজ্জতু. অযং কাযোতি অযং মম পূতিকাযো, ইমিনা ৰীরিযপতাপেন ভিজ্জতি চে, ভিজ্জতু ছিন্নভিন্নং হোতু. মংসপেসী ৰিসীযরুন্তি ইমিনা দল়্হপরক্কমেন ইমস্মা কাযা মংসপেসিযো ৰিসীযন্তি চে, ৰিসীযন্তু ইতো চিতো ৰিদ্ধংসন্তু. উভো জণ্ণুকসন্ধীহি, জঙ্ঘাযো পপতন্তু মেতি উভোহি জণ্ণুকসন্ধীহি সহ মম উভো জঙ্ঘাযো সত্থিযো ঊরুবন্ধতো ভিজ্জিত্ৰা ভূমিযং পপতন্তু. ‘‘ম’’ন্তিপি পাঠো, সো এৰত্থো. সেসং হেট্ঠা ৰুত্তনযমেৰ.

মুদিতত্থেরগাথাৰণ্ণনা নিট্ঠিতা.

চতুক্কনিপাতৰণ্ণনা নিট্ঠিতা.

৫. পঞ্চকনিপাতো

১. রাজদত্তত্থেরগাথাৰণ্ণনা

পঞ্চকনিপাতে ¶ ¶ ভিক্খু সিৰথিকং গন্ত্ৰাতিআদিকা আযস্মতো রাজদত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো, তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো, ইতো চতুদ্দসে কপ্পে বুদ্ধসুঞ্ঞে লোকে ¶ কুলগেহে নিব্বত্তিত্ৰা ৰিঞ্ঞুতং পত্তো, একদিৰসং কেনচিদেৰ করণীযেন ৰনন্তং উপগতো তত্থ অঞ্ঞতরং পচ্চেকবুদ্ধং রুক্খমূলে নিসিন্নং দিস্ৰা পসন্নমানসো সুপরিসুদ্ধং অম্বাটকফলং অদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং সত্থৰাহকুলে নিব্বত্তি. তস্স মহারাজং ৰেস্সৰণং আরাধেত্ৰা পটিলদ্ধভাৰতো মাতাপিতরো রাজদত্তোতি নামং অকংসু. সো ৰযপ্পত্তো পঞ্চহি সকটসতেহি ভণ্ডং আদায ৰাণিজ্জৰসেন রাজগহং অগমাসি. তেন চ সমযেন রাজগহে অঞ্ঞতরা গণিকা অভিরূপা দস্সনীযা পরমসোভগ্গযোগতো দিৰসে দিৰসে সহস্সং লভতি. অথ সো সত্থৰাহপুত্তো দিৰসে দিৰসে তস্সা গণিকায সহস্সং দত্ৰা সংৰাসং কপ্পেন্তো নচিরস্সেৰ সব্বং ধনং খেপেত্ৰা দুগ্গতো হুত্ৰা ঘাসচ্ছাদনমত্তম্পি অলভন্তো ইতো চিতো চ পরিব্ভমন্তো সংৰেগপ্পত্তো অহোসি. সো একদিৰসং উপাসকেহি সদ্ধিং ৰেল়ুৰনং অগমাসি.

তেন চ সমযেন সত্থা মহতিযা পরিসায পরিৰুতো ধম্মং দেসেন্তো নিসিন্নো হোতি. সো পরিসপরিযন্তে নিসীদিত্ৰা সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা ধুতঙ্গানি সমাদিযিত্ৰা সুসানে ৰসতি. তদা অঞ্ঞতরোপি সত্থৰাহপুত্তো সহস্সং দত্ৰা তায গণিকায সহ ৰসতি. সা চ গণিকা তস্স হত্থে মহগ্ঘরতনং দিস্ৰা লোভং উপ্পাদেত্ৰা অঞ্ঞেহি ধুত্তপুরিসেহি তং মারাপেত্ৰা তং রতনং গণ্হি. অথ তস্স সত্থৰাহপুত্তস্স মনুস্সা তং পৰত্তিং সুত্ৰা ওচরকমনুস্সে পেসেসুং. তে রত্তিযং তস্সা গণিকায ঘরং পৰিসিত্ৰা ছৰিআদীনি অনুপহচ্চেৰ তং মারেত্ৰা সিৰথিকায ছড্ডেসুং. রাজদত্তত্থেরো অসুভনিমিত্তং গহেতুং সুসানে ৰিচরন্তো তস্সা গণিকায কল়েৰরং ¶ পটিক্কুলতো মনসি কাতুং উপগতো কতিপযৰারে যোনিসো মনসি কত্ৰা অচিরমতভাৰতো সোণসিঙ্গালাদীহি অনুপহতছৰিতায ৰিসভাগৰত্থুতায চ অযোনিসো ¶ মনসিকরোন্তো, তত্থ কামরাগং উপ্পাদেত্ৰা সংৰিগ্গতরমানসো অত্তনো চিত্তং পরিভাসিত্ৰা মুহুত্তং একমন্তং অপসক্কিত্ৰা আদিতো উপট্ঠিতং অসুভনিমিত্তমেৰ গহেত্ৰা যোনিসো মনসিকরোন্তো ঝানং উপ্পাদেত্ৰা তং ঝানং পাদকং কত্ৰা ৰিপস্সনং পট্ঠপেত্ৰা তাৰদেৰ অরহত্তং পাপুণি. তেন ৰুত্তং অপদানে (অপ. থের ২.৪৪.৫৫-৫৯) –

‘‘ৰিপিনে বুদ্ধং দিস্ৰান, সযম্ভুং অপরাজিতং;

অম্বাটকং গহেত্ৰান, সযম্ভুস্স অদাসহং.

‘‘একতিংসে ইতো কপ্পে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা পীতিসোমনস্সজাতো –

৩১৫.

‘‘ভিক্খু ¶ সিৰথিকং গন্ত্ৰা, অদ্দস ইত্থিমুজ্ঝিতং;

অপৰিদ্ধং সুসানস্মিং, খজ্জন্তিং কিমিহী ফুটং.

৩১৬.

‘‘যঞ্হি একে জিগুচ্ছন্তি, মতং দিস্ৰান পাপকং;

কামরাগো পাতুরহু, অন্ধোৰ সৰতী অহুং.

৩১৭.

‘‘ওরং ওদনপাকম্হা, তম্হা ঠানা অপক্কমিং;

সতিমা সম্পজানোহং, একমন্তং উপাৰিসিং.

৩১৮.

‘‘ততো মে মনসীকারো, যোনিসো উদপজ্জথ;

আদীনৰো পাতুরহু, নিব্বিদা সমতিট্ঠথ.

৩১৯.

‘‘ততো চিত্তং ৰিমুচ্চি মে, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. –

ইমা পঞ্চ গাথা অভাসি.

তত্থ ¶ ভিক্খু সিৰথিকং গন্ত্ৰাতি সংসারে ভযস্স ইক্খনতো ভিক্খু, অসুভকম্মট্ঠানত্থং আমকসুসানং উপগন্ত্ৰা. ‘‘ভিক্খূ’’তি চেতং অত্তানং সন্ধায থেরো সযং ৰদতি. ইত্থিন্তি থীযতি এত্থ সুক্কসোণিতং সত্তসন্তানভাৰেন সংহঞ্ঞতীতি থী, মাতুগামো. এৰঞ্চ সভাৰনিরুত্তিৰসেন ‘‘ইত্থী’’তিপি ৰুচ্চতি. ৰঞ্ঝাদীসু পন তংসদিসতায তংসভাৰানতিৰত্তনতো চ তব্বোহারো. ‘‘ইত্থী’’তি ইত্থিকল়েৰরং ৰদতি. উজ্ঝিতন্তি পরিচ্চত্তং উজ্ঝনিযত্তা এৰ অপৰিদ্ধং অনপেক্খভাৰেন খিত্তং. খজ্জন্তিং কিমিহী ফুটন্তি কিমীহি পূরিতং হুত্ৰা খজ্জমানং.

যঞ্হি ¶ একে জিগুচ্ছন্তি, মতং দিস্ৰান পাপকন্তি যং অপগতাযুউস্মাৰিঞ্ঞাণতায মতং কল়েৰরং পাপকং নিহীনং লামকং একে চোক্খজাতিকা জিগুচ্ছন্তি, ওলোকেতুম্পি ন ইচ্ছন্তি. কামরাগো পাতুরহূতি তস্মিং কুণপে অযোনিসোমনসিকারস্স বলৰতায কামরাগো ময্হং পাতুরহোসি উপ্পজ্জি. অন্ধোৰ সৰতী অহুন্তি তস্মিং কল়েৰরে নৰহি দ্ৰারেহি অসুচিং সৰতি সন্দন্তে অসুচিভাৰস্স অদস্সনেন অন্ধো ৰিয অহোসিং. তেনাহ –

‘‘রত্তো অত্থং ন জানাতি, রত্তো ধম্মং ন পস্সতি;

অন্ধতমং তদা হোতি, যং রাগো সহতে নর’’ন্তি চ.

‘‘কামচ্ছন্দো খো, ব্রাহ্মণ, অন্ধকরণো অচক্খুকরণো’’তি চ আদি. কেচি পনেত্থ তকারাগমং কত্ৰা ‘‘কিলেসপরিযুট্ঠানেন অৰসৰত্তি কিলেসস্স ৰা ৰসৰত্তী’’তি অত্থং ৰদন্তি. অপরে ‘‘অন্ধোৰ অসতি অহু’’ন্তি পাল়িং ¶ ৰত্ৰা ‘‘কামরাগেন অন্ধো এৰ হুত্ৰা সতিরহিতো অহোসি’’ন্তি অত্থং ৰদন্তি. তদুভযং পন পাল়িযং নত্থি.

ওরং ওদনপাকম্হাতি ওদনপাকতো ওরং, যাৰতা কালেন সুপরিধোততিন্ততণ্ডুলনাল়িযা ওদনং পচতি, ততো ওরমেৰ কালং, ততোপি লহুকালেন রাগং ৰিনোদেন্তো, তম্হা ঠানা অপক্কমিং যস্মিং ঠানে ঠিতস্স মে রাগো উপ্পজ্জি, তম্হা ঠানা অপক্কমিং অপসক্কিং. অপক্কন্তোৰ সতিমা সম্পজানোহং সমণসঞ্ঞং উপট্ঠপেত্ৰা সতিপট্ঠানমনসিকারৰসেন সতিমা, সম্মদেৰ ধম্মসভাৰজাননেন সম্পজানো ¶ চ হুত্ৰা একমন্তং উপাৰিসিং, পল্লঙ্কং আভুজিত্ৰা নিসীদিং. নিসিন্নস্স চ ততো মে মনসীকারো, যোনিসো উদপজ্জথাতিআদি সব্বং হেট্ঠা ৰুত্তনযমেৰাতি.

রাজদত্তত্থেরগাথাৰণ্ণনা নিট্ঠিতা.

২. সুভূতত্থেরগাথাৰণ্ণনা

অযোগেতিআদিকা আযস্মতো সুভূতত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো কস্সপস্স ভগৰতো কালে বারাণসিযং গহপতিমহাসালকুলে নিব্বত্তিত্ৰা ৰিঞ্ঞুতং পত্তো একদিৰসং সত্থু সন্তিকে ধম্মং সুত্ৰা পসন্নমানসো সরণেসু চ সীলেসু চ পতিট্ঠায মাসে মাসে অট্ঠক্খত্তুং চতুজ্জাতিযগন্ধেন সত্থু গন্ধকুটিং ¶ ওপুঞ্জাপেসি. সো তেন পুঞ্ঞকম্মেন নিব্বত্তনিব্বত্তট্ঠানে সুগন্ধসরীরো হুত্ৰা, ইমস্মিং বুদ্ধুপ্পাদে মগধরট্ঠে গহপতিকুলে নিব্বত্তিত্ৰা সুভূতোতি লদ্ধনামো ৰযপ্পত্তো, নিস্সরণজ্ঝাসযতায ঘরাৰাসং পহায তিত্থিযেসু পব্বজিত্ৰা তত্থ সারং অলভন্তো, সত্থু সন্তিকে উপতিস্সকোলিতসেলাদিকে বহূ সমণব্রাহ্মণে পব্বজিত্ৰা সামঞ্ঞসুখং অনুভৰন্তে দিস্ৰা সাসনে পটিলদ্ধসদ্ধো পব্বজিত্ৰা আচরিযুপজ্ঝাযে আরাধেত্ৰা কম্মট্ঠানং গহেত্ৰা ৰিৰেকৰাসং ৰসন্তো ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৫৫.২৭২-৩০৮) –

‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

‘‘অনুব্যঞ্জনসম্পন্নো, বাত্তিংসৰরলক্খণো;

ব্যামপ্পভাপরিৰুতো, রংসিজালসমোত্থটো.

‘‘অস্সাসেতা যথা চন্দো, সূরিযোৰ পভঙ্করো;

নিব্বাপেতা যথা মেঘো, সাগরোৰ গুণাকরো.

‘‘ধরণীরিৰ ¶ সীলেন, হিমৰাৰ সমাধিনা;

আকাসো ৰিয পঞ্ঞায, অসঙ্গো অনিলো যথা.

‘‘তদাহং বারাণসিযং, উপপন্নো মহাকুলে;

পহূতধনধঞ্ঞস্মিং, নানারতনসঞ্চযে.

‘‘মহতা পরিৰারেন, নিসিন্নং লোকনাযকং;

উপেচ্চ ধম্মমস্সোসিং, অমতংৰ মনোহরং.

‘‘দ্ৰত্তিংসলক্খণধরো, সনক্খত্তোৰ চন্দিমা;

অনুব্যঞ্জনসম্পন্নো, সালরাজাৰ ফুল্লিতো.

‘‘রংসিজালপরিক্খিত্তো, দিত্তোৰ কনকাচলো;

ব্যামপ্পভাপরিৰুতো, সতরংসী দিৰাকরো.

‘‘সোণ্ণাননো জিনৰরো, সমণীৰ সিলুচ্চযো;

করুণাপুণ্ণহদযো, গুণেন ৰিয সাগরো.

‘‘লোকৰিস্সুতকিত্তি চ, সিনেরূৰ নগুত্তমো;

যসসা ৰিত্থতো ৰীরো, আকাসসদিসো মুনি.

‘‘অসঙ্গচিত্তো সব্বত্থ, অনিলো ৰিয নাযকো;

পতিট্ঠা সব্বভূতানং, মহীৰ মুনিসত্তমো.

‘‘অনুপলিত্তো লোকেন, তোযেন পদুমং যথা;

কুৰাদগচ্ছদহনো, অগ্গিক্খন্ধোৰ সোভতি.

‘‘অগদো ¶ ৰিয সব্বত্থ, কিলেসৰিসনাসকো;

গন্ধমাদনসেলোৰ, গুণগন্ধৰিভূসিতো.

‘‘গুণানং আকরো ৰীরো, রতনানংৰ সাগরো;

সিন্ধূৰ ৰনরাজীনং, কিলেসমলহারকো.

‘‘ৰিজযীৰ মহাযোধো, মারসেনাৰমদ্দনো;

চক্কৰত্তীৰ সো রাজা, বোজ্ঝঙ্গরতনিস্সরো.

‘‘মহাভিসক্কসঙ্কাসো, দোসব্যাধিতিকিচ্ছকো;

সল্লকত্তো যথা ৰেজ্জো, দিট্ঠিগণ্ডৰিফালকো.

‘‘সো ¶ তদা লোকপজ্জোতো, সনরামরসক্কতো;

পরিসাসু নরাদিচ্চো, ধম্মং দেসযতে জিনো.

‘‘দানং দত্ৰা মহাভোগো, সীলেন সুগতূপগো;

ভাৰনায চ নিব্বাতি, ইচ্চেৰমনুসাসথ.

‘‘দেসনং তং মহস্সাদং, আদিমজ্ঝন্তসোভনং;

সুণন্তি পরিসা সব্বা, অমতংৰ মহারসং.

‘‘সুত্ৰা সুমধুরং ধম্মং, পসন্নো জিনসাসনে;

সুগতং সরণং গন্ত্ৰা, যাৰজীৰং নমস্সহং.

‘‘মুনিনো গন্ধকুটিযা, ওপুঞ্জেসিং তদা মহিং;

চতুজ্জাতেন গন্ধেন, মাসে অট্ঠ দিনেস্ৰহং.

‘‘পণিধায সুগন্ধত্তং, সরীরৰিস্সগন্ধিনো;

তদা জিনো ৰিযাকাসি, সুগন্ধতনুলাভিতং.

‘‘যো যং গন্ধকুটিভূমিং, গন্ধেনোপুঞ্জতে সকিং;

তেন কম্মৰিপাকেন, উপপন্নো তহিং তহিং.

‘‘সুগন্ধদেহো সব্বত্থ, ভৰিস্সতি অযং নরো;

গুণগন্ধযুত্তো হুত্ৰা, নিব্বাযিস্সতিনাসৰো.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘পচ্ছিমে চ ভৰে দানি, জাতো ৰিপ্পকুলে অহং;

গব্ভং মে ৰসতো মাতা, দেহেনাসি সুগন্ধিতা.

‘‘যদা চ মাতুকুচ্ছিম্হা, নিক্খমামি তদা পুরী;

সাৰত্থি সব্বগন্ধেহি, ৰাসিতা ৰিয ৰাযথ.

‘‘পুপ্ফৰস্সঞ্চ সুরভি, দিব্বগন্ধং মনোরমং;

ধূপানি চ মহগ্ঘানি, উপৰাযিংসু তাৰদে.

‘‘দেৰা ¶ চ সব্বগন্ধেহি, ধূপপুপ্ফেহি তং ঘরং;

ৰাসযিংসু সুগন্ধেন, যস্মিং জাতো অহং ঘরে.

‘‘যদা ¶ চ তরুণো ভদ্দো, পঠমে যোব্বনে ঠিতো;

তদা সেলং সপরিসং, ৰিনেত্ৰা নরসারথি.

‘‘তেহি সব্বেহি পরিৰুতো, সাৰত্থিপুরমাগতো;

তদা বুদ্ধানুভাৰং তং, দিস্ৰা পব্বজিতো অহং.

‘‘সীলং সমাধিপঞ্ঞঞ্চ, ৰিমুত্তিঞ্চ অনুত্তরং;

ভাৰেত্ৰা চতুরো ধম্মে, পাপুণিং আসৰক্খযং.

‘‘যদা পব্বজিতো চাহং, যদা চ অরহা অহুং;

নিব্বাযিস্সং যদা চাহং, গন্ধৰস্সো তদা অহু.

‘‘সরীরগন্ধো চ সদাতিসেতি মে, মহারহং চন্দনচম্পকুপ্পলং;

তথেৰ গন্ধে ইতরে চ সব্বসো, পসয্হ ৰাযামি ততো তহিং তহিং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা তিত্থিযেসু পব্বজিত্ৰা অত্তনো পত্তং অত্তকিলমথানুযোগং দুক্খং, সাসনে পব্বজিত্ৰা পত্তং ঝানাদিসুখঞ্চ চিন্তেত্ৰা অত্তনো পটিপত্তিপচ্চৰেক্খণমুখেন অঞ্ঞং ব্যাকরোন্তো –

৩২০.

‘‘অযোগে ¶ যুঞ্জমত্তানং, পুরিসো কিচ্চমিচ্ছকো;

চরং চে নাধিগচ্ছেয্য, তং মে দুব্ভগলক্খণং.

৩২১.

‘‘অব্বূল়্হং অঘগতং ৰিজিতং, একঞ্চে ওস্সজেয্য কলীৰ সিযা;

সব্বানিপি চে ওস্সজেয্য অন্ধোৰ সিযা, সমৰিসমস্স অদস্সনতো.

৩২২.

‘‘যঞ্হি কযিরা তঞ্হি ৰদে, যং ন কযিরা ন তং ৰদে;

অকরোন্তং ভাসমানং, পরিজানন্তি পণ্ডিতা.

৩২৩.

‘‘যথাপি রুচিরং পুপ্ফং, ৰণ্ণৰন্তং অগন্ধকং;

এৰং সুভাসিতা ৰাচা, অফলা হোতি অকুব্বতো.

৩২৪.

‘‘যথাপি ¶ রুচিরং পুপ্ফং, ৰণ্ণৰন্তং সুগন্ধকং;

এৰং সুভাসিতা ৰাচা, সফলা হোতি কুব্বতো’’তি. –

ইমা পঞ্চ গাথা অভাসি.

তত্থ অযোগেতি অযুঞ্জিতব্বে অসেৰিতব্বে অন্তদ্ৰযে. ইধ পন অত্তকিলমথানুযোগৰসেন অত্থো ৰেদিতব্বো. যুঞ্জন্তি তস্মিং অত্তানং যুঞ্জন্তো যোজেন্তো তথা পটিপজ্জন্তো. কিচ্চমিচ্ছকোতি ¶ উভযহিতাৰহং কিচ্চং ইচ্ছন্তো, তপ্পটিপক্খতো অযোগে চরং চরন্তো চে ভৰেয্য. নাধিগচ্ছেয্যাতি যথাধিপ্পেতং হিতসুখং ন পাপুণেয্যাতি ঞাযো. তস্মা যং অহং তিত্থিযমতৰঞ্চিতো অযোগে যুঞ্জিং, তং মে দুব্ভগলক্খণং অপুঞ্ঞসভাৰো. ‘‘পুরিমকম্মব্যামোহিতো অযোগে যুঞ্জি’’ন্তি দস্সেতি.

অব্বূল়্হং অঘগতং ৰিজিতন্তি ৰিবাধনসভাৰতায অঘা নাম রাগাদযো, অঘানি এৰ অঘগতং, অঘগতানং ৰিজিতং সংসারপ্পৰত্তি, তেসং ৰিজযো কুসলধম্মাভিভৰো. ‘‘অঘগতং ৰিজিত’’ন্তি অনুনাসিকলোপং অকত্ৰা ৰুত্তং. তং অব্বূল়্হং অনুদ্ধতং যেন, তং অব্বূল়্হাঘগতং ৰিজিতং কত্ৰা এৰংভূতো হুত্ৰা, কিলেসে অসমুচ্ছিন্দিত্ৰাতি অত্থো. একঞ্চে ওস্সজেয্যাতি অদুতিযতায পধানতায চ একং অপ্পমাদং সম্মাপযোগমেৰ ৰা ওস্সজেয্য পরিচ্চজেয্য চে. কলীৰ সো পুগ্গলো কাল়কণ্ণী ৰিয সিযা. সব্বানিপি চে ওস্সজেয্যাতি সব্বানিপি ৰিমুত্তিযা পরিপাচকানি সদ্ধাৰীরিযসতিসমাধিপঞ্ঞিন্দ্রিযানি ওস্সজেয্য চে, অভাৰনায ছড্ডেয্য চে, অন্ধোৰ সিযা সমৰিসমস্স অদস্সনতো.

যথাতি ওপম্মসম্পটিপাদনত্থে নিপাতো. রুচিরন্তি সোভনং. ৰণ্ণৰন্তন্তি ৰণ্ণসণ্ঠানসম্পন্নং. অগন্ধকন্তি গন্ধরহিতং পালিভদ্দকগিরিকণ্ণিকজযসুমনাদিভেদং. এৰং সুভাসিতা ৰাচাতি সুভাসিতা ৰাচা নাম তেপিটকং বুদ্ধৰচনং ৰণ্ণসণ্ঠানসম্পন্নপুপ্ফসদিসং. যথা হি অগন্ধকং পুপ্ফং ¶ ধারেন্তস্স সরীরে গন্ধো ন ফরতি, এৰং এতম্পি যো সক্কচ্চসৰনাদীহি ¶ চ সমাচরতি, তস্স সক্কচ্চং অসমাচরন্তস্স যং তত্থ কত্তব্বং, তং অকুব্বতো সুতগন্ধং পটিপত্তিগন্ধঞ্চ ন আৰহতি অফলা হোতি. তেন ৰুত্তং ‘‘এৰং সুভাসিতা ৰাচা, অফলা হোতি অকুব্বতো’’তি.

সুগন্ধকন্তি সুমনচম্পকনীলুপ্পলপুপ্ফাদিভেদং. এৰন্তি যথা তং পুপ্ফং ধারেন্তস্স সরীরে গন্ধো ফরতি, এৰং তেপিটকবুদ্ধৰচনসঙ্খাতা সুভাসিতা ৰাচাপি যো সক্কচ্চসৰনাদীহি তত্থ কত্তব্বং করোতি, অস্স পুগ্গলস্স সফলা হোতি, সুতগন্ধপটিপত্তিগন্ধানং আৰহনতো মহপ্ফলা হোতি মহানিসংসা. তস্মা যথোৰাদং পটিপজ্জেয্য, যথাকারী তথাৰাদী চ ভৰেয্যাতি. সেসং ৰুত্তনযমেৰ.

সুভূতত্থেরগাথাৰণ্ণনা নিট্ঠিতা.

৩. গিরিমানন্দত্থেরগাথাৰণ্ণনা

ৰস্সতি ¶ দেৰোতিআদিকা আযস্মতো গিরিমানন্দত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সুমেধস্স ভগৰতো কালে কুলগেহে নিব্বত্তিত্ৰা ৰযপ্পত্তো ঘরাৰাসং ৰসন্তো অত্তনো ভরিযায পুত্তে চ কালঙ্কতে সোকসল্লসমপ্পিতো অরঞ্ঞং পৰিট্ঠো সত্থারা তত্থ গন্ত্ৰা ধম্মং কথেত্ৰা সোকসল্লে অব্বূল়্হে পসন্নমানসো সুগন্ধপুপ্ফেহি পূজেত্ৰা পঞ্চপতিট্ঠিতেন ৰন্দিত্ৰা সিরসি অঞ্জলিং কত্ৰা অভিত্থৰি.

সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে রাজগহে বিম্বিসাররঞ্ঞো পুরোহিতস্স পুত্তো হুত্ৰা নিব্বত্তি, গিরিমানন্দোতিস্স নামং অহোসি. সো ৰিঞ্ঞুতং পত্তো সত্থু রাজগহগমনে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা সমণধম্মং করোন্তো কতিপযং দিৰসং গামকাৰাসে ৰসিত্ৰা সত্থারং ৰন্দিতুং রাজগহং অগমাসি. বিম্বিসারমহারাজা তস্স আগমনং সুত্ৰা উপসঙ্কমিত্ৰা ‘‘ইধেৰ, ভন্তে, ৰসথ, অহং চতূহি পচ্চযেহি উপট্ঠহামী’’তি সম্পৰারেত্ৰা গতো ¶ বহুকিচ্চতায ন সরি. ‘‘থেরো অব্ভোকাসে ৰসতী’’তি দেৰতা থেরস্স তেমনভযেন ৰস্সং ৰারেসুং. রাজা অৰস্সনকারণং সল্লক্খেত্ৰা থেরস্স কুটিকং কারাপেসি. থেরো কুটিকাযং ৰসন্তো সেনাসনসপ্পাযলাভেন সমাধানং ¶ লভিত্ৰা ৰীরিযসমতং যোজেত্ৰা ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ১.৪০.৪১৯-৪৪৮) –

‘‘ভরিযা মে কালঙ্কতা, পুত্তো সিৰথিকং গতো;

মাতা পিতা মতা ভাতা, একচিতম্হি ডয্হরে.

‘‘তেন সোকেন সন্তত্তো, কিসো পণ্ডু অহোসহং;

চিত্তক্খেপো চ মে আসি, তেন সোকেন অট্টিতো.

‘‘সোকসল্লপরেতোহং, ৰনন্তমুপসঙ্কমিং;

পৰত্তফলং ভুঞ্জিত্ৰা, রুক্খমূলে ৰসামহং.

‘‘সুমেধো নাম সম্বুদ্ধো, দুক্খস্সন্তকরো জিনো;

মমুদ্ধরিতুকামো সো, আগঞ্ছি মম সন্তিকং.

‘‘পদসদ্দং ¶ সুণিত্ৰান, সুমেধস্স মহেসিনো;

পগ্গহেত্ৰানহং সীসং, উল্লোকেসিং মহামুনিং.

‘‘উপাগতে মহাৰীরে, পীতি মে উদপজ্জথ;

তদাসিমেকগ্গমনো, দিস্ৰা তং লোকনাযকং.

‘‘সতিং পটিলভিত্ৰান, পণ্ণমুট্ঠিমদাসহং;

নিসীদি ভগৰা তত্থ, অনুকম্পায চক্খুমা.

‘‘নিসজ্জ তত্থ ভগৰা, সুমেধো লোকনাযকো;

ধম্মং মে কথযী বুদ্ধো, সোকসল্লৰিনোদনং.

‘‘অনৰ্হিতা ততো আগুং, অননুঞ্ঞাতা ইতো গতা;

যথাগতা তথা গতা, তত্থ কা পরিদেৰনা.

‘‘যথাপি পথিকা সত্তা, ৰস্সমানায ৰুট্ঠিযা;

সভণ্ডা উপগচ্ছন্তি, ৰস্সস্সাপতনায তে.

‘‘ৰস্সে ¶ চ তে ওরমিতে, সম্পযন্তি যদিচ্ছকং;

এৰং মাতা পিতা তুয্হং, তত্থ কা পরিদেৰনা.

‘‘আগন্তুকা পাহুনকা, চলিতেরিতকম্পিতা;

এৰং মাতা পিতা তুয্হং, তত্থ কা পরিদেৰনা.

‘‘যথাপি উরগো জিণ্ণং, হিত্ৰা গচ্ছতি সং তচং;

এৰং মাতা পিতা তুয্হং, সং তনুং ইধ হীযরে.

‘‘বুদ্ধস্স গিরমঞ্ঞায, সোকসল্লং ৰিৰজ্জযিং;

পামোজ্জং জনযিত্ৰান, বুদ্ধসেট্ঠং অৰন্দহং.

‘‘ৰন্দিত্ৰান মহানাগং, পূজযিং গিরিমঞ্জরিং;

দিব্বগন্ধং সম্পৰন্তং, সুমেধং লোকনাযকং.

‘‘পূজযিত্ৰান সম্বুদ্ধং, সিরে কত্ৰান অঞ্জলিং;

অনুস্সরং গুণগ্গানি, সন্থৰিং লোকনাযকং.

‘‘নিত্তিণ্ণোসি মহাৰীর, সব্বঞ্ঞু লোকনাযক;

সব্বে সত্তে উদ্ধরসি, ঞাণেন ত্ৰং মহামুনে.

‘‘ৰিমতিং দ্ৰেল়্হকং ৰাপি, সঞ্ছিন্দসি মহামুনে;

পটিপাদেসি মে মগ্গং, তৰ ঞাণেন চক্খুম.

‘‘অরহা ৰসিপত্তা চ, ছল়ভিঞ্ঞা মহিদ্ধিকা;

অন্তলিক্খচরা ধীরা, পরিৰারেন্তি তাৰদে.

‘‘পটিপন্না চ সেখা চ, ফলট্ঠা সন্তি সাৰকা;

সুরোদযেৰ পদুমা, পুপ্ফন্তি তৰ সাৰকা.

‘‘মহাসমুদ্দোৰক্খোভো ¶ , অতুলোপি দুরুত্তরো;

এৰং ঞাণেন সম্পন্নো, অপ্পমেয্যোসি চক্খুম.

‘‘ৰন্দিত্ৰাহং লোকজিনং, চক্খুমন্তং মহাযসং;

পুথুদিসা নমস্সন্তো, পটিকুটিকো আগঞ্ছহং.

‘‘দেৰলোকা চৰিত্ৰান, সম্পজানো পতিস্সতো;

ওক্কমিং মাতুযা কুচ্ছিং, সন্ধাৰন্তো ভৰাভৰে.

‘‘অগারা ¶ অভিনিক্খম্ম, পব্বজিং অনগারিযং;

আতাপী নিপকো ঝাযী, পটিসল্লানগোচরো.

‘‘পধানং পদহিত্ৰান, তোসযিত্ৰা মহামুনিং;

চন্দোৰব্ভঘনা মুত্তো, ৰিচরামি অহং সদা.

‘‘ৰিৰেকমনুযুত্তোম্হি, উপসন্তো নিরূপধি;

সব্বাসৰে পরিঞ্ঞায, ৰিহরামি অনাসৰো.

‘‘তিংসকপ্পসহস্সম্হি, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অথ থেরস্স অরহত্তপ্পত্তিযা হট্ঠতুট্ঠে ৰিয দেৰে ৰস্সন্তে উপরি তং ৰস্সনে নিযোজনমুখেন অঞ্ঞং ব্যাকরোন্তো –

৩২৫.

‘‘ৰস্সতি দেৰো যথাসুগীতং, ছন্না মে কুটিকা সুখা নিৰাতা;

তস্সং ৰিহরামি ৰূপসন্তো, অথ চে পত্থযসী পৰস্স দেৰ.

৩২৬.

‘‘ৰস্সতি দেৰো যথাসুগীতং, ছন্না মে কুটিকা সুখা নিৰাতা;

তস্সং ৰিহরামি সন্তচিত্তো, অথ চে পত্থযসী পৰস্স দেৰ.

৩২৭.

‘‘ৰস্সতি দেৰো…পে… তস্সং ৰিহরামি ৰীতরাগো…পে….

৩২৮.

‘‘ৰস্সতি দেৰো…পে… তস্সং ৰিহরামি ৰীতদোসো…পে….

৩২৯.

‘‘ৰস্সতি দেৰো…পে… তস্সং ৰিহরামি ৰীতমোহো;

অথ চে পত্থযসী পৰস্স দেৰা’’তি. – ইমা পঞ্চ গাথা অভাসি;

তত্থ ¶ যথাসুগীতন্তি সুগীতানুরূপং, সুন্দরস্স অত্তনো মেঘগীতস্স অনুরূপমেৰাতি অত্থো. ৰলাহকো হি যথা অগজ্জন্তো কেৰলং ৰস্সন্তো ন সোভতি, এৰং সতপটলসহস্সপটলেন উট্ঠহিত্ৰা থনযন্তো গজ্জন্তো ৰিজ্জুল্লতা নিচ্ছারেন্তোপি অৰস্সন্তো ন সোভতি, তথাভূতো পন হুত্ৰা ৰস্সন্তো সোভতীতি ৰুত্তং ‘‘ৰস্সতি দেৰো যথাসুগীত’’ন্তি. তেনাহ – ‘‘অভিত্থনয, পজ্জুন্ন’’ ¶ , (চরিযা. ৩.৮৯; জা. ১.১.৭৫) ‘‘গজ্জিতা চেৰ ৰস্সিতা চা’’তি (অ. নি. ৪.১০১; পু. প. ১৫৭) চ. তস্সং ৰিহরামীতি তস্সং কুটিকাযং অরিযৰিহারগব্ভেন ইরিযাপথৰিহারেন ৰিহরামি. ৰূপসন্তচিত্তোতি অগ্গফলসমাধিনা সম্মদেৰ উপসন্তমানসো.

এৰং থেরস্স অনেকৰারং কতং উয্যোজনং সিরসা সম্পটিচ্ছন্তো ৰলাহকদেৰপুত্তো নিন্নঞ্চ থলঞ্চ পূরেন্তো মহাৰস্সং ৰস্সাপেসি.

গিরিমানন্দত্থেরগাথাৰণ্ণনা নিট্ঠিতা.

৪. সুমনত্থেরগাথাৰণ্ণনা

যং পত্থযানোতিআদিকা আযস্মতো সুমনত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইতো পঞ্চনৰুতে কপ্পে বুদ্ধসুঞ্ঞে লোকে কুলগেহে নিব্বত্তিত্ৰা ৰিঞ্ঞুতং পত্তো একং পচ্চেকবুদ্ধং ব্যাধিতং দিস্ৰা হরীতকং অদাসি ¶ . সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কোসলরট্ঠে গহপতিকুলে নিব্বত্তিত্ৰা সুমনোতি লদ্ধনামো সুখেন ৰড্ঢি. তস্স পন মাতুলো পব্বজিত্ৰা অরহা হুত্ৰা অরঞ্ঞে ৰিহরন্তো সুমনে ৰযপ্পত্তে তং পব্বাজেত্ৰা চরিতানুকূলং কম্মট্ঠানং অদাসি. সো তত্থ যোগকম্মং করোন্তো চত্তারি ঝানানি পঞ্চ চ অভিঞ্ঞাযো নিব্বত্তেসি. অথস্স থেরো ৰিপস্সনাৰিধিং আচিক্খি. সো চ নচিরেনেৰ ৰিপস্সনং ৰড্ঢেত্ৰা অরহত্তে পতিট্ঠাসি. তেন ৰুত্তং অপদানে (অপ. থের ২.৪৪.৬০-৭১) –

‘‘হরীতকং আমলকং, অম্বজম্বুৰিভীতকং;

কোলং ভল্লাতকং বিল্লং, সযমেৰ হরামহং.

‘‘দিস্ৰান ¶ পব্ভারগতং, ঝাযিং ঝানরতং মুনিং;

আবাধেন আপীল়েন্তং, অদুতীযং মহামুনিং.

‘‘হরীতকং গহেত্ৰান, সযম্ভুস্স অদাসহং;

খাদমত্তম্হি ভেসজ্জে, ব্যাধি পস্সম্ভি তাৰদে.

‘‘পহীনদরথো বুদ্ধো, অনুমোদমকাসি মে;

ভেসজ্জদানেনিমিনা, ব্যাধিৰূপসমেন চ.

‘‘দেৰভূতো ¶ মনুস্সো ৰা, জাতো ৰা অঞ্ঞজাতিযা;

সব্বত্থ সুখিতো হোতু, মা চ তে ব্যাধিমাগমা.

‘‘ইদং ৰত্ৰান সম্বুদ্ধো, সযম্ভূ অপরাজিতো;

নভং অব্ভুগ্গমী ধীরো, হংসরাজাৰ অম্বরে.

‘‘যতো হরীতকং দিন্নং, সযম্ভুস্স মহেসিনো;

ইমং জাতিং উপাদায, ব্যাধি মে নুপপজ্জথ.

‘‘অযং পচ্ছিমকো ময্হং, চরিমো ৰত্ততে ভৰো;

তিস্সো ৰিজ্জা সচ্ছিকতা, কতং বুদ্ধস্স সাসনং.

‘‘চতুন্নৰুতিতো কপ্পে, ভেসজ্জমদদিং তদা;

দুগ্গতিং নাভিজানামি, ভেসজ্জস্স ইদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তে পন পতিট্ঠিতো একদিৰসং মাতুলত্থেরস্স উপট্ঠানং অগমাসি. তং থেরো অধিগমং পুচ্ছি, তং ব্যাকরোন্তো –

৩৩০.

‘‘যং পত্থযানো ধম্মেসু, উপজ্ঝাযো অনুগ্গহি;

অমতং অভিকঙ্খন্তং, কতং কত্তব্বকং মযা.

৩৩১.

‘‘অনুপ্পত্তো সচ্ছিকতো, সযং ধম্মো অনীতিহো;

ৰিসুদ্ধঞাণো নিক্কঙ্খো, ব্যাকরোমি তৰন্তিকে.

৩৩২.

‘‘পুব্বেনিৰাসং জানামি, দিব্বচক্খু ৰিসোধিতং;

সদত্থো মে অনুপ্পত্তো, কতং বুদ্ধস্স সাসনং.

৩৩৩.

‘‘অপ্পমত্তস্স ¶ মে সিক্খা, সুস্সুতা তৰ সাসনে;

সব্বে মে আসৰা খীণা, নত্থি দানি পুনব্ভৰো.

৩৩৪.

‘‘অনুসাসি মং অরিযৰতা, অনুকম্পি অনুগ্গহি;

অমোঘো তুয্হমোৰাদো, অন্তেৰাসিম্হি সিক্খিতো’’তি. –

ইমাহি পঞ্চহি গাথাহি সীহনাদং নদন্তো অঞ্ঞং ব্যাকাসি.

তত্থ যং পত্থযানো ধম্মেসু, উপজ্ঝাযো অনুগ্গহি. অমতং অভিকঙ্খন্তন্তি সমথৰিপস্সনাদীসু অনৰজ্জধম্মেসু যং ধম্মং ময্হং পত্থযন্তো আকঙ্খন্তো উপজ্ঝাযো অমতং নিব্বানং অভিকঙ্খন্তং মং ওৰাদদানৰসেন অনুগ্গণ্হি. কতং কত্তব্বকং মযাতি তস্স অধিগমত্থং কত্তব্বং পরিঞ্ঞাদিসোল়সৰিধং কিচ্চং কতং নিট্ঠাপিতং মযা.

ততো ¶ এৰ অনুপ্পত্তো অধিগতো চতুব্বিধোপি মগ্গধম্মো সচ্ছিকতো. সযং ধম্মো অনীতিহোতি সযং অত্তনাযেৰ নিব্বানধম্মো ফলধম্মো চ অনীতিহো অসন্দিদ্ধো অত্তপচ্চক্খো কতো, ‘‘ইতিহ, ইতি কিরা’’তি পৰত্তিযা ইতিহসঙ্খাতং সংসযং সমুচ্ছিন্দন্তোযেৰ অরিযমগ্গো পৰত্ততি. তেনাহ ‘‘ৰিসুদ্ধঞাণো নিক্কঙ্খো’’তিআদি. তত্থ ৰিসুদ্ধঞাণোতি সব্বসংকিলেসৰিসুদ্ধিযা ৰিসুদ্ধঞাণো. তৰন্তিকেতি তৰ সমীপে.

সদত্থোতি অরহত্তং. সিক্খাতি ¶ অধিসীলসিক্খাদযো. সুস্সুতাতি পরিযত্তিবাহুসচ্চস্স পটিৰেধবাহুসচ্চস্স চ পারিপূরিৰসেন সুট্ঠু সুতা. তৰ সাসনেতি তৰ ওৰাদে অনুসিট্ঠিযং ঠিতস্স.

অরিযৰতাতি সুৰিসুদ্ধসীলাদিৰতসমাদানেন. অন্তেৰাসিম্হি সিক্খিতোতি তুয্হং সমীপে চিণ্ণব্রহ্মচরিযৰাসতায অন্তেৰাসী সিক্খিতৰা সিক্খিতঅধিসীলাদিসিক্খো অম্হীতি.

সুমনত্থেরগাথাৰণ্ণনা নিট্ঠিতা.

৫. ৰড্ঢত্থেরগাথাৰণ্ণনা

সাধূ ¶ হীতিআদিকা আযস্মতো ৰড্ঢত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ইমস্মিং বুদ্ধুপ্পাদে ভারুকচ্ছনগরে গহপতিকুলে নিব্বত্তিত্ৰা ৰড্ঢোতি লদ্ধনামো অনুপুব্বেন ৰড্ঢতি. অথস্স মাতা সংসারে সঞ্জাতসংৰেগা পুত্তং ঞাতীনং নিয্যাদেত্ৰা ভিক্খুনীনং সন্তিকে পব্বজিত্ৰা ৰিপস্সনায কম্মং করোন্তী অরহত্তং পাপুণিত্ৰা অপরেন সমযেন পুত্তম্পি ৰিঞ্ঞুতং পত্তং ৰেল়ুদন্তত্থেরস্স সন্তিকে পব্বাজেসি. সো পব্বজিতো বুদ্ধৰচনং উগ্গহেত্ৰা বহুস্সুতো ধম্মকথিকো হুত্ৰা গন্থধুরং ৰহন্তো একদিৰসং ‘‘এককো সন্তরুত্তরোৰ মাতরং পস্সিস্সামী’’তি ভিক্খুনুপস্সযং অগমাসি. তং দিস্ৰা মাতা ‘‘কস্মা ত্ৰং এককো সন্তরুত্তরোৰ ইধাগতো’’তি চোদেসি. সো মাতরা চোদিযমানো ‘‘অযুত্তং মযা কত’’ন্তি উপ্পন্নসংৰেগো ৰিহারং গন্ত্ৰা দিৰাট্ঠানে নিসিন্নো ৰিপস্সিত্ৰা অরহত্তং পত্ৰা মাতু ওৰাদসম্পত্তিপকাসনমুখেন অঞ্ঞং ব্যাকরোন্তো –

৩৩৫.

‘‘সাধূ ¶ হি কির মে মাতা, পতোদং উপদংসযি;

যস্সাহং ৰচনং সুত্ৰা, অনুসিট্ঠো জনেত্তিযা;

আরদ্ধৰীরিযো পহিতত্তো, পত্তো সম্বোধিমুত্তমং.

৩৩৬.

‘‘অরহা দক্খিণেয্যোম্হি, তেৰিজ্জো অমতদ্দসো;

জেত্ৰা নমুচিনো সেনং, ৰিহরামি অনাসৰো.

৩৩৭.

‘‘অজ্ঝত্তঞ্চ বহিদ্ধা চ, যে মে ৰিজ্জিংসু আসৰা;

সব্বে অসেসা উচ্ছিন্না, ন চ উপ্পজ্জরে পুন.

৩৩৮.

‘‘ৰিসারদা খো ভগিনী, এৰমত্থং অভাসযি;

অপিহা নূন মযিপি, ৰনথো তে ন ৰিজ্জতি.

৩৩৯.

‘‘পরিযন্তকতং দুক্খং, অন্তিমোযং সমুস্সযো;

জাতিমরণসংসারো, নত্থি দানি পুনব্ভৰো’’তি. – ইমা গাথা অভাসি;

তত্থ ¶ ¶ সাধূ হি কির মে মাতা, পতোদং উপদংসযীতি সাধু ৰত মাতা ময্হং ওৰাদসঙ্খাতং পতোদং দস্সেতি, তেন মে ৰীরিযং উত্তেজেন্তী উত্তমঙ্গে পঞ্ঞাসীসে ৰিজ্ঝি. যস্সাতি যস্সা মে মাতুযা. সম্বোধিন্তি অরহত্তং. অযঞ্হেত্থ যোজনা – জনেত্তিযা মে অনুসিট্ঠো যস্সা অনুসাসনীভূতং ৰচনং সুত্ৰা অহং আরদ্ধৰীরিযো পহিতত্তো ৰিহরন্তো উত্তমং অগ্গফলং সম্বোধিং অরহত্তং পত্তো.

ততো এৰ আরকত্তা কিলেসেহি অরহা পুঞ্ঞক্খেত্ততায দক্খিণেয্যো দক্খিণারহো অম্হি. পুব্বেনিৰাসঞাণাদিৰিজ্জাত্তযস্স অধিগতত্তা তেৰিজ্জো নিব্বানস্স সচ্ছিকতত্তা অমতদ্দসো নমুচিনো মারস্স সেনং কিলেসৰাহিনিং বোধিপক্খিযসেনায জিনিত্ৰা তস্স জিতত্তাযেৰ অনাসৰো সুখং ৰিহরামীতি.

ইদানি ‘‘অনাসৰো’’তি ৰুত্তমত্থং পাকটতরং কাতুং ‘‘অজ্ঝত্তঞ্চা’’ তি গাথমাহ. তস্সত্থো – অজ্ঝত্তং অজ্ঝত্তৰত্থুকা চ বহিদ্ধা বহিদ্ধৰত্থুকা চ আসৰা যে ময্হং অরিযমগ্গাধিগমতো পুব্বে ৰিজ্জিংসু উপলব্ভিংসু, তে সব্বে অনৰসেসা উচ্ছিন্না অরিযমগ্গেন সমুচ্ছিন্না পহীনা পুন দানি কদাচিপি ন চ উপ্পজ্জেয্যুং ন উপ্পজ্জিস্সন্তিযেৰাতি.

ইদানি মাতু ৰচনং অঙ্কুসং কত্ৰা অত্তনা অরহত্তস্স অধিগতত্তা মাতরং থোমেন্তো ‘‘ৰিসারদা’’তি গাথমাহ. তত্থ ৰিসারদা খোতি একংসেন ৰিগতসারজ্জা. এৰং মাতু অত্তনো ¶ চ অরহত্তাধিগমেন সত্থু ওরসপুত্তভাৰং উল্লপেন্তো মাতরং ‘‘ভগিনী’’তি আহ. এতমত্থং অভাসযীতি এতং মম ওৰাদভূতং অত্থং অভণি. এৰং পন মং ওৰদন্তী ন কেৰলং ৰিসারদা এৰ, অথ খো অপিহা নূন মযিপি তৰ পুত্তকেপি অপিহা অসন্থৰা মঞ্ঞে, কিং ৰা এতেন পরিকপ্পনেন? ৰনথো তে ন ৰিজ্জতি অৰিজ্জাদিকো ৰনথো তৰ সন্তানে নত্থেৰ, যা মং ভৰক্খযে নিযোজেসীতি অধিপ্পাযো.

ইদানি ‘‘তযা নিযোজিতাকারেনেৰ মযা পটিপন্ন’’ন্তি দস্সেন্তো ‘‘পরিযন্তকত’’ন্তি ওসানগাথমাহ, তস্সত্থো সুৰিঞ্ঞেয্যোৰ.

ৰড্ঢত্থেরগাথাৰণ্ণনা নিট্ঠিতা.

৬. নদীকস্সপত্থেরগাথাৰণ্ণনা

অত্থায ¶ ৰত মেতিআদিকা আযস্মতো নদীকস্সপত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো পদুমুত্তরস্স ভগৰতো কালে ¶ কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং পিণ্ডায চরন্তং দিস্ৰা পসন্নমানসো অত্তনা রোপিতস্স অম্বরুক্খস্স পঠমুপ্পন্নং মনোসিলাৰণ্ণং একং অম্বফলং অদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে মগধরট্ঠে ব্রাহ্মণকুলে উরুৰেলকস্সপস্স ভাতা হুত্ৰা নিব্বত্তো. ৰযপ্পত্তো নিস্সরণজ্ঝাসযতায ঘরাৰাসং অনিচ্ছন্তো তাপসপব্বজ্জং পব্বজিত্ৰা তীহি তাপসসতেহি সদ্ধিং নেরঞ্জরায নদিযা তীরে অস্সমং মাপেত্ৰা ৰিহরতি. নদীতীরে ৰসনতো হিস্স কস্সপগোত্ততায চ নদীকস্সপোতি সমঞ্ঞা অহোসি. তস্স ভগৰা সপরিসস্স এহিভিক্খুভাৰেন উপসম্পদং অদাসি. তং সব্বং খন্ধকে (মহাৰ. ৩৬-৩৯) আগতমেৰ. সো ভগৰতো আদিত্তপরিযাযদেসনায (মহাৰ. ৫৪; সং. নি. ৪.২৮) অরহত্তে পতিট্ঠাসি. তেন ৰুত্তং অপদানে (অপ. থের ২.৪৪.৮১-৮৭) –

‘‘পদুমুত্তরবুদ্ধস্স, লোকজেট্ঠস্স তাদিনো;

পিণ্ডায ৰিচরন্তস্স, ধারতো উত্তমং যসং.

‘‘অগ্গফলং ¶ গহেত্ৰান, ৰিপ্পসন্নেন চেতসা;

দক্খিণেয্যস্স ৰীরস্স, অদাসিং সত্থুনো অহং.

‘‘তেন কম্মেন দ্ৰিপদিন্দ, লোকজেট্ঠ নরাসভ;

পত্তোম্হি অচলং ঠানং, হিত্ৰা জযপরাজযং.

‘‘সতসহস্সিতো কপ্পে, যং দানমদদিং তদা;

দুগ্গতিং নাভিজানামি, অগ্গদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তে পন পতিট্ঠিতো অপরভাগে অত্তনো পটিপত্তিং পচ্চৰেক্খিত্ৰা দিট্ঠিসমুগ্ঘাতকিত্তনমুখেন অঞ্ঞং ব্যাকরোন্তো –

৩৪০.

‘‘অত্থায ¶ ৰত মে বুদ্ধো, নদিং নেরঞ্জরং অগা;

যস্সাহং ধম্মং সুত্ৰান, মিচ্ছাদিট্ঠিং ৰিৰজ্জযিং.

৩৪১.

‘‘যজিং উচ্চাৰচে যঞ্ঞে, অগ্গিহুত্তং জুহিং অহং;

এসা সুদ্ধীতি মঞ্ঞন্তো, অন্ধভূতো পুথুজ্জনো.

৩৪২.

‘‘দিট্ঠিগহনপক্খন্দো, পরামাসেন মোহিতো;

অসুদ্ধিং মঞ্ঞিসং সুদ্ধিং, অন্ধভূতো অৰিদ্দসু.

৩৪৩.

‘‘মিচ্ছাদিট্ঠি পহীনা মে, ভৰা সব্বে ৰিদালিতা;

জুহামি দক্খিণেয্যগ্গিং, নমস্সামি তথাগতং.

৩৪৪.

‘‘মোহা সব্বে পহীনা মে, ভৰতণ্হা পদালিতা;

ৰিক্খীণো জাতিসংসারো, নত্থি দানি পুনব্ভৰো’’তি. –

ইমা পঞ্চ গাথা অভাসি.

তত্থ অত্থায ৰত মেতি ময্হং অত্থায ৰত হিতায ৰত. বুদ্ধোতি সব্বঞ্ঞুবুদ্ধো. নদিং নেরঞ্জরং অগাতি নেরঞ্জরাসঙ্খাতং নদিং অগঞ্ছি, তস্সা নদিযা তীরে চ মম ভাতু উরুৰেলকস্সপস্স অস্সমং উপগতোতি অধিপ্পাযো.

ইদানি যথাৰুত্তমত্থং ৰিৰরিতুং ‘‘যস্সাহ’’ন্তিআদি ৰুত্তং. যস্সাতি যস্স বুদ্ধস্স ভগৰতো. ধম্মং সুত্ৰানাতি চতুসচ্চপটিসংযুত্তং ধম্মং সুত্ৰা, সোতদ্ৰারানুসারেন উপলভিত্ৰা. মিচ্ছাদিট্ঠিং ৰিৰজ্জযিন্তি ¶ ‘‘যঞ্ঞাদীহি সুদ্ধি হোতী’’তিআদিনযপ্পৰত্তং ৰিপরীতদস্সনং পজহিং.

মিচ্ছাদিট্ঠিং ¶ ৰিৰজ্জযিন্তি ৰুত্তমেৰত্থং ৰিত্থারেত্ৰা দস্সেতুং ‘‘যজি’’ন্তিআদিমাহ. তত্থ যজিং উচ্চাৰচে যঞ্ঞেতি পাকটযঞ্ঞে সোমযাগৰাজপেয্যাদিকে নানাৰিধে যঞ্ঞে যজিং. অগ্গিহুত্তং জুহিং অহন্তি তেসং যঞ্ঞানং যজনৰসেন আহুতিং পগ্গণ্হন্তো অগ্গিং পরিচরিং. এসা সুদ্ধীতি মঞ্ঞন্তোতি এসা যঞ্ঞকিরিযা অগ্গিপারিচরিযা সুদ্ধিহেতুভাৰতো সুদ্ধি ‘‘এৰং মে সংসারসুদ্ধি হোতী’’তি মঞ্ঞমানো. অন্ধভূতো পুথুজ্জনোতি পঞ্ঞাচক্খুৰেকল্লেন অৰিজ্জন্ধতায অন্ধভূতো পুথুজ্জনো হুত্ৰা ৰনগহনপব্বতগহনাদীনি ৰিয দুরতিক্কমনট্ঠেন দিট্ঠিযেৰ গহনং দিট্ঠিগহনং ¶ , তং পক্খন্দো অনুপৰিট্ঠোতি দিট্ঠিগহনপক্খন্দো. পরামাসেনাতি ধম্মসভাৰং অতিক্কমিত্ৰা ‘‘ইদমেৰ সচ্চ’’ন্তি পরামসনতো পরামাসসঙ্খাতেন মিচ্ছাভিনিৰেসেন. মোহিতোতি মূল়্হভাৰং পাপিতো. অসুদ্ধিং মঞ্ঞিসং সুদ্ধিন্তি অসুদ্ধিং মগ্গং ‘‘সুদ্ধিং মগ্গ’’ন্তি মঞ্ঞিসং মঞ্ঞিং. তত্থ কারণমাহ ‘‘অন্ধভূতো অৰিদ্দসূ’’তি. যস্মা অৰিজ্জায অন্ধভূতো, ততো এৰ ধম্মাধম্মং যুত্তাযুত্তঞ্চ অৰিদ্ৰা, তস্মা তথা মঞ্ঞিন্তি অত্থো.

মিচ্ছাদিট্ঠি পহীনা মেতি এৰংভূতস্স পন সত্থু সম্মুখা চতুসচ্চগব্ভং ধম্মকথং সুত্ৰা যোনিসো পটিপজ্জন্তস্স অরিযমগ্গসম্মাদিট্ঠিযা সব্বাপি মিচ্ছাদিট্ঠি সমুচ্ছেদপ্পহানৰসেন ময্হং পহীনা. ভৰাতি কামভৰাদযো সব্বেপি ভৰা অরিযমগ্গসত্থেন ৰিদালিতা ৰিদ্ধংসিতা. জুহামি দক্খিণেয্যগ্গিন্তি আহৰনীযাদিকে অগ্গী ছড্ডেত্ৰা সদেৰকস্স লোকস্স অগ্গদক্খিণেয্যতায সব্বস্স চ পাপস্স দহনতো দক্খিণেয্যগ্গিং সম্মাসম্বুদ্ধং জুহামি পরিচরামি. তযিদং ময্হং দক্খিণেয্যগ্গিপরিচরণং দধিনৰনীতমথিতসপ্পিআদিনিরপেক্খং সত্থু নমস্সনমেৰাতি আহ ‘‘নমস্সামি তথাগত’’ন্তি. অথ ৰা জুহামি দক্খিণেয্যগ্গিন্তি দাযকানং দক্খিণায মহপ্ফলভাৰকরণেন পাপস্স চ দহনেন দক্খিণেয্যগ্গিভূতং অত্তানং জুহামি পরিচরামি তথা কত্ৰা পরিচরামি, তথা কত্ৰা পরিহরামি. পুব্বে অগ্গিদেৰং নমস্সামি, ইদানি পন নমস্সামি তথাগতন্তি.

মোহা সব্বে পহীনা মেতি দুক্খে অঞ্ঞাণাদিভেদা সব্বে মোহা ময্হং পহীনা সমুচ্ছিন্না, ততো এৰ ‘‘ভৰতণ্হা পদালিতা. ৰিক্খীণো জাতিসংসারো, নত্থি দানি পুনব্ভৰো’’তি তীসু পদেসু মে-সদ্দো আনেত্ৰা যোজেতব্বো.

নদীকস্সপত্থেরগাথাৰণ্ণনা নিট্ঠিতা.

৭. গযাকস্সপত্থেরগাথাৰণ্ণনা

পাতো ¶ ¶ মজ্ঝন্হিকন্তিআদিকা আযস্মতো গযাকস্সপত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো ইতো একতিংসে কপ্পে সিখিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো নিস্সরণজ্ঝাসযতায ঘরাৰাসং পহায তাপসপব্বজ্জং পব্বজিত্ৰা অরঞ্ঞাযতনে ¶ অস্সমং কারেত্ৰা ৰনমূলফলাহারো ৰসতি. তেন চ সমযেন ভগৰা একো অদুতিযো তস্স অস্সমসমীপেন গচ্ছতি. সো ভগৰন্তং দিস্ৰা পসন্নমানসো উপসঙ্কমিত্ৰা ৰন্দিত্ৰা একমন্তং ঠিতো ৰেলং ওলোকেত্ৰা মনোহরানি কোলফলানি সত্থু উপনেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে ব্রাহ্মণকুলে নিব্বত্তিত্ৰা ৰযপ্পত্তো নিস্সরণজ্ঝাসযতায ঘরাৰাসং পহায তাপসপব্বজ্জং পব্বজিত্ৰা দ্ৰীহি তাপসসতেহি সদ্ধিং গযাযং ৰিহরতি. গযাযং ৰসনতো হিস্স কস্সপগোত্ততায চ গযাকস্সপোতি সমঞ্ঞা অহোসি. সো ভগৰতা সদ্ধিং পরিসায এহিভিক্খূপসম্পদং দত্ৰা আদিত্তপরিযাযদেসনায (মহাৰ. ৫৪) ওৰদিযমানো অরহত্তে পতিট্ঠাসি. তেন ৰুত্তং অপদানে (অপ. থের ২.৪৫.৮-১৪) –

‘‘অজিনেন নিৰত্থোহং, ৰাকচীরধরো তদা;

খারিযা পূরযিত্ৰানং, কোলংহাসিং মমস্সমং.

‘‘তম্হি কালে সিখী বুদ্ধো, একো অদুতিযো অহু;

মমস্সমং উপগচ্ছি, জানন্তো সব্বকালিকং.

‘‘সকং চিত্তং পসাদেত্ৰা, ৰন্দিত্ৰান চ সুব্বতং;

উভো হত্থেহি পগ্গয্হ, কোলং বুদ্ধস্সদাসহং.

‘‘একতিংসে ইতো কপ্পে, যং ফলমদদিং তদা;

দুগ্গতিং নাভিজানামি, কোলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তে পন পতিট্ঠিতো অত্তনো পটিপত্তিং পচ্চৰেক্খিত্ৰা পাপপৰাহনকিত্তনমুখেন অঞ্ঞং ব্যাকরোন্তো –

৩৪৫.

‘‘পাতো মজ্ঝন্হিকং সাযং, তিক্খত্তুং দিৰসস্সহং;

ওতরিং উদকং সোহং, গযায গযফগ্গুযা.

৩৪৬.

‘‘যং ¶ মযা পকতং পাপং, পুব্বে অঞ্ঞাসু জাতিসু;

তং দানীধ পৰাহেমি, এৰংদিট্ঠি পুরে অহুং.

৩৪৭.

‘‘সুত্ৰা ¶ সুভাসিতং ৰাচং, ধম্মত্থসহিতং পদং;

তথং যাথাৰকং অত্থং, যোনিসো পচ্চৰেক্খিসং.

৩৪৮.

‘‘নিন্হাতসব্বপাপোম্হি, নিম্মলো পযতো সুচি;

সুদ্ধো সুদ্ধস্স দাযাদো, পুত্তো বুদ্ধস্স ওরসো.

৩৪৯.

‘‘ওগয্হট্ঠঙ্গিকং সোতং, সব্বপাপং পৰাহযিং;

তিস্সো ৰিজ্জা অজ্ঝগমিং, কতং বুদ্ধস্স সাসন’’ন্তি. –

ইমা পঞ্চ গাথা অভাসি.

তত্থ পঠমগাথায তাৰ অযং সঙ্খেপত্থো – পাতো সূরিযুগ্গমনৰেলাযং, মজ্ঝন্হিকং ¶ মজ্ঝন্হৰেলাযং, সাযং সাযন্হৰেলাযন্তি দিৰসস্স তিক্খত্তুং তযো ৰারে অহং উদকং ওতরিং ওগাহিং. ওতরন্তো চ সোহং ন যত্থ কত্থচি যদা ৰা তদা ৰা ওতরিং, অথ খো গযায মহাজনস্স ‘‘পাপপৰাহন’’ন্তি অভিসম্মতে গযাতিত্থে, গযফগ্গুযা গযাফগ্গুনামকে ফগ্গুনীমাসস্স উত্তরফগ্গুনীনক্খত্তে অনুসংৰচ্ছরং উদকোরোহনমনুযুত্তো অহোসিন্তি.

ইদানি তদা যেনাধিপ্পাযেন উদকোরোহনমনুযুত্তং, তং দস্সেতুং ‘‘যং মযা’’তি গাথমাহ. তস্সত্থো – ‘‘যং মযা পুব্বে ইতো অঞ্ঞাসু জাতীসু পাপকম্মং উপচিতং. তং ইদানি ইধ গযাতিত্থে ইমিস্সা চ গযাফগ্গুযা ইমিনা উদকোরোহনেন পৰাহেমি অপনেমি ৰিক্খালেমী’’তি. পুরে সত্থু সাসনুপগমনতো পুব্বে এৰংদিট্ঠি এৰরূপৰিপরীতদস্সনো অহুং অহোসিং.

ধম্মত্থসহিতং পদন্তি ৰিভত্তিঅলোপেন নিদ্দেসো. ধম্মেন চ অত্থেন চ সহিতকোট্ঠাসং, আদিতো মজ্ঝতো পরিযোসানতো চ ধম্মূপসংহিতং অত্থূপসংহিতং সুট্ঠু একন্তেন নিয্যানিকং কত্ৰা ভাসিতং ৰাচং সম্মাসম্বুদ্ধৰচনং সুত্ৰা তেন পকাসিতং পরমত্থভাৰেন তচ্ছভাৰতো তথং যথারহং পৰত্তিনিৰত্তিউপাযভাৰে ব্যভিচারাভাৰতো যাথাৰকং দুক্খাদিঅত্থং যোনিসো উপাযেন পরিঞ্ঞেয্যাদিভাৰেন পচ্চৰেক্খিসং ‘‘দুক্খং পরিঞ্ঞেয্যং, সমুদযো পহাতব্বো, নিরোধো সচ্ছিকাতব্বো ¶ , মগ্গো ভাৰেতব্বো’’তি পতিঅৰেক্খিং, ঞাণচক্খুনা পস্সিং পটিৰিজ্ঝিন্তি অত্থো.

নিন্হাতসব্বপাপোম্হীতি এৰং পটিৰিদ্ধসচ্চত্তা এৰ অরিযমগ্গজলেন ৰিক্খালিতসব্বপাপো অম্হি. ততো এৰ রাগমলাদীনং অভাৰেন নিম্মলত্তা নিম্মলো. ততো এৰ ¶ পরিসুদ্ধকাযসমাচারতায পরিসুদ্ধৰচীসমাচারতায পরিসুদ্ধমনোসমাচারতায পযতো সুচি সুদ্ধো. সৰাসনসব্বকিলেসমলৰিসুদ্ধিযা সুদ্ধস্স বুদ্ধস্স ভগৰতো লোকুত্তরধম্মদাযস্স আদিযনতো দাযাদো. তস্সেৰ দেসনাঞাণসমুট্ঠানউরোৰাযামজনিতাভিজাতিতায ওরসো পুত্তো অম্হীতি যোজনা.

পুনপি অত্তনো পরমত্থতো ন্হাতকভাৰমেৰ ৰিভাৰেতুং ‘‘ওগয্হা’’তি ওসানগাথমাহ. তত্থ ওগয্হাতি ওগাহেত্ৰা অনুপৰিসিত্ৰা. অট্ঠঙ্গিকং সোতন্তি সম্মাদিট্ঠিআদীহি অট্ঠঙ্গসমোধানভূতং মগ্গসোতং. সব্বপাপং পৰাহযিন্তি অনৰসেসং পাপমলং পক্খালেসিং, অরিযমগ্গজলপৰাহনেন পরমত্থন্হাতকো অহোসিং. ততো এৰ তিস্সো ৰিজ্জা অজ্ঝগমিং, কতং বুদ্ধস্স সাসনন্তি ৰুত্তত্থমেৰ.

গযাকস্সপত্থেরগাথাৰণ্ণনা নিট্ঠিতা.

৮. ৰক্কলিত্থেরগাথাৰণ্ণনা

ৰাতরোগাভিনীতোতিআদিকা ¶ আযস্মতো ৰক্কলিত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো পদুমুত্তরস্স ভগৰতো কালে হংসৰতীনগরে কুলগেহে নিব্বত্তিত্ৰা ৰিঞ্ঞুতং পত্তো সত্থু সন্তিকং গচ্ছন্তেহি উপাসকেহি সদ্ধিং ৰিহারং গন্ত্ৰা পরিসপরিযন্তে ঠিতো ধম্মং সুণন্তো সত্থারং একং ভিক্খুং সদ্ধাধিমুত্তানং অগ্গট্ঠানে ঠপেন্তং দিস্ৰা সযম্পি তং ঠানং পত্থেন্তো সত্তাহং মহাদানং দত্ৰা পণিধানং অকাসি. সত্থা তস্স অনন্তরাযতং দিস্ৰা ব্যাকরি.

সোপি ¶ যাৰজীৰং কুসলং কত্ৰা দেৰমনুস্সেসু সংসরন্তো অম্হাকং সত্থু কালে সাৰত্থিযং ব্রাহ্মণকুলে নিব্বত্তি, ৰক্কলীতিস্স নামং অকংসু. সো ৰুদ্ধিপ্পত্তো তযো ৰেদে উগ্গণ্হিত্ৰা ব্রাহ্মণসিপ্পেসু নিপ্ফত্তিং গতো সত্থারং দিস্ৰা রূপকাযস্স সম্পত্তিদস্সনেন অতিত্তো সত্থারা সদ্ধিংযেৰ ৰিচরতি. ‘‘অগারমজ্ঝে ৰসন্তো নিচ্চকালং সত্থারং দট্ঠুং ন লভিস্সামী’’তি সত্থু সন্তিকে পব্বজিত্ৰা ঠপেত্ৰা ভোজনৰেলং সরীরকিচ্চকালঞ্চ সেসকালে যত্থ ঠিতেন সক্কা দসবলং পস্সিতুং, তত্থ ঠিতো অঞ্ঞং কিচ্চং পহায ভগৰন্তং ওলোকেন্তোৰ ৰিহরতি. সত্থা তস্স ঞাণপরিপাকং আগমেন্তো বহুকালং তস্মিং রূপদস্সনেনেৰ ৰিচরন্তে কিঞ্চি অৰত্ৰা পুনেকদিৰসং ¶ ‘‘কিং তে, ৰক্কলি, ইমিনা পূতিকাযেন দিট্ঠেন? যো খো, ৰক্কলি, ধম্মং পস্সতি, সো মং পস্সতি. যো মং পস্সতি, সো ধম্মং পস্সতি. ধম্মঞ্হি, ৰক্কলি, পস্সন্তো মং পস্সতি, মং পস্সন্তো ধম্মং পস্সতী’’তি (সং. নি. ৩.৮৭) আহ.

সত্থরি এৰং ৰদন্তেপি থেরো সত্থু দস্সনং পহায অঞ্ঞত্থ গন্তুং ন সক্কোতি. ততো সত্থা ‘‘নাযং ভিক্খু সংৰেগং অলভিত্ৰা বুজ্ঝিস্সতী’’তি ৰস্সূপনাযিকদিৰসে ‘‘অপেহি, ৰক্কলী’’তি থেরং পণামেসি. সো সত্থারা পণামিতো সম্মুখে ঠাতুং অসক্কোন্তো ‘‘কিং ময্হং জীৰিতেন, যোহং সত্থারং দট্ঠুং ন লভামী’’তি গিজ্ঝকূটপব্বতে পপাতট্ঠানং অভিরুহি. সত্থা তস্স তং পৰত্তিং ঞত্ৰা ‘‘অযং ভিক্খু মম সন্তিকা অস্সাসং অলভন্তো মগ্গফলানং উপনিস্সযং নাসেয্যা’’তি অত্তানং দস্সেতুং ওভাসং ৰিস্সজ্জেন্তো –

‘‘পামোজ্জবহুলো ভিক্খু, পসন্নো বুদ্ধসাসনে;

অধিগচ্ছে পদং সন্তং, সঙ্খারূপসমং সুখ’’ন্তি. (ধ. প. ৩৮১) –

গাথং ৰত্ৰা ‘‘এহি, ৰক্কলী’’তি হত্থং পসারেসি. থেরো ‘‘দসবলো মে দিট্ঠো, ‘এহী’তি অৰ্হানম্পি লদ্ধ’’ন্তি বলৰপীতিসোমনস্সং উপ্পাদেত্ৰা ¶ ‘‘কুতো আগচ্ছামী’’তি অত্তনো গমনভাৰং অজানিত্ৰা সত্থু সম্মুখে আকাসে পক্খন্দন্তো পঠমপাদেন পব্বতে ঠিতোযেৰ সত্থারা ৰুত্তগাথং ¶ আৰজ্জেন্তো আকাসেযেৰ পীতিং ৰিক্খম্ভেত্ৰা সহ পটিসম্ভিদাহি অরহত্তং পাপুণীতি অঙ্গুত্তরট্ঠকথাযং (অ. নি. অট্ঠ. ১.১.২০৮) ধম্মপদৰণ্ণনাযঞ্চ (ধ. প. অট্ঠ. ২.৩৮১) আগতং.

ইধ পন এৰং ৰদন্তি – ‘‘কিং তে, ৰক্কলী’’তিআদিনা সত্থারা ওৰদিতো গিজ্ঝকূটে ৰিহরন্তো ৰিপস্সনং পট্ঠপেসি, তস্স সদ্ধায বলৰভাৰতো এৰ ৰিপস্সনা ৰীথিং ন ওতরতি, ভগৰা তং ঞত্ৰা কম্মট্ঠানং সোধেত্ৰা অদাসি. পুন ৰিপস্সনং মত্থকং পাপেতুং নাসক্খিযেৰ, অথস্স আহারৰেকল্লেন ৰাতাবাধো উপ্পজ্জি, তং ৰাতাবাধেন পীল়িযমানং ঞত্ৰা ভগৰা তত্থ গন্ত্ৰা পুচ্ছন্তো –

৩৫০.

‘‘ৰাতরোগাভিনীতো ত্ৰং, ৰিহরং কাননে ৰনে;

পৰিদ্ধগোচরে লূখে, কথং ভিক্খু করিস্সসী’’তি. –

আহ. তং সুত্ৰা থেরো –

৩৫১.

‘‘পীতিসুখেন ¶ ৰিপুলেন, ফরমানো সমুস্সযং;

লূখম্পি অভিসম্ভোন্তো, ৰিহরিস্সামি কাননে.

৩৫২.

‘‘ভাৰেন্তো সতিপট্ঠানে, ইন্দ্রিযানি বলানি চ;

বোজ্ঝঙ্গানি চ ভাৰেন্তো, ৰিহরিস্সামি কাননে.

৩৫৩.

‘‘আরদ্ধৰীরিযে পহিতত্তে, নিচ্চং দল়্হপরক্কমে;

সমগ্গে সহিতে দিস্ৰা, ৰিহরিস্সামি কাননে.

৩৫৪.

‘‘অনুস্সরন্তো সম্বুদ্ধং, অগ্গং দন্তং সমাহিতং;

অতন্দিতো রত্তিন্দিৰং, ৰিহরিস্সামি কাননে’’তি. –

চতস্সো গাথা অভাসি.

তত্থ ৰাতরোগাভিনীতোতি ৰাতাবাধেন অসেরিভাৰং উপনীতো, ৰাতব্যাধিনা অভিভূতো. ত্ৰন্তি থেরং আলপতি. ৰিহরন্তি তেন ইরিযাপথৰিহারেন ৰিহরন্তো. কাননে ৰনেতি কাননভূতে ৰনে, মহাঅরঞ্ঞেতি অত্থো. পৰিদ্ধগোচরেতি ৰিস্সট্ঠগোচরে দুল্লভপচ্চযে. ৰাতরোগস্স সপ্পাযানং সপ্পিআদিভেসজ্জানং অভাৰেন ফরুসভূমিভাগতায চ লূখে লূখট্ঠানে. কথং ভিক্খু করিস্সসীতি ভিক্খু ত্ৰং কথং ৰিহরিস্সসীতি ভগৰা পুচ্ছি.

তং ¶ সুত্ৰা থেরো নিরামিসপীতিসোমনস্সাদিনা অত্তনো সুখৰিহারং পকাসেন্তো ‘‘পীতিসুখেনা’’তিআদিমাহ. তত্থ পীতিসুখেনাতি উব্বেগলক্খণায ফরণলক্খণায চ ¶ পীতিযা তংসম্পযুত্তসুখেন চ. তেনাহ ‘‘ৰিপুলেনা’’তি উল়ারেনাতি অত্থো. ফরমানো সমুস্সযন্তি যথাৰুত্তপীতিসুখসমুট্ঠিতেহি পণীতেহি রূপেহি সকলং কাযং ফরাপেন্তো নিরন্তরং ফুটং করোন্তো. লূখম্পি অভিসম্ভোন্তোতি অরঞ্ঞাৰাসজনিতং সল্লেখৰুত্তিহেতুকং দুস্সহম্পি পচ্চযলূখং অভিভৰন্তো অধিৰাসেন্তো. ৰিহরিস্সামি কাননেতি ঝানসুখেন ৰিপস্সনাসুখেন চ অরঞ্ঞাযতনে ৰিহরিস্সামীতি অত্থো. তেনাহ – ‘‘সুখঞ্চ কাযেন পটিসংৰেদেসি’’ন্তি (পারা. ১১).

‘‘যতো যতো সম্মসতি, খন্ধানং উদযব্বযং;

লভতী পীতিপামোজ্জং, অমতং তং ৰিজানত’’ন্তি চ. (ধ. প. ৩৭৪);

ভাৰেন্তো সতিপট্ঠানেতি মগ্গপরিযাপন্নে কাযানুপস্সনাদিকে চত্তারো সতিপট্ঠানে উপ্পাদেন্তো ৰড্ঢেন্তো চ. ইন্দ্রিযানীতি মগ্গপরিযাপন্নানি এৰ সদ্ধাদীনি পঞ্চিন্দ্রিযানি. বলানীতি তথা সদ্ধাদীনি ¶ পঞ্চ বলানি. বোজ্ঝঙ্গানীতি তথা সতিসম্বোজ্ঝঙ্গাদীনি সত্ত বোজ্ঝঙ্গানি. চ-সদ্দেন সম্মপ্পধানইদ্ধিপাদমগ্গঙ্গানি সঙ্গণ্হাতি. তদৰিনাভাৰতো হি তগ্গহণেনেৰ তেসং গহণং হোতি. ৰিহরিস্সামীতি যথাৰুত্তে বোধিপক্খিযধম্মে ভাৰেন্তো মগ্গসুখেন তদধিগমসিদ্ধেন ফলসুখেন নিব্বানসুখেন চ ৰিহরিস্সামি.

আরদ্ধৰীরিযেতি চতুব্বিধসম্মপ্পধানৰসেন পগ্গহিতৰীরিযে. পহিতত্তেতি নিব্বানং পতিপেসিতচিত্তে. নিচ্চং দল়্হপরক্কমেতি সব্বকালং অসিথিলৰীরিযে. অৰিৰাদৰসেন কাযসামগ্গিদানৰসেন চ সমগ্গে. দিট্ঠিসীলসামঞ্ঞেন সহিতে সব্রহ্মচারী দিস্ৰা. এতেন কল্যাণমিত্তসম্পত্তিং দস্সেতি.

অনুস্সরন্তো সম্বুদ্ধন্তি সম্মা সামং সব্বধম্মানং বুদ্ধত্তা সম্মাসম্বুদ্ধং সব্বসত্তুত্তমতায, অগ্গং উত্তমেন দমথেন দন্তং, অনুত্তরসমাধিনা সমাহিতং অতন্দিতো অনলসো হুত্ৰা, রত্তিন্দিৰং সব্বকালং ‘‘ইতিপি সো ভগৰা অরহ’’ন্তিআদিনা অনুস্সরন্তো ৰিহরিস্সামি. এতেন বুদ্ধানুস্সতিভাৰনায ¶ যুত্তাকারদস্সনেন সব্বত্থ কম্মট্ঠানানুযোগমাহ, পুরিমেন পারিহারিযকম্মট্ঠানানুযোগং.

এৰং পন ৰত্ৰা থেরো ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ২.৫৪.২৮-৬৫) –

‘‘ইতো সতসহস্সম্হি, কপ্পে উপ্পজ্জি নাযকো;

অনোমনামো অমিতো, নামেন পদুমুত্তরো.

‘‘পদুমাকারৰদনো, পদুমামলসুচ্ছৰী;

লোকেনানুপলিত্তোৰ, তোযেন পদুমং যথা.

‘‘ৰীরো পদুমপত্তক্খো, কন্তো চ পদুমং যথা;

পদুমুত্তরগন্ধোৰ, তস্মা সো পদুমুত্তরো.

‘‘লোকজেট্ঠো চ নিম্মানো, অন্ধানং নযনূপমো;

সন্তৰেসো গুণনিধি, করুণামতিসাগরো.

‘‘স কদাচি মহাৰীরো, ব্রহ্মাসুরসুরচ্চিতো;

সদেৰমনুজাকিণ্ণে, জনমজ্ঝে জিনুত্তমো.

‘‘ৰদনেন সুগন্ধেন, মধুরেন রুতেন চ;

রঞ্জযং পরিসং সব্বং, সন্থৰী সাৰকং সকং.

‘‘সদ্ধাধিমুত্তো সুমতি, মম দস্সনলালসো;

নত্থি এতাদিসো অঞ্ঞো, যথাযং ভিক্খু ৰক্কলি.

‘‘তদাহং ¶ হংসৰতিযং, নগরে ব্রাহ্মণত্রজো;

হুত্ৰা সুত্ৰা চ তং ৰাক্যং, তং ঠানমভিরোচযিং.

‘‘সসাৰকং তং ৰিমলং, নিমন্তেত্ৰা তথাগতং;

সত্তাহং ভোজযিত্ৰান, দুস্সেহচ্ছাদযিং তদা.

‘‘নিপচ্চ সিরসা তস্স, অনন্তগুণসাগরে;

নিমুগ্গো পীতিসম্পুণ্ণো, ইদং ৰচনমব্রৰিং.

‘‘যো সো তযা সন্থৰিতো, ইতো সত্তমকে মুনি;

ভিক্খু সদ্ধাৰতং অগ্গো, তাদিসো হোমহং মুনে.

‘‘এৰং ¶ ৰুত্তে মহাৰীরো, অনাৰরণদস্সনো;

ইমং ৰাক্যং উদীরেসি, পরিসায মহামুনি.

‘‘পস্সথেতং মাণৰকং, পীতমট্ঠনিৰাসনং;

হেমযঞ্ঞোপচিতঙ্গং, জননেত্তমনোহরং.

‘‘এসো অনাগতদ্ধানে, গোতমস্স মহেসিনো;

অগ্গো সদ্ধাধিমুত্তানং, সাৰকোযং ভৰিস্সতি.

‘‘দেৰভূতো মনুস্সো ৰা, সব্বসন্তাপৰজ্জিতো;

সব্বভোগপরিব্যূল়্হো, সুখিতো সংসরিস্সতি.

‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ধম্মেসু দাযাদো, ওরসো ধম্মনিম্মিতো;

ৰক্কলি নাম নামেন, হেস্সতি সত্থু সাৰকো.

‘‘তেন কম্মৰিসেসেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘সব্বত্থ সুখিতো হুত্ৰা, সংসরন্তো ভৰাভৰে;

সাৰত্থিযং পুরে জাতো, কুলে অঞ্ঞতরে অহং.

‘‘নোনীতসুখুমালং মং, জাতপল্লৰকোমলং;

মন্দং উত্তানসযনং, পিসাচভযতজ্জিতা.

‘‘পাদমূলে মহেসিস্স, সাযেসুং দীনমানসা;

ইমং দদাম তে নাথ, সরণং হোহি নাযক.

‘‘তদা পটিগ্গহি সো মং, ভীতানং সরণো মুনি;

জালিনা চক্কঙ্কিতেন, মুদুকোমলপাণিনা.

‘‘তদা পভুতি তেনাহং, অরক্খেয্যেন রক্খিতো;

সব্বৰেরৰিনিমুত্তো, সুখেন পরিৰুদ্ধিতো.

‘‘সুগতেন ¶ ৰিনা ভূতো, উক্কণ্ঠামি মুহুত্তকং;

জাতিযা সত্তৰস্সোহং, পব্বজিং অনগারিযং.

‘‘সব্বপারমিসম্ভূতং ¶ , নীলক্খিনযনং ৰরং;

রূপং সব্বসুভাকিণ্ণং, অতিত্তো ৰিহরামহং.

‘‘বুদ্ধরূপরতিং ঞত্ৰা, তদা ওৰদি মং জিনো;

অলং ৰক্কলি কিং রূপে, রমসে বালনন্দিতে.

‘‘যো হি পস্সতি সদ্ধম্মং, সো মং পস্সতি পণ্ডিতো;

অপস্সমানো সদ্ধম্মং, মং পস্সম্পি ন পস্সতি.

‘‘অনন্তাদীনৰো কাযো, ৰিসরুক্খসমূপমো;

আৰাসো সব্বরোগানং, পুঞ্জো দুক্খস্স কেৰলো.

‘‘নিব্বিন্দিয ততো রূপে, খন্ধানং উদযব্বযং;

পস্স উপক্কিলেসানং, সুখেনন্তং গমিস্সসি.

‘‘এৰং তেনানুসিট্ঠোহং, নাযকেন হিতেসিনা;

গিজ্ঝকূটং সমারুয্হ, ঝাযামি গিরিকন্দরে.

‘‘ঠিতো পব্বতপাদম্হি, অস্সাসযি মহামুনি;

ৰক্কলীতি জিনো ৰাচং, তং সুত্ৰা মুদিতো অহং.

‘‘পক্খন্দিং সেলপব্ভারে, অনেকসতপোরিসে;

তদা বুদ্ধানুভাৰেন, সুখেনেৰ মহিং গতো.

‘‘পুনোপি ধম্মং দেসেতি, খন্ধানং উদযব্বযং;

তমহং ধম্মমঞ্ঞায, অরহত্তমপাপুণিং.

‘‘সুমহাপরিসমজ্ঝে, তদা মং চরণন্তগো;

অগ্গং সদ্ধাধিমুত্তানং, পঞ্ঞপেসি মহামতি.

‘‘সতসহস্সিতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং ¶ পন পত্ৰা অঞ্ঞং ব্যাকরোন্তোপি থেরো ইমা এৰ গাথা অভাসি. অথ নং সত্থা ভিক্খুসঙ্ঘমজ্ঝে নিসিন্নো সদ্ধাধিমুত্তানং অগ্গট্ঠানে ঠপেসীতি.

ৰক্কলিত্থেরগাথাৰণ্ণনা নিট্ঠিতা.

৯. ৰিজিতসেনত্থেরগাথাৰণ্ণনা

ওলগ্গেস্সামীতিআদিকা ¶ ¶ আযস্মতো ৰিজিতসেনত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো অত্থদস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো ঘরাৰাসং পহায ইসিপব্বজ্জং পব্বজিত্ৰা অরঞ্ঞে ৰিহরন্তো আকাসেন গচ্ছন্তং ভগৰন্তং দিস্ৰা পসন্নমানসো পসন্নাকারং দস্সেন্তো অঞ্জলিং পগ্গয্হ অট্ঠাসি. সত্থা তস্স অজ্ঝাসযং ঞত্ৰা আকাসতো ওতরি. সো ভগৰতো মনোহরানি মধুরানি ফলানি উপনেসি, পটিগ্গহেসি ভগৰা অনুকম্পং উপাদায. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কোসলরট্ঠে হত্থাচরিযকুলে নিব্বত্তিত্ৰা ৰিজিতসেনোতি লদ্ধনামো ৰিঞ্ঞুতং পাপুণি. তস্স মাতুলা সেনো চ উপসেনো চাতি দ্ৰে হত্থাচরিযা সত্থু সন্তিকে ধম্মং সুত্ৰা পটিলদ্ধসদ্ধা পব্বজিত্ৰা ৰাসধুরং পূরেন্তা অরহত্তং পাপুণিংসু. ৰিজিতসেনোপি হত্থিসিপ্পে নিপ্ফত্তিং গতো নিস্সরণজ্ঝাসযতায ঘরাৰাসে অলগ্গমানসো সত্থু যমকপাটিহারিযং দিস্ৰা পটিলদ্ধসদ্ধো মাতুলত্থেরানং সন্তিকে পব্বজিত্ৰা তেসং ওৰাদানুসাসনিযা ৰিপস্সনায কম্মং করোন্তো ৰিপস্সনাৰীথিং লঙ্ঘিত্ৰা বহিদ্ধা নানারম্মণে ৰিধাৰন্তং অত্তনো চিত্তং ওৰদন্তো –

৩৫৫.

‘‘ওলগ্গেস্সামি তে চিত্ত, আণিদ্ৰারেৰ হত্থিনং;

ন তং পাপে নিযোজেস্সং, কামজালং সরীরজং.

৩৫৬.

‘‘ত্ৰং ওলগ্গো ন গচ্ছসি, দ্ৰারৰিৰরং গজোৰ অলভন্তো;

ন চ চিত্তকলি পুনপ্পুনং, পসক্ক পাপরতো চরিস্সসি.

৩৫৭.

‘‘যথা কুঞ্জরং অদন্তং, নৰগ্গহমঙ্কুসগ্গহো;

বলৰা আৰত্তেতি অকামং, এৰং আৰত্তযিস্সং তং.

৩৫৮.

‘‘যথা ৰরহযদমকুসলো, সারথিপৰরো দমেতি আজঞ্ঞং;

এৰং দমযিস্সং তং, পতিট্ঠিতো পঞ্চসু বলেসু.

৩৫৯.

‘‘সতিযা ¶ ¶ তং নিবন্ধিস্সং, পযুত্তো তে দমেস্সামি;

ৰীরিযধুরনিগ্গহিতো, ন যিতো দূরং গমিস্সসে চিত্তা’’তি. –

গাথা অভাসি.

তত্থ ওলগ্গেস্সামীতি সংৰরিস্সামি নিৰারেস্সামি. তেতি তং. উপযোগত্থে হি ইদং সামিৰচনং ¶ . তে গমনন্তি ৰা ৰচনসেসো. হত্থিনন্তি চ হত্থিন্তি অত্থো. চিত্তাতি অত্তনো চিত্তং আলপতি. যথা তং ৰারেতুকামো, তং দস্সেন্তো ‘‘আণিদ্ৰারেৰ হত্থিন’’ন্তি আহ. আণিদ্ৰারং নাম পাকারবদ্ধস্স নগরস্স খুদ্দকদ্ৰারং, যং ঘটিকাছিদ্দে আণিম্হি পক্খিত্তে যন্তেন ৰিনা অব্ভন্তরে ঠিতেহিপি ৰিৰরিতুং ন সক্কা. যেন মনুস্সগৰস্সমহিংসাদযো ন নিগ্গন্তুং সক্কা. নগরতো বহি নিগ্গন্তুকামম্পি হত্থিং যতো পলোভেত্ৰা হত্থাচরিযো গমনং নিৰারেসি. অথ ৰা আণিদ্ৰারং নাম পলিঘদ্ৰারং. তত্থ হি তিরিযং পলিঘং ঠপেত্ৰা রুক্খসূচিসঙ্খাতং আণিং পলিঘসীসে আৰুণন্তি. পাপেতি রূপাদীসু উপ্পজ্জনকঅভিজ্ঝাদিপাপধম্মে তং ন নিযোজেস্সং ন নিযোজিস্সামি. কামজালাতি কামস্স জালভূতং. যথা হি মচ্ছবন্ধমিগলুদ্দানং জালং নাম মচ্ছাদীনং তেসং যথাকামকারসাধনং, এৰং অযোনিসোমনসিকারানুপাতিতং চিত্তং মারস্স কামকারসাধনং. তেন হি সো সত্তে অনত্থেসু পাতেতি. সরীরজাতি সরীরেসু উপ্পজ্জনক. পঞ্চৰোকারভৰে হি চিত্তং রূপপটিবদ্ধৰুত্তিতায ‘‘সরীরজ’’ন্তি ৰুচ্চতি.

ত্ৰং ওলগ্গো ন গচ্ছসীতি ত্ৰং, চিত্তকলি, মযা সতিপঞ্ঞাপতোদঅঙ্কুসেহি ৰারিতো ন দানি যথারুচিং গমিস্সসি, অযোনিসোমনসিকারৰসেন যথাকামং ৰত্তিতুং ন লভিস্সসি. যথা কিং? দ্ৰারৰিৰরং গজোৰ অলভন্তো নগরতো গজনিরোধতো ৰা নিগ্গমনায দ্ৰারৰিৰরকং অলভমানো হত্থী ৰিয. চিত্তকলীতি চিত্তকাল়কণ্ণি. পুনপ্পুনন্তি অপরাপরং. পসক্কাতি সরণসম্পস্সাসৰসেন. পাপরতোতি পাপকম্মনিরতো পুব্বে ৰিয ইদানি ন চরিস্সসি তথা চরিতুং ন দস্সামীতি অত্থো.

অদন্তন্তি ¶ অদমিতং হত্থিসিক্খং অসিক্খিতং. নৰগ্গহন্তি অচিরগহিতং. অঙ্কুসগ্গহোতি হত্থাচরিযো. বলৰাতি কাযবলেন ঞাণবলেন চ বলৰা. আৰত্তেতি অকামন্তি অনিচ্ছন্তমেৰ নিসেধনতো নিৰত্তেতি. এৰং আৰত্তযিস্সন্তি যথা যথাৰুত্তং হত্থিং হত্থাচরিযো, এৰং তং চিত্তং চিত্তকলিং দুচ্চরিতনিসেধনতো নিৰত্তযিস্সামি.

ৰরহযদমকুসলোতি ¶ উত্তমানং অস্সদম্মানং দমনে কুসলো. ততো এৰ সারথিপৰরো অস্সদম্মসারথীসু ৰিসিট্ঠো দমেতি আজঞ্ঞং আজানীযং অস্সদম্মং দেসকালানুরূপং সণ্হফরুসেহি দমেতি ৰিনেতি নিব্বিসেৰনং করোতি. পতিট্ঠিতো পঞ্চসু বলেসূতি সদ্ধাদীসু পঞ্চসু বলেসু পতিট্ঠিতো হুত্ৰা অস্সদ্ধিযাদিনিসেধনতো তং দমযিস্সং দমেস্সামীতি অত্থো.

সতিযা ¶ তং নিবন্ধিস্সন্তি গোচরজ্ঝত্ততো বহি গন্তুং অদেন্তো সতিযোত্তেন কম্মট্ঠানথম্ভে, চিত্তকলি, তং নিবন্ধিস্সামি নিযমেস্সামি. পযুত্তো তে দমেস্সামীতি তত্থ নিবন্ধন্তো এৰ যুত্তপ্পযুত্তো হুত্ৰা তে দমেস্সামি, সংকিলেসমলতো তং ৰিসোধেস্সামি. ৰীরিযধুরনিগ্গহিতোতি যথাৰুত্তো ছেকেন সুসারথিনা যুগে যোজিতো যুগনিগ্গহিতো যুগন্তরগতো তং নাতিক্কমতি, এৰং ত্ৰম্পি চিত্ত, মম ৰীরিযধুরে নিগ্গহিতো সক্কচ্চকারিতায সাতচ্চকারিতায অঞ্ঞথা ৰত্তিতুং অলভন্তো ইতো গোচরজ্ঝত্ততো দূরং বহি ন গমিস্সসি. ভাৰনানুযুত্তস্স হি কম্মট্ঠানতো অঞ্ঞং আসন্নম্পি লক্খণতো দূরমেৰাতি এৰং থেরো ইমাহি গাথাহি অত্তনো চিত্তং নিগ্গণ্হন্তোৰ ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৪৫.২২-৩০) –

‘‘সুৰণ্ণৰণ্ণং সম্বুদ্ধং, দ্ৰত্তিংসৰরলক্খণং;

ৰিপিনগ্গেন গচ্ছন্তং, সালরাজংৰ ফুল্লিতং.

‘‘তিণত্থরং পঞ্ঞাপেত্ৰা, বুদ্ধসেট্ঠং অযাচহং;

অনুকম্পতু মং বুদ্ধো, ভিক্খং ইচ্ছামি দাতৰে.

‘‘অনুকম্পকো ¶ কারুণিকো, অত্থদস্সী মহাযসো;

মম সঙ্কপ্পমঞ্ঞায, ওরূহি মম অস্সমে.

‘‘ওরোহিত্ৰান সম্বুদ্ধো, নিসীদি পণ্ণসন্থরে;

ভল্লাতকং গহেত্ৰান, বুদ্ধসেট্ঠস্সদাসহং.

‘‘মম নিজ্ঝাযমানস্স, পরিভুঞ্জি তদা জিনো;

তত্থ চিত্তং পসাদেত্ৰা, অভিৰন্দিং তদা জিনং.

‘‘অট্ঠারসে কপ্পসতে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অঞ্ঞং ব্যাকরোন্তোপি ইমা গাথা অভাসি.

ৰিজিতসেনত্থেরগাথাৰণ্ণনা নিট্ঠিতা.

১০. যসদত্তত্থেরগাথাৰণ্ণনা

উপারম্ভচিত্তোতিআদিকা আযস্মতো যসদত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনি. তথা হেস পদুমুত্তরস্স ¶ ভগৰতো কালে ব্রাহ্মণকুলে নিব্বত্তিত্ৰা ব্রাহ্মণানং ৰিজ্জাসিপ্পেসু নিপ্ফত্তিং গতো কামে পহায ইসিপব্বজ্জং পব্বজিত্ৰা অরঞ্ঞে ৰিহরন্তো একদিৰসং সত্থারং দিস্ৰা পসন্নমানসো অঞ্জলিং পগ্গয্হ অভিত্থৰি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে মল্লরট্ঠে মল্লরাজকুলে নিব্বত্তিত্ৰা যসদত্তোতি লদ্ধনামো, ৰযপ্পত্তো তক্কসিলং গন্ত্ৰা সব্বসিপ্পানি সিক্খিত্ৰা সভিযেন পরিব্বাজকেন সদ্ধিংযেৰ চারিকং চরমানো, অনুপুব্বেন সাৰত্থিযং ভগৰন্তং উপসঙ্কমিত্ৰা সভিযেন পুট্ঠপঞ্হেসু ¶ ৰিস্সজ্জিযমানেসু সযং ওতারাপেক্খো সুণন্তো নিসীদি ‘‘সমণস্স গোতমস্স ৰাদে দোসং দস্সামী’’তি. অথস্স ভগৰা চিত্তাচারং ঞত্ৰা সভিযসুত্তদেসনাৰসানে (সু. নি. সভিযসুত্ত) ওৰাদং দেন্তো –

৩৬০.

‘‘উপারম্ভচিত্তো ¶ দুম্মেধো, সুণাতি জিনসাসনং;

আরকা হোতি সদ্ধম্মা, নভসো পথৰী যথা.

৩৬১.

‘‘উপারম্ভচিত্তো দুম্মেধো, সুণাতি জিনসাসনং;

পরিহাযতি সদ্ধম্মা, কাল়পক্খেৰ চন্দিমা.

৩৬২.

‘‘উপারম্ভচিত্তো দুম্মেধো, সুণাতি জিনসাসনং;

পরিসুস্সতি সদ্ধম্মে, মচ্ছো অপ্পোদকে যথা.

৩৬৩.

‘‘উপারম্ভচিত্তো দুম্মেধো, সুণাতি জিনসাসনং;

ন ৰিরূহতি সদ্ধম্মে, খেত্তে বীজংৰ পূতিকং.

৩৬৪.

‘‘যো চ তুট্ঠেন চিত্তেন, সুণাতি জিনসাসনং;

খেপেত্ৰা আসৰে সব্বে, সচ্ছিকত্ৰা অকুপ্পতং;

পপ্পুয্য পরমং সন্তিং, পরিনিব্বাতিনাসৰো’’তি. –

ইমা পঞ্চ গাথা অভাসি.

তত্থ উপারম্ভচিত্তোতি সারম্ভচিত্তো, দোসারোপনাধিপ্পাযোতি অত্থো. দুম্মেধোতি নিপ্পঞ্ঞো. আরকা হোতি সদ্ধম্মাতি সো তাদিসো পুগ্গলো নভসো ৰিয পথৰী পটিপত্তিসদ্ধম্মতোপি দূরে হোতি, পগেৰ পটিৰেধসদ্ধম্মতো. ‘‘ন ত্ৰং ইমং ধম্মৰিনযং আজানাসী’’তিআদিনা (দী. নি. ১.১৮) ৰিগ্গাহিককথং অনুযুত্তস্স কুতো সন্তনিপুণো পটিপত্তিসদ্ধম্মো.

পরিহাযতি সদ্ধম্মাতি নৰৰিধলোকুত্তরধম্মতো পুব্বভাগিযসদ্ধাদিসদ্ধম্মতোপি নিহীযতি. পরিসুস্সতীতি ৰিসুস্সতি কাযচিত্তানং পীণনরসস্স পীতিপামোজ্জাদিকুসলধম্মস্সাভাৰতো. ন ৰিরূহতীতি ¶ ৰিরূল়্হিং ৰুদ্ধিং ন পাপুণাতি. পূতিকন্তি গোমযলেপদানাদিঅভাৰেন পূতিভাৰং পত্তং.

তুট্ঠেন চিত্তেনাতি ইত্থম্ভূতলক্খণে করণৰচনং, অত্তমনো পমুদিতো হুত্ৰাতি অত্থো. খেপেত্ৰাতি সমুচ্ছিন্দিত্ৰা. অকুপ্পতন্তি অরহত্তং. পপ্পুয্যাতি পাপুণিত্ৰা. পরমং সন্তিন্তি অনুপাদিসেসং নিব্বানং. তদধিগমো ¶ চস্স কেৰলং কালাগমনমেৰ, ন কোচিৰিধোতি তং দস্সেতুং ৰুত্তং ‘‘পরিনিব্বাতিনাসৰো’’তি.

এৰং সত্থারা ওৰদিতো সংৰেগজাতো পব্বজিত্ৰা ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৪৪.৩৫-৪৩) –

‘‘কণিকারংৰ ¶ জলিতং, দীপরুক্খংৰ জোতিতং;

কঞ্চনংৰ ৰিরোচন্তং, অদ্দসং দ্ৰিপদুত্তমং.

‘‘কমণ্ডলুং ঠপেত্ৰান, ৰাকচীরঞ্চ কুণ্ডিকং;

একংসং অজিনং কত্ৰা, বুদ্ধসেট্ঠং থৰিং অহং.

‘‘তমন্ধকারং ৰিধমং, মোহজালসমাকুলং;

ঞাণালোকং দস্সেত্ৰান, নিত্তিণ্ণোসি মহামুনি.

‘‘সমুদ্ধরসিমং লোকং, সব্বাৰন্তমনুত্তরং;

ঞাণে তে উপমা নত্থি, যাৰতা জগতো গতি.

‘‘তেন ঞাণেন সব্বঞ্ঞূ, ইতি বুদ্ধো পৰুচ্চতি;

ৰন্দামি তং মহাৰীরং, সব্বঞ্ঞুতমনাৰরং.

‘‘সতসহস্সিতো কপ্পে, বুদ্ধসেট্ঠং থৰিং অহং;

দুগ্গতিং নাভিজানামি, ঞাণত্থৰাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অঞ্ঞং ব্যাকরোন্তোপি থেরো ইমা এৰ গাথা অভাসি.

যসদত্তত্থেরগাথাৰণ্ণনা নিট্ঠিতা.

১১. সোণকুটিকণ্ণত্থেরগাথাৰণ্ণনা

উপসম্পদা ¶ চ মে লদ্ধাতিআদিকা আযস্মতো সোণস্স কুটিকণ্ণস্স গাথা. কা উপ্পত্তি? অযং কির পদুমুত্তরস্স ভগৰতো কালে হংসৰতীনগরে ৰিভৰসম্পন্নো সেট্ঠি হুত্ৰা উল়ারায ইস্সরিযসম্পত্তিযা ঠিতো একদিৰসং সত্থারং সতসহস্সখীণাসৰপরিৰুতং মহতিযা ¶ বুদ্ধলীল়ায মহন্তেন বুদ্ধানুভাৰেন নগরং পৰিসন্তং দিস্ৰা পসন্নমানসো ৰন্দিত্ৰা অঞ্জলিং কত্ৰা অট্ঠাসি. সো পচ্ছাভত্তং উপাসকেহি সদ্ধিং ৰিহারং গন্ত্ৰা ভগৰতো সন্তিকে ধম্মং সুণন্তো সত্থারং একং ভিক্খুং কল্যাণৰাক্করণানং অগ্গট্ঠানে ঠপেন্তং দিস্ৰা সযম্পি তং ঠানং পত্থেত্ৰা মহাদানং দত্ৰা পণিধানং অকাসি. সত্থা তস্স অনন্তরাযতং দিস্ৰা ‘‘অনাগতে গোতমস্স নাম সম্মাসম্বুদ্ধস্স সাসনে কল্যাণৰাক্করণানং অগ্গো ভৰিস্সতী’’তি ব্যাকাসি.

সো তত্থ যাৰজীৰং পুঞ্ঞানি কত্ৰা দেৰমনুস্সেসু সংসরন্তো ৰিপস্সিস্স ভগৰতো কালে সাসনে পব্বজিত্ৰা ৰত্তপটিৰত্তানি পূরেন্তো একস্স ভিক্খুনো চীৰরং সিব্বিত্ৰা অদাসি. পুন বুদ্ধসুঞ্ঞে লোকে বারাণসিযং তুন্নৰাযো হুত্ৰা একস্স পচ্চেকবুদ্ধস্স চীৰরকোটিং ছিন্নং ঘটেত্ৰা অদাসি. এৰং তত্থ তত্থ পুঞ্ঞানি কত্ৰা ইমস্মিং বুদ্ধুপ্পাদে অৰন্তিরট্ঠে কুররঘরে মহাৰিভৰস্স সেট্ঠিনো পুত্তো হুত্ৰা নিব্বত্তি. সোণোতিস্স নামং অকংসু. কোটিঅগ্ঘনকস্স কণ্ণপিল়ন্ধনস্স ধারণেন ‘‘কোটিকণ্ণো’’তি ৰত্তব্বে কুটিকণ্ণোতি পঞ্ঞাযিত্থ.

