📜

নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

থেরীগাথাপাল়ি

১. এককনিপাতো

১. অঞ্ঞতরাথেরীগাথা

১.

‘‘সুখং ¶ ¶ ¶ ¶ সুপাহি থেরিকে, কত্ৰা চোল়েন পারুতা;

উপসন্তো হি তে রাগো, সুক্খডাকং ৰ কুম্ভিয’’ন্তি.

ইত্থং সুদং অঞ্ঞতরা থেরী অপঞ্ঞাতা ভিক্খুনী গাথং অভাসিত্থাতি.

২. মুত্তাথেরীগাথা

২.

‘‘মুত্তে ¶ মুচ্চস্সু যোগেহি, চন্দো রাহুগ্গহা ইৰ;

ৰিপ্পমুত্তেন চিত্তেন, অনণা ভুঞ্জ পিণ্ডক’’ন্তি.

ইত্থং সুদং ভগৰা মুত্তং সিক্খমানং ইমায গাথায অভিণ্হং ওৰদতীতি.

৩. পুণ্ণাথেরীগাথা

৩.

‘‘পুণ্ণে পূরস্সু ধম্মেহি, চন্দো পন্নরসেরিৰ;

পরিপুণ্ণায পঞ্ঞায, তমোখন্ধং [তমোক্খন্ধং (সী. স্যা.)] পদালযা’’তি.

ইত্থং সুদং পুণ্ণা থেরী গাথং অভাসিত্থাতি.

৪. তিস্সাথেরীগাথা

৪.

‘‘তিস্সে সিক্খস্সু সিক্খায, মা তং যোগা উপচ্চগুং;

সব্বযোগৰিসংযুত্তা, চর লোকে অনাসৰা’’তি.

… তিস্সা থেরী….

৫. অঞ্ঞতরাতিস্সাথেরীগাথা

৫.

‘‘তিস্সে ¶ ¶ যুঞ্জস্সু ধম্মেহি, খণো তং মা উপচ্চগা;

খণাতীতা হি সোচন্তি, নিরযম্হি সমপ্পিতা’’তি.

… অঞ্ঞতরা তিস্সা থেরী….

৬. ধীরাথেরীগাথা

৬.

‘‘ধীরে ¶ নিরোধং ফুসেহি [ফুস্সেহি (সী.)], সঞ্ঞাৰূপসমং সুখং;

আরাধযাহি নিব্বানং, যোগক্খেমমনুত্তর’’ন্তি [যোগক্খেমং অনুত্তরন্তি (সী. স্যা.)].

… ধীরা থেরী….

৭. ৰীরাথেরীগাথা

৭.

‘‘ৰীরা ¶ ৰীরেহি [ধীরা ধীরেহি (ক.)] ধম্মেহি, ভিক্খুনী ভাৰিতিন্দ্রিযা;

ধারেহি অন্তিমং দেহং, জেত্ৰা মারং সৰাহিনি’’ন্তি [সৰাহনন্তি (ক.)].

… ৰীরা থেরী….

৮. মিত্তাথেরীগাথা

৮.

‘‘সদ্ধায পব্বজিত্ৰান, মিত্তে মিত্তরতা ভৰ;

ভাৰেহি কুসলে ধম্মে, যোগক্খেমস্স পত্তিযা’’তি.

… মিত্তা থেরী….

৯. ভদ্রাথেরীগাথা

৯.

‘‘সদ্ধায পব্বজিত্ৰান, ভদ্রে ভদ্ররতা ভৰ;

ভাৰেহি কুসলে ধম্মে, যোগক্খেমমনুত্তর’’ন্তি.

… ভদ্রা থেরী….

১০. উপসমাথেরীগাথা

১০.

‘‘উপসমে তরে ওঘং, মচ্চুধেয্যং সুদুত্তরং;

ধারেহি অন্তিমং দেহং, জেত্ৰা মারং সৰাহন’’ন্তি.

… উপসমা থেরী….

১১. মুত্তাথেরীগাথা

১১.

‘‘সুমুত্তা ¶ সাধুমুত্তাম্হি, তীহি খুজ্জেহি মুত্তিযা;

উদুক্খলেন মুসলেন, পতিনা খুজ্জকেন চ;

মুত্তাম্হি ¶ জাতিমরণা, ভৰনেত্তি সমূহতা’’তি.

… মুত্তা থেরী….

১২. ধম্মদিন্নাথেরীগাথা

১২.

‘‘ছন্দজাতা অৰসাযী, মনসা চ ফুটা [ফুট্ঠা (স্যা.), ফুঠা (সী. অট্ঠ.)] সিযা;

কামেসু অপ্পটিবদ্ধচিত্তা [অপ্পটিবন্ধচিত্তা (ক.)], উদ্ধংসোতাতি ৰুচ্চতী’’তি [উদ্ধংসোতা ৰিমুচ্চতীতি (সী. পী.)].

… ধম্মদিন্না থেরী….

১৩.ৰিসাখাথেরীগাথা

১৩.

‘‘করোথ ¶ বুদ্ধসাসনং, যং কত্ৰা নানুতপ্পতি;

খিপ্পং পাদানি ধোৰিত্ৰা, একমন্তে নিসীদথা’’তি.

… ৰিসাখা থেরী….

১৪.সুমনাথেরীগাথা

১৪.

‘‘ধাতুযো দুক্খতো দিস্ৰা, মা জাতিং পুনরাগমি;

ভৰে ছন্দং ৰিরাজেত্ৰা, উপসন্তা চরিস্সসী’’তি.

… সুমনা থেরী….

১৫. উত্তরাথেরীগাথা

১৫.

‘‘কাযেন ¶ সংৰুতা আসিং, ৰাচায উদ চেতসা;

সমূলং তণ্হমব্বুয্হ, সীতিভূতাম্হি নিব্বুতা’’তি.

… উত্তরা থেরী….

১৬. ৰুড্ঢপব্বজিতসুমনাথেরীগাথা

১৬.

‘‘সুখং ত্ৰং ৰুড্ঢিকে সেহি, কত্ৰা চোল়েন পারূতা;

উপসন্তো হি তে রাগো, সীতিভূতাসি নিব্বুতা’’তি.

… সুমনা ৰুড্ঢপব্বজিতা থেরী….

১৭. ধম্মাথেরীগাথা

১৭.

‘‘পিণ্ডপাতং ¶ চরিত্ৰান, দণ্ডমোলুব্ভ দুব্বলা;

ৰেধমানেহি গত্তেহি, তত্থেৰ নিপতিং ছমা;

দিস্ৰা ¶ আদীনৰং কাযে, অথ চিত্তং ৰিমুচ্চি মে’’তি.

… ধম্মা থেরী….

১৮. সঙ্ঘাথেরীগাথা

১৮.

‘‘হিত্ৰা ¶ ঘরে পব্বজিত্ৰা [পব্বজিতা (সী. অট্ঠ.)], হিত্ৰা পুত্তং পসুং পিযং;

হিত্ৰা রাগঞ্চ দোসঞ্চ, অৰিজ্জঞ্চ ৰিরাজিয;

সমূলং তণ্হমব্বুয্হ, উপসন্তাম্হি নিব্বুতা’’তি.

… সঙ্ঘা থেরী….

এককনিপাতো নিট্ঠিতো.

২. দুকনিপাতো

১. অভিরূপনন্দাথেরীগাথা

১৯.

[অপ. থেরী ২.৪.১৫৭ অপদানেপি] ‘‘আতুরং ¶ অসুচিং পূতিং, পস্স নন্দে সমুস্সযং;

অসুভায চিত্তং ভাৰেহি, একগ্গং সুসমাহিতং.

২০.

‘‘অনিমিত্তঞ্চ ভাৰেহি, মানানুসযমুজ্জহ;

ততো মানাভিসমযা, উপসন্তা চরিস্সসী’’তি.

ইত্থং সুদং ভগৰা অভিরূপনন্দং সিক্খমানং ইমাহি গাথাহি অভিণ্হং ওৰদতীতি [ইত্থং সুদং ভগৰা অভিরূপনন্দং সিক্খমানং ইমাহি গাথাহি অভিণ্হং ওৰদতীতি (ক.)].

২. জেন্তাথেরীগাথা

২১.

‘‘যে ইমে সত্ত বোজ্ঝঙ্গা, মগ্গা নিব্বানপত্তিযা;

ভাৰিতা তে মযা সব্বে, যথা বুদ্ধেন দেসিতা.

২২.

‘‘দিট্ঠো হি মে সো ভগৰা, অন্তিমোযং সমুস্সযো;

ৰিক্খীণো জাতিসংসারো, নত্থি দানি পুনব্ভৰো’’তি.

ইত্থং সুদং জেন্তা থেরী গাথাযো অভাসিত্থাতি.

৩. সুমঙ্গলমাতাথেরীগাথা

২৩.

‘‘সুমুত্তিকা ¶ ¶ ¶ সুমুত্তিকা [সুমুত্তিকে সুমুত্তিকে (সী.), সুমুত্তিকে সুমুত্তিকা (স্যা. ক.)], সাধুমুত্তিকাম্হি মুসলস্স;

অহিরিকো মে ছত্তকং ৰাপি, উক্খলিকা মে দেড্ডুভং ৰাতি.

২৪.

‘‘রাগঞ্চ অহং দোসঞ্চ, চিচ্চিটি চিচ্চিটীতি ৰিহনামি;

সা রুক্খমূলমুপগম্ম, অহো সুখন্তি সুখতো ঝাযামী’’তি.

… সুমঙ্গলমাতা থেরী [অঞ্ঞতরা থেরী ভিক্খুনী অপঞ্ঞাতা (স্যা. ক.)].

৪. অড্ঢকাসিথেরীগাথা

২৫.

‘‘যাৰ কাসিজনপদো, সুঙ্কো মে তত্থকো অহু;

তং কত্ৰা নেগমো অগ্ঘং, অড্ঢেনগ্ঘং ঠপেসি মং.

২৬.

‘‘অথ ¶ নিব্বিন্দহং রূপে, নিব্বিন্দঞ্চ ৰিরজ্জহং;

মা পুন জাতিসংসারং, সন্ধাৰেয্যং পুনপ্পুনং;

তিস্সো ৰিজ্জা সচ্ছিকতা, কতং বুদ্ধস্স সাসন’’ন্তি.

… অড্ঢকাসি থেরী….

৫. চিত্তাথেরীগাথা

২৭.

‘‘কিঞ্চাপি খোম্হি কিসিকা, গিলানা বাল়্হদুব্বলা;

দণ্ডমোলুব্ভ গচ্ছামি, পব্বতং অভিরূহিয.

২৮.

‘‘সঙ্ঘাটিং নিক্খিপিত্ৰান, পত্তকঞ্চ নিকুজ্জিয;

সেলে খম্ভেসিমত্তানং, তমোখন্ধং পদালিযা’’তি.

… চিত্তা থেরী….

৬. মেত্তিকাথেরীগাথা

২৯.

‘‘কিঞ্চাপি খোম্হি দুক্খিতা, দুব্বলা গতযোব্বনা;

দণ্ডমোলুব্ভ গচ্ছামি, পব্বতং অভিরূহিয.

৩০.

‘‘নিক্খিপিত্ৰান ¶ সঙ্ঘাটিং, পত্তকঞ্চ নিকুজ্জিয;

নিসিন্না চম্হি সেলম্হি, অথ চিত্তং ৰিমুচ্চি মে;

তিস্সো ¶ ৰিজ্জা অনুপ্পত্তা, কতং বুদ্ধস্স সাসন’’ন্তি.

… মেত্তিকা থেরী….

৭. মিত্তাথেরীগাথা

৩১.

‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহারিযপক্খঞ্চ, অট্ঠঙ্গসুসমাগতং.

৩২.

‘‘উপোসথং ¶ উপাগচ্ছিং, দেৰকাযাভিনন্দিনী;

সাজ্জ একেন ভত্তেন, মুণ্ডা সঙ্ঘাটিপারুতা;

দেৰকাযং ন পত্থেহং, ৰিনেয্য হদযে দর’’ন্তি.

… মিত্তা থেরী….

৮. অভযমাতুথেরীগাথা

৩৩.

‘‘উদ্ধং পাদতলা অম্ম, অধো ৰে কেসমত্থকা;

পচ্চৰেক্খস্সুমং কাযং, অসুচিং পূতিগন্ধিকং.

৩৪.

‘‘এৰং ¶ ৰিহরমানায, সব্বো রাগো সমূহতো;

পরিল়াহো সমুচ্ছিন্নো, সীতিভূতাম্হি নিব্বুতা’’তি.

… অভযমাতু থেরী….

৯. অভযাথেরীগাথা

৩৫.

‘‘অভযে ভিদুরো কাযো, যত্থ সতা পুথুজ্জনা;

নিক্খিপিস্সামিমং দেহং, সম্পজানা সতীমতী.

৩৬.

‘‘বহূহি দুক্খধম্মেহি, অপ্পমাদরতায মে;

তণ্হক্খযো অনুপ্পত্তো, কতং বুদ্ধস্স সাসন’’ন্তি.

… অভযা থেরী….

১০. সামাথেরীগাথা

৩৭.

‘‘চতুক্খত্তুং ¶ ¶ পঞ্চক্খত্তুং, ৰিহারা উপনিক্খমিং;

অলদ্ধা চেতসো সন্তিং, চিত্তে অৰসৰত্তিনী;

তস্সা মে অট্ঠমী রত্তি, যতো তণ্হা সমূহতা.

৩৮.

‘‘বহূহি দুক্খধম্মেহি, অপ্পমাদরতায মে;

তণ্হক্খযো অনুপ্পত্তো, কতং বুদ্ধস্স সাসন’’ন্তি.

… সামা থেরী….

দুকনিপাতো নিট্ঠিতো.

৩. তিকনিপাতো

১. অপরাসামাথেরীগাথা

৩৯.

‘‘পণ্ণৰীসতিৰস্সানি ¶ , যতো পব্বজিতায মে;

নাভিজানামি চিত্তস্স, সমং লদ্ধং কুদাচনং.

৪০.

‘‘অলদ্ধা চেতসো সন্তিং, চিত্তে অৰসৰত্তিনী;

ততো সংৰেগমাপাদিং, সরিত্ৰা জিনসাসনং.

৪১.

‘‘বহূহি দুক্খধম্মেহি, অপ্পমাদরতায মে;

তণ্হক্খযো অনুপ্পত্তো, কতং বুদ্ধস্স সাসনং;

অজ্জ ¶ মে সত্তমী রত্তি, যতো তণ্হা ৰিসোসিতা’’তি.

… অপরা সামা থেরী….

২. উত্তমাথেরীগাথা

৪২.

‘‘চতুক্খত্তুং ¶ পঞ্চক্খত্তুং, ৰিহারা উপনিক্খমিং;

অলদ্ধা চেতসো সন্তিং, চিত্তে অৰসৰত্তিনী.

৪৩.

‘‘সা ¶ ভিক্খুনিং উপগচ্ছিং, যা মে সদ্ধাযিকা অহু;

সা মে ধম্মমদেসেসি, খন্ধাযতনধাতুযো.

৪৪.

‘‘তস্সা ধম্মং সুণিত্ৰান, যথা মং অনুসাসি সা;

সত্তাহং একপল্লঙ্কেন, নিসীদিং পীতিসুখসমপ্পিতা [নিসীদিং সুখসমপ্পিতা (সী.)];

অট্ঠমিযা পাদে পসারেসিং, তমোখন্ধং পদালিযা’’তি.

… উত্তমা থেরী….

৩. অপরাউত্তমাথেরীগাথা

৪৫.

‘‘যে ইমে সত্ত বোজ্ঝঙ্গা, মগ্গা নিব্বানপত্তিযা;

ভাৰিতা তে মযা সব্বে, যথা বুদ্ধেন দেসিতা.

৪৬.

‘‘সুঞ্ঞতস্সানিমিত্তস্স, লাভিনীহং যদিচ্ছকং;

ওরসা ধীতা বুদ্ধস্স, নিব্বানাভিরতা সদা.

৪৭.

‘‘সব্বে ¶ কামা সমুচ্ছিন্না, যে দিব্বা যে চ মানুসা;

ৰিক্খীণো জাতিসংসারো, নত্থি দানি পুনব্ভৰো’’তি.

… অপরা উত্তমা থেরী….

৪. দন্তিকাথেরীগাথা

৪৮.

‘‘দিৰাৰিহারা নিক্খম্ম, গিজ্ঝকূটম্হি পব্বতে;

নাগং ওগাহমুত্তিণ্ণং, নদীতীরম্হি অদ্দসং.

৪৯.

‘‘পুরিসো অঙ্কুসমাদায, ‘দেহি পাদ’ন্তি যাচতি;

নাগো পসারযী পাদং, পুরিসো নাগমারুহি.

৫০.

‘‘দিস্ৰা ¶ অদন্তং দমিতং, মনুস্সানং ৰসং গতং;

ততো চিত্তং সমাধেসিং, খলু তায ৰনং গতা’’তি.

… দন্তিকা থেরী….

৫. উব্বিরিথেরীগাথা

৫১.

‘‘অম্ম জীৰাতি ৰনম্হি কন্দসি, অত্তানং অধিগচ্ছ উব্বিরি;

চুল্লাসীতিসহস্সানি [চূল়াসীতিসহস্সানি (সী.)], সব্বা জীৰসনামিকা;

এতম্হাল়াহনে দড্ঢা, তাসং কমনুসোচসি.

৫২.

‘‘অব্বহী ¶ ¶ [অব্বুতী (স্যা.), অব্বুল়্হং (ক.)] ৰত মে সল্লং, দুদ্দসং হদযস্সিতং [হদযনিস্সিতং (সী. স্যা.)];

যং মে সোকপরেতায, ধীতুসোকং ব্যপানুদি.