সো অনুক্কমেন ৰড্ঢিত্ৰা কুটুম্বং সণ্ঠপেন্তো আযস্মন্তে মহাকচ্চানে কুলঘরং নিস্সায পৰত্তপব্বতে ৰিহরন্তে তস্স সন্তিকে ধম্মং সুত্ৰা সরণেসু চ সীলেসু চ পতিট্ঠায তং চতূহি পচ্চযেহি উপট্ঠহি. সো অপরভাগে সংসারে সঞ্জাতসংৰেগো থেরস্স সন্তিকে পব্বজিত্ৰা কিচ্ছেন কসিরেন দসৰগ্গং সঙ্ঘং সন্নিপাতেত্ৰা উপসম্পজ্জিত্ৰা কতিপযকালং থেরস্স সন্তিকে ৰসিত্ৰা, থেরং আপুচ্ছিত্ৰা সত্থারং ৰন্দিতুং সাৰত্থিং উপগতো, সত্থারা একগন্ধকুটিযং ৰাসং লভিত্ৰা পচ্চূসসমযে অজ্ঝিট্ঠো সোল়সঅট্ঠকৰগ্গিযানং ¶ উস্সারণেন সাধুকারং দত্ৰা ভাসিতায ‘‘দিস্ৰা আদীনৰং লোকে’’তি (উদা. ৪৬; মহাৰ. ২৫৮) উদানগাথায পরিযোসানে ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ২.৪৪.২৬-৩৪) –

‘‘পদুমুত্তরো ¶ নাম জিনো, আহুতীনং পটিগ্গহো;

ৰসীসতসহস্সেহি, নগরং পাৰিসী তদা.

‘‘নগরং ¶ পৰিসন্তস্স, উপসন্তস্স তাদিনো;

রতনানি পজ্জোতিংসু, নিগ্ঘোসো আসি তাৰদে.

‘‘বুদ্ধস্স আনুভাৰেন, ভেরী ৰজ্জুমঘট্টিতা;

সযং ৰীণা পৰজ্জন্তি, বুদ্ধস্স পৰিসতো পুরং.

‘‘বুদ্ধসেট্ঠং নমস্সামি, পদুমুত্তরমহামুনিং;

পাটিহীরঞ্চ পস্সিত্ৰা, তত্থ চিত্তং পসাদযিং.

‘‘অহো বুদ্ধো অহো ধম্মো, অহো নো সত্থু সম্পদা;

অচেতনাপি তূরিযা, সযমেৰ পৰজ্জরে.

‘‘সতসহস্সিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তে পন পতিট্ঠিতো অত্তনো উপজ্ঝাযেন আচিক্খিতনিযামেন পচ্চন্তিমেসু জনপদেসু ৰিনযধরপঞ্চমেন গণেন উপসম্পদা, ধুৰন্হানং, চম্মত্থরণং, গুণঙ্গুণূপাহনং, চীৰরৰিপ্পৰাসোতি পঞ্চ ৰরে যাচিত্ৰা তে সত্থু সন্তিকা লভিত্ৰা পুনদেৰ অত্তনো ৰসিতট্ঠানং গন্ত্ৰা উপজ্ঝাযস্স তমত্থং আরোচেসি. অযমেত্থ সঙ্খেপো. ৰিত্থারো পন উদানট্ঠকথাযং আগতনযেন ৰেদিতব্বো. অঙ্গুত্তরট্ঠকথাযং (অ. নি. অট্ঠ. ১.১.২০৬) পন ‘‘উপসম্পন্নো হুত্ৰা অত্তনো উপজ্ঝাযস্স সন্তিকে কম্মট্ঠানং গহেত্ৰা ৰিপস্সনং ৰড্ঢেত্ৰা অরহত্তং পাপুণী’’তি ৰুত্তং.

সো অপরভাগে ৰিমুত্তিসুখেন ৰিহরন্তো অত্তনো পটিপত্তিং পচ্চৰেক্খিত্ৰা সোমনস্সজাতো উদানৰসেন –

৩৬৫.

‘‘উপসম্পদা চ মে লদ্ধা, ৰিমুত্তো চম্হি অনাসৰো;

সো চ মে ভগৰা দিট্ঠো, ৰিহারে চ সহাৰসিং.

৩৬৬.

‘‘বহুদেৰ রত্তিং ভগৰা, অব্ভোকাসেতিনামযি;

ৰিহারকুসলো সত্থা, ৰিহারং পাৰিসী তদা.

৩৬৭.

‘‘সন্থরিত্ৰান ¶ সঙ্ঘাটিং, সেয্যং কপ্পেসি গোতমো;

সীহো সেলগুহাযংৰ, পহীনভযভেরৰো.

৩৬৮.

‘‘ততো কল্যাণৰাক্করণো, সম্মাসম্বুদ্ধসাৰকো;

সোণো অভাসি সদ্ধম্মং, বুদ্ধসেট্ঠস্স সম্মুখা.

৩৬৯.

‘‘পঞ্চক্খন্ধে ¶ পরিঞ্ঞায, ভাৰযিত্ৰান অঞ্জসং;

পপ্পুয্য পরমং সন্তিং, পরিনিব্বিস্সত্যনাসৰো’’তি. –

ইমা পঞ্চ গাথা অভাসি.

তত্থ উপসম্পদা চ মে লদ্ধাতি যা সা কিচ্ছেন দসৰগ্গং ভিক্খুসঙ্ঘং সন্নিপাতেত্ৰা অত্তনা লদ্ধা উপসম্পদা. যা চ পন ৰরদানৰসেন সব্বপচ্চন্তিমেসু জনপদেসু ৰিনযধরপঞ্চমেন গণেন সত্থারা অনুঞ্ঞাতা উপসম্পদা, তদুভযং সন্ধাযাহ. চ-সদ্দো ¶ সমুচ্চযত্থো, তেন ইতরেপি সত্থু সন্তিকা লদ্ধৰরে সঙ্গণ্হাতি. ৰিমুত্তো চম্হি অনাসৰোতি অগ্গমগ্গেন সকলকিলেসৰত্থুৰিমুত্তিযা ৰিমুত্তো চ অম্হি. ততো এৰ কামাসৰাদীহি অনাসৰো অম্হীতি যোজনা. সো চ মে ভগৰা দিট্ঠোতি যদত্থং অহং অৰন্তিরট্ঠতো সাৰত্থিং গতো, সো চ ভগৰা মযা অদিট্ঠপুব্বো দিট্ঠো. ৰিহারে চ সহাৰসিন্তি ন কেৰলং তস্স ভগৰতো দস্সনমেৰ মযা লদ্ধং, অথ খো ৰিহারে সত্থু গন্ধকুটিযং সত্থারা কারণং সল্লক্খেত্ৰা ৰাসেন্তেন সহ অৰসিং. ‘‘ৰিহারেতি ৰিহারসমীপে’’তি কেচি.

বহুদেৰ রত্তিন্তি পঠমং যামং ভিক্খূনং ধম্মদেসনাৰসেন কম্মট্ঠানসোধনৰসেন চ, মজ্ঝিমং যামং দেৰানং ব্রহ্মূনঞ্চ কঙ্খচ্ছেদনৰসেন ভগৰা বহুদেৰ রত্তিং অব্ভোকাসে অতিনামযি ৰীতিনামেসি. ৰিহারকুসলোতি দিব্বব্রহ্মআনেঞ্জঅরিযৰিহারেসু কুসলো. ৰিহারং পাৰিসীতি অতিৰেলং নিসজ্জচঙ্কমেহি উপ্পন্নপরিস্সমৰিনোদনত্থং গন্ধকুটিং পাৰিসি.

সন্থরিত্ৰান সঙ্ঘাটিং, সেয্যং কপ্পেসীতি চতুগ্গুণং সঙ্ঘাটিং পঞ্ঞাপেত্ৰা সীহসেয্যং কপ্পেসি. তেনাহ ‘‘গোতমো সীহো সেলগুহাযংৰ পহীনভযভেরৰো’’তি. তত্থ গোতমোতি ভগৰন্তং গোত্তেন কিত্তেতি. সীহো সেলগুহাযংৰাতি সেলস্স পব্বতস্স গুহাযং. যথা সীহো মিগরাজা তেজুস্সদতায পহীনভযভেরৰো দক্খিণেন পস্সেন ¶ পাদে পাদং অচ্চাধায সেয্যং কপ্পেসি, এৰং চিত্তুত্রাসলোমহংসনছম্ভিতত্তহেতূনং কিলেসানং সমুচ্ছিন্নত্তা পহীনভযভেরৰো গোতমো ভগৰা সেয্যং কপ্পেসীতি অত্থো.

ততোতি পচ্ছা, সীহসেয্যং কপ্পেত্ৰা ততো ৰুট্ঠহিত্ৰা ‘‘পটিভাতু তং ভিক্খু ধম্মো ভাসিতু’’ন্তি (উদা. ৪৬) সত্থারা অজ্ঝেসিতোতি অত্থো. কল্যাণৰাক্করণোতি সুন্দরৰচীকরণো, লক্খণসম্পন্নৰচনক্কমোতি অত্থো. সোণো অভাসি সদ্ধম্মন্তি সোল়স অট্ঠকৰগ্গিযসুত্তানি ¶ সোণো কুটিকণ্ণো, বুদ্ধসেট্ঠস্স সম্মাসম্বুদ্ধস্স সম্মুখা, পচ্চক্খতো অভাসীতি থেরো অত্তানমেৰ পরং ৰিয অৰোচ.

পঞ্চক্খন্ধে পরিঞ্ঞাযাতি পঞ্চুপাদানক্খন্ধে তীহিপি পরিঞ্ঞাহি পরিজানিত্ৰা তে পরিজানন্তোযেৰ, অঞ্জসং অরিযং অট্ঠঙ্গিকং মগ্গং ভাৰযিত্ৰা, পরমং সন্তিং নিব্বানং পপ্পুয্য পাপুণিত্ৰা ঠিতো অনাসৰো. ততো এৰ ইদানি পরিনিব্বিস্সতি অনুপাদিসেসনিব্বানৰসেন নিব্বাযিস্সতীতি.

সোণকুটিকণ্ণত্থেরগাথাৰণ্ণনা নিট্ঠিতা.

১২. কোসিযত্থেরগাথাৰণ্ণনা

যো ¶ এৰ গরূনন্তিআদিকা আযস্মতো কোসিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সত্থারং দিস্ৰা পসন্নচিত্তো উচ্ছুখণ্ডিকং অদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে মগধরট্ঠে ব্রাহ্মণকুলে নিব্বত্তি, কোসিযোতিস্স গোত্তৰসেন নামং অকাসি. সো ৰিঞ্ঞুতং পত্তো আযস্মন্তং ধম্মসেনাপতিং অভিণ্হং উপসঙ্কমতি, তস্স সন্তিকে ধম্মং সুণাতি. সো তেন সাসনে পটিলদ্ধসদ্ধো পব্বজিত্ৰা কম্মট্ঠানং অনুযুঞ্জন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৪৪.৪৪-৪৯) –

‘‘নগরে ¶ বন্ধুমতিযা, দ্ৰারপালো অহোসহং;

অদ্দসং ৰিরজং বুদ্ধং, সব্বধম্মান পারগুং.

‘‘উচ্ছুখণ্ডিকমাদায বুদ্ধসেট্ঠস্সদাসহং;

পসন্নচিত্তো সুমনো, ৰিপস্সিস্স মহেসিনো.

‘‘একনৰুতিতো কপ্পে, যং উচ্ছুমদদিং তদা;

দুগ্গতিং নাভিজানামি, উচ্ছুখণ্ডস্সিদং ফলং.

‘‘কিলেসা ¶ ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা গরুৰাসং সপ্পুরিসূপনিস্সযঞ্চ পসংসন্তো –

৩৭০.

‘‘যো ৰে গরূনং ৰচনঞ্ঞু ধীরো, ৰসে চ তম্হি জনযেথ পেমং;

সো ভত্তিমা নাম চ হোতি পণ্ডিতো, ঞত্ৰা চ ধম্মেসু ৰিসেসি অস্স.

৩৭১.

‘‘যং আপদা উপ্পতিতা উল়ারা, নক্খম্ভযন্তে পটিসঙ্খযন্তং;

সো থামৰা নাম চ হোতি পণ্ডিতো, ঞত্ৰা চ ধম্মেসু ৰিসেসি অস্স.

৩৭২.

‘‘যো ৰে সমুদ্দোৰ ঠিতো অনেজো, গম্ভীরপঞ্ঞো নিপুণত্থদস্সী;

অসংহারিযো নাম চ হোতি পণ্ডিতো, ঞত্ৰা চ ধম্মেসু ৰিসেসি অস্স.

৩৭৩.

‘‘বহুস্সুতো ধম্মধরো চ হোতি, ধম্মস্স হোতি অনুধম্মচারী;

সো তাদিসো নাম চ হোতি পণ্ডিতো, ঞত্ৰা চ ধম্মেসু ৰিসেসি অস্স.

৩৭৪.

‘‘অত্থঞ্চ ¶ যো জানাতি ভাসিতস্স,

অত্থঞ্চ ঞত্ৰান তথা করোতি;

অত্থন্তরো নাম স হোতি পণ্ডিতো,

ঞত্ৰা চ ধম্মেসু ৰিসেসি অস্সা’’তি. –

ইমা পঞ্চ গাথা অভাসি.

তত্থ ¶ যোতি খত্তিযাদীসু চতূসু পরিসাসু যো কোচি. ৰেতি ব্যত্তং. গরূনন্তি সীলাদিগরুগুণযুত্তানং পণ্ডিতানং. ৰচনঞ্ঞূতি তেসং অনুসাসনীৰচনং জানন্তো, যথানুসিট্ঠং পটিপজ্জমানো পটিপজ্জিত্ৰা চ তস্স ফলং জানন্তোতি অত্থো. ধীরোতি ধিতিসম্পন্নো. ৰসে চ তম্হি জনযেথ পেমন্তি তস্মিং গরূনং ৰচনে ওৰাদে ৰসেয্য যথানুসিট্ঠং পটিপজ্জেয্য, পটিপজ্জিত্ৰা ‘‘ইমিনা ৰতাহং ওৰাদেন ইমং জাতিআদিদুক্খং ৰীতিৰত্তো’’তি তত্থ জনযেথ পেমং গারৰং উপ্পাদেয্য. ইদঞ্হি দ্ৰযং ‘‘গরূনং ৰচনঞ্ঞু ধীরো’’তি পদদ্ৰযেন ৰুত্তস্সেৰত্থস্স পাকটকরণং. সোতি যো গরূনং ৰচনঞ্ঞূ ধীরো, সো যথানুসিট্ঠং পটিপত্তিযা তত্থ ভত্তিমা চ নাম হোতি, জীৰিতহেতুপি তস্স অনতিক্কমনতো পণ্ডিতো চ নাম হোতি. ঞত্ৰা চ ধম্মেসু ৰিসেসি অস্সাতি তথা পটিপজ্জন্তো চ তায এৰ পটিপত্তিযা চতুন্নং অরিযসচ্চানং জাননহেতু ¶ লোকিযলোকুত্তরধম্মেসু ৰিজ্জাত্তযাদিৰসেন ‘‘তেৰিজ্জো, ছল়ভিঞ্ঞো, পটিসম্ভিদাপত্তো’’তি ৰিসেসি ৰিসেসৰা সিযাতি অত্থো.

যন্তি যং পুগ্গলং পটিপত্তিযা অন্তরাযকরণতো ‘‘আপদা’’তি লদ্ধৰোহারা সোতুণ্হখুপ্পিপাসাদিপাকটপরিস্সযা চেৰ রাগাদিপটিচ্ছন্নপরিস্সযা চ উপ্পতিতা উপ্পন্না, উল়ারা বলৰন্তোপি নক্খম্ভযন্তে ন কিঞ্চি চালেন্তি. কস্মা? পটিসঙ্খযন্তন্তি পটিসঙ্খাযমানং পটিসঙ্খানবলে ঠিতন্তি অত্থো. সোতি যো দল়্হতরাহি আপদাহিপি অক্খম্ভনীযো, সো থামৰা ধিতিমা দল়্হপরক্কমো নাম হোতি. অনৰসেসসংকিলেসপক্খস্স অভিভৰনকপঞ্ঞাবলসমঙ্গিতায পণ্ডিতো চ নাম হোতি. তথাভূতো চ ঞত্ৰা চ ধম্মেসু ৰিসেসি অস্সাতি তং ৰুত্তত্থমেৰ.

সমুদ্দোৰ ¶ ঠিতোতি সমুদ্দো ৰিয ঠিতসভাৰো. যথা হি চতুরাসীতিযোজনসহস্সগম্ভীরে সিনেরুপাদসমীপে মহাসমুদ্দো অট্ঠহিপি দিসাহি উট্ঠিতেহি পকতিৰাতেহি অনিঞ্জনতো ঠিতো অনেজো গম্ভীরো চ, এৰং কিলেসৰাতেহি তিত্থিযৰাদৰাতেহি চ অকম্পনীযতো ঠিতো অনেজো. গম্ভীরস্স অনুপচিতঞাণসম্ভারেহি অলদ্ধগাধস্স নিপুণস্স সুখুমস্স পটিচ্চসমুপ্পাদাদিঅত্থস্স পটিৰিজ্ঝনেন গম্ভীরপঞ্ঞো নিপুণত্থদস্সী. অসংহারিযো নাম চ হোতি পণ্ডিতো সো তাদিসো পুগ্গলো কিলেসেহি দেৰপুত্তমারাদীসু ৰা কেনচি অসংহারিযতায অসংহারিযো নাম হোতি, যথাৰুত্তেন অত্থেন পণ্ডিতো চ নাম হোতি. সেসং ৰুত্তনযমেৰ.

বহুস্সুতোতি পরিযত্তিবাহুসচ্চৰসেন বহুস্সুতো, সুত্তগেয্যাদি বহুং সুতং এতস্সাতি বহুস্সুতো. তমেৰ ধম্মং সুৰণ্ণভাজনে পক্খিত্তসীহৰসং ৰিয অৰিনস্সন্তমেৰ ধারেতীতি ধম্মধরো ¶ চ হোতি. ধম্মস্স হোতি অনুধম্মচারীতি যথাসুতস্স যথাপরিযত্তস্স ধম্মস্স অত্থমঞ্ঞায ধম্মমঞ্ঞায নৰলোকুত্তরধম্মস্স অনুরূপং ধম্মং পুব্বভাগপটিপদাসঙ্খাতং চতুপারিসুদ্ধিসীলধুতঙ্গঅসুভকম্মট্ঠানাদিভেদং চরতি পটিপজ্জতীতি অনুধম্মচারী হোতি, ‘‘অজ্জ অজ্জেৰা’’তি পটিৰেধং আকঙ্খন্তো ৰিচরতি. সো তাদিসো নাম চ হোতি পণ্ডিতোতি যো পুগ্গলো যং গরুং নিস্সায বহুস্সুতো ধম্মধরো ধম্মস্স চ অনুধম্মচারী হোতি. সো চ তাদিসো তেন গরুনা সদিসো পণ্ডিতো নাম হোতি পটিপত্তিযা সদিসভাৰতো. তথাভূতো পন সো ঞত্ৰা চ ধম্মেসু ৰিসেসি অস্স, তং ৰুত্তত্থংৰ.

অত্থঞ্চ যো জানাতি ভাসিতস্সাতি যো পুগ্গলো সম্মাসম্বুদ্ধেন ভাসিতস্স পরিযত্তিধম্মস্স ¶ অত্থং জানাতি. জানন্তো পন ‘‘ইধ সীলং ৰুত্তং, ইধ সমাধি, ইধ পঞ্ঞা’’তি তত্থ তত্থ যথাৰুত্তং অত্থঞ্চ ঞত্ৰান তথা করোতি যথা সত্থারা অনুসিট্ঠং, তথা পটিপজ্জতি. অত্থন্তরো নাম স হোতি পণ্ডিতোতি সো এৰরূপো পুগ্গলো অত্থন্তরো অত্থকারণা সীলাদিঅত্থজাননমত্তমেৰ উপনিস্সযং কত্ৰা পণ্ডিতো হোতি. সেসং ৰুত্তনযমেৰ.

এত্থ ¶ চ পঠমগাথায ‘‘যো ৰে গরূন’’ন্তিআদিনা সদ্ধূপনিস্সযো ৰিসেসভাৰো ৰুত্তো, দুতিযগাথায ‘‘যং আপদা’’তি আদিনা ৰীরিযূপনিস্সযো, ততিযগাথায ‘‘যো ৰে সমুদ্দোৰ ঠিতো’’তিআদিনা সমাধূপনিস্সযো, চতুত্থগাথায ‘‘বহুস্সুতো’’তিআদিনা সতূপনিস্সযো, পঞ্চমগাথায ‘‘অত্থঞ্চ যো জানাতী’’তিআদিনা পঞ্ঞূপনিস্সযো ৰিসেসভাৰো ৰুত্তোতি ৰেদিতব্বো.

কোসিযত্থেরগাথাৰণ্ণনা নিট্ঠিতা.

পঞ্চকনিপাতৰণ্ণনা নিট্ঠিতা.

৬. ছক্কনিপাতো

১. উরুৰেলকস্সপত্থেরগাথাৰণ্ণনা

ছক্কনিপাতে ¶ ¶ দিস্ৰান পাটিহীরানীতিআদিকা আযস্মতো উরুৰেলকস্সপত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো পদুমুত্তরস্স ভগৰতো কালে কুলগেহে নিব্বত্তিত্ৰা, ৰযপ্পত্তো সত্থু সন্তিকে ধম্মং সুণন্তো সত্থারং একং ভিক্খুং মহাপরিসানং অগ্গট্ঠানে ঠপেন্তং দিস্ৰা, সযম্পি তং ঠানন্তরং পত্থেত্ৰা মহাদানং দত্ৰা পণিধানমকাসি. ভগৰা চস্স অনন্তরাযতং দিস্ৰা, ‘‘অনাগতে গোতমবুদ্ধস্স সাসনে মহাপরিসানং অগ্গো ভৰিস্সতী’’তি ব্যাকাসি.

সো ¶ তত্থ যাৰজীৰং পুঞ্ঞানি কত্ৰা ততো চৰিত্ৰা দেৰমনুস্সেসু সংসরন্তো ইতো দ্ৰানৰুতিকপ্পমত্থকে ফুস্সস্স ভগৰতো ৰেমাতিককনিট্ঠভাতা হুত্ৰা নিব্বত্তি. অঞ্ঞেপিস্স দ্ৰে কনিট্ঠভাতরো অহেসুং. তে তযোপি বুদ্ধপ্পমুখং সঙ্ঘং পরমায পূজায পূজেত্ৰা যাৰজীৰং কুসলং কত্ৰা দেৰমনুস্সেসু সংসরন্তো অম্হাকং ভগৰতো নিব্বত্তিতো পুরেতরমেৰ বারাণসিযং ব্রাহ্মণকুলে ভাতরো হুত্ৰা, অনুক্কমেন নিব্বত্তা গোত্তৰসেন তযোপি কস্সপা এৰ নাম জাতা. তে ৰযপ্পত্তা তযো ৰেদে উগ্গণ্হিংসু. তেসং জেট্ঠভাতিকস্স পঞ্চ মাণৰকসতানি পরিৰারো, মজ্ঝিমস্স তীণি, কনিট্ঠস্স দ্ৰে. তে অত্তনো গন্থে সারং ওলোকেন্তা দিট্ঠধম্মিকমেৰ অত্থং দিস্ৰা পব্বজ্জং রোচেসুং. তেসু জেট্ঠভাতা অত্তনো পরিৰারেন সদ্ধিং উরুৰেলং গন্ত্ৰা ইসিপব্বজ্জং পব্বজিত্ৰা উরুৰেলকস্সপো নাম জাতো মহাগঙ্গানদীৰঙ্কে পব্বজিতো নদীকস্সপো নাম জাতো, গযাসীসে পব্বজিতো গযাকস্সপো নাম জাতো.

এৰং তেসু ইসিপব্বজ্জং পব্বজিত্ৰা তত্থ তত্থ ৰসন্তেসু বহূনং দিৰসানং অচ্চযেন অম্হাকং বোধিসত্তো মহাভিনিক্খমনং নিক্খমিত্ৰা, পটিৰিদ্ধসব্বঞ্ঞুতঞ্ঞাণো অনুক্কমেন ধম্মচক্কং পৰত্তেত্ৰা, পঞ্চৰগ্গিযত্থেরে অরহত্তে পতিট্ঠাপেত্ৰা যসপ্পমুখে পঞ্চপঞ্ঞাস সহাযকে ৰিনেত্ৰা সট্ঠি অরহন্তে ‘‘চরথ, ভিক্খৰে, চারিক’’ন্তি ৰিস্সজ্জেত্ৰা, ভদ্দৰগ্গিযে ৰিনেত্ৰা উরুৰেলকস্সপস্স ¶ ৰসনট্ঠানং গন্ত্ৰা ৰসনত্থায অগ্যাগারং পৰিসিত্ৰা ¶ , তত্থ কতনাগদমনং আদিং কত্ৰা অড্ঢুড্ঢসহস্সেহি পাটিহারিযেহি উরুৰেলকস্সপং সপরিসং ৰিনেত্ৰা পব্বাজেসি. তস্স পব্বজিতভাৰং ঞত্ৰা ইতরেপি দ্ৰে ভাতরো সপরিসা আগন্ত্ৰা সত্থু সন্তিকে পব্বজিংসু. সব্বেৰ এহিভিক্খূ ইদ্ধিমযপত্তচীৰরধরা অহেসুং.

সত্থা তং সমণসহস্সং আদায গযাসীসং গন্ত্ৰা পিট্ঠিপাসাণে নিসিন্নো আদিত্তপরিযাযদেসনায সব্বে অরহত্তে পতিট্ঠাপেসি. তেন ৰুত্তং অপদানে (অপ. থের ২.৫৪.২৫১-২৯৫) –

‘‘পদুমুত্তরো নাম জিনো, সব্বলোকৰিদূ মুনি;

ইতো সতসহস্সম্হি, কপ্পে উপ্পজ্জি চক্খুমা.

‘‘ওৰাদকো ৰিঞ্ঞাপকো, তারকো সব্বপাণিনং;

দেসনাকুসলো বুদ্ধো, তারেসি জনতং বহুং.

‘‘অনুকম্পকো কারুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

‘‘এৰং নিরাকুলং আসি, সুঞ্ঞতং তিত্থিযেহি চ;

ৰিচিত্তং অরহন্তেহি, ৰসীভূতেহি তাদিভি.

‘‘রতনানট্ঠপঞ্ঞাসং, উগ্গতো সো মহামুনি;

কঞ্চনগ্ঘিযসঙ্কাসো, বাত্তিংসৰরলক্খণো.

‘‘ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

‘‘তদাহং হংসৰতিযা, ব্রাহ্মণো সাধুসম্মতো;

উপেচ্চ লোকপজ্জোতং, অস্সোসিং ধম্মদেসনং.

‘‘তদা মহাপরিসতিং, মহাপরিসসাৰকং;

ঠপেন্তং এতদগ্গম্হি, সুত্ৰান মুদিতো অহং.

‘‘মহতা পরিৰারেন, নিমন্তেত্ৰা মহাজিনং;

ব্রাহ্মণানং সহস্সেন, সহদানমদাসহং.

‘‘মহাদানং দদিত্ৰান, অভিৰাদিয নাযকং;

একমন্তং ঠিতো হট্ঠো, ইদং ৰচনমব্রৰিং.

‘‘তযি ¶ সদ্ধায মে ৰীর, অধিকারগুণেন চ;

পরিসা মহতী হোতু, নিব্বত্তস্স তহিং তহিং.

‘‘তদা ¶ অৰোচ পরিসং, গজগজ্জিতসুস্সরো;

করৰীকরুতো সত্থা, এতং পস্সথ ব্রাহ্মণং.

‘‘হেমৰণ্ণং মহাবাহুং, কমলাননলোচনং;

উদগ্গতনুজং হট্ঠং, সদ্ধৰন্তং গুণে মম.

‘‘এস পত্থযতে ঠানং, সীহঘোসস্স ভিক্খুনো;

অনাগতম্হি অদ্ধানে, লচ্ছসে তং মনোরথং.

‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ধম্মেসু দাযাদো, ওরসো ধম্মনিম্মিতো;

কস্সপো নাম গোত্তেন, হেস্সতি সত্থু সাৰকো.

‘‘ইতো দ্ৰেনৰুতে কপ্পে, অহু সত্থা অনুত্তরো;

অনূপমো অসদিসো, ফুস্সো লোকগ্গনাযকো.

‘‘সো চ সব্বং তমং হন্ত্ৰা, ৰিজটেত্ৰা মহাজটং;

ৰস্সতে অমতং ৰুট্ঠিং, তপ্পযন্তো সদেৰকং.

‘‘তদা হি বারাণসিযং, রাজাপচ্চা অহুম্হসে;

ভাতরোম্হ তযো সব্বে, সংৰিসট্ঠাৰ রাজিনো.

‘‘ৰীরঙ্গরূপা বলিনো, সঙ্গামে অপরাজিতা;

তদা কুপিতপচ্চন্তো, অম্হে আহ মহীপতি.

‘‘এথ গন্ত্ৰান পচ্চন্তং, সোধেত্ৰা অট্টৰীবলং;

খেমং ৰিজিরিতং কত্ৰা, পুন দেথাতি ভাসথ.

‘‘ততো ¶ মযং অৰোচুম্হ, যদি দেয্যাসি নাযকং;

উপট্ঠানায অম্হাকং, সাধযিস্সাম ৰো ততো.

‘‘ততো মযং লদ্ধৰরা, ভূমিপালেন পেসিতা;

নিক্খিত্তসত্থং পচ্চন্তং, কত্ৰা পুনরুপেচ্চ তং.

‘‘যাচিত্ৰা ¶ সত্থুপট্ঠানং, রাজানং লোকনাযকং;

মুনিৰীরং লভিত্ৰান, যাৰজীৰং যজিম্হ তং.

‘‘মহগ্ঘানি চ ৰত্থানি, পণীতানি রসানি চ;

সেনাসনানি রম্মানি, ভেসজ্জানি হিতানি চ.

‘‘দত্ৰা সসঙ্ঘমুনিনো, ধম্মেনুপ্পাদিতানি নো;

সীলৰন্তো কারুণিকা, ভাৰনাযুত্তমানসা.

‘‘সদ্ধা পরিচরিত্ৰান, মেত্তচিত্তেন নাযকং;

নিব্বুতে তম্হি লোকগ্গে, পূজং কত্ৰা যথাবলং.

‘‘ততো চুতা সন্তুসিতং, গতা তত্থ মহাসুখং;

অনুভূতা মযং সব্বে, বুদ্ধপূজাযিদং ফলং.

‘‘মাযাকারো যথা রঙ্গে, দস্সেসি ৰিকতিং বহুং;

তথা ভৰে ভমন্তোহং, ৰিদেহাধিপতী অহুং.

‘‘গুণাচেলস্স ৰাক্যেন, মিচ্ছাদিট্ঠিগতাসযো;

নরকং মগ্গমারূল়্হো, রুচায মম ধীতুযা.

‘‘ওৰাদং নাদিযিত্ৰান, ব্রহ্মুনা নারদেনহং;

বহুধা সংসিতো সন্তো, দিট্ঠিং হিত্ৰান পাপিকং.

‘‘পূরযিত্ৰা ৰিসেসেন, দস কম্মপথানিহং;

হিত্ৰান দেহমগমিং, সগ্গং সভৰনং যথা.

‘‘পচ্ছিমে ভৰে সম্পত্তে, ব্রহ্মবন্ধু অহোসহং;

বারাণসিযং ফীতাযং, জাতো ৰিপ্পমহাকুলে.

‘‘মচ্চুব্যাধিজরাভীতো, ওগাহেত্ৰা মহাৰনং;

নিব্বানং পদমেসন্তো, জটিলেসু পরিব্বজিং.

‘‘তদা দ্ৰে ভাতরো ময্হং, পব্বজিংসু মযা সহ;

উরুৰেলাযং মাপেত্ৰা, অস্সমং নিৰসিং অহং.

‘‘কস্সপো নাম গোত্তেন, উরুৰেলনিৰাসিকো;

ততো মে আসি পঞ্ঞত্তি, উরুৰেলকস্সপো ইতি.

‘‘নদীসকাসে ¶ ভাতা মে, নদীকস্সপসৰ্হযো;

আসী সকাসনামেন, গযাযং গযাকস্সপো.

‘‘দ্ৰে সতানি কনিট্ঠস্স, তীণি, মজ্ঝস্স ভাতুনো;

মম পঞ্চ সতানূনা, সিস্সা সব্বে মমানুগা.

‘‘তদা উপেচ্চ মং বুদ্ধো, কত্ৰান ৰিৰিধানি মে;

পাটিহীরানি লোকগ্গো, ৰিনেসি নরসারথি.

‘‘সহস্সপরিৰারেন, অহোসিং এহিভিক্খুকো;

তেহেৰ সহ সব্বেহি, অরহত্তমপাপুণিং.

‘‘তে চেৰঞ্ঞে চ বহৰো, সিস্সা মং পরিৰারযুং;

ভাসিতুঞ্চ সমত্থোহং, ততো মং ইসিসত্তমো.

‘‘মহাপরিসভাৰস্মিং, এতদগ্গে ঠপেসি মং;

অহো বুদ্ধে কতং কারং, সফলং মে অজাযথ.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা সীহনাদং নদন্তো –

৩৭৫.

‘‘দিস্ৰান ¶ পাটিহীরানি, গোতমস্স যসস্সিনো;

ন তাৰাহং পণিপতিং, ইস্সামানেন ৰঞ্চিতো.

৩৭৬.

‘‘মম সঙ্কপ্পমঞ্ঞায, চোদেসি নরসারথি;

ততো মে আসি সংৰেগো, অব্ভুতো লোমহংসনো.

৩৭৭.

‘‘পুব্বে ¶ জটিলভূতস্স, যা মে সিদ্ধি পরিত্তিকা;

তাহং তদা নিরাকত্ৰা, পব্বজিং জিনসাসনে.

৩৭৮.

‘‘পুব্বে যঞ্ঞেন সন্তুট্ঠো, কামধাতুপুরক্খতো;

পচ্ছা রাগঞ্চ দোসঞ্চ, মোহঞ্চাপি সমূহনিং.

৩৭৯.

‘‘পুব্বেনিৰাসং জানামি, দিব্বচক্খু ৰিসোধিতং;

ইদ্ধিমা পরচিত্তঞ্ঞূ, দিব্বসোতঞ্চ পাপুণিং.

৩৮০.

‘‘যস্স ¶ চত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো’’তি. –

ইমা ছ গাথা অভাসি.

তত্থ দিস্ৰান পাটিহীরানীতি নাগরাজদমনাদীনি অড্ঢুড্ঢসহস্সানি পাটিহারিযানি দিস্ৰা. ‘‘পাটিহীরং, পাটিহেরং, পাটিহারিয’’ন্তি হি অত্থতো একং, ব্যঞ্জনমেৰ নানং. যসস্সিনো’’তি ‘‘ইতিপি সো ভগৰা’’তিআদিনা সদেৰকে লোকে যথাভুচ্চং পত্থটকিত্তিসদ্দস্স. ন তাৰাহং পণিপতিন্তি যাৰ মং ভগৰা ‘‘নেৰ খো ত্ৰং, কস্সপ, অরহা, নাপি অরহত্তমগ্গং সমাপন্নো, সাপি তে পটিপদা নত্থি, যায ত্ৰং অরহা ৰা অস্স, অরহত্তমগ্গং ৰা সমাপন্নো’’তি ন তজ্জেসি, তাৰ অহং ন পণিপাতনং অকাসিং. কিংকারণা? ইস্সামানেন ৰঞ্চিতো, ‘‘ইমস্স মযি সাৰকত্তং উপগতে মম লাভসক্কারো পরিহাযিস্সতি, ইমস্স এৰ ৰড্ঢিস্সতী’’তি এৰং পরসম্পত্তিঅসহনলক্খণায ইস্সায চেৰ, ‘‘অহং গণপামোক্খো বহুজনসম্মতো’’তি এৰং অব্ভুন্নতিলক্খণেন মানেন চ ৰঞ্চিতো, পলম্ভিতো হুত্ৰাতি অত্থো.

মম সঙ্কপ্পমঞ্ঞাযাতি ময্হং মিচ্ছাসঙ্কপ্পং জানিত্ৰা, যং যং ভগৰা উত্তরি মনুস্সধম্মা ইদ্ধিপাটিহারিযং দস্সেতি, তং তং দিস্ৰা ‘‘মহিদ্ধিকো খো মহাসমণো মহানুভাৰো’’তি চিন্তেত্ৰাপি ‘‘ন ত্ৰেৰ খো অরহা যথা অহ’’ন্তি এৰং পৰত্তং মিচ্ছাৰিতক্কং জানন্তোপি ঞাণপরিপাকং আগমেন্তো অজ্ঝুপেক্খিত্ৰা পচ্ছা নেরঞ্জরায মজ্ঝে সমন্ততো উদকং উস্সারেত্ৰা রেণুহতায ভূমিযা চঙ্কমিত্ৰা তেন আভতনাৰায ঠিতো তদাপি ‘‘মহিদ্ধিকো’’তিআদিকং চিন্তেত্ৰা পুন ‘‘ন ত্ৰেৰ খো অরহা যথা অহ’’ন্তি পৰত্তিতং মিচ্ছাসঙ্কপ্পং ঞত্ৰাতি অত্থো. চোদেসি নরসারথীতি তদা মে ¶ ঞাণপরিপাকং ঞত্ৰা ‘‘নেৰ খো ত্ৰং অরহা’’তিআদিনা পুরিসদম্মসারথি সত্থা মং চোদেসি নিগ্গণ্হি. ততো মে আসি সংৰেগো, অব্ভুতো লোমহংসনোতি ততো যথাৰুত্তচোদনাহেতু এত্তকং কালং অভূতপুব্বতায অব্ভুতো লোমহংসনৰসেন পৰত্তিযা লোমহংসনো ‘‘অনরহাৰ সমানো ‘অরহা’তি ¶ মঞ্ঞি’’ন্তি সংৰেগো সহোত্তপ্পো ঞাণুপ্পাদো ময্হং অহোসি.

জটিলভূতস্সাতি ¶ তাপসভূতস্স. সিদ্ধীতি লাভসক্কারসমিদ্ধি. পরিত্তিকাতি অপ্পমত্তিকা. তাহন্তি তং অহং. তদাতি ভগৰতো চোদনায সংৰেগুপ্পত্তিকালে. নিরাকত্ৰাতি অপনেত্ৰা ছড্ডেত্ৰা, অনপেক্খো হুত্ৰাতি অত্থো. ‘‘ইদ্ধীতি ভাৰনামযইদ্ধী’’তি ৰদন্তি. তদযুত্তং তদা তস্স অঝানলাভীভাৰতো. তথা হি ৰুত্তং ‘‘কামধাতুপুরক্খতো’’তি.

যঞ্ঞেন সন্তুট্ঠোতি ‘‘যঞ্ঞং যজিত্ৰা সগ্গসুখং অনুভৰিস্সামি, অলমেত্তাৰতা’’তি যঞ্ঞযজনেন সন্তুট্ঠো নিট্ঠিতকিচ্চসঞ্ঞী. কামধাতুপুরক্খতোতি কামসুগতিং আরব্ভ উপ্পন্নতণ্হো যঞ্ঞযজনেন কামলোকং পুরক্খত্ৰা ঠিতো. সো চে যঞ্ঞো পাণাতিপাতপটিসংযুত্তো হোতি, ন তেন সুগতিং সক্কা লদ্ধুং. ন হি অকুসলস্স ইট্ঠো কন্তো ৰিপাকো নিব্বত্ততি. যা পন তত্থ দানাদিকুসলচেতনা, তায সতি পচ্চযসমৰাযে সুগতিং গচ্ছেয্য. পচ্ছাতি তাপসপব্বজ্জাতো পচ্ছা সত্থু ওৰাদেন তাপসলদ্ধিং পহায চতুসচ্চকম্মট্ঠানানুযোগকালে. সমূহনিন্তি ৰিপস্সনং উস্সুক্কাপেত্ৰা মগ্গপটিপাটিযা রাগঞ্চ দোসঞ্চ মোহঞ্চ অনৰসেসতো সমুগ্ঘাতেসিং.

যস্মা পনাযং থেরো অরিযমগ্গেন রাগাদযো সমূহনন্তোযেৰ ছল়ভিঞ্ঞো অহোসি, তস্মা তং অত্তনো ছল়ভিঞ্ঞভাৰং দস্সেন্তো ‘‘পুব্বেনিৰাসং জানামী’’তিআদিমাহ. তত্থ পুব্বেনিৰাসং জানামীতি অত্তনো পরেসঞ্চ পুব্বেনিৰাসং অতীতাসু জাতীসু নিব্বত্তক্খন্ধে খন্ধপটিবদ্ধে চ পুব্বেনিৰাসঞাণেন হত্থতলে আমলকং ৰিয পচ্চক্খতো জানামি বুজ্ঝামি. দিব্বচক্খু ৰিসোধিতন্তি দিব্বচক্খুঞাণং ৰিসোধিতং, পকতিচক্খুনা আপাথগতং পকতিরূপং ৰিয দিব্বং মানুসম্পি দূরং তিরোট্ঠিতং অতিসুখুমঞ্চ রূপং ৰিভাৰেতুং সমত্থঞাণং ভাৰনায মযা ৰিসুদ্ধং কত্ৰা পটিলদ্ধন্তি অত্থো. ইদ্ধিমাতি অধিট্ঠানিদ্ধিৰিকুব্বনিদ্ধিআদীহি ইদ্ধীহি ইদ্ধিমা, ইদ্ধিৰিধঞাণলাভীতি অত্থো. সরাগাদিভেদস্স পরেসং চিত্তস্স জাননতো পরচিত্তঞ্ঞূ, চেতোপরিযঞাণলাভীতি ৰুত্তং হোতি. দিব্বসোতঞ্চ পাপুণিন্তি দিব্বসোতঞাণঞ্চ পটিলভিং.

সো ¶ মে অত্থো অনুপ্পত্তো, সব্বসংযোজনক্খযোতি যো সব্বেসং সংযোজনানং খযভূতো খযেন ¶ ৰা লদ্ধব্বো, সো সদত্থো পরমত্থো চ মযা অরিযমগ্গাধিগমেন অধিগতোতি. এৰমেতায গাথায থেরস্স অঞ্ঞাব্যাকরণং অহোসীতি ৰেদিতব্বো.

উরুৰেলকস্সপত্থেরগাথাৰণ্ণনা নিট্ঠিতা.

২. তেকিচ্ছকারিত্থেরগাথাৰণ্ণনা

অতিহিতা ¶ ৰীহীতিআদিকা আযস্মতো তেকিচ্ছকারিত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইতো একনৰুতে কপ্পে ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্ৰা ৰেজ্জসত্থে নিপ্ফত্তিং গতো. ৰিপস্সিস্স ভগৰতো উপট্ঠাকং অসোকং নাম থেরং ব্যাধিতং অরোগমকাসি, অঞ্ঞেসঞ্চ সত্তানং রোগাভিভূতানং অনুকম্পায ভেসজ্জং সংৰিদহি.

সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সুবুদ্ধস্স নাম ব্রাহ্মণস্স পুত্তো হুত্ৰা নিব্বত্তি. তস্স তিকিচ্ছকেহি গব্ভকালে পরিস্সযং অপহরিত্ৰা পরিপালিততায তেকিচ্ছকারীতি নামং অকংসু. সো অত্তনো কুলানুরূপানি ৰিজ্জাট্ঠানানি সিপ্পানি চ সিক্খন্তো ৰড্ঢতি. তদা চাণক্কো সুবুদ্ধস্স পঞ্ঞাৰেয্যত্তিযং কিরিযাসু উপাযকোসল্লঞ্চ দিস্ৰা, ‘‘অযং ইমস্মিং রাজকুলে পতিট্ঠং লভন্তো মং অভিভৰেয্যা’’তি ইস্সাপকতো রঞ্ঞা চন্দগুত্তেন তং বন্ধনাগারে খিপাপেসি. তেকিচ্ছকারী পিতু বন্ধনাগারপ্পৰেসনং সুত্ৰা ভীতো পলাযিত্ৰা সাণৰাসিত্থেরস্স সন্তিকং গন্ত্ৰা অত্তনো সংৰেগকারণং থেরস্স কথেত্ৰা পব্বজিত্ৰা কম্মট্ঠানং গহেত্ৰা অব্ভোকাসিকো নেসজ্জিকো চ হুত্ৰা ৰিহরতি, সীতুণ্হং অগণেন্তো ¶ সমণধম্মমেৰ করোতি, ৰিসেসতো ব্রহ্মৰিহারভাৰনমনুযুঞ্জতি. তং দিস্ৰা মারো পাপিমা ‘‘ন ইমস্স মম ৰিসযং অতিক্কমিতুং দস্সামী’’তি ৰিক্খেপং কাতুকামো সস্সানং নিপ্ফত্তিকালে খেত্তগোপকৰণ্ণেন থেরস্স সন্তিকং গন্ত্ৰা তং নিপ্পণ্ডেন্তো –

৩৮১.

‘‘অতিহিতা ৰীহি, খলগতা সালী;

ন চ লভে পিণ্ডং, কথমহং কস্স’’ন্তি. – আহ; তং সুত্ৰা থেরো –

৩৮২.

‘‘বুদ্ধমপ্পমেয্যং ¶ অনুস্সর পসন্নো, পীতিযা ফুটসরীরো হোহিসি সততমুদগ্গো.

৩৮৩.

‘‘ধম্মমপ্পমেয্যং ¶ …পে… সততমুদগ্গো.

৩৮৪.

‘‘সঙ্ঘমপ্পমেয্যং…পে… সততমুদগ্গো’’তি. – আহ; তং সুত্ৰা মারো –

৩৮৫.

‘‘অব্ভোকাসে ৰিহরসি, সীতা হেমন্তিকা ইমা রত্যো;

মা সীতেন পরেতো ৰিহঞ্ঞিত্থো, পৰিস ত্ৰং ৰিহারং ফুসিতগ্গল়’’ন্তি. –

আহ. অথ থেরো –

৩৮৬.

‘‘ফুসিস্সং চতস্সো অপ্পমঞ্ঞাযো, তাহি চ সুখিতো ৰিহরিস্সং;

নাহং সীতেন ৰিহঞ্ঞিস্সং, অনিঞ্জিতো ৰিহরন্তো’’তি. – আহ;

তত্থ অতিহিতা ৰীহীতি ৰীহযো কোট্ঠাগারং অতিনেত্ৰা ঠপিতা, তত্থ পটিসামিতা খলতো ৰা ঘরং উপনীতাতি অত্থো. ৰীহিগ্গহণেন চেত্থ ইতরম্পি ধঞ্ঞং সঙ্গণ্হাতি. সালী পন যেভুয্যেন ৰীহিতো ¶ পচ্ছা পচ্চন্তীতি আহ. খলগতা সালীতি খলং ধঞ্ঞকরণট্ঠানং গতা, তত্থ রাসিৰসেন মদ্দনচাৰনাদিৰসেন ঠিতাতি অত্থো. পধানধঞ্ঞভাৰদস্সনত্থঞ্চেত্থ সালীনং ৰিসুং গহণং, উভযেনপি গামে, গামতো বহি চ ধঞ্ঞং পরিপুণ্ণং ঠিতন্তি দস্সেতি. ন চ লভে পিণ্ডন্তি এৰং সুলভধঞ্ঞে সুভিক্খকালে অহং পিণ্ডমত্তম্পি ন লভামি. ইদানি কথমহং কস্সন্তি অহং কথং করিস্সামি, কথং জীৰিস্সামীতি পরিহাসকেল়িং অকাসি.

তং সুত্ৰা থেরো ‘‘অযং ৰরাকো অত্তনা অত্তনো পৰত্তিং ময্হং পকাসেসি, মযা পন অত্তনাৰ অত্তা ওৰদিতব্বো, ন মযা কিঞ্চি কথেতব্ব’’ন্তি ৰত্থুত্তযানুস্সতিযং অত্তানং নিযোজেন্তো ‘‘বুদ্ধমপ্পমেয্য’’ন্তিআদিনা তিস্সো গাথা অভাসি. তত্থ বুদ্ধমপ্পমেয্যং অনুস্সর পসন্নোতি সৰাসনায অৰিজ্জানিদ্দায অচ্চন্তৰিগমেন, বুদ্ধিযা চ ৰিকসিতভাৰেন বুদ্ধং ভগৰন্তং পমাণকরানং রাগাদিকিলেসানং অভাৰা অপরিমাণগুণসমঙ্গিতায অপ্পমেয্যপুঞ্ঞক্খেত্ততায চ অপ্পমেয্যং. ওকপ্পনলক্খণেন অভিপ্পসাদেন পসন্নো, পসন্নমানসো ‘‘ইতিপি সো ভগৰা অরহং সম্মাসম্বুদ্ধো’’তিআদিনা (ম. নি. ১.৭৪; সং. নি. ৫.৯৯৭) অনুস্সর অনু অনু বুদ্ধারম্মণং সতিং পৰত্তেহি, পীতিযা ফুটসরীরো হোহিসি. সততমুদগ্গোতি অনুস্সরন্তোৰ ফরণলক্খণায পীতিযা সততং সব্বদা ফুটসরীরো পীতিসমুট্ঠানপণীতরূপেহি অজ্ঝোত্থটসরীরো উব্বেগপীতিযা ¶ উদগ্গো কাযং উদগ্গং কত্ৰা আকাসং লঙ্ঘিতুং সমত্থো চ ভৰেয্যাসি, বুদ্ধানুস্সতিযা বুদ্ধারম্মণং উল়ারং পীতিসোমনস্সং পটিসংৰেদেয্যাসি. যতো সীতুণ্হেহি ৰিয জিঘচ্ছাপিপাসাহিপি অনভিভূতো হোহিসীতি অত্থো.

ধম্মন্তি ¶ অরিযং লোকুত্তরধম্মং. সঙ্ঘন্তি অরিযং পরমত্থসঙ্ঘং. সেসং ৰুত্তনযমেৰ. অনুস্সরাতি পনেত্থ ‘‘স্ৰাক্খাতো ভগৰতা ধম্মো’’তিআদিনা ধম্মং, ‘‘সুপ্পটিপন্নো ভগৰতো সাৰকসঙ্ঘো’’তিআদিনা সঙ্ঘং অনুস্সরাতি যোজেতব্বং.

এৰং থেরেন রতনত্তযগুণানুস্সরণে নিযোজনৰসেন অত্তনি ওৰদিতে পুন মারো ৰিৰেকৰাসতো নং ৰিৰেচেতুকামো হিতেসীভাৰং ¶ ৰিয দস্সেন্তো ‘‘অব্ভোকাসে ৰিহরসী’’তি পঞ্চমং গাথমাহ. তস্সত্থো – ত্ৰং, ভিক্খু, অব্ভোকাসে কেনচি অপটিচ্ছন্নে ৰিৰটঙ্গণে ৰিহরসি ইরিযাপথে কপ্পেসি. হেমন্তিকা হিমপাতসমযে পরিযাপন্না ইমা সীতা রত্তিযো ৰত্তন্তি. তস্মা সীতেন পরেতো অভিভূতো হুত্ৰা মা ৰিহঞ্ঞিত্থো ৰিঘাতং মা আপজ্জি মা কিলমি. ফুসিতগ্গল়ং পিহিতকৰাটং সেনাসনং পৰিস, এৰং তে সুখৰিহারো ভৰিস্সতীতি.

তং সুত্ৰা থেরো ‘‘ন ময্হং সেনাসনপরিযেসনায পযোজনং, এত্থেৰাহং সুখৰিহারী’’তি দস্সেন্তো ‘‘ফুসিস্স’’ন্তিআদিনা ছট্ঠং গাথমাহ. তত্থ ফুসিস্সং চতস্সো অপ্পমঞ্ঞাযোতি অপ্পমাণগোচরতায ‘‘অপ্পমঞ্ঞা’’তি লদ্ধৰোহারে চত্তারো ব্রহ্মৰিহারে ফুসিস্সং ফুসিস্সামি, কালেন কালং সমাপজ্জিস্সামি. তাহি চ সুখিতো ৰিহরিস্সন্তি তাহি অপ্পমঞ্ঞাহি সুখিতো সঞ্জাতসুখো হুত্ৰা ৰিহরিস্সং চত্তারোপি ইরিযাপথে কপ্পেস্সামীতি. তেন ময্হং সব্বকালে সুখমেৰ, ন দুক্খং. যতো নাহং সীতেন ৰিহঞ্ঞিস্সং অন্তরট্ঠকেপি হিমপাতসমযে অহং সীতেন ন কিলমিস্সামি, তস্মা অনিঞ্জিতো ৰিহরন্তো চিত্তস্স ইঞ্জিতকারণানং ব্যাপাদাদীনং সুপ্পহীনত্তা পচ্চযুপ্পন্নিঞ্জনায চ অভাৰতো সমাপত্তিসুখেনেৰ সুখিতো ৰিহরিস্সামীতি. এৰং থেরো ইমং গাথং ৰদন্তোযেৰ ৰিপস্সনং ৰড্ঢেত্ৰা অরহত্তং সচ্ছাকাসি. তেন ৰুত্তং অপদানে (অপ. থের ১.১৮.৩৯-৪৪) –

‘‘নগরে বন্ধুমতিযা, ৰেজ্জো আসিং সুসিক্খিতো;

আতুরানং সদুক্খানং, মহাজনসুখাৰহো.

‘‘ব্যাধিতং সমণং দিস্ৰা, সীলৰন্তং মহাজুতিং;

পসন্নচিত্তো সুমনো, ভেসজ্জমদদিং তদা.

‘‘অরোগো আসি তেনেৰ, সমণো সংৰুতিন্দ্রিযো;

অসোকো নাম নামেন, উপট্ঠাকো ৰিপস্সিনো.

‘‘একনৰুতিতো কপ্পে, যং ওসধমদাসহং;

দুগ্গতিং নাভিজানামি, ভেসজ্জস্স ইদং ফলং.

‘‘ইতো ¶ চ অট্ঠমে কপ্পে, সব্বোসধসনামকো;

সত্তরতনসম্পন্নো, চক্কৰত্তী মহপ্ফলো.

‘‘কিলেসা ¶ ঝাপিতা ময্হং…পে… কতং বুদ্ধস্স সাসন’’ন্তি.

এত্থ চ বিন্দুসাররঞ্ঞো কালে ইমস্স থেরস্স উপ্পন্নত্তা ততিযসঙ্গীতিযং ইমা গাথা সঙ্গীতাতি ৰেদিতব্বা.

তেকিচ্ছকারিত্থেরগাথাৰণ্ণনা নিট্ঠিতা.

৩. মহানাগত্থেরগাথাৰণ্ণনা

যস্স সব্রহ্মচারীসূতিআদিকা আযস্মতো মহানাগত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো ককুসন্ধস্স ভগৰতো কালে ¶ কুলগেহে নিব্বত্তিত্ৰা ৰিঞ্ঞুতং পত্তো একদিৰসং ককুসন্ধং ভগৰন্তং অরঞ্ঞং অজ্ঝোগাহেত্ৰা অঞ্ঞতরস্মিং রুক্খমূলে ঝানসুখেন নিসিন্নং দিস্ৰা পসন্নমানসো তস্স দাল়িমফলং অদাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাকেতে মধুৰাসেট্ঠস্স নাম ব্রাহ্মণস্স পুত্তো হুত্ৰা নিব্বত্তি, মহানাগোতিস্স নামং অহোসি. সো ৰিঞ্ঞুতং পত্তো ভগৰতি সাকেতে অঞ্জনৰনে ৰিহরন্তে আযস্মতো গৰম্পতিত্থেরস্স পাটিহারিযং দিস্ৰা পটিলদ্ধসদ্ধো থেরস্সেৰ সন্তিকে পব্বজিত্ৰা তস্সোৰাদে ঠত্ৰা অরহত্তং পাপুণি. তেন ৰুত্তং অপদানে (অপ. থের ২.৪৫.১-৭) –

‘‘ককুসন্ধো মহাৰীরো, সব্বধম্মান পারগূ;

গণম্হা ৰূপকট্ঠো সো, অগমাসি ৰনন্তরং.

‘‘বীজমিঞ্জং গহেত্ৰান, লতায আৰুণিং অহং;

ভগৰা তম্হি সমযে, ঝাযতে পব্বতন্তরে.

‘‘দিস্ৰানহং দেৰদেৰং, ৰিপ্পসন্নেন চেতসা;

দক্খিণেয্যস্স ৰীরস্স, বীজমিঞ্জমদাসহং.

‘‘ইমস্মিংযেৰ ¶ কপ্পম্হি, যং মিঞ্জমদদিং তদা;

দুগ্গতিং নাভিজানামি, বীজমিঞ্জস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ৰিমুত্তিসুখেন ৰিহরন্তো থেরো ছব্বগ্গিযে ভিক্খূ সব্রহ্মচারীসু গারৰং অকত্ৰা ৰিহরন্তে দিস্ৰা তেসং ওৰাদদানৰসেন –

৩৮৭.

‘‘যস্স ¶ সব্রহ্মচারীসু, গারৰো নূপলব্ভতি;

পরিহাযতি সদ্ধম্মা, মচ্ছো অপ্পোদকে যথা.

৩৮৮.

‘‘যস্স সব্রহ্মচারীসু, গারৰো নূপলব্ভতি;

ন ৰিরূহতি সদ্ধম্মে, খেত্তে বীজংৰ পূতিকং.

৩৮৯.

‘‘যস্স সব্রহ্মচারীসু, গারৰো নূপলব্ভতি;

আরকা হোতি নিব্বানা, ধম্মরাজস্স সাসনে.

৩৯০.

‘‘যস্স সব্রহ্মচারীসু, গারৰো উপলব্ভতি;

ন ৰিহাযতি সদ্ধম্মা, মচ্ছো বৰ্হোদকে যথা.

৩৯১.

‘‘যস্স সব্রহ্মচারীসু, গারৰো উপলব্ভতি;

সো ৰিরূহতি সদ্ধম্মে, খেত্তে বীজংৰ ভদ্দকং.

৩৯২.

‘‘যস্স সব্রহ্মচারীসু, গারৰো উপলব্ভতি;

সন্তিকে হোতি নিব্বানং, ধম্মরাজস্স সাসনে’’তি. –

ইমা ছ গাথা অভাসি.

তত্থ সব্রহ্মচারীসূতি সমানং ব্রহ্মং সীলাদিধম্মং চরন্তীতি সব্রহ্মচারিনো, সীলদিট্ঠিসামঞ্ঞগতা সহধম্মিকা, তেসু. গারৰোতি গরুভাৰো সীলাদিগুণনিমিত্তং গরুকরণং. নূপলব্ভতীতি ন ৰিজ্জতি ন পৰত্ততি, ন উপতিট্ঠতীতি অত্থো. নিব্বানাতি কিলেসানং নিব্বাপনতো কিলেসক্খযাতি অত্থো. ধম্মরাজস্সাতি সত্থুনো. সত্থা হি সদেৰকং লোকং যথারহং লোকিযলোকুত্তরেন ধম্মেন রঞ্জেতি তোসেতীতি ধম্মরাজা. এত্থ চ ‘‘ধম্মরাজস্স সাসনে’’তি ইমিনা নিব্বানং নাম ধম্মরাজস্সেৰ সাসনে ¶ , ন অঞ্ঞত্থ. তত্থ যো সব্রহ্মচারীসু ¶ গারৰরহিতো, সো যথা নিব্বানা আরকা হোতি, তথা ধম্মরাজস্স সাসনতোপি আরকা হোতীতি দস্সেতি. বৰ্হোদকেতি বহুউদকে. সন্তিকে হোতি নিব্বানন্তি নিব্বানং তস্স সন্তিকে সমীপে এৰ হোতি. সেসং ৰুত্তনযমেৰ. ইমা এৰ চ থেরস্স অঞ্ঞাব্যাকরণগাথা অহেসুং.

মহানাগত্থেরগাথাৰণ্ণনা নিট্ঠিতা.

৪. কুল্লত্থেরগাথাৰণ্ণনা

কুল্লো সিৰথিকন্তিআদিকা আযস্মতো কুল্লত্থেরস্স গাথা. কা উপ্পত্তি? অযম্পি পুরিমবুদ্ধেসু ¶ কতাধিকারো তত্থ তত্থ ভৰে পুঞ্ঞানি উপচিনন্তো ইমস্মিং বুদ্ধুপ্পাদে সাৰত্থিযং কুটুম্বিযকুলে নিব্বত্তিত্ৰা কুল্লোতি লদ্ধনামো ৰিঞ্ঞুতং পত্তো সত্থু সন্তিকে ধম্মং সুত্ৰা পটিলদ্ধসদ্ধো পব্বজি. সো চ রাগচরিতত্তা তিব্বরাগজাতিকো হোতি. তেনস্স অভিক্খণং কিলেসা চিত্তং পরিযাদায তিট্ঠন্তি. অথস্স সত্থা চিত্তাচারং ঞত্ৰা অসুভকম্মট্ঠানং দত্ৰা, ‘‘কুল্ল, তযা অভিণ্হং সুসানে চারিকা চরিতব্বা’’তি আহ. সো সুসানং পৰিসিত্ৰা উদ্ধুমাতকাদীনি তানি তানি অসুভানি দিস্ৰা তং মুহুত্তং অসুভমনসিকারং উপ্পাদেত্ৰা সুসানতো নিক্খন্তমত্তোৰ কামরাগেন অভিভুয্যতি. পুন ভগৰা তস্স তং পৰত্তিং ঞত্ৰা একদিৰসং তস্স সুসানট্ঠানং গতকালে একং তরুণিত্থিরূপং অধুনা মতং অৰিনট্ঠচ্ছৰিং নিম্মিনিত্ৰা দস্সেতি. তস্স তং দিট্ঠমত্তস্স জীৰমানৰিসভাগৰত্থুস্মিং ৰিয সহসা রাগো উপ্পজ্জতি. অথ নং সত্থা তস্স পেক্খন্তস্সেৰ নৰহি ৰণমুখেহি পগ্ঘরমানাসুচিং কিমিকুলাকুলং অতিৰিয বীভচ্ছং দুগ্গন্ধং জেগুচ্ছং পটিক্কূলং কত্ৰা দস্সেসি. সো তং পেক্খন্তো ৰিরত্তচিত্তো হুত্ৰা অট্ঠাসি. অথস্স ভগৰা ওভাসং ফরিত্ৰা সতিং জনেন্তো –

‘‘আতুরং অসুচিং পূতিং, পস্স কুল্ল সমুস্সযং;

উগ্ঘরন্তং পগ্ঘরন্তং, বালানং অভিনন্দিত’’ন্তি. –

আহ ¶ . তং সুত্ৰা থেরো সম্মদেৰ সরীরসভাৰং উপধারেন্তো অসুভসঞ্ঞং পটিলভিত্ৰা তত্থ পঠমং ঝানং নিব্বত্তেত্ৰা তং পাদকং কত্ৰা ৰিপস্সনং ৰড্ঢেত্ৰা অরহত্তং পাপুণিত্ৰা অত্তনো পটিপত্তিং পচ্চৰেক্খিত্ৰা –

৩৯৩.

‘‘কুল্লো ¶ সিৰথিকং গন্ত্ৰা, অদ্দস ইত্থিমুজ্ঝিতং;

অপৰিদ্ধং সুসানস্মিং, খজ্জন্তিং কিমিহী ফুটং.

৩৯৪.

‘‘আতুরং…পে… বালানং অভিনন্দিতং.

৩৯৫.

‘‘ধম্মাদাসং গহেত্ৰান, ঞাণদস্সনপত্তিযা;

পচ্চৰেক্খিং ইমং কাযং, তুচ্ছং সন্তরবাহিরং.

৩৯৬.

‘‘যথা ইদং তথা এতং, যথা এতং তথা ইদং;

যথা অধো তথা উদ্ধং, যথা উদ্ধং তথা অধো.

৩৯৭.

‘‘যথা দিৰা তথা রত্তিং, যথা রত্তিং তথা দিৰা;

যথা পুরে তথা পচ্ছা, যথা পচ্ছা তথা পুরে.

৩৯৮.

‘‘পঞ্চঙ্গিকেন তুরিযেন, ন রতী হোতি তাদিসী;

যথা একগ্গচিত্তস্স, সম্মা ধম্মং ৰিপস্সতো’’তি. –

উদানৰসেন ইমা গাথা অভাসি.

তত্থ ¶ কুল্লোতি অত্তানমেৰ থেরো পরং ৰিয কত্ৰা ৰদতি.

আতুরন্তি নানপ্পকারেহি দুক্খেহি অভিণ্হং পটিপীল়িতং. অসুচিন্তি সুচিরহিতং জেগুচ্ছং পটিক্কূলং. পূতিন্তি দুগ্গন্ধং. পস্সাতি সভাৰতো ওলোকেহি. কুল্লাতি ওৰাদকালে ভগৰা থেরং আলপতি. উদানকালে পন থেরো সযমেৰ অত্তানং ৰদতি. সমুস্সযন্তি সরীরং. উগ্ঘরন্তন্তি উদ্ধং ৰণমুখেহি অসুচিং সৰন্তং. পগ্ঘরন্তন্তি অধো ৰণমুখেহি সমন্ততো চ অসুচিং সৰন্তং. বালানং অভিনন্দিতন্তি বালেহি অন্ধপুথুজ্জনেহি দিট্ঠিতণ্হাভিনন্দনাহি ‘‘অহং মম’’ন্তি অভিনিৰিস্স নন্দিতং.

ধম্মাদাসন্তি ধম্মমযং আদাসং. যথা হি সত্তা অদাসেন অত্তনো মুখে কাযে ৰা গুণদোসে পস্সন্তি, এৰং যোগাৰচরো যেন অত্তভাৰে ¶ সংকিলেসৰোদানধম্মে যাথাৰতো পস্সতি, তং ৰিপস্সনাঞাণং ইধ ‘‘ধম্মাদাস’’ন্তি ৰুত্তং. তং ঞাণদস্সনস্স মগ্গঞাণসঙ্খাতস্স ধম্মচক্খুস্স অধিগমায অত্তনো সন্তানে উপ্পাদেত্ৰা. পচ্চৰেক্খিং ইমং কাযন্তি ইমং করজকাযং নিচ্চসারাদিৰিরহতো তুচ্ছং অত্তপরসন্তানানং ৰিভাগতো সন্তরবাহিরং ঞাণচক্খুনা পতিঅৰেক্খিং পস্সিং.

যথা পন পচ্চৰেক্খিং, তং দস্সেতুং ‘‘যথা ইদ’’ন্তিআদি ৰুত্তং. তত্থ যথা ইদং তথা এতন্তি যথা ইদং ময্হং সরীরসঙ্খাতং অসুভং আযুউস্মাৰিঞ্ঞাণানং অনপগমা নানাৰিধং মাযোপমং কিরিযং দস্সেতি, তথাৰ এতং মতসরীরং পুব্বে তেসং ধম্মানং অনপগমা অহোসি. যথা এতং এতরহি মতসরীরং তেসং ধম্মানং অপগমা ন কিঞ্চি কিরিযং দস্সেতি, তথা ইদং মম সরীরম্পি তেসং ধম্মানং অপগমা নস্সতেৰাতি. যথা চ ইদং মম সরীরং এতরহি সুসানে ন মতং ন সযিতং, ন উদ্ধুমাতকাদিভাৰং উপগতং, তথা এতং এতরহি মতসরীরম্পি পুব্বে ¶ অহোসি. যথা পনেতং এতরহি মতসরীরং সুসানে সযিতং উদ্ধুমাতকাদিভাৰং উপগতং, তথা ইদং মম সরীরম্পি ভৰিস্সতি. অথ ৰা যথা ইদং মম সরীরং অসুচি দুগ্গন্ধং জেগুচ্ছং পটিক্কূলং অনিচ্চং দুক্খং অনত্তা, তথা এতং মতসরীরম্পি. যথা ৰা এতং মতসরীরং অসুচিআদিসভাৰঞ্চেৰ অনিচ্চাদিসভাৰঞ্চ, তথা ইদং মম সরীরম্পি. যথা অধো তথা উদ্ধন্তি যথা নাভিতো অধো হেট্ঠা অযং কাযো অসুচি দুগ্গন্ধো জেগুচ্ছো পটিক্কূলো অনিচ্চো দুক্খো অনত্তা চ, তথা উদ্ধং নাভিতো উপরি অসুচিআদিসভাৰো চ. যথা উদ্ধং তথা অধোতি যথা চ নাভিতো, উদ্ধং অসুচিআদিসভাৰো, তথা অধো নাভিতো হেট্ঠাপি.

যথা ¶ দিৰা তথা রত্তিন্তি যথা অযং কাযো দিৰা ‘‘অক্খিম্হা অক্খিগূথকো’’তিআদিনা (সু. নি. ১৯৯) অসুচি পগ্ঘরতি, তথা রত্তিম্পি. যথা রত্তিং তথা দিৰাতি যথা চ রত্তিং অযং কাযো অসুচি পগ্ঘরতি, তথা দিৰাপি, নযিমস্স কালৰিভাগেন অঞ্ঞথাভাৰোতি অত্থো. যথা পুরে তথা পচ্ছাতি যথা অযং কাযো পুরে পুব্বে তরুণকালে অসুচি দুগ্গন্ধো জেগুচ্ছো পটিক্কূলো, তথা চ পচ্ছা জিণ্ণকালে. যথা চ পচ্ছা জিণ্ণকালে অসুচিআদিসভাৰো, তথা পুরে তরুণকালেপি ¶ . যথা ৰা পুরে অতীতকালে সৰিঞ্ঞাণকালে অসুচিআদিসভাৰো চ অনিচ্চাদিসভাৰো চ, তথা পচ্ছা অনাগতকালে অৰিঞ্ঞাণকালেতি এৰম্পেত্থ অত্থো ৰেদিতব্বো.

পঞ্চঙ্গিকেন তুরিযেনাতি ‘‘আততং ৰিততং আততৰিততং ঘনং সুসীর’’ন্তি এৰং পঞ্চঙ্গিকেন পঞ্চহি অঙ্গেহি সমন্নাগতেন তুরিযেন পরিচরিযমানস্স কামসুখসমঙ্গিনো ইস্সরজনস্স তাদিসী তথারূপা রতি সুখস্সাদো ন হোতি. যথা একগ্গচিত্তস্স, সম্মা ধম্মং ৰিপস্সতোতি সমথৰিপস্সনং যুগনদ্ধং কত্ৰা ইন্দ্রিযানং একরসভাৰেন ৰীথিপটিপন্নায ৰিপস্সনায খন্ধানং উদযব্বযং পস্সন্তস্স যোগাৰচরস্স যাদিসা ধম্মরতি, তস্সা কলম্পি কামরতি ন উপেতীতি. ৰুত্তঞ্হেতং ভগৰতা –

‘‘যতো যতো সম্মসতি, খন্ধানং উদযব্বযং;

লভতী পীতিপামোজ্জং, অমতং তং ৰিজানত’’ন্তি. (ধ. প. ৩৭৪);

ইমা এৰ চ থেরস্স অঞ্ঞাব্যাকরণগাথাপি অহেসুং.

কুল্লত্থেরগাথাৰণ্ণনা নিট্ঠিতা.

৫. মালুক্যপুত্তত্থেরগাথাৰণ্ণনা

মনুজস্সাতিআদিকা ¶ আযস্মতো মালুক্যপুত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনিত্ৰা ইমস্মিং বুদ্ধুপ্পাদে সাৰত্থিযং কোসলরঞ্ঞো অগ্গাসনিকস্স পুত্তো হুত্ৰা নিব্বত্তি. তস্স মাতা মালুক্যা নাম, তস্সা ৰসেন মালুক্যপুত্তোত্ৰেৰ পঞ্ঞাযিত্থ. সো ৰযপ্পত্তো নিস্সরণজ্ঝাসযতায ঘরাৰাসং পহায পরিব্বাজকপব্বজ্জং ¶ পব্বজিত্ৰা ৰিচরন্তো সত্থু সন্তিকে ধম্মং সুত্ৰা সাসনে পটিলদ্ধসদ্ধো পব্বজিত্ৰা ৰিপস্সনায কম্মং করোন্তো নচিরস্সেৰ ছল়ভিঞ্ঞো অহোসি. সো ঞাতীসু অনুকম্পায ঞাতিকুলং অগমাসি. তং ঞাতকা পণীতেন খাদনীযেন ভোজনীযেন পরিৰিসিত্ৰা ধনেন পলোভেতুকামা মহন্তং ধনরাসিং ¶ পুরতো উপট্ঠপেত্ৰা ‘‘ইদং ধনং তৰ সন্তকং, ৰিব্ভমিত্ৰা ইমিনা ধনেন পুত্তদারং পটিজগ্গন্তো পুঞ্ঞানি করোহী’’তি যাচিংসু. থেরো তেসং অজ্ঝাসযং ৰিপরিৰত্তেন্তো আকাসে ঠত্ৰা –

৩৯৯.

‘‘মনুজস্স পমত্তচারিনো, তণ্হা ৰড্ঢতি মালুৰা ৰিয;

সো প্লৰতী হুরা হুরং, ফলমিচ্ছংৰ ৰনস্মি ৰানরো.

৪০০.

‘‘যং এসা সহতে জম্মী, তণ্হা লোকে ৰিসত্তিকা;

সোকা তস্স পৰড্ঢন্তি, অভিৰট্ঠংৰ বীরণং.

৪০১.

‘‘যো চেতং সহতে জম্মিং, তণ্হং লোকে দুরচ্চযং;

সোকা তম্হা পপতন্তি, উদবিন্দূৰ পোক্খরা.

৪০২.

‘‘তং ৰো ৰদামি ভদ্দং ৰো, যাৰন্তেত্থ সমাগতা;

তণ্হায মূলং খণথ, উসীরত্থোৰ বীরণং;

মা ৰো নল়ংৰ সোতোৰ, মারো ভঞ্জি পুনপ্পুনং.

৪০৩.

‘‘করোথ বুদ্ধৰচনং, খণো ৰো মা উপচ্চগা;

খণাতীতা হি সোচন্তি, নিরযম্হি সমপ্পিতা.

৪০৪.

‘‘পমাদো রজো পমাদো, পমাদানুপতিতো রজো;

অপ্পমাদেন ৰিজ্জায, অব্বহে সল্লমত্তনো’’তি. –

ইমাহি ছহি গাথাহি ধম্মং দেসেতি.

তত্থ মনুজস্সাতি সত্তস্স. পমত্তচারিনোতি সতিৰোস্সগ্গলক্খণেন পমাদেন পমত্তচারিস্স, নেৰ ঝানং, ন ৰিপস্সনা ¶ , ন মগ্গফলানি ৰড্ঢন্তি. যথা পন রুক্খং সংসিব্বন্তী পরিযোনন্ধন্তী তস্স ৰিনাসায মালুৰা লতা ৰড্ঢতি, এৰমস্স ছ দ্ৰারানি নিস্সায রূপাদীসু পুনপ্পুনং উপ্পজ্জমানা তণ্হা ৰড্ঢতি. ৰড্ঢমানাৰ যথা মালুৰা লতা অত্তনো অপস্সযভূতং রুক্খং অজ্ঝোত্থরিত্ৰা পাতেতি, এৰং তণ্হাৰসিকং পুগ্গলং অপাযে নিপাতেতি. সো প্লৰতীতি সো তণ্হাৰসিকো পুগ্গলো অপরাপরং ভৰাভৰে উপ্লৰতি ধাৰতি. যথা কিং? ফলমিচ্ছংৰ ৰনস্মি ৰানরো যথা রুক্খফলং ইচ্ছন্তো ৰানরো ৰনস্মিং ধাৰন্তো রুক্খস্স একং সাখং গণ্হাতি, তং মুঞ্চিত্ৰা অঞ্ঞং গণ্হাতি, তং মুঞ্চিত্ৰা অঞ্ঞন্তি ‘‘সাখং ¶ অলভিত্ৰা নিসিন্নো’’তি ৰত্তব্বতং ¶ নাপজ্জতি; এৰমেৰ তণ্হাৰসিকো পুগ্গলো হুরা হুরং ধাৰন্তো ‘‘আরম্মণং অলভিত্ৰা তণ্হায অপ্পৰত্তিং পত্তো’’তি ৰত্তব্বতং নাপজ্জতি.

যন্তি যং পুগ্গলং. এসা লামকভাৰেন জম্মী ৰিসাহারতায ৰিসমূলতায ৰিসফলতায ৰিসপরিভোগতায রূপাদীসু ৰিসত্ততায আসত্ততায চ ৰিসত্তিকাতি সঙ্খং গতা ছদ্ৰারিকা তণ্হা সহতে অভিভৰতি তস্স পুগ্গলস্স. যথা নাম ৰনে পুনপ্পুনং ৰস্সন্তে দেৰে অভিৰট্ঠং বীরণং বীরণতিণং ৰড্ঢতি, এৰং ৰট্টমূলকা সোকা অভিৰড্ঢন্তি ৰুদ্ধিং আপজ্জন্তীতি অত্থো.

যো চেতং…পে… দুরচ্চযন্তি যো পন পুগ্গলো এৰং ৰুত্তপ্পকারং অতিক্কমিতুং পজহিতুং দুক্করতায দুরচ্চযং তণ্হং সহতে অভিভৰতি, তম্হা পুগ্গলা ৰট্টমূলকা সোকা পপতন্তি. যথা নাম পোক্খরে পদুমপত্তে পতিতং উদবিন্দু ন পতিট্ঠাতি, এৰং ন পতিট্ঠহন্তীতি অত্থো.

তং ৰো ৰদামীতি তেন কারণেন অহং তুম্হে ৰদামি. ভদ্দং ৰোতি ভদ্দং তুম্হাকং হোতু, মা তণ্হং অনুৰত্তপুগ্গলো ৰিয ৰিভৰং অনত্থং পাপুণাথাতি অত্থো. যাৰন্তেত্থ সমাগতাতি ইমস্মিং ঠানে যত্তকা সন্নিপতিতা, তত্তকা. কিং ৰদসীতি চে? তণ্হায মূলং খণথ ইমিস্সা ছদ্ৰারিকতণ্হায মূলং কারণং অৰিজ্জাদিকিলেসগ্গহনং অরহত্তমগ্গঞাণকুদালেন খণথ সমুচ্ছিন্দথ. কিং ৰিযাতি? উসীরত্থোৰ বীরণং যথা উসীরেন অত্থিকো পুরিসো মহন্তেন কুদালেন বীরণাপরনামং উসীরং নাম তিণং খণতি, এৰমস্স মূলং খণথাতি অত্থো. মা ৰো নল়ংৰ সোতোৰ, মারো ভঞ্জি পুনপ্পুনন্তি তুম্হে নদীতীরে জাতং নল়ং মহাৰেগেন আগতো নদীসোতো ৰিয কিলেসমারো মচ্চুমারো দেৰপুত্তমারো চ পুনপ্পুনং মা ভঞ্জীতি অত্থো.

তস্মা করোথ বুদ্ধৰচনং ‘‘ঝাযথ, ভিক্খৰে, মা পমাদত্থা’’তিআদিনা (ম. নি. ১.২১৫) ৰুত্তং বুদ্ধস্স ভগৰতো ৰচনং করোথ, যথানুসিট্ঠং পটিপত্তিযা সম্পাদেথ. খণো ৰো মা ¶ উপচ্চগাতি যো হি বুদ্ধৰচনং ন করোতি, তং ¶ পুগ্গলং অযং বুদ্ধুপ্পাদক্খণো পতিরূপদেসৰাসে উপ্পত্তিক্খণো সম্মদিট্ঠিযা পটিলদ্ধক্খণো ছন্নং আযতনানং অৰেকল্লক্খণোতি সব্বোপি খণো অতিক্কমতি, সো খণো মা তুম্হে অতিক্কমতু. খণাতীতাতি যে হি তং খণং অতীতা, যে ৰা পুগ্গলে সো খণো অতীতো, তে নিরযম্হি সমপ্পিতা তত্থ নিব্বত্তা চিরকালং সোচন্তি.

পমাদো রজোতি রূপাদীসু আরম্মণেসু সতিৰোস্সগ্গলক্খণো পমাদো, সংকিলেসসভাৰত্তা রাগরজাদিমিস্সতায ¶ চ রজো. পমাদানুপতিতো রজোতি যো হি কোচি রজো নাম রাগাদিকো, সো সব্বো পমাদানুপতিতো পমাদৰসেনেৰ উপ্পজ্জতি. অপ্পমাদেনাতি অপ্পমজ্জনেন অপ্পমাদপটিপত্তিযা. ৰিজ্জাযাতি অগ্গমগ্গৰিজ্জায. অব্বহে সল্লমত্তনোতি অত্তনো হদযনিস্সিতং রাগাদিসল্লং উদ্ধরেয্য সমূহনেয্যাতি.

মালুক্যপুত্তত্থেরগাথাৰণ্ণনা নিট্ঠিতা.

৬. সপ্পদাসত্থেরগাথাৰণ্ণনা

পণ্ণৰীসতীতিআদিকা আযস্মতো সপ্পদাসত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে কপিলৰত্থুস্মিং সুদ্ধোদনমহারাজস্স পুরোহিতপুত্তো হুত্ৰা নিব্বত্তি, তস্স সপ্পদাসোতি নামং অহোসি. সো ৰযপ্পত্তো সত্থু ঞাতিসমাগমে পটিলদ্ধসদ্ধো পব্বজিত্ৰা কিলেসাভিভৰেন চেতোসমাধিং অলভন্তো ব্রহ্মচরিযং চরিত্ৰা সংৰেগজাতো পচ্ছা সত্থং আহরন্তো যোনিসো মনসিকারং ৰড্ঢেত্ৰা অরহত্তং পাপুণিত্ৰা অঞ্ঞং ব্যাকরোন্তো –

৪০৫.

‘‘পণ্ণৰীসতি ৰস্সানি, যতো পব্বজিতো অহং;

অচ্ছরাসঙ্ঘাতমত্তম্পি, চেতোসন্তিমনজ্ঝগং.

৪০৬.

‘‘অলদ্ধা চিত্তস্সেকগ্গং, কামরাগেন অট্টিতো;

বাহা পগ্গয্হ কন্দন্তো, ৰিহারা উপনিক্খমিং.

৪০৭.

‘‘সত্থং ¶ ৰা আহরিস্সামি, কো অত্থো জীৰিতেন মে;

কথঞ্হি সিক্খং পচ্চক্খং, কালং কুব্বেথ মাদিসো.

৪০৮.

‘‘তদাহং ¶ খুরমাদায, মঞ্চকম্হি উপাৰিসিং;

পরিনীতো খুরো আসি, ধমনিং ছেত্তুমত্তনো.

৪০৯.

‘‘ততো মে মনসীকারো, যোনিসো উদপজ্জথ;

আদীনৰো পাতুরহু, নিব্বিদা সমতিট্ঠথ.

৪১০.

‘‘ততো চিত্তং ৰিমুচ্চি মে, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি. –

ইমা গাথা অভাসি.

তত্থ ¶ পণ্ণৰীসতিৰস্সানি, যতো পব্বজিতো অহন্তি যতো পট্ঠায অহং পব্বজিতো তানিমানি পণ্ণৰীসতিৰস্সানি. অচ্ছরাসঙ্ঘাতমত্তম্পি, চেতোসন্তিমনজ্ঝগন্তি সোহং এত্তকং কালং ব্রহ্মচরিযং চরন্তো অচ্ছরাসঙ্ঘাতমত্তম্পি অঙ্গুলিফোটনমত্তম্পি খণং চেতোসন্তিং চেতসো সমাধানং ন লভিং.

এৰং পন অলদ্ধা চিত্তস্সেকগ্গতং, তত্থ কারণমাহ ‘‘কামরাগেন অট্টিতো’’তি. তত্থ অট্টিতোতি পীল়িতো, অভিভূতোতি অত্থো. বাহা পগ্গয্হ কন্দন্তোতি ‘‘ইদমিধ অতিৰিয অযুত্তং ৰত্ততি, যদাহং নিয্যানিকে সাসনে পব্বজিত্ৰা অত্তানং কিলেসপঙ্কতো উদ্ধরিতুং ন সক্কোমী’’তি উদ্ধংমুখো বাহা পগ্গয্হ কন্দমানো. ৰিহারা উপনিক্খমিন্তি ৰসনকৰিহারতো বহি নিক্খন্তো.

যেনাধিপ্পাযেন নিক্খন্তো, তং দস্সেতুং ‘‘সত্থং ৰা আহরিস্সামী’’তিআদি ৰুত্তং. তত্থ সত্থং ৰা আহরিস্সামীতি ৰা-সদ্দো ৰিকপ্পনত্থো. তেন ‘‘রুক্খা ৰা পপতিস্সামি, উব্বন্ধিত্ৰা ৰা মরিস্সামী’’তিআদিকে মরণপ্পকারে সঙ্গণ্হাতি. সিক্খন্তি অধিসীলসিক্খং. পচ্চক্খন্তি পচ্চাচিক্খন্তো পরিচ্চজন্তো. ‘‘পচ্চক্খা’’তিপি পাল়ি, পচ্চক্খাযাতি অত্থো. কালন্তি মরণং. কথঞ্হি নাম মাদিসো সিক্খাপচ্চক্খানেন কালং করেয্যাতি অত্থো. সিক্খাপচ্চক্খানঞ্হি অরিযস্স ৰিনযে মরণং নাম. যথাহ ভগৰা – ‘‘মরণঞ্হেতং ¶ , ভিক্খৰে, যো সিক্খং পচ্চক্খায হীনাযাৰত্ততী’’তি (ম. নি. ৩.৬৩). ‘‘সিক্খং পচ্চক্খা’’তি পন পাঠে কথঞ্হি নাম মাদিসো সিক্খং পচ্চক্খায কালং করেয্য, সিক্খাসমঙ্গী এৰ পন হুত্ৰা কালং করেয্য? তস্মা সত্থং ৰা আহরিস্সামি, কো অত্থো জীৰিতেন মেতি যোজনা.

তদাহন্তি যদা কিলেসাভিভৰেন সমণধম্মং কাতুং অসমত্থতায জীৰিতে নিব্বিন্দন্তো তদা. খুরন্তি নিসিতখুরং, খুরসদিসং ৰা সত্থকং. মঞ্চকম্হি উপাৰিসিন্তি পরেসং নিৰারণভযেন ওৰরকং পৰিসিত্ৰা মঞ্চকে নিসীদিং. পরিনীতোতি উপনীতো, গলে ঠপিতোতি অধিপ্পাযো. ধমনিন্তি ‘‘কণ্ঠে ধমনিং, কণ্ঠধমনিং গলৰলয’’ন্তিপি ৰদন্তি. ছেত্তুন্তি ছিন্দিতুং.

ততো মে মনসীকারো, যোনিসো উদপজ্জথাতি ‘‘যদাহং মরিস্সামী’’তি কণ্ঠে ধমনিং ছিন্দিতুং খুরং উপনেসিং, ততো পরং ‘‘অরোগং নু খো মে সীল’’ন্তি পচ্চৰেক্খন্তস্স অক্খণ্ডং অচ্ছিদ্দং সুপরিসুদ্ধং ¶ সীলং দিস্ৰা পীতি উপ্পজ্জি, পীতিমনস্স কাযো পস্সম্ভি, পস্সদ্ধকাযস্স নিরামিসং সুখং অনুভৰন্তস্স চিত্তস্স সমাহিততায ৰিপস্সনাৰসেন ¶ যোনিসো মনসিকারো উপ্পজ্জি. অথ ৰা ততোতি কণ্ঠে খুরস্স উপনযতো ৰণে জাতে উপ্পন্নং ৰেদনং ৰিক্খম্ভেন্তো ৰিপস্সনায ৰসেন যোনিসোমনসিকারো উপ্পজ্জি. ইদানি ততো পরং মগ্গফলপচ্চৰেক্খণঞাণং উপ্পন্নভাৰং দস্সেতুং ‘‘আদীনৰো পাতুরহূ’’তিআদি ৰুত্তং. তং হেট্ঠা ৰুত্তত্থমেৰ.

সপ্পদাসত্থেরগাথাৰণ্ণনা নিট্ঠিতা.

৭. কাতিযানত্থেরগাথাৰণ্ণনা

উট্ঠেহীতিআদিকা আযস্মতো কাতিযানত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনিত্ৰা ইমস্মিং বুদ্ধুপ্পাদে সাৰত্থিযং অঞ্ঞতরস্স কোসিযগোত্তস্স ব্রাহ্মণস্স ¶ পুত্তো হুত্ৰা নিব্বত্তো, মাতুগোত্তৰসেন পন কাতিযানোতি লদ্ধনামো ৰযপ্পত্তো সামঞ্ঞকানিত্থেরস্স গিহিসহাযো থেরং দিস্ৰা পব্বজিতো সমণধম্মং করোন্তো রত্তিং ‘‘নিদ্দাভিভৰং ৰিনোদেস্সামী’’তি চঙ্কমং আরুহি. সো চঙ্কমন্তো নিদ্দায অভিভূতো পচলাযমানো পরিপতিত্ৰা তত্থেৰ অনন্তরহিতায ভূমিযা নিপজ্জি, সত্থা তস্স তং পৰত্তিং দিস্ৰা সযং তত্থ গন্ত্ৰা আকাসে ঠত্ৰা ‘‘কাতিযানা’’তি সঞ্ঞং অদাসি. সো সত্থারং দিস্ৰা উট্ঠহিত্ৰা ৰন্দিত্ৰা সংৰেগজাতো অট্ঠাসি. অথস্স সত্থা ধম্মং দেসেন্তো –

৪১১.

‘‘উট্ঠেহি নিসীদ কাতিযান, মা নিদ্দাবহুলো অহু জাগরস্সু;

মা তং অলসং পমত্তবন্ধু, কূটেনেৰ জিনাতু মচ্চুরাজা.

৪১২.

‘‘সেয্যথাপি মহাসমুদ্দৰেগো, এৰং জাতিজরাতি ৰত্ততে তং;

সো করোহি সুদীপমত্তনো ত্ৰং, ন হি তাণং তৰ ৰিজ্জতেৰ অঞ্ঞং.

৪১৩.

‘‘সত্থা হি ৰিজেসি মগ্গমেতং, সঙ্গা জাতিজরাভযা অতীতং;

পুব্বাপররত্তমপ্পমত্তো, অনুযুঞ্জস্সু দল়্হং করোহি যোগং.

৪১৪.

‘‘পুরিমানি পমুঞ্চ বন্ধনানি, সঙ্ঘাটিখুরমুণ্ডভিক্খভোজী;

মা ¶ খিড্ডারতিঞ্চ মা নিদ্দং, অনুযুঞ্জিত্থ ঝায কাতিযান.

৪১৫.

‘‘ঝাযাহি জিনাহি কাতিযান, যোগক্খেমপথেসু কোৰিদোসি;

পপ্পুয্য অনুত্তরং ৰিসুদ্ধিং, পরিনিব্বাহিসি ৰারিনাৰ জোতি.

৪১৬.

‘‘পজ্জোতকরো ¶ ¶ পরিত্তরংসো, ৰাতেন ৰিনম্যতে লতাৰ;

এৰম্পি তুৰং অনাদিযানো, মারং ইন্দসগোত্ত নিদ্ধুনাহি;

সো ৰেদযিতাসু ৰীতরাগো, কালং কঙ্খ ইধেৰ সীতিভূতো’’তি. –

ইমা গাথা অভাসি.

তত্থ উট্ঠেহীতি নিদ্দূপগমনতো উট্ঠহন্তো উট্ঠানৰীরিযং করোহি. যস্মা নিপজ্জা নাম কোসজ্জপক্খিযা, তস্মা মা সযি. নিসীদাতি পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা নিসীদ. কাতিযানাতি তং নামেন আলপতি. মা নিদ্দাবহুলো অহূতি নিদ্দাবহুলো নিদ্দাভিভূতো মা অহু. জাগরস্সূতি জাগর, জাগরিযমনুযুত্তো হোহি. মা তং অলসন্তি জাগরিযং অননুযুঞ্জন্তং তং অলসং কুসীতং পমত্তবন্ধু মচ্চুরাজা কূটেনেৰ অদ্দুহনেন ৰিয নেসাদো মিগং ৰা পক্খিং ৰা জরারোগেহি মা জিনাতু মা অভিভৰতু, মা অজ্ঝোত্থরতূতি অত্থো.

সেয্যথাপীতি সেয্যথা অপি. মহাসমুদ্দৰেগোতি মহাসমুদ্দস্স ঊমিৰেগো. এৰন্তি যথা নাম মহাসমুদ্দঊমিৰেগো উপরূপরি উট্ঠহন্তো তং অভিক্কমিতুং অসক্কোন্তং পুরিসং অভিভৰতি, এৰং জাতি জরা চ কোসজ্জাভিভূতং তং অতিৰত্ততে উপরূপরি অজ্ঝোত্থরতি. সো করোহীতি সো ত্ৰং, কাতিযান, চতূহি ওঘেহি অনজ্ঝোত্থরণীযং অরহত্তফলসঙ্খাতং সুদীপং অত্তনো করোহি অত্তনো সন্তানে উপ্পাদেহি. ন হি তাণং তৰ ৰিজ্জতেৰ অঞ্ঞন্তি হীতি হেতুঅত্থে নিপাতো. যস্মা ততো অগ্গফলতো অঞ্ঞং তৰ তাণং নাম ইধ ৰা হুরং ৰা ন উপলব্ভতি, তস্মা তং অরহত্তসঙ্খাতং সুদীপং করোহীতি.

সত্থা হি ৰিজেসি মগ্গমেতন্তি যং সাধেতুং অৰিসহন্তা যতো পরাজিতা পুথূ অঞ্ঞতিত্থিযা, তদেতং তস্স সুদীপস্স কারণভূতং পঞ্চৰিধসঙ্গতো জাতিআদিভযতো চ অতীতং অরিযমগ্গং দেৰপুত্তমারাদিকে অভিভৰিত্ৰা তুয্হং সত্থা ৰিজেসি সাধেসি. যস্মা সত্থু সন্তকং ¶ নাম সাৰকেন অধিগন্তব্বং ন ৰিস্সজ্জেতব্বং, তস্মা তস্স অধিগমায পুব্বরত্তাপররত্তং পুরিমযামং পচ্ছিমযামঞ্চ ¶ , অপ্পমত্তো সতো সম্পজানো হুত্ৰা অনুযুঞ্জ যোগং ভাৰনং দল়্হঞ্চ করোহি.

পুরিমানি পমুঞ্চ বন্ধনানীতি পুরিমকানি গিহিকালে আবদ্ধানি গিহিবন্ধনানি কামগুণবন্ধনানি পমুঞ্চ ৰিস্সজ্জেহি, তত্থ অনপেক্খো হোহি. সঙ্ঘাটিখুরমুণ্ডভিক্খভোজীতি সঙ্ঘাটিধারী ¶ খুরেন কতসিরমুণ্ডো ভিক্খাহারভোজী, তিৰিধম্পেতং পুরিমবন্ধনপমোক্খস্স খিড্ডারতিনিদ্দাননুযোগস্স চ কারণৰচনং. যস্মা ত্ৰং সঙ্ঘাটিপারুতো মুণ্ডো ভিক্খাহারো জীৰতি, তস্মা তে কামসুখানুযোগো খিড্ডারতিনিদ্দানুযোগো চ ন যুত্তোতি ততো পুরিমানি পমুঞ্চ বন্ধনানি খিড্ডারতিং নিদ্দঞ্চ মানুযুঞ্জিত্থাতি যোজনা. ঝাযাতি ঝাযস্সু আরম্মণূপনিজ্ঝানং অনুযুঞ্জ.

তং পন অনুযুঞ্জন্তো যেন ঝানেন ঝাযতো কিলেসা সব্বসো জিতা হোন্তি, তং লক্খণূপনিজ্ঝানং অনুযুঞ্জাতি দস্সেন্তো ‘‘ঝাযাহি জিনাহী’’তি আহ. যোগক্খেমপথেসু কোৰিদোসীতি চতূহি যোগেহি খেমস্স নিব্বানস্স পথভূতেসু বোধিপক্খিযধম্মেসু কুসলো ছেকো অসি, তস্মা ভাৰনং উস্সুক্কাপেন্তো অনুত্তরং উত্তররহিতং, ৰিসুদ্ধিং নিব্বানং অরহত্তঞ্চ পপ্পুয্য পাপুণিত্ৰা পন ত্ৰং পরিনিব্বাহিসি. ৰারিনাৰ জোতীতি মহতা সলিলৰুট্ঠিনিপাতেন অগ্গিখন্ধো ৰিয অরিযমগ্গৰুট্ঠিনিপাতেন পরিনিব্বাযিস্সতি.

পজ্জোতকরোতি পজ্জোতিং করো পদীপো. পরিত্তরংসোতি খুদ্দকচ্চিকো. ৰিনম্যতেতি ৰিনমীযতি অপনিয্যতি. লতাৰাতি ৰল্লি ৰিয. ইদং ৰুত্তং হোতি – যথা ৰট্টিআদিপচ্চযৰেকল্লেন পরিত্তরংসো মন্দপভো পদীপো অপ্পিকা লতা ৰা ৰাতেন ৰিধমিয্যতি ৰিদ্ধংসিয্যতি, এৰং তুৰম্পি. কোসিযগোত্ততায, ইন্দসগোত্ত, ইন্দসমানগোত্তং. মারং তস্স ৰসে অনাৰত্তনা অনুপাদানতো চ অনাদিযানো, নিদ্ধুনাহি ৰিধমেহি ৰিদ্ধংসেহি. এৰং পন ৰিদ্ধংসমানো সো ত্ৰং ৰেদযিতাসু সব্বাসু ৰেদনাসু ৰিগতচ্ছন্দরাগো ইধেৰ ইমস্মিংযেৰ অত্তভাৰে সব্বকিলেসদরথপরিল়াহাভাৰেন সীতিভূতো নিব্বুতো অত্তনো পরিনিব্বানকালং কঙ্খ আগমেহীতি ¶ . এৰং সত্থারা অনুপাদিসেসং নিব্বানং পাপেত্ৰা দেসনায কতায থেরো দেসনাৰসানে ৰিপস্সনং ৰড্ঢেত্ৰা অরহত্তং পাপুণি. অরহত্তং পন পত্ৰা সত্থারা দেসিতনিযামেনেৰ ইমা গাথা অভাসি. তা এৰ ইমা গাথা থেরস্স অঞ্ঞাব্যাকরণঞ্চ জাতা.

কাতিযানত্থেরগাথাৰণ্ণনা নিট্ঠিতা.

৮. মিগজালত্থেরগাথাৰণ্ণনা

সুদেসিতোতিআদিকা ¶ আযস্মতো মিগজালত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো ইমস্মিং বুদ্ধুপ্পাদে সাৰত্থিযং ৰিসাখায ¶ মহাউপাসিকায পুত্তো হুত্ৰা নিব্বত্তি, মিগজালোতিস্স নামং অহোসি. সো ৰিহারং গন্ত্ৰা অভিণ্হসো ধম্মস্সৰনেন পটিলদ্ধসদ্ধো পব্বজিত্ৰা ৰিপস্সনং ৰড্ঢেত্ৰা অরহত্তং পত্ৰা অঞ্ঞং ব্যাকরোন্তো –

৪১৭.

‘‘সুদেসিতো চক্খুমতা, বুদ্ধেনাদিচ্চবন্ধুনা;

সব্বসংযোজনাতীতো, সব্বৰট্টৰিনাসনো.

৪১৮.

‘‘নিয্যানিকো উত্তরণো, তণ্হামূলৰিসোসনো;

ৰিসমূলং আঘাতনং, ছেত্ৰা পাপেতি নিব্বুতিং.

৪১৯.

‘‘অঞ্ঞাণমূলভেদায, কম্মযন্তৰিঘাটনো;

ৰিঞ্ঞাণানং পরিগ্গহে, ঞাণৰজিরনিপাতনো.

৪২০.

‘‘ৰেদনানং ৰিঞ্ঞাপনো, উপাদানপ্পমোচনো;

ভৰং অঙ্গারকাসুংৰ, ঞাণেন অনুপস্সনো.

৪২১.

‘‘মহারসো সুগম্ভীরো, জরামচ্চুনিৰারণো;

অরিযো অট্ঠঙ্গিকো মগ্গো, দুক্খূপসমনো সিৰো.

৪২২.

‘‘কম্মং কম্মন্তি ঞত্ৰান, ৰিপাকঞ্চ ৰিপাকতো;

পটিচ্চুপ্পন্নধম্মানং, যথাৰালোকদস্সনো;

মহাখেমঙ্গমো সন্তো, পরিযোসানভদ্দকো’’তি. – ইমা গাথা অভাসি;

তত্থ ¶ সুদেসিতোতি সুট্ঠু দেসিতো, ৰেনেয্যজ্ঝাসযানুরূপং দিট্ঠধম্মিকসম্পরাযিকপরমত্থানং যাথাৰতো ৰিভাৰনৰসেন দেসিতোতি অত্থো. অথ ৰা সুদেসিতোতি সম্মা দেসিতো, পৰত্তিনিৰত্তীনং তদুভযহেতূনঞ্চ অৰিপরীততো পকাসনৰসেন ভাসিতো স্ৰাখ্যাতোতি অত্থো. চক্খুমতাতি মংসচক্খু, দিব্বচক্খু, পঞ্ঞাচক্খু, বুদ্ধচক্খু, সমন্তচক্খূতি ইমেহি পঞ্চহি চক্খূহি চক্খুমতা. বুদ্ধেনাতি সব্বঞ্ঞুবুদ্ধেন. আদিচ্চবন্ধুনাতি আদিচ্চগোত্তেন. দুৰিধো হি লোকে খত্তিযৰংসো – আদিচ্চৰংসো, সোমৰংসোতি. তত্থ আদিচ্চৰংসো, ওক্কাকরাজৰংসোতি জানিতব্বং. ততো সঞ্জাততায সাকিযা আদিচ্চগোত্তাতি ভগৰা ‘‘আদিচ্চবন্ধূ’’তি ৰুচ্চতি. অথ ৰা আদিচ্চস্স বন্ধূতিপি ভগৰা আদিচ্চবন্ধু, স্ৰাযমত্থো হেট্ঠা ৰুত্তোযেৰ. কামরাগসংযোজনাদীনং সব্বেসং সংযোজনানং সমতিক্কমনভাৰতো সব্বসংযোজনাতীতো ততো এৰ কিলেসকম্মৰিপাকৰট্টানং ৰিনাসনতো ৰিদ্ধংসনতো সব্বৰট্টৰিনাসনো, সংসারচারকতো ¶ নিয্যানতো নিয্যানিকো, সংসারমহোঘতো সমুত্তরণট্ঠেন উত্তরণো, কামতণ্হাদীনং সব্বতণ্হানং মূলং অৰিজ্জং অযোনিসো মনসিকারঞ্চ ৰিসোসেতি সুক্খাপেতীতি তণ্হামূলৰিসোসনো, তিণ্ণম্পি ৰেদানং সম্পটিৰেধস্স ¶ ৰিদ্ধংসনতো ৰিসস্স দুক্খস্স কারণত্তা ৰিসমূলং, সত্তানং ব্যসনুপ্পত্তিট্ঠানতায আঘাতনং কম্মং কিলেসং ৰা ছেত্ৰা সমুচ্ছিন্দিত্ৰা নিব্বুতিং নিব্বানং পাপেতি.

অঞ্ঞাণস্স মূলং অযোনিসো মনসিকারো আসৰা চ ‘‘আসৰসমুদযা অৰিজ্জাসমুদযো’’তি (ম. নি. ১.১০৩) হি ৰুত্তং, তস্স ভেদায ৰজিরূপমঞাণেন ভিন্দনত্থায. অথ ৰা ‘‘অৰিজ্জাপচ্চযা সঙ্খারা’’তিআদিৰচনতো (ৰিভ. ২২৫-২২৬; সং. নি. ২.১) অঞ্ঞাণং মূলং এতস্সাতি অঞ্ঞাণমূলং, ভৰচক্কং, তস্স মগ্গঞাণৰজিরেন পদালনত্থং দেসিতোতি সম্বন্ধো. কম্মযন্তৰিঘাটনোতি কম্মঘটিতস্স অত্তভাৰযন্তস্স ৰিদ্ধংসনো. ৰিঞ্ঞাণানং পরিগ্গহেতি কামভৰাদীসু যথাসককম্মুনা ৰিঞ্ঞাণগ্গহণে উপট্ঠিতেতি ৰচনসেসো. তত্থ তত্থ হি ভৰে পটিসন্ধিযা গহিতায তংতংভৰনিস্সিতৰিঞ্ঞাণানিপি গহিতানেৰ হোন্তি. ঞাণৰজিরনিপাতনোতি ঞাণৰজিরস্স ¶ নিপাতো, ঞাণৰজিরং নিপাতেত্ৰা তেসং পদালেতা. লোকুত্তরধম্মো হি উপ্পজ্জমানো সত্তমভৰাদীসু উপ্পজ্জনারহানি ৰিঞ্ঞাণানি ভিন্দত্তমেৰ উপ্পজ্জতীতি.

ৰেদনানং ৰিঞ্ঞাপনোতি সুখাদীনং তিস্সন্নং ৰেদনানং যথাক্কমং দুক্খসল্লানিচ্চৰসেন যাথাৰতো পৰেদকো. উপাদানপ্পমোচনোতি কামুপাদানাদীহি চতূহিপি উপাদানেহি চিত্তসন্তানস্স ৰিমোচকো. ভৰং অঙ্গারকাসুংৰ, ঞাণেন অনুপস্সনোতি কামভৰাদিনৰৰিধম্পি ভৰং একাদসহি অগ্গীহি আদিত্তভাৰতো সাধিকপোরিসং অঙ্গারকাসুং ৰিয মগ্গঞাণেন অনুপচ্চক্খতো দস্সেতা.

সন্তপণীতভাৰতো অতিত্তিকরট্ঠেন মহারসো পরিঞ্ঞাদিৰসেন ৰা মহাকিচ্চতায সামঞ্ঞফলৰসেন মহাসম্পত্তিতায চ মহারসো, অনুপচিতসম্ভারেহি দুরৰগাহতায অলব্ভনেয্যপতিট্ঠতায চ সুট্ঠু গম্ভীরো জরামচ্চুনিৰারণো, আযতিং ভৰাভিনিপ্ফত্তিযা নিৰত্তনেন জরায মচ্চুনো চ পটিসেধকো. ইদানি যথাৰুত্তগুণৰিসেসযুত্তং ধম্মং সরূপতো দস্সেন্তো ‘‘অরিযো অট্ঠঙ্গিকো’’তি ৰত্ৰা পুনপি তস্স কতিপযে গুণে ৰিভাৰেতুং ‘‘দুক্খূপসমনো সিৰো’’তিআদিমাহ. তস্সত্থো – পরিসুদ্ধট্ঠেন অরিযো, সম্মাদিট্ঠিআদিঅট্ঠধম্মসমোধানতায অট্ঠঙ্গিকো, নিব্বানগৰেসনট্ঠেন মগ্গো সকলৰট্টদুক্খৰূপসমনট্ঠেন ¶ দুক্খৰূপসমনো, খেমট্ঠেন সিৰো.

যথা ইতো বাহিরকসমযে অসম্মাসম্বুদ্ধপৰেদিতত্তা কম্মৰিপাকো ৰিপল্লাসো সিযাতি এৰং অৰিপল্লাসেত্ৰা পটিচ্চুপ্পন্নধম্মানং পটিচ্চসমুপ্পন্নেসু ধম্মেসু কম্মং কম্মন্তি ৰিপাকঞ্চ ৰিপাকতো ¶ ঞত্ৰান পুব্বভাগঞাণেন জাননহেতু সস্সতুচ্ছেদগ্গাহানং ৰিধমনেন যাথাৰতো আলোকদস্সনো তক্করস্স লোকুত্তরঞাণালোকস্স দস্সনো. কেনচি কঞ্চি কদাচিপি অনুপদ্দুতত্তা মহাখেমং নিব্বানং গচ্ছতি সত্তে গমেতি চাতি মহাখেমঙ্গমো, সব্বকিলেসদরথপরিল়াহৰূপসমনতো সন্তো, অকুপ্পায চেতোৰিমুত্তিযা অনুপাদিসেসায চ নিব্বানধাতুযা পাপনেন পরিযোসানভদ্দকো সুদেসিতো চক্খুমতাতি যোজনা.

এৰং ¶ থেরো নানানযেহি অরিযধম্মং পসংসন্তো তস্স ধম্মস্স অত্তনা অধিগতভাৰং অঞ্ঞাপদেসেন পকাসেসি.

মিগজালত্থেরগাথাৰণ্ণনা নিট্ঠিতা.

৯. পুরোহিতপুত্তজেন্তত্থেরগাথাৰণ্ণনা

জাতিমদেন মত্তোহন্তিআদিকা আযস্মতো জেন্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনিত্ৰা ইমস্মিং বুদ্ধুপ্পাদে সাৰত্থিযং কোসলরঞ্ঞো পুরোহিতস্স পুত্তো হুত্ৰা নিব্বত্তি, তস্স জেন্তোতি নামং অহোসি. সো ৰযপ্পত্তো জাতিমদেন ভোগইস্সরিযরূপমদেন চ মত্তো অঞ্ঞে হীল়েন্তো গরুট্ঠানিযানম্পি অপচিতিং অকরোন্তো মানথদ্ধো ৰিচরতি. সো একদিৰসং সত্থারং মহতিযা পরিসায পরিৰুতং ধম্মং দেসেন্তং দিস্ৰা উপসঙ্কমন্তো ‘‘সচে মং সমণো গোতমো পঠমং আলপিস্সতি, অহম্পি আলপিস্সামি; নো চে, নালপিস্সামী’’তি চিত্তং উপ্পাদেত্ৰা উপসঙ্কমিত্ৰা ঠিতো ভগৰতি পঠমং অনালপন্তে সযম্পি মানেন অনালপিত্ৰা গমনাকারং দস্সেসি. তং ভগৰা –

‘‘ন মানং ব্রাহ্মণ সাধু, অত্থিকস্সীধ ব্রাহ্মণ;

যেন অত্থেন আগচ্ছি, তমেৰমনুব্রূহযে’’তি. (সং. নি. ১.২০১) –

গাথায ¶ অজ্ঝভাসি. সো ‘‘চিত্তং মে সমণো গোতমো জানাতী’’তি অভিপ্পসন্নো ভগৰতো পাদেসু সিরসা নিপতিত্ৰা পরমনিপচ্চাকারং কত্ৰা –

‘‘কেসু ন মানং কযিরাথ, কেসু চস্স সগারৰো;

ক্যস্স অপচিতা অস্সু, ক্যস্সু সাধু সুপূজিতা’’তি. –

পুচ্ছি. তস্স ভগৰা –

‘‘মাতরি ¶ পিতরি চাপি, অথো জেট্ঠম্হি ভাতরি;

আচরিযে চতুত্থম্হি, সমণব্রাহ্মণেসু চ.

‘‘তেসু ¶ ন মানং কযিরাথ, তেসু অস্স সগারৰো;

ক্যস্স অপচিতা অস্সু, ত্যস্সু সাধু সুপূজিতা.

‘‘অরহন্তে সীতিভূতে, কতকিচ্চে অনাসৰে;

নিহচ্চ মানং অত্থদ্ধো, তে নমস্সে অনুত্তরে’’তি. (সং. নি. ১.২০১) –

পঞ্হং ৰিস্সজ্জেন্তো ধম্মং দেসেসি. সো তায দেসনায সোতাপন্নো হুত্ৰা পব্বজিত্ৰা ৰিপস্সনায কম্মং করোন্তো অরহত্তং পত্ৰা অত্তনো পটিপত্তিকিত্তনমুখেন অঞ্ঞং ব্যাকরোন্তো –

৪২৩.

‘‘জাতিমদেন মত্তোহং, ভোগইস্সরিযেন চ;

সণ্ঠানৰণ্ণরূপেন, মদমত্তো অচারিহং.

৪২৪.

‘‘নাত্তনো সমকং কঞ্চি, অতিরেকঞ্চ মঞ্ঞিসং;

অতিমানহতো বালো, পত্থদ্ধো উস্সিতদ্ধজো.

৪২৫.

‘‘মাতরং পিতরঞ্চাপি, অঞ্ঞেপি গরুসম্মতে;

ন কঞ্চি অভিৰাদেসিং, মানত্থদ্ধো অনাদরো.

৪২৬.

‘‘দিস্ৰা ৰিনাযকং অগ্গং, সারথীনং ৰরুত্তমং;

তপন্তমিৰ আদিচ্চং, ভিক্খুসঙ্ঘপুরক্খতং.

৪২৭.

‘‘মানং মদঞ্চ ছড্ডেত্ৰা, ৰিপ্পসন্নেন চেতসা;

সিরসা অভিৰাদেসিং, সব্বসত্তানমুত্তমং.

৪২৮.

‘‘অতিমানো চ ওমানো, পহীনা সুসমূহতা;

অস্মিমানো সমুচ্ছিন্নো, সব্বে মানৰিধা হতা’’তি. –

ইমা গাথা অভাসি.

তত্থ জাতিমদেন মত্তোহন্তি অহং উদিচ্চে ব্রাহ্মণকুলে নিব্বত্তো, ‘‘ন মাদিসো উভতো সুজাতো অঞ্ঞো অত্থী’’তি কুলমানেন মত্তো মানথদ্ধো অচারিন্তি যোজনা. ভোগইস্সরিযেন চাতি ৰিভৰেন আধিপচ্চেন চ হেতুভূতেন ভোগসম্পদঞ্চ ইস্সরিযসম্পদঞ্চ পটিচ্চ উপ্পন্নমদেন মত্তো অহং অচারিন্তি যোজনা. সণ্ঠানৰণ্ণরূপেনাতি সণ্ঠানং ¶ আরোহপরিণাহসম্পত্তি, ৰণ্ণো ¶ ওদাতসামতাদিছৰিসম্পত্তি, রূপং অঙ্গপচ্চঙ্গসোভা. ইধাপি ৰুত্তনযেন যোজনা ৰেদিতব্বা. মদমত্তোতি ৰুত্তপ্পকারতো অঞ্ঞেনপি মদেন মত্তো.

নাত্তনো ¶ সমকং কঞ্চীতি অত্তনো সমকং সদিসং জাতিআদীহি সমানং অতিরেকং ৰা কঞ্চি ন মঞ্ঞিসং ন মঞ্ঞিং, মযা সমানম্পি ন মঞ্ঞিং, কুতো অধিকন্তি অধিপ্পাযো. অতিমানহতো বালোতি বালো অহং ততো বালভাৰতো অতিমানেন খতূপহতকুসলাচারো, ততো এৰ পত্থদ্ধো উস্সিতদ্ধজো থম্ভৰসেন গরূনম্পি নিপচ্চকারস্স অকরণতো ভুসং থদ্ধো অনোনমনথদ্ধজাতো উস্সিতমানদ্ধজো.

ৰুত্তমেৰত্থং পাকটতরং কাতুং ‘‘মাতর’’ন্তিআদি ৰুত্তং. তত্থ অঞ্ঞেতি জেট্ঠভাতুআদিকে, সমণব্রাহ্মণে চ. গরুসম্মতেতি গরূতি সম্মতে গরুট্ঠানিযে. অনাদরোতি আদররহিতো.

দিস্ৰা ৰিনাযকং অগ্গন্তি এৰং মানথদ্ধো হুত্ৰা ৰিচরন্তো দিট্ঠধম্মিকসম্পরাযিকপরমত্থেহি ৰেনেয্যানং ৰিনযনতো সযম্ভুতায নাযকভাৰতো চ ৰিনাযকং. সদেৰকে লোকে সীলাদিগুণেহি সেট্ঠভাৰতো অগ্গং. পুরিসদম্মানং অচ্চন্ততায দমনতো সারথীনং ৰরুত্তমং, অতিৰিয উত্তমং ব্যামপ্পভাদিওভাসেন আদিচ্চমিৰ তপন্তং, ওভাসন্তং ভিক্খুসঙ্ঘপুরক্খতং ধম্মং দেসেন্তং সব্বসত্তানং উত্তমং সত্থারং দিস্ৰা বুদ্ধানুভাৰেন সন্তজ্জিতো ‘‘অহমেৰ সেট্ঠো, অঞ্ঞে হীনা’’তি পৰত্তমানং ভোগমদাদিমদঞ্চ ছড্ডেত্ৰা পহায ৰিপ্পসন্নেন চেতসা সিরসা অভিৰাদেসিন্তি যোজনা. কথং পনাযং মানথদ্ধো সমানো সত্থু দস্সনমত্তেন মানং পহাসীতি? ন খো পনেতং এৰং দট্ঠব্বং. সত্থু দস্সনমত্তেন মানং ন পহাসি ‘‘ন মানং, ব্রাহ্মণ, সাধূ’’তিআদিকায পন দেসনায মানং পহাসি. তং সন্ধায ৰুত্তং ‘‘মানং মদঞ্চ ছড্ডেত্ৰা, ৰিপ্পসন্নেন চেতসা. সিরসা অভিৰাদেসি’’ন্তি. ৰিপ্পসন্নেন চেতসাতি চ ইত্থম্ভূতলক্খণে করণৰচনং দট্ঠব্বং.

‘‘অহমেৰ ¶ সেট্ঠো’’তি পৰত্তো মানো অতিমানো. ‘‘ইমে পন নিহীনা’’তি অঞ্ঞে হীনতো দহন্তস্স মানো ‘‘ওমানো’’তি ৰদন্তি. ‘‘সেয্যোহমস্মী’’তি পন অঞ্ঞং অতিক্কমিত্ৰা অত্তানং সেয্যতো দহন্তস্স পৰত্তো সেয্যমানো অতিমানো. ‘‘হীনোহমস্মী’’তি পৰত্তো হীনমানো ওমানো. পহীনা সুসমূহতাতি হেট্ঠিমমগ্গেহি পহীনা হুত্ৰা অগ্গমগ্গেন সুট্ঠু সমুগ্ঘাটিতা. অস্মিমানোতি ‘‘এসোহমস্মী’’তি খন্ধে ‘‘অহ’’ন্তি ¶ গহণৰসেন পৰত্তমানো. সব্বেতি ন কেৰলং অতিমানওমানঅস্মিমানা এৰ, অথ খো সেয্যস্স সেয্যমানাদযো নৰৰিধা অন্তরভেদেন অনেকৰিধা চ সব্বে মানৰিধা মানকোট্ঠাসা হতা অগ্গমগ্গেন সমুগ্ঘাটিতাতি.

পুরোহিতপুত্তজেন্তত্থেরগাথাৰণ্ণনা নিট্ঠিতা.

১০. সুমনত্থেরগাথাৰণ্ণনা

যদা ¶ নৰো পব্বজিতোতিআদিকা আযস্মতো সুমনত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সিখিস্স ভগৰতো কালে মালাকারকুলে নিব্বত্তিত্ৰা ৰিঞ্ঞুতং পত্তো একদিৰসং সিখিং ভগৰন্তং পস্সিত্ৰা পসন্নমানসো সুমনপুপ্ফেহি পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে অঞ্ঞতরস্স উপাসকস্স গেহে পটিসন্ধিং গণ্হি. সো চ উপাসকো আযস্মতো অনুরুদ্ধত্থেরস্স উপট্ঠাকো অহোসি. তস্স চ ততো পুব্বে জাতাজাতা দারকা মরিংসু. তেন সো ‘‘সচাহং ইদানি একং পুত্তং লভিস্সামি, অয্যস্স অনুরুদ্ধত্থেরস্স সন্তিকে পব্বাজেস্সামী’’তি চিত্তং উপ্পাদেসি. সো চ দসমাসচ্চযেন জাতো অরোগোযেৰ হুত্ৰা অনুক্কমেন ৰড্ঢেন্তো সত্তৰস্সিকো অহোসি, তং পিতা থেরস্স সন্তিকে পব্বাজেসি. সো পব্বজিত্ৰা ততো পরিপক্কঞাণত্তা ৰিপস্সনায কম্মং করোন্তো নচিরস্সেৰ ছল়ভিঞ্ঞো হুত্ৰা থেরং উপট্ঠহন্তো ‘‘পানীযং আহরিস্সামী’’তি ঘটং আদায ইদ্ধিযা অনোতত্তদহং অগমাসি. অথেকো মিচ্ছাদিট্ঠিকো নাগরাজা অনোতত্তদহং পটিচ্ছাদেন্তো সত্তক্খত্তুং ভোগেন পরিক্খিপিত্ৰা ¶ উপরি মহন্তং ফণং কত্ৰা সুমনস্স পানীযং গহেতুং ওকাসং ন দেতি. সুমনো গরুল়রূপং গহেত্ৰা তং নাগরাজং অভিভৰিত্ৰা পানীযং গহেত্ৰা থেরস্স ৰসনট্ঠানং উদ্দিস্স আকাসেন গচ্ছতি. তং সত্থা জেতৰনে নিসিন্নো তথা গচ্ছন্তং দিস্ৰা ধম্মসেনাপতিং আমন্তেত্ৰা, ‘‘সারিপুত্ত, ইমং পস্সা’’তিআদিনা চতূহি গাথাহি তস্স গুণে অভাসি. অথ সুমনত্থেরো –

৪২৯.

‘‘যদা নৰো পব্বজিতো, জাতিযা সত্তৰস্সিকো;

ইদ্ধিযা অভিভোত্ৰান, পন্নগিন্দং মহিদ্ধিকং.

৪৩০.

‘‘উপজ্ঝাযস্স উদকং, অনোতত্তা মহাসরা;

আহরামি ততো দিস্ৰা, মং সত্থা এতদব্রৰি.

৪৩১.

‘‘সারিপুত্ত ইমং পস্স, আগচ্ছন্তং কুমারকং;

উদককুম্ভমাদায, অজ্ঝত্তং সুসমাহিতং.

৪৩২.

‘‘পাসাদিকেন ¶ ৰত্তেন, কল্যাণইরিযাপথো;

সামণেরোনুরুদ্ধস্স, ইদ্ধিযা চ ৰিসারদো.

৪৩৩.

‘‘আজানীযেন আজঞ্ঞো, সাধুনা সাধুকারিতো;

ৰিনীতো অনুরুদ্ধেন, কতকিচ্চেন সিক্খিতো.

৪৩৪.

‘‘সো ¶ পত্ৰা পরমং সন্তিং, সচ্ছিকত্ৰা অকুপ্পতং;

সামণেরো স সুমনো, মা মং জঞ্ঞাতি ইচ্ছতী’’তি. –

অঞ্ঞাব্যাকরণৰসেন ছ গাথা অভাসি.

তত্থ আদিতো দ্ৰে গাথা সুমনত্থেরেনেৰ ভাসিতা, ইতরা চতস্সো তং পসংসন্তেন সত্থারা ভাসিতা. তা সব্বা একজ্ঝং কত্ৰা সুমনত্থেরো পচ্ছা অঞ্ঞাব্যাকরণৰসেন অভাসি. তত্থ পন্নগিন্দন্তি নাগরাজং. ততোতি তত্থ, যদা নৰো পব্বজিতো জাতিযা সত্তৰস্সিকো ইদ্ধিবলেন মহিদ্ধিকং নাগরাজং অভিভৰিত্ৰা অনোতত্তদহতো উপজ্ঝাযস্স পানীযং আহরামি, তস্মিং কালেতি অত্থো.

মং ¶ উদ্দিস্স ময্হং সত্থা এতদব্রৰি, তং দস্সেন্তো, ‘‘সারিপুত্ত, ইমং পস্সা’’তিআদিমাহ. অজ্ঝত্তং সুসমাহিতন্তি ৰিসযজ্ঝত্তভূতেন অগ্গফলসমাধিনা সুট্ঠু সমাহিতং.

পাসাদিকেন ৰত্তেনাতি পস্সন্তানং পসাদাৰহেন আচারৰত্তেন, করণত্থে ইদং করণৰচনং. কল্যাণইরিযাপথোতি সম্পন্নিরিযাপথো. পাসাদিকেন ৰত্তেনাতি ৰা ইত্থম্ভূতলক্খণে করণৰচনং. সমণস্স ভাৰো সামণ্যং, সামঞ্ঞন্তি অত্থো. তদত্থং ঈরতি পৰত্ততীতি সামণেরো, সমণুদ্দেসো. ইদ্ধিযা চ ৰিসারদোতি ইদ্ধিযম্পি ব্যত্তো সুকুসলো. আজানীযেনাতি পুরিসাজানীযেন. অত্তহিতপরহিতানং সাধনতো সাধুনা কতকিচ্চেন অনুরুদ্ধেন সাধু উভযহিতসাধকো, সুট্ঠু ৰা আজঞ্ঞো কারিতো দমিতো. অগ্গৰিজ্জায ৰিনীতো অসেক্খভাৰাপাদনেন সিক্খিতো সিক্খাপিতোতি অত্থো.

সো সামণেরো সুমনো পরমং সন্তিং নিব্বানং পত্ৰা অগ্গমগ্গাধিগমেন অধিগন্ত্ৰা সচ্ছিকত্ৰা অত্তপচ্চক্খং কত্ৰা অকুপ্পতং অরহত্তফলং অপ্পিচ্ছভাৰস্স পরমুক্কংসগতত্তা মা মং জঞ্ঞাতি মং ‘‘অযং খীণাসৰো’’তি ৰা ‘‘ছল়ভিঞ্ঞো’’তি ৰা কোচিপি মা জানেয্যাতি ইচ্ছতি অভিকঙ্খতীতি.

সুমনত্থেরগাথাৰণ্ণনা নিট্ঠিতা.

১১. ন্হাতকমুনিত্থেরগাথাৰণ্ণনা

ৰাতরোগাভিনীতোতিআদিকা ¶ ¶ আযস্মতো ন্হাতকমুনিস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনিত্ৰা ইমস্মিং বুদ্ধুপ্পাদে রাজগহে ব্রাহ্মণকুলে নিব্বত্তিত্ৰা ৰযপ্পত্তো ৰিজ্জাট্ঠানাদীসু নিপ্ফত্তিং গতো ন্হাতকলক্খণযোগেন ন্হাতকোতি পঞ্ঞাযিত্থ. সো তাপসপব্বজ্জং পব্বজিত্ৰা রাজগহস্স তিযোজনপ্পমাণে ঠানে অরঞ্ঞাযতনে নীৰারেহি যাপেন্তো অগ্গিং পরিচারযমানো ৰসতি. তস্স সত্থা ঘটে ৰিয পদীপং হদযব্ভন্তরে পজ্জলন্তং অরহত্তূপনিস্সযং দিস্ৰা অস্সমপদং অগমাসি. সো ভগৰন্তং দিস্ৰা হট্ঠতুট্ঠো অত্তনো ¶ উপকপ্পননিযামেন আহারং উপনেসি. তং ভগৰা পরিভুঞ্জি. এৰং তযো দিৰসে দত্ৰা চতুত্থদিৰসে ‘‘ভগৰা তুম্হে পরমসুখুমালা, কথং ইমিনা আহারেন যাপেথা’’তি আহ. তস্স সত্থা অরিযসন্তোসগুণং পকাসেন্তো ধম্মং দেসেসি. তাপসো তং সুত্ৰা সোতাপন্নো হুত্ৰা পব্বজিত্ৰা অরহত্তং পাপুণি. ভগৰা তং অরহত্তে পতিট্ঠপেত্ৰা গতো. সো পন তত্থেৰ ৰিহরন্তো অপরভাগে ৰাতাবাধেন উপদ্দুতো অহোসি. সত্থা তত্থ গন্ত্ৰা পটিসন্থারমুখেন তস্স ৰিহারং পুচ্ছন্তো –

৪৩৫.

‘‘ৰাতরোগাভিনীতো ত্ৰং, ৰিহরং কাননে ৰনে;

পৰিদ্ধগোচরে লূখে, কথং ভিক্খু করিস্সসী’’তি. – গাথমাহ; অথ থেরো –

৪৩৬.

‘‘পীতিসুখেন ৰিপুলেন, ফরিত্ৰান সমুস্সযং;

লূখম্পি অভিসম্ভোন্তো, ৰিহরিস্সামি কাননে.

৪৩৭.

‘‘ভাৰেন্তো সত্ত বোজ্ঝঙ্গে, ইন্দ্রিযানি বলানি চ;

ঝানসোখুম্মসম্পন্নো, ৰিহরিস্সং অনাসৰো.

৪৩৮.

‘‘ৰিপ্পমুত্তং কিলেসেহি, সুদ্ধচিত্তং অনাৰিলং;

অভিণ্হং পচ্চৰেক্খন্তো, ৰিহরিস্সং অনাসৰো.

৪৩৯.

‘‘অজ্ঝত্তঞ্চ বহিদ্ধা চ, যে মে ৰিজ্জিংসু আসৰা;

সব্বে অসেসা উচ্ছিন্না, ন চ উপ্পজ্জরে পুন.

৪৪০.

‘‘পঞ্চক্খন্ধা পরিঞ্ঞাতা, তিট্ঠন্তি ছিন্নমূলকা;

দুক্খক্খযো অনুপ্পত্তো, নত্থি দানি পুনব্ভৰো’’তি. –

ইমাহি সেসগাথাহি অত্তনো ৰিহারং সত্থু পৰেদেসি.

তত্থ ¶ ঝানসোখুম্মসম্পন্নোতি ঝানসুখুমভাৰেন সমন্নাগতো. ঝানসুখুমং নাম অরূপজ্ঝানং, তস্মা অট্ঠসমাপত্তিলাভিম্হীতি ৰুত্তং হোতি. তেন অত্তনো উভতোভাগৰিমুত্তিতং দস্সেতি. অপরে পনাহু – ‘‘সোখুম্মন্তি অগ্গমগ্গফলেসু অধিপঞ্ঞাসিক্খা ¶ অধিপ্পেতা, ততো ঝানগ্গহণেন ¶ অত্তনো উভতোভাগৰিমুত্তিতং ৰিভাৰেতী’’তি. ৰিপ্পমুত্তং কিলেসেহীতি পটিপ্পস্সদ্ধিৰিমুত্তিযা সব্বকিলেসেহি ৰিমুত্তং, ততো এৰ সুদ্ধচিত্তং, অনাৰিলসঙ্কপ্পতায অনাৰিলং, তীহিপি পদেহি অরহত্তফলচিত্তমেৰ ৰদতি. সেসং হেট্ঠা ৰুত্তনযমেৰ. ইমমেৰ চ থেরস্স অঞ্ঞাব্যাকরণং অহোসীতি.

ন্হাতকমুনিত্থেরগাথাৰণ্ণনা নিট্ঠিতা.

১২. ব্রহ্মদত্তত্থেরগাথাৰণ্ণনা

অক্কোধস্সাতিআদিকা আযস্মতো ব্রহ্মদত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনিত্ৰা ইমস্মিং বুদ্ধুপ্পাদে সাৰত্থিযং কোসলরঞ্ঞো পুত্তো হুত্ৰা নিব্বত্তি, ব্রহ্মদত্তোতিস্স নামং অহোসি. সো ৰযপ্পত্তো জেতৰনমহে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা ৰিপস্সনায কম্মং করোন্তো সহ পটিসম্ভিদাহি ছল়ভিঞ্ঞো অহোসি. তং একদিৰসং নগরে পিণ্ডায চরন্তং অঞ্ঞতরো ব্রাহ্মণো অক্কোসি. থেরো তং সুত্ৰাপি তুণ্হীভূতো পিণ্ডায চরতিযেৰ, ব্রাহ্মণো পুনপি অক্কোসিযেৰ. মনুস্সা এৰং অক্কোসন্তম্পি নং ‘‘অযং থেরো ন কিঞ্চি ভণতী’’তি আহংসু. তং সুত্ৰা থেরো তেসং মনুস্সানং ধম্মং দেসেন্তো –

৪৪১.

‘‘অক্কোধস্স কুতো কোধো, দন্তস্স সমজীৰিনো;

সম্মদঞ্ঞা ৰিমুত্তস্স, উপসন্তস্স তাদিনো.

৪৪২.

‘‘তস্সেৰ তেন পাপিযো, যো কুদ্ধং পটিকুজ্ঝতি;

কুদ্ধং অপ্পটিকুজ্ঝন্তো, সঙ্গামং জেতি দুজ্জযং.

৪৪৩.

‘‘উভিন্নমত্থং চরতি, অত্তনো চ পরস্স চ;

পরং সঙ্কুপিতং ঞত্ৰা, যো সতো উপসম্মতি.

৪৪৪.

‘‘উভিন্নং তিকিচ্ছন্তং তং, অত্তনো চ পরস্স চ;

জনা মঞ্ঞন্তি বালোতি, যে ধম্মস্স অকোৰিদা. (সং. নি. ১.১৮৯);

৪৪৫.

‘‘উপ্পজ্জে ¶ ¶ ¶ তে সচে কোধো, আৰজ্জ ককচূপমং;

উপ্পজ্জে চে রসে তণ্হা, পুত্তমংসূপমং সর.

৪৪৬.

‘‘সচে ধাৰতি চিত্তং তে, কামেসু চ ভৰেসু চ;

খিপ্পং নিগ্গণ্হ সতিযা, কিট্ঠাদং ৰিয দুপ্পসু’’ন্তি. –

ইমা গাথা অভাসি.

তত্থ অক্কোধস্সাতি কোধরহিতস্স মগ্গেন সমুচ্ছিন্নকোধস্স. কুতো কোধোতি কুতো নাম হেতু কোধো উপ্পজ্জেয্য, তস্স উপ্পত্তিকারণং নত্থীতি অত্থো. দন্তস্সাতি উত্তমেন দমেন অগ্গমগ্গদমথেন দন্তস্স. সমজীৰিনোতি কাযৰিসমাদীনি সব্বসো পহায কাযসমাদীনং ৰসেন সমং জীৰন্তস্স সত্তট্ঠানিযেন সম্পজঞ্ঞেন সম্মদেৰ ৰত্তন্তস্স. সম্মদঞ্ঞা ৰিমুত্তস্সাতি সম্মা অঞ্ঞায অভিঞ্ঞেয্যাদিকে ধম্মে জানিত্ৰা সব্বাসৰেহি ৰিপ্পমুত্তস্স. ততো এৰ সব্বকিলেসদরথপরিল়াহৰূপসমেন উপসন্তস্স. ইট্ঠাদীসু তাদিলক্খণপ্পত্তিযা তাদিনো খীণাসৰস্স কুতো কোধোতি অঞ্ঞাপদেসেন থেরো অত্তনো কোধাভাৰং তস্স চ কারণানি ৰত্ৰা ইদানি কোধে অকোধে চ আদীনৰানিসংসদস্সনেন ধম্মং কথেন্তো ‘‘তস্সেৰা’’তিআদিমাহ. তত্থ যো কুদ্ধং পটিকুজ্ঝতীতি যো পুগ্গলো অত্তনো উপরি কুদ্ধং কুপিতং পুগ্গলং পটিকুজ্ঝতি, তস্সেৰ তেন পটিকুজ্ঝনপচ্চক্কোসনপটিপ্পহরণাদিনা পাপিযো ইধলোকে ৰিঞ্ঞূগরহাদিৰসেন পরলোকে নিরযদুক্খাদিৰসেন অভদ্দকতরং অকল্যাণতরং হোতি. কুজ্ঝনেন পন অকুদ্ধস্স পাপং হোতীতি ৰত্তব্বমেৰ নত্থি. কেচি পন ‘‘যো অকুদ্ধং পটিকুদ্ধং আরব্ভ কুজ্ঝতী’’তি অত্থং ৰদন্তি. কুদ্ধং অপ্পটিকুজ্ঝন্তোতি যো পন কুদ্ধং পুগ্গলং ‘‘অযং কুদ্ধো কোধপরেতো’’তি ঞত্ৰা ন পটিকুজ্ঝতি খমতি, সো দুজ্জযং কিলেসসঙ্গামং জেতি নাম. ন কেৰলঞ্চস্স কিলেসসঙ্গামজযো এৰ, অথ খো উভযহিতপটিপত্তিম্পীতি দস্সেন্তো আহ ‘‘উভিন্নমত্থং…পে… উপসম্মতী’’তি. যো পরং পুগ্গলং সঙ্কুপিতং কুদ্ধং ‘‘কোধপরেতো’’তি ঞত্ৰা তং মেত্তাযন্তো অজ্ঝুপেক্খন্তো ৰা সতো ¶ সম্পজানো হুত্ৰা উপসম্মতি খমতি ন পটিপ্ফরতি. সো অত্তনো চ পরস্স চাতি উভিন্নং উভযলোকসুখাৰহং অত্থং হিতং চরতি.

উভিন্নং তিকিচ্ছন্তং তন্তি তং অত্তনো চ পরস্স চাতি উভিন্নং দ্ৰিন্নং কোধব্যাধিতিকিচ্ছায তিকিচ্ছন্তং খমন্তং পুগ্গলং যে জনা ধম্মস্স অরিযাচারধম্মে অকুসলা, তে বালা ‘‘অযং অৰিদ্দসু যো অত্তানং অক্কোসন্তস্স পহরন্তস্স কিঞ্চি ন করোতী’’তি মঞ্ঞন্তি ¶ , তং তেসং অযোনিসো মঞ্ঞনন্তি অধিপ্পাযো. ‘‘তিকিচ্ছন’’ন্তিপি পঠন্তি, তিকিচ্ছনসভাৰন্তি অত্থো.

এৰং ¶ থেরেন ৰুচ্চমানং ধম্মং সুত্ৰা অক্কোসকব্রাহ্মণো সংৰিগ্গো পসন্নচিত্তো চ হুত্ৰা থেরং খমাপেত্ৰা তস্সেৰ সন্তিকে পব্বজি. থেরো তস্স কম্মট্ঠানং দেন্তো ‘‘ইমস্স মেত্তাভাৰনা যুত্তা’’তি মেত্তাকম্মট্ঠানং দত্ৰা কোধপরিযুট্ঠানাদীসু পচ্চৰেক্খণাদিৰিধিং দস্সেন্তো ‘‘উপ্পজ্জে তে’’তিআদিমাহ. তত্থ উপ্পজ্জে তে সচেতি সচে তে কম্মট্ঠানং অনুযুঞ্জন্তস্স কঞ্চি পুগ্গলং নিস্সায চিরপরিচযো কোধো উপ্পজ্জেয্য, তস্স ৰূপসমায –

‘‘উভতোদণ্ডকেন চেপি, ভিক্খৰে, ককচেন চোরা ওচরকা অঙ্গমঙ্গানি ওকন্তেয্যুং, তত্রাপি যো মনো পদূসেয্য, ন মে সো তেন সাসনকরো’’তি (ম. নি. ১.২৩২) –

সত্থারা ৰুত্তং ককচূপমং ওৰাদং আৰজ্জেহি. উপ্পজ্জে চে রসে তণ্হাতি সচে তে মধুরাদিভেদে রসে তণ্হা অভিলাসো উপ্পজ্জেয্য, তস্স ৰূপসমায –

‘‘পুত্তমংসং জাযম্পতিকা যথা কন্তারনিত্থরণত্থমেৰ খাদিংসু, ন রসতণ্হায এৰং কুলপুত্তোপি পব্বজিতো পিণ্ডপাতং পটিসেৰতি…পে… ফাসুৰিহারো চা’’তি (সং. নি. ২.৬৩ অত্থতো সমানং) –

এৰং ৰুত্তং পুত্তমংসূপমোৰাদং সর অনুস্সর.

সচে ধাৰতি তে চিত্তন্তি অযোনিসো মনসি করোতো তৰ চিত্তং কামেসু পঞ্চকামগুণেসু ছন্দরাগৰসেন, কামভৰাদীসু ভৰেসু ভৰপত্থনাৰসেন সচে ধাৰতি সরতি জৰতি. খিপ্পং নিগ্গণ্হ সতিযা, কিট্ঠাদং ¶ ৰিয দুপ্পসুন্তি তথা ধাৰিতুং অদেন্তো যথা নাম পুরিসো কিট্ঠাদং সস্সখাদকং দুপ্পসুং দুট্ঠগোণং যোত্তেন থম্ভে বন্ধিত্ৰা অত্তনো ৰসে ৰত্তেতি, এৰং সতিযা সতিযোত্তেন সম্মাধিথম্ভে বন্ধন্তো খিপ্পং সীঘমেৰ নিগ্গণ্হ, যথা কিলেসৰিগমেন নিব্বিসেৰনং হোতি, তথা দমেহীতি. কেচি পন ‘‘থেরো পুথুজ্জনোৰ হুত্ৰা অক্কোসং অধিৰাসেন্তো তেসং মনুস্সানং অরিযগুণে পকাসেন্তো ধম্মং কথেত্ৰা পচ্ছা দ্ৰীহি গাথাহি অত্তানং ওৰদন্তো ৰিপস্সনং ৰড্ঢেত্ৰা অরহত্তং পত্ৰা অঞ্ঞং ব্যাকরোন্তো ইমাযেৰ গাথা অভাসী’’তি ৰদন্তি.

ব্রহ্মদত্তত্থেরগাথাৰণ্ণনা নিট্ঠিতা.

১৩. সিরিমণ্ডত্থেরগাথাৰণ্ণনা

ছন্নমতিৰস্সতীতিআদিকা ¶ আযস্মতো সিরিমণ্ডত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনিত্ৰা ইমস্মিং বুদ্ধুপ্পাদে সংসুমারগিরে ব্রাহ্মণকুলে নিব্বত্তিত্ৰা ¶ সিরিমণ্ডোতি লদ্ধনামো ৰযপ্পত্তো ভেসকলাৰনে ভগৰতি ৰিহরন্তে সত্থারং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা লদ্ধূপসম্পদো সমণধম্মং করোন্তো একস্মিং উপোসথদিৰসে পাতিমোক্খুদ্দেসট্ঠানে নিসিন্নো নিদানুদ্দেসস্স পরিযোসানে ‘‘আৰিকতা হিস্স ফাসু হোতী’’তি (মহাৰ. ১৩৪) পাল়িযা অত্থং উপধারেন্তো আপন্নং আপত্তিং অনাৰিকত্ৰা পটিচ্ছাদেন্তো উপরূপরি আপত্তিযো আপজ্জতি, তেনস্স ন ফাসু হোতি, আৰিকত্ৰা পন যথাধম্মং পটিকরোন্তস্স ফাসু হোতীতি ইমমত্থং মনসি কত্ৰা ‘‘অহো সত্থু সাসনং সুৰিসুদ্ধ’’ন্তি লদ্ধপ্পসাদো তথা উপ্পন্নং পীতিং ৰিক্খম্ভেত্ৰা ৰিপস্সনং ৰড্ঢেত্ৰা অরহত্তং পত্ৰা অত্তনো পটিপত্তিং পচ্চৰেক্খিত্ৰা পসন্নমানসো ভিক্খূনং ওৰাদং দেন্তো –

৪৪৭.

‘‘ছন্নমতিৰস্সতি, ৰিৰটং নাতিৰস্সতি;

তস্মা ছন্নং ৰিৰরেথ, এৰং তং নাতিৰস্সতি.

৪৪৮.

‘‘মচ্চুনাব্ভাহতো ¶ লোকো, জরায পরিৰারিতো;

তণ্হাসল্লেন ওতিণ্ণো, ইচ্ছাধূপাযিতো সদা. (সং. নি. ১.৬৬);

৪৪৯.

‘‘মচ্চুনাব্ভাহতো লোকো, পরিক্খিত্তো জরায চ;

হঞ্ঞতি নিচ্চমত্তাণো, পত্তদণ্ডোৰ তক্করো.

৪৫০.

‘‘আগচ্ছন্তগ্গিখন্ধাৰ, মচ্চু ব্যাধি জরা তযো;

পচ্চুগ্গন্তুং বলং নত্থি, জৰো নত্থি পলাযিতুং.

৪৫১.

‘‘অমোঘং দিৰসং কযিরা, অপ্পেন বহুকেন ৰা;

যং যং ৰিজহতে রত্তিং, তদূনং তস্স জীৰিতং.

৪৫২.

‘‘চরতো তিট্ঠতো ৰাপি, আসীনসযনস্স ৰা;

উপেতি চরিমা রত্তি, ন তে কালো পমজ্জিতু’’ন্তি. –

ইমা গাথা অভাসি.

তত্থ ছন্নন্তি ছাদিতং যথাভূতং অৰিৰটং অপ্পকাসিতং দুচ্চরিতং. অতিৰস্সতীতি আপত্তিৰস্সঞ্চেৰ কিলেসৰস্সঞ্চ অতিৰিয ৰস্সতি. আপত্তিযা হি ছাদনং অলজ্জিভাৰাদিনা ¶ তাদিসোৰ, ছাদনেন ততো অঞ্ঞথাৰ পুনপি তথারূপং ততো ৰা পাপিট্ঠতরং আপত্তিং আপজ্জেয্যাতি ছাদনং ৰস্সনস্স কারণং ৰুত্তং. ৰিৰটন্তি পকাসিতং অপ্পটিচ্ছন্নং. নাতিৰস্সতীতি এত্থ অতীতি উপসগ্গমত্তং, ন ৰস্সতীতি অত্থো. অৰস্সনঞ্চেত্থ ৰুত্তৰিপরিযাযেন ৰেদিতব্বং চিত্তসন্তানস্স ৰিসোধিতত্তা. তস্মাতি ৰুত্তমেৰত্থং কারণভাৰেন পচ্চামসতি, ছন্নস্স দুচ্চরিতস্স আপত্তিৰস্সাদীনং অতিৰস্সনতো ৰিৰটস্স চ অৰস্সনতোতি অত্থো. ছন্নং ৰিৰরেথাতি পুথুজ্জনভাৰেন ছাদনাধিপ্পাযে উপ্পন্নেপি তং ¶ অননুৰত্তিত্ৰা ৰিৰরেথ আৰিকরেয্য, যথাধম্মং পটিকরেয্য. এৰন্তি ৰিৰরণেন যথাধম্মং পটিপত্তিযা. তন্তি তং ছন্নং দুচ্চরিতং. নাতিৰস্সতি আপত্তিৰস্সং কিলেসৰস্সঞ্চ ন ৰস্সতি, সুদ্ধন্তে পুগ্গলং পতিট্ঠপেতীতি অত্থো.

ইদানি ¶ ‘‘একংসেন সীঘংযেৰ চ অত্তা সোধেতব্বো, অপ্পমাদো কাতব্বো’’তি তস্স কারণং সংৰেগৰত্থুং দস্সেন্তো ‘‘মচ্চুনাব্ভাহতো লোকো’’তিআদিমাহ. তত্থ মচ্চুনাব্ভাহতো লোকোতি অযং সব্বোপি সত্তলোকো চোরো ৰিয চোরঘাতকেন, সব্বৰট্টনিপাতিনা মচ্চুনা মরণেন অভিহতো, ন তস্স হত্থতো মুচ্চতি. জরায পরিৰারিতোতি অযং লোকো উপ্পাদতো উদ্ধং মরণূপনযনরসায জরায পরিৰারিতো অজ্ঝোত্থটো, জরাসঙ্ঘাতপরিমুক্কোতি অত্থো. তণ্হাসল্লেন ওতিণ্ণোতি সরীরস্স অন্তো নিমুগ্গেন ৰিসপীতখুরপ্পেন ৰিয উপাদানলক্খণেন তণ্হাসঙ্খাতেন সল্লেন ওতিণ্ণো হদযব্ভন্তরে ওগাল়্হো. তণ্হা হি পীল়াজননতো অন্তো তুদনতো দুরুদ্ধারতো চ ‘‘সল্লো’’তি ৰুচ্চতি. ইচ্ছাধূপাযিতোতি আরম্মণাভিপত্থনলক্খণায ইচ্ছায সন্তাপিতো. তং ৰিসযং ইচ্ছন্তো হি পুগ্গলো যদিচ্ছিতং ৰিসযং লভন্তো ৰা অলভন্তো ৰা তায এৰ অনুদহনলক্খণায ইচ্ছায সন্তত্তো পরিল়াহপ্পত্তো হোতি. সদাতি সব্বকালং, ইদঞ্চ পদং সব্বপদেসু যোজেতব্বং.

পরিক্খিত্তো জরায চাতি ন কেৰলং মচ্চুনা অব্ভাহতোযেৰ, অথ খো জরায চ পরিক্খিত্তো. জরায সমৰরুদ্ধো জরাপাকারপরিক্খিত্তো, ন তং সমতিক্কমতীতি অত্থো. হঞ্ঞতি নিচ্চমত্তাণোতি অতাণো অসরণো হুত্ৰা নিচ্চকালং জরামরণেহি হঞ্ঞতি ৰিবাধীযতি. যথা কিং? পত্তদণ্ডোৰ তক্করো যথা তক্করো চোরো কতাপরাধো ৰজ্ঝপ্পত্তো অতাণো রাজাণায হঞ্ঞতি, এৰমযং লোকো জরামরণেহীতি দস্সেতি.

আগচ্ছন্তগ্গিখন্ধাৰাতি মহাৰনে ডয্হমানে তং অভিভৰন্তা মহন্তা অগ্গিক্খন্ধা ৰিয মচ্চু ব্যাধি জরাতি ইমে তযো অনুদহনট্ঠেন অগ্গিক্খন্ধা ইমং সত্তলোকং অভিভৰন্তা আগচ্ছন্তি ¶ , তেসং পন পটিবলো হুত্ৰা পচ্চুগ্গন্তুং অভিভৰিতুং বলং উস্সাহো নত্থি, ইমস্স লোকস্স, জৰো নত্থি পলাযিতুং জৰন্তেসু, অজ্ঝোত্থরন্তেসু. যত্থ তে নাভিভৰন্তি, পিট্ঠিং দস্সেত্ৰা ততো পলাযিতুম্পি ইমস্স লোকস্স জঙ্ঘাজৰো নত্থি, এৰং ¶ অত্তনা অসমত্থো মাযাদীহি উপাযেহি অপ্পটিকারে তিৰিধে বলৰতি পচ্চামিত্তে নিচ্চুপট্ঠিতে কিং কাতব্বন্তি চে? অমোঘং ¶ দিৰসং কযিরা, অপ্পেন বহুকেন ৰাতি অপ্পেন অন্তমসো গদ্দূহনমত্তম্পি কালং পৰত্তিতেন বহুকেন ৰা সকলং অহোরত্তং পৰত্তিতেন ৰিপস্সনামনসিকারেন অমোঘং অৰঞ্ঝং দিৰসং করেয্য, যস্মা যং যং ৰিজহতে রত্তিং, তদূনং তস্স জীৰিতং অযং সত্তো যং যং রত্তিং ৰিজহতি নাসেতি খেপেতি, তদূনং তেন ঊনং তস্স সত্তস্স জীৰিতং হোতি. এতেন রত্তিক্খযো নাম জীৰিতক্খযো তস্স অনিৰত্তনতোতি দস্সেতি. তেনাহ –

‘‘যমেকরত্তিং পঠমং, গব্ভে ৰসতি মাণৰো;

অব্ভুট্ঠিতোৰ সো যাতি, স গচ্ছং ন নিৰত্ততী’’তি. (জা. ১.১৫.৩৬৩);

ন কেৰলং রত্তিৰসেনেৰ, অথ খো ইরিযাপথৰসেনাপি জীৰিতক্খযো উপধারেতব্বোতি আহ ‘‘চরতো’’তিআদি. চরতোতি গচ্ছন্তস্স. তিট্ঠতোতি ঠিতং কপ্পেন্তস্স. আসীনসযনস্স ৰাতি আসীনস্স সযনস্স ৰা, নিসিন্নস্স নিপজ্জন্তস্স ৰাতি অত্থো. ‘‘আসীদন’’ন্তিপি পঠন্তি, তত্থ সামিঅত্থে উপযোগৰচনং দট্ঠব্বং. উপেতি চরিমা রত্তীতি চরিমকচিত্তসহিতা রত্তি উপগচ্ছতি, রত্তিগ্গহণঞ্চেত্থ দেসনাসীসমত্তং. গমনাদীসু যেন কেনচি ইরিযাপথেন সমঙ্গীভূতস্স চরিমকালোযেৰ, তেনেৰস্স ইরিযাপথক্খণা জীৰিতং খেপেত্ৰা এৰ গচ্ছন্তি, তস্মা ন তে কালো পমজ্জিতুং নাযং তুয্হং পমাদং আপজ্জিতুং কালো ‘‘ইমস্মিং নাম কালে মরণং ন হোতী’’তি অৰিদিতত্তা. ৰুত্তং হি –

‘‘অনিমিত্তমনঞ্ঞাতং, মচ্চানং ইধ জীৰিতং;

কসিরঞ্চ পরিত্তঞ্চ, তঞ্চ দুক্খেন সংযুত’’ন্তি. (সু. নি. ৫৭৯);

তস্মা এৰং অত্তানং ওৰদিত্ৰা অপ্পমত্তেন তীসু সিক্খাসু অনুযোগো কাতব্বোতি অধিপ্পাযো.

সিরিমণ্ডত্থেরগাথাৰণ্ণনা নিট্ঠিতা.

১৪. সব্বকামিত্থেরগাথাৰণ্ণনা

দ্ৰিপাদকোতিআদিকা ¶ ¶ আযস্মতো সব্বকামিত্থেরস্স গাথা. কা উপ্পত্তি? অযং কির পদুমুত্তরস্স ভগৰতো সাসনে উপ্পন্নং অব্বুদং সোধেত্ৰা পটিপাকতিকং ঠপেন্তং একং থেরং দিস্ৰা, ‘‘অহম্পি অনাগতে একস্স বুদ্ধস্স সাসনে অব্বুদং সোধেত্ৰা পটিপাকতিকং ঠপেতুং সমত্থো ভৰেয্য’’ন্তি পত্থনং পট্ঠপেত্ৰা তদনুরূপানি পুঞ্ঞানি কত্ৰা ¶ দেৰমনুস্সেসু সংসরন্তো ইমস্মিং বুদ্ধুপ্পাদে অপরিনিব্বুতে এৰ ভগৰতি ৰেসালিযং খত্তিযকুলে নিব্বত্তিত্ৰা সব্বকামোতি লদ্ধনামো ৰযপ্পত্তো ঞাতকেহি দারপরিগ্গহং কারিতো নিস্সরণজ্ঝাসযতায ঘরাৰাসং জিগুচ্ছন্তো ধম্মভণ্ডাগারিকস্স সন্তিকে পব্বজিত্ৰা সমণধম্মং করোন্তো উপজ্ঝাযেন সদ্ধিং ৰেসালিং উপগতো ঞাতিঘরং অগমাসি. তত্থ নং পুরাণদুতিযিকা পতিৰিযোগদুক্খিতা কিসা দুব্বণ্ণা অনলঙ্কতা কিলিট্ঠৰত্থনিৰসনা ৰন্দিত্ৰা রোদমানা একমন্তং অট্ঠাসি. তং দিস্ৰা থেরস্স করুণাপুরস্সরং মেত্তং উপট্ঠাপযতো অনুভূতারম্মণে অযোনিসোমনসিকারৰসেন সহসা কিলেসো উপ্পজ্জি.

সো তেন কসাহি তাল়িতো আজানীযো ৰিয সঞ্জাতসংৰেগো তাৰদেৰ সুসানং গন্ত্ৰা, অসুভনিমিত্তং উগ্গহেত্ৰা, তত্থ পটিলদ্ধঝানং পাদকং কত্ৰা, ৰিপস্সনং ৰড্ঢেত্ৰা, অরহত্তং পাপুণি. অথস্স সসুরো অলঙ্কতপটিযত্তং ধীতরং আদায মহতা পরিৰারেন নং উপ্পব্বাজেতুকামো ৰিহারং অগমাসি. থেরো তস্সা অধিপ্পাযং ঞত্ৰা অত্তনো কামেসু ৰিরত্তভাৰং সব্বত্থ চ অনুপলিত্ততং পকাসেন্তো –

৪৫৩.

‘‘দ্ৰিপাদকোযং অসুচি, দুগ্গন্ধো পরিহীরতি;

নানাকুণপপরিপূরো, ৰিস্সৰন্তো ততো ততো.

৪৫৪.

‘‘মিগং নিলীনং কূটেন, বল়িসেনেৰ অম্বুজং;

ৰানরং ৰিয লেপেন, বাধযন্তি পুথুজ্জনং.

৪৫৫.

‘‘রূপা সদ্দা রসা গন্ধা, ফোট্ঠব্বা চ মনোরমা;

পঞ্চ কামগুণা এতে, ইত্থিরূপস্মি দিস্সরে.

৪৫৬.

‘‘যে এতা উপসেৰন্তি, রত্তচিত্তা পুথুজ্জনা;

ৰড্ঢেন্তি কটসিং ঘোরং, আচিনন্তি পুনব্ভৰং.

৪৫৭.

‘‘যো ¶ ¶ চেতা পরিৰজ্জেতি, সপ্পস্সেৰ পদা সিরো;

সোমং ৰিসত্তিকং লোকে, সতো সমতিৰত্ততি.

৪৫৮.

‘‘কামেস্ৰাদীনৰং দিস্ৰা, নেক্খম্মং দট্ঠু খেমতো;

নিস্সটো সব্বকামেহি, পত্তো মে আসৰক্খযো’’তি. –

ইমা গাথা অভাসি.

তত্থ দ্ৰিপাদকোতি যদিপি অপাদকাদযোপি কাযা অসুচীযেৰ, অধিকারৰসেন পন উক্কট্ঠপরিচ্ছেদেন ৰা এৰং ৰুত্তং. যস্মা ৰা অঞ্ঞে অসুচিভূতাপি কাযা লোণম্বিলাদীহি অভিসঙ্খরিত্ৰা মনুস্সানং ভোজনেপি উপনীযন্তি, ন পন মনুস্সকাযো, তস্মা অসুচিতরসভাৰমস্স দস্সেন্তো ‘‘দ্ৰিপাদকো’’তি আহ. অযন্তি তদা উপট্ঠিতং ইত্থিরূপং ¶ সন্ধাযাহ. অসুচীতি অসুচি এৰ, ন এত্থ কিঞ্চিপি সুচীতি অত্থো. দুগ্গন্ধো পরিহীরতীতি দুগ্গন্ধো সমানো পুপ্ফগন্ধাদীহি সঙ্খরিত্ৰা পরিহরীযতি. নানাকুণপপরিপূরোতি কেসাদিঅনেকপ্পকারকুণপভরিতো. ৰিস্সৰন্তো ততো ততোতি পুপ্ফগন্ধাদীহিস্স জেগুচ্ছভাৰং পটিচ্ছাদেতুং ৰাযমন্তানম্পি তং ৰাযামং নিপ্ফলং কত্ৰা নৰহি দ্ৰারেহি খেল়সিঙ্ঘাণিকাদীনি লোমকূপেহি চ সেদজল্লিকং ‘ৰিস্সৰন্তোযেৰ পরিহীরতী’তি সম্বন্ধো.

এৰং জেগুচ্ছোপি সমানো চাযং কাযো কূটাদীহি ৰিয মিগাদিকে অত্তনো রূপাদীহি অন্ধপুথুজ্জনে ৰঞ্চেতিযেৰাতি দস্সেন্তো ‘‘মিগ’’ন্তিআদিমাহ. তত্থ মিগং নিলীনং কূটেনাতি পাসৰাকরাদিনা কূটেন নিলীনং, পটিচ্ছন্নং কত্ৰা মিগং ৰিয নেসাদো. ৰক্খমানো হি ইৰ-সদ্দো ইধাপি আনেত্ৰা যোজেতব্বো. বল়িসেনেৰ অম্বুজন্তি অম্বুজং মচ্ছং আমিসবদ্ধেন বল়িসেন ৰিয বাল়িসিকো. ৰানরং ৰিয লেপেনাতি রুক্খসিলাদীসু পক্খিত্তেন মক্কটলেপেন মক্কটং ৰিয মিগলুদ্দো অন্ধপুথুজ্জনং ৰঞ্চেন্তো বাধেন্তীতি.

কে পন বাধেন্তীতি আহ. ‘‘রূপা সদ্দা’’তিআদি. রূপাদযো হি পঞ্চ কামকোট্ঠাসা ৰিসেসতো ৰিসভাগৰত্থুসন্নিস্সযা ৰিপল্লাসূপনিস্সযেন অযোনিসোমনসিকারেন পরিক্খিত্তানং অন্ধপুথুজ্জনানং মনো রমেন্তো কিলেসৰত্থুতায অনত্থাৰহভাৰতো তে বাধেন্তি নাম. তেন ৰুত্তং ‘‘রূপা সদ্দা…পে… ইত্থিরূপস্মি দিস্সরে’’তি.

ইত্থিগ্গহণঞ্চেত্থ ¶ অধিকারৰসেন কতন্তি ৰেদিতব্বং. তেনেৰাহ ‘‘যে এতা উপসেৰন্তী’’তিআদি. তস্সত্থো – যে পুথুজ্জনা এতা ইত্থিযো রত্তচিত্তা রাগাভিভূতচিত্তা উপভোগৰত্থুসঞ্ঞায ¶ উপসেৰন্তি. ৰড্ঢেন্তি কটসিং ঘোরন্তি তে জাতিআদীহি নিরযাদীহি চ ঘোরং, ভযানকং, অন্ধবালেহি অভিরমিতব্বতো কটসিসঙ্খাতং সংসারং পুনপ্পুনং উপ্পত্তিমরণাদিনা ৰড্ঢেন্তি. তেনাহ ‘‘আচিনন্তি পুনব্ভৰ’’ন্তি.

যো চেতাতি যো পন পুগ্গলো এতা ইত্থিযো তত্থ ছন্দরাগস্স ৰিক্খম্ভনেন ৰা সমুচ্ছিন্দনেন ৰা অত্তনো পাদেন সপ্পস্স সিরং ৰিয পরিৰজ্জেতি, সো সব্বং লোকং ৰিসজিত্ৰা ঠিতত্তা লোকে ৰিসত্তিকাসঙ্খাতং তণ্হং সতো হুত্ৰা সমতিৰত্ততি.

কামেস্ৰাদীনৰং দিস্ৰাতি ‘‘অট্ঠিকঙ্কলূপমা কামা বহুদুক্খা বহুপাযাসা’’তিআদিনা (পাচি. ৪১৭; চূল়ৰ. ৬৫; ম. নি. ১.২৩৪) ৰত্থুকামেসু কিলেসকামেসু অনেকাকারৰোকারং আদীনৰং, দোসং, দিস্ৰা. নেক্খম্মং দট্ঠু খেমতোতি কামেহি ভৰেহি চ নিক্খন্তভাৰতো নেক্খম্মং, পব্বজ্জং ¶ , নিব্বানঞ্চ, খেমতো, অনুপদ্দৰতো, দট্ঠু, দিস্ৰা. সব্বকামেহিপি তেভূমকধম্মেহি নিস্সটো ৰিসংযুত্তো. সব্বেপি তেভূমকা ধম্মা কামনীযট্ঠেন কামা, তেহি চ থেরো ৰিসংযুত্তো. তেনাহ ‘‘পত্তো মে আসৰক্খযো’’তি.

এৰং থেরো আদিতো পঞ্চহি গাথাহি ধম্মং কথেত্ৰা ছট্ঠগাথায অঞ্ঞং ব্যাকাসি. তং সুত্ৰা সসুরো ‘‘অযং সব্বত্থ অনুপলিত্তো, ন সক্কা ইমং কামেসু পতারেতু’’ন্তি যথাগতমগ্গেনেৰ গতো. থেরোপি ৰস্সসতপরিনিব্বুতে ভগৰতি উপসম্পদায ৰীসৰস্সসতিকো পথব্যা থেরো হুত্ৰা, ৰেসালিকেহি ৰজ্জিপুত্তেহি উপ্পাদিতং সাসনস্স অব্বুদং সোধেত্ৰা, দুতিযং ধম্মসঙ্গীতিং সঙ্গাযিত্ৰা ‘‘অনাগতে ধম্মাসোককালে উপ্পজ্জনকং অব্বুদং সোধেহী’’তি তিস্সমহাব্রহ্মানং আণাপেত্ৰা অনুপাদিসেসায নিব্বানধাতুযা পরিনিব্বাযি.

সব্বকামিত্থেরগাথাৰণ্ণনা নিট্ঠিতা.

ছক্কনিপাতৰণ্ণনা নিট্ঠিতা.

৭. সত্তকনিপাতো

১. সুন্দরসমুদ্দত্থেরগাথাৰণ্ণনা

সত্তকনিপাতে ¶ ¶ অলঙ্কতাতিআদিকা আযস্মতো সুন্দরসমুদ্দত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনিত্ৰা ইমস্মিং বুদ্ধুপ্পাদে রাজগহে অঞ্ঞতরস্স মহাৰিভৰস্স সেট্ঠিনো পুত্তো হুত্ৰা নিব্বত্তি. সমুদ্দোতিস্স নামং অহোসি. রূপসম্পত্তিযা পন সুন্দরসমুদ্দোতি পঞ্ঞাযিত্থ. সো পঠমৰযে ঠিতো ভগৰতো রাজগহপ্পৰেসে বুদ্ধানুভাৰং দিস্ৰা, পটিলদ্ধসদ্ধো নিস্সরণজ্ঝাসযতায পব্বজিত্ৰা, লদ্ধূপসম্পদো সমাদিন্নধুতধম্মো রাজগহতো সাৰত্থিং গন্ত্ৰা, কল্যাণমিত্তস্স সন্তিকে ৰিপস্সনাচারং উগ্গহেত্ৰা, কম্মট্ঠানং অনুযুঞ্জন্তো ৰিহরতি. তস্স মাতা রাজগহে উস্সৰদিৰসে অঞ্ঞে সেট্ঠিপুত্তে সপজাপতিকে অলঙ্কতপটিযত্তে উস্সৰকীল়ং কীল়ন্তে দিস্ৰা, পুত্তং অনুস্সরিত্ৰা রোদতি. তং দিস্ৰা অঞ্ঞতরা গণিকা রোদনকারণং পুচ্ছি. সা তস্সা তং কারণং কথেসি. তং সুত্ৰা গণিকা ‘‘অহং তং আনেস্সামি, পস্স তাৰ মম ইত্থিভাৰ’’ন্তি ৰত্ৰা ‘‘যদি এৰং তংযেৰ তস্স পজাপতিং কত্ৰা ইমস্স কুলস্স সামিনিং করিস্সামী’’তি তায বহুং ধনং দত্ৰা ¶ , ৰিস্সজ্জিতা মহতা পরিৰারেন সাৰত্থিং গন্ত্ৰা, থেরস্স পিণ্ডায ৰিচরণট্ঠানে একস্মিং গেহে ৰসমানা দিৰসে দিৰসে অঞ্ঞেহি থেরস্স সক্কচ্চং পিণ্ডপাতং দাপেসি. অলঙ্কতপটিযত্তা চ হুত্ৰা সুৰণ্ণপাদুকা আরুয্হ অত্তানং দস্সেসি. অথেকদিৰসং গেহদ্ৰারেন গচ্ছন্তং থেরং দিস্ৰা, সুৰণ্ণপাদুকা ওমুঞ্চিত্ৰা, অঞ্জলিং পগ্গয্হ পুরতো গচ্ছন্তী নানপ্পকারং থেরং কামনিমন্তনায নিমন্তেসি. তং সুত্ৰা থেরো ‘‘পুথুজ্জনচিত্তং নাম চঞ্চলং, যংনূন মযা ইদানেৰ উস্সাহো করণীযো’’তি তত্থেৰ ঠিতো ভাৰনং উস্সুক্কাপেত্ৰা ছল়ভিঞ্ঞো অহোসি. তং সন্ধায ৰুত্তং –

৪৫৯.

‘‘অলঙ্কতা সুৰসনা, মালধারী ৰিভূসিতা;

অলত্তককতাপাদা, পাদুকারুয্হ ৰেসিকা.

৪৬০.

‘‘পাদুকা ¶ ¶ ওরুহিত্ৰান, পুরতো পঞ্জলীকতা;

সা মং সণ্হেন মুদুনা, ম্হিতপুব্বং অভাসথ.

৪৬১.

‘‘‘যুৰাসি ত্ৰং পব্বজিতো, তিট্ঠাহি মম সাসনে;

ভুঞ্জ মানুসকে কামে, অহং ৰিত্তং দদামি তে;

সচ্চং তে পটিজানামি, অগ্গিং ৰা তে হরামহং.

৪৬২.

‘‘‘যদা জিণ্ণা ভৰিস্সাম, উভো দণ্ডপরাযনা;

উভোপি পব্বজিস্সাম, উভযত্থ কটগ্গহো’’’.

৪৬৩.

‘‘তঞ্চ দিস্ৰান যাচন্তিং, ৰেসিকং পঞ্জলীকতং;

অলঙ্কতং সুৰসনং, মচ্চুপাসংৰ ওড্ডিতং.

৪৬৪.

‘‘ততো মে মনসীকারো, যোনিসো উদপজ্জথ;

আদীনৰো পাতুরহু, নিব্বিদা সমতিট্ঠথ.

৪৬৫.

‘‘ততো চিত্তং ৰিমুচ্চি মে, পস্স ধম্মসুধম্মতং;

তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি.

তত্থ মালধারীতি মালাধারিনী পিল়ন্ধপুপ্ফদামা. ৰিভূসিতাতি ঊনট্ঠানস্স পূরণৰসেন পুপ্ফেহি চেৰ গন্ধৰিলেপনাদীহি চ ৰিভূসিতগত্তা. ‘‘অলঙ্কতা’’তি ইমিনা হত্থূপগগীৰূপগাদীহি আভরণেহি অলঙ্করণং অধিপ্পেতং. অলত্তককতাপাদাতি পরিণতজযসুমনপুপ্ফৰণ্ণেন লাখারসেন রঞ্জিতচরণযুগল়া. সমাসপদঞ্হেতং, ‘‘অলত্তককতপাদা’’তি ৰত্তব্বে গাথাসুখত্থং দীঘং কত্ৰা ৰুত্তং. অসমাসভাৰে পন ‘‘তস্সা’’তি ৰচনসেসো ৰেদিতব্বো. পাদুকারুয্হ ৰেসিকাতি একা রূপূপজীৰিকা ইত্থী যথাৰুত্তৰেসা সুৰণ্ণপাদুকা পটিমুঞ্চিত্ৰা ‘‘ঠিতা’’তি ৰচনসেসো.

পাদুকা ওরুহিত্ৰানাতি পাদুকাহি ওতরিত্ৰা, সুৰণ্ণপাদুকাযো ওমুঞ্চিত্ৰাতি অত্থো. পঞ্জলীকতাতি পগ্গহিতঅঞ্জলিকা সা ৰেসী মং. সামং ৰা ৰচনপরম্পরং ¶ ৰিনা সযমেৰ অভাসথ. সণ্হেনাতি মট্ঠেন. মুদুনাতি মধুরেন. ‘‘ৰচনেনা’’তি অৰুত্তম্পি ৰুত্তমেৰ হোতি, অভাসথাতি, ৰুত্তত্তা.

যুৰাসি ¶ ত্ৰং পব্বজিতোতি ত্ৰং পব্বজন্তো যুৰা, দহরোযেৰ হুত্ৰা পব্বজিতোসি, ননু পব্বজন্তেন সত্তমে দসকে সম্পত্তেৰ পব্বজিতব্বন্তি দস্সেতি. তিট্ঠাহি মম সাসনেতি মম ৰচনে তিট্ঠ.

কিং ¶ পন তন্তি আহ ‘‘ভুঞ্জ মানুসকে কামে’’তি কামে পরিভুঞ্জিতুকামস্স রূপসম্পত্তি, ৰযসম্পত্তি, পরিৰারসম্পত্তি, ভোগসম্পত্তি চ ইচ্ছিতব্বা. তত্থ ‘‘কুতো মে ভোগসম্পত্তী’’তি ৰদেয্যাতি, আহ ‘‘অহং ৰিত্তং দদামি তে’’তি. ‘‘তযিদং ৰচনং কথং সদ্দহাতব্ব’’ন্তি মঞ্ঞেয্যাতি তং সদ্দহাপেন্তী আহ ‘‘সচ্চং তে পটিজানামি, অগ্গিং ৰা তে হরামহ’’ন্তি. ‘‘ভুঞ্জ মানুসকে কামে, অহং ৰিত্তং দদামি তে’’তি যদিদং মযা পটিঞ্ঞাতং, তং একংসেন সচ্চমেৰ পটিজানামি, সচে মে ন পত্তিযাযসি, অগ্গিং ৰা তে হরামহং অগ্গিং হরিত্ৰা অগ্গিপচ্চযং সপথং করোমীতি অত্থো. উভযত্থ কটগ্গহোতি অম্হাকং উভিন্নং জিণ্ণকালে পব্বজ্জনং উভযত্থ জযগ্গাহো. যং মযং যাৰ দণ্ডপরাযনকালা ভোগে ভুঞ্জাম, এৰং ইধলোকেপি ভোগেহি ন জীযাম, মযং পচ্ছা পব্বজিস্সাম, এৰং পরলোকেপি ভোগেহি ন জীযামাতি অধিপ্পাযো. ততোতি তং নিমিত্তং, কামেহি নিমন্তেন্তিযা ‘‘যুৰাসি ত্ৰ’’ন্তিআদিনা ‘‘যদা জিণ্ণা ভৰিস্সামা’’তিআদিনা চ তস্সা ৰেসিযা ৰুত্তৰচনহেতু. তঞ্হি ৰচনং অঙ্কুসং কত্ৰা থেরো সমণধম্মং করোন্তো সদত্থং পরিপূরেসি. সেসং হেট্ঠা ৰুত্তনযমেৰ.

সুন্দরসমুদ্দত্থেরগাথাৰণ্ণনা নিট্ঠিতা.

২. লকুণ্ডকভদ্দিযত্থেরগাথাৰণ্ণনা

পরে অম্বাটকারামেতিআদিকা আযস্মতো লকুণ্ডকভদ্দিযত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে হংসৰতীনগরে মহাভোগে কুলে নিব্বত্তিত্ৰা, ৰযপ্পত্তো সত্থু সন্তিকে ধম্মং সুণন্তো নিসিন্নো তস্মিং খণে সত্থারং একং ভিক্খুং মঞ্জুস্সরানং অগ্গট্ঠানে ঠপেন্তং দিস্ৰা, সযম্পি তং ঠানং পত্থেন্তো বুদ্ধপ্পমুখস্স ভিক্খুসঙ্ঘস্স মহাদানং দত্ৰা, ‘‘অহো ৰতাহম্পি অনাগতে অযং ভিক্খু ¶ ৰিয একস্স বুদ্ধস্স সাসনে মঞ্জুস্সরানং অগ্গো ভৰেয্য’’ন্তি পণিধানং অকাসি. ভগৰা চ তস্স অনন্তরাযতং দিস্ৰা ব্যাকরিত্ৰা পক্কামি.

সো ¶ তত্থ যাৰজীৰং পুঞ্ঞানি কত্ৰা দেৰমনুস্সেসু সংসরন্তো ফুস্সস্স ভগৰতো কালে চিত্তপত্তকোকিলো হুত্ৰা রাজুয্যানতো মধুরং অম্বফলং তুণ্ডেনাদায গচ্ছন্তো সত্থারং দিস্ৰা পসন্নমানসো ‘‘দস্সামী’’তি চিত্তং উপ্পাদেসি. সত্থা তস্স চিত্তং ঞত্ৰা পত্তং গহেত্ৰা নিসীদি. কোকিলো দসবলস্স পত্তে অম্বপক্কং পতিট্ঠাপেসি. সত্থা তং পরিভুঞ্জি. সো কোকিলো ¶ পসন্নমানসো তেনেৰ পীতিসুখেন সত্তাহং ৰীতিনামেসি. তেন চ পুঞ্ঞকম্মেন মঞ্জুস্সরো অহোসি. কস্সপসম্মাসম্বুদ্ধকালে পন চেতিযে আরদ্ধে কিং পমাণং করোম? সত্তযোজনপ্পমাণং. অতিমহন্তমেতং. ছযোজনপ্পমাণং. এতম্পি অতিমহন্তং. পঞ্চযোজনং, চতুযোজনং, তিযোজনং, দ্ৰিযোজনন্তি ৰুত্তে অযং তদা জেট্ঠৰড্ঢকী হুত্ৰা ‘‘এথ, ভো, অনাগতে সুখপটিজগ্গিযং কাতুং ৰট্টতী’’তি ৰত্ৰা রজ্জুযা পরিক্খিপন্তো গাৰুতমত্তকে ঠত্ৰা ‘‘একেকং মুখং গাৰুতং গাৰুতং হোতু, চেতিযং একযোজনাৰট্টং যোজনুব্বেধং ভৰিস্সতী’’তি আহ. তে তস্স ৰচনে অট্ঠংসু. ইতি অপ্পমাণস্স বুদ্ধস্স পমাণং অকাসীতি. তেন পন কম্মেন নিব্বত্তনিব্বত্তট্ঠানে অঞ্ঞেহি নীচতরপ্পমাণো হোতি.

সো অম্হাকং সত্থু কালে সাৰত্থিযং মহাভোগকুলে নিব্বত্তি, ভদ্দিযোতিস্স নামং অহোসি. অতিরস্সতায পন লকুণ্ডকভদ্দিযোতি পঞ্ঞাযিত্থ. সো সত্থু সন্তিকে ধম্মং সুত্ৰা, পটিলদ্ধসদ্ধো পব্বজিত্ৰা, বহুস্সুতো ধম্মকথিকো হুত্ৰা মধুরেন সরেন পরেসং ধম্মং কথেসি. অথেকস্মিং উস্সৰদিৰসে একেন ব্রাহ্মণেন সদ্ধিং রথেন গচ্ছন্তী অঞ্ঞতরা গণিকা থেরং দিস্ৰা দন্তৰিদংসকং হসি. থেরো তস্সা দন্তট্ঠিকে নিমিত্তং গহেত্ৰা ঝানং উপ্পাদেত্ৰা, তং পাদকং কত্ৰা, ৰিপস্সনং পট্ঠপেত্ৰা, অনাগামী অহোসি. সো অভিণ্হং কাযগতায সতিযা ৰিহরন্তো একদিৰসং আযস্মতা ধম্মসেনাপতিনা ওৰদিযমানো অরহত্তে পতিট্ঠহি. তেন ৰুত্তং অপদানে (অপ. থের ২.৫৫.১-৩৩) –

‘‘পদুমুত্তরো ¶ নাম জিনো, সব্বধম্মেসু চক্খুমা;

ইতো সতসহস্সম্হি, কপ্পে উপ্পজ্জি নাযকো.

‘‘তদাহং হংসৰতিযং সেট্ঠিপুত্তো মহদ্ধনো;

জঙ্ঘাৰিহারং ৰিচরং, সঙ্ঘারামং অগচ্ছহং.

‘‘তদা সো লোকপজ্জোতো, ধম্মং দেসেসি নাযকো;

মঞ্জুস্সরানং পৰরং, সাৰকং অভিকিত্তযি.

‘‘তং সুত্ৰা মুদিতো হুত্ৰা, কারং কত্ৰা মহেসিনো;

ৰন্দিত্ৰা সত্থুনো পাদে, তং ঠানমভিপত্থযিং.

‘‘তদা বুদ্ধো ৰিযাকাসি, সঙ্ঘমজ্ঝে ৰিনাযকো;

অনাগতম্হি অদ্ধানে, লচ্ছসে তং মনোরথং.

‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ধম্মেসু দাযাদো, ওরসো ধম্মনিম্মিতো;

ভদ্দিযো নাম নামেন, হেস্সতি সত্থু সাৰকো.

‘‘তেন ¶ কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘দ্ৰেনৰুতে ইতো কপ্পে, ফুস্সো উপ্পজ্জি নাযকো;

দুরাসদো দুপ্পসহো, সব্বলোকুত্তমো জিনো.

‘‘চরণেন চ সম্পন্নো, ব্রহা উজু পতাপৰা;

হিতেসী সব্বসত্তানং, বহুং মোচেসি বন্ধনা.

‘‘নন্দারামৰনে তস্স, অহোসিং ফুস্সকোকিলো;

গন্ধকুটিসমাসন্নে, অম্বরুক্খে ৰসামহং.

‘‘তদা পিণ্ডায গচ্ছন্তং, দক্খিণেয্যং জিনুত্তমং;

দিস্ৰা চিত্তং পসাদেত্ৰা, মঞ্জুনাভিনিকূজহং.

‘‘রাজুয্যানং তদা গন্ত্ৰা, সুপক্কং কনকত্তচং;

অম্বপিণ্ডং গহেত্ৰান, সম্বুদ্ধস্সোপনামযিং.

‘‘তদা ¶ মে চিত্তমঞ্ঞায, মহাকারুণিকো জিনো;

উপট্ঠাকস্স হত্থতো, পত্তং পগ্গণ্হি নাযকো.

‘‘অদাসিং হট্ঠচিত্তোহং, অম্বপিণ্ডং মহামুনে;

পত্তে পক্খিপ্প পক্খেহি, পঞ্জলিং কত্ৰান মঞ্জুনা.

‘‘সরেন রজনীযেন, সৰনীযেন ৰগ্গুনা;

ৰস্সন্তো বুদ্ধপূজত্থং, নীল়ং গন্ত্ৰা নিপজ্জহং.

‘‘তদা মুদিতচিত্তং মং, বুদ্ধপেমগতাসযং;

সকুণগ্ঘি উপাগন্ত্ৰা, ঘাতযী দুট্ঠমানসো.

‘‘ততো চুতোহং তুসিতে, অনুভোত্ৰা মহাসুখং;

মনুস্সযোনিমাগচ্ছিং, তস্স কম্মস্স ৰাহসা.

‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

‘‘সাসনং জোতযিত্ৰা সো, অভিভুয্য কুতিত্থিযে;

ৰিনযিত্ৰান ৰেনেয্যে, নিব্বুতো সো সসাৰকো.

‘‘নিব্বুতে তম্হি লোকগ্গে, পসন্না জনতা বহূ;

পূজনত্থায বুদ্ধস্স, থূপং কুব্বন্তি সত্থুনো.

‘‘সত্তযোজনিকং থূপং, সত্তরতনভূসিতং;

করিস্সাম মহেসিস্স, ইচ্চেৰং মন্তযন্তি তে.

‘‘কিকিনো কাসিরাজস্স, তদা সেনায নাযকো;

হুত্ৰাহং অপ্পমাণস্স, পমাণং চেতিযে ৰদিং.

‘‘তদা ¶ তে মম ৰাক্যেন, চেতিযং যোজনুগ্গতং;

অকংসু নরৰীরস্স, নানারতনভূসিতং.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘পচ্ছিমে চ ভৰে দানি, জাতো সেট্ঠিকুলে অহং;

সাৰত্থিযং পুরৰরে, ইদ্ধে ফীতে মহদ্ধনে.

‘‘পুরপ্পৰেসে ¶ সুগতং, দিস্ৰা ৰিম্হিতমানসো;

পব্বজিত্ৰান ন চিরং, অরহত্তমপাপুণিং.

‘‘চেতিযস্স পমাণং যং, অকরিং তেন কম্মুনা;

লকুণ্ডকসরীরোহং, জাতো পরিভৰারহো.

‘‘সরেন মধুরেনাহং, পূজিত্ৰা ইসিসত্তমং;

মঞ্জুস্সরানং ভিক্খূনং, অগ্গত্তমনুপাপুণিং.

‘‘ফলদানেন বুদ্ধস্স, গুণানুস্সরণেন চ;

সামঞ্ঞফলসম্পন্নো, ৰিহরামি অনাসৰো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অপরভাগে অঞ্ঞং ব্যাকরোন্তো –

৪৬৬.

‘‘পরে অম্বাটকারামে, ৰনসণ্ডম্হি ভদ্দিযো;

সমূলং তণ্হমব্বুয্হ, তত্থ ভদ্দোৰ ঝাযতি.

৪৬৭.

‘‘রমন্তেকে ¶ মুদিঙ্গেহি, ৰীণাহি পণৰেহি চ;

অহঞ্চ রুক্খমূলস্মিং, রতো বুদ্ধস্স সাসনে.

৪৬৮.

‘‘বুদ্ধো চে মে ৰরং দজ্জা, সো চ লব্ভেথ মে ৰরো;

গণ্হেহং সব্বলোকস্স, নিচ্চং কাযগতং সতি’’ন্তি. –

ইমা তিস্সো গাথা অভাসি.

তত্থ পরেতি সেট্ঠে অধিকে, ৰিসিট্ঠেতি অত্থো. অধিকৰাচী হি অযং পরসদ্দো ‘‘পরং ৰিয মত্তাযা’’তিআদীসু ৰিয. অম্বাটকারামেতি এৰংনামকে আরামে. সো কির ছাযূদকসম্পন্নো ৰনসণ্ডমণ্ডিতো রমণীযো হোতি তেন ‘‘পরে’’তি ৰিসেসেত্ৰা ৰুত্তো. ‘‘অম্বাটকৰনে অম্বাটকেহি অভিলক্খিতৰনে’’তি চ ৰদন্তি. ৰনসণ্ডম্হীতি ৰনগহনে, ঘননিচিতরুক্খগচ্ছলতাসমূহে ৰনেতি অত্থো. ভদ্দিযোতি এৰংনামকো, অত্তানমেৰ থেরো অঞ্ঞং ৰিয ৰদতি. সমূলং তণ্হমব্বুয্হাতি তণ্হায ¶ মূলং নাম অৰিজ্জা. তস্মা সাৰিজ্জং তণ্হং অগ্গমগ্গেন ¶ সমুগ্ঘাটেত্ৰাতি অত্থো. তত্থ ভদ্দোৰ ঝাযতীতি লোকুত্তরেহি সীলাদীহি ভদ্দো সুন্দরো তস্মিংযেৰ ৰনসণ্ডে কতকিচ্চতায দিট্ঠধম্মসুখৰিহারৰসেন অগ্গফলঝানেন ঝাযতি.

ফলসুখেন চ ঝানসমাপত্তীহি চ ৰীতিনামেতীতি অত্তনো ৰিৰেকরতিং দস্সেত্ৰা ‘‘রমন্তেকে’’তি গাথাযপি ব্যতিরেকমুখেন তমেৰত্থং দস্সেতি. তত্থ মুদিঙ্গেহীতি অঙ্গিকাদীহি মুরজেহি. ৰীণাহীতি নন্দিনীআদীহি ৰীণাহি. পণৰেহীতি তুরিযেহি রমন্তি একে কামভোগিনো, সা পন তেসং রতি অনরিযা অনত্থসংহিতা. অহঞ্চা তি অহং পন, এককো বুদ্ধস্স ভগৰতো সাসনে রতো, ততো এৰ রুক্খমূলস্মিং রতো অভিরতো ৰিহরামীতি অত্থো.

এৰং অত্তনো ৰিৰেকাভিরতিং কিত্তেত্ৰা ইদানি যং কাযগতাসতিকম্মট্ঠানং ভাৰেত্ৰা অরহত্তং পত্তো, তস্স পসংসনত্থং ‘‘বুদ্ধো চে মে’’তি গাথমাহ. তস্সত্থো – সচে বুদ্ধো ভগৰা ‘‘একাহং, ভন্তে, ভগৰন্তং ৰরং যাচামী’’তি মযা যাচিতো ‘‘অতিক্কন্তৰরা খো, ভিক্খু, তথাগতা’’তি অপটিক্খিপিত্ৰা ময্হং যথাযাচিতং ৰরং দদেয্য, সো চ ৰরো মমাধিপ্পাযপূরকো লব্ভেথ ময্হং মনোরথং মত্থকং পাপেয্যাতি থেরো পরিকপ্পৰসেন ৰদতি. ‘‘ভন্তে, সব্বো লোকো সব্বকালং কাযগতাসতিকম্মট্ঠানং ভাৰেতূ’’তি ‘‘সব্বলোকস্স নিচ্চং কাযগতাসতি ভাৰেতব্বা’’তি কত্ৰা ৰরং গণ্হে অহন্তি দস্সেন্তো আহ ‘‘গণ্হেহং সব্বলোকস্স, নিচ্চং কাযগতং সতি’’ন্তি. ইদানি অপরিক্খণগরহামুখেন পরিক্খণং পসংসন্তো –

৪৬৯.

‘‘যে ¶ মং রূপেন পামিংসু, যে চ ঘোসেন অন্ৰগূ;

ছন্দরাগৰসূপেতা, ন মং জানন্তি তে জনা.

৪৭০.

‘‘অজ্ঝত্তঞ্চ ন জানাতি, বহিদ্ধা চ ন পস্সতি;

সমন্তাৰরণো বালো, স ৰে ঘোসেন ৰুয্হতি.

৪৭১.

‘‘অজ্ঝত্তঞ্চ ন জানাতি, বহিদ্ধা চ ৰিপস্সতি;

বহিদ্ধা ফলদস্সাৰী, সোপি ঘোসেন ৰুয্হতি.

৪৭২.

‘‘অজ্ঝত্তঞ্চ ¶ পজানাতি, বহিদ্ধা চ ৰিপস্সতি;

অনাৰরণদস্সাৰী, ন সো ঘোসেন ৰুয্হতী’’তি. –

ইমা চতস্সো গাথা অভাসি.

তত্থ যে মং রূপেন পামিংসূতি যে জনা অৰিদ্দসূ মম রূপেন অপসাদিকেন নিহীনেন ‘‘আকারসদিসী পঞ্ঞা’’তি, ধম্মসরীরেন চ মং নিহীনং পামিংসু, ‘‘ওরকো অয’’ন্তি হীল়েন্তা পরিচ্ছিন্দনৰসেন ¶ মঞ্ঞিংসূতি অত্থো. যে চ ঘোসেন অন্ৰগূতি যে চ সত্তা ঘোসেন মঞ্জুনা মং সম্ভাৰনাৰসেন অনুগতা বহু মঞ্ঞিংসু, তং তেসং মিচ্ছা, ন হি অহং রূপমত্তেন অৰমন্তব্বো, ঘোসমত্তেন ৰা ন বহুং মন্তব্বো, তস্মা ছন্দরাগৰসূপেতা, ন মং জানন্তি তে জনাতি তে দুৰিধাপি জনা ছন্দরাগস্স ৰসং উপেতা অপ্পহীনছন্দরাগা সব্বসো পহীনছন্দরাগং মং ন জানন্তি.

অৰিসযো তেসং মাদিসো অজ্ঝত্তং বহিদ্ধা চ অপরিঞ্ঞাতৰত্থুতাযাতি দস্সেতুং ‘‘অজ্ঝত্ত’’ন্তিআদি ৰুত্তং. অজ্ঝত্তন্তি অত্তনো সন্তানে খন্ধাযতনাদিধম্মং. বহিদ্ধাতি পরসন্তানে. অথ ৰা অজ্ঝত্তন্তি, মম অব্ভন্তরে অসেক্খসীলক্খন্ধাদিং. বহিদ্ধাতি, মমেৰ আকপ্পসম্পত্তিযাদিযুত্তং বহিদ্ধা রূপধম্মপ্পৰত্তিং চক্খুৰিঞ্ঞাণাদিপ্পৰত্তিঞ্চ. সমন্তাৰরণোতি এৰং অজ্ঝত্তঞ্চ বহিদ্ধা চ অজাননেন সমন্ততো আৰরণযুত্তো আৰটঞাণগতিকো. স ৰে ঘোসেন ৰুয্হতীতি সো পরনেয্যবুদ্ধিকো বালো ঘোসেন পরেসং ৰচনেন ৰুয্হতি নিয্যতি আকড্ঢীযতি.

বহিদ্ধা চ ৰিপস্সতীতি যো চ ৰুত্তনযেন অজ্ঝত্তং ন জানাতি, বহিদ্ধা পন সুতানুসারেন আকপ্পসম্পত্তিআদিউপধারণেন ৰা ৰিসেসতো পস্সতি. ‘‘গুণৰিসেসযুত্তো সিযা’’তি মঞ্ঞতি, সোপি বহিদ্ধা ফলদস্সাৰী নযগ্গাহেন ফলমত্তং গণ্হন্তো ৰুত্তনযেন ঘোসেন ৰুয্হতি, সোপি মাদিসে ন জানাতীতি অত্থো.

যো পন অজ্ঝত্তঞ্চ খীণাসৰস্স অব্ভন্তরে অসেক্খসীলক্খন্ধাদিগুণং জানাতি, বহিদ্ধা চস্স পটিপত্তিসল্লক্খণেন ৰিসেসতো গুণৰিসেসযোগং পস্সতি. অনাৰরণদস্সাৰী কেনচি অনাৰটো হুত্ৰা অরিযানং গুণে ¶ দট্ঠুং ঞাতুং সমত্থো, ন সো ঘোসমত্তেন ৰুয্হতি যাথাৰতো দস্সনতোতি.

লকুণ্ডকভদ্দিযত্থেরগাথাৰণ্ণনা নিট্ঠিতা.

৩. ভদ্দত্থেরগাথাৰণ্ণনা

একপুত্তোতিআদিকা ¶ আযস্মতো ভদ্দত্থেরস্স গাথা. কা উপ্পত্তি? অযং কির পদুমুত্তরং ভগৰন্তং ভিক্খুসঙ্ঘঞ্চ সতসহস্সপরিমাণং চীৰরাদীহি চতূহি পচ্চযেহি পূজেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং সেট্ঠিকুলে নিব্বত্তি. নিব্বত্তমানো ¶ চ অপুত্তকেসু মাতাপিতূসু দেৰতাযাচনাদীনি কত্ৰাপি অলভন্তেসু সত্থারং উপসঙ্কমিত্ৰা ‘‘সচে, ভন্তে, মযং একং পুত্তং লচ্ছাম, তং তুম্হাকং দাসত্থায দস্সামা’’তি ৰত্ৰা আযাচিত্ৰা গতেসু সত্থু অধিপ্পাযং ঞত্ৰা অঞ্ঞতরো দেৰপুত্তো খীণাযুকো হুত্ৰা ঠিতো সক্কেন দেৰরঞ্ঞা ‘‘অমুকস্মিং কুলে নিব্বত্তাহী’’তি আণত্তো তত্থ নিব্বত্তি, ভদ্দোতিস্স নামং অকংসু. তং সত্তৰস্সুদ্দেসিকং জাতং মাতাপিতরো অলঙ্করিত্ৰা ভগৰতো সন্তিকং নেত্ৰা ‘‘অযং সো, ভন্তে, তুম্হে আযাচিত্ৰা লদ্ধদারকো, ইমং তুম্হাকং নিয্যাতেমা’’তি আহংসু. সত্থা আনন্দত্থেরং আণাপেসি – ‘‘ইমং পব্বাজেহী’’তি. আণাপেত্ৰা চ গন্ধকুটিং পাৰিসি. থেরো তং পব্বাজেত্ৰা সঙ্খেপেন ৰিপস্সনামুখং আচিক্খি. সো উপনিস্সযসম্পন্নত্তা ৰিপস্সনায কম্মং করোন্তো সূরিযে অনোগ্গতেযেৰ ভাৰনং উস্সুক্কাপেত্ৰা ছল়ভিঞ্ঞো অহোসি. তেন ৰুত্তং অপদানে (অপ. থের ১.৫.৫৪-৬৯) –

‘‘পদুমুত্তরসম্বুদ্ধং, মেত্তচিত্তং মহামুনিং;

উপেতি জনতা সব্বা, সব্বলোকগ্গনাযকং.

‘‘সত্তুকঞ্চ বদ্ধকঞ্চ, আমিসং পানভোজনং;

দদন্তি সত্থুনো সব্বে, পুঞ্ঞক্খেত্তে অনুত্তরে.

‘‘অহম্পি দানং দস্সামি, দেৰদেৰস্স তাদিনো;

বুদ্ধসেট্ঠং নিমন্তেত্ৰা, সঙ্ঘম্পি চ অনুত্তরং.

‘‘উয্যোজিতা ¶ মযা চেতে, নিমন্তেসুং তথাগতং;

কেৰলং ভিক্খুসঙ্ঘঞ্চ, পুঞ্ঞক্খেত্তং অনুত্তরং.

‘‘সতসহস্সপল্লঙ্কং, সোৰণ্ণং গোনকত্থতং;

তূলিকাপটলিকায, খোমকপ্পাসিকেহি চ;

মহারহং পঞ্ঞাপযিং, আসনং বুদ্ধযুত্তকং.

‘‘পদুমুত্তরো লোকৰিদূ, দেৰদেৰো নরাসভো;

ভিক্খুসঙ্ঘপরিব্যূল়্হো, মম দ্ৰারমুপাগমি.

‘‘পচ্চুগ্গন্ত্ৰান সম্বুদ্ধং, লোকনাথং যসস্সিনং;

পসন্নচিত্তো সুমনো, অভিনামযিং সঙ্ঘরং.

‘‘ভিক্খূনং সতসহস্সং, বুদ্ধঞ্চ লোকনাযকং;

পসন্নচিত্তো সুমনো, পরমন্নেন তপ্পযিং.

‘‘পদুমুত্তরো লোকৰিদূ, আহুতীনং পটিগ্গহো;

ভিক্খুসঙ্ঘে নিসীদিত্ৰা, ইমা গাথা অভাসথ.

‘‘যেনিদং আসনং দিন্নং, সোৰণ্ণং গোনকত্থতং;

তমহং কিত্তযিস্সামি, সুণাথ মম ভাসতো.

‘‘চতুসত্ততিক্খত্তুং ¶ সো, দেৰরজ্জং করিস্সতি;

অনুভোস্সতি সম্পত্তিং, অচ্ছরাহি পুরক্খতো.

‘‘পদেসরজ্জং সহস্সং, ৰসুধং আৰসিস্সতি;

একপঞ্ঞাসক্খত্তুঞ্চ, চক্কৰত্তী ভৰিস্সতি.

‘‘সব্বাসু ভৰযোনীসু, উচ্চাকুলী ভৰিস্সতি;

সো চ পচ্ছা পব্বজিত্ৰা, সুক্কমূলেন চোদিতো;

ভদ্দিযো নাম নামেন, হেস্সতি সত্থু সাৰকো.

‘‘ৰিৰেকমনুযুত্তোম্হি, পন্তসেননিৰাসহং;

ফলঞ্চাধিগতং সব্বং, চত্তক্লেসোম্হি অজ্জহং.

‘‘মম সব্বং অভিঞ্ঞায, সব্বঞ্ঞূ লোকনাযকো;

ভিক্খুসঙ্ঘে নিসীদিত্ৰা, এতদগ্গে ঠপেসি মং.

‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি.

তস্স ¶ ভগৰা ছল়ভিঞ্ঞুপ্পত্তিং ঞত্ৰা ‘‘এহি, ভদ্দা’’তি আহ. সো তাৰদেৰ সত্থারং উপসঙ্কমিত্ৰা ৰন্দিত্ৰা পঞ্জলিকো সত্থু সমীপে অট্ঠাসি, সা এৰ চস্স উপসম্পদা অহোসি. বুদ্ধূপসম্পদা নাম কিরেসা. থেরো জাতিতো পট্ঠায অত্তনো পৰত্তিযা কথনমুখেন অঞ্ঞং ব্যাকরোন্তো –

৪৭৩.

‘‘একপুত্তো অহং আসিং, পিযো মাতু পিযো পিতু;

বহূহি ৰতচরিযাহি, লদ্ধো আযাচনাহি চ.

৪৭৪.

‘‘তে চ মং অনুকম্পায, অত্থকামা হিতেসিনো;

উভো পিতা চ মাতা চ, বুদ্ধস্স উপনামযুং.

৪৭৫.

‘‘কিচ্ছা লদ্ধো অযং পুত্তো, সুখুমালো সুখেধিতো;

ইমং দদাম তে নাথ, জিনস্স পরিচারকং.

৪৭৬.

‘‘সত্থা চ মং পটিগ্গয্হ, আনন্দং এতদব্রৰি;

পব্বাজেহি ইমং খিপ্পং, হেস্সত্যাজানিযো অযং.

৪৭৭.

‘‘পব্বাজেত্ৰান ¶ মং সত্থা, ৰিহারং পাৰিসী জিনো;

অনোগ্গতস্মিং সূরিযস্মিং, ততো চিত্তং ৰিমুচ্চি মে.

৪৭৮.

‘‘ততো ¶ সত্থা নিরাকত্ৰা, পটিসল্লানৰুট্ঠিতো;

এহি ভদ্দাতি মং আহ, সা মে আসূপসম্পদা.

৪৭৯.

‘‘জাতিযা সত্তৰস্সেন, লদ্ধা মে উপসম্পদা;

তিস্সো ৰিজ্জা অনুপ্পত্তা, অহো ধম্মসুধম্মতা’’তি. –

ইমা গাথা অভাসি.

তত্থ ৰতচরিযাহীতি, ‘‘এৰং কত্ৰা পুত্তং লভিস্সথা’’তি ৰুত্তং সমণব্রাহ্মণানং ৰচনং সুত্ৰা, খীরং পাযিত্ৰা, অনসনাদিৰতচরণেহি. আযাচনাহীতি দেৰতাযাচনাহি সত্থুআযাচনায চ, ইদমেৰ চেত্থ কারণং, ইতরং থেরো মাতাপিতূনং পটিপত্তিদস্সনত্থঞ্চেৰ কিচ্ছলদ্ধভাৰদস্সনত্থঞ্চ ৰদতি.

তেতি ¶ মাতাপিতরো. উপনামযুন্তি উপনামেসুং.

সুখেধিতোতি সুখসংৰড্ঢিতো. তেতি তুয্হং. পরিচারকন্তি কিংকারং.

হেস্সত্যাজানিযো অযন্তি অযং দারকো মম সাসনে আজানীযো ভৰিস্সতি. তস্মা খিপ্পং অজ্জেৰ পব্বাজেহীতি এতং অব্রৰি, আহ.

পব্বাজেত্ৰানাতি আনন্দত্থেরেন পব্বাজেত্ৰা. ৰিহারন্তি গন্ধকুটিং. অনোগ্গতস্মিং সূরিযস্মিন্তি সূরিযে অনত্থঙ্গতেযেৰ. ততো চিত্তং ৰিমুচ্চি মেতি ততো ৰিপস্সনারম্ভতো পরং ন চিরেনেৰ খণেন সব্বাসৰেহি মে চিত্তং ৰিমুচ্চি, খীণাসৰো অহোসিং.

ততোতি মম আসৰক্খযতো পচ্ছা. নিরাকত্ৰাতি অত্তনা সমাপন্নং ফলসমাপত্তিং অপ্পেত্ৰা ততো ৰুট্ঠায. তেনাহ ‘‘পটিসল্লানৰুট্ঠিতো’’তি. সা মে আসূপসম্পদাতি যা মং উদ্দিস্স ‘‘এহি, ভদ্দা’’তি সত্থু ৰাচা পৰত্তা, সা এৰ মে ময্হং উপসম্পদা আসি. এৰং জাতিযা সত্তৰস্সেন, লদ্ধা মে উপসম্পদাতি সাতিসযং সত্থারা অত্তনো কতং অনুগ্গহং সাসনস্স চ নিয্যানিকতং দস্সেতি. তেনাহ ‘‘অহো ধম্মসুধম্মতা’’তি.

এত্থ চ ‘‘চিত্তং ৰিমুচ্চি মে’’তি খীণাসৰভাৰং পকাসেত্ৰাপি পুন ‘‘তিস্সো ৰিজ্জা অনুপ্পত্তা’’তি লোকিযাভিঞ্ঞেকদেসদস্সনং ছল়ভিঞ্ঞভাৰৰিভাৰনত্থং. তেনাহ অপদানে ‘‘ছল়ভিঞ্ঞা সচ্ছিকতা’’তি.

ভদ্দত্থেরগাথাৰণ্ণনা নিট্ঠিতা.

৪. সোপাকত্থেরগাথাৰণ্ণনা

দিস্ৰা ¶ ¶ পাসাদছাযাযন্তিআদিকা আযস্মতো সোপাকত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সিদ্ধত্থস্স ভগৰতো কালে ব্রাহ্মণকুলে নিব্বত্তিত্ৰা ৰিঞ্ঞুতং পত্তো ব্রাহ্মণানং ৰিজ্জাসিপ্পেসু নিপ্ফত্তিং গতো কামেসু আদীনৰং দিস্ৰা ঘরাৰাসং পহায তাপসপব্বজ্জং পব্বজিত্ৰা একস্মিং ¶ পব্বতে ৰিহরতি. সত্থা আসন্নমরণং তং ঞত্ৰা তস্স সন্তিকং অগমাসি. সো ভগৰন্তং দিস্ৰা পসন্নচিত্তো উল়ারং পীতিসোমনস্সং পৰেদেন্তো পুপ্ফমযং আসনং পঞ্ঞপেত্ৰা অদাসি. সত্থা তত্থ নিসীদিত্ৰা, অনিচ্চতাপটিসংযুত্তং ধম্মিং কথং কথেত্ৰা তস্স পস্সন্তস্সেৰ আকাসেন অগমাসি. সো পুব্বে গহিতং নিচ্চগ্গাহং পহায অনিচ্চসঞ্ঞং হদযে ঠপেত্ৰা, কালঙ্কত্ৰা, দেৰলোকে উপ্পজিত্ৰা, অপরাপরং দেৰমনুস্সেসু সংসরন্তো, ইমস্মিং বুদ্ধুপ্পাদে রাজগহে সোপাকযোনিযং নিব্বত্তি. সো জাতিআগতেন সোপাকোতি নামেন পঞ্ঞাযি. কেচি পন ‘‘ৰাণিজকুলে নিব্বত্তো, ‘সোপাকো’তি পন নামমত্ত’’ন্তি ৰদন্তি. তং অপদানপাল়িযা ৰিরুজ্ঝতি ‘‘পচ্ছিমে ভৰে সম্পত্তে, সোপাকযোনুপাগমি’’ন্তি ৰচনতো.

তস্স চতুমাসজাতস্স পিতা কালমকাসি, চূল়পিতা পোসেসি. অনুক্কমেন সত্তৰস্সিকো জাতো. একদিৰসং চূল়পিতা ‘‘অত্তনো পুত্তেন কলহং করোতী’’তি কুজ্ঝিত্ৰা, তং সুসানং নেত্ৰা, দ্ৰে হত্থে রজ্জুযা একতো বন্ধিত্ৰা, তায এৰ রজ্জুযা মতমনুস্সস্স সরীরে গাল়্হং বন্ধিত্ৰা গতো ‘‘সিঙ্গালাদযো খাদন্তূ’’তি. পচ্ছিমভৰিকতায দারকস্স পুঞ্ঞফলেন সযং মারেতুং ন ৰিসহি, সিঙ্গালাদযোপি ন অভিভৰিংসু. দারকো অড্ঢরত্তসমযে এৰং ৰিপ্পলপতি –

‘‘কা গতি মে অগতিস্স, কো ৰা বন্ধু অবন্ধুনো;

সুসানমজ্ঝে বন্ধস্স, কো মে অভযদাযকো’’তি.

সত্থা তায ৰেলায ৰেনেয্যবন্ধৰে ওলোকেন্তো দারকস্স হদযব্ভন্তরে পজ্জলন্তং অরহত্তূপনিস্সযং দিস্ৰা ওভাসং ফরিত্ৰা সতিং জনেত্ৰা এৰমাহ –

‘‘এহি ¶ সোপাক মা ভাযি, ওলোকস্সু তথাগতং;

অহং তং তারযিস্সামি, রাহুমুখেৰ চন্দিম’’ন্তি.

দারকো বুদ্ধানুভাৰেন ছিন্নবন্ধনো গাথাপরিযোসানে সোতাপন্নো হুত্ৰা গন্ধকুটিসম্মুখে অট্ঠাসি. তস্স মাতা পুত্তং অপস্সন্তী চূল়পিতরং পুচ্ছিত্ৰা তেনস্স পৰত্তিযা অকথিতায তত্থ তত্থ ¶ গন্ত্ৰা ৰিচিনন্তী ¶ ‘‘বুদ্ধা কির অতীতানাগতপচ্চুপ্পন্নং জানন্তি, যংনূনাহং ভগৰন্তং উপসঙ্কমিত্ৰা মম পুত্তস্স পৰত্তিং জানেয্য’’ন্তি সত্থু সন্তিকং অগমাসি. সত্থা, ইদ্ধিযা তং পটিচ্ছাদেত্ৰা, ‘‘ভন্তে, মম পুত্তং ন পস্সামি, অপিচ ভগৰা তস্স পৰত্তিং জানাতী’’তি তায পুট্ঠো –

‘‘ন সন্তি পুত্তা তাণায, ন পিতা নাপি বন্ধৰা;

অন্তকেনাধিপন্নস্স, নত্থি ঞাতীসু তাণতা’’তি. (ধ. প. ২৮৮) –

ধম্মং কথেসি. তং সুত্ৰা সা সোতাপন্না অহোসি. দারকো অরহত্তং পাপুণি. তেন ৰুত্তং অপদানে (অপ. থের ১.২.১১২-১২৩) –

‘‘পব্ভারং সোধযন্তস্স, ৰিপিনে পব্বতুত্তমে;

সিদ্ধত্থো নাম ভগৰা, আগচ্ছি মম সন্তিকং.