৫৩.

‘‘সাজ্জ অব্বূল়্হসল্লাহং, নিচ্ছাতা পরিনিব্বুতা;

বুদ্ধং ধম্মঞ্চ সঙ্ঘঞ্চ, উপেমি সরণং মুনি’’ন্তি.

… উব্বিরী থেরী….

৬. সুক্কাথেরীগাথা

৫৪.

‘‘কিংমে কতা রাজগহে মনুস্সা, মধুং পীতাৰ [মধুপীতাৰ (সী.)] অচ্ছরে;

যে সুক্কং ন উপাসন্তি, দেসেন্তিং বুদ্ধসাসনং.

৫৫.

‘‘তঞ্চ অপ্পটিৰানীযং, অসেচনকমোজৰং;

পিৰন্তি মঞ্ঞে সপ্পঞ্ঞা, ৰলাহকমিৰদ্ধগূ.

৫৬.

‘‘সুক্কা ¶ সুক্কেহি ধম্মেহি, ৰীতরাগা সমাহিতা;

ধারেতি অন্তিমং দেহং, জেত্ৰা মারং সৰাহন’’ন্তি.

… সুক্কা থেরী….

৭. সেলাথেরীগাথা

৫৭.

‘‘নত্থি নিস্সরণং লোকে, কিং ৰিৰেকেন কাহসি;

ভুঞ্জাহি ¶ কামরতিযো, মাহু পচ্ছানুতাপিনী’’.

৫৮.

‘‘সত্তিসূলূপমা কামা, খন্ধাসং অধিকুট্টনা;

যং ত্ৰং ‘কামরতিং’ ব্রূসি, ‘অরতী’ দানি সা মম.

৫৯.

‘‘সব্বত্থ ৰিহতা নন্দী [নন্দি (সী. স্যা.)], তমোখন্ধো পদালিতো;

এৰং জানাহি পাপিম, নিহতো ত্ৰমসি অন্তকা’’তি.

… সেলা থেরী….

৮. সোমাথেরীগাথা

৬০.

‘‘যং তং ইসীহি পত্তব্বং, ঠানং দুরভিসম্ভৰং;

ন তং দ্ৰঙ্গুলপঞ্ঞায, সক্কা পপ্পোতুমিত্থিযা’’.

৬১.

‘‘ইত্থিভাৰো নো কিং কযিরা, চিত্তম্হি সুসমাহিতে;

ঞাণম্হি ৰত্তমানম্হি, সম্মা ধম্মং ৰিপস্সতো.

৬২.

‘‘সব্বত্থ ¶ ¶ ৰিহতা নন্দী, তমোখন্ধো পদালিতো;

এৰং জানাহি পাপিম, নিহতো ত্ৰমসি অন্তকা’’তি.

… সোমা থেরী….

তিকনিপাতো নিট্ঠিতো.

৪. চতুক্কনিপাতো

১. ভদ্দাকাপিলানীথেরীগাথা

৬৩.

‘‘পুত্তো ¶ বুদ্ধস্স দাযাদো, কস্সপো সুসমাহিতো;

পুব্বেনিৰাসং যোৰেদি, সগ্গাপাযঞ্চ পস্সতি.

৬৪.

‘‘অথো ¶ জাতিক্খযং পত্তো, অভিঞ্ঞাৰোসিতো মুনি;

এতাহি তীহি ৰিজ্জাহি, তেৰিজ্জো হোতি ব্রাহ্মণো.

৬৫.

‘‘তথেৰ ভদ্দা কাপিলানী, তেৰিজ্জা মচ্চুহাযিনী;

ধারেতি অন্তিমং দেহং, জেত্ৰা মারং সৰাহনং.

৬৬.

‘‘দিস্ৰা আদীনৰং লোকে, উভো পব্বজিতা মযং;

ত্যম্হ খীণাসৰা দন্তা, সীতিভূতম্হ নিব্বুতা’’তি.

… ভদ্দা কাপিলানী থেরী….

চতুক্কনিপাতো নিট্ঠিতো.

৫. পঞ্চকনিপাতো

১. অঞ্ঞতরাথেরীগাথা

৬৭.

‘‘পণ্ণৰীসতিৰস্সানি ¶ ¶ , যতো পব্বজিতা অহং;

নাচ্ছরাসঙ্ঘাতমত্তম্পি, চিত্তস্সূপসমজ্ঝগং.

৬৮.

‘‘অলদ্ধা চেতসো সন্তিং, কামরাগেনৰস্সুতা;

বাহা পগ্গয্হ কন্দন্তী, ৰিহারং পাৰিসিং অহং.

৬৯.

‘‘সা ভিক্খুনিং উপাগচ্ছিং, যা মে সদ্ধাযিকা অহু;

সা মে ধম্মমদেসেসি, খন্ধাযতনধাতুযো.

৭০.

‘‘তস্সা ধম্মং সুণিত্ৰান, একমন্তে উপাৰিসিং;

পুব্বেনিৰাসং জানামি, দিব্বচক্খু ৰিসোধিতং.

৭১.

‘‘চেতোপরিচ্চঞাণঞ্চ ¶ ¶ [চেতোপরিযঞাণঞ্চ (ক.)], সোতধাতু ৰিসোধিতা;

ইদ্ধীপি মে সচ্ছিকতা, পত্তো মে আসৰক্খযো;

ছল়ভিঞ্ঞা [ছ মেভিঞ্ঞা (স্যা. ক.)] সচ্ছিকতা, কতং বুদ্ধস্স সাসন’’ন্তি.

… অঞ্ঞতরা থেরী ….

২. ৰিমলাথেরীগাথা

৭২.

‘‘মত্তা ৰণ্ণেন রূপেন, সোভগ্গেন যসেন চ;

যোব্বনেন চুপত্থদ্ধা, অঞ্ঞাসমতিমঞ্ঞিহং.

৭৩.

‘‘ৰিভূসেত্ৰা ইমং কাযং, সুচিত্তং বাললাপনং;

অট্ঠাসিং ৰেসিদ্ৰারম্হি, লুদ্দো পাসমিৰোড্ডিয.

৭৪.

‘‘পিলন্ধনং ৰিদংসেন্তী, গুয্হং পকাসিকং বহুং;

অকাসিং ৰিৰিধং মাযং, উজ্জগ্ঘন্তী বহুং জনং.

৭৫.

‘‘সাজ্জ পিণ্ডং চরিত্ৰান, মুণ্ডা সঙ্ঘাটিপারুতা;

নিসিন্না রুক্খমূলম্হি, অৰিতক্কস্স লাভিনী.

৭৬.

‘‘সব্বে যোগা সমুচ্ছিন্না, যে দিব্বা যে চ মানুসা;

খেপেত্ৰা আসৰে সব্বে, সীতিভূতাম্হি নিব্বুতা’’তি.

… ৰিমলা পুরাণগণিকা থেরী….

৩. সীহাথেরীগাথা

৭৭.

‘‘অযোনিসো ¶ ¶ মনসিকারা, কামরাগেন অট্টিতা;

অহোসিং উদ্ধতা পুব্বে, চিত্তে অৰসৰত্তিনী.

৭৮.

‘‘পরিযুট্ঠিতা ক্লেসেহি, সুভসঞ্ঞানুৰত্তিনী;

সমং চিত্তস্স ন লভিং, রাগচিত্তৰসানুগা.

৭৯.

‘‘কিসা ¶ পণ্ডু ৰিৰণ্ণা চ, সত্ত ৰস্সানি চারিহং;

নাহং দিৰা ৰা রত্তিং ৰা, সুখং ৰিন্দিং সুদুক্খিতা.

৮০.

‘‘ততো রজ্জুং গহেত্ৰান, পাৰিসিং ৰনমন্তরং;

ৰরং মে ইধ উব্বন্ধং, যঞ্চ হীনং পুনাচরে.

৮১.

‘‘দল়্হপাসং [দল়্হং পাসং (সী.)] করিত্ৰান, রুক্খসাখায বন্ধিয;

পক্খিপিং ¶ পাসং গীৰাযং, অথ চিত্তং ৰিমুচ্চি মে’’তি.

… সীহা থেরী….

৪. সুন্দরীনন্দাথেরীগাথা

৮২.

‘‘আতুরং অসুচিং পূতিং, পস্স নন্দে সমুস্সযং;

অসুভায চিত্তং ভাৰেহি, একগ্গং সুসমাহিতং.

৮৩.

‘‘যথা ইদং তথা এতং, যথা এতং তথা ইদং;

দুগ্গন্ধং পূতিকং ৰাতি, বালানং অভিনন্দিতং.

৮৪.

‘‘এৰমেতং অৰেক্খন্তী, রত্তিন্দিৰমতন্দিতা;

ততো সকায পঞ্ঞায, অভিনিব্বিজ্ঝ [অভিনিব্বিজ্জ (সী. স্যা.)] দক্খিসং.

৮৫.

‘‘তস্সা মে অপ্পমত্তায, ৰিচিনন্তিযা যোনিসো;

যথাভূতং অযং কাযো, দিট্ঠো সন্তরবাহিরো.

৮৬.

‘‘অথ নিব্বিন্দহং কাযে, অজ্ঝত্তঞ্চ ৰিরজ্জহং;

অপ্পমত্তা ৰিসংযুত্তা, উপসন্তাম্হি নিব্বুতা’’তি.

… সুন্দরীনন্দা থেরী….

৫. নন্দুত্তরাথেরীগাথা

৮৭.

‘‘অগ্গিং ¶ চন্দঞ্চ সূরিযঞ্চ, দেৰতা চ নমস্সিহং;

নদীতিত্থানি গন্ত্ৰান, উদকং ওরুহামিহং.

৮৮.

‘‘বহূৰতসমাদানা ¶ ¶ , অড্ঢং সীসস্স ওলিখিং;

ছমায সেয্যং কপ্পেমি, রত্তিং ভত্তং ন ভুঞ্জহং.

৮৯.

‘‘ৰিভূসামণ্ডনরতা, ন্হাপনুচ্ছাদনেহি চ;

উপকাসিং ইমং কাযং, কামরাগেন অট্টিতা.

৯০.

‘‘ততো সদ্ধং লভিত্ৰান, পব্বজিং অনগারিযং;

দিস্ৰা কাযং যথাভূতং, কামরাগো সমূহতো.

৯১.

‘‘সব্বে ভৰা সমুচ্ছিন্না, ইচ্ছা চ পত্থনাপি চ;

সব্বযোগৰিসংযুত্তা, সন্তিং পাপুণি চেতসো’’তি.

… নন্দুত্তরা থেরী….

৬. মিত্তাকাল়ীথেরীগাথা

৯২.

‘‘সদ্ধায পব্বজিত্ৰান, অগারস্মানগারিযং;

ৰিচরিংহং তেন তেন, লাভসক্কারউস্সুকা.

৯৩.

‘‘রিঞ্চিত্ৰা ¶ পরমং অত্থং, হীনমত্থং অসেৰিহং;

কিলেসানং ৰসং গন্ত্ৰা, সামঞ্ঞত্থং ন বুজ্ঝিহং.

৯৪.

‘‘তস্সা মে অহু সংৰেগো, নিসিন্নায ৰিহারকে;

উম্মগ্গপটিপন্নাম্হি, তণ্হায ৰসমাগতা.

৯৫.

‘‘অপ্পকং জীৰিতং ময্হং, জরা ব্যাধি চ মদ্দতি;

পুরাযং ভিজ্জতি [জরায ভিজ্জতে (সী.)] কাযো, ন মে কালো পমজ্জিতুং.

৯৬.

‘‘যথাভূতমৰেক্খন্তী, খন্ধানং উদযব্বযং;

ৰিমুত্তচিত্তা উট্ঠাসিং, কতং বুদ্ধস্স সাসন’’ন্তি.

… মিত্তা কাল়ী থেরী….

৭. সকুলাথেরীগাথা

৯৭.

‘‘অগারস্মিং ¶ ¶ ৰসন্তীহং, ধম্মং সুত্ৰান ভিক্খুনো;

অদ্দসং ৰিরজং ধম্মং, নিব্বানং পদমচ্চুতং.

৯৮.

‘‘সাহং পুত্তং ধীতরঞ্চ, ধনধঞ্ঞঞ্চ ছড্ডিয;

কেসে ছেদাপযিত্ৰান, পব্বজিং অনগারিযং.

৯৯.

‘‘সিক্খমানা ¶ অহং সন্তী, ভাৰেন্তী মগ্গমঞ্জসং;

পহাসিং রাগদোসঞ্চ, তদেকট্ঠে চ আসৰে.

১০০.

‘‘ভিক্খুনী উপসম্পজ্জ, পুব্বজাতিমনুস্সরিং;

দিব্বচক্খু ৰিসোধিতং [ৰিসোধিতং দিব্বচক্খু (সী.)], ৰিমলং সাধুভাৰিতং.

১০১.

‘‘সঙ্খারে পরতো দিস্ৰা, হেতুজাতে পলোকিতে [পলোকিনে (ক.)];

পহাসিং আসৰে সব্বে, সীতিভূতাম্হি নিব্বুতা’’তি.

… সকুলা থেরী….

৮. সোণাথেরীগাথা

১০২.

‘‘দস পুত্তে ৰিজাযিত্ৰা, অস্মিং রূপসমুস্সযে;

ততোহং দুব্বলা জিণ্ণা, ভিক্খুনিং উপসঙ্কমিং.

১০৩.

‘‘সা মে ধম্মমদেসেসি, খন্ধাযতনধাতুযো;

তস্সা ধম্মং সুণিত্ৰান, কেসে ছেত্ৰান পব্বজিং.

১০৪.

‘‘তস্সা মে সিক্খমানায, দিব্বচক্খু ৰিসোধিতং;

পুব্বেনিৰাসং জানামি, যত্থ মে ৰুসিতং পুরে.

১০৫.

‘‘অনিমিত্তঞ্চ ¶ ভাৰেমি, একগ্গা সুসমাহিতা;

অনন্তরাৰিমোক্খাসিং, অনুপাদায নিব্বুতা.

১০৬.

‘‘পঞ্চক্খন্ধা পরিঞ্ঞাতা, তিট্ঠন্তি ছিন্নমূলকা;

ধি ¶ তৰত্থু জরে জম্মে, নত্থি দানি পুনব্ভৰো’’তি.

… সোণা থেরী….

৯. ভদ্দাকুণ্ডলকেসাথেরীগাথা

১০৭.

‘‘লূনকেসী ¶ পঙ্কধরী, একসাটী পুরে চরিং;

অৰজ্জে ৰজ্জমতিনী, ৰজ্জে চাৰজ্জদস্সিনী.

১০৮.

‘‘দিৰাৰিহারা নিক্খম্ম, গিজ্ঝকূটম্হি পব্বতে;

অদ্দসং ৰিরজং বুদ্ধং, ভিক্খুসঙ্ঘপুরক্খতং.

১০৯.

‘‘নিহচ্চ জাণুং ৰন্দিত্ৰা, সম্মুখা অঞ্জলিং অকং;

‘এহি ভদ্দে’তি মং অৰচ, সা মে আসূপসম্পদা.

১১০.

‘‘চিণ্ণা ¶ অঙ্গা চ মগধা, ৰজ্জী কাসী চ কোসলা;

অনণা পণ্ণাসৰস্সানি, রট্ঠপিণ্ডং অভুঞ্জহং.

১১১.

‘‘পুঞ্ঞং ৰত পসৰি বহুং, সপ্পঞ্ঞো ৰতাযং উপাসকো;

যো ভদ্দায চীৰরং অদাসি, ৰিপ্পমুত্তায সব্বগন্থেহী’’তি.

… ভদ্দা কুণ্ডলকেসা থেরী….

১০. পটাচারাথেরীগাথা

১১২.

‘‘নঙ্গলেহি কসং খেত্তং, বীজানি পৰপং ছমা;

পুত্তদারানি পোসেন্তা, ধনং ৰিন্দন্তি মাণৰা.

১১৩.

‘‘কিমহং সীলসম্পন্না, সত্থুসাসনকারিকা;

নিব্বানং নাধিগচ্ছামি, অকুসীতা অনুদ্ধতা.

১১৪.

‘‘পাদে পক্খালযিত্ৰান, উদকেসু করোমহং;

পাদোদকঞ্চ ¶ দিস্ৰান, থলতো নিন্নমাগতং.

১১৫.

‘‘ততো চিত্তং সমাধেসিং, অস্সং ভদ্রংৰজানিযং;

ততো ¶ দীপং গহেত্ৰান, ৰিহারং পাৰিসিং অহং;

সেয্যং ওলোকযিত্ৰান, মঞ্চকম্হি উপাৰিসিং.

১১৬.

‘‘ততো সূচিং গহেত্ৰান, ৰট্টিং ওকস্সযামহং;

পদীপস্সেৰ নিব্বানং, ৰিমোক্খো অহু চেতসো’’তি.

… পটাচারা থেরী….

১১. তিংসমত্তাথেরীগাথা

১১৭.

‘‘‘মুসলানি ¶ গহেত্ৰান, ধঞ্ঞং কোট্টেন্তি মাণৰা [মানৰা (সী.)];

পুত্তদারানি পোসেন্তা, ধনং ৰিন্দন্তি মাণৰা.

১১৮.

‘‘‘করোথ বুদ্ধসাসনং, যং কত্ৰা নানুতপ্পতি;

খিপ্পং পাদানি ধোৰিত্ৰা, একমন্তে নিসীদথ;

চেতোসমথমনুযুত্তা, করোথ বুদ্ধসাসনং’.

১১৯.