‘‘বুদ্ধং উপগতং দিস্ৰা, লোকজেট্ঠস্স তাদিনো;

সন্থরং সন্থরিত্ৰান, পুপ্ফাসনমদাসহং.

‘‘পুপ্ফাসনে নিসীদিত্ৰা, সিদ্ধত্থো লোকনাযকো;

মমঞ্চ গতিমঞ্ঞায, অনিচ্চতমুদাহরি.

‘‘অনিচ্চা ৰত সঙ্খারা, উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখো.

‘‘ইদং ৰত্ৰান সব্বঞ্ঞূ, লোকজেট্ঠো নরাসভো;

নভং অব্ভুগ্গমী ৰীরো, হংসরাজাৰ অম্বরে.

‘‘সকং দিট্ঠিং জহিত্ৰান, ভাৰযানিচ্চসঞ্ঞহং;

একাহং ভাৰযিত্ৰান, তত্থ কালং কতো অহং.

‘‘দ্ৰে সম্পত্তী অনুভোত্ৰা, সুক্কমূলেন চোদিতো;

পচ্ছিমে ভৰে সম্পত্তে, সপাকযোনুপাগমিং.

‘‘অগারা অভিনিক্খম্ম, পব্বজিং অনগারিযং;

জাতিযা সত্তৰস্সোহং, অরহত্তমপাপুণিং.

‘‘আরদ্ধৰীরিযো ¶ পহিতত্তো, সীলেসু সুসমাহিতো;

তোসেত্ৰান মহানাগং, অলত্থং উপসম্পদং.

‘‘চতুন্নৰুতিতো ¶ কপ্পে, যং কম্মমকরিং তদা;

দুগ্গতিং নাভিজানামি, পুপ্ফদানস্সিদং ফলং.

‘‘চতুন্নৰুতিতো কপ্পে, যং সঞ্ঞং ভাৰযিং তদা;

তং সঞ্ঞং ভাৰযন্তস্স, পত্তো মে আসৰক্খযো.

‘‘পটিসম্ভিদা চতস্সো…পে… কতং বুদ্ধস্স সাসন’’ন্তি.

অথ ভগৰা ইদ্ধিং পটিসংহরি. সাপি পুত্তং দিস্ৰা হট্ঠতুট্ঠো তস্স খীণাসৰভাৰং সুত্ৰা পব্বাজেত্ৰা গতা. সো সত্থারং গন্ধকুটিচ্ছাযাযং চঙ্কমন্তং উপসঙ্কমিত্ৰা, ৰন্দিত্ৰা অনুচঙ্কমি. তস্স ভগৰা উপসম্পদং অনুজানিতুকামো ‘‘একং নাম কি’’ন্তিআদিনা দস পঞ্হে পুচ্ছি. সোপি সত্থু অধিপ্পাযং গণ্হন্তো সব্বঞ্ঞুতঞ্ঞাণেন সংসন্দেন্তো ‘‘সব্বে সত্তা আহারট্ঠিতিকা’’তিআদিনা (খু. পা. ৪.১) তে পঞ্হে ৰিস্সজ্জেসি. তেনেৰ তে কুমারপঞ্হা নাম জাতা. সত্থা তস্স পঞ্হব্যাকরণেন আরাধিতচিত্তো উপসম্পদং অনুজানি. তেন সা পঞ্হব্যাকরণূপসম্পদা নাম জাতা. তস্সিমং অত্তনো পৰত্তিং পকাসেত্ৰা থেরো অঞ্ঞং ব্যাকরোন্তো –

৪৮০.

‘‘দিস্ৰা পাসাদছাযাযং, চঙ্কমন্তং নরুত্তমং;

তত্থ নং উপসঙ্কম্ম, ৰন্দিস্সং পুরিসুত্তমং.

৪৮১.

‘‘একংসং চীৰরং কত্ৰা, সংহরিত্ৰান পাণযো;

অনুচঙ্কমিস্সং ৰিরজং, সব্বসত্তানমুত্তমং.

৪৮২.

‘‘ততো পঞ্হে অপুচ্ছি মং, পঞ্হানং কোৰিদো ৰিদূ;

অচ্ছম্ভী চ অভীতো চ, ব্যাকাসিং সত্থুনো অহং.

৪৮৩.

‘‘ৰিস্সজ্জিতেসু পঞ্হেসু, অনুমোদি তথাগতো;

ভিক্খুসঙ্ঘং ৰিলোকেত্ৰা, ইমমত্থং অভাসথ.

৪৮৪.

‘‘‘লাভা অঙ্গানং মগধানং, যেসাযং পরিভুঞ্জতি;

চীৰরং পিণ্ডপাতঞ্চ, পচ্চযং সযনাসনং;

পচ্চুট্ঠানঞ্চ সামীচিং, তেসং লাভা’তি চাব্রৰি.

৪৮৫.

‘‘‘অজ্জদগ্গে ¶ মং সোপাক, দস্সনাযোপসঙ্কম;

এসা চেৰ তে সোপাক, ভৰতু উপসম্পদা’’’.

৪৮৬.

‘‘জাতিযা সত্তৰস্সেন, লদ্ধান উপসম্পদং;

ধারেমি অন্তিমং দেহং, অহো ধম্মসুধম্মতা’’তি. – ইমা গাথা অভাসি;

তত্থ ¶ ¶ পাসাদছাযাযন্তি গন্ধকুটিচ্ছাযাযং. ৰন্দিস্সন্তি, অভিৰন্দিং.

সংহরিত্ৰান পাণযোতি উভো হত্থে কমলমকুল়াকারেন সঙ্গতে কত্ৰা, অঞ্জলিং পগ্গহেত্ৰাতি অত্থো. অনুচঙ্কমিস্সন্তি চঙ্কমন্তস্স সত্থুনো অনুপচ্ছতো অনুগমনৰসেন চঙ্কমিং. ৰিরজন্তি ৰিগতরাগাদিরজং.

পঞ্হেতি কুমারপঞ্হে. ৰিদূতি ৰেদিতব্বং ৰিদিতৰা, সব্বঞ্ঞূতি অত্থো. ‘‘সত্থা মং পুচ্ছতী’’তি উপ্পজ্জনকস্স ছম্ভিতত্তস্স ভযস্স চ সেতুঘাতেন পহীনত্তা অচ্ছম্ভী চ অভীতো চ ব্যাকাসি.

যেসাযন্তি যেসং অঙ্গমগধানং অযং সোপাকো. পচ্চযন্তি গিলানপচ্চযং. সামীচিন্তি মগ্গদানবীজনাদিসামীচিকিরিযং.

অজ্জদগ্গেতি দ-কারো পদসন্ধিকরো, অজ্জ অগ্গে আদিং কত্ৰা, অজ্জ পট্ঠায. ‘‘অজ্জতগ্গে’’তিপি পাল়ি, অজ্জতং আদিং কত্ৰাতি অত্থো. দস্সনাযোপসঙ্কমাতি ‘‘হীনজচ্চো, ৰযসা তরুণতরো’’তি ৰা অচিন্তেত্ৰা দস্সনায মং উপসঙ্কম. এসা চেৰাতি যা তস্স মম সব্বঞ্ঞুতঞ্ঞাণেন সদ্ধিং সংসন্দেত্ৰা কতা পঞ্হৰিস্সজ্জনা. এসাযেৰ তে ভৰতু উপসম্পদা ইতি চ অব্রৰীতি যোজনা. ‘‘লদ্ধা মে উপসম্পদা’’তিপি পাল়ি. যে পন ‘‘লদ্ধান উপসম্পদ’’ন্তিপি পঠন্তি, তেসং সত্তৰস্সেনাতি সত্তমেন ৰস্সেনাতি অত্থো, সত্তৰস্সেন ৰা হুত্ৰাতি ৰচনসেসো. যং পনেত্থ অৰুত্তং, তং সুৰিঞ্ঞেয্যমেৰ.

সোপাকত্থেরগাথাৰণ্ণনা নিট্ঠিতা.

৫. সরভঙ্গত্থেরগাথাৰণ্ণনা

সরে ¶ হত্থেহীতিআদিকা আযস্মতো সরভঙ্গত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে রাজগহে অঞ্ঞতরস্স ব্রাহ্মণস্স পুত্তো হুত্ৰা নিব্বত্তি, অনভিলক্খিতোতিস্স কুলৰংসাগতং নামং অহোসি. সো ৰযপ্পত্তো কামে পহায তাপসপব্বজ্জং পব্বজিত্ৰা সরতিণানি ¶ সযমেৰ ভঞ্জিত্ৰা পণ্ণসালং কত্ৰা ৰসতি. ততো পট্ঠায সরভঙ্গোতিস্স সমঞ্ঞা অহোসি. অথ ভগৰা বুদ্ধচক্খুনা লোকং ৰোলোকেন্তো তস্স অরহত্তূপনিস্সযং দিস্ৰা, তত্থ গন্ত্ৰা, ধম্মং দেসেসি. সো পটিলদ্ধসদ্ধো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পত্ৰা তত্থেৰ ৰসতি. অথস্স তাপসকালে কতা পণ্ণসালা জিণ্ণা পলুগ্গা অহোসি. তং দিস্ৰা ¶ মনুস্সা ‘‘কিস্স, ভন্তে, ইমং কুটিকং ন পটিসঙ্খরোথা’’তি আহংসু. থেরো ‘‘কুটিকা যথা তাপসকালে কতা, ইদানি তথা কাতুং ন সক্কা’’তি তং সব্বং পকাসেন্তো –

৪৮৭.

‘‘সরে হত্থেহি ভঞ্জিত্ৰা, কত্ৰান কুটিমচ্ছিসং;

তেন মে সরভঙ্গোতি, নামং সম্মুতিযা অহু.

৪৮৮.

‘‘ন ময্হং কপ্পতে অজ্জ, সরে হত্থেহি ভঞ্জিতুং;

সিক্খাপদা নো পঞ্ঞত্তা, গোতমেন যসস্সিনা’’তি. – দ্ৰে গাথা অভাসি;

তত্থ সরে হত্থেহি ভঞ্জিত্ৰাতি, পুব্বে তাপসকালে সরতিণানি মম হত্থেহি ছিন্দিত্ৰা তিণকুটিং কত্ৰা অচ্ছিসং ৰসিং, নিসীদিঞ্চেৰ নিপজ্জিঞ্চ. তেনাতি কুটিকরণত্থং সরানং ভঞ্জনেন. সম্মুতিযাতি অন্ৰত্থসম্মুতিযা সরভঙ্গোতি, নামং অহু অহোসি.

ন ময্হং কপ্পতে অজ্জাতি অজ্জ ইদানি উপসম্পন্নস্স ময্হং সরে সরতিণে হত্থেহি ভঞ্জিতুং ন কপ্পতে ন ৰট্টতি. কস্মা? সিক্খাপদা নো পঞ্ঞত্তা, গোতমেন যসস্সিনাতি. তেন যং অম্হাকং সত্থারা সিক্খাপদং পঞ্ঞত্তং, তং মযং জীৰিতহেতুনাপি নাতিক্কমামাতি দস্সেতি.

এৰং ¶ একেন পকারেন তিণকুটিকায অপটিসঙ্খরণে কারণং দস্সেত্ৰা ইদানি অপরেনপি পরিযাযেন নং দস্সেন্তো –

৪৮৯.

‘‘সকলং সমত্তং রোগং, সরভঙ্গো নাদ্দসং পুব্বে;

সোযং রোগো দিট্ঠো, ৰচনকরেনাতিদেৰস্সা’’তি. – ইমং গাথমাহ;

তত্থ সকলন্তি সব্বং. সমত্তন্তি সম্পুণ্ণং, সব্বভাগতো অনৰসেসন্তি অত্থো. রোগন্তি দুক্খদুক্খতাদিৰসেন রুজনট্ঠেন রোগভূতং উপাদানক্খন্ধপঞ্চকং সন্ধায ৰদতি. নাদ্দসং পুব্বেতি ¶ সত্থু ওৰাদপটিলাভতো পুব্বে ন অদ্দক্খিং. সোযং রোগো দিট্ঠো, ৰচনকরেনাতিদেৰস্সাতি সম্মুতিদেৰা উপপত্তিদেৰা ৰিসুদ্ধিদেৰাতি সব্বেপি দেৰে অত্তনো সীলাদিগুণেহি অতিক্কমিত্ৰা ঠিতত্তা অতিদেৰস্স সম্মাসম্বুদ্ধস্স ওৰাদপটিকরেন সরভঙ্গেন সো অযং খন্ধপঞ্চকসঙ্খাতো রোগো ৰিপস্সনাপঞ্ঞাসহিতায মগ্গপঞ্ঞায পঞ্চক্খন্ধতো দিট্ঠো, পরিঞ্ঞাতোতি অত্থো. এতেন এৰং অত্তভাৰকুটিকাযম্পি অনপেক্খো বাহিরং তিণকুটিকং কথং পটিসঙ্খরিস্সতীতি দস্সেতি.

ইদানি যং মগ্গং পটিপজ্জন্তেন মযা অযং অত্তভাৰরোগো যাথাৰতো দিট্ঠো, স্ৰাযং মগ্গো সব্ববুদ্ধসাধারণো. যেন নেসং ওৰাদধম্মোপি মজ্ঝে ভিন্নসুৰণ্ণসদিসো যত্থাহং পতিট্ঠায দুক্খক্খযং পত্তোতি ¶ এৰং অত্তনো অরহত্তপটিপত্তিং ব্যাকরোন্তো –

৪৯০.

‘‘যেনেৰ মগ্গেন গতো ৰিপস্সী, যেনেৰ মগ্গেন সিখী চ ৰেস্সভূ;

ককুসন্ধকোণাগমনো চ কস্সপো, তেনঞ্জসেন অগমাসি গোতমো.

৪৯১.

‘‘ৰীততণ্হা অনাদানা, সত্ত বুদ্ধা খযোগধা;

যেহাযং দেসিতো ধম্মো, ধম্মভূতেহি তাদিভি.

৪৯২.

‘‘চত্তারি অরিযসচ্চানি, অনুকম্পায পাণিনং;

দুক্খং সমুদযো মগ্গো, নিরোধো দুক্খসঙ্খযো.

৪৯৩.

‘‘যস্মিং ¶ নিৰত্ততে দুক্খং, সংসারস্মিং অনন্তকং;

ভেদা ইমস্স কাযস্স, জীৰিতস্স চ সঙ্খযা;

অঞ্ঞো পুনব্ভৰো নত্থি, সুৰিমুত্তোম্হি সব্বধী’’তি. –

ইমা গাথা অভাসি –

তত্থ যেনেৰ মগ্গেনাতি যেনেৰ সপুব্বভাগেন অরিযেন অট্ঠঙ্গিকেন মগ্গেন. গতোতি পটিপন্নো নিব্বানং অধিগতো. ৰিপস্সীতি ৰিপস্সী সম্মাসম্বুদ্ধো. ককুসন্ধাতি অৰিভত্তিকো নিদ্দেসো. ‘‘ককুসন্ধকোণাগমনা’’তিপি পাঠো. তেনঞ্জসেনাতি তেনেৰ অঞ্জসেন অরিযমগ্গেন.

অনাদানাতি অনুপাদানা অপ্পটিসন্ধিকা ৰা. খযোগধাতি নিব্বানোগধা নিব্বানপতিট্ঠা. যেহাযং দেসিতো ধম্মোতি যেহি সত্তহি সম্মাসম্বুদ্ধেহি অযং সাসনধম্মো দেসিতো পৰেদিতো. ধম্মভূতেহীতি ধম্মকাযতায ধম্মসভাৰেহি, নৰলোকুত্তরধম্মতো ৰা ভূতেহি জাতেহি, ধম্মং ৰা পত্তেহি. তাদিভীতি, ইট্ঠাদীসু তাদিভাৰপ্পত্তেহি.

‘‘চত্তারি ¶ অরিযসচ্চানী’’তিআদিনা তেহি দেসিতং ধম্মং দস্সেতি. তত্থ চত্তারীতি গণনপরিচ্ছেদো. অরিযসচ্চানীতি পরিচ্ছিন্নধম্মদস্সনং. ৰচনত্থতো পন অরিযানি চ অৰিতথট্ঠেন সচ্চানি চাতি অরিযসচ্চানি, অরিযস্স ৰা ভগৰতো সচ্চানি তেন দেসিতত্তা, অরিযভাৰকরানি ৰা সচ্চানীতি অরিযসচ্চানি. কুচ্ছিতভাৰতো তুচ্ছভাৰতো চ দুক্খং, উপাদানক্খন্ধপঞ্চকং. তং দুক্খং সমুদেতি এতস্মাতি সমুদযো, তণ্হা. কিলেসে মারেন্তো গচ্ছতি, নিব্বানত্থিকেহি মগ্গীযতীতি ৰা মগ্গো, সম্মাদিট্ঠিআদযো অট্ঠ ধম্মা. সংসারচারকসঙ্খাতো নত্থি এত্থ রোধো, এতস্মিং ৰা অধিগতে পুগ্গলস্স রোধাভাৰো হোতি, নিরুজ্ঝতি দুক্খমেত্থাতি ৰা নিরোধো, নিব্বানং. তেনাহ ‘‘দুক্খসঙ্খযো’’তি. অযমেত্থ ¶ সঙ্খেপো, ৰিত্থারো পন ৰিসুদ্ধিমগ্গে ৰুত্তনযেনেৰ ৰেদিতব্বো.

যস্মিন্তি যস্মিং নিরোধে নিব্বানে অধিগতে. নিৰত্ততেতি অরিযমগ্গভাৰনায সতি অনন্তকং অপরিযন্তং ইমস্মিং সংসারে জাতিআদিদুক্খং ন পৰত্ততি উচ্ছিজ্জতি, সো নিরোধোতি অযং ধম্মভূতেহি সম্মাসম্বুদ্ধেহি দেসিতো ¶ ধম্মোতি যোজনা. ‘‘ভেদা’’তিআদিনা ‘‘রোগো দিট্ঠো’’তি দুক্খপরিঞ্ঞায সূচিতং অত্তনো অরহত্তপ্পত্তিং সরূপতো দস্সেতি. ‘‘যস্মিং নিব্বত্ততে দুক্খ’’ন্তি পন পাঠে সকলগাথায তত্থাযং যোজনা – যস্মিং খন্ধাদিপটিপাটিসঞ্ঞিতে সংসারে ইদং অনন্তকং জাতিআদিদুক্খং নিব্বত্তং, সো ইতো দুক্খপ্পত্তিতো অঞ্ঞো পুনপ্পুনং ভৰনভাৰতো পুনব্ভৰো. ইমস্স জীৰিতিন্দ্রিযস্স সঙ্খযা কাযসঙ্খাতস্স খন্ধপঞ্চকস্স ভেদা ৰিনাসা উদ্ধং নত্থি, তস্মা সব্বধি সব্বেহি কিলেসেহি সব্বেহি ভৰেহি সুট্ঠু ৰিমুত্তো ৰিসংযুত্তো অম্হীতি.

সরভঙ্গত্থেরগাথাৰণ্ণনা নিট্ঠিতা.

সত্তকনিপাতৰণ্ণনা নিট্ঠিতা.

৮. অট্ঠকনিপাতো

১. মহাকচ্চাযনত্থেরগাথাৰণ্ণনা

অট্ঠকনিপাতে ¶ ¶ কম্মং বহুকন্তিআদিকা আযস্মতো মহাকচ্চাযনত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো পদুমুত্তরস্স ভগৰতো কালে গহপতিমহাসালকুলে নিব্বত্তিত্ৰা ৰুদ্ধিপ্পত্তো, একদিৰসং সত্থু সন্তিকে ধম্মং সুণন্তো সত্থারা সংখিত্তেন ভাসিতস্স ৰিত্থারেন অত্থং ৰিভজন্তানং অগ্গট্ঠানে ঠপিযমানং একং ভিক্খুং দিস্ৰা, সযম্পি তং ঠানং পত্থেন্তো পণিধানং কত্ৰা, দানাদীনি পুঞ্ঞানি কত্ৰা, দেৰমনুস্সেসু সংসরন্তো সুমেধস্স ভগৰতো কালে ৰিজ্জাধরো হুত্ৰা আকাসেন গচ্ছন্তো সত্থারং হিমৰন্তপব্বতে একস্মিং ৰনসণ্ডে নিসিন্নং দিস্ৰা পসন্নমানসো কণিকারপুপ্ফেহি পূজং অকাসি.

সো তেন পুঞ্ঞকম্মেন অপরাপরং সুগতীসুযেৰ পরিৰত্তেন্তো কস্সপদসবলস্স কালে বারাণসিযং কুলঘরে নিব্বত্তিত্ৰা পরিনিব্বুতে ভগৰতি সুৰণ্ণচেতিযকরণট্ঠানে সতসহস্সগ্ঘনিকায সুৰণ্ণিট্ঠকায পূজং কত্ৰা, ‘‘ভগৰা ময্হং নিব্বত্তনিব্বত্তট্ঠানে সরীরং সুৰণ্ণৰণ্ণং হোতূ’’তি পত্থনং অকাসি.

ততো যাৰজীৰং কুসলকম্মং কত্ৰা একং বুদ্ধন্তরং দেৰমনুস্সেসু সংসরিত্ৰা ¶ ইমস্মিং বুদ্ধুপ্পাদে উজ্জেনিযং রঞ্ঞো চণ্ডপজ্জোতস্স পুরোহিতগেহে নিব্বত্তি. তস্স নামগ্গহণদিৰসে মাতা ‘‘ময্হং পুত্তো সুৰণ্ণৰণ্ণো, অত্তনো নামং গহেত্ৰা আগতো’’তি কঞ্চনমাণৰো ত্ৰেৰ নামং অকাসি. সো ৰুড্ঢিমন্ৰায তযো ৰেদে উগ্গহেত্ৰা পিতু অচ্চযেন পুরোহিতট্ঠানং লভি. সো গোত্তৰসেন কচ্চাযনোতি পঞ্ঞাযিত্থ. তং রাজা চণ্ডপজ্জোতো বুদ্ধুপ্পাদং সুত্ৰা, ‘‘আচরিয, ত্ৰং তত্থ গন্ত্ৰা সত্থারং ইধানেহী’’তি পেসেসি. সো অত্তট্ঠমো সত্থু সন্তিকং উপগতো. তস্স সত্থা ধম্মং দেসেতি. দেসনাপরিযোসানে সো সত্তহি জনেহি সদ্ধিং সহ পটিসম্ভিদাহি অরহত্তে পতিট্ঠাসি. তেন ৰুত্তং অপদানে (অপ. থের ২.৫৪.১-২৭) –

‘‘পদুমুত্তরো ¶ ¶ নাম জিনো, অনেজো অজিতং জযো;

সতসহস্সে কপ্পানং, ইতো উপ্পজ্জি নাযকো.

‘‘ৰীরো কমলপত্তক্খো, সসঙ্কৰিমলাননো;

কনকাচলসঙ্কাসো, রৰিদিত্তিসমপ্পভো.

‘‘সত্তনেত্তমনোহারী, ৰরলক্খণভূসিতো;

সব্বৰাক্যপথাতীতো, মনুজামরসক্কতো.

‘‘সম্বুদ্ধো বোধযং সত্তে, ৰাগীসো মধুরস্সরো;

করুণানিবন্ধসন্তানো, পরিসাসু ৰিসারদো.

‘‘দেসেতি মধুরং ধম্মং, চতুসচ্চূপসংহিতং;

নিমুগ্গে মোহপঙ্কম্হি, সমুদ্ধরতি পাণিনে.

‘‘তদা একচরো হুত্ৰা, তাপসো হিমৰালযো;

নভসা মানুসং লোকং, গচ্ছন্তো জিনমদ্দসং.

‘‘উপেচ্চ সন্তিকং তস্স, অস্সোসিং ধম্মদেসনং;

ৰণ্ণযন্তস্স ৰীরস্স, সাৰকস্স মহাগুণং.

‘‘সংখিত্তেন মযা ৰুত্তং, ৰিত্থারেন পকাসযং;

পরিসং মঞ্চ তোসেতি, যথা কচ্চাযনো অযং.

‘‘নাহং এৰমিধেকচ্চং, অঞ্ঞং পস্সামি সাৰকং;

তস্মাতদগ্গে এসগ্গো, এৰং ধারেথ ভিক্খৰো.

‘‘তদাহং ৰিম্হিতো হুত্ৰা, সুত্ৰা ৰাক্যং মনোরমং;

হিমৰন্তং গমিত্ৰান, আহিত্ৰা পুপ্ফসঞ্চযং.

‘‘পূজেত্ৰা লোকসরণং, তং ঠানমভিপত্থযিং;

তদা মমাসযং ঞত্ৰা, ব্যাকাসি স রণঞ্জহো.

‘‘পস্সথেতং ইসিৰরং, নিদ্ধন্তকনকত্তচং;

উদ্ধগ্গলোমং পীণংসং, অচলং পঞ্জলিং ঠিতং.

‘‘হাসং সুপুণ্ণনযনং, বুদ্ধৰণ্ণগতাসযং;

ধম্মজং উগ্গহদযং, অমতাসিত্তসন্নিভং.

‘‘কচ্চানস্স ¶ গুণং সুত্ৰা, তং ঠানং পত্থযং ঠিতো;

অনাগতম্হি অদ্ধানে, গোতমস্স মহামুনে.

‘‘তস্স ধম্মেসু দাযাদো, ওরসো ধম্মনিম্মিতো;

কচ্চানো নাম নামেন, হেস্সতি সত্থু সাৰকো.

‘‘বহুস্সুতো মহাঞাণী, অধিপ্পাযৰিদূ মুনে;

পাপুণিস্সতি তং ঠানং, যথাযং ব্যাকতো মযা.

‘‘সতসহস্সিতো ¶ কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

‘‘দুৰে ভৰে সংসরামি, দেৰত্তে অথ মানুসে;

অঞ্ঞং গতিং ন গচ্ছামি, বুদ্ধপূজাযিদং ফলং.

‘‘দুৰে কুলে পজাযামি, খত্তিযে অথ ব্রাহ্মণে;

নীচে কুলে ন জাযামি, বুদ্ধপূজাযিদং ফলং.

‘‘পচ্ছিমে চ ভৰে দানি, জাতো উজ্জেনিযং পুরে;

পজ্জোতস্স চ চণ্ডস্স, পুরোহিতদিজাধিনো.

‘‘পুত্তো তিরিটিৰচ্ছস্স, নিপুণো ৰেদপারগূ;

মাতা চ চন্দিমা নাম, কচ্চানোহং ৰরত্তচো.

‘‘ৰীমংসনত্থং বুদ্ধস্স, ভূমিপালেন পেসিতো;

দিস্ৰা মোক্খপুরদ্ৰারং, নাযকং গুণসঞ্চযং.

‘‘সুত্ৰা চ ৰিমলং ৰাক্যং, গতিপঙ্কৰিসোসনং;

পাপুণিং অমতং সন্তং, সেসেহি সহ সত্তহি.

‘‘অধিপ্পাযৰিদূ জাতো, সুগতস্স মহামতে.

ঠপিতো এতদগ্গে চ, সুসমিদ্ধমনোরথো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অথ সত্থা ‘‘এথ, ভিক্খৰো’’তি হত্থং পসারেসি. তে তাৰদেৰ দ্ৰঙ্গুলমত্তকেসমস্সুকা ইদ্ধিমযপত্তচীৰরধরা ৰস্সসট্ঠিকত্থেরা ৰিয অহেসুং. এৰং থেরো সদত্থং নিপ্ফাদেত্ৰা, ‘‘ভন্তে, রাজা পজ্জোতো তুম্হাকং ¶ পাদে ৰন্দিতুং ধম্মঞ্চ সোতুং ইচ্ছতী’’তি সত্থু আরোচেসি. সত্থা, ‘‘ত্ৰংযেৰ, ভিক্খু, তত্থ গচ্ছ, তযি গতেপি রাজা পসীদিস্সতী’’তি আহ. থেরো সত্থু আণায অত্তট্ঠমো তত্থ গন্ত্ৰা রাজানং পসাদেত্ৰা অৰন্তীসু সাসনং পতিট্ঠাপেত্ৰা পুন সত্থু সন্তিকমেৰ গতো. সো একদিৰসং সম্বহুলে ভিক্খূ সমণধম্মং পহায কম্মারামে সঙ্গণিকারামে রসতণ্হানুগতে চ পমাদৰিহারিনো দিস্ৰা তেসং ওৰাদৰসেন –

৪৯৪.

‘‘কম্মং বহুকং ন কারযে, পরিৰজ্জেয্য জনং ন উয্যমে;

সো উস্সুক্কো রসানুগিদ্ধো, অত্থং রিঞ্চতি যো সুখাধিৰাহো.

৪৯৫.

‘‘পঙ্কোতি হি নং অৰেদযুং, যাযং ৰন্দনপূজনা কুলেসু;

সুখুমং সল্লং দুরুব্বহং, সক্কারো কাপুরিসেন দুজ্জহো’’তি. –

দ্ৰে গাথা অভাসি.

তত্থ ¶ ¶ কম্মং বহুকং ন কারযেতি নৰাৰাসকারাপনাদিং সমণধম্মকরণস্স পরিবন্ধভূতং মহন্তং নৰকম্মং ন পট্ঠপেয্য, খুদ্দকং অপ্পসমারম্ভং খণ্ডফুল্লপটিসঙ্খরণাদিং সত্থু ৰচনপটিপূজনত্থং কাতব্বমেৰ. পরিৰজ্জেয্য জনন্তি গণসঙ্গণিকৰসেন জনং ৰিৰজ্জেয্য. জনন্তি ৰা যাদিসং সংসেৰতো ভজতো পযিরুপাসতো কুসলা ধম্মা পরিহাযন্তি, অকুসলা ধম্মা অভিৰড্ঢন্তি, তাদিসং অকল্যাণমিত্তভূতং জনং পরিৰজ্জেয্য. ন উয্যমেতি, পচ্চযুপ্পাদনত্থং কুলসঙ্গণ্হনৰসেন ন ৰাযমেয্য, যস্মা সো উস্সুক্কো রসানুগিদ্ধো, অত্থং রিঞ্চতি যো সুখাধিৰাহোতি যো রসানুগিদ্ধো রসতণ্হাৰসিকো ভিক্খু পচ্চযুপ্পাদনপসুতো, সো কুলসঙ্গণ্হনত্থং উস্সুক্কো, তেসু সুখিতেসু সুখিতো, দুক্খিতেসু দুক্খিতো, উপ্পন্নেসু কিচ্চকরণীযেসু অত্তনা যোগং আপজ্জতি, যো সুখাধিৰাহো সমথৰিপস্সনামগ্গফলনিব্বানসুখাৰহো সীলাদিঅত্থো, তং রিঞ্চতি পজহতি একংসেন অত্তানং ততো ৰিৰেচেতীতি অত্থো.

এৰং পঠমগাথায ‘‘কম্মারামতং সঙ্গণিকারামতং পচ্চযগেধঞ্চ ৰজ্জেথা’’তি ওৰদিত্ৰা ইদানি সক্কারাভিলাসং গরহন্তো দুতিযং গাথমাহ. তস্সত্থো – যা অযং ভিক্খায উপগতানং পব্বজিতানং কুলেসু গেহৰাসীহি গুণসম্ভাৰনায করীযমানা ৰন্দনা পূজনা চ, যস্মা তং ¶ অভাৰিতত্তানং ওসীদাপনট্ঠেন মলিনভাৰকরণট্ঠেন চ পঙ্কো কদ্দমোতি বুদ্ধাদযো অরিযা পৰেদযুং অব্ভঞ্ঞংসু পৰেদেসুং ৰা, যস্মা চ অপরিঞ্ঞাতক্খন্ধানং অন্ধপুথুজ্জনানং সক্কারাভিলাসং দুৰিঞ্ঞেয্যসভাৰতায পীল়াজননতো অন্তো তুদনতো দুরুদ্ধরণতো চ সুখুমং সল্লং দুরুব্বহং পৰেদযুং, ততো এৰ সক্কারো কাপুরিসেন দুজ্জহো দুপ্পজহেয্যো তস্স পহানপটিপত্তিযা অপ্পটিপজ্জনতো. সক্কারাভিলাসপ্পহানেন হি সক্কারো পহীনো হোতি, তস্মা তস্স পহানায আযোগো করণীযোতি দস্সেতি –

৪৯৬.

‘‘ন পরস্সুপনিধায, কম্মং মচ্চস্স পাপকং;

অত্তনা তং ন সেৰেয্য, কম্মবন্ধূ হি মাতিযা.

৪৯৭.

‘‘ন পরে ৰচনা চোরো, ন পরে ৰচনা মুনি;

অত্তা চ নং যথা ৰেদি, দেৰাপি নং তথা ৰিদূ.

৪৯৮.

‘‘পরে চ ন ৰিজানন্তি, মযমেত্থ যমামসে;

যে চ তত্থ ৰিজানন্তি, ততো সম্মন্তি মেধগা.

৪৯৯.

‘‘জীৰতে ৰাপি সপ্পঞ্ঞো, অপি ৰিত্তপরিক্খযো;

পঞ্ঞায চ অলাভেন, ৰিত্তৰাপি ন জীৰতি.

৫০০.

‘‘সব্বং ¶ ¶ সুণাতি সোতেন, সব্বং পস্সতি চক্খুনা;

ন চ দিট্ঠং সুতং ধীরো, সব্বং উজ্ঝিতুমরহতি.

৫০১.

‘‘চক্খুমাস্স যথা অন্ধো, সোতৰা বধিরো যথা;

পঞ্ঞৰাস্স যথা মূগো, বলৰা দুব্বলোরিৰ;

অথ অত্থে সমুপ্পন্নে, সযেথ মতসাযিক’’ন্তি. –

ইমা ছ গাথা রঞ্ঞো পজ্জোতস্স ওৰাদৰসেন অভাসি. সো কির ব্রাহ্মণে সদ্দহিত্ৰা পসুঘাতযঞ্ঞং কারেতি, কম্মং অসোধেত্ৰাৰ অচোরে চোরসঞ্ঞায দণ্ডেসি, অট্টকরণে চ অস্সামিকে সামিকে করোতি, সামিকে চ অস্সামিকে. ততো নং থেরো ৰিৰেচেতুং ‘‘ন পরস্সা’’তিআদিনা ছ গাথা অভাসি.

তত্থ ¶ ন পরস্সুপনিধায, কম্মং মচ্চস্স পাপকন্তি পরস্স মচ্চস্স সত্তস্স উপনিধায উদ্দিস্স কারণং কত্ৰা পাপকং ৰধবন্ধাদিকম্মং ন সেৰেয্য, পরেন ন কারাপেয্যাতি অত্থো. অত্তনা তং ন সেৰেয্যাতি অত্তনাপি তং পাপকং ন করেয্য. কস্মা? কম্মবন্ধূ হি মাতিযা ইমে মাতিযা মচ্চা কম্মদাযাদা, তস্মা অত্তনা চ কিঞ্চি পাপকম্মং ন করেয্য, পরেনপি ন কারাপেয্যাতি অত্থো.

ন পরে ৰচনা চোরোতি অত্তনা চোরিযং অকত্ৰা পরৰচনা পরস্স ৰচনমত্তেন চোরো নাম ন হোতি, তথা ন পরে ৰচনা মুনি পরস্স ৰচনমত্তেন মুনি সুৰিসুদ্ধকাযৰচীমনোসমাচারো ন হোতি. এত্থ হি পরেতি ৰিভত্তিঅলোপং কত্ৰা নিদ্দেসো. কেচি পন ‘‘পরেসন্তি ৰত্তব্বে পরেতি সং-কারলোপং কত্ৰা নিদ্দিট্ঠ’’ন্তি ৰদন্তি. অত্তা চ নং যথা ৰেদীতি নং সত্তং তস্স অত্তা চিত্তং যথা ‘‘অহং পরিসুদ্ধো, অপরিসুদ্ধো ৰা’’তি যাথাৰতো অৰেদি জানাতি. দেৰাপি নং তথা ৰিদূতি ৰিসুদ্ধিদেৰা, উপপত্তিদেৰা চ তথা ৰিদূ ৰিদন্তি জানন্তি, তস্মা সযং তাদিসা দেৰা চ পমাণং সুদ্ধাসুদ্ধানং সুদ্ধাসুদ্ধভাৰজাননে, ন যে কেচি ইচ্ছাদোসপরেতা সত্তাতি অধিপ্পাযো.

পরেতি পণ্ডিতে ঠপেত্ৰা ততো অঞ্ঞে, কুসলাকুসলসাৰজ্জানৰজ্জং কম্মং কম্মফলং কাযস্স অসুভতং সঙ্খারানং অনিচ্চতং অজানন্তা ইধ পরে নাম. তে মযমেত্থ ইমস্মিং জীৰলোকে যমাম উপরমাম, ‘‘সততং সমিতং মচ্চু সন্তিকং গচ্ছামা’’তি ন জানন্তি. যে চ তত্থ ৰিজানন্তীতি যে চ তত্থ পণ্ডিতা ‘‘মযং মচ্চু সমীপং গচ্ছামা’’তি ৰিজানন্তি. ততো সম্মন্তি মেধগাতি এৰঞ্হি তে জানন্তা মেধগানং পরৰিহিংসনানং ৰূপসমায পটিপজ্জন্তি, অত্তনা ¶ পরে চ অঞ্ঞে ন মেধন্তি ন বাধেন্তীতি অত্থো. ত্ৰং পন জীৰিতনিমিত্তং অচোরে চোরে করোন্তোপি দণ্ডনেন সামিকে অস্সামিকে করোন্তোপি ধনজানিযা বাধসি পঞ্ঞাৰেকল্লতো. তথা ¶ অকরোন্তোপি জীৰতে ৰাপি সপ্পঞ্ঞো, অপি ৰিত্তপরিক্খযো পরিক্খীণধনোপি সপ্পঞ্ঞজাতিকো ইতরীতরসন্তোসেন সন্তুট্ঠো অনৰজ্জায জীৰিকায জীৰতিযেৰ. তস্স হি জীৰিতং নাম. তেনাহ ভগৰা – ‘‘পঞ্ঞাজীৰিং জীৰিতমাহু সেট্ঠ’’ন্তি (সং. নি. ১.৭৩, ২৪৬; সু. নি. ১৮৪). দুম্মেধপুগ্গলো পন পঞ্ঞায ¶ চ অলাভেন দিট্ঠধম্মিকং সম্পরাযিকঞ্চ অত্থং ৰিরাধেন্তো ৰিত্তৰাপি ন জীৰতি গরহাদিপৰত্তিযা জীৰন্তো নাম ন হোতি, অনুপাযঞ্ঞুতায যথাধিগতং ধনং নাসেন্তো জীৰিতম্পি সন্ধারেতুং ন সক্কোতিযেৰ.

ইমা কির চতস্সোপি গাথা থেরো সুপিনন্তেন রঞ্ঞো কথেসি. রাজা সুপিনং দিস্ৰা থেরং নমস্সন্তোযেৰ পবুজ্ঝিত্ৰা পভাতায রত্তিযা থেরং উপসঙ্কমিত্ৰা ৰন্দিত্ৰা অত্তনা দিট্ঠনিযামেন সুপিনং কথেসি. তং সুত্ৰা থেরো তা গাথা পচ্চুনুভাসিত্ৰা ‘‘সব্বং সুণাতী’’তিআদিনা দ্ৰীহি গাথাহি রাজানং ওৰদি. তত্থ সব্বং সুণাতি সোতেনাতি ইধ সোতব্বং সদ্দং আপাথগতং সব্বং সুভাসিতং দুব্ভাসিতঞ্চ অবধিরো সোতেন সুণাতি. তথা সব্বং রূপং সুন্দরং অসুন্দরম্পি চক্খুনা অনন্ধো পস্সতি, অযমিন্দ্রিযানং সভাৰো. তত্থ পন ন চ দিট্ঠং সুতং ধীরো, সব্বং উজ্ঝিতুন্তি চ নিদস্সনমত্তমেতং. যঞ্হি তং দিট্ঠং সুতং ৰা, ন তং সব্বং ধীরো সপ্পঞ্ঞো উজ্ঝিতুং পরিচ্চজিতুং গহেতুং ৰা অরহতি. গুণাগুণং পন তত্থ উপপরিক্খিত্ৰা উজ্ঝিতব্বমেৰ উজ্ঝিতুং গহেতব্বঞ্চ গহেতুং অরহতি, তস্মা চক্খুমাস্স যথা অন্ধো চক্খুমাপি সমানো উজ্ঝিতব্বে দিট্ঠে অন্ধো যথা অস্স অপস্সন্তো ৰিয ভৰেয্য, তথা উজ্ঝিতব্বে সুতে সোতৰাপি বধিরো যথা অস্স অসুণন্তো ৰিয ভৰেয্য. পঞ্ঞৰাস্স যথা মূগোতি ৰিচারণপঞ্ঞায পঞ্ঞৰা ৰচনকুসলোপি অৰত্তব্বে মূগো ৰিয ভৰেয্য. বলৰা থামসম্পন্নোপি অকত্তব্বে দুব্বলোরিৰ, রকারো পদসন্ধিকরো, অসমত্থো ৰিয ভৰেয্য. অথ অত্থে সমুপ্পন্নে, সযেথ মতসাযিকন্তি অত্তনা কাতব্বকিচ্চে উপ্পন্নে উপট্ঠিতে মতসাযিকং সযেথ, মতসাযিকং সযিত্ৰাপি তং কিচ্চং তীরেতব্বমেৰ, ন ৰিরাধেতব্বং. অথ ৰা অথ অত্থে সমুপ্পন্নেতি অত্তনা অকরণীযে অত্থে কিচ্চে উপ্পন্নে উপট্ঠিতে মতসাযিকং সযেথ, মতসাযিকং সযিত্ৰাপি তং ন কাতব্বমেৰ. ন হি পণ্ডিতো অযুত্তং কাতুমরহতীতি এৰং থেরেন ওৰদিতো রাজা অকত্তব্বং পহায কাতব্বেযেৰ যুত্তপ্পযুত্তো অহোসীতি.

মহাকচ্চাযনত্থেরগাথাৰণ্ণনা নিট্ঠিতা.

২. সিরিমিত্তত্থেরগাথাৰণ্ণনা

অক্কোধনোতিআদিকা ¶ ¶ ¶ আযস্মতো সিরিমিত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে রাজগহে মহদ্ধনকুটুম্বিকস্স পুত্তো হুত্ৰা নিব্বত্তি, সিরিমিত্তোতি লদ্ধনামো. তস্স কির মাতা সিরিগুত্তস্স ভগিনী. তস্স ৰত্থু ধম্মপদৰণ্ণনাযং (ধ. প. অট্ঠ. ১.গরহদিন্নৰত্থু) আগতমেৰ. সো সিরিগুত্তস্স ভাগিনেয্যো সিরিমিত্তো ৰযপ্পত্তো সত্থু ধনপালদমনে লদ্ধপ্পসাদো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পত্তো. একদিৰসং পাতিমোক্খং উদ্দিসিতুং আসনং অভিরুহিত্ৰা চিত্তবীজনিং গহেত্ৰা নিসিন্নো ভিক্খূনং ধম্মং কথেসি. কথেন্তো চ উল়ারতরে গুণে ৰিভজিত্ৰা দস্সেন্তো –

৫০২.

‘‘অক্কোধনোনুপনাহী, অমাযো রিত্তপেসুণো;

স ৰে তাদিসকো ভিক্খু, এৰং পেচ্চ ন সোচতি.

৫০৩.

‘‘অক্কোধনোনুপনাহী, অমাযো রিত্তপেসুণো;

গুত্তদ্ৰারো সদা ভিক্খু, এৰং পেচ্চ ন সোচতি.

৫০৪.

‘‘অক্কোধনোনুপনাহী, অমাযো রিত্তপেসুণো;

কল্যাণসীলো সো ভিক্খু, এৰং পেচ্চ ন সোচতি.

৫০৫.

‘‘অক্কোধনোনুপনাহী, অমাযো রিত্তপেসুণো;

কল্যাণমিত্তো সো ভিক্খু, এৰং পেচ্চ ন সোচতি.

৫০৬.

‘‘অক্কোধনোনুপনাহী, অমাযো রিত্তপেসুণো;

কল্যাণপঞ্ঞো সো ভিক্খু, এৰং পেচ্চ ন সোচতি.

৫০৭.

‘‘যস্স সদ্ধা তথাগতে, অচলা সুপ্পতিট্ঠিতা;

সীলঞ্চ যস্স কল্যাণং, অরিযকন্তং পসংসিতং.

৫০৮.

‘‘সঙ্ঘে পসাদো যস্সত্থি, উজুভূতঞ্চ দস্সনং;

অদলিদ্দোতি তং আহু, অমোঘং তস্স জীৰিতং.

৫০৯.

‘‘তস্মা ¶ সদ্ধঞ্চ সীলঞ্চ, পসাদং ধম্মদস্সনং;

অনুযুঞ্জেথ মেধাৰী, সরং বুদ্ধান সাসন’’ন্তি. – ইমা গাথা অভাসি;

তত্থ অক্কোধনোতি অকুজ্ঝনসীলো. উপট্ঠিতে হি কোধুপ্পত্তিনিমিত্তে অধিৰাসনখন্তিযং ঠত্ৰা ¶ কোপস্স অনুপ্পাদকো. অনুপনাহীতি ন উপনাহকো, পরেহি কতং অপরাধং পটিচ্চ ‘‘অক্কোচ্ছি মং অৰধি মং, অজিনি মং অহাসি মে’’তিআদিনা (ধ. প. ৩; মহাৰ. ৪৬৪; ম. নি. ৩.২৩৭) কোধস্স অনুপনয্হনসীলো. সন্তদোসপটিচ্ছাদনলক্খণায মাযায অভাৰতো অমাযো. পিসুণৰাচাৰিরহিততো রিত্তপেসুণো, স ৰে তাদিসকো ভিক্খূতি সো তথারূপো তথাজাতিকো যথাৰুত্তগুণসমন্নাগতো ভিক্খু ¶ . এৰং যথাৰুত্তপটিপত্তিযা পেচ্চ পরলোকে ন সোচতি সোকনিমিত্তস্স অভাৰতো. চক্খুদ্ৰারাদযো কাযদ্ৰারাদযো চ গুত্তা পিহিতা সংৰুতা এতস্সাতি গুত্তদ্ৰারো. কল্যাণসীলোতি সুন্দরসীলো সুৰিসুদ্ধসীলো. কল্যাণমিত্তোতি –

‘‘পিযো গরুভাৰনিযো, ৰত্তা চ ৰচনক্খমো;

গম্ভীরঞ্চ কথং কত্তা, নো চট্ঠানে নিযোজযে’’তি. (অ. নি. ৭.৩৭) –

এৰং ৰিভাৰিতলক্খণো কল্যাণমিত্তো এতস্সাতি কল্যাণমিত্তো. কল্যাণপঞ্ঞোতি সুন্দরপঞ্ঞো. যদিপি পঞ্ঞা নাম অসুন্দরা নত্থি, নিয্যানিকায পন পঞ্ঞায ৰসেন এৰং ৰুত্তং

এৰমেত্থ কোধাদীনং ৰিক্খম্ভনৰসেন সমুচ্ছেদৰসেন চ অক্কোধনাদিমুখেন, পুগ্গলাধিট্ঠানায গাথায সম্মাপটিপত্তিং দস্সেত্ৰা ইদানি নিপ্ফত্তিতলোকুত্তরসদ্ধাদিকে উদ্ধরিত্ৰা পুগ্গলাধিট্ঠানায এৰ গাথায সম্মাপটিপত্তিং দস্সেন্তো ‘‘যস্স সদ্ধা’’তিআদিমাহ. তস্সত্থো – যস্স পুগ্গলস্স তথাগতে সম্মাসম্বুদ্ধে ‘‘ইতিপি সো ভগৰা’’তিআদিনযপ্পৰত্তা মগ্গেনাগতসদ্ধা, ততো এৰ অচলা অৰিকম্পা সুট্ঠু পতিট্ঠিতা. ‘‘অত্থী’’তি, পদং আনেত্ৰা সম্বন্ধিতব্বং. অরিযকন্তন্তি অরিযানং কন্তং পিযাযিতং ভৰন্তরেপি অৰিজহনতো. পসংসিতন্তি বুদ্ধাদীহি পসট্ঠং, ৰণ্ণিতং থোমিতং অত্থীতি যোজনা. তং পনেতং সীলং গহট্ঠসীলং পব্বজিতসীলন্তি ¶ দুৰিধং. তত্থ গহট্ঠসীলং নাম পঞ্চসিক্খাপদসীলং, যং গহট্ঠেন রক্খিতুং সক্কা. পব্বজিতসীলং নাম দসসিক্খাপদসীলং উপাদায সব্বং চতুপারিসুদ্ধিসীলং, তযিদং সব্বম্পি অখণ্ডাদিভাৰেন অপরামট্ঠতায ‘‘কল্যাণ’’ন্তি ৰেদিতব্বং.

সঙ্ঘে পসাদো যস্সত্থীতি ‘‘সুপ্পটিপন্নো ভগৰতো সাৰকসঙ্ঘো’’তিআদিনা অরিযসঙ্ঘে পসাদো সদ্ধা যস্স পুগ্গলস্স অত্থি অচলো সুপ্পতিট্ঠিতোতি আনেত্ৰা যোজেতব্বং. উজুভূতঞ্চ দস্সনন্তি দিট্ঠিৰঙ্কাভাৰতো কিলেসৰঙ্কাভাৰতো চ উজুভূতং. অকুটিলং অজিম্হং কম্মস্সকতাদস্সনঞ্চেৰ সপ্পচ্চযনামরূপদস্সনঞ্চাতি দুৰিধম্পি দস্সনং যস্স অত্থি অচলং সুপ্পতিট্ঠিতন্তি ¶ যোজনা. অদলিদ্দোতি তং আহু সদ্ধাধনং, সীলধনং, সুতধনং, চাগধনং, পঞ্ঞাধনন্তি ইমেসং সুৰিসুদ্ধানং ধনানং অত্থিতায ‘‘অদলিদ্দো’’তি তং তাদিসং পুগ্গলং বুদ্ধাদযো অরিযা আহু. অমোঘং তস্স জীৰিতং তস্স তথারূপস্স জীৰিতং দিট্ঠধম্মিকাদিঅত্থাধিগমেন অমোঘং অৰঞ্ঝং সফলমেৰাতি আহূতি অত্থো.

তস্মাতি ¶ , যস্মা যথাৰুত্তসদ্ধাদিগুণসমন্নাগতো পুগ্গলো ‘‘অদলিদ্দো অমোঘজীৰিতো’’তি ৰুচ্চতি, তস্মা অহম্পি তথারূপো ভৰেয্যন্তি. সদ্ধঞ্চ…পে… সাসনন্তি ‘‘সব্বপাপস্স অকরণ’’ন্তিআদিনা (ধ. প. ১৮৩; দী. নি. ২.৯০) ৰুত্তং বুদ্ধানং সাসনং অনুস্সরন্তো কুলপুত্তো ৰুত্তপ্পভেদং সদ্ধঞ্চেৰ সীলঞ্চ ধম্মদস্সনহেতুকং ধম্মে সুনিচ্ছযা ৰিমোক্খভূতং পসাদঞ্চ অনুযুঞ্জেয্য ৰড্ঢেয্যাতি.

এৰং থেরো ভিক্খূনং ধম্মদেসনামুখেন অত্তনি ৰিজ্জমানে গুণে পকাসেন্তো অঞ্ঞং ব্যাকাসি.

সিরিমিত্তত্থেরগাথাৰণ্ণনা নিট্ঠিতা.

৩. মহাপন্থকত্থেরগাথাৰণ্ণনা

যদা ¶ পঠমমদ্দক্খিন্তিআদিকা আযস্মতো মহাপন্থকত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে হংসৰতীনগরে ৰিভৰসম্পন্নো কুটুম্বিযো হুত্ৰা একদিৰসং সত্থু সন্তিকে ধম্মং সুণন্তো সত্থারং একং ভিক্খুং সঞ্ঞাৰিৰট্টকুসলানং অগ্গট্ঠানে ঠপেন্তং দিস্ৰা সযম্পি তং ঠানন্তরং পত্থেন্তো বুদ্ধপ্পমুখস্স ভিক্খুসঙ্ঘস্স সত্তাহং মহাদানং পৰত্তেত্ৰা, ‘‘ভন্তে, যং ভিক্খুং তুম্হে ইতো সত্তদিৰসমত্থকে – ‘সঞ্ঞাৰিৰট্টকুসলানং অযং মম সাসনে অগ্গো’তি এতদগ্গে ঠপযিত্থ, অহম্পি ইমস্স অধিকারকম্মস্স বলেন সো ভিক্খু ৰিয অনাগতে একস্স বুদ্ধস্স সাসনে অগ্গো ভৰেয্য’’ন্তি পত্থনং অকাসি. কনিট্ঠভাতা পনস্স তথেৰ ভগৰতি অধিকারকম্মং কত্ৰা মনোমযস্স কাযস্সাভিনিম্মানং চেতোৰিৰট্টকোসল্লন্তি দ্ৰিন্নং অঙ্গানং ৰসেন ৰুত্তনযেনেৰ পণিধানং অকাসি. ভগৰা দ্ৰিন্নম্পি পত্থনং অনন্তরাযেন সমিজ্ঝনভাৰং দিস্ৰা ‘‘অনাগতে কপ্পসতসহস্সমত্থকে গোতমস্স নাম সম্মাসম্বুদ্ধস্স সাসনে তুম্হাকং পত্থনা সমিজ্ঝিস্সতী’’তি ব্যাকাসি.

তে ¶ উভোপি জনা তত্থ যাৰজীৰং পুঞ্ঞানি কত্ৰা ততো চুতো দেৰলোকে নিব্বত্তিংসু. তত্থ মহাপন্থকস্স অন্তরাকতং কল্যাণধম্মং ন কথীযতি. চূল়পন্থকো পন কস্সপস্স ভগৰতো সাসনে পব্বজিত্ৰা ৰীসতি ৰস্সসহস্সানি ওদাতকসিণকম্মং কত্ৰা দেৰপুরে নিব্বত্তি. অপদানে পন ‘‘চূল়পন্থকো পদুমুত্তরস্স ভগৰতো কালে তাপসো হুত্ৰা হিমৰন্তে ৰসন্তো তত্থ ভগৰন্তং দিস্ৰা পুপ্ফচ্ছত্তেন পূজং অকাসী’’তি আগতং. তেসং দেৰমনুস্সেসু ¶ সংসরন্তানংযেৰ কপ্পসতসহস্সং অতিক্কন্তং. অথ অম্হাকং সত্থা অভিসম্বোধিং পত্ৰা পৰত্তিতৰরধম্মচক্কো রাজগহং উপনিস্সায ৰেল়ুৰনে মহাৰিহারে ৰিহরতি.

তেন চ সমযেন রাজগহে ধনসেট্ঠিস্স ধীতা অত্তনো দাসেন সদ্ধিং সন্থৰং কত্ৰা ঞাতকেহি ভীতা হত্থসারং গহেত্ৰা তেন সদ্ধিং পলাযিত্ৰা অঞ্ঞত্থ ৰসন্তী তং পটিচ্চ গব্ভং লভিত্ৰা পরিপক্কগব্ভা ‘‘ঞাতিঘরং ¶ গন্ত্ৰা ৰিজাযিস্সামী’’তি গচ্ছন্তী অন্তরামগ্গেযেৰ পুত্তং ৰিজাযিত্ৰা সামিনা নিৰত্তিতা পুব্বে ৰসিতট্ঠানে ৰসন্তী পুত্তস্স পন্থে জাতত্তা পন্থকোতি, নামং অকাসি. তস্মিং আধাৰিত্ৰা ৰিধাৰিত্ৰা ৰিচরণকালে তমেৰ পটিচ্চ দুতিযং গব্ভং পটিলভিত্ৰা পরিপক্কগব্ভা পুব্বে ৰুত্তনযেনেৰ অন্তরামগ্গে পুত্তং ৰিজাযিত্ৰা সামিনা নিৰত্তিতা জেট্ঠপুত্তস্স মহাপন্থকোতি কনিট্ঠস্স চূল়পন্থকোতি নামং কত্ৰা যথাৰসিতট্ঠানেযেৰ ৰসন্তী অনুক্কমেন দারকেসু ৰড্ঢন্তেসু তেহি, ‘‘অম্ম, অয্যককুলং নো দস্সেহী’’তি নিবুন্ধিযমানা দারকে মাতাপিতূনং সন্তিকং পেসেসি. ততো পট্ঠায দারকা ধনসেট্ঠিনো গেহে ৰড্ঢন্তি. তেসু চূল়পন্থকো অতিদহরো. মহাপন্থকো পন অয্যকেন সদ্ধিং ভগৰতো সন্তিকং গতো সত্থারং দিস্ৰা সহ দস্সনেন পটিলদ্ধসদ্ধো ধম্মং সুত্ৰা উপনিস্সযসম্পন্নতায পব্বজিতুকামো হুত্ৰা পিতামহং আপুচ্ছি. সো সত্থু তমত্থং আরোচেত্ৰা তং পব্বাজেসি. সো পব্বজিত্ৰা বহুং বুদ্ধৰচনং উগ্গণ্হিত্ৰা পরিপুণ্ণৰস্সো উপসম্পজ্জিত্ৰা যোনিসোমনসিকারে কম্মং করোন্তো ৰিসেসতো চতুন্নং অরূপজ্ঝানানং লাভী হুত্ৰা ততো ৰুট্ঠায ৰিপস্সনং উস্সুক্কাপেত্ৰা অরহত্তং পাপুণি. ইতি সো সঞ্ঞাৰিৰট্টকুসলানং অগ্গো জাতো. সো ঝানসুখেন ফলসুখেন ৰীতিনামেন্তো একদিৰসং অত্তনো পটিপত্তিং পচ্চৰেক্খিত্ৰা অধিগতসম্পত্তিং পটিচ্চ সঞ্জাতসোমনস্সো সীহনাদং নদন্তো –

৫১০.

‘‘যদা পঠমমদ্দক্খিং, সত্থারমকুতোভযং;

ততো মে অহু সংৰেগো, পস্সিত্ৰা পুরিসুত্তমং.

৫১১.

‘‘সিরিং হত্থেহি পাদেহি, যো পণামেয্য আগতং;

এতাদিসং সো সত্থারং, আরাধেত্ৰা ৰিরাধযে.

৫১২.

‘‘তদাহং ¶ পুত্তদারঞ্চ, ধনধঞ্ঞঞ্চ ছড্ডযিং;

কেসমস্সূনি ছেদেত্ৰা, পব্বজিং অনগারিযং.

৫১৩.

‘‘সিক্খাসাজীৰসম্পন্নো, ইন্দ্রিযেসু সুসংৰুতো;

নমস্সমানো সম্বুদ্ধং, ৰিহাসিং অপরাজিতো.

৫১৪.

‘‘ততো ¶ ¶ মে পণিধী আসি, চেতসো অভিপত্থিতো;

ন নিসীদে মুহুত্তম্পি, তণ্হাসল্লে অনূহতে.

৫১৫.

‘‘তস্স মেৰং ৰিহরতো, পস্স ৰীরিযপরক্কমং;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৫১৬.

‘‘পুব্বেনিৰাসং জানামি, দিব্বচক্খু ৰিসোধিতং;

অরহা দক্খিণেয্যোম্হি, ৰিপ্পমুত্তো নিরূপধি.

৫১৭.

‘‘ততো রত্যাৰিৰসানে, সূরিযুগ্গমনং পতি;

সব্বং তণ্হং ৰিসোসেত্ৰা, পল্লঙ্কেন উপাৰিসি’’ন্তি. – ইমা গাথা অভাসি;

তত্থ যদাতি যস্মিং কালে. পঠমন্তি আদিতো. অদ্দক্খিন্তি পস্সিং, সত্থারন্তি, ভগৰন্তং. অকুতোভযন্তি নিব্ভযং. অযঞ্হেত্থ অত্থো – সব্বেসং ভযহেতূনং বোধিমূলেযেৰ পহীনত্তা কুতোচিপি ভযাভাৰতো অকুতোভযং নিব্ভযং, চতুৰেসারজ্জৰিসারদং দিট্ঠধম্মিকসম্পরাযিকপরমত্থেহি ৰেনেয্যানং যথারহমনুসাসনতো সত্থারং সম্মাসম্বুদ্ধং ময্হং পিতামহেন সদ্ধিং গন্ত্ৰা যায ৰেলায সব্বপঠমং পস্সিং, তং পুরিসুত্তমং সদেৰকে লোকে অগ্গপুগ্গলং পস্সিত্ৰা ততো দস্সনহেতু ততো দস্সনতো পচ্ছা ‘‘এত্তকং কালং সত্থারং দট্ঠুং ধম্মঞ্চ সোতুং নালত্থ’’ন্তি ময্হং সংৰেগো অহু সহোত্তপ্পং ঞাণং উপ্পজ্জি. উপ্পন্নসংৰেগো পনাহং এৰং চিন্তেসিন্তি দস্সেতি সিরিং হত্থেহীতি গাথায. তস্সত্থো – যো ৰিভৰত্থিকো পুরিসো ‘‘উপট্ঠাযিকো হুত্ৰা তৰ সন্তিকে ৰসিস্সামী’’তি সৰিগ্গহং সিরিং সযনে উপগতং হত্থেহি চ পাদেহি চ কোট্টেন্তো পণামেয্য নীহরেয্য, সো তথারূপো অলক্খিকপুরিসো এতাদিসং সত্থারং সম্মাসম্বুদ্ধং আরাধেত্ৰা ইমস্মিং নৰমে খণে পটিলভিত্ৰা ৰিরাধযে তস্স ওৰাদাকরণেন তং ৰিরজ্ঝেয্য, অহং পনেৰং ন করোমীতি অধিপ্পাযো. তেনাহ ‘‘তদাহং…পে… অনগারিয’’ন্তি. তত্থ ছড্ডযিন্তি, পজহিং. ‘‘ছড্ডিয’’ন্তিপি পাঠো. ননু অযং থেরো দারপরিগ্গহং অকত্ৰাৰ পব্বজিতো, সো কস্মা ‘‘পুত্তদারঞ্চ ¶ ছড্ডযি’’ন্তি অৰোচাতি? যথা নাম পুরিসো অনিব্বত্তফলমেৰ রুক্খং ছিন্দন্তো অচ্ছিন্নে ততো লদ্ধফলেহি পরিহীনো নাম হোতি. এৰংসম্পদমিদং দট্ঠব্বং.

সিক্খাসাজীৰসমাপন্নোতি যা অধিসীলসিক্খা, তায চ, যত্থ ভিক্খূ সহ জীৰন্তি, একজীৰিকা ¶ সভাগৰুত্তিনো হোন্তি, তেন ভগৰতা পঞ্ঞত্তসিক্খাপদসঙ্খাতেন সাজীৰেন চ সমন্নাগতো সিক্খনভাৰেন ¶ সমঙ্গীভূতো, সিক্খং পরিপূরেন্তো সাজীৰঞ্চ অৰীতিক্কমন্তো হুত্ৰা তদুভযং সম্পাদেন্তোতি অত্থো. তেন সুৰিসুদ্ধে পাতিমোক্খে সীলে পতিট্ঠিতভাৰং দস্সেতি. ইন্দ্রিযেসু সুসংৰুতোতি মনচ্ছট্ঠেসু ইন্দ্রিযেসু সুট্ঠু সংৰুতো. রূপাদিৰিসযেসু উপ্পজ্জনকানং অভিজ্ঝাদীনং পৰত্তিনিৰারণৰসেন সতিকৰাটেন সুপিহিতচক্খাদিদ্ৰারোতি অত্থো. এৰং পাতিমোক্খসংৰরইন্দ্রিযসংৰরসীলসম্পত্তিদস্সনেন ইতরসীলম্পি অত্থতো দস্সিতমেৰ হোতীতি থেরো অত্তনো চতুপারিসুদ্ধিসীলসম্পদং দস্সেত্ৰা ‘‘নমস্সমানো সম্বুদ্ধ’’ন্তি ইমিনা বুদ্ধানুস্সতিভাৰনানুযোগমাহ. ৰিহাসিং অপরাজিতোতি কিলেসমারাদীহি অপরাজিতো এৰ হুত্ৰা ৰিহরিং, যাৰ অরহত্তপ্পত্তি, তাৰ তেহি অনভিভূতো, অঞ্ঞদত্থু তে অভিভৰন্তো এৰ ৰিহাসিন্তি অত্থো.

ততোতি তস্মা, যস্মা সুৰিসুদ্ধসীলো সত্থরি অভিপ্পসন্নো কিলেসাভিভৰনপটিপত্তিযঞ্চ ঠিতো, তস্মা. পণিধীতি পণিধানং. ততো ৰা চিত্তাভিনীহারো. আসীতি অহোসি. চেতসো অভিপত্থিতোতি, মম চিত্তেন ইচ্ছিতো. কীদিসো পন সোতি আহ ‘‘ন নিসীদে মুহুত্তম্পি, তণ্হাসল্লে অনূহতে’’তি. ‘‘অগ্গমগ্গসণ্ডাসেন মম হদযতো তণ্হাসল্লে অনুদ্ধটে মুহুত্তম্পি ন নিসীদে, নিসজ্জং ন কপ্পেয্য’’ন্তি এৰং মে চিত্তাভিনীহারো অহোসীতি অত্থো.

এৰং পন চিত্তং অধিট্ঠায ভাৰনং ভাৰযিত্ৰা ঠানচঙ্কমেহেৰ রত্তিং ৰীতিনামেন্তো অরূপসমাপত্তিতো ৰুট্ঠায ঝানঙ্গমুখেন ৰিপস্সনং পট্ঠপেত্ৰা অরহত্তং সচ্ছাকাসি. তেন ৰুত্তং ‘‘তস্স মে’’তিআদি. নিরূপধীতি কিলেসুপধিআদীনং অভাৰেন নিরুপধি. রত্যাৰিৰসানেতি রত্তিভাগস্স ৰিগমনে ¶ ৰিভাতায রত্তিযা. সূরিযুগ্গমনং পতীতি সূরিযুগ্গমনং লক্খণং কত্ৰা. সব্বং তণ্হন্তি কামতণ্হাদিভেদং সব্বং তণ্হাসোতং অগ্গমগ্গেন ৰিসোসেত্ৰা সুক্খাপেত্ৰা ‘‘তণ্হাসল্লে অনূহতে ন নিসীদে’’তি, পটিঞ্ঞায মোচিতত্তা. পল্লঙ্কেন উপাৰিসিন্তি পল্লঙ্কং আভুজিত্ৰা নিসীদিন্তি. সেসং উত্তানত্থমেৰ.

মহাপন্থকত্থেরগাথাৰণ্ণনা নিট্ঠিতা.

অট্ঠকনিপাতৰণ্ণনা নিট্ঠিতা.

৯. নৰকনিপাতো

১. ভূতত্থেরগাথাৰণ্ণনা

নৰকনিপাতে ¶ ¶ যদা দুক্খন্তিআদিকা আযস্মতো ভূতত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো সিদ্ধত্থস্স ভগৰতো কালে ব্রাহ্মণকুলে নিব্বত্তিত্ৰা ¶ সেনোতি লদ্ধনামো ৰিঞ্ঞুতং পত্তো একদিৰসং সত্থারং দিস্ৰা পসন্নমানসো ‘‘উসভং পৰর’’ন্তিআদিনা চতূহি গাথাহি অভিত্থৰি.

সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাকেতনগরস্স দ্ৰারগামে মহাৰিভৰস্স সেট্ঠিস্স পুত্তো হুত্ৰা নিব্বত্তি. তস্স কির সেট্ঠিনো জাতা জাতা দারকা বদ্ধাঘাতেন একেন যক্খেন খাদিতা, ইমস্স পন পচ্ছিমভৰিকত্তা ভূতা আরক্খং গণ্হিংসু. যক্খো পন ৰেস্সৰণস্স উপট্ঠানং গতো, পুন নাগমাসি. নামকরণদিৰসে চস্স ‘‘এৰং কতে অমনুস্সা অনুকম্পন্তা পরিহরেয্যু’’ন্তি ভূতোতি নামং অকংসু. সো পন অত্তনো পুঞ্ঞবলেন অনন্তরাযো ৰড্ঢি, তস্স ‘‘তযো পাসাদা অহেসু’’ন্তিআদি সব্বং যসস্স কুলপুত্তস্স ৰিভৰকিত্তনে ৰিয ৰেদিতব্বং. সো ৰিঞ্ঞুতং পত্তো সত্থরি সাকেতে ৰসন্তে উপাসকেহি সদ্ধিং ৰিহারং গতো. সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা অজকরণিযা নাম নদিযা তীরে লেণে ৰসন্তো ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.৭.২০-২৮) –

‘‘উসভং পৰরং ৰীরং, মহেসিং ৰিজিতাৰিনং;

সুৰণ্ণৰণ্ণং সম্বুদ্ধং, কো দিস্ৰা নপ্পসীদতি.

‘‘হিমৰা ৰাপরিমেয্যো, সাগরোৰ দুরুত্তরো;

তথেৰ ঝানং বুদ্ধস্স, কো দিস্ৰা নপ্পসীদতি.

‘‘ৰসুধা ¶ যথাপ্পমেয্যা, চিত্তা ৰনৰটংসকা;

তথেৰ সীলং বুদ্ধস্স, কো দিস্ৰা নপ্পসীদতি.

‘‘অনিলঞ্জসাসঙ্খুব্ভো ¶ , যথাকাসো অসঙ্খিযো;

তথেৰ ঞাণং বুদ্ধস্স, কো দিস্ৰা নপ্পসীদতি.

‘‘ইমাহি চতুগাথাহি, ব্রাহ্মণো সেনসৰ্হযো;

বুদ্ধসেট্ঠং থৰিত্ৰান, সিদ্ধত্থং অপরাজিতং.

‘‘চতুন্নৰুতিকপ্পানি, দুগ্গতিং নুপপজ্জথ;

সুগতিং সুখসম্পত্তিং, অনুভোসিমনপ্পকং.

‘‘চতুন্নৰুতিতো কপ্পে, থৰিত্ৰা লোকনাযকং;

দুগ্গতিং নাভিজানামি, থোমনায ইদং ফলং.

‘‘চাতুদ্দসম্হি কপ্পম্হি, চতুরো আসুমুগ্গতা;

সত্তরতনসম্পন্না, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অপরেন সমযেন ঞাতীনং অনুকম্পায সাকেতং গন্ত্ৰা কতিপাহং তেহি উপট্ঠিযমানো অঞ্জনৰনে ৰসিত্ৰা পুন অত্তনা ৰসিতট্ঠানমেৰ গন্তুকামো গমনাকারং দস্সেসি. ঞাতকা ‘‘ইধেৰ, ভন্তে, ৰসথ, তুম্হেপি ন কিলমিস্সথ, মযম্পি পুঞ্ঞেন ৰড্ঢিস্সামা’’তি থেরং যাচিংসু. থেরো অত্তনো ৰিৰেকাভিরতিং তত্থ চ ফাসুৰিহারং পকাসেন্তো –

৫১৮.

‘‘যদা দুক্খং জরামরণন্তি পণ্ডিতো, অৰিদ্দসূ যত্থ সিতা পুথুজ্জনা;

দুক্খং পরিঞ্ঞায সতোৰ ঝাযতি, ততো রতিং পরমতরং ন ৰিন্দতি.

৫১৯.

‘‘যদা দুক্খস্সাৰহনিং ৰিসত্তিকং, পপঞ্চসঙ্ঘাতদুখাধিৰাহিনিং;

তণ্হং পহন্ত্ৰান সতোৰ ঝাযতি, ততো রতিং পরমতরং ন ৰিন্দতি.

৫২০.

‘‘যদা ¶ সিৰং দ্ৰেচতুরঙ্গগামিনং, মগ্গুত্তমং সব্বকিলেসসোধনং;

পঞ্ঞায পস্সিত্ৰ সতোৰ ঝাযতি, ততো রতিং পরমতরং ন ৰিন্দতি.

৫২১.

‘‘যদা ¶ অসোকং ৰিরজং অসঙ্খতং, সন্তং পদং সব্বকিলেসসোধনং;

ভাৰেতি সঞ্ঞোজনবন্ধনচ্ছিদং, ততো রতিং পরমতরং ন ৰিন্দতি.

৫২২.

‘‘যদা নভে গজ্জতি মেঘদুন্দুভি, ধারাকুলা ৰিহগপথে সমন্ততো;

ভিক্খূ চ পব্ভারগতোৰ ঝাযতি, ততো রতিং পরমতরং ন ৰিন্দতি.

৫২৩.

‘‘যদা ¶ নদীনং কুসুমাকুলানং, ৰিচিত্ত-ৰানেয্য-ৰটংসকানং;

তীরে নিসিন্নো সুমনোৰ ঝাযতি, ততো রতিং পরমতরং ন ৰিন্দতি.

৫২৪.

‘‘যদা নিসীথে রহিতম্হি কাননে, দেৰে গল়ন্তম্হি নদন্তি দাঠিনো;

ভিক্খূ চ পব্ভারগতোৰ ঝাযতি, ততো রতিং পরমতরং ন ৰিন্দতি.

৫২৫.

‘‘যদা ৰিতক্কে উপরুন্ধিযত্তনো, নগন্তরে নগৰিৰরং সমস্সিতো;

ৰীতদ্দরো ৰীতখিলোৰ ঝাযতি, ততো রতিং পরমতরং ন ৰিন্দতি.

৫২৬.

‘‘যদা সুখী মলখিলসোকনাসনো,

নিরগ্গল়ো নিব্বনথো ৰিসল্লো;

সব্বাসৰে ব্যন্তিকতোৰ ঝাযতি,

ততো রতিং পরমতরং ন ৰিন্দতী’’তি. – ইমা গাথা অভাসি;

তত্থাযং ¶ পদযোজনামুখেন পঠমগাথায অত্থৰণ্ণনা – খন্ধানং পরিপাকো জরা. ভেদো মরণং. জরামরণসীসেন চেত্থ জরামরণৰন্তো ধম্মা গহিতা. ‘‘তযিদং জরামরণং দুক্খ’’ন্তি অৰিদ্দসূ যথাভূতং অজানন্তা পুথুজ্জনা যত্থ যস্মিং উপাদানক্খন্ধপঞ্চকে সিতা পটিবন্ধা অল্লীনা, তং ‘‘ইদং দুক্খং, এত্তকং দুক্খং, ন ইতো ভিয্যো’’তি ৰিপস্সনাপঞ্ঞাসহিতায মগ্গপঞ্ঞায পরিজানিত্ৰা, ইধ ইমস্মিং সাসনে সতো সম্পজানো, পণ্ডিতো ভিক্খু, যদা যস্মিং কালে লক্খণূপনিজ্ঝানেন ঝাযতি. ততো ৰিপস্সনারতিতো মগ্গফলরতিতো চ পরমতরং উত্তমতরং রতিং ন ৰিন্দতি নপ্পটিলভতি. তেনাহ ভগৰা –

‘‘যতো যতো সম্মসতি, খন্ধানং উদযব্বযং;

লভতী পীতিপামোজ্জং, অমতং তং ৰিজানতং.

‘‘পঠব্যা একরজ্জেন, সগ্গস্স গমনেন ৰা;

সব্বলোকাধিপচ্চেন, সোতাপত্তিফলং ৰর’’ন্তি. (ধ. প. ৩৭৪, ১৭৮);

এৰং ¶ পরিঞ্ঞাভিসমযমুখেন ৰিৰেকরতিং দস্সেত্ৰা ইদানি পহানাভিসমযাদিমুখেনপি তং দস্সেতুং দুতিযাদিকা তিস্সো গাথা অভাসি. তত্থ দুক্খস্সাৰহনিন্তি দুক্খস্স আযতিং পৰত্তিং, দুক্খস্স নিপ্ফত্তিকন্তি অত্থো. ৰিসত্তিকন্তি তণ্হং. সা হি ৰিসতাতি ৰিসত্তিকা, ৰিসালাতি ৰিসত্তিকা, ৰিসটাতি ৰিসত্তিকা, ৰিসক্কতীতি ৰিসত্তিকা, ৰিসং হরতীতি ৰিসত্তিকা, ৰিসংৰাদিকাতি ৰিসত্তিকা, ৰিসমূলাতি ৰিসত্তিকা, ৰিসফলাতি ৰিসত্তিকা, ৰিসপরিভোগাতি ৰিসত্তিকা, ৰিসালা ৰা পন সা তণ্হা রূপে সদ্দে গন্ধে রসে ফোট্ঠব্বে ধম্মে কুলে ¶ গণে ৰিত্থটাতি ৰিসত্তিকাতি ৰুচ্চতি. পপঞ্চসঙ্ঘাতদুখাধিৰাহিনিন্তি সত্তসন্তানং সংসারে পপঞ্চেন্তি ৰিত্থারেন্তীতি পপঞ্চা, রাগাদযো মানাদযো চ. তে এৰ পৰত্তিদুক্খস্স সঙ্ঘাতট্ঠেন সঙ্ঘাতা, সদরথপরিল়াহসভাৰত্তা দুক্খঞ্চাতি পপঞ্চসঙ্ঘাতদুখং, তস্স অধিৰাহতো নিব্বত্তনতো পপঞ্চসঙ্ঘাতদুখাধিৰাহিনী. তং তণ্হং পহন্ত্ৰানাতি অরিযমগ্গেন সমুচ্ছিন্দিত্ৰা.

সিৰন্তি ¶ খেমং, অখেমকরানং কিলেসানং সমুচ্ছিন্দনেন তেহি অনুপদ্দুতন্তি অত্থো. সম্মাদিট্ঠিআদীনং ৰসেন দ্ৰিচতুরঙ্গো হুত্ৰা অরিযে নিব্বানং গমেতীতি দ্ৰেচতুরঙ্গগামিনং, গাথাসুখত্থঞ্চেত্থ ৰিভত্তিঅলোপো কতোতি দট্ঠব্বং. রূপূপপত্তিমগ্গাদীসু সব্বেসু মগ্গেসু উত্তমত্তা মগ্গুত্তমং. তেনাহ ভগৰা – ‘‘মগ্গানট্ঠঙ্গিকো সেট্ঠো’’তিআদি (ধ. প. ২৭৩). সব্বেহি কিলেসমলেহি সত্তানং সোধনতো সব্বকিলেসসোধনং. পঞ্ঞায পস্সিত্ৰাতি পটিৰেধপঞ্ঞায ভাৰনাভিসমযৰসেন অভিসমেচ্চ.

সোকহেতূনং অভাৰতো পুগ্গলস্স চ সোকাভাৰহেতুতো নত্থি এত্থ সোকোতি অসোকং. তথা ৰিগতরাগাদিরজত্তা ৰিরজং. ন কেনচি পচ্চযেন সঙ্খতন্তি অসঙ্খতং. সব্বেসং কিলেসানং সব্বস্স চ দুক্খস্স ৰূপসমভাৰতো, সংসারদুক্খদ্দিতেহি পজ্জিতব্বতো অধিগন্তব্বতো চ সন্তং পদং. সব্বেহি কিলেসমলেহি সত্তসন্তানস্স সোধননিমিত্ততো সব্বকিলেসসোধনং. ভাৰেতীতি সচ্ছিকিরিযাভিসমযৰসেন অভিসমেতি. বহুক্খত্তুঞ্হি নিব্বানং আরব্ভ সচ্ছিকিরিযাভিসমযং পৰত্তেন্তস্স আলম্বকে লব্ভমানৰিসেসকং আলম্বিতব্বে আরোপেত্ৰা এৰং ৰুত্তং. সংযোজনসঙ্খাতানং বন্ধনানং ছেদনতো সংযোজনবন্ধনচ্ছিদং. নিমিত্তঞ্হেত্থ কত্তুভাৰেন উপচারিতং, যথা অরিযভাৰকরানি সচ্চানি অরিযসচ্চানীতি. যথা পুরিমগাথাসু যদা ঝাযতি, তদা ¶ ততো রতিং পরমতরং ন ৰিন্দতীতি যোজনা. এৰং ইধ যদা ভাৰেতি, তদা ততো রতিং পরমতরং ন ৰিন্দতীতি যোজনা.

এৰং থেরো চতূহি গাথাহি অত্তানং অনুপনেত্ৰাৰ চতুসচ্চপটিৰেধকিত্তনেন অঞ্ঞং ব্যাকরিত্ৰা ইদানি অত্তনা ৰসিতট্ঠানস্স ৰিৰিত্তভাৰেন ফাসুতং দস্সেন্তো ‘‘যদা নভে’’তিআদিকা গাথা অভাসি. তত্থ নভেতি আকাসে. সিনিদ্ধগম্ভীরনিগ্ঘোসতায মেঘোযেৰ দুন্দুভি মেঘদুন্দুভি. সমন্ততো পগ্ঘরন্তীহি ধারাহি আকুলাতি ধারাকুলা. ৰিহগানং পক্খীনং গমনমগ্গত্তা ৰিহগপথে নভেতি যোজনা. ততোতি ঝানরতিতো.

কুসুমাকুলানন্তি ¶ তরূহি গল়িতকুসুমেহি সমোহিতানং. ৰিচিত্তৰানেয্যৰটংসকানন্তি ৰনে জাতত্তা ¶ ৰানেয্যানি ৰনপুপ্ফানি, ৰিচিত্তানি ৰানেয্যানি ৰটংসকানি এতাসন্তি ৰিচিত্তৰানেয্যৰটংসকা নদিযো, তাসং নানাৰিধৰনপুপ্ফৰটংসকানন্তি অত্থো. উত্তরিমনুস্সধম্মৰসেন সুন্দরো মনো এতস্সাতি সুমনো ঝাযতি.

নিসীথেতি রত্তিযং. রহিতম্হীতি, জনসম্বাধৰিরহিতে ৰিৰিত্তে. দেৰেতি মেঘে. গল়ন্তম্হীতি ৰুট্ঠিধারাযো পগ্ঘরন্তে ৰস্সন্তে. দাঠিনোতি সীহব্যগ্ঘাদযো পটিপক্খসত্তা. তে হি দাঠাৰুধাতি ‘‘দাঠিনো’’তি ৰুচ্চন্তি, নদন্তি দাঠিনোতি ইদম্পি জনৰিৰেকদস্সনত্থমেৰ গহিতং.

ৰিতক্কে উপরুন্ধিযত্তনোতি অত্তসন্তানপরিযাপন্নতায অত্তনো কামৰিতক্কাদিকে মিচ্ছাৰিতক্কে পটিপক্খবলেন নিসেধেত্ৰা. অত্তনোতি ৰা ইদং ৰিন্দতীতি ইমিনা যোজেতব্বং ‘‘ততো রতিং পরমতরং অত্তনা ন ৰিন্দতী’’তি. নগন্তরেতি পব্বতন্তরে. নগৰিৰরন্তি পব্বতগুহং পব্ভারং ৰা. সমস্সিতোতি নিস্সিতো উপগতো. ৰীতদ্দরোতি ৰিগতকিলেসদরথো. ৰীতখিলোতি পহীনচেতোখিলো.

সুখীতি ঝানাদিসুখেন সুখিতো. মলখিলসোকনাসনোতি রাগাদীনং মলানং পঞ্চন্নঞ্চ চেতোখিলানং ঞাতিৰিযোগাদিহেতুকস্স সোকস্স চ পহাযকো. নিরগ্গল়োতি, অগ্গল়ং ৰুচ্চতি অৰিজ্জা নিব্বানপুরপৰেসনিৰারণতো, তদভাৰতো নিরগ্গল়ো. নিব্বনথোতি নিতণ্হো. ৰিসল্লোতি, ৰিগতরাগাদিসল্লো. সব্বাসৰেতি, কামাসৰাদিকে সব্বেপি আসৰে. ব্যন্তিকতোতি ব্যন্তিকতাৰী অরিযমগ্গেন ৰিগতন্তে কত্ৰা ঠিতো দিট্ঠধম্মসুখৰিহারত্থং যদা ঝাযতি, ততো ঝানরতিতো পরমতরং রতিং ন ৰিন্দতীতি যোজনা. এৰং পন ৰত্ৰা থেরো অজকরণীতীরমেৰ গতো.

ভূতত্থেরগাথাৰণ্ণনা নিট্ঠিতা.

নৰকনিপাতৰণ্ণনা নিট্ঠিতা.

১০. দসকনিপাতো

১. কাল়ুদাযিত্থেরগাথাৰণ্ণনা

দসকনিপাতে ¶ ¶ ¶ অঙ্গারিনোতিআদিকা আযস্মতো কাল়ুদাযিত্থেরস্স গাথা. কা উপ্পত্তি? অযম্পি পদুমুত্তরবুদ্ধস্স কালে হংসৰতীনগরে কুলগেহে নিব্বত্তো সত্থু ধম্মদেসনং সুণন্তো সত্থারং একং ভিক্খুং কুলপ্পসাদকানং অগ্গট্ঠানে ঠপেন্তং দিস্ৰা তজ্জং অভিনীহারকম্মং কত্ৰা তং ঠানন্তরং পত্থেসি.

সো যাৰজীৰং কুসলং কত্ৰা দেৰমনুস্সেসু সংসরন্তো অম্হাকং বোধিসত্তস্স মাতুকুচ্ছিযং পটিসন্ধিগ্গহণদিৰসে কপিলৰত্থুস্মিংযেৰ অমচ্চগেহে পটিসন্ধিং গণ্হি. বোধিসত্তেন সদ্ধিং একদিৰসংযেৰ জাতোতি তংদিৰসংযেৰ নং দুকূলচুম্বটে নিপজ্জাপেত্ৰা বোধিসত্তস্স উপট্ঠানং নযিংসু. বোধিসত্তেন হি সদ্ধিং বোধিরুক্খো, রাহুলমাতা, চত্তারো নিধী, আরোহনিযহত্থী, অস্সকণ্ডকো, ছন্নো কাল়ুদাযীতি ইমে সত্ত একদিৰসংযেৰ জাতত্তা সহজাতা নাম অহেসুং. অথস্স নামগ্গহণদিৰসে সকলনগরস্স উদগ্গচিত্তদিৰসে জাতত্তা উদাযীত্ৰেৰ নামং অকংসু, থোকং কাল়ধাতুকত্তা পন কাল়ুদাযীতি পঞ্ঞাযিত্থ. সো বোধিসত্তেন সদ্ধিং কুমারকীল়ং কীল়ন্তো ৰুদ্ধিং অগমাসি.

অপরভাগে লোকনাথে মহাভিনিক্খমনং নিক্খমিত্ৰা অনুক্কমেন সব্বঞ্ঞুতং পত্ৰা পৰত্তিতৰরধম্মচক্কে রাজগহং উপনিস্সায ৰেল়ুৰনে ৰিহরন্তে সুদ্ধোদনমহারাজা তং পৰত্তিং সুত্ৰা পুরিসসহস্সপরিৰারং একং অমচ্চং ‘‘পুত্তং মে ইধানেহী’’তি পেসেসি. সো ধম্মদেসনাৰেলায সত্থু সন্তিকং গন্ত্ৰা পরিসপরিযন্তে ঠিতো ধম্মং সুত্ৰা সপরিসো অরহত্তং পাপুণি. অথ নে সত্থা ‘‘এথ, ভিক্খৰো’’তি হত্থং পসারেতি. সব্বে তঙ্খণংযেৰ ইদ্ধিমযপত্তচীৰরধরা ৰস্সসট্ঠিকত্থেরা ৰিয অহেসুং. অরহত্তং পত্ততো পট্ঠায পন অরিযা মজ্ঝত্তাৰ হোন্তি, তস্মা রঞ্ঞা পহিতসাসনং দসবলস্স ন কথেসি. রাজা ‘‘নেৰ গতবলকোট্ঠকো আগচ্ছতি, ন সাসনং সুয্যতী’’তি অপরম্পি অমচ্চং পুরিসসহস্সেন ¶ পেসেসি ¶ . তস্মিম্পি তথা পটিপন্নে অপরন্তি এৰং নৰহি অমচ্চেহি সদ্ধিং নৰ পুরিসসহস্সানি পেসেসি সব্বে অরহত্তং পত্ৰা তুণ্হী অহেসুং.

অথ রাজা চিন্তেসি – ‘‘এত্তকা জনা মযি সিনেহাভাৰেন দসবলস্স ইধাগমনত্থায ন কিঞ্চি কথযিংসু, অযং খো পন উদাযী দসবলেন সমৰযো সহপংসুকীল়িকো, মযি চ সিনেহৰা, ইমং পেসেস্সামী’’তি তং পক্কোসাপেত্ৰা, ‘‘তাত, ত্ৰং পুরিসসহস্সপরিৰারো রাজগহং গন্ত্ৰা দসবলং আনেহী’’তি ৰত্ৰা পেসেসি. সো পন গচ্ছন্তো ‘‘সচাহং, দেৰ, পব্বজিতুং লভিস্সামি, এৰাহং ভগৰন্তং ইধানেস্সামী’’তি ¶ ৰত্ৰা ‘‘যং কিঞ্চি কত্ৰা মম পুত্তং দস্সেহী’’তি ৰুত্তো রাজগহং গন্ত্ৰা সত্থু ধম্মদেসনাৰেলায পরিসপরিযন্তে ঠিতো ধম্মং সুত্ৰা সপরিৰারো অরহত্তং পত্ৰা এহিভিক্খুভাৰে পতিট্ঠাসি. তেন ৰুত্তং অপদানে (অপ. থের ১.৪.৪৮-৬৩) –

‘‘পদুমুত্তরবুদ্ধস্স, লোকজেট্ঠস্স তাদিনো;

অদ্ধানং পটিপন্নস্স, চরতো চারিকং তদা.

‘‘সুফুল্লং পদুমং গয্হ, উপ্পলং মল্লিকঞ্চহং;

পরমন্নং গহেত্ৰান, অদাসিং সত্থুনো অহং.

‘‘পরিভুঞ্জি মহাৰীরো, পরমন্নং সুভোজনং;

তঞ্চ পুপ্ফং গহেত্ৰান, জনস্স সম্পদস্সযি.

‘‘ইট্ঠং কন্তং পিযং লোকে, জলজং পুপ্ফমুত্তমং;

সুদুক্করং কতং তেন, যো মে পুপ্ফং অদাসিদং.

‘‘যো পুপ্ফমভিরোপেসি, পরমন্নঞ্চদাসি মে;

তমহং কিত্তযিস্সামি, সুণাথ মম ভাসতো.

‘‘দস অট্ঠ চক্খত্তুং সো, দেৰরজ্জং করিস্সতি;

উপ্পলং পদুমঞ্চাপি, মল্লিকঞ্চ তদুত্তরি.

‘‘অস্স পুঞ্ঞৰিপাকেন, দিব্বগন্ধসমাযুতং;

আকাসে ছদনং কত্ৰা, ধারযিস্সতি তাৰদে.

‘‘পঞ্চৰীসতিক্খত্তুঞ্চ ¶ , চক্কৰত্তী ভৰিস্সতি;

পথব্যা রজ্জং পঞ্চসতং, ৰসুধং আৰসিস্সতি.

‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘সককম্মাভিরদ্ধো ¶ সো, সুক্কমূলেন চোদিতো;

সক্যানং নন্দিজননো, ঞাতিবন্ধু ভৰিস্সতি.

‘‘সো পচ্ছা পব্বজিত্ৰান, সুক্কমূলেন চোদিতো;

সব্বাসৰে পরিঞ্ঞায, নিব্বাযিস্সতিনাসৰো.

‘‘পটিসম্ভিদমনুপ্পত্তং, কতকিচ্চমনাসৰং;

গোতমো লোকবন্ধু তং, এতদগ্গে ঠপেস্সতি.

‘‘পধানপহিতত্তো সো, উপসন্তো নিরূপধি;

উদাযী নাম নামেন, হেস্সতি সত্থু সাৰকো.

‘‘রাগো দোসো চ মোহো চ, মানো মক্খো চ ধংসিতো;

সব্বাসৰে পরিঞ্ঞায, ৰিহরামি অনাসৰো.

‘‘তোসযিঞ্চাপি সম্বুদ্ধং, আতাপী নিপকো অহং;

পসাদিতো চ সম্বুদ্ধো, এতদগ্গে ঠপেসি মং.

‘‘পটিসম্ভিদা চতস্সো…পে… কতং বুদ্ধস্স সাসন’’ন্তি.

অরহত্তং পন পত্ৰা ‘‘ন তাৰাযং দসবলস্স কুলনগরং গন্তুং কালো, ৰসন্তে পন উপগতে পুপ্ফিতেসু ৰনসণ্ডেসু হরিততিণসঞ্ছন্নায ভূমিযা গমনকালো ভৰিস্সতী’’তি কালং পটিমানেন্তো ৰসন্তে সম্পত্তে সত্থু কুলনগরং গন্তুং গমনমগ্গৰণ্ণং সংৰণ্ণেন্তো –

৫২৭.

‘‘অঙ্গারিনো দানি দুমা ভদন্তে, ফলেসিনো ছদনং ৰিপ্পহায;

তে অচ্চিমন্তোৰ পভাসযন্তি, সমযো মহাৰীর ভাগীরসানং.

৫২৮.

‘‘দুমানি ¶ ফুল্লানি মনোরমানি, সমন্ততো সব্বদিসা পৰন্তি;

পত্তং পহায ফলমাসসানা, কালো ইতো পক্কমনায ৰীর.

৫২৯.

‘‘নেৰাতিসীতং ন পনাতিউণ্হং, সুখা উতু অদ্ধনিযা ভদন্তে;

পস্সন্তু তং সাকিযা কোল়িযা চ, পচ্ছামুখং রোহিনিযং তরন্তং.

৫৩০.

‘‘আসায কসতে খেত্তং, বীজং আসায ৰপ্পতি;

আসায ৰাণিজা যন্তি, সমুদ্দং ধনহারকা;

যায আসায তিট্ঠামি, সা মে আসা সমিজ্ঝতু.

৫৩১.

‘‘পুনপ্পুনঞ্চেৰ ৰপন্তি বীজং, পুনপ্পুনং ৰস্সতি দেৰরাজা;

পুনপ্পুনং খেত্তং কসন্তি কস্সকা, পুনপ্পুনং ধঞ্ঞমুপেতি রট্ঠং.

৫৩২.

‘‘পুনপ্পুনং যাচনকা চরন্তি, পুনপ্পুনং দানপতী দদন্তি;

পুনপ্পুনং দানপতী দদিত্ৰা, পুনপ্পুনং সগ্গমুপেন্তি ঠানং.

৫৩৩.

‘‘ৰীরো ¶ ¶ হৰে সত্তযুগং পুনেতি, যস্মিং কুলে জাযতি ভূরিপঞ্ঞো;

মঞ্ঞামহং সক্কতি দেৰদেৰো, তযা হি জাতো মুনি সচ্চনামো.

৫৩৪.

‘‘সুদ্ধোদনো নাম পিতা মহেসিনো, বুদ্ধস্স মাতা পন মাযনামা;

যা বোধিসত্তং পরিহরিয কুচ্ছিনা, কাযস্স ভেদা তিদিৰম্হি মোদতি.

৫৩৫.

‘‘সা গোতমী কালকতা ইতো চুতা, দিব্বেহি কামেহি সমঙ্গিভূতা;

সা মোদতি কামগুণেহি পঞ্চহি, পরিৰারিতা দেৰগণেহি তেহি.

৫৩৬.

‘‘বুদ্ধস্স ¶ পুত্তোম্হি অসয্হসাহিনো, অঙ্গীরসস্সপ্পটিমস্স তাদিনো;

পিতুপিতা ময্হং তুৰংসি সক্ক, ধম্মেন মে গোতম অয্যকোসী’’তি. –

ইমা গাথা অভাসি.

তত্থ অঙ্গারিনোতি অঙ্গারানি ৰিযাতি অঙ্গারানি, রত্তপৰাল়ৰণ্ণানি রুক্খানং পুপ্ফপল্লৰানি, তানি এতেসং সন্তীতি অঙ্গারিনো, অতিলোহিতকুসুমকিসলযেহি অঙ্গারৰুট্ঠিসংপরিকিণ্ণা ৰিযাতি অত্থো. ইদানীতি ইমস্মিং কালে. দুমাতি রুক্খা. ভদন্তেতি, ভদ্দং অন্তে এতস্সাতি ভদন্তেতি একস্স দকারস্স লোপং কত্ৰা ৰুচ্চতি, গুণৰিসেসযুত্তো, গুণৰিসেসযুত্তানঞ্চ অগ্গভূতো সত্থা. তস্মা ভদন্তেতি সত্থু আলপনং. পচ্চত্তৰচনঞ্চেতং একারন্তং ‘‘সুকটে পটিকম্মে সুখে দুক্খেপি চে’’তিআদীসু ৰিয. ইধ পন সম্বোধনত্থে দট্ঠব্বং. তেন ৰুত্তং ‘‘ভদন্তেতি আলপন’’ন্তি. ‘‘ভদ্দসদ্দসমানত্থং পদন্তরমেক’’ন্তি কেচি. ফলানি এসন্তীতি ফলেসিনো. অচেতনেপি হি সচেতনকিরিযমারোপেত্ৰা ৰোহরন্তি, যথা কুলং পতিতুকামন্তি, ফলানি গহেতুমারদ্ধা সম্পত্তিফলগহণকালাতি অত্থো. ছদনং ৰিপ্পহাযাতি পুরাণপণ্ণানি পজহিত্ৰা সম্পন্নপণ্ডুপলাসাতি অত্থো. তেতি দুমা. অচ্চিমন্তোৰ পভাসযন্তীতি দীপসিখাৰন্তো ৰিয জলিতঅগ্গী ৰিয ৰা ওভাসযন্তি সব্বা দিসাতি অধিপ্পাযো. সমযোতি কালো, ‘‘অনুগ্গহাযা’’তি ৰচনসেসো. মহাৰীরাতি মহাৰিক্কন্ত. ভাগী রসানন্তি অত্থরসাদীনং ভাগী. ৰুত্তঞ্হেতং ধম্মসেনাপতিনা – ‘‘ভাগী ৰা ভগৰা অত্থরসস্স ধম্মরসস্সা’’তিআদি (চূল়নি. অজিতমাণৰপুচ্ছানিদ্দেস ২). মহাৰীর, ভাগীতি চ ইদম্পি দ্ৰযং সম্বোধনৰচনং দট্ঠব্বং. ভাগীরথানন্তি পন পাঠে ভগীরথো নাম ¶ আদিরাজা. তব্বংসজাততায সাকিযা ভাগীরথা, তেসং ভাগীরথানং উপকারত্থন্তি অধিপ্পাযো.

দুমানীতি লিঙ্গৰিপল্লাসেন ৰুত্তং, দুমা রুক্খাতি অত্থো. সমন্ততো সব্বদিসা পৰন্তীতি, সমন্ততো সব্বভাগতো সব্বদিসাসু চ ফুল্লানি, তথা ফুল্লত্তা এৰ সব্বদিসা পৰন্তি গন্ধং ৰিস্সজ্জেন্তি. আসমানাতি আসীসন্তা ¶ গহিতুকামা. এৰং রুক্খসোভায গমনমগ্গস্স ¶ রামণেয্যতং দস্সেত্ৰা ইদানি ‘‘নেৰাতিসীত’’ন্তিআদিনা উতুসম্পত্তিং দস্সেতি. সুখাতি নাতিসীতনাতিউণ্হভাৰেনেৰ সুখা ইট্ঠা. উতু অদ্ধনিযাতি অদ্ধানগমনযোগ্গা উতু. পস্সন্তু তং সাকিযা কোল়িযা চ, পচ্ছামুখং রোহিনিযং তরন্তন্তি রোহিনী নাম নদী সাকিযকোল়িযজনপদানং অন্তরে উত্তরদিসতো দক্খিণমুখা সন্দতি, রাজগহং চস্সা পুরত্থিমদক্খিণায দিসায, তস্মা রাজগহতো কপিলৰত্থুং গন্তুং তং নদিং তরন্তা পচ্ছামুখা হুত্ৰা তরন্তি. তেনাহ ‘‘পস্সন্তু তং…পে… তরন্ত’’ন্তি. ‘‘ভগৰন্তং পচ্ছামুখং রোহিনিং নাম নদিং অতিক্কমন্তং সাকিযকোল়িযজনপদৰাসিনো পস্সন্তূ’’তি কপিলৰত্থুগমনায ভগৰন্তং আযাচন্তো উস্সাহেতি.

ইদানি অত্তনো পত্থনং উপমাহি পকাসেন্তো ‘‘আসায কসতে’’তি গাথমাহ. আসায কসতে খেত্তন্তি কস্সকো কসন্তো খেত্তং ফলাসায কসতি. বীজং আসায ৰপ্পতীতি কসিত্ৰা চ ৰপন্তেন ফলাসায এৰ বীজং ৰপ্পতি নিক্খিপীযতি. আসায ৰাণিজা যন্তীতি ধনহারকা ৰাণিজা ধনাসায সমুদ্দং তরিতুং দেসং উপগন্তুং সমুদ্দং নাৰায যন্তি গচ্ছন্তি. যায আসায তিট্ঠামীতি এৰং অহম্পি যায আসায পত্থনায ভগৰা তুম্হাকং কপিলপুরগমনপত্থনায ইধ তিট্ঠামি. সা মে আসা সমিজ্ঝতু, তুম্হেহি ‘‘কপিলৰত্থু গন্তব্ব’’ন্তি ৰদতি, আসায সদিসতায চেত্থ কত্তুকম্যতাছন্দং আসাতি আহ.

গমনমগ্গসংৰণ্ণনাদিনা অনেকৰারং যাচনায কারণং দস্সেতুং ‘‘পুনপ্পুন’’ন্তিআদি ৰুত্তং. তস্সত্থো – সকিং ৰুত্তমত্তেন ৰপ্পে অসম্পজ্জমানে কস্সকা পুনপ্পুনং দুতিযম্পি ততিযম্পি বীজং ৰপন্তি. পজ্জুন্নো দেৰরাজাপি একৰারমেৰ অৰস্সিত্ৰা পুনপ্পুনং কালেন কালং ৰস্সতি. কস্সকাপি একৰারমেৰ অকসিত্ৰা সস্সসম্পত্তিঅত্থং পংসুং কদ্দমং ৰা মুদুং কাতুং খেত্তং পুনপ্পুনং কসন্তি. একৰারমেৰ ধঞ্ঞং সঙ্গহং কত্ৰা ¶ ‘‘অলমেত্তাৰতা’’তি অপরিতুস্সনতো কোট্ঠাগারাদীসু পটিসামনৰসেন মনুস্সেহি উপনীযমানং পুনপ্পুনং সালিআদিধঞ্ঞং রট্ঠং উপেতি উপগচ্ছতি.

যাচনকাপি ¶ যাচন্তা পুনপ্পুনং কুলানি চরন্তি উপগচ্ছন্তি, ন একৰারমেৰ, যাচিতা পন তেসং পুনপ্পুনং দানপতী দদন্তি, ন সকিংযেৰ. তথা পন দেয্যধম্মং পুনপ্পুনং দানপতী দদিত্ৰা দানমযং পুঞ্ঞং উপচিনিত্ৰা পুনপ্পুনং অপরাপরং সগ্গমুপেন্তি ঠানং পটিসন্ধিৰসেন দেৰলোকং উপগচ্ছন্তি. তস্মা অহম্পি পুনপ্পুনং যাচামি ভগৰা ময্হং মনোরথং মত্থকং পাপেহীতি অধিপ্পাযো.

ইদানি ¶ যদত্থং সত্থারং কপিলৰত্থুগমনং যাচতি, তং দস্সেতুং ‘‘ৰীরো হৰে’’তিগাথমাহ. তস্সত্থো – ৰীরো ৰীরিযৰা মহাৰিক্কন্তো ভূরিপঞ্ঞো মহাপঞ্ঞো পুরিসো যস্মিং কুলে জাযতি নিব্বত্ততি, তত্থ হৰে একংসেন সত্তযুগং সত্তপুরিসযুগং যাৰসত্তমং পিতামহযুগং সম্মাপটিপত্তিযা পুনেতি সোধেতীতি লোকৰাদো অতিৰাদো অঞ্ঞেসু. ভগৰা পন সব্বেসং দেৰানং উত্তমদেৰতায দেৰদেৰো পাপনিৰারণেন কল্যাণপতিট্ঠাপনেন ততো পরম্পি সোধেতুং সক্কতি সক্কোতীতি মঞ্ঞামি অহং. কস্মা? তযা হি জাতো মুনি সচ্চনামো যস্মা তযা সত্থারা অরিযায জাতিযা জাতো মুনিভাৰো, মুনি ৰা সমানো অত্তহিতপরহিতানং ইধলোকপরলোকানঞ্চ মুননট্ঠেন ‘‘মুনী’’তি অৰিতথনামো, মোনৰা ৰা মুনি, ‘‘সমণো পব্বজিতো ইসী’’তি অৰিতথনামো তযা জাতো. তস্মা সত্তানং একন্তহিতপটিলাভহেতুভাৰতো ভগৰা তৰ তত্থ গমনং যাচামাতি অত্থো.

ইদানি ‘‘সত্তযুগ’’ন্তি ৰুত্তে পিতুযুগং দস্সেতুং ‘‘সুদ্ধোদনো নামা’’তিআদি ৰুত্তং. সুদ্ধং ওদনং জীৰনং এতস্সাতি সুদ্ধোদনো. বুদ্ধপিতা হি একংসতো সুৰিসুদ্ধকাযৰচীমনোসমাচারো সুৰিসুদ্ধাজীৰো হোতি তথা অভিনীহারসম্পন্নত্তা. মাযনামাতি কুলরূপসীলাচারাদিসম্পত্তিযা ঞাতিমিত্তাদীহি ‘‘মা যাহী’’তি ৰত্তব্বগুণতায ‘‘মাযা’’তি লদ্ধনামা. পরিহরিযাতি ধারেত্ৰা. কাযস্স ভেদাতি সদেৰকস্স লোকস্স চেতিযসদিসস্স অত্তনো কাযস্স ৰিনাসতো উদ্ধং. তিদিৰম্হীতি তুসিতদেৰলোকে.

সাতি মাযাদেৰী. গোতমীতি গোত্তেন তং কিত্তেতি. দিব্বেহি কামেহীতি, তুসিতভৰনপরিযাপন্নেহি দিব্বেহি ৰত্থুকামেহি. সমঙ্গিভূতাতি সমন্নাগতা. কামগুণেহীতি কামকোট্ঠাসেহি, ‘‘কামেহী’’তি ৰত্ৰা ¶ পুন ‘‘কামগুণেহী’’তি ৰচনেন অনেকভাগেহি ৰত্থুকামেহি পরিচারিযতীতি দীপেতি. তেহীতি যস্মিং দেৰনিকাযে নিব্বত্তি, তেহি তুসিতদেৰগণেহি, তেহি ৰা কামগুণেহি. ‘‘সমঙ্গিভূতা পরিৰারিতা’’তি চ ¶ ইত্থিলিঙ্গনিদ্দেসো পুরিমত্তভাৰসিদ্ধং ইত্থিভাৰং, দেৰতাভাৰং ৰা সন্ধায কতো, দেৰূপপত্তি পন পুরিসভাৰেনেৰ জাতা.

এৰং থেরেন যাচিতো ভগৰা তত্থ গমনে বহূনং ৰিসেসাধিগমং দিস্ৰা ৰীসতিসহস্স খীণাসৰপরিৰুতো রাজগহতো অতুরিতচারিকাৰসেন কপিলৰত্থুগামিমগ্গং পটিপজ্জি. থেরো ইদ্ধিযা কপিলৰত্থুং গন্ত্ৰা রঞ্ঞো পুরতো আকাসে ঠিতো অদিট্ঠপুব্বং ৰেসং দিস্ৰা রঞ্ঞা ‘‘কোসি ¶ ত্ৰ’’ন্তি পুচ্ছিতো, ‘‘সচে অমচ্চপুত্তং তযা ভগৰতো সন্তিকং পেসিতং মং ন জানাসি, এৰং পন জানাহী’’তি দস্সেন্তো –

‘‘বুদ্ধস্স পুত্তোম্হি অসয্হসাহিনো, অঙ্গীরসস্সপ্পটিমস্স তাদিনো;

পিতুপিতা ময্হং তুৰংসি সক্ক, ধম্মেন মে গোতম অয্যকোসী’’তি. –

ওসানগাথমাহ.

তত্থ বুদ্ধস্স পুত্তোম্হীতি, সব্বঞ্ঞুবুদ্ধস্স উরে জাততায ওরসপুত্তো অম্হি. অসয্হসাহিনোতি, অভিসম্বোধিতো পুব্বে ঠপেত্ৰা মহাবোধিসত্তং অঞ্ঞেহি সহিতুং ৰহিতুং অসক্কুণেয্যত্তা অসয্হস্স সকলস্স বোধিসম্ভারস্স মহাকারুণিকাধিকারস্স চ সহনতো ৰহনতো, ততো পরম্পি অঞ্ঞেহি সহিতুং অভিভৰিতুং অসক্কুণেয্যত্তা অসয্হানং পঞ্চন্নং মারানং সহনতো অভিভৰনতো, আসযানুসযচরিতাধিমুত্তিআদিৰিভাগাৰবোধনেন যথারহং ৰেনেয্যানং দিট্ঠধম্মিকসম্পরাযিকপরমত্থেহি অনুসাসনীসঙ্খাতস্স অঞ্ঞেহি অসয্হস্স বুদ্ধকিচ্চস্স চ সহনতো, তত্থ ৰা সাধুকারীভাৰতো অসয্হসাহিনো. অঙ্গীরসস্সাতি অঙ্গীকতসীলাদিসম্পত্তিকস্স. ‘‘অঙ্গমঙ্গেহি নিচ্ছরণকওভাসস্সা’’তি অপরে. কেচি পন ‘‘অঙ্গীরসো, সিদ্ধত্থোতি দ্ৰে ¶ নামানি পিতরাযেৰ গহিতানী’’তি ৰদন্তি. অপ্পটিমস্সাতি অনূপমস্স. ইট্ঠানিট্ঠেসু তাদিলক্খণপ্পত্তিযা তাদিনো. পিতুপিতা ময্হং তুৰংসীতি অরিযজাতিৰসেন ময্হং পিতু সম্মাসম্বুদ্ধস্স লোকৰোহারেন ত্ৰং পিতা অসি. সক্কাতি জাতিৰসেন রাজানং আলপতি. ধম্মেনাতি সভাৰেন অরিযজাতি লোকিযজাতীতি দ্ৰিন্নং জাতীনং সভাৰসমোধানেন গোতমাতি রাজানং গোত্তেন আলপতি. অয্যকোসীতি পিতামহো অসি. এত্থ চ ‘‘বুদ্ধস্স পুত্তোম্হী’’তিআদিং ৰদন্তো থেরো অঞ্ঞং ব্যাকাসি.

এৰং ¶ পন অত্তানং জানাপেত্ৰা হট্ঠতুট্ঠেন রঞ্ঞা মহারহে পল্লঙ্কে নিসীদাপেত্ৰা অত্তনো পটিযাদিতস্স নানগ্গরসস্স ভোজনস্স পত্তং পূরেত্ৰা দিন্নে গমনাকারং দস্সেতি. ‘‘কস্মা গন্তুকামত্থ, ভুঞ্জথা’’তি চ ৰুত্তে, ‘‘সত্থু সন্তিকং গন্ত্ৰা ভুঞ্জিস্সামী’’তি. ‘‘কহং পন সত্থা’’তি? ‘‘ৰীসতিসহস্সভিক্খুপরিৰারো তুম্হাকং দস্সনত্থায মগ্গং পটিপন্নো’’তি. ‘‘তুম্হে ইমং পিণ্ডপাতং পরিভুঞ্জিত্ৰা যাৰ মম পুত্তো ইমং নগরং সম্পাপুণাতি, তাৰস্স ইতোৰ পিণ্ডপাতং হরথা’’তি. থেরো ভত্তকিচ্চং কত্ৰা রঞ্ঞো পরিসায চ ধম্মং কথেত্ৰা সত্থু আগমনতো পুরেতরমেৰ সকলং রাজনিৰেসনং রতনত্তযে অভিপ্পসন্নং করোন্তো সব্বেসং পস্সন্তানংযেৰ সত্থু আহরিতব্বভত্তপুণ্ণং পত্তং আকাসে ৰিস্সজ্জেত্ৰা সযম্পি ৰেহাসং অব্ভুগ্গন্ত্ৰা ¶ পিণ্ডপাতং উপনেত্ৰা সত্থু হত্থে ঠপেসি. সত্থা তং পিণ্ডপাতং পরিভুঞ্জি. এৰং সট্ঠিযোজনং মগ্গং দিৰসে দিৰসে যোজনং গচ্ছন্তস্স সত্থু রাজগেহতোৰ ভত্তং আহরিত্ৰা অদাসি. অথ নং ভগৰা ‘‘ময্হং পিতু মহারাজস্স সকলনিৰেসনং পসাদেসী’’তি কুলপ্পসাদকানং অগ্গট্ঠানে ঠপেসীতি.

কাল়ুদাযিত্থেরগাথাৰণ্ণনা নিট্ঠিতা.

২. একৰিহারিযত্থেরগাথাৰণ্ণনা

পুরতো ¶ পচ্ছতো ৰাতিআদিকা আযস্মতো একৰিহারিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো কস্সপদসবলস্স কালে কুলগেহে নিব্বত্তিত্ৰা ৰিঞ্ঞুতং পত্তো সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা অরঞ্ঞং পৰিসিত্ৰা ৰিৰেকৰাসং ৰসি.

সো তেন পুঞ্ঞকম্মেন একং বুদ্ধন্তরং দেৰমনুস্সেসু সংসরন্তো ইমস্মিং বুদ্ধুপ্পাদে ভগৰতি পরিনিব্বুতে ধম্মাসোকরঞ্ঞো কনিট্ঠভাতা হুত্ৰা নিব্বত্তি. অসোকমহারাজা কির সত্থু পরিনিব্বানতো দ্ৰিন্নং ৰস্সসতানং উপরি অট্ঠারসমে ৰস্সে সকলজম্বুদীপে একরজ্জাভিসেকং পত্ৰা অত্তনো কনিট্ঠং তিস্সকুমারং ওপরজ্জে ঠপেত্ৰা একেন উপাযেন তং সাসনে অভিপ্পসন্নং অকাসি. সো একদিৰসং মিগৰং গতো অরঞ্ঞে যোনকমহাধম্মরক্খিতত্থেরং হত্থিনাগেন সালসাখং গহেত্ৰা বীজিযমানং নিসিন্নং দিস্ৰা সঞ্জাতপসাদো ‘‘অহো ৰতাহম্পি অযং মহাথেরো ৰিয পব্বজিত্ৰা অরঞ্ঞে ৰিহরেয্য’’ন্তি চিন্তেসি. থেরো ¶ তস্স চিত্তাচারং ঞত্ৰা তস্স পস্সন্তস্সেৰ আকাসং অব্ভুগ্গন্ত্ৰা অসোকারামে পোক্খরণিযা অভিজ্জমানে উদকে ঠত্ৰা চীৰরঞ্চ উত্তরাসঙ্গঞ্চ আকাসে ওলগ্গেত্ৰা ন্হাযিতুং আরভি. কুমারো থেরস্স আনুভাৰং দিস্ৰা অভিপ্পসন্নো অরঞ্ঞতো নিৰত্তিত্ৰা রাজগেহং গন্ত্ৰা ‘‘পব্বজিস্সামী’’তি রঞ্ঞো আরোচেসি. রাজা তং অনেকপ্পকারং যাচিত্ৰা পব্বজ্জাধিপ্পাযং নিৰত্তেতুং নাসক্খি. সো উপাসকো হুত্ৰা পব্বজ্জাসুখং পত্থেন্তো –

৫৩৭.

‘‘পুরতো পচ্ছতো ৰাপি, অপরো চে ন ৰিজ্জতি;

অতীৰ ফাসু ভৰতি, একস্স ৰসতো ৰনে.

৫৩৮.

‘‘হন্দ ¶ একো গমিস্সামি, অরঞ্ঞং বুদ্ধৰণ্ণিতং;

ফাসু একৰিহারিস্স, পহিতত্তস্স ভিক্খুনো.

৫৩৯.

‘‘যোগী-পীতিকরং রম্মং, মত্তকুঞ্জরসেৰিতং;

একো অত্থৰসী খিপ্পং, পৰিসিস্সামি কাননং.

৫৪০.

‘‘সুপুপ্ফিতে ¶ সীতৰনে, সীতলে গিরিকন্দরে;

গত্তানি পরিসিঞ্চিত্ৰা, চঙ্কমিস্সামি এককো.

৫৪১.

‘‘একাকিযো অদুতিযো, রমণীযে মহাৰনে;

কদাহং ৰিহরিস্সামি, কতকিচ্চো অনাসৰো.

৫৪২.

‘‘এৰং মে কত্তুকামস্স, অধিপ্পাযো সমিজ্ঝতু;

সাধযিস্সামহংযেৰ, নাঞ্ঞো অঞ্ঞস্স কারকো’’তি. –

ইমা ছ গাথা অভাসি.

তত্থ পুরতো পচ্ছতো ৰাতি অত্তনো পুরতো ৰা পচ্ছতো ৰা, ৰা-সদ্দস্স ৰিকপ্পত্থত্তা পস্সতো ৰা অপরো অঞ্ঞো জনো ন ৰিজ্জতি চে, অতীৰ অতিৰিয ফাসু চিত্তসুখং ভৰতি. একৰিহারীভাৰেন একস্স অসহাযস্স. ৰনে ৰসতোতি চিরপরিচিতেন ৰিৰেকজ্ঝাসযেন আকড্ঢিযমানহদযো সো রত্তিন্দিৰং মহাজনপরিৰুতস্স ৰসতো সঙ্গণিকৰিহারং নিব্বিন্দন্তো ৰিৰেকসুখঞ্চ বহুং মঞ্ঞন্তো ৰদতি.

হন্দাতি ৰোস্সগ্গত্থে নিপাতো, তেন ইদানি করীযমানস্স অরঞ্ঞগমনস্স নিচ্ছিতভাৰমাহ. একো গমিস্সামীতি ‘‘সুঞ্ঞাগারে খো, গহপতি, তথাগতা অভিরমন্তী’’তিআদিৰচনতো (চূল়ৰ. ৩০৬) বুদ্ধেহি ৰণ্ণিতং পসট্ঠং অরঞ্ঞং একো অসহাযো গমিস্সামি ৰাসাধিপ্পাযেন উপগচ্ছামি. যস্মা একৰিহারিস্স ঠানাদীসু অসহাযভাৰেন একৰিহারিস্স নিব্বানং পটিপেসিতচিত্ততায পহিতত্তস্স অধিসীলসিক্খাদিকা তিস্সো সিক্খা সিক্খতো ভিক্খুনো অরঞ্ঞং ফাসু ইট্ঠং সুখাৰহন্তি অত্থো.

যোগী-পীতিকরন্তি যোগীনং ভাৰনায যুত্তপ্পযুত্তানং অপ্পসদ্দাদিভাৰেন ঝানৰিপস্সনাদিপীতিং আৰহনতো যোগী-পীতিকরং. ৰিসভাগারম্মণাভাৰেন পটিসল্লানসারুপ্পতায রম্মং. মত্তকুঞ্জরসেৰিতন্তি ¶ মত্তৰরৰারণৰিচরিতং, ইমিনাপি ব্রহারঞ্ঞভাৰেন জনৰিৰেকংযেৰ দস্সেতি. অত্থৰসীতি ইধ অত্থোতি সমণধম্মো অধিপ্পেতো. ‘‘কথং নু খো সো মে ভৰেয্যা’’তি তস্স ৰসং গতো.

সুপুপ্ফিতেতি ¶ ¶ সুট্ঠু পুপ্ফিতে. সীতৰনেতি ছাযূদকসম্পত্তিযা সীতে ৰনে. উভযেনপি তস্স রমণীযতংযেৰ ৰিভাৰেতি. গিরিকন্দরেতি গিরীনং অব্ভন্তরে কন্দরে. কন্তি হি উদকং, তেন দারিতং নিন্নট্ঠানং কন্দরং নাম. তাদিসে সীতলে গিরিকন্দরে ঘম্মপরিতাপং ৰিনোদেত্ৰা অত্তনো গত্তানি পরিসিঞ্চিত্ৰা ন্হাযিত্ৰা চঙ্কমিস্সামি এককোতি কত্থচি অনাযত্তৰুত্তিতং দস্সেতি.

একাকিযোতি একাকী অসহাযো. অদুতিযোতি তণ্হাসঙ্খাতদুতিযাভাৰেন অদুতিযো. তণ্হা হি পুরিসস্স সব্বদা অৰিজহনট্ঠেন দুতিযা নাম. তেনাহ ভগৰা – ‘‘তণ্হাদুতিযো পুরিসো, দীঘমদ্ধান সংসর’’ন্তি (ইতিৰু. ১৫, ১০৫).

এৰং মে কত্তুকামস্সাতি ‘‘হন্দ একো গমিস্সামী’’তিআদিনা ৰুত্তৰিধিনা অরঞ্ঞং গন্ত্ৰা ভাৰনাভিযোগং কত্তুকামস্স মে. অধিপ্পাযো সমিজ্ঝতূতি ‘‘কদাহং ৰিহরিস্সামি, কতকিচ্চো অনাসৰো’’তি এৰং পৰত্তো মনোরথো ইজ্ঝতু সিদ্ধিং পাপুণাতু. অরহত্তপ্পত্তি চ যস্মা ন আযাচনমত্তেন সিজ্ঝতি, নাপি অঞ্ঞেন সাধেতব্বা, তস্মা আহ ‘‘সাধযিস্সামহংযেৰ, নাঞ্ঞো অঞ্ঞস্স কারকো’’তি.

এৰং উপরাজস্স পব্বজ্জায দল়্হনিচ্ছযতং ঞত্ৰা রাজা অসোকারামগমনীযং মগ্গং অলঙ্কারাপেত্ৰা কুমারং সব্বালঙ্কারৰিভূসিতং মহতিযা সেনায মহচ্চরাজানুভাৰেন ৰিহারং নেসি. কুমারো পধানঘরং গন্ত্ৰা মহাধম্মরক্খিতত্থেরস্স সন্তিকে পব্বজি, অনেকসতা মনুস্সা তং অনুপব্বজিংসু. রঞ্ঞো ভাগিনেয্যো সঙ্ঘমিত্তায সামিকো অগ্গিব্রহ্মাপি তমেৰ অনুপব্বজি. সো পব্বজিত্ৰা হট্ঠতুট্ঠো অত্তনা কাতব্বং পকাসেন্তো –

৫৪৩.

‘‘এস বন্ধামি সন্নাহং, পৰিসিস্সামি কাননং;

ন ততো নিক্খমিস্সামি, অপ্পত্তো আসৰক্খযং.

৫৪৪.

‘‘মালুতে উপৰাযন্তে, সীতে সুরভিগন্ধিকে;

অৰিজ্জং দালযিস্সামি, নিসিন্নো নগমুদ্ধনি.

৫৪৫.

‘‘ৰনে ¶ কুসুমসঞ্ছন্নে, পব্ভারে নূন সীতলে;

ৰিমুত্তিসুখেন সুখিতো, রমিস্সামি গিরিব্বজে’’তি. –

তিস্সো গাথা অভাসি.

তত্থ এস বন্ধামি সন্নাহন্তি এসাহং ৰীরিযসঙ্খাতং সন্নাহং বন্ধামি, কাযে চ ¶ জীৰিতে চ নিরপেক্খো ৰীরিযসন্নাহেন সন্নয্হামি. ইদং ৰুত্তং হোতি – যথা নাম সূরো পুরিসো পচ্চত্থিকে পচ্চুপট্ঠিতে ¶ তং জেতুকামো অঞ্ঞং কিচ্চং পহায কৰচপটিমুচ্চনাদিনা যুদ্ধায সন্নয্হতি, যুদ্ধভূমিঞ্চ গন্ত্ৰা পচ্চত্থিকে অজেত্ৰা ততো ন নিৰত্ততি, এৰমহম্পি কিলেসপচ্চত্থিকে জেতুং আদিত্তম্পি সীসং চেলঞ্চ অজ্ঝুপেক্খিত্ৰা চতুব্বিধসম্মপ্পধানৰীরিযসন্নাহং সন্নয্হামি, কিলেসে অজেত্ৰা কিলেসৰিজযযোগ্গং ৰিৰেকট্ঠানং ন ৰিস্সজ্জেমীতি. তেন ৰুত্তং ‘‘পৰিসিস্সামি কাননং ন ততো নিক্খমিস্সামি, অপ্পত্তো আসৰক্খয’’ন্তি.

‘‘মালুতে উপৰাযন্তে’’তিআদিনা অরঞ্ঞট্ঠানস্স কম্মট্ঠানভাৰনাযোগ্যতং ৰদতি, রমিস্সামি নূন গিরিব্বজেতি যোজনা. পব্বতপরিক্খেপে অভিরমিস্সামি মঞ্ঞেতি অনাগতত্থং পরিকপ্পেন্তো ৰদতি. সেসং সুৰিঞ্ঞেয্যমেৰ.

এৰং ৰত্ৰা থেরো অরঞ্ঞং পৰিসিত্ৰা সমণধম্মং করোন্তো উপজ্ঝাযেন সদ্ধিং কলিঙ্গরট্ঠং অগমাসি. তত্থস্স পাদে চম্মিকাবাধো উপ্পজ্জি, তং দিস্ৰা একো ৰেজ্জো ‘‘সপ্পিং, ভন্তে, পরিযেসথ, তিকিচ্ছিস্সামি ন’’ন্তি আহ. থেরো সপ্পিপরিযেসনং অকত্ৰা ৰিপস্সনায এৰ কম্মং করোতি, রোগো ৰড্ঢতি, ৰেজ্জো থেরস্স তত্থ অপ্পোস্সুক্কতং দিস্ৰা সযমেৰ সপ্পিং পরিযেসিত্ৰা থেরং অরোগং অকাসি. সো অরোগো হুত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৪৪.১-১২) –

‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

‘‘নিপ্পপঞ্চো নিরালম্বো, আকাসসমমানসো;

সুঞ্ঞতাবহুলো তাদী, অনিমিত্তরতো ৰসী.

‘‘অসঙ্গচিত্তো ¶ নিক্লেসো, অসংসট্ঠো কুলে গণে;

মহাকারুণিকো ৰীরো, ৰিনযোপাযকোৰিদো.

‘‘উয্যুত্তো পরকিচ্চেসু, ৰিনযন্তো সদেৰকে;

নিব্বানগমনং মগ্গং, গতিং পঙ্কৰিসোসনং.

‘‘অমতং পরমস্সাদং, জরামচ্চুনিৰারণং;

মহাপরিসমজ্ঝে সো, নিসিন্নো লোকতারকো.

‘‘করৰীকরুতো ¶ নাথো, ব্রহ্মঘোসো তথাগতো;

উদ্ধরন্তো মহাদুগ্গা, ৰিপ্পনট্ঠে অনাযকে.

‘‘দেসেন্তো ৰিরজং ধম্মং, দিট্ঠো মে লোকনাযকো;

তস্স ধম্মং সুণিত্ৰান, পব্বজিং অনগারিযং.

‘‘পব্বজিত্ৰা তদাপাহং, চিন্তেন্তো জিনসাসনং;

এককোৰ ৰনে রম্মে, ৰসিং সংসগ্গপীল়িতো.

‘‘সক্কাযৰূপকাসো মে, হেতুভূতো মমাভৰী;

মনসো ৰূপকাসস্স, সংসগ্গভযদস্সিনো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা থেরে তত্থ ৰিহরন্তে রাজা কোটিধনপরিচ্চাগেন ভোজকগিরিৰিহারং নাম কারেত্ৰা থেরং তত্থ ৰাসেসি. সো তত্থ ৰিহরন্তো পরিনিব্বানকালে –

৫৪৬.

‘‘সোহং পরিপুণ্ণসঙ্কপ্পো, চন্দো পন্নরসো যথা;

সব্বাসৰপরিক্খীণো, নত্থি দানি পুনব্ভৰো’’তি. –

ওসানগাথমাহ. সা উত্তানত্থাৰ. তদেৰ চ থেরস্স অঞ্ঞাব্যাকরণং অহোসীতি.

একৰিহারিযত্থেরগাথাৰণ্ণনা নিট্ঠিতা.

৩. মহাকপ্পিনত্থেরগাথাৰণ্ণনা

অনাগতং ¶ যো পটিকচ্চ পস্সতীতিআদিকা আযস্মতো মহাকপ্পিনত্থেরস্স গাথা. কা উপ্পত্তি? অযং কির পদুমুত্তরবুদ্ধকালে হংসৰতীনগরে কুলঘরে নিব্বত্তিত্ৰা ৰিঞ্ঞুতং পত্তো সত্থু সন্তিকে ধম্মং সুণন্তো সত্থারং একং ভিক্খুং ভিক্খুওৰাদকানং অগ্গট্ঠানে ঠপেন্তং ¶ দিস্ৰা তজ্জং অধিকারকম্মং কত্ৰা তং ঠানন্তরং পত্থেসি.

সো তত্থ যাৰজীৰং কুসলং কত্ৰা দেৰমনুস্সেসু সংসরন্তো কস্সপসম্মাসম্বুদ্ধকালে বারাণসিযং কুলগেহে নিব্বত্তিত্ৰা ৰিঞ্ঞুতং পত্তো পুরিসসহস্সগণজেট্ঠকো হুত্ৰা গব্ভসহস্সপটিমণ্ডিতং মহন্তং পরিৰেণং কারাপেসি. তে সব্বেপি জনা যাৰজীৰং কুসলং কত্ৰা তং ¶ উপাসকং জেট্ঠকং কত্ৰা সপুত্তদারা দেৰলোকে নিব্বত্তিত্ৰা একং বুদ্ধন্তরং দেৰমনুস্সেসু সংসরিংসু. তেসু গণজেট্ঠকো অম্হাকং সত্থু নিব্বত্তিতো পুরেতরমেৰ পচ্চন্তদেসে কুক্কুটনামকে নগরে রাজগেহে নিব্বত্তি, তস্স কপ্পিনোতি নামং অহোসি. সেসপুরিসা তস্মিংযেৰ নগরে অমচ্চকুলে নিব্বত্তিংসু. কপ্পিনকুমারো পিতু অচ্চযেন ছত্তং উস্সাপেত্ৰা মহাকপ্পিনরাজা নাম জাতো. সো সুতৰিত্তকতায পাতোৰ চতূহি দ্ৰারেহি সীঘং দূতে পেসেসি – ‘‘যত্থ বহুস্সুতে পস্সথ, ততো নিৰত্তিত্ৰা ময্হং আরোচেথা’’তি.

তেন চ সমযেন অম্হাকং সত্থা লোকে উপ্পজ্জিত্ৰা সাৰত্থিং উপনিস্সায ৰিহরতি. তস্মিং কালে সাৰত্থিৰাসিনো ৰাণিজা সাৰত্থিযং উট্ঠানকভণ্ডং গহেত্ৰা তং নগরং গন্ত্ৰা ভণ্ডং পটিসামেত্ৰা ‘‘রাজানং পস্সিস্সামা’’তি পণ্ণাকারহত্থা রঞ্ঞো আরোচাপেসুং. তে রাজা পক্কোসাপেত্ৰা নিয্যাদিতপণ্ণাকারে ৰন্দিত্ৰা ঠিতে ‘‘কুতো আগতত্থা’’তি পুচ্ছি. ‘‘সাৰত্থিতো, দেৰা’’তি. ‘‘কচ্চি ৰো রট্ঠং সুভিক্খং, ধম্মিকো রাজা’’তি? ‘‘আম, দেৰা’’তি. ‘‘কীদিসো ধম্মো তুম্হাকং দেসে ইদানি পৰত্ততী’’তি? ‘‘তং, দেৰ, ন সক্কা উচ্ছিট্ঠমুখেহি কথেতু’’ন্তি. রাজা সুৰণ্ণভিঙ্গারেন উদকং দাপেসি. তে মুখং ৰিক্খালেত্ৰা দসবলাভিমুখা অঞ্জলিং পগ্গহেত্ৰা, ‘‘দেৰ, অম্হাকং দেসে বুদ্ধরতনং নাম উপ্পন্ন’’ন্তি ¶ আহংসু. রঞ্ঞো ‘‘বুদ্ধো’’তি ৰচনে সুতমত্তেযেৰ সকলসরীরং ফরমানা পীতি উপ্পজ্জি. ততো ‘‘বুদ্ধোতি, তাতা, ৰদেথা’’তি আহ. ‘‘বুদ্ধোতি, দেৰ, ৰদামা’’তি. এৰং তিক্খত্তুং ৰদাপেত্ৰা ‘‘বুদ্ধোতি পদং অপরিমাণ’’ন্তি তস্মিংযেৰ পদে পসন্নো সতসহস্সং দত্ৰা ‘‘অপরং ৰদেথা’’তি পুচ্ছি. ‘‘দেৰ, লোকে ধম্মরতনং নাম উপ্পন্ন’’ন্তি. তম্পি ¶ সুত্ৰা তথেৰ সতসহস্সং দত্ৰা ‘‘অপরং ৰদেথা’’তি পুচ্ছি. ‘‘দেৰ, সঙ্ঘরতনং নাম উপ্পন্ন’’ন্তি. তম্পি সুত্ৰা তথেৰ সতসহস্সং দত্ৰা ‘‘বুদ্ধস্স ভগৰতো সন্তিকে পব্বজিস্সামী’’তি ততোৰ নিক্খমি. অমচ্চাপি তথেৰ নিক্খমিংসু. সো অমচ্চসহস্সেন সদ্ধিং গঙ্গাতীরং পত্ৰা ‘‘সচে সত্থা সম্মাসম্বুদ্ধো, ইমেসং অস্সানং খুরমত্তম্পি মা তেমেতূ’’তি সচ্চাধিট্ঠানং কত্ৰা উদকপিট্ঠেনেৰ পূরং গঙ্গানদিং অতিক্কমিত্ৰা অপরম্পি অড্ঢযোজনৰিত্থারং নদিং তথেৰ অতিক্কমিত্ৰা ততিযং চন্দভাগং নাম মহানদিং পত্ৰা তম্পি তায এৰ সচ্চকিরিযায অতিক্কমি.

সত্থাপি তংদিৰসং পচ্চূসসমযংযেৰ মহাকরুণাসমাপত্তিতো ৰুট্ঠায লোকং ৰোলোকেন্তো ‘‘অজ্জ মহাকপ্পিনো তিযোজনসতিকং রজ্জং পহায অমচ্চসহস্সপরিৰারো মম সন্তিকে পব্বজিতুং আগমিস্সতী’’তি দিস্ৰা ‘‘মযা তেসং পচ্চুগ্গমনং কাতুং যুত্ত’’ন্তি পাতোৰ সরীরপটিজগ্গনং কত্ৰা ভিক্খুসঙ্ঘপরিৰুতো সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তো ¶ সযমেৰ আকাসেন গন্ত্ৰা চন্দভাগায নদিযা তীরে তেসং উত্তরণতিত্থস্সাভিমুখট্ঠানে মহানিগ্রোধমূলে পল্লঙ্কেন নিসিন্নো ছব্বণ্ণবুদ্ধরস্মিযো ৰিস্সজ্জেসি. তে তেন তিত্থেন উত্তরন্তা বুদ্ধরস্মিযো ইতো চিতো চ ৰিধাৰন্তিযো ওলোকেন্তো ভগৰন্তং দিস্ৰা ‘‘যং সত্থারং উদ্দিস্স মযং আগতা, অদ্ধা সো এসো’’তি দস্সনেনেৰ নিট্ঠং গন্ত্ৰা দিট্ঠট্ঠানতো পট্ঠায ওনমিত্ৰা পরমনিপচ্চাকারং করোন্তা ভগৰন্তং উপসঙ্কমিংসু. রাজা ভগৰতো গোপ্ফকেসু গহেত্ৰা সত্থারং ৰন্দিত্ৰা একমন্তং নিসীদি সদ্ধিং অমচ্চসহস্সেন. সত্থা তেসং ধম্মং দেসেসি. দেসনাপরিযোসানে সদ্ধিং পরিসায অরহত্তে পতিট্ঠাসি. তেন ৰুত্তং অপদানে (অপ. থের ২.৫৪.৬৬-১০৭) –

‘‘পদুমুত্তরো ¶ নাম জিনো, সব্বধম্মান পারগূ;

উদিতো অজটাকাসে, রৰীৰ সরদম্বরে.

‘‘ৰচনাভায বোধেতি, ৰেনেয্যপদুমানি সো;

কিলেসপঙ্কং সোসেতি, মতিরংসীহি নাযকো.

‘‘তিত্থিযানং যসে হন্তি, খজ্জোতাভা যথা রৰি;

সচ্চত্থাভং পকাসেতি, রতনংৰ দিৰাকরো.

‘‘গুণানং আযতিভূতো, রতনানংৰ সাগরো;

পজ্জুন্নোরিৰ ভূতানি, ধম্মমেঘেন ৰস্সতি.

‘‘অক্খদস্সো তদা আসিং, নগরে হংসসৰ্হযে;

উপেচ্চ ধম্মমস্সোসিং, জলজুত্তমনামিনো.

‘‘ওৰাদকস্স ভিক্খূনং, সাৰকস্স কতাৰিনো;

গুণং পকাসযন্তস্স, তপ্পযন্তস্স মে মনং.

‘‘সুত্ৰা পতীতো সুমনো, নিমন্তেত্ৰা তথাগতং;

সসিস্সং ভোজযিত্ৰান, তং ঠানমভিপত্থযিং.

‘‘তদা হংসসমভাগো, হংসদুন্দুভিনিস্সনো;

পস্সথেতং মহামত্তং, ৰিনিচ্ছযৰিসারদং.

‘‘পতিতং পাদমূলে মে, সমুগ্গততনূরুহং;

জীমূতৰণ্ণং পীণংসং, পসন্ননযনাননং.

‘‘পরিৰারেন মহতা, রাজযুত্তং মহাযসং;

এসো কতাৰিনো ঠানং, পত্থেতি মুদিতাসযো.

‘‘ইমিনা পণিপাতেন, চাগেন পণিধীহি চ;

কপ্পসতসহস্সানি, নুপপজ্জতি দুগ্গতিং.

‘‘দেৰেসু ¶ দেৰসোভগ্গং, মনুস্সেসু মহন্ততং;

অনুভোত্ৰান সেসেন, নিব্বানং পাপুণিস্সতি.

‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ¶ ধম্মেসু দাযাদো, ওরসো ধম্মনিম্মিতো;

কপ্পিনো নাম নামেন, হেস্সতি সত্থু সাৰকো.

‘‘ততোহং সুকতং কারং, কত্ৰান জিনসাসনে;

জহিত্ৰা মানুসং দেহং, তুসিতং অগমাসহং.

‘‘দেৰমানুসরজ্জানি, সতসো অনুসাসিয;

বারাণসিযমাসন্নে, জাতো কেণিযজাতিযং.

‘‘সহস্সপরিৰারেন, সপজাপতিকো অহং;

পঞ্চপচ্চেকবুদ্ধানং, সতানি সমুপট্ঠহিং.

‘‘তেমাসং ভোজযিত্ৰান, পচ্ছাদম্হ তিচীৰরং;

ততো চুতা মযং সব্বে, অহুম্হ তিদসূপগা.

‘‘পুনো সব্বে মনুস্সত্তং, অগমিম্হ ততো চুতা;

কুক্কুটম্হি পুরে জাতা, হিমৰন্তস্স পস্সতো.

‘‘কপ্পিনো নামহং আসিং, রাজপুত্তো মহাযসো;

সেসামচ্চকুলে জাতা, মমেৰ পরিৰারযুং.

‘‘মহারজ্জসুখং পত্তো, সব্বকামসমিদ্ধিমা;

ৰাণিজেহি সমক্খাতং, বুদ্ধুপ্পাদমহং সুণিং.

‘‘বুদ্ধো লোকে সমুপ্পন্নো, অসমো একপুগ্গলো;

সো পকাসেতি সদ্ধম্মং, অমতং সুখমুত্তমং.

‘‘সুযুত্তা তস্স সিস্সা চ, সুমুত্তা চ অনাসৰা;

সুত্ৰা নেসং সুৰচনং, সক্করিত্ৰান ৰাণিজে.

‘‘পহায রজ্জং সামচ্চো, নিক্খমিং বুদ্ধমামকো;

নদিং দিস্ৰা মহাচন্দং, পূরিতং সমতিত্তিকং.

‘‘অপ্পতিট্ঠং অনালম্বং, দুত্তরং সীঘৰাহিনিং;

গুণং সরিত্ৰা বুদ্ধস্স, সোত্থিনা সমতিক্কমিং.

‘‘ভৰসোতং সচে বুদ্ধো, তিণ্ণো লোকন্তগূ ৰিদূ;

এতেন সচ্চৰজ্জেন, গমনং মে সমিজ্ঝতু.

‘‘যদি ¶ সন্তিগমো মগ্গো, মোক্খো চচ্চন্তিকং সুখং;

এতেন সচ্চৰজ্জেন, গমনং মে সমিজ্ঝতু.

‘‘সঙ্ঘো ¶ চে তিণ্ণকন্তারো, পুঞ্ঞক্খেত্তো অনুত্তরো;

এতেন সচ্চৰজ্জেন, গমনং মে সমিজ্ঝতু.

‘‘সহ কতে সচ্চৰরে, মগ্গা অপগতং জলং;

ততো সুখেন উত্তিণ্ণো, নদীতীরে মনোরমে.

‘‘নিসিন্নং অদ্দসং বুদ্ধং, উদেন্তংৰ পভঙ্করং;

জলন্তং হেমসেলংৰ, দীপরুক্খংৰ জোতিতং.

‘‘সসিংৰ তারাসহিতং, সাৰকেহি পুরক্খতং;

ৰাসৰং ৰিয ৰস্সন্তং, দেসনাজলদন্তরং.

‘‘ৰন্দিত্ৰান সহামচ্চো, একমন্তমুপাৰিসিং;

ততো নো আসযং ঞত্ৰা, বুদ্ধো ধম্মমদেসযি.

‘‘সুত্ৰান ধম্মং ৰিমলং, অৰোচুম্হ মযং জিনং;

পব্বাজেহি মহাৰীর, নিব্বিন্দাম্হ মযং ভৰে.

‘‘স্ৰক্খাতো ভিক্খৰে ধম্মো, দুক্খন্তকরণায ৰো;

চরথ ব্রহ্মচরিযং, ইচ্চাহ মুনিসত্তমো.

‘‘সহ ৰাচায সব্বেপি, ভিক্খুৰেসধরা মযং;

অহুম্হ উপসম্পন্না, সোতাপন্না চ সাসনে.

‘‘ততো জেতৰনং গন্ত্ৰা, অনুসাসি ৰিনাযকো;

অনুসিট্ঠো জিনেনাহং, অরহত্তমপাপুণিং.

‘‘ততো ভিক্খুসহস্সানি, অনুসাসিমহং তদা;

মমানুসাসনকরা, তেপি আসুং অনাসৰা.

‘‘জিনো তস্মিং গুণে তুট্ঠো, এতদগ্গে ঠপেসি মং;

ভিক্খুওৰাদকানগ্গো, কপ্পিনোতি মহাজনে.

‘‘সতসহস্সে কতং কম্মং, ফলং দস্সেসি মে ইধ;

পমুত্তো সরৰেগোৰ, কিলেসে ঝাপযিং মম.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং ¶ পত্ৰা পন তে সব্বেৰ সত্থারং পব্বজ্জং যাচিংসু. সত্থা তে ‘‘এথ, ভিক্খৰো’’তি আহ. সা এৰ তেসং পব্বজ্জা উপসম্পদা চ অহোসি. সত্থা তং ভিক্খুসহস্সং আদায আকাসেন জেতৰনং অগমাসি. অথেকদিৰসং ভগৰা তস্সন্তেৰাসিকে ভিক্খূ আহ – ‘‘কচ্চি, ভিক্খৰে, কপ্পিনো ভিক্খূনং ধম্মং দেসেতী’’তি? ‘‘ন, ভগৰা, দেসেতি ¶ . অপ্পোস্সুক্কো দিট্ঠধম্মসুখৰিহারমনুযুত্তো ৰিহরতি, ওৰাদমত্তম্পি ন দেতী’’তি. সত্থা ¶ থেরং পক্কোসাপেত্ৰা – ‘‘সচ্চং কির ত্ৰং, কপ্পিন, অন্তেৰাসিকানং ওৰাদমত্তম্পি ন দেসী’’তি? ‘‘সচ্চং, ভগৰা’’তি. ‘‘ব্রাহ্মণ, মা এৰং করি, অজ্জ পট্ঠায উপগতানং ধম্মং দেসেহী’’তি. ‘‘সাধু, ভন্তে’’তি থেরো সত্থু ৰচনং সিরসা সম্পটিচ্ছিত্ৰা একোৰাদেনেৰ সমণসহস্সং অরহত্তে পতিট্ঠাপেসি. তেন নং সত্থা পটিপাটিযা অত্তনো সাৰকে থেরে ঠানন্তরে ঠপেন্তো ভিক্খুওৰাদকানং অগ্গট্ঠানে ঠপেসি. অথেকদিৰসং থেরো ভিক্খুনিযো ওৰদন্তো –

৫৪৭.

‘‘অনাগতং যো পটিকচ্চ পস্সতি, হিতঞ্চ অত্থং অহিতঞ্চ তং দ্ৰযং;

ৰিদ্দেসিনো তস্স হিতেসিনো ৰা, রন্ধং ন পস্সন্তি সমেক্খমানা.

৫৪৮.

‘‘আনাপানসতী যস্স, পরিপুণ্ণা সুভাৰিতা;

অনুপুব্বং পরিচিতা, যথা বুদ্ধেন দেসিতা;

সোমং লোকং পভাসেতি, অব্ভা মুত্তোৰ চন্দিমা.

৫৪৯.

‘‘ওদাতং ৰত মে চিত্তং, অপ্পমাণং সুভাৰিতং;

নিব্বিদ্ধং পগ্গহীতঞ্চ, সব্বা ওভাসতে দিসা.

৫৫০.

‘‘জীৰতে ৰাপি সপ্পঞ্ঞো, অপি ৰিত্তপরিক্খযো;

পঞ্ঞায চ অলাভেন, ৰিত্তৰাপি ন জীৰতি.

৫৫১.

‘‘পঞ্ঞা সুতৰিনিচ্ছিনী, পঞ্ঞা কিত্তিসিলোকৰদ্ধনী;

পঞ্ঞাসহিতো নরো ইধ, অপি দুক্খেসু সুখানি ৰিন্দতি.

৫৫২.

‘‘নাযং ¶ অজ্জতনো ধম্মো, নচ্ছেরো নপি অব্ভুতো;

যত্থ জাযেথ মীযেথ, তত্থ কিং ৰিয অব্ভুতং.

৫৫৩.

‘‘অনন্তরঞ্হি জাতস্স, জীৰিতা মরণং ধুৰং;

জাতা জাতা মরন্তীধ, এৰং ধম্মা হি পাণিনো.

৫৫৪.

‘‘ন হেতদত্থায মতস্স হোতি, যং জীৰিতত্থং পরপোরিসানং;

মতম্হি রুণ্ণং ন যসো ন লোক্যং, ন ৰণ্ণিতং সমণব্রাহ্মণেহি.

৫৫৫.

‘‘চক্খুং সরীরং উপহন্তি তেন, নিহীযতি ৰণ্ণবলং মতী চ;

আনন্দিনো তস্স দিসা ভৰন্তি, হিতেসিনো নাস্স সুখী ভৰন্তি.

৫৫৬.

‘‘তস্মা হি ইচ্ছেয্য কুলে ৰসন্তে, মেধাৰিনো চেৰ বহুস্সুতে চ;

যেসঞ্হি পঞ্ঞাৰিভৰেন কিচ্চং, তরন্তি নাৰায নদিংৰ পুণ্ণ’’ন্তি. –

ইমা গাথা অভাসি.

তত্থ ¶ ¶ অনাগতন্তি ন আগতং, অৰিন্দন্তি, অত্থো. পটিকচ্চাতি পুতেতরংযেৰ. পস্সতীতি ওলোকেতি. অত্থন্তি কিচ্চং. তং দ্ৰযন্তি হিতাহিতং. ৰিদ্দেসিনোতি অমিত্তা. হিতেসিনোতি মিত্তা. রন্ধন্তি ছিদ্দং. সমেক্খমানাতি গৰেসন্তা. ইদং ৰুত্তং হোতি – যো পুগ্গলো অত্তনো হিতাৰহং অহিতাৰহং তদুভযঞ্চ অত্থং কিচ্চং অনাগতং অসম্পত্তং পুরেতরংযেৰ পঞ্ঞাচক্খুনা অহং ৰিয পস্সতি ৰীমংসতি ৰিচারেতি, তস্স অমিত্তা ৰা অহিতজ্ঝাসযেন মিত্তা ৰা হিতজ্ঝাসযেন রন্ধং গৰেসন্তা ন পস্সন্তি, তাদিসো পঞ্ঞৰা পুগ্গলো অচ্ছিদ্দৰুত্তি, তস্মা তুম্হেহি তথারূপেহি ভৰিতব্বন্তি.

ইদানি আনাপানসতিভাৰনায গুণং দস্সেন্তো তত্থ তানি যোজেতুং ‘‘আনাপানসতী যস্সা’’তি দুতিযং গাথমাহ. তত্থ আনন্তি ¶ অস্সাসো. অপানন্তি পস্সাসো. অস্সাসপস্সাসনিমিত্তারম্মণা সতি আনাপানসতি. সতিসীসেন চেত্থ তংসম্পযুত্তসমাধিভাৰনা অধিপ্পেতা. যস্সাতি, যস্স যোগিনো. পরিপুণ্ণা সুভাৰিতাতি চতুন্নং সতিপট্ঠানানং সোল়সন্নঞ্চ আকারানং পারিপূরিযা সব্বসো পুণ্ণা সত্তন্নং বোজ্ঝঙ্গানং ৰিজ্জাৰিমুত্তীনঞ্চ পারিপূরিযা সুট্ঠু ভাৰিতা ৰড্ঢিতা. অনুপুব্বং পরিচিতা, যথা বুদ্ধেন দেসিতাতি ‘‘সো সতোৰ অস্সসতী’’তিআদিনা (দী. নি. ২.৩৭৪; ম. নি. ১.১০৭) যথা ভগৰতা দেসিতা, তথা অনুপুব্বং অনুক্কমেন পরিচিতা আসেৰিতা ভাৰিতা. সোমং লোকং পভাসেতি, অব্ভা মুত্তোৰ চন্দিমাতি সো যোগাৰচরো যথা অব্ভাদিউপক্কিলেসা ৰিমুত্তো চন্দো চন্দালোকেন ইমং ওকাসলোকং পভাসেতি, এৰং অৰিজ্জাদিউপক্কিলেসৰিমুত্তো ঞাণালোকেন অত্তসন্তানপতিতং পরসন্তানপতিতঞ্চ সঙ্খারলোকং পভাসেতি পকাসেতি. তস্মা তুম্হেহি আনাপানসতিভাৰনা ভাৰেতব্বাতি অধিপ্পাযো.

ইদানি অত্তানং নিদস্সনং কত্ৰা ভাৰনাভিযোগস্স সফলতং দস্সেন্তো ‘‘ওদাতং ৰত মে চিত্ত’’ন্তি ততিযং গাথমাহ. তস্সত্থো – নীৰরণমলৰিগমতো ওদাতং সুদ্ধং ৰত মম চিত্তং. যথা পমাণকরা রাগাদযো পহীনা, অপ্পমাণঞ্চ নিব্বানং পচ্চক্খং কতং অহোসি, তথা ভাৰিতত্তা অপ্পমাণং সুভাৰিতং, ততো এৰ চতুসচ্চং নিব্বিদ্ধং পটিৰিজ্ঝিতং, সকলসংকিলেসপক্খতো পগ্গহিতঞ্চ হুত্ৰা দুক্খাদিকা পুব্বন্তাদিকা চ দিসা ওভাসতে তত্থ ৰিতিণ্ণকঙ্খত্তা সব্বধম্মেসু ৰিগতসম্মোহত্তা চ. তস্মা তুম্হেহিপি এৰং চিত্তং ভাৰেতব্বন্তি দস্সেতি.

যথা ভাৰনামযা পঞ্ঞা চিত্তমলৰিসোধনাদিনা পুরিসস্স বহুপকারা, এৰং ইতরাপীতি দস্সেন্তো ¶ ‘‘জীৰতে ৰাপি সপ্পঞ্ঞো’’তি চতুত্থগাথমাহ. তস্সত্থো – পরিক্খীণধনোপি সপ্পঞ্ঞজাতিকো ইতরীতরসন্তোসেন সন্তুট্ঠো অনৰজ্জায জীৰিকায জীৰতিযেৰ. তস্স হি জীৰিতং জীৰিতং নাম. তেনাহ ভগৰা – ‘‘পঞ্ঞাজীৰিং জীৰিতমাহু সেট্ঠ’’ন্তি (সং. নি. ১.৭৩, ২৪৬; সু. নি. ১৮৪). দুম্মেধপুগ্গলো পন পঞ্ঞায অলাভেন ¶ দিট্ঠধম্মিকং সম্পরাযিকঞ্চ অত্থং ¶ ৰিরাধেন্তো ৰিত্তৰাপি ন জীৰতি, গরহাদিপ্পত্তিযা জীৰন্তো নাম ন তস্স হোতি, অনুপাযঞ্ঞুতায ৰা যথাধিগতং ধনং নাসেন্তো জীৰিতম্পি সন্ধারেতুং ন সক্কোতিযেৰ, তস্মা পারিহারিযপঞ্ঞাপি তুম্হেহি অপ্পমত্তেহি সম্পাদেতব্বাতি অধিপ্পাযো.

ইদানি পঞ্ঞায আনিসংসে দস্সেতুং ‘‘পঞ্ঞা সুতৰিনিচ্ছিনী’’তি পঞ্চমং গাথমাহ. তত্থ পঞ্ঞা সুতৰিনিচ্ছিনীতি পঞ্ঞা নামেসা সুতস্স ৰিনিচ্ছযিনী, যথাসুতে সোতপথমাগতে অত্থে ‘‘অযং অকুসলো, অযং কুসলো, অযং সাৰজ্জো, অযং অনৰজ্জো’’তিআদিনা ৰিনিচ্ছযজননী. কিত্তিসিলোকৰদ্ধনীতি কিত্তিযা সম্মুখা পসংসায সিলোকস্স পত্থটযসভাৰস্স ৰদ্ধনী, পঞ্ঞৰতোযেৰ হি কিত্তিআদযো ৰিঞ্ঞূনং পাসংসভাৰতো. পঞ্ঞাসহিতোতি পারিহারিযপঞ্ঞায, ৰিপস্সনাপঞ্ঞায চ যুত্তো. অপি দুক্খেসু সুখানি ৰিন্দতীতি একন্তদুক্খসভাৰেসু খন্ধাযতনাদীসু সম্মাপটিপত্তিযা যথাভূতসভাৰাৰবোধেন নিরামিসানিপি সুখানি পটিলভতি.

ইদানি তাসং ভিক্খুনীনং অনিচ্চতাপটিসংযুত্তং ধীরভাৰাৰহং ধম্মং কথেন্তো ‘‘নাযং অজ্জতনো ধম্মো’’তিআদিনা সেসগাথা অভাসি. তত্রাযং সঙ্খেপত্থো – য্ৰাযং সত্তানং জাযনমীযনসভাৰো, অযং ধম্মো অজ্জতনো অধুনাগতো ন হোতি, অভিণ্হপৰত্তিকতায ন অচ্ছরিযো, অব্ভুতপুব্বতাভাৰতো নাপি অব্ভুতো. তস্মা যত্থ জাযেথ মীযেথ, যস্মিং লোকে সত্তো জাযেয্য, সো একংসেন মীযেথ, তত্থ কিং ৰিয? কিং নাম অব্ভুতং সিযা? সভাৰিকত্তা মরণস্স – ন হি খণিকমরণস্স কিঞ্চি কারণং অত্থি. যতো অনন্তরঞ্হি জাতস্স, জীৰিতা মরণং ধুৰং জাতস্স জাতিসমনন্তরং জীৰিততো মরণং একন্তিকং উপ্পন্নানং খন্ধানং একংসেন ভিজ্জনতো. যো পনেত্থ জীৰতীতি লোকৰোহারো, সো তদুপাদানস্স অনেকপচ্চযাযত্ততায অনেকন্তিকো, যস্মা এতদেৰং, তস্মা জাতা মরন্তীধ, এৰংধম্মা হি পাণিনোতি অযং সত্তানং পকতি, যদিদং জাতানং মরণন্তি জাতিযা মরণানুবন্ধনতং আহ.

ইদানি ¶ যস্মা তাসু ভিক্খুনীসু কাচি সোকবন্ধিতচিত্তাপি অত্থি, তস্মা তাসং সোকৰিনোদনং কাতুং ‘‘ন হেতদত্থাযাতিআদি ৰুত্তং. তত্থ ন হেতদত্থায মতস্স হোতীতি যং মতস্স ¶ জীৰিতত্থং জীৰিতনিমিত্তং পরপোরিসানং পরপুগ্গলানং রুণ্ণং, এতং তস্স মতস্স সত্তস্স জীৰিতত্থং তাৰ তিট্ঠতু, কস্সচিপি অত্থায ন হোতি, যে পন রুদন্তি, তেসম্পি মতম্হি মতপুগ্গলনিমিত্তং রুণ্ণং, ন যসো ন লোক্যং যসাৰহং ৰিসুদ্ধাৰহঞ্চ ন হোতি ¶ . ন ৰণ্ণিতং সমণব্রাহ্মণেহীতি ৰিঞ্ঞুপ্পসট্ঠম্পি ন হোতি, অথ খো ৰিঞ্ঞুগরহিতমেৰাতি অত্থো.

ন কেৰলমেতেৰ যে রুদতো আদীনৰা, অথ খো ইমেপীতি দস্সেন্তো ‘‘চক্খুং সরীরং উপহন্তী’’তি গাথং ৰত্ৰা ততো পরং সোকাদিঅনত্থপটিবাহনত্থং কল্যাণমিত্তপযিরুপাসনাযং তা নিযোজেন্তো ‘‘তস্মা’’তিআদিনা ওসানগাথমাহ. তত্থ তস্মাতি যস্মা রুণ্ণং রুদন্তস্স পুগ্গলস্স চক্খুং সরীরঞ্চ উপহন্তি ৰিবাধতি, তেন রুণ্ণেন ৰণ্ণো বলং মতি চ নিহীযতি পরিহাযতি, তস্স রুদন্তস্স পুগ্গলস্স দিসা সপত্তা আনন্দিনো পমোদৰন্তো পীতিৰন্তো ভৰন্তি. হিতেসিনো মিত্তা দুক্খী দুক্খিতা ভৰন্তি তস্মা ধম্মোজপঞ্ঞায সমন্নাগতত্তা মেধাৰিনো দিট্ঠধম্মিকাদিঅত্থসন্নিস্সিতস্স বাহুসচ্চস্স পারিপূরিযা বহুস্সুতে, অত্তনো কুলে ৰসন্তে ইচ্ছেয্য পাটিকঙ্খেয্য কুলূপকে করেয্য. যেসন্তি যেসং মেধাৰীনং বহুস্সুতানং পণ্ডিতানং পঞ্ঞাৰিভৰেন পঞ্ঞাবলেন যথা মহোঘস্স পুণ্ণং নদিং নাৰায তরন্তি, এৰং কুলপুত্তা অত্তনো অত্থকিচ্চং তরন্তি পারং পাপুণন্তি. তে ইচ্ছেয্য কুলে ৰসন্তেতি যোজনা.

এৰং থেরো তাসং ভিক্খুনীনং ধম্মং কথেত্ৰা ৰিস্সজ্জেসি. তা থেরস্স ওৰাদে ঠত্ৰা সোকং ৰিনোদেত্ৰা যোনিসো পটিপজ্জন্তিযো সদত্থং পরিপূরেসুং.

মহাকপ্পিনত্থেরগাথাৰণ্ণনা নিট্ঠিতা.

৪. চূল়পন্থকত্থেরগাথাৰণ্ণনা

দন্ধা ¶ ময্হং গতীতিআদিকা আযস্মতো চূল়পন্থকত্থেরস্স গাথা. কা উপ্পত্তি? যদেত্থ অট্ঠুপ্পত্তিৰসেন ৰত্তব্বং, তং অট্ঠকনিপাতে মহাপন্থকৰত্থুস্মিং (থেরগা. অট্ঠ. ২.মহাপন্থকত্থেরগাথাৰণ্ণনা) ৰুত্তমেৰ. অযং পন ৰিসেসো – মহাপন্থকত্থেরো অরহত্তং পত্ৰা অগ্গফলসুখেন ৰীতিনামেন্তো চিন্তেসি – ‘‘কথং নু খো সক্কা চূল়পন্থকম্পি ইমস্মিং সুখে পতিট্ঠপেতু’’ন্তি? সো অত্তনো অয্যকং ধনসেট্ঠিং উপসঙ্কমিত্ৰা আহ – ‘‘সচে, মহাসেট্ঠি, অনুজানাথ ¶ , অহং চূল়পন্থকং পব্বাজেয্য’’ন্তি. ‘‘পব্বাজেথ, ভন্তে’’তি. থেরো তং পব্বাজেসি. সো দসসু সীলেসু পতিট্ঠিতো ভাতু সন্তিকে –

‘‘পদুমং যথা কোকনদং সুগন্ধং, পাতো সিযা ফুল্লমৰীতগন্ধং;

অঙ্গীরসং পস্স ৰিরোচমানং, তপন্তমাদিচ্চমিৰন্তলিক্খে’’তি. (সং. নি. ১.১২৩; অ. নি. ৫.১৯৫) –

গাথং ¶ উগ্গণ্হন্তো চতূহি মাসেহি গহেতুং নাসক্খি, গহিতগহিতং পদং হদযে ন তিট্ঠতি. অথ নং মহাপন্থকো আহ – ‘‘পন্থক, ত্ৰং ইমস্মিং সাসনে অভব্বো, চতূহি মাসেহি একগাথম্পি গহেতুং ন সক্কোসি. পব্বজিতকিচ্চং পন ত্ৰং কথং মত্থকং পাপেস্সসি? নিক্খম ইতো’’তি. সো থেরেন পণামিতো দ্ৰারকোট্ঠকসমীপে রোদমানো অট্ঠাসি.

তেন চ সমযেন সত্থা জীৰকম্বৰনে ৰিহরতি. অথ জীৰকো পুরিসং পেসেসি, ‘‘পঞ্চহি ভিক্খুসতেহি সদ্ধিং সত্থারং নিমন্তেহী’’তি. তেন চ সমযেন আযস্মা মহাপন্থকো ভত্তুদ্দেসকো হোতি. সো ‘‘পঞ্চন্নং ভিক্খুসতানং ভিক্খং পটিচ্ছথ, ভন্তে’’তি ৰুত্তো ‘‘চূল়পন্থকং ঠপেত্ৰা সেসানং পটিচ্ছামী’’তি আহ. তং সুত্ৰা চূল়পন্থকো ভিয্যোসোমত্তায দোমনস্সপ্পত্তো অহোসি. সত্থা তস্স চিত্তক্খেদং ঞত্ৰা, ‘‘চূল়পন্থকো মযা কতেন উপাযেন বুজ্ঝিস্সতী’’তি তস্স অৰিদূরে ঠানে অত্তানং দস্সেত্ৰা ‘‘কিং, পন্থক, রোদসী’’তি পুচ্ছি. ‘‘ভাতা মং, ভন্তে, পণামেতী’’তি আহ. ‘‘পন্থক, মা চিন্তযি, মম সাসনে তুয্হং পব্বজ্জা, এহি, ইমং গহেত্ৰা ‘রজোহরণং, রজোহরণ’ন্তি মনসি করোহী’’তি ইদ্ধিযা সুদ্ধং চোল়ক্খণ্ডং অভিসঙ্খরিত্ৰা অদাসি. সো সত্থারা ¶ দিন্নং চোল়ক্খণ্ডং ‘‘রজোহরণং, রজোহরণ’’ন্তি হত্থেন পরিমজ্জন্তো নিসীদি. তস্স তং পরিমজ্জন্তস্স কিলিট্ঠধাতুকং জাতং, পুন পরিমজ্জন্তস্স উক্খলিপরিপুঞ্ছনসদিসং জাতং. সো ঞাণস্স পরিপক্কত্তা এৰং চিন্তেসি – ‘‘ইদং চোল়ক্খণ্ডং পকতিযা পরিসুদ্ধং, ইমং উপাদিণ্ণকসরীরং নিস্সায কিলিট্ঠং অঞ্ঞথা জাতং, তস্মা অনিচ্চং যথাপেতং, এৰং চিত্তম্পী’’তি খযৰযং পট্ঠপেত্ৰা তস্মিংযেৰ নিমিত্তে ঝানানি নিব্বত্তেত্ৰা ঝানপাদকং ৰিপস্সনং পট্ঠপেত্ৰা সহ পটিসম্ভিদাহি অরহত্তং পাপুণি. তেন ৰুত্তং অপদানে (অপ. থের ১.২.৩৫-৫৪) –

‘‘পদুমুত্তরো নাম জিনো, আহুতীনং পটিগ্গহো;

গণম্হা ৰূপকট্ঠো সো, হিমৰন্তে ৰসী তদা.

‘‘অহম্পি ¶ হিমৰন্তম্হি, ৰসামি অস্সমে তদা;

অচিরাগতং মহাৰীরং, উপেসিং লোকনাযকং.

‘‘পুপ্ফচ্ছত্তং গহেত্ৰান, উপগচ্ছিং নরাসভং;

সমাধিং সমাপজ্জন্তং, অন্তরাযমকাসহং.

‘‘উভো হত্থেহি পগ্গয্হ, পুপ্ফচ্ছত্তং অদাসহং;

পটিগ্গহেসি ভগৰা, পদুমুত্তরো মহামুনি.

‘‘সব্বে দেৰা অত্তমনা, হিমৰন্তং উপেন্তি তে;

সাধুকারং পৰত্তেসুং, অনুমোদিস্সতি চক্খুমা.

‘‘ইদং ৰত্ৰান তে দেৰা, উপগচ্ছুং নরুত্তমং;

আকাসে ধারযন্তস্স, পদুমচ্ছত্তমুত্তমং.

‘‘সতপত্তছত্তং পগ্গয্হ, অদাসি তাপসো মম;

তমহং কিত্তযিস্সামি, সুণাথ মম ভাসতো.

‘‘পঞ্চৰীসতিকপ্পানি, দেৰরজ্জং করিস্সতি;

চতুত্তিংসতিক্খত্তুঞ্চ, চক্কৰত্তী ভৰিস্সতি.

‘‘যং যং যোনিং সংসরতি, দেৰত্তং অথ মানুসং;

অব্ভোকাসে পতিট্ঠন্তং, পদুমং ধারযিস্সতি.

‘‘কপ্পসতসহস্সম্হি ¶ , ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘পকাসিতে পাৰচনে, মনুস্সত্তং লভিস্সতি;

মনোমযম্হি কাযম্হি, উত্তমো সো ভৰিস্সতি.

‘‘দ্ৰে ভাতরো ভৰিস্সন্তি, উভোপি পন্থকৰ্হযা;

অনুভোত্ৰা উত্তমত্থং, জোতযিস্সন্তি সাসনং.

‘‘সোহং অট্ঠারসৰস্সো, পব্বজিং অনগারিযং;

ৰিসেসাহং ন ৰিন্দামি, সক্যপুত্তস্স সাসনে.

‘‘দন্ধা ময্হং গতী আসি, পরিভূতো পুরে অহুং;

ভাতা চ মং পণামেসি, গচ্ছ দানি সকং ঘরং.

‘‘সোহং পণামিতো সন্তো, সঙ্ঘারামস্স কোট্ঠকে;

দুম্মনো তত্থ অট্ঠাসিং, সামঞ্ঞস্মিং অপেক্খৰা.

‘‘ভগৰা তত্থ আগচ্ছি, সীসং ময্হং পরামসি;

বাহায মং গহেত্ৰান, সঙ্ঘারামং পৰেসযি.

‘‘অনুকম্পায মে সত্থা, অদাসি পাদপুঞ্ছনিং;

এৰং সুদ্ধং অধিট্ঠেহি, একমন্তমধিট্ঠহং.

‘‘হত্থেহি ¶ তমহং গয্হ, সরিং কোকনদং অহং;

তত্থ চিত্তং ৰিমুচ্চি মে, অরহত্তং অপাপুণিং.

‘‘মনোমযেসু কাযেসু, সব্বত্থ পারমিং গতো;

সব্বাসৰে পরিঞ্ঞায, ৰিহরামি অনাসৰো.

‘‘পটিসম্ভিদা চতস্সো…পে… কতং বুদ্ধস্স সাসন’’ন্তি.

অরহত্তমগ্গেনেৰস্স তেপিটকং পঞ্চাভিঞ্ঞা চ আগমিংসু. সত্থা একেন ঊনেহি পঞ্চহি ভিক্খুসতেহি সদ্ধিং গন্ত্ৰা জীৰকস্স নিৰেসনে পঞ্ঞত্তে আসনে নিসীদি. চূল়পন্থকো পন অত্তনো ভিক্খায অপ্পটিচ্ছিতত্তা এৰ ন গতো. জীৰকো যাগুং দাতুং আরভি, সত্থা পত্তং হত্থেন পিদহি. ‘‘কস্মা, ভন্তে, ন গণ্হথা’’তি ৰুত্তে – ‘‘ৰিহারে একো ভিক্খু অত্থি, জীৰকা’’তি. সো পুরিসং পহিণি, ‘‘গচ্ছ, ভণে, ৰিহারে নিসিন্নং অয্যং গহেত্ৰা ¶ এহী’’তি. চূল়পন্থকত্থেরোপি রূপেন কিরিযায চ একম্পি একেন অসদিসং ভিক্খুসহস্সং নিম্মিনিত্ৰা নিসীদি. সো পুরিসো ৰিহারে ভিক্খূনং বহুভাৰং দিস্ৰা গন্ত্ৰা জীৰকস্স কথেসি – ‘‘ইমস্মা ভিক্খুসঙ্ঘা ৰিহারে ভিক্খুসঙ্ঘো বহুতরো, পক্কোসিতব্বং অয্যং ন জানামী’’তি. জীৰকো সত্থারং পটিপুচ্ছি – ‘‘কোনামো, ভন্তে, ৰিহারে নিসিন্নো ভিক্খূ’’তি? ‘‘চূল়পন্থকো নাম, জীৰকা’’তি. ‘‘গচ্ছ ¶ , ভণে, ‘চূল়পন্থকো নাম কতরো’তি পুচ্ছিত্ৰা তং আনেহী’’তি. সো ৰিহারং গন্ত্ৰা ‘‘চূল়পন্থকো নাম কতরো, ভন্তে’’তি পুচ্ছি. ‘‘অহং চূল়পন্থকো’’,‘‘অহং চূল়পন্থকো’’তি একপহারেনেৰ ভিক্খুসহস্সম্পি কথেসি. সো পুনাগন্ত্ৰা তং পৰত্তিং জীৰকস্স আরোচেসি. জীৰকো পটিৰিদ্ধসচ্চত্তা ‘‘ইদ্ধিমা মঞ্ঞে, অয্যো’’তি নযতো ঞত্ৰা ‘‘গচ্ছ, ভণে, পঠমং কথনকময্যমেৰ ‘তুম্হে সত্থা পক্কোসতী’তি ৰত্ৰা চীৰরকণ্ণে গণ্হা’’তি আহ. সো ৰিহারং গন্ত্ৰা তথা অকাসি, তাৰদেৰ নিম্মিতভিক্খূ অন্তরধাযিংসু. সো থেরং গহেত্ৰা অগমাসি.

সত্থা তস্মিং খণে যাগুঞ্চ খজ্জকাদিভেদঞ্চ পটিগ্গণ্হি. দসবলে ভত্তকিচ্চং কত্ৰা ৰিহারং গতে ধম্মসভাযং কথা উদপাদি – ‘‘অহো বুদ্ধানং আনুভাৰো, যত্র হি নাম চত্তারো মাসে একগাথং গহেতুং অসক্কোন্তম্পি লহুকেন খণেনেৰ এৰং মহিদ্ধিকং অকংসূ’’তি. সত্থা তেসং ভিক্খূনং কথাসল্লাপং সুত্ৰা আগন্ত্ৰা বুদ্ধাসনে নিসজ্জ, ‘‘কিং ৰদেথ, ভিক্খৰে’’তি পুচ্ছিত্ৰা, ‘‘ইমং নাম, ভন্তে’’তি ৰুত্তে, ‘‘ভিক্খৰে, চূল়পন্থকেন ইদানি ময্হং ওৰাদে ঠত্ৰা লোকুত্তরদাযজ্জং লদ্ধং, পুব্বে পন লোকিযদাযজ্জ’’ন্তি ৰত্ৰা তেহি যাচিতো চূল়সেট্ঠিজাতকং (জা. ১.১.৪) কথেসি. অপরভাগে তং সত্থা অরিযগণপরিৰুতো ধম্মাসনে নিসিন্নো মনোমযং কাযং ¶ অভিনিম্মিনন্তানং ভিক্খূনং চেতোৰিৰট্টকুসলানঞ্চ অগ্গট্ঠানে ঠপেসি. সো অপরেন সমযেন ভিক্খূহি ‘‘তথা দন্ধধাতুকেন কথং তযা সচ্চানি পটিৰিদ্ধানী’’তি পুট্ঠো ভাতু পণামনতো পট্ঠায অত্তনো পটিপত্তিং পকাসেন্তো –

৫৫৭.

‘‘দন্ধা ময্হং গতী আসি, পরিভূতো পুরে অহং;

ভাতা চ মং পণামেসি, গচ্ছ দানি তুৰং ঘরং.

৫৫৮.

‘‘সোহং ¶ পণামিতো সন্তো, সঙ্ঘারামস্স কোট্ঠকে;

দুম্মনো তত্থ অট্ঠাসিং, সাসনস্মিং অপেক্খৰা.

৫৫৯.

‘‘ভগৰা ¶ তত্থ আগচ্ছি, সীসং ময্হং পরামসি;

বাহায মং গহেত্ৰান, সঙ্ঘারামং পৰেসযি.

৫৬০.

‘‘অনুকম্পায মে সত্থা, পাদাসি পাদপুঞ্ছনিং;

এতং সুদ্ধং অধিট্ঠেহি, একমন্তং স্ৰধিট্ঠিতং.

৫৬১.

‘‘তস্সাহং ৰচনং সুত্ৰা, ৰিহাসিং সাসনে রতো;

সমাধিং পটিপাদেসিং, উত্তমত্থস্স পত্তিযা.

৫৬২.

‘‘পুব্বেনিৰাসং জানামি, দিব্বচক্খু ৰিসোধিতং;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৫৬৩.

‘‘সহস্সক্খত্তুমত্তানং, নিম্মিনিত্ৰান পন্থকো;

নিসীদম্বৰনে রম্মে, যাৰ কালপ্পৰেদনা.

৫৬৪.

‘‘ততো মে সত্থা পাহেসি, দূতং কালপ্পৰেদকং;

পৰেদিতম্হি কালম্হি, ৰেহাসাদুপসঙ্কমিং.

৫৬৫.

‘‘ৰন্দিত্ৰা সত্থুনো পাদে, একমন্তং নিসীদহং;

নিসিন্নং মং ৰিদিত্ৰান, অত্থ সত্থা পটিগ্গহি.

৫৬৬.

‘‘আযাগো সব্বলোকস্স, আহুতীনং পটিগ্গহো;

পুঞ্ঞক্খেত্তং মনুস্সানং, পটিগ্গণ্হিত্থ দক্খিণ’’ন্তি. –

ইমা গাথা অভাসি.

তত্থ দন্ধাতি, মন্দা, চতুপ্পদিকং গাথং চতূহি মাসেহি গহেতুং অসমত্থভাৰেন দুব্বলা. গতীতি ঞাণগতি. আসীতি, অহোসি. পরিভূতোতি, ততো এৰ ‘‘মুট্ঠস্সতি অসম্পজানো’’তি হীল়িতো. পুরেতি, পুব্বে পুথুজ্জনকালে. ভাতা চাতি সমুচ্চযত্থো চ-সদ্দো, ন কেৰলং পরিভূতোৰ, অথ খো ভাতাপি মং পণামেসি, ‘‘পন্থক, ত্ৰং দুপ্পঞ্ঞো অহেতুকো মঞ্ঞে, তস্মা পব্বজিতকিচ্চং ¶ মত্থকং পাপেতুং অসমত্থো ¶ , ন ইমস্স সাসনস্স অনুচ্ছৰিকো, গচ্ছ দানি তুয্হং অয্যকঘর’’ন্তি নিক্কড্ঢেসি. ভাতাতি, ভাতরা.

কোট্ঠকেতি, দ্ৰারকোট্ঠকসমীপে. দুম্মনোতি, দোমনস্সিতো. সাসনস্মিং অপেক্খৰাতি, সম্মাসম্বুদ্ধস্স সাসনে সাপেক্খো অৰিব্ভমিতুকামো.

ভগৰা তত্থ আগচ্ছীতি, মহাকরুণাসঞ্চোদিতমানসো মং অনুগ্গণ্হন্তো ভগৰা যত্থাহং ঠিতো, তত্থ আগচ্ছি. আগন্ত্ৰা চ, ‘‘পন্থক, অহং তে সত্থা, ন মহাপন্থকো, মং উদ্দিস্স তৰ পব্বজ্জা’’তি সমস্সাসেন্তো সীসং ময্হং পরামসি জালাবন্ধনমুদুতলুনপীণৰরাযতঙ্গুলিসমুপসোভিতেন ৰিকসিতপদুমসস্সিরীকেন চক্কঙ্কিতেন হত্থতলেন ‘‘ইদানিযেৰ মম পুত্তো ভৰিস্সতী’’তি দীপেন্তো ময্হং সীসং পরামসি. বাহায মং গহেত্ৰানাতি, ‘‘কস্মা ত্ৰং, ইধ তিট্ঠসী’’তি চন্দনগন্ধগন্ধিনা অত্তনো হত্থেন মং ভুজে গহেত্ৰা অন্তোসঙ্ঘারামং পৰেসেসি. পাদাসি ¶ পাদপুঞ্ছনিন্তি পাদপুঞ্ছনিং কত্ৰা পাদাসি ‘‘রজোহরণন্তি মনসি করোহী’’তি অদাসীতি অত্থো. ‘‘অদাসী’’তি ‘‘পাদপুঞ্ছনি’’ন্তি চ পঠন্তি. কেচি পন ‘‘পাদপুঞ্ছনি’’ন্তি পাদপুঞ্ছনচোল়ক্খণ্ডং পাদাসী’’তি ৰদন্তি. তদযুত্তং ইদ্ধিযা অভিসঙ্খরিত্ৰা চোল়ক্খণ্ডস্স দিন্নত্তা. এতং সুদ্ধং অধিট্ঠেহি, একমন্তং স্ৰধিট্ঠিতন্তি, এতং সুদ্ধং চোল়ক্খণ্ডং ‘‘রজোহরণং, রজোহরণ’’ন্তি মনসিকারেন স্ৰধিট্ঠিতং কত্ৰা একমন্তং একমন্তে ৰিৰিত্তে গন্ধকুটিপমুখে নিসিন্নো অধিট্ঠেহি তথা চিত্তং সমাহিতং কত্ৰা পৰত্তেহি.

তস্সাহং ৰচনং সুত্ৰাতি, তস্স ভগৰতো ৰচনং ওৰাদং অহং সুত্ৰা তস্মিং সাসনে ওৰাদে রতো অভিরতো হুত্ৰা ৰিহাসিং যথানুসিট্ঠং পটিপজ্জিং. পটিপজ্জন্তো চ সমাধিং পটিপাদেসিং, উত্তমত্থস্স পত্তিযাতি, উত্তমত্থো নাম অরহত্তং, তস্স অধিগমায কসিণপরিকম্মৰসেন রূপজ্ঝানানি নিব্বত্তেত্ৰা ঝানপাদকং ৰিপস্সনং পট্ঠপেত্ৰা মগ্গপটিপাটিযা অগ্গমগ্গসমাধিং সম্পাদেসিন্তি অত্থো. এত্থ হি সমাধীতি উপচারসমাধিতো পট্ঠায যাৰ চতুত্থমগ্গসমাধি, তাৰ সমাধিসামঞ্ঞেন গহিতো, অগ্গফলসমাধি পন উত্তমত্থগ্গহণেন, সাতিসযং চেৰাযং সমাধিকুসলো, তস্মা ‘‘সমাধিং পটিপাদেসি’’ন্তি আহ. সমাধিকুসলতায ¶ হি অযমাযস্মা চেতোৰিৰট্টকুসলো নাম জাতো, মহাপন্থকত্থেরো পন ৰিপস্সনাকুসলতায সঞ্ঞাৰিৰট্টকুসলো নাম. একো চেত্থ সমাধিলক্খণে ছেকো, একো ৰিপস্সনালক্খণে, একো সমাধিগাল়্হো, একো ৰিপস্সনাগাল়্হো একো অঙ্গসংখিত্তে ছেকো, একো আরম্মণসংখিত্তে, একো অঙ্গৰৰত্থানে, একো আরম্মণৰৰত্থানেতি ৰণ্ণেন্তি. অপিচ চূল়পন্থকত্থেরো ¶ সাতিসযং চতুন্নং রূপাৰচরজ্ঝানানং লাভিতায চেতোৰিৰট্টকুসলো ৰুত্তো, মহাপন্থকত্থেরো সাতিসযং চতুন্নং অরূপাৰচরজ্ঝানানং লাভিতায সঞ্ঞাৰিৰট্টকুসলো. পঠমো ৰা রূপাৰচরজ্ঝানলাভী হুত্ৰা ঝানঙ্গেহি ৰুট্ঠায অরহত্তং পত্তোতি চেতোৰিৰট্টকুসলো, ইতরো অরূপাৰচরজ্ঝানলাভী হুত্ৰা ঝানঙ্গেহি ৰুট্ঠায অরহত্তং পত্তোতি সঞ্ঞাৰিৰট্টকুসলো. মনোমযং পন কাযং নিব্বত্তেন্তো অঞ্ঞে তযো ৰা চত্তারো ৰা নিব্বত্তন্তি, ন বহুকে, একসদিসেযেৰ চ কত্ৰা নিব্বত্তেন্তি, একৰিধমেৰ কম্মং কুরুমানে. অযং পন থেরো একাৰজ্জনেন সমণসহস্সং মাপেসি, দ্ৰেপি ন কাযেন একসদিসে অকাসি, ন একৰিধং কম্মং কুরুমানে. তস্মা মনোমযং কাযং অভিনিম্মিনন্তানং অগ্গো নাম জাতো.

ইদানি ¶ অত্তনো অধিগতৰিসেসং দস্সেতুং ‘‘পুব্বেনিৰাসং জানামী’’তিআদিমাহ. কামঞ্চাযং থেরো ছল়ভিঞ্ঞো, যা পন অভিঞ্ঞা আসৰক্খযঞাণাধিগমস্স বহূপকারা, তং দস্সনত্থং ‘‘পুব্বেনিৰাসং জানামি, দিব্বচক্খু ৰিসোধিত’’ন্তি ৰত্ৰা ‘‘তিস্সো ৰিজ্জা অনুপ্পত্তা’’তি ৰুত্তং. পুব্বেনিৰাসযথাকম্মুপগঅনাগতংসঞাণানি হি ৰিপস্সনাচারস্স বহূপকারানি, ন তথা ইতরঞাণানি.

সহস্সক্খত্তুন্তি সহস্সং. ‘‘সহস্সৰার’’ন্তি কেচি ৰদন্তি. একাৰজ্জনেন পন থেরো সহস্সে মনোমযে কাযে নিম্মিনি, ন ৰারেন. তে চ খো অঞ্ঞমঞ্ঞমসদিসে ৰিৰিধঞ্চ কম্মং করোন্তে. ‘‘কিং পন সাৰকানম্পি এৰরূপং ইদ্ধিনিম্মানং সম্ভৰতী’’তি? ন সম্ভৰতি সব্বেসং, অভিনীহারসম্পত্তিযা পন অযমেৰ থেরো এৰমকাসি, তথা হেস ইমিনা অঙ্গেন এতদগ্গে ঠপিতো. পন্থকো নিসীদীতি অত্তানমেৰ পরং ৰিয ৰদতি. অম্বৰনেতি, অম্বৰনে জীৰকেন ¶ কতৰিহারে. ৰেহাসাদুপসঙ্কমিন্তি ৰেহাসাতি করণে নিস্সক্কৰচনং, ৰেহাসেনাতি অত্থো, দ-কারো পদসন্ধিকরো. অথাতি, মম নিসজ্জায পচ্ছা. পটিগ্গহীতি দক্খিণোদকং পটিগ্গণ্হি. আযাগো সব্বলোকস্সাতি, সব্বস্স সদেৰকস্স লোকস্স অগ্গদক্খিণেয্যতায দেয্যধম্মং আনেত্ৰা যজিতব্বট্ঠানভূতো. আহুতীনং পটিগ্গহোতি, মহাফলভাৰকরণেন দক্খিণাহুতীনং পটিগ্গণ্হকো. পটিগ্গণ্হিত্থ দক্খিণন্তি জীৰকেন উপনীতং যাগুখজ্জাদিভেদং দক্খিণং পটিগ্গহেসি.

অথ খো ভগৰা কতভত্তকিচ্চো আযস্মন্তং চূল়পন্থকং আণাপেসি – ‘‘অনুমোদনং করোহী’’তি. সো সিনেরুং গহেত্ৰা মহাসমুদ্দং মন্থেন্তো ৰিয পভিন্নপটিসম্ভিদাপ্পত্ততায তেপিটকং বুদ্ধৰচনং সঙ্খোভেন্তো সত্থু অজ্ঝাসযং গণ্হন্তো অনুমোদনং অকাসি. তথা উপনিস্সযসম্পন্নোপি ¶ চাযমাযস্মা তথারূপায কম্মপিলোতিকায পরিবাধিতো চতুপ্পদিকং গাথং চতূহিপি মাসেহি গহেতুং নাসক্খি. তং পনস্স উপনিস্সযসম্পত্তিং ওলোকেত্ৰা সত্থা পুব্বচরিযানুরূপং যোনিসোমনসিকারে নিযোজেসি. তথা হি ভগৰা তদা জীৰকস্স নিৰেসনে নিসিন্নো এৰ ‘‘চূল়পন্থকস্স চিত্তং সমাহিতং, ৰীথিপটিপন্না ৰিপস্সনা’’তি ঞত্ৰা যথানিসিন্নোৰ অত্তানং দস্সেত্ৰা, ‘‘পন্থক, যদিপাযং পিলোতিকা সংকিলিট্ঠা রজানুকিণ্ণা, ইতো পন অঞ্ঞো এৰ অরিযস্স ৰিনযে সংকিলেসো রজো চাতি দস্সেন্তো –

‘‘রাগো রজো ন চ পন রেণু ৰুচ্চতি, রাগস্সেতং অধিৰচনং রজোতি;

এতং ¶ রজং ৰিপ্পজহিত্ৰা ভিক্খৰো, ৰিহরন্তি তে ৰীতরজস্স সাসনে.

‘‘দোসো রজো…পে… সাসনে.

‘‘মোহো রজো…পে… ৰীতরজস্স সাসনে’’তি. –

ইমা তিস্সো ওভাসগাথা অভাসি. গাথাপরিযোসানে চূল়পন্থকো অভিঞ্ঞাপটিসম্ভিদাপরিৰারং অরহত্তং পাপুণীতি.

চূল়পন্থকত্থেরগাথাৰণ্ণনা নিট্ঠিতা.

৫. কপ্পত্থেরগাথাৰণ্ণনা

নানাকুলমলসম্পুণ্ণোতিআদিকা ¶ আযস্মতো কপ্পত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সিদ্ধত্থস্স ভগৰতো কালে ৰিভৰসম্পন্নে কুলে নিব্বত্তিত্ৰা পিতু অচ্চযেন ৰিঞ্ঞুতং পত্তো নানাৰিরাগৰণ্ণৰিচিত্তেহি ৰত্থেহি অনেকৰিধেহি আভরণেহি নানাৰিধেহি মণিরতনেহি বহুৰিধেহি পুপ্ফদামমালাদীহি চ কপ্পরুক্খং নাম অলঙ্করিত্ৰা তেন সত্থু থূপং পূজেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে মগধরট্ঠে মণ্ডলিকরাজকুলে নিব্বত্তিত্ৰা পিতু অচ্চযেন রজ্জে পতিট্ঠিতো কামেসু অতিৰিয রত্তো গিদ্ধো হুত্ৰা ৰিহরতি. তং সত্থা মহাকরুণাসমাপত্তিতো ৰুট্ঠায লোকং ৰোলোকেন্তো ঞাণজালে পঞ্ঞাযমানং দিস্ৰা, ‘‘কিং নু খো ভৰিস্সতী’’তি আৰজ্জেন্তো, ‘‘এস মম সন্তিকে অসুভকথং সুত্ৰা কামেসু ৰিরত্তচিত্তো হুত্ৰা পব্বজিত্ৰা অরহত্তং পাপুণিস্সতী’’তি ঞত্ৰা আকাসেন তত্থ গন্ত্ৰা –

৫৬৭.

‘‘নানাকুলমলসম্পুণ্ণো ¶ , মহাউক্কারসম্ভৰো;

চন্দনিকংৰ পরিপক্কং, মহাগণ্ডো মহাৰণো.

৫৬৮.

‘‘পুব্বরুহিরসম্পুণ্ণো, গূথকূপেন গাল়্হিতো;

আপোপগ্ঘরণো কাযো, সদা সন্দতি পূতিকং.

৫৬৯.

‘‘সট্ঠিকণ্ডরসম্বন্ধো, মংসলেপনলেপিতো;

চম্মকঞ্চুকসন্নদ্ধো, পূতিকাযো নিরত্থকো.

৫৭০.

‘‘অট্ঠিসঙ্ঘাতঘটিতো, ন্হারুসুত্তনিবন্ধনো;

নেকেসং সংগতীভাৰা, কপ্পেতি ইরিযাপথং.

৫৭১.

‘‘ধুৰপ্পযাতো মরণায, মচ্চুরাজস্স সন্তিকে;

ইধেৰ ছড্ডযিত্ৰান, যেনকামঙ্গমো নরো.

৫৭২.

‘‘অৰিজ্জায ¶ নিৰুতো কাযো, চতুগন্থেন গন্থিতো;

ওঘসংসীদনো কাযো, অনুসযাজালমোত্থতো.

৫৭৩.

‘‘পঞ্চনীৰরণে যুত্তো, ৰিতক্কেন সমপ্পিতো;

তণ্হামূলেনানুগতো, মোহচ্ছাদনছাদিতো.

৫৭৪.

‘‘এৰাযং ¶ ৰত্ততে কাযো, কম্মযন্তেন যন্তিতো;

সম্পত্তি চ ৰিপত্যন্তা, নানাভাৰো ৰিপজ্জতি.

৫৭৫.

‘‘যেমং কাযং মমাযন্তি, অন্ধবালা পুথুজ্জনা;

ৰড্ঢেন্তি কটসিং ঘোরং, আদিযন্তি পুনব্ভৰং.

৫৭৬.

‘‘যেমং কাযং ৰিৰজ্জেন্তি, গূথলিত্তংৰ পন্নগং;

ভৰমূলং ৰমিত্ৰান, পরিনিব্বিস্সন্তিনাসৰা’’তি. –

ইমাহি গাথাহি তস্স অসুভকথং কথেসি. সো সত্থু সম্মুখা অনেকাকারৰোকারং যাথাৰতো সরীরসভাৰৰিভাৰনং অসুভকথং সুত্ৰা সকেন কাযেন অট্টীযমানো হরাযমানো জিগুচ্ছমানো সংৰিগ্গহদযো সত্থারং ৰন্দিত্ৰা, ‘‘লভেয্যাহং, ভন্তে, ভগৰতো সন্তিকে পব্বজ্জ’’ন্তি পব্বজ্জং যাচি. সত্থা সমীপে ঠিতমঞ্ঞতরং ভিক্খুং আণাপেসি – ‘‘গচ্ছ, ভিক্খু, ইমং পব্বাজেত্ৰা উপসম্পাদেত্ৰা আনেহী’’তি. সো তং তচপঞ্চককম্মট্ঠানং দত্ৰা পব্বাজেসি. সো খুরগ্গেযেৰ সহ পটিসম্ভিদাহি অরহত্তং পাপুণি. তেন ৰুত্তং অপদানে (অপ. তের ১.৪.১০২-১০৭) –

‘‘সিদ্ধত্থস্স ভগৰতো, থূপসেট্ঠস্স সম্মুখা;

ৰিচিত্তদুস্সে লগেত্ৰা, কপ্পরুক্খং ঠপেসহং.

‘‘যং ¶ যং যোনুপপজ্জামি, দেৰত্তং অথ মানুসং;

সোভযন্তো মম দ্ৰারং, কপ্পরুক্খো পতিট্ঠতি.

‘‘অহঞ্চ পরিসা চেৰ, যে কেচি মমৰস্সিতা;

তম্হা দুস্সং গহেত্ৰান, নিৰাসেম মযং সদা.

‘‘চতুন্নৰুতিতো কপ্পে, যং রুক্খং ঠপযিং অহং;

দুগ্গতিং নাভিজানামি, কপ্পরুক্খস্সিদং ফলং.

‘‘ইতো চ সত্তমে কপ্পে, সুচেল়া অট্ঠ খত্তিযা;

সত্তরতনসম্পন্না, চক্কৰত্তী মহব্বলা.

‘‘পটিসম্ভিদা চতস্সো…পে… কতং বুদ্ধস্স সাসন’’ন্তি.

অরহত্তং ¶ পন পত্ৰা লদ্ধূপসম্পদো সত্থারং উপসঙ্কমিত্ৰা ৰন্দিত্ৰা একমন্তং নিসিন্নো অঞ্ঞং ব্যাকরোন্তো তা এৰ গাথা অভাসি. তেনেৰ তা থেরগাথা নাম জাতা.

তত্থ নানাকুলমলসম্পুণ্ণোতি, নানাকুলেহি নানাভাগেহি মলেহি সম্পুণ্ণো, কেসলোমাদিনানাৰিধঅসুচিকোট্ঠাসভরিতোতি অত্থো. মহাউক্কারসম্ভৰোতি, উক্কারো ৰুচ্চতি ৰচ্চকূপং. যত্তকৰযা মাতা, তত্তকং কালং কারপরিসেদিতৰচ্চকূপসদিসতায মাতু কুচ্ছি ইধ ‘‘মহাউক্কারো’’তি অধিপ্পেতো. সো কুচ্ছি সম্ভৰো উপ্পত্তিট্ঠানং এতস্সাতি মহাউক্কারসম্ভৰো. চন্দনিকংৰাতি চন্দনিকং নাম উচ্ছিট্ঠোদকগব্ভমলাদীনং ছড্ডনট্ঠানং, যং জণ্ণুমত্তং অসুচিভরিতম্পি হোতি, তাদিসন্তি অত্থো. পরিপক্কন্তি, পরিণতং পুরাণং. তেন যথা চণ্ডালগামদ্ৰারে নিদাঘসমযে থুল্লফুসিতকে দেৰে ৰস্সন্তে উদকেন সমুপব্যূল়্হমুত্তকরীসঅট্ঠিচম্মন্হারুখণ্ডখেল়সিঙ্ঘাণিকাদিনানাকুণপভরিতং কদ্দমোদকালুল়িতং ¶ কতিপযদিৰসাতিক্কমেন সংজাত কিমিকুলাকুলং সূরিযাতপসন্তাপকুথিতং উপরি ফেণপুব্বুল়কানি মুঞ্চন্তং অভিনীলৰণ্ণং পরমদুগ্গন্ধং জেগুচ্ছং চন্দনিকাৰাটং নেৰ উপগন্তুং, ন দট্ঠুং অরহরূপং হুত্ৰা তিট্ঠতি, তথারূপোযং কাযোতি দস্সেতি. সদা দুক্খতামূলযোগতো অসুচিপগ্ঘরণতো উপ্পাদজরামরণেহি উদ্ধুমাযনপরিপচ্চনভিজ্জনসভাৰত্তা চ মহন্তো গণ্ডো ৰিযাতি মহাগণ্ডো. সব্বত্থকমেৰ দুক্খৰেদনানুবদ্ধত্তা গণ্ডানং সহনতো অসুচিৰিস্সন্দনতো চ মহন্তো ৰণো ৰিযাতি মহাৰণো গূথকূপেন গাল়িতোতি, ৰচ্চকূপেন ৰচ্চেনেৰ ৰা ভরিতো. ‘‘গূথকূপনিগাল়্হিতো’’তিপি পাল়ি, ৰচ্চকূপতো নিক্খন্তোতি অত্থো. আপোপগ্ঘরণো কাযো, সদা সন্দতি পূতিকন্তি, অযং কাযো আপোধাতুযা সদা পগ্ঘরণসীলো, তঞ্চ খো পিত্তসেম্হসেদমুত্তাদিকং পূতিকং অসুচিংযেৰ সন্দতি, ন কদাচি সুচিন্তি অত্থো.

সট্ঠিকণ্ডরসম্বন্ধোতি ¶ , গীৰায উপরিমভাগতো পট্ঠায সরীরং ৰিনদ্ধমানা সরীরস্স পুরিমপচ্ছিমদক্খিণৰামপস্সেসু পচ্চেকং পঞ্চ পঞ্চ কত্ৰা ৰীসতি, হত্থপাদে ৰিনদ্ধমানা তেসং পুরিমপচ্ছিমপস্সেসু পঞ্চ পঞ্চ কত্ৰা চত্তালীসাতি ¶ সট্ঠিযা কণ্ডরেহি মহান্হারূহি সব্বসো বদ্ধো ৰিনদ্ধোতি সট্ঠিকণ্ডরসম্বন্ধো. মংসলেপনলেপিতোতি, মংসসঙ্খাতেন লেপনেন লিত্তো, নৰমংসপেসিসতানুলিত্তোতি অত্থো. চম্মকঞ্চুকসন্নদ্ধোতি, চম্মসঙ্খাতেন কঞ্চুকেন সব্বসো ওনদ্ধো পরিযোনদ্ধো পরিচ্ছিন্নো. পূতিকাযোতি, সব্বসো পূতিগন্ধিকো কাযো. নিরত্থকোতি, নিপ্পযোজনো. অঞ্ঞেসঞ্হি পাণীনং কাযো চম্মাদিৰিনিযোগেন সিযা সপ্পযোজনো, ন তথা মনুস্সকাযোতি. অট্ঠিসঙ্ঘাতঘটিতোতি, অতিরেকতিসতানং অট্ঠীনং সঙ্ঘাতেন ঘটিতো সম্বন্ধো. ন্হারুসুত্তনিবন্ধনোতি, সুত্তসদিসেহি নৰহি ন্হারুসতেহি নিবন্ধিতো. নেকেসং সংগতীভাৰাতি, চতুমহাভূতজীৰিতিন্দ্রিযঅস্সাসপস্সাসৰিঞ্ঞাণাদীনং সমৰাযসম্বন্ধেন সুত্তমেরকসমৰাযেন যন্তং ৰিয ঠানাদিইরিযাপথং কপ্পেতি.

ধুৰপ্পযাতো মরণাযাতি, মরণস্স অত্থায একন্তগমনো, নিব্বত্তিতো পট্ঠায মরণং পতি পৰত্তো. ততো এৰ মচ্চুরাজস্স মরণস্স ¶ সন্তিকে ঠিতো. ইধেৰ ছড্ডযিত্ৰানাতি, ইমস্মিংযেৰ লোকে কাযং ছড্ডেত্ৰা, যথারুচিতট্ঠানগামী অযং সত্তো, তস্মা ‘‘পহায গমনীযো অযং কাযো’’তি এৰম্পি সঙ্গো ন কাতব্বোতি দস্সেতি.

অৰিজ্জায নিৰুতোতি, অৰিজ্জানীৰরণেন নিৰুতো পটিচ্ছাদিতাদীনৰো, অঞ্ঞথা কো এত্থ সঙ্গং জনেয্যাতি অধিপ্পাযো. চতুগন্থেনাতি, অভিজ্ঝাকাযগন্থাদিনা চতুব্বিধেন গন্থেন গন্থিতো, গন্থনিযভাৰেন ৰিনদ্ধিতো. ওঘসংসীদনোতি, ওঘনিযভাৰেন কামোঘাদীসু চতূসু ওঘেসু সংসীদনকো. অপ্পহীনভাৰেন সন্তানে অনু অনু সেন্তীতি অনুসযা, কামরাগাদযো অনুসযা. তেসং জালেন ওত্থতো অভিভূতোতি অনুসযাজালমোত্থতো. মকারো পদসন্ধিকরো, গাথাসুখত্থং দীঘং কত্ৰা ৰুত্তং. কামচ্ছন্দাদিনা পঞ্চৰিধেন নীৰরণেন যুত্তো অধিমুত্তোতি পঞ্চনীৰরণে যুত্তো, করণত্থে ভুম্মৰচনং.

কামৰিতক্কাদিনা ¶ মিচ্ছাৰিতক্কেন সমপ্পিতো সমস্সিতোতি ৰিতক্কেন সমপ্পিতো. তণ্হামূলেনানুগতোতি, তণ্হাসঙ্খাতেন ভৰমূলেন অনুবদ্ধো. মোহচ্ছাদনছাদিতোতি, সম্মোহসঙ্খাতেন আৰরণেন পলিগুণ্ঠিতো. সব্বমেতং সৰিঞ্ঞাণকং করজকাযং সন্ধায ৰদতি. সৰিঞ্ঞাণকো হি অত্তভাৰো ‘‘উচ্ছিন্নভৰনেত্তিকো, ভিক্খৰে, তথাগতস্স কাযো তিট্ঠতি, অযঞ্চেৰ কাযো বহিদ্ধা চ নামরূপ’’ন্তিআদীসু (দী. নি. ১.১.১৪৭) কাযোতি ৰুচ্চতি, এৰাযং ৰত্ততে কাযোতি ¶ এৰং ‘‘নানাকুলমলসম্পুণ্ণো’’তিআদিনা ‘‘অৰিজ্জায নিৰুতো’’তিআদিনা চ ৰুত্তপ্পকারেন অযং কাযো ৰত্ততি, ৰত্তন্তো চ কম্মযন্তেন সুকতদুক্কটেন কম্মসঙ্খাতেন যন্তেন যন্তিতো সঙ্ঘটিতো. যথা ৰা খেমন্তং গন্তুং ন সক্কোতি, তথা সঙ্খোভিতো সুগতিদুগ্গতীসু ৰত্ততি পরিব্ভমতি. সম্পত্তি চ ৰিপত্যন্তাতি যা এত্থ সম্পত্তি, সা ৰিপত্তিপরিযোসানা. সব্বঞ্হি যোব্বনং জরাপরিযোসানং, সব্বং আরোগ্যং ব্যাধিপরিযোসানং, সব্বং জীৰিতং মরণপরিযোসানং, সব্বো সমাগমো ৰিযোগপরিযোসানো. তেনাহ ‘‘নানাভাৰো ৰিপজ্জতী’’তি. নানাভাৰোতি, ৰিনাভাৰো ৰিপ্পযোগো, সো কদাচি ৰিপ্পযুঞ্জকস্স ৰসেন, কদাচি ৰিপ্পযুঞ্জিতব্বস্স ৰসেনাতি ৰিৰিধং পজ্জতি পাপুণীযতি.

যেমং কাযং মমাযন্তীতি যে অন্ধবালা পুথুজ্জনা এৰং অসুভং অনিচ্চং অধুৰং দুক্খং অসারং ইমং কাযং ‘‘মম ইদ’’ন্তি গণ্হন্তা মমাযন্তি ছন্দরাগং উপ্পাদেন্তি, তে জাতিআদীহি নিরযাদীহি চ ঘোরং ভযানকং অপণ্ডিতেহি অভিরমিতব্বতো কটসিসঙ্খাতং সংসারং পুনপ্পুনং জননমরণাদীহি ৰড্ঢেন্তি, তেনাহ ‘‘আদিযন্তি পুনব্ভৰ’’ন্তি.

যেমং কাযং ৰিৰজ্জেন্তি, গূথলিত্তংৰ পন্নগন্তি যথা নাম ¶ পুরিসো সুখকামো জীৰিতুকামো গূথগতং আসীৰিসং দিস্ৰা জিগুচ্ছনিযতায ৰা সপ্পটিভযতায ৰা ৰিৰজ্জেতি ন অল্লীযতি, এৰমেৰং যে পণ্ডিতা কুলপুত্তা অসুচিভাৰেন জেগুচ্ছং অনিচ্চাদিভাৰেন সপ্পটিভযং ইমং কাযং ৰিৰজ্জেন্তি ছন্দরাগপ্পহানেন পজহন্তি. তে ভৰমূলং অৰিজ্জং ভৰতণ্হঞ্চ ৰমিত্ৰা ছড্ডেত্ৰা অচ্চন্তমেৰ পহায ততো এৰ সব্বসো অনাসৰা সউপাদিসেসায অনুপাদিসেসায চ নিব্বানধাতুযা পরিনিব্বাযিস্সন্তীতি.

কপ্পত্থেরগাথাৰণ্ণনা নিট্ঠিতা.

৬. ৰঙ্গন্তপুত্তউপসেনত্থেরগাথাৰণ্ণনা

ৰিৰিত্তং ¶ অপ্পনিগ্ঘোসন্তিআদিকা আযস্মতো উপসেনত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে হংসৰতীনগরে কুলগেহে নিব্বত্তিত্ৰা ৰযপ্পত্তো সত্থু সন্তিকং গন্ত্ৰা ধম্মং সুণমানো সত্থারং একং ভিক্খুং সমন্তপাসাদিকানং অগ্গট্ঠানে ঠপেন্তং দিস্ৰা সত্থু অধিকারকম্মং কত্ৰা তং ঠানন্তরং পত্থেত্ৰা যাৰজীৰং কুসলং কত্ৰা দেৰমনুস্সেসু সংসরন্তো ইমস্মিং ¶ বুদ্ধুপ্পাদে নালকগামে রূপসারীব্রাহ্মণিযা কুচ্ছিম্হি নিব্বত্তি, উপসেনোতিস্স নামং অহোসি. সো ৰযপ্পত্তো তযো ৰেদে উগ্গহেত্ৰা সত্থু সন্তিকে ধম্মং সুত্ৰা পটিলদ্ধসদ্ধো পব্বজিত্ৰা উপসম্পদায একৰস্সিকো ‘‘অরিযগব্ভং ৰড্ঢেমী’’তি একং কুলপুত্তং অত্তনো সন্তিকে উপসম্পাদেত্ৰা তেন সদ্ধিং সত্থু সন্তিকং গতো. সত্থারা চস্স তস্স অৰস্সিকস্স ভিক্খুনো সদ্ধিৰিহারিকভাৰং সুত্ৰা, ‘‘অতিলহুং খো ত্ৰং, মোঘপুরিস, বাহুল্লায আৰত্তো’’তি (মহাৰ. ৭৫) গরহিতো. ‘‘ইদানাহং যদিপি পরিসং নিস্সায সত্থারা গরহিতো, পরিসংযেৰ পন নিস্সায সত্থু পাসংসোপি ভৰিস্সামী’’তি ৰিপস্সনায কম্মং করোন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.২.৮৬-৯৬) –

‘‘পদুমুত্তরং ভগৰন্তং, লোকজেট্ঠং নরাসভং;

পব্ভারম্হি নিসীদন্তং, উপগচ্ছিং নরুত্তমং.

‘‘কণিকারপুপ্ফং দিস্ৰা, ৰণ্টে ছেত্ৰানহং তদা;

অলঙ্করিত্ৰা ছত্তম্হি, বুদ্ধস্স অভিরোপযিং.

‘‘পিণ্ডপাতঞ্চ পাদাসিং, পরমন্নং সুভোজনং;

বুদ্ধেন নৰমে তত্থ, সমণে অট্ঠ ভোজযিং.

‘‘অনুমোদি মহাৰীরো, সযম্ভূ অগ্গপুগ্গলো;

ইমিনা ছত্তদানেন, পরমন্নপৰেচ্ছনা.

‘‘তেন চিত্তপ্পসাদেন, সম্পত্তিমনুভোস্সসি;

ছত্তিংসক্খত্তুং দেৰিন্দো, দেৰরজ্জং করিস্সতি.

‘‘একৰীসতিক্খত্তুঞ্চ, চক্কৰত্তী ভৰিস্সতি;

পদেসরজ্জং ৰিপুলং, গণনাতো অসঙ্খিযং.