‘‘তস্সা তা [তং (সী.)] ৰচনং সুত্ৰা, পটাচারায সাসনং;

পাদে পক্খালযিত্ৰান, একমন্তং উপাৰিসুং;

চেতোসমথমনুযুত্তা, অকংসু বুদ্ধসাসনং.

১২০.

‘‘রত্তিযা ¶ পুরিমে যামে, পুব্বজাতিমনুস্সরুং;

রত্তিযা মজ্ঝিমে যামে, দিব্বচক্খুং ৰিসোধযুং;

রত্তিযা পচ্ছিমে যামে, তমোখন্ধং পদালযুং.

১২১.

‘‘উট্ঠায পাদে ৰন্দিংসু, ‘কতা তে অনুসাসনী;

ইন্দংৰ ¶ দেৰা তিদসা, সঙ্গামে অপরাজিতং;

পুরক্খত্ৰা ৰিহস্সাম [ৰিহরাম (সী.), ৰিহরিস্সাম (স্যা.)], তেৰিজ্জাম্হ অনাসৰা’’’তি.

ইত্থং সুদং তিংসমত্তা থেরী ভিক্খুনিযো পটাচারায সন্তিকে অঞ্ঞং ব্যাকরিংসূতি.

১২. চন্দাথেরীগাথা

১২২.

‘‘দুগ্গতাহং পুরে আসিং, ৰিধৰা চ অপুত্তিকা;

ৰিনা মিত্তেহি ঞাতীহি, ভত্তচোল়স্স নাধিগং.

১২৩.

‘‘পত্তং দণ্ডঞ্চ গণ্হিত্ৰা, ভিক্খমানা কুলা কুলং;

সীতুণ্হেন চ ডয্হন্তী, সত্ত ৰস্সানি চারিহং.

১২৪.

‘‘ভিক্খুনিং পুন দিস্ৰান, অন্নপানস্স লাভিনিং;

উপসঙ্কম্ম অৰোচং [অৰোচিং (ক.)], ‘পব্বজ্জং অনগারিযং’.

১২৫.

‘‘সা ¶ চ মং অনুকম্পায, পব্বাজেসি পটাচারা;

ততো মং ওৰদিত্ৰান, পরমত্থে নিযোজযি.

১২৬.

‘‘তস্সাহং ¶ ৰচনং সুত্ৰা, অকাসিং অনুসাসনিং;

অমোঘো অয্যাযোৰাদো, তেৰিজ্জাম্হি অনাসৰা’’তি.

… চন্দা থেরী….

পঞ্চকনিপাতো নিট্ঠিতো.

৬. ছক্কনিপাতো

১. পঞ্চসতমত্তাথেরীগাথা

১২৭.

‘‘যস্স ¶ মগ্গং ন জানাসি, আগতস্স গতস্স ৰা;

তং ¶ কুতো চাগতং সত্তং [সন্তং (সী.), পুত্তং (স্যা.)], ‘মম পুত্তো’তি রোদসি.

১২৮.

‘‘মগ্গঞ্চ খোস্স [খো’থ (স্যা. ক.)] জানাসি, আগতস্স গতস্স ৰা;

ন নং সমনুসোচেসি, এৰংধম্মা হি পাণিনো.

১২৯.

‘‘অযাচিতো ততাগচ্ছি, নানুঞ্ঞাতো [অননুঞ্ঞাতো (সী. স্যা.)] ইতো গতো;

কুতোচি নূন আগন্ত্ৰা, ৰসিত্ৰা কতিপাহকং;

ইতোপি অঞ্ঞেন গতো, ততোপঞ্ঞেন গচ্ছতি.

১৩০.

‘‘পেতো মনুস্সরূপেন, সংসরন্তো গমিস্সতি;

যথাগতো তথা গতো, কা তত্থ পরিদেৰনা’’.

১৩১.

‘‘অব্বহী [অব্বুয্হং (স্যা.)] ৰত মে সল্লং, দুদ্দসং হদযস্সিতং;

যা মে সোকপরেতায, পুত্তসোকং ব্যপানুদি.

১৩২.

‘‘সাজ্জ অব্বূল়্হসল্লাহং, নিচ্ছাতা পরিনিব্বুতা;

বুদ্ধং ধম্মঞ্চ সঙ্ঘঞ্চ, উপেমি সরণং মুনিং’’.

ইত্থং সুদং পঞ্চসতমত্তা থেরী ভিক্খুনিযো…পে….

২. ৰাসেট্ঠীথেরীগাথা

১৩৩.

‘‘পুত্তসোকেনহং অট্টা, খিত্তচিত্তা ৰিসঞ্ঞিনী;

নগ্গা পকিণ্ণকেসী চ, তেন তেন ৰিচারিহং.

১৩৪.

‘‘ৰীথি [ৰসিং (সী.)] সঙ্কারকূটেসু, সুসানে রথিযাসু চ;

অচরিং তীণি ৰস্সানি, খুপ্পিপাসাসমপ্পিতা.

১৩৫.

‘‘অথদ্দসাসিং ¶ ¶ সুগতং, নগরং মিথিলং পতি [গতং (ক.)];

অদন্তানং দমেতারং, সম্বুদ্ধমকুতোভযং.

১৩৬.

‘‘সচিত্তং ¶ পটিলদ্ধান, ৰন্দিত্ৰান উপাৰিসিং;

সো মে ধম্মমদেসেসি, অনুকম্পায গোতমো.

১৩৭.

‘‘তস্স ¶ ধম্মং সুণিত্ৰান, পব্বজিং অনগারিযং;

যুঞ্জন্তী সত্থুৰচনে, সচ্ছাকাসিং পদং সিৰং.

১৩৮.

‘‘সব্বে সোকা সমুচ্ছিন্না, পহীনা এতদন্তিকা;

পরিঞ্ঞাতা হি মে ৰত্থূ, যতো সোকান সম্ভৰো’’তি.

… ৰাসেট্ঠী থেরী….

৩. খেমাথেরীগাথা

১৩৯.

‘‘দহরা ত্ৰং রূপৰতী, অহম্পি দহরো যুৰা;

পঞ্চঙ্গিকেন তুরিযেন [তূরেন (ক.)], এহি খেমে রমামসে’’.

১৪০.

‘‘ইমিনা পূতিকাযেন, আতুরেন পভঙ্গুনা;

অট্টিযামি হরাযামি, কামতণ্হা সমূহতা.

১৪১.

‘‘সত্তিসূলূপমা কামা, খন্ধাসং অধিকুট্টনা;

যং ‘ত্ৰং কামরতিং’ ব্রূসি, ‘অরতী’ দানি সা মম.

১৪২.

‘‘সব্বত্থ ৰিহতা নন্দী, তমোখন্ধো পদালিতো;

এৰং জানাহি পাপিম, নিহতো ত্ৰমসি অন্তক.

১৪৩.

‘‘নক্খত্তানি নমস্সন্তা, অগ্গিং পরিচরং ৰনে;

যথাভুচ্চমজানন্তা, বালা সুদ্ধিমমঞ্ঞথ.

১৪৪.

‘‘অহঞ্চ খো নমস্সন্তী, সম্বুদ্ধং পুরিসুত্তমং;

পমুত্তা [পরিমুত্তা (সী. স্যা.)] সব্বদুক্খেহি, সত্থুসাসনকারিকা’’তি.

… খেমা থেরী….

৪. সুজাতাথেরীগাথা

১৪৫.

‘‘অলঙ্কতা ¶ সুৰসনা, মালিনী চন্দনোক্খিতা;

সব্বাভরণসঞ্ছন্না, দাসীগণপুরক্খতা.

১৪৬.

‘‘অন্নং ¶ পানঞ্চ আদায, খজ্জং ভোজ্জং অনপ্পকং;

গেহতো নিক্খমিত্ৰান, উয্যানমভিহারযিং.

১৪৭.

‘‘তত্থ ¶ রমিত্ৰা কীল়িত্ৰা, আগচ্ছন্তী সকং ঘরং;

ৰিহারং দট্ঠুং পাৰিসিং, সাকেতে অঞ্জনং ৰনং.

১৪৮.

‘‘দিস্ৰান ¶ লোকপজ্জোতং, ৰন্দিত্ৰান উপাৰিসিং;

সো মে ধম্মমদেসেসি, অনুকম্পায চক্খুমা.

১৪৯.

‘‘সুত্ৰা চ খো মহেসিস্স, সচ্চং সম্পটিৰিজ্ঝহং;

তত্থেৰ ৰিরজং ধম্মং, ফুসযিং অমতং পদং.

১৫০.

‘‘ততো ৰিঞ্ঞাতসদ্ধম্মা, পব্বজিং অনগারিযং;

তিস্সো ৰিজ্জা অনুপ্পত্তা, অমোঘং বুদ্ধসাসন’’ন্তি.

… সুজাতা থেরী….

৫. অনোপমাথেরীগাথা

১৫১.

‘‘উচ্চে কুলে অহং জাতা, বহুৰিত্তে মহদ্ধনে;

ৰণ্ণরূপেন সম্পন্না, ধীতা মজ্ঝস্স [মেঘস্স (সী.), মেঘিস্স (স্যা.)] অত্রজা.

১৫২.

‘‘পত্থিতা রাজপুত্তেহি, সেট্ঠিপুত্তেহি গিজ্ঝিতা [সেট্ঠিপুত্তেহি ভিজ্ঝিতা (সী.)];

পিতু মে পেসযী দূতং, দেথ ময্হং অনোপমং.

১৫৩.

‘‘যত্তকং তুলিতা এসা, তুয্হং ধীতা অনোপমা;

ততো অট্ঠগুণং দস্সং, হিরঞ্ঞং রতনানি চ.

১৫৪.

‘‘সাহং ¶ দিস্ৰান সম্বুদ্ধং, লোকজেট্ঠং অনুত্তরং;

তস্স পাদানি ৰন্দিত্ৰা, একমন্তং উপাৰিসিং.

১৫৫.

‘‘সো মে ধম্মমদেসেসি, অনুকম্পায গোতমো;

নিসিন্না আসনে তস্মিং, ফুসযিং ততিযং ফলং.

১৫৬.

‘‘ততো কেসানি ছেত্ৰান, পব্বজিং অনগারিযং;

অজ্জ মে সত্তমী রত্তি, যতো তণ্হা ৰিসোসিতা’’তি.

… অনোপমা থেরী….

৬. মহাপজাপতিগোতমীথেরীগাথা

১৫৭.

‘‘বুদ্ধ ¶ ৰীর নমো ত্যত্থু, সব্বসত্তানমুত্তম;

যো মং দুক্খা পমোচেসি, অঞ্ঞঞ্চ বহুকং জনং.

১৫৮.

‘‘সব্বদুক্খং পরিঞ্ঞাতং, হেতুতণ্হা ৰিসোসিতা;

ভাৰিতো অট্ঠঙ্গিকো [অরিযট্ঠঙ্গিকো (সী. ক.), ভাৰিতট্ঠঙ্গিকো (স্যা.)] মগ্গো, নিরোধো ফুসিতো মযা.

১৫৯.

‘‘মাতা ¶ ¶ পুত্তো পিতা ভাতা, অয্যকা চ পুরে অহুং;

যথাভুচ্চমজানন্তী, সংসরিংহং অনিব্বিসং.

১৬০.

‘‘দিট্ঠো হি মে সো ভগৰা, অন্তিমোযং সমুস্সযো;

ৰিক্খীণো জাতিসংসারো, নত্থি দানি পুনব্ভৰো.

১৬১.

‘‘আরদ্ধৰীরিযে পহিতত্তে, নিচ্চং দল়্হপরক্কমে;

সমগ্গে সাৰকে পস্সে, এসা বুদ্ধান ৰন্দনা.

১৬২.

‘‘বহূনং [বহুন্নং (সী. স্যা.)] ৰত অত্থায, মাযা জনযি গোতমং;

ব্যাধিমরণতুন্নানং, দুক্খক্খন্ধং ব্যপানুদী’’তি.

… মহাপজাপতিগোতমী থেরী….

৭. গুত্তাথেরীগাথা

১৬৩.

‘‘গুত্তে ¶ যদত্থং পব্বজ্জা, হিত্ৰা পুত্তং ৰসুং পিযং;

তমেৰ অনুব্রূহেহি, মা চিত্তস্স ৰসং গমি.

১৬৪.

‘‘চিত্তেন ৰঞ্চিতা সত্তা, মারস্স ৰিসযে রতা;

অনেকজাতিসংসারং, সন্ধাৰন্তি অৰিদ্দসূ.

১৬৫.

‘‘কামচ্ছন্দঞ্চ ব্যাপাদং, সক্কাযদিট্ঠিমেৰ চ;

সীলব্বতপরামাসং, ৰিচিকিচ্ছঞ্চ পঞ্চমং.

১৬৬.

‘‘সংযোজনানি এতানি, পজহিত্ৰান ভিক্খুনী;

ওরম্ভাগমনীযানি, নযিদং পুনরেহিসি.

১৬৭.

‘‘রাগং মানং অৰিজ্জঞ্চ, উদ্ধচ্চঞ্চ ৰিৰজ্জিয;

সংযোজনানি ছেত্ৰান, দুক্খস্সন্তং করিস্সসি.

১৬৮.

‘‘খেপেত্ৰা ¶ জাতিসংসারং, পরিঞ্ঞায পুনব্ভৰং;

দিট্ঠেৰ ধম্মে নিচ্ছাতা, উপসন্তা চরিস্সতী’’তি.

… গুত্তা থেরী….

৮. ৰিজযাথেরীগাথা

১৬৯.

‘‘চতুক্খত্তুং পঞ্চক্খত্তুং, ৰিহারা উপনিক্খমিং;

অলদ্ধা চেতসো সন্তিং, চিত্তে অৰসৰত্তিনী.

১৭০.

‘‘ভিক্খুনিং ¶ উপসঙ্কম্ম, সক্কচ্চং পরিপুচ্ছহং;

সা মে ধম্মমদেসেসি, ধাতুআযতনানি চ.

১৭১.

‘‘চত্তারি ¶ অরিযসচ্চানি, ইন্দ্রিযানি বলানি চ;

বোজ্ঝঙ্গট্ঠঙ্গিকং মগ্গং, উত্তমত্থস্স পত্তিযা.

১৭২.

‘‘তস্সাহং ¶ ৰচনং সুত্ৰা, করোন্তী অনুসাসনিং;

রত্তিযা পুরিমে যামে, পুব্বজাতিমনুস্সরিং.

১৭৩.

‘‘রত্তিযা মজ্ঝিমে যামে, দিব্বচক্খুং ৰিসোধযিং;

রত্তিযা পচ্ছিমে যামে, তমোখন্ধং পদালযিং.

১৭৪.

‘‘পীতিসুখেন চ কাযং, ফরিত্ৰা ৰিহরিং তদা;

সত্তমিযা পাদে পসারেসিং, তমোখন্ধং পদালিযা’’তি.

… ৰিজযা থেরী….

ছক্কনিপাতো নিট্ঠিতো.

৭. সত্তকনিপাতো

১. উত্তরাথেরীগাথা

১৭৫.

‘‘‘মুসলানি ¶ গহেত্ৰান, ধঞ্ঞং কোট্টেন্তি মাণৰা;

পুত্তদারানি পোসেন্তা, ধনং ৰিন্দন্তি মাণৰা.

১৭৬.

‘‘‘ঘটেথ ¶ বুদ্ধসাসনে, যং কত্ৰা নানুতপ্পতি;

খিপ্পং পাদানি ধোৰিত্ৰা, একমন্তং নিসীদথ.

১৭৭.

‘‘‘চিত্তং উপট্ঠপেত্ৰান, একগ্গং সুসমাহিতং;

পচ্চৰেক্খথ সঙ্খারে, পরতো নো চ অত্ততো’.

১৭৮.

‘‘তস্সাহং ৰচনং সুত্ৰা, পটাচারানুসাসনিং;

পাদে পক্খালযিত্ৰান, একমন্তে উপাৰিসিং.

১৭৯.

‘‘রত্তিযা ¶ পুরিমে যামে, পুব্বজাতিমনুস্সরিং;

রত্তিযা মজ্ঝিমে যামে, দিব্বচক্খুং ৰিসোধযিং.

১৮০.

‘‘রত্তিযা পচ্ছিমে যামে, তমোক্খন্ধং পদালযিং;

তেৰিজ্জা অথ ৰুট্ঠাসিং, কতা তে অনুসাসনী.

১৮১.

‘‘সক্কংৰ দেৰা তিদসা, সঙ্গামে অপরাজিতং;

পুরক্খত্ৰা ৰিহস্সামি, তেৰিজ্জাম্হি অনাসৰা’’.

… উত্তরা থেরী….

২. চালাথেরীগাথা

১৮২.

‘‘সতিং ¶ উপট্ঠপেত্ৰান, ভিক্খুনী ভাৰিতিন্দ্রিযা;

পটিৰিজ্ঝি পদং সন্তং, সঙ্খারূপসমং সুখং’’.

১৮৩.

‘‘কং নু উদ্দিস্স মুণ্ডাসি, সমণী ৰিয দিস্সসি;

ন চ রোচেসি পাসণ্ডে, কিমিদং চরসি মোমুহা’’.

১৮৪.

‘‘ইতো বহিদ্ধা পাসণ্ডা, দিট্ঠিযো উপনিস্সিতা;

ন তে ধম্মং ৰিজানন্তি, ন তে ধম্মস্স কোৰিদা.

১৮৫.

‘‘অত্থি সক্যকুলে জাতো, বুদ্ধো অপ্পটিপুগ্গলো;

সো মে ধম্মমদেসেসি, দিট্ঠীনং সমতিক্কমং.

১৮৬.

‘‘দুক্খং ¶ দুক্খসমুপ্পাদং, দুক্খস্স চ অতিক্কমং;

অরিযং চট্ঠঙ্গিকং মগ্গং, দুক্খূপসমগামিনং.