‘‘সতসহস্সিতো ¶ কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘সাসনে দিব্বমানম্হি, মনুস্সত্তং গমিস্সতি;

তস্স ধম্মেসু দাযাদো, ওরসো ধম্মনিম্মিতো.

‘‘উপসেনোতি নামেন, হেস্সতি সত্থু সাৰকো;

সমন্তপাসাদিকত্তা, অগ্গট্ঠানে ঠপেস্সতি.

‘‘চরিমং ৰত্ততে ময্হং, ভৰা সব্বে সমূহতা;

ধারেমি অন্তিমং দেহং, জেত্ৰা মারং সৰাহনং.

‘‘পটিসম্ভিদা চতস্সো…পে… কতং বুদ্ধস্স সাসন’’ন্তি.

অরহত্তং পন পত্ৰা সযম্পি সব্বে ধুতঙ্গধম্মে সমাদায ৰত্ততি, অঞ্ঞেপি তদত্থায সমাদপেতি ¶ , তেন নং ভগৰা সমন্তপাসাদিকানং অগ্গট্ঠানে ঠপেসি. সো অপরেন সমযেন কোসম্বিযং কলহে ¶ উপ্পন্নে ভিক্খুসঙ্ঘে চ দ্ৰিধাভূতে একেন ভিক্খুনা তং কলহং পরিৰজ্জিতুকামেন ‘‘এতরহি খো কলহো উপ্পন্নো, সঙ্ঘো দ্ৰিধাভূতো, কথং নু খো মযা পটিপজ্জিতব্ব’’ন্তি পুট্ঠো ৰিৰেকৰাসতো পট্ঠায তস্স পটিপত্তিং কথেন্তো –

৫৭৭.

‘‘ৰিৰিত্তং অপ্পনিগ্ঘোসং, ৰাল়মিগনিসেৰিতং;

সেৰে সেনাসনং ভিক্খু, পটিসল্লানকারণা.

৫৭৮.

‘‘সঙ্কারপুঞ্জা আহত্ৰা, সুসানা রথিযাহি চ;

ততো সঙ্ঘাটিকং কত্ৰা, লূখং ধারেয্য চীৰরং.

৫৭৯.

‘‘নীচং মনং করিত্ৰান, সপদানং কুলা কুলং;

পিণ্ডিকায চরে ভিক্খু, গুত্তদ্ৰারো সুসংৰুতো.

৫৮০.

‘‘লূখেনপি ৰা সন্তুস্সে, নাঞ্ঞং পত্থে রসং বহুং;

রসেসু অনুগিদ্ধস্স, ঝানে ন রমতী মনো.

৫৮১.

‘‘অপ্পিচ্ছো চেৰ সন্তুট্ঠো, পৰিৰিত্তো ৰসে মুনি;

অসংসট্ঠো গহট্ঠেহি, অনাগারেহি চূভযং.

৫৮২.

‘‘যথা ¶ জল়ো ৰ মূগো ৰ, অত্তানং দস্সযে তথা;

নাতিৰেলং সম্ভাসেয্য, সঙ্ঘমজ্ঝম্হি পণ্ডিতো.

৫৮৩.

‘‘ন সো উপৰদে কঞ্চি, উপঘাতং ৰিৰজ্জযে;

সংৰুতো পাতিমোক্খস্মিং, মত্তঞ্ঞূ চস্স ভোজনে.

৫৮৪. ‘‘সুগ্গহীতনিমিত্তস্স, চিত্তস্সুপ্পাদকোৰিদো.

সমথং অনুযুঞ্জেয্য, কালেন চ ৰিপস্সনং.

৫৮৫.

‘‘ৰীরিযসাতচ্চসম্পন্নো, যুত্তযোগো সদা সিযা;

ন চ অপ্পত্ৰা দুক্খন্তং, ৰিস্সাসং এয্য পণ্ডিতো.

৫৮৬.

‘‘এৰং ৰিহরমানস্স, সুদ্ধিকামস্স ভিক্খুনো;

খীযন্তি আসৰা সব্বে, নিব্বুতিঞ্চাধিগচ্ছতী’’তি. –

ইমা গাথা অভাসি.

তত্থ ৰিৰিত্তন্তি, জনৰিৰিত্তং সুঞ্ঞং অরঞ্ঞাদিং. অপ্পনিগ্ঘোসন্তি, নিস্সদ্দং সদ্দসঙ্ঘট্টনরহিতং. ৰাল়মিগনিসেৰিতন্তি, সীহব্যগ্ঘদীপিৰাল়মিগেহি চরিতং. ইমিনাপি জনৰিৰেকংযেৰ দস্সেতি পন্তসেনাসনভাৰদীপনতো. সেনাসনন্তি, সযিতুং আসযিতুঞ্চ যুত্তভাৰেন ¶ ৰসনট্ঠানং ইধ সেনাসনন্তি অধিপ্পেতং. পটিসল্লানকারণাতি, পটিসল্লাননিমিত্তং, নানারম্মণতো নিৰত্তেত্ৰা কম্মট্ঠানেযেৰ চিত্তস্স পটি পটি সম্মদেৰ অল্লীযনত্থং.

এৰং ভাৰনানুরূপং সেনাসনং নিদ্দিসন্তো সেনাসনে সন্তোসং দস্সেত্ৰা ইদানি চীৰরাদীসুপি তং দস্সেতুং ‘‘সংকারপুঞ্জা’’তিআদি ৰুত্তং. তত্থ ¶ সংকারপুঞ্জাতি সংকারানং পুঞ্জং সংকারপুঞ্জং, ততো কচৰরট্ঠানা. আহত্ৰাতি আহরিত্ৰা. ততোতি তথা আহটচোল়ক্খণ্ডেহি. করণে হি ইদং নিস্সক্কৰচনং লূখন্তি সত্থলূখরজনলূখাদিনা লূখং অৰণ্ণামট্ঠং. ধারেয্যাতি নিৰাসনাদিৰসেন পরিহরেয্য, এতেন চীৰরসন্তোসং ৰদতি.

নীচ মনং করিত্ৰানাতি ‘‘অন্তমিদং, ভিক্খৰে, জীৰিকান’’ন্তিআদিকং (ইতিৰু. ৯১; সং. নি. ৩.৮০) সুগতোৰাদং অনুস্সরিত্ৰা নিহতমানদপ্পং চিত্তং কত্ৰা. সপদানন্তি ঘরেসু ¶ অৰখণ্ডরহিতং; অনুঘরন্তি অত্থো. তেনাহ ‘‘কুলা কুল’’ন্তি. কুলা কুলন্তি কুলতো কুলং, কুলানুপুব্বিযা ঘরপটিপাটিযাতি অত্থো. পিণ্ডিকাযাতি মিস্সকভিক্খায, ইমিনা পিণ্ডপাতসন্তোসং ৰদতি. গুত্তদ্ৰারোতি সুপিহিতচক্খাদিদ্ৰারো. সুসংৰুতোতি হত্থকুক্কুচ্চাদীনং অভাৰেন সুট্ঠু সংৰুতো.

লূখেনপি ৰাতি অপিসদ্দো সমুচ্চযে, ৰা-সদ্দো ৰিকপ্পে. উভযেনপি লূখেনপি অপ্পেনপি যেন কেনচি সুলভেন ইতরীতরেন সন্তুস্সে সমং সম্মা তুস্সেয্য. তেনাহ ‘‘নাঞ্ঞং পত্থে রসং বহু’’ন্তি. নাঞ্ঞং পত্থে রসং বহুন্তি অত্তনা যথালদ্ধতো অঞ্ঞং মধুরাদিরসং বহুং পণীতঞ্চ ন পত্থেয্য ন পিহেয্য, ইমিনা গিলানপচ্চযেপি সন্তোসো দস্সিতো হোতি. রসেসু গেধৰারণত্থং পন কারণং ৰদন্তো রসেসু অনুগিদ্ধস্স, ঝানে ন রমতী মনো’’তি আহ. ইন্দ্রিযসংৰরম্পি অপরিপূরেন্তস্স কুতো ৰিক্খিত্তচিত্তসমাধানন্তি অধিপ্পাযো.

এৰং চতূসু পচ্চযেসু সল্লেখপটিপত্তিং দস্সেত্ৰা ইদানি অৰসিট্ঠকথাৰত্থূনি দস্সেতুং ‘‘অপ্পিচ্ছো চেৰা’’তিআদি ৰুত্তং. তত্থ অপ্পিচ্ছোতি, অনিচ্ছো চতূসু পচ্চযেসু ইচ্ছারহিতো, তেন চতুব্বিধপচ্চযেসু তণ্হুপ্পাদৰিক্খম্ভনমাহ. সন্তুট্ঠোতি, চতূসু পচ্চযেসু যথালাভসন্তোসাদিনা সন্তুট্ঠো. যো হি –

‘‘অতীতং নানুসোচেয্য, নপ্পজপ্পেয্যনাগতং;

পচ্চুপ্পন্নেন যাপেয্য, সো ‘সন্তুট্ঠো’তি পৰুচ্চতী’’তি.

পৰিৰিত্তোতি ¶ গণসঙ্গণিকং পহায কাযেন পৰিৰিত্তো ৰূপকট্ঠো. চিত্তৰিৰেকাদিকে হি পরতো ৰক্খতি. ৰসেতি সব্বত্থ যোজেতব্বং. মোনেয্যধম্মসমন্নাগমেন মুনি. অসংসট্ঠোতি দস্সনসৰনসমুল্লপনসম্ভোগকাযসংসগ্গানং অভাৰেন ¶ অসংসট্ঠো যথাৰুত্তসংসগ্গরহিতো. উভযন্তি, গহট্ঠেহি অনাগারেহি চাতি উভযেহিপি অসংসট্ঠো. করণে হি ইদং পচ্চত্তৰচনং.

অত্তানং দস্সযে তথাতি অজল়ো অমূগোপি সমানো যথা জল়ো ৰা মূগো ৰা, তথা অত্তানং দস্সেয্য, এতেন পাগব্বিযপ্পহানমাহ. জল়ো ৰ মূগো ৰাতি চ গাথাসুখত্থং রস্সত্তং কতং, সমুচ্চযত্থো চ ¶ ৰাসদ্দো. নাতিৰেলং সম্ভাসেয্যাতি অতিৰেলং অতিক্কন্তপমাণং ন ভাসেয্য, মত্তভাণী অস্সাতি অত্থো. সঙ্ঘমজ্ঝম্হীতি ভিক্খুসঙ্ঘে, জনসমূহে ৰা.

ন সো উপৰদে কঞ্চীতি সো যথাৰুত্তপটিপত্তিকো ভিক্খু হীনং ৰা মজ্ঝিমং ৰা উক্কট্ঠং ৰা যংকিঞ্চি ন ৰাচায উপৰদেয্য. উপঘাতং ৰিৰজ্জযেতি কাযেন উপঘাতং পরিৰিহেঠনং ৰজ্জেয্য. সংৰুতো পাতিমোক্খস্মিন্তি পাতিমোক্খম্হি পাতিমোক্খসংৰরসীলে সংৰুতো অস্স, পাতিমোক্খসংৰরেন পিহিতকাযৰাচো সিযাতি অত্থো. মত্তঞ্ঞূ চস্স ভোজনেতি পরিযেসনপটিগ্গহণপরিভোগৰিস্সজ্জনেসু ভোজনে পমাণঞ্ঞূ সিযা.

সুগ্গহীতনিমিত্তস্সাতি ‘‘এৰং মে মনসি করোতো চিত্তং সমাহিতং অহোসী’’তি তদাকারং সল্লক্খেন্তো সুট্ঠু গহিতসমাধিনিমিত্তো অস্স. ‘‘সুগ্গহীতনিমিত্তো সো’’তিপি পাঠো, সো যোগীতি অত্থো. চিত্তস্সুপ্পাদকোৰিদোতি এৰং ভাৰযতো চিত্তং লীনং হোতি, ‘‘এৰং উদ্ধত’’ন্তি লীনস্স উদ্ধতস্স চ চিত্তস্স উপ্পত্তিকারণে কুসলো অস্স. লীনে হি চিত্তে ধম্মৰিচযৰীরিযপীতিসম্বোজ্ঝঙ্গা ভাৰেতব্বা, উদ্ধতে পস্সদ্ধিসমাধিউপেক্খাসম্বোজ্ঝঙ্গা. সতিসম্বোজ্ঝঙ্গো পন সব্বত্থ ইচ্ছিতব্বো. তেনাহ ভগৰা – ‘‘যস্মিঞ্চ খো, ভিক্খৰে, সমযে লীনং চিত্তং হোতি, কালো তস্মিং সমযে ধম্মৰিচযসম্বোজ্ঝঙ্গস্স ভাৰনাযা’’তিআদি (সং. নি. ৫.২৩৪). সমথং অনুযুঞ্জেয্যাতি সমথভাৰনং ভাৰেয্য, অনুপ্পন্নং সমাধিং উপ্পাদেয্য, উপ্পন্নঞ্চ যাৰ ৰসীভাৰপ্পত্তি, তাৰ ৰড্ঢেয্য ব্যূহেয্যাতি অত্থো. কালেন চ ৰিপস্সনন্তি যথালদ্ধং সমাধিং নিকন্তিযা অপরিযাদানেন হানভাগিযং ঠিতিভাগিযং ৰা অকত্ৰা নিব্বেধভাগিযংৰ কত্ৰা কালেন ৰিপস্সনঞ্চ অনুযুঞ্জেয্য. অথ ৰা কালেন চ ৰিপস্সনন্তি সমথং অনুযুঞ্জন্তো তস্স থিরীভূতকালে সঙ্কোচং অনাপজ্জিত্ৰা অরিযমগ্গাধিগমায ৰিপস্সনং অনুযুঞ্জেয্য. যথাহ –

‘‘অথ ¶ ৰা সমাধিলাভেন, ৰিৰিত্তসযনেন ৰা;

ভিক্খু ৰিস্সাসমাপাদি, অপ্পত্তো আসৰক্খয’’ন্তি. (ধ. প. ২৭১-২৭২);

তেন ¶ ¶ ৰুত্তং – ‘‘ৰীরিযসাতচ্চসম্পন্নো’’তিআদি. সততভাৰো সাতচ্চং, ৰীরিযস্স সাতচ্চং, তেন সম্পন্নো সমন্নাগতো, সততপৰত্তৰীরিযো, নিচ্চপগ্গহিতৰীরিযোতি অত্থো. যুত্তযোগো সদা সিযাতি সব্বকালং ভাৰনানুযুত্তো সিযা. দুক্খন্তন্তি ৰট্টদুক্খস্স অন্তং পরিযোসানং নিরোধং নিব্বানং অপ্পত্ৰা ৰিস্সাসং ন এয্য ন গচ্ছেয্য. ‘‘অহং পরিসুদ্ধসীলো ঝানলাভী অভিঞ্ঞালাভী ৰিপস্সনং মত্থকং পাপেত্ৰা ঠিতো’’তি ৰা ৰিস্সট্ঠো ন ভৰেয্যাতি অত্থো.

এৰং ৰিহরমানস্সাতি, এৰং ৰিৰিত্তসেনাসনসেৰনাদিনা ৰিপস্সনাৰসেন যুত্তযোগতাপরিযোসানেন ৰিধিনা ৰিহরন্তস্স. সুদ্ধিকামস্সাতি, ঞাণদস্সনৰিসুদ্ধিং অচ্চন্তৰিসুদ্ধিং নিব্বানং অরহত্তঞ্চ ইচ্ছন্তস্স. সংসারে ভযস্স ইক্খতো ভিক্খুনো, কামাসৰাদযো সব্বে আসৰা খীযন্তি খযং অব্ভত্থং গচ্ছন্তি, তেসং খযগমনেনেৰ সউপাদিসেসঅনুপাদিসেসপভেদং দুৰিধম্পি নিব্বানং অধিগচ্ছতি পাপুণাতি.

এৰং থেরো তস্স ভিক্খুনো ওৰাদদানাপদেসেন অত্তনা তথাপটিপন্নভাৰং দীপেন্তো অঞ্ঞং ব্যাকাসি.

ৰঙ্গন্তপুত্তউপসেনত্থেরগাথাৰণ্ণনা নিট্ঠিতা.

৭. (অপর)-গোতমত্থেরগাথাৰণ্ণনা

ৰিজানেয্য সকং অত্থন্তিআদিকা আযস্মতো অপরস্স গোতমত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা অম্হাকং ভগৰতো উপ্পত্তিতো পুরেতরমেৰ সাৰত্থিযং উদিচ্চব্রাহ্মণকুলে নিব্বত্তিত্ৰা ৰযপ্পত্তো তিণ্ণং ৰেদানং পারগূ হুত্ৰা, ৰাদমগ্গং উগ্গহেত্ৰা অত্তনো ৰাদস্স উপরি উত্তরিং ৰদন্তং অলভন্তো তেহি তেহি ৰিগ্গাহিককথং অনুযুত্তো ৰিচরতি. অথ অম্হাকং ভগৰা লোকে উপ্পজ্জিত্ৰা ¶ পৰত্তিতৰরধম্মচক্কো অনুপুব্বেন যসাদিকে ৰেনেয্যে ৰিনেত্ৰা অনাথপিণ্ডিকস্স অভিযাচনায সাৰত্থিং উপগচ্ছি. তদা সত্থু জেতৰনপটিগ্গহে পটিলদ্ধসদ্ধো সত্থারং উপসঙ্কমিত্ৰা ধম্মং সুত্ৰা পব্বজ্জং যাচি. সত্থা ¶ অঞ্ঞতরং পিণ্ডচারিকং ভিক্খুং আণাপেসি – ‘‘ভিক্খু, ইমং পব্বাজেহী’’তি. সো তেন পব্বাজিযমানো খুরগ্গেযেৰ অরহত্তং পাপুণিত্ৰা কোসলজনপদং গন্ত্ৰা তত্থ চিরং ৰসিত্ৰা পুন সাৰত্থিং পচ্চাগমি. তং বহূ ঞাতকা ব্রাহ্মণমহাসালা উপসঙ্কমিত্ৰা পযিরুপাসিত্ৰা নিসিন্না ‘‘ইমস্মিং লোকে ¶ বহূ সমণব্রাহ্মণা সংসারে সুদ্ধিৰাদা, তেসু কতমেসং নু খো ৰাদো নিয্যানিকো, কথং পটিপজ্জন্তো সংসারতো সুজ্ঝতী’’তি পুচ্ছিংসু. থেরো তেসং তমত্থং পকাসেন্তো –

৫৮৭.

‘‘ৰিজানেয্য সকং অত্থং, অৰলোকেয্যাথ পাৰচনং;

যঞ্চেত্থ অস্স পতিরূপং, সামঞ্ঞং অজ্ঝূপগতস্স.

৫৮৮.

‘‘মিত্তং ইধ চ কল্যাণং, সিক্খা ৰিপুলং সমাদানং;

সুস্সূসা চ গরূনং, এতং সমণস্স পতিরূপং.

৫৮৯.

‘‘বুদ্ধেসু সগারৰতা, ধম্মে অপচিতি যথাভূতং;

সঙ্ঘে চ চিত্তীকারো, এতং সমণস্স পতিরূপং.

৫৯০.

‘‘আচারগোচরে যুত্তো, আজীৰো সোধিতো অগারয্হো;

চিত্তস্স চ সণ্ঠপনং, এতং সমণস্স পতিরূপং.

৫৯১.

‘‘চারিত্তং অথ ৰারিত্তং, ইরিযাপথিযং পসাদনিযং;

অধিচিত্তে চ আযোগো, এতং সমণস্স পতিরূপং.

৫৯২.

‘‘আরঞ্ঞকানি সেনাসনানি, পন্তানি অপ্পসদ্দানি;

ভজিতব্বানি মুনিনা, এতং সমণস্স পতিরূপং.

৫৯৩.

‘‘সীলঞ্চ বাহুসচ্চঞ্চ, ধম্মানং পৰিচযো যথাভূতং;

সচ্চানং অভিসমযো, এতং সমণস্স পতিরূপং.

৫৯৪.

‘‘ভাৰেয্য চ অনিচ্চন্তি, অনত্তসঞ্ঞং অসুভসঞ্ঞঞ্চ;

লোকম্হি চ অনভিরতিং, এতং সমণস্স পতিরূপং.

৫৯৫.

‘‘ভাৰেয্য ¶ চ বোজ্ঝঙ্গে, ইদ্ধিপাদানি ইন্দ্রিযানি বলানি;

অট্ঠঙ্গমগ্গমরিযং, এতং সমণস্স পতিরূপং.

৫৯৬.

‘‘তণ্হং পজহেয্য মুনি, সমূলকে আসৰে পদালেয্য;

ৰিহরেয্য ৰিপ্পমুত্তো, এতং সমণস্স পতিরূপ’’ন্তি. –

ইমা গাথা অভাসি.

তত্থ ¶ ৰিজানেয্য সকং অত্থন্তি, ৰিঞ্ঞূজাতিকো পুরিসো অত্তনো অত্থং যাথাৰতো ৰিচারেত্ৰা জানেয্য. ৰিচারেন্তো চ অৰলোকেয্যাথ পাৰচনং ইধ লোকে পুথুসমণব্রাহ্মণেহি সম্মাসম্বুদ্ধেন চ পৰুত্তং পাৰচনং, সমযো. তত্থ যং নিয্যানিকং, তং ওলোকেয্য পঞ্ঞাচক্খুনা পস্সেয্য. ইমে হি নানাতিত্থিযা সমণব্রাহ্মণা অনিচ্চে ‘‘নিচ্চ’’ন্তি, অনত্তনি ‘‘অত্তা’’তি, অসুদ্ধিমগ্গঞ্চ ‘‘সুদ্ধিমগ্গো’’তি মিচ্ছাভিনিৰেসিনো অঞ্ঞমঞ্ঞঞ্চ ৰিরুদ্ধৰাদা, তস্মা নেসং ৰাদো অনিয্যানিকো. সম্মাসম্বুদ্ধো পন ‘‘সব্বে সঙ্খারা অনিচ্চা, সব্বে ধম্মা অনত্তা, সন্তং নিব্বান’’ন্তি সযম্ভূঞাণেন যথাভূতং অব্ভঞ্ঞায পৰেদেতি, তস্মা ‘‘তস্স ¶ ৰাদো নিয্যানিকো’’তি সত্থু সাসনমহন্ততং ওলোকেয্যাতি অত্থো. যঞ্চেত্থ অস্স পতিরূপং, সামঞ্ঞং অজ্ঝূপগতস্সাতি, সামঞ্ঞং সমণভাৰং পব্বজ্জং উপগতস্স কুলপুত্তস্স যং এত্থ সাসনে পব্বজিতভাৰে ৰা পতিরূপং যুত্তরূপং সারুপ্পং অস্স সিযা, তম্পি অপলোকেয্য.

কিং পন তন্তি আহ ‘‘মিত্তং ইধ চ কল্যাণ’’ন্তিআদি. ইমস্মিং সাসনে কল্যাণমিত্তং সেৰিযমানং সমণস্স পতিরূপন্তি যোজনা. এস নযো ইতরেসুপি. কল্যাণমিত্তঞ্হি নিস্সায অকুসলং পজহতি, কুসলং ভাৰেতি, সুদ্ধমত্তানং পরিহরতি. সিক্খা ৰিপুলং সমাদানন্তি ৰিপুলং সিক্খাসমাদানং, মহতিযা নিব্বানাৰহায অধিসীলাদিসিক্খায অনুট্ঠানন্তি অত্থো. সুস্সূসা চ গরূনন্তি গরূনং আচরিযুপজ্ঝাযাদীনং কল্যাণমিত্তানং ওৰাদস্স সোতুকম্যতা পারিচরিযা চ. এতন্তি কল্যাণমিত্তসেৰনাদি.

বুদ্ধেসু সগারৰতাতি সব্বঞ্ঞুবুদ্ধেসু ‘‘সম্মাসম্বুদ্ধো ভগৰা’’তি গারৰযোগো গরুচিত্তীকারো. ধম্মে অপচিতি যথাভূতন্তি অরিযধম্মে যাথাৰতো ¶ অপচাযনং আদরেন অভিপূজনং. সঙ্ঘেতি অরিযসঙ্ঘে. চিত্তীকারোতি সক্কারো সম্মাননং. এতন্তি রতনত্তযগরুকরণং.

আচারগোচরে যুত্তোতি কাযিকৰাচসিকৰীতিক্কমনসঙ্খাতং অনাচারং, পিণ্ডপাতাদীনং অত্থায উপসঙ্কমিতুং অযুত্তট্ঠানভূতং ৰেসিযাদিঅগোচরঞ্চ পহায কাযিকৰাচসিকঅৰীতিক্কমনসঙ্খাতেন আচারেন পিণ্ডপাতাদীনং অত্থায উপসঙ্কমিতুং যুত্তট্ঠানভূতেন গোচরেন চ যুত্তো সম্পন্নো, সম্পন্নআচারগোচরোতি অত্থো. আজীৰো সোধিতোতি ৰেল়ুদানাদিং বুদ্ধপটিকুট্ঠং অনেসনং পহায অনৰজ্জুপ্পাদে পচ্চযে সেৰন্তস্স আজীৰো সোধিতো হোতি সুৰিসুদ্ধো, সোধিতত্তা এৰ অগারয্হো ৰিঞ্ঞূহি. চিত্তস্স চ সণ্ঠপনন্তি যথা চক্খাদিদ্ৰারেহি রূপাদিআরম্মণেসু অভিজ্ঝাদযো নপ্পৰত্তন্তি, এৰং দিট্ঠে দিট্ঠমত্তাদিৰসেন চিত্তস্স ¶ সম্মা ঠপনং. এতন্তি আচারগোচরসম্পত্তি আজীৰপারিসুদ্ধি ইন্দ্রিযেসু গুত্তদ্ৰারতাতি এতং তযং.

চারিত্তন্তি চরিত্ৰা পরিপূরেতব্বসীলং. ৰারিত্তন্তি ৰিরতিযা অকরণেন পরিপূরেতব্বসীলং. ইরিযাপথিযং পসাদনিযন্তি পরেসং পসাদাৰহং আকপ্পসম্পত্তিনিমিত্তং ইরিযাপথনিস্সিতং সম্পজঞ্ঞং. অধিচিত্তে চ আযোগোতি সমথৰিপস্সনাসু অনুযোগো ভাৰনা.

আরঞ্ঞকানীতি অরঞ্ঞে পরিযাপন্নানি. পন্তানীতি ৰিৰিত্তানি.

সীলন্তি চতুপারিসুদ্ধিসীলং. হেট্ঠা হি ভিন্দিত্ৰা ৰুত্তং, ইধ অভিন্দিত্ৰা ¶ ৰদতি. বাহুসচ্চন্তি বহুস্সুতভাৰো. সো হি ভাৰনানুযোগস্স বহুকারো, বোজ্ঝঙ্গকোসল্লঅনুত্তরসীতিভাৰঅধিচিত্তযুত্ততাদীসু সম্মা পৰিচযবহুলস্স সমথৰিপস্সনানুযোগো সম্পজ্জতি. ধম্মানং পৰিচযো যথাভূতন্তি রূপারূপধম্মানং অৰিপরীতসলক্খণতো সামঞ্ঞলক্খণতো চ পরিৰীমংসা. ইমিনা অধিপঞ্ঞাধম্মৰিপস্সনমাহ. সচ্চানং অভিসমযোতি দুক্খাদীনং অরিযসচ্চানং পরিঞ্ঞাভিসমযাদিৰসেন পটিৰেধো.

স্ৰাযং সচ্চাভিসমযো যথা হোতি, তং দস্সেতুং ‘‘ভাৰেয্যা’’তিআদি ৰুত্তং. তত্থ ভাৰেয্য চ অনিচ্চন্তি ‘‘সব্বে সঙ্খারা অনিচ্চা’’তিআদিনা (ধ. প. ২৭৭) অৰিভাগতো ¶ ‘‘যং কিঞ্চি রূপং অতীতানাগতপচ্চুপ্পন্ন’’ন্তিআদিনা (ৰিভ. ২; সং. নি. ৩.৪৯) ৰিভাগতো ৰা সব্বসঙ্খারেসু অনিচ্চসঞ্ঞং ভাৰেয্য উপ্পাদেয্য চেৰ ৰড্ঢেয্য চাতি অত্থো. অনত্তসঞ্ঞন্তি, ‘‘সব্বে ধম্মা অনত্তা’’তি পৰত্তং অনত্তসঞ্ঞঞ্চ ভাৰেয্যাতি যোজনা. এৰং সেসেসুপি. অসুভসঞ্ঞন্তি, করজকাযে সব্বস্মিম্পি ৰা তেভূমকসঙ্খারে কিলেসাসুচিপগ্ঘরণতো ‘‘অসুভা’’তি পৰত্তসঞ্ঞং. দুক্খসঞ্ঞাপরিৰারা হি অযং, এতেনেৰ চেত্থ দুক্খসঞ্ঞাপি গহিতাতি ৰেদিতব্বং. লোকম্হি চ অনভিরতিন্তি সব্বলোকে তেভূমকেসু সঙ্খারেসু অনাভিরতিসঞ্ঞং. এতেন আদীনৰানুপস্সনং নিব্বিদানুপস্সনঞ্চ ৰদতি.

এৰং পন ৰিপস্সনাভাৰনং অনুযুত্তো তং উস্সুক্কাপেন্তো ইমে ধম্মে ৰড্ঢেয্যাতি দস্সেন্তো ‘‘ভাৰেয্য চ বোজ্ঝঙ্গে’’তি গাথমাহ. তস্সত্থো – বোধিযা সতিআদিসত্তৰিধধম্মসামগ্গিযা, বোধিস্স ৰা তংসমঙ্গিনো পুগ্গলস্স অঙ্গাতি বোজ্ঝঙ্গা, সতিআদযো ধম্মা. তে সতিআদিকে সত্তবোজ্ঝঙ্গে, ছন্দআদীনি চত্তারি ইদ্ধিপাদানি, সদ্ধাদীনি পঞ্চিন্দ্রিযানি, সদ্ধাদীনিযেৰ পঞ্চ ¶ বলানি, সম্মাদিট্ঠিআদীনং ৰসেন অট্ঠঙ্গঅরিযমগ্গঞ্চ. চ-সদ্দেন সতিপট্ঠানানি সম্মপ্পধানানি চ গহিতানীতি সব্বেপি সত্ততিংসপ্পভেদে বোধিপক্খিযধম্মে ভাৰেয্য উপ্পাদেয্য চেৰ ৰড্ঢেয্য চ. তত্থ যদেতেসং পঠমমগ্গক্খণে উপ্পাদনং, উপরিমগ্গক্খণে চ ৰড্ঢনং, এতং সমণস্স ভিক্খুনো সারুপ্পন্তি.

এৰং বোধিপক্খিযসত্ততিংসধম্মে ভাৰেন্তো যথা মগ্গসচ্চং ভাৰনাভিসমযৰসেন অভিসমেতি, এৰং সমুদযসচ্চং পহানাভিসমযৰসেন, নিরোধসচ্চং সচ্ছিকিরিযাভিসমযৰসেন অভিসমেতীতি দস্সেন্তো ‘‘তণ্হং পজহেয্যা’’তি ওসানগাথমাহ. তত্থ তণ্হং পজহেয্যাতি, কামতণ্হাদিপভেদং সব্বং তণ্হং অরিযমগ্গেন অনৰসেসতো সমুচ্ছিন্দেয্য, মোনং ৰুচ্চতি ঞাণং, তেন ¶ সমন্নাগতত্তা মুনি. সমূলকে আসৰে পদালেয্যাতি কামরাগানুসযাদিসমূলকে কামাসৰাদিকে সব্বেপি আসৰে ভিন্দেয্য সমুচ্ছিন্দেয্য. ৰিহরেয্য ৰিপ্পমুত্তোতি এৰং সব্বসো কিলেসানং পহীনত্তা সব্বধি ৰিমুত্তো সব্বূপধিপটিনিস্সগ্গং ¶ নিরোধং নিব্বানং সচ্ছিকত্ৰা ৰিহরেয্য. এতন্তি যদেতং ৰিহরণং, এতং সমণস্স সমিতপাপস্স ভিক্খুনো পতিরূপং সারুপ্পন্তি অত্থো.

এৰং থেরো সমণসারুপ্পপটিপত্তিকিত্তনমুখেন সাসনস্স নিয্যানিকভাৰং তব্বিলোমতো বাহিরকসমযস্স অনিয্যানিকতঞ্চ ৰিভাৰেসি. তং সুত্ৰা তে ব্রাহ্মণমহাসালা সাসনে অভিপ্পসন্না সরণাদীসু পতিট্ঠহিংসু.

(অপর)-গোতমত্থেরগাথাৰণ্ণনা নিট্ঠিতা.

দসকনিপাতৰণ্ণনা নিট্ঠিতা.

১১. একাদসনিপাতো

১. সংকিচ্চত্থেরগাথাৰণ্ণনা

একাদসনিপাতে ¶ ¶ কিং তৰত্থো ৰনে তাতাতিআদিকা আযস্মতো সংকিচ্চত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে সাৰত্থিযং ব্রাহ্মণমহাসালকুলে পটিসন্ধিং গণ্হি. তস্মিং কুচ্ছিগতেযেৰ মাতা ব্যাধিতা হুত্ৰা কালমকাসি. তস্সা সুসানং নেত্ৰা ঝাপিযমানায গব্ভাসযো ন ঝাযি. মনুস্সা সূলেহি কুচ্ছিং ৰিজ্ঝন্তা দারকস্স অক্খিকোটিং পহরিংসু. তে তং ৰিজ্ঝিত্ৰা অঙ্গারেহি পটিচ্ছাদেত্ৰা পক্কমিংসু. কুচ্ছিপদেসোপি ঝাযি, অঙ্গারমত্থকে পন সুৰণ্ণবিম্বসদিসো দারকো পদুমগব্ভে নিপন্নো ৰিয অহোসি. পচ্ছিমভৰিকসত্তস্স হি সিনেরুনা ওত্থরিযমানস্সপি অরহত্তং অপ্পত্ৰা জীৰিতক্খযো নাম নত্থি.

পুনদিৰসে আল়াহনট্ঠানং গতা মনুস্সা তথানিপন্নং দারকং দিস্ৰা অচ্ছরিযব্ভুতচিত্তজাতা দারকং আদায গামং পৰিসিত্ৰা নেমিত্তকে পুচ্ছিংসু. নেমিত্তকা ‘‘সচে অযং দারকো অগারং অজ্ঝাৰসিস্সতি, যাৰ সত্তমা কুলপরিৰট্টা দুগ্গতা ভৰিস্সন্তি. সচে পব্বজিস্সতি, পঞ্চহি সমণসতেহি পরিৰুতো ৰিচরিস্সতী’’তি আহংসু. ঞাতকা ‘‘হোতু, ৰড্ঢিতকালে অম্হাকং অয্যস্স সারিপুত্তত্থেরস্স সন্তিকে তং পব্বাজেস্সামা’’তি ৰত্ৰা সঙ্কুনা ছিন্নক্খিকোটিতায সংকিচ্চোতি ৰদন্তা অপরভাগে সংকিচ্চোতি ৰোহরিংসু. সো সত্তৰস্সিককালে অত্তনো গব্ভগতস্সেৰ মাতু মরণং, গব্ভে চ অত্তনো ¶ পৰত্তিং সুত্ৰা সংৰেগজাতো ‘‘পব্বজিস্সামী’’তি আহ. ঞাতকা ‘‘সাধু, তাতা’’তি ধম্মসেনাপতিস্স সন্তিকং নেত্ৰা, ‘‘ভন্তে, ইমং পব্বাজেথা’’তি অদংসু. থেরো তং তচপঞ্চককম্মট্ঠানং দত্ৰা পব্বাজেসি. সো খুরগ্গেযেৰ সহ পটিসম্ভিদাহি অরহত্তং পত্ৰা তিংসমত্তেহি ভিক্খূহি সদ্ধিং অরঞ্ঞে ৰিহরন্তো চে চোরহত্থতো মোচেত্ৰা সযম্পি তে চোরে দমেত্ৰা পব্বাজেত্ৰা অঞ্ঞতরস্মিং ৰিহারে বহূহি ভিক্খূহি সদ্ধিং ৰিহরন্তো ¶ তে ৰিৰাদপসুতে দিস্ৰা ‘‘অঞ্ঞত্থ গচ্ছামী’’তি ভিক্খূ আপুচ্ছি. অযমেত্থ সঙ্খেপো, ৰিত্থারো পন ধম্মপদৰত্থুম্হি (ধ. প. অট্ঠ. ১.সঙ্কিচ্চসামণেরৰত্থু) ¶ আগতনযেনেৰ ৰেদিতব্বো. অথ নং অঞ্ঞতরো উপাসকো উপট্ঠাতুকামো আসন্নট্ঠানে ৰাসং যাচন্তো –

৫৯৭.

‘‘কিং তৰত্থো ৰনে তাত, উজ্জুহানোৰ পাৰুসে;

ৰেরম্ভা রমণীযা তে, পৰিৰেকো হি ঝাযিন’’ন্তি. –

পঠমং গাথমাহ. তং সুত্ৰা থেরো –

৫৯৮.

‘‘যথা অব্ভানি ৰেরম্ভো, ৰাতো নুদতি পাৰুসে;

সঞ্ঞা মে অভিকিরন্তি, ৰিৰেকপটিসঞ্ঞুতা.

৫৯৯.

‘‘অপণ্ডরো অণ্ডসম্ভৰো, সীৰথিকায নিকেতচারিকো;

উপ্পাদযতেৰ মে সতিং, সন্দেহস্মিং ৰিরাগনিস্সিতং.

৬০০.

‘‘যঞ্চ অঞ্ঞে ন রক্খন্তি, যো চ অঞ্ঞে ন রক্খতি;

স ৰে ভিক্খু সুখং সেতি, কামেসু অনপেক্খৰা.

৬০১.

‘‘অচ্ছোদিকা পুথুসিলা, গোনঙ্গলমিগাযুতা;

অম্বুসেৰালসঞ্ছন্না, তে সেলা রমযন্তি মং.

৬০২.

‘‘ৰসিতং মে অরঞ্ঞেসু, কন্দরাসু গুহাসু চ;

সেনাসনেসু পন্তেসু, ৰাল়মিগনিসেৰিতে.

৬০৩.

‘‘‘ইমে হঞ্ঞন্তু ৰজ্ঝন্তু, দুক্খং পপ্পোন্তু পাণিনো’;

সঙ্কপ্পং নাভিজানামি, অনরিযং দোসসংহিতং.

৬০৪.

‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

৬০৫.

‘‘যস্স চত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

৬০৬.

‘‘নাভিনন্দামি ¶ মরণং, নাভিনন্দামি জীৰিতং;

কালঞ্চ পটিকঙ্খামি, নিব্বিসং ভতকো যথা.

৬০৭.

‘‘নাভিনন্দামি মরণং, নাভিনন্দামি জীৰিতং.

কালঞ্চ পটিকঙ্খামি, সম্পজানো পতিস্সতো’’তি. – ইমা গাথা অভাসি;

তত্থ কিং তৰত্থো ৰনেতি কিন্তি লিঙ্গৰিপল্লাসেন ৰুত্তং. ৰনে কো তৰত্থো, কিং পযোজনন্তি অত্থো. তাতাতি দহরসামণেরতায নং অত্তনো পুত্তট্ঠানে ঠপেত্ৰা আলপতি. উজ্জুহানোৰ পাৰুসেতি ¶ উজ্জুহানো কির নাম একো পব্বতো, সো পন গহনসঞ্ছন্নো বহুসোণ্ডিকন্দরো, তহং তহং সন্দমানসলিলো ¶ , ৰস্সকালে অসপ্পাযো, তস্মা উজ্জুহানো ৰা পব্বতো এতরহি পাৰুসকালে তৰ কিমত্থিযোতি অত্থো. কেচি পনেত্থ ‘‘উজ্জুহানো নাম একো সকুণো সীতং ন সহতি, ৰস্সকালে ৰনগুম্বে নিলীনো অচ্ছতী’’তি ৰদন্তি. তেসং মতেন উজ্জুহানস্স ৰিয সকুণস্স পাৰুসকালে কো তৰ অত্থো ৰনেতি? ৰেরম্ভা রমণীযা তেতি ৰেরম্ভৰাতা ৰাযন্তা কিং তে রমণীযাতি যোজনা. কেচি ‘‘ৰেরম্ভা নাম একা পব্বতগুহা, পব্ভারো’’তি চ ৰদন্তি. তঞ্চ ঠানং গমনাগমনযুত্তং জনসম্বাধরহিতং ছাযূদকসম্পন্নঞ্চ, তস্মা ৰেরম্ভা রমণীযা, ৰনে ৰসিতুং যুত্তরূপা. কস্মা? পৰিৰেকো হি ঝাযিনং যস্মা তাদিসানং ঝাযীনং যত্থ কত্থচি পৰিৰেকোযেৰ ইচ্ছিতব্বো, তস্মা ‘‘দূরং অরঞ্ঞট্ঠানং অগন্ত্ৰা ৰেরম্ভাযং ৰস, তাতা’’তি ৰদতি. অযঞ্হেত্থ অধিপ্পাযো – যস্মা ঝাযীনং পৰিৰেকক্খমে নিৰাসফাসুকে সেনাসনে লদ্ধেযেৰ ঝানাদযো সম্পজ্জন্তি, ন অলদ্ধে, তস্মা ন এৰরূপে সীতকালে যত্থ কত্থচি ৰনে ৰসিতুং সক্কা, গুহাপব্ভারাদীসু পন সক্কাতি.

এৰং উপাসকেন ৰুত্তে থেরো ৰনাদযো এৰ মং রমেন্তীতি দস্সেন্তো ‘‘যথা অব্ভানী’’তিআদিমাহ. তস্সত্থো – যথা পাৰুসে কালে অব্ভানি ৰলাহকানি ৰেরম্ভৰাতো নুদতি খিপতি নীহরতি, এৰমেৰ মে চিত্তং ৰিৰেকপটিসঞ্ঞুতা সঞ্ঞা অভিকিরন্তি ৰিৰেকট্ঠানংযেৰ আকড্ঢন্তি.

কিঞ্চ ¶ ? অপণ্ডরো কাল়ৰণ্ণো, অণ্ডসম্ভৰো অণ্ডজো কাকো, সীৰথিকায সুসানট্ঠানে, নিকেতচারিকো তমেৰ নিৰাসনট্ঠানং কত্ৰা ৰিচরণকো উপ্পাদযতেৰ মে সতিং, সন্দেহস্মিং ৰিরাগনিস্সিতন্তি, কাযস্মিং ৰিরাগূপসংহিতং কাযগতাসতিকম্মট্ঠানং ময্হং উপ্পাদযতিযেৰ. একদিৰসং কির থেরো কাকেন খজ্জমানং মনুস্সকুণপং পস্সিত্ৰা অসুভসঞ্ঞং পটিলভি, তং সন্ধায এৰমাহ. তেন কাযে সব্বসো ছন্দরাগস্স নত্থিতায ৰনেযেৰ ৰসিতুকামোম্হীতি দস্সেতি. যঞ্চাতি চ-সদ্দো সমুচ্চযত্থো, তেন অঞ্ঞম্পি মম অরঞ্ঞৰাসকারণং সুণাহীতি দস্সেতি. যং পব্বজিতং মেত্তাৰিহারিতায অলোভনিযপরিক্খারতায চ রক্খিতব্বস্স অভাৰতো অঞ্ঞে সেৰকাদযো ন রক্খন্তি. যো চ পব্বজিতো অঞ্ঞে কেনচি কিঞ্চনপলিবোধভূতে ন রক্খতি তাদিসানংযেৰ অভাৰতো. স ৰে ভিক্খু সুখং সেতীতি, সো ভিক্খু সমুচ্ছিন্নকিলেসকামতায সব্বসো ৰত্থুকামেসু অনপেক্খৰা অপেক্খারহিতো যত্থ কত্থচি ¶ সুখং সেতি. তস্স অনুসঙ্কিতপরিসঙ্কিতাভাৰতো অরঞ্ঞম্হি গামম্হি সদিসমেৰাতি অত্থো.

ইদানি ¶ পব্বতৰনাদীনং রমণীযতং ৰসিতপুব্বতঞ্চ দস্সেতুং ‘‘অচ্ছোদিকা’’তিআদি ৰুত্তং. তত্থ ৰসিতং মেতি, ৰুট্ঠপুব্বং মযা. ৰাল়মিগনিসেৰিতেতি, সীহব্যগ্ঘাদীহি ৰাল়মিগেহি উপসেৰিতে ৰনে.

সঙ্কপ্পং নাভিজানামীতি, ইমে যে কেচি পাণিনো সত্তা উসুসত্তিআদীহি পহরণেহি হঞ্ঞন্তু মারিযন্তু মুট্ঠিপ্পহারাদীহি ৰজ্ঝন্তু বাধীযন্তু, অঞ্ঞেন ৰা যেন কেনচি আকারেন দুক্খং পপ্পোন্তু পাপুণন্তূতি; এৰং দোসসংহিতং পটিঘসংযুত্তং ততো এৰ অনরিযং ব্যাপাদৰিহিংসাদিপ্পভেদং পাপসঙ্কপ্পং উপ্পাদিতং নাভিজানামি, মিচ্ছাৰিতক্কো ন উপ্পন্নপুব্বোতি মেত্তাৰিহারিতং দস্সেতি.

ইদানি ‘‘পরিচিণ্ণো’’তিআদিনা অত্তনো কতকিচ্চতং দস্সেতি. তত্থ পরিচিণ্ণোতি উপাসিতো ওৰাদানুসাসনীকরণৰসেন. ওহিতোতি ওরোহিতো. গরুকো ভারোতি গরুতরো খন্ধভারো.

নাভিনন্দামি ¶ মরণন্তি ‘‘কথং নু খো মে মরণং সিযা’’তি মরণং ন ইচ্ছামি. নাভিনন্দামি জীৰিতন্তি ‘‘কথং নু খো অহং চিরং জীৰেয্য’’ন্তি জীৰিতম্পি ন ইচ্ছামি. এতেন মরণে জীৰিতে চ সমানচিত্ততং দস্সেতি. কালঞ্চ পটিকঙ্খামীতি পরিনিব্বানকালংৰ আগমেমি. নিব্বিসন্তি নিব্বিসন্তো, ভতিযা কম্মং করোন্তো. ভতকো যথাতি যথা ভতকো পরস্স কম্মং করোন্তো কম্মসিদ্ধিং অনভিনন্দন্তোপি কম্মং করোন্তোৰ দিৰসক্খযং উদিক্খতি, এৰং অহম্পি জীৰিতং অনভিনন্দন্তোপি অত্তভাৰস্স যাপনেন মরণং অনভিনন্দন্তোপি পরিযোসানকালং পটিকঙ্খামীতি. সেসং ৰুত্তনযমেৰ.

সংকিচ্চত্থেরগাথাৰণ্ণনা নিট্ঠিতা.

একাদসনিপাতৰণ্ণনা নিট্ঠিতা.

১২. দ্ৰাদসকনিপাতো

১. সীলৰত্থেরগাথাৰণ্ণনা

দ্ৰাদসকনিপাতে ¶ ¶ সীলমেৰাতিআদিকা আযস্মতো সীলৰত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে রাজগহে বিম্বিসাররঞ্ঞো পুত্তো হুত্ৰা নিব্বত্তি, সীলৰাতিস্স নামং অহোসি. তং ৰযপ্পত্তং রাজা অজাতসত্তু মারেতুকামো চণ্ডং মত্তহত্থিং আরোপেত্ৰা নানাৰিধেহি উপাযেহি উপক্কমন্তোপি মারেতুং নাসক্খি পচ্ছিমভৰিকস্স অরহত্তং অপ্পত্ৰা অন্তরা জীৰিতন্তরাযাভাৰতো. তস্স পৰত্তিং ¶ দিস্ৰা ভগৰা মহামোগ্গল্লানত্থেরং আণাপেসি – ‘‘সীলৰকুমারং আনেহী’’তি. থেরো ইদ্ধিবলেন সদ্ধিং হত্থিনা তং আনেসি. কুমারো হত্থিতো ওরুয্হ ভগৰন্তং অভিৰাদেত্ৰা একমন্তং নিসীদি. ভগৰা তস্স অজ্ঝাসযানুরূপং ধম্মং দেসেসি. সো ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পত্ৰা কোসলরট্ঠে ৰসতি. অথ নং অজাতসত্তু ‘‘মারেথা’’তি পুরিসে আণাপেসি. তে থেরস্স সন্তিকং গন্ত্ৰা ঠিতা থেরেন কথিতং ধম্মকথং সুত্ৰা সঞ্জাতসংৰেগা পসন্নচিত্তা হুত্ৰা পব্বজিংসু. থেরো তেসং –

৬০৮.

‘‘সীলমেৰিধ সিক্খেথ, অস্মিং লোকে সুসিক্খিতং.

সীলঞ্হি সব্বসম্পত্তিং, উপনামেতি সেৰিতং.

৬০৯.

‘‘সীলং রক্খেয্য মেধাৰী, পত্থযানো তযো সুখে;

পসংসং ৰিত্তিলাভঞ্চ, পেচ্চ সগ্গে পমোদনং.

৬১০.

‘‘সীলৰা হি বহূ মিত্তে, সঞ্ঞমেনাধিগচ্ছতি;

দুস্সীলো পন মিত্তেহি, ধংসতে পাপমাচরং.

৬১১.

‘‘অৰণ্ণঞ্চ অকিত্তিঞ্চ, দুস্সীলো লভতে নরো;

ৰণ্ণং কিত্তিং পসংসঞ্চ, সদা লভতি সীলৰা.

৬১২.

‘‘আদি ¶ ¶ সীলং পতিট্ঠা চ, কল্যাণানঞ্চ মাতুকং;

পমুখং সব্বধম্মানং, তস্মা সীলং ৰিসোধযে.

৬১৩.

‘‘ৰেলা চ সংৰরং সীলং, চিত্তস্স অভিহাসনং;

তিত্থঞ্চ সব্ববুদ্ধানং, তস্মা সীলং ৰিসোধযে.

৬১৪.

‘‘সীলং বলং অপ্পটিমং, সীলং আৰুধমুত্তমং;

সীলমাভরণং সেট্ঠং, সীলং কৰচমব্ভুতং.

৬১৫.

‘‘সীলং সেতু মহেসক্খো, সীলং গন্ধো অনুত্তরো;

সীলং ৰিলেপনং সেট্ঠং, যেন ৰাতি দিসোদিসং.

৬১৬.

‘‘সীলং সম্বলমেৰগ্গং, সীলং পাথেয্যমুত্তমং;

সীলং সেট্ঠো অতিৰাহো, যেন যাতি দিসোদিসং.

৬১৭.

‘‘ইধেৰ নিন্দং লভতি, পেচ্চাপাযে চ দুম্মনো;

সব্বত্থ দুম্মনো বালো, সীলেসু অসমাহিতো.

৬১৮.

‘‘ইধেৰ কিত্তিং লভতি, পেচ্চ সগ্গে চ সুম্মনো;

সব্বত্থ সুমনো ধীরো, সীলেসু সুসমাহিতো.

৬১৯.

‘‘সীলমেৰ ইধ অগ্গং, পঞ্ঞৰা পন উত্তমো;

মনুস্সেসু চ দেৰেসু, সীলপঞ্ঞাণতো জয’’ন্তি. –

ইমাহি গাথাহি ধম্মং দেসেসি.

তত্থ সীলমেৰিধ সিক্খেথ, অস্মিং লোকেতি ইধাতি, নিপাতমত্তং, ইমস্মিং সত্তলোকে অত্থকামো কুলপুত্তো চারিত্তৰারিত্তাদিভেদং আদিতো সীলমেৰ সিক্খেয্য, সিক্খন্তো চ নং সুসিক্খিতং অখণ্ডাদিভাৰাপাদনেন সুট্ঠু সিক্খিতং সুপরিসুদ্ধং পরিপুণ্ণঞ্চ কত্ৰা সিক্খেয্য. অস্মিং ¶ লোকেতি ৰা ইমস্মিং সঙ্খারলোকে সিক্খিতব্বধম্মেসু সীলং আদিতো সিক্খেয্য. দিট্ঠিসম্পত্তিযাপি সীলস্স পতিট্ঠাভাৰতো আহ ‘‘সীলং হী’’তিআদি. তত্থ হীতি কারণৰচনং. যস্মা সীলং সেৰিতং পরিচিতং রক্খিতং ¶ মনুস্সসম্পত্তি, দিব্বসম্পত্তি, নিব্বানসম্পত্তীতি এতং সব্বসম্পত্তিং তংসমঙ্গিনো সত্তস্স উপনামেতি আৰহতি.

সীলং সব্বসম্পত্তিং উপনামেতীতি সঙ্খেপতো ৰুত্তমত্থং ৰিত্থারতো দস্সেন্তো ‘‘সীলং রক্খেয্যা’’তিআদিমাহ. তত্থ রক্খেয্যাতি গোপেয্য. পাণাতিপাতাদিতো হি ৰিরমন্তো ৰত্তপটিৰত্তঞ্চ পূরেন্তো পটিপক্খাভিভৰনতো তং রক্খতি নাম. মেধাৰীতি পঞ্ঞৰা, ইদং তস্স রক্খনুপাযদস্সনং ঞাণবলেন হিস্স সমাদানং অৰিকোপনঞ্চ হোতি. পত্থযানোতি ইচ্ছন্তো. তযো সুখেতি ¶ তীণি সুখানি. সুখনিমিত্তং ৰা ‘‘সুখ’’ন্তি অধিপ্পেতং. পসংসন্তি কিত্তিং, ৰিঞ্ঞূহি ৰা পসংসনং. ৰিত্তিলাভন্তি তুট্ঠিলাভং. ‘‘ৰিত্তলাভ’’ন্তি চ পঠন্তি, ধনলাভন্তি অত্থো. সীলৰা হি অপ্পমত্ততায মহন্তং ভোগক্খন্ধং অধিগচ্ছতি. পেচ্চাতি কালঙ্কত্ৰা. সগ্গে পমোদনন্তি দেৰলোকে ইট্ঠেহি কামগুণেহি, মোদনঞ্চ পত্থযমানোতি সম্বন্ধো. ইধলোকে পসংসং ৰিত্তিলাভং পরলোকে দিব্বসম্পত্তিযা মোদনঞ্চ ইচ্ছন্তো সীলং রক্খেয্যাতি যোজনা.

সঞ্ঞমেনাতি কাযাদীনং সংযমেন. সংযতো হি কাযদুচ্চরিতাদীহি কঞ্চি অৰিহেঠেন্তো অভযদানং দদন্তো পিযমনাপতায মিত্তানি গন্থতি. ধংসতেতি অপেতি. পাপমাচরন্তি পাণাতিপাতাদিপাপকম্মং করোন্তো. দুস্সীলঞ্হি পুগ্গলং অত্থকামা সত্তা ন ভজন্তি, অঞ্ঞদত্থু পরিৰজ্জেন্তি.

অৰণ্ণন্তি অগুণং, সম্মুখা গরহং ৰা. অকিত্তিন্তি, অযসং অসিলোকং. ৰণ্ণন্তি গুণং. কিত্তিন্তি সিলোকং পত্থটযসতং. পসংসন্তি সম্মুখা থোমনং.

আদীতি মূলং. সীলঞ্হি কুসলানং ধম্মানং আদি. যথাহ – ‘‘তস্মাতিহ ত্ৰং, ভিক্খু, আদিমেৰ ৰিসোধেহি কুসলেসু ধম্মেসু. কো চাদি কুসলানং ধম্মানং? সীলঞ্চ সুৰিসুদ্ধ’’ন্তি (সং. নি. ৫.৩৬৯). পতিট্ঠাতি অধিট্ঠানং. সীলঞ্হি সব্বেসং উত্তরিমনুস্সধম্মানং পতিট্ঠা. তেনাহ – ‘‘সীলে পতিট্ঠাযা’’তিআদি (সং. নি. ১.২৩; ১৯২; পেটকো. ২২; মি. প. ২.১.৯). কল্যাণানঞ্চ মাতুকন্তি সমথৰিপস্সনাদীনং কল্যাণধম্মানং মাতুভূতং ¶ , জনকন্তি, অত্থো. পমুখং সব্বধম্মানন্তি, সব্বেসং পামোজ্জাদীনং অনৰজ্জধম্মানং পমুখং মুখভূতং, পৰত্তিদ্ৰারন্তি অত্থো. তস্মাতি আদিভাৰাদিতো. ৰিসোধযেতি অক্খণ্ডাদিভাৰেন সম্পাদেয্য.

ৰেলাতি দুচ্চরিতেহি অনতিক্কমনীযট্ঠেন ৰেলা, সীমাতি অত্থো ¶ . ৰেলাযতি ৰা দুস্সিল্যং চলযতি ৰিদ্ধংসেতীতি ৰেলা. সংৰরং সীলং কাযদুচ্চরিতাদীনং উপ্পত্তিদ্ৰারস্স পিদহনতো. অভিহাসনন্তি তোসনং অৰিপ্পটিসারহেতুতায চিত্তস্সাভিপ্পমোদনতো. তিত্থঞ্চ সব্ববুদ্ধানন্তি সাৰকবুদ্ধা, পচ্চেকবুদ্ধা, সম্মাসম্বুদ্ধাতি সব্বেসং বুদ্ধানং কিলেসমলপ্পৰাহনে নিব্বানমহাসমুদ্দাৰগাহণে চ তিত্থভূতঞ্চ.

সীলং বলং অপ্পটিমন্তি মারসেনপ্পমদ্দনে অসদিসং বলং সেনাথামো চ. আৰুধমুত্তমন্তি সংকিলেসধম্মানং ¶ ছেদনে উত্তমং পহরণং. গুণসরীরোপসোভনট্ঠেন আভরণং. সেট্ঠন্তি সব্বকালং উত্তমং দব্বঞ্চ. সপাণপরিত্তানতো কৰচমব্ভুতং. ‘‘অব্ভিদ’’ন্তি চ পঠন্তি, অভেজ্জন্তি অত্থো.

অপাযমহোঘাতিক্কমনে সংসারমহোঘাতিক্কমনে চ কিলেসেহি অসংসীদনট্ঠেন সেতু. মহেসক্খোতি মহব্বলো. গন্ধো অনুত্তরোতি পটিৰাতং সব্বদিসাসু ৰাযনতো অনুত্তরো গন্ধো সব্বজনমনোহরত্তা. তেনাহ ‘‘যেন ৰাতি দিসোদিস’’ন্তি যেন সীলগন্ধেন তংসমঙ্গী দিসোদিসং সব্বা দিসা ৰাযতি. ‘‘দিসোদিসা’’তিপি পাল়ি, দস দিসাতি অত্থো.

সম্বলমেৰগ্গন্তি সম্বলং নাম পুটভত্তং. যথা পুটভত্তং গহেত্ৰা মগ্গং গচ্ছন্তো পুরিসো অন্তরামগ্গে জিঘচ্ছাদুক্খেন ন কিলমতি, এৰং সীলসম্পন্নোপি সুদ্ধং সীলসম্বলং গহেত্ৰা সংসারকন্তারং পটিপন্নো গতগতট্ঠানে ন কিলমতীতি সীলং অগ্গং সম্বলং নাম. তথা সীলং পাথেয্যমুত্তমং চোরাদীহি অসাধারণত্তা তত্থ তত্থ ইচ্ছিতব্বসম্পত্তিনিপ্ফাদনতো চ. অতিক্কামেন্তো তং তং ঠানং যথিচ্ছিতট্ঠানং ৰা ৰাহেতি সম্পাপেতীতি অতিৰাহো, যানং. কেনচি অনুপদ্দুতং হুত্ৰা ইচ্ছিতট্ঠানপ্পত্তিহেতুতায ¶ সীলং সেট্ঠং অতিৰাহো. যেনাতি যেন অতিৰাহেন যাতি দিসোদিসন্তি অগতিং গতিঞ্চাপি তং তং দিসং সুখেনেৰ গচ্ছতি.

ইধেৰ নিন্দং লভতীতি ইধলোকেপি দুম্মনো রাগাদীহি দূসিতচিত্তো ‘‘দুস্সীলো পাপধম্মো’’তি নিন্দং গরহং লভতি. পেচ্চ পরলোকেপি অপাযে ‘‘পুরিসত্তকলি অৰজাতা’’তিআদিনা যমপুরিসাদীহি চ নিন্দং লভতি. ন কেৰলং নিন্দমেৰ লভতি, অথ খো সব্বত্থ দুম্মনো বালো ইধলোকে দুচ্চরিতচরণেন দূসিতচিত্তো পরলোকে কম্মকারণাদিৰসেন দুক্খুপ্পত্তিযাতি সব্বত্থ বালো দুম্মনো হোতি. কথং? সীলেসু অসমাহিতো সম্মা সীলেসু ন ঠপিতচিত্তো অপ্পতিট্ঠিতচিত্তো.

ইধেৰ কিত্তিং লভতীতি ইধলোকেপি সুমনো ‘‘সপ্পুরিসো সীলৰা কল্যাণধম্মো’’তি কিত্তিং লভতি. পেচ্চ পরলোকেপি সগ্গে ‘‘অযং সপ্পুরিসো সীলৰা কল্যাণধম্মো. তথা হি দেৰানং সহব্যতং উপপন্নো’’তিআদিনা কিত্তিং লভতি. ন কেৰলং কিত্তিমেৰ লভতি, অথ খো ¶ ধীরো ধিতিসম্পন্নো সীলেসু সুট্ঠু সমাহিতো অপ্পিতচিত্তো সুপতিট্ঠিতচিত্তো সব্বত্থ ইধলোকে সুচরিতচরণেন, পরলোকে সম্পত্তিপটিলাভেন সুমনো সোমনস্সপ্পত্তো হোতি. সীলমেৰ ইধ অগ্গন্তি দুৰিধং সীলং লোকিযং লোকুত্তরন্তি. তত্থ লোকিযং তাৰ কামলোকে খত্তিযমহাসালাদীসু, দেৰলোকে ব্রহ্মলোকে চ উপপত্তিৰিসেসং আৰহতি, লাভীভাৰাদিকস্স চ কারণং ¶ হোতি. লোকুত্তরং পন সকলম্পি ৰট্টদুক্খং অতিক্কামেতীতি সীলং অগ্গমেৰ. তথা হি ৰুত্তং –

‘‘হীনেন ব্রহ্মচরিযেন, খত্তিযে উপপজ্জতি;

মজ্ঝিমেন চ দেৰত্তং, উত্তমেন ৰিসুজ্ঝতী’’তি. (জা. ১.৮.৭৫);

আকঙ্খেয্য চে, ভিক্খৰে, ভিক্খু – ‘‘লাভী অস্সং চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি (ম. নি. ১.৬৫), ‘‘সীলেস্ৰেৰস্স পরিপূরকারী’’তি (ম. নি. ১.৬৫), ‘‘ইজ্ঝতি, ভিক্খৰে, সীলৰতো চেতোপণিধি ৰিসুদ্ধত্তা’’তি (অ. নি. ৮.৩৫; দী. নি. ৩.৩৩৭) চ.

লোকুত্তরসীলস্স ¶ পন সব্বসো পহীনপটিপক্খস্স সত্তমভৰতো পট্ঠায সংসারদুক্খং ৰিনিৰত্তেন্তস্স অগ্গভাৰে ৰত্তব্বমেৰ নত্থি. পঞ্ঞৰা পন উত্তমোতি ‘‘পঞ্ঞৰা পন পুগ্গলো উত্তমো পরমো সেট্ঠোযেৰা’’তি পুগ্গলাধিট্ঠানেন পঞ্ঞায এৰ সেট্ঠভাৰং ৰদতি. ইদানি সীলপঞ্ঞানং সেট্ঠভাৰং কিচ্চতো দস্সেন্তো ‘‘সীলপঞ্ঞাণতো জয’’ন্তি আহ. জযন্তি চ লিঙ্গৰিপল্লাসো দট্ঠব্বো, অহূতি ৰা ৰচনসেসো. তত্থ পজাননট্ঠেন পঞ্ঞাণং, সীলতো পঞ্ঞাণতো চ পটিপক্খজযো. ন হি সীলেন ৰিনা পঞ্ঞা সম্ভৰতি, পঞ্ঞায চ ৰিনা সীলং কিচ্চকরং, অঞ্ঞমঞ্ঞোপকারকঞ্চেতং. ৰুত্তঞ্হি ‘‘সীলপরিধোতা পঞ্ঞা, পঞ্ঞাপরিধোতং সীল’’ন্তি (দী. নি. ১.৩১৭) মনুস্সেসু চ দেৰেসূতি ইদং নেসং ঠানৰিসেসদস্সনং. তত্থ হি তানি সৰিসেসানি ৰত্তন্তি, সমাধি পনেত্থ সীলপক্খিকো পঞ্ঞায অধিট্ঠানভাৰতো, পঞ্ঞাপক্খিকো ৰা ভাৰেতব্বতো সীলাধিট্ঠানতো চ.

এৰং থেরো তেসং ভিক্খূনং সীলমুখেন ধম্মং দেসেন্তো অত্তনো সুৰিসুদ্ধসীলাদিগুণতাদীপনেন অঞ্ঞং ব্যাকাসি.

সীলৰত্থেরগাথাৰণ্ণনা নিট্ঠিতা.

২. সুনীতত্থেরগাথাৰণ্ণনা

নীচে ¶ কুলম্হীতিআদিকা আযস্মতো সুনীতত্থেরস্স গাথা. কা উপ্পত্তি? অযম্পি পুরিমবুদ্ধেসু ¶ কতাধিকারো তত্থ তত্থ ভৰে পুঞ্ঞানি উপচিনিত্ৰা দেৰমনুস্সেসু সংসরন্তো বুদ্ধস্স সুঞ্ঞকালে কুলগেহে নিব্বত্তিত্ৰা ৰযপ্পত্তো বালজনেহি সদ্ধিং কীল়াপসুতো হুত্ৰা ৰিচরন্তো একং পচ্চেকবুদ্ধং গামে পিণ্ডায চরন্তং দিস্ৰা, ‘‘কিং তুয্হং সব্বসো ৰণিতসরীরস্স ৰিয সকলং কাযং পটিচ্ছাদেত্ৰা ভিক্খাচরণেন, ননু নাম কসিৰাণিজ্জাদীহি জীৰিকা কপ্পেতব্বা? তানি চে কাতুং ন সক্কোসি, ঘরে ঘরে মুত্তকরীসাদীনি নীহরন্তো পচ্ছা ৰত্থুসোধনেন জীৰাহী’’তি অক্কোসি. সো তেন কম্মেন নিরযে পচ্চিত্ৰা তস্সেৰ কম্মস্স ৰিপাকাৰসেসেন মনুস্সলোকেপি বহূনি জাতিসতানি ¶ পুপ্ফছড্ডককুলে নিব্বত্তিত্ৰা তথা জীৰিকং কপ্পেসি. ইমস্মিঞ্চ বুদ্ধুপ্পাদে পুপ্ফছড্ডককুলে এৰ নিব্বত্তো উক্কারসোধনকম্মেন জীৰিকং কপ্পেতি ঘাসচ্ছাদনমত্তম্পি অলভন্তো.

অথ ভগৰা পচ্ছিমযামে বুদ্ধাচিণ্ণং মহাকরুণাসমাপত্তিং সমাপজ্জিত্ৰা ততো ৰুট্ঠায বুদ্ধচক্খুনা লোকং ৰোলোকেন্তো সুনীতস্স হদযব্ভন্তরে ঘটে পদীপং ৰিয পজ্জলন্তং অরহত্তূপনিস্সযং দিস্ৰা ৰিভাতায রত্তিযা পুব্বণ্হসমযং নিৰাসেত্ৰা পত্তচীৰরমাদায ভিক্খুসঙ্ঘপরিৰুতো রাজগহং পিণ্ডায পৰিট্ঠো. যস্সং ৰীথিযং সুনীতো উক্কারসোধনকম্মং করোতি, তং ৰীথিং পটিপজ্জি. সুনীতোপি তত্থ তত্থ ৰিঘাসুচ্চারসঙ্কারাদিকং রাসিং কত্ৰা পিটকেসু পক্খিপিত্ৰা কাজেনাদায পরিহরন্তো ভিক্খুসঙ্ঘপরিৰুতং সত্থারং আগচ্ছন্তং দিস্ৰা সারজ্জমানো সম্ভমাকুলহদযো গমনমগ্গং নিলীযনোকাসঞ্চ অলভন্তো কাজং ভিত্তিপস্সে ঠপেত্ৰা একেন পস্সেন অনুপৰিসন্তো ৰিয ভিত্তিং অল্লীনো পঞ্জলিকো অট্ঠাসি. ‘‘ভিত্তিছিদ্দেন অপক্কমিতুকামো অহোসী’’তিপি ৰদন্তি.

সত্থা তস্স সমীপং পত্ৰা ‘‘অযং অত্তনো কুসলমূলসঞ্চোদিতং উপগতং মং সারজ্জমানো জাতিযা কম্মস্স চ নিহীনতায সম্মুখীভাৰম্পি লজ্জতি, হন্দস্স ৰেসারজ্জং উপ্পাদেস্সামী’’তি করৰীকরুতমঞ্জুনা সকলনগরনিন্নাদৰর-গম্ভীরেন ব্রহ্মস্সরেন ‘‘সুনীতা’’তি আলপিত্ৰা ‘‘কিং ইমায দুক্খজীৰিকায পব্বজিতুং সক্খিস্সতী’’তি আহ. সুনীতো তেন সত্থু ৰচনেন অমতেন ৰিয অভিসিত্তো উল়ারং পীতিসোমনস্সং পটিসংৰেদেন্তো ‘‘ভগৰা, সচে মাদিসাপি ইধ পব্বজ্জং লভন্তি, কস্মাহং ন পব্বজিস্সামি, পব্বাজেথ মং ভগৰা’’তি আহ ¶ . সত্থা ‘‘এহি, ভিক্খূ’’তি আহ. সো তাৰদেৰ এহিভিক্খুভাৰেন পব্বজ্জং উপসম্পদঞ্চ লভিত্ৰা ইদ্ধিমযপত্তচীৰরধরো ৰস্সসট্ঠিকত্থেরো ৰিয হুত্ৰা সত্থু সন্তিকে অট্ঠাসি. ভগৰা তং ৰিহারং নেত্ৰা কম্মট্ঠানং আচিক্খি. সো পঠমং অট্ঠ সমাপত্তিযো, পঞ্চ চ অভিঞ্ঞাযো নিব্বত্তেত্ৰা ৰিপস্সনং ৰড্ঢেত্ৰা ছল়ভিঞ্ঞো অহোসি. তং সক্কাদযো দেৰা ব্রহ্মানো চ উপসঙ্কমিত্ৰা নমস্সিংসু. তেন ৰুত্তং –

‘‘তা ¶ ¶ দেৰতা সত্তসতা উল়ারা, ব্রহ্মা চ ইন্দো উপসঙ্কমিত্ৰা;

আজানীযং জাতিজরাভিভূতং, সুনীতং নমস্সন্তি পসন্নচিত্তা’’তিআদি.

ভগৰা তংযেৰ দেৰসঙ্ঘপুরক্খতং দিস্ৰা সিতং কত্ৰা পসংসন্তো ‘‘তপেন ব্রহ্মচরিযেনা’’তি গাথায ধম্মং দেসেসি. অথ নং সম্বহুলা ভিক্খূ সীহনাদং নদাপেতুকামা, ‘‘আৰুসো সুনীত, কস্মা কুলা ত্ৰং পব্বজিতো, কথং ৰা পব্বজিতো, কথঞ্চ সচ্চানি পটিৰিজ্ঝী’’তি পুচ্ছিংসু. সো তং সব্বং পকাসেন্তো –

৬২০.

‘‘নীচে কুলম্হি জাতোহং, দলিদ্দো অপ্পভোজনো;

হীনকম্মং মমং আসি, অহোসিং পুপ্ফছড্ডকো.

৬২১.

‘‘জিগুচ্ছিতো মনুস্সানং, পরিভূতো চ ৰম্ভিতো;

নীচং মনং করিত্ৰান, ৰন্দিস্সং বহুকং জনং.

৬২২.

‘‘অথদ্দসাসিং সম্বুদ্ধং, ভিক্খুসঙ্ঘপুরক্খতং;

পৰিসন্তং মহাৰীরং, মগধানং পুরুত্তমং.

৬২৩.

‘‘নিক্খিপিত্ৰান ব্যাভঙ্গিং, ৰন্দিতুং উপসঙ্কমিং;

মমেৰ অনুকম্পায, অট্ঠাসি পুরিসুত্তমো.

৬২৪.

‘‘ৰন্দিত্ৰা সত্থুনো পাদে, একমন্তং ঠিতো তদা;

পব্বজ্জং অহমাযাচিং, সব্বসত্তানমুত্তমং.

৬২৫.

‘‘ততো ¶ কারুণিকো সত্থা, সব্বলোকানুকম্পকো;

‘এহি ভিক্খূ’তি মং আহ, সা মে আসূপসম্পদা.

৬২৬. ‘‘সোহং একো অরঞ্ঞস্মিং, ৰিহরন্তো অতন্দিতো.

অকাসিং সত্থু ৰচনং, যথা মং ওৰদী জিনো.

৬২৭.

‘‘রত্তিযা পঠমং যামং, পুব্বজাতিমনুস্সরিং;

রত্তিযা মজ্ঝিমং যামং, দিব্বচক্খুং ৰিসোধযিং;

রত্তিযা পচ্ছিমে যামে, তমোখন্ধং পদালযিং.

৬২৮.

‘‘ততো ¶ রত্যাৰিৰসানে, সূরিযুগ্গমনং পতি; (জা. ১.১১.৭৯);

ইন্দো ব্রহ্মা চ আগন্ত্ৰা, মং নমস্সিংসু পঞ্জলী.

৬২৯.

‘‘নমো তে পুরিসাজঞ্ঞ, নমো তে পুরিসুত্তম;

যস্স তে আসৰা খীণা, দক্খিণেয্যোসি মারিস.

৬৩০.

‘‘ততো ¶ দিস্ৰান মং সত্থা, দেৰসঙ্ঘপুরক্খতং;

সিতং পাতুকরিত্ৰান, ইমমত্থং অভাসথ.

৬৩১.

‘‘তপেন ব্রহ্মচরিযেন, সংযমেন দমেন চ;

এতেন ব্রাহ্মণো হোতি, এতং ব্রাহ্মণমুত্তম’’ন্তি. –

ইমাহি গাথাহি সীহনাদং নদি.

তত্থ নীচেতি লামকে সব্বনিহীনে. উচ্চনীচভাৰো হি নাম সত্তানং উপাদাযুপাদায, অযং পন সব্বনিহীনে পুক্কুসকুলে উপ্পন্নতং দস্সেন্তো ‘‘নীচে কুলম্হি জাতো’’তি আহ. তেন ৰুত্তং – ‘‘নীচেতি লামকে সব্বনিহীনে’’তি. দলিদ্দোতি দুগ্গতো, দলিদ্দাপি কেচি কদাচি ঘাসচ্ছাদনস্স লাভিনো, অকসিরৰুত্তিনো হোন্তি, অহং পন সব্বকালং কসিরৰুত্তিতায হীনো উদ্ধনং উপট্ঠপিতউক্খলিকো দস্সনযুত্তং থেৰকম্পি অপস্সিং যেৰাতি দস্সেন্তো ‘‘অপ্পভোজনো’’তি আহ. নীচকুলিকা দলিদ্দাপি কেচি অনীচকম্মাজীৰা হোন্তি, ময্হং পন ন তথাতি দস্সেন্তো আহ ‘‘হীনকম্মং মমং আসী’’তি. কীদিসন্তি চে? অহোসিং পুপ্ফছড্ডকো, হত্থৰিকলস্স হত্থৰাতি ৰিয উপচারৰসেনাযং ইমস্স সমঞ্ঞা অহোসি যদিদং ‘‘পুপ্ফছড্ডকো’’তি. মিলাতপুপ্ফসন্থরৰণ্ণতায ৰা উক্কারভূমিযা এৰং ৰুত্তো.

জিগুচ্ছিতোতি জাতিযা চেৰ কম্মুনা চ হীল়িতো. মনুস্সানন্তি মনুস্সেহি. পরিভূতোতি অৰঞ্ঞাতো. ৰম্ভিতোতি খুংসিতো. নীচং মনং করিত্ৰানাতি অঞ্ঞে মনুস্সে সিনেরুং ৰিয উক্খিপিত্ৰা তেসং পাদপংসুতোপি অত্তানং নিহীনং কত্ৰা পৰত্তিযা নীচং নিহীনং মনং কত্ৰা. ৰন্দিস্সং ¶ বহুকং জনন্তি পুথুমহাজনং দিট্ঠদিট্ঠকালে ৰন্দিং সিরসি অঞ্জলিং করোন্তো পণামিং.

অথাতি অধিকারন্তরদীপনে নিপাতো. অদ্দসাসিন্তি অদ্দক্খিং. মগধানন্তি মগধা নাম জানপদিনো রাজকুমারা, তেসং নিৰাসো একোপি জনপদো রুল়্হিযা ‘‘মগধান’’ন্তি ৰুত্তো, মগধজনপদস্সাতি অত্থো. পুরুত্তমন্তি উত্তমং নগরং.

ব্যাভঙ্গিন্তি কাজং. পব্বজ্জং অহমাযাচিন্তি, ‘‘সুনীত, পব্বজিতুং সক্খিস্সসী’’তি সত্থারা ওকাসে কতে অহং পব্বজ্জং অযাচিং. আসূপসম্পদাতি ‘‘এহি, ভিক্খূ’’তি সত্থু ৰচনমত্তেন আসি উপসম্পদা. যথা মং ওৰদীতি ‘‘এৰং সমথপুব্বঙ্গমং ৰিপস্সনং ভাৰেহী’’তি যথা মং ওৰদি, তথা সত্থুনো ৰচনং অকাসিং পটিপজ্জিং. রত্তিযাতিআদি তস্সা পটিপত্তিযা রসদস্সনং. তত্থ পুব্বেনিৰাসঞাণং ¶ অনাগতংসঞাণঞ্চ বহুকিচ্চন্তি ‘‘পঠমং যামং ¶ মজ্ঝিমং যাম’’ন্তি অচ্চন্তসংযোগৰসেন উপযোগৰচনং ৰুত্তং. ন তথা আসৰক্খযঞাণং একাভিসমযৰসেন পৰত্তনতোতি ‘‘পচ্ছিমে যামে’’তি ভুম্মৰসেন ৰুত্তন্তি দট্ঠব্বং. ইন্দোতি সক্কো দেৰরাজা. ব্রহ্মাতি মহাব্রহ্মা. ইন্দব্রহ্মগ্গহণেন অঞ্ঞেসং কামদেৰানং ব্রহ্মূনঞ্চ আগমনং ৰুত্তমেৰাতি দট্ঠব্বং. উক্কট্ঠনিদ্দেসো হেস যথা ‘‘রাজা আগতো’’তি. নমস্সিংসূতি কাযেন ৰাচায চ নমক্কারং অকংসু.

তত্থ কাযেন কতং নমক্কারং দস্সেন্তো ‘‘পঞ্জলী’’তি ৰত্ৰা ৰাচায কতং দস্সেতুং ‘‘নমো তে’’তিআদি ৰুত্তং. দেৰসঙ্ঘপুরক্খতন্তি দেৰগ্গহণেন উপপত্তিদেৰভাৰতো ব্রহ্মানোপি গহিতা. সিতং পাতুকরিত্ৰানাতি অত্তনো ওৰাদস্স মহপ্ফলতং দেৰব্রহ্মূনঞ্চ গুণসম্পত্তিং নিস্সায সত্থা সিতং পাত্ৰাকাসি. পাতুকরোন্তো চ ন অঞ্ঞে ৰিয দন্তে ৰিদংসেতি, মুখাধানং পন থোকং ৰিৰরতি, তত্তকেন চ অভিভূতদিব্বফলিকমুত্তরস্মিযো অৰহসিততারকাসসিমরীচিযো সুসুক্কদাঠসম্ভৰা ঘনরস্মিযো নিক্খমিত্ৰা তিক্খত্তুং সত্থু মুখং পদক্খিণং করোন্তি, তং দিস্ৰা পচ্ছতো গচ্ছন্তাপি সত্থা সিতং পাত্ৰাকাসীতি সঞ্জানন্তি.

তপেনাতি ¶ ইন্দ্রিযসংৰরেন, ‘‘ধুতধম্মসমাদানেনা’’তি কেচি. সংযমেনাতি সীলেন. দমেনাতি পঞ্ঞায. ব্রহ্মচরিযেনাতি অৰসিট্ঠসেট্ঠচরিযায. এতেনাতি যথাৰুত্তেন তপাদিনা. ব্রাহ্মণো হোতি বাহিতপাপভাৰতো. এতন্তি তপাদি যথাৰুত্তং. ব্রাহ্মণমুত্তমন্তি উত্তমং ব্রাহ্মণং, ব্রাহ্মণেসু ৰা উত্তমং সব্বসেট্ঠং, অহূতি ৰচনসেসো. ব্রাহ্মণন্তি ৰা ব্রহ্মঞ্ঞমাহ, এৰং উত্তমং ব্রহ্মঞ্ঞং, ন জচ্চাদীতি অধিপ্পাযো. ন হি জাতিকুলপদেসগোত্তসম্পত্তিআদযো অরিযভাৰস্স কারণং, অধিসীলসিক্খাদযো এৰ পন কারণং. তেনাহ –

‘‘যথা সঙ্কারঠানস্মিং, উজ্ঝিতস্মিং মহাপথে;

পদুমং তত্থ জাযেথ, সুচিগন্ধং মনোরমং.

‘‘এৰং সঙ্কারভূতেসু, অন্ধভূতে পুথুজ্জনে;

অতিরোচতি পঞ্ঞায, সম্মাসম্বুদ্ধসাৰকো’’তি. (ধ. প. ৫৮-৫৯);

এৰং থেরো তেহি ভিক্খূহি পুচ্ছিতমত্থং ইমাহি গাথাহি ৰিস্সজ্জেন্তো সীহনাদং নদীতি.

সুনীতত্থেরগাথাৰণ্ণনা নিট্ঠিতা.

দ্ৰাদসকনিপাতৰণ্ণনা নিট্ঠিতা.

১৩. তেরসনিপাতো

১. সোণকোল়িৰিসত্থেরগাথাৰণ্ণনা

তেরসনিপাতে ¶ ¶ ¶ যাহু রট্ঠেতিআদিকা আযস্মতো সোণস্স কোল়িৰিসস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনি. অযং কির অনোমদস্সিস্স ভগৰতো কালে মহাৰিভৰো সেট্ঠি হুত্ৰা উপাসকেহি সদ্ধিং ৰিহারং গন্ত্ৰা সত্থু সন্তিকে ধম্মং সুত্ৰা পসন্নমানসো সত্থু চঙ্কমনট্ঠানে সুধায পরিকম্মং কারেত্ৰা নানাৰণ্ণেহি পুপ্ফেহি সন্থরিত্ৰা উপরি নানাৰিরাগৰত্থেহি ৰিতানং বন্ধাপেসি, তথা সত্থু ভিক্খুসঙ্ঘস্স চ দীঘসালং কারেত্ৰা নিয্যাদেসি. সো তেন পুঞ্ঞকম্মেন দেৰমনুস্সেসু সংসরন্তো পদুমুত্তরস্স ভগৰতো কালে হংসৰতীনগরে সেট্ঠিকুলে নিব্বত্তি, সিরিৰড্ঢোতিস্স নামং অহোসি. সো ৰযপ্পত্তো ৰিহারং গন্ত্ৰা সত্থু সন্তিকে ধম্মং সুণন্তো সত্থারং একং ভিক্খুং আরদ্ধৰীরিযানং অগ্গট্ঠানে ঠপেন্তং দিস্ৰা, সযম্পি তং ঠানন্তরং পত্থেন্তো সত্তাহং মহাদানং পৰত্তেত্ৰা পণিধানমকাসি. সত্থাপি তস্স পত্থনায সমিজ্ঝনভাৰং দিস্ৰা ব্যাকরিত্ৰা পক্কামি.

সোপি যাৰজীৰং কুসলং কত্ৰা দেৰমনুস্সেসু সংসরন্তো পরিনিব্বুতে কস্সপদসবলে অনুপ্পন্নে অম্হাকং ভগৰতি বারাণসিযং কুলগেহে নিব্বত্তিত্ৰা ৰিঞ্ঞুতং পত্তো গঙ্গাতীরে পণ্ণসালং করিত্ৰা একং পচ্চেকবুদ্ধং তেমাসং চতূহি পচ্চযেহি সক্কচ্চং উপট্ঠহি. পচ্চেকবুদ্ধো ৰুট্ঠৰস্সো পরিপুণ্ণপরিক্খারো গন্ধমাদনমেৰ গতো. সোপি কুলপুত্তো যাৰজীৰং তত্থ পুঞ্ঞানি কত্ৰা ততো চৰিত্ৰা দেৰমনুস্সেসু সংসরন্তো অম্হাকং ভগৰতো কালে চম্পানগরে উসভসেট্ঠিস্স গেহে পটিসন্ধিং গণ্হি. তস্স পটিসন্ধিগ্গহণতো পট্ঠায সেট্ঠিস্স মহাভোগক্খন্ধো অভিৰড্ঢি. তস্স জাতদিৰসে সকলনগরে মহাসক্কারসম্পন্নো অহোসি, তস্স পুব্বে পচ্চেকবুদ্ধস্স সতসহস্সগ্ঘনিকরত্তকম্বলপরিচ্চাগেন সুৰণ্ণৰণ্ণো সুখুমালতরো চ অত্তভাৰো অহোসি, তেনস্স সোণোতি নামং অকংসু. মহতা পরিৰারেন ৰড্ঢতি ¶ , তস্স হত্থপাদতলানি বন্ধুজীৰকপুপ্ফৰণ্ণানি অহেসুং, সতৰিহতকপ্পাসস্স ৰিয সম্ফস্সো পাদতলেসু মণিকুণ্ডলাৰট্টৰণ্ণানি লোমানি ¶ জাযিংসু. ৰযপ্পত্তস্স তস্স তিণ্ণং উতূনং অনুচ্ছৰিকে তযো পাসাদে কারেত্ৰা নাটকানি উপট্ঠাপেসুং. সো তত্থ মহতিং সম্পত্তিং অনুভৰন্তো দেৰকুমারো ৰিয পটিৰসতি.

অথ ¶ অম্হাকং সত্থরি সব্বঞ্ঞুতং পত্ৰা পৰত্তিতৰরধম্মচক্কে রাজগহং উপনিস্সায ৰিহরন্তে বিম্বিসাররঞ্ঞা পক্কোসাপিতো অসীতিযা গামিকসহস্সেহি সদ্ধিং রাজগহং আগতো, সত্থু সন্তিকং গন্ত্ৰা ধম্মং সুত্ৰা পটিলদ্ধসদ্ধো মাতাপিতরো অনুজানাপেত্ৰা সাসনে পব্বজিত্ৰা লদ্ধূপসম্পদো সত্থু সন্তিকে কম্মট্ঠানং গহেত্ৰা, জনসংসগ্গপরিহরণত্থং সীতৰনে ৰসন্তো ‘‘মম সরীরং সুখুমালং, ন চ সক্কা সুখেনেৰ সুখং অধিগন্তুং, কাযং কিলমেত্ৰা সমণধম্মং কাতুং ৰট্টতী’’তি ঠানচঙ্কমমেৰ অধিট্ঠায, পধানমনুযুঞ্জন্তো পাদতলেসু ফোটেসু উট্ঠহিতেসুপি ৰেদনং অজ্ঝুপেক্খিত্ৰা দল়্হং ৰীরিযং করোন্তো অচ্চারদ্ধৰীরিযতায ৰিসেসং নিব্বত্তেতুং অসক্কোন্তো, ‘‘এৰং ৰাযমন্তোপি অহং মগ্গং ৰা ফলং ৰা নিব্বত্তেতুং ন সক্কোমি, কিং মে পব্বজ্জায, হীনাযাৰত্তিত্ৰা ভোগে চ ভুঞ্জিস্সামি, পুঞ্ঞানি চ করিস্সামী’’তি চিন্তেসি. সত্থা তস্স চিত্তাচারং ঞত্ৰা তত্থ গন্ত্ৰা ৰীণূপমোৰাদেন ওৰদিত্ৰা ৰীরিযসমতাযোজনৰিধিং দস্সেন্তো কম্মট্ঠানং সোধেত্ৰা গিজ্ঝকূটং গতো. সোণত্থেরোপি সত্থু সম্মুখা ওৰাদং লভিত্ৰা ৰীরিযসমতং যোজেত্ৰা ৰিপস্সনং উস্সুক্কাপেত্ৰা অরহত্তে পতিট্ঠাসি. তেন ৰুত্তং অপদানে (অপ. থের ১.৫.২৫-৫৩) –

‘‘অনোমদস্সিস্স মুনিনো, লোকজেট্ঠস্স তাদিনো;

সুধায লেপনং কত্ৰা, চঙ্কমং কারযিং অহং.

‘‘নানাৰণ্ণেহি পুপ্ফেহি, চঙ্কমং সন্থরিং অহং;

আকাসে ৰিতানং কত্ৰা, ভোজযিং বুদ্ধমুত্তমং.

‘‘অঞ্জলিং পগ্গহেত্ৰান, অভিৰাদেত্ৰান সুব্বতং;

দীঘসালং ভগৰতো, নিয্যাদেসিমহং তদা.

‘‘মম সঙ্কপ্পমঞ্ঞায, সত্থা লোকে অনুত্তরো;

পটিগ্গহেসি ভগৰা, অনুকম্পায চক্খুমা.

‘‘পটিগ্গহেত্ৰান ¶ সম্বুদ্ধো, দক্খিণেয্যো সদেৰকে;

ভিক্খুসঙ্ঘে নিসীদিত্ৰা, ইমা গাথা অভাসথ.

‘‘যো সো হট্ঠেন চিত্তেন, দীঘসালং অদাসি মে;

তমহং কিত্তযিস্সামি, সুণাথ মম ভাসতো.

‘‘ইমস্স ¶ মচ্চুকালম্হি, পুঞ্ঞকম্মসমঙ্গিনো;

সহস্সযুত্তস্সরথো, উপট্ঠিস্সতি তাৰদে.

‘‘তেন যানেনযং পোসো, দেৰলোকং গমিস্সতি;

অনুমোদিস্সরে দেৰা, সম্পত্তে কুলসম্ভৰে.

‘‘মহারহং ব্যম্হং সেট্ঠং, রতনমত্তিকলেপনং;

কূটাগারৰরূপেতং, ব্যম্হং অজ্ঝাৰসিস্সতি.

‘‘তিংসকপ্পসহস্সানি, দেৰলোকে রমিস্সতি;

পঞ্চৰীসতি কপ্পানি, দেৰরাজা ভৰিস্সতি.

‘‘সত্তসত্ততিক্খত্তুঞ্চ, চক্কৰত্তী ভৰিস্সতি;

যসোধরসনামা তে, সব্বেপি একনামকা.

‘‘দ্ৰে সম্পত্তী অনুভোত্ৰা, ৰড্ঢেত্ৰা পুঞ্ঞসঞ্চযং;

অট্ঠৰীসতিকপ্পম্হি, চক্কৰত্তী ভৰিস্সতি.

‘‘তত্রাপি ব্যম্হং পৰরং, ৰিস্সকম্মেন মাপিতং;

দসসদ্দাৰিৰিত্তং তং, পুরমজ্ঝাৰসিস্সতি.

‘‘অপরিমেয্যে ইতো কপ্পে, ভূমিপালো মহিদ্ধিকো;

ওক্কাকো নাম নামেন, রাজা রট্ঠে ভৰিস্সতি.

‘‘সোল়সিত্থিসহস্সানং, সব্বাসং পৰরা চ সা;

অভিজাতা খত্তিযানী, নৰ পুত্তে জনেস্সতি.

‘‘নৰ পুত্তে জনেত্ৰান, খত্তিযানী মরিস্সতি;

তরুণী চ পিযা কঞ্ঞা, মহেসিত্তং করিস্সতি.

‘‘ওক্কাকং তোসযিত্ৰান, ৰরং কঞ্ঞা লভিস্সতি;

ৰরং লদ্ধান সা কঞ্ঞা, পুত্তে পব্বাজযিস্সতি.

‘‘পব্বাজিতা ¶ চ তে সব্বে, গমিস্সন্তি নগুত্তমং;

জাতিভেদভযা সব্বে, ভগিনীহি ৰসিস্সরে.

‘‘একা চ কঞ্ঞা ব্যাধীহি, ভৰিস্সতি পরিক্খতা;

মা নো জাতি পভিজ্জীতি, নিখণিস্সন্তি খত্তিযা.

‘‘খত্তিযো নীহরিত্ৰান, তায সদ্ধিং ৰসিস্সতি;

ভৰিস্সতি তদা ভেদো, ওক্কাককুলসম্ভৰো.

‘‘তেসং পজা ভৰিস্সন্তি, কোল়িযা নাম জাতিযা;

তত্থ মানুসকং ভোগং, অনুভোস্সতিনপ্পকং.

‘‘তম্হা কাযা চৰিত্ৰান, দেৰলোকং গমিস্সতি;

তত্রাপি পৰরং ব্যম্হং, লভিস্সতি মনোরমং.

‘‘দেৰলোকা ¶ চৰিত্ৰান, সুক্কমূলেন চোদিতো;

আগন্ত্ৰান মনুস্সত্তং, সোণো নাম ভৰিস্সতি.

‘‘আরদ্ধৰীরিযো পহিতত্তো, পদহং সত্থু সাসনে;

সব্বাসৰে পরিঞ্ঞায, নিব্বাযিস্সতিনাসৰো.

‘‘অনন্তদস্সী ভগৰা, গোতমো সক্যপুঙ্গৰো;

ৰিসেসঞ্ঞূ মহাৰীরো, অগ্গট্ঠানে ঠপেস্সতি.

‘‘ৰুট্ঠম্হি দেৰে চতুরঙ্গুলম্হি, তিণে অনিলেরিতঅঙ্গণম্হি;

ঠত্ৰান যোগস্স পযুত্ততাদিনো, ততোত্তরিং পারমতা ন ৰিজ্জতি.

‘‘উত্তমে দমথে দন্তো, চিত্তং মে সুপণীহিতং;

ভারো মে ওহিতো সব্বো, নিব্বুতোম্হি অনাসৰো.

‘‘অঙ্গীরসো মহানাগো, অভিজাতোৰ কেসরী;

ভিক্খুসঙ্ঘে নিসীদিত্ৰা, এতদগ্গে ঠপেসি মং.

‘‘পটিসম্ভিদা চতস্সো…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা উদানৰসেন অঞ্ঞাব্যাকরণৰসেন চ –

৬৩২.

‘‘যাহু রট্ঠে সমুক্কট্ঠো, রঞ্ঞো অঙ্গস্স পদ্ধগূ;

স্ৰাজ্জ ধম্মেসু উক্কট্ঠো, সোণো দুক্খস্স পারগূ.

৬৩৩.

‘‘পঞ্চ ছিন্দে পঞ্চ জহে, পঞ্চ চুত্তরি ভাৰযে;

পঞ্চসঙ্গাতিগো ভিক্খু, ওঘতিণ্ণোতি ৰুচ্চতি.

৬৩৪.

‘‘উন্নল়স্স পমত্তস্স, বাহিরাসস্স ভিক্খুনো;

সীলং সমাধি পঞ্ঞা চ, পারিপূরিং ন গচ্ছতি.

৬৩৫.

‘‘যঞ্হি কিচ্চং অপৰিদ্ধং, অকিচ্চং পন করীযতি;

উন্নল়ানং পমত্তানং, তেসং ৰড্ঢন্তি আসৰা.

৬৩৬.

‘‘যেসঞ্চ সুসমারদ্ধা, নিচ্চং কাযগতা সতি;

অকিচ্চং তে ন সেৰন্তি, কিচ্চে সাতচ্চকারিনো;

সতানং সম্পজানানং, অত্থং গচ্ছন্তি আসৰা.

৬৩৭.

‘‘উজুমগ্গম্হি ¶ ¶ অক্খাতে, গচ্ছথ মা নিৰত্তথ;

অত্তনা চোদযত্তানং, নিব্বানমভিহারযে.

৬৩৮.

‘‘অচ্চারদ্ধম্হি ¶ ৰীরিযম্হি, সত্থা লোকে অনুত্তরো;

ৰীণোপমং করিত্ৰা মে, ধম্মং দেসেতি চক্খুমা;

তস্সাহং ৰচনং সুত্ৰা, ৰিহাসিং সাসনে রতো.

৬৩৯.

‘‘সমথং পটিপাদেসিং, উত্তমত্থস্স পত্তিযা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৬৪০.

‘‘নেক্খম্মে অধিমুত্তস্স, পৰিৰেকঞ্চ চেতসো;

অব্যাবজ্ঝাধিমুত্তস্স, উপাদানক্খযস্স চ.

৬৪১.

‘‘তণ্হক্খযাধিমুত্তস্স, অসম্মোহঞ্চ চেতসো;

দিস্ৰা আযতনুপ্পাদং, সম্মা চিত্তং ৰিমুচ্চতি.

৬৪২.

‘‘তস্স সম্মা ৰিমুত্তস্স, সন্তচিত্তস্স ভিক্খুনো;

কতস্স পতিচযো নত্থি, করণীযং ন ৰিজ্জতি.

৬৪৩.

‘‘সেলো ¶ যথা একঘনো, ৰাতেন ন সমীরতি;

এৰং রূপা রসা সদ্দা, গন্ধা ফস্সা চ কেৰলা.

৬৪৪.

‘‘ইট্ঠা ধম্মা অনিট্ঠা চ, নপ্পৰেধেন্তি তাদিনো;

ঠিতং চিত্তং ৰিসঞ্ঞুত্তং, ৰযঞ্চস্সানুপস্সতী’’তি. – ইমা গাথা অভাসি;

তত্থ যাহু রট্ঠে সমুক্কট্ঠোতি যো অহু অহোসি অঙ্গরট্ঠে অসীতিযা গামিকসহস্সেহি ভোগসম্পত্তিযা ইস্সরিযসম্পত্তিযা চ সম্মা অতিৰিয উক্কট্ঠো সেট্ঠো. রঞ্ঞো অঙ্গস্স পদ্ধগূতি চতূহি সঙ্গহৰত্থূহি পরিসায রঞ্জনট্ঠেন রঞ্ঞো অঙ্গাধিপতিনো বিম্বিসারস্স পরিৰারভূতো গহপতিৰিসেসো তস্স রট্ঠে কুটুম্বিকো অহূতি যোজেতব্বং. স্ৰাজ্জ ধম্মেসু উক্কট্ঠোতি সো সোণো অজ্জেতরহি লোকুত্তরধম্মেসু উক্কট্ঠো জাতো, গিহিকালেপি কেহিচি উক্কট্ঠোযেৰ হুত্ৰা ইদানি পব্বজিতকালেপি উক্কট্ঠোযেৰ হোতীতি অত্তানমেৰ পরং ৰিয দস্সেতি. দুক্খস্স পারগূতি সকলস্স ৰট্টদুক্খস্স পারং পরিযন্তং গতো, এতেন ধম্মেসু উক্কট্ঠোতি অৰিসেসেন ৰুত্তং উক্কট্ঠভাৰং ৰিসেসেতি অরহত্তাধিগমদীপনতো.

ইদানি যায পটিপত্তিযা দুক্খপারগূ জাতো, অঞ্ঞাপদেসেন তং দস্সেন্তো ‘‘পঞ্চ ছিন্দে’’তি গাথমাহ. তস্সত্থো – অপাযকামসুগতিসম্পাপকানি পঞ্চোরম্ভাগিযানি সংযোজনানি পুরিসো সত্থেন পাদে বদ্ধরজ্জুকং ৰিয হেট্ঠিমেন মগ্গত্তযেন ছিন্দেয্য, রূপারূপভৰসম্পাপকানি পঞ্চ উদ্ধম্ভাগিযানি সংযোজনানি পুরিসো গীৰায বদ্ধরজ্জুকং ৰিয অগ্গমগ্গেন জহেয্য, ছিন্দেয্য, তেসং পন উদ্ধম্ভাগিযসংযোজনানং পহানায পঞ্চ সদ্ধাদীনি ইন্দ্রিযানি ¶ উত্তরি ভাৰযে ¶ ভাৰেয্য. এৰংভূতো পন ভিক্খু রাগসঙ্গো দোসমোহমানদিট্ঠিসঙ্গোতি পঞ্চন্নং সঙ্গানং অতিক্কমনেন পঞ্চসঙ্গাতিগো হুত্ৰা, কামোঘো, ভৰোঘো, দিট্ঠোঘো, অৰিজ্জোঘোতি চতুন্নং ওঘানং তিণ্ণত্তা ওঘতিণ্ণোতি ৰুচ্চতি.

অযঞ্চ ওঘতরণপটিপত্তিসীলাদীনং পারিপূরিযাৰ হোতি, সীলাদযো চ মানাদিপ্পহানেন পারিপূরিং গচ্ছন্তি, ন অঞ্ঞথাতি দস্সেন্তো ‘‘উন্নল়স্সা’’তি গাথমাহ. তত্থ উন্নল়স্সাতি উগ্গততুচ্ছমানস্স. মানো ¶ হি উন্নমনাকারৰুত্তিযা তুচ্ছভাৰেন নল়ো ৰিযাতি ‘‘নল়ো’’তি ৰুচ্চতি. পমত্তস্সাতি সতিৰোস্সগ্গেন পমাদং আপন্নস্স. বাহিরাসস্সাতি বাহিরেসু আযতনেসু আসাৰতো, কামেসু অৰীতরাগস্সাতি অত্থো. সীলং সমাধি পঞ্ঞা চ, পারিপূরিং ন গচ্ছতীতি তস্স সীলাদীনং পটিপক্খসেৰিনো লোকিযোপি তাৰ সীলাদিগুণো পারিপূরিং ন গচ্ছতি, পগেৰ লোকুত্তরো.

তত্থ কারণমাহ ‘‘যঞ্হি কিচ্চ’’ন্তিআদিনা. ভিক্খুনো হি পব্বজিতকালতো পট্ঠায অপরিমাণসীলক্খন্ধগোপনং অরঞ্ঞৰাসো ধুতঙ্গপরিহরণং ভাৰনারামতাতি এৰমাদি কিচ্চং নাম. যেহি পন ইদং যথাৰুত্তং অত্তনো কিচ্চং, তং অপৰিদ্ধং অকরণেন ছড্ডিতং. অকিচ্চন্তি পত্তমণ্ডনং চীৰরকাযবন্ধনঅংসবদ্ধছত্তুপাহনতালৰণ্টধম্মকরণমণ্ডনন্তি এৰমাদি পরিক্খারমণ্ডনং পচ্চযবাহুলিযন্তি এৰমাদি ভিক্খুনো অকিচ্চং নাম, তং কযিরতি, তেসং মাননল়ং উক্খিপিত্ৰা চরণেন উন্নল়ানং সতিৰোস্সগ্গেন পমত্তানং চত্তারোপি আসৰা ৰড্ঢন্তি.

যেসং পন পঞ্ঞাদিগুণো ৰড্ঢতি, তে দস্সেতুং ‘‘যেস’’ন্তিআদি ৰুত্তং. তত্থ সুসমারদ্ধাতি সুট্ঠু পগ্গহিতা. কাযগতা সতীতি, কাযানুপস্সনাভাৰনা. অকিচ্চং তেতি তে এতং পত্তমণ্ডনাদিঅকিচ্চং. ন সেৰন্তীতি ন করোন্তি. কিচ্চেতি, পব্বজিতকালতো পট্ঠায কত্তব্বে অপরিমাণসীলক্খন্ধগোপনাদিকে. সাতচ্চকারিনোতি সততকারিনো তেসং সতিযা অৰিপ্পৰাসেন সতানং সাত্থকসম্পজঞ্ঞং, সপ্পাযসম্পজঞ্ঞং, গোচরসম্পজঞ্ঞং, অসম্মোহসম্পজঞ্ঞন্তি চতূহি সম্পজঞ্ঞেহি সম্পজানানং, চত্তারোপি আসৰা অত্থং গচ্ছন্তি পরিক্খযং অভাৰং গচ্ছন্তীতি অত্থো.

ইদানি অত্তনো সন্তিকে ঠিতভিক্খূনং ওৰাদং দেন্তো ‘‘উজুমগ্গম্হী’’তি গাথমাহ. তত্থ উজুমগ্গম্হি অক্খাতেতি অন্তদ্ৰযপরিৰজ্জনেন কাযৰঙ্কাদিপ্পহানেন চ উজুকে মজ্ঝিমপটিপদাভূতে অরিযমগ্গে সত্থারা ভাসিতে. গচ্ছথাতি পটিপজ্জথ. মা নিৰত্তথাতি অন্তরা ¶ ৰোসানং মাপজ্জথ. অত্তনা চোদযত্তানন্তি ইধ ¶ অত্থকামো কুলপুত্তো অপাযভযপচ্চৰেক্খণাদিনা ¶ অত্তনাৰ অত্তানং চোদেন্তো. নিব্বানমভিহারযেতি, অত্তানং নিব্বানং অভিহরেয্য উপনেয্য, যথা নং সচ্ছিকরোতি, তথা পটিপজ্জেয্যাতি অত্থো.

ইদানি মযাপি এৰমেৰ পটিপন্নন্তি, অত্তনো পটিপত্তিং দস্সেতুং ‘‘অচ্চারদ্ধম্হী’’তিআদি ৰুত্তং. অচ্চারদ্ধম্হি ৰীরিযম্হীতি ৰিপস্সনং ভাৰেন্তেন মযা সমাধিনা ৰীরিযং সমরসং অকত্ৰা অতিৰিয ৰীরিযে পগ্গহিতে. অচ্চারদ্ধৰীরিযতা চস্স হেট্ঠা ৰুত্তাযেৰ. ৰীণোপমং করিত্ৰা মেতি আযস্মতো সোণস্স ‘‘যে খো কেচি ভগৰতো সাৰকা আরদ্ধৰীরিযা ৰিহরন্তি. অহং তেসং অঞ্ঞতরো, অথ চ পন মে নানুপাদায আসৰেহি চিত্তং ৰিমুচ্চতি, তস্মাহং ৰিব্ভমিস্সামী’’তি চিত্তে উপ্পন্নে সত্থা ইদ্ধিযা তস্স সম্মুখে অত্তানং দস্সেত্ৰা ‘‘কস্মা ত্ৰং, সোণ, ‘ৰিব্ভমিস্সামী’তি চিত্তং উপ্পাদেসি, কুসলো ত্ৰং পুব্বে অগারিযভূতো ৰীণায তন্তিস্সরে’’তি পুচ্ছিত্ৰা তেন ‘‘এৰং, ভন্তে’’তি ৰুত্তে ‘‘তং কিং মঞ্ঞসি, সোণ? যদা তে ৰীণায তন্তিযো অচ্চাযতা হোন্তি, অপি নু তে ৰীণা তস্মিং সমযে সরৰতী ৰা হোতি কম্মঞ্ঞা ৰাতি? নো হেতং, ভন্তে! তং কিং মঞ্ঞসি, সোণ, যদা তে ৰীণায তন্তিযো অতিসিথিলা হোন্তি, অপি নু তে ৰীণা তস্মিং সমযে সরৰতী ৰা হোতি কম্মঞ্ঞা ৰাতি? নো হেতং, ভন্তে. তং কিং মঞ্ঞসি, সোণ, যদা পন তে ৰীণায তন্তিযো নেৰ অচ্চাযতা হোন্তি, নাতিসিথিলা সমে গুণে পতিট্ঠিতা, অপি নু তে ৰীণা তস্মিং সমযে সরৰতী ৰা হোতি কম্মঞ্ঞা ৰাতি? এৰং, ভন্তে. এৰমেৰ খো, সোণ, অচ্চারদ্ধৰীরিযং উদ্ধচ্চায সংৰত্ততি, অতিলীনৰীরিযং কোসজ্জায সংৰত্ততি, তস্মাতিহ ত্ৰং, সোণ, ৰীরিযসমতং অধিট্ঠহ, ইন্দ্রিযানঞ্চ সমতং পটিৰিজ্ঝা’’তি এৰং ৰীণং উপমং কত্ৰা পৰত্তিতেন ৰীণোপমোৰাদেন ময্হং ধম্মং দেসেসি. তস্সাহং ৰচনং সুত্ৰাতি তস্স ভগৰতো ৰচনং ৰীণোপমোৰাদং সুত্ৰা অন্তরা উপ্পন্নং ৰিব্ভমিতুকামতং পহায সত্থু সাসনে রতো অভিরতো ৰিহরিং.

ৰিহরন্তো চ সমথং পটিপাদেসিং ৰীরিযসমতং যোজেন্তো সদ্ধাপঞ্ঞানং ৰিয সমাধিৰীরিযানং সমরসতং উপ্পাদেন্তো ঝানাধিট্ঠানং ৰিপস্সনাসমাধিং ¶ সম্পাদেসিং ৰিপস্সনং উস্সুক্কাপেসিং. তত্থ পযোজনং আহ ‘‘উত্তমত্থস্স পত্তিযা’’তি. উত্তমত্থস্স পত্তিযাতি অরহত্তাধিগমাযাতি অত্থো.

ইদানি যথা পটিপন্নস্স সমথৰিপস্সনা সম্পজ্জিংসু, তং ¶ অঞ্ঞাপদেসেন দস্সেন্তো ‘‘নেক্খম্মে’’তিআদিমাহ. তত্থ নেক্খম্মেতি পব্বজ্জাদিকে কামনিস্সরণে. অধিমুত্তস্সাতি তত্থ নিন্নপোণপব্ভারভাৰেন ¶ যুত্তপ্পযুত্তস্স, পঠমং তাৰ পব্বজ্জাভিমুখো হুত্ৰা কামে পহায পব্বজিত্ৰা চ সীলৰিসোধনং অরঞ্ঞৰাসো ধুতঙ্গপরিহরণং ভাৰনাভিযোগোতি এৰমাদীসু অনৰজ্জধম্মেসু যুত্তপ্পযুত্তস্সাতি অত্থো. পৰিৰেকঞ্চ চেতসোতি চেতসো পৰিৰেকঞ্চ অধিমুত্তস্স এৰং নেক্খম্মাধিমুত্তস্স সতো চতুক্কপঞ্চকজ্ঝানানং নিব্বত্তনেন ৰিৰেকে যুত্তস্স পযুত্তস্স. অব্যাবজ্ঝাধিমুত্তস্সাতি অব্যাবজ্ঝে নিদুক্খতায অধিমুত্তস্স ঝানসমাপত্তিযো নিব্বত্তেত্ৰা সমথসুখে যুত্তপ্পযুত্তস্স. উপাদানক্খযস্স চাতি চতুন্নম্পি উপাদানানং খযন্তে অরহত্তে অধিমুত্তস্স. ভুম্মত্থে হি এতং সামিৰচনং. তং যথাধিগতং ঝানং পাদকং কত্ৰা অরহত্তাধিগমায ৰিপস্সনং অনুযুঞ্জন্তস্সাতি অত্থো.

তণ্হক্খযাধিমুত্তস্সাতি তণ্হা খীযতি এত্থাতি তণ্হক্খযো, নিব্বানং, তস্মিং অধিমুত্তস্স উপাদিং ভযতো, অনুপাদিঞ্চ খেমতো দস্সনেন নিরোধে নিন্নপোণপব্ভারস্স. অসম্মোহঞ্চ চেতসোতি অসম্মোহসম্পজঞ্ঞৰসেন চিত্তস্স অসম্মোহপৰত্তিং সম্মোহসমুচ্ছিন্দনেন ৰা চিত্তস্স অসম্মোহভূতং অরিযমগ্গং অধিমুত্তস্স. দিস্ৰা আযতনুপ্পাদন্তি চক্খাদীনং আযতনানং যথাসকপচ্চযেহি খণে খণে উপ্পাদং, তপ্পটিপক্খতো নিরোধঞ্চ ৰিপস্সনাপঞ্ঞাসহিতায মগ্গপঞ্ঞায দিস্ৰা দস্সনহেতু সম্মা চিত্তং ৰিমুচ্চতীতি সম্মা হেতুনা ঞাযেন মগ্গপটিপাটিযা সব্বাসৰতো চিত্তং ৰিমুচ্চতি.

‘‘তস্স সম্মা ৰিমুত্তস্সা’’তিআদীসু অযং সঙ্খেপত্থো – তস্স ৰুত্তনযেন সম্মদেৰ সব্বসংকিলেসতো ৰিমুত্তস্স, ততো এৰ অচ্চন্তুপসমেন সন্তচিত্তস্স খীণাসৰভিক্খুনো কতস্স কুসলস্স অকুসলস্স ৰা উপচযো নত্থি মগ্গেনেৰ সমুগ্ঘাতিতত্তা, পরিঞ্ঞাদিভেদং করণীযং ¶ ন ৰিজ্জতি কতকিচ্চত্তা. এৰং ভূতস্স যথা একঘনো সেলো পব্বতো পকতিৰাতেন ন সমীরতি ন সংকম্পতি, এৰং ইট্ঠা চ অনিট্ঠা চ রূপাদযো আরম্মণধম্মা তাদিনো তাদিভাৰপ্পত্তস্স ঠিতং অনেজং পহীনসব্বসোকতায ৰিসংযুত্তং চিত্তং নপ্পৰেধন্তি ন চালেন্তি. অস্স চ আরম্মণধম্মস্স কালেন কালং ফলসমাপত্তিং সমাপজ্জিত্ৰা ৰিপস্সন্তো ৰযং নিরোধং খণে খণে ভিজ্জনসভাৰং অনুপস্সতীতি অঞ্ঞং ব্যাকাসি.

সোণকোল়িৰিসত্থেরগাথাৰণ্ণনা নিট্ঠিতা.

তেরসনিপাতৰণ্ণনা নিট্ঠিতা.

১৪. চুদ্দসকনিপাতো

১. খদিরৰনিযরেৰতত্থেরগাথাৰণ্ণনা

চুদ্দসকনিপাতে ¶ ¶ ¶ যদা অহন্তিআদিকা আযস্মতো খদিরৰনিযরেৰতত্থেরস্স গাথা. কা উপ্পত্তি? কামঞ্চিমস্স থেরস্স গাথা হেট্ঠা এককনিপাতে (থেরগা. অট্ঠ. ১. খদিরৰনিযত্থেরগাথাৰণ্ণনা) আগতা. তত্থ পনস্স অত্তনো ভাগিনেয্যেসু সতিজননমত্তং দস্সিতন্তি তস্সা এককনিপাতে সঙ্গহো কতো. ইমা পন থেরস্স পব্বজিতকালতো পট্ঠায যাৰ পরিনিব্বানা পটিপত্তিপকাসিতা গাথা ইমস্মিং চুদ্দসকনিপাতে সঙ্গহং আরোপিতা. তত্থ অট্ঠুপ্পত্তি হেট্ঠা ৰুত্তাযেৰ. অযং পন ৰিসেসো – থেরো কির অরহত্তং পত্ৰা কালেন কালং সত্থু ধম্মসেনাপতিপ্পভূতীনং মহাথেরানঞ্চ উপট্ঠানং গন্ত্ৰা কতিপাহমেৰ তত্থ ৰসিত্ৰা খদিরৰনমেৰ পচ্চাগন্ত্ৰা ফলসমাপত্তিসুখেন ব্রহ্মৰিহারেহি চ ৰীতিনামেতি. এৰং গচ্ছন্তে কালে জিণ্ণো ৰুড্ঢো ৰযো অনুপ্পত্তো অহোসি. সো একদিৰসং বুদ্ধুপট্ঠানং গচ্ছন্তো অন্তরামগ্গে সাৰত্থিযা অৰিদূরে অরঞ্ঞে ৰসি. তেন চ সমযেন চোরা নগরে কতকম্মা আরক্খমনুস্সেহি অনুবন্ধা পলাযন্তা থেরস্স সমীপে গহিতভণ্ডং ছড্ডেত্ৰা পলাযিংসু. মনুস্সা অনুধাৰন্তা থেরস্স সমীপে ভণ্ডং দিস্ৰা থেরং বন্ধিত্ৰা ‘‘চোরো’’তি সঞ্ঞায গহেত্ৰা রঞ্ঞো দস্সেসুং, ‘‘অযং, দেৰ, চোরো’’তি. রাজা থেরং মুঞ্চাপেত্ৰা, ‘‘কিং, ভন্তে, তুম্হেহি ইদং চোরিককম্মং কতং ৰা, নো ৰা’’তি পুচ্ছি. থেরো কিঞ্চাপি জাতিতো পট্ঠায অত্তনা তাদিসং ন কতপুব্বং, তং পব্বজিততো পট্ঠায পন অকতভাৰস্স, সব্বসো কিলেসানং সমুচ্ছিন্নত্তা তাদিসস্স করণে অভব্বতায পকাসনত্থং সমীপে ঠিতানং ভিক্খূনং রঞ্ঞো চ ধম্মং দেসেন্তো –

৬৪৫.

‘‘যদা অহং পব্বজিতো, অগারস্মানগারিযং;

নাভিজানামি সঙ্কপ্পং, অনরিযং দোসসংহিতং.

৬৪৬.

‘‘‘ইমে হঞ্ঞন্তু ৰজ্ঝন্তু, দুক্খং পপ্পোন্তু পাণিনো’;

সঙ্কপ্পং নাভিজানামি, ইমস্মিং দীঘমন্তরে.

৬৪৭.

‘‘মেত্তঞ্চ ¶ ¶ অভিজানামি, অপ্পমাণং সুভাৰিতং;

অনুপুব্বং পরিচিতং, যথা বুদ্ধেন দেসিতং.

৬৪৮.

‘‘সব্বমিত্তো সব্বসখো, সব্বভূতানুকম্পকো;

মেত্তচিত্তঞ্চ ভাৰেমি, অব্যাপজ্জরতো সদা.

৬৪৯.

‘‘অসংহীরং অসংকুপ্পং, চিত্তং আমোদযামহং;

ব্রহ্মৰিহারং ভাৰেমি, অকাপুরিসসেৰিতং.

৬৫০.

‘‘অৰিতক্কং সমাপন্নো, সম্মাসম্বুদ্ধসাৰকো;

অরিযেন তুণ্হীভাৰেন, উপেতো হোতি তাৰদে.

৬৫১.

‘‘যথাপি ¶ পব্বতো সেলো, অচলো সুপ্পতিট্ঠিতো;

এৰং মোহক্খযা ভিক্খু, পব্বতোৰ ন ৰেধতি.

৬৫২.

‘‘অনঙ্গণস্স পোসস্স, নিচ্চং সুচিগৰেসিনো;

ৰালগ্গমত্তং পাপস্স, অব্ভমত্তংৰ খাযতি.

৬৫৩.

‘‘নগরং যথা পচ্চন্তং, গুত্তং সন্তরবাহিরং;

এৰং গোপেথ অত্তানং, খণো ৰো মা উপচ্চগা.

৬৫৪.

‘‘নাভিনন্দামি মরণং, নাভিনন্দামি জীৰিতং;

কালঞ্চ পটিকঙ্খামি, নিব্বিসং ভতকো যথা.

৬৫৫.

‘‘নাভিনন্দামি মরণং, নাভিনন্দামি জীৰিতং;

কালঞ্চ পটিকঙ্খামি, সম্পজানো পতিস্সতো.

৬৫৬.

‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

৬৫৭.

‘‘যস্স চত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

৬৫৮.

‘‘সম্পাদেথপ্পমাদেন, এসা মে অনুসাসনী;

হন্দাহং পরিনিব্বিস্সং ৰিপ্পমুত্তোম্হি সব্বধী’’তি. – ইমা গাথা অভাসি;

তত্থাযং ¶ অপুব্বপদৰণ্ণনা ইমস্মিং দীঘমন্তরেতি, যদা অহং পব্বজিতোম্হি, ততো পট্ঠায অযঞ্চ মে চরিমকালো, এতস্মিং দীঘমন্তরে কালে ‘‘ইদং ময্হং হোতূ’’তি অভিজ্ঝাৰসেন ৰা, ‘‘ইমে সত্তা হঞ্ঞন্তূ’’তিআদিনা ব্যাপাদৰসেন ৰা অনরিযং দোসসংহিতং সঙ্কপ্পং নাভিজানামীতি যোজনা.

মেত্তঞ্চ ¶ অভিজানামীতি, মিজ্জতি সিনিয্হতি এতাযাতি মেত্তা, অব্যাপাদো. মেত্তা এতিস্সা অত্থীতি মেত্তা, মেত্তাভাৰনা মেত্তাব্রহ্মৰিহারো, তং মেত্তং. চ-সদ্দেন করুণং মুদিতং উপেক্খঞ্চাতি ইতরব্রহ্মৰিহারে সঙ্গণ্হাতি. অভিজানামীতি, অভিমুখতো জানামি. অধিগতঞ্হি ঝানং পচ্চৰেক্খতো পচ্চৰেক্খণঞাণস্স অভিমুখং হোতি. কীদিসন্তি আহ ‘‘অপ্পমাণ’’ন্তিআদি. তঞ্হি যথা বুদ্ধেন ভগৰতা দেসিতং, তথা অনোদিস্সকফরণৰসেন অপরিমাণসত্তারম্মণতায অপ্পমাণং. পগুণবলৰভাৰাপাদনেন সুট্ঠু ভাৰিতত্তা সুভাৰিতং. পঠমং মেত্তা, ততো করুণা, ততো মুদিতা, পচ্ছা উপেক্খাতি এৰং অনুপুব্বং অনুক্কমেন পরিচিতং আসেৰিতং, বহুলীকতং অভিজানামীতি যোজনা.

সব্বেসং সত্তানং মিত্তো, সব্বে ৰা তে ময্হং মিত্তাতি সব্বমিত্তো. মেত্তঞ্হি ¶ ভাৰেন্তো সত্তানং পিযো হোতি. সব্বসখোতি, এত্থাপি এসেৰ নযো. সব্বভূতানুকম্পকোতি, সব্বসত্তানং অনুগ্গণ্হনকো. মেত্তচিত্তঞ্চ ভাৰেমীতি, মেত্তায সহিতং সম্পযুত্তং চিত্তং ৰিসেসতো ভাৰেমি, ৰড্ঢেমি, পকাসেমি ৰা অকথেন্তেপি ভাৰনায উক্কংসগতভাৰতো. ‘‘মেত্তং চিত্তঞ্চ ভাৰেমী’’তি ৰা পাঠো. তস্সত্থো হেট্ঠা ৰুত্তনযোৰ. অব্যাপজ্জরতোতি, অব্যাপজ্জে সত্তানং হিতূপসংহারে অভিরতো. সদাতি, সব্বকালং, তেন তত্থ সাতচ্চকিরিযং দস্সেতি.

অসংহীরন্তি ন সংহীরং, আসন্নপচ্চত্থিকেন রাগেন অনাকড্ঢনিযং. অসংকুপ্পন্তি ন কুপ্পং, দূরপচ্চত্থিকেন ব্যাপাদেন অকোপিযং, এৰংভূতং কত্ৰা মম মেত্তচিত্তং আমোদযামি অভিপ্পমোদযামি ব্রহ্মৰিহারং ভাৰেমি. অকাপুরিসসেৰিতন্তি, কাপুরিসেহি নীচজনেহি অসেৰিতং, অকাপুরিসেহি ৰা অরিযেহি বুদ্ধাদীহি সেৰিতং ব্রহ্মং সেট্ঠং নিদ্দোসং মেত্তাদিৰিহারং ভাৰেমি ৰড্ঢেমীতি অত্থো.

এৰং ¶ অত্তুদ্দেসৰসেন পঞ্চহি গাথাহি অত্তনো পটিপত্তিং দস্সেত্ৰা ইদানি তং অঞ্ঞাপদেসেন দস্সেন্তো ‘‘অৰিতক্ক’’ন্তিআদিনা চতস্সো গাথা অভাসি. তত্থ অৰিতক্কং সমাপন্নোতি, ৰিতক্কৰিরহিতং দুতিযাদিঝানং সমাপন্নো, এতেন থেরো ব্রহ্মৰিহারভাৰনায অঞ্ঞাপদেসেন অত্তনা দুতিযাদিঝানাধিগমমাহ. যস্মা পনাযং থেরো তমেৰ ঝানং পাদকং কত্ৰা ৰিপস্সনং ৰড্ঢেত্ৰা একাসনেনেৰ অরহত্তং গণ্হি, তস্মা তমত্থং অঞ্ঞাপদেসেনেৰ দস্সেন্তো ‘‘অৰিতক্কং সমাপন্নো’’তি ৰত্ৰা ‘‘সম্মাসম্বুদ্ধসাৰকো. অরিযেন তুণ্হীভাৰেন, উপেতো হোতি তাৰদে’’তি আহ. তত্থ ৰচীসঙ্খারাভাৰতো অৰিতক্কাৰিচারা সমাপত্তি ‘‘অরিযো তুণ্হীভাৰো’’তি ৰদন্তি. ‘‘সন্নিপতিতানং ৰো, ভিক্খৰে, দ্ৰযং করণীযং ধম্মী ৰা কথা অরিযো ¶ ৰা তুণ্হীভাৰো’’তি (ম. নি. ১.২৭৩) পন ৰচনতো যা কাচি সমাপত্তি অরিযো তুণ্হীভাৰো নাম. ইধ পন চতুত্থজ্ঝানিকা অগ্গফলসমাপত্তি অধিপ্পেতা.

ইদানি তস্সাধিগতত্তা লোকধম্মেহি অকম্পনীযতং উপমায পকাসেন্তো ‘‘যথাপি পব্বতো’’তি গাথমাহ. তত্থ যথাপি পব্বতো সেলোতি, যথা সিলামযো একঘনসেলো পব্বতো, ন পংসুপব্বতো ন মিস্সকপব্বতোতি অত্থো. অচলো সুপ্পতিট্ঠিতোতি, সুট্ঠু পতিট্ঠিতমূলো পকতিৰাতেহি অচলো অকম্পনীযো হোতি, তস্মা অরহত্তং নিব্বানঞ্চ এৰং মোহক্খযা ভিক্খু, পব্বতোৰ ন ৰেধতীতি মোহস্স অনৰসেসপ্পহানা, মোহমূলকত্তা চ সব্বাকুসলানং পহীনসব্বাকুসলো ভিক্খু যথা সো পব্বতো পকতিৰাতেহি, এৰং লোকধম্মেহি ন ৰেধতি ন কম্পতি, মোহক্খযোতি ৰা যস্মা অরহত্তং নিব্বানঞ্চ ৰুচ্চতি ¶ , তস্মা মোহক্খযাতি মোহক্খযস্স হেতু নিব্বানস্স অরহত্তস্স চ অধিগতত্তা চতূসু অরিযসচ্চেসু সুপ্পতিট্ঠিতো অসমাপন্নকালেপি পব্বতো ৰিয ন ৰেধতি, পগেৰ সমাপন্নকালেতি অধিপ্পাযো.

ইদানি পাপং নামেতং অসুচিসীলো এৰ সমাচরতি, ন চ সুচিসীলো, সুচিসীলস্স পন তং অণুমত্তম্পি ভারিযং হুত্ৰা উপট্ঠাতীতি দস্সেন্তো ‘‘অনঙ্গণস্সা’’তিআদিগাথমাহ ¶ . তস্সত্থো – রাগাদিঅঙ্গণাভাৰতো অনঙ্গণস্স সব্বকালং সুচিঅনৰজ্জধম্মে এৰ গৰেসন্তস্স সপ্পুরিসস্স ৰালগ্গমত্তং কেসগ্গমত্তং পাপস্স লেসমত্তম্পি সকলং লোকধাতুং ফরিত্ৰা ঠিতং অব্ভমত্তং হুত্ৰা উপট্ঠাতি, তস্মা ন এৰরূপে কম্মে মাদিসা আসঙ্কিতব্বাতি অধিপ্পাযো.

যস্মা নিক্কিলেসেসুপি অন্ধবালা এৰরূপে অপৰাদে সমুট্ঠাপেন্তি, তস্মা অত্থকামেহি সক্কচ্চং অত্তা রক্খিতব্বোতি ওৰাদং দেন্তো ‘‘নগরং যথা’’তিআদিগাথমাহ. তস্সত্থো – যথা পন পচ্চন্তনগরৰাসীহি মনুস্সেহি পচ্চন্তং নগরং দ্ৰারপাকারাদীনি থিরানি করোন্তেহি সঅন্তরং, উদ্দাপপরিখাদীনি থিরানি করোন্তেহি সবাহিরন্তি সন্তরবাহিরং গুত্তং করীযতি, এৰং তুম্হেহিপি সতিং উপট্ঠপেত্ৰা অজ্ঝত্তিকানি ছ দ্ৰারানি পিদহিত্ৰা দ্ৰাররক্খিতং সতিং অৰিস্সজ্জেত্ৰা যথা গয্হমানানি বাহিরানি ছ আযতনানি অজ্ঝত্তিকানি উপঘাতায সংৰত্তন্তি, তথা অগ্গহণেন তানিপি থিরানি কত্ৰা তেসং অপ্পৰেসায দ্ৰাররক্খিতং সতিং অপ্পহায ৰিচরন্তা অত্তানং গোপেথ. কস্মা? খণো ৰো মা উপচ্চগা. যো হি এৰং অত্তানং ন গোপেতি, তং পুগ্গলং বুদ্ধুপ্পাদক্খণো, মনুস্সত্তভাৰক্খণো, মজ্ঝিমদেসে উপ্পত্তিক্খণো, সম্মাদিট্ঠিযা পটিলদ্ধক্খণো, ছন্নং আযতনানং অৰেকল্লক্খণোতি সব্বোপি অযং খণো অতিক্কমতি, সো খণো তুম্হে মা অতিক্কমতূতি.

এৰং ¶ থেরো ইমায গাথায সরাজিকং পরিসং ভিক্খূ চ ওৰদিত্ৰা পুন মরণে জীৰিতে চ অত্তনো সমচিত্ততং কতকিচ্চতঞ্চ পকাসেন্তো ‘‘নাভিনন্দামি মরণ’’ন্তিআদিমাহ. তং হেট্ঠা ৰুত্তত্থমেৰ (থেরগা. অট্ঠ. ২.৬০৭).

এৰং পন ৰত্ৰা অত্তনো পরিনিব্বানকালং উপট্ঠিতং দিস্ৰা সঙ্খেপেনেৰ নেসং ওৰাদং দত্ৰা পরিনিব্বানং পৰেদেন্তো ওসানগাথমাহ. তত্থ সম্পাদেথপ্পমাদেনাতি সম্পাদেতব্বং দানসীলাদিং অপ্পমাদেন সম্পাদেথ, দিট্ঠধম্মিকসম্পরাযিকপভেদে গহট্ঠৰত্তে সীলানুরক্খণে সমথঅনুযোগে ৰিপস্সনাভাৰনায চ ¶ অপ্পমত্তা হোথ. এসা মে অনুসাসনীতি দানসীলাদীসু ন পমজ্জথাতি এসা মম অনুসিট্ঠি ওৰাদো.

এৰং ¶ সিখাপত্তং পরহিতপটিপত্তিং দীপেত্ৰা অত্তহিতপটিপত্তিযাপি মত্থকং গণ্হন্তো ‘‘হন্দাহং পরিনিব্বিস্সং, ৰিপ্পমুত্তোম্হি সব্বধী’’তি আহ. তত্থ ৰিপ্পমুত্তোম্হি সব্বধীতি সব্বসো কিলেসেহি ভৰেহি চ ৰিপ্পমুত্তো অম্হি, তস্মা একংসেন পরিনিব্বাযিস্সামীতি.

এৰং পন ৰত্ৰা আকাসে পল্লঙ্কেন নিসিন্নো তেজোধাতুং সমাপজ্জিত্ৰা পজ্জলন্তো অনুপাদিসেসায নিব্বানধাতুযা পরিনিব্বাযি.

খদিরৰনিযরেৰতত্থেরগাথাৰণ্ণনা নিট্ঠিতা.

২. গোদত্তত্থেরগাথাৰণ্ণনা

যথাপি ভদ্দোতিআদিকা আযস্মতো গোদত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং সত্থৰাহকুলে নিব্বত্তো. গোদত্তোতি নামেন ৰযপ্পত্তো পিতরি কালঙ্কতে কুটুম্বং সণ্ঠপেন্তো পঞ্চহি সকটসতেহি ভণ্ডং আদায অপরাপরং সঞ্চরিত্ৰা ৰাণিজ্জেন জীৰিকং কপ্পেতি যথাৰিভৰং পুঞ্ঞানিপি করোতি. সো একদিৰসং অন্তরামগ্গে ধুরে যুত্তগোণে ৰহিতুং অসক্কোন্তে পতিতে মনুস্সেসু তং ৰুট্ঠাপেতুং অসক্কোন্তেসু সযমেৰ গন্ত্ৰা তং নঙ্গুট্ঠে গাল়্হং ৰিজ্ঝি. গোণো ‘‘অযং অসপ্পুরিসো মম বলাবলং অজানন্তো গাল়্হং ৰিজ্ঝতী’’তি কুদ্ধো মনুস্সৰাচায, ‘‘ভো গোদত্ত, অহং এত্তকং কালং অত্তনো বলং অনিগুহন্তো তুয্হং ¶ ভারং ৰহিং, অজ্জ পন অসমত্থভাৰেন পতিতং মং অতিৰিয বাধসি, হোতু, ইতো চৰিত্ৰা নিব্বত্তনিব্বত্তট্ঠানে তং বাধেতুং সমত্থো পটিসত্তু ভৰেয্য’’ন্তি পত্থনানুরূপেন অক্কোসি. তং সুত্ৰা গোদত্তো ‘‘এৰং নাম সত্তে বাধেত্ৰা কিং ইমায জীৰিকাযা’’তি সংৰেগজাতো সব্বং ৰিভৰং পহায অঞ্ঞতরস্স মহাথেরস্স সন্তিকে পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পত্ৰা সমাপত্তিসুখেন ৰীতিনামেন্তো একদিৰসং অত্তনো সন্তিকং উপগতানং গহট্ঠপব্বজিতানং অরিযগণানং লোকধম্মে আরব্ভ ধম্মং কথেন্তো –

৬৫৯.

‘‘যথাপি ¶ ভদ্দো আজঞ্ঞো, ধুরে যুত্তো ধুরস্সহো;

মথিতো অতিভারেন, সংযুগং নাতিৰত্ততি.

৬৬০.

‘‘এৰং পঞ্ঞায যে তিত্তা, সমুদ্দো ৰারিনা যথা;

ন পরে অতিমঞ্ঞন্তি, অরিযধম্মোৰ পাণিনং.

৬৬১.

‘‘কালে ¶ কালৰসং পত্তা, ভৰাভৰৰসং গতা;

নরা দুক্খং নিগচ্ছন্তি, তেধ সোচন্তি মাণৰা.

৬৬২.

‘‘উন্নতা সুখধম্মেন, দুক্খধম্মেন চোনতা;

দ্ৰযেন বালা হঞ্ঞন্তি, যথাভূতং অদস্সিনো.

৬৬৩.

‘‘যে চ দুক্খে সুখস্মিঞ্চ, মজ্ঝে সিব্বিনিমচ্চগূ;

ঠিতা তে ইন্দখীলোৰ, ন তে উন্নতওনতা.

৬৬৪.

‘‘ন হেৰ লাভে নালাভে, ন যসে ন চ কিত্তিযা;

ন নিন্দাযং পসংসায, ন তে দুক্খে সুখম্হি চ.

৬৬৫.

‘‘সব্বত্থ তে ন লিম্পন্তি, উদবিন্দুৰ পোক্খরে;

সব্বত্থ সুখিতা ধীরা, সব্বত্থ অপরাজিতা.

৬৬৬.

‘‘ধম্মেন চ অলাভো যো, যো চ লাভো অধম্মিকো;

অলাভো ধম্মিকো সেয্যো, যঞ্চে লাভো অধম্মিকো.

৬৬৭.

‘‘যসো চ অপ্পবুদ্ধীনং, ৰিঞ্ঞূনং অযসো চ যো;

অযসোৰ সেয্যো ৰিঞ্ঞূনং, ন যসো অপ্পবুদ্ধিনং.

৬৬৮.

‘‘দুম্মেধেহি পসংসা চ, ৰিঞ্ঞূহি গরহা চ যা;

গরহাৰ সেয্যো ৰিঞ্ঞূহি, যঞ্চে বালপ্পসংসনা.

৬৬৯.

‘‘সুখঞ্চ কামমযিকং, দুক্খঞ্চ পৰিৰেকিযং;

পৰিৰেকদুক্খং সেয্যো, যঞ্চে কামমযং সুখং.

৬৭০.

‘‘জীৰিতঞ্চ ¶ অধম্মেন, ধম্মেন মরণঞ্চ যং;

মরণং ধম্মিকং সেয্যো, যঞ্চে জীৰে অধম্মিকং.

৬৭১.

‘‘কামকোপপ্পহীনা ¶ যে, সন্তচিত্তা ভৰাভৰে;

চরন্তি লোকে অসিতা, নত্থি তেসং পিযাপিযং.

৬৭২.

‘‘ভাৰযিত্ৰান বোজ্ঝঙ্গে, ইন্দ্রিযানি বলানি চ;

পপ্পুয্য পরমং সন্তিং, পরিনিব্বন্তিনাসৰা’’তি. – ইমা গাথা অভাসি;

তত্থ আজঞ্ঞোতি, উসভাজানীযো. ধুরে যুত্তোতি, সকটধুরে যোজিতো. ধুরস্সহোতি, ধুরৰাহো. গাথাসুখত্থঞ্চেত্থ দ্ৰিসকারতো নিদ্দেসো কতো, সকটভারং ৰহিতুং সমত্থোতি অত্থো. মথিতো অতিভারেনাতি, অতিভারেন গরুভারেন পীল়িতো. ‘‘মদ্দিতো’’তিপি পাল়ি, সো এৰত্থো. সংযুগন্তি, অত্তনো খন্ধে ঠপিতং যুগং নাতিৰত্ততি ন অতিক্কামেতি, সম্মা যো উদ্ধরিত্ৰা ধুরং ছড্ডেত্ৰা ন তিট্ঠতি. এৰন্তি যথা সো ধোরয্হো অত্তনো ভদ্রাজানীযতায অত্তনো ধীরৰীরতায অত্তনো ভারং নাতিৰত্ততি ন পরিচ্চজতি, এৰং যে ৰারিনা ৰিয মহাসমুদ্দো লোকিযলোকুত্তরায পঞ্ঞায তিত্তা ধাতা পরিপুণ্ণা, তে পরে নিহীনপঞ্ঞে ন অতিমঞ্ঞন্তি, ন পরিভৰন্তি. তত্থ ¶ কারণমাহ ‘‘অরিযধম্মোৰ পাণিন’’ন্তি, পাণিনং সত্তেসু অযং অরিযানং ধম্মো যদিদং তেসং পঞ্ঞায পারিপূরিং গতত্তা লাভাদিনা অত্তানুক্কংসনং ৰিয অলাভাদিনা পরেসং অৰম্ভনং.

এৰং পঞ্ঞাপারিপূরিযা অরিযানং সুখৰিহারং দস্সেত্ৰা তদভাৰতো অনরিযানং দুক্খৰিহারং দস্সেতুং ‘‘কালে’’তিআদি ৰুত্তং. তত্থ কালেতি লাভালাভাদিনা সমঙ্গীভূতকালে. কালৰসং পত্তাতি লাভাদিকালস্স চ ৰসং উপগতা, লাভাদিনা সোমনস্সিতা অলাভাদিনা চ দোমনস্সিতাতি অত্থো. ভৰাভৰৰসং গতাতি ভৰস্স অভৰস্স চ ৰসং উপগতা ৰুদ্ধিহানিযো অনুৰত্তন্তা তে. নরা দুক্খং নিগচ্ছন্তি, তেধ সোচন্তি মাণৰাতি তে নরা ‘‘মাণৰা’’তি লদ্ধনামা সত্তা লাভালাভাদিৰসেন ৰুদ্ধিহানিৰসেন অনুরোধপটিৰিরোধং আপন্না ইধলোকে সোচন্তি, পরলোকে চ নিরযাদিদুক্খং গচ্ছন্তি পাপুণন্তীতি অত্থো.

‘‘উন্নতা’’তিআদিনাপি ¶ লোকধম্মৰসেন সত্তানং অনত্থপ্পত্তিমেৰ দস্সেতি. তত্থ উন্নতা সুখধম্মেনাতি সুখহেতুনা সুখপচ্চযেন ভোগসম্পত্তিআদিনা উন্নতিং গতা, ভোগমদাদিনা মত্তাতি অত্থো. দুক্খধম্মেন চোনতাতি দুক্খহেতুনা দুক্খপচ্চযেন ভোগৰিপত্তিআদিনা নিহীনতং গতা দালিদ্দিযাদিনা কাপঞ্ঞতং পত্তা. দ্ৰযেনাতি যথাৰুত্তেন উন্নতিওনতিদ্ৰযেন লাভালাভাদিদ্ৰযেন ¶ ৰা বালপুথুজ্জনা হঞ্ঞন্তি, অনুরোধপটিৰিরোধৰসেন ৰিবাধীযন্তি পীল়িযন্তি. কস্মা? যথাভূতং অদস্সিনো যস্মা তে ধম্মসভাৰং যাথাৰতো নব্ভঞ্ঞংসু, পরিঞ্ঞাতক্খন্ধা পহীনকিলেসা চ ন হোন্তি, তস্মাতি অত্থো. ‘‘যথাভূতং অদস্সনা’’তিপি পঠন্তি, অদস্সনহেতূতি অত্থো. যে চ দুক্খে সুখস্মিঞ্চ, মজ্ঝে সিব্বিনিমচ্চগূতি যে পন অরিযা দুক্খৰেদনায সুখৰেদনায মজ্ঝত্ততাৰেদনায চ তপ্পটিবদ্ধং ছন্দরাগভূতং সিব্বিনিং তণ্হং অগ্গমগ্গাধিগমেন অচ্চগূ অতিক্কমিংসু, তে ইন্দখীলো ৰিয ৰাতেহি লোকধম্মেহি অসম্পকম্পিযা ঠিতা, ন তে উন্নতওনতা, কদাচিপি উন্নতা ৰা ওনতা ৰা ন হোন্তি সব্বসো অনুনযপটিঘাভাৰতো.

এৰং ৰেদনাধিট্ঠানং অরহতো অনুপলেপং দস্সেত্ৰা ইদানি লোকধম্মে ৰিভজিত্ৰা সব্বত্থকমেৰস্স অনুপলেপং দস্সেন্তো ‘‘ন হেৰা’’তিআদিমাহ. তত্থ লাভেতি চীৰরাদীনং পচ্চযানং পটিলাভে. অলাভেতি তেসংযেৰ অপ্পটিলাভে অপগমে. ন যসেতি পরিৰারহানিযং অকিত্তিযঞ্চ. কিত্তিযাতি পরম্মুখা কিত্তনে পত্থটযসতাযং. নিন্দাযন্তি সম্মুখা গরহাযং. পসংসাযন্তি, পচ্চক্খতো গুণাভিত্থৰনে. দুক্খেতি দুক্খে উপ্পন্নে. সুখেতি এত্থাপি এসেৰ নযো.

সব্বত্থাতি ¶ সব্বস্মিং যথাৰুত্তে অট্ঠৰিধেপি লোকধম্মে, সব্বত্থ ৰা রূপাদিকে ৰিসযে তে খীণাসৰা ন লিম্পন্তি সব্বসো পহীনকিলেসত্তা. যথা কিং? উদবিন্দুৰ পোক্খরে যথা কমলদলে জলবিন্দু অল্লীযিত্ৰা ঠিতম্পি তেন ন লিম্পতি, জলবিন্দুনা চ কমলদলং, অঞ্ঞদত্থু ৰিসংসট্ঠমেৰ, এৰমেতেপি উপট্ঠিতে লাভাদিকে, আপাথগতে রূপাদিআরম্মণে চ ৰিসংসট্ঠা এৰং. ততো এৰ ধীরা পণ্ডিতা সব্বত্থ লাভাদীসু ঞাণমুখেন পিযনিমিত্তানং সোকাদীনঞ্চ অভাৰতো সুখিতা ¶ লাভাদীহি চ অনভিভৰনীযতো সব্বত্থ অপরাজিতাৰ হোন্তি.

ইদানি লাভালাভাদীসু সেয্যং নিদ্ধারেত্ৰা দস্সেন্তো ‘‘ধম্মেনা’’তিআদিমাহ. তত্থ ধম্মেন চ অলাভো যোতি যো ধম্মং রক্খন্তস্স তংনিমিত্তং অলাভো লাভাভাৰো, লাভহানি. যো চ লাভো অধম্মিকো অধম্মেন অঞ্ঞাযেন বুদ্ধপটিকুট্ঠেন ৰিধিনা উপ্পন্নো, তেসু দ্ৰীসু অলাভো ধম্মিকো ধম্মাৰহো সেয্যো, যাদিসং লাভং পরিৰজ্জন্তস্স অকুসলা ধম্মা পরিহাযন্তি, কুসলা ধম্মা অভিৰড্ঢন্তি, তাদিসো অলাভো পাসংসতরো অত্থাৰহো. যঞ্চে লাভো অধম্মিকোতি যো লাভো অধম্মেন উপ্পন্নো, সো ন সেয্যোতি অধিপ্পাযো.

যসো ¶ চ অপ্পবুদ্ধীনং, ৰিঞ্ঞূনং অযসো চ যোতি যো অপ্পবুদ্ধীনং দুপ্পঞ্ঞানং ৰসেন পুগ্গলস্স যসো লব্ভতি, যো চ ৰিঞ্ঞূনং পণ্ডিতানং ৰসেন অযসো যসহানি. ইমেসু দ্ৰীসু অযসোৰ সেয্যো ৰিঞ্ঞূনং. তে হিস্স যথা অকুসলা ধম্মা পরিহাযন্তি, কুসলা ধম্মা অভিৰড্ঢন্তি, এৰং যসহানিং ইচ্ছেয্যুং, তথা চ ভব্বজাতিকো তং অগুণং পহায গুণে পতিট্ঠেয্য. ন যসো অপ্পবুদ্ধীনন্তি দুপ্পঞ্ঞানং ৰসেন যসো সেয্যো হোতি, তে হি অভূতগুণাভিব্যাহারৰসেনাপি নং উপ্পাদেয্যুং, সো চস্স ইধ চেৰ ৰিঞ্ঞূগরহাদিনা সম্পরাযে চ দুগ্গতিযং দুক্খপরিক্কিলেসাদিনা অনত্থাৰহো. তেনাহ ভগৰা – ‘‘লাভো সিলোকো সক্কারো, মিচ্ছালদ্ধো চ যো যসো’’তি (সু. নি. ৪৪০) ‘‘সক্কারো কাপুরিসং হন্তী’’তি (চূল়ৰ. ৩৩৫; অ. নি. ৪.৬৮) চ.

দুম্মেধেহীতি, নিপ্পঞ্ঞেহি. যঞ্চে বালপ্পসংসনাতি বালেহি অৰিদ্দসূহি যা নাম পসংসনা.

কামমযিকন্তি ৰত্থুকামমযং, কামগুণে পটিচ্চ উপ্পন্নং. দুক্খঞ্চ পৰিৰেকিযন্তি পৰিৰেকতো নিব্বত্তং কাযকিলমথৰসেন পৰত্তং ৰিসমাসনুপতাপাদিহেতুকং কাযিকং দুক্খং, তং পন নিরামিসৰিৰট্টূপনিস্সযতায ৰিঞ্ঞূনং পাসংসা. তেন ৰুত্তং ‘‘পৰিৰেকদুক্খং সেয্যো’’তি.

জীৰিতঞ্চ ¶ ¶ অধম্মেনাতি অধম্মেন জীৰিককপ্পনং জীৰিতহেতু অধম্মচরণং. ধম্মেন মরণং নাম ‘‘ইমং নাম পাপং অকরোন্তং তং মারেস্সামী’’তি কেনচি ৰুত্তে মারেন্তেপি তস্মিং পাপং অকত্ৰা ধম্মং অৰিকোপেন্তস্স ধম্মহেতুমরণং ধম্মিকং সেয্যোতি তাদিসং মরণং ধম্মতো অনপেতত্তা ধম্মিকং সগ্গসম্পাপনতো নিব্বানুপনিস্সযতো চ ৰিঞ্ঞূনং পাসংসতরং. তথা হি ৰুত্তং –

‘‘চজে ধনং অঙ্গৰরস্স হেতু, অঙ্গং চজে জীৰিতং রক্খমানো;

অঙ্গং ধনং জীৰিতঞ্চাপি সব্বং, চজে নরো ধম্মমনুস্সরন্তো’’তি. (জা. ২.২১.৪৭০);

যঞ্চে জীৰে অধম্মিকন্তি পুরিসো যং ধম্মতো অপেতং জীৰিকং জীৰেয্য, তং ন সেৰেয্য ৰিঞ্ঞূহি গরহিতত্তা অপাযসম্পাপনতো চাতি অধিপ্পাযো.

ইদানি ¶ যথাৰুত্তং খীণাসৰানং অনুপলেপং কারণতো দস্সেন্তো ‘‘কামকোপপহীনা’’তিআদিগাথমাহ.

তত্থ কামকোপপহীনাতি অরিযমগ্গেন সব্বসোৰ পহীনা অনুরোধপটিৰিরোধা. সন্তচিত্তা ভৰাভৰেতি খুদ্দকে চেৰ মহন্তে চ ভৰে অনৰসেসপহীনকিলেসপরিল়াহতায ৰূপসন্তচিত্তা. লোকেতি খন্ধাদিলোকে. অসিতাতি তণ্হাদিট্ঠিনিস্সযৰসেন অনিস্সিতা. নত্থি তেসং পিযাপিযন্তি তেসং খীণাসৰানং কত্থচি লাভাদিকে রূপাদিৰিসযে চ পিযং ৰা অপিযং ৰা নত্থি, তংনিমিত্তানং কিলেসানং সব্বসো সমুচ্ছিন্নত্তা.

ইদানি যায ভাৰনায তে এৰরূপা জাতা, তং দস্সেত্ৰা অনুপাদিসেসায নিব্বানধাতুযা দেসনায কূটং গণ্হন্তো ‘‘ভাৰযিত্ৰানা’’তি ওসানগাথমাহ. তত্থ পপ্পুয্যাতি, পাপুণিত্ৰা. সেসং হেট্ঠা ৰুত্তনযমেৰ. ইমা এৰ চ গাথা থেরস্স অঞ্ঞাব্যাকরণাপি অহেসুং.

গোদত্তত্থেরগাথাৰণ্ণনা নিট্ঠিতা.

চুদ্দসকনিপাতৰণ্ণনা নিট্ঠিতা.

১৫. সোল়সকনিপাতো

১. অঞ্ঞাসিকোণ্ডঞ্ঞত্থেরগাথাৰণ্ণনা

সোল়সকনিপাতে ¶ ¶ ¶ এস ভিয্যোতিআদিকা আযস্মতো অঞ্ঞাসিকোণ্ডঞ্ঞত্থেরস্স গাথা. কা উপ্পত্তি? অযম্পি পদুমুত্তরস্স ভগৰতো কালে হংসৰতীনগরে গহপতিমহাসালকুলে নিব্বত্তিত্ৰা ৰিঞ্ঞুতং পত্ৰা একদিৰসং সত্থু সন্তিকে ধম্মং সুণন্তো সত্থারং একং ভিক্খুং অত্তনো সাসনে পঠমং পটিৰিদ্ধধম্মরত্তঞ্ঞূনং অগ্গট্ঠানে ঠপেন্তং দিস্ৰা সযম্পি তং ঠানন্তরং পত্থেন্তো সতসহস্সভিক্খুপরিৰারস্স সত্থুনো সত্তাহং মহাদানং পৰত্তেত্ৰা পণিধানং অকাসি. সত্থাপিস্স অনন্তরাযতং দিস্ৰা ভাৰিনিং সম্পত্তিং ব্যাকাসি. সো যাৰজীৰং পুঞ্ঞানি কত্ৰা সত্থরি পরিনিব্বুতে চেতিযে পতিট্ঠাপিযমানে অন্তোচেতিযে রতনঘরং কারেসি, চেতিযং পরিৰারেত্ৰা সহস্সরতনগ্ঘিযানি চ কারেসি.

সো এৰং পুঞ্ঞানি কত্ৰা, ততো চৰিত্ৰা, দেৰমনুস্সেসু সংসরন্তো ৰিপস্সিস্স ভগৰতো কালে মহাকালো নাম কুটুম্বিকো হুত্ৰা অট্ঠকরীসমত্তে খেত্তে সালিগব্ভং ফালেত্ৰা, গহিতসালিতণ্ডুলেহি অসম্ভিন্নখীরপাযাসং সম্পাদেত্ৰা, তত্থ মধুসপ্পিসক্করাদযো পক্খিপিত্ৰা, বুদ্ধপ্পমুখস্স সঙ্ঘস্স অদাসি. সালিগব্ভং ফালেত্ৰা গহিতগহিতট্ঠানং পুন পূরতি, পুথুককালে পুথুকগ্গং নাম অদাসি. লাযনে লাযনগ্গং, ৰেণিকরণে ৰেণগ্গং, কলাপাদিকরণে কলাপগ্গং, খলগ্গং, ভণ্ডগ্গং, মিনগ্গং, কোট্ঠগ্গন্তি; এৰং একসস্সে নৰ ৰারে অগ্গদানং নাম অদাসি. তম্পি সস্সং অতিরেকতরং সম্পন্নং অহোসি.

এৰং যাৰজীৰং পুঞ্ঞানি কত্ৰা, ততো চুতো দেৰলোকে নিব্বত্তিত্ৰা দেৰেসু চ মনুস্সেসু চ সংসরন্তো, অম্হাকং ভগৰতো উপ্পত্তিতো পুরেতরমেৰ ¶ কপিলৰত্থুনগরস্স অৰিদূরে দোণৰত্থুনামকে ব্রাহ্মণগামে ব্রাহ্মণমহাসালকুলে নিব্বত্তি. তস্স কোণ্ডঞ্ঞোতি গোত্ততো আগতং নামং অহোসি. সো ৰযপ্পত্তো তযো ৰেদে উগ্গহেত্ৰা লক্খণমন্তেসু চ পারং অগমাসি. তেন সমযেন অম্হাকং বোধিসত্তো ¶ তুসিতপুরতো চৰিত্ৰা কপিলৰত্থুপুরে সুদ্ধোদনমহারাজস্স ¶ গেহে নিব্বত্তি. তস্স নামগ্গহণদিৰসে অট্ঠুত্তরসতেসু ব্রাহ্মণেসু উপনীতেসু যে অট্ঠ ব্রাহ্মণা লক্খণপরিগ্গহণত্থং মহাতলং উপনীতা. সো তেসু সব্বনৰকো হুত্ৰা, মহাপুরিসস্স লক্খণনিপ্ফত্তিং দিস্ৰা, ‘‘একংসেন অযং বুদ্ধো ভৰিস্সতী’’তি নিট্ঠং গন্ত্ৰা মহাসত্তস্স অভিনিক্খমনং উদিক্খন্তো ৰিচরতি.

বোধিসত্তোপি খো মহতা পরিৰারেন ৰড্ঢমানো অনুক্কমেন ৰুদ্ধিপ্পত্তো ঞাণপরিপাকং গন্ত্ৰা একূনতিংসতিমে ৰস্সে মহাভিনিক্খমনং নিক্খমন্তো অনোমানদীতীরে পব্বজিত্ৰা অনুক্কমেন উরুৰেলং গন্ত্ৰা পধানং পদহি. তদা কোণ্ডঞ্ঞো মাণৰো মহাসত্তস্স পব্বজিতভাৰং সুত্ৰা, লক্খণপরিগ্গাহকব্রাহ্মণানং পুত্তেহি ৰপ্পমাণৰাদীহি সদ্ধিং অত্তপঞ্চমো পব্বজিত্ৰা, অনুক্কমেন বোধিসত্তস্স সন্তিকং উপসঙ্কমিত্ৰা, ছব্বস্সানি তং উপট্ঠহন্তো তস্স ওল়ারিকাহারপরিভোগেন নিব্বিন্নো অপক্কমিত্ৰা ইসিপতনং অগমাসি. অথ খো বোধিসত্তো ওল়ারিকাহারপরিভোগেন লদ্ধকাযবলো ৰেসাখপুণ্ণমাযং বোধিরুক্খমূলে অপরাজিতপল্লঙ্কে নিসিন্নো তিণ্ণং মারানং মত্থকং মদ্দিত্ৰা, অভিসম্বুদ্ধো হুত্ৰা, সত্তসত্তাহং বোধিমণ্ডেযেৰ ৰীতিনামেত্ৰা, পঞ্চৰগ্গিযানং ঞাণপরিপাকং ঞত্ৰা, আসাল়্হীপুণ্ণমাযং ইসিপতনং গন্ত্ৰা, তেসং ধম্মচক্কপৰত্তনসুত্তন্তং (মহাৰ. ১৩ আদযো; সং. নি. ৫.১০৮১) দেসেসি. দেসনাপরিযোসানে কোণ্ডঞ্ঞত্থেরো অট্ঠারসহি ব্রহ্মকোটীহি সদ্ধিং সোতাপত্তিফলে পতিট্ঠাসি. অথ পঞ্চমিযং পক্খস্স অনত্তলক্খণসুত্তন্তদেসনায (মহাৰ. ২০; সং. নি. ৩.৫৯) অরহত্তং সচ্ছাকাসি. তেন ৰুত্তং অপদানে (অপ. থের ১.১.৫৯৬-৬১২) –

‘‘পদুমুত্তরসম্বুদ্ধং, লোকজেট্ঠং ৰিনাযকং;

বুদ্ধভূমিমনুপ্পত্তং, পঠমং অদ্দসং অহং.

‘‘যাৰতা বোধিযা মূলে, যক্খা সব্বে সমাগতা;

সম্বুদ্ধং পরিৰারেত্ৰা, ৰন্দন্তি পঞ্জলীকতা.

‘‘সব্বে দেৰা তুট্ঠমনা, আকাসে সঞ্চরন্তি তে;

বুদ্ধো অযং অনুপ্পত্তো, অন্ধকারতমোনুদো.

‘‘তেসং ¶ হাসপরেতানং, মহানাদো অৰত্তথ;

কিলেসে ঝাপযিস্সাম, সম্মাসম্বুদ্ধসাসনে.

‘‘দেৰানং গিরমঞ্ঞায, ৰাচাসভিমুদীরিহং;

হট্ঠো হট্ঠেন চিত্তেন, আদিভিক্খমদাসহং.

‘‘মম সঙ্কপ্পমঞ্ঞায, সত্থা লোকে অনুত্তরো;

দেৰসঙ্ঘে নিসীদিত্ৰা, ইমা গাথা অভাসথ.

‘‘সত্তাহং ¶ অভিনিক্খম্ম, বোধিং অজ্ঝগমং অহং;

ইদং মে পঠমং ভত্তং, ব্রহ্মচারিস্স যাপনং.

‘‘তুসিতা হি ইধাগন্ত্ৰা, যো মে ভিক্খং উপানযি;

তমহং কিত্তযিস্সামি, সুণোথ মম ভাসতো.

‘‘তিংসকপ্পসহস্সানি, দেৰরজ্জং করিস্সতি;

সব্বে দেৰে অভিভোত্ৰা, তিদিৰং আৰসিস্সতি.

‘‘দেৰলোকা চৰিত্ৰান, মনুস্সত্তং গমিস্সতি;

সহস্সধা চক্কৰত্তী, তত্থ রজ্জং করিস্সতি.

‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তিদসা সো চৰিত্ৰান, মনুস্সত্তং গমিস্সতি;

অগারা পব্বজিত্ৰান, ছব্বস্সানি ৰসিস্সতি.

‘‘ততো সত্তমকে ৰস্সে, বুদ্ধো সচ্চং কথেস্সতি;

কোণ্ডঞ্ঞো নাম নামেন, পঠমং সচ্ছিকাহিতি.

‘‘নিক্খন্তেনানুপব্বজিং, পধানং সুকতং মযা;

কিলেসে ঝাপনত্থায, পব্বজিং, অনগারিযং.

‘‘অভিগন্ত্ৰান সব্বঞ্ঞূ, বুদ্ধো লোকে সদেৰকে;

ইসিনামে মিগারঞ্ঞে, অমতভেরিমাহনি.

‘‘সো দানি পত্তো অমতং, সন্তিপদমনুত্তরং;

সব্বাসৰে পরিঞ্ঞায, ৰিহরামি অনাসৰো.

‘‘পটিসম্ভিদা চতস্সো…পে… কতং বুদ্ধস্স সাসন’’ন্তি.

অথ ¶ নং সত্থা অপরভাগে জেতৰনমহাৰিহারে ভিক্খুসঙ্ঘমজ্ঝে পঞ্ঞত্তৰরবুদ্ধাসনে নিসিন্নো পঠমং পটিৰিদ্ধধম্মভাৰং দীপেন্তো, ¶ ‘‘এতদগ্গং, ভিক্খৰে, মম সাৰকানং ভিক্খূনং রত্তঞ্ঞূনং যদিদং অঞ্ঞাসিকোণ্ডঞ্ঞো’’তি (অ. নি. ১.১৮৮) এতদগ্গে ঠপেসি. সো দ্ৰীহি অগ্গসাৰকেহি অত্তনি করীযমানং পরমনিপচ্চকারং গামন্তসেনাসনে আকিণ্ণৰিহারঞ্চ পরিহরিতুকামো, ৰিৰেকাভিরতিযা ৰিহরিতুকামো চ অত্তনো সন্তিকং উপগতানং গহট্ঠপব্বজিতানং পটিসন্থারকরণম্পি পপঞ্চং মঞ্ঞমানো সত্থারং আপুচ্ছিত্ৰা হিমৰন্তং পৰিসিত্ৰা ছদ্দন্তেহি নাগেহি উপট্ঠিযমানো ছদ্দন্তদহতীরে দ্ৰাদস ৰস্সানি ৰসি. এৰং তত্থ ৰসন্তং থেরং একদিৰসং সক্কো দেৰরাজা ¶ উপসঙ্কমিত্ৰা ৰন্দিত্ৰা ঠিতো এৰমাহ – ‘‘সাধু মে, ভন্তে, অয্যো ধম্মং দেসেতূ’’তি. থেরো তস্স চতুসচ্চগব্ভং তিলক্খণাহতং সুঞ্ঞতপটিসংযুত্তং নানানযৰিচিত্তং অমতোগধং বুদ্ধলীলায ধম্মং দেসেসি. তং সুত্ৰা সক্কো অত্তনো পসাদং পৰেদেন্তো –

৬৭৩.

‘‘এস ভিয্যো পসীদামি, সুত্ৰা ধম্মং মহারসং;

ৰিরাগো দেসিতো ধম্মো, অনুপাদায সব্বসো’’তি. – পঠমং গাথমাহ;

তত্থ এস ভিয্যো পসীদামি, সুত্ৰা ধম্মং মহারসন্তি যদিপি অনেকৰারং সত্থু সন্তিকে ধম্মং সুত্ৰা তত্থ অভিপ্পসন্নো. ইদানি পন তুম্হেহি কথিতং নানানযৰিচিত্ততায অসেচনকতায চ মহারসং ধম্মং সুত্ৰা এসো অহং ততো ভিয্যো পসীদামি. ৰিরাগো দেসিতো ধম্মো, অনুপাদায সব্বসোতি সব্বসংকিলেসতো সব্বসঙ্খারতো চ ৰিরজ্জনতো ৰিরাগজননতো ৰিরাগো. ততো এৰ রূপাদীসু কঞ্চি ধম্মং অনুপাদায অগ্গহেত্ৰা ৰিমুত্তিসাধনৰসেন পৰত্তত্তা সব্বসো অনুপাদায দেসিতো.

এৰং সক্কো দেৰরাজা থেরস্স দেসনং থোমেত্ৰা থেরং অভিৰাদেত্ৰা সকট্ঠানমেৰ গতো. অথেকদিৰসং থেরো মিচ্ছাৰিতক্কেহি অভিভুয্যমানানং একচ্চানং পুথুজ্জনানং চিত্তাচারং দিস্ৰা তপ্পটিপক্খভূতঞ্চস্স অনুক্কমং অনুস্সরিত্ৰা, অত্তনো চ সব্বসো ততো ৰিনিৰত্তিতমানসতং আৰজ্জেত্ৰা তদত্থং দীপেত্ৰা –

৬৭৪.

‘‘বহূনি ¶ লোকে চিত্রানি, অস্মিং পথৰিমণ্ডলে;

মথেন্তি মঞ্ঞে সঙ্কপ্পং, সুভং রাগূপসংহিতং.

৬৭৫.

‘‘রজমুহতঞ্চ ¶ ৰাতেন, যথা মেঘোপসম্মযে;

এৰং সম্মন্তি সঙ্কপ্পা, যদা পঞ্ঞায পস্সতী’’তি. – দ্ৰে গাথা অভাসি;

তত্থ বহূনি লোকে চিত্রানীতি রূপাদিৰসেন তত্থাপি নীলপীতাদিৰসেন ইত্থিপুরিসাদিৰসেন চ অনেকানি লোকে চিত্তৰিচিত্তানি আরম্মণজাতানি. অস্মিং পথৰিমণ্ডলেতি পচ্চক্খভূতং মনুস্সলোকং সন্ধায ৰদতি. মথেন্তি মঞ্ঞে সঙ্কপ্পন্তি তজ্জং পুরিসৰাযামসহিতং অরণিসহিতং ৰিয অগ্গিং অযোনিসোমনসিকারাভিসঙ্খাতানি মিচ্ছাসঙ্কপ্পানি মথেন্তি মঞ্ঞে মথেন্তানি ৰিয তিট্ঠন্তি. কীদিসং? সুভং রাগূপসংহিতং, কামৰিতক্কন্তি অত্থো. সো হি সুভাকারগ্গহণেন ‘‘সুভো’’তি ৰোহরীযতি.

রজমুহতঞ্চ ¶ ৰাতেনাতি চ-ইতি নিপাতমত্তং. যথা গিম্হানং পচ্ছিমে মাসে ৰাতেন ঊহতং উট্ঠিতং রজং মহামেঘো ৰস্সন্তো উপসম্মযে, ৰূপসমেয্য. এৰং সম্মন্তি সঙ্কপ্পা, যদা পঞ্ঞায পস্সতীতি যদা অরিযসাৰকো তানি লোকচিত্রানি সমুদযতো, অস্সাদতো, আদীনৰতো, নিস্সরণতো চ যথাভূতং পঞ্ঞায পস্সতি, অথ যথা তং রজং উহতং মেঘেন, এৰং সম্মন্তি পঞ্ঞায সব্বেপি মিচ্ছাসঙ্কপ্পা. ন হি উপ্পন্নায সম্মাদিট্ঠিযা মিচ্ছাসঙ্কপ্পা পতিট্ঠং লভন্তি. যথা পন পঞ্ঞায পস্সতি, তং দস্সেন্তো –

৬৭৬.

‘‘সব্বে সঙ্খারা অনিচ্চাতি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা.

৬৭৭.

‘‘সব্বে সঙ্খারা দুক্খাতি…পে… এস মগ্গো ৰিসুদ্ধিযা.

৬৭৮.

‘‘সব্বে ধম্মা অনত্তাতি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা’’তি. –

তিস্সো গাথা অভাসি.

তত্থ ¶ সব্বে সঙ্খারাতি ছল়ারম্মণসঙ্গহা সব্বে তেভূমকা পঞ্চক্খন্ধা. অনিচ্চাতি ‘‘আদিমজ্ঝঅন্তৰন্ততো, অনিচ্চন্তিকতো, তাৰকালিকতো, তত্থ তত্থ ভিজ্জনতো ন নিচ্চা’’তি যদা ৰিপস্সনাপঞ্ঞায পস্সতি. অথ নিব্বিন্দতি দুক্খেতি অথ ইমস্মিং ৰট্টদুক্খে নিব্বিন্দতি, নিব্বিন্দন্তো দুক্খপরিজাননাদিৰিধিনা সচ্চানি পটিৰিজ্ঝতি. এস মগ্গো ৰিসুদ্ধিযাতি এস যথাৰুত্তো ৰিপস্সনাৰিধি ঞাণদস্সনৰিসুদ্ধিযা, অচ্চন্তৰিসুদ্ধিযা চ মগ্গো অধিগমুপাযো.

দুক্খাতি ¶ সপ্পটিভযতো, উদযব্বযসম্পটিপীল়নতো, দুক্খমতো, সুখপটিক্খেপতো চ দুক্খা. সেসং ৰুত্তনযমেৰ.

সব্বে ধম্মা অনত্তাতি সব্বেপি চতুভূমকা ধম্মা অনত্তা. ইধ পন তেভূমকধম্মাৰ গহেতব্বা. তে হি অসারতো, অৰসৰত্তনতো, সুঞ্ঞতো, অত্তপটিক্খেপতো চ অনত্তাতি ৰিপস্সিতব্বা. সেসং পুরিমসদিসমেৰ.

এৰং ৰিপস্সনাৰিধিং দস্সেত্ৰা তেন ৰিধিনা কতকিচ্চং অত্তানং অঞ্ঞং ৰিয কত্ৰা দস্সেন্তো –

৬৭৯.

‘‘বুদ্ধানুবুদ্ধো ¶ যো থেরো, কোণ্ডঞ্ঞো তিব্বনিক্কমো;

পহীনজাতিমরণো, ব্রহ্মচরিযস্স কেৰলী.

৬৮০.

‘‘ওঘপাসো দল়্হখিলো, পব্বতো দুপ্পদালযো;

ছেত্ৰা খিলঞ্চ পাসঞ্চ, সেলং ভেত্ৰান দুব্ভিদং;

তিণ্ণো পারঙ্গতো ঝাযী, মুত্তো সো মারবন্ধনা’’তি. –

গাথাদ্ৰযমাহ.

তত্থ বুদ্ধানুবুদ্ধোতি বুদ্ধানং অনুবুদ্ধো, সম্মাসম্বুদ্ধেহি বুজ্ঝিতানি সচ্চানি তেসং দেসনানুসারেন বুজ্ঝতীতি অত্থো. থিরেহি অসেক্খেহি সীলসারাদীহি সমন্নাগতোতি, থেরো. কোণ্ডঞ্ঞোতি গোত্তকিত্তনং. তিব্বনিক্কমোতি দল়্হৰীরিযো, থিরপরক্কমো. জাতিমরণানং পহীনকারণত্তা পহীনজাতিমরণো. ব্রহ্মচরিযস্স কেৰলীতি মগ্গব্রহ্মচরিযস্স অনৰসেসং, অনৰসেসতো ৰা মগ্গব্রহ্মচরিযস্স পারিপূরকো, অথ ৰা কেৰলী নাম কিলেসেহি অসম্মিস্সতায মগ্গঞাণং ফলঞাণঞ্চ, তং ইমস্মিং ¶ অত্থীতি কেৰলী. যস্মা পন তদুভযম্পি মগ্গব্রহ্মচরিযস্স ৰসেন হোতি ন অঞ্ঞথা, তস্মা ‘‘ব্রহ্মচরিযস্স কেৰলী’’তি ৰুত্তং.

ওঘপাসোতি ‘‘কামোঘো, ভৰোঘো, দিট্ঠোঘো, অৰিজ্জোঘো’’তি (ধ. স. ১১৫৬; ৰিভ. ৯৩৮) এৰং ৰুত্তা চত্তারো ওঘা – ‘‘অন্তলিক্খচরো পাসো, য্ৰাযং চরতি মানসো’’তি (মহাৰ. ৩৩; সং. নি. ১.১৫১) এৰং ৰুত্তো রাগপাসো চ. দল়্হখিলোতি ‘‘সত্থরি কঙ্খতি, ধম্মে কঙ্খতি, সঙ্ঘে কঙ্খতি, সিক্খায কঙ্খতি, সব্রহ্মচারীসু কুপিতো হোতি অনত্তমনো আহতচিত্তো খিলজাতো’’তি (ম. নি. ১.১৮৫; অ. নি. ৫.২০৫) এৰং ৰুত্তো দল়্হো থিরো পঞ্চৰিধো চেতোখিলো চ. পচুরজনেহি পদালেতুং অসক্কুণেয্যতায দুপ্পদালযো. ততো এৰ পব্বতসদিসতায পব্বতোতি চ সঙ্খং গতো. ‘‘দুক্খে অঞ্ঞাণ’’ন্তিআদিনা (ৰিভ. ২২৬; সং. নি. ২.২) ৰা নযেন ৰুত্তো অঞ্ঞাণপ্পভেদো চ. ইতি এতং সব্বং ছেত্ৰা খিলঞ্চ পাসঞ্চাতি এতেসু চতুব্বিধেসু সংকিলেসধম্মেসু যো খিলঞ্চ পাসঞ্চ অরিযমগ্গঞাণাসিনা ছিন্দিত্ৰা. সেলং ভেত্ৰান দুব্ভিদন্তি যেন কেনচি ঞাণেন ছিন্দিতুং অসক্কুণেয্যং অঞ্ঞাণসেলং ৰজিরূপমঞাণেন ¶ ছিন্দিত্ৰা, চত্তারোপি ওঘে তরিত্ৰা, তেসং পরতীরে নিব্বানে ঠিতত্তা তিণ্ণো পারঙ্গতো. আরম্মণূপনিজ্ঝানলক্খণেন লক্খণূপনিজ্ঝানলক্খণেনাতি দুৰিধেনপি ঝাযী; মুত্তো সো মারবন্ধনাতি সো এৰরূপো খীণাসৰো সব্বস্মাপি কিলেসমারবন্ধনা মুত্তো ৰিপ্পমুত্তো ৰিসংযুত্তোতি. অত্তানমেৰ সন্ধায থেরো ৰদতি.

অথেকদিৰসং ¶ থেরো, অত্তনো সদ্ধিৰিহারিকং একং ভিক্খুং অকল্যাণমিত্তসংসগ্গেন কুসীতং হীনৰীরিযং উদ্ধতং উন্নল়ং ৰিহরন্তং দিস্ৰা, ইদ্ধিযা তত্থ গন্ত্ৰা, তং ‘‘মা, আৰুসো, এৰং করি, অকল্যাণমিত্তে পহায কল্যাণমিত্তে সেৰন্তো সমণধম্মং করোহী’’তি ওৰদি. সো থেরস্স ৰচনং নাদিযি. থেরো তস্স অনাদিযনেন ধম্মসংৰেগপ্পত্তো পুগ্গলাধিট্ঠানায কথায মিচ্ছাপটিপত্তিং গরহন্তো সম্মাপটিপত্তিং ৰিৰেকৰাসঞ্চ পসংসন্তো –

৬৮১.

‘‘উদ্ধতো চপলো ভিক্খু, মিত্তে আগম্ম পাপকে;

সংসীদতি মহোঘস্মিং, ঊমিযা পটিকুজ্জিতো.

৬৮২.

‘‘অনুদ্ধতো ¶ অচপলো, নিপকো সংৰুতিন্দ্রিযো;

কল্যাণমিত্তো মেধাৰী, দুক্খস্সন্তকরো সিযা.

৬৮৩.

‘‘কালপব্বঙ্গসঙ্কাসো, কিসো ধমনিসন্থতো;

মত্তঞ্ঞূ অন্নপানস্মিং, অদীনমনসো নরো.

৬৮৪.

‘‘ফুট্ঠো ডংসেহি মকসেহি, অরঞ্ঞস্মিং ব্রহাৰনে;

নাগো সঙ্গামসীসেৰ, সতো তত্রাধিৰাসযে.

৬৮৫-৬.

‘‘নাভিনন্দামি মরণং…পে… সম্পজানো পতিস্সতো.

৬৮৭.

‘‘পরিচিণ্ণো মযা সত্থা…পে… ভৰনেত্তি সমূহতা.

৬৮৮.

‘‘যস্স চত্থায পব্বজিতো, অগারস্মানগারিযং;

সো মে অত্থো অনুপ্পত্তো, কিং মে সদ্ধিৰিহারিনা’’তি. –

ইমা গাথা অভাসি.

তত্থ উদ্ধতোতি উদ্ধচ্চযুত্তো অসমাহিতো ৰিক্খিত্তচিত্তো. চপলোতি পত্তচীৰরমণ্ডনাদিনা চাপল্যেন সমন্নাগতো লোলপকতিকো. মিত্তে আগম্ম পাপকেতি অকল্যাণমিত্তে নিস্সায সমণধম্মং অকরোন্তো. সংসীদতি মহোঘস্মিং, ঊমিযা পটিকুজ্জিতোতি যথা মহাসমুদ্দে পতিতপুরিসো সমুদ্দৰীচীহি ওত্থটো সীসং উক্খিপিতুং অলভন্তো তত্থেৰ সংসীদতি, এৰং সংসারমহোঘস্মিং পরিব্ভমন্তো কোধুপাযাসঊমিযা পটিকুজ্জিতো ওত্থটো ৰিপস্সনাৰসেন পঞ্ঞাসীসং উক্খিপিতুং অলভন্তো তত্থেৰ সংসীদতি.

নিপকোতি ¶ নিপুণো, অত্তত্থপরত্থেসু কুসলো. সংৰুতিন্দ্রিযোতি মনচ্ছট্ঠানং ইন্দ্রিযানং সংৰরণেন পিহিতিন্দ্রিযো. কল্যাণমিত্তোতি কল্যাণেহি মিত্তেহি সমন্নাগতো. মেধাৰীতি ধম্মোজপঞ্ঞায ¶ সমঙ্গীভূতো. দুক্খস্সন্তকরো সিযাতি সো তাদিসো সকলস্সাপি ৰট্টদুক্খস্স অন্তকরো ভৰেয্য.

কালপব্বঙ্গসঙ্কাসোতিআদি ৰিৰেকাভিরতিকিত্তনং. নাভিনন্দামীতিআদি পন কতকিচ্চভাৰদস্সনং. তং সব্বং হেট্ঠা (থেরগা. অট্ঠ. ২.৬০৭) ৰুত্তত্থমেৰ. ওসানে পন ¶ কিং মে সদ্ধিৰিহারিনাতি অত্তনো সদ্ধিৰিহারিকং সন্ধায ৰুত্তং. তস্মা এদিসেন দুব্বচেন অনাদরেন সদ্ধিৰিহারিনা কিং মে পযোজনং একৰিহারোযেৰ ময্হং রুচ্চতীতি অত্থো.

এৰং পন ৰত্ৰা ছদ্দন্তদহমেৰ গতো. তত্থ দ্ৰাদস ৰস্সানি ৰসিত্ৰা উপকট্ঠে পরিনিব্বানে সত্থারং উপসঙ্কমিত্ৰা পরিনিব্বানং অনুজানাপেত্ৰা তত্থেৰ গন্ত্ৰা পরিনিব্বাযি.

অঞ্ঞাসিকোণ্ডঞ্ঞত্থেরগাথাৰণ্ণনা নিট্ঠিতা.

২. উদাযিত্থেরগাথাৰণ্ণনা

মনুস্সভূতন্তিআদিকা আযস্মতো উদাযিত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনিত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে কপিলৰত্থুস্মিং ব্রাহ্মণকুলে নিব্বত্তিত্ৰা উদাযীতি লদ্ধনামো ৰযপ্পত্তো সত্থু ঞাতিসমাগমে বুদ্ধানুভাৰং দিস্ৰা, পটিলদ্ধসদ্ধো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পাপুণি. তযো হি ইমে উদাযিত্থেরা অমচ্চপুত্তো পুব্বে আগতো কাল়ুদাযী, কোৰরিযপুত্তো লালুদাযী, অযং ব্রাহ্মণপুত্তো মহাউদাযীতি. স্ৰাযং একদিৰসং সত্থারা সেতৰারণং সব্বালঙ্কারপটিমণ্ডিতং মহাজনেন পসংসিযমানং অট্ঠুপ্পত্তিং কত্ৰা নাগোপমসুত্তন্তে (অ. নি. ৬.৪৩) দেসিতে দেসনাপরিযোসানে অত্তনো ঞাণবলানুরূপং সত্থু গুণে অনুস্সরিত্ৰা, বুদ্ধারম্মণায পীতিযা সমুস্সাহিতমানসো ‘‘অযং মহাজনো ইমং তিরচ্ছানগতং নাগং পসংসতি, ন বুদ্ধমহানাগং. হন্দাহং বুদ্ধমহাগন্ধহত্থিনো গুণে পাকটে করিস্সামী’’তি সত্থারং থোমেন্তো –

৬৮৯.

‘‘মনুস্সভূতং সম্বুদ্ধং, অত্তদন্তং সমাহিতং;

ইরিযমানং ব্রহ্মপথে, চিত্তস্সূপসমে রতং.

৬৯০.

‘‘যং ¶ ¶ মনুস্সা নমস্সন্তি, সব্বধম্মান পারগুং;

দেৰাপি তং নমস্সন্তি, ইতি মে অরহতো সুতং.

৬৯১.

‘‘সব্বসংযোজনাতীতং ¶ , ৰনা নিব্বনমাগতং;

কামেহি নেক্খম্মরতং, মুত্তং সেলাৰ কঞ্চনং.

৬৯২.

‘‘স ৰে অচ্চরুচি নাগো, হিমৰাৰঞ্ঞে সিলুচ্চযে;

সব্বেসং নাগনামানং, সচ্চনামো অনুত্তরো.

৬৯৩.

‘‘নাগং ৰো কিত্তযিস্সামি, ন হি আগুং করোতি সো;

সোরচ্চং অৰিহিংসা চ, পাদা নাগস্স তে দুৰে.

৬৯৪.

‘‘সতি চ সম্পজঞ্ঞঞ্চ, চরণা নাগস্স তেপরে;

সদ্ধাহত্থো মহানাগো, উপেক্খাসেতদন্তৰা.

৬৯৫.

‘‘সতি গীৰা সিরো পঞ্ঞা, ৰীমংসা ধম্মচিন্তনা;

ধম্মকুচ্ছিসমাৰাসো, ৰিৰেকো তস্স ৰালধি.

৬৯৬.

‘‘সো ঝাযী অস্সাসরতো, অজ্ঝত্তং সুসমাহিতো;

গচ্ছং সমাহিতো নাগো, ঠিতো নাগো সমাহিতো.

৬৯৭.

‘‘সযং সমাহিতো নাগো, নিসিন্নোপি সমাহিতো;

সব্বত্থ সংৰুতো নাগো, এসা নাগস্স সম্পদা.

৬৯৮.

‘‘ভুঞ্জতি অনৰজ্জানি, সাৰজ্জানি ন ভুঞ্জতি;

ঘাসমচ্ছাদনং লদ্ধা, সন্নিধিং পরিৰজ্জযং.

৬৯৯.

‘‘সংযোজনং অণুং থূলং, সব্বং ছেত্ৰান বন্ধনং;

যেন যেনেৰ গচ্ছতি, অনপেক্খোৰ গচ্ছতি.

৭০০.

‘‘যথাপি উদকে জাতং, পুণ্ডরীকং পৰড্ঢতি;

নোপলিপ্পতি তোযেন, সুচিগন্ধং মনোরমং.

৭০১.

‘‘তথেৰ চ লোকে জাতো, বুদ্ধো লোকে ৰিহরতি;

নোপলিপ্পতি লোকেন, তোযেন পদুমং যথা.

৭০২.

‘‘মহাগিনি পজ্জলিতো, অনাহারোপসম্মতি;

অঙ্গারেসু চ সন্তেসু, নিব্বুতোতি পৰুচ্চতি.

৭০৩.

‘‘অত্থস্সাযং ৰিঞ্ঞাপনী, উপমা ৰিঞ্ঞূহি দেসিতা;

ৰিঞ্ঞিস্সন্তি মহানাগা, নাগং নাগেন দেসিতং.

৭০৪.

‘‘ৰীতরাগো ¶ ৰীতদোসো, ৰীতমোহো অনাসৰো;

সরীরং ৰিজহং নাগো, পরিনিব্বিস্সত্যনাসৰো’’তি. – ইমা গাথা অভাসি;

তত্থ ¶ ¶ মনুস্সভূতন্তি মনুস্সেসু ভূতং, নিব্বত্তং; মনুস্সত্তভাৰং ৰা পত্তং. সত্থা হি আসৰক্খযঞাণাধিগমেন সব্বগতিৰিমুত্তোপি চরিমত্তভাৰে গহিতপটিসন্ধিৰসেন ‘‘মনুস্সো’’ত্ৰেৰ ৰোহরীযতীতি. গুণৰসেন পন দেৰানং অতিদেৰো, ব্রহ্মানং অতিব্রহ্মা. সম্বুদ্ধন্তি সযমেৰ বুজ্ঝিতব্ববুদ্ধৰন্তং. অত্তদন্তন্তি অত্তনাযেৰ দন্তং. ভগৰা হি অত্তনাযেৰ উপ্পাদিতেন অরিযমগ্গেন চক্খুতোপি…পে… মনতোপি উত্তমেন দমথেন দন্তো. সমাহিতন্তি অট্ঠৰিধেন সমাধিনা মগ্গফলসমাধিনা চ সমাহিতং. ইরিযমানং ব্রহ্মপথেতি চতুব্বিধেপি ব্রহ্মৰিহারপথে, ব্রহ্মে ৰা সেট্ঠে ফলসমাপত্তিপথে সমাপজ্জনৰসেন পৰত্তমানং. কিঞ্চাপি ভগৰা ন সব্বকালং যথাৰুত্তে ব্রহ্মপথে ইরিযতি, তত্থ ইরিযসামত্থিযং পন তন্নিন্নতঞ্চ উপাদায ‘‘ইরিযমান’’ন্তি ৰুত্তং. চিত্তস্সূপসমে রতন্তি চিত্তস্স উপসমহেতুভূতে সব্বসঙ্খারসমথে, নিব্বানে, অভিরতং. যং মনুস্সা নমস্সন্তি, সব্বধম্মান পারগুন্তি যং সম্মাসম্বুদ্ধং সব্বেসং খন্ধাযতনাদিধম্মানং অভিঞ্ঞাপারগূ, পরিঞ্ঞাপারগূ, পহানপারগূ, ভাৰনাপারগূ, সচ্ছিকিরিযপারগূ, সমাপত্তিপারগূতি ছধা পারগুং পরমুক্কংসগতসম্পত্তিং খত্তিযপণ্ডিতাদযো মনুস্সা নমস্সন্তি. ধম্মানুধম্মপটিপত্তিযা পূজেন্তা কাযেন ৰাচায মনসা চ তন্নিন্না তপ্পোণা তপ্পব্ভারা হোন্তি. দেৰাপি তং নমস্সন্তীতি ন কেৰলং মনুস্সা এৰ, অথ খো অপরিমাণাসু লোকধাতূসু দেৰাপি তং নমস্সন্তি. ইতি মে অরহতো সুতন্তি এৰং মযা আরকত্তাদীহি কারণেহি অরহতো, ভগৰতো, ধম্মসেনাপতিআদীনঞ্চ ‘‘সত্থা দেৰমনুস্সান’’ন্তিআদিকং ৰদন্তানং সন্তিকে এৰং সুতন্তি দস্সেতি.

সব্বসংযোজনাতীতন্তি সব্বানি দসপি সংযোজনানি যথারহং চতূহি মগ্গেহি সহ ৰাসনায অতিক্কন্তং. ৰনা নিব্বনমাগতন্তি কিলেসৰনতো তব্বিরহিতং নিব্বনং উপগতং. কামেহি নেক্খম্মরতন্তি সব্বসো কামেহি নিক্খমিত্ৰা পব্বজ্জাঝানৰিপস্সনাদিভেদে নেক্খম্মে অভিরতং. মুত্তং সেলাৰ কঞ্চনন্তি অসারতো নিস্সটসারসভাৰত্তা সেলতো নিস্সটকঞ্চনসদিসং দেৰাপি তং নমস্সন্তীতি যোজনা.

স ¶ ৰে অচ্চরুচি নাগোতি সো একংসতো আগুং ন করোতি, পুনব্ভৰং ন গচ্ছতি; নাগো ৰিয বলৰাতি. ‘‘নাগো’’তি লদ্ধনামো সম্মাসম্বুদ্ধো, অচ্চরুচীতি ¶ অত্তনো কাযরুচিযা ঞাণরুচিযা চ সদেৰকং লোকং অতিক্কমিত্ৰা রুচি, সোভি. যথা কিং? হিমৰাৰঞ্ঞে সিলুচ্চযে, যথা হি হিমৰা পব্বতরাজা অত্তনো থিরগরুমহাসারভাৰাদীহি গুণেহি অঞ্ঞে পব্বতে অতিরোচতি, এৰং অতিরোচতীতি অত্থো. সব্বেসং নাগনামানন্তি অহিনাগহত্থিনাগপুরিসনাগানং ¶ , সেখাসেখপচ্চেকবুদ্ধনাগানং ৰা. সচ্চনামোতি সচ্চেনেৰ নাগনামো. তং পন সচ্চনামতং ‘‘ন হি আগুং করোতী’’তিআদিনা সযমেৰ ৰক্খতি.

ইদানি বুদ্ধনাগং অৰযৰতো চ দস্সেন্তো নামতো তাৰ দস্সেতুং ‘‘ন হি আগুং করোতি সো’’তি আহ. যস্মা আগুং, পাপং, সব্বেন সব্বং ন করোতি, তস্মা নাগোতি অত্থো. সোরচ্চন্তি সীলং. অৰিহিংসাতি করুণা. তদুভযং সব্বস্সপি গুণরাসিস্স পুব্বঙ্গমন্তি, কত্ৰা বুদ্ধনাগস্স পুরিমপাদভাৰো তস্স যুত্তোতি আহ ‘‘পাদা নাগস্স তে দুৰে’’তি.

অপরপাদভাৰেন ৰদন্তো ‘‘সতি চ সম্পজঞ্ঞঞ্চ, চরণা নাগস্স তেপরে’’তি আহ. ‘‘ত্যাপরে’’তি ৰা পাঠো. তে অপরেত্ৰেৰ পদৰিভাগো. অনৰজ্জধম্মানং আদানে সদ্ধা হত্থো এতস্সাতি, সদ্ধাহত্থো. সুপরিসুদ্ধৰেদনা ঞাণপ্পভেদা উপেক্খা সেতদন্তা তে এতস্স অত্থীতি, উপেক্খাসেতদন্তৰা.

উত্তমঙ্গং পঞ্ঞা, তস্সা অধিট্ঠানং সতীতি আহ ‘‘সতি গীৰা সিরো পঞ্ঞা’’তি. ৰীমংসা ধম্মচিন্তনাতি যথা খাদিতব্বাখাদিতব্বস্স সোণ্ডায পরামসনং ঘাযনঞ্চ হত্থিনাগস্স ৰীমংসা নাম হোতি, এৰং বুদ্ধনাগস্স কুসলাদিধম্মচিন্তনা ৰীমংসা. সমা ৰসন্তি এত্থাতি, সমাৰাসো, ভাজনং কুচ্ছি এৰ সমাৰাসো, অভিঞ্ঞাসমথানং আধানভাৰতো সমথৰিপস্সনাসঙ্খাতো ধম্মো কুচ্ছিসমাৰাসো এতস্সাতি ধম্মকুচ্ছিসমাৰাসো. ৰিৰেকোতি উপধিৰিৰেকো. তস্সাতি বুদ্ধনাগস্স. ৰালধি, পরিযোসানঙ্গভাৰতো.

ঝাযীতি আরম্মণূপনিজ্ঝানেন চ ঝাযনসীলো. অস্সাসরতোতি পরমস্সাসভূতে নিব্বানে রতো. অজ্ঝত্তং সুসমাহিতোতি ৰিসযজ্ঝত্তে ¶ ফলসমাপত্তিযং সুট্ঠু সমাহিতো তদিদং সমাধানং সুট্ঠু সব্বকালিকন্তি দস্সেতুং ‘‘গচ্ছং সমাহিতো নাগো’’তিআদি ৰুত্তং. ভগৰা হি সৰাসনস্স উদ্ধচ্চস্স পহীনত্তা ৰিক্খেপাভাৰতো নিচ্চং সমাহিতোৰ. তস্মা যং যং ইরিযাপথং কপ্পেতি, তং তং সমাহিতোৰ কপ্পেসীতি.

সব্বত্থাতি, সব্বস্মিং গোচরে, সব্বস্মিঞ্চ দ্ৰারে সব্বসো পিহিতৰুত্তি. তেনাহ – ‘‘সব্বং কাযকম্মং ঞাণপুব্বঙ্গমং ¶ ঞাণানুপরিৰত্ত’’ন্তিআদি (নেত্তি. ১৫). এসা নাগস্স সম্পদাতি এসা ‘‘ন হি আগুং করোতি সো’’তিআদিনা ‘‘সম্বুদ্ধ’’ন্তিআদিনা এৰ ৰা যথাৰুত্তা ৰক্খমানা চ বুদ্ধগন্ধহত্থিনো সম্পত্তি গুণপরিপুণ্ণা.

ভুঞ্জতি ¶ অনৰজ্জানীতি সম্মাজীৰস্স উক্কংসপারমিপ্পত্তিযা ভুঞ্জতি অগরহিতব্বানি, মিচ্ছাজীৰস্স সব্বসো সৰাসনানঞ্চ পহীনত্তা সাৰজ্জানি গরহিতব্বানি ন ভুঞ্জতি অনৰজ্জানি ভুঞ্জন্তো চ সন্নিধিং পরিৰজ্জযং ভুঞ্জতীতি যোজনা.

সংযোজনন্তি ৰট্টদুক্খেন সদ্ধিং সন্তানং সংযোজনতো ৰট্টে ওসীদাপনসমত্থং দসৰিধম্পি সংযোজনং. অণুং থূলন্তি খুদ্দকঞ্চেৰ মহন্তঞ্চ. সব্বং ছেত্ৰান বন্ধনন্তি মগ্গঞাণেন অনৰসেসং কিলেসবন্ধনং ছিন্দিত্ৰা. যেন যেনাতি যেন যেন দিসাভাগেন.

যথা হি উদকে জাতং পুণ্ডরীকং উদকে পৰড্ঢতি নোপলিপ্পতি তোযেন, অনুপলেপসভাৰত্তা, তথেৰ লোকে জাতো বুদ্ধো লোকে ৰিহরতি, নোপলিপ্পতি লোকেন তণ্হাদিট্ঠিমানলেপাভাৰতোতি যোজনা.

গিনীতি অগ্গি. অনাহারোতি অনিন্ধনো.

অত্থস্সাযং ৰিঞ্ঞাপনীতি সত্থু গুণসঙ্খাতস্স উপমেয্যত্থস্স ৰিঞ্ঞাপনী, পকাসনী অযং নাগূপমা. ৰিঞ্ঞূহীতি সত্থু পটিৰিদ্ধচতুসচ্চধম্মং পরিজানন্তেহি অত্তানং সন্ধায ৰদতি. ৰিঞ্ঞিস্সন্তীতিআদি কারণৰচনং, যস্মা নাগেন মযা দেসিতং নাগং তথাগতগন্ধহত্থিং মহানাগা খীণাসৰা অত্তনো ৰিসযে ঠত্ৰা ৰিজানিস্সন্তি, তস্মা অঞ্ঞেসং পুথুজ্জনানং ঞাপনত্থং অযং উপমা অম্হেহি ভাসিতাতি অধিপ্পাযো.

সরীরং ¶ ৰিজহং নাগো, পরিনিব্বিস্সত্যনাসৰোতি বোধিমূলে সউপাদিসেসপরিনিব্বানেন অনাসৰো সম্মাসম্বুদ্ধনাগো, ইদানি সরীরং অত্তভাৰং ৰিজহন্তো খন্ধপরিনিব্বানেন পরিনিব্বাযিস্সতীতি.

এৰং চুদ্দসহি উপমাহি মণ্ডেত্ৰা, সোল়সহি গাথাহি, চতুসট্ঠিযা পাদেহি সত্থু গুণে ৰণ্ণেন্তো অনুপাদিসেসায নিব্বানধাতুযা দেসনং নিট্ঠাপেসি.

উদাযিত্থেরগাথাৰণ্ণনা নিট্ঠিতা.

সোল়সকনিপাতৰণ্ণনা নিট্ঠিতা.

১৬. ৰীসতিনিপাতো

১. অধিমুত্তত্থেরগাথাৰণ্ণনা

ৰীসতিনিপাতে ¶ ¶ ¶ যঞ্ঞত্থং ৰাতিআদিকা আযস্মতো অপরস্স অধিমুত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো অত্থদস্সিস্স ভগৰতো কালে ৰিভৰসম্পন্নে কুলে নিব্বত্তিত্ৰা ৰিঞ্ঞুতং পত্তো সত্থরি পরিনিব্বুতে ভিক্খুসঙ্ঘং উপট্ঠহন্তো মহাদানানি পৰত্তেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে আযস্মতো সংকিচ্চত্থেরস্স ভগিনিযা কুচ্ছিম্হি নিব্বত্তি, অধিমুত্তোতিস্স নামং অহোসি. সো ৰযপ্পত্তো মাতুলত্থেরস্স সন্তিকে পব্বজিত্ৰা ৰিপস্সনায কম্মং করোন্তো সামণেরভূমিযংযেৰ ঠিতো অরহত্তং পাপুণি. তেন ৰুত্তং অপদানে (অপ. থের ১.৪.৮৪-৮৮) –

‘‘নিব্বুতে লোকনাথম্হি, অত্থদস্সীনরুত্তমে;

উপট্ঠহিং ভিক্খুসঙ্ঘং, ৰিপ্পসন্নেন চেতসা.

‘‘নিমন্তেত্ৰা ভিক্খুসঙ্ঘং, উজুভূতং সমাহিতং;

উচ্ছুনা মণ্ডপং কত্ৰা, ভোজেসিং সঙ্ঘমুত্তমং.

‘‘যং যং যোনুপপজ্জামি, দেৰত্তং অথমানুসং;

সব্বে সত্তে অভিভোমি, পুঞ্ঞকম্মস্সিদং ফলং.

‘‘অট্ঠারসে কপ্পসতে, যং দানমদদিং তদা;

দুগ্গতিং নাভিজানামি, উচ্ছুদানস্সিদং ফলং.

‘‘পটিসম্ভিদা চতস্সো…পে… কতং বুদ্ধস্স সাসন’’ন্তি.

অরহত্তং পন পত্ৰা সমাপত্তিসুখেন ৰীতিনামেন্তো উপসম্পজ্জিতুকামো ‘‘মাতরং আপুচ্ছিস্সামী’’তি মাতু সন্তিকং গচ্ছন্তো অন্তরামগ্গে দেৰতায বলিকম্মকরণত্থং মংসপরিযেসনং চরন্তেহি পঞ্চসতেহি চোরেহি সমাগচ্ছি. চোরা চ তং অগ্গহেসুং ‘‘দেৰতায বলি ¶ ভৰিস্সতী’’তি. সো চোরেহি গহিতোপি অভীতো অচ্ছম্ভী ৰিপ্পসন্নমুখোৰ অট্ঠাসি. তং দিস্ৰা চোরগামণিঅচ্ছরিযব্ভুতচিত্তজাতো পসংসন্তো –

৭০৫.

‘‘যঞ্ঞত্থং ¶ ৰা ধনত্থং ৰা, যে হনাম মযং পুরে;

অৰসেসং ভযং হোতি, ৰেধন্তি ৰিলপন্তি চ.

৭০৬.

‘‘তস্স তে নত্থি ভীতত্তং, ভিয্যো ৰণ্ণো পসীদতি;

কস্মা ন পরিদেৰেসি, এৰরূপে মহব্ভযে’’তি. – দ্ৰে গাথা অভাসি;

তত্থ যঞ্ঞত্থন্তি যজনত্থং দেৰতানং বলিকম্মকরণত্থং ৰা. ৰা-সদ্দো ৰিকপ্পনত্থো. ধনত্থন্তি সাপতেয্যহরণত্থং. যে হনাম মযং পুরেতি যে সত্তে মযং পুব্বে হনিম্হ. অতীতত্থে হি ইদং ৰত্তমানৰচনং. অৰসেতি অৰসে অসেরিকে কত্ৰা. তন্তি তেসং. ‘‘অৰসেসন্তি’’পি পঠন্তি. অম্হেহি গহিতেসু তং একং ঠপেত্ৰা অৰসেসানং; অযমেৰ ৰা পাঠো. ভযং হোতীতি মরণভযং হোতি. যেন তে ৰেধন্তি ৰিলপন্তি,চিত্তুত্রাসেন ৰেধন্তি ¶ , ‘‘সামি, তুম্হাকং ইদঞ্চিদঞ্চ দস্সাম, দাসা ভৰিস্সামা’’তিআদিকং ৰদন্তা ৰিলপন্তি.

তস্স তেতি যো ত্ৰং অম্হেহি দেৰতায বলিকম্মত্থং জীৰিতা ৰোরোপেতুকামেহি উক্খিত্তাসিকেহি সন্তজ্জিতো, তস্স তে. ভীতত্তন্তি ভীতভাৰো, ভযন্তি অত্থো. ভিয্যো ৰণ্ণো পসীদতীতি পকতিৰণ্ণতো উপরিপি তে মুখৰণ্ণো ৰিপ্পসীদতি. থেরস্স কির তদা ‘‘সচে ইমে মারেস্সন্তি, ইদানেৰাহং অনুপাদায পরিনিব্বাযিস্সামি, দুক্খভারো ৰিগচ্ছিস্সতী’’তি উল়ারং পীতিসোমনস্সং উপ্পজ্জি. এৰরূপে মহব্ভযেতি এদিসে মহতি মরণভযে উপট্ঠিতে. হেতুঅত্থে ৰা এতং ভুম্মৰচনং.

ইদানি থেরো চোরগামণিস্স পটিৰচনদানমুখেন ধম্মং দেসেন্তো –

৭০৭.

‘‘নত্থি চেতসিকং দুক্খং, অনপেক্খস্স গামণি;

অতিক্কন্তা ভযা সব্বে, খীণসংযোজনস্স ৰে.

৭০৮.

‘‘খীণায ভৰনেত্তিযা, দিট্ঠে ধম্মে যথাতথে;

ন ভযং মরণে হোতি, ভারনিক্খেপনে যথা.

৭০৯.

‘‘সুচিণ্ণং ব্রহ্মচরিযং মে, মগ্গো চাপি সুভাৰিতো;

মরণে মে ভযং নত্থি, রোগানমিৰ সঙ্খযে.

৭১০.

‘‘সুচিণ্ণং ¶ ¶ ব্রহ্মচরিযং মে, মগ্গো চাপি সুভাৰিতো;

নিরস্সাদা ভৰা দিট্ঠা, ৰিসং পিত্ৰাৰ ছড্ডিতং.

৭১১.

‘‘পারগূ অনুপাদানো, কতকিচ্চো অনাসৰো;

তুট্ঠো আযুক্খযা হোতি, মুত্তো আঘাতনা যথা.

৭১২.

‘‘উত্তমং ধম্মতং পত্তো, সব্বলোকে অনত্থিকো;

আদিত্তাৰ ঘরা মুত্তো, মরণস্মিং ন সোচতি.

৭১৩.

‘‘যদত্থি সঙ্গতং কিঞ্চি, ভৰো ৰা যত্থ লব্ভতি;

সব্বং অনিস্সরং এতং, ইতি ৰুত্তং মহেসিনা.

৭১৪.

‘‘যো তং তথা পজানাতি, যথা বুদ্ধেন দেসিতং;

ন গণ্হাতি ভৰং কিঞ্চি, সুতত্তংৰ অযোগুল়ং.

৭১৫.

‘‘ন মে হোতি ‘অহোসি’ন্তি, ‘ভৰিস্স’ন্তি ন হোতি মে;

সঙ্খারা ৰিগমিস্সন্তি, তত্থ কা পরিদেৰনা.

৭১৬.

‘‘সুদ্ধং ধম্মসমুপ্পাদং, সুদ্ধং সঙ্খারসন্ততিং;

পস্সন্তস্স যথাভূতং, ন ভযং হোতি গামণি.

৭১৭.

‘‘তিণকট্ঠসমং লোকং, যদা পঞ্ঞায পস্সতি;

মমত্তং সো অসংৰিন্দং, ‘নত্থি মে’তি ন সোচতি.

৭১৮.

‘‘উক্কণ্ঠামি সরীরেন, ভৰেনম্হি অনত্থিকো;

সোযং ভিজ্জিস্সতি কাযো, অঞ্ঞো চ ন ভৰিস্সতি.

৭১৯.

‘‘যং ¶ ৰো কিচ্চং সরীরেন, তং করোথ যদিচ্ছথ;

ন মে তপ্পচ্চযা তত্থ, দোসো পেমঞ্চ হেহিতী’’তি. –

ইমা গাথা অভাসি.

৭২০.

‘‘তস্স তং ৰচনং সুত্ৰা, অব্ভুতং লোমহংসনং;

সত্থানি নিক্খিপিত্ৰান, মাণৰা এতদব্রৰু’’ন্তি. –

অযং সঙ্গীতিকারেহি ৰুত্তগাথা. ইতো অপরা তিস্সো চোরানং, থেরস্স চ ৰচনপটিৰচনগাথা –

৭২১.

‘‘কিং ¶ ভদন্তে করিত্ৰান, কো ৰা আচরিযো তৰ;

কস্স সাসনমাগম্ম, লব্ভতে তং অসোকতা.

৭২২.

‘‘সব্বঞ্ঞূ সব্বদস্সাৰী, জিনো আচরিযো মম;

মহাকারুণিকো সত্থা, সব্বলোকতিকিচ্ছকো.

৭২৩.

‘‘তেনাযং ¶ দেসিতো ধম্মো, খযগামী অনুত্তরো;

তস্স সাসনমাগম্ম, লব্ভতে তং অসোকতা.

৭২৪.

‘‘সুত্ৰান চোরা ইসিনো সুভাসিতং, নিক্খিপ্প সত্থানি চ আৰুধানি চ;

তম্হা চ কম্মা ৰিরমিংসু একে, একে চ পব্বজ্জমরোচযিংসু.

৭২৫.

‘‘তে পব্বজিত্ৰা সুগতস্স সাসনে, ভাৰেত্ৰ বোজ্ঝঙ্গবলানি পণ্ডিতা;

উদগ্গচিত্তা সুমনা কতিন্দ্রিযা, ফুসিংসু নিব্বানপদং অসঙ্খত’’ন্তি. –

ইমাপি সঙ্গীতিকারেহি ৰুত্তগাথা.

তত্থ নত্থি চেতসিকং দুক্খং, অনপেক্খস্স, গামণীতি গামণি, অপেক্খায, তণ্হায, অভাৰেন অনপেক্খস্স মাদিসস্স, লোহিতসভাৰো পুব্বো ৰিয, চেতসিকং দুক্খং দোমনস্সং নত্থি, দোমনস্সাভাৰাপদেসেন ভযাভাৰং ৰদতি. তেনাহ ‘‘অতিক্কন্তা ভযা সব্বে’’তি. অতিক্কন্তা ভযা সব্বেতি খীণসংযোজনস্স অরহতো পঞ্চৰীসতি মহাভযা, অঞ্ঞে চ সব্বেপি ভযা একংসেন অতিক্কন্তা অতীতা, অপগতাতি অত্থো.

দিট্ঠে ধম্মে যথাতথেতি চতুসচ্চধম্মে পরিঞ্ঞাপহানসচ্ছিকিরিযভাৰনাৰসেন মগ্গপঞ্ঞায যথাভূতং দিট্ঠে. মরণেতি মরণহেতু. ভারনিক্খেপনে যথাতি যথা কোচি পুরিসো সীসে ঠিতেন মহতা গরুভারেন সংসীদন্তো তস্স নিক্খেপনে, অপনযনে ন ভাযতি, এৰং সম্পদমিদন্তি অত্থো. ৰুত্তঞ্হেতং ভগৰতা –

‘‘ভারা ¶ ¶ হৰে পঞ্চক্খন্ধা, ভারহারো চ পুগ্গলো;

ভারাদানং দুখং লোকে, ভারনিক্খেপনং সুখ’’ন্তি. (সং. নি. ৩.২২);

সুচিণ্ণন্তি সুট্ঠু চরিতং. ব্রহ্মচরিযন্তি, সিক্খত্তযসঙ্গহং সাসনব্রহ্মচরিযং. ততো এৰ মগ্গো চাপি সুভাৰিতো অট্ঠঙ্গিকো অরিযমগ্গোপি সম্মদেৰ ভাৰিতো. রোগানমিৰ সঙ্খযেতি যথা বহূহি রোগেহি অভিভূতস্স আতুরস্স রোগানং সঙ্খযে পীতিসোমনস্সমেৰ হোতি, এৰং খন্ধরোগসঙ্খযে মরণে মাদিসস্স ভযং নত্থি.

নিরস্সাদা ভৰা দিট্ঠাতি তীহি দুক্খতাহি অভিভূতা, একাদসহি অগ্গীহি আদিত্তা, তযো ভৰা নিরস্সাদা, অস্সাদরহিতা, মযা দিট্ঠা. ৰিসং পিত্ৰাৰ ছড্ডিতন্তি পমাদৰসেন ৰিসং পিৰিত্ৰা তাদিসেন পযোগেন ছড্ডিতং ৰিয মরণে মে ভযং নত্থীতি অত্থো.