১৮৭.

‘‘তস্সাহং ৰচনং সুত্ৰা, ৰিহরিং সাসনে রতা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

১৮৮.

‘‘সব্বত্থ ¶ ¶ ৰিহতা নন্দী, তমোখন্ধো পদালিতো;

এৰং জানাহি পাপিম, নিহতো ত্ৰমসি অন্তক’’.

… চালা থেরী….

৩. উপচালাথেরীগাথা

১৮৯.

‘‘সতিমতী চক্খুমতী, ভিক্খুনী ভাৰিতিন্দ্রিযা;

পটিৰিজ্ঝিং পদং সন্তং, অকাপুরিসসেৰিতং’’.

১৯০.

‘‘কিং নু জাতিং ন রোচেসি, জাতো কামানি ভুঞ্জতি;

ভুঞ্জাহি কামরতিযো, মাহু পচ্ছানুতাপিনী’’.

১৯১.

‘‘জাতস্স মরণং হোতি, হত্থপাদান ছেদনং;

ৰধবন্ধপরিক্লেসং, জাতো দুক্খং নিগচ্ছতি.

১৯২.

‘‘অত্থি সক্যকুলে জাতো, সম্বুদ্ধো অপরাজিতো;

সো মে ধম্মমদেসেসি, জাতিযা সমতিক্কমং.

১৯৩.

‘‘দুক্খং দুক্খসমুপ্পাদং, দুক্খস্স চ অতিক্কমং;

অরিযং চট্ঠঙ্গিকং মগ্গং, দুক্খূপসমগামিনং.

১৯৪.

‘‘তস্সাহং ৰচনং সুত্ৰা, ৰিহরিং সাসনে রতা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

১৯৫.

‘‘সব্বত্থ ¶ ৰিহতা নন্দী, তমোখন্ধো পদালিতো;

এৰং জানাহি পাপিম, নিহতো ত্ৰমসি অন্তক’’.

… উপচালা থেরী….

সত্তকনিপাতো নিট্ঠিতো.

৮. অট্ঠকনিপাতো

১. সীসূপচালাথেরীগাথা

১৯৬.

‘‘ভিক্খুনী ¶ ¶ ¶ সীলসম্পন্না, ইন্দ্রিযেসু সুসংৰুতা;

অধিগচ্ছে পদং সন্তং, অসেচনকমোজৰং’’.

১৯৭.

‘‘তাৰতিংসা চ যামা চ, তুসিতা চাপি দেৰতা;

নিম্মানরতিনো দেৰা, যে দেৰা ৰসৰত্তিনো;

তত্থ চিত্তং পণীধেহি, যত্থ তে ৰুসিতং পুরে’’.

১৯৮.

‘‘তাৰতিংসা চ যামা চ, তুসিতা চাপি দেৰতা;

নিম্মানরতিনো দেৰা, যে দেৰা ৰসৰত্তিনো.

১৯৯.

‘‘কালং কালং ভৰাভৰং, সক্কাযস্মিং পুরক্খতা;

অৰীতিৰত্তা সক্কাযং, জাতিমরণসারিনো.

২০০.

‘‘সব্বো আদীপিতো লোকো, সব্বো লোকো পদীপিতো;

সব্বো পজ্জলিতো লোকো, সব্বো লোকো পকম্পিতো.

২০১.

‘‘অকম্পিযং অতুলিযং, অপুথুজ্জনসেৰিতং;

বুদ্ধো ধম্মমদেসেসি, তত্থ মে নিরতো মনো.

২০২.

‘‘তস্সাহং ৰচনং সুত্ৰা, ৰিহরিং সাসনে রতা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

২০৩.

‘‘সব্বত্থ ৰিহতা নন্দী, তমোখন্ধো পদালিতো;

এৰং জানাহি পাপিম, নিহতো ত্ৰমসি অন্তক’’.

… সীসূপচালা থেরী….

অট্ঠকনিপাতো নিট্ঠিতো.

৯. নৰকনিপাতো

১. ৰড্ঢমাতুথেরীগাথা

২০৪.

‘‘মা ¶ ¶ ¶ সু তে ৰড্ঢ লোকম্হি, ৰনথো আহু কুদাচনং;

মা পুত্তক পুনপ্পুনং, অহু দুক্খস্স ভাগিমা.

২০৫.

‘‘সুখঞ্হি ¶ ৰড্ঢ মুনযো, অনেজা ছিন্নসংসযা;

সীতিভূতা দমপ্পত্তা, ৰিহরন্তি অনাসৰা.

২০৬.

‘‘তেহানুচিণ্ণং ইসীভি, মগ্গং দস্সনপত্তিযা;

দুক্খস্সন্তকিরিযায, ত্ৰং ৰড্ঢ অনুব্রূহয’’.

২০৭.

‘‘ৰিসারদাৰ ভণসি, এতমত্থং জনেত্তি মে;

মঞ্ঞামি নূন মামিকে, ৰনথো তে ন ৰিজ্জতি’’.

২০৮.

‘‘যে কেচি ৰড্ঢ সঙ্খারা, হীনা উক্কট্ঠমজ্ঝিমা;

অণূপি অণুমত্তোপি, ৰনথো মে ন ৰিজ্জতি.

২০৯.

‘‘সব্বে মে আসৰা খীণা, অপ্পমত্তস্স ঝাযতো;

তিস্সো ৰিজ্জা অনুপ্পত্তা, কতং বুদ্ধস্স সাসনং’’.

২১০.

‘‘উল়ারং ৰত মে মাতা, পতোদং সমৰস্সরি;

পরমত্থসঞ্হিতা গাথা, যথাপি অনুকম্পিকা.

২১১.

‘‘তস্সাহং ৰচনং সুত্ৰা, অনুসিট্ঠিং জনেত্তিযা;

ধম্মসংৰেগমাপাদিং, যোগক্খেমস্স পত্তিযা.

২১২.

‘‘সোহং পধানপহিতত্তো, রত্তিন্দিৰমতন্দিতো;

মাতরা চোদিতো সন্তো, অফুসিং সন্তিমুত্তমং’’.

… ৰড্ঢমাতা থেরী….

নৰকনিপাতো নিট্ঠিতো.

১০. একাদসনিপাতো

১. কিসাগোতমীথেরীগাথা

২১৩.

‘‘কল্যাণমিত্ততা ¶ ¶ ¶ মুনিনা, লোকং আদিস্স ৰণ্ণিতা;

কল্যাণমিত্তে ভজমানো, অপি বালো পণ্ডিতো অস্স.

২১৪.

‘‘ভজিতব্বা সপ্পুরিসা, পঞ্ঞা তথা ৰড্ঢতি ভজন্তানং;

ভজমানো সপ্পুরিসে, সব্বেহিপি দুক্খেহি পমুচ্চেয্য.

২১৫.

‘‘দুক্খঞ্চ ৰিজানেয্য, দুক্খস্স চ সমুদযং নিরোধং;

অট্ঠঙ্গিকঞ্চ মগ্গং, চত্তারিপি অরিযসচ্চানি.

২১৬.

‘‘দুক্খো ¶ ইত্থিভাৰো, অক্খাতো পুরিসদম্মসারথিনা;

সপত্তিকম্পি হি দুক্খং, অপ্পেকচ্চা সকিং ৰিজাতাযো.

২১৭.

‘‘গলকে অপি কন্তন্তি, সুখুমালিনিযো ৰিসানি খাদন্তি;

জনমারকমজ্ঝগতা, উভোপি ব্যসনানি অনুভোন্তি.

২১৮.

‘‘উপৰিজঞ্ঞা গচ্ছন্তী, অদ্দসাহং পতিং মতং;

পন্থম্হি ৰিজাযিত্ৰান, অপ্পত্তাৰ সকং ঘরং.

২১৯.

‘‘দ্ৰে পুত্তা কালকতা, পতী চ পন্থে মতো কপণিকায;

মাতা পিতা চ ভাতা, ডয্হন্তি চ একচিতকাযং.

২২০.

‘‘খীণকুলীনে কপণে, অনুভূতং তে দুখং অপরিমাণং;

অস্সূ চ তে পৰত্তং, বহূনি চ জাতিসহস্সানি.

২২১.

‘‘ৰসিতা সুসানমজ্ঝে, অথোপি খাদিতানি পুত্তমংসানি;

হতকুলিকা ¶ সব্বগরহিতা, মতপতিকা অমতমধিগচ্ছিং.

২২২.

‘‘ভাৰিতো মে মগ্গো, অরিযো অট্ঠঙ্গিকো অমতগামী;

নিব্বানং সচ্ছিকতং, ধম্মাদাসং অৰেক্খিংহং [অপেক্খিহং (সী.)].

২২৩.

‘‘অহমম্হি কন্তসল্লা, ওহিতভারা কতঞ্হি করণীযং;

কিসা গোতমী থেরী, ৰিমুত্তচিত্তা ইমং ভণী’’তি.

… কিসা গোতমী থেরী….

একাদসনিপাতো নিট্ঠিতো.

১১. দ্ৰাদসকনিপাতো

১. উপ্পলৰণ্ণাথেরীগাথা

২২৪.

‘‘উভো ¶ ¶ মাতা চ ধীতা চ, মযং আসুং [আভুং (সী.)] সপত্তিযো;

তস্সা মে অহু সংৰেগো, অব্ভুতো লোমহংসনো.

২২৫.

‘‘ধিরত্থু কামা অসুচী, দুগ্গন্ধা বহুকণ্টকা;

যত্থ মাতা চ ধীতা চ, সভরিযা মযং অহুং.

২২৬.

‘‘কামেস্ৰাদীনৰং ¶ দিস্ৰা, নেক্খম্মং দট্ঠু খেমতো;

সা পব্বজ্জিং রাজগহে, অগারস্মানগারিযং.

২২৭.

‘‘পুব্বেনিৰাসং জানামি, দিব্বচক্খুং ৰিসোধিতং;

চেতোপরিচ্চঞাণঞ্চ, সোতধাতু ৰিসোধিতা.

২২৮.

‘‘ইদ্ধীপি মে সচ্ছিকতা, পত্তো মে আসৰক্খযো;

ছল়ভিঞ্ঞা সচ্ছিকতা, কতং বুদ্ধস্স সাসনং.

২২৯.

‘‘ইদ্ধিযা ¶ অভিনিম্মিত্ৰা, চতুরস্সং রথং অহং;

বুদ্ধস্স পাদে ৰন্দিত্ৰা, লোকনাথস্স তাদিনো’’ [সিরীমতো (স্যা. ক.)].

২৩০.

‘‘সুপুপ্ফিতগ্গং উপগম্ম পাদপং, একা তুৰং তিট্ঠসি সালমূলে [রুক্খমূলে (স্যা. ক.)];

ন চাপি তে দুতিযো অত্থি কোচি, ন ত্ৰং বালে ভাযসি ধুত্তকানং’’.

২৩১.

‘‘সতং সহস্সানিপি ধুত্তকানং, সমাগতা এদিসকা ভৰেয্যুং;

লোমং ন ইঞ্জে নপি সম্পৰেধে, কিং মে তুৰং মার করিস্সসেকো.

২৩২.

‘‘এসা অন্তরধাযামি, কুচ্ছিং ৰা পৰিসামি তে;

ভমুকন্তরে তিট্ঠামি, তিট্ঠন্তিং মং ন দক্খসি.

২৩৩.

‘‘চিত্তম্হি ¶ ৰসীভূতাহং, ইদ্ধিপাদা সুভাৰিতা;

ছল়ভিঞ্ঞা সচ্ছিকতা, কতং বুদ্ধস্স সাসনং.

২৩৪.

‘‘সত্তিসূলূপমা কামা, খন্ধাসং অধিকুট্টনা;

যং ত্ৰং ‘কামরতিং’ ব্রূসি, ‘অরতী’ দানি সা মম.

২৩৫.

‘‘সব্বত্থ ¶ ৰিহতা নন্দী, তমোখন্ধো পদালিতো;

এৰং জানাহি পাপিম, নিহতো ত্ৰমসি অন্তকা’’তি.

… উপ্পলৰণ্ণা থেরী….

দ্ৰাদসনিপাতো নিট্ঠিতো.

১২. সোল়সনিপাতো

১. পুণ্ণাথেরীগাথা

২৩৬.

‘‘উদহারী ¶ ¶ ¶ অহং সীতে [উদকমাহরিং সীতে (সী.)], সদা উদকমোতরিং;

অয্যানং দণ্ডভযভীতা, ৰাচাদোসভযট্টিতা.

২৩৭.

‘‘কস্স ব্রাহ্মণ ত্ৰং ভীতো, সদা উদকমোতরি;

ৰেধমানেহি গত্তেহি, সীতং ৰেদযসে ভুসং’’.

২৩৮.

জানন্তী ৰত মং [জানন্তী চ তুৰং (ক.)] ভোতি, পুণ্ণিকে পরিপুচ্ছসি;

করোন্তং কুসলং কম্মং, রুন্ধন্তং কতপাপকং.

২৩৯.

‘‘যো চ ৰুড্ঢো দহরো ৰা, পাপকম্মং পকুব্বতি;

দকাভিসেচনা সোপি, পাপকম্মা পমুচ্চতি’’.

২৪০.

‘‘কো নু তে ইদমক্খাসি, অজানন্তস্স অজানকো;

দকাভিসেচনা নাম, পাপকম্মা পমুচ্চতি.

২৪১.

‘‘সগ্গং নূন গমিস্সন্তি, সব্বে মণ্ডূককচ্ছপা;

নাগা [নক্কা (সী.)] চ সুসুমারা চ, যে চঞ্ঞে উদকে চরা.

২৪২.

‘‘ওরব্ভিকা সূকরিকা, মচ্ছিকা মিগবন্ধকা;

চোরা চ ৰজ্ঝঘাতা চ, যে চঞ্ঞে পাপকম্মিনো;

দকাভিসেচনা তেপি, পাপকম্মা পমুচ্চরে.

২৪৩.

‘‘সচে ইমা নদিযো তে, পাপং পুব্বে কতং ৰহুং;

পুঞ্ঞম্পিমা ¶ ৰহেয্যুং তে, তেন ত্ৰং পরিবাহিরো.

২৪৪.

‘‘যস্স ¶ ব্রাহ্মণ ত্ৰং ভীতো, সদা উদকমোতরি;

তমেৰ ব্রহ্মে মা কাসি, মা তে সীতং ছৰিং হনে’’.

২৪৫.

‘‘কুম্মগ্গপটিপন্নং মং, অরিযমগ্গং সমানযি;

দকাভিসেচনা ভোতি, ইমং সাটং দদামি তে’’.

২৪৬.

‘‘তুয্হেৰ সাটকো হোতু, নাহমিচ্ছামি সাটকং;

সচে ভাযসি দুক্খস্স, সচে তে দুক্খমপ্পিযং.

২৪৭.

‘‘মাকাসি ¶ ¶ পাপকং কম্মং, আৰি ৰা যদি ৰা রহো;

সচে চ পাপকং কম্মং, করিস্সসি করোসি ৰা.

২৪৮.

‘‘ন তে দুক্খা পমুত্যত্থি, উপেচ্চাপি [উপ্পচ্চাপি (অট্ঠ. পাঠন্তরং)] পলাযতো;

সচে ভাযসি দুক্খস্স, সচে তে দুক্খমপ্পিযং.

২৪৯.

‘‘উপেহি সরণং বুদ্ধং, ধম্মং সঙ্ঘঞ্চ তাদিনং;

সমাদিযাহি সীলানি, তং তে অত্থায হেহিতি’’.

২৫০.

‘‘উপেমি সরণং বুদ্ধং, ধম্মং সঙ্ঘঞ্চ তাদিনং;

সমাদিযামি সীলানি, তং মে অত্থায হেহিতি.

২৫১.

‘‘ব্রহ্মবন্ধু পুরে আসিং, অজ্জম্হি সচ্চব্রাহ্মণো;

তেৰিজ্জো ৰেদসম্পন্নো, সোত্তিযো চম্হি ন্হাতকো’’তি.

… পুণ্ণা থেরী….

সোল়সনিপাতো নিট্ঠিতো.

১৩. ৰীসতিনিপাতো

১. অম্বপালীথেরীগাথা

২৫২.

‘‘কাল়কা ¶ ¶ ভমরৰণ্ণসাদিসা, ৰেল্লিতগ্গা মম মুদ্ধজা অহুং;

তে জরায সাণৰাকসাদিসা, সচ্চৰাদিৰচনং অনঞ্ঞথা.

২৫৩.

‘‘ৰাসিতোৰ সুরভী করণ্ডকো, পুপ্ফপূর মম উত্তমঙ্গজো [উত্তমঙ্গভূতো (ক.)].

তং জরাযথ সলোমগন্ধিকং, সচ্চৰাদিৰচনং অনঞ্ঞথা.

২৫৪.

‘‘কাননংৰ ¶ সহিতং সুরোপিতং, কোচ্ছসূচিৰিচিতগ্গসোভিতং;

তং জরায ৰিরলং তহিং তহিং, সচ্চৰাদিৰচনং অনঞ্ঞথা.

২৫৫.

‘‘কণ্হখন্ধকসুৰণ্ণমণ্ডিতং, সোভতে সুৰেণীহিলঙ্কতং;

তং ¶ জরায খলিতং সিরং কতং, সচ্চৰাদিৰচনং অনঞ্ঞথা.

২৫৬.

‘‘চিত্তকারসুকতাৰ লেখিকা, সোভরে সু ভমুকা পুরে মম;

তা ¶ জরায ৰলিভিপ্পলম্বিতা, সচ্চৰাদিৰচনং অনঞ্ঞথা.

২৫৭.

‘‘ভস্সরা সুরুচিরা যথা মণী, নেত্তহেসুমভিনীলমাযতা;

তে জরাযভিহতা ন সোভরে, সচ্চৰাদিৰচনং অনঞ্ঞথা.

২৫৮.

‘‘সণ্হতুঙ্গসদিসী ¶ চ নাসিকা, সোভতে সু অভিযোব্বনং পতি;

সা জরায উপকূলিতা ৰিয, সচ্চৰাদিৰচনং অনঞ্ঞথা.

২৫৯.

‘‘কঙ্কণং ৰ সুকতং সুনিট্ঠিতং, সোভরে সু মম কণ্ণপাল়িযো;

তা জরায ৰলিভিপ্পলম্বিতা, সচ্চৰাদিৰচনং অনঞ্ঞথা.

২৬০.

‘‘পত্তলীমকুলৰণ্ণসাদিসা, সোভরে সু দন্তা পুরে মম;

তে জরায খণ্ডিতা চাসিতা [পীতকা (সী.)], সচ্চৰাদিৰচনং অনঞ্ঞথা.

২৬১.

‘‘কাননম্হি ৰনসণ্ডচারিনী, কোকিলাৰ ¶ মধুরং নিকূজিহং;

তং জরায খলিতং তহিং তহিং, সচ্চৰাদিৰচনং অনঞ্ঞথা.

২৬২.

‘‘সণ্হকম্বুরিৰ সুপ্পমজ্জিতা, সোভতে সু গীৰা পুরে মম;

সা জরায ভগ্গা [ভঞ্জিতা (?)] ৰিনামিতা, সচ্চৰাদিৰচনং অনঞ্ঞথা.

২৬৩.

‘‘ৰট্টপলিঘসদিসোপমা ¶ উভো, সোভরে সু বাহা পুরে মম;

তা জরায যথ পাটলিব্বলিতা [যথা পাটলিপ্পলিতা (সী. স্যা. ক.)], সচ্চৰাদিৰচনং অনঞ্ঞথা.

২৬৪.

‘‘সণ্হমুদ্দিকসুৰণ্ণমণ্ডিতা, সোভরে সু হত্থা পুরে মম;

তে জরায যথা মূলমূলিকা, সচ্চৰাদিৰচনং অনঞ্ঞথা.

২৬৫.

‘‘পীনৰট্টসহিতুগ্গতা ¶ উভো, সোভরে [সোভতে (অট্ঠ.)] সু থনকা পুরে মম;

থেৰিকীৰ লম্বন্তি নোদকা, সচ্চৰাদিৰচনং ¶ অনঞ্ঞথা.

২৬৬.

‘‘কঞ্চনস্সফলকংৰ সম্মট্ঠং, সোভতে সু কাযো পুরে মম;

সো ৰলীহি সুখুমাহি ওততো, সচ্চৰাদিৰচনং অনঞ্ঞথা.

২৬৭.

‘‘নাগভোগসদিসোপমা উভো, সোভরে সু ঊরূ পুরে মম;

তে জরায যথা ৰেল়ুনাল়িযো, সচ্চৰাদিৰচনং অনঞ্ঞথা.

২৬৮.

‘‘সণ্হনূপুরসুৰণ্ণমণ্ডিতা ¶ , সোভরে সু জঙ্ঘা পুরে মম;

তা জরায তিলদণ্ডকারিৰ, সচ্চৰাদিৰচনং অনঞ্ঞথা.

২৬৯.

‘‘তূলপুণ্ণসদিসোপমা উভো, সোভরে সু পাদা পুরে মম;

তে জরায ফুটিতা ৰলীমতা, সচ্চৰাদিৰচনং অনঞ্ঞথা.

২৭০.

‘‘এদিসো অহু অযং সমুস্সযো, জজ্জরো বহুদুক্খানমালযো;

সোপলেপপতিতো ¶ জরাঘরো, সচ্চৰাদিৰচনং অনঞ্ঞথা’’.

… অম্বপালী থেরী….

২. রোহিনীথেরীগাথা

২৭১.

‘‘‘সমণা’তি ¶ ভোতি সুপি [ভোতি ত্ৰং সযসি (সী.), ভোতি মং ৰিপস্সি (স্যা.)], ‘সমণা’তি পবুজ্ঝসি [পটিবুজ্ঝসি (সী. স্যা.)];

সমণানেৰ [সমণানমেৰ (সী. স্যা.)] কিত্তেসি, সমণী নূন [সমণী নু (ক.)] ভৰিস্সসি.

২৭২.

‘‘ৰিপুলং ¶ অন্নঞ্চ পানঞ্চ, সমণানং পৰেচ্চসি [পযচ্ছসি (সী.)];

রোহিনী দানি পুচ্ছামি, কেন তে সমণা পিযা.

২৭৩.

‘‘অকম্মকামা অলসা, পরদত্তূপজীৰিনো;

আসংসুকা সাদুকামা, কেন তে সমণা পিযা’’.

২৭৪.

‘‘চিরস্সং ৰত মং তাত, সমণানং পরিপুচ্ছসি;

তেসং তে কিত্তযিস্সামি, পঞ্ঞাসীলপরক্কমং.

২৭৫.

‘‘কম্মকামা অনলসা, কম্মসেট্ঠস্স কারকা;

রাগং দোসং পজহন্তি, তেন মে সমণা পিযা.

২৭৬.

‘‘তীণি পাপস্স মূলানি, ধুনন্তি সুচিকারিনো;

সব্বং পাপং পহীনেসং, তেন মে সমণা পিযা.

২৭৭.

‘‘কাযকম্মং সুচি নেসং, ৰচীকম্মঞ্চ তাদিসং;

মনোকম্মং সুচি নেসং, তেন মে সমণা পিযা.

২৭৮.

‘‘ৰিমলা সঙ্খমুত্তাৰ, সুদ্ধা সন্তরবাহিরা;

পুণ্ণা সুক্কান ধম্মানং [সুক্কেহি ধম্মেহি (সী. স্যা. অট্ঠ.)], তেন মে সমণা পিযা.

২৭৯.

‘‘বহুস্সুতা ধম্মধরা, অরিযা ধম্মজীৰিনো;

অত্থং ধম্মঞ্চ দেসেন্তি, তেন মে সমণা পিযা.

২৮০.

‘‘বহুস্সুতা ¶ ধম্মধরা, অরিযা ধম্মজীৰিনো;

একগ্গচিত্তা সতিমন্তো, তেন মে সমণা পিযা.

২৮১.

‘‘দূরঙ্গমা ¶ সতিমন্তো, মন্তভাণী অনুদ্ধতা;

দুক্খস্সন্তং পজানন্তি, তেন মে সমণা পিযা.

২৮২.

‘‘যস্মা গামা পক্কমন্তি, ন ৰিলোকেন্তি কিঞ্চনং;

অনপেক্খাৰ গচ্ছন্তি, তেন মে সমণা পিযা.

২৮৩.

‘‘ন ¶ তেসং কোট্ঠে ওপেন্তি, ন কুম্ভিং ন খল়োপিযং;

পরিনিট্ঠিতমেসানা, তেন মে সমণা পিযা.

২৮৪.

‘‘ন তে হিরঞ্ঞং গণ্হন্তি, ন সুৰণ্ণং ন রূপিযং;

পচ্চুপ্পন্নেন যাপেন্তি, তেন মে সমণা পিযা.

২৮৫.

‘‘নানাকুলা ¶ পব্বজিতা, নানাজনপদেহি চ;

অঞ্ঞমঞ্ঞং পিযাযন্তি [পিহযন্তি (ক.)], তেন মে সমণা পিযা’’.

২৮৬.

‘‘অত্থায ৰত নো ভোতি, কুলে জাতাসি রোহিনী;

সদ্ধা বুদ্ধে চ ধম্মে চ, সঙ্ঘে চ তিব্বগারৰা.

২৮৭.

‘‘তুৰং হেতং পজানাসি, পুঞ্ঞক্খেত্তং অনুত্তরং;

অম্হম্পি এতে সমণা, পটিগণ্হন্তি দক্খিণং’’.

২৮৮.

‘‘পতিট্ঠিতো হেত্থ যঞ্ঞো, ৰিপুলো নো ভৰিস্সতি;

সচে ভাযসি দুক্খস্স, সচে তে দুক্খমপ্পিযং.

২৮৯.

‘‘উপেহি সরণং বুদ্ধং, ধম্মং সঙ্ঘঞ্চ তাদিনং;

সমাদিযাহি সীলানি, তং তে অত্থায হেহিতি’’.

২৯০.

‘‘উপেমি ¶ সরণং বুদ্ধং, ধম্মং সঙ্ঘঞ্চ তাদিনং;

সমাদিযামি সীলানি, তং মে অত্থায হেহিতি.

২৯১.

‘‘ব্রহ্মবন্ধু পুরে আসিং, সো ইদানিম্হি ব্রাহ্মণো;

তেৰিজ্জো সোত্তিযো চম্হি, ৰেদগূ চম্হি ন্হাতকো’’.

… রোহিনী থেরী….

৩. চাপাথেরীগাথা

২৯২.

‘‘লট্ঠিহত্থো পুরে আসি, সো দানি মিগলুদ্দকো;

আসায পলিপা ঘোরা, নাসক্খি পারমেতৰে.

২৯৩.

‘‘সুমত্তং মং মঞ্ঞমানা, চাপা পুত্তমতোসযি;

চাপায বন্ধনং ছেত্ৰা, পব্বজিস্সং পুনোপহং.

২৯৪.

‘‘মা ¶ মে কুজ্ঝি মহাৰীর, মা মে কুজ্ঝি মহামুনি;

ন হি কোধপরেতস্স, সুদ্ধি অত্থি কুতো তপো.

২৯৫.

‘‘পক্কমিস্সঞ্চ ¶ নাল়াতো, কোধ নাল়ায ৰচ্ছতি;

বন্ধন্তী ইত্থিরূপেন, সমণে ধম্মজীৰিনো’’ [ধম্মজীৰিনে (ক.)].

২৯৬.

‘‘এহি কাল় নিৰত্তস্সু, ভুঞ্জ কামে যথা পুরে;

অহঞ্চ তে ৰসীকতা, যে চ মে সন্তি ঞাতকা’’.

২৯৭.

‘‘এত্তো ¶ চাপে চতুব্ভাগং, যথা ভাসসি ত্ৰঞ্চ মে;

তযি রত্তস্স পোসস্স, উল়ারং ৰত তং সিযা’’.

২৯৮.

‘‘কাল়ঙ্গিনিংৰ তক্কারিং, পুপ্ফিতং গিরিমুদ্ধনি;

ফুল্লং দালিমলট্ঠিংৰ, অন্তোদীপেৰ পাটলিং.

২৯৯.

‘‘হরিচন্দনলিত্তঙ্গিং, কাসিকুত্তমধারিনিং;

তং ¶ মং রূপৰতিং সন্তিং, কস্স ওহায গচ্ছসি’’.

৩০০.

‘‘সাকুন্তিকোৰ সকুণিং [সকুণং (স্যা.)], যথা বন্ধিতুমিচ্ছতি;

আহরিমেন রূপেন, ন মং ত্ৰং বাধযিস্সসি’’.

৩০১.

‘‘ইমঞ্চ মে পুত্তফলং, কাল় উপ্পাদিতং তযা;

তং মং পুত্তৰতিং সন্তিং, কস্স ওহায গচ্ছসি’’.

৩০২.

‘‘জহন্তি পুত্তে সপ্পঞ্ঞা, ততো ঞাতী ততো ধনং;

পব্বজন্তি মহাৰীরা, নাগো ছেত্ৰাৰ বন্ধনং’’.

৩০৩.

‘‘ইদানি তে ইমং পুত্তং, দণ্ডেন ছুরিকায ৰা;

ভূমিযং ৰা নিসুম্ভিস্সং [নিসুম্ভেয্যং (সী.)], পুত্তসোকা ন গচ্ছসি’’.

৩০৪.

‘‘সচে পুত্তং সিঙ্গালানং, কুক্কুরানং পদাহিসি;

ন মং পুত্তকত্তে জম্মি, পুনরাৰত্তযিস্সসি’’.

৩০৫.

‘‘হন্দ খো দানি ভদ্দন্তে, কুহিং কাল় গমিস্সসি;

কতমং ¶ গামনিগমং, নগরং রাজধানিযো’’.

৩০৬.

‘‘অহুম্হ পুব্বে গণিনো, অস্সমণা সমণমানিনো;

গামেন গামং ৰিচরিম্হ, নগরে রাজধানিযো.

৩০৭.

‘‘এসো হি ভগৰা বুদ্ধো, নদিং নেরঞ্জরং পতি;

সব্বদুক্খপ্পহানায, ধম্মং দেসেতি পাণিনং;

তস্সাহং সন্তিকং গচ্ছং, সো মে সত্থা ভৰিস্সতি’’.

৩০৮.

‘‘ৰন্দনং ¶ দানি ৰজ্জাসি, লোকনাথং অনুত্তরং;

পদক্খিণঞ্চ কত্ৰান, আদিসেয্যাসি দক্খিণং’’.

৩০৯.

‘‘এতং খো লব্ভমম্হেহি, যথা ভাসসি ত্ৰঞ্চ মে;

ৰন্দনং দানি তে ৰজ্জং, লোকনাথং অনুত্তরং;

পদক্খিণঞ্চ ¶ কত্ৰান, আদিসিস্সামি দক্খিণং’’.

৩১০.

ততো ¶ চ কাল়ো পক্কামি, নদিং নেরঞ্জরং পতি;

সো অদ্দসাসি সম্বুদ্ধং, দেসেন্তং অমতং পদং.

৩১১.

দুক্খং দুক্খসমুপ্পাদং, দুক্খস্স চ অতিক্কমং;

অরিযং চট্ঠঙ্গিকং মগ্গং, দুক্খূপসমগামিনং.

৩১২.

তস্স পাদানি ৰন্দিত্ৰা, কত্ৰান নং [কত্ৰানহং (সী.)] পদক্খিণং;

চাপায আদিসিত্ৰান, পব্বজিং অনগারিযং;

তিস্সো ৰিজ্জা অনুপ্পত্তা, কতং বুদ্ধস্স সাসনং.

… চাপা থেরী….

৪. সুন্দরীথেরীগাথা

৩১৩.

‘‘পেতানি ভোতি পুত্তানি, খাদমানা তুৰং পুরে;

তুৰং দিৰা চ রত্তো চ, অতীৰ পরিতপ্পসি.

৩১৪.

‘‘সাজ্জ সব্বানি খাদিত্ৰা, সতপুত্তানি [সত্ত পুত্তানি (স্যা.)] ব্রাহ্মণী;

ৰাসেট্ঠি কেন ৰণ্ণেন, ন বাল়্হং পরিতপ্পসি’’.

৩১৫.

‘‘বহূনি পুত্তসতানি, ঞাতিসঙ্ঘসতানি চ;

খাদিতানি অতীতংসে, মম তুয্হঞ্চ ব্রাহ্মণ.

৩১৬.

‘‘সাহং নিস্সরণং ঞত্ৰা, জাতিযা মরণস্স চ;

ন ¶ সোচামি ন রোদামি, ন চাপি পরিতপ্পযিং’’.

৩১৭.

‘‘অব্ভুতং ¶ ৰত ৰাসেট্ঠি, ৰাচং ভাসসি এদিসিং;

কস্স ত্ৰং ধম্মমঞ্ঞায, গিরং [থিরং (সী.)] ভাসসি এদিসিং’’.

৩১৮.

‘‘এস ব্রাহ্মণ সম্বুদ্ধো, নগরং মিথিলং পতি;

সব্বদুক্খপ্পহানায, ধম্মং দেসেসি পাণিনং.

৩১৯.

‘‘তস্স ব্রহ্মে [ব্রাহ্মণ (সী. স্যা.)] অরহতো, ধম্মং সুত্ৰা নিরূপধিং;

তত্থ ৰিঞ্ঞাতসদ্ধম্মা, পুত্তসোকং ব্যপানুদিং’’.

৩২০.

‘‘সো ¶ অহম্পি গমিস্সামি, নগরং মিথিলং পতি;

অপ্পেৰ মং সো ভগৰা, সব্বদুক্খা পমোচযে’’.

৩২১.

অদ্দস ¶ ব্রাহ্মণো বুদ্ধং, ৰিপ্পমুত্তং নিরূপধিং;

স্ৰস্স ধম্মমদেসেসি, মুনি দুক্খস্স পারগূ.

৩২২.

দুক্খং দুক্খসমুপ্পাদং, দুক্খস্স চ অতিক্কমং;

অরিযং চট্ঠঙ্গিকং মগ্গং, দুক্খূপসমগামিনং.

৩২৩.

তত্থ ৰিঞ্ঞাতসদ্ধম্মো, পব্বজ্জং সমরোচযি;

সুজাতো তীহি রত্তীহি, তিস্সো ৰিজ্জা অফস্সযি.

৩২৪.

‘‘এহি সারথি গচ্ছাহি, রথং নিয্যাদযাহিমং;

আরোগ্যং ব্রাহ্মণিং ৰজ্জ [ৰজ্জা (সী.)], ‘পব্বজি [পব্বজিতো (সী.)] দানি ব্রাহ্মণো;

সুজাতো তীহি রত্তীহি, তিস্সো ৰিজ্জা অফস্সযি’’’.

৩২৫.

ততো চ রথমাদায, সহস্সঞ্চাপি সারথি;

আরোগ্যং ¶ ব্রাহ্মণিৰোচ, ‘‘পব্বজি দানি ব্রাহ্মণো;

সুজাতো তীহি রত্তীহি, তিস্সো ৰিজ্জা অফস্সযি’’.