মুত্তো ¶ আঘাতনা যথাতি যথা চোরেহি মারণত্থং আঘাতনং নীতো কেনচি উপাযেন ততো মুত্তো হট্ঠতুট্ঠো হোতি, এৰং সংসারপারং, নিব্বানং, গতত্তা পারগূ, চতূহিপি উপাদানেহি অনুপাদানো, পরিঞ্ঞাদীনং সোল়সন্নং কিচ্চানং কতত্তা কতকিচ্চো কামাসৰাদীহি অনাসৰো, আযুক্খযা আযুক্খযহেতু তুট্ঠো সোমনস্সিকো হোতি.

উত্তমন্তি সেট্ঠং. ধম্মতন্তি, ধম্মসভাৰং. অরহত্তে সিদ্ধে সিজ্ঝনহেতু ইট্ঠাদীসু তাদিভাৰং. সব্বলোকেতি সব্বলোকস্মিম্পি, দীঘাযুকসুখবহুলতাদিৰসেন সংযুত্তেপি লোকে. অনত্থিকোতি, অনপেক্খো. আদিত্তাৰ ঘরা মুত্তোতি যথা কোচি পুরিসো সমন্ততো আদিত্ততো পজ্জলিততো গেহতো নিস্সটো, ততো নিস্সরণনিমিত্তং ন সোচতি, এৰং খীণাসৰো মরণনিমিত্তং ন সোচতি.

যদত্থি সঙ্গতং কিঞ্চীতি যংকিঞ্চি ইমস্মিং লোকে অত্থি, ৰিজ্জতি, উপলব্ভতি সঙ্গতং, সত্তেহি সঙ্খারেহি ৰা সমাগমো, সমোধানং. ‘‘সঙ্খত’’ন্তিপি পাঠো, তস্স যংকিঞ্চি পচ্চযেহি সমচ্চ সম্ভুয্য কতং, পটিচ্চসমুপ্পন্নন্তি অত্থো. ভৰো ৰা যত্থ লব্ভতীতি যস্মিং সত্তনিকাযে যো উপপত্তিভৰো লব্ভতি. সব্বং অনিস্সরং এতন্তি সব্বমেতং ইস্সররহিতং, ন এত্থ কেনচি ‘‘এৰং হোতূ’’তি ইস্সরিযং ৰত্তেতুং সক্কা. ইতি ৰুত্তং মহেসিনাতি ¶ ‘‘সব্বে ধম্মা অনত্তা’’তি এৰং ৰুত্তং মহেসিনা সম্মাসম্বুদ্ধেন. তস্মা ‘‘অনিস্সরং এত’’ন্তি পজানন্তো মরণস্মিং ন সোচতীতি যোজনা.

ন ¶ গণ্হাতি ভৰং কিঞ্চীতি যো অরিযসাৰকো ‘‘সব্বে সঙ্খারা অনিচ্চা’’তিআদিনা (ধ. প. ২৭৭) যথা বুদ্ধেন ভগৰতা দেসিতং, তথা তং ভৰত্তযং ৰিপস্সনাপঞ্ঞাসহিতায মগ্গপঞ্ঞায পজানাতি. সো যথা কোচি পুরিসো সুখকামো দিৰসং সন্তত্তং অযোগুল়ং হত্থেন ন গণ্হাতি, এৰং কিঞ্চি খুদ্দকং ৰা মহন্তং ৰা ভৰং ন গণ্হাতি, ন তত্থ তণ্হং করোতীতি অত্থো.

ন মে হোতি ‘‘অহোসি’’ন্তি ‘‘অতীতমদ্ধানং অহং ঈদিসো অহোসি’’ন্তি অত্তদিট্ঠিৰসেন ন মে চিত্তপ্পৰত্তি অত্থি দিট্ঠিযা সম্মদেৰ উগ্ঘাটিতত্তা, ধম্মসভাৰস্স চ সুদিট্ঠত্তা. ‘‘ভৰিস্স’’ন্তি ন হোতি মেতি ততো এৰ ‘‘অনাগতমদ্ধানং অহং এদিসো কথং নু খো ভৰিস্সং ভৰেয্য’’ন্তি এৰম্পি মে ন হোতি. সঙ্খারা ৰিগমিস্সন্তীতি এৰং পন হোতি ‘‘যথাপচ্চযং পৰত্তমানা সঙ্খারাৰ, ন এত্থ কোচি অত্তা ৰা অত্তনিযং ৰা, তে চ খো ৰিগমিস্সন্তি ¶ , ৰিনস্সিস্সন্তি, খণে খণে ভিজ্জিস্সন্তী’’তি. তত্থ কা পরিদেৰনাতি এৰং পস্সন্তস্স মাদিসস্স তত্থ সঙ্খারগতে কা নাম পরিদেৰনা.

সুদ্ধন্তি কেৰলং, অত্তসারেন অসম্মিস্সং. ধম্মসমুপ্পাদন্তি পচ্চযপচ্চযুপ্পন্নধম্মসমুপ্পত্তিং অৰিজ্জাদিপচ্চযেহি সঙ্খারাদিধম্মমত্তপ্পৰত্তিং. সঙ্খারসন্ততিন্তি কিলেসকম্মৰিপাকপ্পভেদসঙ্খারপবন্ধং. পস্সন্তস্স যথাভূতন্তি সহ ৰিপস্সনায মগ্গপঞ্ঞায যাথাৰতো জানন্তস্স.

তিণকট্ঠসমং লোকন্তি যথা অরঞ্ঞে অপরিগ্গহে তিণকট্ঠে কেনচি গয্হমানে অপরস্স ‘‘ময্হং সন্তকং অযং গণ্হতী’’তি ন হোতি, এৰং সো অসামিকতায তিণকট্ঠসমং সঙ্খারলোকং যদা পঞ্ঞায পস্সতি, সো তত্থ মমত্তং অসংৰিন্দং অসংৰিন্দন্তো অলভন্তো অকরোন্তো. নত্থি মেতি ‘‘অহু ৰত সোহং, তং মে নত্থী’’তি ন সোচতি.

উক্কণ্ঠামি সরীরেনাতি অসারকেন অভিনুদেন দুক্খেন অকতঞ্ঞুনা অসুচিদুগ্গন্ধজেগুচ্ছপটিক্কূলসভাৰেন ইমিনা কাযেন উক্কণ্ঠামি ইমং কাযং ¶ নিব্বিন্দন্তো এৰং তিট্ঠামি. ভৰেনম্হি অনত্থিকোতি সব্বেনপি ভৰেন অনত্থিকো অম্হি, ন কিঞ্চি ভৰং পত্থেমি. সোযং ভিজ্জিস্সতি কাযোতি অযং মম কাযো ইদানি তুম্হাকং পযোগেন অঞ্ঞথা ৰা অঞ্ঞত্থ ভিজ্জিস্সতি. অঞ্ঞো চ ন ভৰিস্সতীতি অঞ্ঞো কাযো ময্হং আযতিং ন ভৰিস্সতি, পুনব্ভৰাভাৰতো.

যং ৰো কিচ্চং সরীরেনাতি যং তুম্হাকং ইমিনা সরীরেন পযোজনং, তং করোথ যদিচ্ছথ, ইচ্ছথ চে. ন মে তপ্পচ্চযাতি, তং নিমিত্তং ¶ ইমস্স সরীরস্স তুম্হেহি যথিচ্ছিতকিচ্চস্স করণহেতু. তত্থাতি তেসু করোন্তেসু চ অকরোন্তেসু চ. দোসো পেমঞ্চ হেহিতীতি যথাক্কমং পটিঘো অনুনযো ন ভৰিস্সতি, অত্তনো ভৰে অপেক্খায সব্বসো পহীনত্তাতি অধিপ্পাযো. অঞ্ঞপচ্চযা অঞ্ঞত্থ চ পটিঘানুনযেসু অসন্তেসুপি তপ্পচ্চযা, ‘‘তত্থা’’তি ৰচনং যথাধিগতৰসেন ৰুত্তং.

তস্সাতি অধিমুত্তত্থেরস্স. তং ৰচনন্তি ‘‘নত্থি চেতসিকং দুক্খ’’ন্তিআদিকং মরণে ভযাভাৰাদিদীপকং, ততো এৰ অব্ভুতং লোমহংসনং ৰচনং সুত্ৰা. মাণৰাতি চোরা. চোরা হি ‘‘মাণৰা’’তি ৰুচ্চন্তি ‘‘মাণৰেহি সহ গচ্ছন্তি কতকম্মেহি অকতকম্মেহিপী’’তিআদীসু (ম. নি. ২.১৪৯) ৰিয.

কিং ¶ ভদন্তে করিত্ৰানাতি, ভন্তে, কিং নাম তপোকম্মং কত্ৰা. কো ৰা তৰ আচরিযো কস্স সাসনং, ওৰাদং নিস্সায অযং অসোকতা মরণকালে সোকাভাৰো লব্ভতীতি এতং অত্থং অব্রৰুং, পুচ্ছাৰসেন কথেসুং, ভাসিংসু.

তং সুত্ৰা থেরো তেসং পটিৰচনং দেন্তো ‘‘সব্বঞ্ঞূ’’তিআদিমাহ. তত্থ সব্বঞ্ঞূতি পরোপদেসেন ৰিনা সব্বপকারেন সব্বধম্মাৰবোধনসমত্থস্স আকঙ্খাপটিবদ্ধৰুত্তিনো অনাৰরণঞাণস্স অধিগমেন অতীতাদিভেদং সব্বং জানাতীতি, সব্বঞ্ঞূ. তেনেৰ সমন্তচক্খুনা সব্বস্স দস্সনতো সব্বদস্সাৰী. যম্হি অনাৰরণঞাণং, তদেৰ সব্বঞ্ঞুতঞ্ঞাণং, নত্থেৰ অসাধারণঞাণপাল়িযা ৰিরোধো ৰিসযুপ্পত্তিমুখেন অঞ্ঞেহি অসাধারণভাৰদস্সনত্থং একস্সেৰ ঞাণস্স দ্ৰিধা ৰুত্তত্তা. যং পনেত্থ ৰত্তব্বং, তং ইতিৰুত্তকৰণ্ণনাযং (ইতিৰু. অট্ঠ. ৩৮) ৰিত্থারতো ৰুত্তমেৰাতি তত্থ ৰুত্তনযেনেৰ ¶ ৰেদিতব্বং. পঞ্চন্নম্পি মারানং ৰিজযতো জিনো, হীনাদিৰিভাগভিন্নে সব্বস্মিং সত্তনিকাযে অধিমুত্তৰুত্তিতায মহতিযা করুণায সমন্নাগতত্তা মহাকারুণিকো, দিট্ঠধম্মিকসম্পরাযিকপরমত্থেহি যথারহং ৰেনেয্যানং অনুসাসনতো সত্থা, ততো এৰ সব্বলোকস্স কিলেসরোগতিকিচ্ছনতো সব্বলোকতিকিচ্ছকো, সম্মাসম্বুদ্ধো আচরিযো মমাতি যোজনা. খযগামীতি নিব্বানগামী.

এৰং থেরেন সত্থু সাসনস্স চ গুণে পকাসিতে পটিলদ্ধসদ্ধা একচ্চে চোরা পব্বজিংসু, একচ্চে উপাসকত্তং পৰেদেসুং. তমত্থং দীপেন্তো ধম্মসঙ্গাহকা ‘‘সুত্ৰান চোরা’’তিআদিনা দ্ৰে গাথা অভাসিংসু. তত্থ ¶ ইসিনোতি অধিসীলসিক্খাদীনং এসনট্ঠেন ইসিনো, অধিমুত্তত্থেরস্স. নিক্খিপ্পাতি পহায. সত্থানি চ আৰুধানি চাতি অসিআদিসত্থানি চেৰ ধনুকলাপাদিআৰুধানি চ. তম্হা চ কম্মাতি ততো চোরকম্মতো.

তে পব্বজিত্ৰা সুগতস্স সাসনেতি তে চোরা সোভনগমনতাদীহি সুগতস্স ভগৰতো সাসনে পব্বজ্জং উপগন্ত্ৰা. ভাৰনাৰিসেসাধিগতায ওদগ্যলক্খণায পীতিযা সমন্নাগমেন উদগ্গচিত্তা. সুমনাতি সোমনস্সপ্পত্তা. কতিন্দ্রিযাতি ভাৰিতিন্দ্রিযা. ফুসিংসূতি অগ্গমগ্গাধিগমেন অসঙ্খতং নিব্বানং অধিগচ্ছিংসু. অধিমুত্তো কির চোরে নিব্বিসেৰনে কত্ৰা, তে তত্থেৰ ঠপেত্ৰা, মাতু সন্তিকং গন্ত্ৰা, মাতরং আপুচ্ছিত্ৰা, পচ্চাগন্ত্ৰা তেহি সদ্ধিং উপজ্ঝাযস্স সন্তিকং গন্ত্ৰা, পব্বাজেত্ৰা উপসম্পদং অকাসি. অথ তেসং কম্মট্ঠানং আচিক্খি ¶ , তে নচিরস্সেৰ অরহত্তে পতিট্ঠহিংসু. তেন ৰুত্তং ‘‘পব্বজিত্ৰা…পে… অসঙ্খত’’ন্তি.

অধিমুত্তত্থেরগাথাৰণ্ণনা নিট্ঠিতা.

২. পারাপরিযত্থেরগাথাৰণ্ণনা

সমণস্স অহু চিন্তাতিআদিকা আযস্মতো পারাপরিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা সুগতীসুযেৰ সংসরন্তো ইমস্মিং বুদ্ধুপ্পাদে সাৰত্থিযং অঞ্ঞতরস্স ব্রাহ্মণমহাসালস্স পুত্তো হুত্ৰা ¶ নিব্বত্তি. তস্স ৰযপ্পত্তস্স গোত্তৰসেন পারাপরিযোত্ৰেৰ সমঞ্ঞা অহোসি. সো তযো ৰেদে উগ্গহেত্ৰা ব্রাহ্মণসিপ্পেসু নিপ্ফত্তিং গতো. একদিৰসং সত্থু ধম্মদেসনাকালে জেতৰনৰিহারং গন্ত্ৰা পরিসপরিযন্তে নিসীদি. সত্থা তস্স অজ্ঝাসযং ওলোকেত্ৰা ইন্দ্রিযভাৰনাসুত্তং (ম. নি. ৩.৪৫৩) দেসেসি. সো তং সুত্ৰা পটিলদ্ধসদ্ধো পব্বজি. তং সুত্তং উগ্গহেত্ৰা তদত্থমনুচিন্তেসি. যথা পন অনুচিন্তেসি, স্ৰাযমত্থো গাথাসু এৰ আৰি ভৰিস্সতি. সো তথা অনুৰিচিন্তেন্তো আযতনমুখেন ৰিপস্সনং পট্ঠপেত্ৰা নচিরস্সেৰ অরহত্তং পত্তো. অপরভাগে অত্তনা চিন্তিতাকারং পকাসেন্তো –

৭২৬.

‘‘সমণস্স অহু চিন্তা, পারাপরিযস্স ভিক্খুনো;

এককস্স নিসিন্নস্স, পৰিৰিত্তস্স ঝাযিনো.

৭২৭.

‘‘কিমানুপুব্বং ¶ পুরিসো, কিং ৰতং কিং সমাচারং;

অত্তনো কিচ্চকারীস্স, ন চ কঞ্চি ৰিহেঠযে.

৭২৮.

‘‘ইন্দ্রিযানি মনুস্সানং, হিতায অহিতায চ;

অরক্খিতানি অহিতায, রক্খিতানি হিতায চ.

৭২৯.

‘‘ইন্দ্রিযানেৰ সারক্খং, ইন্দ্রিযানি চ গোপযং;

অত্তনো কিচ্চকারীস্স, ন চ কঞ্চি ৰিহেঠযে.

৭৩০.

‘‘চক্খুন্দ্রিযং চে রূপেসু, গচ্ছন্তং অনিৰারযং;

অনাদীনৰদস্সাৰী, সো দুক্খা ন হি মুচ্চতি.

৭৩১.

‘‘সোতিন্দ্রিযং ¶ চে সদ্দেসু, গচ্ছন্তং অনিৰারযং;

অনাদীনৰদস্সাৰী, সো দুক্খা ন হি মুচ্চতি.

৭৩২.

‘‘অনিস্সরণদস্সাৰী, গন্ধে চে পটিসেৰতি;

ন সো মুচ্চতি দুক্খম্হা, গন্ধেসু অধিমুচ্ছিতো.

৭৩৩.

‘‘অম্বিলং মধুরগ্গঞ্চ, তিত্তকগ্গমনুস্সরং;

রসতণ্হায গধিতো, হদযং নাৰবুজ্ঝতি.

৭৩৪.

‘‘সুভান্যপ্পটিকূলানি ¶ , ফোট্ঠব্বানি অনুস্সরং;

রত্তো রাগাধিকরণং, ৰিৰিধং ৰিন্দতে দুখং.

৭৩৫.

‘‘মনং চেতেহি ধম্মেহি, যো ন সক্কোতি রক্খিতুং;

ততো নং দুক্খমন্ৰেতি, সব্বেহেতেহি পঞ্চহি.

৭৩৬.

‘‘পুব্বলোহিতসম্পুণ্ণং, বহুস্স কুণপস্স চ;

নরৰীরকতং ৰগ্গুং, সমুগ্গমিৰ চিত্তিতং.

৭৩৭.

‘‘কটুকং মধুরস্সাদং, পিযনিবন্ধনং দুখং;

খুরংৰ মধুনা লিত্তং, উল্লিহং নাৰবুজ্ঝতি.

৭৩৮.

‘‘ইত্থিরূপে ইত্থিসরে, ফোট্ঠব্বেপি চ ইত্থিযা;

ইত্থিগন্ধেসু সারত্তো, ৰিৰিধং ৰিন্দতে দুখং.

৭৩৯.

‘‘ইত্থিসোতানি সব্বানি, সন্দন্তি পঞ্চ পঞ্চসু;

তেসমাৰরণং কাতুং, যো সক্কোতি ৰীরিযৰা.

৭৪০.

‘‘সো অত্থৰা সো ধম্মট্ঠো, সো দক্খো সো ৰিচক্খণো;

করেয্য রমমানোপি, কিচ্চং ধম্মত্থসংহিতং.

৭৪১.

‘‘অথো সীদতি সঞ্ঞুত্তং, ৰজ্জে কিচ্চং নিরত্থকং;

ন তং কিচ্চন্তি মঞ্ঞিত্ৰা, অপ্পমত্তো ৰিচক্খণো.

৭৪২.

‘‘যঞ্চ অত্থেন সঞ্ঞুত্তং, যা চ ধম্মগতা রতি;

তং সমাদায ৰত্তেথ, সা হি ৰে উত্তমা রতি.

৭৪৩.

‘‘উচ্চাৰচেহুপাযেহি, পরেসমভিজিগীসতি;

হন্ত্ৰা ৰধিত্ৰা অথ সোচযিত্ৰা, আলোপতি সাহসা যো পরেসং.

৭৪৪.

‘‘তচ্ছন্তো ¶ আণিযা আণিং, নিহন্তি বলৰা যথা;

ইন্দ্রিযানিন্দ্রিযেহেৰ, নিহন্তি কুসলো তথা.

৭৪৫.

‘‘সদ্ধং ¶ ৰীরিযং সমাধিঞ্চ, সতিপঞ্ঞঞ্চ ভাৰযং;

পঞ্চ পঞ্চহি হন্ত্ৰান, অনীঘো যাতি ব্রাহ্মণো.

৭৪৬.

‘‘সো ¶ অত্থৰা সো ধম্মট্ঠো, কত্ৰা ৰাক্যানুসাসনিং;

সব্বেন সব্বং বুদ্ধস্স, সো নরো সুখমেধতী’’তি. – ইমা গাথা অভাসি;

তত্থ সমণস্সাতি পব্বজিতস্স. অহূতি অহোসি. চিন্তাতি ধম্মচিন্তা ধম্মৰিচারণা. পারাপরিযস্সাতি পারাপরগোত্তস্স. ‘‘পারাচরিযস্সা’’তিপি পঠন্তি. ভিক্খুনোতি সংসারে ভযং ইক্খনসীলস্স. এককস্সাতি অসহাযস্স, এতেন কাযৰিৰেকং দস্সেতি. পৰিৰিত্তস্সাতি পৰিৰেকহেতুনা কিলেসানং ৰিক্খম্ভনেন ৰিৰেকং আরদ্ধস্স, এতেন চিত্তৰিৰেকং দস্সেতি. তেনাহ ‘‘ঝাযিনো’’তি. ঝাযিনোতি ঝাযনসীলস্স, যোনিসোমনসিকারেসু যুত্তস্সাতি অত্থো. সব্বমেতং থেরো অত্তানং পরং ৰিয কত্ৰা ৰদতি.

‘‘কিমানুপুব্ব’’ন্তিআদিনা তং চিন্তনং দস্সেতি. তত্থ পঠমগাথাযং তাৰ কিমানুপুব্বন্তি অনুপুব্বং অনুক্কমো, অনুপুব্বমেৰ ৰক্খমানেসু ৰতসমাচারেসু কো অনুক্কমো, কেন অনুক্কমেন তে পটিপজ্জিতব্বাতি অত্থো. পুরিসো কিং ৰতং কিং সমাচারন্তি অত্থকামো পুরিসো সমাদিযিতব্বট্ঠেন ‘‘ৰত’’ন্তি লদ্ধনামং, কীদিসং সীলং সমাচারং, সমাচরন্তো, অত্তনো কিচ্চকারী কত্তব্বকারী অস্স, কঞ্চি সত্তং ন চ ৰিহেঠযে, ন বাধেয্যাতি অত্থো. অত্তনো কিচ্চং নাম সমণধম্মো, সঙ্খেপতো সীলসমাধিপঞ্ঞা, তং সম্পাদেন্তস্স পরৰিহেঠনায লেসোপি নত্থি তায সতি সমণভাৰস্সেৰ অভাৰতো.

যথাহ ভগৰা – ‘‘ন হি পব্বজিতো পরূপঘাতী, ন সমণো হোতি পরং ৰিহেঠযন্তো’’তি (ধ. প. ১৮৪). এত্থ চ ৰতগ্গহণেন ৰারিত্তসীলং গহিতং, সমাচারগ্গহণেন সমাচরিতব্বতো চারিত্তসীলেন সদ্ধিং ঝানৰিপস্সনাদি, তস্মা ৰারিত্তসীলং পধানং. তত্থাপি চ যস্মা ইন্দ্রিযসংৰরে সিদ্ধে সব্বং সীলং সুরক্খিতং, সুগোপিতমেৰ হোতি, তস্মা ইন্দ্রিযসংৰরসীলং তাৰ দস্সেতুকামো ইন্দ্রিযানং অরক্খণে রক্খণে চ আদীনৰানিসংসে ৰিভাৰেন্তো ¶ ‘‘ইন্দ্রিযানি মনুস্সান’’ন্তিআদিমাহ. তত্থ ইন্দ্রিযানীতি রক্খিতব্বধম্মনিদস্সনং, তস্মা চক্খাদীনি ছ ইন্দ্রিযানীতি ৰুত্তং হোতি. মনুস্সানন্তি রক্খণযোগ্যপুগ্গলনিদস্সনং. হিতাযাতি অত্থায. অহিতাযাতি অনত্থায. হোন্তীতি ¶ ৰচনসেসো. কথং পন তানিযেৰ হিতায চ অহিতায হোন্তীতি আহ ‘‘রক্খিতানী’’তিআদি. তস্সত্থো – যস্স চক্খাদীনি ইন্দ্রিযানি সতিকৰাটেন অপিহিতানি, তস্স রূপাদীসু অভিজ্ঝাদিপাপধম্মপৰত্তিযা দ্ৰারভাৰতো অনত্থায পিহিতানি, তদভাৰতো অত্থায সংৰত্তন্তীতি.

ইন্দ্রিযানেৰ ¶ সারক্খন্তি যস্মা ইন্দ্রিযসংৰরো পরিপুণ্ণো সীলসম্পদং পরিপূরেতি, সীলসম্পদা পরিপুণ্ণা সমাধিসম্পদং পরিপূরেতি, সমাধিসম্পদা পরিপুণ্ণা পঞ্ঞাসম্পদং পরিপূরেতি, তস্মা ইন্দ্রিযারক্খা অত্তহিতপটিপত্তিযাৰ মূলন্তি দস্সেন্তো আহ ‘‘ইন্দ্রিযানেৰ সারক্খ’’ন্তি. সতিপুব্বঙ্গমেন আরক্খেন সংরক্খন্তো যোনিসোমনসিকারেন ইন্দ্রিযানি এৰ তাৰ সম্মদেৰ রক্খন্তো, যথা অকুসলচোরা তেহি তেহি দ্ৰারেহি পৰিসিত্ৰা চিত্তসন্তানে কুসলং ভণ্ডং ন ৰিলুম্পন্তি, তথা তানি পিদহন্তোতি অত্থো. সারক্খন্তি চ সং-সদ্দস্স সাভাৰং কত্ৰা ৰুত্তং, ‘‘সারাগো’’তিআদীসু ৰিয. ‘‘সংরক্খ’’ন্তি চ পাঠো. ইন্দ্রিযানি চ গোপযন্তি তস্সেৰ পরিযাযৰচনং, পরিযাযৰচনে পযোজনং নেত্তিঅট্ঠকথাযং ৰুত্তনযেনেৰ ৰেদিতব্বং. ‘‘অত্তনো কিচ্চকারীস্সা’’তি ইমিনা অত্তহিতপটিপত্তিং দস্সেতি, ‘‘ন চ কঞ্চি ৰিহেঠযে’’তি ইমিনা পরহিতপটিপত্তিং, উভযেনাপি ৰা অত্তহিতপটিপত্তিমেৰ দস্সেতি পরাৰিহেঠনস্সাপি অত্তহিতপটিপত্তিভাৰতো. অথ ৰা পদদ্ৰযেনপি অত্তহিতপটিপত্তিং দস্সেতি পুথুজ্জনস্স সেক্খস্স চ পরহিতপটিপত্তিযাপি অত্তহিতপটিপত্তিভাৰতো.

এৰং রক্খিতানি ইন্দ্রিযানি হিতায হোন্তীতি ৰোদানপক্খং সঙ্খেপেনেৰ দস্সেত্ৰা, অরক্খিতানি অহিতায হোন্তীতি সংকিলেসপক্খং পন ৰিভজিত্ৰা দস্সেন্তো ‘‘চক্খুন্দ্রিযং চে’’তিআদিমাহ. তত্থ চক্খুন্দ্রিযং চে রূপেসু, গচ্ছন্তং অনিৰারযং. অনাদীনৰদস্সাৰীতি যো নীলপীতাদিভেদেসু ইট্ঠানিট্ঠেসু রূপাযতনেসু গচ্ছন্তং যথারুচি পৰত্তন্তং চক্খুন্দ্রিযং অনিৰারযং, অনিৰারযন্তো অপ্পটিবাহন্তো তথাপৰত্তিযং আদীনৰদস্সাৰী ন হোতি চে, দিট্ঠধম্মিকং সম্পরাযিকঞ্চ আদীনৰং দোসং ন পস্সতি চে ¶ . ‘‘গচ্ছন্তং নিৰারযে অনিস্সরণদস্সাৰী’’তি চ পাঠো. তত্থ যো ‘‘দিট্ঠে দিট্ঠমত্তং ভৰিস্সতী’’তি (সং. নি. ৪.৯৫) ৰুত্তৰিধিনা দিট্ঠমত্তেযেৰ ঠত্ৰা সতিসম্পজঞ্ঞৰসেন রূপাযতনে পৰত্তমানো তত্থ নিস্সরণদস্সাৰী নাম. ৰুত্তৰিপরিযাযেন অনিস্সরণদস্সাৰী দট্ঠব্বো. সো দুক্খা ন হি মুচ্চতীতি সো এৰরূপো পুগ্গলো ৰট্টদুক্খতো ন মুচ্চতেৰ. এত্থ চ চক্খুন্দ্রিযস্স অনিৰারণং ¶ নাম যথা তেন দ্ৰারেন অভিজ্ঝাদযো পাপধম্মা অন্ৰাস্সৰেয্যুং, তথা পৰত্তনং, তং পন অত্থতো সতিসম্পজঞ্ঞস্স অনুট্ঠাপনং দট্ঠব্বং. সেসিন্দ্রিযেসুপি এসেৰ নযো. অধিমুচ্ছিতোতি অধিমুত্ততণ্হায মুচ্ছং আপন্নো. অম্বিলন্তি অম্বিলরসং. মধুরগ্গন্তি মধুররসকোট্ঠাসং. তথা তিত্তকগ্গং. অনুস্সরন্তি অস্সাদৰসেন তং তং রসং অনুৰিচিন্তেন্তো. গন্থিতোতি রসতণ্হায তস্মিং তস্মিং রসে গন্থিতো বন্ধো. ‘‘গধিতো’’তি চ পঠন্তি, গেধং আপন্নোতি অত্থো. হদযং নাৰবুজ্ঝতীতি ‘‘দুক্খস্সন্তং করিস্সামী’’তি পব্বজ্জাদিক্খণে উপ্পন্নং চিত্তং ন জানাতি ন সল্লক্খেতি ¶ , সাসনস্স হদযং অব্ভন্তরং অনৰজ্জধম্মানং সম্মদ্দনরসতণ্হায গধিতো নাৰবুজ্ঝতি ন জানাতি, ন পটিপজ্জতীতি অত্থো.

সুভানীতি সুন্দরানি. অপ্পটিকূলানীতি মনোরমানি, ইট্ঠানি. ফোট্ঠব্বানীতি উপাদিণ্ণানুপাদিণ্ণপ্পভেদে ফস্সে. রত্তোতি রজ্জনসভাৰেন রাগেন রত্তো. রাগাধিকরণন্তি রাগহেতু. ৰিৰিধং ৰিন্দতে দুখন্তি রাগপরিল়াহাদিৰসেন দিট্ঠধম্মিকঞ্চ নিরযসন্তাপাদিৰসেন অভিসম্পরাযঞ্চ নানপ্পকারং দুক্খং পটিলভতি.

মনং চেতেহীতি মনঞ্চ এতেহি রূপারম্মণাদীহি ধম্মারম্মণপ্পভেদেহি চ. নন্তি পুগ্গলং. সব্বেহীতি সব্বেহি পঞ্চহিপি. ইদং ৰুত্তং হোতি – যো পুগ্গলো মনং, মনোদ্ৰারং, এতেহি যথাৰুত্তেহি রূপাদীহি পঞ্চহি ধম্মেহি ধম্মারম্মণপ্পভেদতো চ. তত্থ পৰত্তনকপাপকম্মনিৰারণেন রক্খিতুং, গোপিতুং ন সক্কোতি, ততো তস্স অরক্খণতো নং পুগ্গলং তংনিমিত্তং দুক্খং অন্ৰেতি, অনুগচ্ছতি, অনুগচ্ছন্তঞ্চ এতেহি পঞ্চহিপি রূপারম্মণাদীহি ছট্ঠারম্মণেন সদ্ধিং সব্বেহিপি আরম্মণপ্পচ্চযভূতেহি অনুগচ্ছতীতি. এত্থ চক্খুন্দ্রিযং, সোতিন্দ্রিযঞ্চ অসম্পত্তগ্গাহিভাৰতো ‘‘গচ্ছন্তং ¶ অনিৰারয’’ন্তি ৰুত্তং ইতরং সম্পত্তগ্গাহীতি ‘‘গন্ধে চে পটিসেৰতী’’তিআদিনা ৰুত্তং. তত্থাপি চ রসতণ্হা চ ফোট্ঠব্বতণ্হা চ সত্তানং ৰিসেসতো বলৰতীতি ‘‘রসতণ্হায গধিতো, ফোট্ঠব্বানি অনুস্সরন্তোতি’’ ৰুত্তন্তি দট্ঠব্বং.

এৰং অগুত্তদ্ৰারস্স পুগ্গলস্স ছহি দ্ৰারেহি ছসুপি আরম্মণেসু অসংৰরনিমিত্তং উপ্পজ্জনকদুক্খং দস্সেত্ৰা স্ৰাযমসংৰরো যস্মা সরীরসভাৰানৰবোধেন হোতি, তস্মা সরীরসভাৰং ৰিচিনন্তো ‘‘পুব্বলোহিতসম্পুণ্ণ’’ন্তিআদিনা গাথাদ্ৰযমাহ. তস্সত্থো ¶ – সরীরং নামেতং পুব্বেন লোহিতেন চ সম্পুণ্ণং ভরিতং অঞ্ঞেন চ পিত্তসেম্হাদিনা বহুনা কুণপেন, তযিদং নরৰীরেন নরেসু ছেকেন সিপ্পাচরিযেন কতং ৰগ্গু মট্ঠং লাখাপরিকম্মাদিনা চিত্তিতং, অন্তো পন গূথাদিঅসুচিভরিতং সমুগ্গং ৰিয ছৰিমত্তমনোহরং বালজনসম্মোহং দুক্খসভাৰতায নিরযাদিদুক্খতাপনতো চ কটুকং, পরিকপ্পসম্ভৰেন অমূলকেন অস্সাদমত্তেন মধুরতায মধুরস্সাদং, ততো এৰ পিযভাৰনিবন্ধনেন পিযনিবন্ধনং, দুস্সহতায অপ্পতীততায চ দুখং, ঈদিসে সরীরে অস্সাদলোভেন মহাদুক্খং পচ্চনুভুয্যমানং অনৰবুজ্ঝন্তো লোকো মধুরগিদ্ধো খুরধারালেহকপুরিসো ৰিয দট্ঠব্বোতি.

ইদানি ¶ এতে চক্খাদীনং গোচরভূতা রূপাদযো ৰুত্তা, তে ৰিসেসতো পুরিসস্স ইত্থিপটিবদ্ধা কমনীযাতি তত্থ সংৰরো কাতব্বোতি দস্সেন্তো ‘‘ইত্থিরূপে’’তিআদিমাহ. তত্থ ইত্থিরূপেতি ইত্থিযা চতুসমুট্ঠানিকরূপাযতনসঙ্খাতে ৰণ্ণে. অপি চ যো কোচি ইত্থিযা নিৰত্থস্স অলঙ্কারস্স ৰা গন্ধৰণ্ণকাদীনং ৰা পিল়ন্ধনমালানং ৰা কাযপটিবদ্ধো ৰণ্ণো পুরিসস্স চক্খুৰিঞ্ঞাণস্স আরম্মণভাৰায উপকপ্পতি, সব্বমেতং ‘‘ইত্থিরূপ’’ন্ত্ৰেৰ ৰেদিতব্বং. ইত্থিসরেতি ইত্থিযা গীতলপিতহসিতরুদিতসদ্দে. অপি চ ইত্থিযা নিৰত্থৰত্থস্সপি অলঙ্কতঅলঙ্কারস্সপি ইত্থিপযোগনিপ্ফাদিতা ৰেণুৰীণাসঙ্খপণৰাদীনম্পি সদ্দা ইধ ইত্থিসরগ্গহণেন গহিতাতি ৰেদিতব্বা. সব্বোপেসো পুরিসস্স চিত্তং আকড্ঢতীতি. ‘‘ইত্থিরসে’’তি পন পাল়িযা চতুসমুট্ঠানিকরসাযতনৰসেন ৰুত্তং. ইত্থিযা কিংকারপটিস্সাৰিতাদিৰসেন অস্সৰরসো চেৰ পরিভোগরসো ¶ চ ইত্থিরসোতি একে. যো পন ইত্থিযা ওট্ঠমংসসম্মক্খিতখেল়াদিরসো, যো চ তায পুরিসস্স দিন্নযাগুভত্তাদীনং রসো, সব্বোপেসো ‘‘ইত্থিরসো’’ত্ৰেৰ ৰেদিতব্বো. ফোট্ঠব্বেপি চ ইত্থিযা কাযসম্ফস্সো, ইত্থিসরীরারূল়্হানং ৰত্থালঙ্কারমালাদীনং ফস্সো ‘‘ইত্থিফোট্ঠব্বো’’ত্ৰেৰ ৰেদিতব্বো. এত্থ চ যেসং ইত্থিরূপে ইত্থিসরেতি পাল়ি, তেসং অপি-সদ্দেন ইত্থিরসসঙ্গহো দট্ঠব্বো. ইত্থিগন্ধেসূতি ইত্থিযা চতুসমুট্ঠানিকগন্ধাযতনেসু. ইত্থিযা সরীরগন্ধো নাম দুগ্গন্ধো. একচ্চা হি ইত্থী অস্সগন্ধিনী হোতি, একচ্চা মেণ্ডগন্ধিনী, একচ্চা সেদগন্ধিনী, একচ্চা সোণিতগন্ধিনী, তথাপি তাসু অন্ধবালো রজ্জতেৰ. চক্কৰত্তিনো পন ইত্থিরতনস্স কাযতো চন্দনগন্ধো ৰাযতি, মুখতো ¶ উপ্পলগন্ধো, অযং ন সব্বাসং হোতীতি, ইত্থিযা সরীরে আরূল়্হো আগন্তুকো অনুলিম্পনাদিগন্ধো ‘‘ইত্থিগন্ধো’’তি ৰেদিতব্বো. সারত্তোতি সুট্ঠু রত্তো গধিতো মুচ্ছিতো, ইদং পন পদং ‘‘ইত্থিরূপে’’তিআদীসুপি যোজেতব্বং. ৰিৰিধং ৰিন্দতে দুখন্তি ইত্থিরূপাদীসু সরাগনিমিত্তং দিট্ঠধম্মিকং ৰধবন্ধনাদিৰসেন সম্পরাযিকং পঞ্চৰিধবন্ধনাদিৰসেন নানপ্পকারং দুক্খং পটিলভতি.

ইত্থিসোতানি সব্বানীতি ইত্থিযা রূপাদিআরম্মণানি সব্বানি অনৰসেসানি পঞ্চ তণ্হাসোতানি সন্দন্তি. পঞ্চসূতি পুরিসস্স পঞ্চসু দ্ৰারেসু. তেসন্তি তেসং পঞ্চন্নং সোতানং. আৰরণন্তি সংৰরণং, যথা অসংৰরো ন উপ্পজ্জতি, এৰং সতিসম্পজঞ্ঞং পচ্চুপট্ঠপেত্ৰা সংৰরং পৰত্তেতুং যো সক্কোতি, সো ৰীরিযৰা আরদ্ধৰীরিযো অকুসলানং ধম্মানং পহানায কুসলানং ধম্মানং উপসম্পদাযাতি অত্থো.

এৰং রূপাদিগোচরে পব্বজিতস্স পটিপত্তিং দস্সেত্ৰা ইদানি গহট্ঠস্স দস্সেতুং ‘‘সো অত্থৰা’’তিআদি ¶ ৰুত্তং. তত্থ সো অত্থৰা সো ধম্মট্ঠো, সো দক্খো সো ৰিচক্খণোতি সো পুগ্গলো ইমস্মিং লোকে অত্থৰা, বুদ্ধিমা, ধম্মে ঠিতো, ধম্মে দক্খো, ধম্মে ছেকো, অনলসো ৰা ৰিচক্খণো ইতি কত্তব্বতাসু কুসলো নাম. করেয্য রমমানোপি, কিচ্চং ধম্মত্থসংহিতন্তি গেহরতিযা রমমানোপি ধম্মত্থসংহিতং ধম্মতো অত্থতো চ অনপেতমেৰ তং তং কত্তব্বং. অনুপ্পন্নানং ভোগানং উপ্পাদনং, উপ্পন্নানং পরিপালনং, পরিভোগঞ্চ করেয্য, অঞ্ঞমঞ্ঞং, অৰিরোধেন, অঞ্ঞমঞ্ঞং, অবাধনেন, তিৰগ্গত্থং অনুযুঞ্জেয্যাতি অধিপ্পাযো ¶ . অযঞ্চ নযো যেসং সম্মাপটিপত্তিঅৰিরোধেন তিৰগ্গত্থস্স ৰসেন ৰত্ততি বিম্বিসারমহারাজাদীনং ৰিয, তেসং ৰসেন ৰুত্তো. ন যেসং কেসঞ্চি ৰসেনাতি দট্ঠব্বং.

অথো সীদতি সঞ্ঞুত্তন্তি যদি ইধলোকে সুপসংহিতং দিট্ঠধম্মিকং অত্থং পরিগ্গহেত্ৰা ঠিতং. ৰজ্জে কিচ্চং নিরত্থকন্তি সম্পরাযিকত্থরহিতং অনত্থুপসংহিতং কিচ্চং সচেপি ৰিস্সজ্জেয্য পরিচ্চজেয্য. ন তং কিচ্চন্তি মঞ্ঞিত্ৰা, অপ্পমত্তো ৰিচক্খণোতি সতিঅৰিপ্পৰাসেন অপ্পমত্তো ৰিচারণপঞ্ঞাসম্ভৰেন ৰিচক্খণো অনত্থুপসংহিতং, তং কিচ্চং মযা ন কাতব্বন্তি মঞ্ঞিত্ৰা ৰিৰজ্জেয্য.

ৰিৰজ্জেত্ৰা পন যঞ্চ অত্থেন সঞ্ঞুত্তং, যা চ ধম্মগতা রতি. তং সমাদায ৰত্তেথাতি যংকিঞ্চি দিট্ঠধম্মিকসম্পরাযিকপ্পভেদেন অত্থেন ¶ হিতেন সংযুত্তং তদুভযহিতাৰহং, যা চ অধিকুসলধম্মগতা সমথৰিপস্সনাসহিতা রতি, তদুভযং সম্মা আদিযিত্ৰা পরিগ্গহং কত্ৰা ৰত্তেয্য. ‘‘সব্বং রতিং ধম্মরতি জিনাতী’’তি (ধ. প. ৩৫৪) ৰচনতো সা হি একংসেন উত্তমত্থস্স পাপনতো উত্তমা রতি নাম.

যং পন কামরতিসংযুত্তং কিচ্চং নিরত্থকন্তি ৰুত্তং, তস্সা অনত্থুপসংহিতভাৰং দস্সেতুং ‘‘উচ্চাৰচেহী’’তিআদি ৰুত্তং. তত্থ উচ্চাৰচেহীতি মহন্তেহি চেৰ খুদ্দকেহি চ. উপাযেহীতি নযেহি. পরেসমভিজিগীসতীতি পরেসং সন্তকং আহরিতুং ইচ্ছতি, পরে ৰা সব্বথা হাপেতি, জিনাপেতি পরং হন্ত্ৰা, ৰধিত্ৰা অথ সোচযিত্ৰা, আলোপতি সাহসা যো পরেসং. ইদং ৰুত্তং হোতি – যো পুগ্গলো কামহেতু পরে হনন্তো, ঘাতেন্তো, সোচেন্তো সন্ধিচ্ছেদসন্ধিরুহনপসয্হাৰহারাদীহি নানুপাযেহি পরেসং সন্তকং হরিতুং ৰাযমন্তো সাহসাকারং করোতি, আলোপতি, জিগীসতি সাপতেয্যৰসেন পরে হাপেতি, তস্স তং কিচ্চং কামরতিসন্নিস্সিতং অনত্থুপসংহিতং একন্তনিহীনন্তি. এতেন তপ্পটিপক্খতো ধম্মগতায রতিযা একংসতো উত্তমভাৰংযেৰ ৰিভাৰেতি.

ইদানি ¶ যং ‘‘তেসমাৰরণং কাতুং যো সক্কোতী’’তি ইন্দ্রিযানং আৰরণং ৰুত্তং, তং উপাযেন সহ ৰিভাৰেন্তো ‘‘তচ্ছন্তো আণিযা আণিং ¶ , নিহন্তি বলৰা যথা’’তি আহ. যথা বলৰা কাযবলেন, ঞাণবলেন চ সমন্নাগতো তচ্ছকো রুক্খদণ্ডগতং আণিং নীহরিতুকামো ততো বলৰতিং আণিং কোটেন্তো ততো নীহরতি, তথা কুসলো ভিক্খু চক্খাদীনি ইন্দ্রিযানি ৰিপস্সনাবলেন নিহন্তুকামো ইন্দ্রিযেহি এৰ নিহন্তি.

কতমেহি পনাতি আহ ‘‘সদ্ধ’’ন্তিআদি. তস্সত্থো – অধিমোক্খলক্খণং সদ্ধং, পগ্গহলক্খণং ৰীরিযং, অৰিক্খেপলক্খণং সমাধিং, উপট্ঠানলক্খণং সতিং, দস্সনলক্খণং পঞ্ঞন্তি ইমানিপি ৰিমুত্তিপরিপাচকানি পঞ্চিন্দ্রিযানি ভাৰেন্তো ৰড্ঢেন্তো এতেহি পঞ্চহি ইন্দ্রিযেহি চক্খাদীনি পঞ্চিন্দ্রিযানি অনুনযপটিঘাদিকিলেসুপ্পত্তিযা দ্ৰারভাৰৰিহনেন হন্ত্ৰা, অরিযমগ্গেন তদুপনিস্সযে কিলেসে সমুচ্ছিন্দিত্ৰা, ততো এৰ অনীঘো নিদ্দুক্খো ব্রাহ্মণো অনুপাদিসেসপরিনিব্বানমেৰ যাতি উপগচ্ছতীতি.

সো অত্থৰাতি সো যথাৰুত্তো ব্রাহ্মণো উত্তমত্থেন সমন্নাগতত্তা অত্থৰা, তং সম্পাপকে ধম্মে ঠিতত্তা ধম্মট্ঠো. সব্বেন সব্বং অনৰসেসেন ৰিধিনা অনৰসেসং বুদ্ধস্স ভগৰতো ৰাক্যভূতং অনুসাসনিং কত্ৰা যথানুসিট্ঠং পটিপজ্জিত্ৰা ঠিতো. ততো এৰ সো নরো উত্তমপুরিসো নিব্বানসুখঞ্চ এধতি, ব্রূহেতি, ৰড্ঢেতীতি.

এৰং ¶ থেরেন অত্তনো চিন্তিতাকারৰিভাৰনাৰসেন পটিপত্তিযা পকাসিতত্তা ইদমেৰ চস্স অঞ্ঞাব্যাকরণং দট্ঠব্বং.

পারাপরিযত্থেরগাথাৰণ্ণনা নিট্ঠিতা.

৩. তেলকানিত্থেরগাথাৰণ্ণনা

চিররত্তং ৰতাতাপীতিআদিকা আযস্মতো তেলকানিত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে সত্থু অভিজাতিতো পুরেতরংযেৰ সাৰত্থিযং অঞ্ঞতরস্মিং ব্রাহ্মণকুলে নিব্বত্তিত্ৰা তেলকানীতি লদ্ধনামো ৰযপ্পত্তো হেতুসম্পন্নতায কামে জিগুচ্ছন্তো ঘরাৰাসং পহায পরিব্বাজকপব্বজ্জং ¶ পব্বজিত্ৰা ৰিৰট্টজ্ঝাসযো ‘‘কো সো পারঙ্গতো লোকে’’তিআদিনা ৰিমোক্খপরিযেসনং ¶ চরমানো তে তে সমণব্রাহ্মণে উপসঙ্কমিত্ৰা পঞ্হং পুচ্ছতি, তে ন সম্পাযন্তি. সো তেন অনারাধিতচিত্তো ৰিচরতি. অথ অম্হাকং ভগৰতি লোকে উপ্পজ্জিত্ৰা পৰত্তিতৰরধম্মচক্কে লোকহিতং করোন্তে একদিৰসং সত্থারং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তে পতিট্ঠাতি. সো একদিৰসং ভিক্খূহি সদ্ধিং নিসিন্নো অত্তনা অধিগতৰিসেসং পচ্চৰেক্খিত্ৰা তদনুসারেন অত্তনো পটিপত্তিং অনুস্সরিত্ৰা তং সব্বং ভিক্খূনং আচিক্খন্তো –

৭৪৭.

‘‘চিররত্তং ৰতাতাপী, ধম্মং অনুৰিচিন্তযং;

সমং চিত্তস্স নালত্থং, পুচ্ছং সমণব্রাহ্মণে.

৭৪৮.

‘‘কো সো পারঙ্গতো লোকে, কো পত্তো অমতোগধং;

কস্স ধম্মং পটিচ্ছামি, পরমত্থৰিজাননং.

৭৪৯.

‘‘অন্তোৰঙ্কগতো আসি, মচ্ছোৰ ঘসমামিসং;

বদ্ধো মহিন্দপাসেন, ৰেপচিত্যসুরো যথা.

৭৫০.

‘‘অঞ্ছামি নং ন মুঞ্চামি, অস্মা সোকপরিদ্দৰা;

কো মে বন্ধং মুঞ্চং লোকে, সম্বোধিং ৰেদযিস্সতি.

৭৫১.

‘‘সমণং ব্রাহ্মণং ৰা কং, আদিসন্তং পভঙ্গুনং;

কস্স ধম্মং পটিচ্ছামি, জরামচ্চুপৰাহনং.

৭৫২.

‘‘ৰিচিকিচ্ছাকঙ্খাগন্থিতং, সারম্ভবলসঞ্ঞুতং;

কোধপ্পত্তমনত্থদ্ধং, অভিজপ্পপ্পদারণং.

৭৫৩.

‘‘তণ্হাধনুসমুট্ঠানং, দ্ৰে চ পন্নরসাযুতং;

পস্স ওরসিকং বাল়্হং, ভেত্ৰান যদি তিট্ঠতি.

৭৫৪.

‘‘অনুদিট্ঠীনং ¶ অপ্পহানং, সঙ্কপ্পপরতেজিতং;

তেন ৰিদ্ধো পৰেধামি, পত্তংৰ মালুতেরিতং.

৭৫৫.

‘‘অজ্ঝত্তং মে সমুট্ঠায, খিপ্পং পচ্চতি মামকং;

ছফস্সাযতনী কাযো, যত্থ সরতি সব্বদা.

৭৫৬.

‘‘তং ¶ ন পস্সামি তেকিচ্ছং, যো মেতং সল্লমুদ্ধরে;

নানারজ্জেন সত্থেন, নাঞ্ঞেন ৰিচিকিচ্ছিতং.

৭৫৭.

‘‘কো মে অসত্থো অৰণো, সল্লমব্ভন্তরপস্সযং;

অহিংসং সব্বগত্তানি, সল্লং মে উদ্ধরিস্সতি.

৭৫৮.

‘‘ধম্মপ্পতি ¶ হি সো সেট্ঠো, ৰিসদোসপ্পৰাহকো;

গম্ভীরে পতিতস্স মে, থলং পাণিঞ্চ দস্সযে.

৭৫৯.

‘‘রহদেহমস্মি ওগাল়্হো, অহারিযরজমত্তিকে;

মাযাউসূযসারম্ভ, থিনমিদ্ধমপত্থটে.

৭৬০.

‘‘উদ্ধচ্চমেঘথনিতং, সংযোজনৰলাহকং;

ৰাহা ৰহন্তি কুদ্দিট্ঠিং, সঙ্কপ্পা রাগনিস্সিতা.

৭৬১.

‘‘সৰন্তি সব্বধি সোতা, লতা উব্ভিজ্জ তিট্ঠতি;

তে সোতে কো নিৰারেয্য, তং লতং কো হি ছেচ্ছতি.

৭৬২.

‘‘ৰেলং করোথ ভদ্দন্তে, সোতানং সন্নিৰারণং;

মা তে মনোমযো সোতা, রুক্খংৰ সহসা লুৰে.

৭৬৩.

‘‘এৰং মে ভযজাতস্স, অপারা পারমেসতো;

তাণো পঞ্ঞাৰুধো সত্থা, ইসিসঙ্ঘনিসেৰিতো.

৭৬৪.

‘‘সোপানং সুগতং সুদ্ধং, ধম্মসারমযং দল়্হং;

পাদাসি ৰুয্হমানস্স, মা ভাযীতি চ মব্রৰি.

৭৬৫.

‘‘সতিপট্ঠানপাসাদং, আরুয্হ পচ্চৰেক্খিসং;

যং তং পুব্বে অমঞ্ঞিস্সং, সক্কাযাভিরতং পজং.

৭৬৬.

‘‘যদা চ মগ্গমদ্দক্খিং, নাৰায অভিরূহনং;

অনধিট্ঠায অত্তানং, তিত্থমদ্দক্খিমুত্তমং.

৭৬৭.

‘‘সল্লং অত্তসমুট্ঠানং, ভৰনেত্তিপ্পভাৰিতং;

এতেসং অপ্পৰত্তায, দেসেসি মগ্গমুত্তমং.

৭৬৮.

‘‘দীঘরত্তানুসযিতং ¶ , চিররত্তমধিট্ঠিতং;

বুদ্ধো মেপানুদী গন্থং, ৰিসদোসপ্পৰাহনো’’তি. – ইমা গাথা অভাসি;

তত্থ ¶ চিররত্তং ৰতাতি চিরকালং ৰত. আতাপীতি ৰীরিযৰা ৰিমোক্খধম্মপরিযেসনে আরদ্ধৰীরিযো. ধম্মং অনুৰিচিন্তযন্তি ‘‘কীদিসো নু খো ৰিমোক্খধম্মো, কথং ৰা অধিগন্তব্বো’’তি ৰিমুত্তিধম্মং অনুৰিচিনন্তো গৰেসন্তো. সমং চিত্তস্স নালত্থং, পুচ্ছং সমণব্রাহ্মণেতি তে তে নানাতিত্থিযে সমণব্রাহ্মণে ৰিমুত্তিধম্মং পুচ্ছন্তো পকতিযা অনুপসন্তসভাৰস্স চিত্তস্স সমং ৰূপসমভূতং ৰট্টদুক্খৰিস্সরণং অরিযধম্মং নালত্থং নাধিগচ্ছন্তি অত্থো.

কো ¶ সো পারঙ্গতোতিআদি পুচ্ছিতাকারদস্সনং. তত্থ কো সো পারঙ্গতো লোকেতি ইমস্মিং লোকে তিত্থকারপটিঞ্ঞেসু সমণব্রাহ্মণেসু কো নু খো সো সংসারস্স পারং নিব্বানং উপগতো. কো পত্তো অমতোগধন্তি নিব্বানপতিট্ঠং ৰিমোক্খমগ্গং কো পত্তো অধিগতোতি অত্থো. কস্স ধম্মং পটিচ্ছামীতি কস্স সমণস্স ৰা ব্রাহ্মণস্স ৰা ওৰাদধম্মং পটিগ্গণ্হামি পটিপজ্জামি. পরমত্থৰিজাননন্তি পরমত্থস্স ৰিজাননং, অৰিপরীতপ্পৰত্তিনিৰত্তিযো পৰেদেন্তন্তি অত্থো.

অন্তোৰঙ্কগতো আসীতি ৰঙ্কং ৰুচ্চতি দিট্ঠিগতং মনোৰঙ্কভাৰতো, সব্বেপি ৰা কিলেসা, অন্তোতি পন হদযৰঙ্কস্স অন্তো, হদযব্ভন্তরগতকিলেসৰঙ্কো ৰা অহোসীতি অত্থো. মচ্ছোৰ ঘসমামিসন্তি আমিসং ঘসন্তো খাদন্তো মচ্ছো ৰিয, গিলবল়িসো মচ্ছো ৰিযাতি অধিপ্পাযো. বদ্ধো মহিন্দপাসেন, ৰেপচিত্যসুরো যথাতি মহিন্দস্স সক্কস্স পাসেন বদ্ধো যথা ৰেপচিত্তি অসুরিন্দো অসেরিৰিহারী মহাদুক্খপ্পত্তো, এৰমহং পুব্বে কিলেসপাসেন বদ্ধো আসিং, অসেরিৰিহারী মহাদুক্খপ্পত্তোতি অধিপ্পাযো.

অঞ্ছামীতি আকড্ঢামি. নন্তি কিলেসপাসং. ন মুঞ্চামীতি ন মোচেমি. অস্মা সোকপরিদ্দৰাতি ইমস্মা সোকপরিদেৰৰট্টতো. ইদং ৰুত্তং হোতি – যথাপাসেন বদ্ধো মিগো সূকরো ৰা মোচনুপাযং অজানন্তো পরিপ্ফন্দমানো তং আৰিঞ্ছন্তো বন্ধনং দল়্হং করোতি, এৰং অহং পুব্বে ¶ কিলেসপাসেন পটিমুক্কো মোচনুপাযং অজানন্তো কাযসঞ্চেতনাদিৰসেন পরিপ্ফন্দমানো তং ন মোচেসিং, অঞ্ঞদত্থু তং দল়্হং করোন্তো সোকাদিনা পরং কিলেসং এৰ পাপুণিন্তি. কো মে বন্ধং মুঞ্চং লোকে, সম্বোধিং ৰেদযিস্সতীতি ইমস্মিং লোকে এতং কিলেসবন্ধনেন বন্ধং মুঞ্চন্তো সম্বুজ্ঝতি এতেনাতি ‘‘সম্বোধী’’তি লদ্ধনামং ৰিমোক্খমগ্গং কো মে ৰেদযিস্সতি আচিক্খিস্সতীতি অত্থো. ‘‘বন্ধমুঞ্চ’’ন্তিপি পঠন্তি, বন্ধা, বন্ধস্স ৰা মোচকং সম্বোধিন্তি যোজনা.

আদিসন্তন্তি দেসেন্তং. পভঙ্গুনন্তি পভঞ্জনং কিলেসানং ৰিদ্ধংসনং ¶ , পভঙ্গুনং ৰা ধম্মপ্পৰত্তিং আদিসন্তং কথেন্তং জরায মচ্চুনো চ পৰাহনং কস্স ধম্মং পটিচ্ছামি. ‘‘পটিপজ্জামী’’তি ৰা পাঠো, সো এৰত্থো. ৰিচিকিচ্ছাকঙ্খাগন্থিতন্তি ‘‘অহোসিং নু খো অহমতীতমদ্ধান’’ন্তিআদিনযপ্পৰত্তায (ম. নি. ১.১৮; সং. নি. ২.২০) ৰিচিকিচ্ছায আসপ্পনপরিসপ্পনাকারৰুত্তিযা কঙ্খায চ গন্থিতং. সারম্ভবলসঞ্ঞুতন্তি করণুত্তরিযকরণলক্খণেন বলপ্পত্তেন সারম্ভেন যুত্তং. কোধপ্পত্তমনত্থদ্ধন্তি সব্বত্থ কোধেন যুত্তমনসা ¶ থদ্ধভাৰং গতং অভিজপ্পপ্পদারণং. ইচ্ছিতালাভাদিৰসেন হি তণ্হা সত্তানং চিত্তং পদালেন্তী ৰিয পৰত্ততি. দূরে ঠিতস্সাপি ৰিজ্ঝনুপাযতায তণ্হাৰ ধনু সমুপতিট্ঠতি উপ্পজ্জতি এতস্মাতি তণ্হাধনুসমুট্ঠানং, দিট্ঠিসল্লং. তং পন যস্মা ৰীসতিৰত্থুকা সক্কাযদিট্ঠি, দসৰত্থুকা মিচ্ছাদিট্ঠীতি তিংসপ্পভেদং, তস্মা ৰুত্তং ‘‘দ্ৰে চ পন্নরসাযুত’’ন্তি, দ্ৰিক্খত্তুং পন্নরসভেদৰন্তন্তি অত্থো. পস্স ওরসিকং বাল়্হং, ভেত্ৰান যদি তিট্ঠতীতি যং উরসম্বন্ধনীযতায ওরসিকং বাল়্হং বলৰতরং ভেত্ৰান হদযং ৰিনিৰিজ্ঝিত্ৰা তস্মিংযেৰ হদযে তিট্ঠতি, তং পস্সাতি অত্তানমেৰ আলপতি.

অনুদিট্ঠীনং অপ্পহানন্তি অনুদিট্ঠিভূতানং সেসদিট্ঠীনং অপ্পহানকারণং. যাৰ হি সক্কাযদিট্ঠি সন্তানতো ন ৰিগচ্ছতি, তাৰ সস্সতদিট্ঠিআদীনং অপ্পহানমেৰাতি. সঙ্কপ্পপরতেজিতন্তি সঙ্কপ্পেন মিচ্ছাৰিতক্কেন পরে পরজনে নিস্সযলক্খণং পতিপতিতে তেজিতং উস্সাহিতং. তেন ৰিদ্ধো পৰেধামীতি তেন দিট্ঠিসল্লেন যথা হদযং আহচ্চ তিট্ঠতি, এৰং ৰিদ্ধো পৰেধামি সঙ্কপ্পামি সস্সতুচ্ছেদাদিৰসেন ইতো চিতো চ পরিৰট্টামি. পত্তংৰ ¶ মালুতেরিতন্তি মালুতেন ৰাযুনা এরিতং ৰণ্টতো মুত্তং দুমপত্তং ৰিয.

অজ্ঝত্তং মে সমুট্ঠাযাতি যথা লোকে সল্লং নাম বাহিরতো উট্ঠায অজ্ঝত্তং নিম্মথেত্ৰা বাধতি, ন এৰমিদং. ইদং পন অজ্ঝত্তং মে মম অত্তভাৰে সমুট্ঠায সো অত্তভাৰসঞ্ঞিতো ছফস্সাযতনকাযো যথা খিপ্পং সীঘং পচ্চতি, ডয্হতি. যথা কিং? অগ্গি ৰিয সনিস্সযডাহকো তংযেৰ মামকং মম সন্তকং অত্তভাৰং ডহন্তো যত্থ উপ্পন্নো, তত্থেৰ সরতি পৰত্ততি.

তং ন পস্সামি তেকিচ্ছন্তি তাদিসায তিকিচ্ছায নিযুত্ততায তেকিচ্ছং ¶ সল্লকত্তং ভিসক্কং তং ন পস্সামি. যো মেতং সল্লমুদ্ধরেতি যো ভিসক্কো এতং দিট্ঠিসল্লং কিলেসসল্লঞ্চ উদ্ধরেয্য, উদ্ধরন্তো চ নানারজ্জেন রজ্জুসদিসসঙ্খাতায এসনিসলাকায পৰেসেত্ৰান সত্থেন কন্তিত্ৰা নাঞ্ঞেন মন্তাগদপ্পযোগেন ৰিচিকিচ্ছিতং সল্লং তিকিচ্ছিতুং সক্কাতি আহরিত্ৰা যোজেতব্বং. ৰিচিকিচ্ছিতন্তি, চ নিদস্সনমত্তমেতং. সব্বস্সপি কিলেসসল্লস্স ৰসেন অত্থো ৰেদিতব্বো.

অসত্থোতি সত্থরহিতো. অৰণোতি ৰণেন ৰিনা. অব্ভন্তরপস্সযন্তি অব্ভন্তরসঙ্খাতং হদযং নিস্সায ঠিতং. অহিংসন্তি অপীল়েন্তো. ‘‘অহিংসা’’তি চ পাঠো, অহিংসায অপীল়নেনাতি ¶ অত্থো. অযঞ্হেত্থ সঙ্খেপত্থো – কো নু খো কিঞ্চি সত্থং অগ্গহেত্ৰা ৰণঞ্চ অকরোন্তো ততো এৰ সব্বগত্তানি অবাধেন্তো মম হদযব্ভন্তরগতং পীল়াজননতো অন্তো তুদনতো অন্তো রুদ্ধনতো চ পরমত্থেনেৰ সল্লভূতং কিলেসসল্লং উদ্ধরিস্সতীতি.

এৰং দসহি গাথাহি পুব্বে অত্তনা চিন্তিতাকারং দস্সেত্ৰা পুনপি তং পকারন্তরেন দস্সেতুং ‘‘ধম্মপ্পতি হি সো সেট্ঠো’’তিআদিমাহ. তত্থ ধম্মপ্পতীতি ধম্মনিমিত্তং ধম্মহেতু. হীতি নিপাতমত্তং. সো সেট্ঠোতি সো পুগ্গলো উত্তমো. ৰিসদোসপ্পৰাহকোতি যো ময্হং রাগাদিকিলেসস্স পৰাহকো উচ্ছিন্নকো. গম্ভীরে পতিতস্স মে, থলং পাণিঞ্চ দস্সযেতি কো নু খো অতিগম্ভীরে সংসারমহোঘে পতিতস্স ময্হং ‘‘মা ভাযী’’তি অস্সাসেন্তো নিব্বানথলং তংসম্পাপকং অরিযমগ্গহত্থঞ্চ দস্সেয্য.

রহদেহমস্মি ¶ ওগাল়্হোতি মহতি সংসাররহদে অহমস্মি সসীসং নিমুজ্জনৰসেন ওতিণ্ণো অনুপৰিট্ঠো. অহারিযরজমত্তিকেতি অপনেতুং অসক্কুণেয্যো রাগাদিরজো মত্তিকা কদ্দমো এতস্সাতি অহারিযরজমত্তিকো, রহদো. তস্মিং রহদস্মিং. ‘‘অহারিযরজমন্তিকে’’তি ৰা পাঠো, অন্তিকে ঠিতরাগাদীসু দুন্নীহরণীযরাগাদিরজেতি অত্থো. সন্তদোসপটিচ্ছাদনলক্খণা মাযা, পরসম্পত্তিঅসহনলক্খণা উসূযা, করণুত্তরিযকরণলক্খণো সারম্ভো, চিত্তালসিযলক্খণং থিনং, কাযালসিযলক্খণং মিদ্ধন্তি ইমে পাপধম্মা পত্থটা যং রহদং, তস্মিং মাযাউসূযসারম্ভথিনমিদ্ধমপত্থটে, মকারো চেত্থ পদসন্ধিকরো ৰুত্তো. যথাৰুত্তেহি ইমেহি পাপধম্মেহি পত্থটেতি অত্থো.

উদ্ধচ্চমেঘথনিতং, সংযোজনৰলাহকন্তি ৰচনৰিপল্লাসেন ৰুত্তং, ভন্তসভাৰং উদ্ধচ্চং মেঘথনিতং মেঘগজ্জিতং এতেসন্তি উদ্ধচ্চমেঘথনিতা. দসৰিধা সংযোজনা ¶ এৰ ৰলাহকা এতেসন্তি সংযোজনৰলাহকা. ৰাহা মহাউদকৰাহসদিসা রাগনিস্সিতা মিচ্ছাসঙ্কপ্পা অসুভাদীসু ঠিতা কুদ্দিট্ঠিং মং ৰহন্তি অপাযসমুদ্দমেৰ উদ্দিস্স কড্ঢন্তীতি অত্থো.

সৰন্তি সব্বধি সোতাতি তণ্হাসোতো, দিট্ঠিসোতো, মানসোতো, অৰিজ্জাসোতো, কিলেসসোতোতি ইমে পঞ্চপিসোতা চক্খুদ্ৰারাদীনং ৰসেন সব্বেসু রূপাদীসু আরম্মণেসু সৰনতো ‘‘রূপতণ্হা…পে… ধম্মতণ্হা’’তিআদিনা (ৰিভ. ২০৪, ২৩২) সব্বভাগেহি ৰা সৰনতো সব্বধি সৰন্তি. লতাতি পলিৰেঠনট্ঠেন সংসিব্বনট্ঠেন লতা ৰিযাতি লতা, তণ্হা. উব্ভিজ্জ তিট্ঠতীতি ছহি দ্ৰারেহি উব্ভিজ্জিত্ৰা রূপাদীসু আরম্মণেসু তিট্ঠতি. তে সোতেতি তণ্হাদিকে ¶ সোতে মম সন্তানে সন্দন্তে মগ্গসেতুবন্ধনেন কো পুরিসৰিসেসো নিৰারেয্য, তং লতন্তি তণ্হালতং, মগ্গসত্থেন কো ছেচ্ছতি ছিন্দিস্সতি.

ৰেলং করোথাতি তেসং সোতানং ৰেলং সেতুং করোথ সন্নিৰারণং. ভদ্দন্তেতি আলপনাকারদস্সনং. মা তে মনোমযো সোতোতি উদকসোতো ওল়ারিকো, তস্স বালমহাজনেনপি সেতুং ¶ কত্ৰা নিৰারণং সক্কা. অযং পন মনোমযো সোতো সুখুমো দুন্নিৰারণো. সো যথা উদকসোতো ৰড্ঢন্তো কূলে ঠিতং রুক্খং পাতেত্ৰাৰ নাসেতি, এৰং তুম্হে অপাযতীরে ঠিতে তত্থ সহসা পাতেত্ৰা অপাযসমুদ্দং পাপেন্তো মা লুৰে মা ৰিনাসেয্য মা অনযব্যসনং পাপেয্যাতি অত্থো.

এৰং অযং থেরো পুরিমত্তভাৰে পরিমদ্দিতসঙ্খারত্তা ঞাণপরিপাকং গতত্তা পৰত্তিদুক্খং উপধারেন্তো যথা ৰিচিকিচ্ছাদিকে সংকিলেসধম্মে পরিগ্গণ্হি, তমাকারং দস্সেত্ৰা ইদানি জাতসংৰেগো কিংকুসলগৰেসী সত্থু সন্তিকং গতো যং ৰিসেসং অধিমুচ্চি, তং দস্সেন্তো ‘‘এৰং মে ভযজাতস্সা’’তিআদিমাহ. তত্থ এৰং মে ভযজাতস্সাতি এৰং ৰুত্তপ্পকারেন সংসারে জাতভযস্স অপারা ওরিমতীরতো সপ্পটিভযতো সংসারৰট্টতো ‘‘কথং নু খো মুঞ্চেয্য’’ন্তি পারং নিব্বানং, এসতো গৰেসতো, তাণো সদেৰকস্স লোকস্স তাণভূতো কিলেসসমুচ্ছেদনী পঞ্ঞা আৰুধো এতস্সাতি পঞ্ঞাৰুধো. দিট্ঠধম্মিকাদিঅত্থেন সত্তানং যথারহং অনুসাসনতো সত্থা, ইসিসঙ্ঘেন অগ্গসাৰকাদিঅরিযপুগ্গলসমূহেন নিসেৰিতো পযিরুপাসিতো ইসিসঙ্ঘনিসেৰিতো, সোপানন্তি দেসনাঞাণেন সুট্ঠু কতত্তা অভিসঙ্খতত্তা সুকতং, উপক্কিলেসৰিরহিততো সুদ্ধং, সদ্ধাপঞ্ঞাদিসারভূতং ধম্মসারমযং ¶ পটিপক্খেহি অচলনীযতো দল়্হং, ৰিপস্সনাসঙ্খাতং সোপানং মহোঘেন ৰুয্হমানস্স ময্হং সত্থা পাদাসি, দদন্তো চ ‘‘ইমিনা তে সোত্থি ভৰিস্সতী’’তি সমস্সাসেন্তো মা ভাযীতি চ অব্রৰি, কথেসি.

সতিপট্ঠানপাসাদন্তি তেন ৰিপস্সনাসোপানেন কাযানুপস্সনাদিনা লদ্ধব্বচতুব্বিধসামঞ্ঞফলৰিসেসেন চতুভূমিসম্পন্নং সতিপট্ঠানপাসাদং আরুহিত্ৰা পচ্চৰেক্খিসং চতুসচ্চধম্মং মগ্গঞাণেন পতিঅৰেক্খিং পটিৰিজ্ঝিং. যং তং পুব্বে অমঞ্ঞিস্সং, সক্কাযাভিরতং পজন্তি এৰং পটিৰিদ্ধসচ্চো যং সক্কাযে ‘‘অহং মমা’’তি অভিরতং পজং তিত্থিযজনং তেন পরিকপ্পিতঅত্তানঞ্চ পুব্বে সারতো অমঞ্ঞিস্সং. যদা চ মগ্গমদ্দক্খিং, নাৰায অভিরূহনন্তি অরিযমগ্গনাৰায অভিরুহনূপাযভূতং যদা ৰিপস্সনামগ্গং যাথাৰতো অদ্দক্খিং. ততো পট্ঠায তং তিত্থিযজনং অত্তানঞ্চ অনধিট্ঠায চিত্তে অট্ঠপেত্ৰা অগ্গহেত্ৰা তিত্থং নিব্বানসঙ্খাতস্স অমতমহাপারস্স ¶ ¶ তিত্থভূতং অরিযমগ্গদস্সনং সব্বেহি মগ্গেহি সব্বেহি কুসলধম্মেহি উক্কট্ঠং অদ্দক্খিং, যাথাৰতো অপস্সিন্তি অত্থো.

এৰং অত্তনো অনুত্তরং মগ্গাধিগমং পকাসেত্ৰা ইদানি তস্স দেসকং সম্মাসম্বুদ্ধং থোমেন্তো ‘‘সল্লং অত্তসমুট্ঠান’’ন্তিআদিমাহ. তত্থ সল্লন্তি দিট্ঠিমানাদিকিলেসসল্লং. অত্তসমুট্ঠানন্তি ‘‘অহ’’ন্তি মানট্ঠানতায ‘‘অত্তা’’তি চ লদ্ধনামে অত্তভাৰে সম্ভূতং. ভৰনেত্তিপ্পভাৰিতন্তি ভৰতণ্হাসমুট্ঠিতং ভৰতণ্হাসন্নিস্সযং. সা হি দিট্ঠিমানাদীনং সম্ভৰো. এতেসং অপ্পৰত্তাযাতি যথাৰুত্তানং পাপধম্মানং অপ্পৰত্তিযা অনুপ্পাদায. দেসেসি মগ্গমুত্তমন্তি উত্তমং সেট্ঠং অরিযং অট্ঠঙ্গিকং মগ্গং, তদুপাযঞ্চ ৰিপস্সনামগ্গং কথেসি.

দীঘরত্তানুসযিতন্তি অনমতগ্গে সংসারে চিরকালং সন্তানে অনু অনু সযিতং কারণলাভেন উপ্পজ্জনারহভাৰেন থামগতং, ততো চ চিররত্তং অধিট্ঠিতং সন্তানং অজ্ঝারুয্হ ঠিতং. গন্থন্তি অভিজ্ঝাকাযগন্থাদিং মম সন্তানে গন্থভূতং কিলেসৰিসদোসং পৰাহনো বুদ্ধো ভগৰা অত্তনো দেসনানুভাৰেন অপানুদী পরিজহাপেসি, গন্থেসু হি অনৰসেসতো পহীনেসু অপ্পহীনো নাম কিলেসো নত্থীতি.

তেলকানিত্থেরগাথাৰণ্ণনা নিট্ঠিতা.

৪. রট্ঠপালত্থেরগাথাৰণ্ণনা

পস্স ¶ চিত্তকতন্তিআদিকা আযস্মতো রট্ঠপালত্থেরস্স গাথা. কা উপ্পত্তি? অযং কির পদুমুত্তরস্স ভগৰতো উপ্পত্তিতো পুরেতরমেৰ হংসৰতীনগরে গহপতিমহাসালকুলে নিব্বত্তিত্ৰা ৰযপ্পত্তো পিতু অচ্চযেন ঘরাৰাসে পতিট্ঠিতো রতনকোট্ঠাগারকম্মিকেন দস্সিতং অপরিমাণং কুলৰংসানুগতং ধনং দিস্ৰা ‘‘ইমং এত্তকং ধনরাসিং ময্হং পিতুঅয্যকপয্যকাদযো অত্তনা সদ্ধিং গহেত্ৰা গন্তুং নাসক্খিংসু, মযা পন গহেত্ৰা গন্তুং ৰট্টতী’’তি চিন্তেত্ৰা কপণদ্ধিকাদীনং মহাদানং অদাসি. সো অভিঞ্ঞালাভিং একং তাপসং উপট্ঠহন্তো তেন দেৰলোকাধিপচ্চে নিযোজিতো যাৰজীৰং পুঞ্ঞানি কত্ৰা ততো চুতো ¶ দেৰলোকে নিব্বত্তিত্ৰা দিব্বসম্পত্তিং অনুভৰন্তো তত্থ যাৰতাযুকং ঠত্ৰা ততো চুতো মনুস্সলোকে ভিন্নং রট্ঠং সন্ধারেতুং সমত্থস্স কুলস্স একপুত্তকো হুত্ৰা নিব্বত্তি.

তেন ¶ চ সমযেন পদুমুত্তরো ভগৰা লোকে উপ্পজ্জিত্ৰা পৰত্তিতৰরধম্মচক্কো ৰেনেয্যসত্তে নিব্বানমহানগরসঙ্খাতং খেমন্তভূমিং সম্পাপেসি. অথ সো কুলপুত্তো অনুক্কমেন ৰিঞ্ঞুতং পত্তো একদিৰসং উপাসকেহি সদ্ধিং ৰিহারং গন্ত্ৰা সত্থারং ধম্মং দেসেন্তং দিস্ৰা পসন্নচিত্তো পরিসপরিযন্তে নিসীদি. তেন খো পন সমযেন সত্থা একং ভিক্খুং সদ্ধাপব্বজিতানং অগ্গট্ঠানে ঠপেসি. তং দিস্ৰা সো পসন্নমানসো তদত্থায চিত্তং ঠপেত্ৰা সতসহস্সভিক্খুপরিৰুতস্স ভগৰতো মহতা সক্কারেন সত্তাহং মহাদানং পৰত্তেত্ৰা পণিধানং অকাসি. সত্থা তস্স অনন্তরাযেন ইজ্ঝনভাৰং দিস্ৰা ‘‘অনাগতে গোতমস্স নাম সম্মাসম্বুদ্ধস্স সাসনে সদ্ধাপব্বজিতানং অগ্গো ভৰিস্সতী’’তি ব্যাকাসি. সো সত্থারং ভিক্খুসঙ্ঘঞ্চ ৰন্দিত্ৰা উট্ঠাযাসনা পক্কামি. সো তত্থ যাৰতাযুকং পুঞ্ঞানি কত্ৰা ততো চৰিত্ৰা দেৰমনুস্সেসু সংসরন্তো ইতো দ্ৰেনৰুতে কপ্পে ফুস্সস্স ভগৰতো কালে সত্থু ৰেমাতিকভাতিকেসু তীসু রাজপুত্তেসু সত্থারং উপট্ঠহন্তেসু তেসং পুঞ্ঞকিরিযায কিচ্চং অকাসি.

এৰং তত্থ তত্থ ভৰে তং তং বহুং কুসলং উপচিনিত্ৰা সুগতীসুযেৰ সংসরন্তো ইমস্মিং বুদ্ধুপ্পাদে কুরুরট্ঠে থুল্লকোট্ঠিকনিগমে রট্ঠপালসেট্ঠিনো গেহে নিব্বত্তি, তস্স ভিন্নং রট্ঠং সন্ধারেতুং সমত্থে কুলে নিব্বত্তত্তা রট্ঠপালোতি ¶ ৰংসানুগতমেৰ নামং অহোসি. সো মহতা পরিৰারেন ৰড্ঢন্তো অনুক্কমেন যোব্বনপত্তো মাতাপিতূহি পতিরূপেন দারেন সংযোজিতো মহন্তে চ যসে পতিট্ঠাপিতো দিব্বসম্পত্তিসদিসং সম্পত্তিং পচ্চনুভোতি. অথ ভগৰা কুরুরট্ঠে জনপদচারিকং চরন্তো থুল্লকোট্ঠিকং অনুপাপুণি. তং সুত্ৰা রট্ঠপালো কুলপুত্তো সত্থারং উপসঙ্কমিত্ৰা সত্থু সন্তিকে ধম্মং সুত্ৰা পটিলদ্ধসদ্ধো পব্বজিতুকামো সত্তাহং ভত্তচ্ছেদং কত্ৰা কিচ্ছেন কসিরেন মাতাপিতরো অনুজানাপেত্ৰা সত্থারং উপসঙ্কমিত্ৰা পব্বজ্জং যাচিত্ৰা সত্থু আণত্তিযা অঞ্ঞতরস্স থেরস্স সন্তিকে পব্বজিত্ৰা যোনিসোমনসিকারেন কম্মং করোন্তো ৰিপস্সনং ৰড্ঢেত্ৰা অরহত্তং পাপুণি. তেন ৰুত্তং অপদানে (অপ. থের ১.২.৯৭-১১১) –

‘‘পদুমুত্তরস্স ¶ ভগৰতো, লোকজেট্ঠস্স তাদিনো;

ৰরনাগো মযা দিন্নো, ঈসাদন্তো উরূল়্হৰা.

‘‘সেতচ্ছত্তো পসোভিতো, সকপ্পনো সহত্থিপো;

অগ্ঘাপেত্ৰান তং সব্বং, সঙ্ঘারামং অকারযিং.

‘‘চতুপঞ্ঞাসসহস্সানি, পাসাদে কারযিং অহং;

মহোঘদানং করিত্ৰান, নিয্যাদেসিং মহেসিনো.

‘‘অনুমোদি ¶ মহাৰীরো, সযম্ভূ অগ্গপুগ্গলো;

সব্বে জনে হাসযন্তো, দেসেসি অমতং পদং.

‘‘তং মে বুদ্ধো ৰিযাকাসি, জলজুত্তরনামকো;

ভিক্খুসঙ্ঘে নিসীদিত্ৰা, ইমা গাথা অভাসথ.

‘‘চতুপঞ্ঞাসসহস্সানি, পাসাদে কারযী অযং;

কথযিস্সামি ৰিপাকং, সুণোথ মম ভাসতো.

‘‘অট্ঠারসসহস্সানি, কূটাগারা ভৰিস্সরে;

ব্যম্হুত্তমম্হি নিব্বত্তা, সব্বসোণ্ণমযা চ তে.

‘‘পঞ্ঞাসক্খত্তুং দেৰিন্দো, দেৰরজ্জং করিস্সতি;

অট্ঠপঞ্ঞাসক্খত্তুঞ্চ, চক্কৰত্তী ভৰিস্সতি.

‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘দেৰলোকা চৰিত্ৰান, সুক্কমূলেন চোদিতো;

অড্ঢে কুলে মহাভোগে, নিব্বত্তিস্সতি তাৰদে.

‘‘সো পচ্ছা পব্বজিত্ৰান, সুক্কমূলেন চোদিতো;

রট্ঠপালোতি নামেন, হেস্সতি সত্থু সাৰকো.

‘‘পধানপহিতত্তো সো, উপসন্তো নিরূপধি;

সব্বাসৰে পরিঞ্ঞায, নিব্বাযিস্সতিনাসৰো.

‘‘উট্ঠায অভিনিক্খম্ম, জহিতা ভোগসম্পদা;

খেল়পিণ্ডেৰ ভোগম্হি, পেমং ময্হং ন ৰিজ্জতি.

‘‘ৰীরিযং ¶ মে ধুরধোরয্হং, যোগক্খেমাধিৰাহনং;

ধারেমি অন্তিমং দেহং, সম্মাসম্বুদ্ধসাসনে.

‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি.

অরহত্তং পন পত্ৰা সত্থারং অনুজানাপেত্ৰা মাতাপিতরো পস্সিতুং থুল্লকোট্ঠিকং গন্ত্ৰা, তত্থ সপদানং পিণ্ডায চরন্তো পিতু নিৰেসনে আভিদোসিকং কুম্মাসং লভিত্ৰা তং অমতং ৰিয পরিভুঞ্জন্তো, পিতরা নিমন্তিতো স্ৰাতনায অধিৰাসেত্ৰা, দুতিযদিৰসে পিতু নিৰেসনে পিণ্ডপাতং পরিভুঞ্জিত্ৰা অলঙ্কতপটিযত্তে ইত্থাগারজনে উপগন্ত্ৰা ‘‘কীদিসা নাম তা, অয্যপুত্ত, অচ্ছরাযো, যাসং ত্ৰং হেতু ব্রহ্মচরিযং চরসী’’তিআদীনি (ম. নি. ২.৩০১) ৰত্ৰা, পলোভনকম্মং কাতুং আরদ্ধে তস্স অধিপ্পাযং পরিৰত্তেত্ৰা অনিচ্চতাদিপটিসংযুত্তং ধম্মং কথেন্তো –

৭৬৯.

‘‘পস্স ¶ চিত্তকতং বিম্বং, অরুকাযং সমুস্সিতং;

আতুরং বহুসঙ্কপ্পং, যস্স নত্থি ধুৰং ঠিতি.

৭৭০.

‘‘পস্স চিত্তকতং রূপং, মণিনা কুণ্ডলেন চ;

অট্ঠিং তচেন ওনদ্ধং, সহ ৰত্থেহি সোভতি.

৭৭১.

‘‘অলত্তককতা পাদা, মুখং চুণ্ণকমক্খিতং;

অলং বালস্স মোহায, নো চ পারগৰেসিনো.

৭৭২.

‘‘অট্ঠাপদকতা কেসা, নেত্তা অঞ্জনমক্খিতা;

অলং বালস্স মোহায, নো চ পারগৰেসিনো.

৭৭৩.

‘‘অঞ্জনীৰ নৰা চিত্তা, পূতিকাযো অলঙ্কতো;

অলং বালস্স মোহায, নো চ পারগৰেসিনো.

৭৭৪.

‘‘ওদহি ¶ মিগৰো পাসং, নাসদা ৰাগুরং মিগো;

ভুত্ৰা নিৰাপং গচ্ছাম, কন্দন্তে মিগবন্ধকে.

৭৭৫.

‘‘ছিন্নো ¶ পাসো মিগৰস্স, নাসদা ৰাগুরং মিগো;

ভুত্ৰা নিৰাপং গচ্ছাম, সোচন্তে মিগলুদ্দকে’’তি. – ইমা গাথা অভাসি;

তত্থ চিত্তকতন্তি চিত্তং কতং চিত্তকতং, ৰত্থাভরণমালাদীহি ৰিচিত্তং কতন্তি অত্থো. বিম্বন্তি দীঘাদিভাৰেন যুত্তট্ঠানেসু দীঘাদীহি অঙ্গপচ্চঙ্গেহি মণ্ডিতং অত্তভাৰং. অরুকাযন্তি নৰন্নং ৰণমুখানং লোমকূপানঞ্চ ৰসেন ৰিস্সন্দমানঅসুচিং, সব্বসো চ অরুভূতং ৰণভূতং অরূনং ৰা কাযং. সমুস্সিতন্তি তীহি অট্ঠিসতেহি সমুস্সিতং. আতুরন্তি সব্বকালং ইরিযাপথন্তরাদীহি পরিহরিতব্বতায নিচ্চং গিলানং. বহুসঙ্কপ্পন্তি বালজনেন অভূতং আরোপেত্ৰা বহুধা সঙ্কপ্পিতব্বং. যস্স নত্থি ধুৰং ঠিতীতি যস্স কাযস্স ধুৰভাৰো ঠিতিসভাৰো নত্থি, একংসতো ভেদনৰিকিরণৰিদ্ধংসনধম্মোযেৰ. তং পস্সাতি সমীপে ঠিতং জনং, অত্তানমেৰ ৰা সন্ধায ৰদতি.

রূপন্তি সরীরং. সরীরম্পি হি ‘‘অট্ঠিঞ্চ পটিচ্চ, ন্হারুঞ্চ পটিচ্চ, মংসঞ্চ পটিচ্চ, চম্মঞ্চ পটিচ্চ, আকাসো পরিৰারিতো ‘রূপন্ত্ৰেৰ সঙ্খং গচ্ছতী’’তিআদীসু (ম. নি. ১.৩০৬) রূপন্তি ৰুচ্চতি. মণিনা কুণ্ডলেন চাতি সীসূপগাদিআভরণগতেন মণিনা কুণ্ডলেন চিত্তকতং. অট্ঠিং তচেন ওনদ্ধন্তি অল্লচম্মেন পরিযোনদ্ধং অতিরেকতিসতপভেদং অট্ঠিং পস্সাতি যোজনা. কুণ্ডলেন চাতি চ-সদ্দেন সেসাভরণালঙ্কারে সঙ্গণ্হাতি. সহ ৰত্থেহি সোভতীতি তযিদং রূপং মণিনা চিত্তকতম্পি ৰত্থেহি পটিচ্ছাদিতমেৰ সোভতি, ন অপটিচ্ছাদিতন্তি ¶ অত্থো. যে পন ‘‘অট্ঠিতচেনা’’তি পঠন্তি, তেসং অট্ঠিতচেনং ওনদ্ধং সোভতি, ওনদ্ধত্তা অট্ঠিতচেনাতি অত্থো.

অলত্তককতাতি অলত্তকেন কতরঞ্জনা লাখায সংরঞ্জিতা. পাদাতি চরণা. মুখং চুণ্ণকমক্খিতন্তি মুখং চুণ্ণকেন মক্খিতং, যং মণ্ডনমনুযুত্তা সাসপকক্কেন মুখপীল়কাদীনি হরিত্ৰা লোণমত্তিকায দুট্ঠলোহিতং হরিত্ৰা মুখচুণ্ণকৰিলেপনং করোন্তি, তং সন্ধায ৰুত্তং. অলন্তি বালস্স অন্ধপুথুজ্জনস্স নো ¶ চ পারগৰেসিনো ৰট্টাভিরতস্স মোহায সম্মোহনায সমত্থং তস্স চিত্তং মোহেতুং পরিযত্তং, পারগৰেসিনো পন ৰিৰট্টাভিরতস্স নো অলং ন পরিযত্তং.

অট্ঠাপদকতাতি ¶ অট্ঠপদাকারেন কতা সঞ্চিতা পুরিমভাগে কেসে কপ্পেত্ৰা নলাটস্স পটিচ্ছাদনৰসেন কতা কেসরচনা অট্ঠপদং নাম, যং ‘‘অলক’’ন্তিপি ৰুচ্চতি. নেত্তা অঞ্জনমক্খিতাতি উভোপি নযনানি অন্তো দ্ৰীসু অন্তেসু চ যথা অঞ্জনচ্ছাযা দিস্সতি, এৰং অঞ্জিতঞ্জনানি.

অঞ্জনীৰ নৰা চিত্তা, পূতিকাযো অলঙ্কতোতি যথা অঞ্জনী অঞ্জননাল়িকা নৰা অভিনৰা মালাকম্মমকরদন্তাদিৰসেন চিত্তা বহি মট্ঠা উজ্জলা দস্সনীযা, অন্তো পন ন দস্সনীযা হোতি, এৰমেৰ তাসং কাযো ন্হানব্ভঞ্জনৰত্থালঙ্কারেহি অলঙ্কতো বহি উজ্জলো, অন্তো পন পূতি নানপ্পকারঅসুচীহি ভরিতো তিট্ঠতীতি অত্থো.

ওদহীতি ওড্ডেসি. মিগৰোতি, মিগলুদ্দকো. পাসন্তি, দণ্ডৰাগুরং. নাসদাতি ন সঙ্ঘট্টেসি. ৰাগুরন্তি পাসং. নিৰাপন্তি মিগানং খাদনত্থায খিত্তং তিণাদিঘাসং. উপমা খো অযং থেরেন কতা অত্থস্স ৰিঞ্ঞাপনায. অযঞ্হেত্থ অত্থো – যথা মিগানং মারণত্থায দণ্ডৰাগুরং ওড্ডেত্ৰা তত্থ নিৰাপং ৰিকিরিয মিগলুদ্দকে নিলীনে ঠিতে তত্থেকো জৰপরক্কমসম্পন্নো ছেকো মিগো পাসং অফুসন্তো এৰ যথাসুখং নিৰাপং খাদিত্ৰা, ‘‘ৰঞ্চেসি ৰত মিগো’’তি মিগলুদ্দকে ৰিরৰন্তে এৰ গচ্ছতি. অপরো মিগো বলৰা ছেকো জৰসম্পন্নোৰ তত্থ গন্ত্ৰা নিৰাপং খাদিত্ৰা তত্থ তত্থ পাসং ছিন্দিত্ৰা, ‘‘ৰঞ্চেসি ৰত মিগো, পাসো ছিন্নো’’তি মিগলুদ্দকে সোচন্তে এৰ গচ্ছতি, এৰং মযম্পি পুব্বে পুথুজ্জনকালে মাতাপিতূহি আসজ্জনত্থায নিয্যাদিতে ভোগে ভুঞ্জিত্ৰা তত্থ তত্থ অসজ্জমানা নিক্খন্তা. ইদানি পন সব্বসো ¶ ছিন্নকিলেসা অপাসা হুত্ৰা ঠিতা, তেহি দিন্নভোজনং ভুঞ্জিত্ৰা তেসু সোচন্তেসু এৰ গচ্ছামাতি.

এৰং থেরো মিগলুদ্দকং ৰিয মাতাপিতরো, হিরঞ্ঞসুৰণ্ণং ইত্থাগারঞ্চ ৰাগুরজালং ৰিয, অত্তনা পুব্বে ভুত্তভোগে চ ইদানি ভুত্তভোজনঞ্চ নিৰাপতিণং ৰিয, অত্তানং মহামিগং ৰিয চ কত্ৰা দস্সেতি. ইমা গাথা ৰত্ৰা ৰেহাসং অব্ভুগ্গন্ত্ৰা রঞ্ঞো কোরব্যস্স মিগাজিনউয্যানে মঙ্গলসিলাপট্টে নিসীদি. থেরস্স কির পিতা সত্তসু দ্ৰারকোট্ঠকেসু অগ্গল়ং দাপেত্ৰা ¶ মল্লে আণাপেসি ‘‘নিক্খমিতুং মা দেথ, কাসাযানি অপনেত্ৰা সেতকানি নিৰাসেথা’’তি, তস্মা থেরো আকাসেন ¶ অগমাসি. অথ রাজা কোরব্যো থেরস্স তত্থ নিসিন্নভাৰং সুত্ৰা তং উপসঙ্কমিত্ৰা সম্মোদনীযং কথং সারণীযং ৰীতিসারেত্ৰা ‘‘ইধ, ভো রট্ঠপাল, পব্বজন্তো ব্যাধিপারিজুঞ্ঞং ৰা জরাভোগঞাতিপারিজুঞ্ঞং ৰা পত্তো পব্বজতি. ত্ৰং পন কিঞ্চিপি পারিজুঞ্ঞং অনুপগতো এৰ কস্মা পব্বজিতো’’তি পুচ্ছি. অথস্স থেরো, ‘‘উপনিয্যতি লোকো অদ্ধুৰো, অতাণো লোকো অনভিস্সরো, অস্সকো লোকো সব্বং পহায গমনীযং, ঊনো লোকো অতিত্তো তণ্হাদাসো’’তি (ম. নি. ২.৩০৫) ইমেসং চতুন্নং ধম্মুদ্দেসানং অত্তানং ৰিৰিত্তভাৰং কথেত্ৰা তস্সা দেসনায অনুগীতিং কথেন্তো –

৭৭৬.

‘‘পস্সামি লোকে সধনে মনুস্সে, লদ্ধান ৰিত্তং ন দদন্তি মোহা;

লুদ্ধা ধনং সন্নিচযং করোন্তি, ভিয্যোৰ কামে অভিপত্থযন্তি.

৭৭৭.

‘‘রাজা পসয্হপ্পথৰিং ৰিজেত্ৰা, সসাগরন্তং মহিমাৰসন্তো;

ওরং সমুদ্দস্স অতিত্তরূপো, পারং সমুদ্দস্সপি পত্থযেথ.

৭৭৮.

‘‘রাজা চ অঞ্ঞে চ বহূ মনুস্সা, অৰীততণ্হা মরণং উপেন্তি;

ঊনাৰ হুত্ৰান জহন্তি দেহং, কামেহি লোকম্হি ন হত্থি তিত্তি.

৭৭৯.

‘‘কন্দন্তি নং ঞাতী পকিরিয কেসে, ‘অহো ৰতা নো অমরা’তি চাহু;

ৰত্থেন নং পারুতং নীহরিত্ৰা, চিতং সমোধায ততো ডহন্তি.

৭৮০.

‘‘সো ¶ ডয্হতি সূলেহি তুজ্জমানো, একেন ৰত্থেন পহায ভোগে;

ন মীযমানস্স ভৰন্তি তাণা, ঞাতী চ মিত্তা অথ ৰা সহাযা.

৭৮১.

‘‘দাযাদকা তস্স ধনং হরন্তি, সত্তো পন গচ্ছতি যেনকম্মং;

ন মীযমানং ধনমন্ৰেতি কিঞ্চি, পুত্তা চ দারা চ ধনঞ্চ রট্ঠং.

৭৮২.

‘‘ন ¶ দীঘমাযুং লভতে ধনেন, ন চাপি ৰিত্তেন জরং ৰিহন্তি;

অপ্পং হিদং জীৰিতমাহু ধীরা, অসস্সতং ৰিপ্পরিণামধম্মং.

৭৮৩.

‘‘অড্ঢা ¶ দলিদ্দা চ ফুসন্তি ফস্সং, বালো চ ধীরো চ তথেৰ ফুট্ঠো;

বালো হি বাল্যা ৰধিতোৰ সেতি, ধীরো চ নো ৰেধতি ফস্সফুট্ঠো.

৭৮৪.

‘‘তস্মা হি পঞ্ঞাৰ ধনেন সেয্যা, যায ৰোসানমিধাধিগচ্ছতি;

অব্যোসিতত্তা হি ভৰাভৰেসু, পাপানি কম্মানি করোতি মোহা.

৭৮৫.

‘‘উপেতি গব্ভঞ্চ পরঞ্চ লোকং, সংসারমাপজ্জ পরম্পরায;

তস্সপ্পপঞ্ঞো অভিসদ্দহন্তো, উপেতি গব্ভঞ্চ পরঞ্চ লোকং.

৭৮৬.

‘‘চোরো যথা সন্ধিমুখে গহীতো, সকম্মুনা হঞ্ঞতি পাপধম্মো;

এৰং পজা পেচ্চ পরম্হি লোকে, সকম্মুনা হঞ্ঞতি পাপধম্মো.

৭৮৭.

‘‘কামা ¶ হি চিত্রা মধুরা মনোরমা, ৰিরূপরূপেন মথেন্তি চিত্তং;

আদীনৰং কামগুণেসু দিস্ৰা, তস্মা অহং পব্বজিতোম্হি রাজ.

৭৮৮.

‘‘দুমপ্ফলানীৰ পতন্তি মাণৰা, দহরা চ ৰুড্ঢা চ সরীরভেদা;

এতম্পি দিস্ৰা পব্বজিতোম্হি রাজ, অপণ্ণকং সামঞ্ঞমেৰ সেয্যো.

৭৮৯.

‘‘সদ্ধাযাহং পব্বজিতো, উপেতো জিনসাসনে;

অৰঞ্ঝা ময্হং পব্বজ্জা, অনণো ভুঞ্জামি ভোজনং.

৭৯০.

‘‘কামে আদিত্ততো দিস্ৰা, জাতরূপানি সত্থতো;

গব্ভৰোক্কন্তিতো দুক্খং, নিরযেসু মহব্ভযং.

৭৯১.

‘‘এতমাদীনৰং ¶ ঞত্ৰা, সংৰেগং অলভিং তদা;

সোহং ৰিদ্ধো তদা সন্তো, সম্পত্তো আসৰক্খযং.

৭৯২.

‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

৭৯৩.

‘‘যস্সত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো’’তি. – ইমা গাথা অৰোচ;

তত্থ পস্সামি লোকেতি অহং, মহারাজ, ইমস্মিং লোকে সধনে ধনসম্পন্নে অড্ঢে মনুস্সে পস্সামি, তে পন লদ্ধান ৰিত্তং ধনং লভিত্ৰা ভোগসম্পত্তিযং ঠিতা সমণব্রাহ্মণাদীসু কস্সচি কিঞ্চিপি ন দদন্তি. কস্মা? মোহা কম্মস্সকতাপঞ্ঞায অভাৰতো. লুদ্ধা লোভাভিভূতা যথালদ্ধং ধনং সন্নিচযং সব্বসো নিচেতব্বং নিধেতব্বং করোন্তি. ভিয্যোৰ যথাধিগতকামতো উপরি কামে কামগুণে ‘‘তথাহং এদিসে চ ভোগে পটিলভেয্য’’ন্তি অভিপত্থযন্তি পচ্চাসীসন্তি তজ্জঞ্চ ৰাযামং করোন্তি.

ভিয্যো ¶ ¶ কামপত্থনায উদাহরণং দস্সেন্তো ‘‘রাজা’’তিআদিমাহ. তত্থ পসয্হপ্পথৰিং ৰিজেত্ৰাতি অত্তনো ৰংসানুগতং পথৰিং বলক্কারেন অভিৰিজিয. আৰসন্তোতি পসাসেন্তো. ওরং সমুদ্দস্সাতি অনৰসেসং সমুদ্দস্স ওরভাগং লভিত্ৰাপি তেন অতিত্তরূপো পারং সমুদ্দস্স দীপন্তরম্পি পত্থযেয্য.

অৰীততণ্হাতি অৰিগততণ্হা. ঊনাৰাতি অপরিপুণ্ণমনোরথাৰ. কামেহি লোকম্হি ন হত্থি তিত্তীতি তণ্হাৰিপন্নানং ইমস্মিং লোকে ৰত্থুকামেহি তিত্তি নাম নত্থি.

কন্দন্তি নন্তি মতপুরিসং উদ্দিস্স তস্স গুণে কিত্তেন্তা কন্দনং করোন্তি. অহো ৰতা নো অমরাতি চাহূতি অহো ৰত অম্হাকং ঞাতী অমরা সিযুন্তি চ কথেন্তি, গাথাসুখত্থঞ্হেত্থ ৰতা-ইতি দীঘং কত্ৰা ৰুত্তং.

সো ডয্হতি সূলেহি তুজ্জমানোতি সো মতসত্তো ছৰডাহকেহি সম্মা ঝাপেতুং সূলেহি তুজ্জমানো. তাণাতি পরিত্তাণকরা.

যেনকম্মন্তি যথাকম্মং. ধনন্তি ধনাযিতব্বং যংকিঞ্চি ৰত্থু. পুন ধনন্তি হিরঞ্ঞসুৰণ্ণং সন্ধায ৰদতি.

‘‘ন দীঘমাযু’’ন্তিআদিনা কামগুণস্স জরায চ পটিকারাভাৰং ৰত্ৰা পুন তস্স একন্তিকভাৰং দস্সেতুং ‘‘অপ্পং হী’’তিআদি ৰুত্তং. ফুসন্তীতি ¶ অনিট্ঠফস্সং ফুসন্তি পাপুণন্তি, তত্থ অড্ঢদলিদ্দতা অকারণন্তি দস্সেতি. ফস্সং বালো চ ধীরো চ তথেৰ ফুট্ঠোতি যথা বালো ইট্ঠানিট্ঠসম্ফস্সং ফুট্ঠো, তথেৰ ধীরো ইট্ঠানিট্ঠফস্সং ফুট্ঠো হোতি, ন এত্থ বালপণ্ডিতানং কোচি ৰিসেসো. অযং পন ৰিসেসো, বালো হি বাল্যা ৰধিতোৰ সেতীতি বালপুগ্গলো কেনচি দুক্খধম্মেন ফুট্ঠো সোচন্তো কিলমন্তো উরত্তাল়িং কন্দন্তো বালভাৰেন ৰধিতো পীল়িতোৰ হুত্ৰা সেতি সযতি. ইতো চিতো চ আৰট্টন্তো ৰিৰট্টন্তো ৰিরোধেন্তো ৰেধতি ফস্সফুট্ঠোতি ধীরো পন পণ্ডিতো দুক্খসম্ফস্সেন সম্ফুট্ঠো ন ৰেধতি কম্পনমত্তম্পি তস্স ন হোতীতি.

তস্মাতি ¶ যস্মা বালপণ্ডিতানং লোকধম্মে এদিসী পৰত্তি, তস্মা হি পঞ্ঞাৰ ধনেন সেয্যা, যায ৰোসানমিধাধিগচ্ছতীতি পঞ্ঞাৰ ধনতো পাসংসতরা, যায পঞ্ঞায ৰোসানং ভৰস্স ¶ পরিযোসানভূতং নিব্বানং অধিগচ্ছতি. অব্যোসিতত্তা হীতি অনধিগতনিট্ঠত্তা. ভৰাভৰেসূতি মহন্তামহন্তেসু ভৰেসু.

উপেতি গব্ভঞ্চ পরঞ্চ লোকং, সংসারমাপজ্জ পরম্পরাযাতি যো পাপানি কত্ৰা অপরাপরং সংসরণমাপজ্জিত্ৰা উপেতি গব্ভঞ্চ পরঞ্চ লোকং গব্ভসেয্যায পরলোকুপ্পত্তিযা চ ন মুচ্চতি, তস্স পাপকম্মকারিনো পুগ্গলস্স কিরিযং অভিসদ্দহন্তো ‘‘অত্তা চ মে হোতী’’তি পত্তিযাযন্তো অঞ্ঞোপি অপ্পপঞ্ঞো বালো যথা পটিপজ্জিত্ৰা উপেতি গব্ভঞ্চ পরঞ্চ লোকং, ন ততো পরিমুচ্চতি.