৩২৬.

‘‘এতঞ্চাহং অস্সরথং, সহস্সঞ্চাপি সারথি;

তেৰিজ্জং ব্রাহ্মণং সুত্ৰা [ঞত্ৰা (সী.)], পুণ্ণপত্তং দদামি তে’’.

৩২৭.

‘‘তুয্হেৰ হোত্ৰস্সরথো, সহস্সঞ্চাপি ব্রাহ্মণি;

অহম্পি পব্বজিস্সামি, ৰরপঞ্ঞস্স সন্তিকে’’.

৩২৮.

‘‘হত্থী ¶ গৰস্সং মণিকুণ্ডলঞ্চ, ফীতঞ্চিমং গহৰিভৰং পহায;

পিতা পব্বজিতো তুয্হং, ভুঞ্জ ভোগানি সুন্দরি; তুৰং দাযাদিকা কুলে’’.

৩২৯.

‘‘হত্থী গৰস্সং মণিকুণ্ডলঞ্চ, রম্মং চিমং গহৰিভৰং পহায;

পিতা পব্বজিতো ময্হং, পুত্তসোকেন অট্টিতো;

অহম্পি পব্বজিস্সামি, ভাতুসোকেন অট্টিতা’’.

৩৩০.

‘‘সো তে ইজ্ঝতু সঙ্কপ্পো, যং ত্ৰং পত্থেসি সুন্দরী;

উত্তিট্ঠপিণ্ডো উঞ্ছো চ, পংসুকূলঞ্চ চীৰরং;

এতানি অভিসম্ভোন্তী, পরলোকে অনাসৰা’’.

৩৩১.

‘‘সিক্খমানায ¶ মে অয্যে, দিব্বচক্খু ৰিসোধিতং;

পুব্বেনিৰাসং জানামি, যত্থ মে ৰুসিতং পুরে.

৩৩২.

‘‘তুৰং ¶ ¶ নিস্সায কল্যাণী, থেরী সঙ্ঘস্স সোভনে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৩৩৩.

‘‘অনুজানাহি মে অয্যে, ইচ্ছে সাৰত্থি গন্তৰে;

সীহনাদং নদিস্সামি, বুদ্ধসেট্ঠস্স সন্তিকে’’.

৩৩৪.

‘‘পস্স সুন্দরি সত্থারং, হেমৰণ্ণং হরিত্তচং;

অদন্তানং দমেতারং, সম্বুদ্ধমকুতোভযং’’.

৩৩৫.

‘‘পস্স সুন্দরিমাযন্তিং, ৰিপ্পমুত্তং নিরূপধিং;

ৰীতরাগং ৰিসংযুত্তং, কতকিচ্চমনাসৰং.

৩৩৬.

‘‘বারাণসীতো নিক্খম্ম, তৰ সন্তিকমাগতা;

সাৰিকা তে মহাৰীর, পাদে ৰন্দতি সুন্দরী’’.

৩৩৭.

‘‘তুৰং বুদ্ধো তুৰং সত্থা, তুয্হং ধীতাম্হি ব্রাহ্মণ;

ওরসা মুখতো জাতা, কতকিচ্চা অনাসৰা’’.

৩৩৮.

‘‘তস্সা ¶ তে স্ৰাগতং ভদ্দে, ততো [অথো (ক.)] তে অদুরাগতং;

এৰঞ্হি দন্তা আযন্তি, সত্থু পাদানি ৰন্দিকা;

ৰীতরাগা ৰিসংযুত্তা, কতকিচ্চা অনাসৰা’’.

… সুন্দরী থেরী….

৫. সুভাকম্মারধীতুথেরীগাথা

৩৩৯.

‘‘দহরাহং সুদ্ধৰসনা, যং পুরে ধম্মমস্সুণিং;

তস্সা মে অপ্পমত্তায, সচ্চাভিসমযো অহু.

৩৪০.

‘‘ততোহং সব্বকামেসু, ভুসং অরতিমজ্ঝগং;

সক্কাযস্মিং ভযং দিস্ৰা, নেক্খম্মমেৰ [নেক্খম্মঞ্ঞেৰ (সী.), নেক্খম্মস্সেৰ (স্যা.)] পীহযে.

৩৪১.

‘‘হিত্ৰানহং ¶ ঞাতিগণং, দাসকম্মকরানি চ;

গামখেত্তানি ফীতানি, রমণীযে পমোদিতে.

৩৪২.

‘‘পহাযহং ¶ পব্বজিতা, সাপতেয্যমনপ্পকং;

এৰং সদ্ধায নিক্খম্ম, সদ্ধম্মে সুপ্পৰেদিতে.

৩৪৩.

‘‘নেতং [ন মেতং (সী. স্যা.)] অস্স পতিরূপং, আকিঞ্চঞ্ঞঞ্হি পত্থযে;

যো [যা (স্যা.)] জাতরূপং রজতং, ছড্ডেত্ৰা [থপেত্ৰা (ক.)] পুনরাগমে [পুনরাগহে (ক.)].

৩৪৪.

‘‘রজতং ¶ জাতরূপং ৰা, ন বোধায ন সন্তিযা;

নেতং সমণসারুপ্পং, ন এতং অরিযদ্ধনং.

৩৪৫.

‘‘লোভনং মদনঞ্চেতং, মোহনং রজৰড্ঢনং;

সাসঙ্কং বহুআযাসং, নত্থি চেত্থ ধুৰং ঠিতি.

৩৪৬.

‘‘এত্থ রত্তা পমত্তা চ, সঙ্কিলিট্ঠমনা নরা;

অঞ্ঞমঞ্ঞেন ব্যারুদ্ধা, পুথু কুব্বন্তি মেধগং.

৩৪৭.

‘‘ৰধো বন্ধো পরিক্লেসো, জানি সোকপরিদ্দৰো;

কামেসু অধিপন্নানং, দিস্সতে ব্যসনং বহুং.

৩৪৮.

‘‘তং মং ঞাতী অমিত্তাৰ, কিং ৰো কামেসু যুঞ্জথ;

জানাথ মং পব্বজিতং, কামেসু ভযদস্সিনিং.

৩৪৯.

‘‘ন ¶ হিরঞ্ঞসুৰণ্ণেন, পরিক্খীযন্তি আসৰা;

অমিত্তা ৰধকা কামা, সপত্তা সল্লবন্ধনা.

৩৫০.

‘‘তং ¶ মং ঞাতী অমিত্তাৰ, কিং ৰো কামেসু যুঞ্জথ;

জানাথ মং পব্বজিতং, মুণ্ডং সঙ্ঘাটিপারুতং.

৩৫১.

‘‘উত্তিট্ঠপিণ্ডো উঞ্ছো চ, পংসুকূলঞ্চ চীৰরং;

এতং খো মম সারুপ্পং, অনগারূপনিস্সযো.

৩৫২.

‘‘ৰন্তা মহেসীহি কামা, যে দিব্বা যে চ মানুসা;

খেমট্ঠানে ৰিমুত্তা তে, পত্তা তে অচলং সুখং.

৩৫৩.

‘‘মাহং কামেহি সঙ্গচ্ছিং, যেসু তাণং ন ৰিজ্জতি;

অমিত্তা ৰধকা কামা, অগ্গিক্খন্ধূপমা দুখা.

৩৫৪.

‘‘পরিপন্থো ¶ এস ভযো, সৰিঘাতো সকণ্টকো;

গেধো সুৰিসমো চেসো [লেপো (সী.)], মহন্তো মোহনামুখো.

৩৫৫.

‘‘উপসগ্গো ভীমরূপো, কামা সপ্পসিরূপমা;

যে বালা অভিনন্দন্তি, অন্ধভূতা পুথুজ্জনা.

৩৫৬.

‘‘কামপঙ্কেন সত্তা হি, বহূ লোকে অৰিদ্দসূ;

পরিযন্তং ন জানন্তি, জাতিযা মরণস্স চ.

৩৫৭.

‘‘দুগ্গতিগমনং মগ্গং, মনুস্সা কামহেতুকং;

বহুং ৰে পটিপজ্জন্তি, অত্তনো রোগমাৰহং.

৩৫৮.

‘‘এৰং ¶ অমিত্তজননা, তাপনা সংকিলেসিকা;

লোকামিসা বন্ধনীযা, কামা মরণবন্ধনা [চরণবন্ধনা (সী.)].

৩৫৯.

‘‘উম্মাদনা ¶ উল্লপনা, কামা চিত্তপ্পমদ্দিনো;

সত্তানং সঙ্কিলেসায, খিপ্পং [খিপং (সী.)] মারেন ওড্ডিতং.

৩৬০.

‘‘অনন্তাদীনৰা কামা, বহুদুক্খা মহাৰিসা;

অপ্পস্সাদা ¶ রণকরা, সুক্কপক্খৰিসোসনা [ৰিসোসকা (সী.)].

৩৬১.

‘‘সাহং এতাদিসং কত্ৰা, ব্যসনং কামহেতুকং;

ন তং পচ্চাগমিস্সামি, নিব্বানাভিরতা সদা.

৩৬২.

‘‘রণং করিত্ৰা [তরিত্ৰা (সী.)] কামানং, সীতিভাৰাভিকঙ্খিনী;

অপ্পমত্তা ৰিহস্সামি, সব্বসংযোজনক্খযে.

৩৬৩.

‘‘অসোকং ৰিরজং খেমং, অরিযট্ঠঙ্গিকং উজুং;

তং মগ্গং অনুগচ্ছামি, যেন তিণ্ণা মহেসিনো’’.

৩৬৪.

ইমং পস্সথ ধম্মট্ঠং, সুভং কম্মারধীতরং;

অনেজং উপসম্পজ্জ, রুক্খমূলম্হি ঝাযতি.

৩৬৫.

অজ্জট্ঠমী পব্বজিতা, সদ্ধা সদ্ধম্মসোভনা;

ৰিনীতুপ্পলৰণ্ণায, তেৰিজ্জা মচ্চুহাযিনী.

৩৬৬.

সাযং ¶ ভুজিস্সা অনণা, ভিক্খুনী ভাৰিতিন্দ্রিযা;

সব্বযোগৰিসংযুত্তা, কতকিচ্চা অনাসৰা.

৩৬৭.

তং সক্কো দেৰসঙ্ঘেন, উপসঙ্কম্ম ইদ্ধিযা;

নমস্সতি ভূতপতি, সুভং কম্মারধীতরন্তি.

… সুভা কম্মারধীতা থেরী….

ৰীসতিনিপাতো নিট্ঠিতো.

১৪. তিংসনিপাতো

১. সুভাজীৰকম্বৰনিকাথেরীগাথা

৩৬৮.

জীৰকম্বৰনং ¶ ¶ ¶ রম্মং, গচ্ছন্তিং ভিক্খুনিং সুভং;

ধুত্তকো সন্নিৰারেসি [তং নিৰারেসি (ক.)], তমেনং অব্রৰী সুভা.

৩৬৯.

‘‘কিং তে অপরাধিতং মযা, যং মং ওৰরিযান তিট্ঠসি;

ন হি পব্বজিতায আৰুসো, পুরিসো সম্ফুসনায কপ্পতি.

৩৭০.

‘‘গরুকে মম সত্থুসাসনে, যা সিক্খা সুগতেন দেসিতা;

পরিসুদ্ধপদং ¶ অনঙ্গণং, কিং মং ওৰরিযান তিট্ঠসি.

৩৭১.

‘‘আৰিলচিত্তো অনাৰিলং, সরজো ৰীতরজং অনঙ্গণং;

সব্বত্থ ৰিমুত্তমানসং, কিং মং ওৰরিযান তিট্ঠসি’’.

৩৭২.

‘‘দহরা চ অপাপিকা চসি, কিং তে পব্বজ্জা করিস্সতি;

নিক্খিপ কাসাযচীৰরং, এহি রমাম সুপুপ্ফিতে [রমামসে পুপ্ফিতে (সী. স্যা.)] ৰনে.

৩৭৩.

‘‘মধুরঞ্চ পৰন্তি সব্বসো, কুসুমরজেন সমুট্ঠিতা দুমা;

পঠমৰসন্তো সুখো উতু, এহি রমাম সুপুপ্ফিতে ৰনে.

৩৭৪.

‘‘কুসুমিতসিখরা চ পাদপা, অভিগজ্জন্তিৰ মালুতেরিতা;

কা তুয্হং রতি ভৰিস্সতি, যদি একা ৰনমোগহিস্সসি [ৰনমোতরিস্সসি (সী.), ৰনমোগাহিস্সসি (স্যা. ক.)].

৩৭৫.

‘‘ৰাল়মিগসঙ্ঘসেৰিতং ¶ , কুঞ্জরমত্তকরেণুলোল়িতং;

অসহাযিকা গন্তুমিচ্ছসি, রহিতং ভিংসনকং মহাৰনং.

৩৭৬.

‘‘তপনীযকতাৰ ধীতিকা, ৰিচরসি চিত্তলতেৰ অচ্ছরা;

কাসিকসুখুমেহি ¶ ৰগ্গুভি, সোভসী সুৰসনেহি নূপমে.

৩৭৭.

‘‘অহং তৰ ৰসানুগো সিযং, যদি ৰিহরেমসে [যদিপি ৰিহরেসি (ক.)] কাননন্তরে;

ন হি মত্থি তযা পিযত্তরো, পাণো কিন্নরিমন্দলোচনে.

৩৭৮.

‘‘যদি মে ৰচনং করিস্সসি, সুখিতা এহি অগারমাৰস;

পাসাদনিৰাতৰাসিনী, পরিকম্মং তে করোন্তু নারিযো.

৩৭৯.

‘‘কাসিকসুখুমানি ধারয, অভিরোপেহি [অভিরোহেহি (সী.)] চ মালৰণ্ণকং;

কঞ্চনমণিমুত্তকং ¶ বহুং, ৰিৰিধং আভরণং করোমি তে.

৩৮০.

‘‘সুধোতরজপচ্ছদং ¶ সুভং, গোণকতূলিকসন্থতং নৰং;

অভিরুহ সযনং মহারহং, চন্দনমণ্ডিতসারগন্ধিকং;

৩৮১.

‘‘উপ্পলং চুদকা সমুগ্গতং, যথা তং অমনুস্সসেৰিতং;

এৰং ত্ৰং ব্রহ্মচারিনী, সকেসঙ্গেসু জরং গমিস্সসি’’.

৩৮২.

‘‘কিং ¶ তে ইধ সারসম্মতং, কুণপপূরম্হি সুসানৰড্ঢনে;

ভেদনধম্মে কল়েৰরে [কলেৰরে (সী. ক.)], যং দিস্ৰা ৰিমনো উদিক্খসি’’.

৩৮৩.

‘‘অক্খীনি চ তুরিযারিৰ, কিন্নরিযারিৰ পব্বতন্তরে;

তৰ মে নযনানি দক্খিয, ভিয্যো কামরতী পৰড্ঢতি.

৩৮৪.

‘‘উপ্পলসিখরোপমানি তে, ৰিমলে হাটকসন্নিভে মুখে;

তৰ মে নযনানি দক্খিয [নযনানুদিক্খিয (সী.)], ভিয্যো কামগুণো পৰড্ঢতি.

৩৮৫.

‘‘অপি দূরগতা সরম্হসে, আযতপম্হে ৰিসুদ্ধদস্সনে;

ন ¶ হি মত্থি তযা পিযত্তরা, নযনা কিন্নরিমন্দলোচনে’’.

৩৮৬.

‘‘অপথেন পযাতুমিচ্ছসি, চন্দং কীল়নকং গৰেসসি;

মেরুং লঙ্ঘেতুমিচ্ছসি, যো ত্ৰং বুদ্ধসুতং মগ্গযসি.

৩৮৭.

‘‘নত্থি ¶ হি লোকে সদেৰকে, রাগো যত্থপি দানি মে সিযা;

নপি নং জানামি কীরিসো, অথ মগ্গেন হতো সমূলকো.

৩৮৮.

‘‘ইঙ্গালকুযাৰ [ইঙ্ঘাল়খুযাৰ (স্যা.)] উজ্ঝিতো, ৰিসপত্তোরিৰ অগ্গিতো কতো [অগ্ঘতো হতো (সী.)];

নপি নং পস্সামি কীরিসো, অথ মগ্গেন হতো সমূলকো.

৩৮৯.

‘‘যস্সা ¶ সিযা অপচ্চৰেক্খিতং, সত্থা ৰা অনুপাসিতো সিযা;

ত্ৰং তাদিসিকং পলোভয, জানন্তিং সো ইমং ৰিহঞ্ঞসি.

৩৯০.

‘‘ময্হঞ্হি অক্কুট্ঠৰন্দিতে, সুখদুক্খে চ সতী উপট্ঠিতা;

সঙ্খতমসুভন্তি জানিয, সব্বত্থেৰ মনো ন লিম্পতি.

৩৯১.

‘‘সাহং সুগতস্স সাৰিকা, মগ্গট্ঠঙ্গিকযানযাযিনী;

উদ্ধটসল্লা অনাসৰা, সুঞ্ঞাগারগতা রমামহং.

৩৯২.

‘‘দিট্ঠা হি মযা সুচিত্তিতা, সোম্ভা দারুকপিল্লকানি ৰা;

তন্তীহি চ খীলকেহি চ, ৰিনিবদ্ধা ৰিৰিধং পনচ্চকা.

৩৯৩.

‘‘তম্হুদ্ধটে তন্তিখীলকে, ৰিস্সট্ঠে ৰিকলে পরিক্রিতে [পরিপক্খীতে (সী.), পরিপক্কতে (স্যা.)];

ন ৰিন্দেয্য খণ্ডসো কতে, কিম্হি তত্থ মনং নিৰেসযে.

৩৯৪.

‘‘তথূপমা ¶ দেহকানি মং, তেহি ধম্মেহি ৰিনা ন ৰত্তন্তি;

ধম্মেহি ¶ ৰিনা ন ৰত্ততি, কিম্হি তত্থ মনং নিৰেসযে.

৩৯৫.

‘‘যথা হরিতালেন মক্খিতং, অদ্দস চিত্তিকং ভিত্তিযা কতং;

তম্হি ¶ তে ৰিপরীতদস্সনং, সঞ্ঞা মানুসিকা নিরত্থিকা.

৩৯৬.

‘‘মাযং ¶ ৰিয অগ্গতো কতং, সুপিনন্তেৰ সুৰণ্ণপাদপং;

উপগচ্ছসি অন্ধ রিত্তকং, জনমজ্ঝেরিৰ রুপ্পরূপকং [রূপরূপকং (ক.)].

৩৯৭.

‘‘ৰট্টনিরিৰ কোটরোহিতা, মজ্ঝে পুব্বুল়কা সঅস্সুকা;

পীল়কোল়িকা চেত্থ জাযতি, ৰিৰিধা চক্খুৰিধা চ পিণ্ডিতা’’.

৩৯৮.

উপ্পাটিয চারুদস্সনা, ন চ পজ্জিত্থ অসঙ্গমানসা;

‘‘হন্দ তে চক্খুং হরস্সু তং’’, তস্স নরস্স অদাসি তাৰদে.

৩৯৯.

তস্স চ ৰিরমাসি তাৰদে, রাগো তত্থ খমাপযী চ নং;

‘‘সোত্থি সিযা ব্রহ্মচারিনী, ন পুনো এদিসকং ভৰিস্সতি’’.

৪০০.

‘‘আসাদিয [আহনিয (স্যা. ক.)] এদিসং জনং, অগ্গিং পজ্জলিতং ৰ লিঙ্গিয;

গণ্হিয আসীৰিসং ৰিয, অপি নু সোত্থি সিযা খমেহি নো’’.

৪০১.

মুত্তা চ ততো সা ভিক্খুনী, অগমী বুদ্ধৰরস্স সন্তিকং;

পস্সিয ৰরপুঞ্ঞলক্খণং, চক্খু আসি যথা পুরাণকন্তি.

… সুভা জীৰকম্বৰনিকা থেরী….

তিংসনিপাতো নিট্ঠিতো.

১৫. চত্তালীসনিপাতো

১. ইসিদাসীথেরীগাথা

৪০২.

নগরম্হি ¶ ¶ কুসুমনামে, পাটলিপুত্তম্হি পথৰিযা মণ্ডে;

সক্যকুলকুলীনাযো, দ্ৰে ভিক্খুনিযো হি গুণৰতিযো.

৪০৩.

ইসিদাসী ¶ তত্থ একা, দুতিযা বোধীতি সীলসম্পন্না চ;

ঝানজ্ঝাযনরতাযো, বহুস্সুতাযো ধুতকিলেসাযো.

৪০৪.

তা ¶ পিণ্ডায চরিত্ৰা, ভত্তত্থং [ভত্তত্তং (সী.)] করিয ধোতপত্তাযো;

রহিতম্হি সুখনিসিন্না, ইমা গিরা অব্ভুদীরেসুং.

৪০৫.

‘‘পাসাদিকাসি অয্যে, ইসিদাসি ৰযোপি তে অপরিহীনো;

কিং দিস্ৰান ব্যালিকং, অথাসি নেক্খম্মমনুযুত্তা’’.

৪০৬.

এৰমনুযুঞ্জিযমানা সা, রহিতে ধম্মদেসনাকুসলা;

ইসিদাসী ৰচনমব্রৰি, ‘‘সুণ বোধি যথাম্হি পব্বজিতা.

৪০৭.

‘‘উজ্জেনিযা পুরৰরে, ময্হং পিতা সীলসংৰুতো সেট্ঠি;

তস্সম্হি একধীতা, পিযা মনাপা চ দযিতা চ.

৪০৮.

‘‘অথ মে সাকেততো ৰরকা, আগচ্ছুমুত্তমকুলীনা;

সেট্ঠী পহূতরতনো, তস্স মমং সুণ্হমদাসি তাতো.

৪০৯.

‘‘সস্সুযা সস্সুরস্স চ, সাযং পাতং পণামমুপগম্ম;

সিরসা করোমি পাদে, ৰন্দামি যথাম্হি অনুসিট্ঠা.

৪১০.

‘‘যা ¶ ময্হং সামিকস্স, ভগিনিযো ভাতুনো পরিজনো ৰা;

তমেকৰরকম্পি দিস্ৰা, উব্বিগ্গা আসনং দেমি.

৪১১.

‘‘অন্নেন চ পানেন চ, খজ্জেন চ যঞ্চ তত্থ সন্নিহিতং;

ছাদেমি উপনযামি চ, দেমি চ যং যস্স পতিরূপং.

৪১২.

‘‘কালেন উপট্ঠহিত্ৰা [উট্ঠহিত্ৰা (স্যা. ক.), উপট্ঠহিতুং (?)], ঘরং সমুপগমামি উম্মারে;

ধোৰন্তী হত্থপাদে, পঞ্জলিকা সামিকমুপেমি.

৪১৩.

‘‘কোচ্ছং পসাদং অঞ্জনিঞ্চ, আদাসকঞ্চ গণ্হিত্ৰা;

পরিকম্মকারিকা ¶ ৰিয, সযমেৰ পতিং ৰিভূসেমি.

৪১৪.

‘‘সযমেৰ ¶ ওদনং সাধযামি, সযমেৰ ভাজনং ধোৰন্তী;

মাতাৰ একপুত্তকং, তথা [তদা (সী.)] ভত্তারং পরিচরামি.

৪১৫.

‘‘এৰং মং ভত্তিকতং, অনুরত্তং কারিকং নিহতমানং;

উট্ঠাযিকং [উট্ঠাহিকং (ক.)] অনলসং, সীলৰতিং দুস্সতে ভত্তা.

৪১৬.

‘‘সো মাতরঞ্চ পিতরঞ্চ, ভণতি ‘আপুচ্ছহং গমিস্সামি;

ইসিদাসিযা ন সহ ৰচ্ছং, একাগারেহং [একঘরেপ’হং (?)] সহ ৰত্থুং’.

৪১৭.

‘‘‘মা এৰং পুত্ত অৰচ, ইসিদাসী পণ্ডিতা পরিব্যত্তা;

উট্ঠাযিকা অনলসা, কিং তুয্হং ন রোচতে পুত্ত’.

৪১৮.

‘‘‘ন ¶ চ মে হিংসতি কিঞ্চি, ন চহং ইসিদাসিযা সহ ৰচ্ছং;

দেস্সাৰ মে অলং মে, অপুচ্ছাহং [আপুচ্ছাহং (স্যা.), আপুচ্ছহং-নাপুচ্ছহং (?)] গমিস্সামি’.

৪১৯.

‘‘তস্স ৰচনং সুণিত্ৰা, সস্সু সসুরো চ মং অপুচ্ছিংসু;

‘কিস্স [কিংস (?)] তযা অপরদ্ধং, ভণ ৰিস্সট্ঠা যথাভূতং’.

৪২০.

‘‘‘নপিহং ¶ অপরজ্ঝং কিঞ্চি, নপি হিংসেমি ন ভণামি দুব্বচনং;

কিং সক্কা কাতুয্যে, যং মং ৰিদ্দেস্সতে ভত্তা’.

৪২১.

‘‘তে মং পিতুঘরং পটিনযিংসু, ৰিমনা দুখেন অধিভূতা;

‘পুত্তমনুরক্খমানা, জিতাম্হসে রূপিনিং লক্খিং’.

৪২২.

‘‘অথ মং অদাসি তাতো, অড্ঢস্স ঘরম্হি দুতিযকুলিকস্স;

ততো উপড্ঢসুঙ্কেন, যেন মং ৰিন্দথ সেট্ঠি.

৪২৩.

‘‘তস্সপি ঘরম্হি মাসং, অৰসিং অথ সোপি মং পটিচ্ছরযি [পটিচ্ছসি (সী. ক.), পটিচ্ছতি (স্যা.), পটিচ্ছরতি (ক.)];

দাসীৰ ¶ উপট্ঠহন্তিং, অদূসিকং সীলসম্পন্নং.

৪২৪.

‘‘ভিক্খায চ ৰিচরন্তং, দমকং দন্তং মে পিতা ভণতি;

‘হোহিসি [সোহিসি (সব্বত্থ)] মে জামাতা, নিক্খিপ পোট্ঠিঞ্চ [পোন্তিং (সী. স্যা.)] ঘটিকঞ্চ’.

৪২৫.

‘‘সোপি ৰসিত্ৰা পক্খং [পক্কমথ (সী.)], অথ তাতং ভণতি ‘দেহি মে পোট্ঠিং;

ঘটিকঞ্চ মল্লকঞ্চ, পুনপি ভিক্খং চরিস্সামি’.

৪২৬.

‘‘অথ ¶ নং ভণতী তাতো, অম্মা সব্বো চ মে ঞাতিগণৰগ্গো;

‘কিং তে ন কীরতি ইধ, ভণ খিপ্পং তং তে করিহি’তি.

৪২৭.

‘‘এৰং ভণিতো ভণতি, ‘যদি মে অত্তা সক্কোতি অলং ময্হং;

ইসিদাসিযা ন সহ ৰচ্ছং, একঘরেহং সহ ৰত্থুং’.

৪২৮.

‘‘ৰিস্সজ্জিতো গতো সো, অহম্পি একাকিনী ৰিচিন্তেমি;

‘আপুচ্ছিতূন গচ্ছং, মরিতুযে [মরিতাযে (সী.), মরিতুং (স্যা.)] ৰা পব্বজিস্সং ৰা’.

৪২৯.

‘‘অথ অয্যা জিনদত্তা, আগচ্ছী গোচরায চরমানা;

তাতকুলং ¶ ৰিনযধরী, বহুস্সুতা সীলসম্পন্না.

৪৩০.

‘‘তং দিস্ৰান অম্হাকং, উট্ঠাযাসনং তস্সা পঞ্ঞাপযিং;

নিসিন্নায চ পাদে, ৰন্দিত্ৰা ভোজনমদাসিং.

৪৩১.

‘‘অন্নেন ¶ চ পানেন চ, খজ্জেন চ যঞ্চ তত্থ সন্নিহিতং;

সন্তপ্পযিত্ৰা অৰচং, ‘অয্যে ইচ্ছামি পব্বজিতুং’.

৪৩২.

‘‘অথ মং ভণতী তাতো, ‘ইধেৰ পুত্তক [পুত্তিকে (স্যা. ক.)] চরাহি ত্ৰং ধম্মং;

অন্নেন চ পানেন চ, তপ্পয সমণে দ্ৰিজাতী চ’.

৪৩৩.

‘‘অথহং ভণামি তাতং, রোদন্তী অঞ্জলিং পণামেত্ৰা;

‘পাপঞ্হি মযা পকতং, কম্মং তং নিজ্জরেস্সামি’.

৪৩৪.

‘‘অথ ¶ মং ভণতী তাতো, ‘পাপুণ বোধিঞ্চ অগ্গধম্মঞ্চ;

নিব্বানঞ্চ লভস্সু, যং সচ্ছিকরী দ্ৰিপদসেট্ঠো’.

৪৩৫.

‘‘মাতাপিতূ অভিৰাদযিত্ৰা, সব্বঞ্চ ঞাতিগণৰগ্গং;

সত্তাহং পব্বজিতা, তিস্সো ৰিজ্জা অফস্সযিং.

৪৩৬.

‘‘জানামি অত্তনো সত্ত, জাতিযো যস্সযং ফলৰিপাকো;

তং তৰ আচিক্খিস্সং, তং একমনা নিসামেহি.

৪৩৭.

‘‘নগরম্হি এরকচ্ছে [এরককচ্ছে (স্যা. ক.)], সুৰণ্ণকারো অহং পহূতধনো;

যোব্বনমদেন মত্তো সো, পরদারং অসেৰিহং.

৪৩৮.

‘‘সোহং ততো চৰিত্ৰা, নিরযম্হি অপচ্চিসং চিরং;

পক্কো ততো চ উট্ঠহিত্ৰা, মক্কটিযা কুচ্ছিমোক্কমিং.

৪৩৯.

‘‘সত্তাহজাতকং ¶ ¶ মং, মহাকপি যূথপো নিল্লচ্ছেসি;

তস্সেতং কম্মফলং, যথাপি গন্ত্ৰান পরদারং.

৪৪০.

‘‘সোহং ততো চৰিত্ৰা, কালং করিত্ৰা সিন্ধৰারঞ্ঞে;

কাণায চ খঞ্জায চ, এল়কিযা কুচ্ছিমোক্কমিং.

৪৪১.

‘‘দ্ৰাদস ৰস্সানি অহং, নিল্লচ্ছিতো দারকে পরিৰহিত্ৰা;

কিমিনাৰট্টো অকল্লো, যথাপি গন্ত্ৰান পরদারং.

৪৪২.

‘‘সোহং ততো চৰিত্ৰা, গোৰাণিজকস্স গাৰিযা জাতো;

ৰচ্ছো লাখাতম্বো, নিল্লচ্ছিতো দ্ৰাদসে মাসে.

৪৪৩.

‘‘ৰোঢূন [তে পুন (স্যা. ক.), ৰোধুন (ক. অট্ঠ.)] নঙ্গলমহং, সকটঞ্চ ধারযামি;

অন্ধোৰট্টো অকল্লো, যথাপি গন্ত্ৰান পরদারং.

৪৪৪.

‘‘সোহং ততো চৰিত্ৰা, ৰীথিযা দাসিযা ঘরে জাতো;

নেৰ মহিলা ন পুরিসো, যথাপি গন্ত্ৰান পরদারং.

৪৪৫.

‘‘তিংসতিৰস্সম্হি ¶ ¶ মতো, সাকটিককুলম্হি দারিকা জাতা;

কপণম্হি অপ্পভোগে, ধনিক [অণিক (অট্ঠ.), তংসংৰণ্ণনাযম্পি অত্থযুত্তি গৰেসিতব্বা] পুরিসপাতবহুলম্হি.

৪৪৬.

‘‘তং মং ততো সত্থৰাহো, উস্সন্নায ৰিপুলায ৰড্ঢিযা;

ওকড্ঢতি ৰিলপন্তিং, অচ্ছিন্দিত্ৰা কুলঘরস্মা.

৪৪৭.

‘‘অথ সোল়সমে ৰস্সে, দিস্ৰা মং পত্তযোব্বনং কঞ্ঞং;

ওরুন্ধতস্স পুত্তো, গিরিদাসো নাম নামেন.

৪৪৮.

‘‘তস্সপি অঞ্ঞা ভরিযা, সীলৰতী গুণৰতী যসৰতী চ;

অনুরত্তা ¶ [অনুৰত্তা (ক.)] ভত্তারং, তস্সাহং [তস্স তং (?)] ৰিদ্দেসনমকাসিং.

৪৪৯.

‘‘তস্সেতং কম্মফলং, যং মং অপকীরিতূন গচ্ছন্তি;

দাসীৰ উপট্ঠহন্তিং, তস্সপি অন্তো কতো মযা’’তি.

… ইসিদাসী থেরী….

চত্তালীসনিপাতো নিট্ঠিতো.

১৬. মহানিপাতো

১. সুমেধাথেরীগাথা

৪৫০.

মন্তাৰতিযা ¶ নগরে, রঞ্ঞো কোঞ্চস্স অগ্গমহেসিযা;

ধীতা আসিং সুমেধা, পসাদিতা সাসনকরেহি.

৪৫১.

সীলৰতী চিত্তকথা, বহুস্সুতা বুদ্ধসাসনে ৰিনীতা;

মাতাপিতরো উপগম্ম, ভণতি ‘‘উভযো নিসামেথ.

৪৫২.

‘‘নিব্বানাভিরতাহং, অসস্সতং ভৰগতং যদিপি দিব্বং;

কিমঙ্গং পন [কিমঙ্গ পন (সী. স্যা.), কিং পন (?)] তুচ্ছা কামা, অপ্পস্সাদা বহুৰিঘাতা.

৪৫৩.

‘‘কামা কটুকা আসীৰিসূপমা, যেসু মুচ্ছিতা বালা;

তে দীঘরত্তং নিরযে, সমপ্পিতা হঞ্ঞন্তে দুক্খিতা [হঞ্ঞরে দুখিতা (?)].

৪৫৪.

‘‘সোচন্তি পাপকম্মা, ৰিনিপাতে পাপৰদ্ধিনো সদা;

কাযেন চ ৰাচায চ, মনসা চ অসংৰুতা বালা.

৪৫৫.

‘‘বালা ¶ তে দুপ্পঞ্ঞা, অচেতনা দুক্খসমুদযোরুদ্ধা;

দেসন্তে ¶ অজানন্তা, ন বুজ্ঝরে অরিযসচ্চানি.

৪৫৬.

‘‘সচ্চানি ¶ অম্ম বুদ্ধৰরদেসিতানি, তে বহুতরা অজানন্তা যে;

অভিনন্দন্তি ভৰগতং, পিহেন্তি দেৰেসু উপপত্তিং.

৪৫৭.

‘‘দেৰেসুপি উপপত্তি, অসস্সতা ভৰগতে অনিচ্চম্হি;

ন চ সন্তসন্তি বালা, পুনপ্পুনং জাযিতব্বস্স.

৪৫৮.

‘‘চত্তারো ৰিনিপাতা, দুৰে [দ্ৰে (সব্বত্থ)] চ গতিযো কথঞ্চি লব্ভন্তি;

ন চ ৰিনিপাতগতানং, পব্বজ্জা অত্থি নিরযেসু.

৪৫৯.

‘‘অনুজানাথ মং উভযো, পব্বজিতুং দসবলস্স পাৰচনে;

অপ্পোস্সুক্কা ঘটিস্সং, জাতিমরণপ্পহানায.

৪৬০.

‘‘কিং ভৰগতে [ভৰগতেন (স্যা.)] অভিনন্দিতেন, কাযকলিনা অসারেন;

ভৰতণ্হায নিরোধা, অনুজানাথ পব্বজিস্সামি.

৪৬১.

‘‘বুদ্ধানং ¶ উপ্পাদো ৰিৰজ্জিতো, অক্খণো খণো লদ্ধো;

সীলানি ব্রহ্মচরিযং, যাৰজীৰং ন দূসেয্যং’’.

৪৬২.

এৰং ভণতি সুমেধা, মাতাপিতরো ‘‘ন তাৰ আহারং;

আহরিস্সং [আহরিযামি (সী.), আহারিসং (?)] গহট্ঠা, মরণৰসং গতাৰ হেস্সামি’’.

৪৬৩.

মাতা দুক্খিতা রোদতি পিতা চ, অস্সা সব্বসো সমভিহতো;

ঘটেন্তি সঞ্ঞাপেতুং, পাসাদতলে ছমাপতিতং.

৪৬৪.

‘‘উট্ঠেহি পুত্তক কিং সোচিতেন, দিন্নাসি ৰারণৰতিম্হি;

রাজা ¶ অনীকরত্তো [অণীকদত্তো (সী. স্যা.)], অভিরূপো তস্স ত্ৰং দিন্না.

৪৬৫.

‘‘অগ্গমহেসী ভৰিস্সসি, অনিকরত্তস্স রাজিনো ভরিযা;

সীলানি ব্রহ্মচরিযং, পব্বজ্জা দুক্করা পুত্তক.

৪৬৬.

‘‘রজ্জে আণাধনমিস্সরিযং, ভোগা সুখা দহরিকাসি;

ভুঞ্জাহি কামভোগে, ৰারেয্যং হোতু তে পুত্ত’’.

৪৬৭.

অথ নে ভণতি সুমেধা, ‘‘মা এদিসিকানি ভৰগতমসারং;

পব্বজ্জা ৰা হোহিতি, মরণং ৰা মে ন চেৰ ৰারেয্যং.

৪৬৮.

‘‘কিমিৰ ¶ পূতিকাযমসুচিং, সৰনগন্ধং ভযানকং কুণপং;

অভিসংৰিসেয্যং ভস্তং, অসকিং পগ্ঘরিতং অসুচিপুণ্ণং.

৪৬৯.

‘‘কিমিৰ ¶ তাহং জানন্তী, ৰিকুলকং মংসসোণিতুপলিত্তং;

কিমিকুলালযং সকুণভত্তং, কল়েৰরং কিস্স দিয্যতি.

৪৭০.

‘‘নিব্বুয্হতি সুসানং, অচিরং কাযো অপেতৰিঞ্ঞাণো;

ছুদ্ধো [ছড্ডিতো (স্যা.), ছুট্ঠো (ক.)] কল়িঙ্গরং ৰিয, জিগুচ্ছমানেহি ঞাতীহি.

৪৭১.

‘‘ছুদ্ধূন [ছড্ডূন (স্যা.), ছুট্ঠূন (ক.)] নং সুসানে, পরভত্তং ন্হাযন্তি [ন্হাযরে (?)] জিগুচ্ছন্তা;

নিযকা মাতাপিতরো, কিং পন সাধারণা জনতা.

৪৭২.

‘‘অজ্ঝোসিতা অসারে, কল়েৰরে অট্ঠিন্হারুসঙ্ঘাতে;

খেল়স্সুচ্চারস্সৰ, পরিপুণ্ণে [খেল়স্সুচ্চারপস্সৰপরিপুণ্ণে (সী.)] পূতিকাযম্হি.

৪৭৩.

‘‘যো ¶ নং ৰিনিব্ভুজিত্ৰা, অব্ভন্তরমস্স বাহিরং কযিরা ¶ ;

গন্ধস্স অসহমানা, সকাপি মাতা জিগুচ্ছেয্য.

৪৭৪.

‘‘খন্ধধাতুআযতনং, সঙ্খতং জাতিমূলকং দুক্খং;

যোনিসো অনুৰিচিনন্তী, ৰারেয্যং কিস্স ইচ্ছেয্যং.

৪৭৫.

‘‘দিৰসে দিৰসে তিসত্তি, সতানি নৰনৰা পতেয্যুং কাযম্হি;

ৰস্সসতম্পি চ ঘাতো, সেয্যো দুক্খস্স চেৰং খযো.

৪৭৬.

‘‘অজ্ঝুপগচ্ছে ঘাতং, যো ৰিঞ্ঞাযেৰং সত্থুনো ৰচনং;

‘দীঘো তেসং [ৰো (ক.)] সংসারো, পুনপ্পুনং হঞ্ঞমানানং’.

৪৭৭.

‘‘দেৰেসু মনুস্সেসু চ, তিরচ্ছানযোনিযা অসুরকাযে;

পেতেসু ¶ চ নিরযেসু চ, অপরিমিতা দিস্সরে ঘাতা.

৪৭৮.

‘‘ঘাতা নিরযেসু বহূ, ৰিনিপাতগতস্স পীল়িযমানস্স [কিলিস্সমানস্স (স্যা. ক.)];

দেৰেসুপি অত্তাণং, নিব্বানসুখা পরং নত্থি.

৪৭৯.

‘‘পত্তা তে নিব্বানং, যে যুত্তা দসবলস্স পাৰচনে;

অপ্পোস্সুক্কা ঘটেন্তি, জাতিমরণপ্পহানায.

৪৮০.

‘‘অজ্জেৰ তাতভিনিক্খমিস্সং, ভোগেহি কিং অসারেহি;

নিব্বিন্না মে কামা, ৰন্তসমা তালৰত্থুকতা’’.

৪৮১.

সা চেৰং ভণতি পিতরমনীকরত্তো চ যস্স সা দিন্না;

উপযাসি ৰারণৰতে, ৰারেয্যমুপট্ঠিতে কালে.

৪৮২.

অথ অসিতনিচিতমুদুকে, কেসে খগ্গেন ছিন্দিয সুমেধা;

পাসাদং পিদহিত্ৰা [পিধেত্ৰা (সী. স্যা.), পিধিত্ৰা (ক.)], পঠমজ্ঝানং সমাপজ্জি.

৪৮৩.

সা ¶ ¶ চ তহিং সমাপন্না, অনীকরত্তো চ আগতো নগরং;

পাসাদে চ [পাসাদেৰ (সী. স্যা.)] সুমেধা, অনিচ্চসঞ্ঞং [অনিচ্চসঞ্ঞা (সব্বত্থ)] সুভাৰেতি.

৪৮৪.

সা চ মনসি করোতি, অনীকরত্তো চ আরুহী তুরিতং;

মণিকনকভূসিতঙ্গো, কতঞ্জলী যাচতি সুমেধং.

৪৮৫.

‘‘রজ্জে আণাধনমিস্সরিযং, ভোগা সুখা দহরিকাসি;

ভুঞ্জাহি কামভোগে, কামসুখা দুল্লভা লোকে.

৪৮৬.

‘‘নিস্সট্ঠং ¶ তে রজ্জং, ভোগে ভুঞ্জস্সু দেহি দানানি;

মা দুম্মনা অহোসি, মাতাপিতরো তে দুক্খিতা’’ [মাতাপিতরো চ তে দুখিতা (?)].

৪৮৭.

তং তং ভণতি সুমেধা, কামেহি অনত্থিকা ৰিগতমোহা;

‘‘মা কামে অভিনন্দি, কামেস্ৰাদীনৰং পস্স.

৪৮৮.

‘‘চাতুদ্দীপো রাজা মন্ধাতা, আসি কামভোগিন মগ্গো;

অতিত্তো ¶ কালঙ্কতো, ন চস্স পরিপূরিতা ইচ্ছা.

৪৮৯.

‘‘সত্ত রতনানি ৰস্সেয্য, ৰুট্ঠিমা দসদিসা সমন্তেন;

ন চত্থি তিত্তি কামানং, অতিত্তাৰ মরন্তি নরা.

৪৯০.

‘‘অসিসূনূপমা কামা, কামা সপ্পসিরোপমা;

উক্কোপমা অনুদহন্তি, অট্ঠিকঙ্কল [কঙ্খল (সী.)] সন্নিভা.

৪৯১.

‘‘অনিচ্চা অদ্ধুৰা কামা, বহুদুক্খা মহাৰিসা;

অযোগুল়োৰ সন্তত্তো, অঘমূলা দুখপ্ফলা.

৪৯২.

‘‘রুক্খপ্ফলূপমা কামা, মংসপেসূপমা দুখা;

সুপিনোপমা ¶ ৰঞ্চনিযা, কামা যাচিতকূপমা.

৪৯৩.

‘‘সত্তিসূলূপমা কামা, রোগো গণ্ডো অঘং নিঘং;

অঙ্গারকাসুসদিসা, অঘমূলং ভযং ৰধো.

৪৯৪.

‘‘এৰং বহুদুক্খা কামা, অক্খাতা অন্তরাযিকা;

গচ্ছথ ন মে ভগৰতে, ৰিস্সাসো অত্থি অত্তনো.

৪৯৫.

‘‘কিং মম পরো করিস্সতি, অত্তনো সীসম্হি ডয্হমানম্হি;

অনুবন্ধে জরামরণে, তস্স ঘাতায ঘটিতব্বং’’.

৪৯৬.

দ্ৰারং ¶ অপাপুরিত্ৰানহং [অৰাপুরিত্ৰাহং (সী.)], মাতাপিতরো অনীকরত্তঞ্চ;

দিস্ৰান ছমং নিসিন্নে, রোদন্তে ইদমৰোচং.

৪৯৭.

‘‘দীঘো বালানং সংসারো, পুনপ্পুনঞ্চ রোদতং;

অনমতগ্গে পিতু মরণে, ভাতু ৰধে অত্তনো চ ৰধে.

৪৯৮.

‘‘অস্সু থঞ্ঞং রুধিরং, সংসারং অনমতগ্গতো সরথ;

সত্তানং সংসরতং, সরাহি অট্ঠীনঞ্চ সন্নিচযং.

৪৯৯.

‘‘সর ¶ চতুরোদধী [সরস্সু চতুরো উদধী (?)], উপনীতে অস্সুথঞ্ঞরুধিরম্হি;

সর এককপ্পমট্ঠীনং, সঞ্চযং ৰিপুলেন সমং.

৫০০.

‘‘অনমতগ্গে ¶ সংসরতো, মহিং [মহামহিং (?)] জম্বুদীপমুপনীতং;

কোলট্ঠিমত্তগুল়িকা, মাতা মাতুস্ৰেৰ নপ্পহোন্তি.

৫০১.

‘‘তিণকট্ঠসাখাপলাসং [সর তিণকট্ঠসাখাপলাসং (সী.)], উপনীতং অনমতগ্গতো সর;

চতুরঙ্গুলিকা ঘটিকা, পিতুপিতুস্ৰেৰ নপ্পহোন্তি.

৫০২.

‘‘সর কাণকচ্ছপং পুব্বসমুদ্দে, অপরতো চ যুগছিদ্দং;

সিরং ¶ [সর (সী.)] তস্স চ পটিমুক্কং, মনুস্সলাভম্হি ওপম্মং.

৫০৩.

‘‘সর রূপং ফেণপিণ্ডোপমস্স, কাযকলিনো অসারস্স;

খন্ধে পস্স অনিচ্চে, সরাহি নিরযে বহুৰিঘাতে.

৫০৪.

‘‘সর কটসিং ৰড্ঢেন্তে, পুনপ্পুনং তাসু তাসু জাতীসু;

সর কুম্ভীলভযানি চ, সরাহি চত্তারি সচ্চানি.

৫০৫.

‘‘অমতম্হি ৰিজ্জমানে, কিং তৰ পঞ্চকটুকেন পীতেন;

সব্বা হি কামরতিযো, কটুকতরা পঞ্চকটুকেন.

৫০৬.

‘‘অমতম্হি ৰিজ্জমানে, কিং তৰ কামেহি যে পরিল়াহা [সপরিল়াহা (সী. অট্ঠ.)];

সব্বা হি কামরতিযো, জলিতা কুথিতা কম্পিতা সন্তাপিতা.

৫০৭.

‘‘অসপত্তম্হি সমানে, কিং তৰ কামেহি যে বহুসপত্তা;

রাজগ্গিচোরউদকপ্পিযেহি, সাধারণা কামা বহুসপত্তা.

৫০৮.

‘‘মোক্খম্হি ৰিজ্জমানে, কিং তৰ কামেহি যেসু ৰধবন্ধো;

কামেসু হি অসকামা, ৰধবন্ধদুখানি অনুভোন্তি.

৫০৯.

‘‘আদীপিতা ¶ ¶ তিণুক্কা, গণ্হন্তং দহন্তি নেৰ মুঞ্চন্তং;

উক্কোপমা হি কামা, দহন্তি যে তে ন মুঞ্চন্তি.

৫১০.

‘‘মা অপ্পকস্স হেতু, কামসুখস্স ৰিপুলং জহী সুখং;

মা পুথুলোমোৰ বল়িসং, গিলিত্ৰা পচ্ছা ৰিহঞ্ঞসি.

৫১১.

‘‘কামং ¶ কামেসু দমস্সু, তাৰ সুনখোৰ সঙ্খলাবদ্ধো;

কাহিন্তি খু তং কামা, ছাতা সুনখংৰ চণ্ডালা.

৫১২.

‘‘অপরিমিতঞ্চ ¶ দুক্খং, বহূনি চ চিত্তদোমনস্সানি;

অনুভোহিসি কামযুত্তো, পটিনিস্সজ [পটিনিস্সর (সী.)] অদ্ধুৰে কামে.

৫১৩.

‘‘অজরম্হি ৰিজ্জমানে, কিং তৰ কামেহি [যেসু জরায চ; মরণব্যাধিহি গহিতা (?)] যেসু জরা;

মরণব্যাধিগহিতা [যেসু জরায চ; মরণব্যাধিহি গহিতা (?)], সব্বা সব্বত্থ জাতিযো.

৫১৪.

‘‘ইদমজরমিদমমরং [ইদং অজরং ইদং অমরং (?)], ইদমজরামরং পদমসোকং;

অসপত্তমসম্বাধং, অখলিতমভযং নিরুপতাপং.

৫১৫.

‘‘অধিগতমিদং বহূহি, অমতং অজ্জাপি চ লভনীযমিদং;

যো যোনিসো পযুঞ্জতি, ন চ সক্কা অঘটমানেন’’.

৫১৬.

এৰং ভণতি সুমেধা, সঙ্খারগতে রতিং অলভমানা;

অনুনেন্তী অনিকরত্তং, কেসে চ ছমং খিপি সুমেধা.

৫১৭.

উট্ঠায অনিকরত্তো, পঞ্জলিকো যাচিতস্সা পিতরং সো;

‘‘ৰিস্সজ্জেথ সুমেধং, পব্বজিতুং ৰিমোক্খসচ্চদস্সা’’.

৫১৮.

ৰিস্সজ্জিতা মাতাপিতূহি, পব্বজি সোকভযভীতা;

ছ অভিঞ্ঞা সচ্ছিকতা, অগ্গফলং সিক্খমানায.

৫১৯.

অচ্ছরিযমব্ভুতং ¶ তং, নিব্বানং আসি রাজকঞ্ঞায;

পুব্বেনিৰাসচরিতং, যথা ব্যাকরি পচ্ছিমে কালে.

৫২০.

‘‘ভগৰতি কোণাগমনে, সঙ্ঘারামম্হি নৰনিৰেসম্হি;

সখিযো তিস্সো জনিযো, ৰিহারদানং অদাসিম্হ.

৫২১.

‘‘দসক্খত্তুং সতক্খত্তুং, দসসতক্খত্তুং সতানি চ সতক্খত্তুং;

দেৰেসু ¶ উপ্পজ্জিম্হ, কো পন ৰাদো মনুস্সেসু.

৫২২.

‘‘দেৰেসু মহিদ্ধিকা অহুম্হ, মানুসকম্হি কো পন ৰাদো;

সত্তরতনস্স মহেসী, ইত্থিরতনং অহং আসিং.

৫২৩.

‘‘সো ¶ ¶ হেতু সো পভৰো, তং মূলং সাৰ সাসনে খন্তী;

তং পঠমসমোধানং, তং ধম্মরতায নিব্বানং’’.

৫২৪.

এৰং করোন্তি যে সদ্দহন্তি, ৰচনং অনোমপঞ্ঞস্স;

নিব্বিন্দন্তি ভৰগতে, নিব্বিন্দিত্ৰা ৰিরজ্জন্তীতি.

ইত্থং সুদং সুমেধা থেরী গাথাযো অভাসিত্থাতি.

মহানিপাতো নিট্ঠিতো.

সমত্তা থেরীগাথাযো.

গাথাসতানি চত্তারি, অসীতি পুন চুদ্দস [গাথাসঙ্খ্যা ইধ অনুক্কমণিকগণনাৰসেন পাকটা];

থেরিযেকুত্তরসতা [থেরীযেকুত্তরছসতা (?) তিংসমত্তাপি পঞ্চসতমত্তাপি থেরিযো একতো আগতা মনসিকাতব্বা], সব্বা তা আসৰক্খযাতি.

থেরীগাথাপাল়ি নিট্ঠিতা.